الفصل السادس

رواية الغرور والندم الجزء السادس 6 بقلم قمر الليل الغرور والندمرواية الغرور والندم الحلقة السادسة

اني تعصبت قتلها شني هذي اخرتها إناسبو واحد زي كريم شني هيا خلت من الرجالة ولا شني تي والله لو يكون آخر راجل ما نوافق يكون نسيب لينا و مشيت ثاني يوم زي العادة مشيت للقهوة أخديت من الكاشير ورق الغله و خذيت طاسة قهوة و قعمزت قدام القهوة على جيت كريم واني مغلول منه قتله شن جي عندك عين تجيني هو تكلم بهدوء قالي خيرني شن درتلك خوي يوسف غلطت معاك في حاجة كل ما في الموضوع بعتلك العيلة وطلبو بنتكم بالحلال قتله هذي اكبر اهانه

انك تصير نسيب لينا واحد درويش و نيه اناسبوك شن بيقولو علينا الناس هو ما قدرش يتكلم و الناس قعدت تتجمهر و تشوف فيا انطيحله في قدره بعدين هوا تكلم وقال والله ماني مهبول و درويش زي ما تحسابني لكن لأني كنت نتعامل معاك بحسن نية و عاملتك زي خوي الصغير انته استوطيت حيطي اني شديت طاست القهوة و حذفتها عليه و تبعزعطت على حوايجه قدام الناس وقتله اني مش خوك اقلب زومتك من هنى احسن ما يكبر الموضوع و برا قول لامك وبوك يشوفولك وحده

من شاكيليتك هو الدموع نزلو من عيونه وقبل لا يمشي قال اني ما عنديش بو و ام ومشى الناس كلها قعدت تتحسب فيا و يوقولو عليا في كلام ديل يقولو عليا زفت ديل يقولو أنسان قلبه ميت لكن اني متغطرس وما عدلتش عليهم

واحد فيهم جاني وقالي كانك راجل و ولد اصل راك استرت عليه وكلمته في مكان مش عام لكن خزي عليك و الزباين اللي في القهوة كلهم طلعو هجو و قعدو يسبو فيا الولد متاع المكاينة و الكاشير طلعو قعدو يقولولي عيب اللي درته مع كريم و علاش طيحت قدره قدام الناس اني قتلهم بعصبية هذا أسلوبي واللي مش عاجبه يشرب مية البحر بعدين من يكون كريم طشت حثالة مضحكة هما سكتو ورجعو لخدمتهم ثاني يوم جيت للقهوة لقيتها فاضية ولا زبون جي و الحكاية كساد

خديت طاسة قهوتي ومشيت قعمزت زي العادة على الطاولة بعد شوية جاني الكاشير قالي بيسيب قتله خيرك شن صارلك قالي والله حصلت عمل كويس و مشى بعد شوية حتى الولد متاع البريوش و المكينة قالي بنسيب حتى اني قتله شن قصتكم اليوم انتم الزوز بتسييبو قالي اني ما نكذبش عليك ما نقدرش نخدم مع واحد زيك بعد اللي درته لهذاك الولد المسكين انته انسان عديم الإحساس حتى بوي اصلاً سمع بالقصة و الناس كلها تتكلم عليك بوي قالي معاش تخدم معاه يله

السلام عليكم و مشى قلت ودره مش واقفه عليكم الخدم لكن الموضوع ما وقفش هكي القهوة معاش خدمة لان الزباين كلهم معاش جو وبعدين عرفت شن السبب لان الناس كلها تتكلم على الموقف اللي درته مع كريم وكرهوني حتى الجيران و اصحاب المحلات اللي بحداي قطعوني و معاش يكلمو فيا اني طبعاً مش حاسب حد ومعدلتش عليهم لكن لقيت القهوة معاش تربح مشيت عرضتها لإيجار و أجرها مني واحد قعدت راقد في الحوش امي و اختي ماعندهمش بالفالطه اللي اني درتها مع

كريم لكن في يوم جي خالي يتغدى عندنا و بعد الغدى قالي شن قصتك يا يوسف مع كريم اني قتله كيف شن تقصد يا خالي قال ……