تحميل رواية «قمع المشاعر» PDF

الندم....

مشهد.... للكاتبه روزايه

الخيبه والخذلان الي نعتقد ننساها ونتجاوزها هي نفسها الشحرجه الي تصيبنه قبل النوم..

نظل نسعل نسعل بس ماراح تختفي احتمال راح تختبئ جوه حزن عميق واحتمال راح تجي على شكل رغبه بالبجي... او احتمال تشكل على شكل جرح مايشفه...

كل واحد بينه داخله هش خفيف مثل الزجاج مجرد ماتعصف بي الحياة يتحول الى حطام من الداخل بس كمظهر خارجي نكول هذا الانسان قوي وهذا الشخص كدر يوكف على رجلي واتجاوز كل المصائب بس الناس الهه الظاهر محد يعرف بداخلنه شنو..

احنه الضعفاء الي نعيش على الذكريات... احنه الي تنزل دموعنه من نسمع اغنيه وندمر من ابسط تفصيله تربطنه بالماضي..

احنه الي انحن لماضي ماراح يرجع ولا نكدر نعيش الحاضر... مانؤمن بالاتي الجميل ونعيش بماضي اليم...

احنه الي دمرنه نفسنه بادينه تحت مسمى الحب والتضحيه...

هوايه ناس بعدهم ابدايه الطريق وتوقفت سفنهم عن الابحار وظلو يعانون الالم والخذلان ويعدون ايام العمر وكل مرحله يوكفون عدهه ماراح يكدرون يتجاوزوهه...

...

مخليه راسي على حافه الكرسي وعيني بالسماء صوت العصافير وسرب الحمام الي يرسم اشكال جميله..

صوت الاغنيه المفتوحه بسياره جيرانه اسمعهه بكل وضوح وكانو هاي الاغنيه لامست كل شعره احساس بداخلي واخذتني للبعيد اااي بعيد حيل ...

جوز منهم بعد لاتعاتبهم جوز..شلك عدهم ناس ما الهم عهد جوز

شلون جازونه بهجر وبلاعذر.. تالي باعونه بسعر ماينذكر..

هاي هم قسمه وعد جوز جوز منهم...

متعلمه يوميه اطلع اكعد بهذا المكان وجيرانه عنده كيه يشتغل بيهه يوميه هيج وقت يفتح اغاني بسيارته وكل اغنيه اسمعهه تفتح جروح جديده...

الدموع واكفه بطرف عيني بس عاهدت نفسي ما ابجي ولا اذل نفسي ولا اسمح لاي شخص ينظر الي بنظره عطف ويكولون خطيه شصاير بيهه..

بالي ويه الاغنيه واني ادندن وياهه انفتح باب البيت حيل وطبت قبس بنت عمي بنفس عصبيتهه وصياحهه وهي تسد الباب بقوه...

صحت وراهه قبس قبس ما التفتت عليه طبت وهي بنفس السب والغلط ما اكدر اكوم ولا رجليه تعيني اكوم ...

كمت اصيح ماما اريدهه تجي تكومني اسمع صوت ماما وهي تهدي بيهه ودكلهه لا يجي ويسمعج والله بعد ما احاميج ..

اجتني ماما وهي تصفك بايدهه ودكول الله يهدي بنت عمج اخاف عليهه من اخوج بس يسمع هاللسان شطوله شيخلصهه..

... ماما عليمن حاركه اعصابج اشو موفريلهه كلشي وهي اطب تطلع تتهجم علينه شتريد من عدنه..

.. اسكتي يابنتي انتي ماعندج حظ لاتحجين عليهه هي هم متاذيه لاتلوميهه..

.. الله عليج ماما شوفيهه منو يمهه تروح للمدرسه وتجي منو يحاجيهه منو يكلهه على عينج حاجب ..

.. الله يهديهه ما اعرف شتريد بالضبط شو تعالي خلي اطببج جوه واحجي وياهه..

سندتني ماما وكومتني واخذت ليجوه جانت واكفه تغسل يم المغسله انتظرتهه تكمل حته احجي وياهه ولو ما اخلص من السانهه..

التفتت عليه كتلهه هاقبس شبيج عصبيه منو وياج؟؟

ماجاوبتني عدت السؤال مره ثانيه وجان تنفجر بيه بذاك الحجي بس عوزهه تكوم تضربني سب غلط طلعت الموتى من كبورهه...

صدك خبله وبيهه خيط موصاحيه سكتت عنهه لان السانهه متبري منهه ومانعرف شتريد بالضبط...

راحت لغرفتهه وماما تاشرلي اسكتي عنهه رغم السانهه الطويل بس تحبهه حيل ودكول يتيمه هاي ...

ونعرف بس يجي اخوي وتسمع صوته راح تحاول تعلى صوتهه وتسمعه وهو واكف وياهه ع الحافه وهذيج الساعه تصير الدعاوي التطلع منهه تهجم بيوت...

رجيت راسي ع التخم واخذت نفس عالي استحسف شبابي وضعفي واحسد كل انسان يعيش كامل...

اخذتني الصفه لذاك اليوم البعيد لليوم الي ماخسرت بس كلبي وحبي لا خسرت نفسي وياااا....

...

حبايبي الحلوين شلونكم مشتاقتلكم هوااايه ...

اعتذر عن فترة انقطاعي لان مريت بظروف صعبه وهاي اليوم رجعتلكم بقصه جديده وان شاء الله تعجبكم مثل القصه الي قبلهه..

وطبعا الغلاف يروي احداث القصه مثل ما تعلمتو المغزى بالغلاف...

اريد صبركم وتحملكم على وحده من الابطال ترى خبله وراح تخليكم تغردون بلا انقطاع...

انتظروني قريبآ.... احبكم

هذا الغلاف...

قمع المشاعر.... البارت الاول..

للكاتبة زهراء ( روزايه)

‏اي كبران متعرفوني حقگم

تجاعيدي ، و سماري ، و شيبي منكم

والله اثنينه نفس المواليد

قبل لا اشوفگم چنت بكُبركم !

....

شجن ... واكفه ع طولي كدام المرايه ولابسه الكعب العالي مال اختي الجبيره هدى المخطوبه قبل فتره ومسويه نفسي مقدمه اخبار..

ساعه افتح شعري وساعه ارفعه اخلي الكرسي واكعد اصير بمستوى الميز واكعد نفس كعدة مقدمين الاخبار وابدي القي النشره المسائيه ..

القي كل الاحداث الي مرت بهذا اليوم كل نشرة اخبارية اقدمهه عن بيت جدي والاحداث الي تصير بالدقيقه الوحده..

اسمع صوت ماما وهي تصيح وين ولت اختج خلي تجي تاكل ماتدري صبينه العشا ..

ما الحك اكوم بس علمود انزع الحذاء مال هدى الجديد الي اشترى خطيبهه اركض وشعري طاير وراي واجيب واضم بي جوه الجربايه ..

وانزع اكسسوارات هدى لان كل مره تنهيني منهن واني ما اتوب لازم يوميه اقدم هاي النشره واتخيل نفسي يجي يوم واكون مقدمه...

هو هذا حلمي من الصغر اكون اعلامية اومذيعه اي شي المهم اطلع بالتلفزيون..

جنت اقترح قصص من خيالي واتخيل نفسي للبعيد بيوم احقق كل احلامي واصير الاعلامية الوحيدة من عائله الحجي صالح..

نزلت اركض ع الدرج لكيت للكل كاعدين اجت عيني بعين هدى خزرتني تدري بيه شجنت اسوي شكد تكتلني بس ما اتوب..

كعدت بصف بابا وهو يلعب بشعري ويكول ها شجونه بعدج تريدين تصيرين مذيعه ويضحك هو وعمي عامر من اكلهم اي ..

واني بكل فخر اهز راسي ببرائه واكله اي مع العلم جانت ماكو قنوات اكعد اتابعهه بس مصرة احقق حلمي..

صوت ضحك عمي عامر وجدي وهم يحجون على فلان وابن فلان ومحد يكوم من السفره الا يكوم جدي الحجي صالح..

عائله بسيطه من عوائل بغداد القديمه صاحبة قيم واخلاق وتجيهم الناس تطلب المساعده من جدي الحجي مايوم رجع واحد ولا قبل بالباطل...

عندي عم واحد اسمه عامر متزوج يمنه بنفس البيت وعنده ٣ بنات ومرته بعد ماتخلف صار بيهه اكياس وشالو المبايض

وواحد مانعرفه وين رغم عمري بهذاك الوقت جنت ١٢ سنه بس جنت اسمع بيبي تصعد ع السطح وتنوح بكلمات ما افهمهه وبس اسمع يايمه يا رضا...

اني فضوليه حيل لذلك جنت اسأل هوايه سالت بابا شكد يكول مسافر ومره سالت جدي دمعت عينه وكال مسافر ماندري شوكت يجي..

عمي ماميت بس ماادري وين وليش من ينذكر اسمه كل العيون تحنكهه العبره وخاصه بيبي الي تغطي وجهه بالشيله مالتهه وتكوم تبجي...

عندي عمات اثنين بشرى وبسمه متزوجات اقرباء ودائما يجن لان قريبات ...

بابا عادل الي هو الجبير لهاي العائله موضف بالتجاره وجدي من خياطين قبل فكلهم اخذو المهنه من جدي وصاروا ورا الدوام يرحون لمحل الخياطه..

عندي اخوان اثنين بشار الجبير وبعده هدى حته ماما تسميهم روسييه من كدما يتناكرون وعمر وفاديه واني اخر وحده ...

مره من المرات كلهم اجتمعو ويحجون بوضع بغداد جانت سنه ٢٠٠٤ وجدي ماقبل واحد يطلع من بغداد وكال مايمنه شي بس مالكم علاقه بالسوالف ولاتحجون على فلان حزبي وعلى فلان ...

نسمع صوت القصف بس جنه اطراف بغداد منطقتنه شبه امنه بس ماكو طلعه اعتمدو على المحل وع الرواتب الي جانت بهذاك الوقت تفاليس...

جانو بيت خالي فاضل الله يرحمه جيرانه بيناتنه بيت عنده بس ٢ ولد الجبير وائل متزوج وعندي ٢ اطفال واتزوج من هو وصغير وضابط بالجيش والاصغر من عنده غيث وبنيه وحده متزوجه ..

علاقتنه حيل قويه بيهم يطبون ويطلعون علينه نفس البيت محسوبين وجدي يحبهم يكول عليهم صدك زلم عليهم العتب..

مره جنت بالحديقه ارش ويه بابا واندك الباب ركضت قبل بابا فتحته جان وائل ابن خالي متعودين علي ونحبه ..

مسويه ضفيره هنديه مد ايده على راسي وخربط شعري من فوك وكال موكايلج لاتفتحين الباب كبرتي!!

ما اهتميت لكلامه كل الامور بهذاك الوكت ماخذيهه بفطره وماكو واحد نيته موخوش لو المقابل يفكر بالموزين...

رجعت ارش بالحديقه واسمعه يحجي ويه بابا بصوت خافت ..

وائل.. عمي اني ماردت اجي للحجي كلت خاف ماتقبلون هاي اجيت كتلك بلاول..

عادل.. والله يا ابني فاجاتني شلون احجي لابوي وشكله وانت تدري من يوم طلعته وامي وابوي ماارتاحو..

وائل.. هو جاي يرضيكم ويكول صارت عندي جهال وما اكدر اظل وحيد يم نسابتي محتاج اخوتي ..

هذا الكلام دازه بيد عمي واني اجيت اكلكم حته يجيكم لان تدرون طريق وطويل وخاف تفشلو والوضع مو امان..

عادل.. هاهي ابني رحمه الله والديك راح اكعد ويه ابوي واخوتي ونتفاهم الدنيا راحت بحالهه وهاي سنين طويله مفارگي..

شجن.. طلع وائل وبابا واكف ويا بالباب ويحجون الي عرفته يحجون عن عمي رضا ..

ورا الغده وبعد ما شربو الجاي والكل كاعد فتح الموضوع بابا بكل هدوء

عادل.. يابه اليوم اجاني وائل وابن عمه صديق رضا ودازه يريد يجي يشوفنه .

الكل انتفض من عمامي لبيبي لجدي حته الاحفاد كلهه تصيح وين جان رضا وين هسه اتذكر عنده اهل..

عادل.. موهيج الحجي يابه احجيلك كلمه ترى صار سنين طويله وغلط وصارو عنده جهال والله اعلم شكبرهم زحمه يتربون عند الغربه..

الحجي.. ياولدي ماكو انسان كامل وان النفس لاماره بالسوء الا مارحم ربي .. واخوكم غلط جان شاب وطايش واني عاقبته بمافيه الكفايه وانطرد صار سنين من سنه ٨٨ وهاي احنه ب٢٠٠٤ انحرم من خوتكم ومن ولد عمه ومن بغداد كلهه..

مانعرف شوكت الله ياخذ امانته ولازم الانسان مبري ذمته اني ابوكم الله يحاسبني وما اخفي عليكم ضميري مايهدأ طول هاي المده اعرف السويته غلط..

عامر.. يابه شتحجي شنو الغلط السويته راح رضا للعدو مالته وخله ايده بيده واتزوج بنته ودنك روسنه كدام الناس..

احنه ناس معروفين والكل يحمد بينه تذكر شكالو علينه الناس وتذكر شنو من بيئه الي اتزوجهه وهسه دكول غلط السويته..

تذكر عمامي شحجو عليكم وشلون شيخنه سمعك كلام موحلو بحقك وانت حجي وطول عمرك متقي الله وكافي شرك عن الناس..

اني موكدامك مو حبيت وردت اخطب وما قبلو ينطوني تذكر شكالك ابوهه..

كالك ياحجي صالح انت علم وهاي ادنك على ايدك وابوسهه بس بنتي ما انطيهه تعذرني موقصور بيكم بس ابنكم رضا السوا كلهه تحجي بي واني ما اكدر انطي بنتي ومرت حماهه جانت تركص بالكروه..

الحجي.. كافي ياعامر بعدك تذكر هاي بنتك بطولك واتزوج احسن وحده وبت خير وعز وهسه جاي تفتح دفاتر قديمه شما تسوون رضا يبقه اخوكم..

جان الزغير والمدلل وحب شفتوني حاولت امنعه بكل الطرق وماكدرت البيدي شنو اكتله وهناك يم رب العباد اكله من ورا حجي الناس..

عامر.. لا موتكتله بس مثل ماتبريت منه كدام العشيره وكلت ماعندي ولد اسمه رضا هاهي انسد واعتبرنا مات ..

السوا مو شويه يابويه بعت العندك والماعندك ورحت فصلت ابوهه تذكر اندك شغل ليل نهار وهاي ادينه ازرفت من الابر والخياطه حته انسد فصل ابوهه ..

ابنك اعتدى على بتهم وسواهه مره براسنه وبت بيت ولهاي اللحظه من ينجاب طاري رضا ادنك من العار وهسه تريده يؤجع شنكول للناس مرت اخونه الله يسلمهه جانت تركص هي وعائلتهه ويطلعون حفلات لو دكول ابوهه نسيبي طبال وي......على عائلته..

الحجي.. ماتريدون اخوكم لاتريدو البيت بيت ابوكم يجي رضا ويكعد وتتبارون ويا الذمه ..

عمت عيوني على فراكه وهاي امكم كدامكم باليوم ماتنشف دمعتهه علي ويجوز محتاجنه وواكع بمشكله..

عامر.. اني ماعندي اخ واذا اجه رضا اني اطلع من البيت واذا انشر الخبر بالمنطقه رضا رجع والله يا حجي ماتشوفني لا اني ولا عائلتي ...

عادل.. كافي عامر ندري كلبك محروك ع الماضي بس لاتنسه الكدامك ابوي الحجي صالح نسيت روحك وتشمر بحجيك..

الحجي.. كافي سدو الموضوع واني امر ع وائل احجي ويا وانت عامر اذا تحبني وتعز امك لا تكدر خواطرنه

عمي عامر طلع وهو عصبي وبابا ساكت لان جنت اسمعه يكول لماما مشتاق لرضا كبر هسه شيب لوبعده؟

جدي ظل ساكت وبيبي ماعدهه سلاح غير الدموع وتصيح يايمه رضا...

بشار اخويه الجبير جدي من صغره معلمه على شغل الخياطه وهو خلا مسوؤل عن المحلات بشار جان مرحله اولى كلية هندسه نفط بس عمره ٢٠ لان تاخر سنه يله تسجل علمود هدى اختي حته يرحون سوه وعاد السادس سنه ..

دائما يرجع متأخر ورا العشه هو يكول لاتنتظروني اتعشه برا ومرات ماما تنتظره دكول خطيه ماياكل من اكل البيت من يجي ويلكانه متعشين مايصيرله واهس..

بس طب للبيت تلكته بنت عمي عامر الصغيره عمرهه ٦ سنوات كالتله بشار بابا وجدو تعاركو..

جان واكف يشرب مي والتفت على هدى الي تغسل مواعين كالهه شكو خير ان شاء الله؟؟

هدى.. عمي عامر طلع عصبي لان عمي رضا داز خبر يريد يجي يرضي جدي وصارت الهوسه

بشار.. عمج رضا شذكره؟؟ وابوي شكال؟؟ حجاهه بتعجب

هدى.. بابا ساكت مبين موافق بس عمي عامر ماقبل واتذكر الماضي الي ما نسى ابد..

بشار.. اني راح اروح اسبح واشوف جدي لاتصبيلي عشه ماريد متعشي..

شجن.. جان بشار اخويه يمشي واني امشي ورا لحدما وصلته لباب الحمام وصاح بيه مادري شريد بس اريد اعرف قصه عمي...

هدى الجبيره وتذكر الاحداث وسامعه من عماتي وجنه لازمين رجليهه اني وبنات عمي عامر اثنين الكبار ونتوسلهه تحجيلنه كالت خلي اكمل شغلي واجي..

رحنه كعدنه متحضرين نسمع وشوكت تجي هدى وبالي ثاني يوم اكعد كدام المرايه والقي نشرة الاخبار والاحداث الصارت..

شفنه بشار راح لغرفه جدي واحنه ورا بس سدو الباب وماسمعنه شي..

مرات عمي عمي عامر يكول لجدي انت معتمد بكلشي ع بشار ومعتبره ابنك الجبير حته بمكان عادل وجدي يكله اشو بينت كمت تغار من بشار ماعندي حفيد غير بس هذوله الثنين بشار وعمر ...

وعمي عامر دائما يتشاقه ويه بشار واسمعه يكول والله بشار مو ابن اخوي لا هذا صديقي وعضيدي الله يحبنه وعوضنه بمكان رضا ...

...

احنه البنات كلنه انام بغرفه فرشنه وننتظر هدى تحن علينه بعدماتكمل اتصال خطيبهه ع الارضي..

اجت لكتنه كاعدين منتظريهه كلنه نفس العمر والفضول كاتلنه انريد نعرف قصه عمي رضا..

كعدنه داير مدايرهه وهي بدت تحجيلنه عن عمي ومرته الي يكولون جميله بشكل..

هدى.. بسنه ١٩٨٨ جان عمري ٣ سنوات ما اتذكر الاحداث ولا عشتهه بس بمرور السنين من كبرت كمت افتهم واسال عمتي بشرى مامتزوجه جانت وهي تحجيلي بحكم جنت البنيه الوحيده عدهم ...

اتذكر بيبي شكد بجت وعمتي بشرى دكلهه لاتبجين علي من ورا هاي ظلينه بدون زواج بعدماجانت الكل تتمنى قربنه بس من ورا ابنج شوفي حالنه شلونه...

بيبي.. الله اكبر غلط بشر هو مامعصوم غلط عاقبتو هيج ياظلام وين ترحون من الله اني ام اني والده ما اسامح كل واحد اله ايد باذيه ابني ودماره..

بشرى.. بعدج ادافعيله وادري بيج مامصدكه وبكلبج دكولين لا رضا مايسويهه لج يوم شوفي حالنه شلونه شوفي اخوتي الشغل هلكهم من ورا فصل هذيج ال.....

هذاك عامر كدامج شفتي شلون متعذب ويلوب انحرم من حبيبته بسبب طيش رضا دمره ودمرنه كلنه..

هدى.. هاي يوميه عركه بيبي وعمه وتجي ماما اطلع عمتي من الغرفه دكلهه راح تموت الحجيه كلبهه محروك لحد يلومهه..

عمتي بشرى معلمه وقبل هوايه ناس خاطبيهه بس جانت منغره بشبابهه وجمالهه وجدي يريدلهه الزين لحدما صارت سالفه عمي محد خطبهه بعد وتالي اتزوجت ابن خالهه الي مادارس...

كعدت يمه عمه وبدت تحجيلي عمي رضا اصغر واحد بيهم المدلل وعزيز ابو طايش ومحد يكله على عينك حاجب وجان يدور مشاكل واسمه جدي يركع ورا...

اكو وحده بالمنطقه دكول حلوه حيل الكل يحلف بجمال سميه بس شنو فائدته الجمال واخلاق ماكو ..

دكول عمه جانت هاي العائله موخوش سمعه والكل يحجي عليهم وعمتهه وامهه اصلا كاوليات هذني الي يركصن بالمناسبات ولصدام حسين

وجمالهن وصوتهن يسمونه قبل غجر دائما من تنذكر يمدحون بجمالهه انت سميه شابه صغيره جميله وعمي رضا يركض وراهه واكثر من مره جدي ناهي عنهه بس مايفيد

جدي جان حته مايستقبل ابوهه ولا يقبل يكعد يمه بالمحل يكول لابارك الله بي يدري بعائلته هيج وهو يطبل الهن..

سميه بعمر ١٨ عليهه صوت حلو وكايمه تطلع ويه امهه وعمتهه وتغني لحزبيه صدام وهذوله الله اعلم شجان ينطوهه مقابل وشتنطيهم...

لحدما بيوم منهن جاي عمي رضا مفاتح جدي بالموضوع كايله جدي لو اعرف اتبرى منك ما الطخ سمعه عائلتي واجدادي بهيج نسب ...

بيومهه حته ضاربه وطارده من البيت وعمي رايح لابوهه كايله اني اريدهه وهم عائله نص ردن قابلين..

ومايحسون غير عمام سميه وابوهه واخوتهه اجو هادين على بيت جدي ويصيحون رضا نهب بتنه..

ظالين يدورون عليهم فوك الشهر ومحد لاكيهم وجدي دنك راسه كدام اهله وعشيرته والكل صار يلوم بي وشلون جبتلنه هيج عار واحنه الي نكعد بمضيفك انحل مشاكلنه لان نعرفك رجال حق..

مامخلين مكان يعتب عليهم مامدوري وتالي لكوهم بالطارميه منطقه ع اطراف بغداد كوم ابوهه سوي كعده وكال لازم يتزوجهه رضا بنتي انفضحت ولازم تفصلون..

جدي بايع كل املاكه واملاك اخوته يله سادين الفصل ومتبري من عمي كدام العشيره وراح ومحد يعرف شي عنه..

بعد مرور سنتين جايه وحده من كرايب سميه وكايله لبيبي ترى ابو سميه هو شرد رضا وكاله انطيك سميه وانكول نهبهه حته ياخذ فصل ..

من هذا اليوم انمحى رضا من اخوته وعمي عامر اول ضحيه ورا عملته جان يحب وحده وحته طالبهه من اهلهه وقابلين بعد سواية رضا ماقبلو اهلهه ..

دكول عمتي ظل عامر ينوح مثل المره ويدك ع راسه بيوم الزفوهه كدامه ويصيح الله لاينطيك رضا وظل ٤ سنين مايرضى يتزوج وكوه خطبوله ابتهال هسه مرته تصير بنت خاله ..

اخذوا البريء بجرم المذنب وظلت هاي القصه تداور بين العوائل ومضرب مثل سوايه رضا ابن حجي صالح...

وهسه عمي رضا سمعت من بابا عنده ٣ اثنين ولد وبنيه وجاي يطلب السماح من جدي..

هاي قصة عمنه الي لحد الان الناس تذكرهه شلون اخذ رقاصه وتغني لرجال صدام وشلون باع مبادئه واخلاقه وقبل يرتبط بهيج وحده بحجه الحب...

شجن.. جنت اسمع القصه من هدى واني اتخيل ولد عمي شكبرهم وبنت عمي شلونهه يجوز حلوه مثل امهه لان يكولون حيل حلوه...

غفيت واني اتخيل اشكالهم وصرت اتمنى التقي بيهم واشوف عمي رضا الي سوه هيج ...

ثاني يوم كعدت والبيت مخبوص وعمي عامر اخذ مرته وبناته وداهم لاهلهه وكال ما منا لمن يروح رضا يله اجي...

جانن عماتي اثنين بشرى وبسمه موجودات ونسو الزعل بس ينتظرون شوكت يجي عمي ويشوفو...

احنه فرحانين على فرح اهلي اني وفاديه اختي اصغر من عندي كلساع نركض للباب انشوف شوكت يجي ونرجع لبيبي نكلهه بعدهم...

صارت الساعه ب١١ ونسمع صوت سياره بالباب اول وحده ركضت اني فتحت الباب واشوف عمي نسخه الاصل من بابا يشبهه حيل بس شعره ابيض وعبالك اكبر من عمره..

واثنين ولد نزلو ويا بعمر يطلع عمرهم ١٥ سنه وامهم سميه رغم ماهي جبيره بس جميله بشكل جمال ريفي ما اعرف شنسمي...

سلمت على عمي ومايعرفني منو سالني منو انتي؟؟

.. اني شجن بنت عادل.. جانت الدموع متجمعه بعينه ومرته محجبه ولابسه محتشم وتمشي ورا وولده نفس جمال امهم..

طب عمي بنص الطرمه والكل طلع يستقبلهم بس شاف جدي ركض علي مثل الطفل وركع بالكاع جوه رجلين جدي ويصيح سامحني يابه ويبجي بصوت عالي..

كلهه تبجي علي بجيه حته اني هاجت عندي المشاعر وبجيت على بجي ماما انتقل من جدي لبيبي وهو ينحب مثل الفاكده ابنهه...

ماكو حجي بس صوت البجي وعيون تتعاتب حاضن بابا واخواته وهو يكلهم سامحوني اذيتكم ابروني الذمه..

تقدمت مرته وسلمت عليهم بس محد عبرهه جان كل شوكهم لابنهم كعدو بالصاله وهو كلساع يبوس ايدي جدي لو راس بيبي ...

سالو عن حياته وشلون ووين كاعد كالهم كاعد بالطارميه وعندي هذوله الولد ٢ وبنيه قبس ظلت يم خالتهه لان عدهه سفره من الطريق..

لحد العصر وراحو كالو ماعدنه سياره اجينه ويه جيرانه ويرجع المغرب كاله جدي احنه نوصلك كال موقبس عفناهه هناك ولازم ارجع ..

طلع فرحان وجدي يكله كدامك اسبوع رضا جيب غراضك وتعال محضرلك بيت بس تعال..

جانت هاي كلمات جدي يحجيهه بتوسل وعمي يبوس بيد جدي ويكله اي اجي بويه اجي واوكع ع عامر يسامحني لازم يسامحني ...

ركضت للغرفه القي نشره الاخبار وهالمره نرجس بنت عمي لازمه الفايل ومسويته ميكرفون وتسالني واني احجيلهه بصفتي مراسله...

لحدماسمعت صوت بشار جوه ونزلت اركض اشوفه شجايب النه وماما تحجيله عن عمي وهو ساكت..

هو بطبعه هادىء بس اذا طكن عنده يكوم يخبط واحد ع واحد من العصبيه حته مره تعارك هو وعمي عامر وتلازمو من الركبه والا شويه يضرب عمي بس جدي ادخل ...

لثاني يوم الصبح جنت نايمه وافز على صوت الصريخ والعياط اول مره بحياتي اسمع هيج صوت ..

صوت عماتي جان يرج البيت رج وصوت رياجيل بره كمت اريد اشوف شكو من الهبطه ما اكدر كوه وصلت للباب الغرفه واشوف عماتي يشلعن بشعرهن بنص الصاله ....

يتبببع ... متابعه ممتعه..

غيرت اسم القصه والغلاف  لان هذاك حسيته مومناسب ومثل مامتوعدين على ابداعات عبير الف شكر الج الاسم وتصميم الغلاف وبعد انتم وشطارتكم والغاز عبير AbeerAL_Hussnawy

والجميله سارونه اغلب الاسماء من عدهه لان بهيج شغلات عقلي يوكف وهاا لادكولين غششتيهه ترى بس اقترحولي شي مختصر خاف تهدون عليهه شكرا قلبيHamzayhoocom1996

ما اجيتكم وايدي فارغه جبتلكم البارت الاول وبعد ما ادري راح التزم بالنشر لولا؟؟ ادعولي التزم😆

صوره الغلاف👎

قمع المشاعر.... البارت الثاني..

للكاتبة زهراء ( روزايه)

وطفى الشارع ضواه

ونعست كل الدروب

وروحي عالمامش تلوب

وانا اذوب....وانا اذوب

يا بحر ، يا ليل ، يمعود

روحي بالظلمة تذوب

والخطوة متيهة دمي

والعيون تريد حلمي

والازقة الغافية ، وكل الذنوب

يا فوانيس المحلة اشتعلي مني

هاج دمي ...هاج دمعي

هاج كل هذا الحنين

اشتعلي مني ، روحي بالظلمة تذوب

يا بريد ، الليل ما يندز رسالة

خاطر كليبي يتوب...وانا بالظلمة اذوب

كلمات: صفاء السراي

.....

شجن.. صريخ بيبي ونحيب عماتي ويصيحن رضا موهيج الخوه يا اخونه عرفت بلحظتهه عمي رضا مات بس شلون ووين ماندري!!

ساعات وهن ع نفس اللطم والدك والنوح والجيران والكرايب فزعت علينه  اكو ناس ماشايفتهه من الهوسه حته ماما تيهتهه..

بين عليهن شكد يحبنه عمتي بشرى الي جانت تحجي علي ودكول دمرنه اكثر وحده منهاره بيبي كلساع تتخربط وتوكع ويذبون عليهه مي ..

البيت فارغ بس نسوان وبابا وعمي واخوتي كلهه رايحه للمستشفى يدورون علي اسمع من النسوان يكولن بس اجاهم الخبر مايدرون وين بيا مستشفى..

اسمع بيبي تصيح رضا رحت وماخليت ريحه من عندك انت وولدك ياناس ياعالم ٤ نفرات راحتلنه انهجم بيت صالح ..

واني كاعدع ع الدرج وابجي وعبالك عمي عايش ويانه بس ع بجي عماتي وبيبي اني وفاديه ملخنه نفسنه تالي صاحت بينه هدى وسكتنه..

للظهر يله اجه عمي عامر الوجه محتقن من الدم وجدي يكودون بي ولد عمتي بسمه فتحو المضيف  جدي باني بطرف الحديقه من غير الاستقبال هذا المضيف معروف يستقبل بي الناس ويحلون مشاكلهم..

اجه عمر ويسولف لماما يكلهه مالكيناهم بس هوايه عوائل ميته السياره فايته من يم رتل امريكي وماواكف السايق وضاربين السياره كلهه ...

وبس واحد عدل والناس مجتمعه يمه سالنا يكول كل واحد اجه اخذ اهلهه لان من البارحه المغرب مضروبين واحنه اليوم يله درينه..

... يايمه لاتحجي كدام بيبيتك هيج ترى كلساع توكع وهسه شلون وين ادورون؟؟

.. جدي دز ناس ع بيت اهل مرت عمي بالطارميه وخابر يكول هم مستلميهم ويهددون بان مو الامريكان ع اساس جدي كاتلهم لان هو هادر دمه..

... عزا العزانه تحجي صدك انت يامصيبتنه اسكت لاتحجي ولاحرف دخيلك ربي ..

شجن.. بساعه صارت الهوسه الزلم برا تهد وتتوعد ع ابو سميه شلون هيج يعتقد منو الي يكتل ابنه واحفاده ...

صارت هوايه ناس تجي ومن كل مكان كرايبهم صار بيت جدي مابي مكان للكعده وغير الصياح والعويل..

صار العصر وامي ومرت عمي عامر يلوبن ويدعن كون الله يحلهه لان هذاك ابوهه عديم اخلاق مامنه رجه وشراح يسوي ومايرضه ينطيهم حته يسوون لعمي فاتحه..

تالي جدي صالح رغم تعبه والمصيبه الي كسرت ظهره جمع ولد عمامه وزلم العشيره والشيخ ويا وكلهه تسلحت وكالو لوكاتل لومكتول ضحك علينه بهذيج السنين وسكتنه علمود سمعتنه بس هسه ابنه مايندفن عدنه؟؟ لاماتصير ولا راح تصير..

ماما تركض ورا بشار تتوسل بي مايروح وهو يكلهه شلون ما اروح واعوف ابوي وعمي وحدهم المات عمي نفس دمنه ..

كوه طلع بعد بواجي امي وتخاف علي بس عمر جان بالرابع علمي ماخلته يروح وبابا كاله ابقه هنا البيت فارغ مابي رجال ...

مأسآ يصه هذاك اليوم لحد الان طابعه بذاكرتي كل النسوان واكفه بالطرمه وبيبي منهاره وعمتي بشرى تصيح ياناس اخوتي راحو للموت ...

الي يدعي واللي يبجي والي ماخذه ركن هي وشكم وحده يكصن بالمرحومه وكله من وراهه ...

اني دزتني هدى اجيب شكر من فوك صعدت مليت الشكردان واسمع صوت وحده تبجي من غرفه عمي رضا الغرف الفوك وحده لعمي رضا وغرفه اخوتي بشار وعمر..

تقربت للباب جان مامسدود واسمع بواجي بنت عمتي بسمه اسمهه فرح واختهه بصفهه دكلهه اسكتي لاتجي امي وتشوفج شتكليلهه تبجين ع بشار ..

فرح.. اموت نفسي اذا صار بي شي

..  الي يسمعج يكول يباوعلج خطيه اشو نظره مامحصله من عنده بس معلقه نفسج بوهم ..

.. اسكتي انتي مالج علاقه مايباوع بس ادري بي يحبني...

شجن.. انتبهن عليه واكفه وسمعت كل حجيهن غيرن الموضوع وكالت سوده عليه فرح تبجي ع بشار واخوتي شلون بيهم وهي جذب اصلا اخوتهه بكد عمر ومارايحين..

ما اكدر اسكت نزلت ركض لهدى شاورتهه شسمعت ماحسيت غير الكرصه طيرت زندي وكالت اكص السانج اذا حجيتي كدام احد ..

من خوفي رجعت مره ثانيه نزلت شكر بالدولكه وما ادري بروحي...

هدى الجبيره وكلنه نخاف منهه ماما ماتكتلنه وهدى باطشه بينه والفضل الهه بتعليمنه بالصح والغلط لان ماما معتمده عليهه ..

ومبين على هدى تدري لان شفتهه صعدت ليفوك وشويه ونزلت فرح وراهه يعني اختي يمكن طابختهه..

ظلت براسي فرح بنت عمتي تحب بشار وهو فدوه لكلبه مايوم ضحك حته الضحك عنده بفلوس يطب ساكت يطلع ساكت واذا خزرنه اني وفاديه انظل اسبوع ما نباوع بوجه..

كل عقلهه فرح حبته اصلا اسمع ماما دكله داعيه عليهه امهه التتورط بيك من كدما حقنه وعنده الابتسامه بفلوس..

صارت الدنيا ليل وكل خبر ماكو عنهم ماما دزتني لبيت خالي اشوف وائل بلكي يعرف شي عنهم..

رحت لبيت خالي طلعتلي مرته كالت بعده مااجه هو بالجيش واليوم من سمع كال انزل ولسه ماوصل ..

طلعت امشي بالفرغ شفت وائل من بعيد ركضت علي حته يخابرهم بدون مايخليني احجي كال ولج انتي شكبرج صرتي وطالعه بدون حجاب ..

هزيت راسي كتله اني ما البس حجاب انت شعليك !!

شوهذا عصب وخزرني ورفع اصبعه بتهديد وكال شنو شعليه لاتخليني اطيح حظج كبرتي حرام وعيب بدون حجاب اطلعين والناس تشوف شعرج..

حته نساني عليمن اجيت كال روحي طبي لبيتكم واني هسه اجي وكلي لامج جايين بالطريق ماكوشي لايخافون..

رجعت كلت لامي هدئن وارتاحن وظلن يطبخن ينتظروهم  شوكت يجون ولحد ال١١ بليل يله اجو الصريخ والعياط وجابو عمي وولده الله يرحمهم وخلو توابيتهم بالطرمه وعماتي داير مدايرهم يدكن عليهم..

ليل وهدوء حته صدى صياحن واضح التمت علينه الناس منين مامنين مرت عمي اهلهه ماخذيهه وعمي ولده جابهم جدي بعد تهديد وعركه وهذولاك يصيحون انتم كتلتوهم...

كالو تخلص الفاتحه ونشوف حل لهاي المصيبه وخاف سكتنه قبل هالمره مانسكت ابوهه واحد سكط ويدور فصول مثل ماجان يتاجر بجمالهه بسبيل الفلوس حته بموتتتهه طمعان...

بالهوسه والصياح اسمع عمتي بشرى تصيح شو وخرن تعالي هدى ولجن بنت عمج وكعت شو داده ساعدنه ..

ادفع بالنسوان وادحس روحي بنصهن بس حته اشوف منو بنت عمي ...

جانت اكبر مني بسنتين عمرهه جان ١٤ بس انعم بعد وشعرهه تمري وطويل حيل جانت مسويه ضفيره ومهوسه متروكه صاير مده مامشطه ...

شالتهه هدى ومرت عمي عامر وهي مغمي عليهه ودخلنهه للغرفه مالتنه واني امشي وراهن حطنهه بالكاع ويرشن عليهه مي نكعنهه خطيه ..

مرت عمي ابتهال فتحت دكم ثوبهه جانت لابسه ثوب ميدي وكلوش وبي دكم من كدام ونكعت ركبتهه بس بيضه حيل مثل مايكولون ثلج عكس بشرتهه الي تقريبا حنطاويه ..

كامت تفتح بعينهه وتصيح ماما اريد ماما ودموعهه تجري بغزاره بس حيل حلوه يمكن مثل ماكالو امهه جانت جميله وهي طالعه ع امهه ...

ملامحهه ماتنمل بس صافنه عليهه وبصفي بنت عمي عامر كلساع ودكلي شوفيهه شلون حلوه عود مثلنه..

شويه وانتبهت بس لومامنتبهه احسن مثل المجنونه من صياح ومن ادفر عضت مرت عمي عامر وخلتهه تكمز...

ضربت هدى اختي دفره ببطنهه لان جانت يم رجليهه تصيح اريد ماما كتلتو ماما الله ياخذكم ..

جانت فاقده يعني تعض وتدفر تكفش هدى من حجابي وهدى عود مطوله بالهه لواني مسويه هيج جان موتتني

اكو نسوان طبن للغرفه يريدن يهدنهه بس مرت عمي ابتهال طلعتهن كالت لاتفضحنه وكحه حيل لزمتهه وهي ادفع وادفر برجليهه ..

التفتت عليه ابتهال كالت شجن اركضي لواحد من عمامج لوبشار خلي يجونه هاي عدهه انهيار عصبي..

اني مثل الطلقه من النسوان للزلم ما احس غير بالشارع وادور عليهم ماكو لابابا ولاعمي بس لمحت بشار واكف ويه وائل والجكاره بحلكه ...

ركضت علي كتله بشار هاي بنت عمي رضا عضت عمتي ابتهال وضربت هدى دفره وعمتي دكول خلي يجي عدهه انهيار..

شمر الجكاره بالكاع وداس عليهه وطب وهو يكفخ براسي ويكلي وين موليه طالعه بنص الهوسه ..

اركض كدامه وطبيت للغرفه جانت بس عمتي ابتهال وهدى لازماتهه طب بشار وهاي عبالك شافت جني كدامهه..

اول مافزت وتحرك بنفسهه تريد تخلص من عمتي الي لازمتهه سأل بشار شبيهه؟؟

انهدت بي مجرمين كتلتو ماما واخوتي الله ينتقم منكم انت وجدك وابوك انت مجرم انت كتلتهم...

هدى متفاجئه بقوتهه وجرئتهه تقرب عليهه وكعد بالكاع وثنى ركبه وصار كدامهه وابتهال لازمتهه..

بشار.. اذا ماسديتي حلكج اطيح حظج هسه انتي شنو من تربيه وشزارعين براسج  ؟؟

قبس.. انتم كتلتو ماما انت وابوك اني اريد اخوتي اريد بابا الله ينتقم من عدكم جانت تحجي بصوت بي شهكه ومنهاره حيل دفعت ابتهال بقوه وتريد تعضهه..

بس بشار كدامهه لزمهه من اكتافهه حيل بسرعه انغمى عليهه التفت على هدى كالهه خلي شي ع راسهه خلي اخذهه للمستشفى ..

كام وشالهه بين ادي صايره كلهه بحضنه وهدى تلبس بيهه الشال وطلع ليبرا وابتهال تركض ورا وتلبس بعباتهه..

شفته من بعيد شمر السويج ع وائل واخذوهه تاخرو يله رجعو مخليلهه مغذي بس مددت غفت كالت ابتهال انطوهه مهدء وكالو عدهه انهيار عصبي...

خلصت الفاتحه وكعدو يحجون على هاي المشكله الحقيقه جانت عند الرجال الي مامات كال جنه صاعدين بسياره كوستر كيه ويمكن السايق مالتنه  مطلوب وكفونه الامريكان وماقبل يوكف وكدامه رتل وصار يجتاز بيهم وهم خرطو السياره كلهه بس هو متصوب وطالع من الموت وبعد مايدري بشي...

دز جدي ناس ع اهل سميه يجرهم للكعده وشلون يتهمونه وشلون هيج سوو وهذولاك ع كولت ماما مكطمين لا شيخ ولاجبير يعتمد علي..

جان مدري منين يلم شيوخ ويجي هاد ع جدي ويكلهم انتم كتلتوهم حسب حجيه بنته سميه وعمي ماميتين بساعتهه وهم كايليله لاتصدكون ترى الحجي صالح كتلنه ..

يكلهم جدي مو هذا شاهد ابو المستشفى الرجال حجه كدام الشيخ يكول لا انتم دفعتوله فلوس وخليتو هيج يحجي منين مايجيبو ينكلب ع ظهره..

تالي اخر شي كامله جدي كاله اذا ماكمت من ديواني اكسر العصا ع ظهرك وظهر اليطلعلك وراك خسيس عديم غيرة وناموس عبالنه رجال ونحجي وياك بس تالي ذيل الجلب اعوج ماينعدل...

سنين وانت عايش بهاي الخيسه والدنائه وبعت شرف عائلتك وبعدك ما اتقيت ربك ..

سكتو جدي كوه وهو اخذ الرياجيل الجايبهم وطلع ومن طالع بالباب كايل لجدي اني اعرف منو ينتقم من عدكم الا يصير طشاركم ماله والي بس انتظر والي منك وبيك ينتقم منك..

طارده جدي وبيومهه تخربط وضغطه معلك هذا الحجي سولفه النه بابا وشلون جدي طارد ابو سميه من الديوان..

عماتي ظلن يم بيبي لان مريضه وبيتنه مافرغ اكوناس تجي تعزي درت متاخر وجيب المي ورجع الجاي..

قبس بنت عمي بعدهه لوتصفن ساعات لو تجيهه لحظات تصرخ حتلو بنص الليل وتضرب شكو واحد كدامهه..

دخل عليهه بابا مافاد كل الي تشوفه تصيحله مجرم انتم كتلتو ماما ماتحبوهه..

جدي يكول هاي البنيه زارعين براسهه الكره والله اعلم شمعلميهه بهاي الليله الماتو بيهه وهيج تصيح وكلما تشوف عمي عامر دكله انت كتلت بابا ماتحبه...

حاولو وياهه بكل الطرق مافاد حته احنه كالو صادقوهه وبلكي تتعود عليكم بس هي اكبر من عمرهه من تشوفنه اطردنه ...

اليوم اربعين عمي وسوو اربعين جبير وعزمو هوايه ناس واجت فرح واني الله خلاهه بالي وين ماتروح اركض وراهه بس اريد اعرف اخوي يحبهه ...

صعدنه اني ونرجس فوك انريد انزل فراشات ونمشي ونتختل بلكي هم نسمعهه بس هالمره ماسمعناهه شفناهه...

جان بشار بالغرفه مالته واكف يلبس بساعته وهي واكفه كدامه ومرتجيه على الميز ومكتفه اديهه وتباوعله بنظرات مثل المسلسلات وهو مبتسم...

نرجس تكرص بيه ودكلي بشار يضحك وتضحك الفطيره واني وياهه اكلهه اااي يضحك

بدون مبالغه بس فعلا بشار الضحكه عنده شي مقدس ومايضحك الا للضروره ...

خاف يشوفنه بسرعه نزلنه وتاكدنه هو يحبهه وهالمره ويه نزلتنه لزمتنه هدى وتعال جيب الي يخلصنه منهه...

سلاح هدى الكرصه واذا اقوى العضه حطتنه جوه الدرج اثنينه طيحت حظنه وكالت خلي ينزل والا اكله عليجن واحنه نتوسل بيهه ...

من هذا اليوم بعد ماراقبنه ولا صعدنه نتختل لان كرصات هدى اسبوع يله طابت..

وفرح دكت اقامه يمنه ع الرغم ابد ما اشوف بشار يباوعلهه ويعاملهه حالهه حال البقيه بس مادري الي شفنا بالغرفه شنو معنى...

صار العشه وبدو يصبون وقبس تحركت من مكانهه لاول مره وكامت جانت من الحمام للفراش...

وكفت بالمطبخ وتباوع وتصد بالوجوه بغربه وعيونهه مورمه من البجي جرتهه عمتي تريد تحضنهه دفعتهه متوحشه هاي البنيه..

ظلت واكفه بصف الثلاجه وصافنه على الهوسه والصب وهذا يصيح وهذا يتعارك ...

طب بابا شافهه تقرب عليهه حشكت نفسهه بالحايط وتبجي كالتله ماما عوفوهه بيهه خوفه لو ماره سابقا بشي لان البنيه موطبيعيه...

التهى الكل بالصب ويشيلون مواعين تقربت وكفت بصفهه كتلهه انتي شسمج؟؟

ما ادري شجنت احس من سالتهه ٤٠ يوم يمنه مثلا ما اعرف اسمهه بس ردت افتح موضوع؟

التفتت عليه وكالت ماتعرفين اسمي سالي ابوج؟؟

... لا اعرف اسمج قبس!!

.. لعد شكو تسالين؟؟

.. بيا صف انتي؟؟

.. بالثاني متوسط وانتي؟؟

... بالسادس ابتدائي ...

.. ماحجت شي بس هزت راسهه ما ادري ليش حبيتهه واريد اصادقهه شويه وطب وائل باوعلي وضحك لان شافني لابسه حجاب هو اني مالبسته علموده بس جنت اصلي...

وائل ضابط جان لابس مدني بس المسدس بحزامه وركض علي ابنه الصغير شاله وصاح ع مرته الي هي تصير بنت خالتي كالهه اخذيهم جوه لا ينجون...

كلت لقبس تعالي بالغرفه نترت ايدهه حيل بس ماحجت وظلت واكفه بس عيون بابا وعمي عليهه يطبون ويطلعون يباوعلهه مع العلم مابيهه ذره شبه من عمي كلهه ع امهه..

بعد ماشالو الاكل اجه بشار كال خوماناسين شي؟؟

بشرى.. لاعمه مانسينا بس راح نكوم نسوي الجاي ومن تكملون دزلنه واحد من الولد خلي يجي ياخذه...

جان يحجي ويه عمتي وقبس تباوعله بحقد وتعصر بديهه يمكن صدك معلميهه وزارعين الكره بداخلهه ...

بشرى.. عمه ماتحاجون قبس لاتاكل ولاترضه تحجي ويه البنات التفتت عليهه وكالتلهه تعالي يابنتي انتي بنص اهلج والله قدر وراد هالشي موبيدنه نغير وابوج اخونه رغم الصار وهاي كدامج ملخنه نفسنه علي وانتي ما اجيتي وياهم اجه وترضاو وكال راح اجيب قبس واجي نكعد هنا ...

قبس.. جذابين انتم من زمان عايفين بابا وحده تمرض وماعنده شغل يشتغله وانتم ماتريدو وهسه من مات صرتو تحبو ..

بشار.. انتي بعدج صغيره لا ادفنين نفسج تحت انقاض الحقد ترى اطلعين من جوه الانقاض وانتي خسرانه نفسج ..

ابوج صح مالحكت علي ولاحته شفته من اجه بس تاذينه علي والماضي راح وامج الله يرحمهه وانتي هسه وحيده ماعندج احد لا تغلقين على نفسج بهذا العمر..

قبس.. لا تصدكون راح اعيش يمكم انتقم من عدكم وكلكم اخليكم تتندمون انتم دمرتونه بابا شاف انواع الذل بسببكم انتم لو مرحبين بي جان ماعاش مذلول ..

بشرى.. يابنتي انتي شعرفج بالصار ترى الحجو الج بيت جدج كله جذب ابوج هو عافنه واختار حياته ..

شجن.. دارت وجهه وعافتهم وهي تخزر ببشار وهو مرسوم شبح ابتسامه على وجهه ...

بالليل انام كلنه سوه هي غرفه جوه بصف غرفه بيبي غرفه البنات احنه وبنات عمي عامر وبهذا اليوم عماتي وبناتهن لان ثاني يوم يرحون للنجف..

صوت هدى وهي تكعد بينه كومن بدلن السياره ب٥ تجي هم البارحه كالو بس الكبار شنو غير رايهم واخذونه ...

شجن.. موكلتو ماترحون بس الكبار؟؟

.. كومي بسرعه محد يظل يمجن والسياره تكفي ردنه نعوفجن يم بيت خالي ابو وائل بس ماموجودين مرت وائل يم اهلهه تروح وخالتي تروح ويانه كومن بالعجل ...

كمنه بسرعه بدلنه وتريكنه دنيا ظلمه بعده الفجر ماطالع قبس ماقبلت تتريك رغم محاولات بيبي بس ماقبلت لاتحجي ولاتاكل...

راحت تبدل واني هدى دزتني للغرفه اجيب جواريب لماما بدون ما ادك الباب مامتعلمه ادكه لان ماعدنه احد طبيت بسرعه ..

ويه طبتي ظليت لا اني اتقدم ولا اطلع ولا انسه هذا الموقف حته هي صاحت بيه اطلعي برا مامتعلمه ادكين بالباب...

بسرعه ركضت ليبرا وعلامات الدهشه واضحه عليه  بيه حاله من اتعرض لموقف صعب اروح بالمخزن اصفن لحدما ارتاح..

معقوله هذا الشي مأثر ع قبس جانت تبدل ودايره ضهرهه وبس لابسه بنطرون وتريد تلبس البدي واني طبيت..

جان جانب كامل من ظهرهه ومن اندارت مرسوم على صفحتهه وصدرهه الايسر ونص من بطنهه ونازل ليجوه شي اسود مثل الوحمه مضيع نص جسمهه وكانو مقسوم نصين ابيض واسود...

ظليت ب١٠ دقايق بالمخزن واسمع صوت فاديه ادور عليه وطلعت اني من يمي خفت ماخليت عيني بعينهه بس هي قويه ماحسهه غير تلزمني من ايدي ودكلي الشفتي تنسي ترى اذا حجيتي ماتعرفين شسوي بيج واني بس اهز راسي..

صاحو اجت السياره وبد الكل يصعد واني بالي يم الشفته مامعقوله اكو هيج وحمه مشوهه كل جسمهه ...

كعدت بصف عمه بشرى والظاهر عدهه سفره بس تحركت السياره كامت تتغمه وكلساع ودنكت اخر شي كعدت بالكاع وصاحت نزلوني..

سيارتنه كلهه نسوان وعمي عامر وعمر اخويه وسيارة ثانيه سيارتنه الصغيره جانت بهذاك الوكت اسمهه ميسوبيشي..

يسوق بيهه بشار وجدو بالصدر وبابا ورجل عمتي بشرى ورا كالت عمه وكفوهم خلي نصعدهه وياهم احسن هاي خاف لان ازدحام ..

وكف السياره السايق ونزلوهه ماتحملت تقيئت كعدت ع الرصيف وتكح شفت بشار نزل عليهه ومخلي ايده ع ظهرهه وهي تسعل وبابا نزل ..

اتذكر عمي كال ما اجت لان عدهه سفره من الطريق صعدوهه وياهم واني متت ذبحت نفسي اريد انزل وياهه سويت نفسي تلعب وهدى تعرف كلاواتي ...

تالي بابا كال تعالي هنا يمهه حته تسولفن بالطريق مايدري اصلا اخاف منهه ..

رجل عمتي حول بمكانه واني رحت وياهه فاتحين الجامه وهي بدون حجاب ولا اني بس هي مطلعه راسهه من الجامه وهوه الفجر يلعب بشعرهه وجدي كلساع يحاجيهه بس ماتجاوبه ...

لحدما وصلنه وهي اكثر وحده تمرغلت بالكاع على امهه موابوهه جانت تحجي بكلمات الكل واكف يسمعهه وهي دكلهه ماما رحتي وعفتيني انتي عندج اهل وتعذبتي اني بدون اهل شراح يصير بيه...

ماما ابد لاتسامحيهم اني انتقم منهم واجي يمكم وتروح لكبر اخوتهه وتبجي كوه رفعوهه عنهم...

سمعت هدى دكول لعمتي وراهه قصه هاي البنيه ماتشوفيهه شلون تحجي بالانتقام بسلا تهجم بيوتنه ...

رجعنه بعد تعب وتغدينه بالطريق وصلنه لبغداد الوضع موامان بس الله سترنه بهذيج الطلعه...

مرت الايام والشهور وبديت اكبر وهدى اختي اتزوجت بسكته علمود حزن جدي والحال مثل ماهو وقبس حرف واحد ماتحجي...

سجلونه بالمدرسه ومرات نطلع بالدوام الصباحي ويه بشار من يروح للكلية ومرات ياخذنه بابا وكلما تصعد اشوفهه شلون تباوع بحقد لبشار وتريد تاكله بس هو مطنشهه...

فرح هم اول سنه كلية وادك علينه عمتي نمر عليهه وبشار يتحجج يوميه يوم يكلهه عمه مو ع طريقي ومرات يكلهه رايح نفرات عكس الي شفنا يمكن مايحبهه..

اني وقبس ونرجس نفس المدرسه بس قبس بالثالث واحنه بلاول دائما البنات يكولن بنت عمج متوحشه كاعده وحدهه بالرحله الاخيره وماتحجي ويه وحده وكسلانه حيل..

صدك جانت تجي تشمر جنطتهه وتنام ابد ماتقره لحدما صارت الدخولات وطلعت ماداخله بكلوريا ومحد حاجاهه كالو خطيه حالتهه النفسيه تعبانه...

وعادت السنه الثانيه ونفس المستوى واحنه صرنه صف ثاني راح نلحك بيهه وهي اسمهه المدرسات يشكن منهه...

مره من المرات دزو عليه بالصف وكالو الاداره تريدج رحت وجان الكاهه كاعده حاجتني المديره كالت قبس تعالي اتصلي باهلج بنت همج جايبه وياهه سجينه ...

اني من سمعت سجينه وهي تخزر بيه خفت منهه مخبله هاي يجوز تكتلنه دكيت ع بيت جدي طلعتلي ماكو وحجيتلهه كالت هسه ادز ابوج ..

رحت لصفي وهي ظلت بالاداره بالفرصه نزلت اريد اشوفهه شفت بشار وجدي جايين ركضت عليهم وطبيت وياهم للاداره..

كعدت المديره تحجيلهم عن مستواهه واسلوبهه الهجومي واكثر من مره محذرتهه ماتجيب الالات حاده وياهه لان متكرره اكثر من مره..

ظل جدي يتعذر من المديره ويكلهه يتيمه ومصدومه باهلهه ماتو كلهم وبهالسوالف..

جان درس اخير اخذونه اجازه وطلعنه وطول الطريق جدي يعلم بيهه وهي دايره وجهه مرات احسهه موصاحيه او متعرضه لتعنيف..

بس طبينه البيت لزمهه بشار من زندهه بعد ماخله جدي يفوت ليجوه وهي جانت تباوع بعين بشار بشموخ وقوه..

بشار.. قبس اتجاوزتي هوايه ونكول خطيه هالمره دزت المديره ع سجينه المره الثانيه الله اعلم شنو شنو مسترجله انتي؟؟؟

ماجاوبت بس كالتله ما اعيدهه بعد مدري منين نزل عليهه الهدوء والسكينه ...

ثاني يوم داومنه وماكو شي صارت الحله وواكفين بباب صفهه نتتظرهه طلعت البنات وهي ماكو سالت عليهه كالن غايبه اليوم..

طلعنه اندور عليهه ورحنه للاداره كالو قبس اليوم مامداومه شلون مامداومه واحنه اجينه سوه وين راحت..

رجعنه للبيت نركض نكلهم قبس اختفت ونحجيلهم بابا ركض وعمي عامر يخابر ع بشار وانخبصو..

لليل وماخلو مكان مادورو حته رادو يبلغون مراكز الشرطه فص ملح وذاب..

٣ ايام مستمرات هم يدورون عليهه ماخلو لا مستشفى ولا فرع يعتب عليهم اختفت نهائيآ...

اخر شي كالو خلي نخابر على بيت جدهه دكو ع جدهه من سمع وكع لعمي غلط وصياح والا اشتكي عليكم وين وديتو البنيه هم دفنتوهه مثل بنتي...

اسبوع كامل وجدي كال لازم انروح برجلينه ونشوف خاف يم جدهه وضمهه علينه وراح عمي عامر وجدي ورجعو بأسى وكالو ماكو اصلا هم ازيد من عدنه ومحملينه المسوؤليه...

ومن هذيج السنه صادفت ٢٠٠٦ اختفت قبس رغم معارف جدي حته بالجيش شكد دورو وماكو وبين كل مده يرحون للطارميه ومايلكوهه ..

حته خلو واحد يراقب وماكو كالو خاف يجذبون علينه بس للاسف ما الهه اي اثر ..

وين راحت بهذا العمر وشلون عدهه جرأه هيج تسوي وحدهه وهي حته ماتندل ببغداد ومنو ساعدهه؟؟؟

يتببببع... متابعه شيقه

قمع المشاعر.... البارت الثالث..

للكاتبة زهراء ( روزايه)

غــربلــت الحچــي وشفــت الــسوالــف عــيب

عشــت يم نــاس مابيهــم اوشــالــت طــيب

يــا وسفــه العــمر خلـصتــه مـوت ابمــوت

مـن اصد لـ مرايتــي يوجعـني شــوف الشــيب

.....

شجن.. مر شهر كامل ع اختفاء قبس جدي بهذا الشهر تعب حيل وتمرض يكول لو ميته ويه ابوهه احسن وساعه يكول حفيدتي وين بيا مكان؟؟

من كدما دورو عليهه تعبو مع العلم ماطش الخبر مالتهه بس عماتي وعمام بابا كل الي يسال عنهه يكولون راحت لبيت جدهه متعلقه بيهم يكولون حته ماتبقى بصمه عار بيوم تنذكر انهزمت بنيه من عدهم

اشوف جدي يبجي ويكول شسويت ياربي وابتليت بهيج ذنب طول عمري اخاف الله واخاف ع سمعتنه شلون هيج صار بينه ياربي رحمتك...

مرت ايام وشهور واني نجحت لصف ثالث متوسط وقبس انمحت نهائيا وكل الي يسال عنهه نكول راحت لبيت جدهه ..

هدى اختي صار عدهه طفل وتجينه دائما وبعدهه ع نفس الدور المسوؤله من عدنه ...

بشار اتخرج ومنتظر التعين لان هندسه نفط ويتعين بسرعه وعمر اخويه دخل مرحله اولى كليه اداره واقتصاد..

هذا الحجي جان سنه ٢٠٠٧ يعني ورا سنه من اختفاء قبس بس ظلت نارهه بگلب جدي وعمي وبابا ودائما من يتذكروهه يحجون باسى...

حياتنه طبيعيه بس علاقتنه ابيت خالي ابو وائل نفسهه بيتنه واحد يارايحين الهم ياجايين علينه وبحكم متعودين علينه جدي حته من يفتقدهم هو يروح يشوفوهم...

مرات الاهل مهما يكونون ملتزمين وناس بسطاء ومعروفين بالقيم والاخلاق بس يكونون مودور اساسي بالتربيه ..

ومرات الفطره الي عند الانسان والي تكون زايده عن حدهه هايه غلط لان كلشي اله زمان ومكان ..

صح الفطره موجوده بس تختلف عن زمن السبعينات واطورت الناس اختلفت بالتسعينات ولحد يومنه هذا يعني كل تطور لازم الاهل ينتبهون بان هذا الزمان موزمانهم ومايصير يربون اطفالهم على زمنهم الجميل ..

جيات وائل النه ويكعد ويه بابا هالشي جدا طبيعي واني ما اشوف اي غلط يبدر من وائل لان من الصغر معتبري مثل بشار واكثر حاله حال بابا لان جنه انشوفه بعمر بابا...

بوقتهه جان عمره ٣٥ سنه يعني مستحيل افكر بيوم بنيته ومستحيل اتخيل وائل بغير تخيل هو ابن خالي مثل بابا هاي الصوره المطبوعه براسي...

جان كلما يجينه اسلم علي باليد وابوسه لو مرات يحرك شعري ويكلي شوكت تلبسين حجاب ..

اروح يمهم لان مرته حبابه حيل جانت شكد تشكي من عنده لخالتي ودكلهه تعبني عيشتي ويا قهر بقهر وخالتي تواسيهه ودكلهه اتحملي بركبتج كومه جهال...

عمري ١٥ بس بعدني اطلع بالشارع والعب وكلشي عادي عند اهلي خاصه من تعين بشار جان يطلع الصبح يجي بليل واذا اجه يلكانه بالبيت اني وفاديه يعني مايدري شكوماكو...

مكرس حياته بس شغل ودوام وبحكم بابا موجود مامن علينه حته مرات يحجي ويانه وينصحنه بس مانكله نطلع بالشارع ندري مايقبل..

ما انروح بعيد نلعب بالباب لو طوبه لو نركض سباق وجانت ماما دكول اطلعن العبن بس لاتتاخرن قبل لايجي بشار..

يعني السبب من اهلي هم موافقين ويدرون هالشي غلط بحيث بدون علم بشار بس يشوفو شي عادي بابا يكول شكو محد اكو احنه جيران صار اسنين ...

صح مامبين علينه هيج عمر مومثل هسه بس من كبرت عرفت هالشي غلط والغلط الاكبر من الاهل..

مره من المرات نلعب طوبه وساعه حبل جانت عصريه اني وفاديه ونرجس بنت عمي عامر...

وحده جيرانه كالت خلي نسوي مسابقه منو تركض لراس الفرع وتوصل اول وحده هي تفوز واني الطول طول النخله والعقل عقل الصخله..

اول وحده صفكت وكيفت وشديت العده وبديت اركض ويه ركضتي جان اوكع والطش على وجهي ...

شعري منفوش من العرايك اني وفاديه وايدي تزلغت وفاديه خاف تخسر ولا وكفتلي كملت الركضه..

ماحسيت غير وائل واكف على راسي والمسدس بحزامه جان جاي من الدوام ودنك عليه ولزمني من ايدي وكومني ..

.. انتي بيج مرض يوميه على نفس المنوال ماكبرتي وين امج عنج ماتستحين تركضين بالشارع جنج ثور..

... هي ماما قابله وجنت احجي وامثل البراءه واني متالمه بس حته لا يصيح عليه ..

جرني من ايدي وطببني للبيتهم جان غيث اخو عمره ٢٠ يداوم تربيه رياضيه كاعد بالحديقه من شاف وائل كام سلم علي وهو يباوع على الخبصه الي بيه..

وائل... شو تعالي غسلي واعقلي بطلي تصرفات الاطفال هاي عيب بابا كبرتي انتي ..

... هي ماما كالت العبي بالشارع قبل لايجي بشار

... يعني تخافين من بشار وامج تعرف هالشي غلط..

جان يحجي وياي ويغسل باديه الي مزلغه وكلهه تراب كعد بمستواي وعدل شعري

.. اسمعي شجونه عمرج صار ١٥ وعيب اطلعين بالشارع ولازم تلبسين حجاب الله يذبج بالنار وعمتي اني احجي وياهه بعد ما اطلعج وبس اشوفج برا احجي لبشار وتعرفين شيسوي بيج...

غسلت من يمهم وطلعت بس ماتبت نفس اللعبه رجعت العبهه وهالمره بدون ماوائل يكول لبشار الله سلطه علينه جان جاي من الدوام..

بيومهه جرني من اذاني سحل للمطبخ راد يكتلني واحتميت ورا جدي..

صيح عليه وكام يحجي ع ماما ماتشوفيهه شكبرهه والله العظيم اذا لكيتهه برا اطيح حظهه عبالكم بعدهه صغيره منطيهم مجال وكتنه تغير مومثل قبل...

من هاي الرزاله وجرت الاذن ماطلعت بعد وبيوم صادف عيد ومن نفسي اقتنعت البس حجاب جابتليا هدى وطلعت من الصبح محجبه مع العلم ماعدنه ولد بس رحت لبيت خالي ابو وائل عايدتهم ويه ماما..

شافني وائل بيومهه شكد مدح بيه وانطاني عيديه وكال هيج طالعه حلوه وانتي احلى البنات اتشاقه واضحك وياهم بس ما ادري المضموم شنو...

صرت صف خامس علمي وجنت مركزه ع دراستي بشكل موطبيعي طلعت اعفاء بكل الدروس وجان الكل فرحان بيه واول هديه اجتني من وائل...

جان بكل عيد ميلاد الي ياخذوني يمهم ويسوولي عيد ميلاد وغير الحلويات شكد جان يشتريلي الاهتمام بس من وائل غيث اصلا ما اشوفه هوايه

بيوم الي طلعت اعفاء دزو عليه بيت خالي وتعشيت يمهم ومن اريد اروح لبيتنه صاحني وائل للاستقبال..

جان جايبلي هديه ساعه لونهه ذهبي حيل حلوه ومحبس ع شكل فراشه فرحت بيهن حيل كتله شكرا يا احلى اخ لان معتبرته اخ لا اكثر..

شفته مثل الي عصب او ضاج كال تعالي البسيجيا كتله لا قابل شبيه ماعندي ايد والبسه كل نيه ماعندي وكل تفكير بتصرفاته مامفكره ..

شخص متعوده علي من صغري وحاله حال بابا او اخويه مستحيل يخطر ابالي غير شي..

جر ايدي ولبسني المحبس وهو يباوعلي بنظرات جريئه لاول مره اخاف من وائل

ولاول مره كلبي يدك سريع مو فرحه لا رهبه وخوف من عنده ومن تصرفه ...

جريت ايدي حيل وانداريت اريد اطلع بس لزمني من اكتافي وكال شبيج شجونه تعالي ليش خايفه؟؟

.. لا اريد اروح ماما كالت لاتتاخرين..

.. اي هسه اني اوديج وظل يتقرب اتجاهي بس مو هذا وائل الي معتبرته اخويه الجبير غير شخص كدامي..

من خوفي وارتباكي بهذيج اللحظه ماعرفت شنو اسوي رجليه ماتتحرك لاتتقدم ولاترجع خطوه..

رجع لزم ايدي ويحرك بالمحبس الي لبسنيا وهو يكلي يوم الي البسج الحلقه!!! وهمس بكل هدوء عن لا احد يسمعه وكال احبج شجن...

كلشي صار فجأه كل تصرف سوا ماجنت بيوم اتخيله من عنده وموهذيج المعرفه التامه الي عندي لان عايشه بداخل بريء بشكل موطبيعي...

مثل الصاعقه وضربت مرتفع هيج انضرب راسي بالكلمه الي نطقهه..

تلقائيا ايدي رجفت وكاني جاي احلم موحقيقه هاي ما حسيت على نفسي غير راكضه للشارع واسمعه يصيح وراي شجن شجن..

طبيت لبتنه وكلبي يدك سريع همزين محد اكو برا بوجهي لصحيات البرا كل شبر بجسمي يرجف من الخوف..

هذا مو وائل مستحيل!!! وائل يخاف علينه من كلشي ومن جان بابا يروح للسفر واحنه صغار وائل يتكفل بالصغيره والجبيره..

خوفه وحرصه علينه مايخلي احد يشك بشي ويفسر تصرفاته بشي موحلو...

جريت طبله صغيره بالحمام وكعدت عليهه وماجاي اسيطر ع دكات كلبي ردت اركض لماما اكلهه بس ترددت..

غسلت وجهي وطلعت وبوجهي للغرفه الغلط الاكبر ليش اهلي هيج مامنين بي؟؟ ليش ماسالوني شكو رايحه؟ ليش مامنعوني من الطلعه ؟؟ ليش جانو يضمون كل تصرفاتنه عن بشار؟؟

لان يعرفون هالشي غلط ويعرفون مايقبل بتصرفاتهم لو عايفين تربيتنه ع اخونه ماجان وكعت بهيج موقف...

بيومهه ماكدرت انام حته فرحه نجاحي اختفت والخوف الي بداخلي ما هدء ابد...

من هذا اليوم صرت ما اطلع ابد وكلما اسمع صوته انهزم للغرفه اشهر طويله ما خليته يشوفني صرت حذره بكل تصرفاتي..

ما اروحلهم ابد حته من يدوزني اهلي اتحجج بالف حجه وما اروح حته لا اشوفه جانت خالتي تجي دكلي ليش ماتجين اطلع حجتي اقره لسادس..

خليت خصوصي وسجلت بخط اروح للمدرسين وارجع مرات اشوفه بالشارع بس ادير وجهي وحته هو عرف غلطه صار من يشوفني يدنك...

كرست كل وقتي للدراسه ونهائيا انفصلت عن العالم وبس اقره وذبيت كل جهدي وبديت اميز الحياة والصح والغلط وسالفه وائل ضميتهه وماحجيت لاي احد عليهه...

امتحنت سادس وانتظر النتيجه والمنحوس يبقه منحوس لوعلكو براسه فانوس وهاي اني هيج كل التعب وهذيج القرايه ماحصلت ع معدل عالي حصلت على ٧٠...

شكد بجيت بالنتائج حته اجه وائل يحجي وياي ونسيت السوا وشنو معتبرني من حركه كلبي شكيت كل الكتب والملازم مومدح بنفسي بس جنت شاطره حيل وتعبت والواحد يستحسف تعبه...

حجو عليه اهلي وبشار كال اقدملج اهلي بس رضيت بالمقسوم وسكتت كتلهم ما اريد اي قبول يطلعلي ما اريده اريد اروح اعلام...

اعترضوا اهلي كالو موحلو المهنه للبنيه وبهالحجي بس بشار جان داعم بكل الظروف كال مابيهه شي شهاده حالهه حال البقيه والشريفه تبقى لو وين مايحطوهه..

اكو مدرسات لاعبات لعب واكو اعلاميات قمه الادب مدام حلمهه من الصغر عوفوهه تحققه ..

قنعو اهلي وسكتو وكالو هاهي قدمي اعلام حته وائل جان مثل الي يتمنى رضاي وكال قدمي واني وياج بكل خطوه ...

طلع قبولي اعلام وبديت احظر للدوام وبشار شاطر بكلشي هو ويداوم دارس ماجستير وصعد وعينو مدير للموارد ولازم ينتقل للبصره..

من فاتح اهلي بالموضوع ماقبل بابا وكاله لو اموت ما اخليك اقتنع برزقك وانت هنا مهندس وما محتاج وراتبك خير من الله..

بس بشار مصر ماقبل كاله اني درست وضغطت ع نفسي بسبيل اتقدم مو اراوح بمكاني وظل يقنع بابا لاتفوت عليه الفرصه وبس اداوم سنه وراهه الي حق التنقل واعتبر تعيني طالع بالبصره..

بهذا اليوم شفت دموع بابا تجري ع لحيته البيضه وشلون يفارك بشار وماما ازيد من بابا بس جدي جان داعم بكلشي لبشار وقنع اهلي بان هذا مستقبله ولاتوكفون بطريقه..

كال ينطوني بيت هناك خاص واسكن بي واني اجيكم كل اسبوع بغداد موبعيده ..

بهالاثناء جان بابا كال مدام هيج وقررت تستقر لازم تزوج خوما تظل اعزب يا ابني..

بشار.. كول يا الله يابه بعدني ماداومت لزكتلي المره ترى من ترقيت وصرت مدير مومعناتهه لازم اتزوج اني مامقرر للزواج شوكت ما اريد اني اكلكم..

... لا ابني لازم تزوج شنو عيشتك وحداني بالبصره محد يمك اني اكول لونخطبلك فرح بنت عمتك...

اني نسيت سالفه فرح واصلا هي ماتجينه هوايه لان بشار مامتواجد وحتلو اجت هو ماينطي مجال من كبرت عرفت فرح هي الي لازكه اله..

بشار.. فرح بنت عمتي ومابيهه قصور بس اني ماناوي اتزوج واذا اقرر اتزوج اني اختار..

بابا.. وشبي. اختيارنه خوش بنيه وعمتك حبابه وهم خريجه واحنه انشوف البنيه عدهه هوى يمك..

الحجيه.. يا يمه بشار اني اعرف وسمعت عمتك ماعدهه اعتراض لان بتهه موافقه توكل ع الله وخلينه نفرح بيك موصغير يايمه...

بشار.. شنو عدهه هوى؟؟ شنو عمتك موافقه؟؟ منو سمحلكم تحجون نيابه عني وشلون تفتحون هيج موضوع ويه اهلهه بدون موافقتي..

الحجيه.. مافتحنه موضوع بس جبناهه سالفه وكالت يوم المنى بشار وليدنه ومانلكه احسن من عنده..

وترى احنه كلنه نعرف بفرح حلوه وحبابه ومن صغرهه عينهه عليك ..

بشار.. حجيه موهيج الحجيه هذا الموضوع سدو واذا فرح اجتهه قسمه زينه خلي تتزوج ماعندي شي وياهه..

ام بشار.. لا تسد السالفه هيج فكر بيهه اني احبهه فرح وبتنه احسن من مااندور وحتلو ماتتزوج هسه فكر ع راحتك..

بشار.. كتلكم سدو الموضوع ولاتفتحو ويه عمتي فرح ماعندي شي اتجاهه ومن اقرر اني اكلكم ...

حجه هيج وطلع وفعلا اهلي سدو السالفه وكالو راسه يابس ومامنه فائده بالحجي ..

بس ظلت فرح ترفض الزواج رغم تخرجت بس جنت اسمع من هدى دكول تحب بشار ...

وبيوم سفر بشر جان الكل مجتمع يمنه واشوف وائل تغير وماله علاقه بيه بس اسمع شكاوي مرته وشكد تعاني من عنده وتقريبا بديت انسه وما افكر بالصار ...

وائل طبيعي وجياته النه قليله واني تعودت ما اروحلهم لذلك ارتاحيت من هاي الناحيه...

جانت اخت وائل موجوده يمنه وكاعدين انسولف ورفعت راسي انتبهت ع غيث يباوعلي بس بنظره مومثل المعتاد..

دنكت ورجعت لسوالف وظليت كلما ارفع راسي تجي عيني بعينه ...

المشكله الي عندي عديمه انتباه يعني سالفه وائل شكم سنه مهتم بيه ومداريني ووين يله عرفت نيته الا حجاهه..

وهسه غيث شكد جان يجينه واشوف هاي النظره بس الثول عاميني ولاجنت افسر شي ...

بس هسه ما اعرف ليش صرت احب هاي النظره واحب اشوفه يباوعلي واول مايندك بابنه واسمع صوته اركض افتحه ...

وليش بس ادري بي موجود اركض ع المرايه اعدل واطلع واسلم بخجل ...

كامو وسلموا ع بشار وطلعو اخر شي من طلعوا ابتسم بوجهي ومن صار بصفي بالباب حجه بصوت ناصي وكال صايره حلوه!!!

حسيت الكل سمع هاي الكلمه وخدودي اشتعلت نار خوف ع ارتباك ع ما ادري ع حب او اعجاب كلهه اندمجت عندي..

ظليت افكر بكلامه وهو اصلا ماكال شي بس كل كلمه يكولهه غيث اروح بيهه للبعيد...

بيوم تسجيلي بالكليه خابر بشار وكال خلي غيث لو وائل ياخذوج لان بابا مايكدر عنده شغل ...

وصدك راح ويايه غيث وبابا كال اول فرحه الج لازم اكون موجود وغيث يندل ومداوم بس اني امشي ورا مثل الطلي حته كلساع اعثر وهو يكلي شجاج ...

بابا راح يستنسخ وغيث راح يملي استماره واني ظليت كاعده انتظر شويه واجه غيث كال ما اجه عمي..

.. لا بعده شوتاخر؟؟

.. ما ادري مريت ع المكتبه ماشفته ازدحام .. جوعانه تاكلين شي؟؟

.. لا موجوعانه بس تعبنه شوكت نرجع..

.. بعدج باولهه هسه تتعودين دكومين تاخذين الجامعه طول بعرض..

.. لايمعود اني عجوزيه حته صديقات ماعندي

.. هسه تتعرفين وتصير عندج صديقات

جان غيث متخرج ويشتغل بشركه اسياسيل جسمه رياضي لان خريج تربيه رياضيه وجهه مبتسم وحنين هم كلهم هيج ...

قربه يمي يخليني ارتبك ونظراته عليه منين ما امشي هوهيج من زمان لواني جاي احس هيج لان معجبه بي!!!

كملت تسجيل ورجعنه تعبانه بسرعه نمت واسمع صوت عمتي بشرى صوتهه عالي من تسولف كعدت لميت شعري وغسلت ورحت سلمت عليهه..

جان جدي وبيبي وعمي عامر كاعدين وهي تحجيلهم بطاري قبس ...

بشرى.. يابه والله سمعت الحجي من كرايبهم كالت بتكم انتم منطيهه لخالتهه وسويت نفسي ادري كتلهه اي ..

جدي.. سدي يابه اذا يم خالتهه عركهه دساس هم انجيبهه بالغصب وتنهزم وتصخم وجوهنه مرت ٦ سنوات كبرت وراحت زارعيين براسهه حقد وشفتوهه شلونهه خلوهه اعتبرتهه ميته...

بشرى.. يابه اذا سوت غلط مرجعهه علينه لازم تروحون لخالتهه وتشوفوهه شلون عايشه ..

جدي.. واني اروح ادور ع خالتهه اكيد نفس العائله وتربات ابوهن الطبال ..

.. لعد تخلي شابه بنص رجال غريب تتربى ويكولون مو بغداد بغير محافظه عايشه وماعدهه جهال...

جدي.. سدي هاي السالفه ولاتفتحوهه بعد ماتت ويه اهلهه..

شجن.. ماقبل جدي حته واحد يذكرهه مع العلم بشار دائما يذكرهه ويكول وين الله واشوفهه واعلمهه ع هاي الدكه...

بس هاهي مثل ماكال جدي نعتبرهه ماتت وراحت ويجوز تزوجت كبرت هسه هي اكبر من عندي بسنتين ...

بس مدام ظلت براس بشار ماراح ينساهه ولاراح يعديهه الهه..

يتببببببع....متابعه ممتعه

قمع المشاعر.... البارت الرابع..

للكاتبة زهراء ( روزايه)

وگطعـو السچة التودينه عليهم

واحنة ياحيرتنه حيره

لانسينه ولاگدرنا نعود ليهم....

....

شجن.. بدايه سنه دراسيه ومرحله اولى جنت طايره من الفرح لبسي عادي مرات بنطرون وقميص طويل مرات تنوره يعني شي طبيعي ..

اني موضخمه ودائما محافظه ع جسمي وبس اشوف شويه سمنت اسوي دايت هيج مرتاحه رغم جنت اتمنى كلية اعلى بس كلشي مسجل ومكتوب..

تعرفت على بنات ويايه وتقريبا صرنه صديقات بس اني حته من جنت بالمدرسه صديقاتي محدودات وبس بلاسم يعني لا اكعد اسولفلهن حياتي ولا اسراري بس جنت اسمع منهن يعني بين قوسين اني ما اقدس الصداقه عندي فدشي عابر ...

كلما ارجع من الدوام اشوف غيث واكف بالباب عبالي صدفه لحدماتكررت الحاله وشكيت بوقتهه وكفته متعمد يعرف شوكت ارجع..

بحيث عمر اخويه اصغر من عنده بسنه وصارو اصدقاء وين عمر يم غيث وين غيث يم عمر يعني صارو كلش قريبين ..

وائل ما انطيته اي اهتمام رغم يجينه واطلع اسلم بس لا احجي ويا ولا اسمحله يتشاقه وحته ما اباوع بوجهه والظاهر هو هم صار ثكيل او تندم ..

رغم احب اروح لبيت خالي علمود اشوف غيث بس ما ادري شنو الي يدفعني ابطل خوفي من وائل وخاف يتمادى اكثر وخاف يفسر جيتي بغير شي جنت ابد ما اروح..

صار الشارع هو مكان لقاءنه الوحيد اطلع الصبح للجامعه الكا واكفلي بالباب لحدما اصعد بالخط وهو اديه بجيبه واكف يباوعلي ووراهه التفت علي اشوفه يصعد بسيارته ويروح للدوام...

وبرجعه كذلك لو نرجع نفس الوقت لو هم الكا واكف بالباب وبس يشوفني عيونه تحجي ونظراته من بعيد اكدر اميزهه ..

مره نزلت من الخط وهو جان واكف ابابهم ومن نزلت اجه علينه جنت افتح بالباب وهو واكف بصفي يحجي وياي..

... شلونج شجن؟؟

.. زينه انت شلونك

.. شلونه دوامج تعودتي؟؟

.. اي تعودت زين ماشي الحال ..احجي وافتح بالباب طب وياي كال صيحيلي عمر وياج ..

مشيت كدامه هو يمشي وراي دكيت باب المطبخ مسدود واكفه وادك ماكو احد نسيت اهلي كالو معزومين يم عمه بشرى وكالو خلي الخط يوصلج لبيت عمه..

غيث.. ها شجن وين اهلج؟؟

.. نسيت كالو تعالي ورانه لبيت عمه بشرى مسويه عشا لجدو وهسه الخط مالتي راح ..

... تعالي يمنه

.. لا اريد اروح وراهم

.. اوكفي لعد خلي اجيب السياره واجي ..

.. راح غيث يجيب السياره واني ذبيت ملازمي ع الكرسي البرا ورحت للمرايه غسلت وعدلت شالي وطلعت للباب انتظره..

اجه غيث وفتحت باب السياره الورا جان يصيح بيه تعالي هنا السايق مالتج اني!!

ابتسمت سديت الباب وانداريت يمه حرك السياره ومد ايده فتح اغنيه ما اعرف منو يغنيهه واول مره اسمعهه..

لوتحب لوماتحب هي وحده من اثنين... تاركني وسط الدرب توعدني الك سنتين...

جان يدندن ويه الاغنيه واني مركزه بيهه لان اول مره اسمعهه قطع الصفنه مالتي بسؤاله..

غيث.. شجن احتمال هذا الوقت الغير مناسب بس لازم احجي وياج بموضوع..

شجن.. بس كال هيج كلبي زادت دكاته وافكر بشنو اجاوبه لان كلشي واضح عيونه فاضحته حبه واهتمامه بيه مبين علي..

شنو الموضوع؟؟

.. احتمال انتي منتبه من جنتي بالسادس ولحد هاي اللحظه عيوني تفتر وراج واني اريد اخذ رأيج قبل ما افتح الموضوع ويه اهلج..

... بلعت ريگي ونصيت راسي شراح اجاوبه بلحظه اجه براسي وائل شلون وهو اخو حسيت معدتي تخربطت لان صرت بموقف ضاع الحجي من عندي..

غيث.. دا احجي وياج شجن وين رحتي صفنتي؟؟ اني رايدج وحبيتج من زمان بس ردت تكملين كليه او من توصلين مرحله ثالثه بس ما كدرت اصبر اكثر واريد اسمع الجواب من عندج ..

شجن... عفيه غيث وصلني بسرعه هسه يتعشون ويعوفوني..

غيث.. تحجين صدك ؟؟ لج اني وين احجي وانتي حايره ابطنج ويا عشه هذا الساعه هستوهه ب٤ افتح السياره هسه واشمرج منهه ..

شجن.. حسيت العرك الي يوكع من كصتي من الفشله مايكفي كلينس درت وجهي ع الجامه ونفسي عالي ارتبكت بشكل موطبيعي ...

غيث.. باوعيلي شجن!! ماراح اخذ راسج داحجي وياج ..

شجن.. خفف سياقه وهو ملتفت عليه ومرتجي ع عكسه ويسوق بايده اليسرى..

واني منصيه راسي وافرك بايدي اريد اكله اي اني هم احبك من زمان وملاحظتك من جنت بالسادس واعرف خوفك واهتمامك بيه دليل ع حبك هذا الحجي جان بلساني بس ماكدرت انطقه..

من شافني هيج مرتبكه ردت اخرب وبس امسح بوجهي رجع عدل كعدته وهو يسوق ساكت لحدما وصلني لباب عمتي ..

نزلت ادك بالباب وهو واكف ماراح اشرتله روح نزل الجامه ونصخ نفسه وكال خلي يفتحون الباب واروح ..

ظليت ادك هوايه يله اجو فتحو وهو حرك السياره وراح طبيت لبيت عمتي اول ماغسلت من برا لان ملامحي فاضحتني وكلش مرتبكه..

سالتني ماما منو جابج ؟؟ كتلهم رحت للبيت نسيت ولكيت غيث جابني ؟؟

رغم اللمه والهوسه وضحك وسوالف عمتي بشرى الي سوالفهه ماتنمل ومرحه حيل بس بالي مسافر لغيث وبكلامه واتندمت ليش ماجاوبته !!

ماعندي صديقه اركض احجيلهه ولا عندي جرأه احجي لاخواتي هو هذا طبعه الموحلو كلشي احتفظ بي لنفسي وما اشارك احد..

تعشينه ورجعنه للبيت جنت تعبانه حيل بوجهي للحمام سبحت وطلعت شويه سالفه ويه فاديه وبنات عمي عامر لحدما مددت بفراشي وعيني بالسكف..

جان ماعندي تليفون بس عند اخوتي وماما واني مواعيدني يشترولي وغلسوا..

حاولت انام ماكدرت باوعت لساعه ب١٢ ونص وجان الجو بارد وشته شهر الواحد ٢٠١١ هذا التاريخ ابد ما انسى..

كمت من فراشي ورحت على تليفون بابا الي دائما يعوفه بالمطبخ موكلش ويه التليفون ..

طلعت رقم غيث وكلبي يدك قبل لا اتصل متردده اتصل لولا وخاف عيب وخاف هيج وقت نايم؟؟

بنص تفكيري وضغطت ع الاتصال دكات كلبي اقوى من دكات التليفون طولت الدكه يله جاوب الوووو

ماكدرت احجي مخليته ع اذني وساكته واني كلساع اباوع للصاله لايجي احد اكثر من مره كال الووو وماحجيت بس صوت انفاسي عالي..

صوته الحنين والبحه الي بصوته خلتني انطق اسمه تلقائيا وكتله غيث!!!

وسكتت كال شجن احجي!!! كوه كدرت انطق كلمه اني موافقه وسديته بسرعه..

مسحت المكالمه وبوجهي للفراش وعبالك جنت بمعركه وفعلا هي معركه نمت وغطيت راسي واتنفس سريع وشلون كدرت احجي هيج!!!

بهذا اليوم مانمت ابد لحد الفجر صليت وكمت سويت ريوك وبين مابدلت واجاني الخط عبالي اشوفه بالباب مثل كل مره بس الظاهر بعده ماكاعد لان سيارته بالباب...

بالكليه كوه افتح عيوني من النعاس وطول المحاظره الدكتور يشرح واني تجيني الغفه وافز ع علو صوته ..

صار اليوم شطوله بس اريد ارجع وانام متت تعب اتخيل المخده الي صارت بين عيوني ...

بس رجعت للبيت بدلت وجريتهه نومه لثاني يوم كعدوني اهلي ع العشا ماكعدت بس كعدت صليت متاخره ورجعت نمت...

ثاني يوم صادفت جمعه واجت ام وائل من الصبح كالت ساره اليوم جايتنه خلي يجن البنات يمنه ساره متزوجه بديالى لابن خالي الثاني  وكل فتره تجي شكم يوم وانروح انشوفهه...

اني ردتهه حجه حته اشوف غيث ونسيت وائل وسوالفه بدلنه ع السريع لبست بنطرون جينز وفوكا قميص للركبه ورحنه اني وفاديه وهدى اليوم هم تجي كالت ماما تجي وراكم..

بس مرت وائل بالبيت وهي ساره وجهالهه عدهه توم ولد وتوم بنات تسولفنه ع عيالهه وساعه ع صديقاتهه بالمستشفى لان هي موضفه وخطيه مرت وائل كل الشغل براسهه..

كمت اساعدهه ماقبلت كالت متعوده بس اصريت اساعدهه اخذت الزلاطه كمت اسوي لان جهالهه وكحين حيل وهم حامل خطيه هذا رابع طفل...

بس اني وياهه بالمطبخ هي واكفه تطبخ التمن واني كاعده ع ميز الطعام اسوي زلاطه ومدنكه وفزيت ع صوت وائل وهو يسلم..

رديت السلام وهو فات ليجوه بدون ماارفع راسي ولاشفت وجهه اسمع صوته جوه يلعب بابنه الصغير ...

مرتاحه من ناحيته لان مثل الي حس ع نفسه وغلطه او اني ما انتبه علي واشوفه يباوع اولا...

كملت الزلاطه وواكفه اغسل يم السنك ومرت وائل طلعت مدري وين راحت وطب غيث بس شفته دنكت اتذكرت من خابرته...

سلم عليه وخلا علاكه ع الكاونتر وهمس يم اذني بهدوء شلونج ياحلوه؟؟

خجلت من كلامه بس مبتسمه ومدنكه بس فاتت مرت وائل وطلع جنت طايره من الفرح واني اشوفه كدامي ..

احلامي حيل بسيطه اتخيل نفسي اصير مرت غيث وموجوده بهذا البيت اتلفت بالبيت واتخيل نفسي ورحت للبعيد والابتسامه مرسومه ع وجهي..

انتبهت من صفنتي جان يصير وائل كدامي وصافن عليه بسرعه دنكت وهو هم دار وجهه مجرد ما اتذكر الصار كلبي يوجعني..

وخاف يعترض وائل ع حبنه وخاف يمنع غيث مع العلم مرت خالي تحبني حيل واشوف عيونهه شلون صافنه عليه ...

تونست حيل بهذا اليوم مع العلم غيث بس تغده وطلع بس وجوده بهالساعتين خلاني مثل الطير الطاير وفرحان بحريته ..

رجعت للبيت لكيت ماما تسوي دولمه للعشا كتلهه شعجب  مسويتهه دائما تتعاجز منهه ..

ماما.. مو بشار راح يجي بالطريق بعد امه اذا اله ما اكوم المن اسوي لعد..

ابتهال.. هاا ام بشار البارحه كتلج مشتهيتهه كتيلي مابيه حيل اليوم طايره ماتلحكين تلفينهه..

ماما.. داده موتتدللين شلون ما اسويلج بس اني ادري ببشار يجي اليوم وكلت فدمره اسويهه ..

ابتهال.. اكلج ام بشار اذا اجه لاتحجوله ع سالفه بنت رضا الله يرحمه ترى بشار مايسكت ..

خاف رجلي ورجلج فاهين وذابيهه هيج وعدهم الناس كلهه زينه ويشوفون العالم باحسن صوره ترى بشار ماراح يسكتلهه وانتي تذكرين اجت يمنه سنه وشلون جان ضايج منهه..

ام بشار.. والله يا ابتهال اني خايفه من هالسالفه والبارحه حجيت ويه الحجيه دكلي لاتحجوله ووصيت عامر مايحجيله بس اني ادري بابني ماناسيهه ويدور عليهه

ابتهال.. اني سمعت من عامر كال بشار يتمنى يلكاهه ودائما يكلهم انتم شلون تامنون بكل واحد يضحكلكم وماخذين الامور ببساطه ..

شجن.. جنت اسمعهن وماعرف شبيهه قبس سالتهن ماما شبيهه بنت عمي ؟؟

ماما.. شبيهه يا امي ديربالج تحجين كدام اخوج جدج وابوج لكوهه يم خالتهه واستغفر الله من خالتهه ذنبهه عليهه ...

شجن.. ماما انتم ملاحظين عائلتنه شنو جدي رجال حجي ويعرف كلشي ومن اهل قبل ليش هيج فقره وما خذين الناس بان كلهه ملائكه..

يعني لاتحاسبون ولا تمنعون كلشي عدكم عادي هسه احنه كبرنه وكمنه نعرف ترى الزمن مومثل قبل يعني هسه ٢٠١١ مثل السنه الي انهزمت بيهه قبس ٢٠٠٦

طبعا لا تغير ولازم ينتبهون ويربون ويحافظون على عاداتهم واخلاقهم حسب هذا الزمن مو قبل عشرين سنه..

جدو وبابا وعمو عامر عدهم الناس مثاليين وماكو انسان سيء ويحبون حته عدوهم ما ادري شلون بشار يختلف عنهم..

ابتهال.. بشار يشبه خالج ابو وائل الله يرحمه لحكت عليه قبل لايموت شنو من انسان اتذكر مره كلت لعامر شلون رجال سبع كال ابو وائل مثل الذيب يكول لاتامن حته باخوك من يجوع يغدرك...

وهذا بشار نسخه من خالج دائما اكول لعامر ويكول اي والله من احجي ويا عبالك احجي ويه المرحوم نفس تفكيره ونفس الشخصيه...

شجن..  بعدنه نحجي وانشوف السياره وكفت بالباب ركضت فاديه الي نسميهه اللوكيه هاي تتلوك لبشار حته يشتريلهه الي تريده..

انفتح الباب وطب بشار كل مايجي متغير وكبران اكثر لو جسمه صاير اضخم مانعرف الي متغير بي شنو سلمنه علي وباس ماما من راسهه ..

ودخل سلم ع جدو وبيبي ويداهر بيبي بس كل شقه بدون ابتسامه بحيث مرات مانعرفه يتشاقه لويحجي جديات...

رحت للغرفه اريد اقره عندي امتحان يوم الاحد وبشار صعد لغرفته بعدني هستوني قريت سطرين واسمع صوت صياحه وماما تهدي بي..

طلعت من الغرفه واشوفه صاير نار لاول مره اشوفه بهالعصبيه وجدو يكله هسه ارتاح وبعدين نحجي..

بشار.. شنحجي حجي وانتم اصلا ماناوين تحجولي عليمن هالتستر بالموضوع خايفين منهه وحده تربت وكبرت ومتعرفون وين ومرجعهه عليكم..

اذا صار شي شيكولون بنت منو مو ترجع عليك ماتفكرون موعدنه بنات ماتفكرون اقل زله من عدهه هاي البنات الي عدنه راح تتدمر..

الحجي.. لا موهيج الحجي البنيه مستقره يم خالتهه والناس محد يدري بيهه واحنه مانريدهه..

بشار.. انتم صاحين لو بعقلكم شي؟؟ شنو مانريدهه شنو مستقره انت تعرف هاي العائله كلش زين يعني تتوقع خالتهه راح تطله صايمه ومصليه ومتقيه ربهه..

شبيكم دخيل الله لا انت ولا ابوي ولا عمي تفكرون هاي بنيه هاي عرض هاي شرف

اقل لطخه بيهه يتلطخ اسمنه واني بهذاك الوكت اكعد مثلك اتبرى لو اكعد اطردهه لا والله ارتكب بيهه جريمه وعود خلي ادخل سجن..

بنفسك سمعتك دكول خالتهه موخوش شلون عاشت يمهه كل هاي السنين وهسه دريتو ليش ساكتين..

ام بشار.. يمه صلي ع النبي هستوك اجيت ارتاح ويجي ابوك وعمك وتفاهمو..

بشار.. شتفاهم نفس حجي جدي قبل يومين سالت ابوي كتله ماكو خبر عنهه كال لا يعني ماناوي يحجيلي

صح بعيد عنكم بغير محافظه بس مومعناتهه انقطع عنكم وما ادري بكلشي ...

التفت ع جدي وكاله انطيني عنوان خالتهه وين؟؟

الحجي.. يا ابني خلي يجي ابوك موهيج الحجي ما تروح وحدك ..

بشار.. حجي رحمه لابوك انطيني العنوان ترى اجيبه ولاعبالك ساكت طول هاي السنين ادور عليهه وجذب ماعدهه خاله خالاتهه ٣ وكلهن رحتلهن وهذني موجودات ببغداد بعد ياخاله جديده هاي ...

الحجي.. احنه عمتك بشرى وحده من كرايبهم كايلتلهه يم خالتهه هذا عنوانهه كاعده بناحية العلم بتكريت ...

شجن..دار وجهه بشار وطلع وتليفونه بيده وجدي رجال جبير تعبان بسرعه صاح انطوني علاجي ماشاف راحه لامن عمي رضا ولت هسه بنته..

اجه بابا وعمو عامر وصبينه العشا بشار كعد ويانه بس ما اكل حته ماما انقهرت هيج شويه وكام كال متغدي متاخر ...

جدو حجه لبابا وكالو هسه نكعد ويا ونفهمه ترى اذا جابهه غصب هم راح تنهزم من جانت صغيره وانهزمت هسه من جبيره نكدرلهه...

راحو للاستقبال يحجون ويه بشار بس ما انطاهم مجال بس نسمع صياحه وعصبيته

وهو يكلهم ظلو كاعدين اني اجيبهه باجر واريد اشوف شلون ماتجي وشلون الهه عين وتوكف بوجهي...

يتتتتبع .... متابعه ممتعه

قمع المشاعر.... البارت الخامس..

للكاتبة زهراء ( روزايه)

شجن.. ثاني يوم صادف يوم السبت وعطله كعدت ب٩ لكيت ماما وبيبي وابتهال كاعدات بالمطبخ ويحجن بسالفه بنت رضا..

سالت ماما على بشار كتلهه ماما راح بشار ؟؟

.. اي راح هو وعمج عامر وجدج ماقبلو يروح وحده وهسه ادك عليهم مايجاوب ..

.. وبابا ماراح؟؟

.. لا ابوج دوام وماقبلو ينطو اجازه وراح عمج عامر..

ابتهال.. والله كل عقلكم تجي هي من جانت صغيره لسانهه متر هسه من كبرت احسبي من انهزمت عمرهه ١٦ سنه وهاي ٢٠١١ يعني عمرهه ٢١ سنه كبرت وتعلمت وتلگيهه تمردت اكثر..

الحجيه.. والله يا ابتهال مانعرف شنحجي لو ولد خلي وين مايروح بس هاي بنيه وندري من انهزمت راحت لاهل امهه ولو متزوجه هم احسن بهواي عاد نكول بركبة رجال بس بنيه وحلوه ومن بيت لبيت شنكول والله مصيبتنه مصيبه ربج ساترنه من كلام الناس جان هسه صرنه علج بحلوگهم..

ام بشار.. والله گلبي مفرفح بشار واعرفه راسه يابس ولازم ينفذ الي يريده وهو متحلف بيهه من يوم الراحت بي ماعاجبه تصرفات ابو ولا وضعنه ويكول انتم ماخذين الامور ببساطه ومن يصير الشي الاكبر هذيج الساعه تتندمون ..

ابتهال.. ادري ياداده متحلف بيهه شيسوي يزوجهه يعقد عليهه بحجه ابن عمهه؟؟

ام بشار.. علمي علمج هم حالي من حالج مادري بتفكير ابني شنو بس اقنع بروحي واكول دارس وفاهم وجبير ما يسوي هيج شغلات ويجبرهه هم خطيه هي محد يحملهه ذنب ترى الذنب لاهلهه وللبيئه التربت بيهه...

شجن.. عفتهن يسولفن ورحت اكمل قرايه امتحاني باجر وكلساع بالي يسرح لغيث وتنرسم ابتسامه ع وجهي ..

كالي اريد اتقدملج هاي الايام واني متردده ما اريد ارتبط وادرس اريد اكمل دراسه يله واشوفهه بعد وقت وبلاخص بابا ادري بي ماراح يقبل يحب غيث ومتاكده راح يكله الاتكمل دراستهه ..

مثل هدى جانت معهد معلمات وابن عم بابا يريدهه وكال ما انطيهه الا تكمل وشكد دز ناس وجدي جان يقنع بابا وكال تاخذ شهادتهه يله والا بالسنه الاخيره يله انخطبت ...

بيت عمي عامر يبنون ابيتهم وراح يكمل بهاي الايام يشيلون يعني بعد ماكو نرجس ماكو بنات عمي عامر على الرغم احنه نفس العمر بس واهسهن بالدراسه موشي اثنينهن ادبي واثنينهن عادن السادس ...

لحد الساعه ب٥ العصر يله رجعو جنت اغسل بالطرمه وفتحو الباب جدي خطيه وجهه اصفر من الطريق مومال طريق طويل ويتعب رجال جبير ..

اباوع عليهم وادور وينهه جايه وياهم؟؟ طبعا لا منو يكدر يقنعهه؟؟١

بشار ماكو بس ذبهم بالباب وراح للبصره حته ماما بجت كالت هو اني شفت شي من عنده وليش ماطب سلم عليه بس خابرهه اعتذر منهه ..

وهي شلون عدهه گلب دكله روح يمه منو كالك زعلانه موسلمت عليه الصبح والي يسمعهه مايكول نصبتهه مناحه...

كلنه ركضنه انريد نسمع شصار  صاحت عليه بيبي اجيب مي لجدو صار المطبخ شبعده ما اريد يفوتني شي...

اخذت كلاص المي ورحت انطيته لجدو جان كاعد بالكاع ومرتجي ع التخم وفاتح دكم الدشداشه وكوه ياخذ النفس ويكول لا تكعد تگابلني عامر يحجيلجن مابيه...

ام بشار.. ابو نرجس بشر شصار؟؟

عامر.. والله يا ام بشار شنحجي مانريد الله يعاقبنه هالعقوبه برضا ومن بعده بنته شمسوين وهيج نركض والمصايب تركض. ورانه..

عامر.. طلعنه من بغداد ب٥ الفجر وطول الطريق اباوع بشار بشنو يختلف عنه ليش نحسه هو الجبير وناخذ الشور من عنده دائما يميز الصح من الغلط وياما نقذنه من مواقف لو واكعين بيهه جان الله يستر..

السبب وين؟؟ تربيه ابو ؟؟ لا ما اتذكر عادل تعب بتربيته جنت اكله من صغره عادل اهم شي تربي ابنك يكول هو يربي نفسه بشار رجال وفعلا من صار عمره ٢٠ سنه ولحد هاي اللحظه معتمدين علي..

رزن شخصيته قويه وماشي طريق عدل مايميل وعنده كلشي يهون الا الواحد يتمسك باخلاقه وماينجاب اسمه بالموزين ..

جان يسوق ومطلع ايده من الجامه ويدخن بس مبين سارح ومشغول باله ومركز ع الطريق ..

اتجنب احجي بالموضوع كدام ابوي لان الضغط والسكر من القهر يصعد عنده وخاف يتخربط..

ما اندل العلم رغم جاي اكثر من مره لتكريت بس ما اندل هاي المنطقه بس بشار يندلهه لان جان عنده صديق بيهه ..

هذا الحجي جان نهايه سنه ٢٠١١ الوضع زين وامان والناس بدت ترجع لحياتهه الطبيعيه بعد ماشافت اللوعات من السقوط للمليشيات لتنظيم القاعده يوميه طالعتنه جماعه شكل...

طبينه العلم وع العنوان نمشي ونسال لحدما ولد شاب كال بهذاك الفرع ثالث بيت بس مايعرفهم بس سامع بيهم مبينين سمعتهم منتشره بالمنطقه لان بس سالنا كال بيت ساجده وضحك يعني المره معروفه بسمعتهه..

وكفت السياره باب البيت جان البيت مثل مانكول علي خرابه ومضىروب قفل نزلنه اندك بي خاف احد موجود جوه ماكو..

على صوتنه طلع واحد من الجيران كال شالو من هين صار اسبوع...

ظلينه واحد يباوع بوجه الثاني ووين شالو ؟؟ راح بشار يستفسر من الرجال ومنطي العنوان الجديد..

عامر... ها بشار وين شايلين؟؟

بشار.. هذا جيرانهم ويكول شالو لبغداد وهذا العنوان مالتهم بس ليش شايلين مايدري!!!

عامر.. خلي نرجع ونروح لهذا العنوان بلكي نلكاهه ...

رجعنه طول الطريق كلساع تجي عيني ع بشار واشوف العصبيه والغضب مبين من عيونه ويسوق سريع ويتمنى شوكت يوصل ...

عامر.. يابه كل الغلط منين ؟؟ الغلط من عدنه لان من ماتو اهلهه احنه انطيناهه دلال زايد بحجه يتيمه وخطيه لو شادين عليهه ماكدرت تنهزم..

الحجي.. ياعامر العرك دساس ولو تحطهه جوه سابع كاع هم تنهزم الي انهزمت بنص القتل والسلب وماخافت يعني ماتكدر تحكمهه ولاتكدر تسيطر عليهه..

احنه مانطيناهه دلال زايد احنه عاملناهه مثل بناتنه ماتفرق شي عنهن بس هي من اول يوم اجت حاقده علينه واستغلت طيبتنه ...

عامر.. شفت ابوي تعب من يحجي سكتت وبشار ساكت ماناقش ابد..

وصلنه للعنوان والسياره ماتفوت بالفرع مثل مانسمي ( الدربونه) منطقه شعبيه وبيوتهه صغار حيل نمشي ونسال ع العنوان ومحد يعرف لان جدد ..

تالي لكينه محل طالع من البيت سالنه كال هذوله اجو من تكريت هذاك بيتهم ...

وكفنه بابهم دكينه اكثر من مره ماكو تقرب بشار دك الباب بالسويج حيل..

سمعنه صوت مره وهي تصيح اااي شجاكم انطير انطو مجال!!

طلعتنه وحده استغفر الله ما اعرف شكول عليهه لابسه دشداشه قصيره بعز البرد وبدون حجاب والشعر اصفر حته اريد اسالهه ماعرفت شكول..

تالي تقدم بشار وسالهه كالهه انتي ساجده؟؟

.. اي عيوني تفضل اني ساجده منو انت؟؟

بشار.. ماعندج رجال بالبيت نحجي ويااا..

..اي عندي بس انت طالب ساجده كول وتحجي وتتموع كدام بشار بس شافت وجهه حدي كالت راح اصيح رجلي..

بس طبت التفت علينه كال هااا هذا عرضكم هنا عايش !!

شويه واجانه رجلهه كناله احنه اهل قبس الرجال تفاجئ وماعرف شيحجي بس كال تفضلو وفتحلنه الباب..

كعدنه وننتظر ابوي يحجي وكوه يله كالهم احنه جايين ع قبس بتنه رحنه لتكريت وكالو شالو وجيرانكم انطونه العنوان..

بعده ابوي يسولف وطبت ساجده وبدون سابق انذار انهدت بينه بالحجي الزين..

هسه تذكرتو عدكم بنيه شلتوهه وشمرتوهه واني ربيتهه وهسه جايين اطالبون بيهه اسمعوني من البدايه قبل لا تبدون تتفلسفون براسي اطلعوا منا لا اخابر الشرطه عليكم واسحلكم بالمراكز..

بشار.. موجنج منطلقه زايد؟؟ منو حاجاج حته تحجين من يمج ؟؟

ومنو انتي حته تهددين الشرطه التحجين عنهه هسه اخليهم يسحلوكم انتي ورجلج واخليج من محكمه لمحكمه ...

ساجده.. يمه وصفكت باديهه فوك حگه دكه جاي تهددني اسمعني عيوني بنيه ماعدكم يمي والبنيه حامل لو تريدون تاخذوهه من رجلهه....

عامر.. بس انريد نستوعب كلامهه الي طلع من حلكهه ما جاي نكدر حته بشار سكت وماعرف شيجاوبهه ..

الحجي.. احنه ماجايين نتعارك عدنه بنيه يمكم من حقنه نشوفهه اذا حامل ومتزوجه نطمن عليهه ونروح واذا جذب كلامكم النه حجي ثاني..

رجل ساجده.. كومي يامره صيحي قبس خلي تجي تحجي وياهم اهلهه هذوله..

كامت ساجده وفوك الربع ساعه اجت قبس يمه اني عمهه وصفنت ع جمالهه ..

كبرانه وشطبه طويله مثل السمج الشبوط جسمهه وبدون حجاب والشعر طويل مثل ما اجتنه وبعد اطول ..

ماسلمت علينه بس كالت خيركم رايدين شي؟؟

كالهم الحجي عوفونه وياهه بدون زحمه طلعو واحنه كاعدين ماادري شراح نحجي ..

الحجي.. شلونج بنتي قبس؟؟

.. زينه مثل ماتشوفون بنص الخير!!

.. السمعناه صح يابويه خالتج دكول انتي متزوجه وحامل منو زوجج؟؟

قبس.. هاي موخالتي هاي بنت خاله ماما وعشت يمهه ومتزوجه اخو رجلهه وحامل اطلبون شي لو تريدون تاخذوني غصب ...

كلامهه وتنتر بالحجي خله بشار يكوم بعصبيه وكالهه شكد رعنه انتي انهزمتي واتزوجتي وعايشه بنص بيئه زباله ماخفتي ع نفسج ماكدرتي اطلعين من هاي العائله؟؟

قبس.. انتم اخر من يحجي ويعلمني اني ماتربطني شي بيكم ولا تبيعون مثاليات براسي عشت بعيده عنكم لان انتم مجرمين وعادي عدكم تكتلوني مثل ماكتلتو عائلتي كلهه..

ما اتحمل بشار كلامهه وصوتهه العالي وكام تقرب عليهه وكوه لازم نفسه عنه وهي واكفه وتباوعله ودكله يله مد ايدك اضرب لان انت ابن عمي وتمون ولازم نتحمل...

عامر.. كلامهه دلاله ع تربيتهه وعنطزتهه بالحجي ابوي سحب بشار الي زواجهه جان صدمه والاكثر من هذا البيئه العايشه بيهه ..

جانت لابسه حلقه وكلشي يدل ع انو هي متزوجه ما خلتنه كلام ولاكدرنه نحجي شي قابل شنسوي نجيبهه غصب من رجلهه باي حق..

طلعنه من البيت وبشار ساكت بس لو نحجي ويا كلمه وحده ينفجر علينه هاي سوء تصرفاتنه وهذا عرضنه كله السبب يرجع النه..

الحجيه.. الله يعينه ويسترنه مدامهه متزوجه هاهي بركبه رجال ع الاقل ما نكول بنيه ونخاف..

عامر.. ليش يمه المتزوجته شنو سمعه سكط  وخالتهه العايشه وياهه تعلمهه موهسه باجر ومرجعهه النه ..

ابتهال.. لعد شتسوون اطلكوهه من رجلهه مالكم حق تحجون ابد انسوهه والي يسالكم عليهه كولو تزوجت وخلصوا الي عليكم سويتو...

شجن.. فد انقهرت من سمعت كلامهم هيج بنيه حلوه شابه راحت ضحيه حقد وانتقام بيت امهه يحجون براسهه وخلوهه تكرهنه..

لو عايشه ويانه جان احسن دلال شافت وكملت دراسه بس اختار الطريق الغلط وراح تعاني هواي ...

ثاني يوم رحت للدوام امتحنت وطلعت برا واشوف غيث واكف بنفس المكان الي اوكف بي دائما..

امشي وكلساع ارفع راسي بخجل وهو يباوعلي لحدماوصلت يمه...

شجن ... غيث شجابك؟؟

غيث.. بلاول سلمي غير اشتاقيتلج ؟؟

شجن.. موخاف واحد يشوفنه ويروح يكول لاهلي..

غيث..ترى ابن خالج اني واذا كالهم يسوي فضل ويخفف عني حته اخطبج..

شجن.. موكلنه موهسه خلي اكمل المرحله الثانيه وننخطب!!

... وليش هالتاخير ترى انطيتج وعد تكملين دراستج شجن خلي بس خطوبه هسه وشوكت مايعجبج نتزوج..

شجن.. غيث بابا ميقبل ماتذكر سالفه هدى شكد خلاهم ينتظرون وقبل فتره سمعت ماما كالت لابتهال عادل يكول ياخذن الشهاده يله افكر ازوجهن ..

غيث.. انتي بس كولي اي ومالج علاقه بابوج اني احجي ويه بشار مابي داعي التاخير واني متعين ومكون نفسي يعني بس موافقتج ظاله ..

شجن..غيث خلي اكمل المرحله الاولى ماظل شي عنهه. راح تجي نصف السنه وبالعطله الصيفيه تعال بس خاف مايقبل بابا وهو يعرف نيتك وبعد مايخليك تجينه..

... بس لاتفاولين واسكتي راح انتظر تكملين هاي السنه وبعد ماعندج حجه واذا رفض ابوج عادي اخطب مره خامسه وعاشره منا لمن يوافق..

شجن... جنت طايره بكلامه حته من الخجل ماكدرت ارفع راسي واباوع بعيونه غيث الشخص الي جنت احلم بي من كلشي كامل والكمال لله...

شهاده ومتعين واخلاق وحنون ومن غير شكله الي كومه بنات كالن هذا منيلج ومن اكلهم ابن خالي يكلولي ما تسويلنه ويا واسطه ...

حته مرت خالي امه جانت حيل حابتني وتمهد لماما وعينهه وراي وين ما اكوم وشلون اسولف..

بيومهه ظل ساعه كامله يمي وكال راح اروح للدوام لان اخذت اجازه زمنيه يمشي واني اباوع علي وادعي من كل كلبي كون يصير من نصيبي...

رجعت للبيت واني محمله طاقه وحيويه مفعمه بالحب ما اخلي شغله ما اخلصهه وغيث ابالي...

تقريبا بيتنه هدء من سالفه قبس بنت عمي والكل ملتهي بدوامه واني ما اروح لبيت خالي هو غيث يجي علينه علمود عمر واشوفه ومرات يجيني للكليه...

كلشي جان بحدود مايوم اتجرأ وحجه كلمه موحلوه ولا لزم ايدي بس جان يشع حب بعيونه وبكلامه خايف الله بشكل ودائما يلح بالخطوبه يكول حته تصيرين حلالي ....

اجت عطله نصف السنه واشوف وائل يجينه بس عادي شخص عادي بحياتي ومرات حته ما اسلم علي كل فكري ويه غيث...

بيوم الي اجه بشار وعمي عامر جان يريد يشيل متحضر  ما ادري شلون بليل وكال عمي عامر بشار ماتاخذ البنات للمول..

بوقتهه كاله بشار وين اريد بيهن خلي عمر يروح وياهن؟؟ وساعه يكول انت اخذ سيارتي واخذهن ..

بس تواسيل بنات عمي الي متعودات علي خاصه نرجس تحب بشار حب اخوي عظيم لان ماعدهن اخ وهو معتبرهن مثلنه..

كاعدات كدامه ويتوسلن حباب بشار راح نشيل ومانتذكر طلعتنه وهو يكلهن ولجن ما اعرف اطلع ويه نسوان !!!

تالي مادري شلون اقتنع وهاي تسجل بالتاريخ كال باجر العصر اخذجن ...

وثاني يوم العصر بدلنه وراحت ويانه ابتهال واخذنه للمول لان ماطالعين ويا ابد لذلك فرحانات...

ما افتر ويانه هي ابتهال تفتر ويانه وهو كال انتظركم جوه تاخرنه جان ازدحام ونرجس تشتري ملابس ..

انقهر عليهن طلعتهن قليله لان ماعدهن اخ احنه دائما عمر ويانه وماما ونطلع هي امهن تتعاجز وظالات بالبيت...

جنه واكفين يم محل نريد نشتري ومانحس بشار يصيح بينه نمتن هنا شوفن صارلجن شكد؟؟؟

صدك ماحسينه بالوقت ساعتين احنه نفتر بس موذنبنه هو ازدحام ونرجس صعبه بلاختيار...

كالت غير مره اشتري شو ماعجبني وانريد ننزل ما اعرف شلون التفتت اباوع ع الفساتين وانصدم بلي كدامي..

هي لوموهي؟؟ خاف لان كبرت ماعرفتهه بس نفس الملامح وهي صورتهه ابالي لان جنت احب شكلهه هي قبس بنت عمي...

لاموهي مستحيل هي!!! جانت لابسه بنطرون قماش اسود وفوكا قميص وشايله شعرهه ذيل حصان واكفه تبيع بكوزمتك وكومه ناس يمهه والاكثر شباب..

لزمت ايد ابتهال وكتلهه تعالي هاي موقبس فتحت عينهه ع وسعهه وهي صافنه عليهه وتصيح اي ولج هي هي!!!

ما اتحملت جان بشار واكف بعيد هو وبنت عمي الصغيره ركضت علي كتله بشار هاي يمكن قبس هوبسرعه اندار كال وينهه!!!

.. هنا بكوزمتك تشتغل بس يمكن هي شو تشبهه؟ مشه كدامي وادي بجيوبه جان المحل خفيف وابتهال وبناتهه واكفات بالباب صافنات...

فات كدامي وهو ع نفس المشيه وادي ماطلعن جان لابس بنطرون اسود وقميص بيجي ومعبي بالبنطرون وجسم بشار طويل وضخم عنده اكتاف يعني يجذب..

بالمحل بس نسوان اثنين وبشار واكف واني ورا بس شافته بين عليهه شلون فزت بس ظلت تباوع بنص عينه..

تقرب بشار عليهه وهي وكفت وكتفت اديهه ورفعت تك حاجب وكالتله ترى محل مال نسوان محتاج شي ؟؟؟

هاي الكلمه خلت بشار من ورا الميز يسحبهه من ايدهه ولواهه كلت انكسرت والنسوان الي بالمحل طلعن من شافنه وابتهال وبناتهه مسويات حاجز بالباب...

بشار.. عديمه تربيه موعبالج متزوجه وهذا السان ماينكص تحترمين نفسج لا اتصرف وياج غير تصرف..

بعين وقحه تباوع بنص العين وماانهزت ابد اباوع لايدهه الي ع الميز جانت ضاغطه علي بقوه وتريد تنفجر قبضه ايدهه ..

قبس.. هسه شتريد اني اشتغل هنا ما عاجبكم ومو من اخلاقكم وقيمكم اتبرو مني ترى ماراح اموت وراكم هاك شوفني عايشه صار اسنين بدونكم..

بشار.. تربيه سزز الصوج موبيج بالعافج بلا رداد وبرجلج العار العايفج كوم لحم بنص هاي الشباب..

شجن.. نعرف بشار من يعصب الا شويه ويمد ايده عليهه وانوب اجه صاحب المحل بس ابتهال اتلافت الموضوع وتتوسل لبشار بداعه امك خلي انروح لانعرفهه ولاتعرفنه هاي ماتت من زمان لا تقهر نفسك علمودهه..

من جانت تحجي ابتهال هيج قبس كوه مصبره ع نفسهه بس ساكته ماجاوبت ...

بشار ترك ايدهه بقوه حته صاحت اخ وكالهه احفضي وجهي زين لان راح تشوفيني هوايه ولو اني لو انتي لو ادفنج بصف امج ..

طلعنه كلنه وجنت اخر وحده اني طلعت من المحل التفتت عليهه شفتهه شلون كعدت ع الكرسي ودنكت راسهه بأسى وكانو هاي الانسانه محمله هموم...

ردت ارجع احاجيهه بس خفت من بشار ورحت اركض وراهم بحيث من صعدنه بسياره بس نريد ناخذ نفس من المشي السريع ...

كلنه ساكتين لحدماوصلنه للبيت بشار ماطب ويانه طلع واحنه حجينه التفاصيل لبيبي والجدو وجان بابا كاعد ..

صفك ادي جدو وكال لاحول ولاقوه الا بالله هاي الا تحطني بصف ابوهه يله ترتاح وفوكاهه اعرف بشار مايسكت عنهه ...

جنت احس عائلتنه ماخذ الامور ببساطه وخاصه سالفه قبس مامنطيهه اهميه كل الي عليهم راحو ودورو عليهه عرفو مصيرهه هاهي سكتو..

عدهم اهم شي كلام الناس مدام كل الناس متعرف شي عنهه ومايذكروهه وحته الاقرباء وعمام بابا ناسيهه معتبريهه يم بيت جدهه ومثل ماندفن رضا هي راحت ويا ...

لذلك بيت جدو ما ذابحين نفسهم عليهه لان مرتاحين منهه والناس ماتذكرهه ولو واحد جاي لجدو وكايله بنتكم هيج جان ماتصرفو هيج كلهم وكفو ويه بشار وجابوهه ..

مرات احجي لهدى اكلهه ليش بشار منطيهه اهميه ليش مايتصرف مثل بابا وعمو الوحيد حارك دمه ويريد يجيبهه باي طريقه...

دكلي هدى هو هذا اخوج اذا خله شي براسه يجيبه يجيبه لاتعبون نفسكم وياا...

وفعلا صار حته مايشارك جدو وبابا باي شي وبس يحجون يسكتهم ودائما هاي الكلمه تتردد ع لسانه موشغلكم!!!

خلصت عطله نصف السنه وتفاجات بيوم الي اجه بشار وجان جايبلي تليفون وخط وكال ما ادري ماعندج عبالي مشتريلج..

شكد جنت فرحانه بي بعد محاظره طويله عريضه من بشار لاتستخدمي غلط وانتبهي ولايضيع من عندج وبي صورج ولاتنطي لصديقتج وخاف وحده دكلج اخابر من عنده ممنوع ..

توصيات السيد بشار حافظتهن كلهن واخر شي كال شجن اياج اسمع كلمه موحلوه بحقج !!!

شجن.. ليش دكول هيج موحالي من حال هدى مودرست قابل بس اني؟؟

بشار.. تختلفين لان هدى درست بوقت مومثل هذا جانت الناس طيبه هسه ما تامن بابن عمك ..

وهدى درست معهد معلمات انتي كليه وجامعه بغداد يعني ماكو داعي اكعد اعلمج الصح شنو والغلط انتي موصغيره ..

واني وياج تمرين باي شي مشكله ماتعرفين تصرفين ياشجن لاتضمين عليه تعلمي من الاول لاتضمين حته مايوم نسمح لنفسنه انشك بمقدار ذره..

شجن.. اطمئن حته صديقات واسرار ماعندي تدري بيه حته من جنت بالمدرسه ماعندي ...

هز راسه وطلع واني حته فرحتي بتليفون اختفت وافكر اذا عرف بسالفه غيث شيسوي يمكن يوزعني ثواب ع الجيران...

خليت الخط واول ما اتصلت بهدى وعندي صديقه اخذ منهه محاظرات ضفت رقمهه رقم غيث حافظته وترددت اكله اشتريت تليفون ...

كلت اتفق ويا بعدين مايدز اي شي ولايخابر بس خاف احتاجه بيوم لان بشار حته من ينام عينه مفتوحه يخوف ..

رجعت لدوامي وهالمره غيث اجاني للكليه وكال راح اسافر لاربيل اسبوع واجي علمود دوره منظمتهه شركه اسياسيل..

اضطريت اكله عندي تليفون حته اطمئن علي بس كتله البارحه جابو خاف يكول ليش ماكتيلي وصيته مايدز الا اني ارمشله وخاصه بالايام الي بيهه بشار موجود..

اخذ الرقم وراح وكال ديربالج ع نفسج وصلت ويا لباب الكليه ولحدماصعد بسيارته واني رحت للخط ..

جان الخط بي ٣ طالبات بعدنه مامجموعين كلنه كعدت وطلعت تليفوني ما ادري شلون انتبهت ع سياره وائل اعرفهه كلش زين معقوله لوتخيلي..

ظليت مركزه هوايه وادور علي شفته واكف ويه واحد من الامن وبعدين رجع لسيارته بس جان عصبي حته سد باب السياره بقوه..

لزمت گلبي بخوف معقوله شاف غيث من طلعنه سوه؟؟ وشعنده جاي ؟؟

غيث جان يعرف واحد من امن الجامعه ويخلو يدخل ووائل هو رتبته شكبرهه فعادي يخلو ومبين يعرفهم ..

ظلت حسبه تاخذني وحسبه ترجعني خفت ع غيث اكثر من ماخفت ع نفسي خاف يتعاركون لو وائل يكله احبهه جنت كمت ابعد الافكار السلبيه وارجع الكه نفسي بمتاهات  من الافكار مالهه نهايه...

بس طلعت التليفون ودزيت رساله لغيث كتبتله شفت وائل اخوك باب الجامعه وراك وخاف شافنه ؟؟

مخليه موبايلي ع رجليه وصافنه بهاي السالفه العوجه ورن التليفون رساله من غيث فتحتهه ..

جان كاتب واذا شافنه قابل مسوي جريمه عود اذا حجه بلاخلاق من الصبح تلكيني ابيتكم لاتخافين حبيبتي ولاتفكرين بشي سيء ماكو شي...

رساله غيث بعثت بداخلي الاطمئنان بس ظليت افكر بوائل شعنده جاي للجامعه وشبي عصبي؟؟؟

رجعت للبيت لكيت هدى يمنه وعمتي بسمه وبتهه فرح هلووو افرح بالاكشن اليوم بشار هنا وراح اظل عيوني يارايحه ياجايه ...

هوسه وكلهه بالمطبخ واني بدلت واجيت اساعد ماما سوالف وضحك شويه واندك الباب رحت اريد اشوفه صحت منووو؟؟

اجاني صوت وائل اني شجن ؟؟ بسرعه لبست الكبوس مال التراك لان جان شته وفتحتله الباب..

طب وهو واكف بالباب اريد امشي اصيح ماما كال شلونج شجن؟؟

بدون ما التفت علي كتله الحمدلله ومشيت سمعت الكلام   الي كاله اجه باذاني ولا انساهه..

كال هانت ماظل شي ياشجن!!!

بسرعه طبيت ليجوه وطلعتله ماما والخوف متملكني شيقصد هذا ياربي بسلا راح يخرب بيني وبين غيث..

بلحظه ردت اخابر ع غيث واحجيله وخفت لا اخسره وردت اخابر لبشار واحجيله بس خاف تكبر !!!

كل الاحتمالات صارت كدامي وكل الحلول بس ما اتجرات ونفذت واحد ..

رغم الهوسه وملتهين بس بالي مشغول وابد مامرتاحه حته عشه ماتعشيت احس نفسي انسدت بس من اشوفه...

ورا العشا جبت الجاي وكلهه كاعده واشوف فرح الي ساحله نفسهه بالكاع بس صافنه ع بشار...

الي اصلا هو بعالم ثاني صافن مدري وين والجكاره ماوكعت من ايده ابد وحده ورا الثانيه...

تحاول تجذب نظره حته نرجس كالت شوفي فريحه شلون سحلت نفسهه ع بيشو وهو مويمهه..

هي مخلصه اداره واقتصاد واثناء الحديث كالت عمتي بشار ماكو واسطه منا منا تتعين بيهه فرح ابو فرح كال بشار مسوؤل عن شركه الموارد مامحتاجين؟؟

بشار.. والله يا عمه بعدني ماداومت بشركه بغداد اني مدير الموارد الي بالبصره بس هسه رفعو كتاب تنسيب ٣ ايام ببغداد بس بعدني مامداوم ..

بسمه.. خليهه ع بالك اذا محتاجين حتلو عقد شعدهه كاعده..

بشار.. ان شاء الله...

شجن ...مر اسبوع واجه غيث كعدنه بنفس مكانه وحجينه ع وائل جان يضحك ويكلي شبيج جبانه هو مو اخوي واذا شافنه يدري احب بس ماكايله انتي..

اريد احجي واكله ترى هيج وهيج وابطل جنت احس نفسي بضياع وما اعرف شلون اتصرف ولاعندي احد احجيله واخذ رأيه..

طلع غيث واني رحت حضرت اخر محاظره وبطلعه ما احس غير وائل بوجهي ومخنزر وعصبي..

ارتديت ليورا وصارت البنات الي اعرفهم شحه بس اريد وحده امشي وياهه يتقرب عليه واني احاول اطلع من الهوسه مال باب الجامعه..

ما احس غير ايده تلزم ذراعي وكال وين ست شجن عندي كلام وياج!!!!

يتببببع .... احبكم

قمع المشاعر.... البارت السادس..

للكاتبة زهراء ( روزايه)

البارت من زمان كامل بس انترنيت ضعيف اسفه ع التاخير...

شجن.. ليش اني هلكد جبانه اريد احجي ما اكدر وبين عليه الخوف وهو استغل هالشي نقطه ضعف بحيث جان يحاجيني بعصبيه ويأمرني امشي ويا..

وائل شتريد عندي خط واروح بي واصلا راح يعوفني..

.. امشي وياي اني اوصلج للبيت .

.. لا ماكو داعي امشي وياك شتريد من عندي حاسبتك مثل بشار واكثر بمقام بابا ..

.. لاتكفريني بنص الناس اني لا اخوج ولا ابوج تفتهمين هالشي لو افهمج بطريقتي كتلج امشي ولا تخلين صوتي يعلى بنص الجامعه ..

.. جنت احجي وارجف والله اذا مارحت اتصل ع بشار لحد الان ماكلت لاهلي واذا اكلهم تصير موزينه باي حق تجيني للكليه وتوكف وياي بنص الناس..

.. ليش ست شجن اول مره واحد يوكف وياج غيث مايجيج لو بس من جانب وائل صارت عيب..

... كلش ارتبكت وعبالك فتحت باب عليه الله نقذني بهاي اللحظه ماكدرت اجاوبه بس اجت وحده وياي بالخط كالت شجن راح يروح ابو الخط استعجلي ماعرف شلون خليت ايدي بايدهه وامشي سريع واسحل بالبنيه حته دكلي شبيج اوكفي بس اريد اوصل للسياره اريد اختفي من كدامه..

صعدت بالسياره لو عبالك جنت بسباق كلبي ينبض سريع وايدي ترجف بيه خوفه من وائل موطبيعيه هذا الشخص سبب عندي عقده نفسيه ...

رجعت للبيت والدنيا طالعه من عيني اسحل بنفسي سحل والتفكير هلكني احس اديه ورجليه مربوطه ما اكدر اسوي شي ساعه اكول احجي لماما وساعه اكول لا لبشار يساعدني لو لغيث خاف ماينطي باخو ...

وائل صار كابوس كدامي اي شي يصير ما الحك افرح بي لان الكا كدامي اريد احد احجيله بس طبعي هذا الزفت الي مايوم  سريت صديقه لو اخت لو ام ...

كمت اخاف اروح للكليه خاف يجيني وماخليت غيث يجي بعد وكلما كال اريد اجيج اطلع الف حجه ...

لحد مايوم اجه ع عمر وجانو اهلي كلهم ويه بيت عامر لان شالو وبس اني وعمر نايم اندك الباب واسمع صوته برا يصيح عمر ..

خليت الحجاب ع راسي وطلعت ردت احجي ويا ردت افهمه خوفي بس ماعرف شلون ابدي الموضوع ويااا..

وكفنه يم باب الاستقبال حته اذا كعد عمر اشوفه جانت عيون غيث تحجي قبل ماينطق اي كلمه...

خوفه ولهفته عليه بحد ذاتهه تخليني اتردد احجي حرف واحد اخاف اخسره ..

المشكله كلنه نعرف غيث يعتبر وائل بمثابه ابو هو ربا وهو وصله للكليه يعني تعلق غيث بوائل مو مجرد اخوان بيناتهم رابطه اقوى ..

خفت مايصدكني ويذب اللوم بيه ويكول ليش ماكتيلي من الاول هاي الافكار جانت تخنكني وتعقد الساني...

عيونه تفتر ع ملامح وجهي بقلق جنت منطيه ظهري للحايط وهو واكف كدامي ومخلي ايده ع الحايط ويسالني شبيج شجن صاير شي؟؟

.. لا ماصاير شي بس مامرتاحه ..

.. من شنو مامرتاحه ليش ماتقبلين اجيج للكليه ترى مو يوميه جايج لا تقبلين نتخابر لا تقبلين اجيج شصاير وياج؟؟

.. ماصاير شي بس اخاف واحد يشوفنه وخاصه من يوم شفت وائل ..

.. واذا شافني وائل مسوي جريمه بنت عمتي واريدج كتلج خلي اجي احاجي اهلج ماتقبلين مو احسنلج من هذا الخوف والقلق..

... مو خاف مايقبلون وبعدين يشدون ويايه ومايخلوك تجي يمنه وتصير شوفتك حسره..

.. ياحبيبي اعتراضهم ع الدراسه كملي قابل راح ابطلج انتي خليني اتصرف من يمي احاجي بشار وهو يقنع ابوج..

... ما ادري خلي افكر وارجعلج الجواب غيث الله عليك لاتعوفني وبجيت بسرعه ما اتحملت احس هذا الشخص موالي هاي الحنيه والخوف كله يصير من نصيب وحده ثانيه..

خليت اديه ع عيوني وبجيت احس مثل الغصه ابلعومي مااكدر ابلعهه ولا اكدر اطلعهه وارتاح ..

من شافني هيج لزم اديه اثنينهم ونزلهم من وهو يسال بقلق شجن شبيج حبيبتي منو وياج سولفيلي...

شلون اعوفج انتي حبيبتي وعمري ما اتخلى عنج مهما يصير لاتخافين احجي اي شي واني اول واحد بجانبج ..

شجن.. مسحت دموعي وكتله مابيه شي لاتخاف بس ضايجه لا يكعد عمر خلي اروح وسحبت ايدي من عنده واريد اطب ليجوه ...

بس هو سحبني من ذراعي وصرنه اني ويا عين بعين ماكال شي بس باسني من راسي وكال اني وياج لاتخافين ..

هاي الكلمه دائما يكولهه ومن اسمعهه صدك اهدء وارتاح مثل البنج المؤقت ..

راح غيث واني طبيت جوه احس نفسي مهمومه كمت صليت وقريت قران دعيت الله يبعد عني وائل وارتاح...

شالو بيت عمي عامر وصار وضع البيت كابه جانت لمه وحلوه هسه ماكو بس اني وفاديه الي هاي وجودهه وعدم وجودهه لاشي ليل نهار نايمه لوتاكل ..

اتمنى عندي اخت اكعد وياهه احجيلهه يومي الي بالجامعه جانت فاديه صف سادس وكعدت فتره مراجعه بس مخلصتهه اكل ونوم ...

ماما الي يضيعهه يلگاهه بالمطبخ وعمر طالع دائما حته يبات برت يم اصدقاءه يعني البيت فارغ اريد اتلهى بشي ماكو اركض ع الملازم اقره بيهه ...

ابد مانتراسل اني وغيث اخاف من بشار ع الرغم مايجي ولايطلب تليفوني بس اخاف من عنده الا الشغله الضروريه ونادرا ما تصير...

يجي ع عمر واشوفه بس كعده وسوالف ماكو لا بالكليه ولامن يجي ابيتنه بس النظرات بيناتنه ومرات افتحله الباب يسالني شلونج غير هالكلام ماكو...

بيوم من عدهن اجتنه مرت خالي ام وائل كاعده وتحجي مرت وائل تعبت خطيه وحدهه وجهالهه هواي واتوسل لغيث يوم شمنتظر ليش ماتتزوج عاد وائل يطلع ابيت وحده واني وياك نظل هنا...

ام بشار.. اي والله اشوفهه بس تركض للشغل والجهال شجا وائل وياهه مايطلعهه ابيت وانتي وغيث وحدكم وهو هم مايقصر عنكم وبعدين غيث راتب وانتي عندج تقاعد المرحوم يعني ماتحتاجون بعد خلي يرحم هاي المسكينه..

.. والله يداده لوتشوفيهه مرات تكعد تبجي وابجي وياهه ساكمهه سكم وائل الاسبوع الي يجي بيهه يركضهه تركض طلباته ماتخلص وجهاله كبرو ووكحين بس تتذمر يكوم عليهه يكتلهه ..

ام بشار... ليش هيج صاير شو وائل جان علم بين جيله وكلنه نمدح بي شبي تالي وكت تخبل ع البنيه المسكينه وهي اختي المرحومه لو عدله تخليهه هيج بس ظلت بدون ام ..

ام وائل.. والله ازيد من بنتي واتعارك ويا وازعل بس مايفيد داده مكرهه بعيشتهه غير هي صابره وحبابه ساره جان طكت وشردت من عنده بس لخاطر جهالهه ساكته ...

ام بشار .. الله يهدي عليهه الزلم من تكبر تتخبل ..

ام وائل.. هسه اقتنع غيث يتزوج ومنا وهيج نخطبله بس منتظرين وائل يجي ونحجيله ...

جانت تحجي وتباوعلي مبتسمه حته خجلت من عندهه وكانو الهه قصد بهاي النظره ..

كمت من يمهم واني افكر شلون يجي يخطب غيث واني ع ابواب امتحانات اخر السنه ع الاقل خلي انجح للمرحله الثانيه..

فتحت تليفوني ودزيتله رساله غيث صدك الي سمعته من امك ناوي تخطب ع جيه وائل بس اني بعدني ما مكمله هاي السنه..

دزيتهه وظليت بالغرفه شويه واجتني رساله من عنده كاتب اي صح لان گلبي طك حسره عليه شوفتج من يجي وائل بس نحجي ويه بشار ومن تكملين امتحانات نجي نخطب رسمي ..

بس قريت هاي الكلمه نبض گلبي بفرح بس فكره وائل ومجرد ما اتذكره كلشي بيه يتخربط...

بشار ما انشوفه ابد تمر اسابيع هو يركض من مكان لمكان وخاصه هاي الايام عدهم دورات مال تنقيب بكركوك وبلانبار كل محافظه اسبوع وحته دوامه ببغداد بعده ماداوم الا يكمل دورات التنقيب...

خابرته ماما كالهه بس هالاسبوع اكمل واجي واداوم ٣ ايام ببغداد والباقي بالبصره ندري بي يتعب بس هاي حياته اتعود عليهه ...

عمتي بسمه بهاي الايام باعت بيتهه واشترت بيت قريب علينه وصارت يارايحه ياجايه هي وفرح ومرات احسهن متفقات بس حته يلفتن انتباه بشار..

كمل الاسبوع واجه بشار زاد خوفي شلون راح يفتح غيث الموضوع ويه بشار وخاف يرفضون جانت الهواجس مسيطره عليه ...

تالي بيوم الي اجه الله جاب عماتي بشرى وبسمه اثنينهن موجودات واسمع صوت عمتي بشرى العالي وهي دكول لبابا ليش ماتقبل ياعادل ترى كل بنيه مصيرهه الزواج..

ظليت كاعده استحي اطلع كل ضني السالفه تخص غيث دزيت فاديه تسمع شيحجون وهاي التنبل كوه تكعد من واحد يدزهه ع شي تسوي نفسهه تقره...

فاديه.. عيني ست الحسن جايين خطابه عليج وابوج واخوج كالو ماعدنه مره للزواج ..

.. منو الجاي ماعرفتي؟؟

.. ما ادري بس من طرف عمتج بشرى مدري شيصير من رجلهه وابوج كال ماازوج اي بنيه قبل ماتاخذ شهادتهه..

... وبشار شكال؟؟

.. هم كال نفس حجي بابا كال لاشجن بعدهه صغيره وهستوهه مرحله اولى تكمل دراستهه يله تزوج

يعني غسلي اديج بصابونه زواج ماكو الا بعد اربع سنوات ..

.. واشفتيني ذابحه نفسي عوبه هو سالتج شعدهم؟؟

فاديه.. لاماذابحه نفسج بس صار ساعه تسمعين من الباب ووجهج مخطوف شجاج مفلفله ع العرس يمه من عندجن البنات هستوهج دخلتي كليه وتفكرين بالزواج ..

شجن.. امشي منا ولج لا اكوم ابتلي بيج غير اعرف عليمن يسولفون سويتيني ذابحه نفسي ...

فاديه.. انتي كومي منا اريد اقره شبيج مستحيه ما اطلعين اصلا جاي يسولفون بغير سالفه ..

شجن.. غميتهه وطلعت السانهه متبري منهه ابتليت كتلهه روحي سمعي شعدهم رحت للمطبخ جانت فرح تسوي جاي ردت اخذ من عدهه عود فشله خطار بس هي ماخذه ع الوضع ماقبلت..

اخذت الصينيه وراحت واني رحت وراهه وكفت باب المطبخ الي طالع ع الصاله اشوفهه قدمت الجاي واني اباوع لبشار يباوعلهه لولا..

شفته من بعيد اخذ الجاي منهه ورفع راسه عليهه باوعلهه طارت فرح بعد منو يلزمهه حطت الصينيه ع الطبله والابتسامه شاكه حلكهه..

هسه اني شعليه واراقب بيهه بس من الله فرح ما ارتاحلهه اتذكرهه من جنه صغار هي جبيره تتفيك واطردنه من نلعب بغرفتهه ولحدالان من تجي بس تحجي بالموديل وتعوج بحلكهه عود هي تعرف كلشي استغفر الله ما اريد اشيل ذنبهه بس ما ارتاحلهه...

رجعت للغرفه اخذت تليفوني ودزيت رساله لغيث ياجل موضوت الخطوبه وحجيتله السبب جان مصر الا يحجي بس ظليت اتوسل بي لان اذا ماوافقوا معناتهه راح يحرموني من شوفته لان عرفو بنيته...

ثاني يوم من رجعت من الدوام لكيت عمي عامر بالباب سلمت علي وطبيت جان واكف هو وبشار من طبيت سالت ماما شوبس عمي جاي ماجايب البنات ويااا؟؟

ام بشار.. لا ماجابهن كال دوام عدهن للجمعه ويجيبهن جاي ع اخوج علمود بنت رضا..

.. هم بنت رضا شبيهه هالمره عوفوهه تزوجت وراحت احسبوهه ماتت لزكتو..

.. روحي احجي هالحجي لعمج وابوج كله منهم شيسمعون كلمه من واحد يجون يخلوهه براس بشار ومنا هو شلون يتفاهم..

هسه اجه عامر واخوج الله يسلمه مايحجي ولا اعرف شي من عنده سمعت من عدهم اخوج مو يداوم بهاي الشركه الجديده وطلعت قبس اداوم هناك موضفه بالشركه ..

.. واذا ياماما حتلو اداوم لعد هي الدنيا صغيره يلكاهه باي مكان ذاك اليوم شفناهه بالمول يعني شلون كلما يشوفهه يحرك بروحه هي متزوجه وعدهه حياتهه وماتربت ويانه واصلا بدون حجاب يعني تختلف عن عاداتنه ..

ام بشار..دروحي بدلي وتعالي ساعديني اريد ادز لابتهال كبه تحبهه قبل لايروح عمج عامر ..

هي هاي ماما هي وابتهال الي يشوفهن يكول اخوات مستحيل نسوان حمه اتذكر من ابتهال تصير عدهه ولاده ماما تسبح وتبدل وتوكل وابتهال كذلك من تتمرض ماما اول وحده تنام يم راسهه

رحت ابدل وافكر بقبس شنو من صلافه عدهه وقوه لاتخاف ولاتهاب واحد والله اعلم شراح تجي مصايب من جوه راسهه...

طلعت ساعدت ماما وخلتلي الكبه بحافظه وطلعت انطيتهم لعمي عامر جان بشار منطيني ظهره بالباب اخذهن من عندي بس لمحت وائل واكف وياهم ..

هذا الشخص بس اشوفه تلعب نفسي واختنك كلشي بي يخليني اتوتر الله يبعد شره عني..

بهاي الايام الوضع بالبيت متوتر بسبب قبس لان اداوم ويه بشار ومانعرف شلون مخلصيهه مد وجزر. اكيد لا بشار مايسولف اي شي ومانعرف شلون يتصرف وياهه وهو مديرهه وهي لسانهه متبري منهه...

اني بلشت امتحانات وما الحك احك راسي وتواصلي ويه غيث قليل مقدر وضعي وخوفي بس بعده يلح بسالفه الخطوبه واكله اصبر

بيوم ١٤/٦/٢٠١٢ هذا التاريخ مستحيل اكدر انسى بيوم من الايام بعدلي امتحانين واخلص احس طاقتي خلصت من السهر والامتحانات وحته ما الحك احجي ويه غيث بس يجي لعمر واشوفه..

كل يوميه اكمل امتحان واكعد شويه ويه البنات واروح للخط اكعد انتظرهن لان الجامعه هوسه ومرات يخابرني غيث يسالني شلونج بلامتحان واظل احجي ويا شويه واسده...

بهذا اليوم الاكشر طلعت من الكليه للخط واني امشي شفت رجلين صارت كدامي رفعت راسي واشوف وائل ...

اتلفت يمنه ويسرى حسيت بخوف موطبيعي ولاحجيت بس اريد اتعدا وامشي للخط ..

وائل.. اوكفي ابمكانج واياج تمشين خطوه وخله ايده ع حزامه الي بي المسدس ...

احس نفسي بحلم لو بمشهد فلم الساني انعكد منا اني اخاف من عنده والرهبه والخوف الي بنص الشارع خلاني ما اعرف انطق حرف واحد..

لگيت نفسي امشي ورا بدون صوت ايدي ع الجنطه مالتي ابالي افكار اشرد ابالي اصيح بصوت وافزع الناس علي بس كله هذا ما سويت شي من عنده بس رجليه تمشي وكانها مسيره..

فتحلي باب السياره الصدر وكال اياج ياشجن تنطقين حرف واحد !!!

واندار فتح الباب وصعد اضغط ع ايدي واتمنيت اي واحد يجي بهاي اللحظه يخلصني ..

ليش ماحجيت ليش مانهزمت ليش وليش كومه تساولات ظليت طول هاي السنين اتسائلهه لو لازم اشوف هالشي واتعذب..

حرك السياره واني كوه حجيت وكتله وائل شتريد من عندي؟؟

بس حجيت ضرب الستيرن بقوه وصرخ بصوت عالي اسكتي لا احط طلقه براسج هسه اسكتي الله بلاني بيج بلوه انتي!!!

... شبيك وائل الله عليك نزلني شتريد من عندي من دون البنات يوميه متهجم عليه شتريد؟؟

.. اريدج ماتحسين من صغرج احبج وكبرتي كدامي يوم ورا يوم اريدج عقل ماعندج ماتشوفيني اركض وراج ليل نهار..

... شتحجي انت شتريد مني انت رجال متزوج وعندك ٤ جهال ومرتك بنت خالتي وحبابه تريدني اخرب بيتهه والله انت تحبني انت مستوعب الي تحجي انت بمقام ابونه موصغير حته تحجي هالحجي المابي معنى..

من حجيت هيج الظاهر ضوجه الكلام سحب مسدسه وياشر بي بوجهي والله اكتلج والله ادفنج انتي وعدله وما اخلي واحد ياخذج ..

ادري بيج كلش زين غيث اخوي يريدج عبالج اخلي يتزوجج واني عيني عليج عبالج تفترين بطولج كدامي واتحسر مرت اخوي انتي...

لا تحلمين اخليج تعيشين مثل البنات مدام ما اختاريتيني ادمرج والله ..

شجن.. خفت حيل من نبره كلامه وتهديده احس نفسي ضاك والسياره مقفله وهو عبالك موبوعيه مدري شصار بيه ..

لزمت ايده اتوسله يفتح الباب وهو يدفعني للكرسي وعيني ع المسدس لايكتلني مخبل موصاحي ..

اشوف السياره اطب بفروع اول مره اشوفهه واني الخوف صعد من طرف رجلي ووصل لراسي كلشي بيه يرجف ودموعي تنزل عشره عشره..

احس كلبي بده يضعف من الخوف والبواجي اتندمت ع كلشي ليش ماحجيت لاهلي ليش ماحجيت لبشار ويوكفه عند حده ...

وصل لبيت ونزل يفتح الباب واني اريد افتح باب السياره بضعف وهو مقفلهه اي تصرف اسوي احتمال مايتردد بقتلي ...

مستحيل هذا الانسان بيوم جان امان النه واهلي مامنين بي ومعتبري رجال من صدك ...

طبب السياره للبيت ونزلني سحل واني كمت اعلي بصوتي وهو ولامهتم لحدمادفعني بنص الصاله ..

هنا حسيت الموت قريب عليه كمت اصرخ بعلو صوتي اريد واحد يساعدني وين الناس عبالك اموات محد يسمعني..

متاكده وائل مو بوعيه شارب شي لان ماكو هيج انسان عمره راح ٣٥ سنه وطفل مايسوي سوايته..

بجيت بصوت عالي واني اتوسل بي وائل الله عليك عوفني انت مستوعب الي تسوي اني عرضك..

وائل.. شتريدين ازفج بيدي لاخوي الي ربيته بيده شتريدين يا شجن من صغرج وعيني عليج لو الي لو تكعدين طول عمرج بلازواج...

جان يحجي ويتقرب عليه وتليفوني يدك واني لازمه الجنطه حيل سحبهه من عندي وطلع التليفون غيث يتصل...

وائل.. شوفي گلبه حس ودك عليج شرايج اجاوبه واكله عندي..

شجن.. صرخت بعلو صوتي حقير الله ينتقم من عندك من الخوف احس راح ينغمى عليه بهاي اللحظه...

وائل.. سد التليفون ورجعه للجنطه وكال لاتخافين كولي موافقه وباجر اجي اخطبج ادللج والله ..

شجن.. شمئزيت من كلامه كمت اغلط علي بدون وعي رغم الرجفه الي بضلوعي وكل جسمي مثل السعفه واجاهه الريح هيج حالي واتعس...

ما احس علي غير يتقرب من عندي واديه تحاوطني من اكتافي ويهز بيه ويصيح شجن احبج اني ما اخليج تروحين لغيري انتي الي...

ادفع بي بكل قوتي الي اوشكت ع الانهيار وهو بقوه لازمني ويتقرب لحدما كام يبوس بيه مثل المجنون..

شفايفي وركبتي يبوس بيهن واحس الدنبوس نغرس ابلعومي من الصريخ والمقاومه..

حس ع نفسه وابتعد دار وجهه يفرك براسه ما اعرف شلون اجتني القوه عفت كلشي حته تليفوني وجنطتي..

وطلعت اركض مثل المخبله من البيت واسمعه يصيح وراي شجن اوكفي...

واني اركض حافيه بس اريد اطلع للشارع وانقذ نفسي وصوته وخطواته قريبه عليه...

يتببببع.. متابعه ممتعه

حبايب گلبي اشوف التعليقات تحجون ع غيث هوايه زين انتم شعرفتو عنه وهو مابدر اي شي من عنده..

انطيكم معلومه غيث البطل والوحيد الي راح يتأذى ويصارع الالم رجاءا لاتحكمون ع شخص من اولهه وهو حته مامسوي شي ورجال بمعنى الكلمه ....

هوايه بنات يسألون ع حسابي بالفيس خليته الكم فوك بالصوره اسمه Rozaya Ra

احبكم

قمع المشاعر.... البارت السابع..

للكاتبة زهراء ( روزايه)

شجن .. عرفت هاي المحطه الاخيره.. والرحله الاخيره.. والميته الاخيره بهاي الحياة الي راح اعيشهه على ندم على حرمان والم ..

وصلت لباب البيت وصوته وهو يصيح شجن يرن باذاني جان قافل الباب وماينفتح صرخت بصوت عالي اريد احد ينقذني..

بس للاسف الشخص الي كدامي انسان وضيع مجرم بمعنى الكلمه ما اعرف شصار ولا اريد اتذكر ذاكرتي من توصل لهذا الموقف كلشي بيه ينهار وترجع عليه الرجفه من جديد واظل ايام بالفراش اضرب براسي بس اريد الصار بهذاك اليوم يختفي...

ماحسيت شلون صار ولا انتهبت على المسدس الي بيده بس كل الي حسيت بي حراره اخترقت رجلي وبدت تسعر تسعر الى ان احس نار وفاتت بالعظم...

وكعت بالكاع واني اعيط من الالم بس بصوت مبحوح بعدني مامستوعبه الموقف بس الالم بده يصعد ع كلبي واشوف الدنيا تفتر...

بين الوعي واللاوعي بس اتذكر كلامه كلش زين يسوق بالسياره بسرعه ويه كل طسه تطلع روحي بس روحي بدت تغيب ومااكدر حته اعبر عن الالم..

وائل.. اسمعي ياشجن اذا نطقتي بكلمه وحده اطبلج للمستشفى بطلقه كاتم براسج واذا اكلج لا اني اريد اذلج واطلع هالغرور من عيونج ..

راح اكل لبشار اختك لكيتهه ويه واحد وانهزمت ولحكتهه وازور حته تقرير طبي يكول انتي موبنيه وتعرفين اخوج زين ماكو داعي اكعد اشرحلج شيسوي بيج..

خلي انطيج الاحتمال الثالث وهذا اكيد حبيب الگلب تضحين علموده مو اخوي هو بس وحق الله الفه بتهمه ينحكم بيهه مؤبد للابد وتحلمين تشوفي ..

وحتلو اشتكيتي وحتلو حجيتي ترى اني برتبه نقيب اطلع منهه مثل الشعره من العجين واخلي اهلج يزوجوج الي غصبا عنج ..

سمعتيهن كلهن هذني كدامج وانتي اختاري وحده من عدهن ادمرج والله وادمر غيث وياج وهااا خاف عبالج تقبلين بغيث ويجي يخطبج والله الضحيه غيث ابيعه واخليج بالحلم تتمنين شوفته اشمره ٤ ارهاب وانتي ظلي ابجي ورا...

صحيح جانت روحه تغيب بس ما فاقده الوعي وسمعت كلامه بوضوح رغم المي بس مجرد ماحجه ع غيث احس انتهيت وبعدما اكدر اقاوم ابد وبعدهه ما اعرف الصار...

ما حسيت غير صوت ماما وهي تبجي يم راسي واصوات هوايه واسمعهم شيحجون بس ما اكدر افتح عيوني...

اسمع بابا يكول دكتور شو ماكعدت بنتي بيهه شي؟؟

ضرباتهم والراشديات الي ع خدي خلتني احس وافتح عيني بالم واني اصيح ماما ودموعي تجري ما اكدر اسيطر على اي شعور بداخلي...

بديت انتبه شويه واشوف الكل واكف ع راسي بديت استوعب الصار واتذكر التفاصيل وابجي انهاريت ابجي بدون دموع بس صوت الانين مالتي عالي يريدون يسكتوني ما اكدر اسمع الطبيب يكلهم عدهه انهيار عصبي انطيناهه مهدىء..

فتحت عيني الم برجلي وبشار واكف يم راسي من شافني انتبهت دنك ع راسي وباسه وجر كرسي وكعد كدامي ..

نفسيتي مدمره اريد اصرخ وابجي كلساع تجي اكبالي لوعتي بالبيت كلشي يمر كدامي مثل البرق ودكوم دموعي تجري..

بشار.. شجن شلون صار هالشي منو ضربج؟؟ احجي ابويه انتي حتلو غلط كلشي احجي ابد لاتخافين .

شجن.. كمت ابجي اكثر من اسمع كلامه شحجي بلحظه ردت اسولف كلشي وشيصير خلي يصير وارجع اتردد..

ام بشار.. يايمه دشوفهه شلون صايره عوفهه ومن تصير زينه تحجيلنه موسولفلك وائل بعد شكو..

بشار.. شسولفلي وائل كل عقلج اني مصدكه التفت على ماما واشر باصبعه خلي ابن اخوج يطلع من عدهه واذا حسب كلامه اريد تفاصيل وشهود كامله ع الحادث ..

ام بشار.. جاي يكلك واحد من الامن الي اباب الجامعه مخابره لان يعرف هاي گرايبه وجاي لاكيهه بلاسعاف وابو الامن كايله فاتت زفه وضربو طلقات واجت برجلهه بعد ليش تذبهه براس وائل احمد الله طلعت بنتي سلامات ..

بشار.. ما ذابهه براس وائل خلي يجيب ابو الامن الي خابره مو جامعه شكبرهه شنو زفه فاتت وماوكفت ماشافو رقم السياره لعد عليمن مخليهم بالباب ...

ام بشار.. والله يابشار انت ادور سوالف وتشك باضفرك يكلك الرجال هيج دكول هيج روح شوف وائل شلون گلبه محروك ...

شجن.. بشار صاح بماما حته زعلت وحاول وياي شكد واني بس ابجي كلما اريد احجي اتذكر تهديده وكلامه اني طبني مرض بس غيث شنو ذنبه اني الي وصلته لهنا اني الي ماحجيت اله وكتله ترى اخوك هيج..

بشار من شافني تعبت كام من يمي وراحو يحجون ويه الضابط الي جاي ياخذ اقوالي..

وللاسف ضعف شخصيتي وخوفي واعتبرت هذا الانسان مثل ظلي ماراح يعوفني وسهله عنده كلشي يسوي ما اريد احد يتأذى بسببي لذلك حجيت للضابط مثل مامسولفلهم وائل..

بس ظل بشار معاند ويريد ابو الامن الي خابر وائل حته فاديه كالت بشار تعارك برا هو وائل وكايله اذا ماجبت ابو الامن ارفع دعوه عليك ...

جنت بس اني وماما بالغرفه ورجليه الالم بيهه فضيع عايشه المسكنات بالضبط الضربه صايره بالعظم جوه الركبه بشويه...

انفتح الباب واشوف غيث كدامي هذا الشخص الي راح اخسره للابد ومتاكده شجن جاي تتلاشى شويه شويه ..

بس شفته كمت ابجي الحمدلله جانت امه ويا التهت تحجي ويه ماما وهو واكف يم راسي عيونه متجمعه الدموع بيهه ومكور ايده بقوه..

شجن.. لاتبجين حبيبتي الحمدلله ع السلامه ماكدرت اجي لان بشار موجود خاف يشك لان مبين الخوف عليه...

شجن.. الله يسلمك لاتسمعك ماما من اطلع للبيت احاجيك لاتخاف عليه..

.. شلون ما اخاف عليج صار يومين ماغمضت عيني بيومهه گلبي جان حاس وادك عليج وماتجاوبين حته ماكدرت اكمل الدوام مثل المخبل افتر بالشارع واكول بيج شي ...

لحدما خابرني وائل وكالي اريد اهدأ ما اكدر حته وائل يكلي هلكد تحبهه لاول مره تنزل دموعي ياشجن وكدام اخوي خفت لا اخسرج ...

شجن.. جان يحجي والدموع تلالي بعينه شكد تعجبني شخصيته وشكد رزن وثكيل بس شفت الخوف الي بعينه هذا الانسان يحمل حنيه هائله والحب الي بداخله عظيم.

شويه وراحو واني من الابر المهدئه والمسكنات كلساع انام ظليت ٣ ايام بالمستشفى وبعدهه طلعت للبيت ...

ظلن عندي امتحانين اجلتهن احس خسرت كلشي حته جنت حيل شاطره ودرجاتي عاليه ناويه اطلع من الاوائل وخرب كلشي احلم بي..

يوميه بشار يجي يفتح السالفه وياي ويكلي احجي وكانو جان مامصدك بكلام وائل بس نفس الحجي اعيده خوفي ع غيث من جهه ومن جهه ثانيه اخاف ع نفسي خاف يتهمني لو يعتدي عليه ويتزوجني غصب..

جنت بدوامه التفكير هلكت نفسي بس من ورا الافكار الموحلوه رغم غيث ماعافني ولت لحظه تليفوني كل ٥ دقايق تجي رساله من عنده يواسيني ويرفع من معنوياتي ...

وكلمه اني وياج شمايصير لاتخافين هاي جنت اسمعهه هوايه من عنده..

قبل جنت من اسمعهه ارتاح وداخلي يطمئن هسه ماتاثر بيه بالعكس تزود حالتي كابوس وائل خانكني واحس حقي راح يضيع واني الخسرانه الوحيده...

مر اسبوع ع الحادث ويجن عماتي يشوفني وفرح دكت اقامه يمنه بحجه اساعدج بس هاي البنيه ما ارتاحلهه جانت هدى هي القايمه بكلشي تكومني وتاخذني للحمام ...

بليل واجت فاديه كالت تعالي للاستقبال اجت ساره مرت وائل واخته مجرد ماسمعت اسمه كلشي بيه انتفض وتملكني الخوف ماشفته من هذيج اللحظه...

كتلهه كليلهم نايمه ما اريد اطلع !!

.. بكيفج هسه تجيج ماما اطلعج غصبا عنج.. طلعت فاديه واني اضغط ع نفسي واكول صيري قويه صيري سباعيه وروحي كعدي كدامه حسسي بذنبه..

لا تخافين شلون من جنتي صغيره ياشجن ماتخافين ابد هسه هم هيج صيري كومي واجهي ولاتضيعين حقج جنت احجي ويه نفسي واريد اطمنهه ...

اجت ماما خبصتني بسرعه كومي ولبست الشال وساعدتني اضغط ع نفسي بكل قوه بس اريد انسه لواتناسى الصار اسمع صوت غيث واخذ نفس حته اطمئن..

طبيت للاستقبال جانو كلهم كاعدين بس كلت السلام عليكم وكامت مرت وائل واخته بوسني وتحمدلي ع السلامه وكعدت بصف ماما ...

جانت رجلي لازم تنمد فيخلون شي عالي جوهه حته ماتنطبك خليتهه ع الطبله ورفعت راسي كدامي غيث وبالجهه الثانيه وائل.

جانو يحجون بسالفتي وهذا الانسان المنافق عجيب اكو هيج بشر يحجي بحركه وعصبيه ويكلهم والله اطلعه من جوه الكاع واخذ حقهه المشكله فص ملح وذاب امن الجامعه يكولون سيارات هوايه ومانعرف منو الضرب والتهينه بيهه ...

بشار.. وائل مقدر تعبك وركضتك هاي الايام بس ماكو هيج حجي اذا ما تكول لازم تدفع الذنب امن الجامعه ع شنو مخليهم..

اني رحت والتقيت برئيس الجامعه وراح افتح القضيه من جديد وانت الشاهد انت وابو الامن ...

وائل.. يا اخوي الرجال ماراد حته ينذكر اسمه حته لاينفصل من وضيفته بحجه الاهمال قضاء وقدر والله لطف هم هديلهه شوي..

غيث.. وائل شنو هديلهه دشوف حالتهه يعني انضربت وتاذت ومانعرف السبب وين حقهه هذا حته امتحاناتهه عافتهن..

عادل.. يابويه غيث مقدر خوفكم عليهه وهي مثل اختكم بس مثل ماكال وائل وين يلكاهم بهذا الوكت الناس صار ماعدهه مخافه الله

بشار.. هسه نظل ورا السالفه ونتابعهه وانشوف وائل ماقصرت هاي تكاليف المستشفى ماكو داعي تدفعهن اني دفعتهن بس ما ادري بيك مرجعهن وماقابل تاخذهن ..

وائل.. شنو هالحجي بشار معتبرني غريب عنكم ترى شجن غاليه علينه وماكو فرق دفعتهن انت لو اني..

بشار.. لايابه عليمن انت ماقصرت وكام انطا الفلوس لان وائل ماخذني بالخاص واهلي جانو مخبوصين وهو دافع الاجور ومن بشار منطيهن لبابا مرجعهن ماقابل..

كلساع تجي عيني ع غيث الي حسيت راح يفضح نفسه بنظراته العالم تسولف وملتهيه وهو مارمش لحظه يحاول يشتت نظره ويرجع يباوعلي ويطمني بعيونه وهو يكلي اني وياج للابد...

خليت فاديه تاخذني للغرفه اشمئز من اسمع صوت وائل وهو يسولف واني اصلا تعبانه بسرعه نمت...

....

قبس.... اني قبس مواليد ١٩٩٠ درست معهد تقني حاسبات سنتين اول مافتحت عيني للدنيا وعايشه باسره مفككه ما اعرف شي منهه شنو اب شنو ام كله فاقدينه..

من صغري بيه عقده وشبه حاله نفسيه من جنت اسمع الجهال تركض وراي ويصيحون البگعه اضربهم بالحجار واكعد املخ بشعري رغم صغر سني بس محد جان يهتملي ويكولون خطيه هاي طفله..

لا مشه عليه هذا اللقب ومحد يكول قبس كلهه تعيرني باللوحمه ...

احداث طابعه ابالي جنت اشوف ماما شكد تنكتل من بابا جان يجرهه وينيمهه برا بالبرد واحنه نبجي عليهه وهو مثل المجنون يكسر بالبيت ويكلهه من وراج حرمتيني من اهلي..

يوميه نفز ع صياح ماما وننقهر عليهه شلون يكتلهه ويعذبهه اتولد بداخلي كره موطبيعي اتجاه ابوي جنت اتمنى يموت من كدما اشوفه شلون معذبهه ...

كاعدين قريبين ع بيت اهل ماما وماتخلينه انروح وحته اذا بابا شافنه هناك مايكتلنه لا يرجع عليهه واسمعه يكلهه تريدين يطلعون مثلج..

رغم من صغري وماما ملتزمه صلاه وصوم وماتطلع ابد بس ليش يشك بيهه هذا الجنت ماعرفه...

زين ويانه كأطفال بس موزين ويه امنه ومرات اشوفه يكعد يبجي ويحضن بيهه ويكلهه ليش هيج سويتي بيه ياسميه مواني حبيتج ليش خليتيني اخسر اهلي...

كلشي ما اعرف عن ماضي اهلي وشبيهه ماما بس الي اعرفه بابا يكول ع جدو كو..... ويكول اكرهه هو الي دمرنه طول هاي السنين ...

من كبرت بديت استوعب وبابا حابسنه بالبيت من يطلع يقفل الباب واسال ماما دكول استاهل اني السبب ...

رغم اروح للمدرسه وارجع ويه اخوتي ابد ماجان يضربنه ولا يحاجينه بس الواكعه بي هي ماما ...

مرات يضربهه ومرات يكعد يبجي وياهه ويكلهه دمرتيني وهي دكله مواني ابوي السبب مواني !!!

اكثر ماجنت اعاني منه هي العقده النفسيه الي عندي الكل يعرف بيه ويكولون يمعود هاي مخبله بيهه خيط حته الجهال الي يلعبون وياي يكولون عليه قبس المخبله..

هذا الشي موبس اذاني لا حطمني دمرني بمعنى الكلمه كمت احبس نفسي بالمخزن ساعات طويله واشلع بشعري وحده وحده احس الالم بالبصيله واني مستمره لحدما يهدأ داخلي يله اطلع...

عشت وتربيت واني انسانه مريضه محطمه فاقده الحنان من الجهتين من الام والاب لحدما ماتو واني انتظر منهم عطف ولو بمقدار ذره بس جانو ملتهين بهمهم ...

ما ادري شجاب هاي الذكريات على بالي بهاي اللحظه بس يمكن لان شفت ابن عمي الي حقدي عليهم يوم عن يوم يزداد هم الي قتلو اهلي....

جنت كاعده بالمطبخ مال الشركه هذا شغلي خريجه بس اشتغل عامله او مساعده ويه العامله الاساس ماعليه بالشغل والتنظيف بس عليه الكهوه مال المدراء والضيوف ...

ماكو شغله ما اشتغلتهه بس طمع الناس والحيوانات الي بالمجتمع تخليني ما استمر بالشغله غير اسبوع وابطل ...

الي عرفته من ام حسن جاي مدير للشركه جديد اسمه بشار وشفته من دخل للشركه عرفته ابن عمي ..

هالشي خلاني ازداد حقد وغل هلكد متمكنين واني عليه اللكمه حسره وعيشتي ويه ساجده بفلوسي ...

اباوع ع سيارته من الشباك شلون راقيه وشلون اله صيت وسمعه بحيث من بدلو المدير كالو اجه مدير جديد بصمه وكل الموضفين فرحانين..

واني بنت عم المدير اشتغل عامله الرايح والجاي يسمعني حجي اكعد ابجي وادك والطم لحدما ارتاح بس كل هذا وما اعرف منين ابدي وشلون انتقم من عدهم...

حته الورث بابا انحرم من عنده ايام سوده مرت علينه كلما يروح لابو يطرده وكلما يدز ناس يرجعون يكلوله مايقبل بيك عانيت الامرين الفقر واليتم بحياتي...

صاحت عليه ام حسن قبس يمه كومي سوي كهوه للمدير ويكولون مايشربهه غير ساده

اسوي بالكهوه واكول يدري بيه اشتغل عامله هو عرف بيه اشتغل هنا لان تلكاني بالباب وكال شعندج كتله اداوم هنا بس عباله اشتغل موضفه ..

مايدري اشتغل عامله واودي كهوه واجمع الكاسات الفارغه راح يتقبلهه لولا ؟؟ خاف راح تتاذى سمعته واحتمال يطردني من الشغل..

رغم الكل يكول حلوه بس هاي الكلمه جنت اسمعهه دائما يكولون ليش وجهج حزين كل هالجمال وحزينه مايدرون بداخلي شنو؟؟

اخذتله الكهوه وامشي كمت استحي من نفسي من عيون الموضفين تجمع الدموع بعيني وارجع ابلع الغصه بس بسبيل احصل لكمه اكلهه لان ساجده سهله عدهه تبيعني هي ورجلي ...

دخلت للمكتب جانت السكرتيره مره جبيره يكلولهه ام هشام كتلهه هاي كهوه استاذ بشار...

ام هشام.. فوتي يمه خليهه ع الميز مدري طلع هو مدري بالغرفه لان اكو تفتيش اني هستوني كعدت...

قبس.. دكيت الباب مرتين بس ما انكر خوفي والرهبه الي بداخلي وجذب من امثل القوه ...

اجاني صوته وهو يكول تفضل!!!!

يتببببع .... احبكم

قمع المشاعر.... البارت الثامن..

للكاتبة زهراء ( روزايه)

قبس.. اجاني صوته كال تفضل بلحظه ترددت ورجعت خطوه ليورا ما اريد التقي بي ولا اريد يشوف وضعي عامله عنده ..

شكد تجاوزت عقبات وحدي وشكد احس نفسي قويه بس اي شي يخص اهل بابا يخليني لا ارادي اضعف واتذكر شكو ذكرى سيئه مرت بحياتي..

ام هشام السكرتيره.. شبيج واكفه بالباب ياخاله ماتسمعين كال تفضلي بعدنه يايمه مانعرف طبعه خاف يطلع صعب مثل القبله ويكطع رزقج ...

قبس.. ابتسمت بوجهي واخذت نفس وفتحت الباب طبيت اجت عيني على المكتب جان منصي راسه بسرعه افترت عيني على الغرفه الي كاعد بيهه راقيه بمعنى الكلمه فدشي حضاري ..

تقربت بخطوات بطيئه رفع راسه عليه على نفس وضعه القلم بيده ولازم فايل وعينه عليه لحدماوصلت يمه خليت الكهوه ع الميز ...

بسرعه شمر القلم وكام وكف وكال قبس !! علامات الاستغراب انرسمت على وجهه وهو يباوع عليه من فوك ليجوه ..

خليت خصله من شعري ورا اذني وكتله اي قبس شو تفاجات موتدري بيه اشتغل هنا!!

بشار.. للاسف ماتحريت وراج عبالي موضفه مو عامله هنا ولج شتسوين انتي كرامتج وين وتشتغلين هيج..

قبس.. شبيهه هاي الشغله موشريفه الالف بالعراق يشتغلن هيج المهم شغله شريفه ...

بشار.. ادري بيهه شغله شريفه بس مو لعمرج هاي للنسوان الكبار موانتي بهذا لبسج ..

قبس.. والله اريد اعيش استاذ بشار انت متمكن ماتدري بغيرك احنه ع كد حالنه...

جنت احجي بس ما انكر ارتباكي كدامه ما اعرف ليش ارتبك واخاف من اوكف كدامه حته اتلعثم بالحجي ..

دفع الكرسي ليورا واجه عليه وادي اثنينهم بجيبه صار قريب كلش ماكدرت اظل واكفه اكثر درت وجهي اريد اطلع بس صاح بيه..

بشار.. تروحين تكعدين يم ام حسن والي يريد كهوه ام حسن تودي منا لحد نهايه الدوام واجي عليج اياج ياقبس اشوفج تفترين بالشركه..

قبس.. ماحاجيته اخذت الصينيه وطلعت نظرات ام هشام عليه غريبه لان تاخرت جوه ماتدري شكو..

رحت يم ام حسن كوه اسيطر ع نفسي فجاه نزلت دمعتي درت وجهي لاتشوفني حسيت بذله موطبيعيه ..

اباوع ع نفسي ولبسي وشبابي الي مثلي هسه عايشه بخير اهلهه معززه مكرمه واني افتر من غرفه لغرفه يتامرون عليه الشياب ...

مسحت دمعتي بسرعه وظليت كاعده يم الشباك الي يطل ع الشارع العام حياتي مثل هذا الازدحام كلشي مزدحم داخلي تضارب مشاعر فضيع عندي..

اريد اخذ حقي منهم واريد انتقم واريد اكون بنيه بمعنى الكلمه تروح للدوام بعز وكرامه وترجع تلكه كلشي متوفر الهه بالبيت ...

هاي الشابه الصغيره تريد حياة كريمه حتلو متزوجه حالي من حال بنات جيلي ياريت عندي رجال قايم بواجبي ويغار ويخاف عليه ليش مخليني سلعه للرايح والجاي..

تعبت حيل تعبت واني احفظ بنفسي من العيون القذره مرات اخاف الله يعاقبني اتمنى لو انخلقت قبيحه ولا ذره جمال حته ارتاح ...

فززني صوت ام حسن من صفنتي خاله قبس غرفه الحسابات رايدين جاي اودي اني لو انتي شو جنج تعبانه!!!

قبس.. لا خاله هذا شغلي اني اودي كملي شغلج انتي ام حسن عليهه التنظيف وتفتر ماتكعد واني المدير الي قبلهم كال عليج الكهوه والضيافه وبس تتاخرين اطردج جان شايب اموت الموضفين تموت..

كمت سويت الجاي وعدلت ملابسي اني مامحجبه البس بنطرون وقميص دائم جسمي مو سمين ولاضعيف زين متناسق مايل للضعف اكثر شي...

اخذت الصينيه وطلعت امشي بممرات الشركه طبعا الشركه ترميم جديد ونظيفه اكثر الموضفين البيهه شياب ماعدا المشاريع لا شباب ...

وصلت لغرفه الحسابات الباب مامسدود حيل بس دكيت الباب ودخلت خليتلهم الكهوه مالتهم على الميز جانو الكاعدين 4 بالغرفه كل واحد على مكتبه..

اكو واحد ما اعرف حته اسمه يطلع عمره بالخميسن هيج عين وقحه عنده ماشايفه الي مثله شبع مي ورد وفواتح وهو صابغ شيباته ..

من طلعت ما احسه غير وراي ويصيح قبس عيوني!! انشلعت عيونك وذبوهن للجلاب التفتت علي بعصبيه كتله نعم رايد شي..

.. لا بس ردت اكول هيج شابه وحلوه ليش تشتغلين عامله اني ادور على بنت حلال بس كولي نعم واخلصج من هاي العيشه..

قبس.. صدك توترت واحس الحراره وصلت لراسي كتله تعرف شكد عمرك ؟؟ ماتستحي على شيباتك ماعندك بنات لو الدنائه الي عندك عاميه عيونك ..

... احترمي نفسج ولج لا اكص السانج الظاهر ماتعرفين استاذ فلاح منو ادفعج ثمن هذا الكلام..

قبس.. حجي روح اكعد بمكتبك موزين عليك تمشي هواي فقراتك تعبانه ...

عفته ومشيت واني يوم عن يوم اكتشف احنه البشر مانفرق عن الحيوان غير بس عدنه عقل واصلا العقل الي عدنه اكسباير...

بعدني امشي بالممر واجه بوجهي بشار بسرعه وكفت كتله خير ان شاء الله تظل كلما تشوفني لازم توكفني..

شو هذا بسرعه سحبني من ذراعي جانت اكو غرفه مال صادرات فارغه مثل المتروكه ..

ضاغط ع زندي بقوه بس عصبي حيل حجه بنبره تهديد وما انكر فعلا خفت من عنده..

بشار.. حذرتج كتلج لا اطلعين لولا؟؟ شنو انتي حضرت جنابج تعاندين لو شنو ؟؟ عقل ماعندج تفترين بطولج بين كومه زلم وين رجلج عنج الي متزوجته شنو شغله وانتي تشتغلين بمكانه..

قبس.. ايدي وجعتهه استاذ عوفني ..

بشار.. قبس قسما بالله اذا لمحتج خارج الغرفه اطيح حظج واطردج من الشركه واظل وراج لحدما اكسر راسج سمعتي لواعيد براسج اليابس؟؟

قبس.. عوف ايدي افتهمت !! نتر بايدي حيل حسيتهه راح تنخلع ومشيت ع السريع من يمه حته الصينيه مدري وين عفتهه ..

مخبل موصاحي كالتلي خالتي ترى يحبون القتل وعدهم المره للكتل والنوم بس عابتله شلون شايف نفسه...

رحت كعدت يم ام حسن واني افكر شراح يخلصهه صار شهر اشتغل بهدوء بس اجه المدير الجديد احس نفسي بمغامره كلما اطلع لازم اترزل ...

موخوفا من عنده ماطلعت بس محد طلب جاي وكهوه بعد لحدما صار نهايه الدوام ودك جرس يعلن على انتهاء الوقت وبدت الموضفين تطلع ...

اخذت جنطتي لبستهه صفح وفتحت قراصه شعري وعدلته باصابيعي قصير هو يوصل لاكتافي كصيته قبل فتره لان احتركت اطرافه جان كلش طويل..

طلعت بعد ماسلمت على ام حسن بهذا الوقت يصير كلش ازدحام لان الشفت المسائي يداوم وتصير الزم اخوك لايضيع واحد يضرب بالثاني...

من طلعت تلكتني ام هشام كالت المدير يريدج همزين لحكت عليج قبل لا اطلعين...

اخذت نفس عالي وزفرته شيريد من عندي هالمدير الشايف نفسه رحت اشوفه شيريد جانت سكرتيره ثانيه كاعده شنو هاي والله نظام عدهم..

دكيت الباب وطبيت ظليت واكفه لان جان يصلي صايره بجانبه واباوع علي شلون يصلي يكوم ارفع راسي ويه طوله يكعد ادنك لحدماحسيت ركبتي اوجعتني..

بيني وبين نفسي كلت خوش تستر بالدين وهم كتلو اهلي ويتموني وهسه يصلي ومسوي نفسه يخاف الله...

كمل صلاه وكام رفع السجاده خلاهه ع التخم ولبس حذائه وافتر ورا الميز كعد واشرلي تعالي اكعدي..

كعدت بالكرسي الي كدامه وانتظره شيحجي كتله استاذ تاخرت اني اكوشي اريد اروح؟؟؟

بشار... شوفي قبس انتي موبس بنت عمي انت عرضي وعرض عائله بيت حجي صالح يعني اي شي يمسج يمسنه ويمس بناتنه ...

اني ماجاي اذمج ولا اريد اسمعج كلام جارح وما اعرف الظروف المريتي بيهه شنو بس الي اعرفه انتي وحده رعنه صلفه ماتخافين ...

قبس.. فتحت عيني على كبرهه متفاجئه من كلامه لا يستحي ولا يخاف شكد ارعن المصخم خلاني ماعرفت شكول لان ما انطاني مجال...

بشار.. انتي اختاريتي هاي العيشه انهزمتي من عدنه وعيشتي ابيئه زباله لو ظاله حالج من حال البنات وهسه كليه وماخذه حقج وزياده ...

قبس.. استاذ الجنه مالتكم ماريدهه ومثل مادكول انتي رعنه منو كالك تحجي ويه وحده رعنه ترى عادي تريد تطردني ماكو مشكله الف شغله اكو لعلمك يجوز ماتصدك هاي الشغله يمكن العاشره الي اشتغلهه وابطل من ذاتي ..

يعني اني متعوده على هاي الوضعيه موفدشي جديد واني مخليه ابالي وجودي هنا مؤقت ...

بشار.. وين رجلج؟ ليش انتي تشتغلين وهو وين؟

... هم يشتغل بس يصرف ع نفسه لان اسم الله عليك رجلي سكير وشراب يوميه الي يحصلهن يجيب بيهن بطل لروحه واني لازم ادفع اجار لذلك اشتغل حته اكدر اعيش..

.. المن ادفعين؟؟ موكاعده ويه ساجده انتي؟

... اي بلي كاعده وياهه بس ادفعلهه لان هنا السكن غالي ونص عليه ونص عليهه ...

بشار.. منو جابرج على هاي العيشه موجنتي معززه مكرمه اكو واحد اذاج بالسنتين العشتيهن يمنه..

قبس.. الظاهر على حضرتك تحب تسمع الحجي ينعاد وهم راح اعيده انتم ناس قتله مجرمين قتلتو اهلي وتبريتو من بابا وخليتو شاف الذل ما اريدكم ولا اريد النعيم مالتكم ولو اعرف اسكن بالشارع ما ادك بابكم...

بشار.. زعطوطه!! هسه اسمعيني زين هاي الشغله ماريدهه انتي شفت CV  مالتج انتي خريجه معهد وراح احولج حسب شهادتج وتعوفين هاي الشغله لام حسن او اجيب وحده جبيره بالعمر..

قبس.. ليش استاذ شبيهه الشغله لو ماتحب يكولون بنت عم المدير عامله لان مايصرفلك..

بشار.. لا موهيج بس انتي عينج صلفه ومثل ماكتلج رعنه وتوكعين نفسج بمشكله وماتحسين عبالج بطوله هاي ...

عندج اختيارين يا اما تبطلين وماتشوفيني وجهج يا اما تشتغلين حسب شهادتج بقسم الحاسبات بس شرط ويه الشفت المسائي...

قبس.. ليش ويه المسائي ما اكدر؟؟؟

بشار.. الصباحي راح يحجون وليش حولتهه من عامله للحسابات ومحد يفتهم بان عندج شهاده راح يتهموج واحتمال يطلعون عليج اشاعه ...

لذلك بالمسائي احسن واهدء والموضفين اقل والي وياج كلهن نسوان كبار يعني ترتاحين احسن من الصباحي بهواي..

قبس.. محتاجه الشغل حيل وما اكدر ارفض مابيه حيل مشعول الصفحه عزيز يظل يدك ع راسي يريد شغل وساجده تلعب بيه جوله ..

كتله اي موافقه هاهي جان يكلي يله تكدرين تروحين امداا حته ذوق ماعنده طردني وطول ماهو يحجي جدي بشكل لاتروح عينه لامنا ولامنا...

طلعت تمشيت شويه حته اشوفلي كيه اصعد بيهه مااصعد بتكسيات ابد هو بالكيه ويوميه متعاركه...

....

شجن.. بدت رجلي تتحسن وكامو ياخذوني علاج طبيعي مرات بابا واليوم الي ماموجود يجي غيث ياخذني وماترمش عينه وهو يباوعلي بالمرايه ...

امشي عليهه ببطء بس احس بيهه انحراف اكللهم يكلولي لا بعدهه حته اكل لغيث ماتشوفهه يكلي غير طلقه بالعظم موبسهوله ترجع طبيعيه..

السالفه انسدت لان بشار فتح القضيه ودزو ع الشهود ووائل الكلب جاب ابو الامن وحجه مثل ماكال وائل وراحت السالفه وصار هو البطل الخارق لان نقذني...

صارت رجله طويله يوميه جاي بس ما اطلع حته اسمعه يسال عليه واسوي نفسي نايمه ...

غيث مايجي الا بشغله لو يخابرونه اهلي ياخذنه للعلاج الطبيعي بس تواصلنه مستمر على نفس حبه وحنيته...

حته كمت اساله خاف رجلي يبقه بيهه انحراف واظل من امشي مثل الي اعرج جان يكلي حتلو حبيبتي كلج على بعضج حلوه ...

دائما يخليني مرتاحه من كلامه وانسى اليأس الي يتسلل لداخلي ...

بشار يوميه يسالني لو يخابرني شلونج محتاجه شي اكله لا حته عمر ما احس غير علاكه الحلويات يم راسي الله رزقني باخوتي من اشوف خوفهم وحنيتهم اكول لاتخافين ياشجن ...

هدى على ابواب ولاده واجت يمنه وفرح اجت بحجه صديقه هدى البنيه مامسويه شي بس اني ماحبهه حتلو تحب بشار وتتوددله بس اني ما ارتاحلهه...

من اجت كالت راح اظل يمكم منا لمن تجيب هدى تساعد ماما بالشغل وحته اني تجي تسالني محتاجه شي اكلهه لا...

تحجي عليه فاديه دكلي انتي نحيسه والله البنيه حبابه وماعدهه اذيه بس انتي تكرهيهه..

..  ولج مو اكرهه بس ما ارتاحلهه لان اشوفهه ساحله نفسهه ع اخوج..

... وانتي شعليج ساحله نفسهه ع رجلج بنيه تحبه وهااا خليهه بعلمج لوما شايفه مجال من عنده ما يوميه جايه...

.. يعني بشار هم يحبهه؟؟

.. هو اخوج مايحب غير روحه وامه واحنه هيج شويه حاصرنه بزاويه كلبه بس موقصه يحبهه بس احتمال هم معجب بيهه از راغبهه..

شوفي ولج شجن فرح تربت احسن تربيه وبشار يدري بهالشي ومن صغرهه هي تحبه يعني اخوج اذا قرر يتزوج زواج عادي اول مايختار فرح لان يعرف معدنهه شنو..

وصدك ترى فرح مؤدبه بشكل طاحظهه لو ساحله نفسهه علي بس شبيج لو اني بمكانهه يجوز امرغل روحي غير تريد تلفت انتباهه..

.. طالعه عينج ست فاديه كومي اقري موبعد يومين امتحاناتج ..

.. اي راح اكوم اقره عربي لان راح اجل الاسلاميه..

.. ولج عوبه هي اسلاميه دين محمد ليش تاجلي..

.. شسوي يا اختي موزينه بالدين صديقتي اسمهه آشين مسيحيه وهي تضرب درس الاسلاميه واني وياهه اكول خطيه تظل وحدهه وهسه من اجيت راجع ما اعرف كلشي..

... دمشي ولي هسه تعمين على نفسج وتجيبين معدل قليل..

.. يله يمعوده اخوج عنده فلوس اظل اتلوكله لحدمايقدملي اهلي بس خلي انجح..

... جانت المخده بحضني شمرتهه عليهه يله كامت دومهه لا ابالي وضاربه الدنيا جلاق...

صار العشا وصاحتنه ماما اني اكوم امشي ويه الحايط لان كالو لاتضغطين عليهه مشيت على كيفي لحدماوصلت للسفره ..

احنه ناكل ع الميز بس لان فرح وهدى يمنه وجهال فرشنه سفره وكعدنه سوالي مكان بابا وكعدت بصفه  وفرح كدامي وبشار يغسل يم المغسله اجه كعد..

هالمره شفته بعينه شلون باوعلهه بابتسامه حلوه مثل غيث من يباوعلي هسه ماعرفتك يابشار تحبهه لا لعد ليش مخلي البنيه معلگه ...

من كملنه عشا فرح وفاديه غسلن مواعين وبشار طلع واني وين اروح راسلت غيث شويه ونمت ....

...

قبس... يوميه ارجع  هلكانه من التعب للبيت استلم طلبيات تجهيز كيك وكبه والي عنده مناسبه اطبخله سبع صنايع والبخت ضايع ...

بسرعه سبحت لان الجو حار وبدلت ولزمت المطبخ عندي كيكه عيد ميلاد وطلبيه مال مقبلات بلشت اشتغل بيهن وكل الي احصله يادوب مصرف ودفع سكن ...

ومرات انكتل وياخذهن من عندي حته يشتري شرب بيهن كل هذا متحملته بس حته احافظ على نفسي ...

مندمجه بشغل وشفته فتح الباب وعلاكه البطاله بيده طب بوجهه لثلاجه ويفتح بالگدور ع الطباخ شمحضره اكل طال صبيلي ...

هو يشتغل حارس مال كراج سيارات ما اشوف من عنده ربع لان كلهن لروحه ماحجيت بسرعه عفت شغلي وصبيتله اكل ورجعت اكمل الكيكه...

عزيز.. عندج فلوس هاي ساجده اجت الصبح تريد فلوس دكول الايجار مزودي ودافعه هي ابمكانه ...

قبس.. لا والله ماعندي راتب بعد ما اجه وهاي الطلبيات يله مصرف لبيتنه هسه اني اروح الهه واكلهه تنتظرني ..

عزيز..خلصيني منهه لاكلساع ناطه عليه جنهه گنفذ ( قنفذ) ..

قبس.. اكلك عزيز غيرو مدير الشركه وطردني من الدوام الصباحي يكول مامحتاجين وحولني للمسائي..

عزيز.. اي شكو بيهه المهم اتجيبيلنه لگمه وين ماجان هو المسائي ل٨ ويخلص..

قبس.. غميت روحي ع هذا الرجل الي بس اسمه ذكر عبالي راح يغار عليه من حركة كلبي كمت اسب بامي وابوي باهله بكل عشيرتي على هالعيشه الگشره...

ما كعدت لحد ٩ بليل بين تنظيف وشغل كلت انام همزين باجر اداوم ب٢ عندي طلبيه الصبح اخلصهه..

صارت ب١ لبست جنطتي صفح وشعري مسويته ذيل حصان وطلعت اول ماوصلت للشركه خنكتني العبره شلون تنزل الموضفات من احدث السيارات واللبس شلون ...

الشفت المسائي يختلف عن الصباحي بمعنى الكلمه الموضفين راقين وشباب اكو كبار بالعمر بس اناقه وينگطون فلوس وحظي يركض ورا الربع لويحصله لومايحصله...

ما اندل شغلي وين اول ماطبيت بصمت وكلت خلي اروح لابن عمي العود هو يدليني مو المدير..

جانت الموضفين هستوهم يجون بس السكرتيره موجوده سلمت عليهه كتلهه اريد اشوف المدير كليله قبس...

شالت التليفون حاجته كالهه خلي تجي دكيت الباب واخذت نفس لان كلما نتواجه لازم نتعارك..

فتحت الباب وطبيت كلت السلام عليكم جان واكف ويدك باصبعه بهدوء ع الميز ويخابر ...

بس اجت باذاني فرح اني امر عليج واخذج لاتروحين...

يتبببببع.... متابعه ممتعه

قمع المشاعر.... البارت الحادي عشر..

للكاتبة زهراء ( روزايه)....

لا محسوب ع الميتين

ولا محسوب ع العدليين

انه المحتار وي روحه

والما يدرون بجروحه

شايب عمره بالعشرين

...

قبس.. انهاريت واني اسمع صوت الشرطه ما ادري شجاني بسرعه تراكمت عليه السنين جنت فرحانه بيومي فرحتي اختفت وبس لازمه ايد بشار واتوسل بي لايسلمني للشرطه تضاربت عندي الافكار وتخيلت راح يسلمني وينتقم من عندي...

لحدماتعدتنه الشرطه واني بعدني لازمه ايده حيل اريد اخذ نفس ما اكدر مثل الكبر حسيت بغداد ...

بشار.. قبس شجاج شمسويه وهيج تاخفين ومد ايده لزم ايدي وبعدهه عنه ..

... انتبهت لحالتي بس بعده الهلع بداخلي رجعت ع الكرسي مالتي وحطيت اديه على وجهي وبجيت احس بالم ياكل جسمي گلبي يوجعني وصدري ثكيل...

اكو صوت براسي يحجي بس الافكار السيئه واكو صوت ضعيف كلش يقابله يكلي لاتخافين فخذي مابطلت من كدما اكرص بي بس اريد انتبه ع نفسي اريد استجمع قواي من جديد...

يحاجيني بشار قبس ماراح تحجين شلون اخذج لاهلي وانتي بهاي الحاله موراح يسالون شبيهه؟؟

قبس.. الله عليك لاتاخذني للبيت وين ماجان حتلو اظل بالسياره اي مكان بس لاتاخذني للبيت جنت احجي بلاوعي ما اريد احد يشوف حالتي ولا اريد اشوف اي بشر ...

بشار.. وين اخذج بهالليل وباجر وراي دوام من الفجر للبصره ياقبس احجي شبيج اني اساعدج ...

قبس.. جفت الدموع بعيني والكلام سكن بلساني ماحجيت ابد وهو من كدما سأل سكت ماعاد السؤال...

بس طلع تليفونه لواحد اسمه محمد اسمعه يخابر بي واني وجهي ع الجامه واضافيري منبته بفخذي...

اسمعه يكله محمد اوكفلي اباب الشقق وانطيني مفتاح الشقه محتاجهه وهذاك لازك بعينه جان صوته عالي يكله ها ولك بشار اول تالي ادور شقق تالي الليل...

... محمد بلا لغوه زايده كتلك محتاجهه جيبلي المفتاح وبعدين افهمك الي عرفته هاي الشقه مواله هاي لصديقه ...

عم الهدوء وتليفونه ماسكت ابد ساعه امه وساعه ابو وساعه اخته دكله من تجي جيبلي حبشكول وياك وهو يكلهه دزي عمر خاف اتاخر...

لحدما وصلنه منطقه حيل حلوه انتبهت ع اللوحه مكتوب عليهه شارع حيفا وسحب تليفونه اتصل بمحمد وكاله هاهي ظل واكف يمك...

وصلنه لمجمع مال شقق ونزل هو جاب المفتاح اني ما باوعت ولا شفت شي والمنطقه حيل هادئه رجع صعد وحرك السياره يوكفهه بالكراج والتفت عليه كال يله انزلي...

نزلت ورجليه صايره مثل خيوط بيت العنكبوت بهالضعف هذا الزم بالسيارات وامشي شكو شي كدامي استند علي وهو يباوعلي بهدوء وماحجه...

جانت الشقه طابق ثاني ماكدرت اكمل الدرج رجليه محدده كعدت على الدرجات وهو وراي جان عايفني براحتي ومايدخل ابد ولايحجي...

بشار.. قبس اساعدج تكدرين توكفين؟؟

... هزيت راسي بمعنى اااي وكمت لزمت الحايط واصعد درجه درجه وهو وراي لحدما وصلت للدرجات الاخيره ردت اوكع لزمني الدوار...

حسيت على ايده سندتني من ذراعي وصار بصفي كال امشي ع كيفج رجليه اسحلهن سحل كوه وصلت الشقه وهو يفتح بالباب ولازمني من ذراعي ...

الي يشوف حالتي ولزمته يكول جايبهه بالقوه لهذا المكان فتح الباب وفوتني قبله والتفت سده جانت الشقه ماثثه كامل وبيهه تخم بالصاله كعدني علي ورجعت راسي ليورا...

محتاجه علاجي بس ما اكدر اكله ما اريد احد يعرف بيه مريضه احارب بكل قوتي بس حته اصحى ومحد يكول مريضه على الرغم حسيت بامان هسه بس بعدني ما اكدر اتمالك نفسي...

كعد كدامي وماتفصل بيناتنه غير الطبله وخلا السويج والتليفون على الطبله وعينه عليه...

بشار.. ماراح تحجيلي شبيج ؟؟

.. هزيت راسي لااااا

... ولشوكت مثلا تبقين مهزومه وكلما تسمعين صوت الشرطه ياخذج الرعب وبعدين الى متى اظل ضامج هنا احجي قبس اساعدج...

قبس.. بشار عزيز وساجده ورجلهه اخذتهم الشرطه..

.. ليش اخذتهم وانتي ليش مرعوبه؟؟ وشنو الي ادلين بي..

... اخذت نفس عالي وبديت احجيله ورا زواجي ب٦ اشهر اكتشفت عزيز يشرب وياخذ حبوب من خطبني ووافقت علي جان ماعنده احد بس هو وامه وابو متوفي وجانو عائله  محترمه ورا زواجي بشهرين وماشفت اي شي من عنده يصوم ويصلي وتقريبا ارتاحيت شويه بس ماتت امه وكانو هي جانت حاميته...

بسرعه كام يسهر برا ويجي سكران اتلكا ادك والطم ويحلف بس  هالمره وبعد مايعيدهه بس تعود علي والجماعه الي ويا حبوب وشرب يعني صار مثلهم...

عزلت نفسي عنه ومالي علاقه بي وهو هم لاياذيني ولا اله علاقه بيه لان عايش بعالم وحده بس شرب ونسوان لا يدخل بيه ولا ادخل بي...

بشار.. احنه من اجيناكم موكلتي هو اخو رجل ساجده شلون عائله محترمه بعد؟؟

... اخو من ابو بس امهم تختلف وام عزيز خوش مره وجان اصلا ماتخلي يختلط برجل ساجده بس من ماتت صار يلعب بكيفه كتلك لحد ما اجه يوم وشفته يجيب علاليك حبوب ويا بوقتهه حجيت وتعاركت كال موالي وثاني يوم اخذهن...

صح بعد مايجيبهن يمي بس ادري بي هو ورجل ساجده يبيعون حبوب والمخزن متروس شرب وكل انواع الحبوب ومره بالصدفه اكتشفت وحذروني ما احجي وكلت اني شعليه هك متعودين...

اليوم من اجت الشرطه واخذتهم لان لزموهم يبيعون خفت لا ياخذوني وياهم هاي كل القصه...

بشار.. صح خفتي وحقج بس ليش هالهلع هذا قبس انتي ما انتبهتي ع نفسج وكانو مسويه جريمه قتل ماكو هيج خوف وانتي مامسويه شي وتكدرين تنكرين ودكولين ما ادري بيهم مدام ابيتج...

قبس.. سكتت ماجاوبته ما اكدر اشرحلهه حالتي لان يرادلي يوم كامل وماراح اوصله احساسي بضبط ...

من شافني سكتت هو هم سكت كام وكال راح اقفل الشقه بين ما اجيب عشا واجي كومي غسلي ارتاحي....

طلع وسمعت قفل الشقه كوه كدرت احرك نفسي للحمام غسلت احس المي ينزل على بشرتي يحركهه نزعت بنطروني واشوف فخذي مشخط وبي دم وهسه بديت احس بي يحركني وكمت احس بالالم ...

جان اكو ديتول وكلينس عقمته واني ويه كل تعقيم تشوغ روحي من الالم عدلت نفسي وغسلت وجهي من كدما عيوني مورمه احس روحي موقبس...

الشقه جوهه زين بس اني بردت حيل رحت ادور بالغرفه لكيت بطانيه بجنطه فتحتهه ولفيت نفسي بيهه ورجعت لمكاني كعدت...

شويه واسمع صوت القفل مال الباب التفتت علي شفته فتح الباب وخلا العلاليك ع الميز الي صاير بالجانب واجه باتجاهي ...

بشار.. هااا بردتي ماطفيتي التبريد !!

.. لا لكيت بطانيه دفيت هسه بعدني احجي ودك تليفونه كمت بيه مابيه اخذت العلاليك ورتبتهم ع الميز واسمعه يخابر بامه يكلهه لا عندي شغل ما اجي اليوم ابات برا...

ظل شويه يسولف بالتليفون وما اعرف عليمن يحجون بس سالفه طبيب ويكلهه نفسيتهه تعبانه ع كيفكم وياهه ..

سد التليفون واجه كعد اشرلي اكعد جنت واكفه اجمع بالعلاليك ادور ع حاويه زبل اذبهم ..

من شويه ارتاحيت وبديت استعيد قوتي مادري ليش صابني الخجل من عنده مع العلم اول مره اشوف هيج شخص ابد مايباوع واذا اجت عينه بعيني اثناء الكلام يكون جدي بشكل وهادئ واسلوبه بالحديث حلو...

جنت ما اشتهي اصلا اني من يصير بيه هيج اترك الاكل ايام بس كلت فشله اكوم ظليت اكل مقبلات وهو جدا طبيعي اكل وكام ...

بسرعه لميت الاكل خليته بالثلاجه وغسلت ورحت للبطانيه تلفلفت بيهه وهو مدري وين راح كلت خلي اكوم اشوفه وين؟؟ شفته بالغرفه يصلي ورجعت لمكاني...

ورا ماكمل صلاه اجه كعد وكال اي ست قبس هسه الحل شنو؟؟ باجر دوام عندي بالبصره اكعد هنا شلون ودوامج ؟؟ والى متى تظلين مهزومه وانتي ماعرفتي شي يجوز طلعوهم؟؟

قبس.. لا عادي باجر الصبح ارجع للبيت شويه صارت عندي رهبه بس احجي جذب اني وين ارجع اصلا مجرد ما اتخيل يسجنوني وياهم مدري شيصير بيه بس مثل ماكال خوما اظل هنا وفوكاهه بشقه صديقه...

بشار.. باجر لا اداومين ظلي هنا واني هم ماراح اداوم واني اروح واشوف شنو مصيرج واطمن عليج يله او انتي حره تريدين اخذج يم اهلي ؟؟

قبس.. لاااا لاااا

... ومثلا الى متى تظلين مهزومه شكتلج قبس فكري بنفسج زين واني وياج لحدما توكفين ع رجلج جاي تحطمين نفسج وماتدرين بعدج ابدايه العمر شراح تسووين بالباقي وانتي عايشه برعب..

يابنت عمي احنه ناس انخاف الله بكلشي ابعدي هاي الافكار احته قتلنه اهلج جدج رجال حجي وتحمل كل كلام الناس الزين والموزين بسبيل ماياذي ابوج...

المذنب الوحيد وسبب وصولج لهاي الحاله ابوج هو زرع بطفولتج هالشي وانتي اجيتي كملتيهه بعقلج الحجر ..

الي عليه كلته وخليهه ابالج يجوز بعدج ماتعرفيني بيه طبيعه انصح مره واثنين اذا تعدت الثالثه وانتي ع هاي الحاله اجيبج للدرب بالقوه ...

قبس.. تهددني؟؟

بشار.. احذرج اني هسه ماحجيت لان شفتج متاذيه ولو ماجايبج لهنا ولو ماخذيج وياهم شنو موقفنه بطلي هالاستخفاف وفكري بعقلج تريدين تكرهينه اكرهينه قوي نفسج وابني حياتج وبعدين سوي الي يعجبج موانتي مهلسه الجناح ماتملكين كلشي ولاعندج سند تحتمين بي وتمارسين القوه غصب عن نفسج موهيج الحجي يابنتي....

كومي نامي بالغرفه والصباح رباح وفكري بكلامي زين لحد الان صبري مانفذ وياج وجاييج باسلوب وتعامل مثل اخواتي حته لا اذيج بيوم ...

قبس..حجه هيج وكام للمطبخ اسمع صوت الطكه مال الجداحه واني كمت للغرفه مددت جسمي مكسر وعيني ماجاي تاخذ نوم ظليت فوك الساعه افكر بكلامه شفت الضوه مال الصاله طفه كلت اكيد نام...

ساعه اغمض عيني وساعه افز برعب الالم هاج عليه بس احمد الله كدرت اتماسك نفسي ورجعت لطبيعتي قبل جنت اظل ايام اني ع هيج وضع...

باوعت لساعه تليفوني ب١١ عطشت طلعت اريد اشرب مي طلعت من الغرفه للمطبخ امشي ع اطراف اصابيعي شربت مي ورجعت...

ويه رجعتي شفت ضوه تليفونه اشتعل اجته رساله الفضول الي عندي خلاني اتقدم اشوفه نايم لوكاعد مو اقره الرساله امشي ع كيف وصلت قريب علي وجان افز فزه كلبي احسه طفر من مكانه...

فززني صوته وهو يكلي هااا رايده شي وعبالك عنده عيون ورا بسرعه كتله لااااا  وركضت للغرفه تغطيت وغطيت بنوم عميق...

كعدت ثاني يوم الساعه ب٨ ونص لكيته بالمطبخ واكف ويشرب جاي كتله صباح الخير..

... صباح النور شلون صرتي؟؟

.. زينه الحمدلله

.. يمج ريوك تريكي واني راح اروح اشوف السالفه شنو وارجع ..

طلع وقفل باب الشقه جان منطيني ع هواي اكله مااريد اروح يكول هاهي ياترى هو طبعه هيج لو تمثيل لان عشتهم يمهم واتذكره يكولون راسه يابس والتزامه بالعادات يفوق جده ...

لاعندي ملابس لاشي اختنكت من البنطرون رحت غسلت ورجعت لثلاجه لكيت بيهه جبن سويت لفه وكلاص جاي وكعدت اكل..

انتبهت ع وضعي اني شنو اريد وين راح اوصل بهاي السوالف لو استقر حالي من حال البنات يم رجلهه واتحمل الزين والشين لان هذا اختياري !! يا اما اتنازل عن كلشي وارجع لبيت جدي او ع الاقل اكعد ويه نفسي واراجع حياتي واشوف الغلط وين؟؟

تاخر هواي بشار لحد الساعه ب١١ وهو ماكو ولاعندي رقمه اتصل بي اباوع ع تليفوني محد متصل بيه لا ام ولا داده ...

ادور ع شي اسوي ماكو بطبيعتي ما اكدر اكعد احسن نفسي زينه ومنتعشه وكانو الخوف والهم الي عندي حملتهم لغيري واحس نفسي خفيفه...

متعوده دائما اغسل راسي لان دهني واذا ماغسلت يكوم يحكني كلت خلي اكوم اغسله شو هي شقه لو ماثثه ومتوفر بيهه كلشي...

طبيت للحمام بس عفت الباب مفتوح لان اكو حوض جبير دنكت راسي وبديت اغسل بي...

كمت اغني باغنيه قديمه احبهه حيل .. لا ام تحن لبجاي لاخاله وياي داده حسن لاخاله وياي...

كل الوجوه ثگال من يگبل هواي داده حسن من يگبل هواي

داده كل الوجوه ثگال من يگبل هواي داده حسن...

صوتي حلو حيل بالاغاني جانو يكولون مثل صوت امج وجنت مندمجه ويه الاغنيه والحن بيهه كملت ولفيت شعري بحجابي مااحب استخدم خاولي غيري وطلعت...

تفاجات واني اشوف بشار جاي وكاعد وكانو جان يسمعني بس اي علامه على وجهه ماكو بس كتله من يمته اجيت...

بشار.. قبل شويه اخذي اتغدي اني تغديت ما اريد وحضري نفسج حته انروح..

... وين انروح؟؟ وشنو صار؟؟

.. ماكو شي ساجده ورجلج بالبيت اليوم مطلعيهم لان مالاكين شي عدهم والظاهر واسطه خالتج قويه جايبه راس ابو التحقيق..

قبس.. يعني موجودين من الصبح؟؟ مادري ليش خنكتني العبره لا احد سال عليه لا كالو وينهه ؟؟

بشار.. موهسه تغنين داده حسن هو هذا حالج وبعدين شسوين بسؤال هيج ناس قذره شلون عايشه ويه رجلج ما ادري..

قبس.. سكتت كلت بكلبي حقك ماتدري معذور رحت اريد انشف شعري لكيت شسوار صحت بشار يصير استخدمه؟؟

... استخدمي هي هاي الشقه صايره وقف !!

بسرعه نشفت شعري ولبست شالي واكلت اني وواكفه لان ما اشتهي وكتله يله ...

طلعنه سوه وبس صعدت التفت عليه كال اسمعي الي يسالج وين جنتي؟؟ كولي يم بيت جدي..

قبس.. اعرف ترى موغبيه اني!!

.. هاااا ما ادري الي ادري بيج عقلج قيد الاستعمال كلت انبهج للضروره..

... ليش هيج ماخذ نظره عليه ترى عشت ايام بس الله يعلم بيهه وصلت لهذا الحال الي غيري تعتبر بطله..

... بطله ع شنو؟؟؟ زواجج لو شغلج قبل ؟؟ لو عيشتج وتربيتج ساجده ؟؟

.. انت شكد اناني وشايف نفسك وعندك البنيه اذا اشتغلت معناتهه انهانت ومعناتهه موخوش؟؟

...لج لزمي السانج!! وبعدين انتي كلتيهه بنيه والبنيه ماتشتغل بالاماكن الي اشتغلتي بيهه عبالج ما اعرف مشتغله خدامه ابيت  ناس بالكراده امهم دكتوره وعدهه 5 شباب ...

ومشتغله باكثر من محل بالمولات والقيصيرات؟؟ ومشتغله بعقد يومي بالمستشفى وتلزمين خفارات...

شتريدين ست قبس اكعد امجد بيج واكلج بارك الله بطولاتج وانتي من ساسج لراسج غلط..

قبس... كل الشغل الي عددته جنت محترمه نفسي بي اني محتاجه وهالشي جان غصب عني اطلع اشتغل . 

بشار.. عليمن تزوجتي علمود تصرفين علي شنو واجبه اتجاهج ماسالتي نفسج اكعدي وانطمي بالبيت وغصب عنه يجيبلج لگمه تاكليهه محد مات من الجوع ..

قبس.. الي افهمه من كلامك معتبرني من البنات الموخوش بسبب شغلي؟؟

بشار ... اني رجال شرقي عربي متخلف همجي من جانب عرضي شتريدين تسميني سميني ...

وخلي اكون صريح وياج من اشوفج ابدي اكسر اعظامج واحد واحد لو ما انهزمتي بذاك اليوم جان هسه محققه كل احلامج وابن ابو الي يحاجيج بس رعونه الي عندج خلتني ما اثق بيج اعذريني ع هالجمله بس الصراحه واجبه...

قبس... ما طالبه ثقتك وكول عني رعنه وكلما اراجع نفسي وابدي الوم بروحي ليش انهزمت بس بكلامك هذا همزين خلصت من تخلفك..

بشار.. ماتخلصين وراج وراج والبارحه كتلج مرتين سياسه المره الثالثه بالقوه واني رجال فارغ واريد اجرب كل الاساليب وياج واشوف يا اسلوب يروضج من جديد..

وهسه وصلنه لبيت خالتج انزلي وانتبهي ع نفسج ورقمي بكارت الشركه من تحتاجين شي دكي عليه ...

قبس..ولا انطه مجال للحجي والي يقهر من يحجي عينه ليكدام واني جني وحده ملكوفه ملتفته علي واسولف وهو مبتعد مني متر عبالك راح اكله متملق بليد شايف نفسه عود شوفوني اني مدير وشخصيه ...

نزلت وطبكت الباب حيل ومن انداريت كال مكسوره ايدج !!!

ضحكت ومشيت هذا الي الله قدرني علي ما اكدر اجاوبه لان كلامه صح...

فتحت الباب وطبيت محد بالبيت بسرعه للحمام سبحت وبدلت ارتاحيت البنطرون خانكني وعقمت فخذي ورحت خليت علاجي بالجنطه منا وهيج يمكن راح تجيني الحاله هواي...

حته طلبيات هاي الايام ماكو وعبالك انكطع رزقي لزمت البيت تنظيف لحد ماوصلت للمطبخ اسمع ساجده تصيح من الحايط يفصل بيناتنه حايط صغير...

طلعت برا كتلهه هاا خاله؟

... وخلخاله بعيونج وين جنتي ؟؟ انتي خبرتي علينه ام الدروب..

.. لا والله اجيت من الدوام لكيت الشرطه ماخذتكم وحرت وين اروح بهذاك الليل ورحت لبيت جدي..

.. هااا هسه صارو عندج بيت جد اسمعي ولج وحق الله باشاره وحده تعرفين شسوي وارجعج خبله مثل قبل واخلي عزيز يمج ليل نهار...

قبس.. عليمن تهدديني يمج بكاعج ماخلصانه من شرج شتريدن تكبسلين وتشربين وحدج  شكو تذبين بلاج عليه...

...خاف الج نيه تعترفين علينه تعرفين ساجده شتسوي واني بالسجن وادز عليج جماعتي وحق الله ياقبس اردج خبله وتقضين حاجتج جواج اذا ما رجعتي لوعيج وعبالج بيت جدج يخلصوج من عندي..

... سديت اذاني عنهه ما اريد اسمع ما اريد بسرعه ركضت للمطبخ وسديت الباب واضغط ع راسي ما اريد اسمع اي شي ما اتحمل هالضغط هذا ركضت لعلاجي اخذت حبايه وبعد ما ادري بنفسي علاجي يخليني نايمه مده ٢٤ ساعه حته ثاني يوم دوام ماداومت...

بين النايمه وبين الحلم حسيت على شي يمشي على جسمي فتحت عيني واشوف عزيز بس بالشورت ويتلمس بجسمي عطت عيطه يمكن وصلت للشارع وهي عيطه هي وكفه على حيلي ...

عزيز.. هذا مصير الي يخل بلاتفاق موكتلج ماتحجين ترى تعرفين شسوي بيج...

قبس.. اسمع عزيز وحق الله وروح اهلي اطلع بالشارع الم الحي عليك واروح للشرطه برجلي اذا تقربتلي تحترم نفسك لا العب بيك لعب مو دزتك ساجده عليه وانت مثل الاله تحرك بيك ...

عزيز.. انتي خبرتي علينه مووو حته تخلصين من عدنه؟؟

...امشي عزيز خايفه منك جان اشتكيت عليك طول هاي السنين شوف ربعك وربع ساجده امشي اطلع برااا...

عزيز... راح اطلع بس اتذكري مصيرج بيدي ديربالج تخطين خطوه من دون علمي..

قبس..كعدت بالكاع وهو راح لجهنم الله لاينطيج ساجده ياربي وين اروح اشرد من عدهم واروح لبيت جدي خاف ساجده تلعب لعبتهه وتسحبني وراهه اذا هي سهراتهه شكو واحد بالدوله ...

وجانت ضدي حته ما اتعين بسبيل ما اقوى واتمرد عليهه وهسه من شافتني تعينت وبيت جدي اندلهم خافت من عندي...

شكول عليج يمه انتي ورضا ادعي عليكم حطمتوني دمرتو شبابي اذا موكدهه ابوي شكو جنت تحجي ع ابوك وخليتني اتحمل مذله اهل امي بسبيل لا انكتل صورتهم مجرمين الي...

يومين اني غايبه وبشار هو كال اروح للبصره والمعاون زين متفهم من شافني كتله جان عندي ضرف ماحجه شي ...

اباوع لسناء وعاليه ونضال الف هنيالهن الله لايجعلني من الحاسدين بهذا عمرهم ويسولفن ماما هيج وبابا هيج واني اريد واحد اعتمد علي ماكو...

سناء.. قبس شبيج مخطوف لونج ترى احنه هنا اخوات يجوز ماتعرفينه صار ٣٠ سنه بالخدمه كلب ع گلب اسرارنه سوه ووحده توكف لثانيه اعتبرينه مثل امج او اخواتج الكبار وسولفينه...

قبس... مابيه شي بس تعبانه شويه بكلبي كلت هو اكو شي ينحجي بحياتي حته اكعد واحجي شو كلهه عباره عن زباله وقذاره ...

فتحت الفايلات وكمت انزل بيهم بالحاسبه مال اليومين الفاتن وع اعصابي اشتغل بس اكول الحمدلله ...

مر اسبوع كامل واني ماشفت بشار كالو بعده بالبصره بس المعاون استاذ محمد يجي عليه ويسالني عمي محتاجه شي خابرني استاذ بشار وكال شوفهه واتشكر من عنده ...

اهتمامه وحرصه وخوفه يجبرني احترمه وابدي امحي شكو بقايه حقد وغل بداخلي...

عندي بيانات بيهن غلط اثناء ما اسوي بيهن شفتهن سالت سناء كالت شوفيهن للمدير قبل لاتشتغلين اليوم اجه واذا مالكيتي شوفيهن لاستاذ محمد...

اخذت السجل ورحت جنت لابسه تنوره طويله لونهن اسود وستره ماروني وكعب عالي وشال مشجر اسود وماروني بيومهه اني انعجبت بنفسي ...

طبيت لسكرتيره كتلهه هيج وهيج السالفه كالت يمه ضيوف خلي استاذن من عنده شالت السماعه حاجته كالهه خلي تجي...

دكيت الباب وطبيت جنت اباوع للكاع وانداريت سديت الباب والتفتت شفت بنيه شابه تقريبا بعمري ووياهه مره جبيره ..

قبس.. اعتذر استاذ على المقاطعه بس البيانات بيهن غلط مال البارحه وماكدرت انزلهم..

بشار.. تعالي اتفضلي هسه اشوفهم...

قبس.. كعدت على التخم الي بالجانب وفتحت السجل احضر بي اسمع حديثهم وهي دكله بغنج ودلع ولان بنيه مثلهه اعرف سوالف البنات...

دكله حباب بشار كول لبابا حته انروح وياك من تروح للبصره والله صديقتي الوحيده هاي وشلون ما احضر عرسهه...

بشار..  فرح لادخليني ويه ابوج وبعدين اخذكم يم ناس مانعرفهم واني مويمكم اني اداوم بالرميثه وصديقتج بغير مكان واظل ٣ ايام عيب زحمه تظلون هلكد يم الناس...

... ياعمه شيقنعهه فروحه دكت رجل الا تاخذيني لبشار وهو ابوهه ماقابل...

قبس... شنو عمه وهاي فرح الي ذاك اليوم سمعته يخابر بيهه!! اني صار عندي فضول اشوفهه ظليت اباوع الهه حليوه زينه ولبسهه حلو ومحتشم ...

اثناء ما اباوعلهه نسيت نفسي مركزه عليهه جان دكلي بكل صلافه خير رايده شي شكو هيج تباوعين؟؟

قبس.. لا مارايده شي .

فرح.. لعد انتظري شغلج ولاتبحلقين هيج. 

قبس.. باوعت لبشار ردت اكوم اسحلهه واركع راسهه بالميز بس هو حجه كالهه فرح شنو هالحجي شنو التطفل من عندج؟؟

فرح.. شفتهه مدري شلون تباوع وعبالي تعرفني؟؟

بشار.. لاماتعرفج ولاشايفتج انتي تعرفيهه تعالي قبس هاي عمتج بسمه وبتهه والتفت على المره جان يكلهه هاي بنت عمي رضا شنو نسيتوهه؟؟؟

بسمه.. كامت ع حيلهه واني كمت وحضنتني وتبوس بيه يايمه بنيتنه كبرانه ماشاء الله كمر كمر يابعد عمتج شلونج ليش هيج عفتينه بقلق عليج..

قبس.. هلو عمه شلونج انتي ..جنت احجي وعيني ع فرح تريد تفترسني لاسلمت عليه ولااني سلمت كعدت عمتي وهي تحجي ليش عفتينه وليش وليش...

بشار.. عمه بعدين اجيبهه وعاتبيهه وهسه تعالي ياقبس خلي اشوف البيانات...

بسمه.. يله ياعمه احنه نروح وامانه قبس مري علينه بوستني وطلعت ...

قبس..ما اتحملت بس طلعت كتله هاي البليده اسمهه فرح هي هاي حبيبتك؟؟؟؟؟؟

يتببببع ... تفاعلكم موشي ولاتسوون واهس لاتعتبون عليه اذا اتاخر بالتنزيل

ما احبكم💔...