تحميل رواية «يا أجمل الوحوش» PDF

التصويت + التعليق بين الفقرات لُطفاً

يا أجمل الوحوش

- رُسل فَهد

....

كلها تصيحلك بهداي ّ

من گلبك تعت ّ بيه مثل جَـرّ العبي من الروس

و تتفنن بتعذيبي و لا واحد يگلك ليش

" جنود و لزمو الجاسوس "

ما خذت الحذر منك

من اطرافك و الزم بيك

صوچي تقربت للموس !!

- رُسل فَهد

....

طبيت للصالة و أنصدمت بالمنظر الـ شفته ..

دمعة لازمة عدنان من ياخته و وجسمهه طاخ بجسمه الشال واكع على أجتافهه و شعرها على وجهه تحچي ويا و هي مبتسمة و أيدها على چتـفة ، دفَعها و گام من شافني ..

هي ابتعدت و بعدها على نفس الابتسامه و ملامح الوجه الجريئة حتى اني من شفتهم ما انكسرت عينها وهو عدل دشداشته ونكثها و صعد

ما حاجيتهه رحت للغرفة مصدومة لكيت امي كاعدة تخلي كريم فكس مال اعصاب لرجليها غمضت عيوني احب استنشق عطرة و امي تخلي وسادة خشمها

تغريد : انتِ وين تهوجمين ما تكعدين و تركدين

جُمارة : جدة نايمة و اني اراقب البيت بمكانها

تغريد : امشي انطمري لا اذبحج

جُمارة : باجر الصبح راح يأخذني زِناد يسجلني

- وين يسجلج شو تخططين بكيفج

- مادري هو بس كال اسجلج

- ها و انتِ شيكول تمشين ورا

جُمارة : طبعاً يمة غير شيخ العشيرة

ضربتني بالعصارة مال الكريم

تغريد : امشي انطمري

اجيت انام بس أفكر شنو شكل الكلية و شلون راح أداوم كل الاعرفة عنها هي ولد وبنات يداومون سوه وجدة كل شوية تعطس تفززني من افكاري كعدت الصبح اول وحدة بيهم طلعت من الغرفة حتى بعدهم ريوگ ما مسوين و اني وحدي اهوجم تالي يضربني بوري و ميجي

رحت غسلت وجهي و عدلت شعري على المرايا

شعري ثخين بس مايطول حدة بس يعبر چتفي لهنا ويوگف يخلص عمره بس هو بني غامق قريب على الأسود مو مثل شعر روز طويل يعبر فخذها بني فاتح و بي خيط شگار خفيف بس ميزة وحدة نشترك بيها هي شعر الوجه الاشگر و على اساسها نسمي روحنه شُگر

امي دكول هسة تطلعن بدون ما ادري تخلن لوجوهجن اوكسجين مال صبغ حتى الشعر يصير أشگر لان ما اخليجن تحفن ندري بيها تريد تستفزنه

سمعت صوتهن ينزلن من فوگ عدلت الشال و ردت ارجع للغرفة

بس فرحت من شفت ورود واكفة بالمطبخ تحظر ريوگ اجيت يمها

جُمارة : و اخيراً راح ناكل ريوك طيب من ايدج

ورود : تدللين شمشتهية

جُمارة : لا جذب عوفيني سوي لخطيبج خطية من تمرضتي لسه يأكل بس فواكه صاير صحي

ضحكت و بعدها أردفت

ورود : وداعتج ما أقبل لو يبقى بس هوَ بالدنيا اني هم گلبي ملچوم منه وهو يسوي نفسة ما يتذكر شيء

جُمارة : عزه شسوه هذا هم !!

ورود : من چانوا عايشين فترة چنه صغار هو عمرة 15 سنة

اني ويا دوم أصدقاء حتى جان هو يقريني و أنا صف خامس اموت على المدرسة و دوم شاطرة

مرة أنا ويا كاعدين بالبستان نقره أنا ما اجذب جنت جاهلة صحيح بس جنت اكعد ويا و اسولف ارتاح لان سوالفه حلوة

تالي كتلة شراع تدري أنا احبنك جاهلة ما أفتهم أمده گصتي

جُمارة : اييي و شصار

ورود : طلعت وحدة من أخواته خاتلة وره النخلة تتصنط علينه امها دازتها تالي اخته طلعت تركض هو ركض وراها ما جاوبني حتى ، لا تذكريني اسكتي اتمنى اطم روحي

- دكملي شنو الگط منج حچي

ورود : اصبررري ، تالي راكضة كدامهم كلهم دكلها يمه وريدة بالبستان وحدة وي شراع و دكله أنا احبنك و تصيرلج ذيج الخبيصة امه الحية هي و امي عداوة كامت تذب حجي

و عمامي صاحولي إذا الحجاية صدك لو جذب هو امه اخذته و راحت و أنا كلت لعمامي لان ما معلمينه على الجذب و أنا جاهلة اخاف تالي كتلني عدنان بوكتها گطعني و عمي عمار عساها بحظة بطلني من المدرسة

و فتنة أمة كامت من تجي ما تجيبة لا هو و لا خواته تجي تسلم و تروح جنت طفلة و مراهقتي أنبنت كلها على هاي السالفة و ما طلع هو من بالي جنت دوم ادعي عليه و على أخواتة و امه و ماضنيت اشوفة بيوم بعد مادري شجابة

بعد كل هالسنين

جُمارة : يعني بعدج تحبي

ورود : ادوس على گلبي و انعل والديه و ما اقبل بي بعد

هي تحجي و تحضرلة صينية ريوگ

كعدت جدة كلهم نزلوا و مكيفين لان ورود رجعت تسوي ريوگ

راح عدنان جابلها بيض و غسان يجيب صمون و رقية و نَورس يعجنن

عجينة خبز للغدة و العشا اني أساعد ورود بس عيني على الباب

رحت كعدت يم جدة هي بيدها السبحة تسَبح تقربت عليها و همست

جُمارة : شو اليوم حفيدج الچبير ما أجة

رهينة : جنچ مشتاگة يجدة

جُمارة : شمشتاگة اريد منة مصلحة لذلك اسأل عليه

سكتت و بعدها أردفت بـ شماته

رهينة : يجوز اليوم يتريگ ويَـ مرته

باوعتلها رافعة حاجبـي

جُمارة : اممم زين إذا يتريگ وياها شو هو حتى مامبين

عليه متزوج

رهينة : هو هذا طبعة شني شتردينه يمشي و گايد مرته

ويصيح احبها و اريدنها

من طريقة كلامها أعرفها عود تريد تنرفزني عبالها أغار

جُمارة : لا بس على الأقل يعني إذا لزم أيدها يبقى محَصن أيدة ويباوعلها لو يخلي قراصتها بـ الستيرن مال السيارة

اباوع لجدة وجهه كام ينطي ألوان

ما جاوبتني عدلت گعدتها و ضمت السبحة ، همست

أنهجم بيتك إعله هاي الفضايح

أول ما كمت طَب هَوَ گال السلام عليكم

رهينة : هلا جدة ابن الحلال بذكرة توها بت عمك سألت عليك .. درت وجهي عليها اباوعلها بصدمة و احس أختنگت من الفشلة ، خزرت جَدة بعصبية

زِناد : أي علمود الكلية تريد تسجل لان راح الوكت

تنفست براحة شوية لان گال علمود الكلية و نفذني بس عمامي صارت نظراتهم غريبة يباوعون لجدة ما قابلين

أكلت نص لفة على السريع بالمطبخ و رحت ابدل لبست الصاية مال روز همزين نايمة ما تدري و اخذت ربطة من مالات امي لان حلوات

و تشتري غاليات دائماً

بقيت كاعدة بالغرفة انتظر شوكت يصيحلي ماكو تالي طلعت و كعدت على الدرج رقية و دمعة يباوعليّ بحقد بس ورود بفرح هو كاعد يشرب چـاي بس ظهرة عليه ما شافني و يسولف وي عمامي

هسة غير يخلص سوالف و يفضها

خلص الچاي و وكف

زِناد : يالله جدة محتاجة شيء أنا رايح خطية هاي سدو التسجيل بس راح احاول وياهم

رهينة : بكيفك يجدة

- ورود صيحيلها

ورود : هاي وراك

دار وجهه باوعلي وطلع مشيت ورا و تذكرت اني ما كعدت امي و كلت الها هسة تطلعني عاشگتة و طالعة أفرفر ويا

ركضت للغرفة كعدتها هي اخترعت

- يمة راح اروح اسجل تقبلين لو لا

تغريد : هو انتِ كاشخة و مكملة ضلت علية

جُمارة : شبيج يمه بدال ما تدعيلي راح اعيشج براتبي

تغريد : انهجم بيتج بعدج ما داومتي روحي الله يسهلج

بستها و طلعت لگيته يدگ هورن فتحت الباب الوره و كعدت طلعت امي لابسة حجابها يمكن وره الحادثة الصارت امي ما تريد بعد نطلع باب الحوش كلمن تأخذ رجل و تكعد و تسكت

، سلم على أمي و طلعنه ما حچة اي شيء طول الطريق بس اني گلبي يدگ سريع و خايفة مدري شبية

لمن وصلنة دَخل السيارة و نزلنه انصدمت بفرحة و اني اباوع للاسم

كلية الطب - جامعة ميسان

اباوع للبنات أشكال الملابس و المكياج اريدلي وحدة مو حلوة ماكو و هو يباوع للأجواء و يرجع يباوعلي بس چنة ما عاجبة الوضع دخلنة جوة لقسم الإدارة

- تسجيل أستاذ ؟

زِناد : نَعم

- نعتذر والله بس من قبل أسبوعين انغلق التسجيل

زِناد : اريد غرفة العميد بلا زحمة

هي سكتت و طبت للغرفة شوية و طلعت كالت تفضل كعد و اني كعدت گبالـه هو جان يشرحلة الأوضاع المريت بيها و صدمني من طلع مقدملي من تاريخ ايام النتائج و منطي الموافقة

- كمية مواد فاتت مو طبيعية و يجوز ما تضبطهن و ترسب و انتو دافعين خليها للسنة الجاية تداوم اعتيادي

هو باوعلي شاف الهضمة مبينة بعيوني

زِناد : سهلها استاذ سهلها هي عايدة السادس 3 سنوات بالرابعة يالله طلعت المعدل التريدة و هم بعد تأجل

لا مترهم

- مو اني اكلك هي متدبرها مواد راحت هواي و الدفع واجب إذا نجحت او رسبت هي صبرت صبرت بقت على هالسنة

زِناد : يعني هسة أگوم ما بيها مجال

- والله ما بيها لو بيها بعيني بس خلي رقمك عسى و لعل أكدر أسهلها و أشوف الوضع

زِناد : مو مشكلة مشكور

سجل رقمة و طلعنة بس الفرحة الي جانت غامرتني اول ما دخلت كلها تحولت حزن من طلعت

مشيت قبلة للسيارة بس فتحت الباب ما انفتح داس السويج و اشر فتحي فتحي فتحته و صعدت و طبگت الباب قوي امسح بدموعي قبل لا يصعد بالسيارة اجة فتح و صعد

زِناد: عليمن البچي هسة انتِ جاهلة بابا معليج اني أرتبها

جُمارة : ما اريد هو اني أصلا اعرف حضي شنو و كلشي اريدة ميصير و كلشي احبة ميبقى رجعني ما اريد أصلا أداوم بعد حتى السنة الجاية ما أداوم

زِناد : هسة كافي بچي گتلج

جُمارة : انتَ شعليك تتحكم بعيوني ترى عيوني و دموعي و بكيفي ابچي حتى على البچي تحاسبني

زِناد : ليش شوكت أنا محاسب خلقتج هو أنا ما شايفج

غير بيوم الاجيتي وي امج هذاك اليوم

درت وجهي على الجامة ابجي و امسح بدموعي بس صوت النشغة فاضحني لمن وگف السيارة نزلت بسرعة اركض و رحت للغرفة كلهن يباوعن حضنت امي و هي تسكت بية

جُمارة : ما قبلوا يسجلوني تأخر الوقت ما قبلوا

تغريد : يالله طبهم طوب هي السنة غمض فتح خلصت

- ماريدددد بعد ما اريدددد

شمرت الشال و الصاية و نمت على جرباية جدة ابجي ما سكتت لحد ما نمت و كعدت العصر عيوني مورمة من البجي امي و روز كاعدات بالغرفة امي تصبر عليه بس اني احس خلاص طلع حتى الدوام من عيني و راح شغفي بكلشي بالحياة

اخذت هدومي حتى اسبح لكيت امجد كاعد يم جدة رهينة لمن طلعت هي صاحتلي رحت يمها انطتني من جوزدانها چكليته و حلقومة

رهينة : اخذيهن هذن مراد وزعوهن

أخذتهن و درت وجهي لگيت امجد صَافن علية

طبيت للغرفة لكيت امي و روز يتعاركن

جُمارة : اسكتن يالله كافي راسي يوجعني

هن صدك ما حجن بعد

انتظرت شعري ينشف حتى امشطة امي طلعت بقت بس روح تضرب صفنات المكص كبالي اني كل مره متعودة اكصة لان هو من الأساس قصير بس لان ثخين من يطول يضوجني اخذت المكص و كصيته و اني عيني على المرايا و ايدي ليوره ما مسيطرة كل مرة اقسمة نصين و اكصة بس هسة لان الدنيا طالعة من عيني مالي خلگ

كصيته وجبات لحد ما شفته واصل لرگبتي اخترعت ،الشعر مخليته على الميز بلعت ريگي و مشطته على امل يسرح و يطول شويه بس ماكو فايدة حجيت بصوت خايف

جُمارة : روز

دارت وجهه عليه و انصدمت كامت بسرعة تتلمس بشعري

روز : صخام بوجهج ولج هاي شسويتي

ما ردت أبين الخسارة و الخوف مديت ايدي ألمه

جُمارة : يالله عوفي احسن هيج

اباوع لأيدي اصلاً ما ينلم حطيت الشال على راسي و طلعت من الغرفة رحت افتر بالساحة مثل المخبلة اريد أتخطى الصدمات الي بحياتي

طلع هو من الديوان يضحك من شافني اشرلي بعيونه شبيج عفته و طبيت جوه لگيت رقية تسولف لدمعة استوقفني الموضوع لان باب المخزن مفتوح و الصوت عالي و ريحة السمج تعط

رقية : اي ولج لا تغرج الهيبة مسودن مو صاحي بس عمامة يخافون منه يستاهلون هم شيخوّا و سوو الجبير تالي كبر حتى اعله روسهم

دمعة : ولج خالي جان يعرفة يكول شاب بس المشية اليطب الها اعتبريها محلولة يعني شيخ من صدك شيخ

رقية : اكلج وين لا يغرج الحجي ترى هو وين يركد هنا حياته نصها سفر يعالج بروحة بس هاي الفترة ما سافر مادري شعجب يجوز لان بِت تغريد هنا

دمعة : هواي يجي لهنا جا ما يسوي مضيف لبيته

رقية : بطرانة انتِ ولج هو نص البيت اله ما تشوفي يجي على خشومهم يگعد و فنه اليتنفس على ساعة حتى انتو يطلعكم و يطيكم حصصكم

دمعة : منيله ولج شو هو لا شغلة و لا عملة

رقية : احنه الـ بلاية شغلة و عملة حليمة وحيدة أهلها و ابوها شيخ جان عدها اخو و مات و ذيج املاك الشيخ الرنانة كلها صارت لـ حليمة ماتت حليمة و كل ورثها صار اله

دمعة : يبو جا شبيهم اهلنا يموتون و يعوفون البيت الايجار علينه احنه نسدد وراهم ديونهم

رقية : ولج أجتنا سنين عيشنا رعب هذا الما يتسمى

حارت الأمهات وين تضم ولدها ، اليجي و مسويله مكسورة

اعتبري ماخذة لغرفة التأديب لبيته ما يطلع منها غير الولد يمشي على السراط المستقيم

و مو بس هاي يفدي بروحة عندج هذولة إسلام و سلام شريك و بعد منو ما اتذكر ها علي و يونس ذولة كلهم هسة

إذا يگلهم اشمروا روحكم بالشط يشمروها و يشتغلون تحت ذراعة

دمعة : كش هذا داهية اكول لسه ما متزوج

رقية : و منو تاخذة ولج مشوه جسمة يخوف رهينة أجت فترة هاي قبل لا يشيخ عليهم حارت منين تخطبلة و ما أنطوها منو ينطي بنته لواحد مشوه حَرام چنة وحش

تالي آيست وكعدت و هو كاللها اصلاً ما أتزوج

دمعة : يا چـا مو شيخ و بالك عَنه ما يريد بزر يحمل اسمه

رقية : و هي شني دايمتله عشتو والله عمامة متحلفين اله بس يخطي خطوة ثانية ضدهم يطردوه و يأخذون عگال ابو منه

دمعة : چا منو يصير احسها ما تلوگ لغيرة

غمتها بأثنين إيديها

رقية : إمدااااج چـا ما تردين رجلج يصير الشيخ و تصيرين شيخة هاي رهينة رجلها صارلة قرن ميت و الوادم لسه تحسبلها حساب عبنها شيخة

دمعة : أنا ببالي غير شيء ما أريدها الشيخة أخذنها انتن

درت وجهي بحيرة ما يدري عقلي يشيل يا فكرة

كعدت يم ورود بالصالة و كلت الها اوكفي خل اجيب روز ويانه نسولف

رحت للغرفة لكيت امي تقنعها بهذا الضابط و هي تبجي ما تقبل

جريتها و خزرت امي كعدنه بالصالة نزل غسان من فوگ

غسان : هلا بـ ورداتنه و الواو قَاف

بقيت ساكته شايلة القاف و افتر بي

جُمارة : قردااااات ؟

عافنة و طلع يضحك

جُمارة : هذا اخوج الكسولة شو ما داوم كلية

ورود : يريد يدخل أهلية إدارة أعمال

- وينكم وين إدارة الأعمال عمي وجوههم مال طلايب

ورود : كالتله جدة أنا أنطيك نص و هسة يتلوگ لابن عمي زِناد بلكي ينطي نص حتى بالعطلة الجاية يشتغل و هو يدفع قصده

روز : هو مو اسمه قسط ؟

جُمارة : اي احنه معدان نكول قصد قصد احلى

ورود : تصعدن بغرفتي ؟

اخذنه فواكه من الثلاجة و صعدنا

فاتحين الباب لان ورود تسولف و تنظف

روز : همزين صرتي زينة البيت مابي روح

ورود : قصدج البيت خايس محد تنظفة لا عبالجن أنا صرت زينة و نسيت لا والله النار لسه بصدري بس گلت خل أكوم لان امي حارت المن تزوجني حتى الموته نبشتهم من كبورهم و دكول اجوي خطبوج

روز : جنها تغريد كمشتني احجي بالتليفون و هسة كل شوية تريد تزوجني ساعة و طگت حوصلتي و اكللها موافقة

جُمارة : احسن عاد أتزوج واحد حقيقي و لا انتظر واحد وهمي

ورود : ولج شنو و أنا أكول خانسة يمة من السكوتي موتي

و من المدگدگ فوتي

روز : احبه يعني ترى الحب مو بالشكل و اللمسات و إلا قريبين لبعض اني تبعدنه قارات و اموت عليه

جُمارة : ولج مصدگة احنه وي الكاعدين بالعراق

ما مدبريها مو النوب بالخارج

روز : يعني يابة شعليجن ترى ما ضاحك عليجن ضاحك عليه و اني قابلة أصير مضحك

شفناها ضاجت سدينه الموضوع

ورود : خل أضحكجن جبتنها على الوهمي أنا بية حاله مال مخابيل انتظر اخلص شغل بالنهار حتى من أتمدد ابدي حياة جديدة بعقلي لحد ما انام و من اكعد ثاني يوم اتذكر وين وصلت و هم انتظر الليل يجي حتى اكمل الحياة العايشتها وحدي

جُمارة : الحمدلله و الشكر اكتشفت بس اني حالياً صاحية و ما صايبتني لعنة الزلم لان اثنينجن عاشگات

ورود : انجبي ما عاشگة اني ولج كل مرة اسوي رجلي شكل مرة دكتور و مرة ضابط و مرة ارهابي بس الأكثر حباً الشيخ اتمنى روحي صدگ اخذلي شيخ و يطگ العگال و العباية ويلييي و الودام كلها تهابة و ما يصيحولي غير مرت الشيخ

روز : مرت الشيخ ما فكرتي بالفصول كل يوم يحط مرة فوكاج لو فصلية لو هديةً

ورود : اترجاج لا تخربين أحلامي و مخيلاتي اني مصممة بيت جبير بس أنا ويا و اثنين نسوان حمى يغارن مني

لان البيت بيت رجلي و هو يصيحلي الشيخة

جُمارة : شيخة ورود بس شيلي البردة تنكعت مي

ورود : امداجن أنا صوجي انطيجن أسراري

روز : يا اسرار ولج هاي فضايح لا دكوليها لاهلج يأخذوج للمصح

جُمارة : اسكتن اني شكد كارهه الحياة آخر امل جان عندي الكلية و راح

روز : لا تنسين و جريمة شعرج

شلت الشال و شمرته على الجرباية ورود انصدمت

ورود : عزه بعينج هاي شمسوية

جُمارة : الكاعد تشوفينا ست

- بس والله لايگلج عابت كلشي يلوگلج بعد لو تگصين الكذله

- لا ما اريد شنو عندي عرس امير لسه ما مقتنعة بي ميت

شراع : ورود

عدلت حجابها و طلع اله شوية و طبت

ورود : أبقن هنا خلي اروح اصب چـاي و اجي

نزلت و احنه نزلنا وياها رحت للغرفة كلت لامي افتحيلنا غرفة أبوي خل نبقى بيها ما قبلت

لكيت جدة تحسب بالفلوس انطتني خمسة ضميتها بجيبي

رهينة : ذولة الحرامية بوكت زِناد جان مسافر هاي الفلوس كلها ما أشوفها يبوگون بيها و يرجعون لوره

جُمارة : و هو ليش مسافر

رهينة : تمرض يجدة مدري يا منعول صفحة و امه مصخمة بي شمر عليهّ تيزاب رادو يحرگون وجهه بس الله ستر وهو سبع صار الحرگ بأيده صحيح طاب و تعداها

بس تغير وليدي صار وحش مو بشر

جُمارة : جدة ليش دكولين هيج مو عيب شنو وحش

كلكم دكولون عنه وحش ادري تقصدون طبعه بس ترى حباب

رهينة : هاي الفترة شوية لازم روحه بس گبل جان ما يتجرع

جُمارة : اي يجوز بسبب الحرگ تعقد و هسة رجع طبيعي

شنو وحش عايشين بغابة

جدة مصغرة عيونها و تباوعلي بمكر امي كاعدة تباوع صافنة بغير عالم

رهينة : تدافعيلة شو يجمارة

جُمارة : جا ما عندي شي ويا ابن عمي و حسبة اخوي

رهينة : الله يسلمج ما عاتب عليج و كايلج اريد أخت

طلعت بره من الغرفة هن يحضرن بالعشه يطبخن ننتظر كل لليلة ننتظر كشخة دمعة شنو يومية لون و يومية شكل و أحنه كلنه لابسين اسود بس هي تلمع لمع

امي لسه خايفة منها لا تشوف شعري وعلي تذبحني اليوم العشه سمج اكول رقيه ما تحملت من العصر شوتلها وحدة الجهال انجلبوا و غسان شايل سمجة ويفتر عليهم بيها و هي تلبط و الصياح عالي الولد البقية و عمامي كلهم بالديوان جابها عليه و اني صعدت اركض

شوية و صار هدوء نزلت بس صوت البنات يضحكن بالمخزن بره نزلت من الدرج و هو لازملي السمجة طلع من جوه الدرج يخوفني بيها صدك و هي تتحرك شكلها مخيف هن واكفات يضحكن طب امجد شافه

امجد : لك بابا انتَ حيوان متستحي تأدب لا اطيييييح حظك

هن رجعن لشغلهن وهو رجع السمجة

شوية و هم رجع هو مو بس عليه كلهن يخوفهن بس ما يخافن بس اني بيه خوفة من كل الحيوانات و ما اريدة يطخني هم لان السمج كله زفر

ركضت بالمطبخ ختلت وره ورود و الزيت مال السمج بالطاوة طفر على ايدي صرخت و خليت ايدي جوه البوري اجتي امي تركض و روز

لان اني حتى من جان يركض وراي ما طلعت صوت لان خاف اكو احد غريب بالديوان و يجوني

بجيت لان صدك الچوية قوية و توجع

تغريد : هسة انتِ شجابج للنار يالله خفيفة خفيفة

رفعت راسي من سمعت صوته

زِناد : شنو شبيج ، شبيها

تغريد : طفر عليها الزين و انجوت

جرتني أمي و أخذتني للغرفة جابتلها روز معجون أسنان خلتلي على المكان من صار العشا جدة دزت عليه ما تقبل تأكل إلا أجي يمها

و اني ابجي من گد ما ايدي تحرگني

تغريد : روحي يمها شويه و تعاي

عدلت شالي و اني لازمه ايدي كلش تحرگني و عيوني حمر من البچي

قبل لا أوصل و جدة تصيح تعاي حبيبة تعاي يمي

كعدت يمها اخذت ايدي تشوفها

رهينة : ما بيها شي ما بيها ياخذوج للمستشفى

هزيت راسي لا

رفعت راسي لكيت زِناد و امجد كاعدين گبالي

امجد : كتله تأدب بس زعطوط شتسويله

اني اباوع للأكل جوعانه و جدة تأكل عشر لگمات يالله تنطيني لفة صغيرة لو مخليتني يم امي توكلني هواي احسن جدة حايرة ببطنها

ما رفعت راسي لان عرفته من كف ايده و هو خلة لفة فوگ ماعوني بقيت مدنگة حتى احس روحي شبعت عفت اللفة ما اخذتها لان ادري كلها تباوعلي وهو شلون هيج جريء و ميستحي منهم

كلت لجَدة شبعت اريد اكوم ، كمت و هي شالت اللفة السواها خلتهه بأيدي استحيت أرجعها اخذتها ورحت للغرفة أكلتها و امي هم سوتلي وحدة أكلتها

غسلت ايد وحدة و احس بية ريحة سمج اخذت ملابس و رحت اسبح

من طلعت امي ما موجودة بالغرفة همزين نزعت الخاولي و نشفت شعري حطيتله شويه زيت و مشطته اباوعله والله صدك لايگلي رتبته و شلت الشال اريد البسه طبت امي تنشف ايدها بدشداشتها

صاحت بوجهي من شافت شعري

تغريد : ولج هااااااي شمسويههههه وين شعرج ولج

جُمارة : يمة ما ادري جنت ضايجة

و كصيته هواي حتى اني ما قابله

عضت إصبعها و ضربتني صرخت بوجهها

- لا تضربين كاااافي اني مو زعطوطة

ضربتني راشدي قوي

تغريد : زعطوطة و نص و اكسر راسج

جُمارة : وخري يالله وخري

أمي نهارت يمكن طلعت حركة امير بية و اني ابجي و اصيح

حتى روز ماكو تخلصني منها و تهديها

اندك الباب و أندفر طب زِناد و امي مستمرة تضربني

جرني من ايدها و خلاني ورا و أمي رجعت تريد تأخذني منه

تغريد : جيبها معليك جيبها شعليك انتَ

زِناد : شنو شعلية ليش هيج تضربيها غير آفتهم

تغريد : و اذبحها و انتَ متتدخل

زِناد : حتى اذبحج وراها

تغريد : شنووووو ؟

زِناد : ام امير شبييج شنو صغيرة انتِ شمسوية غير افهم

تغريد : مالك دخل كصت شعرها و فورت دمي وخر شو جيبها

هو دار وجهه يريد يشوف شعري جرتني امي منه و عاضة ايدها

ضربتني راشدي ، والله احس امي مو طبيعية

صرخ بوجها قوي و كلهم أجوي يردون يشوفون شكو

جر شالي و خلى على راسي طلعني من الغرفة و كال لروز شوفي اختج شبيها

اني اهد بأيدة اريد ارجع للغرفة لان ادري بأمي شراح تسوي إذا فضلته عليها كدامهم تكوم تفكر أشياء ما صايرة و دموعي تجري ايدي تحرگني قوي

جُمارة : هد ايدي أمي متقبل

زِناد : امشي كعدي يم جدة امشي

كعدت يمها و هي تبوس بية و تشوف ايدي و وجهي

رهينة : شبيها امج المسودنة

جُمارة : لا جدة بس يمكن تذكرت امير اني اعرفها

- جا انتِ شعليج تكتلج ما تستحي هسة اليشوفها شيگول

بقيت ساكتة أباوع على ايدي بدت تخزن و تطلع بيها اكياس مائية صغر دموعي توكع على ايدي و امسحها بقى كاعد گبالي بس اني ما رفعت راسي و لا باوعت الهم لحد ما احس روحي نعست و اريد انام

جُمارة : جدة اريد انام

زِناد : روحي جدة وياها بالغرفة

فرشت فراشي و تمددت طلعت ايدي من الغطة حتى ما انلچم و الايد الثانية حاضنة بيها لعابتي كل ما تنزل دمعة امسحها بيها

نمت مهضومة حيل مرة من سالفة الكلية و مرة من شعري و حرگ ايدي و ختمتها امي ...

.....

" ورود "

بقت أمي تلح عليه على موضوع الزواج و شكيتها لأبوية يالله خلصت شوية رجعت اسوي اكل لشراع و اني ما ادري هذيج الفترة شلون خلصها بس مو مثل قبل جنت امي اصعدلة الاكل هسة ادزة بيد زهرة

و غرفته الصبح انتظره يروح و انظفها بس ابد ما دار بيني و بينه اي كلام لحد ما صاحلي على چـاي جنت اني و البنات بالغرفة

يمشي و يصعد و ينزل يخابر

هو حياته عبارة عن دوام و من يجي يأكل و ينام و يطلع العصر ما يجي غير بنص الليل و حتى من يصعد بالليل يخابر جنت أراقبة من فتحة باب غرفتنه ..

صارت هوسة عمتي تغريد و جُمارة بالكوة خلصها زِناد منها

و اني سويت حملة على المطبخ و الساحة البرة راح الشيخ لمشية مال

صلح و رجع أنا اعرفه من وجهه إذا شوية بي ابتسامة يعني حالين السالفة و إذا معصب يعني السالفة ما نحلت من اول مره

طب للديوان بوكت متأخر أنا اكثر وحدة حافضته لان اكثر وحدة تفتر بالبيت ما دام ما راح لبيته و بقى بالديوان يعني اليوم مشتاگ لجمارة

و ما دام جُمارة موجودة مو مال يشتاقلها ، مغثوث لان امها كتلتها

سويت اكل لغسان لان ما اكل شرد من زِناد من انجوت جُمارة

عدنان : حياة حضريلي الحمام اريد اسبح

دمعة و گفتله على الدرج مخوصرة

دمعة : لا أبوك يريد يسبح الحمام الفوگ ما فاتحيلة السخان والمي بارد

باوعت بصدمة عليها

دمعة : ورود طلعي لابوج هدوم غرفتي ما بيها هواي كلهن لبسهن و انتو ما غاسلين هدوم

ورود : معليج انتِ اصعدي اني احضرلة الحمام يالله

دمعة : احترمي نفسج

عدنان : انتِ احترمي نفسج لج لا افصل راسج عن جسمج

دمعة : تأدبوا اني أمكم بس الظاهر محد مربيكم عدل

بقيت فاتحة حلگي اباوع لعدنان هي ضحكت و صعدت

عدنان طب و ركع باب الحمام ورا

حضرت هدوم أبوي و امي بسابع نومة طلعت للديوان امشي على كيف

وصلت للباب مديت راسي على كيف مثل كل مرة كاعد وصوت موال

واضح ياااااع كون تسمع جدة تنجلط وهو يغني بصوت ناصي

حافظة كله ..

صار صوته عالي وهو يردد

لَو بَس تدري بية شگَد أحبك

جِبت گلبين حتى أكدر لگلبك

لان حُبك چبير يعذب الـ گلوب

گلب واحد عِندي و خايف يذوب

يرجع المطرب يعيد و هو يعيد ويا نفس الكلمات بدون ملل كل يوم

يخليني صافنة بشيء من كد جنونة بحبها

خطية ما تهنى اول ما أجن سوولهم سالفة و كتلوا اخوها

بعد ما ندري عمة تغريد على هذا القهر الشايلته و عصبيتها

و قساوتها تنطي بتها لزناد ..

بقيت أنا واكفة بمكاني أفكر ، أنخطف لوني و احس دمي نشف

و كل اعضائي انشلت من أعاينله واكف گبالي وين اشرد و اطم روحي

زِناد : ما تستحين بالله ؟

شهگت من الخوف

ورود : شيخ أنا جاية خاطر اكلك تريد چـاي

زِناد : لا ما اريد رايح للبيت و يالله طبي جوة

طبيت للبيت اركض و صعدت كبل للغرفة تغطيت بـ لحافين

و بعدني مستحية كلت بلكي ما يجي للريوك باجر يبو يا فشلة الفشلة صارلي اكثر من سبع سنين أراقب بيك هسة يالله تكمشني

ثاني يوم و اني مخبوصة بهوسة الريوك اسويلهم طلبات المستمعين

خوب جدة جنها حبلة يومية تريد البيض شكل

اسوي بصينية شراع و نزل هو مستعجل يركض

شراع : ورود مستعجل اليوم كلششش عندي شغل

ورود : هذا سويت اكل

شراع : جاي جاي

صبيتله و هو يأكل سريع بكامل أناقته

دكت عليه وحدة فتح خط سبيكر و هو التليفون على الكاونتر

- عيني شراع وين صرت

شراع : لج عيني جاي دقاقيق خل نتزقنب

- جان تريكت ويانه

شراع : لا ما اكدرالاهل مسوين خوش ريوك

وديت الاكل لجدة و رجعت بعده يأكل غسل أديه مرتين بالصابون و راح

....

"جُمارة "

كعدت الصبح على عياط رقية تعاركت هي و عمي هاشم

طلعت برة و اني مطفية حتى اغسل وجهي

هاشم : يابة إذا عديتي عتبة الباب و حق لا إله إلا الله طلاگج يوصلج و أحط فوك راسج مرة و تحلمين تشوفين جاهل أنا حجيت و انتِ إذا مره طلعي

هي لابسة عبايتها و ماخذة جهالها تالي رجعت و صعدت فوگ

رهينة : خفت لهاي الخلق العايبة بس تردن تتزعلن حتى هناك تضلن سايبات ما ادري بيجن أنا و ما اعرف مكسراتجن

بعدهم يردون يحجون و صار صياح عالي بالساحة طلعو يركضون

و اني من ضمنهم طبت سيارة للساحة شحطت و وكفت زِناد واكف يأشرلهم نزلوا ما يقبلون ينزلون يأشروله بس اهدأ قفل باب الساحة

شهگت و خليت ايدي على گلبي من شفتة يضرب بالجامة

بكل قوة لحد ما تفلشت و يجر بالي كاعد بالصدر

طلع اليسوق ولاء أخو نزله كطعة تگطع يعني ما اعرف شلون و هذا أخو

ما رف گلبة عليه بحيث من گام عنه اخو ما يتحرك و الثاني شريك

و وياهم خالد ابن عمي عمار و من لزم شريك ما هده لحد ما شاله و شمره فوگ ولاء و خالد نفس الشيء

راحو عمي هاشم اول بداية يهدي تالي من دفعة عافوا و محد تقربلة

اجة للمطبخ يغسل كلها طبت جوه بس اني بقيت واكفة اباوع من الشباك دشداشتة صارت كلها دم اجة وكف بصفي فتح البوري

و اني اباوع على منظرهم ماتوا لو بيهم بعد نفس شو محد يتحرك

تنگعت منه مي لان يشيل و يشمر على طگت الدم الي بالدشداشة

درت وجهي عليه باوعتله بتعجب

رهينة : ولك يجدة شجاك شمالك

زِناد : صوووت واحد ما اريد اسمع

هو ينفت أعصابة تالفة باوعلي و باوع لأيدي شال مي و نگع شعرة

اشر على ايدي بعيونة

زِناد : شلون صرتي

جُمارة : لا ، ها كلشي مابية

عافنه و طلع من البيت كله و راحت مرت يونس لاخوها و عمامي

گوموا ولاء و شريك يغسلون

رهينة : ولكم شمسوين

خالد : جدة يردون يخطفون بت الشيخ قاسم

تالي لگفنه زِناد

رهينة : عساكم بالمرض وكونه بعد ايدي حرامات ما كتلكم خلاص ولكم بعد هاه فشخة امير إعله راسة ما طايب جرحها

تجون تردون تصخمون روسنة انتو ما عدكم أبهات بيها خير تربيكم والله إلا اخلي يربيكم من جديد

بعدها تحجي و طبت عجيبة تركض باوعت لولاء ولطمت على صدرها

عجيبة : أريدك بالسرطان كون بأيدك حليمة ماتت و عافتلنا سرطان يأكل بينه شلل بيدك ان شاء الله ولك اخوك هذا يا وحش يا شيطان الرجيم

رهينة : كون السرطان بدمج ولج و يوكف إعله فاتحتج تدعين على وليدي هيج يمكسورة الرگبة يالمگطمة انعل ابوج لابو الساعة الاجيتي بيها تف امداج انتِ و خلفتج الوسخة

عجيبة : والله الي يوم اذبحة بيدي و اخليج تنوحين على جثته إذا ما يعوف ولدي بحالهم شنو حكم فرعووون خلي يعوفنه عمي شيخ و هيج ما نريدة كلمن شيخ على روحة

رهينة : شيخ عليج و على ولدج و عليها كلها و يحكمج و يكسر راسج و انتِ الممنونة و إذا بيج خير من يجي هذا الحجي أحجي گبالة

عجيبة : ما خايفة منه و أطب بنص عيونه ، امشي يمه امشي لبيتك عساها بالكسر إيدك

رهينة : كسرو عظامج و طحنوها ان شاء الله علف للحيايا

لان بس الحيايا ما تتسمم من عظمج

طلعت وهي نظراتها كلها حقد و شر

كعدت جدة تغلط عليهم و تدعي على عجيبة لان تحجي على زِناد

جُمارة : هسة انتِ جدة صدك تحجين هلگد مخلفة

يوسف و فاخر و عمار و يعقوب و قاسم و هاشم

شنوو قحط

رهينة : و شبيهم ويلادي شواربهم ينحلف بيها ميدبين

و عاقلين اجن هالسعالوا خلفن هاي الخلفات العايبة

و تخزينه

غسان : هسة أنا حجيت هاي الفكرة بشقة شو هو سواها صدك

سكت بسرعة من طب علينا مغير ملابسه آشر عليه

بلعت ريگي ..

...

"روز"

تغريد اخذت ملابس راحت تسبح لان تخلي لرجلها كريم فكس

بسرعة قفلت الباب و اخذت تليفونها دگيت بسرعة و بچيت

- انتَ وووووين

- ها حبيبة القلب

روز : ازاد لا تخبلني تغريد تريد تزوجني و البارحة ضربتني كله من وراك لان خابرتك اني بعد ما آتحمل لو تجي لو گول ما اكدر خلي اشوف حياتي

- هاي عود أنا حبيبك مع الأسف والله

روز : صدك تحجي ترى اني دمي محترك و انتَ تحجي ببرود ترى من صدك مليت

- شتأمر حبيبي أجيك ؟ هسة اعوف الدنيا كلها و أجيك

روز : خاف تزوجني

- أزوجها هي ، لج بابا شبيج اخليج تصيرين لغيري شنو مخبل

روز : لعد تعال يالله كافي اني انتظرت

هواي و بديت اصدگ كلامهم

- غيروك عليه العدوان

روز : انتَ بيك شي ترى خبلتني تغريد مراويتنه نجوم الظهر و لا تلفون ولا طلعة و لا طبه حياتي بالكوه امشيها

- ما يلوگلك حبيبي غير صدر السيارة و ارقى تليفون

و أفرك الدنيا فَر انتَ شتحجي اني غير تعبي كله علمودك

روز : الف مرة كايلتلك لا تحجي وياي بصغية ولد

- ليش حبيبي مايعجبك

روز : اي مايعجبني

- طبك مرض حبيبي مو شرط كلشي يعجبك

روز : يالله باي و اضربني بالنعال بعد إذا دكيت

- محضرلك كيشوانية على گد ما تحجي هاي الحجاية و ما تنفذها

روز : هالمرة صدك رايحة

- دير بالك على نفسك حبيبي

روز : و يهمك ؟

- شلون ميهمني لك اني عايش على صوتك

روز : باي

- أحبك

- اني هم

سديته بسرعة و فتحت قفل الباب

شوية و طبت تغريد هي ما تحجي ويانه اثنينه

و طبت علينه جُمارة تركض

...

"جُمارة "

بلعت ريكي و باوعت لجدة

زِناد : امشي بدلي يالله ثواني

- وين

- بدلي گلت

ركضت للغرفة و اني كلي آمل على الكلية بلكي أتصلوا بي

امي ما حجت وياي لبست صاية روز ما حجت مبينه فرحانه لقيت الشال و طلعت لكيته ماكو كالت ورود بالباب منتظرج

لكيته كاعد بالسيارة ينضف الجامة الأمامية فتحت الباب و صعدت ورا

ما حجيت شيء خايفة منه لسه أتخيل شكله و كلامهم

وگف السيارة يم مضمد فتحلي الباب نزلت رجال جبير

زِناد : خلي يشوف ايدج

طلعتها اله ضل يسألني وين صأنجويتي و يعقّمها تأذيت و جريت ايدي

- لازم أنظفها عمو حتى متلتهب

اشرلي بعينه أنطي أيدج أشرتله براسي لا

اجة تقرب عليه و لزم ايدي من المعصم و ثبتها بعصبية

بقيت مغمضة عيوني لحد ما نزلت دموعي من الوجع

زِناد : شوية على كيفك وياها

- مو لازم أنظفها

خله شي يحرگ هواي سديت حلگي بقوة لان اخاف منه بس دموعي كامت تجري و بعدها كام يلفها شوية ألوجع بده يخف رحت بسرعة

صعدت بالسيارة بس أنشغ من الوجع و النوب اني ما متريگة

وهو بعده يتحاسب وي الرجال هسة منو عاتب عليه منو

فتح الباب وصعد حرك السيارة و وكف گبال صيدلية ، لمن صعد خله يمي علاگة بيها شكلين كريم

زِناد : هذا اللفاف بالليل افتحي و خلي من هاي العصارتين اثنينهن سوه

جُمارة : ترى ما جانت توجعني هيج اني ما عاتبة عليك

تجيبني لهذا حتى روحي راحت من الوجع

زِناد : اششش ، كافي

احس روحي دخت تمددت على الكشن الوره

لحد ما صحاني صوته

- يالله نزلي

كمت بسرعة لان عبالي البيت حتى اكل لگمة قبل لا اطيح

بَس !!!

.....

الوَحش يمج حنين يصير

حَتى الصلب يمچ ، ذَاب

- انتِ بنية لو تيزاب ؟

- رُسل فَهد 🤎

حساب الإنستقرام rusul.fahad

قناة التلي رُسل فَهد

*علماً بأن القناة بأدارة فهد أبني هالفترة 😂

هلو حبيباتي شلونكم ، رجعنا وي اكثر فقرة يكرها الكاتب ..

أكو بعض الابطال بعدهم مَا تم ظهورهم

بالرواية بس خليت أشباهُهم ..

مبدئياً شنو رأيكم بالرواية ؟

رُغم التفاعل ما حابته بس تعرفوني ما أهتم لهذهِ الناحية

و لا الها الأولوية بعالم كتاباتي .. 🌸

فقرة الأشباه كالعادة الشبه مو مطابق 100/100

لكن الأهم يتعدى الـ 100/65 ...

لان الرواية ضخمة و الأبطال عددهم كبير راح

يتم ترتيبهم بالتسلسل و الأولوية للأبطال الأساسيين

يا أجمل الوحوش

- رُسل فَهد

...

زِناد يشبه هذا المُمثل بهذهِ الهيئة خاصتاً لان اللحية مو شيء ثابت بوجهه لذلك الملامح على الأغلب هيج

جُمارة بعد ما قصت شعرها هي اكثر وحدة مطابقة

لشبيهتها

اما تغريد vs رهينة جمعتهم سوه

تغريد تشبه هذه الممثلة لكن عيونها بنيه

بس رهينة تكون بشرتها بيضة و نورانية

كذلك روز تكون عيونها عسلية لكن هواي تشبه هذه

الممثلة حتى لون الشعر

و الوهمي الي معذب قلوب القارئات 😂

متأكدة بعد التشبيه تقولون يستحق الانتظار 😂

اما بعد ورود النادرة برو ماكس

و كذلك شراع السفينة على گولتكم 🙂

مريض الوسواس القهري بسبب دلال فتنة أخت رهينة

و شريك لكن بدون لحية لان يعمل جندي في السلك العسكري

حفيد رهينة لكن ابو مو أبنها ( إبن ضرتها )

و بنت الشيخ معشوقة "شريك" من الشخصيات الي ما تم ظهوروها

للان

عالية أخت شريك الوحيدة

و آخيراً الفنانة في عالم الانتقام " دمعة "

اما آخراً امجد ابن عجيبة 🙂

.........

إذا أضطريت لنشر أشباه بعض الشخصيات الأخرى

سيكون على مواقعي الأخرى إنستقرام او قناة التلي

الرواية على وشك البداية 🤭

دُمتم في حُفظ الله و رعايته 🤍

كان ختامها مِسك " أبني فَهد " مدير أعمالي 😂

التصويت + التعليق بين الفقرات لُطفاً

يا أجمل الوحوش

- رُسل فَهد

...

بعد إن كتبت قصيدة كاملة عن التخطي ختمتها بهذهِ الأبيات :

و المأذينه سـولفنـا

المُهم ما نگدر بلياك

توجع بَعدك الايام

( حامل و بـ بطنها تدوس )

تَعال النا الاعذار هواي

طگنـا العوز و انت َ فلوس

- رُسل فَهد

...

"جُمارة"

بَس!!!

انرسمت الابتسامة على وجهي و غمرتني الفرحة و نسيت

الألم و الجوع و كل شعور مو حلو مر عليه من البارحة و اليوم

لمن شفتنه رجعنة وكفنه بـ باب الكُلية لان البارحة حسيت هذا آخر

يوم راح أشوفها بي و مستحيل أجيها بعد

باوعتله مصدومة و فرحانة هو هَم إبتسمت رغم كل ملامحة

و عصبيتة توثق ماكو مجال للابتسامة حَتى ..

زِناد : يالله متنزلين

جُمارة : صدمتني

زِناد : أعيش و أصدمج

جُمارة : آمين يا رب

جان يمشي و اني امشي ورا دار وجهه عليه يضحك

حتى أسنانة بَينت حقي لازم أنصدم بيهن لان هلال العيد

يطلع اكثر منهن

جان لازم بأيدة ظرفين ورق اسمر من بعيد يبين بداخلهن فلوس

امشي و الفراشات تطلع من حلگي احسها

رجعنة طبينه لنفس الغرفة مال البارحة بس الموظفة الي كالت اله ماكو

تسجيل تباوعله بدهشة عكس نظرتها البارحة جانت عادية

سَلم و دِخل حتى العميد مدري شبي مخبوص و يرَحب

- اني ما اعرف تعرف هاي الشخصية چان كتلي البارحة تدللون

دلال هذا الشخص صاحب هواي أفضال عليه ولازم أردهن

زِناد : أني أتصلت بي يسهلي الموضوع

بس طلع يعرفك حق المعرفة

- اكيد اكيد ، هسة خلي الطالبة تملي الاستمارة

حتى توقع الها

كام العميد يسأل وهو يجاوبة حرف واحد ما نطقت اني

ملىء استمارتي كلها ، حافظ حياتي اكثر مني

- ما شاء الله شنو هالسرعة البديهية

زِناد : ههههه ، تعرف ولد عم و كلنه نفس البيت

واحد حافظ حياة الثاني

شال الظرفين و خلاهن على الميز هو و العميد گاموا واحد يتعارك وي الثاني وهم اثنينهم بداخلهم يردون يأخذوهن ، عركة مال زناگيل

اني كاعدة على الكرسي

و اكيد فاز بمالعركة زِناد لان العميد إذا ما يأخذ هسة يرسبني

حتى يرجع يأخذهن فززني صوته

زِناد : يالله يابة

- مو باجر الاحد تبلش دوام اني راح أحاجي كل الاساتذة يتساهلون وياها و يرجعون يعيدون الها المحاظرات حتى لو نضطر تداوم ساعة إضافية باليوم

زِناد : مو مشكلة انتَ رتبها من يمك و ممنون الك اني

- انتو تتدللون و أفضالكم ما تنسي و ان شاء الموفقية للدكتورة

زِناد : دكتورة شيبتنه يالله صارت دكتورة

- هههههه يالله المهم صارت

خزرتة

طلعنه و اني لسه احس روحي ما مصدكة و كل ما اتذكر آمير احس بالخيانة هو ميت و اني أداوم مشاعر مخربطة عقلي يشبه عقل المجانين

فتحت باب السيارة و صعدت و طبگتة قوي

زِناد : على كيفج منو يتكفل الخساير تغريد لو بتها

جُمارة : شيبتك يالله صرت دكتورة خطية مو انت جنت تدفع فلوس المعهد لو تقره بمكاني

زِناد : هههه ، اني سجلتج بَس انتِ بعدج ما شايفة من يجيبون الجثة و يشرحوها گبالج

جُمارة : إيع ، صدگ ؟

زِناد : اي دكتورة جُمارة

جُمارة : خاف تموع روحي و ما تحمل شلون

زِناد : ابطلج غير

جُمارة : و الفلوس امي كالت ادفعلج من فصل امير

زِناد : تدورن فصول

باوعتلة بالمرايا لگيته يباوعلي خزرتة

زِناد : والله الي يوم أقلعهن

جُمارة : ما راح أجاوبك لان خجلتني بكرمك

ما اكدر أشوف ردة فعل ملامحة لان اني كاعدة ورا مباشرتاً

بس سكت ثواني و بعدها أردف

زِناد : أحنه للغربة نعزب شحال إذا يحتاجنه

المنه و بينه

بقيت ساكتة و هو صار بطيء عكس الروحة جان سريع

و احس معدتني كطعتني من الجوع اني احب الاكل ابد ما أتحمل بدونه بس على كولة امي ياريته مبين

جُمارة : يالله شوكت نوصل ترى كلش جوعانة

زِناد : ما حچيتي بحلگج عظم ، يالله وصلنه

شوية وصدك وصلنه وكف السيارة بالباب فتحته و نزلت هو نزل الجامة ردت أطب درت وجهي لكيته يباوعلي

جُمارة : يالله روح

زِناد : دفوتي للبيت يالله

عدلت ربطتي و رحت بأتجاهه هو يباوعلي

جُمارة : شكراً اني تعبتك

زِناد : هذا واجبي

مد ايدة و انطاني ورقة القبول اخذتها و طبيت اركض للبيت فرحانة

بس من وصلت لباب الغرفة تذكرت اني ما احجي وي امي

و هي البارحة حيل قست وياي و هانتني كدامهم رجعت للمطبخ

صبيت ماعون اكل من الغده جان مستوي و رجعت للغرفة

خليت ورقة القبول يم مخدتها و نزعت الصاية و الربطة

هي رفعتها قرتها و رجعتها

روز : مبروك بس اغسلي الصاية لا اذبحج

جُمارة : منو يذبحني انتِ ؟ ولج دهددي بشيء اكدر اصدكة

خليتهن على الميز لان ادري امي من تغسل هدوم راح تغسلهن

همزين محد لام فراشي لسه رجعت نمت و للعصر يالله كعدت

طلعت بره لكيت الأجواء مشحونه و كلها ضايجة تقربت على ورود كرصتها اشرتلهة شكو دارت وجهه على الجدر تسوي حلاوة حليب

ورود : عالية بت عمي جعفر رايدة تحرك روحها و شريك بالعسكرية راح الصبح ورا ما كتله الشيخ و اجت امها هنا تركض للشيخ كتلها وجابها هسة هنَ بالديوان

جُمارة : هم كتلها ليش بس يكتل

ورود : جا طبها مرض ولج لو منتحرة صدك

جان شحصلت و هم وين يطون وجوههم من العالم

جُمارة : و هسة شنو

ورود : ما ادري بس لا يجي عمي عمار هسة و مالنه خلگ

درت وجهي على باب الشارع شفته طب هو و ولدة

جُمارة : هم ابن حلال هاي جدة رهينة صدك شريفة

جدة من سمعت بعمار اجه راحت للمضيف و عمي فاخر و ولدة راحو وياها لان جان زِناد كايللهم لحد يجي للمضيف يريد يحجي وياها

هي و امها وحدة

و كلهن راحن وراهم حتى ورود طفت جدر الحلاوة و راحت للمضيف

اني صبيت حلاوة اكل بيها و اسمع العياط صار بفلس

خلصت آخر لكمة بالماعون يالله رحت وياهم عدلت حجابي و طبيت للمضيف

اباوعلها بنيه حلوة شگرة كلش شعرها اشكر مبين من العباية لان لابسة عباية بدون حجاب بس وجها بي آثر جفوف حمر مال راشديات

اني خاتلة وره ورود اباوع

عمار : صارن هواي يا ابن حليمة هواي بنات استهترت فد نوب و تمادت طبعاً لان ما لكن واحد يردهن

زِناد : و شني انتَ جاي تحاسبني على عمايل غيري

خاف انا منطيها البانزين و كايللها انتحري

عمار : لا بس تطبب ابن عمك سجن لخاطر حرمة و تسكت اعله سالفة ورود الما ينسكت عنها و ناس تاخذهم للكليات حتى يتطاولن وي الزلم احنه من يا زمن هاي نسوانه و هسة

الختامية أخت شريك تريد تنتحر

ليش بوية خاف انتِ هم عاشكة و هله ما يرضون ينطوه

حالج حال اخوج ..

زناد : تريد تخليني

احجي حَچي يأذيك وأنا ما اريد لان ولدك واكفين و زحمة

عمار : لا ، لا تعال طگني يالله و حط عگالي بركبتي و اسحلني يالله حتى ترتاح

زِناد : ياريت محد يجبرني اسوي هاي العمايل بي

عمار : حتى اكص إيدك و أخليك عبرة لمن اعتبر

زِناد : ياريت ما تخليني هسة اسوي حركة و أتندم عليها

لان وراها الأجيال كلها دكوم ما تحترم عمامها و أنا هذا

الشي ما اريدة

جدة رهينة راحت يمه تبوس بذراعة لان ما تلوح چتفة

و تمسح بأيدة

رهينة : على كيفك يبعد امك

عمار : اي هدي هدي حتى ما يجي يضرب ابنج

عمي فاخر واكف يسكت بعمي عمار و حتى ولده يسكتوه

وهو دفعهم

عمار : لا أنا اليوم اريد اعرف هذا ما اله رداد بس اريد أفتهم

قاسم : شجاك يخوية هدي زِناد خوش زِناد

جا هو شله غرض بالتنتحر شو انتَ هم مدري شلونك

عمار : ما تبقى بنية بـ بيت أهلها كلهن يتزوجن

ولد عمهن و يكعدن يم رجولتهن عينهم عليهن و هذا الحجي يشمل الجميع بت يعقوب و بت جعفر و بت فاخر

زِناد : ليش ما تعوف بت يعقوب انتَ شتريد بالضبط

عمار : تريدها يالله اخذها و فضنه شمنتظر و لا تخاف ما اخذها لولدي امها و ام عدنان ما يتوالمن

زِناد : والله عيب عليك و چثير جاي تصغر بعيني

رهينة : مالك غرض بجمارة شلك دخل بيها ها جم مرة كايلة الكم عوفوها جم مررررره

عمار : بس ما تداوم كلية أنا بناتي اثنينهن بطلتهن وًهن شاطرات ليش ما خليتوهن يداومن كلية

رهينة : و انت ياهو متدخل ببناتك شو انت ما خليتلك بنية ما بطلتهة و هسة جاي تصفط براسي

عمار : ورود و عالية يتزوجن ما يضلن

رهينة : لا ما يضلن احنه هم لعبت ارواحنا ورود متقدم الها شراع ابن اختي و ماكو احسن منه

عمار : يعني ابن اختج احسن من ولدي احسن من احفادج ولك فاخر ما تنطيني بتك وعلي اخليهم يذبحوها

حجاها و نكث عباته و طلع ورود طبت جوة و كلهن بدن يطلعن و هو متخوصر و يفتر بالديوان يحجي وي جدة و هي تهدي بي و عالية و امها واكفات على جهة

رهينة : هنا انتِ يجدة تعاي اخذيني للغرفة اشرب دواي سكري صعد من بلاويهن

باوعلي و اني اجيت اخذ جدة دار وجهه على عالية

زِناد : هاي امج خزيتيها كدام الوادم و اخوج بالعسكريه رايح بنص الموت حتى يجيبلج زقنبوت تنتحرين ليششش هااااااا

هي ساكته بس تبجي دار وجهه عليه بعصبية

- جيبلي ماي بساع

من الخوف ركضت للمطبخ حطيتله مي بالكلاص و رحت للديوان اول ما طبيت لكيته لازم وجهه بقوة يحاجيها و يحرك ايدة

و مو بس وجهه حتى جسمها ينهز من ايدة تتحرك من شافني هدها

بسرعة احس بطني من الخوف كامت توجعني

بالكوة وصلت يمهم ايدي ترجف اول ما اريد أنطي الكلاص

طاح من ايدي لان طول المسافة شايلته بإيدة وحدة و ايدي ترجف

شهكت من وگع و باوعتله خايفة

رهينة : انكسر الشر انكسر الشر

تقرب عليه بقيت واكفة متصنمة بمكاني و اباوع لجدة من صار كبالي رجعت ليورة سحب ايدي فتحت عيوني من الصدمة و الخوف و المستحه فتح اللفاف الي عليها و اني گلبي يدك سريع

زِناد : يالله اخذي جدة و حطيلها العصارات

عفت حتى جدة و طلعت وحدي اركض ما درت وجهي عليهم

جانت امي كاعده بالغرفة تكف بالصاية مالتي صدك لان جانت طويلة و كلها تربان من جوة

جبت العصارتين فتحتهن خليت شوية من هاي و شوية من هاي بس تحرگني من اخليها غمضت عيوني و امشي اصابيعي على مكان الحرگ كمت اطفر من الوجع كامت امي جابت كارتون من علاج جدة

و دارت من كل عصارة شوية وخلطتهن

سحبت ايدي و كامت تخلي و اني كلساع اجر بيدي و هي ترجع تجرها بالكوة يالله خلصت بقينة كاعدين بالغرفة و اني سولفت لروز على العركة الصارت دك تليفون امي كالت الها هلا ام علاوي

باوعتلي بسرعة روز بعصبية

تغريد : اي اي عيني اتذكر ، صحيح كلامج و احنه ما نلكة احسن منكم .. اي هي الكم ما تصير لغيركم ان شاء الله

... هاي الفترة بلكي احجي وياهم حتى ارجع لبيتي بـ بغداد مشتاقتلة

ضلت تسولف و روز صارت كبريت بس تباوع و عيونها كلها عصبية

اول ما سدته امي راحت وكفت كبالها

روز : مو بكيفج توافقين و أنا كتلج ما أتزوج لو تموتين

تغريد : وافقي لخاطري حتى نرجع لبغداد اني ما اريد اكعد وي ذولة و الولد خوش ولد والله الدنيا كلها تحلف بي

روز : لا ما اقبل اني ما مستعدة اضحي بروحي بس حتى انتو ترتاحون شنو هاي الأنانية و منو يخليج ترجعين ترى جُمارة سجلوها هنا حتى ما تتنفسين و دكولين ارجع

تغريد : أبطلها و اكسر خشومهم و اني السنة الجاية

اسجلها ببغداد و نعيش بعيد عنهم

روز : منين تخلصين من زِناد الناهي على بتج لو من رهينة و عمار الي لو بيدة حتى انتِ يزوجج

تغريد : انعل أبوهم كلهم ما يهموني

روز : و اني هم ما يهمني غير گلبي

كامت الها امي و قفلت الباب ضربتها

تغريد : شنو اني گو** هنا شو عينك عينك تتمعشكين كبالي وياريت لو بحالج ضالة مثل الجلبة تدورين ختلات حتى تخابري

روز : معليج بية معليج ترى ما يدك يخاف علية منج لان يدري بيج شنو و شكد تضربين عبالك احنه زعاطيط عندج

تغريد : يابة و علي وروح امير لو تموتين ما تأخذينه

حتى لو يجي ويبوس قنادر ما اخلي ياخذج هاي ترجية خليها بأذنج

روز : زين احجي ويا انتِ والله راح تغيرين نظرتج

ضربتها راشدي

تغريد : ولج شنو اني أگ** عليجن تردين اكلة يالله شوكت تجي تأخذها ولج وين عايشين احنه يمكسورة الركبة