الفصل الثالث

رواية جثة أب الجزء الثالث 3 بقلم محمود الأمين جثة أبرواية جثة أب الحلقة الثالثة والصدمه انه كان واحد غريب انا معرفوش، انا كنت فاكر ان الراجل ده جاي ومعاه فيديو يدين حد من المتهمين، ولكن الفيديو بيوضح شاب معاه موتوسيكل قابل الاستاذ حسن تحت بيت مراته التانية سماح واداله الكيس الخاص بالبن

الموتوسيكل كان دليفري، من الموتوسيكلات اللي بيكون راكب فيها صندوق من ورا، حاولت اني المح المكتوب على الصندوق ولكن كان صعب.. الكاميرا كانت بعيدة شوية وحتى لو حاولنا نعمل زوم الصورة هتبكسل، ولكن الراجل صاحب المحل اتكلم وقال _هو حضرتك عاوز تعرف المحل اللي الشخص ده شغال فيه وبيبيع البن مش كده؟! = اه تعرف المكان ده يا حاج؟

_ايوه.. ده بعدنا بشارعين كده والراجل ده مش اول مره يجي للاستاذ حسن عند البيت ده متعود دايما كل ما البن يخلص بتاع الاستاذ حسن يتصل بيه وبيجي بنفس الموتوسيكل ده يسلموا الحاجه وياخد الفلوس ويمشي = طيب انا هستاذنك تيجي معايا عشان توريني المحل _تحت امرك يا باشا حاضر

نزلت انا والرائد طه ومعانا الراجل صاحب محل الملابس واللي كان بالمناسبه اسمه ايوب، ركبنا العربية واتحركنا على العنوان واول ما وصلنا هناك دخلنا المكان كان عباره عن كافيه صغير وفي نفس الوقت بيبيع بن، ولكن الراجل اللي كان في الفيديو مش موجود في المحل.. في الوقت ده قرب مني صاحب المحل وقال _اقدر اساعد حضراتكم في حاجة؟ = حضرتك تعرف الراجل اللي في الفيديو ده؟!

_اه طبعاً ده عمر، بس هو ساب المحل امبارح وقال ان جتله سفرية بره وانه مش هيقدر يكمل في المحل واخد بقيه حسابه ومشي = طيب حضرتك معاك عنوانه؟ _اه طبعاً هو كان سايب نسخة من بطاقته هنا الراجل لما عرف اننا شرطه كان متعاون جداً، واتحركنا على العنوان ولكن لما وصلنا هناك كانت الصدمة الشقة كانت بتتحرق والاهالي كانت بتحاول تطفيها، ولما سألت ايه اللي حصل؟!

كل اللي واقف قال انه سمع صوت انفجار انبوبه بوتاجاز من جوه الشقة، وطبعا اكيد دي مش صدفه، القاتل لما عرف اننا قربنا قرر يقتل الشخص اللي معاه تفاصيل الموضوع، اللي هيحل اللغز وكنا هنعرف منه مين اللي طلب منه يعمل كده على ما المطافي وصلت كانت الشقة اتفحمت تماماً، ولما طلعنا الشقه بعد ما طفوها، لقينا فعلاً جثه الشاب اللي اسمه عمر وللاسف كانت اتحرقت خالص والملامح اتشوهت

وده اللي خلى الطب الشرعي اول ما وصل ميقدرش يقول اي حاجه مبدئية ولا حتى المعمل الجنائي عرف ياخد اي اجراء في الاجواء دي، ومكنش قدامنا غير اننا نرجع محل البن تاني، وقتها طلبت من الراجل بالحب كده من غير اذن نيابة اننا عاوزين نراجع الكاميرات وفهمته الموضوع والراجل بصراحه كان محترم أوي ومتاخرش.. وبعد مراجعه الكاميرات وبالذات في اليوم اللي حصلت في الجريمة عرفنا أخيراً مين الشخص اللي كان قريب من عمر اللي شغال في محل البن

وخلاه يعمل كده والشخص ده يبقى علام ابن الاستاذ حسن الكبير.. ولكن هنا وقفت دقيقه وانا بسال سؤال لنفسي التحريات اثبتت ان الوحيد اللي يعرف ان ابوه اتجوز هو كمال يبقى علام عرف منين اكيد اخوه بلغوا بكل حاجة، وعشان جبت اذن ضبط واحضار لعلام وكمال واتقبض عليهم هما الاتنين في بيتهم واتشدوا على مكتبي

واول ما وصلنا هناك كان عندهم ثبات ثقتهم في نفسهم خليتني مستغرب هل ده غرور ولا بجاحة ولا ايه بالظبط؟ بصيت لعلام وقولتله _المرة دي غير، انت جاي هنا متهم وبالدليل والمرة دي مش هتخرج منها.. وانا هسالك السؤال مره واحدة وعاوز اجابه واضحه قتلت ابوك ليه يا علام؟! = انا معملتش حاجة، وبعدين هو فين الدليل اللي حضرتك بتقول عليه؟!

_الدليل، كاميرات مراقبه محل البن اللي جابتك وانت داخل المحل وبتتكلم مع الولد اللي اسمه عمر وطبعا اتفقت معاه على انه يحط السم في البن، ويوديه لابوك زي كل مره عند بيت مراته التانية، وابوك طلع فوق وشرب منه فنجان فعلاً وعشان السم ده مفعوله بطيء ابوك رجع البيت وتوفى عندكم.. ايه رأيك في الكلام ده؟ = انا فعلا دخلت محل البن ده، بس عشان اسأل عن الاسعار وتقدر حضرتك تجيب اللي اسمه عمر هنا وتسأله

_مأمن نفسك انت، عارف اني مقدرش اجيب عمر.. عشان حضرتك قتلته في بيته قبل ما احنا نوصله وبكده كنت فاكر انك قتلته والسر هيتدفن معاه.. الاحسن ليك انك تتكلم وتقول الحقيقة _انا اللي عندي قولته، ومعنديش كلام تاني اقوله بصيت لكمال اللي كان خايف وقولتله _وطبعا انت يا كمال اللي عرفته ان ابوك اتجوز، انا معرفش السبب ايه؟!

.. وعلى فكره دي مش تهمة انا جايبك هنا النهارده عشان اوريك انت عملت ايه لما بلغت اخوك، كنت السبب في موت ابوك، وموت العامل اللي في المحل اللي باع ضميره عشان قرشين وكانت النتيجه انه اتقتل هو كمان = انا.. انا _انت ايه؟! .. ما تتكلم؟! = انا اللي قتلتهم، اخويا ملهوش دعوة الجمله كانت صدمه بالنسبالي، اعتراف كمال بمنتهى السهولة ان هو اللي عمل كده خلاني واقف مذهول ولكنه كمل كلام وقال

_هو المفروض ابويا اللي انا وقفت معاه وكنت كل ما اشتغل اساهم في البيت كان وعدني بحاجات كتير، انه هيقف جنبي وهيساعدني لحد ما عرفت انه اتجوز وفي البداية كنت رافض اعرف حد من اخواتي كنت بروح وازوره واطمن عليه، حتى بعد ما هي خلفت الولد، قولت عادي اخويا برضو، والست كانت بتعاملني كويس الحق يتقال.. لحد ما في يوم عرفت انه كتب كل حاجه للولد الصغير واكتفى انه يكتب الشقه بتاعة امي الله يرحمها بس باسمي، وحرم علام ونسمة من الميراث.. طيب علام وكان بيعامله وحش ونسمة عملت ايه؟!

قعدت افكر ومكنش سهل عليا قرار اني اخلص منه، ولكن في النهاية اخدت القرار وكان لازم كل حاجه تكون مظبوطة عشان متكشفش بسهولة.. والحظ خدمني لما عرفت محل البن اللي بيجيب منه ابويا القهوه بتاعته ولقيت جوه عمر زميل دراسه وياما غششته في الامتحانات في البدايه كان رافض يعمل كده ولكن لما شاف شويه فلوس الكلام اتغير ووافق.. وحط السم فعلاً لابويا، ومحدش من اخواتي كان عارف حاجة.. ولما لقيت علام عاوز يشتري قهوه نصحته بنفس المحل مكنتش

عارف انه هيلبس الموضوع ولا كان في نيتي ده، وبعد ما عمر نفذ والموضوع بدأ يدخل في الجد، بدأ يبتزني عشان ادفعله أكتر وكنت عارف اني حتى لو دفعت مش هيشبع.. فقررت اخلص عليه هو كمان روحت عنده ومعايا الفلوس وهو بيعد فيها ضربته على دماغه وفتحت الانبوبة ورميت الولاعه وخرجت بسرعة من المكان

كانت أكتر حركه غبيه عملتها.. اني خليت علامه اشترى البن من نفس المحل وانا مستحيل اخليه يلبس جريمه معملهاش خلص كلامه اللي حرفيا لو الشيطان كان واقف كان سقف، اتحول كمال للنيابة ومنها للمحكمة، والموضوع وقتها قلب قضية رأي عام.. عن الشخص اللي قلبه مليان قسوه اللي قدر يقتل ابوه بقلب ميت.. لحد دلوقتي فاكر القاضي وهو بيقول لكمال

لو في حكم اكبر من الاعدام كنت حكمت عليك بيه حسبي الله ونعم الوكيل فيك.. وحكم عليه بالاعدام، وخلصت قضية كانت من اصعب القضايا اللي مرت عليا في حياتي. تمت