رواية بيت حبوبه الفصل الرابع 4 - بقلم دانيا

رواية بيت حبوبه

الفصل الثالث3

بقلم دانيا

ضحى جابت النظارة مدتها لحبوبه ولسه الضيوف مركزين مع ضحى بس غالبهم التعليق ، حبوبه لبست نظارتها واتضحت ليها الرؤيه عاينت لضحى عاوزة تقول ليها امشي نادي مكارم من شافت الدلال والكحل في وش ضحى هي زاتها اتهجمت وم قدرت تقول حاجه فجأة لمحت ام العريس بتعاين لضحى بإشمئزاز شديد حبوبه بصوت متردد همست لضحى امي نادي مكارم .... ام العريس فجأة قامت على حيلها قالت نحن نستأذن منك ياحاجه " مديحه " حبوبه قالت ليها اجي دا كلام شنو متين جيتو لمن تمشو حبوبه اتوترت لأنو حست الضيوف انزعجوا .

ضحى بسرعه طلعت من المكان وهي بترجف مشت لمكارم في الغرفه اول ما شافتها اتخلعت قالت ليها " بسم الله يابت دا شنو دا العاملاهو في وشك دا ؟ " سكتت ودنقرت راسها قالت ليها حبوبه بتناديكي لأنو الضيوف قالوا ماشين ... ختت يدها في كتف ضحى وقالت ليها خلاص انتي امشي غسلي وشك دا قبل خالي محمد يجي ،، مكارم طلعت برا تشوف الضيوف لقتهم مشوا وحبوبه قاعده براها وباين عليها الإنزعاج ، قالت ليها حبوبه خير الحاصل شنو الضيوف طلعوا بالسرعه دي ؟ قالت ليها تعالي اقعدي يابتي ... مكارم جات قعدت جنبها مسكتها من يدها قالت ليها يابتي الله م جعل النصيب بس وكلوا مقدر ومكتوب من الله .

لكن الناس ديل معارف خالك محمد لو عرف الله يستر منو ... نادي ضحى خليها تجي مشت مكارم جوا لقت ضحى قاعده تبكي اول ما شافت مكارم قالت ليها حبوبه زهجت مني صاح؟ انا والله م عملت حاجه كلو من بنات حاجه سعديه ،، قالت ليها يازوله ماخلاص الحصل حصل مافي داعي تلومي نفسك ورح حبوبه بتناديكي اترددت في إنها تطلع لكن تاني قامت مشت .... جات وقفت بعيد مدنقره راسها وم قادرة تعاين لحبوبه .

حبوبه قالت ليها تعالي يابتي اقعدي جات بخطوات بطيئه قعدت جنب حبوبه في السرير ،، حبوبه قالت ليها انتي لشنو عملتي كدا يابتي خلاص زهجتي من بيتنا ومستعجله تمشي مننا ؟ او انتي شايفه المسؤليه دي هينه كدا وانك قادرة عليها يابتي انتي جاهزة تمشي لقريه تانيه وتقعدي مع ناس جدد م بتعرفيهم وتعيش معاهم وتتعودي عليهم وتخدميهم وتختيهم فوق راسك .... وبعدين الكحل والدلال ديل نحن ما عندنا في البيت جبتيهم من وين ،، انا م بقول ليكي الكلام دا عشان الومك واحسسك بغلطك انا عاوزاكي تعرفي الصاح من الغلط وكل شيء في وقتو المناسب وعمرو المناسب وانتي هسي لسه بدري عليكي ،، ضحى مسكت يد حبوبه وبقت تبكي وتعتذر .

خالي محمد مشى للناس ديل من قدام وقفوا من شافوهو نزل من الحمار الراجل قال ليهو السعيه سعيتنا لكن البت دي حراميه ساكت بتغالطنا في غنمنا نحن م بنعرف حاجتنا .... انا عارف البنيات البرسلوهن يسقن ديل غير سرقة البهم الكذب م عندهم شغله ،، خالي محمد قال ليهو الغنم غنمي والبنات بناتي ... الراجل سكت مسافه وبقى يعاين لخالي محمد طوالي خالي محمد مشى ساق الغنمه وجاء راجع بيها علينا الراجل اتلفت قال ليهو كلكم حراميه بترسل البنات وانت بتدسى طوالي خالي محمد قال لتقى سوقن الغنم وامشن ورجع للراجل لمى فيهو دق وولد الراجل بقى يحجز قال ليهم انتوا من قريه تانيه البخليكم تجوا تسقو في ابيارنا شنو تاني م القاكم هنا لقيتكم م تلومو غير نفسكم ومشى خلاهم والراجل سنو اتكسرت وخشمو كله بنزف دم .

جاء ورانا قال لينا وين ضحى ؟ من الخوف بقينا دي بتعاين لدي والعبره خانقانا م قادرين نجاوب نقول شنو ،، هو ماعندو عادة تكرار السؤال من اول مره لو ما سمعت بسمعك بطريقه تانيه .... تقى قالت ليهو بصوت متردد ضحى في البيت سكت م قال حاجه وصلنا البيت العشاء لقينا ناس حبوبه قاعدين في الحوش قال لينا خشن جوا انا بهتم بالغنم ،، خشينا سلمنا على ناس حبوبه قعدنا جنب حبوبه بعد شويه جاء خاشي سلم على حبوبه وخشى جوا م اتكلم .

وضحى كانت بتعاين ليهو وبترجف من الخوف قلت لمكارم الضيوف جو؟ حركت راسها حبوبه قالت لينا امشن صلن عشان نخت العشاء .... بعد شويه خالي محمد قال " ضحي " قولت ضحى البت دي تقول الأرض اهتزت تحت رجلينها قامت سريع وهي بترجف مشت عليهو جوا مكارم قالت لحبوبه ياحبوبه خالي محمد لمن جاء داخل كان شايل صوت الحمار في يدو ،، حبوبه قالت ليها انقوم عليهو مسافه حبوبه تصلو قال لضحى كانت واقفه جنب الباب وهو واقف ومربع يدينو " انا مش قلت ليكي انتي سوقي الغنم للمرعى ؟ " قبل ترد لمى فيها بصوت العنج اداها صوتين زي السم حبوبه جات وقفت بينهم خلاهم وطلع برا قدام حبوبه نهائي م برفع صوتو يجوط مع زول ولا برفع يدو على زول .

ضحى بقت تبكي في الغرفه وحبوبه تحنس فيها ونحن بهناك في المطبخ بنبكي معاها موجوعين عليها لكن من دون ما نطلع صوت ،، مكارم مسحت دموعها وودت العشاء لخالي محمد كان قاعد في الديوان .... ختتو ليهو في التربيزه وجات راجعه ختينا العشاء زول عندو نفس للأكل مافي حبوبه بقت تتكلم لينا وحكت لينا حكاوي كتير وكيف زمان كان عندهم اخوهم الكبير يمكن عادي يمسكهم يدقهم من دون سبب بس هم كانوا محترمنو وم حصل اتناقشوا معاهو او زعلوا منو وفي حين عندهم صاحباتهم في الحي مافي زول بسألهم او جايب ليهم خبر وكان بنصحوهم م يسكتوا ويردوا في وش اخوهم ... بس حبوبه قالت كنا بنسمع بدي وبنفضي بي دي وفي النهايه رغم قساوته معانا بس كان حامينا وراعين والحافظ رب العالمين ،، كبرنا وعرفنا إنو قسوتو علينا ما كانت غير حب وخوف علينا وبسببها بقينا اقوياء والحمد لله .

للحظه نسينا الحصل وبدينا نتعشى وبعدها لمينا العده في المطبخ وجينا اتلمينا حول حبوبه وحكاويها لمن نمنا ....والصباح بعد ما نضفنا وجهزنا الشاي لحبوبه وخالي محمد نحن قعدنا شربنا الشاي في المطبخ ،، خالي محمد سأل حبوبه ياداب سأل من ضيوف امس حبوبه سكتت مسافه وتاني قالت ليهو والله ياولدي يمكن الله م كاتب نصيب ،، قال ليها خير انا ماشي المدينه عندي شغل اسبوع كدا وبجي راجع ... قالت ليهو في رعاية الله ياولدي ، قال ليها م بوصوكم على نفسكم وانا كلمت زاهر يمر عليكم