تحميل رواية «طَوفانْ رَجُلْ» PDF

السلام عليگمـಿـ

طوفان رجل

بارت 45

نورا ناصر

من الغير منطقي إنك تتغاضى عن أحاديث وتصرّفات مؤذية تجاهك لأجل المحافظة على خاطر فلان والهلع من خسارته، بل خسارته هي أول خطوة للتعافي، من يعرف قيمة ذاته أختصر على نفسه الكثير من الأذى.

اني جان لازم من  الصفعة الأولى الي وجهه الي فيصل

اعوفه وامشي وماارجع لأن فيصل انسان ما  يستحق فرصة ثانية

اكو هواي بشر يستحق فرصة بس مو علئ حساب كرامتنا وكياننا يستحق الي يغلط غلط ينغفر اما فيصل كل اغلاطه صفعات الي ومايتسامح عليها

‏

‏ قررت اشيله من بالي وافكر اتطلق منه ومن بين اسبابي

‏ هو نكرانه لأبني

‏

‏  ابنه الي مااعترف بي ولا سجله وهالشي مخليني حيل استهضم وانقهر لدرجة احس الغصة بنص روحي من اشوف يوسف يضحك ويبتسم ويناغي اكول ليش نكره ليش مااهتم اله

‏

‏شون يكدر ينكر  بزره ياناس من لحمه ودمه ليش مايريده

من اتذكر اهتمامه بيه بوقت حملي  انقهر اكثر ليش تحول اهتمامه لقسوة شلون يكدر يكون حنين وقاسي ويجرح بنفس الوقت

مرات مو بس المواقف القاسية تأذيني حتئ مواقف الحب والحنية توجعني واتمنئ امحيها باي شكل من الاشكال امحيها من ذاكرتي وللأبد

عمو حسن اقترح عليه اكمل دراسة وهالشي حيا بيه الامل

من جديد ، حسيت بلحظتها هو هذا الضوه الي بنهاية النفق المظلم الي ادور عليه

هو عمو حسسن  دومه منعزل وكله وحده ومشغول كمل الماجستير وصار استاذ بالجامعة بوقت مبكر من حياته ويحب شغله هواي يشتغل بشغف

بيبي دوم تلح عليه يتزوج بس هو رافض الفكرة

نهائي مرة من المرات كالي هو يريد يهاجر للخارج ، كلش محبيت يسافر عمو لان كلش احبه

من كالي علئ تكملة الدراسة،  جدي جان يصلي

‏بس كمل تسليم كلي منعولة الوالدين يا طايحة الحظ اكعدي واستري علينا فيصل  متسودن منج

‏

‏ كتله على روحه ليش متسودن جدي لاتخليني افشر وعمو حسن كاعد

‏

‏ جدي كال ايا برب،،،،وك يعني ماتستحين مني وبس من حسن تستحين

‏

‏كتله صحيح والله شكد عيب عمو حسن فيصل مالحك يشبع مني لان كبل صرت حامل وهسه من جبت يريد يكمل

‏

‏ وجان جدي يشمر عليه شحاطته جان تجي بجتفي

لزمت جتفي مصدومة ثواني

وباوعتله اضحك

كتله اصلا ولا توجع  واكمل دراسه بعد تريد شي

ظل يصفك ايد بايد

بعدين كال انتي هيج لسان لو من رحتي يم فيصل  صرتي ملسونة

‏

‏ كتله لا والله من الدنيا خلتني هيج

باوع لعمو حسن كاله بالله لاتخربها احنه شنو عم علينا غير الكلية

كتله جدي اريد اطلگ من فيصل هاي بالاضافة لقرار تكملة دراستي

كال عوفيها هاي السالفة هسه

عمو حسن كال درة حسبي حسابج ونظمي وقتج بس يبدي الدوام اجيبلج استمارة اعادة قيد بس يوسف شلون وين تخلينه

حكيت راسي ظليت افكر هو الكل يحبه ويداري

خاصة  عمه امل اكيد تقبل تخلي يمها والبنات يحبنه ورنا موجودة بالبيت وجدي وكلهم يحبوه حتئ عمو فلاح يحبه عبالك عوضوه شويه عن حب ابوه ولو حب الاب ميتعوض

خو وليد يموت عليه كل ميفوت للبيت جايب وياه لعبة لو لبسة لو حاجات ياكلها خاصة هو يحب الموز لذلك مينكطع الموز من بيتنا

كمت من يمهم واخذت يوسف ويايه وحلقت بأحلامي من كال عمو حسن اكمل فرحت حييل وانتعشت ...

طبت رسل عليه  كالت درة درة تليفون الج

كتلها منو كالت  احمد

انطيتها يوسف هو يحبها بس شافها فرفح عليها يريد ينزل من الجرباية اخذته وطلعت

رحت للتليفون رفعته كلت الو اجاني صوت احمد

كال شونج دره

كتله اهلا وسهلا ليش كاطع

‏

‏ كال مو ابو  دريد مريض (عرفت قصده علئ فيصل )

‏

‏كتله بسخرية  سوده عليه وضحكت

‏كتله  شونك انت

‏

‏ كال ابن اخوي شونه

‏

‏ كتله يخبل كبران

‏

‏رد والله مشتاقله اريد اجي اشوفه

‏

‏ كتله اي تعال ترئ راح يبدي ينساكم انت ورزان

‏

‏رد شوكت ترجعين

‏

‏جاوبته ارجع شنو شبيك احمد هيج ماعندي كرامة وارجع

‏شنو مو انته فكيتني منه

رد ندمان هو وبس يجر حسرات ويدخن البارحة اني مودي للمستشفئ

ضحكت اي حوبتي اللهم لا شماتة

كال لا درة لااا اخوي هذا لتحجين هيج كدامي ورجعي ترئ يحبج والله

شبيك انت احمد ترضاها لرزان هيج واحد يسوي بيها وترجعله

كال طبعا ماا اقبل وهاا للعلم ترئ طلق سلوئ حتئ قبل متخلص المدة

كتله وليش داتكولي اخباره ترئ ميهمني

مادري ليش بلحظتها حسيت فيصل يمه ويسمع كلامي بدخلة جدي عليه رفعت راسي باوعلي،  فر ايده بمعنئ ويامن تحجين

كتله هذا احمد جدي

كعد يمي عالكرويته واني ختمتها ويه احمد

جدي تحسر و كال حسبته فيصل

هزيت راسي بمعنئ لا ودنكت

‏خله ايده علئ چتفي كال خليج عزيزة بويه ولا تتنازلين

‏وابد لا تحاچينه لو حاول وياج

رفععت راسي باووعتله لااا جدي ابد والله اصلا اريد اتطلق منه والله ماريد ابقئ علئ ذمته جدي فدوة طلگني منه

سحبني لحضنه وباس راسي كال بويه ماريدلج الشماتة وفيصل انه اعدله الج

اخذت ايده وبستها وهزيت راسي برفض بس شفت ايد جدي ترتعش سكتتت ماريد اقهره بكلامي

حاولت اغير الموضوع

كتله جدي كلش حابة اكمل دراستي

كال هذا هو يجرالج بس يبدي الدوام خلي حسن يسجلج بس بويه عن المشاكل هالمرة

جاوبته اطمئن واني تعلمت من اخطائي بس الشهادة الي ذخر واني اريد احقق انجاز لنفسي

هز راسه وكال الله كريم بويه الله كريم

وراها بكم يوم اجوي نسرين ورزان واحمد تفاجئت من شفتهم وفرحت بيهم كولش

رزان كالت بست ايد امي ورجلها بس لحتئ تقبل اجيج

غمزت الها وهي ضحكت اخذوا يوسف فرحانيين بي ويبوسونه

نسرين كالت راح اسافر وجيت اشوفج

كتلها شلون راح تفاركين امج

ردت ماما تكول راح تتبعني كتلها اني اصلا منهزمة منكم وضحكت برقة

وعيونها مدمعة هي كلش رقيقة وتنحب

احمد جايب وياه كاميرا وظل يصور يوسف ويصورنا كلنا

جلبت بيهم عالعشا تعشوا وودعتهم وبالاخص نسرين وراحوا

وراها خابرت رزان كالت سافرت نسرين وامها حيل مقهورة عليها وتبجي هي وحيدة امها المدللة

تحسرت اووف شكد حلو الوحدة عدها ام تحبها باوعت ليوسف بحضني جان يضحك كتله انت هم مثلي من تكبر تتحسر علئ اب بسته علئ جبينه ودمعت عيني

وراها تكررت الاتصالات من احمد ورزان واحس فيصل يمهم ويسمع صوتي جنت اتخيل شكله كاعد ويدخن ويسمعني جنت اختم بسرعة واضطر احجي وياهم مجبورة شويه واسده اريد احرمه حتئ من صوتي ومرات هواي ماارد اتحجج مشغولة

مرة من المرات احمد كلي اكو واحد يريد يحجي وياج

سويت نفسي عود مادري كتله منووو

واجاني صوت فيصل متردد درة شلونج

كتله مع سلامه مااكدر اكسر حجاية

وغلقت التليفون ماانطيته مجال ابد ولا اريد انطي بعد ابد واصلا جاي افتح موضوع الطلاق وي جدي ويسده وي عمو حسن وهم يسده يكولي يم ابوي مو يمي واني ايد وحدة وماتصفك 

ورا ماسديته خابرتني رزان وحجتلي

كالت  والله العظيم عيون فيصل  دمعت وشغل جكاره وعبالك. مو يمنه شكد حجينا وياه

كال جدها قافل شلون بيه واني اعزه واحبه ومااريد تصير مشاكل واخسره

كتلها يعني شنو هو تواصل ويا جدي!!!

كالت اي دوم يخابره ويتوسل بي يريد يرجعج بس جدي قافل

وكملت بتوسل احجي وياه انت درة ورجعي

كتلها بعصبية تحجين صدك رزان لو ما انت الي شلتي شعري الي تكطع بيده من الكاع

هي سكتت كتلها  رزان اسألج سؤال وجاوبي بصراحة

اذا تزوجتي وزوجج هيج سوا بيج مثل ماسوا فيصل تقبلين ترجعيله

هي سكتت

كتلها معناها انت ماتقبلين علئ نفسج وشفتي بعينج وحشيته وياي ولج كتلني كدامكم كلكم لااستحئ،ولا خجل دااس عليه ومشئ ليش الي ماتقبلونه لروحكم تقبلونه لغيركم ليش ماتخلين نفسج مكاني هذا مو انصاف ترة

ردت خجلانة والنبي حقج بس دااشوفه متمرمر وندمان انطي فرصة اخيرة

كتلها ماكو ولا نص فرصة ولااابد بعد وخلي يعيش بحسرته يستاهل

ردت بصدمة ماتوقعتج هلكد حاقدة يمعودة ابو ابنج

كتلها وهو معترف بأبنه! !!شبيج رزان لو ماتعوفين كل شي انت

تنهدت كالت داانقهر عليه هواي

يمعودة يستاهل من ايده لتنقهرين ولا شي

وضحكت

ختمتها وياها

‏

رنا

صادف اليوم حنه شوكة وكلنه مخبوصين بيها جانت دره كاعده يمها وتعلمها

كالت الها .. شوفي عيني من تتزوجين عند بيت عيالج مو تصيرين خبله خليج ثكيله ورزنه حتى يحبوج ويحترموج

جاوبتها اني .. لا خليها على طبيعتها هم اكيد راح يحبوها هيج يعني ماكو داعي تتصنع اذا هي هيج طبعها

دره .. لا اني مو قصدي تتصنع وانما مو تظل تجفص مثل ما هي حاليا كاعده تجفص على امها وابوها هم الناس ما ترضا

شوكة بتأييد .. اي والله هم صدك مو حلوه اكعد ازكط على الوادم وجفص عليهم لازم احترم نفسي واثقف روحي

ولو اني مثقفه اصلا ما اكول قوري اكول باتول

عقدت حواجبي مستغربه وباوعتلي دره بنفس النظره كالت .. باتول شنو

رفعت اكتافي بعدم معرفه والله ما اعرف لشوكة ومصطلحاتها منين تجيبها

ضحكت شوكة وهي تكول .. لج عيني باتول معناها قوري هاي بلغه العجل وجا والدا بلغه داده وماما وعيني گلبي تخص البغدادين الساكنين بدول الجاور شفهمجن انتن

وهااا ما اكول طاسه كله اكول ورشنه وهاي باللغه التركيه هي خامطينها منه الاتراك

كل شي اعرف ماكو مني اعرف كل لغات العالم احجي بيهن بس غير محد منطيني مجال ومكتشفني

ماكو غير حسيون اكتشف ابداعاتي الثقافية همزين اجه فدوه شحلاته وشحلات عيونه الوسيعه وجسمه الرشيق

ضحكنه عليها وعلى مصطلحاتها وعمتي اخذتها وراحت للصالون حتى تمكيجها وتلبسها البدله

ظليت اني ودره بالبيت ننظف ونكمل شغلنا واجت هم ناس تغدو يمنه

دخل وليد وهو شايل علي صاح عليه.. رناااا رنا وينج

طلعت عليه بسرعه ولزمته من صدره مخليته يدخل كال .. شبيج خلي ادخل

ابتسمت بوجهه .. لا عيب ميصير لان دره جاي تنظف وياي وممحتشمة

رد عليه ببرود .. عادي شنو قابل اول مره اشوفها بنت عمي عشت وياها عمر واعرف عنها كل شي

ابتسمت واني اخفي غيرتي .. ممكن تطلع شويه وتلزم علي بين ما نخلص شغلنا مو حلوه تفتر فوك راسنه ومنعرف ننظف

عقد حواجبه وهو يباوعلي كال .. احجي شعندج ليكون متردين اتواجد بالبيت لان دره هنا

ضحكت .. يعني هسه اني اذا طلبت منك ما تدخل لان دره موجوده انت مراح تدخل ؟

جاوبني … وانتي شكو تشككين ويروح بالج لبعيد دره ما بيني وبينها شي اختي هي وعلى ذمة رجال

رديت عليه بحزم .. وانت على ذمتي تفضل اطلع برا من دون مطرود لو تكعد وتسكت بغرفتك وما تطلع منها وانت اختار واحد من الخيارين

ضحك كال .. شنو هاي صايره وكحه ولج منين متعلمة جنتي بزون مغمضه هسه متفرعنه

جاوبته بغرور .. والله انت وامك هيج يالله يجي وياكم وبعدين هنا اني قررت انتبه النفسي احسن ما ظاله الة تفريخ عندك افرخ وارجع ليوره اييع لعبت نفسي

عفته ومشيت وهو يباوعلي مستغرب من وضعي بس خلي يولي طكت مرارتي منه ومن اهله

رجعت انظف ويه دره وكملنه رحنه نبدل ثنينه

دخلت الغرفتي  بعد ما سبحت هو جان طالع برا بدلت لبست فستان بيجي حلو جان موديله وشسورت خليت مكياج

باوعت الروحي جنت حلوه طالعه قدمت خصلات شعري الي مصبوغه بلون اشگر غامق وجان حيل لايك ويه معانيي وشكلي

ابتسمت بأعجاب.. ما شاء الله طالعه حلوه عين النبي تحرسني

دخل ابني علاوي كال .. الله ماما حلوووه

ضحكت كرصت خدوده وبسته كال .. ماما تزوجيني

متت من الضحك عليه وحضنته .. يروح امك انت شلون اتزوجك ؟ انت غير ابني وبعدين وليد غير ابوك وهو زوجي

صفنت عليه وحجيت .. هو ابوك وييين ؟

رد عليه بطفوله .. ويه دله بالمطبخ ( ويه دره بالمطبخ)

بلعت ريكي الجاف ونزلت علي بخيبة امل طلعت بسرعه وكلبي يرجف

وفعلا من رحت شفته واكف وياها جانت حلوه مثل الفراشه الناصعه جانت اميره كاشخة ومبدله وهو جان ومرتجي على الكاونتر وهي الي جانت تحجي ما عرفت شنو تحجي بس احس كلبي طلع من مكانه

تقربت اكثر وسمعتها تكوله.. ندمت على اشياء هواي هواي يا ولييد وخربطت حياتي بيدي وما ينفع الندم والله

رد عليها بتنهيده طالعه من اعماق گلبه كلها .. عرفت راح تندمين لان روحي لحد الان متعذبه

دخلت عليهم بسرعه هو ارتبك حييل وحتى هي دره ارتبكت وصارت متعرف شتسوي

ابتسمت بوجههم عكس تيار الحزن الي اجتاح روحي كتله .. هااا اسفه اخاف كطعت سوالفك

مشت دره من يمي وطلعت وهي تكول .. لا يابه يا سوالف ماكو سوالف رجلج يسولف عن فيصل واني جاوبته همزين اجيتي خلي اروح اليوسف

ابتسمت بوجهها وهي طلعت باوعتله ورفعت حاجب هو ارتبك كال .. ردت مي ودخلت المطبخ ما جنت اعرف بيها

رجعت باوعتله بنص عين وضحكت باستهزاء

تقرب مني وهو يشم بشعري كال .. طالعه تجننين

درت وجهي عليه مره ثانيه ودفعته حييل وشديت على شفايفي بغضب .. انت صدك متستحي وما عندك خجل

رجعت رفعت اصبعي بتهديد .. بسيطه بسيطه خلي يخلص عرس شوكة ويصيرر خير

لزم ايدي بغضب وهو يكول .. شسوين مثلا تطلبين الطلاك لو ترحين لاخوج الشفيه حتى يرجعج ثاني يوم اليه وهو الممنون

لمعت عيوني بالدموع حسيته طعني بخنجر مسموم شكد صعب من يعيرني بسوالف اخوي واهلي اصعب شي يحسسني بضعفي وذلي اله

وفعلا اخوي ذلاني واهلي من يوم الي خلوه يدوسني هو واهله ومحد حرك ساكن منهم

جابته بقهر .. شوووف لا اخوي ولا امي ولا ابوي ولا اي واحد من اهلي الي ذلوني الك ولاهلك ما اروح الهم

انهزم باليله ضلمة واخليك ما تعرف ليلك من نهارك لا انت ولا اهلي تلكوني بعد ما اريدك ولا اريد اهلي شوفتك بالنسبه اليه موت

سحبني من شعري حييل وهو يعت بيه .. ولج حقييره منين متعلمة هاي السوالف لج رنا صايره حيل عرمة وما تنجرعين انتي بس اطلعي وشوفي بالقران دمج الطخة بصدري وسام واتباها بيه

حجيت من بين اسناني .. تدري صايره ما اطيقك احسك اناني جذاب منافق كل شي سلبي بيك

باوعلي بخدر وهو يكول .. واني صاير اطيقج اكثر من قبل وشكلج يجذبني

حرك گلبي فوك ما هو محترك تقرب مني راد يبوسني دنكت راسي اجت بوسته بشعري

دفعته وطلعت من المطبخ بسرعه وملهوفه واسمع صوت الهلاهل اجت العروس اجت العروس

دخلت الغرفتي ودخلت بنوبة انهيار فضيعه وعمتي تصيح .. ولج رنيوه والله متت منج كارصه بالغرفه عساها احتركت بيج وخلصت منج ومن ضيمج والله الا ازوج وليد وكسر ضهرج

عفته تحجي الوحده اجت دفرت الباب حييل مسحت دموعي وعدلت مكياجي وطلعت ضايجة حتى ما اعرف شنو اسوي

وعمتي تحجي وهو كل شويه دخل ورمقني بنظراته وعرف بيه حييل ضايجة يصفن عليه وما يعرف شيسوي احسه محتار بيني وبين حبه

وهذا الشي متعبني ومضوجني احس نفسي هامش بكل الحياة مو بس بحياته

دره

من بعد ما خلصنه تنظيف اني ورنا طبعا  اني دوم اساعدها لان هي ناعمه مو مال كراب وهسه جايبه فاحب اساعدها

كملنه شغلنه وكل وحده راحت تبدل هي بغرفتها واني بغرفتي القديمة

من كملت طلعت للمطبخ دا اشرب ماي وهماتين ردت اسوي اكل ليوسف

بعدني دا اباوع بالكلاصات وشفت وليد دخل كال بارتباك .. ها دره شلونج

جاوبته واني متوتره وبصراحة خايفه من زوجته تشوفنه وتفهمنه غلط وهي تعرف عنده مشاعر تجاهي فاني ما ردت تصير مشاكل

رديت .. الحمدلله بخير

صفن بوجهي باستغراب وهو يكول .. ما اشوفج بخيير ابد احسج تعبانه احس ظهرج مكسور واحسج متندمة وحياتج مخربطه

نزلت عيوني وتنهدت بللت شفايفي بحيره ما اعرف شنو اجاوب وشنو احجي احس فعلا مكسور ضهري وخاطري

رفعت راسي شفته ينتظر مني اجابه تنهدت مره ثانيه وجاوبته .. الله كريم يا وليد وشينفع الندم الفاس وكع بالراس

رجع سالني بترقب وكآن يريد بس مني اجابه كال .. ندمتي على فيصل

صفنت بوجهه ومجاوبته فكرت معقوله لان رفضت وليد وحركت كلبه هيج صار بيه وتخربطت حياتي وفعلا ندمت على فيصل بكد شعر راسي

سألني مره ثانيه.. ندمتي؟

جاوبته بصدق …ندمت على اشياء هواي هواي يا ولييد وخربطت حياتي بيدي وما ينفع الندم والله

رد عليه بحسره واضحة على معالم وجهه…عرفت راح تندمين لان روحي لحد الان متعذبه

انصدمت من كال هيج يعني هو شنو لحد الان ما كطع الامل بيه لحد الان روحه مفرفحة عليه

زين هو مو تزوج مو زوجتة ممقصره وياه ومحد تتحمل تعيش وياهم وعاشت وصبرت الخاطره معقوله هيج يجازيها

زين شنو فرقه عن فيصل .. فيصل ما يملي عينه بس التراب وكذلك وليد. ما يملي عينه بس التراب وثنينهم يدورون نسوان

بس اني طركاعتي مزواج ويبدل النسوان مثل ما يبدل سيارته و وليد ابد ما تزوج على رنا حتى لو صحت اله فرصه

دخلت زوجته وصابتني بحاله هلع وذهول حسيت نفسي مسويه جريمة خجلت حيل من رنا حاولت اصلح الموقف ما كدرت فخليت وطلعت عفتهم الوحدهم

ماكو شويه واجت شوكة ورنا ما طلعت من غرفتها عرفت تعاركت هي وزوجها

ظليت كاعده يم شوكة ذبت لحم بالركص والبدله مالتها محتركة كتلها .. يا شوكة بدلتج محتركة

ردت عليه بعدم اهتمام.. اي ادري هذا الكلب ابن السطعش كلب انطانياه محتركة بس عادي المهم نتزوج ومو حتى بيوضي يبست ماكو بيضه صاحيه احبل بيها

ضحكت عليها واجت العالم لبسوها الذهب وهي مستمره تهز وتركص وبصراحة طالعه جنها مهرج امها ما عندها ذوق تارساتها لمع عبالك قوس قزح

والله عرفت هما هيج تصخم شوكة وتلطمها تموت على الحمره الطوخ وحاطات الها كريم عبالك صابات وجهها صب مطلعاتها سعلوه

انقهرت عليها كلت باجر اني اروح وياها واتعارك ويه ابو البدلات شنو منطيها هيج بدله محتركة وقديمة باجر اطلعها تجنن

ثاني يوم رحنه اني وياها للصالون بالعرس ورحت فعلا تعاركت ويه ابو البدلات وانطانه بدلة تجنن حيل حلوه وتاج وملحقات العروس

وخليت ام الصالون تخلي الها مكياج هادئ لان كلتلها البارحة قلدو عليها وذموج وكتلها مالج شغل بيها خليها تحجي لوحدها انتي شوفي شنو يلوك عليها خليلها لا تأخذين رأيها

وهي شوكة تدك وتلطم تريد اله لمع وازرك واخضر وتعاركنه هناك وعضتني بيدي مجلوبه مو عروس

اجينه للبيت وهناء تحجي معجبها المكياج تكول مو وجهه عروس وين المع وين الاحمر والازرك طالعه جنها شبح ما بيها اللوان هواي

هزيت ايدي وطلعت من طلعت شفت وليد واكف طلع من غرفته ورنا لابسه بنطرون وقميص وتلبس بسوارها بس متكدر

تقرب منها ولزم ايدها بحنيه راد يلبسها السوار هي عاطت بيه بعصبيه وردت عليه .. عوفه مالك شغل اني اعرف شلون البسه

رفع حاجب ورد عليها.. لا بالقران حالتج مو طبيعيه

جاوبته .. خليت الك الممه والحليب وكل شي دير بالك على ابنك بين ما اجي من عرس اختك هم اخاف على الولد يصير بيه شي شيخلصني منكم اخذ بس علاوي

رد عليها بسخريه .. اي وبعد شسوي اكنس الغرفه لو اعزل الملابس هاي تاليها اخبط مميات واغير حفاظات

مشت عنه وهي تحرك شعرها بغرور.. والله محد كلك تزوج وخلف

جاوبها بغضب .. افاااااا تعالي للعرس ما ترحين اكسر رجلج والله

وكفت ودارت وجهها عليه كالت .. الرجال كلمته وحده وانت كلت اروح لا تغير رايك

جاوبها .. بسيطة ترجعين لو مترجعين اله اخليج تخلفين الثالث

ضحكت وردت عليه.. عادي هم انت تحتار بيه شدخلني بولدك

خليت ورجعت واني اضحك والله عجبتني رنيوه صايره شرسه ومتغيره شخصيتها صايره تعرف شلون ترد وتثير مشاعر وليد وتخلي يثور عليها

علاقتهم صايره بيها اكشن خلي حتى يلتهي وياها ويحل عني

كملنه وهي اجت لبست حجابها ولبست عبايتها وطلعنه للزف زفة شوكة مشي يعني احنه مشينه شارعين وبس السياره مال عروس

جانت زفتها تموت ضحك لان هم ما جابو سيارات وكالو قريب عليمن جايبين وشوكة جنها ام كلثوم كاعده وتهفي على روحها جايبه مهفه من هاي النايلون وفرحانه بيها

واخيرا انحلت عقدة شوكة وتزوجت حسوني وماكو احنه جنه كاعدين وما نسمع الهلاهل

عزاا لج شوكة انطي مجال شبسرعه سلمتي الاول والتالي يا ام بيوض يابسه

ورا ايام من عرس شوكة  سمعت فيصل عدنا كاعد بالديوان معناها تصالحوا هو وجدي

ظليت رايحة جايه اطكطك بأصابعي واباوع من الشباك اريد اعرف شنو يدور بينهم

طلعت بيبي صبرية شافتني عرفت جاي اراقب الوضع ومتحرمسة

ظلت تحجي هاا حنيتيله مووو تردين ترجعين وياه وظلت تفر بيدها

كملت درب الچلب عالگصاب

ومشت

عفتها تحجي هي تحجي وتسكت مرة جبيرة شنو اريد اسويلها اخر همي

منتظرة الغضب مالتي

انتظرت جدي يجي ويحجيلي كل شي

بس هو دز عمو فلاح وكاله خلي يحضرون غدااا

معناهه فيصل باقي عالغدة يمنااا ، طبخت هناء

الغدة وامل ورنا عاونوها واني ابد ولا لزمت ماعون مااشتهيت حتئ،طبخ مااشتهي امد ايدي وياهم واخليله

اللتهيت اسكت الزعاطيط جهاال رنا ويوسف توليت امرهم

ولمن طلع شفته من ورا االبردة عينه عالبيت ويتفحصه شباك شباك،  مايدري اني ورا واحد منهم اختلس النظر اله

بس حرك سيارته وراح طلعت للديوان يم جدي فتحت الباب وفتت بسرعة وسديته وراي كتله هاا شراد فيصل منك

يتبع

السلام عليكم

طوفان رجل

46

أنا شخص قد تعثّر واستقام، انحنى واعتدل،انهار واستقوى، ثم صار يعرف حدوده مع الحياة والناس،متى يُواجه، ومتى ينسحب، ومتى لا يلتفت أبداً.

ركضت لجدي بس طلع فيصل رحت كعدت يمه جان جدي مبتسم ويباوعلي

كال هاا ماتصبرين بعد مو؟ تردين تعرفين شصار بيننا

رديت ها اي اي ما اصبر جدي شنو حجيتوا شنو اتفقتوا

‏

‏جر حسرة ومدد رجليه  كمت هميت روحي وساعدته حتئ يتمدد لان مابي هو الرعاش تعبه وحتى عظامه تصلبت

‏

‏كال تدرين بويه من خابرني كال  اريد اجي

‏ماكدرت اكله لا مو من طبعي ارد الخطار

‏

‏هو اجه دخلته للديوان وكعدنا دزيت على جايات

‏وهو عيونه على الباب

‏

‏ كتله  خير ابو يوسف ?

‏

‏ظل صافن وهاي اول مره يسمعها مني

‏

دنگ وبتنهيدة  ‏كال اني غلطت وجاي ارجع درة

سكت شويه وعصر بأصابعه حيل كمل كلامه عيونه على اصابعه

كال " وابني "

   رديت عليه انا ماعندي مره الك انا منتظرك تطلگها

   ‏

هز راسه قوي وكال وهو مايحط عينه بعيني

   لا مااطلكها لو تنكلب الدنيا  مرتي واريدها ابوسلام لاتخلي الموضوع يكبر

   ‏

   رجعت ظهري وكتله وانا مسيطر

   ‏درة  ضاكت مر وياك وتعبت عبالي تصونها باوع خاف عبالك يتيمه ومالها احد لالا انه درع حصين واحميها من الدنيا وسهامها وانت جنت واحد منهم

   ‏

   ‏جاوب مصدوم  يعني شنو ابو سلام هذا اخر كلام عندك

   ‏

   ‏ كتله اي انتظرك تطلكها احسن حميتها من عدي وزواجكم جان اتفاق وخلصت المدة من زمان جزاك الله خير ومامبري الذمة من مديت ايدك عليها وهذا فراق بينها وبينك

   ‏

   ‏جاوب  واني اريدها وماطلك و انتوا لعبتوا عليه وانت بالذات خليتها تعوف المانع وتخلف ودزيتها لعمامها وانا ماموجود والحرمة مايصير تطلع من بيت رجلها وهو غايب لو ما انت زلمة ومن هذا المجتمع وتعرف هاي العادة زين

كتله هذا مو حجي فيصل انت تخوط بصف الاستكان وماتباوع لاغلاطك وزلاتك، هذا كله مايبررلك الي سويته بيها

‏

‏انت  تزوجت عليها وانه كلت ميخالف هذا طبعه وانه اعرفنه من گبل مزواج يتزوج ويطلك وانطيته بتي

‏

‏  بس مال تضربها و تدميها وتتهمها لا هنا انا مااقبلها عليها واخليلك حد وهذا الحد هو الطلاگ حتئ تعرف خسارتك جبيرة

‏

‏ كال بنبرة تهديد  هااا هيج صارت ميخالف ابو سلام يصير خير

‏

‏كملت كتله ولاتعب نفسك وتدز ناس ولاساده الموضوع منتهي درة جوهرة وانت ماصنتها بتي من الحراير موش من الجواري يافيصل

‏

‏

هز راسه وطلع فلوس وهو معصب

كال هذا مصرف درة هي وابنها

ومد ايده الي وبيده الفلوس

رجعت ايده  و كتله  لاتكلف نفسك درة غنية انت تعرف ابوهه شخله الهه ومو بعازة فلوسك

هنا حسيت عيونه صعدت لهامته

بلع ريگ گوة وكال هي تريد تطلگ لو هذا قرارك انت

كتله وانت شتتوقع يفيصل بعد الي سويته بيها وهي اصلا شكللها تكول تم وانت تعرف هذا الشي زين

هز راسه وكال سهلة يعني تريد تتطلگ

لزمت عصاتي وضربتهه عالكاع وكتله اي تريد

خله وكام

كتله جدي يعني شنو انت مو ماتقبل اتطلگ منه

كال اي ماتطلكين انت منو الج ومحد يكدرلج ترئ بس فيصل هسه مو هذا عمج حسن الي تحبي وتكولين يوكفلي ويوكفلي جاي يمشي بجوازه ويريد باقرب فرصة يطلع برئ العراق ويتركج هم فكر بيج بس كليلي هم كال هاي اليتيمة منوو الهه

ظليت ابجي والطم وادك وجدي يقنع بيه كتله والله ماابقئ هنا اروح لعمامي اخذ ابني واشرد منه

كال وهو تعبان وعبالك مايلوحج فيصل ويتبعج

كتله اي والله خلي يجي عمامي يوكفولي

رد عمامج وياي ومثل رأيي ومايردونج تطلكين

واحنه نتناقش اني وجدي ودگ التليفون

شاله جدي وباوعلي عرفته فيصل

ركضت خليت اذني سمعته يكوله

درة يمك اريد احاجيهه

حسيته من نبرة صوته معصب حييل

جاوبه جدي هاي هيه تسمعك

كال بحزم وعصبية درة انت تردين تطلكين

كتله بصياح اي طلكني طلكني مااريدك الا اروح للمحكمة وارفع عليك دعوة

جاوب انجبي واكلي تبن انت اوصلي للمحكمة الا اكطع ظهرج وهذا جدج يسمع طلاك ماكو افتهمتي لو لا

وسد التليفون بوجهي

طلعت من الديوان منهارة ورحت لغرفتي اكمل بجي ماريد ابجي كدام جدي يتأذئ ويتعب اكثر مما هو تعبان

طبت رسل شايلة يوسف هو شافني شمر روحه عليه

اخذته وابوس بي واحضن وهو عينه علئ عيوني ووجهي الغرگان بدموعي

محتارة بزماني وابني شنو مصيره فكرة ظلت تدور براسي

اشرد منا واروح لعمامي

خليت ابني يم العابه وفتحت الكنتور وظليت اباوع علئ هدومي شوون اشرد هسه والليلة والله كون اسويها

غمضت عيوني وصوت جدي يحجي يم باب غرفتي ويه وليد

هنا ضعفت شون اسويهه وجدي مريض جدي نقطة ضعفي ماكدر لاا مااكدر

لااكدر اعوف جدي ولا اكدر ارجع لفيصل عبالك معلكة بين الحياة والموت

رحت كعدت يم ابني واباوعله وابوسه هو عبالك الضوه الوحيد الي بحياتي

اندكت الباب ومسحت دموعي حييل واسمع صوت وليد يم الباب يصيح درة وينه هذا الحقير طلعي مشتاقله

يقصد يوسف

ويوسف بس سمع صوته ظل يكركر ويزحف وهو كاعد يريد يروح صوب الباب يريد يطلع لوليد

رحت فتحت الباب اله اريده يتقوة علئ الزحف ما شلته

هو شاف وليد وظل يحاول يزحف باتجاهه

ووليد كمبص كدام الباب ومد اديه يسويله تعال

وعلاوي ابن وليد يقلد ابوه هم يسوي مثله ويوسف شارك حلكه ويضحك الهم

هو زحف خطيه وتعب يباوعلي ويباوعلهم

كام وليد يريد ياخذه

كتله واني جان صوت تعبان لان باجية قبل شويه

كتله عوفه وليد خلي هو يجيكم

ومن حجيت وليد صفن باوعلي بعدها باوع ليوسف

و كال لتشلعين گلبه درة خطيه

كتله لا خلي يستقوي حتئ يمشي بسرعة

رد وعليمن مستعجلة خلي براحته لو تريدي يكبر بسرعة

كتله واني الزم يدة الباب وبحسرة اريده يكبر حتئ يصيرلي سند تعبت

كال لعد وجدي واني وحسن وين رحنا احنه كلنا سندج درة

باوع بعيوني ثواني ودار علئ يوسف

قبل ليوصل للباب دخل وليد واخذه يبوس بي وعينه عليه

درت وجهي اريده بس يطلع من يمي

ياربي خطية مرته احسها تغار هي هم عدهه مشاعر وحقها بكولشي

رغم تحبني حييل وتحبه ليوسف بس بنفس الوقت هذا رجلها وتعرف بمشاعره تجاهي وصعبة عليها تتقبل هالموضوع

غيرها وحدها ماتتحمل ابد وتسوي المستحيل وكلشي تسوي حتئ ميحجي ويايه كلمة

بعد مو وليد وهو يحب ابني ومداريه عبالك واحد من ولده وماكو فرق بينهم ابد

قرب يمي وليد كال شبيج درة صوتج مايعجب وعيونج حمرة انت باجية

جنت بصف الباب حاولت اطلع مابقئ وياه بالغرفة وحدنا

كتله واني احط عيوني بعيونه

يعني ماتعرف درة هي يايوم ارتاحت يايوم ما بجت

كال شبيج هم فيصل لو امي وجدتي وياج ?

جتي رنا شايلة ابنها الصغير والله حسيت بنظراتها اخترقت گلبي اعرف افسرها وماعرف بيها فضول بيها ترقب بيها خذلان وغيرة

غمضت عيوني ثواني وتحسرت كتله سمعت من جدي عمو حسن يريد يسافر ويستقر برة

كال اي ويريد يخطب مهندسة وياه همين اليوم حجالي بس جدتي ماقابلة وزعلانه عليه انت عبالك مو ويانه درة يمعودة كافي متقوقعة علئ روحج وتنوحين شوفي حياتج شوفي الي حواليج وين صاروا

مسحت وجهي هو طلع علاكة وانطاهه ليوسف جان بيها العاب ميكي ماوس باوع لرنا وانطاني يوسف وراح

من راح رنا كالت درة اريد افوت اسبح بلكي تخلين الجهال يمج ديري بالج عليهم

هزيت راسي واخذت الجهال طلعنا برا بالبستان الجو حلو ظليت افكر بكلام وليد صدك شدعوة هلكد بس انحب وابجي، خلي افاتح عمو حسن بموضوع الجامعة مرة ثانية خاف نسئ

هو هالايام ظل يحب،والحب الاعمئ وناسي كل شي والله توقعته يحب من صفناته والتليفونات وهسه وليد اكد شكوكي

ظل يبجي ابن رنا الصغير مخليتهم اثنينهم بالعربانة وهذا يوسف يكرص بخده ويضوجه

كمت خليت يوسف وحده بالعربانة واخذت الصغير وعلاوي،جبير كل شوي اصيحله لان يروح بعيد بالبستان واخاف عليه

ضوجه كولش شوكة ماخذة البيت كله وياها جانت مونستنا بسوالفها

واني كاعدة بالبستان واشوف مصطفئ جاي من بعيد

لابس دشداشة وبيده السبحة ومبتسم بس شافني من بعيد ابتسم دنكت واعصر باديه

اجه قريب مني سلم شلونج درة هزيت راسي الحمدلله

كال سمعت باخبارج

رفعت عيني بوجهه كتله بتساؤول  اي

رد بحسرة ليش هيج يا درة والله حرام ضيعتي روحج وضيعتيني وياج يعني مالكيتي غير فيصل توافقين عليه وتتزوجينه والكل يعرف فيصل شنو

باوعلي يشوف ردة فعلي،

كال يعني صحيح الي سمعته عنج

جاوبته بنبرة شبه عصبية وانت شنو سمعت

كال بتنهيدة سمعت فيصل يريد يطلكج ومامعترف بابنه

كتله حجي نسوان هذا لاتصدك كل شي ينكال ابني ماعليه واذا نريد نطلك شكو بيها مو اول اثنين ولا اخر اثنين يتطلكون

تقرب مني كال صراحة هاي الاخبار تفرررح درة لو تتزوجين 99 مرة اكون اني الزوج رقم 100 بعدني ماتزوجت ولا راح اتزوج لان انتظرج

ضحكت بصوت كتله والله بطران مصطفئ وخطية انت هو انت حالك من حال فيصل اثنينكم تدورون نسوان بس هذا همكم

كال اي يمكن هسه ادور نسوان بس صدكي من اتزوجج انت راح تصيرين كل نسواني

جاوبته روح مصطفئ روح العب بعيد اني بذمة رجال هسه بلا هالكلام مو ماعندك شغل وعمل وجاي عليه

كال لا والله عندي تدرين بول بريمر حل الجيش العراقي بس احنه دزوا علينه واني هم جاي اشوف خالي سمعت مريض وهم جاي اشوف الحبيبة

خزرته واخذت الجهال وطبيت جوئ

لليل اجوي احمد ورزان عرفت هو دازهم وكالعادة حاجتني رزان  ارجع وهو يحبج ومن هالكلام الي مالمست بافعاله حب لان الي يحب ما يأذي ولا يتهم ولا يعدد يكتفي وحتئ لو  اخطاء وعيوب  شريكه زادت لازم هو يصلحها

احمد كال تدرين فيصل فتحلي معرض سيارات بس حتئ اقنعج ترجعين بس اني اكولج ابقي ولترجعين شوني بالخباثة

رزان كالت عزااا الا اكوله لفيصل

كاللها لا يمعودة ماصدكت اعوف الكلية واشتغل بالمعرض

ضحكت اني  هاا احمد لعد اشو حجيك يختلف عن بالتليفون

رزان كالت شبيج انت من يحاجيج بالتليفون فيصل يمه ويسمعج

اندار عليها احمد هاا فضحتي الزلمة الا ارجع اكله عليج ووحدة بووحدة

ضحكت عليهم واجت رسل جابت يوسف يريد ياخذه احمد بس ميقبل مجلب برسل قووي

كام صفكة راشدي خفيف وكال هذا نسانه وميريدنه هاي شنو درة مااتفقنا هيج

اني صفنت لعد ابوه شلون راح يتقبله وشلون راح يكبر ويعرف ابوه ناكره شنو ردة فعله شسويت بالطفل شسوويت بابنك فيصل

رزان كالت درة صدك فيصل يريد بيان الولادة حتئ يطلع ليوسف جنسية

اني هنا انصدمت شعجب وشلون غير رأيه

صراحة مو بس انصدمت وهمين فرحت لان مايصير يبقئ يوسف هيج بلا جنسية

رحت لجدي استأذنت منه قبل  ويله انطيتهم البيان

من رجع عمو حسن بالليل ذكرته بموضوع الكلية

اني من حجيت وياه بهدوء ولوحدنا هو كال ماناسيج بس ينفتح التسجيل

من صعد لغرفته تلگتني بيبي كالت هاايالعرمة كرررية شنووو ابنج خما تخلينه علئ،گلبي وتولين للكرررية

تحجي باستهزاء وسخرية

كتلها شبية مخبلة واخلي يمج شنو عبالج نسيت شجنتي،تسويلي،من جنت صغيرة

صح صغيرة بس،فطنة وافتهم وبعدين مو عيب،عليج شكبرج مرة تتصنتين وتتسمعين

كالت والله فيصل يشك،،،ج بالنص اذا داومتي

فريت بيدي ورحت نمت بالليل حلمت ايدي مكسورة وتوجعني ومحد يداويها وجنت الوب الووب كعدت مخرووعة مااعرف ليش،اجه علئ،بالي،جدي،

نزلت من السرير وطلعت رحت لجدي للديوان شفته نايم بس يون من الوجع

وليد نايم بصفه وهم صاروا يتناوبون كل ليلة واحد يروح يمه

مرة عمو حسن ومرة فلاح ومرة وليد

مخليله جرباية بالديوان وينام عليها كعدت يمه وابوس براسه حييل،  موبيدي احبه و كعدته من النوم ظل يبوس بيدي ويشمني،

كتله بهمس كعدتك سودة عليه

كال اذن لو بعده

جاوبته لا بعدها ساعة 2 هسه

ليش ما نايمة بويه

حجيت بغصة كتله جيت اطلع عليك واشوفك خاف تحتاج شي

كال اووووف ياادرة اوووف يااموت خليها لوكتها شلون بيج بويه

سكتته وحضنت راسه وابجي بسكوت بس دموعي تجري

كال روحي بوويه روحي يم وليدج لا تلوعين روحج وياي

طلعت ورحت يم يوسف وكل شويه الزم ايدي عبالك الحلم حقيقة

بعد ما عمو حسن وعدني ارجع اكمل هالفترة فيصل اختفئ ومااوصل بعد النا من خلال كلام رزان عرفت مسافر واني اصلا ما اسأل عنه

عمو حسن  راح سوا معاملتي ورجعت فعلا وجابلي القبول وكال حتئ، تداومين

‏

‏بس  جدي جان رافض رجعتي للدوام من مبدا شيخلصنا فيصل وانت ماتكعدين وانت وووانت بس اني اصريت وبداخلي خوف من فيصل

حضرت نفسي واتفقت ويا امل  مرة عمي انطيها فلوس بس تخلي يوسف يمها وتداري

رنا خطية كالت اني عيني عليه

بس اني رفضت لان رنا عدهه اطفال اثنين ماكدر اضوجها

حضرت ملابسي اني لبست كيلوت اسود وستره جويتي وحجاب مقفل واباوع على نفسي وفرحانه وماخليت ولاقطرة مكياج ابد وداومت وفرحتي ماتنوصف

داومت كم يوم وفرحانة حيل ومخليه كولشي ورايه

وبيوم وخلت محاضره والثانيه خلصت  ورحت كعدت بره بالحديقه

واني كاعزة شفت غيم فوك راسي باوعت واشوفه فيصل

ماادري وين اشرد والنار من عيونه تحركني

‏

‏ لزمني من زندي وهو صاك سنونة وكلي طلعي

‏

‏ كتله وين اطلع

‏

‏كال  بت كلب تلعبين بكيفج اليوم اشعل الخلفوج وسحلني سحل والله مامشي على رجليه حسيت نفسي طايره من السحل

‏

‏ وجهي انخطف من  صدك خفت منه  ويسب ويغلط واني نبلع الساني بس ابجي

‏

‏ وهو يصيح تستغفليني تداومين ولابستني ولاعبالك زوجج فكرج من راسج

‏

‏ اذا ماربيتج جديد مااسمه ابن ابوي بت النعال هذا جدج مطلع عينج

‏

‏يحجي وفشار وغلط هوايه واني بس ابجي

رجع يصيح شنو هالملابس كاعده تضوين بت النعال لج عفتج كلت خل ترتاح وتصفا واجي احجي وارجعج

اني هنا كمت اصيح ماارجع كوه مااريدك كوه انت ابو نسوان مااكدر اعيش وياك بس واجهه كدام الناس

كال بت النعال هو ياريت ارجع لطبعي مال النسوان جان كسرتج وادبتج لج سديتي نفسي عن النسوان ومحتار بمصايبج وطراكيعج يوميه سالفه جديده

‏

‏ ولج انت الاخرس تحجينه ولج  انتي تحجين الصغير

‏

‏اسمعي لج  الكليه تنسيها وتكعدين تربين ابنج وخل اسمع واصله بعد

‏

‏كتفت اديه ودرت وجهي عالجامة

‏

‏ضرب الستيرن قوي وكال  ولج انتي لعبتي بحالي لعب  طفله ادوس عليج بقندرتي وانعل سلفه سلفاج

طلع حبايه وشربها بالسيارة

خفتتتتت كتله وين موديني فيصل

دار عليه عيووونه نااار

بصياح رد لكبرررج لجهنم بعد ووين! !!

يتبع

اعرف مقصرة وشالعة قلبكم 🥺بس والله موبيدي كلما افتح مسودة اريد اكتب تكلعلي مية سالفة عوجة والله اتمنئ اختمها واخلص

طوفان رجل

بارت 47

نورا ناصر

الورقة التي لم تسقط في فصل الخريف خائنة في عيون أخواتها، وفية في عيون الشجرة ومتمردة في عيون الفصول، فالكل يرى الموقف من زاويته.

كتله بعصبية وشراسة:  انت بسببك صارت الدنيا كلها گبري صارت كلها جهنم حواليه مو حتئ روحي كرهتها   كافي كاافي جاي تحاسبني ماتحاسب نفسك

انت مو تسافر وتختفي ومتحجي مو تروح وتتزوج وتجي وتجيبها ومتحجي وبعدين اريد اطلع من ذمتك اريد اطلگ منك وماريدك بعد بحياتي افهم ماريدك انت انتهيت بالنسبة الي

سااق السيارة بسررعة واشوف الطريق تغير عليه مو طريق بيت جدي هذا ياربي وين موديني هذا ابو النسوان وبي كله البلا

انهاريت بالسيارة واعيط لزمني من جتفي وثبتني جانت قبضته قويه حييل حتئ جتفي ظل يصل عليه

بعدها تبينتلي ملامح المكان الي رايحين اله عرفته من الطريق لبيتهم الي جنت كاعدة بي وياهم

الطريق كله ادعي كون احمد هناك لو هشام بلكي ينقذوني منه ياربي شراح يسوويلي

تذكرت اخر كتلة من رجعت لبيت اهلي جانت ليلة مؤلمة والاكثر الم هي جروحي جان يضرب بقسوة وعنف والله حسيت فروة راسي كلها انشالت من مكانها ضربني بلا رحمة

باوعت عليه بحقد شكد اكرها باوعلي شو سكتي خفتي مو

شحيت نظراتي منه بقرف كتله شنو الي ماسويته بيه حتئ تسوي هسه

صف السيارة بالبيت واكو مشتمل بصف البيت سحلني اله جانت الدنيا صبح واكيد الكل نايمين

فوتني للمشتمل جنت هادئة هدوء ماقبل العاصفة وداخلي متحمل عليه هواي اتمنئ ادچه بسچين واخلص وارتاح

طببني للصالة مال المشتمل دفعني دفع صررخت بوجهه

لااتدفع ووديني بيت جدي يله مامرخوص تجيبني هنا منين ترخصت انت ترئ وراي زلم لا عبالك تايهة

لزمني من زنودي حييل ويهز بيه

كال ووولج بت النعال ترديني تجلطيني انت شوون وياج شنوو هالصلافة شنوو هالرعوونة هو هيج رباج جدج

حركت روحي اريد اتملص منه كتله وووخررر عني اكرررهك ولاتسب ابويه لااتسب

حررني من قبضته وهو يدفعني وكال جري عدل وابوج مايحصل مسبة

انطيته ظهري وركضت اريد اطلع واهج منه تبعني ولزمني وسحبني لصدره حيل وصار يمشي بيه لحد غرفة النوم وفوتني بيها

كل هذا واني اعيط واضرب علئ صدره اريد افك منه واخلص بس ماكو هو كولش قوي وقبضته عبالك من حديد

وكفني بنص الغرفة وهو شابگني حييل ووجهي بوجهه

ابتسم بمكر وهو يباوعلي باستمتاع

صار شكد ما حسستيني انت مرتي

فتحت عيوني وهزيت راسي

كتله فيصل لا تحااول لاتحاوول حتئ اني اكرهك ومااتقبلك وانت مو رجال اذا سويتها غصب عني الرجال ماياخذ شي من زوجته بالقوة

فلتني ولزمني من فكي قووي ورجع شمرني علئ السرير حسبت اسناني الي بالفك الاسفل تكسرت

صااح باعلى صوت عنده هااا يعني تعترفين انت زووجتي موووو

داازحف على السرير اريد اروح لذيچ الجهة حتئ اشرد

لزمني من حجل رجلي وسحبني حييل من رجلي ورجعني وكعت جوه علئ الارض وبصف السرير

سحبني من ايدي ورجعني قربني اله حييل وسحب حجابي من راسي وصار يشم بيه

گال ااااه مشتاقلج والله

غمضت عيوني وصكيت على أسناني واتنفس سريع گلبي نبضاته تجاوزت الحد الطبيعي

نزل شفايفه على خدي يبوس بيها

لحظات من الضعف اجتاحتني سديت عيوني اقوى بعد ورصيت على اجفاني

تذكرت كلشي سواه الي ضرب غلط اهانة والاكثر من هذا تذكرت ابني المشمور ابيت جدي ابنه الي نكره وتبره منه  وهذا خلاني انتفض

من مكاني

هو جان مخلي وجهه برقبتي يشم بيها ويبوس وايده على خصري محوطني ويسحب بيه اله

اخذت خصلة من شعري وخليتها بحلگي واني من قبل تلعب نفسي من الشعر واتقيئ بسرعة اذا اجت شعره بحلگي

وفعلا لعبت نفسي خليت ايدي على بطني وميلت روحي ليكدام بسرعة وتقيئت على الكاع هو بسرعة كام وابتعد عني

خلصت ورفعت وجهي عليه شفته يباوعلي

صفنت بوجهه ثواني

كال بحزن هلكد صايرة تكرهيني

كتله واني كوة اجر انفاسي

واكثر بعد

كال روحي غسلي كمت غسلت بالحمام وطلعت لبست شالي ونظفت المكان وطلعت شفته بالصالة يشرب جكاير

كتله وديني لبيت جدي ابني محتاجني هسه

هز راسه وطلعت شفت صفية بالحديقة هو راح قبلي للسيارة وهي اجت باتجاهي تباوع علئ لبسي وتحجي وين البوشيه وين العباه وتضحك

كتلها بقهر  شلونج

ضحكت ضحكة مسمومة كالت يا حيف صرتي مثل نسوانه بس للونسة

كتلها انت حطب جهنم شحجي وياج يعني انت وحدة كاتلة نفس الله حرم قتلها وينتظرج عذاب بالاخرة وهذا الي يخليني اسكت عنج اشفق عليج

وعفتها ورحت

صعدت بالسيارة داا اريد اكعد ورا جان كاعد بمكان السايق التاف عليه عااط بيه بصوووت عالي تعاااي هناااا

خلاني انزل واكعد كدام.

حرك السيارة ومشئ بيها

كال تكرهيني ماتشتهيني تنقرفين مني مااطلكج اني مااطلكج مايفصلني عنج غير الموت مووتي لوو موتج

باوعتله ودرت وجهي منه اضحك باستهزاء

وصلنا  لبيت جدي نزلنا اريد اركض للبيت لزمني من ايدي ووجهني للديوان وهو صاك علئ سنونه ويحجي تعاي مناااا بلوئ تعاااي

مادري ليش لزمتني الضحكة ان شاءالله تنجلط علئ ايدي

فتح باب الديوان و دخلنا شافنا جدي ماتفاجئ  شمرني بالديوان كدام جدي ركضت ختلت وراه

وكله  اذا ماتكدر عليها خل اخذها وياي دز علئ ابنها خلي يجيبونه

جان ينتر ويصيح وصاير نااار وجدي احر ماعند فيصل ابرد ماعنده

بس خفت عليه حييل خاف يضم بگلبه وينقهر لذلك التزمت الصمت ولا عبالك ذيج الشرسة الي جانت وياه قبل شوويه

طب وليد بعد ماسمع عياط فيصل الي يجيب التايه

جان وليد توئ جاي من الدوام مالته وحتئ بيده علاليك

شمرهم يم باب الديوان وصاح بفيصل

خيرررر شبيك ليش تصيح ابيتنا مو عيب عليك متوحد بمرة ورجال جبير شنوو هي وليه وهيه هاي رجولتك بالله

اندار عليه فيصل بعصبية وكاله انجب وليد ولاتتدخل لاتنسئ الي سويته بيك من گبل ترئ اعيده والله الزم حدودك احسن الك وخليك بعيد

تقدم عليه وليد وكاله زمان السلطة انتهئ يا فيصل لاتعيش بالماضي احنه ولد اليوم

ضحك فيصل باستهزاء وكال اني عندي سلطة بكل مكان وزمان ولاتنسئ هالشي

صاروا واحد يهدد الثاني لطمت خدي وجدي ساكت خوفني سكوته ركضت افارغ بينهم واحد تقرب من الثاني ويردون يتكامشون

وكفت ابينهم كتله روح فيصل بعد مااداوم اني بس لاتحلم ماارجع الك روووح

كال وهو يأشر علئ جانب راسه بمزاجي مخليج هنا وبمزاجي اخذج افتهمتي

هزيت راسي برفض وهو طلع ركع الباب حييل

كال وليد شنو صاير

كتله عرف جاي اداوم واجاني للكلية يرعد

رد والله هو الغلط راكبه من راسه لرجليه بس ميصير تداومين وانت علئ ذمته وهو مايدري واني كلت  لحسن هالحجي بس هو صاير تفكيره اوربي هاي بعده ماطلع من العراق

جريت نفس ولزمت راسي كال وهو يفترس ملامحي بنظراته

شبيج خما سوالج شي

هزيت راسي بمعنئ لا وركضت لجدي خفت من سكوته

اجه وليد وكنبص كباله همين

كتله جدي بيك شي انت زين

كال زين بويه زين وباوع لوليد وكله روح بويه ارتاح هسه

راح وليد وبقينا اني وجدي وعيوني بعيونه

كال شفتي الي صار اليوم بعينج

دنكت راسي وهو كمل كال جنت متوقع يوصله الخبر وهو مسافر ويجي هايج لهيج انا ماتفاجئت من شفته جايبج وجاي

كمت علئ حيلي كتله شسوي ياجدي تورطت بي اني هالرجال والله عبالك اندفنت بالحياة من وراه

كال تفرج بيه خلي عينج بعين الله وعينج علئ وليدج ويجيهه يوم وتفرج وصدكيني فيصل ينعدل

كتله اي من ينعدل ذيل الجلب

كال ولج جلبة هذا رجلج ابو ابنج لاتحجين عليه هيج

فريت ايدي كتله غير يعترف بابنه بالاول

عدل كعدته كال مو سواله جنسية

ضحكت باستهزاء وجاوبت والله صارت زحمة عليه

كال دروحي روحي وجهج اصفر شربي ماي واكليلج لكمة وارتاحي

رحت بست راسه واديه ياريت االكل يفكر بيه مثلك

جان يباوعلي بقهر باس راسي وكمت من يمه احس تتبعني نظراته واني هم امشي واتلفت عليه

رحت لغرفتي بدلت ملابسي وطلعت اريد اصعد فوك ادور يوسف سمعت بيبي تحجي بالتليفون عرفت تحاجي صفية واكيد ذيج تكللها شافتني وي فيصل اليوم

عفتها تحجي وياها جانت تكللها يااا صدك عوود

ومتفاجأة

صعدت شفت يوسف يلعب ويه اسماء بنت عمو فلاح وعمه امل يمهم جاي تطرز شافني فرفح عليه اخذته ابوس بي مشتاقتله حييل حبيبي فكري كله وياه من اطلع لحد ما اجي

رنا

جنت كاعده دا انظف بالبيت والجهال وخبصتهم الحياة صايره خبصه عندي مدا الحك على شي ومليت وجزعت واني اشكي من عمتي ام رجلي

بصراحة لو عدنا جنه ثانيه جان كدرنه نقسم الشغل بس شنو ما عدنا وكل الشغل براسي هم ما اكدر اخلي النسوان الكبار يشتغلن بس والله تعبت

عمتي جانت بالسوك اجت مهفه ومتعصبه شمرت المسواك وظلت تصيح .. شلون بيه شلون اندهرت دهيره هي هاي مال زواج الخبله شلون بيه وزوجتها

صاحت عليها بيبي كالت .. خايبه هووووي فهمينا السالفه شني شمالج مدرعمه جنج مفخخه

لطمت على خدها وهي تكول .. لج المصخمة شويكة الخبله متعاركة ويه عيالها وسابه المره وحتى لاعنه ابوهم والرجال ميت

بيبي عاطت بيها كلتلها .. روحي روحي ولج جيبيها لا انوب تخبل العالم خلينا نعلمها ونادبها

راحت عمتي تركض هزيت ايدي بعدم قبول هي البنيه مريضه مو مال زواج ليش هيج ورطوها بالزواج وهم يعرفون حالت بنتهم

عزلت المسواك وكملت دا اسوي بالغدا واجت عمتي دخلت وشوكة وراها عاطره الحلك وتضحك وشايله جنطتها ومخليه المكياج كله صابغه وجهها صبغ

صاحت … هاااا رنيوووه اجيتكم خطار ايييع هاي شنو بيتكم يلعب النفس مو مثل بيت رجلي يخبل رجلي

ضربتها امها وهي تكول .. انجب بيتج ولج فحل الفحول وطايحتله غلط ومسبه

تعصبت وهي ترد عليها .. جااا شسوي مجلوب عايف نسوان اخوو ويطلب مني شوكة جيبي هدومي شوكة سويلي اكل  واله انام يمه شكد خبل

بيبي ردت عليها.. جااا غير رجلج ويطلب منج

تخصرت وهي ترد … ياااا جااا اخوانه ما يطلبون مني ليش بس هو خلي يولي مدام مرة اخوو موجوده والكل يطلب منها هو هم جا اني شلي غرض بيهم مخلفته وناسيته

رحت سلمت عليها وبستها كتلها .. غير زوجج يا عيني لعد هسه اني مو اخدم اخوج هي هاي سنة الحياة وهم اروح وانام يمه

ردت بعدم اهتمام.. خاب بطران على زمانه انوب جايني تعاي سوي زلاطه شنهااااي صدك جذب جا ما يسوي هو زلاطة طماطة انعل ابو لابو الخلفه مسودن مو صاحي بيه خيط

ضحكت على كلامها وعرفتها مو مال زواج ومو كد المسوولية

كعدت عمتي كالت .. تكول المره هاي بتكم مو صاحيه كتلها اغسلي الملابس بالغساله مخليه الملابس وشامره باكيت التايت فوگاه ومخليتهن يفرن من دون مي

انوب دكول من سألتها تكلي جااا ما غسلهن ابنج شدخلني وبعدين هن هيج ينغسلن شني تعلميني انتي خاب دطيري

انوب غالطة على المرة من دون خجل ومستحى اني اعرفها تجفص ما تلزم لسانها شلون زوجتها ما ادري يمه انوب الناس بس لا يطلكوها جنهم يطلكوها

هي جانت تفتر بالبيت وعمتي تحمس بروحها حمس وتلطم

بيبي كالت .. جااا شنسوي اذا ما يردوها شنسوي خليها تتطلك

لطمت عمتي بصدمة … يممممة غير اذا تطلكت شوكة انجلط اني ما عولت ازوجها انوب تتطلك لا مستحيل خليني اروح اشوفلي كشافه تثبتها عندهم احسن ما ترجع الي مطلكة

اخذت عبايتها وراحت تهف وهي تدور على كشافه تخلي عيال شوكة يقبلون بمرضها وحالتها الي مو طبيعيه بالنسبه الهم

باوعتلها بأسف خطيه والله البنيه عندها ضمور وحتى مرات لسانها ثكيل ليش هيج بهذلتها بهيج زواج وقشمرت العالم

دخلت للغرفه جان وليد لحد الان مموجود طالع برا ودره بغرفتها

بدلت بسرعه وخليت مكياج خفيف وطلعت كعدت ويه دره شويه جانت ضايجة ومهمومة

حاولت اخليها تسولف بس هي كتومة ما حجت شي وحتى حسيت بيها تحاول متحسسني بالشي الي يصير وياها ولا تحسسني ان هي عندها مشاكل

باوعتلها وهي تدرس كتلها .. عاجبني ادرس تدرين

بسرعه رفعت نظرها الي وضحكت كالت .. صدك؟ لعد ما دام هيج عاجبج تدرسين قدمي خارجي وامتحني

ابتسمت .. والله اتمنى بس وين اذا اني ما اعرف اقره وهم مثل ما تعرفين عندي اطفال وما اعتقد اهلي يرضون ادرس ولا حتى عيالي

دره .. هذا ابسط حق من حقوقج تدرين ؟ اصلا انتي محرومة من ابسط حقوقج

وهاا حاولي تكسبين وليد وطلبي منه تكملين دراستج امتحني خارجي وشوفي شلون حتتطورين باجر حتى اطفالج تفيديهم

هزيت راسي برفض.. هو اصلا ما يقبل وليد ادرس يعني قابل شحصير وآني أبتدائية اني اصلا مواصله بالدراسه

ضحكت ولزمت ايدي .. العافيه بالتداريج عيني وبعدين لا تنسين شويه شويه توصلين

رفعت عيوني بتفكير وضحكت .. هههه ما ادري اشوف

دخل وليد باوع علينه وتنهد كال .. هااا شنو شو كاعدات لوحدجن

رديت عليه.. جنت منتظرتك تاخرت

جاوب.. اي جنت ويه الشباب محتاجات شي

باوعت الدره .. محتاجة شي يجيبلج

هزت راسها بنفي.. لا عمري مشكورين مدلليني انتم ههه

ضحكت وظليت كاعده هو راح للغرفه ما رحت وراه خليت وطلعت برا بالحديقه كعدت ما اريد احسسه بلهفتي عليه ولا اريد يحس اني لازكة اله

ظليت تقريبا ربع ساعه واني بفترة نقاهة سمعت صوته وهو يصيح عليه

وكفت ومشيت عنده شفته واكف بباب الغرفه وهو شايل الطفل وبيده جكارته كال .. تعالي وين صرتي مو تشوفين دخلت للغرفه ليش ما اجيتي مخليتني ويه المزعطه انتي شبيج

رديت بدلع .. وشكو تصيح يعني قابل شنو اكعد ولزك يمك طلعت دا اشتم هوا برا

جاوبني .. هااا حلو كلتيلي تشتمين هوا موو

رديت عليه بدلع… مووو

اخذت الطفل من ايده وضحكت .. يعمري يروح ماما انت شكعدك مو جنت منطلقه بالهواء الطلق ودا اخطط الحياة جديده

اول ما دخلت لزمني وليد واحتضني وهو يكول .. وشنو هاي الحياة الجديده واني من ضمنها لو لا

باوعتله بنص عين.. اممم ما اعرف اشوف خلي اكمل تخطيط يله لان لحد الان ما وصلت الك بصراحة انت حاليا مو من ضمن التخطيط والتنفيذ

كال بهدوء .. رنا حييل متغييره شخصيتج شكلج احسج مو مثل قبل تهمين وتنقهرين هسه لا بالعكس ضاربه الدنيا جلاق

رفعت اصبعي باستنكار .. جلاق ودفره هههه يمعود ايقنت محد يسوه احرك دمي عليه والفقير والمحترم الناس تذله عاد كلت خلي اطنش واعيش النفسي شنو رايك

جاوب بثقه .. حلووو اصلا فرحان بيج بس مو معناها اني هم هيج تتصرفين وياي حتى دا احس نفسي ما الي داعي بحياتج احسج صرتي تكهريني ومستعده تفضلين غيري وهذا الشي قالقني

عقدت حواجبي .. شقصدك

تنهد وهو يكول … يعني مثلا تكدرين تتخلين عني وتاخذين غيري وخاصه انتي حاليا متغيره اخاف شايفه غير شوفه

رفعت ايدي بعصبيه وكورته ضربته على صدره بقبضة ايدي بغضب .. احترم نفسسسك وليد مو اني الي افتر وره غير زوجي واني متزوجة وهااا ترا مو كلها نفسك ولا نفس طبعك متزوج وعينك على غير مرتك

لهنا وتلزم لسانك لا انت ولا غيرك يخليني اغضب ربي واشوفلي غير شوفه وعيب عليك هيج تشكك بيه عيب اني ام ولدك

واذا فعلا شفت غير شوفه فمعناها شفت نفسي وعشت الروحي بعيدا عنكم جنس ادم مفهوم

لزم ايدي وهو يكول .. لا رنا مو هيج قصدي صدكيني

نترت ايدي منه بغضب .. راجع نفسك وراجع كلامك للن هذا الشي حرام واني متربيه واحسن من تربيتك فاسكت وراجع نفسك وعوفني بحالي

رد عليه باستنكار .. مو قصدي والله

عفته ورحت نومت الطفل وغسلت وجهي وبدلت غطيت نفسي ونمت ومحجيت وياه

حسيت بيه تسلل لفراشي واحتضني وهو يعتذر ويبرر كلامة وتصرفه وياي

بس اني جنت جامده ومصطكه وما بدرت مني اي ردة فعل

درة

مرت يومين كعدت بالبيت بس گلبي خلصان ومعصبة حييل مقهورة من فيصل اجه عمو حسن وحاجيته بس وين هو باله مو ويايه يريد يخطب هالفترة كال نشوف ابوي شراح يسوي وصارت سكتة بس اني الوب

وهم واني بهاي الحالة واسمع حجي علئ انو اني طالعة وي فيصل ورايحة وياه للمشتمل ونايمة وياه  ومن هالكلام.

جنت كاعدة بالغرفة واسمع صار حجي وخطوات رايحة وخطوات جايه طلعت بيدي يوسف شفت وليد لابس دشداشة وغترة

رحت باتجاها كتله خير وليد شكووو شصاير

رد وهو يتقرب مني رجلج الشفية كرة عينج بي جايب عمامه وجاي حتئ يرجعج

فتحت عيوني بصدمة يااربي صدك عوود بس لا جدي يقبل هالمرة لزمت وجهي باثنين ادية يااربي ماارجع يااربي مااريد

رحت للغرفة مفرفحة كعدت احاجي يوسف

احنه شلون بينا يااربي شلووون بينا يارب ماارجع هالمرة

بعدها للمغرب يله فضت ركضت اريد اعرف شصار

شفت عمو حسن وسألته

كال جدج رفض ترجعين

رادوا توسلوا ماكو سألوه زين ليش كاللهم ماترجع وخلص والي اسبابي والموضوع بيننا  واطلعوا منها انتوا لا تخسروني

ضحكت وانطلقت لجدي كعدت ابوس بي واتشكر منه

كال اذا ماااخلي يحفئ عليج ومايلكاج البيت الي رباج صغيرة يربيج انت وابنج وابن ابنج

ضحكت كال اكو اوراق لازم توقعين عليها بس خلي يجيبها عادل كون الله ينطيني عمر واخلصها

تفاجئت كتله شنو هاي الاوراق جدي

كال بعدين تعرفين

بس  خلي ادبه موعباله انتي نفس الرخيصات الياخذهن لا انتي بغلات الروح والنفس يصعد وينزل

وج دموعج من طلعنا منهم وكسرت عيونج ماانساهم واذوقه ضعف هذا الكسر وعلي وعلي الا اخلي يتمناج وماينولج

‏

‏وديري بالج تلينين اله و واذا سمعت حاجيه وياه زعلي جبير واتبرا منج سمعتي

‏

‏هزيت راسي

‏

‏كال  انتي الج الصافي هو اندك بيمن عباله هينه اني كوه بلعت زواجه وكلت هسه يشوف الطفل ويعقل وشو تخبل

‏

‏جان  جدي يحجي بعصبيه وحركان دم كمت بست راسه كتله جدي اني من غيرك اضيع وانذل

‏

‏ كال ماانكر هو يحبج بس يصح بشر يغلط بس لازم يتعلم منه يالله

وراها بايام كاعدة بغرفتي وادرس البنات منئ بنت عمو حامد ورسل بنت عمو فلاح

جان عند منئ جدول الضرب وهي ماحافظته

كلت الها

8*7

ظلت تفكر وتحسب بيديها

بسرعة ردت رسل 56

هي رسل رابع ابتدائي ومنئ سادس

بس رسل ذكية ومبين الها مستقبل حلوو

بس جاوبت رسل كبت العيطة بيناتهن

شوون تجاوبين وجاي افكر

كوة فاككتهن انفتحت الباب وطبت اسماء تضحك

كتلها هاا شردتي ماتردين تقرين

ضحكت كالت جدي يصيحلج

خليت يوسف يمهن وطلعت

رحت لجدي جان يمه ملازم وكتب وفايل

انطاني التليفون كال هاج سمعي

اخذته منه وكلت الو

اجاني صوته طرش اذني  اسمعي لج ترحين كد الامتحان وادز الحراس ياخذوج بشر ماتحجين وياه مو تردين شهاده خلداشوف بشنو تفيدج

ضحكت ومجاوبته وهو ظل  يصيح سمعتي

كتله اي

كال بارتياح  تمام جبتلج استثناء من الجامعة ترحين بس بوقت الامتحان افتهمتي

‏

‏كتله ماتسال على يوسف !!!!

‏

‏كال في امان الله

بعد مرور سنتين ...... واني باقية ببيت جدي بقيت معلكة وعلئ ذمته وبهاي السنتين لا شفته ولا شافني ولا شاف ابننا

وبيوم وبحفلة عمو حسن الي تأخرت هواي وليد اخذ يوسف وطلع بي بره

يتبع

السلام عليكم

طوفان رجل

بارت 48

نورا ناصر

‏المقياس الحقيقيّ لنجاحك هو عدد المرّات التي استطعت أن تستعيد فيها توازنك بعد كُل انهيار .

خلال السنتين الي بقيتهم بيت اهلي هو دز ناس ووسط حتئ عمامي الي بالعمارة وجابهم لجدي يقنعوا بس جدي جان قافل

واني هم جنت الح علئ جدي يطلقني منه وهم قافل مااعرف شنو من الي اباله

وخلال هالسنتين طش خبر طلاقي منه ماعرف منو الي بث هاي الاشاعة بس الظاهر اذته هواي بس انتشرت اجه وجاب سادة وناس واصلة  وشيوخ وجدي موقفه هو هو ماتغير

ورا ما تخرجت من االجامعة الي انحرمت من اجوائها واجواء حفلات التخرج بسبب فيصل

وبيوم كعدت من النوم  بسبب يوسف الي علمه وليد يصيحلي بأسمي وميكول ماما بينما يكوله بابا ولرنا وعمه امل كله ماما

جان لازمني من ايدي ويجر بيه

ويكعدني دلا دلا دعدي دلاا

(درة درة كعدي درة )

كعدت اتمطط جنت اريد اترس نوم بعد ماخلصت الامتحانات ونجحت وتخرجت

كمت شلته ومددته يمي ماقبل وانتفض

كال ولت دوم دومي

كمت كووة وطلعت اتمطط   اشوف تحضيرات وزينة

رزان من المطبخ وبيدها كاسة كبيرة وخلتها عالميز وجانت مبتسمة

احمد كاعد بيده تليفونه وليد بصفئ كاعد جان نازل التليفون النقال للعراق بس غالي كولش حتئ السيم كارد جان ب50 الف دينار اول مانزل

ظليت افرك بعيوني هاي شنو منو مسويلي كل هذا ياعمري انتوا احلئ اخوان والله

وحضنت رزان وبوستها مشكورة ياعمري يفرحني بزواجج ان شاءالله

ضحك احمد كال ترئ مو احنا الي سوينا هذا كله فيصل دزه ظليت متفاجئة لو بس اعرف شيحس

وليد كال درة الظاهر فيصل بعده مايعرف درة ماتهمها كل هاي البهرجة

ابتسمت لوليد وبداخلي متفاجئة من فيصل كل افعاله ماتدل علئ انو انسان متزن

من جهة عايفني مشتولة ومعلكة ومن جهة يحتفل بتخرجي

هم يحجون وليد واحمد ويكولون فيصل

ويوسف مثل الببغاء يردد وراهم

ويكول ليسل

لزمه وليد وشاله يكوله تعرف منو فيصل

هو يضحك ويستحي يدنك ويكول ليسل

بداخلي غصة شكبرها علئ هالطفل بس احاول اكتمها

احمد اخذه ويكوله عوفه وليد طفل لا تلعب بعقله وتفتح عيونه علئ هالاشياء الها مدة وتنتهي صح اخوي غلطان بس هم ما اقبل

ووليد يضحك باستهزاء ويوجه كلامه لأحمد يكوله طفل مثل الوردة دشوفه شلون حلو واخوك رافس النعمة برجليه

هذا شون راح يواجه الطفل من يكبر لا والله شلون راح يواجه ربه

كعدت مقهورة حرف مانطقت جنت اسمع لنقاشاتهم وبعدها اصداء اصواتهم اختفت وصرت افكر

شنو من بشر من جهة يفرحني بتخرجي ومن جهة ناكر ابنه ومخلي ورا ظهره

ياربي ماجاي اكدر اخترق مكنوناته هالرجال محيرني حيرة بس الله يدري بيها

شنو من امراض نفسية يعاني منها بس الله يعينه على نفسه

التمن البنات والجهال وظلوا ياكلون الكيك والحلويات والعصاير ويضحكون ويسولفون واني بغير عالم ولا اكلت لكمة بحلكي

ماريد منه شي دااكره كولشي منه صايرة مااطيقه ابد هو ماعرف شلون يكسبني واحتار شلون يأذيني

هو جان يدز مصرف واني جنت مو بحاجته لهذا المصرف ابد

بعدها عمو حسن خطب مهندسة بس قرروا مايسكنون يمنا بنفس البيت،  احنه كاعدين باطراف بغداد وهو قرروا يكعدون بغير منطقة واصلا دايفكرون بالسفر

بيوم خطبة عمو حسن تحضرنا كلنا حتئ نطلع وسوو مشية الزلم والنسوان سوئ

بدلت ليوسف طلع يجنن وهو حلو ومدنفش ولسانه طويل ويضحك للهوا وكل الي يشوفه يحبه

لبست اني وخلصت طلعت كال وليد يوسف يروح وياي ويا الزلم وباوعله كاله مو صح يوسف انت زلمة

رد اي بابا

كتله خاف يضوجك وانت وياك علاوي وايود هم خاف يريد يروح وياك

كال لعد وحد يوسف هم ابني ويروح وياي مو صح يوسف وكنبص كدامه انت تروح وياي لو وي درة

باوعلي بنظرات البراءة عود يترخص مني

ابتسمت اله انطيته اشارة القبول وهو لف اديه حوالين رقبة وليد وظل يبوس بي وليد وشاله وبالايد الثانية لزم علاوي وطلعوا برا

طليت من الشباك واشوفهم متجمعين بالكراج يردون يصعدون بالسيارات وفيصل من ضمنهم

يممه شكد صار ماشايفته و بطني لوتني بلحظتها

كوة جريت نفس،

جان فيصل عينه علئ وليد وهو قريبين من الشباك كولش تقرب احمد كال لفيصل وهو يأشر علئ يوسف الي شايله وليد

ووجه كلامه لفيصل تعرف هذا منو الي شايله وليد

صفن فيصل علئ يوسف وظل يتأمل ملامحه

هنا حسيت گلبي سچاچين و تنغرس بي من گد الوجع

والظاهر عرفه لو حس بي هو مشايفه ابد من عمره 4 اشهر رجعت لبيت جدي واصلا مجان حتئ يباوع عليه وهو عدهم

تقربله فيصل يباوعله متردد ويوسف يباوعله مستغرب ومتمسك بوليد حييل

بداخلي صررخة اريد اكوول ليوسف هذا ابوك

وبنفس الوقت اكول لفيصل هذا ابنك الي تبريت منه ونكرته

بعدها هو بنفسه كالها كال هذا يوسف ووليد تعمد يريد يغثه كاله هذا ابني الثالث مو صح يوسف منو اني

ويوسف ايده بحلكه يكوله بابا ويضحك

حسيت فيصل بهت ومد ايده بحماس واخذ يوسف من بين ادين وليد وشاله يباوعله ويتفحص كل ملامحه

ضحك بوجه ضحكه حلووووووه كولش مثل العيد اي والله هاي الضحكة ماانساها وبيها هواي معاني والف تفسير وشايل يوسف  لقطه ماتنسي من عمري ولاتنمسح ولااريد انساها من حلاوتها

ماحسيت غير عالهلاهل الي ورايه تفززني من صفنتي

غمضت عيوني ووكع الدمع منها وغرك وجهي عبالك محتاجة لهاي الفرحة من زمان

ركضت للمراية وخليت كحل وعدلت مكياجي وطلعت صار بوجهي وليد يضحك كتله تعال عرفت من ردت تاخذه السالفة مو خالية

كال بضحكة ليش قابل اول اخذه ويايه

سكتت وبس اباوع

تقرب عليه كاال بشرفج درة جنتي تبجين اثر بيج الموقف! !

كتله بالله وخر عني وليد

ومشيت عنه

هو طكاهه ضحكة

وبعدها اخذونا لبيت العروسة بس اني وين فكري شارد يم يوسف لان اخذوه وياهم

لمحت عروسة عمو حسن حلوة ونازكة واصغر منه بهواي

لان هو راح يشارف علئ الاربعين سنة يله قبل يتزوج

بس اني  كلما اتذكر هو راح يسافر حيل ينعصر گلبي من القهر

وارجع و اكول ميخالف بعيد وسعيد لان كلش احبه وبالنهاية هاي دنيا وكلمن يگول ياروحي بيها.

بيبي جانت ضايجة لان مراح يسكن وياهم وبس تحجي علئ خطيبته وتعد وتصف بس من تشوفه يدخل تسكت وتسوي روحها فرحانة حتئ لايغير رأيه هي من زمان تريده يتزوج ويستقر

خلصت الحفلة ورجعنا للبيت ويوسف عدهم رحت كبال الشباك واشوف فيصل دخل وشايل بيده يوسف واحمد يمه وجدي ويضحكون.

يوسف جان نايم علئ جتفه لاول مرة اشوفه شايل طفل

شكد جان ابن عمار يروح يمه ولا مرة شفته شايله صح يحاجي ويشاقي بس مايشيله

دخلوا جوه وصارت الناس تخف طلع عمو حسن وباركتله وبوسته

سالني شلونها سرئ حلوة مو

جان فرحان من يسألني عبالك لاگي شي ضايعله من زمان

ابتسمت كتله اي والله حلوة ولايكتلك الله يسعدكم

باس راسي وكال تدرين يوسف وين هسه

دنكت كتله اي ادري

رد مايقبل يعوفه من رحنا لحد ماجينا هو عنده بس يوسف مستغرب منه وهم ساكت

تحسرت كتله تأخر فيصل هواي تأخر

كال لا بعده يوسف طفل ومايميز واصلا هاي المرحلة ماراح يتذكرها ولا يميزها

تنهدت والغصة بروحي

طلع احمد كال درة يردوج ويأشر عالباب

ووكال لعمو حسن من رخصتك خال

اشرله عمو حسن وكال اروح اشوف امي جنهه ماعاجبهه الوضع وابتسم

اني هم ابتسمت بس، ابتسامتي تلاشت بسرعة ورحت وكفت يم باب الديوان

دخلت وكلت السلام عليكم جان فيصل كاعد وبحضنه يوسف نايم

اجت عيني بعينه واشتغل موال العتاب ردتك امان بس يا فيصل تصيرلي حرب وفوضئ ليش

كال ها درة شلونج

كتله من الله بخير

ماترجعين درة ماكافي زعل

كتله تاخرت هواي واشر علئ ابني النايم بحضنه

رد بندم راح اعوضه عن كل شي

هزيت راسي برفض تعودنا بدونك ودربنا مو واحد

دار علئ جدي وكاله احجيلك حجايه ابو سلام مايصير وماصارت هاي زعلة

جدي كله خليهه براحتها وانا اشوف لو تطلگها احسن گلبها تزفر منك يفيصل الي سويته بيها مايتسوئ

كال كيفكم بس اني طلاك مااطلگ

ووجهه كلامه لاحمد تعال احمد ودي الولد لأمه خلي تخلي بفراشه وخلي ترجع عندي حجايتين وياهه علئ انفراد من رخصتك ابوسلام

جاوبه جدي ببرود اي بس لاتطول

هو تفاجئ وفتح عيونه علئ اوسعهن،  احمد اخذ يوسف وطلع كال روحي درة اني هسه انطي لرزان تخلي بفراشه

مشئ فيصل ومشيت وراه وكفنا بباب الديوان

كتله فيصل لا تحاول

رد درة لاتخليني احقر وياج الله ليراويج حقارتي جري عدل وياي احسن

كتله شنو ملكتني انت خما ملكتني ماريدك هي كوة

ودرت وجهي عنه

سحبني اندرت عليه كتله مابيينا حجي

جاوب كافي واوعدج ماتتكرر بعد

اننفضت كتله انت ماتتوب ادري بيك وكاافي بعد مديت ايدك عليه مرة مرتين وتلاثة كاافي مو مارايدة روحي وارجع وياك ماارجع

عفته وفتت جوه

مرت الايام يدز مصرف ويجي يشوف يوسف ويبقئ بالساعات يمه واني ولااطلع

اما جدي حالته جانت متذبذبة يوم زين ويوم لا.

بس هسا لا حالته تعبت كولش وصار يشمني شم ويريدني بس انه يمه

وفعلا اني كله يمه اوكله بيدي واشربه بيدي جان الموت بعيونه جنت عايشة وياه لحظة بلحظة قبل لايكول اخخ دموعي تصب

جان يكول راح الحيل يا درة

اذا رحت لا تكليلي اكعد

خليت جبيني علئ راسه وابجي

حضني ويحجي ياموت خليها لوكتها يامووت خليها لوكتها

خضع لعملية جراحة بالعظام لان عظامه لامه جراحة واني ووليد شلناه بالصلوات وداريناه

هو طلب من عمو حسن يعجل بزواجه يريد يفرح بي وفعلا تزوجت عمو حسن وسكن بعيد عنا وجان مكانه بالبيت فارغ بس يجي علئ طول للبيت

رنا

شوكة مر على زواجها هواي بس خطيه ما صار عندها اطفال هي رحمها طفولي وعيالها ما طلگوها رغم فيوزاتها الطاكة

كالو خطيه ما نريد نكسر ظهرها ومو ذنبها خلوها على ذمة ابنهم وتحملو كافة خبالاتها

بس هو ابنهم يريد يتزوج هو دومة شارد منها وهي لازكة بيه لزكة وساعه تغلط عليه وساعه حاضنته وتبوس بيه ساعاتها مو سوه

وهو خطيه متحمل وساكت ومرات ينتفض عليها وعلى اهله ويجيبوها زعلانه وهي تغافلنه وترجع الهم تعودت عليهم

ومرات هم يضحكون عليها يكولون موتستنه وفرحانين بيها مطلعتنه من الكابه وتتصرف تصرفات تضحك ومتونسين عليها

بس يظل ابنهم خطيه يكولون مرته مسودنه ويضحكون عليه وهو متخبل وحالف اله يتزوج

وهم يريدله طفل وهي ما يصير عندها وكل يوم ماخذتها امها الدكتوره ما خلت دكتوره ما راحت الها بس ماكو امل وكلولها لا تمشين ولا ترحين اكعدي واسكتي

وعمي حامد هم ظل يحجي عليها كلها صدك جذب هي شوكة مال جهال وتردين تورطيها دخلي تولي عوفيها خليها تربي روحها بالاول يالله تربي الها طفل

وعمتي من يومها وهي ما مخليه مكان ما راحت اله انوب ظلت تفتر بيها بالكشافات يكطعن الها للحباله وماكو

اني جنت حامل وبشهري داخله اخذت سونار طلع بيه بنوته جنت حيل فرحانه بيها وحتى كعدت احظر الها جهاز اخيط ملابس واشتري شغلات حلوه اريد ادللها اعوض النقص العندي بيها

وعمتي جانت تفتر عليه .. احنه ما نريد بنيه احنه ما نحب البنات من تخلفين انطيها الشوكة حماتج ما بيها شي اذا جبرتي خاطرها وانطيتيها البنيه

اني تعصبت ورديت عليها.. والله شنو اشو دا احسج تحجين عن قطعة قماش من عن طفلة طالعه من روحي لا والله بنتي ما انطيها لو على كص ركبتي لو اعرف اتطلك

كالت بحقد.. لا والله مو بكيفج ابوها موجود وناخذها منج انتي نعاليش وبيش الكيلو حتى ناخذ رايج كلج خلك وحده مهتلفه ولا تنسين وليد لا يحبج ولا يريدج يحب بنت عمه دره وهي تريد تتطلك احتمال ياخذها مره عليج ويشمرج شمرة الجلاب على اهلج

تعصبت من كلامها وكوه حاولت اصبر نفسي جاوبتها .. لا وليد ما يسويها هو يحبني مستحيل يتزوج عليه وحتى دره دره اختي ما يصير الجمع بين الاختين انتي بس اسكتي وخلي رجليج بماي بارد وهو كل شي ما يصير بس لا تكعدين تنبشين وتشبجين لحيه بلحيه

لطمت وهي تكول … يمممه رنيووه تردين كلام بوجهي ولج المهتلفه هاليام منطينج مجال صايره تاكلين وجوه بسيطة اذا ما طلكت ما اطلع ام وليد اطلع عار وكح .. بنت كح

عفتها ومشيت اجر بروحي جر شلون تقهر بيه شلون تحسسني بعدم اهتمام وحب ابنها اليه وحبه لبنت عمه عبالك تذكرني ؟؟ ليش اني ناسيه !!

رجعت الغرفتي ضايجة وروحي تريد تفر مني اني شنو حياتي شلون هيج عايشه بين ناس منحطه احس كلبي تفحم منهم

شفته دخل للغرفه اول ما دخل ما اعرف ليش حسيت بكره تجاهه حييل كرهته هو السبب بكل شي هو السبب خله اليسوه والما يسوه يعير بيه

باوعلي .. هااا شكو شبيج

رديت عليه .. سلامتك ماكو شي

جاوب .. هو انتي تظلين هيج بس تلطمين ونكديه ترا صاير حتى اضوج ادخل للغرفه

اشرت اله .. دام هيج تفضل اطلع برااا

فتح عيونه مصدوم من كلامي كال .. ادبسزز ولج اتطرديني من بيتي طايحة حظ انتي حييل تخبلتي

رفعت حاجب .. مو اني نكديه وانت ما تحب تدخل للغرفه روح اكعد يم امك انت ابنها المدلل وحيدها

تقرب مني لزمني من شعري حييل كال من بين اسنانه .. شبييج انتي تخبلتي بالقران اجيبج ببوكس اله افلش وجهج واحترمي نفسج احسن الج

تقربت منه وصرخت بوجهه واني ابجي.. محترمة نفسي والله محترمة نفسي قبل لا اشوفك واشوف امك

ما اشوف اله جابني براشدي حسيت مخي اختض وانضربت بطرف الكنتور

صرخت بصوت عالي ولزمت راسي حسيت بشي دافي نزل عليه وبطني فجأة تكطعت وصار عندي وجع قوي خبلني

لزمت بطني واني اصرخ هو من خوفه ركض عليه ولزمني كال .. رنااا رنا هااا شبيج اوكفي رنا والله مو قصدي بس اهدي حبيبتي

جنت منهاره واحس الوجع بگلبي وگوه اتنفس شالني بين اديه ويمسح على وجهي كال .. رناا شنو شبيج لا تخبليني

ما حسيت الا فقدت الوعي واغمى عليه

دره

جنت كاعده العب بيوسف وما اسمع بس صوت الصريخ ركضت بسرعه طلعت واشوف وليد طلع وهو شايل رنا والنزيف ماخذها ومغمي عليها

طلع وليد وجهه مخطوف ويصيح بصوت عالي ويغلط حتى سب اهله وكل عشيرته

ركضت وراه عمتي وهي تكول .. شكو شبيها رنا احجي شصار عزا العزاني حسبي الله ونعم الوكيل بيج يرنيوه خبلتي الولد شسويتي

هو اخذها وراح وعمتي ظلت تدعي وتغلط عليها وبيبي للمره الاولى ما رضت عليها ورزلتها وظلت تغلط عليها

ظليت اني كاعده متوتره ما اعرف شنو الي صار ويه رنا خطيه مسكينه وفقيره زين منها متحملة بيت عمي ومتحمله ابنهم

اجه عمي حامد وره ساعتين ولزم عمتي خبزها خبز بصونده وهي تصرخ محد نقذهه منه

كلها بغضب .. ولج شبييج مجلوبه حاطه عقلج ويه جنتج هالمسكينه الفقيره من وراج البنيه حالتها خطره وتدرين اذا وقعنه على عمليتها تموت بسبب سوالفج وعجرفتج الله ينتقم منج واذا ماتت البنيه وعسرت بركبتج ويوم القيامة تتحاسبين

ردت عليه بغضب وتصرخ .. ان شاء الله بالعسار يرنيوه عساج عسرتي ولا جبتي

لطمها عمي على حلكها خلاه يصب دم وبيبي ظلت تفارغ بيهم وتغلط عليهم وهو طلع كلها بتهديد .. والله اذا رنا ماتت وحق الزهره اطلكج ولا اخليج ساعه هنا

طلع وهي ظلت تروح منا وتجي منا وتفرك بديها انوب اجت ام رنا المره متخبله على بنتها كعدت ترزل بيها وتغلط عليها وخلت وراحت

ظل ياهو يجي يرزل عمتي ويغلط عليها ويروح حل تستاهل هاي تالي العجرفه والخباثه والحقد

يومين بقينه على هالحال والبنيه حالتها تسوء ما تتحسن وما اعرف ليش لحد الان ما سوو الها عمليه وجابت ورجعت الحياتها

اطفالها عند عمتي ام وليد للامانه مداريتهم وممقصره و وليد اول مره اشوفه بهيج هم احسه كبر سنين اشوف القهر والحزن بعيونه عليها واشوفه شارد بذهنه ومو ويه العالم ويه عالمها هي ومرضها

حاولت اتقرب منه حاولت اطلعه من ازمته واوكف وياه بس شفته يتهرب مني ويصدني لذلك فضلت اكون بعيده عنه واخلي بهمه

اليوم الثالث جنت اصلي ودا ادعي الرنا تكوم بالسلامة دخلت عمتي ام وليد كالت .. ما تمشين وياي خابروني عيال شوكة كالو نريدج خايفه لا الخبله سوت الها مصيبه

ابتسمت بوجهها وهزيت راسي بقبول وخليت ورحت وياها اول ما وصلنه ونسمع الصياح مال شوكة يجيب التايهه وسابع جار يسمعه

استغربت وعمتي ظلت ترجف دكينه الباب ودخلنه ونشوف شوكة لازمة صونده وهاجمة على رجلها تريد تكتله وامه تحاجي بيها بس وين ماكو شوكة لو عسكر كامل ما يلزمها غاديه نار

وهي تصرخ … اطللللع ولك حسيووون ولك متزوج عليه اني شووكة يالعاجر يالماعندك خلفه تتزوج عليه صبرت وياك وقبلت بكل شي يالماعندك جهال تاليها تتزوج عليه يا ابو بيوض يابسه

امها صاحت بيها كالت .. ولج شوكة شبيج شكووو خابصه الدنيا

شمرت الصونده وتخصرت … المسعد نسيبج العار ابو بيوض يابسه متزوج عليه

هو فتح الباب ومد راسه وهو يكوله .. ولج انتي الخبله شكوو خابصه الدنيا امشي ولي ويه امج

هي مدري شلون خمطته من كفشته وسحلته خطفته من بين الجموع من الكتكوت الي يلكفة عتوي مفترس

وهي كتلته هي خشنه وضخمة وهو كصير ومدبدب ضاع بيدها طاحتله حمسات على ضهره وعلى راسه فطسته تفطس دمغات

وتصيح.. ولك يالعار يا ابو كرش ابو ثرب متزوج عليه جنك نبيل شعييل ومتزوج عليه اليوم اسكطك تسكط

وصار الصريخ ماله والي والعياط والصياح واني بصراحة لزمتني الضحكة مدري شصار بيه

وهي اخذته تكف وصلته الباب الشارع وطلعته برا يريد يخلص روحة منها ماكو وما اسمع اله الهوسه

هو جان مصلخ لابس بس فانيله التعلاكة ولابس شورت ابيض ظل يفلش بالباب والجيران التمت ويضحكون وهي تصيح

خطيه الجيران جابو اله عبايه لبسوا وراح دخل جوه واحنه اخذناها ورحنه وهي مستمره تتفل عليهم وتغلط وتفشر انوب الفشار ما ينلبس عليه ثوب لزمت حلكها سديته عضتني

وصلنه للبيت وهي مستمره .. الساقط ابو نطف اكسباير العاجر متزوج عليه ولك صاير حجي متولي تلكة احسن مني احلى مني ولك ضيعت شبابي وياك بسيطه حسيون اذا ما خلعتك بالمحكمة ما اطلع شويكة الكمر

عم الهدوء بعد ساعتين من درمة شوكة ودخل عمو حسن  وهو  وخايف كال .. رنا جابت بنيه بس رنا مو زينه

يتبع

السلام عليكم

سنة سعيدة 💞

رواية طوفان رجل

بارت 49

نورا ناصر

______________________

________________

ادور كل كتر بالبيت وينك

عليلة ومالي حيل خلاف عينك

بعدني ما وفيت وياك دينك

يبعد الروح روحي الهم كتلها

رنا

بعد فتره وعيت على نفسي جنت دا احس نفسي بدوامة احس نفسي بعالم ثاني واحس بشي جاثم على صدري عبالك مثل الطابوكة بصدري كوه اتنفس

فتحت عيوني ببطئ استوعب اني وين ما اشوف بس الاضويه وصوت الاجهزه

ظليت تقريبا عشر دقايق واجت الممرضه كالت ..الحمدلله على سلامتج ماما ان شاء الله صرتي احسن

رديت عليها بتعب.. اني وين

كالت .. انتي جبتي بس دخلتي بغيبوبه الحمدلله عدت سلامات والبنوته ما شاء الله تجنن كولش حلوه تشبهج يله كومي بالسلامة حتى تشوفيها

درت وجهي واني اريد استوعب اني وين شصار بيه اخر شي ظليت افكر واني اعيد الماضي واربط الخيوط تذكرت اني من ضربني وليد وبعدها ما اعرف شنو الي صار

تنهدت بحزن وقهر .. الله ينتقم منك ومن امك يا وليد الله يحرك كلبك مثل ما تحرك بكلبي انت واهلك

كرهت حتى روحي كرهت حتى بزري فقدت الشغف حتى ما فرحت بولادتي

بجيت بصمت وروحي رجفت على بنتي ما اريدها تعيش الخذلان ولا اريدها تكون وحيده اريدها تكبر وتتزوج وتدرس وتاخذ الانسان الي يحبها وهي تحبه ومستحيل تكون هامش مثلي

حسيت بالباب انفتح درت وجهي شفته دخل من باوعلي ضحك بسرعه وكأن الفرحة تغلغلت بداخله

تقرب مني بعد ما اجه وهو ملهوف وسريع لزم ايدي وباسها وباس راسي وباس جبيني كال .. الحمدلله على سلامتج حبيبتي رنا عمري شلون صرتي

مجاوبته ودرت وجهي منا واني مجافيته واصلا ما اريده رجع باسني مره ثانيه وقدم اعتذاره

همست بضعف .. وليييد ما اريدك عوفني واطلع برا

رد عليه .. والله اعتذر وعد مني هذا شاربي ازينه اذا بعد اذيتج او خليت اي واحد ياذيج رنا والله حسيت روحي يتيم من دخلتي بغيبوبه وعرفت شكد انتي غاليه وشكد الج معزه عندي

هزيت راسي برفض والدمعه بعيني .. لا انت جذاب كل مره هذا كلامك وترجع اتعس من قبل عوفني طلكني خليك بعيد عني ولا تشوفني وجهك خليك بعيد وخليني انساك واكون سعيده

عصر ايدي وهو يكول بلهفه .. لا ما اعوفج مستحيل احنه صرنه عائلة تجنن صارت عدنا بنيه مثلج حلوه راح اعيشكم احلى عيشه والله تدللون عليه بس اصبري رناوي صح قصرت هواي بحقج بس شسوي جنت مطي

بس هسه لا وعيت على نفسي وانطيني فرصه راح تشوفين انسان ثاني والله مستحيل اضرج مستحييل  صدكيني وثقي بيه بس هالمره

سكتت مجاوبته وتنهدت حيره والله محتاره بعيشتي وياه

ظليت تقريبا يوم كامل وطلعوني للبيت هو جان كولش خايف عليه وحتى يخاف يباوع بوجهه دره هههه ضحكني

يعني من يشوفها بمكان ينهزم وامه بعدها تحجي وهو ميقبل يحجي ويغلط وامة شويه انرعدت ظلت تخاف تحجي من هو موجود بس من ما موجود تشلع وتبلع

بنتي اول ما حضنتها وبستها جان احلى يوم بحياتي عبالك ابد ما مخلفه هو صدك ولدي اعزاز بس بنتي معزتها تختلف احسها حلوه وبريئة بيها مني هووواي و وعدتها اعيشها احلى عيشه وما اقصر بحقها ولا اخليها تنقهر وتضوج

مر الايام طبيعيه وشوكة خطيه مسكينه زوجها مطلكها غيابي وهي هجمت تخبلت لبست نعالها وعبايتها وراحت تركض .. تصيح بسيطه تطلكني غيابي يا ابو بيوض يابسه الا افضحك بالمحكمة

وامها راحت تركض وراها هاي اول ما اجاها تبليغ من المحكمة تريد تهجم على القاضي مدري منو

وتلطم ليل ونهار وحل شويه وهاده على عيالها بس هي شنو اخذت كل حقوقها حاضر وغايب وذهب ما خلت شي حتئ سلة الزبالة بالغرفة اخذتها وهو رجلها ولا حجه ابد ابد يريد بس يخلص

ورجعت للبيت اول ايام جانت حزينة وضايجة وتتوسل بأمها تكوللها رجعيني اله بعد مااكتله ولاامد ايدي عليه التوبة

امها غمتها وكالتلها سليمة هو منو يريدج انت الخبلة منوو ماتكليلي رجال طول بعرض مطلعته للشارع مصلخ بطرانة ترفسين النعمة برجليج دكعدي وتغم بيها

وهي خطية الدمعة علئ عينها اول مرة اشوفها عاقلة ومنعزلة ومنزوية

درة

اجوي احمد ورزان وجايبين وياهم نسرين بنت خالة فيصل خطية نفسيتها تعبانة لان رجلها مطلكها

دخلوا شافوا جدي وسلموا عليه وبعدها كعدنا بالصالة

نسولف

هي ظلت تحجي عن زوجها كالت خابر كوومة ماجاوبت عليه وبعثلي مسجات وهم مجاوبته

كتلها ولو فضول مني بس ليش تطلگتي منه

ردت هو اني اعرف الخلل مني اني احبه واغار عليه شفته بالعمارة يم المصعد ويدك فچ ويه جارتنا وهاي مو اول مرة اشوفه يحاجيها متتت من القهر وتعاركت وياه

كلمة منه كلمة مني صارت عركة جبيرة وعضيته بيده فقدت السيطرة علئ نفسي اجيت اشلع وصلة من ايده وهو الحقير لزمني من شعري وسحبني واني داعضه بالله عليكم

احمد گاللها ادري چلبة ولچ خما چلبة وتعضين بس هو غلطان من طلكج

ردت هي بحماس اي والله غلطان شدعوة ايده والطلاق

جاوب احمد اي والله شدعوة عليه هسه هو لو شامرج من فوك العمارة ميخالف بس يطلكج لا كلش عيب عليه

رفعت اديها ونزلتها وكالتله احمد لتستهزء رجاء

هو هسه ديلح واني كوة لازمة نفسي مااجاوبه

كالتلها رزان انجبي وضبي گلبج كسرج مرة ومرتين يكسرج الف خلي عندج كرامة وكعدي وسكتي

نسرين مبين عليها كلمة تجيبها وكلمة توديها

كالت : ها هو صح  جدو كال ماله داعي يطلقج وضربلي مثل بفيصل شكد صارت مشاكل بينه وبين درة وماتطلقوا

كتلها فيصل غلطان الغلط منه مو مني

ردت نسرين بس خالة صفية تكول انت رحتي للعمارة بوقت كولش خطر وفيصل مموجود ومينعرف عنه شي وهماتين انت خلفتي يوسف غصب عنه وهو ميريد وهالشي هماتين ينحسب خطأ عليج

ظليت اباوعلها بحيرة وكأني ناقصة هم ونكد

احمد كال لنسرين بتحذير نسرين مو وكته هالحجي

خلت اديها علئ حلكها وكالت بفشلة ياا اسفة والله ميصير اكول هيجي وافتح مواضيع تضوجج وجدج بأيامه الاخيرة

هنا گلبي فزز كتلها بعصبية لااا رجاءا لتكولين هيج جدي مرت عليه ايام صعبة وتجاوزها لاتظلين تفاولين عليه

احمد خزرها وباوعلي كال ترة متقصد هي هاي نسرين تجفص وبعدين تتندم

هي دمعت عيونها واجت تبجي وبرطمت

تذكرت المثل الي يكول ضربني وبكئ سبقني واشتكئ

درت وجهي منهم

احمد كام كال خلي نروح للبستان خلي تفتر نسرين الخبلة لان نفسيتها تعبانة من ورة رجلها الشفية

هزيت راسي رزان مقبلت تروح بقت يمي وهو توسل بيها رفضت

فاتت رسل من يمنه بيدها كتبها

هو صاح عليها امشي ويانا دلينه الطريق خاف نضيع البساتين جبيرة

كالتله بدلع طفولي وهي تخلي القلم بحلكهه

اريد اقرا عندي دروس

كاللها بعصبية امشي لج امشي شدااكلج اني

هي ظلت تباوعله بخوف ونزلت االقلم من حلكها

وتباوعله مثل الي مسوي جريمة وخايف وكدامه الي ديعاقبه.

كالتله رزان وهي تضحك عوفهه البنية شاطرة وبعدين انت مو عشت هنا طفولتك شبيك متندل

كاللها هو شكد عشت هنا كلها 4 سنوات دمشي امشي

واخذهن وراح

ظلت رزان كالت اكولج شغلة ترئ نسرين مو اول مرة تتطلق هاي ثاني مرة يعني اذا رجعها وتطلقت ثالث مرة بعد تنتهي بينهم الا تتزوج شخص ثالث يله

فتحت عيوني بصدمة

كالت ويمكن ميرجعها لان هي عقيم ماتجيب اطفال خطية

انقهرت عليها بلحظتها

رزان كملت كالت اي عذريها لسانها فالت ترئ متعرف شنو تحجي وشنو تكول تحبه طليقها العار تموت عليه بس هو عار يعرف بسوالفها من ايام ما جانوا بالكلية يعرفها خبلة

ولسانها فالت.

بعدها اجو احمد ونسرين اجه احمد كعد يمي كرصني من خدي وكال تعالي اضحكج

باوعتله مبتسمة وهو يكول تعاركت وي وحدة الاسبوع الفات

كالتله رزان ايباه شلون انجاز الناس تتعارك وي مصارعين وي ملاكمين

رفع النفاضة بوجهه ديضربها وكاللها سمعي سمعي غير هي لسانها باشط تسوالها ست ملاكمين ظلينا نضحك

وهو يحجي النه عالبنية الي اجت اله للمعرض

كال دخلت عليه شعرها كيرلي بس لايگ الها

ملامحها كلها نعومة جانت معصبة وعيونها ماتستقر عليه

ردت بابا اشترئ منكم سيارة واريد ارجعها

اني كلش عجبني الاشيها خاصة من شفتها معصبة او يمكن ظنت سوء بينا حبيت استفزها اكثر

كتله سوينه المكاتبة بعد ماكو رجعه

كالت تؤاؤ هاي السيارة ورجعلي الفلوس بابا شويه مرات ميعرف يتصرف

يعني شنو ابوج مخبل تقصدين ؟

كالت بعصبية احترم نفسك ولتتجاوز

كعدت على الكرسي وارتكيت بأريحية وكتلها هاي انت هيج دتكولين

كالت من الاخير عيني هاي الفلوس رجعلي السيارة

ضحكت بصوت عالي حلال عليج السيارة اخذيها

عرفت خطأها كالت قصدي هاي السيارة جبتها بباب المعرض رجعلي الفلوس

تقربت ليكدام واني على نفس كعدتي واذا مرجعتها ؟

ظلت تباوع معاجبها وتنفخ وخلت وطلعت

اني ورزان ظلينا نحجي عليه

هو ضحك كال خلي اشلع قلبها وبعدين عود ارجعها الها لان ادري راح ترجع

بعدهه ظلوا تعشوا وراحوا

ومثل كل يوم جنت كاعدة يم جدي ويوسف يمنه يشوفني ابوس بي يسوي مثلي وهو جدي متمدد صفح ويباوع علينا ومبتسم

لزم ايد يوسف بقبضة واهنة ويبوس بيها

وصار يحاجي

والله ييوسف لو تدري شكد مقهور راح اخليك وامشي ومااشوفك تكبر نفس ما كبرت امك علئ ايدي

خليت ايدي علئ حلگه وابوس براسه واحاجي،

فدوة رحتلك جدي لا تكول هذا الكلام فدووة

گال كربت يا درة مابقئ شي خلي ابالج ترئ انه امنت عليج عد فيصل وبس هو خيالج فيصل الكل تهابه وتخاف منه هاي عمامج تشوفين بعينج وتسمعين كلهه تهابه من حامد وشيلي ايدج

رمشت بعيوني والله من التهيت بجدي جنت ناسية حتئ،فيصل عبالك فصلت عن العالم كله وبس اني وجدي عايشيين لوحدنا بي.

لشويه دخلت بيبي توهه كاعدة من النوم وكابلت جدي وظلت تنوح وتلطم هاا بعدني ماشبعت منك كضيت عمرك هاجرني وعازل حتئ فراشك عني هسه تريد تخليني وتمشي عدنان

ضحك جدي كال وانت وين فنيتي عمرج فلانة وفلتانة وعلانة  وذاك الي وهذا الي واريد هذا واريد ذاك وامك واختك

كرهتيني بعيشتي وبيج كضيت عمري هايم علئ وجهي منج ولو ما عيشتي الكشرة وياج جان ماهيمتيني جان ماشفتها وكضيت العمر كله لايبة روحي عليهه

مسحت دموعها بفوطتها وكالت هاا مو رجلك بالكبر وبعدك تريد بدرية مو كافي كول باريني الذمة كول شي بي خير وصي عليه ولدك

وظلت تبجي وتنعي كمت لزمتها من ايدها

كتلها كومي خلي يرتاح كافي عاد ماتشوفين حالته

بيا حال هو هسه وانت تنعين يمه

ضربتني علئ ايدي حييل سحبتها مزعوجة

وهي كالت وخري عني البوومة الفگر من شفتج شفت الفگر ماعليج وخري وخررري ردي لرجلج ردي شعندج هنا مكابلتنه والله ملينه من شوفتج

جدي نام علئ ظهره وكال بتعب بعد بعد ولج مامليتي ماتعبتي لسانج ماتعب من هاليتيمة ماكرهتي روحج علئ الي جاي تسوينه بيهه

كالت برفض واصرار لع اظل لاخر يوم بعمري اكرهها انه ماعونت اخلص من بدرية الدور طلعتلي بت ابنها

ضحك جدي وكال هاي خرفانة مامنها فايدة

اريد اطلعها  من يمه ماكو عبالك متخبلة يمكن متأثرة بمرض جدي الصراحة هي كولش تحبه بس هو ابتعد عنها من زمان وهجرها بسبب تصرفاتها

واندكت الباب ودخل فيصل للديوان اجت عيوني المدمعة بعينه وصديتهه بسرعة

هو كال السلام عليكم

بيبي كلتله اجيت بوكتك علواه تاخذ مرتك شنو ظاله هنا

رد عليها وعيونه عليه ليش لازم مضوجتج

كالت بسرعة عبالك تلبگ لبگ

اي ماتخليني اكعد يم الحجي عبالك مالتهه بس الهه

اجه يمي هو خله جتفه يم جتفي كال ها ترجعين

بعدت عنه وكتله تؤتؤ علئ حالة جدي مستحيل اروح وياك

ضحك كال يعني اذا صار جدج زين ترحين

هزيت راسي

جدي سمعه كال يا زين ابو يوسف انه كاعد اتاني العمر يخلص بهالايام

جاوب فيصل عمرك طويل حجي بس اكو طبيب فرنسي جاي بمستشفى باربيل اريد اخذك اله

كال ماريد ماريد عشت 80 سنة بعد شكد اريد اعيش كافي وداك براسي سلام واريد اروح اشوفه

رحت يمه جدو واني هاا واني شوون يهون عليك تعوفني

باوعت لفيصل فدوة فيصل عالجه عند الطبيب هذا بلكي يوكع علئ علته عفية خلي يطيب

فيصل شعت عيونه بالامل كال بابتسامة

ان شاءالله اخذه ولا يهمج اتدللي

دنكت اني وسكتت وبس امسح علئ راس جدي وهو مايقبل يروح يعالج وبيبي كاعدة يم جدو وتنعي

شكد نكد تريد تفاول عليه

فيصل حجئ عليها كاللها صدك جذب حجية هيج انت جاي تتعبين نفسيته رجاء لاتسوين هيج اقري قران صلي يمه بس مو تنعين

جان يحاجيهه بعصبية وهي تخاف من فيصل خلت وطلعت

راح كعد بصف يوسف واخذه بحضنه ويبوس بي

هو من يشوف وليد يطب للبيت يروحله يركض

بس فيصل عادي صح تعلم ميستغرب منه بس بعده عباله وليد ابوه

وهالشي يخلي فيصل يتخبل مبين من عيونه شكد يضوج من قرب يوسف ووليد من بعض.

بعدهه كام فيصل يشيل جدي شيل ويوديه ويفره عالاطباء رغم ماهو ثگيل جدي وجابله كرسي متحرك بس حيل تعب وياه

هو اصلا يحب جدي وعلاقتهم رغم توتر علاقتنا ومشاكلنا مشت طبيعي

بس العمر اله حوبة لا يفيد اطباء ولا علاح

زادت حالة جدي سوء ويوم عن يوم هو يضعف ويتعب وصار قليل الكلام والاكل بس عينه مفتوحة عليه ومن يحجي يكول اريد اشبع شوف منج

اجوي عمامي من العمارة وجانوا محملين امانة من بيبي

تريد يبريلها الذمة وهو دموعه صبت وتمتم بشفايفه وبثگل لان گوة يحجي كال محللة

وبيوم انتهئ جدي صار ماينسمع صوت اله وظل ينازع بروحه بس عينه عليه وجانت تجري دمع هنا عرفت راح يروح مني جدي وراح ابقئ وحيدة

خلوه عمامي كبال القبلة وصاروا يرددون الشهادة بوجهه

واني عبالك دااحلم جان كلما يوجهونه يكسر رگبته عليه جنت اريد املخ روحي كوة اتنفس وليد جان يبجي واجه يمي كال كومي توضي واقري يمه سورة يس حتئ يهون عليه سكرات الموت وانت هم ترتاحين

كمت توضيت وجبت القران وكعدت يمه واني اناشغ واقرا وهو عيونه تصب دمع وبس عينه عليه

بيبي وصفية وهناء كلبوها مناحة ولطم قبل لا تطلع روحه

بس فيصل صاح عليهم وطلعهم من الديوان

وغمض جدي وعلى وجهه ابتسامة كمت اصرخ واملخ  بروحي ونايمة  على صدره  واصيح لاتعوفني اروح وياك جدي جدي كلهم ياذوني من الي بعدك جدي اخذني وياك لاتعوفني

‏

‏فقدت بعد مااحس يجروني جر منه وداير مدايره الكل يبجي

‏

‏اليوم  مات الاب والام والاخ والاخت والجد كلهم بي اي والله كلهم بي

‏

‏ مات الي يعرفني جدي يعرفني من نظراتي من اسوي مصيبه ومااحجيها ومايعرفون منو سواها جان يدري بيه

جان يمشط شعري يكوي ملابسي علمني علئ بلوغ االبنت وعلمني علئ ليلة دخلتي جان بالنسبة الي مدرسة لا بل جامعة بحالها راح وتركني وياريت اخذني وياه اخذني وياك جدي ولا تخليني بهالدنيا

يتبع

اعذروني وتحملوني متبقئ شي واختم وهالبارت صعب عليه اكتبه الجد هو جان بطل الرواية الله يرحمه برحمته الواسعة ويرحم امواتكم جميعا.

السلام عليكم

لفتني تعليق احدى متابعات الرواية مااتذكر تعليقها نصا بس معلقة انو الكاتبة مسوية فيصل هو البطل مااعرف شون استنتجت هالشي

انا بطلي بهالرواية هو الجد ،  مو شرط البطل يصير زوج البطلة

درة بطلها جدها

انسان يستحق ان يكون البطل

عاش قصة حب غير مكتملة ومن طرف واحد

وزوجة سليطة اللسان وظالمة

انعدم ابنه ظلم وعاش بحسرته عليه العمر كله

مو هينة ابد الضنى ينعدم وهو بريء

ربى حفيدته وصار الها الام والاب والعائلة كلها

بغض النظر عن اسم الرواية الجد هو بطلها 💔

الله يرحمه برحمته الواسعة

السكرين هذا من محادثة درة رسالة قديمة طبعا درة لهسى مختفية

السلام عليكم

رواية طوفان رجل

بارت 50

نورا ناصر

لا وجع كفقد روح لن تراها مهما بكيت.

احس روحي انتهيت مالي طاقة اعيش حياة مابيها جدي  ولا دنيا مابيها حسه تعودت عليه ماكدر اتعود بدونه.

شلعوني شلع من يمه شون تسكت جدي وشون مااسمع صوتك مااشم ريحتك مااحجي وياك ولااشوف طولك شلون بيه جدي شلوون

زين ليش عودتني عليك ليش علقتني بيك ليش ماعاملتني مثل البقية حتى لا يجي هاليوم واتأذى

شلعوا گلبي من وخروني من يمك يا جدي

التمت الناس علينا وصارت هوسة واخذوا جدي لزموني كوة اريد اروح وراهم بس فيصل طلعني كوة و خلاني يم النسوان

ووصاهم يلزموني ومايخلوني اطلع

اخذوه وراحوا بي للمستشفئ واني كاعدة وبنات عمي لازماتني عن لا املخ بروحي بس صوت صراخي يجيب التايه احس حنجرتي راح تطگ واوتاري تگطعت

اجه علئ بالي ودوه للمستشفئ هسه

اكول بلكي يفحصه الدكتور ويلكئ بي نبض ويرجعونه

لو ميخالف يبقئ بالمستشفئ ويعالجوونه حسه بالدنيا كافي

عندي امل يرجع مامعقولة يموت جدي شون راح استوعبها هاي شلوووون

بقيت علئ هالحال والناس اجت تعزي وانترس البيت واني اباوع وكلت هاي هيه بعد مايرجع جدي

و كلما يجوون نسوان  يصرخون ويبجون يم بيبي وينعون اني ينهد حييلي بس ماريد اصدك جدي مات كل شويه بعد عندي امل يرجع

وراها جابوه بتابوته وفروه ابيته كعدت يم تابوته اعاتبه ليش يتركني واتوسل بيهم اشوفه لأخر مرة ماقبلوا يفتحولي التابوت.

وشالوا جدي ومشوا بي يردون يطلعوه ميطلع التابوت من البيت ثگيل وانكسر الباب الرئيسي يله طلع منه.

سودة عليه جدي ماتريد تفاركني لو ماتريد تفارگ بيتك وتطلع منه .

وطلعت جنازته من البيت واصوات لا اله الا الله صارت مسموعة بالمكان والحناجر تصدح بيها.

جدي الكل يحبه عاش ومات وهو ما مأذي أحد ولا ظلم أحد. 

وطلعت وراه عراضة شكبرها وشكدها.

اجيت اطلع بدون وعي وراهم اريد اركض ورا جنازته فقدت وانهاريت ماعرف شسووي وحتئ النسوان الي محاوطاتني ماكدرن يلزمني هديتهم وفلتت منهم ومشيت

وماادري شلون لگفني فيصل جان يحجي وياي بس صوته مايوصلني جانت عيونه حمرة دم ولاف الغترة علئ رگبته

لزمني وقربني اله ومن الهوسة انضغطت لجسمه دخلني جوه وهو لازم معاصم اديه بقووة.

صاح رزان نسررين وظل يكرر بأسمائهن بنص الهوسة صوته جان طالع تعبان ومبحوح.

اجن يركضن وهو صاح بيهن لزمنها ولاتخلنها تطلع مفهووم

دخلني وسد الباب وطلع يمشي سريع

هن لزمني واني وكعت عالكاع انهاريت

شوون جدي مخلينك بتابوت الخشب بارد عليك جدي

ليش لافينك بالچفن مايلوكلك

جدي حبيبي ارجع والله من هاللحظة صارت الدنيا وحشة عليه استاحشيتك ارجع جدي عفية صررت انوووح نيااح يبجي الصخر بس كل هذا مايفيد بعد راح جدي.

طبيت للبيت لازماتني نسرين ورزان وكعدت بزوية غطيت وجهي وابجي والذكريات كلها انهالت عليه من يوم جنت صغيرة لحد ماكبرت شنسئ منك جدي.

يجون النسوان يكابلني ويبجن وياي ويعزني واسمع وحدة حطت يوسف يمي يبجي واسمعه يصيح باسمي

دلا دلا

خليت راسه بحضني ودموعي توكع عليه امسح علئ راسه هو مبين جان مرعوب من الهوسة واني نسيته

غمضت عيوني شون اكدر امحي ابتسامة جدي من بالي شوون اكدر انسئ شوفتي اله وهو ميت.

وخرت يوسف من حضني وكمت كامن وياي رزان ونسرين ورنا وين ترحين يسألن بيه.

رحت للمطبخ اريد اطبخ لعزا جدي

كالت رزان ياادرة امشي كعدي بالعزاا هسه يجيبون طباخ يطبخ شطبخين انت

اني مادري شنوو اريد اريد اشرد من حزني اريد اشرد من مصيبتي اريد افقد انسئ ادخل غيبوبة اني ماريد اعيش هاي المصيبة ماريد جدي يكولون عنه ميت جان بيني و بين الجنون شعرة وحدة بس.

كوة كعدني وصيتهم يجيبون اجزاء من القران حتئ يقرون بدال لا كاعدات كل وحدة بسالفة.

كعدت وعيني عالباب واكول هسه يدخل عليه

بطوله وهندامه وابتسامته الي مايوم دخل عليه وماابتسم بوجهي  الي تخلي الفرحة تتربع بنص روحي.

الظاهر راح اشتاق لهاي الابتسامة كلش هواي

وخلص اليوم واني بين مصدگة وبين ممستوعبة وبين حزينة وگلبي ينزف.

لنهاية اليوم البيت يروش وحتئ عمامي اجوي من العمارة واخذوني الهم سلمت عليهم وجانوا يبجون علئ جدي هم حتئ بمرضته ماتركوه يجون علئ طول اله.

اجتي مرة عمو حسن وامها وخالاتها وعماتها عزونا وهي بقت يمنا بالبيت جابت اكل تريدني اكل واني مااشتهي

رنا يمها كالتلي بصوت مبحوح بسبب البجي

اكلي درة وشوفي الاكل مال فاتحة جدج شكد طيب شوفي نفسه شكد طيبة وصار الاكل هيج طيب.

طكيت بجي وهن يبجن ويايه ويردني بس اكل

ظلن يتوسلن بيه وجانت الدنيا ليل ورا العشه وهو حتئ بالعشا طبخوا ووزعوا عالفقرة

كتلهم بصوت كله بجي ودموع باجر اكل ماريد هسه

رنا كالت انت من يومين من تخربط الحجي كطعتي الاكل مايصير والله  والله جدج مايقبل عليج هيج تسوين بروحج اتذكر من جنتي حامل وجيتي يمنا كل شويه يفوت للمطبخ جايب شي لو يوصي علئ شي يكول خلي درة تاكل خلي يزيد دمها وحتئ من قبل لا تتزوجين يجيب ويخلي كدامج اكلي فدوة لخاطره هو

باوعتلها كتلها اوف رنا شنسئ منه اني

ردت وهي تخلي ايدهه علئ جتفي والدموع توكع من عيونها كلنا درة كلنا نحبه وماشفنه منه شي موزين حشه بس انت انت الله يعين گلبج ادعيلج بالصبر ويصبرنا وياج.

يوسف كاعد يمهن يسمع بالحجي ظل يشيل باللحم من الماعون ويخلي بحلگي

باسته مرة عمو حسن كالت فدوة شكد حنين

ورنا تكوله الله يخليك سند لأمك ان شاءالله.

باوعتلها وهمست ان شاءالله.

ماعرف شلون كضيت الليل رحت لغرفته مالته

افتش بأغراضه  عنده فاتيه يعني صندوق خشب مزخرف بيه شغلات كلها عزيزة عليه سلاحه وعباته وحتى مقراضته واشياء معدنية حتى موبايله وعطره جان يدز من السعوديه ويجي على شكل بوكس عطر العود خليتهم علئ گلبي واناشغ

دخل عمو حسن ووليد  وصرنا نبجي احنه الثلاثة سوئ وعمو حسن شابكني كتله عمو جدي شلون هان عليك دفنته خطية مريض شون يهون عليك خليته عالتراب

خله راسي علئ صدره ويبجي

ووليد صوته مسموع بالبجي

دخل عمو فلاح وعمو حامد و عمو فلاح

وصرنا نتذكره ونتذكر سوالفه وذكرياتنا وياه الي ماتنسي.

رنا

اول ليلة بالقبر للحجي الله يرحمه وهاي اول منازل الاخره وبيها الانسان تبشر بمكانته بالجنه او يسود وجهه بسبب اعماله الفاسقه

ان شاء الله يارب جدنا بمنازل الجنه لان الرسول صلى الله عليه وسلم كال … انا وكافل اليتيم بالجنه

والحجي ربي يرحمه ويوسع قبره كفل طفله يتيمة وصار الها سند صار الها اب وام واخ واخت صار الها دنيا حطلها الشمس بيد والقمر بيد عله من مقدراها و وصلها وكفلها

ان شاء الله ربي يبشره بالجنه ويثبته عند السؤال ويجعلنه منازله منازل الجنه والفردوس الأعلى

رحت توضيت وصليت اله صلاة الوحشه وقريت اله الفاتحة

كعدنه الصبح ثاني يوم الفاتحة والنسوان جانت تروح وتجي وتلطم

ودره بضيم حالها وعيونها محاوطها زراك قوي من كثر الدك واللطم وتبجي بصوت يكطع الگلب والنسوان تجي تواسيها ما تواسي بيبي

اجت بيبي زهرة وكعدت مقابيلها وهي تنعي الها بصوت حنين يكسر الخاطر ويذوب الگلب

كالت الها .. دره يمه گولي .. يابجدي يالفارش عباتك

وانه العزيزه من بناتك حنين يامحله صفاتك

صرخت دره وهي ترد عليها .. اي والله بيبي والله حنين والله جان مداريني مثل الطفل جان كل شي بالنسبه اليه ظليت وحيده محد الي انكسرت خاله جدي كسرني كلبي يوجعني

صدك اني العزيزة صدك اني العزيزة من بناته شلوون بيه وين اروح وين انطي وجهي بعد منو يدافعلي منو يسأل عني منو يشيل همي اليوم صدك تيتمت صدك اليوم صرت يتيمة گلبي نار موجره بيه

ردت الها بيبي زهرة  وهي تكمل كولي يدره .. ياجدي يابو المحنه.. انت الضمد ونته فخرنه ..خلافك بعد چا ياهو النه

لطمت على وجهها دره وهي تصرخ … اييي ايي جاا بعد منو الييي جدييي وينك جديي

النسوان من شافن انهيار دره خطيه سكتن بيبي زهرة  كللها كافي تنعين واني اجيت يم دره سكتتها حاولت اهديها

حاولت اوكلها بس ما قبلت تاكل ولا تشرب حييل متاذيه ومنهاره قريت عليها نومتها على رجلي

انوب جريت المخده خليتها جوه راسها ورحت انظف بالمطبخ

وهوسة النسوان بالهول بيبي عايفه النسوان وكاعده تسولف كالت .. هاي مرة حسن فكر بت فكر بس لفت علينه وعرست مات الشايب كل شي ما بيه مثل الورد بس هاي جسحته وجهه الفكر

ردت عليها هناء ….والله اني خيير وجهي خير عليكم جنتوا فكور من لفيت عليكم واني جبت الخير وياي صدك ام هلا بت خير جبت الخير وياي

بيبي فرت شفايفها ما راضيه

وشوكة كالت .. انهجم بيتج كوون هي وبت خيير بت ابو الخبز يابس هو غير ابوج جان يبيع خبز يابس وامج تبيع ثوم بالتقاطع

ركعتها امه على رجلها… ولج انلصميي اذا ما ربيتج فلا اطلع هنيوه اني ابوووي يبيع خبز يابس

ردت شوكة باستفزاز.. اي والله جااا اني مجذبه مو حتى جان عنده مطي وعربانه وياخذنه وياه ونصيح خبز ياااابيوووس خبز يااااابيوووس

وتصيييح بنص الفاتحة تكافشن هي وامها وطاحت بيهن وطردتهن بيبي

عفتهن ورحت اكمل شغلي هزيت ايدي صدك الناس زاحت المستحه هسه مرت حسن شدخلها هذا يومه مكتوب عليه بهيج عمر يموت وتوكع ورقته الف رحمة ونور تنزل على گبره

دخل وليد لابس اسود ولابس غتره سوده بيها ابيض ودخلوا الغده صاح عليه كال .. رنااا

ركضت اجيت يمه كتله .. هاا وليد البقاء لله

رد عليه بتنهيده.. البقاء لله

كمل كلامه وهو يكول .. مو تخلصيها تكربين وتشتغلين هواي بنات هنا خليهن يشتغلن عنج واكلي وديري بالج على نفسج وعلى جهالج

ابتسمت على كلامه حاول يفرحني رغم الحزن الي مغيم على گلوبنا بس الاهتمام حلوو خاصه من تجي من الشخص الصح

كال درة شلونها

دنكت وكتله شلونها بعد

كال ديري بالج عليها وخليها تاكل وراح

درة

يوم ثاني اجت رزان كعدت يمي جان يوسف بحضني

باسته وكالت فيصل بالمستشفى متخربط.

اني بوقتها كل مشاعري لجدي وفقدانه

ماحسيت بشي تجاه هالخبر اصلا ماكو مساحة بداخلي احس بأي شخص غير جدي.

ماجاي اصدك اخر شي شفته بتابوت عبالك حلم وجاي احلم ونار بگلبي متطفئ صفيت جسد بدون روح.

مااعرف شلون خلصت ايام العزاء واني بعدها انهاريت ماظلت قوة بيه وكعت وحتئ نزف صرت انزف ونقلوني للمستشفئ

اسبوع بالمستشفئ شبه فاقدة وعالمغذيات والمهدئات مااحس باي احد يمي ولا ادري بلي يدور حولي  اريد بس اغمض وانتظر جدي يمرلي بحلم.

جنت احس بيهم ينقلوني للسيارة لمحت فيصل وسمعت عمو حسن ووليد صوته متعصب بس اغمض وافتح ومادري شيصير بيه.

لهناك وافتح عيني واباوع عبالك بين الوعي والاوعي ولهناك واشوف نفسي بذيج الغرفة الي كضيت بيها اسوء ايام حياتي.

كعدت وانتفضت خليت اديه علئ اذاناتي واصرررخ جدي جدددي جدددي.

كمت وكفت بنص الغرفة واصرخ بعلو صوتي

اجو يركضون فيصل ورزان واحمد ووراهم طبت نسرين وفاتن وعمتي اجن وكفن بالباب يتفرجن.

ويوسف تسلل من بيناتهم وجانت عيونه حمرة وملامحه متغيرة حيييل اني وين جنت عبالك صدك بغيبوبة وماواعية علئ شي حتئ ابني ناسيته شسوئ بيه فراكك جدي.

فيصل طلعهم كلهم وبقينا بس اني وياه اجه لزمني

كال اهدي درة ابتعدت عنه خطوات وصررخت ابتعددد عني لااا تجي يمي ولا تلزمني افتهمممت.

كال زين بس اهدي شويه خلي افهمج

صرخت واني اكعد عالجرباية لان مابيه اوكف بعد  رجليه ماتعييني من الصدمة ويوسف تسلق وصعد يمي واكف وواصل بوكفته لچتفي وخلي ايده عليه.

وفيصل واكف خطوات عني بنص الغرفة اباوعله ولازمة راسي يحاولي يهدأ ثورتي واني منطلقة بالحجي

ومعصبة احس فوك مصيبة جدي انغدرت.

كتله انت ليش ترجعني ليش تستغل هاي الفرصة منو كلك اريد ارررجع اني  منوووو گلك ليش تستغفلني ليش تستغل ضعفي هو هذا الي الله كدرك عليه.

ماكدرت ترجعني وجدي عايش ترجعني واني عاجزة وضعيفة

فتحت عيوني علئ اوسعها واهز راسي برفض

واحجي بس لا فيصل لااا لاعبالك مرة كدرت تلوي ذراعي بجدي وعديتها الك وانصاعيت هسه ماتكدر بعد

كال وهو يأشر بيده ويسوي اشارة الصبر

انتظري درة لا تحكمين عليه اني الله شاهد جبتج هنا حتئ اداريج ماترهم تكعدين ويه صبريه وهناء اخاف عليج اني

وتكوم تجيبني هنا ببيتك مااكعد وياهم اني جدي امن عليه وعندي بيوت من ورث بابا اكعد بيهن

عكد حواجبه وكال وشنوو تتوقعين اخليج تعيشين ببيت لوحدج شيليهه من بالج هاي مفهووم

جان ياشر باصبعه بتهديد.

كتله بنتر وديني بيت جددي ووديييني

خزرني وطلع

من طلع انتبهت علئ يوسف جان يبجي بدون صوت اخذته لحضني وشلته وادور تليفوني ماكو مموجود بالغرفة

طلعت عباية وشال ونزلت بس احس روحي وجسمي ضعيفة كلش عودي ضعيف ورقيق كلش.

نزلت الدرج جان كاعد بالصالة ويدخن يمه بس نسرين.

من شافني تفاجئ طفئ الجكارة بالنفاضة وكام علئ حيله

يوسف جان بعده يبجي وعلئ ايدي اخذه مني بسرعة سحبته هو من سحبته عافه ما تمسك بي

كال وهو يباوع للعباية بيدي وين رايحة ?

كتله وين تليفوني

سأل باختصار ليش لمنو تخابرين

واني ادور وجهي جاوبته لعمو حسن

شتردين منه ?  هو جابج وياي هنا يكول احسلج

من ورا خشمي جاوبته واباوع لنسرين هو اريد احجي وياه بهذا الموضوع.

هي من شافت نظراتي خلت وكامت صعدت الدرج

تقرب مني لزمني اريد ابتعد عنه عثرت لزمني وكفني

كال درة رجعيني امان الج صدكيني ماتخسرين هالمرة لخاطر يوسف

ضحكت بنص ابتسامة هازئة ههه وانت نسيت شسوويت بيوسف.

كال درة اني الي اسبابي انت ليش ماتباوعين لنفسج لاخطائج شنو هذا الغرور راح تصير تلث سنوات صدك تحجين خلي نطوي الصفحة ونبدي صفحة جديدة.

تعبت من يوسف علئ ايدي ظلت توجعتي نزلته بس بقئ هو مچلب بيه بملابسي لازمني قوي.

كتله لو اشكك الدفتر كله انت ميفيد وياك جربتك مرة ومرتين وتلاثة ميفيد

كال سمعي درة من الاخير طلاك ما اطلك تعيشين وحدج هم باحلامج ترجعين بيت جدج الله يرحمه ووليد هناك هم انسيها.

اني عفت الكلام كله الي كاله وبس اثرت بيه جملة الله يرحمه بحق جدي اووف جدي الرحمة للميت والحي اني منوو يرحمني من بعدك .

مد ايده بجيب دشداشته وطلع موبايلي ومده الي كال هذا هم جبتي من وراي وهاي شكم وحدة صارت

وهز راسه بس يله ميخالف

كتله واني اخذه منه لاتشفق عليه فيصل وانت تدري اني ماريدك بعد ماريدك جاي تقارن اخطائي بأخطائك

كال اخطائي انعكاس لاخطائك درة.

ضحكت باستهزاء كتله هاي بدل ما تاخذ بيدي وتصحح اخطائي تكوم تجرم بيه وتتفنن بعذابي كتلك انت اماني فيصل وانت شوف شسويت بيه.

كال بتوسل رجعيني لحضنج اخر مرة وداعتج وداعة حجي عدنان اني استفاديت من اغلاطي ماكو هيج تنازل تره درة افتهمي

كتله اغلاطك ههه انت مشروع مجرم نسيت من مرتين ردت تموته ? وخليت ايدي علئ راس يوسف لو من اتهمتني حركت الغرفة

اخذت الفون وطلعت من يمه للحديقة احسه تبعني طلعت رقم عمو حسن وخابرته اجاني صوته

كتله ليش عمو ليش تستغفلوني وترجعوني لفيصل واني تعبانة مو تدري بيه ماريد ارجع

كال احسلج درة فيصل وعدني

لعد اني وين من كل هذا جان انتظرتني اكعد استوعب ع الاقل شنو طفلة اني تتحكمون بمصيري! 

كال اني جايج ونحجي

جاوبته تعال رجعني لبيت جدي اني متحضرة وواكفة بالباب ولابسة عباتي.

رد من اجي راح احجيلج كلشي ابقي بس مسافة الطريق وجاي

سديته منه التفتت شفته واكف مرتجي عالباب ويباوعلي

كال ببرود درة دخلي برد

مشيت باتجاه الباب اريد افوت وكفت يمه

كتله راح افوت انتظر عمو حسن كال راح يجي.

وفتت ماانتظرته يحجي

صعدت فوك ماريد اشوف احد كعدت ويوسف جان منعس لاادري بي اكل لاادري بي شرب ظليت احاجي واتعذر منه وابجي

هو ظل يعدد بجهال وليد علاوي وايود وماما رنا ووليد ويبجي يريدهم

حضنته كتله هسه راح نروح الهم حبيبي لاتبجي

ظل يمسح دموعي ويسألني ليش ابجي.

مسحت دموعي كتله ابجي وياك بس تسكت اسكت ظل يضحك ونام بحضني.

دقايق وطبت نسرين بيدهه صينية جانت صابغة شعرها احمر ولابسة تراك سبورت اسود وهي بيضه حليب

كولش مغرية طالعة.

لدرجة واني بنص كرهي لفيصل واريد بس اشرد منه غررت لان اعرفه ابو نسوان.

كالت اكلي انت تعبانة والدكتور كال لازم تاكلين دمج كولش نازل وتعبانة.

هزيت راسي واباوع للصينية بيها اجبان وبيض وكوب جاي وكعك مسمسم.

جان جسمي هزيل وارجف وفعلا جوعانة

هي انطتني كعكة كالت لخاطر ابنج يمعودة وبعدين خطية فيصل والله ديسوي اللمستحيل عمود يرجعج ارجعي وكافي زعل

صدوك علئ فكرة شنو رايج بصبغة شعري

وضحكت وقبل لا اجاوبها كالت راح ارجع لارشد راح يجي عليه الاسبوع الجاي ودااكمل تحضيرات انت همين ارجعي لفيصل.

كتلها اني مو انت ترئ ظروفي مو نفس ظروفج تختلف والله يسعدج ان شاءالله.

كالت اممم اي والله صحيح ومن فشلتها كالت يله اكلي اكلي وتضحك.

اندكت الباب طبت رزان كالت اجه خالو حسن جوه يريدج

خليت يوسف نايم ونزلت عالدرج كلت لرزان فيصل وين

كالت طلع عنده شغلة مهمة

هزيت راسي نزلت واسمع عمتي تكله اي يمتئ تسافر.

كال ماظل شي خويه ونطلع

كالتله يعني كبل اربعين ابوي

جاوبها اي والله بعد مو بيدي

ديحجي وطب فيصل واني جنت واكفة بنهاية الدرج.

يتبع.

السلام عليكم

طوفان رجل

بارت 51

نورا ناصر

التعب

عاشر گلايدنه وصفت صفره

النهر ضيگ ومامش حيل ونعبره !!

شــبـعــد ونعاشر التابوت مو متنه الف مره

لـ زهراء حامد.

نزلت واشوف فيصل هستوة جاي يسلم على عمو حسن

رحت باتجاههم شافني عمو اجه يمي وحضني

لزمني يباوع بوجهي

كال  شلونج درة انت زينة !

كتله عمو اني ليش هنا ليش رجعتوني هنا لحكتوا تتحكمون بيه.

سمعت فيصل يسوي هيج تؤتؤ

باوعتله كوة لازم اعصابه.

عمو حسن يريد يحجي عمتي كلتله

اكعد خويه اكعد السالفة مطولة.

باوعلهه كال من رخصتكم ارريد احجي وي درة لوحدنه

فيصل هز راسه بس عيونه بهامته من العصبية وحسيته كوة متحكم باعصابه وساكت.

وعمتي رفعت تك حاجب وتباوع معاجبهه وخلت وراحت لغرفتها وفيصل صعد فوك ويفر بسبحته.

بقينا كاعدين اني وعمو حسن

كال متردد  درة اني راح اسافر.

باوعتله مقهورة وبداخلي صرخة شكبرهه لعد واني منو اليه.

هزيت راسي ودنكت كتله عمو انت متحضر وتريد تروح قابل امنعك الله وياك واتمنالك السعادة انت جنت الوحيد الي حنين عليه بعد جدي  جنت عكس الكل زين وطيب.

جرهه حسرة كال ما ودي اتركج والله يا درة بس هذا الي صار تعرفين اغلب الكفائات والاساتذة مهددين بهاي الفترة واني اريد اطلع وامن علئ نفسي واكون عائلة.

بلعت غصتي وكتله ان شاءالله خير عمو بس اني

كال سمعي درة انت تردين ترجعين تعيشين وي حامد وهناء! ! شنو نسيتي الي سووه بيج قبل وحتئ من رجعتي زعلانة هم جانت تصير مشاكل وضيجة خلگ.

رفعت راسي بمواجهته كتله لعد عمو اعيش وي فيصل هو هذا الحل برأيك.

كال فيصل وعدني درة.

كتله واني كوة لازمة اعصابي ووعدكم من قبل يحميني ويأمن عليه وشوف شنو الي صار تلث سنين واني زعلانة ومعلكة ومشتولة عدكم شكد لحيت عالطلاك ماطلكتوني منه.

جدج جان رافض يطلكج منه وحتئ عمامج اخوان ابوج هم ما مأيدين الفكرة.

كتله ماارجعله ابو نسوان وخاين نكر ابنه سنتين وتهمني تهم باطلة خله الناس تحجي عليه كرهته كرهته عمووو انت تريد تسافر الله وياك اني الي الله هنا وفيصل اعيش وياه واجهة اجتماعية لا اكثر ولاااقل وعلمود ابني وبس.

وفعلا هو بالفترة الاخيرة صار يحتار شلون يدلل يوسف وتعلق بي ويحبه حييل.

نزل فيصل بهالاثناء وسمع جملتي الاخيرة

عمو حسن كام من مكانه وكال لفيصل

فيصل درة امانتك امانة ابوي الحجي الله يرحمه اذا عرفت مأذيهه لو معنفهه لو كاسرها صدك ماراح تلكئ اثرها بالعراق كله وتظل عمرك كله تدور عليها وماتلكاهه.

كال لا تهدد حسن انطيتك كلمة اني وخلص.

هز راسه بوسني وحضني ماكدرت ماابجي

ورغم كبريائي كتله شوكت تسافر

مو هينة افارك اثنين بشهر واحد جدي وعمو حسن

واحد سكن المقابر والثاني يريد يهاجر بارادته عني.

عمو حسن حوط اكتافي كال قبل لا اسافر اجي واودعج واشووفج اني واحلام زوجتي.

هزيت راسي وحضنته وهو يبوس براسي

طلعت عمتي تكوله خويه ابقئ تعشئ يمنا

‏بس هو ماقبل سلم عليهم وجان يوصي عليه وطلع.

انتبهت عمتي صايرة هزيلة وضعيفة كولش عيونها محورة ووجهه اصفر ممعقولة علئ جدي هي يمكن مريضة.

ورا ماطلع عمو صعدت فوك شفت يوسف بعده نايم

فتت للغرفة وتوني دااسد الباب هو فتحه

التفتت ورايا شفت داخل واكيد يريد يتناقش

تقرب مني كال درة شنو هالكلام هذا الي حجيتي لعمج

كتله باستهزاء شنو جنت تتصنت عليه

هو مارد كال درة اني والله احبج

وجهت ايدي باتجاهه كتله لاتكول هالكلمة رجاء ماتلوكلك والله اصلا انت تزوجتني مو حبا بيه لاا والله ابد بس علمود واجهه اجتماعية وبس لان الناس كللها ظلت تحجي عليك تبدل نسوان اكثر مما تبدل ملابسك صارت سمعتك كولها مووزينة وعلئ كل لسان ردت تحسنها وتزوجتني.

فتح عيونه مصدوم ومعصب بنفس الوقت

كال انت شنوو هالحجي ترئ،اني مخايف من حجي عالم وناس عزاا مااتزوج عشرة بوقت واحد كلام الناس اخر همي.

كتله ماايهمني بعد تزوج طلك مايهمني وبس كدام الناس انت زوجي ويجي يووم واخلص منك.

ودااطلع لزمني من ايدي قووي وثبتني كدامه

وكال بموتي لووو بمووتج.

سحبت نفسي منه كتله شووف هذا الي يخليني اكررهك مقيدني عبالك ملكتني وخررر خليتني اتنفس وخررر.

قررب مني وباسني بشفتي غصب عنييي وخرررته واني امسح البوسة.

طبيت لغرفة رزان وجانت نسرين يمها،  هي نسرين تجي يم بيت فيصل لان نفسيتهه زعلانة بسبب طلاقها وهسه حترجع لرجلها شفتهن دتحضر اغراضها حتئ تروح.

كعدت يمهم وظلت نسرين تجفص كالعادة

كالت اكولج درة انت متعارضين خطبة رزان لاخويه بعد ميطلع الاربعين مال جدج مووو عمود اريد اسافر والله حرجع لارشد واريد الحك علئ خطوبتهم اشوفهه. 

قبل لا اجاوب جاوبتهه رزان لا نسرين هو مو بس جدهه لدرة وجدي همين شون اسوي حفلة وهو بعده ترابه اخضر اني اكول ورا السنوية وان اان شاءالله تحضرين عندج وقت هواي منا لسنة.

كالت لا اني اتفقت وي ارشد نرتب حياتنا ونتفرغ لبعض وننظمها وبلكي اقنعه نتبنئ طفل ونربي،سوئ مااعتقد راح اكدر ارجع كل فترة حتئ لو بعد سنة.

رزان جاوبتهه انت اصلا كل كم شهر هنا شمعنئ هسه

كالت شبيج ماتسلمين عدل انت دااكلج ترة اريد اضبط حياتي واعووف الطيش والتهور وارتب وضعي. ومااظل انطط بين بغداد وعمان لا راح احاول استقر اني احب ارشد مااريد اخسره.

باوعت لرزان ضايجة خطية وعيونهه مدري شلونها نظراتها.

كملت نسرين كل شي واجه عليها اخوها ودعتنا كلنا وراحت.

كملت نسرين كل شي واجه عليها اخوها ودعتنا كلنا وراحت.

رجعت كعدت يم رزان جانت ضايجة كوولش

بقيت ساكتة اريدهه هي تحجي.

كالت بعد حسرة ماما دتاخذ علاج كيمياوي

انصدمت معقووولة من شوكت!

كالت مو من هواي بس بدات اعراضه تطلع عليها هي ماحجت كالت ماريد احد يتشمت بيه.

جاوبتها وليش نشمت هو المرض بي شماتة!

كالت بحزن  هي هيج تفكيرهه ماما

نامت بحضني وتبجي ظليت العب بشعرها

كتلهه فيصل يدري

هزت راسها يدري هشام كاله بس هي متريد فيصل يعرف وهماتين كالت لتكولوله.

تدرين ماما تكول خاف فيصل يتشمت بيها

كتلها لا مامعقووولة فيصل يتشمت

لكيت نفسي ادافع عنه فجأة رغم كولش كارهته

هزيت براسي ومكملت جملتي

كتلها الله يشافيها.

بقيت افكر ويه نفسي ياربي ليش ادافع اله شنو الي يشفع اله حتئ ادافع اله رحت للغرفة لكيت يوسف ماكو اكيد يمه هو.

رحت مددت وافكر بسيئاته وحسناته ونمت واني افكر وبعالم الرؤيا  زارني جدي.

بالحلم ويكولي جدي خلي فيصل يجيني يشيلني ويوديني للطبيب.

كعدت من النوم يوسف يبوس بيه فتحت عيوني اريد استوعب دقايق واستوعبت واشوفه يوسف يمي وفيصل واكف يباوعلي ورجليه مكشفه.

كمت بسرعة سحبت الغطا وغطيت روحي وجريت يوسف يمي سألته اكلت هز راسه.

حسيت بفيصل طلع من الغرفة

وبقيت متمددة ويمي يوسف يكرك وياي

بعدها كال اريد بابا وليد اريد علاوي وظل يبجي عليهم

اريد اسكته ماكو بس يبجي

اجت رزان سمعته يبجي واجه احمد سمعه يبجي

حاولوا يسكتونة ونزلوا بي للحديقة

حتئ فاتن طلعت كالت شالقصة كالب الدنيا حتئ جهالي كعدوا من النوم.

بوقتهه عدهه بنية بعمر ست اشهر

شافت محد قلدهه خلت وطبت وبعدهه هدأ يوسف وسكت ونام بحضن رزان.

رزان كالت ممنتبهة علئ حمودي هواي يصفن وغمزت الي وكملت يمكن يحب.

ررن تليفونه بهاللحظة وهو كال بنت الحلال بذكرها وكام يخابر سمعته يكول هلو حبيبتي.

ابتسمت سألت رزان ولج هاي منين الي يحبهه نعرفهه?

ردت لج نفسهه هاي الي تعارك وياهه بالمعرض من بعد العداوة حب شفتي شلون.

ضحكت كتلها اي والله

ردت اي بس البنية مسيحية يعني مااعرف شوون راح يتزوجون هواي فروقات تمنعهم.

كتلها شبيهم المسيح اطيب ناس هواي اتذكر مسيحيات تزوجوا مسلمين جانوا وياي بالجامعة والعكس هم.

ردت اي بس امها قافلة كلش وتريد تاخذهه وتسافر برا العراق.

ليش هو احمد خطبها ?

جاوبت لا بس هي سيلا مفاتحة امها بالموضوع ورافضه نهائي وهو حيل حبهه مقهورة عليه احمد حظه هذا تدرين هي كل مرة تكوله خلي ننفصل وتعوفه ومتجاوب عليه فترة ويرجعون مرة ثانية.

فركت وجهي صدك حظه خطية

باوعتله شكد حلو مبتسم ويحجي وياها شافني اباوعله ابتسم اكثر وابتسامته بخجل جانت.

ضحكت ودرت وجهي شفت يوسف نايم

فكرت بالحلم الي شفت جدي بي وتذكرت شكد باخر مرضته سودة عليه جان كله فيصل يشيله شيل ويودي للسيارة ومن السيارة للعيادة وبالعكس ولده ماشالوه وهو شاله.

باوعت علئ مكتبه وحاجيته بقلبي بس هذا يشفعلك يافيصل.

بهاي الفترة يوسف تعبت نفسيته كوة تأقلم وفوگ الضيم يريد يلعب ويه جهال عمار بس امهم متقبل كله مخليتهم بشقتها والجبير مدرسة عنده والبنات الاثنين متخليهم ينزلون يمنه.

عمتي تعالجت بس تعبت حيييل صارت سمرة طووخ وجلد وعظم وبلا شعر ومرت بحالة نفسية فضيعة واكثر من مرة تحاول تنتحر من فوك المستشفئ تريد تشمر نفسها بس يلزموها.

مرت الايام وبيوم منهن اجتي رزان للغرفة كالت خوالي هنا نزلي سلمي عليهم ويردوج.

طبعا بهاي الفترة رزان مخطوبة لاخو نسرين

ونسرين رجعت لزوجها ومستقرين بالاردن.

نزلت  سلمت عليهم عمامي بعد كلام وسؤال واني بداخلي اعرف جاين على شنو

كال عمو حامد  بنتي درة  انتي الكاع مالة ابوج

‏ شتسوين بيها احنه راح ناخذها انتي ملتهيه  ورجلج الله مفضل عليه وانتو مامحتاجيه واحنه عدنا البنات مالها ورث  واحنه اولى بيها

‏

‏اني ظاله ساكتة واهز براسي ورا مخلص كلامه

‏باوعت لعمو فلتح وكلت انت شتكول عمو فلاح

‏

‏ كال اني نفس كلام حامد مااختلف وياه.

‏

‏كتلهم شوفوا اولا هاي كاع كاع ابويه وانتو تدرون اني لحد هسه ورثي من جدي ماماخذته ثانيا اني مااتنازل عنها لو تنطبك الكاع على السما ثالثا عندي خيارات الكم اذا تريدون اختاروا

تردون تظل على هذا الحال وكدام الناس هي ملككم ومحصولها يوصل الي  بيد وليد هم ميخالف ترودن تاجروها وتنطوني ايجار كل شهر هم ميخالف تردون تاجروها للفلح باسمكم هم ميخالف واني بكل الحالات محافظة على صورتكم كدام الناس لخاطر جدي

واذا كولش عوفوها وابو يوسف يشوف ناس تتكفل بيها

‏

‏ عمو حامد جاوبني نصا وبهاي العبارة اصحي على نفسج جدج ومات وفيصل كسر خشمج  وتزوج عليج ذيج المرة وهم يرجع يتزوج عليج هذا الخشم اليابس بعد شنووو.

ضحكت كتله جدي مات بس زرع بيه روحه واني اقوى من قبل بمية  مره اما كلامك على ابو يوسف هو يرده.

عمتي جانت كاعدة عالكرسي المتحرك وتهز بيدها

هزيت راسي الهه بمعنئ شنووو

كالت تنازلي وفضيها احسن المشاكل مو حلوة.

خليت طلعت وكلام عمو حامد هزني كولش وكلامه صحيح بس فصيل  اني باعدته عني ومراح ادخله

بيناتنا خفت لا يكولي انت وعمامج حليها او يكولي اتنازلي ظليت افكر اليوم كله واكول وينك جدي لتموا عليه كلهم.

بالليل ورا العشا نام يوسف جنت بالبلكون

وشفت سيارة فيصل  دخلت الظاهر هسه ياله رجع

ظليت اتسائل  اكول معقولة عمتي ماحجت الصار اله زين شنو موقفه من عمامي ووليتهم عليه!

بهالاثناء اجتني رسالة من عمو حسن يكول ليش هيج فيصل  مسوي بعمامج ليش مدخلته بيناتكم.

تفاجئت معناهه عمتي وصلتله الكلام.

دخل بطوله وثكله ويتلفت كال وين يوسف

واني صافنه بي كتله نايم

‏

‏ كال ليش ماخابرتيني

‏

‏ كتله علئ شنووو

‏

‏رد علئ عمامج ووجيتهم

‏

‏جاوبته  مايحتاج اني مسكتت الهم لان هم  سووها

‏عليه وليه بس شافوا جدي مات  جدي جان لازمهم  مني بس مات كاموا عليه وحتئ عمو حامد كال جدج مات بعد هسه فيصل يرجع بعد يتزوج.

‏

‏باوع بوجهي كال اني بوكت جدج تزوجت عليج وجدج مالزمني وثانيًاً الله ماخلقه بعد الي يسوي وليه عليج واني عايش  خابري وسألي شسويت بيهم عمامج الخيخه.

دنكت راسي كتله منو كلك

كال سعد من مدخلهم خابرني بعدين خابرت صفية وحجتلي  وحجت ولو انتي ماينخاف عليج تكول  وجوههم صارت صفر من كلامج  بس مافهمت شنو قصدج ابو يوسف هو يرد كلامكم.

كتله مااعرفت بشنو ارد وهمه عيروني لان تزوجت عليه خفت لا تتخلى عني وتعوفني وياهم.

دنكت جانت غصة بحلكي مرة تمووت اووف وينك جدي وينك سندي وينك حزام ظهري.

هو  جانت بايده جكاره طفاها بالنفاضه وباوع عليه

وكال مااعرف شلون تفكرين بيه ودائمًا تفكيرج سلبي بيه تعرفين واني رايح لعمامج عيوني على الموبايل اكول هسه تخابرني وتشتكي منهم

‏

‏ تخيلي انتظر مكالمة حتى احس فعلا اني امانج او اني اول شخص تفكرين بي من عندج مشكلة.

‏

‏ لزم وجهي باديه وكال درة  اريد حب جدج الي ربع مو اكثر اريد احسه بعيونج بروحج ليش هذا الجمود ومااعرف شنو اسوي ماعرف شنو مااعرف

‏

‏باوعتله بعيون مدمعة مااعرف شلون اتصرف.

‏

‏كال  تصبحين على خير وطلع.

بعدهه عرفت رايح ومطيح حظهم وموكفهم عند حدهم.

ومرزلهم لان جايين بغيابه للبيت والتفاهم وياه مو وياي  وكايللهم يبقى الحال على ماهو عليه لاعب بيهم لعب حلكهم مافاكي واصلا همه يخافون منه ويحسبوله الف حساب.

اني اموري رجعت عاديه والوارد  وليد هو يحاسبهم بفلس خطيه ينفذ وصيه جدي وليد اخ والنعم منه بس فيصل يضوج منه.

واذا افكر بيوم اتنازل عن الكاع راح اتنازل عنها  لوليد لان بس هو يستاهل.

بيبي زهره بهاي الفترة  حالتها تعبانه وفيصل دائما عندها خطيه هي مره جبيره بس ماكو مثل حنانها وطيبتها كلها حنية وطيبه

جنت ادعيلها بظهر الغيب ادعيلها الله يشافيها ويطول بعمرها ويجازيها على كد تعبها

دخل فيصل وهو مهموم وحزين الحزن والقهر واضح على معالم وجهه

ما حجيت وياه ولا نطقت بحرف ما جنت اعرف شلون اصبره واوسيه هو كاسر خاطر بداخلي ما يستحق المؤاساة ولا يستحق اي طيبة خاطر مني

اكو امور بداخل الانسان مخفيه ما يكدر يبينها للشخص الجرحه ويبتعد عنه وحتى من يوكع بازمة تكون اكو فد فجوه تبعده عن هذا الشخص لان الماضي ينذكر وما ينسى حتى لو مر وقت طويل

شويه واجاه خبر عن بيبي زهره كالو اله الحجيه مو زينه وتعالج تعال بسرعه قبل لا تموت

هو تخبل جان متوتر جان عبالك طفل وراح يفقد امة ما يعرف وين يروح و وين يجي ياخذ قميصه ويرجع يرجعه

اول مره اشوف فيصل بهيج حاله

اني احبها بيبي زهرة حيل كتله اروح وياك

باوعلي ثواني وكال حضري  نفسج ثواني اذا ما خلصتي اعوفج واروح امي راح تموت

ركضت بسرعه لبست عباتي وحجابي ورحت وياه جان يسوق بسرعه ويخطف من بين السيارات واحجي وياه ما يجاوب باله وعقله و روحه كله عند الحجيه

يريد يوصل قبل الكل يريد يوصل قبل لا تموت وتودع الحياة يريد يوصل وهو يريد يسمع اخر كلمة منها ويطرب اذانه بصوتها الشجن يبوسها ويستنشق عطرها وحنيتها يسمع اخر كلامها ويشاركها باخر انفاسها

اول ما وصلنه للبيت ونسمع صوت الصريييخ هو ركض بسرعه ودخل للبيت ويصرخخخ.. يممممه لااا يممه اجيتج والله اجيت شلون تموتين وما اسمع منج ولا احجي وياج ولا اودعج لا يمه مو هيج الوداع

شافها مغطين وجهها والنسوان يصرخن عليها من شافنه ابتعدن وهو كعد يمها حضنها ورفعها الصدره

حجه وياها وهو يكول ..يمه راحت روحج مني بس طيفج ملازمني ياااربي امي بذمتك ربي ارحمها واغفر الها

شالها بين اديه والولد جابو التابوت شال تابوتها وهو محني الظهر ومكسور الجناح جان لازم خاصرته ويمشي كوه عبالك كبر الف سنه وشيب بهالحظه عبالك طفل بأول سنينه وفقد امه

اخذوها والنسوان تبجي وتتصارخ واني ابجي عليها … مبريه الذمة يا طاهره يا عفيفه يا شريفه يا مربية اليتيم ربي يجازيج بالجنة مبرية الذمة ليوم الدين

ظلينه بالبيت عزلنا ونصبوا جادر وهي الله يرحمها اخذوها للمستشفى سوو الها ورقة وفاة واخذوها للنجف

فيصل راح وياها ما تركها هي جانت تكوله .. اريدك تدفني بيدك وتكول عليه الربت ولدها وحيل يوجع يومها الربت ولدها

ثاني يوم اجو من النجف جان وجهه مغبر وتراب النجف بيه والهم مالي وجهه والحزن طاغي عليه

دخل للحمام لان هو شايلها ولازم يغسل غسول مس الميت

جابوله دشداشه سوده وغتره سوده انطوهم الي واني انتظرته بباب الحمام صاح عليه انطيته الخاولي والملابس وظليت منتظره

طلع من الحمام لاف الغتره على ركبته والدشداشه سوده وتعبان من الطريق ومن الدفن

همست اله .. البقاء لله ان شاء الله خاتمة الاحزان ربي يرحمها وينور قبرها ويجعله روضه من رياض الجنه ويعفو عنها ويغفر الها اني جنت ابجي لان كلش احبها.

رد عليه بحزن وتهرب ما يريد اشوف كسرته كال ..الله يرحمها  ويرحم امواتج يارب

تنهدت وحطيت ايدي على جتفه باسف .. كول يا الله هذا الي مقدر ومكتوب وهذا يومها لازم تكون صابر هذا اني جدي الله يرحمه مات وهاي اني صابره ومحتسبه

جر نفس عميق وزفره كال.. الله كريم الله يصبرنا الحمدلله على كل حال ما قصرتي يا ام يوسف واسيتيني رغم كل شي صار بينه فعلا انتي اصيلة وتربات شيوخ

نزلت راسي مفتخره بتربيتي وهو طلع من البيت ولزم الفاتحة من كل شي اكل شرب جاي هو الي تكفل حتى بالدفن والقبر

ومشت الحياه بعد جدي بس هو موجود بروحي ومرات حتى احجي وياه كأنه موجود كل ليلة جمعة اطبخ ثواب واوزع عالفقرة واسويله ختمات.

شفت نفسي استقريت بس يوسف متعبني وباقي وحده ماعرف شلون اجاني احساس يريد اخو وهو كبر هسه.

فيصل جاي يكبر وحتئ سالفة النسوان تاركها من زمان ماجابله وحدة وتزوجها.

فكرت وفكرت وحسبتلها الف حساب، وقررت ما اصد محاولاته القرب مني  بعد.

ومرت سبع سنوات علئ وفاة حبيب روحي الاول جدي.

بهاي فترة السبع سنوات ولدت اطفالي التوأم

وعشت احلئ ايام حياتي ويا فيصل لدرجة عشقته وهو مابيوم اذاني وفعلا التزم بوعده لعمي حسن.

بس اجه اليوم الي غير كولشي معقولة درة ترتاح!

اصلا اني جنت متعجبة شدعوة سبع سنوات اظل مرتاحة وماكو شي يكدر عليه حياتي.

واجه اليوم الي رجع علاقتنا  للصفر.

يتبع. 

ان شاءالله بارتين او 3 واختمها.

السلام عليكم

يـحـزنـي ابــعـد     

گـضـيـت ولاخـلگ عـنـدي  

عـلامـك بـيـه مـاخـذ صـك

مـتـى بـشـفـتـي بـدال الآاااه طـلاگـة ضـحـك تـنـفـك

لـ نور السامرائي.

درة درة خابري وليد خلي يجي ياخذني وياه اليوم خميس

انت ليش مغلسة.

طكيتهه ضحكة يوسف ابو لسان شوكت تتعلم تكول ماما

ولزمته من خشمه جعصته.

كال اخخخخ شبيج مووو اني كبررت هسه عمري عشرة  لو اني بكد ايهم وادهم جان اكولج ماما بس فاتت بعد.

كرصت خدوده كتله لك اكعد واسكت انت متاخذ كلام بابا شنوو يكولك كافي طلعة متشوف الاوضاع شلونهه والانفجارات يومية تحصد بالارواح اخاف عليك امي واخاف علئ وليد وعلئ علي خطية يجوك مناك لهنا والطريق خطر .

رد شسووي لرجلج فيصل مياخذني الهم يكول اخذك وياي للشغل تتعلم بالله اني مال شغل دشوفي اديه مال شغل

رفعت راسي ليفوك اضحك علئ سوالفه ياربي عبالك رجال

واحنه دنتناقش دخل فيصل بس ملامحه ماتبشر بخير ابد لازم التليفون ومخلي علئ اذنه ومن دخل غلقه وكف يمي ونزلوا التوم جلبوا بدشداشته اخذ ايهم ولزم ادم من ايده.

كال بيبيتج تعبانة تريد تموت وتريد تشوفج حتئ تتبارئ وياج الذمة.

كمت مرعوبة منوو بيبي بدرية ?

جاوب وهو يكعد عالسرير وبحضنه ايهم لالا بيبيتج صبرية ام حامد.

جاوب يوسف ختولي ختموت جانت تكتلني من اروح عدهم.

جان فيصل رد علئ يوسف بس اني غمضت ورجعت لذاكرتي لذيج الايام.

اتذكر  اول ايام من سجلت مدرسه جدي بعد عيني يكعدني الصبح ويريكني ويحضر جنطتي وحتئ حذائي يمسح بكل عناية واهتمام

وياخذني الهه للمطبخ كاللها  مشطليها

جانت لازمة قوري الجاي وتباوعلي ونترت

مااعليه بيها انه شلت ايدي من السبح والتمشيط والله ولا اسوي خليها بكفشها .

جدي بيده المشط كاللها لعنة الله عليج دنيا واخرئ عجوز البين

واخذني وكعدني بحضني وصار يسررح شعري و يمشطه   بس خطية سودة عليه مايعرف يظفره

اخذ جنطتي ولبسني حذائي وجواريبي وشعري مفتوح يوصل لنهاية ظهري وهو متفشل طلب من  ام سعيد تمشطلي والمرة ماقصرت بكل حب وحنية مشطتلي شعري.

هواي مواقف لبيبي مااكدر انساهه خوب من جوتني هناء وشوكه غلست عليه شكد صرخت شكد صحت استنجدت بيها بيبي بيبي من قلة الحيلة والخوف وهي ولا جانت تسمعني.

عود وعت على نفسها من تريد تموت وتريد ابريلها الذمة مدري ضميرها صحئ  مااعرف.

وعيت علئ صوت فيصل وهو يكولي يالله درة اذا تردين ترحين خلي الجهال يم مرة هشام وخلي نروح ساعة زمان نشوفهه.

هزيت راسي وكمت متثاقلة ومتعاجزة يوسف وكف كبالي كال اروح وياكم

ابوه ماخلاه احسه يريد يبعده عن وليد بكل الطرق لان هو حييل متعلق بي لوليد واحس فيصل يتضايق ويغار من هالعلاقة .

بدلت ووديت الجهال يم مرة هشام اخو فيصل الي تزوج من فترة بس ماعدهم جهال من سنة وهي صيدلانية

وتوفت بيبي بس ماكدرت ابجي عليها ومن شالوا جنازتها

وصلت ميتة مالحكت عليها كلت خلي  تروح تتلاكه وياابوي هو يحللها ويوهبها.

رنا خطية هي بارتهه قبل متموت وكلتلي هواي رادت تشوفني وفعلا خابروا فيصل حتئ يجيبني بس رحت ميتة وشايلين جنازتهه.

طول السنين الي وياه جنت اني على اخر حبه من اللبس والاظافر والمكياج وحتى وزني ثابت  من صرت  حامل زاد وزني وبعد الحمل رجعت نزلته وحافظت  عليه.

ورغم وجع جدي وفقدانه بس اني ماهملت نفسي كلت افقد اثنين صعبه كتمت حزني على جدي بقلبي وبروحي وهو عايش بنظري عايش بنص گلبي ومتربع بكياني خالد بافعاله والي سواه علمودي كله.

طلعت من الغرفة دااروح للمطبخ طب احمد بس مو هو احمد القديم ابد بعد حبيبته سيلا صار احمد ثاني.

مو احمد المرح والي دوم يضحك ويسولف،  حبيبته بعد اصرارهم علئ الزواج جبرتها امها تاخذهه وياهه للبنان

وفعلا سافرت وياها وبعد فترة رجعت لبغداد انهزمت منهم واجت كعدت يم عمتها ماتكدر تبعد عن احمد واخيرا انخطبوا لبعض رغم معارضة اهلها لهذا الزواج

جانت الفرحة ماسايعة احمد ورحنا سوينا اله احلئ حفلة ماحضرها احد من اهلها فقط هي بس،جانت ممتأثرة بموضوع غياب اهلها  وفرحانة بي هواي.

وبوحدة من ايام بغداد الدامية وتحديدا بواحد من الانفجارات بمنطقة الكرادة جانت فايتة سيلا بسيارة تكسي حتئ تروح لعمتها

وبنفس الوقت صار انفجار بالسيطرة وبهالانفجار استشهدت  سيلا ويه كوكبة من الارواح البريئة الي مالها كل ذنب بس لانها عراقية.

انزفت روحها للجنة  وي مجموعة من الشهداء بيهم السني والشيعي ومنهم المسيحية سيلا الي ماتت ووياهه احلامها ومن بينهم حلم زفافها لحبيبها

الي تركت الامان وحلم الهجرة الئ الجنة((اوروبا)) واجت حتئ ترتبط بي بمدينة الموت والانفجارات بوقتها جانت التفجيرات الانتحارية والاحزمة الناسفة والعبوات والسيارات المفخخة تحصد بارواح العراقيين وماتفرق بين شيعي وسني ومسيحي.

‏

‏ بس للاسف مااكتمل الحلم وتركت احمد بعد ماجان كتلة من الحيوية تحول الئ شاب يائس حاول الانتحار اكثر من مرة ويلزموه اخوانه

جان يلوم نفسه ويردد  ليش خليتها ترجع لبغداد اني السبب اني شاركت بقتلها اني موتتها.

انهار ودخل بحالة كئابة وحزن وتمرض واخوته ماقصروا وياه كلنا ماقصرنا وياه احمد ميستاهل ابد انسان قمة بالاخلاق والحنية

حبها لسيلا ومااهتم لديانتها حب روحها قبل كل شي بس للاسف حبهم ماتكلل بالزواج حبهم قتله وحش مجرم مثل ماقتل غيرها الالاف.

رغم مرور سنوات علئ استشهاد سيلا الا انو احمد بعده ويتعافئ ببطئ ورافض يروح للمعرض الي تعرف بي عليها وميقبل يشتغل وماعنده كل طموح بالحياة.

فات من يمي عبالك جثة محنطة متتت قهر عليه.

بيوم من ايام حياتي المشؤومة دخل عليه فيصل ووياه وحدة اعرفها كولش زين بس بعمري ماتوقعت يدخل عليه وهو متزوجها.

قبلها جان يخابر ومتعصب وضايج مااعرف شبي مااعرف

الئ ان اجه وكال خالي بالاردن رايدني بشغلة ولازم اسافر

باوعتله مو خالي وكلبي كرصني.

جنت احس بي  مو على بعضه ويخابر يطلع من الغرفة ويرجع مهموم ويباوعلي بقهر ويحضني حييل ويبوس بيه.

وسافر وتقريبا ظل بالشهر هناك  ويخابر على طول يحجون  وياه الجهال بالتليفون.

فيصل  مايلزمه شي ابد لا وعد لعمي ولا حبي اله

‏ بس هو بعيونه الف كلام وخوف واعتذار واني نفس الوكفه القديمة من دخل وبيده سلوئ وهنا بيده نسرين

‏

‏اني ماانصدمت منه انصدمت منها لان اعتبرتها اخت وصديقة ونتواصل علئ طول بالتليفوون وبعد ماتطلقت من زوجها للمرة الثالثة مرت بضغط وتعب نفسي واجهاد هواي وكفت وياها فعلا الصدمة جانت بيها مو بي

‏

‏من كال اي نسرين زوجي  عفته وصعدت كلمه ماحجيت

صعدت لميت الذهب مالتي وملابس الي ولجهالي  ومستمسكات و نزلت كدامهم كلهم

هو  شاف الجنطه كال وين

كتله ماابقى بالبيت وانت اخذ راحتك

‏

‏ كال ارجعي درة

‏

‏كتله اطلع يعني اطلع.

‏

‏قرب مني و شاورني وكال بعدين افهمج

‏

‏ كتله ماافهم طلقني وخليني اطلع.

‏بصيااح احجي

‏و اخوانه كلها واكفه.

خزرني و ‏ اني سحبت الجهال اريد اطلع ولزمني من ايدي ورجعني كمت اصيح ضربني راشدي ولا اهتميت اجر بالجهال وهو يجرهم مني

صااح بصووت عالي  تردين تطلعين اطلعي بدونهم وخليهم يمي

كتله بهستيرياااا مااطلع وأعوفهم مووو بكيفك

‏

‏  ضربني ضرب واني ماارضى اعوف الجهال والصراخ واحمد يدفع بي وهو ماكو ميقبل يصيح علئ احمد لتدخل ونسرين تتوسل بيه

‏

‏ جهالي انرعصوا من الهوسه وحمويني هشام واحمد

‏ ويايه هو يدفع بيه يريد يحبسني بغرفة عمتي

‏

‏و هو علئ هذا الحال يدفع بيه  انتبهت  على المسدس جان جوه سترته انلطخت بصدره وهو يدفع بيه ومديت ايدي وسحبت المسدس وصوبته عليه.

‏

‏  وهو شافه بيدي  تخبل ظل يصيح ويتقرب مني واني ارجع ليورا ويصيم  عوفيه.

‏

‏اني بعد ماجنت موجهته عليه سحبته وخليته  براسي  واصيح بووجهه  عبالك تذلني لان جدي مات.

‏

‏  صيحت صياح لحد مااصوتي بح

‏ اموت ومااعوف جهالي

‏

‏  هو يصيح عوفي بس عوفي دررة لا تسويلنه قدر.

‏

‏وجهت المسدس ورميت على الشباك

‏

‏ واجا هشام  كال جيبي والي تردي يصير

‏

‏ هزيت راسي لا جذابين كلكم وماتكدرون عليه

‏

‏كال انطي المسدس واني  اسوي الي تردي

‏

‏  اثناء ماانتبه لهشام  جر قيصر المسدس مني وضربني. راشدي بقووة  وكال حتى بعد مااتسويها وسحلني سحل  لغرفة عمتي وقفلها عليه ظليت ادك اريد جهالي يمي وابجي بهستيريا

‏تعبت من البجي وظليت اصيح وينك جدي وينك جدي  تعال شوف حالي بعدك

‏

‏ هو من سمع صوتي فتح الباب ودخل وقفله عليه اشرت اله اطلع مااريد اشوف وجهك.

‏

‏ كال بس اسمعي مني فتره واطلكها

‏

‏كتله  نفس كلامك ذيج المره مااابقى عبالك جدي مات دوسون عليه

لا والله افضل الموت ولا تنهان كرامتي

يظل يحجي ويتوسل والجهال تبجي برا عليه

‏

‏ كال اني مااحبسج اريدج تهدين وافتح الباب

‏

‏ اني ساكته ومخليه راسي بين رجليه ظل يحجي هواي ويقنع بيه واني ولا كلمة حجيت.

‏

‏وظليت يومين يدخلون الاكل عليه ومااكل لمن تخربطت واجا هشام فحصني كال الضغط مصفر حولوني مستشفى.

‏

يتبع.

برتوت عنون 🥹

بمناسبة فوز العراق 🥹يارب نصعد للنهائي يارب 😓

حتئ لعبة العراق ماشفتها 😭كعدت ادور بالمحادثة علئ تكملة للاحداث وخبلتني كوة اوصل شايفين اذا محادثة قديمة وبيها حجي هواي شون تعلگ. 

قصة سيلا واحمد تفاصيلها تجننن 😭بس شسوي للمتفلسفات الي سوونا بلا ثقافة وماكدر اطول ومحتاجة اجمع تفاصيلها حتئ قصة نسرين وي زوجهه حيل فد شي ان شاءالله بس اختمها اكعد اضيف التفاصيل وارتبها ويه البارتات.

السلام عليكم

رواية طوفان رجل

بارت 53

نورا ناصر

‏ما عادت الأشياء تؤثر

أو أنني ما عُدت أشعُر

إلهيّ ، من فينا فقد حواسه

أنا ؟ أو هذا الكونْ ؟

وشكلو مغذي بايدي من التعب والقهر تمنيت انام ومااكعد بس فكري يم جهالي واحساس الخذلان جان صعب اتحمله فيصل هذا طبعه نسرين شبيهه وليش

وفلا نمت بس للاسف گعدت.

ورا ما فتحت عيني بتعب اول ماوكعت عيني عليه

شفته لازم ايدي ومغفي.

صرت اباوع بارجاء المكان عرفت اني بالمستشفئ بعد ثواني استوعبت الصار كله سحبت ايدي منه.

هو فتح عيونه تعبان كولش كال شنو تردين تطلعين وين ترحين بس فهميني وين وشون امن عليج كليلي ومااكدر على فراككم انتي والجهال.

درت وجهي منه ماريده يشوف دموعي سمعته يكول

دره فهميني الصار غصبا عليه لاتفكرين تعوفيني درة اني شون اعوفكم انتو كل دنيتي والله.

ابتسمت باستهزاء بس حلكي مر احس واكعة من مكان عالي وجسمي متكسر

كتله: * ششوف منك بعد فيصل ومنو نسرين

كال وهو يتوسل بس اصبري هاي نسرين بت خالتي تدرين بيها وبظروفها انت وهي يتيمة اب  وجدي الله يرحمه وصاني عليها كال هاي مخبلة وموبعيدة تطلك للمرة الثالثة

وفعلا تطلكت وانت تدرين بهالشي

وورا مامات جدي خالي تكفل بيها وهسه  طلب مني اتزوجها حتئ تصير جرة اذن لرجلها

وهي تدرين بيهه شلون متخبلة من طلكها رجلها للمرة الثالثة

واني مااكدر ارفض اله طلب تحملي لخاطري

بقيت ساكتة اجه لزم ايدي ويتوسل

كال درة انت تدرين بجدي اله فضل عليه شون انتشلني وتبناني وكل العز الي اني بي منه هو.

‏

‏كتله لخاطرك فيصل ? واني منو يطيب خاطري بالله

‏ واني منو يحس بيه ليش فيصل ليش كل مرة تصعدني فوك الغيم وترجع تشمرني للكاع تكسرني وتأذيني.

‏

احجي و  دموعي ماتوكف ظل يتوسل ويبوس باديه

واني اسحبها بقووة منه

كتله واني احاول اكوم والله  ماابقى بالبيت وانت وياها بي ماابقئ والله.

كال  وين ترحين درة فهميني.

‏

‏ كتله اكعد بالمشتمل مال الحراس القديم

‏

‏كال بصدمة  شلون انت واعية علئ نفسج والي تكولي

‏

‏  كتله والله هذا العندي موتريدني ماابعد مااكدر ابقى واشوفك انت وياها ارحمني الله يخليك

‏

كتله وخليها ابالك اني مااياسس لو اعرف انتحر ومااظل كدامكم واقبل بالذل.

جانت  عيونه حمر ويبلع ريكه كال هاهيه يجرالج اكلي وصيري زينة ويصير خير.

باسني علئ راسي صديته انب  وهو طلع

اجه هشام كال الجهال يم وردة يقصد مرته وزينين لتخافين عليهم.

تشكرت منه وخابرت علئ رقمها ردت عليه

وطمنتني عالجهال وانطتني يوسف احاجي

كال درة انت وين ويمتئ تطيبين هذا فيصل مقبل اروح ويه بابا وليد هي العجوز مو ماتت وبعد محد يبسطني هناك.

ضحكت بعز المي كتله وبيبي هناء هم تكتل وجدو حامد همين.

جاوب بس اني ماريد ابقئ هنا اروح هناك مو ذاك بيت اهلج اني ماحب فيصل ليش ضربج ليش حبسج اروح هناك وانتظرج تطيبين بس هو مايقبل.

كتله شلون تعوف اخوانك وتروح هناك يوسف ماتوقعتك هيج.

كال شبيج انت والله ولاااخليهم اخذهم حتئ لو اخطفهم

صفنت بيها حجايته هالطفل هذا فتح عينه عالمشاكل والزعل والاذية شراح يصير بي ياربي.

ظليت انصح بي لايروح يسوي شي بنفسه لو باخوته

كتله ماما لاتعوف بيت ابوك امن الك ولاخوتك اني اطلع من المستشفئ ولكل حادث حديث مااقبل اني تطلع تمام ماما ازعل عليك والله.

كال فيصل ضربج خليولي امشي لبيت بابا وليد

ياربي شلون بي هذا الطفل مفتر دماغه كله اول مرة يشوف فيصل يضربني ومتأثر حييل ومتغير ولا عبالك هذا يوسف عبالك واحد ثاني.

ختمته منه واني بالي يمه وافكر بي.

وراها اجوي رنا ووليد وجايبين شوكة وياهم.

سلموا عليه كالت شوكة والله فلك هذا فيصل تزوج نص امة محمد لا ظلت مطلقة لا ظلت ارملة لا ظلت عزبة

ظلت عليه خليتزوجني وانت توسطيلي.

ضحكت ووليد رزلهه الله يطيح حظج كدامي هالحجي ولج انت ماتبتي من الزواج

فرت ايدها مايصير نكرر التجربة مرة ثانية

جاوبهه سكتي سكتي فضحتينا ورنا طاكة من الضحك

وهو هم رزلها سكتي صوت ضحكتج شعلوه

خلت ايدهه علئ حلكهه

هو قرب مني يحجي بهمس كال درة عرفت الي صار كله تعرفين عمتي ماتضم حجايه وادري سبب وجودج هنا هو

يادرة ذيل الچلب عمره مينعدل اذا تردين نرفع عليه دعوة طلاق وتطلكين منه غصبا ماعليه شو خير من الله عندج انت مو بحاجته احنه كلنه سندج وولدج ماشاءالله كبروا وهم مو بحاجته تره.

كتله وليد تعبانة هسه والله مااعرف حتئ افكر شسوي.

كال درة لا تضعفين هذا اذا تسكتين عنه يتمادئ ولاعبالج ينعدل ذيل الجلب ينعدل وهو ماينعدل يظل هيج لاخر عمره.

ابتسم وليد وكال بس حكي بشعرج وصفني وهي تطلعلج الافكار الجهنمية.

ابتسمت من اني صغيرة عندي هاي الحركة من احك راسي معناهه جاي افكر بشي.

كتله الله كريم

  بعدها طلعت من المستشفى علئ مسؤوليتي

  ‏واني بالسيارة اباوع للطريق وباوعت لايدي الي صارت كلها زراكات من الكانولات والابر

  ‏

  ‏ بهيج وضع اني اريد جدي مثل يتيمة تريد امها

  ‏اني يتيمة جدي واريده

  ‏

  ‏نزلت دموعي وداخلي يصرررخ وينك جدي

  ‏تدري بحالي لو ماعندك علم بالحالة  الي اني بيها.

  ‏

  كضيتها حسرات وبجي وضجت من روحي واني بهذا الضعف وكلام وليد يررن بأذني.

مو بس كلام وليد لا والله كوومة افكار شيطانية تحوم براسي وتريد انفذها وكلام يتردد من داخلي يحاجي فيصل اذا ماندمتك مااطلع درة هالمرة كلش حالفة.

  ‏

  ‏وصلنا للبيت ونزلت تلگاني يوسف والتوأم اجوني يركضون لازمين ايد بأيد.

  ‏

  ‏گلبي انشرح لشوفتهم ياربي عافيتي هم للحظات ونسيت مخططاتي وعشت بس بعالمي وياهم حتئ فيصل نسيته وخليته ورا ظهري.

ظل يوسف يبوس باديه وراسي شكد حنين واخوانه شنو يسوي يسوون مثله. 

لزمني من ايدي يوسف كال يله درة انت مو حاضرة خلي نروح لبيت اهلج.

خزره ابوه وهو ميخاف وحتئ متغير هواي

كاله بعصبية شبيك انت هيج تباوع عبالك ماشفتك

ضربت امي.

لزمه فيصل من جتفه عصره حيل وصار ينطق اسمه بتحذير.

خفت عليه جتفه رقيق خاف يفسخه  وورحت عليه ورغم جنت احس بضعف بس رحت وحررته من ايد فيصل

  ‏

  ‏ كام هو يريد يدخلني لبيتهم بسرعة مخلي ايده علئ ظهري.

  ‏

  ‏ رفعت عيوني عليه

  ‏وظليت احاجيه بنظراتي اقصد وين جايبني،!

  ‏

  ‏افتهمني وهز راسه كال اصبري بس اشرحلج.

  ‏

  ‏  كتله بعصبية تضحك عليه عبالك هينة اني توكف بوجهي

  ‏

  ‏كال انتي مخبله شون اكعدكم هناك

  ‏

  كتله بصيااح  بلغهم ينظفون المشتل وينقلون  كل غراضي بيه

خله ايده علئ حلكي يسكتني بعدت روحي منه وانركع راسي من ورا  بالحايط.

كعدت بالكاع منهارة وجهالي حواليه

عالصوت اجوي مرة هشام وفاتن وعمتي عالكرسي المتحرك هي مريضة بس لسانها مايسكت.

ووراهم نسرين مترددة وتعصر باصابعها

بلحظتها الله خله بداخلي الهه كرره مو طبيعي مناصفة ويه فيصل.

للحظة نزلت دموعها وصارت تبجي تريد تجيني بس

مترددة وشي يمنعها.

مرة هشام كالت عفية امشي بغرفتي اذا تردين

ظليت اضرب عالكاع كتلها هاي هنا كعدتي وماادخل للبيت وهو وعدني ليش يخلف مو كتله اروح للمشتمل.

ظلوا يهدون بيه وهو فرفح وجهالي يصفنون بالوجوه والخوف انرسم بنظراتهم كلمن يحجي يلتفتون عليه.

وفعلا مثلما ردت كعدت بالمشتمل  اني والجهال ونمنا بي غرفه وحده وهول ومطبخ وتخم وكاونتر بسيط.

ظليت ارتب بي ومرة هشام ويايه رتبت الملابس بالكنتور ومواعين بالكاونتر وراحت

اجه هو يفتر ورايه بالمشتمل كعدت بالصالة

كالي من كل عقلج تكعدين هنا وجهالي وياج لج  راح اتخبل شنو اسويلج فهميني مااكدرلج اني فكري  بالجهال

سكتت مجاوبته ملتهية احجي وياهم وهم اباوع لنظرات يوسف تجاه ابوه يباوع بغضب رغم هو صغير

وهم الجهال خطيه كاعدين يمي فتحت التلفزيون الهم

وظلوا  يباعون وهو كاعد مخلي رجل علئ رجل ويباوعلي صافن عليه

اني ابد ولاجني اشوفه والجهال ايهم وادم كل شوي يروحون بمه هم صدك متعودين عليه.

بعدين اجوا يمي  رادوا ينامون منعسين ويثاوبون

‏ اخذتهم و نومتهم بالغرفه وطلعت لكيته ماكو.

‏

‏ويوسف نايم بالصالة كمت كعدته فززز مخرووع

‏حضنته وبسته واخذته للغرفة

‏

‏ورحت تاكدت من  الابواب وطفيت الاضوية تمددت يمهم وتذكرت جدي وسوالفه وحنيته.

‏

‏طلعت اغراضه بالفاتية مالته وابوس بيهم واشم ريحتهم راح تختفي ريحته منهم ياربي لاتحرمني من ريحته عالاقل ريحته.

قريتله الفاتحة ونمت عسئ ولعل يمرني بحلم والله اشتاكيتله كد رحمة الله الواسعة مشتاكتله.

كعدت الصبح حسيته  نايم يمنا احنا فارشين فراشات بالكاع حتى تكفي اني والجهال وهو حاشك نفسه ويانه.

‏

‏ تغطيت ورجعت نمت للثمانية كعدته

‏ كتله ماعندك شغل

‏

‏ كعد هز راسه وطلع رجعت نمت بمكانه ووراها كعدت طبخت النا اني والجهال.

اجتي مرة هشام كالت تجين تتغدين لو اجيبلج غدا لهنا.

كتلها لا والله طبخت مشكورة قلبي والله ماتقصرين.

كالت درة ترة نسرين تريد تحاجيج بس خجلانة منج كولش.

جاوبتهه والها عين تحجي وهم تخجل حبابة مااريد احاجيهه فدوة كوليلها لا يجي لسانهه علئ لساني بعد.

كالت ترة البنية مجبورة

فركت راسي اي بس لا تتقرب صوبي فدوة اني معصبة ومااعرف اذا راح اكدر الزم نفسي منهه لو لا.

ضحكت يعني تضربيها

كتلها شنو رايج انت ? شسوين لو بمكاني.

والله صراحة درة اني لو بمكانج اسوي كلشي يطلع بيدي،بس بنفس،الوقت سامعة عن فيصل مزواج وهاي مو اول مرة يسويها!

تحسرت وشنو المطلوب مني اتعود مثلا اتأقلم!

كالت اووف والله درة حقج والله يساعدج.

بعدها راحت واني دااصب غداا

دخل فيصل شافني اصب كال شنو حتى الاكل عزلتيه

كتله ببرود اي مااكدر اشوفها كدامي

‏

ظل يباوع داير مداير المشتمل

‏ كلي شلون كاعده اهنا هذا خيري كله جوه رجليج انتي وجهالي 

‏

‏فهميني شلون شلووون ويصيح

‏

‏كال  لج اخواني وجهالهم ونسوانهم مرتاحين بخيري ومرتي وجهالي متبهذلين

‏

‏ غلطت بحقج صحيح بس لاتتخلين عن حق جهالنا

‏

‏اجه يمي لزم اديه وكال  بعد لاطبخين االاكل يوصلج اخاف علئ  اديج.

ضحكت ببرود وسخرية

كتله اني احب الطبخ ومايتعبني ارتاح انت ولا تشيل همي

كال درة لاتشلعين كلبي.

خليت الاكل بالصينية وبكل برود وصحت للجهال وكعدنا ناكل وهو وهو معصب يشيل روحه ويركعها

وحتئ تعمدت  ماكتله تفضل اكل

طلع من المشتمل وهو مدخن من العصبية.

يوسف عبالك يقرا افكاري كال همزين ماكتيله ياكل ويانه والله لو ماكل ويانه جان ولا تغديت.

مديت ايدي، كرصته ولك هذا ابووك ميصير تكول عنه هيج.

كال ليش يضربج مااحبه

صفنت عليه مااعرف شسوي وياه يوسف صاير ميطيق فيصل.

مرت فترة واني طول هاي الفترة افكر اخابر وليد واحاجيه علئ فد مخطط ابالي اسويه بس اتردد اولا ماريد اورط وليد وياي واخاف عليه من فيصل

وثانيا اكو مخططات ابالي غيرها اريد اسويها

بهاي المدة فيصل يجي للبيت والجهال يلعبون وياه واغلب ايامه يمنه ينام بس مياكل ويانه ابد

يوسف مبتعد عنه رغم محاولاته وياه بس هو مايكدر يمحي من بالي الشي الي صار ومدة ايده عليه.

يوسف هواي يحبني احس حبه الي مثل حب جدي وبي هواي هواي  من جدي.

وهالشي الي مصبرني ومأذيني بنفس الوقت

هواي اشوف بي جدي ومن يسوي شغلة تذكرني بي ماكدر اسيطر علئ دموعي واتمنئ جدي عايش ويشوفه ويشوف التوم وسوالفهم.

من يجي فيصل اني اعامله بكل برود يحجي وياي علئ مزاجي ارد.

اطلع من الشباك اشوف نسرين وكالعادة اناقتها وجمالها ومرات اشوفها تطلع وراه للسيارة او تكعد يمه بالحديقة او تحجي وياه واتخيل علاقتهم وهم بغرفة وحدة

ماعرف شيصير بيه اتعب حييل واضوج اتمنئ اطلعلهم بالبندقية اصفيهم هيج تجيني رغبة

مرة جنت فاتحة الشباك واشتغل وشفتها جايه باتجاه المشتمل بس مترددة وتتلفت اعتقد جايه تحاجيني  كمت ركعت الشباك بوجهه واعتقد اجاهه الجواب مني ورجعت للبيت.

وبيوم اندكت الباب عليه فتحتها شفت احمد

لابس قمصلة سودة وجواهه بدي اسود وشعره مكفش وطولان ولحيته.

ضحك بس مو ضحكته الاولية لا نظرات الحزن تشع من عيونه يمتئ يطيب جرحك يااحمد.

كال هاا شوو هنا شعندج

دااجاوبه انتبهت وراه رسل بملابس الجامعة ودتنزع حذائها هو جان مغطيهه بطوله من واكف.

من وكفت جانت عيونها كلها دمووع وترجف وخايفة.

ظلت لابسة تك حذاء وحضنتني كالت اسمي وهي تبجي

حضنتها واباوع لاحمد بنظراتي اسئلة مستغربة شبيهه وحاضنتهه حيل وامسح علئ راسها

هو قوس شفايفه وحرك اكتافه بمعنئ مادري

كتلها شبيج رسولة شبيج حبيبتي ظلت تناشغ

احمد مرتكي علئ الحايط كال اجت للبيت الجبير تسال عنج وجبتها هنا.

اخذتها وطببتها بالصالة كعدت واجوا الجهال اللتموا عليها يحبوها وخاصة يوسف جان صغير وهي صغيرة تشيله

رحت للمطبخ اجيبلهه مي اجه ورايا احمد

كال شعجب تطلع وحدهه وهي صغيرة وهسه دنيا المغرب.

كتله مااعرف شبيهه بس كولي انت وين مختفي من مدة

رفع شعره ليفوك وتحسر كال بعد ووين يعني دايح بارض الله الواسعة.

كتله شفته اخوك ودكته الناقصة

كال بعد تنهيدة شفت والله ماعرف شحجي درة من يمي فشلان منج يعني الا نسرين بس ماعرف شلون اشوفهه هو كلش متأثر وضايج وحاجيته هو كال مؤقت  بس انت ليش هنا ليش عفتي البيت الجبير يمعودة الكل برا وانت جوه

غمزتله كتله اني هم مؤقت و عندي خطط جهنمية الشيطان متربع براسي حاليا ويفكر.

كال اعوذ بالله من شيطانج  شنوو درة بشنو تفكرين يمعودة ستري علينا انت صايرة تخوفين

جاوبته عود يمكن احتاجك انت همين

شنو درة لزمتج للسلاح تخوف ذاك اليوم بس لا تردين تنفذين عملية اغتيال

ابتسمت وادخل الجهنم علمود منو فيصل ونسرين لا اني ارقئ من هيج افكر باخرتي

دااطلع كتله اروح اشوف رسل شبيهه

رحت انطيتهه مي ايدهه ترجف اخذت رشفة وانطته الي الكلاص احمد واكف ومرتجي علئ اطار باب المطبخ ومجتف اديه ويباوع الهه.

لزمتهه من وجهه كتلها شبيج ظلت تناشغ

اكيد هسه يدورون عليه.

كاللها  احمد ليش انت وين جنتي

باوعتله بخوف كالت بالجامعة

هو باوع لساعته كال لعد ليش يدورون عليج

دنكت تعصر بأصابعها

هو صيح درة هاي بنت عمج شبيهه

كمت كتله احمد اخذ الجهال واطلع للحديقة خطية ضايجين.

باوعلهه وهي بسرعة دنكت تعصر باصابعها

هو مشئ لحد نص الصالة واخذ ادم علكه من بلوزته وخلاه علئ جتفه وسحب ايهم وهم شاله وخلاه علئ خصره بس بالمقلوب وهم طاكين من الضحك.

رفس يوسف علئ كيفه وكاله وانت اطلع كدامي يله

يوسف لازم ايد رسل وكاعد يمهه

ماقبل كال لا اني اريد اعرف رسل شبيهه ماروح وياك.

رجع رفسه بس شويه اقوئ وصاح بي امشييييي لك يله كدام عود هو زلمه.

رفع جتافه يوسف كالل اي اني زلمة.

نزل ادم وسحبه حييل من ايد رسل وكاااله دمششيييي

واخذهم الثلاثة برا وصاح درة تعالي

كتلها هسه اجي

ركضت هو همسلي يم الباب كال يمعودة شوفيهه شمسويه خاف مسويه مكسورة ونتورط خاف احد ضاحك عليها

كتله لا ماتسويهه رسل عاقلة بس هي خايفة ومستحية.

كال الله يستر بنات هالوكت كلشي يطلع مهن

جاوبته اي بس مو رسل

عفته وسديت الباب ورحت

كعدت يمها كتلهه اي رسل شبيج احجيلي احمد وطلع خاف تخافين منه احجي اني اساعدج شكووو شبيج والله خوفتيني عليج.

وهي ظلت تحجي ....

يتبع ...