الفصل الرابع

رواية حين رتب الله الأقدار الجزء الرابع 4 بقلم ملك شريف حين رتب الله الأقداررواية حين رتب الله الأقدار الحلقة الرابعة صحيت الصبح بدري اتوضيت وصليت. خرجت الصاله لاقيت عمر بيبصلي فـ قولتله: _ايه يا عمر بتبصلي كده ليه؟ _لا انا اتخضيت بس. _من ايه؟! _منك انتي طبعا يعني قاعد لوحدي وانا طالعه بـ شعرك المنكوش ده فـ طبيعي اتخض. ضربته في كتفه وقولت: _بطل رخامه بقي واسكت. _ماشي قومي اعمليلنا نفطر يلا _لا مش هعمل حاجه

_يعني مش هتفطري؟ _لا هفطر في الصيدليه سيبته ودخلت اوضتي لبست ونزلت الصيدليه. وصلت الصيدليه وقولت: _السلام عليكم رد عليا دكتور محمد: _وعليكم السلام……في حد سأل عليكي _مين؟ _معرفش في شاب كده سألني موجوده ولا لا وقولتله انك لسه مجتيش _طيب اليوم كان عادي انهارده وخلصت الشيفت بتاعي وروحت بس وانا مروحه عديت علي المكتبه دخلت وانا بقول: _اخبارك ايه يعمو محمود _بخير يبنتي تعالي اقعدي

_لا معلش انا قولت اجي اطمن عليك ورايحه انهارده التحفيظ _ماشاءالله جدعه روحي وانا شويه وهاجي _طيب هستناك مشيت من عند عمو محمود وانا ماشيه كنت متحمسه شويه بس برضو كنت متوتره وصلت البيت و خبطت علي الباب فاتحتي ست كبيره باين عليها الطيبه وبشوشه قولت: _السلام عليكم _وعليكم السلام انتي ملك صح؟ رديت باستغراب: _ايوه ابتسمت وقالت: _انا ام يوسف…..عمو محمود قالي انك جايه انهارده _اتشرفت بـ معرفة حضرتك ردت عليا: _اتفضلي يا بنتي

دخلت البيت كان هادي جدا ام يوسف قالت: اطلعي الدور اللي فوق، البنات قاعدين هناك. هزيت راسي وطلعت اول ما دخلت الاوضه كان في حوالي سبع او تمن بنات قاعدين كل واحده ماسكه مصحفها سلمت عليهم وقعدت في مكان فاضي بعدها بدقيقتين… دخلت بنت شكلها قريب من سني كانت شايله صينيه عليها كوبايات عصير اول ما شافتني وقفت وقالت بـ بتسامه: _انتي جديده؟ _ايوه حطت الصينيه علي الترابيزه. وقعدت جمبي وقالت: _انا رنا اخت يوسف ابتسمت وقولت:

_وانا ملك فضلنا نتكلم شويه وارتحت لكلامها جدا كنت قاعده لاقيت بنوته صغيره جت جمبي وقالت: _انتي اول مره تيجي _اه اول مره ردت عليا: _انا علطول بروح احفظ مع شيخ يوسف _شطوره _وانتي هتيجي تاني _اه ان شاءالله هاجي تاني قعدت جمبي تحكي شويه وسمعنا صوت ام يوسف بتنادي: _يا بنات….يوسف طالع كل البنات سكتوا وبعد ثواني دخل يوسف وقال: _السلام عليكم ورحمة الله وبركاته ردينا كلنا السلام وقعد في مكانه وبدأ يسمع للبنات واحده واحده

كنت قاعده مستنيه دوري قلبي بيدق من التوتر يمكن لاني اول مره اروح احفظ عند حد وديما بحفظ لوحدي رنا همستلي وقالت: _متقلقيش…..يوسف هادي جدا ابتسمت وسكت ولما جه دوري بص يوسف في المصحف اللي معاه وقال بـ هدوء: _اتفضلي يا أختي بدأت اقرأ في الاول صوتي كان واطي شويه من التوتر بس بعد كام آيه ارتحت ولما خلصت…. قال: _ماشاءالله قراءتك جميله بس محتاجه تركزي شويه هنا. قال كده وهو شاور علي الآيه. هزيت راسي وقريتها تاني ابتسم وقال:

_احسنتِ……بارك الله فيكِ. حسيت بـ راحه كبيره مكنتش متوقعه ان اول يوم يعدي بالسلاسة دي بعد ما الحلقه خلصت…. ام يوسف قالت: _ياريت ي بنات لو مش وراكم حاجه تقعدو شويه يوسف استأذن ومشي والبنات قعدو اتعرفنا علي بعض وهزرنا وضحكنا ولـ اول مرة….. حسيت اني وسط ناس اعرفهم من زمان… وانا خارجه عمو محمود كان لسه راجع اول ما شافني قال: _ها ي ستي……اول يوم عدي ازاي؟ ابتسمت من قلبي وقولت: _الحمدلله….احسن ما كنت متوقعة. رد عليا:

_قولتلك هتحبي المكان ضحكت بـ خفه وقولت: _طلع عندك حق فعلا سلمت عليهم كلهم ونزلت ومكنتش اعرف ان المكان اللي دخلته انهارده هيغير حياتي كلها بعد كده –“سبحان الله، الحمدلله، لا اله إلا الله، استغفر الله” روحت البيت وانا مبسوطه ان عملت اكتر حاجه كان نفسي اعملها من زمان دخلت الشقه عمر كان قاعد بيتفرج على التليفزيون اول ما شافني قال: _خير وشك مبسوط كده ليه؟ _روحت انهارده اول يوم تحفيظ القرآن _بجد _اه والله اخدني في

حضنه وهو بيربت عليا وقال: _الف مبروك يا حبيبتي ان شاءالله تختمي قريب _يارب و دخلت نمت وانا مرتاحه. “”””””””””””””””””””””””””””””””””””””””””””””” “استغفرالله العظيم واتوب إليه” صحيت الصبح بدري يومي عادي جدا. بس الحمدلله علي نعمة اليوم العادي. اللي من غير مشاكل. ومن غير مرض. نزلت الصيدليه ولما الشيفت بتاعي خلص مشيت. عديت علي عمو محمود وروحت غيرت هدومي ونزلت التحفيظ. بصراحه حبيت المكان جدا والمكان في راحه نفسيه غريبه

والبيت دافئ وصلت وسلمت علي ام يوسف ولما يوسف جه البنات بدأت تسمع. خلصت تسميع ونزلت عشان امشي. بس لما نزلت اتفاجأت لما شوفت………