تحميل رواية «تحت جناح الظالم» PDF

تكملة البارت التاسع عشر

جرح يلچم جـرح واتبرغث من الـ اه

  واخيطهن والمدللهـم ايـفـتـگــون..

  مو شغلة جرح كل الجروح اطيب

  بس المشكله بوادمنه اله اتخون..

مشهد في الوقت الحاضر 💫

مرام: حيدر الله ينطيك شنو ينشزني ابووس ايدك فدوا  خلصني من هل مصيبه احجي وابجي

حيدر بعصبيه ؛ شللللللووون احلهااااا فهمينييييي من خره بحيدر وخررره بساعة السوووووده الي خلااااكم بطريقيييي

اني غيررري واحد ياااخذ عائلته ويهههج شلللي بدوخة الرااس هااي

گمت ارجف من صار عصبي وگام يعيط

مازعل منه لان ادري حمله ثگيل بس ميته خووف لياخذون بتي منيي

اني الي ربيت واني الي سهرت واني الي كبرت واني الي اشتغلت حتى اوفر احتياجات واني الي شفت انواع الذل وتحملت لخاطر ماس

بأي حق هسه انطيها

شو هوا لا يعرفهه ولا شايفهه ولا يدري بيها

شنو هل حنيه الي نزلت فجأه

كمت ابجي

ركضت على سبحتي وكمت اردد ياسند من لاسند له

هاي اني من اختنگ التجأ لربي لان هوا الوحيد الي ميمل من دعائي ودائما يطلعني بمعجزه من المصايب

ابجي واتخيل اذا اخذو ماس شسووي

اني عيني متغمض اذا موهيا يمي اشمها يله انام

شلون بيه لو اخذوهه وشلون بيه لو حيدر تعب مني ونطاهه

فلااش باگ

مرام تكول لحارث:

اكرهم كره بس الله يعلم بي

واكل للروح احقدي وبالحقد زيدي

ولو لحم البشر ماينوكل مكروه

اكل من لحمهم لو وگع بيدي

فتحت  عيني اني بغرفه مو غرفتنه

ونايمه على سديه وبصفي اجهزه طبيه وبصفي ستاند مال مغذي معلگيلي مغذي

اباوع محد من اهلي موجود

اريد استرجع ذاكرتي واتذكر الي صار

احس وجع براسي متت

كمت ابجي من الوجع ومن الوضع الي اني بي

شويه واجتي دكتوره جبيره بالعمر

الدكتوره: هاا يحلوه كعدتي؟

مرام: ي دكتوره

الدكتوره: يلا مادام كعدتي سولفيلي شلون نفتح راسج

ولتخافين من اي احد لان القانون كله وياج

مرام: دكتوره منو جابتي هنا؟

الدكتوره: اختج وابوج

بس ابوج بالتوقيف منتضريج تفيقين حتى نفتح محضر

مرام: كمت ابجي

لاا لاا دكتوره بابا معليه

اني اني وكعت على راسي وتعورت ابويه معليه طلعو حبابه

دكتوره: ماما هسه راح يجي ضابط التحقيق ويحقق وياج وانطي افادتج ومثل مكتلج اذا احد مأذيج احجس وكلنه وياج

مرام: لا لا محد مأذيني

راحت واجتي وياها ضابط

سالني شلون صار الحادث كتله نضربت بالمحجر مال درج بلا مادري لح عليه وحاول يعرف مني بس اني اصريت على كلامي  سد الفايل الي بيده وطلع 

وره تقريبا ١٠ دقايق  فات ابويه وويا نور

اني رغم مخليتهم يسجنو بس كارهته كره يمكن لو عدوي جان مكرهته بهل طريقه هوا فات وني درت وجهي وغمضت اريد انام

نور: ها ميمي نشفتي دمنه والله حيل مبقى بيه

مرام : بصوت ناصي نور الله يخليج طلعي منا ماريد اشوف وجهه كارهته ابوس ايدج طلعي

نور: ارتاحي انتي واني اتصرف

راحت وكفت يمه وحجت

— بابا روح انت للبيت الوكت متاخر واني راح ابات يم مرام

صحت مابيهه شي بس خل يخلص المغذي ويشوفون وضعهه للصبح حتى اذا مابيهه شي اجيبهه واجي

روح توكل ضلتك هنا مابيهه فايده

مجذب خبر دار وجهه وراح

احس من راح تنفست

ندارت عليه نور وحجت

— يي  ميمي هذا ابوج وزحلگته

هزيت راسي وحجت نور

نور: مرومه اني جوعانه ميته جوع وماشتهي  اكل وحدي شتكولين  ادز اكل واني وياج ناكل  ؟..........

هزيت براسي بمعنى لا ماريد

نور: هسه الاكل شعليه تزعلين عليه  راح ادز وغصبا عنج تاكلين

سكتت محجيت

راحت جابت اكل  واجتي كعدت بصفي ع السديه وتفتح بالاكل

مرام: نور منو ضربني براسي

هيا ملتهيه دتفتح بالاكل من حجيت رفعت راسهه عليه

نور: هااا؟؟

مرام : منو ضربني على راسي

اجحي واتمنى تكولي اسماء لان هيا مرت اب وشماسوي هيا مرت اب لا من دمنه ولا من لحمنه

نور: ابوج ضربج

مرام: اني جنت شاكه هوا لان هوا الوحيد جان ورايه بس اغالط نفسي

اكول مستحيل اكو اب يسويها ويريد  يفني حياة بنته

رغم اعرف بس بجيت من كالت ابوج

نور: ليش من اجه الضابط مكلتيله ؟ ليش خليتيهم يطلعوو ؟ جان خلصنه منه

مرام: واسجن ابويه ؟ صح هوا عار وسكط وعيب يتسمى اب بس المشكله غصبا علينه يبقى ابونه

زين سوال اسماء شسوت من ضربني

نور: اخخخخ سكتي مرام گابه عركه للظالين بالبيت وياهه

الگ…ه الدايحه من ضربج حارث  اجتي تعيط

اسماء: لك حااارث شسوووويت تضيع نفسكك من وراه هاي العايقه

انتي متمدده بالگاع وسابحه بدمج وهيا فاتت من يممج وتحجي ويا حارث ودفرتج ومشت

تعاركت وياها وطلعت ضيم قلبي استغليتهه فرصه كلت ميكدر يحجي ابوج الدثوو

مرام: وتالي شلون نقلني للمستشفى

بما انو هاي مو اول مره يضربني ذيج المره هم طگ ايدي ومارف قلبه عليه شعجب صعدت عده الابوه هسه وجابني للمستشفى ؟

نور: هه والله ضحكتيني

هذا ابوج احساسه ميت وضميره هم

لج متمدده ودمج غرگ الدنيا راح فات للغرفه واسماء ويا

وني كمت اعيط كتلهم اله اخابر الشرطه و اخذهه بسيارتهم وارفع دعوه عليكم واخيسكم بالسجون

من شافوني طلعت اركض اجه ركض ورايه كلي بدلي ملابسه بين ماجيب السياره بالباب

ني هم بدلت ملابسج لان كلهه دم

بس الله لاينطيج غير العافيه يامرام هديتي نص حيلي لجج ابدلج جثه لايد ولا رجل والدم ماعرف منين يطلع تخبللت عليج والقران راد يوكف قلبي

عليج الله عوفيهم انعلبو المدرسه لابو لو ميته شسوي

لج كمت ماشوف دربي

بس شنو رجفو رجفه بس عد الله خبرهه

من صعدنه بالسياره حارث يتوسل يكلي لتكولين اني ضربتهه اروح بيها وتالي عمري ادخل سجون

توسل بيه

كتله مالي شغل هيا اذا عاشت وتريد ترفع دعوه عليكم مالي دخل واذا ماتت هاي الالله كتبهه عليكم

خليته يرعش الطريق كله

نوب الاغم من وصلنه للمستشفى يكلي روحي جيبي سديه مافوتهه اني اخاف يجلبون بيه

كوليلهم اني سايق

كتله تنزلهه لو اصيح امن المستشفى

لاكلج ولا تكوليلي راح نص حيله

هذا الحجي هيا تسولف وتسويلي لفات صغار اكل وتاكل ويايه

كملنه اجتي الممرضه  بدلت المغذي وخلت واحد جديد وخلت بي ابره

وره شويه كمت ماشوف  نمت

وكعدت نور نايمه ع الكرسي الي بصفي

للصبح ساعه ب ٩ تقريبا

اجتي دكتوره شاف وضعي وشافت الجرح مال راسي

بدلتلي الضماد مالته وكتبتلي ورقة خروج

راسي مفتوح ٦ خياطات والضربه كللش مكانهه خطر يعني بيني وبين الموت شعرايه

الي قهرني خلاني ابجي كلش

مكان الضربه مزيني يعني فراغ اكو براسي شكد نقهرت شكد بجيت

وني شعري عندي اعز من روحي مداريته واحبه كلش

طلعت من المستشفى نور اجرت تكسي ورحنه للبيت

فتت للبيت هدوء اكيد بعدهم مطمورين

فوتتني نور للغرفه

كالت اسويلج ريوك حتى تاخذين العلاج وتنامين

راحت سوتلي ريوك واجتي

جابت الصينيه خلتهه ع الجربايه وكعدت بصفي اكلت شويه

مردت افشلهه لان تعبت ويايه اكلت لخاطرهه

كملت نطتني الحبوب  وكالتلي واح انام لان صرت طلي

مرام: ومترحين للصالون

نور: لا خابرت ام دره كتلهه صارت مصيبه

محجت شي كالت بس طمنيني عليكم وهاهيه

راحت نامت وني تفكير الانتقام ضل براسي

دخت من التفكير ونمت

وهاي اول مره انام براحتي بلا ما احد يگعدني..........

كعدت الظهر من وجع راسي

جنت وحدي بالغرفه

كمت فتحت الباب داريد اطلع

شفت اسماء كاعده بالصاله رجل على رجل ولازمه الريمونت تكلب بالتلفزيون

طلعت حتى مسلمت عليها

فتت من كبالهه تعديتهه داروح للمطبخ واستوقفني صوتهه

اسماء: لاعبالج بعد هل تمثيليه تفرضين رآيج عليه وتكملين مدرسه

اذا جنت افكر نسبه ١٪؜  اخليج تكملين بعد الصار لو تموتين ماخليج تشوفين مدرسه

نداريتلهه وني حرگه بقلبي هلكبرهه وصلت بيه مرحله كلت لو يذبحوني هم ما اهتم لان شيصير بعد اكثر من الي صار بعد

مرام: شوفي

اذا شفتي ساكته مو معناهه خايفه منج  بس انتي شررر واني اتچفى الشر

خليهه ببالج مدرسه اكمل وغصبا ع الكل

لاماخذه منج ولا مانه عليه بشي

اني صاحبة فضل عليكم اني دا اصرف عليكم ماحاجيتهه قبل بس بعد الصار لا احجيهه

اني متفضله عليكم مو انتو اني دا ادرس واتعب والي وصلتله بتعبي ويزودي مو بزود احد افتهمتي لو لا

اسماء: لسان گ…ه شترجه منج بعد منو امج مو مروه الگ..ه

مرام : امممميييي الي تحجيين عليهه تااااج رااسج

امي ماسوت سوايتججج امي مادخلتتتت زلممم للبيتتت اميي اشرففف من الشررررف افتهمتي لووو لااااا والقررراااان والقرررران اذا مأجه حيدر وكتيتله لاول والتالي فلا اطلع بت امي

اخااف عبالج الدثو رجلج يسكت على خيااسج اخووويه زلمه ميقبل ع الگ…ده

على عياطي اجتي نور ولمى يتراكضن

نور تريدني اسكت

بس يانار قلبي شيسكتني وشيطفيها لو اشرب من دمهم هم ما ارتاح اكرهههم بكل حواسي

واكفات البنات وهيه حجت حجايه لهسه ترن بأذني

اسماء: هاي اني وهاي انتي اذا مندمتج على كلامج  وكولي كالت اسماء يامرام اذا ماخليتج معلوله ومحد يعرف علتج ماطلع بت ابويه اصبريلي

وشوفي الي يعاندني ويراددني شنو تاليته

اصبببري

كلامهه مهز شعرايه بجسمي من كد ماكارهتهه وماطايقته

كلت اكثر من الي صار شيصير

مره كسرو ايدي ومره فتحو راسي ومن غير الحرب النفسي الي عايشته  شيردون يسوون اكثر

بس اسماء كل طرگاعه تسويهه اليه اكول شتسوي بعد اكثر وتصدمني بالاكثر

ضليت كاعده بالبيت 4 ايام ما اداوم

بقى على دوامي يومين بس

اني راكبه راسي اله اداوم  واسماء معانده اله ابطل

بهاي الـ4 ايام الي گعدتهه لاحظت خروج اسماء من البيت بشكل يومي

والمغرب تشعل بخور ريحته تخنننگ بحيث اگوم اتقيئ من تشغله

ومن اسأل لمى تكولي تكلي متعلمه عليه يوميه تشغله

بيوم نايمه بالليل او بمعنى اصح داريد انام متمدده بفراشي

يعني واعيه حسيت صوت فوگ راسي عبالي لمى لو واحد من الجهال

رفعت راسي اباوع ماكو احد

رجعت تغطيت داريد اغفه وچان اسمع صوت يصيح  بصوت ناصي يم راسي " مرام وين خالتهن"

فززيت

اباوع ماكو احد بالغرفه والغرفه ضلممه

اني متأكده سمعت صووت والله سمعت

نور نايمه ع الجربايه وغاطه بسايع نومه وباب الغرفه مسدود كمت ابجي اختنگت

مدا ارتااح

ربي دخيلك

غطيت راسي وداريد انام وحسيت احد يلعب برجلي

عطت عيطه فززت الميت

نور كمزت

نور: اسم الله مراام شبيييج يمعوده

مرام: ابجي واحجي

نوررر اكو احد صلح عليه صوته غريب مسامعته وحسيت احد يلعب برجلي

نور: حلمانه رجعي نامي واقري ايات

مرام: نور والله محلمانه والله متأكده

حاولت تهدئني ونامت بصفي  كوه كدرت اغفى للصبح

ومنا بدت معاناتي ويا سحر اسماء

الي راح يوصلني لمرحلة الجنون

هوايه شايفه زوجات اب  ويأذون اطفال  ازواجهم  بس مو بهل طريقه

يجوز مرت الاب تضرب ترزل تهين بس متوصل بيها انو تأذي بالموت والسحر

اسماء تركيبه عجيبه

اكو بشر شكد ماحقير بس بالمسايسه يجي

اسماء مو من هذا النوع

اسماء تحب ٢٤ ساعه نتلوگلهه و٢٤ ساعه تتعارك ويانه

مرات احسهه انسانه مريضه نفسياا

عدهه عقد نفسيه.....................................

************************************

أردت أن اقابلكِ

لأكون على حقيقتي معك

لكي أقرأ لك الروايات

و أشاركك

أفكاري والخرافات

أردت أن اقدم لك كُل صباح

كوباً من القهوة

وتسمعي معي الموسيقى

أردت أن نراقب هذا العالم معًا

أردت أن تتشابك أيدينا

ونركض في كُل الأمكنة

أردتُ أن نستريح

وتضعي من تعبِك رأسكِ على كتفي

وأنتِ مُنهكة.......

حبايبي هاي التكمله البارت لان البارت كان قصير وان شاء الله يكون خالي من التقصير

انا اعرف جيدًا كيف أُرمم روحي

‏فقد كسرني من قبلك عدة اصدقاء تجاهلوا قدري و تمادوا ضدي و استباحوا كسرة خاطري تجاهلت و صبرت، مرَّت عليّ ليالٍ من شدة ألمها كنت اصرخ بإبتساماتي المُزيفة.. لكنني نجوت، و سأنجو لأنني لا اعرف الا ان اكون قويًا في عين ذاتي..........

************************************

في الوقت الحاضر💫

مرام : خايفه من كلشي

خايفه على بنتي الوحيده خايفه على نفسي خايفه من المستقبل المجهول خايفه لا حيدر يتعب مني وابقى بلا سند

خايفه من ابويه

من گد القهر الي بياا حتى النفس من اجره احس يجرح بلعومي من يدخل

... اني ليش هيج ضعيفه ؟؟ ليش شخصيتي مهزوزه؟؟ اني مو صغيره مره وعندي طفله

اذا بنتي تفتح عينهه على هيج ام شلون رح تعيش

حياتنه غابه والقوي بيها ياكل الضعيف وبالضبط مثل وضعي حاليا ياهو الي يجي ينهش بلحمي

القريب والغريب وكأن ماعدهم شغله غيري

مرام صيري اقوى من زمانج هذاا الوكت ميريد الفقيره والضعيفه شفتي شلون كلهه تأذيجج

بطلللي خووف بطللللي بطلللللي

كمت الطم على وجهي اريد ابطل هل خوف

التفكير الزايد رح يموتني

صح الي دامر بي كولش صعب بس يرادله قوه حتى اكدر اتعدى

ربي الصبر منك

- فعلت الكثير لأنجو ، أنا الذي لم يكن يهمنُي أمرًا ما ، أصبحتُ أفعل حتى المستحيل لأنجو من فرط تثاقل الذكريات على صدري.

فلاش باگ

فتحت عيني الدنيا ظلمه

كمت من جربايتي اتلمس حتى اطلع من الغرفه

فتحت الباب هم ظلمه شنو السالفه؟؟

بالعاده يفوت ضوه من الشبابيك مال صاله

ليش هسه ظلمه اريد اوصل للشباك مدا اندل شي

خفت اريد ارجع للغرفه ماكو ظلام من كل جهه

اريد اصيح على نور

بس صوتي مديطلع

كمت ابجي

ربي دخيلك

اغمض عيني وارجع افتحهه كلت بلكي حلم واكعد منه

كعدت بالگاع من الخوف ولميت نفسي وخليت راسي بين رجليه

سمعت صوت احد يمشي بأتجاهي

هاي نور لو لمى اريد احجي صوتي مديطلع اختنگت بالزايد

كمت ابجي والصوت مال مشي ديقترب مني

حسيت بشي صار على رجلي

مديت ايدي داتلمس وياريتني ممتلمسه

رجل بس بيها شعر خشن عبالك مال قنفذ واصابع رفيعه

عطتتتت بعلو حسي وبعد محسيت بشي ..

نور : مرام وضعهه ابد مو طبيعي

يوم تفز بالليل تعيط ويوميه كوابيس احس حالتهه النفسيه تدمرت

نايمه وماحس اله عيطه وشي وگع بالگاع فزيت على العيطه طلعت واشوف مرام متمدده بالصاله ولازمتهه الرجفه وتشهگ

نور: مرااام مراام يمعوده شجااج شبيج

على صوتي وصوت مرام اجه ابويه واسماء يركضون

حارث: ها شبيها مرام

نور: مادري سمعتها عاطت واجيت اركض لكيتهه واكعه

حارث: دكعديها فوتيهه للغرفه عبالي احتركت شوف شنو

نور: احجي بقلبي هوا انت يايوم خايف علينه

عفته وحاولت اكعد مرام مكعدت جبت مي ورشيت عليهه وكعدت اقره ايات يم راسهه

شبيها البنيه شجاهه

بدت تصحى وتهذري

مرام: نور نور لزمت رجله ليش ظلمه الضوه من مطفي

تحجي وتشهك وتبجي كومتهن على كيف ورجعتهه بفراشهه وخليت جوا راسهه قران وضليت العب بشعرهه لحد مغفت

اعرف اسماء عدهه سوالف سحر وشعوذه بس ماتوقعتهه ولا اجه على بالي تسوي لوحده بينه.........

حالتي بدت تنتكس يوم بعد يوم

الاكل شبه گطعته

ما اتقبل اي احد يحجي ويايه

حتى الشغل تركته المدرسه بدت وني مالي خلك لاي شي

صلاتي گطعتهه من اسمع القرآن اتخبل اختنگ احس احد يخنگني

هملتت نفسي بشكل

كمت فترات اغيب عن الوعي

يعني ساعات مادري نفسي وين الله ذابني

ومن ارجع لوعي الگه روحي بمكان غير الي جنت بي وكوولشي ماتذكر عن الي اسوي

اكثر من مره اصحى على روحي الگه نور تسبحني بالحمام ومن اسألهه ليش تترد تكولي متريد تحرجني

ومره وعيت على نفسي گاعده بالغرفه ومبلله نفسي

تخببلت شلون مسويتهه على روحي بلا مادري

گمت ابجي بهستريه

من اجتي نور تهدئني ودخلتني للحمام

كالت انو هاي مو اول مره اكثر من مره تتكرر السالفه

هلگد بجيت ونهاريت

ايام تمر عليه وني ماعرف يايوم او ياساعه كلشي مادري

من غير الليل اخخخخ يالليل من يجي بالليل وهم ادخل بهذا الظلام وهم يجيني هذا الوحش

ومن غير مرات احسه يلعب بجسمي افز مخنوكه وبس ابجي مابيدي شي اسوي حتى استحي اگلهم هيج يسويلي

( هذا الموقف نقلته نور)

بيوم كاعدين كلنه بالليل بالصاله وني جنت كاعده وياهم بس جسديا اما روحيا فروحي مو وياهم ولا ادري اصلا اني وين ولا اتذكر كل الي صار

كاعدين فجأه گمت طلعت من الصاله

نور عبالهه داجيب شي من المطبخ مهتمو بقو على گعدتهم

تأخرت نور فقدتني

مرام ليش تأخرت خل اشوفهه واجي

اجتي لگتني گاصه شعري وگاعده بباب الترك اطلع بالنفط حتى احرگه

عاطت وعلى عيطتهه اجوي يركضون

شافني ابويه لزمني وكتلني

كل ضنه بوعيي وداعاندهم لان بطلوني من المدرسه

بس نور حجت

- بابا كل عقلك تضربهه متشوف حالهه شلون صاايره بابا مرام مو بوعيهه وامرهه مو خالي خل نوديهه لكربلاء زياره بلكي بجاه اهل البييت وكراماتهم عد الله تشفى

فزت اسماء من يمهه

اسماء: مابيهه شي عياره لان بطلت من المدرسه

نور: منا وتأكدت اسماء الهه ايد بالسالفه اله بنيه مثل الورد بيوم وليله ينگلب حالهه؟

من حجت هيج اني لحيت

نور: بابا اذا باجر متودينه اني اخذهه واروح

عفتهم وسحبت مرام وطلعت

فتت غسلتلهه اباوع شعرهه شلون مگصگصته صح مو هوايه بس مسگطته

لازم ينگص يتعدل

اخذتهه للغرفه مشطتلهه شعرهه وضفرته وخليتهه ع الجربايه

مرام صايره جثه اوديها منا واجيبهه منا

نومتهه وطلعت ملابس الي والهه حتى باجر من الصبح اخذهه للامام العباس

هناك شفائهه

احنه منعرف بسوالف السحر والشعوذه والله هوا الي يحمينه واذا مرام بيهه شي كون الله يشافيهه مو بشر

خليت راسي ع المخده وحاولت انام گوه يله نمت

كعدت ب ٨ كمت سويت ريوك وتريكنه اني ومرام ونظفت البيت بدلت وبدلت لمرام

جان يوم جمعه وابويه بالبيت

دگيت الباب مال غرفه عليهم

طلعتلي اسماء كفشتهه شكبرهه

اسماء: ياستار استر وين موليه من الصبح

نور : باجي فدوا گعدي بابا

مبدلين دننتضره يودينه لكربلاء

اسماء : ابوج وجه الصبح نام بدلي وكعدي غير وكت روحو

نور: تقصدت احجي بصوت عالي حتى اكعد ابويه

باااجي البنيه راااح تموووت الله يخليج مو وكت سواالف

بابااااا بااابا فدوا كوم ودينه البنيه راح تموت

اجاني صوته المزعج

حارث: نور اخذي اختج وروحو ماكدر اروح تعبان نوب اسويلي حادث

اخذي اختج

وهاج هاي ٢٥ ترحون لكراج... مناك تصعدون سياره لكربلاء. ومن ترجعون سالو على سيارات بغداد وتعالو

متفاجئت من ابويه اعرفه عرضه سگط

بس نقهرت لان اذا لاسامح الله صار علينه شي ميحرك ساكن

ياخسارة الفلوس الي انطيهه الهم ميغزر بيهم شي

مكلت باطل اخذت الفلوس واخذت ايد مرام وطلعت

من طلعت مرام سألتني

مرام: نور وين رايحين؟

نور: نروح نزور حبيبتي

شويه نغير جو مو احسن

مرام: نروح نزور ماما ؟

نور؛ لا نروح لكربلاء ووعد غير مره اخذج للنجف ونزور ماما

هزيت راسي ومشيت

اخذنه تكسي وتوجهنه گبل لكربلاء لا اخذنه نفرات ولا شي

نور متخله من الفلوس

الطريق كله نور تبسبس بالتلفون ساعه تعصب وساعه تضحك

مهتميت ولا يهمني اعرف............

دگت بينه السياره تقريبا ٣ ساعات

الطريق بين اغفه وبين اصفن وبين اتذكر مدرستي وابجي

بس رغم هذا احس مرتاحه

ممختنگه مثل خنگه البيت احس الهوا بارد يدخل بريتي استنشق بكل قوتي عبالك رح يخلص

وصلنه نزلنه من التكسي وصارت بوجهي قبه والمناير هيج الله ذب عليه بجي

ابجي وماعرف شحجي

ضليت امشي وابجي نور خلتني براحتي

امشي ودموعي تنزل

ياسيدي ومولاي ماريد بس صحتي ترجع

سيدي احنه ايتام ونظلمنه هواي

اريدك بجاهك عد ربك تنصفنخ وتخلصنه من الي احنه بي

كمت ادعي لخواتي ولنفسي وصلت يم الباب مكتوب

ياساقي عطاشى كربلاء

اخخخخخ يابو فاضل اجيتك وتعنيتلك وني عليله وادري علاجي يمك

فتنه جواا وجان ازدحام لان جمعه فتت ودموعي تتسابق

كلشي محجيت حاولت الزم الشباك كوه وصلتله

شبعت بجي احس هموم على قلبي

داطلع حتى اصلي ومره صارت بوجهي نطتني جكليته وكالت ابو فاضل نطاني مرادي باوعتلهه وابتسمت كالت ينطيج مرادج ان شاء الله

اخذتهه وطلبت ترجعلي صحتي

صليت ودعيت رب العالمين يربط قلبي بالصلا وبعد ماتركهه

كملنه وطلعته زرنه الامام الحسين وهم صلينه صلاة الزياره وطللعنه

اشترت نور حلاوه وكفر وبعد مدري شنو

طلعنه ووكفنه تكسي وتوجهنه لبغداد

بالطريق نعست نمت فزيت واكفين بالسيطره مال دخول بغداد وازدحام

جان الساعه ب5 العصر والدنيا شته وبدت تغرب

واگفين وچان السايق يشغل المسجل

جان تطلع لطميه اسمها سوالف دافيه لقحطان البديري

البيت لومابي سوالف دافيه

گول شالت منه امي العافيه

يمه يمه عطشانه عليج

وينج اريد اموت بين اديج

امي ويين امي وين

سمعتها وكمت ابجي

عبالك مكتوبه علينه

اباوع لنور مغطيه وجهه وشابعه بجي

السايق تعذر وراد يطفي بس نور كلتله بقي

وصلنه للبيت جانت ساعه 6 دنيا ليل

نور مقبلت ابو التكسي يوكف بباب بيتنه كالت حتى ليكولون ميلجن كروه ذبنه شويه ليغاد

نزلنه ومشيته وصلنه للبيت

نور ضمت الحلاوه بالعلاكه الي بيهل المحرم مال صلا حتى لياخذوهه لان جابتهه لام دره

فتنه للبيت

جان ابويه واسماء گاعدين

سلمنه ودخلنه

ابويه ضل يحجي على نور

دنيا ليل جاياتني متكولن بالبيت يضل بالهم

نور نهدت بي

طبعا اجي دنيا ليل ترى احنه رايحين لكربلا مو لراس الشارع وبعدين ترى ساعه ٦ يوميه اجي ب ١٠ شو متحجي

واذا نت خايف علينه ليش موديتنه بيدك

عافته وفاتت وني فتت وراها

بدلت ورحت توضيت وصليت

بس هم اختنگت بالصلا

لزمت سبحتب وكعدت اسبح

نور سدت باب الغرفه وضلت تروح وتجي ع البلكونه

مرام؛ نور شبيج

نور: لا لا مابيه شي

مرام: لعد دسدي باب البلكون بارده ثلجت

طلعت وسدته وراها

كاعده ع الجربايه وجان تفوت اسماء

اسماء: لعد نور وين

بعدني محجيت وجان تشوف حركه بالبلكون

ضلت تسنط وني قطرة دم مبقى بيه لحضات وچان تفتح باب البلكونه وتسحل نور من شعرهه

لگت الموبايل بيدهه........................................

مشهد مستقبلي:

مره اول مبطلوني ابويه ومرته من المدرسه جنت ابجي والدنيا طالعه من عيني طلعت عود عصبيه عليهم كتلهم حذاء ماعندي اروح للشغل اشترولي

ابويه من شافني احجي من ورا خشمي لزمني ملخني تملخ كام يعيط عليه يكلي تشتغلين وتنطيني الفلوس الي صرفتهن عليج من اجيتي للدنيا لهسه وغصبا عليج وماكو حذاء تشتغلين بالي عندج اتذكر بيومها مرته البومه كاعده ع التخم تباوع عليه وتضحك بشماته صدوك حقدت عليهم ثنينهم............................!

************************************

اكو جُملة تگول

" لن تبلغ النضج حتى يُهدم أمام عينيك كل ما كُنت تؤمن به "

وفعلياً بعمرك ما راح تحس إنك فهمت إلا حتى تاخذ درس يعلمك انه ما تنطي لأحد كلشي حلو جواك، درس يفهمك إنه الثقه والأمان ما ينفعون يكونون لأي شخص لمجرد إنك انبهرت بطريقته في البدايات، درس يعلمك إنه كل اللي سمعته كان مُجرد كلام ما اله أي أفعال.........

- إنها للمرةُ الاولى التي تمنيتُ فيها بأن اتقن الرسِم لأرسم ألمي، المرة الأولى التي شعرتُ فيها، بأن ثمانية وعشرون حرفاً لا تفِي بالغرض.

كاعده ع الجربايه وجان تفوت اسماء

اسماء : لعد نور وين

بعدني محجيت وچان تشوف حركه بالبلكون ضلت تتستط وني قطرة دم مبقى بيه لحضات وجان تفتح باب البلكونه وتسحل نور من شعرهه

لگفت الموبايل بيد نور

اسماء : گـ….به  داااايححححه ام الصالوونات تتواعدين بنص البيت ادبسززززز

فوتتهه سحل  من شعرها للغرفه

وگامت تعيط بعلو حسهه على ابويه

اجه يركض الطلي مالهه

بدون ميفتهم شي بس شاف اسماء تضرب بيها اخذ نور من ايدهه واستلمهه ضرب

يضرب بلا رحمه وهوا ميعرف شكو

ونور هلگدوتهه بين ايدهم

ما انكر نور غلطت وغلطهه جبير وياما حذرتهه بس هيه متسمع كلام

وهاي تاليتهه

كمت ابجي اريد اخلصهه منهم خلوني وكتلوني فوگاهه

اسماء: گ..ب ساقطات امهات الصالونات 

گو… جن كلهه سواا

يوميه طرگاعه  يوميه بلوه شكل يمتى الله يخلصني مننججججن

اليوم جايبه تلفون للبيت باجر تفوتيلي رجال ببيتي

وني اكول دكن رجل اله يروحن لكربلاء اثاري يروحن يتواعدن الساقطاات

تحجي وتضرب بينه وابويه فوگاهه

هيا مو خوفا علينه ولا خوفا على سمعتنه بس لگتلهه حجه حتى تفتح علينه باب من المشاكل

شبعنه كتل بيومهه وفكو مني وابتلشو بنور

اسماء اخذت التلفون منهه وكلتلهه افتحي

نور كلتلهه مو مالي مال زبونه نسته وجبته بالغلط

التلفون بيد اسماء  وچان يدگ مكتوب ع الرقم وتيني

اسماء فتحت خط وسكتت

اجاهه صوت ها حبيبي وينج كتلني البرد گرصت نور واشرتلنه حتى تحجي

نور بتردد: أ ألو  ممنو ؟

— هاي شبيج حبيبي شبي صوتج ؟

نور: اخي التلفون صاحبته ناسيته وباقي يمي

— نور شبيج ياتلفون ؟ شنو ماعرف صوتج

سدت الخط اسماء ورجعت سحلت نور ملختهه تكلخ

اله تفتحيلي التلفون

تعبت من الكتل هيا وابويه عافوهه كالو باجر ناخذه لابو التليفونات ونفتحه

اخذته اسماء ضمته

كل هل مشكله ولمى ولا ادخلت ولا وصلت للغرفه

نور حالهه يبچي الصخر متمدده بالغرفه ومزورگه

ساعه اكول تستاهل هيه الجابتهه لروحهه 

وساعه اكول بسببهم وصلت لهبج حال لان كثرة الكتم يولد الانفجار

صاحت عليه اسماء بغرفتهه وبدت تحقيق

اسماء: اي مرام احجي شتعرفين على نور وعلى التلفون  ومنين جابته منيلهه فلوس وين تطلع وين تطب هم تطلع من الصالون احجيلي كلشي ولتخليهه تعم عليج...........

مرام: باجي اني بكلشي مادري كدامج تفاجئت من شفته

والله حتى مادري منيلهه فلوس ومشتريته  وهيا بالصالون ولا تطلع حتى اذا ام دره تريد شي تدزني اليه وخابري ام دره واسأليهه اذا متصدگيني

اسماء: يعني متدرين بالتلفون  ولا تخابر كدامج ؟

لاول مره بحياتي احلف كذب

كولش اخاف من الحلفان بس اضطريت احلف لان اذا ما احلف ادخل بمتاهه الهه اول مالهه اخر

باجي والله كلشي مادري

ونتي كدامج صحتي شلون تعبانه وصارلي اكثر من شهر مبطله من الصالون بعد شلون اعرف

ولو ادري جان اجيت كتلج غير انتي امنه وتخافين علينه

حجيت هيج حتى تفك مني ومو كلسع تسألني

اسماء: سهله تبين باجر اخذ التلفون لابو التلفونات واخلي يفتحه

اسماء شكد حاولت ويا نور حتى تعرف منيلهه الفلوس بس نور اذا الحايط حجه هيه تحجي لا تجاوب ولا تحجي

لليل كاعدين بالغرفه اني ونور

ساعه الوم بيها ساعه اواسي بيها

جبتلها مي وغسلت وجهه

سوده عليه صاير خريطه مينشاف

ساعه ٢ بالليل اني ونور كاعدين منعرف مصيرنه شنو وشنو راح يسوون الصبح

فاتت علينه لمى  وحجت

لمى : نور راح اجيبلج التلفون واخليلج جبه وشال ع التانكي مالنفط بالطرمه ونهزمي لتبقين ناويلج نيه گشره  روحي بأي مكان بس اخلصي منهم

نور فزت من مكانهه مخروعه

نور: صدك تحجين لمى؟؟ شيردون يسوولي اكثر من هيج

لمى: نور مجايه حتى اسولف ترى بالبوكه اجيت

وحتى على مرام راح تعمين سوي الي كتلج عليه راح اطلعلج الجبه هسه واخليلج بنصهه التلفون  وعندي٢٥  راح اخليهه الج وياهن وبس ينامون الفجر اطفري

نور مجذبت خبر هيا منا كارهتم

مرام ؛ نور وين تروحين كعدي وسكتي 

نور : مالج دخل اني اريدهه حجه حتى اطلع من البيت

لان اذا نفتح التلفون كلنه نروح بالرجلين

مرام كلشي حاجيه بي على اسماء وعلى ابوج وهوووايه حجي

اني اعرف شصرف ووين اروح واذا ماخليتهم يبوسون الايادي ماطلع اسمي نور

خفت بالزايد گمت ارجف ماعرف شسوي

كمت ارجف حتى النوم نسيه مكابله نور وكاعده صارت ب ٤ ونص

نفتحت الباب على كيف

فاتت لمى

حجت بصوت ناصي

مرام روحي طلعي سوي روحج تترسين الصوبه نفط حتى من ينفتح باب الصاله كولي اني جنت اترس نفط لان الغرفه بارده واريد اشغل الصوبه

ومن تطلعين خل تلحگج نور وتطفر

يلا استعجلن مادام نايمن

طلعت بس الرجفه سرت بجسمي

اريد اوصل للباب مال صاله وكلسع يتخيلي احد يجي ورانه ويشوفني دا اهزم نور ختمت القران لحد مفتحت الباب ( الباب مال صاله بي صوت من ينفتح)

الحمدلله فتحته ومحد سمع طلعت وطلعت ورايه نور  بس طلعت فتت اوكض حتى الباب مسديته من الخوف

نور طلعت باستني وباست لمى  وطلعت

اني من الخوف  رجعت للغرفه وغطيت راسي

ماريد اشوف ردة فعلهم من يجون للغرفه وميلگوهه

خفت عليهه وخفت على روحي لان ادري مراح اخلص وراح يشملوني وياهه...........

گوه اريد اغمض عيني اريد انام بس مدا اكدر

ساعه افكر هسه نور وين راحت وشنو وضعهه الدنيا فجر وبعدهه مظلمه  اخاف خطفوهه اخاف صار عليهه شي

ساعه افكر اذا رح يفتحون باب الغرفه ونور ماكو شنو تكون ردة فعلهم

ابجي اريد بس انام مگدرت

كمت اقره ايات

حتى صارت الصلاه وخفت اگوم اصلي اخاف يشوفوني ويكولون طلعت كدامج

ليله من اسوء ليالي حياتي

منا اني صحتي تعبانه ومابيه حيل ومنا سالفة نور الي هدت نص حيلي ونوب اهلي شبعوني كتل

ربي طلعنه من هاي المصيبه واستر علينه ياارب

صارت ساعه ب ٦ وني منايمه 

بالي يم نور كولش خايفه عليهه

(بيا طبيعه من مااكدر انام اضل احسب من ١-١٠ واعيد من١٠-١ لحد ما ادوخ وانام )

جربت هاي الطريقه ومنا اني تعبت وجنت طالعه طريق محافظات

شويه ونمت

نمت واجنت اتمنى ما اكعد لان اعرف راح اكعد على مصيبه

ب ١٠ فزيت على عيطة اسمااء

اسمااء: لجججج نووور اطلعي وين اخذتي التلفون عبالج ماحس بييج بييج بربوووك طلعي دتخابرين منووو

اخترعت على عيطتهه فزيت مخروعه

مرام: ها باجي شكوو

اسماء : اختتج اخذت التلفون ومدري وين خاتله اصيح عليهه متجاوب كومي شوفيهه وين

كمت مثل المخبله  ادور عليهه ادري بيها ماكو بس خفت لا تنتبه عليه مادور واتورط

شدعيلج نور عيشتينه برعب

كمت ادور وابجي

مرام: باجي نور ماكو

اسماء؛ نور دوريهه عدل اخاف متخربطه واكعه بمكان كووووومي بسرعه

ني هم مقصرت فريت البيت فر ورجعتلهه

مرام: باجي والله ماكو

احجي وابجي

لزمت تلفونهه وخابرت على ابويه

اسماء؛ الوووو حااارث الحگ نور طينت راسك

نور انهززمت واخذت الموبايل

كامت تتوعد وتدعي عليهه

اسماء؛ يا گ..ه يادايحه يا ام الزلم تنهزمين وين تروحين اجيبج لو بسابع سمه وادوس راسج بالقنده ياكلبه يابت الكلب

ضلت تفشر وتغلط

اخر شي لزمي عباتج وطلعي

افترت ع الجوارين كلهم

مشفتو نور نور نهزمت وصخمت وجهنه

حتى الي ميدري هيه كلتله وفضحتنه فضيحه

بالي كله يم نور وماعرف شسوي لا اكدر اعرف اخبارهه ولا اعرف وين راحت ….

نور : طلعت من بيت ابويه وناويه عليهم نيه گشره يا اسماء وحارث اذا ماندمتكم ما اطلع بت ابويه

لابسه الجبه ولافه وجهي بالشال حتى لحد يعرفني

طلعت اركض من يم بيتنه فجرية شتا بارده وظلمه

طلعت الفرع مالتننه شويه اخذت نفس

وصلت للشارع العام

ولا سياره ولا طير بالشارع نوب زاد الخوف

اخاف ارجع اخاف احد يشوفني واخاف ابقى

واكفه وادعي رب العالمين يوكف ويايه ويسهلهه عليه

اجه تكسي وكف

گتله لمنطقه ….

كال اصعدي

بدون ماعامله  راسا صعدت

كمت ابجي ع الوضع الي وصلناله

انتبه عليه السايق وحجه

السايق: شبيج عمو اكدر اساعدج بشي؟

نور : لا عمو رحم الله والديك

السايق: بس لا رجلج طاگج وشارده

نور : لا عمو  مرت ابويه تعاركت ويايه وطردني

السايق: لا يالماتستحي؟ وامج وين بويه

نور: امي بالنجف

السايق : عمت عيني عليج بويه لعد شعدج رايحه لمنطقه….

نور: عمو ع القرب بيت جدي هنا ومن اوصل اخابر عليهه تجيني

السايق: الله يعينج بويه

نور: عمو بس فدوا اذا لكيتهم مموجودين عادي توديني للنجف

كلت بيني وبين نفسي اذا بيت جدو مموجوين اروح للنجف يم كبر ماما واكعد يمهه ماعندي غير مكان.......

ساعه ب٣ الظهر اجه ابويه

مانكر جان وجهه مخطوف لونه

ويسال بيش ساعه كعدتو وبيش ساعه افتقدتوهه ومن هل حجي

فات للغرفه تعارك ويا اسماء

حارث؛ هسسسسه ارتاحيتيي من هجت البنيه؟؟؟

كللله من وراجججججج اذا صار بيها شي محد يخلصج من ايدي

٢٤ سااعه تنگييين برااسي بنااتك ويااا بناتك

اني شكووو تزوجتجج لعد مو علمودد بنااتي وتالي متحملتيهننن؟؟

لججج هسه اذا اجه اخوهه شكللله فهمييني شكللله

ضل يعيط ويصيح واحد يذبهه براس الخ واحد يحمل الخ مسؤليه هزيمتها

ابويه شكله صدك خاايف

اسماء تعيط بجهه وتكله بتك گ..ه لوماعدته شي بالتلفون متنهزم وتاخذه

من سمعت اودي لابو تلفونات نهزمت الله واعلم شبي

وانت على شنو خايف

خابر اخوهه وكله السالفه كلهه وكله نهزمت

" موقف اسماء وحارث جان قوي يعني رغم همه ظالمين وكل الي صار بينه وراح يصير بسببهم بس بسالفة نور همه اهل الحق حتى لو كالو لحيدر يكولوله لكينه عدهه تلفون وردة فعل اي اب يضرب بته وهيه زيدتهه واخذت التلفون ونهزمت الحجي والملامه راح يصير على نور"

شجعته اسماء يخابر على حيدر

" من سمهه وخباثتهه تريد تخربنه ويا حيدر وتريده يغير نضرته علينه "

رفع التلفون ابويه وخابر عليه

گله اختك نهزمت

تعال للبيت وافهمك

تقريبا ساعهر واجه حيدر بزيه العسكري

حيدر ؛ هاا يابه وين نهزمت شنو السالفه شصاير احجيليي

سولفله ابويه السالفه كلهه وكله ضربتهه بس مگله زورگتهه وعدمتهه العافيه

حيدر تخبل ساعه يسب بنور وساعه يعيط على ابويه يكله كله بسببك شنو بنات حديثات مطلعهن بالصالون كله من وراكم انتو تحملو نتيجه غلطكم

يلوب وميعرف شيسوي

كال ميصير هسه نبلغ لازم ورا ٤٨ ساعه

كال لابويه ماريد جنسس مخلووق يدري واذا سمعت السالفه طالعه اعلگم فلقه

صاح علينه اني ولمى ونبهنه

هوا كاعد وجان تفوت جيرانه ام جليل

—ها خاله بشرو لگيتوهه

عاط حيدر عيطه هزز البيت هزز حتى ابويه اخترع

المره رأسا طلعت

حيدر: اسممممااااااااءءء اسمممااااااءء منووو سمحلجججج تحججين انتي منوووو حتى تحجين

اسماء: ابو كرار على كيفك طلعت دا اسأل بلكي خاتله يم الجوارين وكتلهم

حيدر : يعنننننيييب مفتره ع الجوااااريين كلهمممم ومسولفتلهممممم

لجججج مو عدج جهاااااال متخافين على سمعتتتتهممممم

بعصبيته گام وشبعهه كتل

ابويه محرك ساكن ولا حجه شي لان يخاف من حيدر

طلع حيدر

واسماء لبسي عباتج واخذي جهالج وطلعي

قبلهه تعاركت ويا ابويه

اسماء: انتتت مابيك خيير مو رجال شننو ابنك يضربني كدام عينك وانتت ساكت 

شبييك ترجف منه انتتت ابوو لو هوا ابوووك  وبعددين بتكم گ..ه اني شكوووو

عيطت لحد مبزعت اخذت جهالهه وطلعت

ابويه كام لف راسه ونام

اني ولمى وحده صافنه بوجه الخ

ولا عبالك بتهم مهزومه شوفي ولا مهتمين.........................................................

************************************

‏"تعٌود على الفراغ ، وعلى مُرور اليوم دون صوت أو رسالة أو حتى وجه يطٌل عليك ، تعٌود أن تكون وحيِد حتى لاتُعاني كثيراً عِندما يبتعد عنك شَيء أعتدت عليه."...

************************************نعزي صاحب العصر والزمان بحلول شهر محرم الحرام وذكرى استشهاد الامام الحسين عليه السلام عظم الله اجورنا واجوركم بهذا المصاب وجزاكم الله وإياكم افضل الجزاء بمصاب سيد الشهداء.........

مرحباً 🌈💕

أوجه لك هذه الرسالة لتبدين سعيدة لأنك تستحقين ذلك ، لا تكتثري لأمر قد مضى ، حاربي من أجل لحظة اليوم لكي تبدو أكثر إشراقاً من الأمس ، كوني على يقين بأنكِ تستحقين دوماً أن تكوني سعيدة وقلبك يكون أكثر اشراقاً ، المٌر سيمر وسينبت مكان ذبلانك زُهور فأبقي مبتسمة دائماً لان هناك اشخاص يخشون حزنك ابتسمي ولتكن بداية صباحك ابتسامتك ولا تدعي احداً يهزم ابتسامتك الجميلة اتمنى لكِ يوماً جميلاً كجمال مبسمك ♥️♥️.....

***********************************

يومين  واجانه حيدر

حيدر : ماكو خبر ع البنيه

حارث : لا والله كلشي ماكو مخليت مكان مدورتها بي

اني ولمى وحده صافنه ع اللخ اصلا مطلع من البيت على كد دوامه ويرجع والوضع كللش طبيعي عدهم

حيدر : اخخخخخخ الله الزمهه تطير خما تطير الله ميخلصه مني اني رجااال شكدنب شكبرني اركض ورا طفله تالي عمري

طفله تخليني افقد عقللي؟؟

يابا  مرحت لعماتي لخوالهه لخالاتهه؟؟ اخاف رايحه يم واحد منهم

حارث: سالت ورحت وماكو

بابا قدم بلاغ وفضهه

حيدر : ياااابااااا شنووووو اقدددم بلاااغ؟؟ شووو تحجييههه بسهووله

البنيه ممخطوفه اروح يم جماااعتي اكلهم اريد اقدمممم بلاغ لاننن اختي انهزمتتتت؟؟

والي كتلللك هياا عابره السن القانووونب بعني منكدددر نسووووي شييي لاهيه طفله ونكوللل ضاعت ولا هيه عدهه امراض بعقلهه

ارووح للمركززز شكلهممم فهمننني شكلهمم

اكلهم اختيييي عمرهه ٢١ سنه نهزززمت

كلللله من وراك انت ومرتك كللله من ورااكم بنيه معرفتووو تلزموهه؟؟؟

محتااج شغل انت وتخليهه تشتغلل

والله راح تخبلووني

يحجي ويعيط احسه رح ينفجر من العصبيه

اخرها حجه

— كوم نروح نقدم بلاغ انو البنيه اختفت

دزيتهه للاسواق وراحت مرجعت بعد

غير هذا الحجي متحجي

شال سويجه والمسدس وكال لابويه منتصرك بالسياره استعجل

ابويه نخبص بدل بسرعه وطلع

اسماء يومين ورجعت وحدهه

وتكوم تكعد تسب بنور وتغلط عليهه وبهاي الفتره شويه لاهيه من عدنه

بابا وحيدر راحو قدمو بلاغ واجوي حيدر بيومهه بات عدنه لان جان بالواجب واجه كبل على بابا اخذه وزاح قدمو بلاغ ورجع هلكان نام خطيه بهدومه  وحذائه على جربايتي

شفته انقهرت عليه

رحت نزعته حذائه وغطيته

اسماء ضلت تروح وترجع ع الغرفه مالتنه

اني مهتميت كلت يجوز تطلع للبلكونه او شوف وين

لحد مطلع حيدر  المغرب من الغرفه عيونه براسه

اول مطلع جنت كاعده بالصاله وصافنه  فززني بعياطه

حيدر: كووووممممي سوووويلييي سممم راسي راح ينفجججر

خفت من عيط وني منا بالي يم نور وكل فكري يمهه ونوب صحتي بالنازل

ردتهه حجه حتى ابجي

ركضت للمطبخ داسوي اكل

اجه ورايه

حيدر : مرام لتسوين اكل بس صبيلي جاي

نتجه ع الكاونتر وطلع جكايره ووكف يشرب

من كد ما شكله عصبي ويخوف حتى خفت ابجي

الدموع جمدت بعيني

حجه هوا

— شبيج شو الوجه مكلوب

مرام: لا مابيه بس شويه تعبانه

حيدر: شلونج بالسادس؟؟

هوا حجه هيج وني كمت ابجي

حيدر : هاا يمعوده شحجيت اني

مصخمه احجي لتخافين اتلاحكي روحج مادام بداية السنه

مرام: حيدر بطلوني من المدرسه

حجيتها وكعدت بالگاع ابجيي

حيدر: باعي مرام

حقه ابوج بعد الصار يبطلجن

ترى سواية نور مو هينه

مرام: حيدر قبل لتنهزم نور

اول مبدت المدرسه تعاركت ويايه اسماء وبطلتني

كمت وكفت على حيلي وفتحت راسب وراويته الضربه الي براسي

شووف لان مقبلت ابطل شوف شلون ابوك فتح راسي

جرني من راسي وباسني وحجه

حيدر: وعيونج اله اندمهم بس اصبريلي خل اخلص من سالفة نور وني بيدي ارجعج للدراسه بعد شتردين

كمت اشهك بحضنه وهوا يسكت بيا.......

نمت نومه عميقه رممعدت اله على صوت بيبي

— يااا هاي ياهي نايمه هنا

فتحت عيني وباوعت  عليها وحجيت

— اني بيبيي نور

— ياا ولج نور بت مروه؟

— اي بيبيي نور

حاولت تنزلي حتى تحضني

كمت بسرعه حصنتها وكمت ابوس بيها

— يااا شجاج ولج شبي وجهج

بس لا حويرث طاگج والله اچسر ضلوعه او ماد ايده عليج

كمت ابجي على كلامهه كعدتني على جربايتهه وكامت تهدي بيا

شبيج بيبي سولفي لاتخافين

انه وخوالج بضهرج مانرضى احد ياذيجن

نور: بيبي خل يكعد خالو ونسولف واسولفلكم كلشي وانتو احكمو

كعدو خوالي ونسوان خوالي

سوو ريوك واني كاعده بصف بيبي ماريد ابتعد منها

كملو ريوك وصاحني خالو محمد للديوانيه

داروح وبيبي كالتلي سنديني خل اجي وياج

سندتها ومشينه  وصلنه للديوانيه

فتت

مغيرين هوايه بديكورها واثاثهه

ومكبرين صورة جدوا الله يرحمه وخاليهه مقابيل الباب

من شفت صورته بجيت

هذا الانسان العظيم الحنين الي ماكو مثله يموت وابويه العار يعيش ؟؟

فتت كعدت كبال خالو وبيبي بصفي

حجه خالو

اي نور احجي شكو شصاير

نور: خالو راح احجيلك من ماتت ماما لحد هسه واكولك على معاناتنه وانت احكم

هز براسه

واني بديت احجي

— من ماتت ماما وطلعنه من بيتكم رحنه لبيت عمو

من خابر جدو على بابا وكله خاله ماتت بابا الي مقبل يجيبنه احنه كمته نبجي كال مابيه حيل تعبان من الطريق

مرت عمو حارت شسوت بينا لان فد وحده نحسه  ومتتحمل اي احد كامت تحير شسوي بيه وبخواتي نشتغل وننضف ونوب اتهم بينه نبوك منهه

صارت مشكله وابويه ضربنه كدامهه ورجعنه لبغداد

من رجعنه كام يشرب ويطلع يعوفنه

مره كال روحو للمنتزه راح يجي صديقي

بالصدفه شفنه اسماء طالعه من بيتنه ورا فتره كال اريد اتزوجهه اتزوجهه وطبعا هاي الفتره كل مانكله ودينه لبيت جدو يتحجج بشغله ومن نكله خل نخابرهم يكول ماعندي رصيد لحد ما ايسنه

مافد يوم كال انتو خابرتو او سالتو علينه

وسمعت بهل شي من جدو تمرض انت اجيت وكلتلنه 

بطلنه من المدرسه غصب عنه بله اني طبني مرض بس لمى ليش بطلهه مرام ذيج تنوح على دراستهه صف سادس علمي وشاطره وبطلهه لان مرته متقبل تكمل ذيج وينهه هيه والميته سوا مدري ساحرتهه مدري شمسويتلهه اسماء الليل متنامه تسوي سوالف توكف العقل

لو تكص شعرهه وتحركه لو تعيط بنص الليل وتصيح اجاني

وشغلنه غصب عنه وياخذ فلوسنه كلهه وهوا ممحتاج

وطلعتي من بيته

لان لكه عندي تلفون

مانكر اني غلطانه بس خالو شغلي كله ع الحجز

الزبونه من تحجز يمي وتجي اني استفاد

واشتريته حتى اكدر اطلعلي كن فلس وذيج ام الصالون وروح اسالهه على اخلاقي واسألهه اذا عندي زايده ناقصه

من اسماء عرفت عندي تلفون لزمتني كطعتني تكطع واجه ابويه بلا ميفتهم شي هم ضربني

وهذا وجهي شوفو كدامكم

وذيج مرام يوم فاتحين راسهه يوم كاسرين ايدهه

لان متقبل تبطل من المدرسه

وهيه كله من تعبهه ربع متاخذ منهم

خالو تعبنه والله تعبنه ماعدنه سند

واجيت يمكم اريد تلكولنه حل واذا صعبه عليك كلي واني هسه اطلع وما اورطكم

بيبي عاطت ؛ شنووو الصعبه عليه جاا غير خوالكم واحنه بيت جدجن

جاا اذا شلنه ايدنه وين ترحن للشارع  منو ياخذ حقجن الغربه؟؟

حجه خالو : اني رغم ما اطيق ابوجن وكارهه وماريد اتصادم ويا وما انكر ضايج منجن لان اكثر من مره نتصل وابوجن يكول ميقبلن يحجن وياكم ومن غير اختج لمى لسانهه شطوله من خابرت تطالب بورث

بس انتن تبقن بنات مروه الي هيا اختي

لتتوقعين نعوفج بالشارع

وحقج يوصل لحد عندج ولتتوقعين افوت هذا الضرب الهم اخذلج حقج ونشوفلجن حل بعيشتجن

انتن وصية ابوي لحد ما مات يوصي بنات مروه يابنات مروه

والجن حق يمي تكبرن وتاخذنه

نور: كلشي منريد بس نريد ابويه يجر عدل ويانه

الخال: الي تردي يجرالج وهسه كومي ارتاحي ولتفكرين بشي ولتحجين ويا اي احد وتكولين اني ببيت جدي

خل اشوف شيسوي

ارتاحيت من حجي خالو

خوالي ادري بيهم كول وفعل زلم بمعنى الكلمه يعني من كال ناخذ حقجن صدوك ياخذو مو بس حجي لسان

طلعت بالحديقه وكاعده اتأمل بالحديقه مال جدوو كل ذكرى تجيني تموتني قهر

………

ضل حيدر يتردد علينه

والبلاغ لهسه كلشي مصار منه

بيوم اجه الظهر

اسماء  ماخذه لمى والجهال وتفرفر يم الجوارين وابويه بالشغل 

بس اني بالبيت

فات سلم وكعد

حيدر: ايي مرام لعد البقيه وين

مرام : بابا بالشغل وباجي اخذت لمى والجهال وراحت يم الجيران

رحت داسويله جاي اجه ورايه

حيدر: اكلج ميمي صدوك ابوج راح لخوالج ولبيت عماتج  وشاف اذا نور يمهم لو لا

شو اني هذا الانسان ماصدك بي

مرام: والله باب البيت مطلعه ولا رفع تلفون على اي احد بس يروح لشغله ويجي

حيدر : اني متاكد هيه لو يم خوالج لو يم عماتج

ولو عماتج استبعدهن لان لو يمهن جان كالن لابوج ع الاكثر بيت خوالج

شلونهه علاقتكم بيت جدج؟

مرام: زفت بابا حارمنه من الدنيا كلهه

واخر شي لمى تعاركت ويا خالو وسده بوجهه

حيدر : مجانت تسولفلج شي.........

بلعت ريكي وحجيت : لاا اصلا من بطلت ابتعدت  عنها

جنه بحكم شغل واحد فكولشي نسولف

بس من بطلت ابتعدت

صحتي متساعد احجي واسولف كل همي انام بلا كوابيس

حيدر : خل اخلص من طرگاعت اختج واتفرغلج

والله شكلج راح تهدين حيلي

احير بيج اوديج شيوخ وساده لو ارجعج للمدرسه لو مستشفيات علمود راسج المفتوح

حاول يطلعني من المود الي اني بي

ضحكت وحجيت: كلشي ماريد بس خل نور ترجع لا اريد مدرسه ولا صحه ولا اي شي اريد نور ترجع

حجه: الله كريم بأقرب وكت

اله اكلج عندج رقم خوالج

مرام: لا والله شسوي بي وني تلفون ماعندي

بس بتلفون باجي وبابا

حيدر: ها شتسوي بي اسماء بس لا مخيله عليه

المهم حاولي تحصلي اليه

ضحكت وكتله تدلل

بقى شويه وراح......

احنه فقدنه الحنيه من زمان من وفاة ماما محد احتوانه وحسسنه انو احنه بشر

ابويه التهه بعائلته الجديده ونسى انو عنده بنات

وخوالي وعمامي وكل اقربائنه يمكن لو مره لو مرتين شفناهم ورا وفاة ماما

كولش جنت محتاجه اخ او اب يطبطب عليه ويكلي اني وياج

جنت محتاجه السند

من حضني حيدر حسيت احساس كلش غريب

احس اكو حايط اكدر انتجي عليه

وكلامه مجرد كلامه جان مطمن لروحي

صح حيدر حاول يهديني ويسكتني  ويحاول يضحكني

بس احسه اعصاب

دمارات وجهه وايده گامت تطلع

وهاي احد مميزات حيدر

من يصير اعصاب حتلو ميعيط بس دمارات وجهه وايده تبرز

صبيتله جاي واخذه وراح للصاله

كلسع تفوت من يمه اسماء  ومدلعه دشداشتهه

(بعدين افتهمت السالفه)

هوا اخذ غراضه وطفر

……….

نور

وصلنه منطقة بيت جدو اهل ماما

وني الطريق كله اصفي بالموبايل  ونطيت خبر لـ… ميتصل ابددد

بقيت بس رقم ام دره وزبوناتي

وصلت ساعه ٥ الفجر لبيتهم والسايق خليته ينتضر

نزلت دگيت الجرس مره ومرتين وثلاثه وبديت اايس شويه ونفتح الباب

خالي محمد مخروع

الخال: هاا خالو شصااير يا ستار ابوج خواتج بيهن شي  هذا وجهج شبيي

نور: خالو اني  البيه مو ابويه ولا خواتي

شاف التكسي واكف بالباب  عافني وتوجه اله

الخال: خويه منين جيتهه ؟؟

السايق: والله ياعمي من منطقة ال…

الخال بيش الساعه ؟؟

السايق : ب ٤ ونص هيج شي

الخال: مشكور عمي  نطتك الكروه لو لا

السايق ؛ اي بويه نطتني

وديرو بالكم عليهه لان شكل مرت ابوهه مأذيتهه

الخال: هذا هو عمي مشكور توكل

راح السايق ورجع خالو

فوتي خالو بغرفة بيبيتج ارتاحي ونامي والصبح نسولف

فتت للبيت اباوع للحديقه

اخخخخ هاي الحديقه شبيها من ذكريات

جدو الله برحمه  جان زارعهه نارنج وبرتقال ورمان وعنب  وميقبل لاي طفل يفوت للحديقه و٢٤ ساعه يسگي بيها

واذا احد گطع من الفاكهه يتخبل يكول بعده ملاحگ جان هوا يگطع النه ويجيبه

جانت الحديقه تخبل  هسه صايره هيمه كلهه تراب والزرع ميت

انذكر ماما الله يرحمه وخالاتي جانن من يلتمن ببيت جدو يطلعن العصر يكعدن بالحديقه يكولن ريحتهه ترد الروح وبيها هوا بارد

صافنه ونزلت دموعي

ضلت بس ذكراهم

جدو مات وماما ماتت وخالاتي تطشرن وبعد متعود ذيج اللمه

فززني صوت خالي وهوا يحجي

- فوتي خالو جوا الدنيا بارده لتتمرضين

فتت لغرفة بيبي

اخخخ شكد احب هاي الغرفه اشم بيها ريحة ماما بيبي حبيبتي نايمه ع الجربايه مالتهه

نزلت فراش من النظده وحاول انام

صافنه ع البرده الي بالغرفه  نفسهه من زمن ماما ولا تغيرت

كلشي بهاي الغرفه قديم

الجربايه البردات الكومدي الي عليه الفراش

حسيت انو ماما هنا

هاي الغرفه بالذات جانت مال ماما من جانت بنيه

تسولف تكول تعاركت ويا خواتي تكلهم اني الجبيره ولازم غرفتي جوه

وتالي رايحه لابوهه ذابتلهه دمعتين

منطيهه الغرفه الهه

ماما جانت الجبيره بأخوانهه واخواتهه وجدو وبيبي كللش جانو مدلليهه اكثر كل اخوانهه

وحتى من تقدم بابا لخطبتهه بيبي وجدو متخبلين كالولهه شلون ننطيج لواحد متزوج

بس هيه لان حبته  سوتلهه زعله ويومين متطلع لدوامهه ولا تحجي وياهم حابسه روحهه بالغرفه

لحد مأجه جدو وكاللهه موافق وبايسهه من راسهه يكلهه شكم مروه عندي هيه بس هل وحده وتزعل عليه؟

وصارت القسمه

نمت بيومهه نومه مريحه بشكل مو طبيعي احساسي تجاه هذا البيت مو عبالك بيت جدي لا عبالك بيت امي وامي لهسه بي..........

نور..

باليوم الخامس كاعدين نتريك وجان يدك تلفون خالو

شافه رقم غريب

جاوب

الوو . اي عيني  منو؟؟

اهاا  اهلا وسهلا  هلا بيك عيني واحنه هم عدنه موضوع وياك ياريت لو تجيب ابوك وياك

هلا بيك بكل وكت منتضريك

احس الاكل وگف ببلعومي

اريد اعرف منو هذا

حجه خالو : هذا...............................................................

************************************

- رسالة لك أنت الذي تقرأ:

"ان الله خلق مع العسر يسراً، ومع الحزن فرحًا، ومع الالم حياة، أنهض اليوم، هذه الرسالة لقلبك الجميل، إبدأ من جديد وأستعن بالله وأفرح وكأنك تملك الكون بما فيه، فالله عند ظنك به فأفراحك قادمة إبتهج"📬🎈.....

روي أنّه لم يبقَ مع الإمام الحسين (عليه السّلام) يوم عاشوراء إلاّ أهل بيته وخاصّته , فتقدّم علي الأكبر (عليه السّلام) ، وكان على فرس له يُدعى الجناح ، فاستأذن أباه (عليه السّلام) في القتال فأذن له ، ثمّ نظر إليه نظرة آيِسٍ منه ، وأرخى عينيه فبكى , ثمّ قال : (( اللّهُمّ كُنْ أنتَ الشهيد عَليهم ؛ فَقد بَرَز إليهم غُلامٌ أشبهُ النّاس خَلقاً وخُلقاً ومَنطِقاً برسولك )) .

فشَدّ علي الأكبر (عليه السّلام) عليهم وهو يقول :

أنَا عَليُّ بنُ الحسين بن علي     نحن وبيتِ الله أولَى بِالنّبي

تالله لا يَحكُمُ فينا ابنُ الدّعي     أضرِبُ بالسّيفِ اُحامِي عَن أبي......

************************************

ها انا متعبه لم انم منذ يوم ولادتي

كنت أعتقد أن فَرط محبّتي للآخرين ، ستحميهم من التغيّر أو الذهاب ، لكنني تفاجأت أنه لا شيء قابل للحفظ، كان كل شيء إما أن يتغيّر أو يُفقد.

الخال: هذا اخوج حيدر

نور: شش شنو؟؟ شيريد ؟ عرف اني هنا

الخال:: شبييج  گمتي ترجفين چنج سعفه  اهدئي شبييج

نور: خالو شلون تكله جيب ابوك عدنه موضوع وياك  غير يذبحني وبلا ميرفله جفن

الخال: الى متى تضلين خاتله

انتي مو ردتي نسويلجن حل؟

عوفيهه ورايه والج الصافي

سكتت محجيت شي بس ضل بالي اخاف يجون هنا ويضربوني

……..

راح حيدر واجتي اسماء

كلتلهه جان حيدر هنا

اسماء : لعد لييش مصحتي عليه ؟؟

مرام: هوا اني ادري انتي بيا بيت

كلت للمى انو تجيبلي رقم خالي محمد من موبايل اسماء

وفعلا مقصرت جابته

ثاني يوم اجه حيدر ونطيته الرقم

حيدر طلع تقريبا ساعه هيج شي واجه

حيدر : يابا  باجر الصبح نروح لبيت جد البنات  حضر روحك

حارث: ها ليش

حيدر : نروح ونفتهم هواي يريدك بالاخص انت

حارث: ماشي

سالت حيدر اذا نور ببيت خالي او لا

محجه شي بس كال اطمني

ثاني يوم الصبح اجه حيدر على ابويه اخذه وراحو

كمت انتبه على اسماء

كل ميجي حيدر تتمكيج وتلبس دشاديش دلعه  وتحاول تغري

جنت ما انتبه بس هيه كامت تشكك الواحد

من تشوفه تتموع بحجيهه وتحاول تبرز مفاتنهه

سالت لمى

كالت معليج واسكتي لتسمعج

ني هم سكتت

وكعدت انتضر ابويه وحيدر يجون يجيبون نور  ممتعلمه ابتعد عنهه هلگد  احنه كله سوه ابد مفترقنه

شكد اشتاقيتلهه

……

نور ؛كاعده انتضر ابويه وحيدر ومنتضره مصيري ومنتضره شنو راح يصير

متوتره وقلقانه كولش وبيبي تهدي بيه

لتخافين واحنه وياج ومحد يكدر يطخ اضفر منج ومن هل حجي

صارت ب ١١ ندگ الجرس

وهنا لو تذبحوني قطرة دم متلكون بيا 

ما انكر خايفه منهم كولش

طلع خالي فتح الباب هذا الحجي ني خاتله بغرفة بيبي

سمعت صوت خالو بستقبلهم وفتحلهم باب الديوانيه

فاتو

وصاح على ابنه

جيب مي يابا

دخلو شويه وسمعنه اصواتهم علت

اسمع خالي يحجي بصوت عالي:

ابو حيددر البنيه صارلها ٥ ايام من جايتني

وانت متدري

شنو هسه تذكرت عدهه خوال

لو فرضنه البنيه مجايه يمي

يعني متكلف روحك وتخابر وتنطي علم لتنسى حارث ترى هاي بت اختنه واحنه خوالهه والنه حق بيهن

حارث: محمد انت تدري هنه ميريدنكم

اني ياهو مالتي

شنو مانعهن اني

محمد: تسمحلي اجذبك واكلم ايي  انت مانعهن؟؟

هسه اصيحهه واسألهه وشوف جوابهه.....

محمد: حارث لتضل تمشي ورا حجي النسوان

ذني بناتك مو عدواتك

ترى نور كلشي حجت

مو فاتح راااس مرام ومبطلهه من المدرسه؟؟

مو مزورگ  نور وموصلهه للموت؟؟

وينهن وين الشغل

بنات صغار مال تعتمد عليهن؟

خاف الله بيهن  ترى ذني مو مروه الي جابت عمرهه تشتغل وتخلي بحلگك وتالي  ماتت من قهرهه ونت عايش بخيرهه

تكدر تكلي بأي حق مسجل البيت بأسم مرتك؟؟

حارث تدري مروه من بنت البيت شكد اخذت من ابويه ؟؟؟؟

محالله وموهوبه بس القصد الفلوس كلهه مالتهه ومال ابويه يعني مفروض البيت بأسم البنات

وهيه من سجلته بأسمك لان مره ثاقه بيك لافكرت عندك ولد من غير مره واخاف بحصل من الورث ولا خلت هيج شي ببالهه تعرف لييش لان مره عينهه مليانه

لان بت خير مو حديثة نعمه

تجي هاي بكم يوم تسجل البيت بأسمهه بأي حق؟؟

خويه حيدر انت احجي تقبلهه ؟؟

تقبل بتصرفات ابوك؟؟؟

لاخله احترام النه ولا احترام لبناته

شنو يبطلهن من المدرسه شنو يخليهن يشتغلن

هيج عدكم صعبه تتحملون مسؤؤلية بنات وتخلوهن هنه يصرفن عليكم

عمي كعدوهن واني ادزلكم مصرف اذا متكدرون على مصرفهن

حيدر: كل هاي المده ساكت ولا حجيت ردت اسمع كلشي

بس خال البنات كلللش هانه وداس بالحجي

خلاني مثل بلاع الموس لا اكد احجي وادافع لان حجيه صحيح شنو بنيه بهل عمر تشتغل وتنطي شغلهه؟

— شوف خويه

يشهد الله وداعت جهالي

اني مادري بكل هذا الحجي

غير تبطيلة مرام وقبل يومين دريت بيها

بس حجايتك مال مو كد مسؤليتهن هاي واكفه

احنه لامتعاجزين منهن ولا منكدر على مسوليتهن

وهنه اذا اشتغلن حتى يتعلملهن صنعه تفيدهن بالمستقبل

الحمدلله اني نقيب وراتبي …. وبيتي ملك والملك لا الله

والوالد يشتغل بال…. وتعرف الرواتب شكد

يعني ممحتاجين شغلهن

وسالفة البيت

هاي حفك تحجي بيها

لان هذا حق البنات وممفروض يتسجل باسم مرة ابويه

وان شاء الله يسجله بأسم البنات بأقرب وكت

حيدر:

مردت انطي بأبويه گدام الرجال

حاولت الزگه بكل طريقه

لان صدوك سوايات ابويه تفشل..........

البنيه مترجع اله يتحول البيت بأسمهن  وتتعهدون اليه متمدون ايدكم لاعليهه ولاعلى خواتهه

حيدر : خوويه شنوو نتعهدلك هياا غير بتنه

احنه نعرف شلون نربيهه وسالفة البيت كتلك ابويه راح يحوله باقرب وكت

ومن رخصتك هسه صيحلي  نور خل ناخذهه ونروح

محمد : تعذرني اخويه

جيتك على عيني وراسي بس نور متطلع من البيت

اذا ميتحول البيت بأسمهن وشغل بعد ميشتغلن وماتمدون ايدكم عليهن

بنات لاحول ولا قوه تضربوهن هل صرب وبلا سبب ليش الله يقبلهه محمد؟؟

حيدر : خوووويه صيييح نورر خل ناخذهه ونوللي ورايه شغل عايفه وجاي صيحهه رحمه لابوك

محمد : ابو كرار البنيه مو طفله

هسه اصيحهه كدامك واذا قبلت تجي وياكم اخذهه وروح

واذا ماقبلت تعذروني

نووور .. نوووور

تعالي خالو لتخافين اخوج وابوج هناا

نور: من صاح خالو عبالك اجاني عزرائيل اتقدم خطوه وارجع خطوتين

رحت وبيبي سوده عليه اجتي ورايه خايفه عليه

وصلت لباب  الديوانيه وشفت ابويه وحيدر

شكددد اكرهم ثنينهم مو زلم

وثنينهم الهم ايد بالي صار بينه

حيدر ما احسبه اخ

رجال غريب علينه لو صدوك اخونه جان وكف النه بوكت الجنه محتاجي

بس هوا اصلا جان داير وجهه عنه وكولشي منعرف  عنه

وابويه اخخخخ ابويه

ميحتاج احجيلكم عليه وعلى اذيته

فززني صوت خالي

—خالو ابوج واخوج جاين ياخذوج

تردين تروحين وياهم لو تبقين

وانتي حره محد يجبرج

تبقين هنا معززه مكرمه واخليج على راسي اذا الكاع مشالتج

واذا تريدين ترحين لبسي وتوكلي ويا ابوج

نور: اباوع على حيدر يخزر بيا يريد ياكلني بنضراته مثل الاسد الهايج

يريد يفترسني

كلت اذا ارجع وياهم مسويت شي بس راح يزيدون بالكتل عليه لان طلعت من البيت

مدري منين الله نطاني قوه وحجيت

— لا خالو ما ارجع

الي شفته ببيت ابويه مو قليل

ممستعده ارجع للضيم نفسه  

ابقى هنا حتى لو خدامه لبيبي

حيدر : كعدي نور خل نحجي

نور: تقدمت فتت وبيبي فاتت ورايه سلمت وكعدت

حجه حيدر :

اي  نور احجي ليش متردين ترجعين

نور: حيدر تعبت

حجيتها وبجيت

حيدر : اذا من الشغل فلتتوقعين انخليج ترجعين تشتغلين

نور : لا حيدر اصلا الشغل مخلصني من كعدة البيت

حيدر اني احجيهه كدامك وكدام ابويه نفسه

اني تعبتت

والله تعبت

ضرب

اهانه

حرمان

ذل

تعبنه والله تعبنه

داحجي وكمز عليه ابويه

_ ادبسززززز مستهتره اني ضاربجن بلا سبب

لوو ما جنتيي متواعده واسماء لكفت عدجج تلفون يله ضربتجج مستهتررره

حيدر هوا وخالي جروو مني

وبيبي ضلت تعيط تعبت سوده عليه

كلت لحيدر لحضه هسه اجي

رحت جبت الموبايل وخليته بيد حيدر

— هذا التلفون الي لكو عندي فتشه وشوفه مال شنو وشكو جايبته بلا ميدرون واسال خالو اول مأجيت خليته بيده وكتله فتشه اذا عندي شي

بس عادي كلشي متوقعه منهم اكيد مطلعين عليه اشكال حجي

عذا التلفون الي تهمتوني بي

مال شغل الزباين قبل ليجن يحجزن يمي حتى استفاد اني اطلعلي كم فلس

اشتري بيهن احتياجاتي الب انتو ما بيوم جبتوهن الي؟؟

اسألهم فد يوم اجوي كالو منين جبتي ملابسج ؟؟ منين تجيبين احتياجاتح؟؟ منين تصرفين؟؟

مالهم دخل عسى ما ابوك اهم شي ما اطلب منهم

واذا ممصدك كلامي روح لام دره واسألهه اذا اجذب عليك...........

حيدر : زين عوفج من هذا الحجي كله

شنو رآيج تجين ويايه لبيتي وتبقين يمي؟؟

نور: لا خليني يم بيبي هنا مرتاحه

حيدر: ابقى ارتاحي جم يوم وارجع اخذج

وهل مره كدام الكل حجاره اذا وكعت عليج من السما لو على خواتج اني اتحمل المسؤؤليه

واحنه هسه نرفع الزحمه واسفين ع الازعاج

چلب بيهم خالو ع الغده بس مقبلو يبقون

ديطلعون وصاح عليه حيدر

طلع محفظته وشال ٥٠ ونطاهن الي

كال اخاف تحتاجين شي

اخذتهن وتشكرته وفتت

راحو وبيبي وخالو ضلو يمدحون بحيدر

شلون ولد وشلون يحجي ومعزب وابن دوااوين واحسن من ابو وووو هوايه ضلو يحجون بي

للعصر اندگ الجرس

فتح الباب ابن خاالب وجان اشوف بيت خالتي يدخلوون

خالتي

وبنات خالتي

وابوهم

واخر واحد

اخخخ يا اخر واحد

ردت اموت بسببه

ليث

ليث ابن خالتي احبه وهوا هم يحبني

صارت علاقتنه صدفه

دزلي طلب بالفيس  وني وافقت بلا ما انتبه ع الصوره او الاسم

وضل يدز مساء الخير وصباح الخير  وني اصلا التلفون قله الزمه لان شغل وبالبيت ماكدر

مره جانت دنيا ظهر وماكو زباين مددت ردت انام بس مأجاني نوم

ضوجه دخلت اتصفح بالفيس

شفت ناشر صورة رجل خالتي بمناسبة عيد ميلاده

نطيت لايك وعبرت الصوره

ورا شويه دزلي بالخاص

_ شعجب تواضعتي وسويتي لايك؟؟

قريت ومجاوبت ، رجع دز

- شنو متعرفين تقرين ادزلج بصمه ؟؟

هم قريت ومجاوبت

رجع دز

- هسه تطلع عميه حظي واعرفه

دزيتلك ضحكه طويلله

وكتبتله

- انت شكد تلح يعني يجوز مشغوله يجوز ميعجبني ارد يجوز مرتبطه  شهل ملحه

-كللللللووووش واخيرا جاوبتي

الحمدلله طلعتي تشوفين وتعرفين تقرين

ضليت احجي ويا حجي عادي بس ابد مگتله اني بت مروه

يوميه صار يدز ويخابر ويسأل

صارت بيناتنه صداقه

هووايه يلح يريد يشوفني بس اني ارفض رفض قاطع

يكلي اذا تخافين ادزين صورتج نطلع بفد مطعم

بس هم جنت ارفض

طولت علاقتنه تقريبا ٧ اشهر وهوا مشايفني

بديت اتعلق بي

وهوا كذلك

مره من المرات كلي اذا مدزين صورتج ينتهي كلشي بيناتنه  اني مرايد منج شي بس اريد اشوفج واذا محجبه دزيلي صوره بالحجاب

مخلالي مجال اتحجج

كتله بس وعد اذا دزيتلك صورتي لا تأذيني ولاتحجي لاحد

دزيتهه  اله

وهوا نصدم 

معقووله انتي نوز بت خالتي ؟؟

لجج صدوك تحجين

ليش محجيتي وليش مكلتي

ساعه يضحك وفرحان وساعه مصدوم

استمرت علاقتنه بدون علم اي مخلوق لا اهلي ولا اهله..............

بيوم الي رحت لكربلاء تعارك ويايه

كلي شلون ترحن وحدجن اني اجي وياجن

بس اني مقبلت  وضل يعيط ويصيح

وتعارك ويايه بيومهه

وبطريق الرجعه تصالحنه وكال اريد اجي اشوفج حتى لو من بعيد

خفت كلش بيومه بس كلت بالبلكونه ومحد ينتبه

اجه وحظي الفگر طلع اسماء ولگفت الموبايل بيدي

وهاي چانت قصتي ويا ليث

بس ابد مافد يوم تجاوز حدوده ويايه

علاقتنه جانت طاهره ونقيه

مو مثل علاقات هل وكت

كولش اعتذر ع التأخير بس عندي ضروف

واتمنى تدعون لبنتي لان مريضه

راح انزل صور النه

وكتبو بالتعليقات صورة منو تردون انزل بالبارت اليجي.........

هذا حويدر بنات ☹️😍...

هاي صوره اليه ولمى سنه ٢٠١٨

الي دتاخذ الصوره لمى مرام الي بصف الباب.....

- بُنَي قاسِم، ڪيفَ تجِدُ طعم الموتِ عندك؟

- واللهِ يا عمُّ، -في نُصرَتِكَ؛ أحلىٰ مِنَ العسل.....

ليلة مُظلمه ومُوحشه على السيدة زينب "ع" حيثُ قُتل جميع إخوتها وأبنائها ، ليله بِها زينب تحرس الأيتام والأرامِل ، فـ اللهُم بزينب وبوحشة زينب وغُربتها ووحدتها إني اسألك ..🖤.....

***********************************

يل رسمك ابعيني نطبـع راحـن عيوني ومـارحت

عريان السيد خلف

*******

دخلو بيت خالتي  سلمت عليهم وصلت لليث

نور: هلو ليث شلونك

احجي واحس الناس كولهه تسمع دگات قلبي من گد ما مرتبكه

ليث: هلاو نور شلونج شخبارج  شعجب بيت خالي عمي مشتاقين

ليث من النوع فرفوش وسبورتي بشكل

فسلم ولا عبالك اكو علاقه بيناتنه

بسرعه سلمت وطلعت

كولهم اجتمعو بالديوانيه سوالف وضحك

وسألو على سبب جيتي و الاثار الي بوجهي وخالو سولفلهم  وني  من الفشله اريد اختفي

گمت بسرعه للمطبخ ردت التهي بأي شي

اكو مواعين ع السنك وكفت اغسلهن وادندن بيني وبين نفسي جنت مدمنه على اغنيه علي حليم مال لامتغيب لحضه وحده عن بالي

مندمجه وداغني وحسيت احد ورايه

انداريت واشوف ليث

نور: عزااا هااي شسووي هنا ووح لحد يشوفنه

ليث : شلونك يحلو

نور: عفيه ليث روح الله يخليك لاحد يشوفنه معايزني مصيبه

ليث: شبيج ياحبيبي ليش هيج جبانه

نور: ليث روح يمهم حبااب

ليث: والي ميروح شسويله ؟

نور: لتلح روح هناك يمهم

حجيتهه وادفع بي اريده يروح لطش

- درووح

شو هذا لزم ايدي وگام يبوس بيها

ليث: وعلي مشتاقلج ولج احبج وداعت امي

بس اخلص هاي السنه اجي اخطبج مليت بعلي مليت

الى متى اضل احجي وياج بالختله وحسره عليه شوفتج

نور: من سمعت حجيه فهيت ونسيت نفسي

اول انسان يهتم بيه بعد وفاة امي

يخاف عليه  دائما يطمن عليه  يسال اذا محتاجه شي يحس بيا من اضوج

كل بنيه  بينه تحب احد يهتم بيها

وما اشوف نفسي غلطت او سويت شي عيب

مجرد حبيت

بس للاسف احنه مجتمع تحكمه الاعراف والعادات والتقاليد

ممنوع بنيه تحب بس الرجال عادي يحب

صافنيه على ليث وهاي اول مره اكون قريبه عليه واركز بمعانيه

اسمر وطويل طوله ١٨٢  ووزنه تقريبا ٨٥ كولش معتني بجسمه  عنده لحيه خفيفه عيونه صفر   شكله رجولي

ليث: وين صفنتي ولج ترى اني اخجل

نور: عاابتلك مصفنت بس تذكرت شغله

يلا روح ليجي احد

ليث: ياريت حتى يستعجلون بزواجي

نور: ليث كافي بداعتي اطلع

ليث: بووويه تحلفني بداعتهه

مادام حلفتيني بحبيبة قلبي رح اطلع

شمر بوسه بالهوا وطلع

وني دگات قلبي يمكن يسمعوهه الجيران......

اجوي بابا وحيدر وعياطهم من الباب

حيدر : والله والله والله وروح جدي لو سمعت وحده بيهن تشتغل اهجم البيت على روسكم  واخذهن واحرمك منهن

حلواااا هسه من فشلنه محمد

حلوااا من يكولل اني اصرف علييكم بس كعدوهننن

انت ماستحيت من نفسسسسك يكولك متكدر لمسوليتهن؟؟؟

شجاااك ياباا شجااك

حارث: حيدر راسي يوجعني لتدوخني اجيت ويايه رحمه الله والديك مقصرت كافي لتاكل رااسي

هسه قابل هنه اول بنات يشتغلن؟؟؟

حيدر: انت ناووي تمووتني

خل اطلع احسن ما ارتكب بيكم جريمه

والبيت هذا الاسبوع يتحول باسم البنات

عافنه وطلع

وگبت العيطه بين اسماء وابويه

حارث: اسماااء كافي متمللين من المشاكل مشفتي اخووهن شسووه حقج مسمعتي حجي خالهن

مامحتاج للشغل اني خل يكعدن وينجبن مالي خلك مشاكل

اسماء : يي خووش والله نوب اصرف على بنات مروه

حارث الراتب فللس مياخذن منه

خل يشتغلن ويعتمدن على نفسهن

شنو اول اخر ناس نشغل بناتنه

حارث : اسماء فكيني تعبت

وحضري روحج بأجازتي هذا الاسبوع نروح نحول البيت واسجله بأسم البنات

اسماء: شنووو شنووو شنووو

بالله عيد  مسمعت  عدل

يا بيت حبيبييي مو هوه لعب جهال ويوميه محوله

البيت بأسمي  وما احوله لو امووت  والسند اصولي بيع وشره يعني بالقانون متكدر تاخذه مني

والله خوش يسجله باسم البنات واني جهاالي ولد البطه السوده

يضلون ايد وره وايد كدام

حارث: مو بكيفج كلت يتحول البيت يعني يتحول

اسماء: حااااارث لتخليني هسه اطردك انت وبناتك بالشاررع لتطلع خبالااااتي

البيت ميتحول لو على گص ركبتي

مو اني اعرررف هذا الگ..د حيدر ميجي من ورا بس المصايب

ميت على البنات ويريد يحول البيت بأسمهن........

ثاني يوم ابويه طلع للشغل واسماء من الصبح لبسي عباتج وطلعي

سالت لمى تكول مادري وين رايحه

للظهر اجتي

وبيدهه علاليك سود

فاتت لغرفتهه

ويا الغروب طلعت شغلت المنقله بالطرمه ورشت عليهه مدري شنو وحرگت بخور

خلت منه شويه بطاسه حديد وفوتتهه بخرت بي البيت

من سالتهه هذا شنو

تكول مال مشاكل البيت مديصفى من المشاكل

ابد ما اصدك بهاي الانسانه واني ادري هيا ورا الاشياء الي دا اشوفهه ودتصيرلي

طبعا رغم هاي الفتره ملتهيه بمشكله نور ومشاكل البيت  بس ابد مدا تفارگني الكوابيس صح قلت بس بقت الخنگه ومن اصلي احس اريد اموت قلبي يدگ سريع كولش واختنگ

اجه ابويه بالليل وفات للغرفه وفاتت ويا اسماء

واسمع حجيهم بس ممفهوم او بمعني اصح ما اخلي بالي وياهم لان مو فضوليه

طلع ابويه من الغرفه انسان ثاني

حارث: باجر اروح اجيب نور وبعد شغل متشتغل وانتي ترجعين لمدرستج ولمى هم ونور تقدم خارجي وتدرس وتمتحن

اني ولمى مصدومات وحده تباوع بوجه الخ

معقوله ابويه صحه ضميره وبعد ميأذينه

الفرحه الي بقلبي مو طبيعيه

تمنيت نور موجوده حتى تسمع الي دنسمعه

ياربي بجاه كلمن عنده جاه عندك تمم فرحتنه واهدي اسماء وابويه علينه منريد غير شي

خابر بابا على حيدر وگله تعال باجر عندي موضوع وياك

اجه حيدر الصبح

وبابا عاد نفس الموضوع

حارث: حيدر فكرت بحجيكم انت وخال البنات وقررت ابطلهن من الشغل ويرجعن يدرسن

والبيت اسبوع البجي على اجازتي اخذ اسماء واخذهن حتى احوله بأسمهن

حيدر : ييي عفيه يابا والله واحسن قرار قررته

خطيه ذني يتامى لتكسر بيهن خليهن يكملن مدرسه ياخذن شهاده محد يفيدهم غير شهادتهن

حيدر كولش فرح وگام باس راس بابا وتعذر منه لان عله صوته عليه

خابر على خالو كله جايين

راحو بابا وحيدر

كعدو ويا خالو وكالوله بعد متشتغل  والبيت اسبوع الخ يتحول بأسمهن

وحيدر تعهد لخالو محد يمد ايده على نور ولا علينه

وخالو مكال شي

كال هيه بتكم بس اني ما ارضى ينضربن يتامى ومالهم احد وهلله هلله بيهن ولو غلطن علموهن ومن هل حجي

صاحو نور وكالوللهه  وحيدر تعهدلهه محد يمد ايده عليهه

هيا هم مكالت باطل

بس قبل لتطلع خالي اخذ الموبايل منهه وفلشه بالگاع

كدام حيدر وابويه

كاللهه شغل وبعد متشتغلين شسوين بي

وهيه سكتت محجت

خالو قصد بهذا تصرفه

انو احنه منقبل ع الغلط واذا جانت المشكله بسبب الموبايل فهذا الموبايل تفلش بين قوسين كسر عين ابويه وحيدر بهذا تصرفه

نور طلعت ويا ابويه وحيدر

صح خايفه بس الى متى تبقى ببيت جدي

لحم  بني ادم ثكيل ومحد يحمله

وهيا ماعدهه شي مادام راح يرجعهه للمدرسه وميمد ايده عليهه وبطلهه من الشغل بعد ماعدهه شي وياهم

بالطريق طلب بابا يومف حيدر يم مطعم

يجيب اكل جاهز

نور كولش استغربت هدوء بابا وتصرفه والقرارات الي اخذهه وجانت ممرتاحه

لان تعرف لو الدنيا كولهه تتغير اسماء وحارث ميتغيرون

طماعين وعينهم ميمليهه شي غير التراب

اخذ بابا بيومهه دجاج شوي وتمن برياني وببسي وخبز حار ورجع للبيت

وصلو للبيت  وفاتت نور

اني تلكيتهه من الباب ابوس واحضن بيها

لان صدوك مشتاقتلهه

فاتت جانت اسماء كاعده ولمى والجهال

سلمت

واسماء كامت على حيلهه واخذتهه بالاحضان وتبوس بيهه وتبجي  وتعاتب

ليش ماما هيج سويتي بينه

لجج ردنه  نمووت والله

اكو وحده هيج تسوي باهلهه

مفكرتي لو صار عليج شي شيصير بحالنه

اني ولمى ونور وحيدر كولنه في حالة صدمه مدا نصدك الي ديصير

اسماء تبجي على نور وخايفه عليهه؟؟

سلمت وكعدت وكمه حضرنه الغدا وكولنه كعدنه ناكل

حيدر وابويه واسماء ونور ولمى والجهال واني

مرات اكو انسان يصحى ضميره ويوعى على غلطه ويتندم 

ومرات انسان يلبس قناع الضمير الصاحي والانسان الطيب بس حقيقته غير شي

اسماء مجنه بساعتهه نعرف اذا فعلا صحه ضميرهه لو محرد قناع يخفي حقيقتهه

بس ليش حتى تلبس قناع

هيا متخاف من احد وجابت عمرهه قبيحه

شنو الي ديصير والي راح يصير منعرف

كل الي نكوله الله ليستر.......

كملنه غدا وطلع حيدر وابويه واسماء فاتو للغرفه واني غسلت المواعين وكعدت اسولف لنور على كول الي صار بغيابهه  تعبنه من السوالف

لفينه راسنه ونمنه

مرت اول ايام عادي

حيدر جان يتردد بين يوم ويوم او كل يومين بس ابد معافنه

وكل ميجي جايب شي وكل مره ينطينه مصرف

وبدت نور تغير نضرتهه عليه وبدت تحبه

بيوم من الايام ابويه جان ماعنده دوام

العصر مدري منو خابر عليه وهوا نخبص

ضل يصيح رتبو البيت بسرعه واستعجلو

احنه هم رتبنا عبالنه صديقه

شو ورا شويه اجه رجال شوي جبير للبيت

بابا استقبله وضل يفره بالبيت

احنه استغربنه

شعنده يفوت عاى غرفنه؟؟

وليش بابا فوته على الغرف؟؟ وفره كل البيت ؟؟

اسأله هوايه تدور براسنه

الى ان طلع الرجال وفات ابويه واسماء للغرفه

حيدر بهاي الفتره جانت عنده دوره مال ترقيه  بأحد المحافظات

طلع ابويه هوا واسماء بالليل تاخرو يله اجوي

طبعا هاي الفتره اسماء هادئه وابويه اهدء منهه

ضلو  تقريبا يومين يطلعون الصبح يجون العصر ويرجعون يطلعون بالليل ويجون بتالي الليل

وبهاي الفتره ابويه حتى شغل ميروح

الى ان  بيوم اجتي اسماء  على لمى سحبت التلفون منهه وجابت تلفون ابويه وتلفونهه وكعدت تفتح بيهن وتطكطك بالسيمكارتات

احنه تفاجئنه تصرفهه

بس الي فاجئنه وصدمنه اكثر  دخلت ابويه وحجيه الي لحد الان يرن بأذني

حارث: لمو ملابسكم ولمو غراض البيت باجر راح نشيل …….......................

************************************

الليلة تكول زينب جنت مدللّة مابين

إثنين والليلة لا عباس يمي ولا حسين 🥺💔

************************************

ليث كولش يشبه احمد عز بس ليث اسمر

عمر ليث جان بذاك الوقت ٢٤ سنه

نور تشبه هاي الممثله كولش بس نور حواجبهه اثخن وشعرهه اسود وطويل......

‏"إيّاك أن ترى الحياة من منظورٍ واحد، وتحصرها في إطارٍ ضيّق، فإن لم تأتِ كما ينبغي ظننت أن الكون الفسيح بأسره قد ضاقَ عليك؛ إنّ هذه الحياة مليئة بالعوالِم الرَحبة، والآفاق الواسعة، وإنّ الأرواح المُحلّقة بجناحي العطاء والصفاء لها سماوات تشبهها وتليق بها".

************************************

اول  شي قبل منبدي بالبارت اقدم اعتذاري بسبب التأخير الي صار

بس دا امر بضروف صعبه كولش خلتني اتأخر بنقل الاحداث للكاتبه  وان شاء الله اعوضكم

اتمنى تتفهمون هل شي وتعذروني وتدعولي الله يفرجهه  عليه وعلى بنتي

مرام…

- كانت تستيقظ دائمًا بهلع، كردةِ فعلٍ لرجوعها للواقع الأليم، كردةِ فعلٍ لخيبة الحياة القاسية ، التي تعايشها ولا تكترث لما تشعر به.

حارث: لمو ملابسكم ولمو غراض البيت باجر راح نشيل

وحده تباوع للخ ومدا نفتهم شديصير

مرام: ليش بابا  وين نشيل والمن نعوف البيت  ومدارسنه شلون؟؟!

حارث : ماريد اسأله ماصخه  لمو غراضكم باجر من الصبح طالعين

لان البيت بعته

لا لا لا مستحيل  اكيد ديتشاقى  مستحيييل يسويهه ويبيع البيت  هوا مو كال راح احوله بأسم البنات

شلون يبيعه وليش اصلا باعه

هذا البيت بي كل ذكرياتنه  طفولتنه وحياة ماما كلهه بهذا البيت

كل ركن من هذا البيت بي ذكرى من ذكريات طفولتنه وحتى كبرنه

حجت نور

- بابا البيت مو على اساس يتحول بأسمنه على اي اساس تبيعه ونشيل

حارث: خليني ساكت عليج وعلى عملتج لتخليني انهي حياتج هسه

البيت بيتي واني حر ابيعه احرگه انطي اني حررررر مو تجي وحده بكد النعاااال تتأمر عليه وتعلمني شسوووي مفهوووم لو لاااا

طلع ابويه من الغرفه واحنه مصدومات

ليش يبيع البيت وشنو عدهم من لعبه

شنو الي راح يسوو بعد

بدينه نلم بملابسنه بس دموعنه تتسابق

ثلاثتنه مقهورات ومصدومات من تصرف ابويه

مو عبالك بناته  عبالك غريبات 

كملنه ملابسنه وگمنه ع البيت لمينه الفرفوري وغراض المطبخ  ولمينه الفراش والنضده ولمينه المخزن وابويه فتح البنكات والمبردات وفتح غرفة النوم

للصبح احنه منايمين هلكنه

والي يتعب اكثر التفكير

رايحين لمكان مجهول منعرف شنو الي مضموم النه منعرف شنو السر ورا هذا تصرفهم

مندري شنو مصيرنه وشنو تالي هذا اللعب الي دتلعبه اسماء.....

لل٧ الصبح احنه نلم بالغراض انتهينه من التعب حتى اسماء ويانه منامت ومتحمسه اكثر من عدنه

طبينه سبحنه وحده وره الخ

اني سبحت اول وحده

وطلعت مشطت ورحت طلعت القوري وخدرت جاي

ردت اسوي ريوك بس المواعين كلهن ضاميهن

طلعت الاجبان الي بالثلاجه  وكعدت بالگاع لان تعبت

لميت رجلي وخليت راسي بين رجلي گمت اغفي

طلعت اسماء من الحمام سألتهه

- باجي سويت جاي وطلعت الاجبان تتريكين

اسماء: اي خليهن هنا وصيحي خوات والجهال

خل نتريك بين ما ابوج يجيب سيارة الحمل حتى نحمل الغراض

هزيت راسي وصحت  البنات

لمى جانت دتسبح

اخذت صمونه خليت بيها جبن وصبيت جاي وكعدت اكل

شويه واجه ابويه وويا عمال ثنين

طلعو الغراض حملوهن واحنه نناوشهم

روحو وتعالو وجيبو وودي ووووو تعبنه هلكنه

اخر شي كال يلا صعدو بالسياره

اخذت فره ع البيت بحجه اشوف اذا ناسين شي او لا

بس احس روحي دتطلع هنا نولدنه وهنا كبرنه وهنا لعبنه

البيت وطن واحنه سلبو منعده وطنه

ابااوع ع البيت يقبض الروح اول مره اشوفه بلا اثاث وهيج فارغ

فتت غرفة ماما اباوع حيطانهه واتلمسهن ودموعي تجري

مو هينه عليه اطلع منه والله

افوت لغرفتنه

هاي الغرفه الي شهدت على كل حياتنه

طفولتنه ومراهقتنه وحتى شبابنه

اباوع للحايط مالتهه من چنه اطفال جنه نكتب ذكرى عليه ونشخبط بمكانات متبين لو بصف الكنتور ليجوه لو يم الجربايه  لان ماما جانت متقبل نشخبط ع الحايط

ذكرى في تاريخ ٢٠٠٥ /٧/٤

وذكرى لخ ب ٢٠٠٦ ورا مماتت ماما

كل شي بهذا البيت احس اله ذكرى محفوره بقلبي لهاي الساعه

اباوع للصاله  اباوع للمطبخ

يعني معقوله هاي اخر مره اشوف هذا البيت !!

فززني صوت ابويه

حارث: لججج يلااا صارلي ساعه اصييح عليج شنووو طرشه  امشي دااقفل الباب

طلعت من البيت وودي ما اطلع بس كالعاده مجبوره

صعدنه بالسياره ويا ابويه  مشت شويه السياره ونزل يم مكتب مال عقار گال راح اخلي مفاتيح البيت يمه

رجع صعد وبقت تمشي بينه السياره  جان يوم جمعه ودنيا صبح تقريبا ساعه ١٠ والشوارع فارغه 

نص ساعه او اقل وصلنه لمنطقه ال…

منطفه راقيه وبيوتهه بنائهن حديث

صح منطقتنه جانت راقيه وناسهه هم راقين ومرتبين ( منطقه من مناطق الكرخ)  بس بيوتهه قديمه

البيوت الي من تفوت من يمهه تستنشق رائحة بغداد

المنطقه الي كعدنه بيها بالرصافه

وصلنه لبيت بابه صغير  مو مثل بابنه القديم طلاقتين

كمت اقارن بين هذا البيت وبين بيتنه بأصغر التفاصيل

باب اسود صغير  وكفت سيارة بابا وراهه وگفت السياره الي بيها غراضنه

نزلو الولد الغراض بالبيت وراحو

البيت اول منفوت بي طرمه كولش صغيره تقريبا حجمها ٢*٣

وبعد الطرمه اكو بابين و شبابيك على طول الحايط  الباب واحد مال مطبخ  والثاني مال استقبال

المطبخ صغير مو بگد مطبخنه القديم

بس بنائه احدث من ذاك البيت

الارضيه سيراميك سوده كولش حلوا واكو ازاره بالحايط هم سوده

ورا المطبخ تجي صاله صغيره عاليمنه من نطلع من المطبخ باب الاستقبال الي داخل البيت واكو بابين بعد  وبالنص صايره صاله صغيره

البابين مال غرف النوم وبصف المطبخ ع الجهه اليمنه باب الحمام

ومقابيل باب المطبخ اكو درج المحجر ماله كولش حلو

الي يكعد بالصاله يسيطر ع البيت كوله لان كول البوب مال بيت بالصاله صايرات

فوگ ماكو بس مخزن صغير وسطح

وهيچ  تصميم البيت الجديد

گلنه لاسماء بس خل نطلع الفراشات ننام ومن نگعد نكمل لان تعبنه كولش

طلعنه الفراشات حتى بدون منظف الارضيه خليناهن ونمنه  تغطينه لان جان الجو شتا

نمنه  ومحسينه اله على اسماء تكعدنه.........

يلا گومن كافي نوم ساعه ٧ صارت دنيا ليل والبيت بعده كولشي ممرتبين بي كومن مادام اكو وطنيه نوب تطفى ونبقى مثل العميان

كعدنه بس متكسرات هم نايمين بالگاع وهم تعبانين

كعدنه جان ابويه جايب اكل كعدنه ناكل بسرعه وكمنه ع البيت

طبعا احنه ثلاثتنه شاطرات بشغل البيت وبينه طبيعه مال وهواس  نتخبل من شي وصخ لو مخربط

ومن نشتغل نشتغل بضمير مو شلون ماكان

جان اكو حنفيه مال مي بصف الماطور برا بالطرمه

جبنه سطلات وگمنه ننقل مي من الطرمه للبيت حتى نغسله

اني اترس السطلات واوديهن ونور تغسل ولمى تمسح بالوصله حتى لتطگع الارضيه

اسماء اول مكملنه الغرف كامت تفوت بأخشاب الغرفه هيا وابويه والتهو يشدون بيهن

علاوي ويقين ( اخواني من اسماء) خطيه يجيبون ويودون ويانه يساعدونه

كملنه غسل البيت ومسحه

ونور كالت للمى تفوت جنط الملابس مالتنه بغرفتنه

واني ولمى بدينه نفرغ الطرمه من الغراض

اول شي نقلنه الغراض الي منحتاجهن صعدناهن بالسطح ( المبردات  وعدنه كومدي مال غراض ابويه وهوايه غراض بعد ) صعدناهن سفطناهن بالمخزن ونزلنه

كلنه نرتب مكان نومتنه قبل لتطفى الكهرباء وبعدين نكمل البيت

فرشنه غرفتنه وجبنه الجرابي الحديد شديناهن ورتبنه غراضنه بقى بس الكنتور مكدرنه نشده فوتنه قطعه بالغرفه وكلنه من يكمل ابويه يشده النه حتى نسفط ملابسنه

طلعنه ع الصاله فرشناهه وهم خلينه بيها التخم القديم مال ذاك البيت ورتبنه الطلات بالنص

الاستقبال جانو مفوتين التخم

بس فرشنا وعلگنه الستائر وفوتنه ميز البلازمت بس معرفنه نشد البلازما بالميز  خليناها ع التخم وسدينه الباب وطلعنه

من نشتغل ننسى نفسنه بكيث نهلك بس منحس على نفسنه ياخذنه الواهس بالشغل

تقريبا كملنه الي مگدر عليه

بقى بس الكاونتر والملحق  مالته مگدرنه نفوتهن لان ثگال

وبقى اشياء بسيطه ابويه يكملهه

باوعنه ع الساعه ساعه ب٢بالليل حيييل شگد شتغلنه ولاحسينه بالوقت

لمى نايمه على جربابة نور منتحره  والجهال مجطلين بالگاع بلا غطه

اسماء وابويه سادين باب الغرفه الظاهر نايمين

اني ونور ميتات برد فوتنه الصوبه الكهربائيه دنشغلهه حتى تدفه الغرفه وچان تطفه الكهرباء

نور : دشوفي الحظ صارلنه ساعات نكرب مطفت الكهرباء من اجينه نرتاح طفت

عمي وجوهنه مومال راحه هيا گوه

مرام: نجيب النفطيه نشغلهه

نور: دگعدي يانفطيه تلفلفي ونامي ظلمه شنشوف هسه

صدوك لفيت راسي ونمت حتى لاحسيت ببرد ولا بأي شعور من التعب  راسا نمت

كعدنه الصبح على صوت الجهال

طبعا الغرفه خنگه لابيها شباك ولايدخللهه ضوه

كعدت لكيت بس يقين وعلاوي كاعدين يتعاركون

الساعه جانت ب١١

نور نايمه ولمى هم نايمه وغرفة ابويه هم مسدود بابهه

اجوي الجهال جوعانين يردون اكل

الثلاجه فارغه كولشي مابيها

يبووو هاي شلون سالفه

مرام: تحملو بس يكعد بابا يجيب اكل لان كلشي ماكو الثلاجه فارغه

علي: مرام جوعان والله

مرام: حبيبي شسوي والله اكل ماكو

علي: عندي فلوس راح اروح اشتري

مرام: اكعد ولك وين تروح كلشي منندل هنا وين تروح تهبد

علي: اسأل اي واحد واشتري اندومي حتى تسوي النه

مرام: روح بس اذا بعيد ارجع لا امك تكعد وتسويلنه هوسه

عمر علاوي جان بوقتهه٧ سنوات

راح واني غسلت وجهي وكعدت بالمطبخ انتضره

اجتي يقين يمي شعرهه مكفوش كمت غسلتلهه وكعدت امشطلهه

طبعا شعر لمى ويقين مسؤليتي

اني كولش احب البنات واحب ارتب شعرهن اتفنن بالظفاير  والترتيب

كعدت امشطلهه وكلسع دايره راسهه تخليني اعصب عليهه ( جان عمرهه٤ سنوات)

مشطتلهه وكملت وعلاوي لهسه مأجه

تقريبا عدت ربع ساعه وهوا مبين

قلبي كام يلعب

دخيلك ربي رجعه بسلامه مابينه حيل مصايب

عدت نص ساعه لخ والولد ماكو

تخبلت خبال

لابيه اكعدهم واكلهم طلع بعلمي لان راح تنذب براسي ولابيه اضل ساكته

نوب منطقه جديده كلشي منعرف عنهه

ركضت لنور بسرعه كعدتهه

مرام: نووور نووور اكعددي الله يخليج

نور: شكووو يمعوده عوفيني تعبانه وجسمي متكسر

مرام؛ لجج كووومي علاوي طلع قبل نص ساعه ولهسه مرجع كعددددي

فزت من نومهه

نور: ومنو كله يطلعععع شلون يطلعع وحده والمنطقه كلشي منندل بيها

مرام : لج كعد جوعان وماكو اكل وضل يلح اله يروح للاسواق يريد اندومي

كامت تعيط عليه

-اكوووو مطي يسووي سوايتج

يعني طفلللل شلون تخلي يطلع وحده ومنطقه كلشي ميندل بيهاااا

مخبللله انتي

فزت من فراشهه وراحت دگت الباب على غرفة ابويه

طلع ابويه وجهه مورم من النعاس

حارث: شكووو شبيج خبصتي الدنيا

نور ؛ الحگ علي.............................................................

************************************

‏"إيّاك أن ترى الحياة من منظورٍ واحد، وتحصرها في إطارٍ ضيّق، فإن لم تأتِ كما ينبغي ظننت أن الكون الفسيح بأسره قد ضاقَ عليك؛ إنّ هذه الحياة مليئة بالعوالِم الرَحبة، والآفاق الواسعة، وإنّ الأرواح المُحلّقة بجناحي العطاء والصفاء لها سماوات تشبهها وتليق بها".

أنا شخص قد تعثّر واستقام، انحنى واعتدل، انهار واستقوى، ثم صار يعرف حدوده مع الحياة والناس، متى يُواجه، ومتى ينسحب، ومتى لا يلتفت أبداً 🖤✔︎👋🏻

مشهد  في الوقت الحاضر💫

اتذكرت هذاك اليوم وكمت ابجي

رفعت بجامتي واباوع ع الاثر الي برجلي

تذكرت الحقد الي شفته بعين ابويه واسماء

بسبب تصرف عفوي ومالي بي اي قصد شوهو رجلي وتركو بيها اثر لهل ساعه

كل ما اريد انسى اذيتهم واسامحهم اشوف الاثار الي تركوهه بيا  سواء جانت نفسيه او اثار تعنيف

شكد اسمع اخبارهم هسه ومانكر انقهر عليهم واتمنى لو اكدر اساعدهم

بس من اراجع نفسي واتذكر الي سووو بيه احقد عليهم 

ماكو شي من الي سوو ينسي

شنسى مثلا  العنف مالتهم  لو تدميرهم لمستقبلي وحرماني من الدراسه وهيه حق من حقوقي لو انسى بعرسي شصخمو وجهي وشلون فشلوني  لو من ابني مات بسببهم

ماكو شي الهم ينسي  كل مواقفهم ويايه ناقصه كل مواقفهم اذتني ومو اي اذيه…..

فلاش باگ💫

نور: الحگ علي طلع راح للاسواق قبل نص ساعه ولهسه مرجع

حارث: شنوووو شلووون تخليي يطلعع طفللل ميندل شي ومنطقه جديددده

نور: جنت نايمه وضال يلح على مرام وطالع

اجه يركض عليه جرني من شعري

حارث: طااايحة الحظ شلووون تخلي يطللللع  منطقه جديده شيندلل بيهااا  دفرني وعافني وطلع

كعدت اسماء وتخبلت خبال على ابنهه

ساعه تعيط وتدعي عليه وساعه تدعي يرجع بسلامه

گمت الوب ماعرف شسووي كمت افتر بالبيت وادعي يارب يرجع بالسلامه

كعدت بالمطبخ  بالگاع بصف الطباخ  ولميت رجلي وكمت ابجي

شوويه ونفتح الباب

كلهه گمزت اله اني مابيه حيل اگوم

اجه ابويه وعيونه براسه احسه شيطان مو اب يعيط

حارث: لكمممم ماااكووو الولددد ماكووو شافني

شافني لامه نفسي وگاعده بالگاع اجه يركض عليه

حارث: كلللله من وراج عقللللج ويين من دزيتتي كليلي شسووي بيج اذاا صار بيج شي

ديحجي ويعيط وصار اعصاب وگام يدفر بيا وبالطباخ

لحد منفتحت الباب مال فرن مال طباخ وگعت على رجلي

وهوا مستمر يدفر بيا حسيت بوجع برجلي بس الخوف جان اكبر من انو احجي

حسيت ملابسي تبللت

ضل يعيط ويصيح لحد مندگت الباب عافني وطلع

سمعنه صوت رجال وفات علي ركض للبيت يبجي

اسماء: يمةةةة علاااوي حبيبييي لكك ليشش تطلععع وتخوفنه عليكك والله ردنه نموت اني وابووك

علي: مادري ماما نسيت طريق البيت وعمو جابني

اني شفت علي فات وابويه تشكر من الرجال ودخل اني سحبت نفسي ورحت للغرفه

بس اباوع على ملابسي كلهه دم

فتت للغرفه ونزعت ملابسي داشوف الجرح الي برجلي 

واباوع منضر مقززز ومجرد النضر اله تحسون الوجع

برجلي اليسره بصف الصابونه مال رجل مشكوكه وشگ نازل للكرشه

بس من بداية الكرشه مال رجل كوولش قوي بحيث طالع الشحم الابيض واباوع ع اللحم شلون مفتوح وينزف دم

كمت ابجي اخاف اسويله شي والمنظر خوفني اكثر......

ضليت على گعدتي ابجي واخاف اطلع اگوللهم

عجيبه والله يأذوني واخاف اشكيلهم ليرجعون يأذوني اكثر

شويه واجتي نور

نور: هااا ولج شنو هذاا الدم عزااا صخاام شوو دا اشووف

اول مشافت كامت تلطم على خدهه

عزااا العزااج كوون ولج الجرح جبير يرادله خيااط

مرام: لاا حبابه اخاف ماريد  عوفيهه هسه يوگف النزف

نور : لججج شيوگف حتى مومال اخليله لاسقة جروح جبير شوفيي

خررب بالحظ نوب هوسه وين راح الگه الشاش والمعقم

مرام: منطيت اي ردة فعل كاعده وابجي

طلعت شويه واجتي جايبه ديتول وكلينس

اجتي تريد تعقمه اليه واني اخاف كمت ابجي بالزايد

مرام: لاا الله يخليج والله اخاف اتأذه

نور: لججج مرام اتحملي شويه احسن ما يلتهب ويخيطو الج بلا بنج

كمت ابجي خلت من الديتول ع الكلينس وخلته ع الجرح لو عبالك دارت ملح عليه شاغت روحي گمت اكمز

لزمتني وعقمته مره لخ   وجابت كبسول فتحتهه ودارتهه  عليه وخلت عليه كلينس جاف وجابت شال شگته ولفته على رجلي صح الجرح طويل تقريبا ٢٠سم بس كله سطحي يعني شخط بس بدايته جرح عميق

بدلت ملابسي وضليت كاعده بالغرفه

نص ساعه وصاحت عليه نور

نور: مرااام … مرااام تعالي اكلي

هسه هاي شكد تافهه مو تدري ماريد اطلع شيسموهه من تصيحني على الاكل وهمه كاعدين( ادردم بيني وبين نفسي) ضلت تصيح مجاوبتهه

هيا هم عافتني ورا شويه جابتلي لفه بيها بيض وكلاص جاي

كعدت اكل كملت اكل واحتاجيت اروح للحمام

اكثر شغله اكرهه من اهلي يتعاركون ويايه واتواجه وياهم بمكان واحد

ما احب اشوفهم اتمنى لو اختفي حتى ماشوفهم ولايشوفوني

طلعت من الغرفه والحمدلله كعدتهم صايره بالصاله وكلهم كاعدين شافني ابويه دار وجهه

فتت للحمام وطلعت

صاحت اسماء

اسماء: مرام كملن الكاونتر انتي وخواتج وباقي الشغل خما نضل هيج هواسه

طلعت نور من الاستقبال

نور: ماعدنه شي باجي الكاونتر هسه اني اكمله البيت كله كملنا البارحه بقى بس الكنتور مالنه بابا يشده حتى نسفط ملابسنه

والمطبخ هسه اني ولمى نكمله

مرام رجلهه مشكوكه متكدر تمشي.......

اسماء: غير من غبائهه راد يروح الطفل

لعد اكو وحده عاقله تسوي سوايتهه

والله زين محرگج  هذا الجرح حتى كل متشوفي تتصرفين صح ومتغلطين

سكتت وعفتهه وفتت للغرفه

بس شنو الغرفه تخنگ ممتعلمه عليها خليت راسي والافكار تتضارب براسي

شلنه من بيتنه ونباع ومنعرف السبب

اسماء طگطگت السيمكارتات ومنعرف ليش

المدارس محد جاب طاريهه وهم منعرف ليش

ليش هيج ديتصرفون

شنو ليش ترى مبينه يردون تنگطع اخبارنه عن حيدر وخوالي

لان حيدر من گام يدافعلنه وكام يدخل بتفاصيلنه وراد ابويه يحول البيت اسماء حست راح تخسر كلشي

اكيددد كالت ابيع البيت واكطع علاقتهم حتى ما اخسر

زين هذا الطلي شبيي ميفكر معقوله هيج سحورة اسماء عاميته !!!

ضليت افكر لحد مادخت ونمت

وووين يلا حسيت

مشغلين الاضويه وابويه ديشد بالكنتور

كعدت وكمت من فراشي رحت غسلت وتفقدت المطبخ اذا بي شي ينوكل او لا لان جوعانه.......

فتت للمطبخ كلشي مرتب بمكاني

سوده عليه خواتي تعبن بالشغل ومگعدني اشتغل وياهن

لكيت جدر مركه ع الطباخ  جريت صمونه وكمت اغمس واكل وني واكفه  اكلت وطلعت

فتت للاستقبال مرتب وشادين البلازما ومسفطين التحفيات ع الميز وكلشي مرتب ونظيف

سديت الباب وطلعت

اسماء طلعت من غرفتهه وبيدهه تلفونهه ومخبوصه تصيح على ابويه

اسماء: حاااررث حااارث شو تعال

حارث : تعالي يمعوده ماكدر اعوف الي بيدي

راحتله وفاتت لغرفتنه وني واكفه اباوع عليهم

اسماء: حارث شوف هاي مديل حديث وسعرهه زين وصاحبهه كاتب بيها مجال

حارث ؛ خل اكمل واشوفهه

اسماء : شتشوف داكلك مديلهه حديث وعجبتني  راح اتصل ع الولد واتفق ويا حتى نروح نشوفهه

حارث : براحتج  والتهه يكمل شغله

اني صافنه هاي دتحجي على سياره لو اني متوهمه

لا مستحيل متوهمه سياره لان دتكول مديلهه حديث واتفق ويا صاحبهه

والله عمي خووش اسماء السعلوه تركب سياره لا ونوب مديل حديث.........

خابرت على الولد واتفقت يلتقون بعد ساعتين

نور ولمى مو اقل صدمه مني

بس شبيدنه

كمل ابويه وراح بدل وكعد بالصاله واسماء نخبصت تمكيج وتبدل

كملو وطلعو

مدري ليش من يطلعون احس بحريه مو طبيعيه 😂😂

مرام: شفتي بالله تريد تشتري سياره

نور: ايي حبيبتي طبعا تشتري لعد خما اني وياج نشتري

هااي رجلين حظهه مكصكصات هل تشوفي كاعد ومتربع

لمى: اكلجن انتن ملتهيات بسوالف الماصخه وماسألتن نفسجن ليش شلنه وليش باعو البيت

اني ونور لتفتنه للمى

رغم لمى اختنه بس كدام اسماء ابدد متحجي ويانه تحسسنه عبالك عدواتهه احنه

بله احجي ليش ولو هيا مبينه حتى متحوله بأسمنه

لمى: ترى اسماء كلش تثق بيا وكل الحجي صار كدامي

— تدرن باعت البيت ليش

تكول حيدر كام يدخل بالصغيره والجبيره هو مو ميت ع البنات بس يريدهن يستگون عليه بس اله اكسر خشمه

وحتى على خالو محم د تكول مادام كامو يدخلون راح يهدمون حياتنه وحارث فقير لايحل ولايربط

وني لهل سبب بعت البيت  واجينه اجرنه هنا

حتى لا احد يوصلنه ولا احد يدخل بينه وحتى السيمكارتات من كسرتهن حتى لا احد يدك علينه وتنگطع اخبارنه نهائيا

نور: زين ليش كسرت سيمكارتج

لمى : خافت عبالهه حيدر عنده رقمي وكالت اني اشتريلج

مرام: وليش مرجعونه للمدرسه

لمى: شوف هاي شكد فطيره

منو يرجعج لجج اخاف اسماء جان الهه نيه ترجعج فهسه انسيي كامت تسوي عناد بحيدر واصلا كالت ماكو لو يموتن مارجعهن للمدرسه

نور: وهسه شلون اذا اريد اتواصل ويا حيدر  لمى الله يخليج ساعديني

لمى: نور لو اكدر اساعدج بس والله كلش  اخاف لان اذا حست مجرد احساس اني انقللجن كلشي تنهي حياتي والله

بس اكدر اخليجن تخلصن من هاي العيشه

نور ومرام : شلوون

لمى : اقنعهه تطلعن تشتغلن هم تخلصن من البيت وهم تطلعن جم فلس وهم تكدرين تدبريلج موبايل وتحجين ويا حيدر والاهم متعمين عليه............

نور: ييي والله ياريت لو تخلينه نرجع نشتغل ع الاقل ماگابل خلقتهه وهم اشم شويه هوا

لمى ؛ هاي خلنهه عليه اني اقنعهه

ضليت صافنه على تفكير اسماء

تفكيرهه احسه مال ناس شرانيه

احسهه من تنام ع المخده تفكر شسوي من مصيبه ثاني يوم وشلون تتصرف

لليل اجتي اسماء وابويه وشكلهه فرحااانه وحتى جايبه عشى من براا

نور : هاا الله يساعدكم

اسماء: باااركيييلييي نوور بااركيلللي

نور : مبروك بس على شنو

اسماء: اشترييت سيااره

نور: مبروك منها للطياره ان شاء الله

اسماء: باجر راح اجيبهه

حارث اريد اسجل دوره مال تعليم سياقه

حارث: وليش دوره خو اني اعلمج

اسماء: لاعيني ادخل دوره شنو الي يدخلن احسن مني وبعدين انت تشتغل وتجي تعبان يمتى تعلمني بعد

حارث: براحتج

تعشينه وكملنه واسماء جالگه حلگهه وممصدگه

نمنه وثاني يوم طلعت من الصبح هيا وابويه راحو تكاتبو ع السياره وجابونه واجوي

جان موديلهه بوقتهه توسان بيضه حديثه

حتى احدث من سياره ابويه

اجتي وفرحانه بيها ساعه تلطخهه باللبن وساعه تكسر عليها بيض من الحسد

ولو هيا حقها تخاف من الحسد احنه من الناس نحسدهه على حضهه

مشت الايام واسماء دخلت دورة تعليم سياقه  لحد مكملت الدوره وكامت تعرف تسوق وتعالو شدو روسكم يگرعان

اذا تروح للاسواق تاخذ السويج وتطلع بالسياره حتلو الاسواق قريبه اهم شي تراوي الناس وهيا منا تمووت ع الفخفخه

حجت لمى وياهه بسالفة الشغل ومقبلت كالت بس يطلعن يتواصلن ويا حيدر ونسدت سالفة الشغل

البيت الي كاعدين بي ايجار وايجاره غالي جان بوقتها ٦٠٠ الف

بيوم من الايام جانو كاعدين ابويه واسماء  واحنه بالصاله حجت اسماء ويا ابويه

اسماء: حارث شنو رايك نشغل الفلوس الي بقت ونستفاد منهن احسن مما مضمومات وممستفادين منهن

حارث؛ بكيفج بس شوفيلج ناس ثقه

لان اني هم كبرت والعقد مال شغل هاي اخر سنه ويخلص وتعبت ماريد اجدده ع الاقل نشغل الفلوس ونعيش باللي يجي منهن

اسماء: خليهه عليه اني اشوف ناس ثقه واشغلهم.........................................................

***********************************

حبايب گلبي هاي نور اخت مرام ومالكينه صوره لخطيبها لان متوفي رحم الله من قرأ سوره الفاتحه على روحه الطاهرة.... اترحموله.......

************************************

معنى الحب الحقيقي:

الحب ....

الحب كلمة حلوة عظيمة الي عايشها صّـْـْْحّ  يعرف معناها الحرفي ومعناها الحقيقي الي صرنا نفتقدة !

خلنحجي م‌ـــِْن الجانب الايجابي

الحب شي حلو الحب روح تشاركك تفاصيلك بحلوها ومرها.. شخص موشرط يشبهك ويشبه اطباعك شخص ممكن يختلف عنك بس يكملك تحس ويا بالامان والراحة الامان الي كل شخص محتاجه الامان الي تحس بي موتسمعه فقط الشخص الي سند تكول عنه بدون متخاف بيوم يتركك متخاف بيوم يديرلك ظهرة ..

شخص بس شوفه تلمع عيونك لٱ ارادياً فراشا گلبك تطير ودكاته توصل الف بلحضتها ..

الحب شخص راح يخليك تحب الحياة بعد مافقدت شغفك بيها مو لان هو صار وياك لٱ

لان خلاك تشوف الحياة بعيونة شخص شاف بيك الدنيا وشوفها الك صح

الحب شخصين يحاربون كلشي سوا حتى يوصلون لحضه ينجمعون بيها ..

لما نحب الناس الصح راح نحلو وتحل ملامحنا على كد ميبين علينا احنا نحب هالشخص ..

الحب اذا زاركم راح ينطبع بداخلكم اذا حلو واذا محلو راح تبقى بداخلكم الذكريات والناس الحبيتوها ..

هواي نقرة كتب واقتباسات وشعراء

منهم الي كالو( ماالحب الا للحبيب الاولي)

ومنهم الي كالو(الحب ليس للاول الحب للاوفى)

وكل شخص يشوف الحب بطريقة مختلفه حسب الي عاشه وحسب الحب الي مر بي ..

بس بهالفترة تحديداً اختلف الحب صرنا نسمع كلمة الحب بطريقة مؤذية بطريقة شوهت اسم الحب بسبب الاختيارات الغلط، بسبب التقاليد الغلط ،بسبب الظروف الي صعبت بهواي ...

ما اريد اعممم ..بس بنضري الحب بهذا زمنا فاشل ولو مو الحب فاشل اكو نفوس ضعيفه صارت تدعي الحب وفشلته ...بنضري لا تحبون خاصه اذا جنتو بمقتبل العمر وراكم دراسة و عدكم اهداف  حققو اهدافكم ابنو مستقبلكم استقلو بنفسكم حتى متحبون لغاية او علمود اشياء زائلة موباقية للابد ، صدكوني بس مضيعه للوقت وراح تدمرون مستقبلكم ..

لا تدورون علئ الحب او الشريك من الله يكتب الكم الانسان الصح راح بدون مقدمات يجي بدون ما تحسون ...هو مو كلها بس اغلبيه هسة جذب ماكو حب مجرد تسليه ناس مريضه عدهم عادي يجرحون او عادي كسر خاطر لذلك شلكم بدوخة هل راس والله عيشو حياتكم.. الحب يرادله ناس تكون كد الكلام ناس يعرفون قيمة الشخص الي عدهم ناس عيونهم مليانه يعاملوكم كأنما هدية من الله انتو جيتو لحياتهم وطبعا هذا  الشي نادر ويجوز يكون مو نادر لان احس الحب رزق ومثل مكال رائد(العشك موش تكلب وتختار مثل الموت هم كل واحد بيومة)يعني صدك احس هالبيت حقيقي لدرجة لان لمن يجي الشخص الصح راح يجي بدون مقدمات وراح يدخل حياتكم ويغيركم م‌ـــِْن غير متحسون الا تجي لحضة تكولون وين جان ه‌َـَْـُذآ الشخص م‌ـــِْن قبل لَيــِْ♡‌ ـِْش  مادخل حياتي م‌ـــِْن قبل بس هي قاعدة صارت تمشي علينا بكد ما سمعناها هالقاعدة تكول( كلشي بوكتة حلو) لذلك حبو ناسكم وحبو اختياراتكم بس بالوقت الصح لان مينفع تختارون اشخاص صّـْْحّ  بوقت غلط ...

لذلك نصيحة اشترو راحة بالكم واهتمو بنفسكم واختارو صح وعيشو صح لتختارون غلط او تتوهمون بحب وهمي وتذمون الحب  وانتو معرفتو تحبون ..

اختارو ناس تريحكم تغار عليكم من الناس التضحك اكثر من عدكم تحتويكم تطيركم للسما بحبهم بحيث تطير فراشات گلبگم لمن تشوفوهم تحضنهم عيونكم قبل اديكم تبجي وياكم قبل متضحكون وياهم محد يستاهل ولو يوم تنزل دمعتكم عليه لان ماكو احد احسن من احد ولا دمعه رخيصة ودمعه غاليه.

اما اذا اجتلي الفرصة بالحب ...مراح احب ابد وهلفكرة خارج اطار حياتي اني انسانة مكتفيه بنفسي عاجبتني عيشتي ومرتاحة بشكل مو طبيعي  واخاف علئ گلبي لذلك لا ما احب ..

واذا يوم من الايام صارت هلفرصة لازم يكون هل شخص صدك يستحقني يلا..

لآزٍمٍ تعرفون شغلة الناس الي يخافون على گلبهم حبهم صعب واختيارهم صعب لذلك مراح يحبون بطريقة عاديه 🖤🖤......

- من مأساةٍ قديمةٍ، من حزنٍ قديم ، يعتصر قلبي أسىً وتزداد حدة أيامي، و ينصبُّ إتساع حدقة أعين البشر تجاه ما أعانيه ليشمتوا فيَّ.

عمرنه مراح نسامح حارث واسماء ع العمله الي سووهه

على حقنه الي اكلو 

ع البيت الي باعو ومنطونه من فلوسه شي

دائما عدالة رب العالمين ميجي مثلهه

يجوز ميأذيهم بنفس الطريقه

بس يعرف بشنو يأذيهم

اسماء شكد ما احجي عن حقارتهه ولؤمهه وجشعهه وطمعهه مراح اوفي بسرد كم سطر هذة الشخصيه الغريبه المخيفه

رغم اذيتهه النه  بس يبقى الحقد  الي حاقدي على ابويه اضعاااف مضاعفه

لان هيا اذا گامت واذا گعدت فتبقى مرت اب  بس اويلي ع الاب

دائما اسمع بنات يحجون الاب نعمه والاب الحبيب الاول لبنته  واشوف مرات بنات يبجون على ابوهم لان ميت

اتمنى اجرب هذا الشعور اتمنى عندي اب حنين يسأل عليه يتفقد حالي

يشوفني اذا محتاجه شي او لا

مرات افكر بيني وبين نفسي اكول اذا يموت هم ابجي عليه !!! مستحيللل حتى ماكدر امثل هل شي

مرات اسمع الاسود يخنگ الميت بقبره اكول نذر عليه بس يموت البس عليه اسود الدهر كله حتى بگبره اخنگه

فلوس البيت الي بقت ١٠٠ مليون

١٠٠ مليون فلسس مشفنه منهه

اسماء اشترت سياره ودفعو اجار مال سنه ليگدام وفخفخه ويوميه بمطعم طالعه وووووو كومه اشياء

الي صفه منهن ١٠٠ مليون

شغلتهن يم ناس على اساس ثقه

گامو ينطوهه بالشهر مليون

ابويه فصخ العقد مال عمل وگابلنه وگعد

اسماء ٢٤ ساعه دايحه بالسياره وجيب الزلمه الي يلزمهه

كامت تلعب بالفلوس لعب

ورغم هذا ابد محاولت تتقرب منه

وحتى احتياجاتنه متوفرهه

گمنه نضطر نمد ايدنه على فلوسهم ونبوگ منهن بلا ميدرون حتى ندز نواقصنه والاشياء الي نحتاجهه

هسه تكولون حرام

بس احنه مجبورات

يعني شنو ذنبنه تجي لشهريه لاي وحده بينه وهيا ماعدهه لوازمهه الخاصه !! شنو المعطر مال جسم واحنه نتحسر عليه

خالينه خدم بالبيت  بس حتى الخدم هم يخصصولهم راتب احنه بلاش

لمى ذيل اسماء

تطلع تاخذهه وياهه تجي تكعد يمهه ذيلهه وين متروح لمى وياهه

كل الرفاه والنعيم الي عايشه بس اسماء بخير امي

امي الي ماتت وهيا تجمع الفلس ع الفلس حتى تبنيلنه مستقبل زين

جابت عمرهه توفي بفلوس البيت تالي ماتت وماتهنت بي ولا بناتهه تهنو بي

العيشه الي عايشتهه اسماء مفروض امي تعيشهه

بس يا ترى هاي الفلوس والرفاه راح تدوم لاسماء؟؟

رب العالمين مرات ينطي للبشر يشوفه يحمده ع النعمه الي نطاهه اله لو يطغى ويشوف نفسه ع الناس

ينطي حتى يختبره يفكر بالفقير ! يفكر يزكي او يخمس من الخير الي رب العالمين نطا اله !!؟

مثل مينطي ويغني بلمح البصر يجعل ايده والحايط  وكأن فلوسه تحولت لتراب.......

بيوم من الايام جان نهاية شهر ومفروض يجيبولهم ارباح الفلوس

اسماء تتصل ع المره المره موبايلهه مغلق ضلتت تتصل لحد ما ملت

عافتهه وثاني يوم هم تتصل ومغلق بدت ملامح الخوف تظهر على وجهه

اخذت سويجهه ولمى وطلعت

رجعت اسماء الوجه مكلوب وملامح الخوف كولهه بوجهه

اسماء: لكككك حااارث الحگ ولكككك الحگ راااحت فلوووسنه حاااارث

حارث: هااا خيررر شكو تعيطين

اسماء : لك هااااي ام الزلللم مهزومه وطافره بالفلوووس كليييي شلوون دبرنييييي

حارث: شنوووو شنوووووو 

وووين ولللت انتيييي مو كلتتتي ثققققه واعرفها اسمااااااء

اسماء: لككك ماخذه ب ٥٠٠ مليون ومهزومه وبيتهه ايجاار يكولون مسلمته قبل ١٠ ايام  ناس تكول مسافره وناس تكول رايحه للبصره يم كرايبه

حارث: لججججج كله من وراججججج هذا الي بمشيي بحجي النسواان لججج ضيعتينه انتي ضيعتييينه

يعيط ويصيح واسماء تبجي وتلطم

واني ملامح الفرح  والشماته مبينه على وجهي

صح فلوسنه الي راحت بس طبهن مرض مادام اخذوهن والحمدلله والشكر رب العالمين مخلاهم يتهنون بيهن

خليهن راحن صدقه جاريه على روح امي ولا نبقى كاتلنه القهر واحنه نشوفهن يتسربتن گدام عينه

ابويه يعيط وتعارك ويا اسماء وكتلهه وساعه يبجي مثل النسوان ضل لا شغل ولا فلوس يصرف منها ولابيت يحوي هذا ايجار شهر اذا مدفعو يشردهم ابو الايجار

مرتاااحه راحه عجيبه محاسه بيها من قبل

حللل ويطبهم مرض هذا الي ياكل مال يتيم او يموت الله ميوفقه

عبالهم حوبتنه تتعداهم ! لا والله الحوبه تسحگ وتلحگ وتاخذ ثلثين من الحگ

يعيطون ويبجون ويصيحون ويوميه رايحين يوميه ناس كايلتلهم بكذا مكان شايله  حالهم يبجي الكافر

اله اني وخواتي فرحانات ومتشمتات بيهم

هاي اخر ٣ اشهر بالسنه وبعدهه لازم يدفعون ايجار

زين عيشه مطلوبه منهم

اسماء متعلمه على فخفخه وصرف وتبذير

منين راح تصرف منين تعيش

بقو شهر متزوهرين لاليلهم ليل ولا نهارهم نهار

لحد ما فد يوم اسماء اجتنه للغرفه وجمعتنه وكعدت تحجي ويانه

اسماء: شوفن بنات

تعرفن الضرف الي دنمر بي وتعرفن شلون نضحك علينه ونباگ من عدنه مبلغ مو هين

وتدرن ابوجن فصخ عقد العمل مالته

واحنه كاعدين ايجار ولاعدنه معين ولاعدنه راتب جنه معتمدين ع الفلوس الي تجينه وهسه  الفلوس راحت وابو الايجار بعد شهرين او ٣ يجي يريد ايجار واحنه الي عدنه وجوه ايدنه دوب تكفي اكلنه وشربنه لمدة شهر او اقل

اني اليوم اريدجن ترجعن تشتغلن واني لو اكو مكان يشغلني جان اشتغلت بس تدرن عمري موصغير وماكو بيدي اي صنعه.......

اني ونور عبالك چنه سجينات واليوم كالو رح تطلعن افراج

شكد فرحنه راح نرجع نشتغل ونشوف ناس ومنگابلهه ٢٤ ساعه

نور: باجي احنه ماعدنه مشكله نشتغل

بس احنه شراح نستفاد من الشغل

يعني مفروض حتى لو شي بسيط ناخذ من الراتب تشتري بي احتياجاتنه ونواقصنه

اسماء: يي يي لا شلون لعد

اكيد اخليلجن مصرف الجن انتن هم كبرتن

معارضنه وكالت بدلن خل نطلع نتعشى برا وهم منهه تدورن شغل

الحلو بأسماء حتى لو مفلسه وماعدهه عدهه استعداد تداين وتطلع تاكل احسن اكل مرات اشوف هاي من الزينات بيها

يعني رغم هيا طغت ومافكرت بينه ابدد

بس جانت يوميه تطلع تتعشى وتجيبلنه اكل وياهه او تجيب عشى من بره ونتعشى

طلعنه  تعشينه وورحنه على اكثر من صالون علمود شغل  تركنه رقم اسماء عد اكثر من صالون

المنطقه الي كاعدين بيها منطقه تجاريه بنص سوك صايره

رجعنه للبيت واسماء نوعا ما هاديه

استمرينه لمدة اسبوع يوميه تاخذنه وتطلع ندور ع شغل

لحد ما يوم من الايام كاعدين نتغده واتصل رقم على موبايل اسماء

جاوبت والي فتهمتا واحد من الصالونات الي رحنه عليهم

جان مركز تجميل مو صالون صغير وجانو طالبين وحده بس ويردوهه خبيرة شعر

اصباغ ومعالج وتسريح وتصفيف تسريحات هيج شي

فنور الي راحت لان نور اضبط مني بالشعر

نطوهه مليكانه وكااولهه اشتغلي شعرهه

طلبو منهه لون معين ونور مقصرت لعبتهه الاصباغ والشعر

طلعتلهم اللون الي رادو

انبهرو بالنتيجه

طلبو منهه تسريحه معينه شوي جانت صعبه بس نور اتقنتهه وسوتهه تجنن

من شافو شغلهه  خلوهه توقع عقد سنوي وياهم

الراتب جان ٥٠٠$  + نسبه على كل زبونه  بس الوقت طويل من ١٠ صبح لل١٠ بالليل.......

نور وافقت وبلشت بالشغل وياهم  وحبت الشغل

وبقيت اني يوميه اسماء موديتني لصالون شكل وملت من الصالونات كامت تدورلي بمحلات كوزمتك لان عندي خبره بيهن

لحد ملكيت شغل بمحل تجهيزات صالون حلاقه

يبيعون مسرحات شعر واصباغ شعر كل الاشياء الي متعلقه بالصالون

جان قريب على المركز الي تشتغل بي نور  بس دوامي جان اقل من دوامهه

جان من ١٢ الطهر لل٨ بالليل

راتبي جان ٥٠٠ الف

وعطله يوم الجمعه

كولش كيفت من لكيت هل شغل

بدينه بشغلنه الجديد وبمغامرات جديده وبأحداث غير متوقعه من................................................................

************************************

اشياء عشوائيه احبها ...

المـطر

لزَمـات الادين

الحُـضن بدون سبب

الضِحك الهستيري

صديقاتي كلهم

المشي

احد يهديني  اغُنية بدون مناسبة

شَخص يكلي شفت فلان شيِ وذكرّتج

الغـيوم

إللي يفضفضلي

احـد يضَحك بسبّبي

دلع ترتر

🤍🤍🤍🤍🦋🦋🦋🦋......

أجمل حب هو الذي نعثر عليه أثناء بحثنا عن شيء آخر…

بدينه بشغلنه والحمدلله نوعا ما مرتاحين بي

بس الشي الموحلو انو اني ونور مو سوه

بس مرات اروح يمهه من يخلص دوامي حتى اسماء تجي ترجعنه سوه

عرفت انو نور عدهه علاقه بأبن خالتي ليث ويحبهه وتحبه 

كولش فرحت لنور 

افرح لاخواتي من يكونن سعيدات

نور هم مگعدت راحه وهم اشترت موبايل وبحجة تحجي ويا ليث لان نكطعت اخبارهه فجأه

اني ماعندي اي سلطه  على نور حتى امنعهه من انو تشتري تلفون سري لان هيا اكبر مني ومفروض تتعض من المشكله الاولى

بيوم من الايام جان خلصان دوامي ورحت على نور

فتت شفت نور وجهه مگلوب والدمعه بطرف عينهه

مرام: ها نور شكو  شبيج

نور ؛ ماكو شي

مرام: لعد شبي وجهج مكلوب

نور: ماكوو شي دا اكلج

اني هم عفتهه ضلت تلملم وترتب الهوسه الي كبالهه شافتني سكتت عنها عافت الي بيدهه واجتي كعدت يمي

نور: مرام راح اموت شلون بيا

مرام: يا ستار شكوو

نور: ليث مراام

مرام: شبيي

نور: لججج يريد يطوع ويروح للموصل

لجج راح اتخبل

مرام: ياااا زين واهله ميكدرون يمنعو

نور: متعاركين ويا وطالع من البيت خابرني اعصاب ويعيط

نوب من منعته سده بوجهي وغلقه

مرام: الله يستره اذا هوا مقرر لتعرضيله ادعيله الله يحفظه ويرجع بخير وسلامه

نور: لجج مرام يكلي من يتحرر العراق اجي اخطبج واسوي خطوبتنه بيوم التحرير

لج والله روحي مفرفحه عليه

مرام: ان شاء الله ماكو شي الله يستره ويحمي

نور: اميين

**

نور

من رجعت اشتغل احس اتحررت

كولش مشتاقه لليث ونكطعت اخباري واخباره ومابيناتنه اي تواصل روحي تلوي عليه بس مابيدي شي اسوي....

بحيث من كالت اسماء اشتغلو عبالك اطلقت سراحي

شغلي نوعا ما جان مريح صح وقت هوايه بس اتونس وهم احصل خوش كراميات

جمعت خلال شهر او اقل ورجعت اشتريت تلفون

بس هل مره مگمت اخذه ويايه للبيت كمت ابقي بالمركز لان عندي لوكر خلص بيا فأضم بي فلوسي وغراضي وحتى موبايلي

اول مشتريت جهاز وسيم كارت بدون اي تردد دكيت رقم ليث وقلبي يدگ سريع عبالك اول مره احجي ويا

ضل يدگ يدگ قبل ليفصل جاوب

ليث: الوو منو

نور: ليث شلونك( وراسا بجيت)

ليث : نووور !!! لجج ليش هييج وين رحتوو ليش هيج نكطعت اخباركم

لجج شلون يهون عليج هيج تعوفيني

ولج صار ٩ اشهرر لاسامع صوتج ولا اعرف اخبارج

لجج مثل المخبل صرت اجي يم بيتكم اضل واكف ساعات عسى ولعل اشوف احد منكم  تالي واحد من المنطقه كال شالو صارلهم شهر

لججج تخبلت خبال كلت هذا ابوهم اخذهم وسافر

والله ميت بدونج شلون ينطيج قلبج هيج تسوين بيا

نور: هوا يحجي وني ابجي على كلامه حتى ماعرف شحجي

صدوك جنت مشتاقتله

ضل يعاتب وساعه يضحك وساعه يرزل بيا  وني فرحانه

سولفتله كولشي من يوم لي رجعت من بيت جدو لحد هذا اليوم

تخبل ضل يعد ويصف على ابويه وعلى سوايته العوجه

ضلينه على تواصل گمت من اوصل للشغل اتصل عليه واخلي السماعه وماسده اله من اريد اطلع 

حتى لو منحجي شي اهم شي هوا ويايه ع الاتصال

الي عرفته ليث مفاتح اهله بسالفة الزواج خاله مجان عدهه اعتراض بس ابو معارض

يكله شنو تاخذ بت حارث السني

ابو يضوج من ابويه لان سني

نسدت السالفه من اختفيته

ابو صح جان معارض بس بي مجال حسب كلام ليث يعني مو قافل كلش

من رجعنه تواصلنه منعته يكول لاي احد على مكاني او انو تواصلت ويا اخاف لتوصل لخالي ويجي وتصير مشكله واني اوكع بيها

وهوا خطيه ضل مقل بلاع الموس

لابي يضل ساكت لان يريد يخطبني

ولا يكدر يحجي يخاف عليه

كتله فتره لحد ما الله يفرجهه

كلنه نعرف الاحداث الي صارت ب ٢٠١٣ مال د١١عش الارهابي

بالاخص من السيد علي السستاني انطه فتوة الجهاد......

شبابنه كلهم دمهم حار وميقبلون احد يدنس گاعهم وعبالك اجتهم الفتوه من الله السيد انطه الفتوه منا شباب العراق كن الجنوب للشمال كلهه طلعت

الصغير والجبير الشاب والعريس والطفل مابقى واحد ما طلع

وكلهم يرحون يركضون برجلهم يرجعون بخشبه ملفوفه بعلم العراق

شباب بعمر الورد  ركض عليهم الموت ركض

من جمالهم وحلاة روحهم الگاع مكدرت تحملهم لهل سبب ضمتهم بداخلهه

ليث من  السيد انطه فتوه جان طالب مرحله اخيره رايد يروح بس صايره مشكله جبيره بينه وبين اهله  وخالتي واكعه متخربطه ناقليهه طلعت ضاربتهه جلطه  فهو خايف عليها ومراح

كمل كليه والاوضاع شتدت بالزايد

ركب راسه اله يروح

امه باست  ايده تتوسل بي ماكو ميفيد

ابو متعارك ويا عايفه وطالع

خابرني يرعد عليه لان اهله ميقبلوله يروح

ني هم كمت اتوسل بي بس مفاد كام يعيط عليه وسده بوجهي وغلق موبايله.......

لليل قبل لا اطلع اتصل عليه مغلق

روحي فرفحت ادري بي مخبل ويروح ميوكف بعينه احد

نوب يحرك قلبي يكلي حتى لو اموت اهم شي تطمنت عليج انتي بخير

دزيتله رساله كتبتله

— حبيبي لتخلي بالي عليك

اذا تحبني صدوك احلفك بداعتي لتروح والله ماتحمل يصير عليك شي

دزيتهه وضميت الموبايل وطلعت

وصلت للبيت تعبانه ميته تعب دوب اكلت ورحت اريد انام بس يا نوم لي يمر على عيوني

روحي مفرفحه عليه

لابيه احجي لاحد ولا اكدر اضل ساكته

شكد تعبانه ونعسانه حاولت انام مكدرت تجيني افكار سوده

كمت توضيت وكعدت اصلي صلاة الليل وكعدت ع السجاده ادعيله الله يحرسه ويحمي

شويه ارتاحيت

نمت وكعدت الصبح قبل وكتي عيوني عبالك بيها ملح كمت نضفت وكملت وطلعت للشغل

اريد بي اوصل حتى اشوف شدازلي

وصلت طبعا الصبح بالمركز كوولش يجون زباين قليلين فكولنه ولد وبنات من كل الاقسام نجتمع الصبح ونتريگ سوه

لمتهم حلوه وكلهم قلب على قلب  يضحكون ويتشاقون اخوان عبالك

حضروو الريوگ صاحو عليه كتلهم ما اشتهي

فتحت التلفون لكيته داگ عليه مره وحده

راسا اتصلت عليه وكعدت بالغرفه

اتصل شويه ورفع الخط  شكله نايم يحجي بثگل

ليث: الوو

نور: نهديت بيي

انني مزااعتك وبعد ما احجي ويااك وبعد ابدد لتتصل عليه

ليث: شبيج حبيبي ترى انتي الي اتصلتي مو اني هسه اني كاعد من النوم انتي شبيج دايخه

نور: رووح رووح بعد ماحجي ويااك

هيج تخلي بالي وتغلقه ؟؟

متكول اكو حيوانه يضل بالهه عليه

ليش هيج مستهين بيا

ليث: كملتي؟؟

نور: اي كملت تكدر تجاوبني؟؟

ليث: احبج

بعز عصبيتي ضحكتي وخرب ام العصبيه

نور: ليث بداعتي لتسوي هيج بعد والله وگف قلبي عليك

ليث: حبيبي سدي الموضوع

نور: مادام تطمنت عليك هل اروح اكل لان ميته جوع

ليث : لتسدي خلي الخط مفتوح

نور: صار

اعرفه ميخليني اسده حتى اكون حديه ويا الكل وما اتشاقى ويا احد

وني اصلا ما اتساقى ولا اذب ميانه ويا احد

رحت لكيتهم مكملين اخذت جبن  خليته بالصمونه وصبيت جاي وكعدت اكل واحجي ويا

اجه ولد ويانه اسمه اسامه هذا مايع كولش احسه اختنه كولش حباب ومن يحجي يخرب ضحك يتنعوص

حجه : هاا نونه موصحناج كلتي ما اشتهي

نور: يي وهسه نفتحت شهيتي

هوا يسولف وليث من يمه يدردم

اسامه: يولي اريد امكيجج مواصفاتج تخببل اريد اطلع ابداعاتي بوجهج

ني ضليت مثل بلاع الموس ماكدر احجي شي

ليث كام يعيط يكلي  كوليله خطيبي يسلم عليك

نور: اسامه خطيبي يسلم عليك  واشرتله على اذني بمعنى فاتحه خط

اسامه: ياااا نونو مخطووبه اول مره اعرف حقيره غير تكولين لو تخافين نحسدج

جلب نوب ني بس اتصنع الضحك ماعرف شسوي

ليث زرف اذني بالعياط وهذا مستمر يسولف

ختمها باخر شي

كال: خل اروح اكول للشله نور مخطوبه وضامه علينه

صرت بموقف ما انحسد عليه..........

ليث: شنوو هذا المخنثثث يشاافى وياج شنوو يكللج نونو

نور: ليث شسوي والله هوا هيج ويا الكل مو بس ويايه  اصلا نحسبه اختنه

حتى مينغار منه

ليث: هذاااا حجي ماال اختججن شنوو اختججن ماعنده… ضل يفشر ويعيط

تعذرت منه حتى بس اهدي  وسديت التلفون

كملت اكل ورحت لمكاني ارتب بي

اجو بنات ويايه يتأكدون اذا صدوك مخطوبه وليش مكلتلهم ومن هل حجي

شدعي عليك ليث

فهمتهم انو حاجين بالموضوع بس ماكو خطوبه رسمي

وضلن يسألن ويدخلن باشياء خاصه

وني حديه بالجواب لان ماحب احجي خصوصيه

لليل خابرت على ليث جان مخبوص ويحجي بسرعه

نور : ها حبيبي شبيك

ليث؛ داحضر ملابسي الفجر راح اروح

هوا كال هيج لو احس ذبحني

نور: لا ليث الله يخليك لا والله قلبي يضل يمك

ليث: ياحبيبتي ياعمري يا امي وابويه

اذا اني ما اطلع وغيري ميطلع منو يحمي كاعنه لعد

نونه حبيبتي شلون ترديني انحسب ع الزلم واني كاعي ما ادافع عليهه

تقبليهع باجر عكبه الدواعش يفوتون ويوصلون بغداد ويتعدون على نسوانه !!

محد يقبلهه وداعتج

ولتخافين عليه اروح وارجعلج بالف سلامه وعيونج وهذا وعد

وبس  يتحرر اسوي خطوبتي منج بيوم التحرير

ولتخافين اضل على تواصل وياج

الي اريده منج بس تدعيلنه ننتصر على ذوله الحثاله

نور؛ هوا يحجي وني قلبي احسه يريد يوكف ابجي بس مابيدي شي اسوي هوا حاسم امره ومتخذ قراره

بس بنفس الوقت كلامه صحيح اذا هوا يكعد وغيره يكعد منو يدافع عن ارضنه  ودعته وضليت ادعيله يرجع بسلامه وبيومهه اخذت الموبايل ويايه للبيت حتى اطمن عليه

رجعت للبيت وايدي على قلبي ماريد اغلط الغلط الاول والگف لان محتاجه التلفون اكثر من كل وقت

سويت عشى وتعشينه سبحت وغسلت ملابسي ورحت لفراشي مددت

دزيتله رساله ع الواتس اب

- حبيبي شديسوي

-داسلم على اهلي حتى اطلع هم يله المنشأه تطلع ب٢

- اوكي

ورا ساعه هيج شي دزلي

- حبيبي كاعده؟

- ايي مديجيني نوم

-اتصل ؟ تكدرين تحجين؟

-ي عادي

اتصل وضليته نحجي ابد مجاب طاري حتى ليخلي بالي

لل٣ الفجر نحجي اني نعست

كتله راح انام

كال خلي التلفون مفتوح

خليته مفتوح وضميته بصدري ونمت................................................................

************************************

اشياء عشوائيه احبها ...

المـطر

لزَمـات الادين

الحُـضن بدون سبب

الضِحك الهستيري

صديقاتي كلهم

المشي

احد يهديني  اغُنية بدون مناسبة

شَخص يكلي شفت فلان شيِ وذكرّتج

الغـيوم

إللي يفضفضلي

احـد يضَحك بسبّبي

دلع ترتر

🤍🤍🤍🤍🦋🦋🦋🦋