الفصل الخامس

رواية الفراق هو نصيبنا الجزء الخامس 5 بقلم حبيبة الديب الفراق هو نصيبنارواية الفراق هو نصيبنا الحلقة الخامسة _نهارك أبيض انتَ بتعمل ايه هنا ايه اللى جابك _بينا ميعاد و اتفاق يا حلوه و انتِ اتأخرتي _انا لسه خارجه من الجامعه و كنت جيالك على فكره بس انتَ اللى مش بتصبر خالص! فتح باب عربيته: _طب يلا اركبي..! _اركب فين يابا؟ انا مش هينفع اركب معاك العربيه لوحدنا _يعني هناخدها مشي مثلاً ولا اجيب لك طياره..؟! تركبي موتوسيكل؟

رفعت حاجبي و اتكلمت باستنكار : _بتهزر معايا مش كده؟ ضحك وقفل العربيه و بص لي : _خلاص ايه رايك تركبي أوبر..! سكت شويا كنت بفكر بعدها هزيت راسي بالموافقه: _ماشي اطلب اوبر..! طلع فونه و طلب اوبر و انا بصيت له : _هو احنا هنروح فين؟! ابتسم و بص لي : _خليها مفاجأة ياستى..! اتوترت : _مفاجأة ايه بس؟ انا عايزه اعرف انا رايحه فين لو سمحت! _مش انتِ واخده جوائز في سباق الخيل؟ هنتسابق سوا ابتسمت و اتكلمت بثقه : _هه؟

تسابق مين بس هتخسر اكيد.! _هنشوف! مفيش كام دقيقه و كانت عربية الاوبر جت كرم فتح لي باب العربيه الخلفي و انا ركبت بتوتر بس ايه الجنتله دي يا عم كريم بس ركب قدام جنب السواق و بعد شويا كنا وصلنا لنادي السباق كنت مطمنه اني مش اول مره اجي هنا و كمان مطمنه ان المكان مليان ناس مش لوحدينا فيه كنت بجهز نفسي للسباق و بنقي الفرس اللى هتسابق بيها و كنت مبسوطه الصراحة نسيت اني جايه غصب عني عشان انا اصلاً بحب الاجواء دي اوي

السباق من ٣ جولات اللى هيكسب في اتنين يبقا هو الفائز ركبت الفرسه اللى اختارتها و كريم كان مستعد برضوا و هو جنبي ابتسمت و اتكلمت: _على فكره انتَ لما تخسر في حكم هتعمله لازم نلعبها باحكام..! ابتسم و اتكلم : _انا معنديش مانع بس لو انا كسبت هتقبلي عزومتي على الغدا _تمام بس لو انا كسبت.! سكتت شويا بفكر بحكم بعدها ابتسمت و بصيت له : _لو انا الكسبانه هنروح الملاهي و هتركب اصعب لعبه هناك خمس مرات ورا بعض..!

ابتسم بهدوء و اتكلم بثقه : _تمام يبقا اتفقنا..! السباق بدأ و انا كنت بجري بسرعه اوي، انا بركب خيل و بتسابق بيه من وانا عندي عشر سنين و على طول بكسب اي سباق بس هو كان محترف اوي فعلاً و سرعته رهيبه و كان مركز جامد للحظه حسيت انه هيكسب فعلاً بس انتبهت اكتر و بصيت قدامي ركزت كويس و انا بتسابق معاه الفرس كان كويس و بيجري بسرعه كبيره و انا كنت متحكمه فيه و ثانيه عدت و التانيه لقيت نفسي وصلت لخط النهايه و كسبت فعلاً..!

ابتسمت بانتصار و بصيت له و اتكلمت بثقه : _شوفت؟ مش قولتلك هتلعب معايا هتبقا خسران؟! ابتسم ببرود و اتكلم : _لسه في جولتين ماتفرحيش اوي كده..! غمزت له بإبتسامة : _هنشوف يا كابتن! الجوله التانيه بدأت و كنت محافظه على تركيزي بس اتفجأت ان سرعته عدتني فعلاً و سبقني بكتير حاولت اوصل له و يادوب كنت قريبه منه و قربت له بس هو كان سبقني و كسب المرادي..! ضحك بفرحه و غمزلي المرادي: _معلش يا زوزا مره عليا و مره عليكِ..!

اتكلمت بغيظ : _ماتقولش زوزا ياعم اي العشم ده ابن اختي انتَ؟! ضحك تاني و اتكلم : _خلاص ماتتعصبيش كده باقي جوله و ياعالم ممكن انتِ اللى تكسبي فعلاً و بالمناسبه انتِ شاطره اوي و تعرفي توصلي..! ابتسمت و اتكلمت بغرور : _عارفه..! ضحك عليا و شرب مايه و انا كمان شربت مايه و كنا بنستعد لأخر جوله..! السباق بدأ للمره التالته و انا بقا كنت مُصره اكسب المرادي بجد اصلي مش بحب اخسر أبداً

كنت بجري بغباء عشان اوصل قبله بس برضوا سابقني معرفش ازاي بيلحق كده فضلت اجري بسرعه و سبقته بس بعد لحظات هو سبقني تاني كان قريب من خط النهايه خلاص و انا كنت هستسلم بس مره واحده جريت بسرعه جداً و بقيت في نفس سرعته و مستواه فعلاً كنت حاسه في اللحظه دي اننا هنبقا تعادل بس حسيته بيبطئ سرعته ماهتمتش و سرعت اكتر و أخيراً وصلت لخط النهايه و كسبت ضحكت و رفعت ايدي بفرحه و بصيت له كان فرحان برضوا و بيضحك من قلبه

انا لو كنت خسرت كنت هزعل الصراحه بس لا ده عنده روح رياضيه بحته شكله طيب والله نزلت من على الفرس و هو نزل و وقف قصادي و هو بيضحك و يسقف لي : _لأ براڨو ابهرتيني الصراحه.! ابتسمت و عدلت طرحتي : _دي اقل حاجة عندي يا كابتن.! _يابنتي كفايا كابتن دي بقا بصي شيلي الالقاب و قوليلي كريم عادي بصي لو حابه كمان تقوليلي يا كيمو معنديش مشكله بس بلاش كابتن..! ضحكت جامد و بصيت له : _حاضر حاضر هقولك يا كيمو من عنيا يا كيمو..!

ابتسم و اتكلم : _طب ايه مش هنفذ الحكم؟! _حكم ايه؟ _لا لا شكلك بتنسى بقا ابتسمت له: _اااه ااه افتكرت، شكلك مستعجل على المرمطه بس تمام عادي..! طلعنا من النادي و طلب اوبر تاني و احنا واقفين مستنين يحيي رن عليا أوباا نسيت اني هقابل هنا رديت عليه _الو يا يحيي.! كريم بص لي و ركز معايا و يحيي اتكلم بضيق: _انتِ يابت مجتيش ليه مش قولتي جايه اقابلها و اتعرف عليها؟! اديها خلصت شغلها و مشيت يا زهره..! اتكلمت باسف حقيقي :

_والله نسيت يا يحيي حقك عليا بكرا هجيلك الشركه والله.! _لو مش حابه تيجي خلاص انسي الحوار _حوار اي اللى انساه، يابني بقولك خلاص هاجي بكرا، انشغلت بحاجه تانيه و نسيت خالص والله..! _ماشي يا زهره هنشوف..! _خلاص بقا ماتقفش ياعم.! _مش زعلان بس ياريت ماتنسيش بكرا كمان..! _من عنيا يا ابن عمي..! _يلا سلام _مع السلامه.! قفلت معاه و بصيت ل كريم اللى كان واضح انه اضايق و كان مركز معايا مفهمتش ماله ولا اهتميت اساله الاوبر جيه

و ركبنا العربيه بس المرادي مافتحليش الباب الاه فين الجنتله ياعم كريم؟ اتبخرت ولا ايه روحنا الملاهي و انا متحمسه بقالي كتير ماجتش هنا بصيتله : _شوف ايه اصعب لعبه هنا عشان تجربها خمس مرات ورا بعض..! هز كتفه و اتكلم ببرود : _شوفي انتِ مش ده حكمك…! اتكلمت بتردد : _هو…. هو انت مضايق ليه..؟! _و هضايق ليه.؟! _مش عارفه حساك اتغيرت فجأة لو مضايق اني جيبتك هنا ولا حاجة ممكن تمشي عادي مش شرط يعني..! بص لي ب نظره

خوفتني و حسيته هينفجر : _هو انتِ غبيه.؟ يعنى فكرك اني هضايق اني جيت هنا معاكِ؟ على فكره انا خسرت نفسي عشان اجي هنا معاكِ و نقضي وقت اكتر مع بعض..! اتوترت من صرحته دي و مش فاهمه ماله اتغير كده ليه لقيته بص لي و اتكلم تاني بنفس الغضب : _هو يحيي كان عايز منك ايه؟! اتفجأت بجد من سؤاله هو ده اللى مضايقه؟ اتكلمت بتفاجئ: _وانتَ بتسال ليه..؟ سكتت و كملت بتردد و عدم فهم : _هو انتَ غيران ولا ايه؟ اتنهد و بص لي : _زهره

هو انتِ مفكراني اني اخترت انك تخرجي معايا ٣ خروجات نتعرف على بعض هل ده من فراغ؟ او عشان اضايقك مثلاً؟ سكتت و مرضتش و هو كمل : _انتِ ماسألتيش نفسك انا عارف معلوماتك منين؟ انا معجب بيكِ يا زهره و كنت بعمل كده عشان أشوفك اكتر و اتعرف عليكِ اكتر مش عايز اعجابي بيكِ مجرد اعجاب وبس كنت حابب اشوفك و اخرج معاكِ و اعرفك اكتر ده كان غرضي بس لو انتِ بتحبي شخص تاني او معجبه حتى بشخص تاني ف ياريت اعرف ده..!

انا كنت ساكته و متفجأه فعلاً مشاعري متلخبطه حاجه جوايا بتقولي اللى بتعمليه ده غلط و حاجه تانيه بتقولي ايه يعنى لما تجربي شعور الحب و ان حد مهتم بيكِ و عايز يلفت انتباهك مشاعري متلخبطه بين الصح و الغلط بس ماحستش بنفسي غير وانا بهز راسي برفض و انا بتكلم بتردد : _لا يعني مفيش حد في حياتي خالص ولا بفكر في ده عمتاً..! قال بترقب : _طب و يحيي؟ اتكلمت بتفاجئ : _قصدك يحيي اخويا ولا يحيي تاني معلش..! _اخوكِ؟ _واكتر كمان..!

ابتسم بارتياح و اتكلم : _طب حلو إذا كان مجرد اخ ف تمام..! _تمام ايه؟ _يلا يا زهره نشوف اصعب لعبه و نجربها سوا! و قبل ما ارفض حتى لقيته شدني من ايدي و سحبني وراه و وقف عند لعبه عاليه اوي بتطلع لفووووق اوي و تقف كام ثانيه و تنزل جري و الناس كلها كانت بتصرخ جامد كريم راح يقطع تذاكر

وانا الصراحه كنت واقفه قدامها مبهوره و عايزه اجربها و نسيت التردد و التوتر من كريم و ركبتها معاه بحماس ركب على الكرسي و انا ركبت الكرسي اللى جنبه و كنت عماله اهز رجلي بحماس عبال ما المرجيحه تبدأ و كريم بصي و همس لي بإبتسامة : _تعرفي اني بحب برأتك و طفولتك اوي..! ابتسامتي راحت و اتوترت زياده و فجأة اللعبه اشتغلت و طلعت فوووق اوي مره واحده و انا من خضتي مسكت دراعه جامد و خبيت وشي في كتفه و صرخت بغضه و هو ضحك عليا ،

بعدت عنه و ضربت دراعه : _متضحكش عليا ياعم..! _خلاص يا زوزا ماتزعليش _متقولش يا زوزاااااعااااااااا يامامااااااااااا طبعاً صرخت لما اللعبه نزلت مره واحده تاني و وقعت قلبي و كريم كان بيضحك عليا بس و انا بصيت له بغيظ و عدلت الطرحه اللى لما بتوتر بظبطها معرفش ليه مع الوقت بدأت اتحمس اكتر و اخد على الجو ده ركبناها دورين ورا بعض بعدها دوخت و نزلت و كريم ركب دور زياده عشان التحدي بس بعد كده صعب عليا و نزلته

كان دايخ منها ساند على الحيطه و انا واقفه قصاده بضحك عليه _أومال لو ركبت الخمسه بجد كنت عملت ايه؟! _حرام عليكِ بجد اي الاحكام دي بطني قلبت..! _حقك عليا خلاص تعالى اعزمك على ايس كريم.! معرفش ازاي بس جبت اتنين ايس كريم و احنا لسه في مدينة الملاهي كُنا بناكلها و بنتمشى انا جبت بالفرواوله و هو جاب بالفانيليا كريم اتكلم و قطع الصمت : _هنحدد خروجتنا التانيه امتى؟ _هو لازم نخرج تاني؟ ماكفايا كده عشان انا حاسه بالذنب اصلاً

_حاسه بالذنب ليه؟ عشان سلمى.؟! كلت قطعت ايس كريم و بصيت له : _ممكن و ممكن برضوا عشان من ورا اهلي او ممكن مثلا اني عرفت نيتك ايه..! ابتسم : _طب و فيها ايه لما نخرج سوا و انتِ عارفه اني معجب بيكِ؟ _لا معلش مانا ماليش في جو الارتباط ده..! _انا قولت ارتباط؟! _طب هتسميه ايه معلش.؟! غمز لي و ابتسم : _حالياً سميه اتفاق، مش احنا مابينا اتفاق برضوا؟! يا ريت نلتزم بيه بقا..! سكت و سرحت انا عارفه اني اللى بعمله ده غلط

و ممكن الغلط بدأ فعلاً لما سمعت كلام سلمى و قررت اروح ل كريم بدالها بس مفيش حد مابيغلطتش و مفيش حد ميثالي كله بيغلط بس المهم اني ماطولش في الغلط ده و ماكررهوش انا هخلص اتفاقي مع كريم و مش هخليه يشوفني تاني خالص..! وقتها ده كان قراري العبيط اللى كنت فاكره اني هعمل كده فعلاً..! _تيجي نركب فنجان الشاي؟ بصيت له بتوهان و انا لسه سرحانه في افكاري و متلخبطه بس روحت معاه بصمت

ركبنا فنجان الشاي و كانت في اغاني جميله شغاله مع اللعبه و دخلتني في المود فعلاً و بعدها ركبنا لعبت العربيات و كنت راكبه عربيه حمرا و هو عربيه زرقه بس كنت عماله اخبط فيه كتير و جامد بالعربيه و هو بصلي و ضحك : _يابنتي خلاص خبطيني كتير كفايا كده..! _لا انا باخد حقي منك عشان خبطت عربيتي..، فاكر؟ قال بهزار: _ده انتِ قلبك اسود بقا..! ابتسمت و انا بخبطته و بقول بمناغشه: _جداً..!

خلصنا لعب و خلاص كُنا هنروح بقا لقيته وقفني و شاور لي على لعبه الرمايه اللى بيصيب لعبه بياخدها _تيجي نلعب دي؟! _الله! ايوه يلا يلا ابتسم و روحنا هناك _عايزه انهي لعبه؟! بصيت لهم و عجبني دبدوب كبير لونه احمر و ماسك قلب صغير و شكله كان كيوت و حلو اوي، بصيت له و انا حرفياً عيني بتطلع قلوب شاورت عليه : _هو ده شكله قمور جداً…! ابتسم بهدوء : _هجيبهولك..! بدأ يلعب عشان يجيبه و خسر و لعب تاني و خسر بس جابه من تالت مره

مسكه من الراجل و ناولهولي و انا خدته منه و حضنته جامد بحماس لقيت كريم بص لي بإبتسامة و همس عند ودني : _على فكره انا اللى جبته هاا؟! بصيت له لقيته غمز لي وشي احمر و اتوترت و بصيت في كذا اتجاه تاني و عملت عبيطه _احم، مش يلا ولا ايه انا كده هتاخر اوي.! _اهلك مارنوش يعني، مش معنى يحيي بس اللى رن..! _عشان انا قولت ل ماما اني هتأخر انهارده شويا على اساس اني كنت رايحه الشركه عند يحيي و بعدها كنت هروح اشوف سلمى

و نسيت ميعادنا الصراحه بس لقيتك في وشي انتَ بقا..! لقيت وشه قلب تاني مفهمتش من ايه غريب اوي الولا ده اتكلم باقتضاب: _تمام، يلا _استنى _ايه تاني _انت جبت لي لعبه و انا كمان هجيب لك واحده..! ايه اللى بقوله ده؟! انا نفسي استغربتني جداً..! ابتسم ابتسامه بسيطه و روحنا عند الراجل تاني و لعبت كذا مره لحد ماكسبت و ناولتله اللعبه كان دبدوب صغنن قد كف الايد كده _خد _ايه ده؟ دبدوب؟! _ماهو مافيش غير دباديب و عرايس

لو مش حابب خلاص رجعه..! ابتسم و مسكه : _لا طبعاً حابه جداً جداً..! _طب يلا بقا..! طلب اوبر و مشينا أخيراً ، وصلني للجامعه تاني و هو راح ل عربيته و انا ل عربيتي و قبل ما اركب عربيتي ناداني _استني _نعم؟! _هنتقابل تاني امتى..؟! قولت بتردد: _هو لازم؟! بص لي كام ثانيه و هو قالب وشه بعدها اتكلم: _لو مش حابه خلاص مش هجبرك و موضوع سلمى برضوا اعتبريه انتهى هكلم جدي انهارده و هقوله اننا مش متفاهمين سوا سلام..! _استنى..!

رجع و لف ضهره بص لي و هو ساكت و مستنيني اتكلم: _انا موافقه اخرج معاك بس مرتين بس..! انا وافقت ليه معرفش بس اللى اعرفه اني مش طبيعية بس حاسه اني كنت مبسوطه و انا معاه او ممكن مش عايزاه زعلان؟ مش عارفه بس انا متلخبطه جامد..! اتكلم بنفس البرود: _امتى طيب؟! الله!!؟ برضوا مضايق طب ماله ده _شوف انتَ بس بكرا مش فاضيه، عليا جامعه و رايحه الشركه عشان اشوف موضوع يحيي..! _موضوع يحيي؟!

_اصله واقع على شوشته و بيحب زميله هناك في الشغل وانا المفروض هصاحبها و اتعرف عليها عشان اعرف في حياتها حد ولا لأ..! ابتسامته ظهرت تاني : _يعني انتِ رايحه عشان يحيي بيحب بنت هناك و تتعرفي عليها صح؟! _صح..! ايه ده ثواني؟ هو انا بحكيلك اسرار ابن عمي ليه.؟! ضحك و مردش عليا، خد مني الدبدوب و راح ناحية عربيته و انا روحت وراه بعدم فهم _خد هنا يا كابتن انتَ عايز ايه من دبدوبي هاته..! _خدي اهو _ايه ده؟!

عملت ايه فيه الله ريحته حلوه..! ابتسم و اتكلم بثقه : _رشيت عليه من برفاني عشان كل لما اوحشك تحضنيه..! _توحش مين يابا..! بص بقولك ايه انتَ بتتجاوز حدودك عشان انا ساكته، خد دبدوبك اهو و مفيش خروجات تاني بعد كده خلاص فضيناها سيره..! _انتِ قفوشه اوي يا زهره خلاص معلش حقك عليا خديه و روحي بقا ولا اوصلك انا؟ _لا انا هروح لوحدي..! _طب خدي دبدوبك بقا..! _طب ممكن متتصرفش كده تاني..! _حاضر يا ستي و حقك على راسي..!

كان مادد ايده ب الدبدوب و انا خدته منه و ركبت عربيتي و مشيت و هو كان لسه واقف بيبص عليا و انا ماشيه..! روحت البيت كانت الساعه سبعه و يحيي و بابا على وصول طلعت أوضتي بسرعه بالدبدوب قبل ما ماما تشوفه معايا و حطيته على السرير بعدها مسكته و شميته بإبتسامة و فعلاً كان نفس ريحته..!