تحميل رواية «يا أجمل الوحوش» PDF

التصويت + التعليق بين الفقرات لُطفاً

يَـا أجمل الوحوش

- رُسل فَهد

....

و يبقى النزف للأبد مَا ينشف صوابي

أنا حياتي أنتهت

بيد أقــرب أحبابـي

- رُسل فَهد

....

" عالية "

رحمة : يمة علاوي يگول اكويلي الدشداشة ما يريد القاط

ام سلام : يدلل امشي كعدي العروس الفوگ تخبز

حتى نصب الغده و نروح

آريج : عمة منو يگول جدة تجي معوگـة

ام سلام : تجي غصباً اعليها جا ملچة حفيدها و إذا ما اجت صدك اخلي عمار يصول عليها صولة الفرسان

أباوع لوجه آريج خازرتني عمتي اول ما شافتني عوجت حلگها و طلعت من المطبخ بيدها دشداشتها الهَاشمي

طلعت آريج يم باب المطبخ تتلفت تعاينها راحت لو بعدها

دارت وجها علية و غمتني بأثنين اديها

آريج : حسافة عليج ذيج الليلة و أنا كاعدة احف و اسوي

تاليها هيج تجازيني خايبة انتِ مو مال عيني و آغاتي

عالية : عود صدگ راح يملچ

آريج : طبعاااااً جا عمتي و حطت شي بـ بالها شلون ما يصير و أختنة بالله خوثة مابيها حظ طبج طووووب

عالية :ولج أنا بچيت من ضربت أمه وهو يگلي تبجين عليه

يعني لسه ما ناسيتة

آريج : جا اكيدددد هو هسة يشك بكل شي انتِ تسوي و النوب انتِ ما مقصرة تصدي كل ما يجي شلون ما يفكر هيج

المهم شوفيلج ثوب حلو لان اول وتالي ياخذوج ويانة

عالية : ما أروحن شني شعندي

- مو بكيفج البيت فارغ فرد مره ما يخلوچ

- شني ما يخلوني من راحوا يخدمون بالموكب مو يرحن للسوگ و يعوفني وحدي

آريج : ترى من صالحج ما تضلين لان منا و غاد حتى رفجان يطببن عليج في سبيل يخلصن منج

عالية : ما يودوني لامي

- تحجين عشرة بالشهر انتِ تدرين لو لا أنا روحي شايطة اكثر منج

رحمة : عاااااالية .. يالله امشي خبزي اخوتي راح يجون

ردت اشرد من أفكاري و أصعد فوگ أخبز صعدت المعجنة وياي

شغلت التنور و عاينت من فوگ على سطح بيت أهلي ما تبين منه غير الراية لان بيت زِناد اعلى من بيتنة بشوية

اخبز و أنا ما ادري بروحي غبية لو صدك ما اله بگلبي مچان

احس بروحي مقهورة اعلى روحي و بنفس الوكت گلبي ما يرف دوم عليه

اتخيل امه تهدني و تعوفني بحالي و يوديني يم امي

اريدنة يملچ و ارتاح

و من أعاين غرفتها و غرفتي و شراح أعاين ورا ما يتزوج

تضل حسبة تجيبني و حسبة توديني

بين سالفة و سالفة عاينت روحي مخلصة معجنة الخبز كلها

نزلت الصينية و أنا شايلتها على راسي لگيتهم جايين و هن يصبن

اخذ خالد من الصينية خبزة و الرحمة اخذتها مني حتى تثرد الهم

صعدت فوگ ما لگيته بالغرفة عرفتة بالحمام حضرت هدومي

و صاحتلي آريج نزلت الها

عالية : صحتيلي

آربج : نظفي وياي المطبخ يالله تسبحين ما تعاينين الباچة

هوستها شكثر هم ترجعين تزفرين

بقيت واگفة يمها و ضِجت لان انا متعودة أسبح اول ما اخلص خبز

صَبن الهم و و هوستهم و هم ياكلون كل اثنين بموضوع شكل و نقاشهم بصياح صبتلي آريج يالله راحت تاكل اكلت و بديت اكف بالهوسة الموجودة بالمطبخ و احس روحي بغير عالم شوية و اجت

آريج يمي تعزل مدت ايدها تاخذ الجلافة مني

آريج : ما ردتج تسبحين حتى أكف الجهال و أعرف شلون

أرتبج أذا ما خليتهن يشحطن أنا معَتـبة

عالية : ترى والله ما أروحن شعندي خالة ولد عمة بنية

آريج : لا مرت العريس يحظي دمشي روحي أنا متأكدة

عمتي لو وحدة خطبتج عمتي تجي تقنع بعمي يقبل

و تطلگج من ابنها في سبيل بت اختها ترتاح

عالية : بالعافية عليه و عليهن

آريج : لا والله بالعافية عليه أنا على هيج وحدة ثولة و فاهية ولج أنا سلام مرة تعاركت ويا أمه حتى تحرگ گلبي گالت لاختها أريدچ تطيني مره لسلام ما مرتاح

أنا وگف الها أعله الدرج مخوصرة و ولدها كلهم كاعدين

گلت لاختها إذا ما تردين بتج دزيها لهنا وحگ داحي باب خيبر أردنها بحضنج جثة محترگة ببدلة العرس و أنا أرعد و أمه ترعد النوب صعدني يسد بحلگي گوة عگبها أخذني لايران يراضيني أجيت لگيت امه نايمة بالفراش

عالية : إذا هيج تحبهم شكو تزوجهم

آريج : لا ما تريد خيرها لغيرها كون كلهن من صوبها

و بنات خواتها والله أنا عشگتة چنت أعاينلة من نجيهم للقرايات أنا أجي وي أمي خاطر أعاينة و مره أشوفنة و مره لا

تالي مرة أجينة لبيت عجيبة ام امجد و مرينه أنا و امي من يمهم هوَ عاينلي و غمز عاد أنا ضحكت و كضيت عباية أمي

وره چم يوم أجة خطبني و ملچني أموووتن عليه و يموت عليه بس لسه يعيرني بذيج الضحكة يگلي گلت أغمز و إذا ضحكت موافقة و إذا دارت وجهة و راحت أعوفنهة

عالية : ههههه شكد حلو

- گتلة طبعا أضحك چـا أخليك تروح لغيري مسودنة

خلصنة المواعين گوه ردت أصعد و آريج تجرجر بية ما تخليني لحد ما شغلت بخور و صعدنا طبت بغرفة رحمة الدنيا مخبوصة كلمن تجيب غراضها و تجي على مرايتها

رحمة لافة شعرها حتى ينبرم و سلوى مرت إسلام واكفة تصبغ بشعرها

و جوجة يا علبة ظلال تعاينها مفتوحة تخلي لعيونها منها

و امها تضربها و ما تتوب

سلوى : و لسة واگفة ما ترحين تنيمين السچينة بگلبة

رحمة : السچينة بگلبج كون چا طبعاً يملج و يتزوج ما يضل كاتل روحة أعله هاي الخلقة و هي تتماوع عليه فوگ ما سترها

آريج : انجبي انتِ و شلج غرض بهذا الحجي ترى بعدج بِت بيت صمي حلگج يالله

عوجت حلگها و ما جاوبت

آريج : و انتِ روحي سبحي و تعاي يمنه هنا

طبيت للغرفة هو متمدد على الچرباية بيدة التليفون ، التليفون مشتغل بس هو غافي فتحت باب الكنتور فَز بساع عَاينلي أخذت دشداشة من الجديدات الما تهنيت بيهن ، طلعت و هو داير وجهة و سَد التليفون

رحت يمهن وحدة تسوي بشعر الثانية و النوب تمكيجن

رحمة خربت مكياجهة برسمة الكحلة و راحت غسلت وجهها كله

بين حاجة و حاجة صار العصر و بدت عمتي من جوه تصيح لولدها

- يالله كلمن يجي ياخذ هدومة و هموّ أديكم ما ضل وكت

راحت سلوى و أجت بيدها ثوبين

- هذن آريج الگلتي عليهن أنا سمنت ما يطبن بية بعد

وكفتني آريج تقيسهن عليه و رحمة خازرتني أختارت الي الزيتوني أحلى من النيلي

رحمة : أكلج ترى المفروض ما تروح بس رجل خالتي خابر أمي گال الها إذا ما نعاين مرته صدگ راضية ما نطيها

حسبالهم الماخذينها احنه ينحلف بـ بختها و شرفها

عالية : و لا أنا ميتة أعله أخوج أصلاً فرحة گلبي ها كبرها

رحمة : ترحيلة فدوة

فرشت شعرها سلوى على الطبلة و رحمة تكوي شعرها بالأوتي

رحت للحمام لبستة و اجيت يم آريج غمزتلي

آريج : تعاي كعدي على الكرسي خل أعاين شعرج شيصير

رحمة : اكلج لو لابسة ذاك احسن عايني شلون دلع

- لا شني چي طالعة حلوة ترديها تنزعة

مشطت شعري و هم آريج كوتليا و هوسة الولد فوك وهم يبدلون

و يعيطون وكفت أعاين بالمرايا شعري من انكوه صار اطول و أنا ما اريد احد يعاين هلكد كاشخة حتى أغورهم أنا ما اريد اغور آحد

عالية : آريج أنا أريد كصيبة

آريج : يمن كون گصبوج

وكفت تمكيج روحها و ما تسمعلي لحد ما شافتني صدك ما اريد شعري يبقى محلول كعدتني و بدت تظفر شعري من فوگ و نزلت گذلة

سلوى : خايبة جوجة هسة ما ترضى تسوي كصيبة فرنسية

عالية : أنا احب هيج

اريج بيدها سبريه اللمع لازم نشتري گبل الهدوم بأعراسنه و رشت اللمع على الكصيبة و لزمت وجهي تجرلي كحلة و عيوني انترست دموع

آريج : عايني عيونها خضر بس طوخ ما يبينن

عايني الكحلة شلون سوتهن

سلوى : خبيثة چا ليش ما جريتيها الي هيج

- انجبي هي اجت بيدي عدلة

رادت تحطلي مكياج بعد ما قبلت مديت راسي من الغرفة عاينتة

طِلع لابس دشداشة بيضة و بيدة ساعتة و محفظتة و تليفونه طبگ الباب و نزل يجاوب احد دگ عليه

حطيت الشال على راسي و رحت للغرفة شمرت الشال و حطيت من العطر مالته الأسود لان اقوى و أطيب من العطر الوردي

أجت اريج بيدها هدومها و عبايبتها

اريج : همي ايدج يالله خلصوا لفي الشال شلون ما چان و غطي روحج بالعباية

عالية : بيا سيارة نروح محد منهم عندة سيارة !

اريج : سلام راح يوصلنا بسيارة زِناد و الولد يرحون وحدهم شلته غرض بيهم

طلعت عباتي من الكنتور و الشحاطة الجابتها الي آريج

هي ما توالم وي الثوب بس ما تبين جثير الثوب نازل عليه رفعت الدلعة

و عدلت الثوب من جهة الخصر و وگفت اريد الم الگذلة حتى اجيب الشال ، فزيت و خليت ايدي على صدري من أنفتح الباب

طَب هوَ متجه للچرباية بَس وگف بالباب من عاينلي واگفة

أجت عينه على طرف الثوب لحد ما صارت عينة بعيني

أعاينلة جثير طالع حلو بالدشداشة هَاي و بَس الشوارب تلمع بوجهة

درت وجهي عنة و أنا احس من التوتر معدتي واحد يمردها بيدة

اريدة يوخر حتى اخذ الشال على الچرباية وكف يفتح محفظته

و يحسب بالفلوس ضليت لازمة گلبي لا يطلع بيهن نقص

اجيت جريت الشال و وگفت البسـه و اخذت العباية و هو بعدة بالغرفة

لزمت العباية و وگفت ارشلها عطر قبل لا البسها عاينلي بطرف

عينه و صاح بوجهي

علي : شني ترى العطر وصل لبيت زِناد

هديته و قَبقته لبست العباية و عاينتلة قبل لا اطلع

عالية : شگـد أكرهك

طبگت الباب و نزلت بس بقيت خايفة اتلفت لا ينفتح الباب

لگيتهن واگفات بالمطبخ منتظرات سلام و الولد يصيحون على علي ينزل

قبل لا ينزل طَب سلام يصيح يالله

طلعنه و هو و مرته وراي

سلام : غطي وجهج يالله أنا مو كتلج هناك

يالله تلغمطين وجهج

آريج : شني هناك وين الحگ و انتَ ما تحاسب اختك كدرتك بس عليه والله عمي خوش

سلام : شلج غرض بأختي ابوي موجود ويحاسبها

اريج : أنا هم ابوي موجود

- أنا رجلج لج اكسر راسج هسة أنا

عليمن أحجي بالليل أعلمج

كعدت بحضن آريج لان ماكو مكان بيت البنية مو هواي بعيدين

وصلنة بساع و چادر الزلم منصوب بالشارع و الهوسة للضالين

البنات كلها بدلات الوان و واگفة تعاين بالباب طبيت وي أريج امشي وراها اكثر من بتها جوجة

طبينة و كلها تسأل عمتي جا حجية رهينة ما تجي لملچة حفيدها

و احنه بالغرفة وهن ينزعن العبي صاحوا اجت العروس و تلگتها الهلاهل و الگولات و الـ بالغرفة كلها تعاينلي أنا مبتسمة

بس كل هلهولة أحسها طلقة تضرب گلبي بلعت ريگي و درت وجهي انزع العباية و الشال

بقيت كاعدة بالغرفة ما طلعت و آريج تطب و تطلع عليه

و كامن يطبن للغرفة يرعدن و يحجن ليش جدة ما تجي شيخلصنا من

ابو البنية و النوب صَبوا عشا و أنا بعدني كاعدة بمكاني

اريج : جا لو ادري ما جايبتج امداج و طاح حضج

هي تحجي و لازمة وجهي تحطلي حمرة

عالية : ما يلوكلي اللون الأحمر

اريج : انجبي وين اكو زيتوني و احمر حطيتلج جوزي

وكفت يم المرايا أعاين مبتسمة جنت اتعارك وي امي حتى اخلي حمرة و دكلي امي طالعة جنج قرقوز

هن يهوسن و يصفگن بره جرتني من ايدي آريج طلعت وياها بس گلبي

يدك سريع جثير خايفة النوب من گامت كلها تعاينلي ردت أختفي

عاينت للعروس طالعة حلوة و بدلتها تجنن بس هي خازرتني

حسيت بالأمان من صاحوا أجت الجدة رهينة و كلها گامت النسوان الكبار حتى يسلمو عليها اول ما كعدت جدة و خلصن مباوس وياها اجيت يمها تعاينلي مصدومة بستها تدنت و كعدتني يمها

رهينة : عاف هذا الشَحم و الحِسن و يريد

يتزوج طاح حظك يعليوي

عالية : طبة مرض جدة

- مرض بگلبج ولج

صبوا الجدة عشا ما رادت

رهينة : مريضة أنا والله لو ما زِناد يگول ما أروح إذا ما ترحين ما أجي سكري صاعد

صاحت لعمتي اجت يمها

ام سلام : گولي عمة

رهينة : خَافن ينجاب طاري عالية لا تهيعين هي مَرت علي

گولي أخت شريك و بَس دام أبنج على گلبج أنا ما راح اخليها وقف لخلقكم تكربين عليها انتِ وبنات اختج

ام سلام : تسوين فضل والله أنا اصلاً سألتني عنها

ام غانم گلت الها لا ما متزوجة

رهينة : خسرانة التشتغل ضدي ترى

ام سلام : محد مشتغل ضدج كل ما يگرب الها ابني تصدة

و ما تريدة عايني كشختها و فرحتها بملچتة

گرصتني جدة فركت مكان الگرصة متوجعة

رهينة : أنا الله مسلط عليه بس الخوثات

أخذن هدى يم باب المطبخ حتى يعقد عليها

الشيخ و الهلاهل بكل دقيقة تعلى اكثر رحت للغرفة من حسيت عيوني دمعت مسحتهن و وكفت يم المرايا اهفي بوجهي حتى تخف الحرارة

جانت وحدة واگفة تخابر و تبچي ما ادري شبيها

اشرتلي اطلعي من الغرفة خفت منها و طلعت اعدل بثوبي

ويَ ما أريد أروح يم جدة صار صوت الهلاهل عالي كلش و أعاينلة طَب

امه تلگته باسته و هو راح لجدة باس ايدها و راسها جرت ايدة تحاچي

وهو شَاورها و جدة عيونها تدور عليه معصبة

وخرت البنية الگدامي طَبت تدور على أبنها و أنا صرت بالمقدمة

جابولهم الحلقات و الكيك هو يستحي ما يرفع عينة لان كلها

النسوان واگفة و عمتي تمشي وتصيح بلاية تصوير مشكولات الذمة

رهينة : عالية تعاي يمي

من گالت عالية رفع عينة يعاينلي و الحلقة مالتها بيدة

أجيت كعدت يمها بس احس بروحي مختنگة و كل ثانية ابلع ريگي

ادية ترجف ضميتهن جوه رجلية حتى ما يبينن جده قربت راسها

على أذاني و اني گوه اسمع صوتها من بين الهوسة

رهينة : تبچين ولج ما تردي

بقيت ساكته ما جاوبتها اباوع لامة اكثر بشر فرحان تصفگ

و تهوس بصوت عالي

گامَن يصيحن " حِبها ولك حِبها لَتخاف من أمها "

اجتي امها يَمة بَاستة

- أنا عندي علاوي أعز منها بَعد بوسها و اخذها حلالك

أعليمـن تخاف

حسيتهم صدگ فرحانين و فرحتهم صدگية و أنا طرف ثالث

رفعت عيني أعاينلهم لان كلها تعاين و متحمسة أبتسمت بس شفايفي

ترجف احس روحـي مفضوحة جثير

مَد أيدة على خدها و بَاسها ..

يبوسها و يعاين عَلية لَحد ما طِلع أحس روحي فَحمت و الدنيا

كلها انسدت بوجهي فوك ما هي مسدودة

صارت هوستهن و هن كلمن تدرو على غراضها حتى تروح

حجت المره الكاعدة كبال جدة

- ام يوسف عيني هاي حفيدتچ ما شاء الله

إذا نجي نطلبها تنطوها والله ابني مهندس

رهينة : ان شاء الله أحاجي امها و اخوها و اردلج خبر

هي بِت جعفر ابني المتوفي

- اي سألت عنها ام علاوي سولفتلي

- اي تدللين

اشرتلي آريج يالله راح نروح

بقت عمتي و رحمة و احنه طلعنة لان جدة ويانة زناد وَصلنة

و علي واكف يمه يسولفون على الضابط الي عليهم

زناد : مالك غرض بي كمل واجبك و رِد بمكانك انطمر

لحد ما يخلص الواجب

علي : ترى هو اصلاً شاد وياي لان ابن عم الضابط

الطگيته انتَ من وره شريك

زناد : عوفة يغثغث بَس من يمصخها خابرني

رهينة : وينها عالية صعدت

- اي جدة

رهينة : عاين ولك دامك ملچت اليوم عالية خطبوها مني

بس أحاجي امها و شريك تطلگها خلي تشوف حياتها

علي : منية هاي الخطبتها

رهينة : و انتَ شلك غَرض ام راهي ابنها مهندس

- ما تعرفين تگليلها متزوجة

زناد : انتِ بكيفج جدة تخوطين و تخربطين

علي : ضمي شعرج انتِ يالله

عالية : معليك

گـضينة العُمر نِحلم بيك

و صفَت بـوساتنـة لغيـرك

....

" جُمارة "

ردت أحچي دگت عليه أمي غمض عيونه بقلة صبر

جُمارة : افتح سبيكر خلي أسمع صوتها مشتاقتلها

فتح سبيكر و أجه صوت أمي بدون حتى سَلام

تغريد : عود شنو تسويها شغلة عناد أنا مو گتلك اريد جُمارة

زِناد : باچر

- رهينة تدري بعمايلكم لو كدرتها جانت بس علينه

تدري بشيخ عشيرتها يعرف بت اختها مخطوفة

سد السماعة و أشرلي أمشي ليگدام وهو يحجي وياها ما يجاوب غير

بـ اي ، اي و سَده

وكفت و درت وجهي عليه اطگ بأصابيعي هو يباوع لأيدي

زِناد : ليش وگفتي

جُمارة : اريد أحاجيك بموضوع بس أخاف منك

- تخافين مني ليش ، خافي من الدنيا كلها و أمني يمي

أبتسمت و مسحت وجهي بأثنين اديه

جُمارة : أكو موضوع محيرني هواي

- و هوَ ؟

- شوف لي لا تاخذ غير نظرة على روز هي كلش فقيرة والله

زِناد : فضيني بابا جُمارة

جُمارة : فضيني ؟ يالله حتى ما أحجي

مسح شواربة مبتسم و ضغط على عيونه ، باوعلي

زِناد : گولي عيني

جُمارة : اكو واحد جان يدك على رقم روز هواي

فـ اني حافظة رقمة يعني هي تليفونها انكسر و كلشي

راح بس اني ورة ما انخطفت خليت رقمة بتليفون جدة

ما لگيته وي الارقام بس من دكيت كال ها جدة

زِناد : خالتج ما تحجي ويا بس هو يدك عليها

مسحت وجهي و باوعت للبيت

جُمارة : لا بس هو يدك عليها فـ كلت شلون يكول هلا جدة

و هو واحد غريب و أني من يومها أفكر

زِناد : خوش تسترين على خالتج

عوجت حلگي لان من عيونه احسة كاشفني مدري يدري بالموضوع

و ما اعرف اني شنو السالفة

وصلنه للبيت طبيت و هو ما جاوبني گال في أمان الله و راح

لكيت جدة كاعدة عينها على الباب و تسبح طبيت شمرت هدومي و تمددت على الجرباية و بيدي علبة الخرز

رهينة : ما تسلمين ولج عمت عينج كون

جُمارة : دايخة بحفيدج

شمرت عليه باكيت العلاج

رهينة : باعي ولج لا تتغزلين بي گدامي لان وحگ هو علي

اكضج اخنگج بمچانج

ابتسمت هي ما تشوفني

جُمارة : الصبح إذا خابرتي و اجه كعديني على الريوك و إذا ما اجة ما اتريگ

رهينة : بسيطة ولج أنا اعلمج

نمت براحة على خبر روز ، ما ادري شلون بس المهم رجعت

جنت بعالم الأحلام و فزيت على صوت جدة وهي تگعدني رفعت راسي

لگيتها كاعدة هي و زِناد يتريگون حطيت الشال على راسي و طلعت اغسل وجهي لان مطفية

طبيت للغرفة گعدت يمها سوتلي لفة گيمر من يوم الي عرفت احبة لحد هذا اليوم توصيهم الصبح يجيبون و صَبتلي چاي

رهينة : آمس دگلي لو زِناد لو ما أتريگ

رفعت عيني لگيته كاعد يشرب چـاي و بيدة سچينة يبرد بيها

جُمارة : اي صحيح گلت هيج حتى اضوجج

رهينة : أعليمن أكيف هو أنا بدون شي

ما يحلى ريوكي إلا ويا

جُمارة : چا ديري بالج لا يعلگ سكرج

ردت اخوط الچاي مد ايدة على الخاشوگة طلعن

اثنين شمر وحدة بالصينية

رهينة : والله عشر رجولة ما يگدرولج انتِ

جُمارة : شبيك تباوع صفح

زِناد : اكلي يالله

جُمارة : لتخاف أني مو مثلك حتى أخذ اثنين

ابتسم و هو يشرب چـاي ورجع يبرد بالسچينة

رهينة : لا تحاولين ما تلگين عليه لوله كامل و الكمال لله

جُمارة : جدة انتِ شنو شنو حسرة عليه افتح حلگي بحچاية عمي شواية الله على فضة اني محد مشحطني غيرج

هو يضحك بصوت عالي و جدة تبوس بي

رهينة : أنا لو بيدي ما أزوجة لان محد

تستاهلة هذا ابو طول الحلو

زِناد : افاااااا جدة ترى هاي جُمارة هاي

اكلت لكمة و شربت چـاي و حطيتهن بالصينية زعلانة

و كمت من يمهم كعدت على جربايتي

رهينة : ام بطن تشبع بطنها گبل لا تزعل

زِناد : تعاي عيني تعاي يابة تعاي أكلي يالله

درت وجهي عنهم و عاقدة حواجبي فتحت علبة الخرز و طلعت الخيط البيها كصيت خيط چبير و كعدت اسوي سوار

زِناد : تعاي حبيبتي يالله جدة تتقشمر وياج

رهينة : عوفها شني تتوسل بيها

- جدة تزعليها صدگ تحجين

اباوعلها تأشرله عود اتشاقة وياها تريد تضوجني

رهينة : چا و اذا زعلتها و ياهي هيَ

جُمارة : مرت الشيخ

رفع راسة يضحك و هو يبرد السچينة باوعلي

زِناد : والله و كفو

رهينة : بيدي أنا اخلي ياخذج لو لا

جُمارة : جدة ترى اخلي ياخذج لدار المسنين ديري بالج مني

و ما يتحاسب لان هواي اعتنة بيج

هو عاض شفتة گوه كاتم الضحكة وكف ينكث بدشداشتة من البرد مال السچينة ضمها بجيبة و يباوع لجدة صارت بارود

رهينة : أنا اليوم اروحن يم فتنة أخيتي الظاهر حتى چبيري

بعد ما يريدني لو يريدني صدگ جا كسر عظامج

زِناد : يالله من تردين ترحين خابري ولاء لان أنا طالع

جدة ضربت رجلها و عضت أصبعها هو خاف عليها لا تنجلط

اجه حضنها يضحك وهي زعلانة يبوس بيها ما ترضى و من گد ما حافضها ما يتعب فتح محفظته انطاها 25 رِضت

و اني اكول عليمن طالعة

جُمارة : اصرفي جدة بخير رجلي

رهينة : ولج أنا بصلافتج و عرامتج ما مرت علية وحدة عمي ترحين فدوة لتغريد و صلافتها انتَ ما تعاين

طلع من محفظته عشرة و يأشرلي بيدة تعاي أخذيها

زِناد : لايگتلها جدة حتى العرامة لايگة

اجيت يمة رفعت حواجبي اثنينهن لجدة

جُمارة : عندي أربع الألف تأخذهن و تنطيني خمسة ؟

لان خاف يضيعن مني

ضحك و هو يأشرلي يالله رحت طلعتهن من الجرارة أخذهن من أيدي

انطاني خمسة و عشرين أبتسمت

زِناد : أنا عندي نفس الكائن بس وحدة جبيرة و الثانية صغيرة

كعدت اسوي أساور حتى جدة سويت الها واحد و عليه اسمها بس اول واحد سويته اله و ضميته من يجي يأخذني لامي انطي اله

سويت الخرز مال أسواري و سوارة نفس اللون

حتى امي و روز سويت الهن

اجة العصر أخذ جدة بالكوة لملچة علي ابن عمي عمار

ردت اروح وياهم بس ما خلاني يكول بالليل اخذج لامج حتى سويت روحي زعلانة و ما تأثر حياة بقت كاعدة يمي تسولف

صاحلها عدنان كالت تعاي يمي بالمطبخ

جُمارة : مو زِناد كاللكم سافرو و اني أجملكم للعلاج

حياة : ما ادري حاير بالطلايب عدنان و أنا هم تعبت

طلبته هاي السنة من ابو فاضل ابو راس الحار كون ما يردني

جُمارة : ديري بالج لا يحشونة و يتزوج عليج

حياة : جا أنا من زمان حاطة دمي بشيشة وحاله حال عمامة و ابو على يوم يطبلي بيدة وحدة

ودتلة صينية الاكل و اجت تخلط أعشاب بالكلاص حتى تشربها و هي جاي تشرب راد مي اخذتله كلاص المي

و أنا بالمطبخ سمعتة يحاجيها بعصبية بس مو بصوت عالي

عدنان : و التالي وياج أنا من شوكت حذرتج من هذا السم

حياة : صارلي جثير ما شاربة منه

عدنان : جيبي جيبي

مديت راسي اباوعلة اخذ الكلاص منها و دمعة

خاتلة وره الدرج تباوع الهم اجت حياة الدمعة بطرف عينها بس ما تريد تبين وكفت تكف المطبخ رحت اخذ هدوم حتى اسبح و اجيت يم حياة

اريد اكللها تسويلي دگمة الدشداشة فزيت و ختلت بالممر مال الحمام

من شفت عدنان حاضنها و يبوس بيها كون تنزل دمعة

حياة : أنا شربنة ترى أعلمودك يصيرون عندك جهال

عدنان : انعل ابو الجهال تروحين تتسممين تموتين النوب لا أحصلج انتِ و لا أحصل الجهال

كامت تبجي و هو يسكت بيها اخذها و صَعدها فوگ

دمعة : ميو

نزيت بخرعة خليت ايدي على گلبي لگيتها وراي

جُمارة : وسل و مرض

دمعة : ههههه هسة أنا احبة و أراقبة انتِ ليش

جُمارة : حتى خاف تفوتج لقطة اسولفلج عنها و أجلطج

دمعة : ما اتأثر اني وين ما ينحطون الحلوين اروح و إذا أكلج هالايام عيني على زِناد صَح مو حلو و محد تريدة

بَس الشكل مو كلشيييي اكو أشياء اهم

جُمارة : اكلييي قندرة و لا تجيبين اسمه على لسانج على أساس شلون راح يگلبج ايععععع

دمعة : عابتلج ششفتي منه ترى تستاهلين الأحلى دكتورة شكدج تأخذين واحد مشوه

دفعتها قوي وهي تضحك بخباثة

جُمارة : ترحيلة فدوة افتهمتي لو لا و ما الج غرض بيه إذا مشوه شكو حاطة عينج عليه

دمعة : يعني أنا أريده لليلة وحدة مو العمر كلة ابقى ويا

لا يمه اوييييي

جُمارة : لا هاج حبي روحي عيشي ويا

غميتها و طلعت من الممر رحت لغرفة جدة منهارة و هي هم اجتي ضايجة اخذت هدومي و رحت اسبح مشطت شعري و خليت الشال على المخدة لان جدة ما انحدر شوكت تطبب زِناد للغرفة

اجيت أقيس لجدة سكرها

رهينة : شمالج مطرگة الگصة لان ما رحتي

- لا

- يغار عليج ما يرضى ويريد يملچچ طگت حوصلتة

- سكرج عالي جدة

انطيتها علاج و نامت شوية و دگ تليفونها زِناد اخذته و رحت

كعدت على الچرباية فتحت خط

زِناد : شلون صرتي جدة

جُمارة : سكرها صاعد و اخذت دوه و نامت

زِناد : ها حبيبي شلونج

- زينة ما أخذتني لامي

- ما دام ماكو و انتَ شلونك يعني زعلانة

- لا

حجيتها و سديت التليفون طفيت الضوة و تمددت دگ مرة ثانية ما جاوبته بعد و عيوني مسحتها مدري شبية لسة كلام دمعة يحفر بگلبي

و متعبني وجع راسي و افكاري المحدودة الي ما تخليني اتذكر احد

صَبو عشا و ما طلعت و لا كدرت أنام اخذت تليفون جدة سويته عام لان جنت مسويته صامت لگيته داك بس مرتين طبعاً ما يكلف روحة

اجيت ارجع التليفون يم راس جدة أنفتح الباب صار الضوه مال الهول بعيني و انفتح الضوه ركضت اخذت شالي

باوعت بعصبية اريد اشوف منو و اني البس بالشال لگيته زناد

جُمارة : ما تدك الباب عود شنو تچفت علينه هيج

ولو انتَ ما عندك محرمات شحجي وياك

بقى صافن بوجهي ملامحة بين العصبية و الابتسامة

كعدت جدة مخترعة تصيح شكو

زناد : ماكو شي شلون صرتي جدة

رهينة : زينة بشوفتك بعد گلبي شمالكم تعاركتوا

جُمارة : لا ، لا تكيفين

زناد : باچر اجيج الصبح أخذج لطبيبج يچيك وضعج

رهينة : الله لا يحرمني منك يبعد روحي

بعدهم يحجون و طَب شريك اديه بجيوبة سَلم و باس

جدة و وكف يم الباب

رهينة : خيرك شو وجهك ما يبشر بخير شبيك

شريك : كلش زين تعرفين شبية انتِ و الگاعد بصفج

رهينة : تاج راسك

زناد : مو كتلك ربيعة ترد النه خبر ونروح

شريك : أنا مو گتلك بفرحة الزهرة يردون يملچوها

زناد : محد يملچها لا تضل تمسلت گتلك أنا أروح

- صارلي سنة انتظرك

- و انتظر بَعد شعندك چا ما تحس بطعم السالفة إذا ما تتعب و تصبر عليها

باوعلي و دار وجهة على الباب وهو أعصابة تلفانة

زناد : احجي شمالك

شريك : أنا مو انتَ حتى أنتظر هلگد

صرت حافظته شريك يجي بارود و تالي بحچايتين زِناد يقنعة و يسكته

باس جدة و طلع عبر الباب و رِجع باس زِناد و راح

رهينة : أنا شلون بأحفادي كلها عاشگة

زناد : ههههههه هاي بَعد

كام و أشرلي بعيونه تعاي باس جدة و طلع طفيت الضوة و جدة رجعت تمددت طلعت الباب و سديته وراي الهول كاعدين عدنان و غسان يتعارك وي سرى طلعت للساحة شفت شحاطتة بـ باب المضيف

لفيت الشال عدل و طبيت

زناد : تعاي تعاي ياهو ما عندة محرمات

جُمارة : انتَ ماكو غيرك هم گول چذب

- شو انتِ فد مرة صايرة

- مو أنا بساع أذب ميانة إذا احد انطاني مجال

زناد : عَايني باچر غبشة أخذج لامج لان راسي أنوكل

يومين و أجي أحاچيها حتى أملچچ ادري محاولة فاشلة

بس ما تضيع بيج

جُمارة : لا اني هم راح أحاچيها

زِناد : أنا هسة من أعاينچ مثل الگضة عمره يبني بيته

و هسة يعاين البيت كِمل

- غمض عيونك

بقى حاير يريد يغمض ويحسهن مو سوالفة و زحمة

و هم ما يريد يضوجني بعد صراعات بداخلة انتصرت اني و غمض عيونه يضحك

جُمارة : أفتحهن

مديتلة ايدي بيها السوار

اخذه يضحك قِره الاسم ضَمة بجيبة ردت أكلة لبسه بس خفت

زناد : أمج بس توافق حتى ترحين وي جدة للعمرة

عينج عليها

جُمارة : فضة من راحت انتَ أخذتها

باوعلي رافع حواجبة ، مِسح شواربة

زناد : لا راحت وي عجيبة

جُمارة : ها

- لسة ما عرفتي فضة شنو

- اعرفها و أحبها و أغار منها

زناد : باجر من تعاشريها تعرفيها زين

جمارة : خاف أنصدم

- لا بَس هسة راح أصدمچ

باوعتلة منتظرته يحجي

- روز خالتج الي خطفها أبن عمي عمار نَفسة الي جانت تحجي ويا و تنتظرة و أني اعرف بس ضميت عليچ

خاف باچر تروحين لاهلج وتحقدين عليه أكثر

جُمارة : شنوووووووو ؟ يعني حتى انتَ متفق وياهم و تضحك علينه

زناد : يحبها و أمج مابيها مجال

جُمارة : يعني إذا رفضتك امي تسوي مثلة

زناد : كونچ وياي و مطاوعتني اسوي أنگس منه

بقيت ساكته و صافنة شكد جنت شاكة هو واحد من ولد عمي عمار

بس روز تبعد شكوكي بهذا الموضوع ضل يحجي وياي واني بغير عالم

طَب آمجد للديوان وگف يم الباب

آمجد : يالله امشي وياي أمج تريدج

زناد : و انتَ شنو لَك

امي تدك على آمجد و هو يصيح تعاي جاوبي امج و تسدة من امجد تدك على زناد و اثنينهم ما يجاوبوها واحد يخزر بالثاني

أني اخاف من آمجد و بنفس الوقت ضجت من زناد

زِناد : امشي نامي و أنا الفجر اخذج

امجد : امشي السيارة واگفة بالباب

ما ادري حبي لزناد هيج واصل حَد و حتى و هو غلطان ما أمن بغيرة

اجة امجد عصبي يريد يأخذني ختلت وره عباية زناد ولزمتها

قوي ..

و الحِيرة باچر تنعاد

بِين آمجد و بين زِناد ..

....

" روز "

محمد : لـيش هيـچ لـيش

خليت الكرسي گبالي و ختلت ورا و كل ما يتقدم ارجع اكثر

روز : خلي أروح

محمد : هـيج أنا طلعت مو زين

روز : اي مو زين

- دگتك هاي خلتني أتندم على الساعة الاجيت بيها لخاطرك

- لو ما جاي أحسـن و لو ما عارفتك أحسن

محمد : لااا يابة لااا الظاهر حضني ما غَزر

روز : عوفني خل أطلع طلگني و أنا راح أتنازل عنك

و چفيني شرك لان ضميري بِده يأنبني

محمد : حتى لو تنازلتي ما تفيديني

بَعد لأن أنا معتقل بجريمة خَطف

بلعت ريگي من أنحصرت بالحايط و صار گبالي طلعت اركض من الجهة الثانية و وگفت يم الباب رافعة إصبع السبابة

روز : لتتقرب و تخليني أعيط

محمد : بس تعيطين يچفتون عليـة و للتحقيق گبل

صار يتقدم و اني مخلية ايدي على حلگي ما اريد يطلع صوتي

ويأخذونه يضربونه انطبگ جسمه عليه و انحصرت بينه وبين الحايط

غمضت عيوني قوي و هوَ وجهك قريب على وجهي

عضيت ايدي حتى ما أصرخ و دمعت عيوني من الوجع

لمن عَضني قوي بحنچي

محَمد : لـو أدري بيـچ بساع ترحين

چـا كثرت بيج النياشين

دفعته و أني امسح اثر العضة و امسح دموعي

روز : طلگني يالله حتى أروح

محمد : أعتبريني مطلگج من هاي اللحظة بس من أطلع

تجيج الورقة قبل لا أسافر

روز : لا ما أريد طلگني هسة

هَـز راسة بـ لا و أندگ الباب و طَب الشرطي گال انتهى الوقت

و اجه سلام أني وخرت من يم الباب

سلام : طلگتها لو لا

محمد : أي

باوعتلة بصدمة فاتحة عيوني ليش يچذب راد ياخذة الشرطي

قرب راسة يم أذاني

- بس هاي المرة لتغدريني

شكلة و ملامحة و الكدمات الي بوجهة جانت كفيلة تسكتني طلعت وي

سلام بدون كلام رجعني وگفت بالباب نزلت تغريد فتحت الباب

تغريد : طلگججج ؟

- اي

حجيتها و صعدت أركض للغرفة و قفلتها عليه امسح بدموعي

شنو من ضياع وصلت روحي اله وليش قبلت أجذب عليهم كلهم

أتذكر شكلة و أبچي عليه و اني بنفسي وديته لهذا المكان ..

ما كعدت غير العصر على صوت تغريد تصيح اسمي من جوه

نزلت اسحل بروحي گوه و هي مخوصرة تباوعلي

تغريد : شكو اجيتي مطنگرة و هذا حنچچ شبي

عفتها و رحت للسنك اباوع بالمرايا مكان العضة صاير ازرگ

غسلت وجهي و لميت شعري هي واگفة وراي

روز : يمكن گارصتني دودة

تغريد : الدودة شسمها محمد ابن عمار

روز : تغريد عوفيني

تغريد : مقهورة لان طلگج لازم ، هذا السگط الما يستحي

- تغريد كافي ترى اني بيدي سلمته للشرطة يالله عوفيني بحالي

عافتني و راحت للمطبخ تدردم علينه و على آل سرهيد

تغريد : ياهو يجي يخطبج انطيج حلكج إذا أنفتح بعد اذبحج

روز : على أساس قبل فتحت حلگي مو رحت وياج للصالون

بس هو اجه خطفني ابن عمار

- اي غير يدري بيج عاشگتة

كعدت يم القنفة الي بصف الشباچ وخرت طرف البردة و اباوع على الجهال تلعب طوبة و الشمس بين الأفرع داخلة ما جاي يروح من بالي منظره و هو مضروب و خايفة من موضوع الطلاگ

ليش سمعتلة

تغريد تليفونها بيدها و تفتر بس ما تدك أنفتيت من يمي لحد ما خابرت و اكيد ما تتعارك غير وي زِناد راحت جابت النه لفات للعشا اكلت شوية و صعدت نمت و ضليت على هذا الروتين ثلاث ايام و تغريد تنهار من تشوفني هيج جنت اشرد من الواقع اروح للنوم

و حتى من انام أحلم بي

عيوني تجري دموع بكل وكت صارت و تغريد عندها استعداد لو يجي أنگس خلق الله هية تقبل تنطيني اله و منهارة لان ما يرضون يجيبون جُمارة و ما تقبل تجازف و تروح دگول بس أروح ما يخلوني أرجع

عشت حالة كئابة و ما أنظف البيت و لا امد ايدي على الطبخ

خاتلة بالغرفة و ما انزل تغريد حتى ضرب ضربتني و ما نزلت ،

و أنا أفكر بي رجعت كتبت على الحايط أليم چربايتي

روز - الوهمي و نمت

تغريد الصبح من أجت تگعدني شايفة الكتابه و اني

مدري وين جان عقلي من كتبتها

فزيت على صياحها و اني صيحت عليها ضربتني و جابت قلم تشخبط

على اسمه و تغلط عليه

تغريد : ولج سواااج مضحك يا مضحك يا زمالة ينصب عليج هاي السنين كلها و هو ابن عمار كتالين امير ولو انتن شيهمجن

روز : هو جان مسافر معليه بأهلة

تغريد : ابنهم لو مو ابنهم هااااااا

روز : كافي معليج بيه معليج أنا احبه أكرهة معليج

تغريد : اذبحج والله و إلا ازوجج انتِ و ذيج السايبة

خدامة رهينة

روز : ما اتزوج لو تموتين

انهارت و اني جنت متعمدة استفزها حتى تضربني بلكي أصحى على زماني بس ماكو حتى آكل ما يطب بمعدتي بَس مي بالكوة اشرب

لحد ما حسيت روحي راح اطيح اكلت لگمة و تغريد تخابر عجيبة

روز : تعاليلي تعاي لهاي روز فگع الندى والله

إلا أزوجها

من شفتها تريد تسولف الها سالفتي كلها جربت التليفون من ايدها

روز : شنو تردين تفضحيني و عجيبة شنو تسولفيلها

تغريد : اريد توصل هذا الحچي لاهله

- اهلة ما يدرون بية كووووه تردين تسوين السالفة جبيرة

عوفيني بحالي جفيني شرج

دفعتها و هي انهارت ركضت اصعد الدرج و احس روحي دخت

ردت اطيح چلبت گوة و أندگ الباب قوي

كعدت على الدرج حتى ارتاح تالي ما حسيت على روحي لمن

طِحت بالگاع

نَـدامة أيامنة بلياك ...

...

" ورود "

كل ما اتذكر سوالفة سچاچبن تنبت بگلبي و هو عينك عينك يعترف

يحب وحدة غيري و أنا حتى بالحلم ما حبيت واحد غيرة

من ردوا اخواني ما جابلهم زناد طاري و لا حتى امي و جدة

و عدنان يلوب بس ما يحچي

بيوم الي زناد اخذ جدة للطبيب دگ الباب عدنان عليه يگول بدلي

عرفته ناويها مو خوش نية و امي تهدأ بي

ام عدنان : ولك يمة صدك تحجي مو كتلك شمرت الحلقة بوجهة بَعد أعليمن هالطلايب

عدنان : يطلگها و هو الممنون و رجليه فوگ راسة

ام عدنان : اي اول و تالي يطلگها هو من يعاينك هيج يحقر بالزايد

- انعل والديه ، بدلي يااااالله

أبدل و ايدي ترجف من صوته و زهرة حايرة تجيبلي العباية و الربطة

و الحذاء و امي واكفة مقهورة علية و على حظي

بدلت و نزلت جوه ابوي واكف مابي حيل يحجي لازم كليته

و أخذني عدنان بيدة و الأيد الثانية لازم بيها عقد السيد

عدنان : دنگي راسج و عدلي حجابج

قبل لا يأجر عدنان تكسي اجه ويانه غسان لحد ما وصلنة و اني ادعي زناد يدك على عدنان و يرجعنه مثل ذيج المرة و لا تصير مشكلة بنص المحكمة

طبينة و النوب صوت الكعب يطگ و عدنان كل شوية خازرني و يتحلفلي

المحكمة متروسة عَالم غمضت عيوني من بعيد عاينت ندى اجت من بعيد

تطگ بكعبها و كل الأنظار عليها من تمشي من تقربت علينه

و شافتنه أبتسمت خزرتها ، ضحكت و مِشت

عدنان راح بيدة العقد مدري شيسوي و أنا و غسان واكفين لزمت گلبي و كمت اقرا آيات من شفته بيدة الأوراق لابس زي المحاماة و اجه يمنة يارب لهي عدنان هو من عاين عليه واگفة اجه بأتجاهنة يمشي سريع

شراع : غسان شكو جايين

غسان : لان انتَ ما تريد تحلها بدون مشاكل

عاينلي خله ايدة على زندي وخرتهة

شراع : ورود شبيج ليش هيج كاعد تسوين

- مالي غرض عدنان جابنه روح أحجي ويا

شراع : روح غسان اخذ ورود و ارجع اني العصر ادزلكم ورقة الطلاگ

غسان : روح احجي وي عدنان

شراع : ما أحجي ويا أني اخذ ورود وارجع ليش تلح

جرني غسان من ايدي و ندى من بعيد واكفة تعاين عدنان تليفونه و تليفون غسان أحتركن بالاتصال و عدنان منهار

عدنان : طبعا هذا الساقط موصيهم لان محد يرضى حتى يقيم دعوة يگلولي مانستلم هيج قضايا

غسان : امشي هو گال العصر ادز الورقة

طلعنه و نفس كل مرة تيتي تيتي مثل ما رحتي اجيتي

و عدنان ضرب شراع بچتفة من صار بطريقنا بقى شراع واگف

ثواني و مِشه بس كلها تعاين علينه

رجعنة زناد واكفلهم بالباب اول ما نزلنه طبيت و هو وعدنان يتصايحون بنص الساحة غسان طب وراي لازم عباتي

ضلو للعصر موضوعهم شراع و عدنان ما ضلت غلطة ما غلطها عليه و جدة ما ترضى كامت تصيح عليهم و تهددهم بزناد

عدنان : كااااااافي جدة يالله سكتي

جدة انهارت شلون عدنان صاح عليها بصوت عالي اول مرة جدة

أعاينها تنهضم زعلت و راحت للغرفة

راح ابوي يراضيها قفلت باب الغرفة و كلها تلوم عدنان

و عدنان كاعد على جمر ينتظر شراع يدز ورقة الطلاك

تالي من غربت الدنيا اخذ تليفون غسان و دگ على شراع

امي اكثر وحدة ما راضية و البيت كله متوتر

- اني عدناااااااان لك وين ورقة الطلاك كلب ابن الـ 16 كلب

شنوووووو انتَ تلعب عليه والله اخلي جنازتك اليوم يكبرون عليها

اجه يم أبوية فتح سبيكر يسمعة كلام شراع

شراع : انا أبوي كلب لك والله ماكو چلاب غيرك انتَ و اهلك

يا ساقط

عدنان : لككككككك تغلطططط علييية اليوم اليوم اختل بحضن امك جايك انااااا

شراع : لا منتظرك بالباب ما أريد حضن امي إذا انتَ زلمة تعال

عدنان : ضم روحك يم أخواتك

شراع : اضم روحي يمهن و لا أسحول بيهن يومية بالمحاكم

عدنان : جايك أنا أراويك الأمهات شتجيب

شراع : لا خير البيهن إذا يجيبن مثلك

اخوتي انهاروا حتى يونس طلعوا يركضون و كل واحد بيدة توثية وراح وياهم عمي هاشم لان هو من زمان متحلفلة بس عدنان صعد فوگ و نزل يركض امي تبوس بي خاف شايل سلاح

كال الها لا راحوا بسيارة عمي هاشم امي تلطم على خدها

و عمي قاسم خابر على زناد و زناد بغير محافظة

بيت عمي عمار ما يدرون من سمعوا اجوي علينه اخذوا التواثي يم گواني الطحين و راحوا أبوية يدك و محد يجاوبة

البيت كله يلوب و كلنه نفتر

ام عدنان : يمة ساعة شيطان لا ينچتل واحد منهم

دمعة : مو كتلج من زمان وافقوا على خالد احسن من شراع

- شمدريني هيييييج يصير شمدريني

كلنه واكفات بالكراج انفتح الباب و طبوا شمروا التواثي و هم يتصايحون و يتعاركون

ام عدنان : ولكمممممم شبيكم

سلام : عدنان أبنج طَگ شراع چيلة

شگد مُرات چلماتك يَـ خايب

و أنـا لخَاطرك صديت چيـلات ..

- رُسل فَهد 🤎

التصويت + التعليق بين الفقرات لُطفاً

يَا أجمل الوحوش

- رُسل فَهد

....

لأجل ما نِنلثگ عَنكم مِشينـة

و شَرفكم مَا يجي لـ خيط بعبينة

- رُسل فهَد

....

"عالية "

- معليك

دارو وجهم هو و زِناد و عاينوا علية خفت كضيت چتف جدة من يَم الكشن درت وجهي على الجامة و تحركت السيارة اول ما وصلت البيت طبيت اركض اسبح گبل لا يجون امسح بالكحلة و ما تنمسح

أول ما فرشت الفراش عَاينته طَب للغرفة ينزع الساعة و المحبس

و الحلقة يحطهن على الميز و أنا اسوي روحي مخبوصة اعدل بالغطه

شمر الدشداشة على الچرباية و لَف الخاولي على جسمة

حتى يروح يسبح اذكر شريك أخوي چانت عقدة حياتة الدشداشة البيضة و يمكن كل الزلم هيج بحيث حتى من ينزعها على كيف لا تتوسخ

مديت ايدي على گلبي جسمي بارد بس ليش احس بگلبي حار

مسحت دموعي و اني اردد كافي عالية انتِ متحبي اهلة ميحبوج

لازم ترجعين يم أمج تمددت على الفراش و متغطي نص جسمي

لان احس مختنگة من حسيت باب الحمام انفتح غمضت عيوني قوي

اسمع تحركاته بالغرفة و بكل حركة اغمض عيني اقوى أريدها تتأدب

و تبطل على كل شي يصير تبچي تغطيت و درت وجهي على الجهة الثانية لان صدك ما كدرت أسيطر عليها غطيت راسي و خنكت روحي في سبيل ما أبين أنا جاي ابچي

فزيت الصبح البردة من آمس أنا دنيتها و الضوة تارس الغرفة

عاينت على مكانه كاعد و التليفون بيدة عاينلي و رجع يعاين للتليفون

لميت شعري صاير كفشة لان امس نمت بدون ما امشطة

الغرفة ما بيها ساعة ما اعرف الوكت شكد يومية اعرف الصبح اجة

من صوت امه و هي تلعلع بأسمي حتى انزل اعجن و اخبز اليوم روحي محترگة و أتمناها صدك تجيب طاري الخبز حتى اشمرها بالتنور و اخلص من شرها

طلعت من الغرفة غسلت و جهي و نگعت شعري و طبيت امشطة

على المرايا شكد غسلته امي و لسه بس لمع حتى وجهي و رگبتي كلهن

فرگت شعري نصين و وگفت انعم بي و ظفرته و بقيت واكفة يم المرايا أوخر اللمع من وجهي و ركبتي ما يروح

رجعت گعدت بفراشي و أنا عاقدة حواجبي مدري شمالني

اريد بس واحد يحجي وياي حچاية حتى أكوم اشرب من دمة

أندگ باب الغرفة و اسمع صوت امه تحجي وي رحمة

تمددت بساع و غطيت راسي گام هو يفتح الباب

ام سلام : صباح المبارك يمة علاوي

ان شاء الله يوم الاجيبلك ريوك عرسك لغرفتك بعد گلبي

علي : الله يسلمج يمة

ام سلام : شني ما تريد ريوگ لو مشبعتك هديوة ههههه

علي : لا خلي رحمة تسويلي راسي يوجعني

دزيلي بيدها براسيتول

- صار هسة اخليها تجيبلك ، ماضل وكت طَر الظهر و نسوان اخوتك جاي ينظفن چـا اليوم عالية ما تعجن

علي : لا مريضة خلي يجيبون وياهم خبز

- هاااا لا هسة اخليهن وحدة تعجن و وحدة تخبز

تعال انزل تريك جوه

- لا البنات يشتغلن خل يأخذن راحتهن مرتاح هنا

ام سلام : بكيفك حبيبي براحتك

طلعت و اني رفعت الغطه لان أختنگت هو كاعد بمكانة عاينلي

و رد يعاين للجهاز

شوية و فتحت الباب رحمة عاينتلي كاعدة خزرتني اخذ الصينية منها

و كاللها على مَي نزلت تجيبلة مديت ايدي على صينيته أخذت كوب الچاي و خليته يمي أشربه عَاينلي و ما حِچة شي طلع من الغرفة

صاح من الدرج رَحمة كوب چـاي وياك

رحمة : صبيتلك خوية

علي : اي بعد واحد

اجه رد كعد بمكانه و هي طَبت شايله بيدها كوب الماي و الچاي

و ردت خزرتني أنا هم خزرتها طلعت و سدت الباب مد ايدة

عليه مسويلي لَفة صغيرة اخذتها من أيدة و أنا عاقدة حواجبي

أكلها بعصبية مادري شبية اليوم صايرة مفترسة

ما نزلت حتى من صَبو غده و ادري بيها ما دام هو هنا ما تصيح

بأسمي فتحت باب الغرفة و كلت أنظفها و اسبح ما دامهم ملتهين بالأكل رتبت كلشي بس چربايتة ما عدلتهة عفتها بهوستهـا

فتحت الشباك و مِسحت الگاع و فتحت البنكة ردت اسبح و أعوفنها

بس خفت لا هم أنتهم بسالفة و أنا لا بيها و لا عليها

قفلتها و اخذت المفتاح و طبيت الحمام حتى الصابونه خلصت و أنا اغسل بوجهي حتى يروح اللمع أندك باب الحمام صحت منو

علي : أنا وين المفتاح

فتحت الباب شوية و مديتلة ايدي بيها المفتاح

ما ياخذ بس المفتاح لازم يكض چف ايدي كله

خلصت و نشفت شعري أعاين بالمرايا أنا و الخاولي و وجهي كلنه لمع

شكول عليج آريج على هاي السواية طبيت للغرفة لكيته ساد الشباج

و مطفي البنكة و يعدل بچربايتة

جايبلي غده و مخلي على الميز مشطت و حطيت عطر و كعدت اكل

عاجبني دور المرتاحة يصعدولها الاكل لغرفتها و ما تسوي شي

علي : من نظفتي الغرفة ما تعرفين تعدلين الچرباية

عالية : ما تستاهل

علي : طبعاً ما أستاهل لأن أنا ما أخذتج و شردت بيج

لو مسوي هيج وياج چان طلعت استاهل و ما تبچين من أكضج

جنت اريد اخلي اللگمة بحلگي نَزلتها و احس غصيت بدون أكل

شلت عيوني عليه لگيته هو هم يعاين عليه بس كل واحد نظرته تختلف

و كل واحد نظرتة بيها خسارة

عالية : لا تجي يمي خلي هدى ترتبلك چربايتك

اصلاً أنا منتظرة شوكت تتزوج حتى أخذ الچرباية مالتك

بعز نظرته الما تتفسر أبتسم و هز ايدة

رديت آكل شوية و شلت الصينية اول ما اجيت لفراشي اريد انام

علي : تعاي مرغيلي ظهري

عالية : ادية توجعني و ما أمرغ أنا حتى لو ما توجعني

- امشي

تمددت بالفراش و تغطيت و هو يعاينلي

علي : يالله حتى أخذج لامج

فزيت من مكاني وخرت الغطى و رفعت الردانات تدنه و سوالي مكان

نزع التيشيرت و نام على بطنة التليفون بيدة و أنا أعاين ويا

فيديوات حلوة و هو كل شوية يگول اقوى

علي : الـ متون مرغيهن قوي

دگ تليفونه رقم غريب بقى لازم التليفون من تريد تنتهي المكالمة

يالله جاوب لأن أنا كاعدة بصفة و التليفون على أذانه أجاني

صوت هدى تسلم عليه شلت ادية من ظهرة

و نزلت رداني لزم ايدي يأشرلي أوگفي

وخرت ايدة و تمددت بفراشي سَلم عليها و تسألة شوكت يلتحق و ينزل

سَدة من عدها و حاچاني بقيت دايرة وجهي ما جاوبته

گلت حتى العصر ينقهر عليه و يأخذني لامي هو نام و أنا بقيت كاعدة

لحد ما صار العصر يالله غفيت

كعدت هو ما موجود بالغرفة نزلت اركض لكيتهم كاعدين

بالهول بس هو ما موجود صعدت و الغصة ذابحتني ادري بي هسة يجي بالليل وينام و ما يأخذني طبيت. للغرفة أبجي

انفتح الباب طبت آريج

- شمالج يمسودنة

عالية : گالي مرغيلي حتى اخذج لامج و تالي ضحك عليه

آريج : شني طارت الدنيا يجوز بالليل من يجي

- لا مو دگت عليه هدى تَيه حتى دربة

اريج : ها يعالية شحچينه شگلنه

عالية : اكلج ترى أنا ما أغار عليه بس أنا تحز بخاطري

والله هسة لو يطلگني عندي احلى من العسل

آريج : كطنة شيليها من أذانج هنا ماكو شي اسمة طلاگ

عالية : غصباً عليه يطلگني والله هسة تشوفين

إلا أكرهة بعيشته

- خايفة لا هو يكرهج بعيشتج

ضلت تحجي وأنا منهارة لحد ما باستني و طلعت صار العشا و حتى على العشا ما اجة بقيت كاعدة انتظرة وكفت يم الشباك أعاين

ماكو ما اله آثر صارت بـ ١١ و هوَ ماكو كل شوية اسأل اريج على الساعة شلت فراشي خليته على الچرباية و نمت على الچرباية حتى البطانية فرشتها جوه الفراشات حتى يضل لا غطى و لا فراش

تمددت على الچرباية و اغم بروحي عود هذا اقوى انتقام أكدر اسوي

تذكرت شكلي و أنا أمرغلة مثل الخدامة تاليته يضحك عليه

لو تأخر لان يخابرها ما ياخذ راحته بالغرفة

نزلت من الجرباية شلت هدومة المعلگة كلها و شمرتها بالكاع اريد

احرگ گلبة و خايفة منه بحيث القميص اليطيح على الكاع أشيله و ارد اشمرة على الحصير حتى ما يتوسخ من شي

شمرت آخر شي سترة طاحت منها عِلبة بالكاع رحت اخذتها فتحتها

بيها حلقة ذهب ناعمة و حلوة رجعتها بمكانها بالسترة و علگت السترة

سديت باب الكنتور و تغطيت النوب فوك القهر صار الخوف مسيطر عليه

و گلبي يدگ سريع

كلت بلكي انام بس ما كدرت لحد ما سمعت صوت ضحكته يصعد الدرج هو و خالد مد ايدة على اليده يفتح الباب لگا مقفول ضل يحجي ويا خالد وهو يفتح القفل غمضت عيوني و تشاهدت

طَب للغرفة وهو ساكت و اني كل ثانية ابلع ريگي

علي : عَاليـة

بقيت ساكتة ما جاوبتة فتح الكنتور شوية و طبگة صارت خطواتة تتقرب

عليه غمضت عيوني قوي شال الغطه من يم راسي بس ما نطق حرف

ما سمعت غير طگت الجداحة شوية رد يمي كضني من زندي

ورفعني من المخدة كض بأيدة الثانية وجهي و هدَة واجه دخان الجگاير بوجهي وأنا لسه مغمضة عيوني ما فاتحتهن

علي : هاي شمسوية انتِ بالله

حجاها و هز جسمي كله بيدة

حجيت وأنا سادة عيوني

عالية : بكيفي موش مضحك عندك أنا خوش لو لا

علي : و شلون بالله اجاج احساس انتِ مضحك

عالية : كتلي اخذج لامج و عفتني و رحت

علي : كتلج اخذج بس ما كتلج شوكت

بقيت ساكتة ما ادري شجاوب بس احاول أبين أنا مو خايفة

علي : دقيقتين بَس إذا ما عاينت الهدوم

كلها معلگة أعلگج بمكانهن

عالية : ما المهن والله و شتريد تسوي سوي

علي : بابا انتِ من يا طينة

عالية : من نفسسسس طينتك

حجيتها و درت وجهي ما اريدنة يعاين دموعي هَد ايدي و أنا

تمددت ابچي و امسح بدموعي

يعلگ بالهدوم و يغلط طبگ باب الكنتور قوي و اجة حط التليفون على الشحن عرفته من الصوت ، دفعني على الحايط و تمدد بصفي

جريت نفس قوي لو عايفة الفراش بالگاع احسلي النوب أنحصرت بينه و بين الحايط رفع راسي و عَدل المخدة

علي : جاهلة ما عليج عَتب

درت وجهي عليه بعصبية عاينته بلاية حتى فانيلة

و خشمي طَخ بزندة

عالية : إذا جاهلة ما تردني لامي هااا شمستفاد مني هسة

انتَ أنا كلشي ما اسويلك و مرتك راح تجي بعد عليمن حاطني يمك

علي : أتونس عَلـيج

ضربته بصدرة قوي و هو يضحك ضليت احوس اريد أكومن كض ايدي و حِبس رجلية و ايدة الثانية على حلگي

علي : شو أنجلبتي من آمس اليوم

أنا احجي و محترك گلبي بس ما ينفهم مني حرف من وره ايدة

السادة حلگي

لا هو مَل و هدني و لا أنا تعبت و سكتت لحد ما طَر الفجر آيست و نمت

و كعدت على صوت أمه بالغرفة

ام سلام : ها يمة خو ما بيك شي اليوم لسه ما كعدت

علي : لا والله نمت الفجر

- تعال أنزل يالله شوية و نصب غده

- نعسان بعدني من تصبون دزيلي واحد

طلعت و قفل الباب و رَد نام على الچرباية

مد ايدة على خدي و گصتي احس روحي متكسرة من النومة من كد ما المكان ضيگ بس ما بية حيل أكوم بعدني نعسانة

علي : نعسانة لو النومة حلوة

شلت الغطة و ضربته و عبرت من فوگا مردت مصارينه

عالية : شلون ما گعدتني اليوم شيخلصك من أمك

ضحك و گعد عدل

علي : اي والله شيخصلني

لميت شعري خازرتة و نزلت آريج تطبخ هو شوية و نزل اجه للمطبخ

صب ماعون من الغدة و كعد وي امه بالصالة يسولفون

آريج : شگايل لامه فوگ شو نزلت تزبد و ترعد عليج

عالية : ما گاللها بس عاينتني نايمة على الچرباية يمة

آريج : هسة يالله صار بيج خير عگبيش

عالية : لا يا خير اصلاً راد يطگني بس يمكن انقهر عليه

اريج : عايني إذا التحق شلون راح تطلع ضيم ذني الايام منج هسة هي كاعدة على أعصابها

عالية : فوگ ما زوجتة شني شتريد مني

آريج : ما تهدج إذا ما تشردج بـ لليلة ظلمة ، صدگ انتِ ليش ما تخلي يشتريلج غرفة عود شني وحد والله لو دكليلة من الصبح يروح يجيبلج أصلا هاي الغرفة و الملچة و المخاسير كلها على امه ما رادت منه شي غير يوافق بس فلوس الحلقة

سمعت ماخذتهن منه

عالية : ما يهمني لا هو و لا فلوسة

آريج : شالفايدة من الفلوس ولج ولدها ما تخليهم سيارة يشترون تفكر شلون نسوانهم تگعد بصدر السيارة

عالية : و عود هم ليش هلكد يسمعون كلامها

آريج : انتِ ما شايفتها هاي الحيالة تكضهم بالغرفة و تضل دموعها تتجارى تخلي الولد يطلعون من الغرفة حسبة تجيبهم و حسبة توديهم

شوية و طَبوا كلهم بَس إسلام مدري شبي صعد فوگ يركض

دقايق و صار العياط اله اول ما اله تالي و عمتي تغلط على سلوى

ام سلام : مرمرت ابني هاي مكسورة الرگبة ولج شني

بس انتِ صار عندج ولد وشختي بي

فتيتي گلبة لهالرجال

شوية و نِزل أعصاب بيدة ابنة كعد على الكرويته يبوس بي و آريج صعدت تشوفها صعدت وياها للطابق الثالث

و سلوى تلم هدومها و تبجي

آريج : خايبة شمالج ما صارلج عشر ايام من اجيتي

رجلج خطية ششاف منج و من ابنة

سلوى : ما أريدنة لا هو و لا أبنـة امس وأنا نازلة بالليل أعاينة اجة لو بعدة لگيت امه كاعدة تقنع بي تزوجة

آريج : امداج على هاي خايبة أنا كبال عيني وكفت كالتلي أزوجة و ما همتني هم هيج دوم يسمعولها بس ما يسوون التريلة

سلوى : لا يسون مو هذا علي شكثر جان مستقتل على عالية و ما يريد غيرها تالي ضحكت عليه امه و زوجته

آريج : لا خية مرتة خوثة و غبية ما تريدة هو لو يعاينها

تحبة و تگله لوتموت ما تتزوج والله ما يتزوج

سلوى : أنا ما اريدن ابقى هنا خلي تفيدة امـه

آريج : جان زوجته و انتِ زعلانة بس غير هو ما يريد غيرج

حاولت وياها آريج بكل طريقة بس هي معصبة و تبجي

أعاين لغرفتها شكد حلوة و مرتبة و صورة عرسهم على الحايط

نزلت وي آريج و عمتي تحشي عمي عمار على سلوى

ام سلام : ولج ما صارلج جم يوم من اجيتي بس طبعاً هنا ما يصرفلها تريد تروح يم اهلها خاطر تضل سايبة

أسلام : يمة وين تطلع ترى حتى وهي زعلانة ما تعتب باب الحوش إذا ما امهة تدك عليه و أنا اكللها اي لو لا

ام سلام : ضل انتَ ضل دافع شطلع عيونهن غيركم

والله إلا أزوجك و أدبها إلا أخليها تمشي على السراط

أسلام : يمة ما تچفيني شر الزواج مو كرهت حتى حياتي

أنا عائلتي نفرين و ما ملحگ عليهم ويني و وين الزواج

نزلت سلوى تمسح بدموعها و عبايتها على راسها بيدها جنطتها

و تعاين على أبنها و رجلها

عمار : وين ان شاء الله

سلوى : عمي رايحة لبيت اهلي اخوي جايني

عمار : بابا انتن تردن تهجمن بيوتجن گوه

سلوى : لا والله عمتي تريد تهجم بيوتنة

حجتها و طلعت من باب المطبخ راد يگوم امه كضت ايده ما عاينلها

طلع وراها و ابنـه بأيده هن ملتهيات يصبن و أنا أعاينلهم من شباج المطبخ هو شابگها يبوس بيها و يقنعها وهي معاندة و تبجي

صبوا الغدة و أجت آريج تاخذ أخر ماعون للسفرة

علي : عاااااالية

فزيت و حتى آريج فزت

آريج : امشي امشي كعدي ويانة خلي امه تنجلط