الفصل الثالث

رواية حين رتب الله الأقدار الجزء الثالث 3 بقلم ملك شريف حين رتب الله الأقداررواية حين رتب الله الأقدار الحلقة الثالثة فعلا كان مكتوب اسمي بالكامل. لاكن ده مكانش أغرب حاجه. الاغرب ان تحت اسمي كان مكتوب: _بكره الساعه 4 العصر…..متتأخريش. ومكتوب ان المكان في الشارع بتاع الصيدليه اللي بشتغل فيها. بصيت لعمر وقولت: _ايه الهبل ده؟ أخد الورقه مني وقراها. وبعدين قال: _اكيد حد بيهزر. _وانا كمان قولت كده. _ارميها وخلاص.

طلعنا البيت تاني. ورميت الورقه فعلا. لاكن الحقيقه فضلت بفكر شويه. مين اللي باعتها؟ بس في الاخر طنشت وقولت يمكن البنت الصغيره بتلعب. كملت أكلي وبعدها دخلت اوضتي. قعدت شويه علي الموبايل وبعدين نمت. “””””””””””””””””””””””””” “سبحان الله، الحمدلله، لا إله الا الله، الله أكبر” تاني يوم صحيت متأخر شويه. لاقيت عمر واقف فوق دماغي وبيقول: _اخيرا صحيتي. _ليه الساعه كام؟ _الساعه 12. قومت مفزوعه وقولتله: _انت كداب صح

_لا والله الساعه 12. _ليه مصحتنيش؟ _قولت اسيبك براحتك. _يالهوي حرام عليك ي عمر. قومت بسرعه فتحت الدولاب وانا بجيب اي حاجه. وعمر قاعد بيضحك. قولت بعصبيه: _بطل ضحك يا بارد واطلع بره. _انا اصلا كنت خارج. خرج من الاوضه وانا لبست بسرعه ونزلت. الحمدلله وصلت بس متأخر شويه. عدي اليوم عادي جدا. لدرجه اني نسيت موضوع الورقه اصلا. لحد ما بصيت بالصدفه علي الساعه. كانت: 3:55 وافتكرت: “بكره الساعه 4 العصر…..”

اتنهدت وانا بقول لنفسي: _اكيد هبل. لاكن الفضول كان قاتلني. الشيفت بتاعي في الصيدليه كان خلص. ف لميت حاجتي وخرجت. قررت أمشي في المكان اللي مكتوب في الورقه. مش عشان اروح ولا اي حاجه بس بصراحه فضولي كان اقوي مني. واشوف مين من عيال الحاره عامل فيا المقلب ده. وصلت. وبصيت حواليا. ناس رايحه جايه. الشارع زحمه. عدت دقيقه ومفيش اي حد. وكنت خلاص هلف وامشي. وفجأه سمعت صوت ورايا بيقول: _كنت متأكد انك هتيجي.

لفيت جسمي بسرعه لمصدر الصوت. ولاقيت. الشاب الللي جالي الصيدليه واقف. اتعصبت وقولتله: _انت؟! _ايوه انا. _انت اللي بعت الورقه ولا لا؟ _ايوه. _وليه عملت كده. _مكنتش عارف أكلمك ازاي. رديت بضيق: _ودي طريقه يعني. _انا بس كنت عايز اقولك حاجه. _قولتها قبل كده. _لا المره دي مختلفه. _وانا مش مهتمة. كنت هلف وامشي. بس قال بسرعه: _استني دقيقه بس. وقبل ما أرد. سمعنا صوت خناقه جاي من آخر الشارع. والناس بدأت تتجمع.

بصيت تلقاني ناحيه الزحمه وفي وسط الناس…. لمحت شخص اعرف كويس. _يوسف؟! قولتها باستغراب وانا شايفه وسط الزحمه. الشاب بص ناحيه الزحمه وقال: _انتي تعرفيه؟! رديت بضيق: _وانت مالك. وسبته ومشيت ناحيه الناس. لان بصراحه الفضول عندي كان اقوي من اي حاجه. قربت اكتر ولاقيت اتنين شباب بيتخانقو والناس متجمعه حواليهم. واحد منهم كان بيزعق وبيقول: _هات حقي الاول. والتاني بيرد بعصبيه: _وانا معملتش حاجه.

اما يوسف فكان واقف بينهم بيحاول يهدي الموضوع. وقال بهدوء: _خلاص ي جماعه صلو علي النبي ده احنا جيران. طبعا محدش كان سامعه. وفي شاب زق الشاب التاني والخناقه بدأت تكبر. فوقت علي نفسي لما حسيت ان قريبه شويه منهم وممكن يوقعوني معاهم في النص. اخدت ديلي في سناني واخدتها جري لبيتنا. ايوه اومال انا كاسبه عمري في كيس شيبسي؟! طلعت البيت وانا بتنهدت براحه. عمر فتح الباب وقال: _في ايه يا بت بتنهجي كده ليه؟ _كان في خناقه تحت.

_طب وانتي مالك. _يبني ما انا كنت قريبه منهم وخوفت وطلعت اجري. ضحك وقال: _يا جبانه. _اقعد ساكت. وكملت وانا بقول: _عمر. _خير. _عايزه اقولك حاجه. _مصيبه ايه المرادي. _عيب كده والله……انا بعمل مصايب؟! _ايوه انتي كلك مصايب اصلا. وكمل وهو بيقول: _عايزه ايه. _هغير هدومي واجي احكيلك. _ماشي. _وجهزلنا اي حاجه ناكلها والله جعانه اوي. سيبته ودخلت غيرت هدومي. خرجت لاقيته حاطط ليا انا وهو الاكل قولتله:

_حبيبي ي عموره عارف ان جايه تعبانه. _طب يلا يختي تعالي. قعدت جمبه وانا بقول: _احكيلك بقي اللي حصل. _احكي يلا. حكيتله كل اللي حصل من اول ما الشاب جالي الصيدليه. ما انا مينفعش اخبي عليه ده حبيب قلبي اصلا يعني هو عارف عني كل حاجة وبالنسبالي عمر ده مش اخويا بس لا ده صاحبي وحبيبي ف لازم يكون عارف. خلصت كلام وقولتله: _بس كده ده اللي حصل. _بس انتي غلطانه برضو. _ليه؟ _عشان روحتي المكان.

_بص انا هقولك بصراحه يمكن انا فعلا كنت غلطانه بس الشارع اللي كان مكتوب كان طريقي وانا مروحه اصلا وكمان فضولي كان قاتلني واللي طمني اكتر ان عارفه الشارع ده وكل الناس اللي موجوده في عارفني ف مكنتش خايفه والشارع مليان ناس. _ماشي بس انتي برضو غلط. _معاك حق. _طيب لو كلمك تاني ولا اي حاجه ياريت مترديش عليه وقوليلي _حاضر

ممكن اكون انا غلطانه فعلا ان روحت المكان بس والله ما كان في دماغي اوي يعني كنت بقول ايه اللي هيحصل وكنت بضحك علي نفسي ان كده كده ده طريقي. خلصنا كلام ودخلت. كنت مضايقه ان انهارده مروحتش المكتبه عند عمو محمود بس الواد البارد ده والخناقه معرفتش اروح بس قولت ان شاء الله هروح اطمن عليه بكره. صليت وبعدين نمت. ^^^^^^^^^^^^^^^^^^^^^^^^^^^^^^^^^^ “استغفر الله العظيم واتوب اليه” صحيت الصبح وكالعاده نزلت الصيدليه.

الشيفت بتاعي انهارده كان صغير ف مشيت بدري. عديت علي عمو محمود وقولت: _ازيك يا عمو محمود. _بخير يبنتي…..بس انتي مجتيش امبارح ليه؟ _معلش اصل كان….. حكتله علي الخناقه وبعدين قولتله: _عشان كده معرفتش اجي. ضحك وقال: _ايوه يوسف قالي علي الخناقه بس مقاليش انك طلعتي تجري ضحكت وقولتله: _الحمدلله يارب ميكونش حد اخد بالو قعدت احكي معاه شويه وبعدين روحت. صليت ونمت وانا متحمسه لـ اول يوم حفظ بكره…..