تحميل رواية «طَوفانْ رَجُلْ» PDF

رجل كالطوفان يقتحم عالم امراة يقودها الكبرياء ويحركها كيد النساء ...

هو يطارد الحسناوات كالذئب الجائع ويغرس بهن أظافر الاشتهاء ..

بهذا التمرد وهذا التحدي كيف سوف يُكوّنان سطور هذه الحكاية ؟

قريباً ينزل المشهد ...

رواية "طوفان رجل"

بقلمي "نورا ناصر"

تصميم الغلاف من ابداع عبير الحسناوي AbeerAL_Hussnawy

السلام عليكم ...

أحبتي أحلى متابعين

اشتاقيت الكم كلش 😍

اخترت لكم هذه الرواية من بين عدد هائل من الروايات التي وصلت اليَّ ..

وبعد معاناة لأن الاختيار صار كلش صعب عليه اختار قصة بعد هذيان بين جمر وجليد ..

لذا اخترت هذه الرواية عسى ولعل ان تعجبكم كما اعجبتني ...

نبدأها بقصيدة نثرية خطتها أناملي لوصف حال بطلة الرواية ...

********

أخاطِبُكَ أيها الثائر المغرور ...

ثائر كجيش هب لقتال النمرود

كفضاء فارغ فسيح تملئه جبروت

كسيل جارف من الجنون

من يلقنك فن الغموض ؟

من يحشد ثورة الغرور لديك ؟

كيف تكون مواجهة الزلالزل ومجابهة البراكين بحممها الثائرة ؟

فليشهد الله انك في حياتي كزلزال عنيد وبركان عتيد

لكن ياسيدي هل تعتقد بانني ساركع امامك ؟

وانا متيقنة بانك تخطط لحز نحري و ارتشاف دمي !

هل تظن باني سأضيء لك شموع الحب و ارى بعينك

رغبة جبارة لأحراقي بها

لا يا مولاي لايغريك شكل الوردة الشامخة التي أنا عليها ..

أنا قاسية مثل شوكها وصلبة كجذورها ...

ووبينما انت تستعرض سنوات طيشك أمامي

وعلاقاتك

وعشيقاتك

وصديقاتك

وحليلاتك

انا اقبع هناك في ركن الكبرياء

يغطيني الظلام وكيد النساء

ولتعلم ايها القاسي المغرور إن مابيننا حرباً باطلة فلا النصر لك ولا لي ...

المقتطف الاول

سفرة الى بحيرة الحبانية ...

گاعدة بالٖباص وسط زملٖائي وزميلٖاتي واصواتهم عالٖية يغنون ويطبلٖون فرحانين ومنطلٖقين ...

وأني اباوع علٖيهم واصفگ والابتسامة شاگة حلٖگي والفرحة مالية اعماقي ، ممصدكة جيت وياهم ممصدكة بيناتهم اني ، ماتوقعت جدي راح يقبلٖ اجي وياهم الا بعد توسلٖ وزعلٖ ودلٖع ..

وصلٖنا لٖلٖحبانية ونزلٖنا من الٖباص يم الكورنيش الٖجو جان روعة كولش حلٖو ، نزلنا كلٖ واحد اغراضه ..

والشباب ركضوا للبحيرة وصاروا يسبحون واحنه واكفين نتفرج عليهم ونضحك ...

صديقتي رحاب كالت راح يروحون مناك لذيج الجهة خلي نروح وياهم جاوبتها بحماس يله وخليت ايدي بيدها مثل العريس والعروسة ..

طلعت وجبة قبلنا واحنا وراهم مشينا ونسينا نفسنا واحنا نمشي ونباوع ع الاماكن جانت كولش حلوة الاشجار ، الخضار ، الاطفال يلعبون بمدينة العاب الحبانية والهوا يضرب بالمي وينطي منظر كولش حلو ماينشبع منه ..

فاتت من يمنه بس عكس اتجاهنا موكب سيارات حديثة ومظللة مبينة تابعة لمسؤول حكومي كبير ..

اني باوعت ع السيارات بنظرة عميقة وركزت بكل وحدة بيهم فضولي كتلني اريد اعرف منو بهذا السرب

لان كلهم جنه نعرفهم المسؤولين لان القنوات الاثنين الي جانت تطلع ع التلفزيون كلها الهم ولاخبارهم اغلب الاوقات

بقيت اباوع والسيارات تفوت وشعري صار على وجهي بسبب الهوا .. درت وجهي وعدلت شعري ورجعته ليورى ..

بللت شفايفي وقلق دب باعضامي فجاة صار عندي نوع من الخوف والبرودة دخلت باطرافي حسيت حيصير شي..

مشينه خطوات مو بعيده ورجعت نفس السيارات هنا حسيت استنزفت طاقتي والتفكير اخذ هوايه من عقلي

همست الصديقتي امشي بسرعه امشي لازم نضيع بنص الجموع الضاهر السيارات رجعت علينه

ضحكت كالت : شيسون بينه

جريتها بسرعه واعصابي متوترة : دمشي امشي يمعوده

جنت مثل الانسان الي هارب من الموت وهو يعرف هاي ساعته و وكعة ورقته...

جنت اريد اكذب الواقع جنت اريد اشجع نفسي واطمنها ان مو اني المقصوده ولا صديقتي بس ترجع الحقيقه وتضربني بقسوة وعرفت اني المقصوده

من صاح عليه بصوته الحاد ...انتي ام الابيض انتظري لحظه

وكفت من دون ما ادير وجهي وعيوني جحضت بلحضتها الف فكرة دخلت بعقلي نظرتي وكفتي صدمتي تكسير أجزاء بروحي بعد ما سمعت صوته

باوعتله بنظرات استجداء واستعطاف بلكي يرحم حالي بس شفت عيونه متجرده من كل معاني الإنسانية

بدت اطرافي تنتفض ضدي بمجرد ما شفت عيونه ما كدرت حتى ارد او اجاوب بكلمه ضاع الكلام مني

بذاك الوقت كانت الاقاويل والاشاعات منتشرة عن اختفاء جميلات الجامعات العراقيات وهالكلام مايخفى عن كل عراقي ومينعرف زيفه من حقيقته الى هذا الوقت كل واحد يكول شكل وضايعة السالفة

بقيت واكفة بمكاني اباوع للسيارات الواكفة وللولد الي كبالي والتفت لصديقاتي ومرعوبة خايفة ياخذني وياه اني هذا هم حظي ايام واني زعلانة وحرمت روحي من الاكل وقافلة على نفسي حتى يقبل جدي واجي يا جية الكشرة ..

زيه ولبسه يدل على رهبته مسلح جان وعيونه حاده مرعبه ونظرته تخوف كال بصوت جهوري...السيد « .... » يريدج

أني كال هيج لو كلبي انخطف مني!!! صرت ارجف مثل السعفة ميتة من الخوف جان اسم ثاني رجل بالدولة العراقية بذاك الوقت ...

انسانه مثل جنح الفراشه ما عندي طاقه اقابل عملاق من الدوله اكيد حكون كسيره انتهت الحياة بلحضتها وكأن تقيدت بسلاسل من نااار المصير المحتوم

الف فكرة اجت ببالي حكون انثى راضخه واتجرد من كل قيمي وشرفي وعزتي ونفسي لو راح اتمرد والمعجزة الالهيه الها دور...

حسيته حفر قبري بيده ما عنده هدف بس يلطخ صفحات بيضه من حياتي اخطاء تحيط بيه ادفع ثمنها مستقبلي وعفتي وعفافي...

رفعت عيوني اله بنظرات راجيه ومتوسله وذليله لكن قابلني بنظرات جامده وخبيثه بهل لحظه حسيت استنزفت قدرتي على مواساة نفسي ...

المقتطف الثاني

"أنثى الرصاص "

گعدت وأباوع لٖأديه لهسه ترجف ، بس رغم هذا مفتخرة بنفسي وبلي سويته اليوم ، ومنتظرة اعرف ردة فعله من يسمع انجازي واني حميت بيته وماخليته ينداس

فدوة الكلبه جدي ماقصر من علمني على السلاح اليوم اجه وكته ...

سمعت صوته يحجي ويه عمتي وبيبي زهرة كمت على حيلي بسرعة صح ارجف بس مبتسمة احس بنشوة الانتصار ... ومنتظرة يثني عليه ويفتخر بيه

ظل يستفسر منهم و ويسألهم

_ خو مااذووكم ؟؟ خو ما واحد بيكم تأذى ؟

جاوبته : لا يمه محد تأذى هيه مرتك صوبتهم وشردوا

ظل يصيح بعلو صوته بغضب كاسح

_ يااا مرة منهم هاي ياهيه الطلعتلهم هاااا

عمتي جاوبته بخوف وتردد : دره!

اجه يركض ويصيح : شنووو شطلعها بت الكلب لج وووينج شووون تطلعين للزلم ؟؟

اني الابتسامة الي جانت مزروعة بوجهي قبل شووية تلاشت ومن الخوف ركضت صرت ورى القنفة

وهو دخل للصالة مثل اعصار تسونامي ...

اني شفته عيونه بكصته وحمر من العصبية

دنكت صرت جوة القنفة وهو ظل يصيييح ويسب ويغلط واسمع صوت بيبي زهرة تهدي بي ...

طلعت راسي من القنفة وجاوبته بس على كيفك غير دفعوا عمتي واعتدو علينه لعد اخليهم يدوسون حرمة بيتنا شون يصير ماعاش ولاصار الي يدوسنه واني موجودة واكدر احمي

صاااح بصووت خلاني الزم بالقنفة قووي باثنين اديه وانزل جواها واطلع بس راسي واطل عليه ..

وهو كمل كلامه بصياح : انتي شلج شغل عسا ما يكتل الوادم كلها اكو زلم لو ماكو زلم بنت النعال هسه اني احتار بمصيبتج بذيج المصيبه يعني الولد خطر اي نعال لو يموت ولو اكو حكومة يكعدونج بفندق خمس نجوم لو بالسجن يخلون ابو ابوج يعفن

كتله فوكاها من ردت احافظ على بيتك فوكاها صاير عصبي عليه وعبالهم عود ماكو زلم لا اني مره بالف رجال

خزرني وهم عليه يريد يجيني ، ركضت بسرعة للهول الداخلي وقفلته اني هم ضجت ماتوقعت ردة فعله هيج ... وهو يصيح وراي والكل وراه اجوي

يصيح يعني تظلين هنا ماتطلعين لج شكول وشحجي مرتي طالعه للسلابه لو جارينج ومااخذينج ...

اني فتحت الباب وطلعت راسي كتله اصلا مخانيث بس رميت شردوا اربعتهم حتى ظليت صافنه كلت لعد عليمن جايين شردوا بهالسرعه اشجعت وصوبتهم واحك براسي

ظل يمسح بوجهه بتوتر ويستغفر ربه ... وعيونه عليه ويهز راسه برفض

تقربت منه سلوى البلوى ، خلت ايدها على كتفه وتمسح بعرك وجهه ووتتموع

كالتله : كنالها كنالها اكعدي واسكتي وانلصمي طلعت ترمي مسويه روحها من الماجدات العراقيات

هسه حتى لو دفع عمتي شنو قابل انتم تسكتون لو هي اله تحب تستعرض قابل عمتي ما عندها ولد اشو يطلعون الحكوك من اللحلوك

يعني هسه وكعت بمشكله اكبر من القبلها وهسه يكولون بين العشاير الزلم ضامه روحها وطلعولنه النسوان

رد عليها وهو يبعد ايدها منه : ...وشحده الي يجيب طاري النسوان ما رايد روحه اليذكر اسم مرتي بديوان والله اسويها دم للركاب

اباوعلها بتحذير واحاجي نفسي : ماتسكت الحية الي تفح سمها هينه بسيطة يا بلوى

وين تروحين مني خلي تفض هاي المصيبة

دواج عندي انت هم ماتتوبين مني

ورجع باوعلي بتهديد : وانتي،ولج احسابج بعدين اذا ما ربيتج وخليت الاسلاح يتراولج فلا اطلع ابن امي وابوي اطلع كو***د ابن كوا**

بيبي زهرة وجهت كلامها اله : لا يمه على كيفك لا تغلط على نفسك وعلى ابوك

رد : انتوا شلون تخلينها تطلع يعني هسه لو واحد منهم فطس ومات واحد منهم صوب عليها شگول اني

بيبي زهرة ردت عليه بعصبية بعد مافاض بيها : كول دافعت عن شرفها عن كرامتها وعزة نفسها افتخر بيها يمه هل بنيه ضبعة تحطها ببيتك وانت مأمن محد يدوسلك على طرف

راح كعد على كرسي واني تركت الباب الي جان بيدي لازمته وانفتح من وحده وبقيت واكفة بمكاني ...

كعد يم بيبي زهرة وهي مدت ايدها بحنان وتمسح على جتفه :- ادري خايف عليها

رد عليها ونظراته عليه يباوع بعدم رضى وغضب وكال: اي طبعا تضل عرضي مهما تكون الظروف

شحيت نظراتي منه بكبرياء ...

بيبي سألته : اي يمه وشراح تسوي

بتنهيده ويفرك بكصته : اذا مات اكلهم اني كتلته واسد حلكهم بجم فلس وما اخليهم يجيبون اسمها ادعي الله ما يموت

ورجع رفع اصبعه بتهديد وعيونه تنطق غضب وعينه عليه : - انتي احمدي ربج ما يموت ولو هو يموت ما يموت اني مسكطج مسكطج

فتحت عيوني بعصبية وجاوبته : هااااي انوب فوكاها فوك ما مضحيه بنفسي لخاطركم

كام على حيله وشمر الكرسي لبعيد طخ بالحايط وصار صوت كولش قوي على اثره رجفت ورمشت بعيوني

وهو بعصبية وغضب

هجم عليه ويصيح :- انوب ترادد ترادد ولج انتي شنووو ؟

لزمته بيبي زهرة تهدي بي : يمه عوفها يمه عوفها وانتي روحي شكو واكفه كدام وجهه ما تشوفي صاير نار

مشيت بهدوء وحذر من باب الهول للدرج واباوعله

خاف بأي لحظة يهجم واكف جسمه متصلب ويباوعلي مخنزر

ظليت ادردم بكلبي كله ما راضي هم لو اطك روحي طلقه واكتلها هم ما يرضه هو اني صوجي ذيل الجلب عمره ما ينعدل..حشاني اني

واني ع الدرج سمعت بيبي زهرة تكله : - يمه على كيفك هي حتى الرشاشه ما بيها حظ ما ترميي

جاوبها اي مو هي التفگه العوجه هم تصح بيها رميه اخلص من الگوم تتلگاني السريه..اخلص من ذولاك الهتليه تتلگاني الضبعه ومصايبها ...

فريت ايدي وصعدت لغرفتي هسه اني شمسوية كلب الدنيا والله يا الله ....

...........

رواية طوفان رجل ...

اتمنى ماتحكمون على الرواية من المشهد الاول وتنتظرون الاحداث الي مااعرف شوكت تنزل بالضبط

كل الشكر للكاتبة المحبوبة Smoo-1997 على المساعدة والتشجيع 🥺شكرا يروحي مقصرتي رغم مريضة خطية ماتركتني ❤

الجمعة

٨ / ١٠ / ٢٠٢١

نورا ناصر

البصرة ❤

سلام عليكم

احبابي ومتابعيني وصديقاتي 🌺

شلونكم يارب تكونون بخير

هواي حبايب يدخلولي خاص يسألون عن موعد هاي القصة

بالبداية احب اعتذر الكم على التأخير واتمنى تتقبلون اعتذاري ، فعلا تأخرت ومو بالعادة اتأخر هلكد وقت بس هالمرة ظروفي استثنائية فعلا وانجبرت اتأخر عليكم ..

واذا انزل بارت ماراح اكدر اللتزم بالبقية  ابد يمكن يوم انزل وعشرة لا واذا انزل بالاسبوع بارت او بارتين الكل راح يمل

واصلا نزلت اقتراح بالكروب مال الفيس والاغلب رفضوا الفكرة

وانا من اريد انزل لازم التزم فعليا وياكم حتى لا يصير ملل والمعروف عن الاغلبية ماعدهم صبر 😁

ان شاءالله موعدنا بشهر 9 او 8 يكون التنزيل

حتى اكدر التزم بالتنزيل اليومي وفعلا حابة التزم بهاي القصة حتى لا اتعرض لهجوم مباغت من البعض 🤭

احبكم كلش هواي وفديت الي يسأل عني على طول ويفتقدني 😍اطمأنوا ما اعوفكم ومحضرتلكم تشكيلة روايات مختلفة عن كل رواياتي السابقة

تحياتي الكم

نورا ناصر

🌺

السلام عليكم

رواية طوفان رجل

الجزء الاول " "

بقلمي نورا ناصر

***

اقتباس :

_ ولسوء حظك انا هي تلك المرأة التي لا تُنسىٰ

ولا يقوىٰ قاموس ذاكرتك علىٰ محوّها بسهولة ...

***

فتحت عيني لكيت جدي هستوة كاعد ، سمعت صوته يتلو الاذكار " اصبحنا واصبح الملك لله " " ياصباح يا رزاق يا الله "

جانت الدنيا الفجر ، تمططت وتثائبت وتبعته شفته كمل وضوء واني سويت مثله هو يباوعلي مبتسم ولسانه يلهج بذكر الله

رحنا للغرفة ظل يلبسني جادر الصلاة ويغطي شعري بيده وكفت وراه واردد كل الي يكوله

اول بذره من بذوره الي زرعها بيه نصلي ويقرا دعاء (اللهم اني اتوجه اليك بنبيك نبي الرحمة وال بيته الذين اخترتهم على العالمين اللهم لين لي صعوبتها وحزونتها واكفني شرها فانك الكافي المعافي والغالب القاهر )

يعيدها ثلت مرات المرة الثالثة صحت جدي تعبت

ظل يأشر براسه بمعنى كملي .. ويردد الله اكبر

جان بالغرفة البايسكل مالتي مكلوب وتايراته ليفوك صايرات جنت افر بيهن قبل مااصلي واني جاي اصلي عيني عليه واقرا ورا جدي

شفت التاير وكف مكام يفتر كطعت الصلاة ورحت فريته ...واسمع جدي يكول الله اكبر رجعت ركض اكمل الصلاة

دا ارجع لمصلايتي لكيت وليد

ابن عمي جاي يصلي عليها ركضت ودفعته

كتله وخر عن سجادتي هم هنا لحكتني اني وجدي روح لحامد وهناء

باوعلي بغضب عيب تدفعيني اني اكبر منج وحرام اريد اصلي انت جاي تلعبين بالبايسكل

جدي خلص صلاته باوعلي وخزرني كال مايصير بويه اخوج كافي تتعاركون حتى ع الصلاة

كتله ببراءة الطفولة لا جدو هو ابووه حامد موو اخوويه وانت هسه جذبت حرام عليك

جدي ضحك ضحك ولزم وجهي كالي شون بهذا لسانج

كتله جدي انتٓ بس الي اني هو هواي عنده

عنده ابوه حامد وامه هناء وعنده اخواته اني ماكو الي احد بس انت واشر بصبعي السبابة على جدي

اخذ اصبعي جدي ظل يبوس بي ...ورجع اخذ راسي

باسه

وليد كال بنفس اللحظة عيييب تكولين هناء وحامد كولي عمه وعمووو

اريد اهد عليه لزمني جدي وكال هاي اذا انظل على مناكركم بوويه يأذن الظهر واحنه ما مخلصين صلاة الصبح

چنا اني ووليد مثل توم وجيري بأوقات عركاتهم ومثلهم بأوقات صفاءهم وصحبتهم

اغار منه على جدي واتعارك وياه ومرات اصف وياه ونلعب ومن تاخذه امه وتروح لبيت اهلها ابجي عليه واشتاقله

ومشت الايام وكبرت عن ذاك اليوم بس بعده جدي ياخذني وياه وين ميروح ...

مرة صارت عزيمة وهو جدي متعود ياخذني للعزايم وياه

شفته كاعد على الكرسي و بيده سبحته من العقيق الفاخر

يلوكله التكبر والجبروت الي مبين على هيئته وملامحه الرجولية الغليضة ..

شكله عراقي بحت ، اسمر طويل عظمه خشن وجسمه مرتب يلمع من ذوله النظيفين كولش

نظراته باتجاهي نظرات غريبة تجهل تفسيرها طفلة بعمري ..

اشر عليه بيده الي لازم بيها سبحة وهو يوجه سؤاله لجدي ونظراته تقيمني بتركيز عميق

_ هيه هاي بت الروسية ؟

جاوبه جدي وهو يدور وجهه يباوع عليه

وابتسم ابتسامته الحنون الي ...

_ اي هاي رويحتي من الدنيا ..وبعدين بت الروسية شنو احنا اهلها هاي بتنه لا تكولها بعد هاي فيصل مو حلوة هاي الچلمة منك ..

حرك شفته بابتسامة ماوصلت لعيونه .. وكال وهو يباوعلي قابل كايلين شي غلط هيه صدك امها روسية .. وهذا مو انتقاص ابو سلام ليش تحسست!

باوعتله عدل وتذكرته هو هذا عمو فيصل اعرفه هو ابن عم جدي ، جان يجينه

بس فترة كطع منه وهسه من عزموا جدي للمزرعة بهاي العزيمة وشفته بعد سنوات..

ظلوا يحجون هو وجدي ورجع عمو

فيصل كال :- يا ابو سلام ترة البنية كبرت وصارت

مرة شعجب جايبها وياك للعزيمة وكلها زلم هنانه

وشعجب قبلوا عمامها ؟

رد جدي عليه :- هو منو يكدر يفك حلكه بوجودي انه مسؤول عنها

عمو فيصل كال : اي ميخالف بس انت غلطان ابو سلام هالبنية هاي مكانها مو هنا وبهيج مناسبة المفروض هسه انته تكون اكثر خوف وحرص عليها

باوعله جدي وجاوبه : افااا فيصل انه مو حريص على درة مو حريص على بنية الغالي

ودار وجهه و صاح عليه تعاي بوية درة تعاي

تقربت من جدي اكثر وهو صاح لواحد من الولد

وكاله جيب التفگة ..

راح الولد جاب بندقية ورجع مدها لجدي

وكال باحترام : تفضل شيخ ..

جدي دار وجهه عليه وكال درة بويه اخذي التفكة وشوفيهم سباعيتج يله بنيتي ..

هزيت راسي .. بابتسامة وعيوني عليهم كلهم من واحد للثاني ... كلهم ملامحهم تفضح ترقبهم وتفاجئهم ..

.. اخذت البندقية من الولد بحماس .. وخليتها على الكاع وفككتها قطعة قطعة بكل شغف ورجعت شكلتها بمهارة واتقان

ورفعت راسي اباوع واشوف الكل صافن عليه ...

اباوع لعمو فيصل يفر بسبحته وحواجبه معكودة بخشونة ومبين عنده حجي هوايه يحجي بس ملتزم الصمت وعاجبه يسكت

... بصفه اخوه يضحك ومتعجب كال هاي شمسوي بالبنية ابو سلام خطية اديهه ترفة ليش هيج

جدي كال احسن ابو طالب احسن البنية وحيدة وحيد وفقير ماترهم ينوكل بهالدنيا وينداس لازم ازرع بداخلها قووة حتى المقابل يخاف منها ومايستغلها من يشوفها قوية

رد واحد ثاني هم من العمام : كول يالله ابو سلام انت موجود ان شاءالله الله يخليك خيمة على راسها

جدي جاوبه : والله يا ابو محمد الواحد يغمض ومايدري بروحه راح يفتح لو لا وهالبنية قطعة من كلبي اريدها من بعدي حوك وجبل مايهزها ريح

جاوب ابو طالب والله سباعية عاشت ايدك ابو سلام ...

جدي كله شعبالك تربيتي لو ما شوية صغيرة جان خليتها تشارك بحرب ايران

ظلوا كلهم يضحكون الا عمو فيصل بس ارتسمت على وجهه ابتسامة باردة وتلاشت بلحظة

ورى ماخلصوا حوارهم اني تحمست بزيادة

سألته هاا جدو ارمي ؟

هم كلهم همهموا مصدومين .. جدي كلي ولا تظل بنفسج بوية ارمي

عمو فيصل كال لا لاء لاترمي الخيل مالتي يخاف ويهيج

جاوبه : جدي افااا هذا خيلك جبان فيصل

كال عمو فيصل اي اريد ادخله دورة عندك يصير كلبه كوي مثل حفيدتك بت الروسية ويأشر عليه ..

ظل الكل يضحك بس اني ضوجني من كال بنت الروسية باوعت لشعره عالي واسود ليل ، تذكرت عمو حامد من صغري هو ومرته من اسوي وكاحة يكولون عرك الروس

ومن كد ما يصيحلي هيج وكع شعره على وكت وصارت عنده صلعة وياريت يتوب مني

هسه عمو فيصل نفس الشي اشو تولاني بنت الروسية ما بنت الروسية والله ياعمو بس لا مصيرك مثل عمو حامد .. جان هذا الكلام احجي ويه نفسي ..

جدي اشرلي ارمي

واحسه يفتخر بيه .. رفعت االبندقية من الكاع وسحبت اقسام ورفعتها ورميت طلقتين ليفوك ...

عمو فيصل كال يلعن بليسج طرشتينه وهاي الخيل كامت تصيّح

اخوه كال والله انت بس تشدين حيلج بعد شوي يشدولج رتبة على جتافج

وسألوا جدي شكد عمرها .. كاللهم ... ثنعش سنة وبعد شهرين تدخل بال13 ..

جدي حافظ كل تفاصيلي ، وهو الرجل الاول بحياتي بدون منازع ...

اني نولدت لام روسية واب عراقي .. بابا جان مهندس نفط بالسبعينات دزوه الشركة الي يشتغل بيها ايفاد لروسيا

هناك تعرف على امي .. وتزوجها ظلوا سوى خمس سنوات ، جانت امي جميلة ومهتمة بنفسها وترفض تخلف طفل من بابا ... خوفا على جمالها

اجيت اني بالغلط وبذلت كل جهدها حتى تجهضني رغم معارضة ابوية ..

الا انو جان مقسوم اجي لهاي الدنيا واتذوق مرارتها ...

واجيت للدنيا ، انولدت بروسيا ، وبدت المشاكل بين امي وابوية .. ادت الى انفصالهم ورجع بابا للعراق بس مجان لوحده جنت اني وياه وعمري ٣ سنوات ...

بعد وفاة ابويه بفترة قليلة من لمن رجع للعراق تربيت باحضان جدي الحنونة الدافية ... من عمر ثلاث سنوات واني ما اكو انثى بحياتي تربيت على ايد رجل وكان نعم الرجل وهو جدي ...

بعد الغدة وشرب الجاي طشوا كل اثنين بسالفة .. اني اخذتني رجليه امشي بين الزرع والاشجار والمي الي يجري بالساكية منطي ريحة كولش منعشة لمن يختلط ويه التراب والزرع ...

شفت فراشة غرتني بأللوانها الزاهية ، مشيت وراها على كيف وحاولت اخليها ماتسمع خطواتي بس ماكدرت وهيه طارت لبعيد بالبستان وصارت تحط من وردة لوردة

كل انثى تتمنى تكون فراشة بسبب جمالها شكلها والوانها الحلوة الزاهية وخفتها والاهم اجنحتها الي تاخذها وتطير بيها بكل مكان ترغب بي لكن المشكلة برقتها وضعفها و اقل خدش يقتلها ..

وفجأة اختفت الفراشة من امام انظاري وشفت نفسي ابتعدت كولش هواي ، باوعت للطريق الي اجيت منه

ورجعت باوعت كدامي شفت اكو بيت خفت لا يطلع احد منه غريب ...فكرت ارجع يم جدو ووليد

داارجع وبصفي سياج خشبي ناصي مشيت بصفه كم خطوة واباوع على الزرع والورد والثيل الاخضر المبلل سحرني المنظر احب الزرع كولش

انتبهت اكو طيرة لونها رمادي ، واكفة بمكانها وشكلها حزين .. تقربت من السياج ومديت ايدي الها توقعت حتطير بس ماطارت الظاهر ماتكدر تطير

انتبهت على واحد من اجنحتها ، جناحها مو طبيعي ومامتلاصق ويه بدنها طالع ليبره والظاهر جريحة

انقهرت عليها حيل

كمت عدلت وكفت وباوعت لارجاء المكان واريد اشبخ هذا السياج واخذها بدون محد يشوفني ..

هستوه مخليه رجلي ع الجهه الثانية واسمع صوت باب انفتحت ... خجلت كلش ودعيت مااحد يشوفني بهالوضع

وماكدر اسحب رجلي بسرعة خاف اتاذى من الخشب .. واني دااسحب رجلي بهدوء سمعت صوته ورايه ويسأل بصرامة هاي شجاي تسوين ؟

قبل مااباوعله ظليت ا سحب برجلي من على السياج الخشبي واللتفت شفته عمو فيصل ...

انوب رجلي شكلت بالسياج واعتقد جلب البنطرون بمسمار او شي خفت كولش اسحب رجلي ينبت البسمار برجلي

هو صار قريب مني وسحبني من ايدي وهو يسحب بيه ويكول شعندج هنا شنو هالوكاحة هاي ؟ انوب تكمزين ؟

جاوبته واني اسحب ايدي منه بس خجلانه ..

ها ءء عمو هاي طيرة اريد اخذها

هو طل ع الطيرة وكال هاي مو مالة ربه تموت بس تحبسيها

جاوبته لا ماا احبسها بس اعالجها لان مبينة مجروحة

كال اي طبعا مو حضرتج قبل شويه رميتي واكيد اجت بيها طلقة وانجرحت بسببج

خليت اديه على خدودي وصحت بأسف

لاااا عمووو صدك عليك الله عفية لا تكولها

ورجعت باوعت للطيرة وشكلها الحزين وجعلي كلبي

ودمعت عيوني

هو ظل يباوعلي شافني مدمعة وبعد شويه ابجي واناشغ ... لزمني من كتفي ودارني عليه

مد ايده وكرصني من خدي ويباوع بانبهار لعيوني

كال شبيج اشاقة وياج لتبجين ...

ابتسمت بس مقهورة وهو كال الطريق طويل منا للسوباط والباب الي يفتح على الحديقة المحوطة بالسياج الخشبي هم بعيد طفري جيبي الحمامة وامشي بصف السياج هذا وادليج الباب الي تطلعين منه

وبالفعل كمزت واخذت الطيرة بين اديه ومشيت بصف السياج وهو سابقني بخطوات .. بس يمشي ويلتفت عليه الى ان وصلت لنهاية السياج

هو اشرلي وكال فوتي يسرى وامشي كبل اكو باب ناصي يطلعج منا وروحي يم جدج وبعد لا تتحركين من مكانج ترى اكو جلاب هنا يعضوج

جان عبالك ديخوف طفلة صغيرة .. ابتسمت ممصدكة بكلامه ومشيت وشفت باب طلعت منه ، كباله جان اكو اسطبلات مال خيول شكلهم كلش حلو اكو اسود واكو بني محمر طوخ بقيت اباوع عليهم اريد الزمهم

بس سمعت صوته من بعيد يسولي تؤ تؤ تؤ التفتت عليه اجت بعيوني نظراته الصارمة ، مجتف اديه ويهز راسه ... حضنت الطيرة ومشيت بيها ورحت يم جدي..

رحت يم وليد وجان من ضمن الحضور جانوا مصطفى ابن اخت جدو وعادل ابن اخو الي هو جدو قاسم

جانوا يم وليد اجه وليد باوعلي

مبتسم واني هم عرفت سر ابتسامته

وحجينا اثنينابهمس بنفس الوقت

- تتذكر

- تتذكرين

وضحكنا اثنينا ، هذا عادل خطية من جنا صغار اكل مني ضربة على رأسه بطابوگة

لهسه كلما يجي بين فترة وفترة اني ووليد نتذكر شصار بذاك اليوم

وليد ابن عمي كولش ضخم وطويل وهوايه يشبه جدو وجان يجون يمنه مصطفى وعادل هم تلاثتهم تقريبا نفس الاعمار ويلعبون دعبل بالفرع

اني اصغر منهم بهواي و دائما كاعده بظهر وليد واباوع وياهم همه يطردون بيه لان يكولون مانريد بنات واني كبل اصيح بوجههم انت معليك اني ويا ووليد

وهو هم يكلهم معليكم بيها هي ويايه

وانطاني اثنين دعبل ويكعدني ، خاصة وجدي ماموجود ومماخذني وياه ...

كاعدين ديلعبون لشويه صارت عركة بيناتهم

تعارك عادل ويا وليد ومصطفى يفاكك بيهم

كام عادل ضرب وليد واني اكره عادل لان كله يصيح عليه وبنفس الوقت تخبلت

شلون يضربه لوليد

رحت جبت طابوكه وفتحت راس عادل بيها وخليت دم يطلع منه هوايه

بقينا مصدومين ثواني ونباوع عادل يصرخ بالكاع ويسب ويغلط بيه

لزمني وليد من ايدي وعصرها حيييل وشردنا للبيت

وصلنا للبيت نفسنا مگطوع كوة نتنفس ، ترك ايدي الي جانت غركانة بالعرك

طببني بالطرمة وظل يصيح بووجهي

_ انتِ شعليج شعليج ولج ليش تدخلين بيناتنا احنه ولد انت يمتى تقتنعين انت بنية

هو يصيح واني عاضه شفتي وساكتة

خله اديه على راسه ولج يمكن مااات هسه لان شفت الدم هووايه هوووايه طلع منه

ظليت اصيح عليه شبيك شبيك اني مو اخوك ياوليد شون اخليك تتعارك وحدك اني بظهرك ماخليهم يضربووك

نسى كل شي و كام يضحك حوط جتفي بايده و كال لو لازميج شاكدر اسوي اني بالله وهم اثنين واني واحد

كتله انت تحميني انت سبع واني هم مااخاف منه عادل جبان

امشي امشي لسانج شطوله متر الا شويه امشي نشوفلنه زويه نختل بيها علما تفض لو يجي جدي

طبعا ظلينا خاتلين بالترك وميتين حر جانت العطلة الصيفية ... واحنا علىٰ هالوضع مال الختلة نسمع صوت ام عادل تصيح

ووينكم وووينكم نايمييين شابعييين نوم وابنكم يهبد ويركع بالاولاد العالم

ظلينا واحد يباوع للثاني واني گلبي دگاته احسها تدگ ببلعومي من الخوف

لشويه ونسمع صوت هناء ام وليد طلعت تجاوب ام عادل

هاي شكو عيني داده ام عادل چنج جايه هداده علينا خير ان شاءالله عمي الشيخ ماموجود

ردت عليها ام عادل بصياح ؛ لچ دشووفي ابنج المامتربي شسوى بعدولي ضاربه بالطابوكة وهاي شوفة عينج الدم سودة عليه يمه

ردت هناء بعصبية وبدا صوتها يعلى

وشكوو بيها جهال بيناتهم واذا يعني نوم الطابوكة براسه خلي يلحس صوابه ويكوم يصير رجال سبع لو تردينه يظل رجيجة

ام عادل جاوبتها يله بله خلي اضرب ابنج طابوكة وافيض دمه واشوفج شوون تحجين بالله

هناء بغضب وتهديد شحدددكم تگيسوونه والله لاكلبها واطيها عاليها

هااا يالانقلابيه اشووفج ماترضيين على ابنج شوو طلعي كدامي يله طلعيي املصصص اذاناته موو مختلته مثل الجباااان

من بين عياطهن صررخ عادل جااي اكللج مووو وليد ضربني مووو وليد هاي درة .. والله دررة

هناء هنا اخذت وضعية الانقلاب وتغيرت 180 درجة

وصلتلنا صوت لطمتها لصدرها منوو ضربك درره ؟ هالادبسززز وووينج وولج شوون تضربينه بالماتستحيين اليوووم ازين رااسج صفر ولج شلون تفشليينه ويه الناس شلووون

وكملت بعد ماجرت انفاسها ماعليج ام عادل رووحي ودي ابنج للمضمد والليلة اني يمج وجايبتلج درة من اذانها ومزينتها صفر بعد

خليت اديه على حلگي ، باوعلي وليد وحاوط چتافي لتخافين دره اني اكول لأُمي مو دره ضربته اني

وخرت اديه عن حلكي واني خربانه ضحك

ولك مدا ابجي دااضحك اصلااا

اني ادري جدي بسدي ومايرضى احد

يأذيني لذلك فرطت ضحك

بعدهه هناء كامت تدور عليه هي وبيبي

اخذني وليد من ايدي وطلعنا للحديقة الخلفية

لحد ماسمعت صوت سيارة جدي اجوي هو وعمو حسن يله دخلت للبيت قريب يصير المغرب

اول مادخل حجوله كل الي صار

وجدي خررب من الضحك وكال مقولته الشهيرة بحقي :- دره تنام نوم الضباع وتكعد كعدة السباع

بيبي ماقبلت عليه كالتله انت شنو تريد تفرعنها علينا جاي نكلك مخليه دمه بطوله وهو اكبر منها موو عيييب موودينه للمضمد وخياطات براسه ودنيا

جاوبها وهو يربت على ظهري ويباوعلي بفخر

كال موو عييب جاي تدافع عن ابن عمها خليها تصيير قوية لا تنوكل ... بروحها وحيدة ويتيمة ومحد دايم الها

وذاك يوم وهذا يوم وكبر عادل صار رجال شطووله وبعدها هاي الحادثة متنسي كل مرة نتذكرها اني ووليد .....

بعدنا جنه بالمزرعة وبيدي الطيرة وكلما اصفن تجي احجاية عمو فيصل "هذه بنت الروسيه" ببالي وكل شويه واباوعله واني مقهورة منه كولش وهو مندمج يسولف ويستمع .. ويتناقش

اني ماافوت شي ابد ومااسكت عن شي الي

بقيت احوص اريد استغل اي فرصة ...

شافني وليد عرفني ضايجة وسألني وكتله على هذا الموضوع

كتله انت سمعت عمو فيصل شنو كال؟

كال اي سمعت هو غلطان بس اصلا انتي غلط تجين اهنا واحنه كلنه زلم

كتله معليك وعيبت بلساني

صاح عليه ووولج درره بطلي هاي الحركات عييب احنه موو بالبيت

وظل يتلفت وضربني بالطرف على الخفيف وضغط باصبعه على طرف راسي

بعدها خليت الطيرة بالزرع وخليت يمها مي واكل ..

وعفتها ...

من راحوا ظلينا بس احنه الكرايب واني حجاية عمو بدماغي تفتر وعيني لا ارادي تروح عليه

اني كولشي اعرف بالعشاير واصلا تفكيري كله نفس الزلم حتى مو الشباب لان كله وياجدي ووليد

اخر شي ظلوا بس جدي وعمو فيصل وعمار واحمد جان يلعب ويانا جان كلت الجدو كدامهم وعيني مرة عليه ومرة على عمو فيصل

: جدي هو الجاهل بيمن يسمه باسم ابوه لو بأسم امه؟

عمو فيصل كبل طخت عنده وضحك فهم قصدي عليه من كال بنت الروسيه

جان يكول يابه انتي بت حجي عدنان وهو رباج

كتله يعني عمو انت غلطان وهيج شي مايفوتك

جان يمد ايده على شعري يكلب بي كال يابه نصالحج اليوم نخليج تصعدين خيل شنو رأيج !

اني كمت اكمز من الفرح وفعلا صعدنا ووياي وليد واحمد ...

مشت الأيام والأشهر والسنوات .. بنات عمي كلهن بطلن من المدرسة الا اني شكد حاولوا عمامي يبطلوني حدي ماقبل كال شهادة تفيدها وهي ماعدها احد ...

كعدت الصبح جدي شافني شغل الصوبة ورحت كعدت بصفه ... اجت بيبي جايبه الريوك

باوعتلي عكرت ملامحها وكالت على وين ان شاء الله ؟

جاوبتها والله بيبي للمدرسة اليوم عندي امتحان

كالت هناء بنبرة تنگط سم وهي داخلة جايبه الجاي وخلته على الصوبة :- شوون ويه سندريلات اخر وكت وشراح تفيدج المدرسة ماعدنا بنات تكمل تاليتج تتعينين بالمطبخ كعدي وسكتي تعلميلج شغلة وعملة شووفي شووكة تعلمت تعجن واليوم اخليها تخبز

بيبي جاوبتها معدلة معدلة شووكة تجيبينها ويه هاي الغمة ؟!

جدي كاللهم لا تشوشون عليها عدهه امتحان يله بويه بسم الله مدي ايدج تريكي وجيبيلنه علامة زينة نفرح بيهه

بيبي جاوبته انت محد خربها غيرك هسه شويه بعد تكبر تظل ماتاخذ حجاية احد و هسه تعنس وتظل محد يگلبها يخلص عمرها بالدراسه وتظل لا ولد ولا تلد حالها حال الثلاجة

تريد بعد تحجي بس سكتت ماكملت من شافت خزرة جدي ...

ناوشني جدي استكان الجاي ويسويلي حركات بوجهه عود معليج بيهم ويستهزء بكلامهم ويهز راسه

اخذته منه واني اضحك ... وكلامهم مايهمني لان ادري شما يحجون جدي يريد مصلحتي

داومت وخلص الدوام .. طلعت وظليت اكفة يم باب المدررسة وانتظر السايق يجي ، واشوف البنات صار عددهن قليل اغلبهن مشن لبيوتهن ...

زاحمني التفكير والقلق ، السايق تأخر واحتمال چبير مايجي ، يمكن تعطلت سيارته او اخذوه صخرة ....

لازم اروح مشي راح اتأخر والمدرسة شبه فرغت ..

احنا عايشين باراضي زراعيه بيوت متباعدة واحد عن الثاني لان بساتين بس كل الاقارب ساكنينها وتقريبا احنه جيش بيها ناس تعرف ناس ومثل ميكولون عمك خالك ...

اخذت الطريق وظليت امشي على اراضي ترابية لان المدرسه بعيدة عن زقاقنا ولازم مسافه امشي يله اوصل

كمت امشي سريع والطريق الي مابي احد اكضيها ركض حتى اوصل لمن وصلت لديرتنا كمت امشي على كيف لان تعبت من الركض وصرت كوة اجر النفس

جنت لابسه صدريه موديلها جان اسمه برنسيسه

يعني تصير من فوك ضيقه ومن جوه كلوشه

والدكم مسطرة على طولها من النص وبيها فتحه من كدام وشريط من ورا مشدود فيونكه

شعري اسود ثخين و مسويته ظفيرة لنهاية ظهري وبرجم من كدام (يعني كذلة خفيفة على الجبين)

واني داامشي وگلبي دگاته سريعة من الركض والخوف خايفة لا يطلعلي چلب لو احد من عمامي يشوفني هنا امشي تصيرلي بلوى

واني على هالحال سمعت صوت سياره وراي ونزل منها واحد لان انفتح الباب وانسد

ظليت ارجف فكرت هذا واحد من عمامي مابيها نقاش وهسه راح يسويلي مصيبه

ويكول جايه تتمخطر مشي مناك لهناك وتستعرض بطولها حتى يشوفونها هذا تفكيرهم

هم بروحهم يردولهم حجة حتى يبطلوني لو ما جدي الله يطول عمره هو واكفلي سيف ودركة ...

هي ثواني من التفكير واسمع خطواته وراي

واجاني صووته وراها يكوول

شنو هالغزال الشارد هذا شنو هالكصيبه المتعوب عليها هاي

منين انتِ ؟ اشو طرفنا كله مابي هيج قوام عبالك شطب ريحان ...

صكيت على اسناني واني امشي وجريت نفس

بعصبية ..

وهو مستمر يشمر بالحجي

اخر شي كال ياربي هسه غير تلتفت عليه اشووف ربي شخالق شمبدع ...والله أنتِ الي ياخذج يربح الدنيا والآخرة

زاد خووفي وقلقي مووو منه ابد لاا خفت لا احد يشوفه وهمه يردون حجه عليه

والا اني مااخاف من رجال ....

فاض بيه وكلت خلي اندار عليه اضربه بالجنطه واسطره سطره المدهور ينسى اسمه بيها ويعرف ويامن اندك وبمنو يتحرش

التافيت معصبة وبوضع الاستعداد اريد اضربه

.. بس من شفته هو ركزت بعيوني عليه وقلصتها بتركيز وگلبي يدگ سرييع

بعدها ضحكت بدهاء وهو انرعب من ضحكتي الي خطفت لون الخلفه ....

يتبع ...

Happy birthday hafsa03987

هلووووو مشتاقتلكم كوومات شكد احبكم عائلتي الثانية ..

بارت خفايفي ولطيف ان شاءالله يعجبكم

التنزيل بعدني ممحددة كل شكد انشر بس ان شاءالله التزم وياكم

اريد تتوقعولي منوو شافته دره اخر شي

والتوقع الاهم منو هو الطوفان من بين الشخصيات الي انطرحت بالبارت لان هو واحد منهم ...

حبايبي لطفا الي يحب ينظم و عندهم فيس انظموا لكروبنا بي منشورات تعجبكم تخص القصص وايضا اوقات التنزيل خاف نت ينقطع وافتح مجاني 🤭

واخيرا متابعة للكاتبة لطفا😘

WriterJihan

السلام عليكم

رواية "طوفان رجل"

الجزء الثاني

- ليس صحيحًا ما يشاع بأن الأطفال ينسون بسهولة ، فكثيرٌ من الناس يعيشون حياتهم وهم رهائن لأفكارٍ إنطبعت في أعماقهم منذ سنوات طفولتهم.

- أجاثا كريستي 📚.

باوعت شفته بالبدلة العسكرية الزيتوني ... والبيرية السودة على رأسه ...والسلاح مالته

هو اشگر وطويل وبشرته مكتسبة حمار بسمار من الشمس ...

جان بعده مصدوم بشوفتي كال وهو متفاجئ هاي منو دره ؟ ما شاءالله كبرانه

اني بعدهه الضحكة مسيطرة عليه جاوبته هلو مصطفى شلونك ....

دنك وهز راسه الحمدلله زين ليش تمشين وحدج شعجب ؟

كتله السايق مااجاني تأخر ماعرف ليش ورجعت مشي

رفع رأسه ظل صافن بوجهي شويه وبعدها مشينه سوى ، هو سابقني بخطوات واني وراه

لازمة اللفكس حاضنته لصدري والجنطة على جتفي

ثقيلة بيها الكتب والدفاتر ..

بعده احسه خجلان لان قبل شويه جان يتحرش

بيه بدون ميعرفني لان سكت واني هم سكتت ..

باوع على جنطتي كال ثگيلة اشيلها عنچ ؟

جاوبته لا متعودة عليها

كال يمعودة يومية تجين سيارة اليوم مشي اكيد اكو فرق

جاوبته لا لتهتم اصلا وصلنا للبيت

كال اني اسلم واطلع لبيتنا

هزيت راسي ، دكينا الباب وهو واكف وراي بمسافة قريبة ، فتح الباب وليد شافه مصطفى وكال بنبرة مرحبة وهو يمد ايده اله

اااهلا ابوو الصوف

جاوبه مصطفى انجب لك خرووف انيي

ضحكت وطبيت هم باقين يم الباب وليد يكوله فووت هو يكوله لا اريد ارووح

ساله وليد شخبار الحاتات هالايام

اني بعدني امشي المسافة الي بين باب الشارع وباب البيت ، التفتت اشوف مصطفى يباوع عليه ويرجع يباوع لوليد

يكله مااكووهالايام صررنا خووش اوادم

وليد يكوله مستشرف هالايام يعني ماكو عشرينيه يابسة اربعينية تارسة كلش صايرة شحة

ظليت اباوعلهم وهو مصطفى يمسح گصته بالبيريه ونظراته يبوكها بوك ويباوعلي ....

وجان اركعه بنظرة تحسسه مدري منو قبل شويه جان مفعل دور المغازلجي المطيرجي

وهو وليد يلح عليه وهو يجاوب وليد بالانكار ...

اني اعرف كل سوالفه لان قبل جنت اكعد يمهم ويسولف عن صاحباته البنات ، هو حلو ومرغوب ويكيف عليهن ....

صار ضابط وبعده مستهتر ، جان هستوى مخلص الكلية العسكرية ...

دخلت للبيت هو تفاجئ من شافني لان كبرانه صار كوومة مشايفته لان ظليت انعزل كله بغرفتي ومو هواي اطلع يمهم وهو انشغل من صار بالكلية العسكرية وجياته قلت

دخلت لغرفتي بس افكر بي ماعرف تفكير مراهقة عمرها بس 16 سنة واخذ عقلي شاب وسيم

لو هو فعلا ياخذ العقل وهنا اقتحم الحب حياتي لأول مرة وهو هم جانت نظراته تختلف

عن كل مرة اشوفه بيها

كعدت على السرير مالتي مبتسمة ولهسه حجاياته ترن بأذني ..احس بدفئ الحب يسري بعروكي

افتريت بغباء ما اعرف شنو اسوي احس نفسي متقيده ومبتسمة وشارده بذهني وياه بلعت ريگي بضحكه وبعدها رحت باوعت بالمرايه أشوف وجهي انصدمت وجهي احممر اني جنت اسمع ان الخجل يسبب احمرار بالخدود بس ممجربته على نفسي و اول معلومة صحيحة وتطبقت عندي نظري وعملي

ركزت بوجهي بالمرايه وعدت حواري وياه دا اشوف نفسي شلون طلع مني الكلام كلت ببتسامة لطيفه. هلاو مصطفى شلونك وارمش بعيوني

جان اكمز كمزه بسبب بيبي وهي دكول ولج ويامن تحجين

رديت بارتباك بعد ما حطيت ايدي على گلبي جاوبتها بلعثمة : ويامن احجي مدتشوفين الغرفه فارغه

كالت :- يله موو شرفتي كوومي سويلج شغلة بيها فايدة وساعدي مرة عمج

كتلها ان شاءالله بيبيى ... اني هستوة فتت من يمها بيبي وسلمت عليها من جيت من المدرسة ماحجت شي بس ادري بيها هناء دافعتها

كمت بدلت ورحت وكفت على الكاونتر احضر بالمواعين

حسيت ايد ثگيلة انحطت على چتفي واجاني صوت شوقة ولچ دره شفتي مصطفى ؟ مصيبة صابته على هالجمال ولج صاير يدووخ يدووخ ...

باوعتلها متعجبة ماعرف من شوكت هي انعجبت بي

يمكن سبقتني وحبته لو اني قبلها حبيته

احس كلامها ضوجني

التافيت بيدي الماعون واباوع الها

كتلها وين شفتي مصطفى ؟

كالت هستوة جان واكف يم الباب هو ووليد واني جنت جايبة الملابس من الحبل بس راح حرامات

هسه لو لازمة وليد ع الغده جان ضاك التبسي مالتي والعصر جاب امه واجه يخطبني

وظلت تضحك

واني صافنة بوجهه كالت شبيج تباوعيلي اني حلووة مووو ؟

جاوبتها واني ادور على السنك :- انت حلوة شوكة بس عقلج فافون

ضربتني على ظهري وكالت عن شقاج الماصخ هذا احجي عدل

كتلها هو الرجال خما يريد بس طبخ هم يريد وحدة ذكية وشاطرة ترى مو كل الرياجيل يردونها تطبخ وتنفخ ونادرة اكو رياجيل يفضلون البنية الي عدهه شهادة

جاوبت لعد شسوي هو منو يخليني اكمل دراسة وبعدين شبيها شهادة الوفاة ناخذهه بالمستقبل بدون تعب وبعدين اهلنا يكولون اقرب طريق لقلب الرجل معدته ماگالو عقله!!

انت جنتي ماتهتمين بدراستج لو مهتمة وقاريه وجايبة درجات عالية جان محد يبطلج وشايفه عمي حامد شكد متعصب من يشوف درجاتج يفتخر بيج ويغير نظرته للبنية التدرس و نصيحة شوكة لا تاخذين نصيحة من احد بعد

رفعت ايدهه ونزلتها بملل هسه معليه اني مايهمني شنو يحبون الرياجيل البقية اني يهمني بس مصطفى

يريد ادرس ارجع ادرس يريد اطبخ اطبخ

ها هاي من شوكت شوقة تحبي انت ؟

كالت اني صار هواي مشايفته بس اليوم واني جايه شفته مدري شصار بيه هو صح ابو نسوان ويصاحب هواي ونص بنات الفرع مصاحباته حتى زنيبة صاحبتي بت ام لؤي هم تحبه بس اني احس نفسي من هاي اللحظة صرت انانية بحبه وبعد مااخلي اي وحدة تقرب عليه

صفنت وكتلها ان شاءالله يكون من نصيبج

بس احس الكلام هذا ماطلع من كل گلبي

كالت اكلج شلون اخلي مصطفى بس اني يباوعلي بحيث يعني يكولون شنو هاي ساحرته يعني بس عليه يباوع ولو هو عوينجي ما ينضمن بس نجرب شعدنه لا شغل ولا مشغلة ولا دراسه

رديت : والله يا اختي ما اعرف عود اذا لكيتي حل دزي اليه خلي اجرب

شوكة مصدوومة' بس لا مخليه عينج عليه شافج بروح ابوج شافج ؟

رفعتلها حواجبي واني اضحك بفخر... ايييييي اصلا راد يشيل جنطتي ومخليته

ظلت تفر بيدها وتباوعلي وحواجبها مرفوعة فوك كصتها بشبر

وكالت :- لا ربحنااااا

طبت هناء شايلة صفطة الخبز ، توهه خابزه ..

خلته ع الكاونتر وبس تخوزر بيه ، هي من تتعب تطلع حرگتها بيه اني خليت وطلعت من المطبخ رحت كعدت يم جدي

سألتني بيبي حضرت المواعين كتلها اي بيبي حضرت كل شي

جدي كال اليوم مرة سلمان السايق جابت وهو جان وياهه بالمستشفى لعد انت منو جابج من المدرسة بويه ؟

جاوبته اني شفته تأخر والمدرسة فرغت واجيت مشي

جدي عصب كال ليش اجيتي مشي ولا واحد من عمامج اجه عليج يردج للبيت هاي لو ابوج عايش ما خلاج

وظل يصيح على عمو حامد لان مااجه عليه

وبيبي ماقبلت عليه تكله شلون بالله حسن بالكلية وحامد ملتهي بشغلة لا تضوجهم وكت غده خليهم ساترين علينا راح تهججهم من البيت بسبب بت الروسية

هنا بدت جملة بنت الروسيه ماتجرح بس احسها ملازمتني مثل ظلي ...

اني رحت للمطبخ كرصتني هناء بيدي

ها الفتانة ماتعرفين تسد حلكج وتنلصمين سويتيلج ضيجة خلگ ع الغده ونترت بوجهي هاج اخذي الصينية وزعيها ع السفرة

اخذتها منها ووزعتها ع السفرة اني متعودة على هالمشاكل وكلش باردة من ناحيتها لخاطر جدي اتغاضى عن هواي امور

بيبي ماتقبل على اولادها ماتريدهم يطلعون من البيت لذلك تصف ويه هناء عليه واني تعودت على سوالفهن

وزعت الاكل واجت هناء كالت هاج هذا ماعون تمن الج اخذته وخليته كدامي ، هستوة اكلت منه لگمة وجان يطلع بي شعر

كمت اركض للحمام اذبه وهمه يعرفون بيه اذا بالاكل اكو شعر اتقيء معدتي ماتتحمل وذبيت كولشي

وطلعت من الحمام واباوعها تضحك عليه هي واشواق

جدي كام يصيح قذرات وصخات غير تنبهون على الاكل

وهي نطت كالت والله مو اني طبخت امل

تقصد امل مرة عمو فلاح

جدي ظل يصيح و يحجي عليها واني ادري كلش زين هي ورى السالفة وتريد تضرب عصفورين بحجر

اني فرت رووحي ورحت انام ....

ظليت احووص شون اردها الها لازم ما اسكت الها

واني اصلا متعودة ارد الها الصاع صاعين ...

اجتني امل العصر يمي ...كلتلي وداعة فلاح وداعة بناتي مو اني طبخت ...

كتلها عمه ادري بيها انت ليش مادافعتي عن نفسج كدام حدي ليش خليتي التهمة عليج

كالت بعد هي صارت وراحت شسويلها ماشفتيها تحلف مية يمين

عمه انت منطتها مجال هواي

وشريد اسويلها اني مرة كافيه خيري شري وعمج فلاح هم فقير وهاي تگرط الحيه من راسها ابليس وكاعد ويانه

شوفي لعد اني شراح اسوي الا اندمها .....

راحت من يمي امل وبعدها اندكت الباب عليه فتحتها شفته وليد مبتسم وبيده علاكة

كال هاج ماتغديتي

اخذتها منه كتله الفضل لأم وليد

ظل يضحك ماتعودتي عليها

هزيت راسي ودنكت ع العلاكة اشوف شبيها جوعانة انحرمت من الغده واني شون احب الغده من اجي من المدرسة تعبانة واكل احس يروح تعبي ...

كال امشي لتحبسين روحج كله بالغرفة

كتله جاي افكر بشي

رد بضحكة الله يستر منج من تفكرين

كعدت يمه بالصالة واكل بالنساتل الي جابهم ...

اباوعله كتله ها ؟

كال شنو ؟

شونها الكلية ماكو حب اعجاب

كال ولج وولج

ضحكت كتله يعني ماكو وحدة منا منا

رد من اشوف وحدة احلى منج عود اكبل وياهه

ظليت اضحك وجاوبته لعد هو بالجمال

رد اي لعد الي يكلج الجمال جمال الروح كليله كلاوات .....

هو بس جمال كون عقل وذكاء وتعرف تتصرف ترى البنية مو تاخذ بس جمالها وعقلها تنك

رد بسررعة : اي اريد مثلج جمال وذكاء

ضربته على زنده بقبضة ايدي ... لزم ايدي عصرها

يحجي بالشقة والله اذا ماتتوبين يجي يوم اخلعها الج ايدج وبعدين اكو واحد يمدحونه يظل يكفخ بالوادم لو هاي بس انتي ؟

.. عوف ايدي وبعدين بصفتك منو تتغزل بيه

رد وليد ببرود : نعتبر انو مو بصفتي شي بس الله جميل ويحب الجمال لعد شلون اذا هذا الجمال كله خالقه سبحانه وتعالى يعني مثلا مثلا هسه احنه من نشوف فد مكان حلو تلقائيا نكول اللهم صل على محمد وآل محمد والكلام يتفسر عليج

مثلا تغزلت بالطبيعه هم الطبيعه تكولي بصفتك منو وتفشلني غير خلقة الله لازم نثني ونحمد الله عليها

ضحكت والله لسانك شطوله مينكدر عليك

ولا تغير الموضوع انت عندك وحدة وتحبها بس ماتكول

قرب جسمه مني وكال وانت اذا تحبين هم راح تكوليلي لو لا ؟

حسيته يحجي بجدية كولش هواي خجلت ...

وكبل طخ ببالي مصطفى واليوم من شافنه هو سوى

خاف مبين على نظراتنا شي على هيئتنا

لان صدك مصطفى جانت نظراته تختلف

بهالاثناء دخل جدو شايل بيده زنبيل وخلاه بحضني

جان بي فواكه من البستان لارنج وبرتقال ورمان

كال هاج بويه ماتغديتي انت نغصوج

اخذتها فرحانة بدلال جدي ووليد ..

انتظرت ليوم ثاني واني اريد بس انتقم من هناء شفتها طلعت للسوك جابت قماشات اثنين وفرحانه بيهم كولش وكل شوي تفكر بموديل تخيطهم وتستعرض بيهم تخليهم على جسمها وتشوف لونهم يوالم بشرتها لو يكفي على كدها وطولها

اني صافنه وبس اراقب ، حكيت راسي اجتني فكرة بس شنوو هيه

بيبي عبالك تقرا افكاري كالتها اغسليهم ياله توديهم للخياطه باجر...

وفعلا راحت غسلتهم وشرتهم

العصر شفتها جاي تحضر العجين تريد تخبز وشاعلة تنور الحطب

اني صعدت اودي ملابس عمو حسن بكنتوره ، طليت ع سطح شفتهم قماشاتها مشروره بالسطح وهي كاعدة بالحوش جوه تكطع بالعجين تسوي طوبات

اخذتهم و لفيتهم وسويتهم مثل الطوبه وشمرتهم بنص التنور ورجعت اركض

شافني عمو حسن كال متخلص مغامراتكم

كتله لا لاتكول شفتني عمو عفية حباب

ضحك واني ركضت للحمام فتحتت الدوش عود اسوي نفسي جاي اسبح

وكل شوي اتنسط وهناك واسمع صريخها يبووه قماشي من شمره بالتنور هاي دره مو مااكو غيرها النذلة ولج وين ترووحين مني اليوم

وسمعت عمو حسن يكلها لااتهمين البنيه بالحمام جاي تسبح خاف طارن من الهوا ووكعن

ظلت تصيح شنو اني قشمر وتضحك عليه مووو

اسمع صاح بيها مااسمع صوتج عيب واني انطيج فلوسهم ومااسمع صوتج عوفي اليتمه بحالها

بيبي طلعت تكله هنيالها دره كلها دافعلها سيفين سيفين لا واحد ولا الثاني عمي اني اليتيمة موو هيه

كلها يمه المفروض انتي اكثر ووحده ماترضين احد يحجي عليها هاي بت سلام العزيز

بعد ظليت مااسمع صوت بيبي

طلعت من الحمام سويت نفسي ماادري بشي سألتهم هاي شكوو ؟

اجتني هناء هدادة ماتعرفين نذالتج حقارتج نقمةةة وولج ليش تحركين قماشي دره ؟ هاا تحركينه

جاوبتها صدك جذب كل هالصياح واللطم على قطعة قماش عبالي مدري شنو عبالي هدوا علينه احتلونه الإيرانين حتى طلعت بصابون حتى ما سبحت عدل وتاليها على قحط قطعة قماش

ولا يهمج باجر اكصلج اربع قطع بس لا تموتين علينه حتى بعد لا يفيدج اقماش ولا يفيد ثوب يمعوده ديري بالج على صحتج محد يفيد لا تنجلطين

هي تخبلت .. يمه من عيارتج رس مال روووس تنكطون نعل كلش هامتج هنيوه احلفي مو انتي حركتيهن

: لا والله ما احلف جدو معلمني اذا كنت صادقه او جذابه ما احلف وبعدين على شنو اتعب نفسي وتحمل ذنب من وراج ترا اخر همي ومو اني حركتهم تصدكين تصدكين متصدكين كيفج

وممجبوره اببرلج الي يعرفني يفهمني والحليم تكفي اشاره

جاوبت وهي متخبلة والله اليوم لو احركج مكانه لوو ترحين تجيبيلي عينا نفسه

صاح عمو حسن اسكتين لو شلون موو كتلج اني انطيج فلووسهن

ظلت تفر بيدها وراحت تكمل خبز

اجه عمو لوه اذني كالي بهمس ولج ماتجوزين شون بيج والله ياذوج

كتله عمو العين بالعين والسن بالسن والبادي اظلم

كال متصيرلج جارة هز راسه ودخل غرفته

&&&&

وراها كثرت جياته مصطفى علينا بأيام اجازته

بس اني اسمع بي سمع جاي مااطلع مقابيله ، بس اشوف شوكه مسويه كذله صفح وزلوف مدري عطوب وتعدل بروحها وشايله صينية الضيافة

اسألها المن هاي منو عدنا

تهز راسها صفح بغرور ويروح زايد عود تبعد كذلتها عن عيونها وتكول لمصطفى

وتروح وتقدمله الضيافة ..

وبيوم اجتني لمياء اخته لصفي هي وياي بالمدرسة وانطتني رسالة منه

انصدمت وبسرعة رجعتها الها ...كتلها كليله لا يدز ولاينتظر وعد او كلمه مني اني امري كله بايد جدي واني مااكسر كلمته

وراها من رفضت رسالته وبيوم طلعت من المدرسة شفته ، واني اعرف هم عنده بنات بيها لمحته من بعيد وسويت نفسي مااشوفه

لمن شافني تجاهلته عبر الشارع بسرعة واجا سلم على عمو سلمان وعليه اني رديت بس رفعت وجهي عليه ودنكت سويت نفسي افتش بالجنطه وبعدها طلعت بالسيارة ...

مصطفى صاحب بنات وعلاقات من هو بالمتوسطه

ودوم اتذكر من لم اكعد يمهم واسمع كلامه عن صاحباته واضحك وياهم وهو يحجي شون يتقشمرن ويصدكون بهيج كلام

واني طفلة جان بنظري كل هذا الشي تافه وعدم تصديق بوجود الحب

وهو جان نافخ ريشه ويكولهم هنه يذبن نفسهم عليه

رجع الكلام هذا كله لذاكرتي بهاي الايام هواي ظليت افكر

غمضت عيوني وظليت احجي ويانفسي ديري بالج من مصطفى هذا يحب يلعب ولان انتي صعبه يحب يوكعج

ظل حبه بقلبي محبوس وقلبي من يسمع بأسمه يصير مثل عصفورة محبوسة بقفص وترفرف بجناحينهه

مرة جنت بالمطبخ ودايرة على السنك اغسل مواعين .. وسمعت صوت شي انحط

باوعت شفته مصطفى خله كاسيت على الكاونتر وطلع بسرعة ...

ماعرف شلون غافل الكل ووصل للمطبخ .. انصدمت من تصرفه وجسارته .. رحت اخذت الكاسيت شفته اغنية لكاظم الساهر

واخذته وظليت اسمع بي وجان هالكاسيت سلوة هذا الحب المحبوس

جنت على الصامت انتظر موعد رجوعه واصعد فوك السطح واشوفه من يجي ، مرات يلكفني اباوع عليه ويأشر بايده الي واني اركض اضم نفسي حتى مايحس بيه

وظليت هيج عشت عبارات جبران خليل جبران عن الحب وكمت ابحث عن الاشعار والدارمي والليل طويل

قل تواجدي بالبيت ، محبوسة ويه افكاري و كله بغرفتي بس جدي حس عليه متغيرة

اجاني للغرفة وسأل على احوالي

جنت استحي اخلي عيني بعينه .. احسه يعرف اني فد شي وتغير بداخلي ...

سكت وسكت وبعدها كالي عبارة نصاً

بويه انتي مو مال تفكرين بقلبج تضيعين فكري بعقلج ولاتصفنين مو هو خيالج ترى

كتله شنو جدي مافتهمت ؟

ظل يضحك رد على الشاغل بالج ...

ماعرفت شنو اجاوبه وظليت اضحك وياه سويت نفسي فطيرة بس هو يفهمني

راح للديوان واني تبعته ... جان عندي مكان رغم بساطته بس احس روحي مثل الجنين ببطن امه محد يكدر يوصلي بي ...

جدي ينام بالديوان ع الكاع ، يخلي مخدتين ينام عليها و يدنه شويه واني تمددت بجهة الحايط

هذا المكان ماكو احلى منه ومحد يكدر يوصلي بي وحدي ، جدي يظل يسولف ويايه وظل هذا المكان مثل المريض النفسي من يروح للدكتور وجدي الدكتور من احجي الي بيه ويوكع على علته ..

جان هو يحجي واني بس استمع وفعلا جدي هنا وكع ع العلة الي بيه ...

كال سمعي بويه دره الحرام والحلال شغلة الانسان يحكمها بعقله ديننا بسيط وحلو وانساني يابويه خلي علاقتح بربج قويه بالصلاه والدعاء واحجي ويا ربج بالي بقلبج راح تلكينه يهديج للطريق الصحيح

وراح تحسينا وياج لان انت يتيمه ، ربج من اخذ منج ابوج وامج انطاج انه سند اسد مكانهم واصيرلج حتى اخ واخت

يابويه دره انه حتى الغلط مرات مااحاسبج عليه حتى لاتخافين مني لو تبعدين عني ، من تردين تغلطين خلي هالحجي ترجيه باذنج وتذكريني

ترى الله خله بقلبي محبه الج تفوق محبة ابوج وامج وعمامج كلهم وانه عندي الدنيا هاي كلها بكفه وانتي بكفه ودي كون ماافاركج ومن اطلع اخليج بجيبي حتى مايمسج شر وانا ماكو وانه العليه ربيتج وقويتج وانتي تنمين هاي الاشياء الي زرعتها بيج

ورى هالكلام غفيت بمكاني المفضل وبصف جدي وكعدت واني دره الي الكل يعرفها ، دره حتى الحب مايكدر يغيرها ، من صدك ماحبيت نفسي ويه هذا الحب ... ظليت كلما صورته تصير كدامي اطردها واتعوذ من الشيطان ...

جنت فوك واشوف ولد بيت زامل جوارين بيت جدي والي جانوا دائما يكطعون المي عن كاعنا

وجان عدهم كوم ولد شفتهم تكاثروا على وليد والكثره تغلب الشجاعة

هو وليد بس هالواحد عدنا واحنا كلنا بنات ، واعرف بوقتها جان محد موجود لا عمامي ولا جدي

نزلت اركض وصحت على شوكه

شوووكة لحكي ولج وليد جاي يتعارك جيبي الكررك

وتعاي صوب بيت زامل

كلت هيج واني انزل ركض واشبخ ع البايات ركضت للرشاشه اخذتها شفت شوكه كدامي تشبخ هي ودشداشتها

وركضت وكعنالهم دك اني بطرف الرشاشه افشخ بيهم وشوكه بالكرك عجنتهم عجن

هم عبالهم بس ااخوفهم استصغروني كمت رميت طلقتين فوك

على حس الرمي اجو مصطفى وعادل وولد جدو قاسم كلهم و فكوهم منا

وبعدها وصل جدي اجا واني حالي حال الولد واكفه

اجا مصطفى سحلني من ايدي كال شنو انتي ولد هاده بالسلاح جيبي اشوو وبعدين جان بلغتينا واحنه نهد

جريت ايدي منه كتله شنو اني زعطوطه وانتظر فزعتكم الله لايعوزنا لأحد

خزرني واني وكفت بمكاني وانوب اجا عادل كال العرمه شعليج بهاي السوالف روحي للبيت هسه كدامي يللله

كتلهم انتو شعليكم حيروا بالمشكله

خزرتهم ورحت يم جدي وكفت باوعتلهم ينفخون صاروا اعصاب

وجدي ملتهي يحجي ويا بيت زامل يكولون وليد ضرب بالاول هما ماجانوا قصدهم عركه

نطيت اني كتلهم جذاب اني شفتك من فوك ضربته وانتو تكاثرتوا عليه

جان واحد منهم كال انتي جذابه ادبسسز

اني من سمعته هيج كال رفعت الرشاشه بوجهه

وكلها كامت تصيح نزليها نزليهااا لا تثووور

وصاحوا على الولد اسكت هسه اطشر راسك احجي عدل

وكلها تنتظر من جدي موقف بس هو ابد ماصاح بيه

اجه ووليد اخذ الرشاشه مني وكفخه بيها خله حلكه يجري دم

وهمه يفاكون بيهم و ابوهم عاف المشكله

كلها وكال لجدي سهله ابو سلام فروخ تعاركت بيهم بس هاي البت منين السبعه الماتخاف من احد واني ولدي ترجف من السلاح ؟

ظلوا يضحكون ووليد سلحني للبيت

يمشي ويدردم عليه

كال بعدين حسابج ولج انت شون تطلعين هيج بجامتج وانت

لا وانوب جايبه شوكه وجايه حتى اني فشختني بالكررك تضرب عامي شامي انتن منووو دازز عليجن منووو

كتله ووليد لعد شون اعوفك وحدك

كال ااي عووفيني طبني مرض اني اخذ حكي بايدي سمعتي بعد صرتي جبيره والعين عليج مايصير انت شووكت تعقلييين شوووكت هااا

ورجعني للبيت اني وشوكه ...

بعدها انجمعوا كلهم بديوان جدي وانحلت المشكله بالصلح وبعد ماراحوا الغربه بقوا الكرابه جانوا يفتحون موضوع وياجدي شون دره صارت جبيره وهي عرضنا بعد مايصير تطلع وياك وتفتر الناس اكلت وجهنا

وابعدها عن شغلة السلاح لاتسوي القدر لو تكتللها واحد ...

يمكن موضوع طلعتي بيومها اخذ اكثر مجال اكثر من موضوع عركة وليد ويه بيت زامل ومشاكلهم على المي الي ماتخلص ولا تنتهي. ..

وبيومها جان مصطفى جاي وياهم ولابس دشداشة بيضه جانت تجنن عليه وهو عيونه صفر و مزين صفر اخذتلي صفنة عليه ..... ماتصيرلي جارة ...

......

وبليلة جنت كاعدة بغرفتي وجان عدنا عرس والكل راحوا للعرس بس اني عندي امتحان وكعدت اقرا

اندكت باب غرفتي كمت فتحتها

مد ايده عليه و جان يلزمني من ياخة تي شيرتي جان ووجهه احمر واعصاب نار

صيحت بوجهه شكو ؟؟؟

كال انت شكووو عندج ولج ؟؟؟

يتبع .

التصميم الجميل للادمن ام عبد الرحمن 😍

السلام عليكم

رواية طوفان رجل

الجزء الثالث

نورا ناصر

ومَا فائِدةُ علاَقتي بك بكوني كَالجارِ اَلثَامن

حَتى الوصِية لم تَشمَله

‏

‏لسان حال ؟؟؟؟

......

دره :

نزلت شفت شوكه حاصرة لمياء جوه الدرج وتصيح بوجهه

- انطينياههه كتلج هو دزهه الي جيبيها لااا شلوون لوويمه جيبيها لااادفنج هنا ومحد يدري بيج والله اسويهه لا عبالج ؟ ؟

هي شوكة كلش ضخمة وطويلة وذيج لمياء معصعصة وضايعة ويه شوكه

اباوع على لمياء خطية بعد شويه وتبجي من الخوف

مدت ايدها لصدرها طلعت ظرف وانطته لشوكه

اخذته منها شوكة وهي طايرة من الفرح مثل جندي حصل على غنيمة حرب

اني مدري اضحك مدري اضوج وادري بالرسالة الي بس مابيدها شي لمياء خطية كلش فقيرة وشوكة تهددها ولازمتها تريد تخنگها وعاصرتها عصر

رحت لغرفتي مالي خلك اسوي شي احس نفسي متقيدة عبالك شي يمشي بدمي ثگيل عليه

جريت النفس بقووووة ونفخت وتأفأفت شلون بهالحب هذا

وراها بدقايق واني بعدني بخلوتي اقتحمتها عليه شوكه وركعت الباب حيل وراها واجت يمي تدرعم وتدبج

لازمة الرسالة قووي بعد شويه تتشگگ بيدها

واني عبالك لازمة قلبي بيدها وجاي تشگك بي

ملازمة قطعة ورق

كعدت يمي ع الجرباية وخلت جتفها بصف چتفي ودفعتني بچتفها ومبينه طايرة من الفرح

كالت دره مصطفى دزلي رسالة موو كتلج ظل يحبني لان دائما يجينه وهسه دزلي رسالة

اني ظليت بس اهز براسي حتى الحجي مايطلع مني وادري الرسالة الي

كالت اكلج بالله اقريها هاي الرسالة الي عدل بالله مدري شكاتب

هي واصلة للخامس ابتدائي وبعد ما كملت ومو هلكد تعرف تقرا

باوعتلها اريد بس ابجي اخذتها منها ورغبة بداخلي اريد اصرخ واكللها هاي مالتي الي دازها الي موو الج

تنهدت ، باوعت للكلمات ولخطه الحلو وصرت اقراها بقلبي وعبالك كل حواسي توقفت فجأة ..

"عندما أحببتُكِ أيقنت أنني أفنيت عمري على اللاشيء وها انا اجدد لك حبي واخلاصي

وأؤكد لك بأنني غريقٌ في عشقك

فهل لك ان تنتشلي ذلك الغريق ؟

قاطعت قرائتي الصامتة شوكة من طختني بچتفها حيل مرة ثانية وكالت

ايييي دره شبيج صفنتي اقرريلي

واحجيلي شيقصد فرزنيلي

صرت اقرالها الي كاتبه واحس الكلمات تجرح لساني وتطلع منه ، غصة شكبرها بحلگي وعبرة خانگة بلعومي .

خبزتني على ظهري حييل وكالت ثول خابصتنا شهادة ودراسة وقرايه ماتعرفين تقرين امداج جيبيييها .

اخذتها وهي تبوس بيها وتشمشم شفطتها شفط وتخليها على گلبها حيل ترصها ، تمرعدت الرسالة حريمة .

راحت شوكة طلعت من الغرفة كلها .

واني بقيت بالغرفة الوب ، ماعرف شسوي

ظليت اشغل نفسي ارتب بالاغراض لو اگلب بالكتب

افتح الكنتور اباوع للملابس بدون تركيز واسده

وجان اشوف الكاسيت مال الاغاني

اخذته خليته بالمسجلة وكعدت اسمع

واني على هذا الحال دخلت شوكة عبالك مداهمة تدفر دفر كالت اكلج دره

وخلت اصابعها كلهن على دگم المسجلة وطفتهه

اني مدري شنو هالبرود العندي رغم داخلي جحيم وبيه رغبة قوية هسه الزمها اشمرها من فوك السطح

راحت تكلب بجنطتي وطلعت دفتر وقلم وجابته

كالت كتبيله لمصطفى جواب عفية

لزمت القلم والورقة وظليت محتاره شنو اكتب

وهي اكلت راسي يله يله ولج كتبي ترى حبست لمياء يم امي خليتها تخبز وياهه كبل لاتخلص امي وتروح

كتلها شبيج هو مصطفى مو بالعسكرية لاتستعجلين

كالت ميخالف عود من يجي تنطيهيا لميه خو ما راح تحمض عدهه

تأفأفت وظليت اكتب و بديتها بشعر

(قلبي يحدثك بانك متلفي

روحي فداك عرفت أ ِلمن تعرف

لم اقض حق هواك ان كنت الذي لم اقض فيه اسى ومثلي لم يفي)

اني من كتبته متقصده ويعرف معناها مني لان همه يعرفون شوكه مخلصه خامس ابتدائي ماتعرف بالشعر ...

قريته الها

كالت وووع مو حلو جنه نشيد الوطني مال الاصطفاف وطن المدى على الافق جناحا

كتلها لا حتى يكول عليج مثقفة وتعرف تكتب اشعار

كالت خوش كملي كملي

لوو اكلج اني اردلج وانت كتبي احسن

كتلها ميخالف رديلي بكيفج

ظلت تردلي عزيزي صوفي توفي تعال بسرعه اخطبني لان ابوي يريد يزوجني واني مااكدر اكسر كلمته

كمت اضحك كتلها مايصير هيج تكتبين هسه يكول ذابه روحها عليه

كالت لعد شلون نكتب شونك وشخبارك وان شاء الله تكون بخير ؟

هزيت راسي وميتة ضحك ...

انوب راحت ترستها لاصقات كلوب حمر واجت كلتلي هاا حلوة موو ؟

وقبل لااكوللها رأي طلعت تركض ورجعت مخليه حمره بحلكها وطابعتها بالرسالة

راحت ورجعت كالت لمياء شاردة انت انطيهه الرسالة هاي باجر من تشوفينها بالمدرسة

كتلها اني معليه رسالتج انت حيري بيها لا انوب امج تسويلي مصيبة وبعدين باجر جمعة ماكو مدرسة لو حتى هاي مضيعتها ..

غمتني وراحت ...

وراها صارت امتحانات نصف السنة وماشفت لمساء بعد ولا هي اجتنا للبيت ..

اخر يوم امتحان اجتني كالت لا تطلعين وكت اليوم اريد احجي وياج

وفعلا ورى ما خلصت باوعت للباب اريد اطلع احس گلبي مورم من هذا الموضوع

بس حسيت ايد انحطت على زندي وراهه اجاني صوت لمياء ها دره شونج بالامتحان

التافيت عليها وتنهدت جاوبتها زينة والله الاسئلة جاوبت ..

جرتني وكعدنا بالساحة ظلت تحجيلي

تدرين بمصطفى من يروح للعسكرية ويتأخر يدز مرسال النا والج من جيت الكم شوكة اخذته مني بالكوة

جريت نفس بضيق وباوعتلها بوجهي المكتئب وحجاية جدي ترن بأذني "مو هو خيالج"

جاوبتها كتلها اني مية مرة كتلج لا يدز شوفي هسه لو واكع بيد واحد من عمامي وتصيرلي سالفة

ردت لا هو يفتهم واصلا حتى اسمج ماكتبه عليه

لتخافين بس اني والله أخاف منها شوكة جعصتني جعص

ظليت اضحك من تذكرت شون جاعصتها جوة الدرج

هي كملت كلامها كالت لو تدرين شوكه شسوت اجتنه للبيت ودكت رجل الا مصطفى يطلع

وتنطي الرساله وامي تعاركت وياها ماكو مافكت هاي بنت عمج شكد خوثة

واني كلت لمصطفى هي اخذت الرسالة عبالها الها

كال اشوفها من اروح تكابلني وتكعد الخبلة ...

ضحكنا اني وياها كتلها عفية بعد لا يدز شي

هي كالت لا هو راح يدز امي تخطبج ....

اني گلبي راد يشگ صدري و يطلع من مكانه فرفحت وادري جدي ما هاوي

كتلها لا اني بعد وراي سادس اريد ادرس ماافكر بالزواج

كالت يعني سادس وراها كلية مو هيج زين عمامج يقبلون

حكيت كصتي مادري والله اني هم ممفاتحة جدي بهذا الموضوع مال الكلية وهسه هم افكر بالسادس وبس شيصير وراه ظلت يم الله.

من رجعت حجيت ويا جدي بموضوع الكلية واحلامي وطموحاتي وهو هواي شجعني وساندني ..

صارت عطلة نصف السنة اجا جدي لغرفتي

كال ها بويه مدام عطلتي اريد اخذج وياي للعقاري اشتريت بيت واريدج تسويلي توكيل حتى اديره باسمج بس ها مو تسمع بيبيتج ترى تسويهه كربلا

ضحكت كتله شوكت نروح ؟

رد باجر نروح للسجل العقاري وياعادل حتى يمشي هو بالاجراات

كتله ماشي ..

عادل محامي وفتح مكتب محاماه اله وهو كولش شاطر احنه ولدنا كلهم سباع وشاطرين بس عيبهم البنيه ماتكمل ومكانها البيت والمطبخ وتربي الجهال لا الها راي ولاصخام وهالشي كولش جان يضوجني

كعدت الصبح شفت جدي كاعد رحت لبست بنطرون جنز وتي شيرت ابيض بي رسومات

دك الباب وطلعنا جان عادل يفك عيونه ( طبعا صار هواي ماشايفني لان بلغت عزلت نفسي وكمت بعد استحي اطلع يمهم واحجي وياهم وجدي نبهني كال بعد ماترهم صرتي جبيره وعيب لذلك انعزلت )

هو فتح عيونه كال هاي شنو شالابسه؟؟

كتله شلابسه قابل ؟

جان يكول لجدي صدك جذب عمي هاي شلابسة

روحي بدليهم

كتله انت معليك

كال والله ماانطلع اذا ماتبدلهم ...

جدي كال بويه روحي بدليهم

رحت لبسيت قميص كابوي فوكاهم وطلعت

هو شافني قيمني بنظراته وظل يهز ايده

صعدنا بالسيارة جان يكول انت ليش مامحجبه ؟

كتله استغفر الله انت شعليك

كام يصيح نصي صوتج لا اكص السانج

جدي جان ساكت بس يباوع علينا

كتله تكص اللسان منو حتى اني اكص ايدك قبلها

اني حجيت هيج وجدي كام يعيط علينا اثنينا

كال انتووا شنوو ولكم ماتحترمون مو واكف

سكتنا بس هو بس يتأفأف ويستغفر ويباوع عليه من المرايه لان اني وراه كاعدة

بعدين نزل يم محل شويه واجا بيده حجاب

كال هاج البسي

كتله مااعرف البسه

كال لجدي جماعتي كلها هناك وعالم شون اطب للعقار وهيج مفرعه الناس تاكل ووجهي

كتله شنو مفرعه يعني مگملة قصدك ؟ اصلا لاتجذب مابيه گمل

كام يضحك هو و جدي

وجدي كال مفرعه يعني بلا حجاب شجابها على الكمل

كتله مو من بيبي وهناء يفلون بنات عمي يكولون هاي مفرعه يعني كمله عدها جهال

همه خربوا ضحك

كال الي يشوف طولج ولسانج عباله فاهمه طلع الطول طول النخله والعقل عقل الصخله ...

كتله جدي كافي صيح بي سكت بس ابتسامه على وجهه

كتله تعال لبسني الحجاب مااعرف كال واني شمعرفني ظليت اعصاب وارد ابجي

بعدين جدي كله لبسها شون ماجان جان يجي عود يلبسه الي ويباوع على وجهي ويضم بشعري جان يكول شدعوه هلكد سرح

ضحكت جان يشد الربطة

وكال هاهيه

ظليت اباوع بجامة السيارة كتله شنو جني الدجاجه العامله هيج شادها

كال شمعرفني انوب ديله لبسي وسكتي

سكتت

نزلنا جان يكول نعله بليسج هاي الكصيبه ضميها شطولها

كمت افوتها جوه القميص بس شنو شويه وابجي

خبلني المدهور

خلصنا المعامله واعزمنا على الغدا بس نظراته عليه

مدري شلونها

بعدين جدي كله دره تريد تدخل قانون ان شاء الله

كال عادل شنو هالحجي القانون مايرهم للبنيه خل تكمل سادس وتكعد بالبيت اشرفلها

رفعت عيني خزرته كتله انت اليوم ماتريد اليوم يعدي على خير اني هذا طموحي بكيفي كلمن يحتفظ برايه لنفسه

جدي باوعلي وخزرني واني سكتت

جدي كال لا اريدها مثل عمها تكمل دراسات وتصير استاذه

رد عادل راح اطلع عين بناتنا وتخليهن يردن يصيرن مثلها

كتله اكولك الي يشوفك محامي ومثقف ويسمع هذا كلامك مايصدك هيج تفكيرك رجعي ويلغي كيان المراه انتو عدكم المره مثل الهايشه بالضبط

ظلوا يضحكون هو وجدي ...

جدي ندسه ماتكدر على السانها وهاي اخر مره اطلع وياكم اثنيكم سطرتوا راسي سطر

رجعنا للبيت وبالطريق اشوفه يباوع عليه بالمرايه واني اغلس

وراها خلصت عطلة نصف السنة وبلشت امتحانات اخر السنة وبيومها جان عرس عمار اخو عمو فيصل

ازوج بت جدو قاسم فاتن الصغيره فانقسمت النسوان يم فاتن والزلم ابيتهمو هم سوو

عرس كولش جبير بالبستان والذبايح والهوسات والطبل الدنيا انكلبت وجان عرس كولش

حلووو اني مارحت للعرس جان عندي امتحان وجان حتى السبت دوام فاملحلك اقرا ...

بس من يمي اسمع صوت العرس ، مليت شويه من القرايه صعدت للسطح اباوع عليهم ..

قبلها هناء وبناتها جانن يحضرن يروحن للعرس

وظلن احتارن شيسون بلكي العالم تشوفوهم وتخطبهن كل شويه هناء تكول لشوكه ولج لبسي هذا الكوستم حلو عليج هسه يشوفونج ويخطبونج

امل مرة عمو فلاح بدلت لبناته الصغار واخذتهن وراحت

ظليت اباوع ع العرس من فوك بستانهم بصف بستاننا واشوف هيبة هذا العرس عمو فيصل صار شكد مشايفته .. جان لابس الزي العربي شكد مرتب وكشخة وحضوره من بينهم اله ثقل ...

نزلت لغرفتي اقرا وبيبي وهناء وبناتها وامل وبناتها تعشوا بالعرس ورجعوا ناموا

بس وليد مارجع باقي هناك لمة شباب

ل١٢ واندكت باب غرفتي بقوة ومبين الي دكها اعصاب بحيث فززني

بس فتحتها لزمني من ياخة تي شيرتي ووجهه جان احمر واعصاب نار...

كتله بعصبية شكو شبييك ؟

كالي انتي شكو شعندج ولج هسه اتخالصوا مصطفى وعادل من وراج

تفاجئت من وراي اني شعليه؟؟؟

كال شنوو دره عاشگه انوب عادل درره عادل ويجرر بيه ملكييتي غيرره

كتله بغضب هددني وليد انت تخبللت صار لعقلك شي هااا شجااي تخررربط

عاف هدومي وفرك وجهه وتعوذ من الشيطان

راح كعد ع كرسي بصف الميز ويفرك بأديه .. متوتر وانفاسه سريعة

وظل يسولف كاعدين وكالوا عرس منو الجاي صاح عادل اني ان شاء الله ومصطفى صاح اني هم

ظلينا نضحك عود ننصب عليهم ونستفسر منو صاحبة الحظ السعيد

هم كالوا من كرايبنا فرحناهم و بعدين ورا شويه ووكفوا على صفحة اثنينهم يدخنون بس جان صوتهم يوصلني

عادل سأل مصطفى شعجب ابو البنات قررت تتزوج

وتعوف صاحباتك

جاوبه مصطفى حبيت وخاف تروح مني

رد عادل : اي والله اني هم الحب بهذل احوالي

بس عليك الله منو الي تحبها مصطفى؟

مصطفى همس لعادل اشو هذا تخبل كله اني اريدها

وناوي اخطبها وهذا مصطفى گله انجب اني اريدها وهي تريدني و وتمالخوا واحد يضرب الثاني

عرفت الكلام جان عليج لان عادل كال لمصطفى منو يكول هي دره تريدك ...

اني كمت اضرب بيهم واغلط عليهم طايحين الحظ عينكم على عرضي ... تخالصنا تلاثتنا لو مااحمد اخو عمي فيصل ظل يفاكك بينا بس مااكدر

و الك.....د مصطفى طلع سلاحه وكلها لتمت علينا بس من سالوا شنو سبب العركه ماحجوا

كالوا واحد غلط على الثاني واجه جدي وعمي فيصل وظلوا يسالون ...

وجدي متعجب وليد بويه شكو ولكم فشلتونا ...

عفت جدي و لحكتهم كتلهم باعوا كوا....ويد اثنينكم

دره اني ناهي عليها ومحد يفتح الموضوع بعد مرة ثانية والله اطير ركابكم بس اسمع واحد يحجي بأسمها

اني فاتحه حلكي مصدومه واول مره اخاف مااريد بسبي احد يتاذى ...

كتله عادل مو سولفتك كله عرك اني وياه اصلا مااطيقه ومن رحنا للعقاري وبعد ماشفته ومصطفى والله ماحاجيه وياه كلمه وخل يجي اي واحد يفتح حلكه كدامي اتحداهم

جان وليد شكله كولش تعبان حتى عيونه مدمعه جان يكول شلون بيه دره شلون وشنو تاليتها

كولشي ماافتهمت من كلامه الاخير خلاني افر باذني وصافنه ...

اجه يمي صفن بوجهي مبين بعيونه كل تعب الدنيا

كال شفت رسالة بيها وصف لعيونج واعرفه خط مصطفى ....

ارتبكت ماعرفت احجي بس كتله انت و وين شفتها ؟ عندي بيها اسمي ؟

فرك وجهه وظل يستغفر وطلع

طلع من الغرفة واني رحت وراه اسد الباب جان اشوف شوكه تغمزلي وكالتلي شنو جنتوا تسوون انت ووليد ؟

غميتها وسديت باب غرفتي ....

وراها ما اعرف شلون رحت للامتحان وشون امتحنت بقى بالي كلش مشغول بالعركة ...

اصلا يوم ثاني طش خبر العركة اكثر من طشة العرس نفسها ...

وبعدها مباشرة ورى عرس عمار اجت ام مصطفى واني كاعدة بالهول وطبت يم جدي بالاستقبال

جدي سألها خيرج أم مصطفى احجي شعندج

ردت والله مادري شكلك ابو سلام هذا مصطفى الله يسلمه مگرع راسي دزني الك اخطبله دره واني يا ابو سلام ماريدها انت من يمك رفضه البنية ماتوالمنا امها روسيه وطول عمرها رابيه بين الزلم وقويه مانكدر نحكمها

جدي كالها لو تجيبلها نجمه من السما مااطيها الكم خايبه انتي تطولين اظفر درره ؟؟؟

ولج الزلم تتكاتل عليها وابنج مو حوك وربات نسوان وانا بتي رجال واريد تاخذ خيال وكون ارجل منها ياله طلعي بره بره

كلتله وهي متوترة ابوو سلام تطردني اني ماكلت غير الحق شكايله اني ؟؟؟

ولج سعيدة حجايه وحدة مااثنيها دره ماتصير الكم خلي ابنج يكطع ترى لا مايشوف خير مني

هو علمود شنو جايتك غير اريدك ترده اني ماريدها تصير جنتي وحدة متفرعنة

ولج انت لو تخلفيلج مية واحد ماتكدرين تربينه مثل ما انه ربيت دره يله انگلعي واذا سمعتج تحجين عليها اكطع ظهرج

هي خلت وطلعت ووراها هو اجه متخبل يتوسل بجدو يكله خالي لاتكتلني بايدك معليك بامي والله دره اخليها تاج على راسي اعيشها ملكة والله ماتلكي احد يحبها بكد ما اني احبها

جدي هم ماانطاه مجال وهم كله ماترهملك انت مو خيالها

وطش الخبر بالبيت كله و شوكه من درت مصطفى خطبني كلبت البيت بالنوح والدك والطلم

تكلول لامها وعمة امل وبيبي دره باكته مني هو يحبني

وتصرخ ولكم راح اموت باكوا حبي المايخافون الله يبوووووه

وظلن تغني اغنية مات الانسان الي بداخلنا مات كلنا بدم خل نبكي عليه

وتبجي بصوت مثل تريد تصرخ وهم يسكتون بيها

وماتسكت ...و كاعده بالباب مال غرفتي

واني مقهورة وقافلتها عليه

كاعدة وتهدد بيه والله بس تطلعين الا املخج تملخ

ضاكت بيه الدنيا عبالك صارت بكد السمسمة ....

جان رفض جدي لمصطفى متوقع منه بس اني اني حييل انقهرت جنت معجبة بي ورايدته ...

فراگه لا كتلني ولا مقويني

بعد ما جدو رفض مصطفى اسودت الدنيا بعيني وتبعثرت احلامي تهدم كل شي حلو بنيته ويه مصطفى بكلمة وحدة من جدي استوقفت عندي الحياة وضاع الامل وتخربطت أحوالي

جنت كاعده بالاستقبال معتكفه على نفسي والدنيا مسودة بوجهي ولحد الان عندي بصيص آمل يقنعني ان ممكن جدي يغير رأيه واكون من نصيبه

سمعت صوته وهو يصيح عليه ..دره درتي بويه دره وينج

فزيت من مكاني ورحت على السريع اله وكفت باب الاستقبال وجاوبته. هااا جدي محتاج شي

اشرلي بيده كال.. تعاي بويه تعالي نامي يمي

ابتسمت ابتسامة حزينه وباوعت للمكان الاحبه وياما نمت بي وسمعت قصص من جدي على اثرها جنت اغفى واروح بغير عالم

تقربت منه ونمت على ايده وهو يهوسلي هوسته المعهودة..دره من حلاها گصايبها وراها اجه الخاطوب يخطبها وجدها ما انطاها

عادها مرتين وتلاثه واحسه بكل مره يحجيها ينغز بگلبي وكأن يحسسني ان هو فرحان ممنطيني المصطفى

غرغرت عيوني بالدموع وصبرت بروحي بالتواسيل بلعت الغصه وتنهدت

حسيته حس بيه باس راسي وهو يكول.. خايب جدي هذا ما يفيدج افتحي عيونج يا جدي وشوفي زين اكو الي يحبج ويفرح الفرحتج ويضحك لضحكتج واشوف عيونك تلمع من تمرين بدربه

تنهد وكمل كلامه... لا تمشين وره گلبج يجدي تخسرين امشي وره عقلج وخلي يوديج للطريق الصحيح وياخذج للي يحبج

استغربت..شنو هي حزوره كل شي مفهمت وبعدين هذا منو يدليني عليه

ضحك...ههههههه انتي يا جدي ما فاتحة عيونج عليه لو تركزين راح تعرفين منو

رمشت باستغراب...اي منووو؟

رد بتنهيده..هذا الي مخليته بحسرته ومشلوع گلبه من وراه سوالفج وعرامتج هذا الذاك اليوم من وره العركة الصارت من وراج يدخن ويرجع ليوره وشويه ويشگ قميصه

عدلت كعدتي وعقدت حواجبي... اوكف اوكف اوكف بس لا قصدك عادل الغثيث هذا ما ينبلع لو اشرب بطلين بيبسي كزاز ايييع شكد اكرهه لو يموت ما اتزوجه

جدي ظل يضحك بصوت عالي وبعدها غص اندك الباب اجوه خطار وطلع واني خليت ورحت دخلت جوه واتذمر بهمس .. خرب بالحظ رفض مصطفى ومفكرلي بهذا العقده ايييع ولا اتزوجه لو مو جدي

فتت من يم وليد باوعلي بهدوء كال .. شبيج وجهج احمر

اجيت كعدت بصفه واني اهز بيدي كتله ..جدي هيج يكولي اكولك معقوله يقصد عادل يبوو لا ما اتخيل نفسي

رد بانزعاج ... لا ما اعتقد

عدلت كعدتي بحماس وحاجيته والفضول مسيطر عليه... لعد منو الله عليك اذا تعرف گولي

رفع اكتافه بشرود كال.. ما اعرف

استغربت من اجاباته المختصرة وكلامه القليل ويايه شبي هذا بعدها كلت يجوز تعبان

كتله تصبح على خير وبدون ما اسمع اجابه منه

عفته ورحت

بعد ما اجه مصطفى يخطب اكد الموضوع عليه يعني هسه الكل عرف سبب العركة هي اني

واني شدخلني اصلا ما حضرت العرس بعد شكو كل سالفه معفنه وشمروها براسي شنو اني حائط نصيص

هناء حدت اسنانها وكل شويه وكالت اني جنت اعلم يا سبحان الله والله عبالك واحد وگلي عندها علاقة بمصطفى

استغفر الله يا ربي هسه هاي شلون بيها ويجي واحد ويكول دره اسوي مشاكل هو اني غير يجفصون بمصاريني وساكته

وهاي بيبيتي مصيبة سوده تحجي حجي ما يتلبسين عليه ثوب طلعني من الكلچيه واني ساكته وصابره ومتحمله

بس جدو الله يحفظه ويطول بعمره جان يدافع عني دفاع مستميت وحتى غلط عليهن وشحتهن صار طفارهن ماله والي حل هيج احسن تترزلن يالله تمشن عدل يمال اللطم

بعد ما شحتهن جدي شردن للمطبخ ياكلن هم البهايم علفها اقصد على مرة عمي بيبي محترمتها نوعا ما

جان بيومها دوامي ظهري كلت خلي اروح اسوي لفة واروح للمدرسه

دخلت للمطبخ هناء تطبخ واني طلعت من الثلاجة جبن دا اسوي لفه جان كالت اووم اجت ام الزلم جا سوتها كاتل ومكتول لامة عليها زلم الوادم كلها

تخصرت ورديت عليها... والله حلوه ومؤدبه والكل يهواني والبنيه من الزرع من يشوفون الفاكهه ناضجة وزينة يقطفها ابن الحلال ليش لا

جان هي تخبلت كالت... اي عرك مال روس ورد مال ساقطات بت روسية شنترجة منج مو من ثوبنه

اجيت ارد عليها بس دخل عمو حامد شمر عليها السويج مال السياره كلها اريده منج مو يضيع وحضري الحمام بساع

هي اخذته وخلته بصدرها وتخوزر بيه وراحت تحضر الحمام من طلعت طلعته من صدرها خلته على الكاونتر ورجعت تطبخ وتدرم

اخذته بخفاء بدون ما تحس وخليته باللفه وحطيتها بالجنطه واشرد اجة عمو سلمان واروح

وصلت للمدرسه اخذت اللفه وانطيتها للبزون مالت الحارس اييع ولا اكلها والسويج جان بصدر هنيوه يصير عندي تسمم

خلص دوامي ورجعت للبيت والگة امة الثقلين مگلوبه عمي حامد يريد يطلع والسويج ماكو ويصيح ويعربد عليهم

وكل شويه ونكثوا البيت جان كال عمو بعد ما عاط بيه جفلت بمكاني مشايفه السويييج

كمزت وجاوبته بثقه... اي شايفته

رد عليه بقمة غضبة ..وييين

رديت عليه .. عمتي هنا من انطيته الها حطته بصدرها يجوز دخلت سبحت ونزعت و وكع منها وراح بالمجاري

هو عاط بيها كلها ... صدك

عضت شفتها وهي تتوعد الي ... لا وين حتى ما سابحة صار يومين

وعمي لزمها وسكطها تسكط هو متوبها متضم هنا

عاد اني شسويت انقهرت اخر شي طلعته وشمرته على الكاونتر واجت بيبي تصيح ... هذا هذا لكيته لكيته صلاوات على النبي لگيناه حمود يمه

اخذه من ايدها بعصبية وراح طلع

وتهجم عليه هناء وهي مكتولة وبحرگة گلبها بسجينة وهي تصيح والله اليوم اذبحها هي اخذته ماكو غيرها

يتبع ...

مهرة عنيدة ساسها هيبة شيوخ

بنت النشاما والفعول جزيلة

المتعبة ب ترويضها كل مطنوخ

الكايدة والنادرة ......والاصيلة

عزمي وصدقي....صدق بأسمى معانيه

بي عفة المهرة وبي روح خيال وحدي وصلت العز لآخر

مو انيه أنثى ولكني عن ألفين رجال

اختيارات الادمن ام عبدو 😍

ولقطة من البارت السابق 😁💕

والتصميم من ايادي ام عبدو

تسلم ايدج ♥️

النشر ان شاءالله راح يكون نمطه

يومين نشر ☑️

يوم استراحة ❌

متابعة لحساب الكاتبة لطفا 😘

Shams_Alnayile

السلام عليكم

رواية طوفان رجل

الفصل الرابع

نورا ناصر

""لديّ شخصٌ كلما هزمتني الحياةُ ،

أذهبُ إليه ..

أسأله هل أستحقُ هذا !

فـ يُخبرني أني لا أستحقُ إلا أفضلَ شيءٍ ، بل أن الأفضلَ قليل عليّ ..

و أن الحياةَ تنعمُ بـ وجودي فيها ..

كل مرة أذهبُ مُحمَّلةً بالخيباتِ ، فـ أعودُ حاملةً النجومَ فـ يديّ ..

نستحقُ شخصًا واحدًا على الأقلُ يرفعُنا لنلمسَ السماءَ ،

فـ الوقتِ الذي يُقسمُ فيه البقيّةُ أننا لا نستحقُ السيرَ على الأرضِ."

اااه ياجدي

دره ؛

جان دوامي صباحي وجان اول يوم الي بالمدرسة

طفلة بعمر ست سنوات ، منعسة وكوة امشي

ورا جدي الي سابقني بخطوات

صحت جدي تعبت اوكف

التاف عليه كال تعاي بويه

ماعاش الي يتعبج انه اشيل عنج تعبج

اخذني من الارض وشالني على چتفه

جانت بيدي علاگة بيها مشطي وقراصاتي وزيت شعر

خاص بيه واني مجلبة بدشداشته

متمسكة بعزوتي وسندي

بعد ما بيبي شالت ايدها مني واني بعمر ست سنوات

جدي صار يوديني لجيرانه ، مرية اسمها ام سعد هي

تسبحني و تمشطني وتظفرلي شعري

لان جانت بيبي تسبحني وتضربني وجدي كم مرة شاف ظهري ازرگ من الضرب حجى عليها ورزلها

بعدها سحبت ايدها مني وماقبلت تسويلي اي شي

جان جدي هو يمشط شعري بس مايعرف يظفره يكول لبيبي اظفري تكله والله ولا اسوي خليها بكفشتها طبها مرض

بعدها صاح لأمل لان يدري هناء تكرهني مو بعيدة تخبث وتكص ظفيرتي

والمفاجأة حتى امل كالت اعذرني عمو مااكدر عمتي محذرتني وانت ماترضى بلاذيه الي تدري اذا داروا عليه هي وهناء شيسون بيه واني وفلاح لا حول ولا قوة

اكو مره بالدكان ام سعيد تبيع حلويات اتفق وياها تظفرلي شعري وكاللها حتى لو بفلوس

بس هي جانت ارحم منهم عليه ماقبلت ابد تاخذ فلس احمر من جدي وهي هم عدها بنيه ظلت تسوي تسريحات اشكال لشعري

اني مجان اكو اي مراة بحياتي لذلك من جنت اكعد يم ام سعد وتظفرلي شعري جان شعور مختلف جنت ادور حنان الام الي ماعشته بيها

............

من خليت المفاتيح ياريتني ما خليتها لو شامرتها بالبلوعة احسن ، بس هم كالوها سوي زين وذب بالشط لو ذابتهم بالبلوعة بس اني ردت اصير خيرة

ركضت وراي هنا البيت كله تريد تشخطني بالسجينة والله جانت طايرة وراي اني بعد كلت خلص هاي هيه نهايتي وصلت راح تذبحني واسلمها

خاصة وهي لزمتني من ملابسي وسحبتني واني اسحب بنفسي اريد اخلص نفسي منها

بس امل شافتها وظلت تصرخ وحتى جانت شايلة بنتها رسُل الزغيرة على ايدها واخترعت الطفلة من الصريخ وهم ظلت تبجي

على صوت امل وصريخها هنا ظلت تهدد الها تكوولها اصص سكتي والله ادچچ وياهه

نزلوا عمو حسن ووليد من فووك وليد ظل يتوسل لأمه وييصييح يمممه عووفي السچينة يمه عوووفيها

يحجي ويتقرب منها يريد ياخذهه منها

وهي مصرة تكتلني

عمو وليد شمر عليها دولكه ستيل بكل قووته وكعت على چتفها خلتها تتأذى و تنزل ايدها بس بقت لازمتها للسچينة بأيدها

ركض وليد اخذها منها

بعدها اجت بيبي تتمخطر هاي شنو شصاير

اصلا جذب هي تعرف شصاير وتدري بهناء تريد تموتني بس هي تكرهني

بعدها انهاريت وشصار بيه بقيت بمكاني منهارة اصرخ وابجي

اجت شوكة مصدومة تباوعلي اول مرة يصير بحالي هيج اول مرة انهار يمكن تعبت وخلصت طاقتي

ظليت ابجي على كل شي مر بيه احس گلبي ورم وروحي فرفحت

طفولتي الضايعة ، انوثتي المفقودة ، عشقي الغير مكتمل ، امي الي تركتني لحمة حمرة ، لو ابويه الي انعدم بالثمانينات بعد تهمة انتمائه لحزب محظور وعافني طفلة

ويمكن لوو باقي هم جان تزوج ومرته ظلمتني بالحالتين اني متعذبة ومتأذايه ...

كومني وليد واشر لشوكة تاخذني تغسل وجهي دفعتها ورحت لغرفتي اهذي

اريد جدي اريد جدي

وهو جان معزوم بغير محافظة وظاله وحدي المفروض مااسوي مصيبة الا لمن جدي يكون موجود ...

دك عليه الباب وليد ماكمت فتحته ولا جاوبته

هو عباله بيه شي

كال دره راح افوت تره

ثنيت رجليه واني كاعدة وحضنت نفسي وخليت خدي على ركبي وجهي على ذاك الصوب

اجه وليد كرفص كدامي وايده على لحيته

كال دره كومي تعشي

كتله واني أبعد وجهي عنه روح وليد عوفني

رد واني شعليه يا عيني انت كلش زين تدرين اني وياج ضد امي لان امي باطل من راسها لاخمص رجليها باطل بلي دتسوي بيج

جاوبت بحرگة گلب وغصة ادري والله ادري وليد قابل ما اعرفك تگولي هالكلام بس اني مقهورة مقهووورة والمصيبة جدي مووو هنا

خله ايده چتفي كال بابتسامة اني موجود انت مو دائما تكوليلي انت تشبه جدي خلقا واخلاقا احسبيني جدج واذا تردين تكوليلي جدي هم اني قابل

ابتسمت ... كرصني من خدي وهو فرحان

كال والله جو حلو بره كومي خلي نتمشى

وعندي شون حب شمس من هذا الاسود الناعم الي تحبي جبته الچ مخصوص

تنهدت كتله وليد لا تتعب نفسك والله مقهورة ومخنوگة

كال اي كومي شمي هوا والله خوش هوا بالبستان والگمر طالع چبير شوي انت احلى منه

جاوبته بغرور شويه بس شويه كووم ماروح وياك

ضحك وسحبني كومي كوومي لاااشيلج ونزلج جووه

كمت ويا صدك جان اكو هوا بره وكمرة السما الگمر جبير طالع

ظل يسولف ع الكبلات الي بالكلية وعلى الاساتذة وع البنات المعجبات بي وظل يحمسني للكلية كال عوفي المشاكل والمغامرات وفكري بمستقبلج

ودراستج وطموحج تعلمي تتجاهلين هواي امور صدكي ترتاحين

كتله انت هم كول لامك خلي تفك مني اني اليوم لو ما انت وعمووحسن والله جان انذبحت وليد كل يوم انتوا العصر ماكو دااخيل بس لو انتوا ماكو تدري اني لهسه ارجف

كال افااا دره السبعة الي تنام نوم الضباع وتكعد كعدة السباع ماتخاف من بندقية تخاف من سجين

ردت اي ما اخاف من بندقية بيد عاقل بس اخاف من سچينة بيد مخبلة

ظل يضحك

فترينه بالبستان ورجعنه للبيت ...بيبي كاعدة بالصالة ظلت تفررر بيدها وكالت عشتوو

همس وليد يم اذني ميخالف دره

ماعجبني الوضع كلها حتى الميخالف مالة وليد

هم معجبتني شمسويه اني والله هم يعيلون بيه وبدون سبب كرههم الي

فرضا نكول امي تركتني ، نكول امي مختلفة عنهم وروسيه بس هي اذتني الي واذت ابويه مااذتهم ليش يكرهوني ويحقدون عليه

تمنيت اختفي اطير اهاجر تنشگ الأرض وتبلعني بس وجود جدي مصبرني خليت ورحت لغرفتي واني ساكتة بس احس جمر بنص بلعومي اريد احجي ابجي اصررخ ما اكدر...

مرت الايام ومشى الوقت .. ايام وروتين عاديه كولش ، چنت كاعده بعطله نهاية السنه مال السادس انتظر النتائج صاحت عليه بيبي ووينج تعااي انت وووينج

مادري عبالك تستنكف تگول أسمي .. واني هم غلست كلت خلي تكول اسمي يله أكوم

تالي صااحت درررره روحي جيبي خضره من الحديقه البره ...

كمت على حيلي مو مال اعاند بعد واني هم كولش احب الخضرة على الغده ...وهم مابيه حيل حجيهم

احنه عدنا حديقتين وحده داخل البيت والثانيه كباله يعني اعبر الفرع اخذت سله من المطبخ ورحت لميت كرفس وريحان ورشاد ...

واني على هالحال وجان اسمع احد يصيح باسمي دره هلوو دره شلوونج

عرفته من صوته ورجفة گلبي باوعت لمصطفى

من باوعتله كبل كلبي احسه وكع

كتله واني كوة مسيطرة على رجفة لساني هسه شجابك يامعود اني عايزه مصايب كافي الي صار

اجه كرفص مقابيلي بيني وبينه مشارة الزرع

ظل يباوعلي لابس دشداشة كريميه

خليت عيني بعينه ثواني ونزلتها اكطع بالخضرة

كال اسمعي دره امي وافقت عليج بس عدهه شرط

تكول خلي تبطل ياله نخطبها واني اقتنعت بكلام امي صراحة احسن بطلي واني مراح اخليج محتاجة لشي

ضحكت كتله لعد زين كتلي هالحجي وبعدين اني لا ابطل ولا يشرفني ارتبط برجال يمشي بكلام امه حتى لو قلبي يريده

كمت دااروح وسحبت سلة الخضرة وياي

شال دشداشته واجه يمي لزمني من ايدي

وكال وهو يشدد على احرف اسمي

دررره اسمعي الكلام والله متندميين والله

سحبت ايدي منه كتله مصطفى تووب مني ومن هاللحظه انساني واذا صدك تعزني استر عليه ولاتتقرب بعد

سد عليه طريقي وكف كدامي ... كال دره اني ادري تحبيني واني هم احبچ لا تضيعين هالحب خلي نرتبط وبعدين نتفاهم

كتله بعصبية حتى لو اني اقبل بيك جدي مايقبل واني امشي بشور جدي ومااكسر كلمته اذا مكايلتلك هالحجي اني كايلته لاختك لمياء فوك المية الف مرة وهاي هيه نقطة راس سطر انسى مصطفى انسى

وركضت وعفته واني امشي دموعي عشره عشره واحس گلبي هسه انذبح ...

بس دخلت صار وليد گبالي كال شبيج

باوعت لعيونه مقهورة

كتله تحسست من الخضره ....

لزمني من ايدي يباوعلي ممصدگ

كال خما شفتي احد بالزرع وضوجج بحجايه

كال هيج ورفع حاجبه

هزيت راسي بقووة وسديت عيوني حييل فرغتهن من الدمع

هو اجه يطلع يروح للزرع يدور ، لزمته من عكسه كتله تعال ووين رايح ؟ وكت غده

كال فووتي جووه دره هسه اجي اني

ظليت مچلبة بي ماريده يروح

لزمني حييل انت ليش متقبلين ارووح هاا

وليد عفية ادخل انت شبيك ترى اني رديته والله وماانطيته مجال وليد شبيك ؟؟

رد بعصبية ليش تچذبين دره

بلعت ريك وتنفست وكملت بچي هو عافني وراح للمكان الي چنت بي

ظليت كوومة ادعي كون ميتعاركون ...

بعدهه اجه وليد بس ملامحه ماتتفسر وجهه احمر وعيونه دم وميتحاچى ، باوعلي ودار وجهه

واني هم شفته هيج ما سألته وهو بهالحالة ..

للظهر اجا جدي بس شافني عرفني ضايجه من شي

ظل طول مااحنا نتغدى عينه عليه ، خو وليد ماضاگ الاكل ...

ماادري شلوون بيه اني وي مصطفى ...

من خلص الغدا جدي كال درتي جيبي جاي و تعاي للديوانيه ..

رحت صبيته وووديته ..

اشرلي اكعد بصفه .. ورحت كعدت بصفه

كال اي بويه شكو احجي بعيوونج حجي احجيلي

كمت ابجي وسلوفتله الي صار كله

اصلا اني مااكدر اكبت بعد واضم عليه شي يمه راحتي ومن اتخلص من هالمشاعر يمه ارتاح

جدي كال هابويه موكتلج ابن امه وماينطلع وراه

هو انه ادري بي دخل مرحلة اكتئاب وكام ماينزل وامه تجي تحجيلي وتشكي يمي وتكول خلي تنعدل وخليها تبطل

كتلها ابد ينسى يزوج دره اريدها تكمل عشمي بيها هاي امانة الغالي

صح بعد هاليوم انقهرت و كمت مااطلع من غرفتي وقطعت كولشي ، انقهرت وبجيت بس اخذ مني ايام تخلصت بيها من المشاعر السلبية وبعدها نهضت بنفسي

لان جدي ظل يجي لغرفتي ويهدأ بيه

وكالي عليمن مقهوره وتبجين يابويه الي مااوكف وياج باول عثره وانتي هسه عزيزه عدنه مايوكف بعد وياج من تكونين تحت جنحه

كومي ذبي همج وخليه على الله فكري بنفسج وبس محد ينفعج غير شهادتج حتى انه يجي يوم ومتوكل ومسلمها ...

حضنته وبسته وبجيت كتله دخيلك بداعتي عندك لاتكول هذا الحجي ...

كلامه چان دووه الي ...

وبهاي المرحله الي حسيت بيها اني بنيه ودخلت حياتي بفاصل جديد بديت ابحث عن اشياء بنفسي انميها واطورها مثل القراءة والروايات

و هوايه وجنت مدمنه بكتابات جبران خليل جبران جنت اسرح بعالمه وافسر كتاباته كانت كلها اشياء تلامس روحي والوحدة الي عايشه بيها

جنت حيل وحيده جدي انشغاله بالفصول والكعدات دائما ووياه وليد ومرات يظل ايام مسافر بغير محافظه

ثانيا توجهاتي اختلفت مهتمه بعالم الجمال والموضه والبس والرقص وعايش عالم لوحدي جانوا صديقاتي يجيبولي مجلات وعمو حسن وجنت كافيه خيري وشري لان من كبرت بدا الكلام يجرح وياثر

بديت اشوف بنات جيلي شنو اهمامهم صرت اشتري ذهب ولبست حجل نازك وتكمه واذا اشوف شي اكول لجدي وياخذني واختار على ذوقي

ظهرت فتره من الفترات راقصه اسمها نورا بوكتها كولش انشهرت صديقتي جابتلي كاسيت فديو واخذت الكاسيت بغرفتي واقفل الغرفه واظل اتمرن عليها يوميه

مرة اجا جدي لغرفتي كال شو ماكو وينج مختفية

كتله ها ملتهية اشوف رقص

كال بويه حرام

كتله جدي هسه راقصه كدام احد اشو لوحدي بالغرفه اونس نفسي ووماثره على احد

كام يهز بايده ومن ديطلع بسته بخده

وقفلت الباب...

وجنت اوصي عمو حسن على كاسيتات نورا

ظل يضحك كال والله مخبله انتي وماعندج شغلة وعملة من التفگة للرقص

ظليت اضحك

بعدها كمت اشوف نبيله عبيد بافلامها ركصها خبلني كمت اوصي صديقتي تجيبلي من اخوها عنده محل شرايط فديو واني كولش مستمتعه وهمه هم خلصانين مني ومن مشاكلي ولساني

بحيث ظلوا كلها تسال عليه لان مالي صوت ...

يجن بنات عمامي ساعات يجون يمي هم نلعب اخليهم مكياج واصبغ اظافرهم وحتى انطيهم من ملابسي يكيفن الا شوكه المخبله ساعه هيج وساعه هيج وساعه انقهر عليها لان هي تندفع بسرعه من يوزوها وساعات تتندم وتجي تعتذر وتبچي ..

قبل جانت للنتائج نستلمها من المدرسه مو مثل هسه بالنت رحت اني وجدي وعمو سلمان يسوق

كال جدي اذا طلعتي اكثر من ٩٠ وتكسرين خشم كل واحد كال ماطلع راح اذبح عجلين

كتله ان شاء الله اني جنت زينه لوما اخر امتحان صارت هوسه خطبة مصطفى خربطت بي ..

دخلت للمدرسه ارجف خايفة حييل

شافتني المعاونه كالت دره مبرووك معدلج ٩٤....

كمت اكمز من الفرح ماادري شصار بيه اخذت النتيجة وطلعت اركض مثل المخبله لجدي

واصيح جدي جدي الحك ...

هو انصدم خطية زين منه بقى واكف على طوله

كال بلهفة وحماس هااا بوويه بشري

كتله طلعت ٩٤

هو من الفرحة كام يبجي ....

و ويكول والله جنت مراهن عليج وياروحي

و اكول ماتكدر تطلع معدل وهاي المصايب فوك راسها سبااعية بوويه سباعيه

ظل يبوس بيه من عيوني ويبجي واني ابجي وياه وفرحتي بكبر الدنيا .....بعدهه اشتره بيبيسي لكل الادارة مالة المدرسة الي جايين

ورجعنا للبيت وكعدني يمه بالصدر

كال لعمو سلمان اذبج عجول اثنين اليوم

عمو سلمان يبارك النا ....

من وصلنه للبيت ظلن بيبي وهناء يعوجن بحلكهم

ومعاجبهن بس عمه امل طشت جوكليت ...

و اجو عمامي ووليد يباركولي

عمو حسن جانت فرحته مبينه على وجهه بوسني من راسي وكال اختاري هدية على ذوقج

كتله لا عمو والله فرحتك وياي هايه احلى هديه

ووليد نسى زعله واجه باسني من راسي كال سبعه والله عااشت ايددج

اما عمو حامد كال شتسوي بيها يله بطلوها هايه خوش مرحله وصلت بعد كافي

جدي كله انجب درره سوت الي ولاوحده بديرتنا مسويته من اكولهم ذيبه محد يصدك هسه تقدم كليه ومحد يفتح حلكه بعد

حامد كله والله ولاتقدم ولا اخليها تووصل وراسي يشمه الهوا

جدي رده : من تمشي حجايتك على هناء عود مشيها على دره ولك اني الي تعبت وربيت وسهرت ومحد اله حق بمصيرها غيري ...

وهو صدك جدي عاش وياي امتحانات السادس كلها

من العصر جان يحضرلي الفانوس والالة حتى خاف تطفى الكهرباء اكعد ادرس عليهم

حتى مرات حارة يكعد يهفي عليه ...

سوينه حفلة على كدنا وشوكه كامت تهوس الي الكلب مليان بفرح خل تسمع الشماته

ورافعة ايدها وتدبج برجلها ....

وجرتني للوسطة وكمنا نركص بالنص هي والبنات

وتهووس عين البارده كل الهلا بيها وعين الحاره الحمزه يطفيها ...

وليد اجه لزم ايدي وايد شوكه وظل يفتر ويانه

وكولش فرحان ...

عيني راحت على جدي اشوفه من سنين مافرحان هيج فرحة حمدت الله وشكرته ودعيت ربي يفرحه ويحفظه ويطول بعمره

باوعت لعمو فلاح وعمو حسن وجدي تلاثتهم يصفكون و شوكه تهز ركبه لامها ولبيبي وامها تغم بيها

امها تكولها مسودنه مخبله غمه حتى غمه

وهي تزيد ماتنقص و تهوس وتكول موش مسودنه فرحانه موش مسودنه فرحانه

كاموا كلهم يضحكون وهي كيفت اخذت تطش بالجوكليت

وبعدها كلمن راح بجهه واني مشيت ورا جدي

سألته جدي من وزعت دزيت لام سعد ؟

كال لعد شلون انساها يا بعد جدج انتي

كتله جدي العالم كلها درت مو ؟ ليش وزعت

كام يضحك كال جا شلون لازم نسمع الشماته ويضحك بصوت عالي ويبوس بيه

صفن بوجهي وكال انوب راح تصيرين بالكليه يابويه يابويه اجاني الضيم بويه رايحه للكليه اريدهم يكولون صدك ابو سلام ربه احسن من تربية الي عدهم اب وام خوش بوويه

كلتله ونعم منك جدي ابشر ولا تشيل هم تربيتك اني وخليت راسي على صدره فرحاانة ما واسعتني الدنيا كلها ....

وراها بأيام ... جنت بالمطبخ واكيد مصطفى مايفك مني ولايكعد جسر كولش وميخاف حتى عليه بهاي تصرفاته ميخاااف

واني على عالحالة هاي دخل يمي

سلم عليه تأفأفت ورديت السلام ... جان بيده مغلف

مداه الي كال هاي هدية نجاحج ... والف مبروك

كالها مبتسم

انصدمت بداخلي هذا شنو مايمل ابد شسالفته

بقيت مصفصفة حتى مااكدر امد ايدي واخذها جنت بحالة صراع بين قلبي وعقلي وصورة جدي گدامي وصوته يرن بأذاني لا تسمعين بقلبج

ودخلت هناء هو بسرعة طلع من الباب الثاني وهي بس شافته طلع ولكتها حجة واصلا حتى لو ماكو شي راح تتبلى وتسوي فلم ...واصلا اجتها من السما وتريدها من الله ع الله

جان كلامها مثل السجين العمية التذبح بيه

وبدا الكلام ياذيني لان جدي زرع بيه الشرف اهم من الاكل وكولش خوفني من السمعه وخاصة اني محد يجي الي يدافعلي وطبت هناء وشافته لمصطفى واني بين عليه بسرعة وجهي نار تچوي احسه ...

بس طلعت من المطبخ سمعتها تصييح يبوه لحكوا عاركم دره مصاحبة مصطفى ولكم شدولكم كرون

سمعوها عمو حسن ووليد واجوا يركضون

وماانطوها مجال وبسرعه ظلوا يسكتوها

بس هي ماتسكت وتصيح بالبيت والله بعيني شفتهم بالمطبخ خاتلين

لطمت على خدي كتلها جذااابة والله جذاااابة شنووو شفتيني بالله ترة انت هم عندج بنات

ظلت ماتسكت شكد حاول وليد يسكت بيها ماتسكتتت

عمو حسن ضربها بالفازة مالة الورد

وضلت تصيح زادت زاادت عبالك مخبلة رادت تستغلها فرصة وتخرب كل شي عليه

وليد كال صعدي لغرفتج رحت صعدت بقيت بيها جدي مجان موجود واديه على راسي ومفرفحة

كلشي يأذيني نارر تسري بجسمي اني مرراح اخلص مرااح اخلص الا انقلع من هذا البيت الااا يالله يمكن ارتاح لو ماارتاح

مر وقت وللظهر ولجية عمو حامد من شغله

لشويه كاعدة بغرفتي واجه عمو حامد كسر باب الغرفه عليه و جدي جان معزوم ع الغده منو يفزعلي

كسر الباب ودفرها وكعلي ضرب ودك على راسي وظهري ووجهي وهو ديضرب بيه ويغلط ويسب ويطعن

دخل عمو حسن وراه ولزم عمو حامد من ياخة الدشداشه وصرخ بوجهه بغضب وعصبية

كاله والله اذا لزمت اظفرها اطشر راسك واخلي الناس تحجي اخ كتل اخو ...

تلازموا اثنينهم تخالصوا واني صوتي اختفى ورااح اريد اتنفس مااكو و.

صرررخت على وليد اريده يجي يفكهم تخالصوا اثنينهم والسبب اني مدري هنا مدري مصطفى الي مايجوز مني ولا يتركني بحالي ...

نزل وليد يركض سحب عمو وفاككهم وكاله لعمو معليك واعتبر الموضوع منتهي اني اخصمها ...

وكله بكوم و دك ولطم شوكه بكوم ثاني عبالك العركة هايه هيجت جروحها

ظلن تصيح لا لا هو يحبني اني مو درره اني يحبني ويدزلي رسائل ...

محد حاجاها ابد عافوها لان يعرفوها طگه ونص

واني جنت ابجي ومن اشوفها تجيني ضحكة

ظلن تركض وراهم تكلهم كتلوني اني اني صاحبته شبيكم شبيككم موتوني موو دره صاحبته والله اني والله

اجتي امها غمتها وكالت الها شفايتلي يباوع عليج وعلواه الكاج بحضنه حتى نزوجكم غصب وافك منج ......

ورى ما تفاككوا عمامي وليد لزمني من زندي ودخلني لغرفتي وظل يباوع بوجهي ويستغفر وميت من القهر

كتله واني طعم الدم بحلكي

شبيك قابل جديدة هاي عليه الكتلة اشو اني حيصير بيه عاهة من ورى ابوك وامك

تتذكر من تعاركوا مصطفى وعادل بالعرس وسمع تلاطيش حجي انو العركة من وراي واجه هنا وامك دفعته هم كسرني تكسر وكال اريد اذبحج سودتي وجهنا عار بسببج الزلم تتعارك

كعد ع الكرسي وخله اديه على وجهه وينفخ من العصبية

شبيدي درة شبيدي اكتلهم هو وامي وادخل جهنم

كتله لا. تكتلهم وليد اطلع وعوفني بوحدي

سحبني كال بقهر امشي للحمام غسلي

كتله ماريد عوفني ... كال صار وطلع ...

بقيت كاعدة ماعرف شنو اسوي هالحب صار جحيم عليه اني اعلمج هنا بسيطة اردلج الصاع صاعين بس ع البارد ...

بعدها اجت بيبي تتوسل بيه اصلا هي وقت العركة الحاضرة الغائبة ومن خلصت اجت تتوسل

لتحجين لجدج يطردهم ويسحلهم ، اني بعد ماخليهم يضربوج ...

بس وين وهو من اجه جدي وشاف اثار الضرب طرد هنا لأهلها وبسط عمو حامد

وورى فترة بيبي راح تبوس ادين ورجلين ورجعتهم وهم اصلا ماعدهم مكان يرحوله ...

اما مصطفى راح وليد تعارك وياه ويوم ثاني بكل عين صلفة وجسارة اجه خطب للمرة الالف وهم طرده جدي ...

مرت الايام وخابرتني صديقتي على التليفون الارضي كالت قدمتي انسيابيه؟

كتلها لا بعد عمو حسن يسويها الي

كالت اكولج دره ليش مانقدم على جامعة صدام للقانون (( جامعة النهرين حاليا)) صارلها كم سنه فاتحيها وبيها امتيازات هوايه حتى ايفادات للطلاب يدزونه وبيها التقديم خاص

فكرت وعجبتني الفكرة ، رحت لجدي

وكتله على الموضوع

كال بكيفج الهم انتي عاجبتج

من اجه عمو حسن وطرحت عليه الفكرة والموضوع كله

كال والله درة اني هم انصحج هاي فرصه ماتتعوض لان بيها هواي امتيازات قدمي

وفعلا حضرت نفسي اروح اقدم واتفقت ويا وليد ياخذني للكلية

لبست قميص ابيض ونيلي وبنفسجي مقفل وبنطرون جينز وحذاء جان اسمه بلدوزر بوكته كولش غالي

ومنزله كذله ورافعه شعري لفوك وكلي طاقة وحماس وحيويه

لكيت وليد مبدل ومبتسم وتريكنا وطلعنا وصلنا

لباب الكلية واني لازمه ايده خايفه من هذا العالم الواسع وابواب مجتمع بعيده كل البعد عن عالمي وعن طبيعة حياتي ...

همست يم اذن وليد : وليد اني خايفة

ظل يضحك وهمسلي كال لايسمعج جدي ليش خايفه

كتله مااعرف

كال عادي هذ االشعور ، بس انتي سباعيه خلي عالمج محدود ولاتختلطين زايد ان جان ولد ولابنات انتي تعرفين تخلين حدود للمقابل

اني استمع اله وبس اهز راسي

كال نفس الشي من رحتي بصف اول تذكرين هم لازمه ايدي وتكولين وليد خايفة رجعني لجدي خاف الجهال يكتلوني

ظليت اضحك

وليد ضخم وجسمه مرتب ومحافظ عليه اسمر بملامح ناعمة ولابس قميص نيلي وبنطرون جينز والبنات يباعون عليه

هوايه تعب و مشى كل المعاملة واني افتر وراه وكالوا اسبوعين تعالوا على النتيجه

و طبعا مالنا حق التقديم بالانسيابيه العاديه لحد ماتطلع نتيجه التقديم

وراها باسبوعين رجعنا الهم و لگيناهم رافضين قبولي بالجامعة ومكتوب على الفايل والدها ضد الدولة.......

يتبع...

الغلاف ابداع ام عبدو 😘

السلام عليكم

رواية طوفان رجل

الجزء الخامس

نورا ناصر

انا لست وحدي ، كان هو أهلي و عائلتي ، عندما أميل كان هو الحائط الذي أحب أن يتّكئ عليه قلبي ، كان ظلي الذي يمنعني من السقوط كان روحٌ بدلاً عن روحي المرهقة

هو الف كتف والف سند هو !!! ‏هو جدي .."

هواي اسأل اني ليش مختلفة عن البقية ، وين أمي ووين ابويه ، كل الي حواليه عندهم ام واب ، شوكه ووليد امهم هناء وعمو حامد

وحتى هناء وعمو حامد وعمو حسن وعمو فلاح عدهم بيبي وجدي امهم وابوهم ، الا اني !

من اسمع شوكة ووليد يصيحون لهناء ماما صرت اسوي نفسهم بس هناء نهرتني ونترتني وكالتلي بصريح العبارة

اني مو امج انت امج فد وحدة كافرة شجابني على امج بعد لاتكليلي يمه

انكسر گلبي بوقتها واني طفلة جانت هناء جاي تلگط التمن كمت مديت ايدي وطشيته وركضت لديوان جدي

هو شافني عرف مسويه مصيبة ختلت يمه ويسمع هناء تصييح ويضحك ويغنيلي

الطفل ماينسى سواء ذكريات سيئة او حلوة ماينساهه واني ما انسى

سألت جدي اني وين امي ووين ابوي ليش الكل عدهم واني لا

اخذني لحضنه ولزم كفوف اديه يبوس بيهم

كالي انه امج وانه ابوج واختج وهم اخوج

وفعلا هو جان معوضني عن كل شي...بس جنت الاحظ اني مختلفة عنهم بلا ام وبلا اب ...

بس جدي جان ابوي وولي امري متكفل بكل ناقصة وزايدة تخصني .. جان امي الي تغمرني بحنانها جان يمشطني وحتى ملابسي مال مدرسة يغسلهم ويكويهم ويحضرلي الجنطة واللفة والمي الي اخذه اشربه بالمدرسة بدبة صغيرة ومن ارجع يغسلها ويمليها ويجمدها الي لثاني اليوم

جان اخويه وسندي ويطلعني وياه بكل مكان الا ان كبرت وشبيت وضغطوا عليه عمامي واولاد عمامه والعشيرة كلها حتى لا اطلع وياه بكعداته وفصوله

و من جنت اطلع وياجدي بفصل وانعس اطب جوه عباته وانام على رجله وهو يغطيني مثل الام الي تغطي جهالها جوه العباه

ومرة من المرات كاعدين بفصل ابو الفصل كله صدك جذب جايب بنيه وياك

جدي زعل وعاف الكعدة كلها وقفل عليه قفلة معدلة

يكولي جان قصدي حتى بعد الي يشوفج وياي ياخذ درس ومايسأل

لأن بيبي من يريد يطلع تكله من هسه اكلك اني معليه بدره واذا تسوي وكاحه اكطعها تكطع مو تحجي

عاد هو بصق عليها وصار ياخذني وياه

ولأن جان يبات محافظات قرر يبني الي غرفة جوه و وخله بيها ثلاجة وتلفزيون وحتى فديو واشرطة مال كارتون وقبل ميسافر يشتري لفات ويترسلي الثلاجة حلويات واجبان وصمون ويكولي لاتطلعين بس للحمام واني اوصي وليد وحسن عليج

مرت الايام وعيت وكبرت واني مايمر يوم اذا ما اخلي جدي يحچيلي عن ابوي

مرة اخذني لمكتبته جانت مكتبة ضخمة بيها مئات الكتب

ابويه جان واحد من الكفاءات العراقية بالسبعينات جان مهندس نفط بزمن الرئيس احمد حسن البكر الي حكم العراق من سنة 1968 الى 1979

وجان ذكي وكفوء سوه ابحاث واعمال وحفريات بأبار النفط بواسطة مضخات عملاقة طلع منها النفط بعد امتار بالمناطق الصحراوية بعد ما چانت الشركات الاجنبية

تشتغل بيها وتاخذ بمكانها نسب ضخمة

لمن سمع الرئيس أحمد حسن البكر وصلت اخبار ابحاثه واعماله دز عليه وكافئه بقطعة ارض 600 متر بالاعظمية ودزه ايفاد لروسيا للدراسة هو ومجموعة شباب عراقيين وجانت هواي تجي على ابحاثه شهادات تقديرية ومكافآت مادية

وهناك بروسيا تعرف على ماما جانت جارتهم بالعمارة الي ساكنين بيها ...

اني جنت اقضي ايام وليالي بهذه المكتبة جانت هي سلوتي وملاذي

جنت اقرا كتابات بابا ووصفه لأمي ومن خلال هالوصف عرفت انو اني كولش اشبهه ، نسخه منها طولي و وقوامي وبياض بشرتي كله عليها

‏

‏ بس الفرق اني عندي فشگة بحنچي تقسمه وهالشي الي ورثته من ابويه

‏

‏

‏ كان يعشقها عشق حدالنخاع ويوصفها بطريقه شفافه العيون الواسعه النرجسيه الرموش الكثيفه الي اخذت عقله و الملامح الناعمه سحرته

وشفاه عريضة والشعر حكاية والضحكه تترسم

مثل اللوحة ..

‏

‏وعايشه وياوالدتها وكانت بنت باره بامها المقعده على كرسي متحرك

‏

‏كل يوم الصبح جان يصبح عليها من يطلع للدوام وميكتمل هذا الصباح الا بشوفتها

‏

‏مرة من المرات حاولت تتجاذب وياه اطراف الحديث سألته انت من اي دولة

‏جاوبها اني عراقي

‏ضحكت ضحكة رنانة وصل صداها لقلبه

‏وكملت كلامها يعني انت عندك هواي فلوس

‏

‏وهم فعلا جانوا يشوفون العراقي كتلة فلوس

‏لان بوقتها بالسبعينات العراق جان بأوج ازدهاره وتطوره

‏

يكمل وصفها ويكول بالمذكرات مالته الي وكعت ايدي عليها وقريتها جنت اشوفها فراشة نشيطة كولش تتحرك تغسل وتنظف بالمحل مالتها الي جان بنفس مكان سكنهم وكانت مصممه وترسم وتخيط عدها بوتيك

‏

‏يكول جنت اشوف بنظراتها لهفة من تشوفني جنت احس بيها تنتظرني لمن اجي ، اشوفها الصبح من اطلع والعصر من ارجع وجانت شوفتها بالنسبة الي مثل علاج يوصفوه مرتين باليوم يعالج تعبي ويعيني على غربتي

صار يتردد عليها هواية ويقضي وياها ساعات بدون ملل

‏ووكف وياها من توفت والدتها وصارت وحيدة .

‏

‏هي تشبثت بي وهو عشقها ... ومن هنا بدات العلاقة وقرر يتزوجها .

نزل باجازة للعراق كعد ويه اهله وبلغ جدي وبيبي

‏بقرار زواجه من تالنا الروسيه .

‏

‏هو جان جاي يبلغهم مياخذ رايهم وموافقتهم

‏هم تخبلوا وصار الكل ضده وظلوا يحجون وياه ويقنعوا هالبنية مو من ديننا مو ملتنا وشون تخلف منها .

‏

‏ بس هو ولاسمع راي احد جان عنيد الله يرحمه والظاهر اني ماورثت بس فشكة الحنچ من بابا وهماتين ورثت صفة العناد منه .

‏ بيبي جانت اكبر معارض لهذا الزواج قطعت وياه كولش زعلت زعل جبير عليه بس هو ولا غير ابد جان مصر على رأيه .

‏

‏ رجع لروسيا وتزوجها وجان كولش سعيد ومقنع بفكرة عدم الانجاب واستمروا بشغلهم وهو خلص مدة الايفاد

‏بس استقر بروسيا على مودها .

ساعدها بتوسعة محلها وكبرته وسوته معمل للملابس وكبر بمساعدة بابا المادية .. لان هلى ابحاثه وشغله جان يحصل هوايه فلوس على كل بحث يحصل 100 الف دينار والي قيمته هسه تعادل ملايين .

جان يبعث الفلوس لجدي وبدوره جدي يشتري بيهم قطع اراضي بيها ضمان للمستقبل وخلال ثلاث سنين الي راحت جانوا عايشين احسن عيشة هي وبابا تحبه ويعشقها .

وبيوم غلبه الحنين لأهله ولأرض العراق وقرر ‏ينزل ويشوف اهله بس بيبي ظلت على زعلها وابد ما تحاجي ولا معتبرته ابنها ماعرف شلون تكدر تكون بهالقسوة .

بس جدو ابو قلب الجبير الي جان متسامح وياه رغم معارضته هو الثاني لهذا الزواج ومن رجع لروسيا وبلحظة شوق نسوا المانع واني وكعت بيها .

لان وراها طلعت حامل وبدات المشاكل هذا الحمل يوقف بوجه طموحها ورادت تنزلني باي طريقة وابويا رافض رفض نهائي جان رايد اجي لهاي الدنيا .

‏

وصلوا لطريق مسدود كدر يقنعها ووعدها من تولد ياخذني منها ومالها اي علاقه بيه وهالشي مقابل مبلغ مالي ضخم .

وسكتت فعلا تم الاتفاق وباعتني على ابويا وهو اشتراني منها اشتراني من امي !!

وبعد ولادتي سنة 1980

سلمتني اله وهو اخذني ورجعت ويا لأرض العراق ، رجعت بشهادة الميلاد واني لحمة حمرة وبالعراق سوالي الجنسية العراقية .

بابا رجع بمركز اكبر بشركة النفط العراقية وصدام حسين جان لازم الحكم وكتها وبعدها ظهر حزب الدعوة بالعراق

يكول جدي ابوي ماجان منتمي اله ولا اصلا جانت توجهاته دينية

‏

‏بس احد افراد هذا الحزب سوه دعوة لبابا هو ومجموعة مهندسين ولمن راح بابا للبيت اتضحله انو مجانت دعوة عادية

‏

‏جان اجتماع خاص بقيادات حزب الدعوة وجانوا يردون يقنعونهم بالانتماء الهم وجانت مثل ندوة تعريفية لافكار الحزب وتوجهاته

‏

‏اصلا بابا وين وين الدين نسى حتى الصلاة بروسيا ولاتوجهاته دينيه اصلا حتى شرب يشرب بعد فراق ماما

‏

‏ طبوا الامن عليهم بهاي الكعده واخذوا وياهم وخطيه جان يكول مالي علاقه بس منو يصدكه ومنو يعترف بكلامه اصلا الاعدام جان حتى بدون تحقيق

‏

‏بوقتها حرب ايران عالگة وصدام مستلم الحكم يريد يثبت وجوده

بعد اختفاءه جدي وعمامي ظل يدورن عليه ، جان جدي هايم على وجهه يريد بس يعرف مكانه وين ، راح لجد فيصل ((جده ابو امه)) بوقتها جان لواء بالجيش العراقي وهم عنده حصص واسهم بشركات تابعة للحكومة

‏

‏ساعد جدي هواي وكدر يعرف مكانه مسجون بالامن العامة وحتى كدر يحصله موافقة حتى يلتقي بي ولو دقايق معدودة

والتقى جدي بأبويه اكدله انو بريء وممنتمي لهذا الحزب مجرد دعوه وحضر الاجتماع بس التهمة جانت متلبسة بي

كال جدي انو ابوي هواي وصاه عليه وكله دره امانتك

وجدي جان كد هاي الامانة

طلع جدي مفرفح من يمه ويشوف الموت شلون محاوطه توسل باللواء يسويله حل ع الاقل يوكله محامي يدافع عنه

اللواء كاله الاوامر جايه من فوگ لاتسال بعد واستر على عائلتك لياخذوهم كلهم وكل الي بيدي اسوي هو احمي عائلتك

جدي كله بحزن وانكسار و سلام؟ لخاطر لبنيته لاتظل يتيمة

كله اللواء حجي عدنان انه مابيدي عليه شي

كل الي اكدر عليه اخليهم ينطوك الجثة تدفنها

لان الاغلبية جانوا حتى دفن مالهم حق يدفنوهم اهلهم

رجع جدي مفرفح للبيت مابيده شي على ابنه ويدري بي بريء ، الدنيا صايرة بعينه سووده ظلمه مثل كبر كافر

جان الفضل يعود للواء جد فيصل بحماية عائلة جدي لان جانوا الامن يكرفون العائلة الي يطلع منها معارض كلها ويفنوها بلارحمة

جانت حرب داخلية شعواء بين حزبين

الدعوة والبعث وراحت بيها هواي ابرياء ...

بعد اسبوع من الاعتقال وبيوم بارد من ايام شهر اذار اندكت باب بيت جدي الصبح طلع جدي يشوف منو بس گلبه علمه قبلها انو اجه الخبر الي مايريد يسمعه

فتحها وكع گلبه من شاف عنصر من الامن كباله

انطاه ورقة اعدام بابا جانوا عادمينه ساعة الخمسة الفجر يوم 2 بشهر 3 عام 1983

وجان عمري بوقتها بس 3 سنوات ...

عنصر الامن سلم جدي ورقة الاعدام وبلغه يجي يستلم جثة ابويه ويدفع فلوس مكان الرصاص الي انعدم بي ...

ثمن الرصاص الي اخترق جسد ابنه من دمه ولحمه

مجبور يدفع ثمنه

******

جنت بغرفتي ارتب ملابسي الي توه مشتريتهم لأن سمعت هاي الكلية الي راح اداوم بيها كلها لابناء المسؤولين وللعوائل من الطبقة الراقية

ولازم اكو كد هذا الشي وماابين اقل منهم وليش لا واني بفضل جدي عندي خير من الله

اخذني وليد للأعظمية اشتريت ملابس ووراها بكم يوم رحت وياعمو حسن للمنصور هم تسوكت

جدي كال الي يلبس من هاي مو احسن من دره

وخطيه هلكتهم تعب لان بلكوا اختاريت واخذت هم لبنات عمي وجبت لشوكه بعد ماسوينه معاهدة صلح اني وياها بعد الرقص الي رقصته بنجاحي ولان عدهم عرس واحد من ولد العمام وكلها ذكرتها حتى بيبي وهناء اشتريت الهم ، فرحانة ومنطلقة لدرجة ناسية كل الخلافات

طلعت من غرفتي بعد مارتبتها واني فرحانة ومحلقة ويه احلامي وطموحاتي

‏شفت جدي ووليد جاي يتناقشون طلع تعينه موظف باحدى شركات التصنيع العسكري حكومي وجانت بوكتها رواتبهم كولش قويه بس جدي ضايج لان جان يريده يلزم البستاتين لان عمو حامد وعمو فلاح لاعبين لعب بيها وكل مره من يتحاسبون وياجدي تصير مشكلة

بس وليد وعده العصر يوميه يلزم الحسابات وويوجه الشغل للفلح ويخلص كولشي حتى لو باليل

ياله جدي شويه اقتنع ولان جدي هم يريد وليد يشوف نفسه بعد ماخلص دراسة كليه اداره واقتصاد حرامات شهادته تروح جان قبل التعيين منو يريده لان مايكفي العيشه اذا الموظف والمعلم راتبه ٣ الف شنو تكفيهم وكوة مدبرين العيشة

سألته وليد شوكت تداوم ؟

رد الاسبوع الي يجي ان شاءالله

_ معناهه مراح تكدر تروح ويايه للجامعة الاسبوع الجاي

_ عمي حسن هو كال ياخذج ترى فكرت بيج لا عبالج وكتله على موضوع روحتج

وفعلا رحت ويا عمو حسن من رحنا صاحت الموظفة بأسمي وانطتني الفايل تباوعلي عبالك بيه جرب وتباوع من فوك ليجوه شمرت عليه الفايل وكالت مرفووضة

اخذني عمو حسن وطلعنا كتله عمو ليش رفضوني انت هم مو تداوم استاذ هندسة بالمستنصرية ؟

كال مسوي استمارة انتماء للحزب و صرت استاذ بيها بس جامعة صدام ينبشون جد جدج الي يقدم بيها وحتى بالمنطقة يسألون عليج وعلى سمعتج حتى للمدرسه يسألون عن اخلاقج ويطلعون شجرة العائله كلها والظاهر عرفوا عن سلام الله يرحمه

رجعت للبيت واذيال الخيبه تاكلني ومكسورة خاطر

مايسوى فرحتي وتحضيري للكلية ، عمو خطية طول الطريق يواسيني

اول ماطبيت تلكونا جدي خطية متلهف شافني ضايجة كال شصار شبيهه بنيتي

اني مالي خلگ احجي كعدت ساكتة سولفلهم عمو حسن الموضوع

اباوعلهم ناس فرحت وناس حزنت

وليد كال سهله قدمي انسيابية وهم يقبلون حقوق لان المعدلات موزينة هالسنه

كتله اني اريد هاي الكلية قفلت عليها بعد

وظليت ابجي ...

جدي كال ولا تبجين سهله الي تردي يصير اني بالوجود واخلي بنفسج شي سهلة درتي

دموعج غسلني ان شاء الله كون اذا ماحليتها

تغدي بويه

كمت كتله اسم الله عليك اني افديك بروحي شنو الكليه شنو اني كلي فدا لتراب رجلك

وكمت حضنته

بيبي كالتله هدي شويه ابو سلام الفرخه مسويتك مثل الفانوس السحري بس تذب دمعه الا تنفذ الي تريده

كاللها باصرار واصير مارد هم

كالتله ها هيج الحجي ابو سلام خاف تجيبلها واحد من الكلية وتسود وجهك

كلها بعصبية سود الله وجهج ان شاء الله اني اعرف شنو زرعت واعرف شأحصد ريحي نفسج ياام گلب الاسود

هناء من يمها كالت حل اني اعثر والله

باوعتلها كلت بقلبي غير تكعد راحه بسيط (شخصيه كارتون جان يطلع بذاك الوكت على قناه العراق العامه الساعه بالسته ونتحضر وننتظر نشوفه )

(بسيط بقره سمينه بس والله تروحلها فدوه جنت اموت على هذا الكارتون بس من حركت قلبي واصلا شوكه هم كالت بسيط يشبه امي )

سكتوا وصبينا غدا تغدينا ورى الغدا

وديت الجاي لديوان

خليته يمه اخذه يشرب كال تسلم ايد بنيتي

كتله الله يسلمك الي حبيبي جدي

باوعلي شاف بعيوني هواي اسئلة

وكأنو يقرأ افكاري

كال دره تدرين من يحلها؟؟

كتله منو جدي ؟

كال فيصل ماكو غيره

كتله متفاجأة عمو فيصل شون وهو مسافر هسه وين نلكاه نحصله يعني ؟

كال معليج خلي اخابر على بيتهم ونشوف كومي جيبيلي التليفون

كمت جبتله التليفون والرقم موجود بدليل الهاتف

خابرهم على ارضي وفعلا طلع مسافر

جدي جان يحجي وياعمار اخوه لعمو فيصل

كله بس يرجع بلغه اريده ضروري خليني على بالك عمار ولا تنساني ...

ظل يسمع منه جدي وبعدها سلم عليه وكاله الله وياك ...

مرت اسبوعين ماكو خبر والله مروا عليه عبالك دهر خوف وقلق ومن غير الشماته الي ويايه

شافني عمو حسن هيج متوترة وقلقة كال ليش ماتجين يمي قانون مستنصرية

اني شلون فكري دكيت رجل الا جامعة صدام

كتله لا عمو اريدها هاي الجامعة بنفسي كولش

وليد كال زين دره قانون جامعة بغداد شنو رأيج غيري يمعودة بدلي

لالا وليد الا جامعة صدام

طركاعه السوده عليه من اقفل على شي مدري حظي يردم ويعوج ويايه وضاملي ضمايم بس الله الي يعلم بيها

وراها اجاني جدي كال بويه دره ابشري فيصل جاه

بس مو اليوم نروح خليها على باجر عندي شغل لو من اخلص شغلي اروحله مناك

كتله ابد الااروح وياك رجلي على رجلك جدي

الا اني اروحله عفية اريد يطمأن گلبي

گال وانه شنو اريد غير يطمن گلبج

ضحك ضحكته الاحبها

((اووف ياربي حظ مصخم من اليوم الا اجلب اروح اووف ساعه السوده لو ساكته ومقدمه على اي كليه بس شلون اني وعنادي اعاند الدنيا عود اريدها تنعدل ويايه اذ هي عوجه من حبلت امي بيه اريدها هسه تنعدل ....))

جدي كال ماشي بويه باجر باجر اخذج اليوم عندي شغل

كتله ميخالف بس شيجيب باجر

احجي واعصر بأصابعي ...

ثاني يوم هم عزمونا على الغدا وشوكه جلبت تريد تروح ويانا جدي ماقبل ناخذها

اجت تتوسل بيه كالت اكلج درو احنا مو صديقات خلي يقبل يكولون بيت عمو فيصل قصر جبير ويخبل وضايجة اني يله حبابة مو ركصت بنجاحج

ضحكت وكتلها رايحة اقنع جدي

رحت يمه اقنع بي

كال تفشلنا

كتله عليه والله اني عيني عليها ....

كال مدام صارت يمج هذا هو لعد بويه

رحت ركضت بشرتها واطيتها ملابس مني من الليل سطرتني سطر والااسرح شعرها وهي محجبه بس عادي تذب الحجاب كدامهم

اجه الصبح كوة على اعصابي بدلت و سويت نفس تسريحة كوادالوبي ولبست تيشيرت ركلان وجينز

واخذنا شوكة ويانه ورحنه وصلنه لبيتهم همه بعيدين علينا كولش يعني مسافه يله وصلنا فتحواا الباب حرس اثنين سلموا على جدي ودخلوا بالسياره ظلت تمشي جان شوكه تصيح يمااااااااااه شني هاي قصر وعلي اي والله قصر

اني وجدي ضحكنا على حجيها يعني مسافه كولش طويله وكلها حديقه اصلا عبالك بستان كله اشجار الفواكه بي وبنصه نافوره وشوكه صاحت يابويه يابويه نافوره نافورة

متنا من الضحك اني وجدي كتلها عيب مو كدامهم هم هيج تحجين هي هزت راسها

وصلنا للباب الداخلية لكينا عمو فيصل ( يلمع لمع يبرق برق وشعره مشط ارتب من عمري الضايع اصلا

من جنت بعمر ست سنوات اسمي عمو النظيف

سالني جدي وكال ليش هيج تسمي؟

كتله مو دائما سابح وشعره مبلل

جدي ضحك كال هو صدگ نظيف كولش بس هذا دهن يخلي لشعره

كتله حتى لو مو ذوله عمامي مو نفس عمو النظيف لاويجي قميصه مكوي عدل اعدل من حياتي مسطره وكسرة البنطرون خط مستقيم ..

من وصلنا لبيتهم شفته واكف بالباب وياعمار واحمد وهشام اخوانه

اني اعرفهم لان جانوا كاعدين ببيت جدو قاسم يمنا

ويجونا على طول احمد ورزان كولش علاقتي قويه بيهم

بس عمو فيصل صار ست سنين ماشايفته من يوم عزمونا بالمزرعة لان هو ما كاعد ويه اخوته

بس هو شكله ولايكبر ابد مداري روحه ومبين ملتزم بنظام غذائي

سلم علينا صافحتهم بالايد بس هو باسني بخدي وصيح ماشاء الله هاي منو دره خاف اكول بت الروسيه وتزعل

ضحكت كتله كول بت سلام احسن

حرك ايديه على راسي وكال تفضلوا تفضلوا

طبينا اباوع لشوكه لابسه تك حذائها والثاني ماكو

دنيت روحي و شاورتها كتلها وين تك حذائج هاا ؟؟

جان تكول اسكتي خايبه سويت نفس سندريلا بلكي واحد يشوف تك حذائي ويخطبني امير خفير حقير حي الله واحد

شهكت كتلها صدك تحجين عيب والله ياسندريلا خل اروح اجيبه

اريد اكووم سحبتني

جان تكول عليج العباس ابو راس الحار ماتكومين

كتلها لاشافج العباس على هاي الفضيحة

انوب فوك الضيم رجلها قياس ٤١ وينها وين سندريلا عود من شافت القصر شغلت ذكائها

وانوب الحذاء عالي وهي تمشي عرجه عبالهم لوت رجلها ويصيحون الله الله

واباوع لأحمد ورزان ميتين ضحك يعرفون سوالفها وهي تلعب وياهم جانت

مرة ابوه لعمو فيصل تصير عمتي هم ناس تاخذ من ناس ...وهو فيصل يصير ابوه يصير ابن عم جدي

طلعت وحده بالثلاثيين حلوه تخبل ومرتبه ولابسه دراعه نفس الخليجات الي بالتلفزيون نشوفهم بس مخليه هواي مكياج ومضيعه شكلها

سلمت علينا وهو عرفنا عليها كال هاي زوجتي ايناس

جدي سلم عليها بس بوجهه ضحكه كوه كاتمها

اني كاعدة بصف جدي سمعته شاوره لعمو فيصل وكله هاي يارقم بعدك ماجزت من طبعك شوكت تخلف ؟

هو ظل يضحك كاله عفتهم الكم الخلفه مااريدها

ظلوا يضحكون اني كولشي ماامفتهمه عليهم ...

جدي كال دره فهمي عمج فيصل شنو تريدين

كمت على حيلي و تقربت من يمه

احمد جان كاعد يمه على الكرسي

كتله كوم كوم حباب

هو كال تدللين

كام احمد سوالي مكان واني كعدت يمه على الكرسي لازمه الكرسي خجلانه وكلهم يباعون عليه استحيت

باوعت لجدي اشر بعيونه بمعنى احجي

فيصل كال كولي شنو

بلعت ريكي حجيت الموضوع كله يمه

جان يكول سهله الله كريم وهز راسه

هو طبعه مايحجي كولش قليل حتى اهله يعرفوه بلاشارات بس وياه جدي يسولف

مو مثلنه نخرط خرط بالحجي

بعدها كال يله صلاه كاموا يتوضون

اني كمت وراه امشي جنت منزله خصل طويله من شعري ليكدام وطوال كولش جان الموديل لفها من جوه ومن ورا لافته كبه

جان الموديل لفتها بكتر اسود قديفه بي لؤلؤ ابيض جان موديله

تبعته شفته راح يم المغسله ومد ايده اخذ مي وغسل وجهه

وكفت و لزمت المغسله والخصل تنزل ويايه على المغسله كتله عمو شتكول تصير لو لا ؟

رفع عينه باوعلي ماحجه شي ورجع يتوضأ

كتله توسل وببراءة هاعمو كول تصير لو لا جدي يكول بس عمج فيصل يدبرها

كال ببرود الله كريم

التفت ظل يباوع عليه صفن ثواني بوجهي

و كال بامتعاض شكد تحجين استغفر الله خربتي وضوئي

راح اعيد الوضوء من وراج

كتله بفررحة شكرا شكرا شكرا واضرب رجلي بالكاع

باوعلي وبدون مايحرك ساكن

ضحكت كتله الي ايده بالمي مو مثل اليده بالنار

كال يله هسه تخلينه نكمل وضوء لا

جاوبته عمو اخذ راحتك

عفته ورحت وياااحمد ورزان وشوكه لكيت شوكه نازعه احذائها

همستلها كتلهه هاا نزعتي حذائج ؟

كالت انفصخت رجلي ولج دره

كمت اضحك كالت هو فيصل ابو النسوان لو ياخذني

شهكت من الضحك وظلوا يصيحون اسم الله اسم انطوني مي ظليت اشرب و اباوع لعمو فيصل يبرج برج وشوكه لو تغسل مية مره ماتلمع مثله

رحت لجدي سمعت عمو فيصل يكول لجدي

ليش ماتحجبها للبنيه وعايفها بكيفها

كله جدي فيصل مااكدر اجبرها على شي هالبنيه مااخذه وقلبي وروحي فيصل اعشگها عشك

ضحك عمو فيصل كاله بتعجب هاا؟؟؟

كله والله مو ماجربت العشگ من كبل هسه عرفته بدره طوال النهار محتار بيها وافكر بس افرحها واسعدها الله بس ينطيني طولة العمر واسعدها

عمو فيصل بس يضحك

طبيت كلت الجدي بعد روحي بعد كلبي كون يومي كبل يومك وابوس بي وهو يبوس باديه وعمو فيصل يكولي ديري بالج على جدج ودوم رفعي راسه ماتلكين هيج واحد يحبج

كتله مااخذله ان شاء الله اني

صاحتني عمتي الي مرة ابو فيصل ورحت

جانوا مخلين الاكل على ميز الطعام

شفت شوكه محتاره شون تاكل ع الميز هي اذا ماتتربع بالكاع وتاكل بيدها شون يصرفلها

شاورتني كالت اني شجابني وياكم هسه من صدگ تندمت

كتلها ليش ولج شوكة شبيج

كالت متت قهر اولا فيصل لو مااخذني اني احلى من هاي

وتباوع على البنيه ايناس مرة فيصل وتأشر عليها

لزمت ايدها ونزلتها كتلها عيب ولج

كرصتني حييل

فرجت ايدي

كالت بصوت عالي انوب على الميز تعاي اكلي لحم وين صايره هاي

عمتي سمعتها وظلت تضحك كالت شوكه انتو وين تعرفون على الميز وتهز بيدها

شوكه كالتلها شوف العكروك هم عنده ضروك نهجم بيتج ياصفيه(تقصد على عمتي)

اني بسرعة سديت حلكها بيدي

دفعتني باوعتلي وتحجي باعصاب

هي شني تسكتيني هي صفية مو جانت ويانه عايشه مو احنه اهلها وبيت جدي قاسم بي مية نفر وجانت تجي النه ميته جوع هسه صارت تعرف الميز

عمتي هم كبت وشويه تخلي راسها بالجدر

واحمد يشجعهم يكللهم والله مشتاقين للعركات

هنا هدوء العالم ملتهيه تاكل بالجطل بس عفيه عليج شوكه ماتنسين اصلج

وخلاها تعلك بينهم وكوا سكتن بس شافن جدي وعمو فيصل طبوا للغدا لان عمتي تخاف منهم

( اني الصراحه عجبني رد شوكه لان عمتي جان كاتلها العوز والجوع واحنه نلمها وابو فيصل جان شابعها كتل ابد ماارتاحت وياه وهي لسان ماتسكت الى ان توفى واجاهم فيصل الي جان عايش عند جده اللواء من صغره ولماهم ببيت واحد )

عمو فيصل كال يابه افرشوا سفره بالكاع مايكفي الميز وبالكاع الكعده اريح والبركه تعم بالبيت كله

شوكه ظلن تفرك بكذلتها وتمشط بشعرها بيدها وتصيح ونعم منك استاذ فيصل والنعم منك استاذ

شاورتني شفتي شون جاوبته هسه يكول مثقفه ولابد وان يجي يوم ويزوجني

كتلها وج عيب كافي فضحتينا

عافتني و كامت تشيل بالمواعين وتحولهن من الميز للسفره فرتهم فر

انوب اجت شاورتني كالت ذكريني سندريلا بعد شسوت حتى اسوي مثلها ؟؟

كتلها خرب حظي هنه ذني اعمالها حذاء ضاع وخدامه

كالت خوش حجييي

كتلها كون العباس ابو الفاضل مايخليج تتزوجين اذا تعاركتي بعد

خلت وسكتت

اجه عمار وزوجته فاتن الي هي بنت عمهم

فاتن جانت مدلله ومغروة وجانت عازله روحها من عدنا احنا من جنا جهال ، كلها تلتم وتلعب اشكال وهي من ذوله الي من تمرين يمها تبجي وتارسه شعرها كومه قراصات وكماشات يمكن مية وحده وشايلة جنطه بيدها وتباوع للواحد من فوك ليجوه وكلساع تعدل بشعرها ....

وذني البنات يتلوكن الها ...

مرة من المرات جانت واكفة اجت يمها شوكه

كالتلها الله حلو شعرج

هي دفعتها اووي وسخه وخري

وذني اللوكيات ظلن يضحكن

اني بوقتها كمت جريت شوكه

وكتلها شوكه نظيفه وتخبل و بستها

خطيه شوكه كيفت وخليت ايدي على جتفها

كتلها تخبلين

كالت اول مره استحي اريد اخذ حقي

كتلها من حقج

كالت روحي صيحيها يم الباب واني اجي

كتلها تمام

وسويت مثل ماكالت رحت صحت فاتن

واجتي

وجان تجي شوكه وتخرب شعرها كله ووكعت القراصات واني بس اراقب اخاف احد يجي

وهي فاتن ظلت تصيح ماما ماما

كتله شوكه كافي اخذتي حقج امشي نركض

بس شوكة مااكتفت لزمت جنطتها وتدوس عليها وتدبج

جريتها وشردنا وصرنا اعداء الها وبكل مناسبه لازم تصير مشكله وشوكه تسميها الصفره )

اليوم من شفتها تذكرتها وهي هم سلمت علينا من ورة خشمها الظاهر تذكرت من سوينا بيها هيج

بس مااعرف شون عمار خطبها هو يخبل ومرح

شوكة من شافت فاتن اجت تسلم شاورتني

يمكن قرأت افكاري

همست بأذني

ولج درو امي تكول فاتن مسويه سحر لعمار واخذها

هي منو يجرعها ؟

عضيت شفتي وسكتتها وفاتن تباوعلنا بأمتعاض

عمار كالي ليش مااجيتي بعرسي؟ مو سويناه يمكم

كتله جان عندي امتحان بليلتها

كال سالنا عليج كالوا بعد جدها حبسها كبرت وهو هذا الصحيح بس سباعيه خوش معدل مطلعه الحمد لله

كاله جدي شون مااحبسها وين اكو بحلاتها لو عليه اخليها بجيبي وين مااروح ويايه بس رفعت راسي رغم سوالف حامد ومرته بس كدرت بعد جدها وروحه

اني اباوع لجدي بحب و بفخر من يحجي عني

عمو فيصل كال سباعية سباعية

وفاتن تعوج بحلكها ...

كملنا الغدا وشربنا الجاي وطلعنا بعدين اذكرت الفايل بالسياره رجعت اركض انطيته اله

وكتله بتوسل وحماس عمو املي بيك بعد ربي تحقق حلمي فدوة

اخذه مني نظرة عليه ونظرة على الفايل

كال الله كريم ...

طلعنا من يمهم وطول الطريق واني افكر بالسيارة ياترى يكدر يسويها؟

ماكدرت اكتم افكاري سألت جدي

جدي انت ليش متأكد عمو فيصل يكدر يسويها الي ؟

باوعلي و كالي من نوصل اسولفلج ...

كتله ماشي

باوعت لشوكه نعست ونامت على جتفي

رجعت باوعت لجدي كاعد كدام

كتله جدي زين ليش تكله هاي يارقم على زوجته؟

ضحك جدي و كال!!!

يتبع ..

ملاحظة ابو فيصل يصير ابن عم جد درة

يعني مو فيصل ابن عم جدهه

يعني ابو فيصل وجد درة اولاد عم

واتوقع ذكرت انو درة رجعت للعراق وعمرها 3 سنوات وهذا هم خطأ مني الصحيح الي انذكر بهذا البارت 3 سنوات ابوها انعدم الله يرحمه ويرحم كل شهداء العراق

الفاتحة على ارواحهم الطاهرة 💔

واكيد الابداع ابداع ام عبدو 💜😘

البارحة نشرت شبيه وليد بالفيس والي ماعدهم فيس من حقهم يعرفون

اسمر بملامح ناعمة وليد. يشبه حسن الشافعي

ودرتنا اكيد لا يخفى عليكم تشبه ليلى العطار

الله يرحم ليلى ويطول عمر درتنا الجميلة 💜

تحياتي الكم قراءة ممتعة كيكاتي 😘💜

وشكرا ع التفاعل الحلو مثلكم 😍

ومتابعة لحساب الكاتبة بلا زحمة zan_eb15

السلام عليكم

رواية طوفان رجل

الفصل السادس

نورا ناصر

الاهتمام لا يأتيك إلّا من شخص يريدك فلا يسأل عنك إلّا من يفتقدك ولا يفتقدك إلّا من يلاحظ مساحة الفراغ من بعدك والإهمال لا يأتي إلّا من اثنين إمّا شخص لديه بديل أو شخص لا يريدك أساساً الظروف بريئة فهناك من يختلق الاعذار ليرحل وهناك من يختلق الوهم ليبقى وشتان ما بينهما .."

                          ******

جدي من اني وصغيرة مايخليني اطلع ابد من دون الجهال اني ممنوعة عليه الطلعة الا وياه واكيد من خوفه وحرصه عليه

جانوا  كل البنات الي بعمري واكبر وحتى اصغر  يروحون للدكان  ويشترون  ،  فد يوم طلعت بالطرمة لكيت شوكه  تاكل تمر هند

جانوا  يبوعوه بجياسة والجيس  بدرهم واحد

وهاي كاعدة و تمطك واني طاحت هاطولتي وظليت امطك وياها و اشتهيت تمرر هند  كولش حامض واحبه

جان جدي طالع مموجود رحت لبيبي توسلت بيها

حتى تنطيني فلوس اوصي احد يشتريلي

وبعد معاناة  انطتني درهم اخذته وركضت

لشوكة

كتلها شوكه اشتري اليه تمر هند مثل مالتج

عفية ماكدر اطلع جدي مايقبل

ظليت اتوسل بيها معاندة وماتقبل رحت كعدت بالطرمة وانتظر بلكي يجي وليد ياخذ الدرهم ويشتري الي

اباوع لشوكة سحكت جيس ثاني من التمر الهند واني بعدني امطك ع الخالي بلاش

بعدها لمن خلصت تمرها باوعتلي وباوعتلها شفتها صفنت شويه وابتسمت بخبث

اجتني كالت جيبي درهمج اروح اشتريلج خطيه انتي انقهرت عليج

انطيته الها واني مكيفة وفرحانة راح تشتريلي   اخذته وراحت عود تشتري الي واني منتظرتها على نار ومتأملة اكل تمر هند

رجعت شوكة  كالت دره درهمج  ضاع مني ومااشتريت الج

كتلها بخيبة اكل  شنو وين ضيعتي ؟؟

كالت ولج ضاع ضاع مني وكع بالدرب

اني ظليت ابجي ومقهورة  اجاا وليد

شافني على هذا الحال اجه يسكت بيه واني اسولفله مسح دموعي

وكال لتبجين چنج على تمر هند هسى اجيبلج و  راح جابلي وكعدت اكل

وراها اجتي شوكه وبيدها شاميه حمرة وحلكها كله مصبوغ احمر من الشامية

ظلت تباوع للتمر الهند الي بيدي

واني اباوع للشامية مالتها

كتلها منيلج هاي الشامية

ظلت  تضحك عليه وكالت بفرحة عرامة

ونبرة انتصار هاي بدرهمج اشتريتها

اني متت من القهر عصبت حييل وكرهتها لدرجة اريد اكلها باسناني

شمرت التمر هند وهجمت عليها مع العلم هي اكبر مني واضخم ظليت  اهلسها من شعرها حييل ايدي انترست شعر

تركت شعرها وجان اعضها عضه قويه بزندها

حتى وليد يريد يخلصها مني مايكدر مااتركتها الا لمن حسيت اخذت حيفي منها وصارت تفرفح من البچي

وتفشر عليه وتصيح

كتلها اني قويه مااحد يضحك عليه افتهمتييي

هي طلعت ايدها وتباوع للعضه

وفررت بجيى

اني ضحكت كتلها سويتلج ساعة لتبجين

اجا عمو حامد على صوتنا

كال شبيجن ليش شوكه تبجي منو وياها وليد شبيها اختك ولك

هي راحت لزمت بدشداشته وتعت بيها

وفتنت عليه يمه

كلتله باع دره  شسوت بيه عضتني

شاف اثر العضه باوعلي خزرني خزرة تمووت

كال شنوو چلب

ولزمني من ملابسي رفعني  وشمرني بالكاع متتت من الوجع

وليد حجز  وكال لابوه  شوكه اخذت فلوسها وهي هيج سوت بيها

رغم حامد افتهم الخطأ من بنته بس استمر يضرب بيه

ماتركني الى ان جسمي طكع من الكتل ولا احد دافعلي لا بيبي لا احد

وهو شاف جدي ماكو استقوه عليه

وهو يضرب ادردم وابجي متوجعة  بسيطة الا اكول لجدي عليك

رجع ضربني حييل ويصيح بووجهي

ولج بعدج لسانج شطوله اكسر ظهرج هسه

اجه وليد صار بيناتنا ووكعت بي الضربة

ورفع ايده حامد يريد  يضربه بعد بس وهناء

ظلت  تصيح ولك وليد لاتصف وياها

وبيبي تصيح حيل بيها ادبوها ولك وليد خلي يملخها ماتنجرع

 طب عمو حسن تخبل من شافه يضرب بيه

هجم على حامد وظل يصيح عليه

ولك انت  شلون تمد ايدك على يتيمة الله يقبل رسوله هي هاي رجولة منك

كله شووف شسوت بأيد شوكه هااي بلاء من الله مو يتيمة

صاح عمو حسن بعلوو صووته جهال بيناتهم ليش تحط روحك وتصير مكرووه

بيبي جاوبته يمه حسن ماتنجرع وكحة وكحة

اني ختلت ورا عمو حسن وهو اخذني من الارض وشالني ظل يباوعلي وشاف وجهي مزورك

ظل يدعي عليهم الله لاينطيكم شمسوين بيها وحوش انتوا صدك جذب ....

باوع لبيببي كاللها هسه حامد طكة ونص يمه انت شبييج

حامد سمع هيج واجه يهد على عمو حسن ويصيح عليه ولك منو طكه ونص اني انيي

بيبي ظلت تلطم وتصرخ الله اكبر الله اكبر تكاتلوا الاخوان من ورا هاي الچلبة ساعة السودة سلام من رحت بيها لصخام الوجه

عمي حسن كسر الشر واخذني وصعد بيه لغرفته

بدل ملابسي ووغسل وجهي انطاني اكل بس اني مااكلت ومستمرة ابجي جنت موجوعة من صوابات عمو حامد  نومني على جربايته وغفيت بعد مافرطت من البچي

كعدت وراها  صاير  دنيا المغرب شفت نفسي وحدي بالغرفة عمو حسن ماكو خليت ونزلت امشي على اطراف اصابعي خاف يشوفني عمو حامد ويكتلني مرة ثانية

اجتازيت الصالة وفتحت الباب طلعت كعدت يم باب الديوان وابجي واحجي  وينك جدي وينك جدي شو تاخرت عليه اريدك جدي اريدك

بعدها طب جدي ووياه عمو فيصل

اني شفتهم ركضت على جدي وزدت بالبجي

واشكيله من ظلم الحل عليه وهو ماكو

كتله كتلني حامد

واطلع اديه واطلع بظهري واشوفه اثار الضرب

جدي صيح بصووت عالي يفزز الميت من گبره

ولك حووويمد  اليوم موتك على ايدي اليوووم

فيصل  صارت عيونه تجدح نار وهم ظل  يصيح وين حامد ووينه خل يطلع

من صاحوا  طلع عموو حامد  بدشداشته المهدلة وكاللهم وطبها مرض توليى مجلووبة شون تعض شوكه وتسوي زندها ازرك هم زين ما شلعت وصلة منها تردوني اسكت الا اادبها

اني تقويت بجدي وظليت  احجيله كل  الموضوع ووليد يأكد كلامي

بيد جدي عوجيه سوده شالها وظل  يضرب بيها حامد على راسه

ظل حامد يصيح يايابه يابويه تكتلني واني بهالعمر هاي المرجية منك يابه

وظل يفتر بصوره دائرية

لزمه فيصل دك بوكسات ضرب ويهدد بي ويتوعده

يكوله ولك كدرتك على طفلة يتيمة شبيك انت شبييك يمته يصير براسك خير هاا يمته

اذكرت جان لابس قميص وبنطرون و جاي لبيت ابوه

ومر على جدو يسلم عليه ولكه المقتل مالتي

من فيصل ضرب عمو ظل عمو يصيح عليه  تضربني علمودها فيصل ولك انت لا تتدخل انت ابيتنا مالك علاقة بنت اخوي وضربتها اريد اادبها

لزمة من ياخة دشداشته وظل يصيح بوجهه بعصبية

ولك من جابتها امها اطانياها سلام بيدي اشوفها والله الي  يلزمها بعد شوف شسوي بي

اجه عمو حسن  اخذ عمو حامد منهم

ودخله لغرفته

بيومها جانت  تمطر الدنيا كولش قوي

واني اموت على المطر ....

ظل جدي يبوس بيه بكل مكان ضربني عليه حامد

كتله جدي خل اطلع بالمطر شويه

كال تمرضين بويه

كتله بس شويونه

كال يجرالج طلعي ولا تظل بنفسج

طلعت وهو  واكفين جدي وفيصل  ووليد

وكفت جوه  المطر وافتر ببدلتي واصيح ياناس احب جدي ياناس احب جدي  واكررهها وهمه يضحكون عليه ....

                    *********

رجعت من ذاكرتي وسألت جدي زين ليش تكله هاي يارقم على زوجته ؟

ضحك جدي كال قيصر عند عقده من النسوان يزوج المره سنه اكثر او اشهر حسب مزاجه وبعدين يدكلها طابع ويطلگها

تعجبت ورجعت حاجيت  جدي بصدمة

صدك تحجي جدي زين ليش هيج عود شنو ذنبهن ؟

عمو سلمان السايق رد عليه كال  بويه خلي مونس روحه خوما احنه وحدة وتنك فوك روسنا ومخلصانيين

ظلينا نضحك ... كتلهم عجيب امره لعد اذا مايريد خلفه ليش يتزوج ؟

ضحكوا بصوت عالي و جدي باوع عليه

وكال بويه من تتزوجين راح تعرفين وغمزلي

اني خجلت  عود ردت اغطي على الموضوع كتلهم يله شرايده منه خلي يتزوج المهم يسوي موضوعي

كال جدي يسوي يسوي اخذيها منها انا اكلج لادوخين روحج ...

رديت عليه  بتفكير والله يا جدي مااظن كولشي ماحجا بس يكول  الله كريم ويهز براسه

وانوب طلع ملتهي بالنسوان يبدل بيهن وينه وين قضيتي

ظلوا يضحكون و كعدت شوكه تمططت وصحصحت وكالت لجدي اكلك جدي  يعني قيصر يسمع كلامك ويطبقه ؟

كالها اي كولي شتردين انت بعد ؟

كالتله كله خل يزوجني ..

ظلينا نضحك واني كتلها هو اصلا شايب وكبير بالعمر واحنه نكله عمو شون تردين تتزوجينا

ثانيا ترى جدي يكول  سنه ويطلگج

كالت ميخالف خل اعيش بالقصر والعب بالنافوره سنه كامله وخدم شريد بعد

وكملت كلامها  وبعدين هو وينه شايب اشو  جنه العافيه خايبه اني العجوز  صار مية سنه هذا شكله ماتغيرررر على حطته

كتلها لج بكدد بابا الله يرحمه  وعمو حامد اصغر منه

كالت اهووو دوختيني سكتيني ماتقنعيني اني اريده

ومدت راسها على جدي بالصدر ها  جدي شكلت؟؟

جدي باوعلي و غمزلي كلها هاهيه من اشوفه يصير خير

ووجه كلامه الي  بويه دره  ترى فيصل اصغر من ابوج بسبع سنين

كتله حتى لو جدي يبقى جبير وشايب

كال قافلة بويه انت مشيبة الرجال وظل يضحك

وصلنا للبيت سلمنا وطبينا جانوا يحضرون بالعشا اني طبيت اسبح من حر الطريق وطلعت وكعدت يمهم

جان جدي يسولف شنو صار اليوم ويانا ببيت فيصل

بيبي كالت والله فشلتوا روحكم ماتصير ترة سالفتكم عليمن رايحين وداكين الدرب شطوله

  هي هاي دره  بومه ،  امها من تزوجت ابني سودنته واخذته منه ودره من اجت للدنيا انعدم سلام

ماوراها كل خير وانت مثل الزغطوط تركض وراها شتريد تسوي بلا تفكير 

جدي عصب من كلامها بايده دولكه حديد شمرها عليها واجت عدل بوجهها وخشمها طك دم

وهم روحه كام يريد يضربها وعمامي ووليد هبوا من مكاناتهم ولزموه خلت وراحت شردت

وهي تدعي علينا تكتلني ابو سلام وعلمود منوو هاي الچلبة

نقهرت كلش من كلامها ومنا اني خايفة لا ماتصير الشغلة رحت للمطبخ اشرب مي ريجي يبس

هي غافلت جدي واجت وراي  و هجمت عليه تضرب بيه لزمت شعري گطعته تگطع 

صاحت هناء تجي وياهه ووكعني من الضرب

تجر بشعري وتدردم ولج خشمي ترس دم من وراج بت الچلبة بت الكافرة انه يضربني بسببج

  شوكه وامل يدفعن بيهن واجه  وليد دفعهن 

واجه  جدي يريد بس يلزمهن وهي بييبي شردت  ركضت للغرفه وقفلتها عليها وهناء طلعت من باب المطبخ

وكف جدي يم الباب مال الغرفة الي بيها بيبي ويدفر بي ويصيح

اليوم ماتضلين بالبيت اله اطلكج على كبرج هذا

وذاك السبب والغلط

واني شبعت بجي وراسي موتني من البچي  ومنا نفسيتي زفت على القبول لاحركت ولاسويت شي ولا حجيت عليهن

خطيه جدي اجه شبكني وكال لتبجين الا اخذ حقج مربع واخلي العالم تتفرج عليها الا اطلگها وافكج من شرها

اني لساني انعگد ماكدرت احجي ولا كلمة بس الدموع تجري حارة على خدي وتچوي بشرتي...

اجتي شوكه يم جدي كالتله اكلك جدي امي هم كتلتها والله العظيم وشردت واني اريدك تكتلها لان هي تكتل بينا ادبها جدي عفية

عمو حامد يعض اصبعه ورا جدي ويهددها

لان حجت على هناء

شوكه شافتع كالت لجدي جدي جدي  ابوي هم متحلف بيه شووفه جاي يأشرلي بيده ويتهدد

جدي دار وجهه باوع لحامد وهو بطل يهدد شوكه

جدي يباوعله ويحجي  خلي  يجيسج الا اعطره بالنص

رجع جدي لبيبي يريد يكسر الباب ويصيح هسه اتطلعين اليوم ماتبقين اهنا لا انتي ولاذيج العقربه وظل يضرب بالباب بكل قووته

اجه وليد اخذ جدي من يم الباب

واني رحتله ابجي  كتله جدي عوفها عليك الله خليها

هي والله

كال ماكو ولا اعوفها الا اكسر راسها

كتله واني زايدة بچي بروح بابا عوفها جدي

ظل يستغفر ويتأفأف  ورجع  وشبكني بحضنه يكولي وين اضمج عنهم هالظلام يابويه

وظل يصيح بصوت مبحوح ومقهورر

ورافع راسه ليفوك ولك سلام مااكدر احمي بتك شووون بيه ولك سلام ماشبعت نووم ولك رد بتك تريدك محتاجتك ولك ماابيه بعد على فراككك سلااام  الله اكبرررر

هو بجى واني طكيت من البجي كعدت بالكاع على ركبي واشهك

وحتى وليد نزلت دموعه ويكول  لجدي واني وين غير اخليها بنص عيوني شنو هالحجي هذا وكسر الخواطر احنه متعلمين على هاي الهوسه لا تضعف هسه جدي

وانتي دره  هاي اول مره تنكتلين وكولشي ماتسوين

كتله تعبتتت وليد خلصت طاقتي للنهاية

احجي  ودموعي تجري

اجه وليد  باس راسي كال امسحي دموعج سهله سهله. ان مع العسر يسرى

اجتنا شوكه تصيح جدي جدي وينك صار ساعه ادور على امي لكيتها خاتلة ورى البرميل مال النفط كوم اكتلها حباب كووم

جدي كوة عليه ضحك و كالها شون تفتنين على امج وهي خاتله

كالت مو دره  حبابه احسن من امي

كال يا الله من  تصاحبتن هسه البيت انكلب علينا ولطلايب مراح تخلص .....

كوة مر اليوم  وعدا  مثل كل يوم بي عركة بس هالمره ترك اثر جبير بنفسي وظليت افكر اني من شفت ضعف جدي  اني من بعده جدي شون بيه

وحتى وليد شيسوي قابل يضرب امه لو ابوه اووووف ربي حكمتك بوجودي بهاي الدنيا  شنو

لحد الصبح  ابجي هاي العركة عبالك فتحت ابواب لدموعي تنزل

مر ثاني يوم هدوء والايام الي بعدها جان الوقت بطئ كوة يمشي  كلما يدگ التليفون اركض عليه اكول بلكي عمو فيصل يرد جواب

وكلما يجي جدي اسأله يكول اصبري الصبر حلو يابنية صبري

واكله الله كريم واجا الليل والانتظار يكتل كتل كعدت بالحديقه مخنوكه من البيت والبشر الي بي وحتى مافكرت اخذ حقي منهم مستسلمة رفعت راية الاستسلام

مع العلم هناء بس تتلفت خايفه شنو اسوي الها ومتحضرة

وبيبي من تشوفني تكلي فوخت كلبي وكتلتج

وتسوي حركة الحرة

اظل اباوع عليها اكول اني اعرف البيبي على كلب الحفيد مو الجد واني حتى بهاي القاعده مكلوبه وعاكسة وياي  الحمد لله

اجاني  وليد واني كاعدة بالحديقة

كال  ليش هنا كاعدة ؟

تنهدت وحجيت بحزن وقهر كتله مخنوكه كولش وليد

كال هاي الخنكة وراها فرح صدگيني

همست ان شاء  الله وليد الله يسمع منك تعبت

كال ولا تضوجين امشي افرج بالسيارة

كتله ياله علواه موو متتت منا متتت

ظل يضحك كال اي هيج تحمسي

ركضت البس الصايه

شافني جدي كال  ها بويه على وين ان شاء الله

كتله وياووليد رايحين نفتر ونرجع نغير جو

كال اي بويه طلعي رفهي عن روحج

شوكه جانت تباوع فلم هندي تموت عليهم الهنود جان يطلع كل ثلاثاء على قناة العراق وهي حافظتهم مي حتى بالاعادة  هم تشوفهم وتصدك وتنقهر من كل عقلها

من سمعتني احجي ويا جدي راحت ركض بدلت وطلعت قبلي وصعدت بالسيارة حجزت الها مكان

طلعنا شغل أغنية هيثم يوسف اضعف كدامك بس انت

كال اسمعي دره اسمعي هاي جديده لهيثم يوسف

باوعتله مبتسمة كتله حلوة دااسمعها

ظل يدندن  وياها صدك حلوووه الاغنيه وهو معليها كولش وغيرت المزاج ١٨٠ درجه

خلصت الاغنيه سأل شوكه يااغنيه تريدين اشغلها الج

كالت بحماس اريد  عبود خطبوله مره

كاللها ماعدي

كالت اني راح اغنيها وانتوا ويايه دو

كنالها يله متفقين

ظلت تغني  (عبود خطبوله

مره  احنه نصيح يله حيو حيو

من غير حمره محمره يله حيو حيو

كل السحر بعيونها يخاف لاتحسدونها

صلي على اسم النبي صلوات على النبي )

وهي تهز ركبه وتهلهل واني اطك اصبع شبعنا ضحك

وغيرنا المود  وهو نزل اشترالنا موطه واكلناها بالسيارة ووصيته يشتري لجدو وياه يبرد گلبه

رجعنا للبيت ب٢ باليل خليت موطة جدو بالمجمدة

و ركضت للغرفة

نمت على وجهي بسرعة وهاي من الزينات   هم تعبانة وهم حتى لا افكر بالقبول مال الجامعة

ثالث يوم العصر رحت لجدي كال تعاي بويه

عمج فيصل خابر  وكال تعالوا وخلي دره تجيب ملابس للدوام  حتى  باجر اخذها

اني طررت من الفرح بس ناقصني جناحين

ركضت احضر الجنطه ورجعت

لجدي سالته جدي جدي هو كلك صارت الشغلة صاارت ؟

جدي كال ماحجا شي يله بويه همي روحج لاتشوفنا شوكه وتجلب ويانه

رجعت للغرفة  اخذت ارقى لبس وكلي حماس وبهجه ووايمان وثقه بربي مايخذلني هالمرة

سمعت جدي  صاح عليه

واني بسرعه اخلي الغراض وطلعت وراه صعدنا بالسياره وطول الطريق ادعي ربي لاتخليني اياس من رحمتك ربي اجبري جبرا يتعجب له اهل السماء والارض واني يتيمة

جدي جان معلمني اذا باي مكان تملكني الخوف او  خفت من بشر اظل اردد (لاحول ولاقوة الابالله العلي العظيم) تنطيني  قوه وراحه لنفسي  واني متمسكة بيها

بيه شغله لو جدي كالي هذا اللون اسود وهو ابيض اكوله اي اسود واقتنع واصدكه وماااجادله

بعمري ماغيرت مبدا او نصيحه او قناعه علمني عليها جدي عايش بيه

بعد مسافة الطريق وصلنا ودخلنا لبيتهم سلمنا عليهم

ورحبوا بينا وكعدوا يسولفون   سوالف عاديه ساعه كاعدين بس يحجون عن اخبار العشيرة وفلان وعلان

اني  بعد ماكدرت راح اتخبل ما اكدر اصبر احس لازمة جمر بيدي وعاصرة عليه

اخر شي حجيت كتله عمو كول ماصارت الشغلة  وفضها وجدي طول الطريق يكول فيصل ذيب يسويها واني اكوله كولشي ماافتهمت منه بس  الله كريم

ابتسم ابتسامة خاطفة كال شوفي ذيج البوفيه بيها فايل روحي جيبي وتعاي

اني كمزت كمزة ورحت جبت الفايل وجيت

انطيته اله جان يباوعلي وعلى  وجهه ابتسامه خفيفه عابرة ورجع لتكشيرته

كال هاي سويتها ام لسان بعد تطلبيني شي كولي ؟

واني من الفرحة خليت الفايل على گلبي وعصرته واردد  الحمد لله الحمدلله ياربي واباوع ليفوگ

اجه جدي شبكني وحضنته واني طايرة فرح

ويكولي مو كتلج حلها عند فيصل

رحت لعمو فيصل شكد  اني طولي  ١٦٩

وهو بعد اطول مني رفعت نفسي على اطراف اصابعي وبسته واكوله  ممنونه ممنونه منك عمو شكرا

و اباوع لجدي اشوفه فرحان كولش وعيونه مدمعه ظليت ادعي اله ربي انطي عمر بس اشوفه تعبه ماضاع ويايه

كعدنا واني احس حراره تطلع مني من الفرح وكل شوي اباوع للفايل واكلب بي

رفعت راسي على صوت ايناس من كالت تره تره عن الحلال والحرام مايصير تبوسي

كمت مره ثانيه وبسته من الخد الثاني

كتلها ترى هو عمي ومن امي جابتني جان موجود وشالني

جدي يكول(جان عمو فيصل يفتر وياه جده  بكل الدول وهو هناك دائما يتردد على بابا كلما يسافر لروسيا  وقبل يوم  من ولادتي عمو فيصل  مر على بابا باليل من جاي الطلق لماما مخابر على فيصل  ويكول من وصلت اجا بابا يركض وانطاني اله كاله شوف بنتي شكد حلووه )

هو  اكتفى بكلمة  صحيح وخزرها

هي سكتت  وهو ظل يحك بخده باربع اصابعه ...

عمتي كالت لا تزعلين دره ترى ايناس  تشاقى وياج

كتلها اليوم فرحتي بوسع الكون ماازعل من احد ..

عمو كال باتوا اليوم وباجر اخذج منا نطلع اروح وياج اكمل وياج كلشي واخذج للعميد  وواصي عليج بعدين شيخلصني من لسانج

كتله اني وين فتحت حلكي والله ماحجيت شي

كال من جنتي هلكد اشر بيده طولي يعني زغير وانتي السانج رشاش اعرفج

خجلت ودنكت وكعدت عاقلة

جدي كله اني اروح وانت ودي دره للجامعة

بس اني خجلت كلش شون ابقى وحدي عدهم منتعودة

شاورت جدي كتله  عليك الله عاد بس بات وياي مااكدر اظل وحدي

هو كال شون اغير مكاني ومااكدر اعوف البيت

ظليت ازن ازن وهمه هم يلحون وعمتي ابد ماحجت ولا عبالك  ابوها

همه عوجان العائله على كولة جدي صفيه وحامد وماينعدلون 

قهرني  خطيه بقى بس عيونه على بنته ويهز براسه

صعدت بغرفة رزان بدلت لبست دشداشه

نيلي وبيها رسم بالنص بس هي قصيرة شويه

(اني احب اللون الازرق بكولشي اختاره )

فتحت شعري وظفرته ، نزلنا جانوا يشربون جاي

عمتي باوعتلي لملابسي ولرجليه

كالت هاي شنو حجلج نفسه من جنتي صغيرة لهسه

همه كالهم باوعوا على رجلي استحيت كولش (هو ماجان موديل بس بابا من رجع للعراق اشترالي واحد وزارف اذني زرفين  وبيهم تراجي ذهب وتراجي ام الشباك وبيها شذره زركه العشيره كلها لابسه منها اني وشوكه وبنات عمي فلاح حتى بيبي عدها على اكبار  عبالك ماكو موديل بس ذني  )

كتلها لا جدي كلما اكبر يودي للصايغ يضيف ذهب ويكبره على رجلي

عمتي كالت وين اكو مثل جدج عليج يحبج يموت عليج احنه بناته ما دللنا  مثلج وعوجت حلكها

فاتن كالت بس اوع منو بعد يلبس حجل هسه

باوعت لجدي يعني اردهم لو لا هو انطاني اشارة

احجي

كتلها عمه صدك ماكو مثل جدي بالدنيا كلها وهم ماكو مثلج ومثل بيبي

هي شاطت للستار حسيت دخان طلع من اذاناتها بس متكدر تحجي كدام جدي

فاتن كتلها مو المهم الموديل المهم شنو يلوك الي وهذا الحجل احسه جزء من جسمي كلما اكبر يكبر ويايه مو مهم يعجبج اويعجب غيرج 

باوعت الجدي شفت ابتسامه على وجهه معناها راضي

وانتبهت على عمو فيصل  ضارب صفنه عليه وبيده جكارة

يتبع ....

وام عبدو مستمرة بأبداعها  😍❤️

السلام عليكم

رواية طوفان رجل

الفصل السابع

نورا ناصر

في وصف لطيف عن الألفة,,.

"حين كنت بصحبته ؛ لم أكن أُلقي بالاً لما أقول؛ كان الحديث معه سلساً من دون جهد كما التنفس.."

💜جد دره ....

من شفته صافن عليه ، حسيت على روحي وسحبت الكلبيه شويه من گدام  وخجلت اني كاعدة ابيتهم وماخذتهم حاصل فاصل شكد عيب كعدت عاقلة وسكتت

هو تنهد ودار وجهه ورجله مابطلت تهتز ....

عبالك شكله يوحي لتطبيق هذا المثل

مال اصرف نظر واشبع قهر ...

من رجع بابا للعراق عمتي عدها احمد  وهو اكبر مني  بشهرين ، بابا طلب منها ترضعني وياه

هي رضعتني بس  كم مرة  وبعدين ملت مني

على گولتهم معزة اليتيم بس اول سنة

وظلوا يسوولي  حليب النيدو الي لحد هذا عمري واني أشرب منه ...

گاعدين  وطب هشام هذا نسمة العشيرة هادئ كولش وثگيل وماينسمع اله صوت ، يداوم ثاني سنه طبية سلم على جدو باحترام

واجه سلم عليه كتله بفرحة : هشام انقبلت كلية قانون وراح اساوي  رجال العائلة  واطالب بحقوق المراة

ضحك ضحكته الهادئة و كال انتي طموحة  ان شاء الله بعد وبعد

كتله بفرح :-  تسلم تسلم هشام

احمد كال دره  اني اريد انظم لهاي المنظمة بس كون تضم كل نساء المدن المجاورهة مو بس منطقتنا

كتله افكر بالموضوع ولو اني مااريد من رجال العشيرة لان اصلا المنظمة ضدكم

كال لالا اني غير عن رجال العشيرة بدليل كل سنتين بصف

وعمار يكوله انت الغباء جاي وياك من الولادة

وعمتي صفية تكول شوف الاثول ..

اني جنت من الفرحة احس نفسي اريد اكوم  اركص لو اكمز اطلع اركض بطريق ماله نهاية وفرحتي سابقتني

بحيث حتى ما اكدر اثبت نفسي واكعد ع الكرسي احووس احوس واسولف منطلقة و احسن نفسي طايرة بالهواء وقلبي يرفرف ومحلق

كلي  امل وتفاؤل وحب للحياة وبلحظة انرسمت هالدنيا بعيني جنة  ومن هاللحظة افكر للمستقبل  حتى فكرت  اكمل دراسات عليا وابد ماتوقف عن الدراسة بيوم

و هواي خطط وطموحات واصلا اني جنت سجاجة

درجة اولى  مو طبيعية بالدراسة اكل الكتب اكل ...

صاحوني رزان واحمد لحتى نطلع  بالحديقة

كمت وراهم طلعت

احمد كال اكلج دره خوما ضجتي من مرة فيصل من حجت عليج  ؟ 

ضحكت كتله لا يمعود عليمن اضوج هو اني  الاقارب شونهم ويايه حتى  اعتب على الغريب 

كال والله يعجبني تفكيرج ...

كتله لعد شون اعجبك ...

فرشوا بالحديقة وكعدنا كعدة  تخبل

جابوا دومنه وكالوا تعاي نلعب

لعبنا  والضحك يرن بالحديقة

واني لعبت وياهم كلهم حتى جدي لعبت وياه

ساعة يغلبوني وساعة اغلبهم ...

ونسيت نفسي بذيج الگعدة ، رجعت دره  بنت

ال ستطعش سنة ، الي جنت  اتصرف بعفوية وراحة  وبدون اي  تقييد بتصرفاتي

بعد ماخلوا عليه قوانين العيب والحرام

ياريت العيب والحرام الناس تستخدمها وتشوفها من تظلم احد او تاخذ حق احد او من تجرح احد ويظل ماينام الليل

بسبب  كلمة او من يسلب حق شخص او يكسر بخاطر  نفس شخص او ذل انسان الله رفعه وقيمه

ووووو وهواي امور جان احنه بخير  هواي ناس تحجي بمبدأ العيب والحرام بس بالظاهر  والباطن لا عين تشوف ولا اذن تسمع

جان صوتنا يعلى شويه شوويه ونضحك وهالشي اثار انزعاج فيصل وطردنا احنا  الثلاثي المرح

اني ، احمد ورزان

كال دره اليوم طلعت صوتكم  ، كل يوم  اسأل عليكم بغرفتكم وانت احمد مو جنت كله دايح مسربت

همه حسوا على نفسهم تمادوا هواي وبوجوده محد حجه كلهم سكتوا

بس دره الي ماتعرف تسكت كتله عمو يعني الهوسه مني مو ؟  ميخالف اليوم شيطلع منك ماازعل مازعل ابد ابد

عگد حواجبه يباوعلي بتركيز وعمق وكال أم لسان مصلحتچ فوك كل شي

گتله لا والله مو مصلحچية بس انت كلك خير وبركة

هز راسه واحس نظراته مچلبة عليه گوة بعدها

ودار على امه كال يله يمه فرشي للحجي خطية ينام وكت هو الليلة دوختوه وسهرتوه

هي ردت على عمو فيصل كالت ان شاءالله يمه تدلل انت والحجي هسه اكوم افرشله

يله بويه تعال بالمضيف احضر فراشك

كاللها عمو فيصل وياج فرشيلي يمه

جدي كله لا انت روح يم مريتك انه خو ما اخاف يله تلحك كبل لا تخلص المدة مالتك مابقالهه شي

وهو يشدد على احرف كلماته جاوب جدي

لا يمك يمك عن الوحشة حجي عدنان

جدي ولا يكعد واني كوة كاتمة ضحكتي ومدنكة وجهي صار احسه حار من كتم الضحكة اريد انفجر بالضحك ومنا اني فرحانة اريدلي حجة بس اضحك

اخذتني رزان ورحنا بغرفتها كملنا السهرة

جابت  كرزات وجبس وببسي وكعدنا نسولف والسوالف متخلص

هي نعست كالت عادي انام دره لو عيب منج

ضحكت كتلها يمعودة اني منطلقة الليلة حتى مراح يجيني نوم معليج بيه نامي نامي

كالت والله تستاهلين الفرح انت مشفتي شي بحياتج وان شاء الله الايام الجاية كلها سعادة

كتلها لا تقهريني على روحي ولج جاي اكولج فرحانة اليوم ماكو مجال للحزن

تمددت وتثاوبت كالت الله يجعلها على طول

كتلها ان شاءالله تصبحين على خير رزان اني راح  اروح اشوف جدي واجي

كالت تندلين لوو انزل وياج ادليج

كتلها بضحكة لا اندل اندل نامي انت يمعودة سطرتج سطر اني وبعدين صرت وحدة منكم اندل البيت شبر شبر ....

اشرتلي بيدها وخلت راسها عالمخدة  ....

نزلت اني وطلعت بره للمضيف طبيت على كيف امشي بهدوء وضوه الحديقة يفوت من الشباك ويخترق الستائر

تقربت على جدي بوسته على جبينه

هو فز كعد  كال هاا بويه

كتله بهمس وايدي على راسه شون انام قبل ماابوسك ماعرف

هو عدل كعدته وكال اووو  اكول شنو ناسي انه

قبل لا انام يايابه يايابه شون نسيه هاي

و انوب اشوف روحي عطشان كلساع اشرب وماارتوي اثاري مابايسج  

كال چنج على بووسه ورجع باسني

واني اضحك بهدوء خاف يكعد عمو فيصل

جدي احسه مرات ياخذني على كد عقلي بكل مرحلة احسه ينزل لمستوى تفكيري  شكد مااكبر ابقى بعينه ذيج الطفلة

كتله نام جدي ... تمددت ورجعت بسته على  راسه وغطيته لزم ايدي وباسها وكال تصبحين على خير بويه

دااطلع وسمعت صوت عمو فيصل  اني عبالي نايم ماتوقعته كاعد وسمع حجينه مدري كعد على سوالفنه

سمعته كال لجدي  هاي البنيه ماخذه عقلك بسوالفها ومخبلتك بس انت مامقصر  واني مالومك لو الكا الي يحبني مثلها جنت اسوي مثلك و اكثر من هذا بعد

ضحك جدي وكاله تصبح على خير

ابتسمت اني وخليت ورجعت لغرفة رزان وابد ما جايني نوم وافكر بباجر واتكلب ...

انذكرت جدي حجالي عن عمو فيصل

ابو فيصل   تعرف على امه بمعهد المعلمين العالي جانوا اثنينهم طلاب بي ...

صارت بينهم علاقة حب كلش حلوة وهو جان جاد بحبه الها ورادها زوجة مو بس حبيبة ...

راح لبيتهم خطبها من ابوها بس ابوها  رفض

هي وين وهو وين هي فرق بينهم من السماء للكاع بنظر ابوها طبعا

ابوها لواء بالجيش ومن طبقة اجتماعية مرموقة

من الكل النواحي المادية والاجتماعية وعندهم املاك وارثيها  ابا عن جد

ومو بس الاختلاف الاجتماعي بينهم كان سبب برفضه السبب الثاني جان بسبب صحتها لان جان  عدها فتحة بالقلب ولادية

بس هي دكت رجل الا هو وعاندت  وابوها معاند الى ان هملت صحتها ، رفضت تاخذ العلاج وكطعت الاكل وكل هذا ادى الى تفاقم صحتها وتمرضت

ومن خلال هالشي كدرت تضغط على ابوها وقبل تتزوج ابو فيصل

تزوجوا وجانوا فرحانين ببعض واخيرا انتصر حبهم وصاروا سوى تحت سقف واحد

صارت حامل وصحتها اتدهورت  كولش واصلا زين منها  وكدرت  تعيش ابيت عمو قاسم

تعبت صحتها كولش ولدت عمو فيصل سبيعي وبالطلق انتقلت الى رحمة ربها

كاأنو هذا الزواج  هو الي فتح قبرها ووصلت منيتها

ابوه تخبل من بعدها وصار يلوم نفسه وحتى عقله اختل واهله ظلوا سنتين يفترون بي اطباء وساده

شويه صار احسن ،  فيصل ظل من ايد لأيد واكثر شي  بيبته ربته وتعبت عليه وجانت كولش حنينه

من كبر واشتد عوده عمامه اذوه يطلعونه للشغل ويكربون عليه

ابوه تزوج عمتي صفيه  وماادراك ماهي صفيه اذته بالزايد ومارحمته ، جانت تطرده بالشارع

ومرة طاردته وجدي متخبل رايح الها للبيت حاطها وكاتلها

جدي دائما جان يداريه هو و بابا حتى ملابس ينطيه

و يحضر وياه واجباته مال مدرسة وحتى بدراسته محاربينه ويوم يخلو يداوم بالمدرسة وعشرة لا 

وبيوم من الايام اجتي تشوفه  بيبيته وجده الي هم اهل امه الله يرحمها

وصدفة شايفي بالكاع يحرث الارض وشكله تعبان

متخبلين عليه ومقابلين على الوضع الي هو بي

حفيدهم وابن بنتهم الي قتلها الحب والزواج وكان سبب ، تعددت الاسباب والموت واحد ....

اصروا الا  ياخذوه وياهم وهو هم چلب بيهم اخذوه عندهم واهنا انقلب حاله ١٨٠ درجه

من تعب وشغل وكراب  واهمال  الى نظافة ودراسة واهتمام وسفر  ورغم هذا هو ماعاف اخوانه من ابوه

الي هم اولاد عمتي صفية احمد عمار هشام رزان

جان  بين فترة وفترة يجيهم ويساعدهم وماينسى جدي وبابا  كولش يحبهم ويمر عليهم يشوفهم

وعلاقته قوية بيهم ....

                         *******

ثاني يوم كعدت نشطة ومتحمسة كمت من الفراش

وبدلت ملابسي  جنت لابسه قميص ابيض وبنطرون اسود وستره صيفية مارونية مخصرة وبيها دكم على الجهتين

لبست تراجي وگلادة ومحبس جان طقم ذهب بي لولوة كولش نازك مشطت شعري ولفيته سويته  كبايه

نزلت شفتهم كاعدين صبحت عليهم

واباوع لجدي يكولي ماشاء الله شطالعة الحلوة اليوم خجلت وابتسم

كتله طالعة عليك

كال منيلي اچلح املح

خليت اديه على وجهه كتله تخبل جدي انت بعيني احلى من كل البشر

عمو فيصل كال بعد شتريد ابو سلام وين لاكيها هيج وحدة  تتغزل بيك

سحبني جدي وبوسني

تريكنا وخلصنا

وايناس بس تباوعلي كصتني كص يمكن اكثر كن رجلها واحس بعيونها حجي كوومة

اخر شي يمكن ما اتحملت

كالتلي حبي انتي حلوه ليش تخربين ووجهج بالمكياج من هسه بعدج طفلة

باوعت عليها كتلها باجي اني  مامخليه مكياج  باعي وجانت بيدي  كلنس ومسحت وجههي 

هي اكتفت بس بحركة من حواجبها صعدتهم ونزلتهم وعود افتهمت انو اني بلا مكياج

بس اني غير اسكت من شفتها سكتت

كتلها لادوخين نفسج بيه ارتاحي انت

(تعمدت اكلها باجي لان مركزه ويايه اكثر من زوجها)

عمتي ماتطلع بس من تبث سم كالتلها لا هي هيج من تلبس الاحمر ابوي مايخليها تلبسه يخاف عليها من العيون وتهز ايدها 

بله ذني اني عايزتهم چماله لضيمي انوب من عقلت  الناس انجلبت فد مره عليه  والله

بعدين ليش ادوخ نفسي واضيع فرحتي القافله تسير والكلاب تعوي

وبعدها دخل عمو فيصل انتبه الاجواء متوترة شوي

عمتي غيرت كلامها لان هي بوجوده تخنس وتسوي نفسها ولا ماكو مثلها

كالت لعد انوسة ماتدرين دره امها سوريه وهي طالعة عليها حلوة

عمو فيصل وهو يعدل ملابسه كال روسيه دره بت الروسية

وغمزلي ....

اني بوزت شفايفي وعكدت حواجبي بس كاتمة ضحكة

هو كال هاا وين الوعد مو كلتي ماازعل لو شميصير اليوم

هزيت راسي وكتله عمو اني عند وعدي

قربت منه ايناس خلت اديها على كتفه وتتموع كدامه وعين عليه وعين عليه

تكوله فيصل محتاجتك شويه بالغرفة تعال دا اكولك شي ...

جاوبها وهو يتملص منها يله بس بسرعة عندي شغل

مشى وتبعته وتتلفتلي ترفع تك حاجب وابتسامة صفرة  ...

هاي شبيها جنها عبالك راح اخذ رجلها منها .... اصلا هو عمي اكو وحدة تقبل تتزوج واحد تكوله عمو عجييب

طلعت سلمت على جدي الي جان ديتحضر يم الباب حتى يروح

بوسته كال ديري بالج على روحج   راح اطلع مناك لبيتنا وانتو من تخلصون تعالوا كبل للبيت

وطلع  فلوس  كال خاف تحتاجين وانه ووصيت  عمج فيصل عليج

طلع عمو كله لاتوصي حريص بعيوني بت سلام لاتظل تفكر بيها

جدي كله مامنك قصور فيصل

سلمنا  عليهم ودعناهم جدي راح ويا عمو سلمان السايق و اني بقيت   انتظر عمو فيصل

الى ان صعد بسيارة عالية سوده وضخمه هو يسوق وصاح اصعدي

صعدت يمه كعدت وهو  لبس نظاراته

واني ظليت  اباوع عليه لابس قاط رسمي اسود  وجواه قميص بيجي بلا رباط و فاتح الدكمه من فوك والساعه لونها ذهبي ماركة لوكس ومحبس عقيق بيجي ومخبوط

الغريب اول مره اشوف ايد رجال حلووه اي والله تبرج برج اورده مبينه وبيها شعر بس حلوه  واظافره بيض كولش مو شفافه مثلنا لابيض والظفر الباقي لونه وردي بس حلووه واظافره مقرظات عدل وحتى مبرودات بس حلوه اي والله حلوه 

جان يكح يله انتبهت على نفسي عود دنكت اباوع حذائه مرايه والله شفت وجهي بي وهو لونه اسود

تعوذت من الشيطان واحنه هناك زلمنا كاتلهم الوسخ خو عمو حامد  وين وين يله يسبح

بس  عمو حسن ووليد  نظيفين بس مو مثل عمو النظيف ابد والله

والعطر العطر ! حكاية اخرى يطول شرحهها ....

ظليت استغفر بكلبي بعدين نطق ابو الهول

كال انتي ليش ماتغطين شعرج

كتله عمو والله اختنك منها عبالك مشنوقه واصلا اني حياتي كلها مشنوقه شنق بيها

ضحك ورجع ساق حتى ضحكه نازكه  ماادري مو مثل جماعتنا نكمز  من يضحك وريحة حلكهم عبالك تنين تعمي عمي

وصلنا ونزلنا وامشي وياه بصفه

اجت سيارة

سحبني من كف ايدي

و كال تعاي بابا لاتندعمين شيخلصنا من ابو سلام

ضحكت وسحبت ايدي من ايده

هو يمشي برزانه وخفه جسمه مرتب وقيافه عنده بس تعجبت ولايباوع على البنات وهمه البنات يخبلون اني فاكه حكلي عليهم  كل وحدة ولا الثانية يجننن من الجمال ظليت دربي مااشوفه واني بنيه

بينما هو  ولارفع عينه على وحده تعجبن كولش شعجب ابو نسوان ميباوع عليهن يمرن من يمه ولا يركز بوحدة منهن

هسه مصطفى ابو النسوان عيونه مثل المطيرجي هيج وهيج من يشوف بنات هذا ابد مو مثله

قاطعت هالتفكير وبعدته خليني اتهنى اليوم احلى يوم بحياتي

مشيت عبالك طايرة اباوع وابتسامة شاگة حلگي من الاذن للاذن حتى عضلات فكي تعبت من الضحك

امشي وادعي اللهم ضحك خير عليه

دخلنا لغرفة  العميد وهو كام رحب بي وكعد يمه

كاله وهو يأشر عليه هاي  بت عمي واريدكم تديرون بالكم  بالكم عليها

كال تدلل استاذ انت وابن عمك

العميد كال روحي استلمي كتب

طلعنا من يمه

عمو فيصل كال روحي واني هنا ابقى انتظرج

هزيت راسي و مشيت مسافة و درت عليه

شفته طلع جكاره وظل يشرب ....

مشيت واني كولشي مااندل جني تايهة

والولد يتفرجون لان مرحلة اولى يردولهم صيدة

اني  خفت ورجعت لعمو فيصل ولكيته بعده  يدخن  جكاير

من بعيد امشي وهو يباوعلي مركز عليه تركيز عميق بحيث خجلت من نظراته

ظليت امشي واباوع للارض  انوب بالشمس عبالك كزاز هالكد مايلمع هز راسه وعكد حواجبه متساءل

بمعنى شنو

كتله وافرك اديه عمو اخاف ووحدي

وبسرعة دمعت عيني لا اراديا

ضحك ويباوع بوجهي واني لويسوي هيج ابجي

كال بسخرية صدك عوود  ذيبه وضبعه وتخافين من الكليه وطكاهه ضحكة

اني سكتت ودنكت واعض شفتي ...

كمل كلامه كال امشي بابا امشي

مشيت وراه يمشي بخطوات واسعة واني كوة اريد الحكه

وهناك لكه استاذ يعرفه سلم عليه وطلب منه  الكتب وجابوها النا رجعنا بس هو يباوع عليه ويضحك عبالك واحد رابح جائزة

و كلساع يباوع ويضحك واني بس حرك  عيوني هيج وهيج وساكته فشلانه  من روحي

طول الطريق حاضنه الكتب وهو كل شوي يباوعلي  كتله بضحكة ها عمو شبيك تضحك عليه

وسويت نفسي مثل الطفل الي يريد يبجي

كال جدج خابصني بيج ضبعة وذيبة وسبعة ماتخافين من بندقية تخافين من الكلية

كتله عمو والله مكان غريب ومجهول بالنسبة الي

كال تتعودين بس قوي روحج صيري قوية بكل مكان مو بس ابيت جدج

هزيت راسي وكلت ان شاء الله ورمشت بعيوني

رجع طل بوجهي كال نعسانة دره ؟

خجلت لالا عمو بس الصراحة الطريق شويه يدوخ ؟

كال تنزلين اطلبلج اكل تشربين جاي خاف جعتي ؟

هزيت راسي وبعدت خصلة من شعري صارت بنص وجهي لا والله عمو شبعانة

وابتسمت

هز راسه وهمس براحتج

وصلنا لبيتنا تشكرت منه بالسيارة هواي

اريد انزل 

كال دره

انتبهت عليه نعم عمو

كال اي شي تحتاجين موجود ابد لاتتردين بس دكيلي تليفون

ابتسمت كتله تسلم والله ماقصرت تعبتك

ويايه اني

كالي سلمينا

ان شاء الله يوصل

نزلت من السيارة وهو حركها وراح

دخلت للبيت  فرحانه والدنيا شكبرها فرحتي اكبر منها بس طبيت بالطرمه انسحلت من السترة  حيييل

فزيت وعطت يمه لزمت الكتب قووي

واسمع شوكه تصيح باذني وتهز بيه  خيانة خيانة

ظليت  اهز راسي اكولها شنو شبييج وولج شوكة عوفيني

كالت عجبتج فكرة السندريلا وراح تنفذيها مووو بواكة بگتي افكاري

جريت نفس وسحبت روحي منها ماتقبل تهدني تصنمت بمكاني

كتلها يمعوده علمود الكلية رحت د عوفيني خل اطب

طريق طويل وتعبانة

كالت لا لا ياخاينة واني كتلني ابوي من وراج

هو ابوج دوم يكتلج وحتى يكتلني اني شعليه

كالت ولج  لان فتنت على امي وين خاتلة

كتلها شعجب ماشردتي

كالت مالحكت اشرد بس اني   عضيته بزره عضه من هاي التمام

خررربت ضحك كتلها ماتجوزين من سوالفج انت ولج ؟؟

كالت والله  جا شسوي تولاني كفخات واني كاعده بالكاع جاي  اباوع فلم مالحكت اشرد منه

وانوب  امي تكله حيل بيها رافگت دره كل سالفة غمه وتعبانة هسه اجيبها و اني من حلاة روحي عضيته من زره يم العيب

طكيتها ضحكة وسألتها شسوه من عضيتي

كالت  كام يصيح كلب الدنيا  ويسب بيه بت الكلب بت النعال يعني يسب  روحه هو مايسبني مدري شنو مستفاد

بس الحيزبون موجوده وسوي روحها طرشه

كتلها منو الحيزبون بعد ؟؟؟

جان تكول بيبي والله يلوكلها هذا الاسم ( اني صفنت والله شوكه تفتهم تجيب التشبيه بالضبط )

سألتها لعد ابوج يشبه منو ؟

كالت بعدني  محتارة بين اثنين ومن اختار اكولج

كتلها ووليد يشبه منو ؟

كالت وليد حلقوم حلوو حيل طبع وشكل

قربت منها بستها وكتلها اسفة بعد ما اعوفج واروح

هزت راسها بلا

كتلها اسفة

هم  ماقبلت

طلعت فلوس  وانطيتها

حضنتني وجان تبوسني 

كالت سامحتج بعد

كتلها تعاي انطب جوه ابدل ارتاح تعبانة هلكانة

كالت مو اني خاتله من ابوي بعده متوعدلي

كتلها انطب على كيف واكعدي بغرفتي ولاتطلعين واذا سألوا عنج اني مادري بيج وين اصلا

خلت ايدها على بطنها كالت ميته من الجوع مااماكله بطني تصوصي يبس افادي من الجوع

كتلها ولا يهمج انتظري خل ابدل واشوف الطريق نطب بغرفتي واجيب غدا من المطبخ نتغدى اني وانت بالغرفة

كالت انطيني بعد بوسة مدام راح تغديني

رحت شفت الوضع هادئ ماكو احد طريق مفتوح

دخلتها واني ابدل اباوع الشوكه مسكينه (شوكه اسمها اشواق عمي حامد سماها على الحب والوله الي بينه وبين هناء ا

  بسيط وجامبو الجبار من افكر ماترهم

عدها ضمور جزئي  بالدماغ هي اكبر مني بسنتين بس دماغها دماغ اصغر مني ب١٠ سنين يعني الي اذكره والي كالوا صار عمرها ١٠ سنين وهي ماتفتهم شي يعني حتى حمام الا طب وياها امها وطبعا هناء وحامد وين ينتبهون عليها كل يصيحوها مسودنه خبله لو يضحكون عليها

صاحب الضمور مايصير عنده فهم كامل او ادراك يتصرف مباشر بدون تفكير وطبعا جدي اخذها لطبيب بوكتها واخذوا علاج وتحسنت هواي بس يظل دماغها اصغر من اقرانهاب١٠ سنوات

ولان ذاك الوكت نادرة هاي الحالات  لان الضمور كثر حاليا بسبب اليورانيوم والاشعاعات النووية الي تصيب الاطفال حديثي الولادة

وبتطور الطب صار اكو  علاجات بس لازم عمر الطفل مايتجاوز الثلاث سنين بعدها صعب علاجه

لهذا الكل يحبها ومحد يزعل من تصرفاتها العفوية واحيانا هناء تستخدمها بخططها وتوكعها بمشاكل مسكينة وهي مرات تندفع بسرعة من اي شخص

رحت غسلت وصبيت غدا الي والها ورجعت للغرفة سالتها شوكة انتي ليش جنتي تتعاركين ويايه واني ولامرة مأذيتج ودائما اساعدج واكتبلج بالمدرسة رغم تتذكرين ومرة المعلمة كتلتني من وراج شافت نفس الخط واني عود انقهرت عليج لان دائما يوكفوج يم الكسالى واكتبلج واجباتج

ضحكت كالت اي والله  مو امي دائما تكولي باعي دره يحبها جدها وانتي محد يحبج وتوزني عليج وانتي هم حقيرة حيل حلوة وهدومج تخبل وجدي يحبج ويطلعج وياه واني محد يسويلي مثلج

ضحكت كتلهاا مو اني ماعندي اب وام انت عندج حامد وهناء

كالت جان احسن من هناء وحامد مال اخليلهم سم فار واخلص منهم وجدي يكوم يداريني مثلج ونرتاح كلنه شتكولين اسويها فد يوم ؟؟

كتلها عزاا مو اذا سويتي هيج  تطبين للسجن وحرام الله يذبح بالنار  هذول امج وابوج

كالت جاااني قابل  هسه بالجنة هم بالنار

بس اني ماريد انسجن

كتلها اتعوذي من الشيطان وتعاي ننام شويه على الجربايه والله تعبانة

كالت خاف اوسخها

كتلها لالا انت نظيفة ليش هيج تكولين على نفسج

كالت مو امي دائما هيج تكول عليه وسخة قذرة وخري عني

انقهرت جريتها وحضنتها ونمنا

غفيت من تعب الطريق

واشوف عمو فيصل بالحلم كعدت مخرووووعة وميتة خوف ... ريجي يابس

يتبع ...

الغلاف يخص  احداث البارت السابق 😍

بأيادي الجميلة 💜 أم عبد الرحمن ...

دعوة صادقة الي من قلبكم ممكن 🥺

محتاجة دعائكم بشدة 💜

لقضاء حاجة

احبكم هواي تعليقاتكم تجننن مثلكم طبعا اموت ضحك عليها انا ودرة 🤭😁💋