تحميل رواية «ظلال أمراة» PDF

ظلال امرأة

همس ليل

البارت الاول

شلون راح يخلص العمر مايملون يوميا نفس الحجي والله طكت روحي هسة لو كبرت وما زوجت جان اسوو... اشو كلية بعدني ممخلصة هم اكو اهل هيج متعاجزين من بناتهم لو بس حظي ...ماحس الا شي انضرب بية ودفعني مسافة وكعت ...بقيت مامستوعبة المسألة ولا اعرف الصار وسمعت صوت فوك راسي يكول...سلامات اختي خوما بيج شي...رفعت عيني له شفت عيون سود بلون الليل تباوع لي بخوف ...بس ما فهمت شصار اريد اركز ...التموا ناس واسمع هواي اصوات حولي بس صوت ابو عيون سود مميز قوي وجهوري وله حظوره ...اختي اخذج للمستشفى ...باوعت له هذا ليش يريد يوديني...صوت ثاني...وديها مبينة البنية متأذية ومتكدر تحجي ..هواي اصوات كل واحد من جهة يحجي ...اختي انطيني ايدج اكومج...رجعت باوعت لعيونه السودة شنو الموضوع ليش ما اركز ...حاولت اسند نفسي واكوم حسيت اكو شخص ساعدني التفت شفت مرية عمرها وسط تقريبا سندتني وسحبتني كعدت على الرصيف ...صاحب العيون اختفى والناس تفرقت ...سمعت تكولي تعاي وياي غسلي اني معلمة بهاي المدرسة واشرت على المدرسة القريبة...بنفس اللحظة وصل صاحب العيون ...كال رحت اركن السيارة لان سدت الطريق...باوعت هذا شبيه ليش خابص نفسه...جاوبت المرة ماكو شي ان شاء الله هسة تغسل وترتاح ترة مصدومة بعدهي ...اخذتني للمدرسة ...ودخلت حمامات غسلت ورتبت ملابسي...ومن رجعت باوعت للساعة ..يالله تاخرت على المحاضرة ...المعلمة..شلون صرتي...جاوبتها ..ماعرف شصار اشو فجأة اندفعت وكعت...جاوبت ...الولد جان واكف ضربج بالسيارة وانتي تحاولين تعبرين الفرع وهمزين ماجان يمشي سريع ... وين بالج ماشفتي السيارة...لا والله جنت مستعجلة لا يفوتني الخط ...وعندي امتحان..المعلمة..مهما يكون بنتي جان ممكن تتأذين شيفيدج الامتحان...وهسة اول وتالي راح عليج...تشكرت منها وطلعت...شفته متجي السيارة خارج المدرسة مسافة...حاولت اجاوزه ..هو شافني اجى باتجاهي

-ها سلامات ...شلون صرتي...

-الحمد لله

-ترة والله مو صوجي... ضربت اكثر من مرة هورن وانتي عبالك بغير عالم مو يمج الموضوع

-لا تخاف محد يفصلك ...

-اذا هيج فصل حلو ميخالف

-شنو

-اكول خلي اوصلج خاف تاخرتي

-اشكرك مايحتاج...عفت ومشيت صاح بوراي

-دقيقة بلا زحمة...هذا رقم تلفوني خاف تحتاجين شي

-يعني شراح احتاج مثلا

-يعني خاف دكتور اوعلاجات..اني كفيل بيها

اني هنا توقفت ونداريت عليه

-شنو ضارب سيارة وتعرض تصليحها..وبعدين مو تكول صوجي بعد شكو

-يمة لسان لو مثرامة ...لو ماتجاوبين

عفته ومشيت...وطبعا فات علية الامتحان وملحكت غير محاضرة وحدة ...وشفت صديقتي سارة...

سارة...هاي وينج اليوم ...شو هسة جاية

-اسكتي اليوم من الصبح معاكسة الامور وياي

-بعده نفس موال الزواج

-اكو غيره ...وكملت بحادثة من طلعت

-ياستار...خير شصار

-تعاي خلي ندخل محاضرة وبعدين احجيلج

خلصنا محاضرة وحجيت لسارة كلشي...

-شلونه حلو جان

-منو

-الدعمج

-شوف هاي...واذاحلو

-حتى نمشيج براسه...على اساس ماعندج خطابة خطية...صدك اريج انت ضد مسالة الزواج لو معترضة على الولد

-الولد ماشايفته واحد من اقاربنا من بعيد...بس المشكلة اني احس اهلي بس يريدون يزوجوني عبالك حمل ثقيل ...لذلك كارهة فكرة الزواج...مو لان سعيدة وياهم...لا بس

-بس شنو

-ماعرف ...اجى خطي خلي اروح باي

رجعت للبيت واول موصلت شفت امي وكالعادة واكفة بالمطبخ

-ها امي شلونج ....بدلي وتعاي اتغدي

-الحمد لله...هسة دقايق

خلي احجيلكم عن حياتي حتى تتوضح الصورة من احجي...عمري ٢١ سنة ثالث كلية تربية رياضيات...عائلتي بسيطة ...ابوي متوظف على شهادة الثالث وهسة متقاعد وامي رب بيت وتصير اقاربه لابوي...ابوي من نوع الرجال الي مايحب خلفة البنات...ويعتبرهن هم وحمل لازم يخلص منه..ورب العالمين انطاه ٣ بنات وحدة ورة ثانية يلا اجاه ولد وبعده اني...يعني صار عنده اربع بنات وهاي كارثة...وكت الحصار اغلب العراقيين صار حياتهم صعبة ...وخاصة المدارس..صارت مكلفة من ناحية القرطاسية والملابس والي عنده هواي اطفال مايكدر يخليهم يكملون اني جنت صغيرة بس اسمع امي من تحجي على هاي السنوات...ابوي قرر يكعد اخواتي من الدوام ويخلي بس اخوية عدي ...بس امي مارضت كالت خلي يكملن...هو كال ماعندي امكانية خلي الحك على العيشة وخطية امي كالت له اني اتكفل بيهن وفعلا كامت تخيط لجمعية يمنا ...ينطونها القماش والفصال وعليها تخيط كميات ....بس ابوي صمم يبطلنهن...امي هم ظلت تتوسل بيه ..وصارت شوي خبرة بالخياط...كامت تشتغل خياطة...بس مافاد ياهي توصل سادس تمتحن ويبطلها ويزوجها...لحد مازوجهن ثلاثتهن...اما عدي اخوي اكبر مني ب٤ سنوات...متعين...وصار ٣ سنوات مزوج من بنت خالي...طبعا ابوي رباه على انه شي مميز ولازم يثبت وجوده بكل صغيرة وجبيرة يدخل...هذا شي طبيعي بحكم هو اخوي ولازم الاخ يدير باله على اخته ويتابعها وهي بالمقابل تحترم وتفهم هالشي يسويه لمصلحتها ولان يحبها..بس اخوية غير....يسوي هالشي لان يريد يثبت انه صاحب القرار بالبيت حتى بوجود ابوي وامي....

اني الوحيدة الي كدرت امي تخليني ادخل كلية...وهسة المعارك قائمة على تزويجي...حتى يخلصون من اخر حمل عدهم...للحكاية تكملة

#ظلال امرأة

همس ليل

البارت الثاني

ثاني يوم طلعت من وصلت للمكان الي انتظر بي الخط والي يبعد فرع عن بيتنا لان شارعنا مسدود ...بس وكفت سمعت صوت وراي...

-شلون صرتي...

اني فزيت مامتوقعة احد يحجي وياي التفت شفت صاحب العيون وراي

-فززتني ..الحمد لله

-ردت اطمن عليج...بقى بالي عليج

-لا مابية شي ...من رخصتك ..اجى خطي

مامتعودة احجي وية رجل او انطي مجال لاي احد...بس هذا الشخص كان له هيبة وشخصية ومحترم بنفس الوقت ...استحيت ارده فكان أجاباتي مختصرة ...ورجعت الايام مثل ماهي مابين الدوام وبين البيت ....وصاحب العيون مرات اشوفه يطلع من نفس الفرع الظاهر بيتهم هناك ...مرات يلتفت ويبتسم ..اني راسا ادير وجهي ماعايزني بعد هم فوك همي...

-اريج يوم خلصتي قرايتج

-اي امي محتاجة شي اساعدج..ترة ساعدت سهى ومابقى شي بالبيت

-لا يمة بس اريد احجي وياج

شفت امي مرتبكة وحايرة شلون تبدي

-يمة هم موضوع العريس  ...ادري هلكد حمل على كلبكم...يمة فدوة لكلبج بس اكمل كلية اتصرفي...حاولي تقنعين ابوي فدوة

-عدي اخوج شلون بيه...يوميا يسأل ليش ماتقبل

-اكولج يمة ليش همة الي يجون بيهم خير حتى واحد يقبل

- شعرفتي عنهم يمة ...بلكت يطلع ابن حلال ويخليج تكملين

-اعرفهم لان نفس نماذج ازواج اخواتي اكيد

-ازواج اخوات خوش زلم حبابين وصاينيهن

-ماكلت شي...بس وينهن بالسنة حسنة يخلوهن يطلعن ...والله شنو حلوات يخافون عليهن ...ومتسلطين وهنة متحملات لان يدرن مالهن ظهر يسندهن

امي سكتت لان تدري حجيي صحيح ومحد راح يستقبلهن وية جهالهن...

ثاني يوم من دانزل سمعت اخوي يدردم وية امي وابوي

-يعني شنو هي بكيفها ...يابة ماتحجي اشو ماتكدر تجبرها

بقيت واكفة على الدرج ...ماريد اتواجه وياهم لان اعرف ابوية بس اكولها بوجههم يعند ويجبرني من صارت هدوء وابوية كاله عوف الموضوع والولد ماعجبني وسد النقاش نزلت ..بس تأخرت ...سلمت وطلعت ركض وعيوني ماتقبل تبطل دمع...امسحها وترجع الدموع تزخ...واني احس نفسي ثكيلة على اهلي ..ليش هيج يعني واذا بنية قابل عار ويريدون بس يخلصون مني ...وصلت لمكان الخط ..باوعت الساعة ..متاخرة ربع ساعة واعرف بيه ماينتظر ...دكيت على بنية ويانة كالت طلعنا...كملت علي...كعدت على الرصيف ودنكت ماريد احد يشوف ادموعي ...ماعندي فلوس تكفي تكسي والجامعة بعيدة ...وامتحان ثاني محاضرة

حسيت ظل صارفوكي..لا اراديا رفعت راسي …شفته

-خيرج ليش هالدمع...صاير شي

-عافني الخط

-وهاي تستاهل كل هالدموع

-هاي جزء من همي الجبير ...

-تعاي اوصلج...رفعت عيني له واني افكر احسن ما ارسب ويصير عدهم حجة علي حتى يزوجوني..بعدين كلت لا مو مبرر للخطأ

-اشكرك ..راح اخذ كيات..وبكلبي اكول لحد ماوصل خلص الامتحان

-اعتبريني تاكسي واكعدي لورة...

-مو كتلك مايحتاج...عفته ومشيت واخذت كيا وظليت من كيا لكيا لحد ماوصلت ربي مافشلني واني ادعي لكيت الامتحان هسة بادي ...وامتحنت...

ثاني يوم من طلعت للخط شفته واكف..شلون بلة شورطني وحجيت وياه...تقدم علي

-صباح الخير..

-رجاء اخي ترة منة الناس ماريد تجيني حجاية يوميا واكفلي

-على كيفج رشاش وانطلقتي...حتى الصباح مارديتي علي..

شفت الخط من بعيد ابتعدت عنه ...وصعدت بالخط

بقى فترة بعدها دائما واكف لحد مااصعد بالخط يروح

بالبيت استعملت اسلوب الغياب عن الانظار..يعني ارجع من الكلية اتغدة واساعد امي ومرت اخوي سهى بالبيت ومن يجي عدي اصعد لغرفتي اقرة وانزل اسوي عشى وانظف المطبخ وارجع اصعد واتعشى اني واكفة بالمطبخ ..كلت بلكت ينساني هالفترة...ويبطل شغلة الزواج

مرة هم طلعت مستعجلة واركض تنورتي جانت شوي كصيفة ومن الركض حسيت شيء تمزك وية وصلتي لمنطق الخط ...راسا كعدت على الرصيف بس من ناحية الفرع موالشارع العام..اجى الخط...بقى ينتظر فترة وراح واني كاعدة حايرة شلون اكوم التنورة انفتكت فوك عن ركبتي بهواي لا اكدر ارجع للبيت ولا اكدر اركب الخط...دنكت واباوع بالوجوه الي تمر بلكت اشوف مرة تساعدني...بس بيومها عبالك الناس انكطعت...شفته واكف بسيارته ..نزل واجى باتجاهي واني اباوع عليه وعينه بعيني لحد ماوصل يمي

-صباح الخير ...ليش ماصعدتي بالخط

ظليت صافنة عليه...شنو هذا مراقبني..

-ممكن اعرف انت شنو دخلك بالموضوع

-مو شفتج محتارة واجى خطج وبقيتي كاعدة بمكانج

-الله يخليك روح منة ...مالي خلك مشاكل

-ليش شمسويلج ...داريد اساعدج.

-اشكرك ماريد مساعدة

-براحتج

راح بس ما حرك سيارته ظل واكف مقابيلي عبر الفرع..بلة هذا شسويله ..وشلون اظل كاعدة ...ربع ساعة ورجع

-ترة كعدتج هنا ماحلوة...اذا محتاجة شي كولي

دنكت ونزلت دمعتي ...ماعرف شسوي

-هسة ياعيني كول شمحتاجة ...مو احسن من هذا وضعج

-تنورتي انفتكت من ورة...ماعرف شلون ارجع للبيت

-خلي اوصلج بالسيارة

-لا طبعا واذا شافنا احد ...وبعدين ماعرفك حتى توصلني

-يعني تمشين بالشارع وملابسج ملخة احسن...انتظري...

باوعت عليه..جان لابس سويتر صوف لان الدنيا باردة بالشتى ..نزعه وانطانياه

-شدي على خصرج ...وارجعي للبيت

اخذته وكفت وجهي له وشديته ...صح شغلة واكفة بس انستر احسن من المظهر...اشكرت منه ورجعت بس امشي على كيفي...حسيت اكو احد براي ...التفت شفته يمشي وراي...كلت خاف علمود السويتر ...بس من وصلت للبيت وفتحت الباب ودخلت بقيت شوي الباب مفتوح ودافتح السويتر انطيه له باوعت لكيته رايح ..صفطته ودخلت

-هاي يمة شو رجعتي

-تنورتي انفتكت

-عزة يمة لعد شلون مشيت

-غطيتها بالسترة...وصعدت حتى ماكمل حجي ماريد اجذب …بقيت اليوم افكر بيه...ليش يوميا واكف ...وملاحظ حتى خطي...وكت طلعتي...وانتبه اليوم علي عندي مشكلة...حتى قبل كم يوم من فاتني الخط....بس هو يطلع عمره بداية الثلاثينات يعني مو مال يدور حرشة...ساعة اخاف من مراقبته..وساعة اكول شيكدر يسوي...دخت والله ..هسة اني ناقصة هذا يكمل علي....

ثاني يوم بالليل على عشى...صاحوني اكعد وياهم

عدي... يمة من رخصت ابوي ...باجر نسوان تجي تشوف اريج

ام عدي ...مين ذني

عدي ...اهل صديقي ...حاجاني وكال راح ادز اهلي

اريج..احنة مانخلص من هالموضوع...اريد اكمل دراستي

عدي...لج ياموضوع...لحد وين تبقين ماتقبلين …كبرتي ومو ذني اخواتج من جانن بكدج عدهن طفلين

اريج...هي بقت بس السنة والي بعدها ..اتحملوني

ابو عدي...ليش يابة شنو شايليج على راسنا لو متعاجزين منج...نريدج تنسترين ابيت رجلج

اريج...قابل هسة مامستورة ...الا من يصير فوك راسي رجال يلا يسترني

عدي...انتي ليش لسانج طويل...الولد درة مال الله...باجر تشوفين اهله. سمعتي

ردت احجي وامي  دغتني اسكتي ...عفت العشى وكمت ..هذا الي كرهني بالزواج ...هو مو اجبار ترة ومو غاية امنياتي...خلو عندي عقدة منه ...من اجينا للدنيا كل همهم شوكت يسلمونا لرجال ويخلصون عبالك عار احنة...ليش مو مثل باقي الاهالي يفكرون يخلون بيدي سلاح ضد الزمن...شمدريني شلون يطلع الرجال زين مو زين...اوووف كرهت كل الزلم ..وللحكاية بقية

ظلال امرأة

همس ليل

البارت الثالث

كرهت كل الزلم معتبرين احنة درجة ادنى منهم ...وهمة هبة السماء لنا...كلشي حلال لهم حرام علينا..احنة عورة...اندكت الباب ودخلت مرت عدي

سهى...اريج خيتي تجنبي المشاكل وتحظري الناس جاية بالطريق

جنت كاعدة على الجرباية اباوع عليها...تحاول قدر الامكان ترضي رجلها ...حتى لو داست على نفسها...

-جاهزة لا تخافون

الليل كله مانمت افكر شاريد اسوي ...اجوي ونزلت بدون مكياج ...وملابسي بسيطة ..دخلت سلمت شفت تلث نسوان وحدة جبيرة واثنين شابات ...طبعا كاي ام طلعت ابنها ملاك من السما ...اني اسمع ومانطقت بكلمة حتة ..عرفت ابنها مهندس وعنده مكتب مقاولات وهو ثاني واحد  من ولدها ...والي وياها اخته الحبيرة  مزوجة والثانية طلعت بكدي ثالث قانون...وبعد ماركزت بحجيها...لحد ماراحوا ماعرف شحجوا...من رجع عدي ..كال لامي الجمعة الجاية  يجون يقرون الفاتحة...

-بس اني بعدني ماموافقة

عدي...شنو ماموافقة...ليش شناقصة الولد

اريج ...ناقصه ما ناقصه مايخصني ..اريد اكمل دراستي

عدي...شوفي لج كلمة ماريد منج عرفتي

اريج...شنو هو منو الي راح يزوج اني لو انت..اقترب مني وكفت امي بينا من حسته يريد يضربني

ام عدي...استهدي برحمانك يمة...ابوك بعد ماكال موافق غير تاخذه رأيه

عدي...ابوي موافق ...وعقلي بنتج لا والي خلقها كلية بعد ماتوصل

طبعا عرف يضرب على الوتر الحساس...اهم شي كليتي...ثاني يوم رحت لكليتي وحجيت لصديقتي

- اريج سايري امورج ...بلكت يطلع خوش ولد

- هاي اذا ماعندي مشكلة بالزواج ...اكول بلكت..بس فكرة الزواج كلها رافضتها اني

- اني اعرف من ورة ضغط اهلج ...واسلوبهم بتزويجكم انت ماخذة هيج موقف من الزواج..بس هو ترة سنة الحياة

- ماريد هالسنة اريد اكمل دراستي واتوظف واشوف حالي...وما ابقى محتاجة لانسان يتعطف علي بكم فلس لو يتحكم بطلعتي وبطبتي

- هسة لو انتي من هالبنات الي متحررة اكول ميخالف ...بس اشو انتي من الكلية للبيت..زين اتفقي وياه تكملين دراسة...ومللي خلي هو يفسخ الخطوبة

- بلكت يقبل اكمل.

بقى صاحب العيون يوميا اشوفه نفس الشي ينتظرني براس الفرع ومن اصعد بالخط يروح...وطبعا السويتر بقت يمي من اشوفه اذكرها اكول باجر اجيبها وانطيها له...ومن اطلع من البيت انسى

صار يوم الجمعة والصبح عدي سوالي  زفة وهدد خاف افكر ما اقبل ردت اكول لابوي بس نفس شي هو هم يريد يخلص من الحمل وامي خطية مابيدها شي بقت تقاتل ويانة للاخير بس هسة جبهتين مو جبهة صاروا...لبست شي بسيط وسهى ظلت تقنعني اخلي شوية مكياج ...واجوي ترسوا الصالة ..امه واخته ومرت اخو الجبير وخالاته ....ومن شافوني تفاجأوا من لبسي ...شوي وكالوا قروا الفاتحة وصارت هلاهل وجكليت واني بس عيوني تفتر عليهم..زين شنو الموضوع حتى ماخلوني اشوفه...هو مايريد يشوفوني ....سمعت عدي صاح لامي...من رجعت كالت تعاي ورة الباب راح نعقد شيخ اني تخبلت...رحت للمطبخ

-شنو الموضوع ما اتفقنا هيج

-يمة لا تسويلنا فضيحة صوتج

-يافضيحة شنو داتبيعون طلي ...اني بشر ترة حتى ماشفته ...زين هذا الشفية مايريد يشوفني ...ما اعقد لو شمايصير

دخل عدي...شكو شبيج مو كلت تعاي نعقد

اريج...ما اعقد كلت بس قراية فاتحة

عدي...شلون اطلعين وياه تشترين نيشان...وبعدين شنو فرق دانلعب قابل

اريج...اني حتى ماشفته شلونه

عدي...شدورين بشكله...الرجال مايعيبه شي...وبعدين شنو سالفتج اخاف عندج شي لج

ام عدي...لا يمة صدك جذب ..انت تعرف ماكو اشرف من اخواتك...روح هسة تجي

طلع...واني افور بودي اهج من البيت واخلص من هيج حياة معقولة اعقد على شخص ما شايفته...ظلت امي تقنع بية اجنب المشاكل ورحت الشيخ يردد واني ساكتة ماتقبل تطلع الحجاية مني ...اخر شي امي دغتني احجي ...

-نعم وانت وكيلي...بس عبالك جان اقرار مني بالاعدام لنفسي...رجعت الهلاهل واني عيني تدمع واباوع بالوجوه ..عبالك اني خارج عالمهم مو يمهم....طلعوا وهم ما فات الولد بس عدي كال راح يرجع بالليل حتى تشوفيه وتتفقون على روحة تشترون النيشان ...بلحظتها هو يحجي وياي واني احس شكد ضايجة من اخوي ...جنت اتمنى يصير سند لي مو ضدي....

صعدت تمددت على جربايتي وعيني على السكف...شنو من حياة وية شخص ماكلف نفسه يشوف الي اختارها شريكة حياته ...لازم انسان مايهمه بالمقابل شخصيته ...شاتوقع حياتي راح تصير نحو الاحسن...بس اذا نفس افكار عدي ...اقرى السلام على نفسي

اندك الباب ودخلت سهى..كومي اريج الولد ينتظر جوة ..بس شوي رتبي نفسج

اشرت براسي...وكفت مقابل المرايا بعد ماطلعت سهى واباوع على نفسي ..جاي بعد ما تمم البيعة يشوف البضاعة...عدلت شعري بس ونزلت...بقيت محتارة من وصلت باب الصالة شلون ادخل لو انتظر يصيحوني...اشرت امي تعاي...

- دخلي صينية الكيك والعصير...وشوية ابتسمي يمة ..بيدج تصنعين الراحة لبيتج...اخذت الصينية ...دكيت الباب ودخلت واني منزلة راسي جنت خايفة اشوفه ماعرف ليش..سلمت

عدي...قدمي لخطيبج...مشيت باتجاهه واني اباوع على طريقي بدون مارفع راسي بس اشوف رجليه وطرف بنطلونه افكر شكد ضاربه اوتي بحيث هيج مصبوبة الكسرة مالته من وصلت وقدمت

-شلونج اريج..الصوت مو غريب علي رفعت راسي وبرتباك كلبت الصينية بحضنه...رجعت لورة مصدومة من الموقف واسمع الي حولي يصيحون الله الله هاي شسويت..هو جاوب ميخالف ماكو مشكلة

عدي...شبيج وكفتي مثل الثولة اركضي جيبي خاولي مبلل..طلعت للمطبخ وكفت استعيد انفاسي..هي كلها لحظات بس حسيتها دهر...رجعت وبيدي الخاولي واني اجر برجلي ..انطيته الخاولي جان يمسح بنطلونه وعينه علي....

عدي...يلا صارت بحكم حلالك تعارفوا وعافنا وطلع ..اني واكفة صافنة على حركاته وهو يمسح بنطلونه عقلي وكف عن التفكير بس اتبع يده  من يمسح بدون وعي

-راح تبقين واكفة ...شبيج مال وحدة مصدومة اكعدي...لزم ايدي وجرني على القنفة يمه...هسة شنو

-شلون...احجي بصدمة واني اباوع عليه

-هو شنو شلون...شفتج عجبتيني خطبتج...

-مين تعرف عدي ...مين تندل بيتنا ...ليش هالغموض بالخطوبة...

-عندج تلفون....

-اي ...بوقتها جانت ٢٠٠٧ يعني ماكو نت والتلفونان ارقى شي دمعة والدمعتين اني جان عندي ١١٠٠...انطيني رقمج اخابرج وافهمج...

خطيبي هو نفسه صاحب العيون ...ماتوقعت او تخيلت حتى باحلامي وبعدني لسة مامستوعبة الموقف ...دك تلفوني

-الووو

-شلونج

-الحمد لله

-شبي صوتج...احسج مصدومة

-طبعا مصدومة ...وما متوقعة ابد

-ليش

-شنو ليش..

-من وافقتي من باب عريس مناسب ..لو شنو لعد...اني سكتت ماعرف شنو اجاوبه...جاوبيني ليش سكتي

-ماجان بيدي ارفض لو اوافق

-ليش جنتي مجبورة...مابين عليج من نوع واحد يكدر يجبرج

-مو كلشي يكون واضح

-وهسة اختلف الموضوع

-يمكن خف علي ...ابقى ماعرفك

-نتعارف والعشرة لها دور ...

ظلينا نسولف لحد ماخلص رصبده...عرفت منه اسمه حسن...هههه المسالة تضحك خطيبي وماعرف اسمه...هو مهندس وعنده مكتب عقارات عندم اخ اكبر منه مزوج وعنده ٣ اطفال عنده معمل اخشاب واخ اصغر منه مدرس هم مزوج بس بالخارج عايش واختين وحدة مزوجة والثاني بكدي ...عمره مثل ماتوقعت ٣٠ يعني اكبر مني ب٩ سنوات..وعرفت منه من موصلني للبيت مندل بيتنا وطالع اصلا يعرف اخوي لان احنة منطقة وحدة...وتستمر الحكاية

#ظلال امراة

همس ليل

البارت الرابع

الاسبوعين الي بعده جان حافل ...بين نشتري نيشان وعقد محكمة وامتحانات ..فهو راعه هالشي وماضغط والظاهر يعرف طبع اهلي ماكو طبعة وطلعة قبل عقد المحكمة...بس بقى يخابرني بالليل يطمئن ويسال على امتحاناتي ويتركني اقرى....خلصت وقررو تصير الكعدة الجمعة ... بعدني مامتقبلوة الموضوع..بس لازم اطيع مابيدي شي...رحت للصالون بعد ما أجرت بدلة طويلة جويتي لونها وسويت تسريحة بسيطة لون شعري اسود بلون الليل ومكياج ماحبيت يكون صارخ...ومن اجوى اهله ...جانت مرت اخوه الجبير حلوة بس كلش شايفة نفسها ...وامه انسانة بسيطة وطيبة والظاهر متعلقة بولدها حيل...واجن اخواتي وكل وحدة توصيني من جهة ..ويكون جوابي لهم بس هزة راس...كالو راح يدخل العريس...من الباب كانت عينه مركزة عليه وبيها فرحة غريبة اني هم ظليت اباوع عليه...طويل بس يميل للضعف اسمر صاحب لحية خفيفة سودة وشعر اسود سرح واحلى مابيه عيونه سود  كبار ورمش طويل عيونه بيها سحر غريب ومعبرة...هسة شفت بيها لمعة قوية ...من كعد شاورني ...طالعة كمر ولو انتي على طول حلوة..لبسني الذهب ..ايدي جانت ترتعش بس ايده لا  جان مسيطر ....ومن خلص سحب راسي وباسني من كصتي...من طلعوا خابرني بالليل...

-بعد خلص.. عقد شيخ عقدنا ...محكمة وعقدنا ...كعدة مهر وسوينا ...لحد يحجي ويكول بعد...اريد اخذ راحتي وياج

اني سكتت...كال اعرف انتي نظيفة كلش...بس حاولي تجاوبين وياي ....حتى نتفاهم ونكدر نكمل مسير حياتنا

-بعدنا بالبداية انطيني وكت اتعود عليك...

-ميخالف ما اضغط عليج..

ثاني يوم اجى وطلب من ابوية ياخذني نتغدة برة ...وداني مطعم وكعد يسولوف لي على ايام كليته ...حسيته يريدني اخذ عليه...وبعدين فررني شوي واشترالي كم حاجة ورجعني ..بس ماحاول يلمس حتى ايدي

باقي الاسبوع كام هو الصبح يوصلني للكلية وارجع بالخط ويخابرني بالليل.. يحجي تفاصيل يومه واني هم واحيانا يحجيلي عن حياته السابقة..خلال هالفترة اكتشفته انسان كلش هادئ...وصبور ومايستعجل ابد....

ابوي كال ماحب طلعات وطبات خلي يفضها وعلى العطلة تزوجون...حمل يريد يزيحه عبالك..

هو كيف طبعا وعزمنا على بيتهم ...حتى نشوفه ...ورحنا كلنا ...هنا التقيت لاول مرة باخوه الجبير...تفاجأت بيه ...هو نفس طول حسن بس صاحب عضلات حسب ماعرفت عمره ٣٥ ..مخلص اعدادية ولازم محل ابوه بعد وفاته مال نجارة اخشاب ومكبره مسوي معمل...عيونه هم كبار بس لونهن اصفر...وشعره هم لونه كستنائي ..بس ينضح غرور وتعجرف وعصبية بكل حركة مبينة عصبيته...ماحبيته ...وحتى تحسيه من النوع الي يفشل المقابيله ...يعني نوع ماترتاحين تحجين وياه ...بالعكس له رهبة وخوف...ما حجيت كم كلمة وياه...زوجته بنت خاله وماخذها عن حب...من خلال لبس حسن وسيارته جنت اعرف حسن وضعه مرتاح ..ومن شفت بيتهم تاكدت بيتهم ٢٥٠ وطابقين وبناء حديث يعني وضعهم المادي كلش مرتاح ...عكس وضعنا احنة بيتنا ١٠٠ ..غرفتين فوك وحدة لي وحدة لاخوي...لذلك حسيت مرت اخوه تباوعلنا بتكبر ...خلصت العزومة واني احس حسن كلش فرحان بجيتنا وحاير شجايب ...

بيوم رحنا اشترينا غرفة من نزلنا من السيارة لزم ايدي وكادني اول مرة يسويها..وجنة من نفتر نختار الغرفة يعصر ايدي بيده وعيونه تلمع فرح....اختارينا غرفة مصرية حلوة كلش..كالوا نجي العصر ننصبها...رجعني للبيت ورجع حتى يستقبل العمال...من خلصوا خابرني كال باجر اجي اخذج تشوفيها...طبعا لازم يروح احد وياي...اجت امي...رحنا وتلكتنا امه هلاهل واخته جانت هم حبابة اسمها مها ...صعدنا نشوف الغرفة وياي امي ...مها كالت لامي خالة تعاي اشوفج غرفتي الظاهر جانت تريد تفضي الجو..اني ما جنت منتبها فجأة حسيته وراي صار وصوته بأذني

-شوكت تنوريها للغرفة...سكتت ...بعدج ماتعودي علي ...ليش دائما بهيج مواقف اسكتين...دارني باتجاه وبقى لازمني من زنودي ...اني دنكت مد يده ورفع وجهي ...اجت عيني بعينه...همس اريج احبج واريد احس بيج تحبيني...غمضت عيني واني ماعرف شجاوبه...حسيت بشفايفه على خدي ..حاولت ارجع لورة لزمني اقوى ..ومشت شفايفه على طول خدي احد ماوصل لشفايفي ...اول ملامسهن دفعته بقوة ...كان رد فعل طبيعي...بس هو حسيته ضاج...والمشكلة اني ماكان عندي اي مشاعر تجاه الي سواه...

-اريج مو هيج...ترة عفتج براحتج وماضغطت عليج...بس لازم تفكيها شوي...خلاص الزواج اول ماتخلصين امتحانات

حاول يطلع جلبت بذراعه هو ندار علي

-حسن عفية وكليتي ...مابقت بس سنة وحدة

-بعدين نتفق...عافني وطلع..

بقى يومين بعدها ما اتصل بس يجي الصبح يوصلني للكلية ويكتفي بصباح الخير ويظل ساكت واني ماعرفت افتح موضوع وياه ثالث يوم

-حسن مارجعتلي خبر

-على شنو

-على موضوع الكلية...التف نظر لي نظرة سريعة ورجع يباوع على طريق كدامه...اني ظليت اباوع عليه ومتلهفة لجوابه..

- يعني صار يومين ما متصل وماحاولتي تتصلين وتشوفين شبيه ...وهسة كل الي يهمج كليتج

-جنت ملتهية بالدراسة وداشوفك الصبح يعني مامتوقعة مريض او بيك شي لاسامح الله

-ها ...اهم شي دراستج

-افهمني حسن...اني هواي جاهدت حتى اكدر ادخل كلية وامي هواي تعبت وياي ...ماريد اخر مرحلة  اعوفه

-لا تخافين ماتعوفيها...

جان ماباقي على الامتحانات النهائية اقل الشهر...بس حسن كام يكتفي يخابر يسال علي ويوصلني للكلية الصبح وبس

-حسن شو احس مو مثل قبل

-شلون يعني

-يعني تخابر على كد السؤال...ما نطلع مثل قبل

-لان اعصابي تحترك وانتي باردة مثل الثلج...كلت خليها على راحتها لحد الزواج

واستمر نفس اسلوبه اني هم كلت خلي استفاد من الوكت واخلص امتحاناتي...ومن خلصنا كال اتفرغي للتجهيز ...الزواج خلال ١٠ ايام تفاجأت ..بدت ركضة للتجهيز...بس ماعندي فرحة عروس يمكن لان بقى ابالي اني مغصوبة...رغم الولد حباب وصابر وياي ..بس ماعندي اي تفاعل وياه..

بيوم الحنة ابوي رفض يجي حسن كال ماعدنا هاي التقاليد ...يوم العرس طلعت كلش حلوة واجاني للصالون هو واخوه يسوق ورحنا للمصور من نزعت اختي الكب عني ...حسن ما نزلت عينه وجانت الفرحة بعينه جبيرة...زفونا للبيت لان جان الوضع مو مال فنادق...بس امه واخته باتوا يم اخوه الجبير...من سلموا اهلي علي حتى يرحون...حسيت كلبي

الف بدكاته ..جنت كاعدة على الجرباية وبدلتي مفروشة حولي...واحس ايدي ترجف ماكدر اسيطر عليها

-احلى مظهر ما انساه ابد...رفعت عيني له جان متجي على الباب ويباوعلي...تقرب وكعد يمي..ولزم ايدي..

-ليش ترجفين..صار كم شهر ماعرفتيني مستحيل أذيج

-اعرف...بس...خلة اصبعه على شفتي

-اششش مابيها بس...تعرفين من شوكت حبيتج...اشرت له براسي لا...كال من يوم ضربتج ..ودنكت عليج حتى اساعدج ..رفعتيلي عينج وبلحظتها اخذتي كلبي...وبقيت دائما انتظرج حتى تكحل عيني بشوفتج قبل لا صعدين للخط...

-اي لاحظتك ومرات خفت من مراقبتك

-حقج بهيج وكت تكونين حذرة..

-ليش مشيت وراي من انطيتني السويتر

-بيومها ردت اتاكد توصلين سلامات ومحد يتعرضلج .

-وبيومها اندليت بيتنا..ضحك

-لاطبعا قبلها عرفت وين بيتكم وبيا كلية انتي وكل المعلومات المطلوبة.

رفع ايده وخلاها على خدي وظل بحرك ابهامه عليه...وهمس بصوت نبرته جشة ..احبج واموت بعيونج الي ذوبتني ...تقرب من وجهي بحيث حسيت بنفسه

-احلى ليلة بعمري ومامصدك نجمعت بيج...راح اخليج اسعد انسانة...نزلت ايده لركبتي وشفايفه طبعت على خدي ...

-حسن نتعشى اول

-ينتظر العشى كافي مرمرتيني ...وايده سحبت سحلب البدلة

..كملت ليلتنا وثاني اليوم اجو اهله اخوه وامه ومرت اخوه ريام ومها …من اشوف اخوه اخاف ...احسه ما يعجبه شي ...واجو اهله باركولي

حياتي وية حسن كانت عادية ...رغم هو اخذني عن حب ...ويتفانى بحبه ويحاول قدر المستطاع يسعدني ...بس اني جنت احس ناقص شي بعلاقتنا ...يجوز سيطر علي فكرة اني مجبورة ...يجوز عقدة ان الزواج وسيلة حتى اهلي يخلصون مني بقت بعقلي الباطن...هو ماقصر بشي واني هم من ناحية البيت ومن ناحية امه واخته لان امه تريد بس تسعدهم داومت رابع هو جان يساعدني قدر الامكان ...بس من جان يجي اخوه ومرته احس بنوع من الحسد او الغيرة من اشوف علاقتهم مليانة حب ...وصراحة علاقتي جانت سطحية بيهم...لان يباعون بطرف خشمهم...بس علاقة حسن بأخوه علي جانت قوية كلش عبالك مو بس اخوان لا اصدقاء...مرة جانوا يمنا واني جنت بالمطبخ اجهز عشا ...حسيت واحد وكف وراي على السنك

-حبيتي ماخلص العشى

-حسن شبيك وخر لا احد يجي ...وجنت ادفع بيه

-واذا اجى انتي زوجتي ...ليش تتنحسين من هيج مواقف

-راح نرجع لنفس الموال ...طبعا دائما من يحاول يبوسني او يحضني اني ما اقبل...هو عدهم عادي بعائلتهم التعبير عن مشاعرهم كدام الاخرين...بس بعائلتنا لا واصلا حتى المرة ماتكعد يم رجلها اثناء الوجبات مال الاكل وماعدنا ننجمع سوة من يجن اخواتي وازواجهم...هو مايفهم اني تربيتي هيج واني هم ماشرح...لذلك دائما تنخلق مشاكل من مواقف مشابهة ...

-ادري ماتعودي عليه راح يصير سنة مزوجين.

-عدنا غرفتنا مو الا كدام العالم

-وين العالم...شو وحدنا هسة ..وبعدين العالم ذولة اهلي يعني ماكو احد غريب

-واذا اهلك يعني عادي ناخذ راحتنا..ليش لعد خلو غرف النوم

-قابل شمسويلج هي كلها بوسة ...

رفع صوته واجت امه لان صوته عالي

-شبيك ماما ليش صوتك عالي

-ماكو شي ..اني طالع

-وين امي غير تتعشى

-ما اريد سم

طلع واني بقيت محرجة وكت العشى ...

علي...حسن وين راح ليش مابقى على العشى

اريج ...ماعرف طلع

علي...يعني شنو ماتعرفين غير تسأليه ...خابرتيه حتى يجي

ام علي...امي من يجي هي تصبله عشى

ريام..والله اني ابد ماتعشى اذا مو انتظر علي يجي يلا

بقى علي يباوع صفح ومرته تشمر بسامير ..متاكدة هو سمع صوت اخوه ..انتظرت خلصوا عشى شلت المواعين وترخصت وصعدت اقرا ...تاخر يلا اجى حسن ...اني سويت نفسي نايمة حتى مانرجع نفتح الموضوع...ثاني يوم وصلني وما حجينة باي شي من رجعت صاحتني امه

ام علي..شوفي خالة اني بطبعي ما ادخل بحياة ولدي...لان اعرفهم سباع واصحاب شخصية ...بس حسن عندي غير شكل...لان كلبه رقيق وحنون لابعد الحدود ...وحتى من همة صغار جان اكثر واحد يحن على اخوانه واخواته لذلك تشوفين كل اخوته يحبونه..داتشوفين علي ..صح هو ابني الجبير..وماقصر ويانا بس لان شال الحمل من وكت صار عنده نوع من القسوة..اني دوختج بس بنيتي انت حبابة وماشفنا منج اذية ...بس علاقتج برجلج حاولي تحسنيها لا يروح يدور حنان برة بيته

-خالة ليش مقصرة وياه اني

-حشاج من القصور بس ماقصد من ناحية الشغل ..لا من ناحية العواطف...بعدين سوي طفل اربطي بيج

-خالة اريد بس اخلص السنة

-بين ماتحبلين تكون السنة خلصانة ...وولادتج تصير بالعطلة …واحنة وياج...فكري بكلامي

اشرت براسي..وترخصت وظلت حجايتها دور براسي...وتستمر الحكاية..

#ظلال امرأة

همس ليل

البارت الخامس

ظلت حجاية عمتي تفر براسي...بس مو هذا حلمي ..اريد اكمل واتعين خاف من اسوي طفل مايقبل..وبنفس الوقت خاف يمل وارجع لموال اهلي ..حسن خوش انسان بس المشكلة بية ...قررت اترك المانع واشوف...حسن هم رجع طبيعي وياي ..وشبه تعود على اسلوبي...خلال هاي الفترة اخته مها جانت مخطوبة لواحد من اقاربهم ومسافر...وجان مشي معاملة لم شمل ...اجت الموافقة ..ورادو يسوون لها حفلة حتى تسافر...اني ظليت صافنة شلون مابقى كم شهر وتتخرج راح تعوف كليتها حتى تسافر وتزوج وجانت فرحانة...طبعا علاقتي بيها زينة بس مو قوية لان اني كلية الصبح ومن ارجع بين القراية وبين البيت ماكو وقت اكعد وياهم ...وهي هم ملتهية وية خطيبها...اما حماتي الثانية اسمها زينة ....مدرسة وعدها دوام واطفال تجي كل اسبوعين نص نهار كلهم ينجمعون على غدة ....واغلب وقتها تروح يم اخوها علي لان هية وريام كلش متفاهمات ....وعلي حماي جان ليلا يجي يم عمتي يطمن عليها ويكعد وية حسن...اني اسلم واقدم الواجب واصعد لغرفتي اقرى....

يعني نمط حياتنا اعتيادي واقل..كلمن ملتهي بحياته...صح مترابطين سوة ...بس اني كنت خارج دائرتهم...ماحاول ادخلها ...اشوف هيج احسن حتى اجنب المشاكل..بس هذا الشي جان يضايق حسن ...لان يتمنى اندمج وية عائلته...

صار يوم حفلة مها...لبست فستان طويل وردن بس فتحاته جانبية لحد الركبة ..وفتحت شعري ولفيت اطرافه ومكياج ...شفت ريام من شافتني سمعتني حجي وهية تحجي وية امها

ريام...شفتي الخير يخير...تذكرين بخطوبتها

اني سمعت الحجي وغلست ردت اونس نفسي واغير جو ...وخاصة اني احس نفسي صار مدة مجهدة ...طلعت من الصالة للمطبخ اجيب اغراض شافني حسن

_لك شنو هالكمر مالتي ...

_شوكت اجيت مادري بيك...

_لو ادري هيج حلو ينتظرني جان ماطلعت...وين رايحة تعاي..جرني له

_حسن اوكف شبيك خلي اودي الاغراض...هو بقى يجر بية ويبوس بخدي وبركبتي واني ادفع بيه ..وخر حسن شبيك منة العالم

_ياعالم عوفيهم بس شوي تعاي ...

_اوي حسن دوخر شنو شبيك ...دفعته حيل وية ما طلعت صار علي بوجهي ...خزرني بنظرة ...اني خجلت لان توقعت شاف موقفنا..حاولت بعد ما اطلع لحد الليل صعدت شفت حسن ضايج..بس ما حجى هذا اسلوبه من ينزعج مني يسكت .....

سافرت مها ....واني طلعت حامل...طبعا حسن طار من الفرح واني جانت مشاعري عادية...بديت اشك بنفسي ماعندي احاسيس ...ليش ماكو شي يفرحني ...والحمل زاد الفجوة وية حسن لان جنت ما اطيق يلمسني وهالمرة ظهرت مشاكلنا....كام حسن مايقدر مسالة حمل وحام ويطالب بحقوقه ...واني جنت ماكدر اكوله ما اطيق لمستك...

_حسن والله تعبانة منة البيت ومنة الدراسة والنوب الحمل

_احنة اتفقنا تخلصين يلا نسوي طفل ...ليش استعجلتي...أجلي السنة اذا ماتكدرين

_مابقى شي على الامتحانات ماتسوة..بس اتحملني

_اريج اني ما متحملج ...لج صار سنة ونص من زواجنا ويوميا اكول راح تتغير ...وصابرعليج ..هسة صرت مامتحملج

_ليش بشنو قصرت وياك...كلشي جاهز لك

_امي هم جانت مجهزة كل الي انتي تجهزيه..اني اريد زوجة..حبيبة ..وصديقة لذلك أزوجت مو اريد وحدة تطبخ وتنظف وتكوي..اريج من ازوجنا لسة ماسامع كلمة حب منج ...اقصى شي بعلاقتنا الفراش..وخارجه كلشي عيب..عبالك مو زوجتي

_استحي كدام اهلك

_هو منو من اهلي شو جانت بس مها وامي

_هسة هذا كله لان كلت تعبانة ..وماكدر

_مايفيد الحجي افوت اطلع احسن...

بس بدى من اقل الامور يتنرفز ..وفقد هدؤه ..وحتى عمتي بدت تلاحظ هالشي..خلصت السنة...ونجحت...بس كمت اشوف حسن يبتعد عني واني هم تعب الحمل وخاصة بية توم ماركزت وياه ...

دخلت بشهري وبعد عشر ايام اجتني الالام ...نزلت على عمتي...

-يمة خاف عندج ولادة خلي اخابر حسن

_عمة راح اموت الله يخليج ماكدر بعد

اتصلت عليه ...شوي شفنا علي جاي

_حسن خابرني هو باطراف بغداد ...خلي اوديكم للمستشفى لحد مايوصل ..

_عمة خابري امي خلي تجيني

_اي يمة هسة بالطريق اخابرها

جنت استحي ارفع صوتي كدام علي...لذلك كمت اعض على الخاولي لحد ماوصلنا ..ولادتي تعسرت حيل...بلحظتها كرهت حسن والدنيا وكرهت اني امراة من كد ماجنت اتألم ...ولدت  بعد نص نهار طلق...بعدها ماحسيت بالدنيا من كعدت شفت امي وعمتي وحسن يمي...تقرب مني حسن وباس راسي

_حمد لله على سلامتج اروجة..

_وين الاطفال

_ بالخدج شوي تعبانين

_ شجبت...جاوبتني امي

_صلي على محمد ولد يمة

دخلت الممرضة رادت اسماء لهم...هو ظل يباوع علي

_شنو تحبين تسميهم

_بكيفك

_حسام وهمام

_هاي هية

بعد ماطلعنا ...بقى فترة حسن يهتم بية ...اني هم فكرت خلص ارجع اخصص وقت له ومن يكبرون شوي الجهال اقدم تعين...بس المشكلة توم كعدتهم سوة ونومتهم سوة ...واغلب الليل كاعدين...اتعبوني كلش...هو كانما استسلم للامر الواقع وبطل يطالب باكثر من حقه بالفراش ..ومرات اصلا قبل ما يتقرب لي يكعدون ...

شوي شوي حسن التهى عني اغلب وقته خارج البيت ومن يجي ملتهي بالموبايل...حتى الصبح كام يعتمد على امه بالريوك ..واني بعز هوسة الاطفال والبيت جبير والشاغل فكري اريد ارتب اموري حتى اتعين ..

مرة الصبح كعدت وياه...

-حسن اليوم تجي من وكت

_ليش محتاجة شي

_اريد احجي وياك

_الله كريم

طلع وهم تاخر خابرته..كال عندي شغل اتغدوا وبيومها تاخر لليل يلا اجى...

_تاخرت اليوم

_ جان عندي شغل وبعدها مريت يم علي

_حسن مو ملاحظ نفسك هواي داتاخر هالايام

_زين لاحظتي...وبعدين اكو شي محتاجته ومقصر وياج

_اريد احجي وياك

_ان شاء الله خير ..كولي

_اريد اقدم تعين ...التفت علي بخزرة

_شنو...تتعينين ليش وين وكتج وجهالج صغار

_الجهال عمرهم ٨ اشهر اكدر اوديهم حضانة...وقتي ارتبه

_حضانة شنو بهيج عمر...وبعدين مامحتاجين لراتبج.

_مو شغلة راتب اني ليش درست..وهواي امهات اطفالهم صغار ويداومون ومرتبة امورهم

_اولا درستي حتى شهادتج بيدج ...ثانيا ذني الامهات محتاجات الراتب ومبهذلات جهالهم علمود العيشة...انتي مامحتاجة لبهذلة نفسج وجهالج...وبعدين اذا تكدرين ترتبين امورج..ارتبيها حتى اعرف نفسي مزوج

_انت وينك...اشو تطلع الصبح ماشوفك غير وكت الغدة وبعدها تطلع وية جماعتك لو ترجع لشغلك وبالليل وية اخوك

_ ليش شسوي ابقى بالبيت ..انتي ملتهية وية الجهال لو بالتنظيف..شفتج فضيتي نفسج لي ومابقيت.

_هسة الموضوع صوجي...ابقى وشوف جهالك شلون خابصيني..ليش من تريد حقك تجي من وكت

_حتى هاي صايرة بالمنية ...ماكملنا ٣ سنوات وبالمناسبات يلا الكاج

_اهو حسن انت والله ماعدك شغل وعمل...اني وين وانت وين هو ملحكة احك راسي من ورة جهالك والبيت

_خلص لعد لا تكولين اريد تعين

لف راسه ونام.....

بعدها بديت الح على مسالة التعين واصيت صديقاتي شوكت مايصير تقديم على التربية ينطوني خبر...كلت بوقتها احاول اقنعه

لحد يوم جان حسن بالحمام..واني جنت انظف ميز التواليت دك موبايله مسجات فايبر...باوعت ظهرت رسالة على الشاشة

_ها حبي تتاخر

الرسالة الي بعدها

_راح اطلع  ...لا دك امي وياي

بقيت عيني على شاشة الموبايل حتى مارفعته عن الميز بس تبسمرت بمكاني طلع حسن شافني

_اريج شبيج..وكف قريب مني ...شكو شبيج

رفعت عيني له ...افتح الموبايل

-ليش

_افتحه

_لا تأمرين ...وما افتحه ...سحب موبايله وابتعد عني

وتستمر الحكاية ....

#ظلال أمراة

همس ليل

البارت السادس

بقيت صافنة على حسن وهو يبتعد عني ومصدومة ..الكلام مايقبل يطلع من حلكي ...

_منو هاي

_عن شنو تحجين

_الي تنتظرك تخابرها...التفت علي متفاجئ

_شنو تفتشين وراي

_يعني اكو وحدة ...سكت ماجاوب ...صحت جاوبني

_يهمج يعني ..

_ليش مايهمني لعد ...مو زوجي ..جنت احجي بعصبية وهو يجاوب بكل برود

_من شوكت عرفتي عندج زوج وتهتمين بيه

_الي يسمعك اني هاملتك وحايرة اطلع وافرفر بالاسواق...مو كله بيتك واولادك وكلشي ماحاسس بيه ولا تعرف شلون يجي يمك...جان يلبس ملابسه...تقربت منه واشرت على ملابسه بعصببة ...ملابسك نظيفة مكوية...اكلك جاهز...بيتك نظيف..جهالك اني اسهر واربي...هذا كله انت ماحاس بيه يجيك جاهز...لزم يدي الي جنت اشر بيها بقوة

_صح ..هذا واجبج مامسوية اكثر من اي مرة تسوي ابيتها ومقدره اني...بس كله مايدخل ضميري بدرهم ...اذا ماتفرغتي لي ...اذا مالكيت راحتي ابيتي..ولكيت مرة تسمعني وداريني..الرجال يطلع ويتعب طول اليوم حتى مو بس يوكل ويلبس..يريد من يرجع يرتاح .يسمع كلمة طيبة..ضحكة حلوة..مو كل مارجع ماسمع غير تعبت من الشغل طول اليوم...صار شكد ماكصيتي شعرج..اخر مرة شوكت لبستي سيت نوم ...جرني للكنتوروفتحه وسحب سيتات النوم...شوفي ذني نايمات هنا ....سالتيني شلون شغلك...وووووو.شعدد لج..هد ايدي بدفعة

_يعني اني غلطانة لان احاول اخليك بيتك نظيف ومرتب وتلكه كلشي جاهز

_افهمي ...صاح بصوت...ماكلت غلطانة بس مانعيش يومية والشغل مايخلص المفروض لي جزء نعيشه ونتمتع بشبابنا ...شوكت الكاج من نكبر ونصير مابينا حيل نشيل نفسنا

_هذا كله مو مبرر تخوني..يعني اذا انتة هملتني يصير اروح اصادق عليك واخونك...ماحسيت الا راشدي نزل بقوة على خدي..ولزمني من زندي وقرب وجه لي وهو يجي بعصبية اول مرة اشوفه هيج

_حجيتيها هالمرة ...المرة الثانية ماتلومين الا نفسج ..اني رجال وانتي مرة والفرق جبير

_طبعا مقامك جبير والمرة جوة الرجلين....رغم حسيت شكد هاني من ضربي بس حجايته جرحتني اكثر من ضربه 

_مو هيج تنقاس لج ...القصد المرة هية العفة تصير ..سمعتيني..جان يهز بية ويا مايحجي...

_جريت ايدي منه بقوة...اذا تحب تنطي اعذار لنفسك حتى تخون انطي بس اني مانطيك عذر...رحت جريت جنطة وفتحت الكنتور اسحب ملابسي منه

_وين ترحين

_عندي بيت اهل يلفوني

_اهلج الي ماصدكو يزوجوج بحيث حتى مافكروا يخلوج تشوفين الي خطبج...وين يكعدوج جان يحجي بعصبية ويضغط على اسنانه

_رفعت عيني له واني متفاجأ من حجابته...رحمة الله والديك . هو حس على نفسه وعلى حجايته عاف الغرفة وطلع...كعدت على الجرباية واني اعصابي تفور واحس نار بداخلي...هذا الوكت الي جنت اخاف منه...الرجال مال أمان...يجوز قصرت وياه...بس ماتوصل يمد ايده علي ويعيرني..لو متعينة جان ماهتميت اكدر اعيش نفسي وجهال ومااحتاج للاحد...

لميت ملابس لي وملابس لجهالي واني افكر شلون راح يكون استقبال اهلي لي .. نزلت تلكتني عمتي الجهال كانوا يمها...

_وين رايحة امي

_عمة لبيت اهلي

_اكو وحدة تعوف بيتها ...لا يمة مايصير...اني سمعت صوتكم وكتلج من البداية اني ماادخل بينكم...بس احسبيني امج ...بيتج لا تعوفيه ..ازعلي عليه بس ابيتج...ولا تكبرين المشكلة وتنطين مجال لغيرج تستفاد من مشاكلكم....

_عمة جرحني حتى بكلامه

_ماسامعة خوفك من الحليم اذا غضب...حسن هادي وصبور بس من يعصب يفقد يكوم مايعرف يحجي ..لا تاخذين عليه نقطة بساعة عصبية ...استهدي برحمانج وارجعي لغرفتج وهو يحس بغلطه ...وانتي هم يمة اتفرغيله شوي...ولدي يحبون المرة داريهم ودلعهم لان ماعدهم مثل باقي الزلم زايدة برة بيتهم...لذلك يركز على بيته ويريد من مرته كلشي هيج جان ابوهم...كامت باستني اصعدي لغرفتج وكولي يالله

عمتي جانت اصلا معلمة ...بس تركت الوظيفة حتى تربي اولادها ومن توفى زوجها ...ركزت هواي على تربيتهم وهي من نفس نوع حسن هادية وبسيطة وتحاول قدر الامكان تسعد اولادها ...بس بنفس الوقت صاحبة شخصية تفرض احترامها...

صعدت لغرفتي واني مترددة ...اسمع كلامها..حتى مانطي مجال وحدة تستغل الفجوة الي صارت بينا

لو اخاف يكول اهلها مايستقبلوها ويصير مذلة اكثر

بعدين قررت ابقى بس اخذ موقف منه ...لان حيل جرحني بالكلام...جانت اكو نار بداخلي....

نزلت حتى اغدي جهال واسوي غدة لعمتي..سمعتها تحجي بالتلفون افتهمت من حجيها حسن ...ماحاولت اصنت ...بس صوتها جان واضح...جانت تكله موجودة ما خليتها تطلع ...غديتهم واني ما اكلت ..بقيت يومين اتجنب اشوفه...يطلع الصبح يرجع بالليل ..اني اصعد بالغرفة الثانية وما اطلع..ثالث يوم رجع وكت غدة جنت بالمطبخ..دخل سلم ..عمتي ردت السلام واني هم بس بصوت ناصي

_اي يمة زين اجيت حتى نتغدى سوة

_خلي اصعد ابدل واغسل

اني صبيت الغدة ورتبته على الميز والجهال جنت مغديتهم ونايمين ...هيج وكت ابقيهم جوة بغرفتي عمتي لان صعبة اصعد وانزل ...نزل حسن من كعد على الميز خليت الصمون وردت اطلع الزم ايدي من فتت من يمه...

_تعاي تغدي ويانة

_التفت عليه ....من تخلصون وسحبت ايدي وصعدت بعدني هستوني كعدت على الجرباية دخل وراي

_شنو قصدج من هالتصرف ...باوعت عليه

_انت رجال واحنة ادنى تخلص يلا...وبعدين مو من مستواك حتى اكعد وياك ...تقرب علي بعصبية واني خفت لا راديا رفعت ايدي احمي وجهي ..هو وكف بمكانه متفاجأ

_طلعتيني من طوري ...عمري ما مديت ايدي على مرة ..واليوم الي امدها على حبيبتي وام جهالي...تقرب مني ونزل ايدي عن وجهي...بس انت استفزيتيني بحجايتج ...

جان واكف كدامي واني كاعدة على الجرباية ورافعة وجهي له..

_وانت ماقصرت هنت بكل الطرق...نزلت دموعي...مد ايده مسح دموعي

_ماقصدت اقلل من قيمتج ...بس جرحتيني بحجايتج..وفقدت اعصابي ومن اتعصب اكول كلام ما قاصده..

_ وانت تصرفك ماجرحني من تخوني...

_والي خلقج ماخنت...ولا افكر اسويها..مجرد علاقة صداقة عابرة سد نقص

_ وتعيرني باهلي لان شافوك زوج مناسب لبنتهم...لو..ماخلاني اكمل خلى ايده على حلكي

_هاي حقج بيها ....بس كتلج ساعة عصبية ...دنك باس راسي فكيها.الموبايل ابقي بدون رمز بعد

_انطيني وكت ..

_براحتج بس تعاي تغدي ويانا

بقيت يومين بعدها يرجع على الغدى والعشى ونكعد سوة ...بس انام بغير غرفة لحد ماجت رسالة بثاني ليلة لي ...

_ما كافي عاد زعل ....تعبتيني...اشتاقيت لحظنج

ماجاوبته لان راسا يجيني مهما كان ردي بس قررت

اخصص وقت اهتم بحسن …وبنفس الوقت اقنعه اتعين ...

الصبح بس طلع حسن بقيت الجهال يم عمتي..ورحت للصالون ...كصيت شعري وسويت خصل متفرقة بيه على لونه الاسود لان ادري بيه مايقبل اغيره..من رجعت وشافتني عمتي كيفت

_اي بنتي عفية...دير بالج على رجلج...خلي الجهال يمي اليوم

حسن كال ما ارجع على الغدى...رتبت الغرفة وسويت عشى خاص وخليت مكياج ..ولبست سيت نوم حلو ...باوعت على الساعة تاخر ..خابرته

_هلو ابو حسام شو تاخرت

_هلو قلب ابو حسام...شوي عندي شغل ...محتاجة شي

_لا حبي بس منتظرتك على العشى

_ حب ومنتظرة ..لا متاكدة ماغلطانة بالرقم

_هاي شبيك ...عود مسويتلك مفاجاة

_داحلم اني اكيد ...يعني خلاص افراج

_اي تعال وشوف

_جاي وكلي شوق

_انتظرك

بقيت انتظر..هسة يجي وهسة...رجعت دكيت عليه ماجاوب...كلت يجوز على وصول ..بس تاخر زيادة ...رجعت دكيت عليه مقفل..بقيت بقلق...بيومها علي اخوه هم ما اجى...باوعت الساعة ب١٢ وتلفونه مقفل...نزلت على عمتي لكيتها كاعدة..

_عمة حسن تاخر وادك عليه مغلق

_اسم الله...اني كلت خاف اجى ومادري بيه ...وردت اطمن عليه

_شلون عمة

_يمة دكي على علي من موبايلي

دكيت على علي...راسا رفعه

_هاامي خير

_اني ام حسام ..شلونك ابو حسين

_هلا ام حسام..امي بيها شي

_لا...بس حسن تاخر وندك عليه مغلق ...مامر عليك

_وهسة يلا خابرتي ..الساعة ب١٢ ونص...لا مامر هسة اشوف...وتستمر الحكاية

#ظلال امرأة

همس ليل

البارت السابع

بقينا ننتظر خبر من علي واحنة على نار...اني صعدت بدلت ملابسي وغسلت وجهي وتوضيت وبقيت اصلي وادعي الله يرجعه بالسلامة...حسيت روحي مفرفحة عليه..ومن خلصت نزلت يم عمتي بلكت اكو خبر..لكيتها فارشة سجادتها وتدعي...رجعت دكيت عل  حسن مغلق..وحاولت اتصل على علي...مايجاوب...وبعد ٣ مرات محاولة يلا رفع التلفون وراسا صاح بالتلفون

_لا تخبصوني اذا اكو شي اني اخابر ..وسده قبل مايسمع شي مني...بلحظتها ماجان يهمني شي بكد مااريد اطمن على حسن...بقينا قريب الفجر وماكو خبر

_عمة فدوة خابري علي شوفيه..عمتي جانت تسبح وتدعي

دكت عليه...وبس سمعتها صاحت يمة وليدي ركضت عليها واني اصيح شبيه حسن نطتني التلفون وكعدت على القنفة

_ها علي شبيه حسن...اول مرة اصيح باسمه بدون ابو

_مسوي حادثة من راجع بالطريق

_شلونه هسة عفية

_ننتظر الطبيب ..يطمنه

_يامستشفى..راسا صاح بية

_محد يجي هسة ..كافي مخبوص ما انخبص بيكم النوب..سد التلفون بوجهي...رجعت على عمتي لان ارتفع ضغطها..انطيتها حباية وبينها وبين الجهال وبين القلق والدعاء مانمنا للصبح ننتظر واحد يطمنه صارت ب٩ الصبح وماكو خبر طكت روحي..خابرت علي..واول مافتح التلفون راسا نهديت بيه

_كول اكو بشر بالبيت ينتظر خبر ...كولي يامستشفى انتو اريد اجي اشوف رجلي

_صوتج نصي...وحسن بالعناية وجية ماكو ...وسد التلفون

عمتي الظاهر تعرف طبع علي ...بس تدعي وتسبح...اخذت موبايلها وطلعت رقم ريام اكيد تعرف علي وين ...ودكيت عليها

_شلونج ريام

_الحمد لله منو

_اني اريج ...بس عفية علي يامستشفى حاليا

_ليش ماسالتي على زوجج

_ريام مالي خلك يامستشفى همة

كالت اسم المستشفى ...سديته وخابرت اخوية بلغته يجيب امي وياه..من اجى بقيتها يم الجهال ورجعت خابرت على حماتي زينة تجي يم عمتي واخذت عدي ورحت للمستشفى...وبعد ما سأل عدي بالاستعلامات وعرفنا وين ...كلبي جان يدك سريع واني امشي بممرات المستشفى واحس بنفسي امشي بمكاني مادوصل ..شافنا علي من مسافة وحسيته تعصب بين على وجه تلكان بعد ماسلم على عدي التف علي

_مو كلت ماريد احد يوصل لهنا

_يعني نبقى كاعدين كلشي مانعرف...اريد اشوفه واطمن عليه

_بشنو تفيد جيتج هو اصلا بالعناية يعني حتى مايدري منو موجود

جاوبه عدي...ميخالف خوية تريد تطمن على رجلها

دخلت للغرفة ..لكيت حسن عبارة عن وايرات طابة وطالعة منه واجهزة ادك يمه ...راسه مربط ورجله مجبسة وايده ..وجه من جهة وارم ...حسيت روحي ماعت ردت اتخربط من شفته...سحبني علي خارج الغرفة

_لا تحجين لامي شي...ظليت اباوع لوجه

_يعني شنو شبيه حسن

_لسة مانعرف ننتظر يصحى ...ابن عمي دكتور فحصه وصى على دكتور جملة عصبية ..دانتظر يوصل ...

شوي وصلوا عمامهم وولدهم...التفت علي

_ارجعي للبيت واذا اكو جديد اني اخابركم

الايام الي بعدها ماكان لها طعم او لون ..بالبداية ماجنة نكدر ناكل او انام...بس بعدها وبعد ملحت الاخرين ...امي..مرت اخوي ...حماتي ...نرجعنا ناكل ونام بس حتى نكدر نوكف على رجلينا...علي ابد ماعاف حسن وحده ...مخلى يجيب دكتور ويودي دكتور ...مر عشر  ايام واحنة ندعي وننذر يرجعله الوعي ...اني هم مالتزمت مثل ماكال علي ...جنت مرات بالليل اوصي عدي يجيني يوديني  …بالبداية جان علي يضوج من جيتي...بعدين كام مايحجي ويعوفني بالغرفة ويطلع...

من اشوف نومة حسن..اشبع قهر الزم يده واحاجيه وبعد اول كلمات تخنكني العبرة والدمع وماكدر اكمل

_ليش تاخرت مو جنت انتظرك..وكلت ما اتاخر...

_صح عمر محد يلحك عليه...بس كوم اعوضك عن كل الفات...

_ارجعلي اريد احس بحنيتك...بس انت عوضتني بحبك..ليش من تعودت على الحب والحنية تريد تعوفني

_حسن والله احبك ...بس جنت ماعرف اعبرلك..

_شوكت تكعد جهالك يوميا يصيحون ...ابا..مفتقديك ..بعدهم صغار لا تحرمهم منك

هاي جانت كلمات احجيها بخنكة ....وابوس ايده وطلع...

مرة رجعت بالليل من يمه وجنت كلش مضايقة وابجي ...كعدت صليت ودعيت ربي ماعرف شكد ..بس من صحيت لكيت نفس نايمة على السجادة ودك موبايل عمتي..نزلت ركض وكلبي يركض قبلي واخاف من راح اجاوب شيطلع ...لكيت عمتي تصيح

_اللهم صلي على محمد وال محمد وتعيد بيها

_عمة شكو

نطتني الموبايل...ها علي ..حسن شبيه

_مابي ...كعد من الغيبوبة...جان يحجي وصوته كله فرح

_صدك....الله يبشرك بالخير...هسة احي

_لا وين تجين الساعة بالوحدة بالليل...وبعده مشوش شوية خلي يرتاح..باجر تعالي..وسد التلفون

بيومها ماكدرت انام من الفرحة حسيت الله انطاني فرصة ثاني ..صليت ركعتين شكر لله ..

ظليت اتكلب بفراشي ..ماكدر انام اريد الصبح يطلع حتى اروح اشوفه ...كمت فتحت الكنتور وطلعت السويتر مالته الي انطانيه مرة قبل زواجنا..وظليت اشم بيه..ماجان بيه ريحة بس يكفني جان على جسمه يوم

بس صبح الصبح...راسا اخذني عدي للمستشفى...من وصلنا احس كلبي يركض قبل رجلي...يارب الطريق شطوله صار..علي كال حولوه لغير غرفة...شفت هوسة اباب غرفته ..اكو دكاترة يمه ..واولاد عمه برة...واني روحي لايبة اريد بس اشوفه...شافني علي واجى باتجاهي

_ليش ماخابرتي ام حسام ..هوسة هسة

_ادري مايصير هيج اريد اشوف زوجي ..عدي جاوبني

_اريج صوتج منة العالم

_خلي يطلعون الاطباء وادخلج

عافنا وراح

_شبيج اريج تخبلتي..ناس صار اسبوعين تعبانين وية حسن وفرحانين كعد...

_يعني شلون مااشوف زوجي ...ماكو هيج شي ترة

_صوتج نصي ...كالج علي بس يخلصون الاطباء يدخلج

بقيت احوص شوكت يطلعون...صاحني علي..شكد ماجنت متلهفة ادخل ...بس اكو شي بسمرني بالباب...ورجلي ماتقبل تنشال...خوف بداخلني من شنو ماعرف....كوة دفعت نفسي ادخل ...وكفت بالباب بعد ماسديته واني اباوع عليه..جان مغمض عينه ..واني اتأمل بملامحه ...

_شنو تخافين توصلين لهنا...صوته جان تعبان والكلمات كوة تطلع من حلكه

مشيت له واني ماعرف شلون اعبر عن فرحتي برجعته...ماكدر احظنه شو مكسر تكسير...

_حمد لله على سلامتك ابو حسام...تقربت بست راسه ورجعت على خده...الدنيا ظلمة بدونك

_يعني الا....اندعم ...يلا اسمع كلمة... حلوة...جان يحجي بتقطع

_هسة هذا حسن حبيبي صدك...

_الله...احلى كلمة..سمعتها..كل عمري

_هسة انتة بياحال..بس كوم بالسلامة ...واعوضك

_ مو كتلج العمر..لحظات وتنكضي

_بسته من خده ...عمرك طويل ان شاء الله

_شلون الجهال

_يسالون عليك..بس يصيحون ...ابا..ابا

_دير بالج عليهم وعلى نفسج

_انت تطلع ودير بالك علينا ...

_ حبيبتي...بعد لا تجين للمستشفى ...بلكت شوي واطلع

_ليش ما اجي

_ردهة مال زلم ...وهواي يجون علي...صعبة وكفتج بنصهم

_اجيك بالليل مثل كل يوم

اشر براسه وجان تعبان...دخل علي

_ ام حسام لا تعبي بالحجي بعده ترة...دخل عدي سلم عليه

_ اخذ ام حسام رجعها....سلميلي على امي

رجعت واني فرحانة ...وبشرت عمتي وعتبت علي شلون ما اخذها وياي...كتلها بالليل اخذج ونروح...وتستمر الحكاية

#ظلال امراة

همس ليل

البارت الثامن

بيومها الفرحة ماوسعتني ...رجعت غسلت للجهال واني اسولف لهم...بابا راح يجي ...واحسهم يفهمون علي ويرددون ابا ...ابا...

وطول اليوم حرت شسويت اروح منة واجي منة ...اريد اخلص الوقت حتى يصير الليل ارجع اروحله

من صارت ب٧ خابرت على علي...ماجاوبني...دكيت ٣ مرات يلا جاوب...جان صوته مخنوك ماعرف شببه

_ابو حسين اكو شي

_لا ماكو...رايدة شي

_اي عمتي تريد تجي تشوف حسن...سكت فترة ومن رجع حجى جان صوته بيه غصة

_ جيبها ام حسام وتعالوا ...

بيومها اجى رجل حماتي اخذ عمتي وزينة واني انتظرت عدي لحد ماجاب امي تبقى يم الجهال وداني ...وكلبي جان يخفك سريع...اكو خوف بداخلي زرعه صوت علي المخنوك...من وصلت ركضت للغرفة ومانتظرت عدي يركن السيارة ...شفت هوسة  اباب غرفة حسن..اقدامي ماتت اريد بس توصلني للباب ...كامت ماتحملني وصلت سمعت صوت بجي عمتي وحماتي...دخلت للغرفة كلشي ما اشوف من الي بيها بس عيني جانت على حسن وصلت له جان فاتح عينه باوع علي وابتسم...وفجاة الاجهزة بدت تصفر...وصارت ركضة وعياط واني بس اباوع على عينه الي تنظري وهو مبتسم ...

اكو شخص سحبني خارج الغرفة....يجرني لورة وعيوني على حسن ...طلعوني سدوا الباب ...اسمع صياح عمتي وحماتي بس عبالك تجيني من مكان بعيد ...جانت عيني على الباب شوكت ينفتح ومتيبسة بمكاني ...مثل طفل يتيم ينتظر فرحة العيد

انفتحته وطلع ابن عمه الدكتور يبجي ...دخلت ركض بدون وعي ...دفعت الكل قبل مايغطوه...وشبكته

_وين رايح وعايفني...اكعد كافي لا دتشاقة هيج..بعدنا ماشفنا شي..اكعد حسن جهالك ينتظروك...حرام عليك تحرك كلبي...اكعد حبيبي...لا تعوفني ...لك كلشي اسويلك والله بس اكعد لا تنام...جنت حاظنته واهز بيه ...حسيت اكو شخص جرني منه ..واني احاول ابقى مجلبة بيه التفت شفت عدي كمت اصيح عليه

_عوفني اريد اكعده ...عوفني ...شبكني وجرني برة الغرفة ...جنت احس كلبي يريد يطلع من صدري...وروحي تفرفح ...ضاك النفس واني احاول ادفع الي جروني...ماشوف منو حولي او شداسوي...جان كل تفكيري ارجع احظنه واكعده... مامصدكة ...فجاة حسيت النفس نكطع من صدري واختنكت وظلمت الدنيا...

من كعدت شفت امي واختي فوك راسي ومشكلين لي مغذي...يمة وين حسن وين ودوه...امي كامت تبجي..واختي تحجي وياي بس ما افهم شتكول ..مديت ايدي شلعت المغذي..كام يجري الدم راسا اختي ضمدته وصاحت الممرضة...اشرت لها اريد اطلع...

_يمة تعبانة انتي وين ترحين

_رجعوني للبيت ..

رجعنا عدي ...طول الطريق للبيت احجي وية نفسي..جذب ماكو شي هذا حلم وهسة اكعد منه...اي اي هذا حلم هسة اكعد...من وصلت شفت لوحة سودة على حايط البيت ...ما اشوف شمكتوب ...جانت امي ساندتني من جهة واختي من جهة الثاني...ماعرف شكو حولي ولا اميز اي شي...بس اذكر فتت للصالة وعيني على عمتي ...جانت مكسورة وتباوع بالوجوه...من شافتني صاحت

_لج اريج راح حسن ...راح راعي بيتج....عاف جهاله ومشى...تلكوني ناس تبجي وناس تلطم واني اباوع بوجوهم.

لحد ماخلص الثالث ...كلشي ماطب بطني ...عايشة على المي ...حتى نوم جان يخلون المخدة واني بمكاني اتمدد بس مايغمض لي جفن ومرات اظل كاعدة حتى ماتمدد...مادري شكو ماكو...بس مانزلت لي دمعة...جنت احجي وية نفسي..معقولة هيج قسوة عندي ...ليش ماتنزل دموعي...بس بداخلي نار تسعر تحرك بية حرك...اخر شي كمت للحمام وكعت من طولي...صار عندي هبوط وخلوني على المغذي اسبوع  بالمستشفى يجبروني اشرب شي...بس اشرب منة اتقيء منة...اخر شي اجت عمتي للمستشفى ..جابها علي......هي دخلت علي وهو بقى برة وكعدت تحجي وياي

_يمة الله يساعدج ويساعدني...ادري موسهلة عليج...رجلج وابو جهالج...بس يمة جهالج مالهم ذنب...ماكملوا سنة يريدونج وهمام تمرض على بعدج...وبس اني وانتي نعرف لهم...ومثل ماشوفين اني مابية حيل ...

قوي نفسج واكفي علي حيلج حتى تربين جهالج ...وتكبريهم ذولة بقوا من ريحة الغالي...كامت تبجي ..وليدي راح بعز شبابه ...واشوف جهاله يلوبون كدامي..اني مريضة يا امي بس لخاطرج ولخاطر الجهال تعنيت لج....

يمة شكول اني ربيت وسهرت وتعبت وكبرت ٣٣ سنة وبغمضة عين راح ...كومي بنيتي وشدي حيلج لخاطر ولدج...ذولة امانة حسن عدنا

بعد زيارتها حاولت اضغط.على نفسي اكل جان هبوط الضغط حاد يسوي لعبان نفس وية المغذي شوي شوي يلا كدرت اوكف على حيلي...رجعت للبيت ومادخلت لغرفتي ابد ...جنت اسحل بنفسي حتى اداري جهالي وامي ماتركتني تروح وترجع علي وزينة هم حماتي لان عمتي جانت حيل تعبانة

علي مايدخل البيت علمود العدة مالتي ..بس يجيب مسواك ويشوف عمتي والجهال واني اكون فوك ويطلع...

جنت عايشة جسد بلا روح ...اشطب يوم من عمري..

واكثر شي جان يهضمني كلمة ابا الي جان جهالي يكرروها...عقلي جان بعده مامستوعب  حسن مات...عبالك اكو امل بداخلي راح اشوفه...

قبل كم يوم من الاربعين...جنت فوك وسمعت صيحة جوة هبطت نزلت ركض ...شفت واحد بطول حسن ومن ورة كانه حسن ...خفك كلبي سريع ...اصورته حسن واجيت اركض له بس بلحظته التفت وكفت بمكاني... رجعت صعدت..واسمع صوت بجيهم ونعي عمتي...جنت احسدهم يكدرون يبجون ويطلعون الي بداخلهم ...شوية صعدت مها لي ...شبكتني وهي تبجي

عرفت منها هذا اخوهم مصطفى الي بالخارج ...علي ماكايل لهم من الاول هسة يلا وراسا حاجزين وجاين

صار يوم الاربعين وسوو عشى والتمت اقاربهم ..اني جنت الة وامشي ومن صبح الصبح ...مارحت وياهم...امي كالت عدي اخوج يكول هية كامشة عدة وحمويناها اثنينهم وازواج حمواتها وياهم ..

_يعني شنو ما يريدني اروح باربعين رجلي هذا يحجي صدك

_لا يمة مو هيج الحجي...بس خلي همة يطلعون وبراهم بساعتين نطلع ...من نوصل نلكاهم راجعين

وفعلا...هم راحوا...واحنة براهم طلعنا ...بالطريق احس روحي طايرة كدامي ...من وصلنا للمقبرة وشفت القبر واسمه عليه...ذبيت نفسي وحظنت كبره...

_لك حسن اجيتك وجبت ولدك ...كوم يا بعد ناسي وهلي تلكانة...كوم يابو طول الحلو..هاي النومة مو لك...حبيبي صدك هذا كبرك...صدك بعد ما اشوفك...ولاحس بحنيتك...لك حسن عفتني بحسرتي عليك...

اربعين يوم ماطلعت دمعة لي ...جان اكو حلم اشوفه...بس من شفت كبره أيست ...ودموعي صارت شلال يحرك خدودي من تنزل عليه...اشهك واختنك بشهكتي...لحد ما خلص نفسي ...اجت امي كبت مي على وجهي وغسلته

_كافي يوم راح تموتين خبلتي جهالج...شوفي شلون كام يبجون...كومي يمة البجي والطم مايرجع الي راح

اجى عدي وشالني شيل من على الكبر وسهى جانت ويانة هية وامي شالو الجهال...

رجعنا للبيت وبقيت يومين بعدها مريضة ومها اتصعدلي  اكل فوك...لان هي وحماي مصطفى..بقوا يمنا

ثالث يوم بعد الاربعين اجت امي وعدي اخوي...

_كومي اريج يومة لمي ملابسج وملابس جهالج وتعاي وياي

_وين اروح

_ لبيتنا يمة

_ليش

_ابوج واخوج...يكولون مايجوز تبقى يم عيالها..وانت لازمة عدة وحماج هنا

_انتو شتحجون...اني فوك ومانازلة...وبعدين اني بياحال

_ميخالف يمة ميصير عود من تخلصين عدة الله كريم

....وتستمر الحكاية

#ظلال أمراة

همس ليل

البارت التاسع

ظليت صافنة على امي شتدحجي ...اني وين وذولة وين..

_ما اطلع من بيتي...مو جان بس يريد يزوجني...هسة صرت عزيزة

_يمة كسري الشر...واسمعي الكلام من تخلصة عدتج ..عود.ارجعي لبيتج..وبعدين اخوج يريد مصلحتج

بوقتها جنت تعبانة ومالي خلك اجادل وافاصل ...

عمتي من سمعت تخبلت..وكامت تبجي..تكللهم لا تاخذون ريحة المرحوم مني...وظلت تحجي وية امي ..مها هم...وسمعت صوت مصطفى ارتفع وية عدي...شوي واجى علي...وخصم الموضوع مصطفى يروح وياه ومن يجون اني اكون فوك ...

اني استحيت من طلعة مصطفى لان البيت لهم ..

طبعا هالشي عرفته بعدين ...بالبداية جنت عبالي لحسن..بعدين وضحلي انه بعد وفاة ابوه استلم علي الشغل وجان سادس اعدادي ..عاف الدراسة ولزم محل ابوه...وشوية شوية كبره...حسن ومصطفى جانو يشتغلون وياه بالعطلة وكبروا المحل لمعمل بس بزود علي...من صار السقوط حسن جان صايرله اربع سنوات من متخرج وبادي يكون له مكتب ...وطبعا علي منطيه من حصته بالورث..بعد السقوط...طالع هو ومصطفى خارج العراق...باقيين كم سنة مصطفى محصل لجوء بس حسن ما قابل ماكادر يبقى برة راجع ...ومن راجع ماخذ من علي ماتبقى من ورثه وفاتح مكتب المقاولات..وهذا البيت ورث مال ابوهم ...بس حسن هو معدله ومرتبه...

طول فترة العدة ماشفت لا علي ولا مصطفى ...بس بعد ما انتهى الشهرين...صعدت يوم مها

_اكولج اريج علي يكول اكو اوراق مهمة لحسن يريدها ضروري

_يا اوراق

_يكول ما تحويل بيت...وهيج شي

طبعا من وفاة حسن مادخلت الغرفة...ملابس كلها جديدة واسود وانام بالغرفة الثانية..هسة اضطر ادخلها

فتحت الباب...وظلت عيوني تفتر بالغرفة..على مكان نومته..على دراكسوده المعلك من اخر مرة نزعه وطلع...على عطوره فوك ميز التواليت...تقربت وسحبت تي شيرت التراكسود ...خليته على وجهي اشمه..اووف ياريحة الحبايب..دموعي صبن 

_اخ ياحسن مابقة بس عطرك ...ليش عفتني ...ليش لوعت كلبي...بقيت اباوع على دربك شوكت ترجع...

كعدت بالكاع واني حاضنة التي شيرت وابجي...حسيت اكو احد دخل الغرفة

_كومي اريج...ميصير هيج خيتي...كافي

_لج بعد ما اشوفه..ما اشوف طوله الحلو

_الله يصبرج كلنا كلبنا محروك...بس لازم تقوين نفسج لخاطر جهالج

اخذت التي شيرت مني...هي تهون علي ودموعها تجري...كومتني للحمام اغسل

_غسلي حبي...ودوري الاوراق ترة اكو مشكلة صايرة

رجعت للغرفة ...دورت كل الاوراق وفصلت الاوراق الرسمية مالتنا ...بس مالكيت بالباقي شي مهم

_مها ماكو شي...هو شصاير

_خلي اكول لعلي

نزلت واني رجعت الم بالاوراق ...شوي رجعت صعدت مرة ثانية

_اريج علي يريد يحجي وياج...البس عباتج وانزلي  حتى لو تحاجيه من ورة الباب ...ولو هو ميحتاج ..هو كافي انتي مسترة واحنة موجودين يعني ماراح نعوفكم وحدكم...

ومع ذلك وحتى مااخلي حجة لاخوي ...لبست عباية راس..ونزلت حجابي على وجهي ونزلت...جان كاعد علي ومصطفى بالصالة ..من شفت مصطفى كلبي وجعني عبالك حسن وكاعد ...سلمت...همة ردوا بس مانداروا علي

_خيتي ام حسام..حسن الله يرحمه مانطاج او كالج على بيت مشتري

_لا والله خيي هو مايحجي عن شغله

_يعني شلون ماتعرفين عن شغل رجلج شي

الحجاية غثتني ما جاوبت

_زين اي اوراق غير ذني ماكو...

_لا ماكو هو بس كوميدي خاص بيه يخلي كل الاوراق

سكت ماجاوب...واني رجعت صعدت وماعرف شنو المشكلة...

طبعا ...ماخلصت من حجي عدي اخوي يوميا مخابر يحجي ويدردم شلون ابقى هناك وهمة يجون...خلص كلبي....

اني نظفت الغرفة بس مافتحت جهته من الكنتور ..ولميت كل ملابسي الملونة بجنطة ودزيتها بيد امي..

كتلها انطيها....

بس مانمت بغرفتي رجعت للغرفة الثانية...من نمت بالليل حلمت بحسن جاي يفتر بالبيت..ركضت براه مالتفت علي...حاجيته ماجاوبني جان يمشي واني امشي وراه اريده يحجي وياي...بعدين التفت علي

كتله شلونك حسن...جاوبني اني زين بس هاي توجعني ولزم صفحته ...اجى يطلع جلبته بيه...اروح وياك عفية لا تعوفني...رجع باوعلي..لا مو هسة بعد..وعافني وطلع...

كعدت مفزوعة....ليش صفحته توجعه ...خاف اكو تقصير تجاهه...نزلت لعمتي وحجيتله دزت على جوارينها ..تعرف بالاحلام وهاي الشغلات...كالت ملابسه انطيتوهن...كتله لا

_لا خالة مايصير تبقى الملابس معلكة ...اجمعيهن وانطيهن بثوابه...

_خالة ليش يكول صفحته توجعه لعد

_والله شكولج...بس المرحوم باله يمكم

ما افتهمت منها شي...بس عمتي كالت اصعدي لمي ملابسه بجنطة...ودزيهن لناس توزعهن...

صعدت واريد افتح كنتوره ايدي ترجف...من فتحت ...وشفت ملابسه ...ظليت اتلمس بيهن

_راح صاحبجن لمن باقيات معلكات ..ومن قهري جريت جنطة وكمت اطلع بالملابس واذب بيها واني اشهك بالبجي...جانت اصعب لحظة واني افرغ المكان من ملابسه واغراضه ...عبالك من جانن موجودات جان له وجوده بيهن...اختنكت بالبجي من خلصت وشفته فارغ كنتوره ركضت لباب البلكون اريد اشم هوى ...ضاك النفس بصدري

بقيت من اغراضه سويتر الي انطانياه فد يوم قبل زواجنا...وساعتين لولده ...ذكرى لهم من ابوهم ...وبقيت غاط العرس..ماردت افرغ المكان من وجوده تماما

نزلتهن لعمتي ...وكتلها خلي الولد هم يودوها بمعرفتهم....

مها ومصطفى سافروا ...بس مصطفى كال راح اروح ارتب اموري وارجع لان هو اجى على السريع حتى ماجاب زوجته واطفاله ...

طول فترة العدة اني فاصلة وعايشة بعالمي ...لحد يوم ردت حفاظات للجهال ...الفترة السابقة علي يسوك للبيت وضمن المسواك الحفاظات والحليب مال الجهال...فتحت دزداني مالكيت فلوس ادز...بوقتها صحيت على نفسي...حسن ماعنده راتب ...زين شلون راح اكبر ذولة وبعدهم صغار...والطريق براهم طويل...قابل اظل معتمدة على علي...شنو من اريد شي امد ايدي له...لو لعدي اخوي...حتة البيت ورثة ...ورجعت للمربع الاول وعقديي لازم اتعين حتى اعتمد على نفسي وما احتاج لاحد...قررت بس تخلص العدة ادور على وظيفة

بعد ماخلصت العدة بيوم...نزلت جو من فتت من يم الصالة سمعت عمتي تحجي

_يايمة انتة شنو ذنبك تشيلله كله ...شلون شغل معملك يمشي بيع هذا البيت وسد بيه الدين

_لعد شسوي يمة ...حسن الله يرحمه ما تارك شي يثبت حقه..وشلون ابيع البيت وجهال حسن

دكيت الباب ....ودخلت...سلمت..هو مارفع عينه علي

_خيي ابو حسين..اني بالصدفة فتت وسمعت حجيك...وانت قبل فترة ردت اوراق لحسن ..ممكن اعرف شكو

_هو اكو وحدة ماتعرف عن شغل رجلهة

طبعا اسلوبه كلش مستفز...ويخجل

_اي اني

_يمة هو اخوك الله يرحمه مايحجي لا تلوم المرة

_هسة ممكن اعرف شكو

_حسن جان شريك وية واحد يشترون بيت ويهدموه ويرجعون يبنونه طراز حديث ويبيعوه ....كل مرة يسجلوه باسم واحد منهم...اخر مرة اشترو بيت جبير ...وهدموه وعلى اساس يبنوه عمارة ومحلات...طبعا فلوسه كله صارت بالبيت ومكفت ..فدخل صديقه شريك وياه ...اخذ فلوسه منه وقع كومبيالة عليه وهسة ابو الكومبيالة جاي يريد فلوسه

_زين خلي يبيع الكاع شريك المرحوم وانطي الفلوس..

هو ماجاوبني اصلا مايرفع نظره لي...بس جاوبت عمتي

_يمة ابن الحرام نكر...كال هالمرة ماشاركني المرحوم

علي عافنا وطلع ظليت احجي وية عمتي

_عمة شلون...غير مسجليها بينهم

_لا يمة بأسم الشريك...هم جان هذا اسلوبهم...مرة باسم حسن ومرة باسم صاحبه

_عزة مايخاف ربه حق ايتام ياكله...

_منو يفكر هيج...وهذا علي راح يصير بي شي هو فلوسه مشتري بيهن اخشاب عنده وجبة غرف نوم جان ماخذ عربون عليها ...ماجووة ايده شي

_شكد يطلب...من كالت المبلغ بقيت صافنة هاي شلون ينسد

_ماحاول وياه..

_يمة الموضوع صارله ٣ اشهر وهو يروكض ماخلى وهذا ينكر واني اخاف عليه لا تصيرعداوات ...النوب يضيع وليدي الثاني

ترخصت منها وكمت...شلون مصيبة ...ياربي دخيلك

.....وتستمر الحكاية

#ظلال امرأة

همس ليل

البارت العاشر

مرت الايام وعلي يحاول وية شريك حسن بدون فائدة..طبعا جنت اعرف الاخبار من عمتي ...علي مااشوفه من يجي انطيه الجهال واصعد ...هو اصلا يحبهم ومن جان حسن عايش وهمة صغار ...جان ابوهم ينزلهم يمه واسمع ضحكهم...رجع مصطفى ...هالمرة تعرفت عليه...وهم رجع وحده زوجته ماقبلت تجي وياه...كالت تكلفة عليهم تصير

حاول علي ومصطفى وية الشريك..وصلت الشغلة للتهديد وناس ادخلوا وماكوا ...اخر شي نصحوهم يعوفوه لان مسنود وممكن يأذيهم...بيومها  سمعت علي يحجي بعصبية وية مصطفى يكوله هية مو بس شغلة فلوس...لا هذا تعدي ياكلنا عيني عينك

مانزلت مالي خلك اسمع حجاية من علي..

صديقتي سارة خابرت كالت فتحوا تعينات على التربية تعاي قدمي...

ثاني يوم عفت الجهال يم عمتي ورحت وية سارة قدمت فايلي من رجعت لكيت علي يمنا...كاعد هو وعمتي ومصطفى ...طبعا مصطفى شكله كله حسن بس الطباع علي بس اخف عصبية...

من دخلت سلمت ...جانت الوجوه ثكيلة علي ...

واول واحد حجى علي

_ ممكن نعرف وين جنتي...تفاجات بسؤاله

_رحت قدمت على تعيين

_ليش قصرنا وياج بشي...احتاجيتي شي وما لكيتيه

_لا ابو حسين والنعم..بس لازم اعتمد على نفسي الى متى يعني

_طول العمر لحد ما الله ياخذ امانته...

_عمرك طويل...انت صاحب عائلة هم..وهسة الحمل خفيف من يكبرون يكبر وياهم

_انتي شدحجين ..حمليش...ذولة ولد حسن..تعرفين شنو حسن...

تعصب حيل جاوبه مصطفى...على كيفك علي مو هيج

_ابو حسين اعرف ما تقصر ...مع ذلك اني اريد اعتمد على نفسي وتعيين من وكت المرحوم مقررته

_قصدج من وكت المرحوم ورمتي كلبه من ورة  زنج على التعيين

اني تفاجات بالحجي...وجاوبته عمتي...مو هيج الحجي يصير يمة

عفته وصعدت...من نزلت مرة ثاني جنت متأكدة طلع علي...جان باقي مصطفى وعمتي...

كعدت يمهم وعمتي حاجتني

_يمة لا تزعلين من علي...هو طبعه عصبي..بس جان حيل متعلق بحسن..ويحس ولده من ريحته يريدهم يبقون بحظنه

_لا والنوب اجت شغلة شريكه وهو بعده ماصحى من كسرة ظهره بحسن...كمل مصطفى

_ اعرف هذا كله...بس اني من حقي اخلي سند لي ولجهالي..ماطلبت شي مستحيل...هواي نسوان يشتغلن وعدهن جهال...خيي مصطفى اني اكول خلي يبيع البيت هذا وحق حسن بالبيت يدفعه للدين..وانتو اخذوا حصتكم

_ليش وانتي والجهال وين ترحون

_ناجر وعمتي وياي هم

_يمة شلون تحجين ...شلون نبهذل جهال وليدي ..

_عمة لعد احسن واحد يتاذى

من مرت امي حجيت لها الصار..بعد روحتها بيوم...اجت هية وعدي وصاحني

_لمي هدومج وهدوم جهالج ومشي ويانة

_وين اروح

_لبيتنا وين يعني

_ليش الصار

_يعني شنو الصار ...حماج كاعد هنا كلنا ميخالف..بيتها ومسالة وقت ويرجع يسافر..بس يطلع البيت اصلا ورثة ويسدون بيه دين رجلج...مابقة مكان لج..اصلا عيب كعدتج بنص حموينج

_شنو هالحجي عدي...لا اني اول ولا اخر وحدة تترمل وتبقى كاعدة وية عيالها

_مالي شغل بالعالم...احنة مانعوف عرضنا..انتي صغيرة وجهالج صغار وحموينج شباب...مايصير هاي الكعدة ...امشي يلا بدون مشاكل

ماكدرت اكول لا... لهواي اسباب...اولها حتى يبيعون البيت ويسدون دين حسن...وثانيا اعرف اخوي راح يفسرها بغير شغلات ...

اوووف يارب مسويني طوبة كل واحد.يتحكم من جهة...بس خلي اتعين ويصير عندي راتب حتى ما اعتمد على احد...

لميت ملابسي وملابس الجهال واني ابجي ...هنا كل ذكرياتي وية حسن...بديت افقد شوي شوي الشغلات الي اصورها جانت باقية ذكرى منه...

من نزلت شفت عمتي شابكة الجهال وتنعي وتبجي ...ومصطفى وجهه مايتفسر الظاهر متلاغي وية عدي

من وصلنا حجي ابوي جان نفس حجي عدي...

بس اول مرة اسمع منه كلمة تحسسني عندي سند

_يابة اخوج عنده حق...هنا بيت ابوج هو يحويج احسن من الغربة...الي جان يربطج بيهم الله يرحمه..هسة همة عمام ولدج وبس

انطوني الغرفة الفوك جانت غرفة جهال عدي

بالليل واني بغرفتي سمعت صوت على ...البيت صغير ممكن ينسمع اي صوت اعلى من الطبيعي..

ميزت الصوت لعلي..نزلت اشوف امي ماقبلت ادخل..جان علي ومصطفى جايين...صوت علي اعلى من الكل

_يعني شنو قصدك...ترة ماكو هيج حالة كل النسوان العدها جهال تبقى عد عيالها..هذا مو جديد علينا...احنة نريد...جهالنا يربون بحظنا

_لو جهالكم كبار جان كتلكم اخذوهم..بس ذولة صغار لازم يبقون عد امهم ...

_هيج يعني....اني ممنون منكم...طلعوا

واني ظليت على  سكتي شحجي...بقى مصطفى تقريبا يوميا ياخذ الجهال العصر من الباب ويرجعهم عدي ...يطلعهم له او ابوي ...وبين يوم ويوم يدز وياهم علاكة حليب وحفاظات...ومرات ملابس مال بيت ومال طلعة...يعني ماخلوهم يحتاجون...رغم ذلك حسيت بذلة جان صعبة علي اطلب من احد فلوس...لازم احتاج شي اذا مو للجهال فالنفسي اكو شغلات صغيرة جنت ماكدر اشتريها ..وماكدر اطلب من ابوي هو بس التقاعد وشايل وية عدي البيت ...واحنة اكثر من عائلتين...غير مكافش الجهال وجهال عدي اكبر من ولدي...ومن جان يرجعون الجهال وياهم علاكة حلويات...جان تصير ازمة ..رغم اني جنت اشيل الحلويات وانطيها لجهال اخوي ...

اول مرة احتاجيت اروح للدكتور احتاريت شسوي تالي طلعت محبس نيشاني وبعته ورحت...

مرة اجت ريام وية عمتي زيارة...وطول الكعدة مابطلت تحجي وتحمد بنفسها ان هية تطلع تشتري ملابس جهالي ..

_طبعا علي ما يقبل الا من احسن الانواع...واني هم ماعرف اشتري من الرخيص..حتى ذاك اليوم رحت اشتري لحسين والبنات وكالي احسبي حساب اولاد حسن

كان كلامها مبطن انه هذا من حق جهالي مو جهالج هالصرف..هم حقها.

وحقي يكون عندي مصدر اكدر منه اشتري لجهالي...وما اضطر اسمع حجي من واحد

عمتي مارضت على حجيها بس مابيدها شي

طلع تعيني والحمد لله..بس بمساعدة مصطفى ..من اجت عمتي كالت مصطفى يريد فايلج..وانطيتها نسخة وكدر خلال عرف يمشيني...

اول فترة كان دوامي بالاطراف...جنت ابقي اولادي يم امي...بس من جنت ارجع ...الكة بيهم اثر عضة او كرصة لو ضربة...من سالت امي...كالت يمة جهال بينهم شسويلهم...مع العلم جهالي ماكملو سنتين...بس ماكدر احجي...بعدين قررت اسجلهم حضانة ...لان زاد الوضع عن حده...وهم توم ماتكدر امي عليهم...

عدي اخوي جان يحاسبني على الطبة والطلعة..

اصلا جنت على كد الدوام اطلع...ومرات قليلة اذا احتاجيت شي اروح لسوك قريب...وهالشي لازم اسمع حجاية عليه...

المشاكل جانت ماتخلص ...هي صغيرة بس تجمع ...والمكان صغير....خوب من تجي وحدة من اخواتي ...مهرجان يصير بيتنا ....

بدوا همة يضايقون خاصة عدي ومرته...بقيت سنة على هالحال...

يوم رجعت لكيت عمتي يمنا وياها علي...صاحني ابوي...فتت سلمت..علي جاوبني من ورة خشمه

_يابة عم ولدج يكول اشتريت بيت باسم الجهال ...ويريدج تكعدين بيه وياج عمتج

اني بداخلي كيفت...راح تفرج واخلص من الضنكة

_ام حسام...احنة صح تاخرنا بس تعرفين معاملات الورث ولحد.ماحصلنا شي مناسب...ورتبناه...سوي جية شوفي البيت...واخذي من البيت الجبير الاثاث الي يناسبج والباقي انتي اصرفي بيه لان كله المرحوم جهزه....كمل علي حجيه واستاذن وطلع حتى بدون مايسمع جوابي...اسلوبه المتكبر ضايقني كلش

جان ثاني يوم عطلة ...اخذني عدي وخابر علي حتى يجي يوصلنا ...وفعلا كان البيت مشتمل ١٠٠ متر بنفس فرع بيتنا القديم ...يعني صار بالنص بيت اهلي بعد شارعين ...وبيت علي هم بعد شارعين

البيت جان صالة وغرفة نوم وبينهم مطبخ وحمام وفوك غرفتين نوم وحمام...شي مرتب

رجعت رحت لبيتنا اختاريت غرفتين نوم الفوك وغرفة نوم عمتي طبعا وبعض الاثاث ...وعلي كال احنة ننقلها ونرتبها بس جيبي الاولاد وتعالوا...وباقي الاثاث هم تكفل بيعته...رجعت واني فرحانة راح استقل بحياتي وما اصير تحت تحكم احد ...وتستمر الحكاية