الفصل العشرون

رواية خريف أغسطس الجزء العشرون 20 بقلم حميدة عبدالحميد خريف أغسطسرواية خريف أغسطس الحلقة العشرون

نزلت الأكياس وجريت الكُرسي الكان جمب قبس وجبتو جمب امي وقعدت جمبها وفضلتها اراقبها ف توتر وقلق ملحوظ، كان ف شي بيقول لي ف حاجة ح تحصل ، وبدت الأفكار السلبية والايجابية ف نفس الوقت عايمه ف مخيلتي، امي خلصت مكالمتها مع عائشة ونزلت التلفون من اضانها وكل لوحات التوتر ظهرت عليها ، عاينت لي اختي داليا وقالت ليها جيبي لي مويه ، داليا اتحركت ع الحفاظة وامي رجعت عاينت لي وقالت لي ، ي معتصم قلت ليها نعم ي امي وقلبي كان بيضرب

بقوة كُنت متمني ف اللحظة دي تقول لي عائشة قالت راجعة ليك، شلت نفس عميق وقلت ليها اها ي امي حارسك تتكلمي ، قالت لي طيب خلي داليا تجيب لي المويه لحظات بس و داليا جات شايلة كُباية مويه بارده ومدتها لي امي ، شالتها منها وشربت شويه وتاني نزلتها ف الطربيزة وقالت لي، شوف هنا ي معتصم كل شي مكتوب والحمدلله جات كدا ي ولدي ، قلت ليها ي امي حصل شنو ، قالت لي عائشة ح تتزوج وهسي هي إتصلت لي وكلمتني وقالت لي مهما كان انا م بنسى

العُشرة الكانت بيناتنا ، حسيت بوخزة ف قلبي معقولة يعني خلاص عائشة راحت مني معقولة تكون لي واحد غيري ف الحظة دي م قدرت امسك دمعتي مهما حصل عائشة تركت بصمة كبيرة ف قلبي ، دنقرت تحت وحاولت أخفي ضُعفي وكل نظرات الشفقه كانت مرسومه ف وش امي وداليا جا عصام بخطوات هادئه جدا جرا الكُرسي التاني وبقي مُقاصدني ، شبك يدينوا مع بعض وقال لي ، معتصم قلت ليو اها كدا مبسوط صح؟

قال لي مهما حصل انت اخوي ف النهايه وانا م بقبل اشوفك كدا بس انت خربتها براك، صح؟ دي نتيجة غلطتك شفت كلمة وحدة عملت فيك شنو ي اخوي؟ انت خلاص فقدت عائشة وكل حاجه مكتوبه وانا م عايزك تتصرف اي تصرف ممكن يخجلك او يخجلنا معاك بعدين ، عاينت ليو ب بعدم مبالاة وقلت ليو يعني اخلي ولدي يتربى مع راجل تاني ؟

لا والله م انا معتصم البيعمل كدا وان شاءالله بكرة القريبه دي ماشي اجيبوا غصبن عن أي زول ، شات الطربيزة الكانت قدامي وقال لي تم راجل واعمل كدا بس ، انت عايز تجيب ولدك ل منو هنا ، لي مرتك الما مسؤولة دي دي ولا غيرها ؟ عايز تحيبوا عشان بعدين يطلع ليك باطل ؟ ولا عايز تجيبوا عشان ترضى غرورك وكبريائك ؟

عاينت ليو بس وطلعت وكل لو حات الغضب سيطرت على ،ركبت عربيتي ودورت وماعارف ماشي وين فجأة لقيت نفسي واقف جمب راجل عجوز قاعد ف حافة الظلط، وقفت العربية ونزلت وجيت عليهوا كان قاعد ف الشمس وسرحان ف عالموا الخاص جيت ونزلت رجولي قدامو وقلت ليو خير قاعد ف الشمس مالك ابتسم وقال لي قلت شنو ؟

قلت ليك قاعد ف الشمس لي وشكلو شويه راسو م تمام رجع ضحك واشر ع كُل الفراغ الكان قدامنا وقال لي شايف العالم دا كلو قلت ليو اي قال لي عندي ٦جنا وكلهم اولاد وربيتهم واي شي بس لمن كبرو ،فاتو خلوني بسبب مرتي عشان كانت بتعذبهم وهم ماشافو حناني ولا حنان امهم وعشان انا حرمتهم من امهم وحاليا انا وحيد ومرتي الخربت بيتي عشانها مشت وخلتني عشان بقيت عجوز وقالت عايزه تعيش حياتها، ورجع ضحك تاني وقال لي بس انت عارف انا بستاهل وأقول ليك لي ؟

قلت ليو اها لي قال لي عشان عيني كانت زايغه وعشان انا كُنت جاري ورا المظاهر ، م عارف بس حسيتو كأنو بتكلم عني ، طبطبت عليهو برفق ، وقمت من جمبوا وحسيتها كانها رسالة لي ، ركبت عربيتي بخطوات مُتكاسلة ومن بعيد شفت واحد بيبيع قهوة قاعد تحت شجرة كبيرة مشيت وجريت بنبر وقعدت جمبوا، طلبت قهوة ب جنزبيل تقيل عسي ولعلها تخفف الشي الحاصل علي دا ، وحرفيا بقيت تائه بين امرين بين ارضى غروري وكبريائي وبين اتقبل الحاصل دا وافكر ب

عقلانية، قعدت شويه وحسيت نفسي رقت حبه ، ورجعت بيتي ، وكالعادة لقيتو مبهدل ومبشتن وكان الباب فاتح استغربت شديد دخلت بخطوات سريعة وفضلت افتش ع رهف بس م شفتها ، فتحت الغرفة الأولي والتانيه بس برضو كانت مافي ختيت احتمال تكون مشت ناس امها بس لي م كلمتني دخلت غرفتي لقيت الخزنه مفتوحه اتقدمت كم خطوه وانا متمني الفي بالي يكون غلط وجهة نظري داخل الخزنه وكانت فاضيه كل قروشي كانت ماف كل تعبي شكلو راح ، شلت تلفوني واتصلت ل رهف

بس تلفونها كان مقفول اتصلت لي عمي م ردا م عرفت اعمل شنو ، قروشي مشت وين يارب؟

لحظات بس وجاتني مكالمة من رقم غريب فتحت الخط وكانت دي رهف ، وصوتها مقروش من البكاء، وقبل افتح خشمي قالت لي معتصم انا اسفه والله انا اسفه ي معتصم انا مالي غيرك ف الحظه دي انا غلطه غلطة عمري وانا شلت قروشك كلها وكنت عايزه اجري بيها مع عمر هو وعدني ح يتزوجني بس هو قدر بي وشال القروش وجرا بيها وانا ح اووصف ليك مكان ماشي ، م عارف كنت هادئ ف اللحظة دي ، قلت ليها تمام قالت لي معتصم بجد دا انت ، قلت ليها اي انا ، واهاا رسلي الموقع ، عشان اعرف اتصرف قالت لي طيب، رسلت لي الموقع وفتحت بلاغ ف كل مكان واتصلت لي صحبي مؤمن ف جهاز الامن قال لي ابشر لو هو هنا وما طلع لسه قروشك بترجع ليك ،قلت ليو ان شاءالله قفلت الخط ورقدت ف السرير ٠٠

ف جانب آخر٠٠٠٠

دخلت جوا ولقيت ناس امي قاعدين حكيت ليهم بالحاصل امي زغردت لي وقتي وقالت لي قبس امشي اتصلي لي حبوبتك وبشريها قبس قامت وب فرحه جرت ع تلفونها عشان توري حبوبتي ، وانا جيت وقعدت جمب امي وكل لوحات السعادة مرسومه ف وشي ، امي قالت لي اها ح نمشي ليهم متين قلت ليها العصر ان شاءالله ردا لي ابوي وهو بيضحك وقال لي واخيرا ي ولدي ح نفرح بيك ، قلت ليو ان شاءالله ي ابوي وحبوبه ليها الفضل من بعد الله لانو شجعتني كتير جات قبس طالعة من جوا وقالت لي حبوبه بتقول ليك الف الف مبروك ، ضحكت وقلت ليها شكلو حبوبه حارسه مكالمتنا بفارق الصبر ، امي قالت لي اتصل لي عمك صالح ولي خالك محمود عشان يجو ابوي قال ليها بتصل ليهم انا ، قلت ليو

طيب عندي موضوع بسيط ماشي اخلصوا ، اتصلت لي صحبي البراء عشان يبدأ إجراءات السفر كلها وانا عارف ح تواجهني مشكلة حضانة يوسف بس ح اتصرف وقبل اي شي لازم اتكلم مع معتصم ، طلعت برا ومشيت المركز وتابعت الحاصل كلوا وكنت ماخد موعد مع صحبي ايوب، إتصلت عليهو وقال لي انا حارسك ف الكافيه قلت ليو كم دقيقه وبجي عليك قفلت الخط واتحركت عليهو لقيتو قاعد جوا سلمت عليه وقعدت قال لي اها قلت ليو ح اسلمك إدارة المركز وحيكون معاك محمد وانا ح

اتابع معاكم من بعيد قال لي خير شكلك مكبرها، ضحكت وقلت ليو اي ، قال لي اصلك م بتقعد هنا قلت ليو ح يجي يوم واستقر ان شاءالله ابتسم وقال لي الله يجيب اليوم دا ، ونسنا شويه وكل زول شقى طريقو وفات، مسافة الطريق الضهر أذن صليت ف اقرب مسجد صادف طريقي ورجعت البيت ، لقيت ناس امي جاهزين وحارسني ، قبس ضحكت وقالت لي مستعجلين زيادة منك ، قلت ليهم ثواني ارتب نفسي واجيكم ، دخلت جوا استحميت ولبست سرحت شعري وبخيت من عطري المفضل،

واتحركنا اصلا نحنا ساكنين جمب بعض خطوات بس ووصلنا ، ابوي دقا الباب وجا محمد فتحوا بعد دقيقه سلم ع ابوي واعمامي وبعدو اتسلامنا انا وهو وكل زول مبسوط اكتر من التاني فضلنا ودخلنا جوا وقعدنا كلنا ف الحوش، وصادف محمد خبر اعمامو برضو، ناس امي دخلو جوا وفضلنا نحنا الرُجال برا جا عمار اخو محمد سلم علينا وجاب معاهو الضيافه ونسنا شويه وابوي فتح الموضوع وقال لي ابو محمد طبعا نحنا جينا وطالبين بتكم عائشة ل ولدنا الفاروق ابو محمد

ابتسم وعاين لي وقال لي ونحنا احسن منكم م بنلقى وربنا يتمو ع خير ، واتفقنا ع موعد ، العرس ، ابو عائشة قال لي اها م عايز تشوفها قصدو النظرة الشرعية ، ابتسمت وقلت ليو م يحتاج ي عمي ،محمد همس لي ف عضاني وقال لي يحتاج ياصحبي واختي مُجهزة ليك كم هائل من الأسئلة ضحكت وقلت ليو طيب والله يستر م تكون اسئلة صعبة وامشي أسقط فيها ، ضحك وقال لي دا م وقت الهظار، عاينت لي ابو محمد تاني وقلت ليو طيب ح اشوفها، عاين لي محمد واظن محمد

فهم قصدو عاين لي وقال لي ارح ، هو أتقدم وانا لحقتوا جوا ، مكان ناس امي وقبس قاعدين وكانت عائشة ف نصهم ودي اول مره اشوفها فيها ، طلعت خلقه واخلاق سبحان الله حتي ملامحها كانت بريئه شديد ولوهلة عرفت ولدها جايب الشبه من وين كان نسخه مُصغرة من عائشة، سلمت عليهم وقعدنا انا ومحمد جمب بعض وعلامات الخجل كانت ظاهره ف وش عائشة بس لسه خوفها من فكرة الزواج للمره التانيه طغي على كل شي ، وحسيت انو لازم اطمنها شلت نفس عميق وقلت ليها

، والله ي عائشة شايفه اخوك القاعد قدامي دا؟

قالت لي اي قلت ليها انا بوعدو وعد رجال انو انتي أمانة عندي إلا ان اموت انتي وولدك حتكونو كل مسؤوليتي وانا قبل افكر اتزوج ، كنت بجهز ف نفسي عشان الزواج م مجرد كلمة وبس، الزواج مسوؤلية قبل اي شي وحاجه ع اتسال منها إمام الله لو جا يوم وظلمت فيهو الانسانة ال ح اتزوجها وانا م جيت وقعدت قدام اخوانك واعمامك وابوك عشان يجي يوم واتخلي عنك وخليك عارفه ، انتي حتكوني عرضي وم حتكوني اقل من اخواتي وانا جيتك عشان اكمل باقي حياتي

معاك وأتم نص ديني ع سنة الله ورسوله وخليك عارفه دي حاجه بيني وبين الله قبل تكون مع اخوانك او ابوك ، وانا بحب اطمنك انتي ف أيدي أمينه، كنت واثق من كلامي شديد ، محمد قال لي راجل والله ح اديك اختي وانا مرتاح ي صحبي ، ابتسمت وقلت ليو ابشر والله ورجعت عاينت لي عائشة وكانت داخله ف صمت عجيب ، كُلنا كنا منتظرين ردها قطع سرحانه صوت امها وهي بتقول ليها ي بت عائشة طلعت من شردتها واتكلم محمد وقال لي اها بنسبة للأسئلة، ابتسمت

ابتسامه كلها براءة وراحه وقالت ليو بعد كلامو دا م ظنيت ف اسئلة ي اخوي ، ضحك وقال ليها الحمدلله ، ابتسمت وقلت ليها لالا انا بس داير امتحن الليله، قبس قالت لي احسن م تمتحن لانو ح تسقط ، امي قالت ليها يبت انو مفتكرين نفسكم ف بيتكم ، ام عائشة ضحكت وقالت ليها الحالة وحده خليهم يتهاظرو ساي وضحكنا كلنا وعدا اليوم ع خير ورجعنا بيتنا ، بالمسا طلعت برا واتصلت لي معتصم اصلا شلت رقمو من محمد واتكلمت مع عائشة مُسبقا إنو ح إتكلم

مع معتصم وقالت لي م عندها مشكلة بعد تلاتة جرس حتي ردا لي

…..