تحميل رواية «قمع المشاعر» PDF

قمع المشاعر.... السابع عشر من الجزء الثاني...

للكاتبة زهراء ( روزايه)...

قبس... فتحت خط بدون مقدمات كلبي فاير

منهه كتلهه هاافرح شتردين؟؟

جانت تحجي بصوت استغفر الله مال وحده

موخوش عبالهه هو يطلعلهه من سمعت صوتي

كحت وعدلت نبرة صوتهه

وكالت قبس!!! باستغراب ومامتوقعه اجاوبهه

قبس.. اي قبس خوماكوشي هم كتلج امجد وخابرتي

من الصبح ولازم اطير نومتنه ..

فرح.. على كيفج شبيج هاده من الصبح اني ممخابره

عليج مخابره ع ابن خالي..

قبس.. ابن خالج هو زوجي وهو نايم وهو الكال جاوبيهه

وهسه اكو شي؟؟

فرح.. لاماكوشي بس جانت تحجي بصدمه متوقعه

اني بعيده عن بشار ومثل التفاجأت جان دكول

ماما مريضه وردت يجي ياخذهه لان امجد ماموجود

قبس.. ومنو كالج بشار والي الحرم وعنده سيارة

اسعاف انكتلتي لازم تخابرو !! تخربطت امج لازم

يجيج عندج اخو وخابري لو بزعت روحه من عدكم

فرح.. شنو هاالاسلوب وين بشار عنج ماعندج ذوق؟؟

قبس.. عفت الذوق الج خابري وشوفي شسوي

بيج اني شويه خلي لنفسج كرامه وسديته بوجهه

بس شنو احس نفسي نار رغم الجو شته وبارد بس

عبالك مدخليني بتنور ..

التفتت علي طول مااحجي هو مرجه راسه ع التخم ومدد جسمه بالكاع واكو شبح ابتسامه بوجهه ..

قبس.. بشار انت منطيهه مجال اذا ماردتيهه تعرفني

خبله وحق الله اروح لعمامهه العب بيهم طوبه.

بشار.. ترى والله ماتخابر وهاي خابرت هسه

خليتج اتجاوبيهه شمنطيهه مجال ماعندي شي عليهه

حته ارزلهه واتعارك..

قبس.. ليش خليتني اجاوبهه؟؟

بشار.. كل اهلي يدرون بالصار يعني الحجيه اكيد مسولفه

لبسمه وفرح وخليتج اتجاوبيهه حته تعرف

احنه سوه خاف عبالهه علاقتنه خربانه هاي اذا هي

اكيد راح تفتعل سالفه جديده لان تعتبر سالفتهه مانجحت..

قبس.. مممم اكوم اسويلك ريوك لو هم ماتتريك وياي

بشار.. لا مااريد تعالي نامي

قبس.. مواروح للمدرسه؟؟

بشار.. لاا صارلج هوايه غايبه هي مدرسة ابوي

وشوكت مايعجبج تبطلين واترجعين اليوم امر

على المستثمر واشوفه خاف جاب وحده بمكانج..

قبس.. جنه كاعدين بالكاع ع دوشك واحد ابو نفر

للصبح احنه واحد بحضن الثاني هو مستند ع التخم

ورجليه مددهن بالكاع واني كاعده يم بطنه..

فركت ايدي بقلق ونصيت راسي كتله

اريد علاجي!!

بشار.. شحجينه البارحه هاي بعدنه باسم الله

هو مايصير اتركين العلاج مباشرة اخذي نص حبايه

وبين يوم يوم لحدما تكدرين اتركي مثل قبل..

قبس.. بس عقلي منمل يوجعني مااكدر بدون العلاج

بشار.. تعالي واشر ع صدره خلي راسج هنااا..

قبس.. خليت راسي ع صدره مد ايده على عيوني

غمضهن وهمس يم اذني نامي ارتاحي من تنامين اروح للدوام..

اطمئنيت واصلا اني صار مده مااشبع نوم

بسرعه غفيت وغطيت بنوم عميق

فزيت الساعه ب١١ وحدي بالبيت هو رايح للدوام

وااني نايمه بفراشه رغم محتاجه علاجي بس

نوعا مازينه لان عاملني بحنيه

جنت فرحانه يرجع مثل قبل..

كمت نظفت البيت وسويت غده بلكي

يرجع ويتغده من صارت السالفه لغه الغده

نهائيا ياكل برا واني اكل وحدي..

كملت كلشي ورحت للحمام سبحت وحدي

بالبيت طلعت بالبرنص رحت للغرفه طلعت ملابس

اباوع ع نفسي شكد متغيره وضعفانه

اكو اماكن بجسمي صايره زركه ومجرحه من تجيني الحاله

اظل اكرص بنفسي لو اعض ايدي

بدلت ورفعت شعري خفيف حيل

شكد جنت. مرتاحه واحس الفرحه ماواسعتني

وهسه بس الله يعلم بحالي..

صليت وقريت قران وبشار ما اجه

خلص الظهر واجه العصر وهو ماكو

وين اروح افتح البرده اباوع ع الحديقه الابواب

مقفله حته الشمس ماشايفتني..

بديت اتوتر واني افتر بالبيت

صوت المي من يندي يوترني حنيفه الحمام تذب مي

وترتني رحت قفلت الباب ورحت كعدت بالاستقبال

حته لا اسمع صوت

اتذكرت من جنت يم عزيز وراجعت طبيب نفسي

كال من تجيج الحاله جيبي ٧ خرزات او حصوات

اي شي دائري واكعدي العبي بيهن شتتي فكرج..

منين اجيب رحت ادور جمعت اي شي دائري عندي

وكعدت ساعات طويله واني العب بيهن

ومخليه كل تركيزي بيهن

يله كدرت اهدء شويه..

سمعت الباب انفتح ظليت كاعده

من فات للمطبخ الظاهر ماشافني لان اني بالاستقبال

كام يصيح قبس قبس !!

طلعتله من الاستقبال باوعلي بنظرات غريبه

حيل وكانو يكلي شتسوين جنتي

وليش كاعده هنا ماادري تخيلي لو صدك

شفت نظرات الشك بعيونه..

قبس.. الحنفيه مال الحمام تندي مي واني الصوت

يوترني ورحت كعدت بالاستقبال بس ايدي ترعش

مااسيطر عليهه..

بشار.. جاوبني وماخله عينه بعيني كال روحي بدلي اريد

اخذج لسرور

قبس.. ليش شبيه؟؟

بشار.. مابيج شي عاجبني اطمن عليج يله

لان حجزتلج خاف تطلع

قبس.. ماحجيت بس هزيت راسي

وكمت بدلت ومااعرف الغايه شنو قابل يريد

حمل وهو صار اشهر مامتقربلي

طول الطريق ساكته لحدماوصلنه الهه

جان دنيا ليل صاير وهي تنتظرنه سلمت عليهه

وبدت تفحص وتسال وسوت سونار ..

جان كل كلامهه ويه بشار وعبالك اني

حجاره وكدامهه حته السؤال التسأله

توجهه اله وعبالك هو اليريد يحمل..

نرفزتني وهي تساله شكم مره باليوم

تاخذ علاجهه النفسي؟؟

بعده مامجاوب رديت اني كتلهه دكتوره ترى اني

المريضه مو زوجي اشو اسألتج كلهه اله

ليش هو ياخذ العلاج لواني؟؟

باوعتلي بنظره حاده ولمت حلكهه كالت انتي

حاليا مريضه نفسيا والاجابه تكون موصحيحه..

راد يجاوبهه هو بس ماخليته رفعتلهه حاجبي كتلهه

هم معلميج بالطب تحجين ويه المريض

بهاي الصوره

واذا عندج سؤال اسألي الي وباوعيلي الي

اني المريضه موهو؟؟

نزلت من السديه اخذت جنطتي كتله يله حبيبي

تعبانه اني ومن الاساس كتلك اخذني. لهذيج الدكتوره

طلعت كدامه واعرف كلامي موحلو ويه طبييه

بس ماراعت مشاعري وعوزهه تكلي انتي مخبله اسكتي

طلع وراي كلت هسه يطلع عصبي

بس جان هادىء ونوعا ما مبتسم

نزلنه من العماره للسياره من صعدت وحرك السياره

يله حجه

بشار.. ليش حجيتي وياهه بهاي الطريقه

اعتذرت دكول عبالي حالتهه النفسيه تعبانه

قبس.. متاكده لو اضيفهه ويه قائمه معجباتك

جناب المدير العراق مابي بس استاذ بشار

حجيت هيج وجنت احجي بطريقه اقلد بيهه

صوتهه جان يطكهه ضحكه عاليه

واني اباوعله مبتسمه صار شكد ماضاحك

ولاشايفه اسنونه..

قبس.. شكو تضحك حاجيه جذب هم شكم يوم ودكوم تخابرك

والي الحرم تطلب خدمه منك

وانت بدورك شهم واخو خيته تركض الهه حافي

بشار.. ولللج انتي ضارب عندج فيوز عيب تحجين

هالحجي سرور صار سنين اعرفهه مايوم باوعت بعيني

وع الصار هسه سوء فهم وتصرفهه موحلو

قبس.. المهم عود ذكرني سلطان سليمان شكم يوم

والكه سرور انضمت لتحالف معجباتك

بشار.. راح اعتبر نفسي ماسمعت كلامج

شو التفتي عليه خدودج صارن حمر هلكد تغارين..

قبس.. وينهن خدودي انت وحزبك خليت خدود

هاك شوفهن جنهن جلد دجاجه ضاربهه الجفاف

لاتعب نفسك وتتغزل لان ماظل عندي شي للغزل.

بشار.. متأكده؟؟ نوصل للبيت ونتراهن انشوف اكو لولا

قبس.. باوعتله بطرف عيني ودرت وجهي

بيومهه تعشينه بالمطعم ورجعنه للبيت ماكوشي

طب سبح وطلع وفرش بالصاله واني واكفه بالغرفه

مترددع اروح يمه ليش اروح هو المفروض يجي

اخر شي سديت الباب ونمت وحدي ..

فزيت الصبح ع حركته بالغرفه يطلع ملابسه

كعدت نص كعده كتله صباح الخير رد عليه كومي

حته تروحين للدوام

كمت واني ساكته سويت ريوك وبدلت وطلعت وياا

وباشرت بدوامي لحدالظهر واني كاعده مادري منو يجيني

لاعندي تليفون ولا سالت بشار اكو خط نسيت

شويه واجتي طالبه كالت ست اكو رجال بالباب

جاي عليج طلعت شفته ابو حسين سلمت علي

واخذني للبيت من طبيت لفت انتباهي بشار شايل

كل الكاميرات

جانت اكو وحده بالممر ماكو افتريت البيت كله

ولاكاميرا هاي شوكت شالهن معقوله من اني نايمه

طبيت للغرفه بدلت وصليت وكمت سويت غده

بس الي لان اكيد هو مايجي البارحه من طلعنه اشترالي علاجي

اخذت نص حبايه حسب اتفاقنه علمود اكطعه

رغم احس نفسي محتاجه جرعه اكثر بس بديت

اقاوم حته اصير زينه..

رجع بشار ع نفس التصرفات غير السؤال

والجواب بيناتنه لايتريك ولايتغده بالبيت

بس يتعشه ومو دائما بالصدفه احضر العشه

وانتظره من يجي يكلي متعشي

اكول اجمع المواعين واروح للغرفه حته الاكل

يوكف بحلكي حياتي بدت تنحرف لمسار

الذل والحرمان..

مرت ايام واحنه على هذا الحال بيوم منهن اجه بليل

كال كومي انروح لاهلي سألته شنو المناسبه

كال شجن مريضه رجلهه من كاسريهه طالع بيهه عواج

ومجبريهه مره ثانيه..

اجيت اكله اني غير مرحب بيه مااروح بس

سكتت كمت لبست وطلعنه اني ساكته دايره وجهي

ع الجامه وهو هم ساكت لحدماوصلنه..

طبيت وياا واحس نفسي غريبه عن هذا البيت

اكو احساس بداخلي يكول ماالج مكان يمهم

حاولت قدر المستطاع اتصرف طبيعي وماابين

ع نفسي ..

جان الكل كاعد بالصاله طبينه انسلم اتفاجات بوجود

فرح وبسمه وبيت عامر وفاديه بس هدى ماموجوده

سلمت عليهم وكعدت بصفه اتمنيت واحد يسألني

شلونج؟؟ شلون صرتي؟ بس جدو وعمو عادل سألوني

خاله جانت متأذيه ع شجن وتخاف توكف رجلهه لويصير

بيهه شي

احس بالذنب كله بسببي بس اني مامتقصده

اذيهه من حرگة كلبي سويت هيج..

جانو مندمجين بالسوالف واني اباوع بعيني

هاي فرح الهجمت بيوت وكاعده وتسولف وتناقش

وتنبز بين الكل وكلساع وكالت خالو اكو هيج ع مواقع

التواصل وخالو زميلتي هيج!!

باوعت لفاديه اجت عيني بعينهه جانت ضايجه

باوعتلي ودنكت عيني تتنقل بين الكل

شجن جانت متألمه ماشاركت ولاحجت

واسراء بالغرفه ماكاعده..

اثناء الحديث حجه عمو عامر كال بشار شوكت

تروح للعماره؟؟

جاوبه ان شاء الله بعد يومين

عادل.. خير بويه شكو بالعماره؟

بشار.. تعاقد ويه شركه صينيه من رحنه قبل فتره واختارت

العماره تنصب بيهه الشركه ولازم احنه نثبت العقد والاساس

عادل.. وشكد تظل؟

بشار.. حسب التسهيل احتمال ٣ ايام او اكثر..

قبس.. جان يحجي والعبره خانكتني كمت اسمع من الناس

كلشي مااعرف عنه وين يروح؟ وين يجي؟

دوامه شلونه؟ كله هذا اسمعه من اهله..

عادل.. وقبس خوماتظل وحدهه لو ادز امك يمهه؟؟

بشار.. اي امي تجي يمهه

ام بشار.. هي خلي تجي يمنه مااكدر اعوف شجن

شوف حالتهه اني اكوم واكعد

بشار.. هسه الله كريم خلي اشوف بلكي احصل بديل

يروح بمكاني واذا ماكو تجي يمكم

قبس.. كاعده ع اعصابي لاشاركت بحديث ولا كعدت يمهن

اصلا مسافه عن الكل كاعده بصفه ويه الزلم

كمنه احنه وبيت عامر سوه من ردت اطلع دنكت ع شجن

بستهه وكتلهه اعتذر تعرفين حالتي انفعلت حيل

جنت احجي والدموع اتجمعت بعيني قابلتني

بابتسامه كاذبه وكالت لاماصار شي..

بالسياره وحجيت مااتحملت كتله ليش اني ماادري

بسفرتك؟؟

بشار.. وليش لازم اخذ رأيج

قبس.. لا طبعا !! بس ع الاقل ما اتفاجئ

بشار.. وهاي هسه سمعتي شنو الفرق

مثل مااني اسمع عنج من غير ناس واسمع عنج الابشع

شنو الفرق؟

قبس.. شسامع عني ؟ سكت مارد عليه واني هم سكتت

مالي خلك ادخل بنقاش ويه عقله القافل..

طبيت للبيت بدلت ونمت بسرعه لا اريد

اسمع ولا اريد اشوفه

بهذني اليومين بشار انكلب عليه مثل الاعصار

يطب يطلع يتعارك اقل زله وصاح بيه

كمت مااتحمل يسالني اجاوبه بدموع مااكدر احجي..

اذا لكه قميصه مامكوي يگلب البيت

بالصياح وين جنتي؟ وتظلين ثوله؟

بيش فالحه كليلي بس اكل ونوم؟؟

اتأذى من كلامه واكول اتحملي ياقبس

اتحملي هو تعبان والمر عليه موشويه

يجي يوم ويرجع بشارج القديم وبعدين عاتبي ع كلشي...

اليوم طلعنه سوه للدوام واخذت ملابسي

وياي مااريد اروح لبيت عمو بس مجبوره

مااكدر اظل وحدي نزلني بباب المدرسه وراح للعماره

لاسلام ولا كلام ..

خلص الدوام ورجعت لبيت عمو بس طبيت اختنكت

لكيت خاله بالمطبخ سلمت عليه عادي بس بيبي

ردت السلام من وره خشمهه

طبيت للغرفه بس جربايتين وحده لشجن نايمه بيهه

ووحده لاسراء بعد مابنو من جديد غيرو الترتيب..

حطيت غراضي بالكاع وصافنه وين اخلي غراضي

الكنتور ٤ ابواب وكلهن مقفولات بس شجن واسراء

ظليت كاعده ع الجربايه اهز برجلي..

كمت يم شجن كعدتهه شجن شجن!! فزت شافتني

سلمت عليه سالتهه ع صحتهه كالت زينه بس ماتخلي

عينهه بعيني..

قبس.. اريد اخلي غراضي لان ذهبي جايبته وياي

وفلوسي؟؟

شجن.. اني عندي بس خانه وحده البقيه مشتركه اني

واسراء كتبنه وملابسنه مال الكليه

هذا المفتاح مالتي ضمي بي بس اني مامسوؤله عليهن

قبس.. يعني شنو؟؟

شجن.. يروحن ينباكن!! مالي دخل البيه كافيني

مابيه تهمه ثانيه!!

قبس.. اني اعتذرت منج ماتهمتج بس خلي نفسج

بمكاني اني مادازه الصور بس الج احتمال احد يفتح جهازج واحتمال مهكرين حسابج

شجن.. رجاءا اسكتي!! اني موزعطوطه حلفتلج امسحهن

بنفس اللحظه اذا ماثاقه بيه شكو ادزين الي صور

اني هم صوجي ..

قبس.. باوعتلهه وسكتت الغصه ابلعومي ماتخليني اطلع

الكلام كمت من يمهه شمرت الجنطه مال الملابس جوه الجربايه

وطلعت العلبه مال الذهب والفلوس

وكمت  انطيتهن لخاله تضمهن يمهه بدلت وكعدت بالمطبخ

اسراء بالدوام تغديت وياهم بس الكل ساكت

عمو الظاهر ماعنده معلومه هو الوحيد تعامله طبيعي

بس البقيه لا والله كاعدين ع اعصابهم..

طبيت للغرفه اشرتلي شجن نامي ع جربايه اسراء

بعدهه ماتجي تتاخر .. اني اريد اخلص من الواقع

بسرعه نمت وتغطيت ببطانيه جديده من خاله..

فزيت على صوت اسراء وهي تكعد بيه

كومي قبس عفيه اريد انام تعبانه

ورايه امتحان حته اكعد اقره..

يايمه شصار بيه بهذا اليوم ركضت للحمام

ادك على كلبي بقبضة ايدي احسه حجاره وبدت تتفتت

الم قوي يعصر بكلبي اني الغريبه !! اني مالي مكان يمهم

بجيت بجي حسيت نفسي راح اتخربط

غسلت وطلعت وين اروح البيت مومثل قبل بس طابق واحد

ماكو غرفه زايده اكعد بيهه

طلعت برا بالحديقه حديقتهم صغيره

لكيت خاله كاعده هي وشجن كعدت يمهن

انتبهن عليه باجيه..

ام بشار.. قبس انتي تربيتي يمنه والله شاهد اعزج

بمعزة بناتي وماقابله ع اي تصرف لحدالان

بس كليلي احنه بشنو اذيناج وابني شنو ذنبه؟؟

قبس.. اني اسألكم اني شنو ذنبي جبت طول عمري

متعوبه ومن بديت المح خيط الفرح ماكو تهمه

ماتكربست براسي وفوك كل هذا كلكم تعاملوني

معامله الغريب ومصدكين الصار!!

ام بشار.. ليش ماانصدك واحنه شفنه الرسائل

بعيونه وشفناج شلون تحجين ع شجن

اسمعي بنتي سالفه وائل والاعتداء محد يدري بيهه

وواضح بالرسائل تسولفين لهذا التحجين ويا ع شجن!!

قبس.. يارسائل؟؟

ام بشار.. ورا مشكلتكم بيوم اجت هدى جابت تليفونهه وشوفتنه محادثات بينج وبين هذا التحجين ويا

تحجين علينه وتذمينه ومطلعه كل اسرارنه

ودكولين كل هذا الي اسوي انتقام الهم شلون ماتو اهلي

حته زواجج من بشار هو انتقام ودكولين اني موحبا

بي اني اريد الطخ سمعتهم لان ماتفرق عندي هو اني بنت سميه

قبس.. اسمع وصدمه اكبر من صدمه ابجي

واحلف خاله وروح ماما اني ماسوي هيج شلون تشكون بيه

يكدرون يسوون محادثات مفبركه ويشمروهه براسي

ام بشار.. سالفه وائل ياقبس محد يدري بيهه بس احنه

وانتي حاجيه كل التفاصيل ولج يابنتي حته من خطفهه

وشصار بيناتهم حاجيته بالقلم العريض ليش هيج؟؟

تدرين المحادثات بساعتهن هدى مسحتهن وماحجينه لبشار

بس اني وبناتي وسكتنه هاي بشرى ماخليناهه تعرف

ومثل مايوم سترتي بنتي واجبي استرج..

لاتبررين ولاتحجين اكو شغلات ثبتت هي انتي

اكو اسرار محد يعرف بيهه بحادثه شجن وطلعت

قبس.. ليش اتهموني ليش مووائل هو سواهه حته ينتقم

من بشار ؟؟

ام بشار.. وائل رجال مريض السكر هاده ومومثل قبل

حته طلعه من البيت مايطلع ولو هو مايحجي ع نفسه

يخاف من بشار..

قبس.. اني بررت هواي الكم ولبشار ومحد سمعني وكمت طبيت جوه جبت القران وطلعت لبست حجابي

وحطيته كدامهن ماخلتني احلف بس جنت مصره

ماعندي غير حل

مايهمني الصدكوا والظلوا بس ماردت يكولون

بنت سميه واكيد مثل امهه

حطيت ايدي ع القران وابجي واحلف وحق هذا القران

"اذا نزل ع جبل لرأيته خاشعآ متصدعآ من خشية الله"

مايوم فكرت اذيكم .. ولايوم حجيت عليكم

واحبكم اكثر من حبي لاهلي لان انتم صرتم الي اهل

ولايوم خنت بشار لا بالكلام ولا بالنظره

ماراح تصدكوني هسه بس يجي يوم ياخاله تعضون

اصابعكم ندم ومن هسه اكلكم لااطلبون مني ابريكم

الذمه مشكولة ذمتكم ليوم الدين ع كل واحد

تهمني بشرفي وذلني بكلمه وبتصرف ..

كمت رجعت القران وخاله تصيح وراي

ماسمعتهه طبيت ليجوه نار وتسعر بصدري

تلكتني بيبي غمتني وكالت هااا يالخايبه

تاليتج ظليتي مكفخه بين الادين..

ماجاوبتهه عفتهه ومشيت حايره وين اروح

رحت كعدت بالحمام مصدومه !!

موبس مصدومه مخذوله

احس ظهري انقسم نصين الطعنات وحده وره

وحده مااكدر اوكف ع رجليه

الخذلان كسر ظهر انغدرت واني جنت شايله الكل

بالصلوات

غسلت وطلعت تلكتني خالتي رادت تحجي

هزيت راسي مااريد اسمع شي اعتبروني

ضيف عدكم مثل ماضيفتوا اسراء...

صاحتني شجن وماجاوبتهه مااريد

اسمع اي صوت مااريد هاي الذله

اتحمل بشار طول عمري ويبهذلني ولا اشوف هذا الذل

اول يوم هذا بدونه وهيج صار شلون اكمل

الايام البقيه اريد اخابره اريد اكله تعال

اخذني امني عند الغريب ولا عند اهلك..

مرن يومين يمهم صرت اعصاب

اكل مااكل ابد اشتري كيكه وعصير بالمدرسه

يادوب اكدر ابلعهم نفسي مسدوده من كلشي..

صوتي صار عالي اتعارك ويه الكل حته ويه شجن

اسراء كامت تتعمد تشمر ملابسي بنص الغرفه

واتعارك وياهه تكوم تبجي واسمعه تحجي لخاله

دكلهه هي قبس اطلع ملابسهه تشمرهم وتكوم تعيط

خاله اني اخاف من قبس شبيهه مريضه!!

اريد اهد عليهه وافرغ ناري بيهه

بس ماعندي سند ومااستغرب اذا طلعوني بالشارع..

شجن.. كلنه مصدومين بقبس المحادثات الشفناهن

يخلن اكبر واحد يصدك وخاصه من مطلعه سالفه وائل

كلنه اخذنه موقف عليهه بس ماوصلنا لبشار

بيوم الكسرو التجبيره مال رجلي اخذنه عمر

وبالرجعه عمر عنده شغل اجانه غيث

صار شكد ماشايفته من قبل لا يتزوج..

ماباوعتله ابد حته سلم عليه ومارديت علي

السلام ماانكر حبه بعده بكلبي بس مااريده

شطبته من حياتي

امجد ابد مازعجني وهالشي خلا يكبر بعيني اعترف

بحبه ومن شافني رفضت ماشفته بعد

عمه بسمه تجي بس تبجي وتدعي ع الكان السبب

دكول لايرفع علينه خط ولا يخلينه انشوفه حته رايحه

للمختبر ودكول رزلني وكالي من تربين بناتج تعالي

وكولي عندي ولد ..

مشاكلنه ماتخلص نطلع من مشكله انفوت بوحده اكبر

وهالمره مشكلة قبس مانحجي بيهه حته كدام اسراء ماحجينه

بس الانسان تلقائيا تصير عده ردة فعل

بشار خابر ع ماما كالهه اطول اسبوع وديربالج ع قبس

لاتقهروهه بوقتهه ماما شكد بجت كالت يحبهه ويكابر

ماما كالت لقبس ترى بشار يتأخر لو عبالك ذبت عليهه

نفط انفعلت حيل حته بيدهه ماعون كسرته

كامت تصرخ بصوت عالي دمرتوني الله لايوفقكم

همزين اسراء بعدهه بالدوام وماشافت حالتهه

ماانريد احد يدري بحالتهه بيبي كامت ترادد بقبس

ودكلهه فوك شينهه كواة عينهه ضيعتي الولد

وقبس ماما حاضنتهه وهي منفعله حيل

ماتبجي بس تصرخ وتلهث اخر شي ماما استسلمت

وركضت رفعت التليفون خابرت بشار..

كالتله مرتك مانعرف شبيهه منفعله وكامت تكسر بالمواعين

كالهه انطينياهه بس اخذت التليفون

وكامت تغلط وتدعي ع الكل حته ع بشار

ماما تريد تهدي الوضع خاف مايسكت الهه ع صوتهه العالي

كامت تسحب بالتليفون منهه وهي ماترضى تنطي مستمره

بالغلط والصياح

سمعت بشار عاط بيهه وكالهه قسما بالله ترى هسه

اجيج من العماره واطيح حظج وحظ اليكول خطيه

تخبلتي هاي الدعاوي والغلط شنو؟؟

بيبي تحجي من جهه وهي ترد ع بيبي اسكتي لاتدخلين

انتي باطله مثل بنتج بسمه

وكل هذا وبشار ع التليفون صاح راد وماسمعته

دعت علي بحركة كلب وهي دكله روح عساك لاتهنيت لا انت

ولا اهلك وعساك بنار كلبي ...

ماما سحبته منهه وسدته بسرعه وهي دكلهه

شلون تحجين هيج والله اذا اجه ياقبس

يكسر راسج واني ماادافعلج تحملي طولة السانج..

ظلت قبس ع هذا الحال مدة يومين كلما يخابر

بشار تكوم تصيح وتغلط يريد يفتهم منهه ماكو

كام يحجي على ماما شسويتولهه ليش هيج حالتهه؟؟

واحنه مستغربين وضعهه لاتاكل ويانه ولا تنام حته جوه

عيونهه اسود وماعدهه كلام بس صياح مرات اشوفهه

تكرص بنفسهه تهلس شعرهه حته اسراء دكول هاي شبيهه قبس مريضه نفسيا ...

...

الخيبه والخذلان الي نعتقد ننساها ونتجاوزها هي نفسها الشحرجه الي تصيبنه قبل النوم

نظل نسعل نسعل بس ماراح تختفي احتمال راح تختبئ جوه حزن عميق واحتمال راح تجي على شكل رغبه بالبجي... او احتمال تشكل على شكل جرح مايشفه...

كل واحد بينه داخله هش خفيف مثل الزجاج مجرد ماتعصف بي الحياة يتحول الى حطام من الداخل بس كمظهر خارجي نكول هذا الانسان قوي وهذا الشخص كدر يوكف على رجلي واتجاوز كل المصائب بس الناس الهه الظاهر محد يعرف بداخلنه شنو..

احنه الضعفاء الي نعيش على الذكريات... احنه الي تنزل دموعنه من نسمع اغنيه وندمر من ابسط تفصيله تربطنه بالماضي..

احنه الي انحن لماضي ماراح يرجع ولا نكدر نعيش الحاضر... مانؤمن بالاتي الجميل ونعيش بماضي اليم...

احنه الي دمرنه نفسنه بادينه تحت مسمى الحب والتضحيه...

هوايه ناس بعدهم ابدايه الطريق وتوقفت سفنهم عن الابحار وظلو يعانون الالم والخذلان ويعدون ايام العمر وكل مرحله يوكفون عدهه ماراح يكدرون يتجاوزوهه...

...

شجن.. دوام ماعندي ماخذه اجازه علمود رجلي بلكي تتحسن

وافتح التجبير مالتهه جنت كاعده بالحديقه

مخليه راسي على حافه الكرسي وعيني بالسماء صوت العصافير وسرب الحمام الي يرسم اشكال جميله..

صوت الاغنيه المفتوحه بسياره جيرانه اسمعهه بكل وضوح وكانو هاي الاغنيه لامست كل شعره احساس بداخلي واخذتني للبعيد اااي بعيد حيل ...

جوز منهم بعد لاتعاتبهم جوز..شلك عدهم ناس ما الهم عهد جوز

شلون جازونه بهجر وبلاعذر.. تالي باعونه بسعر ماينذكر..

هاي هم قسمه وعد جوز جوز منهم...

متعلمه يوميه اطلع اكعد بهذا المكان وجيرانه عنده كيه يشتغل بيهه يوميه هيج وقت يفتح اغاني بسيارته وكل اغنيه اسمعهه تفتح جروح جديده...

الدموع واكفه بطرف عيني بس عاهدت نفسي ما ابجي ولا اذل نفسي ولا اسمح لاي شخص ينظر الي بنظره عطف ويكولون خطيه شصاير بيهه..

بالي ويه الاغنيه واني ادندن وياهه انفتح باب البيت حيل وطبت قبس بنفس عصبيتهه وصياحهه وهي تسد الباب بقوه...

صحت وراهه قبس قبس ما التفتت عليه طبت وهي بنفس السب والغلط ما اكدر اكوم ولا رجليه تعيني اكوم ...

كمت اصيح ماما اريدهه تجي تكومني اسمع صوت ماما وهي تهدي بيهه ودكلهه هسه يجي ويسمعج والله بعد ما احاميج ..

اجتني ماما وهي تصفك بايدهه ودكول الله يهدي بنت عمج اخاف عليهه من اخوج بس يسمع هاللسان شطوله شيخلصهه..

شجن... ماما عليمن حاركه اعصابج اشو موفريلهه كلشي وهي اطب تطلع تتهجم علينه شتريد من عدنه..

ام بشار.. اسكتي يابنتي انتي ماعندج حظ لاتحجين عليهه هي هم متاذيه لاتلوميهه..

شجن.. الله عليج ماما شوفيهه منو يمهه تروح للمدرسه وتجي منو يحاجيهه منو يكلهه على عينج حاجب ..

ام بشار.. الله يهديهه ما اعرف شتريد بالضبط شو تعالي خلي اطببج جوه واحجي وياهه..

سندتني ماما وكومتني واخذت ليجوه جانت واكفه تغسل يم المغسله انتظرتهه تكمل حته احجي وياهه ولو ما اخلص من السانهه..

التفتت عليه كتلهه هاقبس شبيج عصبيه منو وياج؟؟

ماجاوبتني عدت السؤال مره ثانيه وجان تنفجر بيه بذاك الحجي بس عوزهه تكوم تضربني سب غلط طلعت الموتى من كبورهه...

صدك خبله وبيهه خيط موصاحيه سكتت عنهه لان السانهه متبري منهه ومانعرف شتريد بالضبط...

راحت لغرفتهه وماما تاشرلي اسكتي عنهه رغم السانهه الطويل بس تحبهه حيل ودكول يتيمه هاي ...

حيرتنه وماعرفنه شلون نتصرف وياهه

موهاي قبس تغيرت جذريا لوتحبس نفسهه بالاستقبال

لو تنفعل ومحد يتحملهه بس ماما...

قبس.. فقدت بهاي الايام اصلا ماادري بنفسي

شسويت علاج ماعندي خلص ومااكدر اطلع بيومهه بالدوام

وماكدرت اظل كاعده مااكدر اضبط اعصابي

محتاجه بيتي مااريد اظل هنااا..

من رجعت عصبيه اجتني خالتي تسالني شبيج كتلهه خابري

بشار اريد ارجع لبيتي ماقبلت ظليت اصيح

كتلهه اطلع وحدي كامت خابرته

كالهه خلي عمر يوديهه وتقفل الابواب

اني راجع بالطريق بسرعه جمعت ملابسي

ورجعت لبيتي

مباشرة طبيت للحمام سبحت وركضت ع علاجي اخذته

بديت ارتاح للمغرب اجه بشار

غير السلام بيناتنه لاحجه ولاسالني شبيج

هذيج الايام

بيومهه عفته ونمت بدون عشه

وتعاملنه مثل الغرباء جمرة الشوق بداخلي طفت

لا اشتاقله ولا اريده متأذيه من عنده حيل..

ثاني يوم رحت للدوام قبل حلة المدارس

جان الدرس الاخير مخلصه شغلي وكاعده

مااحس غير ابوغدير واكف فوك راسي..

سلم وكعد والمديره ويااا كالت ست قبس

استاذ موفق جاي مخصوص عليج

يكول اكو مشكله ويطلب مساعدتج..

قبس.. عفوا ست بس اني مااعرفه

المديره.. هو يعرفج طالب مساعدتج مابيهه شي

ست قبس استقبلي المشكله

قبس.. طلعت المديره وعافت الباب مفتوح واني صافنه

ع وقاحته قبل لايحجي اني حجيت!!

انت شرايد مني ؟ تعرفني؟ مأذيتك بشي؟

موفق.. اريدج تسمعيني اعرف المشاكل الوكعت ع راسج

والصراحه اني مقهور عليج وفرحان بنفس الوقت

مقهور عليج لان حرامات هاي العيون تحزن

وفرحان لان راح تطلكين واني اخذج وضحك ..

قبس.. انت شنو من بشر ماقاري قران ماتعرف الحرام

اني مره متزوجه وين تروح من ربك تهجم بيتي

بشنو ماذيتك انت الورا الصار بيه كله احجي ودكيت ع الميز !!!

موافق.. اهدي ياحلوه اهدي.. اني عبد مأمور وسوه حركه

الفلوس بيده استلم اجري وماتشوفين وجهي..

تريدين تنطيني المبلغ الي اريده وابرئج كدام زوجج وحته

انطي الادله عن السوو بيج هيج

تريدين اكمل طريقي واستلم الفلوس من الدفعني عليج

اني حبيت اساعدج والباقي يمج

قبس.. اني اشكرك حيل جزيل الشكر لان اجيت وعرفت

عن نفسك اني وراي رجال وهذا الرجال هو راح يعلمك

شلون تندك بعرضه ..

هسه كوم اطلع برااا قبل ما اخابره واخلي يجي يسحلك

سحل والا اكلك اذا انت رجال اوكف

وطلعت بالباب كمت اصيح ع المديره الاداره كدامي

ع حظي المديره تفتر ع الصفوف وهو مبين خاف

بسرعه طخني بكتفي وطلع يمشي سريع

بلحظتهه شكد فرحت هذا العار ناسيته

حته ماحجيت لبشار علي لان مره كالي هاي نماذج

تعبانه وعبالي من ذوله اليركضون ورا النسوان

بس طلع كل خرابي من عنده وكال اني عبد مأمور

يعني اكو احد دازه اجت فرح ع عبالي بس شجابهه

علي صار الوقت شطوله

اجه الخط واني فرحانه واخيرا لكيت طرف برائتي

ماعندي تليفون اتصل وبهذيج اللحظه الغباء

سيطر عليه لوماخذه تليفون ابو حسين ومخابره بشار

بس كلت راح اوصل للبيت ومن يجي اكعد ويا

واحجيله حته مايصير عصبي ويتهور..

نزلني ابو حسين بالباب وراح واني فتحت الباب

وطبيت بعدني افتح بباب المطبخ اندك الباب

صحت منووو؟؟

اجاني صوت طفله صغيره اني خاله !!

ذبيت جنطتي بالكاع ورحت للباب فتحته

هي فتحه هي لزمه من خصري بايد خشنه

حيل والايد الثانيه سحبت راسي

ومشه بيه سريع لجانب البيت !!

من صدمتني بلحظتهه وهو كله صار بثواني

وعبالك متحضر جان ماعرفت شسوي كلشي

ماعرفت اصلا بسرعه انغمى عليه ووكعت بالكاع...

حسيت على ضرب راشديات ع خدي

اريد افتح عيوني مااكدر كوه كدرت افتحهن

واشوف نفسي مدده بجانب البيت من جهه جيرانه

المره طلبت الغاز

رفعت راسي وانصدم بابو غدير كاعد

كدامي ومبتسم وهو يكلي سلامتج ياحلوه!!

.

.

يتبببببع... متابعه شيقه

قمع المشاعر.... الثامن عشر من الجزء الثاني...

للكاتبة زهراء ( روزايه)...

‏بَعد عُگبيش؟

‏بَعد ما مَرمَرت روحي

‏بَعد ما كِثرن جروحي

‏بَعد ما مات الگرنفل

بَعد ما خَضّر العاگول مِن نوحي

بَعد عُگبيش؟!

...

قبس.. بعدني بملابس الدوام تنورتي مرفوعه

شويه وطالعه رجلي شالي مفتوح ومبلله من كدما

منكعني بالمي حته انتبه..

جنت بحالة صدمه اباوعله ومركزه على وجهه

بس ماعندي ردة فعل كاعد كدامي مكرفض

ومبتسم وهو يكلي شنو هاي رجلج كيك

قبس.. اريد احرك اديه ورجليه مااكدر حجيت

بقلة حيله كتله شتريد مني واحس نفسي

اريد اتخربط

موفق.. مااريد شي من عندج كتلج اني استلم فلوس

وهذا شغلي ياما سويت هاي الدروب

بس هالمره تختلف ماادري ليش مقهور عليج يمكن لان يتيمه

الظاهر رجلج عنده عداوه جبيره بحيث

دفعوا مبلغ حيل جبير وكالو بس اهدم بيته

وانتي هم مامقصره عندج عدو وحاسود واكتملت

السبحه عليج..

قبس.. حسيت نفسي كدرت اتحرك جان مطمئن مني

لان تعبانه حته مااقاوم وهو كعد بالكاع فاتح رجلي

ومحوطهن باديه ويسولف منطلق

من اندمج بالكلام رفعت رجلي بقوه وضربته

ع المنطقه الحساسه بكل قوتي وغضبي

صاح صوت عالي سمعته الجيران ولم رجليه

وكام يتلوى يريد يرفع نفسه مايكدر..

اني بسرعه من ضربته كمت اركض وهو من الالم

العنده مايكدر يكوم مد ايده عليه يريد يلزمني

ومالحك ظل يتلوى بالكاع..

واني ركضت بسرعه للمطبخ وقفلت الباب عليه

افتريت بكل البيت اتاكد من الابواب مقفوله

دكات كلبي سريعه واحس نفسي بحالة انهيار

لازمة باب المطبخ اريد اشوفه شوكت يطلع

تأخر يله طلع لان جان ورا البيت من جهة ام الغاز

ومشه بنص الطرمه وسوالي بوسه بالهوه

ومخلي ايده ع حزامه والمنطقه الحساسه ويضحك

طلع من الباب واخاف اطلع اقفله خاف يندفع عليه

جنطتي بباب المطبخ ظلت رخت رجليه ولهنا انتهت

القوه العندي وكعدت بالكاع

بجيت لطمت ملخت شعري كمت اضرب

براسي بالكاونتر اسمع صوت عقلي

يصيح ارحميني ..

ساعه مرت كمت فتحت الباب مال المطبخ ازحف

على ركبي واخذت جنطتي وركضت حافيه للباب بسرعه

قفلته ورجعت ركض للبيت

شمرت جنطتي بالكنتور واني ابجي

اخذت ملابس ورحت للحمام دموعي اختلطت ويه المي

افرك بمكان لمسته من خصري اريد ازلغ جلدي

ليش ياربي طول عمري احارب وبيوم

الحبيت بشار كلت لهنا وانتهت المعركه

وطلعت بانتصار!!

هسه ويني من الانتصار صفيت خراب

وبس دخان المعركه نصيبي ..

لبست ملابسي وطلعت اخذت علاجي

هاهي عندي احساس اليوم. اخر يوم

الي اكون انسانه طبيعيه .. بعد الصار مستحيل

راح ارجع بنفس قوتي ونفس قدرتي ع التحمل..

مافكرت باي شي ؟؟ ولا فكرت بكلامه هذا العار

بس بالي مشغول شوكت يجي بشار

اريد احجيله يريد يصدكني؟ يريد يطلكني؟

كوه رفعت نفسي من الكاع وكمت فرشت

سجادتي وصليت اقره بالايات القرانيه

وابجي اشهك واني اردد الله اكبر..

كعدت رافعه اديه ياربي انت اقرب للعبد

من حبل الوريد عشت طول هاي السنين

وانت تحميني مااطلب من بشر اطلب من عندك

اريد تبين برائتي وحوبتي بكل واحد اله ايد بالسالفه..

دعيت وبجيت وكمت لميت السجاده وكعدت بالصاله

بشار يتاخر هوكالي عدهم شغل وهاي الايام

يطلعون اشراف ع التنقيب حته بدلة العمل اخذهه

باوعت للساعه ب٢ ضبط اتصفن بالبيت

كلشي بي يخنكني ..

محتاجه امي! محتاجه اخ اركض اشكيله

ويدافع عني مثل بشار وعمر من دافعوا عن شجن..

بوسط الالمي سمعت صوت الباب انفتح بسرعه

كمزت خاف رجع عليه ركضت للغرفه اريد اقفل

الباب عليه بس لمحته من شباك المطبخ صار كدامي

مدنك يفتح بالباب ..

طلعت واني بحاجته ركضت ركضة الطفل

الشاف ابو !!

جنت واكفه بنص المطبخ وهو فتح الباب

مااتذكر بالضبط شصار وشنو من لحظه مرت عليه

كل الي اتذكره ضربة الراشدي مالته خلتني

وكعت بالكاع واسمع طنين اذني

رجع لزمني من تراكي وضربني الثاني على نفس

المكان هناااا حسيت بسائل نزل من اذني على بلعومي ...

اريد افتح عيني ماكدرت طفت عيني اليسره

من قوة الضربه يشحط بيه ورجليه بالكاع

للصاله هي دفعه هي دفرة ببطني شاغت روحي

صرخت بصوت رج البيت رج..

وكعت بالكاع واديه ع بطني وعيني ماتنفتح اذني

مسدوده مااسمع منهه غير الوشه

خياله كدامي اشوفه اريد اركز بملامحه واشوفه ماكدر..

دنك عليه بمستواي صاح بيه بصوت

ليششششش هيج؟؟ شسويتلج حته ادنكين راسي

شلتج هناااا واشر ع راسه .. اذيت نفسي ومااذيتج

ليش هيج طعنتيني ولج بنص بيتي الي امنتج علي

بنص بيتي اتجيبينه ورجع صاح بيه احجججي

اليوم لو اني لوانتي ؟؟

رفعت راسي علي بس هاي الجمله كدرت احجيهه

اني بريئه روح راجع كاميرة الجيران

اني دافعت عن نفسي..

ماسمعني ضربني راشدي ثاني ع نفس الخد لان صاير

ع ايده كمت اصيح اذني اذني ولازمتهه

مااسمع شي ماطور وانفتح بيهه ..

كل هذا وماسمعني يشيلني من هذا المكان ويرجع

يشمرني بالمكان الثاني

يقبض ايده بقوه ويرفعهه يريد يضربني بس

يدفعني من كدامه لو اوكع بالكاع لو ع التخم

مثل الكره الاسفنجيه صرت بايده

تركني وكام ع المرايه ضربهه بقوه

الكزاز ترس البيت ايده تنزف ..

شال الطبلات هن والتحفيات العليهن

كام يشمر بيهن عشوائي الي اجت بالحايط

والي اجت بالباب فقد بهاي اللحظه انهار اكثر من حالتي..

اخر شي كعد بالكاع ولازم راسه ومايردد

غير بس ليش هيج سويتي؟؟

مدنك راسه وتخيلي مدري هاي الحقيقيه

صوت بجي وهو يحجي متقطع ..

اذا ناويه تنتقمين مني؟ ليش ماطلبتي

الطلاك ؟؟ ليش دنكتي راسي وصرت علج بحلوك

الجنت سلام ماسلم عليهم

قصرت وياج اني؟ بخلت عليج بحب؟ بفلوس؟

احجيلي شنو قصوري وياج حته ادورين وراي

وتسوين علاقه وانتي ع ذمتي

شكد دافعتلج وشكد بررت وحميتج من نفسي

هاي جزاتهه ياقبس

ذنبي شنو؟ ذنبي حبيتج وتعلقت بيج

ولج من عمرج ١٤ سنه واني اردد براسي قبس الي

ولو اعرف انهي عليهه ومااخليهه تروح مني

جنت اشوفج شلون متأذيه ع اهلج واكول هم يجي يوم

اعوضهه عن هذا الالم كله واصيرلهه اب وام ..

رحتي اسنين واني ادور عليج ماحجيت كدام احد

افتر عليج مثل المخبل واكول بس الكاهه حته مااضربهه

على هزيمتهه لااا اخذهه بحضني والهه الامان

لكيتج وجنت اكابر واجاهد ويه نفسي حته

لا اضعف وبعدني مااعرفج ردت اتاكد من عندج حتلو متزوجه

واطلكتي بس كون مومثل خالاتج وبناتهن

شكد حاولو يخربون بس جنت اشوفج ورقه بيضه

صافيه من كل شائبه وادافعلج بكل اصرار

حته اذا الشك يدخل براسي ابعده واكول دشوفهه هيج

وجه يعرف يلعب ويخون..

رجفتج بيدي واستمر حته ورا زواجنه واني كلما

اتقربلج احس برجفت اظلاعج اكول هي هاي الحبيتهه

بريئه وماعايشه هيج احساس وهسه عاشته وياي..

حبيتج اكثر من روحي وصلت بيه لو اطلبين

عمري انطي الج بس اشوفج مرتاحه

ولج موبس حبيتج تعلقت بيج صرتي انتي

كل حياتي فضلت ع اهلي ولسه اكلج احبج اكثر من اهلي..

تالي هذا الصار قبس ؟؟ حته من لكيت التليفون

ماانكر دب الشك بكلبي وارجع ابرر الج عفت شغلي

مثل المخبل وافتر اريد اعرف منو سوه هيج

لامحكمه مارحتلهه ورفعت دعوه وتوقف الرقم بس محد عرفه

كل همي شغلي؟؟كل همي سمعتي ومستقبلي

ودست عليهن وحميتج حته لاينذكر اسمج بالموزين

وينج عن تضحياتي مااجن بعينج؟؟

طول عمري سجلي نظيف ومن ورا السالفه مالتج

وهملت شغلي ويوميه كتاب انذار وتحذير

واسمي من دون المدراء رايح جاي للوزاره يهددون انفصل

بسبب تخلفي عن الدوام

واني افتر من مكان لمكان اريد خيط الزمه حته

اخذ حقج طبني مرض اني خليني اموت

خلي يصير بيه شي بس انتي شلون؟ سمعتج

شلون بيهه؟؟ موبس اني ادري حته استرهه

لج قبس كومي طعنيني بكلبي وخليني اموت

رغم المي والم اذني زحفت مثل الطفل بالكاع

اريد اوصل يمه هو بالجهه اليمنه واني بالجهه اليسرى

من الصاله جان كاعد ومستند ع الحايط

ومنزل راسه بالكاع وايده تجري دم وقميصه ابيض

ملطخ بالدم..

بايدي الترعش وبقلة حيلتي لزمت وجهه باثنين

اديه عيني مااكدر افتحهه الضربني عليهه بس الثانيه

ومن كدما بجيت ماشوف بيهه من الغواش

عيونه حمر حيل ايده ترعش واعصاب ركبته

بارزه ماكدرت احجي بس خليت كصتي ع كصته

وبجيت

ماادري بجه وياي لو هاي هزة جسمه من العصبيه

لوفعلا بشار دنك راسه وبجه..

دقايق طويله واحنه اثنينه ع نفس الوضع

دموعنه اختلطت شهكات انفاسنه صارت عاليه

اني خسرت وهو خسر راح حبنه وتهدمت حياتنه

بلا سبب!!

بعد راسه من عندي وكام وهو مخلي اديه ع عيونه

من كام ماكدر يوكف لزم الدرج يريد يوصل للمغسله

بس للاسف جنت اسمع اذا الجبل انهز بس هسه

شفته بعيني شلون وكع بالكاع وهو بضخامته وطوله

تخبلت ركضت علي احرك بي جثه وهامده اضرب بوجهه

بشار اكعد عليك الله لاتعوفني

كوم اضربني كوم عذبني كلشي سوي بيه

بس لاتغمض عيونك!!

مديت ايدي بجيبه طلعت تليفونه اني اعرف الرمز

بسرعه طلعت رقم عمر ودكيت علي عمر الحكلي

بشار وكع وحدي بلبيت بسرعه

حيل ماعندي اريد اسنده مااكدر كمت للثلاجه طلعت ثلج

وحطيته بالمي واجيت اشمر بوجهه يفتح عينه

ويرجع يغمضهه يريد يحجي ومايكدر

ايده تحركت وخلاهه ع كلبه بجيت

يم راسه ومااعرف شجنت احجي بس

كل الي اعرفه بشار راح يروح مني ابد ماكدر يكوم

شفته صارت زركه ايده ارفعهه ترجع توكع...

لحدما اجه عمر ورا ربع ساعه اني ماخليت

شعر ماشلعته وجهي خليته يجري دم

بلكي يحس عليه اذي نفسي ويكعد..

عمر هو وغيث جايين ركضت لبست حجابي

وطبوا سندوا اثنينهم واخذوا مااكدر اظل وحدي

عمر يصعد بي بسياره واني ركضت لغيث

ابوس ايدك اخذني وياكم اموت هناا

صاح عمر بيه فوتي جوه كله من جوه راسج

بنت الكلب احسابج بعدين ماترتاحين اله تموتي؟؟

مااهتميت لكلامه ظليت اتوسل بغيث كال اركضي البسي وتعالي مالج شغل بعمر اني اخذج

عمر كام يصيح ع غيث وحرك السياره وراح وعاف غيث

يمي مبين عمر يدري واصلا امبين سيرتي ع كل السان..

ركضت لبست عبايه اسلاميه وقفلت البيت وطلعت ويا

للشارع لان اجه ويه عمر بالسياره

امشي وابجي الله ينطي اخذني الشفته بعين عمر

بس الله يستر منه..

وكف تكسي وكاله للمستشفى كلبي نار لازمه تليفون

بشار بيدي واهز برجلي كلساع اباوع ع الساعه

هسه انتبه هسه شصار ؟؟

وصلنه للمستشفى نركض بعد ماغيث خابر عمر

وانطا المكان روحي مفرفحه وصلت اتفاجات عمو عادل وعامر

وجدو كلهم واكفين ..

بس ركضت لعمو عادل ابجي ماحسيت غير عامر يدفعني

ولا كال احنه كدام الناس وبنص المستشفى

دفعني حيل وكال ماذبحنه امج بس خلي يكوم بسلامه

اله بيدي ادفنج يم سميه..

عمو عادل رفع ايده حماني وصاح عامر منا ناس

خلي يكوم بسلامه ونحجي والتفت عليه بعتب

ومبين جان يبجي وكال ليش اجيتي اكعدي ابيتج مااكدر احميج!!

قبس.. ماحجيت بس غيث الله ينطي وكفلي وكفة اخو

حجه وياي كال تعالي هناا وجرلي كرسي كعدت واني

امسح بدموعي راح جابلي بطل مي وهو واكف يمي مثل الحارس

لان عمروعمو وعامر متخبلين وكملهه زوج عمه بشرى من اجه وهو يكول ولكم شنو هاي الفضيحه ابلع بريكي

ومااعرف شصاير بعد ؟؟

كل الانظار عليه عمو عادل تخربط واخذوا للطوارىء

وبشار مانعرف شي عنه مايخلون واحد يفوت

شويه وشفت اشكال اول مره اشوفهه بحياتي

كاعده بعيده بس اسمع صوتهم وهم يتوعدون الي

ويصيحون موكلنه بنت سميه نفس خالاتهه

ارتاح بشار من دنكت راسه وروسنه وطشت فضيحتهه

اختنكت اريد اكوم اصرخ اريد اصيح ولكم

حرام عليكم الله كال لاتقذفوا المحصنات

ولكم وين ترحون من عذاب الله وانتم تاكلون بلحمي

ردت اكوم وغيث منعني من شاف نظرات عمو عامر والي

اجو يصيرون ولد عم عمو عادل كالي كومي قبس

بسرعه كومي!!

قبس.. مااكوم شلون تريدني اروح وبشار

مااعرف مصيره يريدون يكتلوني خليهم اني اريد اخلص

من هاي العيشه..

غيث.. لخاطر بشار كومي سالفتج ع كل السان كومي

قبس والله كلهه ضدج وبشار لسه مامنتبه منو يدافعلج؟؟

قبس.. كمت من خوفي خفت اموت وماشايفته

وخفت اموت ويكولون غسلنه عارهه ويظل طول عمره

يعاني

كمت ويه غيث ومااعرف وين اروح طلعنه برا وهو يتلفت

كال اخذج ابيتي فاطمه يم اهلي ماتجي

قبس.. اخذني لبيتي ؟؟

غيث.. بس عامر متحلف بيج خاف يجيج للبيت

وتصير سالفه..

قبس.. غيث اخذني لبيتي.. بعدني احجي وياا دك تليفونه

اشرلي اسكت وهو يجاوبهه ها عمه شلونج

اسمع صوتهه عالي وهي تبجي وهو يكلهه ماكو شي مرتفع ضغطه

سكت شويه وجاوبهه ماشي لعد من اوصل ادك عليج اطلعيلي!!!

سده منهه وكال هاي ام بشار دكول جيب قبس يمنه

تخاف عليج من عامر انتي عاقله وسباعيه روحي يمهم

عامر يكرهج من زمان وشفتي هذوله شلون يحرضون بي

والشيطان شاطر

قبس.. مااريد اروح اخذني يم عمه بشرى

غيث.. يابشرى قبس انتي ماشفتي رجلهه شيحجي

بطلي اعناد وامشي لبيت عمج ام بشار تحميج هي كالت

قبس.. غيث احلفك بعزيز كلبك احجيلي شصاير

شنو هي فضيحتي ومااعرفهه؟؟

غيث.. دمشي وياي واسولفلج اوكفي هنا خلي اجيب السياره

من عمر ..

قبس.. ركض جاب السويج واجه طلعهه من الكراج

وصعدت ويا بس حرك كتله احجيلي

غيث.. والله ماادري ياقبس اليوم هيج بحدود الساعه ب١٢

اجت رسائل للكل ع الفيس الجان فاتح انترنيت شافهه والمافاتح هسه شافهه من حساب وهمي دز وحذف الحساب..

دنك راسه ماكمل كلامه ظليت اتوسل اله غيث احسبني

اختك اني ماعندي ااخ احسبني عرضك الله عليك احجيلي

غيث.. استغفر الله يابه والله مااكدر احجيهه صور الج ومحادثات بفستان مولائق وتحجين ع بشار وشغله انتقام

ودكولين اخذت بثاري منه ووو...

قبس.. كمت الطم ع وجهي وهو يريد يلزمني مايكدر يمد

ايده طبك السياره ع صفحه وكام يصيح راح انزلج بالشارع

كافي بداعه بشار كافي

لك غيث اني بريئه منو يطلع برائتي شلون اباوع بوجه

الناس واني نظيفه وهم يشوفوني وسخه وقذره

من بنات الشوارع

غيث.. يابه والله اني اجتني الرساله وماصدكت كلت اكيد

ضايع تليفونج لو مهكرين حسابج لان مبينه شغله

كيديه بس جيب اليقنع هاي العقول امثال عامر

حته لابو حوراء دازين حته لوائل خابرتني ساره شايفتهن

لان وائل جان نايم..

دزو للكل وبشار مادزوله الغايه شنو محد يعرفهه

اسمعيني قبس الله شاهد انتي عزيزه عليه ومثل

اختي والسمعته والشفته بعيني مااصدكه لان جانت شجن

تحجيلي عنج وماتثق غير بيج

بس لاتلومين بشار ابد شغلات مايشيلهه العقل واني

لوبمكانه ردت فعلي اقوى لان مامخلين ثغره وحده

حته الواحد يعرف منهه دليل متقنين عملهم باحكام

والغايه موانتي .. غايتهم بشار

لان لوانتي جان فضحوج كدام بشار وحده

مافضحوج كدام الكل حته لهذوله الي اجو دزو رسائل

وكاتبين مرت ابنكم سمعتهه ع كل السان

الكل يعرف كيديه وشغلة كره بس منو راح يصدك

عليهم بالشافته عيونهم

قبس.. شهكت شهكه محمله الم وكتله وبعد

شدزو؟؟

غيث.. عوفج منهم هسه ادعي لبشار يطلع سلامات

قبس.. غيث بداعه عزيز كلبك شكو بعد؟؟

غيث.. والله مااعرف شلون احجيهه بس نفسه الفستان

الماخذه بي صوره ع اساس منطيته لواحد وهو مخلي ع

وجهه وبعد حجي موحلو تحجي

وهو يجيبلج حبوب تحطيهه بالاكل لبشار حته

وسكت...

قبس.. حته شنو؟؟ لك احجي لاتخليني اذب

نفسي جوه السيارات

غيث.. من توصلين اسالي ام بشار تحجيلج

وشغل السياره

مااعرف شلون اوصف ناري لو اكعد شهر كامل

احجي المر عليه بهذاك اليوم وهذيج الساعه

بالتحديد مااوصف منهه شعره!!

وصلت لبيت عمو وغيث دك ع خاله

ماخلاني انزل اله طلعت بس شفتهه نزلت اركض

شمرت نفسي بحضنهه تبجي وابجي وياهه

اخذتني من ايدي وطببتني جوه جان الكل كاعد

التبجي والتحجي والتغلط عبرتهن واخذتني لغرفتهه

وكالت مااطلعين ابد تقفلين الباب عليج واله تسمعين

صوتي يله تفتحي..

رادت تطلع جريت ايدهه خاله شدازين رساله

اني انطي حبوب لبشار حته شنو؟؟

ام بشار.. حته مايخلف وحته يفقد رجولته انتي كايله

هيج بالرسائل وعافتني وطلعت

قفلت الباب ماخليت لا لطم مالطمت لا دك على كلبي

ضربت راسي بالحايط كمت اعض بلحمي اريد

اشلعه ...

اصواتهم مرهه مقززه اصواتهم قذره مثل

كلوبهم

اني وين؟؟ اني ماانتمي لهذا العالم ربي اخذني

يمك اني مااكدر اصير بقذارتهم..

مااعرف شكد مر بس الاصوات تعلى وترجع

تهدء جنت مخليه راسي بالكاع وسمعت صوت هدى

وهي تصيح اخوووويه يوم!!

فتحت الباب وطلعت اركض شفت عامر واكف هو شافني

وهو هجم عليه بس حمتني عمه بشرى وهدى صارن كدامه

عامر.. وخرن خلني اغسل عارهه هالساقطه راح تموت رجال

يسوه امهه الك....

بشرى... عامر الزم حدك لاتستقوون عليهه

مجرد ماوكع رجلهه خلي يكوم وهو يقرر شيسوي

لاتظل تهوبز وجامعلك شكم واحد وتاكل بلحمهه

عرضك هاي واتقي ربك عندك بنات

عامر..تشبهين بناتي بهاي الساقطه الزانيه

بشرى... عاااااامر وحق الله اذا ماسكتت اسوي المايعجبك

وتعرفني اذا بيك زود هذا الحجي احجي كدام رجلهه

موصرت سبع من شفته وكع

عامر.. احترمي نفسج بشرى لاتخليني امد ايدي عليج

ام بشار.. كافي عامر قبس ابيتي ومالك حق لا انت ولا غيرك

ولاعشيرتكم كلهه تمسهه بسوء بس ابني اله حق

وهو يطلع ويتصرف

ماصار معلوم الكلام صحيح يجوز يكيدوهه يجوز

مظلومه تريد تشيل ذنبهه اخر كلام عندي كل واحد جاي

يهد على قبس ذاك الباب خلي يطلع منه ولايشوفني وجهه

ابني بين الحياة والموت وانتم تستعرضون منو الاقوى

ساعه انت وساعه عمر وفوكاهه ولد عمك جايين هسه

يهدون ..

عامر.. هيج الحجي ام بشار هيج صار ادافعين عن الغلط؟؟

ام بشار.. هيج ونص قبس جنتي واليمسهه يمس بيتي

ومدام ابني لسه ماحجه مالكم حق بحرف واحد

شجن.. طلع عمو عامر وهو يغلط ويصيح وعمه بشرى

حمت قبس ورجعتهه للغرفه

كلنه كاعدين نبجي ذاك اليوم الاسود بعدنه هستونه نصب الغده

وكل واحد بينه ركض ع تليفونه من صوت الاشعارات

واحد يكل للثاني هذا منو وشكو؟؟

ماكو صورة رجال لان مغطي وجهه بالفستان

بس الكلام ماينلبس علي ثوب والمصيبه صورتهه

هي ولابسته ونفسه مخلي ع وجهه عود يشم بي

وسالفه الحبوب وهي دكول نفذت انتقامي

راح اخلي طول عمره بحسرة الطفل والنومه..

مااعرف شلون اخوي تحمل هالكلام شكد تأذى

بحيث ذاك الهيبه وكع هاي الوكعه

اجه عمو عامر وزيد الطين بله وكال انريد انحوله

لغير مستشفى بس حالته ماتسمح لازم ع مسوؤليتنه

بشار ضاربته جلطه قلبيه نتيجه ارتفاع ضغط الدم..

انعادت الايام السوده بيوم الدخل للسجن

اجن خالاتي كلهن وغير احنه منا كلهه تبجي

وياريت مثل السجن هالمره فضيحه وكل اللوم ع قبس..

تقريبا راح يصير المغرب اني جنت اتوضه اريد اقره

قران وطلعت قبس فاتت من يمي صحتهه قبس ماالتفتت

عليه لزمت يدة الباب مال الحمام ماخليتهه تسده

شجن.. قبس شوفي وجهج بالمرايه عينج زركه تعالي خليلهه

ثلج لايصير بيهه شي

قبس.. عوفيني وامشي من كدامي..

شجن.. سدت الباب حيل واني رحت للغرفه اريد اقره قران

واسمع صوت فرح وهي تصيح الحكولي..

طلعت ع صوتهه وهدى يمي بسرعه كمزت

وماانشوف غير قبس منيمه فرح بالكاع وبيدهه سجين اللحم

وحاطتهه ع ركبة فرح وبالثانيه العوده مال الماسحه

كلهه تعيط قبس عوفيهه عمه بسمه كلبت البيت بالصياح

ماما تتوسل بقبس تعوفهه بس موطبيعيه ابد

الي اشوفه بقبس موبس قوه بهذيج اللحظه

انهيار تام..

كامت وسحلت فرح من شعرهه ولازمه السجين

اي واحد يتقرب تريد ادجه بيهه

بحيث فرح وحدهه بيد قبس

كامت تشيل براس فرح وتضرب بي بالكاع

ضربتهه دفرات ببطنهه وع وجهه

دنكت عضتهه من اماكن متفرقه من جسمهه

وكلساع انكول راح تفوت السجينه

بكلبهه من صريخ عمه بسمه دفرت فرح حيل وكامت ع عمه

صاحت بيهه بصوت تخافين عليهه هاي الساقطه

انتي وبناتج وشكو واحد حجه عليه ساقط

عبالكم اكعد اتوسللكم عوفوني لاتكتلوني هاي اني

كاعده هنا وخلي كوا... يجي عليه الا احطهه بكلبه

شجن.. جاي اشوف فلم رعب قبس منين جابت هاي القوه

ولا وحده بينه كدرت تفتح حلكهه بحرف

الكل بعيد واكف ايد بيهه السجينه والايد الثانيه شعر فرح

خصل طويله مشلعتهن..

اشرت لاسراء بالسجينه تعالي تعالي!!

البنيه كامت تبجي وتصرخ انقذوني منهه

وقبس تضحك اجتهه نوبه جنونيه

شالت الحذاء اليمهه وشمرته ع اسراء

كلما تتحرك فرح تدفرهه برجلهه تكسرت

تكسر حته الدم يطلع من خشمهه

واي واحد يتقرب لفرح يريد يكومهه

تهد علي بالسجينه..

تقربت عليهه عمه بشرى لازمه التليفون بيدهه

وتحاجيهه قبس بنيتي هاج هذا بشار ع التليفون

يريد يحاجيج

ذبي السجينه انطينياهه وحاجي خطيه باله يمج!!

قبس.. حجت بفرحه صدك كعد انطينيا احاجي وهاج

السجينه ..

بشرى.. اخذتهه من ايدهه واخذت قبس للغرفه ودكلهه تعالي هنا خابري حته لحد يسمعكم

شجن.. مدري شلون تعاملت عمه بشرى وياهه واخذتهه من ايدهه وشمرتهه ع التخم واخذت قبس للغرفه

مثل الطفل من يجذبون علي ويقشمرو

قبس.. وينه بشار اتجذبين عليه موو؟؟

بشرى.. اهدي عمه شجاج !!

قبس.. ولي من وجهي انتي هم ساقطه مثلهن

بشرى.. خلفله عليج مقبوله منج

قبس.. قابل جذب؟ انتي مواخت بسمه يعني انتي مثلهه

اني هسه موبنت سميه يعني مثلهه كل الي بالبيت ساقطين..

بشرى.. اي عمه كلامج صحيح كلنه ساقطات

لعد بسمه شنو واني اخت بسمه وليهمج اهم شي انتي

تقبلين

قبس.. اريد اذبح فرح

بشرى.. اني وياج نذبحهه بس موهسه؟؟

قبس.. شوكت؟؟

بشرى.. من يجي بشار حته ينطينه المسدس مالته

قبس.. خاف مايقبل

بشرى.. لا يقبل هو يحبج ومارفضلج طلب

قبس.. اريده خلي يجي هسه

بشرى.. عمه قبس شتحسين سولفيلي؟؟

قبس.. عقلي يوجعني جيبي ايدج حكي

جاي يحكني بي نمل

بشرى.. انتي بوعيج عمه؟

قبس.. اريد بشار جيبي هسه

بشرى.. تعالي نامي وهسه اخابره اكله عوف الدوام وتعال الهه

حته يجي ينومج بحضنه

شجن.. واكفه وابجي ع حالتهه قنعتهه عمه وخلتهه تمدد بفراش ماما وغطتهه وظلت تقره ايات قرانيه

على راسهه واني ركضت جبت حب منوم من عندي

انطيتهه حبايه اخذتهه ونامت...

طلعت برا شفت فرح ملعوب بخلقتهه لعب

شعرهن مكطع وعضه قويه بخدهه وبزندهه

ضاربتهه بالماسحه ع رجليهه تصيح منهن

ولازمه بطنهه تبجي..

عمه بسمه رادت تدعي وتحجي بس عمه بشرى سكتتهه

رادت تاخذ فرح وتكوم بس بيبي كامت تصيح

مااطلعن واذا اكو واحد يطلع هاي الساقطه بنت سميه..

اتجادلت ويه ماما لان ادافع لقبس وعمه بشرى

كامت تحجي وبالاخير عمه بسمه راحت واخذت فرح

وفاطمه وراحت..

لليل يله اجه عمر كال انتبه بشار بس بعده مامتعدي

مرحلة الخطر كالو مده ٧٢ ساعه يله انطلعه

عمر شكد جان عصبي ومتحلف بقبس

بس هسه ساكت ماحجه وطلع من جيبه شريط

حب كال هذا انطو الهه خلي تبلعه ..

مرت هاي الليله بالالم والخوف والقلق

التفكير هلكنه وكلما يندك التليفون نركض

خاف خبر موزين

محد تعرض لقبس طول هاي الايام

لحدما اليوم كالو راح يطلع بشار رحت اركض

اريد ابشرهه لكيتهه صافنه بالفراغ

هزيتهه اكثر من مره يله انتبهت

حته مافرحت شكلهه يخوف خدهه ازرك وعينهه زركه

حته جهه من شفتهه مورمه

ماتبجي ولاتصيح بس ساكته..

حضرنه جربايه بالاستقبال. اكيد تجينه ناس

وبيومهه فاديه يمنه جانت بالشهر الثامن وعدهه اوجاع

خاف تصير عدهه ولاده...

عمو عامر ماشفنا بعد شويه ودخل بابا

مبتسم بس وجهه شاحب اصفر ٣ ايام هو للصبح

يظل يسبح ويصلي ويدعي تعدي ع خير..

كعد يمنه بالمطبخ وهو يوصي ماما كون ماكوشي نقص

بشار متعود ع هدوء ابيته هنا صوت مااريد

ام بشار.. عادل عمر شو سكت جان كالب الدنيا بالصياح

حته قفلت الباب ع قبس خاف يأذيهه

عادل.. موحصل رزاله من بشار غسلهم غسل

ام بشار.. شوكت؟؟

عادل.. اول ماانتبه هواي ناس يمه والطبيب صاح بيهم

كال حاليا وضعه زين بس اله ٧٢ ساعه يله انطلعه

وطلع الناس الجايه كلهه بقينه بس اني وعامر وابوي وعمر

اني وصيتهم لاتفتحون الموضوع ويا اله يصير

زين وهم ظلو ساكتين..

هو الله يسلمه يحبهه اول مافرغت الغرفه سأل منو جابني

هنا!؟

عمر.. اني وغيث؟

بشار.. منو خابركم؟

عمر.. قبس

بشار.. وهسه وينهه؟؟

عامر.. شكو تسال عليهه كوم بسلامه ونعرف نسولف

ندري بيك تستر الهه بس لهنا وبس لازم نخلي حد لهاي

الفضيحه

بشار.. يافضيحه؟؟ وانت منو حته تحجي وياي بهالاسلوب

وتكول فضيحه

عامر.. اني عمك والماخذه بنت اخوي المات وماعرف يربي

بشار.. كح بصعوبه وكال هسه مالي حيل اكوم واناقشك

بس اكلك كلمتين اياك ثم اياك اسمع حرف واحد موزين تحجي

عنهه لا كدامي ولا بظهري

عامر.. عفيه ببن اخوي عود هاي انت الجبير اكعد وبرر

لهاي الزلم الواكفه برا الشافوا صور مرتك شبه عريانه

بشار.. صاح صوت كلت راح ينجلط وكام يحجي بصعوبه

وكال هاي الزلم التحجي عنهم اله احط الق... بحلوكهم

واليكول رجال خلي يوكف بوجهي ويذمهه

صار عصبي حيل مايدري بسالفه الرسائل واصله للكل

عباله بس عمر يدري تفاجئ من سولفله وكاله شكو واحد عندك

علاقه بي جايته رساله

تخربط بسرعه واجو قاسوا ضغطه مرتفع

وكام يحجي علينه الطبيب وطلعنه بس بعدين

دز ع عمر وكاله روح اخذ علاج قبس ودي الهه ووصي امي عليهه

الحجيه.. كل السوته وبعده يحبهه والله بخت ال....

عادل.. يمه قبس ربت يمنه وماشفنه شي موزين منهه

والسوه هيج واحد قريب علينه حته يعرفنه ويعرف حساباتنه

حته رجل هدى شعرفه بحسابه لوماقريب علينه

الحجيه.. ظلو دافعولهه وهي كل الزلم شافت صورتهه

وزنودهه اني من شفتهه استحيت

عادل.. استغفر الله يمه لاتحجين ترى الشرف غالي وكل كلمه

دكوليهه ترجع عليج لان بنت رضا موبنت غريب

وبعدين حته لاسامح الله اكو هيج شي واجبنه نسترهه

لان الله يحب الساترين ولو اني اثق بيهه مثل مااثق ببناتي

ومحد اله شي يمهه بس بشار يريد يطلكهه يريد يبقيهه

شي راجعله

الحجيه.. ولك والفضيحه الماتسولف جنة اختي دكول

زلمنه شايفين الصوره ويكولون والله حلوه مرت بشار

عادل.. هذا اليحجي هيج ناقص غيره واصل

اني عمهه وماشفت الصوره بس شفت هيج مسحتهه

بس اليسوي هيج هذا يجي يوم وتطلع ببناته

اني ويه ابني شيريد يسوي اني ويااا خلي يطلع

ونكعد ونحجي ومرته لحدما ياخذهه هي امانه عدنه

شجن.. ظلوا واحد يرفع وواحد يكبس

صارت ب١١ اجوو طلعت عمه بشرى هلهلت

وماما تبجي حضنتنه

كلنه ركضنه علي بوسنا تعبان حيل ماتلوكله

هاي الوكعه ابد طب لاستقبال عمر وغيث وامجد

جانو موجودين

كلما ارفع راسي تجي عيني بعين امجد ماانتبهت

ع غيث ابد كامت تشاقه ويااا عمه بشرى

موذاك بشار اليحب يداهر عمه وصوت ضحكهم عالي

طلعوا غيث وامجد وعمر راح وياهم التفت عليه

وكال شجن جيبيلي تليفوني شوفي وين؟؟

تليفونه عند قبس رحتلهه للغرفه لكيتهه نازله من الجربايه ومكرفصه نفسهه مسويه وضعيه الجنين ونايمه

بالكاع

كتلهه قبس اجه بشار ماتكومين تشوفي؟؟ ماجاوبتني!!

كتلهه زين وين تليفونه يريده!!

اشرتلي ع الميز اخذته وديته اله شويه وكالت ماما عوفو يرتاح يله كومو من كمنه صاح شجن ابقي وانتم اطلعوا..

كعدت يمي ع الجربايه ايده جانت ملفوفه بشاش

يمكن مجروحه وهو جان يباوع بتليفونه شويه وشمره بصفه!!

بشار.. تعرفيني اثق بيج لذلك اريد منج شغله

شجن.. من عيوني بس كول

بشار.. اول شي قبس شلونهه؟

شجن.. موزينه مااعرف شبيهه اله تتعارك ماما يله تاكل لفه صغيره وماتحجي وكلما افوت الكاهه صافنه وتنام بالكاع ترفع الزوليه وتنام ع الكاشي البارد

بشار..بلع ريكه وعلاجهه تاخذه؟؟

شجن.. عمر جاب علاج انطيته الهه ماتاخذه نفسه وكلما

احاجيهه ماترد عليه يمكن داخله بصدمه قويه

بشار.. وين هسه؟

شجن.. بغرفة ماما!!

بشار.. ممم احجيلي بالتفصيل يارسائل واصله الكم كومي شوفيني

شجن.. نفسهن ماكوشي جديد

بشار.. ادري سالفه الفستان وصلني بس اريد الوصلن الكم بالذات

شجن.. بلاول ماقبلت انطي بس صاح بيه كمت انطيته تليفوني

قراهن وضرب تليفوني بالحايط تفلش..

ورد عليه شكو حافظتهن احجي!! شكو مخليتهن بجهازج

حته مثل الصور وبعدين مانعرف منو الاخذهن؟؟

شجن.. والله العظيم نسيت لان التهيت بالصار

وبالنه يمك نسيت امسحهن

بشار.. يعني هم نسيتي بيوم صور قبس ونكرتي وكلتي

امسح بلحظتهه؟؟

شجن.. والقران لاا مايوم خليت صوره بشار قبس

احبه والله كلبي متكطع عليهه بس مااعرف الصور شلون

طلعن..

بشار.. شجن حدج منا لليل اريد الاسماء بورقه شكو واحد جايته الرساله من بيتنه ومن برا بيتنه شكم واحد اجتنه هاي المحادثات مو ع اساس دازيهن ب١١ بيوم الحادث..

شجن.. واني شلون اعرف؟؟

بشار.. ماادري انتي واخواتج منا لليل اريد الاسماء

روحي دوري انتي وياهن واشرلي اطلع بسرعه!!

شجن.. طلعت من يمه واني حايره شمعرفني المن دزو الرسائل

حجيت لهدى وفاديه كامن يدورن وياي

اجه ابالي امجد كمت دزيتله رساله شرحتله السالفه

كال للعصر اجيبهن..

مااعرف غاية بشار شنو وليش يريد يعرف

المن اندزن؟ بس العليه اجيبله الاسماء..

قبس.. مريت بمرحلة ماتسولف اصلا مااتذكر

اي حدث حته كتلة فرح مااتذكرهه مو بوعي الكامل

اله سولفنهه الي..

تحاجيني شجن ودكلي اجه بشار بس صوتهه ضعيف

اسمع بأذن وحده الثانيه الضربني عليهه طفت فدمره

بس وشه واحس بسائل يتحرك بيهه..

جنت مدده بالكاع جسمي نار رغم الجو شته بس

الحراره تطلع من كل مكان بجسمي ارفع الزوليه وانام

ع الكاشي يله ارتاح..

انفتح الباب وعبالي مثل كل مره شجن لان تحوم فوكاي

بس شميت عطره بسرعه غمضت عيوني

وجمدت اعصابي..

كعد ع الجربايه سمعت صوتهه من كعد واني منطيته ظهري

حجه بصوت قريب ع الهمس اذا كاعده كومي اريد احجي وياج!!

رفعت جسمي من الكاع وكمت وكفت كدامه كتله الحمدلله

ع السلامه رفع راسه باوعلي مثل الفز ورد الله يسلمج..

اشرلي اكعد بصفه كعدت واني احس ببرود موطبيعي

مو بمشاعري لاا بكلشي حته بالالم مااحس

بشار.. ليش ماتاخذين علاجج

قبس.. مااريده

بشار.. تأذين نفسج

قبس.. خلي

بشار.. اكو احد ضربج هنا؟؟

قبس.. لااا

بشار.. اسمعي الي راح اكوله..

انتي عرضي بنت عمي قبل لاتكونين مرتي

سواء غلطتي او بريئه حاليا مااشوف كدامي

اي دليل يكول انتي بريئه اكو صوت بداخلي يكول

اكو واحد ورا هاي السالفه بس مااكدر ابرئج اله اشوف

بعيني..

خليني اكون واضح وياج ما احب اغشج ولا احب

امثل واتصنع!!

انتي مخيره تريدين تبقين هناا؟؟

تريدين ترجعين لبيتج؟؟

بس بالحالتين اني بعيد عنج لا اطالبج بحقوق ولا اطلبيني

بشي..

قبس.. طلگني!!

بشار.. رفع حاجبه وهو صاك اسنانه مااطلكح هسه خلي تعبر

مده ع السالفه يله اطلكج لان راح تثبت التهمه عليج

قبس.. مايهمني المهم اكو الله يعرف بيه بريئه

ماتهموني كلكم

بشار.. قبس لاتستعجلين شكدما انتي متأذيه

اني اضعاف واتخيل صورج تشوفهه هيج شكول زفره

ويحجون بيهه وفرك وجهه بعصبيه وكام

طلاك هسه مااطلك اختاري لو هنا تظلين ؟؟ لو تجين ابيتج

وبالحالتين اني وياج ع ورق..

عافني وطلع مابجيت ولا اجتني الحاله

لان اصلا دخلت بطور العزله وسيطرت عليه

الاوهام بالكامل..

فتحت الباب وطلعت ادور علي صارت اسراء

بوجهي باوعتلي باستهزاء وفاتت..

رحت للاستقبال لكيته هستوه يريد يمدد سديت الباب

وكتله اريد احجيلك بيومهه شصار؟؟

بشار.. لاتحجين اني احجيلج اني مخلي كاميرات بالباب وبالحديقه

وشفت بعيني ياقبس وياريتني ميت وماشفت

قبس.. بس اني بريئه هو طب تهجم عليه بشار

حته ضربته وماخليته يلمسني طلع التصوير

بشار.. ماكو كاميرا بهذيج الجهه لان مامحسب هيج يصير

قبس.. روح لجيرانه عدهم كاميرا صورتنه اكيد الله

عليك روح وتاكد بنفسك اني مااريد شي منك

حتلو تشمرني بالشارع بس اريد اثبتلك اني نظيفه

بشار.. تدرين هذا النذل من شفته عرفته ورحت

لام حسن لان تعرفه ودلتني ابيته ورحتله طلع شايل

وظليت هايم بالشارع افتر بلكي الكاا بس رجعتلج

وهسه من طلعت انطيت معلوماته وطلع مسافر هو وبنته

حته مديرتكم تكول نقل بنته وتدرين شكالت؟؟

كالت ليش تسال علي ترى ست قبس تعرفه ويجي دائما عليهه

عبالي كرايبكم

قبس.. جذابه هو اجه بيومهه كال اني السويت هيج انطيني فلوس وابرئج لان اكو شخص دافعله حته يأذيك

بشار.. للاسف مااصدكج ابد لاتحجين وهسه عوفيني وحدي

قبس.. براحتك لاتصدك

شجن.. هوايه خطار يجينه اسراء مالهه صوت وفرح مااجتنه

بعد الاسماء انطانياهم امجد واخذتهن لبشار وكتله من امجد

ماكو غريب كلهم اولاد عم بابا...

بشار جان مصر يسوي كعده وجمع الكل وخاصه هذوله ودزو

ع شيخ عشيرتنه وبيومهه بشار دافع عن قبس وحماهه من

كل كلمه انكالت عنهه وكالهم السوه هيج اعرفه يكيدني

ووكعت بمرتي

هاي الصور ماخذتهه بتليفونهه ومن اسافر ادزهن الي

وقبل اشهر ضاع تليفونهه او بالاخرى انسرق منهه

وسوو هاي المكيده

وطلب منهم الشيخ تليفونات الموجودين كلهم وحذفوا الصور

والمحادثات وظلوا يعتذرون من بابا وبشار

شلون شكو وشلون حجوا كلام موحلو

كالهم بشار اي كلمه تنكال بحق مرتي

معناتهه مسيتو شرفي هالمره صارت كعده بالتافهم وبمايرضي

الله المره الثانيه احاسبكم واحد واحد

انسدت السالفه ورجعت الامور طبيعيه

وبشار تحسن وكال اليوم بليل ارجع لبيتي..

قبس.. اختاريت ارجع ويااا ماعندي احد

رغم بعدني مذنبه بنظره ونظر اهله بس

املي بربي يجي يوم ويطلع الحق..

خليت رجلي بلبيت واني اتلفت بين

الحيطان طب كدامي للحمام

واني نظفت الهوسه الصارت بذيج الساعه السوده..

رجعت لبيتي الجنت بي مثل الورده الفواحه

بس هسه بس جسد وحته جسد موصاحي

ماكتله ع اذني رغم طفت نهائيا وصرت اسمع

بتك وحده ...

مااعرف حياتي بعد هاي الليله الرجعت بيهه

شراح تكون؟؟

راح ادخل بمعاناة جديده لو راح اشوف شعاع الفرح

يشرق على ايامي المعتمه..

.

.

يتبببببع..... احبكم

قمع المشاعر.... التاسع عشر من الجزء الثاني...

للكاتبة زهراء ( روزايه)...

مِن قلب الألم أتكلم.. مِن وسطِ اوجاع روحي

من بين تلك الخناجر المطعونة في قلبي

لا طاقة لي لتركها ولا طاقة لي لأزالتها ,

تستمتع الدموع وهي تتراقص على وجنَتَي

لا اعرف ماذا يعجِب الدُنيا اكثر اصوات شهقاتي

التي تتعالى ام رجفة شفتيَّ ؟؟

اين انت يا أملي اتهون عليك دموعي؟؟

ايهون عليك ان تترك من تمسكت بك ؟؟

ابعد هذا كله تتركني ولا تُخبرني بالسبب حتى؟؟

يا أملي بي صرخة ترجُّ الدُنيا وما فيها ..

الكِتمان مؤلم والبوح لغيركَ أكثر الماً

....

قبس..  انحبست بين ٤ حيطان كرهت كلشي

كرهت نفسي الضعيفه وكرهت حبي لبشار

حته اهلي !!

صفيت وحيده لاصديقه عندي واشكيلهه

ولا ام اخلي راسي ع صدرهه وتهون عليه

لا ايد اب تمسح ع راسي ويدعيلي بصلاته!!

وحيده

مظلومه

مريضه

كدام عينهه تشوف تهدم عائلتهه

خسارتهه لزوجهه!!

افتح عيني الصبح بس الحيطان كدامي

تعبت حيل علاجي تركته نهائيا ماريده

اني اريد افقد عقلي حته ماافكر حته يكولون لا ع المجنون حرج!!

بشاااار ياوجع كلبي اني ويا غربه واحد مايعرف

الثاني يجي من الدوام المغرب

لا يتغده ولايتريك بالبيت مرات يتعشه ومرات يكول مااشتهي

ينام بالاستقبال بعيد عني!!

غرفتي مايفوتهه غير بس وقت ماياخذ ملابسه

وبالفتره الاخيره كال حضريهن برا مايريد

يفوت ولا يريد يلمحني..

غراضه!! ساعاته ! عطوره ! هذني كلهن

طلعهن ع الطبله بالاستقبال قاطعني

نهائيا حته ملامحه كمت مااشوفهه لان بس

يصير كدامي لويدنك لو يدير وجهه..

اكعد الصبح وحدي بلبيت اجبر نفسي ع الريوك

غده مااتغده اذا كلش اكل فواكه

وعشه مرات هو يجيب جاهز واكله ومرات انام بدون

اكل نفسي مسدوده من اي شي..

صار ١٠ ايام ضبط ع رجعتي للبيت

جانت الساعه ب١٠ بليل حاولت انام وين اروح

ماكدرت كمت من فراشي رفعت شعري

وطلعت للاستقبال..

لكيته مدد ويتصفح بتليفونه!!

ظليت واكفه فوك راسه نزل الفون وكال رايده شي؟؟

قبس.. اريد احجي وياك؟

بشار.. احجي اسمعج ورفع نص جسمه واستند

ع التخم وشبك اصابع اديه وكال اسمعج بس ابد ماباوع بوجهي!!

قبس.. تذكر من جنت بالشركه وكتلك اكو سياره

تمشي وراي وبيهه ام حسن وسالتهه وكالت اشتغل عدهم؟؟

بشار.. ايي

قبس.. ام حسن مره سولفتلي كالت هذا الرجال تورطت

وياا اشتغلت عدهم وكال اني اساعدج جانت محتاجه فلوس

ومنطيهه وره مده كايلهه اريد فوائد عليهن يعني

يشتغل بالارباح يعني مرابي..

بشار.. اااي

قبس.. وبوقتهه سألت ام حسن شلون تاخذين منه

وماتعرفي كالت ست ميامين عرفتني علي

وهسه ست ميامين اكلهه ساعديني دكول هو هذا شغله

هيج منو كالج تاخذين منه !!

بشار.. يعني؟

قبس.. يعني ميامين تضوج منك احتمال متفقه وياه

وسوت هالشي اني مااعرفه وروح اهلي

بشار.. لنفرض تعرفه شوصل صورج يمه؟

زين شلون يعرف اني مامخلي كاميرات بالجهه الثانيه؟

زين سالفه الطفله ليش خليتيني اشيل الكاميرات

وبيوم الصار طفله دكت الباب وانتي ذبيتي جنطتج ورحتي فتحتي؟

زين الفستان شوصله اله؟ وشوصل التليفون بملابسج؟

شمدري انتي تخافين من الطفله وتكولين راح اخلي يشيلهن؟

شمدري انتي تاخذين مانع؟ لنفرض صورج طلعت من شجن بدون متدري؟ الحجي شلون طلع؟

شمدري اني جبت الفستان موانتي اشتريتي وشمدري اني اسألج دائما واريدج تلبسي؟

شمدري بسالفه الانتقام السابقه وانتي جنتي ناويه

تنتقمين من عدنه؟

كليلي انطيني اجابات مقنعه واني وياج

اذا هو هاجم عليج للبيت وين ردة فعلج الشفته عكس

هالشي؟ قبس لاتهيجين مواجعي خليني بحالي

قبس.. بشار اني تعبت من التبرير وصدكني مااهتم

صدكت او لا !! بس اليهمني شرفي انطعن واني مظلومه

الي اذاني انشافت صوري واني بريئه هاي الطرمه ماطالعه الهه

كلي يايوم طلعت وغسلت البرا وحدي مو اله تجي

وتطلع وياي وبس بليل يايوم شفتني افتر بالحديقه

ولازمه تليفوني واخابر؟؟

بشار.. قبس اني رجال شرقي والف مره كتلج اني

شكاك ووياج انتي بالذات سويت انجاز وتغلبت ع شكي

وهوايه صارت شغلات ووكفت بجانبج لان بطبيعتي

اعرف السبب يله احكم بس هسه صار اشهر وماعرفت

هاي مكيده لو حقيقه

زين اكلج شي؟ شفتج شلون افتريتي بالممرات وانتي ادورين

ع الكاميرات؟؟ ليش دورتي عليهه وحته ماسألتيني؟؟

ورحت لجيرانه الكلتي صورتنه كاميراتهم وطلعلي رجلهه

كال عاطلات

قبس.. تفاجات من شفتهن ماكو ودورت عبالي

لاغي بس مال الباب موبقصد

بشار.. وشكم مره اجاج هذا العار للمدرسه وحاجي

وياج وماسولفتي الي ؟ لاتحجين قبس كلبي فاض من

جذبج وضمج عليه

اني لومثل البقيه وع اقل شي اضربج واغلط

وحابسج بالبيت جان خليتيلي احترام

بس اني رخيت الحبل هواي والصوج بهذا ودك ع كلبه

الصوج بي ماكدر يأذيج وماكدر يقسي عليج

تعرفينه هالعار نفسه الشفتي بالشركه ومااجيتي

حجيتي الي تذكرين من كتيلي واحد اتحارش بيه

بالطريق ورزلته وانهزم وكتلج هاي نماذج تعبان

لاطلعين وحدج!! ليش ماكتيلي ترى هذا العار نفسه

الجان ويه ام حسن حته اروح ادوس ع راسه

ليش ضميتي عليه؟ بأي مبرر !! تخافين مني

اني مااخوف بالذات انتي تذكرين شجن اشسويت بيهه

لان ضمت عليه ؟؟

بس انتي كلشي ماكدرت اسويلج

هاي ايدي ورفعهه هاي لووحده غيرج بهاي ايدي

اذبحه ع الاقل جان ضربتج لحدما يرتاح كلبي

بس لسه ضعيف كدام دموعج

وفضلت احترك بناري واكبت بصدري

ولا امد ايدي عليج!!

قبس.. نصيت راسي الغلط مني عبالي من ذوله اليتحرشون

واني بكل مره ارزله

صح غلطت بس مالي قصد انت ترجع تعبان حته انسه

احجيلك لان شغله مومهمه شمدريني توصل لهنا !!

بشار.. لاتعبين نفسج روحي نامي لان موبس انتي الخسرتي

اني هم خسرت!!

قبس.. ماخسرت شي انت !!

بشار.. شمدريج شخسرت خليني اكلج شخسرت؟؟

خسرت منصبي كمدير عام تدرين ليش؟؟

لان افتر وراج اريد دليل يطلعج بريئه وعفت الدوام

وكلما تجي لجنه اني ماموجود وتراكم بالشغل بسببج

لان صار كل همي انتي شلون اطلع برائتج

اسلوبي زفت ويه الناس وكامت الشكاوي

تصعد وتنزل عليه

وهاي كدامج بشار الجاب عمره كله بالشغل

درست وتعبت وسهرت ليلي وعشت سنتين بعيد عن اهلي

ويوميه بمحافظه حته اثبت اسمي ؟؟

ومن ثبته بسببج خسرت بسبب طيشج وغبائج

وضمج عليه وخليتيني مثل الاثول كلشي ماادري

تاليتهه رجعت موضف بالوزاره حالي حال التعينوا البارحه..

هسه ارتاحيتي ؟؟ ارتاحيتي من دمرتي كلشي بنيته

اخذتي انتقامج ؟ رضيتي ضميرج ؟

حملتيني هم طول عمري راح اظل اعاني من عنده

دمرتيني قبس وفوك كل هذا نزلتي راسي وكالو مرت بشار

مصادقه علي ..

كومي من يمي اذا تحبيني واذا الي خاطر يمج

عوفيني وحدي لاتتقربين يمي لاتخليني اشوفج

ابتعدي عني لان تعبت بسببج تعبت!!

قبس.. لاتضغط ع نفسك ترى مثل ماجنت عايشه

بدونكم هسه هم اعيش اذا هلكد كارهني طلكني

لاتخاف عليه هم اعيش وهم احمي نفسي

بشار.. صاح بيه حيل خفت لايرتفع ضغطه

كومي من يمي لاتشوفيني وجهج كومي قبس

رحمه لاهلج ارحميني كااااافي ابتليت حبيتج..

قبس.. من هاي اللحظه استسلمت كليآ

لابعد بررت ولا حجيت ويا ولافكرت حته دماغي ارتاح

دخلت بطور العزله

بوقت فراغي اكعد اقره قران لو اصلي

ومرات اتابع تلفزيون اكل وحدي

كلام بيناتنه ماكو انعدم بس صدفه يسالني ع المسواك

ملابسه احضرهن بدون مايكول

شكدمااني جنت متأذيه هو اذيته اضعاف

من خسر مكانه اتمنيت اني ماداخله حياته ومخربتهه

تمنيت لو متاخر عليه ربع ساعه وعزيز متمم زواجه بيه

ع الاقل هذا مستواي وماطمحت للعالي..

محد سأل عليه نهائيا او بالاحرى ماعندي تليفون

احتمال يخابروا ويسالو ومايكول!!

اني ورقه وعصفت بيهه الريح

واخذتني بعيد عن الشجره الجنت متعلكه بيهه

بيوم منهن اجه سبح وصله وهاي اول مره يطب الغرفه

فتح الباب اني جنت العب بالخرزات حته اشتت فكري

من شافني بلاول صفن عليه وبعدين حجه

كال كومي بدلي انروح لاهلي

قبس.. روح انت ماروح هم اهلك مواهلي!!

بشار.. قبس كومي لازم انروح نبارك لعمر بيته الجديد

قبس.. بس مانتاخر ماريد اشوف احد

بشار.. استعجلي!!

مدري ليش عجبني اغير كمت طلعت بنطرون قماش

اسود وكيمونه طويله سوده وستره ماروني

لبستهم بيهم عرض عليه لان ضعفانه بس لابأس

لبست ذهبي وخليت مكياج وحمره وردي

من شفت نفسي طكيتهه ضحكه وغميت نفسي

باثنين اديه شكد بليده اني!!

اخذت الجنطه سوده وماروني تنشال بالايد

ولبست كعب موحيل عالي وكلما اصد ع المرايه

اضحك

رشيت العطر وطلعت لكيته واكف يمشط بشعره بالمرايه مال المغسله صرت ورا شفته يباوعلي بالمرايه وعيونه ذبلن

ايده لازمه الفرشه ورافعهه ماوصلهه لراسه وعينه عليه..

سويت نفسي مامهتمه درت وجهي وكتله يله كملت

التفت عليه ورفع طرف حاجبه وكال ترى رايحين لاهلي

مو لحفله

قبس.. مالابسه مال حفله بس عجبني اغير

بكيفك اروح ابدل اذا ماتقبل؟؟

بشار.. لااا لااا عوفيهن امشي يله بس

طول مايحجي هو مركز عليه حته وصلنه للسياره

ورجع للبيت كال نسيت السويج..

جابه وصعدنه ورجع نزل كال نسيت التليفون

اعرفه من تتخربط احواله شفته شلون يغمض عينه

ويستنشق عطري ويرجع يفتح عيونه بذوبان..

ركزت ع كل حركه بي وعرفته جاي يحاول

يقاوم وجودي مايريد يضعف ومايريد

يبين ع نفسه بس اني حافظته وحافظه كل دماراته

حرك السياره وطلعنه من الفرع دايره وجهي ع الجامه

هدوء محد حجه بينه اني اريد اشبع من قربه واشتم

عطره وهو هم ياخذ نفس ويرجع يشهكه

وصلنه لبيت عمو نزلنه يمهم بلاول

طبيت كلت السلام عليكم الكل موجود

حته بسمه وفرح وفاطمه عبالهم راح اجيهم هيكل عظمي

اذني طافيه سمعت انرد السلام بصوت ضعيف

وحده تباوع لثانيه شفت الغيض بعين اسراء

وبعين بسمه وبناتهه

بوست خاله وشجن وفاديه وبيبي مادنكت عليهه

مابستهه سلمت من بعيد

بسمه وبناتهه سلمت من بعيد وبشرى ماجايه لاهي

ولاهدى..

كعدت وبشار عفته برا يم عمو بالحديقه

خاله تباوعلي ومبتسمه ماتحملت وحجت

شلونج بنيتي يوميه اخابر ع بشار اسال عليج

بس يطلع بالدوام

قبس.. الحمدلله زينه ااي يكلي وهو يرجع متاخر

والتهي ويا واكول خاف نامت

طبعا هو جذب بس حبيت اعيش دور الزوجه السعيده

الحجيه.. جنه راجعلج ولابسه احمر ومطوخه حمرتج؟

قبس.. ليش هو عافني؟؟ ترى بشار مو زغير وحته

يصدك بهاي السوالف هو بنفسه كالي هاي وحده

موخوش رادتني وماحصلت

قبس.. سكتت ماردت بس كامت تبسبس هي وبسمه

شويه وكلنه رحنه لبيت عمر بيتهم حلو صح زغير

بس مرتب واثاث راقي سلمت ع صابرين

وتفاجات بيهه حامل وبطنهه شكبرهه كالت ٦ اشهر

كعدت بصف بشار والتهوا بالسوالف كلساع اباوع لفرح

هاي القذره العمرهه ماتنظف بكل عين وقحه

تباوعله من يحجي من يعدل كعدته  مركزه ع كل حركاته..

بهاي الاثناء ونطت بيبي وكالت اكول يمه بشار

راسك صاير ابيض ولسه ماشفنه جهالك

رد عليهه رزق حجيه!!

الحجيه.. يارزق ابني مرتين صار عدهه اسقاط يعني

ظهرهه ضعيف مايشيل

بشار.. يعني ابدللهه ظهر!؟

حجيه كل واحد ورزقه

انغاضيت منهه حيل خلت بسمه والقذرات يتهامسن

ويضحكن لاارادي بدون ماانتبه ع نفسي

كمت اهز برجلي حيل واعصر بايدي

لان كاعدات كدامي ويضحكن..

مااحس غير ايده تخلت ع رجلي وعبالك كهرباء

وسرت بجسمي بسرعه توقفت عن الهز

رفعت راسي شفت فرح تباوعلنه واسراء تباوع لفرح

معادله مبهمه شنو بيناتهن وخلصنهه نظرات..

شويه وكمنه بعد ماانطيناهم هديتهم

بس احس النار شابه بظلوعي

هاي صابرين الرادت تخرب حياتي وخابرت

من ورا رجلهه وهسه بيتهه ورجلهه وجهاله

وهذيج فرح الهجمت بيوت كاعده وتضحك وتسولف

وماهامهه شي

صعدت بالسياره وطبكت الباب حيل

ماحجه حرك السياره واني اتنفس سريع

كلبي احسه راح يطك دايره وجهي ع الشارع

واصبر بروحي ..

فتح اغنيه اول مره اسمعهه احسهه تعزف

عزف ع جروحنه اغنيه كلماتهه لحدالان

ادندن بيهه وكأنو هاي الاغنيه مخصوص النه

جانت كلماتهه..

ومرات اطلب منك تنسى...واطلب من روحي الحل نفسه..

لكن وين ارحل الكاك ...اهرب منك واتمناك...

اسمع صوتك وي كل همسه...واهواك شكد ماريد انسه..

حاير بيك وحاير بيه ...وحاير بالناس الي اتلوم!!

لابيه اصبر بعد شويه ...ولابيه اقبل بالمقسوم

انت بنار واني بنار...حته الحب هم بينه احتار

الحب يريد اليتساهل...واحنه المانقبل نتنازل

نستاهل بينه الي صار!!

مااعرف شوصف شعوري بهذيج اللحظه

نزلت دمعه حاره حيل حركت خدي

اداركت الموقف بسرعه مسحتهه

كلما يكول وين ارحل الكاك .. اهرب منك واتمناك

احس روحي تطلع..

مااتحملت المقطع الاخير يحرك حرك

بسرعه مديت ايدي طفيته

التفت عليه ماردته يشوفني متأثره

حجيت من بين غصتي كتله راسي يوجعني..

سكت ماحجه وصلنه للبيت بوجهي للغرفه قفلت للباب

نزعت ملابسي اريد شي يريح نار كلبي ركضت للميز

طلعت المكص كصيتهم كلهم سويتهن وصل صغار

ورجعت دفنت راسي بنص هاي القطع الصغار

وبجيت

مااتحمل فراكه قريب عليه وبعيد اريد

المسه اريد احضنه اريد اكله احبك

اريد اهتمامه وحبه اريد صوته اسمعه وهويكول

حبيبة گلبي

اريده هوو !! اريدك بشااار

مااكدر افاركك مااكدر ارحمني

دكيت ع كلبي الله ياخذك خذلتني

صير مثله شوفه شلون قاسي ومايريدك

صير مثله ليش ضعفت من اغنيه وحده!!

كمت للكنتور طلعتلي تراك لبسته وكعدت كدام المرايه

عيوني تخوف من الكحل والبجي جريت الكلينس

المرطب ومسحته زلغت وجهي من كدما اضغط بقوه..

باوعت ع العلاج ردت اخذ بس اني حلفت

مااخذ اني اريد افقد عقلي مااريد اعيش

ماعندي شي اعيش علموده ماكو هدف

بحياتي وجودي وعدم وجودي مايأثر على احد!!

اخذ عمري انطي لوحده عدهه جهال ومريضه

اخذ عمري وانطي لواحد بركبته جهال ويحب

مرته اني مااريد اعيش !!

لفيت نفسي بالغطه واشهك من البجي

وهو لادك الباب ولاسأل عليه

يعرفني اتأثر بالكلام بس ماعبرني ابد..

بين الحلم والحقيقيه اشتميت عطره

ماادري صدك مدري يتخيلي

حسيت بايده وهي تتخلى على شعري

حسيت بقربه وانفاسه

فزيت بسرعه خابت امالي طلعت احلم

لان الباب ع قفلته باوعت للساعه ب٣

الفجر كمت من مكاني ورحت للحمام غسلت

ركبتي حاره حيل مسحتهه بالمي

اخذتني رجلي للاستقبال فتحت الباب

ع كيف الضوه طافي بس ضوه الثريات الزغار

مضوي الاستقبال..

مشيت ع اطراف اصابعي وصلت قريب

علي جان نايم نومته المعتاده ومخلي ايده

ع عيونه ردت ارفع ايده وانام بحضنه

بس لحكت ع كرامتي بالوقت الاخير

طلعت بسرعه وسديت الباب رحت توضيت

وفرشت سجادتي وظليت اقره قران لحدما اذن الفجر

صليت ونمت ..

ثاني يوم كعدت ب١٠ محتاجه شمس

محتاجه اشم هوى نقي اختنكت من البيت..

ظليت واكفه بباب المطبخ ومخليه خدي ع الجامه

احس الحراره تجوي خدي

تعبت من الوكفه كعدت بالكاع واباوع من الجامه

ع الحديقه وع الطرمه ظليت ساعات

واني ع نفس كعدتي

كلشي ماكو كدامي غير الحديقه الذابله

لان هو هاملهه جان بليل بوميه يشغل الماطور

واني اكعد يمه لواغسل الطرمه

اتذكرت مره كتله عاجبني اغسل السياره

وهو يرشلي بالصونده واني اغسل

وتبللت ملابسي وكام يحجي عليه

خاف اتمرض وعفتهه ع النص وهو كملهه..

تعبت من الكعده كمت من المطبخ رحت فتحت

التفلزيون مامتابعه شي واصلا الصبح

حته القنوات نايمه !!

وين اروح افوت من غرفه واطلع للصاله

بيت جبير ياخذ الروح لابي صوت

لا اكو شي اتلهه بي..

رحت توضيت وكعدت اقره قران

لحدما اذن الاذان صليت وعجبني

اغسل الفوك لان مانصعدله..

اخذت سطله ومنظفات وماسحه وصعدت فوك

كمت اخذ مي من الحمام واغسل جان نهاية شهر الثالث

نظفته كله حته من اشيل الفراشات اصعدهن فوك..

نزلت اكلت فاكهه وكلت مدام عندي واهس خلي

اشيل فراش الغرفه شلته وغسلت الكاشي

وصعدته وحدي فوك احس ظهري موتني

طبيت للحمام سبحت بس تعبانه حيل

لفيت نفسي بالفراش وغفيت

واني ونايمه كلساع افز اكو الم برجليه

الم بكل جسمي..

بديت اعرك ساعه اشمر الغطه وساعه ارجعه

مثل الواحد منكعي بسطل مي

كمت بدلت ملابسي ورجعت مددت

حطيت ايدي ع كصتي حراره عاليه

لزمني البرد تغطيت ب٣ بطانيات واني ارجف

ماحسيت بنفسي غفيت مدري اتخربطت..

فتحت عيني بغواش واشوفه كدامي

لابس فانيله ربع ردن وايده ع كصتي

يحجي وياي صح ماجنت فدمره فاقده

بس سويت نفسي بس جثه

يحاجيني قبس حاسه بشي ليش هيج

حرارتج عاليه وجسمج عركان؟؟

مااجاوبه بس اون احس جسمي مكسر

دنك عليه كومني وهو يحجي وياي

ليش هيج صغيره انتي شعرج رطب وفاتحه التبريد ونايمه!!

قبس.. مو نظفت الفوك وشلت الفراش مال الغرفه

وسبحت مدري ليش هيج صار بيه

بشار.. شوتعالي واخذني للمغسله فتحلي المي

غسلت شعري جان مفتوح ع النص لفه من جديد

وشكله بالقراصه..

ويه كل لمسه ينتفض جسمي

وهي تاهت علي جاي انتفض من الحراره

لو من لمساته!!

رجعني للغرفه كعدت ع الجربايه وهو واكف يم الميز

كال اخذج للمستشفى؟؟

قبس.. لامابيه شي انت شوكت رجعت؟؟

بشار.. هسه اجيت دورت عليج ماكو عبالي نايمه

سبحت واجيت لكيتج مصخنه

ليش ماجاي تاكلين؟؟

قبس.. مااشتهي

بشار.. كومي جبت عشه وياي خلينه نتعشه حته اطلع

اجيبلج علاج..

قبس.. كمت للمطبخ لكيته جايب كباب ومقبلات رتبتهم وصحته جان يصلي كمل واجه كعد ناكل بهدوء

كمل قبلي بس ماكام حته اظل اكل

شبعت وكمت خليت الجاي ع النار وكمت اغسل بالمواعين

وهو كاعد يتصفح بتليفونه

بشار.. باجر ورا الظهر حضري نفسج يجي

غيث ياخذج لبيت عامر خابرتني مرته عازمتج ع خطوبه مروه

قبس.. مااروح

بشار.. ليش؟

قبس.. عامر تهجم عليه بالمستشفى وحته سبني وتلفظ الفاظ

مثل شكله

بشار.. ولللج لاتجاوزين اجه واعتذر وبعدين فشله

من مرته حملتني امانه اجيبج قابل عامر كاعد بالبيت

قبس.. سكتت كلت منا لباجر الله كريم شرب الجاي

وكال راح اطلع اجيبلج علاج تخافين وحدج

هزيتله راسي لااا

طلع ربع ساعه واجه الصيدليه قريبه اخذت العلاج

ورحت فتحت التلفزيون وهو راح للاستقبال

ثاني يوم كعدت من الصبح كتله لادز غيث مااروح

كال براحتج وطلع..

مرت حياتنه بهاي الصوره

كل تقارب ماكو مرات احسه يتجنبني

مرات انتبه علي صدفه الكا يباوع عليه بس

يشوفني انتبه يدير وجهه

هذا الشهر الثالث اني ويا مثل الاخوان

ماشفت اي واحد من بيت عمي ولاحته

اعرف اخبارهم

حزت بنفسي حيل يكدرن يجن ويسألن عليه

ويكدرن من يجي بشار يتصلن بي ويحاجني

بس خليهن يجي يوم ويطلبن السماح وهذيج

الساعه يشوفن قبس ثانيه..

بيوم منهن صدفه اجت فاديه ببالي جان يغسل

بالمغسله وكفت يمه سالته شخبار فاديه؟؟

رد عليه زينه جابت صارلهه شهرين

قبس.. هااا لعد من رحنه شوماكالو

بشار.. ماادري

قبس.. يله هو اني غريبه عنهم ليش يحجلي

عفته ورحت للغرفه كلما اكول ماانقهر

اجذب ع نفسي الواحد موبيده لازم تحز بنفسه

هيج مواقف..

لاطلبت منه اروح ولا اباركلهه  .

جنت اشوف مسلسلات واشوف البطله تسوي

اغراء اذا البطل زعلان شكد حاولت امثل

واخطط من يجي اسوي هيج واسوي هيج

بس جذب بس يجي اختل بالغرفه ...

لاطلعت رجل ولابست قصير طبقت كلامه

من كال ع ورق غير الكفشه مامشطه كلشي ماشاف

بيوم اجه المغرب لكاني كاعده اكل فواكه

راح سبح وصلى واجه بس هالمره بعصبيه

كال ماتكومين تسوين سم

فتحت عيوني هذا شبي هو من يجيب عشه ويا

يتعشه واليوم المايجيب بي ماياكل يكول

متعشي..

كتله وشمدريني تريد عشه شو انت يوميه

برأي شكل!!

بشار.. لازم اكتبلج لافته ماتعرفين واجبج

لواكعد اشرحلج شلون اطبخين

قبس.. كمت من يمه جان مزاجي زين حجيت بهمس

كلت اليوم بشار العالم شبي؟ بس بيني وبين نفسي

بس هو سمعني

صاح وراي شكلتي ولج؟؟ التفتت علي كلشي ماكلت

بشار.. لا عيديهه شو عيدي شكلتي؟؟

قبس.. شبيك ادور حجج عليه كتلك ماكلت

احجي ويه نفسي موتدري بيه مخبله

بشار.. دروحي من كدامي!!

قبس.. عفته ورحت شبي مشحون جنه شايب يفتر من مكان لمكان اليوم امره موطبيعي ابد

كملت العشه صار كلي رحت طبخ رحت اريد اسبح

من طلعت من المطبخ هو كاعد بالصاله صاح شجنتي تسوين؟؟

مدري شلون طلعت مني كتله غير سم!!

اريد الحك اوصل للحمام مالحكت طفر عليه

بسرعه وهي جره هي لزمة من فكي

وعيونه مطككه حمر ويرزل بيه

رعنه!! ماترهملج جاره السانج متبري

منج كومي اخذيلج راشدي تريدين تموتين وتخلصين

مني ودكولين سم..

من شافني ساكته واباوع بعيونه بتركيز

مثل النار وذبو عليهه مي وخمدت

هيج حالته بسرعه ذبلت عيونه

وفتر صوته وصار يحجي بصوت قريب ع الهمس

المصيبه اني تك اذن ومن يهمس مااسمعه مدري

شيحجي واني بس صافنه علي استحي

اكله علي صوتك لان قرب نفسه ويهمس باذني

العاطله..

رخت ايده من فكي وحرك اصابيعه بصوره

سريعه ع مكان لزمته وكال لاتباوعيلي

بهاي العيون !!

قبس.. ركزت حيل بعيونه وكتله ليش

بعدك تهتم بيهن

بشار.. شو بعدك؟؟ ليش اني يايوم غمضت بدونهن

حجه هيج وانتبه ع نفسه وفرم وجهي وراح للمطبخ

رحت اخذت ملابس سبحت ع سريع ورحت صبيت العشه

تعشينه بوسط هدوء تام

كمل هو اخذ باكيت الجكاير وطلع برا واني

كملت مواعين ورحت للغرفه

ظليت مدده شويه بديت انعس

كمت لبست تراك صيفي ونمت..

حسيت ع حركه يم وجهي وانفاس عاليه

فتحت عيني وانصدم ببشار كاعد قريب عليه

وبحركته المعتاده يحرك اصبعه ع ملامحي

بس نطقت بشااار اخذ شفايفي ببوسه

عميقه خلتني مسلوبه الاراده

اريد ادفعه واريد اقربه واضمه لصدري

مااعرف شصار بهذيج اللحظه بس الي

اعرفه جنه واحد مشتاق للثاني

واللهفه مسيطره علينه

ماحسيت شلون اندمجنه وشلون عبرنه

عن اشتياقنه

لحدما باسني من ركبتي بحنيه

وهو يهمس يم اذني سامحيني

سامحيني!!

رفع نفسه من عندي وكام للحمام واني لفيت

نفسي بالفرشه رغم لهفته وحبه

بس اخر شي صار غريب وشيقصد بسامحيني..

انتظرته يطلع من الحمام ورحت سبحت

بس جنت مامرتاحه ابد

شكد فرحن بلحظه اخذني بحضنه

بس اخر شي حسيت اكو شي

مااعرف شكول بس الي اعرفه

اني مامرتاحه حته دموعي نزلت بسرعه

واحس اني مقبله ع مصيبه..

يتببببببع... احبكم

قمع المشاعر.... العشرون من الجزء الثاني...

للكاتبة زهراء ( روزايه)...

‏لم يكن الأمر عاديًا كما تظن،

إنهُ أصبح عاديًا بعد ألف معركة في عقلي

وألف كسرٍ في قلبي وكُنت دومًا أردد لا بأس !!

بينما كُل البأس هُنا في قلبي.

...

قبس.. طلعت من الحمام بس دموعي تنزل وحدهه

مااعرف السبب شنو شلون البوري انفتح

امسح بيهن وهن يتسابقن ع خدي

مشطت شعري ونمت بفراشي وتغطيت

اداري بدموي واحاجي بنفسي ليش تبجين؟؟

موعاملج بحنيه! مو حضنج وعبر عن لهفته

مثل قبل حته ماحسيت اكو شي!!

لعد ع شنو كال سامحيني؟!!

عرف اني بريئه وعباله مااسامحه ؟

شلون مااسامحه!! هو تحمل هوايه وتعذب مثلي

عمري اله وروحي اله بس اشوفه مرتاح

عيني ع الباب هسه يجي ! هسه يجي!

ليش هيج تكسرني اني ماعايشه هيج

شعور من قبل تاخذ حاجتك مني وتعوفني!!

اني موحمل هيج احساس لان انت عودتني

ع الاهتمام..

ياربي امتحانك صعب بعد ماعندي قدره

اتحمل اني موبنت اليوم اني صار اسنين متحمله

اسنين طويله متعذبه بحياتي. ليش مامقسوملي افرح

رفعت الغطه وكمت اريده اشوفه وين؟؟

كلبي حقير ماجاي يقسي علي ويعذبه

كلبي متعلق بي احس روحي مو الي روحي

عافتني وراحتله

رحت للاستقبال ماموجود باوعت من باب المطبخ

شفته كاعد بالحديقه ويدخن

ماطلعتله ولاحاجيته رجعت لفراشي واني اردد

اذا مايريدني ليش تقربلي!!

اني مومن هذا النوع مااكدر اتحمل هلكد

كرامتي وين؟ اني الجنت اكتل واتعارك

وشحده اليغلط عليه وين اني ؟وين نفسي القديمه؟

غفيت واني بوسط دموعي كعدت الصبح راسي

صاير بالون كمت غسلت وسويت جاي

شربت افتريت وحدي ساعات وختمتهه بيأس

رحت قريت قران وظليت لحد الاذان صليت ونمت..

اجه من الدوام المغرب نفس معاملته

بروده نرفزني اجه متعشي واني لاغده ولاعشه

احس روحي رايحه وكل هذا ومااشتهي

كلساع اكول هسه يحاجيني هسه يجي

عليه!! استسلمت ومددت بفراشي الساعه كدامي

مركزه عليهه شلون يفتر الميل مالتهه

واحسب دقيقه! دقيقتين! اريد الوقت يخلص

سمعت صوته يصيح قبس!! كمزت من مكاني

طلعت لكيته شايل تليفونه بيده كال بشرى تريدج!!

فد فرحت لان محتاجتهه حيل اخذت التليفون

ورحت للغرفه سديت الباب بس كالت

هااا قبوسه حبيبتي بجيت!!

قبس.. عمه تعبانه اني !!

بشرى.. يابعد عمتج ولج ليش تبجين كلبي متكطع عليج

قبس.. ليش ماتسالون عليه اني شمسويتلكم

ولا واحد يريدني عمه وحدي ليل نهار محد يسأل عليه..

بشرى.. انعل ابهاتهم مايسوون دمعه وحده من عندج

عيونج هاي الحلوه ماتستاهل تخسر دمع على شكولهم

القذره انتي نظيفه ومظلومه والله مايريدج ويه هذوله

الزباله

قبس.. عمه شصاير خومامتعاركه وياهم شو تحجين عليهم؟

بشرى.. اصلا مااروح من يوم الطلع بشار من المستشفى

هذا المسموط العندي يتخبل اذا اكله اروح لاهلي

متقاعد وكاعد مكابلني وينگ جنه وحده متزوج عليهه رجلهه

قبس.. ابتسمت وكتلهه اريد احجيلج

بشرى.. احجيلي هو رصيد رجلج المسودن!!

قبس.. بديت احجيلهه ع تعامله هو وتعامل اهله

شلون محبوسه ليل نهار ! حجيتلهه ع البارحه

شلون اتقرب من عندي وعافني ويكلي سامحيني!!

بسرعه لطمت ع صدرهه وسمعت صوتهه قوي

وهي تغلط علي يامخبل ياارعن هذا وين عقله

ربي رحمتك يريد يضيع خلي يضيع نفسه لايضيع

هاي اليتيمه ويااا

ردت فعلهه قويه ظليت اسأل عمه شبيج ؟؟

بسرعه كامت تبجي ولج قبس انتي ليش ماعندج حظ

مثل حظ امج الرادت تعيش حياة كريمه بعيده

عن مستنقع اهلهه وتالي اجاهه رضا فرعون واتحملت الكتل

لحدماماتت..

ليش انظلمتي وانتي بعز شبابج ؟ هسه شفتي

الفرح لاح بسماج وتوالت عليج الطعنات

بيش اتنست سميه بياقهر وجابتج للدنيا..

قبس.. عمه شسوي اني تعبت حته مالي قابليه اقاوم

بشرى.. تحجي وتبجي كلشي لاتسوين فوضي امرج

لله وحاشاه ينسه عبد مظلوم

الله لاينطي كلمن اله ايد بأذيتج!! يريد يتأذه هو طبه

مرض بس انتي ولج كلبي نار عليج الله لايوفقهم

عبالج يربحون ولج بنيتي الحوبه تبطي وماتخطي

وحوبتج تبين بيهم كلهم وكولي عمه بشرى كالت

حوبتج تبين ابيت عادل هالمنافقين هذوله..

فرح شعطت ومعطت عوزهه بس اطلع ... هالبربو...

هاي ولسه يستقبلوهه وهسه رجلهه طولانه

وبيت عمج مثل البهايم لافهم ولاعلم وفاتحات اديهن

الهه...

ربج بالمرصاد ابو خيمة الزركه يحكم بالحق

عبالج لوعة كلبج هاي تتعداهم لا والله

يجي يوم وتشوفيهم مطشرين لاخير يدوم

ولا لمه ادوم...

قبس.. ظليت احجي وياهه تقريبا ارتاحيت

لان شفتهه شلون كلبهه محروك عليه

فرحت لان اكو منو يحبني ويهتم بيه ..

سديته منهه ورحت وديت التليفون اله

جان كاعد يدخن بالمطبخ!!

ماادري ليش سألته انت ليش تقربت مني ؟

انت مو تشك بيه ؟ ليش متناقض؟

باوعلي ونصه راسه والجكاره بحلكه كال بصوت

مبحوح عبالك مريض اشتاقيتلج!!! وسكت ماحجه

رجعت سالته شتقصد بسامحيني؟؟

اذا قصدك عرفت اني بريئه فآني مسامحتك

لان انت تحبني واني احبك !! وماشايله عليك بكلبي

ابد..

ماحجه ظل مدنك!! واني ظليت واكفه دقايق

انتظر جوابه وهو ساكت!!

عفته ورحت لفراشي لابد مايوم تشرق الشمس

ع الحرامي ويبين المستور

ويجي يوم اعرف منو الاذاني واعرف انت شضام عليه!!

مرت الايام متتاليه بنظر الناس سريعه

بس يومي يعادل اسبوع من الوحده

والملل!!

اخلق شغل من جوه الكاع حته اتلهه

الكاشي لوعنده لسان جان صاح خلصيني

مروتج اجلف بي واكوم اباوع كون اشوف

روحي بي يصير مرايه لان هو كرانيت اسود مثل المرايه..

من زمان بيه حاله من اندمج بالشغل اغني

شكو اغنيه قديمه اغني بيهه دائما يكلولي

صوتج غجري جنت اسمع امي بشبابهه

جدي ياخذهه تغني لرفاق صدام ومن هاي ماقبلوا عليهه

اهل بابا..

اتذكرت عزيز مدري وين صفه بي الدهر

من جنت اغني يكعد يسمعني ويسويلي

اعد اعد وشنو بيدي اشمره بي خطيه

والله جنت مشوفته انجوم الظهر حته ضحكه مااضحك

يكلي معقوله ماعندج اسنان وماتكدرين تضحكين..

اندمجت واني اتنقل من اغنيه لاغنيه اخر شي

كمت اغنيه باغنيه انوار عبد الوهاب واني انظف يم المغسله..

عد وانه اعد وانشوف ياهو اكثر هموم!!

من عمري سبع اسنين وكليبي مهموم

راحو ووويلي ..راحو بعد ماردو احبابي!!

عندي وتخاف عليك وادورك امك

موش بسواد العين بصبيهه اضمك..

رفعت راسي واشوفه واكف بباب الصاله وميل

جذعه على الباب ومكتف اديه ويباوعلي..

من شفته كمت ومسحت المكان بسرعه

وهو ع وكفته شفت رجليه وهو يتقرب

عليه..

التفتت علي واني عاگده حواجبي كتله لاتفوت

هسه مسحته خلي ينشف!!

رد عليه ليش تغنين هيج اغاني ماعندج

غير هذني هي وداده حسن؟؟

قبس.. جنت اغسل واحجي وليش هم ماتقبل عليهه

اتذكر قبل كلت لاتغنين داده حسن لان اني امج

وخالتج واهلج بس وفيت بوعدك سنتين

وهسه رجعت وحيده..

بشار.. مو وحيده اني ما اتخلى عنج

قبس..قصدك تخليني خدامه ومن تحتاج تفرغ شهوتك

تجيني موهيج ابن عمي..

بشار.. ليش هيج تحجين ليش مادكولين مشتاقلج؟؟

قبس.. انت تشك بيه وبنظرك اني غدرتك

بعد شلون تشتاقلي

بشار تعودت عليك تفكيرك صحيح وماتخطىء ابد

جنت اشوفك ملاك كدامي واكول هنياله شلون

يداري الامور بس هسه كمت اشوف العكس ..

بشار.. ششوفين ترى المر عليه موسهل

قبس.. اتمنى مايجي اليوم الي اكره وجودك بي

لان هذيج الساعه اتوقع كلشي من عندي..

عفته ورحت للغرفه اخذت ملابس ورحت

للحمام كل اسبوع يله نحجي كلمتين

وهاي الكلمتين لوعركه لو صيغة امر..

..

يوم ٢٠١٦/٦/١٤ هذا اليوم حفر اثره بكلبي

لا دوه يعالجه ولا كلام يخفي اثره

هذا اليوم جان دورة السنه مال اهلي

وهو قبل يوم كال باجر ادزلج غيث ورا الظهر

روحي لاهلي جدي مسوي ثواب وكلساع يخابر

عليج!! واني للمغرب واجي عندي شغل..

قبس.. انت من تجي المغرب مر عليه واروح

تدري مامرحب بيه

بشار.. امي تريدج دكول محد يساعدني

قبس.. هاا محتاجه الخدامه عبالي مشتاقيلي

بشار.. قبس بكيفج ماتريدين ترحين لاترحين!

قبس.. لا اروح لخاطر خاله

ثاني يوم ورا الظهر اجاني غيث دك الباب وسمعت صوته

يله طلعت صعدت بالسياره هو ساكت وبس يدخن

عماني عمي!! ليش احب بشار من يدخن ومن اشوف

واحد يدخن تلعب نفسي!!

بالطريق وحجه شلونج قبس؟؟

قبس.. الحمدلله انت شلونك وفاطمه شلونهه؟

غيث.. الحمدلله

قبس.. بعدهه يم اهلك؟

غيث.. اي يمهم اني وياهه شبه منتهين

قبس.. ليش تزوجتهه لعد؟

غيث.. ماادري جان يسوق ومطلع ايده بيهه الجكاره

وحاله امر من حالي!!

غيث.. ماعرفتو منو السوه هيج؟

قبس.. لااا منين يعرف عبالك محترف

غيث.. والله شغله تحير لازم تنكشف الحقيقه

قبس.. المشكله موبس صوري المشكله شكو سر بالعائله

طالع يعني السوه هيج منه وبينه

استمريت بالكلام مامنتبهه ع نفسي كتله

تخيل حته سالفة اخوك وائل من خطف شجن

حاجين بيهه وهو محد يدري!!

بعدني مامكمله الكلام داس بريك انضربت بالجامه

الاماميه كلت هاهي خاف مااموت بقهر بشار

راح يموتني غيث!!

صحت يمعود انتبه راح تموتنه بسرعه طبك السياره ع جهه

يحجي ويتنفس سريع شقصدج وائل خطف شجن

هاي شوكت؟؟

قبس.. ظليت ابلع بريكي عزااا بعيني الساني فلت

اني ادري هم ماكالو ع سالفه الخطف والاعتداء وغيث

مايدري غير شجن عدهه علاقه ووائل تهمهه الباقي كله

مستور..

غيث.. حجه بتوسل وشمر الجكاره من الجامه

الله عليج احجي!! الله ياخذ حقج احجي

قبس اعتبريني اخوج واحجي شوكت اخوي خاطف شجن

وشسوالهه وشيريد منهه؟؟

قبس.. قررت احجيله ليش يظل مثلي وياكل بروحه

حجيتله كلشي حته راد يعتدي عليهه

وحته هوسبب اعاقتهه طبهم مرض شيريد يصير

خلي يصير

اني حجيت لو الولد تخبل كام يضرب بالسترين

نزل برا لازم راسه عزااا العزاني هسه ينجلط

ابن الناس

تقريبا عشر دقايق هو بره وتالي صعد

وهو ساكت اريد احجي كالي لاتحجين حلفته

مايكول اني كلت. كالي وعد مااحجي

بس شصار بي انطعن وجهه احمر حته مايعرف

يسوق كلساع اكول راح يسوي حادث

نزلني بالباب وراح بلاول خفت بعدين

كلت هي خربانه خاف يجي يحاسبني

بشار خلي يحاسبني!!

طبيت لبيت عمو الجماعه كلهه موجوده

رحت لغرفه خاله بعد ماسلمت وبدلت وطلعت

يم خاله اشتغل وياهه بهدوء

كلساع اشوفهه تصفن عليه وعينهه مدمعه

وادير وجهه!!

عمه بشرى ما اجت!! وهالشي خلاني مستغربه

احتمال ماتحجي وياهم لان ماتفوتهه هيج سالفه!!

فرح ام البيت قايمه بالواجب تنظف وتشتغل

اسراء ع وضعهه كاعده وساكته وفاديه وهدى

وجهن ثكيل واعرف عليمن لان مارحت لفاديه من جابت

بس اني ماادري هن موعزلني !!

كملنه كلشي وصار العصر واجت الناس

وكرايبهم المقربين وبيت عامر

كلهه كاعده بالصاله بس نسوان واني جنت بالمطبخ!!

غسلت ورحت كعدت يمهم اشوف النظرات اليه موطبيعيه

اكو نظرات شفقه! واكو نظرات شماته!!

حجت وحده تصير بنت اخت بيبي اسمهه خلود

كالت والله ياقبس

من سمعنه الخبر روحي شاطت انتي الورده

التخبلين هيج يصير بيج

كل ظني تحجي ع سالفه الصور حته كتلهه

الله بالمرصاد وسكتت!! من حجيت هيج اسراء ابتسمت

وفرح ع سكتتهه

خلود .. شلون قبلتي يتزوج شنو من گلب عندج؟؟

هي كالت هيج واني مودخلت بصدمه لا جربت

انواع الصدمات مثل الواحد وشمروا من بنايه

عاليه اريد اسألهه شنو شتحجين؟

بس اكول لا قبس قوي نفسج صيري

سباعيه غايتهم يذلوج ويشمتون بيج

سوي نفسج طبيعيه بشار يحبج ومو طبعه الخيانه!!

ابتسمت بوجهه بس اكيد بين ع وجهي

لان كلهن كامن يكولن خطيه والله يساعدج

واني اكتفي بابستامه مكسوره

كمت مااميز منو التحجي اصوات الكل صارت ذبذبات

بعيده كمت مااحس ع هزة رجلي

لو رجفة ايدي

صوت وحده اكدلي اني موجاي احلم اني

كاعده بنص الحقيقه من كالت يله الخطبهه

هم خوش بنيه ودكتوره ويكولون حليوه!!

ردت عليهه الثانيه بس موبحلات قبس اني مراجعتهه

دكتوره سرور خوش بنيه بس ماتوصل لجمال قبس..

هنااا مو انكسرت لاااا هنا تناثرت

مثل قطع الزجاج المكسور!!

انقسمت نصين!! نص يصيح قبس كومي عيطي صرخي!

والنص الثاني يكول العوض بالله

ع كعدتي وعلى وضعي واني ادور وجه

حنين ياخذني للبعيد يطبطب ع ظهري

ويكول انتي الاحسن وهذا السمعتي

شقه جاي يتشاقون وياج!!

صوت ضحكاتهم تعالت عيني افترت

ع كل الموجودين هدى وفاديه مدنكات راسهن

ام بشار عينهه مدمعه

اسراء تضحك وفرح مبتسمه

العجوز دكلي حيل تستاهلين من نظرة عيونهه..

ماشفت بشر كدامي شفت وحوش

كل همهم ينهشوني

اني بنت منو؟ اني المن انتمي؟ حته اتعاقب

هيج والكل ينبذني!!

اريد الملم ماتبقى من نفسي العزيزه

مايوم طخيت راس وبحبك يا ابن عمي

ذليتهه وخليتهه تصارع الشماته وحدهه..

نقذني صوت شجن وهي دكلي قبس تعالي

اشوفج ششتريت!! عادت عليه الكلام اكثر من مره

يله انتبهت!!

كمت وياهه لغرفه خاله بس سدت الباب وكعت

ع ركبي بالكاع الم يذبح ذبح موسجين واحد

سجاجين ونبتت بكلبي

اريد ابجي واريد اصرخ بس ماكو دموع

كعدت بمستواي ولزمتني من اكتافي وهي

دكلي قوي حالج قبس لاتخليهم يشمتون بيج !!

رفعت راسي عليهه وكتلهه بشار خطب بدون ماادري

بشااار خاني ؟؟ جنت احجيهه بجمل متقطعه

هزت راسهه وكامت تبجي؟؟

جنت بكامل قواي العقليه رغم المي

بس اريد اعرف منو الاخذته مني!!

شجن.. قبل اسبوعين اجه لماما وكالهه اريد اتزوج

بس مامحدد منو كالهه انتي شوفي وماما رفضت

وتعاركت ويا وكالتله لوتموت مااروح اخطبلك

ماادري شلون صار بس الدكتوره سرور صديقة خاله

لمياء وهي اقترحتهه وظلت هوايه تمدح بيهه

بحجه انتي مايصير عندج اطفال لان بيبي مفهمه الكل

هيج!!

وماما ماراحت بس راحن خالاتي وهدى وفاديه

كلهم راحوا خطبوهه وهي يومين ورجعت الجواب موافقه

وكالت اني اعرف حالة قبس مريضه

ورا يومين من رجعت الجواب راحوا عقدوا

عمه بشرى من سمعت اجت علينه وتعاركت غلطت

ع الكل رزلت ماما ورزلت بابا ودعت عليهم

وكالتلهم اما اليتيم فلا تقهر وانتم موبس قهرتوهه

انتم شلتوهن وشمرتوهه من سابع طابق

بيومهه جانت فرح موجوده وهم كامت تبجي وبيبي

كامت تتعارك شنو يخطب غريبه وبنت عمته موجوده

هو ماموجود بس الحجي هنا ابيتنه

عمه بشرى حلفت بعد ماتفوت بيتنه

وراحت زعلانه حته مااجت اليوم لان

رايحه ع جدو بيومهه ومتعاركه ويا بالمحلات وكايلتله

كل صلاتك وصيامك رياء مامقبول وزعل عليهه..

قبس..جانت تحجي قاطعتهه يايوم خطب بالضبط؟

من كالتلي التاريخ نفسه اليوم التقربلي بي

الله اكبر الله اكبر ع هذا الظلم ..

هنااا بجيت !! بجيت بحرارة الفقدان

مابجيت علي لان مايستاهل بجيت ع نفسي

الصارت مضحكه لهيج نماذج

كل الي اكدر علي سويته

طلعت ومثلت قدر المستطاع اني طبيعيه

واني ادري!! حته شفتهن استغربن شلون مامهتمه

يعني متعمد يجيبني هناا حته اسمع من الناس

ماكدر يكولهه بوجهي بس كدر يكسرني

بجداره ويهدمني هدم..

رحت لتليفون خاله خابرت غيث كتله تعال

اخذني ماكال شي الولد اني بسىرعه بدلت

وطلعت صاحت وراي خاله وين رايحه

كتلهه بشار ماله خلك خلي اشوفه شبي!!

اسمع صوت بسمه دكلهه يمعوده عوفيهه

ماتحملت الصدمه يتزوج عليهه ويكسر

خشمهه!! عبالهه تظل رافعه راسهه خليهه تاكلهه..

صعدت بالسياره غيث ساكت كتله اتصل

ببشار كله اني رجعت ماكال شي بس كال صار!!

رجعت لبيتي قفلت الابواب عليه

افرك بركبتي وافتر بالبيت هنااا ضحكنه

هنااا سهرنه!! هنا بجينه اثنينه!!

بهذا المكان حضني من قتلت شخص وكالي اني بظهرج

ماتنكسرين

وينك هسه انكسرت ولك وينك ياخاين

وينك يامتخاف ربك تضحك عليه

تتقرب عليه تفرغ شهوتك بيه وانت خاطب

اقترن اسمك باسم وحده غيري..

ركضت بدلت واني مااعرف شسوي

ردة فعلي مااعرف اوصفهه بس الي

اعرفه اني اتألم ...

ورا نص ساعه من رجعتي شفته فتح الباب

خليته يفوت للمطبخ هستوه نزع حذائه

وخله السويج ع الميز

صحت بصوت عفيه عفيه بالسبع!!

عفيه بحبي الوحيد عفيه برجلي

وابو بيتي ..

لك اني الجبت طول عمري مهدومه هسه تجي تكمل

عليه وتهدمني للاخير ياظالم ياخاين

عبالك السويته رجوله لاااا هذا جبن ..

اني قبس انكسر كدام فرح واهلك الماخافوا الله بيه

يروحن يخطبلك اخواتك واني طول عمري

مداريتهن واحبهم ومايوم اشتريت شي لنفسي وما اشتريته

الهن

بيش اذيتكم !! ابدال ماادور ع الحقيقه وتنصفني

تروح تكسرني هالكسره 

روح اتزوج روح لجهنم بس منو كالك قبس

رخيصه وتجي تفرغ شهوتك بيهه بنفس

اليوم الخطبت بي احجيلي منو كلك!؟

صرخت بصوت عالي وفتحت صدر تراكي

اللللهي تسمعني!!

هذا الانسان اريد تبين بي حوبتي طول العمر

اريد حقي تسمعني!!!

اريده منهم كلهم اريد تشوفني يوم بيهم

مايشوفون الراحه طول العمر مااريده يتمهل

لا بمره ولابجهال ولا بفلوس

تسمعني مووو؟؟ اللللهي تسمعني!!

كلشي مااريد بس حوبتي تبينهه ..

ماادري شلون وكعت بالكاع وشصار وشحجيت

بعد فتحت عيني اني مدده بالكاع وهو ع التخم كاعد

واذا الحايط حجه هو حجه!!

كمت من مكاني واشرت ع اذني هاك شوف

هاي اثرك الما انسى هاي اذني طفت نهائيا مااسمع

بيهه صار اشهر وماكتلك انتظرك تهدء واتحمل الالم

حته لا اضوجك

هاك شوف ورفعت ردن البدي شوف اديه

شوف رجليه شوف اثار حالتي النفسيه

بسببك وبسبب اهلك ..

ساعة السودة الحبيتك بيهه ساعة السوده

الشفتك بيهه اكرهك اني اموت منك

ولك هذا كلبي عبالك اخلي يحن عليك!!

هذا. ادوس علي ولو اعرف اعيش

بالشارع وما اخليك تلمح ذيالي

اني انكسر كدام اليسوه والمايسوه

اني ينطعن بشرفي وسكتت لخاطرك

عندي امل بيوم تنقذني !!

اني اصير مضحكه لاهلك الماخافو الله بيه

ماكلتو يتيمه ولكم ياظلام ماكلتوا بتنه هاي

ماعدهه سند بس رجلهه انت شنو من كلب

عندك ماوكف بعينك يوم حلو

بس لهنا وبس !! وحق الله بسمواته

يا بشار اذا ما اخليك تعض اصابعك ندم

اذا ما اشوف بيك يوم مثل حركة كلبي هاي

وتطلب السماح انت واهلك

رفعت شعري وكتله اليوم اخر ليله الي يمك

اذا انت رجال اطلكني وماتشوفني وجهك

ابد

كل الحجي الحجيته ساكت بس من كلت طلكني

صاح بيه تحلمين!!

لو تموتين مااطلك ماتعرفيني بعدج

هذا البيت تعيشين وتموتين بي لوتموتين ماتوصلين

عتبة الباب!!

قبس... انت رجال واني مره واريد اخليهه براسك

طول العمر شلون كسرت حجايتك مره

اريد اشوف شلون هذا البيت اندفن بي

خاف عبالك اخاف!! انسه لا اخاف منك

ولا من عشرة مثلك طلاك اطلكني وانت

الممنون روح لمرتك الجبتهه عليه

يامتستحي ياعيبة العيبه تاخذني الهه

بحجة صديقتك وتكشفني وطلعت مخلي

عينك عليهه ياخسارة دموعي بيك

عساك بنار كلبي ماتخمد للابد

حسبي الله ونعم الوكيل بيك وباهلك وبكل واحد اذاني!!

رحت للغرفه وقفلت الباب سديت

اذني مااريد اسمع اي شي

خلاص من اليوم احارب شلون اتخلص منك

احارب انتزعك من روحي لو كلفني الامر روحي نفسهه

مابجيت ابد ابد مانزلت دموعي

باوعت لنفسي بالمرايه !!

اااي ياقبس حالتج مثل المرايه التنكسر

وماتعكس غير انكسارهه

اجيتي برجلج الهم ودستي ع الجمر وتحملتي

بس من اليوم مثل مااجيتي برجلج

اطلعي من حياتهم عيشي حره

لو بالشارع تعيشين ولا هاي الكسره الماتنجبر..

للصبح ماغمضت عيني

اكثر من مره دك الباب عليه ومافتحته

ماسمعت منه اي تبرير واي عذر

اكتفى بالصمت..

عرفت دعاء عمه بشرى وبواجيهه

طلعت تدري بس اني المغفله فرحانه

من يباوع بعيوني!!

ثاني يوم كعدت كل الابواب مقفوله من برا

معناتهه ناوي يحبسني

لحدما اجه المغرب اني ساكته

هالمره الحجي والعياط مايفيد لان يعاند اكثر

بس لازم اشوف حل اطلع من البيت..

ورا ٣ ايام بالضبط شفت الباب انفتح هدى وفاديه

واسراء جابهم عمر وراح والحلو عند هدى مفتاح

فتحته وطبت اني كاعده بالمطبخ

سلمن وكعدن وحده تباوع بوجه الثانيه حجيت بنتر

خير مضيعات شي !!

هدى.. انريد انعزل الفوك لان راح يجيبون الغرفه

قبس.. ومنو كالجن اني وسخه وتجن تعزلن بغراضي

هدى.. لاحشاج بس صعبه عليج واحنه حبينه نساعدج

قبس.. قصدكم اجيتن تشمتن منو دز عليجن هو اخوج

خابري الي بسرعه

هدى.. شبيج قبس كنالج عمر راح يجيب الغرفه

وندري الفوك متروك لازم انرتبه

قبس.. كتلج خابري الي قبل ما اوكف بالطرمه والم الناس

عليجن

بالوجه مرايه وبالگفه سلايه جايه انتي

وهذني تشمتين جنابج الكريم

البيت بيتي اذا ماخابرتي وطلعتن العب بيج لعب

واخذي هاي الزباله الجايبتهه وياج

اسراء وهالمره قصرتي لوجايبه فرح هم

كومن يله ادليجن بالباب لو تندلنه وكليله

لاخوج عمر اذا اجه ووكف ببابي

اسوي فرجه لامه محمد

يله كومن قبل ما افقد اعصابي عليجن

هدى.. صدك ماتستحين!!

قبس.. عايفه المستحه الجن انتن تستحن وتخافن الله

يله بسرعه لاتشوفني وجهجن لان بديت اشمئز

بسرعه طلعن من اطلع من البيت عود فوتن

كام وهن يحجن وخاصه هدى!! صحت وراهن اوكفن

نسيت اكللجن يوميه ادعي بصلاتي الله يشوفجن

هاي الحرگه وماتكومن منهه..

طلعن وسدن الباب واني ارجف من العصبيه عمر

مااجه والظاهر خابرنه !! اريد اشوف وين يوصلون

لليل يله اجه بشار ماحجه ولاحجيت اكيد هدى

سولفتله الصار خلص هذا اليوم وبده يوم جديد

طلبت منه يعوف الباب مفتوح ماقبل

كتله اريد اغسل ملابس واشرهن واوعدك

واحلفلك تروح وتجي تلكاني بالبيت

لاتخاف مااروح هسه!!

سكتت وعاف الباب مفتوح كعدت ب٩ صعدت فوك

نزلت الجنط مال الملابس وحطيتهن بالطرمه فرغت الملابس

ناس فوك ناس ملابسي وملابسه

رشيت عليهن نفط وفتحت النار بيهن كامن وحده تلهب بالثانيه..

صعدت فوك ماكو شي بس الفراشات عفتهن

مويريد يحضر للمحروسه من اجه بليل عرف بالسويته

كام يصيح ويغلط اني قفلت الباب عليه وعفته حجه

حجه وسكت..

ورا ايام اباوع من الجامه جاب عمال وسوو درج

وعزل الطابق الفوك عن الجوه

وصعدوا الغرفه تركيه !!

ووياهه شغلات اثاث واني ويه كل دوسه درج

ينداس كلبي..

جنت عديمه الاحساس عديمه المشاعر

فاصله نهائيا لا اسمع ولا انقهر ولا ابجي

اشوفه كدامي يحضر والعرس مبين قريب..

جان بالاستقبال طلعت وكفت كدامه

كتله طلكني اني مااريد اعيش وياك!!

ماسمعني او بلاحرى طردني من الاستقبال وماعنده

غير كلمه لو تموتين !! تحلمين اطلكج..

هالمره كام يحبسني من صدك شكد اتعاركت وشكد

حجيت ويعوفني مقفله الابواب عليه

محد طيب خاطري محد اجاني وكال احنه وياج

عافوني وحدي اعاني!!

تحدد موعد العرس واني محد وصلني وكالي الله بالخير

هدى وخالته يجن اشوفهن من الشباك

يصعد من الدرج الخارجي ويصعدن يعزلن وينظفن

اسمع الحركه فوك

عيوني صارت صلفه حيل لا ابجي

ولا تنزل دمعه وحده حته اني متفاجئه بنفسي

وين وصلتني الصدمات

بيوم منهن مثل كل يوم الابواب مقفوله

وجنت بالمطبخ اشتغل نظفت الطباخ

واكو دهن نازل ورا الطباخ حميتله مي كام يفور!!

اني جنت ساحبه الطباخ من فار المي اجيت

شلته ماتوازنت ايدي مدري بيمن انطخ وانكلب

كله هذا المي اليفور عليه

انكلب ع ايدي اليسرى من زندي وجوه

وغير الوكع ع رجليه بس جسمي

ماوكع بي!!

صرخت بصوت الحكولي روحي احتركت

االالم اخذني واني ادك بالباب واصيح ساعدوني

كلهه مقفوله اركض لازمه ايدي لاباب لاشباك

وواحد يسمعني

كمت اكمز بنص الصاله روحي ذابت احتركت اباوع

لجلدي ماع كله ولج يمه الحكيلي

ياناس ساعدوني كسرت باب المطبخ متأمله واحد ينقذني

مااعرف شسوي!! وما اعرف شخلي لاعندي دهن

لا اعرف اسعف نفسي بس كل الي اعرفه

جلدي احترك وكام يطلع لحمي!!

ظليت ادك بباب المطبخ كعدت بالكاع واصرخ

الله ياخذكم الله ينتقم منكم ولكم ساعدوني

راح اموت روحي تعذبت !!

ماحسيت ع روحي من الالم واني منا ما ماكله اي شي

غابت روحي وماحسيت ع شي!!

هذا الحجي الساعه ب١٠ الصبح فتحت عيني

واني بالمستشفى جانت الساعه ب٥ العصر

مااعرف شكد بقيت واني اداري بروحي العزيزه..

شفت خاله واكفه بس فتحت اون اجت يمي وهي

تتحمدلي ع السلامه !! درت وجهي عنهه!!

شويه واجه هو ماكال غير بس الحمدلله ع السلامه

مارديت روحي رايحه موبس ايدي محتركه

روحي محتركه روحي تعذبت بسببي..

العجيب مايجاوبني لويحجي يريح كلبي ساكت

وجهه اسود مايكدر يحجي من عمايله الشينه...

لا عريس حقه مايريد يعكر مزاجه

بس اتذكر راح يسد الغرفه هو وياهه

ويحضنهه مثل مايحضني توصل روحي

بحنجرتي..

ظليت يومين يسلخون بيهه الله يعلم

شمر عليه عذاب بهاي الايام روحي تصرخ

انقذيني روحي تعذبت كدامهم

جنت وراهه اتعب ويغمى عليه وينطوني

ابر مهدئه افتح عيوني ياخذوني للغسل

وراهه يضربوني وانام..

طلعت من المستشفى وبس خاله وياي

جانت عيونه تلوب عليه اشوفه يكعد يم راسي

ماينام لحد مايشوفني غفيت

اشوف عيونه حاضنتني بس

جسده بعيد عني فاض كلبي من عندي

لا اريد اشوفه ولا اريد حته اشتم عطره..

اليوم ثلاثاء والخميس عرسه

من صارت سالفه الحرق كام يعوف الباب مفتوح

افتريت البيت كله اباوع علي زاويه زوايه

بكل مكان الي ذكرى بيك

بكل مكان ضحكت وبجيت

هناااا نمت بحضنه وهنا تغزل بيه

معقوله راح يصير ذكريات..

هاي الليله مانمت ابد جنت اودع كل جزء

بالبيت ودعته هو فتحت كنتوره واشتم بملابسه

معقوله اكدر اعيش بدونك ؟؟ واكمل حياتي

ثاني يوم الصبح طلعت فرشه عرسي

وفرشتهه ع جربايتي رتبتهه وعطرتهه

فتحت كلوبات النوم صارت غرفه عروس..

اني بدلة عرسي اشتريتهه طلعتهه خليتهه

ع الجربايه واني اباوعلهه هستوني صارلي سنه ونص

ع زواجي..

كمت للميز فتحت المجر جريت المكص شعري جنت مسويته ضفيره من مكان القراصه كصيته هو

والقراصه وخليته ع الميز

اباوعله واتلمسه عفته بمكانه باوعت لنفسي

تغير شكلي جذريا شعري صار بمستوى اذاني..

غمضت عيني لهنا انتهى كلشي

لاحب يجمعنه ولا طريقنه راح يلتقي

رحت للكنتور بدلت جريت فلوسي

المجمعتهم من رواتبي ذهبي عفته اي شي

اشترى هو ظل بمكانه ..

بس فلوس رواتبي ومستمسكاتي

خليتهن بالجنطه نزعت حلقتي

وشمرتهه ع الميز امشي واتلفت العبره خانكتني

بس كافي اني تعبت واريد الم اخر ماتبقى

من عندي مدام باعني بالرخص هاهي

هو يشوف حياته واني اشوف طريقي

طلعت من البيت واني امشي بالشارع مثل الهايمه

وين اروح يابيت ادكه ويستقبلني

يابيت مايعرفه بشار ومايلحكني!!

لاعندي تليفون واخابر سناء وعاليه

ولا اندل بيوتهن وين الشمس تضرب براسي

واصعد وانزل واني مااعرف وين اروح

وكفت بنص الشارع تايهه هذا الماعنده سند

هذا الماعنده اهل تاليته مثلي ..

ماكدرت اتحمل الذل والتهم الوكعت ع راسي

ماكدرت ازفه بيدي وهو يصعد لغرفتهه

ونفس الغزل الكاله الي راح يكوله الهه..

امشي واردد حسبي الله ونعم الوكيل

بجيت ع كسرتي سمعت حجي من الماره

وشكم واحد هتلي الشارع موالي

مااكدر اظل هنا ...

فكرت اروح للامام الكاظم بس شكد ابقه

يوم يومين ردت مكان مايندلني بي لاهو

ولا اهله واكيد من مايلكاني راح يدور بالامام.

اخذتني رجلي واني ماادري شلون مشيت

وشلون وصلت لان جنت امشي بلا وعي

من ١١ طالعه وهسه الساعه ب٤...

نزلت من السياره وانطيته الكروه

كالي عمي انتظرج عباله عندي زياره

لان المثلي شعدهه جايه هنااا.

كتله لا عمو روح..

احتمال هذا امن مكان الي

لان اني قاومت وفشلت واني حاليا

اكذب ع نفسي من اكول انسانه عاديه

وكفت بالباب ورافعه راسي اقره

مستشفى الامراض النفسيه والعقليه

وهالمره مقتنعه قناعه تامه اني موانسانه طبيعيه

ومن هذا المكان راح ابدي حياة جديده!!!

.

.

يتبببببع... احبكم

قمع المشاعر.... الواحد والعشرون من الجزء الثاني...

للكاتبة زهراء ( روزايه)...

وين أبات؟!

الليلة بيتي من التعب طايح ونيدة

الليلة تايه...محطات الحزن

نقطة بجريدة

الليلة سدت بابها بوجهي الحياة

وبوب وکتي...وصبري

وبيوت القصيدة

...

شجن.. اليوم اربعاء وهي حنة بشار وباجر العرس

حاسه بالم قبس واتمنى اروح يمهه بس المشكله اخواتي

كلهن صارن ضدهه وحته مايقبلن اذكر اسمهه..

اني غلطت من زعلت عليهه بس ماقصدي اذيتهه

ابد تفاجأت من ردة فعلهه ودكول انتي مطلعه صوري

توقعتهه تشك بيه اغدرهه

موقصدي اتخلى عنهه ابد ولو ادري جان كلت اي ماامسح

الصور بس جنت ماادري بالموضوع شنو!؟

ماما جانت رافضه رفض قطعي اي عرس ماكو

ممنوع وحده تهلهل ممنوع اشوف جكليته بالكاع

هذا موعرس هذا ركص ع جرح يتيمه

ماعزمنه ولانفر ولاهو قبل يسوي حنه وعرس

بس سرور جانت فرحانه وسوت حنه بالقاعه

وعزمتنه كلنه وطلبت من عنده يجي وماقبل

بيومهه الصبح خابرت ع هدى بلكي تحاجي بشار

ليش ميرد ع اتصالاتي؟؟ اذا هو متزوج سابقا اني اول

زواج الي ومن حقي افرح واسوي حنه

هدى من يمهه انطتهه الموافقه كالتلهه سوي واحنه كلنه

نجي ولاتلحين علي موتعرفي يحب قبس

بس انتي اكسبي!!

نصآ هاي الجمله سمعتهه من هدى واني مستغربه

شسوت قبس حته الكل يكرهه وليش هدى

هيج عاملت هدى بنذاله تدري ببشار يحبهه وظلن

لليل نهار يحجن براسه مايوم اجانه وماستلمنه

كلهن وحده ترفع ووحده تكبس..

هاي الدكله العرك دساس ولاتتوقع ماطبعت باطباع

خالاتهه!!

وبيبي تذكره شلون جانت تكرهنه وفجأه كامت تحبنه

معناتهه غايتهه ادمرنه

اذوا بالكلام مودفاعا عنه بالعكس الكل انصدم بتصرفه

حته ماما حجت علي وكالتله جنت احسبك رجال البيت

بس هسه اخذ الشور من ابن هدى ومااعتمد عليك

بسمه وفاطمه اجن فرح كالو مالهه خلك وهي مبينه

هاي ثاني مره تشوفه ينزف ع غيرهه ماتكدر

تشوفه ..

بيبي مسويه علينه حرب تمشي وتتعارك

شنو خطبتوا غريبه وماتريدن بنت عمتجن

هو لان يشوفجن تكرهن فرح ماخطبهه

جانت الساعه ب١٠ الصبح البيت كئيب ماما خلصتهه

بس بواجي هدى وصابرين وفاديه وبنات عامر واسراء

كلهه مهوسه ويحضرن للحنه العصر..

افكر بقبس هسه شلون حالهه هسه كلبهه

شيكول مريت بهذا الشعور وجربته

شكد مؤذي ..

كلساع اريد اطلب ياخذوني يمهه حتلو تضربني

حتلو تغلط عليه بس خلي اكون

بجانبهه وارجع ذره من افضالهه..

طبيت للغرفه مهوسات اباوعلهن هن فرحانات

لو وحده من اخواتي متزوج عليهه واليوم حنته

فرحنه هيج ؟ جان هسه انكوم ونكعد ندعي عليهم

بس ماادري الانسان ليش لنفسه مايقبلهه

بس يقبلهه ع غيره

وقبس مو اي وحده اخت بمعنى الكلمه شكد حمتنه

وشكد نصحتنه اتذكر شلون انكتلت من بشار لان سترت

الي وشلون بجت ع البجي مالتي من اكعد اشكيلهه حزني

عفتهن وطلعت كعدت بالصاله وخليت ايدي ع خدي

وصافنه اجه ابن هدى كال اجت عمه بشرى!!

كلهه فرحت لان هي زعلنه وتوقعنه

بشار مرضيهه البنات واكفات بباب الغرفه

وبيبي كامت تريد تتلكاهه

بس عمه بشرى جانت شايله حرگة كلب والده

دفعت الباب مال المطبخ حيل وهي تصيح

هااا يالمتخافن الله سويتنهه!!

من شافتهه بيبي صاحت بشرى اذا جايه تذبين سمج

ردي لبيت رجلج!!

بشرى.. انتي اخر وحده تحجين حجيه حاجه بيت الله

وتهجمين بيوت ششوف جواك ربي

ولج انتي بسمه مااستحيتي شعرج ابيض وتكسرين

بنت اخوج وتهلهلين بخطبته

وانتن يالعارات يالماتستحن هدى البعيره يم الحق

غسلت ايدي منج من هجمتي بيت عمر وسويتي

نفسج الحقانيه وادافعين عن قبس

هسه شنو التغير مادافعتي عنهه لو كل ماتجيج فرصه

تهجميلج بيت وحده لان الغيره كاتلتج من نسوان اخوتج

يالبربو.....

وانتي الحيه فاديه ذاك اليوم صرتي وربت وياجن

واكلتن من نفس الماعون محمره حلكج وفرحانه

بعرس المزيون

لابارك الله بيج ولاشفتن راحه مواني عمتجن

بس من اليوم عادل ماعنده بنات ماتن وانطمن بالزبل

ياهجمات البيوت

اجيت اشمت بيجن واشوف هاي فرحتجن شلون

راح تنكلب سم ولو بعد حين

ولجن عبالجن تخلصن من حوبتهه لا والله هيهات!!

كل دمعه حركت خدهه الله يصبهه تيزاب على

حياتجن وكون كل وحده شاركت باذيتهه

تشرب من نفس الكاس

ماقاريت قران ولجن ماتعرفن الله وصه باليتيم

وهي موبس يتيمه اب وام هي مكطوعه من شجره

وماعدهه غير رجلهه وبيتهه

من صفكتن لاخوجن وذليتنهه كدام اشكول قذره

ماتوصل لشعره من شعراتهه شلون نمتن الليل

ماخفت من دعائهه وهي نظيفه ومظلومه

(اتقوا دعوة المظلوم وان كان كافرآ, فأنه ليس دونها حجاب)

اتقن الله وشوفن نفسجن بيهه وخلن نفسكم

مكانهه ماجان تحمرتن وتحضرتن..

تفوو تفووو عليجن ياناقصات تربيه

مع الاسف بنات هاي المسكينه ياعگارب

يامتلونات

صارلهه سنه ونص ولجن بعدهه عروس لسه

اهدومهه مالبستهن وتهنت بيهه ولجن لسه

اثار عرسهه ماراحت وهيج كسرتنهه؟!

بس الحجي مو وياجن والعتب على ذاك

المسوي نفسه عريف احجلي شسويتله

بيادرب مشيتن وخليتنه مايعرف يتصرف

شلون هيج هدمتن بيته...

وانتي يالحجيه لا انتي امي ولادكولين

عندي بنيه وهاي رجلي اكسرهه اذا عتبت

بيت عادل بعد..

حجت كلامهه جمله وحده وطلعت السياره

واكفتلهه بالباب بس طلعت..

ماما كامت تعيط اول مره اشوفهه هيج

كامت ادك ع صدرهه ونزعت حجابهه وكانو

اليوم العرس ع وحده من بناتهه

كامت تبجي وهي تصيح خابرولي اختي الجبيره

خلي تجي تاخذني مااظل بهذا البيت !!

نتوسل بيهه وهي منفعله ماما بالايام الاخيره

تغيرت هوايه وبس تبجي

حته ويه بابا تصيح ودكله انت ماعندك سلطه ع ولدك..

ابد مااقتنعت وماخلتنه نخابر احد حته ماانتظرت خاله

لبست وطلعت اجرت جيرانه وكالت كلن لاخوجن

البيت المابي قبس جنة امك ماتريده..

اباوع ع تشتت عائلتنه وكل واحد بينه مايعرف شيريد

ماما تركت البيت وظلت بسمه هي القائد وبيبي

تحش براس هدى وفاديه ولو بيدهه تكطع لحم قبس

متفاجئه ع الحقد البين هسه..

الساعه ب٢ ضبط جان بابا يتصل بخاله

يريد يحجي ويه ماما وهي رافضه

طلعن البنات من الغرفه كلهن مبدلات

والجهال فرحانه وهم يصيحون لعد خالو بشار مو متزوج

شلون يتزوج مرتين!!

خابرن ع عمر يجي ياخذهن للقاعه هنااا

دك تليفون بابا جان المتصل بشار

اني جنت كاعده بصفه من كال الووو

بشار.. يابه خلي شجن تحضر نفسهه راح امر

عليهه اخذهه يم قبس

كمت اني لبست وهن يحجن عليه نسيتي

شلون طلعت سرج وفضحتج نسيتي

شلون تهمتج بس مارديت عليهن..

بدلت وانتظر بشار شويه واجي صعدت بالسياره

واني اباوعله شكد متغير بهاي الاشهر

الجكاير وحده ورا وحده حته ماانطه مجال لنفسه

ياخذ نفس نقي..

حجيتله بالسياره ماما تركت البيت

وبس تبجي هو ساكت بس شفته غير الطريق

عرفته راح ع ماما..

نزلنه يم خاله طلعتنه خاله كامت تحجي ع بشار

بس من شافته ساكت وبس الجكاره بيده هم سكتت

طلعت ماما وهي تصيح روح لا انت ابني ولا اريدك

وين حبك الهه وين خوفك انت بلسانك كتلي

روحي متعلقه بيهه!! هسه روحك شلون كدرت تأذيهه

حجت حجت ماما وهو ساكت المشكله سكوته

ينرفز الواحد كمت اتوسل بماما خلي انروح

اني وياج يمهه ماانريد لاعرس ولا انشوف احد

الله عليج ماما هسه هي بحاجتنه..

قنعتهه خاله وكامت لبست واجت ويانه

وكلنه امل راح انشوفهه ونشاركهه حزنهه

بس ماتوقعنه السوته قبس

وصلنه للبيت عاف السياره برا

وفتح الباب وطبينه البيت هدوء

ماما تمشي وتصيح اااوف اوووف تاليته للماتعبت..

فتح باب المطبخ شكد مرتبه المطبخ يلمع

التنسيق والترتيب المزهريه نبات ظل مخليته ع الميز

اول مافتنه كفختنه الريحه الطيبه..

صاحت ماما قبس !! وينج يمه

نمشي ونصيح قبس عبالنه زعلانه وماتريد تشوفنه

بشار مشه كدامنه للغرفه واحنه واكفين

بالصاله منتظريهه تطلع بضحكتهه مثل كل مره..

فتح باب الغرفه وظل واكف وصافن

لحظات وصاح بصوت عالي مال مفجوع

قبببببس!!!

عاف الباب مفتوح وركض ع تليفونه العافه

بالمطبخ ع الميز مشينه اني وماما وعرفناهه ماكو

ماما ركضت وراا واني دخلت للغرفه

انصدمت هاي اللحظه حيل اثرت بيه

ريحه الغرفه تجنن والاضواء مال عروس..

فرشتهه

وبدلتهه

وكصيبتهه وشعرهه الحرير

حلقتهه!! والبوم صورهم

كله موجود بس هي ماكو

بس ممتلكاتهه عافتهن وطلعت

مثل اول اجتنه بس بالتراك مالتهه

طلعت امشي كوه من الصدمه اخوي الطول عمري

اشوفه بطل !!

طول عمري اكول اتمنى الله يرزقني واحد مثل بشار

كاعد بالكاع وعمري ماشفته مكسور

دائما اشوفه هيبه واكول محد يكدر يكسره

يريد يكوم مايكدر ماما تريد تحاجي مايسمع

واكفه افرك بعيوني غركهه الدمع

واشوف قطرات الدم تناثرت ع قميصه!!

صحت بصوت بشار ضغطك ارتفع ماما موزين علي

يرتفع ضغطه لاتضربه جلطه بعد..

ماما تخبلت تهز بي وكانو رجع ابو ٥ السنوات وتقنع بي

وهي دكله ماتروح قبس تحبك هاي جاي تعذب بيك

ماتروح تجي تجي!! تسمعني امي حبيبي

انت سندنه لاتوكع !!

دفع ايد ماما وكام وهو مخلي ايده

ع خشمه ركضت جبتله كلينس اخذه

طلع برا بس احسه مامتوازن

وين راح يروح وين يدور عليهه

شمدري وين راحت ليش هي منيلهه

مكان حته ماتندل لان خلصت عمرهه بلبيت..

ماما كعدت بالمطبخ ادك ع رجليهه وتصيح

ارتاحن اخواتج ولج اخواتج دمرن اخوهن

وماكدرتلهن

اني موخوش ام اني ماعرفت اربي ولاكدرتلجن

شجن.. ماما اهدي راح تموتين وين تروح قبس

لازم يلكاهه

ام بشار.. وين يلكاهه كل عقلج اذا انتن مثل الدجاج

هي اقوى من عدجن ماتذكريهه من انهزمت وهي ١٤ سنه

شجن.. خلي يراجع التصوير هو مومخلي كاميرات

ام بشار.. يكول ب٩ شفتهه طلعت ذبت الزبل بالحاويه

ومطمن عليهه وعنده اشراف يفتر ومامنتبه

ع التصوير بعد وفاتحه قبل لايجي عباله نايمه

شجن.. عرفت هو رابط الكاميرات ع تليفونه حقهه

قبس معناته يشك بيهه ويراقبهه سكتت وكامت ماما

لغرفتهم وبس تبجي ماتكدر تدعي ع الكان السبب

لان بناتهه وابنهه السبب..

ظلينه لحد ٥ العصر احنه وحدنه دموع ماظلت عدنه

ماخابرنه اي واحد ولاحجينه بس اكيد عرفو

شفت هدى تتصل عليه وغلقته..

سمعنه الباب انفتح ودخل وحده تلكته ماما وتسال

بشر مالكيتهه؟؟

بشار.. وين الكاهه؟؟ كالت انت رجال واني مره

وكول مره كسرت كلمتي

جان يحجي بعجز وعيونه كوه يفتحهن طب للغرفه

هو وماما واني كعدت ع الدرج

اسمعه هو وماما ياربي شكد نبجي احنه النساء

وشكد ننكسر بس كسرة الرجال تفوق كسرتنه

لان دائما النحبهم انشوفهم ملائكه مايغلطون..

ام بشار.. ادري بيك شكد تحبهه وماسمعت كلامي

من كتلك راح تهجم بيتك انت اذيتهه يا ابني

مكفاك خطبت عليهه فوكاهه جبتهه بنفس البيت

منو كالك هي حائط صد وتتحمل كل هذا

ليش هيج بشار ليش ياامي هدمت بيتك

اذا تشك بيهه؟؟ عاقبهه احبسهه واذا فعلا

مسويه غلط انت رجال الف طريقه للعقاب

مو بهاي الكسره الماتنجبر.

انت مودكول اخاف عليهه من الهوه مودكول احبهه

مثل مااحبج واضعاف وينه حبك وانت

فرحان وتريد اتجيب ضره عليهه..

بشار.. غلطت!! ماكو بشر يغلط ؟؟ غلطت اني

اني ضعت بالاشهر الاخيره يمه ضعت بسببهه

بسبب حبي الهه ماعرفت شتصرف

اخذني الحجي غرني كلام الناس! اشتاقلهه بكل لحظه

اروح للدوام وفاتح التليفون اراقب حركاتهه بالبيت

والله اشتاقلهه والله احبهه!!

اعرف نفسي بس ارجع للبيت اضعف واني

بعدني بشك ومامتقبل الصار اظل افتر من مكان لمكان

حته ارجع تعبان وما اشوفهه واحس بحركاتهه

خسارتي لمنصبي خلتني انهار بسبب حبهه من كدما

ركضت وراهه واريد اعرف دليل

خسرت اسمي ومريت بايام صعبه

ادري مو عذر وادري الغلط راكبني من راسي لرجلي

وماادري شلون خطبت والله ماعندي غيرهه

اني غلطت!! كلت اخطب بس ماتوقعت راح يصير

كلشي بهالسرعه

وصيتج اني كتلج اذا اجت قبس بسنة

اهلهه لاتخلين واحد يحجي كدامهه هي عبالهه

متعمد اذلهه وانتي لحيتي اله تجي

كتلج هسه تسمع واني ردت اكعد وياهه واصارحهه

وتالي راحت رافعه راسي ورجعت مكسوره

اعترف اذيتهه بس هالشي مايمنع اشك بيهه

اني مريض شك شتردين سميني

مرتي كل الادله عليهه دكول عدهه شي

وماعندي دليل غير بس عيونهه اشوفهن نظيفات

اذيتهه وادري بيهه قويه وماتخاف

وادري راح ترجعلي هاي الضربه ضعفين

وراح تخليني حسرة عليه شوفتهه

ام بشار.. كول يالله ان شاء الله تلكاهه

موبس تفكر بفراكهه فكر بالكلام الراح تسمعه

باجر عرسك وانت بهاي الحاله من يسالون عن مرتك

شدكول ؟؟

عدهه اهل وراحت لاهلهه؟ لو يم اختهه؟

شتحجي فهمني تدري يعتبر عار عليك

تدري اذا عرفو كرايبنه شيحجون عليك

وانت قبل شهرين برأتهه بتهمه تكسر الظهر

راح يكولون صدك مصادقه ع رجلهه وانهزمت

مافكرت بيهه ترى هي اندفاعيه

من سالتك قبل لاتخطبهه كتلك يمه ليش

حبيتهه؟؟ وانت من النوع الصعب وتشك

وهي ماتربت يمنه

شكتلي تذكر؟؟

بشار.. كتلج حبيت قوتهه وماناكر هالشي فعلا

حبيت قوتهه وعنفوانهه وهي توكف بوجهي وعينهه

بعيني

ام بشار.. هاهي لعد انت اعترفت هي مو من النوع

الضعيف وتكدر تستقوي عليهه

قبس مثل اسمهه يا امي كلشي بيهه شرار

وماتسمح لنفسهه تنهان كرامتهه وخير دليل

عفتهه وشرفهه طول السنين حافظت علي

ومحد كدر يطخهه

هيج وحده خاف ع كلبك منهه

لان هي رغم كسرتهه هسه بس راح

تجمع نفسهه وترجع اقوى من قبل

وانت راح تظل تعاني وتاكل بروحك عليهه

شلون راح تدخل لمرتك الجديده ولك بشار

اني امك واحس بيك شلون فهمني

الك نفس بيهه مثل قبس لو جبتلك ورطه لروحك

وراح تعيش طول عمرك مغصوب علمود تثبت

رجولتك كدامهه..

شوف عزة نفسهه شوفهه حته ذهبهه

عافته شوف غرفتهه مالحكت تتهنى بيهه

تنساهه ياابني هيهات تنسه هاي الكصيبه..

شجن.. اسمع حديثهم واشهك من البجي

طلعت ماما وسدت الباب وعافته بالغرفه

شلون راح يتحمل هذا المنظر

شلون راح يلمس كصيبتهه العافتهه

وكانو دكلك اتخلى عنك مثل ماتخليت عن شعري

نص ساعه وطلع رجعنه لبيتنه عمر يدري

وبابا يدري والوجوه كلهه مكلوبه

بشار راح يدور عليهه

بس طبينه حجت بيبي هااا انهزمت متعوده ع هالزيمه

موكتله هسه اتجيبلك العار جان يكول

احترامهه من احترامي يله خلي تحترمه زين!!

ام بشار.. خاله اسكتي كلبي طك من سوالفج

ليل نهار تزنين براسه وبراس بناتي

كاااافي لاتخليني اهجم بيتي مثل ما انهجم بيت ابني

الحجيه.. تصيحين بوجهي تعال عادل شوف مرتك

اني تصيحين بوجهي

شجن... كااااافي رحمه لمحمد كاااافي مامليتي

ليل نهار تحجين وماخليتي واحد ماخربتي

كله من عندج انتي وعمه بسمه الزعلتو والرضيتو

كل الخراب من عدكم

الله اعلم شسويتن من اطلعن ساعات ودكولن بالسوك

ياسوك هذا مستغلات عطف اهلي وعرفتن

شلون تهجمن بيوت

الحجيه.. يارعنه ياعرجه طلعلج اللسان يالعانس

كل اليجي يكلبج ويروح وهو يشوفج تك رجل

شجن.. تك رجل بس مامشيت بدرب الحرام

ولاتهمت ولا لفقت تهم مثل ماسوت بنت عمه بسمه

ولامثل ماسوت عمه بسمه وراحت تسوي

محبه حته تزوج بناتهه

والله اعلم شسويتن لبشار شوفي شلون جنتي

شحدكم واحد يفتح حلكه بكلمه ويااا

وهسه خليتنه يريد يحجي السانه معكود

احنه موبنات البارحه ومانفتهم كبرنه وشفنه

البلاوي كدام عيونه وانتي يابيبي وحق عافيتي

هاي انتي سبب دمار بشار

انتي وبسمه تندلن ادروب المحبه والكره وكلشي

تسون حته ياخذ فرح بس ماحصل الج

بسمه.. تنجبين وتسكتين لا اكوم امرد حلكج

مرد صلفه العرجه بيج حظ وتحجين ع بنتي

ماتوصلين لأصبع رجلهه

شجن.. الله لايوصلني لهيج حثاله ليش تنكرين

موهذيج فرح مااجت علمود ماتشوف عرسه

وزفته موانتي بنفسج كلتي فرح تحب بشار

ومستعده تصير الثانيه والثالثه

لوهسه اختلف الحجي..

انفعلت حيل منا لوعة اخوي ومنا قبس

الحسيت نفسي خسرتهه للابد كمت مااعرف شحجي

كل الحجي البكلبي طلعته

كامت بسمه تهد عليه ولازمتهه فاديهوهي تغلط

عليه وتعيرني برجلي ويه حجايتهه يالعرجه

يالعانس سمعت صوت امجد

صاح بيهه يممممممه!!! بسرعه سكتت

التفتت علي بنظره اسف جان واكف بالباب

بسرعه حولت الموجه وكامت تصيح يمه تغلط عليه

وع اخواتك..

برد كلبي بجوابه وهو يكلهه سمعت كلشي

يوم عن يوم انصدم بيج

شنو من بشر انتي راح اطلعيني من طوري

وتخليني عاااق

شجن.. عفته يرزل بامه ورحت للغرفه

ماريد اسمع اي شي جانت اسراء بالغرفه هستوهه

كالت صدك انهزمت صحت بيهه انتي مالج علاقه

لاتتدخلين ..

سكتت بسرعه وعافتني وطلعت ورا ساعه

بسمه راحت بعد ماشعلت النار بالبيت

بشار يفتر يدور عليهه وحته للامام رايح ومالاكيهه

ووين يلكاهه بوسط الملايين

نحاول انستر الموضوع وبابا وصه الكل ممنوع

تحجون اليسال عليهه كولو راحت يم بشرى

لان بشرى ماتجي للعرس..

سرور الف مره اتصلت وتحجي ع قبس

وهدى دكلهه غايتهه تخرب فرحتج لان انتي

احسن منهه ..

كرهت هدى وكرهت اهلي كلهم

خلصت هاي الليله وبشار مااجه

بابا يتصل بي مايجاوب راحوا لبيته

مقفول

نسمع من عمر يدور عليهه بس فص

ملح وذاب...

ثاني يوم صار العرس وبعد الحجي التوجه

لبشار عيب وتنحسب نقطه عليك

وانت ماعايز كلام بس جيب البنيه من اهلهه

وخليهه بالبيت حته مايذكرون قبس

بالموزين

ماادري شلون جان لازم اعصابه اصلا ماشفناه

ابد مناك رايح سياره وحده وجايبهه للبيت

مانكدر نسال ولانعرف شصار ..

بس الي نكدر نكوله الله يعين كلبج

ياقبس اجه الليل واظلمت الدنيا واليوم

دخلت وحده ع الحاضر ببيتج..

يامن تعب يامن شگه يامن ع الحاضر لگه...

قبس.. دخلت من الاستعلامات مال المستشفى

جان ممر طويل امشي واني متردده من هاي الخطوه

صاح عليه رجال جبير تفضلي يابه!!

رحت قريب علي كتله عمو اني اريد اسجل بهاي

المستشفى!!

طكهه ضحكه وهو يكلي قابل مدرسه يابنتي

غير عندج تقارير تثبت انتي مريضه نفسيا

وبعدين وجهج جنه العافيه شجابج ع الشماعيه!!

ماانطاني مجال احجي كال تعالي بنتي شوفي

بعينج واخذني امشي بممرات طويله لحدما شفت ساحه

جانو مطلعين المرضى بيهه

مجانين رسمي واحد يضرب وواحد ينزع ملابسه

والمراقبين يركضون وراهم

بنات بعمري واكبر ونسوان عجايز يسولفن ويه نفسهن

والي تسولف ويه شجره

ظليت مذهوله اني عبالي دار وكل واحد حسب

حالته ماتوقعت اعيش هيج

التفتت علي كتله عمو هاي كلهه هيج!!

رد عليه اي بنتي هاي اسمهه الشماعيه

يعني المجنون المايسيطرون علي اهله

يجيبو هنا احسن من الشارع

واذا عبالج هاي تعالج المرضى النفسيين

والمدمنين لا بنتي هاي تخبل ماتعالج..

عفت الرجال يسولف وطلعت اركض لشارع

احمد الله اتلاحكت نفسي ماعبالي هيج الوضع

عبالي مستشفى منتظمه موهيج شيش بيش..

وكفت تكسي رجال جبير كال وين

جنت حايره شكول بسرعه كتله للامام الكاظم

كال اصعدي بنتي ..

الله ينطي ماحجه طول الطريق

مع العلم جنت خايفه حيل ماامن

بجنس ادم ابد وامنت بس بيك يابشار

وخذلتني..

وصلني للامام طبيت امشي اتذكرت

من حانبي قبل لا اسقط طفلي الاول

وجنه ايد بايد وهسه يا امامي اجيتك وحدي

الي اجيتك اني ويا وطلبت من الله يبعد

عني الشر والسوء اول واحد بعده هو

يعني جان شر والله اختار يبعده عني..

زرت وصليت ودمعتي ماوكفت هسه اجه

هسه شكال؟ هسه شاف غرفتي؟

لوهسه محتفل بالحنه وبعده ماراح افتقدني!!

مانمت ولاغمضت عيني اكو نسوان هوايه

باتن بالامام كل واحظ همه لون وكل هذا

واني اردد الحمدلله والشكر مابيه مرض

خطير من المناظر الشفتهه..

ثاني يوم اطب للضريح ازوؤ واطلع اكعد برا

واخذلي شويه واطلع بس روحي

رايحه كلبي متكطع

اليوم عرسي اليوم لازم يتمم زواجه لان تنحسب

عيبه علي اليوم عريس حبيبي!!

كمت اشتريت لفه وبطل مي لكيتهم

يصيحون عبايه ووياهه خمار اشتريتهم

ولبستهم بالمغاسل خاف واحد يتعرف عليه

روحي تطحن مثل الرحه الفارغه وتطحن

بنفسهه!!

اجه الليل وكامت دموعي تجري

كلساع امد ايدي جوه الخمار امسحهم

ولزمتني الشهكه

هسه باسهه؟؟ هسه حضنهه؟

هسه كالهه عيونج حلوه واذوب بيهم؟

هسه كالهه اول ماشفتج انعجبت بيج

هسه

هسه

هسه دخل بيهه!؟

هسه لمسهه!!

هسه صارت مرته وباسهه من راسهه وكالهه مبروك

ضاق نفسي اختنكت رفعت الخمار واني اخذ الهوه

بالكوه اكو شكم وحده كدامي يباوعلي ويحجن

تقربت عليه وحده

كالت وين اهلج؟؟

هي كالت وين اهلج لو ردتهه حجه

ابجي وابجي تريد تفتهظ مني ماكو

كوه حجيت وكتلهه ميتين

وركضت لحضرة الامام

هاي الليله الثانيه اني ماغمض جفني

صبح الصبح واني اردد هسه تريكو

وهسه يهمس يم اذنهه ويكلهه صباح الخير

دمرت نفسب اكثر من ماهي متعذبه

وين اروح ولشوكت اظل بالامام

وين انطي وجهي واحتمال يطردوني اذاظليت

هوايه

دخلت للامام صليت ودنكت بالكاع ودعيت

بحركة كلب ياربي لو تاخذ امانتك وتخلصني

لو تساعدني والكه مكان انام بي وارتاح

اليوم الثالث اني بالامام

كمت اشتري بطل مي ولفة همزين لابسه خمار

وعبايه حته ايدي اضمهه جان سمعت الف حجايه..

واكفه يم ابو المطعم لمحلي من بعيد

مدري اتخيل غيث!!

شفته رايح للامام بسرعه اشتريت

وانطيت الفلوس وكمت امشي وادور علي

مدري شصابني عبالك شفت كدامي حبل النجاة

شفته سلم ع واحد ووكف يسولف وياه

شويه وكمل طريقه مشيت سريع لحدما وصلت

يمه رغم الازدحام جانت عصريه بوقتهه

من صرت وراا همست غيث غيث!!

التفت يباوع منين الصوت لا اكدر ارفع

الخمار كدام الناس دار وجهه وكمل طريقه

سرعت خطواتي لحدماوصلت بصفه وكتله غيث

اني قبس !!

بسرعه اندار وهو يتلفت خاف واحد يشوفه

كال قبس وينج صدك جذب شمسويه؟؟

يمعوده شو رفعي هالجادر منو يكول قبس...

كتله مااكدر منا ناس رد عليه امشي وياي

للسياره!!

قبس.. مااروح امانه بركبتك لاتبلغ بشار

امانه بركبتك

غيث.. امشي قبس بابشار ليش مااعرف شكد

متأذيه مدري ليش مطمئنه من ناحيته

مشيت ويااا لسيارته بالكراج ورفعت الخمار

غيث.. تحجين صدك ليش هيج سويتي

حتلو كرهتي مافكرتي بسمعته

قبس.. تساعدني لو ارجع منين مااجيت

غيث.. طبعا اساعدج!! بس خليني ابلغه حاله

يبجي الكافر

قبس.. انت الظاهر ماتعرفني هسه انزل

كل عقلك اخلي يلكاني..

غيث.. استغفر الله

قبس.. احلف مايتكله ومايلكاني

غيث.. وروح ابوي مااكله بس قابل تظلين بالشارع

قبس..بعده يحجي وياي ودك تليفونه

رفعه وباوعلي كال هذا بشار

كلبي كام يدك بقوه الفظ انفاسي

بسرعه اكيد راح يكله فتح الخط وهو يحجي

ويااا بس سمعت اسمي بلسان

بشااار هو يكله قبس..............

.

يتبببببع... احبكم

قمع المشاعر.... الثاني والعشرون من الجزء الثاني...

للكاتبة زهراء ( روزايه)...

( بارت طويل بحدود بارتين هديه الكم

ولدكتوره عهود سعد المتابعه للقصه من غرفة الحجر الصحي نتمنى لها الشفاء العاجل 💓)

.....

حنيت لو للهو تسأل على أخباري؟!

إشتاگيتلي،،؟ تندمت،،؟

لو هيچي بس للعب تتحارش بناري؟!

....

قبس.. اسمع صوته وهو يحجي ويه غيث

اغمض عيني شكد اشتاقيت الك

يالعذبتني يالهانت عليك كسرتي

للحظه ضعفت واريد اخذ التليفون واكله حبيبي..

كال لغيث قبس عدهه صديقه اسمهه سناء

ورحت لبيتهم وطلعت سناء مسافره قبل ٤ اشهر

بس اكو وحده اسمهه عاليه ومااندل بيتهه بالضبط

غيث.. يحجي ويباوعلي ادلل هسه اني بالامام

راح ازور وامر عليك انطيني معلومات عاليه

واني ادورهه..

سده من عنده وباوعلي كلبج ينطيج تلوعي؟؟

قبس.. مثل ماانطا كلبه شنو كلوبكم حلال عليهه

الكسر والهجران واحنه لااا ؟

غيث.. هسه وين تروحين وشنو قرارج؟

قبس.. اسمع غيث اني ماارجع لبشار لويكلولي

مات كدامج لاتحاول ويايه ولاتقنعني

اني طلعت من البيت بمزاجي ماارجعله لو يحاربني

من كل الاتجاهات..

غيث.. هسه السوالف هنا ماتفيد راح اخذج لبيتي

وانشوف حل؟

قبس.. وفاطمه ؟؟

غيث.. ترى بيتي شبه متروك فاطمه دائما يم اهلي

نادرا ما نجتمع بنفس المكان

قبس.. لا مااروح وياك راح ارجع للامام وانت مر عليه

مااكدر اجازف ويسويهه حظي المصخم وتجي فاطمه

حته يطلعني مثل اخلاقهن

فرك وجهه وسكت غيث من النوع حتلو عصبي

بس شكله هادىء يعني عصبيته بهدوء حته صوته

موعالي مو مثل العندي يكوم مايعرف شيسوي..

رجع حجه كال عدنه شقه قديمه من زعلت من اهلي اشتريناهه اني واصدقائي نسميهه شقه الزعلانين

كل اليزعل يجي بيهه هسه فارغه راح اخذج الهه

واكلهم اختي زعلانه حته محد يجي

قبس.. خاف تصير حجايه عليه؟

غيث.. لاماكوشي قبل فتره صديقي سكن بيهه

هو وعائلته لان تعارك ويه اهله لتخافين شي مؤقت!!

قبس.. غيث وعدتني ماتحجي؟؟

غيث.. طبعا وعدتج حتلو زعل بشار اهم شي

اطلعين باقل الخسائر..

اكلتي؟؟ خلي انزل اجيبلج اكل؟؟

قبس.. لاتسلم هاك شوف لفتي هسه اكلهه بالسياره

بس اريد خدمه منك؟؟

غيث.. كولي

قبس.. طلعت بس بهاي ملابسي شوفلي اي مكان اشتري

منه ملابس للبيت

غيث.. حرك السياره ويحجي هسه انشوف مكان انزلي

اشتري منه..

قبس.. مااعرف سبب الراحه اتجاه غيث

رغم ينتمي لأقذر عائله مرته فاطمه بنت بسمه

وامه سليمه واخو وائل العار بس حسيت بي اخ حقيقي..

وكف يم قيصيريه كال انزلي انتظرج بالسياره

اخذي راحتج ومد ايده ع جيب بنطرونه طلع محفظته

قبس.. لا اطلع عندي

عيث.. مايصير قبس ادري بعزة نفسج بس اعتبريهن دين؟!

قبس.. لوماعندي جان كتلك بس والله عندي وزياده

ابتسمت ونزلت

اخذت تراك واحد طويل واثنين دشداشه حلوات

لان مااكدر البس تراك كدامه احسهه زحمه

اخذت ملابس داخليه وشاليين وعبايه اسلاميه

خاف احتاجهه للطلعه وحذائين وجواريب

كملت كلشي واريد اطلع واجت عيني ع الكحل

مااكدر بدونه رجعت اخذت من كلشي حاجه كحل ومسكاره

وحمره ومرطب ورجعت للسياره..

تحركت السياره واني افكر ببشار

يعني مايعوفني بحالي وبحيث راح لسناء ويدور

وهسه عاليه شيريد من عندي هو موباعني بالرخص؟؟

وصلنه لمجمع سكني رفعت الخمار خاف من ادخل وياه

اجيبله الشبهه نزلت وهو كال عوفي العلاليك

اني انزلهم صعدنه لطابق الثاني الشقه فتحهه وطبينه..

واكفه واردد الحمدلله الحمدلله ماظليت افتر

بدون مأوى اشرلي ع تخم اكعدي

كعدت وهو يحجي هاي كدامج الشقه امينه حيل

وبالطابق الاول صديقي ساكن وفوك اخته يعني

لاتخافين بيهه عوائل واني امر عليج

قبس.. غيث مااعرف شلون اشكرك وبشنو

ادعيلك الله يخلصك من فاطمه

غيث... طكهه ضحكه وكال راح اروح اجيبلج مسواك

واجي ردت انطي فلوس ماقبل حته بسرعه سد

باب الشقه...

رحت قفلت الباب وافتريت بيهه موجديده بس

زينه ونظيفه حته متحتاج تنظيف هوايه نظفتهه ع السريع

وركضت للحمام احس نفسي مختنكه لان صار

ايام ماغاسله ..

اخذت دشداشه وسبحت ارتاحيت احس نفسي

اتتعش جسدي مو روحي.. طلعت مشطت وخليت الشال

الجديد ع اكتافي خاف يجي فجأه..

غسلت ملابسي وحايره وين اشرهن

تالي شفت مشر جوه الدرج سحبته اخذته للغرفه

لان اكيد مارااح يفوت هنا وشريتهم...

باوعت للغرفه كنتور ابو ٤ ابواب

وجربايه بدون ديكور ميز ماكو مجرد مرايه وسط وجواهه

رف صغير ...

تنقلت بالشقه ورجعت كعدت بالصاله

اخذني فكري لبشار شكال للناس؟

هم راح يحسبو عار ويكولون مثل امهه؟

اندك الباب خفت بسرعه ترددت افتحه اله سمعت

صوته وهو يكول اني غيث!!

فتحته اخذت المسواك منه واني اتشكره

ماقبل يبقى كال راح اروح لبشار وامر عليج المغرب..

قفلت الباب ورتبت المسواك اشتهيت طماطه

گلي وكون لاجعه دورت ع المواعين لكيت طاوه

وسويت الطماطه صار شكلهه يشهي..

هستوني حطيتهه اريد اكل حسيت معدتي كلبت

اريد اوصل للحمام ماالحك تقيئت حيل احس

روحي راح تطلع ومعدتي انكمشت .

غسلت ورحت مددت بالغرفه معقوله صار

عندي تسمم من اللفه؟؟

بسرعه اجه براسي خاف حامل كمزت من مكاني

وكعدت احسب من هول المصايب الصارت ع راسي

مااتذكر اي شي ونسيت الشهريه ماكو؛!

راجعت ذاكرتي بشار من تقربلي جنت بمرحله

التبويض واني مااخذ اي علاج وهاي صارلي شهر

ع خطوبته يعني المفروض هسه جايه وخلصانه

لعد وينهه؟؟

نفضت الافكار من راسي لاااا لااا هاي من اللفه

اني مو احتركت ايدي ودخلت مستشفى لو عندي

حمل جان بين؟؟

بس اتذكر سالتني الممرضه خاف عندج حمل؟؟

وكتلهه لا اخذ علاج حته تحاليل ماسوولي غير

تحليل فقر الدم لان جان جسمي مامحترك بس ايدي..

بحركه لا اراديه خليت ايدي ع بطني

اريده ومااريده!!

اريده ابني يرد عليه وحشتي

ومااريده خاف بيوم يجبرني ارجع لابو لو يعيش

مثل مأساتي..

معقوله بشار جان متعمد يتقربلي بذاك اليوم؟

هو حافظ موعد الشهريه وحته يعرف ايام التبويض

لان من جنت اخذ مانع وراجعنه كام يتبع الطريقه

العلميه حته انسه وهو يذكرني..

اذا متعمد ليش هيج سوه شيتوقع استاذ

بشار يلزمني طفل لو راح اطخ راس ولخاطر

ابني ارجعله ؟؟

دب القلق بكلبي ولاارادي تغيرت حركاتي

وصرت حذره حيل اني حملي بالاشهر الاولى

مااحس بي مرتين صرت حامل وبعد الشهرين

يله يبدي الوحام

ظليت افكر منا اتخيل بيتي داستع وحده

غريبه وصارت هي ام البيت

ومنا افكر اذا حامل حته طلاك مايصير يطلكني

تعبت وراسي صدع وماعندي اي علاج

خفت حيل اني جنت اخذ علاج بجرع موطبيعيه

وهسه جسمي متشبع بهيج مواد خاف يطلع

مشوه واني وحدي ومحد الي ويساعدني..

افتريت بالشقه ادور ع قران اريد اشكيله

همي وين اروح مالكيت قران فرشت سجادتي

وكمت اصلي وابجي

مااريد ارجع لبشار لو روحي بي ماارجع

احبه اضعاف حبه متعلقه روحي بي

ومثل الشده ومعكوده بس مااريده

هو الداس كرامتي وخلاني مضحكه للشماته..

سمعت الباب يندك رحت فتحته غيث

جان جايبلي عشه وفات كعد بالصاله

غيث.. تعالي خلي انسولف

قبس.. اذا ع ابن عمتك مااحجي

غيث..تعالي يابه ماينلام من يكول راسهه يابس

والله احيج ع هاي القوه العندج لو وحده غيرج

هسه تسمع اغاني حزينه وتنتظر يومهه

قبس.. الله عليك؟؟ حجيت باستهزاء

كل عقلك اروح اتحمر واتكحل وانتظره ينزل من يمهه

واظل اتلوكله حته افوز بحبه

ماكو هيج واذا الي نيه افكر بهيج تفكير عاطل

عساني بالموت...

غيث.. يعني هسه كل المتزوج عليهه رجلهه تفكيرهه

عاطل ولازم تعوفه؟

قبس.. شوف غيث

اكو اتزوجو بسبب اما مرته ممعتنيه بي ومشوفته الويل

من طلباتهه ومشاكلهه وتغار من فلانه وفلانه وتريد تشوفه

لازم اطبقه يعني سماعه حجي وهوايه خسرن

ازواجهن من كدما يشوفن بمواقع التواصل منشورات

تخليهن يكرهن ازواجهن لان عبالهن هن مظلومات

وبالدور الاساس عدهن رغباتهن وطلعه وفلوس

واكو بسبب ماعنده اطفال ومرته عقيمه

واكو مشن بدرب الحرام والسحر

واكو ضاعت بيوتهن بسوء تصرف منهه

واكو يتحملن لخاطر اولادهن وهذني اكثر فئه مظلومه

بس يبقى الذنب الاكبر علي هو لاتكلي اكو رجال وفي

هذا بشار قمة الوفاء مايوم فكرت اشوفه ويه وحده

ثانيه وهسه بشار وينه؟؟

اني احبه اكدر اروح اتزوج غيره؟؟ مستحيل

اسويهه بس هو وينه عادي حضر غرفه جديده

وراح يعيد نفس الكذب الكاله باذاني راح يكوله الهه..

غيث.. الصبح شكلتي ؟ موكلتي اني اخوج

لعد خليني احجي واسمعيني وادري ماراح تقتنعين

بس واجبي احجي..

قبس طلعتج اكبر غلط وعواقبهه عليج؟

انتي تريدين تأذي اذي بطلاكج منه مو بهزيمتج

خلينه نحجي واقعنه احنه بالعراق شراح يكول من يسألو وين

مرتك؟ لاعندج اهل ويكول عافتني وراحت لاهلهه

ولا انتي مطلقه ويكول طلقتهه ؟؟ شيريد يكول ماتت ودفنتهه

هي وعايشه بكلبي؟؟

قبس اترجاج كلامي وياج لمصلحتج انتي هسه كلبج نار وماتحسين بحجم الغلط بس والله انتي بهاي طلعتج مو اذيتي

انتي دنكته راسه بالكاع !!

وقبلهه اكو كلام عليج يعني هسه ماكو

حجه ثبتت التهمه

عليج وهسه راح يبدي اللوم

ومو كنالك هي هيج وانت دافعتلهه!!

لحدالان يدبر اعذار حته اهلي ميعرفون

انتي مهزومه متكتم ع الموضوع بس لحد وين؟

لازم تنكشف وهذيج الساعه شيكون الحجي؟؟

قبس.. واني اظل اراعي مشاعره ومشاعري خليهه تنجرح؟

غيث.. موهيج يا اختي انتي قويه وماتختارين ابسط طريق

اني مااكلج ارجعي اله لان هالشي خاص بيج

بس فكري بعقلج بشار لابد مايوم حلو عشتي وياه

لابد مايوم ضحه علمودج ..

لاتكسري بهزيمتج اصعب مايمر ع الرجال

هيج موقف صعبه ياقبس لو يكولون مرته ماتريده

واطلكت منه ميخالف بس مويكولن انهزمت واحتمال

تتأذين ويكول انهزمت لاسامح الله ويه صاحبهه

انتي عايشه بمجتمعنه وشفتي شلون قذر .

قبس.. لاتحاول غيث اني هسه ماسمعت شحجيت

ولا ركزت بكلامك

غيث..اكعدي لاتكومين اليوم احجي منا للصبح

وكتلح والله مودفاع عنه وانتي حره باختيارج

بس العرض والشرف غالي وتدري بي من يانوع

هو وكلشي ولا عرضه..

خليني افهمج امج ليش عانت ويه ابوج؟

قبس.. بسبب اهله بسببهم نفسهم الي اذوني هسه

غيث.. لااا موهيج ابوج اختار امج وجان مقتنع يطلع

من العشيره واخذهه غصبا عن الكل واتزوجهه واتبرو منه

وراهه شنووو؟؟ وراهه كام يحن لاهلهه وكام يحمل امج المسوؤليه وكله بسببج عفت اهلي وامج متحمله

مثل ماطك كلبج هسه امج هم طك كلبهه وعافت ابوج

وانهزمت وهي حامل بيج وابوج يومين ولاكيهه

ومن ذاك اليوم لحدمامات ابوج يعاقب بيهه

واذاهه حيل وتاليتهه شحصلت ؟؟ حصلت عذاب

وعاشت عمرهه كله بالحسره وندمهه ع هزيمتهه..

قبس.. تريد دكول اذا لكاني بشار يعاقبني مثل

بابا ؟؟؟ حجيت هالجمله وبلعت ريكي اخاف

من كلمة عقاب لان شفت بعيني شلون يعاقب ماما..

غيث.. بشار مومثل ابوج واذا يريد يعاقبج

مايطلكج بس!! اعرف وين شطح بالج بس

اريد افهمج عواقب هزيمتج..

قبس.. ماااشي هسه اني اختك شنو برأيك الحل؟؟

غيث.. الحل احاجي بشار واكله لكيتهه

وعدهه شرط ماتقبل ترجع اله اطلكهه

وثقي بالله بشار مستعد يطلكج بس يكون يشوفج بامان

اضمني حياتج انتي تحبي وتريدين تشوفين

حياتج بعيد عنه بس ماتتزوجين

وين تروحين وانتي ماعندج احد ع الاقل

عندج بيت وتكدرين ترجعين اداومين

وهو يشوفلج مكان بس حته يرضيج!!

قبس.. انت ليش ادافعله لان من نفس الصنف!؟

غيث.. والله زعلتي والرضيتي ماكو رجال يتقبل الصار

اني اشوف بشار ضحية مؤامرة حقيرة

وهو يحبج اكثر من روحه..

اكثر من موقف مااتخلى عنج وبهذا وقتنه

محد يسويهة..

اسمه رجال واحنه العراقين اذا واحد باوع لمرته

بالشارع يسويهه كعده شحال هو منين مايلتفت

دليل ضدج والله لو واحد غيره جان سوه العجب

اني مجرد كلام ع شجن وشفتهه كاعده ويه

واحد وطلبت منهه تبرء نفسهه ومابرءت غصب

عني فكرت بالموزين هي كل الزلم هيج

لادكليلي ثقه وماثقه الحب وحده موكافي!!

حتلو يحبج يبرئج بداخله بس كدام الناس شلون

وهو رغم هذا وطلع من المستشفى ووكف الكل

عد حدهم وماقبل يحجون عليج..

كل انسان يغلط. هاي اني كدامج الغلط راكبني

بسبب لحظه غباء لو انفعال

مرات الانسان مايكدر يتحكم بتصرفاته

من يشوف الخسارات متتاليه..

وبشار خسرج وخسر منصبه وسمع كلام والله

اكبر رجال مايتحمله وساكت برأيج ليش ساكت؟؟

غير يحبج لومايحبج جان يطب يطلع يكتل بيج..

تدرين قبل لايخطب جنه معزومين بعرس ابن عمهم

واني وعمر واكفين اجه اخو الحجي رجال جبير

تدرين من سلم علي شكله؟؟

كاله والله جنت احترمك بس من دافعت عن الباطل

سقطت من عيني توقعي ردة فعله شنو لو واحد ثاني

مواجاج وطلع ناره بيج

بالعكس رد علي باسلوب وبين نفسه مامهتم

وحته شبه رزاله وعاف العشه وركض ورا يعتذر

وماسمعه كل هذا وتريدي يسكت يابه رجال هو مو مثل

المره كلبهه رقيق وتتحكم بيهه مشاعرهه..

قبس.. خلصت؟؟

غيث.. تحجين صدك صار ساعه شلغي

قبس.. منو كالك تلغي انت اذاعه وانفتحت

غيث.. دكومي منا العتب ع الطاقه الستهلكتهه بالتفكير..

قبس..كمت من يمه مااريد افكر بكلامه واضعف

طلع وقفلت الابواب وحبست نفسي بالغرفه بعدماتعشيت

جنت تعبانه بسرعه غفيت..

شجن.. صار اسبوع وقبس ماخلو مكان مادورو بي عليهه

بشار ماشفنا ابد من يوم الحنه وسرور مانعرف اخبارهه

بس اتصالهه ويه هدى وماما متقبل واحد يحجي بيهه

سمعنه من بسمه ع اساس وائل حالته الصحيه مدهوره

وماخذي لاربيل وغيث ماقابل يروح وياااه

وماخذه صديقه بس مانعرف شبي بس كالو سكر..

فاطمه يارايحه ياجايه كلساع واحسهه

تشم اخبار وتنقل لفرح لان مااجتنه بعدهه بطور

الصدمه

صادفت عصريه واني نايمه ع رجل ماما وفاديه وهدى

يمنه بسمه ماموجوده وصابرين يوميه تقفل بابهه

وتجي العصر تكعد ويانه..

نسمع صوت عمر وهو يكول تفضلي كامت صابرين

وهي ترحب بيهه من دخلت انصدمت سرور جايبهه

عمر هي مخابرته ضايجه وحدهه..

كعدت يمنه وماما ابد ماالتفتت عليهه ولا اني

حجيت وياهه بس اسراء وهدى ضحك وسوالف وياهه

سرور ملامحهه عاديه حالهه حال كل بنيه

بس عدهه وجنات عاليه جسمهه ضخم موسمينه

بس ضخامه

مدري لان متعود ع قبس جنهه كتكوته..

ماما شويه وكالت راح انام مااريد اسمع صوت

وعافتهه وكامت وهي مدنكه تلعب بمفتاح البيت

اخذتهه هدى وكالتلهه تعالي نطلع برااا

وهاي اول مره اتسمع ع احد بس فضول

عندي اشوف حياتهه ويه بشار شلونهه..

كعدن بالطرمه وهدى وصت فاديه لحد يطلع

بس اني كتلهه راح اروح اسبح سديت باب الحمام

وطلعت بالممر قريبات عليه خليت كرسي وكعدت

جنت اسمع حديثهن بوضوح

هدى تسالهه شلونه وياج؟

سرور..هو وينه؟؟ هدى مصدومه شسويت بنفسي

مااشوفه ابد غير يجي ب١١ بليل ينام بالطابق الجوه

ومن احجي يكلي تعبان انطيني صبر

هدى.. ولسه ماتقربلج

سرور.. هو اول يوم اصلا اني خجلت من نفسي

ارتفع ضغطه وعذرته وظليت للصبح اراقب ضغطه

لان موسهله علي طلعتهه وهاي الايام

يفتر يدور عليهه بعد وين يتقربلي منيله واهس

هدى.. ترى هو رجال اغري البسي وانتي بعدج

بنيه لازم يحن ويعجبه يجرب

سرور.. هو اصلا ميباوع بوجعي واني عاذرته

هدى اني اعتبرتج اختي وداحجيلج مااريد الكلام يطلع

مااريد احد يعرف لسه منتقربلي ويذمو

خلي ع راحته لحدما يحس نفسه زين مقدره شعوره

هدى.. شتحجين خبله انتي؟ اذا ظليتي هيج ماراح

تنسي قبس؟

سرور..والله اني متندمه بكد شعر راسي من اجت

خالتج وكالت بشار يريد يتزوج ع مرته ضحكت

كتلهه مستحيل اني شايفته شكد يحبهه

بشار اعرفه من جنه بالسادس اعدادي جنت اني وياه

بدوره انكليزي خصوصي واعرفه شكد رزن وثكيل

من جان بالكليه اختي تحجيلي علي دكول

المتفوق ع دفعتنه واكلهه وين اكو ولد شاطر

وكل سنه يطلع الاول يعني شخصيته

عجبتني حيل ...

اول يوم راجعت بي يمي ومن طلع ابنهم

مشوه شفت الخوف بعيونه وشلون لزم ايدهه

كلت مستحيل بيوم يخذلهه

هدى.. اوكفي اوكفي كلتي مشوه شو ماندري كالو

ميت ابطنهه

سرور.. شوفي يوم عن يوم جاي انصدم واتندم

ع تصرفي يعني حته انتم متدرون وهالدليل حبه

الهه حته محد يعيرهه بيوم

كله السبب بيكم انتن اجيتن وحجيتن حجي

خليتني اذا جنت معجبه بي تعلقت اكثر

ليش ماكلتن يحبهه والصار نتجيه مؤامره وحقد

هدى ليش كذبتو عليه!؟

الحجيه موكالت خانته وماله نفس بيهه

موكلتو مريضه نفسيا وماتعرف شتتصرف ولكاهه

ويه واحد ليش طعنتوهه اذا انتم ممتاكدين

يعني انتم ظلمتوهه وظلمتوني

هدى.. ماكو شي يجي بسهوله قبس انهزمت وراحت

هي ع امهه وخالاتهه نفس الاخلاق بس هو هسه

يدور عليهه موحبا بيهه لاااا بس علمود مايصير عارهه

علينه..

سرور.. لحد الان مستمره بالكذب دااكلج يحبهه بجنون

اني اراقبه اول مايجي يفوت لبيتهه ورا ساعات يصعدلي

ضغطه مفول معناتهه يحبهه لولا؟؟

الذنب عليكم والله يحاسبكم اشد الحساب

لان ظلمتوني وكذبتوا عليه وكلتو راح يطلكهه

بس لان ماعدهه احد تظل بالبيت

اني حيل متندمه وخايفه من عقاب ربي لان

اني بيوم جرحتهه وبدون قصد والله العظيم رغم

شدة اعجابي ببشار بس مايوم فكرت بسوء

بس عادي اكول شخصيته حلوه بس ماتوصل اخذه

من مرته واهجم بيته..

هدى.. احنه شعلينه هو اجه وكال اريد اتزوج

سرور.. ليش كال؟؟ غير من كلامكم اني هسه دارسه

وجبيره بعمره اني وشفت اشكال بحياتي ومده اسبوع

من كد الحجي موهاي وافقت

وانتن ماقصرتن ماشاء الله تاكلن براسه انتن وازواجكم

ليش رجلج ميستحي مويكول والله هي قبس

جانت تباوعلي من اجي واستحي منهه جريئه

احس بنفسي بدوامه وانتم سحبتوني بنصهه

وخليتوني انتظر عقاب ربي لان انظلمت

اني بس صافنه شلون تقبلت صعدت الغراض كدامهه

وانتن تحضرن ع راسهه..

هدى من هذا اليوم رجاءا كفي عني

موضوع تقنيع وتحجين ببشار مااريد اسمعه

اني وياه هسه نعتبر اصدقاء ودااحاول اتقربله

واكون اله صديقه قبل لا اكون زوجه

وصدكي مايهمني تقربلي واذا لااا لان احترمه

حيل بالعكس كبر بعيني واني اشوفه

شكد يحبهه وبعد مايحل امور قبس

نتصافه اني وياه

يعني هالشي مااريد اي تدخل لامن عندج ولامن

غيرج اني انسانه واعيه واكبر منج واعرف شلون

اتصرف غلطت مره وسمعت كلامكم مااغلط مره ثانيه..

شجن.. عافت هدى وكامت طبت جوه واني مي بارد

ونزل ع كلبي اشمتت بهدى شلون حصلت رزاله

تصرفات هدى ماتنطاق صارت..

راحت سرور واني الابتسامه شاكه وجهي

وهدى حته جهالهه كتلتهم من العصبيه

واستلمت سرور تحجي عليهه

تاكدلي كلام عمه بشرى من كالتلهه ماتحبين

اي وحده كل التشوفيهه تغارين منهه

وهالكلام فعلا سرور هي جابتهه وهسه ذمتهه...

قبس... صارلي اسبوع بالشقه ضايعه

مااعرف شسوي اعراض الحمل بينت عليه

اتقيء هوايه مخلصتهه نوم

ابتسمت واني اتذكر من اصير حامل تصير

روحه بي اركض ع الكنتور اشم بملابسه

وهو يضحك عليه

يكول سامع التصير حامل تكره ريحه رجلهه

انتي كلشي بالعكس هيج جنت ادفن راسي بصدره

واستنشق عطره

اتذكرت من نلعب اني وياه طاولي ومن يوصل

يريد يفوز

عليه اكمز ابوس بي وهو يكلي انسحبت

انتي فزتي

جنت اتذكر بالموقف واني اشوفهه كدامي

عبالك اليوم صارت ومبتسمه

فرحان كلبي وهو يتذكره

فجأه تختفي ضحكتي من اتخيل

مرته الجديده منو يحضر ملابسك؟

هم تحب هي تسد ازرار قميصك وتذوب عيونك

ودكلهه احب هاي الحركه..

هم ادغك من بطنك وتصيح عليهه ودكلهه

لو اكدر اذيج جان كسرت اديج

مسحت دمعتي النزلت وكمت غسلت بسرعه

اريد الهي نفسي بشي ماكو ركضت للقران

وصيت غيث جابلي واحد وكعدت اقره ..

يوميه غيث يمر عليه باوقات متفرقه اليوم

اجاني العصر طب كعد ونفس الحجي يعيده

ومااسمعه؟؟

اكثر من مره سالته عن اخو وائل ويتهرب

من الجواب ماعرفت شصار من حجيتله..

جنت كاعده وهو يتصفح بتليفونه

رفع راسه وكال تدرين انتي هاي حبستج ؟؟

قبس.. شلون؟

غيث.. بشار هسه يعمم اسمج مفقوده على

كل السيطرات والمستشفيات

وحته ع المطار خاف تنهزمين

قبس.. هااا طلع بشار وزير النقل وماادري !؟

غيث.. يعني ماتعرفي عنده صيت ويعرف هوايه

رتب عاليه والدليل من دخل سجن حته قاضي من البصره

جابوله يدورله واسطه

قبس.. اذا هيج عنده نفوذ ماكدر يعرف منو السوه

بيه هيج؟؟

غيث.. لعد شلغي اني من اكلج لاتلومي لان بسالفتج

كلشي محكم ومغلق ومن حقه يشك

قبس.. اكيد حته اذا بيوم اريد اشتغل محد يشغلني

لان موصي الشركات

غيث.. قبس تواجهوا الهزيمه موحل وخلي شروطج

قبس.. مااريد اشوفه

غيث.. خلي يحطلج بيت وحدج ويطلكج بس المهم مأمن عليج

قبس.. منيله فلوس ويشتري بعد بيت هو حته راتبه قل

غيث.. لايابه عنده من جان مدير عام راتبه شدات

وترى بشار من جان بالكليه هو مشرف

ع محلات الخياطه ومعتمد ع نفسه

قبس.. قل اعوذ برب الفلق مخلي عينك ع فلوسه!!

غيث.. شكو ادافعيله خليني احسده موتريدين

حوبتج خلي يفلس

قبس.. انت مستفز !!

غيث.. هسه شدكولين اخابره يجي تتفاهمون

قبس.. مااريده تعرف شنو مااريده ليش ماتقتنع...

عفته وكمت ساعه افكر اشوفه واطلب الطلاك منه

وساعه افكر الى متى اظل هنااا وماعندي مأوى

اجت عيني ع ايدي واثرهه احقد علي

بس اشوفهه شلون صارعت الموت وحدي

لان حابسني شلون انسه واثره انحفر بروحي...

بعد تفكير طويل مدة يومين توصلت لحل

اني ماعندي احد لازم امن ع روحي هو مو يريدني

بامان خلي يطلكني ويخليلي بيت وحدي

لان طلعت بشارع وشفت العيشه شلونهه

خاصه بعد حملي الشاكه بي وين اروح

مااريد ابني يعيش نفس حياتي وبالشارع

بس مااريده اني اريد اعتمد ع نفسي

ومااكله ع حملي ..

وخاصه جان املي بسناء وطلعت مسافره

فكرت بيهه من كل الجوانب ادري بي عنده

معارف هوايه ومثل ماكال غيث موصعبه علي

يعمم اسمي بكل مكان بحجه مختله عقليا..

فكرت هاي الفكره وهي يطلكني وينطيني

حقوقي بالكامل وبعدهه اشوف مكان زين

وبعيد عن الكل يله انهزم ماانهزم للشارع

هذا اخر قرار توصلتله

من اجه غيث جاب المسواك كتله ع قراري خلي

يجي اتفاهم وياااه بس لادكله لكيتهه وصار هلكد يمي

حته لايزعل عليك

كله لكيتهه بالامام وكوه جبتهه للشقه

لان عبالهه راح احجيلك

غيث.. يعني تسوين نفسج ماتعرفين؟؟

قبس.. اي علمودك لان بشار زعله ثكيل

قبس.. طلع غيث وبنفس اليوم اجاني العصر

كال بشار بالعماره رايحين اشراف صارله يومين

خابرته بس ماحجيت يجي واسولفله..

سكتت واشتدت عندي علامات الحمل

تاكدت من نفسي حامل بس ماعندي جهاز

حته احلل شنو حكمتك ياالهي من بثيت

روح بداخلي واني اريد اترك كلشي خاص

بابو واروح؟؟!!

صارلي ١٨ يوم ضبط اني بالشقه

غيث يمرلي يشوف شمحتاجه ومايقبل ياخذ الفلوس

حته كمت اتحسس ثقلت علي هوايه..

سمعت صوت اذان المغرب اذن كمت صليت

وقريت قران شويه غيث مايجي لان راح العصر

لبست تراك ورحت للمطبخ ساده خشمي

واسوي عشه ...

سمعت الباب اندك معقوله غيث اجه؟؟

اني متفقه ويااا مااكول منو

هو يكلي اني غيث

ولا اكو فتحه اباوع منهه..

ظليت خايفه وحايره اتقرب للباب

وارجع ليورا تقربت حيل وقوت الدكه

هنا انتفض كلبي من سمعت صوته

وهو يكلي افتحي قبس !!

ركضت للغرفه وقفلت الباب عليه

مااريده جذب مااريد اتفاهم ويااا اسمعه

يدك مستمر شسوي ياربي

خفت حيل خاف راح يضربني

خاف يعاقبني افكار سوده اجتني..

ركضت للمطبخ طفيت النار احتركت البتيته

وهو يدك بطرف السويج اميز دكته اعرفهه..

قويت حالي لتخافين قبس انتي قويه

انتي قويه روحي افتحي و اخذي حقج

من بين عيونه ليش تظلين مشرده

وهن مرتاحات يطلكج وهو الممنون

اخذت نفس عالي وتقربت للباب ايدي

ترجف خايفه من عنده هسه يضربني

اكيد يأذيني!! اكيد راح يطلع قهر هاي الايام

بيه ..

فتحت الباب وركضت لنص الصاله

كلبي مروتك لاتفشلني احسه يدك براسي

رجليه صارت خيوط واني اباوعله قفل الباب

ارجع ليورا وهو يتقدم عيني بعينه

كلبي فضحني هالعاق هذا المايوم

نصفني بس يشوفه يتبره من عندي..

مثل لمحة البصر جنت مترقبه الراشدي

الراح يجيني بس شفت العكس

بسرعه تقرب عليه وحضني حييييييل

شكد دفعت وشكد ضربت ع صدره وماتركني

احس صدره راح يتفلش من الضرب وهو حاصرني

بحضنه بكل قوته

شعري ولادي ماينشال ايده تغلغلت بشعري

منا هرمونات الحمل ومنا اتذكرت حالتي

كمت ابجي واصرخ الله لاينطيك

الله لايوفقك دمرتني..

كام يتخيلي مثل ماحضني هسه

حضن سرور اتذكرت بيتي الراح وتعبي

وسهر ليلي خساراتي المتتاليه كلهن

سيطرن عليه بهاللحظه.

عافني ع راحتي من كدما صيحت وبجيت

كلت هسه يدكون الشقه علينه وعبالهم جايبين

بنات بيهه

حسيت خلصت طاقتي كعدت بالكاع وهو نزل

بمستواي لان اديه بعدهم حاضنيني..

ماكدرت اباوعله ادري بروحي اضعف كدامه..

رفع راسي باثنين اديه باسني هوايه

كلش هوايه من كل وجهي من راسي

من كصتي من خدودي

من عيوني باسهم حيل وبوسات ماتنعد

ويرجع يلمني بحضنه ويعيد نفس

الكره مره ثانيه بوساته شرحت حالته مايعرف شيسوي

بس كل اليكدر علي عبره بهاي الدقايق..

اشتميت عطره حيل غمضت عيوني واني

استنشق عطره وانفاسه

الحمل مخبلني وماثر عليه وعبالك اكله

واشتهيتهه ولكيتهه!!

حس عليه لان جنت شبه ذايبه واني مغمضه

عيوني خلاني بحضنه وضمني اكثر واني

اسمع دكات كلبه المنتظمه شوكت تتخربط ماادري..

انتبهت ع نفسي دفعته وكمت كتله خلصت

واني ارفع شعري من وجهي..!!

بشار.. اششش  مو وقت الحجي هسه

الله عليج لاتحجين حرف واحد

بس هاي الليله لاتحجين وبعدهه شتريدين اني حاضر

قبس.. خاف ناوي تظل يمي هسه اطلع منا وهالمره

صدك انام بالشارع..

بشار.. قبس بس هاي الليله والله العظيم

اوعدج اسمع كلشي من عندج واكلج حاضر

بس هاي وحجاهه بتوسل!!!

قبس.. وليش بس هاي الليله خاف عبالك تقنعني

لو ترجع قبس بقرارهه لاعيوني متوهم

اني من اتخذت هذا القرار اتخذته قطعي مابي رجعه

بشار.. مااقنعج لان اعرفج شنو؟؟

قبس.. هسه نحجي هسه؟ واذا عندك رأي ثاني

كوله هسه حته اطلع

بشار.. فرك وجهه بقلة صبر وكال نحجي بس ارتاحي بالاول

ليش ترجفين؟؟

قبس.. مالك دخل بيه ارجف اركص لاتدخل

عندي كلام اكوله الك وخلاص كل واحد بدرب..

بشار.. تعالي اكعدي وع كيفج !

قبس.. مامنتبهه ع نفسي شلون جنت ارجف وايدي

ترعش هواني من اشوفه تتخربط احوالي

وفوكاهه امثل مامهتمه...

عفته ورحت للحمام غسلت وبللت ركبتي

احسهه نار اباوع لوجهي هنا باسني

هاي عيوني شكد بوسهم رغم جان الدمع ينزل منهن

جففت وجهي وطلعت لكيته كاعد ومدنك راسه

وحاضنه بين اديه كعدت ع القنفه الكدامه رفع

راسه !!

اول شي ظل صافن عليه عينه تصعد وتنزل

يتفحص بملامحي بجسمي...

توقعته راح يكلي عندج شي وانهزمتي؟؟

بس فاجاني بالسؤال ليش وجهج اصفر انتي حامل؟!!

مااعرف شلون اداري ردة فعلي بهذيج اللحظه

طول عمره فاهمني ومن عيوني يعرفني

بس من وصلت لشرفي ماعرفني

رديت بنتر منين حامل ؟؟ موتدري اخذ علاج

بشار.. رد بعصبيه لاتكذبين بطلي ضم عليه ادري

بيج تركتي العلاج لوماادري ماتقربتلج بهذاك اليوم

قبس... ههههه تقربتلي لان جنت تحس بالذنب

او بالاحرى صارلك مده مامتقرب وانت الله يسلمك

رجال تحب الحلال واجيت فرغت شهوتك ورحت

بشار.. هاااي اني هيج؟؟ حيوان اني واجيج

بوقت عازتي

قبس.. ماادري

بشار.. السانج ولللج خلينه بالتفاهم

قبس.. اكلك جاي تصيح عليه لو حته ترزلني

بشار.. جاوبي ع سؤالي انتي حامل؟؟

قبس.. شوتحجي بثقه طبعا موحامل بس وجهي

اصفر لان مااكل هوايه

بشار.. متاكده؟

قبس.. ااااي

بشار.. واذا طلعتي حامل وضميتي عليه

شسوي بيج؟؟

قبس..عود اتزوج الثالثه!!!

بسرعه طفر من مكانه عليه صار بصفي ولزم ايدي حيل

يريد يعصب بس مجاي يكدر

حجه بنتر نحلهه بالتفاهم لواظل اسمع بساميرج.

قبس.. لاتحجي اسمعني انت اي تفاهم مابيناتنه

العندي انت اسمعه!! موتريدني كدام عينك

لان انت تهتم لكلام الناس هوايه وخاف اجيبلك العار

طلكني وخليني باي بيت وهيج نكون تعادلنه

بشار.. لاتحجين بالطلاك اخليج ببيت وحدج

واوعدج مااجيج ولاتشوفيني بس تظلين ع ذمتي

قبس... تحلم لحد الان اني اتصرف بعقلي لسه

ماشفت خبالي ارفع دعوه عليك وطلعت ايدي هاك

شوفهه شلون منظرهه مقزز واكل للقاضي يهدد

بيه ويعنفني وخير دليل ايدي..

بشار.. تحجين صدك؟؟

قبس.. هسه وقت الجد مااتشاقه والله وروح اهلي

اسويهه ماعندي شي اخسره هو انت ورحت

لاتخلي بيناتنه عداوه

بشار.. مستعده تسمعيني؟؟

قبس... لاااااا

مااريد اسمع ولاحرف منك واصلا وجودك يمي

عيب انت هسه عريس شلون تعوف مرتك

وحدهه

بشار.. قبس رحمه لاهلج اسكتي اسمعيني دقايق

وافتهمي مني قسمآ بالله ماناوي اذيج هيج اذيه

لادكولين خاف من هزيمتي بس والله وداعتج

بكلبي مامفكر اكسرج هيج

حته مامتعمد دزيتج لاهلي امي لحت وكتلهه

لسه ماحجيتلهه وكالت عليه اني جنت ناوي

اكعد وياج وافهمج ليش سويت هيج؟؟

قبس.. مااسمع ابد وسديت اذني الصاحيه

لاتحاول ..واذا تريد تحجي هسه احبس نفسي

بالحمام مااريد اسمع اي مبرر منك

وبعدين تعال شعندك جايني انت موتشك بيه

شلون تسمح لنفسك ترجعلي

ليش هلكد متناقض ؟؟؟

بشار... اذا ماتسمعيني اني هم مااريد اسمعج اسكتي

قبس.. ماشي هم تسوي فضل

وكمت من يمه جريت ايدي حيل رحت للمطبخ البتيته

محتركه بس شفته جعت جنت مااشتهي اكل

ياربي شسوي احس بنفسي ضعيفه

قربه وترني حيل كلساع اضعف واريد احضنه

كعدت ع الكرسي لازمه راسي الهي

عدي هاي الليله ع خير لاتخلي يحس

بضعفي وحاجتي اله...

فززني صوته راح انزل اجيب عشه امانه لااطلعين

اوعديني؟؟

قبس.. ماكدرت اباوعله ولا اسمع صوته المكسور

هزيتله راسي ااااي...

متعجبه هذا بشار شلون فقير وضحكت

خلص عمره اذا تاخر العشه دقايق يكوم يحجي

وهسه يتوسل لا اطلع زلم ماتجي اله بالعين الحمره

صفنت شكد متغير رغم بعده نفس الاناقه

والهيبه ولاحته حته ضعفان بس وجهه تعبان

ومبين يسهر هوايه الجوه عينه اسود..

ظليت ع كعدتي حسيت بنفسي لعبت

ركضت للحمام هاي شلون سالفه هو من وجهي

عرفني اذا شافني اتقيء هسه ياخذني للبيت سحل..

شلون انزعه قميصه واظل اشم بي

حته يروح لعبان النفس

خليت ايدي ع بطني وحاجيته ابني حبيبي

لاتفشلني كدام ابوك

بعدني احجي وركضت للمغسله احس

امعائي تكطعت لاهاهيه سمعت الكلام

مبين ع كلب ابوك حسيته من حاجيته هيج

كاعد رجل ع رجل بطني ويضحك باستهزاء..

شويه واجه لكاني بالصاله خله العلاليك ع الطبله

وكال راح اصلي ماحجيت كمت رتبت الاكل

وهوكمل صلاة وكعدنه ناكل وافكر..

لازم انفذ الخطه ولازم اخذ حقوقي واطلك

كلشي باتفاق لان اذا رفعت دعوه خلع

اطلق وكلشي مااحصل ويكدر يكول انهزمت

وتاليتي فعلا بالمصحه

ماجنت ناويه ارجع بقراري ابد

بس سالفة الحمل خربطت كل افكاري

لذلك لازم اتأنى بتفكيري..

قريب مااخلص اجتني رغبه اتقيء

ضابطه نفسي كوه اريد اكوم باي حجه

بس مالحكت بسرعه ركضت للمغسله

انعل حظي انفضحت هاهيه اليوم !!

اجه وراي جان وجهي احمر لان اليوم كلش هوايه

تقيئت من اشتم ريحة الاكل المغسله بالحمام

جنت مدنكه اغسل وهو وراي..

احسه تقرب اكثر ومد ايده ع المي غسلهم واني بصفه

اريد اخذ النفس مااكدر ردت اطلع اخلص

نفسي من عنده خله رجله كدامي منعني !!

رفع مي بايده وجر راسي غسل وجهي

جنت حيل مختنكه معدتي مشتعله نار

عندي الم بالمثانه وضعي موتمام !!

يوميه مابيه شي بس من شفته هسه

تخربطت احوالي اعرف دروب كلبي

يسوي هيج بيه ويتمسكن حته اضعف..

غسل وجهي ورجع اخذ مي بلل ركبتي

اصابعه لامست بشرتي كأنو ذبذبات كهربائيه

اني بعدت ايده وطلعت بوجهي للغرفه..

بجيت حيل ياربي مااكدر اقاومه

ساعدني الهي حسيت نفسي مثل اول يوم

حبني بي !!روحي تريده كلبي يتوسل بعقلي

حته يتقربله بس عقلي رافض القبول!!

افتر بالغرفه واهفي ع وجهي منا الجو صيف

وحار ومنا اني لاول مره هيج اضعف

حته قبل لايخطبني شكد جنت اتصادم وياااه بس موهيج

يمكن لان جنت قبل اعرف تقربه حرام

بس هسه هو حلالي وحارمه نفسي

بس ماانسه مااكدر يابشار مااكدر انسه جرحك اليه...

ظليت شويه بالغرفه وطلعت لكيته كاعد

لميت المواعين وعزلتهم بالمطبخ كلساع

اغسل احس جسمي جمر حته ملابسي احسهم

حاره..

طلعت من المطبخ صاح عليه اخذج للمستشفى؟

جاوبته مابيه شي بس اني هالايام تعبانه

بشار.. بعدج مصره موحامل؟؟

قبس.. رحت وكفت كدامه اريد ابعد الشك عنه

حجيت بحديه شبيك انت حامل وحامل

ارتاح قبل اسبوع خلصت الشهريه منين حامل..

بشار.. رفعلي حاجبه وكال هم مامصدكج

قبس.. واثق حيل من نفسك؟؟

بشار..طبعا واثق!! حجه بثقه اني من تقربلج اريدج

تصيرين حامل ومتاكد تحملين بس راح اصدكج

هسه !!

قبس.. انت ليش تظل هنا روح لبيتك اني راح انام

مالي خلك

بشار.. كل عقلج اعوفج قبل لاتسمعيني

قبس.. بشار صدكني تعبانه خليني انام

تعال الصبح نحجي وفكر زين لازم نطلك

وهاا اي كلام مااريد اسمع اي مبرر لزواجك حطه

بجيب اخواتك الخطبلك

اني ماانهان وحته لوكسرتني الملم

القطع وارتبهم من جديد خلي يبقه

اثرهه بس المهم اكون اجرح اي واحد يلمسني

بشار.. كتلج بس هاي الليله وباجر نحجي روحي

ارتاحي اني راح اظل هنااا..

قبس.. رحت للغرفه مالي واهس اناقشه ابد

احس حرارتي عاليه...

نفسي تگلب معدتي مشتعله كل يوم كلشي

مابيه اليوم كلهه اجتمعت عليه..

كلساع اركض للحمام تخبلت معدتي موتتني

سمعني اجه وراي يلح اخذج للمستشفى

واني اكله لااا حته يكشفني مااروح

نفس حملي الاول هم هيج جنت مدمره

الوحام هد حيلي قبل جنت مرتاحه

وكام حته مايداوم يظل يمي ويطلعني

اشم هوى

هسه مثل السجن حته شباك ماينفتح بيهه

هاي الشقه اطلع من سجن افوت بسجن ثاني..

رحت مددت ع فراشي جنت مغمضه عيوني

اريد روحي تهدء سمعت الباب انفتح

فتحت عيني جان واكف يباوعلي كعدت ربعت

ع الجربايه كتله شكو؟؟

بشار.. اريد تسمعيني لاتشلعين كلبي

قبس... وروح اهلي مااسمعك خاف تريد تحجيلي

ع ليلة الدخله مالتك تعال اسمعك...

حجيت هيج هو بسرعه اجاني حط ايده

ع حلكي رجعت ليورا حجه بعصبيته المعتاده

انتي تخبلتي اكلج خلي نتفاهم وانتي لزكتي

افتهمي مني بالاول يله تحجين مااذيج اني

ولسه ادور دليل برائتج وانتي تشمرين عليه

سم غلطت ماكو انسان مايغلط كاااااافي

لاتخليني صدك اصير موخوش ادمي..

جان يحجي وايده نساهه ع حلكي وراسي

مستند ع الجربايه عيني بعينه

فتحت عيوني ع وسعهن وخليته يشوف نفسه

بالبؤبؤ مالتي..

ايده ارتخت وبعدهه بهدوء من حلكي

وهو مركز ع حركة البؤبؤ مالتي وين يتحرك

مثل المايريد يفوت لحظه همس بصوت خافت

لاتباوعيلي هيج!!

جنت متعمده استفزه ظليت مركزه اكثر

ومارمشت عيني ابد حسيته علي شلون

بده يرتخي وعيونه ذبلن ورموشه بدت تتلاقه

لزمني من اكتافي بحركه سريعه وطبع

بوسه عميقه على شفايفي

حسيت الهوه انكطع عني بسرعه دفعته

ماجان حاس ع نفسه شيسوي

دفعته واريد اكوم ماانطاني مجال ابد

لمني بحضنه وهو يكول مااسوي شي بس اهدي

بس خليج بحضني..

قاومته حيل مااريده كلما ادفعه

من صدره يرجع يلمني اقوى

اضخم مني بهواي صرت مثل الكتكوت

ورشوا علي مي ..

مدد ع الجربايه وهو حاضني

اعرفه اذا اقاوم يعاند كلت خلي

اهدء حته اكدر افلت منه لان مبين علي

موطبيعي..

ايده انمدت ع شعري بحنيه

وهو يهمس يم اذني ليش هيج سويتي

لان تدرين بيه احبه ؟؟

شخليتي اليه ذكرى بس كصيبتج يوميه

اشمهه يله تغمض عيني..

لاتسامحيني بس لاتحرميني

من شوفة عيونج ضايع بلياهن

هنه وقتي

ساعتي الي امشي عليهه

قبس.. هدءت وهدءت روحي واني

بي اديه قررت اسمعه ويحجيلي السبب

الرئيسي الخلا يسوي هيج..

هستوني افكر احجي دك تليفونه

ماجاوب لحدما خلصت الدكه

ورجع دك مره ثانيه كتله شوف منووو ونحجي!؟

من طلع تليفونه من جيبه ورفعه

يريد يشوف منو؟ شفت المتصل سرور ...

بسرعه ابتعدت عنه وطلعت..

.

.

يتببببببع ... احبكم

حبايبي ممكن متابعه للكاتب علي الفتلاوي aliAbas036

واقرو قصته الجديده حيل حلوه راهب ابوغضب

قمع المشاعر.... الثالث والعشرون من الجزء الثاني...

للكاتبة زهراء ( روزايه)...

تذكر بموعدنة شحچينة؟

ودروبنة البيهن مشينة

يوميه امر بيهن واغنّي

هنا سولفينة هنا سكتنة

وهنا تسامرنة وگعدنة

هذا الدرب منا عبرنة

هنا ردت احضنك بس خجلنة

هنا گتلي نرجع تأخرنة

ومشينة كلمن گاد حزنة ...

....

قبس... طلعت من الغرفه روحي محتركه

هاي حالتي وبيوم افكر ارجعله واني بنص

حضنه وتخابر واتحمل واسكت شلون

اكدر اعبر وخلي ورا ظهري وما اهتم؟؟

لازم اختصر الطريق من بدايته حتلو احبه

ومتعلقه بي طلاك ميطلكهه لان بعدهه عروس

وعيب ترجع لاهلهه هذا اول سبب

والسبب الثاني الغدر مره يغدر مره ثانيه

مااريد اسمع من عنده اي سبب

اي مبرر مااريد لان لعبت روحي من كلشي

كعدت بالصاله اجه وراي جانت سترته ع التخم بصفي

دنك اخذهه وطلع منهه شريط علاج

اخذ حبايه وراح للمطبخ شرب مي واجه

من يمته ياخذ علاج ؟؟ اكتفيت بالصمت

وحته ماسالته علاج شنو وهو اكيد

علاج ضغط لان عيونه حمر صايره..

رجع كعد يمي واني منصيه راسي وافرك

باصابيعي وهو مسافه نص متر عني

حجه بهدوء واتزان خليني احجي واسمعيني!!

هزيتله راسي بالموافقه عدل كعدته ورجع

جذعه ليكدام وخله اديه على رجليه وبده يسولف..

بشار.. الفتره المرت اصعب ماتكون لاتكليلي شغلة

حب وشغلة ثقه لو مااحبج جان كتلتج بلحظتهه

بس جنت اقاوم حته ابرئج وازعلي عليه قابل حتلو

تأذيني بس المهم اخذ حقج

اني ماحبستج! نفس روتين حياتنه القديم

الفرق بطلتي من المدرسه وموبس انتي هيج

حياتج هوايه بيوت وحدهن وماعدهن طفل وزوج

بالدوام سالفه الحبس اني مامتعمد ولو بوقتهه تجين

ودكولين طلعني اطلعج!!

اعرف تأذيتي من الكل وخصوصا اهلي وحسيتي

نفسج منبوذه ومحد يريدج

بس اني هم تأذيت مثلج يعني تريدين اخذج واطبطب

ع ظهرج بالوقت الجنت منين ماالتفت اشوف دليل..

قبس تدرين بيه شكد احبج وروحي بيج

كتلج سابقا اول حب حقيقي انتي واخر حب

ولو اكدر صدك احب بعدج واعيش حياة ثانيه

هسه اطلكج وكل واحد بطريق ..

ادري هذا الحجي ماينفعج لان انتي مقتنعه

قناعه تامه ومغلفه نفسج بحائط صد

ماتردين تسمعين اي شي من عندي .

بس راح اكلج السبب الردت اتزوج سرور

وخلي اكون صريح وياج موخالتي اختارتهه

اني كلت لخالتي حاجيهه واتفقت وياهه

ع اساس تقترحهه كدامي!

قبس.. وتحجيهه بوجهي!؟ ودكول اني مااذيتج

شلون تكون الاذيه بعد..

بشار.. اسمعي لاتكمزين بالحجي راح اكوم ابتلي

بيج بزعتي روحي شعندج قابليه داكول اسمعي

اعرف متصدكين واعرف البراسج تسوي

بس اسمعي وخلاص حجابهه بعصبيه..

قبس.. غمضت عيني ودرت وجهي وكتله كمل!

بشار.. السوه هيج موغريب ابد وعايش بيناتنه

اذا نكول مؤامره حته يفرقنه او سواء يأذيني

لان مبين عداوته ويايه لان نشر الرسائل للكل

معناتهه يضدني اني..

هذا العار الكوا..... الكلتي تعرضلج بالمدرسه واجاج للبيت

هذا اسمه موفق علاء وعنده بنيه وحده اسمهه غدير

ويشتغل ممرض مجاز بنفس العمارة الساكنه

بيهه سرور ..

قبس.. موكالت ام حسن ضابط؟

بشار.. جذب مخلص معهد تمريض وصار اسنين بهاي

الشغله يضرب ابر يم الدكاتره عنده عياده

وقبل فتره منتقل بنفس عماره سرور

بنفس اليوم الي اجاج بي مسافر وبايع بيته وهالشي

مبين مخطط اله تخطيط تام وحاسبهه صح بحيث

مالحكت حته اطلع من الشركه هو يمكن من يمج طالع

بوجهه للمطار..

المهم اني ماانكر شكيت بفرح لان عدهه سوابق

وسوالف ارقام بس فرح شلون عرفت باسرارج

ولنفرض مثل ماكالج دفعولي. فلوس شوصل فرح

اله ؟؟

شكيت باسراء مع العلم ماعدهه عداوه ضدنه

وكلما اسال عليهه كالو حبابه ومن اروح لاهلي

مااشوفهه ابد بس ماادري ليش شكيت بيهه

لان قريبه ع شجن والاسرار طلعت من شجن..

قررت اراقبهه شكم يوم خاف تلتقي بفرح

كل ضني فرح عدهه علاقه ومثل مااتفقت

ويه صابرين كلت يجوز اتفقن سوه واستغلت

وجودهه يمنه حته تاخذلهه اسرارنه..

جنت واكف يم المعهد وشفتهه طلعت ماصعدت

بالخط وظلت تخابر لحدماجتهه سياره هم تكسي

والظاهر خط ثاني متفقه وياااا

ظليت وراهه وشفتهه نزلت وصعدت للعماره

والمشكله ماكدرت اصعد وراهه لان لازم احول

السياره بالكراج ومالحكت عليهه

والعيادات متروسه بس نسوان ..

وانعادت كل مره هاي الحاله وظلت هاي

الحلقه مفقوده وبيوم منهن صعدت وشفتهه

طلعت من الممر البي سرور وهالشي خلاني

اشك عدهه علاقه بيهه ..

سرور اعرفهه معرفه قديمه بنت عائله راقيه

وناس قمة الاخلاق يعني مستحيل يبدر منهه

هالشي واني ممأذيهه حته تطعن بشرفي..

بس اخر مره من تعاركتي وياهه ماارتاحيت

لنظراتهه وهالشي اكد شكوكي خاف كل وحده

اقابلهه تطلع من نفس صنف فرح وميامين

استعجلت حيل وماعرفت اوازن الامور

وكلت اذا خطبتهه تنكشف الحقيقه

اذا اثنينهن متفقات تبين واذا فرح وحدهه

هم تبين مواليوم باجر ولكل فعل رد فعل..

اعترف الاستعجال مرات يكلفك ثمن غالي

مع العلم دائما متأني بكل حياتي وتفكيري

بس هالمره ماحسبتهه صح من كثر الضغوطات

ياقبس صار راسي حته مايفكر

منا الدوام ومشاكله! ومنا سالفه الاتهام

والاكبر من هذا شوگي الج مااكدر افاركج

كل هاي المده واخاف اضعف كدامج واني لسه

مامتاكد ...

كتلج لاتسامحيني هوايه اشياء صارت

بدون حساب واله اني شكد دافعت عنج

مااقبل تنهان كرامتج كدامهن بس والله العظيم

مامتعمد السبب من امي كالت اني موصيه الكل

اني ردت اكعد وياج وافهمج بهاي الطريقه

ردتج تكونين وياي لان لازم تنكشف

بس صار الصار وماتوقعت اهل سرور بهالعجله

ع زواج واخوهه كلساع يتصل لو ابن عمهه

تورطت وغلطت ..

قبس.. شكم يوم كدامك اني ماحجيتلي شمنتظر

بشار.. تدرين بيه هذا طبعي يايوم اجيت

وشاركتج بيمن افكر جديد عليج اني؟؟

قبس.. واسراء ماعرفت وين تروح؟

بشار.. بنفس اليوم من شفتهه سالتهه كالت اني اجي تدريب

بمختبر صديقتي ٣ ايام بالاسبوع

ومبلغه اهلي ورجعت ع امي سالتهه كالت صحيح

تتاخر بهذني الايام علمود التدريب

ماعندي اي دليل عليهه حته سالتهه تعرفين

دكتوره سرور كالت اني ادرب بالمختبر اليمهه

لاتلوميني تشابكت عليه المشاكل ومنين مااربطهه

ماترهم..

قبس.. لنفرض عرفت السوت هيج وطلعت وحده

من هذني الشكيت بيهم شتسوي؟

بشار... ××××××××× بس خلي الزمهن

قبس.. بشااااار وعطت بصوت سد حلكك يمعود

فاجأني اول مره يفشر بهيج كلمات

بشار... والله مااتشاقه سواء ولد لو بنيه

بس خلي الزمه وهذيج الساعه شسوي

قبس.. لنفرض هذا سبب رئيسي

بس هم ماارجع راح احجيلك ليش!؟

اول شي الخذلان اني عشت شعور ماينوصف

ماحسيت بزعلك حسيت خذلتني

وصدكني مدام عدنه عداوات ماراح نرتاح

هم تنحل هاي السالفه وغير يوم يجيبون صور

اكبر الي وهذيج الساعه تكول غسل عار

علاقتنه من الاساس غلط لان من اول يوم

بدت المؤامرات ضدي جنت ادافعلي

بس لهنا توقفت يعني بعد شكم يوم اذا انعادت

السالفه مراح ادافعلي وتكول تعبت

احسن قرار النه اثنينه طلكني

سرور تبقه ع ذمتك بالقليل اذا تريد

اطلكهه هذا واحد من شروطي يراد ٦ اشهر

واني مااظل اصارع بمشاعري طول هاي المده

بشار اني احبك اكثر بس طرقنه

مختلفه مرات الحب موكلشي

وهالشي صار وياي اني تعذبت بهاي الاشهر

وطول عمري مراح انساهم

جرحك وخذلان اهلك شلون تريدني ارجع

واخواتك طعنني بظهري وتهمني وكالن عليه

مجنونه ؟؟

عوفني الله عليك تعبت وخليني اعيش الباقي

من عمري براحه لان تعبت حيل صدكني

وحته اذا رجعنه راح نرجع للاسوء

لان المشاعر بداخلي تغيرت وراح تعاني

من عدم الاهتمام وراح تزود المشاكل ماتقل

خلينه نفترق وكل واحد يعيش بالحياة

الي يريدهه..

بشار.. وحبي الج؟ شلون اكدر افاركج قبس

واني طول هاي ١٨ يوم مااعرف ليلي من نهاري

كليلي شلون افاركج ؟؟

قبس.. تكدر؟ مدامك كدرت تخطي هيج خطوه

تكدر ع كلشي مدامك فكرت تربط اسم وحده

ثانيه باسمك معناتهه تكدر لكلشي!!

بشار.. راح انطيج مجال تفكرين ع راحتج وترتاح

نفسيتج واني وياج بأي قرار المهم سعادتج..

قبس.. ظليت اباوعله وهو كلساع

يرفع راسه يحجي جان مندمج

شكد صعب فراكك وشكد راح ابجي واتعذب وراك

بس من يوم ارتباطنه لحدهاي اللحظه مالحكت

اخذ نفس وكلما افرح شهر احزن اضعافه..

جان التفكير مستحوذ عليه

والقرار النهائي راح اعيش قريبه

علي وبحمايته واربي ابني فقط

اعيش لابني ومااريد التقي بأي شخص..

طعناتهم ادك بكلبي من اتذكر تعاملهم

وياي شنو؟من اتذكر شلون اكعد بصفه

احتمي بي واكعد ويه الزلم لان مايريدني

شلون بيبي تعيرني وهن يضحكن

شلون داسن عليه وصعدن يرتبن وراحن

خطبن كلشي اتذكره يوجع گلبي

مالي مكان بهاي العائله ولازم انهي حياتي

وياهم بأي شكل كان!!

رفع راسه عليه وفتحلي ايده واشرلي

براسه تعالي خليني احضنج !!

هزيتله راسي بفرض مااريد خلينه

بعيدين احسن!!

ظلت ايده مفتوحه واشر بعيونه غمضهن

وفتحهن موكلنه بس هاي الليله!!

تقربت ع كيف سحبني من ايدي

وحضني شي غريب بعده يشك!!

وبعده مامتاكد من برائتي ويتصرف هيج ؟؟

حجيت بهمس شلون تنام بملابسك

مااختنكت منهم؟؟

بشار.. هسه من انام انزعهم نعستي؟!

قبس.. هزيت راسي اااي .. كمنه سوه

تضارب مشاعر عندي مااعرف شريد

بس الي اعرفه اريد اسايسه حته اطلك

وامن ع نفسي بس هالشي جان شاغلني...

اعترف صرت انانينه واستغليت لهفته

وحبه حته مايرفضلي طلب بس ماعندي

غير حل مااكدر اكمل وياه ويه اهله ابد...

مددت ع جربايه وهو افتر من الجهه الثانيه

نزع قميصه وعلكه يفتح بحزامه واني اباوعله

عزاا بعيني شكد صلفه هسه شيكول عليه؟؟

بسرعه درت وجهي عنه ظل بس بالبنطرون

ونزع الفانيله الداخليه هو بي حاله مايحبهه

ابد ماينام بدون بجامه ولايوم شفته بهيج

منظر بس صدره عاري..

انطيته ظهري واني افكر بالجاي

حسيت ايده انمدت جوه راسي

وسحبني اكثر بس ماالتفتت ظليت دايره وجهي..

ايده الثانيه تغلغلت بشعري احس باصابيعه

ع فروة راسي شكد مامسويلي هيج

وجنت ماانام اله هيج...

انسحبت ايده من شعري نزلت ع بطني

جان يرسم بصوره عشوائيه واني ادغدغ منهه

شعور حلو  همس يم اذني؟؟

مصره ابني ماموجود هنا؟؟؟

هزيتله راسي حيل والتفتت علي

اباوع بعيونه واحجي شلزكت بشار موكتلك

قبل اسبوع خلصت منين اكو حمل

واثق من نفسك حيل واذا تقربتلي

لازم يصير حمل؟؟

ورجعت درت وجهي سحب ايدي المحروكه

وظل يبوس بيهه اجرهه منه مايقبل

شكلهه مقرف هو اني ومااباوعلهه اصلا اشمئز منهه

وهو باسهه هواي كلش هواي وظل لازمهه ماتركهه

ماحسيت ع نفسي شلون غفيت

وهاي الليله اعتبرهه ليله عظيمه

بعد المعاناة العشتهه اول مره انام براحه

واحس نفسي خفيفه حته مافزيت طول الليل...

فزيت الساعه ب٥ ونص بس فتحت عيني

لكيته كاعد بس بعده ممدد ومخلي ايده

رافع راسه ويباوعلي من فتحت عيني

اجت بعيونه!!

بشار.. صح النوم شنو صارلج شكد مانايمه ؟

قبس.. صباح الخير ليش ؟؟

بشار.. صباح النور بس اني مانمت الليل كله

كلما اباوعلج الكاج بسابع نومه

قبس.. ايي نعسانه

بشار.. يعني مراح تعترفين؟؟

قبس.. هم رجعنه مره وحده صدكني

بشار.. راح اصدكج !!

ارجعي نامي اني راح اكو اسبح وابدل واروح

قبس.. ماشي اكوم اسويلك ريوك؟

بشار.. لانامي اتريك بالدوام والمغرب اجيج

قبس.. شكووو؟؟

بشار.. لعد تظلين بهاي الشقه لازم نخلي

حل كافي نلعب حيه ودرج

قبس.. تعرف قراري

بشار.. الله كريم..

قبس.. كام من يمي واني رجعت نمت

ماكعدت غير ب١٠ حته ماحسيت شوكت راح...

للمغرب واجه كال امشي وياي للبيت مااكدر

ابقيج هنااا

ماقبلت اروح رجعتي مابيهه معنى شنو السويته

حته ارجع لنفس المنوال

كعد كدامي بس جان حيل تعبان بشكل

موطبيعي حته كلبي اوجعني علي اسرق

نظرات علي وهو يغسل اشوفه

كلساع يفرك كلبه ..

رخيت شويه خفت لا يصير بي شي

لان اخر مره الطبيب منع اي عصبيه

كال هالمره عدت الجلطه ع خير المره

الثانيه تموته..

وادري يكبت بداخله مومثلي اصيح واتعارك

هو يظل خازن بكلبه لحدماينفجر..

رحت جبتله مي واجيت كعدت يمه

شربه وخله ع الطبله وكال كليلي الحل شنو؟؟

قبس.. نفس ماكتلك طلكني وارجع باي مكان تريده

اكعد بي بس اذا ماطلكتني اطلع حته من هاي الشقه

ومااريد اشوف اي شي منكم

بشار.. ترجعين للبيت واطلع سرور بايجار

وبعدين انشوف حل!!

قبس.. يحرم عليه ذاك البيت مااخلي

رجلي بي وشي ثاني شلون اظل وحدي

وهو شكبره لو هم ناوي تقسم ايامك بيناتنه!!

بشار.. اكو مشتمل صغير يم بشرى بصفهه

اجره الج تكعدين بي مؤقت ع الاقل هي يمج

ومااقلق عليج مدام ماتردين تشوفيني

قبس.. بكيفك المهم بعيده عن اهلك

بس ماتجيني

بشار.. لاتخافين مااجيج اتودد

كومي جمعي غراضج اخذج يم بشرى هاي الليله

وباجر انتقلي لان هي متفقه ويه ابو البيت

ومنتظره جواب من عدنه..

قبس.. ماشي كمت جمعت غراضي وطلعنه

كال اني انطي المفتاح لغيث

هو سائل غيث وين لكيتهه كايله صدفه

شفتهه بالامام وجبتهه...

وصلنه بيت عمه بشرى ورا الاذان

دك الباب طلع رجلهه بالاول سلم بلهفه

ع بشار بس من شافني گلب وجهه

طبينه جوه جانت عمه تصلي من كملت اجت

عليه حضنتني وتغلط عليه برب.... ×××××

واكلهه عمه لايسمعج بشار

بشرى.. خلي يسمعني شلون هيج تنهزمين رعنه

وين كاعدين خليتي مايندل دربه

قبس.. هسه بعدين نسولف بس رجلج

شو ضاج من اجيت

بشرى.. وضوجت ابوي هو گالب وجهه ليل نهار

عبالك اني الطلعته تقاعد

قبس.. المفروض يرتاح كافي العمر خلص

بشرى.. شلون يرتاح منو يصبغ شيباته ويضحك

ويه المعلمات روحه خضره لاتشوفي هيج

قبس.. عندج علم سولفلج بشار

بشرى.. اي باجر اجيب المفتاح وانتقلي

اني ردتج يمي بس بشار ماقبل كال خليهه تاخذ راحتهه

قبس.. صاح بشار راح اروح ووصه عمه

واتفقوا باجر يجي يحجي ويه ابوالبيت

طلع واني واكفه بالصاله

مستحيه حيل واخذت ع نفسي لان

زوجهه بس طلع بشار كام يدور حجج يتعارك

ويه عمه وهي ترده ماتسكتله..

حيل تحسست ظليت كاعده بالصاله وهو

يمشي ويضرب بالابواب شبي هذا متخبل!!

حته ماقبل يتعشه وبس اني وعمه

اكلنه سولفنه هواي بس ماكتلهه ع حملي

ظلت تقنع بيه ع موضوع الطلاك واخر شي كالت

بكيفج القرار قرارج..

انطتني غرفه حوراء وهي بس هاي الليله

غسلت وبدلت ومددت احس ظهري يوجعني

كلت امدد ارتاح

ساعات طويله واني مدده بفراشي

ماطلعت خاف ابو حوراء ياخذ راحته

ومبين من النوع العصبي..

جنت مدده ودايره وجهي وضامه اديه

بين رجليه سمعت صوته عالي وهو يتعارك ويه عمه

بالاول ماركزت ع الكلام جان بغرفتهم بصف

غرفتي واسمعهم

سمعته بوضوح وهو يكلهه خاف ناويه تسكنيهه

بصفنه والله يابشرى احرم عليج الطلعه

بشرى.. فضحتنه اسكت هي ليله ورايحه

وانت شعليك تكعد بصفنه ورانه دافع من جيبك

ابو حوراء.. ولج هاي سمعتهه سكط لومابعيني

شفتهه بثوب النوم وهسه جايبتهه ابيتي

حته تبليني والله الزكلهه تهمه واطيرهه...

رجلهه مابي حظ وسكتلهه ويركض وراهه

لان هذا النوع من النسوان يريحن الرجال

وابن اخوج ساحل روحه عليهه

بس جيتهه هنا مااخليهه والله اروح لعامر

اكله خلصنه منهه

بشرى.. صدك ماتستحي التحجي عنهه بنت

اخوي وماخليت اي احترام الي وخلي يكون بعلمك

اذا بيوم حجيت هالحجي كدام مخلوق

وحق الله بهذا عمري واعوفك واريد اشوف شلون

الك عين وتحطهه بعين بشار

نسيت افضاله عليك منيلك هذا البيت الكعدت بي

رحت دكيت باب باب اخوتك ومحد انطاك مية الف

وهو شال ماله وقرضه الك ٥ سنين يله سددتهن

وكل هذا نكرت خيره

طالب منك ماتستحي ماكو مخافة الله اعتبرهه خطار

وباجر رايحه وتكعد بصفك وراك هذا الشي

مايخصك

ابو حوراء.. مرته موخوش ادميه عليهه حجي

وهو ساد اذانه حته مايسمع ولج هاي شابعين

بيهه مثل خالاتهه وانتي ادافعين عنهه..

قبس... ماكدرت اوكف ع رجليه ابد

ماكدرت اقاوم الي اسمعه صوت عمه

وعركتهه ودكله نصي صوتك وهو يعلي

بي اكثر ويصيح خلي تسمعني وتحس ع نفسهه

صدري صار ثكيل شح الهوه عليه

رجعت مددت وغطيت راسي واسد اذني

مااريد اسمع مااريد

حسيت الباب انفتح عمه تريد تتاكد نايمه

لوكاعده سويت نفسي نايمه وماسمعت

ليش يا امي ليش هيج عفتيني احمل ذنبج

الطاهر انتي مظلومه بسبب ابوج وسمعت خالاتج

وهسه نفس الذنب حملته واحتمال

ينجر  وبنتي هم راح تحمل المعاناة نفسهه..

شنو الجنيته اني ياناااس اني اطهر

منهم كلهم عمري ماسمحت لواحد يتحارش بيه

عشت بنص مزبله من ولد خوالي وسجينتي

بيدي كل اليتقرب اضربه وماسمحت واحد يلمسني

كلبي يدك سريع وتاكدت هسه اني

مالي عيشه هنا باي سبب كان!!

لا اريد حب ولا اريد زوج

كلشي مااريد الي اريده حياة طبيعيه

اخلي راسي ع المخده مااسمع هيج كلام

مااسمع اصواتهم وهم يكولون مثل خالاتهه...

انتظرتج الفجر يطلع تسحبت من مكاني

اخذت غراضي ونفس الدرب الجابني

رجعني...

طلعت الشمس واني واكفه بنص الشارع

اجرت تكسي وبوجهي للامام

يجوز امن مكان الي هذا والله هو ينجيني

اعرف بشار هسه يجي وهسه ينهار

اكثر وكمت اطعن بي طعنات متتاليه

مايلحك يستقيم واضربه مره ثانيه

اكبر غلط خليت بشار يندل مكاني

من الاول طلعت المفروض ماارجع

بس عبالي ناسي اوادم..

شجن.. كلنه عرفنه بشار لاكي قبس

بمكان امين يم صديقتهه محد كال ترى

لكوهه بالامام

ورا يومين من رجعت قبس خابرتني

عمه بشرى جانت تحجي بعصبيه كالت

اطلعي برا اريد احاجيج

طلعت برا واسالهه شكو عاطت بيه اخوج

وين؟ ولج قبس انهزمت من بيتي وكلت لبشار

والرجال راح يوكع وماقبل احجي واخاف يسوي

حادث خلي عمر يخابره بس لاتجيبين ذكر قبس..

شجن.. شنو انهزمت مو ع اساس يخليلهه

بيت وحدهه يمج..

بشرى.. اي ولج مادري ابو حوراء ابن المشعول

تعارك وياي وتلاغينه ويمكنهه سمعت وكعدت الصبح

مالكيتهه

وخابرت ع بشار اجه متخبل سوده عليه

مامقهور بس علي شلون هالشايب العندي

مشمت ويكلي هي هاي بنت اخوج ادافعين عنهه

جان خلت احترام لرجلهه

وسفه يابشار والله وسفه انت يالهيبه

مايوم كدر واحد يجيبك بحجايه

صارت شكول شكول تشمرهه سمهه عليك..

شجن.. عمه ليش ماخابرتي بابا خلي يروحله

شمنتظره؟؟

بشرى.. ماقبل ولج حلفني مااحجي وكال راح اكول

اجتني ابد لادكولين انهزمت

بهاي الحاله وماانطه بيهه

يمه شجن لاتحجين ابد وسوي نفسج ماتعرفين

وعوفيهه ورا اخوج هو يفكر ويحلهه..

شجن.. سدته عمه واني صافنه ع جرأة قبس

هاي ثالث مره تنهزم وموكل مره تسلم الجره

الله يستر من هالمره ..

ظليت ساكته ماحجيت واهلي عبالهم قبس

رجعت اجه بابا وحجه كدام الكل

قبس رجعت لبشار ومأجرلهه بيت يم ناس يعرفهم

ومايقبل يدلي بيهه لان احنه اذيناهه

اني وعمه بشرى ندري بالصار البقيه

صدكوا وتعايشوا ويه الوضع وبشار رجع للاسوء

اسمع من عمه دكول يدور عليهه وفص ملح وذاب

مالهه اي اثر

بشار تعامل طبيعي ومن انساله يكول زينه

وماتريد تشوف احد خلوهه ترتاح...

لا اكدر احجي ولا اكدر اساله

بس اشوف اخوي كدام عيني بده يتغير

والحزن ماكله مثل الارضه من تاكل الخشب..

قبس.. خلصت اول ليله بالامام

ثاني يوم رحت. لمحل مال موبايلات اشتريت

جهاز عادي وخط لان جبت جايبه المستمسكات

مالتي خليت الخط ومتردده اخابر غيث

هم يساعدني؟؟

سديت التليفون وكعدت ماتصلت

لان هم يرجعني لبشار ونظل

ندور بنفس الدائره..

مرتاحه هنا بس خايفه خاف يطردوني

وخاف انكشف وخاف وخاف التفكير

موتني

رحت لصيدليه قريبه اشتريت اختبار

حمل وادري بنفسي حامل بس للتاكيد

رحت للحمامات سويته طلع خطين

غسلت وطلعت لنفس مكاني

فتحت التليفون واكو فكره ببالي

رحت لابو محل كتله اريد تفعلي انترنيت

ع الشريحه اشتريت رصيد وسوا الي

كال بس ضعيف ورا ١٢ يقوى لحد الفجر..

رجعت كعدت بنص هاي الناس

مااكعد وحدي دائما وين ماكو تجمع اكعد

يمه حته ماابين وحيده

فتحت الفون وفعلت فيس جديد ع الخط

وسويت حساب فيس اني اعرف حساب

سناء ومخليه صورتهه بسرعه بحثت عنه

جان النت يلعب النفس ساعه يفتر يله

يطلع الاسم كومه اسماء طلعتلي

ظليت ادور شكد يله لكيتهه!!

فرحت حيل عبالك لكيت امي بسرعه

دزيتلهه طلب صداقه ودزيتلهه رساله

هلو سناء اني قبس محتاجتج ضروري

لازم اتجاوبيني اني بالشارع كاعده!!

ظلت عيني ع التليفون شوكت تراسلني

شوكت تفتح وتشوف رسالتي

بس اقره ايات كون سناء تشوف رسالتي

باقرب فرصه...

خلص اليوم وماردت عليه ورا ١٢ صار النت

اقوى فتحته واول ماكتبت بشار عادل بالانكليزي

طلعلي حسابه رجف كلبي!!

مخلي صورته وهو بالتنقيب

لابس البدله مال الشغل

قريت المعلومات كلهه بالانكليزي بس

افتهمت كلمه مهندس ...

كل كلمه اركز بيهه الحاله الاجتماعيه متزوج

نزلت ع حسابه ماينشر بس اكو صور مشاركيهن

جماعته والي بالمؤتمرات وخاصه من يروح للعماره

شكد اشتاقيتلك بس هيهات نلتقي بعد!!

اتمنى الك حياة سعيده وتكدر تنساني

دموعي تنزل شلال امسح بيهم واشهك

طلعت من حسابه مااريد ااشوفك

كافي اذيه انطعنت بشرفي وهالشي

هو الخلاني ادير ظهري عنك..

مرن ٤ ايام وسناء ماردت عليه

اجت ابالي اعلق ع صورة الغلاف مالتهه

كتبتلهه شوفي الخاص!!

ورا ربع ساعه اجتني رساله فتحتهه

بسرعه من سناء مكتوب

هلو قبقب شلونج ولج انعاله بذاته حيوانه

هسه تذكرتي سناء ..

ابجي واكتب حقج سناء بس ماتدرين المريت

بي شنو اريد احاجيج ساعديني

سناء.. عندج شريحه اخابرج عليهه

شو نت يمج ضعيف تتاخرين بالرد

قبس.. كتبتلهه رقمي الجديد بسرعه اتصلت

برقم دولي..

بس كالت الوو بجيت عبالك سمعت صوت

ماما اخذت نفس وحجيتلهه كلشي

وهي ويه كل كلمه فشرت

وتغلط عليهم ومن توصل لبشار

دكول صخام الصخمك استاذ بشار..

قبس.. كليلي سناء شسوي صار اسبوع نايمه بالامام

وحملي مأذيني

سناء.. هسه راح اخابر اختي تجي عليج

تاخذج يمهه راح انطيهه رقمج

اسمعيني قبس..

اختي ام رنا ارمله وماعدهه ولد بس بنات

اثنين صغار بالابتدائيه اني راح اوصيهه عليج

وهناك نتخابر

حبيبه قبس ديربالج ع نفسج وابنج واني

وياج لاتخافين لو اعرف اجيج من تركيا ومااعوفج..

سديته منهه واني شبعانه بجي

الغريب حنين عليه اكثر من اهلي وعمامي

تعال يابشار شوف الذله الشفتهه بس انطيت

بيه

شكم مره كتلك انت سندي وانت اهلي

ومن ادير ظهرك عليه تزاعلني الدنيا وناسهه

ورا ساعتين تقريبا جانت عصريه

طبيت زرت وطلعت تليفوني بالامانات

اخذته لكيت مكالمه من رقم غريب

ورساله حبيبتي قبس اني ام رنا..

بسرعه اتصلت بيهه جاوبتني بعد السلام

كالت اني بالامام انتي وين؟؟

وحده توصف لثانيه لحدماوصلتلهه..

تشبه سناء بس اصغر منهه بوستهه

وكالت امشي ويايه مانزعت الخمار لحدما وصلت

للسياره صعدت..

السياره الهه هي تسوق صعدت والتفتت عليه

ماشاء الله ماشاء الله شكد جانت سناء

دكول عليج حلوه بس والله تفاجات ماشاء الله

الله يحفظج لشبابج

قبس.. حبيبتي تسلمين روحكم الحلوه

ام رنا.. هسه مااريد اعتراض هاي اوامر سناء

حجزتلج عند دكتورتي انروح انجيك الحمل

قبس.. لااا حبيبتي غير مره تعبتكم

ويايه

ام رنا.. لتعترضين موكتلج اوامر سناء وتعرفين

السانهه شيخلصنه منهه

قبس.. الدمعه بطرف عيني وين تعرفني

حته تشيلني بالصلوات وبنات عمي

اكلت وياهن نفس الماعون باعني وغدرني

كلساع امسح دمعتي من كدما مهظمومه

ااخ ياليتيم اااخ يالمالك سند هيج

تاليتك الغربه تحن عليك!!!

وصلنه لعيادة دكتورتهه امشي واتلفت

خاف واحد يشوفني لزمتني من ايدي

وكالت لاتخافين احنه بغير منطقه بعيده

عن الوزيريه ..

سكتت كعدنه شويه وصاحوا اسمي دخلت وياي

سوتلي سونار وفحص واسئله كومه

حجيتلهه عن علاجي النفسي

كالت لتخافين ابنج صحته تمام

لحدالان ماكو شي حملج راح شهرين ونص

كل العليج تلتزمين بالمعاينه وهذا العلاج..

سمعتني نبضاته وبجيت

عبالهه محرومه ذريه صار اسنين

ماتدري بجيت على ابو

الماسمع نبضه واتذكرت اول

مره شلون جان فرحان..

رجعنه لبيتهه بيت راقي بشكل

هي موضفه مديرة مدرسه متوسطه

بناتهه زغار بالابتدائيه ومؤدبات حيل

سلمن عليه وراحن لغرفتهن

انطتني غرفه خاصه كالت هاي جانت غرفة حماتي

وتزوجت وصارت الج

راحت واجت جابتلي علاكه كلهه

بالعلامه ملابس داخليه وتراكات

رفضت اخذهن كالت هاي هسه اشتريتهم من اجيتج

تالي انطيتهه فلوسهن يله اخذتهن...

دلتني بالحمام رحت سبحت

وطلعت مشطت شعري اباوعله

شلون كصير احاول ارفعه ماينرفع

اندك الباب اجت جايبه تليفونهه كالت سناء

تحاجيج. اخذته منهه وهي طلعت

سناء.. ها ولج سليته شلونج هاي تاليته استاذ

بشار طكيتي بالدهن

قبس.. لج مالي واهس اضحك هو طكني بالدهن

سناء.. لاتحجين ع مديري ولج هذا الصاك

هيج يطلع منه ليش ولج اتزوج شناقصج ايد

رجل..

قبس.. حظي سناء لو عندي اهل احتمي

بيهم ماانقهرت بس كطعوا بيه وعافوني

الدنيا شابعتني مهانه

سناء.. ارتاحي ام رنا دره وحبابه ولاتستحين

ابد احسبي البيت بيتج

اني مااكدر اجي بسبب وضع اخويه هسه سوه عمليه

بس امانه ياقبس اي شي تحتاجي

اطلبي انتي بنتي الماخلفتهه

قبس.. شلون اشكرج وبيش ادعيلج

سناء.. بعد مااكلج ادعيلي اشم ريحة الرجال

هسه ادعيلي عاد اشمه بالحلم ضربني الجفاف

قبس.. هههه هيج احسنلج حره ابيه

سناء.. ولج ماكتلج غير عاليه سوده عليه

الحظهه الملطلط اتزوجت قبل شهر واحد

كلشي مابي وصاحي ولج قبس شهر ولكته مجلوط بفراشه

قبس.. لاااا خطيه سوده عليه

سناء.. متت قهر عليهه كتلهه ولج احنه شكول زواج

هاي مات الرجال وهسه رجعت لاهلهه

قبس.. ماتستاهل والله

سناء.. يله نامي ارتاحي وديربالج تحجين

ع مديري اوف استاذ بشار ماتلوكلك هيج تنسحل

خلصت عمرك ساحل هسه صرت مسحول..

قبس.. بسرعه تغير مزاجي وضحكت ويه

سناء حمدت الله وشكرته ع هاي النعمه..

شجن.. صارت قبس حته ماتنذكر بالبيت هوايه

وماما تسال عليهه يكلهه زينه ماتريد تشوفكم

ماانطه بيهه ابد بس اني الوحيده اعرف بيهه

مهزومه ومالكاهه بس هو جان يدافعلهه

مره ماما اصرت اله تاخذني الهه اريد اشوفهه

وكالهه حالتهه النفسيه تعبانه حته اني ماتريد

تشوفني لاتضغطين عليهه

جان يحجي وهو الغصه ابلعومه

حيل مقهوره من تشوف انسان قوي

وبلحظه يضعف وينحني ..

مرت الايام وصار شهرين ع اختفاء قبس

بشار بالنزلان صحته تغير حيل

وماما بس تدعيله

سرور ماتجينه ابد ملتهيه بدوامهه

صرنه مانعرف اي اخبار عن عائله

اخونه الجبير وهي اصلا ماكو عائله

اتفلشت ..

بيوم منهن يمنه هدى اجت من الصبح

اختي هي بس اضوج مش من تصرفاتهه

حته من تحجي مااسمعهه احس كلامهه

كله مزيف عفتهه تخابر بسرور وطلعت

جانن يمنه بسمه وفرح والسوالف والضحك

هن واسراء وصابرين انفتح

موضوع قبس وماحصلت بس الذم

بسمه ترفع وفرح تكبس والحجيه تصفك الهن

ماما حجت عليهن وسكتتهن تغير الموضوع

طلعت هدى من الغرفه وهي تصيح

ام بشار ع الخير سىرور حامل

واخيرا راح يجي ابن الغالي.....

.

.

يتبببببع.... متابعه شيقه

قمع المشاعر.... الرابع والعشرون من الجزء الثاني...

للكاتبة زهراء ( روزايه)...

( شكرا جزيلآ لكل من سأل عني ودعالي

بدعوه صادقه الله يحميكم ويكفيكم شر الامراض

حاليا شويه احسن خاف اقصر وياكم اعذروني

لان الافلاونزا دمرتني  وان شاء الله مااقصر وياكم)

....

السهم الذي إنغرَس في أحشاء العصفور

كان غصناً يُغنّي عليه يوماً ما..!!

...

شجن... كلام هدى صدمني وعبالك اني المتزوج عليه

شلون هيج بشار يعني هلكد مامهتم لوجود قبس

حته يتمم زواجه باحسن صوره وفوكاهه يريد طفل منهه

عجيب امر جنس ادم لاتوكف بعينهم

عشره لايوكف بعينهم حب وتضحيات

وايام حلوه بسرعه يبيعون والهم نفس ويه غيرنه..

ردت بيبي اي ع الخير خلي تسمع هذيج

الشايله خشمهه بنت سميه هو الخلاهه تنغر علينه

ام بشار.. خاله قبس بنت اخوج المرحوم وسنين انتي

تبجين علي وتنوحين ومن اجاج هنا كالت يمه خاف يصير

عليه شي اولاده بامانتج وانتي دكيتي صدرج اله

وتالي ياامانه حافظتو عليهه لو ابوهه عايش

محد كدر يتجرأ يمسهه بحجايه لا انتي ولا حته

ابني كدر يكسرهه..

شجن.. اباوع لفرح احتقن وجهه تريد تكوم وامهه لازمه

ايدهه وتصك ع اسنانهه عمه عود اكعدي

بس جانت بركان حته تباوعلنه بحقد ..

هدى.. ماما شومافرحتي؟

ام بشار.. كايله قبل ماعندي جنة بس قبس واذا اريد

افرح افرح بحملهه

سرور تدري ببشار شلون يحب مرته ويعزهه

بس هي اختارت تنزل ضره وتشتت شملهم خاف

ظال من عنده شويه واني هيج نفسيات دنيئه تفكر

بسعادتهه ع حساب غيرهه هاي مااريدهه..

بسمه.. يله داده هو ابنج الجبير والشيب ترس شعر

افرحيله هو اختار يتزوج بعد انتي ادافعين لقبس

هو هم يضوج اذا شافج مافرحانه..

شجن.. داخلي يغلي ولو عندي جرأه اكوم اخابره

واكله شكد خاين وناكر العشره حته مانتظرت

تلكاهه وتطمئن عليهه

شلون انطاك كلبك مااجت بين عيونك

وتدري بيهه مريضه احتمال مسويه شي بنفسهه..

بسرعه كمت من يمهم مالي خلك اسمع شماتتهن

احس البيت مالتنه يخنك وين مااروح اشوف

شامت ..

مرت ٤ ايام ضبط جنت نايمه تقريبا الساعه ب٣

الظهر وفزيت ع صوت عالي عمتي بسمه

وفاطمه بس ماركزت بالكلام لان هسه كاعده..

افرك بعيوني وارفع بشعري اتلفت على عكازتي

اريد اطلع شصاير قبس وماكو عليمن هالعركه!!

طلعت وصار فاطمه كدامي شوهاي بسرعه

اهجمي عليه رادت تضربني بس اسراء

دفعتهه وصارت كدامي

فاطمه.. هاي ام الزلم المعوقه العرجه شعندج ويه رجلي

طايحة الحظ خاف مارباج خالي اني اربيج

ام بشار.. شنو هالكلام اليطلع من حلكج متستحين

وفوكاهه برجاحة عين واكفه بنص بيتي وتغلطين

فاطمه.. حقج ماتدرين ابنتج تقشمر برجلي

وهاجمه بيتي ودكله تعال اخطبني المحروسه مالتج

عدهه علاقه برجلي قبل مانزوج وعبالي تابت بس

المثلهه شلون اتوب..

ام بشار.. بعصبيه بسرعه تقربت على فاطمه ضربتهه

راشدي وجرتهه من حجابهه وحجت بحديه

عديمه التربيه لو تعرفين شنو الاخلاق ماتلفظتي

هيج كلمات بس الصوج بامج الصافنه عليج

اكص السانج اذا جبتي طاري بنتي

هدت حجابهه ودفعتهه وانتي بسمه ماكفاج هجمان

البيوت كااااافي دمرتي بيتي وعيالي

شتردين حاطه اثنين ماعلمتيهن االادب كل خرابنه

بسببج

بسمه.. يامتستحين اني حماتج الجبيره تحجين وياي هيج؟؟

ام بشار.. اطلعي برا من بيتي اطلعي مااريد

اشوفج ولااشوف هالزباله بناتج

اطلعييييي اخذوهه من كدامي لاتخلوهه تفوت بيتي..

شجن.. انفعلت ماما حيل وبسمه وفاطمه السانهن

شطوله بيبي دفعتهن وطلعن وماما كعدت بالكاع

تملخ بنفسهه وتلوم بالحجيه

كله منج انتي دمرتي ابني حسبي الله ونعم الوكيل

بسببج فتحتي بيتي لهيج شكول

ماتعرفين بسمه من صغرهه صاحبه دكايك

وزوجتيهه حته تستريهه من الخباثه لان حته احنه ماخلصنه

من تهمهه

وكولي كلت اذا ماطلعت بتهه هي السوت

هيج ودمرت اليتيمه وهذيج الساعه

حته انتي مااريدج ابيتي..

شجن.. انفعال ماما خله بيبي ماحجت ولاحرف

بسرعه راحت لغرفتهه واني كعدت كدامهه لازمه

ايدهه واسراء راحت تجيب مي

حجيت بدموع ماما فاطمه جذابه اني ماعندي

تواصل ويه غيث والله العظيم حته رقمه موبتليفوني

ام بشار.. اخذت النفس وكالت ادري بيج

ثوله مومثلهن يهجمن بيوت ..

عافتني وكامت حته مي ماشربت راحت

لغرفتهه رادت تحجي اسراء اشرتلهه

اسكتي لاتدخلين ...

السالفه كبرت ام وائل رايحه لجيرانه تحجي عليه

ماما ماتحملت خابرت ع ساره وكالتلهه من تفرغين

تعالي فهمينه..

ورا ساعه اجت ساره سولفت شغلات

وكف عقلي بيهه

ساره.. خاله شحجيلج اني كاعده وياهم

بس كلشي ماافتهم قبل ٣ اشهر تقريبا

اجه غيث مثل البركان غلط وصياح وتعارك هو وائل..

ماحجو كدامنه راحو بالاستقبال وماسمعنن شكو

بس الي افتهمته علمود سالفه شجن

افتهمت شغله ودنكت راسهه

وائل جذاب وهو متعمد يتهم شجن حته

لاياخذهه غيث لان دره باخو يريدهه

بس ليش سوه هيج مادري وشجن بتنه وربت كدامنه

امهم رادت تدخل بس غيث جان عصبي. حيل

وخاله هو وائل مريض وبي سكر هاد حيله هد

وغيث مدري شجا جان فاقد وكام يضرب بوائل

دفرات بالمنطقه الحساسه لحدما وكع لاايد ولارجل..

وعافه حته مااخذه للمستشفى واني وخالتي اجرنه

سياره واخذناه ومتضرره المنطقه حيل

ومنا بي سكر ظل يومين بالمستشفى وطلعنه

غيث مايريد مرته من يوم عرسهه لهذا اليوم

هو مايريدهه ويرجع ع امه يكلهه شسويتي

وخليتيني اسكت وفاطمه ماتنحمل

تغلط والسانهه طويل حته ع ام وائل شابعه

رزايل منهه ومن تشكي لغيث يكلهه موانتي اختاريتيهه

اتجازي وياهه

وائل مايطلع من غرفتنه اصلا تعبان بالليل

اكعد كلساع اشوفه خاف بي شي

السكر ماخذه حيله وهاي فاطمه من المشاكل مالتهه

حته روحي بزعت..

وهسه متخبله هي وسليمه وامهه غيث مايريدهه

ووائل مدري شصار بي ليل نهار يصيح

اخطبو شجن لغيث وحته اذا ماوافقوا اهلهه

ظل يوميه اخطبهه

خاله مانعرف شصاير اني تعبت ومليت

وهاي بعدني بعز شبابي ورجلي لاسده

ولارده جان السكر مدمره وهسه كملهه غيث

واكو ضرر بالمنطقه الحساسه واني ليل نهار

اكرف شغل وياريت راضين عليه..

ام بشار.. منو كالهه فاطمه بنتي هجامة بيوت مثل

اختهه غيث تزوج واختار طريقه لو تظل كاعده شجن

هاي كعدتهه ماانطيهه

شجن.. جنت اسمع ماما شلون تحجي واني صافنه

ع ردة فعل غيث معقوله عرف بالسبب الرئيسي

معقوله يدري بوائل حاول يعتدي عليه وتعامل وياا

بهالوحشيه وهو يعتبر وائل بمثابة ابوو

من طلعت ساره للباب طلعت وراهه جانت اسراء

تمشي ويانه بس اخر شي من طلعت شاورتني

كالت غيث كال كلي لشجن عرفت السبب الاساسي..

حيل خفت خاف تصير مشاكل من جديد

هسه بوضع احنه حته بشار مومثل قبل

يكدر يدافع عني البي كافي ..

مااعرف غيث شيريد بالضبط اتزوج

واختار طريقه مانسيته بس تناسيت

وبدت حياتي تاخذ غير منعطف

شاركت بمهرجانات هوايه صرت مدمنه

قراءة كتب ومرات يجيني الهام اكتب خواطر

بالفصحى  كمت اعرف اناقش واستفز المقابل

بعد ماجنت كلمتين مااجمعهم

مااريده يرجع ولااريد اعيش نفس القهر

من البدايه حبنه غلط وهاي كل واحد

بينه دفع ثمن غلطته ..

اني قويت نفسي باهلي من وكفوا بجانبي

بشار حاول بكل الطرق يطلعني من دوامه غيث

قدملي كليه اهليه خلاني اشارك بالمهرجانات

كدرت اخلي حجر الاساس بمستقبلي

مامستعده اهدم او طابوگه بنيتهه

بسبب الحب الماحصلت منه غير

هاي حالتي ورجلي الخسرتهه..

ظليت ساكته شكد محتاجه قبس بهاي الايام

جنت اجي احجيلهه كلشي وهي تسمعني

واخر شي تغلط عليه وترزلني حته اذا

جنت ابجي اكوم اضحك..

واسراء تسوي عشه واني كاعده اسوي زلاطه

وانفتح الباب باوعت فاديه

شايله ابنهه وجنطهه تسحل بيهم وسدت الباب حيل..

ماما جانت تقره قران تلكتهه اسراء

طبت كعدت بالمطبخ واني اخذت ابنهه

صاحت بصوت انطني سم..

انطتهه اسراء المي شربته وكالت وين ماما؟؟

شجن.. تقره قران روحي اسراء كليلهه اجت فاديه

صايرشي شكو؟؟

فاديه.. هاج شوفي وشالت الردن مالتهه ايدهه

زركه ورفعت فستانهه رجلهه زركه بسرعه حجيت

بشهكه هاي كمال ضربج

فاديه.. اي كمال الف مره كلت لبابا يشرب

ومن يشرب يصير ثور ايده والضربه

شجن.. وشنو بابا ميدري موكالج بشار ترى سكير

من صغره وانتي كلتي اله هو واهله سوو صايم ومصلي

فاديه.. ماجان يشرب هسه بالجديد كام يشغل فلوس

ويخسر وين يولي يشرب ويجيني

تعبت طكت روحي منه

شجن.. وعيالج شيكولون؟؟

فاديه.. اتحملي واتحملي واكفين بجانب ابنهم

وهاي لميت غراضي واجيت ماارتاحيت غير سنه

زواجي وبده طيحان الحظر

شجن.. لاتزعلين بس انتي شاركتي باذية

انسانه يتيمه ماراح تتعدى الج وهاي بوادرهه

وكولي شجن كالت يوميه توكعين بمشكله

فاديه.. كومي لاابتلي بيج ماكايلتلهه روحي

دوري ورا اخوي مسوياتهه انتي وامي ماكو منهه

دشوفيهه لو فعلا بريئه جان بشار جابهه يوميه

بس حته هو ضامهه عن الناس

شجن..والله ولا انقهر عليجن انتن اخواتي

مدام بعدجن تحجن عليهه

اجت ماما واستلمت فاديه رزايل وشكم مره

كنالج موخوش ادمي هسه جايه

شنسوي انطلكج موكالج اخوج ترى موخوش انسان

ثاني يوم اجت هدى وهوسة الجهال

وغير مشاكلهن وفاديه تصيح ماارجع

وبابا يكلهه هذا اختيارج اروح اربي شسويله..

الحجي.. يابه عادل خابر اخوه خلي يجي يحلهه

عادل.. وليش يحلهه بويه مايستاهلن مو هي راحت

هلهلت ع كسرة بنت عمهه وهجمان بيته

الحجي.. عااادل خابر بشار يبقه اخوهن

وهذا عمر ماعنده غير العرك مايحل السالفه

شجن.. بابا خابر ع بشار وحجاله كاله بليل اجيكم

تعشينه وورا العشه كلهه موجوده حته صابرين واجه

بشار وسرور اني سلمت عليهه وكعدت بصف ماما

وهي كعدت بصف بشار

ماما كلساع وكالت استغفر الله شوفي

شلون اخذت مكانهه وصارت هي الكل بالكل.

بشار ساكت وبابا يحجيله السالفه

ركزت على اخويه الجوه عيونه اسود

لحيته عاليه بس محدده خصلات شيب مطشره براسه

وخاصه بالمنطقه اليم اذانه بيهه شيب كثيف..

كاموا يتناقشون وعمر يعلي صوته

تالي طلع كال انتم حلوهه رأي عمر

تطلك ورأي بشار كل انسان يختار غلط بحياته

يدفع ثمن غلطته وحده ولايدور ع حلول عقيمه!!

اخر حل كالو نخابر على اهله

يجون نفتهم منهم ويتكفلون ابنهم مايشرب

بعد واذا يشرب لايطب البيت ويتهجم ع بتنه..

من بين النقاش رفعت صوتهه ماما

وهي دكله بيهه الخير دكتورة سرور

فرحنه بحملج!!!

اني بسرعه باوعت ع بشار ضيق عيونه

وعگد حواجبه بعلامه استغراب والتفت عليهه!!

هي هم تفاجات وباوعتله بنفس النظره

ابتسمت وكالت ياحمل خاله منو كال اني حامل؟؟

ام بشار.. هدى كالت انتي خابرتيهه وكتيلهه

وهاي صار اسبوعين ندري بس التهينه

بالمشاكل وبشار مايجي حته اباركله

سرور.. العفو خاله بس اني موحامل منيلج

هالكلام هدى ووجهت كلامهه لهدى!!

هدى.. وجهه صار ينطي الوان لان بشار جان خازرهه

وكالت لااا يوم بوقتهه ردت اغث فرح وكلت هيج

ام بشار.. انتي حيوانه شنو هذا الموضوع بي شقه

وشتغثين منهه ليش اشفتيهه مددت كدامج تلطم

وماكلتي بساعتهه اتشاقه صارلج اسبوعين

هدى.. لاتكبريهه ماما نسيت اكلج

بشار.. هددددى وصاح بيهه انتي باي حق تحجين

هيج كلام وبصلافه تكولين اتشاقه وكام وكف

كلنه كمنه نعرفه من يعصب وهدى تتعذر

وتباوع لسرور تريد تنقذهه بس سرور

جانت ردة فعلهه اقوى وهي تحجي ميصير تدخلين

بحياتي الشخصيه..

لاول مره واصلا عمري ماشايفه بشار يمد

ايده ع هدى صارت تلاسن وترفع صوتهه

ضربهه راشدي خلاهه ترتد ليورا..

ماكدرت ترفع راسهه لازمه خدهه ومدنكه بالكاع

سمعهه كلام ماكدرت اظل واكفه بسرعه رحت للغرفه

بس اسمعه يكلهه تماديتي هواي واعرف

غايتج شنو وليش حجيتي هيج !!

هدى ركضت لغرفة اهلي وبابا يسكت ببشار

وماما جابت سرور للغرفه وسدت الباب

التفتت عليهه وكالتلهه احجي الصدك؟؟

بشار مامتقربلج مووو؟؟

سرور.. حجت بتعلثم خاله ميصير احجي

بشي خاص بيناتنه

ام بشار.. اني امه اكدر اروح اساله هسه

سرور.. اكعدي خاله افهمج واحسبيني بنتج

اعرف انتي ضايجه من عندي بس والله العظيم

وداعة عافيتي ماناويه اهجم بيته

كالولي مرته خانته ولكاهه ويه واحد

وحته شوفتني هدى كل الصور والمحادثات

وكلت مابيهه شي مو اول واحد يتزوج

وقبلت بي

والله العظيم لو ادري هيج بشار متاذي عليهه

ورغم كلشي مصدكهه مادخلت بحياته

هدى كالت يطلكهه وترجع يم اهلي

واني ماشفت بي قصور ومو اخر واحد يطلك

مرته وجنت ناويه استقر ماردت امشي برجلي

للنار..

اني موصغيره ومرات الانسان يغلط واني

غلطت ومتعذبه لان احبه وهو يصدني

وكرامتي ماتسمحلي اسوي مثل غيري

واحاول اقربه الي

الله شاهد ياخاله من يوم عرسي مالبست

ولا توددت اخجل من نفسب خاف يكول

رخيصه وتريد ترضي نفسهه

اني ويااا هسه اصدقاء لاغير

ولااطالبه باتمام زواج ولا بيوم

استغل حبه لمرته واحجي بظهره

الله عليج خاله انتي وشجن سمعتوا كلامي

لتحجون لاي شخص هو ممتقربلي

مااريد ينذكر بشي موزين

هدى اني كتلهه تقربلي لان لحت هواي

وكامت تسمعني كلام موحلو وتحجي ع اخوهه

يعني وصلت بيهه دكلي خاف صدك بشار

بي شي وخانته قبس!!!

لذلك ردت اسكتهه وكتلهه تقربلي

بس ماكتلهه حامل لان اني حجيت لبشار

ع كلام هدى وشفته شلون راد يثبت عكس

كلامهه

بس ياخاله الحب موبالكيف وبشار

يحب قبس لدرجه مايكدر يخونهه حته بالحلال

ام بشار.. الله يهدي سركم لاتخافين مانحجي

وماادري هاي اللعبه شوكت تخلص والى متى

راح تبقون اصدقاء

اسمعي يمه ماكو مره تصبر ع رجلهه

هسه متحمله لان عندج امل بيوم يحبج

بس وراهه من حقج يصير عندج طفل وتحسين

بحقوقج ..

سرور .. اكو شغلات تفاهمنه عليهه اني وبشار

وان شاء الله اكون كد كلمتي ونبقى اصدقاء

وقريبين ..

شجن.. جانت تحجي وهي منصيه راسهه

تاهت عليه اصدكهه لو اكرهه احتمال صدك غلطت

وتندمت طلعت ماما وعافتهه يمي..

شجن.. اسالج سؤال بدون احراج

سرور.. تفضلي؟؟

شجن.. انتي جنتي بالاعداديه ويه بشار يعني

احتمال تحبي من زمان

سرور.. لااا.. جنه نتنافس بالدراسه ومو بس

وياه هي المجموعه كلهه شاطره وكلهه مهندسين

واطباء بس منافسه بيناتنه

ومن دخلنه كليه جنت اروح ويه اختي اداوم وياه

هم ماعندي شي رغم شخصيته حلوه ورزن

بس مافكرت احبه ولو فعلا اني احبه من زمان

وين جنت عنه قبل لايتزوج..

كل انسان معرض للغلط واني غلطت بزواجي

لان صدكت بكلام اختج وعبالي صدك مرته

خانته وطلكهه ..

اني من قبلت اتزوجه حسب الكلام بأن

هو راح يطلكهه ومايريدهه وخانته

شمدريني انصدم بعد الزواج..

المهم خلي اروح لايكوم يحجي بس نصيحه

اخت لاختهه هاي البنيه اسراء

راقبيهه واخذي حذر منهه لاتحجين اسرارج وحاولو

اي سر بالعائله لتحجون كدامهه..

شجن.. ليش شبيهه شايفه شي عليهه؟؟

سرور.. لاتساليني بس نصحتج وهسه خلي اروح

شجن.. طلعنه للصاله كام بشار بس الوجوه كلهه

مكلوبه ع ضربة هدى..

مدري شجاني احس راسي راح ينفجر

اكو شي مبهم سرور حبابه لولا؟؟

وخاف تسوي هيج حته تخلي يحبهه

وتصير الكل بالكل

ااااوف وينج ياقبس بيتج راح ورجلج

صار لغيرج اسمج ماينذكر بيناتنه بالصدفه

شلون متحمله الفراك والوحده وانتي

فراشه بس تنحبس تموت..

...

قبس... صارلي ٤ اشهر يم ام رنا حيل حبابه

تروح لدوامهه واقفل الابواب عليه

الهي نفسي بالطبخ رغم ماتقبل بس اني اضوج

حملي كل شهر اراجع واروح لابسه خمار حته

محد يشوفني الوحده مكتوبه ع كصتي

من انولدت لهذا اليوم

لازمه تليفوني واقرب بصورته واحجي وياه

مشتاقتلك حبيبي؟

هوايه مشتاقتلك انت هم مشتاقلي؟

تممت زواجك بسرور؟ صارت حامل؟

شلون تتغزل بيهه شدكلهه نفس الكلام مالتي؟؟

من تبدل وتروح للدوام هم هي تسد ازرار قميصك؟

وانت دكلهه قربج يهلكني مااقاومج؟؟

اشتاقيت لكلشي بيك عصبيتك وصياحك

حته زعلك عليه!! اذيتك هوايه وبهاي طلعتي

الاخيره ادري شصار بيك!!

وادري بسببي صرت حجايه لليسوه والمايسوه

بس اعذرني مااتحمل كلشي اله طاقه

واني طاقتي نفذت مااكدر اكمل وياك

واسمع نفس الكلام من نفس الوجوه اريد اسامحك

بس كسرتي جبيره وكلما اباوع اثر ايدي

اتذكر قساوتك ويقسي كلبي!!

اتمنى اشوفك ولو لمحه ع الاقل نزل صور

حته اكحل عيني بشوفتك ليش هيج

حسابك فارغ!!

وكعت دمعتي على شاشه التليفون مسحتهه

وسديته خليت وجهي بين اديه وبجيت بقهر

روحي جاي تتكطع علي مشتاقتله حيل

كلبي معاديني طول هاي الاشهر

كلساع تجيني نغزات قويه ويكلي

مشتاقله اريده!!

العصر رحت للطبيبه لان اخاف بهاي الاشهر

خاف يكولون مشوه امشي وادعي

قلقانه خايفه هذا اليوم مالبست خمار

ردت اواجه الكل ماردت اختبي طول عمري

تحت انقاض الحياة..

حجزنه وننتظر السره مالتي ساعه وصاحوا اسمي

دخلت ويايه ام رنا الطبيبه سألتني شكم سؤال

وسوتلي سونار ابتسمت..

الدكتوره.. ماشاء الله الحلو مبين وكيح وهاي

يلعب وفرحان مبروك امي البطنج ولد

قبس.. اريد اسكت عيوني ماعندي سيطره

عليهن ام رنا تسكت بيه والدكتوره دكلهه دموع

الفرح هاي

لاموفرح هذا فقدان محتاجه ابووو محتاجه

بشار يفرح مثل فرحتي ...

الدكتوره.. ماما وضع الطفل زين اي تشوهات ماعندج

بس مومعناتهه العلاج النفسي ماراح يأثر

هاي بقت يم الله

احتمال بعد الولاده نكتشف اشياء ماظهرت بالسونار

بس كشكل اطمئني اي تشوه ماكو تمام الخلقه

وكامل الاطراف ..

شغله الي اريدهه منج تسويلي هذا التحليل

ضروري وهنا المختبر مسدود والوحيد اثق بشغله

حاليا عنده حالة وفاة راح اكتبلج ورقه تجين

وراي للمستشفى اسويلج التحليل...

قبس.. بس كالت مستشفى رجف كلبي

اخاف منطي اسمي لكل المستشفيات ويلكوني

حاولت وياهه كالت كتلج هنا العدنه مجربتهم موشي

ام رنا قنعتني وكالت لاتخافين هي شغلة نص ساعه

وروحي لابسه خمار قابل ياخذون اسمج بالباب...

ثاني يوم الصبح رحنه اني وياهه امشي واتلفت

خاف احد يشوفني احس الكل يأشر عليه

ويكول هاي لكيناهه

ام رنا تمشي وتسال وشاطره بسرعه اخذتني

للمختبر انطت الورقه للولد وكالتله فدوه

المريضه متخربطه ساعدوهه..

الولد كال تفضلي اختي كعدت اني لابسه خماري

جان يصيح اسراء تعالي اخذي معلومات المريضه

كلبي يدك الف اريد اكوم من الكرسي وانهزم

بس المختبر ازدحام وبالاحرى رجليه اتشنجت

شنو من حظ عندي مايوم نصفني..

اجت اسراء لابسه صدريه وكلساع اكول بلكي

موهي بيدهه دفتر وقلم حاجتني اسمج وعمرج

وورقه التحليل..

بسرعه حجت ام رنا اسمهه قبس رضا وانطتهه العمر

وحامل ٤ اشهر وراح تفوت بالخامس..

مااكدر ارفع راسي بس لمحت علامات الدهشه

على وجهه الولد اخذ مني دم وهي ساكته

كلساع يتخيلي تسحب الخمار وتذبه مني..

اخذت معلومات كامله من ام رنا حته اسم

الدكتوره مااريد احجي وتسمع صوتي

واكلهه لاتحجين هي ع نيتهه وخوفهه عليه..

طلعت برا المختبر اريد الطم اريد املخ

شعري بس ع حظي االاغبر ..

حجيت لام رنا خطيه كامت تلوم بنفسهه

وغلطنه لومن الاول منطين اسم غلط

بس صارت بعد

مااعرف مصيري اكيد اسراء راح تروح دكلهم

واكيد يجون ع الدكتوره واكيد ادليهم بام رنا

اااخ ياطعم الراحه كلما اضوك طعمج حلو

اعيش سنين المر وراج...

اخذنه النتيجه ورجعنه اسراء الغريب

بيهه حته ماطلعت ورانه كلت هسه تجي

تحاجيني لو ادور عليه تريد تتاكد..

اتذكرت هي مرحله اخيره جاي تتدرب

لان الولد من يسحب يشرح لشكم وحده

ويسولفلهن ع الجهاز ونوع التحليل..

فرحتي بالولد تعكرت ودخلت بتفكير

واوهام خلتني نايمه بالفراش

كلما يندك الباب اكول اجوووو

وهالمره احتمال يكتلوني ومحد يدافعلي...

ظليت انتظر هسه يجون

هسه يكتلوني!! هسه راحو للدكتوره

هسه!!

هسه!!

دماغي كام يصير ارحميني!!

مرت الايام واجه الشهر والايام تمشي

وماشفت واحد اجه وسال معناتهه ماكالتلهم

ماجنت ادري مايدرون مهزومه ..

كمت اخاف انام خاف ياخذ ابني

مني ويعاقبني ع هزيمتي بس لواموت

مااعوفه لو اعرف اعادي الكل وماينام ابني

يوم واحد بدوني؟!!

..

ام بشار.. خلي يسمعوني الجيران وين اروح من عدكم

ولجن كلبي طك لا الجبيره ولاالصغيره براسهه خير

فاديه.. اشمرونه بالشارع غير موخوش اوادم

ام بشار.. هسه صارو موخوش من دكيتي رجلج اله اتزوجه

ماكلتي موخوش

فاديه.. شمدريني اقره الممحي

ام بشار.. يا قهري وتعبي ولجن هاي تاليتهه اثنيجن

زعلانات يمي انتي هدى شبي حمزه تخبل مو خوش رجال

ومايوم زعلتي هسه شبي

هدى.. يمه يدور وراي من صارت عنده فلوس كام يدور

الكه ارقان وتليفونات ويصرف ع البنات

ومن اتعارك يكلي بكيفي مايعجبج روحي لاهلج

وفوكاهه اخواته كلهن واكفات بجانبه

ام بشار.. روحن من وجهي يجي ابوجن واحجله

كافي عليه قهر شجن والمشاكل مال غيث

هدى.. شبي؟

ام بشار.. شبي ماخله واحد مادزه علينه حته رايح للشيخ

واجه البارحه كمنه نستحي نرد الناس

وهذيج بسمه مامخليه سكه النه فاضحتنه

هدى.. خلي يولي غيث اطردو

ام بشار.. كومن من يمي راسي راح ينفجر

اريد واحد ارتاح منه ماكو شسويت وهيج المصايب

تهل ع راسنه

شجن.. والله الصار كلهه من ايدهن ياماما

ليش قليل السوته هدى ترى اكو رب يشوف

الظلم بعينه مثل ماخربت بيت اخوهه هسه

حمواتهه هم يخربن بيتهه

هدى.. لج كومي لا اطيح حظج ذاك اليوم

صرتي وكاعده تشمتين عود هاي انتي اختي

شجن.. ليش ماتتقبلين الحقيقه موانتي

نفسج كلتي لبشار عفيه من اجي لاتجيب قبس

لان رجلي يكول من اشوفهه اتذكر المحادثات

عبالج ماسمعت شلون هانج ورزلج وراد

يمد ايده عليج بس الواحد بهالزمن مومال احترام

انتي اكبر مني وعيب اقلل من قدرج

بس تستاهلين اليصير وياج

هدى.. يا حقيره يارعنه وكامت جرت شعري

حيل صاحت بيهه ماما يله عافتني

تتقبلين الحقيقه انتي وفاديه وهسه

تشوفن شلون راح توكعن باكبر من هاي

المشاكل عفتهن وكمت للغرفه

صايره مااطيقهن ابد ولاحته مقهوره

عليهن اني الوحيده شاهده ع كلشي

جنت اسمع واشوف شسون وشكد

حجن عليهه!!

الراحه صرنه نسمع بيهه بس ماانشوفهه

بيتنه ليل نهار مشاكل اذا مو فاديه تجي هدى

واذا مو هدى صابرين لان اداوم وتقصر بشغلهه

وبيتهه وعمر يرجع عليهه...

بسمه من يوم الطردتهه امي ماشفناهه لاهي

ولابناتهه بس نسمع فاطمه يم اهلهه

وبسمه كلساع هاده ع ام وائل تكلهه ورطتي

بنتي..

غيث ماحجيت وياه ابد ولاهو اتصل

مرات من ارجع من الدوام يشوفني

بالسياره تظل عينه وراي بس ابد ماحاول يتصل

يوميه جاي واحد من كرايبنه لويدز ناس

واسطه يخطب بس اني نهائيا مااسال

ولا افكر ارجعله اعتبرته ورقه وطويتهه

وضميتهه بكلبي

من اتزوج بشار حسيت بمعاناة قبس

بعيني شفتهه شكد متأذيه

هنااا وكعت من سمعت خبر خطوبته

وهي لازمه كلبهه وتهز براسهه ممصدكه

ومااريد اصير مثل سرور وانزل ضره

ع فاطمه بغض النظر عن كلشي

هو اختارهه واكيد تحبه ..

يكفي عندي عرف الحقيقه

والله ينطي الي اتجرأ وحجاله

لان سنين واني ماكدرت احجي ..

سرور ماتجي ملتهيه بدوامهه

وبشار هم نادرا مايمر علينه

كل واحد ملتهي بحياته وشغله

والسؤال الوحيد اليردد براسي

قبس وين؟؟

معقوله عرف مكانهه بشار وضامهه؟؟

عمه بشرى تخابرني دكول اساله مايحجي..

بس هاي الشهر السادس واحنه ماشايفيهه

ولانعرف شي عنهه..

بس من ملامحه وتعبه وظهره المحني

مبين مايدري بيهه لان بيوم الكاهه

اتذكر شلون رجع الدم بوجهه

بس هسه كبر بهاي سنين بهاي الاشهر..

....

قبس.. بطني كبرت تقريبا ارتاحيت من ناحية

اسراء والظاهر يا اما ماعرفتني ماانتبهت

او صارت خوش انسانه وماحجت

كل شهر اراجع مستمره ونفسهه السكرتيره

مال الدكتوره نفسهه ممرضه بصالة الولاده

دائما تكول لتخافين ولاتسوين عمليه

اني هنااك اعتني بيج واتجيبين طبيعي

مع العلم جنت مقرره ع العمليه

بس كلامهه طمني من اظل انتظر سراي

تحجي ع التسهيل ومرات ربع ساعه وتخلصين

فضلت الطبيعي رغم خوفي بس كلت احسن

من العمليه حته مااكلف ام رنا ويايه..

حاليا بشهر الثاني من سنة ٢٠١٧ الجو بارد

ويه كل نفس اتذكره

ويه كل رمشه عين اشوفه كدامي

حنيني زاد وخاصه بهاي الاشهر

احس نفسي محتاجته حيل

صرت مدمنه ع الاغنيه حاير بيك وحاير بيه

الفتحهه بالسياره

من اسمعهه واغني بيهه اتذكر هذاك

اليوم وشكد انغثيت يم اهله

وشلون بجيت بالسياره ...

كل ذكرى حلوه اتذكرهه لازم

تتخللهه ذكرى مره هي هاي ايامي

فرحهه قليل وحزنهه هو المسيطر..

جنت كاعده الساعه ب١٠ الصبح وحسيت

بالم بالمثانه كلت هسه يروح

صار بي ومايزداد دب الخوف بكلبي

ياربي احمي طفلي بعدنه ٥ ايام بالثامن

مابيه خساره بعد..

الهي نفسي بالايات حته انسه الالم

بس الظاهر هاي ولاده ومااعرف

صحت ام رنا ام رنا

تشنجت ماكدرت اتحرك

اجتني تركض صادفت نصف السنه

وعطله هي وبناتهه بسرعه لبستني

واخذت شكم قطعه للطفل وكالت

كومي اخذج هاي ولاده..

بهاي اللحظه العمري ماانساهه

روحي صارت ببشار ابجي بحرگه

واصرخ بعلو صوتي من الالم

واكلهه خلي يجي اريده!!

وصلتني للمستشفى وخابرت ع السكرتيره

يكلولهه ام احمد هي تلكتني واخذتني

للصاله روحي رايحه مااكدر امشي

احسه راح يوكع اكلهه خلي اكعد خاف يوكع بالكاع

ويتعور!!

دارتني ام احمد رغم الصاله جانت متروسه

وكلهه تطلك وكلمن تصيح ياروحي

بدت روحي تغيب نبضات كلبي تزداد

احس صابني غثيان شفت كل الصاله

افترت بيه عيوني غوشت بس صوت

الصياح وصوت انيني جان ظاهر

ماحسيت ع اي شي وماادري

شلون انغمى عليه

بس ضربتني الابره كالت هسه تخليج

اطلكين اسرع ذابت روحي ...

اسمع الاصوات بس مااكدر افتح عيني

ابني وينه؟ اريد ابني

ماسمعت صوته وين ابني!؟

هاي الكلمات جنت اردد بيهه اول مافتحت

نايمه ع السديه والمغذي بيدي

والدكتوره تحجي ويه الممرضه ودكلهه

عينكم عليهه جان. خسرناهه ضغطهه راد يصفر..

مديت ايدي ع بطني اتلمستهه

فتحت عيني بوضوح كمت اشوف ام رنا واكفه تسمع

لكلام الطبيبه كتلهه ابني!!!!

حجيتهه واني كل اعظائي ترجف

صداع قوي والم داخلي

كلهه تراكمت عليه

اجت ام رنا يم راسي بس وجهه مگلوب

باستني من كصتي وكالت الله يعوضج

حبيبتي!!

كافي عليه الصدمات الللهي ارحمني

انهاريت بسرعه كمزت من مكاني رغم الالم

ورجليه مااكدر اسدهم بس احس

انتزعوا روحي واخر ماتبقى مني..

الدكتوره.. حبيبتي قبس الطفل ميت ابطنج

وهو بالثامن ونسبه العيش ضعيفه..

قبس.. لااااااا ماميت لحدما دخلت للصاله

واني مخليه ايدي ع بطني وهو يدفر بيه

اني سمعت صوته وبعدين انغمه عليه

وين ابني وين اخذتوا؟! ام رنا حذابين

هذوله بدلو ابني لو خطفوا اني سمعت صوته

من طلع مني سمعت صريخه

وين ام احمد هي جيبتني اني سمعت

الصوت لاتجذبون عليه ابني

وينه؟ كومي ام رنا كومي جيبي حتلو ميت..

جنت مستوعبه وبكامل عقلي والدكتوره

تهز راسهه بأسى وعبالهه اني مجنونه

عبالهم تخبلت هسه

بس اني اريد اشوفه حتلو ميت

صوتمن سمعت؟؟

الدكتوره.. ماما الوياج هوايه جابن واداخلت

عليج الاصوات من التعب اني استلمت ابنج

بيدي اخذته لطبيب اطفال حاول ينعشه

بس للاسف مابي نفس..

ام رنا تجين وياي اعلمج تكملين

كل الاوراق وانصحج لاتشوفه

لان حالتهه انتكست وهي حاليا بدور صدمه

راح ترجع لنقطة البدايه..

قبس.. اخذوني اشوفه خلوني ابوسه اخر

مره!!

امشي اسحل بروحي ام رنا وام احمد لازماتني

اخذوني للخدش كومه اطفال بس ابني

ماكو..

طلعتليا ملفوف بالملابس الي اشتريتهم

مثل الملاك ونايم بوسته وشميته

بجيت بالم وعقلي رافض يصدك

حجيت ويه ام رنا كلبي يوجعني

موابني ام رنا اني ام احس بي

شوفي كلبي مارف علي شوفيني

ماانهاريت وشوفي حته مايشبهني ولايشبه ابو

ام رنا خاف بدلو ..

ام رنا.. حبيبتي كولي يالله شيبدلون

اني واكفه بالباب واسمع صريخج

واجت ام احمد لافته كالت الطفل

ميت بطنهه مالحكنه علي..

واني ركضت للدكتوره جانت ماموجوده

واجت واخذته لابو الاطفال وسوله انعاش

بس روح مابي يابنتي

الله هو انطا وهو اخذه

قبس.. ليش انطا ليش اتعذب هلكد

ليش اجيب ويندفن ابني وحته ابو مايدري

ليش فهميني ليش اني من دون البنات هيج

ايامي سوده فهميني ليش؟؟

ام رنا.. حاجت الممرضه اخذي يمه متشوفين

حالتهه اخذوا مني بس عجيب امري

ليش كلبي مارف ليش قبس موهذا ابنج

ليش كلبج مانزف وانتي تشوفي

عقلج شيكول اذا مجنون اتوسلك تسكت

اخذتني ام رنا من ايدي للغرفه الدكتوره

اجت فحصتني كالت عندج خياطات هوايه

ديربالج انتي هسه ماحسيتي بروحج شلون

كمزتي بس نازفات موزين عليج..

ام رنا خابرت ابن عمهه هو يجي

يتكفل بدفن الطفل

بعد ماودعته وودعت اخر خيط

فرح بحياتي بعد ماجنت حاملته ابطني

رجعت واني مااملك من هاي الدنيا

الطردتني وحاربتني غير آهاااتي ووجع روحي

.

.

يتببببببببع.... احبكم

قمع المشاعر.... الخامس والعشرون من الجزء الثاني...

للكاتبة زهراء ( روزايه)...

مشاركه من متابعه عزيزه

قبس.....في عشقك لا أقبل أن ينافسني

أحد فيك أنت لي وحدي نضراتك

وابتسامتك همساتك ضحكاتك

كلماتك حتى انفاسك!!!

اني احبك حبآ يتجدد في صدري كل ليلة

حبآ أزاح عن قلبي رتابة الحياة...

بشار ...كيف لي أن أرى غيرك

وانتي في حناية قلبي كيف وانا

معك اعرف لذة الأكتفاء

حبي لكي ليس كباقي العاشقين

محبتي توبة الخطائين فهل التائب يرتد عن دينه

من أي خيوط نسجت تلك العينان

لتسرق قلباً لايرى سواكي

....

قبس.. فتت من يم ممر صالة الولاده اسمع

صوتهن وهن يتألمن ياترى هم راح يموت

هم اكو مثلي فاتت كلشي مابي طلع ميت!؟

كدامي مره جبيره اجت تمشي سريع

وياهه دكتوره بعدهه صغيره مبينه مقيمه

المره تبجي ودكلهه ابنه مات من وراهن..

ام رنا تسحل بيه لان شافتني صفنت ع المره

هاي هم مثلي يموت ابنهه ويكولن مختنك

يجوز هن موتنه ..

طلعتني للسياره روحي مطحونه

اريد اصرخ اريد اصيح بعلو صوتي

بعد شنو الماشفته شنو المعانيته واني بعز شبابي..

حالتي النفسيه صفر وصلنه للبيت

ام رنا ماعافتني ابد وتحجي وتذكرني

هذا ابتلاء والله يحبج ويختبر صبرج بعزيز گلبج

قبس.. انتي ام وكلبج يحس اني كلبي يوجعني

مامرتاحه اني والله سمعت صوته بس انغمى عليه

هبط ضغطي سمعته وحسيت بي من تجره.

ام رنا.. تدرين ياقبس خوفتيني حته رحت للدكتوره

كتلهه صاحت بيه ورزلتني دكلي مامسموحلج تحجين

هيج الكادر عدنه امين وابنكم مات

وطلعتلي اسماء كالت شوفي هذني الفجر بالعمليه اثنين

ماتو يعني موبس انتم مرات انسجل وفيات

اكثر من الولاده..

قبس.. انتي شفتي؟

ام رنا .. اني واكفه بالباب وطلعت الممرضه شايله

طفل يصرخ اخذته للخدج سالتهه ابن منو كالت ماادري

ورا شويه طلعت ام محمد جابته كالت ميت..

قبس حبيبتي انتي تعرفين شي والله بسمواته

وحكمته يعرف شي عاقبة ابنج راح تكون عاقبة

خير عليج الله ماياخذ اذا مايعطي البي صالح..

مامقسوملج يا امي اني اول واحد ولد جبته

بعده مطالع الاربعين وهو يرضع ع صدري

شخط ومات حاسه بيج وعبالك اليوم انعاد كدامي..

بس لاتاذين نفسج لان ماراح ترجعي اكو رب

رحيم اني سامعه هواي حالات تبديل وخاصه اذا ولد

بس اني هسه اروح اتهم بدون دليل انتي انغمه عليج

وماشفتي ابنج..

قبس.. الله كريم.. الله كريم

....

شجن.. هدى وفاديه رجعن وهاي تعودنه كل اسبوع

زعلانات ماما شكل وياهه ضغط وسكر اثنينهم

وتتوسل ببشار دائما اخذني لقبس اشوفهه

يكلهه ماتريد تشوفكم حته اني ماتريد تشوفني..

وضعنه مثل ماهو ماكوشي جديد بس

المشاكل وفلان حجه وفلان تعارك

غيث بعده ع نفس السالفه يدز ناس وهالمره

بشار اليطرد

سمعت من ماما دكول غيث يكله لاخر يوم

بعمري اظل اتقدملهه وبشار يكله لاتخليني

اخرب وياك اختي ماتنتمي لعائلتك للموت..

فاطمه بعدهه يم امهه والحجي عليه

مثل المطر كامن يحجن لجيران ويجن

يلومن بامي ويكلهه ليش تهجم بيت بنت عمتهه

ماما ماتتحمل تعبت حيل صارت روحهه كصيره

وعمه بشرى مااجتنه ابد وحته ماتحاجي الكل

بس نتواصل اني وياهه..

اسراء نفس طبعهه مالهه علاقه بس تساعدنه بالشغل

احنه بعطلة نصف السنه بعد اسبوع

ونرجع للدوام

بهاي الفتره موعطله بس هي تطلع

ياخذهه السايق دكول للمختبر

مره سال بشار عليهه شعدهه تطلع هلكد

وماما كالتله تدرب..

كال وشكو هلكد تدرب هي بمسوؤليتنه

اذا صار شي مرجعهه علينه خلي تكعد

وتسكت ليش منطيهه هلكد مجال اظل

اركض وراهه صغار انتم ماتعرفون الغلط

بوقتهه تلاغه ويه بابا وكاله ممنوع تطلع بعد

وفعلا بابا كالهه بعد لترحين وهي الظاهر

سمعت بشار وعرفت هو المنعهه

اشوفهه تلوب تفتر ولازمة تليفونهه بيدهه

حته شكيت عدهه علاقه بواحد ومتكدر

اذا متلتقي بي..

خلصت العطله واول يوم داومنه بي اني

رجعت من وقت لان ماكو محاضرات

ومن رجعت هي بعدهه مجايه..

الساعه ب٣ ونص ضبط اندك الباب

هي من عادتهه تسحب الحبل وتفوت

جنت كاعده يم ماما بالمطبخ اسولفلهه

على الكليه والبنات صديقاتي

كامت تشوف الباب واني اباوع من الشباك

فتحته جانت اسراء وشايله طفل بيدهه

وجنطه مال طفل انطته لماما وشايله كتبهه

صايره هوسه..

اجت ماما وهي تمشي وياهه لحدما طبت

للمطبخ عاطت ماما بيهه منين هذا الطفل؟!

اسراء.. ع كيفج خاله خلي اخذ نفس

هذا الطفل ابنكم قبس جايبه وعايفته

عند القابله ماتريده

ماما مااستوعبت الخبر بالاول صفنت بوجهه

ورجعت باوعت بوجه الطفل اختل توازن

ماما وهي شايلته بسرعه اسراء اخذته

وماما وكعت بالكاع

كمت اصيح واجت بيبي ع صوتي

رشيت عليهه مي ومخليه راسهه

بحضني وابجي والطفل شالنه بالصريخ

واسراء اخذت ليجوه ..

انتبهت ماما بس فتحت عينهه كعدت ع حيلهه

كامت ادك ع رجليهه ماتعرف شتحجي

لازمه ايدهه خاف تاذي نفسهه

بس ماما حيل انهارت..

بيبي ركضت صاحت صابرين

واجت ع الصوت لازمه ماما من اديهه

وتصيح شلون فهموني شلون ؟؟

بدت تهدء ماما وكلشي ممفتهمين

صاحت اسراء جيبي اجت اسراء

مبدله ملابسهه وشايلته دنكت ع ماما انطتهيا

الطفل يناشغ من البجي..

حضنته ماما وتبجي وياه يباوع

لماما ويبجي وهي دموعهه تنزل عشره عشره

بين المصدكه وممصدكه..

حجت بيبي كل عقلجن ابنه هذا الله اعلم ويامن غلطت

كل هاي الفتره وذبت بلاهه علينه

اكو ام تعوف ضناها..

ام بشار.. اسكتي خاله بروح ابنج اسكتي

عود خلي يجي بشار وهم ذبي سمج هذا

بس هالمره اريد اطلع صدك موخوش..

التفتت ع اسراء تعالي احجيلي شوصل

الطفل يم وشمعرفج بالقابله وامه وين؟؟

اسراء.. خاله اني قبل اشهر بحدود ٤ الاشهر

شفت قبس بالمستشفى وجانت لابسه خمار

واني ماكلت لان شفت بشار ماحجه عن حملهه

كلت هالشي راجع اله ..

جانت وياهه وحده متوسطه بالعمر

وماكدرت احاجيهه لان طلعت بسرعه

وكلت يجوز هي نفسهه المكعدهه يمهه ..

اني اعرف وحده قابله لان تجي هوايه

للمختبر وبيوم الشفت قبس

حجيت ويه القابله لان تشتغل عند الدكتوره

التراجع عدهه..

وانتم بهاي الفتره ماخليتوني اروح للمختبر

واليوم من داومت لكيت القابله بباب

المعهد تنتظرني وكالتلي هاي البنيه

السألتي عليهه عافت ابنهه يمي وانهزمت

بلكي تعرفين اهله..

ورحت وياهه اسالي ابوحسين

هو اخذنه وجانت مخليه الطفل ابيتهه

كالت جاي بالثامن وعمره ١٠ ايام

اذا متعرفين اهله حته اودي لدار الايتام

من جاي شويه حالته الصحيه موتمام بس دكول

دخلت بي مستشفى وهسه صار زين

واني كتلهه اعرف اهله واخذته منهه

خاله مااعرف شسوي وشتصرف بس

انقهرت ع الطفل حيل شنو ذنبه

وهاي كدامكم تاكدو اذا ابنكم

صابرين.. كلام مايدخل العقل احنه وين عايشين

اكو ام تعوف ابنهه قبس يتيمه مستحيل هيج

تسوي خاف اكو غلط بالموضوع

خاله خاف القابله باگته منهه..

اسراء.. شتحجين انتي القابله حته ردت انطيهه

فلوس الحليب ماقبلت كالت لوجه الله

ليش متعجبه هوايه اختارن حياتهن وعافن اطفالهن..

ام بشار... اسكتن لاتحجن ولج شجن شوفي عيونه

سبحانك ربي صورتهن باحسن صوره

نفس عيون امه..

شجن.. ماما شوفي ينطي شبه لبابا حيل

بس عيونه على امه شوفيهن عبالك مرايه

شلون رصاصي صافي..

ام بشار.. كومي جيبي حليبه وينه

وجيبي تليفوني خلي ابشر اخوج بمصيبته

بعد شتحمل ياابني..

وانتي اسراء جيبي رقم القابله اريد

اروحلهه واسمع منهه واشوف قبس

شلون سوت هيج؟!

شجن.. سوت ممه وانطته مبين جوعان حبيبي

خليته بحضني العب بخدوده منفوخات ويباوعلي

بعيونه الحلوه ..

اتصلت ماما ع بشار مارد عليهه

كالتلهه صابرين خاله انتظري يجي من دوامه

خاف يتخربط هناك ومحد يمه ترى اكبر رجال ينهار

بهيج موقف

ام بشار.. راح اخابر سرور تجي يجوز تعرف

القابله

اسراء.. خاله هي المره شنو ذنبهه خطيه

تدخل تحقيق وهي بس ساعدتنه لو ماالله يحب

هالطفل ماخلاني سالتهه بذاك اليوم

ام بشار.. راح ناخذ راسهه هن شكم سؤال

بلكي اكو خيط يودينه لقبس ولاعبالجن تسويهه

اشك ببناتي يسونهه وهي ماتسويهه

لازم اكو سبب ..

صابرين.. اني هم خاله قبس مومن هذا النوع وهي

يتيمه شلون تعوف سندهه الوحيد تذكريهه

شكد تحب علوش وحنينه علي هي تموت ع الاطفال

ام بشار.. اسكتن خلي احاجي سرور

فتحت خط كالتلهه بسرعه تعالي لبيتنه راح ادزلج

ابو حسين وسرور جانت رايحه للعياده كالتلهه

لادزي اني راح اجيكم..

اخذته مني ماما وكامت تهز بي نام بسرعه واسراء

وضعهه مربك وهي مرتبكه تحاول

تسوي نفسهه طبيعي بس بينت عليهه..

اجت سرور سلمت وكعدت وعينهه ع الطفل

البحضن ماما حجت باستغراب منين هذا الامير الحلو؟؟

ام بشار.. ابن بشار وامه قبس !!!

سرور.. استغربت وكالت شو بشار ماكال قبس

حامل!! واذا ابنهه هي وين؟ وهذا الطفل

مومال البارحه جاي اقل شي اسبوع لعد بشار

ميدري بقبس جابت؟؟

شجن.. عيني مانزلت من اسراء فدمره صار وضعهه

سوت نفسهه تغسل بالسنك بس اني انتبهت عليهه

ارتبكت حيل!!

ماما سولفت لسرور بالتفصيل وهي ساكته تسمع

رفعت راسهه لسرور وكالتلهه شو اسراء

تعالي اكعدي فهميني

اسراء.. حجت بنتر وياهه شفهمج؟؟ كلساع اعيد

مثل ماسولفتلج خالتي

سرور..لتعيطين!! وليش مرتبكه اكو شي منعرفه

وين القابله اخذيني لبيتهه اريد اخليهه فرجه

للكادر الصحي وعند يادكتوره تشتغل؟؟

اسراء.. ماادري يادكتوره والقابله مجيبتهه بالبيت

شجن.. موهسه كلتي من اجت قبس عرفتي اسم

الدكتوره وسالتي القابله لان تشتغل عدهه؟؟

اسراء.. لااا موهيج اني اعرف القابله لان تجي

للمختبر وكالت اني اشتغل ويه طبيبه نسائيه

سرور.. اووك زين انتي ليش سألتي القابله

على قبس شمعرفهه بقبس مثلا الالف الموجودات

ليش اله هاي القابله ؟؟ وهي وين تعرفهه؟؟

اسراء.. هااا ماادري كالت اتراجع هناا وكايلتلهه

من اجيب اريد بلبيت ماريد بالمستشفى

سرور.. يعني اوراق قبس موجوده هسه بالمستشفى

هاي نكدر نعرف الصح وين؟

زين قبس شلون وهي جايبه طبيعي وبالبيت وكدرت تنهزم

وين القابله عنهه؟؟

اسراء.. هي موجايبه ومتوسله بالمره كايلتلهه اخذي

لدار الايتام لو انطي لناس ماعدهم ودكول حالتهه الصحيه

موتمام وماخذته هي دكول غلطت!!

سرور.. انتي موكايله لخاله انهزمت!؟

اسراء.. هو اقصد انهزمت وعافته عند المره

سرور.. اذا القابله تولد بالبيت معناتهه مجازه

ماكو قابله بدون اجازه هاي شغله والشغله الثانيه

دائما البكر يجنبون ولادتهن بالبيت وهالشي بالسنوات

الاخيره صار علي مسوؤليه

اني راح اتبع السالفه وارفع شكوى ضدهه شلون

ولدت ام بالثامن وبالبيت ...

اسراء.. زين لاتسوي شر مايجيك عفتن قبس

ولزكتن بالقابله شوفن هذيج ليش انهزمت

وعافتلهه لحمه!!

سرور.. ماكو ام تعوف ضناهه وهي حاملته ٨ اشهر ابطنهه

حته الحيوان يدافع عن صغاره واحنه بشر

احنه امهات عدنه امومه ولتقنعيني بهالكلام

هذا الطفل اما تبدل اما انسرق

قبس تحب بشار واكبر دليل تمسكهه بهذا الطفل

لوماعدهه مخافة الله جان نزلته من الاشهر الاولى

ليش تحملت ضيم الحمل وتشمره..

الحجيه.. هو رجلج مويكول يم صديقتهه وماتقبل

تشوف احد لعد مايدري بيهه حامل يعني جذب مايندلهه

وين واني اكول ليش ماتجي ولا يخلي واحد

يروحله طلعت منزله راسه وبعده يدافعلهه

شعدهه بخت بنت سميه..

سرور..خاله راح اخابر بشار اكله تعال اتعشه هنا

ومن يجي نحجيله لان ضغطه هاي الايام ميستقر ابد

وعبالك كلبه يعلم اكو شي..

تخيلي خاله اول البارحه للصبح يفرك بكلبه

اكله شبيك يكول الم قوي عندي ممرتاح

ام بشار.. سوده عليه ياابني اذا صدك قبس عافت

ابنهه الله يكون بعونك واذا انحرمت قبس

من ابنهه مااكول غير لطفك يارب العالمين ارحمهه

لهاي اليتيمه..

شجن.. اسراء راحت للغرفه كمت وراهه جانت لازمه

الفون تراسل بس بعدني مصره وضعهه موتمام..

ماما نومت الطفل يمهه واني كلساع اروح اكعد

يمه اباوعله حبيبي شكد بريء

مثل الملاك بس حزين خدوده حمر تقاسيم وجهه

ع بابا وبشار بس عيونه نسخه من امه ورموشه كثيفه..

اجه بابا وعمر وماما حجتلهم بابا ردت فعله مثل

ماما تخربط واخذ علاجه اجه شافه ودنك علي باسه

اسمعه يكول لماما لو مايشبهنه انكول هاي لعبه من اسراء..

اجه بشار والكل ساكت طلعت اني شفته كاعد

يحجي ويه بابا علمود الشغل كلساع يريدون يحجوله

ومايعرفون شلون يبدون..

تالي ماما كالت بشار يمه اريد اكلك بموضوع بس توعدني

تتقبله اخاف عليك

بشار.. خير ان شاء الله ترى ماعندي گلب

يتحمل صدمات بعد!!

ام بشار..بدت تحجيله بالتفصيل وتحجي

وتبجي وبابا يمسح بدموعه هم يبجي

سرور جانت واكفه وعينهه ع بشار..

بشار.. شنو هالحجي قبس تعوف ابني

وتنهزم !!! حجاهه وملامحه باهته وصار

وجهه بدقيقه اصفر عبالك جف من الحياة

سرور.. بشار هدي حالك لازم اكو غلط بس

ضغطك موزين عليك

بشار.. وينه!! كل كلامه مال واحد مصدوم حته ماكدر يكوم

سرور.. بشار موهيج الله عليك ضغطك موتمام هسه

تنجلط شوف وجهك شلون صار شوف نفسك شلون

عالي..

كام من مكانه وراح لغرفة ماما رحنه اني وسرور

ورا دنك علي جان نايم مالمسه بس يباوعله

مركز بي سرور حيل خايفه من ردة فعله

لان هادىء...

التفت علينه صدكتن فبس تعوف ابنهه؟؟

حتلو تكرهني بس ماتعوفه...

سرور.. قوي حالك اذا تخربطت هسه منو ياخذ

حقهه وحق ابنك اني وياك متعوفه ابد قبس

مومن هذا النوع لازم تقوي حالك وتعرف الاسباب..

كعد ع الجربايه ولزم راسه بيده ومدنك

سرور كعدت بالكاع كدامه ولزمت اديه

وتتوسل بي الله عليك قوي نفسك صحتك راح تروح

طلعت واني امسح بدموعي ياربي اكشف

الحقيقه اذا قبس هيج صدك عاد ماننقهر عليهه

بس مستحيل تسويهه اجه ابالي خاف مريضه

وبيهه شي وسوت هيج؟!

طلع بشار كعد بمكانه وكلهه ساكته سرور

ركضت سوتله ليمون علمود ضغطه شرب شويه

عادل.. ابني انت كلت قبس زينه وانت تروحلهه

بس ماكلت حامل؟! شكم مره طلبت منك ادليني بيهه

وكتلي حالتهه النفسيه ماتسمح وبس تصير زينه اجيبهه

الي افتهمنا هسه حته انت ماتدري بيهه وين وماتدري حامل؟!

بشار.. لا ادري

عادل.. شتدري؟ لعد وينك بيوم ولادتهه؟

وشلون جابت وانهزمت وانت ساكت؟!

بشار.. ادري حامل بس هسه مادري جابت وراحت

عادل.. يعني انت بهذيج الفتره تروحلهه

موجوده لو دفاعا عنهه دكول موجوده؟!

بشار.. لاموجوده واروحلهه وحامل بس كتلك

حالتهه النفسيه تعبانه والطبيب مانعهه من اي زياره

وماادري جابت

عمر.. يعني من رحت قبل عشر ايام دكول اسراء

عمر الطفل عشره يعني قبس اكيد مالكيتهه بالبيت

مادورت عليهه ليش ماكلت شو ساكت شنو صاير؟!

بشار.. كتلكم ادري وجانت موجوده بطلوا تحقيق

وياي هذا الموضوع لتحجون بي خارج هذا البيت

اليسال كولو اطلكت وكااافي

لاااا كل العنده حجايه يجي يشمرهه

ويروح اول وحده اخر وحده تطلك وتعوف ابنهه

احنه متفقين اتجيب واطلكهه حسب رغبتهه

بس سالفة القابله ماادري شلون صارت

واحتمال خافت مااطلكهه واختارت القابله

سدو الموضوع ابني يظل يم امي واني اشوف

سالفة القابله..

الحجيه.. منو يكول ابنك؟؟

بشار.. صاح بصوت عالي لهنااااا حدج وحق الله

اليجيب كلمه بهذا الموضوع اطلع من طوري واشوفه

المايعجبه

بالذات انتي اذا نطقتي بكلمه مثل هاي

تعرفين شسوي ومايوكف بعيني لاحلال

ولاحرام

الحجي.. اهدي ابني بيبيتك ماتثمن الكلام

قبس بتنه والولد ابنكم ولا اول وحده ولا اخر وحده

تطلك وتعوف ابنهه سدو الموضوع...

شجن.. الكل سكت وبشار اخذ باكيت الجكاير

وطلع راد يروح ورا عمر وماما كالتله عوفه يهدء

بعده ممستوعب الخبر ...

بهذا اليوم محد اتعشه سرور ظلت بملابسهه مال الدوام

لان ماما كالت بشار يبات هناا مااخلي يروح

خاف يصير بي شي!!

طلعتلهه دشداشه من ماما لبستهه لان هي ضخمه

مانتلابس اني وياهه ابتسمت تذكرت قبس..

جانت من تلبس ويايه دكلي ولج شعرضج

واني اكلهه انتي جنج عصفور مهلس

اني جسمي هو المرغوب وهي بحركتهه المعتاده

تخلي ايدهه ع خصرهه ودكول لاعيوني

اسألي اخوج وشوفي شلون راح ينسحل؟!

كلشي صار ذكريات وياهه وماتركت

غير اثر طيب بحياتنه مايوم زعلت علينه

ولا رفعت صوتهه

جانت فاديه وصابرين يتعاركن ع المواعين

دكوم هي تغسلهن دكول حلآ للمشاكل

خاف يسمع عمر ويكتل صابرين خطيه

وتالي حته صابرين خوش جازتهه

ولاواحد اتذكر طيبهه وكال

خطيه وغزر الملح بعيونه...

اسراء اعتكفت بالغرفه وسوت نفسهه نايمه

لان اشوفهه كلساع تتحرك وسرور كاعده يم الطفل

تبوس بي وتسولف هي وماما..

بشار طلع وهو هاي طبيعته اي خبر

صادم ماتبين ردة فعله يروح يدخن ويفتر

يله يجي..

صارت الساعه ب١١ رجع بشار بابا جان ينتظره

برا واكف ظلو شكد يسولفون بس بابا يحجي

وبشار ساكت اخر شي بابا طبطب ع اكتافه ودخل..

بشار كعد بالحديقه وهاي تكررت الحاله

ماجان يكعد هيج ينزل راسه ويلزمه باديه

جنت واكفه بباب المطبخ اباوعله

واجت سرور شافته طلعت يمه

واني تقربت ع الحديقه وكعدت بالكاع

بالطرمه بعز البرد احس كلبي نار

ع قبس ..

سرور كعدت بمستواه ونفس الحركه لزمت ايده

تحجي بصوت خافت كلمه اسمعهه وكلمه لاااا

سرور.. لخاطر ابنك هدي حالك اعرف الموضوع

جبير وصعب وماكو رجال يتحمله

بس بهيج وضع تخسر صحتك  وتخسر ابنك

قبس ماتسويهه تذكر من طلع طفلهه مشوه

شصار بيهه المثلهه ماتسوي هيج تصرف

اذا تريد تكسرك موبهاي الطريقه هذا ابنهه

اكو شي مبهم واني وياك لاخر لحظه

واوعدك سرك هو سري شتفقنه بشار

مو انكون اصدقاء خليني اساعدك خليني

اشاركك بافكارك..

بشار.. ماعندي افكار هسه كل فكري اسراء

وراهه شي بس بشنو اواجهه منيلي دليل

مااريد اي شي بس اعرف قبس وين؟؟

سرور.. احنه هسه نتصرف طبيعي واني

وياك انروح للقابله واشوفهه عند يادكتوره

تشتغل شلون ولدتهه بالبيت وهي بكر

احتمال باگته احتمال بدلته ..

اني شايفه العجب اكو منهن يغلطن وابن

حرام ويتمسكن بي ويضحن بكلشي

بسبيل طفلهن شحال قبس ماعدهه غير

هذا السند والاكبر هو منك ماتكدر تتخلى عنه..

بشار.. عوفيني وحدي راسي مخربط

خليني اهدء حته اعرف افكر

سرور.. بشار الله عليك اتوسلك تنطيني

الطفل اربي ادري بيك ماراح تقبل وراح

تعوفه هنا بس احلفك بداعة امه خليني

اربي اني!!

بشار.. مو وقته هالحجي هسه يظل يم امي

وبعدين الله كريم

سرور.. لا خليني من اليوم باجر انسويله

بيان واني اربي الله عليك تدري بيه

عمري ماراح اصير ام وانحرمت من الامومه

خليني اربي والله احطه بعيوني منا لمن تجي امه!!

بشار.. سرور كتلج مو وقته هالحجي

وانتي دوام مااكدر اخذه ويوميه جايبه لاهلي

ويتبهذل

سرور.. اني اظل هنااا مااروح شعندي بالبيت

وهم اريد اراقب اسراء

بشار.. الله كريم عوفيني هسه

سرور.. مااكوم تريد تظل تاكل بروحك

من هاي اللحظه انفكر سوه اليد الوحده

ماتصفك ولازم نتعاون حته نعرف السالفه ..

اسألك سؤال واعرف راح تعصب

بس كلي انت هم شاك بالطفل لان كلام

الحجيه موحلو؟؟

بشار.. سرووووور!!! اياج تحجين هالحجايه

بعد ادري بقبس حامل بس هي ضمته عني

وهسه مابيدي شي اسوي..

هالمره حجيتيهه المره الثانيه مايصير خير

سرور..اعتذر وعافته وكامت

شافتني كاعده ودرت بيه سمعت حديثهه

طبت جوه ظلت الليل كله سهرانه ويه الطفل..

ثاني يوم ماراحت للدوام واخذوا الطفل

سوتله بيان وسجلوه بأسم قبس

هي بسرعه رتبته ورجعت ب١٠ شايلته

تلكتهه ماما شسماه ابو ابتسم

وهي تبوس بي الحلو اسمه

امير ..

انطته لماما وكالت بشار واكفلي برا

راح اروح عدنه شغل شويه ونجي

جانو هواي يطلعون مرت يومين

مايجون لليل بشار منع الطلعه عن اسراء

حته للدوام بس الشي الغريب

ليش ماسالهه عن اسم القابله

هي تلوب وكلساع وكالت شو ماسالني

ع القابله وشو ماراحوا الهه اسالتهه

هواي واني ماعندي جواب..

من رجعت سرور من الدوام بهاي الفتره

ظلوا يمنه ومرات بشار يبات ابيته

واول مايجي يشيله ويبوسه من عيونه

هاي بوسته المفضله حتلو كاعد يبوسه..

سالت سرور ليش مارحتوا للقابله

بلكي تعرفون شي؟!

ردت عليه ومنو كالج مارحنه

شجن.. شو ماسالتوا اسراء شلون اندليتوا

سرور .. من ابو حسين ماكو داعي نسالهه

شجن لدكليلهه اي شي واني مراقبتهه وانتي

عينج عليهه ابد لا تفرغين عنهه..

شجن.. عرفتوا شي؟!

سرور.. ماكو شي يظل مضموم هسه مااحجي

خلي نتاكد زين ..

شجن.. يعني شنو؟؟

سرور... اكو ايه بالقران دكول

{وَلَا تَحْسَبَنَّ اللَّهَ غَافِلًا عَمَّا يَعْمَلُ الظَّالِمُونَ ۚ إِنَّمَا يُؤَخِّرُهُمْ لِيَوْمٍ تَشْخَصُ فِيهِ الْأَبْصَارُ}

والظالم ايامه قربت بس بعد فوات الاوان

بعد ماقبس اختفت نهائيا

راح اطمنج ياشجن براءه قبس

قريبه حيل واخوج حاليا بوضع

ماكو غير الدعاء يخفف عنه واخاف يتهور

بعصبيته ويضيع هاي ركضته

متشوفي حته مايجي يشوف ابنه!!

شجن.. كلام سرور غريب بس

دعيت الله ينجي قبس واخوي

من كيد الظالمين..

...

قبس.. مااتذكر اي شي كلشي مر عليه

بهاي الفتره من خروجي من المستشفى

من ضياعي ومن فراك ابني مااتذكر اي حدث

دخلت بطور العزله جانت تحجيلي ام رنا

شصار بيه بهذا الشهر مااكل ماانام

عيوني مفتوحات حته صارت بيهم

حساسيه ونظري بده يقل

الدموع ماوكفت ابد من عيوني

دكول كلما احاجيج دكليلي ابني

اريده!!

هاي الفتره حته اصعب من خطوبة

بشار حته اكثر صدمه والم من يوم

زواجه ..

سناء تتصل عليه مااكدر احجي

تجي ام رنا دكله تكدرين تحاجيهه

اهزلهه راسي لااا مااكدر اسمع

ولااكدر انطق حرف..

سناء هي وام رنا اتفقن وام رنا هي

وابن عمهه تكفلت بكلشي ومسوين اجراءات

السفر حته بدون ماادري..

بليلتهه اجت ام رنا حجت وياي كالت

حبيبتي سناء دزت عليج هم تغيرين جو

وهم تتعالجين نفسيتج تعبانه

واني حجيت لابن عمي وكال مدام رجلهه

صاحب مركز احتمال مبلغ المطارات خاف

تسافر راح انروح بالسياره لاربيل

ومناك نروح لتركيا...

ماعندي اي قرار اي كلام ونقاش

ماعندي جنت مسيره حته الحمام تاخذني

ام رنا وهي تغسلي وتمشطلي وتغسل

ملابسي لان ليل نهار صافنه بالفراغ...

طلعنه من بغداد عقولي يكول

ودعيهه بعد ماترجعين

وكلبي يكول لاتسمعي لابد يوم وتعودين..

جنت مغمضه طول الطريق مافتحت عيني

ولاشفت الشوارع بس النار

مشتعله بصدري  حته ماراجعت طبيبه

وهو يدر حليب..

وصلنه لاربيل وظلينه ساعتين ننتظر

الرحله لتركيا ام رنا هي وبناتهه ويايه

صعدنه وانقلعت الطائره اتذكرت اليوم

الي اجينه بي شلون جنت لازمته خايفه ..

طلعت من العراق خاليه ماعندي غير

ذكريات مره !!

عشت ببغداد وحيده وتركتهه وراح

اعيش بنار الغربه وهيهات ارجعلج بعد!!!

.

.

يتبببببببع....احبكم

البارت القادم انكشاف الحقيقه حضرولنه حفله

انريد نفرح بعد قهر وحزن طويل

قمع المشاعر.... السادس والعشرون من الجزء الثاني...

للكاتبة زهراء ( روزايه)...

( البارت طويل مقدار بارتين ومختص بكشف

الحقيقه فقط)

....

شجن... اسراء بهاي الفتره بشار شدد عليهه

منعهه من الطلعه حته الدوام صارت بالاسبوع

تروح مره لومرتين حجت ويه بابا بأن راح يفصلوهه

وهي اخر سنه وماظل شي وتتخرج

كالهه بابا بشار مايقبل انتظري شكم يوم

واني احاجي وكل هذا ومنعرف السبب شنو؟؟

سرور يمنه متروح لبيتهه تروح للدوام ومناك للعيادة

ترجع بليل تستلم امير وتظل سهرانه وياه

مرات تخابر بشار وتفتح وياه كاميرا يشوفه

لان مايجي النه غير صدفه...

الكل عرف بسالفه الطفل هدى وفاديه وبيت

عامر بس كلهه تعرف قبس اطلكت وعافت ابنهه

ورا ماانتشر الخبر اجت عمه بشرى وهاي

اول مره تجي من يوم خطوبة بشار

من اجت تعاركت ورزلتنه وراحت.

اخذت امير بحضنهه وتبجي حته هو انفزع

ماما تسكت بيهه وعمه مستمره تتحسب

ع الكان السبب ؟!!

ايام مرت احنه ع هذا الحال اموري صار عمره

شهرين ضبط ومدنفش غيرو اله الحليب

بسرعه تحسن وعبالك مو بالثامن مثل ماكالت اسراء ..

بيوم من عدهن كلنه ماننسى دائما ماما دكول

هذا مثل يوم عزه عمج رضا وعائلته من جابو ميت

لان هيج بيتنه صار!!

اجت سرور من الدوام وهالمره ماراحت للعياده

تكفلت بامير بدلتله وغسلت وصاحت ع صابرين

تاخذه يمهه!!

ماما سالتهه ليش شكو؟ عوفن الولد لاتصرفن من

كيفجن مونايم وين موديته..

سرور.. خاله بشار كال ودو وهسه شويه ويجي

وتعرفين السبب..

شجن.. اسراء تسأل شكو وبيبي تصيح صايره

سرور ام البيت وتتحكم بكيفهه

عجيب امرهه لارضيتي ع قبس ولا ع هاي

شنو غايتج اله فرح جان سكتت!!

جانت الساعه ب٥ العصر اشوف سرور

تليفونهه بيدهه وكلساع تطلع تخابر وترجع

اسراء تقره عدهه امتحان واني كاعده يم ماما..

شويه وطلعت سىرور كالت خاله تعالي للاستقبال

شفت بشار من الباب الرئيسي دخل ووياه مره

متوسطه بالعمر لابسه عبايه مال راس

ولابسه كله اسود..

تلكتهه سرور ودخلت للاستقبال اني رغم

رجلي بس هميت بسرعه اخذت المي ورحت

اريد افتهم لان راح يخلصوهه عليه الغاز..

انطيت مي للمره وبشار شرب ولازمه كلبي

كلساع اكول هسه يطردوني موضوع خاص

بس محد منتبه ع وجودي..

بشار حيل تعبان بشكل ماينوصف

مكسور مثل الفاقد او دافن احد بيده

كلساع يرفع الكلاص يشرب مي قليل

حلكه يجف!!

سرور.. اني راح اروح اصيح اسراء

بشار.. الحجيه وياج هم

شجن.. تقربت ع ماما سالتهه شكو؟؟

ام بشار.. شمدريني حالي من حالج انتظر شكو؟!

اجت الحجيه بالبدايه سلمت وكعدت ونفس

التساؤلات اجت سرور كعدت بصف بشار

وشويه وفاتت اسراء..

مو مجرد صدمه يمكن عمرهه ماراح تنصدم هيج

وكفت بالباب وتباوع باستغراب رجلهه ترجع خطوه

ليورا وعينهه ع المره الكاعده

صاح بشار بحديه ومبين صاك ع اسنانه

تعالي اكعدي بسرعه!!

ظلت واكفه بالباب يمكن حته السانهه انعكد ماتكدر

تحجي بس رجع عاج بيهه بصوت اعلى

مو وياااااج اني ؟!

تقدمت ومبينه الرجفه عليهه كعدت بالكرسي

الفارغ الوحده والتفت بشار ع المره..

بشار.. اي ام احمد هاي عائلتي كدامج احجي

ابني شيسوي عندج وشوصله؟ امه وين؟

ماتعوفه عند الغريب وضحيلي بهدوء

احسن ما توصل للمحاكم..

ام بشار.. انتي القابله؟؟ داده شفتي امه

جنهه فراشه رقيقه شلون تعوف ابنهه

غير تساليهه ليش قبلتي تعوفه يمج؟!

ام احمد..ابو امير راح احجيلك بس انت وعدتني

ماتاذي عائلتي واني امهم وابوهم ماعندي سند

هز راسه الهه بقلة صبر احسده على هاي القوه

والهدوء بوقتهه شلون متحمل وكاعد ..

ام احمد.. اني صار اسنين اشتغل بهاي الشغله

التجيب ابنيه وتريد ولد تدفعلي المقسوم وابدل

الاطفال بس شنو كله باتفاق وقبل مده اكون متحضره

لأي امر طارء..

قبس مااعرفهه بس تجي هي وحده تراجع عند

الدكتوره الي اشتغل يمهه اشوفهه البنيه حزينه

وكلما تفوت للدكتوره تطلع تبجي ..

راح دكولون شمعنى هاي انتبهتي عليهه

واكو هوايه مراجعات ليش بالذات هاي وحته

حافظه اسمهه؟!

اول يوم اجت بي جانت لابسه خمار واني يم

الطبيبه جوه ومن نزعت خمارهه ظليت صافنه

عليهه شكد حلوه حته الدكتوره من طلعت

كالت ماشاء الله شكد جميله..

ومشت عليهه الحلوه كلما تجي اكلهه هاالحلوه

لحدماعرفت اسمهه قبس رضا لان جانت تراجع

كل شهر تخاف ع الطفل ودائما اسمعهه

دكول لدكتوره ماعندي من الدنيا بس هذا

خليني اموت بس كون يعيش !!!

البنيه مستمره بالمراجعه وبيوم اجتني هاي

واشرت ع اسراء عبالي هم عدهه مراجعه

بس وكفت بصفي وكالت اريد منج خدمه

وبالتطلبي؟!

شويه وطلعت وراهه وكالت تعرفين وحده اسمهه

قبس رضا كتلهه اي هاي الحلوه حامل بولد وهسه

٥ اشهر

كالت اني اداوم بالمستشفى وسالت عنج

واكو شكم وحده كالت ام احمد تفيدج واكو

وحده ثانيه هم تشتغل نفس شغلج عند غير دكتوره

بس انتي احسن لان تعرفيهه

ام احمد.. يعني شتريدين؟؟

اسراء.. هاي قبس وحده هجمت بيتي واخذت رجلي

من عندي ضرتي وتالي اخذت ذهبي وانهزمت

بي وراحت وهسه حامل ورجلي مايدري

واني وياه واصلين للطلاق

اريد الطفل منهه حته اخذه لابو ومايطلكني

لان امه عليهه سمعة موزينه وشوفتني

صور ورسائل موخوش..

شجن.. جانت تحجي وبشار كلساع يريد يكوم لاسراء

بس سرور تلزم ايده

ام احمد.. المهم اني هاي شغلتي طلبت المبلغ كامل

وجان المبلغ جبير وظليت اني اراقب بقبس

شوكت تجي وشلون صحتهه

ظليت ع تواصل ويه اسراء وطمنتهه بس يوكع

الطفل اجيبه الج بأي طريقه اني جنت ناويه ابدله

مرات تصير عدنه تؤام ومرات بنيه وماتريدهه امهه

بس بهذا اليوم ٣ اطفال عدنه ميتين ...

قبس خوافه حيل جانت ناويه تسوي عمليه

بس اني كلما تجي اقنع بيهه واكلهه الطبيعي

احسن حته اسيطر ع السالفه وفعلا اقتنعت ...

من دخلت بالثامن اني حاسبتلهه كمت يوميه اداوم

حته اخذ امكان غيري خاف تجي واني مموجوده

واني حسيت بيهه ماتوصل لسادس

لان بطنهه نازله ونبهتهه الدكتوره تنام ع ظهرهه

وصدك بيومهه اجت قبس تطلك جانت واصله

ولادتهه واني قبلهه مجيبه اثنين اطفالهم ميتين

وحده ولد ووحده ابنيه يعني اجت عدله جنت

شايله هم شلون ابدلهم ومبين ع قبس وحده

قويه خاف تكشفني..

بسرعه انطيتهه ابره طلوگه رغم هي ماتحتاج

بس ردت اعجل بالولاده قبل لاياخذون الاطفال

انخليهم يمنه بين مانكمل الاجراءات واني مااشتغل وحدي

ويايه اثنين ممرضات يعرفن شغلتي ويساعدني

قبس ضعيفه بنيه ماتحملت الالم وبس جابته

انغمى عليهه ضغطهه وصل ٣ رادت تموت

واني اخذت الطفل الميت وطلعته للمره الوياهه

وام الولد الحقيقيه كنالهه راح ناخذه للخدج

وبعدين تستلمي وهي منا تعبانه ومبين ناس فقره صدكوا بسرعه..

كعدت قبس تصيح ابني اريده وكنالهه مات

انهارت كامت تصرخ وتصيح جذابين اخذتوا

ابني عايش جان گلبهه حاس كلساع

اكول هسه انكشف..

بس نقذتني الدكتوره لان فعلا اني سلمت طفل

متوفي والدكتوره شافته بيد المره يعني

ماكو لزمه عليه ..

اصرت اله تشوفه وشافته اني متقنه شغلي

كامل وعندي اكثر من طرف يساعدني

وكدرت اخذ الطفل .

عشرة ايام اتصل ع اسراء دكول ماكدر اجي

والطفل ليل نهار يبجي وعندي جهال صغار اكلهم

ابن صديقتي

لحدما اجت اسراء اخذته وانطتني تكملة الفلوس

لان استلمت عربون بالبدايه وهذا ابنكم يمكم

وامه عبالهه مات وماشفتهه بعد

جانت عدهه خياطات داخليه واني تعمدت اكثرلهه

حته تراجع واشوفهه بس الظاهر عليهه صبوره

وتتجرع الالم مااجت ولاشفناهه ...

ام بشار... الله اكبر.. الله اكبر

ياظالمه ولج ماخفتي ربج تدعي عليج دعوه

ماتكومين منهه ولج انتي تدرين هاي السويتي

بيهه يتيمه وماتتعده حوبتهه

شلون الج گلب سويتي هيج وحرمتيهه من ابنهه

ماشفتي لوعتهه مانكسر كلبج عليهه

الله ينتقم منج شر انتقام الله يبهذلج ويحركج

بنار جهنم المثلج حطب للجهنم ..

وانتي اسراء شنووووو انتي ؟؟ وصاحت بصوت

عالي اكلتي من خيرنه وعشتي بنصنه

شلون تسوين هيج وبعين وقحه اتجيبينه

وتجين واتهمين امه عافته

بشنو مأذيتج قبس كليلي شمسويتلج

وهيج عذبتيهه ؟؟

ام احمد.. اني هسه راح اروح ماعندي شي اكوله

بشار.. حذرتج والله اذا لعبتي لعبتج وانهزمتي

اجيج لو توصلين لاخر الدنيا وهالمره

اخليج تتمنين تشمين ريحه جهالج..

شجن.. مصدومه مااكدر اكوم طلعت المره وماما سدت الباب

اسراء كاعده ومدنكه صاحت بيهه ماما

مستحيه خجلانه ؟؟

رفعت راسهه وكالن مواني هاي تكذب

سرور.. ليش ماجاوبتيهه من جانت اسمعي لج اليوم

لو انتي لو اني وحق الله اليوم وياج لحد ماتعترفين

بسوالفج احجي انتي صاحبه الاتهام

اسراء.. انتي منو وتحجين وياي هيج خاف صدكتي

نفسج اخذتي وصرتي عود شوفوني الزوجه الصالحه

سرور... هههههه اني سرور وانتي اسراء

واليوم انشوف منو اني لو انتي!!

شجن.. بشار جان برا طلع حجه ويه ام احمد

من رجع بيبي كاعده ماتكدر تكوم وتصيح

الحيه بنص بيتنه نربي بيهه تكبر وتلدغنه

شمر تليفونه ع التخم وتقرب ع اسراء

كامت ترجع خطوات ليورا بس عينهه بعينه

مانزلتهه وتباوعله بحقد ..

صار قريب عليهه رفع ايده ضربهه راشدي

من قوته كلت تكسرت اسنانهه رادت

توكع ع الطبله ولزمتهه بس رفعت راسهه

ضربهه الثاني وكعت بالكاع..

محد ادخل بينه كام يضرب بيهه بس راشديات

وهي السانهه شطوله ومستمره تكذب

بهاي اللحظه دخل عمر وهو يصيح شكو ؟؟

ماما تحجي وتبجي وهو واكف مصدوم

ويكله حيل اكتلهه ادبهه انطينياهه ارجعهه ابطن امهه

ابتعد عنهه بشار وجر الجكاره فتحهه يدخن

وكالهه احجي ليش سويتي هيج بشنو مأذيتج ؟؟

اسراء.. مااحجي ولو هسه تشلع من لحمي

مااحجي واذا تريد روح دورهه وين انهزمت..

بس حجت هيج ركض عليهه جرهه من حجابهه

وكع اخذهه سحل من الاتستقبال للغرفه مالتنه

عمر مادخل بس سرور ركضت وراا..

طببهه للغرفه نسمع عياطهه وصريخهه

وهو يكلهه احجي وهي دكله لو تموت!!

ماادري شصار بس سرور كالت انفعل حيل

وهو كوه لازم اعصابه خاف تشتكي علي

لان هيج نموذج خطير

جانت بس سرور يم بالغرفه وهي شاهده

ع عصبيته دكول كام يضرب بيهه دفرات

ضرب راسهه بالحايط وبعدهه ترادد بي

الجكاره بحلكه شامرهه بالكاع وهي جانت

كاعده ضاربهه برجله اكثر من مره ع المنطقه

الحساسه يتهيئلي صوتهه هسه من صرخت

اصوات رجت البيت رج..

سرور تسحب ببشار ودكله لا موهيج بشار

بعدهه بنيه موهيج؟؟

بس فاقد جان يمكن قهر هاي السنه الضاعت

بالفراك يمكن لوعة قبس ع ابنهه كلهن

طلعهن بيهه حته مامنتبه شديسوي؟؟

لحد ماوكعت وانغمى عليهه وسرور

تملخ بنفسهه دكله بنيه بعدهه شلون

هيج تضربهه موتوكع براسك

سمعت بشار يتلفظ بالفاظ عمري ماسامعتهه

ماما صاحت بيه شعندج واكفه لان تدري

بي مامنتبه ع نفسه ..

طلع من الغرفه يفتح ويسد بقبضة ايده

ويمكن خدرت من الضرب وسرور قفلت الباب وركضت

جابتله ليمون شربه ..

بشار.. ممنوع واحد يفتحلهه الباب وممنوع تنطوهه سم

والي الكفه واصل يمهه ابتلي بي؟!

ام بشار.. خاف تشتكي علينه؟!

عمر.. ماتكدر .. خلي تعترف بالحقيقه واندز ع عمامهه

اذا ماكتلوهه اني اكتلهه.

ام بشار.. شلون تسوي هيج منيلهه هلكد فلوس منو

يدعمهه وقبس بشنو مأذيتهه؟!

عمر.. بشار كل عقلك هيج وحده ساقطه راح تعترف

بسهوله يابه اقسي عليهه انطينياهه خلي ازينهه صفر..

سرور.. يمعود عمر لاتحجي هيج دشوفه شلون ضغطه

معلك بشار مامنتبه شسويت والله خايفه من هاي الضربه

بشار.. اسكتي انتي لاتظلين تنگين يم راسي

لازم تحجي اني شاك بيهه بس ماعندي اي لزمه عليهه

كل التهم الصارت هي سببه خلي تحجي يله هذيج الساعه

اعوفهه..

سرور.. وماحجت شلون؟

عمر.. تحجي يمعوده زلم ومن تنكتل تزوع الاكو والماكو

روح بشار شوف اموري وانطيني المفتاح

بشار.. انت الثاني سد حلكك واياك توصلهه

عمر.. عمامهه يدرون بيه متزوجهه حته اني اكتلهه اعذبهه

مايحجون اكلهم مرتي شمدريهم مطلكهه دنطيني يخوي..

بشار... لا ماانطي راح اشوف امير ومناك

اطلع شويه وارجع ..

شجن.. كام هو وعمر طلعوا واحنه مانعرف شنسوي

بس سرور حجتلنه شلون عرفوا ام احمد

سرور.. من يوم الجابت الطفل كتله مدام شايفتهه بالمستشفى معناتهه اسمهه موجود واحنه نعرف المستشفى التدرب

بي اسراء..

ثاني يوم رحنه اني وياه اني اعرف كل الكادر

لان سابقا داومت بيهه اول شي رحت لصالة الولاده اخذت قائمه اسماء من دكتورة مقيمه راجعت التواريخ

اسم قبس موجود قبل عشرة ايام ومكتوب

ولاده طبيعيه والطفل متوفي سألت عن الدكتوره

مالتهه كالت دكتوره نبراس هاي اعرفهه اصلا هاي

استاذتي انسانه راقيه..

رحت عليهه جانت بالجناح الخاص كعدت وياهه

وحجيتلهه انصدمت حته المره رادت تتخربط

وهي دكلي مستحيل مستحيل بيدي طفل ميت

صح ماوكفت يمهه بس جابته الي المره الوياهه...

صاحت ع ام احمد وظلت تسال بيهه وهذيج

ماانطت لزمة ع نفسهه كالت الطفل متوفي..

من طلعت كتله لبشار كذابه ام احمد

معناتهه موهمين قبس وظل يومين يراقب

بام احمد لحدمالكينه بيتهه ورحنالهه

مااعترفت بالاول ...

بس تحت التهديد وقدم بلاغ عليهه واجتهه الشرطه

بتهمه سرقه طفل يله هذيج الساعه كالت

احجيلكم بس تسحبون الشكوه لان عيالهه يكتلوهه

والتقينه بيهه وحجت النه وبلحظتهه بشار

تخربط خاله لوتشوفين لوعته وهو يكول

شلون اتحملت هلكد شلون تحملتي قبس ؟؟

شصار بيج من كالولج ميت ؟؟

وهاي صارله ايام مايكدر حته يروح لدوامه

تدرين ماخذ اجازه ويظل بالبيت يكول

كلبي مثل النار كلساع ويريد يجي يسحلهه

وننتظر ام احمد تجي تعترف كدامهه

الحجيه.. موهاي تنكر هسه هي اجه بعينهه

وبعدهه تنكر

ام بشار..هاخاله شيكول ضميرج

من اتسمعين بعذاب بنت ابنج؟؟

الحجيه.. شمدريني مربين حيه ابيتنه عبالنه

صدك يطلع منهه هيج لان امهه سميه

ام بشار.. مو امهه سميه تشرف الف وحده

من عشيرتنه سميه جانت طفله مصيرهه بيد ابوهه

شكبرهه سميه كلنه ندري جان عمرهه ١٣ سنه ويطلعهه

للرفاق

حبت تعيش حياة امينه وبشرف واتزوجت ابنج

وتالي شحصلت هم تعذبت هي وهم انتم عذبتو

بتهه ولوعتوهه شحصلت كليلي؟!

شجن.. ماما موزين عليج راح تموتين

منا انتي ومنا بشار ع كيفج ويه صحتج

ام بشار.. ياكيفي ولج ياكيفي وين قبس

كلولي وينهه؟؟ بعدهه ولجن تلكن حته صدرهه

يدر ع حليب وعبالهه ابنهه ميت الله اكبر

ششوف ياظلم ياربي من البشر ..

شجن.. ساعه نبجي وساعه نسكت

سامعين باللعنه بس هسه بيتنه صارت بي

لعنه وارجع واكول حوبت قبس

صرنه حته ننسى وجبات الاكل يجي الليل

ومحد يكول وين العشه لان شبعانين

قهر وحزن..

صار الليل وبشار ماكو نتصل علي

مغلق واسراء محبوسه بغرفتهه

لحد الساعه ب١٠ يله اجه ..

اول مادخل كال هاي الساقطه طلعوهه من الغرفه

اخذيهه للمخزن اريد افتش غراضهه ماانتظرهه

شوكت تنطق وتعترف!!

كامت سرور اخذتهه للمخزن وقفلت الباب

وكام هو وماما واني ادلي بي اجت سرور

هي ادور قطعه قطعه !!

بلاوي مو بلوه وحده بنص الملابس اول مالكينه

تليفون مكسر بدون كاميرا وبي خط وشغال

لكينه مجموعه خطوط ٤ اسيا وكورك اخذهن بشار..

فلوس كله ورق ومااعرف شكد بس مبينات هوايه

رام وفلاش والمصيبه الاكبر

الفستان مال قبس ضامته بعلاكه سوده ومخليته

بين الملابس!!

شالته بيدهه سىرور وهي تباوع لبشار

بسرعه سحبه من ايدهه اشوف قبضة

ايده شلون يضغط بقوه على الفستان ..

ماما ماسكتت ابد بس تبجي وتصيح

الله اكبر ياظليمتج ياقبس !!

بشار.. شجن وين لابتوبهه جيبي

شجن.. هذا جوه الجربايه بس بي رمز

بشار.. روحي سرور خلي تنطيج الرمز قبل

مااجرم بيهه!!

سحب الشاحنه وخله التليفون المكسر تقريبا

بس شغال ينتظره يفتح وراحت سرور جابت الرمز

فتحهه مابيهه شي بس بحوث

وتقارير لذلك ماخافت وانطت الرمز..

سحب الفلاش والرام وبده يفتح واحد واحد

جانن كلهن برامج تهكير وصور قبس بالتفصيل

وهذني كلهن دازتهن الي ..

اباوع لايد بشار شلون ترجف وهو يحرك

بيهه اخر شي مانحس غير شمر الحاسبه

بالحايط تفلشت واحنه بوسط هدوء تام..

كمز من يمنه راح ركض عليهه بالمخزن

ونسمع صوتهه رادت تروح سرور

وماما منعتهه كالتلهه خلي يبرد كلبه

ولو جمرته ماراح تبرد للموت...

طلع من عدهه كعد ع الدرج صاح سرور

الباكيت والجداحه طلعله جكاره يدخن

اشرلي ع التليفون جبته ..

وهو هذا المفتاح جانت ماسحه المحادثات

مالكينه اي شي بس ٣ ارقام مخزونه

استاذ موفق!!

فرح!!

ميامين!!

راحت سرور طلعتهه من المخزن بنص الصاله

وحطت التليفون بوجهه وكالتلهه احجي منو هذولي

وشيسوي فستان قبس عندج؟!

جاوبت سرور بحديه وانتي شكو؟؟

لتحاولين لا انتي ولا رجلج مااحجي لو تموتون

هم رجع عليهه بشار يشحطهه شحط يكتلهه

وبعدهه ترادد ودكله اكتل يله عبالك اخاف!!

جانت الجكاره بيده مجمره نبتهه بكتفهه

صرخت حيل وهو ضاغط ع كتفهه لحدما

طفت وماحجت..

حار شيسوي بيهه ومااعترفت

واصلا تستفزه وتضحك بوجهه؟!

بهاي الاثناء اجت عمه بشرى

اني خابرتهه المغرب وحجيتلهه بس

جيتهه جانت متعاركه ويه رجلهه واجت تبات يمنه!!

من شافتهه هجمت عليهه كفشتهه عضتهه

كطعت شعرهه تكطع وبعدهه تضحك

ودكلهم خطيه قبس ماكو بعد..

ماما لازمه بشار كلساع يهد عليهه

وتذكره ترى انت لارجلهه ولا ابن عمهه

لاتسويلنه سالفه

بس الحل جان عند عمه بشرى نزعت حجابهه

وصاحت جيبولي كلاص مي!!

راحت سرور جابتلهه مي شربته ورفعت اردانهه

طلعت اديهه

ودنكت ع اسراء لزمتهه من شعرهه فرت بيهه

الصاله واخذتهه للمخزن وصاحت ولج سرور

جيبيلي المكص والمكينه مال عمج!!

بشار طلع ماما طلعته وسرور اخذت المكص

والمكينه مال الحلاقه وراحت ورا عمه ..

اني وماما گلوبنه ضعيفه ماعنده قدره

انباوع شيسوون ولو هي تستاهل كلشي

بس جسمي كزبر ماتحملت...

كمت اسمع صوتهه ساعه تبجي وساعه

تصرخ مدري شجاي يسوون بيهه

لحدما كامت تصرخ حيل وتصيح والله اعترف

هسه اعترف !!!

طلعت سرور تضحك ودكول ياعمه بشرى

تشتغل بسجن ابو غريب وتعرف شلون

تخلي المجرم يعترف..

طلعت اسراء شكلهه يخوف كاصه شعرهه

ناس طويله وناس كصيره والبنص كرعه

حواجبهه مزينتهن لاعبه بيهن لعب عمه

وغير العضات بكل مكان!!

كعدتهه بنص الصاله وكالت صيحن بشار

هاي اليوم اذا مااعترفت وتحرك بالمكص

تفتح وتسد يطلع صوت وكملت كلامهه

هاي اذا مااعترفت اليوم عندي غير اجراء

وياهه ولو ابن اخوي عاشت رجله مامقصر!!!

بهاي الحاله وحصرتني الضحكه

لان شكل عمه بشرى مال وحده

تشتغل بعصابه!!

شويه واجه بشار جانت اسراء لابسه حجابهه

وبالاساس هو مايباوع ع وجهه كعد كدامهه

وكالهه احجي لحد الان واكف بعيني اخوج

وماخليت طلقه براسج وخاف الطخ ايدي

بدم وحده قذره مثلج!!

اسراء.. رفعت راسهه وكالن احجي بس بشرط؟!

بشرى... شوف ام الدروب تتشرط ولجن الظاهر

تريدين تتجربين غير كتله!!

بشار.. شتردين؟؟

اسراء.. ماتحجون لعمامي طلعوني من بيتكم

بس عمامي ماتحجولهم ..

بشار.. احجي اصلا عمامج مااندلهم وين؟!

شجن.. جان بشار نوعا ما هادىء او هو طبعه

هذا بعد العصبيه يصير هيج مثل اليتعب

وهو منا مريض؟! بس ماندري جان يسايس

بيهه وعنده غير سالفه براسه..

اسراء.. من اول يوم خليت رجلي بهذا البيت

واني ماخذه عهد ع نفسي ادمرك انت وقبس!!

تدري ليش؟؟

لان جنت اسمع اخوي شكد يتوسلك يكلك

اخذ اسراء وانت ماتقبل حته ترزل سامر

وادري شكد جنت تحب مرتك وهذا الحب

مالازم يدوم ليش هي سعيده واني محد يريدني..

كلشي ادري لان جنت اسمع من سامر

وادري انت ماتنكسر غير بس بقبس

وانت جنت ماطايق وجودي ابد..

انت ماخليت عمر  يتزوجني واعيش

حياة طبيعيه وانت خليت عمر يطلكني

وقبس هي رجعت صابرين

اني اكرهه اموت منهه لان كلكم جنتو تحبوهه

واني المحد قبل يتزوجني كله منك

انت شايف نفسك حيل واذيهه هي حته انت

تتأذى..

شجن .. جانت كلما تحجي هيج كلام يكوم يريد

يضربهه وعمه بشرى تحجزه هي وسرور

لان انريد نسمع منهه

اسراء.. ظليت شهرين اني اراقب بيهه

وبحركاتهه واراقب كلامكم عنهه وشكد

تحبهه تاكدت ماكو انتقام اربحه اله بيهه

حته اخليك مدنك راسك مثل مارفضت تزوجني

صادقت فرح حيل واتواصل وياهه عن طريق

رقم ثاني وجانت تحجيلي كلشي شلون جانت

تحبك واجت قبس اخذتك منهه وهالشي

زاد كرهي الكم اثنينكم ..

حجتلي عن امهه وعن سمعتهه وخالاتهه

وحجتلي عن اسراركم وسالفه شجن لان

فرح سامعه من وائل بنفسه صارت عندي

معلومات كامله عنكم...

ماكدرت اشتغل وحدي واني ادري من جان سامر

عايش مره حجيتوا بسالفه ميامين

جنت كلما تجي اكعد بباب الاستقبال اسمعلكم

وسامر يثق بيه ومرات هم يكلي

خطيه بشار هاي ميامين مبزعته بالشغل!!

اعرف حساب ميامين طلعته من اصدقاء سامر

وراسلتهه وحجيتلهه كلشي وكتلهه اريدج

تساعديني لان ادري بيهه تضدك..

وهي ماكالت شي بالعكس فرحت

كالت اني عندي معلومات عن قبس من وحده

اسمهه ام حسن وهم ساعدتني بشغلات

عن حياتهه السابقه وهي مريضه نفسيا

الخطط مني والتنفيذ على واحد جابته ميامين

بفلوس اسمه ابو غدير هذا طلب من ميامين

فلوس وهي انطته جانت غاية ميامين انت

بالذات حته تخسر منصبك وتصير انت بمكانهه..

وبدينه انفذ الخطط بالسره اول شي الطفله

لان اعرف المريض نفسي يكوم يتخيل من اول حدث

مره اثنين اندز طفله صغيره بنت ابو غدير

ينزلهه من السياره ادك الباب وترجع

لحدما ثبتت ع قبس مريضه اوهام ومريضه نفسيا

هذا الحجي جنت اسمعه من شجن لان منصبه برنامج تسجيل عدهه وهي غبيه ماتعرفه مسويته مخفي..

كام ابوغدير سجل بنته بنفس المدرسه

التداوم بيهه قبس حته من يروح يحجي

وياهه وحته انكول عدهم علاقه...

اني من اجيت يمكم تعشينه من طلكني

عمر اخذت فستان قبس دخلت الغرفه بحجه

اعدل حجابي وفرح جانت تراقبلي

اخذته انطيته لابو غدير حته نثبت عدهم علاقه

واني ويا رتبنه المحادثات وبيوم السكنه يمكم

خليت التليفون بالجنط الفوك لان مره حجت لخاله

كالت الفوك فارغ بس ملابسنه بالجنط..

اني جنت شديده الانتباه وياهه اي كلمه

دكولهه اركز بيهه واخذهه نقطه ضدهه..

كله اني فكرت بي وغايتي ادمرك وادمر

سعادتك لان لو متزوجني انت لو اخوك جان

ماتوسلت وانذليت

الينفذ ابو غدير وهو جان محضر كلشي

ومتفقين ع هذا اليوم شوكت مايصير مجال

ويفوت لبيتهه يسافر بسرعه والنقطه الساعدتنه

ضعف قبس وحالتهه النفسيه...

ميامين بس انطتني ابو غدير

واني ظليت اتواصل وياه هو عنده عياده

يم سرور وجنت اروح اخذله شغلات

مثل الفستان وعلمني ع التهكير

فرح ماتدري اني سويت هيج بس

استغليت كلامهه واخذت معلومات منهه

وبيوم حجيتلهه ترى قبس خانت بشار

وهو سترلهه وماحجه لان حسيت نفسي

خسرت كلشي

مامبين اكو شي وخاصه قبس من تجي متأنقه

ونفس اسلوبهه هذا الحجي ورا مالكيت التليفون

بالملابس ..

حجيت لفرح اني شفت المحادثات عند شجن

وهاي فرصتج اذا انفضحت قبس بين الكل

بشار مايكدر يسترلهه بعد ويتزوجج

واتفقنه جابتلي كل ارقام كرايبكم

ودزينالهم المحادثات اني وياهه

لان ميامين انقطع تواصلي وياهه

من يوم انت خسرت منصبك واخذت غايتهه

بس اني غايتي ماتحققت لان مافركشت عائلتك..

اخر اسلوب اتبعته كمت اراسل زوج هدى

وعباله اني قبس وخليته يكره قبس

ويحجي عليهه كدام مرته حاربتهه من كل

اتجاه

لان اكرهه شايفه روحهه مغروره بيك

ومن تحجي تحجي بعز ولازم اكسر خشمهه

وهاي كل السالفه ...

شجن.. بلحظه انهار بشار ضربهه

دفرات يمكن مرتين وتخربط

بعد ماكدر يتزن صاحت سرور الحكولي

يفرك بكلبه وكعد ع التخم

وجه اصفر شفايفه يابسه

اسراء اخذتهه عمه للمخزن وبشار

كوه ياخذ النفس خابرنه عمر اجه يركض

اخذوا وراحوا للمستشفى

سرور راحت وياهم وكلساع نخابرهه

تبجي دكول بالانعاش ادعوله!!

هالمره وكعته اكبر من السابقه

الله لاينطيج يا اسراء هجمتي بيته

وضيعتي مرته وابنه...

اجو بيت عامر وعمه بشرى كل اليجي

تسولفله وتتعارك شلون شكيتوا بقبس

تعاركت ويه بيبي كامت خابرت ع بسمه

كالتلهه فرح بس الزمهه اكلهه باسناني..

مو ليله لاااا ليالي مرت علينه

بشار بالانعاش كلبه تعبان حيل

طلعوا لمستشفى خاصه وبعد التحليل

والفحوصات كالو عنده انسداد بالشرايين

ولازم فورآ قسطره ..

بهذاك اليوم الاسود ماظلت بعيونه دموع شكد بجينه

ماما تخربطت ودخلنه بيهه مستشفى وبابا

ضغط وسكر مرتفع ايام سوده لسه اثرهه بگلبنه..

اخذوا بشار الصبح وهو اساسا ماطلع

لان حالته ماتسمح وسرور وياه ماعافته لحظه

سووله قسطره وهنا جانت صدمه من خابرنه

بابا يبجي..

وهو يكول لماما ابنج راح يروح من ادينه

ولج عنده ٣ شرايين مسدوده واحد انفتح

واثنين ماانفتحن وحولو عملية قلب مفتوح

بشار خسر صحته وشبابه !!!

ع فد دموع ولوعه كل وحده بينه لازمه قرانهه

وتقره ياربي كلشي مانريد بس رجعه سالم النه..

من المستشفى كالو سوو العملية بالخارج

لان جو العراق ملوث والمستشفيات موتمام

وهو اصر يطلع للبيت وبعدين يسافر يسويهه

اسراء ع حبستهه بس نطيهه الاكل

وتروح للحمام عمه بشرى يمنه مثل الرقيب

كلساع تروحلهه تشلع ماتبقه من شعرهه وتطلع

ودكول كلبي مابرد..

من طلع بشار كامت هوايه ناس تجينه

صارت روحه بامير وهو فد واحد يظل يبجي

اله ينام يمه يسكت

محد حجه بالسالفه علمود صحته

اباوع لاخواتي شلون مدنكات راسهن

ومايعرفن شلون يعتذرن والاعتذار ميفيد بعد..

مرت عشرة ايام ضبط شويه تحسن

بشار وكام يفتر بالبيت مانخلي يشيل

امير ع صدره وهذا بس يشوف ابو يكوم يبجي..

بالنه ع قبس وين راحت وشلون عاشت

شلون اذا سمعت ابنهه عايش وماشافته

ولا حطته ع صدرهه

معقوله راح يطول غيابهه ويكبر ابنهه

ويعرف امه مختفيه وامه سرور

وقبس تظل عايشه وحيده ومفارگته..

بعد العشر ايام اجه عمو عامر مدري

شكال لبابا وطلعوا اثنينهم ركضت عمه

بشرى وراهم واجت تركض كالت ولجن

هذا المصخم امجد كاتل فرح كتل موطبيعي

وهسه بالمستشفى!!

طلعت عمه مسولفه لامجد كلشي وطول هاي

الفتره امجد جان حابس فرح وشاد عليهه

ومن سامع هيج متخبل شلون فضحتي البنيه

وشافوهه كل الكرايب بملابس مومناسبه..

كولت عمه بشرى بربو.... ماتموت هسه تبلعهه

وتكوم وكلشي مابيهه...

امجد هو عاقب فرح ومنع عنهه لاتليفون

ولا طلعه واحنه كلنه منحاجي بسمه

مرن اسبوعين وكال بابا حضروا باجر

اكو كعده يمنه كال كرايبنه وعمام اسراء

بشار يريد يبرء قبس كدام الكل..

وثاني يوم هوايه ناس اجت شكو واحد يدري

بسالفة قبس دزو علي عمام اسراء كلهم اجو

وكعد شيخنه يحجي هو وبشار

بابا يكول مدنكين راسهم وكالو احنه ندري

بيهه ليش كنالكم انريدهه اخوهه خلص عمره

يحمي بيهه تالي هيج جازته؟؟!!

كامو باسو بشار واعتذرو

وكل واحد حجه بيوم ع قبس قدم اعتذاره

ودعوا الله يجبر خاطرهم..

اما اسراء عمهه الجبير اخذهه وكال

تجيكم اخبار ترضيكم وظل يتعذر

وطلعت بس بدشداشتهه كلشي ماخذت

لان ماقبل كال اخليهه تتمنى الموت

على هاي السالفه!!!

طلعت براءة قبس بسنه وحده

طلعت اول وحده اسراء الثانيه فرح

اخواتي بعدهن بنص المشاكل..

رب كل ضاره نافعه جية امير

من اول اسبوع كشف براءه امه

صح فاركته بس الله عنده حكمه

لان كشفت نفسهه اسراء..

لهنا رجعت حياتنه طبيعيه بس

بيهه غصه بشار ماقبل سرور تاخذ

امير لان دوام وتجي لليل كالهه بعد ع الليل

يظل يم امي ...

من ظهرت براءه قبس جان موقف ماما

حازم حجت لجدو ع بيبي وشسوت بقبس

وشلون خلتهه تشرب كاس الذل..

وجدو خابر عامر كاله تجي تاخذ امك

منا لمن تكفر ع ذنبهه يله ترجع لبيت عادل...

اي خبر عن قبس ماكو ماخلو مكان

مادور عليهه راحوا للدكتوره حته ياخذون

اسم الجانت تجي وياهه

وكالتلهم ام رنا وجانت ماتذكر اسمهه

الف ام رنا ببغداد وين يدورون

كلنه استسلمنه اله بشار ظل مستمر

رغم صحته بالنزلان بس يدور عليهه

ويكول لو ساعه وحده اشوفهه وخلي

الله ياخذ امانته...

بهاي الفتره بعد مايقاوم جان شايلهه

بحيله وهسه صحته انهارت وكام يتخربط

وبعد الحاحنه وكام يجي نتلكا نتوسل يسوي

العمليه..

حجزو بالهند وراحوا وياه عمر وعمو عامر

واحنه كلوبنه نار شوكت يرجع سالم

خابرنه عمر ب١ الظهر كال دخل العمليه

واحنه ماخلينه دعاء وقران ماقريناه

خابرناه ب٤ وكال لسه ماطلع ادعوله..

عمود بيتنه وابونه الثاني كلهه انهارت

بس نبجي وعينه ع التليفون ومحد

طمنه شلونه؟؟!

.

.

يتببببببببع .... متابعه ممتعه