تحميل رواية «تحت جناح الظالم» PDF

يگول ايهاب المالكي

اصعب موقف بلحضات الوداع

من تشوف الجنت تبني تهدم

من تقوي گلبك وانت مجروح

مامهتم تبين وانت مهتم

من تبتسم بس بداخلك نوح

الدموع بباب عينك سكته تلتم

تضطر تمشي لاكن وانت مكسور

عزت نفسك تبررلك الهم

وراها تعيش لاكن گلبك يموت

بيت الشعر يوصف حال نور 💫

نمت والتلفون بصدري والخط مفتوح

فزيت الصبح التلفون واكع ع الجربايه

يمه عززه العزاني كون لو واحد شايفه  جان صارتلي مصيبه

الحمدلله اكعد قبل الكل

شفت الخط مسدود خليته بصدري وكمت

كملت شغل البيت  الي عليه وبدلت وطلعت للدوام

دزيت رساله لليث طلع صح واحد يعني ماعنده نت

خليته ع الشحن وبديت بشغلي

للظهر التلفون مدگ ابد

رحت تفقدته اخاف متصل واني مسامعته بس ماكو اي اتصال

اتصلت ع الخط يطلعلي مغلق

بديت اخاف ويتصورلي اشياء تخوفني بالزايد

كمت الهي نفسي بالشغل التهي ويا الزباين وويا البنات

بس جذب كل ما ابعد فكري الگه روحي افكر بي

رجعت اتصلت هم مغلق

كمت اكل بروحي والقلق تملكني

ماعرف شسوي لاعندي رقم واحد من جماعته الي راح وياهم ولا اكدر اتواصل ويا اهله

ضليت اكل ربع ساعه اتصل وكله يطلعلي مغلق

لليل كمل دوامي وني احس روحي مسلوبه المشكله يبين على وجهي بسرعه

كمل دوامي وكل الي يحجي ويايه اسمعه بس ما استوعبه شيحجي لان فكري كله يم ليث

كمل دوامي واخذت التلفون ويايه عسى ولعل يتصل او ينفتح خطه

رجعت للبيت سويت عشه وتعشينه

ورحت للحمام اشوف بلكي اجه عنده النت او نفتح خطه بس كولشي ماكو.......

للصبح متزوهره اني مابيدي شي اسوي وما اكدر ابقى ساكته

كلت لباجر اذا مفتح خطه احاول اتواصل ويا اخته واسألهه عليه وشيصير خل يصير

نمت بس غصبت روحي ع النوم

الصبح كعدت كملت كولشي  وطلعت للشغل ضليت اتصل كولشي ماكو لا اتصال ولا اي شي

بده الخوف يتملكني والافكار السوده تربعت براسي

ونوب منا الاخبار ابد متبشر بخير  كولهه شهداء وكلهه دتمون وعدد شهدائنا يفوق اعدادالارهاب

من غير التمثيل الي يمثلو بالجثث 

هذه الاحداث جانت ب٢٠١٥

*******

مرام: الشغل كلش مرتاحه بي بس بي شغله وحده مزعجه وابد ممرتاحه من ناحيتهه

انو الشغل مختلط وويايه بنيه وحده ومن اشتغلت ورايا بأسبوع بطلت وبقيت اني البنيه الوحيده بالمحل

صح الولد حبابين بس اني هوايه متقيده ومن النوع اني مو كولش اجتماعيه فشوي عانيت من هل سالفه

اكو ولد ويانه اسمه وهب

هوا حباب ومشفت منه فد تصرف مو حلو بس نضراته كولش تضايقني وتقيدني

ومرات الظهر الي يروح ينام والي يروح والعصر يجي

فأكثر اوقات الظهر بس اني ويا

وني من النوع كولش خجول ماعرف اسولف او افتح مواضيع ومن يحجي هوا اگضيهه مممم ويي

استمريت بشغلي تقريبا 3 اشهر

كثرت سوالفنه ونوعا ما بده يقل الخجل الي بينه وبديت اتقالم ويا واسولف وافتح مواضيع وكذلك ويا البقيه هم ومرتاحه كوني البنيه الوحيده ابد ميتعبوني ومخليني براحتي

كولش حبيتهم وحسيتهم اخواني

كمت صدوگ اتونس بشغلي

٢٤ ساعه ضحك وسوالف وشقى وتحشيش

بس وهب من اشاقى ويا الولد او من همه يحجون ويايه يكلب وجهه عليه

ومن اروح اساله شبيك ميجاوب اضوج لان فعلا ممتعلمه احد يضوج بسببي

يطنگر وياخذله يوم او يومين ضايج وبعدين يفك من وحده

وضالين على ها حال

وهب: مرام شنو المواصفات الي ترديهه بشريك حياتج؟

مرام: ههه شنو هل سؤال

منو گلك افكر بالزواج

وهب: هيا مال كلاوات شو لا طالبه وتفكرين تكملين دراستج ولاموظفه بدائره حكوميه حتى اكول عده راتب ثابت ومتفكر برجال  اصلا تتمنين تخلصين من الشغل والتعب وتكعدين ببيت وتستقرين

اصلا انتي تفكرين تتزوجين اكثر من كل بنيه

حجاهه بضحك بس شكد قهرني وشكد استصغرت نفسي

مرام :شنو شاكيتلك حالي ومادري

شعليك بيه اشتغل عندي وضيفه طالبه مبطله ترى وضعي يخصني وماحب احد يدخل بي وعود اذا عنست لتاخذني لاخوك

ضجت منه وهوا عرف اني ضجت منه ضل كولسع يتشاقى ويايه بس اني كمت اتجاهله لان صدوك جرحني

وهب: هوا صحيح ماكو واحد يشتغل اله لسببين لو من الضوجه لو محتاج

مرام: لا مو شرط اكو واحد ممحتاج ومو ضايج وهم يشتغل متعرف ضروف الناس

وهب: ونتي ليش تشتغلين

مرام: بكيفي

عفته وطنگرت عليه لحد ثاني يوم وني وجهي السيف ميگصه شكد نتداهر اني ويا ونتشاقى بس اضوج من ما احجي وياا وماعرف هاي الاحاسيس شأفسرهه.........

نور : عدت 3 ايام واي خبر عن ليث ماكو

تعبت كولش تعبت يعني شغل المركز وشغل البيت وكل شغل الدنيا لو اشتغله ما اتعب بس ليث تعبني هد كل حيلي

مجرد ما اصفن ابجي

ادري ياليث شوداك هسه منين طلعتلنه بهاي السالفه

ماعولت كدرت احجي وياك نوب تعوفني وتروح

تعبت ومابيدي غير الدعاء

ورا اليوم ال3 طبعا هاي الفتره اخذ التلفون ويايه للبيت

وجعت مثل كل يوم سويت العليه بلا واهس ورحت مددت انهزم من كلشي بالدنيا

ماريد اسماء وابويه ينتبهون

نوب يسوولي مصيبه واني مناقصني

نمت ساعه ب ٤ الفجر تقريبا فزيت على رجه بصدري

طررت قبل لا اعرف منو لان اصلا ماعندي احد غيره

غطيت راسي وتلفلفت وطلعت التلفون

دازلي رساله كاتب

—شلونج يروحي

قريتهه وراسا اتصلت

مباشرتا جاوب

— شلونج يانضر ليث وروحه

— بس شهگات تطلع مني ماعرف شحجي احس الكلام وگف بزردومي

— ليش يروحي ليش تبجين وعيونج شبكه ماكو بالمنطقه الي احنه بيها وبس صارتلي فرصه اتصلت بيج حتى اطمنج حتى قبل لا اتصل بأمي لان ادري بيج بالج يمي

— يمتى ترجع والله تعبت

—ان شاء الله اكو وجبه بعد اسبوع تلتحق واحنه ننزل 

— الوضع شلونه يمك

—مسيطرين الحمدلله

—لعد شو بالاخبار يكولون راح يفوتون بغداد وكومه شهداء

— مالج دخل بالاعلام هوايه يبالغون صح دننطي شهداء هوايه بس دنحرر بالمناطق

لتخلين ببالج وعوفج من هاي السوالف

سولفيلي شلونج وضعج شلونه  مرتاحه بدوني موو تضحكين وتتشاقين وماخذه راحتج........

نور: لا والله اصلا وجه الغراب لا اضحك ويا احد ولا اسولف انت خليت عقل براسي ؟؟

ضل يضحك

بقينه نسولف لل٧ الصبح كال راح اسده اجه الامر ولازم نطلع

سلمت عليه وسديته اطمنت عليه الحمدلله

من الفرحه مأجاني نوم كمت نظفت وسبحت وبدلت وطلعت للشغل وني مليانه طاقه ايجابيه

بقينه نتواصل بين يوم ويوم ومرات كل يومين لحد ما گلي باجر  راح انزل واني الفرحه مواسعتني

حتى كل الي بالمركز  نتبهو عليه  بس مهمني احد كل الي يهمني حبيبي الي راح يرجع باجر

رجع الحمدلله اخذله ١٠ ايام وهم رجع التحق شكد حاولت اقنعه ميقبل يكول اخوتي هناك منتضريني ارجع حتى ينزلون يشوفون عوائلهم واهلهم

شلون اعرفهم

اكتفيت بالدعاء ومعرضتله ابدد

بيوم الي راح بالليل حلمت بي

كأن بالحلم لابس زي عسكري وشاد علگ اخضر على راسه اجه نطاني سيف وباس راسي  كمت ابجي بالحلم گلي لتبجين اني يمج وبعمري مراح افاركج ولا اخلي غيري يلمسج

راح  صعد بسياره ورفع علم ابيض مكتوب عليه سننتصر بس مكتوبه بالدم بس بالحلم هووسه وناس هوايه وعبالك حرب ناس تصعد بتريلات وناس تركض وكلشي مافتهم

فزيت قلبي مقبوض دنيا فجر جانت

قريتله اية الكرسي حتى تحفظه

دزيتله رساله

— حبيبي وصلت

شافهه وراسا جاوب كتب

— لا حبيبي بعدني شعجب گاعده؟

— حلمت بيك وفزيت خايفه

— يا الله خير ان شاء الله شحلمتي

— سولفتله الحلم

— خير ان شاء الله بحيل الله ننتصر ونرجع گاعنه

وراح اعتبر هذا حلمج حافز حتى صدوك اجيج بخبر النصر والتحرير

— ان شاء الله حبيبي تروح وترجع بالسلامه

رجعت احاول انام مكدرت سمعت الاذان كمت صليت وكعدت ادعيله

كملت ونمت

ومشت الايام طبيعيه

ليث كل يومين يتصل دقيقه وحده يطمني ويسده

وكل ما اكله شوكت ترجع يكول عن قريب بس ممعلوم يمتى

مشت الايام وليث هذا اليوم ال5 وهوا مدازلي رساله ولا متصل

كولش ضل بالي عليه وكولش خفت ماعرف ليش هل مره احسهه مو مثل ذيج المره

هوا بالعاده كل يومين يراسل صارله 5 ايام  يارب رجعه بخير وسلامه

عده اليوم ال5 و ال6 وال7 وماكو كل خبر عنه

مفروض هسه ينزل شو لا نزل ولا خطه نفتح ولا اكو خبر يطمني عليه

بيا طبيعه حتى لو ماعنده نت اكعد اكتبله شصار بيومي يوميه  اكول من يصير عنده نت يكعد يقراهن حتى يعرف اني ما انسى وكل لحضه هوا على بالي

بهذة الايام الي نكطعت اخباره

كمت اكتبله عن خوفي عليه وعن وضعي شلون متخربط وهوايه حجي بحيث من ارجع اقراا اني انقهر على روحي واكعد ابجي

كلت بلكي من يقرا ينقهر عليه وبعد ميروح

اكتب اكتب ويوميه اتأمل يطلع صحين ويقراهن وتخيب امالي

— ليوثي حبيبي والله بالي يمك

— ليث ماريد اخسرك مثل مخسرت امي

— ليث والله صحتي بالنازل

—حبيبي بداعت حبنه بعد لتروح

— ليث اليوم اسامه تشاقى ويايه ورزلته من حجه ويايه شفتك كبالي وراسا رزلته لان ادري بحبيبي ميقبل احجي ويا ولد

— ليث البنات الي ويايه رادو يشوفون صورتك ومن شافوهه كالو هنيالج حلو ومرتب وتعاركت وياهن ماقبل احد يتعزل بيك

— ليوثي ، حبيبي، ابويه انت  كافي ارجع لخاطر امك وابوك مو لخاطري

فكر بيهم شديصير بحالهم

اكتب اكتب اكتب وماكو رد

تعبت كلشش

عده  على غياب  ليث١٢ يوم ضبط

وبتاريخ ٢/٧/٢٠١٥ هذا التاريخ الي ما انسى طول حياتي

اتصل عليه رقم غريب

اني رقمي ما انطي لاي احد حتى للزباين ما انطي لان عدنه نظام الحجز بالمركز  يتصلون بالرسبشن  ويحجزون

اتصل عليه رقم غريب ساعه ب١٢ الظهر  استغربت ورديت

— الو .. تفضل منو ؟؟

……….

— اي نعم  منو حضرتك

……….

اذاني شوشت جسمي نمل وعيوني غوشت النظر بده يقل عندي …....................................................

************************************

من حسيت اكو ثالث بالعيون،

اعتبَرت عيونهم ماضي وتعدى .....

تحت جناح الظالم

للكاتبه: زهراء

منو ذولة الصورهم ع الحياطين 

سألني المايعرف بديرتي شصار

بجيت وكتله ذولة وجوهنا البيض 

بواجينا وحزنة وحشة الدار

وراهم فرغت من الضحكة البيوت

اعلى فكد وجوه غابت عن الانظار

عاين ع الصور ياهو العليه موت

ومنو منهم بوجهة مبين غيار 

ترة وليداتنا بالموت حلوين

ومن الجفن حكها العاشكة تغار

دفناهم رغم كل الخصل سود 

وعطر بيها الجناسي بحضن الاعمار

على الحيطان بيها وجوهم روح 

وقطعهم عبرة تكسر كلب الاحجار

صورهم جا مشت لولا البسامير 

وجا كل صورة منهن راحت لدار 

الثكال المايحركهم هوة الخوف

شلون الثكل ذاك يشيلة بسمار

اصد لعيونهم بيهن حجي هواي 

وبيا سالفة الماتجرح احتار

بين الكلي بشر امي ابنج بخير

كبري بي نفاهة ونسمة واشجار

وبين الراد يحجي ودمعه وازاه 

وشفت بدموع عينه حلقة وسوار

وبين الضال باله وكلي ناخيك 

حاجيلي ابو البيت ياخر الايجار

وبين الكلي صبري يلاوت الجوع 

ترة الوياها ضلوا كلهم زغار

وانة بينهم وبين الاهموم

اضل واكف تنكط كصتي اعذار

ذولة الردت منهم ارواح 

طاحوا قبل كلمة حاضر وصار

ليل وماقبل ينطيهم الموت 

هنيالة التراب بهيج خطار 

راحوا لكن اعلى البال يبقون 

لحد يوم القيامة ترابهم حار 

…. فرااق….  ظلم…. موتت …. فراق احبه ….

اشياء توجع القلب وتحول الانسان الى كتلة هم متنقله

****

في مكان آخر

ليث : التحقت وكلي امل انحرر العراق من هذا التنظيم الارهابي

اشبع قهر من نفوت للمناطق ونشوف العوائل شلون متملكهه الخوف والرعب ويحلفون انو همه مينتمون لاحد

اشوف الرجال الشايب شلون يبوس بأديناتنه حتى منأذي ولا نأذي عائلته

ميدري احنه جايين حتى نحميهم مو نخوفهم

واشوف الشاب من يشوفنه شلون الفرح يبين على وجهه وكأن يستقوي بينه 

اشوف المره الجبيره شلون ترفع ايدهه وتدعيلنه بالنصر ودمعتهه بعينهه لان فقدتلهه ابن

اشوف الاطفال شلون يتراكضون من يشوفونه ويصيحون اجوي راح ينقذونه

كل هذول جانو يشجعوني ويزيدوني اصرار ع التحرير وعلى القتال

التحقت هاي المره وفرحان لان رب العالمين نطاني عمر وخلاني التحق بجماعتي واقاتل

جنت افرح من نطلع مواجهه اكول بالحالتين اني مستفاد

اذا قتلتهم فأني دا احرر كاعي واخلص الناس من ظلم هذول الاوغاد

واذا استشهدت بعد بالاحسن اموت واني شهيد وكلي شرف ميت لان داحمي كاعي

بحيث بالمواجهات جانو يصيحولي ليث جريمه بحيث ادخل بنصهم اصليهم صلي ماطلع واحد صاحي واتصوب ولا اهتم

وصلنه لمناطق مسيطرين عليها د١١عش بشكل تام

يعني مناطق خطره كللش

دخلنه وگلنه لو النصر لو الشهاده..........

اول يوم دخلنه فوج كامل وجان عدنه عتاد واسلحه ومسيطرين

بس مچنه متوقعين عدهم هيج معدات وهيج اسلحه حديثه

بحيث اسلحتنه لا شي يم اسلحتهم

جانو يستعملون طلق اسمه خطوش BMG50

هاي الطلقه حتى اذا متموت اذا تلامس الجلد تسبب سرطان الجلد لان مغلفه  بمواد كمياويه من الخارج وبيها مادة الكبريت  ايضا

بحيث من  نشوف الطلق مالتهم ننصدم شلون يكدرون يستوردون مثل هيج نوعيه

وهاي النوعيه جداا غاليه يعني مو شي عادي

اول ٣ ايام بقينه نحارب ومواجهات كللش قويه  خسرنه شهداء هوايه  ويا كل شهيد يوگع احقد عليهم ويزيد اصراري ع النصر

الى ان دخلنه بمنطقه كلهه الغام بحيث بين متر ومتر زارعين لغم

هنا الامر مال فوج فرقنه خله كل ٤ بمكان 

اني وجماعتي صعدنه ببيت مهدوم صعدنه ع السطح واستقرينه وگمنه نصيد بيهم مثل الفيران

لليل كعدنه بالسطح تعب وماكو اكل كعدنه نصور فديوات لاهلنه

وگلنه الي يطلع عايش بينا يوصلهه لاهلنه  والي طلع ورقه وكعد يكتب والي امن غراضه يم صاحبه

لليل مأجه اي امر بالانسحاب او التحرك من النقطه الاحنه بيها

البيت لابي اكل ولا بي مي تعبنه وجعنه ندز ندائات ماكو اي جواب

كتلهم ابقو اني راح انزل اتصرف

حاولو يمنعوني لان المنطقه ملغومه بس مهتميت

نزلت وامشي بحذر هم ظلمه وهم الگاع ملغومه

ماجنت خايف من الموت بس ماردت اموت واني ما محرر كاعي

المنطقه هدووء وظلمه وانادي بالجهاز ماكو اي رد

مشيت للمكان الي بي الجماعه الباقين مفروض بعد تقريبا فرعين عن المكان الي احنه بي

امشي بحذر ابتعدت تقريبا ٢٠ متر ع البيت الچنه بي

ماحسيت اله قناص صوب بصدري

هاي لحضاتي الاخيره

يي هاي الشهاده الي جنت منتضرهه وطلعت حتى افوز بيها

اني فخور بنفسي راح اموت واني ادافع عن وطني

صوت صياح جماعتي وهوسه اسمع صوتهم وخوفهم عليه واني البسمه على وجهي

__وهل يمكن ان تكون اللحضات الاخيره من عمري مبهجه؟

نعم ها انا ابتسم لملك الموت حين يقبض روحي

أنها اللحظات التي قال المولى عز وجل : { كلا إذا بلغت التراقي وقيل من راق } . نعم عباد الله إنه الفراق ... إنه ليس فراقا عاديا وليست رحله عاديه يودع فيها المرء أهله وذويه فترة ثم يعود إليهم وليست تجربه حرة يؤديها الإنسان فإن فشل فيها لجأ إلى غيرها حتى يرتاح إلى نتائجها .إنها تجربة نادرة مع المرء .. ورحلة إلى عالم آخر وفراق في غاية الألم والحرقة ...........

الكلام منقول عن صديق ليث

تراكضنه من سمعنه صوت القناص

لككك لييث كنالك لاتطلللع ليش العنااد

نركض اني والولد وماهمنه الكاع ملغومه لو اكو قناص

كل الي همنه انو ليث ماصابه شي

ركضنه احنه الثلاثه  ونشوفه مدد وسابح بدمه  جان بركن الفرع بحيث مجرد مسحبنا  دخلنا للفرع بده الرمي علينه

صاحبنه تصوب برجله

بس الحمدلله ما لگفونه لان ظلمه وكلشي مينشاف

لككك ليييث كووم اخووي اكعددد هاي النومه مو الكك گوووم الوطن محتاجكك لككك ياخووويه شگوول لاهلككك شكوول لامك

احجي واسمع شخيره

هاي انفاسه الاخيره حتى مالحك يوصي  لكممم حتى ماودعنه

نبجي وملتمين عليه

نزعنا الملابس الفوك بلكي الطلقه مكانهه مو خطر بس للاسف القناص منطيهيا بنص صدره 

لحضاات مو اكثر وماات ليث

مات ووجهه مبتسم

مات وماشاف من شبابه شي

لكم شباب بعمر الورد تروحح هيج لكممم ظلمم والله ظلم

التمينه عليه مثل النسوان  ليث طيب وبحياته مماذي احد صديق طفولتي وعضيدي

حتى الي ويايه صح ماصارلهم هوايه من يعرفو بس وكفاته وياهم ماتنسى

يخليهم ينزلون بمكانه ويرحون يشوفون اهلهم

سحبنا وفتنه ببيت ثاني كعدنه بي وليث سلمهه للروح وضل بس جسد يمنه

ننحب ونبجي على حاله وحال بقية الشباب لي مثله

شنو ذنبهم الي سوو حتى يموتون

ششافو مو حياتهم همه.........

ندز بهل ندائات وماكو اي رد تعبنه لا اكل لا شرب وجثة ليث لهسه لا مدفونه ولا احد يدري بيها

تعبنه وبدينه نفقد قوانه وكعدنه نتشاهد

لاعتاد لا اكل لا مي

كلشي ماكو

بقينه على هل گعده للفجر ننتضر موتنه

كاعدين بلا حول ولا قوه واحد يباوع للاخ شلون راح يموت

صاحبنه الي تصوب بده التعب يبين عليه

تقريبا ساعه 5 الفجر اجه نداء بالاسلكي

كمزنه كلنه

ردينه ع النداء نطلب مساعده وعدنه شهيد نخبصنه خبص

سبحان الله قبل لحضات كاعدين ننتضر موتنه وبلمح البصر رب العالمين رحم بحالنه

ورا النداء بنص ساعه او اقل اجوي السيارات

تقريبا فوج كامل اجه

طلعنه صاحبنه الي متصوب لان اغمه عليه

خلو وبدو يسعفو

وشالو اخوووي شاللو جثه لا ايد ولا رجل

شالو وهوا مبتسم

شالو وشالو حيلي وياا

طلعنه من المنطقه حتى نرجع

اني الي رجعت ويا ليث لان صديقي واندل بيته واعرف اهله

دزوني اني والجثه بطياره لبغداد

صار 6 ايام من التحقنه تالي ارجع وارجعك بتابوت ؟؟

ابجي وشكد ما ابجي ما ارتاح

وصلنه لبغداد ودزو الجثه لمستشفى ….خلوهه بالثلاجه حتى يستلموهه اهله

وهااي جانت اصعب لحضات حياتي

شلون اكول لابو ابنك استشهد وهوا الي يكلي دير بالك على اخيك

شكله جبته الك بتابوت؟؟

بكل ما تبقى عندي من قوه

اخذت تكسي وبملابسي وبتعبي طلعت لبيتهم

ساعه ٨ ونص الصبح جانت  دكيت الباب

مره والثانيه طلعتلي امه

شفتهه وچن شفت ليث بعيونهه

صباح الخير يمه خير خما ليث بي شي

هيه حجت واني عيوني دمعت

حجيه صيحيلي عمي داحجي ويا

خاله گلي ليث بي شي ليش مانزل وياك

خاله بروح اهلج صيحيلي عمي

حجيتهه وبجيت هيا شافتني بجيت وكامت تعيط

يمةةةةة وليدي بيك شييي يمةةة لييث لاتفجعني بيك بعد امك منتضرتك ترجع خاطر اخطبلك يمةةةة

كعدت على حيلي بالگاع وابجي مثل النسوان

وگابلتني وتلطم ويامن يلطم وياهه

تعيط بكل حيلهه وعلى عياطهه طلعو كل البلبيت وكل الجوارين

ابو يريد يفتهم مني شي ماتطلع الكلمات مني بس الشهكه احسهه نايمه بصدري وعلى ونين ام ليث طلعت

__ولك يمه ليووثي تعال ليه  ولك يمه وليديي من رحتلك فدوا تعال انه متانيتك

ولك شلوون تعووفني وتروووح انت مو كلت انه وياجج للوحه شو عفتني ورحت گبلي للوحه  ولكك ولييدي يممه

( هذا جزء بسيط من معانة هوايه امهات فقدو ابنائهم وهم بعز شبابهم )

طلع الاب يتراكض ووجهه مخطوف ويحاول يفتهم مني

اخذ السويج وطفر ع السياره واني صعدت ويا والام تلطم وتنوح تريد ناخذهه فرفحت روحهه  عاد كتله لابو ليث

_عمي ارجع المره راح تموت اخذهه خل تشوف ابنهه

لاف السياره خلاهه بالسياره بس غاديه تراب على ابنهه

وصلنه للمستشفى وكملنه اجراءات شهادة الوفاة خلال ربع ساعه المستشفى نترست ترس اهل ليث وعمامه........

اخذنه ليث وطلعنه بي للنجف شايل روحي مو صديقي على جتافي

مامتوقع بيوم من الايام اشيل جنازته وهيا ملفوفه بعلم العراق

شيعنا ودفنا على حسب الاصول ورجعنه

اخخخخخ ياعرااق

شتاخذ من عدنه بعد

التعب اكل حيلي اكل

رجعت للبيت بس بدلت لبست اسود وطلعت ويا اهل ليث للفاتحه

هاي فاتحة اخوي شلون اعوفهه

و٣ ايام الفاتحه واكف على حيلي  ومناك تعبان صار عندي ارهاق حاد

اغمى عليه

وعيت ناقليني للمستشفى وشاديلي مغذي

ضغطي مصفر  وارهاق حاد

بقيت يومين بالمستشفى  طلعت للبيت  وهسه يلا تفرغت

وهاي خابرتج حتى اوصلج الامانه الي عافهه الج ليث

وهذا كل الي يصار

( هاي جانت مكالمه بين صديق ليث ونور)

— يعني صارله ٧ ايام من ميت ومادري؟؟

يعني مدفون ومكملين الفاتحه واني ماعرف ؟؟؟

يحجي واحس اذني صفرت وماعاد اسمع شي ولا اشوف شي .....................................................

************************************

"قد كنتُ أتجنب المحبة طوال حياتي ، كنتُ أعلم أن قلبي أكبر مني ، وإنها لكارثة أن تكون شخصاً عاطفياً و منطقياً في آنٍ واحد ، كلما قطعت نصف الطريق في عاطفة ما صفعتني يد المنطق قائلة : عُد هذا الطريق ليس لك 🖤".....

شفتك بالحلم فزيت أدور عليك نسيت انة صحيت وبالحلم عفتك اعاين بالوجوه وانت ما موجود ما معقولة يمي وإني ما شفتك شلتك بالكلب يوم الجنت موجود ودمعة بالجفن يوم الرحت شلتك ما ردتك دمع وتساير الخدين انة عون وذخر بالدنيا الي ردتك وحشة الدنيا بعدك ارجع أترجاك وحشني بيك كولشي حتى سالفتك

اصعب شعور ممكن ان يعيشه الانسان هوا شعور الفقدان

شعور مخيف

كل انسان عنده فوبيا من شي معين

اني عندي فوبيا من الفقدان فقدت هووايه عزاز بحيث كمت اخاف اتعلق بأحد اخاف عليه افقده

حياتي بهذيج الايام جنت عايشتهه بالقدره

جنت اتمنى اموت واخلص لان الي ديصير بيا فوگ طاقتي

احس خلاص لهنا وتوقفت حياتي بعد ماكدر اكمل

الموت ميوجع الميت الموت يأذي العايش

اصعب ايام حياتي  بوفاة ليث عشتهه حتى اصعب من وفاة امي عليه

لان بوفاة امي جنت ابجي اعيط الطم محد يكلي ليش

بس اويلي عليها الي ميتلهه عزيز وماتكدر تحزن عليه

هاي الحزن يصير حزنين عليها

لابيها تلطم وتبجي وتلبس اسود ولابيها تكمل يومهه طبيعي

نهى الاتصال صديق ليث وجنت منصته لكلامه عسى ولعل يكلي نقلنا للمستشفى وطلع عايش

عسى ولعل يكلي تصوب وبعده عايش

عسى ولعل يكلي طلع مو هوا

بس للاسف لحد ماسد الخط ختم كلامه بكلمة عظم الله اجرج والبقيه بحياتج

هنا اني حسيت روحي نسلبت مني

اذاني كمت ما اسمع بيها وعيوني غوشت

هوا سد الخط وني اريد اركز مكدرت

مسيطرت على روحي وگعت

اجوي الي ويايه كوموني وجابولي مي بس ني بحالة صدمه يردون يعرفون شكو الكلمه متطلع مني

اريد استوعب الي گالو على ليث

صافنه والكلام ينعاد براسي

— يعني ليث ميت صارله ٦ ايام ؟؟

يعني مدفون وخلصانه فاتحته واني هنا مادري ؟؟

اكل واشرب وحياتي طبيعيه وحبيبي جواا التراااب؟

كمت اعيط بهستريه

لككك لييث حلمت بييك منطينييي سيف تالي ذبحتني بهذاا السيف

لككك ليييش هييج مو كلتتت ارجعلج مو كلتتت بس ارجع اخطبجج

كمت الطم واملخ بروحي همه يحاولون يهدوني بس يانار قلبي شيطفيهه.....

حلمي تحقق

ليث ذبحني بالسيف الي نطانيا والدم الي مكتوب بي سننتصر هذا دمه انتصر بدمه  انتصرر ونال الشهاده

اعيط واملخ روحي وروحي مفرفحه مابيدي شي اسوي

ربي امتحانك صعب

الاهي اني بشر دم ولحم واحساس وتعبتتت مدا اكدر اكمل ربي والله تعبت اعفيني من هذا الابتلاء ربي موتني المن مبقيتي شو احبابي كلهه جوا التراب شعندي باقيه هنا

جابولي البنات حبوب مهدئه وفوتوني بالفتينگ روم ونطوني غطا مددت ع المسطبه

ولزمت فوني وكعدت اقره بالمحادثه

من البدايه وشلون يتغزل بيا وشلون يحجي ويعصب عليه من اعاند

وحده من المحادثات حاجين بيها

— حبيبتي تعبانه من الشغل؟

— لا عمري ليش ؟

—دا احسج تعبانه كوه تحجين ويايه

نونه حبيبتي اذا تعبانه اكعدي واجي اخطبج واني انطيج مصرفج ليش تعبين روحج

— لا حبيبي اصلا اخلص من البيت ومشاكله ونبي متونسه بالشغل

—بس حبيبتي وقت طويل والله اخاف عليج من التعب انتي ناعمه وصغيره وينج وين هيج شغل

— لتخاف عليه والله مرتاحه

اقره وابجي شلون خايف عليه زدت بالبجي

احس شي خانگني مدا اكدر اتنفس

تعبت الالم احسه بروحي والم الروح ماله علاج

كمت ابجي بالزايد لان مابيدي شي اسوي ربي ساعدني......

اختنگت مكدرت ابقى بعد

لبست شالي وطلعت  كلت للمسؤل ما اكدر ابقى

وهوا اصلا مقهور على وضعي سمحلي بالخروج

طلعت بس احس روحي ورقه والهوا يمشي بيا طلعت بس ماعرف وين اروح  دنيا ظهر وحاره والهوا يحرگ الوجه

ارجع للبيت؟ شكوللهم شكو رجعت وعلى منو ابجي

اخخخخخ حتى البجي راح يضل حسره بقلبي وما اكدر احزن عليه مثل البشر

ضليت امشي وحاره ولا بشر بالشارع 

ضليت امشي لحد ملگيت روحي يم المحل الي تشتغل بي مرام

فتت شافتني اخترعت

مرام: هااا نور شكوو شصااير شبيج تبجين شكوووو احجي

نور: حضنتهه وكمت ابجي احسهه صعبه بالساني من اكول ليث استشهد والله صعبه

لجج مرام راح وبعد ميرجعلي لجج مرام راح يم ماما لج ليث اختار البعد وراح وعافني بهاي الدنيا اهبد وحدي

مرام: روحي نخمطت من حجت هيج

صح ماعندي علاقه بي بس مجرد اسمع شخص استشهد انقهر واكوم ابجي مو نوب ابن خالتي وحبيب اختي حضنتهه وكمت ابجي على بجيهه وحالهه

نور مكسوره احسها جسد بلا روح

تبجي ومفرفحه روحهه بس المشكله شبيدي عليها

جانت دنيا طهر وماكو احد وهب نايم وبس اني بالمحل فوتتهه غسلتلها وهيا تروح بيدي منا وتجي منا عبالك طفل

غسلتلهه وكعدتهه جوا وكعدت اهدي بيها

— نونه حبيبتي هذا امر الله وكلنه على هل طريق هم السابقون ونحن اللاحقون

هوا راح شهيد يم ربه راح وهوا يدافع عن وطنه  بسم الله الرحمن الرحيم(( ولاتحسبن الذين قتلوا في سبيل الله اموات بل احياء ولاكن لاتشعرون))

هوا عدل وديشوفج وديتأذه عليج هسه  خطيه ليش تأذي بالبجي

كومي تعوذي من الشيطان وادعيله واقريله قرآن واهدي لروحه

ترى احنه كلنه خطار بهاي الدنيا ومنعرف يمتى نغادرهه يجوز هوا اليوم غادرهه احنه باجر محد يبقى وماكو احد يموت ناقص عمر كلمن يموت بيومه

هوا الله كاتبله  من يوم الي نولد يموت شهيد وبهذا اليوم........

شو اني حجيت هيج وهاي زادت بالبجي

— يايا لعد اني ويامن دا احجي صارلي ساعه

لج هاي دموعج تحرگه والله تاذي نور خطيه كافي

—لجج مرام تكولين اليوم مات

لجج صارله ٦ ايام من ميت  دافني وخلصان عزاا واني مادري لجج تخيلي اكل واشرب واشتغل وعايشه ايامي طبيعي وهوا ميت

— مردت قلبي من حجت والله حقها بس شبيدي عليها لازم اهدئهه مابيدي غير شي

نور مو بس اختي نور امي وكفاتهه ويايه متنعد بس مصيبتهه صعبه وماعرف شلون اوكفلهه

ربي برد قلبهه وطفي نارهه حقهه مو شي هين.....

كعدت شويه وحجت

اريد ارجع للبيت

— لا حبيبتي وين ترجعين ابقي هنا ترجعين وتتلگاج اسماء شتكوليلهه

— تعبانه مرام والله تعبانه 

— حبيبتي والله حاسه بيج بس علمودج اني

اذا ترجعين للبيت شتكوليلهم ليش رجعت

— تعبانه وضغطي هابط ورجعت

— بكيفج بس صحتج مو مال انتي ترجعين خابري اسماء خل تجي تاخذج

( طبعا بهذا شغلنه اسماء نطت تلفون لنور صرصور صغير وبي سيم كارت بي رقم اسماء وابويه وبس )

خابرتهه كالتلهه تعالي اخذيني تخربطت وني يم مرام بالمحل

ورا شويه اجتي اسماء

اخذت نور وراحو

نور : صعدت وياهه سالتني شبيك

ضغطي هبط وتخربطت مادري شبيه

— ووجهج شبي عيونج ليش مورمه

— تعبانه كلشش من الشغل

— زين ليش جايه يم مرام جان بقيتي بالمركز

— عبالي تكدر تطلع ونرجع اني وياهه بس تكول ما اكدر فخابرتج 

رجعنه للبيت ورحت للڤاترينه مال ادويه اخذت حبايتين فاليوم وفتت للغرفه

اتصارع ويا روحي بس حتى انام وانهزم من الواقع  تعبتت تعبت احس كل اعضائي تعبانه بس مترضى تنام

اخذت الحبوب واحس مفعولهن بده يشتغل جسمي كله رخى وتعب  بس عيني مدا تغمض وعقلي مدا يبطل تفكير

كمت غسلت وتوضيت وجبت القران فتحته وكعدت اقره سورة يس  والواقعه على روحه

كملت وصليتله ركعتين  لميت السجاده ورجعت مددت ع الجربايه اريد انام كمت اتذكر سوالفنه سوا وحجينه ورجعت ابجي بجيت لحد ما خويت ونمت مادرب شكد نمت ويمتى نمت 

كعدت الغرفه ظلمه  بس جسمي بعده نحلان  رجعت جان اتفاجئ ب صار....................................................

***********************************

حبايبي اسفه كلش ع التأخير لان البنيه مثل متعرفون مشغوله وثانيه اسفه لان هاي البارتات شوي تقهر لان لازم تنذكر وخاصه الشهيد البطل ليث هنيئا اله الشهاده والي التحق بمسيره الامام الحسين عليه السلام اقرو الفاتحه ع روحه الطاهره واترحموله الله يرحمه برحمته الواسعه ويسكنه الفردوس الأعلى بحق محمد وآل مُحَمَّد........

المؤسف في الأمر ، أن كل الأشخاص الذين كان وجودهم خطأ في حياتنا ، كانت مشاعرنا تجاههم صحيحة جداً ، وأن أغلب الطرق التي كان مسيرنا فيها غباء ، كان حماسنا فيها ذكياً جداً ، وأن أغلب القرارات الخاطئة التي اتخذناها في كل حين ، كان إصرارنا فيها يشع من أعيننا ، المشكل لم يكن أبداً في مشاعرنا ولا في إصرارنا أو اندفاعنا ، المشكل كان دائماً في المجهود الصحيح للوجهة الخطأ 🖤!

~~~~~~~~~~~~~~~~~~~~~~~~~~~~~~~~

نمت وقتت طويل وكعدت

اول مكعدت تذكرت الي صار

جنت اتمنى لو ميته او لو يطلع هذا كابوس

بس للاسف هذا الي صار واقع ولازم اتقبله

كمت من فراشي والتعب ماكلني اكل

التعب احسه بروحي مو بجسمي

مُهلكه بشكل

كمت اخذت ملابس ورحت للحمام اسبح

عسى ولعل تعب روحي يخف

ولو لو خف تعب روحي نار قلبي شيطفيهه

المات مو اي شخص

المات حبيبي  اسولف بيني وبين نفسي وماحس اله دموعي  ترست عيني تعوذت الشيطان ورحت اسبح

وكفت جوا الدوش  وافكاري تسرح بعيد

اتخيل حال خالتي وهيا فاقده جبيرهه 

اتخيل حال ابو وحال خواته

اكيد مو اقل من حالي

سبحت وطلعت

رغم مماكله شي من الصبح بس مجوعانه شربت مي ورحت للغرفه

شبعانه نوم وماعندي شي اسوي

كمت توضيت وكعدت اقره قرآن على روحه

مابيدي شي اسوي غير ادعيله واقراله قران

ضليت للصبح اقره قران واصلي

منمت ابد

كمت نظفت البيت وبدلت بلا واهس وطلعت

اختنكت من البيت اريد اطلع

ع الاقل من ابجي بالشغل ميسالوني ليش ولا يكعدون يحققون

هنا حتى الدمعه اخاف انزلهه.......

طلعت للشغل

والبنات اخذو من خاطري والولد كذلك

كلهم يعرفون مخطوبه

وتفاجئو من داومت

ونوب ملابسه اسود

حرت شحجي وشبرر

كتلهم

مذمم الكل محد يلبس عليه اسود ورحت البارحه للفاتحه تخربطت ورجعوني

وختنكت من كعدت البيت ماكدر اكعد احسه ياكلني

كلهه تكلي حقج ومصابج مو سهل

والي تهون عليه والي تواسيني

ووووو عشت ايام ما اتمناهه لعدوي من شدتهه وصعوبتهه

اذتني واخذت من حيلي حيل

ايام ذبلت روحي وشبابي

كبرتني ١٠ سنين فوك عمري

بس هيا هاي الحياة تمشي ومتوكف على احد

بعد الي سمعته تقريبا اسبوع او اكثر ما اتذكر

اتصل عليه الرقم نفسه مال صاحب ليث ( الله يرحمه)

جاوبت: الوو

…..

— وعليكم السلام  يي عيني تفضل

…..

— الحمدلله على كل حال هم السابقون ونحن اللاحقون

هذا امر الله شبيدنه احنه

……

—شنو الشي ؟

…..

— اني ما اكدر اطلع  لان ملتزمه بشغل

…..

— ياريت والله لان ماكدر اطلع  كولش اسفه راح اعذبك

العنوان ….

اكون ممنونه منك  تسلم مع السلامه

سديت الخط منه وكمت افكر شنو الامانه الي خالهه ليث الي قبل ليموت!!

ضليت اشتغل وبالي كله يم صديق ليث

للعصر اجه اتصل عليه

طلعتله بباب المركز

سلمت عليه

اخذ من خاطري وطلع ضرف من جيبه خلاا بيدي  وگلي راح ادزلج فيديو ع الواتس اب  هم من ضمن الامانه

اخذت الضرف وتشكرت منه  ودخلت  وهوا راح

ورا تقريبا ١٠ دقايق وصلني فيديو ع الواتس اب

قلبي يدك سرييع وتخربط كل وضعي

استاذنت ودخلت بغرفه الفتينگ روم

اول شي فتحت الضرف...........

ايدي على قلبي وارجف عبالك رح يطلعلي من الضرف

فتحته بداخله ورقه وبنص الورقه حلقه

خليت الحلقه بصفي وفتحت الورقه كعدت اقره

….

الى معشوقتي القريبه البعيده

الى نوارة قلبي

من راح توصلج هاي الرساله معناهه اني فارقت الحياة

ادري راح تتاذين وتبجين وتحزنين عليه

ولا عبالج هينه اني ميت وشايل هم همج شلون من يوصلج الخبر

نونه حبيبتي اطمئني وماريد تبجين عليه

اني رحت يم رب كريم اني رحت شهيد رحت وني رافع راسي لان متت واني ادافع عن گاعي

جنت اتمنى نتزوج قبل لا اموت واخلف منج جهال  واترس البيت

بس القدر ما شاء ان يجمعنه

بس اذا محصلتج بالدنيا راح اطلبج من ربي بالاخره

اريدج تكونين قويه ماريدج تبجين عليه

اريدج تفتخرين انو حبيبج مات شهيد

واريدج دائما  تقريلي قران وتهدي ثواب لروحي اريدج متنسيني وما اكلج لتتزوجين

بس راح تضل نفسي بيج

نونه حبيتج حب طاهر وعمري مانگستج بتفكير وصخ

جنت اشوفج ملاك ابيض مابي اي خطايا

اخاف اتعمق بتفكيري وياج حتى لا الوثج

كل متشوفين النجوم تذكريني وتخيليني يمج

نونه هاي الحلقه جبتهه قبل لا التحق

وضميتهه جنت اتمنى اشوفهه على ايدج جنت كل ما ااطلع اقاتل خالج هدف گبال عيني اتشجع واقاتل حتى ارجعلج واخطبج  بس هذا حدي بالدنيا ومالحگت اشوفهه عليج

اتمنى تضميهه وتبقيهه ذكرى مني حتى متنسيني

وبيوم الي يتحرر العراق اريدج تتذكريني وتكولين جان حلمه يشوف كاعه متحرره

اني متأكد اخوتي مراح يقصرون وراح ياخذون بثارنه

احبج يانوارة قلبي

معشوقكِ المرحوم ليث

اقره وابجي بهستريه اشهگ احس الشهگه تطلع من صدري

متتت احسه واگف بصفي واني اقره الرساله  دمرررتني هاي الرساله رجعتني لنقطه الصفر

ابجي وعبالك اليوم اجه خبر وفاته  متت بجي

اريد افتح الڤيديوو اشوف شبي نتهيت من البجي ضميت الرساله والحلقه بالضرف وطلعت من الغرفه رحتت للمغاسل غسلت ورجعت اريد بس اهدء

شايفين الطفل من يگوم يبجي ويسكتوو

يسكت بس تضل الشهگه تطلع من روحه هذا حالي سكتت من البجي بس الشهگه مو راضيه تروح

ليث كسرني لاا مو كسرني فتتني هشم روحي

طلعت واريد بس استعيد قوتي تعبت من وضعي وتعبت من كلشي ماعندي طاقة تحمل بعد

ربي انت اعلم بحالي  ربي ارحمني وطفي نار قلبي 

احس اكو نار تغلي بداخلي مدا تطفه

كمل يومي بالويل

الفون كمت ما اهتمله واشمره بالمحل واطلع لان الي جنت اهتمله واحاجي راح المن باقي الفون

ضميت الضرف باللوكر  قفلته وطلعت

رجعت للبيت كملت الي عليه والتهيت بصلاتي وقراني

صارن المؤنس الوحيد اليه

ابتعد عن الكل..........

عن خواتي عن اهلي عن الشغل

صار كل همي اشطب يومي وخلاص حتى ما افكر شلون اعيشه اهم شي يمشي وبس

رجعت ثاني يوم شفت الفيديو وياريتني مشايفتي

يحجي ويايه وكأني گباله

بالبدايه سلم عليه ويشاقيني ويحاول يضحكني وكأن يعرف الحال الي اني بي

وبعدين بده يقرالي اشعار وراها گام يبجي وكعد يشرح شلون بده يحبني وشلون جان يشوفني بطفولتي ووووووو فديو تقريبا ٣٥ دقيقه

شبعت بجي لحد ما خويت ونهد كل حيلي تعبت ونفسيتي تعبت  وتأذيت بهاي الفتره كلش

من غير صحتي الي بالنازل اكل لو اكل وجبه باليوم لو ما اكل ضغطي الي ساعه يهبط ويصفر وساعه اذني وخشمي يطگن دم لان يصعد صعود مفاجئ

ومن غير نفسيتيي الي ادمرت

هذا كله كوم الليل من يجيني كوم ثاني

فتره عدت عليه متتسولف واتمنى محد يمر بهيج فتره ولا احد يفقد عزيز

هوايه اشيا اختصرتهه ومذكرتهه لان حسيت طولت واشياء تشبعكم قهر وحزن اكتفيت بهاي الاشياء

………….

مرام

ايام عدت على نور اصعب من انو اكول صعبه

نور انطفت بعد وفاة ليث

شكد احاول احجي وياهه اغير من مودهه متتقبل اي حجي تعوفني وتكوم اكثر وقتهه صار قران وصلا

ومرات الكاهه صافنه بالفراغ ودموعهه ينزلن

مابيدي غير ادعيلهه الله يبرد قلبهه لان مصيبتهه مو هينه

بس شننو الي بيدي عليهه

ايامي متشابهه وماكو شي جديد

نهاية سنة ٢٠١٥ اخر يوم بي جانت من عاداتي وتقاليدي

كل واحد يكتب ٣ امنيات وكلنه نخلطهن سوه وكل واحد بسحب ٣ عشوائيات ويفتحهن ويا متدور الساعه ب ١٢

على اساس تتحقق

هل سنه سويتهه وخليتهم يكتبون الامنيات

نضرتي لوهب بدت تتغير

يعني ممكن اسميهه اعجاب

بس لا اني معترفه ولا هوا معترف وباقين بس نتناگر

كلهم كتبو الامنيات

وخلطتهن

رحت لوهب

مرام: وهب يلا اكتب الامنيات هاك هاي الاوراق.......

وهب : دروحي بابا سوالف زعاطيط هاي

مرام: يلااا حباب اكتبهن يلااا

وهب : دوخري من وجهي خل اكتب امنياتي شلون اكتبهن ونتي خاله راسج  المربع هنا

مرام: طنگرت ورحت 

الامنيات بيدي

جبت اوراق فارغه وطبگتهن وسويتهن مثل المكتوب بيهن الامنيات

ضميت الاصليات وجبت واخذت الورقات الفارغه ورحتله

— يلا جيب امنياتك

وهب: انتي مو امان جيبي الاوراق اني اخلطهن

مرام: لا ما اتفائل بأيدك جيبهن خل اخبطهن يلاا

وها ما اوزعهن هسه قبل لنطلع اوزعهن حتى لتفتحوهن

خله الورقات ال ٣ مالاته ويا الاوراق البيدي وكعدت اخبط بيهن

حجيت

— اخذتهن وفتت جوا للحمامات

كلي فضول اعرف شنو كتب بالامنيات

اني بطبعي ابد مو فضوليه بس الشخص الي يهمني احب اعرف كل شي عنه

بديت افتح بالاوراق كلهن فارغات بس مالاته مكتوب بيهن

فتحت اول وحده مكتوب بيها — لا اريد سواكِ— والثانيه مكتوب بيها لا شئ  والثالثه مكتوب بيها —عيونك سبتني— فرحتت وطررت من الفرح عبالك اعترفلي بس بنفس الوقت ضجت ليش كاتبهه بصيغة ذكر ليش مكاتب عيونج !!

طبگتهن وخليتهن بجيبي وشمرت الفارغات

ورحت خبطت امنياته ويا باقي الامنيات

قبل لنطلع وزعت الامنيات وطلعت

صارت ب ١٢ وفتحت الامنيات

طلعتلي اول وحده عيونك سبتني والثانيه اتزوج واستقر  والثالثه اشتري بيت

ضميتهم واريد ثاني يوم اروح واشوف منو صاحب هاي الامنيات

داومنه ثاني يوم

وطلعت  الامنيات كتلهم منو يريد يتزوج وراح يورطني كلهه كامت تضحك ومحد حجه  خطيه واحد ويانه طالعله لا اريد سواك يكول هذا يا ك… يدور ولد هنا

متنه ضحك عليه بيومهه

وهب من تطشرو سألني على باقي الامنيات

كتله وحده اشتري بيت ووحده مكتوب عيونك سبتني

حاولت ابين انو ما اعرف  منو كاتبهن

عاد هو حجه

— والله عاد هنه عيونج صدوك يسبن

— اني كمت اضحك بخجل ماعرف شحجي

وهاي طبيعتي ابد ما اعرف ارد ع الكلام الحلو يجيني الشلل اللساني 😂😂

مشت الايام طبيعي وماكو شي جديد

بيوم جنت دا اشتغل واجه وهب سألني..........................................................

~~~~~~~~~~~~~~~~~~~~~~~~~~~~~~~~

هناك أشخاص تستطيع أن تحتفظ بهم في قلبك بكل حفاوة رغم مواسم الغياب الطويلة،  لأنّ حضورهم الأول لم يكن عادياً أبداً ❤...

بيوم من الايام دا اشتغل واجه وهب سألني

وهب : مرام سؤال

مرام: اسأل

وهب : لو فرضنا اجيت اتقدمتلج راح توافقين

مرام: احس من الخجل جسمي صار نار

شكد ميانه اني ووهب بس ابد مافد يوم تجاوزنه حدودنه بالكلام

رغم اعرف بي هو عينه عليه ومعجب وهوا يعرف اني معجبه بي بس محد بينه تجرء واعترف للثاني

مرات اكول هيج احسن نبقى ومرات افكر اكول وهب مو شجاع الاعتراف شجاعه ووهب مو شجاع

رغم يغار ويضوج من احجي ويا احد ومن يشوفني تعبانه هوا يشتغل بمكاني

بس مدا افسر تصرفاته شنو

مرات يكعد يسولفلي عن حياتهم وعيشتهم وامه ووضعهم

ومرات احسه يستفزني ويكعد يسولفلي عن حبيبته القديمه ويوصفلي جمالهه وشكلهه

من سألني هل سؤال كولش نحرجت ومعرفت شأجاوبه

رغم هوا ممعترفلي قبل

فجان ردي كرد اي بنيه

- ههه عود ليش هل سؤال

وهب: دا اسألج جاوبيني

مرام: بهل اثناء انتبهت الولد الي ويانه ب المحل واكف ورايه بعد مسافه ومركز ع حجينه

فأني جاوبته: انت مثل اخويه شلون افكر اقبل بيك

شو هذا كتله هيج عيونه گامت تجدح شوار

شنو هوا يريد يفضحني شلون يحجي هيج والولد واكف وشلون يسالني هيج سؤال اصلا

يعني حتلو احبه بس استحي اكوله اي موافقه

وهب: ترى لاعبالج صدكتي اتقدملج

لو تموتين ماباوع عليج

بس داشوف ردت فعلج كلت شويه نضحك

مرام: ولا اني افكر بيك غير تفكير انتو هنا كلكم اخوتي ومستحيل افكر بيكم غير تفكير

حجيت هيج بس الغصه ببلعومي كوه جرعت كلامه

اني مبدر مني شي حتى هيج يحجي ويايه

ولافديوم فشلته او حاولت اخلي احد يضحك عليه او يقلل من قيمته ليش هوا هيج يتعامل ويايه.......

سكتت بس كولش اختنگت وضجت من تصرفه

فتت للمغاسل احاول اهدء نفسي واجر نفس لان احس روحي طلعت مني

موقف ما انحسد عليه

غسلت وطلعت

وهب وجهه السيف ميگصه

اني هم غلست والتهيت بشغلي

مو طبعي اكعد ابرر واعتذر واداري مشاعر

الي يزعل خل يزعل والي يبقى خل يبقى والي ميريدنه ربح منريده خساره وهذا قانون حياتي

لاحاولت اتعير علمود ارضي شخص ولا اقدم شخص على كرامتي

مشه اليوم عادي

والايام الي بعده

وهب گام يتصرف تصرفات يحاول يغثني

اذا تجي بنيه يكعد ويا الولد

شوفو هاي بنيه ومرام بنيه لك شوف جسمهه شوف حلگهه ويضل يحجي كل عقلع اضوج

اني انسانه عقلانيه بشكل

ابد ما اتأثر بمشاعري او مشاعري تتغلب على عقلي فلهل سبب جنت ما اتاثر ولا اضوج كولش عادي

من كام يشوفني هيج كام يخبث ويايه بالزايد

بالشغل يحاول يأذيني

بس ني انطي اذن الطرشه

مشت الايام واحنه اليوم بشهر السابع من سنه ٢٠١٦

الوضع مثل ماهو ماكو جديد

بيوم رجعنه للبيت خابرو على بابا

بيبي ام بابا مريضه جانت وحالتهه تعبانه

اخذ اسماء وراحو

ضلو يترددون عليها كل فتره يرحولهه

مره رجعنه من الشغل بعدنه بملابسه

گال يلا خل نروح بيبيتكم كلش مريضه

اني ونور نرجع تعبانات مالنه خلگ احد گلناله تعبانات ومابينه حيل

ضل يعيط

- امي مريضضه وواصله الموت وانتن متحترمني ومنجن تشوفنهه

الناس اكلت وجهي بناتك كطعياا وبناتك ليش ميجن

يحجي وكأن احنه مذنبات

احنه غير عدنه شغل والتزام ونرجع تعبانات وين بينه حيل نطلع ونطب ونكعد نجامل

طلعته بملل من لا جاره رحنه ولگينه عماتي كلهن ملتمات

بيبي مريضه ووضعهه كولش مخربط

اني بطبعي ماحب الهوسه انعزاليه لابعد حد

سلمت عليهم وكعدت شويه

ضلو يسالون وهوايه يحجون دخت

سحبت نفسي وكعدت ع الدرج

كاعده وخاله ايدي على خدي منتضره نروح

اجه ابن عمتي اياد

اياد: ها مرام شو كاعده هنا وحدج

امشي كعدي يمنه

مرام: لا هنا مرتاحه

راسي يوجعني وهوسه الاستقبال هنا احسن

اياد: وين دتشتغلين

مرام: بمحب مال تجهيزات صالونات حلاقه وهيج شي

اياد : هاا حلو

.....

اياد: شبيج متسولفين

اني يصيحولي نفسيه بس مو مثلج

مرام: ابتسمتله ومجاوبته

اياد فد واحد نفسيه ومعقد ومينبلع يوگف بالزردوم

من قبل اني ماحبه دمه ثقيل كولش.......

ضل يروح ويجي يحاول يفتح مواضيع بس اني مو يمه اصلا تعبانه واريد بس نرجع حتى انام

طلعنه سلمنه عليهم ورجعنه للبيت

مرت الايام عاديه ومتشابهه ماكو جديد

بس الي كمنه نلاحضه التغيرات الي بلمى

حفافه مكياج صبغ شعر تلفون بيدهه

واحنه لحد لان نحف شواربنه بالبوگه

مهتمينه لان اني مو من النوع الي ادخل ونور اصلا من وفاة ليث لهل ساعه احسهه مجرد تشطب يومهه وبس لا عايشه حياة ولا شي

بالعيد چنه معطلين

ابويه كال خل نروح نشوف امي وهم نغير جو

محجينه شي بدلنه وطلعنه

اني بيومهه جنت لابسه ستره اورنج قصيره وجواهه سترابلس ابيض وبنطرون جينز غامق وترانشوز هم بلون الستره وشال نيلي

كولش جنت مرتبه بيومهه

رغم جنت لا مكياج اخلي ولا اي شي بس وجهي بريئ احسه

التمس بي البرائه

رحنه ولكينه الكل ملتم كـ العاده

وهم بيت عمتي ام اياد موجودين

سلمنه وكعدنه

وني نفس الشي ماحب الاختلاط ولا احب سوالفهم

كلهه نفاق وناس تجذب على ناس

وني حسناتي مابيهن ترميشه يعني مو مال اكعد اشاركهم بالذنب

سحبت نفسي وكعدت ع الدرج

الدرج جان مقابيل الاستقبال

كعدت وخليت ايدي على خدي وصافنه

اجه اياد كعد يمي وضربني على فخذي وحجه

اياد: ايييي شلونج مروومه

مرام: فزيت واستغربت تصرفه كمت وكفت وحجيت

الحمدلله زينه

دا انزل لزم بأيدي

- اكعدي شبيج تتهزمين مني ترى مناكل اوادم

- ارتبكت كولش

لاا مو هيج قصدي بس حاره هنا رح اكعد بالاستقبال

كمت كعدت يمهم واحاول انهزم من اياد نضراته ابد مو راحه واني اخاف من اسماء لان اذا نتبهت وح توكعني بمصيبه وني مالي خلك

كعدت شويه وكولهم كامو كعدو بالمطبخ ناس تشرب نراكيل وناس طلعت حب وكعدت تكرز

ني بقيت يم بيبي

الاستقبال بارد وضواا خفيف وبيبي نايمه

عكست ايدي وكعدت اباوع ع التلفزيون

جانت طالعه مدرسة المشاغبين

نصيته وبقيت اباوع........

اجه اياد جان يكعد جوه رجلي ويخلي عكسه على فخذي ( شبه مدد) اني فززيت عبالك عگرب صعد عليه

شهل ميانه شهل تصرفات

كمت متنرفزه عدلت روحي كعدت ع القنافه الي بصف راس بيبي

اياد: اخاف ضايقتك

مرام: لا اخذ راحتك اني هنا كاعده

اياد: مرام تسمعين شعر

مرام : يي مرات

اياد: تعالي اسمعج هذا

رحت بعفويه كعدت يمه دا اسمع الشعر

طلعلي حسين علي المطوري دم الياسمين

ني شفته وكمزت كتله

- ياااا هذا الشاعر الحلو طلع اسم حسين واني ذاك اليوم سمعت شعره وما اعرف اسمه وضليت اكتب الشاعر الحلو الشاعر ابو لحيه ومطلعلي

باوعلي صفح وحجه:

يعجبج شكله

- يوو دشووفه غير يجننن

همزين راويتنيا حتى اعرف اسمه

- مرام انتي مرتبطه؟

- استغفر الله شنو هل حجي

متدري خالك عنده حوزه بالبيت اصلا بيني وبين نفسي ماحجي بهيج موضوع

حجيتهه وضحكت

- دمج حلو مثل وجهج

- شكرا خجلتني

-ترى داحجي صدوك

هوايه حليانه بت خالي

- كمت اتلعثم وماعرف شحجي

رجع حجه

- اريد رقمج شنو بت خالي وماعندي رقمهه

- شوف هذا اكله بحوزه يكلي رقم

وكمت اضحك

- صدوك عود ماعندج تلفون

- لا والله ماعندي

- وشلون اذا اريد اتواصل وياج

- عود انتو ليش متجونه؟

- هوا انتو كطعيه لاتجون ولا تلتقون ولا احد يندل بيتكم ولا نعرف ارقامكم شلون نجيكم بعد

- صدقآ مال گطعيه كولش كطعيه

احنه ناس عمليين حياتنه عباره عن عمل ماعدنه وقت للتواصل ولصلة الرحم

- هسه احنه هم نشتغل وهم عدنه شغل بس مو مثلكم نتواصل ونزور كرايب

- ذاك خالك وروح احجي ويا واعتب عليه اني شنو تحجي ويايه كلمتي بالبيت يقين متسمعهه ترى لا اهش ولا انش

كام يضحك وعافني وراح

نضراته مو راحه وتصرفاته غريبه

اياد كل احنه نعرفه شكد نفسيه ومكروه وميحجي شنو الي خلاا يحجي ويايه ويتلاطف الى ان صار الي مجنت متوقعته.......................................................

"" "" "" "" "" "" "" "" "" "" "" "" "" "" "" "" ""

صباح الخير والسعادة عليكم جميعاً بنات ان شاء الله لهنا ختمنه وياكم الجزء الاول من روايه تحت جناح الظالم ان شاء الله انتظرونا قريبا ب الجزء الثاني لان كلش مشووق وبي احداث نار ان شاء الله يعجبكم البارت واسفه هواي هواي ع التأخير لان الاوضاع مو زينه.....

تحياتي الكم جميعا.

الكاتبه: زهراء

هلاوو حبايبي شلونكم شخباركم مشتاقين يروحي طبعا اسفه ع التأخير لان البطله جان عدها شغل ومشغوله ورجعنالكم بجزء الثاني مليئ ب المفاجائات تابعونا.....

تِحلم وحدة غيري تعيشك العيشتك يا

تحلم تتهنى يوم بُعدي

تحلم تحصل وحدة تحبك أكثر مني

دورني بوجوه الناس

واكلك تحلم تلگاني

السالفة أكثر من كونها تعويد

عايشة بنص روحك

ومحبتي ماتقل تزيد....

************************

مرام: كاعده كبال المرايه والكوافيره دتركبلي التاج

اباوع على وجهي نگلب ع البطانه

معقوله اني هيج حلوه ومادري

اول مره بحياتي احف واخلي مكياج

حتى من نخطبت مخلتني اسماء اخلي مكياج ولا قبلتلي احف

واليوم اول يوم احف واخلي مكياج

بدلتي مال حنه الي لابستهه جانت سلڤر جان اللون هذا ترند

مكياجي فضي وردي كولش فاتح

شعي جان كولش طويل بهاي الفتره لنهاية ظهري

خليته مفتوح وبس برمته من جوه ومن الامام سويت بف ولبست تاج

مكياج كوولش هادئ وبسيط والتسريحه كذلك

طلعت عبالك اميره ممصدكه روحي لابسه بدله وخاله مكياج

كملت الكوافيره وكعدت انتضر زياد اخو اياد يجي ياخذني

بهاي كعدتي صفنت على نفسي وعلى اليوم الي خطبني بي اياد

نرجع بالوقت

فلاااش باگ

من بعد ما كمنه نتردد على بيت عمتي همه هم اجونه ومره كلهه اتفقت نروح لجزيرة بغداد السياحيه

واسماء وابويه وافقو

بيومهه فرحت لان راح نطلع ونغير جو

نخبصنه خبص اني والبنات حايرات شنلبس وشنسوي

لليل حضرنه ملابسنه واخذت اجازه من الشغل ونور كذلك

طلعنه ثاني يوم ورحنه تجمعنه بيت عمتي ام اياد

طول ما احنه كاعدين اياد مفك مني ياخه بس يباوع وتبسم بحيث كولش قيدني

وني احاول اتجنبه حتى لتنتبه اسماء وتسويلي مشكله

كمت للمطبخ دا اشرب مي

اجه ورايه

اياد: مرام هيج راح تروحين للجزيره؟؟

مرام: يعني شلون هيج

احجي واباوع على روحي للحضه شككني بنفسي

جنت لابسه قميص فستقي وبنطرون جينز غامق وحذاء هم فستقي ( فسفوري) اعشق هاي الالوان وشال نيلي

اياد: مو قميصج شويه قصير وردنه تلث ارباع!!

مرام : ي وشنو يعني ترى بابا يقبل وبعدين القميص مو كلش قصير

اياد : ي مو كلش قصير بس جسمج بارز يعني مو تاخذيهه بغير قصد

بس افخاذج كبار وركج جبير يعني هذا اللبس فاضح جسمج

هوا يحجي واني اتمنى اختفي من الفشله ومن جرئة كلامه

عفته ومشيت بدون اي رد مني

بس كولش خجلت

رحت كعدت بصف البنات ننتضر يلتمون البقيه......

طلعنه بسياره كبيره ملتمين كلهم

احنه مفتقدين هيج لمه داىما ابويه بعيد عنهم فكولش شفناها شغله حلوه من نلتم ويا اقاربنه

وصلنه للجزيره واغاني وصوت عالي وناس شايله الاكل وناس شايله الفرشات مال كاع وناس ترمز المي وناس شايله النراكيل

فد لمه كولش حلوه جانت

طول السفره اني لاطشه باسماء حتى اتجنب اياد

بس هوا نضراته ابد متركتني

اسماء راحت تلعب الجهال

البنات منطلقات ويا بنات عمتي وبابا وازواج عمتي كاعدين على مسطبه قريبين ع المنقله وينطون ارائهم للولد اشوو هذا وخلو ذاك ولتشوي هيج

اني كاعده بالكاع يم الغراض واباوع ع الناس الجو جان كللش حلو بداية ٩ بي بروده حلوه

صافنه ع الناس والخضار والمي شارده كللش

فززني صوته وهوه يكولي

اياد: ليش كاعده وحدج كومي افتري لعبي تونسي وياهم

مرام: لاهيج مرتاحه

اياد : شكد نفسيه

مرام: باوعت عليه ومرديت اي شي

وهوا احسه تنرفز لان ادقه بسكوتي

اجه كعد يمي

اياد: هسه شنو متكومين تفترين ؟

مرام: لا هيج مرتاحه

اياد: يلا بعد احسن هوا انتي لبسج منا فضيحه ع الاقل ابقي كاعده احسن

تضايقت من كلامه وحبيت انرفزه

مرام: من رخصتك اني راح اروح للالعاب

اياد: كعدي لتيهين الجزيره جبيره

مرام : ماعليه شي

اياد: ليش تعاندين

مرام: ضجت من الكعده خما جايه حتى اكعد

اياد : شكد مزاجيه خربب ببليسج

كام وكلي امشي يله

مرام: مشه ويايه وكولسع صاير من جهه حتى لحد يطخ بيا للحضه حسيته الحارس الشخصي مالتي

اياد: وين تردين تلعبين

مرام: اريد اصعد للبرج

اياد: هوا بارد حييل فوك تتمرضين

مرام: ماعليه شي

اياد: امشششي

حجاهه بعصبيه

يا هذا شبي هوا شعليه

صعدنه للبرج والهوا صدووك كولش عالي يضرب بالراس

احس نفسي رح اطير واياد احسه دخن من العصبيه

كولهه شباب فوك وهوا يحير يروح منا يجي منا

مدري شنو جان احساسي ساعتهه بس هوا جان شعور حلو

او يمكن لان محد مهتم بيا حسيته شي حلو

افترينه ولعبنه واشتريت شاميه وكعدن اكل وهوا بس ساكت

شويه واتصلو على تلفونه

اياد: يي يي ويايه هسه جايين

مرام: اني باوعتله وخفت لا اهلي يحجون عليه

- شكوو

اياد: ملتمين حتى نطلع سالوني عليج كتلهم ويايه

مدري ليش ساعتهه خفت لا اسماء تسويلي مشكله وصلنه بس الحمدلله جانت ملتهيه ومحجت واصلا كل مجموعه جانت طالعه وحد يعني ممركزه عليه انو بس اني الطالعه......

تمت الخطبه وجانت كولش بسيطه

بحيث بيوم الي اجوي قرو فاتحتي جابو الشيخ عقدلنه وصار هوا خطوبه خوا كطعان مهر

جان اياد كولشي مجايب لا حلقه ولا اي شي لان صارت صدفه

فرحانه بس مو لان اياد خطبتي

لا فرحانه لان راح اخلص من الشغل واخذ جزء من حريتي من مكياج وحفافه وهيج امور

وهذا اكبر غلط ارتكبته بحق نفسي

لان بعد فوات الاوان ادركت انو العرس مو بس حفله وهوسه ومكياج اكو امور اكبرر

تمت خطيتي من اياد

كولش جان لطيف بفترة الخطوبه يوميه يجيني ويحاول يعودني عليه

يطلعني ويونسني

جابلي موبايل وهنا جانت فرحتي متنوصف نزلي برامج الفيس والانستكرام وفايبر وواتس اب جنتت طاايره بمعنى الكلمه فرحانه بهاي التفاصيل اكثر من فرحتي بخطوبتي

الشي الوحيد الي مكدرت اتاقلم ويا هوا اياد

من يجي لو يلزم ايدي لو يكعد ويحشك روحه بصفي لو يحضني

وني هما اتشنج ماكدر اي شي اسوي

جنت احب قربه يمي من نطلع نكعد نسولف نضحك نتخابر

بس من يحاول يتقرب الي انرعص اتكهرب ولا يطخني

هوا من شاف مني صد مره ومرتين كلم يتضايق كولش

حاول يفهمني بالتلفون انو اكو امور بين المخطوبين لازم تصير ولازم يعودني عليه ولازم اتقبل وميصير ارفض

جنت كل مره اكول راح انطي فرصه بس من يجي وتصير صدوك اخاف وانهزم

عده على خطوبتنه شهرين وبهاي الشهرين اياد ابد ممل كل ميجي ويشوفني يحاول بقربتي اله يحاول يبوسني او يحضني

اخرها شاكي لامه وكايللهه بارده ومتقبل ابوسهه او احضنهه او من هل سوالف

خابرتني عمه تسال وتسلم

استغربت اتصالهه لان هيا داىما تراسلني بس ابد متتصل........

رجعنه والطريق كوله اياد كولسع يندارلي ويبتسم

من بعدهه صارو كل جمعه ينجمعون بيت مره يمنه مره بيت عماتي وهيج

اياد اكثر من مره مرلي بشغلي ويشوف وهب ويسالني عليه

لان وهب يستغرب من يجي اياد ويسال عليه ويضل يباوع ويبين على وجهه ملامح الضوجه ف اكثر من مره اياد ينبهني منه

اكوله حباب وخوش ولد يكلي احنه الولد النه غير نضره بالولد وهذاما ارتاحله

مره متجمعين كولنه وجان عمتي ام اياد تطلبتي لاياد كدام الكل

اني هنا الخجل اكلني اكل وماعرفت شتصرف

بس بت عمتي الثانيه الي هيا بت خالته الاياد كولش ضاجت وكامت وكولهه نتبهت عليهه

اني مجان عندي سبب حتى ارفض

بالعكس جنت اتمنى اتزوج حتى اخلي مكياج والبس بدله وتصيرلي غرفه وحدي

يعني تفكير اي بنيه بعمر مراهقه رغم اني جان عمري ١٨ سنه

كل ضني الزواج حمره وكحله وبدله وعرس

اهلي انطو موافقه لان بيبيتي ادخلت وقبل لتسمع رآي اهلي كالتلهم ي احسن ومرام من عدنه وبينه ومن هل سوالف يعني خلتهم كدام امر واقع

رغم اسماء جنت متوقعتهه متقبل لان مو بالسهوله احد يمشي كلمه عليهه وبالذات بشي يخصنخ لان جانت تشوفنه سلعه مستفاده من عدنه

بس هيا جانت بفترة فتور ومعترضت ابد......

جاوبتهه :

هلاو عمه شلونج شخبارج

ام اياد : هلاو حبيبتي شلونج انتي شخبارج بابا شلونه البنات شلونهن

مرام: الحمدلله كولنه زينين انتو شلونكم

ام اياد: نسال عليكم احنه

شخباركم انتي واياد ؟ وضعكم شلونه

مرام: الحمدلله زينين

ام اياد : لعد شبي كالب وجهه وكل ما احجي ويا يكول ضايج خما صاير شي ؟

عمه حبيبتي اني ماريد ادخل بيناتكم بس اني داريد ازوجه حتى اسعده مو حتى الگا كئيب وضايج

مرام: والله عمه ماكو شي ويوميه نتخابر ونحجي والله

ام اياد: شوفي حبيبتي يجوز اني ميحقلي ادخل وهيج امور مفروض الام تحجي بيها ولان انتي ماعندج ام فأني حاسبتج مثل بنتي ومن داريد اعلمج لنفسج مو لاحد اريدكم تكونون سعيدين بحياتكم

امي بين المخطوبين لازم شويه يصير مجال يعني اذا لزمج او حضنج مابيهه شي هوا زوجج شرعا وقانونا حقج تستحين وتخافين بس لازم حتى تتعودون على بعض

زين اذا انتي هسه بوسه ولزمة ايد متخلي شلون بالعرس جاوبيني ؟ انطي مجال حتى تتعودين عليه ويتعود عليج

ولتحسبين هذا تدخل احسبيها نصيحه مني

مرام: طول ما هيه تحجي اني ساكته بس ابددد محبيت تدخلهه يجوز هيه قصدهه تنصح بس غلط واكبر غلط اياد يسولفلهه ع الي بيناتنه كولش انحرجت ومحسيت اكو خصوصيه النه

كتلهه ان شاء الله والله كريم ويصير خير ومن هل سوالف وسديته منهه بس كولش ضجت من اياد

عدت يومين واجه وهم كعدنه وحدنه بالصاله جانو اهلي مموجودين واني رجعت قبل وقت الدوام اجه عليه اياد

هل مره حاول بس ابد ممنعته

كعد بصفي وخله ايده ورا جتفي قربني اله

اني هنا صنم يوديني يمنه اروح يوديني يسره اروح

صرت بصفه كوولش دنكت لان كولش مرتبكه

مد ايده على راسي ورفع شعري بعده عن وجهي خلا ورا اذني قرب راسه على ركبتي كام يشتم بشعري الي نازل

حس بيا ارتبكت حضني كولش وهمس

- لتخافين ولا ترتبكين مستحيل اسويلج شي متردي او اجبرج عليه

مرام:.......

حضني وضل خال راسه على جتفي يحاول يهدئني ضل يسولف على شغله وعلى الغرفه مالتنه ويسالني ع الالوان الي احبهه بالغرفه.......

اني هم ندمجت وكمت اسولفله شنو الي يعجبني وشنو الي ميعجبني

دنتفق كلي خلاص الوان الغرفه على ذوقج

ني بعفويه حجيتهه كتله :

يااااااي شكددد احبكك كلش شكرااا

اياد: ولج صدوك تحبيني؟؟

مرام: ...

اياد: احجي ليش ساكته مو شلعتي قلبي

مرام: هوا شسمه ااا مو المفروض المره تحب رجلهه ؟ يعني مو هيج الصحيح

داحجي ومتلبكه وجان يبوسني اني ابد منطيت اي ردة فعل ضليت مثل الصنم

هوا احسه راح بغير عالم وني لعبت نفسي اريده بس يوخر

يجوز تكولون هاي تبالغ بس بعدين تعرفون شنو السبب الي خلاني بهل برود..................

طبعا اني هواي تعرضت لخيبات بحياتي بس اشد وحده الي من صدك كسرتني انو اني عشقت زوجي وحبيته من كل كلبي بس ماجنت اعرف النوايا ابي وره هذا الحب طبعا بفتره الخطوبه جان شكد يعاملني بطيب وحنيه وحسسني بحبه كمت من صدك احبه ويدافع عني ويوكف وياي بس ابي صار ب الاخير فاجئني..............................................

*************************

خليتنِي بديرة غرُب

مالُوم والمَدمع يكت

يَّ الرسمَك بعيني انطُبع

راحَت عيُوني وما رحِت

ساگيّتك بدمِع الجفِن

يا دمِع هَلبت غزرِت؟

لا طيّف يَّ الطيّفك فرَح

لا تنشِد إنت ولا گلت

و ضايّع ولا اكَولن ضعِت ......

هلاو بنات شلونكم اخباركم ان شاء الله بخير حبايب نزلت قصه جديده كلش كلش حلوه راح تحبوها متأكده احداثها وسردها راح ينال اعجابكم خاصتا الابطال هلمره راح يكونون مختلفين وقصه حياتكم غريبه وبيها تعقيد راح انزللكم الرابط والغلاف علمود تابعوها ومااتأخر عليكم ب التنزيل ان شاء الله

اسم الروايه.. ليالي الأوركيد

رابط الروايه مالتي وادناه الغلاف

هلاو بنات شلونكم اخباركم ان شاء الله بخير حبايب نزلت قصه جديده كلش كلش حلوه راح تحبوها متأكده احداثها وسردها راح ينال اعجابكم خاصتا الابطال هلمره راح يكونون مختلفين وقصه حياتكم غريبه وبيها تعقيد راح انزللكم الرابط والغلاف علمود تابعوها ومااتأخر عليكم ب التنزيل ان شاء الله

اسم الروايه.. ليالي الأوركيد

رابط الروايه مالتي وادناه الغلاف