رواية شيخ الشباب(بنت المؤمن) الفصل الثالث والخمسون 53 - بقلم زهراء العراقيه

مساء الخير
اكو ملاحظة بنهاية البارت ضروري تقروها حتى لا تحتارون
لم يكن على درايه ان يوماً ما سينفلق رأسه نصفين .فيتخضب هذا الشعر الجميل بدمه الطاهر .. حسوني حرقة ولوعه في قلب كل عراقي شريف..
شهيد اخر من بلدي اليوم
الرحمة والمغفرة لروحه الطاهرة .
حسين الدراجي

ميلن لاتنكطن كحل فوك الدم
ميلن وردة الخزامه تنكط سم
جرح صويحب بعطابة مايلتم
لاتفرح بدمنه لا يالاكطاعي
صويحب من يموت المنجل يداعي

مظفر النواب🇮🇶

دا اتمشى بالحضرة لوحدي اووف وين عافني مرتضى حتى معندي افلوس ارجع
صارت كدامي باب دخول للضريح الشريف
كلت خل ادخل مرة ثانية اطوف مرقد الامام علي (عليه السلام)

دخلت بوجهي صار مصلى والنسوان واكفة تصلي خلف وحده
وكفت وياهن خلف المرة
ركعن وسجدن واني وياهن وظلن كاعدات كأنهم خلصو واني ملحكت ضجت، ظليت اتلو دعاء الندبة بكلمات واضحة  و كأني كنت حافظته بس اشوكت ؟
التفتت عليه المرة الي اصلي بالنسوان
لانها فاطمة
ابتسمت الي و جانت لابسة حجاب سمائي انتبهت لأديها لازمه سبحة بيضة خرزها يلمع
كمت من مكاني وكعدت يمها بوستها واني اكول
- فاطمة اشلونج شنو جاية اهنا وحدج

- اجيت ويه محمد بس تايهنا كعدت اهنا تعبانه  كلت اصلي على ما يجي

-اشكد حلو حجابج اشوكت اشتريتي

- ما اذكر
عفية ما اكومين اشوفين محمد وينه مابيه ادورة

كمت طلعن من المصلى
ادور على السيد واني اكول خطية تعبانه بس اني هم تايهه وين الكاهم . 

سمعت واحد خلفي يصيح اوكفي .
زينب
التفتت لأنه
ماجد

- شسوين اهنا شفت اخوج يدور عليج

- وين اريد الكاه تعبت

- كلت اله اني اوصلج وراح
تعالي اوصلج للبيت ...

مشينا خطوتين و فزيت من نومي

مستغربة من الحلم الغريب خطية فاطمة ما صحت الها السيد بعدين ليش بالحلم ما مستغربة منها شنو بالاحلام الاموات احياء؟
الله اشكد حلو هذا الحلم
خل ارجع انام بلكي اكمله
غمضت وظليت ارسم بمخيلتي صورة فاطمة حتى الحلم يرجعلي بلكت اصيح الها السيد
غفيت  و ما كعدت  الا و اذان الفجر يصدح من تليفوني الي مشغله بيه برنامج حقيبة المؤمن .

كمت صليت بالهول خلف بابا حتى يطمن اني بعدني بخير احد شروطه عليه ..اني صارلي ثلاث ايام من بديت استعديت وعي وادراكي لهذا لهسة بعدهم ما حاسين بالاستقرار لحالتي ..

كعدت من خلصت صلاة بمكاني اسمع صوت بابا وهو يقرة تعقيب صلاة الصبح ...

تذكرت الدعاء الي قريت منه بالحلم. وفاطمة واشلون شكلها حلو وحيل بيضة بالحلم  رغم هي مو حيل بيضة كانت مثلي معتدلة . 
الله اشكد هذا الحلم ارتوت منه  اشوية من اشواقي  هنيالي بستها
بس الحلم مخربط اشلون مرتضى يعوفني ويروح هيج والسيد ماجد شسوي اهناك شو الامة كلها اهناك متلمة ؟

بس محد شفته  بالضريح غير فطومة

يارب تكون مرتاحة بمكانها مثل ما شفتها
هي كانت ما تترك فرض
و ما فد يوم علت صوتها على امي وابوية
ولا حتى اذت احد حتى عمتها تحبها
ما الها اذية على احد ومثل بابا اول ما تسمع احد يغتاب تكوم و شديدة الحرص بأمور الدين لكن تبقى بشر
يارب قربها الك و سامحها وامحي سيئاتها بحسناتها...

انقطع صوت بابا وانتبهت اله شفته ملتفت عليه

-ما كمتي كملتي نومج؟

- بابا اذا اجاني شخص ميت بالحلم و كان مرتاح
يعني هو مرتاح بمكانه

- ان شاء الله خير

- حلمت بفاطمة الليلة

- الله يرحمها
خل نقرأ على روحها الفاتحة ...

قريت وياه و مسحت وجهي باديه الي كنت متضرعة بيهن لربي ...

-بابا رقية سولفت الي منو جان يرقيني

ليش مو انت

- ما اعرف كنت اتعبين من احد يقرأ الج غيره

- ليش بابا

- النكاسة الي تعرضتي الها
ما كدرت اني الشيخ العامي اطلعج منها ...
اعتقدت هذا السبب

-اشمعنى السيد محمد

- حتى الشيخ الي وديناج اله كانت روحج ترتاح على الرقية

لكن بالبيت ما نكدر نجيبة وما يطلع هو خارج بيته فمحمد اتولى الامر

همست
- ليش  مو ماجد
عاد هذا زوجته
والله استحي من ابو مصطفى بالكوة ذاك اليوم طلعت اله سلمت

- ماجد شعرفه يا بنتي و هو مو شيخ

مرة من المرات صرتي اشوفيه بهيئة شيطان هو واخوج مرتضى!!!

-شنو شنو

رجع بابا يقرا التعقيب طويل
تاركني بحيرتي....

الصبح من كعدت اريك امي

سألتها

- يوه ابوج كالج

-ماما حبابة كولي اشلون عرفتوني اشوفه بهيئة تخوف

- جان لازمج..هو ومرتضى

صرتي تاشرين عليه عنده كرون ويخوف
وحتى على اخوج
بعدين خرمشتيه للرجال واجه اخوه ولحك عليج هداج النا

-يمة!
اني تخبلت والله يا شنهاي هيج شايفني مخبلة

-ابن حلال  يا يمة و ما عافج و ظل متمسك بيج
لأن يفتهم انت مو مخبلة بس مسحورة

رحت لغرفتي افكر بالايام الي راحت يمكن اتصل بيه مرتين او تلاثه
يسأل عن الحال
ياربي شنو هاي شصاير بيه بس الحمدلله من اجه وشافني باسني يعني بعده متمسك ما مشمئزة نفسة مني
طلبت من مرتضى يزروني الحلم شوقني للزيارة

لكيت نفسي برحلة جماعية ..
مو بس مرتضى امي هم عزمت نفسها صارلها اهواي  ما مزوريها ، فبابا كال يروح ويانه ما تكدرون وحدكم ..
فرحنا كلنا سوة بسيارة بابا امي ومقتدى امي مطروحه  الها الخلفي كلها

واني ورقية المقيمة يمنا هليام تراقب بيه ويه  مرتضى....

دخلنا احنه النساء اني و رقية وعلاوي للحضرة تونا طالعات من التفتيش
وابوية يدخل امي من غير باب
واجه النا .بقينا ننتظر الولد يجونا
بعدهادخلنا اني ورقية زرنا وصلينا صلاة الزيارة ...
سلمت بعد الصلاة . وتذكرت الحلم حبيبتي جعلك الله من الصالحين و اصلين بنساء  الجنة حبيبتي

طلعنا والتمينا من جديد بالحضرة كعدنا مرتضى منطينا ظهرة يقرا قرأن
ومقتدى يركض ورة علاوي الي ماخذ الحضرة  ساحة ملعب و يركض ويكفخ بشكو جاهل  يشوفه بطريقة ومقتدى وراه يعتذر ويسحل بيه يحطه يمنا و يرجع يشرد ..

اما بابا وماما خلفنا كاعدين بابا على كرسي صلاة ما صلى عليه لكن كعد حتى يتساوة بكعدته ويه ماما بعربانتها ومدري شنو يتهامسون مثل المخطوبين ورقية تقرأ دعاء ولازمه ايدها ايدي،ما ناقصنا غير علي و فاطمة.

هذي الفترة فترة نقاهة الي ، كل كم يوم ياخذني مرتضى لمزار،للامام الحسين واخيه (ع)..
ولشريفة (ع) بنت الامام الحسن
و لعون  و للكاظم عليه السلام ..
تساءلت ليش هليام مدا يتصل ماجد

مممم هسة خل اتصل بيه وابادر مدام بقى وياي الموضوع يستحق مني المبادرة كافي تصرفات طفولية مالها داعي للخوف  بقى وياي بأشد ازماتي

خابرت ...

مارد

فات وكت كنت احاول اقرأ باحد مراجعي بس اعيوني مغوشة وراسي يفتر من اقرأ ،هو اتصل حتى نسيت امره
رديت

- هلو زنوبة

- مرحبا اشلونك

- تمام الحمدلله انت اشلون صحتج صارت

-مدام اتصل بيك يعني زينة

- داكة عليه وهاي مصارت بس من ردتي عبد الله

-  حبيبي مشتاقة اله

-يا الله هم اتعرفين اتكولين حبيبي !؟

ضحكت من غير صوت
- اي اعرف

-محتاجة شي

- لا بس ردت
اييي
ممم مدري شردت أسال عليك
يصير؟

- اي ليش ما يصير يعني

- لعد

-لعد شنو؟

بتردد
-ليش ما تتصل

تباطئ الا جاوب

- ما اعرف وضعج شنو وانت يا دوب بديتي تستردين عافيتج

- ماجد

-ها

- ما اكدر بهاي الفترة اجهز  بعدني تعبانه وحتى هاي السنة راحت عليه
اللإمتحانات  راحت
المشكلة حتى لو مأجلة بس ما اكدر ابد اقرا ولا الي قابلية اطلع واداوم
تعبانه مابيه اوكف ولا للدراسة احس نفسي محتاجة نقاهه سنة
تدري هسة احجي وياك ودايخه

- لا اضغطين على نفسج

ازعجني ،ردة مختصر بالنسبة للكلام الي بحت بيه اله

- انت تحملت هاي المدة بمكان ما اجهز و نحضر للزواج
رافقتني برحلة العلاجات الروحانية
يعني بديتها وياي بشدة ما اعتقد تعوفني بعدها

- اعوفج ؟
انت تفكرين بهاي الطريقة
زينب ركزي بعلاجج و تعافي

و اني  ااااه 
انسي

حسيت اكو كلام خلف ال اه بس تراجع يكولة اعتصرني گلبي ناذرني بشي يرهب خلف برودت صوته ...

انتهى الاتصال ما ريحني كد ما قلقني
يا الله شو صرت احس بعد هذا الاتصال مستمر وياي بدافع الواجب
ليش احسه تعبان مني
لا لا هاي الافكار براسي لان عرفت هو كان مرافقني برحلة  جنوني وشايفني بحالات متعبة ومروعة

وكفت كدام المراية اباوع لخلقتي ..
معقولة كره شكلي
المشكلة شكل الانسان تتحكم بيه الشخصية   اذا شايفني و اني مثل ما يكولون مخبولة رسمي وفاقده الاهلية وبيدة لازمني ولا الومة اذا نفسة كشت مني ..

ظليت افكر اهواي ارهقني التفكير ..

كالو الي اجه السيد محمد اتوضي واطلعي

طلعت اتوضى واني اكول شبسرعة صارت الدافية وانتهى الشتا
لبست شي بهاري مو شتائي اووف ما حسيت بالزمن الي فات ولا بالفصل حسبي الله بالي كان السبب دخلت بالهول

شفت امي ومقتدى ياكلون جاي وكعك ابو الدهن  وصوفي جاي ويه ابوه يلعب بتليفونه
سلمت وكعدت يم امي صاحلي اكعد قريبة يمه..

كال هذي جلسات الشيخ وصى بيها ترة بعدج لا عبالج شفيتي بالتمام خلال هاي الاشهر .. حتى سألني عن نظري
و عن حركة ادية ...

- اعيوني من اريد اقرا تزغلل
وادية مرات يصير بيهن خدر واني نايمة

-شفتي هاي الاثار بعدها

-هسة شسوي يعني اشلون ترقيني

فتح ورقة وسالني متوضية
هزيت راسي باي ..
يا دوب اطراف اصابعه على مقدمه راسي و بدأ يقرأ...
اني كمت بس اثاوب  اجيت انام على نفسي

بنهاية الرقية دخل والدي كان عنده شغل ..
كعد يم امي و اخذ كوبها وغمس بيه وبدا ياكل اني تركت تركيزي بالنوم وانتبهت اله ما قاطع السيد بالسلام..

طبك الورقة

-شكرا ابو مصطفى تعبتك وياي ..

- ماله داعي الشكر

- ممنونة منك ..
صب ماي وشرب
-قبل فترة حلمت بفاطمة ..
لاحظت الكلاص ما نزل من حلكة بس بطل يشرب ..

-بداخل الصحن الشريف اصلي بالناس

التفت عليه وعلى وجهه سمات الاندهاش

-  اللهم صل على محمد وعلى ال بيت محمد 
وبعد ؟

- كانت لابسة ملابس حلوة وريحتها متعطرة  الحضرة من حظنتها  هو يصير بالحلم الواحد يميز العطور

- بأي حضرة شفتيها

- بحضرة الامام علي عليه السلام

-مرتاح وجه؟

بدأ يسأل و انظارة لأمام كأنه دا يشوف شي كدامه!

- اي وجها منور
و كلة بشاشة مدا انساه
حتى جانت ادور عليك وتعبت كعدت اصلي
دزتني ادور عليك و اجيبك الها

- و لكيتيني؟

-هااا

هو مجرد حلم لكن خجلت من نفسي ما دورته رحت ويه ماجد ونسيت امرة

هزين براسي  بلا

-لا
هي تيهتك بالحضرة

اله تفسير هذا الحلم

- ان شاء خير
وان شاء الله تلكاني بيوم

فهمت قصده و سألت  بغباء طارئ

-انت مزوج  منو تلكه اهناك

شفته ابتسم بس مباوع الي
بس ظل مبتسم

- بس فاطمة احلى من زوجتك للعلم

التفتت عليه  رافعلي حاجب

-ا اسفة مو قصدي
ا ا
ظليت اوت وت

- مع هذا تظل عشرتها بالذاكرة عالقة وتضج ذكرياتها بخاطري
دائما للأول فرحة محط مختلف بالقلب

سكت الهبل الي جنت اكوله بدافع الغيرة  رده

-يعني زوجتك ما نستك فاطمة

جنت احاول اظم فرحة وجهي

تنهد وسحب انفاسة ببطئ ثكيل وشفته باوع لامي وابوية الي ما يدرون بيه يمكن خلص قرأة وكاعدين مدري شنو يسولفون

-الزوجة الصالحة تاريخ الرجل ...
تاريخ طويل عمره يقاس بالمواقف الطيبة من بداية عمر الشاب لنصف ربيعه و بداية الخريف و النهاية
تبقى تسجل اله ذكريات حياتهم
بتعابير وجهه كل تعبير بيه كذا حدث
مر بحياتهم ...

١٧ سنة عشرة واكثر منها بضعاف تفاصيل عشناها بحلوها و مرها

اتقرب مصطفى ياخذ كلاص الماي
وسمعني اكول
-تاريخ

الوصف عجبتني

مصطفى- يبووو هم التاريخ اشكد اكرهه يدوخ وكله تسفيط حجي زايد

اخذ الكلاص ورجع انتكأ على القنفة مبتعد عنا

السيد-ومرات اكو مرة تاريخ مثل الي وصفه هالمتمرد!!

حس بابا على السيد مخلص و كعدو سوي عفتهم رايحة لغرفتي افكر بكلام السيد
المرة الصالحة تاريخ 
عندي رغبة قوية بستمرار هذي العلاقة ثاني خطوبة الي اذا تركني انهد مو قصة حب قصة استقرار اني تعبت
حتى الي دمروني راح يفرحون بكسرتي....راح اكره نفسي راح تتحطم حياتي اطلع من قصة الاشاعات ادخل بقصة اكبر وهي مشاكل عقلية
لا لا راح اتمسك بيه شنو اني هيج دائما انظلم كافي عاد تعبت مابيه طاقة بعد اصلا لشي جديد
.
انتظرت الليل اجه اني صايرة انعس من وقت ..
طبعا رقية راحت لبيت زوجها فمقتدى بالليل يخلوه ينام يمي جوة بالارض مرابط ..
اتعديته وهو يلعب بتليفونه

-وين رايحه

-اقضي حاجة شنو هالسؤال

- تليفونج وياج؟

-اي حتى لا اخاف

طلعت من الغرفة للأستقبال وسديت الباب عليه ..
ودكيت عليه

- مساء الخير

- مساء الخيرات
رد كانه دا ياكل!

- اشلونك شدسوي

-اني زين جاي اكل

-هسة ؟
الساعة عشرة

- اي شسوي جعت لعد

ضحكت ضحكة قصير وسالت

-شتاكل؟

- والله خير من الله تكة و كباب

- اويلي هاي الكرش راح يطك

سمعت ضحكة

عزة هذا اشبيه

- من الاول عرفتج ضايجه منه
دربالج تراه شي من شخصيتي

- لا والله ههههههههه

- اكلج دقايق واتصل بيج بس خل ابلع كم لكمة

راح  عافني اضحك عليه ،،ابو بطن هذا ورطة
بس يلا شو اسلوبة احسن من العصر و بيه حيوية مو بارد ..

•ماجد

كاعد ضايج حيل ماعندي شي اسويه
مشتاق لفطومة ، هسة بالله اشلون سالفة هاي الوحدة مجاي اتعود عليها
اروح يم اهلي تسلمني اخلاص و ملحتها عليه

اجي اهنا الوحده جاي تاكل بيه ، الحيرة ماخذة جزء مني ، خطيبتي الي التردد منها بدأ يشل حالي لا اكدر اعوفها واحط محمد ونفسي بموقف لا يحسد و لا اكدر اكمل متخوف الي بيها حالة مرضية وترجع الها حتى مرضها نحس مو بدني عقلي هاي حياتي اشلون ابديها هيج ، قسمتي الثانية ليش هيج تعللت ..
حسيت بالجوع كد ما فكرت . 
رحت طلعت البقى من العشى
اجيت احميه منظر الطباخ كله تراب لعب نفسي غسلت صينية وكعدت اكل جوع من غير لذة
كمت فتحت التلفزيون يبعد شي من الوحشة الي بالبيت

دك تليفوني ...لانها هي ..
صوتها كسرلي الوحدة الي احسها
حتى نفسي انفتحت للأكل اني واحجي وياها وتضحك ... سديت الخط سويت كرصة لفة و اكلتها على السريع وغسلت ورجعت الها ..
دكيت ما ردت ...
بعدين هي اتصلت

-وين رحتي

-رحت افرش اسناني
بعدين شبسرعة خلصت اكل

-  ماكو بالعافية حبيبي

-عوافي كابتن

- شنو كابتن هاي اريد غير شي

-ليش انت تحبني

سؤالها صفني للحظة و اخذته بضحك جوابي

- احبج كد التكه

- ههههههههه عاد زين
لا احجي جديات مو واكفه حبيبي وحبيبتي واحنه يا دوب نعرف عن بعض اول سطر

عوفك من الحالة المرضية ادري بيك شهدتها
اقصد ما قبلها

- شو اشتهيت هسة جاي

سمعت لهثة ضحكتها

-ادري انت بهالليل ما تفكير غير بكر...
بمعدتك

-ليش قطعتهيا كولي كرشك
هههههه لا افكر بأمور أخرى تنزل الوزن

-شنية ؟

سؤالها الفطير ضحكني من داخل
كلت خل اتحرش بيها الليل طويل

-يعني مثلا انت يمي و نسولف للصبح
هيج امور دافئة ويه هذا الجو الربيعي تنسيك الهم
مو صح

الو
وين رحتي

- وياك اي وبعدين

- يعني حتى نتعرف عن قرب
هيج شي

- الحمدلله

-شنو
على الشنو الحمد

- اني مشكلتي واضحة حيل يعني حكولك اخر مكالمة بينا أيست منك وكلت قريبا يلبس حذائة ويشرد

-وضحي اكثر

- حسيتك ملان

-لا
ابد هاي اوهام

حست بيك يا ماجد وانت الي تخاف تجرحها وظال متردد

- ابد لا تفكرين بهاي الطريقة

- ان شاء الله
اساسا اني شلتها هذي الفكرة من بالي من هذا الاتصال والضحك مالتك

- لا اصلا انت من البداية غلطانه

- الحمدلله

-هاي طلعتي تحبيني
گلبتها شقة

- ههههه لا بس اشلون ما نكول اعجاب

-دجامليني وكولي اي بس الحمدلله من اكو اعجاب

زينب

-هممم

-اه هاي الهمم عجبتني حيل

-ههه شنو تريد

-ردت أسالج هم بعد اشوفين التهيأت

- لاء

جاوبت بحزم

-ها تمام

-تظن الي بيه خبال ويتهيأ الي

- لا مو هيج بس الحالة غريبة و

- لا تطمن
ما فقدت عقلي محنة وعديتها ...

-زينب

-اروح انام تصبح على خير

-لا انتظري

بجزم كالت حيل نعست ودعتها ضايجه ..

،،
رحت لبيت جدة بنتي .  واخذتها لفاطمة وياي لبيت اهلي ..

امي اسولف وياي وحاطه بنتي بحضنها ..
دخلت اخلاص وخربت الكعدة

- اشلون صار حالها مرتك

-  زينة وسدي السالفة

امي
-اش يمة اخلاص

-يمة ترة كلها تدري جناتج وبناتج كلها تدري خطيبة ابنج مخبولة

امي
-اخلاص
كافي يمة حرام هذا الكلام

-مابيها شي البنية

-انت شتحجي كلها تدري ومغلسة محد يحجي وياكم انت واخوك
شنو لزكتو لهاي العائلة بالله محمد ومعمي بالشيخ صديقة
انت ليش تورط روحك

امي
-كافي سدي الموضوع

-شسد يمة بالله اخذها ورجعت انخبلت
عود ردناها تراعي اولاد اختها
طلعت هي اتريد من يراعها
لا تتورط ترة محمد معمي واني هم عندي علم مريضة عدها فتحتين بالقلب

دخل عدنان
و اطفاله وياه

-سلاماً عليكم

باس راس امي

-اخلاص سوينا جاي

تعال ماجد اريدك بشغلة ..

طلعنا بالحديقة وكفنا و سولف الي
موضوع يخصة ..
دخل محمد سلم ودخل للداخل ..

طلع ورة وقت وصاحلي محمد ادخل

- شنو الموضوع محمد

-تعال لغرفة امي عندي كلام وياك ...

دخلت ولكيت امي كاعدة ...

- كلت لأخوك على كلام اخلاص
لأن شفتك تأثرت يا ماما بكلامها ..

راح اخلي اخوك يتكلم وياك
بس اريد اكلك شغلة
الي صار بزينب صاير بأمي ترة

طلعت امي و كعد محمد على الارض
ثاني رجل وماد الثانية

-تعال اكعد يمي عندي كلمتين وياك ...

-اتفضل

-انت اخوية و عزيز عليه حيل
اعز من روحي
لكن هاي البنية اني ربيتها  بنتي الثانية
وكفت بنصيبها من ابن خال عديلي لأن لمحت بيه خصلة ما توالمها

-منو عدليك ياسر؟

- اكو غيره  حاليا عديلك مو عديلي
ابن خالة بنفس الحي وطلب البنية اكثر من مرة وابوها رفض بالمرة الاولى اني سألته عنه
وشفته مو مناسب
بس للشهادة اجاني لهنا للبيت وحجى وياي شفته مرتب وخوش رجل
بالمرة الاولى استقليت بيه ...
بس من اجاني للبيت غير من نظرتي
بس بعد ابوها الله يسلمه من حجيت وياه رافض رفض قطعي ويمكن قسمة زينة
وما صارت و من اتوفت مرتك تمنيتها الك

ماجد
خصم الكلام اذيتها من اذية بتول وانت بكيفك بعد اذيني و اكسرني كدام ابوها وانت تعرف شنو يعني الي ابوها

- محمد اني صحيح ما عفتها مو ناقص بس هم بشر والي طاقة
احنة حتى مابينا مودة سابقة حتى اتحمل لو مزوجها وبينا عشرة والله العظيم اتحمل
بس احنه مابينا كان بس مهر  واعجاب شكلي من ردت اتعرف عليها صار الي صار بوجهي

- اللهم بلغت اللهم فأشهد اني ما ارضى عنك ولا ابوك

▪︎زينب
حطيت براسي فكرة اليوم اطلع للطبيب
أستأذنت من بابا و طلبت من قداوي يوديني للطبيبة بالحي العصر ..
اريد افحص أسناني وانظفهم

امي الظهر ذكرتني بأني لازم اكول لخطيبي ..

رسلت اله برسالة على طلعتي ..
هو خابر

- سلامتك
من شنو تعانين

- ما اعاني طبيبة اسنان اريد اسوي تنظيف

- ها اوك اجي عليج وراح احجز الج عند طبيبي افضل

-لا لا ماكو داعي اروح ويه مقتدى بالحي

- لا دكتوري جيد و هاي منا وجاي يمه صرنا عائلة

ظليت اتحسس بگلبي كلمة عائلة

-احجز واردلج خبر

-لا لا
عفية استحي من الاطباء هاي رايحه الها سابقا خوش طبيبة

-ها على راحتج
بس هم اني الي اوصلج

-بالحي
-ميخالف منها نشوفج
-اوكي اذا هيج

..
كرصت خدودي او بالاحرى جلدي
-اوف اشوكت اسمن ولو وجهي يتعدل ..

طلعت من غرفتي وطبعا بلغت بابا بمنو يوصلني ..
طلعت اله من رن عليه  بسيارته كاعد ..

نزلنا كدام البناية دخلنا لكينا الطابق الارضي مكتض بالناس لأنه عيادة لطبيبة نسائية و مختبر يمها و مضمد ..
صعدنا  للطابق الثاني طبيبتي ..
لكينا العيادة معزلة سألنها عنها كالو مسافرة ..

ردنا ننزل ماجد كال انزلي قبلي للسيارة

وشفته دخل للتواليت
نزلت
وصارت بوجهي بنية اتقدمت عليه ورفعت بوشيتها

- اشلونج زينب

- ها زينة؟
الحمد لله
-ما عرفتيني

-الصراحه لا والله

-اني زينب اقارب شهد ..زوجة ابن خالها نسيتي

-هاا اسفة والله شكلك متغير

-لا عادي من الحمل

-اها!!!

بهتت وردت اروح من يمها

- انت جاية لهنا عندج حجز ترة هوسة سراية واحد عشرين

-لا اني لطبيبة اسنان

شفت خلفها خليل شايل كرسي وخلاه .

هو هم شافني ظل بمكانه وهي التفتت الي اباوع اله
-ها خليل جابلي كرسي من غرفة المضمد
ماكو مكان فارغ
يلا حبيبتي مع السلامه
نزلت البوشية وراحت ..
ايد لزمت كفي معتصرة اوردته

-منو هذي البنية تعرفيها

- اي اعرفها

همس اشبيج

- اشوية دخت

وكف من وصل لخليل الي مدنك راسه

اني من سمعت ماجد يسلم عليه خليت ورحت للسيارة

اجه وراية  وكعدنا بيها

- ا ا هذا تعرفه
-منو
-الي مرته جانت تحجي وياي

-ها هذا خليل شفته كم مرة بباب بيت زوج اختج هو عرفني عليه ...
ابن عمه يمكن مدري خالته

-لا ابن خاله

نزع نظارته الشمسية

-ابن خالة كلتي ؟

-اي ياسر ماعنده خالات و عمامة بال***

-اها ابن خاله
خالة هو هذا الي بيتهم هم يمكم
اقصد بنفس الحي

-اي

- هاا
تردين اشوفيه

-من م منو

- عبودي
منو يعني
كالها وهو ينطيني نظرة جانبية

خل نسير عليهم وتاخذيه بطريقج مدام ما  دخلنا  للطبيبة

-اوكي بس حخابر بابا

رحنا لبيت فاطمة عفوا السيد وهاي اول مرة ادخل بيت فاطمة ..
مم مغيره بيه اشياء

صار بوجهي تقي مطين

-خالة اجت خالة اجت .

همست بغضب
-عايفة الاطفال وصخين

- مو شرط يلعبون

اووف سمعني ماجد و جاوب

خنست  وحاولت ما ابرز غضبي كدامه
بس لو مجاية احسن نسيت اني بيت فاطمة اخذته وحده غيرها..

طلع السيد وكان مرحب

دخلت مرت ابوهم سلمت وكعدت

السيد- سوي شي الهم

ماجد- ماكو داعي قابل غرب

السيد
-انت متعودين عليك بس زينب صارلها اهواي مجاية

مرته كالت لتقي
-يا ولك روح بدل ليش لهسة ظال هيج

اووف هذا الولد روحه بالحديقة ورشها بالماي

روح بدل

غلس عنها وهي راحت للمطبخ

كلت اله
- تقي حبيبي روح بدل اريد ابوسك

ضحك واستحى وراح

كعد يمي صديق ويشوفني دفتر الاملاء مالته ..

-عفيه حبيبي شطور

بتول
-عنده تسعة ترة

صديق
- انت كسولة لا تحجين كله خمسات واربعات

-ليش بتول

سوت حركه باديها بمعني اشمدريني

دخل تقي

-بدلت وغسلت وجهي صرت نظيف
يلا بوسيني

-تعال حبيبي ..

دخل صوفي وبيده عبود كان طالع لبرة يشتري اله ...

صار يصفك بس شافني ..

جان ماجد يحجي ويه اخوه ندسته

همس
-ها

شاورته

-يلا كوله ناخذ عبودي

-اي اي ميخالف
ورجع يسولف ويه اخوه ..

كعد عبودي يفردش بجنطة ايدي واني اشرب من العصير الي قدمته مرت ابوه

واسمع كلامهم ..

فردش غراضج

التفتت عليه لكيته وكعهم على الارض
انحنيت المهم واني كاعده على القنفة ..
انحنى صديق واخذ صورة واكعة

-بابا هاي ماما ماما

جفلت و صفنت عليهم
هاي الصورة الوحيده الي تتنقل بجنطي او جوة مخدتي . صورة عرس فاطمة واني بحضنها

زوجته كاعده يمه مدت عنقها وشافتها

السيد ببروده المعتاد ابتسم وكال
وهو يغطي وجه فاطمه الغير محجبة
و حط الصورة كدام ماجد

-هاي خطيبتك بحضن اختها

ضحك
-هاي شنو الشعر
هههههههه بيه شگار
يا الله نسلي راح يتحسن
حطيت ايدي على حلكي مستحية

-وتحجين عليه اكل شوفي انت من صغرج اشلون حاضنه الببسي . 

- شو بالله خل اشوف

اخذت الصورة العلوية وكالت

- اهنا حيل طفلة زينب

- اي

-لعد اشلون رادت امك
سكتت مكملت وهو اخذ منها الصورة وانطاها لصديق

-رجعها لخالتك ...

اخذتها وضميتها . 

الحو نظل على العشا. 

راحت المرة وهو راح خلفها

وكف ماجد

-كومي زنوبة اشوفج شغلة

- شنو ماجد
ترة مريد ابقى على العشا اريد ارجع

حباب اتعذر منه وخلينا نروح

-هسة يس كومي ..

كمت وراه وما خلة الاطفال يجون ورانه .

دخلني لغرفة صوفي و قاسم ..

-ها شنو تراويني

سد الباب وكال

- بس اريد افهمج شغلة

- ماجد افتح الباب والله عيب من السيد

-تعالي
جرني من ايدي وعلى سرير صوفي كعدنا

- شنو جهزتي لحد الان

-هااا

-اشتريتي ذهب
وين حلقتج

-ما اشتريت

-زينب اني راح احدد زواجنا

اريد اتناقش وياج بيه

-لا عفية اجله اني بعدني

-بعدج شنو

-ضعيفة و مرهقة

- زينب لا طول خطوبتنا ما بيج شي اني محتاج حيل يتم الموضوع

- ليش

- بنتي

- اشبيها بنتك مو عايشة ويه جدتها على اساس هي تربيها

- ما اكدر
زينب هاي بنتي 
اشتاق الها واريدها يمي

دنك وظل يفرك وجهه بأدية

- اريدها يمي من جهة بيبتها كاسرة خاطري تتمرض اذا اخذها منها
ومن جهة اشتاق الها واريدها يمي

- خليها يم بيبتها ماجد وكل فترة جيبها يمك

- ما ترديها ؟

اني ماعندي ست اطفال هي بنية وطفلة من عمر عبودي
الي تنطيه اله اكدرين تنطيه الها هم

-عبدالله ابن اختي ربيتة من صغره
وبصراحة بيبتي  كالت عبارة الي يموت ابوه يكعد على حضن امه
والي اتموت امه يكعد على عتبة البيت
ماكو احد يعوضها غير شخص يحب امها
اني دا احجي على مودها هي
شفت بعينك مرت اخوك مو مرة مو زينه بس اعتقد مهما تسوي تظل مرت اب بنظر الكل

جمعت قوتي و لزمت ايده 

باوعلها .

- وياي ؟

- ما ادري

خل نطلع خلة وطلع واني خلفة حسيت بيه ضاج مدري اهتم (شال هم)

ورجعني لبيتنا ما تعشينا يمهم واخذت عبودي وياي ...
من هاي الليلة حسيتها رجع بارد السلام وقليل الكلام ..

ما سمعو كلامي وبابا قنعني اغير البيت
و ارتاح بالزواج ...

ظليت شهرين اجهز نفسي للعرس مع خالاتي ...وشهد تملي عليه شجيب وما اجيب ..

سويت بهذي المدة شعري تسريح و تغذية و عالجت بعض مشاكل بشرتي
بعض الاحلام المزعجه ما زالت تراودني وعلاجهم القرأن ...
ما زال السيد متواصل وياي وحتى اكوله على احلامي ..
اشويه النحول بدأ يخف من جسمي بالتدريج ويسكن محلة الخوفه والارهاب من اقتراب موعد الزواج ...
ماجد جياته بهذني الشهرين معدومه كلن اتصل بيه او يتصل بيه حسب مزاجه
مرات يطول ومرات يختصر ويروح ينام .
،،

جنت اشوف فلم واجتني حالة بكاء على مشهد حزين .. شو كمت أتذكر اشياء من حياتي وما كدرت اسكت روحي

اتصل بيه ماجد ما سكتت روحي الا رديت لا رديت ابجي

- الو ماجد

- هلا زنوبتي خو ما نمتي

- لا

-هاي ليش تبجين

- ماجد خايفة عفية اجل العرس بعد سنة ما اريده الشهر الجاي

ذبيتها بوجهه

- زينب صلي على محمد

- ما اصلي تعبت دا اجبر بروحي
اني خايفة هياتني اعترف الك

- لا تبالغين
وتمسلتين

- ما امسلت اني خايفة منك

-لج وحش

- ما اعرفك ساعة تلزك الي وساعة تنساني

- الزك ؟
هاي الفاظ بالله

-لك انت حتى شوفه ما تجي اشوفني

- ها ترديني اجي ؟

زينب ما تكليلي اشبيج

- خايفة منك متقلب

-اني الي متقلب

- اي

- اني مرات ضايج من الشغل لو مشتاق لبتي
مالي خلك احجي
بس من اشتاق الج اجيج بلهفة تكومين تستقبليني بهذا الكلام

- يعني مو لان ما طايقني

-يالكعبة
شنو ما رايدج
ثقة اشوية
والله بديت احبج

يتبع

النت ما انقطع مع الانتفاضة فالنشر رجع  بين يوم ويوم جزء مطول افضل من يومي قصير لأن ملحك ، ومستمرة وياكم
طبعا بالبارت السابق كلت أعتصم  مو لان
اوقف شغل قابل انتم الحكومة هم شنو ذنبكم
بس اني والله تعبانة حيل كلش اتأثر وحساسة شاهد الله حتى قصص مدا اقرأ تركت بس دا اجبر نفسي و اكمل هذي كواجب ومراح اتركها الا ان انهيها بس دكتب من غير روح حتة تعبير احسه بالكوة الكه بسبب الحزن الي بيه اني حتى هاي الاجزاء مدا اصححها
المهم
احداث سحر زينب اختصرتها ببارت واحد لأن ما اريد اتعمق واخليها تشبه قصة خذ بيدي ..هي القصص لازم بيها تشابه مدام من الواقع العراقي .