تحميل رواية «يا أجمل الوحوش» PDF

التصويت + التعليق بين الفقرات لُطفاً

يا أجمل الوحوش

- رُسل فَهد

...

و بعد لـ هنانـة ما بية

أنا مو شيخ خاطر كل فضيحة

الـ منك أسترها

إذا ع الفُرگة ، زخَـة مـُطر و أعبرها

و إذا خنگةّ تواليّ الليل !!

عِدنا الفجر يصگرها

و إذا متروسة روحي جروح ؟؟

- القَصيدة الـ تنترس "الله" يكشخ بيها شَاعرها

- رُسل فَهد

....

" ورود "

أحس رجلية أنشلت ما اكدر حتى أكوم بالگوة مديت رجلي الاولى

حتى اوگف أنفتح الباب من عاينت عدنان واگف احس روحي تاهت

شراع : خو ما محتاج شي

عدنان : ورود تعاااااي

طفرت من الجرباية اعدل بحجابي و أنا أتمنى الگاع تنشگ و تبلعني

جان شراع مخلي ايدة على الحايط و نص جسمة طالع و النص الثاني صاير وره الباب فتت من جوة ايدة جرني عدنان من ايدي

شراع : شبيك وياها

عدنان : ما بية شي

يحجون و هُمَ واحد خازر الثاني

حياة واكفة تهدي بي و دمعة يم الدرج مبتسمة نزلني عدنان وهو لازم

ايدي اول ما نزلت صاح بحياة و دمعة

عدنان : يالله فووك

اعاين امي طلعت من غرفتها و جدة كاعدة تباوع مستغربة

أخذني للمطبخ

عدنان : والله يا ورود إذا لچحتچ طابة يمة بالغرفة و علي أذبحج تعرفين يعني شنو اذبحج

ام عدنان : شجاك يمة شكو غير رجلها

عدنان : مو رجلها هاي الدنيا ما تتأمن عود ساعة الياخذها لبيته يصير رجلها كاعد يمنه و خانس عليها ميستحي

ام عدنان : ولك انتَ الما تستحي إلا اكول لأبوك اليوم

هد ايدي و صعد جدة صاحتله ما سمعلها و شراع كاعد يم جدة

و من الدرج واحد يخزر بالثاني

رهينة : تعاي شكو

شراع : خو ما ضربچ

- لا والله ، جدة ماكو شي

ام عدنان : اخوتها يغارون عليها ههههه ما مقتنعين ورود

راح تعرس و تعوفهم

عفتهم و صعدت فوگ من الهبطة نمت ما كعدت غير بالليل

لگيتهم حتى متعشين

نزلت يم جدة اشوف الأوضاع لكيتها كاعدة هي و أم شريك

رحت للمطبخ اصب شي أكلة فزيت و أني دايرة وجهي أنگرصت من خصري فزيت درت وجهي لگيته شراع

ورود : ليش ما تبطل هاي الحركات

شراع : سويلي اكل وياج جوعان ،

حط الكرسي بالمطبخ و كعد و أنا أسويلة عشا

شراع : اليوم شبي هذا اخوج التلعة

- اسكت لا يسمعك هم هيج مايقبلون ما يعتبروون الخطيب نسيب إلا ورا العرس

شراع : هاي يعني إلا تنكسر عيونهم و ياخذ أختهم

أنا ملتهية أثرم

ورود : اي عفية

اسمعة طَگها ضحكها و ضليت أتذكر كلامة كلمة كلمة لحد ما ركزت

بشنو يقصد هوَ من الفشلة ما درت وجهي و احس ايدي حتى تشنجت ما أكدر أثرم و هو يسكت و يرجع يضحك

درت وجهي عليه بعصبية

ورود : عفية لا تحچي وياي هيج أنا مو كل الحچي اركز بي

و أنا ترى استحي يجوز مو مثل التعرفهن

و رجعت اثرم ر أضرب السچينة قوي بالتختة حتى يطلع صوت

عالي و أبين شكد ضايجة

شراع : آموت ع اليستحي

بقيت ساكتة و كل ما أدير وجهي و انا اطبخ الگا مبتسم و صافن عليه

صاحتني جدة تريد چـاي أنا حاطة القوري بس صبيتلها

خليت آكلة گبالة و گعد ياكل و أنا رحت يم جدة لان ساعة و طب عدنان من الشارع هو بس يريدلة حجة

ام شريك : والله خوب انتِ صرتي شاهدة عليه شكثر يحبها

الله وكيلج يحجي وياها و احنه كاعدات لا يخاف و لا يستحي

ورود : هي حلوة البنية جدة ؟

هزت ايدها جدة و باوعت لام شريك و ضحكن

رهينة : فَلعة مال گمر

ام شريك : أنا لليوم شكد طلعت فواتح و واجبات

ما عاينت بِت بجمالها

ورود : زين بيت عمي عمار ليش ما أطوهم رحمة

رهينة : ما رادت و جانت صغيرة و ابوها هم ما قبل

و الولد تزوج و صاروا عده جهال اثنين

ما تنطون لهذا المگرود بتكم و انتو تدرون بتكم عاشگتة

ام شريك : بلكي هالمرة روحة زِناد تلين گلوبهم

رهينة : هي جدة البت من الأم ربيعة لو أروحلها هسة

من الصبح تجيبها لَيه و تجي بس أنا هيبتي و كرامتي

تسوه شريك و عشيرتة

رحت للمطبخ صبيتلة چـاي لزم أيدي

شراع : من تصعدين اريد أحاچيج

ورود : ما أكدر هسة عدنان يگول صارت شغلة عناد

و أنا ما اريد تصير مشاكل بينكم

شراع : طبة مرض شنو ناهبج أنا ، مرتي

ورود : عفية شراع لا تسوي هيج

شراع : هسة تعاي و ما أسوي

صعدت لغرفتي و قفلت الباب أنا شاكة بدمعة تراقبني و هي دگلة لان حياة فقيرة و ما تطلع منها هيج سوالف

من فتحتة باب الغرفة عاينتلة من طب للغرفة و طبك الباب بقيت

أباوع صافنة و أني نفسي ما أدري بروحي شأريد

أجي محملة حچي و قهر و اريد أعاتبة و بَس إشوفة و اسمع كلامة

ما احس بروحي غير فراشة طايرة و أنسى كلشي جاية عليه

لان هذا مو شخص عادي و جابته الصدفة هذا خلصت ايام و ليالي

أحلم بروحي راح أنزَف اله و راح يجي يوم يعترفلي هو شكد يحبني و أني أسولفلة من شوكت احبة و ما تغير حبي اله

رغم شكد جنت احاول أقسيّ گلبي و اكول ميستاهل

بس ما حصلت اي نتيجة من گلبي

قطع تفكيري دمعة و هي تنزل تتلفت منا و منا وجههة

يدلي التايه

من نزلت ردت أستغل الفرصة و اروح يم شراع بس فضولي چان أقوى

بقيت مصدومة من عاينتها تفتح باب المخزن على كيف و تتلفت

منا و منا طلعت و سدت الباب وراها

نزلت للمطبخ عاينت المضيف موجودين بي ثلاثة عرفتهم من عدد الشحاطات جدة و ام شريك رايحات ينامن طفيت التلفزيون و الصوبة و هي ماكو و لا طبت فتحت الباب على كيف و طلعت و أنا أمشي و الهوى عالي يگص الرأس

الأشجار و النخل و الزرع كله يتحرك و صوت الصراصر تارسة المزرعة

و صوت چلاب من بعيد واضحة و صوت السيارات من تمر على الشارع بقوة سريعة ورق الأشجار الطايح يمشي وياك

وصلت للنص و قررت أرجع بس الصوت السمعتة ما خَلاني

....

" جُمارة "

فزيت على صوت روز و هي تبچي تگعدني

روز : جُمارة جُمارة أجـوي أهل الضابط

كعدت بسرعة و اني افرك بعيوني و اباوع بوجهه مصدومة

- شنو يا ضابط

غمتني و كعدت على الجرباية تبجي بصوت عالي

صعدت امي أجتي بأتجاهنة تمشي سريع و ايدها على خاصرتها

تغريد : هم تردن تسون مسرحية جديدة ها

مو انتِ بنفسج كلتيلي اريد اتزوجة

روز بس تبجي و اني اباوعلهن حايرة بلعت ريگي

جُمارة : يمة انتِ ليش مستعجلة

دارت وجهة بعصبية رجعت راسي ليورة لا تجيني كفخة

تغريد : انتِ بالذات إذا فكيتي حلگج لسانج أكصة

و حالج من حالها بس تتزوج تتزوجين وراها اني ما الي

خلگ الجن و لمكسراتچن

روز: سوي الي يعجبج تغريد بس اني ما راضية

و انتِ ما جاي تفهميني شريد

تغريد : شتردين ست روز أنتظر رباة الشوارع العاشگتة يجي ياخذج والله لو يصبونة ذهب ما اخلي ياخذج و هاي إذا هو زلمة من شوكت كتلج يضحك عليج و انتِ متمشين بكلامي لان اني عدوّتجن

بقت روز تبجي و امي نزلت عصبية ترعد

بقيت لازمة ايد روز أهدي بيها سمعت صياح جوه نزلت اركض

و روز تركض وراي أمي و جدة يتعاركن

رهينة : منين جايبتهم ذولة احنه نعرفهم يعرفونة

تغريد : حاطين خشمكم بحياة بنتي امنتُ بالله أختي

شلكم غرض بيها و الولد زينة الشباب روحي دزي واحد من احفادج يسأل عليهم

رهينة : ياخذها واحد من ولد عمار احنه ما عدنا حظ وي الغريب و اختج تراها بت اختي يالماتستحين

عدنان : شنو زِناد ما يدري شو بس امجد بالمضيف

تغريد : اناااا أنطي لبيت كتااااالين ابني انتِ صدك تحجين

لو تجذبين رهينةةةةةة

رهينة : خابر زِناد يعوف البيدة و يجي بساع بساع

قبل لا يرحون الوادم

تغريد: شنو تخوفيني ما يهز من راسي شعرة

رهينة : لا ما تخافين من هاي رحتي جبتي امجد و خليتي شيخ

- لا اناااا ما اعترف بـ زِناد

فتحت عيوني بصدمة من جدة ضربت امي راشدي بقت امي لازمة خدها رحت يمها بسرعة باوعت لجدة بعصبية

رهينة : اصحي على زمانج يا مَرة حرامات انتِ بت غريبة

عدنان طلع يخابر و الجو مشحون و امي و جدة صايرات كبريت

روز كاعدة على الدرج و تبچي و كل واحد واكف يتفرج بمكان

و اغلبهن متشمتات بـ جدة شلون امي ما تحسبلها حساب

نهى المشهد كِلة لمن دِخل زِناد لابس الفَروة فوگ الدشداشة

و الچفوف مو النايلون هاي المرة چفوف ثخينة و شكلهن من الخارج

جلد ، بدون عگال الغترة لافها هالمرة غير شكل

أجت عيني على دمعة لمن جانت كاعدة على التخم و الكوشة حاضنتها قوي رَخت قبضتها على الكوشة و تباوعلة بدون ما ترمش

رجعت أباوعلة

لَم يكُن شديد الجمال لكنهُ كان عراقياً غالباً

جنوبياً جداً ، عمَارچي تحديداً

زِناد : خير ام أمير

تغريد : يا خير اليجي و انتو موجودين

زِناد : ما عندي نسوان للزواج

تغريد : و منين اجن نسوانك و أنا ما دازة عليك امجد موجود

ضحك و مَد ايدة ضغط على المكان الي بين عيونة

زِناد : العگال ما يتخله إلا إعله راس واحد

و الحچي لغير صاحب العگال ما مسموع ولا ينحسب

تغريد : العگل تارسة السوگ

زِناد : بس مو ياهو اليجي يلبسها ، چا كلها شَاخت

تغريد : هسة أنا ما اريد مشاكل و هي مو بت عمك مالك غرض بيها خلي البت تروح بفالها

زِناد : أنا ما عندي زواج غصب

حجاها و عينة على روز كاعدة على الدرج

تغريد : البت راضية انتَ و من شوكت ما عندك غصب

مو نفسك الناهي على بتي

زناد : ما غاصبها بتج أنا

دار وجهة عليه و مبتسم كال عمي غاصبچ أنا ؟

هزيت راسي بـ لا و أمي خزرتني

عدنان : شيخ الوادم راح تروح أطلع الهم

دار وجهة يريد يروح و مو بس هوَ كلنه درنه وجهنة على اثر

صوت روز

روز : شيخ اني موافقة عليهم تغريد ما غاصبتني

هز راسة و طلع من وصل لباب المطبخ صار كباله امجد

تلاگوا وجه بوجه أنصدمت بأمجد لابس شماغ و عگال

نورس : يا هذا امجد لابس عگال

رهينة : شجاب الثرى يم الثرية

بقو واكفين واحد كبال الثاني لحد ما زِناد ضربة بـ جتفة و طلع

امي راحت يم امجد تسولف و اني صعدت وره روز و هي متغطية و ناصبتها مناحة

جُمارة : طبج مرض مو شفتي زِناد واكف وياج

ابقي ساكتة حتى يرفض شو انتِ توافقين و تگومين تبجين

مسحت دموعها بأثنين أديها و كعدت تحجي بحرگة

روز : اني ما ابچي لان وافقت بس أبجي على گلبي الي وهمني كل هاي السنين اني حبيت الشخص الصحيح

و بقيت انتظررر و انتظرررر و انتظررر

تالي يعوفني بنص الحَرب وحدي !!

جُمارة : اني گتلج ورقتة محروكة لان ماكو هيج إنسان بالكوكب بس شسويلج انتِ جنتي معاندة ما ردت اضل اكسر بخاطرج ، لحد ما هو كسرة

روز : والله حبيتة حب ما ينوصف والله لج والله ما نمت بيوم إذا ما حلمت بي لج اهلي ما أتذكرهم بگدة

روحي روحي هاي متعلقة بي

جُمارة : مو كلشي نريدة نحصلة هاي الدنيا ما نعرف شضامتلنه يجوز يطلع هذا الضابط هو العوض الي تنتظري و الي راح يحلي حياتج

روز : بس اني ما اشوف غيرة حتى هذا إذا تزوجتة

ما راح اكدر انطي گلبي ابد و تالي اتطلگ و ارجع على گلب تغريد

جُمارة : بس يعني هو ما اجة و صار كفو كل هاي السنين

تغريد شعليها لو يجي و يستقتل حتى ياخذج

تكدر تكول لا

روز : اي تكول لا لان تغريد تحب تمشينه على مزاجها

و هي بس تتحكم بحياتنا و هسة تشوفين لان تغريد بيها غرور فتنة هاي امي جانت تسولف عنها اختهن الصغيرة

جُمارة : اعرفها ام شراع

- تكول الدنيا كلها هجت منها عيالها طلعوها و خلصوا منها و من شرها حتى رجلها تمرض و مات من وكت من وراها ما تعرف شتريد بس تريد تخرب و تفرض رأيها على الدنيا كلها

جُمارة : ترى كلهن مغرورات حتى جدة رهينة بس احنه نحسها حبابة لان تحبنه

روز : هسة رهينة شيخة يلوگلها عمي غير رجلها شيخ

سكتنه من طبت امي و هي تباوع بشموخ كأن تبين الي تريده صار

ما حچينة حَرف بقينه ساكتين روز تمددت بالگاع و اني نمت على الچرباية تعب الغرفة لسه بية يعني هم جايين يخطبون روز لو الغرفة

و الله امي بيها شي

فزينـة على عياط جوة نزلت اركض امي و روز نايمات و احس واحد يركض وراي هَم درت وجهي لكيتها البطة خطية حتى هي فضولية و تريد تعرف ...

....

" عَالية "

- بَس ؟

- بَس شنو يعني اول و تالي هناك تعيشين

هزيت راسي بخيبة و عفت الصينية و الاكل نزلت اغسل و احس العبرة

خانگتني هي امه بس اجتي هنا رادت تكتلني و سمعتني أنواع السم

مو النوب أعيش وياهم تذكرت امي و شريك و حياتي وياهم

مسحت دموعي

صعدت للغرفة هو بعدة ياكل تمددت بالفراش و غطيت راسي

گلت بلكي ينكسر خاطرة علية و ما يأخذني لهناك بَس خابت

كل الامال ثاني يوم

علي : راح اطلع ساعتين و اجي جهزي نفسج

حتى نروح لاهلي

هزيت راسي بـ نعم

و كعدت اندب على حظي و أعض بأصابيعي

شجهز بروحي قابل عروس و ألم بجهازي و غراضي

هو أنا بطرگ الدشاديش الجبتهن انتَ

الله لا يوفقك يا فلان عَبنك دمرت حياتي كلها و خليتني مهانة

للرايح و الجاي و ملطشة بيد اليسوه و الما يسوه ، بس والله مو صوچك

ابد لاااا الصوچ كله مني أنا ، أنا ما حسبتلهم حساب

و تالي طَينوا حظي

فزيت بسرعة و مسحت دموعي من طَب زِناد يخابر باوعلي

بطرف عينة و صعد چنة نسمع من عمتي عجيبة عنة أنا و امي

بَس شريك يكول چذابة

چانت دگول غرفة التأديب الموجودة بهذا البيت من واحد منهم يسوي مكسورة و ياخذة الها لحد بيتهم ينسمع صوته و من يطلع يسألوا

شسوالك رغم آثار الضرب الموجودة بي يكول ما سوالي شيء

شريك واحد من الي خلاهم زِناد بهاي الغرفة و امي ضلت أسابيع

تنوح عليه و تبوس أيدة حتى يخليها تشوفة ما يخليها

لحد ما طلع النة شريك واحد ثاني عايش بغير عالم

وراها خلى يصير بالجيش بس لليوم شريك يخاف من زِناد

و مشى على الدرب الصحيح و زِناد لو يگلة موت ، يموت

عمتي عجيبة جانت تگول النة ابنها ولاء هيج صار و لليوم يخاف من زِناد بس احنه ما صدگناها لحد ما شفنة حچيها يتطبق بشريك

ساعة الطلع امي تحب زِناد و صدكت بشريك يگللها أنا صحيت على نفسي زِناد ماله غرض

بس أنا لا صدگت بحچيها ، چانت دگول بس من يسافر نشم الهوى

و نرتاح و نعيش بسلام و من نسمع بي جاي كلهن يضمن ولدهن

إذا سوو شي بغيابة لان راح يعرف و يكعد يحاسبهم واحد واحد

بس المصيبة كل هذا و أنا ما انكسرت عيني و خفت منه

فزيت من افكاري على صوتة و هو ينزل الدرجاية الأخيرة

زِناد : خير ست عالية

ردت اكلة لا ماكو شيء

عالية : لا ماكو خيـر

زِناد : صحيح يا خير اليجي منچن

بقيت ساكتة اباوع لاظافيري و أعاين لأيدي ترجف

دگ تليفونة جاوب واحد بعصبية و منهار و أنا احس

يجي يخنگني وأنا لا بيها و لا عليها

سدة و هو يرعد خله التليفون على الكاونتر

زِناد : أنعل أبوكم لابو الجابكم علية

رجع دگ تليفونة و اجة مثل البركان اخذ التليفون گلت لو يلزم المتصل يجرم بي مسح وجهه من شاف الرقم خَله التليفون على آذانة وهو يحاول يهدي روحة

زِناد : ها جدة ما أكدر أجي تعبان

بقى ساكت ثَواني أباوع شلون هذاك البُركان إنمحى

و مَد ايدة يمسح شواربة مبتسم

- شونج ، لا ما أجي ... ههههه ديالله جَاي

غَسل وجهة و طلع يضحك هاي أكيد جُمارة الغيرت مزاجة

شو ما أحسنه يعرف يحب و ذا هي تحبة شلون ما خافت

ما صعدت بقيت بمكاني بلكي يجي و مغير رأية

تمددت على الكرويتة بدون مخدة و غطه ، فزيت هو كاعد

گبالي يلعب بالتليفون رفع عينه شافني فتحت سد التليفون

علي : يالله فضيها

صعدت و بيدي علاگة اخذتها من الكاونتر حطيت الدشاديش بيها

و العباية بيدي نزلتها و أنا الهضمة و الخوف بداخلي يتعاركن وحدة

تسيطر على الثانية لگيته واگف منتظرني طَفة التلفزيون و الاضوية

و قفل باب الهول

أعاين على البيت آخر مرة صحيح تأذيت هنا هواي

بس حبيتك لان ادري شكد ما جانت الاذية هنا قوية ما راح تكون اقوى

من البيت الرايحتلة

حاطة العباية على راسي بغير شال و ملفلفة روحي بيها

أعاين اعله الفرع البي بيوتنة واجهية الفرع بيت جدة رهينة

و من الجهة اليمنة بيوت عمامي و الجهة اليسرة تكون المزرعة

خالية من البيوت

و بين بيت و بيت ساحة هي المفروض تكون بيوت سمعت من أمي رادو يشتروهن بس راعيهن ما موجود و ما يكدرون يتصرفون بيهن على ساعة يجوز و يطلع صاحبهن

من گد ما الگيعان متروكة صاعد بيهن الزرع و العاگول سوه

گلبي يدگ سريع و هو يفتح سياج الساحة مالتهم

يمشي و أنا امشي ورا چانت أمي ابد ما تطلعني لبيوت عمامي

بس للسوگ لو يأخذنة شريك زيارة جانت دوم هي تروح و أنا ابقى عيني على البيت

ما طابة كل عمري لا بيت عمي عمار و لا بيت عمتي عجيبة

هم عدهم المضيف مفصول عن البيت باب المطبخ يصير بالوجه

مفتوح و صوت النسوان يسولفن طالع الأحذية و الشحاطات

مال الزلم تارسة الباب

نزع شحاطته بس أنا ما نزعتها گلت وين الگاها بعد

من عاينت البيت كله مفروش حتى المطبخ كله مفروش كاربت نزعتها

طفل صغير من شافنة طَب للهول يصيح اجة عمي علاوي ومرتة

بـ لحظة هوسة الصوت صارت هدوء بلعت ريكي و اجر النفس سريع من الخوف نزلت راسي و أنا ادعي يا رب محد يحجي شي ويخلوني اصعد للغرفة بسلام ، راح هوَ باس أمة و هي كاعدة بس بقت منزلة

راسها ضايجة منه

عاينت بالوجوه ما كدرت أفسرها من اول نظرة حاطين الصوبة و كاعدين كلهم الشباب و البنات قسم على الكرويتات و قسم بالگاع و حاطين علبة دبس و علبة راشي و الخبز على الصوبة

خالد : همزين اجيت اليوم عدنا رهن على الدومنة احنه و احفاد ربيعة اليخسرون يعزمون احفاد الثانية على عشا اخذو وياكم فلوس مو ترحون حدايق ترى الدفع اعله الروس

ام سلام : بالله ما تچفوني شر ربيعة و آحفادها انتو ما تنكسر عيونكم مو اخوكم بالسجن بسببهم

إسلام : يمة جا احنه مو كتلنه واحد منهم

- چا و هم مو هم كتلوا ابن تغريد

خالد : يمة احنه ناس عايلة بناس خلينة متصالحين لان

خلافنة وي بيت ربيعة يعني بيوتنة و حلالنا كله

نظل شايلين همة لان هم عينهم أعله زرعنة و أحنه عينة إعله زرعهم

ام سلام : هنيال گلوبكم عَبنها مو مثل گلوبنا أنا ليلي ما انامة بسببكم واحد بالغربة و الثاني بالسجن و الثالث

طيحوا ناهبة برگبته و ما يردون اخاف إعلى البقية

من حِچتها غمضت عيني قوي جنت متأكدة ما تفوتها

علي : رَحمة أمشي صعدي عالية للغرفة

گامت أمة تصفگ بأستمرار

- صعدي العروس يمة صعديها

اسمع ولدها يسكتون بيها و هي دگلهم عوفوني اطلع ضيم گلبي

صعدت فوگ فتحت اختة باب الغرفة طبيت و هي طبگتة قوي و راحت

أعاين للغرفة كنتور صاج چبير و فوگا فراشات هواي مبينات

مالات أمة و چرباية نفر واحد خشب و ميز صغير فوگا مرايا هم داگيها

يعني مو مال الميز

و على الميز مشط و عطر نزعت العباية و گلت خلي أحط الدشاديش

بمكان بالكنتور أخترعت من كل باب بالكنتور افتحة الگا متروس بقج مال هدوم الكنتور چبير 8 بوب ، بابين اله و الباقي بقج هدومهم

عاد شلت هدومي فتحت بيبان الميز الـي عليه المرايا

لگيته كله أحذية أحس روحي أنهضمت رجعتهن بالعلاگة و خليتهن جوة الچرباية

چِنت أسمع هاي الگولة بالاعراس و هسة شفتها بس الفرق

هم بالاعراس يكولوها من باب الشقة و أنا صارت. وياي صدگ

" جَتي العروس محَناية ، لا كنتور و لا چرباية "

كعدت على الچرباية رافعة رجلي و سَاندة ايدي و راسي عليهن

احس مشتاگة لامي هواي امي گلبها طيب ادري بيها حتى وره المصيبة السويتها ما راح تقسي وياي و راح تحاول تصبّرني

أنفتح الباب مسحت دموعي ، طَب علي و بأيدة شال خلى على الميز

علي : هاي من تنزلين لبسي

عالية : يعني لازم أنزل ؟

ما جاوبني رفع البطانية و تمدد اني جنت كاعدة بنهاية الچرباية

مديت رجلي حتى أنزل

علي : ابقي كاعدة اني ربع ساعة و أكعد اروح للشغل

هزيتلة راسي بـ لا و نزلت كعدت بالگاع هو مغمض عينه بَس يحوس

تالي گام رفع الفرشة و طلع فراش من الحاطيهن للچرباية

و طلع من الغرفة جاب مخدة و بطانية خلاهن فوك الفراش و نام

بقيت كاعدة بالگاع ما تحركت و لا فرشتهن طفيت الضوه و رحت يم البردة أعاين الزرع الگبالنه يجنن لو ما باردة جحيل چا فتحت الشباك

تليفونه يدگ بس مسوي صامت بس الضوه يشتغل اجيت أعاين للاسم لگيته الشيخ زِناد

ردت اكعدة بس خفت شوية و دگ الباب قوي هو گعد طلع اخو سلام

- هاك يحجي وياك زِناد مو يدك عليك ما تجاوب

- مسوي صامت

اخذ التليفون من ايد اخو و گام يحجي و يمسح بوجهة و هو يبررلة

لان طلع .. مبين جاي يرزلة لان عفنة البيت سد الجهاز و كعد عاين على الجهاز و الفراش

علي : انتِ وين تهوجمين ما تنطمرين

ما جاوبته كام فتح الكنتور و أخذ ملابس و طلع كعدت على الچرباية اعاين الغرفة شگد چبيرة فارشين بيها حصير و الگاع تصل من البرد

اجة سابح مَشط شعرة گبال المرايا و راح

مرت دقايق بَس من روحتـة ..

....

" جُمارة "

خليت ايدي على حلگي اباوع بصدمة من عمي هاشم لازم مرة بأيدة

لابسة عباية حلوة حيل و رقية تريد تملخها

رهينة : هاي منين جايبها النوب انتو شو يومية واحد جايب النه عسلابة و جاي ما معروف لا اصلهن و لا فصلهن

رقية : هسةةةة يطلكني و اروح لاهلي

و انعل امها و ابوها التجيك

هاشم : روحي يالله بس محد من الجهال يروح

نورس لازمة عمي قاسم تحلف بي خاف هو هم متزوج

و هو يبوس بجهالة و يضحك

رهينة : منين هاي ما تحجي شنو جايبلي خرسة

- شوبِك خالتي ما بستاهل منك كل هاد

جدة شهگت و كامت تدگ على صدرها

- يبووو يبووو يبوووو

هاشم : يمة يتيمة و فقيرة ما عدها احد

رهينة : يمة هلا بكافل اليتامى و المساكين

زِناد : سعد البزاز

حجاها و هوَ يضحك يهز راسة بقلة حيلة

رهينة : يمة أنا ويَـ العراقيات حظي ما كعد جايبلي

سورية وين كاعدين احنة

غسان : جدة بـ باب الحارة

زِناد : لبنانية مو سورية

- اي من لبنان

رهينة : وين تكعدها بقصرك لو وين ولك بدال تبنون

بيوت لارواحكم ضالين تتزعططون يمن اوهمداكم

رقية نزلت عبايتها براسة و تدعي

- امشي غسان وصلني لا اروح وحدي والله

ابنها چلب بيها اخذته وياها

سرى : يابة چا احنة من امس منتظريك تالي تجي جايبنة

هاي الصخلة وياك

صاح ابوها بوجها و هي منهارة

- لو بيج خير ما تاخذيلج واحد متزوج و تهجمين

حياتة

رهينة : عليمن يجدة جا هو ابوج قشمر حتى هيَ تقشمر عليه اخذها و كاللها وياي عدنا بيوت و املاك

و هو دجاجة بالحوش ماكو بأسمة

- ولييييييييييييي عَن جَد

رهينة : اي يَـ چنتي وداعتج جدج

اخذها و صعدها وهي ترعد ويا باللبناني على الدرج

زِناد : بالله هاي وين يحطها هَسة

رهينة : أنا اكلك هذا حاسب حساب مرتة راح تزعل

و هالشهرين محرم و صفر تبقى يم اهلها

شراع يتزوج بفرحة الزهرة و ياخذ غرفتة

ضِحك و هَز أيدة

رهينة : أعليمن يطلعون يجدة هو أبوهم حبلها و جَيبها

و مَوتها و أنا ما ادري چـا إذا شفت الكراب أعوج

گول من الثور الچبير

حجتها و هم ناس مصدومة و ناس تضحك

رهينة : الأمثال تنضرب و ما تنقاس الله يرحم روحة

بهاي المسية

طب يونس يركض

- يالله شيخ وصلوا الجماعة

گال في آمان الله و طلع أباوع لدمعة ذايبة كلش

و شكد اكرها و اضوج منها من الكاها تباوع بهاي الطريقة

طلعت للمطبخ من أباوع جماعة ترسوا الساحة بيهم مثله لابسين غِتر

و عُگل و يضحكون صوت ضحكهم عالي جاي يعلمون بواحد على السلاح و يخاف يسحب أقسام و هُمَ يضحكون و يشجعوه

زِناد : أرمي يالله لا أرميك وَالله

- ثگيلة ما أكدرلها

اباوعلة اول مرة أشوفة يضحك بهيج قوة شوية و طلعوا

من البيت

لكيت جدة تلوب و تغلط على ولدها واحد واحد كعدت يمها

البطة تفتر شالتها و شمترها

رهينة : وخري عني انتِ ما بقى بس البط ما تشمتت بحالي

جُمارة : جدة اكلج

تقربت عليها أشاورها

- شنو زِناد هم راح للصيد

ابتسمت و نِست كل الضوجة عدلت گعدتها

رهينة : شعندج تسألين على حفيدي

عدلت شالي و اني اباوع منا و منا لا تسمعني وحدة

جُمارة : يعني شعندي هيج سؤال عادي

- مالج غرض

عوجت حلگي و درت وجهي عنها

سرى كاعدة على الدرج تبچي انقهرت عليها كعدت يمها

احاجيها طب غسان

غسان : مرتي منو مبچيها عمي اليوم احرگ الدنيا حرگ

سرى : چفيني شرك لا وحگ علي أحط چيلة برأسك

- ههههو ههههو عمي تحط چيلة براسي رحمة الله والديك عمي هاشم تزوجت حتى خاف باجر اتزوج أعلة بتك محد يحاچيني

- و أنا اخذ هاي الشوفة الوصخة

- يااااع الرجال بيد مرتة هي إذا نظيفة هو نظيف

- اكلك چفيني شرك مالي خلگك

- ابن عميييي شوووو بدك اليوم ع العشااا حطلك

صفيحة لو كبة حلب

سرى : توثية خشب كون أعله رأسك

حجتها و صعدت و هو يضحك

لحد الليل و ما أجة صعدت انام و الصبح هم ما موجود جدة كل ما اباوعلها الكاها صافنة عليه و تبتسم و أني اخزرها

صاحتني كالت تعاي اشاورج

اجيت كعدت يمها جرت راسي تشاورني

- اليوم حضري روحج العصر نروح للقراية

ضحكت واني عبالي شو شكو الظهر هم ما اجة على الغدة و العصر اخذت الصاية و الشال مالات ورود امي ما حجت شي مدري شعجب

رفل و سرى و زهرة كلساع يسألن جدة وين ترحين

دگللهن اخذ جمارة للطبيب

طلعنه و اني گايدة جدة و الهوى عالي الشمس طالعة من بين النخل و الخضار تارس الدنيا هاي اول مرة اطلع مشي

رهينة : تريد تروح زهرة و رفل حتى يفشلني كدام النسوان

- جا ما اخذتيهن جدة

- اسكتي ولج ما شايفتهن من يتكافشن بين النسوان

علمود الچياسة و لا جنهن بزر خير

نمشي و جدة كل شوية مسلمة على ىاحد يمكن ما ضال واحد بالعمارة ما تعرفة وصلنة للبيت و النسوان كومة كل مجموعة تطب سوة

بس من طبت جدة أكثرهن كامن واجن يسلمن عليها گعدنها بالواجهة يم الملا و اني كعدت بصفها حتى الملا تعرفها جدة

سألنها عليه حطت ايدها على رجلي

رهينة : يا هاي حفيدتي الدكتورة بت يعقوب أبني

- الله يرحمة يا رب

- مخطوبة ، متزوجة

- لا بعدها شوية تكبر بعد

- هي ناعمة ما مبين عليها.

احس خدودي صارت دم و اني اباوعلهن كلهن عينهن علية

و جدة كامت تسولف بطولات قائد ثورة العشرين حفيدها و عزيزها

و النسوان الكبار صديقاتها كلهن يمدحن بي

قربت حلگي حتى أشاورها

جُمارة : جدة هذا مو زِناد هذا شعلان ابو الجون

گرصتني برجلي

من خلصت القراية جابن حصة جدة وحد و كعدن النسوان كلها تسولف

- جا ام يوسف إذا عدج هيج وحيدة ما تطوها النة

وليدي علاوي هم مهندس يتراهمون

- يا عود أنا ردت أكلج اريدنها لجعفر ابني

ضحكت جدة و مدت ايدها اخذت كلينس

رهينة : تردن الشيخ يسويها گوامة علينا اليوم

- بس لا يريدها

- مرة بالشقة واحد من عمامة گال اريدها لابني

كام و نِهى إعليها

- جا ما ياخذها

- اخوها مات وهي جانت تدرس منتظرها تكمل

و الله كريم

سكتن بعد ما حِچن و احنه طلعنة و اني شايلة العلاگة شكبرها

جُمارة : جدة شنو هسة اليشوفني شيگول شكد عيب

رهينة : امشي شيكول ثواب ابا عبد الله

جُمارة : سلام الله عليه

رهينة : مو تصدگين الحچي الحچيته ترى ردتهن يسدن الموضوع مالتج أنا اخاف من العين

- اي جدة مو قحط بعدين اكلج يعني ترى ما ينراد الها روحة للقاضي حفيدج طايح بعشگي

- انهجم بيتج ولج بحالج هو شني شايفتة يركض وراج يريد

منج حجاية ، شو انتِ طايحة و محد مسمي عليج

جُمارة : عزززه جدة احجي حظج و بختج

- والله أنا ما مچذبة

واحنة نمشي دگ هورن ورانة أخترعنة دارت وجهة جدة حتى تعيط بي

ضحكت من شافته زِناد راحت لمكان السياقة مالته نزل من السيارة حضنها و باسها اني عفتهم يتباوسون و صعدت

هَو صعد جدة و صِعد باوعلي

زِناد : ها شونج

- زينة و انتَ

- الحمدلله

حرك السيارة و باوع لجدة

- ليش تطلعيها بالله

رهينة : لا التوبة بعد ما تطلع

جُمارة : جدة شسويت شو حتى حبابة

رهينة : لا بعد ما تروح أكلنها بعيونهن وكل وحدة تصيح أنا أريدها ما تطوها النه ، گتلهن لا ما نطيها

حطيت الشال على حلگي اضحك جدة هن بس اثنين

شنو السالفة

زِناد : ما أطيتيها عليمن بَعد

رهينة : لا ضامتها لليستاهلها

سكتو بعد شوية و نوصل للبيت رجعت جدة كالت

- والله ما يستحن هاي التگول ابني مهندس و هاي ابني محامي گلت الهن هي دكتورة اصلاً

ما تحملت صار صوت ضحكتي عالي من وورة چذب جدة

رهينة : تضحك هي هبشة كلشي ما تفتهم

"هبشة" : قليلة العلم

زِناد : لا مو هبشة ، مكيفة

نزلت من السيارة و اني خربانة ضحك اخذت جيس وياي لروز و امي نزعت الصاية و نزلت اركض طلعت للكراج لگيته بالمضيف

البطة بيدي اخذتها و رحت

وصلت لنص الساحة و استحيت شمرت البطة و گمت اركض وراها و اضحك طبگت باب الحوش و هو صاح جُمارة

شلت البطة و رحت يَمة

زِناد : تعاي

نزعت شحاطتي و طبيت أضحك و البطة تريد تگمز و تلعب

چان بيدة سلاح و وصلة يمسح بي

زِناد : شايفة هذا السلاح

- اي

- أفرغة براسج إذا تطلعين وي وحدة

جُمارة : شنو سجن

زِناد : أي

جُمارة : ترى جدة حچيها مو كله صحيح تريد تضوجك ،

عاف السلاح و گام اني رجعت ليورة

زِناد : شلونها أمج وياج

- نص و نص

ابتسم و خلة ايدة على راس البطة

جُمارة : اليوم ليش ما أجيت

- معزومين بالدغَارة

- هنيالك يومية مَعزوم

كام يضحك و شال السلاح رجع علگة بالحايط

جُمارة : امجد هم يريد يصير شيخ

- مادري يجوز

- بس أيع ما تلوگ بس عليك

حجيتها و هو أبتسم خليت ايدي على حلگي النوب خنگة البطة

جُمارة : هذا حچي جدة مچلب بحلكي

غمضت عيوني و أحس مدري شصار بية من خلى إيدة على جفني يشيل شي ضليت اغمض و ارجع افتح لحد ما وخره

بَس نظراتها أحسها جاي تتأكد من شي و منتصرة

نزلت البطة و مسحت وجهي بأثنين أديه

زِناد : جدة تلعب على الحبلين

ضحكت و هزيت راسي بَس أحس الدنيا ضاگت بية من سمعت صوت امي قريب تصيح جُمارة بعصبية

البطة ما هي اكيد عرفتني هنا من طلعت البطة اباوع للمضيف منا و منا ماكو اي مكان أختل بي غير ورة الباب و منا لحد ما أوصل الباب

امي طابة

مدري شلون خطرت على بالي هو يباوع

للخوف الواضح عليه ، نسيت كلشي و ما فكرت

رفعت عبايته و ختلت ورا مچلبة ايدي بدشداشته

جُمارة : ضمني عليك الله

.....

جيتك أنا بطرگ گلبي و مِستحَاي

ضُمـني من الدنيا هَـاي

- رُسل فَهد 🤎

تصميم أضحكني 😂

وتصميم أعجبني 🤎

التصويت + التعليق بين الفقرات لُطفاً

يا أجمل الوحوش

- رُسل فَهد

...

يجـوز أرد ، بشرط واحد !!

روح أگطع وردة من أقرب حديقة

و حاول ترجعها بأيدك

شوف يقبلها الغُصن ؟

إحنه وادم من نهِد حاجتنة

مَنباوع وراها ، و لا نِحنّ

- رُسل فَهد

...

" ورود "

وصلت للنص و قررت أرجع بس الصوت السمعتة ما خَلاني

أصوات غريبة طول ما أمشي و أنا متعجبة هالدمعة شنو الجابرها تطلع بهالليل بدون ما تخاف وگفت مصدومة و فاتحة حلگي وعيوني

بصدمة و أنا أعاين

دمعة تتشابگ و تبوس بواحد غريب عبالك عشيقها من گد لهفتها اله

رفعت راسي أعاين على شبابيج الغرف شلون ما خافت

شوية و شمرها على الزرع و بعد ما أكدر أعاين إلا امشي

ليگدام اكثر

اريد ارجع و احس رجلية ما تعيني جامدة بمكانها و اخافن اطلع صوت

و يلزموني هسة يذبحوني و يدفنوني بهاي الكاع و محد يدري بية

رجعت امشي ليورة بس أنا نظري عليهم حتى إذا عاينتهم لچحوني اركض

بس هم وين رايحين بغير عالم من عبرت نص المسافة ركضت و طبيت الهث بخوف وكفت بالخوال أعاين رجلية ترجف رجيف

طبيت للغرفة ردت انام ما أكدر أتگلب چـا شو أنا خايفة و ام المصيبة لا

فتحت البردة على كيف أعاين ما موجودة ما مبينين ضليت

أعاين ماكو الها آثر لحد ما تعبت ما معقولة صعدت بهالسرعة

غمضت عيوني اريد انامن و منظرهم ما يروح من بالي

الصبح كعدت ما منتظرة شراع بكد ما منتظرة أشوفن دمعة هم عينها بيها ذرة خوف لو هي هيج خبرة و متعودة و أنا بهاي الحالة شسوي و المن أكول صبيت لجدة و شراع ما نزل صارت بالعشرة و هو ماكو

من عاينت راح عدنان صعدت فوگ فتحت باب الغرفة مقفول ، دگيته

مرتين ما جاوبني درت وجهي أنزل وصلت يم المحجر أنفتح باب الغرفة

وهو مطفي گوة فاتح عينه

ورود : صباح الخير ، شنو اليوم ماكو دوام

شراع : أيييي مآخذ أجازة

- أسويلك ريوگ ؟

- قَشمر اني عندج ؟

ضحكت و أنا أعاين للدرج لا يصعد احد لو ينزل

احد من درج الطابق الثالث

ورود : حشاك لا ، بس نمت

شراع : يالله سويلي بين ما أسبح

نزلت و أكول بداخلي والله الك خلگ امس بالليل سبحت و الظهر تسبح و الصبح تسبح بهذا جو الشتاء البارد أنا لو ما التنظيف

وعلي كل يومين يالله اسبح شني شبية

صبيتلة الاكل و صعدت الصينية فتحت الباب هو واگف

يخلي عطر و يرتب شَعرة خليت الصينية و هو دار وجهة عليه

شراع : ليش تتعب حبيبي أني أنزلك

ورود : لا أنا متعودة

اعاين لتليفونة يدگ عوجت حلگي و رحت للبردة فتحت الشباج

ورود : راح أنزل أنا و من تريدني صيحلي

شراع : تعاي آكلي وياي

- إكلت أنا من زمان

فتحت باب غرفته و نظفت غرفتي و أجيت نظفت غرفتة

هوَ كاعد ياكل و يراسل

ورود : مو حتى الاكل برد و الچاي صار ثلج

ضحك و سد التليفون لمن خلص هو نزل الصينية تليفونه مسوي صامت

بس كل شوية يشتغل ضوه مال اتصال

طبيت اعاين للتليفون مكتوب المحامية ندى

وراها گام يدك رقم غريب أنا واكفة صافنة بأسمها فزيت

من أيدة صارت على خصري

شراع : وين وصلتي

- يم ندى

حچيتها و درت وجهي بعصبية و هو طگها ضحكة

شراع : اليوم العصر حضري روحچ اطلعج وياي

- أنــا ؟

- اي لعد ما تردين تختارين غرفتج لو واثقة بذوقي

ورود : لا منو يگول ذوقك حلو

- ذوقي أختارج

- لا جا يموت

- لعد ماكو طلعة أنا أختار

ورود : يجوز ذوقك بس بالنسوان حلو

حچيتها و اني رافعة حواجبي ضحك بصوت عالي

شراع : ملعونة

طلعت من الغرفة ركض لامي لگيتها بالغرفة كاعدة هي و نورس

تطيها أقمشة الفرشات التخيطهن الي

اجيت يمها شاورتها گالت اي ميخالف أصبري من يجي

ابوج أكله و اشوف

بقيت كاعدة على الجرباية وأنا أعاين ألوان الفرشات شكد حلوة

طبت جدة تمشي بعكازتها عاينتلي

رهينة : شبيج ولج نزلتي تركضين

ام عدنان : گايل الها خطيبها أخذج اليوم تختارين الغرفة

و تريد تشوف ابوها و أخوتها يقبلون

رهينة : چا ليش ما يقبلون وحد هيَ ، هاي فرشاتها

ام عدنان : اي جبتهن امس وياي من السوگ حتى مرت قاسم تخيطهن على راحتها

رهينة : يالله خياطهن علية عود حاسبيني أنا

اجيت بست جدة مبتسمة وبِست أمي

بيومها حتى ماعين الظهر ما غسلت هو وره ما تريگ راح لاهلة و گال أجيج العصر و أنا منتظرة امي تگول لابوي حتى احظر عباتي

و هدومي

من طلعت من الغرفة

ام عدنان : قبل بس يگول خل تشوف أخوها عدنان

ورود : يووووه يمة عدنان طبعا ما يرضى

- گولي لحياة تقنعة

- ما اريد يالله ما أروح

حجيتها و صعدت للغرفة ضايجة يعني يردوني اقنع عدنان و أنا أخاف اجيب اسم شراع يمه شلون اروح اكله تقبل اطلع وي شراع

حتى يرگعني چلاق يوديني لبيت فتنة گبل بدون زفة

العصر صار و انا كاعدة مستحية من شراع هسة إذا يجي و اكله ما اكدر اروح يعرف من وره أهلي هسة يگول شطلعت هاي

سمعت باب غرفتـة أنفتح سحبت نفس قوي ورجعت شعري ليوره

و أكول يالله عادي عادي

طبت زهرة تركض

- يريدج عدنان جوه

احس رجليه ما تعيني يمه شيريد مني نزلت لكيتهن كلهن كاعدات بالهول و دمعة تعاين صفح كون فگس لهاي العيون الصلفة

امي و جدة و عدنان و كلها كاعدة اعاينلهم و گلبي يدگ سريع

ورود : ها خوية صايحلي

عدنان : اي شرايدة مني

ورود : أنا ؟ لا وداعت ابوي كلشي ما رايدة

امي و جدة و كلهن يضحكن

عدنان : يالله روحي وي رجلج بس مو جثير تتأخرين

- أنا ؟ اي خوش

حجيتها و صعدت اركض مستحية و فرحانة اسمعهم وراي يضحكون

كمت حتى ما أعرف شحجي زهرة يمي بالغرفة تطلعلي بغراضي

لبست هدوم مرتبة و لفيت الربطة فوگاها العباية أمي صاحت لزهرة دزت بيدها جنطة جديدة حتى البسها

حطيت عطر بَس بلاية قطرة مكياج امي ما ترضى و اصلاً ما عندي بالغرفة حجاية امي الشهيرة بس تخلين حمرة

تروح نشعتج بالحنه و العرس و أنا مصدگة بيها

نزلت زهرة شوية و صعدت گالت يالله شراع نزل منتظرج بره

أنزل من الدرج و أنا مستحية احس بروحي حتى من جدة مستحية

و بنفس الوكت متوترة و فرحانة مشاعر هواي و واحد مسيطر على الثاني

طلعت و أنا يمكن صارلي فوگ السنة ما شايفة باب الشارع

دگ هورن بالسيارة نزيت اعاينلة واگف على جهة

حتى هاي اول مرة اعاين سيارتة

و اول مرة أصعد بسيارة بالصدر كلهن أشياء صارن اول مره

كعدت و أنا الخجل محتلني من فوگاي ليجوه اعاين للعباية منزلة راسي

و أول ما حرك السيارة فزيت من خَله ايده علي أيدي و لزمها قوي

شراع : گلت اليوم أنا و عدنان نتضارب علمودج

ورود : لا حباب عدنان بس ساعاته براحاته

تمشي السيارة و اعاين للطريق مرينه على مكان بي أشكال الغرف

كلها حلوة محتارة شأخذ عجبتني وحدة بس ما قبل گال ناعمة و احنة غرفتنة چبيرة يعني تضيع

تالي رحنه لغير مكان أختارينه وحدة كلش حلوة و حجمها نص و نص

انطاهم الرقم و العنوان گعدنا بالمطعم ناكل و أنا ضجت من أعاينلة طلب الي بس ما ياكل بس يَرتبلي الماعين و يسويلي لفات

ورود : بس أنا ما أحب هيج عبالي راح تاكل وياي !!

مد ايدة على كلاص الببسي مالتي بي گصبة أنا شربت منه

رجع هو هَم شرب منه و خلى گبالي

شراع : باعي أنا تلعب نفسي من كلشي بس منج لا

اكلت شوية وگتله شبعانة اخذه سفري و طِلعنه

شراع : ورود شكو ضايجة شنو جديد عليج أني ؟

ورود : لا ، بس أنا ضايجة علمودك

يعني انتَ من كلشي حارم نفسك

شراع : هاي اني ورود إذا ما تتحمليني گولي اني ما أريد

تكونين ما مرتاحة وياي

ورود : ترى انا ما مأثر عليه شي بس أكلك ضايجة عليك

و شنو جديدة مال تتحمليني و ما تتحمليني

شراع : اي أني ما أخذ وحدة ما مرتاحة وياي

ورود : و أنا گايلة ما مرتاحة شو انتَ ما تعرف تحچي

- أني ما أعرف أحچي ؟

بقيت ساكته لان إذا أحچي راح تسوء الأمور اكثر هو گام يسوق سريع

و اعاينلة كل اوضاعة تغيرت حجيت بصوت ناصي

ورود : شبيك ؟

- ما بية شيء وروووود اني مو مخبل لو مريض اني رجال أوهوس و مو جديدة عليج السالفة لا تضلين تلحين بنفس الموضوع لان هذا نهايتي وياج

ورود : انهيها شنو انتَ مان علية ما اريد يالله

رجعني لاهلي

شراع : ماشي ورود ماشي چنت غلطان بساعة الطببتچ

بيها لحياتي

ورود : أنا غلطانة عبالي انصلحت بس طلعت نفسك نفسك

هو ينفت و أنا درت وجهي على الجامة اريد بس نوصل للبيت

اول ما صَف السيارة مديت ايدي اريد افتح الباب

قَفل البيبان

.....

"جُمارة "

- ضمني يمك عليك الله

بأثنين ايدي لازمة دشداشتة بقى متصنم بمكانة حاير لا يگدر يدير وجهة و يحاچيني خاف أمي تطب و لا هو متقبل الصدمة و خوفي من أمي الي يخليني اسوي المستحيل و لا ضربها و أسلوبها القاسي

عُطرة يكفخ بخشمي و اني أتنفس على كيف و گلبي يدك سريع تحس حتى النفس بي صوت عالي يصيح لامي ، اباوع لدشداشتة

و عبايتة فوگاي سودة قماشها شفاف يخليني اشوف كل الدنيا

سودة ، و هي هيج راح تصير إذا شافتني أمي

أباع للخيط الذهبي الي مخَيّط على طرف العباية و هديت ايدي من دشداشتة ثَانية بَس ، رجعت لزمتها قوي و اني اسمع صوت أمي

من بداية المضيف

تغريد : جُمارة هنا ؟ بطتها توها طلعت

وهو يحجي يحرك ايدة و كل ما يحرك ايدة العباية تنجر ليگدام

و اني أنجَر وياها قويت قبضة ايدي على الدشداشة

زِناد : شتسوي هنا مثلاً

صار هدوء و بِدة صوت امي يرجع يبتعد و هي تصيح جُمارة بكل عصبية يمكن إذا لزمتني تأكلني بسنونها بقى واكف ما تحرك و انطاني الأمان و اني رغم صوت امي ابتعد هم بعدني خايفة

جُمارة : اطلع

- طلعي

رفعت العباية و كعدت على الكرسي الجبير ورا الهث و ايدي على گلبي

يريد ينفجر من گد ما يدگ من الخوف منزلة راسي و بأيدي الثانية اعدل بحجابي و بالي كله يم الصوت

زِناد : تعاي أفتحلج هذا الباب و گليلها چنت بالتَرك

بدون كلام هزيت راسي بـ أي اني كاتلني الخوف و الرجفة و هو حاصرته الضحكة نَرفزني طلع قبلي و اني امشي واتلفت يصير بصف المضيف بس الباب بمستوى نهاية المضيف يعني نفس المسافة

الي امشيها من أطب للمضيف راح امشيها حتى أوصل للباب

اني امشي اسرع منه سبقته وهو ما همة شيء

طبعاً قابل امه تركض ورا وراح تكتلة وصلت للباب عضيت إصبعي بغضب و اني اشوف السرقي عليه كومة سلاسل و بيهن قفل باوعتلة

بقلة صبر و عصبية و اني محملته كل المسؤولية

على أساس مو اني الاجيت برجلي

مد ايدة بكل برود و طلع سويج السيارة من جيبة و ويا السويج مفاتيح واحد من عدهن هو مد ايدة على القفل يفتحه و اني احرك رجلي بتوتر و أضربها بالكاع فتح القفل و كام يفتل بالسلاسل

جُمارة : طبعاً أنتَ تبطئ بروحك حتى أمي تكتلني

وهو مدنك يفتح السلسلة رفع عينة عَلية يباوعلي بطرفها من راسي

لرجلي و ما جاوبني كمل يفتح السلسلة اول ما نفتحت سحب السرقي قوي و طلعت من الباب اركض

عبالي راح يروح بس و اني اركض درت وجهي لكيته واكف مخلي ايدة ليوره يباوعلي شوكت أطب لحد ما فتت يم مكان التنانير باب المخزن مفتوح وكفت عدل اريد نَفسي يستقر و انكث بدشداشتي

مسحت وجهي بأثنين اديةو عدلت حجابي و طبيت

لكيت امي واگفة بالهول أيديها على خواصرها و روز كاعدة على الدرج طبن رفل و زهرة يصيح عمة ما لگيناها

جُمارة : يمة شفتي بطتي

عضت إصبعها و أجتي ناحيتي و اني أحاول ابين ما خايفة

تغريد : وين چنتييي

جُمارة : ادور على بطتي شو ما هيَّ هم شفتيها

طلعت البطة من غرفة جدة رحت اركض اخذتها

اليوم متحلفتلها لان من وراها هي فضحتني ، امي تباوعلي ما مصدگة

و تنفت من العصبية

تغريد : امشيييي فوووگ كدامي

اباوعلهن بفشلة عدلت حجابي و صعدت روز لزمت ايدي

روز : وين چنتي ولج تغريد بعد شوية تخابر الشرطة

دكول جُمارة انخطفت

جُمارة : بعد اختج تموت على الإثارة

شنو السالفة شو هاي اول مرة

روز : والله ما ادري

انفتح الباب طبت امي تدور على ربطتها مال الطلعة

تغريد : يالله امشي بدلي تعاي وياي لبيت عجيبة

جُمارة : اني ؟ لا ما اروح يمة تعبانة ستوني جاية من القراية

تغريد : رهينة تركضين وياااهاااا ، امج ما ترحين مووو

- يمة ما احب بيت عجيبة

- شبيهممم احسن من ذولة الوحوش بس هو البزون يحب خناگة

جريت الصاية بعصبية

جُمارة : يالله يالله راح نولي

مديت ايدي الف بالشال و اني ضايجة ما عاجبني اروح روز تمددت على الچرباية و صافنة بغير عالم

جُمارة : ترحين ويانة

هزت راسها بـ لا و مدت ايدها على العصير و الچركاية من الجيس

تاكلهن و أمي لبست عبايتها و اخذت جنطتها

تغريد : يالله بساع انتضرج جوة

خليت البطة بحضن روز فزت و عاطت و شمرتها بالكاع

روز : شبيج شبيججج مو تدرين اخاف ايع اخذيها

جُمارة : ايع بعينج شوية انتِ احلى منها خليها بالغرفة لا تطلعيها اخاف عليها من التحرش

روز : ضميها يم الجابها

جُمارة : لا اخاف عليها منه هي رقيقة ما تتحمل هذا إذا يصير عصبي يدفرها يسوي بيها فشل كلوي

روز : شمدريج عصبي

جُمارة : ليش وين اكو عراقي مو عصبي

شلت البطة و مشيت وصلت آخر طرف بالجرباية شمرتها عليها عاطت

و اني ركضت سديت الباب ، هي اصلاً البطة تركض وراي تريد تطلع

يمكن ضايجة خطية ، نزلت من الدرج بلعت ريگي من لگيته كاعد يم جدة و أمي واكفة يم الدرج منتظرتني

تغريد : وين صرتي صار ساعة

بعدني ما مجاوبتها دار وجهة يشوف ويامن تحچين ، چان كاعد بالكرسي الي يم جدة و منطينا ظَهرة ، باوعلي عاقد حواجبة

و نظرتة مُخيفة

عدلت الصاية و گلت ما دام وي أمي ما يحجي امشي واني متوترة

اول ما وصلت باب المطبخ صاح

زِناد : ويــن ؟

دارت وجهة امي بعصبية و جدة خلت ايدها على رجلة تهدي بي

تغريد : وين ما يعجبني

زِناد : طلعي انتِ ، بس الوياج مَتروح

لزمت امي ايدي بعصبية عَتتني

تغريد : ما تتدخل بتي هاي و وين ما اطلع أخذها

وكف و تقدم علينة والسبحة بيدة و هوَ لابس الدشداشة بدون عباية

فَر السبحة بيدة و خلاها بجيبة باوع لامي

- گتلج ويــن ؟

امي تنفت من العصبية و تخزر بي جرت ايدي اقوى

تغريد : يم عجيبة عندك مانع ؟؟؟؟

أشر بأيدة على باب الشارع

- يالله أنا أوصلچـن

هدت ايدي و مِشت گدامي درت وجهي عليه و كلها بالصالة واگفة

تباوع مشيت وراها اخاف لا تلتفت و تشوفني لسة واكفة طلعنة بالشارع سيارتة موجودة بس مو واحد يروح بيها لان كلش قريبين

امي تمشي و تدردم

تغريد : مشيتها هاي المرة لان أنا ما اريد مشاكل

بس مو أنا الينحط عليها حارس و واحد يوصلها أنا بكيفي وين ما اريد اروح امشي وحدي و محد يمنعني

درت وجهي عليه يهز راسة و رافع حواجبة بمعنى ما يفيد الحجي

تغريد : محد يتحكم بية لا أنا و لا بناتي

راد يحچي و بَاوعلي ، عضيت شفتي و حَاجيته بعيني سَهلها

ابتسم و مَاحچة شي ، فرحت و اني اشوفة يسمع كلامي خلي اكول لجدة من نرجع حتى تنجلط اليوم وصلنة لبيتهم فتح هَو باب السياج و طبت امي بَطئت مشيتي لان أعرفه ما يفوتها

زِناد : حسابج بعدين أنتِ

باوعتلة أضحك فتحت ايدي و بَرطمت شفتي بمعنى شعلية

ضحك و دار وجهة وراح بَس ما رجع لبيت جدة رهينة

تغريد : فضيها تمشين على بيض مكسر

طبيت لبيتهم بَس ما أدري ليش أنقبض گلبي و ما حبيته

رغم البيت مرتب و ريحة البخور بي قوية و المطبخ يلمع

الصالة كلش مرتبة و حلوة مشغلين كارتون الفارة و البزون

و متمددين جهال اثنين حاطين مخاد و معلگين رجليهم على الميز

طلعت عجيبة من الغرفة تلگت أمي لو أختها ما تحضنها هيج

عجيبة : يا هلا اليوم منو جاي

اجتي حضنتني و باستني ، ما بستها لان ما احبها اتذكر اول ما اجينه شلون تعاركت وي امي و ابنها امجد من ضرب امير

و ضربني ، ما ادري شلون امي نِست

كعدت على القنفة و أجتي مرت ولاء و مرت آمجد نزلت وجها

مشخوط بضربة قوية سلمن و راحن للمطبخ امي و عجيبة يسولفن

أنفتح باب غرفة بابها على الصالة طلعت فضة كاعدة على الكرسي

و تحاول تحرك التايرات مال الكرسي بالگوة ما تحملت المنظر

كمت و رحت يمها مبتسمة سحبت الكرسي و سديت الباب

وكفت الكرسي يم القنفات و أمي سلمت عليها وهي كاعدة

عجيبة : جا وينها سعيدة

فضة : تسبح خطية

باوعتلي مبتسمة اني كاعدة بصفها مدت ايدها على ايدي

فضة : تعاي أبوسـج

تقربت عليها بستها و أني مشاعري مدري شبيها ما جاي اعرف

أفسر شعور واحد بس كل الي اعرفة اني مقهورة عليها

حور مرت امجد بالمطبخ هي و مرت ولاء صاح آمجد من فوگ بصوت عالي اباوع لفضة كرمشت وجها بأشمئزاز من صوتة و حور صعدت تركض و صوتها ناصي و مخنوگ من تگول اجيت اجيت

تغريد : ليش لسة ما حبلت مرتة صارلهم هواي متزوجين

اباوع لوجه عجيبة گام ينطي ألون و دنكت تسلت خيط من دشداشتها

عجيبة : والله ما ندري حرنة بيها بالأطباء

تعرفين بيها جني مادري شبيها البنية جاي نعالج بيها

رجلها ما يقبل يعوفها يكول أنا أطيبها

تغريد : خطية ان شاء الله تتشافى و تترسلكم البيت جهال

عجيبة : اي امين جا شنريد

عجيبة و امي يسولفن كله على زِناد و جدة رهينة

و سالفة عمي هاشم من جاب لبنانية

عجيبة : اكلج ترى ياهي التاخذهم لازم تحسب هيج حساب

جا أبوهم منو يوسف الله يرحمة مو چان شكثر يكولون يحب حليمة و أخذني فوگاها

و فاخر جابها بطول زرة و هو عدنان لو مرتة مخلفة جا هسة حفيدة بالمدرسة و هذا هاشم هم تزوج و قاسم بالطريق

و عمار على ساعة هم يجيبها جان يركض يوكل بعيالة ملتهي بيهم هسة راح يعاينهم كبروا وشالوا ارواحهم

راح يجيبلة وحدة بكد بته ، و انتِ رجلج مات هم لو عايش چـا من زمان جاب إعله راسج وحدة

تغريد : لا يعقوب ما يسويها

- يسويها و يعبر لذاك الصوب رهينة موجودة تزوجهم كلهم

جُمارة : ترى جدة ما قابلة حتى على عمامي

عجيبة : لا يغرج يخالة هاي بس مظاهر ولج هي وحليمة

جانن حبايب و بالخنسة اجت خطبتني اله

جُمارة : بس اني سامعة هي حليمة الله يرحمها خطبتج

اباوع لوجهة صار كركم فضة ابتسمت و هي باوعت لامي

عجيبة : ديري بالج على بتج شوفي شلون جاي يغسلون بعقلها و يطمطمون خياسهم

تغريد : جا الجذب ما يدوم و تطلع الشمس على الحرامي

نزلت حور للمطبخ اباوعلها ركضت للبوري تغسل وجها و تمسح بدموعها

صبوا العشا و كعدن بالكاع اني عيني على حور و فضة العاملة مالتها

صبتلها

مدت ايدها تاكل حور و هم صاحلها امه اشرتلها اكعدي

عجيبة : يمة جاي تتعشى تعال خالتك تغريد هنا

بعد ما حِچـة شوية و نزل من الدرج يضحك سلم على امي و كعد

على القنفة الـ گبالنه

امجد : شونج جُمارة

- الحمدلله

حجيتها و اني اريد اكل ما رفعت راسي اله

امجد : حور من تخلصين صبيلي اكل عيني

دارت وجهة تباوعلة بصدمة و هزت راسها بـ نعم

آمجد : شلونة زِناد وياكم خو ما يحاچيكم

تغريد : لا شحدة يحجي وياي

شفت امي ملتهية وي امه رفعت عينه لكيته يباوعلي باوعتله صفح

و حتى فضة خازرته

آمجد : خوش عنده حماية زِناد بكل مكان فضة و جُمارة

باوعتلي امي بسرعة

- جُمارة ؟ شعليها بي جُمارة

امجد : تعاين صفح ما عاجبها الحجي

عضيت شفتي مصدومة من خباثتة

جُمارة : مو يمك ترى

خزرتني أمي ، باوعتلة خزرتة و سكتت

من خلصوا الاكل فضة باوعتلي مبتسمة

- تجين لغرفتي ؟

هزيتلها راسي بـ نعم و اخذتها للغرفة طبيت وياها اسمع امي صاحتني درت وجهي لكيت عجيبة تشاورها

جُمارة : هسة يمة

أباوع للغرفة تجنن لونها أسود بيها ثرية تلمع بالوسط

و البردات رصاصي الفراش رصاصي يعني تناسق ألوان

يريّح النظر و عطر الغرفة يجنن النظافة تشع منها

على ميز المرايا صورة لزناد و عمي يوسف أبو و رجال

ثاني معگل بس زِناد صغير مو هذا عمرة حسيته هذا الرجال

ابوها الي گالوا عَـنه

عندها ثلاجة صغيرة فتحت الباب مالتها و طلعت ماعون فواكه

حركت التايرات مال الكرسي و خلته على الجرباية و اشرتلي تعاي اكعدي

مشغلة التلفزيون قرآن التلفزيون معلگ و جوا ميز ابو الجرارات

عليه صينية متروسة عطور

جُمارة : غرفتج كلش حلوة

فضة : ترديها ؟ ما تنعز عليج

ابتسمت و اني أتشكر منها

فضة : آمجد عوفي خيولي

جُمارة : شعلية بي طبة مرض بس اني أكرها

- هو منو يحبة هاي مرتة ما تحبة

- خطية تقهرني

- يغار من كلشي يخص زِناد

جُمارة : صحيح مبين غوار

فضة : اي ديري بَـالج انتِ

جُمارة : اني ما ردت اجي بس امي ما اكدر اكسر كلامها

فضة : نورتينا ، أنا من زمان أعرفج و من شفتج بالحقيقة

طلعتي احلى من الوصف

جُمارة : منين تعرفيني و منو يوصفني

ابتسمت و مدت ايدها لجنطتها طلعت ككو خلته بحضني

فضة : سامعة عنج من اروح غادي لبيت الجدة

صاحتني أمي و كمت بسرعة سلمت عليها و طلعت

بيدي الككو طلعت عجيبة من المطبخ بيدها كلاص عصير

عجيبة : هاج خالة شربي حتى عشا ما أكلتي عدل

اخذته من ايدها اشرب

طب ولاء سلم و راد يصعد دگ تليفونه بسرعة جاوب

- ها خوية .. اي ... صار

سدة و بَاوعلنه

ولاء : يالله ام آمير أوصلكم

تغريد : اصعد عيني انتَ تعبان شنو أنا صغيرة يومية

اروح و اجي وحدي

ولاء : لا الدرب بالليل صاير كله چلاب آمشينا يالله

ما كدرت أمي تناقش بعد طلعنا و آمجد واگف بره

امجد : خابرك النذل ليش ما خابرني

ولاء : لا دگول نذل احترم نفسك لا يكسر راسك

- حتى أبتر راسك

يحچي و يسويلي حركات بعيونه نظراته مقززة

من درنه وجهنة و لاء يمشي اول واحد و احنه ورا

امي گدامي مشينه مسافة و درت وجهي على آمجد سوالفي حركة

بـ شفته تفلت بالگاع و رجعت كملت طريقي

بس گلبي يدك سريع گلت خاف يلحگني ، وصلنة للبيت

صعدت فوگ بسرعة تعبانة أريد أنام

رقية الصبح گعدت على عياطها اباوع الساعة بـ ١١ اليوم اني متأخرة

البطة تحوم يم باب الغرفة شلتها أبوس بيها احسها بدت تميزني عن الكل اخذتها و نزلته و أني أحاچيها علي الدرج

جُمارة : ها حبيبتي هم گمتي تحبين المشاكل

و تدورين گالات تعاي تعاي

رقية : أبنج هذااااا منيم اللبنانية على فراشي

لو رجال خلي يجيبلها غرفة هالهجامة البيوت هاي شبعوا بيها هناك و أجتي يمنه

نزلت اللبنانية تعدل بالشال على راسها و تضم برگبتها كلها آثار

- ولييييييييي على طولي لك مين أنت لَتطعني بشرفي

رقية شافت آثار رگبتها ضربت على صدرها و جرتها من شعرها

و وحدة تاكل بالثانية سرى أجتي وي امها تكتل بمرت ابوها

نزل عمي هاشم يركض يفاكك بيهن و صياح زلم بالكراج طلعت

جدة تركض خايفة و اني و البطة وراها جدة كامت تلطم

من شَافت زِناد نايم فوگ امجد و خانگة بأثنين أديه

رهينة : ولك جدة اخيك اخيك راح يموت

طبو ولاء و خالد يركضون من بره وخروه بالگوة وطلعوا

يونس و عدنان و عمي قاسم و كلها تباوع امجد يفرك برگبته و يگح بصوت عالي ركضوا جابولة مي شال الكلاص فلشة بالحايط

زِناد : هاي المرة هديتك مرةّ الثانية أدفنك هنا

حجاها و داس برجلة قوي بالگاع

امجد يريد يحجي صوته مخنوگ

رهينة : تعال طب يجدة طب جوة أرتاح

جُمارة : جدة ترى آمجد المكتول مو هوَ

دفرت ايدي و راحت يم زِناد تبوس بذراعة مسرفن الدشداشة

و هي تبوس ايدة و تهدي و تنزل الردن و تنكث بدشداشته

طب عمي عمار شاف كلها ملتمة يسأل شكو من سمع عركة بين زِناد و امجد بدون ما يفهمها شنو طبگ وي آمجد

عمار : ولو ما يفيد وياك الحچي بس ليش ليش حتى وي آخوك شرك ما لزمته

زِناد : أنا وي عمي ما لزمته تريدني أحترم أخوي و احسبلة حساب يغلط يمي أدوس راسة بالقندرة و أطيح حظة

ساقط مستهتر

آمجد : أندمك والله إلا أندمك يا زِناد أنا وياك و الزمن طويل

زِناد : تغلط و أكسر راسك و تغلط و أكسر راسك لحد ما أمشيك عدل

رهينة : شبيك ولك وي تاج راسك

آمجد : بسيطة

حچاها و طلع وهو كله شر عمي عمار طلع يصيحلة و طَبو للمضيف جدة وياهم

عمي هاشم خله مرته الجديدة بغرفة ورود و قفل الباب عليها

لان هاي هم كامت تعيط عليه لان ضاحك عليها و رقية صعدت لغرفتها

استغربت شعجب أجت

زِناد طلع حتى ما ظل على الغده و جدة شحطت

تاكل و تغلط على آمجد

عدنان : يريد يبيع البيت الجبير

رهينة : يمن كون باعوا عظامة وين يريد الإغم

خل يدير بيته همزين زِناد مخلي فضة و يصرف عليهم

عدنان : أي و يگلة ولاء أنا أطلبة خمس ملايين

حسبتهن عليه فايز صار أربع سنين هسة صارن خمسين مليون يعني تطيني من حصتة خمسين

رهينة : چا راضع حليب عجيبة شيطلع قابل ينگط محنه

عاد ولاء عندة سيارة و يعالج بـ ابنه بالدول

إلا انتَ شطالع عليك شو سيارة اشترالك زِناد رحت وره شهر بعتها و أكلت فلوسها

شالوا الماعين و شربوا چـاي بدو يصعدون

رهينة : مو كتلچ دگي عليه ليش ما دگيتي

جُمارة : ما اريد اجيب الشُبهة لنفسي لان هذاك اليوم بعد العصبية خابرته و أجـة

رهينة : حتى أنا من أخابرة يجي يركض چـا شنو

- اممم جا ليش ما دگيتي جدة ، تخافين

ضربتني على رجلي بعصبية

- اششش يالله سكتي

جُمارة : آمجد شكد مكروه

رهينة : آمجد يغار راح يموت إعله الشيخة

- ما تلوگ عليه شنو گوة

رهينة : صرتي مثلهن كلمن تريد الشيخة لرجلها حتى هي تصير شيخة

جُمارة : سويتي رجلي جدة شبساع اني بعدني على قراري ما اخذ واحد من آحفادج يمه النوب الشيخ لا عيني لا