الفصل الثاني

رواية جثة عادل الجزء الثاني 2 بقلم محمود الأمين جثة عادلرواية جثة عادل الحلقة الثانية البطاقه كانت باسم موسى، صاحب عادل اللي اترفد معاه من الشركة، بصيت على الجثة كل حرفيا واللي كان شكلها صعب أوي، موسى كان مضروب بسكينة في كذا مكان بجسمه بشكل عشوائي ومن النظره الاولى في طعانات كتير فيهم كانت نافذه مش مجرد جروح خارجية، وده معناه ان اللي كان بيقتل موسى كان بيضربه بغل عاوز ينتقم منه

فوقت من سرحاني مع الجثة على صوت الرائد ايمن اللي اتكلم وقال _كده حاتم مستبعد من دايرة الشك = ليه بتقول كده؟! _ما هو اكيد اللي حصل ده مش صدفة، الاول عادل يموت مقتول هو واسرته ويتفبرك فيديو ذكاء اصطناعي في حادثة بتبين ان هو اللي عمل كده في اهل بيته وبعد كده انتحر، وبعد كده يجي بلاغ عن جريمه قتل تانية والمجني عليه يطلع هو صاحبه اللي اترفد معاه من نفس الشركة ولنفس الاسباب

وما تنساش يا فندم ان التحريات بتقول ان سبب رفد عادل وموسى من شركه منتجات الالبان هو انهم اكتشفوا فساد في الشركة دي.. ولما اترفدوا عادل هدد انه هيفضحهم = كل الكلام ده جميل، بس ما فيش دليل على الناس دي برضه يا ايمن، لازم دليل قوي عشان نقدر نجيب اذن النيابه باستدعي للمسؤول عن شركة الالبان _عندك حق يا فندم

= انا لسه ما كملتش كلامي، حاتم لسه تحت النظر وما تنساش ان هو هدد اخوه بالقتل عشان موضوع الميراث، واتمنى انه تقرير الطب الشرعي الخاص بعادل يفيدنا شويه، ونلاقي في على الاقل اجابه لسؤال من الاسئلة اللي مش لاقيين ليها اجابة خلصت كلام مع الرائد ايمن وكان وصل رجاله الطب الشرعي والمعمل الجنائي وبدأ فحص الجثه والمكان وكالعادة قربت من دكتور الطب الشرعي اللي كان بيسجل بعض الملاحظات وسألته في حاجه حضرتك ملاحظها

_كان في مقاومة كبيره من المجني عليه مع القاتل وده اللي بتفسره الكدمات اللي على وش المجني عليه، تاني حاجة العنف المستخدم في القتل نفسه الطعن تم بشكل عشوائي ده مش واحد محترف خالص ده واحد جاي يقتل ويتاكد مليون في المية قبل ما يمشي ان الراجل ده مات = طيب في حاجه تاني؟ _لحد دلوقتي لا، بس احنا هنكمل فحص وهنشوف وبعدها هيتم تشريح الجثة جايز نوصل لحاجة جديدة

= طيب بالنسبه لتقرير الطب الشرعي الخاص بجثة عادل واسرته طلع ولا لسه؟! _في ظرف 24 ساعة، هيكون على مكتبك رجعت على المكتب بعد ما الرجاله خلصت شغلها، كنت متصدع ومش قادر ويا دوب طلبت فنجان قهوه من عامل البوفيه ولقيت التليفون بيرن واللي كان بيتصل هو العميد فتحت الخط ولقيته بيزعق وبيقول: تيجيلى على مكتبي في اسرع وقت

ما كنتش فاهم بيزعق ليه بس اكيد في مصيبه حصلت، قومت من مكاني واتحركت على مكتب العميد واول ما دخلت كان ماسك مجموعه جرايد في ايده واتكلم وقال _ازاي خبر زي ده يتصرف من عندك؟! .. الوزاره مقلوبة يا بيه حضرتك مقرأتش التقرير بتاع الفني اللي فحص الفيديو كويس في كلام وصل للصحافه ان الفيديو ذكاء اصطناعي = ما هي دي الحقيقه حضرتك، الفيديو ذكاء اصطناعي

_يبقى انت كده بتأكدلي انك فعلاً ما عملتش شغلك كويس يا حضره الظابط، 5% بس من الفيديو ذكاء اصطناعي ولكن باقي الفيديو حقيقي، انت شكلك قريت اول سطرين وكسلت تقرأ الباقي = انا فعلا اتصدمت لما عرفت ان الفيديو ذكاء اصطناعي، ومكملتش قرايه التقرير.. بس يا فندم الجريمه دي فيها حاجه غريبه الفيديو بيوضح ان عادل غرق بيته بنزين وبعدها ولع في نفسه وماتوا وهو واقف مكانه قدام البيت

لكن بجد الاسعاف كانوا مخرجينه من البيت قدامنا.. فاكيد في حاجه غلط يا فندم _مهما قولت، انت للاسف قصرت في شغلك والمفروض تتسحب منك القضيه دلوقتي، بس انا هديك فرصة ولو فشلت المره دي يبقى هتمشي .. مفهوم ياحضره الظابط؟ = مفهوم يا فندم مفهوم

خرجت من مكتب العميد وانا متضايق وعلى اخري ورجعت تاني على مكتبي.. طلبت الجرايد واول ما بصيت فيها لقيت كل الاخبار بتتكلم عن فيديو الذكاء الاصطناعي المضروب واللي حول القضية من شخص قتل عيلته لمجني عليه كنت هتجنن مش فاهم ازاي ده حصل؟! .. ومين اللي وصل الكلام ده للصحافة؟! وبعد 24 ساعة كان قدامي تقريه‍ر الطب الشرعي لعادل واسرته واللي كان في مكتوب في التقرير ده هيقلب القضية دي تماماً

في اللحظه دي دخل عليا ايمن لقيني باصص في التقرير ومركز فسألني هو في حاجه يا باشا؟ .. حضرتك مركز مع التقرير وشكله كده في حاجة جديدة = ايوه يا ايمن، في حاجة مهمه اوي.. التقرير اللي قدامي بيقول ان عادل ومراته وبنته ممتوش محروقين _نعم؟! .. ازاي يعني؟! .. طيب والفيديوهات اللي احنا شفناها بلاش الفيديوهات احنا مش نزلنا القريه وشوفنا البيت ده محروق قدام عينينا = ايوه يا ايمن، بس التقرير بيقول ان عادل واسرته اتقتلوا بسكينة

يعني في حد خلص عليهم وبعد كده ولع في البيت وده سبب الوفاه الرئيسي _انا محتار يا فندم، دي قضيه معقده = بس اكيد هنوصل للي عمل كده اكيد يا ايمن مش هسيبه يفلت بعملته _طيب معنى كده ان موسى كمان اتقتل على ايد نفس الشخص؟ = الاجابه المنطقيه ايوه، لكن خلينا نكمل تحقيقتنا نشوف هنوصل لايه في النهاية

بعد ما خلصت الكلام مع ايمن، اخدت قرار مش عارف هو صح ولا غلط.. وهو اني رحت لشركة منتجات الالبان اللي كان شغال فيها عادل وموسى وقابلت مدير الشركة ولما عرف الموضوع اللي جاي اتكلم معاه فيه كان مستغرب وقال ان الاتنين مشوا من الشركه من بدري.. وان السبب الرئيسي في رفدهم الاهمال في العمل وانهم خسروا الشركة مبالغ كبيرة وكان ردي عليه وقتها

= بس على حسب التحريات اللي عندنا.. ان عادل وموسى كان عندهم ورق بيثبت فساد في الشركه عندك ودي حاجة تخلي حضرتك متهم رئيسي في قتل الاتنين _حضرتك جاي تتهمني اتهام صريح بإني اجرت حد يخلص عليهم، ولا دي مجرد دردشة.. اصل ده لو اتهام صريح فالكلام ما ينفعش هنا ممكن حضرتك تجيب اذن للنيابة ويتم استدعائي للتحقيق وانا اجيب المحامي بتاعي ووقتها نشوف اذا كنت متهم ولا بريء

اما لو كانت دردشة عادية.. احب اوضح لسيادتك ان احنا شركه كبيره ليها اسمها ومستحيل تتورط في الفساد ده رغم عدم راحتي للشخص ده وانا بتكلم معاه واحساسي انه كذاب الا اني ما كانش عندي اي دليل ضده وده اللي خلاني امشي وانا ندمان اصلا اني روحت عنده كان ممكن اعمل لنفسي مشكلة لكن لما رجعت المكتب لقيت واحد مستنيني وكان قاعد معاه ايمن وعرفت ان الشخص ده جاي وعنده معلومات مهمة عن القضية واتكلم وقال _انا اسمي عباس،

واحد من اهل القريه اللي اتقتل فيها الاستاذ عادل واسرته، انا ترددت كتير قبل ما اجي والتردد ده بسبب ان عندي طفل صغير ملهوش غيري في الدنيا وانا ما ليش غيره ومش عاوز شهادتي تكون السبب في ان حد فينا يحصله حاجة وعشان ما اطولش على حضرتك، انا شوفت القاتل، شوفت الشخص اللي دخل وقتل الاستاذ عادل واسرته وشوفته وهو طالع وماسك السكينه في ايده وغرقانه دم وكان بيجري، ووقتها قفلت الشباك ولما جيت اطلع من الباب لقيت البيت بيتحرق

= مين الشخص ده؟ _الشخص ده يبقى… …..