تحميل رواية «الامارة» PDF

"الإمـــــارة" 👑🔥

بقلمي: زهراء السلامي

الغلاف الذبت بجماله! الفخم الي يفسر ويرمز للقصة بشدة من تصميم المبدعة ♥️🔥 iwantmeto

👑

[المشـــــهد الاول]

"احنه غير حسين ماعدنا وسيلة.. والذنوب هواي چفتها ثجيلة

وغداً يبدو لنا سداً منيعا... هذهِ آرائُنا فيهِ جميعا..

والذنوب             هواي               چفتها             ثجيلة.."

حِس الرادود الحنون يدوي بالديوان وصوت لطم الزلم على صدورهم يرج بالبيت يقشعر الابدان، اضرب على فخذي بخفة واستشعر القصيدة والاجواء الحسينية ما بقى شي لزيارة الاربعين وللاسف ما نگدر نروح لكربلاء، سوينا مجلس بالمنطقة حتى يبقى ذكر الحسين (ع) وما يموت..

اسمعله ورايحة بغير عالم ابتسمت لا ارادي مركزة بي.. اختلاف شاسع بين اسلوبه من يقرا قصايد ويكون بشخصية الرادود وبين شخصيته المرحة ويه ابوي واخواني..

-شيخة.. وينها الشيخة؟؟؟

طلعني من جو القصيدة صوت ابوي يطب للبيت بهيبته ورزة شيوخ كاف عباته ولافها على خصره وسبحته تطگطگ بيده، عدلت الشال على راسي وطلعتله اركض..

-ها بوية صحتلي؟

-اي بوية وينهم الصايعين؟

-فوگ بوية

-شيسوون فوگ؟ شني هاي العالم كلها مو بعينهم ولد الزمال؟؟

-مادري بوية يمكن مشغولين؟

-مشغولين شني؟؟ ينرگلون اكيد انه الهم هالطايحين الصبغ

نزع عباته لا تتعقچ ولبسها الي، ابتسمت على حركته بادلني ابتسامة وباس راسي، رغم منزعج وجاي يرجف من العصبية بس ما ينسى يبوس راسي ويگول..

-شيخة الشيخات

-تروحلك فدوة بوية

-اخوانچ الصايعين يرحون فدوة لهالحسن..

طلعت امي وچم مرية گاعدة بالهول ما اهتملهن، عافنه وراح يوگف بنص الصالة ورفع راسه لمحجر الدرج يصيح منا بصوت قوي عصبي دب الخوف بگلوب امي وباقي النسوان..

-ولك علي الدر! علي البدر! علي الحق! علي التقي! علي الكرار! الامير علي! ابا الحسن علي! علي النور! علي السور!!

صاح لأخواني التسعة الي متأكدة مليون بالمية هسة گاعدين بالسطح ينرگلون ويتابعون مباراة ريال مدريد، ثواني وما اسمع غير ركضة حصونة صارت بالسطح ضحكت من اجو كلهم يمدون روسهم من المحجر واحد صار فوگ الثاني، جاوبوا كلهم بصوت واحد..

-نعم بووية؟؟

-ابوي: وتتتفگ وينكم ولكم هتليية

-علي الدر: بوية چنه نصلي مو شباب؟؟

-علي الحق: اي بوية

-ابوي: شتصلون بالتسعة بالليل؟؟

-علي السور: شيخنا صلاة الليل شمالك ما تشوف السبحة بيدي

-ابا الحسن علي: عوفه علاچي محد يقدر انفاسنا وجهودنا واحنه واگفين ندعيلهم بنصاص الليالي وعايفين اشغالنا

-علي السور: بوية انه گطعت صلاتي لخاطرك واجيت شني هاي

-ابوي: اي و...

صاح علي البدر يقاطع ابوي يسوي روحه ما يسمع..

-علي البدر: شباب سمعونا صلوات بنية التعجيل.. اللهم صل على محمد وال محمد وعجل فرجهم يا كريم

-ابوي: ولـ....

-علي التقي: الثااانية على حب الحسن والحسيننن

-الولد كلهم: اللهم صلِّ على محمددد وال محممممددد

-علي الكرار: الثالثة على حب....

-الاب: وتتتفگ انچلبوو ولد الفايخخة

-امي: ابو علي ليش تحچي عليَّ شمالك

-الاب: مرمروني ولدچ العارات، نزلوا لا اصعدلكم بالحزام.. وينه علي؟؟؟

-علي الحق: نعم بوية

-علي الدر: ها بوية هنا

-علي البدر: هاا هاا

-الاب: وجعع مو انتوو وينهم ذولاك علي السور وعلي النور؟؟

-علي السور: انه هنا چا مو صارلي ساعة انهق بس تَكي ضايع

صارو واحد يباوع بوجه الثاني يدورون على تك علي السور الشال گلوبنا، عدل علي الكرار العرقچين الي على راسه وسأل مستغرب..

-شباب وينه هذا؟ اليوم كله ما شفته؟ ووينه الامير...؟

بعده علي السور جاي يجاوبه وما نسمع غير صوت الصياح يجي من بره البيت، هرول ابوي وانه وياه ونزلو اخواني يتراكضون، طلعنا للحديقة ووگف گلبي وانه اشوف الامير علي شايل بيده واحد مدمى من فوگ ليجوه، لطمت على وجهي اصيح وابوي يرعد..

-الاب: وللللك علييييي شصااااير علييييي

-الامير علي: وعلي والسمااني علي اليوووم اشرررب من دمهممم وروحه لعزيز گلبيي المغدوور!!

ركضله علي الحق يفتهم منه واخذ الجثة الي بين ايده، جحظت عيونه وعاط متخبل حرگ البيت حرگ بصياحه، اجو الزلام يتراكضون من الديوان طببوني جوه غصب املخ بروحي اللطم لطم على وجهي وگابلت امي الوگعت من طولها، اسمع لوعيد اخوي وگلبي ينزف.. وعيد خسف گلبي وعيد يكسر روس وخشوم..

-مااا نرضى الا بدددم لا فصلييية ولا فصصصل وعلي دممم بدممم انععل عشيررتهم واحرگ الاماارة على روسهمم واجيب راااس شيخهم وادوووسه بالقندرة!!!....

♛  ♛  ♛

[المشــــهد الثــاني]

نايمة بالمخزن الصخونة تدگ بيه والرجفة لازمتني، ملفلفة روحي ببطانيتين قديمة ومدا ادفى احس گلبي متجمد..

انام وافز كل خمس دقايق هيچ بقيت وحدي اصارع المرض، اندگت باب المخزن عليَّ ماعندي قوة اگوم افتحها من مكاني صحت بصوتي المبحوح..

-ماريد اشوف احد

-هو بكيفچ!!

دفر الباب برجله ودخل عليَّ الحاجب معگود والوجه ينفض دم من العصبية، بس شفته گلت بگلبي الله يستر من هالليلة..

-شبيچ؟!

نتر بيه بقوة وقسوة، گلبت عيوني عليه وانطيته ظهري ممهتمة لوجوده معتبرته نكرة، سمعت صوت تذمره العالي ونزيت على صوت شي ينكسر، اللتفتت بسرعة واشوف شي يلمع مكسر بالگاع شنو هذا گزاز؟؟

-شبيك تخبلت؟؟

-حسسچ ما اهيسه!!

-تهيس شنوو شو انتَ تمسلت؟؟

عطت مخروعة ويه جرته لياخة قميصي، دا احچي وضرب حلگي بگفه ايده فتحت عيوني مصدومة من تصرفه وعطت ادفع بي واضرب بوجهه وادفعه عني.. تحارب ويايه يكتل واني اكتل جريته من شعره هلسته بيدي شلعته من فروة راسه تخببل عليَّ انگلب شيطان صار يضرب مثل المتوحش وجرني من شعري يضرب راسي بالحايط..

صرت اشهگ اريد اجر النفس اريد راسي يثبت وتروح مني الدوخة حتى ادافع عن روحي وهو على ضربة الوحدة ما مهتم، خشمي وگصتي وشفايفي تنزف دم ما مستوعبة الديصير وما استوعبت شوكت انفتحت الباب مرة ثانية وظهر منها رجال طفر عليه يجره من رگبته ويشمره بالگاع يصيح..

-وولك تضرب نثيية يا عاار الزللم

-لا تددخل ماريد اكسر چلمتتك

-اتدخلل واكسر رااسك بيك خير اكسرر چلمتي وگيسهاا الا اسوييك سبعع وصللل!!

-خليها تتنااازل ونخلص منهاا!

ما اهتم لكلامه شاله شيول وشمره بره المخزن وسد الباب يقفلها علينا وحدنا، وحدنا بهذا المكان الضيق الشبه مظلم رجفت رجيف بحياتي كلها ما عايشة هيچ رعب بلعت العافية ويه خزرة عيونه، نزع الشماغ الملفوف على راسه بشكل چراوية وگال بنبرة غير مفهومة غايتها..

-دخيل بختك يا حُسين...

♛  ♛  ♛

[المشــــهد الثــالث]

-شعجب طبيتي لغرفتي؟

-جبتلك چاي سيدي

ضحك ينزل شيشة العطر من ايده على الميز، ماعرف ليش كلما اگله سيدي يضحك.. تقرب مني كم خطوة بقيت بمكاني منزلة عيوني وبيدي صينية الچاي والكعك..

-لا تصيحيلي سيدي گولي اسمي

-حاضر سيدي

-ههههه شلون بيج انتِ شلون

-محتاج شي ثاني؟

-اي محتاج

-شنو؟

-محتاج ترفعين عيونچ وتعاينيلي

بلعت ريگ ونزلت الصينية بسرعة على الميز وركضت اطلع من الغرفة بس ما سمحلي، چان اسرع مني وهو يطبگ الباب علينا ويحاصرني ميخليني اطلع..

-دخيلك خليني اطلع

-انتِ شنو وجودچ هنا؟

-خدامتك

-لا تگولين خدامتك!!

-سيدي خليني اروح فدوة اخاف

-من شنو تخافين؟

رفعت انظاري اله اباوعله، عيونه مثبتهن على وجهي طبعن بيَّ وابتسامة حنونة مرسومة على ثغره، اردف يكرر سؤال بنبرة متلاعبة..

-من شنو تخافين؟

-منك

-چا هي كل التخاف هيچ وجهها يبرج برج؟

عضيت على شفتي السفلية متوترة وعيوني تطاير كل مكان ماگدر اثبتها بعيونه الحادة، حط ايده بصفي يسندها على الباب ويقرب جسمه مني روحي وگعت من سوه هالحركة، نسيت سبب وجودي هنا ونسيت شنو وصوني والاهم نسيت روحي من همس بيناتنا..

-انتِ گوة تتحارشين بيه

-ها..؟

-يا بعد الها.. چا هي كل التگول ها هيچ تسبي سبي؟

-سيـ....

-گولي سيدي بعد مرة وحدة وعلي الا اشگ حلگچ

-ياااا

-يا بعد اليا

-هاي شبيك انتَ!

-يا بعد الانتَ

-ولك!

-من سيدي لـ ولك؟ خايبة شگد صلفة.. بس خليچ هيچ اخرب على الصلفات

عضيت شفتي اخفي ضحكتي ونزلت عيوني عنه، بلعت ريگي ادير راسي لجهتي اليمين واخفي وجهي منه بسبب قربنا الي يوتر، نزل نفسه يهمس بأذني بتحدي..

-وابو راس الحار الا اكسر خشومهن و اسويچ شيختهن واخليهن خدم جوه رجليچ الترفة...

♛  ♛  ♛

إمـارةٌ أساسُهـا عَليّ

قائمةً على حُب الوَلي

يسري في الوريد عشقهم الأزلي

ومغروسٌ في القلب تراتيل إسمهُ الجَللِ

خلفهم هو الكنز وهوَّ سِر الأسارير

يقولون الوتر الموتور ذو الشأن الكبير

ويتلونهُ بالحَبل القاسم بين النعيم والسعير

لـٰكِـن

وقائِـعُ حكايتهُم حدثت في غضون الزَمهريـر

تُظهر لَك حتمًا إنها مـن الأساطيـر

مَسدٌ على العُنق يلتف مع بقايا حَرير

النـور مُعتـم و ثأرهُـم كبيرٌ مَـرير

وكُل حِداً منهم كالحَيد الفارِس الوقيـر

الحياةٌ ظِـلٌ و ظـلال

العيشٌ فيها يُقيّد الجميع بأغلال

منهـا و فيهـا تُكمن الأخطار

" الإمـارة " هُنـا

أهيَّ السور أم المَسـار؟

و كيفَ سيتخذون القرار في نهاية هذا البيت الجَبار؟

♛  ♛  ♛

عدنااا من جديد برواية ان شاء الله اقل ما يُقال عنها جمييييلة تحمل الكثير والكثيير من القصص والالغاز والعصبية والحُب الـ.. لا خلوها بعدين 🌚👑♥️

يا اخي شحچي وشگول حرت حررت بالمشاهد ماعرف شكتب وشنو اخليي ذني صارن بوجهي وكتبتهن نعوف المشاهد القوية للرواية لوكتهن ان شاء الله 🙈🔥

متحمممسة اخيرراً رجعنا للعراق شبابزز مو تنسون شي بأوربا يم ابناء الحسوم 😉

من هسة حضرن الجنط ولمن الچوالات نشيل غريضاتنا وننتقل لبيت الامراء!! 👑 لبيت الشيوخ لبيت ولد الجنوب 🪬

نعيش بـ "الإمــــارة" ويه بيت ابو علي وولده التسعة وشيختهمم 🦅👑

حفظوا القصة بالمكتبةة اذا عجبتكم ان شاء الله نبدي بيها وره ابناء الحسوم "شمسون"

*ملاحظة: القصة مو فصلية ادري راح يتراود هالشي بداخلكم بس لا 😂😂🫶🏻

توقعاتكممم عن شنو ممكن تحچي الرواية وشنو سالفة المشاهد؟؟ احس راح تتوقعون شي وبعدين تنصدمون بشي ثاني 😁🌚

حسابي الانستا هناك نحچي عن القصة وموعد التنزيل ان شاء الله 🩵👇🏻

#الامارة

بقلمي: زهراء السلامي 💎

لتنسون التصويت + التعليق بين الفقرات + متابعة لحسابي 💙.

━━━━━━ ♛ ━━━━━━

طابور من الرجال الوقورة يقفون على ارجلهم، متزينين بـ هندام عربي عراقي اصيل دشداشة، عگال، شماغ واخيراً البشت يغلف اجسادهم الضخمة، عطور رجالية امتزجت بين المسك والعنبر والبخور تفوح مع احتكاك مصافحة اياديهم دخولاً للديوان الضخم..

-شيخ عثمان: حَي الله النشامة، حَي الله زلام الإمـــارة، حي الله الشيخ وزلام الشــيخ

-شيخ علي: الله يحييّ اصلكم شيخ عثمان

-شيخ عثمان: نورتوا الغربية يا بعد العين.. اللهم صل على محمد والهِ وصحبهِ، على راسي جيتكم اليوم، امارة بَني [اسم الامارة] ترحب بيكم يا هلا يا هلا

اخيراً توزعنا بالديوان كل عشيرة بجهة گاعدين والشيوخ بالوسط، محادثة بسيطة دارت بينهم بالخنسة وهنا اجه دور ابوي "الشيخ علي" يسوي روحه مابي يسولف وأشر لأخوي يبدي الگعدة بـ طريقته بس طبعاً هالدوالغ مو علينا نعرف نية الحجي شنو، جلى اخوي المهيوب صوته وبحنجرة قوية جلجل حِسه بالمكان يجذب انتباه الجميع..

-جمعتنا اليوم على حب فحل الفحول، ابن عم الرسول، بعل البتول، امير المؤمنين، يعسوب الدين، الانزع البطين، الاورع المبين، قائد الغر المحجلين، ازهد الزاهدين، حبل الله المتين ، امام المعصومين، امام المتقين، الضارب بسفينَ، الطاعن برمحين، فارس بدر وحنين، ابو الحسن والحسين، علي ابن ابي طالب..

صمت وبس صوت طگطگة المسابح تنسمع تتداخل ويه نبرة صوته، ابتسمت على نظرة الفخر التنبع من عيون ابوي وهو يعاين ومركز بكل حواسه ويه كلام اخوي "الامــير علي" وسعادته من بدأ المجلس بذكر امير المؤمنين علي ابن ابي طالب (ع)..

جايبينا تراضي بين الطرفين بسبب حالة اعتداء ولد شاب من الغربية على بت يتيمة من محافظتنا وجاية هنا زيارة لبيت عمها، صارت گعدة عدنا وهسة عدهم رادو يلتمون السالفة ويغلسون لولا نخوة عم البت لأخوي الامـير علي، وصلت السالفة لأبوي والشيخ ما تحمل يكض روحه وگلبها گلاب على روسهم ..

-سيف: قرار النفي من المحافظة ظلم يالامير خلي يتزوحها ويستر عليها وفضت راحت ليش كل هالتعقيد

-عم البنية: البت ما تريده شلون؟ نجبرها؟؟

-سيف: هم باعت شرفها وهم ما ترضى تتزوج وتنستر والله خوش حچي هذا

-الشيخ علي: اوزن چلامك سيف لا تخلينا نغلط وياك حگ البت يرجعلها ويرجع شرف عمها مثلما راد الامير وهيچ احنا نتصافى

-سيف: لا تكبرون راسها شيخ چا الوليد گال يعقد عليها شتريد بعد!

ثااار الديوان وعم البت صار يضرب على وجهه وصدره ميت من الحرگة والقهر، وگف بنص الديوان وصاح بعلو صوته..

-اجيتك ونخيتك يا الامير! اجيتك شچاي ومكسور رگبة هاليتيمة امانة عندي وانلعب بيها وبشرفنا ما مرچية منك ترجعني خايب

-الامير علي: وعلي والسماني علي وشيبة ابوي علي وراس اخوتي الثمانية علي وحگ الرباني على حب علي وحگ الله ومحمد وعلي ما تطلع من هالديوان الا وانتَ راضي يا اخوي وعرضك عرضي وبت اخوك خيتي وتاج راس الحثالات...

انلصم الكل على حلگه بعد كلام الامير وانلاصت عليهم بالزايد من تدخلو اخوتي علي الدر و علي البدر وابوي بس ساكت ويتأمل خلفته التشگ شگ وهيچ انكتب تقرير گدام الشيوخ كلها البت متعرضة لاعتداء والولد انكسر ظهره بفصل وشرطوا يتزوجها ويستر عليها بس اهل البت ما رضوا ونفوه هو واهله من المحافظة..

ترحيب، تهليل، تجمهر، ابتسامات لا متناهية تعبنا وانشگت حلوگنا رجعنا بوسنا واحد واحد ورحبوا بينا من جديد، عدلت گعدتي وعيني وگعت على اخواني وزوج المشاكل الحايرين بعگالهم واحد يعدله للثاني ويتناترون..

-علي السور: لك لا مو هيج ابن الاوادم اريد اطلع هيبة نفس علي التقي

-علي النور: خاب گمم هو انتَ چنك سلبوح سيان وينك وين الهيبة

-علي السور: دبرني نور بشرفك يلا خوية شد حيلك انتَ تستطيع انتَ الافضل انتَ الاول انتَ الـ...

-علي الحق: انتَ الراح تنكتل

-علي السور: حق تعال انتَ تعال محتاجك خوية بشاربك انا هذا الشمبانزي ما يفيد

-علي الحق: نعالي وينه نعاليي

-علي النور: لا دخييلك مو گدام الوادم تطيح هيبتنا

-علي الحق: صوتكم لا اشگ حلوگكم لا تفشلونا

-علي التقي: خاب حلگي الي انشگ وتشنج من الابتسامة شوكت يفضوها

-علي الحق: عوفك من حلگك ذولة زوج القنادر شكو جايبيهم خزونا؟

-علي التقي: اسكت خوية غير الشيخ سحلنا من رگابنا چنه طليان هايته زلمة اليعترض وما يجي

-علي السور: اريد اعلق بس اخاف انكتل

-علي الحق: ظل خايف لان راح تنكتل بكل الاحوال

سكتنا كلنا ويه خزرة اخواني الكبار بأختصار معناها "انچبو لا احشي نعال شيخ عثمان الخايس بحلوگكم"..

-شيخ عثمان: وين الغدا وول گم حضرو

-شيخ علي: واصل غداكم شيخ ورانه طريچ نرد گبل لا تظلم الدنيا

-شيخ عثمان: لا شيخ لاا ما مرجية منك هاي.. الاميـر علي اشنو ضريبة اليرد العزيمة عدكم؟

ابتسم الامير واندار على ابوي وگال..

-الاميـر علي: اليرد العزيمة يتحشم مربع

-شيخ عثمان: هااا وهاي طلعت من وليدكم..

ضحك ابوي وسداها وياه نحشمهم مربع والمعنى منها نعزمهم اربع مرات لان ردينا عزيمتهم وخجلنا شيخهم، تفرقنا نطلع ولزم شيخ عثمان ابوي يحچي بصوت ناصي..

-شيخ عثمان: شوكت ناويها شيخ؟

-شيخ علي: بعد بعد ينرادله گعدة الامير

-ما مقتنع؟

-قافل بس مو بكيفه مچانه هذا

عدلت شواربي بأيدي ولميت دشداشتي ومشيت متوجه لأخوتي الكبار، بس شفت الامير علي واگف مغندب ضايج لان ابوي حطه بموقف محرج للمرة المية وخلاه يبدي الگعدة ضحكت وكضيته من معصم ايده وحچيت بيني وبينه بهمس..

-علي الحق: گرب يومك يخوي يعينك الله......

**

"بغداد الساعة 1:10 ظهراً"

جهنم.. وكأن باب من ابواب السعير مفتوح لتبخ السماء شُعلات نار حارقة، شمس ساطعة ملتهبة تضرب بأشعتها الرؤوس.. هواء معدم مليء بـ ثنائي اوكسيد الكاربون تجاهد الرئة تنفسه للصمود..

ذبيت نفس اللهث روحي خارطة من الحر وعيوني انعمت من الشمس، خرب روح اهلك اياد الطينة غير يفضها ويخلينا نروح مو راح اموت هنا!

-اياد: انتِ!! اي اي انتِ ام التراكسود البيجي وين بالچ؟؟

فزيت على صوته يأشر عليَّ ورافع حاجبه السميك، غلست اسوي روحي ما منتبهة ورجع يأشر عليَّ ويحچي بغضب..

-اياد: ام البيجي!! هاي شسمها ام البيجي انتِ بابااا وياچ احچي شبيچ

ضربتني زميلتي بعكسها تنبهني ديحاچيني يبووو ولچ اعرف اعرف ديحچي ويايه اني ماريد اجاوب بس تنازلت ورديت عليه بصوت مسموع..

-تحچي ويايه دكتور؟

-اياد: اي وياچ وين بالج بابا؟ عليمن صافنة؟؟

-عليك

عضيت لسان وره چفصتي والطلاب كلهم گامو يضحكون وهو هم ضحك وخفاها بسرعة، كتف ايده لصدره وگال وهو يراوغ بحچايته..

-اياد: اذا بالچ يمي هسة شنو گلت؟ عيديلي الشرح

بلعت ريگ متوترة وعيون الطلاب كلها عليَّ منتظريني اجاوب عمت عيني ضروري افشل روحي واسرح بعقلي، تنهدت خجلانة وگلت بدون تفكير..

-چنت تشرحلنا على الاصابات من تصير وشلون نعالج الوضع

صفن وباقي حاجبه مرفوع ما نزل، عيوني بعيونه منتظرته يطردني من المحاضرة بس ما سواها! ما سواها والله ما انطردت وانوب هز راسه راضي بجوابي معناها جوابي صح مرحححى..

-اياد: انتبهي عيوني ماريد تصفنين على شي معين بعد

رجعو الطلاب يضحكون بس معليه بيهم ذولة السفيهين زفرت نفس مرتاحة ما اهتميتلهم وبقيت مركزة لنهاية المحاضرة، كملنا لميت اغراضي ولبست الكلاو على راسي الشمس تصگع دمرتني ورحت اهرول للوكر اخذت كتبي وجنطتي وطلعت منا واستوقفني صوته..

-ها عيني وين رايحة؟

اللتفتت وبعدني احط الكتب بجنطتي انخمش گلبي من ابتسم وحط ايده بجيوبه واجه يوگف مقابيلي..

-مو اتفقنا اني اوصلچ؟

-على يا اساس توصلني؟

-على اساس اني گرايبچ

-شكراً دكتور محسن ما احتاج احد يوصلني من رخصتك

عفته اهرول ورجع صاحلي ضايج..

-مو وياچ اني!

انداريتله جزعانة شوكت ناوي يفهم تعبت..

-دكتور محسن گتلك اهلي ميقبلون احد يوصلني وانتَ تعرف وضعي ليش مُصر؟

-اولاً بطلي من هاي "دكتور" صيحيلي بأسمي ثانياً اني مو غريب عليج اصيرلچ من بعيد ليش تتهربين بكل مرة نتشاوف؟!

-لان زوجتك هنا! البنية راح تموت من القهر حرام عليك شوفها شلون تباوعلنا من بعيد

-انعل ابوهاا لا تكفريناا بيها!!

-اشششش صوتك يمعود لا تفضحنا

اضرب على حلگي خفيف حتى يسكت وعينه الصلفة لزگت هناك، تأفأفت مزعوجة وتركته اهرول وهالمرة مو بس صاحلي هالمرة عاط بكل صوته اسمي خله الطلاب تلتفت علينا..

-تَـمني!!

-كافي محسن كافي مرتك تبچي حرام عليك!

-ماروح الا اوصلچ اني

-ماريدك توصلني بابا كافي لا تلززگ

قاطع نقاشنا هجمة مرتدة اجت على ظهري وصوت ضحك عالي معروف، ذبيت نفس مرتاحة من اجت وهي السحبتني بعيد عنه ميحچي شي من تجي هالعوبة..

-نرمين: نقذتچ من هالسايكو مووو

-اي ولج مرته فحطت بچي وهو ولا مهتم

-ههههههه متت ضحك لو تشوفين اشكالكم من بعيد محسن چنه طلي صغيرون يتوسل وانتِ صخلة شرسة

ضحكت وتمشينا نطلع متوجهات لبوابة الجامعة الرئيسية ونسولف سوه..

-نرمين احنه مو اتفقنا نطلع للمول اشتري ملابس حبابة مو تخلفين بوعد....

ما كملت الجملة وشفت رقم طار علينا من مجموعة شباب تمشي گدامنا، اندار الولد شمر الرقم يمشي بالعكس ظهره على جماعته ووجهه علينا، غمز واشر بعيونه على الرقم الي بالگاع..

كشولت لعبانة نفسي واجيت ودست على الورقة الكاتب بيها رقمه بحذائي وعبرته، ضحكو جماعته وهو هم ضحك بصوت مسموع وصاح..

-احب الصععب احبب العصبي احبببه

-نرمين: انتَ شايف روحك بالمراية وليدي؟؟ روح غسل عيونك من الدگن روح

-منو وياچ انتِ اني بالي ويه صديقتج

-تَـمني: بده التمصرن

-شبيك حبيبي ضايج عليَّ

-تَـمني: اييعع عابت هالشكول اي والله

كشيته بيدي متقززة هسة لا خلقة ولا اخلاق من ذولة اهل البناطير البوري اللزگ وطافر لنص رجله طالعات سيقانه المصلبخات والقميص لطش على جسمه وضعيف چنه سلبوح مجاري والحاجب محفحف اخف من حاجبي، استغفر الله اللهم لا شماتة يا ربي اللهم لا اعتراض على خلقك بس همه گوة يحچونه..

-نرمين: اگلچ شنو هالكوكش الذبان الملتم عليچ اليوم شنو سالفتچ انتِ

-دسكتي هم حظي هذا

-شوكت يتوبون تره يلعبون الروح

-تَـمني: خيولي زعطوط امشي نروح

توادعنا واتفقنا باچر نطلع للسوگ، بستها بالهوا وافترقنا هي راحت ويه السايق مالتها واني اخذت فورتات اروح للبيت، حر حر سموم والتراك مالتي شوية بي ثخن انشويت علما وصلت للبيت..

لگيت باب الحوش مفتوح، ركض دخلت ادور على السبلت بس الوطنية طافية وفاتحين مبردة وگفت گبالها مايعة روحي علما استقرت حالتي ياله وخرت ورحت ادورها وگفت بنص الصالة اصيح..

-خالة.. خالة وينج اني اجيت

طلعت من المطبخ لافة الشال على راسها والضحكة تارسة وجهها، رحت عليها احضنها وابوس بيها..

-حنين: هلا يا بعد خالتج شلونچ يالعافية

-اروحلج فدوة حبيبتي بخير اني

وخرت من حضنها اتسائل..

-خالة وينها الخاتون

-بغرفتها بت الاغبر نايمة

-والله صح بت اغبر

-شالعة گلبي بت خالتچ راح انجلط من وراهة

-عوفيها اني اروح اشوفها

صعدت لغرفتها لگيتها نايمة والكتب والملازم مطشرات كل مكان حولها فريت بيدي وصفگتن اعيط..

-ايييي عفية عفية ام السادس عفييية منو الخبصتني عدها امتحان احياء خوش امتحان وانتِ نايمة بين كتبچ

-تالة: تَـمني اشتعل ابوچ طلعيي

-تمني: نچبي لچ تشعلين بأبوية تاج راس ابوچ

دفرت المخدة ضايجة و تعيط، ضحكت وطفرت عليها على الفراش اضرب بيها..

-تالة: ربي ما رايده شي بس رايده معدل تمني بالسادس ربييي

-تَـمني: تجيبي بالحلم لو بقيتي على هالحال

-أمداني اتخيل اجيب معدل ٨٧ واروح كلية تربية رياضة مثلج

-حلمي هذا روحي بالرياضة اني أتنفسها

-دروحي هندسة روحي قانون روحي صخام لطام شجاچ كل يوم صالبيكم بالملعب تموع روحكم من الحر ومحد بحالكم حتى تعيين ما الكم

عفتها تدردم وحدها واني اللملم بغرفتها گاعدة بمزبلة الاكل والگلاصات والمواعين والصواني والملابس الوصخة والنظيفة كلهن مخبوطات سوه، عفتها تنام شوية علما اكمل مكانها وارتبه سريع ونزلت اساعد خالتي بالمطبخ..

-حنين: روحي بنيتي تعبانة انتِ

-لا وينه التعب ترد روحي بشوفتكم اني

-اااخ اااااخ

-سلامتج خالة شبيچ

-مقصرة وياچ يا بنت اختي

-لا گلبي حشاچ من القصور، سولفيلي شلونها تالة وانتِ شلونچ مرتاحة؟

-اني خليني بضيمي بس شلون بـ تالة خاف متجيب معدل وابوها يخزينا

-تجيب تجيب بس على كيفچ وياهة ولا تضغطين عليها

نسولف واطلع بالمواعين حتى نتغدا، فرشت السفرة وجبت الخواشيگ والخضرة والطرشي ونقلت كل الأكل بالسفرة وگعدنا اني وياهة ناكل..

-صدگ خالة شصار على العرس تروحين وياي مو؟

-اي يمة خوما اعوفج وحدج ويه ذني الحياية

-عندي فضول اتعرف عليهن تدرين

-تتعرفين عليهن لو تقهريهن

تحچي ورافعة حاجبها بـ شك، سويت نفسي ما مهتمة واني بالعكس داخلي محترگ، حركت اكتافي بلا مبالاة وگلت..

-هنه يردن يشوفني وكاتلات ارواحهن خليني اروح اتعرف عليهن

-يولون لا تهتمين بيهم

-اهتم خالة اهتم

-تَـمني كافي يمة لا تقهرين بروحچ ما يستاهلن

-ومعقولة اعوف خطافة الزلم تَـمني حسرة بگلبهن؟ عيب خالة ميصير مو من اخلاقي هاي

-لا تحچين على روحچ! ما يوصلن لأظفر من أظافرج ذني الوصخات!!

تنهدت مبتسمة وهزيت راسي ساكتة، محد مصبرني على هالدنيا غيرچ يا خالة صرتيلي الام والاب والسند والاهل كلهم.. ضاجت خالة من كلامي وانزعجت حبيت اغير الموضوع وگلت وعيوني بالماعون..

-نسيت اگلج راح ابات يمكم اليوم

جمدت اللگمة بحلگها وظلت تباوعلي، حكت راسها وضحكت مجاملة تنزع الشال وتذبه بصفها وتگول..

-هاا

نزلت تالة من فوگ تفرك بعيونها گعدت ويانه على السفرة وتغدينا سوه بس خالتي مو طبيعية ومتوترة طول الوقت لحدما صار الليل هي على هالحال واعرف سبب توترها بس ميهمني شي وما راح انحرم منهم بسبب...

-حنين: اجه!! تالة اجه ابووج

مثلت ما مهتمة وبقيت اگلب بموبايلي بينما تالة راحتله تستقبله واسمعه يبوسها ويغنيلها وهي تتنعوص عليه..

-حنين: تَـمني روحي للغرفة ماما

-تَـمني: تمام

هستوني اگوم واشرتلي گعدي بسرعة من دخل عمي بسام وتالة مكمشة بيده، جمدت رجليه بالباب ولمعت ابتسامة على وجهه..

-بسام: يا هلا هاي منو يمنا

-حنين: احم.. اي هاي تَـمني اجت تشوفنا

-بسام: واني اگول ليش البيت منور هلا بـ تَـمني عمو حبيبتي شلونچ مشتاقيلج

نزل نفسه عليَّ وراد يجر وجهي بين ايده ما خليته نصيت جسمي عود دا اشيل الكلينسة مالتي من الگاع، رديت رفعت راسي واشوفه بعده منصي عليَّ مخلي عينه بعيني انزعجت بس شفت نظرات خالتي الخايفة وما ردت ازيد الوضع سوء..

-بسام بهمس: شلونچ

-تَـمني: بخير

-بسام: صايرة ما تجينا

وخرت منه وگمت على حيلي ارجع خطوة ليوره ونزلت القميص يغطيني..

-امتحانات ماعندي وقت

-حنين: يمة تَـمني روحي نامي وراج دوام باچر

-بسام: راح تباتين؟

-حنين: اي تبات اي، روحي لغرفة تالة يله علما اصب لأبوچن عشا

مُرة طلعت منها كلمة "ابوچن" يخسى هذا يصير بمكان أبوية، صح ربيت عندهم وخالتي استقتلت تقنعني بسام صار بحسبة ابوية بس مستحيل اتقبل، صعدت بسرعة بغرفة تالة وطبگت الباب علينا وقفلتها..

-تالة: ليش قفلتي الباب؟

-تَـمني: حتى انام ماعرف بدون ما اقفلها

هزت راسها اي وحطت ملازمها وگعدت تدرس، ساعة مرت وصاحت جوعانة ما خليتها تنزل رجت جبتلها اكل وگلاص حليب وفاكهة وصعدت احطه گدامها..

-تالة: دا اعذبچ

-تَـمني: بس درسي وطلعي معدل كلشي ماريد

-اگلچ اني رايحة لبيت افياء گلت لبابا وقبل هناك ادرس يمها

-هو ياخدچ؟

-اي واقتنع ابات همزين، يله باي

طلعت بالتراك واخذت جنطة كتبها وراحت، قفلت الباب وراهة وتمددت بالفراش عيوني طار منها النوم بالي مشغول.. بين تفكيري غفيت وفزيت الساعة بالـ ٣ الفجر تعبانة ومعدتي تفور..

طلعت اتسحب على اطراف اصابعي، عبرت غرفة خالتي الباب دائماً يعوفوا مفتوح من قبل بس ما لگيت احد بيها يعني گاعدة همزين نزلت بسرعة شربت مي وطلعت حبة مال جالي گرطتها وافتريت بالبيت ادورها..

مالها اثر توترت والافكار بدت تعصف ذهني وماكو غير شي واحد يتردد بعقلي، هرولت لباب الحوش اريد افتحها ولگيتها مقفولة، صعدت للغرفة بسرعة دا اقفلها وانتبهت للمفتاح ما موجود..

نبض گلبي بقوة ادوره مثل المخبلة والتايهة وين راح شلون اختفى هسة چان موجود، ماگدر افتح ضوه لا ينتبهلي گاعدة كل جسمي بده يرجف فقدت الامل اللگاه، فزيت ويه صوت حركة شخص قريب غرفتي عفت كلشي وركضت ادور مكان اتخبه بي ما لگيت غير كنتور تالة المهووس اخذت تلفوني وفتحت الكنتور وطبيت بي..

كنتورها ابو اربع بيبان، بيبان الوسط رف واحد و واسع وبس باب وحدة تنفتح دحست روحي بالطرف كلش وغطيت روحي بالملابس المنثورة وقطعت حتى النفس من انفتحت باب الغرفة وصوت همس تعالى بالمكان..

-بسام: تَـمني.. تَـمني عمو حبيبتي وينج طلعي يا روحي تَـمني..

كممت فمي بأيدي خايفة يطلع صوت تنفسي العالي، بأطراف راعشة فتحت تلفوني وخففت الاضائة كلش ورسلت لخالتي كلمة "تعالي".. ذبيت التلفون بسرعة من تقرب من الكنتور ويضحك..

-شوكت تستسلمين تَـمني تعرفيني احبچ وميت عليج طلعي بابا طلعي كافي تحاولين

ابتعد صوته يكمل بنبرة حقيرة..

-حرام عليج تلعبين بأعصابي طلعييي ولج بنت الكلبب

وبلحظة سريعة خطفت انفاسي فتح باب الكنتور ومد راسه يحچي..

-ابقى وراچ وراچ نهايتج بيدي وبحضني

مغمضة عيوني حييل وكاتمة النفس راح اموت، دعيت من كل گلبي ميمد ايده ويتحسس كومة الملابس الحاطتهن فوگي بس ما سواها لان طلع راسه من الكنتور وين صوت خالة..

-بسام!! شتسوي هنا؟؟

-بسام: انتِ شرجعچ؟؟ مو وديتچ ببيت سالم مرته متخربطة؟؟

-حنين: اجيت اخذ تَـمني وياي شتسوي هنا بسام؟!

-بسام: اهووووو رجعنا على سوالفج المملة وخري لا اطشر وجهچ وخرري

طلع من الغرفة يدردم وخالة طلعت وراه، ذبيت نفس واشكر رب العالمين ستر عليَّ ونجاني من هذا الحيوان، فزيت على رجة تلفوني رسالة من خالتي كاتبتلي..

"وينج يا روح خالتج طلعته من البيت بعد ميرجع ارتاحي"

طلعت من الكنتور انتفض واحس بالتعب زاد عندي، جريت روحي جر للفراش تمددت وحطيت ايدي على گلبي استرجع بذاكرتي كم مرة بسام تحرش بيه وكم مرة مد ايده على جسمي وكم مرة حاول يلعب بكيفه وربي ينجيني منه..

تعبت من التفكير ومن العذاب ومن الخوف تعبت وبعد ماعندي طاقة اتحمل شي، غفيت ليلتي بالخوفة وكل شوية افزفز الى ان طلع الصبح اخذت جنطتي وطلعت گبل للجامعة..

قضيت اليوم شلون مچان ورجعت لبيتي بدون لا اللتقي بـ محسن، فتت للبيت وذبيت جنطتي ورحت احميلي اكل بايت اكلت وتمددت على القنفة اتصفن وحدي لحدما غفيت على وضعي وحسيت على صوت الباب ينفتح..

فتحت عيوني بتثاقل اشوف الساعة بـ 11 بالليل حيييل صارلي شگد نايمة اني، گمت اللم بشعري ولبست الشبشب علما دخل هو ووگف گدامي الحاجب معگود والعيون حمر..

-ماكو الله يساعدك؟؟

بس سمعت صوته ولسانه الثگيل گلت بگلبي يا ستار من هالليلة، وگفت على حيلي وگلت بهدوء..

-شارب؟

-عندج مشكلة؟!!

-لا، نام جوه واني فوگ

فزيت على صوت الطاولة الزجاج تتكسر ضربها برجله رگعها بالقنفة وعاط..

-من احاااچيچ ما تنطيني ظهررچ شني شايفتني طلييي ومالي حشيمة وكراامة

بلا ما ينطيني مجال اجاوب هجم عليَّ يعتني من شعري، صحت موجوعة وادفع بي واضربه بس ويين اگدرله "نعمة" زوجي طوويل كلش وجثل ينگطع نفسي ويه كل راشدي يسطره على وجهي وراسي..

فلتت نفسي من ايده اصيح وارادد وهو متخبل سكران وعقله فصل، دفعته وانطيته راشدي فااار عليَّ ولزم راسي وضربه بتاج القنفة شاغت روحي..

-نعمة: بنتت الكللب السااقطة ال.....

يسب ويفشر عليَّ وعلى امي وخالتي وابوية الميت تخبلت حاربته محاربة يضرب واني اضرب بس قوته غلبتني وضربني بوكس سفطني ويه الگاع..

بألف يا الله گمت من مكاني وهربت اصعد فوگ للغرفة بعدني ما قافلتها عليَّ ودفع الباب ودخل، بچيت بعجز وتعب جسمي تعب من الكتل عيطت اصحي وانبهه بس ماكو فائدة نزع حزامه الرابط بي دشداشته ولفه على ايده..

-تَـمني: نعمةة نعمممة اني تَـمني نعمة والله ارجعلك الكتل والله

ضربني اول حزام على رجلي شاطت روحي تخبلت، شلت المزهرية وشمرتها عليه انجن وصار يضرب بخباال احس بجلدي بده يتشگگ من قوة الحزام..

انحصرت بزاوية الغرفة ابچي بصوت عالي وادعي يارب خلصني يارب نجيني وويه كل "يا رب" انصلخ بالحزام على جسمي وراسي وظهري ورجلي وايدي.. ابچي مفرفحة واضمضم بروحي الى ان خف تنفسي وحسيت راح يغمى عليَّ نزلت ايدي عن وجهي وذبيتهم منا ومنا مأيسة..

-نعمة: حتى ماا تعاندين تااج راسچ بت الكلببب من اريدن احاچيچ توگفينن وتدگين تحية هممم

ذب الحزام من ايده واجه عليَّ يهلس بشعري وينطيني راشديات ماعندي قوة ادافع بيها على نفسي تعبت وتعود جسمي على الكتل وماكو شي بيدي اسوي غير بالبداية احاربه واتعارك وياه وبالنهاية استسلم جوه ايده..

سواني ويه الگاع لطش ودفرني ببطني وظهري وشالني من شعري ينهضني يجبرني اوگف على رجلي مسح وجهي من الدم وباس خدي وشالني على چتفه واخذني للمخزن الي نحط بي گواني الطحين والتمن والفراشات صغير ومظلم شمرني بالگاع وقفل الباب وراه وحاوطني السواد من كل جهة، سواد حظي وروحي وسنيني، بقيت هنا الى ان غبت عن الوعي..

حسيت من جديد على شي يمشي على ايدي، فزيت اطفر من مكاني وصرخت من الوجع رجلي وايدي يوجعوني من ضرب الحزام بس متأكدة اكو شي مشى على ايدي..

گعدت بزاوية المخزن لامة رجلي لصدري وابچي بروح رايحة مهضومة اخاف من الحشرات وهسة مشت على جسمي مردانة لو صرصور وراح يوگف گلبي هنا وحدي شيجيب الصبح ويرجع نعمة لوعيه ويطلعني منا..

ابچي وامسح بدموعي اصبر روحي ميخالف تَـمني ميخالف، هي هاي الدنيا محد مرتاح كل بشر معاناته ومأساته شكل واكيد اكو بنية مكتولة هسة ومنيميهة بالمخزن نفسج لا تخافين.. تخيلي البنية المسكينة وياچ گاعدة وصبريها على ضيمها..

همست بخفوت صوتي مبحوح اضحك على روحي واسولف ويه البنية المكتولة الرسمها خيالي..

-ميخالف حبيبتي الله ميعوفنا كلشي بأجره.. اني تزوجت صار 8 اشهر من رجال همجي رجعي ميشبهني بشي ايده والضرب اذا مرت يومين ما انكتلت استغرب، يسكر تالي الليل ويرجع فاقد مشاعره واحاسيسه ويتونس من يكتلني..

مسحت عيوني ابلع بريگي واكمل اسولف ويه الصرصورات الهنا والبنية الخيالية..

-زوجتني خالتي حتى اخلص من رجلها بسام ومن تحرشاته والكتل بس ذبيت روحي بجحيم اكبر حتى ما اگدر اتطلگ منه يهددني بالطبة والطلعة.. اني مثلچ هم تعبانة وموجوعة ايدي بطبطت من الكتل اخاف ميروح الاثر وانفضح بالدوام

حطيت راسي بين رجلي اتنهد بتعب واسولف ويه صديقتي الخيالية لحدما دخل شوية شمس للمخزن عرفت صار الصبح.. انتظرته يجي وتأخر اليوم من غير العادة صار الظهر ياله اجاني وفتح الباب مصدوم..

-نعمة: تَـمني!

گمت على حيلي ما حاچيته بشي وعبرته اطلع من المخزن اعرج برجلي، رحت لغرفتي شفت الساعة بالـ 11:30 الظهر راح عليَّ الامتحان الله لا يوفقك..

-نعمة: حبيبتي بنيتي انتِ تَـمني گليبي مادري مادري والعباس مادري بروحي

اخذت ملابس وفتت اسبح واسمعه يدگ بباب الحمام ويبررلي ويعتذر احس راح اتقيء من اللعبان نفس، غسلت شعري فروة راسي تموتني وجع شعري متگطع ومتهلس، بعده شعري وجسمي ما استرد عافيته من كتلة اول البارحة ورجع كتلني من جديد..

حطيت دهن على اثار الضرب ولبست ملابسي بالحمام وطلعت لافة المنشفة على شعري، وگفت گبال الميز احط خافي عيوب وهو بصفي واگف ومستمر بالتبرير..

-حبيبتي انتِ گلبي اعشگچ يا راحتي بس گليلي شنو اليرضيچ انا حاضر اطلبي عيونيي يا عيوني ادللي عليَّ يا بعد امي وابوي تَـمني حاچينيي لا تبقين زعلانة

-تريد تعرف شنو يرضيني؟

-اكيد

-طلگني

فك عيونه على وسعهن وتجنح خشمه بعصبية، رفع ايده خفت لا يكتلني وابتعدت اهرول اوگف بعيد بس ما ضربني هالمرة ضرب الميز مالتي ووگع عطوري ومكياجاتي..

-طييف هذا تعرفين شني الطيف؟؟ حلممم اطلگچ بالعباس اجررم بيج واكتل خالتج وبنتها ورووح ابوي انععل الخلفچ لا تستفززيني

-شنو تايهتلك تكتل بكيفك والله اشتكي عليك بالشرطة اخليهم يسحسلوك

-ههههه عيدي بله عيدي المن تشتكين؟

سكتت ابلع بريگي مأيسة، ضحك وبرز سنه البلاتين فر بيده وگال مستهزأ..

-چا ياهي اشتكت عليَّ گبل شهرين وبرشوة سديت الحلوگ وطلعت بليلتها؟ انتِ عبالج هيته هي بوية اذبح واصلخ وانعل ابوچ على امچ واذبحهم جدام عيونج اخبلچ وشرفي اخبلچ وتدرين بيه اسويهاا

سكتت ميتة قهر عافني وطلع من الغرفة واني گعدت على الچرباية اندب حظي المصخم، الف مرة هددني هالتهديد ومرة راد يسويها ودفع لواحد يسحگ تالة وهي راجعة من المدرسة وسجلت صوته وقدمته للشرطة وماعرف شلون طلع منها مثل الشعرة من العجين يضحك ويگول احنه العشاير نحكم بكيفنا والقانون ميتدخل بمشاكلنا..

لملمت روحي اريح نفسي وراسي نمت بالفراش ودموعي على خدي عاجزة اغير شي متأملة فد ضربة تجي من رب العالمين تحذف نعمة واليشبهله من الوجود..

**

"مكان اخر عالم اخر"

-جينا نحنيـك يا ســـباح الگلب.. ورد وهلاهل على طـــول الدرب.. جينا نحنيـك يا ســـباح الگلب.. ورد وهلاهل على طـــول الدرب..

صوت الليل مع اصوات الرجال الخشنة تجلجل في المكان، فرح، سرور، طرب، رقص وهلاهل تمطر من كل حدب وصوب من الديوان الكبير، ابتسمت رافعة راسي اراقب حفيف سعف النخل الذي يتراقص مع بعض بسبب الهواء العالي وكأن حتى الاشجار سعيدة بهذا الزواج..

رتبت الشال على راسي اضم بي شعري ومديت عيوني اراقب شنو ديصير بداخل الديوان بدون لا اخلي احد من الزلم ينتبه عليَّ، ضحكت كاتمة صوتي واني اشوف ابوي يصفگ بيده بحماس وفرح ما مهتم لعگاله والبشت والكشخة فرحان حبيبي على فرح ابنه "علي البدر"..

اليوم زواج اخوي علي البدر اخيراً من بعد سنين طويلة عناء وتعب گدر ياخذ "شمسه" ويعيش الحب جوه اشعتها وحنيتها وجمالها ودلالها، كبرت ابتسامتي من تقرب الرادود على علي البدر وبيده حنة يحطها بكف ايده ويردد بحب..

-جينا نحنيـك يا ســـباح الگلب.. ورد وهلاهل على طـــول الدرب..

يقرا واخواني يشمرون بالورد والچكليت عليه والهلاهل ترگع، كملوا حنته وشاله اخوي علي الحق على چتافه وابوي صاح بفرحة غمرت گلبه..

-انا ناذر لو علي البدر تزوج بنفسي اقراله واهوسله ومثلما طلبتك من علي وزواجك هدية من علي ما ترهم ما نقرا على علي...

ابتسم بدر يحط ايده على راسه ممنون وبده ابوي يقرا بصوت حلو ولحن جميل والكل يردد وياه..

"علي عالي اعلى كـل عالـي ..... علـي موكـل مـن الـرب

علي مـا نصبـك منصـوب ..... لكن بالـنـص امنـصّـب

علي ابساگ العـرش نـورك..... علـي يالعلـمـت جبـريـل

اسمـك نــزل بالـتـوراة..... وزبـور وصحـف وانجيـل

يـا آيـه اعلـه كـل ايــه..... شبه شمس الضحى اعله الليل

يالمـبـدر تـمـام الـتــم ..... وبسـابـع سـمــه کوکب..."

يقرا والكل يقرا وراه والسعادة تنفض من وجوههم، فرحت من اختار مولود يجمع اسمه "علي البدر" و "شمس" سوه عشت الاجواء وياهم وحسيت الرومانسية ترستني ما طلعت من الجو الا من كمل ابوي وعلگو الدي جي وبدو بالردح الشباب، ما تحملت ما اهز وياهم بس ما كملت هز واجتني كرصة بخصري شعلته شعل..

-اااااخ

-واخااخه شتسوين هنا ولج يا البايررة

-اااخ يمة هو هيج شعلتيني شعل

-خلي ابوچ يكضچ تعاينين للزلام بعلي يسويج وصلتين والززهرة

-ما شافني محد بيهم عاينلي والله ملتهين ويه ابوي واخواني

-امشي گدامي امششي انعل امج الغبرة بت الغبرة

تجرني من زندي تسحب بيه ترجعني لداخل البيت، وگفتني بنص المطبخ تزلغ بخدودها من اجت خالتي تسأل شكو يا بووية شيخلصني بعد اليوم..

-ولج تعالي شوفي بت اختج تعاللي تعاين للزلام البرره

-تره محد يهمني بيهم غير اخواني وابوي شسالفة يمة لا تكبرين الموضوع

ضحكت خالتي وضربتني على زندي وتعض بأصابعها..

-ولج "حبيبة" شلون "حبيبة" عدنا بالعباس اسم على مسمى

-حبيبة: خالة بربچ قنعي امي نفتح ردح ونرگص

-چا شون يله نفتح واليوم الرگص صباحي غير علي البدر ماخذ بنيتي ونظر عيني

فرحت ورحت وياهة شمس تصير بنت خالتي وحنتها ببيتنا اليوم البنات بالصالة والزلم بالديوان، رگص وردح واكل وكيك وونسة نسينا ارواحنا ومحد ودت العشا للزلم.. بنص ضحكاتنا سمعنا صوت ابوي القوي يصيح..

-يا الله.. يا الله يا نساووين وين العِشا

زمخن بينا امي وخالاتي وعماتي خلو حتى العروس شمس تگوم ويانه ونحط المفلطح بالصواني وندز للزلم، تعبنا لحتى كملنا وبعد محد بيها حيل لشي كلمن نزعت نفنوفها وگعدنا بالدشدايش ندوس بالمفلطح..

-شمس: حبيبة العظامة على كيفچ لا تخزينا

-حبيبة: خاب طيري ميتة جوع من الصبح ما ماكلة شي

-امي: حبيبة وينها حبييبة

-حبيبة: ماااتت حبيبة صيحن اميين

ضحكن البنات ورحت اشوف شمالها امي شافتني بالدشداشة وشعري رافعته كبة عالية وايدي كلها دهن واللوچ باللگمة دگت صدرها ونترت..

-سودة بوجهچ هذا حال بت هذاا خايبة يردون يشوفوچ النساوين هلبت تصير قسمتچ امشي بسع غسلي وبدلي هدومچ لا تخزينا

اني سمعت نساوين وقسمة واطففر فوگ لغرفتي، قفلت الباب عليَّ اسم الله الرحمن دخيلك علي نجيني منهن ماريد اتزوج وماريد اسمع هالطاري..

ما حسيت على روحي من نمت وصحاني صوت دگ باب غرفتي، گمت اشوف ياهو وهجمن عليَّ بنات عمي وخالتي سوه يرزلن ويحچن ويعتبن ليش عفتهن..

-حبيبة: ما اجيتن بالليل ما حسيت على روحي من غفيت

-ليلة: امچ ما رضت گالت عوفنها تعبانة

تعذرت منهن ونزلنا سوه، شمس راحن وياهة خواتها وامها للصالون واحنه بقينا نرتب وننظف انكربنا بالشغل وكل شوي داخل واحد من اخواني يرعد لان اصوات ضحكنا عالي، طب علينا ابا الحسن علي يلطم ويريد يشگ دشداشته..

-ليلة صوتتچ ليلة طفت ليلتچ ان شاء الله على هالضحكة التجيب التايه

-ليلة: اهوو شبيك وياي حسرة عليَّ الضحكة ودوني لاهلي ماريدكم بعد

-ابا الحسن علي: لا دخيلچ ميت بيج لا ترحين خايبة شلون انامن اليوم وانتِ ماكو

عيبت عليه ليلة مطنگرة ودارت وجهها، غمزلي اگرصها نيابة عنه ما رضيت سوالي اني اعلمج وراح بره..

للظهر صلينا و بدن النسوان يجن العرس هنا ببيتنا ابوي حلف على خالتي ما يسوون العرس ببيتهم ناذر لو شمس صارت لـ علي البدر يزفها من بيتنا ويصعدها غرفتها..

سوينالها كوشة مرتبة وكلشي حسب الاصول ما رضى نخلي شي بنفسها كلنا نعرف ابوي شگد يعز شمس ويحبها وچان يوم منى من علي البدر گاله اريدنها بوية اخطبها گلبي هاويها وميت على طاريها..

صعدت فوگ ويه البنات نتكشخ وحدة تمكيج للخ ووحدة تسوي شعر اللخ ونتبادل بالملابس والاحذية كلنا خوات وكلنا واحد ويا حلو خوتنا..

-ابرار سلسالچ يخبل

-ابرار: هدية من اخوچ هذا هاچ لبسي

-حبيبة: لا ولج ابد والله لابسة گلادة انا

-ابرار: بالعباس ما اللبسها

حطتها برگبتي ابتسمت لبسته ونزلت اشوف امي واعاونها وانرگعت بـ "عبق" تهف ووجهها عرگان..

-شبيچ عبق

-عبق: سودة بوجهي سوودة بوجهي

-شصاير وياچ لا تخرعيني

-عبق: اني اليوم مكتولة مابيها مجال صرنا وجه بوجه اني واخوچ علي التقي و امچ شافتنا وخزرتني تسويلي بيدها اني اعلمچ شسوي برووحي

-حبي انتِ ما متقصدة لا تخافين علي التقي اصلاً ما يعرفچ منو لا تتوترين

-وامج شلون تقتنع شلوون

-معليج بأمي انا احاچيها

راحت للغرفة تلطم المسكينة حتى ما رضت تبدل، شهدت ابرار على الموقف الصار ونزلت توگف بصفي وتگول بحرگة..

-اگص ايديناتي لو ما چانت متقصدة يشوفها تقي

-حبيبة: ابرار ليش تحچين عليها اكيد ما متقصدة وانتِ تعرفين عبق شگد حريصة ما يشوفوها اخواني

-سكتي حبيبة سكتي لا تحرگين بگلبي گبل اسبوع وگفت تغسل مواعين گدام علي الدُر وما لافة نفسها بالشال عدل وهي شحمة ومربرة حرگت دميي

-حرام عليج علي الدُر الوحيد امي ترضى تطلع گدامه عبنه متزوج ونعرفه يحبچ وميفضل وحدة عليج

-ولج حلووة و تجيب التايه بيضة ومتفحة وشاطرة بالشغل حسبالچ الزلام ما يحبون هيچ صح علي الدُر رجلي ويحبني بس ما اأمن بيها گدامه تروش مثل الفراشة

-عبق محترمة ومؤدبة وانسانة بسيطة انتو...

ما كملت كلامي وقاطعتني تنتر ميتة قهر..

-كافي حبيبة كافيي تدافعين عنها تبقى عبق خدامة! صعدت لو نزلت خدامة ولازم تعرف مكانها شنو بهالبيت!

سكتت  ما أجادلها اعرف تفكير ابرار وتخاف من عبق ومن وجودها ببيتنا ورافضته، اللتهيت ويه المعازيم والضيافة هوسة وصوت المسجل عالي والمله منتظرة العروس تجي حتى تبدي العرس وبين كل هالفوضى خنست الاصوات وانقطعت الضحكات واستبدلت بنظرات الكره، توجهت العيون للباب من ظهرت منها عدوة كل الموجودين تَـمني!.....

يتبع 👑....

━━━━━━ ♛ ━━━━━━

عودة حميدة ان شاء الله شباباتي 💜

تركنا اوربا ونزلنا لأراضي العراق الحبيب، ممكن البارت الاول ميكون مفهوم جداً مثلما متعودين، ينرادلنه كم بارت ونگوم نذب ميانة ويه الابطال ونفرش ونگعد ببيتهم 😂

كُلش سعيدة لاني استلمت هالقصة جداً جميلة واحداثها شوقتني وابطالها ينحطون بنص الگلب ♥️ ان شاء الله انتو هم راح تحبوها مثلي واكثر 🙈

أي سؤال، استفسار، فضول ناحية القصة تعالو لحسابي الانستا ودخلو برجلكم اليمين رجاءً 🫣💚

#الامارة

بقلمي: زهراء السلامي 💎

لتنسون التصويت + التعليق بين الفقرات + متابعة لحسابي 💙.

مثل شمعة احترگ كل ليلة يم عميان

لا ينفع ضواي ولا يطفوني.. 🕯️

━━━━━━ ♛ ━━━━━━

اللتهيت ويه المعازيم والضيافة هوسة وصوت المسجل عالي والمله منتظرة العروس تجي حتى تبدي تقرا وبين كل هالفوضى خنست الاصوات وانقطعت الضحكات واستبدلت بنظرات الكره، توجهت العيون للباب من ظهرت منها عدوة كل الموجودين تَـمني!

ماتذكر شكلها كلش زين بس ميزتها هسة بسبب وجه امي الي انگلب، تقدمت تدخل هي ومرية وبنية شابة الصالة وسلمت بصوت مسموع قسم جاوبوها وقسم رمقوها بنظرات كارهة حاقدة..

-تَـمني: السلام لالله عيني حجيات

نفضت ايدها وحدة من الحجيات الگاعدة ونترت كاشة وجهها..

-برررره منچن امهات بغداد

-تَـمني: ليش حجية شبينه

جاوبتها ببرود ما مهتمة والحجية بقت تدردم ما عاجبها، گعدن على الكراسي ولمت المرية العباه على جسمها، عبرتهن اروح لامي واگفة تطحر من الغضب عيونها خابطات والوجه صاير دم..

-سلوى: شجابهن ذني الساقطاات ياهو عزمهن؟؟

-حبيبة: اكيد عمي جابهن

-سلوى: اشتعل افااد عمچ خوووش

عافتني وراحت للمطبخ تسب بيهن وتدعي عليهن، اجت عمتي زهرة تحاچيني اروح اوجبهن واسولف وياهن لزمت ايدي وگالت بأبتسامة..

-زهرة: عيب يبعد عمتچ روحي شوفي البت فشلة داست بيتنا ومچاننا زحمة ما نوجبها

-حبيبة: ماعندي شي وياهة انا عمة بس امي لا تزعل مني

-زهرة: انا احاچيها روحي انتِ

هزيت راسي ورحت بأتجاههن، ابتسمت ولفيت شعري كله حطيته على جهة وحدة وگعدت على كرسي بصفها، ركزت عيونها عليَّ من حچيت..

-اهلاً وسهلاً بيكم انا حبيبة بت الشيخ علي

مادة ايدي الها اصافحها نزلت نظرها تباوعلها ورفعتهن مرة ثانية شكلها مصدومة البت ومتعجبة لان سلمت عليها، ردتلي الابتسامة وصافحت ايدي..

-هلو حبيبة اني تَـمني

-اعرفج خية انتِ مشهورة هنا

كبرت ابتسامتها وعرفتني على بت خالتها تالة وعلى خالتها، سولفت وياهة شوية حبابة ولطيفة وتاخذ وتنطي بالحچي وحسيتها فرحانة لان حاچيتها انقهرت چا شگد مدگورة هالبت وفرحت بسبب محادثة بسيطة دارت بيناتنا..

-شگد عمرچ تَـمني؟

-18 سنة وانتِ؟

-انا 19.. هم تدرسين؟

-اي مرحلة اولى تربية رياضة

-تالة بفضول: وانتِ حبيبة هم تدرسين؟ لو يمكن هنا ميقبلون البنات يدرسون مو؟

-حبيبة: لا اصلاً ممنوع نترك الدراسة ابوي ما يرضى انا مرحلة ثانية تحليلات

سكتنا شوي بس تَـمني بالها سارح واحس بيها تباوعلي وتدير وجهها الى ان ما گدرت تسكت اكثر وسألتني بفضول..

-تَـمني: شعجب ما مزعوجة مني؟

-حبيبة: يا خية وليش انزعج منج

-مادري يمكن لاني زوجة عمچ الكل هنا حاقد عليَّ لان نعمة تزوجني

-باعي انا هالسوالف ما تهمني المهم انتِ خوش بت مبين عليج والله يسعدج ويه عمي ويه ابوي ويه اخوي كله واحد

ضحكت تغطي حلگها وتالة هم ضحكت انتبهت على چفصتي وضحكت وياهن وضربت زند تَـمني بميانة..

-تَـمني: شگد لطيفة حبيبة

-بعد گلبي

-اگلچ اريد مكان اگدر ارتب بي نفسي

-اي خية تعاي لغرفة اخوي

گمت قبلها ولزمت ايدي تهز راسها بـ لا..

-لا عيب ما ادخل غرفة اخوچ خاف بيها شغلات خاصة

-لا هو حاسب حسابه گتله فرغها البنيات كلهن بدلن هناك عبنها خارجية

قبلت وگمنا سوه طلعنا للحديقة وتالة اجت ويانه، بعدنا بالباب وصرنا وجه بوجه ويه اخوي علي الكرار مطين من فوگ ليجوه وريحته تلعب الروح..

-حبيبة: كرار! شصايرر

-علي الكرار: طحت بالخيسة شني ما شميتن ريحة البراز تفوح

-حبيبة: براز؟

-اي عيب من البنيات اگولن خ** مبينات خطار

ضحكت تالة تباوع لـ تَـمني ومغطية خشمها، بوز كرار ورفع ايده التلعب الروح گدامنا..

-علي كرار: اروح اسبح سويلي درب

-حبيبة: وين ولك ما يصير كله نسوان الصالة متروسة ترس

-كل هالنساوين هنا وانا بعدني عزابي؟ جاي تشوفين الظلم حبيبة جاي تشوفين؟؟

-فشلتناا روح ولك

شمر شحاطته من رجليه وطيرها صارت وحدة بشجرة البرتقال والثانية وگعت فوگ السياج على جهة البستان، سمعنا صوت واحد يصيح اكيد صارت بي..

-حبيبة: شسوييت

-زلگت من رجلي

ضحك وراح يصعد من الباب الخارجية والله اخوتي فلا يستحون وواحد مهيلگ اكثر من الثاني..

-تالة: بنات اني راح ادخل جوه هاي امي تتصل بيه

-تَـمني: گتلج خلينا نبلغها رايحات نبدل

-تالة: يله انزع بالصالة گدام النسوان واضغطهن بالزايد باااي

راحت واخذت بس تَـمني ودخلتها الغرفة وويه طبتها اعتلت الهلاهل والتصفيق والهوسات عرفت وصلت شمس، ركضت عليها اتلگاها بس نزعتها العباه بدت المُله وبده الردح على اصوله..

**

"تَـمني"

گاعدة على اعصابي من نظرات النسوان والبسبسة الدا اسمعها، گوة لازمة روحي ما اگوم اتعارك وخالتي تصبر بيه وتسكتني، فرحت من نعمة گلي راح احضر عرس ابن اخوه ردت فد طريقة اگدر اوصل لأهله واشيكلهم منه وعلى الديسوي بيه بس واضح ماكو فائدة لان نعمة ملاك بالنسبة الهم ونيالها الصارت من نصيبه.. اييييع!

دخلت غرفة اخو حبيبة شفت بنات بيها ديبدلن وتارسات ميز التواليت مالته مكياجات وعطور وحتى موصخات الغرفة والكونبار واگع عليه حمرة وتالفاته..

وگفت وره البردة ابدل عن عيون النسوان الهنا واسمع البنات الشابات يضحكن ويسولفن بصاحب الغرفة "علي السور"..

-والله غرفته تخبل يوم الالچ بيداء وتنامين بفراشه راسه براس

-بيداء: امييين ادعنلي بكل صلاة علي السور يشوفني وينتبه لوجودي بعلي ارضى اعيش على الحصيرة وياه

-يا حصيرة خايبة الزلمة الله منطي من خيره وخريج ويشتغل طلبي مهر عالي وگليله ما اعيش ويه اهلك

يسولفن بي ويقررن شيسون بعرسهم والنسوان وياهن على الواهس، خنس صوتهن خفت يكون دخل للغرفة بسرعة مديت راسي وانتبهت الغرفة فرغت وبس بنات ثنين واگفات ومنطياتني ظهرهن وبيدهن شي.. نزيت وطبيت مرة ثانية بالبردة ويه عيطة وحدة بيهن..

-يموووتچ والله يموتچ خلي يفتهم بعدچ تچفصين والله يدمرچ

-فاتن: ويسمع شنو يعني شعلي هو بيه؟؟

-چا الزلمة چفلچ ودگ صدره ولزم شاربه گدام ابوه وعمامه لا تصغري بيناتهم!

-فاتن: ما موديه عليه انا

-بس طلبتي فزعته رحتيله للمحل وگعتي حدر رجليه تتوسلين لا تنكرين فضله وهو...

سكتت بسرعة من انفتح الباب ودخلت وحدة تهمس متوترة..

-اجه اججه الامير اجه

-فاتن: لا بشرفچ شجابه هنا هاي مو غرفته؟؟

-مادري انا شفته جاي وبيده الغمد گمت اختض بمچاني وعلي

-فاتن: لا عفية روحي لهي دخيلج لا يفوت هناا

-ماگدر خية مو بيدي ليش ياهي تگدر تحاچي امشن نطلع بساع

انخبصن خبص وطلعن برة الغرفة، توترت وياهن صرت ماعرف شلون اللبس اخاف يدخل واني بعدني هنا، كملت بسرعة وطلعت الغرفة صايرة خارجية وبصفها بيبان ثنين، مشيت واتلفت منا ومنا المكان فرغ ماكو نسوان شسالفة، صارت طگطگة وراية ما انداريت بعد وطگيتها ركضة للمطبخ مغطين الباب بـ بردة، لويت اليدة اريد افوت ولگيت الباب مقفول خررب شلحگن يقفلنه..

مديت عيوني من البردة ويه صوت نتر زلم ثلاثة واگفين ثنين اشوف وجههم والثالث منطيني ظهره مگابلهم ويرزل بيهم بصوت مسموع ممهتم اذا احد سمعه..

-علي السور وعلي النور تبقون شالين گلبي وما تتوبون؟

-علي السور: لا وستر زيِنب علي النور ضحك عليَّ ولعب بأخلاقي انا مالي غرض ويه البت هي...

-وهررررش

فزيت مخلوسة ويه صوت الراشدي الصلخ وجه الولد، حط الولد ايده على خده وضحك يااا شو هذا يضحك..

-بعده يتمضحك الارعن

-اصلخني بعد بهالخد بشرفك لا تخليها بنفسي

وهذاك ما صدگ تعال وانطي راشدي ثاني يفر وجهه، لزم خده الثاني وعفس وجهه ويگول..

-اححح صار خدي حار

ويجاوبه علي النور فرحان..

-الكتل من الحبيب زي اكل الزبيب

-علي السور: بس انا احب العنب اكثر

-سمعوني ولكم زوج المشاكل والطيحان الصبغ بالعباس ابو فاضل وهاي حلفت بأبو راس الحار انعل والديكم لو تكرر هالتصرف بعلي اوصلها لأبوي اخلي يطركم صفحح

-علي النور: علي الحق شسالفة شو صاير ما تتحچى هاي و انتَ لتطمطم خياساتنا

-علي الحق: اطمطم خياساتكم بالمعقول! مو ويه بت معروفة مو خوش وتنطيكم حبوب تبننن تبلعوها افتح حلگك وولك افتحه اشووف

-علي السور: والله ما اخذناا ما بلعنااا

لازم فچه يعصر بي يفتح بحلگه ويفشر عليهم عزه بعيني على كمية الفشار الگاله مبين هذا سربوت عن حق وحقيق..

-علي الحق: لا تكفروني بيكمم عاينلي انتَ وياه هاي البت فاتن الخ** ما تدنون عليها بس هو مو صوچكم صوچ الامير چفلها ودگ صدر لأبوها عباله ادمية وتتوب وهي تمشي وتبيع حبوب على الوادم بالخفية بس شاربي مو عليَّ اذا ما سحلتها!

-علي السور: بس الامير ما يدري بيها تبيع حبوب چفلها من عرف ابوها راد يذبحها لان لگفها تتراسل ويه ابن الجيران

-علي الحق: ولكم انا اعرفهاا القندرة فاتن اعرفها

-علي النور: خايب دگول چنت مصاحبها وخلصنا

-علي الحق: اكل نععل

ربطت ديحچون على البنية الي انخبصت بالغرفة اثاري طلعت مو هينة ومسوية مصايب، دحست روحي حشگ ويه الباب اخاف ابين هسة غير يرحون لطشو لطش..

-علي النور: حق احنه مالنا غرض بيها والله العظيم البت معجبة بأخيك الحات واجت تسولف وياي چا شلون ارد الحتيت وما انطيهن مجال لا اذا هيچ الحچي ابور مثلكم

-علي السور: بهاي حقك خوية انا وياك وشرفك شرفي

-علي الحق: شرفك شرفي شني خاف راح تغتصبك؟؟

-علي السور: اهووو حق مادري وخر غاد توترنا انتَ وهذا وجهك

-علي الحق: زوج القنادر صيروا اوادم واحدكم شطوله يصير بعد

مبين ما راح يرحون ذولة، حاولت افتح بباب المطبخ بس بعدها مقفولة وماگدر ادگ الباب لا انفضح بس معروف حظي وفهاوتي رجعت خطوة وره ورن صوت كعب حذائي ثلاثتهم اللتفتو يشوفون منو وجهي صار هطوله من الفشلة..

-تَـمني: احم

-علي الحق: عليكم الاحم

گالها ورفع تك حاجبه ويباوعلي بشك..

-تَـمني: تره مچنت اتجسس عليكم شبيكم هيچ تباوعون

-علي الحق: چا احنه حچينا بشي؟

-تَـمني: اگلك علي الحق اريد افوت جوه و...

-علي السور: حفظت اسمه وتگول ما چنت اتجسس عليكم

-تَـمني: قصدت ما نويت اتجسس وگفتي هنا لان باب المطبخ مقفول ومدا اگدر ادخل جوه!

تقدم علي الحق وسوالي وخري بأيده، ابتعدت خطوات عنه وهو طلع مفاتيح من جيبه فتح الباب وسوالي براسه فوتي، دخلت بسرعة للبيت المطبخ متروس نسوان شجاهن قفلن الباب..

رحت للصالة وشفت تالة گاعدة بمكانها وتعوج بحلگها ضايجة، خالة رايحة للحمام وباقية وحدها، اخذت العرس تالة بس تعيب وتضحك عليهم ما اشوف شي غلط بي بس هي تكره هالاجواء وميعجبها العجب..

ضجت وتنرفزت كلش واني اسمع النسوان يحچن علينا ظليت احمس بروحي ميتة حرگة من وكاحتهن، طگت روحي ويه صوت الحجية الوراية تگول..

-لفت على الزلمة وخذته، حرمته من اخوته وگرابته بت الفگر

وتجاوبها الثانية..

-خايبة ساقطة اظن لگاهة بالبتاوين وچلبت بي وستر عليها چا معروفة تَـمني بت العار عيسى

اللتفتت عليهن سكتن بسرعة، ابتسمت تك خد وگلت واني احط رجل على رجل..

-كتلكم عيسى ودفنتكم تَـمني وانتن ظلن قنعن ارواحچن بسالفة البتاوين

حچت وحدة شفناهة اول ما طبينه بالباب مزرفة تزرف بأبر الفلر والبوتكس الشفايف طابقين والعيون مسحوبة ودلعة الفستان واصل لصرة بطنها..

-يااا شوفن اللسان شطوله عيني احنه نخاف نسولف وياچن لا توگف قسمتنا ومحد يدگ بابنا

-تَـمني: غير تگعد مدام نفيخة

-اوصلي لربع جمالي تالي سولفي بس معروفة البايعة شرفها تغار من البنات العفيفات

-حبي اني اعرف اليحچي بالشرف يكون عنده شوية

-هههههه ليش عيني شايفة البنات كلهن نفسچ

-تالة: منو الشفتها اول ما طبينا ويه هذا ابو عيون خضر يبوس بيها ويشمشم

فكن عيونهن النسوان وهي هم جحظت عيونها مصعوقة بس ما طولت صفنتها وفرت السالفة بسرعة تضحك..

-شوف شوف شلون يتبلن عليَّ

گامت بسرعة تشرد والنسوان انلصمن بعد محد حچت، جرت ايدي تالة ونترت بهمس..

-گوميي

-شنو وين؟

-گومي نرگص ونحرگ گلبهن گوومي

گمت وياهة بسرعة، وگفت بنص الصالة اشوف البنات محاوطات العروسة يرگصن وفرحانات السعادة والفرحة تنفض من وجوههن، جرتني تالة من ايدي وهمست..

-عيشي الفرحة مرة بعمرچ رگصي وتونسي وسوي كل البنفسچ

صفنت عليها ما مصدگة هاي تالة الي تسولف هيچ، ابتسمت وهي شجعتني بهزة راس وجرت شعري تنثره على اكتافي ووگفنا بنص الصالة..

ابتسمت من شفت "غزوة" تباوعلي ورافعة حاجبها بأعجاب، غزوة هي الخطبتني لـ نعمة وتحدت اهل نعمة حتى ياخذني.. رگصت رگص طلعت كل طاقتي ليگول البيت بيتي، ضحكت بصوت من تالة جرتني تهمس بأذني..

-باعي العيون نطت بااعي

-دا اشوف

اتمايل واتراقص ممهتمة لاحد، سحبت تالة شال من چتف بنية وشمرته عليَّ رنت صوت ضحكاتي خلت الانظار تتوجه الي وغزوة تهز راسها مستمتعة.. حطيت الشال بيدي ما قبلت اللفه على خصري مغلسة على وجع روحي وبقيت اتمايل ويه صوت الطرب..

رجعت خالتي وضحكت فرحانة من شافتنا اني وتالة متونسات او خلينا نگول بس تالة متونسة اني الحقد تارس گلبي وكارهة كلشي موجود هنا، شوية وصاحت حبيبة..

-يا نساوين تسترن راح يفوت العريس

الكل انخبص يلبس ويغطي نفسه هاي اللبست عبايتها وذيج الي مسحت مكياجها وهاي المسحت صبغ اظافرها واكو لبست من فوگ وعافت الجوه ضامة شعرها ومطلعة الكراعين..

-تالة: متحمسة اشوف العريس سمعت البنات يگولن كلش حلو

-خالة: الحلو حلو لروحه شعلينا بي ماما

دقايق مرت وما سمعنا غير صوت الهلاهل اعتلى ويه دخول العريس متهندم ارقى هندام، عبارة عن زي عربي وبشت فوگاه.. دخل والابتسامة من الاذن للاذن وعيونه ما وگعت من العروسة البادلته نفس النظرات العاشقة..

فرت بيدها ام حبيبة وگالت بصوت عالي بس عود سوتها بالضحك..

-سلوى: هاي شمالكم استحو گدامنا شوي هو هييچ كليتو بعض بنظراتكم ههههه

-علي البدر: عيوني صلفة چا شسوي

ضحكن النسوان يهوسوله فرحانين وحبيبة بوست اخوها وبوست العروسة ورگصو كلهم سوه، كل شوية تالة ناغزتني ومعلقة شي بالخنسة..

-تالة: عن حب متزوجين ذولة وگولي ما گلت

-تَـمني: اي گالن النسوان گرايبهم وحبها خمس سنوات

-تالة: بس هو احلى

-لا هي هم معايزة

-والله هو احلى

-لا باعي عيونها كلش حلوة

-عيونه احلى

-تالة دباعي رشاقتها تفوز

-جسمه احلى

-راسمة على الرجال انتِ شو دولي هناك

ضحكت وخالتي تأشرلي شكو وشبيها سويتلها بيدي ماكو شي وگمنا كلنا متوجهين للزفة، كمشت بيد تالة حيل اخاف عليها تروح بالازدحام الدنيا محترگة هنا، دورت على نعمة بعيوني ما لگيته والزلم كل مكان مثل النمل..

وگفنا على جهة على الاهازيج والگفلات الصارت كوومة ولد ضبة كاملة وگفو بالوسط عاقوا حركة كل الواگفين يقرون گولات ويدبچون سوه والترابة گابة اثر ضرب رجليهم الگاع، قسم شايلين اسلحة بيدهم والقسم الثاني رافعين دشدايشهم ويدبچون..

-تالة: خلينا نروح تَـمني حبابة اخاف من المسدسات

هستوها حچتها ورمى واحد من الزلم طلقات وحدة وره الثانية، صرخت تالة خايفة وضامة اذانها بأيدها وخالتي انخبصت وياهة تهدأها بس الرمي ما وگف كل شوية يفوت واحد يرمي ويدبچ للعريس لحدما تدخل رجال ضخم ينطي شبه لـ نعمة، صاحوله "علي الدر" جر السلاح من ايد الولد وصاح بي..

-انا مو گلت لاا ترموون!!

ضحك الولد وباس كتف الرجال، دگله تحية وگال بأبتسامة..

-حااضر سيددي

ضحك علي الدُر وضرب كتف الولد وعافه متوجه للعريس يصيح عليه..

-علي البدر يلااا يا خوي لا تشتل العالم

مركزة بيهم وحسيت على ايدي تنشنط ونعمة يجر بيه حتى الشال الحاطته على  راسي وگع بالگاع وتدعثر، صحت بي يوگف وهو ما مهتم شياطينه ناطة ووجهه منگلب لونه..

-نعمة ايدي ايييدي انگطعت شبييك

تالة وخالتي خايفات ويمشن ورايه، گلبي وگف من صار يعصر بأصابعي البين ايده احسهن تكسرن خفت يفقد ويكتلني هنا گدام الكل ويفشلني، صعدني السيارة وانطلقنا قبل سيارة الزفة..

الطريق هدوء تام محد تنفس السيارة سموم من الحر وما فاتحين لا جامة ولا تبريد، هفيت وجهي بأيدي محترة انتبهلي وفتح تبريد واستمر الصمت..

انطلقنا لغداد ما حضرنا الزفة شكله ضايج ومو طبيعي گلت ما اسئله گدام خالتي عود من نروح لبيتنا، نمت الطريق كله ونعمة وصل خالتي وتالة واني نايمة مادري ما گعدت الا على ايده يصحيني..

نزلت وياه اول ما فتت للبيت رحت للغرفة نعسانة وهو صعد ورايه، نزع ملابسه وفات يسبح نمت على الچرباية ماكدرت اغفى بعد شبعت نوم بس من شفته يطلع من الحمام سويت روحي نايمة حتى ميجمعنا حديث..

ما تصالحنا من اخر موقف سواه بيه وحبسني بالمخزن، حسيت بي يگعد قريب مني ويتحسر، ضرب رجلي بأيده يگعدني غلست كررها وهم غلست كررها بطريقة اعنف نفخت ضايجة وگمت اگعد على حيلي..

-نعم؟!

-بعدج زعلانة

-شنو رأيك انتَ؟

-مو اعتذرت منچ بعد شسوي احب رجلچ حتى تصالحيني؟

-انتَ كل يوم هيج تعتذر وترجع تكتل كافي نعمة بزعت روحي

-كافي زعل عيب انا زلمتج

-زلمتي يعني اللازم يحميني، يحترمني ويداريني، يحسسني بالامان مو كل يوم كاتلني وترجع تتوسل حتى اسامحك!

-تَـمني روحي طافرة سكتي لا ابتلي بييچ

نترها بوجهي وعيونه راح تنفجر من العصبية، ضحكت مستهزأة ورجعت انام بمكاني وغطيت راسي عنه..

-اليوم اخواني حاچوني

فتحت اذاني وياه وركزت بكل كلمة يحچيها..

-رادو يشوفوچ وما رضيت ادري راح يحچون عليَّ شلون ماخذ بت انا اكبر منها قريب الـ ٣٠ سنة

عصرت عيوني ابلع بريگي متألمة سمعت اكثر من تعليق بالعرس على هالموضوع كلهن گالن تزوجت شايب علمود فلوسه ميعرفون السبب الحقيقي الجمعني ويه هذا الرجال المتوحش..

-سألوني ليش بعدك ما خلفت گلتلهم الصوچ منچ

انتفضت من مكاني فاتحة عيوني عليه، بلع ريگه متوتر ومسح وجهه..

-اي چا تردين انطي بروحي گدام اخوتي

-وتگلهم مني السبب؟

-تَـمني بوية والله ما تسوه السالفة هسا واذا الصوچ منج ياهو راح يضوجچ وانتِ بعيدة عنهم

-نعمة! نعمة لا تلعب بأعصابيي اهلك يعرفون انتَ متخلف لو لا؟

-وووولچ بنت الكلللب

ضربني راشدي قوي انسطرت منه، دفعته حيل وطفرت من الفراش اصيح رايحة روحي..

-لااا تمد ايدك لا تمددهاا

-لا تستفزينيي ومن اطگچ تصيحين لا تططگ

-وهسة شتريد؟؟ وين تريد توصل بهذا حچيك؟

-اريد اتفق وياچ اتفاق بس راضيني اول

-من كل عقلك انتَ

-تَـمني انا زلمتج امون عليج وتعرفيني احبج لا تزعليني منج باباتي

-اييع لا تصيحلي باباتي انتَ مال جدوو

-هاا تَـمني هاا بدينا بالتجاوز

-نعمة شتريد؟

-اريد فرخ

صفنت بوجهه صفنة مطولة وهو هم صفن ساكت هذا شديحچي..

-شلون تريد طفل وانتَ...

-مو زلمة!! گوليهاا گولي مو زلمة حتى افررك حلگچ وانععل والديييچ

-انتَ شبيك كلمة والثانية صحت مو زلمة يا يوم اني معايرتك على عيبك؟ انتَ الوحيد التحچي بالموضوع ويومية تضربني عبالك اني السبب بوضعك

-لا انتِ فرحاانة انا ادري بيج فرحاانة عبن ما اتدنالچ بس بسيطة يا تَـمني حسبالج ماكدر اخذ حقي منج والزهرة الا....

-لا تحلف واهده، اني اساساً ما اريد اطفال ليش مضوج روحك انتَ؟

هدأ بسرعة يمسح على وجهه ويتحسر، هو ميدري اني قبلت بي من گلولي هو ميگدر يتمم زواجه من النسوان وهذا السبب بقى عازب طول هالسنين..

عافني وطلع بره الغرفة مزعوج بعد احسن خلصت منه، غمضت عيوني بلكي انام وهيج جريتها للصبح، بدلت وطلعت للجامعة امتحنت وطلعت من القاعة وشفت نرمين واگفة تسولف ويه خطيبها..

-نرمين: تَـمني همزين اجيتي تعالي لبيتنا امي مسوية تمن وفاصولية

-الله اتمنى بس ماكدر لازم اروح لبيت خالتي اليوم تالة عدها امتحان وتريدني اراجعلها خبصتني خبص صارلها من الصبح تدزلي

-خوما رجل خالتچ موجود؟

-لا اكيد بالدوام يله باي

توادعنا وركبت فورتات (كية نفرات) وعلى حظي النحس گاعدين بصفي ام وطفلها بيده نستلة، گعدت على الكرسي وحسيت گعدت على شي گمت بسرعة شفتها نستلة ككو مفتوحة ولزگت ببجامة التراكسود..

-تَـمني بهمس: خرب حظيي

-الام: يا عيني تدمرتي هذا ابني حاط نستلته هنا

هزيت راسي عادي ومسحتلي المدمر بس شتمسح تراكسودي رياضي لونه وردي فاتح وتدمر من وره يفشل..

-شگد عيب منچ بله خليني افركه بالماي شوية

-لا خاف..

ما كملت حچايتي وشالت بطل المي ودارته على البجامة وره فكيت عيوني على وسعها ومن كل عقلها تفرك بيها وتدردم على ابنها..

-شوف كبرت الطگعة عزززا

لطمت وجهي والي بالكية كلهم يتفرجون علينا واگفة منحنية وهاي تفرك ببجامتي من وره شكلنا يجلب الشبهة تخزيت..

گلتلها عادي وراح ارجع للبيت بس حظي اليوم فد مرة طايح حظه وانلاصت اكثر من وگفت بينا الكية واضطرينا ننزل بطريق مفتوح لا يوگف تكسي ولا كية تمر منا، دمي يغلي من الحر وحتى هوا ماكو انتظرت سيارات هواي توگفلي بس محد يقبل طريق سريع هذا..

حاطة جنطتي وره اغطي بقعة المي والككو المدمرتني واتصلت على نعمة ادگ وميجاوب شل گلبي..

-اوووووف خرررب حظيي من اريدك تختفيي بس من ما اطيق اشوف وجهك مگابلني وگاعد

اتصلت على محسن ونرمين وهم ماكو اكيد بالمحاضرة فكرت اتصل بخالة بس وين تجيني وهي بالدوام، رجعت التلفون بالجنطة ايست منهم وتمشيت لبيت خالتي، الطريق طويل للبيت ورجلي وكعن انوب بالطريق ثنين صچموني بسبب الاثر الي وره تراكسودي تمنيت اطم روحي طمم وما يلگولي اثر..

-شنو ما لگيتي تواليت وما تحملتي بعد ههههه

وهاي الجملة اجت من واحد ورايه اني روحي طافرة ووجهي احسه يچوي من الحر مطعون وشعري معطب وصايرة چني طلية وذولة يتحارشون..

-هسة لو جايبة احتياط شي

انداريت عليه وخرت شعري من وجهي وحچيت محترگ گلبي وميتة تعب..

-شوف اني طاالعة روحي ودتشوف وضعي تروح منا لا اللم الدنيا عليك

-شبيچ ولج شحچينا وياچ اروحلچ للاسواق اجيبلچ شي مناك هههه

-ولي هناك لعبت نفسي

عفته اهرول وهو ورايه يمشي ويسولف ببجامتي من وره ويحچي حچي سخييف واني بقيت اضمضم بيها بالجنطة، نشف المي من وره بسبب الحر شوية ارتاحيت كملت طريقي الى ان وصلت للبيت فتت بسرعة وصار بوجهي كلب بسام مطلعة من البيت مالته ويهوهو بوجهي..

-يماااااا

دخلت للبيت وحالي مرعبل والعرگ يصب مني، فتت من بوابة المطبخ والكلب وراية يريد يفوت تخبلت ركضت اطلع من المطبخ اروح للصالة وما حسيت اله انلطمت بدرج متنقل وشي يوگع على وجهي وراسي وصوت رجال انهبد بالگاع واگع ويصيح..

-دخييلك يا عليي

صرخت عيوني تحرگني اكو شي طب بيهن وحجب عني الرؤيا انهاريت من الخوف وصوت الرجال يحچي بس بالي مو وياه عقلي كله ويه عيوني..

-على كيفچ بالچ ويااي يا بوية باالچ وياي شبيچ تختضين

-عيوني مااا اشوف بيهننن خاالة، تااالة وينچن انعميييت راحن عيوني يا يمة سودة بوجهيي عمت عيني فوگما هي عميية

-انطينا مجال خالووو شمالها هاي ولچ ثبتي لا يطب بعيونچ ويطفيها

عفته وركضت لمغسلة المطبخ نسيت الكلب واللتهيت اغسل بوجهي واحس بشعري واگف مچبن، گدرت افتح عيوني شوية وصرت اشوف بيهن، بقيت اغسل واحچي عليه..

-شبييك انتَ متشوف شبيك

-انا؟؟ هو ياهو طب بيه وكربحني من الدرج

درتله بس راسي وبقيت منطيته ظهري شفته واگف ورايه وبورگ ابيض تارسه من راسه لصدره لهدومه لبنطرونه بس وجهه مبين وشكله معصبب كلش ويلعب بعيونه منا ومنا ميثبتهن عليَّ..

ثواني چانت واجتني لحظة ادراك مدا يباوعلي بسبب بجامة التراكسود يجوز شاف الطگعة ويستحي يباوع، لا هذا هو انفضحتي وتخزيتي وتلطمتي وتطينتي وتطين راسچ وراس الخلفچ يا تَـمني اليوم اسجله بالتاريخ يوم الفشالات!!

تركته بسرعة اهرول اطلع واضمضم بالجنطة من وره وبنفس اللحظة دخل بسام من بوابة المطبخ يتسائل..

-بسام: ها الامير علي محتاج شي خوية؟

ما سمعت جوابه كافي فشلات تركتهم ورجعت للصالة اشوف البورگ واگع كل مكان مدمر الصالة وشغلات الرجال وادواته مال الشغل والدرج كلهن ممطولات بالگاع، اخذتلي صفنة على الاغراض افتهم ليش بيت خالتي جايبين عامل بناء هنا شنو عدهم ديسووه؟

صعدت الدرج وطلع الرجال من المطبخ ويه بسام وبسام يعتذر منه ويضحك وياه من سولفله الصار، رحت لغرفة تالة دخلت اشوف روحي واللگاني ضييم بس كلمة ضيم تفسر حالي شعري مدمر صاير ابيض وملابسي خزي خو من وره ميحتاج اسولف شحسيتي من اجيتي هيج تَـمني؟؟ شحسيتي يا غبرة شحسيتي يا ثولة لو مطمورة وما رايحة اليوم للجامعة هواي اشرفلچ يا مطية يا زمالة..

قفلت باب غرفة تالة واخذت تلفوني وفتت للحمام اسبح ولا ساعة ولا ساعتين احاول اطلع الجص مادري البورگ من شعري گبر شگد فاهية تنلام تالة من تعيب عليج وتصيحلج الفاهية تنلام؟؟ انلطمت بالرجال وخربت شغله وفشلت روحي وخليت بسام يضحك عليَّ..

قطعت رزالتي لنفسي من حسيت بقفل باب الحمام يتحرك، جفلت جامد الدم بيه شنو ديصير ليش عبالك احد ديحاول يفتح بوابة الحمام عليَّ؟ معقولة بسام؟! لا اني متأكدة قفلت باب الغرفة شلون يدخل..

گلبي ينبض بجنون لفيت روحي بالمنشفة وسديت الدوش ووگفت وره باب الحمام حاطة ايدي على گلبي وادعي تطلع تالة او خالتي، انفتح قفل الباب والدم يبس بعروگي حتى رجلي وگفن مابيه اوگف اكثر، غمضت عيوني بقووة ويه صوته الخسيس..

-تَـمني

فكيت عيوني ويه مدة راسه الباب يباوعلي من فوگ ليجوه، ياابة شصار بحالي من دخل للحمام وقفل الباب وراه حتى صوتي ما طلع انبلع لساني وحروفي وخانتني قوتي، بصعوبة حطيت ايدي حاجز بيني وبينه وطلع حسي..

-بسام

-بسام: ليش تعذبيني تَـمني تعالي حبيبتي

-بسام خالتي وين؟

-ماكو احد غيرنا هنا لو تصيحين منا لباچر محد يجيچ ويسمعچ

-منو گلك راح اصيح؟

عگد حاجب مستغرب يمة راحت روحي گوة احچي وامثل القوة علساس ما خايفة واني لو يذبحوني قطرة دم ميلگون بجسمي..

-ما خايفة انتِ؟

-لا يابة

-شعجب؟

-اگلك العامل الجبته جوه راح لو شنو

-راح

جريت جاكيت التراكسود الخفيف الچنت لابسته قبل شوبة ولبسته فوگ جسمي وايدي ترجف رجف، قبضت ايدي مرعوبة من تقرب وحصرني بينه وبين الحايط..

-ليش لبستي اذا ما خايفة؟

-وهيج ابقى؟

-انتِ تعرفين اني شرايد منج امشيي

سحبني يريد ياخذني للغرفة انخلست وجريت ايدي منه، رسمت ابتسامة چذابية على وجهي وگلت..

-ياا شبيك بسام هو هيج تسحبني

-يلا يلا لا تضيعين السالفة

-بسام

ذبلت عيونه يباوعلي ويباوع لطريقة كلامي، جرت على روحي وتجرأت ودفعته من كتفه بخفة وابتسمت..

-اطلع خليني اجهز نفسي

-هاااا

-اي شبيك ماحب هيج غير اتحضر

-ما تحتاجين من الله تخبلين

-اي ادري بس حتى لو انتَ تعرفنا بنات ونحب نترتب يله يله اطلع وانتظرني بالغرفة دقايق واطلعلك

-واذا اتصلتي بأحد؟؟ موبايلج وين؟؟

-جوه بالجنطة عفته

-تَـمني يعني ما موجود هنا الموبايل؟!!

-بسام اكو واحد يدخل تلفون للحمام؟ يتضرر من البخار ويخرب اطلع يله ما اتأخر

طلع من الحمام متفاجئ من ردة فعلي هاي اول مرة انطي مجال وما اتهرب اريده بس يطلع واتصل بخالتي ابلغها وهذا السبب ادخل موبايل ويايه للحمام ولكل مكان اتواجد بي..

وگف بالباب ما قبل يسده يريدني اعوفه مفتوح بعده ما مأمن وشَك عندي خطة..

-بسام: تَـمني اذا ببالج شي ما ارحمج تره اخذچ كدام خالتج ورجلچ والله العظيم

-ياا شگد عيب

-العيب عليَّ وعلى رجلچ الديوث مالج علاقة انتِ

-ماشي ديلا لا تأخرني اريد اكمل واجيك

-باعي لو حاولتي تهربين تره..

-بسام شبيك وين اهرب وشباك الحمام بكبر راسك ثانياً انتَ دتأخرنا هسة تجي خالة وكلشي متستفاد

هز راسه اي وسوالي حركة بأيده عود عيني عليج هزيت راسي بـ اي وسديت الباب بدون لا اقفلها حتى اأمنه، روحي خارطة وارعش من فوگ ليجوه گوة عليَّ حچيت هيج وياه اصلاً ماعرف شلون طلعت هالكلمات من حلگي، وگفت وره الباب وطلعت موبايلي بسرعة ودزيت رسالة لخالتي..

"لحگولي بسام اجاني اني ببيته"

نسختها ودزيتها لـ نرمين وتالة ونعمة وسديت التلفون حاطته على گلبي ميتة، اهمس بگلبي يارب استر عليَّ يارب احميني يارب لا تخليني وحدي يارب والله تعبت منهم يارب...

ضميت التلفون وره المغسلة بسرعة من انفتح الباب ومد راسه مبتسم بخبث ويباوعلي من فوگ ليجوه..

-كملتي؟

-دقايق بعد

-ماكو دقايق امشيييي

سحبني من ايدي وشمرني بره الحمام للگاع، لميت المنشفة على جسمي وگمت بسرعة عيوني على باب الغرفة المقفول النذل محسب حسابه وماخذ احتياط لمفتاح غرفة تالة..

-بسام: سنيين واني انتظر هاليوم

-الباب

-مقفول لو تموتين ما اعوفج اليوم

-لا بسام لاا الباب الجوه انفتح اكو احد اجه

-لا تجذبين..

سحب المنشفة من جسمي چلبت بيها ارجف لدرجة اعصابي تلفت، شددت عليها ونترت بي..

-ولك اكو احد بالبيت سمعت صوت....

خنس صوتي وهو هم جحظ عيونه ويه صوت الدبچ الصار على الدرج مال واحد ديصعد ركض فوگ، عافني بسرعة وركض للباب يفتح القفل وطلع بره يهرول على اطراف اصابعه مثل الجريدي قبل لا يوصل الشخص الجاي ويشوفه..

رخت روحي ووگعت على الچرباية ويه دخول تالة الغرفة وبيدها جنطتها، شافتني نايمة على فراشها ضحكت وطفرت بصفي..

-تالة: تره ما چنت دايحة رحت لبيت... تَـمني شبيچ؟؟

-مابيه شي

-وجهچ اصفر ليش

-فتحتي موبايلج؟

-لا ليش شكو صاير شي؟

بسرعة فتحت تلفونها تشوف وركضت عليها اخذته من ايدها وحذفت الرسالة تحت انظارها المستغربة خالتي حرصت عليَّ اكثر من مرة ما افاتح تالة بموضوع تحرش ابوها بيه خوفاً على مشاعرها وعلاقتها بي بس قبل شوية اضطريت ادزلها هالرسالة..

-ليش اخذتي موبايلي تَـمني شبيچ ابوية وامي صايرلهم شي؟؟

-لا، اني راجعة لبيتي

بقت تلح بالاسئلة وتدور بموبايلها مجاوبت عن شي ولبست من ملابسها وطلعت ركض من هالبيت الحقير، وگفت على الشارع العام انتظر تكسي بس بيت خالتي مزعج متمر تكاسي منا الا قلة قليل..

فوگ الربع ساعة واگفة اني ونعمة ما كلف على نفسه ورجع يتصل بيه وخالتي ما شافت رسالتي حذفتها مني ومنها خاف أرعبها وهي يجوز مشغولة خطية مو مال اخلسها..

تمشيت جوه اشعة الشمس الحارقة وروحي تعبانة اتنهد الطريق كله من العطش والجوع، رحت للاسواق القريب بيت خالتي اشتريت بطل مي وكيكة وطلعت اگعد على الرصيف اكل وحدي الشارع فارغ يصفر حتى طيور ماكو..

شوية وتعدوا عمال يسولفون باعولي وعبروا مني ذبيت نفس مرتاحة واكلت الكيكة بس اسند طولي من البارحة على لحم بطني وشربت بطل المي كله ومن لا وعي شمرته ورايه اذبه بالشارع رغم سطلة النفايات گبالي بس ما انتبهتلها الا من صاح رجال..

-شنهاي

اللتفتت بسرعة وگمت من مكاني وچان اللگاه نفس الرجال الوگعت سطل البورگ على راسه وراسي وبصفه رجال ثاني ثنينهم بيدهم لفات فلافل دياكلون، حچه الشايل جنطة محفور عليها الاميـر علي..

-الامير علي: هنا يذبون الزبل؟

-تَـمني: يگولون

-الامير علي: يا زمال يگول؟

-اني

صفنت استوعب چفصتي وهو هم صفن والبصفه طگها ضحكة عالية وگال..

-اول مرة اشوف زمال يعترف هو زمال

-تَـمني: تره قصدت "اني ماعرف منو الزمال" بس انتو ما خليتوني اكمل الجملة

-اي صح صح هههههههههههههه

-شگد قليل ادب!

عفته ومشيت گدامهم والامير علي وهذا الحقير الضحك عليَّ بقوا يمشون ورايه ويسولفون بين بعض..

-الامير علي: ابو كربله شرايك ببغداد

فزيت واللتفتت عليه خازرته، اشرلي براسه بمعنى خير كشولت بوجهه ونترت..

-لا تمشون ورااية

-الامير علي: ليش الشارع متسمي بأسمج؟

خزرته وهرولت اعوفهم واغلط على روحي لان حچيت وياهم خسيسن كلهم نفس الشي وغريزتهم وحدة، اخيراً حصلت تكسي ركبت ورحت لبيتي..

فتت مهدود حيلي شمرت اغراضي وبوجهي لغرفتي بس حطيت راسي على المخدة غفيت وما حسيت الا على ايد نعمة يگعدني..

-نعمة: لچ گعدي شني ميتة انتِ ووولج تَـمني

وخرت الغطا من وجهي اباوعله ضحك من شاف شعري مخربط وخربطه بالزايد بأيده..

-شبيك

-صار ساعة اگعدچ حسبالي ميتة

-شفت الرسالة نعمة؟

-يا رسالة

-الدزيتها الك الظهر

-هاي يمته كلشي ما وصلني منج

زفرت نفس مالي خلگ اناقشه وهو هم ما لح بس شكله متحمس مادري شسالفته..

-گومي تَـمني جبت عشا بس صبي بمواعين وصيحيلي

-شنو المناسبة

-جاية اختي غزوة وولد اخوي

-شعجب

-عدنا سالفة وعندي سالفة وياچ هم يله بنيتي گومي لا تبطين

گمت لميت شعري وبدلت ملابسي، نزلت شفت غزوة گاعدة بالصالة بهيبتها المعهودة، الشيلة لافتها على راسها وضابتها بچنگال ذهب والعوچية الراسها مذهب بيدها والعباية الجرجيت لافة بيها روحها..

-غزوة: هلا.. هلا بـ أمنية اخوي

-تَـمني: شلونچ عمة

بوستها وحضنتني حييل بين ايدها مردتني ومردت زنودي تعصر بيهن بين ايدها..

-غزوة: زبد زبددد

-نعمة: ههههه خيتي عوفي البت خليها تجيب العشا

ابتسمت وهي رجعت تبوسني وتمسح على شعري، عفتها ورحت للمطبخ ارتب الصينية وكل شوية امد راسي على نعمة وغزوة اللگاهم يتبسبون مادري شعدهم..

اتذكر غزوة من خطبتني لنعمة گلتلي بالحرف الواحد "اخوي مو زلمة ما ياخذ منچ شي يريد بت بس تعيش وياه وترد وحشته" نست تگلي شلون يرد وحشته ونست تگلي هو وحش كاسر يشرب لحدما يفقد ويجي يفرغ طاقته بيه يضرب ويملخ ويجنز ويجلد لحدما يرتاح ويروي رجولته الغبية بس حتى يثبتلي هو رجال يتصرف كل هالتصرفات عباله الرجولة بالضرب الحيوان..

رجعت للطباخ اول ما اجاني نعمة مبتسم ويمدح بيه..

-ايه عاشت ايدج حبيبتي مريتي معدلة موش شلون ما چان

انطيته الصينية اخذها مني وطخ ايده بأيدي، رفع عيونه بعيوني متوتر ويتلعثم بحچايته..

-ترفة حبيبتي

-نعمة انتَ بخير؟

-اي چا شبيه

اخذ الصنية وراحلهم وغزوة هم دخلت الاستقبال، سويتلي لفة على الواگف اكلتها وغسلت فتحت قوطية ببسي وگعدت بالمطبخ اشربها ورجعلي..

-احم.. تَـمني

-امم

-تعالي احاچيچ

عبرنا الصالة والهول واصوات الكاعدين بالاستقبال توصلني ديسولفون وصوت عمة غزوة عالي تضحك، صعدني للغرفة وطبگ الباب علينا..

-تَـمني: راح يباتون؟

-اي بس هسة طالعين همه شوية ويردون

-ها

-تعالي بنيتي اسولف وياچ

گعدنا على الچرباية لزم ايدي بين ايده سحبتها بسرعة منه، تنهد وباس راسي يعتذر..

-تنكسر ايدي بعد لو مديتها عليج

-كل يوم نفس الحجي

باس ايدي وراسي ورجع يبوس بيدي ويتوسل..

-انتِ تعرفيني عصبي چا ما تعودتي عليَّ تَـمني

-عصبي على روحك نعمة مو مسويني كيس ملاكمة شوكت ما ضجت تكتلني

-خلينا ننسى الصار ونفتح صفحة جديدة

-صفحتك احترگت من زمان

گمت اعوفه واروح وجرني من ايدي بقوة خلعها صرخت متألمة اجه وصفگني بظهر ايده على حلگي طگن شفايفي وسنوني دم من وره محبسه الچبير شگ شفتي..

-اسف اسف بس صوتج عاليي

-هددني اروح

-تعالي حبيبتي اتشاقة وياچ شوفي شجايبلچ تعالي

يسحسل بيه ميخليني اطلع خفت وتوترت من تصرفه اريد بس انزل حتى اعرف شمسوي جوه وضامه عليَّ، فلتت روحي منه دا اطلع من الغرفة وعتني من شعري گطعه بيده ويضرب بكل قوته راشديات على وجهي..

رجعتله الضرب ماگدر اسكت على روحي ما اتحمل الا اخذ حقي حتى لو قليل، فگست عينه صاح متوجع وتوحش وراهة لزمني گطعني تگططع، وگعت بالگاع يرفس ببطني وظهري ويدوس على وجهي برجله ونعاله لابسه احس خشمي تهشم جوه رجله..

بچيت بصوت مكتوم كلما اعلي صوتي يضرب بالزايد فحطت من جر تعلاگه من الكنتور وصار يضربني بيها متتت من الوجع والبچي والصياح اتوسل بي يعوفني وهو فاقد يضرب بدون وجع گلب ويفشر عليَّ ويصيح عرفت الجوه طلعوا لانه ماخذ راحته بالكتل والعياط..

-حيواانتيي انتِ حيوااانة جوه رجلييية شوكتتت ما يعجبني ادوس على راسسج بقندرتييي وفنچ لو فتحتي حلگچ

-الله ينتقم منكك يا نذذذل يا حقييير يا ناقص الرجووولة

خنگني بأيد ويگطع شعري بأيده الثانية خصل خصل گامت توگع بيده وعيوني ينزل منهن دم مو دمع تبنج جسمي من الوجع وويه كلماته..

-ناقص الرجولة داس على خشم رجل خالتچ وخالتچ واخذج من بينهم مثل الاسددد تَـمني لو تلفين الدنياا ما تحصلين زلمة نفسي ستر عليج وستر على خياسچ

تفل عليَّ وشمرني جوه رجله حاولت انهض روحي بيدي وداس على ظهري يرجعني للگاع، صرخت اضرب بيدي الگاع حيييل وابچي وما كفاه هالشي داس على راسي مرده جوه رجله ودفرني وطلع من الغرفة وقفل الباب عليَّ..

بچيت من القهر، من الوحدة، من الالم ومن الظلم الدا اعيشه ويه هذا الذكر.. بقيت بمكاني ماگدر اتحرك احس عظم ايدي متكسر وراسي مفشوخ من غير وجع خشمي الينزف دم..

بچيت بمكاني لحدما عيوني طلعت، بچيت على حظي الربطني بي وخلاني كل يوم افتح عيوني على الكتل واغمضهن على كتل والمشكلة لا اني گادرة ارجع لبيت خالتي ولا گادرة اهرب واعوف نعمة جربت اروح لأخوته وبكل مرة يلگفني ويعيشني الموت..

وگفت على حيلي اسحل بروحي اليتيمة وفتت للحمام، فتحت الدوش ودخلت بملابسي اسبح جوه المي البارد بلكت گلبي الموجر يبرد.. سديت الدوش وبقيت گاعدة بالگاع ساندة راسي على حايط الحمام وبقيت هيچ لحد ثاني يوم..

ومثل كل يوم وره كل كتلة يرجعلي نادم من الصبح اجه يعتذر ويبوس بيه وشالني يوديني للغرفة يساعدني يبدلي ملابسي، ما انطيت أي ردة فعل روحي تعبانة مابيه اتعارك، صحت شايغة روحي من لزم ايدي..

-ها شبيها ايدج

بچيت كاتمة صوتي عافني وراح جاب باندج كسور من جوه ولفلي ايدي بيها، دفعت ايده موجوعة بس ما عافني الا كمل لفها تركته ممهتمة وجع البگلبي اكبر من وجع ايدي وجسمي..

گعد يگنبص گدامي ورجع يعتذر روتين بروتين نفس الشي كل يوم ماكو تغيير بس هالمرة مو بس باس ايدي وراسي هالمرة اعتذر بشي ثاني، هالمرة حط بحضني جنطة صغيرة وگال بلهفة..

-هاي الج بابا كلها الج

بقيت اباوعله صافنة عليه، كمل بنفس اللهفة..

-هاي بيوت، عمارات، محلات كلها بأسمج صارت تَـمني مالي وحلالي كلله الج بس لا تزعلين عليَّ وسامحيني

عگدت حاجبي مصدومة شديحچي هذا يا مال ويا حلال ويا بيوت؟..

-تَـمني سامحتيني مو؟ سامحتيني؟؟

دفعت الجنطة عني وگمت اريد اطلع من الغرفة، سحبني بخفة يرجعني ولزم الجنطة يطلع منها مستندات يراويني، عيوني صارت بگصتي من شفتهن..

-كله الج كللله بس...

سكت يباوعلي مرتبك، ضحكت مستهزأة لازم بيها "بس" مو اگول مو نعمة هذا اليفرط بأملاكه الذب دم گلبه عليهن..

-شايفة ذني الاملاك كلهن بأسمچ يصيرن بس لازم تجيبيلي جاهل

كبرت عقدة حاجبي ما مفتهمة، بلع ريگه وگال بأبتسامة وهو يأشر بيده على الطابق الارضي..

-ولد اخوي جوه والموضوع سهل ما ينرادله شي جيبيلي فرخ وشتردين يجرالچ

-مدا افهم عليك

عصب وارتفعت وتيرة انفاسه، فرك وجهه ونتر..

-تحملين اريدن فررخ جبتلج ولد اخوي الاثق بيهم واعرفهم ما يطلعون سر بس خل يصير حمل وما رايدين منهم شي بعد

-انتَ تخبلت

-لييش ليييش السالفة تبقى بيناتنا ما يحچون

-ووولك تريدني احمل بالحراااام وگدامك انتَ شنو مااعندك غيرررة

-ولد اخوووي على الاقل ما يطلعون سري ويفضحوني والفرخ اليصير من دمنا ولحمنا مو من غريب شمالچ انتِ

-عزه بعيني عزززه بعينييي ولك شنو انتَ هيج ماعندك شررف عادي عندك يجون يلعبون بعرضك لا فوگاهة مو وااحد

-صوتج لا تظلين تهوبزين كتلج بيناتنا ما تطلع السالفة! انتِ عبالج سهلة عليَّ و متونس على الوضعية؟؟ بس كلشي يهون ولا تطلع عليَّ سمعة معيوب

-لانك صدگ معيووب وهالشي مو ذنبك موو ذنبك

-سكتي انتِ شتفتهمين يله حضري روحج حتى يجون انا گوة قنعتهم ورضوا بالسالفة

اخذ الجنطة وياه ويريد يطلع ركضت وراه ادفعه اريد اشرد ولزمني من شعري يعتني وشمرني بالغرفة وقفل الباب عليَّ، تخبلتت دگيت ولطمت على وجهي وصدري راح اموت من الخوف مثل المخبلة رحت ادور موبايلي نفشت الغرفة نفش وما لگيته اخذه اخذذ نعمة موبايلي حتى ما اتصل بأحد..

گعدت بالگاع ارجف مثل السعفة المبلولة احس گلبي راح يوگف بريد يدخل عليَّ زلم علمود يعتدون عليَّ يمة وينج بابا وينكم وين عفتوني بهالدنيا الغبرة..

گمت اتمعچل بالباب اريد اكسرها بس ماكدرت صاج وثگيلة، ركضت للشباك صغير وكله كتائب ماكدر اطلع منه انهاريت خوف ورعب الدنيا ظلمت بعيوني واني گاعدة بهالغرفة..

نعمة اختفى صار المغرب وخلص وهو ماكو فكرت وگلت يمكن صارله شي بالطريق وربي نجاني منه يمكن مات وخلصت منه ياارب..

دگت الساعة بـ 12 بالليل وسمعت صوت ضحك جاي من شباب بحديقة بيتنا، ركضت للشباك اشوف ولگيتهم ثنين ووياهم نعمة يتمشون ويضحكون، صكيت بمكاني و فكيت عيوني على وسعها من شفت واحد من الولد هو الاميـر علي!....

يتبع....

━━━━━━ ♛ ━━━━━━

شلون راح تصفى؟؟ التوتر يقرا الففف 😩↖️↖️

+ تَـمني 😔...

توقعاتكم اطربونااا 🫣♥️♥️

#الامارة

بقلمي: زهراء السلامي 💎

لتنسون التصويت + التعليق بين الفقرات + متابعة لحسابي 💙.

شما گلبك حديد يصير على العافوك

ينزل مطر فجأة وياكله الزنجار.. 🥀

━━━━━━ ♛ ━━━━━━

دگت الساعة بـ 12 بالليل وسمعت صوت ضحك جاي من شباب بحديقة بيتنا، ركضت للشباك اشوف ولگيتهم ثنين ووياهم نعمة يتمشون ويضحكون فكيت عيني على وسعها من شفت واحد من الولد هو الاميـر علي!

حطيت ايدي على گلبي روحي مايعة من البارحة على لحم بطني والخوف دمرني، تخربطت على الچربابة وگعت ماگدر اگوم، فزيت بخوف من انفتحت باب الغرفة ودخلت عمة غزوة..

-عمممة

ركضت عليها عثرت بطرف الچرباية ووگعت يم رجليها لزمت ايدها اتوسل وابچي واشرحلها شنو طلب مني نعمة، دگت على وجهها مصدومة ونترت..

-ايااا ناقص الغيرة انا اله هالطرطوور

ركضت اريد اطلع وياهة وما قبلت گالت خاف يعصب ويفقد علينا ثنينا هي راح تروح تحچي وياه وترجعلي، ارتاحيت شوية على الاقل هي تگدر توگفه عند حده دقايق ورجعت بيدها لفة وعصير..

-ها عمة بشري

-لا تخافين يما شني ماعدنا شرف ونحبلچ من هذا وذاك تعالي ارتاحي واكليلچ لگمة نعمة ما يدوس باب دارچ بعد خيولي

-عمة اخذيني لبيت خالتي فدوة ماريد ابقى هنا

-بعيني يما لا تخافين لا عبالج اعوفج انا هم بت واخافن عليج بس اكليلج لگمة وجهچ اصفر سودة عليَّ

-ماريد ماريد بس خليني اروح لبيت خالتي

-لچ هيدي شمالج گعدي اكلي بينما اللبس عباتي

اخذت اللفة منها ارجف ماعندي اعصاب، طلعت وهم رجعت تقفل الباب من شافتني خايفة وما اقبل گالت لان نعمة بالبيت لا يصعدلي بدون علمها، هاي اخته اثق بيها كلش وكلش تحبني وحبابة..

گوة اكلت شوية وشربت العصير ابل ريگي بي، بدلت ملابسي بسرعة وحسيت عيوني تغوش فركتهن وكملت تبديل وگعدت على الچرباية انتظرها ترجع..

دقايق واحس عبالك درنفيس يزرف براسي انسطرت سطر صداع غريب اثر على بصري وعيوني بدت تنسد من وحدها، كمشت بطرف الفرشة اسند روحي لا اوگع ونزلت راسي الدوخة اكلتني، تأخرت عمة غزوة وبديت اخاف ووضعي يسوء بعد لا اكدر ارفع ايد ولا رجل بندت..

ماگدرت ابقى صامدة بعد ووگعت متمددة على الچرباية، أغمض عيوني وافتحها بثگل خدرت كلني وانفاسي تسارعت.. وگف گلبي من انفتحت الباب وطل منها نعمة ورجال وراه ما شفت ملامحه، حاولت اصرخ حاولت يطلع صوتي وادافع عن نفسي بس ماگدرت وفقدت الوعي بمكاني...

فزيت على ريحة غريبة، بس حركت راسي رجعتلي الدوخة وفجأة تذكرت! تذكرت شنو راد يسوي نعمة بيه.. طفرت من الفراش اباوع على روحي وجسمي والاثر البي ماعرف مال كتل البارحة هذا لو جديد، صرخت كاتمة صوتي بأيدي وادگ على صدري افتر مثل المجنونة واللطم على وجهي..

-صخاام بوجهيي لطاام اللطم حالي عمتت عينييي

اخذتني الرجفة واحس اذاني وشت من الخوف، الدنيا صبح وطالعة الشمس، ركضت اللبس ملابسي وابچي محروگة گلب، شفت الباب مفتوح طلعت اهرول انزل جوه وادور بعيوني على عمة غزوة افتر بالبيت روحي رايحة اريدلي اثر لشخص ماكوو البيت فارغ..

وصلت للاستقبال فكيت الباب على وسعها واشوفه نايم! اشوف ابن الحرام نايم ورايح بسابع نومة على القنفة روحي فارت شلت المزهرية الحاطيها على الطاولة ومن لا وعي شلتها ارگعها براسه بس ما لحگت اضربه لان فز ولزم ايدي مصدوم..

-يا ابن الحراااااااااام

-شكووو شصايير

-هدددني يا كلب هددني يا خسيس نذذل وصصخ

-اوزني چلامچ ويااي لا تظلين تخربطيين بالحچي

-هدني تفووووو عليك

تفلت بوجهه فك عيونه على وسعها ودفعني على البوفية روحه شايطة، گام من مكانه يرجف رجف عصبية وجهه انطعن دم وگعت بالگاع ادگ واللطم من القهر اغلط على روحي وعلى نعمة وعليه وهو باقي جافل..

-الاميـر علي: غير افتهم شمااالچ

-علسااس متعررف انذاال استفردتوا بيه حسبي الله ونعم الوكيل بيكم

-يا بشر غير تحچين شبيچ شني اشمن گفه ايددي واعرف

الصدمة شلت اطرافي واختفى صوتي فجأة، گعدت بالگاع بس دموعي تجري والرعشة لازمتني، عضيت على شفتي السفلية اتخيل حجم الخسارة الضيعتها وروحي تلوب..

-انتِ ياهو

رفعت عيوني عليه خازرته كارهة وجود هالبشر من اول مرة اللتقينا ووگع علينا سطل البورگ حقدت عليه، نظرلي نظرة مطولة منتظرني اجاوبه استجمعت قوتي ووگفت على حيلي مسحت عيوني ونترت بي..

-مسوي روحك متعرفني؟

-حرام لو اعرفچ منو

-اني مرت عمك الوليتوها واستفردتوا بيها واعتديتوا عليها

نبرتي ترجف وصوتي شخط من القهر، عگد حاجبه متسائل تخبلت من شفت وضعه تمنيت اكتله بمكانه..

-انتِ حرمة عمي نعمة؟

-ظل ظل غشم روحك ظللللل

-سمعي لللچ هذا الاسلوب ما يعجبنيي تردينا نسولف مثل الاوادم هذا انا گدامچ غردي العندچ وتجاوز لا تتجاوزين!

گلبي خلص مابيه حتى اناقش گعدت على القنفة وهو گعد بالقنفة المقابيلي ونويت اخذه على مايه واسولفله من البداية شرفي وكرامتي خسرتها شعندي غيرها اخسره بعد..

اسولفله وعيونه جاحظة ضحكت بين جملة والثانية على ردة فعله الكذابة ويسوي روحه متأثر علساس ما مسوي شي..

-خوش تمثل

بدون لا يجاوبني عافني وطلع بره الاستقبال وگفت بسرعة ورحت وراه اركض اشوف وين ديروح خفت من شفته وگف بنص الصالة وسأل..

-غرفتچ وين؟

-احترررم نفسك

-غررفتچ وووووين

صاح بيه صوت فزز النايم بگبره، بلعت ريگ واشرت على الطابق الثاني هرول بسرعة يصعد واني رحت للمطبخ اخذت سچينة وصعدت وراه امشي على كيفي اراقبه من بعيد وهو يفوت للغرفة ويدور بيها..

ضامة السچينة بـ ردن التشيرت ووگفت بباب الغرفة اباوعله يدور ويفتر على شي، شوية وراح على الفراش ينبش بي توتري زاد اضعاف من شال الفراش وطلعت ملابسي الداخلية فوراً نترتهن من ايده ممهتم وكمل يدور..

-شدتسوي

مجاوبني واستمر بعملية البحث، كررت السؤال عليه مرة وثنين وثلاثة وميجاوب الى ان طگت روحي وعطت..

-شبيييييك

اللتفت عليَّ وجهه طاگه دماراته من العصبية وشعره مخربط وعرگان، انرعبت من خزرني وتقدم عليَّ بخطوات سريعة يلفح نار متت من الخوف وصرخت بصوت عالي بعده ما واصلني ومديت ايدي وضربت السچينة بچتفه..

-لچ اااااااخ

-لا.. لـ.. لـ.. لا تتقررب اموتك والله اذبحك

-تذبحيني بسچينة فواكه امشي هناك خليني اشوف دربي

وخرت بسرعة وطلع موبايله من جيبه يتصل على شخص روحي خرطت من صاح مستعجل..

-انتَ وين؟؟ البارحة طلعت؟ يمته؟ ليش؟.. وانا ظليت ببيت عمي!؟.. صدگ تحچي؟؟

سد التلفون وذبه من ايده حاير، كمشت گلبي ووگفت على جهة اراقب خطوته التالية بس ماكو خطوة تالية لان رجع يدور بالغرفة نفشها نفش..

عفته ونزلت برجلين ترجف اريد بس اطلع منا اروح لبيت خالتي بس الباب مقفول، دورت على مفتاح البيت ما لگيته صعدت ادور بجنطتي هم ماله اثر انتبهلي الرجال شدا اسوي ذب نفس وسأل..

-شبيچ

-معلييك انتَ

-خوشن

عافني ونزل بقيت ادور بالجنط والغرفة راح اموت نعمة على شنو ناوي خرب روحك شلون تسوي بيه هيچي، نفشت المجرات والكنتور ادور على مفاتيح الاحتياط بس ماكو، دقايق ورجعلي الرجال..

-الباب مقفول وين المفتاح؟

خزرته ونزلت دموعي نفخ هوا وفرك وجهه يسأل من جديد..

-شني هم ما تدرين المفتاح وين خالوو هاي كلاواتج بطليهن وطلعيه

-انتَ شبيييك كلاواتي شنو گول يمكن انتَ الضامه وتريد تخطفني بهالبيت!

-اخطفچ؟! ليش انا اعرفچ بت الاوادم!

-طلعني منااا طلعني الله ينتقم منكم حسبي الله ونعم الـ...

ما كملت الجملة ورگع عطري الموجود على ميز التواليت بالحايط وعاط..

-كاااااافي سكتييي

عافني ونزل جوه يدردم عليَّ بچيت منهارة ماعرف شسوي بروحي وگفت على محجر الدرج اسمعه يسولف ويه روحه ويضغط على جرح چتفه..

-تدچني بسچينة عمية بت الفاهي

-الا اجيبلك سيييف المرة الجاية

-جيبيي حتى اگص راسچ ولسانچ سووا

-امشي للللك

-عليمن لك وللج؟؟

ركض يصعدلي گمت ارجف وركضت ادخل للغرفة عززه حتى مفتاح ماعندي مختفي هرولت للحمام وقفلت الباب عليَّ اطگ سن بسن..

-فتحي البااب

-ما افتح وليي هناك

-انا اعلمج ام لساان بطول نعالي ولسانها شطوله

-انتَ بطول نعالي

-وووولچ فتحي الخ***

ضرب الباب بقوة دفرها تحركت يمة عزه بعيني انچبي تَـمني انلصميي يطبلچ يطيح حظج هذا مو صاحي، اختفى صوته شوية ارتاحيت وگعدت بالگاع لامة رجلي لصدري وافكر شلون بيه ووين انطي وجهي ونعمة وين راح..

-فتحي الباب خلني احاچيچ

-ما افتح

-فتحيها

-ما افتحها

-تفتحيها لو شلون

-شلون

-فتحيهااا ولج

ضربها مرة ثانية فزيت مخروعة هم تحركت الباب خفت يكسرها عليَّ ظليت اللطم من القهر..

-باوع راح افتحها بس اذا سويتلي شي وحق الله...

-اجنزززچ

-لعد ماا افتحها لو تمووت

-فتحيها ما اسويلج شي فتحيي خليني افتهم عليج عقل ما ظل براسي

مسحت دموعي وبلعت ريگي والغصة سوه، گوة طلعت من حلگي جملة..

-باوع انتَ مبين خوش زلمة

-خوشن؟؟

-اي واخو خيتك وعندك شوارب هم

-الحمدلله والشكر شجاب الشوارب هسة!

-يعني هاي.. يعني.. اني بشاربك اي اي بشاربك اني

-زين طلعي

-انتَ جنوبي وابو غيرة ومبين مملوح

-ولج شتمسلتين انتِ فكي الباب لا تخبلينيي

لطمت على وجهي من التمسلت والتچفص وفتحت الباب بسرعة ومديت بس عيوني منها، ضرب عليها حتى افتحها بالكامل سويت مثل ميريد وطلعت من الحمام اشرد بره الغرفة..

-اني بشاربك گتلي بشاربك

-ازين شاربي بالقندرة على المصيبة اللفت على راسي

ضرب على راسه محتار وصار يفتر يروح ويجي، سألني مرة ثانية على الصار وخلاني ارجع اعيدله السالفة من جديد وويه كل حچاية تطلع مني حسيته راح يشگ هدومه..

-الاميـر علي: مستحيل عمي يسويها مستحييل

مسحت عيوني وكشولت ملامحي عليه بحقد صفن بوجهي شوية ورفع موبايله يتصل بشخص ويصيح عليه..

-وين صررت؟؟.. چا لو هو اكو مفتاح هم احتاجك تكسرلي الباب ابن السطل

بنفس الدقيقة طفرت على صوت زجاج الصالة يتكسر، ضرب الاميـر علي وجهه بقوة وركض جوه يوخر تول الصالة عن الشباك شفت نفس صديقه الچان وياه البارحة..

-ها ضلعي يله اطلع ابو كربله لديكم لا خوف عليكم

-خايب شلون اطلع وكتائب الشباچ اعمى انتَ؟؟

-ابو كربله: جيررة شمالني ما شفتهن

-امشي شوفلي غير مكان مابي كتائب

-اي

-ابو كربله لا تتأخررر

عافنا وراح بقيت اللوب من القهر ووجع ببطني گطعني، گعدت حايرة مستحيل نگدر نطلع بدون مفتاح الشبابيك والبيبان كلهن كتائب محكمة حتى باب السطح ومترهم الا يكسرون الكتيبة..

-ابو كربله: ضلعييي كل الشبابيچ والبيبان كتائب ما ترهم

-شوفلي كوسرة منا بلكت نكسره

-صار

طلع ابو كربله وظل لا ساعة ولا ساعتين انوب هذا الغبي تلفونه خلص شحن وماعندي نفس شاحنة تلفونه وظلينه حايرين، بقيت خايفة وارجف بس مادري شجاني وبقيت جوه وياه..

-الاميـر علي: اشتعل گلبك صلاح

مسحت وجهي اباوعله يروح ويرجع وماكلته الحيرة الحقد البگلبي يكبر ويه الم بطني صرت اللوب بمكاني وابچي بالخنسة سكتت اول ما اندار يباوعلي وسويت روحي منزلة عيوني اللعب بطرف الزولية..

-ياهو كاتلچ؟

رفعت عيوني خازرته اشر على روحه بأصبعه وگال بعصبية..

-هم گولي اناااا

-اي

نفخ هوا واستغفر، فرك وجهه للمرة المية وسأل متترفز..

ما تعرفين رجلچ وين يولي؟

-لا

-بالعباس معتب لو خليت عظمة صاحية بي ابو شيبة

-هم الك عين؟

-خير؟؟

-تسوي روحك بريء ومتدري بشي وانتَ كلك بلاا

خزرني بحدة وتقرب مني خفت يعتدي عليَّ وركضت اصعد فوگ لغرفتي ودخلت الحمام اقفل الباب عليَّ، گعدت هنا وحدي شوية وسمعت صوت الكوسرة بره ردت اطلع وخفت يسويلي شي واني وحدي..

حسيت بشي نزل عليَّ لطمت على وجهي اعيط بالخنسة واعصر ببطني وادعي عليهم من گلبي چانت دقايق واختفى صوت الهوسة مال الكوسرة وخنست الاصوات، مديت راسي من الباب ادور عليه بس ما لگيته! عافني! عافني ابن الحرام شرد بعملته وعافني!

متت من القهر اخذت ملابس ورحت اسبح اجلف بجسمي واملخ بروحي بنفس الوقت شسوي وين انطي وجهي منو عندي ويوگف وياي منو يسمعلي ومنو يصدگني، طلعت وبدلت نزلت جوه اشوف الباب مفتوح والبيت فارغ حسيت بجسمي تبنج كله وحتى دموع ماكو عيوني يبست..

طلعت من البيت امشي مثل التايهة ماعرف وين اروح بس لازم ابتعد من هالبيت لا يرجعولي، امشي وامشي وامشي ومادري برجليه اخذتني لبيت خالتي دگيت الباب، طلعتلي خالة شهگت من شافت حالي ودخلتني بسرعة تصعدني لغرفة تالة..

-شبيچ يمة عمت عيني ولج احجي تَـمني نعمة كاتلچ؟؟؟

-تعبانة

-يمة بنيتي خالة احجي گلبي وگف والله

حضنتها وبچيت عاجزة الكلام ميطلع مني مرتب سولفتلها الاگدر انطقه بس احسني مدا احچي ماعرف شلون اشرح وضعي ولا حجم صدمتي وخوفي، تعبت وانهد حيلي حطيت راسي على رجلها وتمددت مابيه اسوي شي..

انام وافز على كوابيس اتحلم بنعمة يجيني يجرني من شعري ويضربني ويشمرني بحديقة البيت ويجي كلب بسام ينهش بجسمي وياكل بي وافز مرعوبة وهيچ انگضت ليلتي..

خوف، رهبة، ضياع لا اني اعرف شسوي ولا خالتي الما نشفت دمعتها، تالة تخبلت من شافتني گلتلها نعمة ضربني شالت روحها ورگعتها من القهر نزلت لأبوها تحلفه ينتقم من نعمة واسمع بسام يصيح..

-ماااهو نقمة ماااكو انعل ابوووه ما نرجعها اله بعد

ضربت على رجليها خالتي ميتة قهر وخوف عليَّ تعرف بسام ميبقيني هنا حباً بيه او حاسبني مثل بنته يريد شي واحد مني وبس.. بقيت معلعلة لا ليلي ليل ولا نهاري نهار والنار تاكل بيه وبگلبي راح اموت قهر..

ثاني يوم اندگت باب الحوش نزلت خالتي تشوف منو بس بسام ما قبل تتقدم اكثر وصار يعيط عليها ودخلها للبيت غصب، نزلت اوگف على الدرج اباوعلها شايطة وتالة متخبلة من تصرف ابوها شوية ورجع بسام يرعد علينا..

-شكوووو تتلاطمن شكوووو

-خالة: منو اجه بسام؟ نعمة؟؟

-لااا مو نقمة زلمة غريب يله فوتي جوه لا تگابليني وانتِ نزلي سويلي عشا خليني اتزقنبب

صاح عليَّ اني اسويله العشا ما قبلت خالة واشرتلي ارجع للغرفة وعتها بسام من شعرها وشمرها بغرفتها وقفل الباب عليها، صاح بـ تالة تلحگ امها..

-تالة: ما ارووح

-باباتي تالة لا تعصبيني روحي لامچ وخلي هاي بت عيسى تنزل تسوي العشا

-تالة: اني اسويلك عوف تَـمني

-تاااااالة

رفع ايده يريد يضربها شهگت خايفة عليها ونزلت ركض احضنها، لمت نفسها بحضني تبجي اول مرة يسويها ويهدد يضربها تالة روحه من الدنيا ويبيع الدنيا لخاطر دمعتها..

-بسام: استغفرالله ربي واتوب إليه استغفر الله لييش تخليني امد ايدي عليج تاالة

-تالة: حرام عليك بابا حراام تَـمني مريضة متشوف حالها متشوف وجهها شلون ذبلاان

-بسام: قزرقططط ما بيهاا امشي ولج سويلي زقووم

گوة عليَّ هديت تالة وگلتلها عادي اروح اسوي ومابيه شي، ما قبلت تعوفني وبقت مچلبه بيه وابوها تخبل عيط عليها الا تصعد فوگ واني هم رحت للمطبخ وطبگت الباب وقفلتها احس بسام عنده نية ثانية من طلبني بالاسم اسوي العشا..

فزيت وين صوت طرق باب المطبخ، حطيت ايدي على گلبي مفزوعة ويه حسه الحقير يهمس اسمي..

-فتحي الباب تَـمني بس احاچيچ

-روح بسام ما افتح

-احاچيچ ولچ مو بحالج اني فتحيي

-جيب تالة

-ووولج فتحييي

ظل يكسر بالباب يريد يفوت عليَّ واسمع لصراخه يتداخل ويه صوت تالة الي تخبلت على ابوها روحي راحت من بچت وتعيط..

-تضررربني بااباا وصلت بيك تضررربني

صياح وهرجة وروح خايفة تهت ودخت ماعرف اهرب لو ابقى؟ اختفي لو اللتزم الهدوء وانتظر نهايتي؟ ثواني مرت بس حسيتها ساعات ثواني وحزمت قراري اطلع منا واريح خالتي وتالة من همي..

طلعت من البيت اركض قبل لا يوصلني بسام ويعرف بيه ما موجودة، رجليه وگعت من الفرة حايرة وين اروح يا مكان يلفيني، قررت ارجع لبيتي واخذ جنطة الفلوس والمستمسكات والسندات الكتبهن نعمة بأسمي واشوفلي مكان اأجره هالليلة حتى اگدر افكر زين..

اخذت تكسي وانطيته عنوان بيتي وگتله يوگفلي اجيب فلوس من البيت وانطي، نزلت للبيت الباب مكسور النذل كسره وعافني وحدي تمشيت على كيفي الكهرباء طافية بالفرع كله طاگة والظلام دامس هنا..

عبرت الباب وانجرحت ايدي بالكتيبة المكسورة صرخت متوجعة وبنفس اللحظة جحظت عيوني ويه صوت شي انكسر بداخل البيت! اكو احد بالبيت! اكو احد ببيتي!!

وگفت متصنمة بمكاني ماعرف ادخل واواجه الموجود لو ارجع انوب ابو التكسي ظل يدگلي هورن وترني بالزايد، بين تفكيري وقراري دقيقة وخصمتها راح ادخل واشوف منو جوه يمكن يطلع نعمة حتى اكتله بمكانه..

طبيت المطبخ وتلمست المجرات وطلعت سچينة چبيرة احطها بگلبه، مشيت على اطراف اصابعي ادخل البيت وگلبي ينبض بجنوون راح يوگف بأي دقيقة.. عبرت المطبخ ودخلت الصالة وحسيت بشي خطف يدخل للغرفة الجوه وشي ثاني خطف يدخل للاستقبال..

ثواني ومو اكثر من ثواني مرت وانگلبت الدنيا هنا، انگلبت الدنيا وانهجم البيت على راسي ماعرف منين دتجي الطلقات سلاح يضرب طلقات صليي بالصالة، حسيت بأكثر من طلقة تعدتني تخبلت من الصياح والخوف اريد اشوف دربي اطلع ماشوف ظلمة والطلقات ما سكنت..

صياحي ملى الدنيا وصرت اركض مثل المجنونة اطلع من البيت وصلت للشارع ادور على ابو التكسي بس ماهو! ابو التكسي راح اكيد هم خاف من الطلقات وهرب يسلم على روحه..

شردت بنص الشارع السچينة بيدي واعيط خايفة وصوت الطلق ما هدأ بداخل بيتي! حسيت بأكثر من واحد بالبيت چان اكو اكثر من واحد والله متأكدة..

اركض واتلفت خايفة وگعت على وجهي چفي وطرف السچينة اذه ايدي، گمت من الگاع ما مهتمة وركضت اكمل طريقي اطلع لشارع بي ضوه وعلى حظي صارت بوجهي دورية شرطة..

ضميت السچينة بملابسي وهدأت من خطواتي امشي على كيف حتى ما احسسهم، يمكن اجو علمود الطلقات الطلعت من بيتي اكو احد خبرهم، انتبهت لعيون العسكر يباوعولي وجان اكو ضابط واگف وياهم بس ما انتبهلي وگدرت اعبر منهم..

رجلي رجعتني لبيت خالتي ابچي مفرفحة روحي علما وصلت لشارعهم احس رجليه وگعت من المشي والركض بس شفت حبل نجاتي گدامي خالتي گاعدة بباب بيتها وتبچي من شافتني گامت تهرول ناحيتي حضنتني لصدرها تمسح على وجهي وتعيط..

-وييين رحتي ردت اموووت يا يمة وين رحتيي

-رجعت خالة رجعت

-طردت بسام طردته ارتاحي تعالي ارتاحي

اخذتني وياهة دخلتني البيت ولغرفة تالة بالتحديد ما قبلت تالة تنام يمي حتى اخذ راحتي واقفل الباب خاف يرجع بسام، سولفت لخالتي شصار گامت تدگ على وجهها موتتني خوف من گالت..

-هووو رجعلچ اكيد الامير حتى ما تفضحي رجعلج يريد يكتلچ

-لا خالة دخيلج ماتوقع لاا

-لعد منو غيره يستفاد من موتچ ويطم عاره؟؟

سكتت افكر بكلامها بينما هي عافتني وطلعت وگلتلي اقفل الباب، سويت مثل متريد ونمت على الفراش اتنهد بتعب وكسرة بس دموعي تشرح حجم وجعي، مادري شوكت غفيت وفزيت على صوت طگطگة يم شباك تالة بالبلكون..

جريت الساعة اشوف ساعة بيش چانت بالـ 2:30 بالليل، جمدت بمكاني اباوع على جهة الشباك ولمحت ظل شخص واگف خايلي بالبردة..

طفرت من الفراش اعيط بعلو صوتي والخيال اختفى بسرعة، انتهيت بلعومي طگ من الصياح وروحي راحت تخبلت علما صعدن خالتي وتالة يهدأن بيه من الخوف صرت بس اأشر على الشباك وانبههن اكو احد هناك..

راحت خالتي تفتح الشباك الچبير ومدت راسها من البلكون ورجعتلي تگول..

-ماكو شي ماما ماكو شي تَـمني لا تخافين تحلمتي حلمم هذا حلم

-والله صدگ شفته شفتته چان لازم عودة والله العظييم

-ميخالف امي راح هذا هو راح خيولي، تالة نامي ويه بنت خالتچ ماما

هزت راسها تالة ونامت يمي بالغرفة، للصبح عيني ما غفت افكر بالخيال الشفته وافكر بتاليتي شنو؟ شلون راح تصفى؟ معقولة هذا نعمة اجاني؟ لو يمكن دز احد الي حتى يكتلني؟ ماعرف ماعرف راسي راح ينفجر..

حسيت على تالة من طلعت للمدرسة وحسيت على خالتي من اجت تطمن علي ومثلت اني نايمة، بقيت امثل للظهر لحدما سمعت صوت قران بالبيت عرفت قرب وقت اذان الظهر، نزلت جوه لكيت خالة كاعدة ويه مره جبيرة ويسولفن...

-خالة: هلاا هلاا بحبيبة خالتها ام بشار تتذكرين تمني بنت اختي مو؟

-ام بشار: اي حبيبتي ما شاء الله شلون كبرانة

سلمت عليَّ المرة وبوستني هوايه وبقت لازمة ايدي بين ايدها ما هدتني، استغربت بس استحيت اجر ايدي منها وبقيت گاعدة بصفها..

-خالة: من رخصتچ عيوني بس اروح اشوف التمن وارجعلچ

هزت راسها المرة مبتسمة وبقت تهز براسها لحدما خالتي اختفت من انظارنا، وترتني هالمرة بس حاولت ما اخلي هالشي يبين عليَّ وابتسمتلها..

استوطن الهدوء بيناتنا محد بينا حچت قريب الدقيقتين وتوقعت راح نبقى على هالهدوء لحدما ترجع خالتي بس ما صار هالشي واول من كسر حاجز الهدوء هي ام بشار..

-ام بشار: ليش ما ترحين؟

-وين؟

-ترحين هناك

-وين هناك؟

-هناك

-اي خالة بس وين هناك؟

عصرت ايدي بين ايدها تباوع بعيوني مباشرةً خفت من نظراتها غريبة وعيونها لونهن لا هو اصفر ولا اخضر وكبار كلش، ابتسمت بلطف ومدت ايدها تمسح خدي بأبهامها.. قشعرت كلني من همست بيناتنا..

-اشوف جاه وسلطة هناك الچ تَـمني

تسارعت انفاسي محتارة ويه هالمرة الغريبة شتقصد وشنو دتشوف بعيوني وهيجي مركزة قلقتني!

-تعب هوااي تعب ودنيا صعبة.. عشگ اخو الحرام منتظرچ بس مكانچ هناك احسن

-مـ.. مـ.. من رخصـ...

-غامري وكتچ هذا

سكتت بسرعة من فزيت منها مخلوسة، ابتعدت افرك بيدي توجعني شگدما ضغطت عليها، بقيت اباوعلها وهي تباوعلي ابتسامتها ما غابت ولا خفتها حتى من رجعت خالتي..

-خالة: تبقين يمنا على الغدة ام بشار مسوية شلون تمن باگله يرد الروح

-ام بشار: بالعافية عيني انتِ بس الولد منتظريني على الغدة

-تَـمني: خالة الباب تندگ

-خالة: مدا اسمع شي

-تَـمني: الباب خالة روحي شوفي خاف اجه عمو بسام

گامت بسرعة تشوف منو ورحت وراهة، بعدها ما واصلة للباب ولزمت ايدها اوگفها..

-تَـمني: جذب محد دگ الباب بس ردتچ تگومين واسألج، خالة ام بشار بصارة؟؟ او منجمة؟

-خالة: بصارة ومنجمة شنو لا يمة اسم الله الرحمن الله يجيرنا مرة من اهل الله هاي خوش ناس تصير بت العلوية سناء اخت هذا الحجي النشتري منه...

-خالةة هالمرة لزمت ايدي وعبالك قرتلي مستقبلي!

-تَـمني شجاچ خالة دا اگلچ المرة ماعدها هالسوالف

-والله العظيم مدا اچذب تعالي تعالي گدامج اسئلها

جريتها من ايدها جر ورجعنا للمرة گاعدة تشرب بالچاي مالتها بس شافتني رجعت تبتسم..

-تَـمني: خالة ام بشار رجعي عيدي شنو گلتيلي قبل شوية بلا امر عليج

-ام بشار: شنو اعيد؟

-الحچي الگلتي ان اني لازم أغامر ووكتي هذا

صفنت عليَّ المرة عبالك ما مفتهمة شدا احچي خبلتني بالزايد..

-خالة انتِ هسة لزمتي ايدي وگلتيلي روحي وجاه هناك وعشگ اخو الحرام وماعرف شنو!

-ام بشار: يمة مدا افهم عليج شوكت گلت هيج اني وشنو معناة هذا الكلام؟

سألت بأستغراب شددديد وعلامات الاستفهام تحاوطها من كل جهة زادت حيرتي، ضحكت خالتي ومسحت على راسي تگول..

-شوية تَـمني تعبانة هالفترة عذرينا گلبي

باستني خالتي تمسح على شعري وتهمس "ميخالف حبيبتي" دفعت ايدها عني وركضت اصعد فوگ وختلت بالفراش شنو هاي تضحك عليَّ؟ لو تريد تخبلني؟؟ زين هي حچت صدك لو اني تخيلت؟ تَـمني شنو ديصير وياچ تَـمني!

شوية وصعدتلي خالتي تسألني حچيتلها من البداية شنو صار واكدتلي ام بشار ماعدها هيجي سوالف ويمكن اني تخيلت الكلام او تحلمت بس المشكلة اني متأكدة المرة الي حاچتني وبعدني احس بلمسة ايدها على معصم ايدي وهي تعصر عليه حيل..

نزلت خالة صبتلي غدا گوة اكلت بس اسند طولي عقلي فصل واحس راح اتخبل تعبت تعبتت، للعصر رجعت تالة تسولف ويايه طبيعي وتضحك متدري الصار بيه ولا شاركتها بهالمصيبة..

لليل سمعنا صوت بسام يصيح على تالة تنزل يمه استغربت شعجب رجع بس افتهمت من رجعت بيدها بوكيه ورد چبير وعلاگة هدايا وابتسامتها من الاذن للاذن..

-تَـمني: راضاچ؟

-اي ما قبلت بالبداية بس ظل يعتذر مني وسامحته

تنهدت وحطت البوكيه على الكرسي ورخت اكتافها..

-تَـمني اني احب ابوية بس اكره تعامله وياچ وويه امي يحترگ گلبي من يأذيكم

-عادي حبيبتي المهم هو زين وياچ واوقات يجر عدل ويه خالتي من متدافعلي، هو يتخبل من احد يدافعلي عوفوني حتى لو شفتو يذبحني هم لا تدخلون وخلوني اني ادافع عن نفسي

-لو تموتيين ولج خبلة انتِ اختي شعندي غيرج اني

حضنتني حضن مطول وجابت علاگة الهدايا بحضني تفتحها وتراويني جايلها ساعة وكومة حلويات أصرت نتقاسم الحلويات ما قبلت وتلعب نفسي اخذ شي من بسام بس ما ردت اكسر خاطرها واكلت نستلة وياهة..

-تالة: اگلج هذا بابا يصيحلي لو يتخايلي؟

-لا ديصيح....

ما كملت الجملة ودخل علينا بسام ينفض نففض عصبية وبيده موبايل ما لحگت ارمش وحسيت بشعري صار بيده يجر بيه وشمرني بالگاع يرفس ببطني ويصيح..

-حاااامل يالساااقطة حاااامل من منوووو

يضرب حيييل وتالة متخبلة وتتوسل بي يعوفني، انتهيت جوه ايده بعد لا اگدر ارفع ايد ولا رجل جنزني والنفس مينجر عندي بعد شفت الموت بعيوني لحدما اجت خالتي هم مكتولة وتسحل برجلها سحل گوة تمشي..

-خالة: هددهااا يا الچلببب هدهااا

-ولللج كسرررت وجهيي بين النااااس اجوني يعايروني يگلولي شوووف الربيتهااا شطلعتتت زنت وحملت بالحراام من واحد **** وبس يمي تستشرففف

-تاااج روسكم هاليتيمة الفقييرة الله ينتقم منكمم ولك هدهاااا

ويه كل صيحة من خالتي وتالة بسام يزيد بالكتل الى ان وصلت مرحلة بعد ما احس بشي والدم محاوطني من كل جهة، لا ايد اگدر ارفع ولا رجل تسندني ماعرف شلون وبالقدرة تالة گدرت تطلع ابوها من الغرفة..

ركضت عليَّ خالتي لزمتني من متوني تحاول تگومني وتفرفح بالعياط..

-گوومي يمة گووومي تَـمني سوودة بوجهي ولچ ماما گووومي

نهضت نفسي استند عليها گعدتني على الچرباية وشفتها راحت تجيبلي ملابس ما سألتها شدتسوي ماعندي قوة، نزعتني وبدلتلي ملابسي بسرعة بسرعة ومسحت الدم الي بوجهي بالكلينس وذبته بالگاع..

لزمتني من زنودي حيييل تعصرهن وتباوع بعيوني وتهمس بصوت يرجف ودموعها تصب..

-رووحي تَـمني منا لا تبقين روحي يمة ستري على نفسچ اني مو گد الامانة موو گد امانة اختيي سوددة بوجههي

وخرت مني تلطم على وجهها وتجرح بصدرها بقهر، لزمت ايدها اهدأها ما قبلت ونترت ايدي منها ورجعت تعدل بشعري وملابسي وتهمس بخفوت شديد..

-جاي واحد من طرفهم وفاضحچ هنا جايين لبسام يگلوله شوف الربيتها خانت رجلها وشردت واجت تختل يمك

فتحت عيوني على وسعها مصدومة وزادت صدمتي من كملت والدموع تنزل مطر من عيونها..

-يگلوله حملت من ذاك ومن رجلها افتهم جرها كتلها وهي دچته بسچينة وشردت وماخذين سچين اله يراوو ويثبتون كلامهم

-خالة

-اشششش لا تحجين شي مصدگتچ اني بس حمل صعب وثگيل صار تعبت يا روح خالتج تعبت واني احميچ من ولد الحرام روحيلهم رووحي وفضحيهم هالانذال ورجعي حقچ منهم!!

-وافضح روحي

-يا خالة هي بقت فضيحة غير اسمچ على كل لسان من العصر لسه تتراگع عليَّ الاتصالات، روحي ماما رووحي واخذي حققچ منهم رووحي وفضحيهم بنص ديوانهم وزيني شواربهمم بقندرتچ رووووووحي!!!

**

-ابا الحسن علي! ابا الحسن وينننك

نزلت من الغرفة اركض على حسه يصيح لابا الحسن بنص البيت متخبل عيونه ناطة وملابسه مخربطة، وگفت مقابيله مخترعة شبي وشرجعه بهالفجرية هو مو گال راح يبات ببغداد اليوم؟

-حبيبة: الاميـر علي شصاير؟ شبيك يروحي

-الاميـر علي: ابا الحسن علي وين؟؟ حبيبة اخوچ ويين

على اثر صوته طلعت امي ومرت ابوي من الغرفة واخواني الباقين كلهم اللتموا عليه يتاسئلون، ما اهتم لاحد منهم وركض يصعد الدرج لغرفة ابا الحسن فوگ..

-رسمية (مرت ابوي): حبيبة شماله وليدي شصاير عرفتي شي؟

-حبيبة: لا يمة مادري طب البيت يرعد يريد ابا الحسن علي

سمعت ابرار تهمس لـ علي الدُر وتسوي حركة مخبل بيدها..

-ابرار: اخوك من يوم يومه مخبل مو جديدة

-علي الدُر: ابرار انلصمي!!

-ابرار: حبيبي انتَ ابوية ما اقصد سامحني

نزلت راسها تتمسكن وره ما خزرها در وعافها ودخل الغرفتهم اللتفتت تريد تدخل وراه ووگفت بمكانها تتسمع على علي السور و علي النور وهمه يحچون..

-علي النور: الله يساعد ذاك الواحد

-علي السور: اي وعلي شلون مگابل ظب يضخ سم اربعة وعشرين ساعة

-علي الحق: انا سمعت فلان راح يتزوج على مريته شايفله خوش ثلاثينية جادة

-علي السور: الحاجب تگول تيب والشفايف مخدات والبوز طوله شبرين كللش قياساته

-ابرار: منو فلان؟؟

-علي التقي: يبدي اسمه بحرف علي الدُر

شهگت ودگت صدرها ورأساً نزلت دموعها، ضحكت امي وحضنتها وترزل بالولد..

-سلوى: طايحين الحظ ليش تزعلون مريت اخوكم وام بيته ليش هو وين اكو من ابرار

-علي الحق: خالة بهاي وياچ انا وين اكو من ابرار هي بس وحدة واجتنا عقوبة سماوية من رب العالمين

-علي السور: بالعباس لو ماطرة علينا حجارة من سجيل ولا جايتنا ابرار

-ابرار: عمة سمعي شلون يحچون عليَّ

-رسمية: كافي وليداتي لا تدوسون بالحچي حبايبي انتم

-علي الحق: على راسي انتِ يمة هاچ حبة

باس راسها وايدها واخذها وراحو لغرفتها هو وباقي اخواني، ابوي متزوج ثنين الاولى رسمية وهي ام الولد كلهم والثانية امي وماعدها غيري بس ثنينهن اصيحلهن يمة انا..

-ابرار: عمة صدگ در راح يتزوج؟؟ وشايفله شوفه لان علي السور يگول قياساته!

-سلوى: شوف هاي العوبة يا قياسات يا احجام ليش در عنده وكت يعاين على النساوين ولي لزلمتچ خلينا نعرف ننخمد

راحت لغرفتها تدردم مقهورة زعلت عليها ونويت باچر اقنعها اخواني چانو يتشاقون وبس يداهروها علي الدُر مستحيل يباوع لغيرها..

-حبيبة: يمة ابوي ما رد من الكوت؟

-سلوى: لا بعد بيتي گال اباتن اليوم

-اي احسن اخاف عليه من الطريق

ابتسمت ولعبت بشعري، عفتها اصعد لغرفتي وجرتني من ايدي ترجعني لمكاني وبسرعة گالت..

-شوفيلي اخوانج شبيهم

-منو منهم؟

-التوأم

-الامير وابا الحسن؟!

-اي

-لا يمة دخيلج ماريد اتسمع عليهم الاميـر علي يزاعلني

-خايبة ما راح يعرف شي لا تخلي يشوفج انا بس يظل بالي عليهم اعرفهم سوادين ثنينهم

هم ما قبلت بس ظلت تلح وجبرتني اروح اتسمع عليهم اكره نفسي من اسويها بس امي يظل بالها على اخواني مع العلم مو ولدها بس تخاف، صعدت اتسحب ورحت اوگف بباب غرفة ابا الحسن امد اذاني اتسمع لصوت الاميـر علي المنهار..

-ابا الحسن علي: ابن عمك صلاح وين راح؟!

-فص ملح وذاب فريت بغداد عليه ماله اثر انعل ابيه

-مستحححيل شني لاعبين عليك اميرر والبت وين راحت؟؟

-عفتها بالبيت وطلعت ادور على صلاح وعمك السگط ثنينهم ماكو

-عفتها وحدها بالبيت وطلعت؟ خوي يجوز هي هم ناصبة عليك وياهم ونيتهم يوگعوك

-انا هم اجه ببالي هالشي رحت لغرفتها نفشتها نفش ادور على اثر تسجيل لو كامرا من ما لگيت شي طلعت من البيت بدون لا اناقشها گلت اللگه صلاح اجره من خوانيگه وارجعلها بس ما لگيته

-امير واذا طلعو مصوريك؟؟

-خوية مصوريني شني جاي اگلك ما شايف البت ولا كاضها شيصورون بالضبط؟؟

-عمك ناصب عليك يالامير يريد يطيحك يا خوي وهاي البت وراهة بلا الگعدة بعد يومين كل خوفي تطب وتصيح بين الزلم وتفضحك

-اعلى ما بخيلها تركبه انا ما لامسها ولا الي شغل بيها تريد تفضح؟ خل تفضح بعد احسن

-افااا انا اخوك يالامير، تطيح راس ابوك بين الزلام

-حسن راسي راح يطگ حسننن

-بيه ولا بيك يالاغم هذا ضغطك تعال نقيسه

هدأت اصواتهم شوية ورجع گال حسن بصوت خافت..

-تذكر امير شصار وراجع نفسك لا تخلينا حايرين حرام عليك هذا مو ثوبك ولا دربك

-بيمن احلفلك ما اتذكر شصار چن واحد طب بعقلي ومسح كلشي منه

-شوداك انتَ ما تگلي شوداك هناك

-عمك نعمة خابرني يريدني اشتغل بيت صاحبه تعذرت وگتله عندي شغل ماگدر گال لخاطري وانعل ابو خاطره الرحتله انا اعرف عمك نجسس وما يتعاشر انا حچي ما احاچي بس شلون رضيت ورحت ماادري!

-وشصار بعدين؟

-كملت البيت وعزمني على عشا ولطش هو وصلاح اله نروح ناكل ببيت نعمة

-نعمة النجس راد يطيحك وصلاح اله ايد خليهم عليَّ انا ادورهم وانعل والديهم وانتَ ارجع للبت فهمها وشوفلك صرفة وياهة لا تفضحك گدام الناس

-ولك ر.....

ما لحگت اسمع شنو جاوبه وتحركت بسرعة اطلع من الممر وره ما سمعت صوت خطوات تقترب من الباب، حطيت ايدي على گلبي مفزوعة وعقلي شخط من هالمصيبة اللفت على روسنا..

نويت ما اصارح امي بالسمعته لا توصلها لأبوي ويعادي الامير قبل لا يلحگ يبررله، ابوي مو متسامح بهيچ مواضيع والغلط واحد سواء للبت او الولد ماعنده قانون الزلمة شايل عيبه العيب يبقى عيب وما يختلف عليه ثنين..

نزلت جوه شفت امي گاعدة على التخم وبيدها موبايلها بس شافتني ضمت موبايلها بصدرها واجت تركض عليَّ سحبتني من ايدي وخذتني لغرفتها وقفلت الباب علينا..

-ها يمة بشري شسمعتي؟

-ما سمعت شي

-شني ما سمعتي شي چا ليش الامير روحه شايطة؟

-مادري يمة ما سمعت شي ابا الحسن صوته ناصي والامير علي شلع گلبي وما سمعتله حس

خزرتني وگرصتني من ايدي صرخت وسدت حلگي بأيدها حتى ما يطلع صوتي، بنفس اللحظة دگ موبايلها الي بصدرها طلعته تشوف منو وعگدت حاجبها مستغربة..

-ابوچ، اششش لا يطلع حسچ

هزيت راسي بـ اي وجاوبته بساع مبتسمة..

-عليكم السلام هلا بيك يا بعد بيتي وبيت الخلفني...

قطعت كلامها تستمتع اله شيگول، ثواني وغابت ابتسامتها وفتحت عيونها بصدمة ما لحگت تجاوبه وابوي سد الاتصال، وخرت امي السماعة من اذنها وباقية على جحظة عيونها..

-يمة شبيچ؟ شصاير؟؟

صفنت عليَّ وزينت وجهها ابتسامة انتصار واسعة، عضت على شفتها السفلية وضحكت ضحكة سعادة جلجلت جدران الغرفة جرتني من متوني وبوستني بخدودي تضحك بصوت عالي وتگول بحماس..

-اخيراً يا روح امچ اخيراً صار النريده من سنيييين......

يتبع 👑....

━━━━━━ ♛ ━━━━━━

الحماس يقرا مليووون عندي 😂🫶🏻🔥🔥🔥

تَـمني كسرت گلبي 💔

والامير شنو سالفته وشنو سالفة نعمة وهذا ابن عم الامير صلاح؟؟ 🤔🤔

*بالبارت السابق اكو سألوا عن معنى الغرفة الخارجية مال علي السور، معناها غرفة مبنية بالحديقة مو بداخل البيت

توقعاتكممم القادمممة 🫶🏻

وتعالو انستا حبايبي 🔥

#الامارة

بقلمي: زهراء السلامي 💎

لتنسون التصويت + التعليق بين الفقرات + متابعة لحسابي 💙.

لگيتَك تفتَر بروحي طِفل خايف

وشبَگتك شَبگة العُمره اهله ما شايف . ♥️

━━━━━━ ♛ ━━━━━━

"عبــق"

عصرت عيوني من حسيت بخدي يوجعني لزمت المكان اتلمسه حار يچوي وبي وجع عبالك گارصني زنبور، فتحت عيوني على كيف تعبانة وفكيتها على وسعها واگع گلبي من شفت ثنين زلم واگفين كدامي، واحد بعده بالزي العسكري والثاني نازع قميصه وباقي بس ببنطرونه العسكري..

-علي التقي: ها گعدتي

-علي الحق: انتِ ياهو

-علي التقي: دصبر خلي البت تسترد وعيها

-علي الحق: غير افتهم منو هاي بغرفتي

فزيت من مكاني اباوعلهم ثنينهم مگابليني وواگفين واني متمددة على چرباية علي الحق، طفرت اعدل نفسي واجر بالدشداشة انزلها سحت من الخجل من شفت رجلي طالعة وانوب تذكرت صدرها مشگوگ بسرعة لزمت الدشداشة اضم بروحي ونزلت راسي..

-علي التقي: ها خايبة راح تسولفين لا

-علي الحق: اذا اجيتي تبوگين مني شي تره مفلس

-علي التقي: لو رايحة لغرفة علي الدر نايم على الفلوس

-علي الحق: والامير علي هم

-علي التقي: وابا الحسن علي شدعوه خوش يجيب فلوس القانون شجانه ما صرنا محامين يا والغسل

-علي الحق: خلينا خلينا جوه رحمة لواء حسين

-عبق: ا.. اني...

-علي الحق: يا الله راح تطلع الجوهرة

-عبق: اني.. اني..

-علي التقي: علي وياچ

-اني.. اني صديقة حبيبة

ماعرف شلون طلعت من حلگي وهمه هم صفنوا عليَّ مستغربين يمة شيخلصني اليوم..

-علي الحق: صديقة حبيبة جاية لبيت حبيبة بالـ (رفع ايده يشوف ساعته وكمل) بالاربعة الفجر؟

-عبق: بتت هنا اني.. اسفة اعتذر لان دخلت غرفتك بس.. بس تيهت

طفرت اطلع من الغرفة ووگفني صوته يصيحلي..

-وين وين وين وين

-فدوة عوفني سيدي اني اسفة

ضحك علي التقي وحق بعده ضايج وحاط ايده على خصره..

-شنو چنتي تدورين وتيهتي بغرفتي؟

-ولا شي

-چا؟

-اني ما تيهت چذبت عليك

-اي طلعيلي بالصافي

-حبيبة گلتلي انام بغرفتك لان عندك واجب ومترجع

-علي التقي: الععببب

-علي الحق: وينها حبيبة هسة؟

-نايمة

عبرني يطلع من الغرفة واني رحت وراه شفته يروح لغرفة حبيبة گمت اللطم على وجهي من الخوف خاف تچفص گدامهم وانفضح بالزايد..

-علي الحق: حبيبة.. حبيبة گعدي اريد احاچيچ

-حبيبة: شكووووووو

-علي الحق: كومي اريد احجي وياچ ولج

-حبيبة: هاا هاا كعدت

-علي الحق: ليش گايلة لصديقتج تنام بغرفتي؟

-منووو

-صديقتج هاي

اشر عليَّ وحبيبة مطفية، شفتي راحت من گدما عضيت عليها اريدها تكمل الجذبة ويايه وهاي صايرة مطي، صفنت بوجهي شوية لحدما اجتها الاشارة فكت عيونها وصرخت..

-عبقققق

-علي الحق: اي قبق شتسوي نايمة بغرفتي؟!

-حبيبة: عبقققق

-عبق بخوف: حبيبة

-حبيبة: هاي هاي هاي هي هنا هيي

-عبق: اي اني اني

-حبيبة: والله اي هي

-علي الحق: افتهمت هي! شتسوي بغرفتي؟؟

-حبيبة: لان هاي.. امي.. اي امي هي

-علي التقي: هالبنية امچ؟

-حبيبة: لا لا امي

-عبق: امي امي كالت انام هناك

-علي التقي: امچ؟

-عبق: لا امها

-حبيبة: اي امي والله باعو سمعوني باعو

گعدت على حيلها توخر شعرها وره اذانها وتبلع بريگها..

-علي الحق: باوعنا

-حبيبة: هاي البنية.. عبق هي صديقتي كلش كلش صديقتي وامها صديقة امي وابوها صديق...

-علي التقي: ابوي؟

-حبيبة: لا مو صديقه لا بس هي صديقتي يووووه حق عوفها خطية البت خافت منك تعاي عبق نامي يمي شوداچ لغرفة حق

-علي التقي: مو گلتن امج گالتلها؟

-عبق: صح صح

-علي الحق: سمعن ولچن انا نعسان وروحي خارطة من التعب باجر اگعدلچن ركبة ونص انا اعلمجن

طلع من الغرفة وراح وياه علي التقي يضحك بينما اني وحبيبة گعدنا نلطم على وجوهنا شيخلصنا من سلوى باجر عزه العزاني..

-حبيبة: ولج شلون شافووچ شلووون

-عبق: غفيت بغرفته لطام اللطمني لطااام

-حبيبة: يبوووو رحنا بين الرجلين امي باجر تعزينا وتطيح حظنا

-عبق: حبابة حبيبة لتحچين لا تكوليلها فدوة

-لا احچي خليها تطلعج كدام باقي الولد شنو تبقين هيج تتختلين انتِ بعد احسن من شافوج

-حبيبةةةة

-والله شبيچ يله نامي

-ماكدر انام مااكدر

-نامي ولج وباجر يحلها الحلال

رجعت تنام بس اني وين اكدر انام بعد عيوني انفتحت هالكبرها كاعدة على نار تچويني واخاف اطلع لا اللگه واحد من الولد كاعدين شلون بيه باجر شلوون..

طلعت الشمس وحبيبة گعدت وراحت تسبح وتبدل واني لاطشة بالغرفة اخاف اطلع، اكل بأظافري وافكر شنو راح تسويلي سلوى اليوم..

-حبيبة: عبق كافي تلومين بروحج ما سويتي شي غلط واني احجي ويه امي لتخافين

-تذبحني والله هي كالت اذا شافوج الولد لو اذبحح لو اشمرج بالشارع

-وانتِ صدگتيها؟؟ عبق انتِ بنت اختها!

-لا لا ميهمني اني طالعة راح اروح للمخزن وما اطلع منه لنهاية عمري

طلعت اركض بره غرفة حبيبة والحظ الفگر صرت وجه بوجه ويه علي الحق طالع عاري الصدر وبس بالبحامة يفتر، مطى ايده لفوگ وتثاوب تعبان..

-علي الحق: ها عنق بعدج هنا

-عبق: لا لا طالعة

-بالدشداشة؟

غمضت عيوني اسب روحي بگلبي عفته ورجعت اركض لغرفة حبيبة، الخاتونة واگفة تمشط وتتعطر ولا يمها..

-امداااج حبيبة امداااج

-ها شبيچ

-شافني علي شااافني

-يا علي منهم؟

-الضابططط

-يا ضابط منهم؟

-ولج علي الحق!!

-ها شفتي بعد انكتبلج تبينين نفسج ويعرفوج نزلي ويايه نتريك نزلي

-ما انزل گلت

-طاحظج

نزلت وعافتني وحدي، حطيت اذني على الباب اتسمع اذا احد گاعد لو لا وذبيت نفس من سمعت سنطة، طلعت من غرفتها وأسمع اصواتهم من جوه يسولفون، تمشيت على اطراف اصابعي ومديت راسي من محجر الدرج اباوعلهم ملتمين يتريوگون نفس كل يوم..

-علي الحق: بدر يجي اليوم دريتو؟

-علي الكرار: اي الحمدلله والله مكانه خالي بالبيت طگ گلبنا بغيابه

-علي الدر: چا انا شگول غير فت افادي ياله رضى يرجع

-علي السور: حلتله مصر كون بعده يحب شمس لا يروح يعشگله مصرية ويجيبها شريچة على راسها

-ابا الحسن علي: علاچي انطيني الجبن

مد علي السور الجبن ينطي وبقوا يسولفون وسلوى ورسمية يشاركن وياهم الشيخ ما موجود كالعادة، شوية وعلي التقي صار يتلفت وگال متسائل..

-شني وينها صاحبتج حبيبة؟

-سلوى: منو هاي؟

-حبيبة: اءءء احم اءءء راحت.. راحت

-علي الحق: وين راحت هسة شفتها فوگ بدشداشتها

-سلوى: منووو هاي؟؟

-علي الحق: اسمها شفق

ضربت على خدي ميتة خوف وخالتي سلوى باوعت لحبيبة متفاجئة..

-منو شفق؟

-علي التقي: ولك لا يمكن اسمها الق مادري غسق هيج شي

-حبيبة: اءء يمة خوش گيمر جايبين اليوم عاشت ايد ابوي

-علي الكرار: ابوج شكو انا جبته

-حبيبة: اي عاشت ايدك بعد بيتي

-سلوى: منو هاي صديقتج حبيبة؟؟ من يمتى وجاي عدنا صديقات يجن من الصباحيات؟

-علي التقي: لا باتت البارحة بغرفة عليوي

-سلوى: يمااااا

-حبيبة: ههههه يمة ههههه انتِ گلتيلها شبيچ نسيتي ياااا

-علي الحق: اويلييي والله صاكة چانت

-رسمية: صوااب ياهي هاي بايته بغرفتك يما حق

-علي الحق: مادري انا گلت هذا فخ من العدو، احتاجيت قوة اسناد وناديت على علي التقي

-علي التقي: وانا طلعت سلاحي وسويت نداء لعلي الدر بس چان نايم ولبسني

ضحكو كلهم بس خالتي شايطة وتخزر بـ حبيبة الي ما فتحت حلگها، حط علي الدر لگمة بحلگه وگال وهو يشرب چاي..

-يمكن تقصدون عبق؟

شرگت سلوى بالچاي وصارت تدگ حبيبة على ظهر امها واشوف وجهها صار دم..

-علي التقي: اي صح يمكن اسمها عبق

-علي الكرار: وشتسوي صديقة حبيبة بغرفة علي الحق بنص الليل؟

-علي الحق: مادري وتره هي بعدها هنا صيحيها حبيبة عيب خليها تتريگ

گامت حبيبة حتى تجيني وصاحت بيها سلوى..

-ويييين رايحة وين؟؟؟

-علي السور: بووووية نززتيني شبيچ

-علي النور: شبيكي خالتو ليش هيك معسبة

-علي التقي: صيحيها حبيبة

-علي الحق: اي صيحيها

شربوا ثنينهم چاي وواحد يباوع للثاني بـ شك ادري مستحيل تعبر عليهم هالثنين خرب حظج عبق.. صعدتلي حبيبة تجر بروحها جر وامها راح تطلع عيونها من الخزر، وگفت بنهاية الدرج واشرتلي تعالي، هزيت راسي لا رجعت اشرتلي تعالي عفتها وشردت للمخزن..

-حبيبة: عبق فتحي الباب عبقق

-ما افتح

-فتحي ولج لا تخليهم يشكون فتحيي

-شكوا وخلصو همه والله شاكين بيه ويعرفون

-ولج ضباطط عبالج تعبر عليهم كلاواتنا امدانه

-شسوي حبيبة اخاف من امج شسوي

-فتحي الباب خليني احاچيج

فتحتلها الباب وطبت عليَّ، رتبت شعري بيدها ومسحت على خدودي بالايد الثانية وگالت وهي مبتسمة..

-اجاچ الفرج عبق لازم تفرحين اخيراً راح يشوفوچ الولد وتعيشين طبيعي حالج من حالنا

-ماريد اخاف

-اذا تخافين من امي اولها واخرها راح تتنازل وتتقبل الامر الواقع

-حبيبة باعي.. راح انزل بس نمشيها علساس صديقتج وبتت يمج ماشي؟؟

-ماشي براحتج بس لازم تبدلين لبسي شي مال طلعة ومرتب شوية

-اللبس الجبة البيجية؟

-لا اييع تخزي

ضربت حبيبة حلگها بسرعة وره جملتها وفتحت عيونها، ادري طلعت من حلگها بدون قصد الجبة البيجية ارقى شي عندي بكنتوري واللبسها بالعزايم وصدقت حبيبة هي صدگ قديمة وتلعب النفس..

-والقران ما اقصد عبق والله العظيم اصلاً انتِ شنو تلبسين تخبلين والله

-ادري ولج ما زعلت هاي الحقيقة الجبة تخزي

-شنو رأيج اني انطيج شي تلبسي؟

-خاف امچ تشگه عليَّ؟

-لا ما تسويها كدام اخواني امشي

رحت وياهة للغرفة واختارتلي نفنوف زيتوني ورهمتلي شال وياه، لبسته وباوعت لروحي بالمراية مبتسمة طلعت مرتبة كلش واللون راهملي..

تأملت روحي ورجعت بيه الذكرى من مرة حبيبة اشترت ملابس وجابتلي وياهة بالسكتة فستانين وجبة بدون لا تعرف امها بس من عرفت سلوى صعدت لغرفتي وشگگتهم وحرگتهم گدام عيني وحرگت گلبي وياهن..

نزلت ويه حبيبة رجليه ترجف، احس صخنت من سلمت وكل انظار الولد صارت عليَّ، شفت اللگمة توگع من حلگ علي الكرار وعلي السور والنور فتحوا حلگهم مصدومين ماعرف ليش..

-علي الكرار: اللهم صل على محمد وال محمد دخيلك يا علي ابن ابي طالب

-رسمية: ووللك

نزلت عيوني ارجف احس راح اغيب عن الوعي من الفشلة، صاحتلي خالة رسمية اگعد اكل ورحت اكعد ويه حبيبة، رفعت انظاري لسلوى شفتها خازرتني وتهز براسها بحركة "اني اعلمج" وابرار راح تطگ وعيونها ما وگعت مني..

-الامـير علي: من بيت من انتِ بلا صغراً؟

-عبق: هاا؟

-علي السور: what is your house name؟

-الامير علي: دخيل بختك يا حسين عود حچى هو

ضحكو كلهم واني هم ابتسمت ونزلت راسي، رفعت عيوني مرة ثانية وصارت على علي الحق وعلي التقي وشفتهم ثنينهم يباوعولي بنظرات ما مفهومة توترت وماعرفت شتصرف كعدت بس اشرب مي وابلعم..

-علي الكرار: يما ليش ما تزوجيني

-كل الولد: اهووووووووووو

-علي الكرار: شمالكم شگلت انا

-ابا الحسن: هاي اكو فد مرة گعدنا ناكل وكرار ما جاب طاري الزواج چان يموت

-علي الدر: اي وعلي، ابرار ماي بلا امر

گامت ابرار تجيب دولكة المي من المطبخ ورجعت، بعدها دتصب لعلي الدر وفززنا صوت صراخ رجال جاي من الحديقة وطب للبيت على نفس العيطة، وگع گلبي من شفته غسان طب للصالة بدون لا يحچي خله اخوان حبيبة يتطافرون وابا الحسن والامير ثنينهم جرو حبيبة وره ظهرهم يغطوها ويعيطون بي..

-الامـير علي: ابنننن السطططل داييس بيتنااا بلا ما تاخذ درررب

-غسان: عذروني عذرونني بس مصيببة ولفت على روسناا مصيبة

-علي الدر: شصايرر؟؟

-غسان: بيت مسعوود هدو علينا وحرگو البساتين وطشرووا الحلال

لطمت رسمية على وجهها والولد تخبلوا، متت خوف ورهبة من عياطهم وعصبيتهم صعدو تقي وحق يركضوو جابو اسلحتهم وركضوا يطلعون بينما علي السور ونور كلمن اخذ بيده توثية وركضوا بره ويه كرار وعلي الدر وابا الحسن..

-الامـير علي: قفلووو الباب وراكم يمة محد تفتح البااب لو تتكسررر

-رسمية: يما عينك على اخوتتك امييير

-الامـير علي: يمة الباااب لا تفتحوووها البااااب

طلع يهرول واحنه وراه وصل لنص الحديقة ودخل من باب الحوش منتصر يلهث لاف شماغ على وجهه وملابسه مصخمة..

-منتصر: امير لا تطلع اميير

-الامـير علي: شنوو ليش ولك

-منتصر: حرگو البساتين لبالهم انتَ بيهن غسان يگول سمع بأذنه مسعود گايل لولده يريد راسك حتى يحرگ گلب ابوك

-ولدد الكلب المخانيييث

-لااا تطلع بداعتيي

-هدنييي منتصررر لا تكضنييي

-احلفك بروح حبوبتتك ما تروح خليرجع ابوك هو يصفيها وياهم

-همه مو يردون راسي انااا؟؟ اروحلهم بنفسيي اشوف يا ابن عاار يكضني هدنييي منتصر

فلت نفسه منه وطلع من البيت وراح وراه منتصر، اللتفتت اشوف حبيبة تبجي وترجف ورسمية تلطم على رجليها خايفة وسلوى بعدها تصيح وتلطم على راسها..

-رسمية: شوكت نخلص منهممم شوووكت يمممة وليداتي رجعولي وليداتي

-عبق: لا تخافين خالة يرجعون ولدج سباع يرجعون والله

رجعنا للصالة وانتفضت موجوعة على گرصة خالة سلوى شلعت لحم ايدي شلع، حدت سنونها ونترت من بيناتهن..

-تعاي عبق اريدج

گمت وياهة حاطة ايدي على گلبي خايفة، رجعتنا للحديقة وگفتني يم باب الحوش وصفگتني راشدي رنت اذاني بسببه..

-بت الچلبب الساقطة!!

-خالة وحق الله جيبي القران الكريم احلفلج عليه ما متقصدة وحق...

جرت لساني من حلگي ومردته بيدها متت وجع وبچي، ضربتي راشدي ثاني وجرت شال حبيبة من راسي شگته وشمرته بالحديقة وتفلت عليه..

-انعل ابووج على امج الساقطة اذا شفتج لابسة من ملابس حبيبة ومنگستهنن انعل خير خيرررچ فهمتيييي

-فهمت فهمت والله

جرت النفنوف من يم الصدر وشگته، صرخت متوجعة لانها جرحت صدري بأظافرها وضربتني على حلگي حتى ميطلع صوتي، ظلت تهزع وتمزق بالفستان صار خرگة عليَّ..

-گووة تريد تصير ام بيت گوووة بت المگرن انعل ابوج الخرگة الاخذ امچ الساقطة بت الساقطة تفوووو عليچ

تفلت عليَّ وجرتني من اذاني تسحلني منها احسها انشگت من قوة لزمتها، شمرتني بالطرمة الثانية البيها التنور وقفلت الباب عليَّ هنا وگعت بالكاع ميتة من الوجع والبچي الدنيا تفور من الحر والطرمة هاي منحر شمس..

گعدت على صفحة ادور الفي بس ماكو لا شجرة ولا شي تغطيني، لميت نفسي وملابسي المشگگة وگعدت ابچي وادعي على امي كله بسببها كل الصار بيه بسببها!!

**

"حبيبة"

ظليت اللوب امي رسمية تخربطت علينا حرت مادري شسوي، لبست عباتي وگلت اخذها للمستوصف بس امي وگفت بوجهي وما رضت راحت عصرتلها حامض واجت تشربها عرفته ضغطها..

الدقيقة تمشي ساعة عدنا راح اموت علما يرجعون اخوتي، بيت مسعود شوكت نخلص منهم ومن حقدهم مادري! واليكتل مسعود يصير عمي! اي عمي اخو ابوي!

مسعود ونعمة اخوان ابوي من غير ام وثنينهم نفس الطينة حاقدين حقد على ابوي ما صاير يشوفون دم سنونهم ولا يشوفون ابوي واخواني مرتاحين..

كل يوم چان عمي مسعود يسويلنا مشكلة وابوي يتعارك وياه، اخر مشكلة صارت من غفار خطبني من ابوي هم صارت مشكلة الها اول مالها تالي لان غفار يصير ابن عمي مسعود وابوي لو يموت ما ينطيهم..

من گبل يكرهونه ومن رفضت غفار صار مسعود وولده السبعة يكرهونا اكثر من گبل بقاطات، ولده شرانيين وكلهم حامين ويرجفون عصبية وانا اخوتي منا عصبيين وكل يوم صايرة بالتواثي بيناتهم..

راحت من بالي عبق كل ظني صعدت لغرفتها ظليت ويه امي جوه وانخبصت ويه مره ابوي اجتها فراقد تهد وتنثني واجت غزوة واكتملت السبحة..

-غزوة: ما يتجاوز مسعود لوما ولدج مسويلهم دگة رسمية

-فراقد: صح مسعود چلب مسعور بس صحيح چلام غزوة ما يتحارش من الهوا

-رسمية: اوووف شمدريني شمسوين ذولة شمدرينيي

لليل احنه گاعدات لا اكل ولا شرب بس ندعي تعدي على خير، اتصل على اخوتي محد بيهم يجاوب نتصل على ابوي نفس الشي دگيت على غسان هم ما يرد اخر شي دكيت على منتصر جاوبني يلهث..

-ها حبيبة

-منتصرر اخواني بيهم شي؟؟ شبيك تلهث؟؟

-مابيهم مابيهم

وطبگ الخط بوجهي ظليت ادگ واللطم، طلعت روحي وانوب اجتني امي تگول سويلنا عشا فكيت حلگي عليها..

-سلوى: چا عيب من فراقد وغزوة شني جايبيهن نموتهن جوع

-يمة روحي طالعة ما يصير هيج والله

-كومي كومي چان كلت لعبق بس شو هاي هم مالها خلگ عوشت ونامت من الظهر

-شبيها؟

-مصخنة اخذتلها علاج قبل شوي وقفلت الباب عليها خاف تنسى وتريد تنزل من يجون الولد ما اخليها

-يمة حرام عليج

-نچبيي وانتِ حسابج بعدين خلي من يرحن النسوان

بولعت بريگي خايفة ورحت اسوي عشا، طلعت بورگ وكبب ووگفت اگليهن، تذكرت ابرار وين راحت هاي؟؟ رجعت لامي اسئلها عنها هي هم صفنت چن ناسيتها..

-صدگ وينها هالملعونة؟

-مادري

راحت لغرفتها وانا وراهة امشي، دگينا الباب عليها ما جاوبت فتحتها امي وطبت وچان نشوفها متغطية ونايمة..

-سلوى: نايييمة بت الغرااب من ناام عليج حاايط كوومي كوومي

-ابرار: ها عمة شبيچ

-وغمممه كومي نايمة ورجلج ما ندري وين ارضه من سمااه

-ابرار: دايخة ولعبانة نفسي عمة يمكن حامل انا

-سلوى: وجععع منين تحبلين من الحايط وزلمتح ما يريدج

-ابرار: هههه لا تصالحنا

-سمم وزقنبوت كومي كومي

گامت تلم بشعرها وتمط جسمها صدگ وجهها صاير اصفر يمكن صدگ تطلع حامل يله بلكت حامل حتى علي الدر يتغاضى عن باقي تصرفاتها ويرجعون مثل قبل..

وگفنا اني وياهة نسوي العشا ظل بالي على عبق بس اكمل اصعدلها اشوفها شلونها، كملت گلي ووگفت اسويلها لفة من شافتني امي خزرتني ونترت..

-هاي المن اللفة؟؟؟

-اءء الي.. الي انا جوعانة

-عوفيها واكلي ويانه شنو مسويتلج لفة مو عيب

-يمة مو انا اريد اصعد لغرفتي ادرس

-تدرسين واخوانج بهالحال حبيبة؟ ليش يمة شبيچ صايرة ما تهتمين لاحد انتِ

-هاا اي صح كلامج صح راح ابقى هنا

هزت راسها وباستني، غافلتها وضميت اللفة بالفرن واخذت صينية العشا حتى ياكلن، اكلت شوية وكمت اريد اصعد لـ عبق ولزمتني امي..

-غسلي المواعين بنيتي ابرار شو تعبانة

-اي هسة جاية

-لا وين رايحة تعاي غسليهن اول

هزيت راسي بنفاذ صبر ووگفت اغسل مواعين واتحرگن على الفقيرة الفوگ، وانا واگفة على السنك سمعت صوت باب الحوش تنرگع، شهگت فرحانة من شفتهم ابوي واخوتي ومنتصر وياهم جاي ودعهم بالباب وراح..

-يممااا رجعو الولد يممااا

ركضن امي ومرة ابوي وفراقد وغزوة يسلمن عليهم ويبوسن بواحد واحد، اباعولهم ملابسهم متربة وعلي السور خده مجروح وعلي الدر ياخته ممزوگة.. طبينا للصالة وانا كسرت ثلج اوديلهم ماي واسويلهم شربت يسند طولهم..

اخذتلهم الماي والعصير واسمع لرزايل فراقد لواحد واحد وهمه ساكتين، علي الحق ضاربله ركن ما مهتم وعلي التقي يلعب بموبايله وعلي الدر يدور بعيونه على ابنه وعلي الكرار يحشش ويه سور ونور والامير وابا الحسن بغير عالم..

-فراقد: اااخ يا شيخ علي كله منك انتَ السبب متيه ولدك وولد اخوك مخليهم يتصارعون

-علي السور: شني ثيران ونتصارع

-فراقد: انگسسس

-علي النور: چا خنگوم نشطف

-ابا الحسن علي: اگلكم اذا وحدة تريد تتطلگ من زلمتها لانه مشعر شلون نقنعها تبطل؟

-علي الحق: جيبه يمي اضربه مزيل

-فراقد: عمت عينهااا صدگ رافسة النعمة هاي

-علي النور: لا حگها هذا چا تخيلي تاكلين ويه قرد كل يوم

-علي السور: وتاكلون مرگة شعر على الغده

-رسمية: يبووو سكتو لعبتو روحي

-فراقد: ابو علي شنيي ما تفهمونا الصار هسة؟؟

-الامـير علي: صدگ حيدر وين در؟

-فراقد: انااا ويامنن ولكم

-علي الدر: نرجعلج خالة عذرينا بس وليدي وين حبيبة؟

-حبيبة: ببيت عمو ناصر ما اجه من الصبح

-علي الدر: هالسربوت شوكت يهيد ببيته

ظلوا هيج يضحكون ويحششون وابوي يباوعلهم ساكت وهيچ ضيعوا السالفة على فراقد وغزوة وخلوهن يروحن لبيتوهن ياله حچو..

-شيخ علي: ولكم ادبسزية طايحين الصبغ ولد الفاايخة ما تتوبون انتمم

-رسمية: شيخ انا شعليه

-شيخ علي: ولدج مرمرو گلبي هذا السربوت مسويله دگة ويه بت مسعود وهدوا علينا

-رسمية بشهگة: صددگ ولك علييي

-علي الكرار: خايبين گولو يا علي من عدنا بعلي وگعت گلوبنا

-شيخ علي: انتَ!!

-علي الكرار: ها انا

-شيخ علي: و تفففگ صايع ما تستحي تتحارش ببت عمك

-علي الكرار: لا بوية اظن فهمتوا غلط تره هي التحارشت بيه مو انا

-شيخ علي: انچبب انچععم انلصمم لا تفتح حلگكك

-علي الحق: چا غير يدافع عن نفسه

-علي التقي: المتهم له الحق في الدفاع عن نفسه لو شتكول ابا الحسن

-ابا الحسن علي: يوكل محامي لازم، كرار وكلني محامي الك وانا ادافعلك بس حرك جيبك

-علي الكرار: بالعباس ربع ما انطي ثانياً بوية انا ما تحارشت بـ سبأ هذا مو  دربي اندگ ببنات عمي البت هي الاجت وگالت خلصني من ظلم اخوتي وانا ساعدتها ودزيتلها ولد صاحبي يخطبها شني كفرررت

-سلوى: شگد عيب

-الامـير علي: وين العيب؟

-سلوى: چا يدز خطابة على بت عمه مو عيب

-علي الدر: چا ليش شبيها اذا خوش ناس وسألوني على بت ادليهم على بنات عمي

-ابا الحسن علي: بالعباس انتحرر لو طلعت انتَ التدز الوادم على ليلة

-شيخ علي: كافي سكتو كلكم، الصار ماريده يتكرر علي الكرار! عمك مسعود فرگاس ما ينجاس يريدله حجة حتى يهد علينا وسالفة حرگ الحلال راح اسكت عليها لخاطركم يا ولد

-علي الحق: بوية احنه مانريدك تسكت شنو لخاطرنا

-شيخ علي: خاطر ما تصير حرب من دم واخسركم واخلي الوادم تشمت بينا اخوان تذابحو علمود حلال

-علي النور: بس بوية هو مسويله امارة وحده ومصدگ روحه شعلينا بي بعد هو الگص صلة الرحم بيناتنا

-بس الكل يعرفنا اخوان

فضت الگعدة وگام ابوي بس اخوتي محد راضي ويردون يسوون عركة ويه بيت مسعود وانا متأكدة هالسالفة ما راح تعدي على خير وراح تصيرلنا مصيبة تكسر ظهرنا..

لليل كلش صعدت فوگ دگيت الباب على عبق ما فتحتها لحيت ادگ وماكو جواب ظل بالي..

-عبقق فتحي الباب تره راح اكسرها مو تتعاركين وياي.. عبببق فتحي الباب شبيييچ

ظليت اضرب بالباب بالخنسة وادفعها لحدما وگعت هي باب فاشلة وبساع تنكسر، طبيت وتفاجأت من شفت فراشها مرتب وهي ماكو.. طلعت من المخزن اركض لحمامها هم ما موجودة، ركضت انزل جوع ادورها خايفة دورت كل مكان بالبيت بس ماهي عبق اختفت!

اخر مكان رحتله الساحة دورت بيها علما عجزت فكرت تكون بساحة التنور فتحتها ادور بعيوني وشفت جسد متكوم بالزاوية لامة روحها ونايمة..

-عبببق

عطت اسمها ما مهتمة احد يسمعني وركضتلها اشوفها تچوي من الحر، شلتها احطها بحضني ودموعي گامت تنزل بدون ما احس روحي فرفحت عليها..

-عببق حاچيني عبقق

فتحت عيونها وردت سدتهن تعبانة، وجهها احمر دم وعيونها زايغة ومدمعة..

-سودة بوجهي كون شلون عفتج هنا شجابج هنا عبوقة يمة حبيبتي

حاولت اشيلها ما گدرت كوة كومتها سندتها على چتفي ودخلتها للبيت وگبل صعدتها لغرفتي ما رضت واشرت على مخزنها تريد تروحله..

-ماعندج سبلت سكتي تعاي يمي

طببتها ونيمتها على الچرباية ونصيت السبلت عليها، اباوع ملابسها مشگگة ووجهها مشخط من الصبة، گعدت وياهة لازمة ايدها بس المسكينة تنتفض كل شوية تفز وترجع تنام والصخونة تاكل بجسمها متت قهر عليها..

غفت عيني واني بصفها وحسيت مخترعة من شفت علي الحق بوجهي، طفرت من الفراش اباوع لـ عبق وعليه وهو مستغرب..

-علي الحق: دگيت الباب هواي ومن ما جاوبتي طبيت خفت صايرلج شي

-ها لا لا مابيه شي

-صاحبتج بعدها هنا؟

-راحت و.. ورجعت بالليل

-ليش شبيها؟

تقرب منها عاگد حاجبه ويباوع لوجهها ورگبتها كلها اثر اللتفتلي مخترع وسأل..

-هاي مكتولة؟؟

-احم

-تشرد من اهلها وتجي هنا يمج حبيبة؟؟

-علي اكدر اشرحلك والله

-لج هاي نار صايرة مصخنة البت

-اي ومادري شسوي

-ناخذها مستشفى؟

-تكدر؟

-اي چا ليش يله گعديها خل ناخذها ونشوف سالفتها شنو

-حق لا تسألها على اهلها تره تنجرح

-همه مسوين بيها هالحال؟

-اي

-حبيبة لا تجيبيلنا مصيبة اهلها يدرون بيها تجيچ هنا لو لا؟!

-يدرون والله

-وامچ هم تدري؟

-تدري اصلاً هي گلتلي نجيبها لبيتنا

-حبيبة؟؟

-والقران ان شاء الله اموت اذا جاي اچذب

هز راسه ووگف على جهة علما گعدتها بس ماكو لا ايد ولا رجل انوب شفت ايدها صاير بيها حبوب صغار محصفة من الحر انخسف گلبي من القهر عليها وبچيت..

-شنو شبيچ تبجين

-ايدها محصفة علي شسوي

-يجوز من الحر يله گوميها تأخر الوقت وباجر ورايه دوام

-ما جاي تصحى ما تحس

-چا شلون

گومتها گوة اجرجر بيها خارطة روحها ماتكدر تنهض، مشيت بيها خطوتين وطاحت بالگاع..

-علي الحق: علييي

-حباب ساعدني هلكت

-شسوي

-شيلها انتَ

-ها!!!

-والله شبيك اعتبرها مثل بنيتك

-بنيتي شنو ولج هاز كاروكچ انا

-تعال يمعود

هز راسه اي ونزل نفسه يشيلها، حط ايد جوه جسمها وايده الثانية جوه اچتافها ورفعها، شفته يباوع لوجهها شوية وانوب دار عيونه يگول..

-جسمها مبين جيبيلها عبا

-اي صار

جبلتها عبا لبستها وحطيت شال على راسها ومشيت وياهم، دعيت من كل گلبي امي ما كاعدة حتى ما تسويلي هوسة بس الحمدلله محد كاعد الوقت متأخر والكل نايم..

اخذنا علي الحق للمستشفى ودخلوها للطوارئ گالو هبوط حاد صاير عدها وعدها رضوض بجسمها، شدولها مغذي وضربولها ابره وسوولها تحاليل طلع عدها فقر دم حاد ونقص حديد وبشرتها شاحبة بسبب قلة التغذية مابيها شي صاحي سودة عليَّ..

-علي الحق: من بيت من هاي؟

-ها؟

-بيت من فضينييي

-شبيك حق معصب

-حتى اروحن اشعل شيب الخلفهم شمسوين بالفرخة!!

-شتسوي چا وين تروح

-انطيني اسم ابوها بساع

-شتسوي بي علي!!

-انتِ شعلييچ انطيني اسم ابوها لا تكفريني بيي

-اسمه بشير الـ^^^^^

-شني مو منا هذا؟؟

-لا من بغداد

-خوش

-عبق: حبيبة

طرت فرح من شفتها حست ونطقت اسمي الحمدلله العلاج فادها، رحت اللزم ايدها وامسح على چتفها على كيف..

-شلون صرتي حبي

-اريد ارجع للبيت حبيبة

-علي الحق: الحمدلله على سلامتج خوية

شهگت نازه ولمت البطانية على جسمها، تباوعلي وتباوعله والرجفة لازمتها كضيت ايدها اطمنها كلشي بخير بس ماكو فائدة..

-علي الحق: تره انا مو عزرائيل

-عبق: حبيبة حبيبببة

-علي الحق: لا اسمي علي الحق

-عبق: يممممة

-علي الحق: وصمه شني اشايفة ولج

-حبيبة: علييي شبيك

-علي الحق: والله كامت تتراعد چنها شايفة ابليس

-حبيبة: اي تخاف منك روح هناك

-علي الحق: مو صوچچ صوچي انا واگف هنا يمچن

راح يطلع من الغرفة وانا ميتة ضحك بينما عبق وجهها مخطوف لونه وشفايفها صايرات بييض اعرفها خايفة ومن كثر خوفها ما حجت حتى من رجعنا للبيت طبت للمخزن وقفلت الباب عليها..

مشت الايام انا حايرة بين دوامي بالجامعة والمستوصف وعبق الي ما رجعت طبيعية، امي شدت وياهة اكثر من قبل صارت تكتلها على اتفه شي وانا اجي افاكك بيناتهن.. جسم عبق صار خريطة من الخراميش والاثار مال الكتل..

ابرار ما طلعت حامل واعتكفت على روحها زعلانة لان علي الدر ما يحاچيها هواي وصراحة ما اللومه لان كلما يفتح وياهة حديث تبچي وتسويلها زعلة من ولشي فـ هو فضل تكون علاقتهم رسمية واكتفى بأبنه حيدر وبس..

قربت الامتحانات واللتهيت بيهن اقرا من الصبح لليل ماريد درجاتي تنزل وابقى محافظة على مستوايه، وبيوم انا گاعدة بين الملازم ادرس اجاني اتصال من علي التقي ابتسمت وجاوبته وچان انصدم من يجيني صوت تَـمني فاحطة بچي وتگول..

-لحگيني حبيبة لحگينيي

-تَـمني؟؟ شبيچ شصايررر

-باگوني واخذو كلشيي املكه وشمروني بالشارع حبيبة ماعرف شسووي جسمي يوجعني وتعبانة

مبين اخذ التلفون منها علي التقي لان صوته الي صار بالسماعة..

-علي التقي: ما رضت تسكت الا اتصل بيج تريدني اجيبچ لبغداد ياله ترضى تجي لشقتي

-حبيبة: شلون اللتقيت بيها ووين؟؟؟

-لگيناها بالشارع طالعة بـ... استغفر الله (نصى صوته كلش وهمس) شفتها طالعة بدشداشة نوم مخازي

-شنوووو

-بالشارع وحدها وتفتر مثل التايهة....

**

"تَـمني"

من يوم اخذني بسام من بيت الشيخ علي ما رجعني لبيت خالتي اخذني لبيت واحد من اصدقائه، ماعرف شلون راح احجي المر عليَّ والشفته بهاي الاربع اشهر الي لازم تكون ايام العدة مالتي بس ما چانت ايام عدة جانت ايام فسق وفجور وترهيب!

اخاف احچي واخاف اتذكر الصار بيه من وداني هناك بسام، اخذ مني تلفوني ومنعني من زيارة خالتي ومن الجامعة سجني بهذا البيت وممنوعة الطلعة عليَّ، شگد حاولت اهرب واطلع منا بس يلگفني بكل مرة..

اخذني لبيت صديقه علساس ابقى ويه زوجته بس الحقيقة ما طلعت زوجته طلعت عشيقته وهو يجيها هنا للبيت بس يتونس وياهة ويرجع لبيته..

بقيت وياهة وياريتني ما بقيت دمرتني وكسرت ظهري، اشكال اللوان شربتني وبالغصب خبلتني واخذت عقلي مني واخر ما توصلتله هو بيوم اني مصخنة وتعبانة اجتني بيدها دولكة وكلاص..

-هناء: ها كعدتي

-اي

-شلون صرتي؟ هاج شربي هذا هسة تصيرين زينة

-ماريد اشرب شي

-ولج زين هذا خبطة تعلمتها من بيبيتي

-وخري اخاف ماريد

-غبية

عافت الدولكة والكلاص وراحت، شفت الدولكة بيها سائل لونه وردي وريحته مطيبة لعبت نفسي بس شربته بلكي اتحسن ميقبلون يجيبولي علاج هنا، رجعت لمكاني وغمضت عيوني وفتحتها على حركة شخص يم رجلي يلعب بيهن فزيت مخترعة من شفته بسام..

-بسام: بس نوم انتِ

-شـ.. شـ.. شتريد بسام شتريد

-ما راح اسويلج شي هسة انتظر العدة مالتج تخلص واللعب بكيفي

استغربت منه شمعنى ينتظر العدة تخلص بس ما علقت مچنت اعرف منتظر تخلص العدة مالتي حتى يعقد عليَّ ويتزوجني غصب عني..

دور عيونه بالغرفة وانوب يرجعهن على جسمي يتفرج، غطيت روحي عدل بس دايخة وراسي مدا يثبت حسيت بي تقرب من جسمي وحسيت بشواربه على رگبتي حاولت اتعارك وياه واضربه بس ايدي راخية ماكدرت.. غمضت عيوني وغفيت مرة ثانية..

گعدت الصبح شفت قميصي مفتح واثر اكو برگبتي لطمت على وجهي ابچي خايفة ماعرف شسوي ووين اروح شلون اهرب من هالمكان!

بقيت وحدي لا ليلي ليل ولا نهاري نهار هنا، تمر الايام ومادري شيصير ميصير بره كل يوم اسمع اصوات تقزز بره واظل كاشة بجسمي خايفة احد يدخل عليَّ..

راسي يوجعني ومخنطلة مدا اصحى بهالبيت كل يوم اتمرض وتجيني هناء تنطيني شي اشربه ما اقبل اخذه بس تجبرني يجي حبيبها فارس يچتفوني ويشربوني غصب وبعد ما احس على شي انام واجرها للصبح اكعد راسي يموتني وجع بس احسن بهواي من الليل..

وبيوم اجتني هناء شايلة بيدها علاليگ من محل اعرفه يبيع ملابس نوم وداخليات نسائية، اشرتلي اروحلها باوعتلها مستغربة بس رحت اشوف شبيها، طلعتلي دشداشة نوم تشبه الفستان بس كلش فضيحة توصل لنص الفخذ والصدر كله تول..

-هاج لبسيها

-ليش؟؟

-غيري ملابسج وتونسي ذني مالتي جابهن الي فارس

-ماريد اللبسها

عتنتي من شعري حيل ونترت..

-سمعيي لج راح تلبسيهاا لا اللعن الخلفججج

-ولييي زباالة ما اللبسهاا لو تموتينننن

ضربتها وتفلت عليها تخبلت عليَّ ركضت للمطبخ جابت سچينة تريد تحطها بگلبي متت بدمي ضليت اتصارع وياهة خايفة واصيح عليها تعوفني، شلت الجبيرة من رجلي بس بعدها شوية توجعني واخاف تضربني عليها صرخت بلا روح خايفة..

-اللبسهااا راح اللبسهااا هدينيي

-يله كدامي يلله وهاج هاي سبحي ونظفي جسمج بالحمام انتظرج

شمرت عليَّ علاكة بيها شامبو وغسول وادوات حلاقة، بجيت مكسورة خاطر ودخلت للحمام سويت مثل متريد وطلعت مع العلم گلبي ناغزني وحاسة منتظرتني مصيبة بس خلص كرهت كلشي وميهمني شي بعد..

لبست الثوب وكعدت مشطت شعري هي ولفته بأصابعها ما صار تفتح بسرعة زفرت نفس ضايجة وكامت عني لازمة تلفونها وتتأفأف عبالك تنتظر اتصال..

-هناء

-هاا

-اريد اتفق وياچ اتفاق

-شنو هو احجي بسرعة

-اذا طلعتيني منا انطيج فلوس

-ههههههههههه دولي يومية عايدتلي هالسالفة

-والله انطيج وشكد متردين

-وشلون تنطيني يمة؟؟

-عندي املاك

-قصدج الاملاك الاخذهن منج بسام؟؟

-شنو

-وين عايشة انتِ بسام اخذ جنطة السندات وجاب كاتب عدل يحولهن كلهن بأسمه وبصمج عليهن وخلاج توقعين هم

-هاي شووووكت

-من چنتي مو بوعيج يا غبية

-شلووون شوكت هاي ماتذكرر لااا حبابة لاااا

-غبية

عافتني وراحت ظليت ادگ واللطم من القهر اختنكت وراح اموت شسوي بروحي شسووي واخذ كلشي مني وين ارووح..

ظليت لليل كاعدة هنا انتظر اجت جايبتلي اكل، اكلت بلا نفس وانطتني گلاص عصير، ما قبلت اشربه جابت السچينة تحطها على رجلي ونترت..

-شربي

-ما اشرب هناء حبابة ماريدد

-شربييي لچ

صرخت متوجعة من نبتت السچينة برجلي وضغطت خفيف، طلع دم شوية متت رعب وصكيت الگلاص كله..

راسي بده يوجعني واحسني طايرة ايدي ورجلي ما ثابتات بالگاع مدا ادوس على الارض كأني بالفضاء، هذا الاحساس كل يوم احس بي وتعودت احساس حلو وارتاح من وراه وانام نومة عميقة..

غمضت عيوني اريد انام وحسيت على صوت مصايح اجه من الصالة فتحت عيوني خايفة ودايخة بنفس الوقت اعرفه هذا صوت فراس حبيب هناء صوته يعيط عليها ويكسر بالبيت وهي تصيح عليه وتبجي..

فتحت الباب على كيفي اباوعلهم واسمع لحديثهم وگف گلبي من صارت تكسر بالاغرض وتصيح على فراس..

-هو گلييي اكتب محل بأسمممچ بشرط تعوفيها يمممچ وعفتهاا شو هسة گلب علينااا

-فراس: ولچ اليوم والله اليوم راح يجيب الشيخ حتى يعقدون

شهگت ولطمت على خدي روحي راحت عزه العزاني اليوم يريد يعقد عليَّ بسام؟؟ اليييوم؟؟؟

-باووع اني هالحجي ميوكل عندي خبزز فهمت لو لااا من صارت ام الصدگ ويريد يعقد اختلف كلامه هو گاال قبل لا اعقدد اجيب كاتب العدل خيوليي هذا صديقك العاار معليه بي بعد اني

گوة واگفة رجليه متشيلني شفت هناء اخذت جنطتها وطلعت من البيت وطلع فراس وراهة يتعارك يريد يرجعها وهي زعلانة، اني شفت الباب انفتحت استغليت الفرصة وطلعت اركض من البيت..

صرت اركض واركض واركض مادري وين رجلي ماخذتني مادري وين تاليتي ومادري ليا شوارع وافرع دخلت صرت اركض مثل المجنونة لحدما انرطمت بجسد شخص رفعت راسي شفته رجال جبير شاف حالي وملابسي وصار يستغفر ويهز براسه ما راضي..

-عموو اخذني لمركز الشرطة فدووة الله يخليك

-روحي عمو روحي الله يستر عليج

-عمو فدووة ابوس ايدك اخذني اني مخطووفة وهربت عموو

على صوت عياطي ودموعي حسيته اقتنع وگلي ما ادخل وياچ للمركز بس انزلج وانتِ تصرفي، هزيت راسي كم مرة اي ورحت وياه ابجي الطريق كله واضرب روحي راشديات حتى ما اغفى وادعي من الله ينقذني ويهيألي ابن الحلال الي يساعدني..

اول ما وصلت لمركز الشرطة شفت دورية استخبارات ديطلعون كومة ضباط وعساكر شباب بچيت من شفت وضعي وملابسي وعز عليَّ امشي كدامهم هيجي..

-يله عمو نزلي وصلنا

-عمو ماعندك شي اللبسه فوك ملابسي

-لا

اشرلي انزل متت بدمي وكوة طلعت من السيارة ارجف ورجليه تريد توگع من الخوف والفشلة والدوخة، مشيت كوة ادخل لمركز الشرطة وسمعت صوت رجال يهمس اسمي همس..

-تَـمني!

اللتفتت اشوفه منو وفتحت عيوني من لگيته علي التقي بملابسه العسكرية واكف ويدخن، بجيت وضحكت بنفس الوقت ماعرف شسوي من السعادة بشوفته كمت اطفر بمكاني وهو فاتح عيونه ما مصدك..

-علي التقيي اني تَـمني، تَـمني انيي الحمدلله يارب الحمدلله رب العالميين

ركض عليَّ ركض يتلفت منا ومنا واشرلي امشي گدامه، مشينا مسافة واخذني لختلة تصير وره حايط وهو صار كبالي خاف احد يشوفني..

-شصاير؟؟ ليش هيج حالج شبيچ؟؟

-اني دا احلم تقي؟؟ اني احلم موو انتَ مو هنا؟

-انا هنا خوية هنا دخيلك ربي شبيها البت

-اريد حبيبة حباب اريدها اريدها احتاجها اريد حبيبة اريدها اريدها اريدها اريدها..

**

"علي التقي"

اعاين على البت وضعها مو طبيعي وتكرر كلمة "اريدها" بشكل مفرط دخت وصابتني الرجفة وانا اعاين بت حديثة طالعة بهالحال وهذا وضعها، چنها مو وياي حتى عيونها ما تثبت عليَّ كل ساع واگع جفنها تريد تغمض..

-كافي افتهمت تعاي امشي ارجعج لاهلج

-ماريد ماريد

-اوديج لبيت خالتج

-ماررريد

-چا شصخمم بيچ

-ماااريدك انتَ روح اييع

-هااا

-اي روح انتَ مو زين

-ولج شني انا شمسويلج

تأكدت مو بوعيها لسانها ثگيل وگوة واگفة وگعت بالگاع ولمت رجليها وتنزل بدشداشتها وتبچي..

-اخذج لبيتي تَـمني؟

-حقيرر ساقط انتَ ولي تفووو عليك

-خرب عشيرتتج

كمت منها حاير شلون ورطة هاي بله شافني احد وياهة مو يسويلنا سالفة وشلون راح اطلعها منا وانا عندي واجب خرب روحي..

-اريد حبيبة اريدها

-منين اجيبلج حبيبة مو هنا

-اريدها

-اي شلون

-اريدها ما اريدها

طگت روحي ونويت اتصل بـ حبيبة حچت وياهة تَـمني واول ما فتحت السماعة بچت بصوت عالي وتصيح لحگيني حبيبة لحگيني، اخذت منها التلفون وكملت ويه حبيبة..

-حبيبة: تقي لا تعوفها فدوة اروحلك خلينا نفهم شبيها

-عندي واجب حبيبة ماكدر شلون ورطة هاي ياربي

-خابر الامير هو مو ببغداد؟؟

-ولج الامير هسة يكفر بيه

-حباب چا شلوون لو اتصل بـ حق هم ببغداد

-حق عنده واجب خرب اوكفي اشوفن الامـير علي

اتصلت بالامير ما گتله على البلوة خلي هو يجي وينصدم بيها انا اطلع منها بس گتله محتاجك ضروري، ظليت واگف مغطي البت وكاض گلبي لا يجي عسكري ويشوفنا حاطها بختلة ومرتبك..

اعاينلها گاعدة وبس تبچي وتفرك بعيونها كسرت گلبي المسكينة، ربع ساعة وسفط سيارته الامير گدام المركز ونزل يركض البورگ بعده بأيده ما مغسل..

-الامـير علي: تقيي شنو شبيك خوية؟ صايرلك شي؟؟

-اي خوية صاير بس اريدك تسترخي وتجر نفس گبل لا اصدمك

-ولك احچيي عليت گلبيي

-تعال شوف بنفسك

وخرت عن البت بس شافها طلعت عيونه من وجهه وبحلگهن بوجهه..

-تَـمني!!

رفعت عيونها تباوعله وتعجبت من ابتسمت وبينت سنونها، فركت عيونها بيدها وهمست بصوت گوة سمعناه..

-ابو البورگ

-الامير علي: منو مسوي بيج هالحال؟؟ تقي شسالفة!!

-والله يا خوية علمي علمك جد جدي انسمط وانا اغطيها ماريدها تبين گدام الزلم

-خرب شرفك بسام..

راح عليها يحاول يگومها من مكانها مايريد يكضها وحاير شلون يخليها تگوم..

-گومي لا تظلين كاعدة هيج

-ما

-گومي يمعودة لا يجي احد ويشوفج

-واذا شافوني اخبل

-اگلك هاي شبيها ليش هيج تحجي؟

-علي التقي: مو صاحية مشربيها شي

-عندك شي بالسيارة يسترها؟

-لا والله ما جايب

-اوكف هنا هسة راجع

راح لسيارته جاب چيس اسود چبير مال زبالة، سوه بي ثقب علمود يدخل بي راسها واجه يلبسها الچيس..

-علي التقي: ههههههه صارت زبالة

-تَـمني: انتَ زبالة

-علي التقي: وولج...

-الامير علي: خاب مو صاحية شبيك خرب راسك

-علي التقي: وين ماخذها؟

-للشقة عود گبل لا تريد تجي اتصل وبلغني

-شني تخاف اطب عليكم وانتم بالخلوة

-دروووح

دفعني من صدري متنرفز ضحكت عليه مخبوص خبصة وياهة وهي معاندة ما تتحرك الا تريد تثقب الچيس وتطلع ايدها هم..

-اريدددد ايددي وين ايدي راحت ايدددي انگطمتت ايدي

-الامير علي: هاي ايدج هااي ما انگطمت

-انگطمت انگططمتت صرت بدون ايد

تبچي وتشهگ والامير ملخ روحه من شاف عسكري يعاين علينا، كضيت الامير سمطته راشدي فك عيونه صافن ما يدري شكو..

-علي التقي: ولك اخذهاا انفضحنا يالحمممزة

-الامير علي: ليييش انا مادري وجاي تنبهني

شالها يسندها بعدما ثقب زرفين جدد لايدها وطلعهن، ضمها ضم بجسمه ومشاها لسيارته انوب بنچرت بالباب ما ترضى تفوت..

-الامـير علي: يله طبيي

-انتَ

-اي انا هم اجي وياچ

-لا تدوس على رجلي توجعني

-ما ادوس يله

-وانتَ؟

-انا هم اجييييي

-ليش تعيط عليَّ

رجعت تبچي وترجف يا بوية غير اشتعلنا انا والامير لو بيدي اصفگها راشدي واخليها ترجع لوعيها بس خطية خاف تروح بيها هاي مبين فاهية..

-الامير علي: تَـمني انا وياچ اجي بس لازم تصعدين السيارة يله بوية يله يا عيني

-مو انتَ هنا

-اي انا هنا وبس تصعدين اروحن هناك

-وهذا

-علي التقي ما يجي عنده واجب

-يعني انتَ راح تساعدني؟

-خايبين يبووووووو اي والعباس اييي

-ههههههه شكراً

فكيت حلگي والامير جمد بمكانه من شمرت روحها وحضنته فرحانة، انتفض الامير يسحب روحه منها وهي لاطشة ما ترضى توخر..

-الامير علي: دخيل بختك يا حسين

-علي التقي: چا انا شمعنا ما شبگتني شني بيه جرب

-اسكت ولك.. تَـمني يله كافي صعدي

-تَـمني: شكراً لان راح تساعدني

-علي التقي: تره انا ساعدتج اول

-تقيي كافيي دخيل الحسينن

-خوش

-الامير علي: يله بوية العالم جاي تتفرج علينا

اباوعله واضحك شعر ايده وگف انتبهت لجسمه مكزبر وهي كاضته، وخرها عنه كوة وصعدها السيارة وجهه ناگع عرگان ومتوتر..

-علي التقي: بالعافية

-انچببب

-لك احترم انا اكبر منك

-هي عشر اشهر مابيهن هيبة

عافني يروح لسيارته ضحكت وهمست بصوت مسموع..

-انتبهلي على شرفك زين خوية

-خاييس

صعد سيارته وطلع گبل وره ما انفضحنا وتخزينا ظليت اتلفت واحس بالعالم كلها تعاين عليَّ، طبيت للمركز اكمل شغلي نص ساعة واجاني اتصال من الامير وانا واگف ويه الضابط مو مال اجاوب عفته يدگ بس بالي يمه، اول ما كملت وگفت بزاوية وجاوبته اجاني صوته يلهث..

-علي التقي تعال للشقة بسااااع!!!

يتبع 👑....

━━━━━━ ♛ ━━━━━━

حماااس مليووون للاحداث القادمة 🙈👑🚬

لتنسون التصويت قلبي مهم جداً 🤍

+

توقعاتكمم الخنفشارييية 🫢🤍🤍🤍

وتعالو انستا حبايبيي أي سؤال يراودكم عن القصة لا تترددون تسألون هناك اريد اسوي هايلايت لـ الامارة هم ان شاء الله 💋🤍

#الامارة

بقلمي: زهراء السلامي 💎

لتنسون التصويت + التعليق بين الفقرات + متابعة لحسابي 💙.

أخذنَي وياك أريدَك ما أريد الغَير

وكون بسدك اگعد وَتگعد بسدِي . 👑

━━━━━━ ♛ ━━━━━━

"علي التـقي"

ماعرف شلون طلعت من المركز وركبت سيارتي وطرت للشقة، سألته شبيك وشصاير ما جاوب وطبگه بوجهي دخيلك يا علي بس لا مسويله طرگاعة..

طبگت بباب العمارة ونزلت اركض وجفلت من صار بوجهي ابن عمي مسعود عاصف واگف ورافع حاجبه يعاينلي من بعيد..

-عاصف: ها اجه ابن الشيخ

-خير عاصف خو ماكو شي؟

-عاصف: لا بس اخوك جايبله وحدة للشقة

-چا واذا

-واذا؟؟

-اي شلك غرض انتَ لا تحط روحك بشي ما يخصك وتوجع راسك

-انا عاجبني اوجع راسي انا ساكن بالشقة البصفكم ومن حگي اعرف ياهي هاي ومن يا عمام

-شللك غرض بوية شعليك انتَ؟؟

-لا تشوهون صورتنا ادري بيكم ضباط

-واذا ضباط لازم مو بعينك؟!

-لا مو بعينيي شو سفردحي ماخذ الوضع يا عين امك

-عااصفف روحي واصلة لخشميي وخر غاد لا تطلع صوتيي

دفعته وعبرت اصعد الدرج لشقتنا بالطابق الثالث، وصلت ولگيت الامير گاعد وحاط ايده على راسه والبت متمددة بنص الممر بين شقتنا وشقة عاصف..

-الامير شصاير؟؟

-ليش تأخرت تقيي انسمط جد جدي وانا اصعدها تالي المفتاح طلع مو عندي ناسي

-وشافك عاصف مو

-شافني نععال اي وتكامشنا

-لعنة الله على ابليسه هالسربوت شجابه هنا اليوم

-على حظنا الخ** اجه

-ديلا فوت فوت يمعود وانا اروح احاچي وافهمه

-اكل تبننن تروح تحاچي شنوو

-چا يتصل بأبوي ويفضحنا؟؟ وابوك شلون يحب هالسوالف بعلي يجينا لبغداد يتفل بوجهي ووجهك ويحشي نعاله بحلگنه

-انا احاچي ابوي مالك غرض تقي بس افتحلي الباب

-خرب رووح تقي خوووش

-خوشن افتح الباب خلني اطببها جوه انشهرنا

فتحتله الباب وانوب اخذله نص ساعة يگعدها حتى تفوت للشقة انشل گلبي والبت مو راضية تگوم كل ساعة وصايحة..

-تَـمني: اريد خالة ماريدك ايع

-الامـير علي: وداعة ابو كربله يا تَـمني لو ما گمتي احرگ روحيي

-احرگها

-علي التـقي: ههههههه فدوة لحلگج

-تقي راح اطيح حظظك ولي منا

-شيلها ولك نايمة هاي

-ما اشيلها انترست حرام خلها تگعد

-ما تگوم مثگلة الفرخة

-وشمعرفك انتَ؟؟ لازم مجرب؟!

-ما مجرب لا تلوفها عليَّ يله گعد فرختك

-گومي تَـمني يله يا بوية انهد حيلي گومي

-ماما

-انا امج اي يله گومي

-احبج ماما

-بعد گلب امچ بس گومي

-وين بابا

-راح بابا طار رااح اشتعلت روحه

-ماما تحبيني؟

-احبچ والحسين

-علي التقي: ها امير شو حميت زايد

-ولك خليها تگووم جابتلي شجرة عائلتها كلها هسة

-شيلها خوية

زفر نفس تعبان ونزل نفسه يشيلها ما رضت تجيله هم ظل يقنعها ياله رضت رفعها وحضنت رگبته، فريت ايدي اعاينلهم اييي امير حظك حلوو اليوم..

-الامـير علي: افتحلي باب الغرفة

وداهة للغرفة ونزلها على الچرباية بس نزلها بچت وغطت وجهها بيدها انكسر خاطري عليها، صارت تهذي وتبچي فترة طويلة وانا وامير صافنين عليها..

-الامير علي: بس لو اكض بسام الچلب الا ازوعه حليب امه

-علي التقي: الله يعلم شعاشت عاين بس تبجي

-اي

-شنسوي امير؟

-مادري خلها تسترد وعيها ونحاچيها

غطاها وطلعنا للصالة وچان نشوف عاصف طاب للشقة واگف ومچتف ايده..

-عاصف: ثنينكم عليها ولد علي؟؟

-الامـير علي: انچبب لك عاار سربووت

-عاصف: شني شگلت انا چا شعدكم ويه بت حديثة لابسة چيس زبالة بهالوقت؟؟

-علي التـقي: انتَ شكوو ولك بابا انتَ يااهووو مالتك

-عاصف: ولد عمي انتم وسمعتنا وحدة

-الامـير علي: هسة صرنا ولد عمك؟؟ چا ياهو الشتت عشيرتنا وسواله امارة وحده چنه طنطل؟؟

-عاصف: مهما يصير نبقى ولد عم وسمعتنا وحدة

-علي التقي: شتريد جاي هنا هسة؟

-اريد اعرف الحاتة المن؟

-الامـير علي: يا ابن الچلببب

كضه امير يكتل بي ريح گلبي ما فاككتهم اريدن عاصف شوي يتربى من شفت الوضع حمى تدخلت وكضيت كل واحد بأيد..

-علي التـقي: هاي البت ارملة عمي نعمة

فك عيونه عاصف والامير علي عاينلي بنظرة بعمري ما انساها شفت عيونه جدحن عصبية چن ما راد عاصف يتعرف عليها..

-عاصف: معقولة؟؟؟

-علي التـقي: اي وانا لگيتها هاربة بالشارع بهالحال وعقلها مو وياهة

-عاصف: ولك هاي حديثة!!

-علي التـقي: چا ما تدري بعمك يدور حديثات

-الامـير علي: وهسة عرفت السالفة يله روح لشقتك

-عاصف: ما اطلع اريد افتهم منها شمالها وشصاير وياهة

-الامـير علي: ياهوو مالتك خالوو انتَ منو وحاط خشمك بالسالفة؟؟

-عاصف: مرة عمي شلون ياهو مالتي امير

-علي التـقي: خلص عاصف البت فاقدة مو بوعيها باجر بس تكعد تعال

-عاصف: ما اطلع منا بله واحد منكم دنت نفسه عليها!!

-الامير علي: لاااا انتَ اليوم تريد تنكتل

تلازمو يتضاربون شگد ردت اكضهم وافاكك ماگدرت واحدهم يگول ثور وشيشلعهم من بعض، ما استقروا الا وره ما واحد دمى الثاني والامير طرد عاصف بره..

-عاصف: عاااشت ايدك يا الامير عاااشت ايدك يا الشييخ تطرد ابن عممك

-الامـير علي بأستهزاء: جسر للطيبين انا

طلع يسب ويفشر على روحه ودخل لشقته، اللتفتت للامير اشوفه يجدح عصبية..

-علي التـقي: شبيك خوية ضايج شمالك تعارك الهوا

-نجسس عاصف ليش ما تدري شنهي نيته!

-ادري بس تفاهم وياه امير يواشك ولا تهيج

عافني وراح للمطبخ ضايج ويغسل ايده، گعدت بالصالة ادخن شوية ورجع نزع قميصه شمره على التخم ونام عليه..

-الامير علي: حق وين

-علي التقي: خفارة حق ما يرجع اليوم

-وانتَ باچر عندك دوام؟

-اي

-اريد اطلب منك شي بس لا تفهمني غلط

-شنو گول

-اريد...

سكت وره ما شفنا تَـمني گدامنا فكينا عيوننا عليها نازعة الچيس ولافة روحها بچرچف، فركت عينها بيدها وراحت تگعد بنهاية التخم بس هم چنها مو بوعيها لان گوة تحچي..

-تَـمني: شنو صار

-الامـير علي: لگاچ تقي بالشارع

فركت عيونها وباوعت بأتجاه امير، برطمت شفايفها وعيونها لمعت بالدمع..

-انتَ ليش تبچيني؟

-الامـير علي: انا؟؟

-اي دست على رجلي

باوعلي امير نظرة سريعة ورجع يعاينلها..

-بعد ما ادوس على رجلج

ابتسمت وحكت خشمها، صفنت بالگاع شوية ورجعت للغرفة ظلينا واحد صافن بوجه الثاني..

-علي التـقي: شنو ردت تگول

-لا انسى

**

"تَـمني"

حسيت الصبح راسي يوجعني احس طبل يدگون بي وتعودت على هالشي بس الما تعودت عليه افتح عيوني واللگه شيشة عطر رجالي على الميز الي بصف راسي!!

فزيت مخترعة من الفراش اتلفت بالمكان مثل المخبلة، شفت ملابس زلم معلگات على تعلاگة زاوية وشفت ميز عليه عطور ومعطرات رجالية وساعة ومحابس وكلشيي مال رجال!

طفرت من الفراش مرعوبة، نزلت عيوني اشوف ملابسي ولطمت على وجهي من شفتني بدشداشة النوم اللبستها الي هناء، من قوة الصدمة احس روحي راح تطلع اني شسويت وووين اني بالضبط؟؟

افتر بالغرفة مثل المجنونة اخاف اطلع لا انصدم بالحقيقة، اتذكر اخر شي صار شفت علي التقي وحچيت ويه حبيبة بالتلفون وبعد كلشي ماتذكر شنو صار ياربي شنو صاار..

نويت اهدأ واخذ شهيق وزفير، دورت بالغرفة على شي اللبسه فوگ ملابسي شفت قميص رجالي وبرمودة رياضية، نزعت الدشداشة ولبستهن ثنينهن وتوجهت للباب فتحتها على كيفي ومديت راسي اشوف منها..

صار بوجهي ممر طويل وفارغ، طلعت من الغرفة اتمشى على اطراف اصابيعي وعبرت هذا الممر متوجهة لماعرف وين، وگفت بمكاني من لاحظتها صالة لان بيها تخم قنفات باوعت للباب الي بيها وتوقعتها باب الخروج من البيت ركضت افتحها بس متنفتح مقفولة ضربت ايدي حيل مقهورة..

-صباح الخير فهاوي

عطت مخترعة وسديت حلگي بسرعة من اللتفتت وشفته الامـير علي لابس فانيله تعلاگة وبجامة، ظليت هيج واكفة وفاكة عيوني عليه وهو مبتسم تك خد..

-او خليني اگول ظهر الخير

باوع للساعة وره ما گالها واني هم رفعت عيوني اباوع شفتها بالـ 11:20 الظهر، وخرت ايدي من حلگي ووخرت شعري عن وجهي وسألت..

-اني.. اني شسوي هنا؟.. وانتَ هم شتسوي؟

-انا ببيتي بس سألي روحج شتسوين ببيتي يا ترى

حچاها وتقدم عليَّ حاط ايده بجيوب البحامة، بلعت ريگي وعدلت وگفتي ابتعد منه، ضحك على كيف وتقرب مني اكثر..

-ما تتذكرين الصار البارحة؟

-هاا؟ لا لا ماتذكر

-اوف حسافة

-شنو

-حريمات بس يله ارجع اذكرچ بالصار اليوم مو مشكلة

-شـ.. شـ.. شتذكرني.. شـ.. شلون يعني

-لا تستعجلين على رزقچ فهاوي

سفطت روحي على الحايط وانطيته ظهري وجهي صار للحايط، سمعته يضحك بصوت عالي وحط ايده بصفي على الحايط يمة گمت ارجف من فوگ ليجوه..

-باوع انتَ.. باوع لو تسويلي شي.. اي لو تسوي امووتك والله اكتلك

-چا منو البارحة لبدت بحضني

-شنو يعني لبدت؟

-يعني ضميتي روحج بحضني

-چذااااااب

-بكيفج بعد

اللتفتت عليه اواجه اختنگت وميتة قهر اباوعله ما مهتم ومبتسم كمت ارجف من العصبية..

-لا تچذذب مو انتَ شيييخ

-للمرة المليون انا مو شيخ

-بس راح تصيير

-ما اصير

-عليك الله بداعة شواربك مدا تچذب عليَّ؟؟

-وداعة شواربي ما مچذب

-يا ساااافل

شلون ومنين اجتني القوة واجيت اضربه راشدي بس ما لحگت لان لزم ايدي بقوة وخزرني..

-لا تتجاوزييين لچ

-وانتَ لا تتساخف وتترعننن يا الشييخ

-موو قندررة انااا

-هه هاي اخلاق شيخ هااي

-اللهم طولچ يا رووح انا شيخصني بيج انتِ اللطشتي بيه

-لا تچذذب اششش اسكت ماريد اشوفك

-بعد احسن

عافني وراح گعدت بالگاع اضرب اخماس بأسداس اريد اتذكر شنو سويت البارحة ماكو عقلي مصفر خرب خرب خرب خررب..

بقيت گاعدة بالگاع اتصفن وانتبهت بالزاوية اكو شي محفور من ركزت شفتها عين بشرية تجنن محفورة بدقة بالحايط ظليت صافنة عليها شكلها يجذب عبالك عين بنية من الرسمة..

-تتريگين؟

طلعني صوته من صفنتي بالمنحوتة وگمت من الگاع، گعدت على التخم وچتفت ايدي لصدري وانطيته گفاية..

-الامـير علي: بعد احسن

ما اهتميتله وبقيت منطيته ظهري وگاعدة، كل شوية اباوعله بطرف عيني اشوفه ياكل ويشرب چاي ولا گانما اكو حيوانة بطنها تصوصي من الجوع گاعدة هنا..

-تَـمني: بالچذب گول تفضلي

-بالچذب تفضلي

-ماريد!!

-خوشن

-عجيبببب

-ها شني

-غير تلح عليَّ!

-ما احب اليلحون

-اني احب!

-وترديني اتشكل مثلما تحبين ست؟

-لا شعليه بيك

-زين

شال صينيته وحطها من الجهة الثانية وضمها بجسمه حتى ما أشوفها صار ظهره عليَّ وكمل ياكل..

-لتخاف ما راح احسد بيضاتك!!

-ميخالف العين حگ

شگد ضوجني عفته ورجعت للغرفة اخطط شنو راح اسوي وشلون اطلع ووين خالتي معقولة ما دورتني؟ ظليت افكر واشوف الساعة صارت بالوحدة الظهر انتبهت ما صليت بعدني بس شلون اطلع وهذا المزعج هنا..

خصمت افكاري وطلعت من الغرفة اتسحب ماعرف الحمام وين شفت باب فتحتها لگيته مطبخ، طبيت اغسل هنا وانتبهت لصينية محطوطة على الكاونتر بيها بيض گلي وجبن وزيتون وزعتر وقوري چاي اويلييي اني بطني توصوص جوع انوب اشوف هيج اكل ماتحملت جريت چيس الخبز واكلت واني واگفة اكل وعيني على الباب اخاف يدخل..

ركضت للسنك جريت گلاص وصبيتلي چاي بارد بس ميخالف ظليت اللگم لگم وابلع، حطيت زيتونة بحلگي وشلت گلاص الچاي اشرب ووگفت اللگمة بحلگي من دخل عليَّ الامير المطبخ، هو صفن واني صفنت مثل الطرنة..

ابتسم ودخل المطبخ يروح للسنك فتحه ووگف يتوضا، الزيتونة بعد متنعلس عندي ظليت اللوب بروحي ماعرف اطلع ابقى والله حيرة وفشلة، كمل وضوء واللتفتلي مبتسم بمكر..

-الامـير علي: لبالي بزون طفر علينا اجيت اطرده

-احم.. لا هاي.. اني

-يله ماكو فرق

گالها مبتسم واخذ خاولي صغير موجود هنا ينشف ايده..

-شوف اني يمكن ابيّن متطفلة بس والله اجيت حتى اتوضا ودورت الحمام و..

-چان لگيتي المطبخ وشفتي صينية اكل اغرتچ وانتِ جوعانة واجيتي تاكلين وصلت الفكرة

-هسة اسوي نفس الاكل وارجعه بمكانه

-يلا لان هذا اكل علي الحق هسة يشگ زيجه اذا ما يلگاه

-لا لا راح اسوي شوف..

رحت للثلاجة اركض وانشنطت رگبتي من جرني من ياخة القميص ويرجعني لمكاني، باوعتله معصبة وهو بسرعة وخر ايده..

-هذا الچ الاكل

-اي هو رايحة اسوي لعلي الحق

-خالو الچ انتِ مو مال علي الحق

-يعني شلون

-يعني انا مسوي الچ وحطيته هنا

-گول والله

-والله

-لعد ليش ما گتلي

-لان ادري راح تجين مثل البزازين تاكلين من تجوعين

-انتَ مسويلي هذا الاكل؟

-اي هسة شمسوي هنه بيضتين وجبن

اجتني كرفة مشاعر مادري منين ودمعت عيوني ظل يباوعلي وعگد حاجبه مستغرب..

-شنو شبيچ

-ولا شي شكراً..

عفته وطلعت من المطبخ واحس ببطني مغصتني، طبيت للباب الثانية شفته الحمام دخلت وبعد ماتحملت طگيت بچي هنا خايفة وسعيدة لان احد سوالي اكل بنفس الوقت..

توضيت وطلعت من الحمام عيوني منفخة رحت للغرفة فتحت الباب وعطت من شفته هنا وديبدل طبگت الباب بسرعة ازلغ بخدودي على الفشلة خرب حظظ الفهاوة غيرر تدگين الباب!!

ركضت للصالة وگعدت على جهة اسوي روحي حبابة وكلشي ما شفت، دقايق واجاني ولا كأن طبيت عليه قبل شوية وهو ديبدل اصلاً ما فتح الموضوع..

-ينراد نجيبلچ شي تلبسي ما معقولة تبقين تفترين بملابسي

نزلت عيوني اشوف الملابس ورفعت راسي اله، عصرت ايدي حيل مرتبكة وخجلانة ومحتاجة اسأله حتى ارتاح بس شلون؟ لا خلص تَـمني لازم تسألين هيچ بسرعة گوليها حتى ميدقق وياچ هيج بسرعة بسرعة اسررع من البرق گوليها وخلصي..

-تَـمني: عليك الله بداعة شواربك سويت عيب البارحة لو لا

واگف يم ميز التلفزيون ياخذ الريموت، اندار يباوعلي من فوگ ليجوه احس وجهي بوخ وراح انفجر بأي دقيقة من الخجل..

-حددي العيب

-مادري يعني سويت امور اتندم عليها؟

-اي

-لا بشررفك

-والله

-شسويت؟؟

ما لحگ يجاوبني بسبب جرس الباب رن، عافني وراح للباب هو بالصالة صاير، فتح الباب وطلت منه بنية شابة شكلها يجنن بيدها شايلة بوكيه ورد احمر چبير وعلاگة مال هدايا..

-مرحبا

-الامـير علي: اهلاً

-العفو هذي شقة علي الحق لو اني غلطانة؟

-ما غلطانة

-اممم اللگاه هنا؟

-لا عنده واجب

-اه صح، تمام تگدر تنطي هذا الورد والهدايا وتگوله من سوزان

-تمام

اخذ الورد والهدايا منها وشفتها تباوعلي وعگدت حاجبها معاجبها واني الفاهية ظليت اباوعلها شگد حلوة ومرتبة طويلة ولابسة فستان فوگ الركبة بشوية وشعرها مفتوح ومكياجها يخبل..

-سوزان: انتَ يمكن اخو علي الحق لانك تشبهه احس

-ماكو شبه بيناتنا بس اي انا اخوه

-اوه ما شاء الله كلكم وسيمين

-محتاجة شي ثاني خيتي؟

-اي اسفة بس اريد مي كلش عطشانة.. اممم ممكن ادخل جوه؟

اندار يباوعلي ورجع يباوعلها گوة لزمت ضحكتي على منظره وشكله متعجب من جرأتها، اشرلها تدخل وگال..

-حياچ

دخلت تگعد ويايه بالصالة وهو راح يجيبلها مي بدون تردد ومماطلة سألتني من طرف خشمها..

-انتِ منو؟؟

-اسألج السؤال نفسه

-اني سوزان

-واني تَـمني

-شتصيرين لـ علي؟

-يا علي منهم حددي

-علي الحق!

-الامـير علي: هذا الماي تفضلي

-اوي تسلم

شربت المي وتباوعله من فوگ ليجوه شگد تنرفز ولا ارتاحيتلها اسحب كلامي من گلت عنها تجنن، حطت الگلاص على الطاولة وگامت تنزل بفستانها..

-ازعجتك اني

-لا، هذا مو بيت علي الحق وحده اخوته وياه

-اي ادري اعرف تقي

-ها ما شاء الله

-اي كلش حبابين كلكم

-خير ان شاء الله

-من رخصتك بس..

-اكو بعد بس؟

-اي بس ماعرفت اسمك

-علي

-ها كلكم علي فدوة

ودعته وطلعت من الشقة، رجع يوگف بوسط الصالة يباوع على بوكيه الورد والهدية ورافع حاجبه ما راضي بقيت اراقب تصرفاته ونظراته مزعوج وما مرتاح، قاطع نظراتي بي صوته يگول بدون لا يباوعلي..

-ما سويتي شي عيب البارحة والصار طبيعي

-ها؟

-ما چنتي بوعيچ، شنو صار وياچ تگدرين تسولفيلي؟

هزيت راسي اي راح گعد على جهة من التخم بعيد عني وگعدت احچيله من البداية للنهاية ما حسيت واني احچي چنت ابچي الا من گام هو وجابلي باكيت الكلينس وحطه گدامي على الطاولة..

-الامـير علي: ما سوالچ شي؟

-لا لا ما سوالي

-متأكدة؟؟

-اي بس اخذ مني الاملاك وبصمني وخلاني اوقع واني مادري

-سهلة

گام لتلفونه اخذه ودگ على شخص، ما طول دقايق واندگ باب الشقة كام فتحه ودخل رجال عرفته هذا ابو كربله صديقه..

-ابو كربله: ها خالوو

-هلا خالو تعال فوت

طب يمسح ايده بوصلة ووگف بنص الصالة من شافني، عوص عينه فترة والامير يباوعله وهذا بعده على هالحطة..

-ابو كربله: اذا ذاكرتي السمبتيكية ما خانتني هاي چنها ام البورگ مو؟

-هي

-لااا بشرف امي

-هي ولك

-ها خالو شلونچ شني مشتهية توگعين سطل بورك على راس الامير علي؟

-ولك عوفها تعال اريد منك شي

-اوگف اوگف شجابها عندك ولك

-چا انا المن جبتك البت بمصيبة ولازم نساعدها

-مثل ما تگول جسر للطيبين انا

-من طيب اصلك هذا، ابو كربله رجل خالتها للبت بايگها تجي وياي نجيبه وندوس بفاده؟

-وليش توصخ رجلك انا ادوس بفاده وبأماكن اخرى هم اذا تريد جسر للطيبين انا

-اسمع ماريد اخواني يعرفون بس يجون ذولة يسوولنا سالفة قانون ومادري شني هالمخرطة اريد انا اكتله وافوخ گلبي بي

-صاار من هالشارب الاسود

-اسمع مواصفاته من البت، دلي وين خذوج بالضبط وشرحيله بنفسج

عدت الموضوع على ابو كربله بدون لا اگله بسام تجاوز ويايه ظل منزل راسه ويهزه بـ اي طول ما اني احچي، وصلت من ردت اهرب واندكت الباب كام امير يفتحها شفناه علي التـقي..

اشرلي الامير اروح للغرفة عرفته حتى ما احجي كدام اخوه، ظليت حايرة ماعرف شلون اغطي نفسي حتى اصلي اخذت چرچف حطيته على راسي وگمطت روحي بي ووگفت اصلي، كملت وگمت سمعت صوت بالصالة صار مديت راسي اشوف منو لگيتهم علي الحق وعلي التقي ثنينهم هنا وابو كربله وياهم..

-علي التـقي: انتو من كل عقلكم؟؟ بابا القانون ياخذ مجراه خلينا احنه نتصرف وياه

-ابو كربله: خالو هالتمضرط ما يمشي وياي انا اجيبه وادوس على راسه بالقندرة اليتجاوز على عرضي

-علي الحـق: بس هي مو عرضك شبيك حامي حسن شسالفتك

-ابو كربله: چا شون كل البنات عرضي لو شتكول الامير؟

-الامـير علي: بعد راسي جسر للطيبين انتَ

-علي الحـق: انطونا فنتگ شباب كضو غيرتكم مو وكتها لا تلوصون دخيلكم خلينا نرجع فلوسها وذاك الوكت انا اجيبلكم بسام ودوسو ب****

-ابو كربله: خوش انا هالحجي يمشي وياي

-الامـير علي: هااا بساع بعتني ولك ابو كربله

-ابو كربله: اسمي حسن ياهو هذا ابو كربله ماعرفه

-الامير علي: كوم كوم طايح الصبغ

-ابو كربله: ههههههه هذا صاير خليفة ابوكم من صدگ، يله اروحن لكربلا انا ازور

-علي التـقي: خايب مو البارحة جنت بكربلا

-ابو كربله: ولك جننة كربله جنة بعلي هنيال العايش بيها، يله أودعناكم

طلع واني بعدني مادة راسي اشوفهم، نزيت من مد راسه علي التقي بموازة راسي وهمس..

-علي التقي: تعاي تَـمني ليش خاتلة

توترت واستحيت اطلع وحدي بيناتهم بس بالنهاية رحت اگعد بالصالة على جهة، بقى علي الحـق يباوعلي ويهز براسه متحسف انقهرت على حالتي بالزايد لهدرجة شكلي يقهر؟

-الامـير علي: يعني تدبروها وحدكم شباب؟

-علي التـقي: افاا وانا اخو الامير طبعاً ندبرها چا هذا علي الحق مو ياهو الچان

-علي الحـق: اي عفية هيج اريدك ترفع من معنوياتي

ضربوا چتفه ثنينهم يضحكون وگعدو سوه يسولفون عن الموضوع، يردون يسوون مداهمة على بسام وجماعته حسب كلام علي الحـق همه عصابة والبنية الچنت عدها هناء بنت ليل واكثر من مرة اللقوا القبض عليها وتطلع..

-تَـمني: ليش تطلعوها اذا هي مو زينة؟

-علي الحـق: حرية شخصية هاي ما دامه ببيتها ما خاطفة ولا ناهبة ولا تنطي لاحد مواد ممنوعة وهي اساساً من غير ديانة هذا السبب كل مرة يفرجون عنها

-علي التـقي: بس هالمرة غير تَـمني لانها خطفتچ بأتفاق مع عشاقها

-تَـمني. عشاقها؟

-علي الحـق: نعم عدها اكثر من عشيق

-تَـمني: عزا العزانيي

-الامـير علي: شباب مو وكتها هالسوالف بيناتنا نحجي

-علي الحـق: من حقها تعرف علي، هناء عدها اكثر من عشيق يتردد على ذاك البيت انتِ لاحظتي هالشي لو لا؟

-لا هو بس فراس مادري فارس مادري نسيت اسمه بس يمكن انتو مخربطين بينها وبين وحدة شوفوا هي مو قصيرة طويلة وعدها..

قاطعوني من گالو علي التـقي و علي الحـق ثنينهم..

-نعرفها تَـمني

-علي التـقي: ما شفتي ضابط يدخل عدها؟

-تَـمني: لا ماعرف لان اغلب وقتي بالغرفة متخليني اطلع

-علي الحـق: سبق وگلتي للامير ما چانت تنطيج حبوب وانما سائل؟ تگدرين تميزين شنو هذا الي تشربي؟

-تَـمني: لا والله ماعرفه بس ريحته مو طيبة ولونه وردي فاتح

-علي الحـق: ويخليج تدوخين مو

-اي ادوخ واهذي وماتذكر شنو يصير من اشربه

هز راسه اي وطلع تلفونه حچه ويه واحد ما افتهمت شي من مكالمته، سد الاتصال وگام..

-تم امير اليوم نلزمهم

-الامـير علي: كفوو من شاربك

-علي الحـق: بس نحتاج تَـمني تحچي أقوالها وهذا هو حگچ يرجع تَـمني لا تخافين

-الامـير علي: مابيها مجال انتَ تاخذ أقوالها هنا؟

-علي الحـق: لا ما ترهم لازم هناك بس لا تخاف ما اطبب عليها ياهو الچان اخلي حيدر يتمم السالفة

-علي التـقي: عاش، يله روح بدل وتعال حتى نتغدا

-الامـير علي: اوگف حق تعال

-ها

-تعرف وحدة اسمها سوزان؟

-علي الحـق: لا ليش

-الامـير علي: منا منا ماكو؟

-لا ماعرف وحدة بهذا الاسم

-ابدد

-ههههههه وداعتك

-چا اجت وحدة اسمها سوزان جابتلك هذا الورد والهدية

ضحكت على حركته خله ايده على وجهها مثل البنات عود خجلان وگال بصوت ناعم..

-علي الحـق: اوووي

-علي التـقي: اويليي مو ورد ضيم چا شبي حظي ما تجيني هيج هدايا

-علي الحـق: حب خلي يصير وجهك مثل وجهي تالي سولف

-الامـير علي: اوگف وين رايح لا تضيع السالفة منو هاي؟

-ماعرفها والله شني مستحي قابل

-چا شلون تعرفك وتعرف تقي؟

-علي التـقي: اللهم صل علي محمد وال محمد يعني انا مرئي والبنات تشوفني؟؟

-علي الحـق: چا ليش بس حقك انا مغطي عليك

-علي التقي: انچب انچب وفضها گول منو هالبت

-علي الحـق: وداعة امي ما اعرفها يجوز مساعدها بشي وحبت تتشكر مني

-تَـمني: لا چانت تزحف على الامير هم

مادري شلون فلتت من حلگي غطيت حلگي بيدي بسرعة مستحية بينما ثلاثتهم باوعولي وكأنما نسوا اني گاعدة هنا..

-علي الحـق: هااا چا من زحفت عليك ما حجيت

-الامـير علي: ما تشوفني اسألك منو هاي شكلها مو راحة

-علي الحـق: ها خوش چا يله ما استقبل هدايا من برابـ**

ذب بوكيه الورد والهدية بالگاع وراح يبدل وعلي التقي ميت ضحك مادري على شنو والامير هم مبتسم ويفر بيده مادري شعدهم..

-الامير علي: تتوقعه مصاحبها؟

-لان ضاج تسأل؟

-اي

-لا حق ما يصاحب مو جوه هالسوالف

-لا بله

-وداعة عبدالله اخذها مني

هز راسه الامير وعلي التقي گام يشوف الهدية شنو فتحها وطلع من العلبة ساعة تجنن ومبينة غالية ووياهة عطر one Million..

-علي التـقي: دائماً تجيله هدايا اخيك صاك ودمه يلعب ابن الاوادم البنات كاتلات رواحهن عليه

ضحك امير ومدد رجليه على الطاولة ورجع راسه وره، ما منتبهه كلش على اشكالهم بس فعلاً لاحظت علي الحـق شكله يجذب طويل وضخم وعيونه ملونة بس ماعرف شنو لونهن ما مركزة عدل..

-علي التـقي: اجه حبيب امه

-علي الحـق: خايبين ميت جوع ما تجيبون الغده

استحيت اني اگوم وظليت كاعدة، راح علي التـقي يجيب الاكل وحط السفرة بالكاع وصار يجيب علب مسلفنة كباب سوگ حطهن بالوسط ورتب السفرة، جاب الخضرة وطماطة وبصل شوي هم قسمهن ورتبهن بصحون وجاب ملح وصماگ حطهن على جهة يسوي كلشي بترتيب وعناية السفرة صارت حلوة..

-علي الحـق: اييييه عاشت ايدك بعد اخوك

-علي التـقي: بالعافية تردون ببسي سفن شي؟

-علي الحـق: اي جبت حطيتهم بالثلاجة يبردون هسة تعال ناكل

-علي التـقي، الامـير علي: يله تَـمني

گالوها سوه رفعوا عيونهم واحد يباوع للثاني وابتسم الامير واشر لـ تقي يصيحلي..

-علي التـقي: يله بوية مو جوعانة؟

-لا بالعافية

-تعاي لا تشلعين گلبي ما احب التماوع

حچاهة بالضحك ابتسمت وگمت اگعد بنهاية السفرة ما مديت ايدي ابد كلش خجلانة ماعرف شتصرف، سوالي تقي لفة اخذتها منه وتشكرته والامير حط گدامي طماطة وبصل شوي وخضرة انتبهتله گام وجاب قوطية ببسي هم حطها گدامي ورجع ياكل..

اكلت وعيوني ما شلتها من ماعون الكباب حتى اللگمة ماعرف شلون دتنبلع عندي گاعدة وحدي بين ثلاث زلم غربة ومن اكول زلم! فـ زززلم من ذولة الزلم الخشنة مو مثل الموجودين بالجامعة مالتنا..

-علي التـقي: ها عينج على كبابتي ولج

-تَـمني: هاا

-علي التـقي: هاا هسة سويتي روحج فقيرة هاج هاج اكليها

حط الكبابة گدامي متت بدمي شلتها بسرعة ارجعها بمكانها وگلت منحرجة..

-لا والقران عيني مو عليها بس جنت هيج منزلة عيوني

-علي التـقي: اممم علينا تَـمني عليناا

-والله العظيم صدگني والله

-ما اصدگ

ضحكوا حق وامير انوب صار وجهي هطوله من الفشلة شلون اقنعه..

-احلفلك بالعباس وتصدگني؟ انتو دائماً تحلفون بي مو؟ والعباس عيني مو عليها

-علي التـقي: دامچ حلفتي بالعباس مصدگچ بس تره العباس ابو راس الحار هذا يسطرچ بمچانچ لا تگولين ما گلت

-تَـمني: اعرف والله وخلي يسطرني اذا دا اچذب

-الامـير علي: تقي بطل سوالفك، تره علي التـقي يشاقيچ ما يقصد

-علي التـقي: ههههه صارت حمرة البت والعباس الحلفتي بي اتشاقة وياچ

ابتسمت وهزيت راسي اي ومع ذلك ما قبل يأخذ الكبابة وجبرني اكلها، كملنا اكل وگمت اني اشيل السفرة وعلي التقي هم ساعدني رحت للمطبخ اغسل المواعين وخطية هو ويايه يرتب استحيت وانقهرت عليه مبين تعبان لان بعده بملابس الدوام ما مبدل..

-اني اكملهن روح ارتاح انتَ

-لا عندي دوام لازم اطلع

-تمام روح اني اكملهن والله

-لا ولج ما تندلين، (شال ماعون بي كبابات ثنين) هذا اضمه هنا حق يجوع نص الليل مثل الزعاطيط ويكوم يبجي اذا ما لگه شي ياكله

ضمه بالفرن واجه يغسل، رتب المطبخ ويايه ابد ما راح الا من كملنا كلشي اني فتت للغرفة وهو طلع ظليت افكر شگد حباب ولطيف ونفسيته حلوة وميستغرب من احد رأساً يضحك ويسولف مع العلم هو ميعرفني..

وهيچ مشن يومين اني هنا نادر اطلع بالصالة اخجل منهم وهمه هم يرحون لشغلهم وميرجعون الا متأخر بس الامير علي يبقى وميصيحلي ابد، صار المغرب طلعت اتوضا ورجعت للغرفة اصلي هستوني سلمت واندگت باب الغرفة صحت بصوتي "الله اكبر" وفتح الباب ودخل بيده علاگة نايلون..

-الامـير علي: تقبل الله

-شكراً

-طلعت اشتريتلج شي تلبسي ما اعرف قياسج جبتلج الاعرفله

-شكراً والله ماكو داعي عبالي طلعت لشغلك

-لا شلون اطلع وانتِ هنا

-ليش عادي

-لا ما اطلع هاج شوفيهن

حسيت اكو سبب ليش ميطلع للشغل بس ما طوخت وياه، اخذت العلاكة منه وطلعت منها صاية سودة وفستان طويل ردنه كاملة وشالات ثنين ودشداشة.. صفنت عليهن صفنة عمر وهو واگف منتظر رأيي..

-حلوات.. احم عاشت ايدك

-ما عجبوچ؟

-لا لا بالعكس شكراً بس.. بس اني مو محجبة

سكت صافن بالعلاگة بس ما خليته يفكر زايد وگلت بضحكة..

-والقياس كلش چبير انتَ جايبلي قياس 46 واني اللبس قياس 38

-38 وين تحطي هذا؟

-ليش هو قياسي هذا

-تلبسي چيس عليج؟

-بس قياسي هذا

-خو اذا هاي ليش نجيب ملابس اجيبلچ چيس وافصله عليج

-شبيك تره قياسي هذا!

-لا

-اي

-كلت لا

-كلت ايي

-لااا يعني لاا ما راح تلبسين هيج گصيف هنا تَـمني عود لبسي وحدج ذاك

-تره مو گصيف يجي فيت عليَّ

-وانا ما يعجبني الفيت!

-انتَ شكو لابسته الك اني؟؟

-چا لخالتي الشگرة؟؟

-خالتك شگرة؟

-اللهم طوولچ يا روح

طلع من الغرفة وطبگ الباب وراه حيل، گمت لفيت السجادة واخذت الملابس ورحت للحمام اسبح واللبس الدشداشة عززا مخاازي عليَّ شطولها وشعرضها اخبخب بيها بس شسوي خرب راسك المعنجر ابو البورگ..

طلعت من الحمام لافة الخاولي على راسي مثل العمامة ورحت للمطبخ احس عطشانة واشتهيت ببسي بكل صلافة فتحت الثلاجة وطلعت قوطية ببسي طگيتها ووگفت اشرب بيها واتفرج على المطبخ والكاونترات..

-راح اطلع

-يماااااا

انتفضت وقوطية الببسي مادري وين طارت من ايدي شفتها بالگاع واگعة وانكبت على الحصير..

-اخترعت امير شبيك

سكت يباوعلي واني رحت اجيب وصلة امسح الببسي لا يدمرنا اكثر..

-راح اقفل الباب عليچ من بره محتاج اطلع ساعتين وارجع

-لا تقفلها حباب اخاف

-چا شلون اعوفچ وحدج هنا

-عادي بس اطبگها وراك اني اقفلها منا

-لا تفتحين الباب لبشر أي احد يجي مالج علاقة بي، اذا اجه واحد من اخواني راح يگول اسمه فتحيها وطبي للغرفة ولا تطلعين للصالة خوشن؟

-خوشن

شفته يخفي ابتسامته وراح، كملت تنظيف الگاع وطلعت للصالة لگيته ماكو قفلت الباب وگعدت اتفرج تلفزيون بس بالي مو ويه التلفزيون افكر بخالتي و تالة گلبي ما مرتاح ومتأكدة خالتي ميتة خوف عليَّ لو حافظة رقمها چان اتصلت بيها وتطمنت..

شفت دفتر وقلم اسود محطوطات على ميز التلفزيون رحت اخذتهن وگعدت ارتب افكاري اول شي اسوي باجر اتطمن على خالتي انوب اروح للجامعة اسأل عن الامتحانات بعدين اشوف علي الحق شسوه ويه بسام عسى يگدرون يرجعولي الاملاك حتى اشوف شنو نعمة عنده هنا ببغداد استغله وااجر بفلوسه شقة اكعد بيها و...

سكتت افكاري شوية من اندگت الباب، باوعت للساعة صايرة بالـ 9 بالليل ترددت افتحها لو اگول منو؟ ما گمت ومن مكاني صحت..

-منو

-انا

-منو انتَ؟

-عاصف انا فتحي

سكتت بسرعة خايفة الامير نبهني ما افتح لاحد، ظل يدك الباب هووايه وانوب دك الجرس انخلست ظليت متوترة لحدما مل وراح ياله ذبيت نفس، عشر دقايق ورجعت اندكت الباب ما قبلت اكول منو ظل يتمعچل بالباب خفت كلش وعطت..

-تره اتصل بالولد يجوك رووح

-انا علي التـقي فتحي

ذبيت نفس وفتحت الباب شفته هو دخل واني بسرعة اخذت الدفتر والقلم وتمشيت اروح للغرفة وصاحلي مستعجل..

-تَـمني تعاي احاچيچ

-تفضل

-اكو احد دك الباب عليج گبل لا اجي انا؟

-اي واحد اسمه عاصف

-هم قندررة

-شنو

-هيج، اگلچ بسام گلتي ماخذ كل املاكچ؟ تتذكرين شنو هنه الاملاك بالضبط؟

-اي اتذكر شقة هنا ومحلين و....

كملتله الاملاك هز راسه مبتسم وطلع من جيبه اوراق وسندات فتحت عيني على وسعها وعطت بدون لا انتبه..

-ذني مالتييي؟؟؟

-اي بس ارجعهن بشرط

-شنو گول

-انا وياچ نص بنص

-شنو

-اي چا تعبت وانا اكتل هالابن الحرام ما الي حصة؟

-ها

-خرب روح الفهاوة هاج هاج اتشاقة شبيچ كلشي تصدگين

ضحكت ورحت اخذهن منه گلي ما كمل تحويل كلشي ينراد يوديهن لكاتب العدل ويصدقهن ما اهتميت المهم رجعنلي وارتاحيت..

طلع وگلي اقفل الباب مرت الساعة والثنين والثلاثة ومحد بيهم رجع الا صارت الساعة بالـ 1:00 بالليل ياله اندگت الباب ومن صحت منو گال اني الامير.. فتحتها بسرعة شفت ملابسه كلهن جص ابيض وصاير بشعره هم..

-عذريني نسيتج مادري شلون خذاني الشغل ونسيت انتِ هنا

-لا عادي

-خوما ضجتي؟ جوعانة؟ كليتي شي؟

-اي اكلت لفة جبن

-اجيبلج شي منا خاف تشتهين؟

-لا شكراً بس ما گتلك اجه علي التقي وجابلي السندات من بسام

-صدگ!!

ابتسمت على فرحته وحماسه هزيت راسي وركضت اجيب السندات اراويه باركلي وتمنالي الخير وراح يسبح.. رجعت للغرفة وحاولت انام من الملل غفيت وگعدت الصبح على دگ باب الغرفة..

مطيت نفسي وانتبهت لايدي شو مابيهن ردان ليش، نزلت عيوني اباوع الدشداشة وين راحت عزه بعيني اني ليش نازعة يماا طفرت من الفراش وشفت الدشداشة واصلة لبطني الفوگ كله ماكو وبس من جوه لابستها، ضربت جبيني بغباء ولبستها مرة ثانية ورحت افتح الباب..

-صباح الخير

-صباح النور اگلك هاي الدشداشة كلش جبيرة ميصير هيج والله

-ميخالف اليوم نشرتيلج غيرها هسة بدلي شنو مو تردين ترحين للجامعة اليوم؟

-اي بس شمعرفك اريد

-منتظرج بالصالة

حچاهة مبتسم وعافني وراح واني رحت اغسل ورجعت للغرفة ابدل لبست الفستان هم عملاق بس عاد بي حزام وشديته شوية صار اشوى، شفت مشط اكو هنا ترددت استخدمه لو لا بس بالنهاية مشطت بي صايرة كفشة خوما اطلع هيج..

رجعت المشط على الميز وطلعتله هو مبدل وكاشخ، گام من شافني جاهزة وطلعنا من الشقة، ركبت سيارته وانطلق لطريق الجامعة السيارة هدووء محد بينا حچى لفترة الا من هو كسر هالهدوء وگال..

-خالتچ مو هنا بالسليمانية هي وبنتها

-شنو ليش؟؟

-رحت اسأل جيرانهم گالو صارلها شهر بالسليمانية تتعالج

-تتعالج؟؟؟

-عدها ربو صاير ماعرف شنو والله بس گالو رئاتها تعبانة وراحت علاج

-يمة حبيبتي وبسام النذل عايفها وحدها

-لا يتردد عليهم هي وبتها رجل هنا ورجل هناك

-وتالة؟ امتحاناتها شلون ما بقالهن شي

-بعد مادري، هسة انتِ شوفي وضع دراستج والله كريم على الباقي

هزيت راسي اي بس مقهورة كلش بس لا تالة جبرها ابوها تبطل والله تموت من القهر، وصلنا للجامعة نزل هو ويايه وتمشينا لقسمي دورت على صديقتي نرمين بعيوني ما لگيتها هالفترة امتحانات والكل مخبوص وميداومون الا قليل بس اكيد هذا يداوم...

-محسن: تَـمني؟؟؟

اوف بس انتَ العايزني بعد، اللتفت عليه شفت وجهه متفاجئ بس بسرعة ابتسم فرحان وتقدم عليَّ..

-الحمدلله على السلامة رجعتي من السليمانية شوكت؟

-ما رحت اني بقيت ببغداد

-مو خالتج هناك شلون انتِ هنا؟

-قصة طويلة محسن، شلونها زوجتك هاجر؟

رفعلي حاجبه ما عاجبه تعمدت اسأله عليها حتى اذكره هو متزوج!!

-زينة

-من رخصتك

-وين وين مترحين قبل لا اعزمج على شي

-لا دكتور مستعجلة

-كتلج لا تكولين دكتور وشكو مستعجلة شنو وراج محاضرات وماكو امشي نشرب شي

-لا محسن مو اني مو..

-ها بوية كملتي؟

سد التلفون مالته ورجعه بجيبه چان يخابر طول ما اني احجي ويه محسن ميدري بيه، باوعله محسن عاگد حاجبه وامير نفس الوضع..

-محسن: منو هذا تَـمني؟!!

-هذا الامـير علي يصير ابن اخو نعمة

-ماات وما خلصتي منهم؟؟

-الامـير علي: خير ان شاء الله خالي؟

-محسن: اني من اقارب تَـمني خاف عبالكم خالتها سافرت ومالها احد احنه موجودين!

-على راسي، يله تَـمني لو تبقين ويه گرايبچ؟!

نبرته احتدت مبين عصب من محسن واسلوبه، هزيت راسي لا وتقربت منه اوگف..

-لا مو گلت تسألي على الامتحانات

-چا يله

اشرلي بيده امشي گدامه وهو اجه ورايه، نمشي هدوء بهدوء محد بينا حچى ابد لحدما وصلنا للقسم سألت الدكاترة گالو همه مقدميلي اجازة لان چنت بالعدة واكدر امتحن باقي الامتحانات هسة لو على الدور الثاني اني مخيرة..

-تَـمني: اخاف ما ادبرها هسة انتظر للدور الثاني

-الامـير علي: مابيها مجال تمتحن بغير جامعة ونسويلها نقل؟

-الدكتور: هسة؟ لا مستحيل اساساً صعب النقل بالمرحلة الاولى بالثانية يكون النقل اسهل وبسيط

صافحه متشكر وطلعنا وگفت بمكاني ما قبلت اتحرك اللتفت يباوعلي رأساً حجيت..

-وين انقل؟

-لأي مچان يعجبج

هزيت راسي ومشيت وياه رجعنا للسيارة وبوجهنا اخذني للسوگ اختاريت ملابس تناسبني ابد ما تدخل وواگف على جهة طول ما اني اشتري خصوصاً من اشتريت سوالف نسائية ما دخل لأي محل..

اشتريت كلشي احتاجه وكل الي بنفسي لان كلشي ماعندي هنا، اتفقت وياه اتداين الفلوس و ارجعهن اله من استلم اجار المحلات ما اخذتهن صار أربعة اشهر..

اربعة ايام مشت واني هنا مرتاحة كلش بس بالي ويه خالة وما حافظة رقمها شنو.. وره هالكم يوم اخذوني اگول أقوالي والضابط الي حچى ويايه گال ينحكم بسام وميطلع منها بسهولة فرحت وسألته على السندات الباقية گال يرجعن كلهن بأسمي طبيعي لان حتى كاتب العدل الي جابه ماعنده اجازة بممارسة مهنته..

ذبيت نفس مرتاحة كللش وسعيدة الامير واخوانه وگفولي طول وابد ما حسسوني اني غريبة او دخيلة كلامهم واسلوبهم وتعاملهم ويايه كله بأدب واحترام صدگ ولد شيوخ ومبين عليهم ترباية رجال تعبان عليهم..

اسبوع صارلي بالشقة بديت اخذ جو عليها گمت ارتب مكانهم وانظفه اكنس وامسح من يطلعون وافتح بخور اشتريته ويه اغراضي اشعله وابخر البيت كله وارش معطرات جو هم، كلما يرجعون يتفاجأون وواحد يسأل الثاني..

-علي التقي: حق انتَ نظفت هالخيسة؟

-علي الحـق: خلني انظف خيسة بيتي حتى انظف هاي

-الامـير علي: اظن تَـمني نظفت

ابتسم وافرح من يمدحون التنظيف بظهري احب كلشي يكون مرتب وريحته حلوة، العصر سويتلهم چاي وكيكة استحيت بس گلت خطية اكيد ضاجو من اكل البره خلي يحسون روحهم بالبيت..

رتبت صينية وحطيت الكيكة والاستكانات على الكاونتر ورحت للغرفة اركض أي واحد يجي يشوفهن راح ياخذهن الهم، شوية واندگت عليَّ الباب چان علي التـقي واصر اگعد وياهم واكل من الكيكة الي سواها الجني..

-علي الحـق: بوويااي خوش جني هذا يرتبلنا وينظف ويسويلنا كيك طيب

-علي التـقي: والله عاشت ايده لازم اعرفه ياهو حتى اگله عااااشت ايدك يالجني لو ندري من زمان جايبيك تخدمنا وننطيك راتب عاد

-تَـمني: مو خدامة اني

-علي التـقي: وانتِ ياهو مالتج جاي نحاچي الجني

-تَـمني: تره اني الجني اني

-علي الحـق: لا ما اظن اتخيل الجني اجگم وعنده شوارب

ضحكو ثلاثتهم واني درت وجهي عنهم مبتسمة، گام الامير من مكانه وجابلي فلوس المحلات طرت فرح من شفته مبلغ محترم شلت مبلغ وانطيته ما قبل ياخذ..

-تَـمني: هاي فلوس من اشتريتلي ذيج المرة مو گتلك اعتبره دين

-اعتبريهن هدية

-ماريد هدية احنه اتفقنا

-لا

-حباب تره هسة ارجع كل الملابس والشغلات لا تحرجني

-لا

-حباب

-لا

-فدوة

-لا

-لخاطر حبيبة اخذهن

-علي التـقي: جيبي انا اخذهن شكو تتوسلين بهذا دافر النعمة

-تَـمني: اي هاك انتَ وانطي عود

-ما انطي اخذهن الي متأخر الراتب

-الامـير علي: تقي لا تلعب ويه البت ما تدري بيها بساع تصدگ

-علي التـقي: بعلي ما لاعب شكو على گلبك انتَ لا راتب ولا صخام تهتمله

-علي الحـق: سواله ديكور غرفة صغيرة چاك چيك مليون ونص طاحت في الجيبِ

-علي التـقي: سواله ديكور محل چاك چيك ثلاث ملايين في الجيبي

-علي الحـق: سواله واجهة بيت چاك چيك سبع ملايين في الجيبي

-علي التـقي: سواله....

-الامـير علي: افتهمنااا فگست عيونكم حاطين عينكم على رزقي

-علي التـقي: چا خوية لا تظل تستشرف براس البت تره هذا نايم على فلووووس اكواام اكوووام نايم عليها

-الامـير علي: غير يسكت ابو رتبة ذهب

-علي التـقي: اسكت لا تفضحنا

ضحكت من عضله شفه يسكته صدگ گعدتهم تونس وحلوة صح بعدني استحي وما اشارك بالحديث بس ما احس بالوقت من يكونون موجودين واكتشفت ان علي التقي وعلي الحق اكبر چذابين گضوها راتبي متأخر وراتبي متأخر تالي الامير فضحهم وگال شگد رواتبهم ثنينهم سكتوا وضموا ضحكتهم بأستكان الچاي..

-علي التـقي: چذاب چذاب وين اكو هذا راتبي

-تَـمني: الا شوية ردت اصدگ انتو فقراء والله العظيم

-علي الحـق: تره صدگ فقراء احنه كلنا فقراء الى الله

-الامـير علي: اكبر چذبة بالتاريخ ضابط فقير

گالها وگام يغسل واني هم فتت للغرفة الفلوس بيدي وفرحانة صح ضجت لان ما قبل ياخذ بس گلت اشوفلي طريقة ارجع الفلوس اله ماحب احد يصرف عليَّ غير خالتي..

ثاني يوم رجع علي التـقي خلص الواجب مالته وعلي الحق باليوم الوراه رجع فرغ البيت وضجت من راحوا، الامـير علي بقى هنا بس ابد منحچي سوه او يطلب مني شي واني بطلت اطلع من الغرفة بس اروح للمطبخ اجيب اكل وارجع..

لثاني يوم دگ عليَّ الباب فتحتها شفت بيده خاولي ودينشف شعره هستوه سابح..

-انا راح ارجع

-لبيتك؟

-اي خلصت شغلي

-تمام

-وانتِ ...

-ادري ادري اني

-شنو تدرين

-اقفل الباب عليَّ وما افتحها لأي احد بس اذا سمعت صوتكم

-لا خالو خاف عبالج اعوفج هنا واروح؟

-اي غير

-خو ماكو شي انا عندي مرة تبقى وحدها ببيت؟

-لعد شلون

-تجين وياي

-عزه اعيش وياك وحدنا؟؟

-وحدنا شني چا ستين الف نفر بالبيت ما عاجبيچ؟

-ها يعني تاخذني لبيت عمو علي؟

-انتِ مو عندج حصة بي؟

-هااا

-خوية انتِ ليش فاهية؟

-مو فاهية بس نسيت

-لا تنسين بعد بيتج ذاك والج حگ بي

-هههههااي بس اريد اتخيل شكل سلوى من تشوفني

بوز بوجهي وانتبهت لروحي چفصت، حمحمت ووخرت شعري من وجهي منحرجة..

-سلوى لان هواي ذلتني هيج كلت

-حضري روحج نطلع الفجر

-اوكي

سديت الباب وبديت احضر اغراضي وانتبهت ماعندي جنطة احط بيهن ملابسي، طلعت شفته كاعد بالصالة يدخن فيب ويشرب چاي، سألته على الجنط گلي اخذ جنطته الي بالغرفة افرغها واخذها..

رحت لغرفته منحرجة اخذت جنطته ورجعت اعبيها، ما كفت واحتاجيت بعد مكان گمت اعبي الجنط الكبار الي اشتريتهن، حطيت ملازمي مال الدوام واحذيتي خرب شكد مشترية اني بعد احتاج جنطة..

لميت شعري ورجعتله بالصالة بس تفاجأت من شفت اكو رجال هنا استحيت كلش وماعرفت شتصرف درت وجهي ارجع بسرعة ووگفت من گال الرجال..

-انتِ ارملة عمي نعمة؟

-تَـمني: اي

-عاصف: چا شتسوي عندك امير؟

-ماعدها احد غيرنا

-وعادي تبقى ببيت رجال غريب؟

-چا اذبها بالشارع؟

-وصارلها كل هالوكت عندك وحدكم؟!

-عندك مانع؟

-عيبة بحگك هاي يا ابن عمي ابوك راضي عن هالشي؟

-لا تشيل هم ابوي

جر نفس من الفيب وزفره ممهتم بقيت اباوعلهم والرجال يبادلني النظرات ما نزل عينه ابد، شفته يلعب بتلفونه شي والامير علي هم بيده تلفونه يگلب بس هذاك مزعوج كلش هز راسه بقلة حيلة وگال..

-حرمة ببيتك وحدكم وثالثكم الشيطان مو اخلاق ولد شيوخ هاي امير ابوك شلون راضي مادري

-شتريد عاصف؟

-انتَ راضي بهالوضع؟؟

-راضي

-چا عاشت ايد الرباك

-وايدك

-انتِ عمي شلون راضية بهالوضع مو عيب عليج؟

-انتَ ياهو مالتك؟؟ ليش جاي تحاجيها من الاساس؟!!

انزعجت من حچه عاصف ويايه هيج ويباوعلي بهالنظرة وكأني مسوية شي يكسر الوجه بس توترت من شفت الامير معصب ويحاچي معلگ خفت لا تصير عركة هنا..

-عاصف: ماكول غير يا عيبة العيبة ارملة عمي نعمة ويه الامـير علي شيخ وخليفة ابوه

-الامـير علي: وين تريد توصل؟! تريد تطلعني عايب ما تگدر عاصف وهاي الدوالغ مو عليَّ راويني عرض چتافك بعد گلبي

-عيب بالحسين عيب انتَ وحرمة وحدكم بشقة ببغداد

-حلالي وبكيفي شعليك انتَ؟!

فتحت عيوني مصدومة والرجال هم جفل متصنم..

-شني حلالك شلون

-عاقد عليها انا

-لا صدگ

-ما تصدگ اسألها

مغصتني بطني من دار الموضوع عليَّ ما باوعلي ولا حتى دار وجهه باقي يدخن بالفيب بينما الرجال الثاني وجه سؤاله الي..

-صدگ عاقد عليج؟؟

ظليت لا اخذ ولا انطي وعيوني على الامـير علي الضاغط على الفيب بيده بقوة چف ايده صار اببض من قوة الضغط..

-ما تحچين شمالها هاي خرسة؟

-تَـمني: وانتَ شعليك؟

-هاا طلعلها لسان

-الامـير علي: اطلع منا عاصف

-عاصف: ما اطلع الا اشوفن عقد زواجكم

-ما عاقدين محكممة اطلععع لا تفضحنا بالعمارة بهالليل

-هااا يعني متعة متزوجين

ضربت صدري بقوة شاهگة والامير جر عاصف من ياخته وصاح بي..

-اطلععع برررره لا ابتلي بيييك وعليييي

-بررره منك عليي شيخ **** انتَ

صفگه راشدي الامير هذاك هم تخبل ورجعله الضربة، متت خوف من حمت العركة وتكامشو واحد يضرب الثاني صرت ارجف واباوعلهم من بعيد ماعرف شسوي.. شفت تلفون الامير محطوط على القنفة ركضتله شفته مفتوح على محادثة ابا الحسن علي وفاتح بصمة صوت تعجبت ليش ديسجل صوته من ديحچي ويه عاصف؟

ما اهتميت وعفت تلفونه ورجعت لمكاني عاصف يهد وينثني ويهدد ويأشر عليَّ ويگول..

-شفت ساقطة نعمة عافلها فلوووس گلت اتزوجها واستفاد براسها

-خاب انچبببب

انطاه راشدي وبوكس بوجهه وهذاك متخبل ويتعارك لحدما امير طرده بره الشقة وطبگ الباب، باوعتله من بعيد ينفخ متنرفز ويعدل بملابسه، رفع عيونه الي يباوعلي بس گلبي مشعوط منه عفته ورحت للغرفة اضم بباقي ملابسي وارجف عصبية..

دقايق ودك باب الغرفة ما كلت تفضل بقى يدك بالباب لحدما دخل من وحده، اللتفتت عليه خازرته مسح على وجهه وگال..

-اجه يستفزني

-وتحطني بالواجهة؟؟

-چا شافچ شنو ترديني اسوي

-وتكول متزوجني؟؟ انتَ شتريد مني شترررريد

-ماريد شي شبيچ

-ليييش ما رديته من گلك متزوجني متعة؟؟ لهدرجة تشوفني ما اسوه ويجي وااحد ادبسززز صايع يحجي عليَّ؟؟؟

-چا انا المن تضاربت وياه

-تضاربت وياه بس ما نفيت كلامه!! دليل صاحلي ساااقطة!

-على كيفج شبيچ ترجفين وهو عاصف منو ومسويتله اعتبار

-عليك الله وبداعة امك تجاوب رجال اجه واتهم اختك متزوجة متعة من صديقك شتسوي؟؟

-لاااا تجيبين حبيبة بهيج موضوع

-ليش؟؟ لانها اختك شالتك الغيرة عليها؟!!

-لا تخربطين بالحجي كافي

-لا مو كافي انتَ هسة شوهت سمعتي كدام ابن عممك واكييد راح يطش الخبر بكل العشيرة واني الي يصير وجهي اسود كدامهم انتَ رجاال ومو مهمم عدكم الرجال شايل عيبببه

-تَـمني لاا گتلچ محد راح يعرف ما يسترجي عاصف ويطش هيج خبر

-عمت عينييي عمتتت عينييي لان قبلت ابقى وياااك

اضرب على وجهي حيل متخبلة، اتخيل يحجي كدام الكل هناك واني رايحة اعيش يمهم شيكلون عليَّ؟؟ شلون راح ابرر موقفي وعلي التقي وعلي الحق صارلهم يومين من رايحين حتى ميكدرون يدافعولي شمعرفهم شنو صار وره ما راحوا..

-كااافي شبيچ انا اتصرف لا تشيلين هم

-وخر عنييي وخر

شلت الجنط ولبست حذائي وسحلت بالجنطة الجبيرة اطلع منا ولزمني من سير الجنطة يجرني..

-وين رايحة بهالليل

-هدني معليك بيه

-وييييين رايحة

-ما اجي وياااك ما ارجع هناك

-من وره عاصف الخ**؟؟؟ ولج ياهوو معبرهم بيت مسعوود

-عوفنيي لا تجرني هييچ

-بالعباااس ما اعوفج وين موليه لا تسودنيني

-انتَ مبينن ما دافعت عن نفسك تريدد تطلع عليك هيج سمعة حتى متصير شييخ انتَ دتستغلنيي حتى تشوه صورتك كدام ابوووك

-تخبلتي انتِ؟؟ وماكوو غيرج اشوه صورتي وياچ؟؟

-اي لان اني مااعندي احد وعبالك ماعندي كرامة وما ادافع عن نفسي وخررر امير شوفلك وحدة غيري سويها تعلاگة لسوالفك

شهگت فازة من جرني من سير الجنطة حيل ودفعني على الحايط، درت وجهي من الجهة الثانية من وگف گبالي مباشرة وانفاسه تلفح نار من العصبية..

-ما ناوي اعلگ سوالفي عليچ شني مخبل انا واشوه سمعتي وصورتي گدام ابوي؟؟ وانا سجلت صوتي لان اعرف عاصف تعمد يفتح وياي هيج موضوع واعرفه جاي يسجل بموبايله بصمة!!

سكت ينتظر ردة فعلي بس بعد ما درتله وجهي وبقيت منطيته گفاية، هدأ نبرته وكمل..

-راح يلعب بالبصمة ويگصها ما يطلع الباقي من گلت عقدت عليج وهيج انا وانتِ ثنينا نروح بيها!

-وسجلت صوت لشنو انتَ؟؟ مو كلت عاصف مو مهم ومحد يهتمله!

-بس اذا يوصل تسجيل بصوتي وانا اعترف مرة وياي بالبيت وفتحها كدام شيوخ يطين حظي وحظ ابوي

-وشمعرفك ما راح يگص البصمة ويطلع بس هالشي؟

-اذا استرجى وسواها انا اطلع تسجيلي واسمعهم

-وتكوللهم اني مرتك؟؟

-عندج مانع تصيرين حرمة الامير؟

-عندي!

-چا بلعي وسكتي

فكيت حلگي عليه وهو باقي صافن بوجهي ومعصب شكله ابد مو مال اكدر احجي وياه واناقش ميبشر بخير واخاف يسويلي شي واحنه وحدنا، درت وجهي من الجهة الثانية ونترت..

-ما اتزوجك لو تموت

-لا حبابة تزوجيني

-لو تموت

-روحي بدلي خلينا نطلع

وخر مني يسويلي طريق عفته وركضت للغرفة بدلت وسفطت الفراش ومشطت شعري وطلعت شفته هو يسحل بالجنط ينزلهن..

رحت وراه بعدما قفل باب الشقة وانطلقنا لمحافظتهم، ما فتحت حلگي بشي حطيت راسي على الكشن حاولت انام بس ماكدرت اغفى وعشت الملل بالطريق..

بنص الطريق نزل اشترالنا اكل اخذته منه بدون لا نحجي واكلنا على الساكت انوب نزل اشترالي جيس حلويات هم اخذته وكعدت اكل انوب نزل اشترالي عصير وشربته ممهتمة انوب نزل اشترالي بعد لفة وهم اكلتها واخر شي نزل اشتره شي بچيس اسود ورجع اخذته منه وهو ظل صافن عليَّ..

-تَـمني: ما اشرب فيب ليش جبتلي

-مو الج هذا الي

-وما اشتريلتي شي وياك؟

-بعد تعاي اكليني

-هاا

-فهاوي

همسها ونزل من السيارة لنفس المحل جابلي چبس چبير ووياه عصير كيفت بس سويت روحي ممهتمة رجعلي وحطه بالسيارة ما فتحته ولا لزمته الا هو گال مستهزأ..

-اكلي وجهج اصفر

-اي والله عندي فقر دم لازم اكل

فتحت الچبس والعصير اكل الطريق كله اگرط احب الاكل واموت عليه بالطريق اتذكر مرة رحت ويه خالة وتالة لاربيل الطريق كله ناكل رحنا ثلاث ايام ومن رجعت شفتني زايدة كيلوين..

-هاك

-ماريد

-هاك

-كتلج ماريد

-هاك

-خرررب جيبي

مد ايده اخذ من الجبس وفاجأني من اخذ عصيري يشرب منه ورجعه الي..

-هاي ليش شربت من عصيري ايع

-ايع بعينج

-ما اشرب بعد

-لا تشربين

-اريد غيره

-مخلفج وناسيچ انا؟؟

-مو سوچي انتَ

صفن عليَّ مصدوم وعاف الطريق، كشرت بوجهه استفزه وشكل ابتسامتي صدگ استفزته لانه زفر نفس وأستغفر مزعوج كلش..

-هم عصير برتقال تردين

-لا اريده ليمون ارتفع ضغطي

-خوشن اجيب ثنين بلكي اكدر اهضمج

-هه متضحك

-ما ناوي اضحكج فهاوي

نزل لاسواق صاير كرفان بنص الطريق وجابلنا ثنين سفن لان ماكو عصير ليمون، صك البطل كله وشمره وره..

-هاي شبيك اظل انطف وراك اني

-چا شكو

-هاك ذبه بالنفايات

-نفايات شني شو تتماوعين انتِ

-لعد شگول

-گولي زبااالة

-لا عيب هالكلمة هسة ممكن تنزل تشمر البطل بالنفايات شيخ المستقبل الامـير علي؟

-جيبي

-شكراً

-جسر للطيبين

اخذهن وسفط سيارته شاف مساحة قطعة ارض كلها نفايات شالهن وشمرهن هناك فكيت حلگي عليه، رجع للسيارة وگال..

-هاي سطلة نفايات بس چبيرة

ضحكت وضميتها بيدي وهو هم شفته يبلع ضحكته، درت وجهي على الشباك اباوع وسألت..

-شوكت نوصل

-بعد

-بعد شكد

-بعد بعد

-يعني شكد

-بعد بعد بعد

-يعني ثلاث مرات بعد؟

-اي

-البعد الوحدة كم دقيقة؟

-بكيفج

-نص ساعة؟

-ساعة

-حيييل يعني بعد بعد بعد ثلاث ساعات؟؟

-سويهن بعد رابعة

-اربع سااااااعات

-اذني اريدها

نفخت هوا ضايجة الطريق ممل انتبهت لشاشة لمس بسيارته، لمستها بأصبعي شفت بيها مسجل فتحته وطلعتلي اغنية..

-طفي انا اشغل من موبايلي

-حلوة هاي عجبتني

-لا

-مو حلوة؟

-لا

شد تلفونه بلوتوث ويه السيارة وفتح اغنية حلوة تبدي بـ "عنك اذا سألوني.. تفضحني بيك عيوني"، انسجمت بيها كلش لطيفة اسمعلها ومبتسمة كلماتها حلوة..

-عجبتج؟

-اي حلوة الاغنية

-هاي مو اغنية

-لعد شنو؟

-اسمه مولود لـ باسم الكربلائي

-حلوة عجبتني احفظلي اسمها حتى احملها من اشتري تلفون

هز راسه اي وبقيت اسمعلها واسمع لهواي وراهة كال اسمهن مواليد مو اغاني وهيج مضى الطريق، قريب لا نوصل فرعهم شفت ظهرت على شاشة السيارة مال الامير رسالة اجته من ابا الحسن علي كاتب "امير شصاير خوية شنو هال...."

فصل البلوتوث من الشاشة ولزم تلفونه يكمل الرسالة شفت وجهه انعفس مزعوج وهز راسه بـ "لا" ويستغفر ما سألته شبيك وبقيت اباوع من الجامة بس دخلنا فرعهم توترت وبطني مغصتني بلعت ريگي واستجمعت قوتي ونزلت من سفط ببابهم..

عدلت شعري بيدي ما متخربط لان سيارته باردة وما فتحنا شبابيك، علگت جنطتي على چتفي وباوعت لملابسي مرتبة لابسة بنطرون كيلوت وسترة صيفية خفيفة ورافعة شعري عالي..

مشى گدامي الامـير علي وفتحلي الباب دخلت لحديقتهم اعبرها وصولاً لبوابة المطبخ واذكر روحي محد متفضل عليَّ هنا الي حصة بهالبيت حالي من حالهم وبس اعيش وياهم اطلب من شيخ علي يفصل البيتين حتى ما اثر عليهم ولا همه يأثرون عليَّ..

مجرد فتحت باب المطبخ شفت حبيبة واگفة على السنك تغسل بس شافتني ابتسمت وضحكت بصوت عالي واجت تحضني، بادلتها حضن فرحانة بشوفتها ومشتاقتلها، بعدني ما سألتها شلونچ ودخلت سلوى للمطبخ تصفگ بيدها وتسوي حركات عيب..

-ايييي اجت ام الزززلم اجتت شنييي ترديلج زلمة ببيتنا واجيتي تستنگيين من ولد الشييخ

-تَـمني: مو بحال ولد الشيخ اني اجيت لبيتي

-هاااا هااااا اجيتي لبيتج شنووو ولج بت الفگررر

-اوي انتِ شبيچ ليش هيجي فوضى ومتعرفين تحجين بهدوء

-اااااخ لو اللزمج يا تَـمني الا اشرررب من دمج

-ديلا سويلي طريق خالتو اروح لغرفتي ارتاح

-وجعععع وسمممم مكاننج بالمخززن روحيله ينتظرجج

-لا اريد غرفتج

-شنو وووولج

-اي اريد غرفتج عيوني عجبتني

-انچبييي لچ تريد غرفتيي ارملة المگرررن نعمة

-باعي سلاوي اذا عندج اعتراض صيحيلي الشيخ اتفاهم وياه

-ايييي واصيحلچ واحد من الولد وياه حتى يشوفووچ بلچن تصيرلج قسمة وياهم؟؟؟

-لا شسوي بولده اني اخذ الراس الچبير حبي

شهگت ودگت صدرها وحبيبة هم فتحت عيونها من قوة الصدمة وكلماتي مااعرف شلون طلعت من حلگي هيچ عبارة، شفت حبيبة تباوع ورايه اللتفتت بسرعة اشوف واذا اللگاه الامـير علي واگف وفاتح عيونه........

يتبع 👑....

━━━━━━ ♛ ━━━━━━

الفشلة والصدمة 🥲↖️↖️↖️↖️↖️

لا تنسون التصويتت واطربوني بتوقعاتكمممم السمبتيكية 💋

#الامارة

بقلمي: زهراء السلامي 💎

لتنسون التصويت + التعليق بين الفقرات + متابعة لحسابي 💙.

والگلب مادرِي شجَاه

قبل چنت اگدر علِيه

الوي اذانه يخَاف منِي

هسَه صَرت امشِي وراه .🔥

━━━━━━ ♛ ━━━━━━

"حبـيبة"

كلش فرحت بشوفة تَـمني احس ردتلي روحي بالي يمها صار اسبوع اتواصل وياهة من موبايل الامـير علي واتوسل بي يكون لين وياهة وما يضوج بسرعة اعرفه عصبي وما يتحمل ملحة يتنرفز بسرعة وينفجر بس هسة غيرت رأيي ويمكن لازم اوصيها هي عليه بعد محادثتها ويه امي انصدمت من گالت..

-تَـمني: لا شسوي بولده اني اخذ الراس الچبير حبي

من قوة كلماتها احس انلصمت و هي هم صفنت على روحها والي زاد الوضع سوء هو دخول الامير اشوف عيونه طلعت من وجهه مصعووق..

-سلوى: سمعتوو خوب سمعتوو انتم وشفتو نيتها شنو تريد الشييخ يبووو تريد شيخي تريد ابوكم اميير حبيبة اجت تبوگ ابوكم من عدنا

-تَـمني: انتِ جبتي الاهانة والحچي لروحچ استقبلتيني بالرزايل والحركات السوقية!

-سلوى: يماااا يا گواة عينهااا هو انتِ كلج....

سكتت ويه خزرة امير خزرهن ثنينهن واشوف وجه تَـمني انخطف، بدون لا يحچي شي اشرلي اجي وراه وعبرهن يطلع من المطبخ مشيت وراه وافرك بيدي..

-حبيبة: الحمدلله على السلامة حبيبي

بست چتفه متوترة وهو جر راسي يبوسه وباس خدي بس العصبية فوول صاعدة عنده، سحبني بخفة من ايدي ودخلني للهول وعگد حاجبه مستغرب من شاف الاثاث متغير..

-حبيبة: ابا الحسن اشتغلها وسواها غرفة لـ تَـمني

-ليش

-انتَ اتصلت بي امير وگتله بهالشي شنو نسيت؟

سكت يهز براسه "اي" قبل اربعة ايام اتصل بأبا الحسن علي يفرغ الهول ويجيب لـ تَـمني اخشاب غرفة نوم وينصبها هنا حتى تاخذ راحتها خطية طول هالايام هو وكرار يشتغلوها واوقات يجون سور ونور يساعدون..

-شنو صار حبيبة؟

-قصدك الصار بين امي وتَـمني؟

-اي، تَـمني صدگ نيتها تتقرب من ابوي؟

-لاا لا طبعاً لا امير ابد والله

-چا؟

-امير انتَ علمتني ادافع لأمي وما انطي بيها مهما صار مو صح؟

-اي؟

-بس هالمرة اريد اگول امي استفزت تَـمني وصاحتلها ام الزلم وعلساس هي جاية هنا حتى تتزوج واحد منكم

-وام لسان ردتها مو؟

-اي والله بس امي حچت هيج لان نفسيتها تعبانة هالفترة وتَـمني هم ما تقصد تره البنية فقيرة ماعدها هالسوالف

هز راسها بهدوء وگعد على چربايتها، دور عيونه بالغرفة يشوفها وحرك راسه نافي..

-شبيك

-غلط نعوفها هنا الهول والديوان يفصلهن حايط وهاي ما تهتم لروحها تحب تضحك ومرحة لا ننفضح بصوتها اليجيب التايه

ضحكت وهو رفع عيونه يباوعلي مستغرب، گعدت بصفه وحضنت زنده اسند راسي عليه..

-والله حبابة تَـمني اميرنا

-ادري بيها حبابة

-مسكينة هالبنية هواي تعذبت بس تدري توقعت اللگاهة ضعفانة وحزينة وتعبانة وداگة ولاطمة بس شو ما شاء الله شحلاتها صايرة

-مو اگلج ما تهتم لشي

-ههههههه تحب الحياة فدوة

-يله بنيات كومي صيحي للولد يبادلون غرفتها ويه غرفة كرار

-هلا هلا هسة يجي يهلهل علينا اكريّر

-خلي يهلهل للصبح تَـمني ما تنام بالهول

-صار

گام من الچرباية وراح للكنتور يفتحه ويتفحص باقي الاخشاب، مشتريلها غرفة تركية ام نفر ونص حلوة ونازكة تشبهها بالضبط اخشابها بيضة وتاج الچرباية مقدف ولونه بيجي فاتح..

-الامـير علي: ما عجبتني الغرفة ما لگو غيرها

-كرار گال هاي كيوت نفسها

-خرب روحه الزاحف

طلعنا من الغرفة وشفناها گاعدة بالصالة وحدها منزلة راسها وتباوع بالگاع، بس شافتنا اجينا گامت وگالت بنبرة سريعة موجهة كلامها للامير علي..

-باوع مو تصدگ اني اجيت علمود ابوك؟ تره مستحيل افكر بالموضوع الرجال جبير بگد ابوية واصلاً اني قصدت..

-الامير علي: اشش

-تَـمني: شو تأشأش بيه؟

-بشرفج سكتي لا تكملين

-غير ابرر لروحي

-لا تبررين بس چفينا شر سوالفج

-اصلاً سوالفي مابيهن شر! سلوى كلها شر مع احتراماتي الج حبيبة بس انتِ ابد ابددد متشبهين امج اختلاف من السما للگاع

-الامـير علي: هسة غير تسكت

-راح اسكت بس گلت ابرر موقفي

-گلتي تردين راس الچبير شتبررين بعد

-ولك لااا

-ها!

-لا يعني ما اقصد اگولك ولك طلعت من حلگي بس دا ابرر شبيك

-انعل ابو التبرير سكتيي

اسمعهم وميتة ضحك عليهم والامير من كل عقله يجادلها ويجاوبها على كل جملة ولا يفوتله جملة وهي ما شاء الله مستلمته بلسانها..

-حبيبة: تَـمني تدرين منو الراس الجبير ببيتنا؟

-ابوج غير

-لا ابوي ما موجود دائماً وهو يكول خيمة البيت الامـير علي من بعد عينه

فكت حلگها واشوف الامير رافعلها حاجبه، فطست من كشت وجهه وگالت بأستنكار..

-تره ما اقصدك الك مو تكيف

-انا اكيف؟؟ ليش خالو منو انتِ؟

-اني تَـمني

-اشتعلت روح تَـمني

-وروح اليشعل بروحها

خزرها وهي انطته گفاهة ضايجة منظرهم ولا ينمل لاحظتها اكثر من مرة من چانت عدنا من تزعل من احد تچتف ايدها لصدرها و تنطي گفاهة تحرمه من شوفة وجهها هههههه..

صعد الامير لغرفته ضايج واخذت تَـمني ويايه فوگ دورت على امي ماكو جوه وابرار وشمس ثنينهن رايحات لبيت اهلهن اليوم..

-تَـمني: حبيبة يحتاج ابررلج موقفي لو اللبسچ؟

-لبسيني خية تعودت على لسانج

-اي حبابة تعودي تره ما اسيطر على روحي

دخلت غرفتي وكعدت على چربايتي بعدها ما جارة نفس وسألت..

-عبق وين؟

-خاتلة بغرفتها

-صيحيلها حبابة مشتاقتلها

-ما تطلع ماطول امير هنا ادري بيها تعاي احنه نروحلها

هزت راسها اي وگمنا نروح للمخزن دگيت الباب ودخلت شفتها لازمة عيدان الحياكة تحوك بس شافت تَـمني شمرتهن وگامت فرحانة تحضنها عبالك صارلهن دهر يعرفن بعض..

-عبق: تَـمنييي مشتاقتلج ولج متت خوف عليج شلونچ

-زينة اني وانتِ شلونچ

-بخير، صدگ الصار وياچ تَـمني لو حبيبة تبالغ؟

-حبيبة: وولج

-عبق: اسفة حبيبة بس شو هسة مدا اصدك من شفت تَـمني شو ولا عبالك صاير بيها كل هالاكشن

-حبيبة: والله خية حتى اني تعجبت

-تَـمني: شبيجن يعني تردوني اموت روحي زعلت بيومها وراحت هو كل ساع

-حبيبة: والله هنيال گلبج انا ينكسر اظفري اظل اسبوعين لازمة حداد

-عبق: مو احنه متعودات على التكفخ حبيبة مو مثلج مدللات

ضحكنا ثلاثتنا وگعدنا بالمخزن ويه عبق نسولف وتَـمني تعيدلنا الصار وياهة وويه كل مرة تحجي موقف عبق تفك حلگها وتسأل..

-وبعدج عايشة؟؟؟

-بعدني

-عبق: صدگ حضنتي الامـير علي ولج تَـمني!!

-لج ايي تقي سولفلي غير متت بدمي من الفشلة انوب انمطلت بالكاع بين شقتهم وشقة عاصف وما اقبل اكوم

-عبق: ههههههههههههه خرب روحج متت ضحك والله

-ولجن تضحكن على أحزاني

-حبيبة: ههههههه تَـمني اسفة والله ادري بيج تبهذلتي بس المواقف تضحككك

-ضحكن ضحكن امداني

گمت اجيب حبشكلات وعصاير ونسينا رواحنا واحنه هنا ما انتبهنا للوقت الا من فتحت باب المخزن شمس ودخلت..

-شمس: هلوو بنات

-حبيبة: هلا بشمس بدر تعاي شوفي تَـمني يمنا

-تَـمني: فدوة انتِ العروسة شمس

تسالمن وانضمت النا شمس هم روحها حلوة وتحب الفرفشة، صعدت ابرار يمنا وكعدت على صفحة متحجي هواي بس احاول اشاركها الحديث ويانه..

صاحت بينا امي نسوي عشا ونزلنا كلنا نتساعد، سلمت تَـمني على مرة ابوي رسمية وهواي رحبت بيها وهلت وسهلت، ترخصت منها ووگفت تگصص بتيته رادت تشتغل ويانه..

-حبيبة: اليوم اجيتي ولج تلحكين على الشغل

-تَـمني: اني يعجبني اساعدكم

ابتسمت وهزيت راسي، دخلت امي للمطبخ تباوعلها صفح وتكول من طرف خشمها..

-اشتغلي عدل لا تتفهين

مجاوبتها تَـمني وكملت محادثتها ويه عبق واگفات على جهة بعيدات عنه ويسولفن على عزيمة باجر، عدنا كل جمعة ابوي يعزم كل عمامي على سمچ ونلتم كلنا، بين ما انا اگلب الكباب بالطاوة تقربت مني شمس وابرار بصفي واكفة..

-شمس: راح تعيش هنا تَـمني؟

-ابرار: اي بت الفگر

-حبيبة: ليش بت فگر ابرار چا حصة عدها بالبيت وماعدها غير مكان تروحله

-شمس: اني اشوفها كلش حبابة ومحبوبة ليش متحبيها ابرار

-ابرار: تتماوع من تحجي تبط الگلب!

زفرت اهز براسي مئيسة لو نجي للحقيقة تَـمني صدگ حچايتها فاهية وتمط بالكلمة هواي الي يشوفها اول مرة عباله تتماوع وتتعيقل من تحچي بس من تعرفت عليها اكثر ودار بيناتنا اكثر من حديث عرفت هاي طريقتها بالكلام..

-شمس: هههه ابرار والله حلوة من تحجي يعجبني بس اسمعلها كل شوية وگايلتلي "شبيــــچ شمس"

-ابرار: تتماوع على زلامنا يا غبررة الزلم تكيف على نسوان فاهية وتتمقچل بالحچي

-شمس: ليش تربطين كلشي بزلمنا ابرار تره يحبونا واحنه تارسات عيونهم

-ابرار: من تلوف على بدر ويروح من ايدج ذاك الوكت قنعي روحج بسالفة انتِ تارسة عينه

-حبيبة: بدر تزوج شمس عن حب! عشگها وميت عليها وما ببدلها بنسوان الدنيا لا تهتمين لكلام ابرار شموسة انتِ تعرفين علي البـدر اكثر من الكل

-شمس: اي چا تعلموني بي بدر يموت عليَّ

كملت تشتغل بس عرفت كلام ابرار اثر عليها ظلت طول الوقت تباوع لـ تَـمني وتنتبه على كلشي تسوي، رجعوا الولد صعدت عبق بسرعة واجه علي البـدر باس ايد امه واجه لشمس جرها على صفحة حتى ما يشوفهم احد وباسها وبكل مرة انا اشوفهم وابتسم فرحانة بطيور الحب..

-علي البـدر: شبيها شمسي

-شمس: مابيه بس تعبانة

عافته وراحت لغرفتها شفته يعگد حاجبه مستغرب وبسرعة اجالي يتسائل..

-شبيها حبيبة؟

-ابرار حچت براسها

-شحچت؟؟

-گلتلها تَـمني راح تلوف على بدر وتاخذه منج

-منو تَـمني؟

-ارملة عمي نعمة ما شفتها؟

-لا ماعرفها

-المهم هي اجتنا وراح تعيش هنا بحصتها مال البيت وشمس شالت هم

-صدگ جذب احنه ما نخلص من ابرار!

-بداعتي بدر لا تحجي لـ در تره يضوج هو توأمك وتعرفه عدل ما يرضى على سوالف ابرار باقيله گشاية ويطلگها وهاي ماعدها احد تتيه اذا تطلگت

-لا شني تخبلت احجيله بس حبيبة لا تخليهن ينفردن وحدهن من اطلع دائماً صيحيها وياچ

-صار

باس خدي وراحلها بالغرفة فرشنا السفرة ونگلت الاكل كله وسور ونور يلگفون بين ايدي خلصوا ماعون البتيتة، شوية وطلعوا شمس وبدر من الغرفة الكشرة من الاذن للاذن على وجه شمس فرحانة وكاضة ايده وگعدوا ياكلون ويانه..

-علي التـقي: چا وين تَـمني حبيبة؟

-حبيبة: ما ترضى تاكل ويانه تستحي

-علي التقي: اي حگها اخذيلها اكل خطية

-اي بعيني هسة اسويلها لفات

-سلوى: اكلي وبعدين سويلها

-لا يمة هسة اسوي شعندي

خزرتني واعرف خزرتها معناها گعدي لا اطيح حظج، سويت مثل متريد وانتبهت لـ الامـير علي يعاين علينا بس ما حچى..

-الامـير علي: ابوي ما رجع من السماوة؟

-رسمية: لا كال باجر الظهر يجي ان شاء الله

-الامـير علي: خوشن، يا ولد بلا امر رتبوا غرفة ارملة عمكم تنقلون الاخشاب لغرفة كرار

-علي الكـرار: اهووووو هم كرار حتى غرفتي ما خلصت منكم

-الامـير علي: ولك اخذ الهول اكبر ومكانه يفك الكلب

-لا انا احبن غرفتي عبنها منحر شمس نفهه

-يله خوية لخاطر هاليتيمة تكسب ثواب

-بالعباس ما اتنازل

-علي الحـق: امير هذا مو مال احترام هسة هينه وطگطگ نعالين على راسه يجر عدل

-علي الكـرار: نجسس

-علي الحـق: چا شلعت گلبه شني ما طلعت غرفة هاي ليگول قصر السلطان سليمان وما يتنازل عنه

-علي السور: هو سليمان وخلي تَـمني تصير هويام

-علي النور: ههههههههه حلوة حلوة

-علي الحـق: محد ضحك غيركم زوج القنادر

-علي الكرار: بس والله خوش فكرة هاي سور يما خطبيلي تَـمني اتزوجها واسويها هويام مالتي

-الامـير علي: انتو ليش سرسرية؟؟ البت اليوم اجت وبديتو بسوالفكم ما تستحون!!!

-علي الدر: لا عاب حلگك خوية سور، نور وكرار لا تفشلونا گدام البت عيب!

-علي التـقي: واذا على الغرفة انا افرغلها غرفتي تاخذها

-علي السور: غرفتي حلوة تكدر تاخذها

-علي التـقي: ونشمرها بالساحة؟؟

-علي الكـرار: عمي يله تنازلت عن غرفتي اخذوها

-علي التـقي: ماكو داعي

-علي الكـرار: بالعباس الا تاخذون غرفتي

-علي الحـق: لا مانريد بعد

-علي الكـرار: يمممة الا غرفتي ياخذوها بعلي ما انام بيها بعد

ضحكوا كلهم وهز راسه امير متفقين، كملت عشا واخذت لفات لـ تَـمني وطبيت لغرفتي شفتها تطفر بمكانها صفنت شوية عليها ياله انتبهت جاي تلعب رياضة..

-ههههه يمعودة اخترعت عبالي صارلج شي

-لا دا اللعب رياضة اليوم كومة اكلت بالطريق

-هاج عشا

-يااا مو كتلج ما اشتهي حبيبة

-اكلي ولج تجوعين تالي الليل

اخذت اللفات من ايدي وحطتهن على جهة، للفجر احنه نسولف وعبق ويانه ما خلينا شي ما اكلنا وتَـمني تضرب على زنود عبق وتكول..

-زبددد زبددد

-عبق: ولج اااخ

-هاي غزة جانت كلما تشوفني هيج تسوي بس شنو هاي عبق زنودج يسون واهس للعض

-دوخري اااخ

ضحكن ورجعن ياكلن ما نامن الا طلعت الشمس ركضت عبق ترجع للمخزن وتَـمني نامت بمكانها، نمت وكعدت الظهر متأخر وابتسمت من شفت شلون تَـمني نايمة، مقرفصة روحها ونايمة مثل الجنين حاضنه رجليها وضامه راسها بيناتهن..

مطيت ايدي وكمت اسبح وابدل اكيد الكل جاي هسة، بدلت ونزلت اسلم على عماتي وعمامي وبناتهم الولد مو كلش نتقرب منهم بس منتصر مسموحلي اسولف وياه لانه جبير وارمل..

رجع ابوي من الكوت وسلمنا عليه واحد واحد ومن دون الكل طول بسلامي وحضنتي، استحيت من بنات عمي واستخطيهن اشوف نظراتهن من ابوي يحاچيني ويدللني محرومات من هالشي فـ ما احب اطوخ علاقتي بي گدامهن وبساع اتملص من ايده واشرد..

-شيخ علي: هههههه استحت شيخة الشيخات

ضحكت خجلانة يعرفني استحي ويسويها متعمد يحب يحرجني گدامهم، فلتت نفسي وركضت للمطبخ اشوف شنو ناقص للغدا شفت ابرار واگفة تگصص طرشي مدبس وتحطه بطاسات صغار..

-ابرار: ايدي تحرگني من الطرشي روحي صيحي بنات عمچ يجن يسون بدالي

-وخري انا اسوي بدالج

-لاا شيخلصني من عمتي من تعرف انطيت شغلي الج صيحي للبنات هنه يسون احسن

-لج عيب خطار جايات فشلة وخري انا اسوي

-كيفچ

راحت تغسل ايدها وطلعت من المطبخ، وگفت بدالها اكمل الطرشي وطلعت خضرة نظفتهن واسمع صوت التگلاه جاي من المنور مال المطبخ هسة ياله استوعبت يا مسودنة واگفة بالمنور تگلي بهالبوخة؟؟

ركضت افتح ستارة المنور وچان اشوفها عبق! عبق كاتها العرگ ووجهها صاير احمررر واگفة تگلي سمچ..

-عبق!! ولچ ليش هنا تگلين تعالي بالمطبخخ

-لا خالة گالت هنا نگلي

-ولج المنور حار كللش ما تحسين انتِ عايني وجهچ احترگ

-ميخالف حبيبة

-امي گلتلچ ما تطلعين منا مو؟

-اي

سكتت ورجعت للمطبخ رحت سديت الباب وقفلتها ورجعتلها سحبتها من ايدها اطلعها بره ما رضت الا سحسلتها..

-قفلت الباب عووبة محد من اخوتي راح يشوفچ

-واذا شافوني؟ واذا اجه احد والله تكتلني وتذبني بالشارع

-محد يجي روحي غسلي وجهچ راح تموتين وگعدي ارتاحي هنا

سوت مثلما گلتلها اباوعلها وداخلي محترگ قهر، گعدت على الكرسي تتنفس بصوت عالي وتهفي وجهها متخربطة، صدرها ورگبتها مطعونات مبين ضغطها نازل..

رحت للثلاجة طلعتلها قوطية عصير وانطيتها اخذته من ايدي تضحك گوة وتگول..

-والله لو خالة سلوى تعرف شربت من عصيركم تطلعه من خشمي

-اگلها انا شربته معليج انتِ

هزت راسها مبتسمة وشربت القوطية، بعدها هستوهة تتكمع منها واجه شخص حاول يفتح باب المطبخ طلع الشربت من خشم عبق ووگفت ترجف بمكانها..

-حبيبة حبيبة الباااب حبيبة

-مقفول خايبة گعدي

-خاف خالة اجت اني راجعة للمنور

-گعدددي هسة اشوف منو

ركضت هي لبوابة المنور تباوع مناك وانا صحت من مكاني..

-منووو

-انا علي الدر

ذبيت نفس وهي هم تنفست مرتاحة وطلعت من المنور رجعت لمكانها، اشرتلها تلبس شال اعرفها مو محجبة بس امي ما ترضى ذبته على راسها ولفته زين، دخل در مستغرب يباوع علينا وركز بـ عبق المتخربطة..

-شبيكم شصاير؟؟

-حبيبة: تخربطت

-يا بوية گلنالكم نجيب اكل من برا ليش تعاندن

-در عادي متعودات احنه بس عبق چانت تگلي بالمنور

گلب وجهه مزعوج وعبرها راح يغسل ايده ووجهه وبلل شعره، دار وجهه لـ عبق يگول..

-سباعية عبق ام بيت معدلة

ابتسمت ونزلت راسها مستحية ضحكت على حركاتها تكت من الخجل من يحاچيها در، نشف ايده بمنشفة المطبخ ومد عيونه بالمنور يشوف..

-چا ابرار وين؟

-هسة راحت چانت تسوي الطرشي

-ها، حيدر ما جاب اللبن؟

-اي دزيته قبل شوي

-شلعي اذاناته اذا عاندچ لا تخلي على راحته

-يااا در ابنك هذا

-ابني وانعل والديه هالفاهي حارگ افادي هالولد بعجزه

-عبق: لا خطية حيدر ميتعاجز ابد ورأساً راح

هز راسه وطلع من المطبخ ضحكت اباوع لعبق وهي هم ضحكت وتحرك اكتافها..

-عبق: ولج يشلع گلبي ياله يطلع حيدوري يموتني

-حبيبة: اعرفه هالمراهق الاغبر

ضحكنا ثنينا وكملنا الغده فرشنا السفرة على طول الصالة وجبنا الاكل واللتمينا كلنا الا تَـمني ما اجت صعدتلها گالت بس تسبح وتجي، نزلت واشرلي ابوي ما اگعد الا بسده لميت نفنوفي وگمت اگعد وين ميريد وبدينا ناكل..

ضحك وسوالف واخوتي وولد عمي واحد يداهر اللاخ وبنات عمي متخبلات لان الولد يضوجوهن ويشمرون عليهن عظام السمچ وياخذون سمچاتهن..

-ليلة: ابا الحسننن هاي سمچتييي

-ابا الحسن علي: صدگ؟

گالها وحطها بحلگه ياكلها طنگرت ودارت وجهها عنه، ضحك وغمز لأختها رفل تفلسلها سمچ وتحط گدامها هزت راسها رفل وغمت اختها..

-رفل: غبرة

-ليلة: جوزي عني رفل

-رسمية: چا وينها....

ما كملت جملتها وانقطع صوت الكل ويه نزولها من الدرج، نزلت تَـمني عطرها سابقها فاتحة شعرها ولابسة فستان ماروني مخصر من فوگ وكلوشة يوصل للكاحل.. فكوا حلوگهم الولد وابوي صار يدور عيونه بين الولد وعمامي..

-تَـمني: سلام

-ناصر: انتِ ارملة اخوي نعمة؟؟

-تَـمني: اي اني

اللتفت على ابوي عاگد حاجبه ومعصب، وگف عمي صمد بمكانه وگال كوة..

-هلا بيج عمي

محد بيهم كمل اكله وغسان عيونه ما نزلت من تَـمني، فر بيده عمي ناصر وگال بأنزعاج..

-بت حديثة شعدها هنا وين اهلها هاي

گام من السفرة وطب للديوان گامو باقي الكبار عمي صمد وابوي واخواني ومنتصر بقوا غسان وفهد ورضوان..

-الامـير علي: يا ولد!

انتبهوا لصوت الامير وگامو بسرعة يرحون وراهم للديوان، شفت امي فرحانة وركضت للهول تتسمع عليهم وامي رسمية راحت وراهة، اجتني تَـمني وهمست..

-ملابسي بيهن شي حبيبة؟

جاوبت ليلة من مكانها مستغربة..

-لا عاديات

-تَـمني: لعد شبيهم؟

-رفل: مادري امشي حبيبة نتسمع عليهم

-حبيبة: مو...

-ليلة: اني اساعد عبق بالمواعين روحي شوفي شكو

هزيت راسي اي وطمنت تَـمني كلشي طبيعي ولتخاف ورحت للهول ويه امي ومرة ابوي وما اسمع غير صوت عمي ناصر يجلجل بالديوان..

-ناصر: بت حديثة معيشها ويه ولدك ابو علي؟؟ شلون هاي لا فوگاهة ارملة!

-شيخ علي: بيتها هذا ناصر نعمة كاتبلها نص البيت هذا بإسمها

-اشتري منهاا خوية اشتري ورجع البت لاهلها عيب شني وين كاعدين بأوربا نزلت تتبختر وشعرها مفلول كدام الزلام خلت الولد تسبل عليها

-صمد: انا ويه ناصر خوية ابو علي وگفتك ويه البت تنحط على الراس بس ما يصلح تبقى ببيت كله ولد

-الامـير علي: عمي جاي نگلكم ماعدها اهل! شلون نعوف البت تنام بالشوارع؟!

-ناصر: نعمة عنده املاك ببغداد ترجع هناك وتعيش وحدها

-ابا الحسن علي: افاا وانا اخو الامير بت حديثة تبقى وحدها ببيت شني ماعدنا غيرة؟

-صمد: بس البت طالعة من مسؤوليتنا لا عدها خلفة من نعمة ولا يربطنا بيها شي

-شيخ علي: وضميرك ابو رضوان وين راح؟ ضميرك يرضاها تعوف بت مثل الورد وحدها تنهش بيها چلاب السوء

-ناصر: چا ماكو حل الا تتزوجها

شهگت وزلغت خدها امي، باوعت لامي رسمية وجهها صار احمر ورفل فكت عيونها مصدومة..

-رفل بهمس: معقولة عمي علي يرضى؟

-شيخ علي: اتزوجها شني بگد بتي شو ما تعرفون تسولفون انتم!

ذبيت نفس وامي ومرة ابوي هم ارتاحن، صارت لغوة وحچي هواي بس حرگ گلبي عمي ناصر من گال بتعالي..

-چا شسوي انا أتزوجها واستر عليها

-علي الحـق: هههههههههههههههههههههه

-علي الكـرار: هو انتَ تلوب على هاي

-شيخ علي: يا ولد!!!

-الامـير علي: ليش تزمخ بيهم بوية؟ صدگ چلامهم چان كال ازوحها لواحد من ولدي ليش الا هو يتزوجها؟!

-ناصر: ولدي متزوجين وطالعين ما عايشين وياي وبعدين انا شبيه؟؟ لو ما يحصلي اتزوج؟؟

-الامـير علي: عمي انتَ متزوج شتسوي ببت بكبر بنياتك!

-ناصر: انا اعقد عليها وما اتگرب منها چا شسوي غير نستر عليها

-الامـير علي: ليش هي عريانة حتى تستر عليها؟؟ لو شفتها هايته بالشوارع؟! البت كاعدة ببيتنا معززة مكرمة ما عليها شي!

-صمد: وشني حاطيها تتصدقون عليها انتم؟ عايز الشيخ علي بعد ناس بييته

-الامـير علي: ما متصدقين عليها ولا متفضلين البت عدها حصة مثل مالنا حصة بهالبيت حگها وشرع الله هذا ما اظن نحتاج نعيد ونزيد بهالسالفة لان حشاكم مصخت!

صفگت ايدها رفل على كيف فرحانة وهمست بيني وبينها..

-ولج فدووووة لحلگه محد غيره يلصمهم على حلوگهم

-سلوى: نچبي انتِ

-رفل: موتي قهر سلاوي

حچتها بالضحك وطلعت من الهول، باوعت لامي واگفة وتطحن بروحها وشفت عيون مرة ابوي نطت ويه جملة عمي ناصر الخبيثة..

-شيخ علي انا مادري عنكم بس اشوف گعدة البت ببيتكم عيبة ويجوز ولدك مستقتلين يدافعولها عبنهم مستفادين منها

-شيخ علي: ناااصر ابلع صووتك ماريد اسممع حسسك

-علي الدر: گاعد ببيتنا عمي وتظن بينا سوء؟ ليش اشايفنا ما متربايين لو جايين من الهور؟؟

-صمد: على العين والراس انتم وتربيتكم ما تنعاب بس خوية هذا مو چلام ناصر هذا چلام الناس من يجون ويشوفوها هناا

-شيخ علي: والحل؟؟ شتريدنا نسوي نطردها؟!!

-صمد: الحل الوحيد الحضرني تخلي واحد من ولدك يعقد عليها

ضربت امي رجلها مشعوطة بينما الاصوات سكنت بالديوان، باوعت لمرة ابوي وشفتها تأشرلي اطلع من الهول متت اريد اسمع ردهم بس ما سمحتلي واخر شي سمعته هو جملة عمي صمد وهو يگول..

-حتى تتحاشى كلام الناس وتصير گعدتها ببيتك وجوه جناحك حلال ومابيها حرمة اعقدلها على واحد من ولدك وانا اشوفن احسن واحد يعقد عليها وتناسبه هو علي التـقي..

طلعت من الاستقبال اللوب سمعت اصوات تداخل بس اكثر واحد ميزت صوته هو الامـير علي وبعدما حچى الكل سكت بس ما جاي اعرف شلون سكتهم وشنو گال لان واگفة بعيد وكلشي ما افهم..

بقيت واگفة بالصالة انتظر مرة ابوي وامي يطلعون شفتهن اجن بأتجاهي ومرة ابوي لزمت ايدي وهمست بيناتنا..

-حبيبة ماريد احد يعرف الصار جوه اياچ يا يمة ازعل عليج والله

**

"تَـمني"

گاعدة على اعصابي حتى غده ماكدر اكل، بنات عمهم ونسوان عمامهم وعماتهم كلهن هنا يتفرجون عليَّ بس بالي مو وياهن بالي كله بالديوان اريد اروح لشيخ علي واحجي وياه عن گعدتي هنا..

شفت حبيبة طلعت من الهول رحت اسئلها عن الصار بسرعة گلتلي عمامها ما قابلين بس صار شي والامـير علي سكتهم..

-شنو صار؟

-حبيبة: مادري عمي صمد حچه وسمعت صوت الامير حچى فوگاه بس ما سمعت شنو گال

-حبيبة حتى لو الامير سكتهم ماريد تطلع عليَّ سمعة مو حلوة واورط ابوج واخوانج اريد احجي ويه الشيخ عفية

-تَـمني محد يسترجي يحجي عليج لا تخافين ابوي ما يسمح بهذا الشي

-ميخالف اريد احجي وياه

-تعاي طلعوا عمامي

اخذتني للديوان وگفت تعدل شالها ودگت الباب، فتحلها علي السور مبوز ويباوعلها من فوك ليجوه..

-حبيبة: شنو شبيك

-علي السور: انتِ ما تستحين ولج؟؟

-شنو شبيك علي

-علي السور: بالعباس فلا تستحين كسرتي وجوهنا

انخلست من اسلوبه ضايج كلش ويباوعلها ما عاجبه، بهتت حبيبة حتى الكلام ضاع منها بلعت ريگها مرتبكة وهمست بخفوت..

-شسويت سور احجي

-ما تستحين وانتِ شايلة كل هالجمال؟

-هااا

-انعل ابو هالوجه الحلو يرحولج فدوة ولد مسعود

-اوووف علي متت خوف هو هيج

ضحك وگرص خدها بيده وباس اصابعه، ضربته خفيف على زنده وعبرت مبتسمة تدخل للديوان، اللتفتت ويه صفير علي السور وعيطته..

-علي السور: هلااا بأختي الحاتة

-الشيخ علي: وووتفگ شني هالاستهتار ولك

-حبيبة: بوية تسمحلي ادخل؟

-هلا هلا بعد ابوچ تعاي اشبع منج شوف

دخلت لابوها واني بقيت واكفة بالباب محد موجود هنا غير ابو حبيبة وعلي التقي وعلي الدر وبدر والامير باقي الولد طالعين..

-شيخ علي: تعاي عمي تَـمني تفضلي

سلمت ودخلت اگعد بطرف الديوان بالاخير بينما الشيخ ظل ساعة يبوس ببنته ويتغزل بيها ابتسمت من صار يلزم اصبع اصبع بيدها ويبوس بيهن ويدللها..

-شيخ علي: يا بعد بيتي وكل اليسيرون

-ربي لا يحرمني منك حبيبي انتَ

-انتِ حبيبتي وبنص الافاد مچانچ

باست ايده وراسه وانتبهت لاخوانها كلهم يباوعولها مبتسمين عبالك ابوهم يتغزل بيهم مو بيها لهدرجة يحبوها، رفع راسه الشيخ الي مبتسم وعيونه تلمع بفرحة ويسولفلي..

-شيخ علي: يوم سعد يوم بشروني بولادتها كل سنة بميلادها اسوي عزيمة السلف كله يحچي بيها هاي بنيتي وعزيزة گلبي كل مالي وحلالي يروح فدوة لرجليها

-تَـمني: ربي يحفظها الك عمو

-حبيبة: ههههه بابا كافي تخجلني

-شيخ علي: يرحولج فدوة تسعتهم اي والله

-علي البـدر: شسالفة بوية بديت اتحسس انا

-شيخ علي: تحسس ياهو كاضك

حچاهة بالضحك يداهره وغمزله، ابتسمت ونسيت سالفتي انسجمت وياهم طلعني من جو السعادة واللطافة صوت الشيخ وهو يگول..

-گولي بوية تَـمني بلسانچ حچي

-تَـمني: احم.. صح عمو فعلاً اريد احجي وياك بشي

-اسمعچ عمي كتيهن

ابتسمت على المصطلح وعلى ابتسامته شگد لطيف هالرجال، نزلت عيوني منحرجة وجريت خصلة من شعري احطها وره اذاني وگلت بدون تردد..

-عمو اني اشكر حُسن استقبالكم بس من رخصتك ماريد اعيش هنا وراح ارجع لبغداد

-وين ترحين؟

رفعت راسي اشوف منو السأل وانتبهت علي التـقي الحچاهة، ابتسمت وجاوبته..

-بيت نعمة ببغداد صار بيت ورثة وسالفته تطول بس هو عنده شقة ببغداد بيها مستأجرين اطلعهم منها واني اسكن بيها

-وحدچ؟!

وهسة الامـير علي سأل ونبرته چانت مستنكرة وحاجبه مرفوع..

-اي علما ترجع خالتي

-الامـير علي: وشبي بيتنا ما يعجبچ؟

-لا اكيد يعجبني بس اني...

-حبيبة: بابا تَـمني تكول ماريد اورطكم

-الشيخ علي: افاااا وانا ابو علي تورطينا شني

-تَـمني: عمو ماحب المشاكل وانتو ما مسؤولين عني ممضطرين تدافعولي وتتحملون حچي من الناس بسببي

-الشيخ علي: بابا عندج حگ بالبيت حصتج هاي ياهو اليحجي سكتي بسند البيت وارتاحي

-تَـمني: بس اني اريحلي اذا ارجع لبغداد والله

-علي الدر: بس عيبة بحگنا هاي خوية

-تَـمني: لا العفو منكم بس انتو..

-علي التـقي: سوالف العفو وعذراً ما تمشي هنا، عيبة تجي ارملة عمنا وتدوس بيتنا تالي تطلع تعيش ببيت وحدها

-تَـمني: بس ليش؟

-الامـير علي: لان ماعدنا نسوان تعيش وحيدها

-الشيخ علي: وهاي جاوبوچ سباعي

-تَـمني: عمو ماريد اعيش بأحراج وياكم مع احترامي الكم كلكم واسفة على كلمتي يمكن غير محترمة بس احنه مو اهل ولا يربطنا صلة دم واني اليوم ياله فطنت واستوعبت هالشي من شفت نظرات عمام حبيبة ونسوان عمامها

-شيخ علي: اعتبري روحج بنيتي اخت حبيبة ولا تفكرين زايد بوية تتعبين بيتج هذا ومحد اله حگ يحچي وياچ حرف

-حبيبة: بوية تَـمني تگول ليش ما نقسم البيت او تبني وحدها بالبستان حتى ترتاح

-الامـير علي: هه

كل الانظار توجهت اله وهو بقى گاعد وساند جسمه على عكسه ويفر بسبحته، تنرفزت من تصرفه بس ما علقت بسبب كلام الشيخ..

-شيخ علي: انا صح ما يعجبني تطلعين من البيت بس تدللين نشوف طريقة ترضيچ بنيتي

-شكراً عمو ما راح انسى فضلك

-الشيخ علي: مو تفضل هذا حگ

ابتسمت فرحانة واترخصت منهم، طلعت من الديوان واحس جبل انزاح من گلبي بقى بس اتواصل ويه خالتي واعرف مكانها حتى اگدر ارجع لبيتها بما ان بسام انسجن..

گعدت بالحديقة بره عدهم مرجوحة ماريد ادخل جوه الوجوه مگلبة عليَّ واحس وجودي غلط بيناتهم، بقيت اهز روحي بالمرجوحة واتفرج على حديقتهم ما شاء الله كلش حلوة وچبيرة ومتروسة ورود واشجار.. اللتفتت اباوع للحايط البي الطرمة الثانية واتذكر حبيبة گالت عدهم بستان وره البيت عامر..

-لا تتحركين

نزيت على صوته وباوعت علي التقي واگف گدامي ويباوع لوجهي، حركت راسي مستفهمة شبي وشفته يتقرب مني توترت وردت اتحرك وصاح..

-لااا تگومين

-ليش شبيك

تقرب مني اكثر وفلتت ايدي من يدة المرجوحة وحسيت شي طار بصفي انتفضت خايفة وبسرعة اجه يركض ولزمه بيده يضحك..

-تَـمني: هاي چانت على ايدددي

-ههههه اي فراشة

-اييييييع

-ايع شني ولج باعيها شحلاتها

لازمها من جناحاتها ويقربها عليَّ، گمت من المرجوحة اركض بعيد وهو يضحك ويركض ورايه بيها يريد يطيرها عليَّ..

-اخاااف لا حباب وخرها اخااااف

-هههههههههه فراشة هاي خير وبركة من تنحط على ايدج شبيچ

-لا تقي فدوة حباب وخر

-يله هذا هو راح افلتها

-افلتها هناااك..

عفته وركضت لجهة ثانية وحسيت برجلي تنلوي وتطب بحفرة، عطت متوجعة ووگعت بالطين من الفشلة ما گمت بقيت گاعدة واللوب بمكاني..

-علي التـقي: الله الله

اجه يمي ونزل نفسه يضحك خفيف من شاف وجهي المتفشل، جر عودة من الگاع ومدها الي يگول..

-كضيها وانا اجرچ

-توجعت ليش تضحك

-ههههههه اسف والله بس شكلج يضحك

ابتسمت وكمشت بالعودة وهو صار يجر بالعودة حتى اگوم، حسيت بشعور غريب وفرحت لانه ساعدني وما حرجني ولا مدلي ايده..

-هلا هلااااا

اللتفتنا ثنينا على صوت صفير وضحك واگفين ابا الحسن علي وعلي الحق والامير علي على جهة الطرمة يتفرجون علينا..

-علي الحـق: اويليي لقطة مال مسلسل تركي

-ابا الحسن علي: نشمي تقي نشميي

-الامـير علي: شنو صار؟

-علي التـقي: البت وگعت ولكم ادبسزية شو انتو ما تستحون

-علي الحـق: اوووف چا شماله حظي

خزره الامـير علي ودفعه من صدره بخفة معترض على جملته، جرني تقي واني صح بصعوبة كلش گمت لان طين بس حاولت جاهدة احط ثگلي كله على العودة وگمت اوگف..

وگفت انفض بفستاني تدمر وعلي التقي ينفض بيده وشمر العودة بعيد، باوع لاخوانه وگال بنبرة يبرر الموقف الصار..

-وگعت كله من وره فراشة

-ابا الحسن علي: اححح اولها رومانسية

باوعوله حق وامير بتك عين وهو ضحك يشمر بروحه على الامـير علي وهمس شي بأذنه دفعه امير عنه وگال من وره خشمه..

-الامـير علي: الحمدلله على السلامة

عافنا وراح والولد وياه يمشون خرب كل مواقف التفشل هو موجود شلون حظ نفايات!

-علي التـقي: فوتي جوه راح يصير المغرب

-تمام

-وانتبهي لخطوتچ ولد الحرام هواي

گالها وراح يطلع من باب الحوش، فسرت جملته ان ممكن يجي واحد يستغل هالموقف ويحاول يتقرب مني وبعد ماعرف تفسيري صح خطأ المهم هيج فسرته..

دخلت للبيت جوه وصعدت لغرفة حبيبة سبحت وبدلت بتراك رياضي وگعدت على چربايتها، صعدتلي تجيبلي غده بس ما اشتهي گوة اكلت وگعدت انتظر اللا شيء..

-حبيبة: ليش ما تنزلين يمنا تكعدين

-مابيه حيل اسمع حچاية تسممني

-محد راح تحاچيچ امي رسمية گالتلهم عندج حصة بالبيت

هزيت راسي وگمت وياهة ننزل جوه، اخذتني لغرفة شمس شفت البنات كلهن هنا وما شاء الله شكد عدها بنات عم و عمة.. گعدت على الچرباية مال شمس وهي واگفة گبال الميز مالتها وتسولف..

-شمس: غير تخبلت عليه شفته يباوعلها گتله هاا شكو خو ماكو شيي خير ان شاء الله

-حبيبة: ولج فاتتني السالقة عليمن يباوع

-شمس: بمصر رحنا لمطعم وطبن راقصات ولج حبيبة يبوووو شصار بيه گبيت من القهر واباوع لـ بدر فاك حلگه وصافن ظليت يومين انا ما احاچي

-ليلة: ههههههه يستاهل

-شمس: اي والله يستاهل چا شنو كاعدة انا طنطل

-رفل: اي زلمة ومن حگه يشوف وشكو بيها

-ليلة: اووع رفل سكتي شنو مرته مو بعينه؟؟

-زهراء: عاد رفل لو شما يسوي الزلمة تطبگ وياهم

-رفل: خرب لا ولج بس مادري شو انا ما تحسست يعني اتخيل زلمتي يعاين لغيري ما راح اهتم عندي ثقة بروحي

استلمنها البنات كل وحدة من جهة وحبيبة تفر بيدها ما عاجبها وعبق مدت رجلها بحضن رفل وسندت جسمها على ليلة..

-عبق: تخيلي انتِ بس تخيلي تجي وحدة تتماوع ولابسة شلاحي وترگص گدامه شنو ردة فعلج؟ عليج الله جاوبي وانتِ تتخيلين مو بس حجي لسان

-رفل: اشگه واشگها نصين

-ليلة: هااا رفل چا شگلنا احنه طگيهة ولج عبيقة طگيهاا

ضربن بيدين بعض منتصرات على رفل، اسمعلهن ساكتة ابد ما شاركت بالحديث رغم اكثر من مرة وجهنلي سؤال بس أجاوب برسمية بعدني ماعرفهن شنو واكت گدامهن الاول والتالي..

الي عرفته رفل وليلة خوات يصيرن بنات عمهم ناصر بس ماكو ذرة شبه بيناتهن، رفل كلش جميلة وشكلها ملفت للنظر عيونها كبار ومفتوحة واسعة وبشرتها تلمع  وشعرها اسود مموج عبالك مسويته بصالون اما ليلة فـ عكس اختها بكلشي، ليلة شقراء وبياضها ناصع اشبه بالباهت وشعرها ناعم وسرح وعيونها اصغر من رفل..

صار المغرب گمنا نصلي ونساعد بالعشا وما بطلن سوالف وضحك كلش استمتعت وياهن، بمرور الوقت انسجمت ويه رفل كلش اجتماعية وسبورتية وكلشي عدها عادي..

صارت بالـ 11 بالليل والبنات راحن ويه اهلهم واحنه صعدنا فوگ، گعدت ويه عبق بالمخزن وعلمتني شوية حياكة صح صعبة بس حبيتها..

-عبق: تَـمني تأخر الوقت گومي نامي ما نعستي

-اي نعست وانتِ هم راح تنامين؟

-اي.. بس تَـمني

-ها

-لا تگولين لاحد چنتي كاعدة يمي

-ليش همه يعرفون بوجودج عبق!

نزلت راسها خجلانة ما ردت احرجها اكثر وطلعت من المخزن، بدون لا اسأل عرفت محد من الولد يعرف بوجودها شفتها تختل بالمنور بكل مرة يطبون للمطبخ..

رحت لغرفة حبيبة فتحت الباب وشفتها مقفول وگفت انتظرها تفتحه وبهالاثناء طلع علي الكـرار من غرفة يدردم..

-علي الكـرار: الا اكول لابوووي

وعلي التقي يجاوبه من الغرفة..

-طبك حريشي

-علي الكرار: تقي سوف تندم كثيرراً

-علي التقي: ما اندم على مخانيث

-انتَ شمعرفك بيهممم وكلت عنهم مخانييث

باوعلي ضايج بس بسرعة تغيرت ملامحه وابتسم من صارت عيني بعينه..

-علي الكرار: شلونچ ان شاء الله مرتاحة ببيتنا

-مرتاحة تسلم

-اذا تحتاجين شي بس گولي عـ...

-علي التقي: ووولك بطل زحف بططططل

نزينا ثنينا من شفنا نعال طاير يجي بنصنا، حطيت ايدي على گلبي فازة وطلع علي التـقي من الغرفة..

-علي الكـرار: ما زحفت شبيك جاي احسسها هي ببيتها

ضحك تقي وضربه على ظهره وگال..

-عبالي جاي تزحف ولك

-لا عيب مو لهدرجة

غمزلي وراح يضحك، هز راسه علي التـقي مأيس وگال..

-ما يتوب من سوالفه كرار بس ما يقصد شي لا تنزعجين من

-لا ابد ممزعوجة

ابتسم ودخل لغرفته، بقيت انتظر حبيبة تفتح الباب لا ساعة ولا ساعتين مادري شدتسوي مليت وگعدت على الدرج انتظرها، مر الوقت وما فتحت قفل باب غرفتها تعبت ونعست واني كاعدة هنا..

-شو هنا؟

اللتفتت على صوت الامـير علي جاي من ورايه، سويت مجال حتى يگدر يعبر باية الدرج وجاوبته..

-انتظر حبيبة تفتحلي الباب

-طاردتچ؟

-لا بس قافلتها يمكن دتسوي شي

-مثل شنو

سكتت ماعرفت شجاوبه وهم ماعرف حبيبة شدتسوي، اول شي اجه بعقلي گلته بسرعة..

-دتسوي ليزر

فتح عيونه جاحظهن واني هم اجتني لحظة ادراك على الچفصة الچفصتها، مادري شجابه على بالي وليش گلت ليزر يمكن لان شفت ليزر منزلي عدها بالغرفة قبل شوية..

-لا لا مو ليزر لا

-اشش

-لا تأشأشني

-عندج مرض البعرة سامعة بي؟

-لا شنو هذا

-العلماء اكتشفوا بالجديد وسبحان الله ثاني حالة اشوفها گدامي انتِ

-شبيه يعني؟ شنو هالمرض لا تخوفني

-مرض خطير هذا

نزل باية جواية وگعد صرت اني اعلى منه بشوية، ركزت وياه وهو يحجي..

-مرض البعرة هذا انصاب بي ابو كربله صاحبي خطية ما تعالج بسهولة الا اخذته وشديته بالعباس

-اگولك انتَ دتضحك عليَّ؟

-لا ليش اضحك صدگ هاي

-يعني شلون اشد روحي بالعباس

-انا اشدچ لا تخافين اجيبلچ علگ من راية العباس واشدچ بيها بالضريج

-وتضربوني؟

-ليش نضربچ؟

-مادري تخيلت تشدوني هناك وتضربوني لحدما اصير زينة

-ههههههههههههههه

-شنو

-ههههههههه خرب عقلج فهاوي

-انتَ دتضحك عليَّ مووو

-هههههه مصيبة انتي بالعباس مصيبة

-شبيه

-هههههه شبيــــه

-اني صوچي مصدگتك لازم اتعلم على سوالفك

-شبيهن سوالفي

-تضحك عليَّ وتستغل كلشي لصالحك

-هاا!

-اي!

-وجعي بگلب العدو بيمن مستغلج انا

-بالبصمة مال زواجنا لو نسييت

-ساعدتج بيها يالفاهية

-ماريد مساعدتك

-خوشن

-صدگ تذكرت

-الله يستر

-شكراً لان ساعدتني و دافعتلي كدام عمامك

سكت وشفت تفاحة ادم تصعد وتنزل عنده، ركز نظره عليَّ وگال بهدوء..

-اسف

-ليش

ابتسم وگال وهو يحرك اكتافه بلا مبالاة..

-لان ساعدتج وانتِ ما تردين مساعدتي بس يله التوبة هاي اخر مرة

-لا لا ولك

ديگوم وكردة فعل مني بالغلط سحبت ايده اجره وفلتتها بسرعة مرتبكة، حط ايده بجيبه بسرعة وحمحم يرجع يگعد عدل بدون ميعلق على تصرفي..

-تَـمني: احم.. اقصد اني ماريدك تستغلني امير مو متساعدني

-وانا شحصل اذا ساعدتج

-تحصل كلمة شكراً مني كل يوم

رفع راسه يباوعلي وابتسم، بادلته ابتسامة وگلت بالضحك..

-اصلاً متحتاج شكر مني مو تگول انتَ جسر للطيبين

-اي وعلي

كبرت ابتسامتي وهو گام من مكانه يسد دگم التشيرت مالته ونزل يروح للمطبخ، بقيت گاعدة بمكاني وانتبهت بعدني مبتسمة خفيتها بسرعة ورجعت احاول افتح باب غرفة حبيبة..

بعدها مقفولة أيست ونزلت جوه اكعد بالصالة ماكو احد هنا وظلمة.. گعدت فترة اتصفن وتذكرت المرجوحة الي بالحديقة وگلت اطلع اتونس بيها..

طلعت من باب المطبخ للحديقة ورجعت بسرعة ادخل جوه من شفت الامـير علي گاعد على الكرويتة الي بالحديقة وبصفه وحدة، من ركزت بصوتها عرفتها رفل صوت ضحكها عالي وامير كل شوية يرزلها..

-صوتچ خايبة شبيچ انتِ

-رفل: ههههه شمالك لا تصير معقد واذا ضحكت

-ما تخافين من ابوچ انتِ تايهة بنصاص الليالي وجايتنا وحدج بالعباس لو عدتيها اكسر رجليج

-اجيت اشوفك بس مو شكول واحد يجي يشوفك عشتو

-الامير علي: ماريد اشوفچ شصخم بيج

-يعني متعنية وجايتك بنص الليل هيچ تتلگاني؟؟

-روحي ما نريدج

-لا ما تفيد انتَ وينه ابا الحسن شوكت يرجع

-ها تردين تقطي

-ههههه اي اخذ منه فلوس وانطي اخبار ليلة

-طفت ليلتج ام فليس

ضحكو ثنينهم وكملوا سوالف ويه بعض واضح ميانة قوية بيناتهم واني الفضول اشتغل عندي، باوعت لشباك المطبخ طابقين صاير شباك طويل وفوگاه شباك صغير جبت كرسي وصعدت عليه فتحت الشباك الصغير صاير فوگ ما انشاف زين..

مديت راسي من الشباك اباوعلهم امير ديدخن فيب وهي كاعدة تاكل اصابع مملحة، سولفوا بمواضيع عشوائية ومن خلال گعدتهم اكتشفت رفل متعلمة تشرد نص الليل من بيتهم وتجي هنا حتى تشوف امير وتسولف وياه ولاحظت هو هم ينتظر جيتها وميعترض من تجيهم وحدها بالليل..

-رفل: الجو صاير يخبل

-حلو لولا وجودج

-ههههههههههه شكد خبيث هالرجال

-هذا اجاچ حسن

-رفل: لك هلااا ضلعيي

-ابا الحسن علي: هاي ياهي عدنا رفل حموضة

-رفل: هاي شبيكم والقران ازعل وارجع لبيتنا

-ابا الحسن علي: سولفيلي على ليلتي ورجعي لبيتج

-رفل: ورررق

-انچبي ما شايل فلوس

-چا ما احجي شي

-بشرفج رفل احجي

-امير ورق

-ابا الحسن علي: اخيك انطيها بس خلتسولف

-الامير علي: قطيتوني انتم ولد الاوادم

ضميت روحي على صفحة من اجه ابا الحسن خفت يشوفني لانه واگف، طلع امير من جيبه فلوس انطاهة ضحكت وحطتهن بجيب الجبة مالتها وگعدت متربعة على الكروتية وبدت تغرد على ليلة..

-اليوم ليلة جانت زعلانة لان اكلت سمچتها وگلتلي اكرهه وحزت بخاطرها

-ابا الحسن علي: تزعل على سمچة؟؟ عمي عشر كيلوات سمچ باجر يمها

-الامـير علي: انچب انتَ لا تترعن ثانياً هي سمچة شدعواها

-رفل: بعد انتم ما تعرفون ليلتي حووساسة

-ابا الحسن علي: اروح سحل للحساسة

-الامـير علي: انلصم بلا هيلگة يله روح

-ابا الحسن علي: شنيي انا شفهمت منها غير ليلة تكرهني

-رفل: لان هاي المعلومة الوحيدة الاملكها اليوم عود تعال باجر انطيك معلومات جديدة بعد راسي

راح ابا الحسن ضايج، نزلت من الكرسي بسرعة وختلت وره الثلاجة من دخل للمطبخ وصعد فوگ، ماعرف ليش ما رجعت لغرفة حبيبة بس گعدة رفل وامير شدتني استغربت من شخصيته وياهة يضحك ويحشش ويداهرها وهي هم ماخدة راحتها كلش، صعدت على الكرسي ورجعت اباوعلهم..

-رفل: انطيني نفس من الفيب

-تكومين لا اركعج براشدي

-اهوووو شبيك انتَ منفس عليَّ

-چا شتسوين بالفيب ما تستحين

-راح تخلص انطيني نفس حباب تظل بنفسي تره

-نفس واحد بس

-جيب

جرته من ايده تدخن بي وهو يصيح عليها بالهمسة كامت تركض بالحديقة وهو وراهة متت ضحك عليهم شال عودة من الگاع وضربها بيها وهي هم شالت عودة تتعارك وياه بيها يتبارزون مثل السيوف وثنينهم يضحكون..

رجعوا لمكانهم وره ما فاز عليها ووگع عودتها ورجع الفيب بجيبه وكملوا سوالفهم سوه..

-رفل: صددددگ نسيت اعلق على مرة عمك الجديدة

-ارملة عمي

-اي نفس الشي كالت حبيبة انتَ جبتها واصريت تعيش وياكم

-اممم

-ليش عود ليش هاا ليش ليش ليش..

تحجي بمكر وتضربه بعكسها وتضحك..

-ولج لا تكضينيي خرب روحج

-هاا نسيت تخاف من الحرام انتَ المهم ليش ردتها تجيكم

-لانها وحيدة

-ايييييي كتلي وحيدة

-اي چا شنو

-اي صحيح ايي

-شبيچ ولج

-امير من الاخير البنية تموت

-وشسويلها

-بشرفك مو حلوة؟؟

-شعليه بيها عيب هالحجي رفل

-الجمال مو عيب والله لطيفة وحبابة ومن ذني امهات اوي ما اوي وفاااهية تاخذ خيرة ياله تطلع من حلگها الحچاية

-يلا كافي رجعي لبيتكم

-شو چنها ما عاجبتك شبيك

-بكيفج تفسرين انتِ

-يعني تعجبك موو موووو

-خرب لاا تكضيني ولج شبيچ

-ههههه انسى شبيك بعدين امير اني ضايجة ونسني

-اللف وصلة واركصلج؟

-ياريييت

-بت الچلبب

كفخها على راسها فوگ الحجاب وهي تضحك ممهتمة، ابتسمت على اجوائهم وتونست واني معليه، لحظات گعدو بهدوء ورفل الي قطعت الهدوء..

-اموري

-ها

-انتَ اخوي وصديقي وبير اسراري

-ادري

-ربينا سوه ومتعلمة عليك ويشهد الله المكان الوحيد الاطلعله بدون علم ابوي هو بيتكم بس حتى اجي واسولف وياك

-ادري رفولة ما تشوفيني ما احجي شي

-همزين من تعرف

-شبيچ ضايجة رفل

-مزعوجة

-من شنو

-ابوي خانگنه كتل وتعنيف واهاين ويومية مهدد يريد يتزوج على امي

-من يومه عمي ناصر هيج

-اي شنسوي بعد

-شنو هالاثر بيدج؟

-ابوي چواني البارحة

-شنووو

-البارحة تعاركت ويه ليلة بالضحك واجانه چواني وكتلها

-من دگيتي عليَّ البارحة بالليل علمود تگليلي ابوج حرگ ايدچ؟

-اي بس ما جاوبتني

-صدكيني مادري بموبايلي شامره بالغرفة

-يله عادي راحت بعد

-رفل شنو ترديني اسوي؟ اروح لعمي واطيح حظه؟

-ههههه لا يمعود هسة يحقد عليَّ وعليك اكثر

-چا شلون تبقن هيج انتن بعلي گلبي يحترگ

-تعودنا امير

-محد يتعود على الهمجية لازم اللگه حل

-هو اكو حل وتگدر تساعدني بس..

-بس شني

-صعب

-گولي شنو هو

سكتت شوية وهو مركز بكل حيله وياهة، عگدت حاجبي مستغربة من رفعت عيونها تباوعله ونطقت بهدوء شديد..

-عوف تَـمني و تزوجني امير....

**

"عبق"

دگت الساعة 2:00 بالليل ميتة نعس وتعب بس باچر خالتي تعزيني اذا عفت الديوان ما نظفته، گمت للحمام غسلت وجهي اصحصح ونزلت اتسحب..

كل يوم انظف بوقت طلعة الولد بس اليوم ما كدرت بسبب العزيمة رادتني سلوى اعوف البنات والونسة واروح انظف بس وعدتها اأجل التنظيف لليل من ينامون..

دخلت الديوان من باب الهول شفته مگلوب گلاااب استكانات چاي ودلال مال گهوة والگعدة متخربطة والزولية وصخة يمة متت قهر شيخلصه هذا..

لبست الربطة بالعكس لفيتها على شعري ورگبتي تطلع وبديت اشتغل بي، اخذت الاستكانات والصواني لمطبخ الديوان اغسلهن ورجعت اكنس الديوان بيدي خالتي تتخبل لو استخدمت المكنسة الكهربائية تريد الا بيدي بهاي مكناسة ام السعف..

فحطت علما كملت كنس ورحت ارتب الگعدة، كملت وبقالي مسح البوفية بس تعبت كلش وگعدت ارتاح واجر نفس.. فركت بعيوني وتثاوبت نعسانة هسة لو يگلولي شنو تتمنين عبق؟ اگلهم بس انام وارتاح..

شفت كوشة الگعدة العربية واني منا مثولة من النعس كلت انام بس شوية هو اني مكتولة باجر مكتولة على الاقل خليني ارتاح وتجي خالتي تكعدني الصبح هي اول وحدة تكعد وتفتش البيت كله قبل الكل خاف انام بمكان مكشوف بدون ما احس وراهة تكتلني..

غفت عيني وجريتها نومة ماخذة راحتي احب نومة الديوان هدوء وواسع مو مثل المخزن مالتي، عصرت عيوني من حسيت وجع صار بخدي مثل الگرصة حكيت المكان ورجعت انام وهم حسيت بگرصة شلون زنبور يگرص..

خدي صار حار يوجعني بين النايمة والكاعدة قررت اگوم اكتل الزنبور وارجع انام، فتحت عيوني گوة ادور على الحشرة الگرصتني بس ماكو شي اللتفتت على جهتي اليمين وروحي رااااحت من شفت علي الحـق گاعد فوك راسي..

-علي الحـق: الله بالخير

طفرت من المكان مثل المخبلة اوگف عدل واباوعله خايفة خرب حظي شسويت بروحي شجابه هذا خرررب..

-علي الحـق: حي الله من جانا بهالفجرية

-اني...

-شاردة من اهلج واجيتي يمنا؟

-اي

-خير ان شاء الله

-اسفة لان نمت هنا ردت اصعد لغرفة حبيبة بس.. بس شفت عدها بنية نايمة وماكو مكان الي

-اممم

-بس.. بس اذا تريدني اروح عادي هسة اروح

-لا ليش ترحين ابقي براحتج

-تمام

ركضت اطلع من باب الديوان بس تفاجأت من شفتها مقفولة، حاولت افتحها بس ماكو اللتفتت عليه مرعوبة شفته كام وتوجه يتمشى بأتجاهي..

-علي الحـق: ليش ما طلعتي؟

-مقفول

-معقولة؟

-اي والله

تقرب يحاول يفتح الباب وعاگد حاجبه، ثواني وفك عگدة حاجبه وتغيرت نظرته الي سند روحه على الباب بصفي وگال..

-صدگ مقفول

-شلون نطلع

-مادري

-تتصل على احد؟

-موبايلي مو وياي

-لعد شلون

-مكتبولنا ننحبس هنا چا شنسوي

-لا عفية خلي نطلع حباب

-شسوي ما تشوفين الباب مقفول

-اكسره

-وياهو يصلحه ابوچ؟

بلعت ريگي ساكتة وارجف خفت كللش خفت لان اولاً اني بالديوان ومقفول عليَّ ثانياً اني ويه رجال غريب وحدنا وثالثاً واخيراً اني ويه واحد من الولد التسعة المحرم عليهم يشوفوني!!

-سيدي الله يخليك طلعنا منا انتَ مو ضابط

-والضابط لازم عنده المفاتيح؟

-لا اقصد عندك طرق خاصة تتبعها اذا المتهم حبسك بمكان

-المتهم يحبسني بمكان؟ چا غير متهم صلف هذا

-اي شبيك سيدي دبرنا حباب

-شبيچ من يصير الصبح يجي اخوي الضابط الثاني يطلعنا

-تستهزأ بيه؟

-لا ليش علي الدر خوش رتبة عليه اكيد عنده مفاتيح كلشي

-شوف سيدي اني هاربة من اهلي واذا عرفوا اني ما موجودة ببيتكم واتصلوا على حبيبة يموتوني

-ميخالف

-هاي شبييك

-شبيه

-اختنگت والله راح اموت طلعنا حباب

-اي شسوي يا بوية جاي تشوفين بعينج الباب مقفول

الخوف بده يسيطر عليَّ احس رجليه متحملني بعد گمت ارجف وابچي بالخنسة خايفة، حاولت افتح الباب اكثر من مرة اليدة راح تطگ بيدي وما انفتحت..

-كافي

لزم ايدي المكمشة باليدة وعصرها بيناتهن، سرت رجفة بجسمي وخفت من تصرفه حاولت املص ايدي منه ما قبل يوخرها انهاريت من الخوف من تقرب مني اكثر خله ظهري ينرگع على الباب وهو صار گدامي ضبط..

-شـ..شتسوي.. شـتسوي انتَ شنو هاي

-شنو اسمج

-وخر حباب

-اسمج شنو؟

-عبق

-حلو مثلج

رفعت عيني اباوعله كلشي ما اشوف منه من وره الدموع مغرگات عيوني، ابتسم تك خد ومسح الدمعة الوگعت على خدي كش جسمي ودرت وجهي عنه خايفة..

-حلوة عبق حيييل حلوة

-بداعة امك تعوفني

-ما اعوفج منو حاصلة هيج غزالة ويعوفها

-هدني هذا.. هذا مو دربكم مو دربكم هذا انتو مو هيج

-منو احنه؟

-انتو كلكم.. كلكم ولد شيخ علي مو هيج تربيتكم

-صح بس انا نشاز بيناتهم

دفعته من صدره احاول افلت روحي منه بس ماكدرله مااا اكدرله ماعت روحي من الخوف شفت اخرتي بعيوني من تقرب ولزگ وجهه بوجهي وهمس بيناتنه..

-لو شسوي بيج ما تگدرين تمنعيني

-بس.. بس الله يكدر يمنعك الله

-صعديلي لغرفتي

-شنو

-تندليها؟

-علي الحق شبيك!

-تصعديلي فوك لو نكمل شغلنا هنا بالديوان

-حرام عليك والله

-يله قبق قرري

-راح اعيط والله واللم الدنيا عليك

-صيحي

-اصيح والله اصيح

-اي صيحي

لزم حنچي بيده وقرب شفته مني غمضت عيوني حييل من حسيت بأنفاسه تضرب وجهي، گلبي انخسف حسيت بكلشي ضاع وماكدر اصيح ماكدر يطلع صوتي منو راح يصدگ خدامة ويذب التهمة على ابن الشيخ خالتي سلوى تنهيني لو عرفت الصار والله تموتني وتگول الصوچ مني وراهة تذبحني..

-يعني عادي اتونس بيج؟

فتحت عيوني ماكدر اباوعله روحي محترگة، شهگت من لزمني من خصري حيل ويقربني منه..

-ما تحچين؟؟

-هدني بستر اختك

-صيحيي

-هدني حق

-عيطي! اذا صحتي راح يجون يساعدوچ!

-الله يساعدني

-وتسلمين روحج عادي؟؟

فلتني من ايده وضرب الباب بقوة حيل، طلع مفتاح من جيبه وفتح باب الديوان إنفجرت بچي من فتح الباب وطلع منها متنرفز وضايج اللتفت عليَّ وگال بقرف..

-ما يشرفني اختي تصاحب بت مثلچ بايعة شرفها

عافني وراح، كلني ارجف من فوگ ليجوه وگعت بالگاع اشهگ ولازمة گلبي يوجعنيي روحي تريد تطلع تعبت من هالعذاب والظلم والله تعبت..

گمت من مكاني ونزعت الربطة من راسي تركتها بيدي، كملت تنظيف الديوان ودموعي تصب لزمت البوفية امسح بيها وارجف اعصاب ماعندي گوة كملتها ورجعت التحفيات لمكانهن..

مسحت دموعي عيوني تحرگني من البحي، فكرت بتصرف علي الحق وعرفته شاك بيه من عافني وراح تأكدت ما راد يأذيني چان بس يريدني اصيح يريد يكشف سر وجودي شنو وليش دا يلگاني ببيتهم بهيج اوقات..

لميت ادوات التنظيف وطلعت من الديوان وصولاً للهول، وگعن المنظفات من ايدي بچيت بالزايد ونزلت اشيلهن وارجعهن لمكانهن، رفعت راسي شاهگة وگلت من كل گلبي..

-عبق: يا ابو فاضل بستر زينب استر عليَّ

مسحت وجهي وگمت فتحت باب الهول وفزيت من شفت علي الحـق گاعد على كرسي ومنزل عيونه بالگاع، حطيت ايدي على گلبي اداري دگاته وعيني على جمرة جگارته المشعولة، انبلع صوتي وحروفي ويه نطقه جملة..

-عبق تشتغل خدامة ببيتنا!...

يتبع 👑...

━━━━━━ ♛ ━━━━━━

تَـمني و.... 🤔؟

وعبق المسكينة 🥹!!!

توقعاتكمممم الحلوووة نشوفها 🙈🔥🔥🔥

#الامارة

بقلمي: زهراء السلامي 💎

لتنسون التصويت + التعليق بين الفقرات + متابعة لحسابي 💙.

أمـاشِيك بـ غَـلط ،

وذنـوب فَـوك ذنَـوب

وأشـيّلن ذنـبّك

وأدري عَـليّ مِـحسوب

عـلىٰ الـفُطرة ويـحِب

شـيّقنعة ڪَلبّي يـتِوب .

━━━━━━ ♛ ━━━━━━

مسحت وجهي وگمت فتحت باب الهول وفزيت من شفت علي الحـق گاعد على كرسي ومنزل عيونه بالگاع، حطيت ايدي على گلبي اداري دگاته وعيني على جمرة جگارته المشعولة، انبلع صوتي وحروفي ويه نطقه جملة..

-عبق تشتغل خدامة ببيتنا!

زفرت نافذ صبري مدا اتحمل كل هالضغط وماعرف شسوي، بلعت ريگي واستجمعت قوتي وسألته بجدية..

-شتريد

-اريدج تحجين الحقيقة

-يا حقيقة؟

-منو انتِ وليش دائماً اشوفچ ببيتنا؟

-هاي المرة الثانية تشوفني هنا

-صدگيني شايفج اكثر من مرتين تتخطفين بالمطبخ بس ما چنت ادقق لحدما چذبتي وگلتي انتِ صديقة حبيبة

-اولاً اني مو جذابة واني فعلاً صديقة حبيبة

-وثانياً؟

-ثانياً اني صاعدة انام بغرفتها من رخصتك

طگت روحي وذبيت ادوات التنظيف بالكاع وعبرت اطلع من الهول، هرول بخطوات سريعة ولزمني من معصم ايدي يستوقفني..

-هددني

-مو قصدي اصيحلج خدامة

حطيت عيني بعينه بس دمعتي خانتني ونزلت وگعت دمعة يتيمة على خدي واني انطق بنترة..

-ومو قصدك تتحارش بيه؟!

-ليش ما صحتي؟

-بعدك على هالسالفة هدني يا اخي وخرر

حرر ايدي منه ينطيني مجال هرولت اطلع من الهول وحطيت ايدي على گلبي من صاح بعلو صوته..

-راح اعرف سالفتج عننق

صعدت الدرج بسرعة اركض ودخلت للمخزن وقفلته، وگعت بالگاع ارجف رجليه ما احس بيهن ماعندي طاقة اظل واكفة، بعد دقايق من الصفنة والتفكير مسحت وجهي وشمرت الربطة بالكاع ورحت لفراشي انام وشيصير خلي يصير ميهمني شي..

الصبح كعدت من وكت، غسلت وبدلت دشداشتي ونزلت اسويلهم ريوگ خدرت الچاي على الچولة ورحت للمنور اگلي البيض بينما اهل البيت نايمين بعدهم..

تثاوبت تعبانة وگعدت بالمنور انتظرهم يكعدون حتى تجيني خالتي سلوى تاخذ الريوك الهم ويبين هي السوته.. مرت اكثر من ساعة وما اجت تعبت وحسيت غفيت على گعدتي ورجعت فزيت بسرعة ويه صوتها..

-نايمة ولج عمت عينج كومي كوومي سلگي لـ علي الدر بيضات ثنين مشتهي على الريوك

-حاضر

گمت اخذت جدرية صغيرة وحطيت بيها المي والبيض وانتظرتهن علما انسلگو، قشرتهن وگصصت البيضة بحب لـ علي الدر.. اكثر واحد اعزه واحبه بين الولد رجال شهم ومحترم ويتمنالي الخير..

علي الدر ما راضي على تصرفات خالتي سلوى واكثر من مرة راد يتدخل واني احلفه يسكت واقنعه اني راضية بالوضع، ما انسى موقفنا بيوم ديطلع الفجر عنده واجب ببغداد واني بالمطبخ اشتغل بسكوت خاف يكعد احد..

اجه در للمطبخ بهيبته وطوله وعطره يهفهف وياه ورتبته على چتفه، شوفته تخجلني وتوترني ماعرف ليش، انخلست وذبيت السفنجة من ايدي من شفته يباوعلي ورافع حاجبه..

-گاعدة؟

-اي محتاج شي اسويلك قبل لا تطلع؟ ريوگ اسويلك؟

-لا عاشت ايدج

-بس اسويلك چاي اوگف

ابتسم ووگف طلع تلفونه من جيبه واللاسلكي مالته صوته شعلاته بالمطبخ توترت شكد ما نادوا بي حتى القوري وگع من ايدي..

-عبق

-نعم

-ليش راضية على روحج هالعيشة؟ فهميني انتِ شوكت تحطين حد لـ سلوى؟

-عادي سيدي اني متعودة

-ماكو متعودة ماكو بت حديثة عايشة ببيت كله زلم تظل سهرانة للفجر تنظفلهم، حتى لو ينطوچ اجور هالشي ما مقبول وانا ما ارضاها

-حباب لا تحجي ويه خالة سلوى اني راضية فدوة

-وانا ما راضي باچر اتصل بأبوي يحطلها حد!

عبرني يطلع من المطبخ تاركني وحدي ورحت اركض وراه واصيح بالهمسة..

-سيددي وين رايح حباب اوكف لاا اني ماريدك تحجي حباااب

-عندي شغل عبق

-بداعة ابننك علي الدر ما تحجي والله العظيم اني قابلة قاابلة لا تخرب حياتي فدوة اروحلك

-مخبلة انتِ!! اذا على الفلوس اني اشغلج بمكان محترم وينطوج اكثر من راتب خالتج سلوى!!

-ماريد ماكدر امي متقبل الا اشتغل عد خالة سلوى وتعرف راح تحافظ عليَّ، احلفك بأعز ما عندك متحجي لاحد لخاطري الله يوفقك ويحفظك لشبابك

زفر نفس متنرفز وركب سيارته وطلعها من الكراج، گلبي راح يوكف من الخوف خالتي سلوى اكثر من مرة هددتني اذا احد افتهم بوضعي اني الاروح بيها وحلفت وقسمت على القران ليلة متبيتني هنا اذا علي الدر لو حبيبة حچو لابوهم او حاولو يحسنون من وضعي، واني ادري بخالتي تعنيها ونهايتي تصير مثل امي!

ومن يومها اني اتوسل بيهم يسكتون واقنعهم اني راضية بوضعي ومقتنعة بس بقو ثنينهم يداروني حبيبة تشتريلي ملابس بالختلات وتقنع امها الملابس من صديقاتي بالمدرسة وعلي الدر يجيبلي حلويات وقرطاسية وشغلات مدرسة بس بالخفية وكل شگددد ياله اقبل اخذ منه لان ابرار تتخبل..

رجعت للحاضر اكمل البيضة واملحها ودزيتها بيد خالتي تاخذها اله، رجعت اگعد بالمنور انتظرهم يكملون ريوك واني اتريك وراهم ومثل كل يوم وكالعادة تجيني حبيبة للمنور بيدها لفة الي وكوب چاي تبوس خدي وتگول..

-صباح الخييير هاي سويتلج لفة مو ما تاكليها

-صباح النور، اكلها طبعاً اذا اني ما اكل منو ياكل

ضحكت وصفگتني راشدي خفيف واجت تعض من لفتي قبل لا تروح، رفستها برجلي طلعت فاطسة من الضحك وتسويلي اني اعلمج..

لميت رجلي وكعدت اكل من اللفة بعدها اللگمة بحلگي وفززني صوت رجال خشن يصيح..

-عببق!! وينها عببببق وينج يمعودة بررد الريووگ عببببق

شرگت باللكمة اكح احس روحي طلعت، شربت چاي بس اريد تنزل اللگمة وكلشي بيه يرعش، فزيت على دخول خالتي للمنور اجت صايرة ناار جرتني من زندي وگرصتني منه احسه اشتعل متت وجع بس ما حجيت كلمة..

-بت الچلبببة شافففچ البارحة مووو؟؟؟

-مـ.. مـ.. منو خالة منوو

-علي الحـق چا منوووو

-لا.. لا مادري

ضربتني راشدي قوي احس طبعت اصابعها على خدي لزمت وجهي ابچي بالخنسة وهي تزيد بالضرب وتدوس بشحاطتها على رجلي الحافية، بدون لا احس صرخت من الوجع اصبع رجلي انسحك ويه الكاع بسببها، صارت تضرب على حلگي حييل بيدها حتى اسكت..

-انچبييي بت السااقطة انچبييي حسسسچ ما اسمعه كلهم هنااا

-هديني حرام عليج والله

-امشيي للج چلبة سااقطة بت الشوارع لوما انا ياهو يلفيج وامچ شذى الغبررة

-حسبي الله ونعم الوكيل بييچ عسى حوبتي متتعداج هدديني راح اموت

ما وخرت مني الا اجن حبيبة وتَـمني وشمس سوه يفاككن بينا وصوت تَـمني عاالي كلش تصيح..

-تمديين ايدج على طفللة شنوو من بشررر انتِ

-سلوى: صوووتج ام السحوورة ام الززلم صوتج نصي لا اخفي

-تَـمني: حسبييي الله ونعم الوووكيل على كل ظاااالم بيت شيووخ ويصير بي كل هالظظظظلم

على اثر صوتها العالي اجو الولد كلهم يركضون گلبي وگع ويه شوفتهم وخالتي بعد متعرف شتسوي رأساً بچت..

-الامـير علي: شصاير شنو هالصوت

-تَـمني: كتلتهااا مرة ابوك كتلت هاي الطفلة المسكينة

-علي التـقي: خالة ليش تكتلين صديقة حبيبة؟؟؟

-سلوى: هي يمة هيي تجاوزت عليَّ اول چا تردوني اسكتلها

گرصت ايدي حتى اأيد كلامها بس لساني انبلع واني اشوف علي الحـق واگف مچتف ايده وعيونه ما نزلت مني..

-رسمية: خلص يمة سدوا الموضوع ورجعوا تريگو انا احلها

-علي الحـق: خليهن يجن ويانه

-سلوى: اي اي نلحگكم

-علي الحـق: عنق هم تجي

عافنا وراح بس باقي الولد ما قبلوا يتحركون متت بدمي من نظراتهم كلهم مستغربين من وجودي بس ميحجون لان امهم موجودة وكالت راح تحلها.. راحو وشمس وياهم وبقن خالة رسمية وتَـمني وحبيبة..

-رسمية: سلوى تالي وياچ ما نخلص من هالسالفة احنه؟!

-سلوى: من واجبي اربيها ام علي چا شلون نعوفها هايته

-رسمية: وحبيبة هم تربيها هيج؟؟

سكتت خالتي تباوع لـ حبيبة ولـ تَـمني متعرف شتجاوب، رفعت اصبعها خالة رسمية وكالت بتهديد..

-اذا افتهمت تعاملين حبيبة هشكل بعليي ما اسكتلج يا سلوى وادخل الشيخ كلشيي ولا حبيبته تضوج لو تنزعج

-سلوى: بنيتي هاي ما ازعلها ام علي

-چا يله امشن كلچن خلنا ناكلننا لگمة

-سلوى: صار

-رسمية: عبق انتِ هم يمة تعاي

-سلوى بخزرة: لييييش

-رسمية: لان الويلاد شافوهاا شنيي تردين تكسرين چلمتهم؟؟

-سلوى: لا حشاهم

-يله كدامي

طلعنا كلنا من المنور واللتفتلي خالتي خازرتني، حطيت الربطة على راسي وعگدتها بقت تباوعلي لحدما رحنا للصالة شالت عينها وسوت روحها طبيعية..

گعدنا كلنا حول سفرة الريوگ وحاصرة دمعتي مهضومة وخجلانة من نظراتهم الكل عرف اني هسة انكتلت بالمطبخ واكيد الطبع بخدي مبين..

-علي الحـق: حبيبة انطي الجوز لـ عنق

-حبيبة: اسمها عبق

-نفس الشي ثنينهن نهايتهن ـق

استمر الهدوء الغير معتاد بسبب وجودي بيناتهم، كملنا اكلنا وگمت اشيل المواعين ويه حبيبة وتَـمني بس ميتة خوف من خالتي اعرف من يطلعون الولد راح تطيح حظي..

وگفت اغسل المواعين وحبيبة ترجع الاكل الزايد بالثلاجة وتسولف ويه تَـمني، دا اغسل سچينة وبالغلط انجرح اصبعي عفست وجهي متوجعة عفت المواعين ولفيت اصبعي بالكلينسة وصعدت للمخزن احط لزگة..

صعدت اركض على الدرج وجفلت من شفت الامـير علي دينزل، وگفت صنم ونزلت عيوني مستحية الشخص الثاني الي كلش اخجل منه هو الامـير علي كلش انسان محترم وميحب الغلط مهيوب وكلامه ونصبته نصبة شيوخ، عمو علي راده شيخ وراه من دون اخوته اكثر من مرة سمعته يگول من اباوع للامير اشوف روحي بشبابي..

-الامـير علي: حي الله من جانا

-الله يحييك شيخ تسلم

ابتسم وذب نفس، رفعت عيوني شفته يباوعلي بنظرة استكشاف وتساؤل..

-ما چنت ادري بصديقة حبيبة عايشة ويانه بالبيت؟

بقيت منزلة راسي مستحية وماعرف شجاوب..

-على العموم وجودچ مرحب بي عبق سواء چنتي صديقة او شي ثاني

عبرني يكمل طريقه ينزل الدرج ظليت اباوع لظهره مبتسمة وسعيدة لان ما حرجني، متأكدة مية بالمية سأل امه عني اليوم وهالمرة گلتله الحقيقة لان اسلوبه ويايه مبين عرف سبب گعدتي هنا..

-عيونج طبعن بظهره

عكست عيوني بسرعة ودرتهن للحايط خجلانة..

-شبي اصبعج

باوعت فوگ وجحظت عيوني مخترعة من شفته واگف گدام محجر الدرج بدون قميص وبيده شايل اثقال دمبلصات حجمهن وسط ويرفع بيهن..

-علي الحـق: بس لو افتهم ليش تخترعين هيج ارتاح

-لان طلعت فجأة هسة ارتاحيت؟

-لا لان بعدني افكر بدشداشتچ الكودري حرگت عيوني من بشاعتها

حچاهة بالضحك ماتحملت ما اضحك گوة بلعتها وكملت اصعد فوگ، رحت للمخزن نسيييت ميصير ادخل گدامه وراح من بالي وعزاا العزاني على هالنسوة..

حطيت لزگة لاصبعي وباوعت لدشداشتي تخزي اووف والله اخجل منهن بس منين اجيب واغيرهن، طلعت من المخزن وشفته واگف بالصالة التجمع الطابق الثاني..

-ها ما شاء الله متعلمة تفترين بالبيت وحدج

عگدت حاجبي مستفهمة ثواني وطخت ببالي شافني من دخلت للمخزن!!!

-اءءء اني.. اني بس سألت..

-سألتي حبيبة وين لصقات الجروح وحبيبة گلتلج يا قبق اللصقات موجودات بالمخزن جوه الفراش الينام عليه الجريدي وبصف الگونية التارسها الگمل

-لا لا

-چا!

-سيدي شتريد مني راح اموت والله

-احجي الحقيقة واعوفج

-وتصدگني؟

-افكر بالموضوع

-اني يتيمة واشتغل بالبيوت حتى استرزق

-وما تخافين؟

-ليش اخاف

-شمعرفج شبيهن ما بيهن البيوت التشتغلين بيهن؟

يحجي ويتقدم وبيده شايل الاثقال، توترت كلش ورجعت خطوات ليوره عثرت بعتبة الدرج ردت اوگع وكمشت بالمحجر حيل..

-ها عنق؟

-اني اتعمد ما اخلي احد يشوفني حتى ما اتعرض لمواقف تشبه هاي

-احد لو الولد حددي

-الولد

-امممم جيد

-وهسة تسمحلي اروح سيدي؟

-لا

-شنوو ليش

-اريدج تسويلي مشروب طاقة

-شلون اسوي

-انا اعلمج عليه تعاي

-يمة

-ها خير

-ما ادخل وياك للغرفة

-چا شلون اعلمج

-راح اوكف بالباب ما ادخل

-بكيفج

دخل لغرفته واني وكفت بالباب كلش متوترة وما اباوع على جسمه بس مركزة ويه ايده، طلع علبة چبيرة من مجر الميز مالته وجاب مطارة متروسة مي وصار يعلمني شلون اسوي واني بس اهز براسي اي..

-شبيچ

باوعت بعيونه ثانية ورجعت اباوع للمطارة الي بيده بدون لا اجاوبه..

-انتِ ضايجة من تصرفي البارحة صح؟

-عرفت شلون تسوي المشروب شوكت تحب اسوي الك؟

-هسة

-سويته انتَ

-اريد جديد

-تمام انطيني العلبة اسوي بالمطبخ جوه

-تعاي هنا سوي

-ما ادخل غرفتك

هز راسه اي وشال العلبة ومدها الي، مديت ايدي اخذها منه وشهگت من جرني اني والعلبة سوه ودخلني لغرفته..

-شنو هاي شبييك

-انا اسف

-على شنو تعتذر بالضبط؟

-على تصرفي البارحة

مجاوبته وحاولت اخذ العلبة من ايده بس مچلب بيها أيست ودرت اطلع من الغرفة بس هالمرة سد الباب علينا وگال بنبرة صوت خافتة..

-يشهد الله ما نويت سوء وياچ البارحة وانا...

-تمام خلص انسى الصار خللص

-اذا خايفة ليش ما تصيحين؟

-ليش تريد تجيبلنا مصيبة انتَ؟؟

-اجيب المصيبة حتى اعرف من منو تخافين وانعل يومه

بلعت ريگي وبقيت اباوع للعلبة البيده..

-منو مخوفچ وما تگدرين تصيحين عبق؟

-انتو!

-احنه؟

-اي انتو اذا صحت بكل بساطة راح يجي الكل يشوفنا وانتَ راح تكول الصوچ مني انطيتك مجال واكيد كل البيت راح يصدگوك واني الاروح بين الرجلين

-تتوقعيني خسيس لهدرجة واذب الصوچ بيج؟

-السويته بيه البارحة رمز الخسه!

خزرني بحدة وفتح الباب واشرلي اطلع، هرولت بره الغرفة وركضت انزل جوه حتى استقبل رزايل خالتي..

**

"تَـمني"

اذا واحد يگلي اوصفيلي سلوى راح اگلهم مرة بمنتصف ثلاثينياتها طويلة رشيقة جميلة بس عبارة عن هوسة! همجية لابعددد الحدود وللاسف عصبيتها وصياحها ورزايلها ومصطلحاتها مخربات جمالها..

مجرد طلعوا الولد استلمت عبق المسكينة صياح وهرجة وتريد تكتلها واني وحبيبة تدخلنا نفاكك واخذناها وصعدنا فوگ..

-حبيبة: اووووف اووووووف شوكت نخللصصص

-تَـمني: شبيچ انتِ متحجين لابوج حبيبة ليش ساكتة؟؟

-هو بكيفيي هاي الغبيية حلفتني على القران ما احجي لابوي وهي حلفت على القران ما يطخ لسانها لساني اذا فكرت اللمحله لو ابينله هي ما مرتاحة!!

-تَـمني: انتِ من كل عقلچ عبق؟؟ تره اذا شيخ علي يعرف بسوالف ام حبيبة ما راح يقبل ويدافعلج شبيييچ

-عبق: عوفوني بنات

-تَـمني: من شنو خاييفة بس فهميني

-حبيبة: عجززت اعرف شنهو اليخوفها مااعرف

بقت عبق تبجي وتمسح بعيونها بقينا كاعدات وياهة لليل احنه محد نزلت بس حبيبة جابتلنا اكل وصعدت، ثاني يوم ما صار شي مختلف نزلت عبق تطبخ الغدة واحنه وياهة ابد ما تركناهة بس الحقيرة سلوى تمشي وترزل بحبيبة وشمس من تشوفهن يشتغلن ويه عبق ويساعدنها..

ثلاث ايام مرت نفس الروتين، باليوم الرابع اجن عماتهم وبنات عمهم كلهن واللتمن سوه اخيراً شفت عبق تضحك متونسة بلقاء ليلة عرفت هنه كلش صديقات وقريبات على بعض..

للعصر اجت رفل، شوفتها ذكرتني بآخر مرة شفتها گاعدة ويه الامير علي وشنو المحادثة الدارت بيناتهم بالليل.. باوعت بعيونها الكبار احاول اقراهن واتذكر شنو صار بعدما گالت للامير..

-عوف تَـمني وتزوجني امير

ما انسى اللتفاتة الامـير علي عليها وكأنه تكهرب، فتح عيونه وهي مركزة بي تنتظر جوابه..

-الامـير علي: رفل انا...

سكت يدور على كلام يجاوبها بي وهي ضحكت بصوت رن بأذني وضربته بخفة على زنده وگالت..

-اتشااااقه يمعود لا تنجلطط

-انتِ ما تتوبين من سوالفج؟؟

-هههههههه والله العظيم اتونس على تعبيراتك وردة فعلك من احد يگلك اخطب رفل لو ليش متتزوج رفل

-اتزوجچ شنو اختي انتِ حالج حال جبيبة

-ادري وانتَ اخوي طبعااً ومستحيل ارضى بيك ثانياً....

مدت اصبعها وحطته على گلب الامير تضغط على المكان وتگول بمكر..

-اعرف منو ساكن هنا

-دوخري اصبعج ولا تلحين گتلج ما عاشگ

-نشوف عود

بدت محادثتهم توترني نزلت من الكرسي ورجعته لمكانه وصعدت انام اخيراً حبيبة فتحت الباب، شفتها نايمة بالفراش ولافة شعرها بكب..

-حبيبة عبالي صارلج شي شفت بابچ مقفول

-ايي عذريني نسيتج والله ورحت اسوي ليزر بالحمام وقفلت باب الغرفة

-هااا همزين لعد جبتها صح من گلت للامير دتسوين ليزر

-شنوووووو

-اي اسفة چفصت مادري شبيه بس احس مو كلش عيب اذا كلت مو؟

-ولج يبوووو على وجهي شلون اطلع كدامه بااجر

-لا لا عادي هو يعرف عندي مرض البعره

-هههههههه مرض البعره شني

-لازم يشدني بالعباس

ضحكنا ونمت بصفها على الچرباية فاحت ريحة عطر يجنن اول ما شلت لحافها وتغطيت اويلي شكد مرتبة هالبنية..

-حبيبة ممكن اسألج سؤال

-اي سألي

-ابا الحسن علي يحب ليلة مو؟

-عاشگها اي

-لعد ليش متقبل تتزوجه؟

-مادري ومن تسأليها هي هم تجاوبج مادري

-ورفل؟

-شبيها رفل

-تحب الامـير علي؟

-يااااا لا خية شتحب منه اخوها الامير

-اخوان بالرضاعة يعني؟

-لا لا بس هي ربت وياه وويه ابا الحسن يموتون على بعض بس بحسبة اخوان ثنينهم ما يحبون بعض

-شو احسها تحبه اني

-بطلي تحسين لان رفل هي الرفضت الامير

-شلون يعني؟

دارت وجهها تواجهني بالنوم وكملت سالفتها..

-باعي گبل ثلاث مادري اربع سنوات امي رسمية خطبت رفل لـ الامير بدون لا يدري وكتلت روحها عليها لان تشوفهم قريبين على بعض وميانة قوية عبالها يحبون بعض بس رفل رفضت رفض قاطع وگلتلها امير اخوي وما اكدر اعاينله بغير نظرة

-وامير شگال من عرف امج خاطبتله؟

-غير احترگ البيت علينا خجل حييل خجل من رفل وفهمها امي خطبتله بدون ما يدري وهو يشوفها حالها من حالي ما راح يجي يوم وتطور علاقتهم

هزيت راسي متفهمة بس الي ما فهمته ليش رفل گلتله "عوف تَـمني وتزوحني" ليش گلتله عوف تَـمني؟؟

نفضت راسي ارجع للواقع واعوف سرحاني وانتبهت وتأكدت رفل صدگ متحبه بسبب كلام خالة رسمية وهي تكول..

-رسمية: اريدن اخطب للامير غزوة شتكولين؟

-غزوة: اي چا ليش هم ياله يشوف بزرته بس عندج وحدة ببالج؟

-رسمية: اي عندي جاي افكر بـ بت شيخ محمد الصايغ شون بت طول بحسم بجمال بحشمة چنها البخت

-زهرة: خير ما اختاريتي ام علي صدگ خوش بنيات بنات محمد

-رفل: تشگ شگ بنته بس عمة شوفي الامـير علي يرضى يتزوج

-رسمية: ما يعترض وليدي الحمدلله والشكر ولدي كلهم مريحيني من هالناحية لا يصاحبون ولا يجيبولي بنات مادري منين ما منين ويردوني اخطبلهم

-غزوة: بعد بيتي تربية شيوخ چا شون

بقوا يخططون شوكت يرحون ويخطبوله واتفقن وره متكمل البنية امتحانات سادس يرحون سوه ويشوفنها، انتبهت لامه تحجي وعيونها عليَّ ما فهمت سبب هالنظرات بس مع ذلك ما اهتميت وگعدت متحمسة يرجعون الولد وصيت علي السور على تلفون يجيبلي وياه لان عنده محل موبايلات..

لليل رجعوا الولد وانطاني سور تلفوني الجديد طرت فرح وگعدت اگلب بي بينما الباقين انجمعوا كلهم سوه ضحك وسوالف وتحشيش علي السور وعلي النور يموتون من الضحك وحاطين دوبهم من دوب علي الحق..

-علي النور: حق احبك

-علي الحـق: خاف متيه بيني وبين صاحبتك؟

علي النور: عشگ انتَ عشششگ

-علي الحق: وصلت، ماكو فلوس ولي

-علي النور: بالعباس نموت عليك خايب مو عيون ضيييييم

-علي السور: يجدحن جددح ما ينعرف لونهن لا هو اخضر لا هو اصفر لا هو رصاصي

-علي الكرار: تمساحي هذا خوية تمساحي

-علي النور: يبوووو دخيل علي يمة بس فهميني بشنو متنسية من حملتي بـ علي الحق تره ماكو هيج خشم مصبوب صبابة

-رسمية: بعد حيلي حيله شبعت سفرجل بـ علي الحق

-علي الحـق: ها يمة حتى انتِ عليَّ

-رسمية: چا چذب؟؟ حبوبتك الله يرحمها نايمة على خوانيگي تجي وتدحس بحلگي سفرجل وفني لو گلت لا

-علي التـقي: زين بيّن بي السفرجل الظاهر انا كليتي بيه حنضل اجيت مگحف

-رسمية: شحلاتك يمة عين السيح تقي ياهو بجمالك

-علي الكرار: يمة من تردين تچذبين چذبي چذبة تتصدگ

-علي التـقي: امشي لك عود هم اله عين ويحجي راس البيذنجانة

استمروا بالتحشيش وواحد يعيب على الثاني وبنات عمهم وياهم كلللش عدهم ميانة ويه بعض ومحد يستغرب من الثاني..

-علي السور: حق بداعتي وره هالغزل ما نستاهل چم حمرة تدللنا بيها؟

-علي الحـق: چم حمرة؟؟ "چم"؟!!!

-علي النور: انتَ چريم واحنه نستاهل

-علي الحـق: انطيكم بس بشرط تعمرولي نرگيله و للصبح تفركولي رجلي

-علي النور: بده يذلنا

-علي الحـق: هذا العندي

-علي السور: موافقين امرنا لالله

-رفل: اميييير انطيني الفستق شبيك

-الامير علي: شني ما تشبعين عمت عينج

-رفل: اريد خالة شوفي ابنج هذا عود راح يصير شيخ بعد عيني

-الامير علي: انفگست عينج هاج

انطاهة الفستق الدياكله وهي تحرك حواجبها بشيطنة وتاكل، امها تخزر بيها وتسويلها على كيفج وهي تضحك ممهتمة..

اللتهيت بتلفوني الجديد گاعدة على جهة حطيت بي خط واخذت رمز الراوتر، نزلت برامج انتظرت يتحملن وركضت على الانستا احاول اتذكر رمز حسابي القديم بس طار من راسي، سويت حساب جديد وبسرعة رحت ابحث حساب تالة اتذكر اليوزر مالته.. بحثته بس يطلعلي ماكو هيجي حساب متت قهر واحس فقدت الامل..

ذبيت التلفون مقهورة وافكر وينهن وليش ماكو خبر عنهن دا اخاف والف فكرة دتجي براسي، صاحتلي سلوى اساعدهن بالعشا كملنا بس ما كدرت اتعشا من الضوجة بقيت كاعدة بالمطبخ بينما همه ياكلون..

مرت الايام اني هنا ضجت واختنگت بس ما فقدت الامل كل يوم انشر ستوري عسى ولعل تالة تشوفه وتراسلني، وبيوم اني كاعدة اگلب بتلفوني بالغرفة اجتني حبيبة الابتسامة من الاذن للاذن..

-تَـمني تعااي تعااي

-شبيچ مكيفة

-تعاي شوفي بنفسج

جرتني من ايدي واخذتني لغرفة صايرة بصف غرفتها تفصلنا باب وگالت هالباب مال غرفة علي التـقي..

-حبيبة: شنووو رأيج بغرفتچ الجديددة؟

-غرفتي اني؟؟؟

-ايييي

-صدگ تحچين

-ولج اييي

-هههههههه عزه انصدمت فدوة لالله شكراً

-تعاي افتري بيها ان شاء الله تعجبج

فرحت كلش و دخلت وياهة الغرفة افتر بيها، طرت فرح بجمالها وترتيبها تجنن صح الغرفة مو كلش جبيرة بس مرتبة كلش اخشابها لونهن ابيض وحاطيلي مراية چبيرة بالزاوية وميز، اكثر شي جذبني هو الزخارف الي بالحايط والسقف الثانوي كلش نازك..

-حبيبة: ردنا بالهول (غرفة كبيرة مستقلة) نسويلج الغرفة بس الامير ما رضى وگال لكرار ينطيج غرفته

-يااا خطية لعد هو وين راح؟

-سكتي كيف هو اخذ الهول

-عمري شكراً حبيبة ماعرف شلون اعبر عن سعادتي امانة تشكريلي على الي فكر يسويلي غرفة وبوسي هم ههههه

ضحكت واني اللتهيت افتر بالغرفة شوية واندگت الباب علينا كالت حبيبة تفضل، عدلت وگفتي من شفته الامـير علي وگف بالباب يباوعلنا وايده بجيوب بنطرونه..

-الامـير علي: عجبتچ؟

ابتسمت وهزيت راسي اي فرحانة، راحتله حبيبة وجرت وجهه عليها وباسته بخده هو صفن واني صفنت..

-الامـير علي: شنهاي

ضحكت حبيبة وباوعتلي وغمزت فوراً افتهمت الامير هو صاحب فكرة يسويلي الغرفة وباسته نيابةً عني عززا شكد استحيت انوب احس وجهي اشتعل نار وهو ميدري شكو بس يباوع بيناتنا..

-حبيبة: امير انتَ خوش امير

-الامـير علي: رحم الله والديج

درتله ظهري بعد ولا باوعتله، شوية وسلوى صاحت لحبيبة وراحت تنزل جوه بينما الامير بعده واكف بالباب ما دخل الغرفة..

-اذا عندج أي ملاحظات عليها انطيني خبر

-كلش حلوة شكراً

-ادللي

تقدم خطوة لداخل الغرفة ورجع بسرعة بره، اشرلي على الشباك الجبير الموجود اكثر شي جذبني بالغرفة هو هالشباك..

-هذا لا تفتحي من تنامين

-ليش

-لا تفتحي

-اي ليش

-لا تفتحي وبس

استفزني جوابه، كتفت ايدي لصدري وباوعتله مزعوجة..

-يعجبني افتحه

-تسويها عناد؟

-اي ليش متقبل تجاوب لعد؟

-ما جاوبت حتى ما اخوفچ

-شبي الشباك لا تخرعني حباب تره ما انام هنا

-مابي شي اشاقيچ بس حشرات تطب منه

-ها زين گتلي

هز راسه واستمر يباوعلي واني افتر بالغرفة استكشفها ما عفت شي وتفحصت كل جزء منها، ما طلعت من تركيزي بيها الا صوت علي التـقي يكول..

-هاي شنو صرنا جيران

ابتسمت على ردة فعله المتحمسة دخل للغرفة يشوفها ويگول متعجب..

-ولا ادري بيج اخذتي غرفة كرار شوف الصدفة

-الامـير علي: متأكد ما تدري؟

ضحك علي التـقي وگعد على چربايتي يشوف الفراش ويعلق على أجزاء للغرفة..

-علي التقي: والله خوش فراش ينراد اجيبلي نفسه

-تَـمني: ما جربته بعدني بس مبين حلو كلش عالي

-اي بعد ذوقي هذا

ضحكت عرفت مدح الفراش لان هو الجابه، گام وگف گدام المراية الطويلة ونفخ نفسه وصار يتأمل روحه..

-علي التـقي: اشگ شگ

-الامـير علي: يله تقي خلي البت تاخذ راحتها

-علي التـقي: اي اي تَـمني من هسة انا راح ابوگ هاي المراية

-تَـمني: ياا احلى شي بالغرفة هاي ما استغني عنها

ضحكنا سوه ارتاح ويه علي التـقي ابد ما اتقيد هو شخصيته مرحة وميحب الرسميات، خطفت نظرة للامير علي لگيته ديباوع علينا بس شكله مزعوج الى درجة، هدأت من ضحكتي وحمحمت اوگف عدل صدگ عيب نسيت روحي ودا اتمضحك ويه رجال غريب..

استغرق نقلي للغرفة وترتيبها مثلما اريد ثلاثة ايام، سور ونور الي ساعدوني بيها واكيد حبيبة وياهم.. طول فترة بقائي هنا افكر بـ عبق وبما ان عندي حصة بالبيت اريد انطيها غرفة ترتاح بيها..

حچيت ويه حبيبة بالموضوع كلش فرحت بس گالت يمكن سلوى متقبل واني عناد بيها الا اغير مكان نومة عبق بس للاسف حچيت ويه عبق وما قبلت تغير مكانها شكد حاولت وياهة بس ابدد معاندة وراكبة راسها مدا اعرف من شنو خايفة هالبنية وشنو الشي الي سلوى دتهددها بي؟

مشى شهر واني هنا ببيت الشيخ علي اكثر من مرة حبيبة كالت الامير علي يوصي امه عليَّ تهتملي وتداريني بس عود ارتاحيت؟ والله ولا ارتاحيت سلوى سم يسري بجسمي راح اموت منها ومن نگهة وعركاتها المتخلص.. تعبت من الغربة بالطلعة والطبة تعيّرني لاني وحيدة وبنات اختها خوات شمس فد حقيرات عكس شمس تماماً شتحچي سلوى يطبلن وراهة..

اليوم جمعة لمة العائلة، اباوعلهم كلهم ملتمين ومتونسين محد مستغرب من الثاني عائلة وحدة چبيرة عايشين بأُلفة ومحبة، سوينه العشا بس شگدما مقهورة ماگدرت احط لگمة بحلگي گعدت بالمطبخ وحدي افكر بتاليتي..

صبيتلي كلاص لبن وكعدت ادور بتلفوني على حساب تالة، جزعت وبزعت ذبيت موبايلي وبقيت افكر بيها وقاطع تفكيري دخول خالة رسمية المطبخ شايلة بيدها ماعون بي لفة..

-ما كليتي ويانه يما هاي جبتلج كلت خاف تستحين

-عاشت ايدج خالة بس ما اشتهي

-لا بعد عيب تردي من ايدي هاج اكلي بنيتي

اخذت اللفه عضيت منها عضة ورجعتها بالماعون نفسي مسدودة، راحت رسمية للسنك تغسل واندارت الي مبتسمة..

-حلوة اللمة مو بله

-اي كلش حلوة ربي يحفظكم لبعض

-وليداتي گلب على گلب من صغرهم واحد يحب الثاني وواحد يتمنى الخير للثاني الي يشوفهم يكول ذولة كلهم نفس العمر بس عبن ماكو فرق بيناتهم هيج مبينين

-صحيح گصة وحدة كلهم

نشفت ايدها بالخاولي وراحت لقوري الچاي تشوفه جهز لو لا، جابت استكان تصبلها چاي وگالت بهدوئها ورقاوتها المعتادة وكأنها تريد تخلق ويايه حديث..

-اتخيلچ بالحجاب حيل حلوة يا يمة هالشعر الحلو ما يستاهل يشوفه ياهو الچان

ابتسمت ساكتة، بادلتني الابتسامة وفاجأتني من گالت من العدم..

-الشيخ يريد يخطبج لواحد من ولده تَـمني

فتحت عيوني على وسعها وگلبي احسه وگع ببطني بلعت ريگي مرتبكة ومنحرجة وهي اردفت..

-يگول حتى نتجنب حجي الناس تتزوجين من عدنا وتصيرين چنة بالبيت

-خالة..

-شنو رأيچ بـ علي التـقي؟

عيوني توسعت اكثر وهي ابتسمت على ردة فعلي، هزت راسها بلطف وكملت..

-انتِ الله يحفظج حلوة وصغيرة وتقي خوش زلمة وينشد بي الظهر حبيب ويدلل محبوبته

-بس..

-هالچم يوم اروح اخطب لـ علي الحـق والامير علي اريد اخذلهم خوات، بنات الشيخ محمد ذهب مصفي حبابات ومؤدبات يلبسن بوشي ثنينهن كلش محتشمات..

سكتت بسرعة من دخلوا علي التـقي وعلي الحق المطبخ يسولفون، راحوا للمغسلة يغسلون وما انقطعت سوالفهم حسيت بأحساس غررريب كلش واني اباوعله اصلاً ماعرف بشنو احس ماعندي تعبير مناسب اشرح بي..

توترت من دار عينه يباوعلي وابتسم بطني مغصتني وعرگت فجأة، گمت بسرعة وركضت اصعد فوگ لغرفتي حبيبة وسديت الباب عليَّ.. گعدت على الچرباية افكر بكلام رسمية واتمنى من كل گلبي تجيني اشارة او رسالة من خالتي او تالة.. نشرت ستوري بسرعة حتى ابين اني موجودة وكعدت ادعي تجاوبني..

بعد ساعات سمعت صوت بالحديقة عرفت الكل ديطلعون لبيوتهم ما طلعت من الغرفة ظليت الليل كله سهرانة وعيني بالتلفون اختنكت وكوة لازمة دمعتي راح انفجر بأي لحظة، طلعت من الغرفة رحت لمخزن عبق لگيتها نايمة ضجت ورحت لحبيبة هم نايمة، مسحت دمعتي الوگعت ونزلت للمطبخ اكعد وحدي وفتحت الشباك اتنفس واهدأ روحي..

كاعدة وحدي اتصفن والتلفون يمي اگلب بي، طلعلي فيديو شعر عن الخوات وبعد ماتحملت وانفجرت بچي قهرة بگلبي راح اموت واشوف تالة وخالتي بس اريد اتطمن عليهم واعرف هنه بخير..

سديت التلفون بسرعة وشمرته على الكاونتر من سمعت صوت طگطگة جاي من الصالة عرفت احد گعد، مسحت عيوني وگمت للمنور ادخل بي ماريد يشوفوني هنا.. مديت راسي اتأكد منو هذا الكاعد وانتبهت ذولة التوأم علي الدر وعلي البدر طلعوا سوه..

ذبيت نفس مرتاحة ورجعت لمكاني اكمل بچيتي واسمع الشعر مرة وثنين وثلاثة وازيد بالبچي، سكتت خانسة ويه صوت رجال يگول..

-عجب شخصك عليَّ سنين ماطل

وگصر عمري بغيابك حيل ماطل

زماني وي الفرح بجفاك ماطل

وخذ كل ذرة فرح مزروعه بيه..

رفعت راسي ويه دخول الامـير علي للمطبخ ويقرا هذا الشعر، مسحت عيوني تغوش من وره الدموع باوعتله ابتسم وگال بلطف..

-مو كافي بچي تَـمني

-مچنت ابچي

-صح خالتي الشگرة جانت تبجي

-اي هي

كبرت ابتسامته وطب للمطبخ يسند روحه على المجمدة، لابس دشداشة جوزية وشماغ حاطه على چتفه..

-منو مزعلچ؟

-محد

-چا ليش هالدموع

درت وجهي منه للجهة الثانية ما تحملت كلامه وسؤاله عني ونزلت دموعي مرة ثانية، غصة ببلعومي خانگتني وتعبت منها..

-كتلت الدمع خاف تشوفه عذال

صفة جنازه الدمع وعيوني تابوت

جذبني الشعر وركزت ويه صوته، بلعت ريگي وسألته بصوت طلع مبحوح..

-انتَ تشعر لو تجيبهن من گوگل؟

ضحك وهز راسه مأيس، كتف ايده لصدره وگال..

-حتى وانتِ بهالحال تداهرين

-اي والله شو كتيتهن عليَّ

-چا غير اواسيچ

-هو هيچ اليواسون؟ خليتني ازيد باللطم

درت وجهي اخاف هم ابجي كوة مصبرة روحي، تقرب خطوتين عليَّ صار ميفصلنا هواي تچه ظهره على الثلاجة وسأل بنبرة حنونة مهتم..

-منو مزعل عيونچ

خنگتني العبرة من جديد واطلقت العنان لدموع جديدة تنزل بقيت منطيته گفاية ميشوفني بينما احس بي تقرب اكثر عليَّ..

-ما مرتاحة ببيتنا؟

بلعت ريگ ومسحت عيوني باوعتله ونويت اشاركه باليوجعني..

-لا ما مرتاحة

-ليش؟ منو وياچ؟

-محد وياي بس.. بس اني اريد ارجع لبغداد

-اممم

-مخنوگة مدا اكدر اتقبل العيشة هنا كلكم زينين وتنحطون على الجرح يطيب وممقصرين وياي بشي بس اني تعبانة كلش واريد خالتي

هز راسه ساكت، دقايق بقينا على هدوئنا هو سارح بالفضاء واني منزلة راسي اللعب بأظافري وعيوني تصب..

-تحسين بعدم استقرار؟

-اي

-تحبين اغيرلچ غرفتچ؟

رفعت عيوني اباوعله وانتبهت لنظرته مختلفة وكأن شخص ديقنع طفلة تبقى وياهم ومتروح، اردف من شافني اباوعله..

-نتبادل اخذي غرفتي وانا اخذ غرفتج، نغير الاثاث وجيبي كل الشغلات الترديها وشنو بنفسج نجيبه حتى تحسين انتِ ببيتج

-شكراً

-واجبي هذا بس لا تبچين

-احس اريد ابچي بعد

-يله چا نطلع نبجي بره

-شنو وين

-طالع اغير جو تجين وياي؟

استحيت اكول اي وهزيت راسي لا، ضحك واشرلي اگوم وگال..

-امشي نطلع ضوجة

گمت اغسل وجهي من الدموع وتمشيت وياه طلعنا من البيت متوجهين لمكان سيارته، بعدني ما ركبت السيارة وانتبهتله وگف ورايه ما تحرك..

-الامـير علي: اطلب منج شي وما تزعلين زايد؟

-كول

-تكدرين تلبسين ربطة على راسج؟

-هاا.. اي عادي هسة اجيب من حبيبة

-لا شيرجعج هاج حطي شماغي على راسج

انطاني شماغه ترددت اللبسه لو لا بس بالنهاية حطيته على راسي ولفيته، ركبنا السيارة ثنينه وانطلقنا للمجهول الكل معزل والشوارع فارغة وظلمة..

-تسمعين شي يغير مزاجچ؟

-اي افتحلنا عنك اذا سألوني

هز راسه موافق وعلگها وفتح الجامات صار الهوا يلعب بالسيارة وبوجهي وشعري كل شوية يوگع الشماغ من راسي وارجعه لحدما سفط كدام أسواق مفتح، نزل يشتري شي واني بقيت كاعدة واتأمل الجو والاجواء..

رجع بيده علاكة فات للسيارة وفتحها طلعلي منها موطة ام العودة وانطانياهة اخذتها من ايده مبتسمة وگعدت اكل وهو يدخن بالفيب ونفتر بالسيارة..

-شكراً امير

-جسر للطيبين

-ربي يوفقك

-اهم شي غيرتي جو

-اي هواي احسن

-ليش ما تطلعين ويه حبيبة من تروح للسوك غيري جو واشتري سوالف انتن البنات تموتن على المشتره

-ههههه والله صح هاي شمعرفك

-حبيبة مگرعة راسي اذا اروح لبغداد وما اجيبلها شي وياي تظل اسبوع ما تحاچيني

-ياا عيني يعني البديات الشتريتهن ويايه لـ حبيبة؟

-اي چا المن

ابتسمت وتذكرت من اخذ رأيي اختار بدي لبنية شابة بنفس جسمي توقعتها حبيبته ولا توقعتهن لاخته..

-راح اسأل على خالتج واشوف اخبارها هالچم يوم

-صدددگ

-اي ان شاء الله بس افرغ اروح لبغداد واشوفن وين ما وين راحت

-شكرراً من كل گلبي والله ما انسى فضلك عليَّ

-بس ماكو شي بلاش هاا

-ميخالف انطيك فلوس الكروة والفرة هم

-هههههههه خرب راسچ فهاوي

-شنو ليش

-شسوي بالفلوس انا اريد غير شي

-مثل شنو؟

-تحچيلي السبب الحقيقي الخلاچ تبچين

-على خالة وتالة كلش مشتاقتلهن

-لا تَـمني السبب الحقيقي اريده

-ماكو سبب حقيقي

-متأكدة؟

-اگدر اسألك سؤال؟

-لا تضيعين سالفتنا

-لا بس اسألك سؤال فضولي

-جواب

-انتَ ليش مهتملي؟

عاف السكان واندار يباوعلي عاگد حاجبه، عدلت على سؤالي واردفت..

-يعني ليش وصيت خالة رسمية تداريني وليش سويتلي غرفة وليش دتساعدني وتدافعلي واني بنية غريبة عليك؟

-ما ترديني اهتملج؟

-لا مو هيجي بس دا اسأل ليش يعني انتَ هيج ويه كل البنات؟

-لا

-لعد؟

-انا اهتملج لان اشوف حبيبة بيج

ابتسمت لا ارادي على جملته بينما هو اردف بنبرة صادقة خالية من الألاعيب..

-اتخيل حبيبة يجور عليها الزمان وتنحط بمكانج راح تحتاج زلمة يوگف وياهة ويساعدها بدون مقابل يسندها وما يحسسها هي عالة عليه

-حلو

-فـ افكر بيج مثل اختي وماعندي نية ثانية بكلشي اسوي

-شكراً

-هواي تتشكرين چنچ

-بس ويه اليستاهلون

ابتسم ابتسامة واسعة لدرجة بين ناب سنه، ضحكت على ابتسامته الامير من النوع من يضحك عيونه تضحك وياه وتطمس جوه وهالشي منطي شكل بريء من يبتسم..

-وهسة لا تضيعين السالفة يا خيتي وگليلي ياهو مزعلج؟

-خالة رسمية

-امي؟؟؟

-لا لا هي ممزعلتني بس گلتلي على شي واحسني توترت وخفت

-شگالت؟

-خطبتني لـ علي التـقي

ضرب بريك قوووي انهزينا ثنينا ليگدام، صرخت خايفة بينما هو جاحظ عيونه وكأن الخبر صدمه..

-تَـمني: يمة گلبي وگفف

-وتقي يدري بهالشي؟؟ يعني هو الگال لامي تخطبج اله؟

-مادري

-ما حسيتي بشي ما حاچاچ؟؟

-لا يعني ما تغيرت معاملته الي هو اصلاً لطيف وكل يوم يصبح عليَّ ويسألني عن حالي ويجيبلي نميات و...

-تمام

قاطعني واني هم سكتت، لاف السيارة ورجع بينا للبيت نزلت وتشكرت منه ورجعتله الشماغ ورحت لغرفتي وضعي احسن وكلش ارتاحيت من شاركت احد بهالشي..

نمت على الفراش تگلبت شوية و هستوها دتغفى عيني وحسيت على طرق باب الغرفة خفيف، گمت افتحها وشفته الامير واگف والشماغ بيده..

-محتاج شي؟

-وانتِ شنو رأيج؟

-بخصوص شنو

-تقي خطبج شنو رأيج؟

-هااا

-لا انسي.. لا تجاوبيني انسي تصبحين على خير

-تلاگي الخير

سديت الباب ورجعت انام، قربت امتحانات الدور الثاني وصار لازم اروح لبغداد امتحن توترت وخفت تروح عليَّ السنة وكل يوم افتح الموضوع ويه حبيبة وتطمني واحد من اخوانها ياخذني وهي تجي ويايه حتى نبقى بشقتهم الي ببغداد..

-عبق: تَـمني شنو احلى مادة عندج بالجامعة؟

-تَـمني: كرة السلة اعشقها فد نتونس بيها وهيج كلها حماس وتحدي

-حبيبة: چنتي زينة بيها؟

-اي من قبل اني اعشق كرة السلة اتذكر من چنت صغيرة بسام الله لا يذكره بالخير جان ياخذني اني وتالة لملعب ونلعب سوه ويه اصدقائه

-عبق: الله وناسة عود سولفيلي اكثر عن قسمج بس انظف غرف الولد وارجع

-حبيبة: انا اجي وياچ حتى نخلصهن اسرع

-لا اليوم هوايه اشتغلتي خالتي تسويلي هوسة اني اكملهن بسرعة

-حبيبة: معليج بسكوت نشتغل ونكملهن بساع

-تَـمني: كلنا نتساعد اني هم انظف وياكم حتى نخلص اسرع واليوم نسهر على فلم شتكولون؟

-عبق: فكرة حلوة اي بس بنات حبابات اذا خالتي سلوى طلبت منچن تطلعن من الغرف واني اكملهن لا تسون مشكلة لخاطري

-حبيبة: خوش هذا هو

-تَـمني: مع احترامي الج حبيبة بس ايييييع اكرهه هالمرة اكررههااا

تندمت لان حجيت هيج كدام حبيبة حسيتها انقهرت مهما يكون تبقى امها بس شسوي مشاعري مدا اسيطر عليها تجاه هالمرة ومعاملتها لـ عبق تفرفح الگلب حتى متعاملها مثل الخدم عبالك عبدة عدها!

قسمنا الغرف واصرت عبق كل وحدة من عدنا تنظف غرفتين بس وهي الباقي شگد حبيبة حچت عليها بس ماكو قافلة فـ حبيبة اخذت غرف سور ونور واني انظف غرفة امير و حق..

اختاريت غرف ذولة الثنين لان اعرف علي الحـق واجب عنده وميجي اليوم والامير طالع شغل لغير محافظة فـ اخذت راحتي بالتنظيف.. متت تعب بغرفة علي الحق شكد عنده اغرااض واثاث وكله من ذني النواعم عنده مسدسات حديد صغار وسيارات ودراجات كلهن ناعمات وصغار واكعد امسح وحدة وحدة..

علما رحت لغرفة الامير اني هلكانة، شفت حاطين ملابسه الي غسلوهن على چربايته عرفت لازم نسفطهن ونرجعن بكنتوره بس ما تقربت منهن ماحب اللزم ملابس رجال غريب..

مسحت غرفته وكنستها ورحت ارتب الميز مالته وانبهرت!! ماكو كلمة تعبر عن الشفته غير الانبهار! شفت رسمات فكيت حلگي عليهن عبالك مو رسمة وكأنها صورة اخذوها بكامره وطبعوها على ورقة شكدما مرسومة بدقة عالية والالوان المستخدمهن شي يجنن..

شفت قلم مال رسامين كلش حلو ابتسمت وحطيته وره اذني واباوع لروحي بالمراية، رجعت للميز گلبت بالرسمات وحدة احلى من الثانية واغلب رسماته بس وجوه شفته راسم وجه رجال وهوايه مكرره بكذا وضعية وبكذا حركات بالوجه شكله يجذب ظليت صافنة عليه وافكر شنو سالفته ويه هالرجال..

شفت الوقت اخذني بسرعة بسرعة كملت باقي الغرفة ورجعت للميز اعدل الرسمات واحطهن بالمغلف الشامره على الميز، فتحت المغلف وشفت ورقة قديمة مشگوگ طرفها مكتوب بيها رسالة محتواها..

"دمرت حياتي، لو بينك وبين الجنة ذنبي هم ما اسامحك يا الامـير علي!"

عدت المكتوب مرة وثنين وثلاثة الكلام هزني واخذ حيز من تفكيري، گلبت بباقي المغلف شفته بس رسمات مابي رسايل ثانية..

-اشوفچ بغرفتي

انتفضت مخترعة ووگع من ايدي المغلف وتطشرت كل رسماته بالگاع، حطيت ايدي على گلبي مرتبكة وخجلانة ونزلت بسرعة اللمهن وهو اجه يساعدني..

-چنت.. چنت ارتبها.. بس نظفتها

-عاشت ايدچ

اخذ المغلف من ايدي واشرلي اگوم ما قبلت وكملت اشيل الاوراق انوب اظافري طويلة وبالغلط دخل اظفري بوحدة من الاوراق ومزقها صار وجهي هطوله من الفشلة..

-ما قصدت بس..

-عادي عادي گومي من الگاع

-دقيقة اشيل الباقي

-گووومي تَـمني

نطق اسمي بجزع رفعت راسي اباوعله وبقيت گاعدة بالگاع شفته ميحط عينه بعيني تفاجأت من تصرفه بس من نزلت عيوني وشفت قميصي تمنيت اطمم روحي بمكانيي!!!!

رفعت قميصي بسرعة وگمزت اوگف بمكاني كل فشلاتي ويه هالبشر بجهة وفشلة اليوم بجهة!! قميصي دلعته جبيرة ومن نازلة ما منتبهة وطالع جسمي بكل وضوح عزا العزانيي شلون اباوع بوجهه بعد!!

-تَـمني: اني طالعة كملت الغرفة

هز راسه اي وگام يحط المغلف على الميز بدون ما يباوعلي، طلعت اركض من الغرفة واللطم على وجهي مستتحيل اكو هيج فهاوة وغبارة شنو هالغباء تَـمني شبييج خزيتينا!!

رحت لغرفتي وانتبهت بعده القلم وره اذني يووه، وخرته عن اذني ورجعت لغرفته فتحت الباب بدون لا اطرقها وعطت من شفته مصلخ!!!

-تَـمنيييييي

-اسففة اسففففااااا

من هول الصدمة بقيت بمكاني واكفة وعاصرة عيوني مغمضتهن، بقيت بس اسمعه يضحك ويحجي..

-فهاوي غير تطگين الباب

-هستوني طلعت من غرفتك ادري متوااازي

-چا ما ابدل؟؟

-هاك قلمك اخذذه

-يابة انعل ابو القلم طلعييي يمعودة

طلعت اركض وعفت الباب مفتوحة غميت روحي من سمعت صياحه جاي من الغرفة..

-الباااااااااب انعل يووم الحلووو

عفته يعيط وطبيت لغرفتي وبعد ما طلعت منها ابدد مدا اتحمل كمية الغباء الدتصيبني بهذا البيت مستحييل عبالك مسويلي عمل ماكو هيج عقلي طاير وماعرف اتصرف من اكون ويه هذا ابو البورگ خرب..

لفيت راسي ونمت بدون عشا ثاني يوم ما طلعت ابد صبحت مصخنة وتعبانة بقيت بالفراش وخطية عبق ابتلت ويايه لان حبيبة اغلب وقتها بالمستوصف..

-عبق: انچبيييي

-والله العظيم طبيت عليه بالغرفة بس عبق ما اسولفلج صدمته وصدمتي

-وللج عاد جان لابس؟؟

-لااااا

-عاااااا

-خرب خرب خرب خرب خرررب لا تذكريني

ضحكت بصوت عالي وراحت تفتح الشباك الچبير، تغطيت عدل ولفيت راسي..

-لا ميقبلون افتح هذا الشباك

-ليش

-تدخل حشرات

-لا ماكو حشرات هالفترة الجو زين صاير عود قبل لا تنامين سدي

-اممم

-اروح اجيبلج شي دافي تشربي واجي

-عابتلج تموت على الاذية

-ماكو اذية شينرادلها

نزلت واني غمضت عيوني اريد انام بسرعة غفيت، فزيت على صوت طرق الباب سمحتلهم بالدخول وبقيت على حطتي مغطية راسي وجسمي، توترت من شفته علي التـقي..

-سلامات اليوم ما شفناچ؟

-مريضة

-مريضة لو شاردة من احد؟

عضيت شفتي ماعرفت شجاوبه باوعتله لگيته مبتسم..

-خليني اخذج للطبيب

-لا ماكو داعي

لح عليَّ ياخذني وبينما هو واگف يحاچيني انضم اله الامـير علي  غصت بهدومي من شفته ماكدر اباوع لوجهه منحرجة..

-الامـير علي: گالو مريضة؟

-اممم

-عندج العافية گومي اخذج للطبيب

-علي التـقي: هسة گلتلها ما ترضى

-تَـمني: صدگوني ما احتاج اروح

-الامـير علي: ليش چا غير نعرف شبيچ

-صخونة عادية وگحة

-گومي خلي ينطيج الطبيب علاج

-ماريد لا مابيه حيل

-علي التقي: اجيبلج انا علاج من الصيدلية؟

-بكيفك

-الامـير علي: انا اجيبلها هسة طالع

-علي التـقي: خوش انا اروح اذا احتاجيتي شي لا تترددين تطلبين

-شكراً تقي

-خادم

طلع من الغرفة وبقى امير واگف ومكتف ايده لصدره، حك طرف انفه وسأل بفضول..

-وينه قلمي بعده عندج؟

-اي هناك على الميز

-اخذي حلالج

-صددگ

طفرت من الفراش فرحانة ضحك وگال مستغرب..

-اي هو قلم

-لا كلش عجبني شكله غريب ولونه جذبني لا هو بنفسجي ولا هو احمر

-اي برغندي هذا اللون

-حلو كلش

-عوفج من اللون شصار على امتحاناتج ترحين تمتحنين لا؟

-اي علي التـقي راح ياخذني

-امم

-اي وحبيبة تجي ويانه وعبق هم بلكي سلوى تقبل تجي

-اها

-اي

-يعني انتِ وتقي تحچون ويه بعض؟

-اول البارحة حچينه اي

-اگدر اسأل بخصوص شنو؟

باوعتله مستفهمة فوراً عدل جملته وگال بكل وضوح وصراحة..

-ماريد واحد منكم يخطي خطوة مجبور عليها اذا گعدتج هنا تجيبلنا الحچي نقسم البيت ونحل المشكلة

-صدگ تحجي؟

-اي

-تقسمون البيت عادي؟

-اي انا احل السالفة

-شكراً والله متعرف موضوع الزواج شگد شايلتله هم

-ما تردين تتزوجين؟

-ممكن بالمستقبل بس هسة لا ابد ماريد واحس اختنگت من الفكرة شكراً دائماً انتَ ناقذني

ابتسم وطلع من الغرفة وسد الباب وراه، ذبيت نفس مرتاحة هم وغم على گلبي موضوع زواجي من علي التـقي مع العلم تقي وردة حباب وخلوق وميعيبه شي ابد، لكن حتى هو الرجال احسه ميدري بسالفة الزواج لان من يحجي ويايه طبيعي كلش عبالك ديسولف ويه حبيبة بس جملته اليوم مال "شاردة من احد" غيرت رأيي ويمكن يعرف..

اجت عبق جايبلتي مطارة حليب حار وجابتلي اكل، رجعت حبيبة وگعدنا كلنا سوه نسولف وناكل لليل راحن البنات واني تمددت بمكاني ماعرف شوكت غفيت بس حسيت على صوت طگطگة وهوا عالي بالغرفة.. فتحت عيوني شفت الشباك الجبير مفتوح والبرده يلعب بيها الهوا..

فركت عيوني ونهضت نفسي اگوم اسده وشهگت بعيطة مكتومة من حسيت بأيد تعصر رگبتي من وره وتخنگني.. عيوني نطت من الخوف ايد على رگبتي خانگتني وايد على حلگي، تعاركت وياه بأيدي ورجلي افلت روحي بس ماگدرت جسم ضخمم ككلش ضخم مسيطر عليَّ..

بچيت بجزع اريد بس صوتي يطلع ماكو وجع قوي صار بخاصرتي عبالك انضربت بيها، دقايق واحس بحركتي خفت روحي خرطت ويه الانفاس الحارة اللفحت خدي واذني..

-باچر يجون ناس يطلبون منج طلبة بديوان شيخ علي والله ثم والله اذا عارضتي خالتج وبنت خالتج تالة يروحن بين الرجلين!!

رغم صوت اليحجي خشن بس ميزتها مرة نبرتها نبرة نساء وكلامها دب الخوف بگلبي، شددت على رگبتي اكثر واردفت بحقارة..

-لا تلعبين ويانه تَـمني شيخ علي وولده التسعة ما گدرولنه اذا حچيتي لجنس مخلوق عن جيتي هنا وچلامي وياچ اعتبري روحج بخبر كان انتِ وخالتج وبنيتها!!

رجع تكرر الالم بخاصرتي فرفرحت روحي واحس بأيدي ورجلي ماتن غمضت عيوني مستسلمة عن الحركة وغرگت بسبات عميق ما صحيت الا على صوت صياح ودگ قوي على باب غرفتي..

فتحت عيني مفزوعة احس بخموول وتعب باوعت للساعة شفتها بالاربعة العصر معقولة لهذا الوقت اني نايمة؟؟ تذكرت الصار البارحة واخذتني الرجفة، گمت گوة اسحل بروحي افتح باب الغرفة شفتها مقفولة استغربت اكثر منو قافلها.. معقولة؟

فتحت قفل الباب وبعدني ما لويت اليدة افتحها وصار هجوووم عليَّ، سلوى وبنات وياهة طفرن عليَّ ملخني تملخخخ تضرب مثل المخبلة واني صافنة اريد ادافع عن نفسي اريد اصرخ استنجد بأحد مااگدر ماعندي قوة بس اسمع اصوات صياح واحس بضرب مجانين على جسمي وراسي..

شعري صار بيدين سلوى تفشر عليَّ وتسب بيه وتصيحلي حرامية وچذابة، دفعتها عني گوة والبنات وگفن على جهة يتفرجن عليَّ وعيونهن تنگط سم.. انداريت اشوف رسمية واگفة بباب غرفتي وجهها محتقن احمرر وبصفها واگفة ابرار تطحر..

-تَـمني: شبييييكم شنو ديصير هناااا

هجمت سلوى عليَّ مرة ثانية ضربتني على خشمي طگ دم وجرتني من شعري تعتني للشباك الچبير شفت الموت بعيوني من الخوف هالمخبلة تريد تشمرني منااا!!

-سلوى: لفيتي عليهم كلهممم بت الچلببب بت ال**** ابوج عيسسيى معروف بسحورته ما خلللى واحد يعتب عليييه تفوووو عليج

تفلت عليَّ وتجر بيه تريد تشمرني لزمت بكتائب الشباك منا ومنا مرعوبة وارجف، صحت بحس مبحوح منهارة..

-وووولج هديييني حقيييرة والله الا اكول للولدددددد والله

-هاااا تگولين للامير التتختلين بغرفته بتوالي الليل موو؟؟؟

-شنووووو

-خذيتي كلشيي وما عجبچ ردتي اكثر!! لفيتي على أملاك الشيخ وسكتنا بس مال تلعبين على الشيييخ بكبره وتصغري جدام العالم وبنص ديوااانه لهنااا وبسسس!

-لا تظلين تشمرين عليَّ بالحچي ملييت منج ومن اللاعيبچ احچي بالخط العريض!

بكل قوتي دفعتها عني وركضت لنهاية الغرفة مفرفحة، حطيت ايدي على گلبي راح يوگف بأي ثانية واتوقعه وگف ويه جملتها من گالت بحرگة..

-شمسووية للامـير علي خليتي يوگف بديوان ابووه بنص الشيوخ ويگول انا عااقد على تَـمني!! تَـمني حلالي وامرها بيدي!!!..

يتبع 👑....

━━━━━━ ♛ ━━━━━━

وهنااااا سأسكت قليلااً 🫢😂🔥🔥🔥🔥🔥

توقعاتكمممم 🫶🏻✨؟؟؟؟

سلام حبايبي 💕

طلبتوا صور مقاربة لأبطالنا واني سويت الاگدر عليه والباقي اعوفه لمخيلتكم 🙈، اللهم اني بريئة من ذنب أي احد ومن ذنب أي شخص راد يزحف (ولد + بنات) 🌝😂

نجي لـ "الامـير علي" ما تعبت بي لان كُلش ينطي شبه لهذا الممثل خصوصاً من يبتسم او يضحك لان ضحكته بعيونه ☺️😂 (وطبعاً ابا الحسن علي تؤامه ميحتاج ندورله شبيه الفرق الوحيد ابا الحسن عيونه عسلي) 😁..

علي الدر وعلي البدر التوأم ينطون شبه لهذا 👇🏻 الفرق بيناتهم بالطول شوية و علي البدر خشمه بي كسر، بس كباقي الشكل وضخامة جسم يتشابهون بنسبة چبيرة

علي التقي شكله كُلش معاكس لشخصيته، شكله من ذولة الضباط العصبيين الميتحچون بس هو بالحقيقة فرفوش 😂👇🏻

اكثررر واحد مقتنعة وراضية على شبيهه هو علي الحق نسخة نسخخخة من هذا سبحان الله 👇🏻

علي السور 👇🏻

علي النور 👇🏻

منتصر (ابن عمهم الدكتور) ملامحه حادة ينطي شبه لهذا 👇🏻

غـفار ابن عمهم مسعود يشبه جدااً 👇🏻

وهسة نجي للبنيات 🙈💕

اول وحدة تَـمني "فهاوي" 😂 دورة الوجه والملامح تشبه هالبنية كُلشش لطيف شكلها بالحقيقة وسوالفها وصوتها متناسق جداً ويه ملامحها 💓👇🏻

حبيبة التعبتنيييي تنطي شبه الهاي، حبيبة هم ملامحها حادة وعيونها بيهن سحبة جمالها جنوبي 🔥 وطبعاً كُلشششش تشبه امها خصوصاً صور سلوى بشبابها عبالك حبيبة 👇🏻🤍

عبق بالخصوص دورة الوجه هم عدها خدود چنهة بطة وشوية عبق متروسة 👇🏻💙

رفل نص وجهها عيون هاي اقرب شي لشكلها بس رفل ماعدها نمش 👇🏻

ليلة هم تعبتني 😩👇🏻 وملاحظظة اسمها ليلة وليس ليلى 👍🏻

هاي اقرب شي لاشكالهم تعبت بيهم والبعض مو كُلش مقتنعة بس بعد شبيدي 😔😂💙

الشخصيات الي ما حطيتلهم صورة ممكن بالبارتات القادمة انشرهم بس بالوقت الحالي عذروني ما لگيت 🥲

نلتقيكم بالبارت القادم ان شاء الله احبكمممم شبابزز وااايد واااايد 💜💜💜💜

حسابي الانستا 💙👇🏻

#الامارة

بقلمي: زهراء السلامي 💎

لتنسون التصويت + التعليق بين الفقرات + متابعة لحسابي 💙.

يا ترفه وحسن شكلچ يهد... ♥️

━━━━━━ ♛ ━━━━━━

-لا تظل مبوز امير شينرادلها

-الامـير علي: ابا الحسن صدگ تحچي انتَ! انتم كلكم صدگ تحچون شلون اطب عليها وانا بهالحال؟؟

-علي الحـق: لا تكبر المواضيع ضلعي السالفة عادية

-علي البـدر: عاين امير لو الحب رادت شي تنفذ وتنطم لا تظل تتميوع

-الامـير علي: بشرفكم انا وبشتي وعگالي والدنيا محترگة وشايل بيدي ورد ملفوف بچيس چني دبدوب عاشگ

-علي الدر: اسمه بوكيه واي عادي اشوف مابيها شي

-الامـير علي: ولك بكبر راسي عاينله

-علي التـقي: اهوووو شگد يتمضيگ هالزلمة تره صايرة مودة هالسالفة

-ابا الحسن علي: كرار گوم شيله خوية وشوفنا الرومانسية على اصولها

-علي الكـرار: عيني وماي عيني غير تدللون

گام كرار شال بوكيه الورد الاحمر عبارة عن 100 وردة جورية، البوكيه گد ما چبير ضم وجه علي الكرار وگوة مشى بي..

-علي الكـرار: حتيت لو مو حتيت؟؟

-علي السور: حتيت لان ما طالع وجهك

-علي التـقي: وجهة نظر

-علي النور: غير ذواق انا العباس عليك امير مو هالبوكيه يجيب راسها لو ما يجيب؟؟

-الامـير علي: طين راسي الي! شلون امشي بي هذا بس فهموني

-علي البدر: انتَ مو تريدها تحبك لو لا!!

-علي التـقي: لا خوية هو ما يريدها تحبه هو يريده بس تبطل ترزله كله ما شافته

-علي الحـق: اي وعلي در وبدر انتم محرومين من عركاتهم غرفكم جوه كل يوم للصبح يظلون واحد يهد على الثاني

-الامـير علي: لا تصدگوهم چذابين هذول

-علي الكرار: امير صدگني هالبوكيه يجيب مفعوله بس تَـمني تشوفه بعدك ما گايللها هلو ترگعك بوسة

-علي النور: بويااااااي چا شماله حظنا احنه هم نريد

-علي السور: كرار گول لامي تستعجل بزواجنا خوية الجفاف كتلني

-الامـير علي: زوج القنادر يااهو جابكم هنا انتم؟؟؟

-علي النور: احنه مالنا غرض علي التـقي گال تعالو من نبدل للامير

-علي البدر: يله خوية ورق فلوس البوكيه انا زلمة على باب الله اطلع من الصبح للعصر علمود راتب ٨٠٠ الف قابل مثلك هم اليوم تعقد وهم رگعت البت بمقدم ومؤخر يكسر الظهر وهم نايم على فلوس

-الامـير علي: در اخذ تكك ضربني ليزر وبعدني ما عاقد

-علي الدر: صدگ يحچي امير انطي فلوس الورد خوية هذا حافي تكي ديونه واصلة لابو موزة

-علي البدر: هيج صارت در تنطي بتكك گدامهم ماگول يا حيييف الرحم الشالنا سوه!!

-علي الدر: چا غير افزعلك واخلي يدفع فلوس الورد صدگ مو شكول نعمة

-علي البدر: لا خوية لا انتَ من رقوك وصرت مقدم گمت تبيع ثگل على اخوك الكاتله الفگر

-علي الدر: مو طلع بلساني نععل وانا اگلك تعال وياي كلية عسكرية انتَ تعاجزت

-علي الحق: لا انا اتذكر ما قبلوك لان عندك كسر بخشمك بدر؟

-علي التـقي: وعلى طولك هم اظن

-علي الكرار: لا قبلوا على طوله بس لان عندك عملية بخاصرته ما رضوا

-علي السور: ونظره ضعيف وداگه الهبري

-علي البدر: وجعععع شمالكم وليتوني ولية خايبين مو صوچكم صوچي انا الزمال الباقي وياكم اخذوو تكي هم ماريدنه

-علي الدر: ولك لاا انا اريدك چا حيدر المن يصيح بابا بعد

-علي البدر: وانا شكو يصيحلي بابا خاف مخلفه وناسيه؟؟

-الامـير علي: ميخالف خوية انتَ دائماً البديل من يروح در واجبات

-علي البدر: تستهزأ بيه ولك؟؟ مو صوچك صوچي انا الوصيت الورد من بغداد لمريتك بس طلعت ما تستاهل

-الامـير علي: ادفعلك فلوسه شبيك خبصتنا

-علي البدر: يله ورق ربع الراتب طار من ورداتك

-الامـير علي: شگد؟

-علي البدر: 500 الف

-علي الحق: خاايب شنيي هاي بووگ عيني عينك هو راتبك كله 750 منين دفعت 500 الف للورد!

-علي البدر: لا صار راتبي ٨٠٠ الف اجتني علاوة

-علي الدر: بدر انطيك مليون بس خلينا نولي

-علي البدر: اي انطيني چا كلها مثلك نايمين على فلوس

-علي التـقي: خايبين خلونا نلمله هذا اخينه داگه الضيم

-ابا الحسن علي: هو اليدگه الضيم يظل كل يوم جايب كنافة لام ستوري

-علي البدر: تستاهل تاج راسكم مريتي اذا هي ما تاكل كنافة انتَ المهتلف تاكل

-علي الدر: ولك حيييييدر اشتتتعل ابيك تعاال هنا

-حيدر: بوية شمالك وياي اريد اروح ويه جماعتي واگفيلي بره

-علي الدر: ولك مهر عمك اليوم صدگ ما تستحي

-حيدر: اي چا المن جبتهم غير يردحون لعمي، رگص وشررب اليومووم لعيونك عميي وللصبببح

-علي الحـق: در ابنك ليش ساقط؟

-علي الدر: اعجز عن الاجابة وعلي

-علي التـقي: خاف ساجدة عبيد مرضعته ولك

-حيدر: كللللوووشش حييل شعرر شعررر اريد خصرك يميل عمي كرارر

-علي الكرار: وقزرقطط يريدني اهزله خصر ابن الخايس

-علي الدر: ابن منو؟

-علي الكرار: اءء احم ابن ابن اخو الخايس

-علي البدر: هم عبالي

-علي الكرار: وانتَ شكو ياهو يمك

-علي البدر: احنه واحد ماكو فرق بيناتنه وهسة ورق امير لا تضيعون سالفة الورد

-الامـير علي: انعل ابو الورد لابو فكرتك فگرتنا بس فهموني شلون اطب بي هذا بالعباس تطير الهيبة

-علي الحـق: ميخالف خوية هاي الدنيا كلنا راح نقدم تنازلات شي يوم

-الامـير علي: تقي ادفع لبدر خوية

-علي التـقي: وانا شكوو خاف انا الراح اتزوج ومادري

-الامـير علي: خرب راسك ولك ما جايب محفظتي

-علي الحـق: ورق تقي مو استلمت راتب البارحة

-علي التـقي: عفية هالراتب خلص گبل لا اتهنى اليوم امك سلتت مني خمسمية الف

-علي الدر: ولك حتى انا خذت مني خمسمية الف شتسوي بيهن؟

-علي الحق: بالعبااس انا خذت مني سبعمية الف گالت يمة محتاجة!!

-الامـير علي: صدگ تحچوون؟؟ خايبين خذت مني مليون گبل يومين!

-علي البدر: ربي الف الحمدلله والشكر انا فقير ربيي

-علي الكرار: يا ترى ماذا تفعل ام علي بكل هذهِ الاموال؟

-علي السور: يجوز تشتري بيهن مانع حمل؟

-علي النور: صراحة تحتاجهم وبشدة

-علي الدر: ذولة السرسرية ليش بعدهم هناااا

-علي السور: رايحين رايحين والله مو مال واحد يگعد وياكم

-علي النور: اي والله، حويددر امشي ولك راح نولي

-علي الحـق: اگص ايدي اذا مو زوج المطيرچية مسودنين ابنك در

دخل منتصر الغرفة يلف بعگاله..

-منتصر: هاي شنيي بعدكم ما متجهزين شباب شسالفة العالم بدت توصل

-ابا الحسن علي: السؤال الي كررته ثمنطعش الف مرة اليوم احنه مو حزانة شلون مسوين كل هالعراضة؟؟

-منتصر: حزين على ياهو ولك

-علي التـقي: چا غير على عمك نعمة ما صار سنة على موته

-منتصر: خاب نچب هسة شلون يحچينا انتَ هم حاسب نعمة بشر؟ استغفر الله لا يجوز على الميت غير الرحمة يله يله الدنيا محترگة كملوووووو بساع

-علي التقي: اي اي هاا اهاا حق اللبس نعالك ودر رتب عگالك وبدر بدل جواريبك وابا الحسن بدل چهرتك كلها

-ابا الحسن: الخايس المگحف الك عين تحجي انتَ

-علي التـقي: ليش تجرحني حسن مو انا اخوك ليش تكسر مجاذيفي وتخليني ابطل واگعد هنا ما اطلع

-منتصر: يمعووودين مو وكت مناگر ابوكم مجهز نعااله

-ابا الحسن علي: لا خايبين صارت بيها نعل گوموو

-منتصر: امير ابوك يگول لا تلبس البشت الاسود چنك ملاية رايحة مواجهة بفاتحة

-الامـير علي: چا شلبس ما جايب غيره وشيرجعني للبيت

-منتصر: هسة انطيك مني

-علي التقي: عيييع منيلك بشت مرتب انتَ دختوور وما يعجبك لبسنا

-منتصر: غير يستچن عاشق الثلاثينيات

-الامـير علي: منتصر راح اللبس بشتي چا شسوي راهم مو شباب؟

-علي الدر: فلگة گمر وعلي

-علي البدر: تخبل

-علي التـقي: تشگ تسعة وتسعين شگة

-علي الحـق: طالع سرسري بس حلو

-ابا الحسن علي: توأمي الصاك وين اكو بجمالك

-منتصر: عمي نيالك عندك فريق كامل يمدح بيك چا مثل حظي وحيد فريد

-علي الدر: أنضربنا زوم شباب اليوم صاير قدر

-علي البدر: بساع جيبولنا بخورة واقرالنا القلاقل الاربعة تقي

-علي التقي: قل اعوذ برب الفلق من شر ما خلق ومن شر غاسق اذا وقب ومن شر النفاثات في العقد ومن شر حاسد اذا حسد صدق الله العلي العظيم تف تف تف تف تف تف

-علي الحـق: ومن شر عيون منتصر الليزرية لا تحرگنا بمكاننا تف تف تف تف تفوووو

-منتصر: ادبسزية سرسرية طايحين حظ وزايعتكم الگاع شگول غيرها جييييرة

**

"عــــبق"

الصالة انترست وتَـمني بعدها ما وصلت، انخبصت ويه الناس كلها تسأل على العروسة وينها وليش تأخرت واشكااال حچي يسم الگلب سمعته عليها اني معليه واحترگ دمي..

-رفل: ولج خاف شردت البت وينهاا؟

-عبق: لا بعدها بالصالون غير

ويه جملتي اعتلت الهلاهل ويه دخول تَـمني مغطيها من فوگ ليجوه بعباية سودة وشال ابيض مغطين وجهها، دخلن خالتي سلوى وحبيبة ورسمية وعمة زهرة الصالة انگلبت گلااب الكل يهوس ويهلهل ويصفگ ويقرون ردات وگفلات راجت الصالة والعروسة بعدها ما وخرت الشال عن وجهها..

-رسمية: حبيبة اخذي مرة اخوچ خليها تتجهز تأخرنا

اخذتها حبيبة وراحن وياهن رفل وشمس يساعدوها، ركضت للمطبخ اجيب مي واوزعه واسمع صوت هوسات الزلم من بره ماتحملت ابقى هنا وما اشوف الفضول اشتغل عندي ركضت اصعد بغرفة حبيبة وفتحت الشباك اشوف منا..

لحگتني ليلة نباوع ومتحمسات، فاتحة شوية من الشباك ولافات البردة ومطلعة منها زرف صغير اباوع بي، الحديقة من الطول للطول متروسة زلم معگلين والولد تسعتهم واگفين يستقبلون العالم التجي وكل اليجي يشمرله گفله ويدبچون للامير..

دخل رجال ببداية أربعينياته ووياه ضبة شباب وگف بنص الحديقة واتجه على عمو علي والامير واخوته، رفع ايده وگال بعلو صوته وبطور هوسات..

"جينااا لأخيناا وحلوووة جيتنااا...

رادونا الوليان نشتت خبزتنااا..

تعنينا للأمـــير وزاد شرفنااا... يا هيبة..

يا هيبة كلنا افرحنالك يا هيبة كلنا افرحنالك"

وصار الدبچ وراهة شعلوه كلها شايله دشدايشها ولازمة عگلها ويرددون "يا هيبة كلنا افرحنالك" والامير وابوه مبتسمين ويحطون ايدهم على راسهم بمعنى "على راسي جيتكم"..  

-ليلة: ولج الله اجوائهم احلى من عدنا

-عبق: عمو علي ما قبل يهوسون ويدبچون لان يعتبرون حزانة بس شو الدنيا انگلبت

-اي عيني وين يگدرون يلزمون رواحتهم چا هذا زواج الامـير

ابتسمت ويه دخول شيخ چبير بالعمر ووياه هم شباب مبينين ولده، مدت راسها ليلة تشوف من الشباك وبنفس الوقت ابا الحسن رفع راسه وشافها يبوووو شلون حظ.. خزرها خزررة بس عود غير ترجع راسها ولا اهتمت الصلفة انوب تمدله لسانها تعيب عليه.. رفعلها حاجبه بمعنى "السالفة عناد؟" واليضحك هي تفتهم عليه وتهز راسها اي..

تونست على سوالفهم اصلاً ما مبينات احنه هو شعنده معلگ راسه فوگ، وخرنا بسرعة من گال علي التـقي..

-حي الله الجبور على راسنا جيتكم

-الله يحيي اصلكم ابن عمي

تباوسوا كلهم واول ما وصلوا للامير وگفوا گدامه وصاح واحد من الشباب وگال هالهوسة تحچي عن ابا الفضل العباس وحب شيخ "رائد" ينقلها لـ امير امارة "إسم الامارة" الامــير علي ابن علي ابن علي السجاد..

"تحتار الفواضل من تعد فضله..

كل صعبة التمرله تنگلب سهلة..

بالشجعان ماكو كل وكت مثله..

بالشجعان ماكو كل وكت مثله..

يتعنى المنية بروح ملهوفة.. يتعنى المنية بروح ملهوفة"

ورجع الكل يدبچ وياه ويهوس، اني صح مرة وحدة جمعني حديث ويه الامـير علي بس فرحانتله من كل گلبي اتمنى يجي يوم و تَـمني تحبه راح يكونون احلى ثنائي.. رجعت وياهم ويه هوستهم الجديدة ما سمعت شگال بالبداية بس لحگت على الدبچة وهو يگول..

"جبت كل العراق وجيت مشيّلهم على متوني"

انتبهت لروحي الضحكة شاگة وجهي واني اشوف الدنيا مخبوصة على هالزواج رغم كلهم يعرفون همه حزنانين على عمهم وشيخ علي اكثر من مرة وضح هالشي وگال العقد بيناتهم بس واضح الخبر طش والكل اجه فرحان للامير ومدا يطيقون يطبون يباركون ويطلعون على السكاتي رجليهم يحكنهم اذا ما دبچو..

سمعت ولاحظت اقره شفايف اكثر من واحد صاحله "امير الامـير علي" وكأنهم منصبي ومتخذي امير لامارتهم شاء ام ابى..

سديت الشباك ونزلت على صوت الهلاهل الي اعتلى عرفت نزلت تَـمني، للاسف ماگدرت اشوفها بسيت المهر اثناء العقد دخلوها لغرفة علي الكرار وطلعوا كل البنات الممتزوجات..

-رفل: اهووو نريد نطب نشوف شنو هاي

-حبيبة: اندري عود شنو هالسوالف طلعونا

-ليلة: سكتن هسة خلونا نسمعها وهي تنطي الوكالة..

مدينه اذاناتنه نتسمع للشيخ الي عاد العقد اكثر من مرة حتى تنطي موافقتها، شگد ما كرر الشيخ حبيبة حطت ايدها على گلبها وهمستلي..

-خاف ترفض؟؟

-عبق: الله يستر ان شاء الله متسويها

مرة ومرتين وثلاثة وتسع مرات الشيخ يعيد بالعقد ويطلب موافقتها، أيسنا تَـمني تحجي وحتى النسوان ظلن يحچن ويگولن ليش هيچ تأخرت، ما سكتن الا من سمعنا صوت تَـمني المايع ينطي الموافقة والدنيااا انگلبت بالهلاهل من الجهتين جهة الزلم من الديوان وجهة النسوان بالصالة..

فرحة ووناسة وحب بالاجواء كلشي هنا مثالي وتتمناه أي بنية، قريت اكثر من مرة الفلق والناس وانفخ بالبيت خايفة لا ينحسدون وتخرب فرحتهم..

-عبق عبق وينج

انداريت فرحانة من سمعت صوت رحمة تصير من گرايب حبيبة من بعيد..

-هلوو رحمة ما شفتج كلت ما راح تجين

-لا شلون ما اجي بس باعي عبق والله مادري شلون اگلج هالشي بس...

-شنو شبيچ

-انتِ مو گلتي تردين ملازمي مال السادس؟

-اي اي

-والله ردت اجيبهم وامي ما رضت تگول خلي اهلها يشترولها انا اسفة والله سامحيني بس مو بيدي

-لا عادي شكو هسة عود خالة سلوى تشتريلي

-اكيد؟؟

-اي اي اكيد راح تشتريلي اصلاً اني ردت اگلچ ما احتاجهم بعد شكراً حبيبتي

-العفو يروحي

گوة نطقت هالجملتين الغصة صعدت لبلعومي خفت تنزل دموعي گدامها وانكسر بالزايد، كل امالي على هالملازم وبانية احلام ادرس بيهن بالختلة لا عندي موبايل ولا وسيلة اكدر ادرس بيها حتى كتب متقبل خالتي اجيب وهسة حتى هالملازم راحن مني..

حطيت ايدي على گلبي يوجعنيي اختنگت، طلعت من البيت للحديقة اجر نفس اريد بس ارتاح اريد هوا بارد يطفي النار المشتعلة بصدري.. دموعي گامت تنزل بدون ما احس على روحي فحطت من القهر ركضت للطرمة الثانية البيها التنور وگعدت هنا وحدي ابچي بالخنسة..

لو عندي فلوس اني اشتري وطززز بسلوى وطزز بالذل والفگر والاهانة طزز بهالبيت وطزز بگعدتي هنا.. فكرت اگول لحبيبة تجيبلي بس شنو الفائدة راح تكتشف امها الحية وتموتني وتكتل حبيبة هم شسوي بروحي ووين انطي وجهي..

-شبيچ

صرخت بكتمة وغطيت وجهي مخترعة من شفتها فراقد، ذبت جگارتها وتقربت توگف مقابيلي.. باوعت منا ومنا وتسائلت..

-شماله الگمر زعلان اليوم

-مابيه شي خالة

-چا شني طالعة هنا ما تخافين يجي زلمة ويشوفج

-لا الزلم مو هنا دخلوهم بالديوان وقفلوا هاي الباب حتى ناخذ راحتنا

-امممم

ترخصت منها وعبرتها ارجع للحديقة الاساسية ووگفني صوتها الخشن..

-انتقمي من البجاچ عبيقة لا تظلين ساكتة عن حگچ

انداريت اواجهها ونزلن دموعي من جديد..

-لو عندي جمالچ وگاعدة بهالبيت بعلي اللعب لعب واكوش على واحد من الفحولة الهنا

-ماريد اتزوج خالة

-چا تظلين مكفخة؟ تزوجي ونامي براسه خلي يحطلهن حد ويصرف عليج.. شغلي الجوزة البراسج تعيشين ملكة

جرت حنك شيلتها ورجعت من بوابة المطبخ، باوعتلها من فوگ ليجوه عاجزة عن التفكير بكلامها.. شمعرفچ بعيشتي فراقد وجايه تنطيني نصايح ليش اني اگدر اتنفس طبيعي بهالبيت حتى ترديني اتزوج واحد منهم؟

مسحت عيوني بسرعة من طلعتلي خالة سلوى وگالت اروح اوزع مي مرة ثانية ركضت جوه واجت رفل ويايه نجيب من المنور حاطين بطالة مي صغيرة بجدورة كبار متروسات ثلج.. جبت صينية اعبيها بطاله ورفل تساعدني بس ثنينا خنسنا على صوت نسوان بالمطبخ يحچن بعلو صوتهن ويضحكن..

-اي خية هي نفسها التوسلت بالامير حتى يتزوجها ويستر عليها سمعت عاشگته من چانت حليلة عمه ورايدته ولعبت عليه لحدما خذاها

-طبعاً لا اهل لا سند وحدها تصول وتجول انا ما جاي اعرف شلون رضى بيها چا امير وامير والدنيا محترگة عليه تاليتها ياخذ ارملة

-ارملة وبت سحار ابوها عيسى يگولون سحار ومسوي لبنيته سحر حتى يگعد حظها وبختها

-خايبة مبخووتة چا مثل حظنا ماكو غير الردي والزايعته الدنيا يجينا

-اي وعلي

-عبق بهمس: دتسمعين رفل؟؟؟

-رفل: اي اسمع، امشي ناخذ الماي معليج بيهن

-ميتات حرگة منها انوب سون ابوها سحار الحقيرات

طلعنا من المنور وبيدنا صواني المي سكتن اول ما شافني، وزعت مي للنسوان وگلبي انفت من سوالفهن ياهي الاتعده منها اسمها تحجي بـ تَـمني بس الي صدگ زعجتني وماتحملت اسكتلها هي فاتن النذلة ام المخدرات!

-فاتن: تدرون بهاي البغدادية حامل من الأمير وتزوجها؟

دايرة ظهري متشوفني واسمعها تسولف ويه بنات بگصتها ويتهمن تَـمني ويقذفن بشرفها..

-اي چا شون خذاها شفتي ثوب المهر لابسته فضفاض حتى ما تبين بطن الحمل والله هالامير ينخاف منه

-فاتن: الامير زلمة وشايل عيبه الخِلة بيها ليش تسلمله روحها ما صدگت شافت......

فتحت عيوني على وسعها مشعوطة، اللتفتت عليهن وقدمتلهن مي سكتن واحذن كل وحدة بطل..

-عبق: فاتن بعدج تشيلين حبوب وياچ؟

-فاتن: يا حبوب؟

-عبق: كبسلة غير، سمعت سهى تريد وگالت فاتن ما جايبة خلصتهن على حبايبها تبيعلهم

-فاتن: يمتتته والقراان چذابة منيلي حبايب؟؟ ومنو هاي سهى اول مرة اسمع بيها!!

-عبق: شمدريني سمعتها تحجي ويه وحدة وذيج صاحتلها سهى يمعودة روحيلها فضحتنا شگد عيب، المهم من رخصتكم بنات اروح اشوف الخبلت الامـير لبست بدلتها لو بعدها

اللتفتت اروح وعرفت شنو راح يصير بسرعة صاحتلي وحدة تسألني..

-اگلچ شعجب خطبوا للامير بغدادية؟

-عبق: يا عيني غير هو متخبل عليها دگ رجل لو تَـمني لو ماريد مع العلم البنية متريده ومو بالها تتزوج بس هو خبص البيت شيخ علي بنفسه خطبها اله وشهر ياله ردتله جواب هي موافقة فرگعت گلبه

-صدددگ

-اذا متصدگيني سألي حبيبة

عفتهن مكيفة ورحت ارجع الصينية بالمطبخ، ضجت لان ما شفت تَـمني لسه عدلت فستاني وشعري وگعدت على الكرسي اسد سير حذائي انفتح، رفعت راسي مرة ثانية وشهگت فرحانة من شفتها تنزل من الدرج وينزلن وراهة البنات..

هرولت اروح للصالة ووگفت من بعيد اتفرج عليها واتأمل جمالها، ما گدرت اغطي انبهاري بفستانها النازك، فستان بصدر مفتوح مخصر وجاي گصة وحدة على جسمها، تَـمني حلفت تلبس اسود وفعلاً اشترته اسود بس كله شغل ناعم من فوگ ليجوه ويلمع بخرزات ناعمة لونهن اسود..

لمعت عيوني ويه مكياجها البارز ملامحها الجميلة وبحمرتها الحمرة الفاقعة هاي من غير تسريحة شعرها المرفوع كله ونازلة كم خصلة على وجهها، ابتسمت ويه ابتسامتها المجاملة ويه النسوان من يباركولها..

تمشيت اروحلها وفوراً ابتسمت ابتسامة برزت اسنانها من شافتني، بوستها وباركتلها وجرتني اگعد بصفها على الكوشة انحرجت واشرتلي سلوى اگوم بسرعة تحججت ما مرتاحة وگمت اوگف بجانبها..

اجت خالة رسمية شايلة ولد بعده صغير رضيع وحطته بحضن تَـمني، بوسته تَـمني ولاعبته وسمعت خالة رسمية تگول گعدته بحضنها حتى خلفتها الاولى يكون ولد، انطتني تَـمني الطفل وگالت بهمس..

-تَـمني: بس اني اريد بنية اول طفل

-عبق بهمس: انتِ مو ما تردين تتزوجي شو هسة تفكرين بالجهال ولج

-تَـمني: شبيچ افكر لمستقبلي خاف حتى من اتزوج غير الامير يجيني ولد اول

-عبق: وشبي الولد هم حلو

-صحيح اي يله اقبل جيبي

ضحكت من اخذته من ايدي وگعدته بحضنها، باوعت لخالة رسمية واحس بفرحتها مكسورة ما مقتنعة بهذا الزواج ومتخبلة من وره بدلة تَـمني تكول فال مو حلو لكن مع ذلك موتت روحها وهي تدافع لـ تَـمني ويه كل وحدة تسألها شعجب خطبتيله ارملة..

گومنا تَـمني نرگصها بيناتنا وكل البنات انضمن ويانه من اجت الملا وبدت تقرالها..

"وعيون الغزالة عيون چنتنا.. صلوا على النبي هالصيدة صيدتنا"

هلاهل وتصفيق من قبل النسوان ورقص ودلع من قبل البنات حول العروسة الحزينة، اشكاال قرتلها الملا وقرت للامير هم هواي..

"اموري رايد رادته وعايف بنات ولايته"

ووحدة تصيح..

"حلوة معدلة كل لوله ما بيها"

والنسوان يرددن وراهه ويضحكن فرحانات والنفاق يتطاير، ما حسينا بالوقت الا من صاحت خالة رسمية العريس راح يطب يشوف عروسته.. لاحظت التوتر على وجه تَـمني وصارت تتلفت تدور الشال الي يجي ويه البدلة تريد تضم بي جسمها بس ماكو الشال اختفى..

-تَـمني: امدااني هم فستان هذا ماخذته مخازي

-حبيبة: والله يخبل

ركضت اللبس شال وجبة والنسوان كلهن تسترن وطفوا الدي جي، سمعنا صوته يگول "يا الله" من الهول وامه صاحت..

-تفضل يبعد امك تفضل

دخل الامير وجحظت العيون بدخوليته، ما گدرت ما اشهگ واني اشوفه متنهدم بهندام عراقي اصيل دشداشة رمادي وعگال وبشت اسود لافه على جسمه وشايل بيده بوكيه ورد عملااااق!!

النسوان كلهن سكتن شفت عيون الفرحانة وعيون الحاسدة وعيون التتمنى وعيون الحاقدة بس اهم شي هي عيون تَـمني شفت عيونها تتوسع وهي تشوفه يدخل بكل هالجمال ممهتم لأي احد..

دخل الامير وقدملها بوكيه الورد، اخذته من ايده وانتبهت لشفايفها تهمس "شكراً" البوكيه چبيير كلش وثگيل حطته على جهة متگدر تشيله وگعدت بمكانها بسرعة..

اللتفتنا ويه صوت هلاهل رفل لابسة شال فوگ شعرها وباقية بفستانها المستور واخذت الصالة طول بعرض تهلهل وتهوسلهم والنسوان وياهة، وگفت بصف الامير بالضبط تصفگ وتقرا..

"اخوونا خوش اخوو يستاهل الهوووسة كلللوووووششش.. يله ولچن ويااي يالفاهيات"

والنسوان يضحكن ويشاركن وحبيبة طاييرة من الفرح، وگفت فراقد بالنص وشالت طرف شيلتها وگالت وهي تدبچ..

-مبااارك عرسك يالهيبة مبااارك عرسك يالهيببة

الفرحة والردات والهلاهل قائمة، ابتسم الامير ومسح وجهه من العرق المتجمع على جبينه بكلينسه ما باوع لـ تَـمني ابد بس اول ما دخل وبعد ولا اللتفت عليها وچان بقى هيچ لولا صوت الملا تگول بالسماعة..

-حبهاا ولك حبهاا ولا تخاف من امها

**

"تَـمني"

التوتر عندي يقرا مليون!! اختنگت واحس ضاق بيه النفس راح اموت وانمطل هنا گدام النسوان، البدلة ضيقة اخذتها ودگيت رجل قياسي 38 بس الحظ سمنت بهالفترة وصايرة اللبس 40 بس عود غير اعترف واخذ نفس قياسي؟؟ لا اخذت قياس اصغر مني حتى اثبت للكل اني مسمنانه وهسة احس راح اطگ..

حرت شغطي وحرت شسوي بروحي ودخول الامير زاد وضعي سوء، اچذب اذا اگول ما عجبني ستايله ملابسه تخببل كلش وهيبة وهو طويل وضخم جذب انظار الكل واچذب اذا اگول ما انبهرت بالبوكيه العملاق طرت بي اموت على الورد وهاي اول مرة شخص يجيبلي ورد..

الخدمني وخفف عني التوتر هو الامير نهائياً ما باوعلي ولا اللتفت اصلاً عبالك ما الي وجود، گاعد بجانبي وبس يوزع ابتسامات والنسوان ورفل اكلنا وشربنا بالهوسات..

وگف يبوس امه وعماته ونسوان عمه يسلم عليهن من بعيد، جريت نفس مختنگة من البدلة اريد بس انزعها بس الگطع عني النفس للتالي هي گفلة الملا من گالت بالسماعة..

"حبها ولك حبهاا ولا تخاف من امهاا"

عزا بعيني شنو حبها شنو لا تخاف من امها اصلاً امي مو هنا امي ميتة الله يرحمها شكو جايبها هسة؟

اللتفت امير يباوعلي خزرته وحركتله اصبعي "لا" بدون لا ينتبهلي احد، ضحك تك خد وجرني من ايدي يگومني سرت قشعريرة بجسمي كله من لمس اصابعي ودارني عليه صرنا وجه بوجه، وگف گلبي من نزل لاذني يهمس..

-الامـير علي: يعني لبستي اسود صدگ

-عبالك اتشاقه وياك؟

-خوشن

-هه

-يردوني احبچ، خاف ابوسچ وتفضحينا هنا

-لعد لا تسويها تره عواقبها وخيمة

-اممم والله؟

-وحق الله...

فتحت عيوني ويه ما طبعت شفايفه على خدي ونزل شوية باس رگبتي، غوشت عيوني ضغطي هبط ولزمتني الدوخة لزمت زنده اسند روحي وبأظافري لزمت متنه وگرصته منه گررصة موووت وخر مني بسرعة يضحك والنسوان يضحكن وياه ويگولن..

-يا حبيبتي تستحي البت تستحي

-تَـمني بهمس: حسابك بعدين بس اصبرلي

-الامـير علي: نشوف عود

-تتحداني حضرتك؟؟

درت وجهي احط عيني بعينه ابتسم ونزل نفسه لمستوايه يهمس بخفوت..

-اتحداچ

-والله؟!

-وداعة عبدالله

اليشوفنا من بعيد يگول ذولة ديتغازلون هو نازل عليها ويحچي مبتسم واني اجاوبه بالهمسة ميدرون دنتعارك وراح تشن حرب بعد شوية..

-رسمية: جيبن الذهب، حبيبة وينه الذهب يمة

ركضت حبيبة لغرفة رسمية جابت علبة الذهب ورجعت قدمتها لامها، عرضوا التخم مالتي على المليكان قبل لا يلبسني الامير بينما امه انطتنا الحلقات حتى نلبسهن لبعض..

لبسني الحلقة واني هم لبسته، ابتسم بأستهزاء وجرني من ايدي يقربني من جسمه وگال بنظرات كلها مكر..

-مبروك علينا

-بدينا بالتمصرن

-چا شترديني اگول منحوس علينا؟

-فراقد: ههههههه شجاي يسولفون العرسان صارلهم ساعة

-تَـمني: ديگولي طالعة كلش حلوة خالة

-فراقد: يااا بعد گلبي تشبع منها بعدين اصبر شوي

-تَـمني: اي خالة گوليله تره استحي گدام الناس اميري كافي اگعد راحة

احچي على كيفي محد غير فراقد وغزوة وامه وسلوى يسمعني، اباوعله وجهه انطعن احمر وگوة لازم روحه لبسني الذهب شلون مچان وراد يطلع وامه صاحت..

-چا هديتك وين يمة لا تنساها ههههه

باوعتله مستغربة يا هدية بعد؟ اللتفتلي وطلع من جيب دشداشته علبة مقدفة لونها احمر فتحها وطلع منها سلسال ذهب طويل كلش لمعت عيوني بشوفته كللش حلو ينلف على الرگبة مرتين..

-الامـير علي: حسابچ بعدين

-تَـمني: امداني اي والله

-فوگاهة

-اي فوگاهة! هاي بدال متگول كلمات حلوة تكولي حسابج بعدين؟ لعد انتَ هم حسابك بعدين وراح تشوف

ضم شفته جوه انصدمت من شفته يضحك وگوة كاتمها، لبسني السلسال غصب وراد يطلع ورجعن يصيحن حبها ولك حبها..

جرني من خصري بقوة شهگت من لمسته ونزل نفسه يبوسني بخدي وهمس بأذني..

-لا تتحمسين زايد گاعدلچ ركبة ونص

طلع وعافني ما عولت شوكت الحفلة تخلص وطلعوا الناس، ركضت اصعد فوگ بس اريد انزع الفستان بعدني دا افتح السحابة وانفتحت الباب عليَّ ودخل هو..

-ليش اجيتتت يمعود راح امووت

-شكو شبيچ

-ليش اجيت حباب اريد ابدل

-غير امي صعدتني اشوفج بعد عيني

-وهسة شفتني مو؟ يله تفضل بس ابدل وتعال مرة ثانية وشوفني للصبح

-لا ذيچ للعرس اگعدلچ للصبح

-اهووووو

بعده ما لحگ يجاوبني ودفعته امه تدخله لغرفتي وهي اجت وياه، هوست شوية بغرفتي لابنها وباست خدوده ثنينهن وجرتني تبوسني وتباركلنا.. لزمت ايدي وحطتها بين ايده وگالت وعيونها مدمعة..

-رسمية: يوم اشوف برزتكم حبيب امك وافرح بيك

-بعد عيني يمة اروحلج فدوة

-بعد روحي روحك

جرتني تبوسني مرة ثانية بينما هو وگف على جهة ينزع عگاله، مدتلي چكليته وحطتها بسرعة بصدر البدلة مالتي شهگت مخترعة وردت اطلعها وما قبلت، همست بأذني..

-وكلي الچكليته

-عزااا خالة شلون

-خايبة شبيچ طلعيها ووكلي

-لا لا ماريد

عضت شفتها وباوعت لابنها الاجه يوگف بصفنا، رجعت تهمس..

-خلي يشوف عود

-عزاااا

-الامـير علي: بس عوزج ملاية وتلطمين بعد شبيچ خلصتيها عزه وعزه

-تَـمني: مو.. مو...

ضحكت رسمية وطلعت وره ما خزرتني بحدة واشرتلي على الچكليته، يمة شصار بيه لو امووت ما اوكله الچكليته شنو تخبلت..

-الامـير علي: والله انتن النسوان عليچن سوالف

-هاااااا

-سوالفچن تضحك

-لا لا والله اني معليه تره هاي خالة هي جبرتني وحطتها والله اني شعليه تره اني ماعندي هالسوالف عيب والله العظيم ماعندي

صفن بوجهي ما مفتهم، غميت روحي الفاهية كتيتهن گدامه وهو ميقصد الچكليته..

-الامـير علي: شنوه العيب؟

-هيج ولاشي

-امممم، چا تعاي گعدي يمي شبيچ موگفيچ قصاص

مشيت مستعجلة وگعدت بصفه وافرك بيدي اخاف حتى انزل عيوني لا ينتبه للچكليته..

-اي شكو ماكو

-ماكو غير القرف والهوسة

-ها خير ان شاء الله

-اگولك امير

-امم

-لا لا هيج انسى

-خوشن

سكتنا ثنينا شوية، هو طلع تلفونه يگلب بي واني گاعدة على اعصابي راح انفجر..

-چا شوكت تنطينياهة

-شنو هي؟

ابتسم واشر بعيونه على مكان الچكليته ورفع عيونه الي، جحظت انظاري ومن لا وعي غطيت صدري بأيدي..

-عزااااا

-يا ستار ياربي سكتي شبعتينا عزيات اليوم

-انتَ وااحد متستحي

-چا هسة ياله دريتي

-ولك ولك باوووعو شلون يحچي وياايه شلون عيبب

-ويامن جاي تسولفين؟

-ويه الـ.. ويه اصدقائي الخياليين!!

-چا ما ناوين يطلعون من الغرفة جماعتج الخياليين خلينا ناخذ راحتنا

-لا ما راح يطلعون!

-ميخالف يلا جيبي الچكليته

-امييييير شبيك

-امـــــــــييير مابي شي يريد الچكليته

-اكرررهك اسكت لا تعيب علييه

-ليش اسكوووت هذا حگي

-حقك شنو تره الچكليته مالتي ودليل موجودة بصدري!!

-بويااي

جفلت ويه ضحكته وانتبهت لصخام وجهي وشنو گلت، من الفشلة والخجل طلعتها گدامه وفتحتها بسرعة وحطيتها بحلگي..

-هههههههههههههه خرب راسج فهاوي جيبيها

-ما مااا متاكلها لااا

طفر عليَّ چتف ايدي ولزم وجهي حيل حتى ما اعلسها، متت وجع وحاولت ابلعها بس بعدني ما لچتها اصلاً.. حاضني حيل مچتفني بأيد ومد ايده بنص حلگي وطلعها بأصابعه واكلها..

-لحگونيييييييييي هذا متحرررررش

-والله خوش چكليته هاي

-هدنااااااي

-هيدي ولج خرب روحج خلنتزقنب الچكليته عدل

-سمممممم سممممممم

-بگلبچ بت الاوادم

-امير انتَ متستحي هاي عود انتَ شييييخ

-اشتععلت روحه للشيخ لا تذكريني خرب

هدني وراح گعد على چربايتي، ظليت اللهث اتنفس سريع ووضعي مخربط احس فچي يوجعني شگدما عصره..

-حلگي يوجعني هو هيچ يلزمون

-تعالي اطيبه

-شتسويله تجبسه الي؟؟

-تعاي وشوفي شسوي

-اووي دوخر

-والله خوش چكليته چثريلنا هالنوع يرد الروح

-اووووف لو اللزمك

-هذا انا گدامج

-لاا مو هيج اقصد.. اقصد.. خلص بطلت ماريد اللزمك

مشيت ضايجة وگعدت بقوة على چربايتي عود زعلانة وياريتني مچبوبة وگاعدة عدل مثل الاوادم لان ما سمعنا غير صوت الشگ الصار بفستاني من الجوانب..

-الامـير علي: اوووي عزاا

من قوة الصدمة ظليت گاعدة وجهي للامام ومبلوع لساني وين اضم وجهي ووين اولي شلون راح اگوم خرب روح الغباء!!

-هاي شني، شهالگيمر الطلع

نزيت من مد اصبعه يتلمس الجوانب طالع جسمي، غطيته بأيدي وصرخت بجزع..

-حباب لا تباوع حباااب

-لا خلص ما اباوع، جيبيلي ماي شحطت بلعومي هالچكليته والله طيبة

-انتَ روح اشرب جوه

-هاا ولج مو انا زلمتج هو هيج يعاملون الزلمة ما انلام اذا خنتچ بعد يومين

-روح خون بس عوفني

-خوشن

گام وطلع من الغرفة ومستمر بالضحك، ذبيت نفس واغمغم بروحي شلون مواقف تفشل يربي هالرجال متعبني كلما اشوفه انثول.. رحت لكنتوري اجيبلي تراك وطفرت اصرخ من طب للغرفة مرة ثانية يگول..

-اگلچ فهاوي.... هاا شني هاي جاي تبدلين؟

-اطلععععع بررره

-گيمر السدة وجبن عرب وحليب هوايش

-ايييييع اطلع

-نعمة الله ولج ليش ايع الايع انتِ

-روح بره راح امووووت

-موتي حتى يحسبوچ شهيدة الفشلات

طلع يضحك بصوت عالي وطبگ الباب وراه، ركضت اقفل الباب من جهتي اخذت المفتاح منه اخر مرة تحسباً خاف يحبسني، لبست برنص على جسمي واندگت الباب عليَّ، رحت افتهحها وابتسمت من شفتهن شمس وعبق بعدهن بمكياجهن بس لابسات صايات وشال على راسهن..

-شمس: تَـمني حبي نصعد عشاكم فوگ احنه لا تنزلين

-تَـمني: منو احنه؟

-عبق: انتِ والامير

-لاا حبابات بنات ماريد اتعشا وياه تفشلت علما گلت بس قبل شوية

-عبق: دسكتي راح اجيب العشا هنا يمعودة گعدو سوه سولفوا وعيشوا الاجواء

طلعن من غرفتي واني اخذت التراك ورحت للحمام، فليت التسريحة ومسحت مكياجي ولبست التراك، شلت شعري كبة عالية وطلعت من الحمام شفته واگف بباب غرفته وصافن على يدة الباب..

-شبيك

رفع عيونه الي واشرلي اتقرب، مشيت كم خطوة صرت تقريباً مقابيله بلل شفايفه بلسانه وحك طرف انفه حاير..

-شصاير اكو مشكلة؟

-لا.. انا ماريد عشا لا تصيحيلي

دخل لغرفته عايفني بحيرتي، استغربت من تصرفه وظل بالي وياه خفت صاير شي وراد يبلغني وتراجع.. صعدن عبق وشمس جايبات العشا استحيت اگلهن مراح ياكل الامير تشكرت منهن وراحن..

اكلت شوية وسويت لفة اله، ظليت ساعة افكر اخذله اللفة لو لا ماعرفت شتصرف جزء مني كارهه وما طايقة شوفته، الحچي الي سمعته اليوم كسرني وحسيت روحي شگدوتني من سمعت مرة تگول بطول زري ولعبت على بيت الشيخ ولفت عليهم وجزء ثاني احس اريد اعرف شنو بي..

قررت اخذله اللفة، طلعت من غرفتي اتسحب على اطراف اصابعي وگلبي يرعد مرتبكة ذبيت نفس ووگفت بباب غرفته، دگيتها وتعجبت من انفتح باب غرفته وطلعت منها رفل!

-رفل: تَـمني؟

-رفل

-رفل: هلا حبي محتاجة شي؟

-لا.. اجيت اگول.. اگول للامير على امتحاناتي ما بقالهن شي

-اي بس هسة هو بالحمام بكيفج تردين تنتظري؟

-لا

عفتها ونزلت مستغربة كلش وجودها بغرفته شلون يسمحون بهيجي شي ومعقولة محد حاس عليهم؟ اخذت الصينية للمطبخ شفت بس عبق واگفة تمسح الطباخ..

-شنو عبق لعد وين الباقين؟

-راحوا كلمن لبيته

-شو من وكت شعجب

-يا من وكت يمعودة باعي الساعة بيش

-اي صح، وين حبيبة شفتيها؟

-اي بغرفتها شو مالها خلگ من وقت الحفلة شفتها تعبانة

-مچان بيها شي بالصالون اگلچ خاف احد غثها بشي؟

-مادري والله بس ماتوقع محد يغث حبيبة الكل يحبها ويحترمها من دون البنات

-لعد شبيها؟ تجين نصعد نشوفها؟

-اي اني گلت بس اكمل المواعين اصعدلها

هزيت راسي مأيدتها، غسلت المواعين التعشيت بيهن وضميت لفات الامير بالمايكرو وصعدنا اني وعبق لغرفة حبيبة.. دگينا الباب ما جاوبت رجعت دگيته اقوه هم ماكو تالي عبق ما اهتمت اجت وفتحت الباب وطبت تهجم لغرفة حبيبة..

جمدنا ثنينا من شفنا حبيبة گاعدة على چربايتها حاطة المخدة بحضنها وعيونها صايرات دم حمر من البچي، دارت وجهها للجهة الثانية تضمه عنه من شافتنا دخلنا..

-عبق: حبيبة؟؟؟ شبيچ ولج شصاير

-حبيبة ببكاء: طلعو بنات

-تَـمني: ولج ليش تبجين منو وياچ؟

-محد

-لعد؟

-ماكو شي خلوني وحدي

-عبق: تمام لعد رايحة اگول لامج

-حبيبة: عبببققق لاااا

-عبق: لعد احچي شبيچ

بچت بالزايد دموعها تنزل وحدة وره الثانية شكلها يموت قهر، بعدها بفستانها الزيتوني وشعرها المفتوح ومكياجها البارز جمالها كلشي ما مغيرة من لبس الحفلة دليل حتى ما نزلت وتعشت وياهم..

گعدنا اني وعبق على چربايتها كلمن من جهة وعبق لزمت ايدها تمسح عليها بهدوء وتهمس..

-احچي حبيبة والله اموت قهر من اشوفج تبچين ما متعودة عليج

-حبيبة بدموع: شنو مو بشر انا وما ابچي قابل

-عبق: انتِ مدللة البيت ميصير تبجين ما اقبل اني

شهگت بدموعها وحضنت عبق بقوة وتبچي من كل گلبها، من قوة هضمتها دمعت عيوني وياهة وحسيت بوجعها قبل لا تحچيلنه شنو الموضوع..

-عبق: منتصر؟

هزت راسها اي وزادت بالبچي، وخرتها عبق من حضنها ومسحت الدموع من خدود حبيبة وهمست بنفس الصوت الخافت..

-شنو صار؟ حچيتو بشي؟ سوالچ شي؟

-لا

-لعد شصار

باوعتلي حبيبة ورجعت تباوع لـ عبق، كل وحدة من عدنا لزمت ايد من ايديها نشجعها تحچي بلعت ريگها وگالت گوة بصوت مبحوح..

-اليوم اجن صديقات امي رسمية لحفلة المهر سلمن عليَّ وصارت كل وحدة منهن تنطي رأيها بيه هاي التگول كبرانة وذيج التكول صايرة احلى من گبل واكو چم وحدة سألن امي اذا يجوها ناس تنطون لو لا وامي تجاوبهم..

-سلوى: اذا خوش قسمة چا ليش

-انا ابني مهندس نفط صارله خمس سنين متعين شاب صايم مصلي يعرف الله حنون على امه وخياته وما ناقصه غير المرة التگعد ببيته واحنه يا ام حبيبة نحبكم ورايدين الگرب منكم

-سلوى: بعد گلبي حبيّبتي على راسي بس بعد مو هنا تصير الخطبة تعرفين اليوم مهر اخوها والشيخ ما يرضى تتشربت خطبة بنيته

-اي خية نجي وعلى روسنا چا شون اجيب بنياتي وعماته ونجي نخطب رسمي

-هلا بيكم بعد عيني ان شاء الله خير

اسمع لامي ومزعوجة ليش املت هالمرة الحبابة وتعرف رأيي بموضوع الزواج ليش هيچ تسوي بكل مرة وتحرجني ويه ابوي؟

عفتها ورحت لبنات عمي مسعود گاعدات هنه وبنات عمي صمد وعمي مرتضى يسولفن ومنسجمات، گعدت وياهن وكل وحدة سألتني على تَـمني وشلون صارت خطبتها من الامير وصدگ الامير رايدها لو هي الرايدته..

-حبيبة: لا هو گايل لابوي يخطبله تَـمني

ابتسمت "هدية" اخت منتصر ودارت وجهها لخواتها وگالت..

-حرامات انا عجبتني اول ما شفتها گلت تلوگ لـ منتصر هو ارمل وهي ارملة ويتناسبون بلچن واحد يخفف عن الثاني وتصير بينهم الفة ومحبة

-حبيبة: هدية شني عينج عليها يمعودة البت خطبها اخوي

حچيتها بالضحك بس نيتي ابسمرها واطفي صلافتها وهي تحچي عينك عينك تريد تخطب لاخوها البت الخطبها اخوي..

-هدية: اي ما حچيت شي بس حليوة لو شتگولين صفا؟

جاوبتها صفا اخت منتصر الثانية..

-صفا: لا بعد البت تزوجت الله يوفقها

گلبي وجعني وظليت اللوبن بمكاني اعاينلهن يسولفن خواته ثلاثتهن هدية و صفا و زينب ويه بنات عمي مسعود عن خطوبة منتصر.. روحي طلعت واحس بنظرات رهف بت عمي عليَّ ادري بيها دازها غفار تراقبني وتنطي اخباري اعرف بسوالفها ماگدرت احچي كلمة وحدة ظليت بالعة موس وساكتة الى ان گالت زينب..

-زينب: بنات خطيبة منتصر هم ما عايزة حلوة كلش وبت ريف متعودة على الكراب والشغل

فكيت عيوني على وسعها ورأساً رهف باوعتلي هم مصدومة، منتصر خاطب؟؟ يمته وشلون وليش محد بلغنا!! اخذتني الرجفة واطرافي بردت وانا اسمع باقي كلامهن..

-هدية: صحيح خوش بت صح ما دارسة وثور الله بأرض الله بس هي تفيده هو بعد زواجه الاول ما يدور مرة يريد بس وحدة تربي بنياته

باست خدود بنات منتصر التوأم وانا گلبي شاب نااار، حطيت ايدي على گلبي انظم دگته لا يوگف واموت من القهر، گوة جريت بطل العصير من رهف شربت منه بلكي ابرد وارتاح..

-رهف: بس انا ادري بمنتصر مو هيچ هو مثقف وواعي ما يريد مرة بس للخدمة واكبر دليل محترمچن ويحبچن وما يرضى لاحد يزعلچن لو يضغط عليجن

-صفا: اي بعد بيتي احنه غير عن مريته چا هي المرة شني شغلها احنه رايدين نجيبها خدامة شنصخم بيها ما عولنا تموت ذيچ العلة مرته الاولى تردينا نجيب علة ثانية

-زهراء: حرام عليچن صفا!!

-صفا: ليش حرام؟ قليل بهذلتنا ذيچ وخذت اخوي الها؟؟ وبعدين شمالچن تتبچبچن شعليچن انتن البت الخطبناها راضية هي عرفته دكتور وشافت صورته تسودنت وگالت موافقة واسبوع الجاي يعقد عليها وياخذها

گمت منهن رجليه ما تشيلني اريد بس اوصل لامي واسئلها صدگ حچيهن لو بكيفهن بس كلام امي هو الكسر ظهري وخله دموعي تنزل وحدة وره الثانية وما اسيطر على روحي تمنيت اصرخ بنص النسوان واصيح من گالت اسبوع الجاي يعقد عليها ويتزوجها بنفس اليوم..

-عبق: يمة يا روحييي

حضنتها عبق بقوة وحبيبة انهارت ذبت روحها تبچي بصوت عالي ممهتمة لو احد سمعها او اكتشف هي دتبچي، القهر غلف گلبي واضح شگد تحبه ومجروحة حطيت ايدي وره ظهرها اطبطب عليها احاول اخفف عنها..

-عبق: حبيبتي لا تبچين الله يعوضج احسن منه......

ما كملت جملتها وانفتحت باب غرفة حبيبة على وسعها وظهر منها علي الحـق جاحظ عيونه واجه يركض ملهوف..

-حبيبة؟؟ شبيها ليش تبجين حبيبة عبق شبيهااا

صرخ بـ عبق تحچيله شبيها وجر ايد اخته وحط راسها على صدره يمسح على شعرها، خنست حبيبة من الخوف وبقت بس تنشر بدون دموع..

-عبق: اءء بطنها.. بطنها توجعها و.. وهاي

-علي الحـق: بطنج؟؟ امشي اخذج للمستشفى.. جيبولها شي تلبسه بسرعة

-حبيبة: لا صرت زينة

-علي الحـق: متوجعة وبالعتها وساكتة حبيبة؟؟ ليش ما اجيتينا ليش ما گلتي ليش تبچين وحدج بالغرفة؟؟

-حبيبة: مادري.. احم ما ردت اخرب فرحة امير وتَـمني

باس راسها ومسح عليه حضنها لصدره اكثر شفتها تبتسم وتغمض عيونها ولا ارادي اني وعبق ثنينا كشرنا وياهة..

-علي الحق: خليني اخذج للمستشفى نتطمن اكثر

-حبيبة: لا حبيبي صرت احسن الله لا يحرمني منكم

-احسن ودگيتي ولطمتي عايني وجهچ

-ما تعرف بأختك تحب تدلل عليكم

ضحك ورفع وجهها اله، باوع بعيونها وگال بثقة..

-حگها تدلل الشيخة

كبرت ابتسامتها وهو نزلها على الفراش ينيمها وغطاها زين، گعد بطرف السرير وهمس وهو يغمزلها بدون خجل..

-خاف عليج الدورة ولج

-حبيبة: عززااا حق شبيك انتَ شو ما تستحي

-چا غير شي علمي هذا ليش تستحين، عايني قبق جيبي خاولي دفي وحطي على بطنها وظهرها بلكت تصير زينة

اباوع لـ عبق وجهها صار احمممر من الخجل بقت تباوع لـ حبيبة الي حالها ميقل عن حال عبق وحسيتني الصلفة الوحيدة هنا لان مو كلش خجلت يمكن لان ما وجهلي الحديث ما اهتميت..

-قبق مو وياچ انا

-عبق: هاا اي اي حاضر

-علي الحـق: اخذي براسيتول مدري شنهي عنق عندج لو اجيبلها؟

-عبق: عندي عندي

-علي الحـق: چا خوش وبعد غسق سويلها حمام دافي عدنا ماي حار لو نحميلها؟

-عبق: عدنا عدنا

-حبيبة: يمعود لعبت بأسمها فلك شبيك

ضحكت بالخنسة بس انطميت وسكتت من اندار بوجهه يواجه وجه عبق لدرجة البنية جفلت ووجهها انخطف لونه، گال وهو يباوع بعيونها..

-چا ما تحچي هي لو خرسة انتِ شفق؟

-عبق: اسمي عبق

-حلو اسمج

ضربته حبيبة على زنده حتى يجوز من البنية ابتسم وگام من چربايتها وتمشى متوجه للباب، قبل لا يطلع گال وهو يباوع لساعته..

-ما بقى شي للوحدة بالليل

-حبيبة: شعندك بالوحدة؟

-علي الحـق: قيام الليل

غمز غمزة لعوبة وطلع من الغرفة وسد الباب وراه، فرت بيدها حبيبة وباوعت لـ عبق السرحت بالباب تباوع للمكان الچان واگف بي علي الحـق..

-حبيبة: ها حبي سالمين؟

-عبق: شنو

-تَـمني: شبيچ وين عقلج

-عبق: بنات اني لازم اروح.. عندي شغل.. شغل بالحديقة انظفها وراهة انام كلش تعبانة حبيبة فدوة اجلي بچيتچ لباچر حتى اكون يمچ وما تلطمين وحدج

-حبيبة: صار

طلعت عبق تهرول من الغرفة تصرفها غريب بس ما علقت ولا حبيبة الظاهر متعودة على شرداتها، گمت صبيت لـ حبيبة مي من الدولكة الي بغرفتها وقدمتلها الگلاص..

-حبيبة ممكن سؤال

-اي حبي

-اني توقعت منتصر يحبچ او على الاقل يكون معجب تفاجأت هسة من گلتي خطب

نزلت راسها تباوع لگلاص المي بدون جواب، بللت شفايفها بلسانها وگالت ببطئ..

-منتصر ما يشوفني اصلاً

-شنو شلون يعني؟

-ما يشوفني مرة بعده يباوعلي بنفس النظرة من چنت طفلة بعده يحزرني حزورات ويهتم لدرجاتي واكلي، ينتبه ويامن اماشي ويدلعني چن طفلة ويتنمر عليَّ مثل اخواني بالضبط

-وشنو ردة فعل اخوانج من يشوفوا يعاملج بهالطريقة؟

-ما يضوجون منتصر الوحيد ما يضوجون من يتواجد لانه تيتم على صغر ابوه مات وعمره 9 سنين وربى اكثر شي ببيتنا وويه ابوي وابوي چان حريص يذكره وينبهه هو اخوي العاشر ويعاملني هالشكل

-وانتِ حبيتي

-حبيته.. بس والله ماكو مرة بينتله انا احبه لو اكو شي بگلبي يجوز اوقات اسهى وانسى ويبين على وجهي او كلامي بس من اتذكر وانتبه لروحي اتغير وارجع طبيعية بس شسوي لگلبي والله جاي اموت تعبت تَـمني انا تعبت

-الله يساعدج هالحب صعب لان يعتبر حب طفولة، زين شنو چان حالج من تزوج اول مرة هم هيج تأذيتي؟

ضحكت مستهزأة وفرت بيدها، نزلت دمعة من عينها مسحتها بيدها وگالت بغصة..

-تزوج صديقتي

-مستحححيل

-صديقتي روح بروح وتدري بيه عاشگته حرگت گلبي واربعة اشهر وره زواجه انا لا اكل ولا شرب اهلي يركضون بيه من مستشفى لمستشفى

-عزا بعيني ليش هيج سوت؟؟ هي ماتت مو؟؟

-ماتت اي الله يرحمها ويغفرلها

-شسوت حبيبة شلون تزوجها؟ يعني حبها وحبته؟

-لا لا هو اصلاً ما يعرفها

-لعد شلون تزوجو؟

-المرحومة چانت تدري بيه احبه وانا هذا لساني الطويل ينرادله گصص ماكو سالفة ما سولفتها الها عنه گلتلها گلبه طيب ويهتم بالكل وحنون واخوتي يحبوا وهو يحبهم ووووو اشكال واللوان..

-اي؟

-تالي بيوم انا عازمتها ببيتنا متعودة دائماً اجيب صديقاتي للبيت لان ابوي ما يرضى اروح لبيوتهن فـ انا اعزمهن وعزمتها هو چان موجود واكثر وقته يگعد وينام بالهول من يبات عدنا يسهرون هو واخوتي للصبح

-وشصار

-هي سمعت بي موجود نزلت للهول منتصر چان بالحمام مايدري بيها، نزعت هدومها ونامت بفراشه من طلع من الحمام انصدم بيها موجودة بهالحال ومن حجم المصيبة ما صاح وراد يستر عليها ويخليها تطلع بس هي استغلت الفرصة وصاحت واللتموا اهل البيت كلهم

-يمممممةةة

-اجو ابوي واخوتي وهي تبچي وتلطم على وجهها لازمة قميصها ومزگته وتگول منتصر جرني للهول و تحارش بيه ورادها علساس تسوي شي وياه، الزلمة حلف بمية امام هو ماله غرض بيها بس الموضوع كبر والسالفة تحولت لسالفة شرف وهي ما گعدت وسكتت ووصلت الصار لاهلها واجوا يهدون على ابوي ويردون راس منتصر

-حبيبة صددگ تحچين؟؟

-اي والله واشكال رادو يجيبون شيوخ يتدخلون وابوي گال ننفضح والحل الوحيد منتصر يتزوجها ونسد السالفة، خواته تخبلن من شافن حال اخوهن بس كل يوم يمر الموضوع يكبر وينحجي بينا اكثر تالي تزوجها وانسد الموضوع

-وجاب منها جهال مو؟

-اي توم بنات همه بداية علاقتهم ما چان يريدها بس هي هم بچت وشكت لخواته تگللهن اخوچن يمكن مو زلمة حطته بموقف محرج واضطر يتمم زواجه منها بساع حملت وماتت بالولادة صارت عدها مضاعفات

-لا حول ولا قوة الا بالله والله انصدمت شحصلت من سوت كل هذا؟

-بنظرها حصلته

-ما تزوج وراهة مو؟

-لا

-زين حبيبة يمكن تكون البنية صادقة وصدگ منتصر راد يتحارش بيها؟

-انا وياچ رغم منتصر امشي وياه وانا عمية بس ويه نزلتها وصيحتها دقيقتين شلحگ بهالدقيقتين يصيحلها وهو چان بالحمام؟ والشغلة الثانية لو راد يسوي وياهة شي چا ياخذها بالهول والولد كلهم يلتمون عنده كل يوم بهالوكت؟ والسالفة انخصمت وتبرئ منتصر كلياً من هي اعترفت من چانت جاي تجيب گالت انا تبليت عليه لان عشگته وردته الي وهو ما مهتملي

-استغفر الله هسة واحد ميكدر يكول غير الله يرحمها

هزت راسها ساكتة ومسحت باقي دموعها، خليتها براحتها وطلعت من الغرفة متوجهة لغرفتي وافكر بموضوع وبـ رفل وين راحت؟ معقولة بعدها بغرفة الامير بس شنو ديسوون هناك وشلون تصعدله هيج هو شلون يقبل مو علساس محترم ويخاف الله ويهتم للحلال والحرام لو من تجي السالفة يم رفل يتغير؟

رحت للحمام فرشت اسناني ورجعت للغرفة وطبيت بفراشي انام، غفت عيني فترة وحسيت على شخص يگعدني وصوت يهمس..

-تَـمني تَـمني گومي حبابة

گمت مفزوعة من ميزتها عبق، ماكدر أشوفها عدل الغرفة ظلمة فتحت التيبل لامب وگعدت عدل افتهم شبيها..

-شبيچ عبق شصاير؟

-تَـمني اخو حبيبة يريدني اروح وياه لبيت صديقه انظفه واني ماريد اروح حبابة گوليلي شسوي؟؟

-اوكفي منو منهم يريدج ترحين وياه؟

-علي الحـق

-يااا

-تَـمني بلا فهاوة ساعديني شسوي وين اروح؟؟

-خو گوليله ماريد اروح

-ميقبل يكول حاچيت صديقي وانطيته خبر راح تجين

-عبق شو ممرتاحة شعندج رايحة لبيت رجال غريب ووياج واحد مثل علي الحـق صح هو حلو ويموت بس حتى لو ميصير ننغر بوجهه الصاك

-تَـمنييييي

-هاا

-انيي ماريد اروح ويااه مدا اگلچ اريددد

-صح صح زين باعي ابقي هنا بغرفتي ولا تطلعين منها اكيد ما راح يجينا لهنا

-راح يجي لج هذا ميستحي المهم الي براسه يسوي اني اعرفه محد يگدرله لا ام ولا اب

-اروح وياچ وتگوليله انتِ مريضة او تعبانة ومتكدرين؟ يمكن من يشوفني يخجل ويبطل هاا شتكولين؟

-برأيج يقتنع؟

-اكيد يقتنع.. امشي ننزل

لبست روب فوگ بجامتي ونزلت وياهة، من گدما ايدها ترجف ايدي دتنخض وياهة.. البيت مظلم والساعة عبرت الوحدة ونص تمشينا للحديقة ووگفنا ننتظره يجي..

-عبق: هو گال بالوحدة بس شو ماكو؟

-علي الحـق: لان صارلي نص ساعة انتظرج

اللتفتنا ثنينا مخترعات طلع من الحديقة الثانية البيها تنور وتمشى ناحيتنا جگارته بيده والايد الثانية بجيب بنطرونه..

-تأخرتي

-عبق: ما راح اجي

-ليش

-لان اني تعبانة وماريد اروح لمكان

-خير ان شاء الله

-تَـمني: تصبح على خير

-علي الحـق: تصبحين على خير تَـمني بس عبق راح تبقى عندي

-عبق: ليش؟؟؟

-علي الحـق: لان الرجال انطيته كلمة وعيب اخلف بيها باجر شلون يتورط بالعزيمة ويگعدون الناس على الوصخ؟

-عبق: اللگه غيري ليش الا اني!

-والله يا بعد گلبي ماكو وحدة غيرچ تگدر تطلع بهالوقت تنظف بس بنات الليل موجودات ويدورن سوالف تعبانة

عصبت كلش من اسلوبه وكلامه وعبق متقل عصبيتها عني بشي، تقرب حق اكثر واردف يكمل كلامه..

-بس اكيد انتِ مو بنت ليل واضح هالشي واني اريدج تسترزقين وتحصليلج خوش مبلغ يطلعج منا

-شنو قصدك

-قصدي واضح قبق انتظرج بالسيارة

عافنا وراح لسيارته بقينا لا ناخذ ولا ننطي، عبق صفنت تفكر بكلامه واني صفنت لانها صفنت..

-تَـمني: لا تگوليلي راح ترحين؟؟

-مادري تَـمني يمكن صدگ احصل خوش مبلغ يفيدني للسادس

-عبق!! تخبلتي انتِ شلون ترحين لبيت رجال غريب ويه علي الحـق انتِ ثنينهم متعرفيهم شلون تجازفين بروحج؟؟

-تَـمني اني گضيت عمري كله مجازفات گعدتي بهذا البيت مجازفة اني ماعندي احد اسند روحي عليه ولا عندي فلوس تطلعني من هالضيم اني محتاجة هالشغل عسى من انام بالليل هلكانة تعب اكون مستفادة من هالتعب وعندي كم فلس للعازة

-شكد راح ينطيج هذا الرجال؟؟ اني انطيج ضعف المبلغ بس لا ترحين

-ماحب احد يتصدق عليَّ تَـمني عوفيني

-ولج عبببق

هدت ايدي وراحت وراه روحي راحت وياهة خفت عليها ولاول مرة يصيبني هالاحساس ان راح يصيرلها شي مو زين وراح تتأذه هالبنية.. ممكن اني وغيري يشوفون تصرفها غباء بس العيشة العايشتها هنا عبق ما اتمناها لكافر حسرة عليها اللبس وحسرة عليها الطلعة والونسة بنية عايشة بمخزن وكأنها حشرة مالها أي حقوق..

ما كدرت ارجع للغرفة كعدت بالحديقة على المرجوحة روحي وياهة وگلبي حاطته بشيشة من الخوف عليها، افرك بيدي وافكر ابلغ أي احد بس منو يكول يوگفولها ويهتمون؟ يجوز اذا گلت لاحد راح اجيبلها مصيبة وعلي الحق يلوف عليها شي ويطلعها هي الموزينة ويطردوها من البيت واضح هالرجال ما طايق عبق وميريدها هنا..

تلفوني بيدي وگاعدة متأملة ترجع عبق وتتنازل عن الطلعة بس ما صار هالشي للاسف، انتبهت على اشعار اجاني من الامـير علي كاتب..

"گاعدة؟"

شفت الرسالة وبينت عنده شفتها بس مجاوبته وسديت التلفون مالي نفس احجي وياه وماريد اتعارك بهالليل، دقايق واجتني رسالة من رقم غريب بالبداية استغربت منه بس الرسالة وضحتلي منو هو..

"انا علي التـقي اگدر احاچيچ تَـمني؟"

فكرت بالرسالة شعنده تقي ويايه؟ ارتبكت من اللحق رسالته بـ..

"انا بالبستان طلعيلي ما اخذ من وقتچ دقايق"

گلبي لعب وخفت اطلعله فوراً كتبت..

"لا تقي ماكدر اطلع بهيجي وقت الصبح نسولف"

"طلعيلي"

"ماكدر شوف ساعة بيش"

"طلعيلي ما نتأخر"

"تمام جايتك"

فوراً طلعت من محادثته ورحت لمحادثة الامـير علي كتبتله..

"اي گاعدة"

ما شافها يبووو مو وكتها وين رحت يمعود، رجعت كتبتله..

"اريدك تگدر تجيني؟"

هم ما شاف الرسالة دگيت عليه رن رنتين وسديته حتى ينتبه على الرسائل، فتح الرسالة وكتبلي..

"انا بباب غرفتج"

"لا تعالي جوه بالحديقة اني"

سديت تلفوني وعيني على باب المطبخ الراح يطلع منه، دقيقتين وشفته اجاني وگفت بسرعة من المرجوحة وهرولت بأتجاهها وبيدي التلفون..

-امير اريد احجي وياك

-حتى انا

-شوف علي التـقي شنو دازلي

مديتله التلفون يشوف المحادثة وعگد حاجبه مستغرب، اردفت اكمل..

-خفت اروح لا يشوفنا احد ويفكر بغير شي

-زين تسوين

-شعنده تقي برأيك؟

-علمي علمچ لان اصلاً تقي مو هنا

-لعد وينه

-طلع للغربية وره العقد مباشرة

-يجوز رجع؟

هز راسه بـ لا ودگ على علي التـقي من تلفوني، يرن ومحد يشيله يرن وماكو جواب شوية وفصل الخط واجتني رسالة من رقمه كاتب..

"لا تتصلين بيه تَـمني ماكدر احجي اخاف لا يسمعني احد"

-الامـير علي: وين اكو هيج بطلة تلعب شناو علي التـقي يخاف لا يسمعه احد؟؟ تقي يخاف؟؟

-امير شبي اخوك شنو سالفته؟

-صبري نتصل على خطه الثاني

طلع تلفونه ودگ على رقم علي التـقي وفتح سبيكر، قريب لا تخلص الدگة جاوبه تقي..

-هاا امير

-وينك تقي؟

-واجب عندي شنو شبيك صاير شي؟

-لا، يعني انتَ بغير محافظة؟

-اي شكو امير شبيك خوية صاير شي وياك؟؟

-لا والله بس ضايج شوي

-من وره خطبتك؟

-اي

باوعلي من گالها گلبت عيوني فوگ وعوجت حلگي بحركة ام زكي..

-علي التـقي: ان شاء الله خير سهلها تسهل حبيب

-عود كلت نطلع انا وياك وابا الحسن وحق نغير جو

-لا وين مو گتلك عندي واجب عود من ارجع

-خوشن يمكن ما يصير تحجي بالموبايل روح لا اعطلك

-فيمالا

سد الاتصال منه وهز راسه وهو يگول..

-ماخذين موبايله الثاني

-معقولة تقي ما انتبه لتلفونه الثاني ما موجود؟

-من يطلع واجبات ما ياخذه وياه هذا بس لجماعته مخلي

-منو ممكن يكون؟

-هسة اشوف

عافني وفتح باب الديوان ودخل رحت وياه وشفته يطلع من البوفية خنجر چبير شكله حلو كلش، اخذه وطلع للحديقة يعبرها يريد يطلع للبستان گلبي مقموت وهالشعور المو حلو مدا يروح من صدري، كمشت معصم ايده وهمست..

-لا تروح امير

-خليني اروح اشوف منو هذا اليلعب علينا

-لا عوفه حباب

-ليش؟

-مادري ممرتاحة گلبي مقبوض لا تروح

-تَـمني هذا وينه البستان ما اتأخر انتِ صعدي لغرفتج

-لا فدوة بداعة امك لا تروح والله ممرتاحة احس راح يصير شي

-واعوفه يسرح ويمرح بگاعنا بكيفه؟؟

-اي عوفه خيولي...

بنفس اللحظة اجت رسالة من نفس رقم علي التـقي على تلفوني كاتب..

"تأخرتي تَـمني انا رحت بعد ما يحتاج تجين"

-تَـمني: معقولة شَك ان گتلك؟

-اكيد اي

-لعد ابقى لا تروح ما دامه ولى عوفه خيولي هذا الحقير

-انتِ ليش سهرانة؟

-عبق راحت ويه اخوك وخفت عليها

-شعدها؟؟

شرحتله السالفة من البداية للنهاية ظل ساكت ويسمعلي، توقعت راح يعلق او يحجي على اخوه بس ما سوه هالشي بالعكس أيد فكرة علي الحـق..

-صدگ تحجي انتَ!!

-اي راد يساعدها الزلمة شنو المشكلة؟

-يساعدها ياخذها لبيت صديقه؟؟؟

-تَـمني تعلميني بأخوي وغيرته؟؟ علي الحق حامي ومسودن لا عبالج راح يعوفها وحدها وانا متأكد ما اخذها لبيت صاحبه يريد يستجوبها ويعرف سالفتها ما راح يسويلها شي

-مستحيلين انتوو شبيكم ويه هالطفلة المسكينة!؟

-ماعندي شي وياهة انا بس هذا حق لا راح يرتاح ولا يهيد الا يعرف سالفتها وسبب گعدتها هنا

-عود شيخ انتَ؟؟

-هم گالت نععل

-اووووه انتو كلكم تشلون الگلبب اروح انام احسن

-اوگفي تعاي

-هاا خيرر

-وجع هاي شبيها تحاچيني من طرف خشتها ما غزرت المية وردة الجبتها لراسج المصفح

-روح اخذ ورداتك وانطيهن لغيري متمشي عندي هالكلاوات

-يله سكتي وتعاي اريد احاچيچ

-شووف اذا اجيت تگولي قربنا موعد الزواج هسة اتخبل عليك افضحححك واشهرك هنااا بالحدديقة

-باع هاي ياهو يريد يتزوجچ انتِ مو كافي عليّ ضيم ابو كربله تجيني انتِ انوب

-ههيهيي طايح بيدك اتزوجك

-هسة غير تسكت وتخلينا نحجي

-يله شيخي احجي

زفر متنرفز كللش اموت ضحك على ردة فعله من اصيحله "شيخ" گعد على المرجوحة وگعدت بصفه بلع ريگه وذب نفس هادئ ما حچى شي ابد..

-ما راح تحچي؟

دار وجهه يباوع لعيوني ثواني، بلع ريگه مرة ثانية وضم شفايفه بداخل فمه، روحي انسحنت خوف من گال بهدوء شديد..

-تَـمني

-لا حباب

-شنو

-لا تعترفلي بحبك فدوة

-شنووو؟؟

-باوع امير انتَ كيوت ولطيف وحباب وكلشي بس انتَ مو ستايلي اني ماريد اتزوج شيخ ماكدر احس...

-تَـمني!!

-امير لا تضغط عليَّ فدوة اني متأكدة راح تحب غيري والله يعوضك و...

-دخيل بختك يا حسين

-اي امير وحباب لا نحجي بالموضوع والله راح اكوم استحي منك بعدين خلينه هيچي اعداء ومرتاحين

-هااا

-اي والله

-چا خوشن يله ختولي

-اي واني اخطبلك احلى واحسن مني ماشي؟

-ماشي

-شكراً

-جسر للطيبين

-وهسة راح اروح انام لان تعبت كلش باجر نكمل عركتنا

گمت من المرجوحة وبنفس اللحظة لزم ايدي امير بقوة يوگفني، باوعت لايده مستفهمة حركته وكبرت علامة الاستفهام على راسي من طلع من جيبه چيس اسود صغير وقدمه الي..

-عايني

-شنو هذا

رجعت اگعد بصفه بينما هو طلع كفوف من جيبه لبسهن وفتح الچيس الاسود.. توسعت عيوني من شفت محتوياته عبارة عن شعر ومادة لزجة لونها اسود وسن مكسور وورقة صغيرة مطبگة هوايه ومبين مكتوب بيها شي..

-امير شنوو هاي

فتحلي الورقة وقدمها لعيوني حتى اقراها، خفت اقره ووخرت بسرعة منه..

-هاي شبييك ما اقراهة تريد تسويلي سحر!!

-تَـمني لگيت هاي بغرفتي!

-صدگ تحچي

-لگيته بين هدومي تعاي شوفي شمكتوب

-لا خاف ميصير اقرا لا اني انسحر وياك

-كلشي ما يصيرلح تعاي

-ما، اخاف

-تَـمني ولج خابرت واحد يفتهم بهالسوالف كال ما تتأثرين تعاي اقريها

مدلي الورقة اكثر حتى تتوضح عندي و شگدما انصدمت بمحتوى هالچيس انصدمت اضعاااف بالمكتوب بالورقة، طلاسم غريبة ودوائر مرسومة وكلمات متفرقة يمدون بالاحرف مسويها على شكل هرم اول كلمة تبدي بـ..

"حب"

"عشـــق"

"هـــــــــــــوس"

"جنـــــــــــــــــــــون "

"يعشــــــــــق تَــــــــــــــمني"

"الامــــــــــير علي مُلك تَـمنـــــــــي"

"هـــــــوس الامــــــــــــــير علي بـ تَـمني"

"بخت بخت يا مبخوت، اني ت م ن ي احب الامـير علي"

"سـ،،،ـحـ،،ـررر بأســـــــــــم تَـمني للأمـــــــــــــــــــير علي"

اقرا وعيوني طلعت من وجهي باوعتله ينظرلي بنظرة ما افتهمتها، حسيت بوجع قوي ضرب راسي لزمت گصتي ودرت وجهي عن الورقة مرعوبة....

**

"عــــبق"

ركبت سيارته ومشينا مسافة لا بأس بيها، احس نبض گلبي صاير براسي ماعرف شدا اسوي وليش دا اروح وياه هو منو وهيج واثقة منه يمكن يطلع انسان مو زين ويستغلني ببيت صديقة، عبق لا تفكرين بس بالفلوس شنو الفائدة تحصلين فلوس ويجوز يصيرلج شي من كل عقلچ ترحين وياه اصحي عبق اصحيي!!

-تگدر ترجعني للبيت

-ليش؟

-ماريد اروح بطلت

-هو بكيفج تبطلين غير متفقين احنه

-ماريد اروح ماريد افتح السيارة

-عبق گعدي وسكتي وصلنا لبيت الرجال

-رجعنيي علي الحـق رجعنيييي ماريد اروح بطلتتتتت

-لا تصيحين

-رجعنييييي اني مو هيج ماروح لبيوت نااس ما اشتغل بره بيتكم رجعنيي للبيت بدااعة امك

-ليش ما فكرتي بهالشي گبل لا نصعد شصحاچ هسة؟

-اني غبية ادري والله ادري اني غبية چنت مو بعقلي افكر بس بملازم الساددس اريد اشترريهن اريد انجحح حباب بس رجعني ماريد اروح وياااك التووبة ماعيدها بعد ما اسويهاا اني شلوون امنت بييك شلوون ما سمعت كلام تَـمنييي

-عبق اهدي ما راح اسويلج شي ليش تبجين

-نزلني فدوة فدوة احلفك بعزيز گلبك تنزلني

من الخوف بطني خبطت والطريق سريع وهو سياقته سريعة ايدي ورجلي وكلشي بيه يرجف متندمة بگدد شعر راسي صعدت وياه شلون سويت هيج طرگاعة دخيلك ياربي تستر عليَّ حتى السادس ماريده بطلت لا ملازم اريد ولا اريد شي بس ارجع للمخزن..

-تنزلني هناا لو اذب روحي من السيارة والله اذب روحي علي الحـقققق

لزمت السكان اديره عليَّ حتى يوگف گام يصيح عليَّ ما راضي احس گلبي راح يوگف مادري وين چان عقلي من صعدت وووين چان..

-ما انزلج وراح نسولف بهدوء شبيچ خايفة عبببق لا تكضين السكان لا نسوي حادث

-نزلنيي حبااب حباااااب

-عبق اهلج وين؟؟ ليش من سألت على ابوج گالولي ميت وامج مرية ملعبة ومسافرة چا منو جابچ لبيتنا وليش اجيتي لبيتنا بالتحديد؟

-معلييك افتح الباب افتحهاا

-ما افتحها الا تجاوبيني شنو علاقتج بمرة ابوي سلوى؟؟؟

-افتح الباب راح اشمر رووووحي

-ماااااا افتتتح جاوبيييي سؤالي شنو علاقتج بمرة ابوووي شنو جاي تسويلچ وشلازمة عليييچ؟؟؟

صياحه خلسني من الخوف ماعرفت شسوي شلون اجاوبه راح يحچي لسلوى وينتهي امري، باوعت لقفل الباب وفتحته من يمي..

-عبققق منو مخوفج حاچينييي

-محد مخوفني محد محد بس نزلني نزلنيييييي

-خوش عبق اعرف شلون اتعامل وياچ راح ترحين لبيت صاحبي وانا اعلمج هناك

بچيت بجزع، بخوف ورهبة، بضياع ووحدة، باوعت لقفل الباب وليدة الباب، رفعت نظري اشوف الشارع الطريق عام وفارغ الدنيا ليل ماعرفت شسوي تهت وحسيت كلشي راح امي راح تموت بسببي واني اضيع بدونها، ما تمنيت غير الامان غير الحب يحاوطني انجح واعيش حالي حال كل البنات تعبت من الخوف تعبت من الحزن والاذية تعبت من الذل والاهاين..

شنو ذنبي وليش امي جابتني لهالدنيا الغبرة لييش اني من دون البنات اعيش هيج تعاسة!! بهالدقايق تمنيت الموت اريد اموت واخلص من هالعيشة من لا شعور ولا وعي فتحت باب السيارة وشمرت روحي منها وبعد ما حسيت بغير الظلام يحاوطني.......

يتبع 👑...

━━━━━━ ♛ ━━━━━━

تَـمني والامير علي 🫠!!!

وعبق يمكن ماكو مثل عبق بطلة هيجي اثرت بيه احس اريد اطب بنص البارت واحضنها 😭🫂♥️♥️♥️

"رأيي الخاص قابل وحد ومانطي رأيي 😂"

السوته عبق غلط وكُلشش غلط من راحت ويه علي الحق بس ماعرف ليش ما حقدت عليها ولا حتى عصبت من تصرفها احسها مكسورة هالبنية وتايهة حتى كلام جارح وضعها ميتحمل الله يعينها على حياتها

🥹♥️♥️

لتنسون التصوويت واطربونا بتوقعاتكم الجميلة 👀🩷🩷🩷🩷؟؟