تحميل رواية «الامارة» PDF

#الامارة

بقلمي: زهراء السلامي 💎

لتنسون التصويت + التعليق بين الفقرات + متابعة لحسابي 💙.

اثاري فلان لـ فلانةة

طرف ثـــالث طلعت انــه!.. 🥀

━━━━━━ ♛ ━━━━━━

مشت الساعة والساعتين والثلاث ساعات والامير علي ما رجع! بديت انهار واتعب وافقد الامل برجعته ظليت اراوح بمكاني اروح واجي وافكر اتصل بأهله؟ ابلغ واحد من اخوته يجيني؟ بس وين يجون وشكد يحتاجلهم وقت ياله يوصلون.. ظل عقلي يجيب ويودي افكار كل ساع تجي على بالي فكرة سلبية وابعدها من بالي واستغفر ربي.. كل دقيقة دتمر احسها تاخذ سنة من عمري حيلي باد وطاقتي نفذت اتهسترت والخبلني بالزايد وخله گلبي يوگع هو من اندگت عليَّ الباب واجاني صوت رجال نسخخة من صوت بسام زوج خالتي..

-يا اهل البيت! يا اهل البيت منو هنا؟

تمشيت للباب ووكفت يمها بدون لا اجاوب، گلبي يدگ بجنون وايدي عرگت بشكل كامت تزحلگ صرت افرك بيها متوترة وكاتمة حتى النفس..

-يا اهل البيت! خوية سيارتكم صايرة بالطريق نريد نطلع مدا نكدر..

زفرت نفس مرتاحة من ميزت صوته بشكل اوضح هذا عنده شوية بحة مال رجال جبير مستحيل يكون بسام.. نزيت من ضرب الباب بشكل اقوى عزا راح يكسرها علينا شبي هذا!

ظليت افرك بيدي محتارة شسوي ماعرف وين رحت يا الامير وعفتني بهالحال، رجعت للشباك اشوف بلكت رجع بس للاسف ماله اثر وفعلاً انتبهت لسيارته صايرة عائق بطريق سيارة ثانية كاتلها الوصخ مبين مركونة هنا صارلها سنة ومحد بحالها..

-شلون قضية هاي.. يا اهل البيييت

توترت ونرفزني صوته ما سكت توقعته يروح من ميسمع جواب بس استمر يدگ ببابنا ممهتم راح يصيرله عشر دقايق هو على هالوكفة يمكن الجيران كلها سمعته، نويت اجاوبه من وره الباب بدون لا افتحها..

-تَـمني: تفضل

-عمي هاي الباجيرو اللؤلؤي الكم؟

-اي النا

-سادة طريق سيارتي بلا امر عليكم حركوها منا

-تمام عمو بس تكدر تنتظر شوية بينما يرجع زوجي لان اني ماعرف اسوق

-لا عمي شنتظر صارلي بالساعة ونص انتظركم واني عندي شغل

-مو زوجي مو هنا منو يحركها؟ انطيك السويچ تحركها انتَ؟

-لا ما اتورط اني رجال يا دوب اشوف بعيوني مالي خلگ يصير لسيارتكم شي وتوكع براسي

نفخت هوا ضايجة مبين عليه حجي جبير ومن ذولة النقناقيين هواي يدردم، حرت شلون اقنعه ينتظر الامير بلكي هو هسة على رجعة بس خبلني وصدگ استفزني من كال..

-امشي انتِ طلعيها

-ماعرف اسوق اني

-شسويلكم شوفيلج چارة

-عمو شنو اشوفلي چارة ماعرف اسوق تريدني اضرب السيارة؟

-اي هي مو سيارتكم؟

-اي بس خوما اضربها انتظر فدوة دقايق ويرجع زوجي

-ما انتظر راح تبدي المباراة

دگيت رجلي بالكاع شايطة ورحت للغرفة لبست شالي ودورت على شي اللبسه فوك ملابسي وشفت عباية الراس حطيتها على اكتافي لبستها واخذت تلفوني والسويچ ورجعت للباب، فتحتها على كيفي ومديت بس عيوني اشوف شلون هيئته اخاف اطلع خصوصاً وره ما الامير نبه عليَّ ما افتح الباب لاحد..

-ها عمو راح تنزلين لو شلون؟

-انزل

حچيتها من وره خشمي ورحت قبله قفلت باب الشقة ونزلت وهو ورايه يمشي ويدردم علينا بزعني علما وصلت للطابق الارضي اني روحي طافرة ما سد حلگه ولا تعب..

-بله هاي وگفة هاي! هاي سفطة؟ منو يسفط سيارته هيج ما تگليلي منووو

-عمو تره سيارتك مبين صارلها دهر هنا مركونة ومطالع بيها

-اي واليوم عجبني اطلع بيها

-اعرف عمو وحقك بس هسة شلون راح احرك السيارة واني ماعرف اسوق هاك البصمة انتَ حركها

-لا معليه اني شوفيلج أي واحد من الشارع يحركها الج

دورت بعيوني بلكي اللگه احد بس شو ما ارتاحيت نويت اني احركها وشيصير خلي يصير، فتحت السيارة بالبصمة وصعدت بكرسي السايق صافنة مثل المطي ماعرف البريك من البانزين وهذا واكف فوك راسي ينگنگ زرف دماغي..

-ها عموو بشري شصار وياچ

-عمو ياهو منهن البانزين؟

-شنووووو

جفلت من گالها نطت عيونه وفچه طلع ليكدام من الصدمة، بلعت ريگي وابتسمتله مجاملة ولزمت موبايلي بحثت على اليوتيوب الفرق بين البانزين والبريك كل هذا والشايب واكف كبالي يفر بيده..

-والله يا الله بنتي بعمرج مهكرة السيارات شبيچ عمي شجاچ

غلست عليه وبقيت ويه اليوتيوب عرفت شنو لازم اسوي وسميت بأسم الله وشغلت السيارة، ترددت لثانية بس قويت نفسي وهستوني دا اريد ادوس بانزين وشفت عاصف ينزل من العمارة ووياه بنية يضحكون سوه نزلت نفسي كلش على الكشن ماريده يشوفني بس للاسف لمحني من بعيد ووگف بمكانه يباوع وعاكد حاجبه مستغرب..

-تَـمني: خرب حظي هذا كلما نجي لبغداد نلگاه

عاف البنية الواكفة بصفه وتقدم بأتجاهي، ارتبكت واصابعي كامت ترجف لزمت تلفوني طلعت رقم اول شخص يجي على بالي من يغيب الامير طلعت رقم علي التـقي خاف يصير ميصير فوراً اتصل بي..

-عاصف: خير حجي خو ماكو شي؟

-السيارة صايرة بطريقي واريد اطلع

حسيت بـ عاصف يباوعلي سويت روحي مدا اشوفه وملتهية بالسكان، بقيت مغلسة عليه لحدما اجه يم الجامة مالتي وضربها بأصبعه ضربات خفيفة يجذب انتباهي..

-طلعي انا احركها

بقيت اباوع ليكدام ولا كأنه موجود عود مدا اسمعك ولا اشوفك بعد عيني، ضرب على الجامة اقوى وگال بصوت اعلى..

-تسمعيني؟؟ طلعي انا احرك السيارة مبين ما تعرفين

-اعرف

نترتها مزعوجة وغيرت الگير ودست بانزين اطلعها من مكانها وهاي جانت اغبى حركة اسويها..

-تَـمني: يمة يممة ثكيلة هاي عزا بعيني مدا توكف شلووون اوكفهااا ولك تعااال علمني شلوون

-عاصف: دوسي برررريك دوسي برييك برجلج

بيني وبين الحاوية مال الزبالة شعررة تخبلت گلبي راح يوكف طلعت مني عيطة قوية ودست البريك بكل قوتي اوكفها و.. ووكفت! صدگ وكفت السيارة وكلشي ما صارلي لا دعمت احد ولا موتت نفسي هه ويكولون عني فاهية اليوم الا اخبص امير من يرجع واخلي يشتريلي سيارة..

ابتسمت فرحانة بهذا الانجاز ودست بانزين ناوية اسفطها عدل بس خفت لا اطب بالحايط فـ عفتها بمكانها ونزلت..

-عاصف: چان طبيتي بالزبل

-بس ما طبيت

-جيبي اسفطها عدل

-لا ماكو داعي شكراً

-چا تعوفيها هيج بنص الشارع

-الرجال: المهم سوت مجال لسيارتي عاشت ايدج عمي

عافنه وراح لسيارته وبنفس اللحظة لگف عاصف من ايدي البصمة وركب سيارة الامير، رحت وراه اضرب بالجامة واعيط بي..

-منو سمحلك تاخذ البصمة من ايدي؟؟

ما اهتملي وشخط بالسيارة يحركها ركضت اوخر منه مخترعة خفت يدوسني هذا مو امان بس ظلت عيني على السيارة خاف ياخذها ويشرد بيها بس همزين مسواها مجرد عدل سفطتها ونزل..

-عاصف: تهي بهي زلم تالي وكت تنزل نسوانها تحرك سياراتهم

-محد نزلني حتى احرك السيارة!

-چا ليش انتِ نازلة الهيبة وين؟

-الهيبة نايم وميدري بكل الصار مردت اكسر نومته ونزلت بداله

-نايم؟

-اي

-نايم؟

-اي شبيك

-هههههههههه

ضحكته مستفزة رغم ملامحه بعيدة كل البعد عن الاستفزاز شكله من ذولة الهادئن الفقرة الياكلون عشاهم بس حركاته وعقله عكس هالصفات تماماً.. مديت چف ايدي اله حتى يحط بيها البصمة وفعلاً شمرها بداخلها بدون لا يخلي اصابعه تطخني..

-شكراً

-انتبهي على نفسج وقفلي البوب عليج بينما يرجع زلمتج

-لا الامير بالبيت نايم مطالع

باوعلي صفح مبتسم تك خد، هز راسه بـ اي وگال..

-تره من شوي تلاگيت وياه يم التقاطع

-شنو

-هو مريض؟

-منو امير؟ لا لا

-مادري شكله چان غريب

-مدا افهم عليك

-چان يسولف ويه روحه من شفته حسبالي جاي يحجي بالموبايل طلع ماكو شي لا بيده ولا بأذنه

بلعت ريگي باهتة من كلامه وما علقت بكلمة، هز راسه شلون المتحسف وحط ايده بجيب دشداشته يردف مستغرب..

-چان يمشي وانرگع بزلمة جبير جاي يمشي ويه بنياته الشابات والزلمة حسباله امير جاي يتحارش بنساوينه رادت تگب عركة شكبرها لوما انا متدخل ومعتذر من الرجال

-انتَ صدگ تحجي؟!

-اي والله اذا ما تصدكيني سأليه

-مستحيل هالشي يطلع من امير اصلاً هو راح للاسواق شعليه بالرجال!

-هههههه خوش

-ليش تضحك؟؟

-تره گال رايح لصاحبه ومناك يطلع للامام الكاظم

-مستحيل!!

-ليش مستحيل اميرچ النايم طالع لصاحبه وين المشكلة؟

-عيب عليك تكذب!

-احترمي نفسج لچ ما جاي تحاجين جاهل!

ماهتميتله وعفته ودخلت العمارة محروگ دمي، اجه ورايه يصعد ومبين رايح لشقتهم لان همه بصفنا ضبط بس ما اجت وياه البنية رجع وحده.. توترت من حسيت بي يصعد الدرج خلفي مباشرةً ماحبيت يباوعلي من وره فـ حاولت اصعد بسرعة ومن صدمتي وفهاوتي عثرت بالعباية وردت اوكع لوما مكمشة بالمحجر مال الدرج..

-عاصف: كل هذا من الصدمة

حچاهة مستهزأ وكمل يصعد الدرج قبلي، ظليت واكفة بمكاني منطيته اذن الطرشة ما راح اصدگ هالكذاب الحقير شنو امير راح لصديقه وشلون يروح يزور بدون لا ينطيني خبر ويعوفني وحدي بالشقة مستحيل يسويها.. كملت طريقي هادئة وقبل لا ادخل للشقة گال..

-هاا صح من تلاگينا نسيت اگلچ حاچيت الامير وسألته عليج عبن شفتكم من وصلتوا العصر گتله لا تعوفها وحدها بالشقة تستاحش اخذها وياك خطية

منطيته ظهري اسوي روحي دا افتح قفل الباب بس اذني وياه منتظرته يكمل كلامه بس سكت.. سكت لفترة قبل لا يگول بضحكة حرگت گلبي..

-گالي ادعبل انتَ وياهة

-كذاااب!

اللتفتت عليه ارجفف من القهر احس راسي راح ينفجر من الصدمة مستحيل هالشي حقيقي احلفف عليه ديكذب والله احلف!

-لا تَـمني ما جاي اچذب بس شكلچ ما تعرفين الامـير علي بعدج

-انتَ وين تريد توصل؟؟

-اريد اطلعج من الاحلام الوردية العايشتها وياه، ماريدج تنصدمين من يطيح قناع وجهه ويطلع الوجه الحقيقي

ضوجنيي بما يكفي وما ناقصني اسمع مغثة اكثر من السمعتها، فتحت قفل الشقة ودخلت بس قبل لا اطبگ الباب واعوفه وحده استوقفني شي گاله بصوت مسموع مبين يريد يسمعني..

-مو كل امير امير تَـمني.. اميرچ مخبل كتل اخوه وكسر گلب عياله

دخل لشقته يضحك متشمت، طبگت الباب صايبتني قشعريرة احس حتى شعر راسي خدر، قفلت الباب ورايه ورحت للغرفة تمددت على الجرباية وغمضت عيوني اداري الهبوط الصار عندي ووجع راسي القوي..

بقيت مغمضة عيوني وافكر بكلام عاصف واكذبه، كلما اتخيل ممكن الامير يحجي عليَّ كدام احد انهار گلبي يعصرني واتعب كللش اتعب.. ماعندي طاقة اكوم من الفراش صفرت بمكاني حاولت اغفى كون يارب اكعد واللگاه يمي بس ما غفيت ماكدرت انام وبقيت اتگلب بالفراش وانتظره يرجع..

ساعتين ونص مرت فوگ الثلاث ساعات الي انتظرته بيهن الساعة راح تدگ الـ 12 بالليل وهو ما رجع تخبلت عقلي ينرادله شوية ويشخط، مليت وتعبت وقررت اتصل بـ علي التـقي او ابا الحسن ميهم أي واحد منهم يشوفلي چارة..

دگيت على تقي وانتظرته يرد بس ماكو ويه ما قربت تخلص الدگة جاوبت التلفون سبأ..

-تَـمني: هلو سبأ اكولج تقي موجود يمج؟

-سبأ: لا والله طلع ويه صاحبه ونسى موبايلاته هنا

-شجاهم ويه الموبايلات ذولة.. ماشي حبي شكراً مع السلامة

-صاير وياكم شي تَـمني؟

-لا حبيبتي بس ردت علي التـقي بشغلة تخص الشقة وامير كال هو مرتبها على ايده ويندل كلشي

-ها چا خوش بس يرجع اگله

-تمام حبي

سديته منها ورحت على ابا الحسن دگيتله وما طول ثواني وجاوب..

-الوو تَـمني انتم وين؟؟

-هلو ابا الحسن احنه ببغداد

-ادري بس امير وين صار شكد ادگ عليه وما يشيله؟

كمت اشوف تلفونه بعده على الشحن ومفول، انتبهتله مسوي صامت ومحترك حرك اتصالات من اخوانه وجماعته وامه..

-تلفونه صامت وهو عافه هنا وطلع من المغرب ولحد الان مرجع

-هاا

-ابا الحسن هو نزل للاسواق يجيب چاي واغراض ويرجع ولحد الان ما بيّن والله ظل بالي عليه

-خاف صارتله شغلة وراح؟

-لا لا هو كال بس للاسواق اروح وارجع بس هسة لاكيت عاصف ويكول شافه من جان طالع وعلى اساس گايله راح يروح لصديقه ويزور مناك

-وعافچ بالشقة؟!

-اي

-هاي شني هاي

-والله شو ظل بالـ... اوكف يمكن صوت الباب هذا اتوقع رجع

-چا شوفي وگليله يدگلي

-ماشي ماشي

سديته منه وركضت للصالة وشفته هستوه ديدخل من الباب منزل راسه ولابس شفقة رياضية سودة ماعرف ليش.. استغربت من سمعته يحچي بشي وقطع كلامه من اللتفت ناحيتي وفجأة جفل بمكانه فاتح عيونه مصدوم عبالك شاف جني لدرجة تفرقت شفايفه عن بعض..

-امير وين جنت ليش تأخرت هيج

بقى جافل على وضعه فاتح عيونه ويباوعلي من فوك ليجوه، استغربت من نظراته ونزلت عيوني اباوع لملابسي هو صح اني لبست قميصه ووحدة من برموداته الي يعوفهن هنا بس لان سبحت وماعندي ملابس شي طبيعي ما ارجع اللبس نفس الجنت لابسته..

-شنو شبيك

-شتسوين هنا انتِ؟

حچاهة بنبرة مختلفة كللش مختلفة حتى صوته متغير وهالشي زيّد قلقي ورحت اتقرب منه، لزمت ايده بين ايدي وهو نزل عيونه عليهن ورفع نظراته الي يباوع لوجهي بنظرات فضولية كلش..

-شبيك حبيبي صاير شي؟

-لا

همسها وجر ايده من ايدي بنفضة خفيفة ووخر مني عاكد حاجبه، انطاني ظهره يفرك وجهه ويستغفر بهمس ثواني ورجع اللتفتلي وكال..

-تَـمني

-ها

-انتِ هنا

-اي لعد وين

-يا علي

-شبيك امير

-نسيتج.. نسيت جايبج وياي

-يااا

-وعلي.. والله العظيم مادري.. مادري چن خايلي اجيت وحدي ونسيتج حبيبتي عفتج كل هالفترة وحدج انا!

-اي وظل بالي صراحة

-اسف حبيبتي اسف يروحي

سحبني من ايدي يحضني وبوس راسي وايدي يتعذر مني، رفعت عيوني اباوعله وشفت ملامحه ضايج ومقهور شلون نساني وبنفس الوقت مبين عليه مريض چف ايده كلش حار من لمسته وحضنه نفس الشي مال واحد مصخن..

-عادي امير تصير

-والزهرة مادري يجوز عبن متعود اجي وحدي نسيت.. مادري تَـمني ثقي بالله مادري

-عادي بس.. احم.. مشفت احد اليوم من طلعت؟

-رحت لصاحبي ومناك طلعنا نزور

-والله؟

-اي والله

-شفت احد قبل لا تروح لصاحبك؟ واحد من اخوتك لو ولد عمك؟

-شفت عاصف

-اهااا

-اي ليش تسألين؟

-سلامتك.. اني رايحة انام تعبانة

-تَـمني اوكفي

-لا امير ماكدر اسولف ماعندي طاقة محتاجة انام

هديت ايده ورحت للغرفة ونمت على فراشي وغطيت روحي، گلبي معصور لدرجة ماكدر احجي شي هسة محتاجة انام ومن اكعد اسولفله شفت عاصف وكلشي.. غمضت عيوني بسرعة من حسيته دخل للغرفة ونزع قميصه ونام بصفي.. حسيت بأيده الحارات كلش من حضنوني من وره وحسيت بي من باس راسي ومسح على شعري ويشمه..

غفيت على هالوضع وكعدت الصبح هو بصفي بس مفتح عيونه وصافن بالسگف، كمت من الجرباية بدون لا اگله صباح الخير ورحت للحمام غسلت وجهي ورتبت نفسي وطلعت لكيته كاعد بالصالة وبيده الريموت يگلب بالتلفزيون..

-نوومه مشتهي بيض

حچاهة وعينه على التلفزيون يتابع اخبار، چتفت ايدي وكملت طريقي لحدما صرت بنص الصالة وسديت التلفزيون بجسمي..

-تَـمني: وين راحت صباح الخير نوومه؟

ضحك يهز براسه، مغط ايده وگال بحنيته المتعودة عليها..

-صباح الخير حبيبة گلبي

-امير اريد احجي وياك بشي

-احجي

-البارحة من طلعت اجه حجي دگ الباب علينا و.....

سولفتله كلشي صار، بالبداية جان طبيعي ويهز براسه يستمعلي بس من وصلت لـ عاصف وگتله حچى ويايه انتفض نفضه فاز من مكانه متخبل! وجهه انگلب احمر دمم وايده ظلت ترجف من الغيرة كوة كملتله احداث البارحة بدون لا اجيب طاري جملة عاصف الگالها "مو كل امير امير..." لان هو هسة وراح اموت خوف فاتح عيونه عليَّ مخنزر عبالك گتله طببت عاصف لشقتنا..

-لاااا عاوز تطببي؟؟ لو جايبته وعازمته على چاي فرد نوب؟؟؟

-يعني هم حاچي عليَّ گدام ابن عمك وهم ضايج؟

-ما حجييييت مااا حجيييت تتوقعين انااا احجييي؟؟؟ ولج تصدگين هالزمااال وتچذبينيييي

-امير اهدأ شبيك دتخوفني

-خ** على الخلللف امير!!!

فتحت عيوني مصدومة هاي اول مرة بحياته يغلط على اهله او يقلل منهم، انقهرت منه ما راضية على عصبيته وكمت اعوفه ورحت للمطبخ وبقيت هنا وهو لا اجه ولا حاچاني بعد..

للظهر صاحلي وما جاوبته، ظل يكرر اسمي كم مرة ومن شافني ما رحتله هو اجاني للمطبخ تنهد وحط علاگة على الكاونتر كفخت ريحة الكباب منها تشهي الميتشهى واني منا بدون ريوك وميتة جوع احس روحي خرطت..

-ليش ما تجاوبين امنية

برطمت مهضومة وانطيته ظهري، حسيت بي يتقدم وصار ورايه مباشرة ولزمني من متوني يديرني عليه باس گصتي وخدودي وگال..

-اذا منتظرة مني اعتذار فـ تحلمين

-امير!!

-يا بعد امير

-تره عطت بوجهي اليوم معقولة مانتبهت على نفسك وعصبيتك شبيك متگولي شبيك؟

-صح انا بالغت

-اي والله كلش بالغت

-چان لازم اعزم عاصف ويانه على الغدة فشلة منه

-امييييير

-تَـمني تسكتين لا اروح اشعل صفحته امشي نتغده ولا تضوجينه امشي

-استغفر الله هو شسوه الرجال؟

-امشي انعل ابو الرجال لابو اليلفي امشييي

جرني من ايدي معصب يربي بعده معصب وقضى اليوم كله عصبي بس ديحاول يتحكم بأعصابه حتى من طلعنا كل شوية خازرله واحد ويريد يتعارك تعبني وطلع الطلعة كلها من عيني ما عولت شوكت نرجع للبيت حتى انام..

رجعنا للشقة وبوجهنا نمنا حتى مسألته شلون نطلع للمطار باجر واحنه ما ماخذين جنط او احتياجاتنه مالي خلگ لا يگب بوجهي.. فزيت نص الليل على صوت دگ باب الشقة بشكل همجي درت وجهي للامير لگيته ماكو انتفضت من مكاني وكمت بسرعة ادوره بالشقة بس ماهو..

-اميير وينك امييير

رحت للغرفة الثانية ادور عنه بس الشقة تصيح بوجهي فارغة محد غيري موجود وصوت الباب مستمر يندك بشكل يفجع.. گلبي ظل يوجعني يربي شديصير وينه هذا الرجال! استسلمت وتقربت من الباب على كيفي وصحت من مكاني..

-منووو

-اناا اناا افتحوا الباب

-يااا امير

فتحت الباب بسرعة من سمعت صوته جاي من بره امير شمطلعه بنص الليل وليش ما اخذ المفتاح وياه..

-شنو امير وين جنت؟

-طلعت

-وين؟

-هاا؟

-وين طلعت

-هيج.. هنا.. هنا

-وين هنا؟

ما جاوبني وعبرني يكمل طريقه للغرفة فكيت حلكي ممصدكة تصرفاته، رحت وراه شفته ديمدد على الفراش ومثل ما حط راسه على المخدة غفه! غفه بهالسرعة عبالك دگمة وداسها.. بالبداية كلت يمكن جان يمشي وهو نايم وما حاس على روحه وغلست عن الموضوع بس يا ريتني ممغلسة ويا ريتني حاچية وما ساكتة ولا الي صارلنا وراهة....

كعدنا ثاني يوم الصبح وسألته عن الصار واستغربت من كال يتذكر ونزل حتى يذب الزبالة وصعد، اوكي وجهة نظر منطقية والطمنني اكثر هو وضعه اليوم هوااايه احسن فاش ومابي شي، بوسني وظل يعتذر عن عصبيته البارحة وشالني ويفتر بيه ويضحكني ويشاقيني متغير مية وثمانين درجة، بالثمانية طلعنا ويه الحملة والطريق كله يضحك فرحان ويسولف عن جمال مكة والمدينة لان هو رايح مرتين للعمرة قبل هالمرة..

-امير لعد وملابسنا شلون؟

-مناك نشتري كلشي عدهم هناك

-ماشي بكيفك

-تعالي خلينا نتصل بأهلي نودعهم

-يلا....

**

"لـــيلة"

گاعدة جوه ويه عمتي رسمية من اتصلوا الامير وتَـمني يودعونه راح يرحون للعمرة، وبنص محادثتنا وياهم طب ابا الحسن للبيت ناطة شياطينه وما طايق بشر عبرنا وراح للدرج يريد يصعد..

-رسمية: وداعة الله يمة انتبهوا على نفسكم الله وياكم... وين ابا الحسن وين؟

وگف على الباية الثالثة واندار لـ عمتي وگال بهدوء عكس ملامحه المعصبة..

-شلونچ يوم

-زين من سألت وينك صارلك چم يوم ما تبيّن؟

-عندي شغل وملتهي

-شغليش يخليك تبات بره البيت؟

-شغل مهم.. محتاجة شي يمة؟

-محتاجتك يوم اريد اسولف وياك مشتاگة لحسك بالبيت

-حگچ عليّ مقصر وياچ انا

نزل من الدرج راحلها وبوس ايدها وجبرته يكعد وياهة شوية، اباوعله صفح بدون لا ادور وجهي مفتشلة احط عيني بعينه وهو هم ولا عاين لوجهي ولا چني كاعدة..

-رسمية: شو ما بشرتني بحمل مريتك ولك شني تضم على امك؟

-ابا الحسن علي: شنو

-رسمية: اسولف على حمل ليلة مريتك

-ابا الحسن: ليلة حامل؟؟؟

-رسمية: لا صدگ؟ چا ما گلتيله؟

-ليلة: احم.. لا ما لحكت عمة

رفعت عيوني اعاين لوجهه مصدوم وجاحظ عيونه، ضحكت امه وضربت على فخذه وكالت..

-راح تصير اب يا بعد امك

جرت وجهه تبوس خدوده وتباركله وتصفگ بيدها وتهوسلنا، توترت من ابتسملها هاي الابتسامة اعرفها مال چذب ومجاملة خصوصاً من بوس امه وكام من مكانه وكال..

-ليلة لحگيني

-رسمية: ههههه لحگي يمة لحگي

ترخص من امه وصعد قبلي فوك، اشرتلي عمتي اروح وراه بس مترددة وخايفة ماعرف شنو راح تكون ردة فعله فوگ، قويت نفسي وصعدت الدرج وبوجهي رحت لغرفتنا فكيت الباب ولگيته كاعد على الجرباية وحاط راسه بين ايديناته ثنينهن..

ظليت واكفة بالباب وهو يذب حسرات قوية وحدة وره الثانية، ظل فترة على هالحال كاض راسه بيده گبل لا يعدل گعدته ويعاين لوجهي ويكول ببرود فضيع..

-انتِ صدگ حامل لو هاي هم چذبة منج؟

-حامل

-وليش ما گتيلي؟!

-عبن ما اشوفك

-طبعاً ما تشوفيني ليلة.. طبعاً ما تشوفيني

ضحك متلوع ووگف على حيله، ذب حسرة شگت صدره من قوتها وگال بعصبية گوة كاتمها..

-تدرين وين جنت كل هالفترة ليلة؟ تدرين؟؟!

-لا

-اي طبعاً ما تدرين حگچ

-ابا الحسن..

-جنت اطمطم خيااااسچ كضييييت طيحان حظججج گشطته گشططط وطميته!!!

-ابا الحسن جيب القران الكريم احلفلك عليه جيبه احلفلك واثبتلك هاي مو صوري وهاي مفبركة والله العظيم مفبركة شلون تريدني اثبتلك شلووون فهمنييي

كض صدره يفرح بي تعبان بس ماهتميت وماردت اأجلها اكثر وتكبر بالزايد ونويت اللتزم بوصية تَـمني واسولفله من الالف للياء، وگفت گباله وسولفتله كلشيي ما اهتميت بعصبيته ولا بخزرته راح يبلعني ولا برجفته ووكفت بكل جرأة اسولف، حلفت بمية يمين ومية امام وجبت القران حطيته بيدي وحلفت عليه وما اكتفيت حطيت ايدي على بطني احلف وداعة هالطفل كل چلمة طلعت مني صحيحة وما زيدت ولا نقصت حرف..

-ليلة: ابا الحسن انا انظلمتتت والله العظيم انظلمت وانلعب بيه وبحالي مادري شتكول عني ماادري وبكيفك تكول غبية من ما حسيت؟؟ تكول ماعندي عقل؟؟ تكول ثولة ومطية بكيفك كوول لان انا انظلمت وداعة ابني البعده ما شاف ضوه شمس انظلمتت

انهد حيلي شكد ما بررت تعبت كلش وضميت وجهي ابجي بقلة حيلة، هرول لاتجاهي گاز على اسنانه بكل قوته وكضني من زندي بحقد احس مرد اللحم ويه العظم ايدي انشلت من لزمته شكد قوية، قربني منه وگال بخزرة..

-لااا تحلفين بالطفل خاطر تبرأين نفسج من خياسج!!

-بعدك ما مصدگني موو؟؟ بعدك؟؟

-سكتييي لا اللطچ على حلگچ اكسررر سنونچ سكتييييي

دفعني على الحايط بقوة انضرب بي متني توجعت كلش بس هم بلعتها وسكتت خفت احجي لا يسويها صدگ عصبيته ما تبشر بخير خفت يفقد اعصابه ويكتلني...

-والله لوما خوفي من الله الا اطلع افااده واعلسه بسنوني!!

ضرب ع الميز بقوة انرجت الاغراض الموجودات عليه ووكعت شيشة عطر بالكاع تكسرت، ضرب الميز مرة ثانية شايطه روحه وعاط..

-مثل الجررريدي كضيتته فااارة بيدي صاار يتبچبچ ويتووسل اعوفنه وووولج فرررخ بطول زرري شاربه مملوط كعد جوه رجليي يبوس بيها تفرفح روحه من الخووووف ويعترف بكلشيي سواه!! ليلة هذاااا يستغلجج وساكتتله هذااا؟؟؟؟؟

-انتَ عرفت ناظم؟

-من *** بناظظظم وبالخلللف نااظم وبيييج الخااافت من هال***** ابن ال**** صاحب ال*****.... ولج يبتزززج وساكتة كل هالوووكت ليييييش؟؟؟؟ ماعندج **** زلمة يدافعلج؟؟

-خفت.. والله خفت

-بت العااااار تخافيييين واحنه موجودين؟؟؟ بعلييي اخسفه خسسسف لووو گايلتلي من البداية انعععل والديه واكعد شيخهمم على عگااله!!!

-خفت ما تصدكوني

-وهسة من فضحچ تردينه نصدگ؟؟؟؟ ولج ليييلة انتِ نعلتي شرررفي تعرفين شنووو يعني طيحتي حظظي وطينتي راااسي؟؟؟

-حسن انتَ تعرفني مظلومة وتأكدت بنفسك هو اعترف بلسانه انا بريئة والصور ما متشكلة على جسمي بس وجهي ليش بعدك معصب

-عاين الصلفة!! عااااين الگباااحة عاااين والحسين ما تستحين انتِ ومااعندح ذرررة مستحة

-شتريدني اكول فهمنيي؟؟

صفگ ايد بأيد ووخر مني محتار ظل يروح يمين ويسار وياكل بروحه، تعبت من الوكفة وتعبت من الوضع ماعرف شلون راح تصفى وشنو تاليتها..

-ابا الحسن انتَ تعبت اگعد خلينا نسولف على كيفنا واشرحلك الصار من البداية بس لا تعصب

چن الگلته استفزه لانه انتفض من مكانه واندار بكل جسمه عليَّ وبدون سابق انذار وبدون أي مقدمات رفع اصبعه يوجهه ناحيتي وگال بنتر..

-عيني بعينج واحلفج بأعز ماعندج تجاوبين بدون چذب!

-شنو

-ليش ما رضيتي تگليلي على الصار وياچ؟! لا تگليلي خايفة لا ما اصدكج ومن هالكلاواات ديربااالج تجذبين ليلة دير بالج!!

-جنت غبية وخفت

-ليلة احجيي الصدگ!!!

-ابا الحسن خفتتت اييي خفت!! والله خفت منك ومن ردة فعلك وچنت خايفة لا تخليني امام الامر الواقع ويكون حَلك هو اتزوجك وتساعدني وانا ماريد هالشي

رخت عظام فچه وتغيرت علومه، صفن ثواني وحط ايده على صدره چن مختنگ وفتح حلگه يتنفس بقوة، يشهق ويزفر بصوت عالي يلهث بطريقة تخوف.. متت خوف عليه ركضت اريد اشوف شبي ودفعني عنه وگال بحسرة مشمأزة روحه..

-حرامات... حرامات على گلبي وعلى سنين عمري حرامات

-انا ماردت اتز....

-حرامات.. بالعباس حرام وجودج بحياتي حرام.. حرررام على العمر الضيعته واناا انتظررج واتمناج حرااااام

شهگت فازة من شال الفازة الموجودة على الطاولة وشمرها بالكاع واندار على الميز تواليت شمر العطور الموجودة عليه ودولكة المي وكلشيي شاله وشمره وصار يشيل ويكسر بالاثاث مال الغرفة ويصيح متسودن..

عطت مخترعة ووكفت على جهة ضامة وجهي بأيد وجسمي بالايد الثانية خايفة لا يلوحني شي، على اثر صوته صعدن رفل و عمتي رسمية شافته بهالحال وتخبلت كضته تريد تتحكم بي ما تكدر انضرب عقله وصار ما يشوف گدامه ركضله علي الكرار اجه يصعد وحاول يقيّد حركته ويهدأه بس ماكو فائدة فلت نفسه من ايد كرار واندار عليَّ يصيح...

-ووولج تتحملين الخوووف والفضيييحة!! تفضلين الموووت على زواجچ منييي؟؟؟؟ حرررراماتتتت عليَّ يممممة حررراامات

-رسمية: يمة سودة بوجهي يممة وليدي شبيك حبيبي شبييك حسونن

-علي الكـرار: خووية صلي على محمد ابا الحسنن لا تدفع حسسن اااخ ايدي حسسن ولك انطي مجال

-ابا الحسن علي: طلعوووهها منااا طللعهااا كرراررر ماريد اشووووفن وجههااا

-علي الكـرار: طلعي لييلة طلعيي منا خوية طلعيي

جرتني رفل من ايدي غصب تنزلني، طلعت من الغرفة وشفت عبق وسلوى وابرار وشمس واكفات ومخطوف لونهن، عبرتهن كلهن ونزلت ويه رفل جوه لغرفة عمتي رسمية اكل بروحي واسمع بصوته انشخط من الصياح راح ينجلط ويوكف گلبه من القهر والمشكلة افتهمني غلطط والله افتهمني غلط..

-رفل والله افتهمني غلط انا ما قصدت اضوجه

-رفل: خلص حبيبتي اهدي مو زين عليج

-ما خلاني اكمل بساع اخذني بصياحه وكسر الغرفة علينا

-رفل: ليلة كافي يا يمة كافي انتِ حامل مو زين عليج ارتاحي هسة يهدأ وترجعون تسولفون على كيفكم

خنست بحضنها ارجف وافكر بي عيوني يابسة دمعة ما جاي تنزل من الصدمة.. شوي ورفل سألتني عن الصار بس مالي عين اسولف لاختي مفتشلة وخجلانة بالي وعقلي كله ظل فوك..

اجتني عبق واجن باقي البنات يصبروني وانا بس اهز براسي على الصامت، لليل طلع هو من البيت ونزلت عمتي كعدت وياي تريد تفتهم الصار وجذبت عليها كلتلها سالفة تافهة وانا استفزيت ابا الحسن وگب عليّ هيج..

-رسمية: ليلة لا تجذبين عليّ شني هالسالفة التافهة الخلته يحلف لو رجع وشافج بوجهه يطردج بالشارع؟!

-ليلة: هو هيج كال!

-اي! شصاير يمة سولفي احجي شكوو لا تربطين ايديناتي احجي خليني اعرف شتصرف

سكتت محتارة بالزايد ماعرف شسوي اسولفلهم على سواد وجهي لو اسولفلهم على غبائي الخلى الرجال المتسودن بيه ينفر مني ويكره وجودي ببيته..

-ابرار: لا تخافين عمة يوم يومين يهدا ويرجع، عادي همه ذوله الزلم هم تجيهم ساعات عصبية ينفجرون بيها

تأملت يطلع كلامها صح بس للاسف.. مرت اليوم واليومين والثلاثة والاسبوع والاسبوعين وابا الحسن علي نافر مني لدرجة ما يعاين لوجهي.. يطلع من الصباحيات وما يرجع الا قريب الفجر وما يصعد لغرفتنا ولا يتدنه عليها ينام كله بغرفة علي الكـرار وهالشي بنى فجوة عملاقة بعلاقتنا وما اظنها بيوم تنسد..

**

-حنين: حبيبتي سلميلي على الامير هوايه وانتبهي على نفسج

-تَـمني: يوصل حبيبتي خالة

-تالة: توتة مو تنسين تدعيلي اريد يم الكعبة تكمشين بالستارة وتدعيلي حبابة

-تَـمني: ميخليني امير اتقدم تالة ازدحام كتل كتل الكل جاي يعتمر هسة علمود قبل شهر رمضان بس تدللين احاول اوصل لاقرب نقطة وادعيلج

-تالة: حبيبتي فدوة لوجهج الحلو

دزتلي بوسة بالهوا وسدت الكامرا ويانه، تنهدت مشتاقتلها كلش بس فرحانة بنفس الوقت، فرحانة لانها سعيدة ومرتاحة والامير مداريها مثل المي بالصينية.. ولا انسى من خابرتها البارحة وكالت بفرحة من كل گلبها "تالة اني دا اعيش احلى ايام عمري ياريتها متخلص"..

-حنين: شبيچ مبوزة تالة

-مشتاقة لتوتة

-ميخالف ماما كله كم يوم وترجع

-اي

-شبيچ امي صارلج كم يوم متغيرة صاير وياچ شي؟

-لا

-تلاوي سولفي لامج حبيبتي شبيچ

-بس متعصبين؟

-ما اعصب

-ادري غباء مني بس مشتاقة لابوية

-اممم

-لا تعصبين ماما بس ماعرف ليش صارله كم يوم على بالي ولا عبالج دا احجي هيج حتى تاخذيني ازوره لا والله وره السواه اني ماريد اشوفه بعد بس هم.. مشتاقتله

-طبيعي بنتي يبقى ابوج

-اي

-وهسة كومي خلينا نسوي گهوة ونشرب سوه نغير مزاجنا

-لا.. خلينا نروح نشوف بيت حبيبة وعبق حبابة

-لا كعدي فشلة

-حبابة ماما فدوة لوجهج والله ضوجة

-ولج المن رايحين اذا تَـمني مو هناك

-عادي لعد الباقين شبيهم مو صرنا اهل وياهم

ظليت اللح عليها هوايه ياله اخيراً قبلت ورحت ابدل ملابسي طايرة من الفرح، اخييراً راح نروح صار شكد مشايفتهم.. كشخت احلى كشخة وتمكيجت ورتبت شعري ونفسي وطلعنا سوه والحلو ميبعدون عنه غير شارعين..

استقبلونا احلى واحسن استقبال وام امير جانت كلش فرحانة بشوفتنا وعاتبت امي ليش منزورهم، كعدت وياهم شوية بالاستقبال وكلت لـ ماما رايحة اشوف عبق الي اكيد حايرة بأمتحاناتها..

صعدتلها فوك وبنفس الملگه الحلو مال ام امير تلگتني، كعدت يمها شوية نسولف واجن يمنا سبأ وشمس وتسائلت عن ليلة ورفل وينهن..

-شمس: ليش ما تدرين بيهن رجعن لبيت اهلهن؟

-تالة: رفل ترجع طبيعي بس ليلة ليش؟؟

-عبق: تعبانة ووحامها مأذيها كالت تريد تروح لبيت اهلها كم يوم ترتاح وتشوف امها وابا الحسن ما عارض

-تالة: وابوهن خوما ضوجهن بشي؟

-شمس: لا زين تكول رفل بس بالبداية عصب وضاج بس سكت وراهة

هزيت راسي متفهمة ودرت عيني على سبأ، احسها متغيرة هالفترة وحليانة ماعرف شدتسوي واستحيت اسئلها..

-عبق: اوگفو انزل اجيب شي نشربه

-سبأ: كعدي خية انتِ جاي تدرسين انزل انا

-تالة: اجي وياچ

نزلنا سوه للمطبخ مشتاقة افتر ببيتهم الجبير البي ريحة عجايز، ماعرف ليش بي ريحة عجايز بس يمكن ريحة الحنية هاي مال شيخ علي تارسة حيطان البيت واتخيل ريحة العجايز هيج..

-سبأ: نسوي چاي لو شربت؟

-تالة: بكيفج اني اصلاً ماشتهي

-لا لا نسوي چاي وناكل كيك امس علي الكـرار جابه وياه كلش طيب

ويه جملتها انفتحت باب المطبخ ودخلوا سور ونور وعلي الكرار وراهم يرزل بيهم وهمه يضحكون ممهتمين.. وگفوا ثلاثتهم بمكانهم من شافوني هنا وعلي السور الوحيد بيناتهم ابتسملي ابتسامة واسعة وكال..

-السلام عليكم

-تالة: عليكم السلام

-علي السور: شلونچ خوية شنو اخبارج؟

-تالة: الحمدلله بخير انتَ شلونك

وگف يسلم عليَّ ويسأل عن اوضاعي واوضاع امي ونور سلم ووكف بصفه هادئ شكله مريض لان وجهه اصفر اما علي الكـرار فـ مجرد ما گال "السلام عليكم" وعبرنا وطلع من المطبخ ما باوع لخلقتي..

-علي النور: يلا بعد براحتكم، سور هم ياله نلحگ امشي

-علي السور: اهووو دولي انتَ

-علي النور: انچبب انتَ وعدتني

-علي السور: هو صوچي اواعد زعاطيط

-علي النور: دكل تبننن

كفخه على راسه وطلع من المطبخ وركض سور وراه يريد يضربه، ضحكت سبأ على حركاتهم وكالت بعدما فرغ المطبخ منهم..

-وعلي فد يونسون همه ملح وبهارات البيت

-تالة: اي تَـمني تكول

-انتِ لو تشوفينهم من يجي تقي هههههههه كل واحد يكعدله من جهة يتوسلون بي وياريت لو اعرف على شنو كله يحجون بالالغاز وعلي الحق من يشوفهم قريبين على تقي يطردهم ويكتلهم عبنه يغار

-يااا يغار على تقي؟

ضحكت تهز براسها وكملت وهي تنصي النار على قوري الچاي..

-خية بهالبيت الولد صايرين احزاب كلمن عنده ثنائي يدافعله وقريب منه

-اممم.. و.. وكرار قريب على منو؟

-كرار حبيب وصاحب الكل ما يفضل احد على احد بس اشوفنه اغلب وقته ويه علي التـقي وعلي الحق طلعاتهم ووناستهم كله سوه بس اوكات يميل ويه سور ونور بعد حسب مزاجه

هزيت راسي مبتسمة وعكست عيني على الصالة شفته كاعد على القنفة وديگلب بتلفونه، تنهدت مقهورة من تذكرت اخر موقف صار بيناتنه لحد هاللحظة حاز بخاطري وضايجة من نفسي وتصرفي وضايجة اكثر لان احسه حاقد عليَّ وكارهني..

-سبأ: انا راح اودي الچاي للنسوان وانتِ صيحي البنيات ينزلن يشربن جوه

طلعت قبلها من المطبخ وعبرت الصالة بدون لا اوكف واحجي وياه، صعدت فوك صحت للبنات ونزلنا سوه ورحنا كلنا للاستقبال نشرب چاي وناكل كيك..

-تالة بهمس: اكولج عبق لعد سلاوي بلاوي وين؟

-عبق: رايحة تزور حبيبة

-حنين: شفت كل البنات عدى ابرار وينها مشتاقتلها؟

-رسمية: بعد روحي، برورة شوي تعبانة وبالغرفة نايمة

-حنين: الله يساعدها ثگل حملها ما بقى شي على ولادتها يمكن مو؟

-رسمية: اي صلوات بشهرها كله چم يوم وينور وليد علي الدر

-حنين: يا فدوة حبيبتي حامل بولد؟

-رسمية: والله مادري شو كلما تسوي سونار الفرخ كاعد على مقعده ما يبين بس الدكتورة كالتلها على حجمه اظنه ولد

قضينا باقي الكعدة بالسوالف ومحسينا بالوقت، عبق شوية وترخصت لان باجر عدها امتحان ومو مال تلتهي فـ بقيت ويه شمس وسبأ اسولف.. اتوالم ويه شمس واحب گعدتها وناسة خصوصاً من تحجي بزوجها ومن تعلم سبأ على شغلات المتزوجات اتونس خرب عرضي شكد رعنة..

-شمس: سبأ صدگ تذكرت اول امس اشتريت عطر كللش حلو بس شو بدر ما حبه خايبة غير متت قهر امس رشيت منه والزلمة راد يذب من راسه لعبانة روحه تاخذينه انتِ؟

-سبأ: خايبة تنطينياه خاطر تقي يذب من راسه لو شني

متت ضحك وشمس ضربت على رجل سبأ تضحك، هزت راسها بـ لا وكالت..

-لاا ولج خوب الزلم اذواق يجوز تقي يحبه عليج تعاي شمي اذا ما تردينه اذبه

-تالة: اذا عاجبج ليش تذبي خو رشي من ميكون موجود؟

-شمس: لا ماحب استخدم شي ما يعجب علي البـدر طلع من عيني بعد

-سبأ: جيبي اشمنه

-شمس: گومن لغرفتي احسن.. امشي تالة لا تظلين هنا

هزيت راسي وگمت وياهن ومثل كل مرة من ادخل لغرفة شمس احس روحي تنشرح اويليي على العطر وعلى الترتيب والنزاكة والنظافة الغرفة تصرخ اني نظيفة وصاحبتي كلها انوثة على كولة تَـمني ما اللوم علي البـدر ليش لهدرجة يحبها ومتعلق بيها غير من وره ترتيبها وغنجها ودلعها عليه بكل ركن من الغرفة الها بصمة خاصة بيها ما شاء الله..

-سبأ: الله يخبببل هذا تالة شمي

-تالة: صدگ يجنن حبيته كلش ريحته فراولة

-شمس: بدري ما يحب هاي العطور يضوج منهن وانا عكسه احبهن

انطت العطر لـ سبأ ووكفنا نسولف على امور عشوائية واكثر وحدة تسأل بينا هي سبأ، حرفياً على كلشي سألت شمس شلون عطر غرفتج هيج وكل شكد لازم نغير الفرشة وشنو اسم المعطر ومنين تشترين ملابسج وووو... ما خلت سؤال يعتب عليها وشمس تجاوبها بحب لان واضح سبأ تريد تتعلم حتى تجذب زوجها وتحببه بيها ودتبذل قصارى جهدها..

بديت استحي من حجي المتزوجات فـ قررت ارجع اكعد يم امي علما يكملن ويجن، طلعت من الغرفة وسافرت نظراتي للمكان الچان كاعد بي علي الكـرار وجذب انتباهي تارك تلفوناته ثنينهن على يدة القنفة ويه بصمة سيارته.. بلعت ريگي وظليت اباوعلهن وبداخلي فكرة بس ماعرف شكد نسبة نجاحها..

قررت اسويها وشيصير خلي يصير، باوعت منا ومناك اتأكد ماكو احد وطلعت تلفوني من جيبي ووخرت الگفر وطلعت السيم كارت ورحت يم تلفونه.. شلت الموبايل بيدي وقارنته بتلفوني نفسه بالضبط حتى نفس اللون ونوعية الجهاز بس الخلفية تختلف شفته حاط خلفية ايفون العادية فـ غيرت خلفيتي وحطيت موبايلي بدال تلفونه ومالته رجعته بجيبي وركضت للاستقبال اكعد ويه النسوان..

كعدت وبداخلي اتمنى تنجح هالفكرة يارب ينتبه من ارجع للبيت حتى يضطر يجي النا يجيبه ومناك تصيرلي فرصة ابررله سوء التفاهم اليخزي الصار بيناتنا.. صراحة ماعرف يا موقف لازم ابررله بالضبط، موقف العرس من تكاتل ويه الزلم لو موقف من عطت عليه وفشلته من وكعت الكهوة على صدري..

تنهدت مختنگة وعيني ظلت على باب الاستقبال، رجعن البنات يمنا ورجعت السوالف امي محست على نفسها وكعدت هواي حتى اذان المغرب محد انتبهله الا من سبأ كالت..

-عمة صارت 8:30 راح يرجعون الولد وما مسويات عشا بعدنا

-رسمية: ياا سودة بوجهي وما مصليات كومن كومن نصلي لا تفوتنا

ترخصت امي وكالت نرجع نصلي ببيتنا بس خالة رسمية حلفت منطلع بدون عشا واني قبلت واستغربت شعجب تقبل بس چنها ماما هم دتحس بالضوجة واحنه وحدنا هنا لا نعرف احد ولا صديقات كاعدات بين اربع حيطان ونتأمل زيارة تَـمني كل كم يوم لبيتنا..

بعدنا كاعدين على المصلاية هستونا كملنا صلاة وفزيت على صوت عياط بنية جاي من الصالة، طلعت خالة رسمية تركض تشوف شكو وكلنا لحگناها.. شفنا حيدر كاعد على الكرسي المتحرك وامه واكفة ايدها وره ظهرها والايد الثانية على بطنها وتبجي وتصيح..

-حيدر: حبوبة امييي حبووبة

-رسمية: يمة اسم الله شبيچ يمة ولج ابررار شبيچ

-ابرار: وجعع عمة وجعععع راح امووت وووجع

-حيدر: هسة اخذج للطبيب يوم

گالها ولزم الكرسي بيده ثنينهن شلون اليريد يكوم وتذكر هو ميكدر يمشي، انكسر گلبي على موقفه وعلى نظرات عيونه الذبلت مهضوم ومستحي بنفس الوقت، بلع ريگه مكسور ومشى بعجلات الكرسي مالته وكال بصوت مبين حابس بي الغصة..

-حيدر: هسة اتصل بعمي ابا الحسن هو ياخذج

-رسمية: يلا بينما اللبسها عباتها امشي يمة امشي

اخذتها خالة رسمية لغرفتها وراحت امي وياهن تساعدها لبسوها حجاب وعباية وصوت ابرار رج البيت رج من العياط تطلگ من الوجع، دقايق قليلة واجه ابا الحسن علي ممفتهم شكو بس من شاف وضع ابرار عرف دتجيب فـ طلع قبلهن يحضر السيارة لان علي الدر مو هنا ببغداد واجب..

-رسمية: شمسه خابري سلوى ترجع بساع وتلاكينا بالمستشفى تعينني

-حنين: ماكو داعي ام علي اني موجودة اجي وياج

-رسمية: مو خاف زحمة عليج ام تالة

-لا ابد ماكو زحمة الله يسهل عليها ان شاء الله

مشوها يطلعوها ورادت تروح وياهن شمس ورسمية ما قبلت تخاف عليها لا تتعب لان هم حامل، قبل لا تطلع امي اللتفتت عليَّ وگالت بتحذير..

-انتبهي على نفسج ماما تالة وابقي ويه البنات لا تكعدين وحدج

-تالة: حاضر

هزت راسها وطلعت بس حسيتها ممرتاحة وظلت تتلفت تباوعلي، كعدنا البنات بالصالة ويه حيدر الخانس ومنزل عيونه على حضنه يباوع لرجله وراحت سبأ تجيب قران حتى نقرالها سورة مريم لتسهيل الولادة..

استمرينا هيج بين النقرا قران وبين نتصفن وصارت دقيقة تجر دقيقة وابرار بعدها بالمستشفى كلما نتصل من تلفون شمس تكول خالة رسمية ادعولها عدها ولادة بس متعسرة كلش.. للعشرة بالليل رجعوا الولد وعلي البدر گبله طلع للمستشفى يلحگهن..

بده يتأخر الوقت وقلقنا عليها بديت انعس وماكدر انام ظل بالي ويه تلفوني الي لسه ما رجع كرار وجابه، اخوته رجعوا الا هو ما اجه معقولة لهدرجة يتأخر بالطلعة؟

-شمس: هاي عمتي تتصل...

-حيدر: يا الله

-شمس: ها عمة... صدگ؟؟؟ الحمدلله.. الحمدلله على سلامتها..

-سبأ: جابت؟؟

-شمس: اي اي الحمدلله جابت

-حيدر: ياا علي الحمدلله والشكرر الحمدلله

ضحك فرحان ورأساً طلع تلفونه واتصل على سور حتى ياخذه للمستشفى لان وعدوه من تجيب امه ياخذوه، دقايق ودخلوا سور ونور يهلهلون ويهزون چتف ومتت ضحك من نور هز رگبته مثل السبرنگ وگال..

-وهلااا بيها هلااا بيها والصاايغ تراچيها وهلاا بيها هلاا بيهاا

-حيدر: شني شمالهم ذولة

-علي السور: خايب اجتك اخت تشگ الراس شگ

-حيدر: امي جابت بت؟؟؟

-علي النور: ولك ايي وتكول امي بيضة ودبدوبة تخبل اللهم صل على محمد وال محمد

فرحته صارت اضعاف طاار حيدر بمكانه خطية يريد بس يگوم ويروحلهم، سحلوه سور ونور يطلعون وياهم للمستشفى وشمس كالت ناكل لگمة ونروح ننام لان تأخر الوقت..

-تالة: اني ماشتهي بنات

-شمس: ليش بدر جاب عشا

-لا والله ماريد

-براحتج بعد، چا نامي ويه عبق احسنلج واريحلچ

-تالة: مو خاف يدخل علي الحـق للغرفة وميدري اني موجودة؟

-سبأ: لا حق وتقي ودر ثلاثتهم واجب مو هنا

هزيت راسي وصعدت يمها بس ما لگيتها بالغرفة كعدت شوية انتظرها وبديت اغفي من النعاس وعبق ماكو، كمت من مكاني افتر بالغرفة انتظر رجعة كرار حتى اخذ تلفوني والتعب ذبحني اريد بس انام، باوعت للساعة راح تصير 1:30 بالليل والافندي ماكو شنو الموضوع هذا وين يروح بنصاص الليالي؟

طلعت من غرفة عبق اروح للحمام وسمعت صوتها جاي من وحدة من الغرف شلون التهذي، خفت وظليت اتبع صوتها لحدما وصلت يم باب الغرفة وفتحت الباب على كيفي وانهبطتت..

-عبببق

-ها

ذبيت نفس مخترعة يمة هاي شدتسوي، نايمة على الجرباية ورافعة رجل على تاج السرير والرجل الثانية حاطتها على ميز الكومدي فوك التيبل لامب، ناثرة شعرها على الفراش وشايلة الكتاب بأيد والايد الثانية لازمة حبل وتفر بي..

-خرعتيني عبق عبالي بيج شي

-لا دا ادرس

-چنتي تهذين

-ادري

-يعني انتِ هيج تقرين؟

-اي

-ملگيتج بالغرفة واجيت ادورج هاي غرفة منو كاعدة بيها؟

-غرفة علي الحـق احب ادرس هنا احس احفظ اسرع

-هاا غرفة الحبيب موو

-ههههه ولي لج

ضحكت وطلعت اعوفها براحتها تدرس على طريقتها الغريبة، رجعت لغرفتها ومليت اكثر من الانتظار اريد تلفوني شنو هاي ضجت انوب تلفون كرار بي رمز وكلشي مدا اكدر اسوي بي..

تصالفت شوية وتجرأت ونزلت جوه لان جوعانة انمردت روحي من الجوع اريد أي شي اكله، تمشيت للمطبخ على كيفي وفتحت الثلاجة طلعت منها جبن مثلثات وكعدت على الكرسي اكله خالي وعيني على الساعة الدتمشي ابطئ من السلحفاة..

اكلت وشربت مي واكلت وراهة تفاحة وعلي الكرار ما رجع! بده الانتظار يصير مزعج بس كلت يمكن رايح للمستشفى لأبرار وطلعت غلطانة لان قريب لا تصير 2 بالليل انفتحت باب المطبخ ودخل منها يدندن بشي مسلطن على الاخر بدون لا ينتبه لوجودي..

-كرار

اللتفت لاتجاهي وتفاجأ من شافني كاعدة، عدل وگفته المايلة وتقرب شوية صار مقابيلي مباشرةً حط ايده بجيب البنطرون وكال..

-نعم

-شلونها ابرار ان شاء الله زينة؟

-شبيها ابرار؟

-غير جابت

-ابرار جابت؟!

-اي يعني مچنت بالمستشفى انتَ؟

-لا

-هاا لعد وين جنت لهالوقت؟

-شعليج

صدمني نترها بوجهي مزعوج وعافني وراد يطلع من المطبخ..

-لحظة!

-خير تالة؟

-انتَ شبيك تحاچيني من طرف خشمك شدعوة عليك

-تالة جنت طالع ومتونس ومزاجي حلو لا تجيبيلي مشكلة وتلزگيها بيه مالي خلگ

-اجيبلك مشكلة؟ ليش عيني اشايفني؟!

-تصبحين على خير

-كرار دا احجي وياك!

-شتردين؟؟ احجي شتريدين تالة!

-شبيك انتَ شنو هالاسلوب المحلو!

تنهد يفرك وجهه وغير نبرة صوته للطافة وقهرني بالزايد لان حسيته گوة عليه ديحجي ويايه على كيفه..

-تفصلي خيتي ليش كاعدة هنا تنتظريني خير ان شاء الله؟

-انتظرك؟ تره هواي مصدگ نفسك انتَ!

-چا شمكعدج هنا بنصاص الليالي المن تنتظرين؟

-منو يكول دا انتظرك الك؟ يمكن احد ثاني؟

حسيت چفصت من جحظ عيونه وفتح حلگه بنفس الوقت، دار وجهه على جهة الصالة ورجع باوعلي وگال..

-احجي شعندج سولفي

-منو سمحلك تاخذ تلفوني؟

-خير؟؟

-تلفوني عندك رجعلياه

-شصخم بموبايلج انا؟؟ لو هاي هم بلية جديدة؟؟؟

-شبيك كرار شبييك

-اششش صوتج لا يعلي لا يسمع ابوي وتلفيلنا سالفة بهالليل

-انتَ صدگ تحجي! تره تلفوني الايفون يمك!

ما جاوبني ومد ايده بجيبه يطلع تلفوناته ثنينهن، لزم الايفون وضوه الشاشة كتب الرمز بي ويطلعله غلط كتبه مرة ثانية ويطلعله هم غلط..

-تالة: اكتب 1979

كتب الرقم وفوراً انفتح التلفون ورفع عيونه يباوعلي، چتفت ايدي لصدري وگلت بأنزعاج..

-شفت؟

-شيسوي هذا يمي مادري بي والله

-يعني ما انتبهت عليه معقولة؟

-لا والله مو انا استعمل الثاني اكثر شي

-حلو، لعد بالبداية افتهم قبل لا تنتر وتعصب وهسة رجعلي التلفون

قدملي التلفون اخذته من ايده وانطيته مالته، ضحكت مستهزأة وكلت واني افر بيدي اريد استفزه..

-ههههه يكول شعندج منتظرتني عشتو

-اي المن منتظرة بهالليل؟

-شعليك

-هم صدگ انا شكو حاط روحي

عافني وطلع من المطبخ ضجت اكثر لان للمرة المية ما حچينا بسبب غبائي واستفزازي الماله داعي وهيج خطتي بائت بالفشل الذرييع وصار لازم اكمل حياتي وهذا الانسان يكرهني وميطيق حتى يحجي ويايه و...

-لا تظلين وحدج هنا وصعدي فوگ

فزيت من شفته واكف بباب المطبخ بدون لا يدخل وحچى ويايه مناك، رفعت راسي عن تلفوني مستغربة اباوعله بدون لا اجاوب..

-صعدي الوكت تأخر

-واذا؟

-ما يصلح البيت كله زلم لا تظلين وحدج هنا ماريد تجيچ حچاية

-منو يحجي عليَّ ماكو احد اصلاً

-ابوي نايم بغرفته ما راح يرضى على كعدتج هنا وحيدج

-عادي اني...

-لوو بس افتهم ليش تعاندن ارتاح!

-منو احنه؟

-شني؟

-كلت "تعاندن" منو قصدك بيها؟

-انتِ

-اني وحدة وانتَ حجيت بجمع مؤنث سالم ليش؟

-شمدريني هي صارت بعد

-مبين هواي تحجي ويه بنات كرار

-هاااااا اكيد هاي مصيبة جديدة تردين تورطيني بيها مو!

-انتَ شبيك شنو سالفتك ليش محسسني بس اريد اورطك واريد اضوجك؟

-افعالج تدل على هذا الشي! انا مالي خلگ مشاكل ملييت وبزعت روحي لعبت ام روحي من اتهاماتج والمواقف التفشل الجاي تحطيني بيها تالة!

-اعرف وحقك

فتح حلگه ديحجي بعد وسكت فجأة من جاوبته هالشكل، صفن خانس وملامحه العصبية تغيرت من تقدمت عليه واردفت بهدوء واحترام..

-اني اسفة على المواقف السخيفة الحطيتك بيها صدگني ما قصدت اني بس اخاف لا امي تفهمني غلط.. فكرت واهتميت بنظرة امي على حسابك وقهرتك مني وانتَ متستاهل ماكو مثل احترامك ورزانتك ويايه اني اسفة كرار اتمنى تقبل اعتذاري

-ها؟..

-اسفة

-يعني شني

-يعني اسفة

-وانا هم

-انتَ هم اسف؟ بس ليش؟

-مادري والله

-ههههه لعد ليش تعتذر

-شمدريني كلت اكولها على الواهس

-ماشي اعتذارك مقبول

-ليش انا شمسويلج؟

-مادري غير انتَ دتعتذر

-خلص سحبتها مو اسف هو انا متكفخ تكفخ انوب اعتذر وين صايرة هاي

-تمام

ابتسمت ممتنة لانه رجع على طبيعته وهو رجعلي الابتسامة يهز براسه، وخرت شعري عن وجهي وكلت بنفس الهدوء..

-تره مچنت انتظر احد لا عبالك

-ادري

-اي ماردتك تفكر بيه بطريقة محلوة

-مافكر لا تخافين

-اممم.. صدگ مبروك على الترقية

-الله يبارك بيج بس شمعرفج؟

-خالة رسمية گلتلنا اليوم

-بعد هاي سوالف امي

ابتسمت وسوه نفس الشي رجعلي الابتسامة، توترت من وكفتي ومن نظراته وحسيت بوجهي صار حار كلش اريد اشرد واريد ابقى اسولف وياه بنفس الوقت ماعرف بشنو احس من اوكف يمه بس شعور يجنن واتمناه ميروح..

-تالة: يلا بعد تصبح على خير

-انتِ من اهله

بقى على وكفته بباب المطبخ واني الي عبرته اطلع، تقربنا من بعض لدرجة ردت اطخ بي بس هو استوعب ووخر بالوقت الضائع وابتعد مني كم خطوة وگال بأستعجال..

-تالة

-نعم

-ارجع اوصلج للدوام سنة اللخ؟

ابتسمت وعضيت على شفتي اخفيها ما توقعته مفكر بالدوام ولا بتوصلينا بس ماكدرت اخفي ابتسامتي اكثر من كال بطريقة يبرر لروحه..

-اوصلچ خاطر ابوگ منج مسلسلات حلوة

-يعني انتَ تسمعني من احجي لـ تَـمني على مسلسلة؟

-لا يعني... لا.. ههههههه

ضحك يغطي عيونه بچف ايده بحركة لطيفة مال واحد مستحي، ضحكت وياه وهزيت راسي وهمست بصوت ناصي لا يسمعونا النايمين..

-يحتاج ارجع اتلوگ لامي بلكت تقنع

-قنعيها

همسها بنفس نبرتي وابتسامته مزينة وجهه الملتحي، بلعت ريگي وسديت حلكي ماريد احجي بعد لا افضح نفسي بشي غبي ميصير استخف لازم اتحكم بنفسي واثگل.. رفعت ايدي بحركة باي وكملت طريقي للدرج واستوقفني صوته من گال بصوت وصلني..

-تالة اذا تقدملچ زلمة هاويچ توافقين؟!.....

**

-انتبه لنفسك لا تخليني ادوس وياك بالحچي عيبب هالتصرفات عيب بگد امك انا!!

-بگد امي وكل البلا بيج ضاحكة على الدنيا كلها بوجهج الحلو

-اشششش صوتك نصيي ولك

-ليش تخافين لا يسمعوني النايمين بالبيت؟

-انچببب وخلصني كول شتريد فضنيي

-اريد فلوس

-اسبوع الفات دزيتلك هو كل يوم؟!

-محتاج شغلي ما جاي يجيب وحالنا بالضيم اريد فلوس

-واذا ما انطيتك؟؟

-افضحج واخزيج اخلي طاري اسمج على كل لسان

-اياا ارعن يا ناكر الجميل!

-سمعيني ولا تظلين تلوصين بالحجي! والعباس افضحج وما يوكف بوجهي اكبر عگال اعترف بكلشي واگلهم انتِ السبب بكل الجاي يعيشونه اهل هالبيت اخلي شيخ علي يذبحج عكس القبلة بيده!

-هاي شبيك حبيبي انتَ ليش هيج جاي تسوي يا عمري

-لا تاخذيني بالحبيات والغراميات بعلي اگلهم انتِ الجاي تلعبين بعقل مرة الامير وسودنتيها وانتِ الوديتي عبق لذيج المستشفى وانتِ التردين تسحرين علي الحـق وتگلبي على مرته خاطر يعوفها وانتِ الجاي تطببينه على مرة الامير وتسهلين دربنا خاطر نفضحها بين اهل البيت ويگولون عدها سوالف زلم! كلشيي عندي ضدج وبالدليل فـ هسة احترمي نفسج وجيبيلي الفلوس وصيري خوش ادمية

-انطيك بشرط!

-هاا وبعدج تتشرطين؟!

-اي.. كلشي تريده يوصل حدر رجليك بشرط تسوي الاگلك عليه بالحرف.....

**

"حـــبيبة"

كاعدة على السرير امشط شعر التوأم الصغار رقية وسكينة وافكر بـ بنية علي الدر "فاطمة" فدوة لگلبها تجنن ما شاء الله عليها، ابوي ومرة ابوي طايرين بيها طيور وابرار كل ساع تعاين لوجهها وتضحك ما مصدگة جابت بت حسبالها حامل بولد، ظالين احنه وياهة كل ساع نخابر على ابوها ونغوره سودة عليَّ لليوم ما شافها صار عمر الطفلة اسبوع وهو ببغداد يلوب يريد بس يرجع وما جاي يكدر من وره الشغل..

رجعت ويه البنيات من گامت سكينة تطلع بره الغرفة وبقت رقية يمي، نزلت عيوني اعاين لوجهها حاطة اصبعها بحلگها خجلانة واشرتلي على شعرها تگول بعفوية..

-اريدن گرون

-حبيبة: مو كليتيلي تردين گصايب؟

-چا ليش سكينة سويتيلها گرون

-عبن سكينة طلبت گرون انتِ ردتي گصايب نفس عمة هدية

-اووع ماريد غيرت رأيي

ضحكت واشرت على عيوني بأصبعي وجريتها اگعدها گبالي افل گصايبها واسويلها گرون.. تنهدت امشط بشعرها متحسرة على حالي هذا وضعي ما تغير من يوم تزوجت منتصر لليوم انا اللوب بالبيت واضيع وكتي بالشغل وبين بناته ماريد افكر بمشاعري اله اريد بس تمر هالچم يوم على خير وارجع لاهلي اطلب الطلاگ..

-رقية: شكراً ماما

تفاجأت من باست خدي وصاحتلي "ماما" ولا ارادي ابتسمت على لطافتها بس الي غيّب ابتسامتي هو دخول منتصر للغرفة مبين هاي رجعته من الدوام..

-السلام عليكم

-عليكم السلام

-شلونچ عنون

-بخير الحمدلله

-رقية: بابا بابا شوف حبيبة شنو سوتلي

-يا جمالج يا بابا

شالها من الكاع يبوس بيها ويكض بشعرها ويتغزل، ابتسمت على منظرها شلون فرحانة بيهن وتهز براسها خاطر يتحركون..

-منتصر: چا وينها سكينة؟

-رقية: راحت يم عمة

-منتصر: زين گلتي لعمة حبيبة شكراً؟

-رقية: اي اي

-عفية ببنيتي

نزلها من ايده وهي راحت تركض تطلع من الغرفة برجليناتها الصغار، ابتسمت على منظرها تخبل شكد احب هالبنيات ومتعلقة بيهن وافرح من اشوفهن فرحانات لو متونسات..

-منتصر: هواي جاي اتعبج ويه البنيات

-لا عادي

-شكراً حبيبة لانچ مهتمتلهن صار هواي ما شايف بناتي هيج نظيفات ومرتبات

-ما سويت شي

هز راسه وكعد على الجرباية، كمت من حسيته صار قريب مني ورحت للميز الهي بروحي..

-حبيبة

-نعم

-لشوكت نظل على هالحال؟

-يا حال؟

-خلينا نتفاهم حبيبة ما يصير هالوضع

-ما جاي افتهم عليك

-انتِ بجهة وانا بجهة، ما يصير هيج احنه متزوجين

-منتصر انا گتلك كله چم يوم ونتطلگ لو نسيت؟

-ليش ما ترضين تنطيني فرصة ليش تردين تدمرين حياتج بيدج ليش؟؟

-راح نرجع على نفس الاسطوانة جاي اگلك ما راح تدمر حياتي وانا رايدة اتطلگ

-حبيبة ماريد هالشي يأثر على علاقتي بيج وبأهلج ماعندي غيركم انا ليش ما تصدكين سويت كل هالشي عبني اعزج واخاف عليج؟

-يا ابن عمي مصدگة وانا ممنونة منك ساعدتني وهذا هو شكراً صار وكت تلتفت لنفسك وحياتك وتتزوج البت التريدها وانا بنفسي اروح اخطبلك رهف ولا تخاف لا راح تخرب علاقتك بيه ولا بأخوتي

-اااااااخ شيقنعها يالحمزة

-انتَ مو عندك شغل؟ روح لا تبطى

گام من مكانه ضايج ومثل ما طلع اليوم الصبح راح بنفس الهدوم ونفس الضيج، ما اعرف شيريد بالضبط هالزلمة حيرني وخلاني اضرب اخماس بأسداس.. ساعات احسه يريدني ويريد رهف بنفس الوكت لا جاي يقتنع يعوفني ولا يقتنع ينسى رهف الي كلما يسولف وياي اشوفها بعيونه واسمع اسمها بحسرته..

نزلت دموعي مهضومة على نفسي، انقهر من روحي عبني جنت عمية كل هالسنين وما راضية اشوف الحقيقة جنت افسر كل نظرة منه حب وكل اهتمام عشگ.. چنت مغمضة جفوني واناظر بعيون گلبي...

تمددت على فراشي اريح نفسي من جبل الهَم التارس صدري تعبت من هالحال، تعبت اعيش ويه الاحبه جوه سگف واحد واجاهد خاطر ما اللين واعاين بعيونه.. تنهدت وهستوها غمضت عيني جاي اغفى وفزيت على صوت فتح باب غرفتي، شلت راسي شفت صفا واكفة وبيدها شايلة نجانة عجين جبيرة ولافة شال على خصرها تشيل بي دشداشتها..

-هاا نايمة؟

-لا هيج متمددة

-تعالي ساعدينا بالخبز تكدرين؟

-اي اكدر، جاية

ابتسمت واني احجيها وهي رجعتلي الابتسامة وطلعت گبلي، كمت ولبست ربطة لفيتها بشكل عكسي على راسي خاطر شعري ما يتلف من حرارة التنور وطلعت وراهة شفت هدية وزينب كاعدات يكرزن حب ويتابعن مسلسل..

-زينب: اكو بعض الناس هواي جاي يتنعوصون لعبوا ارواحنا

-هدية: اي والله

-زينب: حسبالهم بعدهم ببيت ابوهم

-هدية: ههههههه عاوزهم راشدي يصحيهم

غلست عليهن ما مهتمة ولو متأكدة انا المقصودة بالحجي بس مالي خلگ راسي يوجعني ومالي واهس اتعارك، صعدت للسطح ويه صفا ووگفنا نشنگ العجين ونحطه فوك صينية الطحين..

-صفا: مادري بيج تخبزين

-ما اخبز، گبل چنت اوكف ويه عبق اشنگلها العجين بس ماعرف اخبز وهاي اول مرة راح اجرب

-چا انتبهي لـ لهيب التنور

هزيت راسي واخذت العجينة افردها على المخدة، فتحت غطا التنور وسميت بأسم الله ومديت ايدي لزكت العجينة وطلعتها بساع خايفة لا يلوحني نار..

-صفا: ههههه صاكة بمچانچ مبين اول مرة

-اي والله

-لا هسة تتعلمين ما ينرادله شي عايني

سوت وحدة گدامي ومدت ايدها بنص التنور وولا انچوت عجبتني، وكفت اراقبها شلون تخبز واساعدها وعلى وكفتنا صعدت هدية ووياهة سكينة..

-هدية: هاا شجاي تسون

-صفا: تعاي عايني لـ حبيبة شون تخبز ما شاء الله بساع تعلمت

-هدية: شينرادله هو

-صفا: مو هي ما تعرف

-هدية: شو اشوف بس گبلها نزعي الربطة طالعة تضحكين ههههه

جرت الربطة من راسي وهم ما اهتميت تحير شتسوي حتى تغثني، اخذت عجينة كدامها وفردتها على المخدة وفتحت غطا التنور وبعدني جاي امد ايدي خاطر اللزك العجينة جوه وما حسيت الا على دفعة قوووية اجتني من وره وگعتني فوك التنور وراسي يطب بنصه ويلفحني لهيب النار.......

يتبع 👑....

━━━━━━ ♛ ━━━━━━

الامـير علي ينرادله علامة استفهام شكبرها من هسة اگوللكم❓

حبيبة المسكينة شكدد مقهورة عليها 😩

ليلة وابا الحسن بحث اخر صراحة هالثنائي احبببه والهم خانة خاصة بگلبي ماتحمل زعلهم ✋🏻

اخيراً احبكم هواايه وشكراً على تفاعلكم وحبكم للقصة ممتنة امتنان عظيييم 🫂🤍♥️♥️♥️

#الامارة

بقلمي: زهراء السلامي 💎

لتنسون التصويت + التعليق بين الفقرات + متابعة لحسابي 💙.

عيونچ حرب.. وانا اول شهيد ♥️

━━━━━━ ♛ ━━━━━━

"حــبيبة"

جرت الربطة من راسي وهم ما اهتميت تحير شتسوي حتى تغثني، اخذت عجينة كدامها وفردتها على المخدة وفتحت غطا التنور وبعدني جاي امد ايدي خاطر اللزك العجينة جوه وما حسيت الا على دفعة قوووية اجتني من وره وگعتني فوك التنور وراسي يطب بنصه ويلفحني لهيب النار..

-صفا: حبيببببة

عطت من غمج گلبي صوت ذبح بلعومي، روحي فرفحت صرت مثل الطير المذبوح حسيت بأيد صفا من جرتني من التنور وجاي اسمع صوت سكينة تبجي وهدية تصيح بس ماكدر.. ماكدر افتح عيوني راح امووت..

-صفا: حبيبة حبيببة ولج حاچينييي

-حبيبة: مااا اشوووف ااااخ وجهييي عيووني مااا اشوووووف

-هدية: الله يااخذج سكينة الله ياااخذج

-صفا: لااا تطگيهااا ونزلي خابري منتصر خلي يلحگناا.. حبيبة حبيبة عايني عليَّ حبيبة

-حبيبة: وووجهي اااااه

طحت بالكاع ابجيي واصيح مثل المخابيل اهمش بيدي اريد شي يطفي النار الاحسها اكلت وجهي واصابيعي.. شهگت من انشمر بوجهي ماي بارد صحت متملخة گلبي راح يوگف الوجع ينسور بالروح بس ما اهتمت لصياحي ورجعت شمرت ماي على وجهي چم مرة وحسيت بأيد زينب تچتفني خاطر ما ارفس..

-صفا: حبيبة خابرنا منتصر كال لازم نغسلج بالماي تحملي بداعة اممج تحملي

نبض برگبتي وايدي ووجهي.. نبض صار يتوزع كل مكان چن راح ينفجر ما كدرت اطيق الالم وماحسيت على شي بعد غمضت عيوني مسلمتها فاقدة الوعي ومن فكيتهن مرة ثانية لكيت روحي بالمستشفى وچفوف ايدي ثنينهن مضبرات ملفوفات وامي وابوي واخوتي ومنتصر فوك راسي..

-سلوى: يمة بنيتي يمة حبيبة تسمعيني يا بعد امج جاوبيي

-علي السور: ليش ما جاي تحجي دكتور لييش؟؟

-الدكتور: اخوان رجاءً ما يصير هالشي ما مسموح هالعدد كله يدخل للغرفة المريضة لازم ترتاح

-علي البدر: چا جاوب ليش اختي ما تجاوب؟؟

-الدكتور: انطوها مجال.. المريضة بخير لا تخافون هي زينة وهسة تحتاج راحة

وجع وجع وجع وجع، احسني مصلوخة صلخ حتى حجي ماكدر احجي ظليت بس ابجي من الالم واهلي تخبلوا بالزايد.. گوة طلعهم منتصر ويه الدكتور وعافوني وحدي ويه امي كاعدة يم رجليه تفركلي وتبجي..

-سودة بوجهي عليج يا بنيتي.. بيه ولا بيج يا روح امج

-يمة

-هاا يا عيونها كولي حبيبتي شلونچ؟ بشنو جاي تحسين حبيبة سولفي ويه امج وريحي گلبها

-متوجعة

-بخوات العار ولا بيج والعبااس فلا نعديها يا حبيبة ابوج حاد سنونه حلف الا يطيح حظ الچان السبب

-لا يوم.. لا مو هنه السبب

-چا شصعدج تخبزين؟؟ مال خبز انتِ؟؟ يا يوم خبزتي ببيتنا خاطر تخبزين ببيت الحياية؟؟!

-يمة كافي.. تعبانة

-سولفي هنه چانن متقصدات يخلنچ تخبزين خاطر يحرگنچ مو؟؟

-لا.. انا صعدت ويه صفا و...

حچيتلها الصار على كيفي تعبانة ومهدود حيلي مابيه اتناقش هواي، بقت تهز براسها متحلفة واجت تشربني ماي ومسحت على راسي، انتبهت لروحي لابسه شال وملفوفة بـ عباه، ظلت امي كاعدة يم راسي شوي بينما رجع الطبيب وهالمرة چان الطبيب..

-حاكم: الحمدلله على سلامتج

-حبيبة: الله يسلمك

-حاكم: شلونه وضعج زين؟

-سلوى: دكتور بعدها متوجعة چا انتَ مو كلت انطيتها مخدر؟

درت وجهي على امي مستفهمة ياهو عالجني من اجيت؟ حاكم؟! چا والطبيب الجان موجود من فتحت عيوني شسوه؟

-حاكم: شي طبيعي حجية عدها حروق من الدرجة الثانية والثالثة والالم وارد

گالها ولبس چفوف نايلون ووگف گبالي، جفلت من نصى يخلي وجهه بوجهي وبدون سابق انذار كض فچي بخفة ورفع وجهي يقربه عليه اكثر.. انتفضت من تصرفه ووخرت وجهي من بين ايده بس ما رضى ورجع جرني عليه بنفس الطريقة وگال بهدوء يوازي هدوء الغرفة..

-حبيبة انطيني مجال خليني اشوف وضعچ

-سلوى: ميخالف بنيتي تحملي شوي

هدأت نفسي ابلع ريگي ونزلت عيوني ماخليهن بوجهه استحي، رفعتهن مرة لخ من ظل يگلب بوجهي يمين ويسار ويتلمس خدودي على كيفه بأبهامه وترني انوب جاب الة حديدية تشبه المراية وصار يتلمس بيها وجهي وكل ساع عيني تصير بعينه ويبتسم ابتسامة خفيفة ويهمس..

-شوكت تطبيقچ حبيبة

-شنو

-تطبيقچ شوكت؟

-مادري

-مبين ملتهية ومتيهة الايام

-سلوى: اي مو هي تزوجت بالجديد

-حاكم: امممم

-سلوى: ها دكتور بشر؟

-حاكم: راح اسوي شي واريد تتحملين شوية؟

-حبيبة: تمام

-اني اسف اذا راح اأذيج بس اريدج سباعية ماشي؟

هزيت راسي اي ورضيت اظل ساكتة بس ما كدرت ابقى هادئة لانه من وخر الشاش عن وجهي احس روحي صعدت للسماء..

-حبيبة: لااا لااا رجعه لااا

-حاكم: حبيبة تحملي يا عيني

-مااريد رجعه

-دقايق بس دقيقة انطيني

-رجعععه

حضنتني امي تچتفني وحاكم كمل من وجهي واجه على چفوف ايدي تخبلتت ظليت اصيح وابجي بصوت عالي خليت ابوي ومنتصر يركضون يجوني وحاكم انخبص مايعرف بعد شلون يشتغل..

-حاكم: ميحتاج افتح ضماد ايدج مابي شي.. منتصر هذا العلاج تجيبه والضماد كل يوم يتغير مرتين..

وكف يحاچي منتصر على جهة وانا ذبلت طحت بحضن امي مغمضة عيوني اريد بس هالعذاب يخلص تعبت تعب سنين بهالحرگ اريد بس ارجع للبيت وانام بلچن اكعد واللگاه حلم..

رخصوني من المستشفى وخلوني ارجع للبيت بس ما رضيت ارجع لبيت منتصر ردت اظل يم اهلي وضعي ما يتحمل تعب نفسي وجسدي بنفس الوقت..

اول ما طبيت للبيت تلگوني البنات انتبهتلهن جفلن اول ما شافوني وقلقت من ردة فعلهن بس ما حجيت، ترخصت وصعدتني امي فوگ لغرفتي وگبل للفراش حطيت راسي على المخدة ونمت..

انكضى اليوم وانا بالسرير حتى للحمام ماروح ولا الي نفس اكل الوجع ما يخليني اسوي شي غير النوم بس جبروني اتعشا خاطر العلاج وهم رجعت نمت وكعدت الصبح على حس ابوي كاعد يم راسي يقرالي قران..

ابتسمت على صوته الحنون وقررت ما اقاطعه وابقى استمعله لحدما اغفى مرة ثانية بس ماكدرت استحمل اكثر وكمت اريد حمام.. عاينت لايدي ثنينهن ملفوفات شلون راح اكدر اكض بيها بس ضغطت على روحي وكلت هي بعدين تدبر..

اول ما فتت للحمام عاينت للقفل شلون راح اكدر اقفله فـ عفته مفتوح واللتفتت للمغسلة، رفعت عيني وصارت على المراية وهنا جانت الصدمة!!

-حبيبة: وجهيي!! وجههييي!!!

-شيخ علي: حبيبة؟؟ بوية حبيبة شبيچ ابووي

-بووية وجههي وجهههيييي

-راح افتح الباب واجي يمج بنيتي.. هاا؟؟ افتح الباب؟؟

-رمووشي حوااجبييي شعررري وينن راااح شعررري

چفت ابوي للحمام فتح الباب وجرني لصدره يحضني، صرخت بخبال بچيت بحضنه لحدما طلعت عيوني.. طلعت عيوني المابيها ولا رمش والحواجب مختفية ماكو ولا شعرة بيهن! وجهي المهلوط احمرر ومكشر بشكل يخوف وهاي من غير گصتي وجزأ من فچي ملفوف بباندج محترگات.. مادري ابجي على وجهي لو على رگبتي وايدي الملفوفات ومتروسات حروق.. لو ابجي على شعرري الطاير نصه! شعري الچان ينزل جوه خصري ماكو اختفى!! صار خصل طويلة وخصل قصيرة يوصلن لچتفي..

-حبيبة: بوية وجهييي اااااااخ يا بويية تشوووهت

-شيخ علي: لا بنيتي لاا يا رويحتي الطبيب كال يتعال والعباس كال يتعالج، الشعر يطلع من جديد و وجهج كلشي مابي هاي حروق من الدرجة الاولى حتى اثر ما يبقى بنياتي لا تخافين

بجيت ناكرة كلشي كاله مستحيل يطيب شيطيب وانا صرت غير انسانة لدرجة اخاف ارجع اعاين لروحي بالمراية..

-رجعني لفراشي بوية اريد انام.. ماريد ابقى كاعدة اريد انام

-تعالي شيختي وبنيتي تعاي ارتاحي

نهضني على چتفه ومشاني للفراش غمضت عيوني اشرد للنوم وهيج قضيت ايامي.. حابسة روحي بالغرفة ومگابلة المراية وابجي على وجهي الضاعت علومه..

افتهمت من امي منتصر حقق ويه خواته وابوي راحلهن وحلفت هدية على القران مو هي الدفعتني وكالت سكينة بنية منتصر هي الطاحت عليَّ وخلتني اطيح على التنور واحترگ.. رفعت چفوف ايدي الحترگ بطنهن واستوعبت شنو صار، انا كمشت بالتنور وسندت روحي خاطر ما اطيح بكل جسمي جوه هذا سبب حرگ ايدي بس للاسف ما لحگت على شعري ولا وجهي ورگبتي ولاحتهن النار..

ايامي تمشي ابطئ من البطيء، تعبت وتعبت نفسيتي من گدما كررت امي نفس الاسطوانة منو يجي من اخوتي ونسوانهم وعماتي ترجع تكول..

-نفسوها حسدوا بنيتي وعيون الناس السبب! الصار بيها كله من حقد الوادم ونفوسهم الضعيفة

-فراقد: بهاي صدگتي حبيبة اسم الله عليها ما ظل واحد ما خطبها وحط عينه عليها، ام علي تذكرين ام جعفر كتلت روحها كتل خاطر تنطوها وما چنتو ترضون

-ابتسام: انا اتذكرها حتى بوكتها گالتلج راح تظل نفسي بيها وبأبني

وهيج استمرن كل شوية وحدة مذكرتني بفد خاطب اجه ويحللن ويربطن ويلزگن الصار بيه بي.. خلال ما انا ببيت اهلي مرتين رضيت يطبلي للغرفة منتصر وما يطول يمي غير دقايق يكعد شوي واگله نعسانة وتعبانة اريد انام احس گلبي ما يهواه مثل گبل مادري انا نفسيتي تعبانة وتغيرت على الكل ماعرف بالضبط شنو بس اتمنى انساه واكرهه.. اريد اكرهه خاطر ما انقهر وما ازعل من اتطلگ منه وكل يوم اكعد على سجادتي ادعي من الله ينزع حبه من گلبي نزع...

-سلوى: حبيبة اجن صديقاتج

-ماريد اشوف احد يمة

-گلتلهن تعبانة وماتكدر وراحن بس بقت حور ما رضت تروح

-حور؟

-اي اجيبها؟

-اي

دخلتها عليَّ واول ما شفت وجهها ابتسمت مشتاقتلها هالمايعة من بدت العطلة لحد هسة ما شايفتها، حضنتني وسلمت عليَّ ومثل عادتها تبدي تحچيلي عن وضعها وحياتها وانا اتونس على سوالفها دائماً وجودها يغير مزاجي..

**

"عــبق"

رجعوا الامـير علي وتَـمني ثاني يوم من حادثة حبيبة الي البيت كله اللتهى وياهة ومحد اله واهس شي، مع مرور الوقت شكلها بده يرجع نفس قبل والحروق بدت تنشف خصوصاً ويه المرهم والعلاجات التاخذهم هوايه دتتحسن بس دا احس بيها شي ثاني شاغل بالها رغم من اسئلها تجاوبني "ماكو شي" بس اني اعرف حبيبة اعرفها وحافظتها بصم..

-ما صار عرس هذا كل يوم مأجلينه الله يساعدج

اللتفتت على زهراء بنت عمو صمد وبدون لا احجي شي انتبهت هي لچفصتها فـ بسرعة حطت ايدها على حلگها واردفت..

-اسفة والله مو قصدي انا مادري شجاني صايرة امسلت

-عبق: عادي حبي بس لا تحجيها مرة ثانية لا تسمع حبيبة وتزعل لان هي مقابلة على تأجيل عرسي

-زهراء: اي بعيني، هسة عرسچ صار على عيد الفطر مو؟

-عبق: ان شاء الله اي علساس هيج

-زهراء: يلا ان شاء الله حبيبتي ممهلة بجاه علي

-حبيبتي زهورة، شلونچ ويه الحمل خوما متعبج الصيام؟

-زهراء: خية من بده شهر رمضان لحد هسة انا تعبانة وروحي طالعة يجيني الزلمة تالي الليل يريد يحاچيني انطي گفاي وانامن اليوم گوة قنعته يجيبني خاطر اشوف حبيبة

-عبق: اني عكسج ولا حسيت بالصيام اصلاً بـ...

-عببببق!!! عبببببق وينننج عبببق

انخمش گلبي على صوت علي الحـق يصيحلي من جوه، كامت زهراء وكالت رايحة تودع حبيبة حتى تطلع واني عفتها ونزلت اركض جوه شفته واكف بنص الصالة وبيده الموبايل وخالة رسمية والچناين وسور ونور وحيدر كاعدين..

-علي السور: اجاك الموت يا تارك الصلاة

-عبق: طلعت النتائج؟؟

-حيدر: بوياااااي ماكو هيج معدل مصخم

-عبق: شنووو

-علي النور: عبق من هسة اگلج خلي روحج رياضية الدنيا ما تسوه

-عبق: معدلي مو زين مو

-علي السور: معدلج؟ معدلج؟؟ يعني انتِ مقتنعة يطلعلج معدل؟

-علي الحـق: خاب انچبوو هواي اكلتوا تبن واحنه صيام

-عبق: علي شكد معدلي عليي

-علي الحـق: لا تبجين قبق هسة تعطشين

-عبق: حباب گول شكد معدلي والله گلبي مات

-علي السور: ابو شادي الزبنطوطي جاب معدل اقوى صدگ جذب تحجين انتِ

-علي الحـق: راح اگوملللك

-علي النور: خوية هاي تمهيدات خاطر ما تنصدم

-رسمية: ولك احجي مو يبس دم الفرخة

-علي الحـق: معدلج 67

شهكت شهگة حسيت روحي راح تطلع وياهة، انصدمت صدمة حياتي لدرجة رجليه ما حملتني وكعدت على القنفة فاتحة عيوني التجري بدموعها جافلة..

-حيدر: چا مو گلتي مجاوبة ومعدلج ما يقل عن التسعين هاي التسعين مالتج عبق حرامات عليج انتِ شاطرة

-علي الحـق: حويدر راح تنكتل!

-عبق: والله العظيم مجاوبة قسماً بالله هذا مو معدليي مو معدلي علي الحـق والله مو معدلييي

-علي الحـق: ميخالف حبيبتي بعد هو هذا السادس حظ

-عبق: لا لاا لااا وره كل امتحان جنت ارجع واحل وياك الاسئلة تتذكر؟؟ تتذكر علي من جنت تحسبلي درجتي وبنفسك كلت اقل معدل يجيني ٩٣؟؟؟

-علي الحـق: اتذكر عنق بس...

-عبق: لاا مو بس موو بسس انظلمتت هاي مو درجااتي والله مو معدلي والله العظييم صدكونيي

فحطت بجي بهالظهرية انهاريت اباوع لدرجاتي السحگ وابجي بحرگة مستحيل يكونن حقيقيات والله ذبيت روحي ذب على الكتب وجنت اجاوب بالامتحانات كلش زين وارجع فرحانة اطابق اجوبتي ويه النموذجيات وما اللگه اغلاط تنزل من درجتي عشر درجات شلوون هسة هيج معدلي والله راح اموت من القهر..

-علي الحـق: عبقي لا تبجين يرويحتي انعل ابو الدرجات لابو اليبچيچ من باجر نقدم اعتراض ونشوف شيصير ويانه

-علي السور: هههههه ضحكتني اعتراض؟ خوية انسى يلگولك حل واضحة السالفة دفاترها مبيوگة

-علي الحـق: انعل والديهم شني مبيوگة چا وتعبها!!

عفتهم يتناقشون وصعدت فوك لغرفتي حبست روحي بيها ابجي على حظي النحس وامسح بدموعي وارجع ابجي، اندكت عليَّ الباب واجاني صوت حق من بره يريدني افتحله بس مالي واهس اشوف بشر اريد اكعد وحدي واصفن على معدلي التافه..

اذن المغرب واني كاعدة هنا لا الي عين انزل افطر وياهم ولا اشوف احد، متأكدة هسة الكل افتهم بمعدلي التافه وكاعدين يضحكون والولد مسويني ميز، بجيت بالزايد من تخيلت علي التـقي يضحك عليَّ وعلي الدر يشمر حجي وعلي الكرار يشرب باللبن ويكهكه مستهزأ بيه وبعلي الحق.. اوووف عبق اووووف خجلتي علي الحـق وياچ اوووف منج!

-طق طق طق.. طق طق طق يا اهل الغرفة افتحووا الباب

مسحت دموعي على صوت تَـمني واكفة بباب غرفتي من بره ولا ارادي ابتسمت من رجعت تدك على الباب وتسوي بحلگها صوت دگة باب..

-تَـمني: مع الاسف مبينين اهل هالغرفة ميحترمون الضيف يعوفوه بره

كمت بسرعة اخذت كلينسة ومسحت وجهي وفتحت قفل الباب وتفاجأت من شفتهن كلهن هنا واكفات، تَـمني وشمس وابرار وسبأ وحتى حبيبة طالعة من غرفتها وواكفة بباب غرفتي تنتظرني افتحلها..

-حبيبة: طلع المعزب يحترم خطاره

ماتحملت اشوفها كدامي وما احضنها وابجي على صدرها، حطيت راسي على چتفها اشكيلها بدموعي بدون لا احجي وهي تمسح على ظهري بحنانها المشتاقتله..

-حبيبة: عبيقة لا تبجين كله بي صالح

-عبق: ردت اصير نفسج.. ردت اصير محللة مثلج بالضبط واخلي امي تفتخر بيه

-شمس: عسى ان تكرهوا شيئاً وهو خير لكم حبيبتي عبق

وخرت من حبيبة اهز براسي ودخلنا للغرفة اني والبنات، كعدت على الجرباية اسمعلهن كل وحدة حچتلها شي تصبر بيه شوية صرت احسن خصوصاً من كالت تَـمني بهدوء..

-علي الحـق ماقبل يفطر عبوقة خطية كاعد جوه ينتظرج يكول ما اكل بدونها

-عبق: سودة عليه

-ابرار: امشي خية فطري ما خرطت روحج من العطش وامس متسحرين كباب مالح

-سبأ: حلو بسمارج ابرار

ضحكت من كل گلبي على وجه سبأ شلون انجعصت ضايجة لان هي السوت الكباب على السحور البارحة والكل ما تسحر من وره ملوحته يكطع..

-عبق: يلا هسة شوية ونازلة

-حبيبة: هسة تنزلين

هزيت راسي بـ اي وكمت لبست شال فوك راسي ونزلت وياهن وفعلاً شفته كاعد بالصالة يدخن جكارة وامه تحجي عليه لان ما فاطر، اول ما شافني تغيرت ملامحه وابتسم فرحان وطفى الجكارة وكام ويايه للمطبخ صبيتلنا فطور وكعدنا ناكل بهدوء لا هو جاب طاري المعدل ولا اني..

ثاني يوم من الصبح كعدني يريد ياخذني حتى نقدم اعتراض، بالبداية ما ردت اروح لان اعرف ما راح يسوون شي وهم ميتة من العطش بس كلت هذا مستقبلي ماريد اتندم لازم اسوي كلشي يطلع بيدي..

رحنا للتربية وظلينا ننتظر هوايه وتاليها كالو مو هسة الاعتراضات احنه نفتح بوابة وقدموا عليها علي الحـق راد ينجلط من العصبية منا حارة ومنا صيام ومنا ميكدر يدخن جكارة ويشرب چاي روحه رادت تطلع وكوة سيطر على اعصابه وما تعارك..

-علي الحـق: انعل ابوي لو رجعتلهم بعد امشيي

-عبق: ماكو داعي نرجع كالو بوابة الكترونية تنفتح

-بسطالي عليها ما نحتاجها اوديج اهلي

-هااا

-اسجلج بجامعة اهلية على الاقل انظف وارتب وما يشلعون گلوبنا نروح بفلوسنا

-لا علي ماريد اهلي حرامات اني تعبت وما نمت الليل علمود اجيب معدل وتالي اروح اهلي

-عبق چبيدي اغلب الي بالاهلي هم ما ناموا الليل وشطار ومعدلاتهم قوية بس ما حالفهم الحظ بالحكومي واللتجأوا للاهلي ليش ماخذة هيج نظرة على الجامعات الاهلية؟

-مو اني ماخذة الناس ماخذة راح ياكلون گلبي وانتَ هم راح تصرف هواي فلوس، ماكو داعي اروح حكومي شنو ما جابلي هالمعدل عادي

-لا انا ما ارضى

-علي الحـق لا تضغط على نفسك كتلك اني راضية

-خايبة ما اضغط على نفسي شبيچ الخير هواي لا تظلين تفكرين زايد اريدج تصيرين محللة نفس حبيبة وارفع راسي بيج

-برأيك معدلي يجيب تحليلات اهلي؟

-يجيب واذا ما جاب نشوف المسائي

هزيت راسي اي وبداخلي فرحانة ومستحية بنفس الوقت، ماريد اثگل عليه اني بعدني استحي اشتري شي وينطيني فلوسه مو انوب يسجلني بجامعة ويدفعلي يجوز فوك الثلاث ملايين بالسنة ماعرف بالاسعار شكد بعدني..

رجعت للبيت مرتاحة احس هم وانزاح عن صدري، رحت لغرفتي صليت الظهر وبدون لا احس غفيت وجريتها نومة لحد اذان المغرب اجه حق يكعدني حتى ننزل نفطر سوه..

-شيخ علي: ها شصار على الاعتراض مالتكم؟

-علي الحـق: ما نعترض بعد مالي خلك

-رسمية: يعني ما ترهم تصير طبيبة يمة؟ شوف يجوز يرضون بلكت الله

-علي النور: ترهم يمة كلشي يرهم بالعراق

-تَـمني: صدگ عود؟

-علي السور: اي اي تكدر تشتغل بالمستشفى وانا اتوسطلها خلوها وراي

-حيدر: حبوبة ترهم نخليها بصالة الولادة تهلهل للتجيب ولد

-علي النور: لو نخليها فوك سيارة الاسعاف تسويلهم ويويويويوو

الكل مات من الضحك وحتى اني ضحكت يربي اضحك على خيبتي بس والله تحشيشاتهم قوية ذولة الثلاثي، بقوا يحششون على معدلي وعلي التقي يرزل بيهم ويذكرهم بمعدلاتهم التافهة على كولتهم..

ومثل كل يوم نسهر على المسلسلات الجديدة ونكعد نلتم البنات كلنا ونسحل حبيبة غصباً عليها تجي ويانه، مشت الايام سريعة وحلوة وماعرف ليش علي الحـق ما كال لاي احد راح يوديني جامعة اهلية وحتى اني حرص عليَّ ما اكول لبشر وسويت مثلما يريد..

ما بقت الا ايام قليلة على زواجي والتوتر يقرا مليون البنات مخبوصات ويايه واني مخبوصة ويه امي باقية وياهة على تواصل صح متحجي ويايه هوايه ودائماً تنساني ولازم ارجع اذكرها بيه بس وضعها النفسي مستقر وهواي ديهتمون بيها بالدار..

خالة رسمية قضتها مناحة من عرفت علي الحـق يريد يطلع من البيت ونكعد وحدنا، تخبلت البيت شعلته شعل وصراحة حتى اني تفاجأت مجنت اعرف عنده هيج نية ولا ادري بي مجهز بيت وديأثث بي حتى ننتقل اله ويجيب امي تعيش ويانه كلشي يسوي سكتاوي هالرجال والغريب عمو علي واخوة علي الحـق يدرون بي راح يطلع ومن هسة كلمن استلم شي من الاثاث يجيبوه هدية زواجنا..

بيوم استشهاد الامام علي عليه السلام سووا مجلس عزاء ضخم كلش وهاي كل سنة ما شاء الله عمو والولد ثلاث ايام يطبخون ويسوون مجلس عزاء ويسودون البيت والحيطان من فوك ليجوه حداداً على هذا المصاب..

رجعت ليلة لبيتنا وره القراية خالة رسمية چلبت بيها وحلفت عليها مترجع لاهلها وهي قبلت، فدوة بطنها شوية مبين ووحامها هواي خف عن قبل بس بعدها علاقتها بأبا الحسن ما مستقرة ما زال مينام يمها بالغرفة وميلتقون ويه بعض حتى على الاكل كلمن بمكان.. بس ابا الحسن مو ابا الحسن اذا ميهتم بـ ليلته من بعيد لبعيد كل شوية موصي امه خليها تاكل اخذيها للدكتورة سويلها فلان شي لا تشغليها لا تعبيها لا تضوجيها اللخخ.. ومن خالة رسمية تگله ليش ما تهتم بيها بنفسك يگللها بعده مكسور منها وتعبان يخاف لا يرجعلها وينكسر منها بالزايد..

علي التـقي وسبأ على نفس الحطة ماكو أي تطور غير من سبأ خطية شكدد دتحاول تهتم بنفسها كريمات ومقشرات ومواد عناية واشكال اللوان هواي تغيرت نفسيتها وحتى شكلها بده يتغير للاحلى بس علي التـقي بعده بحسبة اخو وياهة ما اخطى أي خطوة ناحيتها للاسف بس رغم وضعها بعدها مهتمة بروحها بسبب تَـمني وشمس يحچن براسها ويركضن وراهة..

الامير وتَـمني كتاكيت الحب من رجعوا من العمرة وره الصار بـ حبيبة وهمه ما سمعنالهم صوت عايشين حياتهم بالحب والسعادة والمناكرات وفصلات تَـمني وماشية امورهم لووز اما حبيبة.. فـ حبيبة رجعت لبيت منتصر بس رجعت گوة عليها وصدمتنا من كالت لامها تريد تطلگ سلوى تخبلت انجنت كامت تدك وتلطم وتكول شيكولون عنج الناس ما صارلج شهرين متزوجة وتردين تطلكين بس حبيبة راسها والف سيف الا تطلگ لانها ممرتاحة وياه ونفسيتها تعبانة..

وفعلاً واضحة نفسيتها تعبانة لان حتى هسة وهي ويايه واكفة كدام الكوشة مالتي تركص بفستانها الوردي وشعرها الگصته لحد چتفها وبحروق ايدها الواضحة وحروق وجهها الخفيفة الخافيتهن بالمكياج مبين عليها تعبانة وتعيسة..

ابتسمت من وكفت يمنا وهلهلت هلهولة قوية تعبر عن فرحتها بينا، نزلت عيوني على بوكيه الورد البيدي وعلى بدلتي البيضة فرحانة وخجلانة مشاعر مختلطة مراودتني، اللتفتت على علي الحـق الكاعد بصفي وايدي اليمنى بين ايده وما مصدگة الدا اعيشه حقيقة كأني بحلم..

اليوم عرسي.. العرس الي الكل چان منتظره ويتجهزله صار شهور، على كولة ليلة لازم نكشخ بعرس سندريلا من الامير الحقيرة تگول هيج مو لان اني حلوة بس لان جنت اشتغل ببيته مثل الخدامة وهو تزوجني وانقذني من البؤوس الچنت عايشة بي..

-اگلج مو چنها مصخت يمته نروح للفندق؟

ضحكت وعضيت شفتي اخزر علي الحـق من همسها بأذني بس عود اهتم؟ والله ولا اهتم وكمل يكول..

-علي الحـق: شوكت يخلص هالعرس الخايس

-عبق: علي هاي شبيك

-هسة الا عرس وسوالف ماصخة ما نروح بوجهنا للفندق ونخلص

-گتلك العرس مهم شوف الكل شلون فرحانين النا باوع لخالة رسمية شكد سعيدة

-علي الحـق: امي اي فرحانة بس الباقين كلهم جذب جايين بس خاطر ياكلون كيك

ضحكت وبلعتها بسرعة من اجت امي تصعد للستيج توكف يمي علمود ناخذ صورة، اباوع لوجه سلوى راح تموت والله راح تنجلط كوة واكفة على حيلها حتى مكياج ما متمكيجة متقبل تسوي أي شي من افتهمت بأمي راح تحضر..

-شكراً للمعازيم الكرام وهسة صار وكت تفرغون الستيج حتى نبدي بفقرة رقص السلو ويه عرساننا

-علي الحـق: ما اركص لو الدنيا تنكلب

-عبق: علي الحـق ميصير هيج احنه تدربنا وانتَ قبلت نركص شبيك اختلفت عليَّ هسة!

-ولج عايني الدنيا كلها هنا عوفيها عود بالفندق اركصج للصبح

-ولك اشششش

سكت من اجتنا الي تنظم الحفلة وحرجته حتى يكوم يركص ويايه، ضحكت بخبث فرحانة وكمنا سوه لزم ايدي على كيف وجرني لوسط القاعة بعدما الكل كعد بمكانه وعلگولنا موسيقى هادئة..

كزبر جسمي من لزم ايدي ثنينهن وباسهن كدام الكل ورفعهن يخليني احاوط رگبته وهو نزل ايده على خصري يحاوطني وصار يحركني مثلما يريد هو.. تنهدت عيني بعينه ونظراتنا تسولف حبنا وسعادتنا وانتظارنا لهاي اللحظة، ابتسمت بهيام من طبع قبلة خفيفة على راسي وهمسلي..

-احبچ عبق احبچ يا دفو گلبي البارد ولهيبه

بلعت ريگي ماكدر اجاوب جامدة بمكاني احس العيون كلها علينا وبنفس الوقت فرحانة كلش فرحانة وسعيدة واعجز اعبر عن شعوري بهاي اللحظة.. ضحكت من رفع ايدي وخلاني ادور حول نفسي مثل الاميرات ببدلتي الي كلها عبارة عن تول منفوش وبس بالصدر بيها شغل كرستالات صغيرة تخليها تلمع بالاضوية بشكل جذاب..

-هاي اول مرة اشوف عگروگ يركص

-هههههه علي

-اموت عليج وعلي

-واني احبك

-يلا شوكت نروح للفندق

-اهوووو علي الحـق

ضحك وكملنا فقرة السلو وبدينا بفقرة الذهب والهدايا بس اني ماعندي احد يلبسني هدايا فـ اشرت للمنظمة تلغي الفقرة بس علي الحـق ماقبل واشر لامي تتقدم عليَّ واجت لازمة بيدها علبة صغيرة مقدفة مال ذهب.. ركزت عيوني اباوع ممفتهمة الديصير منين امي جابت الفلوس واشترتلي ذهب؟!..

-شذى: مبروك بنيتي الحلوة تستاهلين كل خير

-عبق: الله يبارك بيج يمة

جرت ايدي تلبسني السوار بس احسني مهضومة وگلبي معصور، حضنتني لصدرها وباستني من راسي وكالت بنفس نبرة وصوت امي القديمة..

-ابوج لو موجود جان طار من الفرح وما قصر وياچ بشي يا حبيبتي، عذريني من التقصير السوار مو من قيمتج بس هذا الكدرت عليه

كمشت بأيدها مدمعة عيوني منين جابت فلوسهن وهي صارلها سنين بالمستشفى، انخمش گلبي من تخيلت ممكن علي الحـق منطيها حتى تشتريلي بس بسرعة استبعدت الفكرة امي نفسها عزيزة ومستحيل تسمحله، قبل لا اروح بأفكاري زايد سبقتني امي وكالت بهمس بنبرة سريعة بيني وبينها..

-بعت كلادة عيد زواجنا

شهكت بكتمة ونزلت دموعي عليها باعت الكلادة الجابهة الها ابوية قبل لا يموت هدية عيد زواجهم، باعت كلشي وما باعت هالكلادة معتزة بيها وحتى من مرضت واخذتها سلوى للمستشفى علساس تعالجها طلعت من البيت وهي برگبتها بس شلون كدرت تحافظ عليها وهي شبه فاقدة شلون ما سرقوها منها وين ضمتها؟

ظليت حاضنتها ودموعي تنزل ما انشلعت اله من اجتني حبيبة وقدمتلي هديتها.. خلال هاللحظات خلال ما حبيبة اجتني ولبستني كلادة ذهب وهمست بأذني "مبروك عليج خيتي" راحت مني الغربة حسيت عندي اهل عندي سند عندي احن اخت واجمل ام واحسن زوج وسند..

فرحتي تضاعفت من صعدن البنات على المنصة ياخذن ويايه صور وهيج مشى اجمل عرس ومثلما كال علي الحـق اخلي السلف كله يحجي ببدلاتج وذهبج وترتيب عرسج والتوزيع جاب كلشي من احسنه وكلشي من اجوده وارقاه ما قصر حتى بأبسط الشغلات حتى بنوعية الچكليت جابه من احسن واغلى نوع..

بديت اتوتر من بده يخلص العرس وسمعت صوت الزفافة بره، رجع دخل علي الحـق القاعة حتى ياخذني ووكف فوك روس النسوان ينقنق وياكل بگلبهن..

-علي الحـق: يمة شني هاي لبسيها زين لفلفيها لا تخلين شي منها يبين اريد تچفنيها تچفن جماعتي الهتلية واكفين بره

-رسمية: اسم الله الزهرة شبيك ولك شهالحجي هسة نسترها لا تظل تاكل روسنا

-علي الحـق: هاي شني الخركة فوك راسها تره جاي اشوفن وجهها يووووم شبيچ انتِ تردين تطشرين عررضي اليووم

-رسمية: خايبين يبووو اخذوه مناا طلعوه ماريدنه

-علي الحـق: لفيها بعد بعد تره جاي اشوفن رمش عينها

-عبق: ماكدر اتنفسس هاي ثالث طبگة يحطوها فوك راسي

-علي الحـق: وشكو؟ سويهن اربعة جيبولنا وصلة بعد

-فراقد: شلعوا من افاد عدوك وصلة بجاه علي شني وصلة هذا شماله وليدج رسمية

-سلوى: تسودن چن ماكو غيره تزوج وصارت عنده مرة

-علي الحـق: يممة الغيرة يممة اويليي يا غيرتچنن انتن الثنين اويليي

ضحكت جوه الشال مادري بطانية الحطها فوك راسي بس المهم شي ثكيل حجب عني النفس والهوا بحيث طلعوني من القاعة وركبوني السيارة واني كلشي مدا اشوف.. الزفة شنو صار بيها شنو سووا وشنو عاشوا ومنو اجه وما اجه كلشيي ماعرف لحدما وصلنا للفندق ودخلني علي الحـق الي يتعارك ويه ذبان وجهه اسمعه بس يرزل وكل شوية وگايل..

-ولك اااااخ منك سور بعلي لو اكضك

-علي السور: شنوو شبيك انتَ متفرعن علينا

-علي الحـق: ابن الحبااب ما تشوف ذولة الهيلگ واكفين بدرب البت شنييي واكفين هنااا شعدهممم بعد وين اوديهاا اصلاً ياهو عزمهم انا اعلمكم ولد ال... ال.. الحلووو

-علي التقي: اهووو خبصنا طلع الزفة من عيوننا چن بس هو عنده مرة

-علي الحـق: ولك لا تعيد هالحچاية بعلي هسة ابطل واشلع بيها

-الامـير علي: ولك وين تروح والوادم!!

-علي الحـق: ايي عود خلي يزفون سور على نور انا مالكم غرض بيه

-علي النور: ههههه الله اليوم عرسي يعني؟

-علي البدر: اييي وانتَ منا محمر من الله بس عوزك برگع بعد

-علي السور: شباب وينه كرار ما تجي تصورني.. دصورني يا عطواني صور ولك صوور حلوة اللمة

-علي الكـرار: وخر عن چهرتي انتَ، حق تعال دوس على قندرتي بلچن اتزوج وراك بجاه الحسين

-علي السور: هاا ولك چنك ناويها

-علي الكـرار: خايبين ادعولي كون امي ترضى رفعوا ايدكم واقروا وياي امنن يجيب المضطر اذا دعاه ويكشف السوء، امن...

-علي النور: ولكم حلوة اللمة تعالو صورونا فيديو

-ابا الحسن علي: يا لمة ولك مو كرهتونا بأم الدنيا موكفينا بباب الفندق وتلغون خلوا الزلمة ياخذ البت وينزل يتشكر من جماعته!

-علي الحـق: اتشكر شني خو ماكو شي طردوهم من انعل ابوهم

-علي الدر: تقي وينك.. تعال هاي مرتك مادري شصارلها هسة خابرتني ابرار

-علي النور: مبروك راح تصير اب

-علي السور: الله وتجيبون مسعود عنون

-علي التـقي: خاب اكلو نفسكم..

گالها وما سمعتله صوت بعد مبين طلع يشوفها، اخيراً علي الحـق لزم ايدي والايده الثانية حطها وره ظهري يمشيني يصعدني المصعد.. صعدنا وحدنا واحس برجلي صارت تطبگ وحدة على الثانية من التوتر والخوف..

-علي الحـق: هذا ليش هيج طول شسالفة

-عبق: عادي خلي شكو ورانه

-هوااااي ورانه حبيبتي

-احم.. علي اگلك امي وين

-جاية ورانة لا تخافين

-ومنو وياهة؟

-امي وعمتي ابتسام، سلاوي رادت تجي وكلتلها حلمم اطببج لغرفتي اخاف تسويلي سحر

-يااا

-اي والله شبيچ.. ايامها معدودة هالسلوى بسيطة

وصل المصعد ومشاني لغرفتنا، بطني وراسي ورجليه وايدي وگلبي وظهري كلهن خدرن احس كمت اسحل بروحي سحل وماكدر حتى اوخر الكبوس والعباية عني، ظليت بيهن لحدما اجن النسوان هنه رتبني ونزعني وامي باست راسي وطلعت بسرعة حسيت بيها شي واحساسي ما غلط فعلاً بيها طلعت سلوى مسمعتها حجي يسم الكلب بالعرس ومزعلتها..

-علي الحـق: يلا رحم الله والديچن ان شاء الله نردها الچن بالافراح والمناسبات

-ابتسام: الله يسعدكم يا بعد عيني انتبه على بنيتنا زين علاوي

-علي الحـق: بعيني بعيني يلا كافي تفضلوا بلا مطرود

-رسمية: ياا ياا عاين الاستهتار

-علي الحـق: يمة هسة اجه دور اغنيتج تسرسر يمة تسرسر ولا تهتملنا

ضحكن وطلعن من الغرفة واني معتتت من الفشلة هذا شبي تخبل بس لحظة لا هذا ممتخبل وهاي شخصيته الحقيقية من يوم عرفته للان ماعنده ستوب ولا خجل من احد، طبگ الباب وراهن ونزع جاكيت القاط وكال بحماس..

-علي الحـق: علييييييي اليوم....

-علي الحـق لحظظة

-شكو

-اني سامعة لازم تصلي ركعتين على البركع مالتي

-لا صدگ!

-والله شبيك

-يلا هينة هسة نصليها

جرني من البركع خلاني اكوم وياه وفرشه بالكاع واني لابسته متت ضحك ما حاول يوخره من راسي وكدر يصلي على ذياله من كدما طويل، ميعرف بعد شلون يصلي وشلون يسلم خلص ركض ركض وسوه تسبيح الزهراء وكام وهو يكول..

-الحمدلله والشكر.. اليوم...

-وحديث الكساء!!

-شنو

-لازم تقرا حديث الكساء بعد

-غسق لا تطلعيلي سوالف من جوه الكاع!

-علي لازم تقرا حتى يصير زواجنا مبارك

-لا صدگ!

-اي والله

-چا يلا نقراه شنرادله

هزيت راسي اي وتنهدت بصوت مسموع مرتاحة، ابتعدت منه اطلع تلفوني من الجنطة حتى يقرا بي وما حسيت الا على ايد قوية تسحبني من زندي عليه وتشيلني اني والبدلة و................

**

"ســـبأ"

نفسي تلعب مو شون ما چان وطول العرس ساكتة ومستحملة خاطر ما اخرب عليهم ويكولون عني فاهية وما اتحمل ولازم بكل عرس اتخربط بس ماكدرت اقاوم اكثر غمضت عيوني وطحت على ابرار مختل توازني واول ما فتحت عيوني شفت تقي فوك راسي خايف..

-علي التـقي: سبأ انتِ زينة؟؟

-زينة

گلتها وكمت بساع استحي يشوفني مريضة بس ما رضى اكوم وجرني من ايدي يكعدني على صبة موجودة بباب القاعة والبنات كلهم محاوطيني ظال بالهن عليَّ..

-علي التقي: شبيچ سبأ اخذج للطبيب؟

-لا لا انا زينة

-چا ليش طحتي؟ بشنو تحسين؟

-هيج دوخة بسيطة لا تخاف

-تَـمني: خاف حامل سبوئه؟

انتفضت اعاين عليها مستغربة وبدون لا احد ينتبه عليها عضتلي شفة افتهمت قصدها شنو وغطيت بهدومي عزا العزاني جاي تبسمر بـ تقي..

-شمس: يجوز اي حبي سوي تحليل باجر تقي عود اخذها للمختبر

-علي التـقي: احم.. اي.. ان شاء الله

-ابرار: يا رويحتي الف مبروك تستاهلين كل خير

-سبأ: لا بنات انا مو حامل

همستها بحس خافت وشفت تقي يدور وجهه عني واذاناته صايرات حمر، نزيت على گرصة تَـمني لايدي خفيف وظلت تعضلي بشفتها وتكول..

-لا حبي سوي تحليل للاحتياط

-ابرار: اي خية وجوب

-حبيبة: تقي اخذها للبيت خليها ترتاح.. عود طمنيني عليج سبأ انا رايحة هذا منتصر خبصني

ودعتها وراحت بس وجهها مگلوب، كمت على كيفي دايخة كلش ونفسي تلعب كمشت بأيد تَـمني من جهة وبأيد ليلة من الجهة الثانية ومشوني وبنص طريقنا صاحت ليلة..

-ااخ تعبانة ماكدر اسندج سبأ تقي تعال بمچاني

-علي التـقي: اي اي

اجه لگفني من ايدها وخلى تَـمني تعوفني وهو مشاني لسيارته، كعدني بكرسي الصدر وهو راح يهرول لكرسي السايق كعد وبساع شغل السيارة وطلع بينا..

-راح اخذج للمستشفى خاطر نفهم البيج

-لا ماكو داعي والله مابيه شي هاي عبن ما نمت امس تعبت

-ميخالف اخذج خاطر ما اظل افكر بيج

-شنو

-يعني اقصد يظل بالي عليج

-هاا

سكتت واستسلمت ياخذني للمستشفى بس الدنيا ليل وماكو اطباء اختصاص فـ دخلونا على الطوارئ، شفنا طبيب واحد موجود وكعدني على سدية خلاني كاعدة انتظر وهو يروح منا ومناك شايل بيده كوب چاي سفري مبين هسة وقت استراحته، شوي وكمل چايه واجانه..

-الدكتور: السلام عليكم، من شنو تشكين عيني؟

-سبأ: دا...

-علي التـقي: دايخة ومعدتها تگلب صار على چم مرة تتكرر

سكتت من قاطعني وبعد ما حجيت طول ما الدكتور يسولف ويه علي التـقي شنو يسألني تقي يجاوبه والدكتور مبين عليه هلكان كلش كل ساع يتثاوب ومبينة الدنيا طالعة من عينه..

-الدكتور: اشوفج لازمة ايدج هم تشكين منها؟

-علي التـقي: لا

-الدكتور: هههه اسمحلي منا اريدها هي تجاوب

-علي التـقي: ايدج توجعج بوية؟

-سبأ: هاا؟

-ايدج توجعج؟

-اي

-علي التـقي: ايدج توجعج صدگ؟؟

-سبأ: اي والله

-الدكتور: شفت معناها ما منتبه على كلشي يخصها

حچاهة بالضحك بس تقي ما ضحكله وظل يعاين عليَّ، توترت من نظراته حسيته معصب بس ما حچه شي لحدما الدكتور سألني من وين ايدي توجعني واشرتله على معصم ايدي ومد ايده يريد يكضني هنا تقي تخبل ودفع ايد الطبيب حيل وكال..

-شسالفة دكتور!

-الدكتور: اريد افحصها عيوني

-انا افحصها الك!

-شلون تفحصها انتَ حضرتك طبيب؟

-لا بس گول شني تريد انا اسويلك

-خوية انتَ مبين عليك دارس ومثقف انطيني مجال خليني اكمل شغلي بلا زحمة عليك

-لا انا لا دارس ولا مثقف واعذرني نريد طبيبة

-ماكو غيري اليوم

-خوش نجي باجر كومي بوية

-الدكتور: تحب اللبس كفوف حتى ترتاح؟

-وشنو الفرق؟!

-الفرق ما راح اللمسها بشكل مباشر وصدگني نيتي مو سوء انا طبيب وهذا شغلي

اندارلي تقي مخنزر يريد يبلعني، خفت وبدون تردد هزيت راسي بـ لا وهمستله..

-لا لا خلينا نرجع للبيت

-علي التقي: وايدج؟؟!

-ختولي ماريدها ما توجعني عادي

-علي التقي بهمس: سبأ!!

-والله ماريدها شني هسة قحط عندي ايد ثانية عادي

-علي التـقي: استغفر الله ياربي.. اللبس چفوف دكتور امري لالله اللبس

هز راسه الطبيب متفهم وعافنا وراح مادري وين بس خطية حتى من عافنا جان مبين تعبان كللش كسر خاطري..

-سبأ: خطية لا نضغط عليه خلينا نرجع للبيت

-علي التـقي: ياهو ما تضغطين عليه؟

-الطبيب

-وانتِ شلچ غرض بالطبيب؟

-اي يعني مبين تعبان وانا عادي استحمل ما يحتاج نظل هنا

-سكتي سبأ!

نترها منزعج وانطاني ظهره طافرة روحه، انجبيت وبعد ماحجيت حتى من اجه الطبيب يفحصني ظليت احجي بلغة الاشارة من اكول اي اهز راسي ومن اكول لا هم اهز براسي.. كمل الطبيب وكال على الاغلب تشنج هذا بس احتاج اشعة حتى نتأكد ونرتاح..

-الدكتور: عدها العافية ان شاء الله هذا العلاج مال لعبان النفس هواي راح ترتاح عليه

-شكراً

كضني من ايدي وجرني يطلعني من المستشفى ونزل لصيدلية قريبة جابلي العلاج ورجع، ظلينا طول الطريق ساكتين محد بينا حچى لحدما نزلنا للبيت، صعدنا للغرفة وهو بساع نزع دشداشته شمرها بالكاع وطب للحمام وانا ختلت وره البردة ابدل هدومي..

لبست دشداشة خفيفة وطلعت من البردة وهو طلع من الحمام سابح ولاف جسمه بمنشفة جبيرة، راح للكنتور فتحه يطلعله ملابس وصفن عليهن..

-سبأ

-ها

-هذا شنو العطر؟

-يا عطر

-بكنتوري؟

-شنو يا عطر تقصد

تمشيت اوكف بصفه ومديت راسي بالكنتور وكفخني ريحة العطر الحلو، ابتسمت متذكرة شموسة علمتني على طريقة تخلي الكنتور ريحته تخبل والملابس ريحتهم نظافة..

-هاا هههه هاي انا معطرته

-معطرة الكنتور؟

-اي خاطر هدومك تظل ريحتهم حلوة ليش شبي ما حبيته؟

-لا لا بس..

-بس شنو

-هيج انسي

اخذ تراك ووكف وراي خاطر يلبسه، بقيت منطيته ظهري واللوب شنو تعليقه عن العطر وشبي حسيته مستغرب وبحلگه حچاية..

-اذا ما حبيت العطر بعد ما...

-لا بالعكس

-ها يعني حبيته؟

-اي يدوخ

حچاهة وحسيته واكف وراي، انداريت عليه مبتسمة وغابت ابتسامتي من صارت عيني بعينه ادوخ بنظراته الترجف عليهن عضاي..

-من شوكت تعطرين الكنتور؟

-من.. من شهرين يجوز

-امم

-ليش تسأل

-ههههه ولا شي شبيچ

هزيت راسي ساكتة ورحت اكعد على الجرباية، تذكرت ما متعشي هو وطفرت من مچاني وگلت..

-تقي متعشي؟

-اي

-يعني ما اسويلك لگمة؟

-لا

-زين شربـ...

-لا سبأ ماريد شي كعدي وارتاحي اذا ردت شي عود اگلج

-مو خاف تجوع خليني اجيبلك كرزات منا اوكف

ركضت اطلع كرزات ونمنمات من الميز وجبت عصاير من الثلاجة الصغيرة مال الغرفة وحطيتهم على الميز رتبتهم ورحت للكنتور اطلع بعد نساتل ووگفت بمچاني من شفته يعاين عليّ ومبتسم..

-شبيك

-هسة انتبهت على شعرج شكد طويل

-شعري انا؟

-لا شعر حبوبتي

-ههههه اي شعري طويل

-مسويتله شي لو هو هيج من الله

جفلت صاكة من تقدم عليَّ وحط اصابعه بين خصلات شعري، گلبي صار يرجف والنفس ضاگ بيه گوة سيطرت على روحي وما طحت من طولي، رفعت عيوني لعيونه وهمست گوة..

-اي من الله

-ولونه؟

-ما صابغته هو هيج

-لا تصبغينه بيوم ديربالج

-صار

-و.. ورموشچ؟

-حاطة مسكارة و..

-لا بالايام العادية قصدي؟

-لا ماكو شي حتى كحل ما اخلي انا هيج من الله رموشي مكناسات

-صدگ مكناسات عينج ما تبين من وراهن

-ههههه رهف تعيب عليَّ تصيحلي ام السبعة وسبعين

-شنو هاي

-هاي فد حشرة عدها سبعة وسبعين رجل تخوف وعيوني تشبهه رهف وامي دومهن يتنمرن عليَّ ههههه

-خيطيرن احلى من عيونهن

ابتسمت ورجعلي الابتسامة، رجلي ظلت ترجف تريد تطيح فـ تلاحكت لروحي وكعدت على كرسي الميز الجديد الي اشتراه من راح لبغداد.. ميز صغير وبي كرسيين كلش حلو وضاف لمسة تخبل للمكان..

كعد بصفي على الكرسي الثاني وصار يدور عيونه بالغرفة واحس بي يلعب بأطراف شعري من جوه كل ساع يلفه على اصبعه ويفله ويرجع يسوي نفس الشي وانا گلبي طايرر..

-شنو رأيج نصبغ الغرفة؟

-مادري بكيفك

-بكيفج انتِ نصبغ لو نجيب ورق جدران اكو اللوان واشكال حلوة كلش راح تعجبج

-چا هذا هو

-اي وشنو رأيج نغير الغرفة ونجيب لـ..

-لاا لاا

درت وجهي عليه صرنا وجه بوجه ما اهتميت لقربنا واردفت بساع..

-انا احب هاي الغرفة لا نغيرها

-اي بس هاي غرفتي القديمة سبأ ما مبدلها صار سنين

-حلوة

-ميخالف نجيب شي جديد حتى نجدد وياه

-لا مو.. مو انا احبها

ابتسم ساكت وظل يعاين لوجهي، نزلت عيوني ساكتة واسولف بگلبي هو ما يدري حلم عمري جان انام على هالجرباية واحط هدومي بهذا الكنتور، والله هالغرفة عندي احلى من الف غرفة ومعتزة بيها وبكلشي يخصها اريده يبقى وما يتغير..

-سبأ

-ها

-هم تتابعين افلام؟

-يعني مو كلش اعرفلهن

-اممم، زين شنو رأيج بالعرس اليوم؟

-يخبل

-صدگ

-والله يخبل وكلشي جان مرتب وبدلات عبق وحدة تكول للثانية انا احلى فد كشخة وفخمة حتى النسوان تعجبن عليها وعلى اختياراتها

-وانتِ؟

-شنو انا

-محد مدحتچ؟

صفنت مصدومة من سؤاله لدرجة ظل حلگي مفتوح ما سديته، حس عليَّ وعلى ردة فعلي وبساع غير السؤال وكال..

-بشري الكعب خوما اذى رجلج؟

-مدحوني

-شنو؟

-مدحوني اي عمة زهرة كالت طالعة كلش حلوة وفراقد حبت فستاني وبنات عمي صمد كالو كلش متغيرة وحليانة وصديقات عمة رسمية كالن على جسمي كلش حلو وعمة رسمية جانت فرحانة وكالت هاي مرة علي التـقي وحبيبة كالت بشرتي وسماري يجنن وتَـمني حبت عطري هالمرة وكالت كلش حلو ويجذب

حچيتهن كلهن دفعة وحدة اخاف انسى شي ومن كدما نبرتي سريعة احس بجسمي صار يرجف وكزبرت كلني، ما جذبت بكلمة وحدة وفعلاً هذا المدح اجاني بس مو كله اليوم هالمدح صار على مراحل وعلى عدة ايام بس ماعرف ليش كلهن حچيتهن هسة يجوز ردت اثبت نفسي كدامه ان انا مرغوبة وشكلي مقبول ومو بهالبشاعة..

-علي التـقي: حلوو هم زين ما خطبتج وحدة منهن چان كملت

-انخطبت

-شنو؟

عضيت لساني مصعوقة من نفسي!! انا شجاي اسوي وليش كلت انخطبت يمته صار هالشي! يا فشالتي ويا صخام وجهي لو عرفني جذابة بعلي تلعب روحه مني وينفر..

-شبيچ سكتي صدگ خطبوج اليوم؟

-اي

-ياهي هاي؟!

-وحدة اسمها.. اسمها.. ام محمد

-يا ام محمد؟؟

-ماعرف بس اسمها ام محمد كالت

-اي غير افتهم منو منهن؟ امي تعرفها؟؟

-اي.. اظن

-خوش

كام من الكرسي يريد يطلع من الغرفة ينزل يسأل امه وكمشت بأيده خايفة صخام ولطام شلون راح اطمطمها هاي انا شجابني على هالسوالف!!

-تقي شبيك تعال وين رايح

-غير نفتهم منو ام محمد

-لا ختولي عوفها اصلاً كلتلها انا متزوجة

-صدگ كلتيلها؟؟

-اي والله

-اي وشكالت؟

-كالت لا مبين عليج ما متزوجة

-شنو السالفة هاي شمالها؟!!

-اي غير انتَ

-شني انا؟!

-ما جبتلي حلقة خاطر اللبسها

-ماعندج حلقة؟؟؟

-لا

-عليج العباس؟؟

-لا والله ماعندي

-چا اذا على الحلقة سهلة اجيبلج باجر قحط هي

-لا ما يحتاج

-شنو ما يحتاج چا غير يعرفون بيج متزوجة

-لا مو لازم عادي ماكو فرق

-شبيچ سبأ شهالحجي؟؟

-عادي تقي ماهتم اذا كالو عني ما متزوجة حتى اليوم المرة ما اهتميت من ما صدكتني

-وليش بوية؟؟!

-يعني مادري ما احس بروحي متزوجة

-سبأ لا تضوجيني شنو ما تحسين بروحج متزوجة چا انا شنو هنا؟؟

-انتَ شنو

-شنوو؟ انتِ كولي انا شنو لو مو بعينج؟؟

-لا حشاك بعيني اكيد بس يعني..

-يعني شنو؟؟

كمت اللطم بگلبي على صلافتي خايبة منين جبت هالجرأة والافكار شلوون جاي افكر هيج بعلي انا كلمتين ماعرف اسفطهن عدل شلون جاي تجي هالسوالف على عقلي، وخرت منه وابتعدت وانا اكول..

-خلص انسى لا تهتملي

-تعااي وين رايحة

جرني من زندي حيل ورجعني يوگفني گباله، كضني من زنودي ثنينهن وحط عينه بعيني وكرر..

-شنو سالفتج انتِ؟ فهميني شبيج؟؟

-انا ما قصدت اضوجك والله وادري غلطت من گتلك على المرة الخاطبتني چان لازم ما اگلك عجبتها وخطبتني لابنها

-بعدهااا تحجي بنعاالها شني گررن ولج كدامج انااا؟؟؟

-لا بس...

-سكتييي كافي بعدها تريد تسولف بابا انتِ متزووجة تعرفين شنو يعني متزوجة؟؟ واذا على الحلقة من باجر اجيبلج وحدة!!

-ماشي اهده

على وگفتنا تجرأت اكثر وحطيت ايدي على صدره امسح مكان گلبه، والعباس احس بشعر راسي جاي يرجف وياي من الخجل والخوف اخافن يدفر ايدي ويخجلني بس ما سواها.. زفر نفس ورفع ايده يفرك وجهه ويبلع بريگه ويتحسر ضايج كللش..

هاي اول مرة اشوفه هالشكل، من يوم عرفته لهذا اليوم ما شايفة تقي بهالعصبية صح هو يعصب بس مو هالشكل هالمرة عصبيته چانت مختلفة چانت.... غيرة!

فرحت وانتعشت روحي من الصار ونمت ليلتي هنية وصبحت ثاني يوم مثل كل مرة هو بجهة وانا بجهة بس ردت اتجرأ نفس امس واتقرب منه وامثل نايمة حده اريد اشوف ردة فعله.. زحفت بخفة صرت بصفه ضبط وصار راسي يم صدره كوة كضيت نفسي واعصابي وسكنت امثل النوم..

شوي وحسيت بي بده يتحرك معناها كعد بس انتبهتله ظل ساكن فترة بمكانه من شافني بصفه وجسمي طاخ بي، رفرفت روحي من حط ايده على جسمي وصار يتحسس جلدي على كيفه بدون لا يكعدني حركته خلقت بداخلي شي حلوو ماعرف افسره..

-سبأ

بلعت ريگي من همس اسمي على كيفه وظل يتلمسني بلطف، خفيت ابتسامتي من وخرني منه على كيفه كلش وكام من مكانه ورجع غطاني وراح للحمام.. فتحت عيوني ابتسامتي من الاذن للأذن وگلبي يرگص..

نزلت گبله جوه خاطر احضر الريوك علي الحـق وعبق راح يجون ووكفت ويه تَـمني وابرار نشتغل سريع سريع واسمعلهن يسولفن..

-تَـمني: لا مو حامل

-ابرار: يعني حللتي؟

-بدون لا احلل عرفت مو حامل

-ابرار: ميخالف ان شاء الله الشهر الجاي خية خلي املج بالله جبير

-تَـمني: يارب ان شاء الله

على وگفتنا واندكت الباب اجوا علي الحـق وعبق ودخلت عبق تضوي فدوة لروحها الوجه مراية والنفنوف الابيض اللابسته ياكل ويشرب منها صلوات على محمد، وره الريوك هدالها عمي ملوي ذهب وكعدوا ويانه شوي وطلعوا يرحون لبيتهم الجديد لليوم عبق ما شايفته وهاي اول روحة الها..

**

"تَـمني"

كلشي يجنن الاجواء واللمة والوجوه والفرحة وسوالف الولد وغمزاتهم لـ علي الحـق الي اوول مرة بحياتي اشوفه خجلان ووجهه يصير احمر لدرجة ترخص وطلع من البيت حتى يخلص منهم..

طلعوا وبقينا وحدنا ورجعت لنفسيتي التعبانة، مر شهر جديد اني مو حامل بي وبديت افقد الامل هاي العلاجات مدا تجيب نتيجة بس جسمي ديخدر واسمن ومزاجي يتقلب واربعة وعشرين ساعة عصبية وروحي طافرة وكوة اسيطر على روحي ويه الامير..

مرت ايامي بطيئة بعد زواج علي الحق وعبق قضيتها بين الشغل والبيت والنوم والنوم والنوم والنوم والنوم.. شوكت ميجيني امير يلكاني نايمة ويستلمني ضحك ومداهر بأحيان واحيان ثانية يتسائل عن سبب نومي المستمر ودااااائماً عباله حامل وهالشي بده يستفزني ويعصبني اكثر.. ماكدر اگله العلاج يخليني انام وبالعتها وساكتة..

-الامـير علي: شبيچ كلما احاچيج صرتي حمرة شو بساع صايرة تضوجين

-مابيه شي بس تعبانة اريد انام

-نامي وچفيني شرچ نامي

-يووووه اميييييير

-نامي ولج

تمدد بصفي وحضني حيل جعصني حتى انام، غمضت عيوني وبسرعة غفيت، فترة وحسيت على الامير كعد على حيله من اجاله اتصال ماهتميت بالبداية بس تغيرت اهتماماتي من گام من مكانه وراح يوكف بعيد عني و همس مفزوع..

-شبيها؟؟ منو وياهة؟؟ وحدها؟؟ جاي انا جاي جاي لا تطلعين من البيت جايچ انا شبيچ!

گلبي انخمش من سمعته يهمس بصوت ناصي واااضح يخاف لا يوصل صوته الي، طلع من الغرفة يمشي على كيفه كلش بدون لا يطلع طگة عكس عادته وهنا تأكدت منتظرتني مصيبة والمشكلة اني بين النايمة والكاعدة لا صوتي ديطلع ولا جسمي اكدر احركه احسه كله متقلص من الخوف وحركتي جامدة.. قويت روحي وشلت مخدتي دا اريد اشمرها على الباب حتى اجذب انتباهه وجمدت ايدي من شفت جوه مخدتي محطوط شماغ رجال صحراوي ما شايفته من قبل.....

يتبع 👑...

#الامارة

بقلمي: زهراء السلامي 💎

لتنسون التصويت + التعليق بين الفقرات + متابعة لحسابي 💙.

اثاري الدنيا عينك.. يا بعد عيني ♥️

━━━━━━ ♛ ━━━━━━

"تَـمني"

شلت الشماغ بيدي اگلب بي واشم بي ريحة رجالية بس مو من عطور الامـير علي هاي مختلفة بس ما دققت عليه وشمرته من ايدي وگع وره الميز الي يم راسي.. قويت نفسي وصرت احرك بيدي واضرب على رجلي حتى يفك الخدر منها، حسيت بروحي اكدر اكوم وطفرت من مكاني وبدون لا اللبس شال طلعت اركض من الغرفة اللحگه..

-ليلة: شبيچ تَـمني ليش تركضين؟ تَـمنيييي

جريت الشال الحاطته على چتافها وما انتظرت احجي وياهة وركضت اكمل طريقي جوه، نزلت الدرج شفت خالة رسمية كاعدة وسلوى وسبأ ديلفن جدر دولمة وشيخ محشي..

-رسمية: تَـمني جيبيلي بدربج ماي

خففت خطواتي حتى ميسألن شبيه ورحت للمطبخ وبوجهي للشباچ مديت راسي ادوره بعيوني بس ماهو.. ما لحگت راح وعافني اتلاطم بأفكاري وگلبي مشتعلة بي نار!

ضربت رجلي بالكاع ضايجة واخذت كلاص من الكاونتر وصبيت لخالة رسمية مي من البراد ورجعت اقدمه الها..

-عاشت ايدج يمة

-خالة الامير طلع مو؟

-اي طلع

-جنت نايمة وحسيت عليه يطلع يركض ما سألتي شبي خالة؟

-لا هو هذا الامير من يوم يومه يركض

-سلوى: اشتغلي عدل شمالج سبأ هذا هم لف!

-سبأ: عمة جاي اللفن بس السلگ مو زين

-سلوى: اجيتينا كلشي ماكو ما محصلة منج بس التفرفح

-رسمية: سلوى لا تظلين تدردمين ما يعجبج تشتغلين كومي محد طالب منج

-سلوى: لا ام علي اشتغل بس هاي بت مسعود فاهية وانا ماستحمل الفاهيات

ضجت عليها بس نفسيتي كلش متسمح اطبطب على احد اني محتاجة احد يريح گلبي ويفهمني شديصير ويه رجلي..

-تَـمني: خالة صدگ نسيت اگلچ الامير يريد يسافر

-رسمية: وين؟

-لبنان

-شعنده بـ لبنان؟

-مادري يكول جماعتي كلهم رايحين واني هم يعجبني اروح

-هاي شني چا وسفرة حويدر ياهو يروح وياه؟

-ماعرف خالة صاير ميتحچى امير عصبي واقل حجاية مني يكوم يعيط ويگوم الدنيا ميگعدها حتى تعبت من النقاش وياه

-رسمية: اي يمة بعد هو عصبي شنسويله من يوم يومه هيج بس انتِ هم سايسي وعلى كيفج من تسولفين وياه وعلي تره يقنع بس اجيله بأسلوب

-لا خالة مدا تفهميني

كعدت بصفها على القنفة ونصيت صوتي حتى متسمعني سلوى بس انتبهت لخالة رسمية تعضلي شفه حتى اسكت واشرت براسها على غرفتها افتهمت قصدها تريد نسولف هناك بعيد عن سلوى واهل هالبيت..

گامت قبلي واني بقيت كاعدة شوية وياهن واللوب ماريد اكوم وراهة فوراً لا يحسن بشي بس همزين من هي صاحت بنفسها..

-رسمية: ياهيي هناا خليها تجيبلي دواي من الثلاجة

-سلوى: كومي سبأ

-تَـمني: لا كعدي اني اروح

رحت للثلاجة طلعت علاجها وبسرعة دخلت لغرفتها، اشرتلي بيدها تعالي وكعدت على جربايتها ومدت رجليها ثنينهن، شميت ريحة حنة اول ما فتت للغرفة وانتبهت حاطة طاسة حنة بصف راسها..

-رسمية: رجليناتي حارة بلچن الحنة تبردهن، سولفي يمة شبيكم

-خالة الامير عصبي وما اجيت اگلچ بس عصبي لا اصلاً اوقات من احجي وياه احسه مو هو

-يعني شني

-ماعرف خالة ماعرف شلون اشرح اني سولفتلج من نساني ببغداد وطلع و...

-يمة لا تحطين ببالج خوب هو ما متعمد ينساج بس ضغط جاي يصير عليه من كل جهة حقه ما يظل عقل براسه

-وعصبيته المفرطة؟

-الامير من يومه عصبي مو جديدة عليه

-لا خالة من تعرفت عليه مچان لهدرجة عصبي ويضوج بسرعة هسة صاير على كلشي يتنرفز

ابتسمت تهز براسها انوب ضجت اكثر ليش عبالك دا احجيلها عن شي طبيعي، شفت ماكو فائدة من شكوتي الها فـ ترخصت منها وطلعت من غرفتها ورجعت فوك شفت ليلة على كعدتها بالصالة حاطة ايدها على خدها وتتصفن..

-ليلة: حياة زبالة

-تَـمني: اي والله

رجعت شالها على چتافها ودخلت لغرفتي، ملصت تلفوني الحاطته على الشحن ودكيت عليه.. يرن وميشيله يرن وماكو دگيت مرة ومرتين وثلاثة واربعة وميشيل موبايله، طگت روحي وكتبتله رسالة..

"وينك امير محتاجتك"

انتظرته يقراها بس حتى هاي ما قراهة، حطيت تلفوني بجيبي متنرفزة وطلعت اكعد يم ليلة نتصفن بالحيطان ونندب حظنا المصخم..

-ليلة: اگلج

-كولي

-هاي لو احنه فگر لو التوأم فگر

-التوأم فگر احنه شعلينا

-اي بعلي ماكو هيج تره لعبت رواحنا

-انتِ وابو لسانين مالتج بعدكم متتحاچون؟

-اي شاطر بس يمد لسانه بالمحاكم يم النسوان

-لازم شايفة عليه شي؟

شهكت عبالك تذكرت شي واندارت بكل جسمها عليَّ، تربعت على التخم وكالت وهي تشمر بيدها محترگ گلبها..

-ولج اول امس نزلت لغرفة كرار عمتي كالت نظفيها وشفت ابو لسانين نايم يمه بالكاع ولج خييية لو تعرفين اشفت يا خيية

-شفتي ولج؟؟

-ولج خيييية يااا خييييية

تضرب ظهر ايدها ببطن ايدها الثانية وتحرك بيهن وتحرك براسها بنفس الوقت بونة..

-ولج احجيي

-اجته اشعارات على موبايله وانا ما اهتميت لا تقربت ولا شفت بس شايفة من تجي اشعارات وحدة وره الثانية؟ خايبة الموضوع يقلق وواحد يظل باله

-صح اتفق وياچ والله

-اي شسويت انا كضيت موبايله حاطه يم راسه وفتحته عبني اعرف الرمز وولج لو تعرفين شلكيت

-هسة غير تلغييي

-شفت اشكااال نسوان مراسلاته على الواتس اب هاي المسميها ام احمد وذيج ام علي وهاي ام سبطين وذيج ام الحسنين

-هاي انتِ اخترعتي الاسماء لو هنه صدگ هيج؟

-اي والله شبيچ المهم هسة موضوعنا مو الاسماء موضوعنا ذني منووو

-اي والله منو؟؟

-دخلت على محادثة وحدة وحدة وارتاحيت من شفتهن موكلات مدري شيسموهن فـ جريت نفس شوي

-الحمدلله اي ولج هو محامي اكيد عنده نسوان بتلفونه

-اي خو ما اختلفنا بس ليش من طبيت على وحدة مسميها "ام رسول" لگيتها كاتبتله ابا الحسن انطينا فرصة؟؟

-هاا!

-والعباس شطت للسگف ظليت اقرا بالمحادثة وما ملحگة واكتشفت طلعت وحدة جايه لابو لسانين تريده يطلگها من زلمتها وبدت تزحف على زلمتي!

-كذاابة!

-والله شبيچ يالفاهية بالبداية جانت تدزله حجي عن قضيتها وويه كل جملة دازتله سمايل گلب احمر من گلبوا حالچ واحوالج بجاه الزهرة

-امين امين

-شوي شوي بدت تطور وتدزله القرد الخجلان هذا الضام عيونه

-هذا المسوي هيجي؟

ضميت عيوني امثل القرد من كل عقلي وهي تهز براسها بمعنى اي هذا خرب شكد شاخطات..

-ليلة: بدت تزيد وياه وتطوخ ساعة تگله حايرة ماريد اتطلگ اخافن من نظرة الناس وساعة تگله اريد اتطلگ حتى اخلص واخذ واحد يحترم المرة

-عليج الله وهو شيجاوبها؟

-كاتبلها لازم تصفين على راي خاطر نكدر نشتغل

-هاا حلو

-انوب تكتبله انتَ شنو رأيك بالمطلگة هم نظرتك الها مو حلوة لو عادي عندك

-هاي شبيها شاربة شي؟؟

-ولج فد مستفززة انوب تكتبله انتَ ترضى ترتبط بمطلگة وهو كاتبلها انا متزوج وهنا انا كلت لااااا الموضوع بده يكبر ويزيد عن حده

-وبعدين؟؟

-بعدين اعترفتله ولج والله العظيم كتبتله احبك انا واريدك واجيتك بالخصوص اريدك تطلگني من زلمتي خاطر اصير الك وحدك

-عزا بعينهااا

-واول امس كتبتله ابا الحسن انطينا فرصة ام الگمل تريد فرص

-وهو شمجاوبها؟؟

-كاتبلها ام رسول انا متزوج ووظيفتي وياچ محامي وموكل ماكو شي زايد بيناتنا واتمنى تبقى علاقتنا رسمية على گد العمل

-كفوووووو

-يا كفو وانا احترگ دميي

-ليش ولج هاي فوكما حطلها حد

-مادري تَـمني انا ضايجة ومخنوكة احس.. احس.. مادري تَـمني مادري فهميني شنو احس

-تحسين بعدم استقرار

-شلون يعني

-يعني متزوجة وما متزوجة، حامل من رجال ما بيناتكم حتى سلام وعايشة ببيته وبغرفته وهالشي ديأثر على نفسيتج ويتعبج

-اي والله

-ليلة ليش متحاولون تفتحون صفحة جديدة مو كافي هالبُعد؟ ليش كل هالعناد

-انا مالي غرض والله حتى ما محاچيته ولا اعاين لوجهه

-وهنا المشكلة مدا تحجين وياه ولا تباوعيله ولا تكعدين وياه على سفرة وحدة، ابا الحسن يحبج ولج لو تعرفين شكد يشكي يم الامير عن حاله كل يوم بالليل لازم يصعدون فوك للسطح يسوون نراكيل ويكعدون وابا الحسن يشكيله معاناته

-وانا حسبالي يصعدون يتابعون مباريات

-اني هم هيج عبالي وامير هيج مفهمني بس قبل كم يوم صعدت ردت منه شي وبالصدفة سمعت ابا الحسن ديسولف والشاشة مطفية اصلاً

-ماعرف بعد

-لازم تعرفين عود فد يوم انتِ صعدي بنفسج وتأكدي منهم شوفي شلون يحجي بيج وگلبه محترگ

سكتت تتنهد وحطت ايدها على بطنها البدت تبين، افتهم حيرتها واعرف بشنو دتحس والله يعينها هي وياه.. من باب هو ميكدر يرجع يمها لان كرامته دتنجرح وتعب من هالشي وهي مدا تكدر ترجعه الها لان بأختصار هي ليلة!

رجعت لغرفتي وتلفوني بيدي كاعدة على نار انتظر الامير يرجع يتصل، مشى نص النهار وهو ماله اثر وبديت اعصب انطفت غيرتي وصار بمكانها العصبية الشيطانية لو اشوفه هسة كدامي يمكن اهجم عليه واطلع كل حرگتي بس تغيرت مخططاتي وكلشي اريد اسوي من انفتحت الباب ودخل للغرفة وجهه معصب وروحه طافرة..

-تَـمني: زين من رجعت والله

اللتفت عليَّ ثواني ولانت ملامحه واشرلي براسه بمعنى "شنو"، چتفت ايدي وكمت من الجرباية ورحت اوكف كدامه رفعت راسي احط عيني بعينه وكلت بأبرد نبرة اكدر أمثلها هسة..

-وين جنت امير؟

-طالع

-صدگ والله؟

-شبيج تَـمني

-وين جنت طالع؟

-بالمستشفى

-خير ان شاء الله شتسوي هناك؟

ضحك على اسلوبي ولزمني من متوني يقربني عليه صرت اطخ بي، نزل نفسه لمستواية وقلد نبرتي بالكلام يكول..

-ام صاحبي تخربطت ووديتها للمستشفى

-هااا وصاحبك وين ليش مو هو اخذ امه؟؟

-مو هنا

-لعد ليش من اتصل بيك متجاوب؟؟

-مادري والله ما انتبهت لموبايلي وحاطه صامت

-ابددد ما انتبهتله موو؟؟؟

-تَـمني...

-بس تنتبهله من هي تدگ عليك موو!!

-شنو

-انتَ كلت جايچ للبيت لا تطلعين من البيت منو هاااي متريدها تطلع من البيت ورحتلهاا؟؟؟

-حلو ست تَـمني صايرة تتسمعين عليّ

-اي اتسمع!!

-شبيچ ابوي ليش ترجفين

-لا تسويلي ابوي وامي وجاوبنيي امييير منو هااي رحت لبيتهااا

-اذني ماعت وعلي

-هدني وخرر هدني وجاوب هددني

-خايبة خابرتني حفيدتها شبيچ حفيدتها صغيرة عمرها 14 سنة

-كذاااااب

-والزهرة ام الحسن بيمن احلفلج بعد وتصدكين الخابرتني بت صغيرة!

-ههههههه ومن دووون الناس خابروك الك مو؟؟

-اي تَـمني عبني اقرب واحد لصاحبي ومن يحتاجون شي يتصلون بيه

-وانتَ مـ...

سد حلگي بأيده يسكتني ولافني بأيده الثانية يحضن جسمي، دگ گصتي بگصته وگال بصوت هادئ عكس عصبيتي..

-وداعة عيونج ما مچذب عليج تَـمني الوادم ماعدهم زلمة بالبيت وانا متعود اساعدهم من زمان ومن تخربطت ام فاضل بساع اتصلوا بيه اول واحد

دفرت ايده مني ارجف رجيف جسمي مدا اسيطر على رعشته وخرت منه وظليت افتر بالغرفة والافكار تروح وتجي على بالي ومن كد الافكار الاجت بعقلي گلبي صارت بي نغزات قوية عجزت حتى اشكيله ظليت بس افتح حلكي واسده..

-تَـمني شبيچ؟؟ شنو شبييچ؟؟

-گلبي.. گلـ...

لزمت كلبي ووكعت على ركباتي وجع صار بين صدري وبطني تجيني كرفات قوية تذبح، ركض امير كعد بصفي ولزم ايدي يحاچيني بس روحي تريد تطلع من الكرفات والخفقان..

-ولج حاچينيي شبييج

كام بسرعة طلعلي شال وصاية من الكنتور لبسني وشالني بين ايده ونزلني الدرج يركض، هدأت هواايه هدأت والالم اختفى حتى كلبي نبضاته صارت تمام بس بقيت مسنحة بين ايده واسمع لخالة رسمية والبنات مخبوصات ويسألنه شبيه وهو عبرهن وطلع بيه لسيارته..

-نزلني

-هسة هسة نروح للمستشفى هسة

-لا.. نزلني صرت زينة

ما اهتملي وفتح السيارة وكعدني بكرسي الصدر وهو راح لكرسي السايق، شغل السيارة بسرعة وطلع بينا للمستشفى وكل شوية يلتفت عليَّ يباوعلي شلون صرت بس وضعي ممتاز وما اشكي من أي شي هيج فجأة تأذيت بس هسة مابيه شي..

-شلون صرتي؟

-زينة

-اكيد؟؟

-اي رجعني للبيت

-لا نروح للمستشفى حتى نتطمن

-ماريد رجعني

-سكتي اشش

-لا تأشأشني ورجعني للبيت

-ولج مو انتِ مريضة!

-من وراااك!! مرضت من وراك انتَ السبب انتَ!!

-انا؟؟ ليش شسويت؟؟

-شكووو تروحلها للبيتتت منوو هاااي الرحتلهااا احجيييي

-ولج ام صاحـ...

-لااا تعيدلي هالاسطوانة امييير لا تعيدهاا كول منو هاااي!؟؟ مرتك الثانية مووو؟؟؟ رحت لبت شيخ محممددد؟؟؟

-ولج يا بتتت استغفر الله جاي اكلج ام صاحبيي اسمها ام فاضل الحرمة عدها قلب وكل فترة تطيح عليهم ومن صاحبي ما موجود تتصل حفيدتها بيه خاطر انا اوديها!!

-كذاب كذاب كذاب كذاب كذاب ما اصدگك ماا اصدگ

-استغفرالله ربي واتوب اليه استغفررر الله

-هااا انوب تستغفر مو؟؟ تمام امير تمام طلگني وظل استغفر للصبح

-تَـمني!!

-طلگنيييي

-انچبيي واستچني شمالج تسودنتي عليَّ!

-وتغلط عليَّ هم؟؟ اليوم الا تطلگني طلگني ماريدك طلللگ

بقى يسوق ممهتملي خبلني بالزايد خلاني اشوط اشيل روحي وارگعها بالسيارة، لزمته من ايده اوگفه ونتر ايده مني ممهتم شعل بيه الف نار وگبب بصدري الف بركان..

-ولج راح نسوي حادث لا تكضينيي

-اخذني لبيت خالتي لعدد

-ولج تَـمنييي

-تاخذني لو افتح الجامة وافضحك واخزيك؟؟؟؟

-گعدي راحة تَـمنييي لا تتسودينين يا حبيبتي

-اني مو حبيبتك بتت شيخ محمددد حبيبتك موو انيي

-انتِ شبيچ هرموناتج گابة؟؟ خاف حامل نوومه؟

-موو حااامل كااافي كااافي كلما سويت شيي كتلي حاامل كاافي لعبت نفسييي اني مو حاامل العلاجات مداا تسويلي شيييي مليييييت

-يا علاجات؟

-انتَ معليك رجعني للبيت امير رجعني

-تَـمني يا علاجات شنو ذني؟

ذبيت روحي على الكشن تعبانة وروحي طالعة، نار بكل مكان من جسمي احس فحمت وتعبت من التخيل اريد بس ارجع للبيت وانام..

ارتاحيت شوية من شفته يدور بفلكة ويرجعني لطريق البيت، تنهدت امسح على وجهي ودموعي التنزل ودرت وجهي للجامة اللوم بروحي شلون فلتتها وگتله على العلاج الله يستر شنو ضاملي وشنو راح يسوي من نرجع..

سفط بباب بيتنا وبسرعة نزلت من السيارة وركضت للبيت همزين ماكو احد بالصالة وقت مغربية كلهم بالغرف، صعدت بوجهي لغرفتنا وفتت للحمام، نزعت الصاية والشال ووكفت اغسل وجهي واللطم على الصامت جنت بشي ودخلت بشي ثاني من غبائي شجاني ماسيطرت على نفسي شجااني..

توضيت وبقيت بالحمام فترة مترددة اطلع، مشى الوقت وبديت اموع من حرارة الحمام فـ قررت اطلع وشيصير خلي يصير، فتحت الباب على كيفي ومديت راسي شفته واكف على السجادة ديصلي ويجهر بصوته الخشن.. استغليت الفرصة وطلعت بسرعة فرشت سجادتي وراه ووكفت اصلي..

-الامـير علي: الله اكبر الله اكبر الله اكبر.. اللهم صل على محمد وعلى آل محمد كما صليت على إبراهيم وعلى آل إبراهيم في العالمين إنك حميد مجيد وبارك على محمد وعلى آل محمد كما باركت على إبراهيم وآل ابراهم انك حميد مجيد

بلعت ريگي متوترة خلص صلاته يمة شلون هسة اكدر اشرد، سلمت بسرعة وجريت السبحة اسبح وهو هم بده يسبح تسبيح الزهراء، كمل و كام يلم بالسجادة مالته واحس بعيونه عليَّ ما انشلعن..

-الامـير علي: تقبل الله ست

-الله اكبر الله اكبر الله اكبر الله اكبر الله اكبر...

-الله اكبر على كل ظالم ومنافق

-الحمدلله الحمد الله الحمد لله الحمد لله الحمد لله...

-الحمدلله والشكر على نعمة العقل

-سبحان الله سبحان الله سبحان الله سبحان الله سبحان الله..

-سبحان الله على سوادينچ الطلعت علينا

-هاااا سواديني؟ عود عبالك اغلس على سوالفك امير مو؟؟ والله ولا اغلسس واذا مجاوبتني واثبتتلي منو هالمرة تطلگني اي بعد كتلك اني تطلگني ودقيقة وحددة ما ابقى يمك لا تظل تتوسل بعدين وتكول ليش عفتيني تره اني دا انطيك فرصة تعترف تره باجر عكبة هالفرصة متتكرر فـ استغلها لان بعدين رأساً اتطلگ و..

-انا الاطلگچ اذا هسة ما اعترفتي وگلتي شنو هالعلاج الجاي تاخذينه؟!

-هاا؟

-شنو هالعلاج تَـمني؟ شمصخمة من وراي؟؟

-اوكف اوكف كلت راح اطلگج اذا متعترفين يا علاج تاخذين؟ عود انتَ دتهددني لو شنو؟؟ تره اني اريد اتطـ...

-شنو من علااااج ماخذة تَـمني!!!!

عاطها بعصبية حقيقية مية بالمية مابيها ولا ذرة تمثيل ولا سبيل للنقاش لان احس هسة اذا كذبت عليه لو تفهيت راح انلطش براشدي يلزگني بالگاع..

-امير

-احچييي بلا مماطلة احچييي

-امير والله اني.. اني معليه.. لا لا شلون اني معليه اقصد عليه بس بس والله اني.. اوكف هاي شبيك اوكفف

عطت مخترعة من كام على حيله ووكف فوك راسي، ضميت راسي بين ايدي ونزلت عيوني اخاف ارفعهن لا يضربني شكد عندي ثقة بي بس من يعصب ماكدر امثل الهدوء وابقى حاطة عيني بعينه..

-تَـمني اذا....

-دا اخذ علاج حتى اصير حاامل

كلتها وراسي بين ايدي ضامته وارجف، بعد جملتي السريعة صار هدوء بالغرفة لا حس ولا نفس اجه منه دا اشوف رجليه واكف يمي ضبط بس ما صدرت منه أي حركة، رفعت عيوني شوية شوية وجفلت من شفته مخنزر عليَّ وخشمه مجنح بعصبية..

-امير

-علاج مال شنو؟؟!

گالها ولزمني من زندي يرفعني يخليني اوكف گباله، بقيت منزلة عيوني ماعندي الجرأة اباوعله بس خلاني ارفعهن غصب، لزمني من فچي وخلى عيني بعينه الخابط لونهن..

-جاوبي!

-مال.. مال حمل

-من يمته تاخذين هيج علاجات؟؟

-صار هواي

-منو كتبهم الج؟

-طبيبة نسائية

-وانتِ وين لاگية طبيبة نسائية؟

-دا اراجع يمها

-هاي شوكت؟؟

-كتلك امير.. صارلي.. صار فترة طويلة

همستها ونزلت دموعي مهضومة، رفعت ايدي امسحهن بسرعة ورجعن نزلن، وخرت عيونه منه وكملت بحس يرجف كوة طلع مني..

-دا اراجع علمود احمل، شتحجي عليَّ احجي وشتريد تسوي سوي بس تذكر مو انتَ الدتتحمل الكلام المسموم من النسوان! ولا يومية لازمتك وحدة تسأل ما شالت بطنج لو ماكو شي بالطريق! ولا انتَ الدتتحمل حجي النسوان الينخر بالگلب وهنه يقنعن امك حتى تزوجك الثانية لان اني بنظرهن عاقر!

فلتت زندي من ايده وابتعدت عنه اوكف يم الميز منطيته ظهري حتى ابجي وينمرد گلبي براحتي، امسح بدموعي وما اللحك عليهن ينزلن جدد واكثر من اول مرة تعبت منهن واستسلمت اخليهن على خدودي بلكي يغسلن گلبي بطريقهن..

-انتَ متحس.. متحسون انتو كلكم متحسون

-لا تبجين امنية

انهاريت بجي من حسيت بي صار ورايه وجرني لصدره يحضنني، حطيت راسي على صدره ابجي بگلب محروگ وبصوت عالي ابجي على كل مرة حللت بيها وما طلعت حامل وعلى كل لحظة تأملت بيها وعلى كل مرة سمعوني حجي مو حلو..

-لا تزعل مني امير والله العظيم ما قصدت اخبي عليك واروح وره ظهرك بس ماردتك تشيل همي وتضوج، الله يخليك افهم معاناتي ولا تصير انتَ والزمان عليَّ

-اششش خلص تَـمني اهدي

-اريد اصير حامل امير اريد اصير ام.. اريدك تصير اب حالك من حال اخوتك

-ان شاء الله يا عيوني انتِ ليش مستعجلة على رزق ربچ خلي شوكت ما يصير يصير لا تأذين رويحتج هيج مو زين

وخرت راسي من صدره ورفعته لوجهه، ملامحه العصبية تغيرت وانرسمت ملامح الزعل على وجهه مسح دموعي بأبهامه واردف بهدوء..

-وانا اكول شبيچ صايرة طگة ونص اثاري العلاج جاي يأثر على نفسيتج بوية عوفي خيولي مانريده

-لا لا الدكتورة كالت راح احمل اذا ابقى ملتزمة بالعلاج لازم اتحمل ميخالف

-لا تَـمني

-حباب امييير

-گلت لا! وسالفة ترحين للطبيبة من وره ظهري راح تتحاسبين عليها

-لعد انتَ هم تتحاسب على روحتك لبيت ذيج النعالة!!

-تَـمني!!

-امييير!!

-تَـمني عقلي لا تصيرين جاهلة عقلييي

-رجلي امير وتريدني اعقل؟؟ عيني احنه تعلمنا الخبالات منك!

-ولج بت الـ....

فلتت نفسي منه وطلعت من الغرفة اشرد بره وركض دخلت لاول غرفة طلعت بوجهي، غرفة سبأ وعلي التقي وانصدمت.....

**

-علي التـقي: تَـمني!!

-تَـمني: اء.. اءء ها.. هلو.. شلونكم

-سبأ: دخيلك يا علي

گلتها وجريت منشفة وركضت على تقي وحضنته هو والمنشفة اغطي وتَـمني بنفس اللحظة طلعت من الغرفة، ذبيت نفس مرتاحة من سمعت طبگة الباب بس جفلت من انتبهت لحركتي عزه بعيني انا مچتفة الزلمة وحاضنته مثل المسودنة..

بلعت ريگي مكزبر جلدي من حسيت بأنفاسه الحارة صارت تضرب گصتي، فلتت ايدي منه بساع ووخرت اوكف على جهة منطيته ظهري اتنفس سريع وافرك بيدي منحرجة من تصرفي..

-علي التـقي: ههههه والله فشلة زين من جبتيلي شي وسترتيني

غمضت عيوني مرتاحة لانه ما فشلني، اللتفتت عليه مبتسمة وهزيت راسي اي وخر المنشفة من صدره وكال بغمزة..

-شون سرعة اجتني تركض مثل مصاصين الدماء

-هههههه متأثر بالفلم الجاي تتابعه

-اي والله

ضحك واخذ تراك وراح يوكف على جهة يلبس، فركت صدري بيدي اتذكر الموقف الصار من شوي مادري شبيه فورة صارت بگلبي من شفتها بالغرفة وتقي نازع قميصه ولاف بس منشفة على خصره حيلي انهد وايدي ورجلي ظلن يرجفن ردت بس اغطي واضمه..

-شنو شبيچ وجهج اصفر

-مابيه

رحت تمددت على الجرباية وغطيت روحي، ماردت افضح نفسي كدامه ويعرف شكد غرت عليه صايرة ما اسيطر على انفعالاتي وحركاتي مستخفة وما حابة نفسي ما جنت هيج جنت استحي احط عيني بعينه شمالني هسة اتلزگ بي..

-شبيچ مريضة؟

-لا

-چا ليش تنامين هيج وكت

-نعسانة، طفي الضوه من تطلع

انطيته ظهري وانتظرته بينما كمل تبديل وطفى الضوه وطلع، زفرت نفس وانتبهت لروحي متغطية، كشفت نفسي وضربت راسي هي الدنيا تفور من الحر ووطنية ماكو وانا مغطاية شني هالخبال لو عشگچ لهالزلمة خبلج وصرتي ما تحسين بشي من يكون وياچ..

نص ساعة مرت واندكت باب غرفتي سمحتلهم يدخلون ومدت راسها تَـمني، ضحكت من شفت وجهها مبرطمة شفايفها ومايلة براسها عرفتها اجت تعتذر على الصار..

-تَـمني: والله ماعرف شبيه سبأ انتِ بعد لازم تعذريني لان كتلج من اكون ويه الامير اصير مطي

-عاذرتج خية لا تهتمين

-ولج فشلة دخلت عليكم لا احم ولا دستور هسة شيكول عليَّ الرجال

-لا عادي اصلاً ضحك

-اممم.. احم.. يعني دا اكول هيج لان خفت تكونون احم.. شسمه يعني.. اي يعني

-لاااا، لا يروح بالج بعيد والله جان يسبح وهستوه طالع من الحمام

-اهااااااا

ضربت وجهي بيدي وهي ماتت ضحك، ركضت بخطوات سريعة وطفرت على الجرباية وكالت بضحكة..

-تخيلي قبل شوية تعاركنا اني والامير عركة رادت تصير كتل ومكاتل بس ماعرف شلون انحلت وبردنا هيج فجأة

-يا ستار شو ما مبين عليج جنتي تتعاركين جايتني تضحكين

-يووه سبأ شبيكم انتو ليش سلبيين يعني تعاركنا وتصالحنا ليش تردوني ابقى مبوزة اوي

-الله يچفيكم شر التايهات

-شنو ليش هيج گلتي

-شمعرفني جاي ادعيلكم هسة شبيچ

-هاا امين لعد

-اگلج اذا ما نزلت اسوي عشا وياچن عادي مو؟

-اي عادي بس ليش متنزلين شبيچ مريضة؟

-لا بس مالي واهس

-دگومي نتعشا كومي

-لا ماريد بالعافية عليكم انا اريد انامن

لفيت راسي ونمت بمچاني وهي ما ضغطت عليَّ وكامت تطلع من الغرفة، ظليت اللوب بفراشي ما جايني نوم وظليت اللوب لحدما رجع تقي للغرفة بسرعة سويت روحي نايمة..

-سبأ

صاحلي وما جاوبت رجع صاحني بصوت اعلى وغلست، حسيت بي يجي بصفي يكعد ومد ايده على گصتي يشوف حرارتي وصار يمشيها على كل وجهي، گلبي صار ينبض بجنون من نزل يتلمس رگبتي ويهمس..

-مصخنة مادري من الحر صايرة تچوين

رمشت بالغلط وانا مغمضة وبساع فتحت عيوني ماردت ابين چذابة، نزيت من انتبهتله كاعد بوجهي ضبط وهو هم ابتسم على وضعنا وكال بصوت ناصي كلش..

-گعدتج

هزيت راسي اي وبقيت اعاين لوجهه، وخر ايده عني وكام يكعد عدل بصفي..

-نزلي اكليلچ لگمة حتى تصيرين احسن

-ماشتهي

-هيج خفايف اكلي بس حتى تاخذين علاج انتِ مصخنة

-لا مابيه شي هسة اسبح

ما انطيته مجال يسولف وكمت اخذت هدوم ومنشفة وطبيت للحمام اسبح، طولت شوي جوه الماي افكر شلون لازم اتصرف وياه خوما نبقى العمر كله يوم يتقرب مني ويسولف وشهرين يرجع بعيد مليت من هالوضعية..

كملت حمامي وبدلت هنا ووكفت امشط متعودة ما اسوي شي بالغرفة احس استحي منه بس هالمرة قررت اطلع اتعطر وامشط وكلشي علموني عليه شمس وتَـمني راح اطبقه بره..

لفيت شعري بالخاولي بدون لا امشط وطلعت وطلع وياي بخار الماي الدنيا هلاك من الحر بس ماعرف اغسل الا ماي يسمط، لبست نعال لونه وردي وبي گلوب حلو جابته الي حبيبة ومادري ليش من اللبسه احس روحي حلوة هههه..

كعدت على الكرسي كبال الميز وفتحت شعري من الخاولي وكضيته امشط بي، راحت عيني عليه من المراية اشوف شنو جاي يسوي وانتبهتله عينه بالموبايل كاعد يتصفح..

عفت شعري مفتوح وشلت شيشة العطر اتعطر وراهة المرطب احطه على ايدي ووراهة المسك على عروگ ايدي ورجعت رفعت عيني للمراية وانتبهتله جاي يباوعلي.. تخربطت حركتي متوترة وهو هم ما ظل يعاين ورجع لموبايله..

هدأت نفسي ورجعت اكمل الخطوات الي غيرن مني وكل اليشوفني صار يلاحظ فرق حلو، تجرأت ورفعت دشداشتي شوي ونزلت ارطب رجليناتي صعدواً للسيقان اشتغل وگلبي يدگ خايفة لا يفهمني غلط ويكول عني خفيفة.. خلصت بسرعة وحطيت حمرة سحرية خفيفة وشوية كحل ومسكارا وكمت خاطر اشر المناشف..

-نتابع فلم؟

استمريت منطيته ظهري وغمضت عيوني اتنهد طايرة فرح هاي اول مرة يعرض عليّ نتابع فلم سوه خصوصاً وهو يعرف انا ما اتابع وما احب.. سويت نفسي طبيعية واللتفتت عليه وكلت..

-لا مالي واهس

-هاا.. زين تاكلين شي لو بعدج ما تشتهين؟

-ما اشتهي

-بعدج مصخنة؟ تعاي اشوف

كام على حيله وتقدم يجيني، ولا چن رجليناته تدوس بالكاع وعلي چن يدوس بگلبي.. وكف كبالي ومد ايده على گصتي وخدودي ورگبتي وگال..

-لا الحمدلله فاكة الصخونة

-اي

-صدگ تذكرت شفتي الحلقة الجبتها لو بعدج؟

-يا حلقة؟

-هاي حاطها هنا معقولة ما شفتيها؟

راح للميز تواليت حاطها بالحاشية شال العلبة وجابها الي، سويت نفسي ما شفتها ولا ادري بوجودها ومثلت چن ما انتبهت عليها ولا عبالك من امس كل ساع اطب واطلع افتحها اهلهل بگلبي وارجعها بمچانها..

-هاج شوفيها يارب تعجبج وتجي على قياس اصبعج

ظليت اعاينلها بدون لا اطلعها من العلبة، دور عيونه بيني وبين الحلقة مستغرب ليش ما جاي اخذها فـ هو كض ايدي اليمين وطلع الحلقة وحطها بأصبعي..

-اييي الحمدلله اجت فيت

-هسة صرت بحسبة المخطوبة عاشت ايدك

-ليش مخطوبة؟؟

-چا المتزوجة تلبسها باليسرة

-هاا صدك؟ يلا جيبي

طلعها بساع وحطها بأيدي اليسره يأصبعي البنصر، ابتسمت فرحانة من شفتها بيدي ذهب وتلهث جديدة تخبل ومبينه همات مو ذني الطگطوگات لانها سميكة..

-وهسة صرتي متزوجة

-ههههه اي

-عجبتج؟

-حلوة شكراً

-اذا ما عجبتج نغيرها مو مشكلة

-لا زينة

-عايني اذا ضيگة نجيب اكبر لا تستحين

-لا حلوة تمشي وضع، عاشت ايدك

عفته واكف ورجعت للجرباية تمددت وغطيت نفسي، اندارلي وبقى بمچانه يعاين عليّ بدون لا يتقرب..

-بعدج مالج خلگ؟

-لا صرت زينة ليش؟

-مادري شو.. مادري متغيرة

-شون

-احس مالج واهس مثل گبل

-اي الانسان هم عنده طاقة

گلتها وحطيت راسي على المخدة بس شو الزلمة ظل صافن لا تحرك ولا حچى شي بعد، اجه على الجرباية بصفي وحط راسه ونام وهنا عرفت راح يرجع يبتعد وخلص شهر العسل او خليني اكول يوم العسل النعيشه كل شهرين..

ثاني يوم كعدت الصبح ومثل العادة انزل گبله خاطر اسوي الريوك ويه البنات وشفت شمس وتَـمني وعبق جايه يمنا بدون زلمتها، سلمنا عليها وكالت بس يتريكون ويطلعون لبغداد خاطر يزورون امها لان بعدها بدار الرعاية..

-تَـمني: همزين اجيتي عروستنا والله فد مشتاقيلج

-عبق: اني هم والله ودا استاحش وحدي بالبيت مالي واهس اسوي أي شي

-ابرار: چا ليش وحدج وينه علي الحـق؟

-عبق: موجود بس هو هم ديضوج لان متعود على اهله واخوته ولمتهم

-تَـمني: بس عليج الله مو ابردلج راس من طلعتوا من البيت؟

-عبق: ايي والله كلما اكعد من النوم على هدوء واطلع من الغرفة وما اشوف سلاوي بلاوي بوجهي اكول اييييه الحمدلله والشكر ربي

ضحكنا مأيديها وويه ضحكتنا اجتنا سلوى تعربد تريدنا نشتغل اسرع عبن عمي علي عنده روحة للنجف، نزلت ليلة من فوك تتثاوب وتمغط بجسمها وطبت للمطبخ سلوى شافتها تسوي هالشكل لو الدنيا احتركت علينا..

-سلوى: ام الفتووگ وينج ولج لحد هالساعة نووم ما خستي؟؟

-ليلة: لا الحمدلله ما انعديت من خيستچ

-سلوى: انچبي لللج بت العاار

-ليلة: ولي وليي مالي خلگج

-سلوى: اي حگچ بعد عايفچ زلمتچ وگاضيها الله يعلم وين

-ليلة: اهووو بنات طلعوها من وجهي هاي لا اللزمها افطسها تفطسس

-ابرار: عمة ليش حاركة دمج شبيچ

-سلوى: من ورااجن انا اعلمجن لوما انعل شرفجن واشكيچن يم زلامچنن ما يطلع اسمي سلوى

-شمس بهمس: دولي شكد مكروهة

طلعت سلوى واحنه وكفنا نسوي الريوك ما مهتمات الها صرت اقتنع واأيد حجاية تَـمني من تكول عنها مريضة نفسياً وتجي تطلع عقدها علينا لان عمي علي هاملها ويروحلها بس من يحتاجها..

-علي الدر: يا الله.. يا الله ابراار وينج ابرار البت تصرخ من البجي وينج يا بوية

-ابرار: جاية جاية

ركضت تطلع من المطبخ تروح لبنيتها واجت شمس بدالها خطية هم جاي تتعب مع العلم حملها مو غثيث حلو حتى وحام ما صار عدها..

-سبأ: الباب يندگ بنات

-شمس: هسة اصيح علي البدر

راحت هي وبقينا احنه نشتغل ونخف بأيدينا يجوز اجو خطار ولازم هم نسويلهم ريوگ هم ياله نلحگ.. سمعتهم من فتحوا الباب ووصلتنا اصوات زلم جايه من بره ما اهتميت وطگيت البيضة بالطاسة واللتفتت بسرعة اعاين لشباچ المطبخ من سمعت اصوات مألوفة چن اعرفها، حطيت من ايدي ونشفتها بالدشداشة وركضت اعاين من الشباچ وشفتهم ابوي واخوتي!

-تَـمني: ذولة اهلج؟؟

-سبأ: اي.. الله يستر منهم

عفتها وركضت للصالة ومديت اذني على باب الاستقبال بلكت اكدر اسمع منا، اجن خالة رسمية وسلوى وليلة والباقيات كلهن يتسمعن وياي والغريب بالموضوع ابوي چان كلش هادئ وصوته مو عالي مثل العادة..

-شيخ علي: هلا بيكم

-مسعود: شيخ علي انا اعرف احنه مو على صلح واعرفك ما متحمل تشوفن چهرتي بس بعمره الاظفر ما يطلع من اللحم

-شيخ علي: تفضل ابو سلطان شصاير وياك؟

-خوية انتَ گتلي بس يرجعلك غفار اريدن راسه وانا جبتلك غفار بنفسي واحطه جوه رجليك خاطر يستسمحك وشتريد تسوي بي سوي هو عبد الك.. روح لعمك ولك گمممم

صارت بلبلة بيناتهم چن غفار ما راضي وابوي اعتلى صوته لحدما هدأوا كلهم من سمعت صوت غفار يعتذر من عمي ويطلب منه السماح ويقدمله رگبته خاطر يسوي بي اليعجبه..

-رسمية: منهم من الشيطان شمالهم ذولة ياهو صايح براسهم؟

-سلوى: خلينا نسمع الله يستر منهم

-شيخ علي: عاين غفار انتَ ابن اخوي وبحسبة الويلاد بس السويته ببنيتي ما ينسكت عنه ولو جنت ابني هم اطرك نصين وعليي!

-غفار: عمي اعذرني.. والله ما چنت بوعيي

-شيخ علي: مكيف تعترف بلسانك جنت شارب؟؟

گبت بلبلة جديدة وصوت غفار اعتلى وتغيرت نبرته چنه مهضوم وخانگته غصة، ما نكدر نشوف واحنه هنا بس نسمع ووصللنا شون غفار طاح على رجلين عمي يطلب منه السماح وعمي لان گلبه عليه ووگفه يحجي وياه والولد ما رضوا على تصرف ابوهم ورادوا همه يتدخلون ويكتلوه بس عمي علي ما قبل..

-شيخ علي: اسامحك واعديها بشرط ما اشوفن وجهك يا غفار طول ما انا عايش!! انا وبنيتي نروح يميين انتَ تروح يسار واذا حسيت بيك لو شكيت ناويلك على نية ويانه وروح ابوي ما اعديها وبيددي اكسر رجليك واحملهن على چتافك!!

-مسعود: لا شيخ علي هذا هو خوية اعتبره اندفن لا اله شغل بيكم ولا يوصل يمكم

-عاصف: ما دام انحلت والحمدلله عمي نريد نشوف بنيتنا گلبنا يرف عليها

بلعت ريگي متوترة من طلبهم اعرفهم ما يردون يشوفوني لانهم مشتاقين وما غلطت لانهم صدگ ما مشتاقيلي ولا راف گلبهم عليَّ، اول ما طبيت للاستقبال واختلينا وحدنا اجاني ابوي بنفسه وأمر اتمم سالفة شيخ علي اليوم واجيبلهم السندات بأقرب فرصة..

-مسعود: هواااي صبرنا عليج وكل يوم يمر اكول يجوز اليوم تتممها ويعبر هاليوم وانتِ ماكو!

-سبأ: بوية عبن الابرة مو يمي طاحت وانكسرت وجنت منتظرة واحد منكم يجي يجيبلي بديل

-مسعود: يا ثولة وليش ما حچيتي خاطر نجيب ويانه؟؟

-سبأ: مو مشكلة بوية اليوم دز واحد من الولد يجيبها الي نفس ذيج المرة يطفرلي من وره البيت

هز راسه مقتنع وخلوا وطلعوا وطلعت روحي وياهم، كوة سيطرت على نفسي اگللهم الحجي الي لقنه الي علي التـقي بالحرف وبدون لا ازيد او انقص شي خاطر تمشي خطته عدل..

لليل انا كاعدة على نار صارت الفجرية وبلغت علي التـقي وظل بالغرفة ينتظرني خاطر اجيب الابرة من زيد واصعد، سويت نفس گبل فترة نزلت بسكات وانتبهت هالمرة ما جايني زيد اجاني اخوي سالم، اخوي الينگط سم من خباثته وبس شوفة وجهه تخمش الگلب ما اهتميت اخذت الابرة منه وصعدت بنفس الهدوء..

-علي التـقي: بشري؟؟

-جبتها

-وما شك بشي؟؟

-مو زيد جابها اجه سالم

-سالم شجابه؟ هو مو مسافر؟

-اي بس مادري يمته اجه

-وما شك بشي مو؟

-لا ابد

-ولج كفووو

فزيت من جرني من راسي وباسني على خدي قريب شفتي، فكيت عيوني مصدومة من حركته وظليت بس اتصفن مثل المخبلة..

-بالعباس ما ننسالچياهة يا شريفة!

-احم.. بس عاين جابلي ابرة تختلف عن ذيج

-انطيني اشوفها

اخذها من ايدي وظل يكلب بيها دگ اسمها على النت يدورها وفك عيونه مصدوم، سألته شبيك وشنو الموضوع وما رضى يجاوبني ما جنت اعرف سالم جابلي ابرة خاطر تكتل عمي علي بمچانه ومستحيل يعيش وراهة وماعرفت هالشي الا من سمعت تقي يحاجي الامـير علي ثاني يوم..

-الامـير علي: سالم! سالم شجابه تقي هو مو مسافر؟!

-اي علساس

-اوكف.. اوكف انتَ گلت ذيج المرة زيد جابلك ابرة تخدر يعني يجوز عن طريق زيد جاي تجي حبوب الهلوسة التخربط حال تَـمني؟

-امير عاين انا گبل فترة من عرفت هم ربطت الموضوع بس ما كتلك خاطر لا تتهور.. اريد اعرف اذا فعلاً زيد اله ايد بهالسالفة منو من اهل هالبيت متعاون وياه وجاي ينطي الحبوب لـ تَـمني

-علي التـقي واحنه نظل حاطين ايدنا على خدنا نتصفن؟؟ خوب نكضه ونطيح حظه خاطر يعترف!!

-ما يعترف امير اعرف ولد مسعود شنو وانا دواهم بس انطيني مجال

-تقييي ماريد هالشي يمر مرور الكرام اريد انعل والديهم اناا گلبي بعده ناار من وره سيف العار لا تخلينا نعديها لـ زيد!

-افااا وانا اخو الامير على گص رگبتي نعديها وما ناخذ بحگ مريتك!

رجعلي علي التـقي وفهمني شنو لازم اكول وشلون اتصرف، خفت كللش خفت ما يصدكوني اهلي واخوتي بس كلت اتوكل على الله واثق بعلي التقي كون يارب بجاه الحسين تنحل هالسالفة وما تتعقد زايد وتفض بدون لا يتأذه احد..

-علي التـقي: اسبوع الجاي اخذج لاهلج خاطر ما يحسون بشي خوش؟

-سبأ: اي هذا هو

-سبأ معتمد عليج انا لا تخيبين ظني وتطعنيني بظهري

-مستحيل يجي يوم واسويها ارتاح ولا تشيل هم

هز راسه بـ اي وعافني وطلع من البيت يكمل شغله.. ثاني يوم اجتنا حبيبة وباتت خمس ايام متتالية وسلوى تروح وتجي تلوب وتاكل بروحها بس ما جاي نفهم ليش اظن بس عبق تعرف لانها هادئة وما تتسائل عن السبب..

-سلوى: حبيبة لا تشوطينيي سكتي ماريد اسمع حسچ سكتيي

-حبيبة: ماشي اروح احاچي ابوي

-سلوى: حبيبببة تردين تموتين ابوووج؟؟ تردين تنزلين راسه بين النااس؟؟

جاي تريد تجاوبها وسكتت مهبوطة من اندكت باب المطبخ حييل، صوتها عالي لانها حديد والدگة تخوف تخمش الگلب فزت تَـمني من مكانها تركض تروح تفتح الباب ورحنا كلنا وراهة.. عگدت حاجبي مستغربة من شفتها ومرة لابسة عباه وبوشية ومتربة من فوگ ليجوه.....

**

"تــــالة"

عيني بتلفوني منتظرة منه رسالة، بس رسالة ماريد اكثر من رسالة حتى اكدر افهمه قصدي بآخر لقاء صار بيناتنا.. لحد الان متندمة واكل بأصابع الندم من سألني "تالة اذا تقدملچ زلمة هاويچ توافقين؟" وجاوبته اني بـ..

"حالياً لا لان اريد اكمل دراستي"

عمت عينني وعين دراستي شجاني انثولت وجاوبته هيج جواب خليت الرجال يسكت وكلمة وحدة ميحجي، مجرد هز براسه ودخل لغرفته وعافني وحدي اللطم..

نفسيتي تعبت من الانتظار دا انتظر الدوام يوم يوم حتى يرجع يوصلنا ونتشاوف همزين من كدرت اقنع امي خصوصاً من ابو الخط مالتي القديم افتهمنا بي انتقل لغير منطقة وصار بعيد عليَّ وهيج ماكو غير علي الكـرار يوصلني ويه البنات..

-حنين: تالة وين ضميتي الكلينس؟؟

-بالكاونتر ابو الزاوية ماما

-تاالة تعالي وينج

-ماما بالكاونتر بالكاااونتر

-تعالي يا بنتي وينج شبيچ حابسة روحج بالغرفة

كمت من مكاني اتأفأف شمرت الموبايل والمخدة الجانت بحضني وطلعت من الغرفة وانصدمت واگفة رجليه بمكاني من شفت نسوان ثنين كاعدات ويه امي وعمة ابتسام جاية وياهن..

-تالة: السلام عليكم

سلمت وتقدمت عليهن منحرجة همزين من ممشطة شعري وما عايفته كفشة، ردن السلام النسوان وعمة ابتسام ظلت تأهل وتسهل بيه وتبوس بخدودي وتمدح بوجهي وشكلي وشعري وجسمي ما خلت شي محچت عنه..

-ابتسام: شوف ما شاء الله الشبه بينها وبين تَـمني كلش جبير

-حنين: ههههه اي صح هواي يكولون يتشابهن

ابتسمت وحدة من النسوان وشال كلاص العصير الي كدامها وكالت بأتسامة حلوة..

-نجحتي حبيبتي؟ همه انطوكم النتائج مو؟

-تالة: اي الحمدلله نجحت

-ابتسام: ام لبنى هي لبنى ويه تالة نفط المرحلة مو؟

-اي صح، وياچ لبنى موسى بنية صايرة شكرة وقصيرة اكيد تعرفيها

-تالة: اي اعرفها بس يعني مو صديقات احنه

ضحكن كلهن وهزت راسها عمة ابتسام وضربت على رجلي خفيف وكالت بحماس..

-ما دام بنيتي هنا خلونا ندخل بصلب الموضوع، عيني ام تالة احنه جاي ندور مرة لوليدنا وما شاء الله عليه شاب والنعم منه خريج ومتوظف وعنده بيت وحده وسيارة لامهامن كلها صلوات باقي بس المرة هههه

گلبي انقبض من كلامها وبسرعة رفعت عيني اباوع لامي، ابتسمت رغم شكلها مستغربة وكالت بضحكة..

-والله تالة بعدها صغيرة مو مال زواج ومسؤولية هي فراشها گوة تسفطه

-ام لبنى: هههههه كلنا چنه هيج گبل لا نتزوج بس صدگيني ببيت الرجال يختلف وضعها هي من وحدها تكوم تشتغل وتفر البيت فر

هزت راسها امي مبتسمة واشرتلي بأصبعها كومي منا، ظليت كاعدة ماريد اتحرك اريدها بس تكول لا وارتاح بس ما كالت وظلت تأشرلي وتحمحم وبالاخير حرجتني وكالت كدامهن..

-ماما تالة جيبيلنا مي

اضطريت اكوم اجيب المي بس اذني وياهن اسمعهن يسولفن ومنطلقات وامي تضحك وعمة ابتسام تضحك واني ارجف من القهر هنا، كسرت الثلج بحرگة اضربه بالسچينة حيل واذني وياهن بس الي خلاني انتفض واجرح نفسي هو من كالت ابتسام..

-الزلمة تعرفي حنين مو غريب، يصير ابن اخوي مسعود "عاصف"...

**

-ولك هدنيي اختنكت يبوووو عاد علي الحـق من يلزگ شيوخره بعد

-امشي لج عگروگ

گالها ووخر يضحك بس والله ولا بطل ظل يگرص ويعضعض صرت بنفسجية صايرة اخجل من اروح لبيت اهله اول البارحة سألتني خالة رسمية على الاثار الي بزندي وضحكت مستحية اگوللها علي الحـق عنده سوله يگرص ويشلع اللحم..

-علي والله دتفشلني ويه اهلك هاي شبيك

-تعاي بوسيني وابطل

-ماا

-تعاي ولج

-وخر روح ماريد بعد ضجت منك

-عبق هاي شبيها عينج؟؟

-شنو شبيها

كمت على المراية اشوف شبيه وتفاجأت من شفتها وارمة هسة هسة بهاللحظة ورمت وصارت حمرة قبل شوية جانت كلشي مابيها، كام علي الحـق من الجرباية واجه يمي لزمني من متوني ودارني عليه يباوعلها متفاجأ..

-طب بيها شي؟ توجعج؟؟

-لا

-چا ليش هيج ورمت

-مادري والله

-تعاي انفخ عليها

جر شال من كنتوري وحطه على عيني وصار ينفخ فوگاه، كلشي ما احس بيها لا الم ولا متأثرة بس شكلها تغير..

-مابيه شي حبيبي هاي يمكن انتَ ضربتني عليها وما حاس

-هاااا ذبتها براسي شوف رأساً ذبتها براسي بت الحلو

-ههههه اااخ وخر يمممة ولك مو هييج

شالني شيول وركض بيه على الجرباية وشمرني عليها، طلع صوت قوي منها مال خشب واني استغليت الفرصة وعطت عود تأذيت..

-اااه ظهري علي الحـق ظهري راح اموت

-تعاي اسويلج مساج

-لا لاا ههه شبيك ياا دا اتشاقه صدگ جذب ههه

ضحك بصوت عالي وما عافني ابدد ولا انشلع ظلينا لليل احنه نضحك ونسولف وناكل كرزات ونميات ونتابع افلام، نمت على صدره اتنهد مبتسمة عارضين فلم اجنبي على الشاشة وهو متمدد ويدخن جكارة واني اتأمل كعدتنا الحلوة ولمتنا الاتمناها متنتهي..

-عبق: حقي تلفونك يدگ

-اي هذا ابو كربله خيولي

-ليش جاوبه خطية من البارحة يتصل بيك

-اكيد يريدنا نطلع عوفي يولي

-اطلع وياه شويك غير جو اذا تريد

-هاا؟ لا لا خلينا سوه

-ميخالف من ترجع نكمل الفلم كوم غير جو كوم

-چا وانتِ

-اني اريد افوت اسبح وامسح الكاونترات راح اللتهي بينما ترجع

-چا خوش انتبهي على نفسج زين ساعة زمان وراجع انا

-ماشي

گام بسرعة سبح وبدل وطلع عبالك ممصدگ اجاه الافراج، ضحكت على ابتسامته وفرحته ولزمني يبوسني من باب الغرفة لحد باب البيت وكل شوية كايل انتبهي على نفسج ولا تطلعين ولا تشتغلين زايد وووو..

-الله وياك عيني

-عيني شني خايسة هاي كولي حبيبي

-هههه الله وياك حبيبي

ابتسم يهز براسه وطلع من البيت، قفلت الباب وراه ورجعت اكعد بالصالة وحدي حاطة ايدي على خدي، خطية ماكدر احجر عليه اكثر انتبهتله راح ينجلط من الضوجة عاد خلي يتونس ويه جماعته واني خليني باقية هنا شوية وحدي بلكت اتعود على الوحدة..

انقهرت من تأجلت روحة بغداد بسبب وضع امي الدكتور ما نصحنا ناخذها هسة على الاقل ننتظر فد شهر، علي الحـق ما صدگ بيهم وگال كلشي مابيها وهمه ديتعمدون يأخروها علمود يقطونه فلوس بس لخاطري عافها هالشهر.. مادري خفت نطلعها وتسوء حالتها ونتندم..

كمت افتر بالبيت اشوف شنو الوصخ ارتبه بس وين اكو وصاخة البيت يلمع لممع والاثاث يخبل اللوانه كله بيجيات وجوزيات القنفات والبردات والطاولات والمطبخ خشبي يجنن، اول ما فتت للبيت وشفته گلت بگلبي هذا هو بيت احلامي الحمدلله صبرت ونلت بيت ومملكة خاصة بيه اني والاحبه..

مسحت الكاونترات على الواكف وطلعت لحم من الفريز اموعه حتى اسويلنا عشا، ادري من يرجع حق راح يگلي لا تشتغلين انتِ بعدج عروس وراح يجيبلنا اكل من بره لو من بيت اهله بس مليت.. مليت من اكل البرة اريد اني اطبخ..

على وگفتي واني دا اموع باللحم سمعت صوت حركة صار بالطرمة، خفت وظليت على جامدة بمكاني ما تحركت من شفت الباب مقفول ارتاحيت شوية وبقيت مركزة بالصوت اريد اميز هاي صوت خطوات مشي لو هوا..

-عبق: لا اتوقع هوا.. اي هوا عبق اليوم هوا عالي كلش ما شاء الله

غلست على الصوت وركضت للغرفة اخذت تلفوني وملابسي وفتت اسبح بس بالي بقه ويه الباب خايفة مدا اكدر اتعود اني وحدي بهالبيت استاحش كللش من يطلع بس لازم اتعلم ميصير ابقى جبانة..

طلعت من الحمام لافة الخاولي على راسي وسولتي صارت بالمطبخ رجعتله ووكفت يم الباب اتسمع بس سنطة ماكو أي حِس، مرت الدقيقة ودقيقتين وثلاثة دقايق وعشرة واني على هالوكفة اذني لازكتها بالباب انتظر يصير شي بس ما صار.. ذبيت نفس مرتاحة وبعدني دا اريد اتحرك ونزيت بعيطة مخترعة على صوت باب البيت دينسحل ينفتح..

استقريت من سمعت صوت ضحكة علي الحـق جاية من بره وقررت اني افتحله الباب واتلگاه مثل كل يوم، فتحت القفل والباب ووكفت انتظره وابتسامتي من الاذن للاذن دا اشوف خياله يتحرك وصوته يحجي بالتلفون ويسولف ويه علي التـقي ويضححك من كل گلبه اكيد ديتداهرون مثل كل مرة..

تعبت من الانتظار وهو بعده ما تقدم باقي واكف يسولف ويه اخوه واني عايفني هنا، طنكرت بالجذب ووكفت متخصرة ومضيگة عيوني وبحركتي كفخت ريحة غريبة من كدامي، استغربت ونزلت عيوني اتأكد شنو موجود وشهگت واگع گلبي من شفت مي اسود وشعر وخيسة وچبد دم بباب بيتنا وبنفس اللحظة اجه علي الحـق ناحيتي مبتسم يريد يعبر..

-عبق: لاااا علي اووووگففف........

يتبع 👑....

━━━━━━ ♛ ━━━━━━

🌚

#الامارة

بقلمي: زهراء السلامي 💎

لتنسون التصويت + التعليق بين الفقرات + متابعة لحسابي 💙.

التعب عاشر گلايدنه وصفت صفره..

النهر ضيگ ومامش حيل ونعبره..

شــبـعــد ونعاشر التابوت مو متنه الف مره..

لـ زهراء حامد

━━━━━━ ♛ ━━━━━━

-عبق: لاااا علي اووووگففف

انرد ليوره بحركة سريعة متفاجئ من صوتي العالي، هستوه ديريد يرزلني على صوتي العالي واني سبقته واشرت للكاع..

-شوف الكاع

-شبيها

-شنو هالمي الاسود؟ من طلعت هم جان موجود؟

بهت مصدوم من نزل عيونه يشوف اللعبان النفس الصاير كدام الباب حتى الزريعة الحاطيها بصف الدچة متدمرة..

-جاوب علي الحـق من طلعت هم جانت هيجي الباب؟؟

-لا! لا لا ما جانت هيج.. عبق لا تخطين خطوة زايدة وركضي لبسي عباتج وطلعيلي من باب الاستقبال

-ماريد اطلع علي اخاف

-لا لا تخافين لا شكو هسة سمي بأسم الله و طلعيلي من الباب الثانية

سويت مثل ما گال ورحت بسرعة لبست شال وجريت عباية راس وركضت اطلع من الباب الثانية وشفته واكف منتظرني، تلگاني منا وطلعني وبسرعة لزم وجهي بين ايده وظل يگلب بي..

-عينج بعدها وارمة

-خفت شوية

-توجعج؟

-لا متوجع

هز راسه وسحبني من ايدي يطلعني من البيت، سد باب الحوش وراه وعفنا باب المطبخ من جوه مفتوحة ما قبلت وخفت على البيت لا ينباگ وعلي الحق كال..

-لاا لا نكضها لا نروح نجيبلنا مصيبة هسة اخابر اخوتي يجون

صعدني للسيارة وهو ظل واكف بره اتصل بـ علي التـقي وفتح مكبرة صوت، وجهه يزخ عرگان وصاير احمر محتار ويفتر بمكانه واني بعدها بجسمي الرجفة..

-الوو ها تقي وينك انتَ؟؟

-علي التـقي: بالكوفي بعدني كاعد

-تعال لبيتي تكدر؟

-ليش شبيكم؟ صاير شي؟

-لا لا بس تعال تكدر؟؟

-اكيد اكدر جاي مسافة الطريق

سده منه واتصل على الامـير علي وابا الحسن ووراهم اتصل على بدر وگله يجيب الباقين وياه، ظلينا واكفين ننتظر على الاقل واحد منهم يجي حتى هو يوصلني لبيت اهله وفعلاً اقل الخمس دقايق وسفط علي التـقي بسيارته ونزل يجي بأتجاهنا..

-هاا حق شبيكم

-اوكف هنا انتظرني لا تطب للبيت بس اوصل عبق وراجعلك.. تقي لا تفوت للبيت خووش؟؟

-خوش واكف ما اتحرك

هرول لكرسي السايق صعد ومثل الطيارة طلع بينا يوصلني لبيت عمو علي ولزمني الطريق كله استفسارات واسئلة..

-عبق: اي گتلك حسيت بأحد يمشي بالطرمة قبل لا توصل بربع ساعة

-ما خليتي يلمحج مو؟؟

-اي والله ما فتحت الباب ولا الشباك لان كلت يجوز اصلاً هذا هوا واني دا اتخيل

هز راسه متحلف وطبگ يم باب بيت اهله، اشرلي انزل وهو ظل واكف ينتظرني بينما دخلت للبيت ياله رجع لبيتنا.. فتت وايدي على گلبي ادعي كون يارب تعدي على خير وميصير شي..

فتحت باب المطبخ ودخلت البيت هدووء سنطة ماكو نفس، عبرت المطبخ وجفلت من شفت كللل البنات وخالة رسمية واكفات بباب الاستقبال ومادات نفسهن واذاناتهن كأن ديتسمعن على احد..

-عبق: السلام عليكم

اللتفتن كلهن عليَّ وخالة رسمية رفعت اصبعها وحطته يم شفايفها وهمست همس شفايف "اشش"..

-حبيبة: عليكم السلام هلا عبق شلونچ حبي

-رسمية بهمس: انا اعلمج حبيببة

ما اهتمت حبيبة واجتلي حضنتني وسلمت عليَّ بحرارة واجن وراهة سبأ وشمس وابرار بس تَـمني وليلة بقن لازكات اذاناتهن بالباب ولا يمهن..

-عبق: والله لو مربية چلب هم اوفى منچن

-شمس: هههههه لا ولج بس فضولهن ما يكدرن يكضنه

-عبق: شنو شصاير؟

-ابرار: اجت مرة مبوشة مانعرفها واول ما سألناها انتِ ياهو كالت انا جاية اريدن سلوى وعمتي رسمية جاوبتها..

-رسمية: تگربيلها لو شني؟

-لا انا صاحبتها

-سلوى: ههههه هاا هاا هلا حجية هلا بيج خية ليش اجيتي كتلج انا اجي ازورج شكد عيب تزحمتي بهالليل

-ابرار: اهلت بيها عمتي رسمية وطببوها للاستقبال وبساع فاتت وراهة سلوى وكالت الحجية عدها حاجة وياهة وتستحي تحجي كدام الكل فـ تريد خصوصية شوي

-شمس: بس شنو يا عبق غير وجه سلوى انگلب اصفر وظلت بس تبلع بريگها وعينها ما انشلعت من المرة

-حبيبة: مو لهدرجة شمس لا تبالغين

-ابرار: لا صدگ تره! انا عيني ظلت عليها وحتى عمتي رسمية چان ما راحت تتسمع عليهن بس لان الموقف چان كلش غريب وتصرف سلوى يجلب الشبهة

-عبق: اممم

-سبأ: شبيچ عبق شبيها عينج هاي طالعلچ جنيجن؟

-عبق: لا هسة حيروا بسلوى ووراهة اسولفلكم الصار بينا

كعدت على الكروتية مهدود حيلي بس ما خلوني البنات وظلن يسألن لحدما سولفتلهن الصار من الالف للياء، دگت صدرها ابرار وكالت وهي مبحلقة عيونها..

-سترك ربيي شنو هذا؟؟

-عبق: وهسة علي الحـق حاير ومستحير وميخلينا ندخل للبيت بعد لحدما يعرف هذا شنو ومنو دخل بيتنا وشمره ببابنا

-شمس: والكامرات؟ عبق تكدرون تعرفون منهن؟؟

-عبق: كامرات بيتنا بعدهن ما متنصبات بس كامرات الجيران يشتغلون واتوقع راح يخليهم يرجعوهن حتى نعرف

سكتنا من وخرن خالة رسمية وتَـمني وليلة من الباب لان انفتحت وطلعت المرة وسلوى وراهة من الاستقبال.. ظليت اباوع للمرة بس ما عرفتها رافعة البوشية وطالع وجهها وشكلها ما مألوف..

-سلوى: بعد انا اجيچ حجية وبيج خير وتدللي

ابتسمت المرة تهز براسها وانتفضت مفزوعة من نزلت البوشية على وجهها وبسرعة اجت على بالي المرة الخطفتني.. ظليت اباوعلها لحدما طلعت واقارن جسمها بجسم ذيج ونصبتها وحركة ايدها السمرة..

-عبق: هاي شسمها بنات؟؟

-حبيبة: ماعرف

-عبق: يعني تعرفوها انتو مو؟

-شمس: لا مو كنالج هاي اول مرة نشوف وجهها

اجتني خالة رسمية تسلم عليَّ ووياهة تَـمني وليلة بس شكلهن مو طبيعي وظلن وحدة تباوع للثانية، فتحت حلگها ليلة رادت تكول شي وقطعت كلامها من طلعت سلوى من الطبخ تتبوسم..

-سلوى: ههههه خطية جاية بنص الليل خاطر فلوسها

-رسمية: يا فلوس؟

-سلوى: سودة عليَّ ضمتهم عندي گبل چم شهر عدها بت ايدها طويلة وما مخليه على حالها حال واجت حطتهم عندي خاطر تأمن

هزت راسها خالة رسمية بس نظراتها تسولف، نظراتها كلها شك وريبة وسلوى وجهها مطعون احمر مادري من الحر مادري لانها مصخمة وضامة شي..

-شمس: عمة شوفي شصاير ويه عبق

اللتفتت رسمية عليَّ وركزت بعيوني وبدت ويايه التحقيق، سولفتلها كلشي وويه كل حچاية تطلع مني تدك على وجهها وصدرها وتصيح..

-اسم الله الزهررة

-عبق: وعلي الحق هسة مخبوص باقي بالبيت يريد يتأكد شنو هذا المي الاسود

-سلوى: هسة تطلع زبالتج وانتِ ما تدرين

-رسمية: لاا لاا شني تعلميني بـ عبق ونظافتها لا هالسالفة ما ينسكت عنها هسة اخابر ام فگدس

-حبيبة: لا يمة ام فگدس شني هاي هم تصدگون بيها انتم!

-رسمية: اي چا تفهم بهالسوالف ام فگدس معروفة

-شمس: عمة ام فگدس جذابة عايشة على الجذب والوهم تلعب بعقولكم وتصدكون بيها احنه محتاجين شيخ روحاني يتأكدلنا من الموضوع

-رسمية: منين نجيب شيخ روحاني هسة

-تَـمني: عمو علي اكيد يعرف

-رسمية: هو وينه عمچ عليييي

نترتها معصبة وراحت لغرفتها استغربت وعبالي ضايجة من تَـمني بس وصلت الفكرة من ابرار عضتلها شفة وهمست..

-متعاركين هي وعمي امس

-تَـمني: هاا

كعدن كلهن محاوطاتني وظلينا بالساعتين نفكر ونحلل شنو نسوي وشلون نتصرف، رجعت خالة رسمية تكعد ويانه بس منفسة وضايجة اما سلوى فـ ولا يمها وولا هامها وماعرف ليش كلما دتصير عيني عليها تجي ببالي المرة الشفتها قبل شوية واستذكر العشته..

فزينا على صوت فتح الباب ودخلوا الولد وياهم عمو علي، رفعت عيني على الساعة شفتها بالوحدة ونص بالليل واني اكول شبيها عيني گامت تلزگ..

-ابرار: هاا بشروا؟

-علي البدر: رجعنا كامرات الجيران وشفنا صدگ وليد يطلع بگصة حويدر ملثم وطفر على بابهم وطب للبيت

-علي الحـق: الخطوات السمعتيها مو هوا عبق ربچ ستر ما طب للبيت!!

-علي التـقي: حق تالي وياك! لا تظل تلوم بروحك كافي يا خوية هلكت نفسك

-علي الحـق: اناا شطلعني؟؟ مو صاار دهرر مچبوب بالبيت وماا طالع رجلي على رجلهاا شطلعنيي هالمرة بدونهاا!! لو ما قافلة عبق الباب شنسوي؟؟ لو مچيت عليها ومسويلها شيي شلون نتصرف؟؟؟

-عبق: بس ما صارلي شي علي الحـق الحمدلله جنت مقفلة البيبان والله ستر علينا لا تأذي نفسك

-ابا الحسن علي: خوية يعني انتَ ناوي تگابلها وتكعد العمر كله؟ هم باجر عگبة تخلص اجازتك وترجع للدوام

ضرب فخذه حييل مخلف صوت قوي كلش، وجهه تعباان كلش ومتأثر واعرفه راح يبقى يلوم بنفسه وخايف عليَّ، هو سالفة الخطف والشماعية بعده يحوم عليها وميت من وراها انوب اجته هاي..

-شيخ علي: لحد يطلع من البيت اليوم ناموا وباجر تفرج

-الامـير علي: بوية چا غير ندور على الولد!

-شيخ علي: گلت لا! اليوم لا تطلعون گلبي كاضني عود باجر علي التـقي وعلي الكرار تطلعون ويه اخوكم تدورولنا هالفرخ وتفتهمون شني هذا الذباه بباب البيت وحتى لو ما اعترف انا جايب شيخ وماخذه يقرا ويحصن داركم

هزوا روسهم وتفرقوا كلمن راح لغرفته وعلي الحق اشرلي اروحله، وكفت بصفه بدون لا اللمسه وامه وگفت تسولف وياه شوية وتصبره وگلتلنا حتى نروح ننام بغرفته القديمة..

-رسمية: على هونك يمة ان شاء الله محلولة بجاه علي نخيته انا وما فد يوم رد نخوتي

-علي الحـق: رحم الله والديج حبيبتي

راحت للمطبخ ما قبلت تدخل لغرفتها لان عمو علي هناك واتوقع ديريد يصالحها بس خالة رسمية من يوم يومها من تتناگر وياه تشلع گلبه وتظل تتعزز عود ياله بعدين ترضى..

-شو عايني عليَّ

سحبني من خصري بخفة يحاوطني ورفع حنچي حتى يشوف وجهي، ركز عيونه على عيوني المورمة وذب حسرة قوية واخذ بيدي يصعدنا فوك، دخلنا للغرفة وفوراً جرني للجرباية تمدد وتمددت بجانبه وحضني نص حضنه لجسمه..

-علي الحـق

ما جاوب بقى ساكت وعينه على السگف، رفعت راسي وندسته على الخفيف وهمست بصوت انصى..

-علي لا تضوج راح نلگه حل

-اگص ايدي اذا مو بلاوي وراهة!

-اممم يجوز ويجوز هم.....

قطع كلامي من فز يرفع جسمه على عكوس ايده وخزر يباوع للحايط الي گدامنا، باوعتله متسائلة شبي وقبل لا يخليني اسأل نتر..

-هي! اگصص ايدي وراسي ونص جسمي اذا ما طلعت هي! انتبهتي لوجهها شون تغيرت علومه؟! انتبهتي لو لا؟!

-ما ركزت بس علي الحـق ردت اگولك على شي صار اول ما دخلت لبيت اهلك ومدا اكدر انساه

-شكو شصار؟؟

-جانت جايتهم مرة ودخلت هي وسلوى وحدهن بالاستقبال يسولفن علساس ضامة فلوس يم سلوى ماعرف شنو..

-شنو يعني؟

-من سألت البنات تعرفوها لو لا طلع محد يعرفها حتى خالة رسمية والي خربط احوالي هو من شفتها ذبت البوشية على وجهها قبل لا تطلع وماعرف ليش رأساً اجت على بالي...

-المرة الخطفتج!!

-اي، ظلت عيني على ايدها سمارها وطولها وجسمها ذكرني بيها، هسة هي لو حاجية وسامعة صوتها جان ممكن كدرت اميّز بس ما حجت شي قبل لا تطلع

-ابا بت الچلب!!

-هاي عليمن؟؟

-وخري قبق

دفعني بخفة وگمز من الجرباية وطلع يركض من الغرفة، طلعت وراه اللحگه بس استحيت من شفت ابا الحسن والامير بوجهي كاعدين بالصالة يسولفون فـ بسرعة رجعت للغرفة وكعدت على الجرباية انتظره علما يرجع..

ربع ساعة ما طول واجاني وجهه غادي دمم وعروگه ناطة، وگفت على حيلي وتقدمت بأتجاهه بدون لا اسأل جنت اعرف راح يحجي من وحده..

-نكرت بت العار!! نكرت بس بسيططة يا سلوى لو انا لو انتِ بهالبيت!!

-شگلتلها؟

-ابوي صار بوجهي ما رضى انعل والديها واحقق براحتي!!

-شسويت بالضبط؟

-الچلبة سئلتها منو هالمرة الاجت تگلي تصير جيران اهلي ومرة من اهل الله گتلها انطيني اسمها ما ترضى عود من اجه ابوي وشافها مگبحة بالحجي ونافشة روحها تمسكنت وكالت يسموها ام رؤى وعدها بس بنات

-يجوز فعلاً كلامها

-هو انا ادري ما جذبت بس يااهي هاي ام رؤى؟؟ وعود اذا حسبالها اعوفها بدون لا اروح لمنطقة هالحرمة وانعل والديهاا بالسؤال فـ خليها تاكل *****........

عصرت عيوني مثولة من كمية المسبات والفشار الصارت بوجهي والمشكلة عصبي مو مال اتنعوص واگله لا تفشر عفته وحده يعيط ويتعارك لحدما ارتاح گلبه وخلى راسه ونام وجرني ينيمني بصفه وخنگني بين ايده ممنوع حتى اتحرك..

-اختنگت علي

-سكتي

-زين اريد اروح للحمام

-ماكو

-علي الحـق احتاج حمام شبيك

-سويها على روحج

-شكد عيب!!

-كومي كدامي وخلي الباب مفتوح لا تسدينه

-صدگ تحجي انتَ؟

-اي

-علي الحـق وخرررر

-اخااف عليج لا يصير بيج شي وحدددج وما اللحگ علييج

-ميصير بيه شي بس لا تعيط

-امشي كومي انا اخذج للتواليت

نفخت هوا مستسلمة ولزمني من ايدي ومشاني للحمام الي صاير بنص غرفته، وگفلي بالباب ميقبل لا اسدها ولا يروح خبلني هذا شلون وياه..

-حق تره زودتها

-يلا يلاا فضيني

-لا تتأمر واحترم

-عبق اناا عقل ما ظال براسي لا تكعدين تتنعوصيييين عليَّ

-استغفرالله ياربيي

طبكت الباب وعاط بيه خلاني افتحها شوية بس حتى الحمام ماريد وكفت بس غسلت ايدي ووجهي وانتبهت لعيني شوية خاف الورم مالتها يارب تكون اشارة زينة، نشفت ايدي بالكلينس وطلعت ومن كدما واكف بالباب لزگ انركع جسمي بي وماقبل يتحرك..

-هاا شو طلعتي بساع

-اي مو نعست

-يعني شني ردتي تغفين وانتِ جاي تـ....

سديت حلگه بيدي بكل قوتي ونترت بين سنوني..

-اشششششش اششششش كافي كاافي عيب شبيك

-ماكو عيب احنه متزوجين

-واذا متزوجين؟ تره اكو امور عيب نحجي بيها علي الحـق والله فشلة

-انعل ابو الفشلة امشي عنق امشي ننام روحي طافرة انا

سحسلني للفراش ورجع نام مثل قبل شوية يذب كل جسمه عليَّ راح اموت شوكت يتوب من هالنومة مادري..

-علي الحـق والله مو الفراش اني لا تتيه بيناتنا فدوة لرتبتك الخابصني بيها

-تاج راسج هاي جبتها بتعب موش بتواسيل

تنهدت اهز براسي مأيسة من غرور هالتمساح وغمضت عيوني مستسلمة للنوم.. حسيت الصبح على ضوا الشمس داخل الغرفة وانتبهت لـ علي الحـق مو بصفي كمت بسرعة وجريت موبايلي اتصلت بي بس ميجاوب عفته ونزلت جوه لگيت البيت مخبوص خبص...

-عبق: شبيكم

اللتفتت ليلة عليَّ وگالت وايدها على خدها تضربه على الخفيف..

-عركة صارت عركة

-عركة ويامن؟؟..

**

"علي التـقي"

طلعنا من الصبح انا وحق وكرار ندور على الوليد وما طولنا حسبة نص ساعة لگيناه وعرفنا شكله تتبعنا كامرات الفرع والاغبر نازع اللثام من وجهه گبل لا يطلع من فرعهم ولاگفته كامرة واحد من البيوت الموجودة وگدرنا نوصله..

-علي التـقي: حق عاين الوليد مبين فرخ بعده لا تسويله شي بالبداية بس نخوفه لا تمد ايدك عليه بس اذا ما رضى يسولف ذاك الوكت الك حگ شتسوي بي سوي

-علي الحـق: خوش خوش

ظلينا من واحد لواحد نسأل وكل ساع كرار ينزل على البيوت ويدگ بالبيان چن مجادية نسأل على الولد اذا شايفي لو لا الى ان عرفناه ابن منو والطرگاعة طلع ابن واحد من جماعة ابوي اليحب ابوي ويفدي بروحه..

-علي الكـرار: ايا زبالة!!

-علي التـقي: كرار يجوز ابوه ما يعرف بفواين ابنه لا نستعجل بالحكم

توجهنا لبيتهم وسبحان الله اول ما طبينا فرعهم شفنا الولد راكب بايسكله وجاي يريد يطلع وبدون لا ينطي مجال علي الحـق نزل من السيارة وانا جاي امشي بعدني ما سافط فتح الباب ونزل منها يركض على الفرخ وكضه من ياخته سحله من البايسكل..

-علي التـقي: هاي عود احنه حچينا

هزيت راسي مأيس منه وسفطت على جهة ونزلنا انا وكرار نشهد تحقيق علي الحـق اليزوع الچبد من حلگ المتهم..

-علي التـقي: حق على كيفك يا خوية لا تضيع شغلنا

-علي الحـق: اييي اييي على كيفي اييي تعال انتَ تعال حبيبي تعال وليدي سولفلي شسمك؟؟ شنو اسمك انتَ چلوحي؟؟

-الولد: شنوو ياهو انتم هدنني شمالك كاضني هيج هددني

كضه علي الحـق من زيجه عليه وصاح بوجهه صوت خلى الولد يخنس..

-ابن النعاالل تحجيي لاا ارفسس بعرض الخلللفك احچيييي

-اسمي.. خـ.. خالد.. خالد اسمي

-علي الحـق: هااا حلو خوش حجي حلوو خلودي وليدي شعندك ببيتي؟؟ شكو تنطط على الحياطين چنك قرد لو حنيت لاصلك واجيت تثبت هوية؟؟!

-خالد: شنو؟ عمي والله ما جاي افتهم عليك والله ماعرف

-علي الكـرار: احجي خالد لا تطولها وهي گصيرة امس من نطيت على بيت بشارع الـ[^^^^^] وذبيت ببابهم ماي اسود ليش؟؟ وياهو دازك؟

-خالد: هاي انا؟؟ لا والعباس ابو فـ....

بعده ما كمله جملته وسمطه علي الحـق براشدي فر وجهه فررر، شهك الولد يصيح ودفع حق عنه يريد ينهزم وكضيته من الجهة الثانية وجريناه غصب لسيارتنا انضرب ظهره على البنيد، ظل يلبط بمچانه يريد يصيح وصام حلگه بيدي والسهل علينا السالفة الشارع يصفر فارغ الدنيا غبشة وبعدهم الوادم ما گاعدين..

-علي الكـرار: احجي خالد لا تجيبلك وتجيب لاهلك مشكلة تره هذول ضباط لا تندگ بيهم

-خالد: معليه اناا والعباس معليه همه كالولي والله ماعليه

-علي الحـق: احجيي ياهو گلك؟؟ احجيي ولك لاا ادوس بگلبك احجييي

-خالد: وحدة.. مرة مرة ماعرفها وعلي ماعرفها

-علي التـقي: شون شكلها؟؟

-ماادري ما شفت وجهها جانت مبوشة ماادري

-علي الحـق: مبوشة؟؟ هيكل جسمها شلونه مال نسوان كبار؟؟

-خالد: مادري مادري

-علي التـقي: احجيي خالد لا تكفرناا بيك احجيي

-خالد: لا مو.. مو جبيرة لا مبينة يعني.. ماعرف عمرها والله بس مو جبيرة من صوتها عرفت وجانت طويلة.. اي اي طويلة

-علي الحـق: عباتها جاية عدلة لو بيها اطار شغل؟؟

-خالد: يعني شني

-علي الحـق: ركززز وياي عباتها عدلة لو بيها اطار شغل؟؟ هذا النسوان اليشتغلووه بعبيهن؟!!

-خالد: بي بي.. بي زخرفة اظن

-علي الحـق: انتبهت على حذائها؟؟

-علي الكـرار: شسالفة حق!

-علي التـقي: اششش ماعليك انتَ

-علي الحـق: جاوب؟؟؟

-خالد: لا لا ما انتبهت

-علي الحـق: ايدها لابسة چفوف لو لا؟؟

-خالد: لا

-علي الحـق: مبين عليك نغل وتنتبه ايدها بيهن شي مميز؟؟

-خالد: هااا؟

-علي التـقي: جاووووب ولك

-خالد: بيهن بيهن.. چانت لابسة سوارات ذهب انتبهت للسوارات خرخشن بيدها

-علي الحـق: يمته تلاگيتوا؟؟؟

-خالد: اول امس المغرب

-علي الحـق: ويين؟؟

-خالد: على الشط

-علي الحـق: من انطتك البطل شگالتلك؟؟

-خالد: ما كالت شي بس كالت فوت للبيت سكتة ورشه بالباب

-علي الحـق: واذا افتهمت بيك جاي تچذب عليَّ؟!

-خالد: هاا؟... لا لا كالت هم هذا خطر ما يصير اذبه بأي مچان ولازم بباب البيت

-علي الكـرار: ما سألتها مال شنو هذا؟

-خالد: سألت وكالت هذا تحصين لاهل البيت بس انا ما صدكتها و.. وكلت يجوز سحر

رفسه علي الحـق يهده من ايده وشمره على البايسكل مالته عرفته كمل تحقيقه، طفر الفرخ من مكانه خايف وركب بايسكله يريد ينهزم ووكف مبحلگ عيونه من نتر بي علي الحـق..

-لو عرفت بيك مچذذب والزهرة اطررك سبع وصللل

-خالد: والزهرة التحلف بيها ما مجذب بحرف

-علي الحـق: راجعلك راجعلك انا اعلمك ما خلص حسابك

ركبنا السيارة وبساع علي الحق طلع موبايله واتصل بواحد يجيبله اخبار مرة اسمها "ام رؤى" عدها بس بنات وتلبس بوشي من تطلع ويجوز ما تلبس بس بأماكن محددة، امس جانت بمنطقتنا وعلى هالاساس يريده يتبعها..

-علي التـقي: ياهي هاي؟

-علي الحـق: هسة نعرف

اشرلي خاطر ارجعه لبيتنا ومثل گبل شوي ما انتظرني اسفط السيارة ونزل يركض گبلنا البيت واحنه لحگناه، شفناه راح لاتجاه غرفة امي وطب بدون لا يطگ الباب خرعها وهي نايمة..

-رسمية: اسم الله يمة شبيكم وليداتي شصاير؟؟

-علي الحـق: يمة سلوى طلعت من البيت اول امس المغرب؟؟

-رسمية: شبيك حق يمة

-جاوبيييي يوم

-رسمية: مادري.. شمدريني ماذكر

-تذكري حاولي تذكرين!!

-مادري ولك بس.. اي اظن.. اظن طلعت كالت تروح للمستوصف تضرب ابرة

-ايا بت العار!!!....

**

"ســبأ"

نزلت من فوگ اركض مثل المسودنة على صوت الصياح الي وصلني للبيتونة وانا واكفة اشر هدوم، شمرت من ايدي ورحت اشوف شكو وعكدت حاجبي مستغربة من شفت عبق واكفة بباب الاستقبال وليلة بصفها وثنينهن باهتات يعاينن على شي..

-سبأ: شنو شصاير؟؟

-ليلة: تعالي تعالي علي الحـق كض سلاوي وطيح حظ حظها

-شنوو؟؟؟

-سلوى: الله لااا يوفقققك يااا عار الزززلم الله لا ينطيييك عافية يا علي الحـق بجااااه الزهرة كوون اشوف بيك يوووم تاكل لحمم ايددك من القهرر

ركضت بأتجاه صوتها وشفتها مملخة تملخ الشال واكع بجهة والدشداشة مشگوگة ياختها والشعر مخربط وحبيبة حاضنة امها وتبجي وعمتي رسمية واكفة على جهة تضرب على حلگها حتى يسكتون وعلي التقي وعلي الكرار مچتفين علي الحـق الصاير بركاان ويتصايحون..

-علي الكـرار: تمدد ايدددك على حرررمة علي الحـق ولللك صخمتنا ولطمتنااا

-علي الحـق: هددددددني خليني اشرررب من دمهااا هال****...

فلت نفسه من ايدهم وهجم على سلوى!! هجم هجم بالمعنى الحرفي مثل الاسد اليهجم على غزالة ضعيفة لزمها وگطعها تگطططع محد جاي يكدر يسيطر عليه كل راشدي يجيبها بي وكل دفرة وكل لطمة يزلزل بيها گلوبنا گبل لا يزلزل جسمها ويخليها تنهار..

-حبيبة: علي الحـق بداااعتي وووخر بداااعتي اميي راح تموووت وخررر عنهاا

-علي الحـق: اعتررررفي ولللج احجييي گبللل لا اطلع روووحج احجييي

-سلوى: انا معليييه معليه معلييه اااااخ يا يمة راح اموتننن لحگوني يا ولياان

وكفت على جهة جاحظة عيوني ما مصدگة الجاي يصير حقيقة! هاي اول مرة بحياتي اشوف واحد من ولد عمي علي يطگ حرمة همه عدهم هالشي عيببب چبير وما ينسكت عنه وبس الماعنده غيرة يمد ايده على مرة بس هسة شون جاي يطگها وشوصله لهاي المرحلة!

اعاينلها وهي تنطگ وماعرف شون خايلي عبق.. خايلي شون جانت سلوى تطگ عبق بنفس الطريقة وبنفس الوحشية، اتذكر مرة صارت كدامي طگتها لحدمها دمتها وفركت شفايها فررك بين ايدها خاطر ما يطلع صوتها ويسمعها احد وهسة هي راح تموت جوه ايد زلمة عبق ومحد جاي يكدر يفلتها منه!

فزيت على جرة ايد ليلة سحبتني من ايدي حيل من نزل الامـير علي من فوك يركض وتَـمني وراه مصدومة، طب بنص العركة يسحب سلوى الي وجهها صار خريطة من بين ايد علي الحـق ودفعها على المدخل دخلها هناك وحبيبة راحت وياهة وطبگ الباب عليهن وقفلها بالمفتاح الموجود وعاط..

-علي الحـق!!! تخبلللت ولك تسوددنت انتَ شنييي عقل ماااكو طااار عقلك طااار؟؟؟

-ووولك هالچلبببة بت الچلببب السبب بكلشيي ولللك هي الخطفت عبق هيييي

-رسمية: يممة ااخ راسي اااخ گلبي راح اموتن اااخ ااااخ

ظلت تصيح عمتي رسمية بصوت عالي كلش وتوقعتها مثل گبل تصيح هيج بيناتهم خاطر ما يتعاركون ويلتهون بيها بس گلبي طاح ويه طيحتها من طولها.. طاحت چفي على وجهها لدرجة راسها انضرب بالكاشي مال الكاع والولد تخبلوا، ركض الامير عليها متسودن لزمها بين ايده يضرب على خدودها وانتبهت لخشمها رأساً طگ دم.. بدون نقاش شالوها وطلعوا بيها للمستشفى وعافونا البنيات وحدنا بالبيت..

-ليلة: علييييي والله كتلة اكلتها سلاوي بلاوي

-تَـمني: شصار بنات اني ملحگت حرامات

-ليلة: طبچ زلابية ما نزلتي بساع شجاچ

-تَـمني: غير امير هسة تذكر هو مشتاقلي

-عبق: بنااات فهمونا!!

گرصت زندها ليلة وغمزت وهي تگول..

-ليلة: حوبتچ عبيقة جاي تطلع بيها هالچلبة

-عبق: يعني شنو غير احد يفهمنا السالفة!

-ابرار: ما ينرادلها اكيد الها ايد بالصار بيكم وحق تسودن من افتهم

هزيت راسي مأيدة فكرتها بس ما حجيت، توزعنا على التخم بالصالة نكعد وفجأة سمعنا صوت صياح حبيبة جاي من المدخل بدون لا احس على روحي طفرت اركض خايفة عليها لا بيها شي والبنات لحگوني، ما قبلت عبق نفوت جوه واشرت على اذنها تريد تسمع لحديثهن گبل لا نفوت..

-سلوى: هيييج صارت حبيبة؟؟؟ صارت تشككين بأمج وتصفين ويه اخوتج؟؟؟

-حبيبة: والعباااس ما صافة وياهم وياچ انا يا يمة وياچ بس فهميني الصاير انا وياچ وما اعوفج ادافعلج واوكف بوجوههم بس لا تفشليني وسولفيلي

-سلوى: انتِ من يوم يوومج تفزعين لاخوتج ضد امج مو جديدة عليج امشي وليي ماريدج امشييي

-حبيبة: يوم حبيبتي انتِ گليبي اروحلج فدوة اذا انتِ تعرفين أي شي يوصلنا للي سوت هيج بـ عبق سولفي حبيبة گلبي حاچيني حتى لو چنتي غلطانة اوكف وياچ وما اعوفج

-يعني بعدج تذبين الصوج بيه؟؟؟ ولج حرااام بيج الربا بعليي حراام روحي عسى الله يصخم وجهج ويحرگچ مثل حرگة گلبي واكثرر!!

شهگت ميتة قهر على دعوتها ودموعي نزلت متوجعة على صوت لطم حبيبة مبين جاي تلطم على وجهها وصدرها وتصيح..

-احترررگت يمةة احتررگت ارتااحي احتركت وتشوهتت وتصخمم وجهي وراح اتطللگ دعوووتچ سبقتجج خلي يرتاح كلبجج

ركضت عبق فتحت قفل الباب ودخلنا عليهن اشوف حبيبة وجهها مزلغ واحمررر مطعون وسلوى مدماية وواكفة تبجي وتمسح بدموعها، خزرتنا من شافتنا موجودات وزادت حقارتها ولئامتها ونترت ترجف عصبية..

-سلوى: حبيبة طلعي برا ماريد اشوفنچ بعدد طلعيي خلي اخوتج يفيدووج

انهارت حبيبة وطاحت بالكاع تبجي وتلطم على راسها كعدن حدها عبق وتَـمني وسلوى ولا اهتمت ولا رف گلبها على بنيتها الحنينة چن عدوتها كاعدة بالكاع تبجي ووجهها متملخ عافتها وطلعت من المدخل ضاربة الدنيا بعرض الحايط..

گوة گومنا حبيبة خاطر نغسللها ما ترضى عيونها مغيمة والحزن مالي وجهها مهدود حيلها، عفتهن براحتهن وياهة وكعدت بالصالة انتظر شنو راح يصير والانتظار جر للسبعة بالليل واحنه لا غدة ولا عشا محد اله واهس شي..

الحمدلله ارتاحينا من دگو وطمنونا على عمتي رسمية كالو وضعها زين وحبيبة وعبق من صعدن فوك ما نزلن بعد واحنه بقينا هنا وحدة مكابلة الثانية ونتصفن..

-تَـمني: كأنه صوت واحد من الولد رجع؟

-شمس: صوت سور هذا

ويه حچايتها طب سور يفر بسويچ سيارته وگبل لا يخطي خطوة بداخل الصالة وكف باب المطبخ ونزل يلطم ويقرا بصوت عالي القصيدة أخذله دقيقتين هيج ياله فات يمنا وشمر علينا سلامه شمر..

-علي السور: شلونهن امهات كريّع

-ابرار: زينات، وينك انتَ شو مختفي انتَ ونور وحيدر وينه؟

-علي السور: دايحين

-ابرار: اي وين؟

-علي السور: شبيچ ابرار شسالفة شو چنچ تحققين وياي لازم انعديتي من زلمتج دخلينا متونسين وخلصانين من وجه سعلاوي

-شمس: نايم ورجليك بالشمس ماتدري شصار بسلوى

-علي السور: ماتت؟

-تَـمني: لا لا

-علي السور: لا حرامات

-ليلة: انكتلت كتلة طاح صبغها وصبغ اهلها

-علي السور: تگرمت وره الكتلة؟

-شمس: لا

-علي السور: چا ما تنحسب كتلة هاي انچبن

-شمس: ولك والله انكتلت وتدمت گوة فلتوها من ايد علي الحـق

-علي السور: اروووحلك ستين فدوة يا علي الحـق اريد من شريفة بت الحسن تحفظك وتستر عليك وتفرحك وتنطيك فرخ يفرح گلبك وگلبي

-ابرار: علي السور ما جاي نضحك تره صدگ كتلها

سكت صافن علينا چن هسة ياله استوعب ما جاي نتشاقه وياه، بلع ريگه وعيونه صارت على باب غرفتها ورجع يعاين علينا محتار..

-علي السور: يعني.. احم يعني كتلها كتلها؟

-تَـمني: اي والله طيح حظها هم

-علي السور: لا بشرفج!

-تَـمني: دا اگلك والله

-ليش!

-ليلة: بعدنا ما ندري السبب شنو

-علي السور: ولچن لا تلعبن وياي واحجن صدك مو زعطوط كدامجن صدك انكتلت سلوى لو بس ترزلت؟؟

-ابرار: يبوووو انكتلت هاي شبيك

-علي السور: وابوي وين جان؟؟ عرف بالسالفة؟؟

-شمس: لا بعده ما رجع عمي

-علي السور: وبلاوي ما اتصلت بي تشتچيله؟؟

-تَـمني: مادري بعد

-ليلة: لو شاچيتله چان اجه وداس ببطونه بس ما اظنه يدري بعده

-علي السور: خرررب ان فاتني المشهد شجاني وطلعتهم هسة نور وحويدر ياكلون گلبي

-شمس: همزين مچنتو موجودين چان هم انكتلتوا على الواهس اذا هو كرار صار بين الرجلين سودة عليّ وتقي عينه انضربت بالغلط وواحد فوك الثاني صاروا

-علي السور: علييييييي راضي بهيج كتلة المهم اشهد الموقف هسة انا شون اقنع نور وحيدر العركة جانت مو قوية وانتن كاعدات هنا وحدة تجر طول والثانية عرض وتحنصن بينا

-ليلة: عود ما نسولفلهم لخاطرك

-علي السور: اي بشرفچن ان شاء الله كلجن حامل ببنيات وتفرحون گلوبنا بس لا تسولفن خاطر ما ننحسد خوش؟؟

-تَـمني، ليلة، ابرار، شمس: خوش

-علي السور: وانتِ خوية شو لا حس ولا نفس؟

جفلت من وجه سؤاله الي والبنات كلهن اللتفتن يعاينن عليّ، فركت ايدي بألايد الثانية واشرت براسي بمعنى "شنو"..

-علي السور: صارلج دهرين ببيتنا حسچ ما سمعته شسالفة سبأ شمالج تره اخوي ما يحب الفقيرات صيري نچرة خايبة لا يروح الزلمة من ايدج

-ليلة: سوور عوفها لا تضوجها

-علي السور: لا بعلي ولا اعوفها احبنها هالبت تذكرني بمعلمة جانت تجيني بالثالث ابتدائي الله يذكرها بالخير ست ابتهال شون حرمة شريفة جانت

-سبأ: يعني شسوي هسة؟

-علي السور: عاينن شتسولف شني شتسوين تلحلحي سولفي شاركي ويه البنيات ولا تظلين متكترة وحدج تره هالبيت غابة اذا ما تاخذين حگچ بيدج تنعلسين!

هزيت راسي ساكتة وهو باوع للبنات يضحك ويهز براسه مأيس، رغم الاجواء والمشاحنات المشتعلة بس انتبهت حتى علي السور ملاحظني شكد ماعندي رأي وماعرف اسولف وهالشي شوي اثر بيه..

-علي السور: يا علي اجوا.. اجه الشيخ وويلاده عاينن لحد تحجي ولا تمشي ولا تتنفس كعدي بمچانچ ولو الدنيا انگلبت انتن اللتزمن الصمت لا يجيچن شي طاير من شيخ علي يكطع خلفتجن

سكت بسرعة ووكف على جهة من دخل عمي علي ووياه الولد وعمتي رسمية تمشي، شكل عمي مهموم ومتأذي بس ما اظنه يدري بسالفة سلوى بعده وزعله على عمتي..

-شيخ علي: السلام عليكم

-عليكم السلام

-شيخ علي: تعاي ام علي سندي روحج عليَّ يا بعد حيلي

خذاها بين ايده على كيفه ومشاها لغرفتهم بس عمتي بعدها مطنكرة ودايرة وجهها عنه، توزعوا الولد على التخم وره ما فاتوا ابوهم وامهم للغرفة وكعدوا ساكتين محد بيهم تنفس، ناس سارحة وناس معصبة وناس تنتظر چن متوقعين راح يصير شي..

-الامـير علي: حق لا تسولف ولا تفتح حلگك ويه ابوي خلي الموضوع وراي

-علي الحـق: اسولف وانعل والديها شني خايف منها انا؟؟

-الامـير علي: ولك غبي انتَ؟؟ انا ما خايف عليك اخاف على ابوك لا يصير بي شي من وره استهتارك!

-ابا الحسن علي: مطي راح يبرز عضلاته على حرمة

-علي الدر: واليكتلك دخيلة! تدري لو سلوى طلعت وحجت بيك شيصير بينا؟؟ ولك ابوك ينجلط بالعباس ينجلط ويموت وتخش بخطيته و...

گطع حچايته بساع ويه ما طلع عمي علي من الغرفة ورجع سلم علينا بصوت مسموع ومتحمس هالمرة شكلها عمتي صالحته وفرحان، ابتسم يوزع نظراته علينا وراح يريد يكعد بصدر الصالة وبعده ما مستقر بمچانه طلعت سلوى من غرفتها تسحل بجنطتين كبار والوجه صاير ازرگ من اثار الضرب.. فز عمي علي من مچانه جاحظ عيونه ونتر من موقعه بدون لا يتحرك..

-شنو شبيچ؟؟؟

-سلوى: مالي كعدة بهالبيت بعد انا

-شيخ علي: شصاير سلوى؟؟؟ شبيچ وشبي وجهج؟!!

-سلوى: هانوني وانا ببيتك يا شيخ الامارة

-شيخ علي: ما عاش اليهينچ وانا موجود احجي ام حبيبة شصاير؟؟ ياهو معترضلج هسة اللوچه بسنوني وعلي!

گبل لا تفتح حلگها وتحجي گام علي الحـق على حيله وگال بدون لا يرفله جفن..

-انا المعترضلها وهاي خريطة وجهها انا سويتها وما ندمان!

طلعت عيون عمي من وجهه البده يتغير لونه والعرگ يصبصب منه، رجفت ايده الكاضة العوچية وعاط بكل حسه محترگ حراگ..

-شيخ علي: يااابن العايب تحجيها بكل صلافة يا عاار الزلم!!

-علي الحـق: بوية افتهم السالفة گبل لا تعصب استريح وهسة اشرحلك كلشي

-شيخ علي: انچببببب انچبببب بعده اله عين يحجييي ولك انتَ ماا تستحي؟؟ ماعندك غيييرة ماعنددك ضميير شني يااهو ربتك يهودية؟؟؟ فهمنييي ربيت بين يهووود حاچينييي

-علي الحـق: بوية دخيلتك الجبتها لبيتنا سووسة جاي تخرب بيوتنا بييت بيت وانتَ ما تدري ملتهي بشغلك وگعداتك و....

فزيت على حركة عمي علي السريعة ما انطه لعلي الحق مجال يكمل چلامه وهجم عليه عته من ياخته ودفعه بكل قوته على البوفية خلى التحفيات المحطوطة فوگاهة تطيح بالكاع وتتكسر، ركضوا الولد كلمن من جهة يفاككوهم وعمي علي بعده يصيح ويتعارك ويهمش بإيده يريد يكض حق بس ما جاي يلوحه عبن الامير وابا الحسن جروه بعيد، على صوت عياطهم طلعت عمتي رسمية الدمعة بعينها وراحت لعمي تهدي بي بس ماكو فايدة عمي راح ينجلط..

-شيخ علي: وخرررو وخررر ولك لا اشرب من دمك اميييييير اباا الحسننن

-الامـير علي: بوية صلي على محمد يااا بوية خلينا نكعد نتفاهم بهدووء

-شيخ علي: شنتفااهم واخوك السرسري يبرر لروحه يمددد ايده على مرة ابووه العااايب ابن العااايب

-علي الحـق: مرررتك سحرررت مرتييي سنييين هالبت عايشة ببيتك انلعب بيها فلكك وانتَ ما تدررري!! چاا تفززع لناس وناااس عايف هالحيواانة تفتر بيناتنا وتلعبب بأعراضنا وشرفناا وتريدنا نسكتلهاا!!

-علي البـدر: كاافي حق اسكتتت

-علي الحـق: والزهرررة ما اسكتتت واعيد كتلتها مرة وثنين وعشررة ولو بيدي اذبحهااا واعلگها بباااب البيت اسويها عبرة لمن اعتبرر

-سلوى: اسمع يا شيخ اسمع عايشة جوه جناحك ويهددون بيه

-علي الكـرار: ولج سكتيييي

-شيخ علي: انصلمممم انتَ مالك غرض لاا تدخلل!! سلوى رجعي لغرفتج رجعييييييي

-سلوى: ما ارجع

-شيخ علي: رجعييييي لا بعلييي تصير كتلتج الثانية على ايدي

هزت راسها ومسحت دموعها وشالت الجنط ورجعت لغرفتها وعمي رد اندار على علي الحـق اليلفح نار ويرجف بيد كرار وتقي وسور..

-شيخ علي: اسمع ولك چهررتك ماريد اشوفنها ببيتي!! تااخذ چوالاتك وتطلع مناا وبعدد رجليك لو شفتهن عتبن هالبيت احشهنن حشش!!

-رسمية: تطرد وليدك علمود دخيلة علي!!

-شيخ علي: الوليد اليكسر چلمتيي ويعتدي على نسواني ادوس بثررربه واطرده بالاهاناات من بيتي امشيييي اطلععع ولك امشيييي

چلمة ما حچى علي الحـق وسوه مثلما يريد ابوه اشر لـ عبق خاطر تكوم وركضت راحت لاتجاهه، حضنها نص حضنه لجسمه وتمشى بيها لباب المطبخ وراحوا سور وكرار وراه بس گبل لا يطلع اللتفت على ابوه وگال بعيون خابطة بالدم وغصة بگلبه اول مرة اشوفه هالشكل..

-علي الحـق: راح يجي يوم وتتفتح عيونك على السوسة الكاعدة ببيتك كلها مسألة وقت وانتَ بنفسك تطردها من هالبيت!

-شيخ علي: اطلععععع ماريد اسمع صوتك رووح

هز راسه بـ اي واخذ عبق وطلعوا من البيت واحترگت گلوبنا، ظلت عيون عمي تلاحگهم لحدما اختفى اثرهم وبعد ما كدر يستحمل يوكف على حيله طاح على القنفة وكض گلبه تعبان بس ما رضى أي واحد من ولده يتقرب منه حتى عمتي بس سمح لابرار تجي تفتحله دكم الدشداشة وشمس راحت تجيبله ماي..

-رسمية: هيج صارت علي تفضل الغرب على وليداتك وامهم؟ ماكول غير وسفه على سنين العشرة وتعب الايام، صارت هسة كضتي لايدك تضوجك!

خزرها عمي ما متوقع منها هيج حجي واظن هاي اول مرة تسولف وياه هيج عبنه مصدوم ومبين عليه متفاجئ بس ما طولت بالوكفة وخلت وطبت لغرفتها وقفلت الباب على نفسها..

كعد شوي عمي بالصالة صافن بالكاع وصدره ووجهه واذاناته مطعونات من العصبية، محد بينا تنفس حتى الولد اشرولنا نصعد فوك وما نبقى كاعدات وياهم جوه وسوينا مثل ما يردون..

صعدنا كلمن بغرفتها وكعدت انا انتظر علي التـقي يمته يصعد گلبي نار عليهم شجاهم وهيج انكلبت الدنيا بينهم يمتى وشوكت عمي علي طارد واحد من ويلاده ما صايرة من گبل هي مرة وحدة سواها ويه علي الحـق وكله چم يوم وبرد وراضاه بس هالمرة حسيته ما يريده وطردته من كل وگلبه..

فترة طوويلة بقيت انتظر لحدما دكت الساعة 2:45 بالليل ياله نزيت على طگة يدة باب الغرفة ودخل تقي، ذب حسرة عالية ورخى چتافاته وبوجهه اجه وشمر روحه على الجرباية بصفي وغمض عيونه..

افتهمت بي يريد ينام وتعبان وگمت خاطر اطفي الضوه ووگفني من كض ايدي بين ايده حيل وكعدني مرة ثانية على الجرباية، رفع راسه يعاينلي بحركة سريعة وفاجأني من گال..

-شبيچ وين رايحة؟

-اطفي الضوه خاطر تنام

-لا ماريد

-خوش

رجعت اريد اكوم حتى انزل اسويله شي ياكله باقي على لحم بطنه من الصبح گلبي ما ينطيني ينام جوعان بس هم ما خلاني اگوم وجرني مرة اللخ من ايدي ورجع گال..

-وين؟

-راح انزل اسويلك لگمة

-ماريد مو جوعان

-زين خليني...

-انتِ شنو سالفتج؟؟

-شنو

-شبيچ تشردين كلما اجي يمج شمسويلج انا؟!

-ما مسوي شي

-چا شبيچ تگمزين كلما كعدت وياچ؟

-ما گامزة علي التـقي هذا هو راح اكعد صار

-لا.. كومي اذا تردين بس لا تبطين

ابتسمت وكمت من الفراش لبست شال على راسي وطلعت من الغرفة واحس بعيونه وراي، گلبي صار هالگده من الفرح گوة كضيت روحي ما اضحك بصوت عالي على نزته وخرعته من ردت اكوم اخاف لا افسر تصرفه على ان اهتمام ويحب گعدتي وياه لا انصدم بعدين واطلع عايشة بوهم..

نزلت جوه وبوجهي للمطبخ سويت ماعون فواكه وحطيته بصينية وصعدت مرة الثانية فوك لكيته على نفس حطته بس بيده الموبايل يگلب بي، كعدت على الكرسي وحطيت الماعون على الميز وكلت..

-سبأ: جبت فواكه اشتهيت

-بالعافية، علي الحـق طلع لبغداد ويه مرته كال راح يكعدون هناك چم يوم بينما ابوي يهدا وانا وامي نروح للشيخ خاطر يشوفلنا چارة ويه الماي الذبوه بباب بيتهم

فرحت من شاركني بدون لا احتاج اسئله وفرحت اكثر من كام يجي بأتجاهي وجر الكرسي وكعد بصفي واردف وعيونه تفتر على ايدي الجاي تكشر البرتقالة..

-شنو تكولين لو احنه هم نروح فد يومين نغير بيهم جو؟

-نروح لبغداد؟

-اي بس مو هسة خلي وضع البيت يستقر ونروح احنه واخوتي ونسوانهم

-بكيفك

-تحبين ترحين لبغداد؟

-اي انا احب بس رايحة مرة وحدة بس

-وين افتريتي بيها بالضبط؟

-بس للكاظم سلام الله عليه ورجعنا

-هاا يعني ما مفترة بيها

-لا وين ابوي يرضى

-ولا يهمج انا اخذج نروح نزور ومناك نطلع للكورنيش ونتعشا وثاني يوم اخذج للمولات فرفري بيهن حدما تشبعين

-هههههه صدگ؟

-اي عاد انا احب السواگه عكس اخوتي ونستي من اشتري حاجة لـ حبيبة لو امي اكيف اكثر منهن

حچاها بضحك واخذ من الماعون شيف برتقال واكله، ابتسمت بدون لا اجاوبه وهو ما خلى الصمت يكبر واردف..

-المرة الجاية من انزل ان شاء الله اجيبلج حاجة وشوفي ذوقي

-لا لا عندي ملابس انا

-وحبيبة عدها ملابس وهم اجيبلها عادي هي هاي البت تحب تشتري حتى لو كنتورها متروس

-هههههههه

-ليش تضحكين قابل چذب؟

-لا ما چذبت لو تشوف رهف اختي يبووي الملابس العدها تفتح بيهن بسطية

-وانتِ؟

-انا هم عندي بس مو نفس رهيفة هاي تحب هالسوالف تحب تشتري وتكشخ بيهن بالجامعة

-على طاري الجامعة انتِ ليش ما كملتي شمعنى بس رهف؟

-انا ابوي ما رضى بس رهيفة كعدت ركبة ونص لاهلي خلتهم غصباً عليهم يرضون بس ابوي شال ايده منها كالها لا ادفعلج قسط ولا احطلج سايق انتِ تدبرين وضعج

-وشون جاي تدبر وضعها؟

-يعني سنة من السنين اخوي عاصف دفعلها ربع القسط وجدت الباقي من امي واخوتي وباقي السنين دبرت نفسها ويه امي ظلن يسلتن من جيب ابوي واخوتي بدون لا يحسون

-وانتِ شمالج فاهية ما داومتي

-شمعرفني انا ماعندي جرأة اتصالف ويه ابوي لان انا لو حطيت عيني بعينه انكتل

-شگد نگس

اكلت برتقالتي ما مهتمة اصلاً صار الحجي على ابوي ما يهمني ولا يهزني گلبي مات ناحيته وماريد شي يجمعني بي بعد لا من قريب ولا من بعيد..

نمنا هالليلة ومن ثاني يوم طلع علي التـقي ويه عمتي رسمية من الصبح وما رجعوا الا وره المغرب طبت عمتي ونزعت شيلتها وعباتها وكالت..

-اجه الشيخ وقرا على بيتهم الله يحفظه هواي تعب قرا اية الكرسي مادري چم مرة وعلى كعدته ما كام ولا تحرك مگنبص بالباب وفوك الماي يقرا

-ابرار: يلا الحمدلله والشكر

-رسمية: وراهة جاب ماي مقري عليه وشمره على بابهم ولو اگلجن باب بيتهم ماعت ما تصدگوني

-ليلة: ماعت شلون؟؟

-رسمية: والعباس انلوت يدة بابهم چن حط نار عليها ولا يكول شمر عليها ماي بارد

-تَـمني: يممة اسم الله ياربي

-علي التـقي: الموقف جان يرهب الشيخ كال الحمدلله من تلاحگنالهم گبل لا يكبر الموضوع ويصير صعب

-سبأ: يعني هسة مابيهم شي؟ راح السحر؟

-رسمية: الشيخ كال لو جان سحر راح ياخذله چم جلسة ياله يروح بس ما يأثر على علي الحـق ومريته الحمدلله ما دامهم ما داسوا المچان ما يلوحهم شي بجاه علي

ارتاحينا شوية ورحنا للمطبخ نسوي العشا وتَـمني اتصلت بـ عبق تتطمن عليها كالت وضعهم زين بس علي الحـق بعده ضايج وما يتحچى وهي ما جاي تضغط عليه وگاضية اكثر وقتها ويه امها..

-ليلة: سودة عليّ يا خيتي ما تهنيتوا بزواجكم

-عبق: ما رايدة شي بنات غير الله يحفظنا ويستر علينا والله كلما اباوع لروحي بالمراية واشوف عيني شلون وارمة گلبي يوگف من الخوف

-تَـمني: لا تخافين عبق كال الشيخ راح يروح الورم بمرور الايام

-عبق: ان شاء الله يارب

ودعناها وسدينا الموبايل واللتهينا بالعشا، مشى باقي اليوم بملل لا عمي علي كعد ويانه على عشا ولا سلوى طلعت من غرفتها وحبيبة هم حابسة نفسها بغرفتها وكارهة كلشي حتى زلمتها ما تريده..

-ليلة: ولجن باجر يبدي تدريبها الصيفي لازم نقنعها تروح للمستشفى لا ترسب

-شمس: خلوها براحتها بنات هم الله يعينها الجرالها مو سهل

-علي التـقي: سبببأ وينج سبأ!!

رفعت راسي على صوته يصيحلي من فوك وترخصت من البنات وركضت اصعد اشوفه، شفته واكف يم الكنتور لابس دشداشة سودة ولاف چراوية على راسه واشرلي بيده مستعجل..

-طالعة فاتحة انا للكوت سالفة السندات راح نأجلها على السبوع الوراه عبن اريد حق يكون وياي وهو نفسيته ما تسمح هسة خوش؟

-هذا هو مثلما تريد

-يلا بوية محتاجة شي؟

-لا سلامتك بس فاتحة منو رايح؟

-واحد من جماعة الامـير ابوه مات ويريدني اروح وياه.. يلا مع السلامة

-الله وياك....

جفلت جامدة من جر وجهي عليه وباس راسي وراهة باس خدي قريب شفتي وطول شوي.. شهگت بدون صوت وحسيت بصدره انهز بضحكة خفيفة، رفعت عيني بعينه بالصدفة وانتبهتله مبتسم ابتسامة جانبية، هد وجهي الحاصره بيده ومد ايده بجيب الدشداشة طلع جكارة حطها بحلگه وگرص خدي بين اصابعه وطلع من الغرفة..

ظليت فاكة حلكي على حركاته السحلتني اشتعل عدوك يا علي التـقي على هالحركات والشمرات السودنتني يا علي شسوي بروحي شنو جاي يسوي بيه وشيريد بالضبط غير يفهمني هالزلمة مو والله راح اتخبل..

**

-ليلة: كومي حبيبة شبيچ باجر عندج دوام!

-حبيبة: طلعي ماروح

-انجبيي غصباً عليج ترحين چا ترسبين احسن؟؟

-ما ارسب طلعب وعوفيني ليلة تعبانة

-عايني اذا تعبانة من وره سوالف امج تره من يوم يومها سلوى هيج ليش مستغربة وضايجة؟

-اي

-سولفي حبيبة لا تكتمين بگلبج حاچيني

-ماكو شي حبي لا تضوجين روحج

-چا ليش تردين تطلگين؟

ضميت عيوني بچف ايدي وذبيت نفس هلكانة، تعبت وانا اكتم واسكت تعبت وانا اتحمل هالعيشة المقززة وما اللوم الموجودين من يسألوني عن وجهي المگلوب كل وكته، من يوم تزوجت منتصر وانا احس بجزء مني فقدته.. فقدت الحب الچنت موهمة نفسي بي وعايشة عليه فقدت ضحكتي الاحبها وطاقتي الايجابية فقدت هوااي من تزوجت هالزلمة وياريت يرجع بيه الزمن وما اخطي هالخطوة الغبية..

أيست مني ليلة وعافتني وطلعت من الغرفة وانا هم حطيت راسي ونمت بطرانة عبالك بالنوم راح تنحل كل مشاكلي.. ثاني يوم كعدت ومن الصبح كلت لـ علي الكـرار يرجعني للبيت خاطر اجيب چم حاجة وارجع لبيت اهلي..

-علي الكـرار: شلونچ حبيبة

-زينة، انتَ شلونك

-زين..

سكت بس احس بلسانه حجي اعرف كرار من يلوب على شي ما يكدر يكض نفسه فـ قررت اسهل الموضوع اله وانا اسئله..

-شبيك كرار مبين مهموم؟

-ليش عاجبچ وضع بيتنا والخربطة الجاي نعيشها

-لا والله ما عاجبتني بس چن ضوجتك على غير شي

-لا لا ماكو شي

-سولف كرار كول لا تظل تتهرب

-احم.. حبيبة.. احم

-احجي طلعها للدرة

-حبيبة من الاخير عندج تواصل ويه تالة لو لا؟

-تالة بت خالة تَـمني؟؟

-ليش چم تالة نعرف لخاطر مكة يا حبيبة شمالج انتِ

-ها شمدريني

-الزواج هم لحس عقلج

-هاي شبيك اكلتني لا ماعندي تواصل وياهة وصار شكد ما شايفتها

-ليش ما تتواصلين؟ مو عيب عليج مو فشلة؟؟ شون صديقات انتن صدگ جذب والله عيب حبيبة ماحبيها منج هاي وانتِ ام الاصول وشيخة الشيخات تالي عالبت الفقيرك المسكينة ماعندج تواصل وياهة وسفه عليج

-اوكف اوكف لا تاكلني بگشوري كرار تره انا ماعندي تواصل ويه أي وحدة من صديقاتي من طحت بالتنور لليوم مالي خلك نفسي

-چا تواصلي وياهن حبيبتي انتِ رجعي تواصلج ويه الوادم وضغطي اليكرهونچ

-ههههههه شعندك كرار كول لا تظل تلف وتدور

-شعندي ماعندي شي كلشيي ماعندي ابد

-هاا خوش

-هاي شنو!

-شنو

-ما راح تلحين عليَّ خاطر اسولف؟ حبيبة انتِ هم تغيرتي اي بعلي من تزوجتي دكتور تغيرتي علينا

-خايب سولف كول يا بعد اختك يروحلك فدوة الدكتور

-هاااا

-وعلي

-جذابة منتصر يروحلي فدوة؟

-راح تسولف لو لا

-اسولف! حبيبة انا عاشگ تالة

-شنووووو

-شنيي شكوو قابل كتلج احب نعاالة ليش شبيها تالة ما عاجبتج

-ولك لاا مو هيج بس مادري انصدمت ماتوقعت هالشي

-عبنها احلى مني مو؟

-لا حبيبي مو هيج بس يعني مادري...

-اي عبنها احلى ادري انا انتن البنيات ما يعجبچن الزلمة المؤدب والفقير تردنه صاك وملعب وابو نسوان ياله تقتنعن بي

-بالعكسسس شتحجي انتَ كرار ياهي هاي تحب ابو النسوان بس انا قصدي تالة تعرف بيك تحبها لو لا؟

-لا

-امممم

-وهذا السبب انا اريدج تجسين نبضها تشوفيها هاويتني لو اأيس؟

-واذا ما تحبك شتسوي؟

-مادري

-چا غير تعرف اذا ما تحبك شتتصرف؟

-مادري.. مادري حبيبة شمالج متشائمة خليني متفائل ومتحمس واخطط لحياتي وياهة

-ههههه لهدرجة تحبها كرار

-سكتي ماريد اسولف

-هاا ولك

-سكتي خايبة كاعد على نار

-ههههههه والله غيرت مزاجي لا تخاف راح احاچيها واشوف شتكول

-عايني اوكفي شتگليلها؟؟

-اشوف البت خاف محجوزة لو مخطوبة شمعرفنا

-مخطوبة شنيي بعلي انجلط تحجين صدك انتِ؟؟

-اي كرار بعد اذا مخطوبة خوب مو قسمتك تكون

-مو من قسمتي؟؟ ولج سبع نذورة لشريفة بت الحسن ناذر كلما اشوفها اشدلي علگ وانذر نذر جديد

-هههههههه خرب والله ضحكتني ولا مبين عليك هيج تحب

-ضحكي ضحكي وخليني انا متفرگع حتى طفح جلدي صار عندي عايني

-ايييع

دفرت ايده الحطها بوجهي ونزلت من السيارة بعدما وصلنا للبيت، گتله لا ينتظرني اخاف اتأخر وانا اللملم اخلي منتصر يرجعني خاطر نفض هالسالفة للاخير..

نزلت للبيت وتلگني بناته التوأم سودة عليَّ ما راح اشتاق ولا اتأذه على فراگ غيرهن تعلقن بيه وحبني من كل گلبهن ذني البنيات الچانن يشردن مني كلما اجي يمهن صارن يحبني چني امهن..

-حبيبة: هلا هلا برويحتي هلا ببناتي

-رقية: عمة انتِ وين ليش ما تجينه؟

-سكينة: اي احنه نذعل من ترحين

حضنتهن لصدري ومسحت على شعرهن الحلو، رفعت عيني على صوت هدية جاي من فوك تدردم وتفر بيدها..

-زين من تذكرتي عندج بيت وشرفتي

-حبيبة: ما تذكرت

نطقتها ببرود واخذت البنيات وفتت لغرفتي وتفاجأت من شفت منتصر هستوه جاي يطلع من الحمام سابح ولاف روحه بمناشف.. ابتسم ابتسامة واسعة من شافني وگال من كل گلبه..

-يا هلاا بالغايب زين من تذكرتنا

-حبيبة: السلام عليكم

-عليكم السلام والرحمة والاكرام زين سويتي من رجعتي اليوم البنيات اكلن راسي عليج

-اجيت اخذ چم حاجة وارجع لبيت اهلي

غابت ابتسامته وصفن يعاين لوجهي، عفته واكف بدون لا ازيد بالحجي وفتحت الكنتور اطلع منه ملابسي وهو طلع بناته من الغرفة ورجعلي..

-حبيبة ليش هيج جاي تسوين ليش تردين تخربين حياتج بالكوة؟؟

-ما اخرب حياتي ان شاء الله لا تخاف

-اذا انتِ ما تردينا نصير حالنا حال المتزوجين هذا هو مثل ما تردين انا بجهة وانتِ بجهة بس لا تتطلگين وتعوفينا

-واخرب حياتي واعدم شبابي على شنو؟ ولخاطر منو؟

-شنو قصدج تردين تزوجين وره ما اطلگج؟!

-محد يعرف الغيب

-حبيبببببة!!!!

-منتصر ما اتزوج انا عن نفسي هسة اذا تكلي تتزوجين لو لا راح اگلك لا يعجبني ابقى عايشة ببيت اهلي معززة مكرمة بدون لا اعيش جوه رحمة زلمة

-چا شني تكولين ما نعلم الغيب؟!

-لان صدك ما نعرف يجوز يتغير تفكيري بعدين مادري

-وتحجيها بوجهي بكل وكاحة؟!!

-شتريد منتصر تريدني اچذب عليك واگلك انا اقرا المستقبل؟؟ لو تريدني ابقى عايشة ببيتك خاطر اتشوه وانهان؟!

-بعدج تتهمين خواتي وحسبالج هنه الوكعوج بالتنور مو؟

-ما اتهم احد ومسلمة الطيحني بيد ربي اذا جانت بنيتك سكينة فـ مسامحه وموهوبه جاهلة وما تعرف بس اذا چانت وحدة من عمات سكينة فـ لا كون الله ياخذ حگي

حطيت الملابس بالجنطة وباقي احتياجاتي وهو على وكفته ما تزحزح شكد حاچاني وشكد راد اتنازل وابقى وياهم واكمل حياتي مثلما اريد وعرض عليَّ حتى يطلعني لبيت وحدي بس ايد ولا كدرت اتنازل اعرفه ما يحجيها عبنه يحبني هو حب اهتمامي ببناته وراحتهن وياي وما يريد يخسر هالشي..

-حبيبة: توصلني لليت اهلي لو اخذ تكسي؟

-حبيبة كااافي شبيچ انتِ ليييش ما ترضين بشي ليييش

-ارضى بالطلاگ منتصر اليوم راح احاجي ابوي بالموضوع ونخصمها

-مااا اطلگ!

-طلگ ومتنازلة عن الحاضر والغايب وكل حلم رسمته وياك

جر دشداشة مستعجل يلبسها وانا شلت الجنطة وطلعت من الغرفة وعفت البنيات يركضن وراي يردني اللعبهن ما يدرن بيه طلعت من هالبيت وناوية ما ارجعله وانا مرة لابوهن.. فتحت باب الحوش وجاي اطلع وكضني منتصر من زندي حيل ونتر وعيونه بعيوني..

-لا تظلمين بختج وتظلميني وياچ لاا تتهورين وتسوين شي تندمين عليه باجر

-اذا على ظليمتك فـ ما اظلمك رايحة بنفسي اسولف ويه رهف واقنعها ترضى بيك وانا بنفسي اروح اخطبها الك.. واذا الندم فـ ما اندم ان شاء الله دام راس ابوي واخوتي التسعة يشمون الهوا بعمري ما اندم على شي

فلتت ايدي منه ونزلت الدرجات ورحت اوكف يم سيارته معناها انتَ وصلني، هز راسه مأيس مني وسوه الاريده بدون لا يعاند وهالشي موتني.. موتني لانه برد لدرجة هدأ واختفت عصبيته وعرفت السبب ليش، صار عنده امل ينجمع ويه رهف من جديد وهالشي الخلاه يسكت ويوصلني لبيت اهلي بدون لا يحجي وياي حجاية زايدة..

طبيت البيت ونفس كلل يوم صعدت لغرفتي وتمددت على جربايتي وبجيت لحدما تعبت وغفيت بمكاني وهيج مشى يوم جديد وانا على حالي التعبان.. ثاني يوم شكد انتظرت ابوي يرجع خاطر اسولف وياه بي ماكو ما جاي يدوس البيت من يوم تعارك ويه علي الحـق وهو صاير كبريت ما يتحچى وما ينطي لواحد مجال..

افتهمت بي كلش مهتم لموضوع علي الحـق وعبق وكل يوم يروح لبيتهم ويبقى ويه الشيخ الجاي يجيبونه يقرا قران ويحصن البيت ويدعيلهم بس ما يرضى لاحد يوصل هالشي لـ حق لان بعده مزاعله وما طايق شوفته..

مشت ايامنا والبيت ممل لدرجة لا يطاق، امي بعدها ما تحاچيني وانا عايفتها براحتها ماريد اضغط عليها زايد لا تنفجر بيه وتكبر المشكلة والولد كلهم يطلعون من الصبح ما يرجعون الا توالي الليل واحنه البنات نكعد حاطين ايدنا على خدنا نتصفن ونسولف بنفس المواضيع..

صار وكت اداوم بالمستشفى انا اسبوع ضيعت مغلسة على التدريب الصيفي بس بعد ما يصير خاف يجيونا تقييم وما يلوگوني.. كعدت من الصبح سبحت وبدلت ووكفت على المراية اعاين لروحي وگلبي يتگطع، الاثر بگصتي خفيف كلش بس الاثر مال حنچي ورگبتي واضح حتى وره ما گشطولي الجلد.. خوب ايدي بعدني استحي اطلعهم من منظرهم واللبس چفوف سود..

نفضت عقلي من افكاري السلبية وقويت نفسي وكلت لازم اداوم اليوم لازم اتشجع وارجع لحياتي القديمة وطز بالصار گبل.. الماضي ما راح اكدر اغير منه شي بس الله معوضني بحاضر ومستقبل اكدر اشتغل على نفسي واكمل حياتي بالطريقة الترضيني صح الموضوع صعب بس مو مستحيل..

طلعت ويه علي الكـرار هو وصلني والطريق كله اكل گلبي لان عرف ما تواصلت ويه تالة بعدني، وعدته خلال هالچم يوم اروح ازورهم ويه تَـمني واجيبله اخبارها ياله سكت وارتاح گلبه..

-علي الكـرار: حبيبة أي شي تحتاجينه اتصلي بيه اجيچ لا تترددين

-ماشي حبي

ودعته ونزلت بي احس بروحي متوترة كلش، سميت بأسم الله وطلعت الكمامة من جنطتي ولبستها ودخلت للمستشفى وصارت بوحهي صديقاتي الجنت اتهرب منهن خجلاً لا يشوفون شكلي التغير..

-حبيبة بنات هاي حبيبة

-هلو حبي حبيبة شلونچ

-يعمرب شكد مشتاقيلج وينج ولج وين هالغيبة

-والله انا كلت بعد ما تداوم طاح گلبي وكضيت صديقتج حور احقق وياهة

ابتسمت على ملگاهن ورحت اسلم عليهن وحدة وحدة بدون لا انزع الكمامة، بعدني كلشي ماعرف هنا وين اروح وشنو راح نشتغل بس هنه لان گبلي مداومات يعرفن ويندلن وكله وياهن بقيت..

ضحكت على تدريبنا لان ما جاي يخلونا نسوي شي نهائياً بس واكفات ونتفرج على المحللين يسحبون دم ويتعاملون ويه الاجهزة ما يرضون لأي احد غيرهم يشتغل واحنه احترمنا هالشي ورحنا نكعد بالكافتيريا..

-حبي شلونها صحتج؟ بشري وضعج احسن؟

-حبيبة: الحمدلله زينة بس شوي حنچي جاي يحرگني عبن عرگت

-نزعي الكمامة حبي صدك جذب شجاج حبيبة والله چنج البخت

-حبيبة روحي للطبيب خلي يعقملج المكان لا يلتهب وعوفي الكمامة رحمة لوالديج

تورشعني كلهن من كل جهة وجبرني انزلها واروح اشوفلي چارة ويه الحمار الصار بحنچي هو صدك كلش جاي يحرك بس ماريد اروح لا اتلاگه ويه حاكم بس وين يرضن يعوفني بحالي سحلني سحل واخذني للطبيب والحمدلله والشكر من ما لكيته موجود وكاعد طبيب بديل عنه..

دخلوني بسرعة بدون لا انتظر بالسرة عبن لابسة لاب كوت وكعدت على السدية خاطر يفحصه، بعده هستوه جاي يلبس چفوفه ويجيني وانفتحت الباب ودخل حاكم مستعجل.. توترت وسويت روحي ما شفته ودرت عيوني بس چنه هو الما انتبهلي ولا عاين بأتجاهي ووگف بصف الدكتور يسولفون عن حالة مرضية او يجوز مشكلة لان حاكم كال..

-حاكم: اني ماتدخل بعد دكتور رضا شوفلهم چارة لان الموضوع بده يزود عن حده

-رضا: على بختك دكتور صلي على محمد الموضوع ما يستاهل

-حاكم: يستاهل من الموضوع يوصل لاهلي فـ يستاهل! على أي اساس خفارته 22 ساعة والباقين خفارتهم 12؟؟

گالها متنرفز ودار وحهه يتأفأف ولمحني بعيونه، دار عيونه عني بساع وكمل حديثه ويه الطبيب وطلع ورجعلي الطبيب يفحص بحنچي وكتبلي علاج، تشكرت منه وطلعت ورجعت اريد اللبس الكمامة وحسيت بيها تنجر من وجهي بحركة عنيفة..

اللتفتت مخنزرة اريد انتر بالسوه هيج وبلعت لساني بساع من شفته حاكم، ما توقعت حركته وتفاجأت منه وهو هم ما بررلي وكض الكمامة وگطع لاستيكاتها وثقبها بأصبعه من الوسط وگال ببرود..

-لا تلبسيها بعد

-انتَ شعليك دكتور اسمحلي بس هالحركة مو حلوة

-تمام

گالها وعبرني يكمل طريقه يروح، بلعت ريگي اهدأ من نفسي ونويت ما احجي شي ولا اسبب مشكلة الصار مو مهم وتافه خيولي شعليه بي.. رجعت للكافتيريا يم صديقاتي وشفته هم هناك واكف جاي يريد يشتري اكل غلست عليه وظليت كاعدة ويه البنات لحدما خلص الدوام ورجعلي علي الكـرار..

هرولتله بخطوات سريعة ودخلت للسيارة وقضيت الطريق كله على الصامت مالي واهس احجي، رجعت ومن الباب تلاگيت ويه ابوي واكف وبيده صوندة جاي يسگي الساحة شعجب؟ هاي اول مرة يسويها..

-سلام عليكم

-شيخ علي: هلا بوية عليكم السلام

رحتله بوسته ووكفت بصفه، سألني عن حالي ودوامي بس مو نفس گبل ما يسأل بلهفة مبين عليه تعبان والدنيا طالعة من عينه..

-شبيك بوية مبين عليك مهموم

ذب حسرة عالية بدون لا يجاوب وظل يسگي بالزرع، شفت بملامحه تتغير وشفته رجفت حزت بنفسي اشوف ابوي بهالوضع والحيرة وماعرفت شلون اخفف عنه..

-بوية علي الحـق ما يعوفك صدگني ما يعوفك

-صارله چم يوم لا حس ولا نفس منه وينه؟؟ كل يوم اكعد الصبح احسب واكول راح يجيني يحب ايديناتي ويعتذر بس ماكو ما شفت طوله

-بوية الله يلوم الي يلومه هو صح غلط بحگ امي بس ماعرف مشاعري ازعل منه لو عليه

-عوفي حق هسة سولفيلي انتِ شبيچ يا بعد ابوج؟ شو مهمومة وحالج ما عاجبني

-بوية اخاف مو وكتها اسولفلك البيه البيك مكفيك

-افااا وانا ابو علي سولفي بوية ولا تترددين حاجيني ياهو مزعلج؟

-محد مزعلني بس.. بس انا ما مرتاحة بزواجي

-شنو!

-والله ما جاي ارتاح ولا جاي اتقبل عيشتي الجديدة تعبانة ونفسيتي مصفرة

-منتصر مسويلج شي؟؟ مزعلج؟ مضوجج؟؟

-لا لا منتصر خوش زلمة والنعم منه بس انا ماريد.. ماريد ابقى وياه دخيلك يا بوية اوگف وياي وخليني عندك

-حبيبة ابوج انتِ يمي وبگلبي بس الجاي تحسين بي طبيعي هاي المشاكل تصير بين كل المتزوجين ودائماً اول سنة زواج تصير صعبة لا تخافين كله چم يوم وتتعودين على وضعج

-لا لا ماريد بوية ماريدنه انا اعرف نفسي ما راح ارتاح

-حبيبة..

-انا اريد اتطلگ!

فتح عيونه چن مصدوم من قراري وليش ما ينصدم يا بت تجي لابوها وره فترة قصيرة من زواجها وتكله اريد اتطلگ، دار وجهه مني للساحة يكمل سگي بدون لا يجاوبني وظل هيج لفترة من الزمن باقي صافن ويتحسر..

-بوية

رجع عيونه لعيوني وبعده هستوه جاي يفتح حلگه يحاچيني واندكت باب الحوش علينا، اشرلي اطب جوه وركضت للمطبخ ومديت وجهي اعاين من الشباچ وتفاجأت من شفتها...

-ابا الحسن علي: هاا حبيبتي رجعتي

-الامـير علي: چا تريدها تبات

اللتفت على ابا الحسن والامير ثنينهم اجوا للمطبخ وتَـمني واكفة وراهم وبيدها شايلة صينية، تقرب مني الامير عاكد حاجبه وتسائل عن منظري بس ما لحكت اجاوب لان ابوي طلع من باب الحوش مستعجل وطبت بداله البت ومال حاضر كملت طريقها النا وفتحت باب المطبخ وگبلت علينا..

اجتنا بت لابسة بوشية وظاهرة منها عيونها الخضررر البارزات بشكل فضيع من البوشي، صفنت بوجهها شوي اتمايزها وبدون لا ترفع البوشية وتبين وجهها ميزتها ياهي رغم جنت صغيرة بس ما انسى الجرالها بسببنا..

-حبيبة: وديان

رفعت البوشية من وجهها وطاحت دموعها، شهكت بحس عالي ونترت بـ الامـير علي الواكف كدامها..

-وديان: عمتي ماتت

-الامـير علي: ام فاضل ماتت!

-وديان: اي ماتت اي.. ماتت عمتي وعافتنا

تقدمت تَـمني مستعجلة بخطواتها حطت الصينية على المجمدة واللتفتت للامير تأشر على البنية وتسأل..

-منو هاي امير؟؟ منو هالبنية؟؟ انتِ منو بلا صغراً ما عرفتج؟

-وديان: گولي لزلمتج يسولفلج عني

-الامـير علي: الله يرحم ام فاضل خيتي ويصبركم على فراگها

-وديان: بس؟؟؟ بس الله يرحم ام فاضل؟؟ هذا الله گدررك عليه يا الامـير علي!! يا شييييخ الامارة من بعد عين ابووووه

-الامـير علي: وديان صوتج عالي ومو حلوة بحگچ طبتج علينا هالشكل

-وديان: طبعاً اي اي صح طبعاً تخاف على سمعتك تخااف لا تتشوه صورتك يااا غدار اخووووووي يااااا الذبحتت اخوووووي

-ابا الحسن علي: وديااان صلي على محمد خوية والله يصبركم بس الامير شنو ذنبه

-وديان: شنووو ذنبه؟؟ شنو ذنبببه؟؟ ولكم بعدكممم الكم عيييين وتسألون شنووو ذنبببه

-تَـمني: فهمونيي شديصيير امييير احجيي

-حبيبة: وديان حبيبتي تعالي ارتاحي هنا تعالي تفضلي ارتاحي

ثاارت من تصرفي ودفعت ايدي متخبلة، حيلها ما حملها و طاحت بالكاع تلطم على وجهها وراسها لدرجة راد يطيح الشال من راسها بس البت فاقدة وما حاسة، انخبص البيت عليها خبص اجت امي رسمية تركض واجن البنات يتسائلون وتَـمني بس ظالة تلتفت وتعاين للامير الي وجهه صار ازررگ..

-وديان: الله لا يوفقك يااا الامير ولاا يسهلك دررب الله ينتقممم منك اشددد انتقام ويهدددم گلبك!! عسى حوبتي مااا تتعدااااك

-رسمية: لااا تدعين سكتيي لا تدعين على ابنيييي

-وديان: چااا حلال على ابنج يكتل اخوي؟؟؟ حلال عليه وحرام عليّ لو دعيت!! لليوووم اخوي يجيني للحلممم ومااا يكول غيررر اسممك اميررر انتَ الكتلت ضرغاام وعدمتت شباابه.. اااااااخ يا وجع رووحي من اشوفك واسمعك تحلف بعزيز گلبك المغدور بس ماااكو غيرررك الغدرره مااكوو غيرررك الكتللله

تصيح بكل حسها انبح صوتها وما جاي تخلينا نهديها كضيتها حيل اريد اسيطر عليها بس ما تنطي مجال، دفرتني وكامت تروح للامير وكفت كباله تضرب على صدرها بكل حيلها وتصيح..

-يتمتتت اولاااده يا الامير يتمتناا وخليتناا بعازة الززلمة عشتتت ضييييم من بعد عينه ضييييييم شفت المُرر والعذاااب عاين لايددي وللك عااين لايددي عاين لصدرري عاييين لوجهييي عاين شصار بيه عاااين

تفتح بدشداشتها وترفع بردانها وظهرت علامات حرگ.. حرگ غميج ومتكرر عليها اكثر من مرة بنفس المچان ورگبتها صايرة خريطة من الزراگ.. من الصدمة محد بينا نطق والامير وجهه صار اصفرررر وحتى حجي ما يعرف يحجي بقى مبحلگ عيونه بوجهها وعيونه مشخصة..

-عاااين لحالي عااين شسوويت بأختت صاحبك الجانت مدللة، خذيته ويااك وهديت حيلي وبرگبتي جهال ثنين!! اخوتيي جهال ثنين مثل الورود عفتني اربيهمم واتصااارع مصاارع ويه العدوو خاطر احافظ عليهم تجرعتت العلگممم وحدي وانتَ هنااا كاعد تعشگ وتتمعشگ وعااايش حياتك بالطول والعررض وتحلف بروح اخوي المااكو غيرك غدره!! مااكو غيرك يتم عيااله وحرمهم من حنانه!!

-ابا الحسن علي: اميير.. امييير شبيك امييير امييير يمممه ولللج يممممههه......

يتبع 👑....

━━━━━━ ♛ ━━━━━━

الإمـــارة 👑

#الامارة

بقلمي: زهراء السلامي 💎

لتنسون التصويت + التعليق بين الفقرات + متابعة لحسابي 💙.

وانا فاضحني حزني عليك شما لبست اللوان

يبقى اللون الاسود تارس خيالي... 💔

━━━━━━ ♛ ━━━━━━

"قبل اكثر من سبع سنوات"

-خايب روح ما اجي والعباس

-ابو كربله: يهلك تعوفنا وحيدنا

-انچب وادعبل منا مالي خلگ نعسان اريد انام

-الامـير علي: ضرغام اذا ما اجيت بعد لا اعرفك ولا تعرفني وانعل ابو اليحاچيك بعد

-ضرغام: هاا! يعني غصباً عليَّ تاخذني!

-الامـير علي: اي چا بس انتَ من تريدنا نديح وياك تاخذنا غصباً عن الخلفنا؟!

-ابو كربله: عوفه خيولي خلي نايم بالبيت مثل العجيزات

-ضرغام: اكل تبنن انا انام بالبيت مثل العجايز؟؟ طالع طالع من انعل عشيرتكم

ضحكنا منتصرين وابو كربله ظل يهز بچتافه فرحان، اليوم عيد ميلاد "ليث" ابن عمي مسعود ونريد نفاجئه وناخذه لمچان نتونس بي ومناك نطلع نتعشا، ليث الوحيد من ولد مسعود احبنه ومصاحبه وزلمة من صدگ واخو خيته وگفلي وگفات حلوة رغم كرهي لـ مسعود وولده بس ليث يختلف عنهم..

-ابو كربله: ضرغام هم صاير خايس وما يتحچه بس لا يطلع عاشگ واحنه ما ندري؟

-الامـير علي: خيولي ياهي تگلبه راسه راس الفجله

-ضرغام: غبت عنكم دقيقتين گصيتوني انتم شون صحبان مادري

حركنا دراجاتنا وطلعنا نضحك ونمشي على كيف خاطر نكدر نسولف سوه وما نضيع دقيقة، بالطريق اتصل بينا ليث وسأل عن مچاننه وضرغام گال..

-خلي نروح لكهوة وراهة نطلع نتعشا

-ابو كربله: هذا هو صايرين

-الامـير علي: لا انا اريد اطير تاير ونتونس

-ضرغام: لا امير انا گتلك مواعد اهلي ماعيدها بعد

-ابو كربله: هذا هو عوفها عود غير مرة نروح اموري

-الامـير علي: والعباس الا اروح ما يعجبكم لا تجون طبكم مرض

-ضرغام: امير ابوك ما يرضى تلوت بالدراجة شبيك انتَ ما رايد حياتك؟؟

-الامـير علي: چا هي الحياة شبيها اذا ماكو ونسة المن عايشين امشوو امشوو لا تصيرون نثايه

-ضرغام: اموري برگبتي عائلة اذا متت ياهو يفيدني

-الامـير علي: العار ما يموت

كلتها وضحكت اطلع منطلق كدامهم وفوراً رفعت دراجتي على تاير واحد اركبها، روحيي بالدراجة النارية وماحب أي دراجة احب الضخمة والسبورت احب صوتها يوصل لسابع جار من علاته وتايراتها تفحط من امشي..

اخذتلي جولة بالشارع ورجعتلهم لكيتهم واكفين يم دراجاتهم وليث هستوه واصل، نزع الخوذة وعلگها على الدراجة وكعد على الرصيف..

-هاا ليث

-ليث: هلا بأبن عمي

-الامـير علي: شبيك شو ضايج

تحسر وتلفت يعاين لـ ابو كربله وضرغام عرفته يستحي يسولف كدامهم فـ تقربت منه وكعدنا ثنينا على الرصيف، اشرلي على وجهي وكال..

-ليث: شون بيك ما تلبس خوذة انتَ الا تسويلنا قدر

-كلمن ويومه خالوو

-ليث: امس اجتنا فراقد للبيت وكعدت تحجي براس امي تريد تگلبها على ابوي ومن ابوي افتهم طيح حظها وطردها من دارنا

-الامـير علي: بس لو افتهم هاي شكو مگابلتنا وكل يوم داگتلها باب واحد بينا ارتاح

-ليث: اموري ابوي غلطان وابوي مو خوش انسان ادري عنده مكسرات وسوالفه ما ينلبس عليهن ثوب بس امي تدري بهذا الشي وراضية ياخوية راضية وتكول لو ابوكم كومني براشدي وكعدني براشدي هم ماعوفنه وبكل مرة تجي فراقد تحجي براسها وتوزها وامي تنگلب على ابوي وتنكتل وتكعد وتسكت وره الكتلة لا تاخذ موقف ولا تضوج منه هسة انتِ من ماعندج نية تعوفين هالزلمة وتعرفين ما راح يتغير وراضية بي ليش كل مرة تجيبين الاهانة لروحج؟؟ امير انا هم تحز بگلبي من اشوف ابوي يكتل امي كدامنا ويشيل الصوندة علينا يكتل بينا وراهة لو تدخلنا وفاككناهم

-والله مادري شگلك ليث انتم عيشتكم كلها غلط بغلط

-ليث: شنسوي خايب هذا هم حظي انولدت بهيج عائلة

-ميخالف محد اختار اهله بس ديربالك تمشي على درب ابوك واخوتك تره اخرتهم معروفة شني

-لا شني تخبلت انا لو ملت شوي حلم عمري بعد اخذها هي هيج وما راضية بيه انوب اصير سرسري

-ههههههه بعدك عاشگ زهراء بت عمي صمد

-ولك اتنفسسس زهراء انا اشههگ بأسمها

-چا ما تسولفلها يا ليث لو الا تروح من ايدك ياله ترتاح

-بعدها صغيرة اموري مو مال هالسوالف وانا ادري بحظي بس تفتهم بيه رايدها تنچلب عليّ بالزايد

ضحكت اهز براسي مأيده لان صدگ بنات عمي بس يفتهمن واحد رايدهن وعاشگهن ينفرن منه مادري شسالفتهن هذا ابا الحسن اخوي مگطع روحه على ليلة وهي تمشي وتصيحله خوية..

-ابو كربله: شو گضيتوها سوالف وعفتونا ولكم سرسرية

-ضرغام: خليهم براحتهم يجوز امور عائلية

-ليث: امور مسعودية صح

-ضرغام: هههههه حي الله عمي مسعوود

-ليث: شكد عار

-ضرغام: ولك امير وينه ابا الحسن بعلي ما تحلى الكعدة بدونه

-الامـير علي: خيولي الخايس مزاعلني

-ابو كربله: اوووف يعني اليوم تنام بره الغرفة؟

-الامـير علي: انام بعتبة بابه بلچن يلين گلبه

-ضرغام: شمسويله ولك

-الامـير علي: ما مسوي شي هو كله شلت جهاز الاتاري مدري شسمه مالته ورگعته بالحايط وفلشته قابل شسويت

-ليث: ابد كلشي ما سويت

-الامـير علي: اي هو يبالغ گابه هرموناته هالفترة

-ابو كربله: بس لا حامل؟

-الامـير علي: حامل هموم وبواري

ضحكوا على اخوي المهموم واحس گلبي لچمني شجاني وضوجته اليوم وهو چان متحمس على طلعتنا ومحضر روحه من امس، طلعت موبايلي اتصل بي چم مرة بس ما يجاوب واخير شي طلعلي الرقم غير داخل في الخدمة العار شون يهله گلبه يزاعلني..

-ليث: هاا شباب راح نبقى كاعدين على الرصيف ويكتلنا الحر ما نگوم لمچان بي سگف عاد

-ابو كربله: اخر جولة ياهو يسابقني؟

-ليث: انا!

-الامـير علي: انا!

-ضرغام: شباب شساالفة شمالكم وياي جاي اگلكم بطلت وتبت ما اسويها بعد

-ليث: هي مرة شبيك ولك

-ضرغام: خرب روحكم بس مرة وبعد ما عيدها من هسة اگلكم

تحمسنا وكلمن ركب دراجته وانطلقنا نتسابق ومثل كل مرة لو انا لو ليث نغلبهم والعزيمة تطيح براس ابو كربله هو يدفع العشا..

-ليث: يلا اصلاً اليوم ميلادي اول تالي ما راح ادفع فلوس العشا

-ضرغام: صار وبعيني

ابتسمت وشفت ابو كربله يغمزلي، هزيت راسي مفتهم قصده وكملنا طريقنا للكهوة الي دائماً نكعد بيها وبصفها صاير واحد يبيع كباب شوي وتكة نحبها.. وصينا كلمن نفر كباب وكعدنا ونسة وضحكة وفرحة وعلى كل لكمة أتنغص لابا الحسن عقلي وياه ومتمني يكون ويانه..

-ابو كربله: يلا شباب عزيمتكم عليَّ اليوم

-الامـير علي: نص بنص انا وياك

-ضرغام: لا شني انا هم وياكم

-الامـير علي: عود على المرة التجي انتَ ادفع العزيز

-ضرغام: وهاي نظل كل مرة نطلع تعيدلي نفس الحچاية ماكو انا ادفع هالمرة

-ليث: خايب انتَ ليش مطي؟ رزق واجاك لا تظل *****

سكت بس وجهه انگلب ما حچينا بعد بالموضوع بس ظل الكعدة كلها ضايج وحسيته تحسس من چلامنا وافعالنا وياه بكل طلعة، ما يرضى ندفع فلوس عشاه وصاير حتى طلعة ويانه كوة يطلع بسبب هالشي بس احنه نعرف حياته ونعرف عيشته شكد صعبة ويلم الربع على الربع خاطر يجيب لاهله لگمة من شغله بهالدراجة..

-ضرغام: وين رايحين

-ليث: اغسل واوصيلنا چاي

-ابو كربله: جاي وياك

گاموا وعافونا وحيدنا وچن ضرغام ما صدگ بيهم گاموا واللتفت عليَّ وبدون مقدمات كض ايدي وحط بيها عشرة الاف وكال..

-بداعة امك تاخذها مني ولا تخجلني امير

-شكو اخذها انا عازمك

-امير لا تحرجوني ما ارضى بهالوضع كافي مصخت

-مصخت عبنه نعزمك لو مصخت صداقتنا؟

-انتم صحباني والنعم منكم والكعبة لو افتر الدنيا كلها ما اللگه خوة مثل خوتكم بس ما جاي اتقبلها كل مرة تدفعولي جاي احس بروحي ثگيل وانا ماحب هالشي

-كل هذا علمود نفر كباب ولك ضرغام؟

-اي

-ولك حسبتك من حسبة اخوتي شتحجي انتَ؟ هذا ابا الحسن يا يوم طلع وياي ودفع حسابه؟ ماكو كل مرة شامرها براسي بس انا ادفعله وما اهتم عبنه اخوي وصاحبي ويشهد الله انتَ بحسبته ما افرق بيناتكم ولا بشوي

-ادري امير اعرف بيك والزهرة ادري بگلبك ونفسيتك شكد حلوة بس انا استثگلها اذا تريدني اظل اطلع وياكم ترضى تاخذ مني هالفلوس حلفتك بداعة امك

-جيب اذا هالشي يرضيك جيبهن

ابتسم فرحان من اخذتهن منه وذب نفس مرتاح، حطيتهم بجيبي ووصيت على نراگيل الي واله وللولد ودفعت فلوس الكل خاطر ما يحسني مميزه عنهم..

رجعوا الولد كعدوا شوي ويانه وكاموا يسلمون على جماعة اجوا يعرفونهم ورجعنا بقينا وحدنا انا وضرغام، جريت نفس من النركيله وسألته..

-الامـير علي: شلونهم الصغار؟

-ضرغام: يبوسون ايدك

-بعدهم وكحين نفس زوج المشاكل العدنا

-ولك يا وكاحة غير راح يجلطون رضيعتي

-الله يساعدها

-مو طبيعيين امير كل يوم حاطيها وكاتليها وتجيني تبجي عمت عيني وما استحمل اشوفن دموعها اروح واكتلهم ويهجمون عليَّ ثنينهم ويرجعون يكتلوني

-ههههههههههه

-وعلي هيج مكضيها اكتلني واكتلك

-ميخالف خوية صغار من يكبرون يصيرولك سند ان شاء الله

-وهذا المصبرني اعرفهم صغار وراح يتغيرون من يكبرون ولا تنسى ماتوا اهلي الله يرحمهم وهمه صغار كلش ووكعت المسؤولية كلها براس اختي توكل وتشرب وتنزع وتلبس البت تركت دراستها لخاطر اخوتها ماعرف شون اجازيها

-الله يحفظكم ويستر عليكم بجاه علي

-الله يسلمك حبيبي

-بعد همه الصغار هي هاي مشاكلهم چا سور ونور شلعبوا بينا لعب كرهونا الدنيا حتى هسة من كبروا بعدهم لاعبين بينا فلك وابوي يومية كاضله واحد يكتل بي ووره نص ساعة يروح يراضيهم ما يتحمل زعلهم

ظلينا نسولف هواي واخذتنا السوالف وشوي شوي بده ضرغام يحجيلي عن معاناته وشنو جاي يعيش ويسولفلي عن عمته ام فاضل حرمة جبيرة ويوم زينة وعشرة لا بس مضطر يصير زين وياهة ويصرف عليها وياخذها طبيب خاطر تعين احته "وديان" واخوته الصغاو وما تأذيهم..

-ضرغام: ياخوي الحمل صعب والدنيا ساحلتنا ماعرف شون راح تنگضي هالعيشة

-لا تفكر لها مدبر خوية وانا موجود شتريد بس دگلي موبايل برمشة عين تلكاني بسدك

-يا بعد روحي ما تقصر اموري بعلي انتَ اخوي وصاحبي وحياتي ومستقبلي وعرضي وبيتي كله اأمنه يمك

-عزيز گلبي يشرفني

-ماطولنا فتحنا هالموضوع اأمنك على اخوتي اموري خاف يصير بيه شي

-شني شطاري عليك ولك

-مانعرف يمته يجي يومنه ولازم واحد دائماً يوصي

-عمرك طويل ان شاء الله وتكبرهم وتزوجهم على ايدك لا تحجي بالموت ضرغام توجع كلبي

-اموري الموت ويانه بكل لحظة و اريد اوصيك الك بالذات مو لغيرك اريدك معين الهم لا تعوفهم بيوم اأمن على اخوتي وعمتي عندك اموري لا يجي يوم وتنساهم تره ماعدهم احد لا عمام ولا خوال كلها مودعة وباقين جوه رحمة رب العالمين وهالچم فلس الاطلعهن من الدراجة وتوصيل الطلبات بين المحلات

-ببطن عيني اخليهم لا توصي حريص

ابتسم يهز براسه وحسيت بحلگه حچي بس ماريد اسمعه، ماحب طاري الموت وما يعجبني اسولف بي بس ضرغام دائماً يذكرني بالموت كلما اأخر صلاتي يذكرني بالموت كلما اعاند ابوي يذكرني بالموت ويگلي شون لو الله قبض روحك وابوك ما راضي عليك من تروح يم رب العالمين شتگله؟.. كلما نغلط لو اتفه غلط وذنب نسوي ينصح بينا انا وجماعتي وابسط شي هي الاغاني چان ابو كربله اوقات يعلگ بسيارته وضرغام يسولف وياه بهالموضوع.. يگله تخيل هسة الله ياخذ روحك شتسوي؟ وشون تبرر فعلتك يم ربك؟ تريد يكون اخر شي سويته بالدنيا هو الاستماع للاغاني؟ اذا تريد فـ بالعافية عليك واذا ما تريد بعد انتَ تعرف شنو لازم تسوي..

-ليث: هاااا امير الامارة الجديد شو انفتگت بالسوالف من ما شفتنا كاعدين

-ابو كربله: چا غير امير ويشيل خشمه علينا

-الامـير علي: اهوووو هو انا شارد من البيت من وره هالسالفة تجون انتم تفتحوها هنا

-ضرغام: ابوك قافل عليك مابيها مجال

-الامـير علي: بعلي الا اچفص بنص الامارة اذا خلوني بديل لابوي

-ضرغام: احهههه انا ينصبوني امير واگلهم ماريد؟ من انعل ابوي لو سويتها

-ابو كربله: والله ياهو محصلها وهذا كاعد يتبطر على نعمته

-الامـير علي: شباب انتم لا عبالكم راح اللبس عكالي وبشتي وانفخ روحي بصدر ديوان واأمر وانهي وشغلي اقط فصولة من العالم! تره السالفة مو هيج ابدد السالفة جبيرة يومية جايك واحد يگلك تعال حلي فلان سالفة وتعال شوفلي فلانة ليش شردت وتعال دگ صدرك لفلان وتعال فلي گصايب علان

-ليث: اي عادي ادگ صدري لفلان وافلي گصايب علان واهزله خصر هم

-ابو كربله: مطي ما يعرف بمصلحته خايب هاي سمعة هذا جااه هذا منصب هذا حكم الوادم تمشي وتحبب بيدك وتركض وراك وتتوسل بيك وكل ساع جايلك واحد مألفلك شعر وشامرلك ابوذية

-الامـير علي: ماريد خليها الكم

-ضرغام: راح تريد بس مو هسة، هسة بعدك زعطوط

-الامـير علي: ابدد ولا راح يتغير رأيي، انا ماحب هاي العيشة انا ماريدها احب اصير طير حُر احب اتونس احب اسافر احب اتزوج واخلف واشتغل بعيد عن عيون العالم ماريد هاي الحياة انا ضدها وبعمري ما راح تعجبني

-ليث: هاي وانتَ ربيت وكبرت على هالعيشة والعادات والتقاليد چا لو جنت اجنبي شتسوي

-الامـير علي: اشگ زيجي واكعد يم فراقد

فطسوا ضحك مادري على شني بس يجوز عبن ذكرت اسم فراقد وانا هم مادري شمالني جبت طاريها شكد فشلة.. ساعتين مرت على كعدتنا وابو كربله كال يرجع تأخر الوكت وليث هم دگ عليه اخو غفار وگاله ابو معصب واذا ما يلكاهم بالبيت ينكتلون..

-الامـير علي: يلا چا احنه هم نكوم شعدنا وحدنا

-ضرغام: خلينا شوي الجو حلو

-باجر هم نطلع كوم

-لا بعد شوي امير اكعد شبيك خلينا متونسين

-اكعد بشرط نلوت بالدراجات

-خرب رووحك

-هههههه هذا العندي

-ولك انتَ ناوي على منيتي اليوم

-بكيفك بعد

-مو حالف ومواعد اخوتي ما اسويها شون؟

-ادفع كفارة يلاا ولك يلاااا

جريته وياي وكام يضحك، ركبنا كلمن دراجته ورحنا لشارع فارغ ووگف فجأة ونزل من دراجته وكال..

-هاي الخوذة جاي تحز برگبتي

-انزعها تولي

-لا ما انزعها لو اموت شون لو صارلي شي

-شكد جبان

-امير مو جبان اصلاً انتَ ماعرف شلون تركب دراجة بدونها

-ختولي شتسويلي قابل لو ردت اموت ما راح تحميني خوذة

-هاا؟

-والله

-يعني انزعها؟

-بكيفك انا معليه

هز راسه ونزعها بس چنه ما مقتنع، غيرت الموضوع بساع لان اعرف راح يوكف ساعة يفكر يلبسها لو يظل نازعها ويضيع وكتنا وانا اتخبل من واحد يتردد بتصرفاته..

-الامـير علي: نعبر الشارع كله على عجلة وحدة والي يخل بالاتفاق من صدگ يعزم الشلة كلها على العشا باجر

-هذا هو

-اوكف هذا موبايلي

طلعته من جيبي وشفت ابا الحسن مراسلني وكاتب "ابوي يريدك ضروري ارجع"..

-اگلك ابا الحسن راسلني يكول ارجع للبيت ابوي يريدك

-ما نتأخر يمعود يلا خلينا نروح متحمس

-اوكف ضرغام لا مبين السالفة ما تتأجل لازم اروح

-هاي شبيك امير شسالفتك!

-شبيك نحس يجوز هاي اشارة من رب العالمين

-هاا ياهو هسة متردد بتصرفاته؟!

-لا صدگ احجي ختولي نأجلها من يجون الولد لا نروح وحيدنا هسة كلشي يصير

-زودتها خايب

-مادري گلبي خمشني فجأة ماريد بعد

-هههههه جبان

-انچببب

-چا يلا نروح

هزيت راسي اضحك وركبنا دراجاتنا متحمسين وضرغام ضحكته ما فاركت وجهه مشتاگ للتلويت (يسوق الدراجة على تاير واحد) صارله اكثر من 8 اشهر تايب وما مسويها بسبب اخر مرة وكع على ظهره واخته تخبلت وحلفته ما يرجع يعيدها بس هسة ما جاي يكدر يكض حماسه..

-الامـير علي: وااحد.. ثنييين.. ثلاثة!!

دست بانزين حييل وانطلقنا وبحركة سريعة رفعت الدراجة على التاير الخلفي وبديت اسوق بي وهو سوه نفس حركتي، يسوق ويضحككك من كل گلبه ويصيح..

-علييييي شگد مشتاگ لهاااي الاجواء

ضحكت على ضحكته وونسته وسبيته من شفته غلبني.. خرب عقله راجع بقوة دست بانزين اكثر وفجأة حسيت بدراجتي صارت تگمز وماكدرت اسيطر عليها، دست بريك خلفي اخفف من حركة العجلة الخلفية وهبطتها بساع اسوقها على العجلتين بس توازني اختل وبدون لا احس دست بريك قوي ونامت الدراجة وانا وياهة انگلبت..

-ااااااااخخخخ

صحت بصوت عالي من وجع ايدي طحت عليها وانحكت بالصبة وبنفس هاللحظة ضرغام دار وجهه خايف عليَّ وداس بريك خلفي وبرمشة عين، بلمحة بصر، بجررة نفس وحدة ويه دورته لوجهه گام محرك دراجته ودفعه ليوره وخلاه يطيح على ظهره والدراجة بثگلهاا بمحركها بعجلاتها كلهاا طاحت عليه وعلى وجهه ومردته مرددد سوته ويه الكاع كدام عيني..

-ضرغااااااااام

صحتها من غمج روحي وفزيت من مچاني متسودن ما مهتم لوجع ايدي ورجلي، ركضتله بحيلي المهدود ورحت عليه اشوفن وجهه ضايعه علومه والدراجة بعدها مشتغلة والدخان شعل الدنيا.. طحت على ركبي يم راسه وظليت اصييح بعلو صوتي بأسمه اصيح واضرب على خدوده اريده بس يفك عينه بس ما فتحها.. ما فتح عيوني عزيزي ما فتحها..

**

"الحـــاضر"

-اميير افتح عيونك اميير عزا بعينيي خالة مدا يفتح عيونه

-ابا الحسن علي: بس سويلي مجال تَـمني سويلي درب خليني اعرف اتصررف

جرتني حبيبة جر عنه ونهضه ابا الحسن يريد يشيله بس ما كدر، تگابلنا كلنا عليه شلناه گوة وابا الحسن كملها وشاله على ظهره وطلعنا بي للسيارة ووياه امه واني وحبيبة..

ركبنا السيارة وبعده ما محرك ابا الحسن وفتح عيونه امير فاز بس شنو وجهه.. شنو جحظة عيونه وشهگته من فز شكله مخيييف راص على اسنانه حييل ويرجف رجف بين ايدي تخبلت، رجع نفس قبل شوية شلون غاب عن الوعي هم رص على سنونه حيل وتگلبت عيونه ووكع علينا، عطت بأبا الحسن يستعجل والامير شال ايده ولزم الكشن مال كرسي الصدر ويحرك راسه بـ "لا"..

-رسمية: ما عليك بي يمة مالك غرض اخذنا حسن لا يمووت

غمض عيونه مرة ثانية غايب عن الوعي بس من يغيب مو بشكل طبيعي الا عيونه تتگلب ويرجف كل جسمه، ذب راسه بحضني بجهة ورجليه بحضن حبيبة من الجهة الثانية واحس بگلبي راح يوكف اول مرة اشوفه بهالشكل مدا اصدك الامـير علي الي اعتبره اقوى رجل شايفته بحياتي هيج ينهار وميكدر يكعد على حيله..

وصلنا للمستشفى وطلبنا سدية وركضوا بينا، شاف الدكتور لون وجهه ولون جسمه الباهت وخله الممرضين يستعجلون ياخذوا للطوارئ..

-ابا الحسن علي: اخوي عنده ضغطط دكتور

-الدكتور: وضعه ما مستقر استعجلوووا

ركضوا بي ركض والناس كلها تباوع علينا وبقيت كلما ترمش عيني اكول راح افز من هالكابوس راح يمد ايده الامير مثل كل مرة ويكعدني ويحضني ويكول "اسم الله عليج ابوي حلم هذا لا ترجفين"..

-رسمية: نادي علياً مظهر العجائب تجده عوناً لك في النوائب وكل همٍ وغمٍ....

بعدها ما مكملة جملتها وقاطعها صوت بنية اجت من ورانه ووياهة واكف ولد مراهق..

-عساه بالموت

اللتفتت محترك دمي من شفتها البنية "وديان" وخالة رسمية تخبلت ركضت عليها وهمشتها من عبايتها وسحلتها للكاع شمرتها ورادت تدوس عليها وركض ابا الحسن والممرضات يفاككن ويتصايحن..

-رسمية: طلعوهاااا طلعوووا هالحية منااا طلعوهاااا الله ياااخذج خذيتيي حيله وعافيته سنييين وبعدج تحومييين فوك رااسه

-وديان: من ذبح اخوي واخذ عضيدي وظهري وسنددي ما گلتي شي بس من شوي ابنج انهز طوله وطاح تسودنتي مو؟؟؟

جرنها الممرضات يطلعنها من الردهة واخذها الولد وياه وعافتنا وحدنا نلوب ميتين قهر.. ماعرف شنو اكو بينهم بس ميهمني كل الاريده هسة الامير يتحسن ويطمنونه عليه والحمدلله والشكر ما انتظرنا دقايق وطلع الدكتور مبتسم وكال وضع الامير احسن بهواي..

-ابا الحسن علي: صدك دكتور؟؟ عليك العباس لا تجذب عليّ اخوي زين؟؟

-الدكتور: الحمدلله وضعه ممتاز واضح اخوك متعرض لصدمة نفسية وهذا الشي خله ضغطه يهبط

-ابا الحسن علي: هبوط صار عنده يعني مو ارتفاع؟؟

-اي صاير عنده هبوط بس ويه الابرة والمغذي راح يتحسن وتكدرون تاخذوا للبيت لا تخافون

عافنا وراح بس ابا الحسن أصر يحجزله غرفة حتى يرتاح جان خايف على اخوه لدرجة من طلع الامير بكرسي متحرك من الطوارئ حضنه وبچى بچي هز جسمه هز والامير بادله حضن خفيف بس لاحظته باقي مغمض عيونه ما فتحهن ابد..

-تَـمني: شلون صرت امير

همستها كوة الغصة ذابحتني وحطيت ايدي على چتفه احسسه بوجودي، هز راسه ساكت ما حچى شي وسحبه ابا الحسن لغرفته الحجزناها ووياه ممرض يمشي ويجر بستاند المغذي، ظلت عيني تراقبه اريده بس يفتح عيونه بس ما سواها حتى من دخلوا الغرفة وگومه ابا الحسن يكعده على السرير بقى مغمض عيونه وسند راسه على المخدة ودار وجهه عنه..

-تَـمني بهمس: شبي ليش مدا يفتح عيونه؟

-ابا الحسن علي: يجوز يوجعنه خلوه براحته

هزيت راسي اي ووكفت بصف خالة رسمية الكعدت على الكرسي وبقت تراقب ابنها التعبان، نص ساعة ونفسه ثگل نام وبدوا يجون ابوه واخوته واحد وره الثاني وكلهم مصدومين وومصدگين الصار بالبيت..

كلما اسألهم عن وديان ميجاوبوني جواب وافي وبديت انزعج لان شكل البنية مدا يروح من بالي وهي تكشف بجسمها كدامه وتگله "ضگت المر من بعد عينه".. طلعت من الغرفة مختنكة وگلبي بي نغزات رجعتلي هالحالة كله من وره العلاج الغبيي كله بسببه..

طلعت لحديقة المستشفى اجر نفس وكعدت على مسطبة ارتاح شوية، اخذت شهيق وزفير اهدأ نفسي لحدما تحسن وضعي الحمدلله، كمت من مكاني حتى ارجعلهم وانتبهت لـ وديان كاعدة على وحدة من المسطبات وكاعد بصفها الولد وهي منزلة راسها وتبجي..

رجليه اخذتني الهم بخطوات سريعة، وكفت مقابيلها ضبط اتفرج عليهم ساكتة، انتبهلي الولد واشرلي براسه بحركة "شنو" وعلى حركته رفعت وديان راسها بأتجاهي..

-وديان: شتردين!

-وديان على كيفج يا خوية

-وديان: اسكت قاسم خليني افتهم شتريد مني هاي؟؟

-تَـمني: اريد اعرف شبيچ

-وديان: خلي زلمتج يفهمج البيه!

-تَـمني: نايم بالمستشفى زلمتي مدا يكدر يحجي ولا يفتح عيونه اجيت الج اريد افتهم منج الموضوع

-عساه بهالحال واكثر! عساه ما تهنى بجاه ضلع الزهررة!

-لا تظلين تدعين! لا تدعيين وفهميني السالفة يمكن اكدر اساعدج!

-يعني ترجعيلي اخوي؟! ترجعيلي ضرغام الكتله امير؟؟

-شلون كتله فهميني

خزرتني معصبة حسيتها تستصعب تحجي بالموضوع ووضعها تعبان لدرجة عيونها مورمة ومدا تكدر تفتحها، تفهمت زعلها وعفتها ورجعت ادخل للمستشفى شفت الولد واكفين بالباب عدى ابا الحسن..

-علي التـقي: وين جنتي تَـمني گلوبنا طاحت عليج

-تَـمني: جنت بالحديقة كاعدة ليش امير بي شي؟؟

-علي الكـرار: لا بس ظل بالنا من ما شفناج وامي شبعتنا رزايل

-تَـمني: صح جان لازم ابلغ واحد بيكم بس جنت مخنوكة

-علي التـقي: مابي شي اموري لا تخافين وضعه زين نكدر نخرجه بس گلنه نبيته ليلة نخاف لا يرجع يصير عنده هبوط لو ارتفاع بالضغط

-تَـمني: اي زين تسوون

وكفنا فترة ننتظر اللاشيء والمشكلة ماعرف شبيه استحي اگوللهم وخروا شوية من الباب اريد ادخل اشوفه ظليت واكفة وياهم واتأمل واحد يوخر من ذاته وتأملاتي طولت كلش لحدما طلعت خالة رسمية من الغرفة وصاحتلي..

-تَـمني: اي جاية خالة

وخروا من الباب واني هرولت ادخل بخطوات سريعة توقعت اللگاه كاعد بس للاسف بعده نايم، كعدت على الكرسي بصف خالة اباوع لوجهه صفاره مخيف عيونه طامسة وشفايفه بيض مال موتى شكله يوجع الروح..

-رسمية: ابو علي تعب مو مال يبقى ينتظر بره ما يكدر يوكف هواي

-تَـمني: اي خطية

-اااخ اااخ عمت عيني عليك يا يمة

-خالة ادري مو وكتها بس اني بعدني ما مفتهمة الموضوع

-رسمية: ابا الحسن خلي يفهمج

-يعني اذا اسئله راح يجاوب؟

هزت راسها اي وذبت حسرة ومسحت طرف شفتها بالشيلة مالتها، اللقيت نظرة اخيرة للامير وطلعت من الغرفة دورت على ابا الحسن بعيوني ما شفته بين الواكفين..

-وينه ابا الحسن؟

-علي السور: راح يشتري چاي

-تَـمني: اني هم اريد رايحة اجيب وياه

-علي التـقي: انا اجيبلج اوكفي

-لا اني اريد اتمشى

شيخ علي ما قبل اني اروح وخله واحد بيهم يجيبلي، ماضجت من تصرفهم بالعكس بس تمنيت انفرد شوية بأبا الحسن حتى يسولفلي والحمدلله من سمحتلي الفرصة واجت على رجليها.. تقي اتصلوا بي يردوه هسة ببغداد وكرار اخذ حبيبة وشيخ علي حتى يرجعهم للبيت يرتاحون وبقوا سور ونور وبدر واكفين بالباب وكدرت افلت نفسي منهم شوية وتقربت من ابا الحسن..

-تَـمني: ابا الحسن اكدر احجي وياك شوية؟

-اي خيتي تفضلي

-اريدك تفهمني هالبنية وديان منو؟ والله عقلي تعب من التفكير

-حگچ بس لا تخافين الامير ماله غرض بيها لا من بعيد ولا قريب حتى من جان يساعدهم ويتطمن عليهم يسولف ويه اخوتها الصغار لو حفيدة عمتها بت صغيرة

-نفسها حفيدة ام فاضل الي عمرها 14 سنة؟

-اي هي سولاف بت صغيرة تعامله وياهة مو ويه وديان

-زين ليش يساعدهم صدك ماعدهم زلم بالبيت؟

-عدهم.. بس الله يسلمهم عيب علينا لو گلنا عليهم زلم، ام فاضل عدها ثلاث ولد واحدهم چنه بغل بس كل فايدة مابيهم واحد بيهم مسجون وذولاك يومية لو مسافرين لو گاضيها بأربيل

-زين ووديان؟

-شبيها

-سولفلي شلون تعرفتوا عليها؟

-تصير اخت ضرغام صاحبنا.. يعني ضرغام صاحب الامـير علي اكثر ويميل اله انا جنت اطلع ويه الامير فـ صارت عندي صداقة وياه بس قوية مثله هو

-ووينه ضرغام؟

-الله يرحمه

-ليش وديان دتكول الامير السبب؟

صفن بوجهي شوية وغمض عيونه يتنهد، فرك وجهه وكأنه ميحب يتذكر الصار وواضح التأثر بوجهه بس ضغطت عليه حتى يسولفلي وفعلاً.. سولفلي وحچالي الصار بالتفصيل الممل ومردني ويه كل حرف طلع، حطيت ايدي على گلبي جاحظة عيوني من كال بألم..

-رحناله بالمستشفى ملامحه ما تنعرف.. خشمه مكسور وعين من عيونه رايحة ونص جمجمته متهشم عبنه طايح حيل على راسه وما جان لابس خوذة

-يا يمة

-شسولفلج تَـمني من شفت حاله زلمة شونه ما ينعرف وجهه من گفاه وقفصه الصدري غادي تراب بسبب ثگل الدراجة

-والامير شافه بهالحال

-شافه وتسودن خابروني من المستشفى يبلغوني اخوك گوة جريناه من الجثة حاضنها ونايم عليه ما جاي يخلي الاطباء يشتغلون، ركبت سيارة ابوي وطرت للمستشفى مثل المسودن ما مصدك الجاي يصير رحت للردهة الهم بيها واشوفن اموري طايح على ركبه ويلطم على راسه وصدره بكل حيله ويصيح..

-ضررررغااام ولك اااااااخ يا خوية ضرررغام اكعد ضرررغام

-ابا الحسن: اميير امير شصاير؟؟ ولك فهمنيي احجييي

-راااح ضرغام راااح عزيز گلبي كتلته بيددي كتلته اناااا

صياحه رج المستشفى رج صارت الوادم واكفة وتعاين والشرطة هم اجوا وأمير فاقد اجه ابوي واخوتي والدنيا انكلبت كلاب وامير ياهو يكضه يگله انا السبب انا الجبرته نتسابق وهو جان تايب ومنطي وعد لاخته وديان ما يسويها بعد بس هو خلاه يكسر هالوعد وراح بيها

-تَـمني: ووديان؟؟ شنو جانت ردة فعلها؟

-وديان ما اسولفلج البت فقدت الوعي اول ما وصلتله شافت وجه اخوها وشافت الدماية ولحم راسه الطالع وما تحملت المنظر طاحت علينا وحرنا بيها، دقايق وفزت ما مصدكة كاضة امي وتصيح..

-رجعولي اخووي رجعولناا ابو بيتناا رجعوا سندناا رجعووا

انوب افتهمت ضرغام مات بسبب الدراجة لانه هو والامير يفحطون بيهن ويسوقون على عجلة وحدة تسودنت بالزايد صارت تلطم على وجهها وراسها وتدعي على الامير بكل حيلها دعائها كسر ظهرنا يا تَـمني الامير تسودن عقل ما ظل براسه وره هالحادثة دفن ضرغام وظل نايم يم گبره لا يرضى يتحرك ولا يرضى يسولف حتى دموع ما تنزل من عينه..

-لهدرجة چانو قريبين

-مو بس قريبين امير جان بير اسراره لـ ضرغام، شكو مصيبة شكو حاجة يحتاجها اول واحد يروحله امير ويفزعله فزعة اخو واكثر.. ااااخ استغفرالله ربي جنت مراهق وزعطوط واغار من علاقتهم احس ضرغام جاي ياخذ مچاني بگلب الامير وامير يداهر بيه ويگلي عزيز گلبي هذا توأمنا الثالث اعتبره

-بس ليش من يحلف يكول عزيز كلبي المغدور؟ شنو قصده بهالشي؟

-لانه صدگ طلع مغدور.. من خلال التحقيقات اكتشفنا البريك الخلفي مال دراجة ضرغام عطلان، يعني من داسه خاطر يخفف وينزل على العجلة الثانية ما مشتغل وفقد توازنه على الدراجة وانگلب على ظهره والتحقيقات اكدت عطل البريك هو فعل فاعل چن واحد متصيده

-عزا بعيني وعرفتوا منو السوه هيج؟؟

-اي ابن عمته السبب، غدر بي بسبب شغلة تافهة بيناتهم واحد مداين الثاني فلوس ومتعاركين وهذاك النگس لاعب بالبريكات وكتل ابن عمته والاغبر هم كلشي ما حصل وانحكم مؤبد

-بس بقت وديان تلوم الامير مو؟

-بقت اي والامير سنيين اخذ يلوم بنفسه وما هداله بال، والي خبله بالزايد وخلاه يموت قهر هو موت ابن عمي ليث الله يرحمه بنفس الشهر المات بي ضرغام وره چم يوم ليوثي احترك ومات ببيتهم

-يمة گلبي

-الامير انتهى من اگلج انتهى فـ اعنيها لا ضحكة لا سالفة لا حجاية لا رواية لا سفرة لا شغل لا عمل كللله عافه واعتزل بغرفته ما يطلع لبشر واخذله على هالوضع بالـ 8 اشهر تقريباً لحدما ابوي جبره يطلع ويرجع لحياته الطبيعية

-ورجع لحياته الطبيعية بسهولة؟

-لا بالعكس ظل على كلشي يعصب ويكسر ويتعارك ويتضارب ويرجف غضب على اتفه الاشياء لدرجة اجت فترة من الفترات اسمع بنات عمي يصيحنله "المخبل" وامي ترزلهن وتلعب بيهن خلقة.. الوحيدة الجان يسكن وياهة ويهدأ شوي رفل جانت اقرب وحدة اله ويشكيلها وهي تسمعله بدون لا تقاطعه

-واضح الموضوع بعده ما راح من باله لان بعده عصبي وعلى كلشي يتنفرز

-لاااا تَـمني هسة ارحم بهواي امير انتِ ما شايفته گبل لا لا ما شايفته والله لا يراويج جان من يعصب كلها تشرد والزهرة حتى امي تسكت وتخنس ما تجاوبه وترادده

-لعد شلون عمو راده شيخ من بعده؟

-ابوي جانت عنده نظرة مستقبلية وقناعة الامير راح يتغير ويرجع نفس گبل، ضغط عليه بالكعدات والمشيات ويخلي هو يحجي بداله بالغصب خاطر يعرف يسيطر على اعصابه ويخلي امام الامر الواقع عبنه يعرف فشلة يتجاوز والشيوخ والوجوه المعروفة محاوطينه

-تدري ابا الحسن امير ما فد يوم حجالي عنهم؟ لا ضرغام ولا ليث اصلاً ميجيبهم بالطاري

-لو تصعدين للمرسم راح تشوفي كله صورهم خصوصاً ضرغام ودراجاتهم وحتى راسم وديان واخوة ضرغام الصغار، على كل مرة يلتقي بيها ويشوفها يرسم وضعها شون چان وحيرتها ويه اخوانها الصغار

بلعت ريگي واحسني احتريت شوية ماعرف السبب من غيرة غبية صابتني من عرفته راسم وديان ومركز بيها لدرجة راسمها لو ضجت من الموضوع كله واحسني انهميت وانغميت..

-تَـمني: اتوقع شايفة صورة ضرغام اني من قبل مرة شفت صورة رجال الامير راسمه ووياه رسالة مكتوب بيها "دمرت حياتي لو بينك وبين الجنة ذنبي هم ما اسامحك يا الامير"

-اي هاي رسالة من وديان

-يعني جانت تراسله؟

-يووووووه شكد تراسل وتدز بس كله لو تدعي عليه لو تشكيله فقدانها لاخوها وبكل مرة توصل رسالة للامير منها ترجع تنتكس حالته

-بس هم الله يساعدها

-اكيد تَـمني ما نختلف على هالشي والامير من يوم مات ضرغام هو متچفل بعياله وبعمتها ام فاضل

-وهسة هم ماتت ام فاضل لان وديان اجت بسبب موتها وجانت منهارة

-منهارة مو حباً بيها عبن ام فاضل جانت هم ظالمة بس يوم زينة ويوم لا

هزيت راسي وبقت الافكار تروح وتجي على بالي، اتذكر كلام ابا الحسن وارجع اباوع على باب غرفة الامير واستشعر بشنو ديحس هسة.. شنو حاله وشنو وجع گلبه اكيد رجع استذكر موته كله وهالشي دمره لدرجة من شاف وديان وشاف حالها وگع من طوله وضغطه صفر..

-تَـمني امير ما كتله والله العظيم مو هو السبب الخلل كله بالبريكات، حتى من حققوا وياه الشرطة اكدت هالشي

-اي

-صح الامير جان مستهتر بسالفة الدراجة انا اعترفلج اي وحتى هو من يتذكر شون جان متعلق بيها يعترف بروحه غلطان لدرجة من يوم حادثة ضرغام ما ركب دراجة بعد وابوي حرمها علينا كلنا

-بس انتَ كلت الامير گال لضرغام يتسابقون وبعدين بطل بس ضرغام ظل مُصر يريد يفحط ماعرف شيسوي؟

-اي صح

هزيت راسي ساكتة شوية وترخصت منه ودخلت لغرفة الامير لكيته اخيراً فاتح عيونه، طلعت خالة رسمية من شافتني واكفة بالباب تخلينا براحتنا، ابتسمتله من بعيد ورجعلي ابتسامة ضاعت بيها عيونه ورفع ايده يأشرلي اروحله..

تقربت منه بخطوات سريعة وكعدت على السرير بصفه، بقت ايدي بين ايده متحاضنات ونزل عيونه يباوعلهن فترة..

-شلون صرت حبيبي

-زين

-خفت عليك هواي

حرك راسه بحركة "اي" ورفع عيونه يحطهن بعيوني، تنهدت مبتسمة ومديت ايدي امسح على خده ونصيت نفسي بسته على كيفي وهمست بيني وبينه..

-الصار مو ذنبك امير لا تحمل نفسك فوگ طاقتك

عصر كف ايدي البين ايده بدون لا يفتح حلكه ويجاوبني، مسحت على شعره على كيفي وتمتمت بهدوء..

-الدتمر بي وديان صعب وحقها تصرفاتها متنلام عليها لانها ناتجة من خوف وضياع.. والي دتحس بي انتَ هم طبيعي وحقك عزيز گلبك الي مات مو انسان عادي

وخرت عنه بسرعة من شفت دمعة تنزل من عينه، نزلت هالدمعة ولحقتها دموع ورجفة جسد حزينة.. دار وجهه عني حتى يحرر باقي الدموع بدون لا يخجل وانطيته مساحته الشخصية نزلت عيوني افرك بيده على كيفي وكملت اسولف وياه..

-الصار وياك فاجعة والله يعينك عليها بس امير الموضوع صارله سنين

-چنه امس.. والله چنه امس

گالها بصعوبة ودار وجهه يباوع لعيوني، مسح وجهه ولحيته بيده واردف بصوت مكسور..

-انا كتلته تَـمني.. بيدي مات شفت روحه وهي تصعد سمعت شهكة الموت وهي تشگ صدره.. كله شفته وشهدته

-الله يرحمه حبيبي بعد هذا يومه

-انا السبب انا لحيت عليه لو راجعين للبيت وما ضاغط عليه جان ما صار كل هذا

-لا امير هذا قضاء وقدر وهاي منيته هالشي مكتوبله من قبل لا ينولد منيته يموت بهالعمر وبهالطريقة انتَ مالك علاقة...

ظليت احجي وياه هواي وهو باقي بس يهز براسه، ما خليت شي ما لغيته براسه حتى لساني يبس وكمت ماعرف شسولف اريده بس يغير جو وينسى..

-يلا اميري كافي عاد غير جو

-غيرت

-لا تستهزأ دا احجي صدگ

-خوشن

-ميخالف اقبل تسمي اببنا المستقبلي ضرغام حتى تتذكره كلما تشوف ابنك

ذبلت عيونه التعبانة وابتسم ابتسامة خفيفة، ذب حسرة عالية وكال بصوت مبحوح..

-لا نسمي ليث

-على ابن مسعود الله يرحمه؟

حرك راسه بـ "لا" واردف بنفس الهدوء..

-لا انا احب هالاسم من گبل وهو من اللقاب الامام علي عليه السلام

-امممم ماشي الله كريم عود نشوف

-شتشوفين؟

-يعني نشوف نسمي ليث لو سام

-سام شني؟!

-احب اسم سام اريد اسمي ابني سام

-واذا اجتنا بت نسميها مسمومة؟

-ههههههههه لااا امير هاي شبيك

-سام شنو تَـمني تحجين صدك انتِ تره مابيه حيل يجيني وليد مايع اريده زلمة

-اي سام هم يصير زلمة عادي

-سكتي سكتي لا ترفعين ضغطي انا مريض

-هاي شبييك

-اششش سكتي

-لا تأشأش امير راح اسمي سام!

-سمي البريعصي العايش بالمطبخ سام ابني مالج غرض بي

-اميييييير تره سام ابن النبي نوح!

-سلام الله على النبي نوح تَـمني سكتيي لا تخلينا نحجي زايد

-والله انتَ ماعندك ذوق ليش وين اكو احلى من سام

-وديان وين؟

-تره دنحجي بأبننا المستقبلي شعلينا بوديان؟!

-خالوو البت وضعها صعب ما يصير نعوفها وحيدها هسة هي صارت وحيدة حتى عمتها ماتت وماعدها غيرنا

-تره تكرهك هي اني معليه والله بس هي تكرهك بعد

-تَـمني!

-شنو شبيك

-مالي غرض تكرهني لو تحبني قابل راح اتزوجها انا

-نعم!؟؟؟

-تَـمنيييي

-احم.. اي صح مو وكتها يلا عود نأجلها

ضحك بخفة وجر وجهي عليه يبوسني، وخرت منه اضحك لانه دغدغني بشواربه وانتبهت عيونه بعدهن حزينات ومبين ديضغط على نفسه لاني كاعدة يمه ميريد يبين حزنه وقهره گدامي بعد...

**

"حبيبة"

طلع الامير من المستشفى وابوي رادنا كلنا نروح لفاتحة ام فاضل رغم السوته بينا وديان وغضب امي رسمية منها بس ابوي ما رضى وكال هذا واجب والبت بحاجتنا..

رحنا بيوم الثالث ووديان ولا يمنا استقبلت وبوست كل النسوان واحنه چن نكرة ما تقربت من يمنه وكلاص ماي محد جابلنا وامي رسمية كاعدة وتلوب ميتة قهر تريد بس تطلع وتخاف لا ابوي يزعل منها..

خلصت الفاتحة على خير وشالت امي مبلغ محترم وحطته بيد وديان وجبرتها تبوسها بس كدام النسوان عاد لا نتفشل، انتبهت لنظرات وديان على تَـمني وجانت نظراتها حاقدة وغريبة حتى من بوستها كضت ايد تَـمني حيل وحچت من بين سنونها..

-وديان: شكراً لان اجيتي

ابتسمت تَـمني وطلعنا من بيتها بسرعة ووصلنا علي الكـرار كالعادة خطية صاير سايق البيت سودة عليَّ، نزلنا للبيت وشفت ابوي كاعد بالصالة وگبل لا اصعد لغرفتي رحتله بوسته وكعدت بسده، مسح على راسي بيده الحنونة وكال بأبتسامة..

-شلونها شيخة البنات

-زينة بوية الحمدلله

-ويمته تريدني ارجعها لبيت زلمتها معززة مكرمة؟

-بوية

-ليش هيج يا بوية شجرالچ وياهو مزعلج من بيت زلمتج؟ بس كليلي بعلي اخسف بيهم الكاع

-محد صدگني محد انا ما مرتاحة ما جاي اتحمل العيشة هناك ماريدها

-نخلي يعزلج بيت حد بيته مو مشكلة

-لا بوية انتَ ما جاي تفهمني انا..

-حبيبة ابوي انتِ تره الطلاگ مو هين، الزواج موش لعبة شوكت ما نريد نتزوج ويمته ما نحب نتطلگ ما يصير حبيبتي

-ولانه مو لعبة انا ماريد اكمل هالزواج.. انا غلطت من تزوجت منتصر كلش غلطت

-حبيبة لا تخوفيني شمسويلج هالزلمة احجي؟!!

-ما مسوي شي وداعتك عندي لا هانني ولا مس كرامتي من يوم عرسي لليوم بس الصار كله غلط بغلط واذا تنطيني الصلاحية اسولفلك وافهمك الصار بدون لا تحقد على منتصر لان ما يستاهل احد يكرهه

-سولفي!

-بس بيناتنا يبقى الموضوع وما تضوج من منتصر؟

-احجي حبيببة!!

-اوعدني بوية!

-وعد يلا سولفي

ذبيت نفس وسحبته من ايده وگومته الاستقبال حتى محد يسمعنا، كعدت كبال هيبتي وسولفتله الصار من البداية للنهاية سولفتله بدون خوف ولا تردد حچيتله الموضوع بدون لف ودوران بس اكيد ما جبت طاري رفل من حاجت منتصر وسويته چن منتصر افتهم بيه ما رايده اتزوج الخاطبني وحب يساعدني من نهى عليَّ..

-تحجين صدگ انتِ؟؟؟؟!

-بوية لا تعصب دخيلك

-شنييي لعب جهال هو؟؟؟ شايفينا مزعطة حبيبة؟؟؟

-لا لاا والله لا بس.. بس منتصر راد يساعدني

-ليش هو يساعدج جا احنه شبينا؟؟ شنيي ماعندج اخوان؟!! ماعندج اب تجين تسولفيله ما تردين تتزوجين؟؟

-انا سولفتلك بوية

-يمته هاي؟؟

-والله حجيتلك وكتلك ما راضية وماريد اتزوج بس انتَ ما جنت تسمعلي.. اول مرة بحياتي احسك ضدي مو وياي وجنت ما تريد تعرف رأيي اصلاً وبس تريد تزوجني

-هاي انا؟؟؟!

-ماحب اگولها بابا بس اي، عشت اتعس ايام حياتي وحسيت روحي بسجن الدنيا طلعت من عيني وجنت متمنية تسمعلي وتلغي الفكرة بدون لا اضطر ازعلك مني

-يعني الصوج بيه صار!

-بوية.. ماعرف شگلك والله

سكت مخنزر بغضب فـ سكتت ونزلت راسي، كاعدة گباله افرك بيدي بتوتر واحس تندمت لان سولفتله ولو بالعتها وساكتة ولا هالنظرة الشفتها بعيونه..

-يعني هسة جاي تگليلي منتصر ما رايدج؟!

رفعت راسي ويه سؤاله النتره نتر وحرت اكثر وضعت شجاوب وشكول بالضبط بس خلص ما دام بديتها صار لازم انهيها..

-مو ما رايدني بس ما احسه يحبني مثلما انتَ تحب امي رسمية

-بوية هالحب يجي بالعشرة مو بيوم ويومين!

-بوية منتصر اظنه جان يريد وحده وهاويها گبل لا ينهي عليّ وبسبب النهوة والخطبة عافها ولليوم جاي اشوف الكسرة بعيونه وما يهون عليّ اظل ويه زلمة هاوي غيري حتى لو جان زين وياي

-اااااااخ حبيبة اااااااخ منج

-بوية منتصر ما غلط بشي هو يحبنا وراد يساعدني وما يرضى يطلگني عبن مايريد حياتي تخرب ومايريد يخسركم بس انا ما اريد ابقى وياه واذا صدگ عندي خاطر يمك بوية اريدك توكف وياي مثل كل مرة وتعيني على قراري

-ما اعينچ على خراب بيتج حبيبة

-ما يخرب بيتي وانتَ وياي، اكيد ما ترضى على زعلي وقهري العمر كله بوية طلگني منه هسة ولا تخلي باجر عكبة يتماده ويعشگ عليّ ويجي يحجيها بوجهي

-خاطر اكسر رگبته!

-اذا عفتيني وياه راح تكسر رگبتي الي، راح ترجعني مكسورة رگبة وبخت وانتَ ما ترضاها عليّ

فرك وجهه بقوة واستمر بالسكوت.. سكوت ابوي من يريد يفكر مريب لان احس اوقات حتى النفس يگطعه يبقى مثبت عيونه على شي ويفكر وما يسمح لاحد يقاطعه بس هالمرة قاطعته وختمتها وياه بـ...

-حجيت لـ منتصر وطلبت منه الطلاگ ما رضى بالبداية بس احترم رغبتي واظنه راح يقبل اذا انتَ حاچيته

-انتِ متأكدة من قرارج؟

-متأكدة

-ليش تستعجلين بوية ياهو يضغط عليج؟

-كرامتي

-انتِ جاي تكولين ما يخون وانتِ ما متأكدة عاشك گبلج لو لا ليش تستعجلين بالحكم عليه خوب نجيبه هنا ونواجهه!

-مالنا حگ نواجهه على ماضي ما اكتمل بس النا حگ نتصرف بالطريقة التعجبنا بدون لا نكسر ونحرج أي طرف من الاطراف

-دوهنتي حالي يابوية

هزيت راسي متفهمة حيرته وكمت اعوفه وحده يفكر على راحته بدون ضغط زايد، يومين اخذ ابوي يفكر وكضني اكثر من مرة يحاچيني وارجع اعيد عليه نفس الحجي واأكد عليه انا ما هاوية منتصر وماريدنه ولو عافني وياه راح يظلم بختي ويوجع گلبي وبسبب هالحجي اخيراً اقتنع!

اقتنع وكعد اخوتي كلهم عدى علي الحـق وعلي التقي الي ببغداد وفهمهم كلهم على موضوع الطلاگ، تخبلوووا والبيت كام ما كعد حسبالهم منتصر غلطان بحگي وگاموا سور ونور متسودنين يردون يهدون عليه وابوي وگفهم ما راضي..

-شيخ علي: انا سولفتلكم خاطر ما تلومون اختكم من تتطلگ وتسمعوها حجاية تغثها

-علي الدر: ابن امه يفك حلگه ويسمعها حجاية تغثها بالعباس افرك حلگه فررك

-علي السور: بوية اذا هي ما مرتاحة نطلللگ ايي ايي نطلگ وانعل ابو اليجبرها تسكت وتتحمل!!

هز راسه ابوي وابتسمت على فزعة اخوتي كلهم وگفوا وياي وهذا الجنت متأكدة منه، جنت اعرف محد راح يلومني ويوكف بطريقي خصوصاً وره ما ابوي خلصني من موضوع غفار وحلف كدام الكل لو اعترضلي يندم بيت مسعود كلهم..

ثاني يوم ابوي جاب منتصر وسولف وياه، جنت شايلة هم لا يشيلون غيض عليه بس الحمدلله مو كلش ضايجين منه يعني صح مو نفس گبل بس اشوى من تخيلاتي.. اعترض منتصر بالبداية وكال انا مريته وهو رايدني وحسيته حچاهة مجاملة بس كدام ابوي خاطر يعرف الطلاگ ما طالع منه وانا الي رايده بس انا بعد دكيت رجل بالزايد ما ارجعله..

جابوا صديقين من ابوي خاطر يصير الطلاگ كدام الكل وبالعلن وسمتعهم يسألون عن الاسباب وابوي فهمهم، استغفروا ما يعرفون شيكولون وبقوا ساكتين.. دقايق قليلة بقينا بهذا الهدوء گبل لا يجيني صوت منتصر وهو يگول..

-حبيبة... انتِ طالق

شهگت وچن جمرة وحطوها بگلبي من نطق منتصر الطلاگ، غمضت عيوني ونزلت دموعي الحارة تحفر خدودي، حاوطوني البنات كلهن يواسوني وامي رسمية حضنتني لجسمها تمسح على شعري وتهمسلي..

-يعوض الله يمة يعوض الله بالاحسن

بچيت بسكات مهضومة، مقهورة، مكسورة جنح وخاطر.. بحياتي ماتوقعت هيج يصير وياي وبحياتي ما ظنيت اتزوج حب حياتي واتطلگ منه بعد چم شهر من الزواج.. بچيت اكثر من دورت عيوني بالمچان وما لكيت امي واكفة وياي، امي كاعدة بغرفتها وما طلعت ولا چن بنيتها جاي تطلگ بعدها ما تسولف وياي وما تريدني..

-ليلة: وجعه التوجعها ان شاء الله لا تبجين حبيبة هي امج كلها خلگ وحدة مخبلة وكاعدة بغرفة لا تبجين عليها ما تستاهل

-حبيبة: سكتي ليلة

-ليلة: والله هسة شكلت انا

مسحت دموعي ومثلت القوة وصعدت لغرفتي، قفلت على روحي الباب واطلقت العنان لدموعي تودع حبيبها الي من اليوم حالفة اطلعه من گلبي ويه اخر دمعة تنزل مني..

كعدت ثاني يوم تعبانة ومصخنة كلش من البجي ونسوان اخوتي ما عافوني واجت رفل وياهن، ظلن يروشن كل شوي وحدة جايتني وبالليل كلهن باتن يمي وكعدنا نلعب بلي.. تونست وياهن وضحكت على مناگر تَـمني وليلة وعركاتهن وغصيت بالعصير من تَـمني كالت..

-وهسة دينتظرون جواب من خالتي وكلش محتارة

-حبيبة: تالة انخطبت؟؟؟؟

-تَـمني: اي ولو تعرفون منو خطبها متصدگدون

-البنات كلهن: منو!

-تَـمني: عاصف ابن مسعود

-حبيبة: شنوووووو

-تَـمني: اي والله اجت عمة ابتسام وخالاته خطبوله ورايحة خالتي سائلة عنه ومادحيلها بي وبأخلاقه ودتقنع تالة حتى توافق

-رفل: عذرناً على التدخل تَـمني بس خالتج عاقلة؟؟

-تَـمني: سكتن غير خبلتني ماعرف شلون دتفكر

-سبأ: اءء.. احم

-تَـمني: ياا اني نسيت عاصف يصير اخوج شنو رأيج بي سبأ انتِ تحجين الحقيقة اكيد؟

-سبأ: يعني مادري.. هو.. مادري صراحة

-ليلة: سولفي خية سولفي لا تستحين كلنا خوات

-سبأ: عاصف احسن من باقي اخوتي اي بس مال زين وماعنده مكسرات ما اظن

-تَـمني: يبووو جيبوا اليقنع خالتي

-حبيبة: زين تالة شتكول؟؟

-تالة متخبلة تدك وتلطم متريد بس خالة دتقنع بيها بحجة اذا متزوجين عاصف محد يجي يدك بابنا بعد

-حبيبة: ليش بوية محد يدك بابهم!

-تَـمني: لان ابوها مسجون خالتي صايرة عدها عقدة من هالموضوع

-حبيبة: لاا تَـمني تالة شنو ذنبها خو مالها ذنب اذا جان ابوها مو زين

-تَـمني: احنه هيج نكول بس الناس الهم رأي ثاني واقرب مثال الج هي اني لليوم اسمع النسوان يعيرون بيه ويكولون شلون الامير تزوج بت سحار

-ليلة: ياكلون تبنننن انعل ابوهم لابو اليحجون شعليج بالوادم انتِ شمالج فاهية وبساع تتأثرين؟

كضن تَـمني كل وحدة من جهة تحجي براسها وتقنعها تسولف ويه خالتها خاطر يرفضون عاصف وسبأ تأيدهن هنه يسولفن وانا بالي كله ويه كرار شلون راح اگله وشنو راح يتصرف من يفتهم..

انتظرته لليل علما يرجع وغميت روحي من تذكرت هو خفارة اليوم، نمت وبالي يمه انتظر يمته اكعد الصبح واشوفه احس السالفة مو مال موبايل اعرف بـ كرار متسرع ويجوز يسوي شي يندم عليه بعدين..

فزيت الصبح على موبايلي يدگ، مديت ايدي اسحبه من الميز وبعيني النوم بس فكيتهن على وسعهن من شفت المتصل "امي حبيبتي".. فتحت الخط بسرعة وكلت..

-الو

-حبيبة وينج؟؟ وينج لحكيني حبيببة

-شبيچ شصاير!

-تعالي.. تعالي مادري.. مادري شصار ولج تعااالي

-شصاار شكوو؟؟ انتِ وين؟؟

-مات ماات حبيبة ماات ماات ولج ماااات والله مو قصدي معليه ما ردت اسويهاا والله ماردت اسويها

-منوو ماات منووو احججيي فهمينييي

تصيح بكل صوتها وصوت لطمات قوية جاي توصلني، خبلتني طفرت من الجرباية ارجف كلني صحت بيها چم مرة اريد افتهمم اريد بس اعرف ياهو المات بس ما حجت مجرد گالتلي..

-تعاليلي لعمارة موجودة بالـ {^^^^^^} رقم الشقة ٣ تعالي حبيبة تعالي ولا تعوفيني فدوة

-يمة لا تخافين لاا تخافين جاية

-تعاي وحدج حبيبة لا تكولين لاحد والله يذبحوني والله

-يمة شوون اطلع وحدي شلوون

-ولج يذبحووني ترديني امووت؟؟ اذا ترديني اموت جيبي احد وياج جيبيهمم وكتلي امج!!

سديت منها التلفون منهارة ركضت لكنتوري جريت صاية لبستها ارعش رعيش، حطيت شال على راسي وخذيت فلوس و موبايلي ونزلت ركض مثل المخبلة وطلعت للساحة اللهث، وكفت بمچاني اراوح ماعرف اسولف لاحد لو اطلع يربي شسوي شنو هالمصيبة الطاحت على راسي شسوي!

قررت قراري ونويت اطلع من البيت وحدي وموبايلي بأيدي يصير ما يصير اتصل بواحد من الولد يجون، طلعت من باب الحوش على كيفي وجفلت صاكة بمچاني من شفت سيارة تشبه سيارة ابن فراقد تتقرب من بيتنا.. غشيت وجهي وفلتت اركض بين الاشجار الصغيرة المزروعة على رصيفنا وكوة ياله عبرت فرعنا بدون لا تشوفني..

ركضت اتعثر بأطراف صايتي بس ما مهتمة، وصلت للشارع العام ومديت ايدي طلبت تكسي وصعدت بساع وانطيته العنوان..

-خوية رحمة على والديك استعجل

داس بانزين ساكت همزين لا سولف ولا كعد يرطن براسي، دكيت على امي من جديد وما جاوبت دكيت مرة ومرتين وبالثالثة جاوبت بس تبجي ما افتهم عليها أي شي كلشي ما جاي اعرف لا شتكول ولا شسوت طاح گلبي ومن الخوف كمت اصيح بيها بالموبايل..

-لا تخبلينيييي وسولفي عدددل راح امووت احجي شصارر

-تعالي وشوفي

همستها بخوف وسدت الموبايل، ضربت الموبايل على رجلي حيل ميتة خوف ما عولت شوكت اوصل ومثل المسودنة اول ما دخلنا الفرع الخاص بالعنوان انطيت السايق فلوس ونزلت اركض.. طبيت للعمارة وشلت صايتي وركضت اصعد الدرج ولكيت الشقة بالطابق الاول..

ذبيت نفس مرعوبة ووكفت بالباب وطگيتها حيل وسريع، لزكت اذني بالباب اريد اسمع حركة ماكو طكيتها مرة ثانية ياله سمعت صوت امي ناااصي تكول..

-مـ.. منو

-انا يمة حبيبة انا

-يمة بنيتي

فتحت الباب الي وشفتها واكفة ولافة راسها بشيلة امي رسمية ولابسة عباة مچفنه روحها بيها.. بجت اكثر من شافتني وجرتني من ايدي تطببني للشقة وسدت الباب وراي وقفلتها..

-سلوى: حبيبة يمة ما عفتيني اجيتيني يمة بنيتي

-يمة فهميني وعلي ما ظل بيه حيل

غصت تغطي عيونها تبجييي بكل صوتها، روحي راحت بس اريدها تسولف تعبت من التفكير ومابيه استحمل اكثر..

-حبيبة: يمة على كيفج اهدي وفهميني

-سلوى: تعاي وياي

جرتني من ايدي واستغربت من برودة ايدها چن قالب ثلج كضني، غلست على ايدها وحرت بالطركاعة المنتظرتني، گلبي صار ينبض بقوة من سحبتني ووكفتني كدام باب مبين مال غرفة، عاينت لعيوني ونزلت دموعها مرة اللخ وكالت..

-والله غصباً عليّ جان ير...

ما سمحتلها تكمل ومديت ايدي ولويت يدة الباب افتحها وشهكت شهكة حسيت روحي طلعت بيها من شفته طايح بالكاع ودمه يجري..

-يمة

-سلوى: حبيبة راد يعتدي عليّ! راد يعتدي على امج ولج يمة والله راد يسويلي شيي وجرني للغرفة وجر عباتي

-حبيبة: زيد ابن عمي مسعود!

-حبيبة اعتددددى عليّ وكتلته وللج كتلته ادافع عن شرررفي عن شرفناا وشرف ابووج

-صخااام الصخمني صخااام بعيني عمتتت عيني يمممة عمتت عيني عمت عينيييي

لطمت على وجهي مبحلگة عيوني وانا اشوفنه نايم ودمه بطوله، تسودنت وظليت اصيح مثل المخابيل كضتني امي من زنودي ثنينهن وصاحت بيه..

-لاا تصيحين ولج لاا تفضحيناا سكتيي ساعديني نخلص منه بسااع

-شنووو شلوون

-حبيبة انا اممج ساعديني ولا تخليني وحدي ماعندي غيرج انا يمة والله ماعندي لا تكولين لاحد بداعتي عندج حبيبة بنيتي

-يمة شلوون ترديني اسكتتت شلوون كتلتيي فهمينيي شجابكم لهالشقة احجييي سولفيي شعندج ويه زلمة بشقة!!

-انا اجيت عبن......

گطعت جملتها وجفلت فاكة عيونها من اندكت باب الشقة علينا دگات قوية متتالية.......

يتبع 👑....

━━━━━━ ♛ ━━━━━━

الله يرحم ضرغام وليث ويرحم امواتنا جميعاً 🥹♥️♥️

#الامارة

بقلمي: زهراء السلامي 💎

لتنسون التصويت + التعليق بين الفقرات + متابعة لحسابي 💙.

بحچاية منك ترد روحي..

حاچيني هواي يابعدي وبعد روحي ♥️..

━━━━━━ ♛ ━━━━━━

"حــبيبة"

تسودنت امي من اندكت الباب ظلت تطفر بمچانها وكاضتني من ايدي حييل تجرني وتحرك بيه مثلما تريد اول مرة اشوفها بهالوضع الصعب وصعبت حالي واحوالي وقراري صرت مثل التايهة ماعرف شسوي اروح افتح الباب لو ابقى هنا..

-سلوى: گلتي لاحد يجي وياچ مو؟؟ احجييي ولج بعتي امج حبيبة!!!

-حبيبة: لاا يمة لاا ما كلت لاحد والله ما حجيت

-چا ياهو اجانه ياهو

بجت تضمضم بوجهها وتنوح بالسكتة، چفوف ايدها ترجف ما ثبن وحالها بالضيم بس مو احسن من حالي تعبت على تعبها وحرت ازود من حيرتها..

-يمة خليني افتح الباب واشوف منو

-لاا لاا لا لا ولج يكتلوناا يذبحونا يجيبون علينا الشررطة يشتكون علينا

-يوم انطيني مجال خليني اطلع اشوف ياهو وارجعلج لا اطببهم جوه ولا افهمهم بوجودج

-وانتِ؟؟ ما راح يسألون شجابج لشقة وحدج؟؟

صفنت بوجهها ماعرف شجاوب صدگ اذا طلعت تطيح براسي وسمعتي تصير بالحضيض خصوصاً وانا هستوني متطلگة وابوي لليوم ما مقتنع بالسبب الحقيقي وره طلاكي اذا فتحتها راح اطبب روحي بسين وجيم..

-حبيبة: يمة جا شنسوي!

-اششش نسكت وساعديني نخلص من جثته نشمره بالحمام ولا من شاف ولا من درى

-يمةة تحجين صدك انتِ!!

سكتنا ثنينا مرة اللخ من اندكت الباب وظل يدكها هواايه، صمت حلكي امي من ردت افتحه واحجي وياهة وخزرتني بعيونها بمعنى لا تطلعين صوت، بقينا على وكفتنا نرجف ونفكر بالخمس دقايق ما تحركنا لحدما راح الجان يدك بالباب..

-سلوى: ساعديني حبيبة ولا تعوفيني وحدي بهيج محنة

-ما اساعدج يوم ماا اساعدج انتِ راح تدمرين نفسج!!

-والله دافعت عن نفسي والله دافعت عن شرفيي

طاحت بالكاع تلطم على راسها وتكرر بنفس الجملة "دافعت عن شرفي، جنت ادافع عن شرفي" بجيت وياهة منهارة وكل دمعة تطيح مني ترسملي طريق جديد، كل فكرة جاي تجي على بالي بهالساعة تأكدلي امي بورطة وما راح تكدر تطلع منها بسهولة..

-ساعديني حبيبة

درت وجهي اعاين لجثة زيد الممدودة وضميت حلگي بيدي احبس شهگاتي.. شون شاب راح بشربة ماي شون شاب كتلته امي والله يعلم السبب الحقيقي وره كتلته شنو!

تقدمت بخطوات بطيئة على جثته مهدود حيلي، مسحت دموعي الما جاي توكف ونصيت اكعد على ركباتي يم راسه..

-سلوى: شنو جاي تسوين؟؟؟

ما جاوبتها ورفعت عيني ادور على شي اكدر اغلف بيها ايدي، كمت من الكاع ورحت لمطبخ الشقة لفيت ايدي بشالي وصرت افتح بجرارات الكاونتر ادور على چفوف بس ما لكيت غير چيس نايلون اخذته ورجعتله، گنبصت يم راسه من جديد ولبست الچيس چن چف ومديت ايدي لرگبته اقيس نبضه..

-سلوى: حبيبة لا تسودنينييي شنو جااي تسوين!!

-جاي اتأكد من موته!! بلچن بي نببض ونلحك عليه!!

-شنوو؟؟ لا لاا لاااا شنو نلحك عليه لاااا

ركضت بأتجاهي ودفعتني عنه طيحتني بالكاع، شهكت مرعوبة من شكل امي وصرخت گلبي يريد يوكف من شفتها طلعت سچين من جوه عباتها ودچتها برگبته!! بنفس المچان الجنت اقيس بي نبضه!

-يمممماااا شسووويتيي

-لازم يمووت هذا لازم يموووت وينهدر دمممه شوون تدافعين لواحد راد يعتدي على امممج ماعندج غيررة عليَّ انتِ!!

-شسويتي؟؟ انتِ صخمتيي حالنا ولطمتي بالزاايد انتِ تخبلتييي!!!

-اي ايي تخبلت اييي مااا تعرفين شنوو عشت اناا ماتعرفينن

-ضيعتي حگچ من سويتي هيچ يمة! ذبحتي نفسج بيدج!!

-حبيبة لا تصيرين انتِ والزمان عليّ لاا تظلمينيي

-انتِ ظلمتي نفسج!! لو عاايش جان كدرتي تنقذين روحج وشرفج كدامي وكدام الكل! بس انتِ ضييعتي اثبات برائتج ضيعتيييي

بعد جملتي جفلت فاكة عيونها چن ضربتها على الوتر الحساس، نزلت دموعها من جديد ورفعت ايدها ثنينهن تشكيلي..

-والله مادري.. مادري يمة مادري شسويت بس من حرگة گلبيي ولج كضني وراد يطين شرفي حبيبة شسوووي

-يممة موو انتِ تكتليي حگج تدافعين عن نفسج بس مو توصلل نذبحيي خلي ابوي ياخذ حگج وينعل والديه بس مو انتِ!!

عفتها ورجعت على زيد اعاينله واضرب اخماس بأسداس شنسوي وشلون نحل هالسالفة لازم اجيب ابا الحسن او واحد من اخوتي الضباط يحلوها لاازم اقنع امي..

-يمة راح اكول شي بس لا تصيحين بيه!

-اياااچ تجيبين واحد من اخوتج حبيبة اذا جبتي واحد منهم لا انتِ بنتي ولا اعرفج بعد!

-چا شلوووون فهميني شلوووون نحل هالطركااعة

-اشش لا تصيحين ولج لاا تعلين صوتج لا ننلگف!

-انتِ تنگلفين! ومحد غيرج يروح بين الرجلين يوم! لا تدمرين نفسج وخليني اساعدج بداعتي عندج

-ساعديني اي اي ساعديني خلينا ناخذه للحمام ونطلع منا يلا

-وبعدين؟! بعدين شيصير حسبالج ما يلكون الجثة؟؟؟

-هاي شقة فارغة ولج اصلاً محد عايش هنا والله محد عايش ولا راح يعرفون يبقى هنا يعفن ويتحلل جسمه ومحد يلگاه

-والكامرات؟! ما راح يرجعولهن؟؟ فهميني شجابج هنااا احجيييي

-صوتج حبيبة ولج راح اموت صوتج

-اسكت بشرط تفهميني شجابج هنا!!

-اخافن

-من شنو؟؟

-اخافن ما تصدكيني

-كولي الحقيقة واصدكج!

-اي اي الحقيقة صدكيني الحقيقة راح احجيها

-كولي!

بلعت ريكها تفرك بيدها وتضمضم بشعرها الطلع من الشيلة، تعض بشفتها وجسمها يرجف چن سعفة وضربها الهوا..

-احجي يمة

-احم.. اءء.. زيد صارله فترة يحوم عليّ يريد.. يريد..

-شيريد؟؟

-يريدني حبيبة يريددني انطي اليهواه كل زلمة!

-شلووون؟؟؟

-اي وداعتج عندي يا يمة موتني وشلعه لافادي يهدد بيه ويكول اخرب سمعتج يم شيخ علي خاطر يطردج من البيت لو يذبحج اذا ما اجيتيني للشقة

-وانتِ رحتيله؟؟؟؟

-لا لا.. لا بالبداية انطيته اذن الطرشة وما اهتميت بس ظل يهدد هواي وصار يجي لبيتنا ويضرب شباچ غرفتي وابوج يكون موجود ونايم بصفي ولج يريد يفضحني كداامه

-من كل عقلج يمة؟؟ ليش ما سولفتي لابوي؟؟

-وياهو يصدكني؟؟ ياهو يصدك وانا دخيلة جايتكم بفضيحة؟؟

-يا فضيحة؟ ما جاي افتهم عليج ياا فضيحة انتِ مو شردتي من اهلج عبنهم يعنفوج؟؟

-اي

-چا يا فضيحة تحجين عنها؟!

-ماكو فضيحة ماكو بس ابقى دخيلة وعليّ العين والناس تدور الزلة عليّ

سكتت اعاين لوجهها وحركات ايدها وحسيتها جاي تجذب عليّ، امي واعرفها من تضم شي تضيع عيونها عني وما تثبتهن بعيوني لو الدنيا تنكلب..

-كملي

-اخر شي كالي اعوفج بشرط تجيني لهاي الشقة بس اسولف وياچ ونتفق اتفاق ولا تخافين راح يكون ويانه نسوان خاطر تأمنين

-وجاي تقنعيني انتِ صدگتي واجيتيله؟!

-اي صدكت عبنه راواني فتحلي كامرا وشوفني النسوان وبيهن كبار موجودات وانا كلت خاطر اخلص من نگه وتهديداته اجي واحل هالسالفة

-مستحيلة انتِ

-اخذت احتياطي والله! شلت وياي سچين من البيت حطيته بين هدومي خاف يريد يسويلي شي اهدده بيها

-والنسوان وينهن؟؟ ما جاي اشوفلهن اثر

-هي هاي المشكلة من اجيت ما لكيت احد غيره.. ما ردت افوتن وياه بس كال كاعدات بالغرفة وقنعني اطب ولكيته بس هو وبساع جرني من عباتي يريد يسويلي شي وانا طلعت السجين اهدده بيها بس ما اهتم وظل يتعارك وياي واضطريت اشيل السجين واحطها بصدره ورأساً دكيت عليج

اسمعها وفاكة حلكي اشوفها كدام عيوني منهارة وتنتفض، كل ساع عينها تصير على جثته وتشهگ خايفة بس المشكلة ما جاي اكدر اصدك.. مو ما اصدك زيد راد يعتدي عليها لاا اصدك هالشي عبني اعرف ولد عمي مسعود شنو بس احس اكو حلقة مفقودة! اكو شي ثاني بيناتهم وامي ضامته عني!

-يمة

-ها

-اذا تحبيني وترديني اساعدج تسولفيلي كلشي وما تضمين شي

-سولفتلج كلشي شبيچ ما تصدكين!

-خوش هذا هو ما دام سولفتيلي كلشي انا رايحه احچي لابوي وهو يشوفلج حل

-يذبحننني انتِ مسودنة؟؟ والله يغسل عاره ويشمرني بباب بيت اهلي!

-لا ابوي مو هيج

-يصير هيج من تجي السالقة للشرف! حبيبة اذا تساعديني ابقي ماا تساعديني طلعي ماريدج وياي!

-ما اطلع لمكان رجلي على رجلج كومي نرجع للبيت ونخلي الزلم يحلوها!

-ماااريدد طلعي بره طلعيي فوك ضيميي تزيديني ضيمم

كامتلي تجرجر بيه غصب لحدما طلعتني من الغرفة البيها زيد وطبكت الباب وراهة، وكفت بالصالة معاندة ما ارضى اتحرك وشبعت اهاين ورزايل وحتى كفخات منها تريدني بس اروح..

-كتلجج مارووح

-شتردين انتِ شترددين

-اريدج تجين وياي خاطر نحل هالمصيبة اللفت على روسنا!

-ما اجي روحي

-يمة تعـ...

-روحييي كلت واذا افتهمت بيج حاجية لابوج اغضب عليج يا حبيبة ولا انتِ بنيتي ولا اعرفج!

-حرام علييييج

-مو حرام دافعت على شرفي ونفسي ما خليت واحد نجس يكضني!

-حرام تظلمين نفسج بهالطريقة تكدرين تبررين تصرفاتج كلها كدام ابوي واخوتي وهمه يفزعولج ويحلوها

ضحكت مستهزأة ونزلن دموعها من جديد، تهت والحيرة كضتني من كل صوب اشرتلي بأصبعها اطلع وما رضيت اريد اشوف شنو تاليتها وشنو لازم اسوي بس ما سمحتلي واجتني عتتني من ايدي عت وفتحت باب الشقة وطردتني ومن كدما روحها تعبانة ما اهتمت اذا جان اكو احد واكف بره لو لا..

توترت من شفت روحي واكفة وحدي بمكان مجهول وعمارة قديمة، مسحت دموعي بالشال واللتفتت يمين ويسار اتأكد محد شافني ونزلت من الدرج اركض ومغشية وجهي بشالي ما مطلعة شي مني..

ركضت للشارع العام اخذت تكسي وكعدت بالسيارة ماعرف شكول، وين يوديني وشنو اتصرف من ارجع ماعرف.. استسلمت وعفت امي بشقة ويه ابن عمي الذبحته بيدها والكارثة انا الوحيدة الشهدت على هالجريمة وصار لازم انا الالگه حل!

-خوية ما گلتيلي وين تردين اخذج؟

-حبيبة: مادري

-شنو؟

-اخذني لـ.....

هز راسه وكمل يسوق وانا سرحت اعاين من الشباچ والف فكرة والف سالفة تدور براسي كل شوي اريد اگله رجعني للشقة واستچن اذا رجعت شسوي؟ شنو الاكدر اقدمه امي ما راح تسمعلي وراح تسوي الي براسها خليني ماعرف شي احسن لاني تعبت!!!

دليت ابو التكسي بيتنا وانطيته فلوس ونزلت من السيارة، فتحت باب الحوش من بره على كيفي خاطر ما تطلع صوت ودخلت جوه بس خفت من سمعت اصوات اهل البيت كاعدين..

فركت ايدي محتارة شلون ادخل بدون لا يحسون؟ عاينت لباب الديوان مقفولة وباب الاستقبال هم مقفول ماكو حل غير انزع الصاية والشال اشمرهم بالطارمة الثانية وافوت چن جنت بالحديقة كاعدة وحدي..

سويت الفكرت بي بسرعة ودخلت من باب المطبخ وجان فارغ استغليت الفرصة ورحت للمطبخ الحار اركض وفزيت من شفت سبأ بي وجاي تبجي!

-سبأ!!

دارت وجهها عني بساع تمسح بدموعها ورجعت اللتفتت عليّ ترسم ابتسامة چذابة على وجهها..

-حبيبة: شبيچ سبأ؟ ليش تبجين؟

-ماكو شي

-شبيچ حاجيني

-ماكو حبيـ...

-سولفنن لا تعلن گلبي

نترت بوجهها من جزعي بس تندمت لانها ردت تبجي مرة اللخ وانطتني ظهرها، ذبيت حسرة تعبانة وسحبتها من ايدها بخفة اخليها تواجهني..

-سبأ اسفة لان نترت بيج بس اضوج صايرة من اسأل عن حالكم ومحد يجاوبني

-البيج مكفيج حبيبة

-لا مالكم شغل بيه سولفولي چا اذا انا ما اسمعلجن واوكف وياجن ياهي توكف

-توكفين وياي ضد اخوج؟

-اذا هو على غلط اكيد!

سكتت من دخلت شمس للمطبخ الحار شادة شال ثاني على راسها فوك شالها وعيونها منفخة مال وحدة هستوها كاعدة من النوم وراسها يوجعها، شافت سبأ تبجي وتخبلت عافت وضعها وجبرتها الا تسولفلها..

-سبأ: راح اسولفلجن بس بيناتنا الحجي يبقى

-شمس: اي اي احجي

-سبأ: علي التـقي امس واحنه جاي نريد ننام تحسر بصوت عالي وگالي..

-علي التقي: ما يطلع منج شي انتِ طفي الضوه سبأ راسي مصدع

-صار

گمت من الفراش طفيت الضوه الجبير وفتحت الضوه الاصفر مال الغرفة يصير خفيف وهادئ متعلمة افتحه گبل لا انام وانا اسوي عنايتي الليلية العلمتني عليها شمس..

رجعت بصفه على الجرباية وفتحت الجرار الي يم راسي وطلعت الكريمات والسيرومات، المراية على الميز حاطتها بصفي ومسوية هيج خاطر خاف فد يوم اتعاجز واغلس كلشي يم راسي..

فتحت السيروم حطيت لوجهي وراهة المرطب وراهة رطبت رجلي وايدي كلهن بس كله على الصامت اشتغل ما طلعت صوت وهو نايم بصفي ومنطيني ظهره.. اخير خطوة فكيت شعري مشطته وجريت شيشة العطر اتعطر وما حسيت الا بـ تقي يفز من مچانه وينتر بيه..

-كااافي مااا تنامييين

-اي اي راح انام كملت

رشيت بساع من العطر مثل المسودنة وشهكت من جر العطر من ايدي حيل وصاح بيه..

-لااا ترشين من هالعطرر بعدد ملييته

انصدمت من تصرفه هاي اول مرة يعلق على عطري هالشكل وبهالطريقة العنيفة، انهضمت وهزيت راسي بـ اي ساكتة چا شسوي خليني بالعتها وساكتة احسن ما اعصبه وانكتل بهالليل..

دمعتي بعيني وماريد ابجي كدامه، كمت من الجرباية خاطر اروح لـ حبيبة لو اروح يم ليلة شوي ابجي براحتي هناك بس فاجأني مرة ثانية من جرني من اطراف شعري بدون لا يوجعني وزمخ..

-وين رايحة بهالليل؟!!

-ما رايحة

-چا ليش كمتي من الفراش؟

-ماريد انام هنا راح افرش بالكاع

-ليش بوية؟؟

-ظهري جاي يوجعني وما مرتاحة بنومتي

-طبعاااً ما ترتاحينن طبعااً اذا ناايمة بحافة الجرباية لو سويتلج هييج طحتيي طبعاً ما راح ترتاحييننن

يصيح بكل حِسه معصب وروحه طافرة، بلعت ريگي ويه دموعي ورجعت اكعد على الجرباية وكضيت المشط اللهي روحي بي وامشط بشعري..

-نامي!

-اي

-تعاي نااامي

-اي بس امشط

-جيبيي

خذاه من ايدي غصب وكض شعري يمشطه بس شني احسه تكطع هاي وشعري مشطته وسرح بس مبين ما يعرف يمشط الشعر الطويل وبهذل حالي وهم بقيت بالعتها وساكتة..

-يلا نامي

-ما انامن

-شني؟؟

-ما انامن ماريد انامن يمك

-لييش؟؟؟

-ماريد ما جايني نوم انا رايحة يم ليلة اباتن اليوم

-سبأ لااا تفحطيني بهالليل تعااي نامي!

-مااريد!

خذيت مشطي وياي وطلعت من الغرفة واسمعه يصيح بصوت عالي كلش..

-انااا اعلمج سبأ اطلع **** اذااا حاچيتچ بعد!!

طلعت ابجي ميتة قهر ودخلت لغرفة ليلة لگيتها نايمة، حطيت راسي على المخدة بصفها وللصبح عيني ما غفت اتذكر شلون حاچاني وشلون يفشر على روحه اذا حچى وياي بعد وازيد بالبجي..

-ليلة: يا بومة نايمة بصفي

فزيت مخترعة من حجت وهي مغمضة عيونها، مسحت دموعي وهمست بصوت ناصي..

-انا سبأ

-الله لا ينطيك يا تقي

-انچبي لا تدعين عليه

-چا شكو نايمة يمي امشي رجعيله

-لا ماريدن

-ليش خية؟

-زعلانة

-چا الله لا ينطي واطيح حظج اذا دافعتيله

-تمام

-كومي غسلي ماكو زلمة يستاهل تبجين عليه

هزيت راسي ورجعت نامت ليلة وانا كتلج ما غمضت عيني وهاي انا هسة كاعدة هنا واستذكر الصار وابجي على حظي وبختي الضايع..

-حبيبة: اهمدااچ

صفگت ايدها سوه وغمتني بحرگة، استغربت من تصرفها وظليت فاكة حلكي ماعرف شكول..

-حبيبة: ولج انتِ ليش ما تفتهمين سبأ لييش

-سبأ: حتى انتِ عليّ حبيبة بس طبعاً تفزعين لاخوج

-خايبة انا محروگ دمي عليج اريدج ترتاحين وحالج يتغير للأحسن!

-سبأ: ما فهمت

-شمس: اوكفي حبيبة اوكفي اريد نجي لوحدة وحدة ليش كالج بالبداية "ما يطلع منج شي انتِ؟" شنو قصده بهالجملة؟

-سبأ: شمعرفني

-شمس: انتم تسولفون گبل لا تنامون او يعني.. احم.. فد سالفة فد موضوع تفتحون لو گاضيها على الصامت؟

-سبأ: لا ما نسولف

-حبيبة: لا بشرفج!

-سبأ: والعباس ولا نسولف عبن هو يتعب ودائماً ساكت فـ انا هم ما احجي خاطر يرتاح

-شمس: يصير انا اغمچ هالمرة؟

-سبأ: بنات شبيجن وياي فهموني

-حبيبة: خايبة تقي ما يحب يسولف؟؟ علي التـقي؟؟ اخوي روحه بالسوالف والافلام والنراكيل والضحك والتفرفش يكره ويضوج الشخص الهادئ ما يطيق يكعد يمه وانتِ عود مسويتله بيها فضل من ساكتة ااااخ لو اكضج سبأ اااخ

-سبأ: يا خية چا غير يرجع من بره تعبان

-شمس: راجع من بره وين خية جان يكرب هو؟ تره يطلع بالليل للكوفي ويه جماعته لا يحمل طابوگ ولا يطبگ سيراميك لا تخافين ومن يجي الزلمة لبيتج يريد يكمل السهرة وياچ ويتونس لا تشوطيني خايبة مو طلع بلساني شعر وانا افهمج وينهاا تَـمني خليها تنجلط وينها

-سبأ: اووووف مادري سكتن

-حبيبة: انتِ صدگ تنامين على حافة الجرباية؟

-سبأ: هاا

-شمس: جاوبي بصراحة

-سبأ: اي صدگ بس والله على مرتين نمت حده كلش بس بعد استحيت اعيدها وهم ما ردت اضوجه بنومته عبن شعري طويل ويزعج

-شمس: تستحين لييش خايبة انا اذا ما انام على خوانيك بدر ما ارتاح واتعمد احطن شعري على وجهه وايده خاطر من يفز يشوف اول شي شعري بعيونه ويشم عطري بخشمه

-حبيبة: سبأ ما يصير هيج حبي انتِ تجرأي شوي خلي يحسچ مريته عوفي المستحى ما يفيد والله

-شمس: حياتي حبيباتي رويحاتي يا سبيئة زلمتج طاگة روحه من جفافج خصوصاً وهو يشوفج تلبسين وتتعطرين وتتكشخين ولابسته چن مزهرية بصفج

-چا شسوي يعني اتعطر واعطره وياي لو شني

-شمس: اي عطري شكو بيها بخبخي لروحج واخر بخة رشيها عليه داهري بيها وخلقووا من هالشي حديث وموضوع وهي تفرج بعدين

-سبأ: لا لا استحي شني ارشله من عطري اصلاً هو عطره يخبل ماريد اغيره

-شمس: احوووووووووو حوووووو

-حبيبة: ههههههه ولج مو قصدها تغيرين عطره هي رشة شراح تسويله عود رشيها على الجرجف مو عليه بس قصد شموسة تبدين وياه حديث لان تقي حسباله انتِ ما طايقته وما تردينه

-سبأ: مو ماعرف شون

-شمس: انتِ بس ضحكي والله كريم وراهة

-سبأ: چا ما يسأل على شنو تضحكين؟

-حبيبة: وهو المطلوب راح يسألج ليش تضحكين وانتِ اخترعي أي شي خاطر تفتحون موضوع

-سبأ: هاااا والله ما مفكرة بيها من گبل

-شمس: فكري خية فكري.. ومن رخصتج حبيبة وادري تقي اخوج بس سبأ لا ترجعين تحاچينه اليوم وثگلي وجهج بينيله انتِ مقهورة من نترته امس خاطر يجي يراضيج وتسولفون

-حبيبة: اي لازم

-شمس: هذا صوت بدورتي يصيح امشن نتريك امشن

جرتنا انا و حبيبة الوجهها صاير اصفر وحالها مگلوب بس ما صارلي مجال اسئلها شبيج، فرشنا السفرة وحطينا الريوك وتوزعنا حول السفرة.. الكل موجود هنا عدى سلوى والامير علي ومرته..

-شيخ علي: ابا الحسن لا تعوف اخوك وحيده وضعه ما عاجبني

-ابا الحسن علي: صار بوية.. بس لا يظل بالك الامير كلما يشوف وديان لو يصير بيناتهم حديث تنتكس حالته

-رسمية: الله ينطيها العافية تَـمني وياه ما تعوفه مگابلته وكاعدة خطية

-شيخ علي: الله يوفقها ويستر عليها

غمست خبزتي بالمربى وبالصدفة رفعت راسي لـ تقي شفته يعاين عليّ ومن صارت عيني بعينه وخر نظراته عني بساع، توترت وكمت ماعرف شون اكل وانوب لزمتني الكحة وحبستها انذبح زردومي اريد بس اكح واستحي كدامهم..

-شيخ علي: حبيبة امج ليش ما كعدت؟ روحي شوفيها بوية

-حبيبة: هاا؟ مادري.. مادري بوية خليها يجوز بعدها نعسانة

-شيخ علي: لا هي من امس كالت راح تنام بغرفتج حسيت بيها شي مو طبيعي روحي صيحيها

هزت راسها حبيبة بس انتبهت لايدها ترعش حتى من جانت تاكل انتبهتلها عبنها كاعدة بصفي اعصابها تلفانة، كامت من السفرة وراحت للدرج خاطر تصيح امها من فوك همزين مبين تصالحن ما دام سلوى باتت بغرفة بنيتها فرحتلهن والله..

-رسمية: حبيبة شبيچ واكفة على الدرج

-حبيبة: هااا؟ مابيه مابيه شي

-شيخ علي: ليش وجهج اصفر بوية انتِ مريضة؟

-سلوى: لا بس امس رجعنا تناگرنا.. صباح الخير

شهكت حبيبة مبحلگة عيونها من شافت امها تنزل من فوگ وتلف بشالها، كلنا انتبهنا لتصرف حبيبة الغريب واخوتها ظلوا واحد يعاين لوجه الثاني.. نزلت سلوى من فوگ مبتسمة وكالت بضحكة..

-ما ارزلج بعد حبيبة امج لا تخافين هذا هو تراضينا

-شيخ علي: سلوى لا تزعلين بنيتي ما ارضى عليها

-سلوى: انعل ابوها التزعل بنيتك يا بعد هَلي

نزلت تضحك وصوت شحاطتها تضرب باية الدرج واضحة، وصلت لـ حبيبة وحضنتها نص حضنة وجرتها وياهة للسفرة وتسولف وياهة بصوت عالي..

-حبيبة امج وروحها انتِ گلبي مفرفح عليج

-علي النور: اشوفج اول وحدة وكفت وياهة من تطلگت

-سلوى: غير جنت مريضة ومالي خلگ قابل انا متعمدة

-علي السور: خوش خوش

-شيخ علي: بلا حجي زايد يلا تريگو وكلمن يطلع لشغله

-علي السور: تأمر شيخنا الطاگ

-شيخ علي: سوور!

-علي السور: هسة شني واذا گلت عنك شيخ طاگ بس لا ما تريد احد يفتهم بعت بستان كربله بسعر يشگ؟

يغمز ويحجي وياه وعمتي رسمية تضحك بس عمي علي بعده مخنزر، تربع علي النور وكال بحماس..

-اخواني اخواتي چنايني وأحفادي والحياية المتطشرين منا ومناك اود ان ابلغكم ان شيخ علي باع جزء من بستان كربله بسعر يسمحله ياخذنا كلنا وياه سفرة على حسابه

-حيدر: حييي الله جدددي

-علي البدر: رحم الله والديك بوية صدگ ينرادلنا سفرة

-علي الدر: اي والله النفسية محتاجة سفرة بس وين تريد تاخذنا حجي؟

-علي الكـرار: ياريت لو نروح لـ...

-علي النور: اذربيجان بوية بداعة الحياية ودينا هناك

-علي الكـرار: لا انا اكول لو نروح لـ...

-علي السور: لدبي؟ اي والله بوية خوش فكرة اخذنا لـ دبي عاين الدنيا كلها راحت بقت علينا

-علي الكرار: لا ولك انا اكول لو...

-حيدر: نروح للنمسا لان يكول ابو شادي الزبنطوطي الي يريد ولفه يحبه ياخذه سحل للنمسه

-علي الكـرار: وجعععع ولد الاوادم مو جاي اسولف كل شوي واحد مقاطعني! بوية انا اكول خلينا نروح للعمرة وناخذ خالة تَـمني وبنيتها هم خطية هم يتونسن ويانه

-رسمية: خوش نشوف عود

-شيخ علي: شو ذولة قرروا وعزموا واقترحوا دول وواحد يجر طول والثاني عرض چن صدگ راح اخذهم

-علي التـقي: ليش بوية ما تاخذنا شبينا شناقصنا وما نسافر

-شيخ علي: ما بعت البستان

-الولد كلهم: شنووو؟؟؟

-شيخ علي: استخاريت وطلعت الخيرة مو زينة وما بعت

-علي السور: ياهو هذا الاخذلك الخيرة؟؟ اكيد مسعود!

-شيخ علي: انچب لا تستهزأ.. اخذت الخيرة عد واحد صاحبي رجل دين وطلعت الخيرة مو زينة وما راح نرتاح

-علي البـدر: جا زين سويت من ما بعت

-علي النور: لا مو زين جا يمته نروح للنمسه

-حيدر: ويمته نطبق نصيحة ابو شادي الزبنطوطي؟

-شيخ علي: بحلمك طبقها جدي.. ويلا ادعبلوا كلمن يطلع لشغله ماريد اشوفن چهركم بالبيت

سكتوا كلهم وبقوا يبسبسون بين بعض ويضحكون بالسكتة، كضتني الضحكة على حركات سور ونور وهمه يداهرون كرار الضايج.. گمنا البنات شلنا السفرة وغسلنا المواعين بدون حبيبة وضعها مو زين ونفسيتها تعبانة من طلاگها.. اوكات من اعاين عليها انقهر واتأذه حبيبة ما رجعت حبيبة القديمة من يوم انخطبت لـ منتصر لهذا يومها..

-سبأ وينج

انتفضت من سمعت حس تقي يصيحلي من الصالة وذبيت المواعين من ايدي وركضتله وهمشتني من شالي شمس.. صحت مخترعة من حركتها واللتفتت عليها شفتها عاكدة حاجبها بعصبية وراصة على اسنانها..

-انا شحجيت ولج سبأ

-هاا؟ شحجيتي مادري نسيت

-مو كتلج ما تراضي بساع وتاخذين موقف؟؟

-علي التقي: سبأ وينج سبأ!

-سبأ: شمس جاي يصيحلي حبابة خليني اروحله

-شمس: روحي بس لا تترعنين وتستخفين حاجي على كيفج چنچ زعلانة

-سبأ: اي اي صار يلا هديني

هدتني تستغفر ما عاجبها ونويت ارفع راسها وما افشلها، رحتله شفته واكف وبيده الموبايل ووجهه مگلوب..

-شنو ما تسمعين؟

-لا اسمع

-چا ليش هيج تأخرتي

-غير جنت اغسل مواعين

هز راسه وصعد الدرج واشرلي اروح وراه، نشفت باقي الماي الي بيدي بالدشداشة وصعدت فوك، طب لغرفتنا وانتظرني بينما دخلت وسد الباب وراي، راح للميز اخذ باكيت الجكاير وطلع منه جكارة وگال بحسرة..

-سبأ

-نعم

-اريد افض سالفة اهلج تكدرين ترحيلهم اليوم؟

-اي

-يعني ماعندج مشكلة؟ ماريد اضغط عليج

-لا ماهتم

-شنو شبيچ

-شبيه

-شو گوة تسولفين

صفنت منتبهة على نفسي واصلاً چلامي طبيعي جاي احجي نفس كل يوم بس مادري ليش حسباله بيه شي.. تذكرت شمس وحبيبة وكلت هي اجت على رجليها خليني امثل ان صدگ ضايجة واشوف شيسوي..

-تعبانة شوي

-من شنو تعبانة

-ما نمت زين امس

-طبعاً ما تنامين زين غير عايفة فراشچ وركضتي لغرفة ليلة!

-اممم

-سبأ شسالفة!

-شنو

-ما تجاوبين!

-شجاوب كتلي اريدج ترحين لاهلج كتلك خوش بعد شترديني اكول؟

زفر نفس وجاي يريد يجاوبني ودگ موبايله البيده، گلبه يشوف منو وشفت اسم "علي الحـق"، فرك وجهه يستغفر بصوت عالي ضايج وكال..

-نأجل حديثنا عبن حق اجه ويريدني اصالحه ويه ابوي.. تعاي نزلي وياي

-لا ما انزل

-تعالي سبأ شبيچ!

جرني من ايدي غصب عني ونزلني وياه وظل كاض ايدي لحدما دخلنا الاستقبال، من شاف علي الحـق وعبق كدامنا ياله هدني وراح يسلم عليهم وانا هم سلمت عليه وعلى عبق بحرارة..

-سبأ: شونج عبق شخبارج

-عبق: بخير الحمدلله

-سبأ: ضعفانة كلش شبيچ خوما مريضة اسم الله؟

-علي الحـق: هااا قبق هااا؟؟؟

-عبق: اهووو بعد شيخلصني يمعودة ههههه

-علي الحـق: ما ترضى تاكل مورمة گلبي حايرة لو بالموبايل لو تتابع بهالمسلسلات وما ملحكة

عبست وجهها عبق ما عاجبها شلون يحجي عليها وضحك تقي على تصرفاتهم، ضرب زند اخو وكال..

-علي التقي: خايب ما تفرح انا اتوسل بـ سبأ خاطر نتابع شي سوه وما ترضى

-علي الحـق: لا هيج انجلط انا

ضحكوا سوه وعبق تضحك على ضحكتهم وانا كوة ابتسمت، حسيت چلامه بسمار الي چن هو ضايج عبن ما اتابع وياه شي وكلما يعرض عليّ اگله ما احب المسلسلات والافلام..

-علي التـقي: عاين حق لا تتسوفل راح اصيح لابوي خاطر اصالحكم حب رجيلاته ودياته وصير ادمي

-علي الحـق: احبه واراضيه بس بلاوي ما تجي يمي بعلي لو شفتها ادوس بگلبها!

-علي التـقي: علي الحـق ابوك اكيد راح يطلب منك تستسمح منها!

-علي الحـق: ختولي بت العارية انا استسمح من اخت حرملة؟؟

هز راسه تقي ما راضي على سوالف اخوه وعافنا وراح يصيح لعمي علي، كعدنا على القنفات انا وعبق المتوترة وتفرك بيدها وعيونها ما طاحت من الباب وكل شوية هامسة بصوت ناصي..

-علي على كيفك لا تكبر المشكلة ويه ابوك حباب

-خوش خوش

-علي لخاطري فدوة

-خوش عبق افتهمت

سكتوا ثنينهم من انفتحت الباب ودخلوا علي التـقي وعمي سوه، حسيت بعمي جفل مصدوم من شاف علي الحـق بوجهه وهيج افتهمت تقي ما كايل لابوه راح يجيبه خاطر يتصالحون وسواها مفاجئة بس حق ما انطاه مجال يفكر لان رأساً هجم على ابوه وحضنه حيييل واختنگت نبرة حِسه وهو يكول..

-شلونك تاج راسي

-شيخ علي: هلا

-حبيبي ابوي گلبي مفرفح على شوفتك

وخر منه يبوس راسه وايده ونزل يريد يحب رجله وعمي ما رضى كضه من زنوده ورفعه، وكف حق كدام ابوه يعاين لعيونه وشفت عمي يحارب خاطر ملامحه تبقى جامدة بس جاي يفشل لان ابتسامته الخافيها فاضحته..

-شيخ علي: شتسوي جاي هنا انا مو كلت ماريد اشوفن چهرتك بعد

-علي الحـق: عيوني التمساحية اشتاگت تشوف شيباتك بوية

-املصهن عيونك

-فدوة الك

-وادوسهن بنعالي

-وانا ادوسهن وراك يفدنك

-روح ما تمشي عليّ هاي سوالفك

-بوية حطلها ملح و يلا راضيني

-ولك ابن الچلبب قصدك انا ممصخها؟!

-لا حشااك ما اسمحلك تحجي على نفسك بوووية انا الغريب افرك حلگه لو جابك بطاري شون لو القريب حچه...

طگ ضحك من نزع عمي نعاله يريد يكتله وهو راح يشرد بالمنور، ضحكت عبق تغطي حلگها وحق يصيح بـ ابوه من جوه..

-بوية عيييب عيبب مو كدام النساوين لا تضيع هيبتناا

-شيخ علي: اطلعع خليني اچفص بنص هيبتك اطلعع

-ما اطلع

-اطلععع لك ارعن

-بوية زعلت عليك هاي وانا اجيت وحضنتك وصرت خوش وليد بس چنك ما تحب المؤدبين وتريدني ارجع استهتر

-شيخ علي: تعال احاجيك

-ما اطلع هسة تكتلني اخاف

-راح اجيك مناك وعلي

-بوية شبيك انا حامل

ضحكت عبق بصوت عالي وبسرعة ضمت وجهها، عمي علي ضحك على ضحكتها ونزل راسه يستغفر مأيس من خبالات ابنه واشر لـ تقي خاطر يخلي يطلع..

-علي التـقي: هههههه اطلع ابوي انطاك الضوء الاخضر

-علي الحـق: كول وعلي

-علي التـقي: وعلي

فتح باب المنور ومد بس عيونه يباوع لابوه، ذب عمي نعاله واشرله بيده اطلع..

-علي الحق: بوية اذا اكتشفت عندك سلاح ابيض ثاني بعلي ارفع بيك عقوبة

-تطلع لا ارفع روحك من جسمك اطلعع

-راح اطلع بس..

-علي التـقي: شو تعاال

جره من ياخته يطلعه وشمره على عمي ورجعوا تحاضنوا وحق مستمر بالمداهر، خبل ابوه وخلاه يشوط بس بساع يبرده ويصبغ بي وانوب يرجع يشمر عليه حجي..

-شيخ علي: طلعه مناا طلعه اخذي عمي عبق هاي شلون متحملته انتِ بنيتي ما تكليلي شلون

-علي الحـق: تعشگني بوية على عنادك

-شيخ علي: شتعشگ منك چنك گنفذ

-علي الحـق: هاا حجي چنك تغار من عيوني التمساحية

صفگه عمي راشدي على خده وعود بطل سوالفه؟ ابد ولا اهتم استمر وعبق بس كاعدة وتعض بشفتها عود كافي..

-شيخ علي: عمي ماعنده احساس هذا لا تعضيله شفه ولا تهتمين متعود على سوادينه

-علي الحـق: بوية صدگ على طاري السوادين سلاوي بلاوي السوتلنا السحر وكول علي الحـق ما كال

-هم رجعتتت؟؟

-انطيني صبر اجيبلك دليل يخدمك بس صبر اريدن

-ولي بره يلا.. عوف مرتك واطلع ماريد اشوفن وجهك لعبت روحي

-علي الحـق: خوش مع السلامة

-عبق: علي الحـققق وين رايح!

-علي الحـق: جا ابوي طردني شني ماعدنا كرامة احنه

-علي التـقي: من شال عليك النعال وختلت مثل الجريدية ما حجيت بالكرامة

-علي الحـق: مالك غرض انا وابوي نتمالخ نتلاطم نتصايح نتصلخ بيناتنا

نزل عمي شال نعاله يريد يكتله مرة ثانية وطلع علي الحـق يركض من الصالة ويضحك بكل صوته، من صدگ تونست عليهم وعمي علي ابتسامته وضحكته ما غابت من وجهه مبين عليه شكد فرحان بصلحهم ومرتاح..

-عبق: خالة رسمية موجودة؟ اريد اسلم عليها

-سبأ: اي بغرفتها جوه تعاي

اخذتها وطلعنا لكينا علي الحـق بغرفة عمتي حاط راسه على رجليها وهي تبوس بوجهه وخدوده وتغنيله فرحانة عبنه رجع..

-رسمية: وهلا بيك من اجيت.. علاوي شمعة البيت.. هلا بيك علاوي وهلا بيك علاوي

-علي الحـق: زلمتج طگني يمة

-ياا يمة يا يمة سودة عليّ عليك

-سودة على بلاوي اسم الله عليج انتِ يا بعد سلوى واهلها

سوت صوت عبق بالباب ودخلت تسلم عليها وانا عفتهم وصعدت فوك ارجع لغرفتي، اول ما فكيت الباب انرديت ليوره من صار بوجهي تقي واكف.. مادري شبيه ترددت وردت اشرد من الغرفة بس ما خلاني وجرني من ايدي حيل وشمرني على صدره يحضنني ويكول..

-انا اسف

فكيت عيوني مصدومة.. والعباس يمكن بحياتي ما مصدومة مثل صدمتي هسة ومن كدما مذهولة من الموقف كمشت بياخة قميصه وظليت ساندة راسي على صدره ما تحركت..

-انا امس جنت ضايج من شي وطلعت حرگتي بيج وانتِ ما تستاهلين

مسح على راسي وبمسحته جر الشال مني نزعه ووگعه على چتافي، وخرني عنه شوي يعاين بعيوني الضايعة واردف بهدوء وبطئ..

-امس ما كدرت انام عبنچ طلعتي من الغرفة زعلانة ويشهد الله عليّ ما احب ازعلچ لو اضوجچ بشي

نزلت عيوني من عيونه ماعرف شنو لازم احجي وماردت اخرب الاجواء بشي اثول فـ كلت اسكت احسن، رفع حنچي بيده يجبرني اواجه عيونه وگال بأبتسامة خجلان..

-ليش ساكتة؟ لازم بعدج ضايجة وما راضيتيني؟

-لا

-لا يعني تراضينا لو لا يعني ما سامحتك؟

-هههههههه

-هههه ليش تضحكين

-ماكو شي وسامحتك انا

كبرت ابتسامته وحررني من ايده فرحان، فرحت لانه فرحان وفرحت اكثر لان حسيت زعلي منه جان مضوجه وحاز بگلبه مع العلم لو اجي للواقع والله ولا حقدت عليه ولا حتى ضجت منه ومن كثر حبي اله لو ما معتذر مني هم جان سامحته..

-تحبين نروح لاهلج هسة؟

-بكيفك

-چا نازل اجيب السندات

هزيت راسي مبتسمة گلبي متفجره بي قنابل من الفراشات وقلوب الحب، نزل هو وانا اخذت ملابسي وطبيت للحمام اسبح وابدل ورتبت نفسي كلش زين علما كملت لكيته كاعد على الجرباية وحاط بيده جنطة سودة ولابس دشداشة زيتوني سحلني سحل بيها وعيوني الصلفة لزكت عليه ما جاي اكدر اوخرهم..

-ها جاهزة؟

-اي اي.. اي جاهزة

-يلا چا

طلع كدامي وعيوني تركض وراه اعاين لظهره وزنوده المعضلة واوزع ابتسامات، بقيت امشي وراه لحدما نزل وعبرنا الصالة وصعدنا السيارة، اخذت الطريق كله ابوگ منه نظرات واگرص بيدي اعاقب نفسي خاطر اثگل بس اوقات صلافتي ماكدر اتحكم بيها وهاي بس وياه هيج والله..

-شبيچ سبأ

-شنو

-شبيچ كل ساع تعاينيلي بيه شي؟

-انا؟

-اي انتِ

-لا ما عاينت

-لا كل ساع تعاينين حتى شكيت بروحي شنو اكو شي على وجهي؟

فتح المراية الامامية مالته وهو يسوق على كيفه، صار يعاين لوجهه منها ويعدل حواجبه وشواربه وعين على الشارع وعين على المراية..

-ما منتبه هاي حواجبي شو متخربطات چا ما تنبهيني

-ها مادري

-من غسلت وجهي تخربطن

-اي

-شلونچ انتِ خوما متوترة؟

-لا

-شوكت تردين ارجع عليج؟

-بكيفك

-فد ساعة؟

اللتفتتله بكل جسمي وبدون لا احس صحت..

-بس ساعة!!

-ههههههه يمعودة على كيفج جاي اسألج

-لا حباب عوفني يمهم اريد اشوفن امي ورهف

-صار بعيني

-من اكمل ادگلك من موبايل امي

هز راسه موافق وفهمني شنو لازم اسوي، انتبهت للجنطة السودة النزلها وياه جانت جنطة نسائية حطها بحضني وكال..

-كل السندات موجودات هنا ومثلما اتفقنا سبأ لا ترتبكين ولا تتوترين

-امم

-ادري صعبة عليج تلفين مشكلة لاهلج بس تره اهلج متورطين من اول وبدون لا نسوي هاي فيكة السندات ومادري شنهي اكدر اسجن اخوج وبكل بساطة

-چا ليش تريدني اخذلهم السندات وانتَ تكدر تسجنه بدونهن

-سبأ حكم السرقة يختلف عن حكم المخدرات والممنوعات ذنيج يخيسنا بالسجن هاي اذا ما انحكم مؤبد السرقة ياخذله چم سنة يتأدب بيها ويطلع واذا ابوي تنازله خوب بعد غير شكل

سكتت متفهمة بس والله يصعب عليَّ ادوهن حال اهلي واخربط حياتهم، بالبداية جنت ما اهتم واكول طز بيهم يستاهلون بس كلما جاي نتقرب من بيتهم كلما گلبي جاي يرف عليهم واحس ماريد اسويها بعد..

-سبأ

-كول

-انتِ راح تسويها مو؟

-ان شاء الله

كلتها ودرت وجهي للجامة اعاين للطريق وهو چلمة ما حچى بعد، طبينا لفرع بيت اهلي وسفط بالباب وكال..

-انا انتظرج هنا

-لا روح خاف اتأخر

-لا ماعندي شي ابقى هنا انا

-لا تقي روح

ضرب على الستيرن ضايج ونزلت من سيارته عايفته وحده، ضميت الجنطة جوه عباتي وكلشي بگلبي وعقلي يكول سبأ لا تبيعين اهلج لا تسويها، شتكولين للناس باجر عكبة انتِ السبب بموت امج من القهر وسجن اخوتج؟

تمشيت لباب البيت ووكفت كبالها اعاين لضخامتها ولضخامة بيتنا وجماله وفصاله وبنائه الحديث واللوانه التفتح الگلب بس كل هذا غلاف.. كله جذب بجذب برگع ابوي مبرگعه يضحك على الوادم ويخدع ابصارهم يخليهم كلما يعاينون لبيتنا يكولون هنيال العايشين بي وهو العكس تماماً..

رفعت ايدي الترجف ودكيت الباب على كيفي حيل مابيه، اللتفتت لسيارة تقي شفته بعده واكف منتظرني، تنهدت تعبانة ورجعت دكيتها اقوى وجان يفتحلي الباب اخوي سالم..

-سالم: هاي شجابج انتِ حسبالي زيد رجع

-سبأ: لا هاي انا

-شكو شعندج؟

-اجيت ازوركم

-والسندات وين؟!

-خليني افوت تقي واكف بره ماريده ينتبه علينا

هز راسه سالم ما عاجبه وفوتني جوه، عبرت الساحة برجلين كوة شايلتني وطببني من باب الاستقبال مو من باب المطبخ..

-طبي فضيني

-وين امي ورهف؟

-مو هنا

-صدگ والله؟؟

-طلعي السندات وخلصيني

-ما اطلعهن الا اشوف امي ورهف

فزيت من انشمرت على القنفة براشدي صفر اذني من قوته، طحت عليها مختل توازني وحطيت ايدي على خدي الحار خايفة..

-لج **** هم صاير عدج لسان لو هذا ديوثچ منطيج مجال؟؟

فكيت عيوني ورفعت راسي اله بعدني ما فتحت حلكي بچلمة ثانية وانلطمت مرة اللخ على شفتي وكضني من رگبتي يعصرها حييل بين ايده ضاع نفسي..

-السندااات وين؟؟؟

-سـ.. سـ.. سالم.. سالم

-بالعباس ابو فاضل سبأ اذا طلعتي جاي تلعبين وياي اكتلچ وادفنج هنااا جوه رجلي ولج السندااات وييييين

اشرت بعيوني الذبلت على عباتي ياله هدني، كضيت صدري وركبتي اكح بكل حيلي روحي حسيتها رادت تطلع وعيوني نطت من وجهي، .. ما اهتملي اخوي ولا اهتم لحالي وفتح عباتي وجر الجنطة الضامتها جوه..

ارتاحيت شوي ورجعلي النفس وانتبهت لـ ابوي واكف بباب الاستقبال يعاينلي من بعيد وسلطان واكف بصفه، خفت من نظرة عيونهم الشرانية وكمت من القنفة بساع ابتعد منهم..

-سبأ: كلشي موجود بالجنطة كللشي والله كلشي

-مسعود: متأكدة؟

-سبأ: اي وداعتك يا بوية

-سلطان: چا شيخ علي ليش لهسة عايش؟

-سبأ: يعني شني

-سالم: يعني يا خيتي الچلبة انا جبتلج ابرة تكتل علي بمچانه وما يصبحله صبح ثاني بس عجيب محد جابلنا خبر موته؟!

-سبأ: مـ.. مـ.. ماعرف.. ماعرف ماعرف انا سويت.. سويت كلشي كتولي عليه

-مسعود: شسويتي بالضبط؟!

-سبأ: رحـ.. رررحت رحت لغرفته ودجيت الابرة بي وبگت السندات

-سلطان: ومرته وين جانت؟

-سبأ: ماعرف.. ماعرف ما جانت وياه بالغرفة وحده نايم لان بالاساس سلوى صايرة ما تبات وياه بغرفة وحدة

-مسعود: امممم هاجرها يعني

-مادري بعد

-سلطان: يعني الخِلة منك سالم يا مطي! الابرة ما موتته وانتَ خبصتنا خبصص تكول جبتها من اكبر تجار المخدرات وينها؟؟ وين فائدتها؟؟ هذا علي العاار بعده على رجليه؟؟

-مسعود: اسكت انتَ مو وكتها هسة المهم السندات يمنا وعاين سالم من باجر تروح انتَ وزيد تصرفوهن وتدفعون للديانة

-سالم: هو وينه زيد ما رجع

-مسعود: وين ولى هالخنيث؟!!

-سالم: مادري تسألني الي

-سلطان: هسة يرجع بوية لا تهتم واذا ما رجع انا اطلع اجيبه واسحله حدر رجليك

-مسعود: خوش.. وانتِ سمعي ترجعين لبيت زلمتج تقنعي يساعدنا بمعارفه لا يظل متنحس علينا احنه المن منطي مرة؟؟

-سبأ: اي صار

-مسعود: يلا ولي طلعي

-سبأ: بوية اريد.. اريد اشوف امي واختي

-مسعود: ولي ماعندج ام واخت يلا بررره

-سبأ: والله حرام عليك بوية

-سالم: الظاهر جلدج يحكج انتِ تعاااي

ما انطاني مجال ابرر وملشني من الشال وصفگني راشدي وره راشدي وره راشدي احس راسي انسطر وعيوني بعد ماشوف بيها، صرت ارفس جوه رجله وابجي واتوسل بي يعوفني وتكابلوا عليَّ هو وسلطان وابوي واكف يتفرج علينا..

-سبأ: خلووني ارووح ماريد اشووف احد ماااريد بس خلوني ارووح ابوس ايددك يابوية

-سالم: انچبييييي سكتييي ماريد اسمع حسچ

رفسني برجله شاغت روحي، صحت واحس گلبي يريد يوكف من شالني من عباتي سلطان يوكفني كباله ورفع ايده يريد ينطيني بوكس ينهيني وماعرف شلون كدرت افلت نفسي من ايده وشردت بره، طلعت من بين ايده وعبرت الساحة عايفتهم وراي يصيحون ويفشرون عليّ وفتحت باب الحوش وانهزمت اركض من البيت مثل المسودنة..

وانا اهرب شفت سيارة تقي باقي على وكفته بره، بجيت بحس مبحوح وركضتله بدون حذاء حافية وشمرت روحي شمر على سيارته، فتحت الباب وطبيت اشهك بكل صوتي وابجي..

-سبأ شبيييج شصاار سبأ؟؟؟

-اطلعع تقي اطلععع مناا

صحت مخترعة من انضربت جامة سيارته من جهتي جاي اخوي سالم وكاض بيده سچين يهددني بيها، تقي شافه هيج وتخبل فتح الچكمچة اليم رجلي وطلع مسدسه يريد ينزل من سيارته يتعارك وكضيته كوه بثنين ايدي ارجعه..

-لاا تقي لاا بداعة ابووك بداعة اختك بداعتي لا تروح لاا

-هدديني سبأ هدددينييي

-تقي لاا تسويهاا مخابيل اخووتي كلهم هنا هاي خطة منهمم

-هدينييي

-لاا تنزل لا يكتلوووك

دفعني بكل قوته ضربني على الجامة ونزل لـ سالم، تخبلت ظليت اللطم على وجهي من شفتهم تكامشوا وطلعوا من البيت بقية اخوتي سلطان وعاصف وغفار ورزاق.. كض تقي سالم ومطله بالكاع ورفس اخوي بوجهه رفسة ضيع علومه بيها..

-غفار: ياااابن العاااار

هجم غفار عليه من جهة ومن الجهة الثانية عاصف وسلطان ورزاق نزل يساعد سالم، انهاريت متتت بدمي من شفتهم كلهم على واحد مستحيل راح يكدر يفلت نفسه منهم..

-سلطان: اذبببحك من الوريد للوريددد وخلني اشوف زلمةة يطلع وراك

استجمع قوته تقي بكل ماعنده من طاقة ودفع بس عاصف عنه عبن هو الجاي يتعارك وياه يريد ياخذ السلاح من ايده بس تقي مچلب بي مثل روحه واكثر، ضرب عاصف بنص صدره بوكس خلاه ينرد ليوره ورفع ايده الشايلة السلاح وضرب طلقات فوك بالهوا وحدة وره الثانية خلاهم كلهم ينردون ليوره..

-غفار: نزل سلاحكك جباان

-علي التـقي: والزهرة ام الحسنن شاربيي ازينه اذا ما سحلتكم يا ولد مسعود العار!!

-غفار: انچبببببب لك *********.......

نزل عليه فشار ومسبات وهجم مرة اللخ يريد يتكاتل وياه وكضوا عاصف ورزاق خايفين من السلاح الي بيد تقي لا تضربهم بيه، هز راسه زلمتي متحلف بيهم وعافهم وصعد السيارة وانطلق بينا نطلع من فرعنا يرجعني لبيتهم..

الطريق كله ايدي على كلبي وابجي وهو الوجه مكلوب وغادي دممم، ما طول دقيقة ورجعني للبيت وسفط السيارة ينزل منها ركض اجه على جهتي فتحلي الباب واجه نزلني بس كلشي يسوي بسرعة بسرعة، كضني من ايدي وطببني وياه للحوش وراد يطلع مرة اللخ..

-وين رايح ويين

-هسة راجع ما اتأخر

-لا حباب لا تروح الله يخليك لا تروح تقي

-سبأ ما اتأخرررر

هد ايدي وطلع من باب الحوش بساع يركض وعافني بالضيم اللوبن عليه، دخلت جوه للبيت واستقبلتني عمتي والبنات وانصدمن من شافن وضعي وحالتي كلتلهن رحت ازور اهلي وكتلوني وتكامشوا ويه تقي خليت عمتي تفرفح عمت عيني..

ما استحملت نظراتها التوجعني وصعدت اشرد فوك انتظره بالغرفة، نزعت العباه والشال شمرتهم وظليت اراوح بمچاني اروح واجي اروح واجي وعقلي وگلبي وكلشي بيه يريده ويفكر بي..

صعدولي البنات بس طاقة ماعندي ماكدرت حتى اسولف وياهن شي بقن كاعدات يمي والدقيقة تجر دقيقة روحي تطلع ويه كل لحظة تمر وهو بره.. مرت اكثر من ساعة ياله سمعت صوت رجلين تصعد الدرج ركضت حطيت الشال على راسي وفتحت الباب بلچن يكون هو و....

-علي التـقي

صعد تعبان ويذب حسرات، انهاريت وانا اشوف رگبته مخرمشة ومتدماية وقميصه ممزوگ ما استحملت احس روحي راحت ركضت عليه وحضنته بثنين ايدي مچلبه بي وابجيي مفرفحة روحي خايفة ومهدود حيلي..

-مابيه شي سبأ ما صار شي بوية عدت

حاوطني من خصري يرجعلي الحضن ويسولف وياي على كيفه، صوته ناصي واحس بأيده تصعد وتنزل على ظهري يمسح عليه..

-احم سبأ

وره ما حمحم انتبهت لروحي كاضة الرجال من خوانيگه راح اكتله والمشكلة استحي اوخر عنه واستحيت بالزايد من همس بصوت ناصي كلش بأذني..

-العربان كلها هنا سبأ صرنا فرجة

هديته بساع واللتفتت اعاين اشوف البنات كلهن واكفات، ليلة صافنة وتمص بليمونتها وتَـمني واكفة وحاطة ايدها على كلبها وعيونها تطلع كلوب وشمس واكفة مبتسمة بفخر چن جاي تكول تدريباتي وخططي نجحت وابرار وعبق كلساع يرفعن عيونهن يعاينن علينا وينزلنها مستحيات..

-علي التـقي: من رخصتكم

وخرن بساع عن باب الغرفة وهو طب، بقيت واكفة بره امسح بدموعي وجامدة ماعرف شتصرف..

-شمس: روحي وراه ولج

-سبأ: ليش

-ليلة: يا سبأ وداعة هاي الليمونة اذا بقيتي واكفة هنا كدامي چنچ عجل خايف اتبره منج

-سبأ: يعني افوت؟

-البنات كلهن: اييييي

ضحكت بين دموعي متحمسة ونويت اروح وراه، فتحت الباب على كيفي ونزيت من شفته واكف بوجهي ضبط.. شردن البنات يتراكضن من عرفنه واكف قريب من الباب معناها سمعنا وانا صرت بنص هدومي ماعرف وين انطي وجهي..

-علي التـقي: اتفقن عليَّ فتيات القوة؟

-لا لا منو ذني لا

ضحك وانطاني ظهره وراح لاتجاه الحمام، تنهدت احط ايدي على راسي تعبانة وگمزت مخترعة من اللتفتلي بحركة سريعة وگال..

-شلونچ

-زينة.. زينة

-شنو شبيچ تلهثين

-مو اخترعت منك شبيك

ضحك مرة اللخ ودا اتفاجئ من ضحكاته المتتالية يمة شبي هاي وهستونا طلعنا من عركة مو مال ضحك وونسة..

-نتابع فلم سبأ؟

-لـ.. اي عادي اتابع

-صدگ؟؟

-اي

-كولي والله يعني عادي تابعين وياي؟

-اي والله اتابع

-چا تعااي

جرني من ايدي بحركة سريعة وشمرني على الجرباية، جفلت مخترعة من حركته وهو راح على جهته من السرير وكعد متربع هو ودشداشته، جر الحاسبة حطها كباله واشرلي اتقرب..

-تعاي خاطر تشوفين زين راح افتح فلم يخبل

-تمام

تقربت شوي منه بدون لا اطخه بس مستغربة ما سألني شصار ولا استفسر مني انطيتهم السندات لو لا كلشي ما حچى وياي بخصوص الموضوع وعلگ الفلم على الحاسبة..

-تعاي تقربي شون تشوفين هيج

-جاي اشوف

-تعاي تعاي

جسمي كزبر من سحبني عليه لدرجة ظهري ضرب بركبة رجله، كعدني كباله ضبط واحس بگلبي راح يوكف ما جاي اكدر حتى اتنفس خصوصاً من بده الفلم وحسيت بأيده تنلف عليَّ ويحطها على بطني..

-تچي نفسج عليَّ لا يوجعج ظهري

-لا.. عادي

-يوجعج تعاي

خلاني اعدل گعدتي شوي بس ماعندي الجرأة اتچي نفسي عليه ماكدر، ما جاي استحمل احس اريد ابجي من الخوف والسعادة والحماس والتوتر كلها اجتني هسة..

-اگلج

-ها

-هاي انتِ جاي ترجفين لو اكو هزاز بالفراش؟

-لا لا مو انا

-شو عايني عليَّ

رفعت راسي اباوعله وكضني من حنچي مثل عادته يجذب نظراتي يخليني احط عيني بعينه، ابتسم يداعب خدي وكال..

-ليش ترجفين سبأ؟

-هاي مو انا

-صدگ؟

-اممم

-شو خليني اتأكد

غمضت عيوني حيل من نصى عليَّ وباسني على خدي بوسة مطولة، عصرت الچرچف الكاعدة عليه بيدي اسيطر على رجفتي لا اهزه وياي من قوتها وحسيت بروحي راحت من باسني بالخد الثاني، ضحك يمسح على شعري وهمس بيني وبينه..

-صار اكثر من شهر اتمنى نكعد هالكعدة

-يعني شنو

اخذ نفس غميج وسرح يعاين عليّ، ابتسم ابتسامة جديدة ما شايفتها على وجهه من گبل وهمس بنبرة حنونة يجاوب..

-يعني.. نكعد هيج سوه انتِ بين ايدي واعاين لعيونج المتروسة رموش وابوسن خدج.. تاخذنا السوالف بعييد وتسولفيلي شنو تحبين وشنو ما تحبين وشنو هي امنياتج خاطر احققها

-انتَ شنو امنياتك

سألته من العدم وماعرف ليش لفت السؤال عليه، ضحك يفر بعيونه على كل وجهي وشعري وللغرابة الشديدة سكنت وهدأت لا خايفة ولا مرتبكة ولا عندي تردد وخجل اريد اسولف وياه للصبح واسوي كلشي يتمناه..

-ما جاوبتني

-تردين تعرفين امنيتي؟

-اي

-امنيتي بيت ومرة احبها وجهال صغار يلعبون بالحوش وامهم تركض وراهم وتتعب عليهم ومن يجي الليل تجيني تلبد بحضني وتگلي جهالك والشغل تعبوني! وانا اجاوبها يخسى الشغل يا ام فلان لو جاس التعب عيونج

ابتسمت على جمال أمنيته وسرحت بعقلي بعيد افكر بيها، رجعني وياه من باسني بطريقة خلت گلبي ينبض بجنون وهمسة همسها بأذني خلتني اذوب..

-تحققيلي امنيتي سبأ؟ ترضين احبچ ونجيب فلان وفلانة ونشوفهم يلعبون ويكبرون بحوشنا الصغيرون؟

غمضت عيوني مبتسمة وراضية.. كل خلية بجسمي تصرخ اني راضية بيك يا علي التـقي وراضية بحبك وحنانك وهمساتك ولمسات ايدك الحنونة.. راضية تكون حب طفولتي ومراهقتي وشبابي ولحدما يدفنوني.. راضية بگلب وعقل فارغ من كلشي وما تارسه غير خيالك، راضية استسلم بين ايدك بهاي اللحظة وابدي وياك من هالدقيقة بداية جديدة، بداية جانت اول جملة تنگال بيها هي...

-علي التـقي: الله يشيل عدوچ شلعتي افادي، خايبين مو شعر ضيييييم............

"شحلات الناس لو كلهم يشبهونچ؟ گلبچ، طيبتچ، لونچ وحچي عيونچ.. ♥️"

**

-ابا الحسن!

اللتفتلي مخلوس چن لگفته جاي يبوگ من الغرفة ولا عبالك هاي غرفته الصارله شهور محرمها عليه وما يطبلها ما دامني موجودة بيها..

-ابا الحسن علي: اجيت اخذ شي ضروري منا واطلع

-ليلة: هاا

وكفت على صفحة يم الكنتور اعاينله من بعيد يدور بين المجرات على شي ومبين مهم بسبب حركاته السريعة، كحيت وسألته بهدوء..

-على شنو جاي تدور

-فدشي

-لا صدگ!

-والله

-هاا، چا دور الفدشي بذاك الميز يجوز تلگاه

هز راسه مقتنع من كل عقله وراح يدور فوك الميز المكوم عليهن اوراق وفايلات ابد ما اتدنى عليهن ولا اگلب بيهن، چان عندي امل هو يصعد للغرفة يصفي اغراضه بس ولا سواها طول ما انا هنا ما سواها..

-بشر؟

-ماهو

-چا شني من فدشي وكح هذا

ما اندارلي ولا جاوب انقهرت على نفسي وعلى وضعنا وظليت اعاين عليه منصي يدور بالاغراض ومن كدما ضايجة منه اجتني فكرة اروح اطفر على ظهره وافطسه بمچانه بس تراجعت عن الفكرة من تذكرت انا حامل..

بس لحظة.. انا حامل! اي اي ولج انتِ حامل فكري على هالاساس ايي، رحت بخطوات سريعة للكنتور وگنبصت اسوي روحي جاي ادور بين الفايلات الضامهم هنا وانداريت عليه اشوف شنو جاي يسوي، لگيته ما منتبه عليَّ ولا يمه ولا چن شافني اجيت ادور بسيطة يا ابا الحسن..

-ااااخ ااااه ولجج يمة ااااه

اندار على صوتي فاز وشمر الجان بين ايده واجاني يركض ومن استعجاله صعد فوك الجرباية يركض عليها يجيني ما فكر يدور حولها..

-شبييج ليلة شبييج شصاير ولج شبييج

-اااه يمممةة الفررخ يمممة وليدي رااح يموت ااااه

-ولج شكووو شصار احجييي

-اااه يا يمة يا بعد روحيييييي يا بعد عينيييييي يا بعد چلاووييييي وليداتييييي

-نعله عله شرفي احجيييي

-انا شرفك احترم نفسك ولك

-شبيچ ولج احجيي

-جنت جاي.. ااه.. كنبصت واجيت جاي ادور بين الاغراض وكمت بحركة سريعة واحس اااخ يا يمة اااخ راح اموتن

-خررب ولج مسودننة شلون تسوين هيج شلوون تعاي تعاي سندي روحج عليّ خلينا نروح للطبيبة

-لا لا هسة اصير زينة

-انچبييي وسندي روحج عليّ

-احترم نفسك عيب هسة الطفل يتعلم

-چا گومييي

-شيلني انتَ خايب ماكدر

نصى بسرعة عليَّ وشالني من الكاع وركض بيه يريد يطلع وكمشت بباب الكنتور ما اخلي يطلعني من الغرفة..

-ولج هددددي

-مااا اريد طبيبة مااريددد

-هدددي چنچ بريعصي لاطش هددي

-ما اهدددن

-ليلللة لا يموت الفرخ شبييج

-صرت زينة والعباس ابو فاضل

-ميخالف نروح نتطـ...

-ماريد اتطمن خليني اتمدد هسك ارتاح

زفر نفس ضايج كلش واخذني للجرباية مستسلم، مددني على الجرباية وعدل المخاد الوره ظهري وجر اللحاف السفطته گبل نص ساعة خاطر يغطيني بي..

-ليلة: والكعبة ما اسفطه بعد انتَ تعدله

-اسفطه ميخالف بس سكتي

-خوش

-شون صرتي

-احم صرت زينة لا تخاف

-خليني اخذح للطبيبة نتطمن يا ليلة

-لا لا زينة انا هذا فرخي كلشي مابي شحلاته

-اويلي يا ليلة شسويتي بحالي

-يلا ميخالف هي هاي الدنيا هبطات

فرك وجهه ضايج وكام من الجرباية يريد يعوفني ويروح، انخبصت وكضيته من ايده بسرعة وكلت بدون لا احس على روحي..

-اااخ

-تره انتِ كاضتني مو انا

-قصدت.. قصدت ااخ يعني راح يجيك.. شسمه.. راح يجيك اخ

-شنو راح يجيني اخ

-اي شبيك راح يجيك اخو

-امي حااامل؟؟؟؟

-لااااع يااا شبيك شنو حامل شلون تحبل اصلاً وهي بهالعمر

-چا شني

تنهدت ضايجة وذبلت عيوني تعبانة، مسحت على وجهي ونزعت الربطة ذبيتها على الجرباية وكلت بغصة..

-راح يجيك ولد

-انتِ حامل بولد!

-اي

نزلت دمعتي الماعرف منين طلعت بس كلش مقهورة مو شلون ما جان مقهورة منه، تمنيت ما اگله انا حامل بولد بهالطريقة تمنيت نكون زينين ويه بعض واحجيها وانا فرحانة..

-رحت للطبيبة وبالسونار كالت طلع ولد

-الحمدلله والشكر شنو يجي من الله يا محلاه

-الحمدلله

-لا تزعلين ليلة رزق ربج هذا

-اي

-ادري انتِ تردين بت وتحبين البنات بس بعد...

-شنو؟؟

-ادري بيج ضايجة عبنه ولد مو بت بس بعد رزق هذا

-لا! لا لا مستحيل اضوج على هيج شي انتَ شتحجي كله خير وبركة ولد بت كلهم حلوين وينرادون اهم شي تمامة الخلقة

-عفية عليج

-انا زعلانة عبن.....

گطعت چلامي على صوت علي الكـرار يصييح صياح من جوه، يصيح بصوت وصل لغرفتنا وخلانا انا وابا الحسن نطفر نركض نشوف شبي.. طلعت تَـمني من غرفتها وطلع تقي من الغرفة يلبس بدشداشته ونزلنا الدرج كلنا نتسابق ونسمعه يكول..

-هسسسة ترحييين تخطبيهاا الي يوووم هسسةة

-رسمية: صخام الصخمني ولك وين نروح بهالليل

-مااا يهمنيي هسسةة نرووح نخطبهاا!!! ما تشمرين بيه بعددد ولللج يممممة ترديهااا تروح من ايددي؟؟؟ والعبااااس اللعب جوولة لبسيييي عباتج وامشييي نرووووح.....

يتبع 👑...

━━━━━━ ♛ ━━━━━━

امشن نروح على الواهس 🙆🏼‍♀️

#الامارة

بقلمي: زهراء السلامي 💎

لتنسون التصويت + التعليق بين الفقرات + متابعة لحسابي 💙.

لاتكسر بگلبي "الگلب" كسره يعيش 💔!

━━━━━━ ♛ ━━━━━━

"تـــالة"

اباوع لامي كاعدة تتابع مسلسلة على التلفزيون ومنسجمة بكل قوتها وافكر.. امي شبيها؟ من كل عقلها تريد تقبل بهذا العاصفة الترابية؟ اشافت منه شو لا اخلاق ولا خلقة.. او لا لا هو شكله زين بس اخلاقه زبالة شسوي بي..

-ماما

-هممم

-يوم راح احجي وياچ بس اذا عطتي بوجهي والله اخذ اغراضي واطلع من البيت ارجع لابوية!

-وين يكعدج ابوج؟ يحجزلج زنزانة خمس نجوم وياه؟؟

-اهوووو ماما شبيچ مو دنسولف

-كولي بدون لا تهددين هالتهديدات السخيفة عيب ماما كبرتي انتِ وصرتي عروس

-عرنوص صرت مو عروس! ماما كا اتزوووج هالحقير مااتزوجه!!

-ليش يا امي شبيچ انتِ متخبلة

-تره اوڤر انتِ يوم كلللش اوڤر شلون تقبلين ببيت مسعود اييعع باعيهم چنهم وحوش يخرعون شلون تأمنيني عند واحد بيهم!

-عاصف يختلف عن اهله والرجال كال اكعدج بيت وحدج ومالج شغل بأهله بعد شتردين

-يبووووو اكعد بيت وحدي وياه واكابل وجهه؟؟ ماما حبابة لا تسوين هيج تره اني ما موافقة!

تحسرت تهز براسها ساكتة، شالت الريموت تعلي التلفزيون وعافتني كاعدة گبالها اتعارك ويه ذبان وجهي وحدي..

-انتِ مو كلتي همه مو من ثوبنا؟؟ شلون هسة صار ثوبنا؟!

-نفصله ثوب جديد

-هااا هذا تفصلي ثوب جديد والامير علي الي يسووه راس عاصف وراس الخلفه وخلف خلفه ما قبلتي تفصلي ثوب جديد!!

-ماما حبيبتي انتِ الامير يختلف عن عاصف من السما للكاع.. تالة انتِ صرتي جبيرة وواعية وتفهميني اريدج تسمعيني للاخير بدون لا تقاطعين

-تمام

-الامير منگدر نكسبه ونغيره مثلما نريد لانه رجال تمشي وراه العشيرة كلها، شنو صار بالعشيرة شنو جرى ووگعت براسه او براس واحد من اخوته وهذا السبب حياتهم خطرة كلش

-ماما همه زلم يعرفون يرتبون حياتهم النسوان شعليها

-ليش نروح بعيد؟ هاي بت خالتج اقرب مثال كدامج تَـمني لو عطست كل الي بالبيت افتهم عطست تَـمني لو نامت البيت كله عرف تَـمني نامت، لو طلعت لو طبت لو لبست لو كشخت كل العيون تركض وراهة مراكض لانها تابعه لرجال مهم عدهم ويدورون عليهم الزلة

-وعاصف بشنو يختلف؟

-عاصف يختلف لانه من البداية گال ما اهتم للعشبرة وبيتها وحدها وحياتها وحد لا الها علاقة بأهلي ولا حتى لازم تزورهم ومستعد اخليها تداوم جامعة وتطلع وتطب مثلما يعجبها ومحد اله شغل بيها وحتى من شرطت عليه نريد نرجع لبغداد دگ صدره وكال اني اخذكم ووياكم!

-اتفقتي وياه نعيش ببغداد؟ هاي شوكت؟؟

-قبل كم يوم رجعت خالته ام لبنى اتصلت بيه من شفتج مقهورة كلتلها متكو نصيب لان ما ناوين نظل هنا وراح نرجع وهي رايحة گايلتله والرجال دگ صدره وكال نعيش ببغداد سوه ووين متردون هو حاضر

-الله ياخذذه

-لا ماما حرام عليج تدعين على رجال رايدج من صدگ.. شمعرفج تلاوي يمة گعدي وياه شوفي شلونه اطلبي شوفة شرعية ووراهة قرري لا تستعجلين وتظلمين بختچ

-مااريده ناس ميخافون الله وما خلوا شي ما سووا ببيت شيخ علي ما ابلعهم لو تنگلب الدنيااا

عفتها وكمت ادخل لغرفتي واسمعها تعيط من مكانها بحرگة..

-ولج شعليناا بيهمم المهم الولد زييين تااالة ولج هذاا ذههب هذا على ايدناا نغيره ونكسبه لا تصيرين غبيية

-مااااااريد عجينة اشكلهاا بكيفي اريدد رجاال!!

طبگت باب الغرفة ورحت اكعد على الجرباية محترگ دمي، افهم وجهة نظر امي من تريد عاصف لانه عمة ابتسام من اجت كالت عاصف يكول بالحرف الواحد "افرشلها الكاع ورد بس خليها تقبل" وامي تخاف عليَّ وتريدلي واحد يهتم بيه وزين بس المشكلة مدا اكدر اطيقه! اتذكر اجرامهم وسوالفهم وتلعب نفسي والمشكلة الاكبر هي مدا اكدر افكر بغير علي الكـرار!!

حطيت راسي على المخدة تلفانة اعصابي، معقولة ما افتهم بيه انخطبت؟ معقولة تقبل الموضوع وما اهتم؟ معقولة ما حاول يتحرك ولو بشي بسيط؟؟ اوووف ياربي كون ويايه يارب بس هالمرة بس هالمرة والله وبعد كلشي ماريد بس خلي كرار يجيني اصيرله چلبة.. لا لا مو لهدرجة ما اصير چلبة اصيرله خوش زوجة والله..

غمضت عيوني اريد اشرد للنوم وافكر بي واستذكر مواقفنا المعدودة على الاصابع.. ابتسمت من حسيت بصوت ضحكته صار بأذني احب شلون يضحك ويحجي بنفس الوقت، اغلب الكلمات ما افتهمها لان يكون ميت من الضحك ويبلع الحروف ولا ارادي اظل اضحك وياه..

تنهدت ضايجة مدا اكدر اغفى ولا اكدر ابطل افكر بخطبتي الي امي مقتنعة بيها وتريدها تصير، كمت من مكاني اخذت البرنص وفتت للحمام اسبح بلكت ارتاح شوية.. طولت بالحمام جوه المي اتصفن والأفكار تاخذني يمين وشمال لحدما الدوش ظل يتفل عليَّ وخلص التانكي امداني..

طلعت بسرعة اركض من الحمام اللفلف بروحي وشمرت نفسي على الجرباية، جريت موبايلي اريد اتصل بـ تَـمني افضفضلها وانتبهت جايني اشعارين على الانستا واحد من حساب غريب والثاني من علي الكـرار!!

ركضت مثل المخبلة فتحته بأيد ترجف ممصدگة مراسلني هاي اول مرة بحياته يسويها و شفته كاتبلي..

"السلام عليكم، خوية حضري نفسج باجر يجون نسوان بيتنا يزوروكم، ردنا نجي هسة وامي كالت فشلة ما يصلح هيج وكت"

صفنت على الرسالة مستغربة شنو "خوية" وشنو النسوان يردون يزوروكم وشنو قصده يزورونا يعني جايات شيسون؟!

انتبهت للرسالة دازها قبل خمس دقايق، تحسرت اباوعلها وماعرف شجاوب اول مرة بحياتي اخنس ولساني ينگص ماعرف شكتب، دقيقة مرت على قرائتي للرسالة وفزيت من دز رسالة جديدة كاتب..

"عايني مو تكولين راسلني وهذا صلف ومادري شني بس استوجب الامر اراسلج"

ابتسمت على الرسالة وهم قريتها بدون لا اجاوبه، تمددت على الفراش وظل التلفون بيدي اتفرج على رسالته وما طول ثواني ودزلي من جديد..

"راح تجي فراقد وياهن حطت روحها خرب عرضها شكد اكررها عود لا تهتميلها لو ذبتلج بسمار تره هي من يوم يومها ملسونة"

ضحكت من كل گلبي على رسائله واحس بگلبي صار يدگ بجنون، تنفست على كيفي اسيطر على ضحكتي ودز اخر رسالة كاتب بيها..

"لحيت ادري بس تالة باجر مو تطلعون تره جايه امي لو اخليها هسة تتصل بأمج وتنطيها خبر؟؟"

جمدت اصابيعي اريد اجاوب وماعرف شلون اجاوبه، شمرت الموبايل بصفي ونيمت راسي على المخدة ابتسامتي من الاذن للاذن احسني فراشة طايرة من السعادة والوناسة..

غفيت بمكاني بدون لا احس وفزيت الصبح على صوت امي كأنها دتحجي بالتلفون، طفرت من الفراش ولفيت روحي بالبرنص عدل وركضت اشوف ويامن دتحجي..

-هلا بيكم حبيبتي ام علي.. ههههه رحم الله والديج عين غطا وعين فراش هلا بيج

سدت الاتصال منها مبتسمة وحطت التلفون على الميز، كعدت بصفها بدون لا احجي اخاف تحس عليًَ مو طبيعية وتشُك بس ادري بأمي متعبر عليها..

-شو كاعدة من وكت تالة؟

-اي.. اي مادري شعجب

-اممم لعد روحي بدلي وتعالي خلينا نتريك

-تمام.. اءء ماما شنو شبيچ مبتسمة واحسج فرحانة؟

-تَـمني راح تجينا اليوم ومكيفة بيها

-بس تَـمني تجي؟

رفعت عينها عليَّ تباوعلي بنظرات كلهن شَك.. ضحكت اخفف من توتري واردفت..

-مو سمعتج تكولين هلا بيج ام علي

-اي ام رجلها راح تجي وياهة

-هاا شعجب

-هيج عجبهم يجون

-اممم غريب

-ليش غريب؟

-مادري هيج وحدي اسولف عوفيني

ضحكت وركضت للغرفة بدلت ملابسي ومشطت شعري الي تعطب لانه نشف وظفرته ظفيرة بلكت يهفت.. طلعت من الغرفة للمطبخ شفت امي دتگلي بيض عيون..

-تلاوي ماعدنا صمون تطلعين تجيبيلنا منا؟

-مابيه حيل ماما

-يلا امي هم ياله نلحك نرتب البيت خاف يجون فشلة

هزيت راسي اي ورجعت لغرفتي لبست بنطرون وقميص واخذت منها فلوس وطلعت، هاي لو ببغداد امي لو تموت متدزني وحدي بس هنا انگلبت الاية وصارت تقبل اطلع شوية اجيب صمون لو لابو الاسواق تكول امان والفرع كلهم حبابين وعرفونا ويخافون علينا ومع ذلك بس اتأخر شوية تخبصني بالاتصالات وتظل تلطم عليَّ وتحلف متدزني بعد وترجع تكررها من تحتاجني اروح..

رحت لابو الصمون ومديت راسي من الشباك الصغير وكتله اريد صمون بـ خمسمية، وكفت على جهة حتى ما اعيق الناس الراح تجي وراية وطلعت موبايلي ارجع اقرا برسائله وابتسامتي شاكة وجهي..

-هذا الصمون عمي

-تسلم عمو

رجعت تلفوني بجيبي واخذت چيس الصمون ورجعت لطريق البيت اغني واتبسم مكيفة ومتحمسة لزيارتهم، وصلت قريب بيتنا وجمدت رجليه من شفت عاصف طابگ يم بابنا وهستوه ديطلع من سيارته..

مجرد شفت وجهه ضجت ما انطينه اهمية وعبرته ادخل للبيت واستوقفني صوته وهو يكول..

-يا هلا بهالطول

ذبيت نفس واللتفتت عليه اباوع لوجهه مبتسم ومبين من صدگ فرحان بشوفتي، رديتله الابتسامة ونويت افهمه اني ما رايدته حتى هو يگطعها من عنده بدون لا تكبر السالفة واحتاج اقنع بأمي القافلة..

-صباح الخير

-صباح الجمال، شلونها الاميرة

-زينة الحمدلله.. زين من شفتك لان عندي موضوع وياك

-حلو، فرحانة بشوفتي يعني

-شوف عاصف اني احترمك واقدر احترامك النا وكل العروض القدمتها الي في سبيل يتم موضوعنا بس اني ماريد اتزوج ومو ببالي الفكرة اعتذر منك

تغيرت ملامحه وغابت ابتسامته واستبدلها برصة قوية على اسنانه، اردفت بسرعة بدون تردد اكمل البديت بي..

-اتمنى ربي يعوضك بالاحسن مني

-ما تردين تتزوجين لو ما تردين تتزوجيني؟!

-وشنو الفرق؟

-الفرق ان لو اجاچ غيري يجوز توافقين؟!

-بعد هالشي يرجع الي ولقناعني

-اهاااا حلو حلو.. حلو

-ما حبيت تكبر السالفة وتصير ضوجة بين امي وعمة ابتسام بما ان هي خطبتلك فـ اجيت اني بنفسي ا...

-ارفضك! اجيتي بنفسج ترفضيني مو؟؟

-انتَ شاب واكو الف وحدة غيري ممكن تناسبك وتعيش وياهة احلى حياة بس اني ماتوقع راح نتوالم

-ليش ما نتوالم؟؟ شنو الخِلة البيه؟!

-يعني...

-شغل واشتغل، دراسة ودارس شهادتي بطولي بيت وحدي وسيارة ومستعد اعيشچ بأي مچان تختارينه عسى ما على القمر هم اوديج شنو سبب الرفض؟؟

-اهلك

-اهلي؟!!

-اي اسفة عاصف وماحب اجرحك بس اهلك.. اهلك مشكلة جبيرة

-مالج غرض بيهم نعيش بعيد عنهم لا الهم طبة عليج ولا انتِ هو انا اجيت خطبتج وامي ما جبتها اجن خالاتي وعمتي خاطر اثبتلج اهلي مالهم شغل بيج!

-هاي امي دتتصل عليَّ لازم اروح واسفة بس ماكدر.. صدگني ماكدر

عفته قبل لا يحجي شي وهرولت ادخل للبيت، كذب لا امي اتصلت ولا تأخرت بس ردت اهرب منه لان شكله كلش عصب وانغث وماريد اجيبلي مشكلة.. دخلت للبيت حطيت الصمون على الكاونتر وكعدت ويه امي اتريك بس بالي كله ويه جية ام علي النا وشاردة افكر شنو اللبس من يجون..

-اگلج ماما

-ها

-شنو اللبس من تجينا خالة ام علي فستان لو بنطرون وقميص؟

-شتلبسين لبسي حتى لو تبقين بالتراك شكو هسة

هزيت راسي بس ممقتنعة اريد اكشخ كشخة تنذكر العمر كله، كملت ريوكي وكمت اغسل المواعين وركضت للغرفة، طلعت ملابسي كلهن من الكنتور نفشتهن على الجرباية اكدر بيهن واشمر مدا اقتنع بشي اخر شي وقع اختياري على فستان بينصل لونه وردي فاتح وتجي فوگاه سترة قصيرة خفيفة لونها اوف وايت..

صليت صلاة الظهر ومشى الوقت بسرعة بينما رتبت البيت ويه امي ونركض منا ومنا شفت الساعة صارت بالثلاثة الظهر ركض رحت لغرفتي سبحت وبدلت ووكفت اشسور شعري وسمعت باب البيت اندگ..

سمعت اصواتهن يدخلن للصالة وبعد كمت ماعرف شلون اتجهز اركض ركض حطيت مكياج وتعطرت ودخلتلي تَـمني مبتسمة وطايرة من الفرح..

-تَـمني: ولج تالة هاي طلعتي تدرين انتِ؟؟

-تالة: اششش شبيچ مفضوحة سكتي امي متدري

-ولج ممصدگة من الفرحة اريد اططير راح نصير نسوان حمه ونعيش بنفس البيت

ضحكت متحمسة اكثر من حماسها وفرحانة اكثر منها ووكفت هي تسولفلي شلون صار الموضوع وكرار شسوه من عرفني انخطبت..

-تالة: هو شلون عرف؟

-تَـمني: باعي اني مادري جنت فوك من سمعته يعيط والظاهر هو مفتهم من شمس فالتتها ولج غير گوم الدنياا ما گعدها خبص البيت خبص وخبص امه الا تلبسين العباية ونروح نخطبها هسة بهالليل خالة خطية ظلت تركض منا ومناك متعرف شتسوي

-تالة: يممة يمممة

-اجه عمو بنفس اللحظة دخل شاف الدنيا مگلوبة ودخلوا وياه در وبدر سألوه شبيك وراح على ابوه يركض لزم ايده وكال مستعجل..

-بوية انا اريد اتزوج!

-شيخ علي: ما تتزوج ياهو كاضك

-عاين بوية انا فلوس مهر ماعندي مسوي سلف ومدري سني بس ما اظن يكفون ومأجل سالفة زواجي عبن اريد اشيله كله بدون مساعدة احد بس هسة لااا الوضع خرج عن السيطرة والبت راح تروح من ايدي ترضاها بوية تروح البت من ايدي ترضاها؟؟

-علي الدر: يا بت ولك غير نفتهم!

-شيخ علي: ما ارضاها عليك بوية بس فهمنا يا بت تسولف بيها؟

-علي الكـرار: تالة بت خالة تَـمني

صار صمت مخيف بالصالة الكل خنس بدون أي استثناء، عمو ظل صافن ميعرف شيكول وكرار وجهه مصبوغ احمرر وايده اللازم بيها ابوه ترجف، اللتفت شيخ علي على خالة رسمية وكال..

-امانة الله انا ماعرف البت وما شايفها كله چم مرة، انتِ شنو رأيج بيها تشوفيها تناسب علي الكـرار؟

-علي الكـرار: تناسبني!!

-شيخ علي: لا تتجاوز امك كرار انطي مجال

توجهت كل الانظار على خالة وماعرف ليش حطيت ايدي على گلبي، صراحة خفت تكول عليها شي مو حلو وماتحمل اسكت وما ادافعلها فـ كوة ظليت اباوعلها وادعي يارب تكون شايفتها بنظرة حلوة وما تخجلها..

-رسمية: والله يا شيخ علي انا شايفة البت حبابة ومؤدبة وتعرف تسولف يعني مو جامدة وثگيلة على المعدة لا بالعكس بس مشكلتها مو محجبة وتعرف انتَ سلفنا شون يحچون على البت الما تلبس حجاب وبيا نظرة يعاينون عليها

-شيخ علي: افتهمت

تنهدت ادور عيوني على عمي هالمرة وظل ساكت ويهز براسه، رفع عيونه على الكرار وگال بنبرة حازمة قوية..

-عاين بوية، انا ما اوگف بطريقكم وما دام البت مترباية ومحترمة شنريد اكثر من هيج وبعد كلشي يريده الزلمة من مريته يجيبه بأيده ومثل ما يگولون اهلنا گبل المرة تتبع خيالها واكيد افتهمت قصدي

هز راسه علي الكـرار مبتسم ونزل على ايد ابوه يبوسها فرحان وعمو كال لخالة رسمية باجر العصر نجي نخطبج وفراقد حطت روحها من افتهمت واجت عمة زهرة ويانه..

-تالة: يعني يردوني اتحجب؟

-تَـمني: باعي تلاوي الامـير علي من رادني اتحجب چنت مقتنعة بالحجاب ورايده اخطي هالخطوة بدون أي جبر او اكراه، صح بالبداية جانت صعبة عليَّ وجنت انسى اللبس الشال بس جنت مقتنعة بالفكرة وجنت اعرف ان الحجاب هو واجب شرعي علينا ومو ضروري الا نقتنع ياله نلبسه لانه فرض اجه من رب العالمين ولا اعتراض على حكمه.. وصراحة من لبست الحجاب ما عانيت ولا شفته يشكلي عائق بحياتي وجنت اشوف حبيبة شلون تلبس وتكشخ كشخات احلى اصلاً من البدون حجاب واتبعت طريقتها وعودت نفسي

-اي

-فـ انتِ حُرة بعد انتِ واعية وجبيرة وعقلج جبير وتعرفين الصح من الغلط والامر راجع الج

هزيت راسي ورتبت نفسي لاخر شي وطلعت وياهة من الغرفة، سلمت على النسوان جاية خالة رسمية وعمة زهرة وفراقد وابرار وياهن، رحت للمطبخ جبنا الضيافة اني وتَـمني وافترينا عليهن وكعدنا سوه بس شنو كاعدة على نار اني..

-حنين: يا اهلاً وسهلاً نورتونا حبيبتي ام علي

-ام علي: بعد روحي ام تالة النور نورچ انتِ وبنيتنا تالة

سولفن شوية مجاملات بالبداية وبعدين بدت خالة رسمية تحجي عن ولدها وعن الامير كالت عنه مريض هالفترة وميطلع من البيت وهذا السبب تَـمني مدا تجيهم وشوية شوية بدت تلمح على الباقين لحدما وصلت لكرار..

-رسمية: اريد ازوجه والله بعد كافي كبر هم ياله يشوف بزرته ويتونس على ونس مرته

-حنين: اي من حقه شكو بيها

-رسمية: بعد كرار ما يخفى عليج تعرفين ادبه واخلاقه وغيرته والحمدلله عنده وظيفة و...

-حنين: العفو منج ام علي بس چنها البنات تندگ تالة كومي شوفي منو

-فراقد: بعدين خية خليها كاعدة هسة چا احنه جايين نشوفها

سكتت امي وعيونها ما دارتهن عليَّ وبعد ولا اللتفتتلي بس وجهها تغير لونه وصارت تبتسم ابتسامات مجاملة لدرجة حسيتها شوية وراح تنفجر بالنسوان مزعوجة..

-رسمية: وانا صراحة احبنها لـ تالة واحبكم وبعد احنه ماخذين الجبيرة للامير وبقت العنونة اريدنها لـ وليدي علي الكـرار

-زهرة: والنعم منه ام علي وين اكو احسن من علي الكـرار

-رسمية: انا وياچ نعرفه بس بعد الشور شور البت وامها

-حنين: خير ان شاء الله

-رسمية: ان شاء الله وشنو تطلبون احنه حاضرين

-حنين: صراحة ام علي تالة اجوها خطابة قبل كم يوم وهم الناس خوش ناس وما يعلون عليكم بس بعد احنه منطيهم حچاية وفشلة نرجع بيها

متت قهرر من هيج كالت وخالة رسمية هم سكتت والباقيات كذلك، ابتسمت امي ابتسامة تسد الابواب بوجههم بس النقذني والصدمني هو من تَـمني كالت..

-تَـمني: بس تالة مموافقة خالة

-حنين: شنو؟!

-تَـمني: حجيت ويه تالة ومموافقة تتزوج عاصف والبنية متريده واني اعرف بيج انتِ متجبرين بنية

-فراقد: چا بعد شكو خية انطي فرصة لهذا الزلمة يجوز بنيتج توافق

-حنين: لا مو..

-زهرة: ام تالة صلي على نبيچ وخلي الموضوع يمشي ولا توكفين بوجه بنيتج سأليها عن رأيها وسألي على الوليد خاطر يرتاح كلبج وكولي شنو عندج كولي والوادم تحت امركم

سكتت امي مبلوع وجهها متكدر تحجي بعد بس اني لو يذبحوني قطرة دم ميلكون بجسمي من الخوف.. هسة شبيه خايفة واطگ رجل برجل ماعرف بس كلش متوترة وحتى تَـمني حست بيه وحطت ايدها على فخذي تسيطر بحركة رجلي..

-تَـمني: من رخصتكم، تعالي تالة

جرتني من ايدي تكومنط ودخلنا الغرفة عبالي تريد تحجي ويايه بس ما حجت شي، فتحت باب غرفتي شوية واشرتلي اجي اباوعلهن من الباب وياهة..

-تالة بهمس: ليش گمنا جان بقينا كاعدات خاف امي تچفص!

-تَـمني بهمس: ابقي انتِ هنا اني اروح لا تجين تالة عيب همه ماعدهم هيجي شي

هزيت راسي متفهمة وهي طلعت ترجع تكعد يمهن واسمع لام كرار شلون تمدح بـ كرار واخلاقه، تمنيت اگولها ماكو داعي تمدحين اني شايفة ابنج واعرفه شكد محترم لدرجة يوصلني للدوام ويرجعني كلمة ميحجي ويايه واذا حچى بشي ميتجاوز حدوده..

-زهرة: وگالتلج الحرمة شنو تردون احنه حاضرين

-حنين: ام علي ابنج على عيني وراسي واني بدون لا تمدحين بي اعرفه شنو واعرف اخلاقه بس تالة بنيتي ووحيدتي واتمنالها الزين وماريدها تتعب لا هي ام بيت وتشيلج البيت وتهتم وتركض وتطبخ وتنظف لا ما متعودة على هيج وضع واني اخاف لا تعيش يمكم وتصير مشاكل بينها وبين الچناين على هالشي

-رسمية: تتعلم حبيبة كلهن چانن هيج من خذيناهن وتعلمن، هاي تَـمني صلوات على محمد شايلة البيت لا تشكي ولا تتعب ما تفرق نفسها عن الچناين ولا بهالگد

-حنين: تَـمني من قبل هيج ام بيت ويعتمد عليها وما تفشل بس اني دا اگلج بنتي تفشلني وياكم ومو گد بيت العيال واذا اريد ازوجها فـ الا ببيت وحدها ام علي علمود راحتها وراحة زوجها

سكتوا كلهمم ولا نفس طلع منهم حتى فراقد! فراقد هاي اللسام الي مينسد حلگها سكتت كأنه امي سبتهم او مادري شكالت..

-رسمية: هااا

-حنين: اي والله

-رسمية: حگچ خية هذا بعد كلمن يعرف شيناسب بنياته بس اريد اگلچ كرار غرفته جبيرة يطرد بيها الخيل شكد حجمها زهرة نسيت..

-زهرة: جانت الهول مال بيتكم ام علي وشكبره الهول اظن سبعة بخمسة هيج شي وبيها حمام هم وبيها زوية متكترة جبيرة صلوات

-رسمية: اي واذا على شغل البيت تتعود صدگيني انا ما اگلج لا تشتغل ولا تمد ايدها على البيت لان شنو ذنب الباقيات بس اكلج تتعود على الوضع وتَـمني وياهة تساعدها

-تَـمني: اي خالة اني وياهة ما اعوفها

-حنين: والله مشاكل ووجع راس وتعب واذية النا والكم وهذا السبب اريدلها بيت

-فراقد: شيخ علي ما يطلع وليداته بره خصوصاً كرار يحبه ويعرفه بعده ببداية طريچه مو مال يفتح بيت

-حنين: بعد كلشي قسمة ونصيب واول تالي اني اذا ازوجها فـ اريدها تستقر ويايه ببغداد

-رسمية: ببغداد؟ لا عيني لا خية مو عالمنا بغداد ما نكدر نعيش هناك

-فراقد: خوب گولي ما ننطيكم وفضيها ام تالة عليمن هالمماطل

-حنين: لا العفو ولدكم والنعم منهم ما شفنا منهم الا كل خير بس اني صريحة واحچيها بالوجه ومن البداية حتى متصير مشاكل وضيگة خلگ بينانا بنتي اريدلها بيت وتسكن ببغداد مو هنا

-تَـمني: خالة تره كرار خوش كرار

-حنين: والنعم منه خالة بس تالة هم خوش تالة

-رسمية: هذا اخر چلام عندج ام تالة؟

-حنين: اتمنى ميجيب الزعل بيناتنا حبيبتي ام علي هواي احبج واعزج اني بس اي والله هذا اخر كلام

-رسمية: الله لا يجيب الزعل كله قسمة ونصيب، چا يلا احنه نروح تأخر الوكت

گالتها وگامت بس جانت مغثوثة ومبين شكد مقهورة واني ما اقل قهر عنها احس بگلبي ديتطگع وگوة مصبرة نفسي ما اروحلهن وافشل امي كدامهن، اختنكت بدموعي الدا اجاهد مينزلن اريدهن بس يطلعن حتى استلم امي واعاتبها شلون تحط شروط اني اصلاً ما طالبتها..

طلعن وامي ودعتهن بأبتسامة انتصار وبقت تَـمني يمنا، توادعن بالباب وسولفن شوية وبقت تلح عمة زهرة ان يكدرون يقنعون شيخ علي يطلع كرار من البيت بس بغداد صعبة يعيش بيها لان عنده دوام واذا عاش هناك غربة ويبقى وحيد بس ماكووو امي راسها والف سيف ما تنازلت عن أي شي!!

مجرد شفتها رجعت من الحديقة وحدها هي وتَـمني يدخلن للبيت طلعت من الغرفة فااايرة، رحت لامي متخبلة وعطت بصوت لاخر عمري ما انساه حسيت بگلبي طلع وياه..

-تالة: حرااااااااام عليييييج حرااااااااام

-حنين: حرام عليَّ لو انطيتج وبهذلتج

-تَـمني: خالة تالة موافقة انتِ ليش هيج دتسوين؟؟

-حنين: تَـمني ماعندي استعداد ابهذل واحرگ گلب بنية ثانية خليج انتِ كاافي عليَّ!

-تالة: منو كاج اتبهذل منووو؟؟ وحتى لو تبهذلتت راضيية وياه اقببل

-حنين: سكتي تاالة كاافي

-تالة: كل هذا حتى تزوجيني لعاصف؟؟؟ والله اموت نفسيي وما اتزوجه والله!!

-حنين: لاا تتزوجي! ماكو داعي تتزوجي خلص هسة اخابرهم ونرفضه كافي!

-تالة: لعددد ليش رفضتي علي لييييش

-حنين: كاافي بنتي رجعي لغرفتج بعدج صغيرة ومتفتهمين

-تَـمني: زين فهميها؟؟ يلا فهميها خالة!

-حنين: راح يجي يوم تفهم من وحدها وتگلي رحمم الله والديج يمة ما زوجتيني بهيج بيئة وهيج بيت!

-تَـمني: خالة لا تظلميها فدوة لگلبج هي تريده

-حنين: الزواج موو بس حب وعشگ الزواج تبقين ويااه عمر!! اذا ما اختاريتي صح تبقين العمر كله تاكلين بأصابعج وتنوحين!

-تالة: على شنوو انوح على شنووووو

-حنين: على غباائچ الشمرچ هالشمرة! تالة اني امج واعرف مصلحتج زواجچ من هالرجال غلطططط ماما غلططط ما راح ترتاحين!!

**

"لـــيلة"

كاعد كرار على نار يروح ويجي ويفرك بيده ويضحك للهوا فرحان واحنه مكيفين على فرحته وسور ونور وحيدر من هسة سووله حفلة وعرس..

-حيدر: كروري يا چكليته حامض حلوو بباكيته

-علي السور: يا اهل القوط ذبوا القوط كرار لبس قاطه

-علي الكـرار: هههههه سكتوا ولكم بعده كلشي ما صار

-علي النور: يصير ان شاء الله خوية يصير ياهي ترفضك هاي يا مسودنة

-شمس: والله صح وين اكو منك كرار والله محظوظة التصير من نصيبك

ابتسم يتشكر ويحط ايده على راسه ممنون وكعد ويانه ينتظر رجعة عمتي رسمية والباقيات، اخذنالنا ساعة ننتظرهن واخيراً سمعنا بباب الحوش تنفتح وتنركع يدخلون..

گمنا كلنا نتلگاهن من المطبخ وهو اولنا، ركض عليهن وضحكته من الخد للخد وسبأ كل ساع مأشرتلنا وهامسة..

-عاينن شون فرحان عاينن

-فراقد: السلام عليكم

-علي الكـرار: عليكم السلام ها بشرووا؟

-رسمية: ماكو نصيب يمة

حچتها بساع وبدون مقدمات، غابت ابتساماتنا كلنا وهو وگعت ضحكته السعيدة، رفع ايده يحك شعره وگال مستغرب..

-يعني شني

-زهرة: والله الا اخطبلك اغاتها لا تزعل وليدي

-علي الكـرار: رفضوا

-فراقد: اي رفضت وظلت تتشرط وتطلب چن خاطبين اميرة بريطانيا

-علي الكـرار: يوم..

-رسمية: الله يعوضك بالاحسن وليداتي لا تضوج يرويحتي كلها قسمة ونصيب

-علي الكـرار: شنو شروطها؟؟ شنو تريد اسويهن كولي شتريد؟؟

-فراقد: تريد بيت وحدها عشتوو

-علي الكـرار: حگها عادي چا مو حق طلع بيت وحده اطلعها بيت وحد حتى لو اجار مو مشكلة

-زهرة: وشكد يبقى من راتبك يمة اذا طلعتها اجار

-علي الكـرار: ربچ يسهلها عمة شني السالفة البت من حگها تطلب اليعجبها وانا مستعد اسوي التريده

-رسمية: يمة مو هنا المشكلة، المشكلة ما تريد تعيش هنا الا ببغداد

جان متلهف وحسيت رجعله الامل بس من كالت تريد تعيش ببغداد خنطل ورخت چتافاته المشدودة وزادت على النار حطب فراقد من كالت بضوجة..

-انا من اول ماحبن هالمرة رسمية شفتيها شون كاعدة وتتشرط وتعاين علينا بطرف عينها

-رسمية: حگها تشرط ام فرقد تبقى البت بتها وتريد تضمن راحتها

-فراقد: اي بس مو هيج خايبة ماحبها ولا ابلعها

عافنا كرار وطلع من المطبخ وجهه ما يگصه الطبر من الضوجة مبين عليه انكسر گلبه وضاعت احلامه الچان راسمهن ويه هالبت وحرامات.. من صدگ حرامات عليه كرار ما يستاهل..

اليوم كله گضيناه نسولف بخطبتهم وشون رفضته بس بطريقة انيقة عود ما رادت تگولها بوجهنا ما ننطيكم حطت شروط تعجيزية على كولة عمتي خصوصاً وهي تعرف وليداتنا زلام الجنوب ومستحيل يكدرون يعيشون ببغداد..

لليل رجعت تَـمني ومن الباب سألتنا على الامير خطية حسبالها طلع من البيت بس لا ما طلع ولا شفناه نزل الدرج..

-تَـمني: ماعرف شسوي خالة مدا يقبل يرجع لوضعه الطبيعي حرت وتعبت

-رسمية: ميخالف يمة خلي براحته ولا تضغطين عليه

هزت راسها مستسلمة وصعدت فوك ومثل العادة متلگاه كاعد بغرفته لو بالسطح يكعد لو بالمرسم يقضيها.. ثاني يوم اللتمينا كلنا على الغده ونزلت سبأ من فوگ متأخر عكس عادتها وهالشي خله الكل يعاين عليها والبت خطية انخبصت كامت ما تعرف شون تنزل..

-سبأ: صباح الخير

-سلوى: يا صباح خية يا صباح كاعدين على الغدة

-علي التـقي: عسى ما على العشا شكو بيها.. صباح النور تعاي تغدي ويانه

ابتسمت وركضت لاتجاهه، ضحكت شمس على حركاتها شكد سريعة چنها زنبلگ ما تعرف تهيد هالبت بكلشي تتراكض، كعدت بصف زلمتها وتغدينا كلنا سوه عدى كرار والامير وتَـمني ما نزلوا وبدينا نتعود تَـمني تصعد اكلهم فوك لان امير ما يرضى ينزل ويشوف احد..

-شيخ علي: بوية حبيبة ما تاكلين وجهج كلش ما عاجبني شبيچ ليش هيج ذبلانة؟

-سلوى: لا لا كلشي مابيها شيخ بس الجرى عليها مو هين

-شيخ علي: لا انا اعرف بنيتي من تنهم وتنغم اكو شي مزعلها احجي بوية سولفي!

-علي الحـق: حبيبة صاير شي؟ كولي خوية ولا تخافين كلنا وياچ

ظلت ساكتة بس عيونها ما رفعتهن من ماعونها الما ماكله منه لگمة، هزت راسها بـ "لا" واكلت لگمة جديدة بس تصرفها خربط وضع الكل واولهم امها اخذت بنيتها وصعدت بيها فوگ كالت علساس تريد تسولف وياهة وتفتهم البيها..

-علي الحـق: ليلة صعدي وراهن

-ليلة: شنو؟ ليش؟

-شيخ علي: ليش تصعد وراهن

-علي التقي: احسن بوية خلي وحدة من البنيات تروح خاف سلوى تعرف شبيها اخيتنا وتطمطم السالفة خاطر ما نزعل او نضوج على الاقل نفتهم

-شيخ علي: لا ماكو داعي ماكو احد يحبها بكثر امها

گالها بحدة وسكت الكل، كمل ياكل بس انا ظليت اللوبن اريد اصعد وراهن افتهم هاي حبيبة وضعها يخوف وجهها اصفر مال موته وكاضيتها بس بغرفتها ما تطلع ولا تاكل نفسنا.. رفعت عيني على تقي وشفته يغمزلي ما افتهمت بالبداية بس رجع غمزلي واشرلي براسه بدون لا ينتبه احد وعاد انا لگفتها..

-ليلة: الحمدلله والشكر.. عمة انا صاعدة اتمدد شوي بطني جاي يوجعني

-رسمية: روحي يمة وانتبهي على نفسج تغطي زين هاي تشنجات

هزيت راسي وصعدت الدرج ولگفت صوت همسات ابا الحسن وهو يكول بصوت ناصي خاطر ما اسمعه..

-يوم اخذيها للطبيبة خاطر نتطمن تره ليلة عنودية وما ترضى انا اخذها

-رسمية: لا يمة كلشي مابيها كلنا صارت عدنا تشنجات

-ابا الحسن: يووم شبيچ هسة واذا اخذتيها للدكتورة خلينا نفتهم شنو وضعها ويرتاح افادنا

-رسمية: خوش خوش

ابتسمت وكملت طريقي لغرفة حبيبة ووگفت شوي عن بابها امد اذاناتي اسمع، بالبداية هدووء وسنطة كلشي ما وصلني اكثر من ثلاث دقايق واكفة انا وحس ما طلع منهن، ردت اعوفهن واروح بس وكفت بمچاني عاكدة حاجبي مستغربة من سمعت صوت بچي حبيبة عالي وتكول..

-راح تموتينييي موتي على ايدج راح يكون يممة كاافي تعبت تعبببت اضمضم وراج مليييت

سكتت تبجي بصوت مسموع ومبين سلوى جاي تسكت بيها وبعد اختفى صوتها وما طلعلها نفس.. طبيت لغرفتي بس ظلت السالفة براسي وكلت لازم ابلغ واحد من اخوتها البت وضعها مو طبيعي واخافن عليها من امها هاي الحية..

صعد علي التـقي گبلهم كلهم فوگ وبوجهه اجه لغرفتي، طگ الباب عليَّ وفتحتها وبقى واكف بالباب ما طب جوه..

-علي التـقي: بشري؟

-ليلة: اظن سلوى مسويتلها طركاعة جديدة وحبيبة جاي تغطيلها

-علي التـقي: ماعرفتي الموضوع شنو بالضبط؟

-لا والله بـ...

سكتت من شفت سبأ صعدت وظلت تعاين علينا مستغربة من وگفتنا، ابتسمت وگلت بصوت عالي..

-عاشت ايدك ان شاء الله ادوره الك ما يضيع لا تخاف

اللتفت يشوف منو وراي وابتسم من لگاها سبأ، عفتهم ورجعت لغرفتي وراسي بقى معلگ يم غرفة حبيبة اريد بس اعرف شمسوية للفرخة هاي سعلاوي..

لليل كاعدة بالغرفة واكل بالچبوسة كل ساع فاتحتلي واحد روحي بالملح وحامض اموت واستقتل عليه.. تثاوبت نعسانة بس بعد مشتهية اكل كضيت الچبس الجديد جاي افتحه وانفتحت باب غرفتي بدون لا يدگوها وهجمت عليّ تَـمني..

-تَـمني: ليييلة تعالي تعااالي

-ليلة: سترك ربي منو احترگ

-ولج تعاالي محد بس تعالي

-مابيه

-كومي والله تتندمين دكومي

اجت تسحسل بيه غصب عني وطلعتني من الغرفة تصعدني درج السطح، بعدنا ما عبرنا نص الدرج وكالت..

-اوكفي.. روحي غسلي كلچ ريحة خل

-ما اغسل

-ليلة!!

-اهوووو

نزلت مرة اللخ غسلت وصعدت وياهة، اشوف ضحكتها من الاذن للاذن بس ما مفتهمة السالفة شكو انا، اشرتلي على باب السطح المفتوح شوي بأصبعها ورفعته لشفايفها تهمس..

-اششش وسمعي زين

صار عندي فضول ومديت عيوني اعاين شفت الامير وابا الحسن كاعدين يسولفون بس اكثر شي ابا الحسن اليحجي وچن من نبرة صوته حسيته جاي يشكيله..

-امير مليت انا ما تحجي شمالك

-الامـير علي: شتريد اخوي

-اللگالي حل يا خوية

-خوية روح راضيها وفضها عليمن هالسوالف وشلعان الروح

-ماكدر امير انا جاي اتعذب ولك هاويها واريدنها وميت على طيفها بس هي ما جاي تنطيني ريج حلو بله تقربت منها وصدتني؟ هم ترجع تنهان كرامتي من جديد ويطيح حظي؟؟

-والله مادري شگلك سالفتك داچة حيل

-خلي فوگ الحيل حيلين

-تهون وتنسي وتصير سوالف لا تشيل هم خليها وره ربك

-الله كريم.. ادعيلي اموري بداعة فهاوي

-لا تحلفني بفهاوي ولك

-ولك ااااااخ يالقهر اااااخ.. انطفت ليلتج يا ليلة بجاه هالليلة گدما سحلتيني وسحلتي شواربي

-هسة تنزل تلگاهة فاطسة هي والفرخ

-لااا اسم الله عليهم يومي گبل يومهم ان شاء الله لا تكول هيج

-چا هذا هم دعاء واحد يدعي بي

-شمدريني هاي من الضيم.. صدگ ما گتلك راح يصير عندي وليد

اخيراً الامير ابتسم ودار وجهه لاخو، وخرت بساع من الباب خاف يلگفني ووكفت يم تَـمني اكمل تجسس عليهم ولا ارادي ابتسامتي انرسمت على وجهي من امير گال بصوت متحمس..

-الامـير علي: لا بشرفك

-ابا الحسن علي: وعلي

-الخايس راح تصير ابو

-هههههه ولك لليوم ما مصدك راح يصير عندي فرخ اللعبه واناغي متحمس مو شون ما چان وانتظره دقيقة دقيقة

-شتسمي لو ما مفكر بعدك

-"امير" ما يختلف عليها ثنين

-هاي شني ولك بعدك لاطش على اسمي

-اي وانا ردته الامير بس عبنك نحس گلت استغني عن ال التعريف وابقي امير

-لا حسون سمي على اسم الامام علي خاطر علي ابن ابي طالب يحفظه ويحرسه

-اي اكيد انا كلت لو امير لو علي بس عبن اسمي بي علي احس ما ترهم

-علي ابا الحسن علي.. اي والله چنها ما راهمة

-اي هذا هو امير اسميه ليش وين اكو احلى من اسمك

-ههههههه سمي على اسم امير المؤمنين خايب مو على اسمي

-هههه اي اي شبيك

-اشتعلت صفحتك ابا الحسن

ضحكوا ثنينهم بصوت عالي مسموع واشوف تَـمني ظلت تكمز وتضحك وياهم بالسكتة، ضحكت على حركاتها وفرحتها واشرتلها بيدي شبيچ وهمستلي..

-ديضحك امير ديضحك

-ليش جان عالن حداد؟

-اي ولج واذا ضحك ويايه مجاملة تكون وخفيفة بس حتى ما ازعل

ابتسمت لان ابني السبب بفرحتهم ثنينهم ونزلت عيوني اباوع لبطني وحطيت ايدي عليها، تنهدت مبتسمة واردد اسم "امير" فرخي العنون اختارلك ابوك اسمك من هسة ومصمم الا تكون امير ويا محلى اسمك..

-الامير علي: شايف كل الخير وان شاء الله يجي وتگر عينك بشوفته وتفرحنا بي يا خوية تستاهل كلشي حلو بهالدنيا

-يا رويحتي يوم الالك ونفرح بيك

-الله كريم

-ان شاء الله يا الامـير علي كون ما تجي سنة الجاية الا ووليدك بحضنك بجاه علي واهل بيته

-خايب وليد، بت كلشي چان والله يسمع منك

رفعت ايدها تَـمني واسمعها تهمس من كل گلبها "يارب" "يارب" وظليت ادعيلها على الواهس كون ياربي يرزقهم ويفرح هالفاهية وزلمتها النچر..

اكتفيت وتعبت من الوكفة بنفس الوقت وقررنا ننزل انا وتَـمني، هي راحت لغرفتها وانا رجعت لغرفتي وبوجهي رحت للمراية اعاين لوجهي تعبان وذبلان من الحمل ومن وضعي المخربط، لا انا المتزوجة على وجه ولا انا المتطلگة شسوي ياربي عينني وساعدني انا غبية وافكر بكرامتي گبل كلشي وماكدر اتنازل شلون بيه..

**

-تعاي يمي

حچاهة مبتسم ومدد على الجرباية، گلبي يريد يروحله وعقلي معارض وبنفس الوكت گلبي جاي يحترگ وعقلي يطفي بي ويگلي لا تسويلج سالفة بهالليل عيب..

-شبيچ سباوي

-سبأ: مابيه.. انا نازلة اجيبلك فواكه

-ماريد فواكه اريدج الج

-تقي بعدين عندي شغل

-هاا!

انتبهت لنفسي شكلت وتمنيت اكفخ روحي يا شغل الاحجي بي؟ يا شغل؟ وين اكو شغل بالوحدة بالليل شبيه انا؟؟!

-شغليش عندج؟

-ويه تَـمني

-ما يتأجل لباجر؟

-لا

-سبأ شبيچ

-شبيه مابيه كلشي مابيه

-تعالي احاچيچ

-مستعجلـ...

-ما اسويلج شيي تعاالي!!

نترها بعصبية ورفع حاجبه، خفت ورحتله كعدت على طرف الجرباية منطيته ظهري ومنزلة راسي، دغني بأيده على كيفه وگال بنبرة يداهر..

-زعلان الاسمر ما يگلي مرحبا

-كلت

-يمته گلتي شو طلعت ورجعت ما سمعت حسچ

تنهدت افرك بيدي وگوة رسمت ابتسامة على وجهي ودرتله اعاين لوجهه..

-مرحبا

-هههههههههههههههههههههههه

-شبيك تضحك

-تره انا راجع من العصر هسة ياله تذكرتي

-چا انتَ تگول ما اگلك مرحبا

-ههههههه تعاي ولججج..

جرني من زندي عليه وشمرني على صدره، ضحك يمسح على شعري بيده وگال..

-شمالها بت مسعود وياي

-مابيها شي

-اذا ضايجة من شي گليلي

-لا ما ضايجة

-چا شبيچ

-اريد اسألك شي وجاوبني بصراحة

-اجاوبج اكيد كولي

-شنو المضيعه وتريد ليلة تدوره الك؟

-بس لا تغارين من ليلة؟!!

-لا اكيد!

-چا؟

-اغار عبنك ما تريدني انا ادوره وگلت لغيري چا شبيه انا تقي والله ادوره الك واللگاه بساع انتَ بس جربني

-هههههههههه يا حلاتچ يا سبأ

-ادوره الك صدگني تره انا گبل يصيحولي جني البيت كلشي يضيع اللگاه

-ههههههه ولج شني جني البيت

-انتَ بس جربني وشوف وعلي سباعية وادبرها

ظل يضحك هواي ويلعب بخصلات شعري، ابتسمت على ضحكته واحس ارتاحيت من گال..

-بدون ما تحلفيلي ادري بيج سباعية

-امممم

-شلونج انتِ؟ زينة؟

-اي الحمدلله

-خوما جاي تتعبين بشغل البيت؟

-لا ما اهلك نفسي يعني ويه البنيات اشتغل

-عفية بمريتي

كشرت دافنة وجهي بقميصه خجلانة وبقينا ساكتين فترة وهو يمسح على شعري وظهري، كض ايدي بأيده الثانية يحاضن چفوفنا وگال بهدوء..

بالج ويه اخوتج سبأ؟

تحسرت مغمضة عيوني وفضلت ما اجاوب لان ماريد أفكر بالموضوع اصلاً، ما جاي افكر بأخواني گدما افكر بـ رهف وامي اخاف عليهن واخاف من ظلم ابوي وياهن..

-لا ما اهتملهم

-الحمدلله عبن ما نريد نزعلج

-تزعلني على شنو؟

رفعت نفسي خاطر اعاين لوجهه ولاگاني بأبتسامة هادئة، مسح على وجهي بأبهامه وگال بتردد ما توقعته..

-انتِ انطيتيهم السندات صح؟

-اي

-الحمدلله

-ما تثق بيه تقي؟

-لا وموسى ابن جعفر! شون ما اثق بيج وانا اخذتج بيدي ورجعتج بيدي وعشت وياچ الصار بكل تفاصيله!

-اخذوا السندات مني غصب جرهم سالم جر من جوه عباتي

-انا اله هالحيوان

-شنو ناوي تسوي؟

-باجر اقدم بلاغ بيتنا انباگ وراح اخذ كامراتنا وكامرات الجيران كلهم واعرضهم كدام الشرطة ومن نراجعهم راح يشوفون سالم وهو يطفر من وره البيت وتطيح البوگة براسه

-بس سالم اجانه گبل اكثر من شهر معقولة تكدر تتلاعب بالتاريخ؟

-بدون ما اتلاعب السرقة تمت من ذاك الوكت بس چن باجر ياله فطننا عليهن ورحنا قدمنا البلاغ

-تظن الخطة راح تنجح؟

-كضيت شواربي انا سبأ اذا ما شعلت شيب الخلفهم ما يطلع اسمي علي التـقي

هزيت راسي وغمضت عيوني مسلمة كلشي بيد رب العالمين خلي هو يسوي الي بي صالح النا والهم كون ياربي بجاه الحسين يهدي اخوتي ويمسح على صدورنا ويصبرنا على مصايبهم.. رجعت فكيت عيوني مبتسمة من حسيت بي يبوس براسي وگصتي ويگرص بخدودي..

-لا تبيعيلي طناگير الفگر كاتلني

-ههههههه وخر ايدك هاي شبيك

-ليش اوخرها؟ هاا؟ ليش؟ هاا؟ هاا ليش ليش اوخرها لييش

ضحكت ادفع بي مستحية وهو يعاند يرجع يتداهر ويلاشيني، متت من المستحى ووجهي جاي اشوفنه بالمراية الگبالي مصبوغ احمر وهو يستغل هالشي ويضحك على حركاتي ويتعمد يخجلني و.......

نص ساعة واندگت الباب علينا وگام تقي وهو يصيح بكل صوته متنرفز..

-خرب بالباااب خرررب ولكم يااااهوووو هااااذ

ضربت على وجهي مفتشلة من صياحه وظل يدردم ما عاجبه، اشرلي بيده ونتر ضايج..

-تستري خنشوف يا فارغ هذا

راح للباب يفتحها عاكد حاجبه بس رأساً انفكت عگدة حاجبه من شاف حبيبة واكفة بباب غرفتنا ووجهها ماعرف شلون افسره اول مرة بحياتي كلهاا أشوف حبيبة بهالمنظر المخيف..

-علي التـقي: حبيبة؟؟ شبيچ بوية

-حبيبة: اكدر اسولف وياك تقي

-اي اي خوية اي تعاي

-لا نطلع بره احسن

-يلا جايچ

سد الباب بساع وركض لبش دشداشته وگال بنبرة مستعجلة..

-اسف حبيبتي بس شفتي وضعها شلونه

هزيت راسي وگلبي يدگ حيل بس ما يدگ عبن خايفة يدگ عبن گالي "حبيبتي" صاحلي حبيبتي بترس حلگه بدون ضغط ولا مجاملة والزاد دگات گلبي وعبرها المليون هو من جر چف ايدي وباسه خفيف وگال..

-ما اتأخر

حچاهة وطلع من الغرفة يهرول عايفني دايخة ومسحولة من اسلوبه الحلو الناعم.. يا يمة ااخ يا بوية وين انطي وجهي يا علي شيسد حلگي ويطفي ضحكتي الترست حيطان الغرفة وصياحي المسودن وانا اگول بكل حيلي ومخدة تقي بين ايدي..

-تروحلك فدوة حبيبتك.. احببك احببك خايبين احبببه ولك احبببك اموت بيك اااحببببك احبببببكككك

نزيت صامة حلگي بيدي حييل من رجع تقي فتح باب الغرفة عاكد حاجبه ومستغرب كللش، فزيت من الفراش اعاين عليه من بعيد ومبحلگة عيوني ارعش، بلعت ريگي وهمست بحس گوة ينسمع..

-شنو.. شبيك

-شبيچ انتِ شنو هالصياح

-اناا؟

-چا امي شبيچ تصيحين حسبالي صارلج شي

-لا لا لا لا لا ماكو شي لاا هاي مو انا هذا التلفزيون

-التلفزيون يصيح احبك احبك احبك؟

-اي اي.. عاين مسلسل مصري معروض هي تحبه هواي تحبه

-امممم تحبه

-اي بعد هي انا شعليه

-يلا خير ان شاء الله

-انتَ ليش هنا وين راحت حبيبة؟

-مادري شو اجت سلوى وطبن ثنينهن لغرفة حبيبة وانا رجعت اشوف شنو هالصوت الجاي من الغرفة

-چا روحلها روح فشلة تخليها تنتظر

-لا عادي

-لا ما يصير عيب من اختك

-وشكو بيها اذا انتظرت شوي؟

-لا مابيها بس عيب

-لا

حچاهة مبتسم ابتسامة جانبية وطب للغرفة وطبگ الباب وراه، لملمت روحي وغطيت نفسي باللحاف اضم وجهي عنه وكلت گوة..

-لا عيب تقي روح لاختك عيب

-لا مو عيب.. بس العيب اذا عفت التحبني تنتظر

-شني!

ضحك بكل حسه وشمر نفسه بصفي على الجرباية، جر ايدي يبوس چفها وعيونه تصعد وتنزل على وجهي وشعري، توترت واحس بوجهي غده ماي من گال بأبتسامة لعوبة..

-احب اليحبوني وناوي برموشهم انوّر عتمة ظنوني......

**

"تَـمني"

حضرت صينية فواكه ونميات طيبة وحطيت عصاير ونويت اصعدله للمرسم الي لليوم ماعندي جرأة افوتله، هو ما محرمه عليَّ ولا ناهيني ادخل بس لان ابد ميعرض عليَّ اروحله وهو هناك اني محترمة هالشي واوكف بالباب اصيحله وهو يطلعلي بس اليوم الا افوت واكعد وياه واشوف شنو يرسم..

لبست صاية فوگ دشداشتي القصيرة الحمرة وصعدت الدرج على كيفي، الصالة ظلمة والوقت متأخر الكل نايم، وكفت بباب المرسم مالته ودگيت الباب على كيف وقبل لا يلحگ يجاوبني فتحتها ودخلت..

-تَـمني: هلوو شيخي

اللتفتلي متفاجئ وسرعان ما رسم ابتسامة على وجهه يرحب بوجودي، فرحت لانه استقبلني هيجي وكملت طريقي بأتجاهه..

-جبتلك شغلات طيبة كلش واريد اسهر وياك اليوم

-هلا بيچ ابوي

ابتسمت وحطيت الصينية على الميز الموجود، دورت عيوني بالمرسم سريع اشبع فضولي واشوفه شلونه وانتبهت لصور رجال معلگة بكل مكان بي بدون لا اسأل عرفته هذا ضرغام وانتبهت للوحات مرسوم بيها بيت مشتعلة بي النار وهم ما احتاجيت اسأل وعرفت يقصد بي ليث..

-تَـمني: اممم اليوم الحب مبين مرتاح

-ياهو الحب انا؟

-ليش منو غيرك احبه؟

ضحك على كيفه وجرني من خصري يوكفني كدامه، نزعت الصاية والشال شمرتهن وتقربت اكثر اكعد على رجله وامسح على لحيته الصايرة طويلة..

-الامـير علي: شلون جبن عرب هذا

-ههههه امييييير

-حليب هوايش وگصات گيمر وعلي

-اوووي كافي.. شدترسم حياتي

-هاي شني اليوم مكثرة رومانسيات

-يدلل حبيبي الحلو

-خايبة على كيفج ويه گلبي

-شبي گلبك يا گلبي

ضحك اكثر بس ضحكته هالمرة حقيقية وخالية من المجاملة، وخر شعري التناثر على وجهي وباسني خفيف وگال..

-مشتاگلچ وروحه للغالي

-اني اكثر

-مقصر وياچ نوومه انا

-لا تكول هيج مدا اشوف أي تقصير

-تعبتج وياي

-لا والله تعبك راحة حبيبي لا تخلي ببالك

-اروح فدوة لـ حبيبي الطالعة من حلگج

-هههههه شنو رأيك ناكل شي؟ احس جوعانة شوية

-خسى الجوع اليمرد افادچ انا اوكلچ بيدي

گام وگمت من على رجله وهو شال الصينية بيده واخذ ايدي حتى ننزل لغرفتنا نكعد وصراحة ارتاحيت من سوه هيجي لان المرسم يخنگ وحاارة كلش حتى بنكة ما حاط ماعرف شلون يتحمل يكعد هنا كل هالوقت..

دخلنا الغرفة ونقل الصينية على الميز والكراسي وكعدنا نسولف وناكل واشوفه غير غير هالمرة فرحان وياخذ وينطي ويايه ومستمتع وعرفت السبب ليش..

-تَـمني ابا الحسن راح يصير عنده وليد افتهمتي؟

-اي فدوة لگلبهم ليلة هم فرحانة بي تمشي وتصيحله "فرخي"

-يستاهلون كل خير يوم الالنا ان شاء الله

-ان شاء الله حبيب عمري

ضحك وضاعت عيونه ويه ضحكته، ابتسمت ومديت ايدي على الچبس فتحته وفرغته بماعون وفتحت نستلة ناكلها سوه..

-اميري نسيت اگلك تالة رفضت عاصف قبل لا ارجع خالة اتصلت بيهم واعتذرت

-زين تسوي بيت مسعود ما يتعاشرون

-اي هم گلتلها اني بس تعرف ليش هي اقتنعت بي؟ لان عاصف گال افرش لتالة الكاع ورد وشتريد تحت امرها وعلساس قابل يعيشون ببغداد سويه

-كله كلاوات

-صدگ؟

-وداعتج

-والله ماعرف لعد ليش مگتلي من البداية؟

-عبن شفت خالتج راكبة راسها وهاويه الفكرة ولو مادري شنحجي ما راح تبطل ولا تقتنع

-اممم هم صح

اكلنا النستلة وفتحت العصير اصبلنا واخذتنا السوالف لغير مكان، طبعاً اكثر شي اني اسولف هو الطرف المستمتع لان بعده احسه مهضوم وروحه تعبانة على وديان وموت ام فاضل..

-اُكل امير

-صار

-امير شصار على روحة لبنان؟ لو بطلت؟

-يا لبنان

-انتَ مو كلت تريد تروح ويه جماعتك لـ لبنان؟

-انا گلت؟!

-اي انتَ

-انا؟؟ هاي يمته

-شبيك اول ما رجعنا من العمرة گتلي تريد تروح لـ لبنان ويه ابو كربله واصدقائكم الباقين

صفن يباوع لوجهي شوية يستذكر واخذله ثواني على هالحال ياله تذكر او حسيته ديمثل ان تذكر وگال..

-هاا.. اي تذكرت

-شبيك؟

-لا ماروح وياهم بعد بطلت

-بس ليش حسيتك ممتذكر؟

-لا اذكر چا شون

-ها

هز راسه ساكت وما حبيت اللح فـ غيرت الموضوع وسولفتله على مستجدات البيت ومشاكل سلوى ويه العمات وويانه، شفته خنس ومدا ياخذ وينطي ويايه نفس قبل شوية فـ سكتت وهو هم سكت وطول بسكوته فترة قبل لا يكول وعيونه سارحة بالكاع..

-تَـمني

-ها

-هم اجه يوم تمنيتي نعيش وحدنا؟

-وحدنا يعني نشيل من بيت عمو؟

-اي

-تريد الصراحة؟

-اكيد

-اي تمنيت، وكل مرة اتناگر ويه سلوى اتمنى كون ما عايشين هنا واكدر اطلع من البيت واروح لبيتي الخاص ارتاح منها

-بس هذا هم بيتج انتِ تملكين نصه

-اعرف امير بس قصدت مكان مابي غير اني وانتَ.. مملكة خاصة بينا وحدنا نرتاح ونسوي اليعجبنا ونأثثه على ذوقنا ونتونس بي

-امم

-اي بس يعني تبقى امنيات مدا اطلب منك نطلع من البيت والله

ابتسم يهز براسه متفهم وسكتت اني ماردت اضيف كلام ثاني واوجع راسه، هسة مو زين من هو كاعد ويايه وديشرب عصير ووضعه شوية رجع نفس قبل مالي خلگ يتعب وحالته ترجع تنتكس..

-فهاوي

-ها عيني

-تردين نطلع من البيت؟

-شنوو!

-نطلع لبيت وحدنا؟

-تحجي صدگ امير؟

-اي

-كول والله

-والله

-كول وعلي

-هههههه يحفظج علي

-امير صدگ تريدنا نطلع لبيت وحدنا؟؟

-اذا يعجبج اي

-وانتَ يعجبك؟

-انا كلشي يعجبچ يعجبني

-يعجبني اي اي

-هذا هو

-لا عليك الله!

-صار من باجر اطلع ادور على بيت

-عزا بعينيي صدگ تحجي!!!

كمت من الكرسي اطفر واضحك مثل الجهال ممصدگة راح نطلع منا اخيراً، ضحك بكل صوته وجرني عليه يهدأني بس ماتحملت وطفرت عليه احضنه واگمز طايرة من الحماس والوناسة..

-شكراً امير شكرراً احببك والله احبك اعشققك اني

-اهم شي راحتج عندي يا بعد امير

-راحتي يمك ووياك الله لا يحرمني منك ومن حنانك

بست خده بوسات متتالية وهو يضحك ويمدلي خده الثاني حتى ابوسه مناك، حضنته وهو كاعد على الكرسي واتنهد براحة.. راحة لان اخيراً استعدل وضعه وراحة لانه ديحس بمعاناتي بهالبيت ودينتبه لـ لسان سلوى الطويل وسوالفها الي تعل الگلب..

-نوومه بس ماريد احد يفتهم بهالشي انا باجر اكعد ويه امي وابوي وافهمهم غيرهم ماريد احد يعرف

-تدلل من عيوني

-اروح فدوة لعيونج

-احبك تدري؟

-ما دام تحبيني تعاي.........

قضينا الليلة سوه وحرفياً من فرحتي ظليت للهوا اضحك.. اضحك والدنيا ما سايعتني من السعادة احس اريد اطير اريد احضن الامير لحدما ادخل بضلوعه واختل هناك جوه العمر كله..

نام الامير قريب الاربعة الفجر بس اني ما جايني نوم، كمت من الفراش ورحت اسبح واسوي مقشرات وعناية بلكت انعس بس انوب صحصحت، طلعت صليت صلاة الفجر وصليت ركعتين شكر لله على هالهدية العظيمة وكمت لفيت المصلاية ورجعتها لمكانها..

لبست الصاية وشال على راسي واخذت الصينية الاكلنا بيها ونزلتها جوه.. وكفت على السنك اغسل المواعين ولفت انتباهي صوت همسات جاي من الحديقة.. صح استغربت بس نويت ما اتدخل ولا اسمح لفضولي يعرف منو كاعد بره مالي خلگ مشاكل بس ماكدرت اللزم نفسي اكثر خصوصاً من ميزت الصوت تابع لـ بنية.. تابع لبنية وچنه صوت حبيبة؟

ذبيت من ايدي ونشفتها بالصاية ورحت للشباك، وخرت البردة شوية منه ومديت عيوني وشفت حبيبة تبجي ومنزلة راسها وواكف گبالها علي التـقي بس مدا اكدر اشوف ملامح وجهه منطيني ظهره..

-حبيبة: تعبت.. والله تعبت وما جاي استحمل

-علي التـقي: حبيبة فهميني شصاير؟؟

-احلفلي ما تتهور تقي، انا اجيتك من دون اخوتي عبني اعرفك شكد واعي وما تتسرع

-سولفي احجي!

-احلف!

-وداعتج ما اتهور بس احجيلي شبيچ!

-امي

-امج شبيها؟!

بچت اكثر تمسح بوجهها وتهز راسها بـ لا، لزمها تقي من زنودها ونتر بهمس..

-احجي حبيبة امج شبيها؟؟

-تقي لا تسويلها شي بداعتي

-احچي!!

-امي ذبحت زيد ابن عمي مسعود!

ضربت على حلگي وشهگت بدون صوت مصدومة!! مصدومة ومدا اكدر اصدك عزا بعينيي هاي اني سمعت صح لو دا اتخيل؟! معقولة اني نايمة لو دا احلم؟؟ بس عرفت اني كاعدة وصاحية من اردفت حبيبة..

-راد يعتدي عليها وهي مدافعة على نفسها وذبحته

-علي التـقي: تحجين صدك انتِ!!!!

وكعت بالكاع تبجي بالخنسة وتتوسل بي ميحجي ويساعد امها، حچتله الصار من البداية وويه كل كلمة تطلع منها تشهگ وتتوسل وهو باقي بس ساكت كلممة ما نطق توقعته راح يبدي ردة فعل قاسية او قوية بس ما سوه شي او يجوز لان منطيني ظهره ما عرفت شنو نظراته وما كدرت افسرهن..

ظليت ارجف من سمعتها تكول امها عافته بحمام الشقة وشردت ترجع لبيتهم، حطيت ايدي على گلبي انظم دگاته الراح توكف واسمعها تكول..

-امي رجعت للبيت الصبح وصعدت من هذا الدرج الموجود بالحديقة خاطر محد يحس عليها وتوسلت بيه خاطر ما اسولف لاحد بس ماكدرت مااكدر اختنكت تعبت مااتحمل اسكت اكثر

لزمها علي التـقي يهدأها ويحجي وياهة وسألها هواايه اسئلة ماعرف شلون اجن على باله وهو بهالوضع وبهالصدمة، بس ظل يسأل وكل اجوبتها جانت "مادري" او "ماعرف شي"...

ماتحملت ابقى هنا اكثر خفت، خفت لدرجة تجي هسة سلوى وتلگفني اتسمع عليهم واكون اني الضحية القادمة.. صعدت فوك اركض على الدرج وفتت لغرفتي، نمت بصف الامـير علي وجريت ايده خليته يحضنني حييل ويحميني..

للصبح عيني ما غفت ماكدرت أغمضها كل عقلي ويه كلام حبيبة واحس بروحي تعبت ونفسي كامت تلعب وزاد وضعي سوء من ثاني يوم انصدمنا بسالفة سندات عمو علي مبيوگة!

البيت انگلب گلااب وخالة رسمية صابها انهيار لان قسم من املاكها هم بايكين سنداتهن، تخبلت كعدت تدك وتلطم على حظها واحنه محاوطيها منعرف شنسوي.. ماكو هيج بيت مااكو كل مصايبهم تجي دفعة وحدة ياربي دخيلك!

طلعوا الولد كلهم من البيت وراحوا للمخفر يقدمون بلاغ وما طولوا ساعات واجت دورية لبيتنا، صعدلي الامـير علي يركض فوك ووصاني اكعد بالغرفة وما اطلع ابد هزيت راسي اي واكول بگلبي وينه الحيل وانزل وراك..

ظليت وحدي بالغرفة هوايه وماعرف شديصير جوه ولا اريد انزل ماعندي طاقة لشي اريد بس نخلص من هالسالفة، مرت اكثر من ساعتين فوگ الوقت القضيته وحدي وصعدتلي عبق متعرف شصاير هستوها واصلة وكفت تستفسر مني عن الموضوع وجاوبتها برؤوس اقلام..

-عبق: لعد بيت مسعود شعليهم تَـمني ما فهمت؟

-تَـمني: شنو شعليهم؟

-مادري ولج سمعت علي الدر يكول بالتصوير مال البيت الورانه مبين سالم طافر على بيتنا بنص الليل وكالو هو الحرامي!

-صدگ تحجين!

-والله اي..

وفعلاً كلامها صح! فعلاً طلع سالم الحرامي والمغرب دزوا دورية لبيت مسعود نفضوه نفض ولگوا السندات ببيتهم وضاميهن بغرفة رهف فوگ وانسحل سالم من ياخته مثل الحيوان..

صدمة وره صدمة وهوسة وره هوسة ما شفنا بعض كلمن كاعد بغرفته وتوصللنا الاخبار من التلفون ابا الحسن يدگلنا وينطينا الموجز وكال يكدر يخيسه بالسجن خمس سنين هاي اذا ما تنازل عمو علي..

حطيت ايدي على گلبي خايفة مو عليهم وانما خايفة على حبيبة والوضع الي هي بي.. وضعها ميبشر بخير البنية معتكفة على نفسها حتى تطبيقها بالمستشفى عافته وسلوى الحقيرة تسرح وتمرح بالبيت ولا كأن اكو شي وبالعكس اشوفها فرحانة! هالشي مخبلني ماعرف شلون فرحانة ومتشمته ببيت مسعود لهدرجة وتضحك عليهم!

ثالث يوم اندكت باب الحوش و اجوا مسعود وولده النا، تجمعنا كلنا البنات بباب الديوان نتسمع عليهم شلون يتوسلون بعمو علي حتى يتنازل بس عمو ابد ولا تنازل ولا قبل يصفح عنه وكال لازم يتربى ويتأدب ويصيرله درس..

-مسعود: علي يا خوي انا اربي وانعل امه على اخيته بس لا تكسر ظهري بي

-شيخ علي: ابو سلطان اذا اجيت خاطر اتنازل فـ هالسالفة گطنة وشيلها من اذانك ما اتنازل لو اشوفنه ميت گدامي

-مسعود: ابو علي ويلادي خلصووا راحووا! سيف منتهي ومنتشر بجسمه المرض وسالم بالسجن وليث عمت عيني ميت وزيد! زيد انهزم وما ينعرف ارضه من سماه الچلب ابن الچلب!

-شيخ علي: بدال ما جاي هنا تتبچبچ عليهم ربيهم! چان ربيتهم زين ورفعت راسك بيهم ليش حطمتهم وخليتهم كل واحد بمچان والاجرام يمشي بدمهم؟!

-مسعود: غلطوا ونطلب منك السماح علي لا تطلعني مكسور خاطر يا خوية

-شيخ علي: الله وياك مسعود

-مسعود: ماا رجيتها منك يا شيخ!

-الامـير علي: كافي لملم الباقي من كرامتك واطلع واخذ ولدك وياك

صارت بلبلة عالية بين ولد مسعود واخوان الامير والامير وبالاخير طردهم عمو علي برزالة غسلتهم غسسل ومسح بكرامتهم كاشي بيته نصها ما سمعتها لان صارت بالشارع..

-رسمية: كفووو هو هذا قدركم وقيمتكم يا چلاب!

حچتها خالة رسمية بفخر ومسحت على صدرها تتشفى بيهم وتوزع ابتسامات، الصار ما اهتميتله ولا رفولي جفن بس محد قهرني غير سبأ دا اشوفها شكد مقهورة وضايجة على اهلها رغم متحجي شي بس وجهها مبين عليه..

اول ما طلعوا بيت مسعود الامـير علي اجه وبدون مقدمات كال ممنوع احد يصعد للطابق الثاني لان راح يجيب عمال يسوون الدرج الياخذ للسطح الكاشي مگفع من البايات، فرت بيدها سلوى وكالت..

-وكتها هسة شني متوازين

-رسمية: بكيفهم شعليج انتِ؟

-سلوى: لا يعني جاي اكول وضعنا مو مناسب تشوفينا مخبوصين و...

ظلت تبرر لنفسها وخالة رسمية ما جاوبت لبستها وانطتها ظهرها.. للعصر اجن العمات كالعادة بس ما كعدت وياهن هالمرة لان بالي مشوش من سالفة سلوى منتظرة شنو راح يتصرف علي التـقي وليش سواها سكتة؟ وتشوش اكثر من شمس تعبت فجأة وظلت تشكي من بطنها، خفنا عليها وكعدنا اني وليلة وعبق گابلناها لحدما اجه علي البدر ياخذها للدكتورة..

الحمدلله طمنونا وكالو الديصير وياهة طبيعي بس تحتاج راحة لا اكثر يخافون لا تجيبهم سبيعي، اليضحك راح تجيب وللان متعرف جنس الاطفال شنو متقبل تريدهم من يجون للدنيا ياله تعرف..

-ابتسام: چا غير نفتهم بشنو حامل خاطر نجهزلج

-فراقد: انتِ شكو تجهزيلها وشعليج اصلاً؟!

-ابتسام: نحب نشارك بالجهاز عيني ام فرقد مو يمج السالفة

فرت ايدها فراقد ما عاجبها وانطتها گفاهة، صايرة الكعدة وياهن تضوج كلش لان وحدة تبسمر بالثانية واخر فترة صارن يومية يجن لازم لاززم يجن ميفوتن يوم وهالشي مزعج صراحة لان خالة رسمية دترتبط وياهن وتستحي تگوللهن عدها شغل او طلعة..

صبينا العشا وكعدنا كلنا احنه والولد وكالو ماكو تطورات عن حال مسعود وبطني مغصتني من ابا الحسن كال..

-زيد الخنيث عايفهم ومهزوم

-علي السور: چنه حاس گلبه راح يديحون

-حيدر: من يوم يومه زيد غدار وجبان نسخة من اخوه سيف

-علي النور: اي وعلي حباية وانگسمت بالنص

ظلوا يسولفون بيهم شوية وكلمن توجه لغرفته بدون مرته، لان نسوانهم لازم يكعدن يجاملن فراقد!

-زهرة: يلا احنه نترخص بعد تأخر الوكت

-ليلة بهمس: زين من حسيتن

ودعونا اخيراً وطلعن وهسة ياله جريت نفس وصعدت لغرفتي، فتحت الباب وشفت الامير متمدد على الجرباية ولازم بيده شفرة وخشبة صغيرة كاعد ينحت بيها بس شافني دخلت ذبها من ايده وكال بأبتسامة..

-كلت ما تصعد اليوم فهاوي

-فهاوي حايرة تجامل عماتك خالوو

ضحك يسويلي بيده حركة "اني اعلمج" وعفته واخذت برنصي ودخلت للحمام اسبح واتجهز للنوم تعباانة اريد بس مخدة وفراش وايد الامير تحضني..

كملت غسل وسديت البوري ولفيت نفسي بالبرنص، فتحت قفل الحمام وطلعت شفت امير واكف كبال ميز التواليت وفاتح الجرار الاول..

-امير مخلصة غسول حباب باجر طلعني اريد اشتري

گلتها ورحت للكنتور مالتي اطلع ملابسي، اخذت تراك خفيف ستن وانداريت اباوعله بعده على وگفته ما تحرك..

-امير شعندك هناك

هم ما تحرك ولا اندارلي، صحتله مرة ثانية وثالثة ورابعة وبالخامسة ياله اللتفت عليَّ وشفت وجهه مگلوب گلاااب عيونه ناطة وفكه مقبوض وراسه يهتز من كدما راص على اسنانه..

-امير شبيك...

نزلت عيوني على ايده اشوفه شايل قميص رجالي مقفل بلون بيجي واخضر وبيده الثانية شايل ورقة.. بعدني ما مفتهمة شي وبطني خبطت وحسيت بروحي راح اوكع من طولي من گال بغضب..

-شنو هذا تَـمني؟؟!!

-شـ.. شنو

-شنوووو هذااااا

عطت ميتة خوف من ركض بأتجاهي بخطوات سريعة ولزمني من زندي حييل وحط الورقة بوجهي وصاح..

-منووو هذااا؟؟؟؟ ولج منووو هذاااا الجاي تجيبي هنااا منوووو!!

من الصدمة والخوف دموعي ما نزلت ما كدرت حتى ابجي ولا احجي، كمشت بأيده حيل وهمست بصعوبة..

-امير.. ماعرف ماعرف شنو دتكول ماعرف

دفعني على الكنتور بعصبية شايط وشمر القميص الرجالي بوجهي بقوة ونتر بيه يرجف رجف..

-لمي هدومچ وطلعي من بيتييي گبل لااا ارتكب بيج جررريمة!!

-امير

-ووووولج طلعيييييييييييي......

يتبع 👑...

━━━━━━ ♛ ━━━━━━

🥹

#الامارة

بقلمي: زهراء السلامي 💎

لتنسون التصويت + التعليق بين الفقرات + متابعة لحسابي 💙.

البدايات: الورد يطلع بالجماجم لو تجيني ♥️!

النهايات: الورد ذابل من زمان لا تحاول تعتنيلي، لا جماجم لا ملاحم كلها ما تعوض سنيني.. ✋🏻

━━━━━━ ♛ ━━━━━━

-ووووولج طلعييييييي

اباوعله وعيوني تجري كلشي مدا افهم وماعرف شتصرف، لزمني من زندي بقوة وجرني يطلعني من الغرفة بنص الصالة بچيت فحطانة بدون صوت وحسيت بي يخضني بأيده حييل.. تخبلت دفعته عني اتعارك وياه وقاطعني بسرعة من خزرني وهمس بصوت ناصي كلش..

-اشششش تَـمني اششش احبج وعلي احبج

-تَـمني: شنوووو

نزيت فازة من عاط بيه صوت ودفعني عنه خلاني اوگع من طولي من الخوف..

-طلعيييي ماريد اشوف وجهج لاااا تكعدين هنااا كووميييي

رفعت راسي اباوعله ما مفتهمة شي ودموعي عشرة عشرة على خدودي، نصى يگعد گبالي وجر ايدي مخنزر وهمس بيني وبينه..

-اسف.. اسف يرويحتي اسف.. كوومييي تَـمني كووومييي

جرني يجبرني اگوم من الكاع شانط ايدي وويه عياطه طلعوا الكل من غرفهم، طلعوا تقي وحبيبة وليلة يركضون ممفتهمين شنو صاير وهو يتعاارك ويصيحح مثل المجانين..

-مااالكم غررررض كلمن يرجععع لغرررفته

-ليلة: هووو بكيفكك هد البت هدهاا

-الامـير علي: وووخري ليلة لاا تبليني بيج وخررري

-ليلة: بعلييي فلا اوخر هد الببت وللك تسودنتتت انتَ

رفع راسه يخزرها حييل وسمعته يهمس بصوت كلش ناصي وصلني..

-اشتعل بختچ على هاللسان

-ليلة: كومي تَـمني وياايه تعالي تعااي

كعدت بصفي بالكاع وصعدت سلوى ووراهة خالة رسمية وكرار وابا الحسن، وكفت سلوى بالنص وكالت..

-ياا ياا هاي شكو شمالكم

-الامـير علي: اصصص انتِ ولا چلللمة روووحي هنااك ماريدن اشوف وجهچ

-ابا الحسن علي: امير شبييك فهمناا

-ليلة: عاين شمسوي بالفرخة اخوك عااين.. تعاي تَـمني ولج كوومي لا تتفهييين

گومتني ليلة وجرتني اوكف بباب غرفتها بس جسمي كله يرجف ررجف من فوك ليجوه، ابجي واباوع بالوجوه ضايعة الامير گاب نار واخوته يتعاركون وياه على تصرفه وسلوى واكفة على جهة تباوعلي وتضحك وخالة رسمية تصيح..

-ابووكم اجه ابوكم سكتووا لا يطيح حظنا سكتوووا

ما انتظرت ليلة ودخلتني وياهة للغرفة وطبگت الباب وراهة وقفلتها، ضميت وجهي ابچي مقهورة واندارتلي تنتر بيه متعصبة..

-ليلة: سكتي لا تبجين ما يستاهل تَـمني سكتي

-ليلة والله ماعرف شنو صار كلشي مدا افتهم والله

-همه سوادين عقلهم طباگات لا تهتميلهم تعاي نامي يمي اليوم

-لا لا اريد اعرف شنو الموضوع راح اتخبل لييلة والله ممسوية شي اني

-ولج باجر تفاهموا لا تسويلنا سالفة بهالليل زلمتج غادي كبرة نامي خايبة

عافتني واكفة ابچي محتارة وراحت للجرباية نامت وغطت روحها واشرتلي تعالي، مسحت دموعي ورحت يمها نمت بصفها وانطيتها ظهري ماريدها تشوفني ابچي وترزلني..

غمضت عيوني اتذكر شنو سوه بيه وشلون عاط بوجهي ويخض بيه ودموعي شلال على خدودي مهضومة ومتفلش گلبي.. فزيت من حسيت بأيد ليلة تصير على ظهري مسحت عليه خفيف وهمست..

-لا ترجفين خيتي ما دامج ما مسوية الغلط لا تخافين

جملة بسيطة گالتها واحس شوية ريحتني بس هم بقيت قلقة وخايفة، مدا اكدر انسى نظراته عليَّ مدا اكدر انسى عصبيته بس من اتذكر اعتذرلي وهمس بيني وبينه "اسف" شوية اطمن نفسي واكول يمكن اكو شي خصوصاً انتبهت على عيونه تنجرف اكثر من مرة على الباب الي تؤدي للدرج..

ظليت الليل كله عيني على باب الغرفة وانشر من البجي، افرك زندي بيدي وگلبي يوجعني.. تأملت يجيني يفهمني او حتى لو يتعارك ويايه ويطلع حرگته على الاقل افتهم السالفة بس ما اجه..

-ليلة: كافي تَـمني

-ليلة

-ها عيوني

-حبابة طلعي افتهمي الموضوع

-خليهم توتة نارهم تاكل حطبهم نامي وباجر نفتهم كلشي

-فدوة ليلة حبابة

تأفأفت ضايجة بس بالاخير كامت، حطت شال على راسها وطلعت من الغرفة وحلفتني ما اطلع ولا افتح قفل الباب الا من اسمع صوتها.. دقيقتين ما طولت ورجعتلي كالت البيت هدوء وسنطة محد كاعد، انصدمت وظلينا ثنينا نضرب اخماس بأسداس نفكر بالسالفة تالي ليلة ملت ونامت واني ظليت كاعدة للصبح..

صارت الساعة بالتسعة الصبح وبالعادة هيجي وقت نكعد علمود الريوك بس ليلة ما قبلت انزل واصلاً ما ناوية انزل، بقيت بالفراش اتگلب واحاول اغفى بس عبث مدا تغمض عيني..

هستوها شكلت عيني تسحبني لظلام النوم ولقطت اذني باب الغرفة ينفتح، بقيت منطية الباب ظهري ممهتمة وردت اكمل نومتي لان ماعندي طاقة ارفع ايدي من الفراش بس توترت من حسيت بأحد يهبط يكعد بصفي على الجرباية ونبض گلبي بقوة من شميت ريحة عطر رجالي، عطر رجالي اميزه من بين الف رجال..

-تَـمني

انخمش گلبي ويه صوته الناصي وهو يهمس بأسمي وحسيت بعضلاتي تتقلص من مشى ايده على زندي الجرني منه بقسوة..

-تَـمني.. تَـمني گعدي تَـمني

يضرب على زندي بخفة يريدني اصحى بس مابيه اباوع لوجهه اخاف لا نتعارك ويكسرني ويجرحني مرة ثانية..

-تَـمني تكعدين لا اكعدج بطريقتي

-شتريد

همستها وعيوني مغمضتها وعبالك هو ماصدگ سحبني من زندي على كيفه وگلبني ينيمني على ظهري، استمريت سادة جفوني ما رفعتهن بس انجبرت افتحهم من حط ايده جوه راسي ورفعني منه وقربني عليه وباسني بطريقة فاجأتني.....

دفعته عني مرعوبة من تصرفه خفت منه ومن اسلوبه الغريب هذا شبي! شو يوم يتعارك ويوم يبوس شسالفته..

-وخر شبييك

-خلينا نتفاهم تَـمني لا تنامين

بقى لازمني من راسي ميخليني اوخره من ايده بس روحي متريده وبعدها خايفة، فلتت نفسي منه بصعوبة ابتعد بس رجع جرني من ايدي ثنينهن وثبتهن بالجرباية بسمرهن بين ايده وخلاني ارجع انام على ظهري..

-وخر امير شبييك

-افتهمي عليَّ ولا تصيحين ماريد احد يعرف انا هنا

-شدتكول انتَ شبيك وخرر ايدي توجعني

-تَـمني الصار امس مو بقصدي وروحه لعزيز گلبي انچوت روحي ويه طيحة دمعتچ

-امير انتَ شارب شي؟ ماخذ دوا فدشي يخليك تهلوس؟

-لا! لا لا تَـمني لا مو انا الماخذ انتِ الشاربه! انتِ بس ما جاي تحسين على روحج!

-شنو قصدك

-سمعيني راح اسولف وماريدج تقاطعيني خاطر نعرف نحل هالسالفة

-لا تخوفني گول

-سمعي... صار اكثر من شهر تفزين من نومچ لو تبچين لو تسولفين ويه روحج سوالف هواي منها تنفهم ومنها ما تنفهم وانا تعودت عليج لان اعرفج تحجين بنومج بس كامت توصل بيج اوقات تكومين من النوم تفترين بالغرفة وتكعدين يم عتبة الباب وتبجين ومن اجي اريد ارجعج للفراش تتعاركين وياي وتدفعيني منج حتى لمستي ما تتقبليها..

-تَـمني: هاي شوكت!

-تقريباً كل يوم احنه على هالوضع وصرت اعوفج تبجين وتسولفين وتحجين عن هواي شغلات لحدما تتعبين وترجعين تنامين بصفي لو اللكاج نايمة يم الباب اشيلج وارجعج للجرباية بس تَـمني صار اسبوعين الوضع يتطور صرتي تأذين نفسج وتشيلين بالمگص التگصين بي رموشج مدري شني وتردين تدچي بيدج وانا اللحگ عليج بآخر لحظة

-بس شجاب هالشي بالصار البارحة؟

-جايچ بالحجي.. كمت اشك البيج مو بس مشي وحجي وانتِ نايمة اكو خِلة جاي تصير خصوصاً احلامج كلش قالقتني هواي تسولفين بأهلچ و بـ صلاح العار وبسام وتجيبين طاري عاصف هم وياهم كللش هواي تحجين بعاصف وتجيچ أوقات تندحسين بحضني وتكولين..

-اخذني امير اخذني اخذني راح ياخذوني

-ياهو ياخذج ابوي.. تَـمني انتِ نايمة كعدي يا رويحتي كعدي

-اخذوني اخذوني ايدي توجعني ايددي اريد اتقيء.. اريد اريد مي اريد مي

تبجين وتهذين وتهزين براسج لا انتِ الصاحية ولا تكولين نايمة بيج شي غريب بس المشكلة ما جاي افتهم شنو هو الا من اجت مرة وكعدتي بحضني بالضبط چان هستوه مأذن الفجر اجيتيني على السجادة وبعدني ما مسلم ومكمل صلاتي كعدتي بحضني وتبسمرتي هناك لا البيه اگطع الصلاة ولا البيه اكمل..

-امير انتَ خوش انسان تدري؟

-الله اكبر..

-امير

-السلام عليك ايها النبي ورحمة الله وبركاته..

-احس انتَ لازم تتزوج مرة ثانية

-السلام علينا وعلى عباد الله الصالحين...

-لو تتزوج وديان اموري؟ هي حبابة وخوش بنية

-السلام عليكم ورحمة الله وبركاته.. الله اكبر الله اكبر الله اكبر.. ياهي؟؟

-وديان هي كلش حبابة وتحبنا

-شجابها على بالج وديان؟

-مو هي تسولف ويايه وتكول خطبيني الامير

-شنو؟!!.. وين رايحة وين؟

گمتي من حضني ورجعتي للفراش غطيتي راسج ونمتي بس ما كدرت اعوفج اريد افتهم شنو قصدج، لميت السجادة بساع وكعدت بصفج على جهتج من الفراش لكيتج مفتحة عيونج وصافنة على الشباج..

-تَـمني انتِ ووديان شوكت مسولفات؟

-اريد مي

-هسة انطيج حبيبتي بس سولفيلي انتِ ووديان يمته مسولفات؟

-البارحة

-وين البارحة انتِ ما طلعتي من البيت؟

-اممم

-نوومه ابوي كعدي وسولفي وياي مشتاگلچ انا

-غير انتَ

-شني انا

-عايفني وكاعد بالمرسم

-ماسويها بعد التوبة ماعوفنچ وهسة سولفيلي شعندج ويه وديان؟

-وحيدة هي

-وحيدة شون؟ شلون عرفتي

-اهووووووو

-يلا نمنمه سولفي وياي

حكيتي خشمچ هواي وراهة عينج وظليتي ساكتة، بستج على خدج وراسج وضحكتي مثل عادتج من ينغزچ شاربي.. رجعتيلي حبه على وجهي وگلتي بصوت ناصي..

-احبك

-اموت عليج

-لا تتزوج عليَّ اخاف امير

-ما ابدلچ بثانية يا عيونه لامير

-وديان تضوجني

-ليش؟

-تكول.. تكول اخ خشمي

حكيتي خشمج لحدما صار احمر، كضيت ايدج امنعج وابتسمتي تدورين وجهج عني..

-نوومه شتكول وديان

-مادري هواي حجي... تكول مو كل امير امير..

-اميركم ذبح زلمته ويتم عياله

كملتها بدون لا احتاج اسمعها منج لان حفظتها على غيبي! حفظتها ولهذا اليوم ما تروح من بالي وانساها، ما انسى من اجت وديان وكفت گبال ابوي وگالتها بكل صوتها منهارة على اخوها ومحترگ دمها..

-تَـمني وين حچت وياچ وديان؟

-مادري

-امنية لا تنامين بنيتي حاچيني

-تجي هنا وتكول خطبيني لانها وحيدة وتريدك

-تجي هنا؟ لغرفتج؟

-اي

-شلون؟ منو يطببها؟؟

-مادري

-انا ويني من تجي؟

-فوك

-وامي وين؟

-جوه

-والباقين وينهم؟

حركتي چتفاتچ بطريقة ماعرف ورحتي بنومة غميجة.. تكررت هالحالة مرة وره مرة وره مرة وكل يوم شكوكي تزيد واغرز بسنارتي الافكار لحدما طخت براسي سلوى.. سلوى عبن كرار شايفها اكثر من مرة تصعد وتنزل من فوگ ومن يسألها شعندچ تگله جايه تنام بغرفة حبيبة بس الغريب بالموضوع بالليل من انزل من المرسم اروح لـ حبيبة اشوفها وحيدها نايمة ومرة ابوي ماكو..

انتبهت لوضعج يصير هيج بس من تنامين ودائماً تكليلي نفسي تلعب وتعبانة، ظليت كل يوم انفش بالغرفة نفش ادورلي على حبة او شي يجوز تاخذي بدون علمي بس ما لكيت غير علاجچ الي معاندة ما ترضين تعوفينه ومرة من المرات ويه ما چنت ادور بالاغراض شفت هذا..

-تَـمني: شنو هذا

-فتحيها وشوفي بعينج

فتحت العلاگة ومديت ايدي بيها وطلعت منها شماغ ورأساً تذكرت الشماغ الشفته قبل فترة ونسيت ابلغ الامير بوجوده.. شهگت من شفته بين ايدي وقبل لا اللحگ ابرر حط بيدي علاگة ثانية وكال..

-شوفي هاي

فتحها هو هالمرة وطلع منها ملابس داخلية مال رجال!! تخبلتتت من شفتهن وانرديت ليوره مصدومة، ضحك تك خد من شاف وضعي وطلع من العلاكة القميص الشفته البارحة ووياه ورقتين بيهن حچي حب ووعود..

-تَـمني: امير..

-لگيتهم بكنتورچ تَـمني وهذا القميص لگيته بجرار الميز ووياه هاي الورقة

دفعتهن من حضني وشمرتهن بالكاع مفزوعة، كعدت على حيلي وحركت ايدي الترجف بحرگة نافية..

-والله العظيم والقراان مادري بوجودهن امير جيب القران احلفلك ماعرف منين اجن ذني والله اني اعرف بس بالشماغ وشفته مرة جوه مخدتي ونسيت اگلك عليه بس ذني مادري بيهن امير صدگنيي والله

-تعرفين شنو المشكلة؟ المشكلة مرتين تقي يشوف سلوى تطب وتطلع من غرفتنا من احنه جوه ومرة من المرات تلاگينا انا وعمتي زهرة وجه بوجه چانت هم صاعدة فوگ وواكفة يم باب غرفتنا

-شنو!

-تَـمني مو الامـير علي الينلعب بعرضه وبسمعة مريته! انا وعلي التقي صارلنا شهر نشتغل على هالسالفة ونراقب واخير شي اتفقنا ننصب كامرا بالصالة الفوگ ودفنتها بين الاثاث خاطر ما تنشاف وتحسون عليها بس الحظ سواها ومرتين اجي للكامرا اريد اشوف التسجيلات وما اشوف غير السواد چن واحد مغطيها وعرفت اكو من جاي يلعب بيها

-يعني اكتشفوا مكانها؟؟

-اي اكيد وانا وضعي ما يساعد اگعدلها گعدة مرتبة وافكر بالموضوع ووصيت علي الحـق يجيبلي كامرا اصغر ما تنشاف من بغداد وصدگ جابها وامس جبت خبير وصعدته ينصبها ويعلمنا عليها

-من گلتلنا دنسوي درج السطح طلعت جايب ابو كامرات؟؟

-اي.. جبته وانا سويت درج السطح ولبخته خاطر محد يحس بشي

-ليش ما نصبت الكامرات من قبل ليش الا هسة؟

-اخر شي چنت اتمناه انصب كامرا ببيتي ومچان راحتي، نصبتها واحسني مستحي من نفسي شون راح نتورج على نسوان البيت ونتسلط على راحتهن بس لگينه حل لهذا الموضوع الحمدلله

-شنو الحل؟

-شمس ساعدتنا.. هي ظلت تراقبلنا وتشوف الفيديوهات

-واني ليش مادري!

-ماردت احد يفتهم خاطر تمشي الامور طبيعية وما تحس بشي سلوى

-وشصار بعدين!

-لگفناها امنية! لگفناها امس شفنا سلوى وهي تصعد فوگ وتمشي ويه الحايط خاطر ما تبين بالكامرا.. وراحت للكامرا القديمة وغطتها بالفازة وكملت طريقها لغرفتنا، طبت بيدها شي وطلعت بدونه ورجعت للكامرا وخرت الفازة ونزلت تركض من فوگ

-الله ياااخذهاا!!!

-هي حطت هذا القميص وذني الملابس خاطر اشك بيچ! وما اچذب عليج بالبداية اخذتني العصبية والغيرة وتسودنت بس بساع بردت من انتبهتلج خفتي مني وطلعت العركة بره خاطر يطلعون ياخذوچ من ايدي وبالصدفة لمحت خيال الحية سلوى واكفة براس الدرج مبين منتظرة هالعركة على نار وهذا الچانت تريد توصله

-يعني عطت بيه بس حتى ترضيها!

-تَـمني وعيونچ العاشگهن سويت هالشي خاطر نحل هالموضوع ونفضح سلوى ونطردها من هالبيت! ما چنت اريد احسسها انا شاك بيها خاطر ما تبطل فواينها وما نكدر نكض عليها دليل

-يعني هنتني وصغرتني وفضحتني وطردتني من الغرفة كدام اهلك كله علمود تلزم دليل على سلوى الحقيرة؟ زين واني؟؟ امير وكرامتي شنوو؟؟ لهدرجة كرامتي عندك عادي انهان گدام اهلك ويصعد الكل يتفرج عليَّ؟!!

-تَـمني سويت كل هالشي لخاطرچ انا خايف عليج واريد...

-تريد متريد اني طلعني منها امير!! محد غيري ديتبهذل وينلعب بحاله محد غيري دتموت بهالبيت!

-ادري وحگچ عليَّ بس وضعي مو احسن من وضعچ وامس چنت مضطر اسوي هالمسرحية خاطر ما تشك بينا وتعرفني لگفتها

-بس مو على حسابي! مو على حسابي كاافي حاطيني حايط نصيص لكشي! طُزز بسلوى وطُز بهالعيشة التلعب النفس طُزززز

-تَـمني انتِ معصبة من وره العلاج...

-لااا مو من وره العلاج موو من وراه معصبة اني لعبت نفسيي ومليت ماريد ابقى هنا!! مو البارحة طردتني يلا وديني لخالتي ما ابقى دقيقة كاعدة هنا

-تَـمني هيدي هذا العلاج جاي يلعب بأعصابج انتِ مو هيج

-هيج!! لا لا اني هيج وديني لبيت خالتي ما ابقى هنا اليووم

كمت من الجرباية اريد اكوم وما قبل لزمني حيل يعيق حركتي بس ماريد ابقى هنا، كلما اتذكر البارحة اهله شهدوا اهانتي وسمعوه وهو يطردني احس اريد اتقيء من القهر..

-هدنيي لا تلزمنيي

-لا تتخبلين امنية لو زلمة غيري وما متابع سوالف سلوى جان ما عرفتج بريئة وشكيت بيج وصارت صدگ!

-تشك بأخلاقي؟؟ يعني تشك بيه اخونك! هيج انعدمت الثقة بيناتنا امير!!

-تَـمنييي احنه ما عايشين بعالم الخيااال أي زلمة غيررري راح يتسوددن وروحه تطفرر لا تسويلي سالفة بهالصباحية!!

-اوكي ما اسويلك وديني لبيت خالتي واخلص من هالمشاكل

-تَـمنيييييي لا تختبرين صبررري

وخرت ايده مني وعفته وطلعت من غرفة ليلة ورحت لغرفتي، قفلت الباب عليَّ وطلعت جنطة من الكنتور وصرت اعبي بيها ملابسي اعصابي تالفة مدا اتقبل ابقى هنا اكثر.. تعبت ومليت ونفسي متريد أي واحد هنا بعد اريد بس ارتاح واصفي بالي..

بدلت ملابسي وحطيت الشال على راسي واخذت جنطتي وفتحت الباب لكيته واكف گبالي وسادها عليَّ..

-رجعي لغرفتج ولا تسويلنا سالفة تَـمني

-وديني لخالتي اطلبها منك بهدوء وبدون عركة وعصبية اريد اروح لبيت خالتي ارتاح

-راحتج هنا ويمي استچني ببيتج وانا انعل والديه اليزعلج بعد رجعي

-انتَ المزعلني ولا تزعلني اكثر وتمنعني من الطلعة!

-تَـمني!!

-والقران يا امير اذا جبرتني ابقى هنا حلممم اصيرلك مرة بعد!

خزرني بحدة راح يبلعني، بقى فترة على هالوضع واني اضيع عيوني منا ومناك ما اخليهن بعيونه.. شفته مدا يقبل يتحرك فـ نصيت وعبرت من جوه ايده وركضت اوكف لنص الصالة..

-لا تكبر المشكلة ووديني لبيت خالتي

انطيته ظهري وطلعت من الصالة اعبر الدرج، امشي وگلبي يتراگع اخاف لا يجرني من شعري من وره خصوصاً من سمعت صوت خطواته تدبچ بالكاع بعصبية..

نزلت الدرج وشفت الكل كاعدين هنا عدى سلوى ومحد بيهم فتح حلگه وحاچاني غير خالة رسمية، لحگتني للباب تتوسل بيه ابقى وتكول..

-لعني الشيطان يا يمة هذا بيتج وين رايحة وعايفة زلمتج

-تَـمني: اروح ازور خالتي كم يوم خالة حبيبتي من رخصتج

عفتها تحجي على الامير وهاي اول مرة اشوف خالة رسمية هيج تدردم عليه وتصيح وما عاجبها، جانت مفرفحة ولحدما طلعت من باب الحوش اسمعها تكول..

-لا تخليها ترووح ولك اميير وين موديهاا تعال حسبي الله على عدوك رجعهاا

عفتها بهالحال ورحت لسيارته ركبتها وما طلع مني نفس الطريق كله وهو هم ما حچى شي، چان ضايج ويزفر انفاس تعبانة بس ما حطيت ببالي كافي مليت وصار لازم اخلص من موضوع سلوى وارجع كرامتي الداسها بين اهله...

**

"حـــبيبة"

بعد سالفة امير وتَـمني طلعت للمستشفى تطبيق غصباً عني، خابرتني صديقتي وكالت اليوم يقيمونا ورحت وراسي وعقلي كله ويه البيت وامي، ما جاي اكدر اركز بشي صار ايام لا ليلي ليل ولا نهاري نهار وعلى أي ساعة اكول تقي راح يفضح امي ويگلب البيت على روسنا..

وصلني كرار الچانت ضحكته وسوالفه ما تغيب الطريق كله بس اليوم ماكو لا حس ولا نفس طلع منه نزلني للمستشفى وراح.. انغميت اكثر من شفت وضع اخوي ودعيتله بگلبي عسى ربي يبرد ناره ويصيح براس خالة تَـمني وترضى تنطي تالة بدون شروط..

فركت صدري بيدي وقريت سورة الانشراح كون ربي يقويني واكمل هاليوم على خير وما اخربط كدام الدكاترة واتفشل، دخلت للمستشفى وبوجهي لقسم التحليلات شفت صديقاتي كلهن كاعدات واستقبلوني مثل العادة..

-حبيبة همزين من اجيتي امس دكتور براق كال لو اليوم ما اجيتي يرسبچ عنده

هزيت راسي متفهمة وذبيت اغراضي ولبست اللاب كوت، كعدنا انا والبنات سوه ننتظر المقيّم يجي ونعاين للمرضى يرحون ويجون واسمع لصديقاتي يسولفن بيه وليش وجهي اصفر وضعفانة وما خلن سؤال يعتب عليهن..

-حبيبة: بنات عوفن السوالف اجوا المقيمين

شفناهم يدخلون لمكتب گدامنا چانو ثلاثة ما شايفتهم بحياتي، كعدت انتظر اسمي وانتبهت للطلاب وصديقاتي همه يفوتون يقدمون نفسهم ويمتحنون ويطلعون فـ سويت نفسهم، طلعت اخر وحدة من صديقاتي الغرفة ورحت انا بدالها دكيت الباب ودخلت سلمت وسألوا عن اسمي وفوراً بدوا يسألوني ما لحگت اجر نفس..

-كم توب عدنا؟

-حبيبة: خمسة.. لا لا.. سبعة

حچيتها بتردد وظليت اباوعله انتظر منه ردة فعل بس ما سواها وكتب شي بالورقة الگباله، فر القلم بيده وگال..

-المن نستخدم التوب الاحمر؟

-للهرمونات

-وبعد

-للـ..للفيتامينات

-شنو انواع التوبات؟

-التوب الاحمر والاصفر.. والتوب البنفسجي والـ.. والرمادي و..

عضيت على شفتي وسكتت متوترة من شفته يباوعلي منتظر مني اكمل بس المشكلة مدا اتذكر باقي الانواع، انا اعرفهن ومشتغلة بيهن هوايه بس ماعرف شلون انمسحن المعلومات من بالي..

-المن نستعمل التوب البنفسجي حبيبة علي؟

-حبيبة: دقيقة دكتور انا اعرفهن.. اعرفهن والله بس عقلي مشوش.. ما جاي اتذكر

-ميخالف جاوبيني على التوب البنفسجي

-اءء.. احم للـ.. لفقر الدم؟

-شو انتِ تسأليني هههههه

ضحك وضحكوا الكاعدين بصفه واحسني غصت بهدومي، شجاني شلون نسيت شلون وانا كل سنة اطلع من الاوائل واشتغلت بيدي بالمستوصف واعرف كلشي يخص قسمي شلون كدرت انساهن بهالسهولة..

-جاوبيني جواب متأكدة منه التوب البنفسجي المن نستعمله؟

رفعت ايدي الترجف امسح بيها وجهي التعبان وظليت ساكتة، سكتت والعبرة خنگتني من الخوف بحياتي ما منحطة بهيج موقف محرج من قبل، العيون عليَّ وصديقتي واكفة بصفي وجاي انتبه لحركتها تريد تغششني بس ماريد! ماريد اغش انا اعرف!!

-انتِ تعودين لدكتور حاكم مو؟

سألني المقيّم من العدم وفاجأني بسؤاله، وخرت ايدي عن وجهي وبدون لا احس هزيت راسي بـ اي، حرك راسه نفسي واردف..

-اي تذكرتج.. استاذ هاني نفسها البت الكال عنها حاكم لا نسجلها غياب عبن عدهم ظروف وما جاي تكدر تداوم

-استاذ هاني: اي انا اول ما شفتها عرفتها اسمها مميز حفظته

سولفوا ويه بعض شوي وانا عيوني تدور بيناتهم وبالي ويه حديثهم، كتب شي على الورقة الچان يختبرني وگال بأبتسامة..

-هذا هو حبيبة تكدرين ترحين

جمدت رجليه ما جاي اكدر احركها ماريد اروح اريد اجاوب ماريد تنزل درجتي من وره لحظة نسيان غبية، تجمعت الدموع بعيوني مهضومة على حالي من اشرلي مرة اللخ بيده وكال..

-روحي وصيحيلي غير طالب بابا

استسلمت وطلعت صحت لغيري وكعدت على الكراسي مختنكة، كوة سيطرت على روحي ما ابجي وظليت ادور بعيوني على صديقاتي ولا وحدة بيهن لگيتها، همزين من طلعت ايلين من الغرفة واجت تقنع بيه وتسولف وياي..

-ايلين: الحمدلله من عرفوا دكتور حاكم حتى بلكت يعذروچ

-لا ايلين اريد اعيد الامتحان بلچن يرضون

-لا ماتوقع حبيبة خلص يمعودة يولي لا تهتمين انتِ شاطرة ما تحتاجين

ما اهتميتلها ورجعتلهم كلتلهم اريد اعيد الامتحان وما رضوا كالو كل طالب اله حگ مرة وحدة يمتحن، متت قهر وطلعت من مكتبهم خايبة امالي..

-ايلين: شنو رأيج ترحين لدكتور حاكم يجوز من يشوفوه يرضون يعيدون الامتحان؟

-لا لا ماريد يمعودة ماريد خيولي الامتحان امشي نطلع

كضيت ايدها وطلعنا من الردهة وكالت نروح نشرب چاي من الكافتيريا، صدگ محتاجة احس براسي مسطور عاد اشربلي چاي بينما يخلص الدوام كون اتحسن..

-ايلين: انا رايحة اجيبلنا انتِ ظلي كاعدة هنا

ابتسمت ممتنة على حنية صديقاتي ودلالهن، من عرفن بالصار بيني وبين منتصر وگفنلي طول ما شفت نظرة شماته لو حقد بعيونهن بالعكس چانن يردن يساعدني بأي وسيلة جانت..

عصرت عيوني بيدي اهدأ نفسي واصفي بالي، لازم اعزل نفسي عن البيت ما دامني طلعت لازم افكر بدراستي وما اللتهي بشي ثاني واخرب حياتي ومستقبلي هسة شنو استفاديت من طحت بهذا الامتحان شحصلت غير القهر..

-السلام عليكم

رفعت راسي بفضول على صوت الزلمة الصار گبالي وفوراً تغيرت ملامحي للتفاجئ من شفته دكتور حاكم..

-حبيبة: عليكم السلام

-حاكم: هاي شنو حبيبة صدگ ممجاوبة بالامتحان؟

رصيت على سنوني وعاينت لـ ايلين الواكفة وراه وتوزع ابتسامات مثل الخبلة، رفعت اصبعها لظهره وتسويلي "گليله" "حاچي اله"..

-حاكم: شبيچ ليش متجاوبين؟

-حبيبة: اي خربطت بالامتحان شوي من سألوني

-ليش؟ شبيچ اعرفج شاطرة؟

-اي بعد

-زميلتچ كالت تردين تعيدين الامتحان؟ تحبين احجي وياهم بلكت يقتنعون

-لا لا دكتور تسلم ماريد اتعبك

-لا ماكو تعب بالعكس، تعالي وراي

-لا دكتـ..

-امشي حبيبة

طلع گدامي وايلين كشرت بوجهي واشرتلي تعالي، خزرتها هالخفيفة وكمت امشي وره حاكم وهي وياي..

-ايلين بهمس: والله ما حجيت انا هو سألني شلونكم بالامتحان

-حبيبة: اشش بعدين

-حاكم: همزين استاذ هاني يصير صديقي هسة يقبل لا تخافين

-حبيبة: ماريد ازحمك دكتور

-لا تعيديها امشي

كملت طريقي وراه وصدگ دخلني لنفس المكتب الامتحنت بي وحاچاهم وبدون لا يشلعون گلبه رضوا يعيدولي الامتحان وهالمرة جاوبت كلشي بدون ارتباك.. تشكرت منهم وطلعت من الغرفة مبتسمة ومرتاحة وحاكم ابتسامته اكبر من ابتسامتي..

-حبيبة: شكراً الك دكتور معروفك ما انساه

-حاكم: ولو اخت عزيزة

ابتسمت ممتنة وقبل لا اروح سألته عن حور وشلونه وضعها صار چم يوم ما متواصلة ويايه ماعرف شعجب..

-حور زينة وهواي تسأل عنج بس مشغولة هالفترة ويه امي سوت عملية وخواتي وياهة ملتهيات

-عدها العافية والدتك والله يرزقها العافية

-الله يحفظج تسلمين

على وگفتي اتصل علي الكـرار وكال هو بره شعنده جاي وانا دوامي ما مخلص، رفضته منه وسألت حاكم..

-دكتور عادي ارجع للبيت لو الا اكمل الدوام؟

-حاكم: عادي زملائچ طلعوا كلهم

-اي بس خاف ينقصون من درجاتنا؟

-ههههه طلعي حبيبة طلعي وعوفي الدرجات

-يعني ما ينقصون من دراجاتي اكيد؟

-شلون بالسچاچين احنه روحي بابا محد يحاچيج

تشكرت منه وطلعنا انا وايلين من المستشفى شفت كرار كاعد بس وجهه ما يگصه السيف خفت حتى اسأله شبيك، كعدت بالصدر وطلع بينا وصل ايلين اول وبعدين انا... نزلت ايلين وبقيت وحدي وياه وبعدني ما اللتفتتله اسأله شصاير سبقني وگال..

-ما نريد امچ تعرف تَـمني راحت لبيت خالتها زعلانة حبيبة

-ليش

-ما يريدها الامير تعرف، گلنا گدامها مريضة البت ونايمة بغرفتها اياچ تطلع منج وتعرف تَـمني مو بالبيت

-صار

سكتت ووصلني لبيتنا وصدگ سكتت عن روحة تَـمني وما جبتها بطاري، للعصر صاحلي ابوي بالغرفة وگعد يحاچيني يسألني شبيه وليش ضايجة ومنو وياي..

-محد وياي بوية بس تعبانة شوي

-بوية حبيبة منتصر امس اتصل بيه يريد يجي يزورنا اظنه يريد يرجعج

-لا بوية لا ابد لا تنطي مجال انا ما رايده الزلمة

-ليش؟؟

-سولفتلك انا لا تحرجني وتزعلني يا حبيبي

تحسر يهز براسه وما رضى اطلع من غرفته، كعدت يم رجليه افركهن وظل يسولف وياي عن دوامي وعن وضعي وعن اذا محتاجة شي وحاولت ابين نفسي طبيعية وياه وما احسسه..

**

"عـــبق"

مسحت دموعي وخشمي بالكلينسة وسديت الايباد اطلع من المسلسلة بساع وغطيت راسي باللحاف من سمعت صوت باب الغرفة ينفتح ويجيني صوته..

-نايمة بزونتي

دخل للغرفة وفتح الگلوب الاصفر وتقدم للچرباية، كعد من يم جهتي ورفع عن وجهي اللحاف وگال بهمس يضحك..

-وجهها غادي دم من الحر الخبلة

گوة حصرت ضحكتي يا حر واني موتت روحي من البجي من مات البطل، مسح على شعري ووجهي وباس خدودي وكل مكان يلوحه بوجهي واخر شي لزم خدي وگرصه بيده گرصة موت خلاني اشهگ..

-علي الحـق: هههههههه گعدي عگروگ شني من نوم هذا

-علي كم مرة گتلك لا تگرصني!

-انچبي احب خدودچ

-لعد تحب خدودي تطيح حظي!

-يلا يلا كومي خلينا ناكل جبت وياي بقلاوة

-صدگ!

هز راسه مبتسم ونزع قميصه يشمره بالكاع وراح للحمام يسبح، كمت من الجرباية وركضت للصالة شفته جايب چيس متروس حلويات ونساتل وبقلاوة.. تنهدت مبتسمة واحس بفرحة عجيبة، شكد مرتاحة الحمدلله رب العالمين ما جنت اتخيل بحياتي كلها اعيش بهيج جو واتزوج هيج انسان يحبني ويدور راحتي ورضايه بكلشي..

اخذت الچيس ورحت للمطبخ رتبت كلشي بصينية ورجعت للصالة حطيته على الطاولة الوسطية وفتحت شموع معطرة تنطي اجواء رومانسية تخبل، ضحكت من طلع حق من الغرفة مثل عادته بدون قميص وكال..

-خايبين انعل ابو الواجب لابو النگابل وجوههم

-تعال حقي خلينا نكعد سوه

-ااااخ وين چنتي عني انتِ وييين

شمر نفسه على القنفة وجرني يكعدني بصفه كلش، حضني نص حضنة وبده بسوالفه المتعودة عليها، كوة وخرته مني اضحك وكمت اكعد على القنفة الثانية..

-علي شوكت نروح لبغداد بعد؟

-تعاي هنا وعوفي بغداد

-حباب انتَ مو كلت نروح؟

-خاطر تشوفين عمتي مو؟

-اي مشتاقتلها كلش يارب يكون وضعها احسن ونكدر نرجعها ويانه

هز راسه "اي" وشال نستلة فتحها وقسمها بالنص الي واله، عفتها بيدي ما اكلتها وظليت اباوعله انتظره يجاوبني على روحة بغداد..

-عبق: ها حبيبي؟

-كومي بدلي هسة نطلع

-نطلع لبغداد!!!

-اي

-صدگ لو تضحك عليّ؟

-والله كومي لا اغير رأيي

-لا لا رايحة رايحة

ركضت بسرعة بسرعة سبحت وبدلت وحضرت اغراضي واغراضه وطلعنا بهالعصرية.. بينما وصلنا بغداد صار الليل نمنا وثاني يوم طلعنا نشوف امي رحنالها واشوف وجهها راجعتله العافية فدوة لعمرها بس بعدها عدها مشاكل بالذاكرة مو كلش تتذكر بس صايرة تفرح بشوفتي..

صارت الفرحة فرحتين من الدكتور كال وضعها ممتاز ونكدر ناخذها ويانه، تشكر منهم علي الحـق ودفع اخر حساب صرفه عليها بهذا المكان الغالي كلش وطلعنا.. روحي احسها فراشة فرحانة وسعيدة والطريق كله اتشكر من علي الحـق وادعيله من كل گلبي وامي تدعيله ويايه..

-علي الحـق: شسويت انا يمعودات صدگ چذب

-عبق: كلشي سويت علي منطلع من جزاتك العمر كله

ابتسم وعصر ايدي بين ايده، رجعنا للشقة وحضرت غرفة لامي ترتاح بيها ورحت اسويلها شي تاكله سودة عليَّ هواي عدها علاجات لازم تاخذهن حتى تبقى صاحية..

-علي الحـق: حبيبي انا طالع للقاعة اذا تحتاجون شي بس دگيلي

-الله وياك عيني

-تعاي انطيني بوسة

ضحكت ورحتله بسته وودعته للباب وگلي اقفل الباب وراه، سويتها ورجعت للمطبخ اكمل العشا واللتهيت بي، امي كالت مشتهية دولمة فـ كعدت اللفها وسويت وياهة شيخ محشي لغدة باجر..

دگ موبايلي منبه حاطته حتى افتح سورة البقرة بالبيت، من شمروا المي الاسود بباب بيتنا لليوم الشيخ انطانا جدول قران اني وعلي الحق نمشي عليه حتى منتأثر وميصيبنا شي ان شاء الله..

رحت للصالة وربطت تلفوني على التلفزيون وعلگت سورة البقرة عليها وبنفس اللحظة اندكت باب الشقة، نصيت القران ووكفت بالباب وسألت..

-منوو

-اني

-منو انتِ؟

-اني سوزان

اني سمعت اسمها وتفجرت الشياطين بصدري شعدها جايه هاي الغثيثة!! بدون لا افكر زايد فتحت الباب ولگيتها گبالي واكفة بكامل اناقتها وحمرتها الحمرة تصررخ بوجهي..

-سوزان: مرحبا

-تفضلي؟

-علي الحـق موجود؟

-شعليج بي؟

-شي بيني وبينه حبي اريده تكدرين تصيحيلياه؟

-عفواً!

-باعي حبي اني ما جايه هنا حتى اتعارك وياچ اجيت علموده عندي وياه شغل

-شغليش عندج ويه رجلي حبي؟

-رجلچ؟!

-اي نعم اذا تردين منه شي تكدريني تگوليلي واني اوصله اله

-علي الحـق تزوج!

-ومنتظرين طفلنا الاول

-اكيد دتكذبين حبيبتي عيب هاي تصرفات الزعاطيط

-شبيچ ماما شبيچ انتِ؟؟ دا اكلچ الرجال زوجي شنو ترديني اراويچ عقد زواجنا حتى تصدكين؟؟

-ماكو داعي هسة اتصل بي واتأكد بنفسي

طلعت موبايلها من جنطتها بكل صلافة وفتحته تريد تدگله، تسودنت من شفت حركتها وما تحملت ابقى واكفة واتفرج وسحبت الموبايل من اذنها وشمرته ارجعه بجنطتها المفتوحة..

-عبق: سوالف الادبسزياات بطليها حبيبتي عيب!!

-منو سمحلج تجرين التلفون من اذني انتِ صدگ متستحين!!

-ماستحي على نفسي طلعي بره ماريد اشوف وجهج

-انتِ اشايفة نفسج داده؟؟ كلچ خلگ خدامة تشتغلين جوه رجله شوكت سويتي نفسج مرته ومصدگة روحچ!

-عجبچ ما عجبچ مرته وغصبااً عليج وعلى امثلاج تطلعين مناا بكرامتج لاا اطيحه لحظجج وروحه لابوية!!

-ايييع شكد بيئة

گلبي يفوور يفور وانوب تسويلي حركات بحلگها المحمر خبلتني بالزايد، طگت روحي من گلبت شعرها كله على جهة وحدة وكالت..

-على العموم اني وعلي الحق عدنا شغل خاص بيناتنا من يرجع سيدچ للبيت گوليله يدگلي اوكي حياتي

-شغليش عيني شغليش؟؟

-هو يعرف حبيبي لا تعبين نفسج

خزرتها بحدة متمنية اسحلها من شعرها للبيت ارفسها لحدما ارتاح بس ما لحكت لان خلت وطلعت تعوفني بهالحال.. طبگت باب الشقة حييل وكعدت بالصالة اريد اهدأ نفسي اريد اجر نفس ماكدر صدري قبط والهوا گوة اسحبه..

عليت القران على اعلى شي وكعدت انتظر رجعة حق اليوم لو اني لو انتَ يا علي الحـق شعندك ويه هاي الرعنة شعنددددك!

كعدت وحدي هنا والساعة تجر الثانية لا البيه اكمل العشا ولا البيه اتصل بي بقيت كاعدة وعيني على الباب لحدما دگت ال 11 بالليل ياله رجع، فتح الباب بالمفتاح مالته ودخل وابتسامته من الاذن للاذن من شافني كاعدة گباله..

-هاا شو عگروگ كاعد هنا

-عگروگ راح يسوي ليلتك سووووووودة اذا ما جاوبتني على سؤالي يا علي الحـق!!

-يا ستار شبيچ ولج

-شعندك ويه سوزان؟!!

-شنو

-جاوب علي الحـق بدووون لف ودوران شعنددك ويه سوزان!!!

-سوزان منو بابا شبيچ انتِ

-جاوبنييي ولا تخبلنيي جاااوب

-صوتچ لااا ترفعي عبق!!

-جاوبني ولا تشلع گلبي قبل شوية اجت سوزان وكالت بيناتكم شغلل شعدكم!!

-ليش فتحتي الباب بغيابي؟؟ انا شگايل؟!!

-لا تضيع الموضوع الاساسي علي الحـق!

-ليييييش فتحتي البااااب عبق!!!

-تره اني مگاعدة بسجن! عادي افتح الباب ماطول سمعتها بنية شكو بعد!

لطم وجهه متنرفز كلش وعلى صوت عياطي طلعت امي عيونها منفخة من النوم وممفتهمة شكو، خفت اعلي صوتي گدامها وتخاف فـ هدأت نفسي وكررت سؤالي..

-شعندك ويه سوزان؟

-ولج ماعندي شغل وياهة انتِ من كل عقلچ تصدگيها!! ماعندي أي تواصل وياهة وشرفيي!

اشرتله بعيوني على امي حتى ينصي صوته لان شفتها شلون فزت من صاح، هزيت راسي على كيف وابتسمت بالچذب ودرت وجهي على امي..

-جوعانة حبيبتي ماما؟

هزت راسها اي بدون لا تحجي واجت كعدت جوه القنفة بالكاع، ينكسر گلبي من اشوفها هيج صايرة متقبل لا تنام على جرباية ولا تكعد على قنفة كله بالكاع تتربع وتظل صافنة بالحايط..

-عبق: صار من عيوني، تعال علي ساعدني اذا بيك حيل

-لا مابيه

-تعال علي الحـق!

خزرني بقوة واجه ورايه للمطبخ واخذ الطريق كله يدردم عليَّ ويحچي بالهمسة..

-عفية مرة يومية جايبتلي مصيبة ومكربستها براسي

-امشي ابو راس امشي

دخلنا للمطبخ وسديت الباب علينا وخزرته وخزرني، ضحكت على جرأته اله عين يخزر ويعصب عشتوو..

-عبق: انتَ وا...

قطع كلامي ولزمني من فچي حيل خلاني ابلع الكلمة، دفعته من صدره وشدد عليَّ اقوى ونتر بصوت ناصي مخنزر..

-والعباس ماعندي شي وياهة وكل حچاية حچتها چذب بچذب!!

هدني متنرفز وانطاني ظهره يتنفس سريع، عضلات ظهره متقلصة والقميص معفوص من وره من يم الظهر طابگ عظمة على عظمة عود معصب سيادته..

-علي الحـق هالكلاوات متمشي عليَّ! البنية اجت هنا بكل صلاافة ورادت تتصل بيك كدامي شلون ماعندك شي وياهة؟!!

اندارلي وجهه مكلوب ومعصب اضعاف، دفعني من چتفي على كيفه خلاني ارجع ليوره ونتر..

-ما خليتيها تخابرني وتطلع چذبتها وتنفضح!!

-هااا تريدني اشوفها تخابرك واعوفها؟؟

-مااا راح تخابر يا غبية عبن ماكوو شي بيناتنا لاا من قريب ولا بعييد ولا راح يصير شي!! هاي سووسة وطبت بنصنا تريد تخرب علاقتنا عبق!!

-شلون تريدني اصدگك وهي اجتني بكل هالثقة؟!!

-تردين تصدكين موو؟؟ انا اخليج تصدكين بسيطة!

طلع موبايله ودور بالارقام على رقمها ودگه تنرفزت من تصرفه وردت اعيط وحط اصبعه على شفته ينهيني لان فوراً فتح مكبرة صوت واجانه صوتها المايع الحقير..

-سوزان: الوو

-سوزان وياي مو؟

-اي سوزان شلونك عيني

-هلا بيج، افتهمت بيج جاية لبيتي خير ان شاء الله محتاجة شي؟

-هاا يعني زوجتك گلتلك؟

-اي طبعاً

-اهاا حلو

-اي؟

-اسفة اذا سببتلك مشاكل وياهة مو قصدي

-اختصري خيتي ليش اجيتي؟

-اجيت حتى اقدملك عرض واتمنى توافق عليه

عقچ وجهه ضايج واشرتله يجاوبها اريد افتهم شنو هالعرض، ذب حسرة وگال..

-وهو؟

-اني اعرفك تشتغل ويه واحد اسمه عبد الرحمن وعدكم محد موبايلات مشترك ببغداد صح؟

-اي؟

-وداخل شراكة ويه اخوك هم مو؟

-العرض شنو؟

-اريد افتح محل موبايلات بالجادرية بس دا ادورلي على شريك وعبد الرحمن نصحني بيك وگال امين وتحب تفتح مشاريع

-لا ما مفكر افتح محل جديد

-اذا على الفلوس فـ مو مشكلة اني اداينك بس أريدك شريك ويايه

-لا مو علمود الفلوس بس ما مفكر افتح محل جديد

-علي فدوة محتاجة احد ثقة ويايه

عصبت كللش من ملحتها وهو تنرفز اكثر من نرفزتي، عصر الموبايل بيده وگال ناهي الحديث..

-ماعندي نية افتح محل خيتي واذا عندي نية ما اشارك حرمة وياي

-ليش؟؟

-مو دربنا هذا وما نرتاح نمشي بي الله يرزقج بشريك احسن مني

-بس اريدك الك

-مع السلامة

-اوكف اوكف علي الحق

-نعم؟!

-زوجتك يمك؟

باوعلي وحسيته متردد رصيت على سنوني وسديت سماعة التلفون بيدي، اشرتله على التلفون وهمست همس شفايف..

-عبق: گول لا

-علي الحـق بهمس: ولج!

-عبق: والله متشوف وجهي بعد!

-انا اعلمج عنق انا اعلمج

وخرت ايدي عن السماعة من سمعتها تكول..

-چنها يمك؟

-اي جانت يمي هسة راحت، گولي خير؟

-تكدر تجيني؟

-وين اجيچ؟

-لبيتي

شهگت بدون صوت وهو وجهه ظل ينطي اللوان، زلغت خدي ولزم ايدي يعصرها بين ايده حيل وجاوبها..

-شعندي ببيتچ؟!

-تره مو قصدي شي والله مجرد عندي بلاغ اريد اقدمه ومحتاجة ضابط يساعدني

-شوفيلج غير ضابط خيتي ما افيدج انا

-بس شلون اريد اشتكي غير انتو في خدمة الشعب؟

-لا والله انا يا دوب اخدم روحي

گالها وسد الاتصال بوجهها وانطاهة حظر كدامي، رجع موبايله بجيبه وگال وهو رافع حاجبه..

-هسة صدگتي ماعندي شي وياهة؟!

-شتريد منك! وشمعنى لازگتلك!

-عبق متعود على ذني البرابـ** انا! لا عبالج بس انا تركض وراي تلگيها ما مخلية ضابط وابن دولة ما حاطته جوه اباطاتها!

-ليش ما راحت لتقي انتو مو كاعدين بنفس الشقة شمعنى اجت الك؟؟

-شسويلها يجوز تدور صاكين البربـ**

عقچت وجهي وانطيته ظهري ضايجة، نااار بگلبي نار مدا تطفى راح انجلط والله گوة واكفة على رجلي اعصابي ترجف ورجليه غدن خيوط..

-شفق شسالفة

-راح اكمل العشا.. وشوف موبايلك منو ديتصل يمكن هم سوزان بس من رقم ثاني!

-خايبة استچني ولا تتسودنين عليّ هذا تقي جاي يتصل.. الوو شلونك ابو تقوى؟... زين انا... شنو؟... امير شگال؟... لا بشرفك!! لا عليك علي؟؟ جاي جاي جايين احنه جايين.. انعل ابوها لابو الجابها هالـ****

سد الاتصال منه وما لحگت اسئله شكو بسرعة اشر على باب المطبخ وكال..

-عوفي العشا راح نرجع حضري اغراضج بساع..!

**

"ســـبأ"

حطيت الشماغ على راس العاشگته ونزلت عيوني خجلانة من گرص خدي بين اصابعه، حط العگال فوگ راسه يعدله ويسولفلي شنو راح يسوي اليوم..

-ابوي ساحلنه لگعدة وگال انعل والديه الما يجي

-شعجب گعدة بنص الليل؟

-صايرة طلابة شكبرها بين عشيرتين وجابوا ابوي گاطع بيناتهم بلچن تنحل

-ورادكم وياه ترحون؟

-اي خاطر يخلي الامـير علي يسولف ويحطه امام الأمر الواقع

-هاا

-المشكلة علي الحـق مو هنا ماخذ مريته ورايحين لبغداد وابوي متحلفله گوة علي الدر سكته

-وانتَ يمته تروح لبغداد؟

-لازم مليتي مني

-انا؟؟؟ لا والعباس مستحيل امل منك!

-هههههههه شحلاتج يا سبأ

ابتسمت ونزلت عيوني من كرر الحركة وگرص خدي، تنهدت سرحانة بي من كض الشيشة يتعطر وشال سبحته بين ايده ونزل جوه، راح يشوف امه وينها وكالت سلوى طالعة هي وابرار رايحات لبيت عمهم صمد..

-شعجب؟

-سلوى: والله مادري يمة اظن مرة عمك مسويتلها فاينة وگابة ببيتهم

ما جاوبها تقي وعافها وراح للمطبخ، باس خدي وودعته للباب ودعيتله كون ياربي يحفظه ويحرسه وييسر دربه بجاه اسمائه الحسنى..

-سلوى: سبأ!! سبأ وينننج سبأ!!

-اي اي اجيت

ركضت على صوتها بالصالة كاعدة وكالبة وجهها، حاطة الطاولة واستكانها الچاي وحب عين الشمس.. وكفت كبالها انتظرها شتريد مني بس ظلت تعاين عليَّ من فوگ ليجوه ساكتة..

-سبأ: عمة تردين مني شي؟

-اي، لا تظلين تتلزگين للزلمة لا يبزع منج

-لا ما متلزگة انا

-چا ليش يشچى منج يم ابوه؟!

-شنو

-امس نازل يم ابوه يشتچيله من ملحتچ وياه وضايج من هالسالفة يگله ما جاي استحملها وگوة عليّ جارعها وباقي وياهة

سهم وحطته بگلبي فتحت حلگي اريد اجاوب بس ضاعت حروفي، عضيت على شفتي اسيطر على نفسي ماريد ابچي بس ماكدرت اسيطر على روحي لانها زادت الطين بله من كالت..

-يكول مو حلوة ومرعبلة وما تهتم لنفسها وماكدر استحملها، گال كله سنة واتزوج عليها وماريد احد يلومني عبن هي مو الاريدها

-شمس: چذب!

فزيت على صوت شمس يجي من وراي طلعت من غرفتها وطبگت الباب وراهة، گامت سلوى وگفت على حيلها ونترت بحقد..

-سلوى: شنو ولج؟؟ شنو عليمن چذب؟!!

-شمس: مو صحيح كل الحچيتي مو صحيح علي التـقي لا مشتچي منچ ولا جاب طاريچ بسوء سبأ! امس علي البـدر چان كاعد ويه اخوه وعمي وسمعه يمدح بيج ويگول لابوه البت رغم شينات ابوها بس بت اصول ومهتمة بيه ومرتاح وياهة!

-سلوى: يعني تچذبيني يا لعينة؟؟!

-شمس: ما اچذبچ خالة بس حرام عليج تخليها تشك بنفسها وتسوي مشاكل بينها وبين زلمتها.. حرام تفترين على الزلمة زور وهو مادحها امس

-سلوى: صميي حلگج وولي لغرفتج شكوو طلعتي لو واكفة تتسنطين علينا؟؟!

-شمس: حشى والله مو شمس التسنط على عيالها بس طلعت جاي اريد اجيب لامي ماي وسمعتكم

-سلوى: هاا امج هناا مو؟؟ شكو شعدها هنا ام الفگور لو جاية تشمشم اخبار بيت الشيخ وتوديهم لاهلها العارية

-شمس: حرام عليج خالة امي اجت عبني مريضة وماكدر اروحلهم اجت تطمن عليَّ وبس!

ضحكت سلوى مستهزأة وكعدت على القنفة ضجت من تصرفها وشمس هم كللش انقهرت ورجعت لغرفتها وانا رحت اصعد فوگ ولو بيدي احرگها شگد كارهتها تتعمد تسوي مشاكل بالبيت كلما تضوج..

شوي وصاحتلي خاطر اسوي العشا وجبرت ليلة تنزل هم ومثل كل مرة تعاند ليلة ويتعاركن عركة شكبرها وتخليها سلوى بغرفتها وتروح.. ما اهتميت لشي لا لمشاكل البيت ولا لتصرفات سلوى المسمومة ووكفت اسوي العشا واجت حبيبة تعاوني..

-حبيبة: چنها فراقد اجت

-عمتي رسمية مو هنا شعدها جاية؟

-شمدريني شعلينا بيها يمعودة

راحت تفتحلها الباب حبيبة واستقبلتها بس زين ما طولت نص ساعة وراحت عبن ملت وحدها وهي تحب من تكون عمتي موجودة، كملت العشا وكعدنا ناكل وحدنا لان الزلم ياكلون بره ويه ابوهم..

-سلوى: چا ويه ذيج الفاهية ما نزلت؟

-حبيبة: مريضة تَـمني ونايمة

-سلوى: هاا؟

-حبيبة: اي

-سلوى: هاي بعدها مريضة؟ خاف حامل ويخافون يحچون

-حبيبة: مادري بعد بس كالو مريضة وانا هم ما رحت شفتها هسة شوي واروح اتطمن عليها

هزت راسها ساكتة وكملت اكلي وكمت اخذت لشمس وامها بغرفتها وصعدت لـ ليلة هم وخطية ثنينهن ما رضن شلون جبتلهن وگالن هنه ما يشتهن وما يردن ياكلن..

-سبأ: لازم تتغذين ليلة انتِ حامل

-ليلة: يا رويحتي يوم الالج وافرح بيج

ابتسمت اسولف وياهة واسويلها لگم عبنها عنودية وما ترضى تاكل الا احد يضغط عليها.. اخذتنا السوالف وما منتبهات على الوكت وما حسينا الا من سمعنا صوت عمي علي جاي من جوه ويصيح..

-سلووووى وينج سلووووى

-ليلة: يا ستار شصاير!

-سبأ: مادري امشي نشوف

گمنا سوه لبسنا شالات على روسنا ونزلنا نهرول وگفنا على محجر الدرج وشفنا الكلل واكفين بالصالة بدون استثناء وحبيبة واكفة بنصهم تفرك بيدها ووجهها ما يتفسر..

-شيخ علي: سلوى لحگيني للديوان.. الامير، علي التـقي ورسمية تعالو وراي

راحوا كلهم للديوان وظلوا الباقين بالصالة، نزلنا الدرج انا وليلة وسألنا شصاير بس حبيبة ما تحجي عيونها مثبتتها على باب الديوان وما تحركهن..

-علي النور: الله يعلم شمصخمة بلاوي هالمرة

-علي الدر: نور كافي!

-علي السور: لا صدگ الله يعلم چا ليش ابوي هيج معصب وضايج اكيد مسويتلها فاينة بكبر راسها

خزرهم در واشرلهم على حبيبة خاطر ما يحجون كدامها ويقهروها، سكتوا يهزون بروسهم واحنه همات كعدنا وسكتنا ننتظر التالي..

**

"الامـير علي"

اعاين عليها ولو بيدي اطرها نصين وانعل والديها بس ما كدرت، ماكدر اتجاوز ابوي ما دام فاتحته بالموضوع وحچيتله الصار بالتفصيل وراويته كلشي صار لازم هو يحل القضية..

-شيخ علي: سلوى يوم الخميس وين چنتي؟

-سلوى: بالبيت

-شيخ علي: يعني ما طلعتي؟

-سلوى: لا ماطلعت

-ابد؟!

-هااا؟

-طلعتي لو لا سلوى!

-لا.. لا ما طلعت ابو علي انا من اطلع انطيك خبر ما مسويتها بكيفي وعابرتك

هز راسه ابوي بس وجهه مگلوب گلااب اول مرة بحياتي اشوف وجه ابوي ينگلب لونه للاسود! صاير يخوف وگوة كاض اعصابه ومسيطر عليهن..

-شيخ علي: چا شلون لگفوچ بكامرات البيت طالعة الخميس بالستة الصبح تتلفتين چن حرامية؟!!

-سلوى: انا!!

-شيخ علي: عايني سلوى اذا حچيتيلي الحقيقة بدون لف ودوران هواي تهونيها على نفسج بس اذا چذبتي يا ويلج!

-سلوى: هااا تذكرت اي اي تذكرت طلعت صح طلعت بس رجعت بساع ما طولت

-شيخ علي: غبتي عن البيت فوگ الاربع ساعات شني ما طولتي!!

-لا لااا لا ما غبت هيج شني علي تچذبني؟

-شيخ علي: اميير طلع التصوير خليها تشوف بعينها!

هزيت راسي وعرضت التصوير بالايباد كدامها، التصوير الي راجعناه خاطر نودي للشرطة ويلگفون سالم طلبوا تصوير بيتنا والبيوت الورانة والگدامنا وبالتصوير لگفنت سلوى تطلع يوم الخميس الصبح تمشي وتتلفت وتلفلف روحها بعبايتها..

-سلوى: چا وحبيبة! حبيبة هاي حبيبة هم طلعت لو جاين بس عليّ تحاسبوني!

-شيخ علي: موضوعنا مو حبيبة هسة احنه جاي نحجي عليج وين رحتي؟!

-سلوى: تمام ماشي.. خوش ما اجذب اي انا طلعت بالستة الصبح رحت لبيت اختي ام شمس واذا ما تصدگني اتصل بيها هسة واسألها!

-شيخ علي: وليش ما استأذنتي گبل لا ترحين؟!

-سلوى: عبن ادري ما راح ترضى، اختي نهى متعاركة ويه زلمتها وگابة بيناتهم ورايدتني اروح عليها واخذها لبيت ابوي زعلانة بس صالحتهم وگعدتها وسكتتها

-الامـير علي: خوب تخابر ابوها انتِ شكو متصلة بيج؟

-سلوى: خيتها وامون عليها، اذا ما تصدكون اتصلوا بيها هسة وتأكدوا!

هزيت راسي متحلف وجريت موبايل ابوي واخذت رقم ام شمس منه ودگيته بموبايلي، بالبداية ما عرفتني بس بالحجي تعرفت عليَّ وسألتها على سلوى والعجيبة كالت اي! سلوى اجتها الخميس الصبح واجت تصلح بينها وبين ابو شمس!

-سلوى: هاااا شگلت!

اللتفت علينا ابوي مخنزر واعصابه ترجف، كض ايده علي التـقي وگال بدون تردد..

-بوية انا متأكد والله متأكد! زيد انكتل الخميس الصبح!

-رسمية: زيد ابن مسعود!!!

-علي التـقي: اي يمة زيد ابن مسعود لگوه مكتول ومشمور بحمام شقة وبالتشريح بيّن عدهم وكت الجريمة

-سلوى: وانا شعليه!! انا شنوو جايبيني هنا تحققون وياي بجريمة قتل! حرام عليكم حرررام وين شايفته اناا زيد وين عارفته وييين

-علي التـقي: لا تچذبين سلوى الچذب مو لصالحج الجريمة متلبسة بيج وعدنا شهود ضدچ!!

-سلوى: الشهود حبيبة مو؟!

-شيخ علي: سلووووى

-سلوى: لااا حبيبة ادري بيها حبيبة اعررفها چا ما شكيتوا بيها وهي طلعت هم الخميس الصبح؟؟ ليش شكيتوا بس بيه شمعنى اناا لو ذيچ عبنها بنيتك ملاك وما تغلط!

انتفض ابوي بغضب ونفضنا وياه، جرها من زيج دشداشتها عليه ونتر بوجهها مخنزر..

-سمعي وولج لو جبتي طاري بنيتي على لسانج مرة ثانية اگصه من عرجه! كلللشي ولا حبيبة اذبحچ عكسس القبلة لو جبتي حروف اسمها بهيج سالفةة!!

-سلوى: حبيبة بنيتي علي والله بنيتي وقطعة من گلبي انتَ شجاي تكول بس انا انهضمت عبنك تهمتني اتهام باطل حرام عليك شيخ حرام

-الامـير علي: وسوالفج ويه تَـمني؟!! سلووى كل سواالفج انكشفت وكل حچاية تحچيهاا عندي دليل ضدچ عليها!

-سلوى: انا شكوو شعليييه لا تخبلوووني كااافي ملييييت كلشي صاار وذبيتوا براس سلوى

فلتت نفسها من ايد ابوي وصارت تبجي وتلطم على وجهها حييل تزلغت خدودها، هسترتني ما كدرت اصبر عليها لو بيدي اكسرها تكسير وما اخلي بيها عظمة صاحية..

-الامـير علي: سمعي لج انااا واصلة وياااي لخشمي چذبة زايدة وانعل الخلفچ!!

-شيخ علي: اميييرر انا اتفاهم وياهة!!

-الامـير علي: بووية لاا تضحك عليك بوجهها هاي لاعبة جولة ضحكت عليَّ وعليكمم وعلى الكل لاا تصدگوها!

-سلوى: حسبي الله ونعم الوكيل بكل الظلمني حسبي الله

-علي التـقي: بوية لا تلعب عليك بسوالفها انتَ شفت التصوير بعينك!!

-رسمية: چا ما تجيبون التصويرر جيبووا خلونا نشووف

-علي التـقي: يمة سلوى جاي توهم الامير مرته تخونه جاي تخلي قمصان وملابس زلم بغرفتهم ورسايل غرام تكتبهن وتدحسهن بكنتور البت

-سلوى: حرررام عليكم مو اناا ليييش اسوي هيج ليييش شنو احصل اذا سويت هييج

ما جاوبها تقي واخذ الشاشة من ايدي وطلع التصوير الي لگفنا بي سلوى تطب لغرفتنا وبيدها شي وتطلع منها وايدها فارغة، لطمت صدرها امي مصدومة وصاحت..

-صخاام بعينيي صخااام هاي شنوو

-شيخ علي: سلوى شفت كلشي بعيني وعرفت كللشي عنچ لاا تماطلين ويااي ولا تزيدين ضيمي ضيم اعتررفي!!

-سلوى: حسبي الله ونعم الوكيل انا رحت لغرفتهم خاطر اودي ربطة تَـمني نستها جوه وصعدت والله ما سويت شييي ليشش جاي تتهمونيي هاي لان انا وحيدة وماعندي اهل يفزعولي توليتوني!!

-الامـير علي: چا ليش طبيتي هالشكل؟ ليش مشيتي ويه الحايط چن خايفة لا تنلگفين بالكامرات ونكشف عليج شي!

-سلوى: خايفة من وگفتكم هاي! اييي انا عرفت مچان الكامرا وشفتها بعيني وصرت اخاف منها واحاول ما اعبر من گدامها خاطر محد يلبسني تهمة انا ما مسويتها

-شيخ علي: سلوى لااا تسودنيني كل الادلة ضددچ كلهاا! ولج صخمتيني ولطمتيني انتِ! موت زيد وتصرفات تَـمني وطبتچ لغرفتهم ولعبچ وفواينچ كلهاا انكشفت!

-سلوى: رجعووا التصوير! شيخ علي رجععع التصوير رجعه عندي تبررير لنفسي

گوة كضيت اعصابي وما ذبحتها، اخذت الايباد بيدها الترجف ومشته شوي ووگفته وحطته بوجهنا وكالت..

-عاينوو عاينو هاي حبيبة طبت لغرفتكم همات عاين الها اميير هاي اختك طبت وبيدها شي وطلعت بدوونه!! افتتح عيونك وشوف بنفسك!!

-شيخ علي: همممم گالت حبيبة هممم جابت طاريهااا

-سلوى: حبيبة جاي تلعب وتسوي كل هاي السوالف عبنها تكررره تَـمني!! تكره چناين البيت وتغاار منهن علييي بنيتك تسودنت وره طلاگها وهي الكتلت زيد واجتني تبچي وتلطم تگول يمة ساعدينيي وعينيي!!

صم حلگها ابوي وسحلها من شعرها وهاي اول مرة بحياته يمد ايده على مرة، كضها من زندها حيل ووگع بيها دگ راشديات ودفرات ونزع عگاله يجلدها بي وهي تصيح وتبجي بكل صوتها..

-حسبي الله ونعم الوكيل حسبي الله ونعم الوكييل عليج يااا حبيبة الله لااا يوفقج ترگعين لنفسسچ وتذبيها برااسي

-شيخ علي: ولللج سكتيييييييي

-روووح ربي بنييتك المسوودنة رووح ربي التطلگتتت وثاني يوم لگيتها بشقة وين ابن عمهاا ومن هددهاا يفضحها كتلته وخابرتني تتوسل بيه اجييها واساعدهاا روووح

-الامـير علي: ووولج يااا عاااااار

كضيتها من ايد ابوي اريد اموتها بيدي اريد اطلع روحها وادوسها برجلي بس ما كدرت ابوي دفعني عنها وفلتت سلوى من بين ايدي تركض بعيد وصاحت بكل صوتها..

-جيبوا موبايلي وشوفوا يمته حبيبة اتصلت بيه وساعة بييش يوم الخميس خاطر اجيها للشقة واساعدها!! عنددي دليل على كلشيي يثبت برائتي بس انتم تخافون! تخافون تصدگون حبيبة هي السبب وره كلشيي وهي الجاي تلعب عليكم وعلى الكل!! تخافون من الحقيقة تخاافون تنكشف بنيتكم وتنفضحون!!!......

يتبع 👑...

━━━━━━ ♛ ━━━━━━

والله هضيمة!

حسابي الانستا حبايب لا تنسون تتابعوني ♥️👇🏻

#الامارة

بقلمي: زهراء السلامي 💎

لتنسون التصويت + التعليق بين الفقرات + متابعة لحسابي 💙.

گلي شبَعد شتريد؟ الردته اخذته!

كونك نويت تروح خليها سكته

تنشد على الجتال والجاتل انتَ!

━━━━━━ ♛ ━━━━━━

"حــبيبة"

ركضت للديوان ارجف تخبلت من سمعت صوت صياح امي جاي من جوه وصوتهم وهمه يكتلون بيها، فتحت الباب على وسعها وتسودنت وانا اشوف ابوي مملخها تملخ وجاي تشاهد بين ايده..

-بوووية لاااا

شمرت روحي عليها كون الكتل يصير بيه وهي ختلت بظهري تبجي وتنوح، كضت ملابسي من وره حييل تستنجد وتكول بصوت عالي..

-لحگينيي حبيبة لحگي اممچ يا يمة

-الامـير علي: حبيبة وخرري من هالچلببة وخرري

-حبيبة: ماا اوخر عوفوها لييش بوية لييش تمد ايدك عليها انتَ مو معلم اخوتي الحرمة ما تنطگ؟؟ مو گايللهم عيبة الزلمة يمد ايده على مرة!

-شيخ علي: ولج عاايني شلون تدافعلج عااايني چان غزرر بيج

-سلوى: حبيبة امج لا تخليهم يطگوني حبيبة

-علي التـقي: والله حراام عندج بت مثلها حررامات عليها حرامات!!

جرني منها تقي جر وما رضيت اوخر چلبت بأمي بالزايد وحضنتها لصدري احافط عليها منهم..

-رسمية: ولج وخررري ما تستاهل هااي وخرري عنها

-الامـير علي: بعليي يا حبيبة لو ما هديتي امج تنطگين وياهة!!

-حبيبة: طگوني!! طگوني بس عوفوهاا تقيي انتَ مو دگيتلي صدر وگلت تحلها؟؟ مو گتلي ما نسويلها شي ونساعدها لييش خلفت بوعدك لييش؟!

-علي التـقي: عبنها ذبت الصوچ بـ...

-شيخ علي: اسكتتتتت تقييييي واخذ اختك بررره

-رسمية: ليش يسكت؟؟ خليها تعرف امهاا شنو لا تضم عليها ماا تستاهل هالحبيبة هيج ام نذلة!

-حبيبة: فهموني شصاير!

-شيخ علي: طلعي بوية لا تبقين هنا!!

-حبيبة: ما اطلع بدون امي!

-الامـير علي: حبيبة امچ...

-شيخ علي: طلعيييي واخذي امچ وياچ!!

اللتفتوله امير وتقي ثنينهم مبحلگين عيونهم مصدومين بس ما اهتميتلهم وگومت امي وشردت اطلع بيها من الديوان وركض اخذتها لغرفتي فوك، قفلت الباب علينا واللتفتت عليها اريد افتهم بس فاجأتني من طاحت على رجليه وكالت وهي تشهگ..

-سلوى: انجبررت والله انجبررت حبيبة انجبرت اچذب عليهم ما چان بيدي شي اسووي

كعدت بالكاع يمها اوخرها عني بس ما ترضى خبلتني فوك خبالي، گوة جريتها وگعدتها على حيلها اريد افتهم شنو صار جوه..

-يمة لا تبجين وفهميني الصار

-ااااخ يا حبيبة ااخ كلهم ضدي كلهم

-انا وياچ يا رويحتي وياچ لاخر نفس بس لا تبجين

-لا لا ما اظل هنا والله ولا الي گعدة بهالبيت بعد

وخرت مني وكامت فتحت كنتوري وجرت عباتي وشال جديد مني لبستهم زين ولفت روحها بالعباه بس كلشي بيها يرجف ايدها ما تثبت وخطواتها مو رزنة..

-سلوى: انطيني فلوس يمه خليني اروحن

-وين ترحين!

-لبيت اختي ما اظل ببيت هانوني بي

-يمة حبيبتي يا اخت ما تگليلي يا اخت يرضى زلمتها تكعدين وياهم

-اختي نهى چا مو واگفتلها طول انا!

-خالتي ام شمس هم حال الضيم حالهم يا دوب مدبرين عيشتهم ماريدج تنذلين يم احد يوم

-ما انذل حبيبتي انطيني فلوس وخلشوف ياهو يذلني

-چا ما راح تفهميني الصار جوه؟

-انطيني الفلوس وافهمج خليني اجرن نفس

-روحي غسلي وارتاحي بينما اجيبلج من ابوي

-لااا لاا وين رايحة شني من ابوج چا ماعندج هنا انتِ؟؟

-عندي بس خاف ما يكفوچ

-لا يكفون

رحت للكنتور وطلعت من جنطتي كل الموجود بجزداني حطيتهم بيدها وضمتهم بمخبأها السري وعافتني وراحت للحمام تغسل وجهها، شوي وطلعت مغسلة وفچها يرجف..

-يمة يلا سولفيلي رااح اموت!!

-اسولف شمالج خبصتيني هاي فوگ ضييمي!!

سكتت ميتة قهر اريدها بس تحجي وهي تماطل راح انجلط، وكفت كدام المراية تعدل الشال وكالت بصوت ناصي شي بس ما سمعته..

-حبيبة: شگلتي؟ ما سمعت

-اهوووو حبيبة انا روحي طالعة لا تصيريلي فاهية!!

-علّي صوتج يوم غير افتهم!

-عايني.. انا.. انا انجبرت وداعتج يا يمة انجبرت

-على شنو!

-وانا ما حجيت هيج الا وانا اعرف ابوج واخوتج ما يسوولچ شي ولا يأذوچ بالعكس يساعدوج ويبررولچ الصار انا متأكدة بس اذا ظليت ساكتة على روحي يذبحوني والله! همه انا حجيت هيج وروحي رادوا يطلعوها

-شحچيتي يما!

-هاي صوتهم اجوا؟؟ هاي صوت ابوج يصيحلج؟!

-اي صوته اي بس حاچيني شگلتيلهم خليني افتهم!

-لا لا حبيبة ما اللحك ما اللحك هسة يحبسوني هنا وما يخلوني اطلع انا رايحة يمة انتبهي على نفسج

-يمممةة

ما اهتمتلي وفتحت الباب وطلعت من الغرفة وركض على درج السطح صعدت، رحت وراهة بس ماعرفت شنو سوت لان ثواني ما طولت ونزلت مرة اللخ ما لحكت اشوف شبيها وشعدها فوگ.. نزلت الدرج تركض وراحت لغرفة تَـمني القديمة، ركضت وراهة وشفتها فتحت الشباچ ومدت جسمها تنزل من الدرج المتصل بي..

-يمة لا تخبلينيي شنو طالعة هيج مثل الحرامية حسبالج ما يلگوچ!!

بچت بدموع حارة ومسحتهم بالشال، حضنتني لجسمها وشددت عليَّ تبوس براسي ووجهي وتعتذر بس على شنو تعتذر مادري ما جاي افتهم شي، وخرتها مني كاضة بيدها حييل اعيق حركتها ما اهدها اليوم الا افتهم..

-يمة ما ترحين ماا ترحين گبل لا تفهميني!

-احبج بنيتي والله الصار غصباً عني الله يوفقج ويسعدج يا حبيبة وانا راضية عليج دينا واخرة

خنگتني العبرة ودموعي تجمعت بعيوني حسيتها جاي تودعني، دموعها تهمل على خدودها وخشمها وخدودها صايرات حمر واثار الطگ على وجهها مبينة.. حضنتها بكل حيلي اشدد عليها وتوسلت بيها تبقى..

-انا وياچ يوم لا تخافين انا وياچ انتِ راح ترجعين حبيبتي

-وراسچ يا يمة ونظر عيني وسهر ليلي عليج انجبرت اسوي شي ما رايدته وندمانة بگد شعر راسي بس مو بيدي

-يوم..

-روحي يا حبيبة كون الله يحفظج ويرعاچ يا يمة ويعوضج خير ويستر عليج ويرزقج بزلمة يستاهل طيبة گلبچ يا بعد گلبي

وخرتني عنها بحركة سريعة وشالت ذيال عباتها ونزلت تركض من الدرج، گلبي طاح من شفتها شون تنزل سريع خفت عليها تعثر وتطيح بس الحمدلله نزلت وراحت تسحب للطرمة الثانية تطلع مناك..

عفتها.. عفت امي وما نزلت وراهة يجوز طلعتها من البيت راح تهدي الاوضاع وتحافظ على حياتها بلچن ابوي يلگه حل ويرجعلي امي، مسحت دموعي الما جاي توگف وفركت صدري اليوجعني ونزلت جوه شفت الوجوه مگلبة والبيت مشتعل الامير يرفع وتقي يكبس وابوي كاعد على القنفة منزل راسه وساكت..

-الامـير علي: هسة اصعد اصلخهاا صلخخ هالبرب** بووية لا توكف بوجوهناا لا توووكف

-علي التـقي: انا ما جاي افتهم انتَ ليش ساكت؟؟ بوية هااي لو عفناها ببيتنا تنزل راسنا! اتبره منهاا وخلصنا عااد!

عافهم يتصايحون واخوتي الباقين ما مفتهمين شكو، رفع راسه الي ومدلي ايده وكال..

-شيخ علي: حبيبة تعالي لابوچ

هرولت عليه بخطوات سريعة وكعدت حده ضبط، حاوطني بين ايده يحضني ويمسح على راسي ويبوس بي، ذبيت روحي على صدره ونزلن دموعي الحاولت ما اطيحهن گدامهم..

-شيخ علي: كل الكون بچفة وانتِ بچفة يا بوية

-حبيبة: بوية لا تحارب امي.. ادري هي غلطت بس لا تأذيها فدوة امي ماعدها غيرك

فزيت على صوت لطمة الامـير علي على رجله حييل، رفع ايده عليَّ وگال محترگ..

-عااين شلون تدافعلهااا ولك بوووية هااي الچلبة تسكتلها؟؟؟ حرااام والعباااس حررام

-شيخ علي: امير كافي

-الامـير علي: شنوو كافي؟؟ شنووو بوية تحجي صدگ انتَ!! شمالك ملجمم لسانك شبيييك

عافنا وطلع منا غادي نار كبرة، اخذ دوره علي التـقي عصب وگلب البيت وراه واخذ سبأ وصعد بيها الدرج وگبل لا يختفي عن عيوننا رفع اصبعه وگال بنبرة قوية..

-انا اعرفك خايف على حبيبة وخايف لا تنجرح بس انتَ بهذا تصرفك راح تعم على الكل!! على كل هالبيت وعلى سمعتنا وسمعة بنياتنا! الجاي تسوي غلطط بوية غلط!

كض سبأ من ايدها وجرها وراه يصعدون والباقين ظلوا يتسائلون ومن ما يشوفون احد يجاوبهم عصبوا وربثوا البيت بصياحهم در وبدر تگابلوا يتصايحون وابا الحسن واكف ويفر بيده وسور ونور كعدوا على القنفة ينحشون بأبوي وعلي الكرار ختمها من گال..

-هاي الحيرة البين عيونك اعرفها بوية واتذكرها.. اتذكر من اجت سلوى لهالبيت دخيلة وشفت نفس هالنظرة بعيونك وانتَ تركض وره امي خاطر تعذرك وتعذر موقفك من تزوجت عليها! لا تعيد الصار مرتين وحل السالفة انتَ شيخ علي امير امارة الـ[اسم الامارة] والوادم يتعنولك من غير محافظات خاطر تگطع بينهم ما توگف بوجهك حرمة الله يعلم شمسوية

هزوا روسهم كلهم يوافقوه وتفرقوا كلمن راح لغرفته عايفينا انا وابوي وامي رسمية وحيدنا، تحسر ابوي مرة اللخ يمسح على زندي وگال بتعب..

-شيخ علي: ام علي

رفعت عيوني على امي رسمية الساكتة وگاعدة على القنفة گبالنا ما حچت ولا علقت على شي طول ما اخوتي يتصايحون.. ثواني وگامت من مچانها على كيفها وگالت بهدوء..

-رسمية: لا تندهلي علي مافيدك بشي انا، اجه الوكت تلبس عگالك وبشتك وتصير شيخ ببيتك وتحل هالمشكلة اللفت على روسنا

-شيخ علي: رسمية!

-وجوب تتحمل نتيجة افعالك وتصححها بدون لا تمس سمعة احد من هالبيت محد يستاهل يتبهذل لخاطر دخيلة!

جملتها قوية واثرت بأبوي بس ما اهتمت وعافته وراحت لغرفتها، وخرت من صدر ابوي اعاين لوجهه صاير احمر خفت عليه ضغطه ارتفع وركضت اريد اجيبله ماي وعلاجه وكضني من ايدي يرجعني لمچاني..

-بابا اجيبلك علاجك

-گعدي بنيتي اريدچ بچلمة

-لا تضغط على نفسك حبيبي ارتاح الحچي ما طاير

-حبيبة گعدي!

هزيت راسي وكعدت بمچاني انتظره شيگول، جر حسرة قوية وما انتظرني اجر نفس اضافي وشلع گلبي شلع من گال ببحة..

-واجهت امچ بموت زيد وذبت الصوچ بيچ حبيبة، كالت انتِ تطلگتي لخاطره ورحتليه لشقة ومن اختلفتوا ذبحتي واتصلتي بيها خاطر تساعدچ..

شهگت من غمج گلبي نفس حرگ زردومي، بحلگت عيوني ضايع الحچي مني رجعت چن طفل انفاس مايعرف يحجي ويدافع عن نفسه من الصدمة.. كضني ابوي بين ايده وگال بقهر..

-لا عبالچ صدگتها حبيبة ابوچ انا اشك بالدنيا كلها ولا اشكن بيچ بس امچ لعبتها صح وتحجي بزودها مرتبة امورها ووضعها وعدها دليل على كلشي حچت بي.. تهمتچ انتِ الجاي تلعبين بعقل مرة اخوچ وانتِ الغايرة منهن وتردين تخربين بيوت اخوانچ وتفرقيهم عن نسوانهم وانتِ الكتلتي زيد وجبتيها لذيج الشقة

-امي؟..

-يشهد الله ما ردت اكسر گلبچ واخليچ بهالحال، يعز عليّ وحيدتي وبنية گلبي تزعل بس لازم تعرفين الحقيقة.. حبيبة امچ موش ام موش سند وتچوة تسندين روحج على صدرها بوكت العازة

سباق دموعي تتسابق تنزل وحدة وره الثانية ما تنطيني لحظة ارتاح بيها واتنفس، فصلت عنه وضميت وجهي بين ايدي اشهگ وانووح چن طير وگصوا جناحاته.. طير عافته امه بعش طُعم لصگوره تنهش بلحمه..

-حبيبة لا تبجين انا وياچ بوية لا تحرگين روحي بدموعچ.. حبيبة حاچيني.. حبيبة!

-اااااخ بوووية ااااخ

-يا بعد ابوچ انتِ لا تهتمين تروحلج فدوة سلوى والخلفها لا تبجين

-گلبيي.. گلبي.. گـ.. گلبي بوية گلبي راح يوگف

-اسم الله عليج اسم الله بنيتي من عمري على عمرج تنفسي حبيبتي تنفسي بنياتي.. حبيبة شو حاچيني!! ولك علي الدررر بدررر كرااار لحگووني ولكممم وينكممممم

طلعوا اخوتي وامي رسمية يتراكضون ويتسائلون اريد اجر نفس اريد احجي اريد اسولف ماكدر.. صدري قبط وظليت اهمش بيدي انفي الموضوع واعصر بصدري حييل وابوي تخبل عليّ..

-علي الدر: بوية شبيكم؟؟ شصاير شبيها حبيبة شبيها؟؟

-رسمية: يمة بنيتي حبيبة شبيج يا يمة شبييج

-حبيبة: امي.. جذب.. چـ.. جذب ما كلت هيج ما كالت ما تكول امي ما تسويها

-ابرار: عمي خلونا ناخذها للمستشفى عاين وجهها صار ازرررگ

-حبيبة: اميييي وين امي جيبوهاا بوية جيبهاا جيبها خليها تواجهنيي خليها تحجي بوجهيي هالحجي

-رسمية: اشتعلت امج بجاه عليي ولج لا تهتميلها راح تموتيننن

-حبيبة: امي تبيعني؟؟؟ يمة امي تشوه بسمعتي وتنطي بيه؟؟ والله ما مسويتلها شيي ما مسوية

-شمس: حسبي الله ونعم الوكيل بيها حبيبتي اسم الله عليج يا رويحتي

-حبيبة: شمس انتِ شاهدة.. ا.. انتِ انتِ شاهدة وتعرفين كلشي.. عليج علي وداعة البطنج تحجين الصدگ انا مقصرة ويه امي؟؟ بوية والله انطيتها عافيتي وروحي وگلبي وكلشي تريده والله ما بخلت عليها بشي ليش هيج تسوي بييه ليييش

-شيخ علي: انعل والديها لامج ما غزر وياهة شي! حبيبة لا تبجين بوية كافي سكتي انا اخذ حگچ منها لا تهتمين وانا بظهرج!

-علي الكرار: گومي حبيبتي لا تبجين ما تستاهل هالبلوى تبچين عليها كومي ارتاحي بغرفتج وخليها وره ابوي هو يطيح حظها

-ابرار: سودة بوجهي حبيبة هاج بنيتي شربي ماي.. هاك در شرب اختك

-علي الدر: تعاي بوية تعاي لحضني عمت عيني عليج

اخذني لحضنه يمسح على راسي واحس بگلبي واطرافي ميتة، ما جاي اكدر اوكف على حيلي ذبيت روحي عليه يسندني وغمضت عيوني وادعي كون ياربي حلم.. كون ياربي حلم واكعد منه واللگه امي حبيبتي بصفي وحاضنتني بأيدها واشبع شم من عطرها..

دگات گلبي جاي تبطئ ونفسي يضيج، دموعي ما سكنت وعقلي يعيد ويزيد بالگاله ابوي وما جاي اصدگ مستحيل، اكيد عدها تبرير امي ما تبيعني ما تبيع وحيدتها هالشكل ما تسويها وتكسر گلبها فوگ كسرتها بطلاگها..

-علي البدر: هششش حبيبتي هيدي بسم الله الرحمن الرحيم.. قل اعوذ برب الفلق ‏& من شر ما خلق...

فتحت عيوني اهدأ نفسي وركزت بالمحاوطيني من كل جهة، شفت علي الدر حاضني وبدر كاض ايدي وعلي الكرار حاضني من الجهة الثانية وتقي وابا الحسن گبالي يسولفون وياي بس ما جاي افهم شيحچون وسور ونور گاعدين جوه يم رجليه كلمن كاضني من جهة وحيدر كاعد على كرسيه وعيونه حمر وابوي وامي رسمية يعاينون عليَّ ويواسوني بنظراتهم.. نزلت دموعي من جديد ويه حس ابوي القوي وهو يكول..

-شيخ علي: دمعتچ غالية يا حبيبة وطيحتها ما تروح هدر، ما اتسمى علي اذا عفت حگچ وما خذيته من عيونها ورجعتها مثل الچلبة لهالبيت!..

**

-نعست رايحة انام اني بنات عود قفلوا البيبان مو تنسوها

هزيت راسي اي ورجعت خالتي تباوع لـ تالة المگابلة تلفونها وما مهتمة، كررت كلامها خالة توجهه لـ تالة بس هم ما اهتمت ولا باوعت لوجهها..

-حنين: ولج اني مو وياچ؟؟!

-تَـمني: عوفيها خالة ميخالف

-حنين: خليها تنچب! تبيع امها علمود رجال الغبية!

-تَـمني: خالة عوفيها يا عيني

-حنين: كله هذا تتندمين عليه بعدين تالة كله!!

تحچي ومحروگ دمها وتالة ابرد منها ماكو، تالة لا باعت خالتي ولا تعاركت وياهة كل ما بالموضوع من يوم رفضت خالة علي الكـرار وتالة عالنة الصمت.. متحجي كلمة بالبيت صح تشتغل وتساعد امها بس ميحچن سوه لدرجة حتى ملابس للعام الدراسي الجديد ما طلبت من خالة تاخذها للسوگ وتشتريلها..

راحت خالتي لغرفتها مقهورة بس مالي واهس اواسي احد وضعي مو احسن منهن وتالة هم صايرة مادري شلونها احسها متعاركة حتى ويايه متسولف.. گامت قفلت البيبان وراحت لغرفتها تنام..

تنهدت ضايجة وحدي وگابلت التلفزيون وكعدت بس والله بالي مو ويه الفلم مادري اصلاً على شنو يحجي عقلي كله ويه الامير وشنو ديصير وياهم.. من جابني لبيت خالتي تلفوني ما سكت من اتصالاته واني مغلسة بس الغريب بالموضوع اخر محاولة اتصال منه چانت ساعة بـ 10 وبعد ما اتصل ولا دز شي واحس ظل بالي عليه..

عبرت الساعة بـ 2 بالليل وبديت انعس بس عندي ارق مدا اكدر اغفى، طفيت التلفزيون ورحت للمطبخ فتحت الثلاجة اشوف شبيها ولگيت خالتي عدها مگدوس، طلعته وحطيت بيذنجاناية بصمونة واكلتها عن وحشة الليل والضوجة..

كملت اكلي وحسيتني بعد جوعانة، طلعت اكثر وسويتلي لفة ثانية اكلتها بس بعدها معدتي بيها مجال.. وطبعاً كل هذا بسبب العلاج دا اكل بشكل مو طبيعي ولوما الرياضة الالعبها بالبيت والشغل چان صرت فيل بس هي الساترة عليَّ شوية رغم هم سمنانة..

طلعت حلويات تالة من الكاونتر وكعدت اكل، اكلت چبس ونستلة وطگيتلي قوطية عصير شربتها، باوعت للنستلة الثانية وظليت اتحارب ويه نفسي اكلها لو لا وبينما اني بهاي الحرب گمزت من سمعت صوت موبايلي يدگ..

اخذت النستلة وركضت عليه وشفت المتصل "شيخي" عفست وجهي وفتحت النستلة اكلها وموبايلي عايفته يدگ.. عضيت عضة جديدة من خلصت الدگة ودگ مرة ثانية كعدت افكر اجاوبه لو لا واخذتلي بالدقيقتين افكر لحدما استقريت على رأي.. دگ للمرة الثالثة ياله جاوبته بصوت ثگيل..

-الو

-الامـير علي: شلونچ امنية

-الحمدلله كلش زينة

-عساچ دوم

صوته ناصي ومبين ضايج كلش، انقهرت بس دست على قهرتي بالنعال وكملت بنفس النبرة..

-خير امير محتاج شي؟

-اي

-شنو محتاج؟

-فتحيلي الباب وهسة تعرفين

-يا باب؟ باب بيت خالتي؟؟

-اي انا بالباب فتحيلي

-ياا شعندك بهالليل هنا!

-فتحيها وتعرفين خايبة شبيچ انتِ

-مو احنه متزاعلين شلون

-ما يهم نبقى متزاعلين

-ها؟

-اي چا شنسوي

-يلا راح افتحها

سديت الاتصال وشمرت چيس النستلة بالحاوية وركضت افتحله الباب طلعت اهرول حافية لباب الحوش وفتحتها على كيفي، مديت راسي وعطت مخترعة من حط ايده بوجهي ودفع راسي جوه..

-رااسچ لا اگصصه

-هااي شبيييك

-طالعتلي هيج بدون شال شني تردين الوادم يتفرجون عليج!

-تره بالثنتين بالليل منو كاعد؟

-انا!

-وشسويلك حبيبي؟؟

-طبي جوه تَـمني اريد احاچيچ

-ما اطب!

-استغفرالله ربي واتوب اليه.. تَـمني اريد احجي وياچ چلمتين سويلي درب ما اطول لا تخافين

-الموضوع يخص بلاوي؟

-اي

-لعد تعال بسرعة

دخلته للبيت وركضت قبله اتأكد خاف خالتي او تالة گعدن بس همزين ثنينهن نايمات ومع ذلك ماريد اجازف ودخلته للمدخل وطبگت الباب علينا..

-ها شسويتوا؟

ذب حسرة عالية وفرك وجهه مهموم ومغموم، وجهه صاير احمر على بنفسجي مبين ضغطه صاعد كلش وميتحمل شي زايد فـ حاولت قدر المستطاع اكون هادئة وما اعصبه..

-امير رايحة اجيبلك كرسي واجي

-لا ماكو حاجة.. اليوم واجهنا سلوى بكل خياساتها وذبت الصوچ بـ حبيبة

-يعني شنو!

تحسر بصوت اعلى وبده يسولفلي الصار، شلون تهمت بنتها وشلون برئت نفسها وتكول عدها ادلة وشلون عمو علي ضربها والامير راد يضربها وابوه ما قبل.. كلشي حچالي كلشيي وويه كل حچاية اني فاكة حلكي ممصدگة الدا اسمعه حقيقي!!

-كذااب!

-والحسين هذا الصار

-لا لا كذب مستحيل امير!

-والله تَـمني انا هم مصدوم حرگت دمي الله يحرگها

-عزا بعينها على هالخباثة والحقارة! شلون تبيع بنتها بهالطريقة!!

-ااااااخ يالقهر

حسيت بكلامي زدتها عليه وخبلته بالزايد ضرب الحايط بچف ايده قوي معصب ووجهه صار لونه اسوء، عفت الزعل على جهة وخفت عليه لا ينجلط اعصابه تلفانة وايده ترجف ويمسح بوجهه العرگان..

-امير كافي لا تأذي نفسك زايد والله متستاهل

-واختي؟؟ تَـمني واختي هم ما تستاهل اعصب علمودها؟؟ ولج طعنت بشرفها بت ال***** طعنت ببنيتهاا الربتها على ايدها وتعرف اخلاقها!! شنو من بشر هالادمية ما تگليلي شنووو

-مو بشر سلوى حيوانة همها نفسها وبس! ومن واجبكم هسة توكفون ويه اختكم ومتعوفوها وحدها وتاخذون حقها من هالخايسة

هز راسه اي كم مرة متحلف، عفته واكف ورحت جبتله كرسي خليته يكعد ورحت مرة ثانية حتى اجيبله مي بس استوقفني من سحبني من ايدي وجرني عليه خله رجلي تضرب رجله..

-تَـمني

-خليني اجيبلك مي امير

-انا اسف تَـمني

-بعدين نسولف هسة ارتاح مو زين عليك تضغط على نفسك

-رجعي وياي امنية

-لا امير

-ليش!

-خليني هنا احسن اريد ارتاح

-يعني بعدج زعلانة مني

-عوفني امير حباب

-ما اعوفنچ سكتي

-امير اني مقهورة من الصار بعدني مدا اتخطى الموقف النحطيت بي

-حگچ بس اريدچ تعرفين سويت هالشي علمودچ انتِ، ادري بيچ زعلتي وحزت بخاطرج بس ماريدج تنسين عشگي الچ وتعلقي بيج.. مستعد اسوي المستحيل خاطر اعرف ياهو الجاي يأذيچ

-امم

-انا اتعب على تعبچ نوومه ما تهونين عليّ بعلي ما تغمض عيني وانتِ زعلانة

هزيت راسي ساكتة وفلتت ايدي من بين ايده ورحت للمطبخ اجيبله المي، طلعتله بطل من الثلاجة وحطيته بصينية ويه كلاص ووكفت افكر بكلامه.. ما افكر بالصار بيناتنا وانما افكر بـ حبيبة وحالها من تعرف امها تهمتها باطل..

ذبيت نفس زعلانة عليها ورجعتله وبيدي الصينية، صبيتله مي بالكلاص وما قبل يشربه عافه بالصينية وبقى منزل عيونه..

-امير اشرب المي وارجع يم اختك لا تعوفها هي محتاجتك

-وانا محتاجچ

-روح لاختك هسة واحنه بعدين نحل موضوعنا

حرك راسه مأيدني واخذ الكلاص من بين ايدي شربه ورجعه بالصينية وگام على حيله، شال الشماغ الحاطه على چتافه ولفه على راسه بشكل چراوية، كمل ووگف گبالي يباوعلي وساكت..

-شبيك

-منتظرج تجيبين اغراضج وتجين وياي

-لا امير گتلك ما ارجع

-ليش

-گتلك السبب اني

-يمته

-ياا مو گتلك مدا اتخطى الصار

-يعني مابيچ مجال؟

-ابد

-عليج علي؟

-اي والله

-ابد ابد؟

-ابد

-منا منا

-لا امير

-ما يشفعلي شي؟

-لا

-يعني معاندة

-اي

-يعني ما ترديني

-اي

-يعني هذا هو نتطلگ؟

-يااااا امييييير!!!

ضحك على كيفه ونصى يريد يشيلني، دفعته ماقبل بس وين اگدرله شالني غصب عني وگرصني گرصة خلاني اعيط واكتم صوتي بيدي حيل..

-ياا سخييف

-اششش خالتج نايمة عيب

-هسة اعيط وافضحك!

-تَـمني انا روحي طالعة تسكتيين لا اسكتچ بطريقتي؟

-عود شنو تهددني؟؟

-اشش سكتي مالي خلگج

-لا تأشأني ونزلني بسرعة!

-زوج لو نزلتج وفوتت اليوم عليّ

-ليش شكو اليوم عيني؟؟

-اليوم عيد زواجنا خالوو شني ناسية؟

-كذاااب

-شنو معقولة ناسية ولج؟؟؟

-لا لا كذب مستحيل شنو عيد زواجنا صدگ تحجي؟

-اي يلا خلينا نروح نحتفل

-من كل عقلك!

-لا من نصه

-شلون نحتفل وانتو بهالحال؟؟

-متعود على المشاكل انا عادي يلا امشي

-اووكف هاي شبييك ما اجي وياك والله

-تَـمنييي

-والله ما اجي والقران!

-عيد زواجنا ولج صدگ تردين تبقين زعلانة؟

-اي عادي واذا عيد زواجنا بعدني زعلانة لان ما رجعتلي كرامتي

-خايبة زوعت سلاوي العافية كل هذا وما رجعتلج كرامتج!

-اففف مادري نزلني ماريد هسة

-عادي لا تردين انا اريد

دفر باب الاستقبال مال خالتي معصب ودخلني بي وشمرني على القنفة، لطمت على وجهي اباوعله راح للباب قفلها ورجعلي..

-امير عزا شكد عيبب بله كعدت خالتي هسة شتكول

-رجال ومرته شكو اليسمعج يكول صاحبج وياچ

-باوع لوجهك شلون معصب ومتأثر من الصار امير شسالفة

-تَـمني لا تظلين تذكريني وتعبيني زايد انا اجي يمج خاطر انسى وارتاح

-يعني مسويني مخدة شوكت متتعب تجي تحط راسك عليها!

-ليش اكو احلى من هالشي

-عيب حبيبي ميصير شبيك انتَ

-يا علي ابن ابي طالب صارت بيها حبيبي يعني اكو امل

-لا ماكوووو

-اكو وغصباً عليج اليوم عيد زواجنا

-واذااا

-يعني لازم نتراضى وما يجي باجر واحنه متزاعلين ما يصلح

-واذا اجه باجر واحنه متزاعلين شكو بيها

-مو خوش فال تَـمني لا تعاندين

-شيصير نتطلگ يعني؟؟

-شمدريني بس مو خوش فال يلا خلينا نتصالح

-مـ...

-اششش ولا چلمة اعتذار واعتذرت وكرامتج ورجعتها امي تعرف بكلشي ووصيتها تسولف لكل البيت وسلاوي كتلتها ونعلت والديها وباجر اخذج وكدام الكل احچيها واكول تَـمني ما غلطت والصار كله خطة متفقين عليها بعد شتردين؟

-اريد هدية

-مال شني

-مو زاعلتني؟ غير تجيبلي هدية وتراضيني لو تريد تمشي عيد زواجنا هيج!

-خرب راسج تَـمني احنه بيا حال

-ادري وانتَ هم لا تزودها ومتجيبلي هدية

-صار ومن عيوني اجيبلج

-شتجيب؟

-مادري شتردين انتِ

-اريد.. اممممم... اريد.. اريد..

-استغفرالله ولج خلص الوكت وانتِ تكولين اريد فضيها خايبة

-اريد اسافر

-مو وكتها حبي

-ادري من ترتاحون وكلشي ينحل اريد اسافر لايطاليا

-اشتعلتتتت ايطاليا اختاري غيرها!!

-مااا

-تَـمني بالعباس ما اخذج هناك ديلااا

-لعد ما اصالحك

-تَـمنييي

-الا ايطاليا الا

-ما ينطونا فيزاا

-ينطون صديقتي نرمين انطوها شنو احنه وحد مينطونا

-خالوو صديقتج نرمين زلمتها تاجر بگد الدنيا اذا هو ما ينطوه ينطوني انا اللباخ!

-لا تستنقص من نفسك حبيبي والله تسوه التجار انتَ

-چا لا تحمليني فوگ طاقتي امنية والله لو نحصل فيزا بعيني اخذج ولا اخليها بنفسج

-لا خلص ماريد بطلت ماريد اضغط عليك

-ابوي مو على الفلوس وعلي مو على الفلوس الخير هواي بس انا علمود الفيزا ما ينطونا بس راح احاول اذا انطونا اخذج وعد

-شكراً امير

-تدللين يا روح امير اهم شي ترضين علينا

ضحكت وضحك ويايه خفيف، مدلي ايده بمعنى تعالي وگمت حتى اروحله.. حضني بين ايده بدلال وصار يلعب بشعري ويبوس بوجهي وخدودي ومكان غمازاتي ويسولف ويايه بصوت ناصي..

-خايبين اخرب واتكهرب على هالرصعة انا

-ههههه ابو عيون الچقل

-يروحلچ فدوة.. ان شاء الله رضيتي ابوي؟

-رضيت بس احس شويونة بعد زعلانة

-چا سهلة هاي.. تعاي......

**

"شمس"

الحمل صار ثگيل والمسؤولية الحطوها على چتافي اثگل، ثاني يوم من بعد العركة الصارت گعدت ولكيت علي الحـق وعبق يمنا وخالتي شذى هم جاية.. هم گبت هوسة جديدة وعركة لخ وعلي الحق رعد بالبيت رعيد وعاتب ابوه شلون خله سلوى تطلع وما كتلها بمچانها، گوة هدأه تقي وگال ما يكدرون يسوولها شي الا يجيبون عليها دليل واضح خاطر اذا صارت گعدة وانفضحنا نعرف شنو نجاوب الوادم..

الصبح رجع الامـير علي، راح على حبيبة يتطمن عليها وحاچاها شوي وگال كدام الكل تَـمني ما غلطت بشي وكل الصار اتفاقية بيناتهم وعافها ببيت خالتها خاطر ترتاح وما يلوحها شي وتتأذه نفسيتها..

-علي الدر: چا بشنو ردت تسولف ويانه امير وگتلي گعد اهل البيت كلهم؟

هز راسه الامير وطلب من عدنا نگعد كلنا بالصالة وبده يفهمنا الصار من البداية للنهاية، صدمة وره صدمة عقلنا وگف ما چنت اعرف بسلوى ذابحة زيد ولا اعرف شنو الجانت تسوي.. نفسي كامت تلعب وبطني رجعت توجعني من كل هالحقائق ووجعتني اكثر من گعدوني بالاستقبال علي البدر والامير وتقي وحق ورادوني اروح لبيت اهلي خاطر اشوف سلوى واحاول اجيب منها فدشي يفيدهم..

-شمس: مثل شنو اجيب؟

-الامـير علي: أي شي، فتشي مچان گعدتها او أي شي اخذته وياهة حبيبة تكول صعدت للبيتونة اخذت منها شي ونزلت بس ماتعرف شنو

-علي الحـق: گلبي يكول موبايل عدها موبايل ثاني وجاي تتمم خططها الاجرامية بي

-علي البدر: بعد هذا شغلج شمس انتِ لازم تعرفيلنا شنو هالشي

هزيت راسي مفتهمة وشروحلي بعد شنو لازم اسوي بالتفصيل، ترخصت وعفتهم ورحت لغرفتي حضرت جنطتي واغراضي ووصلني بدري لبيت اهلي..

دكيت الباب وگلبي يرجف مسؤولية صعبة وكلوني بيها وماعرف انا گدها لو لا.. استقبلوني امي وخواتي فرحانات بيه وطبيت وياهم لصالة بيتنا، گعدت على الكرويتة وسألت امي عن سلوى بساع وبدون لف ودوران..

-نهى: والله اجتنا امس نص الليل خرعتني كالت متعاركة ويه زلمتها

-شمس: اي صح

-نهى: شصاير يمة خوما شي جبير؟

-شمس: لا يوم بس خالة سلوى صايرة تتحسس من كلشي هالفترة لا تخافين كله يومين وعمي يجي يرجعها

-نهى: ياريت ومو القصد متعاجزة منها بس جاي تشوفين وضعنا يمة شموسة، ابوج يا دوب ملحگ يشبع بطوننا مو مال اجيب نفر زايد

-حگچ يوم حگچ.. وينها هي هسة نايمة؟

-لا فاتت تسبح

-وين هي بيا غرفة تنام

-هو ويه البنيات وين يعني

-ها.. چا انا فايتة امدد جوه شوي تعبانة

-براحتج يوم.. گومن بنيات روحن يم اختچن تونسن

ابتسمت وگمت للغرفة ولحگوني خواتي، تمددت على الچرباية وهنه حاوطوني يسولفن ويسألن على حالي وخواتي الصغار كعدن بصفي ونامن على بطني يراقبن حركة الجهال..

-شمس: ولجن اختنگت خايبات گومن

-هههههه شمسه والله وناسة عايني شون يتحركون هاي ما تتوجعين؟

-اوقات اتوجع اي يموتوني الليل كله ما انامن.. اگلچن خالتي سلوى وين تنام؟

-على القريولة ذيج

-هاا

اخذتنا السوالف شوي وگامت وحدة تعصرلي برتقال والباقيات بقن يمي يسولفن عن حياتهن وانا عيوني تفتر بالغرفة ماكدرت ارتاح اريد بس ادور بالغرفة واخلص من هالشي..

-شمس: بنات تكدرون تطلعون شوي اريد ابدل شو اختنكت بهدومي

-اي حبي براحتج

-شمس: زينة بس سلوى تطلع من الحمام دگي على باب الغرفة بدون لا تكولين شي خوش؟

-بعيني

طلعن وركضت على الباب قفلتها وراهن وكعدت ادور بالغرفة، رحت لعباتها الملفوفة ومحطوطة على الميز ودورت بيها وانوب رحت للشال مالتها هم دورت جواه وكلشي ما لكيت.. صفنت بالغرفة افكر يجوز ضامة شي بالكناتير بس اكيد ماعندي وقت ادور هسة خليها بالليل احسن..

بدلت وفتحت قفل الباب ورجعت تمددت على الچرباية وعيني مادري شلون صارت على الچرباية الثانية، گمت على كيفي ورحت للجرباية التنام عليها سلوى ودورت بالبطانية المسفطيها بس هم ما لكيت شي.. شبه ايست اللگه حاجة هنا بس ما فقدت الامل ورحت اشوفن جوه المخدة كون اكو شي وصدگ لگيت! لگيت موبايل احمر نوعه گلاكسي بس بساع رجعته بمچانه من اندگت عليّ باب الغرفة معناها سلوى طلعت من الحمام..

ركضت ارجع امدد على الفراش وصحت من مچاني خواتي خاطر يطبون واجن ركض للغرفة مثل البزازين حاوطوني ورجعنا نسولف، دقايق واجت سلوى للغرفة وظلت تباوعلي صفح ما عاجبتها جمعتنا..

-شمس: هههههه كافي ولجن

-عليج الله سولفيلنا بدر شلونه وياچ؟ متونسة مو؟

-الحمدلله ماكو منه بدر كون ياربي يرزقچن زلمة يحبچن ويحترمچن بگده واكثر بجاه الحسين

-اميييين

ضحكت على حركتهن وسلوى فرت بيدها وطلعت من الغرفة، شوي وطلعنا نتغده واخذتنا السوالف للعصر سوينا چاي وسلوى بقت مگابلتني ما كامت وانا الف حوصة بيه صارت اريد ارجع للغرفة للموبايل..

-سلوى: شبيچ تلوبين كعدي لا يصير بالفرخ شي

-نهى: اي يمة شمسه كعدي مو زين على الجهال

-شمس: اي بس سمعت صوت موبايلي يدگ يجوز بدر هذا

-سلوى: گعدي انا اجيبه الج

-شمس: لا خالة لا تزحمين انا اروح

ركضت گبلها للغرفة بساع ورحت على تلفوني وصدگ بدري المتصل، فتحت الخط وياه وفهمته على الموبايل وگال حتى لو اريد ادور بي اكيد بي رمز وما راح نستفاد..

-شمس: چا شلون؟

-علي البـدر: اوگفي اشوفن علي الحـق

غاب صوته شوي ورجعلي گال علي الحـق واكف حده ويسمعنا..

-شمس: هلا بيك خوية

-علي الحـق: شمس عدكم حاسبة بالبيت؟

-شمس: لا والله ماعدنه

-مو مشكلة خيتي هسة بدر راح يجيچ ويجيبلج حاسبة علي السور وبس تستلميها دگيلنا نفهمج شتسوين

-شمس: ما ترهم ابوگ الموبايل منها بدون لا تحس؟

-علي البدر: تدبريها؟

-شمس: اي ادبرها واذا شكت بشي راح تشك بخواتي الصغار ماخذاته وضاماته عبن هاي سولتهن

-علي الحـق: ممتاز، اذا ما عرفتي تفتحين الرمز اخذي منها بس مو اليوم تاخذي اتفقي ويه وحدة من خواتج تاخذه منها باجر العصر خاطر ما تشك بيج انتِ بالذات الماخذته

-صار هذا هو

سديته منهم ورجعتلهن كعدت شوي وسلوى راحت ويه امي للمطبخ يحضرن العشا، گمزت من مكاني واشرت لاختي الجبيرة تجي وياي ورحنا للغرفة عود جاي نسولف سوه..

-شبيچ شمسه شو متوترة

-احچيلچ وما تكولين لاحد؟

-اي كولي

-انتِ يمته راح ترجعين لبيتج اليوم؟ لو تباتين؟

-لا ابات انا وانتِ؟

-انا ما ابات بدر ما يرضى.. عايني زيون صايرة مشكلة بين عمي وخالة سلوى وهسة اكتشفت سلوى عدها موبايل غير موبايلها الي نعرفه والمشكلة كلها صارت بسبب هالموبايل نريد نعرف شنو ضامته بي خاطر بلچن نحل المشكلة

-لا شمس وانتِ شعليج تدورين بموبايل الحرمة!

-فضول عندي راح اموت

-هههههههه خبلة شنو فضول زلمتج يعرف!

-اي يدري

-هااا!

-والله وهسة ساعديني خاطر افهمج السالفة كلها بس لازم نستعجل

-خايبة لا تلفين مصيبة على راسج سلوى مو سهلة كل البلا بيها

-ادري بيها تعلميني بيها خية

نفخت هوا ما عاجبها بس اعرفها ما تعترض وراح تساعدني، قفلنا الباب علينا لان متعودات من نكعد سوه نقفلها خاطر خواتي الصغار ما يجون ورحنا لموبايل سلوى لگيته نفس مكانه..

-زينة: شلون غباء عايفة موبايلها هنا وبي بلاوي

-شمس: بي قفل خية مأمنة

هزت راسها اي وحاولت افتح القفل والمشكلة مو رمز كتابة مسويته رسم الملعونة..

-شمس: ما توقعت تسوي رسم

-جيبي انا خبرة بلچن اعرف افتحه

ضحكت من تذكرت اختي ما فد يوم زلمتها خله رمز لموبايله وما لگفته عبنها شكاكة درجة اولى، كضت موبايل سلوى وكعدت تحاول وتحاول وتحاول وتحاول بس ماكو فائدة..

-شمس: خرب عرضها راح يقفل الموبايل وما عرفنا الرمز

-اوگفي اوگفي

رسمت الرمز الاخير وشهگت فازة، مديت راسي اعاين شبيها وشهگت من شفتها فتحته!!

-زينة: انفتح!!!

-شمس: صخاام الصخمج يا زينة فتحتي!

-ههههههههاااي خبرة خايبة انا مرگصة فهيد على تك رجل

-اروح لخيتي فدووة جيبي الموبايل اشوفه

حمدت الله وشكرته لانه سهلي الموضوع وعرفنه الرمز بسهولة معجزة هاي الحمدلله يارب.. اخذت الموبايل من ايدها وكعدت ابحوش بي، اول شي سويته رحت للاستوديو بس مابي غير صور صباحيات ومسائيات..

-زينة: عووع شكد اكررهن فهد خابصني بيهن

-شمس: عوفي فهد وخلينا مركزات

-يلا

طلعت منهن وشفت محملة واتس اب، فتت عليه وشفتها مراسلة ثلاث اشخاص مسميتهم "1" و "2" و "3".. طبيت على رقم واحد وقريت شكاتبين اخر شي بس كلشي ما افتهمت ورغم هذا صورته كله بموبايلي فيديو.. طلعت منه ورحت على رقم 2 هستوني جاي اريد اقره المحادثة وانتفضت طايح الموبايل من ايدي من اندگت باب الغرفة علينا..

-زينة: منوو

-سلوى: انا فتحن الباب ليش قافلاتها؟

-زينة: دقيقة خالة جاي احف لـ شمس

-سلوى: فتحي الباب وكملي اريدن شي من الغرفة

-شمس: لا خالة استحي فدوة ما ظل شي ونخلص

-سلوى: فتحننن الباااب

عاطت بينا وگمت اريد افتحها وزينة ما رضت اشرتلي بيدها غلسي عليها وهمزين من امي صاحت بيها من بره سمعتها تگللها هنه متعودات يگعدن هيج كل مرة وميطولن شوي ويفتحنها واخذت السعلوة يمها..

-شمس: يمة الحمدلله

-زينة: يلا ماعندج وقت بساع

كملت تفتيشي للموبايل ودخلت على رقم 2 وفكيت عيوني متفاجئة من شفت واحد كاتبلها..

"وينج عمري مشتاقلچ"

-زينة: صخاام!

صعدت بالموبايل ايدي ترعش مادري شصار بيه من شفت المحادثة، حبچيات وغراميات بيناتهم وهو داز صورة اله مبين ممرض من لبسه..

-زينة: ولج طفل هذا! عايني شگده!

-شمس: تخون عمي وياه!!

-زينة: صعدي بعد صعدي نشوف

صعدت بالمحادثات وشفته كاتبلها..

"حبي دزيلي صورتج مشتاق اريد اشوفچ"

وهي مجاوبته..

"حياتي ماكدر اهلي لا يلگفوني"

وهو يرجع يكتب..

"امانة دزيها وامسحها مني بسرعة"

"توعدني تمسحها؟"

"وعد يا روحي"

ومبين چن دازتله الصورة وحاذفتها من المحادثة لانه معلق على جمالها وبياضها..

-زينة: سلوى يمته بيضة؟؟

-شمس: مادري باعي شكاتب "اروح فدوة للگيمر اني"

بقينا مستغربات ونصعد بالمحادثة ونقرا بيها لحدما وگفت گلوبنا ثنينه من شفنا سلوى دازتله صورة بت.. والطرگاعة مو بت عادية لااا دازتله صورة ليلة!!!

-زينة: هاي مو مرة حماچ؟؟

-ولج ايييي هاي ليلة مرة ابا الحسن!!

-عايني شكاتبتله عاايني "شوفها واحذفها بساع فدوة"

-عمت عينيي يمة صخاام الصخمني صخاام

لعبت نفسي وگوة صورت الموجود وطلعت من محادثتهم ورحت على رقم 3 وچان اللگه الفاجعة الاطگع!! هم زلمة! هم زلمة هذاا وبيناتهم حب وغرام وسوالف ومسمية نفسها "توتة"..

-زينة: ولج هاي مو تَـمني؟؟؟؟

-يممااا

-خرب بروحها!!

-ولج ماكدر بعد ماكدر اكمل بطني راح ينفجر

-عوفي يولي عوفي يمعودة مو زين عليج

-ماكدر زينة كملي بدالي حبابة صوري كلشي واقري المحادثة زين فدوة

-يلا ارتاحي انتِ انا اكمل

رحت للجرباية مددت واجت زينة يمي تكعد، ضغطي هبط مادري ارتفع من الشفته واحس بمعدتي تفور وتگلب..

-زينة: ها خية شبيچ ولج

-مابيه شي كملي شوفي شنو اكو

-عايني هذا كاتبلها على واحد اسمه زيد

-شكاتب؟

-كاتب "راح ادز الباودر بيده"

-شنو هذا؟

-مادري اظن بيناتهم مكالمات هم لو هي سلوى تحذف بالمراسلات

-طلعي من الواتس وروحي للماسنجر شوفي

هزت راسها اي وسوت مثلما گلتلها وهناا شفنا الطراگيع على اصولها! شفنا نفس الزلمة الچان يحاچيها ومسميته رقم 2 وتدزله صور ليلة علساس هي موصيته على اختها شذى الي هي خالتي ام عبق كاتبتله..

"ماريدها تصحى حبيبي خبلها الي فدوة اروحلك وشگد ما تريد اني حاضرة"

وهو يجاوبها..

"دا انطيها علاج متگدر ترفع ايدها بعد وراه تطمني"

"خوما احد يحس بيك فيصل؟"

"ابد محد شبيچ بالرشاوي كلشي يشتغل حبي"

-زينة: هذا العار هو الجاي يخبل خالتي شذى!

-شمس: اي النذل ايي

-زينة: عايني شلگيت

اخذت الموبايل منها وشفتها مراسلة زيد ابن مسعود ومبين البيناتهم مو علاقة غرامية، البيناتهم شغل غميج وخطير والاكدلي هالشي هي رسالة..

"راح ادز ولد يذب الماي ببابهم بس راح يكلفچ هواي"

"بيش ما چان زيودي ما نختلف"

"اريد هسة تدفعيلي"

"ماعندي هسة اصبرلي انتَ سوي الگتلك عليه وتدلل"

"اذا حسيت بيچن جاي تلعبن عليّ وعلي اندمچن انتِ وزهرة وفراقد السحارات"

"لا هاي شبيك شنو تريده احنه حاضرات"

"چا خوش الباودر راح اجيبه باجر من الولد ولاگيني بالشقة خاطر انطي الچ"

"زهرة تكول هذا اقوى من القديم لو لا؟"

"اي اقوى هذا ينرش على مخدتها من تنام تستنشقه ويمشي بيها ويشخط عقلها"

"فدوة اروحلك يا بطل"

"بس عايني شوي شوي تبدين مو كل يوم لانه قوي ويجوز تروح بيها انتبهي"

"لا توصي حريصة"

اقرا المحادثات وعيوني راح تطلع من وجهي، صداع ضربني وعين من عيوني غوشت من الخوف.. اقرا وما مصدگة فراقد وزهرة وسلوى ثلاثتهن مشتركات بالجرائم الجاي تصير!

-زينة: شني هاي شكاتبلها هنا؟

"باچر اريد الفلوس راح اللاگيچ بالشقة والله اذا ما اجيتي اذبحچ"

"ماعندي زيد والله ماعندي كافي ما تشبع فلوس انتَ!"

"چا افضحجن واشهرچن والله كل سوالفچن اصبها بأذن شيخ علي"

"حرام عليك قطيتنا قط كافي اذيتنا يومية تبتز بينا!"

"انا اريد اهج من العراق تعاليلي باجر والله كريم نشوف شلون نحلها"

"شلون؟"

"احلها بطريقتي وهاي بس للاعزاز اسويها"

"اي شتسوي؟"

"ههههههه *****"

شهگت لاطمة وجهي من قريته شلون يساومها على شرفها وهي ما راضية بس بالاخير شكلها اقتنعت وهذا السبب ذبحته وصار الصار وراهة!

-زينة: هاي خطيرة شمس عوفيها لا تتورطين وياهة

-لازم اوصل هالمحادثات لعيالي زينة فتحيلي نت منج ادزهم

-ماعندي نت بموبايلي

-چا فعليلي بموبايلي

انطيته الها تفعلي وانا بقيت افتش بالموبايل واحس بروحي فرفحت، شفتها مراسلة على الماسنجر مرة اسمها "ام تبارك" ومحادثتهن كلها عبارة عن عبق! كلها ماعدهن غير سيرتها ومن خلال المحادثة عرفتها هي الحرمة الخطفت عبق وشمرتها بالشماعية وهذا الحقير فيصل الي تراسله مساعدها ومدخل عبق هناك بالحيلة ومنزلها بغرف المجانين..

-زينة: شموسة ذولة عصابة!!

-شمس: سكتي زينة راح اموت من الخوف

-زينة: شنو هالامكانية؟! شلون كدرت تخرب بين كل هالناس!

-عايني مبين مو وحدها واكو من يساعدها ويعينها على جرايمها

-زهرة وفراقد عمت عينهن شني من گلوب! ولج هاي زهرة ليش مو تكولين عنها زينة؟؟

-اي والله زينة بس الله يعلم شگلبها

فعلت نت ودزيت شكو شي شفته بموبايل سلوى لـ علي البـدر، ادز وايدي ترجف وبطني تخبط وهو جاي يفتح الرسائل بنفس اللحظة ويشوفهن..

-زينة: بقت ذني المحادثات ما فتحناهن شمس

-عوفيهن ما نلحگ اخذنا المهم الباقي همه يتصرفون

-بشرفچ خلينا نفوت على اخر وحدة

-لا زينة خاف ما نلحك هسة تجينا

-يلا يلا بساع

سويت مثل ما تتمنى وفتحت المحادثة ويا ريتني ما سويتها.. يا ريت اصابعي تگصگصت ولا فتحتها وشفتها شلون تراسل بزلمة وتتفق وياه على شي بس مو مفهوم لان مبين ذااك وينه بيناتهم اتصالات والذبحني بالزايد من شفتها دازتله صور بنيتها!! صور حبيبة دازتهن بس مو كاملات يعني اكو صور بس عينها طالعة لو جسمها شوي لو ربع من وجهها بس انا اعرف هاي حبيبة! متأكدة هاي حبيبة وحتى مسمية اسمها "غرام"..

سديت الموبايل لعبانة روحي ورجعته لمچانه وكعدت انا واختي زينة وحدة تصفن بوجه الثانية منتظرين ردة فعل شيخ علي واولاده...

**

"لـــيلة"

كاعدة بغرفتي ادهن بطني بزيت زيتون وفزيت على صوت صياح رج البيت رررج.. المشكلة ماعرف صوت منو هذا بسبب اصوات الولد الجاي تداخل جوه، ركض ركض گمت مسحت بطني ولبست جبة وشال ونزلت اركض اشوفن الدنيا مگلوبة وعمي علي طلع من غرفته وبيده رشاشة..

-ليلة: شصااير شبيهم سبأ شصايرر شبيچ تبچين شكوو؟؟

-سبأ: اخووي اخووي مات اخووي

تبجي وتلطم على وجهها استوعبت ان هي هسة ياله عرفت بـ زيد ميت الصبح تقي ما خلاها تنزل وتسمع من الامير حاچانه، رحتلها حضنتها اصبر بيها وعيوني تركض على خالة رسمية اريدها بس تفهمنا شكو..

-رسمية: سودة بوجهج يا سلوى شسويتي بحالنا سووودة بوجهج

گعدت ساكتة ماعرف شحجي وشسوي حرت ودخت وانا منا دايخة من وره هالفرخ زادوا دوختي بسعلاوي.. دقايق ورجع تقي يريد ياخذ سبأ لبيت اهلها خاطر تواسي امها واختها وهي صعدت مثل البرق بدلت ونزلت تركض وتبجي وطلعوا من البيت..

ظلينا على هاي كعدتنا فترة طويلة وماكو لا حس ولا نفس اجه منهم، ابرار تروح وتجي وعمتي رسمية روحها تلوب وعبق كاضة گلبها وترجف وحبيبة منتهية لا ايد ولا رجل راح تموت..

تعبنا من الانتظار وقررنا نگوم نسوي لگمة نسند بيها طولنا بس بطلنا من سمعت اصوات جايه من الساحة بره..

-ليلة: صوت الولد هذا! رجعوا رجعوا عمة

ركضنا عليهم للمطبخ ورحت انا للشباچ اشوف، شهگت ادگ صدري من المنظر الصار بوجهي وحبيبة طلعت مفرعة للحديقة تركض مثل المخابيل من شافت ابوها اول ما طبگ باب الحوش طب ويسحل بأمها من شعرها..

طاحت يم امها بالكاع وتلطم على وجهها وراسها لطمم حييل وتزلغ بروحها ومحد جاي يكدرلها من الولد.. شالها الامير شيول من الكاع وطببها للبيت وعمي جر سلوى الصوتها يزرف الاذن زرف وطببها للبيت..

-سلوى: هدوووونيي ما مسوية شيييي هدووووني

-شيخ علي: بعلييي اذبحج واخلص من عارچ بت ال*****

-سلوى: ما مسوووية شي عليييي حرااام عليك حرااام عليكممم

-شيخ علي: علي الحـق!! جيبلييي السچييييين

-سلوى: لااا لاااااا علييي لااا ابوس رجلك لااا ما مسوية شي انا لااا

-شيخ علي: تشاااهدي ولججج

-سلوى: لا بداعتي لااا حبيبة وينج حبيببة وين عفتي اممج

بچت حبيبة تشهگ و تضم وجهها بصدر اخوها وترفس برجلها حييل بالكاع، تخبلت سلوى من رفع عمي السلاح بوجهها وعاط بيها صوت خلس الكل..

-اختااري تموتيين ذبح لو رمييي!!!

-سلوى: حرام عليك.. تخش بخطيتي علييي والله ما مسووية شيي ذني خوااتك هنه راس البله اناا مالي شغل معليييه جيب القران احلفللك

ويه صوتها العالي ماعرف منين وشلون اجه صوت زلم خشنة من الساحة، دفعني ابا الحسن اطلع من المطبخ والباقين كلمن دفعله وحدة يطردها،، ما اهتميت وركضت امد عيوني من الباب اشوفهم وعرفتهم ذولة من اهل سلوى واحد منهم اخوها اسمه صباح وثنين منهم رجولة خواتها وثنين ولد عمها..

استغربت من شفتهم ذولة شلون اجوا وشلون عرفوا راح يصير هيج شي بس اظن ام شمس بلغتهم من راح عمي لبيتها وسحل مناك سلوى..

-صباح: شيخ علي مااا رجيناها مننك شييخ

-شيخ علي: اختك كسررت وجهيي اختك طينت شرررفي وما تستاهل تعييش

-اجتكم دخييلة ابو علي!! هيج تعاملون دخيلتكمم؟؟ يا عيبة العيبة!!

-شيخ علي: دخيلة اجت لبيتي خربته!! لعبت بشرفناا وعرضناا وما ينسكتلهاا هالعايبة الخاينة!

-رجعها النا احنه نربيها شيخ ولا تلوث ايدك بدمها

-سلوى: يمممااا لا لا لاااا علي لا تخليهم ياخذوني لااا

تخبلت سلوى وطاحت على رجلين عمي تبوس بيهن وتحب بقندرته، دفرها عمي منه لعبانة روحه وصاح..

-انا ذباحهاا هالساقطة!!

-صباح: لاا شيخ ما مسموح اجتك دخيلة ورجعوا اهلها يردوها! ما تريدها رجعها النا احنه نتصرف وياهة

-سلوى: ماريددد مااريدد لا تاخذوونييي

-شيخ علي: اخذوها

-الامـير علي: بوووية!!

-شيخ علي: اسكتتت لا احد يحجي!! أخذوها وافصلكم مربع على سوايتها اذبحها واخذ بدالها اربعة لولدي!

شهگنا كلنا وخالة رسمية ويانة، ضربت وجهها وحبيبة وجهها صاير اصفرر وگوة واكفة على رجليها راح تطيح بأي لحظة.. ابرار وعبق صارن يرجفن وروحهن خرطت والزلم بالمطبخ ضج صوتهم شعلوه ويه ابوهم واهل سلوى هم ما راضين على هالشي بس عمي علي معاند..

-رسمية: ابو عليي شيخ علي! ابو علي الدر!! ابو علي!!

صاحته عمتي من جوه بس ما استجابلها عمي وظل يتصايح وياهم، اجاها علي التـقي وعلي الكرار بس ما رضت بيهم ورادت الا عمي يجيها..

-رسمية: علي التـقي طبب الزلام للديوان خاطر يتناقشون وخلي ابوك يجيني

-علي التـقي: يوم ابوي معاند ما يرضى يجي

-رسمية: گله اذا ما تروح وتشوف امي من ترجع ما تلگاها ببيتك بعد

-علي الكـرار: يوووم وكت نكد هسة!!

-رسمية: روح سوي الگتلك عليه!!

راحوا ضايجين ومتنرفزين وصدگ دخلوا الزلم للديوان وسلوى حبسوها بالاستقبال وقفلوا عليها الباب خاطر ما تشرد ويستجوبوها.. نص ساعة مرت واجه عمي علي فااااير ووجهه ما يتفسر مطگع من القهر وگبل لا يحاچي عمتي راح لحبيبة حضنها لجسمه حييل وگال بحسرة..

-شلونچ بنيتي گالو اخوتج تعبتي

-حبيبة: بوية لا تذبحها.. شتسوي بيها سوي بس لا تذبحها

-شوهت سمعتج حبيبة تدزدز للزلم صورج بوووية ما تستاهل تعيش هااي

-ميخالف لخاطري عوفها شتسوون بيها سووا بس لا تموتها وتخش بخطيتها حرام

-شيخ علي: خليني اروح اشوف شتريد مني امج رسمية وراجعلج

هزت راسها حبيبة بس روحها طافية، دموعها زخ على وجهها وكوة كاعدة على حيلها كل ساع عيونها تتگلب واكول البت راح تطيح علينا..

طب عمي لغرفة عمتي رسمية وعيوننا تركض وراه ونار مشتعلة جوانه منتظرين التالي، خمس دقايق طول هناك مو اكثر.. خمس دقايق وطلع من الغرفة واحد ثاني.......

يتبع 👑...

━━━━━━ ♛ ━━━━━━

#الامارة

بقلمي: زهراء السلامي 💎

لتنسون التصويت + التعليق بين الفقرات + متابعة لحسابي 💙.

وراها تعيش لكن گلبك يموت

وأحساسك الطيب بيدي يفهم

ما تحلم بعد بالعنك يروح

وما مسموحلك يومية تندم

كل جروحنا وكل المعاناة

من ورة الناس البيها نحلم...

━━━━━━ ♛ ━━━━━━

"علي التـقي"

رجع ابوي للديوان وجهه مگلوب، يدبچ بالگاع دبچ ومحد عنده الجرأة يفك حلگه ويسأله شنو التالي لا انا واخوتي ولا اهل سلوى..

-شيخ علي: من رخصتكم يا جماعة.. علي التـقي، الامير، ابا الحسن وعلي الحق لحگوني

گالها وطلع گبنا وگمنا لحگناه، طبينا وياه لغرفة امي رسمية وشفناها واگفة وكاضة سبحتها بيدها..

-رسمية: تعالو يمة تعالو ابوكم ما جاي يحسب حساب باچر بأفعاله وهاي اول مرة اشوفنه متهور هشكل

-شيخ علي: چا فضحتنا وشهرتنا هالچلبة!! ترديني اسكتلها ولج رسمية؟؟

-رسمية: ما تسكتلها يا بعدي بس مو هيج تنحل المواضيع مو انتم بهذا تصرفكم راح تجيبولنا فضيحة الها اول مالها تالي

-علي الحـق: لو عفناها عايشة تجيبلنا فضيحة اكبر! هاي اذا مو بيت مسعود ذبحوها وخزونا كدام امة محمد والمسيح

-رسمية: يمة وليداتي انتم بأي تصرف تقدمون عليه خلوا اختكم بين عيونكم، حبيبة سمعتها اهم من سلوى ومن الكل اذا ابوكم سوالها شي شنگول للوادم؟ نگلهم شهرت بأعراضنا ونشرت صور بنياتنا؟ لو نگلهم كتلت زيد!

-الامـير علي: نگلهم كتلت زيد چا هذا الشي بسيط بنظرج يوم!

-رسمية: وانتَ شني تذبحها لخاطر زيد چا اهل زيد وينهم عنها؟ شمالكم انتم ما تفكرون مو هيج انتم راح تحطون علامة استفهام بكبر روسكم علينا!

-ابا الحسن علي: يمة انتِ بس تحبيها وخايفة عليها!

-رسمية: انچب انا وين وانتَ وين! احچيلك چلمة علي!

-شيخ علي: رسمية الجاي تگولينه صح وعلى راسي بس سلوى ما اسكتلها مااا اسكت لهاي المجرمة وامرر مصايبها مرور الكرام!

-علي الحـق: ايدي بيدك بوية امشي ننعل والديها!!

-علي التـقي: يا جماعة انا اكول لو نرجعها لاهلها ونخلص منها خليهم هم يتصرفون وياهة

-الامـير علي: وتشتغلنا من بعيد لبعيد موو؟؟

-شيخ علي: ارجعها بشرط اكسر ظهورهم بفصل اطرهم بي نصيين!

-رسمية: مو انتَ راح تكسر ظهورنا بهذا فصلك علي شمالك صاير متهور وماخذتك العصبية

-شيخ علي: سكتييي رسمية سكتييي امشوا يا ولد

-علي التـقي: بوية يواشك خلينا نتفاهم فدوة اروحلك

-شيخ علي: نتفاهمم على بلاويها؟؟؟ ولك انتَ مااعندك غيرة على اختك ونسوان اخوتك؟؟!

-علي التـقي: رحم الله والديك بوية سويتني ماعندي غيرة ممنون منك

-ابا الحسن علي: چا شتفسر برودك؟؟؟

-علي التـقي: خايبين مو باارد انااا والله موو بارد بس چلام امي عين العقل كلشيي نسوي راح يرجع بشكل سلبي على حبيبة انتم ما تعرفون سلفنا شنو من بشرر ملفي شمالكم!!

-علي الحـق: من الاخير سلوى ما راح تطلع منها وما تطمطم سالفتها لو مادري شيصير، اذا مو احنه طيحنا حظها فـ بيت مسعود ما يسكتون ويلعبون بينا وبيها فلك

-رسمية: خليهم.. اي لا تعاينون عليّ هالشكل خلي بيت مسعود هم يأدبوها بس لا تطلع علينا سمعة احنه الذبحنا دخيلة اجت لدرانا!

-الامـير علي: خوب انتِ يمة بس تفكرين بالنااس ما تفكرين بصخام وجوهناا والنعل الاكلنااهة بوجودهااا

-شيخ علي: بسس! امشوا نروح للوادم جاي ينتظرونه فشلة منهم

-علي الحـق: ادوس ب*****

خزره ابوي ما راضي وطلع واخذنا وياه.. رجعنا للديوان ورجعت السالفة انفتحت واخو سلوى دگ رجل هو يأدبها ويربيها بس لا نذبحها ونخش بخطيتها..

-شيخ علي: تره اختك ذابحة زلمة خاف ما تدري تاخذها وياك تلفيلك مصيبة على راسك مو تگول ما گلتولنا!

-صباح: ذابحة زلمة؟؟!

-الامـير علي: اي ذبحت ابن عمي زيد واهله اليوم افتهموا وماكو كلها يومين ويعرفون سلوى وراهة ويجوكم يدورون فصل

-صباح: لا خالي لاا احنه مالنا غرض لاا منين نجيب خليها تولي ذبحوها شمروها ذبوها بالسجن احنه شايلين ايدنا منها ومتبرين

-شيخ علي: چا مو تريدها انتَ وخايف على اختك!

-صباح: هاي گبل لا ادري بيها كاتلتلها زلمة هسة ما نريدها شيخ هي مريتك وانتَ اولى تتصرف وياهة

-شيخ علي: اخر چلام عندك؟

-صباح: اي والله هذا هو بكيفك شيخ هي دخيلتك عسى ما ذبحتها احنه راضين بعد هي بنيتكم صارت

-شيخ علي: خوش هذا هو

توادعنا وانهزموا من البيت يتراكضون من سمعوا بيها فصل وما اللومهم، ضحك علي الدر مستهزأ وفر بيده يكول..

-علي الدر: باعوا اختهم ولد العارية

-علي السور: بوية شنو راح تسوي هسة؟

-علي النور: بوية گبل لا تجاوب...

توجهت الانظار كلها على علي النور واولهم ابوي، اشرله براسه بمعنى "شبيك" وهذا اخوي وجهه صوفر، ذب حسرة وگال بتردد..

-علي النور: بوية ادري ما منتظر رأيي ولا تهتم تسمعه بس.. بس لا تسوي شي تندم عليه، سلوى غلطت وكلنا نعرف غلطها شكبره بس كلنا نعرف حكمتك ووعيك ومخافتك من رب العالمين اكبر

سكت وسكتنا كلنا ننتظر ردة فعل ابوي بس ما انطانه مجال علي السور وكمل وراه..

-علي السور: بوية نكره سلوى اي انا ما اطيقن شوفة وجهها بس انا ويه نور، عاقب سلوى بالطريقة التعجبك بس لا تكتلها ما تستاهل تلوث ايدك بدمها وتوگف باچر على السراط تتحاسب على وحدة ما تسوى نعالك

خزرهم علي الحـق خاطر يسكتون وبساع خنسوا، ما حچى ويانه ابوي شي ولا علق على حچيهم الاتفق وياه مية بالمية.. اول مرة زوج المشاكل يحچون شي بي خير واظن حتى ابوي مصدوم بيهم وما جاي يكدر ينطق..

-شيخ علي: عوفوها محبوسة بالاستقبال بينما افكر شني اسوي بيها

هزينا روسنا ساكتين ومحد بينا اعترض اصلاً محد بينا عنده الجرأة يتلاسن اكثر ويه ابوي وهو بهالوضع بعلي يشگ حلوگنا..

-شيخ علي: بدر گوم جيب مرتك من بيت اهلها لا تخليها هناك

گام بدر وگام ابوي وياه طلعوا ثنينهم من الديوان وعافونا نضرب اخماس بأسداس واحد يعاين بوجه الثاني وما قاطع صمتنا غير لطمة الامـير علي على فخذه حييل وگال بحس محترگ..

-انا لو بس افتهم شبي ابوي ارتااح شماله متردد هيج! من يمته ابوي يتردد بقرار؟؟

-علي الدر: امير لا تلومه تره جاي يحكم على مرته وام بنيته انتَ لو بمچانه هم هذا وضعك يصير

-علي التـقي: اموري انتَ ماخذ الموضوع بعصبية وغيرتك عامية بصيرتك أي خطوة غلط يتصرفها ابوي تنگلب ضدنا وضد كل نفر موجود بهذا البيت

-علي الدر: ثانياً لازم تخلي ببالك ابوي ماعنده دليل ملموس ضدها ويكدر يزامط بي كل الموجود مجرد محادثات ومن موبايل تكدر بكل بساطة تنكر يعود الها

-علي التـقي: خصوصاً وكل المحادثات لا اسمها مذكور ولا صورتها.. فلست المحادثات تفليس اريدلي واحد كاتب سلوى ماكو كلها اسماء مستعارة!

-علي السور: چا الله يلوم الي يلوم ابوي حگه من هيج متردد

-ابا الحسن علي: انا ما اللوم ابوي سلوى لو ما چانت دخيلة چان صار الموضوع هواي اسهل بس سالفة طبتها لبيتنا لغرض الحماية كاسرة رگابنا

-علي الدر: شباب لا احد يحجي بهاي السالفة ويضغط على الحجي بعد تره ابوي مو نفس اول.. الزلمة كبر والصدمة البي ما جاي تخلي يفكر زين بهداي عليه

-علي الكـرار: صحيح.. شيريد يسوي خلي يسوي عسى ما يسامحها احنه مالنا شغل

-علي الحـق: والله انتم تمخرطون هاي لو يمي بالعباس ما اخليها تشوف شمس باچر اشگها نصين...

**

"حــبيبة"

مأساة.. ماعندي مصطلح يناسب وضعي ووضع البيت غير مأساة، احنه بمأساة وورطة حقيقية السوته امي كسر گلبي وعيني گدام اهلي حتى ما جاي اكدر ادافعلها وافزعلها گلبي تعب منها، تعب وانا ادافع لغلط لا يغتفر..

ضربت مچان گلبي چم مرة اريدن الوجع يهيد ومسحت دموعي الغسلت وجهي وگمت ناوية اروحلها واواجهها اريد افتهم شنو السبب ليش كل هالحقد ليش جاي تسوي بينا هيج ليش تسوي ببنيتها هيج!!

-حبيبة: يمة وين قفل باب الاستقبال؟

-رسمية: ليش يمة شتسوين بي؟

-اريدن اشوفها

-گعدي حبيبة ولا تحرگين افادچ گعدي

-فدوة يوم فتحيلي الباب خليني اسولف وياهة وافتهم بلچن عدها تبرير

-ليلة: تبرير لشنو حبيبة؟ مو السالفة انعرفت وامج انفضحت هي السبب بكلشي جاي يصير بينا تَـمني تخبلت بسببها وعبق لولا ستر الله هم چان راحت بيها بسبب السحر الشمروه بباب بيتهم

-حبيبة: ميخالف ابوس ايدج يمة خليني بس احاچيها فدوة اروحلج بداعتي

-رسمية: ابوج ما يرضى والله ما يرضى

-ابوس ايدج فدوة فدووة

طحت على ايدها ابجي وابوس بيها اتوسل اريد اشوفها، گلبي يگلي هاي اخر مرة اكدر احاچيها واشوفن امي گلبي ناغزني عليها وجاي اموتن على البطيء اريد بس اسمع حسها..

-ليلة: عمة انطيها المفتاح خليها تشوف امها لاخر مرة

-ابرار: اي عمة ما يضر لو شافتها خطية لا تكسرين گلبها عايني لحالها

-رسمية: ولجن شلون بيجن انتن شلون

گامت مستسلمة وكمت وراهة اركض، طلعنا من باب الحديقة فتحت الباب لان مفتاح باب الاستقبال الداخلي عند ابوي وبس البره يمها، حطت المفتاح بالباب جاي تفتح القفل واندارت من سمعت صوت باب الحوش ينفتح..

-رسمية: هاي شني.. شجابها هنا

عكدت حاجبي مستغربة من شفت شمس وامها فتحن باب الحوش وطبن مخبوصات او خالتي ام شمس المخبوصة شمس جانت طبيعية..

-نهى: اختي وين؟؟ وينها سلووى شصار بيهااا

طبت تهرول وتتعثر بعباتها وتصيح وانا ما تحملت اكض روحي اكثر وطكيت من البجي، ركضت عليها حضنتها واصيح من كل گلبي منهارة.. اريدن هالجبل يروح من صدري اريدن امي القديمة ترجع تعبت محتاجتها..

-حبيبة: ياريتني ميتتة يا خالة ولا شاهدة سواية امي

-نهى: سودة بوجهي عليج يا يمة انهد حيلي عليج.. وينها امج حبيبة وينها؟؟ شصار بيهاا سولفيلي

-حبيبة: هنا هاي محبوسة بالاستقبال ابوي مقفل عليها وما يرضى احد يفوتلها

-نهى: ام علي فدوة لطولج مو سالفة هاي ما يصير هيج كلشي ينحل خية صح سلوى غلطت بس كلشي يتصلح والله

-رسمية: كلشي يتصلح الا سواية سلوى عيني ام شمس

-نهى: خليني اشوفنها بلچن...

-رسمية: لا عذريني الشيخ ما يرضى

-نهى: انا خيتها ام علي احلفج بويلادچ تخليني اشوفنها واحچي وياهة چلمتين

قفلت امي رسمية وظلت تعيد نفس الجملة "ابو علي ما يقبل" وخالتي بقت مستمرة تتوسل، طاحت على ركباتها تتوسل وتبجي بگلب ملچوم وامي رسمية ما رضت عليها گومتها على حيلها وكالت..

-ما يرضى نهى لا تحطيني بموقف محرج ويه الشيخ بعلي ياكل راسي

-نهى: اخر مرة ام علي اخافن ما اشوفها بعد

بچيت معصور گلبي من جملتها وشمس نزلت راسها مقهورة، هزت راسها امي بيأس وگالت بتردد..

-رسمية: عشر دقايق غيرها ما الچن سولفن وياهة ونطلع بساع، ام شمس لا تفكرين تساعديها بشي والله الويلاد كاعدين بالديوان بأقل حركة يحرگون البيت علينا ويكتلوها بمچانها

-نهى: لا وراس بناتي ما اسوي شي والله بس احاچيها

هزت راسها امي رسمية وفتحتلنا باب الاستقبال وطبن خالتي وشمس وهي.. طبيت اخر وحدة بيهن انا وخطيت للاستقبال بأصعب واثگل خطوات اخطيها بحياتي ماعرف شلون راح اواجهها شلون راح اكدر اخلي عيوني بعيونها وره السوته بيه..

-نهى: يمة خيتييي

صاحت من الباب وركضت على امي تحضنها وتبجي فوگ راسها وامي واكفة بوجهها الاصفر مبحلگة عيونها وتعاين عليَّ..

-نهى: شلونچ سلوى؟؟ شلونچ ولج حاچيني خيية

-سلوى: حبيبة

-نهى: اي هاي بنيتج حبيبة هم اجت تشوفج سودة عليه

طاحن دموع امي على خدودها ومدت ايدها الي وگالت بصوت مبحوح من البجي..

-تعاي يمة تعاي بنيتي

تبسمرت رجلي ما جاي اكدر اتقدم عليها، شهگت بدون صوت ودموع وظليت اعاينلها من بعيد وهي باقية تبجي وتأشرلي بيدها..

-سلوى: تعالي حبيبة

-نهى: روحي حبيبتي روحي لا تخليها بنفسها

-رسمية بهمس: روحي حبيبة لامچ

هزيت راسي لا ونزلت دموع جديدة على وجهي، مسحتهم بساع ارزل بروحي من جوه وادوس على گلبي بيدي حييل اسكت دگاته واخليهن يهيدن.. ما يصير اروحلها ما تستاهل هالانسانة ما تستاهل تكون ام..

-حبيبة: هاي مو امي

-سلوى: لا يمة.. لا بنيتي لا حبيبة انتِ بنيتي ووحيدتي لا تكولين هيج

-حبيبة: اجيت بس خاطر اسألچ سؤال حاز بگلبي واريد جوابه

-سلوى: كولي اسمعج حبيبتي

-حبيبة: انتِ...

سكتت بساع فازة من سمعت صوت ابوي يصيح لامي رسمية من جوه، انخبصت امي ماتعرف شتسوي وظلت تراوح بمچانها تروح وتجي..

-رسمية: حبيبة ابوج يندهلي يمة اأمنچ امانة تحچين وياهة شوي وتطلعين وتقفلين الباب! اامنچ حبيبة وانتِ تعرفين كلش زين شيصير لو ابوج درى بينا هنا والله تنهجم بيوتنا كلنا!

هزيت راسي بـ اي وحطت المفتاح بيدي وراحت تركض لابوي، غمضت عيوني مهدود حيلي وكعدت على القنفة اريح جسمي اليرجف..

-سلوى: حبيبة

-حبيبة: اششش

-سلوى: شبيج يوم احچيلي! سولفيلي يا بعد امج شبيچ مريضة؟ شو وجهج اصفر ولج سولفيي

-حبيبة: شسولف.. شسولف انتِ بقيتي بيها سوالف

-سلوى: انا معليه.. كل الصار مـ..

-حبيبة: ليش؟.. ليش بهذلتينا؟ ليش بعتي بنيتج؟ ليش سويتي كل هذا الشي ليش؟....

**

"لـــيلة"

رجعت عمتي للصالة تركض من سمعت صوت عمي يصيحلها وانتبهت عليها تغمزلي واشرتلي براسها على الاستقبال، لقطت السالفة وعرفت تريدني اروح وياهن فـ ملصت روحي عود علساس رايحة اجيب الهدوم من الحبل وركضت للساحة اطب من باب الاستقبال البره..

طبيت وشفت الوجوه مگلبة، حبيبة وجهها غادي دم وسلوى واكفة تسولف بكل صلافة وعرامة وتكول..

-حبيبة انا مالي غرض والله اصلاً مادري على شنو جاي اتحاسب مادري يمة شمسوية انا

-حبيبة: تره لگوا موبايلج الثاني!! لگينااه على شنو جاي تنكرين وانتِ انفضحتي!!

-سلوى: يا موبايل ثاني؟؟؟

-حبيبة: المخبيته ببيت خالة نهى!!

-سلوى: انا؟؟ انا عندي موبايل ثاني!!

-ليلة: اگلج بطلي هالسوالف تره تخزيتي والكل عرف بسوالفج

-سلوى: هاي ياهي ذبت هيج سالفة براسي؟؟ شمس؟؟

-شمس: انا شكوو

-سلوى: ماكو غيرج الچلبة!! ماكوو غيرج سويتي سوايتج وذبيتيها براسي!

فكيت حلكي على صلافتها وشمس شهكت ودگت صدرها، يتناترن مهامس من سمعن صوت عمي جاي من الساحة مبين جاي يريد يطلع من البيت..

-شمس: خالة لا تذبين الصوچ بيه حرام علييج خافي ربچ!

-سلوى: هاي سوالفج ام الگالات تعلميني بيج وببراعتج

-نهى: سلوى شبيچ!! شو ذبيتي الصوج بشموسة؟؟

ضحكت سلوى بصوت مسموع من امنت عمي طلع من البيت وصارت تكدر تحجي براحتها خصوصاً الولد كاعدين بالديوان وما اظن يوصل صوتنا الهم..

-سلوى: حبي ما اذب الصوچ بيها انا متأكدة هي السوت هالشي خاطر تطيحني وتخلي شيخ علي يطردني!!

-حبيبة: كاافي انتِ ما تمليين!!

-سلوى: حبيبة انا ما مسووية شي كله من شمس هي السبب بكلشي هي جاي تخرب سمعتي كدامكم!!

-شمس: احجي منا لباجر كل الي بالبيت يعرفون انا شنوو مستحيل يصدگوچ!

-سلوى: تره زواجچ صار على ايدي شمس لا تنسين انا خطبتچ وانتشلتچ لخير الشيخ من چانت دشداشتچ تنكث عليج من عتگها

-نهى: عيب عليج سلوى والله عيب تعيرينا بفرگنا

-سلوى: چا كضي بنيتج وخلي رجليها تلوح الكاع لا تنسى روحها وتصدگ صارت ام البيت تره مثلما جبتها اطلگها من بدر وانعل خير خيرها!

-شمس: لو تموتين ما يطلگني بدر انتِ هذا الكاتلج تغارين مني وتموتين حرگة من تشوفينه مدللني!

-سلوى: ايييييي مدللچ من وره سحورتچنن من وره سحورة امچ الزلمة راح يموت على ايدچنن وايد سحورتچن وسوالفچن مال مبايلات تجيبن وتدحسن وتشمرنها براسي

-نهى: ولج احنه امهات السحورة احنه؟؟! سمعي امج حبيبة سمعي مرة شيخ علي اليحلفون براسه الوادم!

-حبيبة: خالة اروحلج فدوة لا تهتمين هي بس تعبانة نفسيتها وما جاي تعرف شتحچي مسحيها بوجهي

-نهى: انا راح اسكت احتراماً الج ولبنيتچ بس لا تنسين سلوى انا اختچ الچبيرة وعيب هاي تصرفاتج

-سلوى: اختي الجبيرة كضي بنيتج المسموومة كضيهاا لا بعلي طلاگها على ايدي يصيير نهى هاي وانا حذرتج!!

-نهى: سلوى كافي شمس شمسويتلج ليش هيج وياهة شبييچ هاي وانتِ خالتها اخت امها!

-سلوى: چاا السوته گليّل؟؟ تذب تهمة بكبر راسها عليَّ وتكول انا عندي موبايل ثاني خاطر يذبحوني!

-شمس: عبن صدگ عندج موبايل ثاني! وغير الموبايل جاي تسوين مشاكل بين الچناين وبين الولد تردين تفرقينا يا حقيرة!

شهگت فازة من هجمت سلوى على شمس وهمشتها من شعرها وطيحتها بالكاع، عاطت شمس بكتمة وحضنت بطنها خايفة وامها وحبيبة تخبلن.. ركضت حبيبة تقيّد امها الهايجة وانا وام شمس ركضنا على شمس الطايحة وتشهگ بخوف..

-نهى: الله لااا يوفقج يا سلوى ولا يحفظج والله الاا اشچيچ يم زلمتها اخلي هو يتصرف وياج

-سلوى: هديني حبيبة وخرري خلني اچفص ببطن هالچذابة واطلع الفرووخ من حلگها

-حبيبة: يمممااا كااافي

صاحت حبيبة بكل حسها ولطمت على حلگها تخاف لا يسمعوها الولد، ما اهتميتلهن وگومت شمس من الكاع وگعدتها على القنفة البت بس تبجي حاطة ايدها على بطنها وتنوح وامها تلطم وتزلغ بخدودها خايفة عليها..

-سلوى: ساقطات بايرات لوما انا بدر ما يگلب بنيتچ الخايسة الكاتلها الضيم بس انا خليتها براسه اناا رسمتها بعقله وخليته يتسودن بيها انا ومثلما رسمتها بعقله اخلي ينساها واخلي امه تزوجه اغاتهاا

اندارت نهى على اختها انفاسها تلفح نار ووجهها ينفض دم، رصت على سنونها بحقد وگالت بصوت ناصي وجسمها يرجف..

-نهى: عايين من يحجي عاينو الطلعت من بيت ابوي مصلخة واجت تركض لبيت شيخ علي خاطر يسترها! النزلت راس ابوي وهي تسولف ويه زلامهاا وتتصلخلهم!

خنس الكل وره جملة نهى الصدمتنا حتى سلوى فكت عيونها على وسعها وراسها صار يهتز من العصبية.. فلتت نفسها من ايد حبيبة وهجمت على اختها تعاركها وركضت عليهن افاككهن.. حبيبة كضت سلوى وانا كضيت نهى البقت تفضح بسلوى وتحجي شغلات ما ينلبس عليها ثوب بس كل الحجي جاي يصير بصوت نااصي چن متحذرات لا يطلع حسهن..

-نهى: كل البيت مخدوع بيج واولهم شيخ علي يا سلووى!!

-سلوى: ولج هدددينيي اشرب من دمهاا

-حبيبة: خالة فدوة اروحلج كافي خاااالة

-نهى: امج دمررت اختها بيدهاا دمرت شذى وشمرتها بالشماعية بس لانها تعرف بسوالفها ولگفتهاا تحاچي ابن الجيران من السطح وتسوي وياه منكرر!

لطمت وجهي وسلوى ضاعت علومها وجهها صار هاكبره ظلت ترجف بيد بنيتها ودموعها تصب.. اندارت على حبيبة وكالت وهي ترجف..

-سلوى: چذاابة چذابة لا احد يصدگهاا جذاابة

-نهى: چذابة مو؟؟ روحوا تأكدو من ابووي چا ابوي لييش ما يعاين لوجهچ!! ليش تلعب روحه منج ومن بنيتج ما يريدكمم عبنچ انسانة فاجرة!!

-سلوى: لوو فاجرة ما يثبت برائتي شيخ عليي من اجييته بس انتم كلكم ظلمتوني!!

-نهى: سلووى مو علينا سوالفج انتِ لعبتي لعب من صغرج تعرفين سوالف اكبر من عمرج!! لعبتي جوولة بس چنتي تعرفين شلون تلعبيها صح وما تأذين نفسچ وينمس شرفچ وتضيعين المحافظة عليه كل بت!!

-سلوى: سكتوهاا جذاابة والله جذاابة ما مسوية شيي انا ما سويت

-نهى: ما تصدگوني؟؟ روحوا سألوا شذى هي شاهدة!! هي شافتج بعيونها! جانت صغيرة وما تفتهم ونزلت تصيح جوه مخترعة وخايفة من سمعت صوتكم وشافتكم ماا انسى السويتي بينا سلووى ما انسى ابوي الراد ينجلط من شافج بهالحال!!

-سلوى: لاااا ما سويت شييي شذى چذبتت هي چذبت على الكل عبنها تكرهني!!!

-نهى: محد جان يكرهج جنتي مدللة البيت ومدللة امي بس انتِ جبتي الضيم لروحج! سلوى چنتي من يوم يومج لئيمة وانانية وتفكرين بنفسج وبس وجبتيلنه الحچاية!

-سلوى: سكتيي جذاابة

فلتت نفسها من ايد حبيبة ومن الصدمة كلنا ظلينا فاكات حلوگنا ما مصدگات الجاي نسمعه وهي اخذت بحلگة عيوننا وصدمتنا لصالحها وركضت تزبگ تطلع من باب الاستقبال مهزومة..

-ليلة: لاااا رااااحت

ما صحت حبيبة من جمدتها چن رجليها بادن وبعد ما يحملنها، ركضت انا وراهة مثل المسودنة وشفتها وهي تطلع من باب الحوش تركض حافية وانا من سرعتي طار النعال من رجلي وطلعت اريد اللحگها.. بعدني بباب الحوش ما عابرة وسمعت صوت طلقات نار صلت وحدة وره الثانية..

صرخت شاهكة من حسيت بأيدين قوية تحضني من وره وتسحبني تطببني البيت، اللتفتت اريد اشوف منو وذبلت روحي من شفته ابا الحسن واكف وراي وحاضني بكل قوته ويلهث..

-وين راايحة بهالحاال ويين

-سلوى حسن سللوى انهزمت!!

-ادري ادري سمعنا

يلهث كوة يحجي وانا الرجفة بعدها كاضة جسمي ما فارقتني، وخرني من بين ايده واشرلي على باب المطبخ وكال..

-طبي جوه

-صوت طلقات صار ابا الحسن خاف بيت مسعود هدوا علينا!

-لا

-شنو لا

-لا مو بيت مسعود روحي ليلة

-شنو شبيك كوة تسولف ياهو چا؟؟

عافني بدون جواب وطلع من باب الحوش يركض، ما تحملت اسكت وارجع بدون لا اشوف شكو فـ مديت راسي من باب الحوش وچان اشوفن ولد عمي علي كلهم طالعين من الباب الصغيرة التخرج من الديوان وزلم كومة طالعين من بيوتهم..

-ليلة: هاي شصاير

ما جاي اشوف شي الوادم متجمعة بمچان واحد واسمع صوت صياح علي الحـق وزلمة وياه ما ميزت صوته، خفت يلگفوني وتصيرلي مصيبة فـ سديت باب الحوش واللتفتت للبيت وشفت حبيبة هستوها جاي تطلع من باب الاستقبال وتجر برجليها جر..

-ليلة: حبيبة شبيچ

-حبيبة: رجلي.. رجلي ما جاي اكدر أحركها

-ليلة: سودة بوجهي ولج شبيچ يمة

ركضت عليها اسندها على جسمي بس ما رضت وظلت عيونها على باب الحوش وتسأل على امها..

-ليلة: حلوها الولد لا تخافين امشي

-شصار ليلة

-مادري هسة امشي نطب جوه، وينهن خالتج وشمس؟

-بالاستقبال بعدهن

هزيت راسي وعفتهن هناك واخذت حبيبة وياي اطببها من باب المطبخ، استقبلتنا عمتي رسمية وجهها مخطوف وابرار وياهة وشايلة بنيتها الصغيرة بس شني وجوههن ما تتفسر..

-حبيبة: يمة..

-رسمية: سلوى نقلوها للمستشفى حبيبة

-حبيبة: شنو..

-رسمية: ماعرف كلشي مادري دگلي تقي وگال راح ينقلون سلوى للمستشفى

-حبيبة: صار بيها شي من طلعت تركض؟؟ سولفي يمما شصار بيها؟؟؟

-ابرار: مانعرف حبيبة وداعتج كلشي ما حچولنا.. اشش ماما اشش بنيتي

بنيتها فحطانة تبجي وحبيبة ترعش بين ايدي وانا بطني احسها تگطعني من الوجع بس ما حجيت شي مو وكتها..

-رسمية: ليلة جيبي حبيبة وتعالي.. وينها شمس؟ وين راحت

-ليلة: موجودة بالاستقبال عمة طيحتها سلوى وبطنها يوجعها

-رسمية: عسى ماااكو سلوى يجااه عليي

عاطتها وراحت تهرول تشوف شموسة وانا وابرار اخذنا حبيبة ويانه نطببها لغرفة عمتي، البت وجهها ما ينعرف لونه وعيونها فاكتهن بكل حيلها وجسمها كل ساع ضاربته قشعريرة وتنخض منها..

-ليلة: حبيبة انا رايحة اتصل بأبا الحسن خاطر نفهم شني السالفة

ما جاوبتني بعدها مو على بعضها فـ عفتها وياهة ابرار وصعدت لغرفتي اركض على موبابلي، دگيتله چم مرة ياله جاوب ومن جاوبني صوته كلش ما يبشر بخير وگوة تطلع منه الچلمة..

-ليلة: فهمني ابا الحسن تره اختك راح تموت!!

-ابا الحسن علي: شفهمچ ليلة! افهمچ علي الحـق ضرب طلق على سلوى من شافها انهزمت!

-ليلة: صخاااام وماتت؟؟؟

-لا ما ماتت هاي احنه بالطريق ماخذيها للمستشفى

-ابا الحسن والوادم شكالت من شافوا حق يضربها؟؟

-محد كال حسبالهم اجت طايرة من مچان ثاني وصارت بيها.. يلا ليلة يلا وصلنا احنه انا اروح

-حباب ارجع خابرني طمني

سد الموبايل بدون لا يجاوبني بس ظليت اللوب، عصرت الموبايل بين ايدي ونسيت كلشي جوه وعقلي وروحي صارت ويه اتصاله اريد بس افتهم شنو تاليتها وشلون راح تنحل..

كضيت بطني التوجعني من الركض وفكرت امدد خاطر اتحسن شوي ماكدر اضغط على نفسي اكثر خفت على الطفل.. غمضت عيني ثواني اريحهن ومادري شلون اخذتني الغفوة مو من عوايدي بس يجوز عبن كاعدة من الفجر اليوم..

فزيت مخترعة على صوت موبايلي يدگ حاطته بصفي، فركت عيني وباوعت للاسم وشفت المتصل "ابا الحسن" جاوبته بساع بدون تماطل..

-الوو ها حسن بشر؟؟

-وينج انتِ اختفيتي!! الففف مرة دكيت عليج!

-يمته هاي اول مرة تدك

-ولج عشرتالاف مررة اتصلت!!

-مادري ابا الحسن نايمة والله ما منتبهة على الموبايل

-نايمة واحنه الدنياا مشتعلة يمنااا

-شبيك شصاير؟؟ سلوى ماتت؟؟

-ياريت ماتت يارييت ولج الشرطة ترسوا المستشفى الدنيا مگلوبة

-الشرططة؟؟؟

-هاا خوية؟؟ جايك اي جاي جاي انا

-اوكف ابا الحسن وييين رايح ولك لاا تسده

ضربت رجلي بالجرباية من طبگ الخط بوجهي، ماكدرت اكض روحي ونزلت الدرج اركض اريدلي واحد يفهمني بس البيت يصيح بوجهي وماكو غير ابرار كاعدة ترضع بتها..

-ليلة: ولج ابرار افتهمتي بالصار؟؟

-ابرار: اي افتهمت خية افتهمت

-الشرطة شعدهم بالمستشفى ما فهمت هالسالفة؟

حطت فطومة على ملحفها وغطتها واندارت عليَّ بكل جسمها، فكت حلگها مستغربة وكالت بشهگة..

-چا وين چنتي انتِ خية مو الدنيا انگلبت من شوي!

-انگلبت وين

-هنا ببيتنا اجه مسعود يرعد رعد ومن شاف محد موجود من الولد حسباله مهزومين بس طلعتله عمتي وگالت همه بالمستشفى اخذ ويلاده وراح

-خرب حظي كل هذا وانا نايمة شون ما حسيت!

-لا عادي حگچ ما تحسين عبن اجوا من جهة الديوان وعمتي بساع طلعتلهم يعني محد راحلهم غيرها

-زين عمتي وحبيبة وين؟ وشمس وين؟

-عمتي وحبيبة طلعن للمستشفى وشمس راحت لبيت اهلها ويه امها كالت من تفض هالسالفة ياله ترجعها

-والشرطة لشني هسة غير نفتهم....!

**

-حبيبة!! حبيبة گعدي حبيبة!!.. سور ما جاي تصحى ولك سوور

-علي السور: وخر نوور اذا انتَ نايم عليها خنگت البت.. حبيبة ولج خايبة لا تموتينن

-علي النور: امشي جيب الطبيب امشيي

اسمع لاصواتهم فوگ راسي وامي رسمية كاضة ايدي حيل، احس بالدنيا تفتر بيه والتعب ماخذ من حيلي حيل.. فكيت عيوني على كيف ورجعت عصرتهن من وره صوتهم احسه طب بدماغي..

-علي النور: ولك كعدتت رجعت لوعيها رجعتت

-رسمية: الحمدلله والشكر حبيبتي الله لطف بينا الحمدلله

كضيت راسي اليوجعني كللش وانتبهت انا بدون شال، فزيت مخترعة ادور على حجابي وكضتني امي رسمية من ايدي تهدأني..

-لا تخافين ماكو احد يمة

-وين شالي.. ليش نازعته.. ااخ راسي

-علي السور: لا تتحركين هواي حبيبة راح تتوجعين

-حبيبة: شنو؟.. ليش

-علي النور: چا غير طحتي على راسح وانضرب بالحايط شني نسيتي؟

صفنت بوجههم اجمع افكاري واستذكر الصار.. رجعت راسي على المخدة متوجعة من تذكرت طيحتي وتذكرت كلشيي صار گبل لا اطيح وبدون لا اسيطر على نفسي بدت الدموع تتجمع بعيوني..

-رسمية: لا تبجين يمة لا تحرگين بگلبچ ما تستاهل

غطيت وجهي متكطعة تكطع من جوه بس ما نزلت دموعي، حلفت ما ابجي عليها بعد السمعته وشفته.. ما اذب دمعة وحدة على حرمة باعتني بأقرب واسهل فرصة اجت لايدها ما انزل دمعة غالية على وحدة ما مشتريتني بنعال!!

ما انسى من وصلت للمستشفى مفزوعة وتلگوني اخوتي يطمنوني ويگولون ما تأثرت كلش بالطلقة علي الحـق حرص ما يموتها والطلقة شخطتها شخط ومرت من يمها.. طبيت عليها الغرفة ارجف عليها واول ما شافتني بچت ومدتلي ايدها تريدني احضنها..

ذبيت روحي بحضنها ابچي وهي تبچي وتحجي ماعرف شتكول ما افتهم صارت الكلمات تداخل وياهة من الخوف بس كدرت اللقط صوتها من كالت..

-هربيني حبيبة يردون يذبحوني هربيني يمة

-حبيبة: شنو

-طلعيني منا بدون لا يحس احد بنيتي لا تعوفيني وحدي فدوة لطولج

-لا يمة محد راح يذبحج ابوي ما يسويها هو..

-ووولج يذبحونيي سمعتهمم سمعت اخوتج وهمه يتآمرون عليَّ والله

-لا مو بكيفهم يمة شبيچ ابوي هو اليحكم وقراره اليمشي

-انتِ غبييية؟؟؟ جاي اگلج الامير حاد سنونه عليّ ولو راد شيي يسوي غصباً ما على ابووه والكل!

-لا انا مـ...

عطت مخترعة من مدت ايدها وصفگتني راشدي على خدي، فكيت حلكي مصدومة من تصرفها وفزيت من نترت بحقد..

-طلعينيي منااا لا اغضب علييچ طلعينيي

-يمة

-وصمممه اشتعلت امج طلعينيي من خرررب روحج طلعينييي ولججج

-شلون اطلعج واخوتي بالباب واكفين مثل الحرس

-تصرفي حبيبة!! لاا تصيرين انتِ واخوتج عليّ چا ما غزر بيج تربيتي وتعبي!

-الجاي تطلبي صعب ماكدر اهربچ منا خليج هسة وضعج ما يسمح تطلعين من المستشفى عايني لحالج

-ما تطلعيني يعني؟؟ چا طلعي بره لا تگابليني

-شنو

-طلعييي بره ماريد اشوفن وجهج طلعيي

گلبي صار يدگ بسرعة وضعها يخوف ترجف وتحجي بهمس حجي مخربط ولونها مخطوف من الخرعة، عدلت الشال على راسها واشرتلي على الباب ونترت بيه..

-ما منچ فاايدة بعلي بس عِلة على گلبي كاعدة!

-شبيچ جاي اكلج ما اكدر اهزمچ ليش ما راضية تفهمين!

-انچبيي الله ياخدج ويخلصني من ضيمچ اشتععل بختي الخلاني اصير امچ!!

-حرام عليج شبيچ انتِ محاربتني بكلشيي ما كفاچ السويتي بيه!!

-سكتيي حبيبة سكتيي بطلي تتمسكنين على راسي

-اتمسكن وانتِ مشوهة سمعتي!! انتِ شلون ام فهميني شلوون

-ما ردت اصير اممم ماردت اتزووج ابووج ولا ردت اعيش هالعيشة الگشرة!! كرهت روحيي بيوم طبيت بيتكم وتزوجت زلمة متزوج گبلي!

-چا ليش رحتيله! ليش رحتي لابوي بالذات لييش!!

-خاطر اثبت برائتي واخش بعيون الحچوا على شرفي! ماكو غير شيخ علي وگفلي طول وصد ابوي عن ذبحي محد غيره وگفليي

-وهيج تجازينه! هيج تجازين الزلمة الوكفلج وستر عليج!

نزلت راسها تغطي عيونها وتتنفس سريع، ظلت تاخذ شهيق وزفير وجسمها ينخض خض مثل السعفة.. تقربت منها على كيفي ومديت ايدي على چتفها وضربت ايدي توخرها ما ترضى اللمسها..

-سلوى: وخري لا تكضيني

-شنو جاي تسوين بروحج يمة

-محد خبلني ودمرني غير مرة ابوچ واخوتج! محد داس عليّ وعلى كرامتي غيرهم وانتِ بكل مرة تفزعيلهم وتدافعيلهم ضدي!

-يمة عبنچ تغلطين كل غلط اكبر مني ومنج ومع ذلك اوكف وياچ واساعدج بس كافي مليت الى متى اظل اطمطم على سوالفج انا!

سكتت تمسح بدموعها الجاي تنزل وبقت على هالهدوء فترة، كعدت على السرير بصفها مكسور خاطري وگلبي من اسلوبها العنيف وياي بس انكسر گلبي من صدگ من بدت تحچيلي على ماضيها هيج من وحدها بدت تسولف چنها تريد تبرر لعمايلها بهالحچي..

-انا لو احچيلچ الجرالي ما توگفيلي هالوگفة، تزوجت ابوج وانا صغيرة.. تزوجت زلمة ما هاويني ولا رايدني، زلمة انجبر لو ياخذني ويثبت برائتي گدام ابوي لو انذبح گدام عينه وينهدر دمي بس چان كفو.. حبيبة ابوج من يوم يومه كفو وما باع بت اجته بنخوة، ما انسى شلون ابوي شالني من شعري من جوه رجلين شيخ علي وگاله هالبت ما تعيش وماريدن نفسها يصعد وينزل بصدرها اريدها تموت بس ابوچ ما رضى..

-حبيبة: وتزوجچ

-تزوجني اي بس هو ما رادني، اضطر وانجبر يتزوجني عبن ابوي دگ رجل وگال كدام الكل انا مو شريفة ولو مادري شيصير ما يصدگ انا بريئة وغير الذبح ما يبرد افاده وهنا وگف شيخ علي وگال البت اجتني دخيلة وانا ملزوم اثبتلك برائتها

هزيت راسي متفهمة وساكتة ويه صوت شهگتها العالية، بچت يهتز جسمها بقوة ولطمت على رجليها چم مرة وكملت..

-وصدگ عقد عليَّ وخذاني مرة وحدة بس.. بس هالمرة خاطر ما انذبح وبعد ما گربلي ولا شالني من گاعي الا من افتهمت بروحي حامل بيج

-من هالمرة؟

-اي.. حظي الفگر خلاني احبل بيج وبدت معاناتي الجديدة وسوالف السم يتطاير عليّ وين ماروح يصيحولي اجت الدخيلة الخربت بيت رسمية وراحت الدخيلة الطبت لشيخ علي مصلخة..

-ليش هيج يكولون

-عبن صدگ طلعت من بيت ابوي هدومي ممزگة على جسمي من الكتل، ابوي طلع روحي من جسمي ورجعها ما خلى وسيلة تعذيب تعتب عليه لحدما كدرت اشرد من بين ايده واروح لبيت شيخ علي عبني اعرف هذا الشيخ شكد حگاني ويخاف الله وهواي يسولفون بي بسلفنا

-نفس الصار بـ ليلة ورفل!

ضربت على السرير بيدها حيل ورفعت عيونها خازرتني معصبة، ضحكت مستهزأة وكالت بحقد مضاعف..

-لاا!! ماكوو مقارنة! ليلة خذت واحد يعشگ التراب التمشي عليها ورفل خذت واحد وگفلها طوول وما كضها وثبت برائتها غصباً على الكل!! لا تجيبيني لذني المدللات! انا تصخمت وتلطمت عمري كله ما عشت نفس البنيات وجنت بحسرة الحب والاحترام!

-بس ابوي حبچ يوم! ليش ما تصدكين هالشي

-حبني بس ما احترمني! جنت اخاف اعارضه بأي شي يكوله لا يشمرني بالشارع ويطلگني! جنت كلشيي يگوله سمعاً وطاعة انچب واسكت لا اعارض ولا اجادل حتى لو گالي روحي ذبحي روحج هم مستعدة اروح اسويها

-چنتي تحبين گبل ابوي؟

سألتها بدون مقدمات وبدون تردد عبن گلبي يگلي امي صدگ چانت عاشگة گبل لا يتزوجها ابوي وهسة تأكدت من هالشي.. سكوتها وصمتها الغريب ودمعتها الطاحت من عينها اثبتلي توقعاتي صحيحة..

-ليش دمرتي نفسج؟ شحصلتي؟

-اكرههم

-ليش!

-شنو ليش؟؟؟ طبيت لبيت كله ولد شباب واحدهم اطول واضخم مني، اشوفنهم شلون يفترون حول امهم وأبوهم والبيت يرهج بأصواتهم ومسوين عليّ حزب مخليني بخانة الشواذي! لا اكلي وياهم ولا كعدتي وياهم ولا الي چلمة بالبيت چانو يكرهون حتى صوتي!

سكتت فترة ماعرف شنو اعلق، سكتت عبني اعرف امي اول ما وعيت على هالدنيا وهي تخبث وياهم وتسوي مشاكل وتفكيرها شراني وابسط مثال گدامي چان هو تعاملها ويه عبق حقدت عليها على حقد امها ودمرت حياتها ولولا علي الحـق الله يعلم شنو جان صار بالبت.. جذبت انتباهي مرة ثانية من ذبت نفس ومسحت دموعها بگفه ايدها واردفت تكمل بنبرة كره عجيبة..

-حلفت ما اخليهم يعيشون متهنين مو سلوى التنذل وتبقى ساكتة! بديت اخبث وياهم واللعب بأحوالهم ووالله ما ندمانة!

-وانا!!

-ما ندمااانة

-انا ما ندمانة عبنج شوهتي سمعتي!!!

-عرج ما يصير بيج انتِ بت ابوج

-صدك تحجين انتِ!

-حبيبة اذا ما تساعديني طلعي بره ماريد اشوفن چهرتچ

-والعباس حراام عليج

-لا تسويلي حراام ما حراام انتِ لو تحبيني صدگ تطلعيني مناا!!

-جاي اگلچ مااكدر!! مااكدر ما كفااچ دفاعي عنج ووگفاتي الچ كل هالسنين!!

-شني مسوية منية عليّ عبنچ مدافعتلي؟؟ صدگ ما تستحين وادبسزز انتِ

-تدرين بآخر سنتين جنت كلل يوم اسأل روحي سؤال واحد!! سؤال واحد دمرني واكلني اكل من جوه اريد اعرف جوابه

-استغفرالله مالي خلگچ حبيببة

-چنت اسأل امي هم تحبني؟؟ هم تشوفني بتها لو ماخذتني درع لحمايتها وبس؟ امي لو صار بيه شي هم توكف وياي وتسندني لو لا!

-شكد تتفلسفين

-بس هالچم يوم عرفت انتِ شنو وعرفت طينتچ، عرفتج لا تحبيني ولا تهتميلي ما تحبين غير نفسج وما تدورين غير مصلحتج!

گلبي يرجف ويه اطرافي وصوتي يا دوبه يطلع من الغصة الذابحة زردومي، اختنگت مذبوحة من ما اهتمتلي ورفعت ايدها وسوتلي حركة "روحي" بدون لا تجاوب او تبرر حبها الي.. طاحن دموعي الاخيرة عليها وطلعت من غرفتها اشهگ وگلبي متگطع وذر وذر..

تلگوني اخوتي وسندي بهالدنيا وكضاني ابوي بين ايده يهدي بيه ويمسح على راسي، بجيت بجي عمرر على صدره بچي نشف دموعي واخذ ثلثين حيلي.. بچي نهايته چانت هو هدم الثلث الاخير من قوتي ويه ما شفت عمي مسعود وولده جايين ووياهم الشرطة وگبت بلبلة بيناتهم..

-مسعود: اجيت وجبت الشرطة وياي عبني اعرف ما راح تسويلها شي يا علي! اعرف راح تسويلي بيها حررمة وما يصير تنمس وسمعتها مهمة بس وعلييي ابن ابي طالب يا شيخ علي لفصلك فصل اكسر ظهررك وظهر ولدك بي ومرتك اسجنها بيددي!!

-شيخ علي: مسعود شبيك انتَ جاينا شايش فضحتنا شكو!

-رزاق: عاين لا تظل تسويلنا شكوو وشبيك كلشيي مكشوف وكلشي انعرف! دخيلة بيتكم ذبحت اخووي وعضيدي!

نط علي النور يريد يحجي وكضه علي الدر بيده يخزره خاطر يسكت، خنس الكل ومن ضمنهم ابوي وجهه گام ينطي اللوان ما يعرف شيكول من طلع الشرطي الامر مالته وگال..

-وياكم شرطة [^^^^^]، حجي عندنا امر اللقاء قبض صادر من قاضي التحقيق بحق المدعوة سلوى محمود صافي وفق المادة [^^^^]...

شهگت من غمج روحي واحس بالردهة دارت بيه، كضيت بأيد علي الكرار اريد اسند روحي وما لحكت على نفسي ظلمت عيوني وما حسيت بروحي الا وانا هنا.. بغرفة من غرف المستشفى وأمي رسمية كاعدة حدي وسور ونور فوك راسي..

-رسمية: يا يمة بسچ هموم امچ اختارت طريچهة وهي جابت هالشي لروحها

-حبيبة: ما شفتهم من اخذوها.. ما شفتهم

-علي النور: احسلچ خوية الله لطف بحالچ من غبتي عن الوعي چان ما تحملتي وصارت فضيحتنا فضيحتين

-علي السور: ابوي ما راح يعوفها حبيبة لا عبالج كال راح ابقى احاول بلچن نلگه حل ويه بيت مسعود

-رسمية: رغم كل السوته بس بعده ابوج يحاول لخاطرج يا يمة، بعلي گال لو اعرف ادوس على شاربي وكرامتي بس لا تبچي وحيدتي وينكسر گلبها...

**

"تَـمني"

وگفت گبال المغسلة اباوع لروحي بمراية الحمام واتنهد، اتنهد انتظار وترقب.. بيدي جهاز تحليل الحمل المنزلي وروحي تعلگت بي صارلها خمسة ايام فايتتني ودا ادعي ليل نهار اطلع حامل، يارب اكون حامل ياارب بجاه حبيبك محمد اطلع حامل..

بعد اللقاء القبض على سلوى محد گدر يسوي شي، عمو علي حاول بكل ماعنده من قوة وسلطة يقنع بيت مسعود يتنازلون ودفعلهم فصل مو بس يكسر الظهر اضطر يبيع بستان كربلاء حتى يوافيه بس ما قبلوا وگال ابا الحسن حتى لو بيت مسعود يتنازلون تنحكم حق عام وتنسجن..

سلوى انتهت بسبب التسجيلات المسجلهن عليها زيد، چان ذكي وسابقها بخطوة طلع محسب حساب كل شي يسوي وياهة وكل اتفاق دار بيناتهم چان يسجل صوتها ويجمع دلائل خاف تغدر بي حتى من هددته مرة من المرات تقتله وتخلص منه كله طلع بالتسجيل وچانت كل هالتسجيلات تتحول لاخوه وهالشي ثبت التهمة عليها وانحكمت على اساسها.. بس شنو الفايدة مات زيد وكلشي ما حصل!

وضع البيت مزري من بعد سجن سلوى، ما اعرف شسولف وشنو اكول اصلاً ماكو شي ينگال صراحة لان البيت عبارة عن كآبة.. حبيبة معتزلة بغرفتها متطلع الا بوقت الدوام نسحلها ويانه سحل حتى ناخذها والامير ياخذنا للدوام بيده ويرجعنا بيده ويجبر حبيبة تنزل تاخذ محاضراتها غصباً عليها وترجع، هو واخوته مراقبين حالتها ومنتبهين عليها كلش زين يخافون لا يصيبها انهيار..

محرم وصفر طبن منا طلعن منا والايام البعدهن هم ركضن ركض كلشي ما سوينا عكس السنة السابقة، لا قراية سووا بيت عمو ولا احنه طلعنا لقرايات خالة رسمية تكول لو بيدي اطم روحي وما اطلع من البيت واراوي وجهي للناس رغم محد ديحجي عليهم.. واستغربت صراحة خالة ام تالة تكول ما سمعت وحدة ذبت الصوچ ببيت الشيخ ويحجون بس على سلوى وسوالفها وكالو من قبل هي مبينة مو راحة..

فراقد تكسر راسها وطلعت كل المستخبي، راحولها عمو والولد لبيتها لعبوا بيها خلقة بس منعرف شسوولها بالضبط محد يقبل يكول بس كل الي عرفته ان هي اعترفت على سلوى وگالت كلشي صار ببيتنا سلوى چانت وراه..

خبطت بطني من گالت چانت تدخل وديان من درج غرفتي القديمة وتخليها تلتقي بيه وتلعب بعقلي وتروضني على اشياء ما رايدتها بس حتى تدمر حياة الامـير علي بس ما احسها تريد تدمر حياته گلبي يكول هالبنية تحبه ورايدته بس احتفظت بهالمعلومة لنفسي وما شاركتها ويه احد..

زادتها فراقد من گالت سلوى جان عدها تواصل مباشر وقوي ويه زيد ابن مسعود وهو چان يمشيلها كل التريده، شوطت الامير ورادت تجلطه من كالت من رحنا للمزرعة چانت عدها نية تجيب زيد حتى يعتدي عليَّ ويصورني ويهدد الامير بهالتصوير..

تخبلت واحس عقلي انشخط معناها بأسطبل الخيل فعلاً جان زيد موجود والخيال الشافوه حقيقي وتراجع من شافهم اجوا يساعدوني بس الفكرة بقت براسه وراد سيف اخوه يتممها لولا الامير ملحگ عليَّ..

تعبت من هالاخبار التعيسة وافتهمت بـ فراقد طلعت من المحافظة وراح تستقر بغير مكان عقوبة الها بس احسهم هددوها بشي ياله طلعت لان من اسأل الامير شنو صار من حچيتوا وياهة يجاوبني..

-الساقطة تكول انا مالي شغل كله من راس سلوى هي حاقدة عليكم وتكرهكم ورتبت كلشي وجبرتنا نصير وياهة وهددتنا

-تَـمني: فراقد تنجبر؟؟؟

-ختولي بت العار انا من اول ما ارتاحلها هالچلبة وما اطيق جيتها بس ابوي يااهو يكدر لابووي

-امير مدا اصدگ فراقد مو تحبكم!

-فراقد حسودة وغيورة وما تحب غير نفسها تبيع بزرتها بوكت العازة لو احتاجت!

-بس احس الها غاية ثانية من سوت كل هالاشياء بيكم

-تَـمني فراقد خرابة بيوت تموووت لو شافت ناس مرتاحة وعايشين حياتهم هي مريضة نفسياً! من اول انا منبه امي لا تطوخ علاقتها وياهة بس امي فقيرة وينضحك عليها بسهولة

-زين وهسة شنو سويتولها؟

-راح تطلع منا تشيل ابوي تبره منها وحچينا ويه ابنها والعينتين هم شال ايده من امه وكال روحوا فضحوها يم شيخ عشيرتنا خاطر تتأدب

-ابنها باعها!!

-اي هو يكول متعود على فواين امي وما كمت انصدم من سوالفها

-وتالي شسويتوا؟

-ابوي كال حرمة ما نحط راسنا براسها وانا اتفق وياه، صح اكره فراقد وما اطيق شوفتها وگلبي مجمر من وراهة بس عيبة بحگنا لو فضحناها مرجوعها النا ولعشيرتنا

-بس بعدها راح تطلع من المحافظة مو؟

-اي ابوي گاللها چهرتچ ما تنشاف بعد هنا وانطاهة المقسوم وطلع

-شنو المقسوم؟

-هيج سالفة بيننا وبينها

-شسويتو امير

-تَـمني لا تسألين زايد

-زين اوكي اوكي.. وصدگ طلعت فراقد حارگة بيت مسعود والسبب بحرگ ليث؟

-مادري بس ما استبعدها

هزيت راسي اتنهد وافكر بجرايم هاي المرة، عجيب شنو هالحقد والاذية؟ ليش سوت بينا هيج وهي تحب شيخ علي او خليني اكول مستفادة منه ومستغلته!

اما بخصوص عمتهم زهرة فـ وگعت على رجلين اخوها وماتت من البجي اول مرة اشوف عمة زهرة بهالوضع المأساوي، انهارت ودكت ولطمت على وجهها وحلفت على القران سلوى جانت تهدد بيها وكالت تفضح بنتها وتخرب بيتها (بنت العمة زهرة).. شنو نوع الفضيحة ماعرف وعمو علي ما قبل يحجيها لاي احد حتى لولده بس هم ما سامحها وطردها وكال مالج طبة لبيتنا بعد..

شوية انقهرت عليها لان عمو مبين جان كللش مقهور من طردها خصوصاً حسيته عرف السبب الحقيقي الجانت سلوى تهددها بي بس اضطر ياخذ موقف منها ويعوفها لان السوته مو قليل.. لعبن بعائلة كاملة كل هالشهور بدون لا ينلگفن هالشي وحده يصفن الناس من يفتهمون.. رغم محد افتهم ما طلع هالشي عمو بره البيت وحلف الكل محد يجيب طاري عمة زهرة كدام أي بشر..

اخيراً رجعوا كلهم لعمة غزوة الطردها الامـير علي من فترة طوويلة، رجعولها وتعذروا منها وباسوا حتى ايدها وغزوة جانت سعيدة بجيتهم ولمتهم كلهم لحضنها وما حقدت عليهم، صراحة فاجأتنا بتصرفها وكبرت بعيون عمو علي والكل..

وهسة خلوني ارجع للحاضر واركز بالتحليل الراح تطلع روحي واني انتظره.. اخذت شهيق وزفير وغمضت عيوني ادعي للمرة الاخيرة يارب كون افتح عيوني واللگه خطين يارب..

فتحت عيوني على كيف اركز بي ثواني وعضيت شفتي ميتة قهر من شفته بس خط واحد، وكعت دمعتي المشكلة بعيوني حيلة ومسحتها بسرعة ولفيت اختبار الحمل بالكلينسة وذبيته بالزبالة حتى ميشوفه الامير..

غسلت وجهي كم مرة وطلعت من الحمام وجفلت من شفته واكف يم مجر الميز، المجر الي احط بي احتياجاتي النسائية وشفته يدور بي.. رفع راسه من حس عليَّ طلعت من الحمام وگال بلهفة..

-سويتي اختبار حمل؟؟

-هاا

-ماهو اختبارج الحاطته هنا شنو حللتي؟

-وانتَ كلما ادخل للحمام تدور بالمجر لو شنو السالفة

ضحك خفيف خجلان ومسح على لحيته، حرك راسه بـ لا وكال..

-لا بس حسيت عبن اشوفچ متوترة هالچم يوم

-لا عادي كلشي مابيه

-ها

-مو حامل هسة حللت وطلع خط واحد

-هاا

-امم

-يلا كله رزق الحمدلله والشكر حبيبتي

-الحمدلله

-امشي ننزل نتعشا امي جاي تصيح اجت عمة غزوة وجايبة كباب سوگ وياهة

-لا ما اشتهي روح انتَ حبيبي اني اريد ادرس شوية وانام باجر عندي امتحان

-يلا امنية نزلي وياي

-لا والله مو جوعانة وشايلة هم الامتحان حباب

-خاف ضايجة على سالفة البيت؟

-لا والله

-اكيد؟

-اي

ذب حسرة ضايج بس ما ضغط عليَّ اكثر لان يعرف لو حچى حجاية زايدة راح انصبها مناحة واكعد ابجي لباجر، طلع من الغرفة واني رحت لجنطتي طلعت الملازم وتمددت على الجرباية عود ادرس بس بالي مو ويه المادة اصلاً..

افكر بسالفة حملي وبالنقلة، اتفق ويايه امير نأجل طلعتنا من البيت علمود الاوضاع العشناهة صح بالبداية ضجت بس عادي حقه هذا هم خايف على اهله وخايف عليَّ لا يصيرلي شي من هو يكون بالشغل..

نفضت عقلي اركز بالملزمة وربع ساعة واندكت باب غرفتي، كعدت على حيلي وعدلت شعري التخربط وصحت من مكاني..

-تفضل

انفتحت الباب على كييفها كلش ومن هدوئها عرفتها سبأ، ابتسمت من شفتها تمد راسها من الباب خجلانة اشرتلها بيدي وكلت..

-تعالي سوسو

ضحكت وطبت للغرفة تركض، ابتسمت من شفت وجهها يضوي اول مرة من بعدما عرفت بأخوها زيد متوفي اشوف ملامحها فرحانة وتضحك.. تقدمت عليّ وكعدت على الجرباية مالتي وفتحت شوية من ربطتها السودة بس عافتها على راسها ما نزعتها..

-تَـمني: خير يا طير اشوف الاسمر فرحان اليوم

-سبأ: هههههههه تَـمني هاي شمالج وياي

-ولج احجي احجي سولفيلي تره يكتلني الفضول اذا ماعرفت

ضحكت اكثر وتربعت تكعد عدل على الفراش، بللت شفايفها بلسانها كم مرة وحمحمت قبل لا تكول..

-نوومه

-امممم

-احم

-احجي احجي ولج

-تَـمني انا حامل

-كذاااابة

طفرت من الفراش ممصدكة وهي ويايه تضحك من كل گلبها وتكمز على كيفها، جحظت عيوني بفرح ماعرف حتى شكول وشلون اعبر لزمت ايدها بين ايدي بقوة وكلت من كل گلبي..

-الف الفففف مبروك يا روحي تستاهلين كل خير

-يا بعد روحي تَـمني ما جاي اصدك والله من الفرح انتِ وشمس اول ثنين اجيت ابشرهن

-حياتيييي.. بس اوكفي كلتي لـ تقي لو بعدج؟

-گتله گتله اكيد چا شلون

-يمااااا ولج سولفيلي شصاار وشسوه

-ههههه چا سمعي...

-حبابة اريد تفاصيل فدوة سبأ مو تشربتيني تشربت

-ياا خية سكتي استحي

-اهووو سبأ لعد مو تسولفين لشمس شنو اني وحد قابل

-خايبة مادري شمسه ما استحي منها عبنها سافلة

ضحكت من كل گلبي على جملتها وهي انتبهت لروحها شكالت وصمت حلكها متندمة على حچايتها، ضربت رجلها على كيفي وخزرتها وكلت بضحك..

-احچيلي يلا يلا

**

"ســبأ"

مشتاگة لامي ورهف صار اكثر من شهرين من اخر مرة شفتهن، من بعد فاتحة زيد ما رحت ولا وصلت بيتهم عبن ابوي طردني بس انا ما كلت لـ علي التـقي هالشي مستصعبة اخلي يعرف ابوي طردني بفاتحة اخوي وگوة خلاني اكمل الثالث واطلع من بيتهم..

صارلي ثلاث اسابيع ضبط معدتي تگلب وحالي بالضيم گوة عليّ اطبخ وگوة اتحمل عطور المنظفات وعطر علي التـقي، احس كلما يرش عطر اريد اتقيء وگوة عليّ مصبرة نفسي وساكتة بس بعد الحسيته امس والصار بحالي هو ما سكت على وضعي وكال..

-علي التـقي: شبيچ سبأ وجهج اصفر وتشردين كلما كضيتج؟

-مابيه شي بس تعبانة واريد انام

-احنه متزاعلين؟

-لا

-چا شبيچ انا جاي من بغداد مشتاگلچ صار اسبوعين ما شايفج

-اي.. ادري والله بس..

-بس شنو حاچيني؟

-مابيه شي والله تقي لا تخاف

-شو تعاي

تقرب مني وكض فچي يرفعه يخلي عيني بعينه، بلعت ريگي وغمضت عيوني اجتني النعسة فجأة واحس اريد انام هسة وانا بهالكعدة وهو كدامي دخت واريد انام..

-انتِ مريضة سبأ وضعج ما عاجبني؟ ليلة تكول ما جاي تاكلين زين وهواي تنامين

-لا لا مابـ...

-كومي بدلي خلينا نروح للطبيب

-مابيه شي والله

-كومي خلينا نتطمن

ما عاندته زايد وكلت هي اجت على رجليها خليني اروح اللگالي چارة مليت من وضعي التعبان هذا، بدلت هدومي ولبست عباتي وطلعت وياه اخذني گبل للمستشفى لدكتورة نسائية..

-علي التـقي: سولفيلها على وضعج خاطر نعرف المن تحولچ اذا العلاج مو عدها

هزيت راسي اي وكعدنا ننتظر شوي ودخلونا ما طولنا الحمدلله، دخلت يمها وسولفتلها على حالتي وسألتني چم سؤال تالي كتبتلي تحاليل وكالت اروح اسويهن..

طلعنا انا وتقي رحنا للمختبر سويت التحليل وكعدت انتظر النتيجة واشوفن تقي واكف على ناار، رايح جاي ما كعد على الكرسي ولا استراح استحيت اسأله شبيك فـ ظليت ساكتة واعاين لوجهه كل ساع يذب حسرة ويفركه حيل لو يدور وجهه الي ويكول..

-شو تاخرو

-سبأ: مادري والله

-خاف اكو شي؟

-اسم الله ان شاء الله ماكو شي

-لا لا ان شاء الله اكو انتِ كولي يا الله

-يا الله بس ليش تريدني امرض؟

-خايبة سكتي

سكتت صدگ وما علقت شو استحيت، مرت خمس دقايق اضافية وصاح الموظف اسمي..

-الموظف: سبأ مسعود علي؟

-علي التـقي: نعم نعم احنه نعم

هرول عليه بخطوات سريعة واشرلي اكوم، كمت وراه ووكفت خلفه مباشرةً مغشية وجهي بالعباه واسمع الموظف يحاچي تقي..

-حضرتك زوجها؟

-اي انا زوجها

هز راسه الموظف وابتسم، مد ايده وانطه لـ علي التـقي ظرف وكال ببهجة..

-مبروك عليكم زوجتك حامل

شهگت فاكة عيوني وعلي التقي تخبببل، حط ايده على راسه وكال والكاع ما سايعته..

-ياااا علي ابن ابي طالب صدددگ والله؟؟؟

-الموظف: نعم الله يتمم عليها بالخير

اخذ تقي الظرف منه ايده ترجف وانا بعدني جافلة وما مصدكة السمعته، انهضمت من اندارلي تقي عيونه مغورگة بالدمع وگال بهمس بيني وبينه..

-الحمدلله والشكر چنت شاك.. والكعبة چنت شاك

-انا حامل

-اي اي حامل اي الحمدلله والشكر يارب الحمدلله

ابتسامته من الاذن للاذن وابتسامتي انرسمت ضعف ابتسامته، كضني من ايدي يضحك فرحااان كلش فرحان ورجعني للطبيبة..

-علي التـقي: طبي واستفسري شنو لازم نسوي سبأ گليلها اكو علاج او شي خاطر نحافظ على الجاهل افتهمي منها كلشي ولا تنسين حاجة حبابة

-صار صار

طبيت للدكتورة چن فراشة طايرة من السعادة، انطيتها التحليل وباركتلي وگالتلي اصعد للسونار، سوتلي سونار وكالت مبين عدها انا حامل خمس اسابيع وانا الغبرة مادري بروحي وما منتبهة..

كتبتلي علاجات ومثبتات للطفل ووصتني على چم شغلة اسويها، اسمعلها وظالة بس اهز براسي واضحك للهوا وهي تضحك وياي اظن عبالها مسودنة حتى خجلت من نفسي بس ما جاي اكدر اسيطر على روحي وما اضحك..

طلعت منها وكضني تقي من ايدي مرة اللخ وصعدني السيارة، الطريق كله خذاه يغني ويصفگ فرحان والدنيا ما سايعته، اعاينله واضحك مثل المخابيل وهو يضحك على ضحكتي متونس..

نزلني كدام محل حلويات واشترالي كووومة اشياء الاحبه والماحبه جابه، كلشي اعاين عليه جابه الي واشكال عصاير وفواكه اشترالي واشتره لاهله ورجعنا للبيت..

رجعنا وشفنا الكل بغرفهم فـ كال باجر نسولفلهم وانا ايدته، صعدنا فوگ لغرفتنا ايد بأيد وبعدني ما واصلة للباب ونصى يشيلني وطببني جوه بالغرفة.. افتر بيه طاير وانا من الهبطة والخوفة كمشت برگبته واضحك مثل المراهقات..

-علي التـقي: ولج ماا مصدگ مااا مصدگ

-هههههههه انا هم والله

نزلني على الجرباية على كيفه وكعد بصفي ضبط، حط ايدي بين ايده وقشعر جسمي من صار يبوسهم.. ظل يطبع بوسات خفيفة على بطن وظهر ايدي ويسولف وگلبي يرعد رعد ويه سواليفه..

-فدوة لهالايد.. ولج اروح فدوة لهذا السمار السابينا سبي

-ههه.. اءء.. احم.. اگلك

-لا اگلگ ولا تگليلي سبأ من اليوم شغل بيت ماكووو افتهمتي لو اعيد؟؟؟

-لا لا افتهمت

-تلتزمين بالعلاج وتاكلين زين وتنامين زين وترتاحين زين ولوبة وكومة وكعدة ماريد افتهمتي لو اعيد؟؟؟

-افتهمت افتهمت

-بعلي يا سبأ لو افتهمت بيج متعبة روحج وانا مو هنا اللعب بيج خلقة والله

-لا لا صار هذا هو ما اتعب روحي والله

-عفية

كالها مبتسم ومسح على راسي بين ايده وتمدد بمچانه، جر الشال والعباه من راسي وذبهم بالكاع وجرني عليه وشمرني على صدره.. ارتاحت روحي من ثبت راسي وصار يلعب بشعري ويسولف وياي بهدوء..

-اريدج تنزعين الاسود سمرتي

-تقي لا انا..

-لا تكليلي حزينة سبأ، الحزن بالگلب مو بلون الهدوم.. انا ما جاي اگلج نزعي عبن عرفت بيج حامل انا صارلي فترة اريد افاتحج بهالموضوع ومتردد بس بعد ماكدر اسكت اكثر اتمنى تنزعين الاسود وترجعين لحياتج الطبيعية

تحسرت ساكتة ماعرف شكول، خلل اصابعه بين خصلات شعري وأردف بهدوء اكبر..

-الاسود ما يرجع الميتين سبأ وانا ادري مهما تكون علاقتج ويه اخوچ مو زينة اعرفج تحبينه وزعلتي على موته وعشتي بحالة حزن بس كافي.. كافي يا عيوني خلينا نرجع بهجة هالبيت ونسترجع ايامنا الحلوة

-ان شاء الله

ابتسمت من سوه حركته التعودت عليها كض وجهي من فچي ورفعه عليه وباسني بوسة دافية، ابتسمت مغمضة عيوني ولا ارادي عصرت قميصه بين ايدي من گال بصوت هامس لعب بحالي واحوالي..

-احبچ ام فلان

شهگت بكتمة بدون صوت.. شهگت ولزمتني گحة بنفس الوكت بس ماكدر اطلعها، ماريد اطلعها واخرب هاللحظة النتظرتها شهور.. يا بخت حالچ يا سبأ هاي اول مرة يكولها! اول مرة يكول "احبچ" ولج يااا كبر حظچ وعلي التقي يحبچ..

-چنها ما راح تجاوبنا ام فلان

ضحكت مغمضة عيوني ماعندي جرأة افتحها ولو فتحتها اعرف راح اتهرب منه واطفر فـ نويت ابقيها مسدودة واسوي الشي الصارلي عمرر اتمنى اسوي واعترف بي.. ذبيت نفس وقويت نفسي ونهضت روحي منه على كيفي، شجعت نفسي زايد وفتحت عيوني ببطئ وحطيتهم بعيونه العاشگتها، بلعت ريكي وكلت من غمج روحي من كل گلبي وعقلي وخاطري..

-ام فلان عاشگتك مو بس تحبك يا روحي

-لااا بشرفچ!

-هههههه

-هههههههه بت مسعود المسعور اليوم شيخلصچ مني

-ليش ليش شسويت انا

-انا اعلمچ شسويتي تعاالي.......

ضحكت من غمج گلبي وگضينا الوكت سوه، ظل للصبح يداهر ويضحك ويسولف ويتحارش وعلگلنا مسلسل احنبي وجبرني اتابع وياه خاطر يجي الطفل يحجي اجنبي مثلهم..

-علي التـقي: اريدن فرخي يجي اشگر وعيونه زرگ

-سبأ: منين يجي اشگر وامه وابوه چلحان

ضحك بصوت عااالي كلش ودفعني من چتفي دفعة خفيفة، ابتسمت وياه وبساع غيرت الموضوع متندمة على حچايتي وظلينا نسولف وبقت سالفة تجر سالفة وضحكة تجر ضحكة لحد ثاني يوم..

بشرنا اهل البيت بحملي وبشرت تَـمني وشمس وفرحن مثل فرحتي واكثر.. مشت الايام هادئة نوعاً ما ماكو مشاكل وراسنا بارد صح وضع البيت بعده خانس ومخنطل بس احسن من الايام الفاتت..

وبيوم مغربية اجاني علي التـقي وكال خلينا نطلع گبل لا ينزل واجب كيفت وركضت ابدل، طلعنا واخذني لمطعم مرتب كللش ديكوره فخم والكاعدين بي همين هيج، توترت وظليت اعاين للبنات هنا يخبلن كلهن حمر وزرگ وهدومهن حلوة حتى اللابسة عباية هم مهتمة بنفسها كلش ويبرجن برج، استحيت من نفسي وشكلي وتندمت لان رضيت اطلع كضيتها كاعدة ومغشاية بالعباه وهو ناصب عليَّ..

-علي التقي: خايبة بداعة الاعزاز وخري العباه من وجهچ

-سبأ: اي اي هسة

-ولج وخريها

-اي شبيك والله هسة اوخرها

هديتها من ايدي ونصيت عيوني للدفتر الگبالي "المنيو" دفنت وجهي بي وظلت عيوني تطاير منا ومنا اعاين عليهن واللوم بروحي شلون اريدنه يبقى وياي وهذن اللعابات گاعدات گباله..

-علي التقي: تؤ استغفرالله

-شنو

وخرت الدفتر من وجهي اعاين عليه لگيته يلوب ويدور بجيوبه، هز راسه معترض وتحسر وگال..

-موبايلي نسيته بالسيارة خاف يتصلون بيه من الدوام

-تروح تجيبه؟

-اي يلا نطلع سوه بس اجيبه ونرجع

-خوش

گمت وياه طلعنا من المطعم ونويت اگله نغيره لان ما مرتاحة كلش، رجعنا للسيارة فتحها ومد جسمه ياخذ موبايله وداس الدگمة يضوي الشاشة يشوف، تقدمت عليه جاي اريد احاچي على المطعم وسكتت من انتبهت لحاجبه ينعگد وملامحه تتغير..

-سبأ: شنو شبيك

-هاي امي

-شبيها؟

-متصلة عليَّ 17 مرة

-يا ستار خاف صاير شي تقي!

-مادري.. مادري يا علي دخيلك.......

يتبع 👑.....

━━━━━━ ♛ ━━━━━━

الصار بسلوى هو من اصعب المشاهد الاكتبها صراحة من بدت الرواية للان كُلش استصعبته وچان ثگيل عليّ وبچيت شوية هم يمكن لاني متعاطفة ويه حبيبة ومشاعرها وكُلش مقهورة عليها 🥹

وانتو شنو حسيتوا من قريتوا؟

++فرحتي بـ سبأ وتقي 🥹💕💕🦋🦋🦋🦋🦋🦋

بارت الجاي ان شاء الله..... تحضروا 🤌🏻