القصة دي حقيقية 100٪ وعلى لسان احد شهود العيان
…
الموضوع بدأ بصراخ واحدة في منطقه شعبية ومع الصراخ اهل المنطقه كانوا سامعين الكلام ابويا مات.. ابويا مات
وابوها يبقى الاستاذ حسن عبد السميع مدرس لغه عربية، ولما اهل المنطقه طلعوا الشقة لقيوا الاستاذ حسن نايم على سريره ومتوفي وعشان يتأكدوا من وفاته ويطلع تصريح الدفن طلعوا بيه على المستشفى ولكن الحاجه الغريبه اللي حصلت ان بعد الفحص الدكتور خرج من جوه وقال الموضوع في شبهة جنائية والراجل اللي جوه ده اتقتل
….
كنت قاعد في مكتبي في القسم بشرب كوبايه الشاي وجه بلاغ من المستشفى العام عن جثه وصلت هناك عشان يطلع ليها تصريح الدفن وان بعد الفحص اتضح ان الراجل ده مماتش موته طبيعية وان الموضوع في شبهة جنائية، اتوجهت للمستشفى ومعايا قوه صغيره من القسم عشان نشوف البلاغ ده وهناك واول ما وصلنا قابلت الدكتور احمد سليم وده الدكتور اللي كشف على الجثة
وسألته
_ حضرتك الدكتور اللي كشفت على الجثة؟
= ايوه انا.. وانا اللي بلغت كمان
_ طيب عظيم.. حضرتك في قولت في البلاغ انه اثناء الفحص اتضح ان في شبهة جنائية وعلى الاساس ده حضرتك بلغت الشرطة
= ايوه فعلا يا فندم كلام حضرتك مظبوط
_ طيب يا دكتور، ممكن اعرف ايه الحاجه اللي حضرتك بنيت عليها فرضية الشبهة الجنائية.. يعني هل كان في جرح او اي حاجه في جسم المجني عليه تدل على ده؟
وكانت اجابه صادمه من الدكتور لما قال لا.. مفيش اي حاجة في جسم المجني عليه تدل على ان في شبهة جنائية، ولسه كنت هرد عليه لقيت واحد من الناس اللي واقفه واسمه علام وده اللي عرفته بعدين يعني رد عليه وقال
_اومال حضرتك بتقول انه اتقتل ليه؟.. انت معطلنا كل ده وبتقول كلام من دماغك
بصيت على اللي بيتكلم وعرفت انه ابن المجني عليه، طلبت منه يسكت والدكتور طلب مني اننا نتكلم على انفراد
دخلنا المكتب عنده والدكتور اتكلم وقال
_ يا باشا انا عارف ان حضرتك مستغرب كلامي وهتستغرب أكتر لما اقولك ان الراجل ده وصل المستشفى عايش، انا خلاص كنت بتاكد ان الراجل ميت موته طبيعية وهخرج من الاوضه عشان اعمل تصريح الدفن ولكن الراجل مسك ايدي وقال قتلوني.. قتلوني… ولسه كنت هسأله مين هما اللي قتلوك؟
لكن للاسف الراجل قطع النفس ومات
= طيب ما جايز يكون بيخرف؟
_ وجايز لا، ده واحد بيقول انه اتقتل يبقى يتشرح ونشوف اذا كان مات موتة طبيعية ولا اتقتل
….
كلام الدكتور كان منطقي، وده اللي خلاني اوافق عليه واطلب منه انه يبدأ حالا في الاجراءات وان الجثه هتتنقل على المشرحة ودكتور الطب الشرعي يشوف شغله.. خرجت بره الاوضه وعرفت ان الراجل ده اسمه حسن استاذ لغة عربية وعنده ولدين الولد الكبير اسمه علام عنده 27 سنة والصغير كمال وعنده 21 سنة
بلغتهم ان الجثة هتتشرح وعرفت ان عندهم اخت اسمها نسمة عندها 19 سنة بس دي موجوده في البيت وكان لازم نتحرك على البيت ونبلغ رجاله المعمل الجنائي عشان يتم فحص اخر مكان كان موجود فيه قبل اعلان موته.. وصلنا البيت عنده وكان معانا ولاده وفتحت الباب بنته نسمة واللي اول ما شافتنا استغربت، وبدأت رجاله المعمل الجنائي تفحص المكان وترفع البصمات من اوضته، البيت كان مرتب ومنظم ومفيش اي حاجه كانت لافتة للنظر وبعد ما الرجالة خلصوا شغلهم.. اتكلمت مع بنته نسمة واللي كانت متوتره اوي وانا بكلمها
_انتي اول واحده اكتشفتي ان الوالد توفى مش كده؟
= ايوه.. انا دخلت اصحيه عشان ياخد العلاج بتاعه ويتعشى حاولت اصحيه بس مكنش بيقوم وعشان كده صرخت وقولت انه مات
_ طيب هو قبل ما يدخل البيت كان فين؟!
= مش عارفه، بس هو متعود يخرج ومش بيقول بيروح فين.. هو صحيح بابا اتقتل؟
_ لسه مش عارفين.. بس هيبان
…
رجعت على مكتبي وقابلت الرائد طه وطلبت منه عمل تحريات عن الاستاذ حسن وعيلته عاوز اعرف كل حاجه عن الراجل ده، وفعلا بدأ الرائد طه في عمل التحريات مع فريق البحث الجنائي وفي نفس الوقت كنت منتظر تقرير الطب الشرعي عشان ده اللي هيخليني يا اما افتح تحقيق يا اما الجثة تدفن
وبعد 24 ساعة طلع تقرير الطب الشرعي.. وكان على مكتبي فتحت التقرير وكان مكتوب فيه ان الموضوع فيه شبهة جنائية وان الاستاذ حسن مات بسم بطيء المفعول وبياخد حوالي اربع ساعات عشان يعمل توقف في عضله القلب وبعد كده الشخص ده يموت.. وان السم ده بيكون بطيء المفعول بالذات مع المواد التي تحتوي على كافيين ومن المرجح ان المجني عليه شرب قهوة وكان فيها السم ده
…
قفلت التقرير وجبت اذن من النيابة باستدعاء ولاد الاستاذ حسن التلاتة علام وكمال ونسمة وكان اللي بيتكلم معايا علام بصفته اكبر واحد في اخواته
_ انت كنت زعلان يا استاذ علام في المستشفى عشان الدكتور رفض يطلع تصريح الدفن، اهو الدكتور طلع عنده حق وابوك اتقتل مماتش موتة طبيعية
=اكيد حضرتك مقدر موقفي، انا كنت في شغلي واتبلغت من الناس ان ابويا توفى كنت عايز اطلع تصريح الدفن عشان اكرام الميت دفنه وحضرتك عارف وفاهم كلامي بس طالما الموضوع طلع فيه جريمه قتل فانا مع حضرتك لحد ما نعرف مين القاتل ده
_ ما انتوا هنا عشان نعرف مين القاتل؟!.. والدكم مات مسموم وغالبا شرب السم ده في قهوة، فانا عاوز اعرف اخر مره شارب قهوة في البيت كان امتى؟
= افهم من كلام حضرتك ان احنا متوجهلنا اتهام بقتل والدنا؟
_مفيش حد بره دايره الاتهام، وانا لازم اعرف كل حاجة وعاوز اجابه على السؤال من غير جدال او الرد على السؤال بسؤال
…
ردت نسمة وقالت
= انا اللي كنت بعمل القهوة لبابا… بس في اليوم ده بابا مشربش قهوة اصلا في البيت هو خرج مع العصر ورجع الساعه 9 بالليل
_ طيب لما رجع كان كويس ولا شكله تعبان؟!
= لا كان كويس.. وطلب مني اجهز العشا وهيدخل يرتاح شويه واول ما اجهز اصحيه ولما دخلت لقيته ميت
_ تمام يا نسمة.. عموما تقدروا تروحوا ولو في جديد اكيد هنستدعيكم تاني.. بس اتمنى لو افتكرتوا اي حاجه تبلغوني
…
مشيوا من قدامي وبعد ساعات كان الرائد طه قدامي ومعاه التحريات قعد قدامي وباين عليه انه عرف حاجات كتير واتكلم وقال
_ الاستاذ حسن ده حكايته حكايه، اول حاجة الاستاذ حسن على خلاف كبير مع ابنه علام بسبب الشقه اللي في الدور الرابع واللي هي كانت ملك والدته الله يرحمها واللي المفروض علام هيتجوز فيها ولكن علام مش جاهز واخوه الاصغر منه بيشتغل وقادر يساعد ابوه انه يبني نفسه ويتجوز وعشان كده الاستاذ
حسن قال ان لو كمال جهز هيجوزوا في الشقة والكلام ده طبعا معجبش علام
وعلى حسب شهاده الشهود وتحرياتنا ان علام اتخانق مع ابوه في الشارع بسبب الموضوع ده قبل كده وابوه طرده من البيت
ولكن مش هي دي المشكله الاكبر في حياه الاستاذ حسن، المشكله ان الاستاذ حسن قريب كان محبوس على ذمه قضية ولكن طلع منها براءه كان في طالب اسمه مسعد عند الاستاذ حسن في المدرسة ومسعد كان عنده مشكله في القلب وكان وحيد ابوه وبسبب انه غلط في حاجه اثناء الحصه حسن ضغط عليه انه لازم يفتح ايده ويضرب ومع الضغط عليه الولد مستحملش وطب ساكت مات، ولكن محدش عرف يثبت عليه حاجه وبشهاده الولاد اللي كانوا في الفصل ان مسعد كان تعبان في اليوم ده لوحده وان الاستاذ حسن مضغطش عليه ولا حاجة وعشان كده طلع من الموضوع لكن والد مسعد اسمه ممدوح عبد السلام اتهجم على الاستاذ حسن في المدرسه بعدها وكان هيموته وقاله بالنص نهايتك هتكون على ايدي
وعلى حسب تحرياتنا ان في اليوم اللي توفى فيه الاستاذ حسن راح وزار الاستاذ ممدوح في بيته.. بس محدش عارف السبب ايه؟!
…
بعد ما سمعت كلام الرائد طه طلبنا استدعاء الاستاذ ممدوح عبد السلام للتحقيق معاه فيما ورد في التحريات ولكن الاستاذ ممدوح مجاش عشان يتحول لاذن ضبط احضار ووقتها اتحركت ومعايا قوه من القسم عشان نقبض عليه ولكن لما دخلنا شقته كانت في انتظارنا مفاجأه غير متوقعه.. عشان لقينا
