تخيل تبقى قاعد فاتح النت وبتقلب في الاخبار وتتفاجئ بخبر يخليك مش قادر تنطق، خبر ان في راجل ولع في بيته، والبيت كان في مراته وعياله وسابهم يتحرقوا قدام عينيه وبعدها يمسك جركن البنزين ويفضي على نفسه البنزين اللي فاضل ويولع في نفسه
هيكون احساسك ايه وقتها؟!.. هتقول عليه ايه؟!
مجنون جايز او هتقول عليه قاتل والحرق فيه مش كفاية
بس السؤال اللي هيجي في بالك وهو الاهم.. ليه الراجل ده عمل كده؟!
…
انا المقدم علاء حسن كنت قاعد في مكتبي في اليوم ده بخلص شويه حاجات ورايا متأخرة وفي اللحظة دخل عليا الرائد ايمن وكان مش في حالته خالص فسألته
_ مالك يا ايمن، وداخل عليا المكتب كده ليه؟
= انت مشوفتش الفيديو اللي على النت، واللي نازل ليه خمس دقايق؟
_ فيديو ايه انا مشوفتش اي حاجة؟
= طيب خد التليفون واتفرج
…
مسكت التليفون من ايمن وكان الفيديو بيبدأ براجل لابس جلابية وواقف قدام بيت من دور واحد، فضل واقف شويه مش بيعمل ولا حاجة بعدها اتحرك وراح ناحيه جركن بنزين بدأ يفضي في كل حتة في البيت، وبعدها ولع في البيت
وبعد شوية يظهر صوت صراخ في الفيديو وخبط على باب البيت اللي بيتحرق من جوه، وكان واضح من الصوت اللي ظاهر ان اللي جوه واحده ست وبعد دقايق صوتها بيسكت تماماً، ولكن الفيديو ما بيخلصش نفس الشخص بيمسك جركن البنزين وبيبدأ يدلق على نفسه ويولع النار اللي مسكت فيه والغريبة انه مصرخش
بصيت لايمن وانا مش مصدق نفسي وقولتله
_ هو ايه ده؟!.. ازاي ده حصل؟
= للاسف احنا وصلنا لمرحله صعبه اوي، انا اه شوفت جرايم كتير بس اول مره اشوف الجحود ده
…
في اللحظه دي التليفون رن وكان اللي بيتصل العميد مصطفى وطبعا كان شاف الفيديو زي كل الناس وللاسف الحادث ده حصل في قرية من قرى المركز اللي تابع لينا.. وطلب مننا العميد مصطفى اننا نتحرك ونعرف كل التفاصيل
وفعلا اتحركنا ومعانا قوه من القسم على مكان الحادثة.. الناس كانت واقفه ومش مصدقه اللي بيحصل البيت كان بيتحرق والناس كانت بتطفي الحريقه ولكن الموضوع ما كانش سهل، وفضلنا على الوضع ده لحد ما المطافي وصلت وخرجت من البيت 3 جثث.. راجل وست وطفلة
الوضع كان صعب.. وفي اللحظه دي سمعت ست بتتكلم وبتقول
: الله يرحمهم ويسامح اللي كان السبب، كله بسبب السحر والقرف ودي النهاية لو كانت سمعت كلام اهلها ما كانش كل ده حصل
الكلام لفت انتباهي وخلاني اقرب واسأل الست
_ سحر ايه؟!.. انا سمعتك بتقولي سحر
= ايوه.. كلنا شوفنا الفيديو اللي على النت ومحدش فينا عارف مين صوره.. بس اللي نعرفه ان عادل كان ليه في موضوع السحر وكان بيعالج ناس وعامل فيها شيخ وبيطلع يخطب بالناس في الجامع وفي ناس كتير حذرت منه وقالوا عليه ساحر.. واهو النهارده الناس دي طلعت على حق، المجنون ولع في بيته وخلص على مراته وبنته وبعدها ولع في نفسه
_ لا حول ولا قوه الا بالله، عموما انت شكلك تعرفي حاجات كتير وانا هحتاجك قريب عندي في المكتب عشان اخد اقوالك
…
في الوقت ده قرب مني ايمن وكان ملاحظ حاجه انا مش واخد بالي منها بس لما اتكلم عليها بدأت اركز
_ حضرتك مش ملاحظ حاجه؟!
= حاجة ايه يا ايمن مش واخد بالي؟!
_ احنا اتفرجنا على الفيديو مع بعض، الراجل ده اللي اسمه عادل ولع في نفسه قدام البيت بس الرجال الاسعاف لما وصلت بعد ما الحريقة إطفت خرجت جثه الراجل والست والطفله من جوه البيت، رغم ان احنا شايفين بعينينا ان الراجل لما مسكت في النار وقع قدام البيت ومات.. هي دي مش حاجه غريبه؟
= عندك حق يا ايمن، انا ما كنتش واخد بالي من المعلومه دي، هي ازاي جثته دخلت جوه البيت.. والسؤال الاهم مين اللي كان بيصور الفيديو عن قرب لدرجه ان احنا نسمع صراخ الست وبنتها، وفي سؤال كمان ازاي واحد تمسك في جتته النار وما يصرخش او يحاول يفلت
_ فعلا.. الموضوع ده في حاجه غريبة واحنا لازم نعرفها
…
الجثث التلاتة اتنقلوا على المشرحة وللاسف البيت اتفحم تماماً، ومكنش قدامنا غير اننا نعمل تحريات عن عادل ده اللي وراه حكايه كبيره ولازم نعرفها.. وعشان كده طلبت من ايمن يعمل تحريات عن عادل ويعرف كل كبيره وصغيره عنه من يوم ما اتولد
وبعدها رجعت على مكتبي قعدت وانا بفكر في الاسئلة اللي هتفجر دماغي ولعت سيجارة وقعدت اجيبها يمين وشمال
وبعد 24 ساعة كان قدامي ملف التحريات الخاص بعادل معتصم
الشخص اللي خلص على عيلته وبعدها انتحر
وقبل ما افتح الملف اتكلم ايمن وقال
_ المعلومات اللي موجوده جوه دي، هتلخبطك مش هتجاوبك على حاجة وعشان ما تقعدش تقرأ كلام كتير انا هختصر عليك
عادل اتربى على ايد واحد كان شيخ الجامع الشيخ معتصم، كان راجل محبوب من الناس كلها وبيحب يعمل خير ولكنه كان متجوز اتنين مخلف من الاولى عادل ومخلف من التانية حاتم
وكان في عداوه ما بين الاخين من زمان بسبب ان الشيخ معتصم كان بيفرق في المعامله ما بينهم وكان بيعامل عادل احسن شوية وتقدر تقول ده ربي عقده عند حاتم وخلاه كاره اخوه، وبعد ما الشيخ معتصم مات طلع كاتب كل حاجه يملكها لابنه عادل وده اللي خلي حاتم يهدده بالقتل لو ما رجعش ليه حقه
ده بالنسبه للجزئية الاولى.. اما الجزئيه التانية وهي الاهم
عادل كان شغال في الشركه، كان شغال محاسب لانه خريج تجارة ولكن فجأة وبدون سابق انذار اترفد من الشركة ومش هو لوحده ده كمان في صديق ليه اسمه موسى اترفد هو كمان، واتقال انه سبب الرفد الاهمال في العمل، ولكن الكلام اللي كان طالع ساعتها وبقوة ان عادل اكتشف تلاعب وفساد في الشركة دي وكان معاه ورق بيثبت ده.. ولما اتحرينا عن الشركه دي طلعت شركه مشهوره لمنتجات الالبان
ولكن المفاجأة اني جبتلك مع التحريات تقرير الفني اللي فحص الفيديو بتاع الحادثة.. ولما تشوف التقرير هتعرف اجابه السؤال الاول.. ازاي عادل ولع في نفسه قدامنا وبعدين لقينا جثته خارجه من جوه البيت مع رجال الاسعاف
خلص ايمن كلامه ومسكت تقرير الفني واتصدمت.. الفيديو طلع ذكاء اصطناعي ازاي ده؟!
ولكن في الوقت ده يجي بلاغ عن جريمة قتل ولكن في قريه تاني وتابعه لنفس المركز اللي احنا فيه اتحركنا بقوه من القسم على المكان اللي جاي منه البلاغ واول ما وصلنا لقينا نفسنا قدام بيت صغير مكون من دور واحد وكانت الناس متجمعه حواليه دخلنا البيت ولقينا جثه لشخص في اوائل التلاتينات وواقعة جنبه بطاقة
مسكتها وبصيت فيها وكانت
الصدمة.
