رواية شيخ الشباب(بنت المؤمن) الفصل الثالث والأربعون 43 - بقلم زهراء العراقيه

صباح الورد ...
شكراً للي سألو عني  سواء بالرسائل او بالتعليقات او سألو اختي عني اكيد عرفتو سبب الغياب ظروف خاصة  ..
النص ما مصحح على اغلاطي الإملائية الفضيييييييعة لا اصححون خلفي ❤🥀

هل يملك النهر تغييرا لمجراه!!
-نزار قباني

الحب صار  شيخ عجوز يحتضر بعيوني واني أشوف الضعف  و الخجل ماله عين اتشوفني لدرجة دار نظره عني و تراجع بخطواته للخلف عاصر البوم الي بيده و طلع

ياسر- السلام عليكم !
شهد - يلا احنه طالعين
مع السلامة . 

ياسر- علاوي تعالي

علاوي-ما الوح ويه هالة (اروح ويه خالة)
فَطرت گلبي  حسستني بعظم حبي المكتوم والمضموم بداخلي والمحجوب حتى علية الفراق  كشف الحجاب عني
خليل" ‏أنت كنت  رجُل ياكل حزني دائماً بضحكتِه ، مدري ليش بس يمك شكد ترتاح نفسيتي
تركت شهد، مثل مهب  ريح بليلة خريف ممطر  سريعة و عيني تدمع  مشيت من يمه واكف يم الباب و يفرك بعيونه مشيت عنه وصلت لبابنا
و التفاته  سهواً  بدرت مني و ما كدرت ايدي تكمل عملها وتفتح الباب،
دخلت شهد قبلي  وهو حسني ما زلت واكفة رفع نظره لاحظت التهاب اعيونه بعاطفة قوية هزتني هز وأرتعش فكي ردت أنطق بس الكلمات مسربة ما مجمعة، ضاع صوتي المجهد بنفاسي
ردته يدخل ويرحم رجلي الي فقدت السيطرة عليهم كأني اخذ غطسة قوية من شوفته لأن اعرف هاي ختامة النهاية
رفعت زاوية شفتي بالاخير عاتبة ما قاصده الاستهزاء
لزمت جبيني ومسحته ! وأبتسمت

دمعت عينه ! لو يتهيأ الي ! لا أقسم بنظري و بحبي لأبوية وامي هو دمع هذي دمعته نزلت واختلطت ويه لحيته  المحددة !

طلع ياسر حط ايده على متن خليل

-أدخل خليل

وانمدت ايد شهد من داخل بيتنا فاتحه الباب و لزمتني بس ما كدرت اجرني ثقيلة عليها اني، و جرة ياسر خليل يحاول يدخلة

سمعت همسة اي وصلني همسة
- هي هم تعاني

وكأن المحيطات اجتمعت حتى تفصل بينا بهاي اللحظه  ،  دخلت وتركته خلفي رموشة غريقة بالدموع

رحت لغرفتي صريعة لحزني كعدت على سرير رقية سابقاٍ ،ولبتول حاليا ركبي ساحت ما تحمل رجلي  ، دخلت شهد مندفعة بكلامها

- هذا شنو الي سويتيه ليش اجيتي ليش هيج

زينب انت صاحية لنفسج شنو سويتي
محبيت هذا الشي مو حلوة بحقج
اخته تدري بخطبته الج الي ما صارت وحتى كوثر

شلت قوطية بيها اقلامي وشمرتها يم رجليها وكعت 
وسعت نظرها عليه مصدومة بمحاولة ضربي الها
صكيت أسناني و من بينهن كلت

-رجائاً انتِ بالذات ما اريد اسمع منج شي مو ملامة

- فشلتي نفسج ترة

أستفزتني كظمت غيضي و لزمت شرشف السرير عاصرة دية عصر

-وانتِ كلش هامتج اني خايفة عليه!!
كلتها ساخرة منها

- لا

- إنت  وخليل متشابهين حيل بلا مسؤولية  ولا أحساس

- لا تحجين هيج

- كلش مثله
أتكالية و هوائية  ما اعرف مرتضى اشلون متأمل بيوم اتلزمين هذا البيت من بعد امي  !

-هيج شايفتني !

- واعتقد مثل ابن خالج بالضبط
هشة بابسط مشكلة تنهزمين
علقتيني بيه وطلع ما يسوة

وكفت كدامي بالضبط و احنت ضهرها عليه
رفعت وجهي من ذقني رمشت مستغربة ردة فعلها لزمتها قوية و نظرتها أشرس

- هشة!

- وخليل مثل عماد وبعد اضرب

-خليل هش!
خليل سوة الي ما سواه احد على حسابج  سوة الي ما سواه ابن عمج وهو ما بينكم غير اطراف حديث وابن عمج ربيتي على ايدة باعج برخص ورخصج

- هديني وكافي
حطيت ايدي على ايدها احاول اخليها تهد ذقني ، شدت بعصرها اله ورفعت راسي اكثر الها

- خليل خطبج مرة واثنين وثلاثة وتوسل وانذل بذيج اللحظة وهو صار مو يطلبج من ابوج صار يترجاه

هزيت براسي وبعيوني الذهول واللاوعي صاحبني

هدت راسي ..

و وكفت بدات تحجي وتأشر عليه

- وسط ياسر و عمي هم راح اله ويه خليل و ابوج رفضه

امه تخابر امج تجي
امج صدتها بنزاكة هي ما بينت طردة بس بينت رفض المطلب ماكو داعي تجي جان وحي كلام امج

- انت شتكولين امي ما تكدر حتى اجمع كلام

-قبل لا تسوي عمليه وتوكع
هذا الكلام قبل أشهر

من شافج نازلة من سيارة رجل اختج و اطفاله اصيحج ماما تخبل بنفس الليلة
اخذ ياسر وراحو  لأبوج  بالجامع

-جان دريت ليش اني ما ادري

-مرتضى محلفني ما اجيب الج طاري

حتى بداخلهم شك انت مطيته ريك حلو ومتعشم بيج بس أبوج منبه ومانع مرتضى يواجهج بشكوكه

-أخوية يشك بيه !؟

هدأت حدة كلامها
- اني ذبيت السبب بيه وكلت اله جملتها بعيون خليل هي ما الها دخل
ولا حاجيه وياه

- خليل يعني صدك طلبني

- اي طلبج بدل المرة ثلاثة بس أهلج ما ينطوه شسوي اكثر يكعد يذلل اكثر
حتى قسم حلف الهم ما يشرب
حتى ياسر اضرع الهم وزكاه و كفله
لج حتى اخوج وافق بس أبوج ما يقبل
وحتى امج  كلش قافلة

بهتت ملامحي أكثر وانعقد الساني

فاتحه حلكي وصافنه

اشوكت و وين وليش هيج اهلي حتى علم ما الي...!

همست
-هذا محمد سيد محمد والله العظيم هذا هو
اااه

كعدت ابجي ومدنكه وجهي

-قهرتيني حيل من قارنتيه ويه عماد
ترة خليل يدري بسالفه الاشاعات الي تكول عندج علاقة برجل اختج اخوية

رفعت نظري گلبي اجه يوكف ما اتحمل هاي الصدمات الي مطرت عليه توها

- ي يعرف يعرف اني اني

- اي

كالتها وهي مايله راسها

- تدرين شكال الي زينب بطهارة الجامع ما يتقرب الها بس ابن الحلال بالحلال

يعرفج وهو ما معاشرج مو مثل الي قارنتيه بيه

كعدت يمي وذبت نفسها على السرير هزته وحركتني وياه ...التفتت عليها
همست
- جان واثق راح يقنع ابوج
فواعد  امه اذا رفضوه يزوج الي هي تختارها  هيج كلمة وانطاها و واثق اهلج يوافقون بالاخير

ضحكت ودمعت
-اهه راحت ثقته اطشرت من ابوج طردة بأخر مرة صاده بقوة  توجع

هاي ما صارلها مده من خطبها لا يعرفها ولا شايفها امه راحت خطبت اله هم حفيدة شيخ
يمكن حتى تسد النقص الي حسة ابنها الجبير من انرفض و الصدفة البنية اسمها مثل أسمج

بجيت بنشيج يوجع الغريب

- كال امي كتلتني كتل من عرف اسمها
مثل اسمج بعد ما خطبها

-كافي شهد

-ما تمم زواجه ثلاثه يدخل الغرفة ويطلع 
ما يكدر مثل المغصوب

- كافي

- من صار عدنا علم خاف من الفضيحه جبر نفسه جبر يتقبلها

- كافي

اعصر بعيوني واسكت بروحي غصب

- شنويسوي يعني اصلا اني من ضمن الي ضغطو عليه حتى يزوج

- كلنا نتأمل بمرور الايام يتغير و يتعايش واكيد هذا الي راح يصير
تمر الايام ويخمد الجرح

- و اني

- مو كد عذابه عذابج
موكد الي دايمر هسة فتحتي عليه جرحه وطلعتي
ياريتج لو ما طالعة ولا شافج
زدتي عذابه ...
لو منظر بت اختج وهي لازمه الحجاب هديته تسحل  بيه الكاع!

أزدادت اهات الحسرات و تجرعت مرارة ريك البجي

- ياريت

- زينب مو تكولين لاحد اني كلت الج اهلج متحفظين على الموضوع ابوج ما يقبل نحجي بيه

- بابا!
نطقتها و احنيت راسي ضامه وجهي بحجري مريت بهذا الوقت بذاك الألم الي ياخذ منك كل ما  تشعر وتحس بيه بيوم ياكل بيه ببطء قوي وما كعدت الا واني عظام متناثرة عن احساس العجز بكل انواعه ، اني واثقة منه هو مناسب الي لكن امري مو بيدي ولا الي خيار، العجز عن ارضاء الي حولي  جبرا مالي خيار اعصي او ارضيهم،العجز من ان اشوف بعيونهم نظرة فخر مهما اختارين عجزت اصير الي اريده  ، الحياة صارت بطعم الارهاق و الحسرات بخيارات معدومة ..

طبت شهد مرة لخ و شافتني على حطتي كاعده و اباوع لصفحتي للي لا شي اباوع

- زينب امج اتريدج
التفتت عليها ببطء وسالت ببهوت
-شتريد تعبانه خاف اشوف اعيوني وتحس بيه

- تدرين بيها متحفظة كدامي  حيل وتتحرج مني والا كان اخذتها للتواليت بس بع...

سكتتها بأيماء تفهم و كمت لأمي ساعدتها و رجعتها لكعدتها بالغرفة تباوع تلفزيون أجت بتول جرجرتني واني مو هلكد منتبها الها رحت وياها ادفع

-شوفي اشلون نكع

ظليت صافنه على تليفوني شسوي بنص السراحية ؟ و عبودي كاعد ويضحك الي، مطلع الي أسنونه
-اده اده

و مد ايده بنص السراحية يخوط بجهازي وصل الدم لراسي وبانت عروك جبيني جريتها منه واني اصيح على بتول

- شجابه اله

-اني  انطيته جان يبجي حتى اسكته رحت العب اجيت لكيته غاطه بنصها

- والماي شسوي اهنا

هزت امتونها بمادري

عطت عليها اعرفها هي تشرب و تشمرها باي مكان

-كلبة دومج مأذيتني

- اني شعليه انت مهملة

شلت السراحية وذبيتها عليها بللتها
شردت من يمي و شلت عبود من تك ايد ابدله ملابسه مبللة  واني شايطه 
فسخت الجهاز و شريته بالحديقة
اخذت ثوب لبتول ورحت وأدورها سألت شهد

لكيتها تثرم حمص بالمثرامة

- وين بتول اريد اغير الها

- شفتها تبدل بالصالة!

زنوب لا تعصبين عليها خطية تبجي

-احسن شي اخابر ابوهم ياخذهم

-متعلقين بيج وانت هم تدزيهم يومين وتنجين عليهم بعدين
لا تقررين واني متخبطة الافكار

-سوي شوربة لابوية ما يحب الفلافل

- اوك
امج دصيحج مدا اسمعين

-يووه الله ياخذني واخلص

رحت الها

-ها شرايده بعد كلساع زينب زينب عساها ماتت وارتاحت

-هيج
روحي يمة

-شنو هيج شرايده خلصيني

- سبحتي

حطيتها بحضنها وردت اطلع

-طفي
هذا

التفتت نفخت نفسي بغضب و طفيت التلفزيون

-رايده شي ثاني فد مرة

- روحي.

بعدني ما طالعة سمعت صوت بابا بالهول يصيح بأسمي

- زينب ...
يا بنات تعالو

دخلت شفته جايب مسواك

اخذته منه واجت شهد شالت وياي ورحنا للمطبخ عفتها ورحت لأبويه الي صاحلي مرة ثانية ..دخلت للهول شفته كاعد على القنفة

-اليوم طالعة !؟

رايحه لبيت اختج ؟
ما تساءلت اشلون عرف لان بتول كاعده بحضنه ..
ابعدها وكام شال تليفونه

عاد السؤال وهو يقلب بجهازة

- اي
رفع نظرة مستغرب

- ليش طالعة اختج عندج شي وياها تجي او تخابريها مرة ثانية لا اطلعين بلا أذني حتى لو مرتضى اذن الج

كالها و طفى جهازة وحطه بجيبة

- ما اكول لمرتضى ولا راح اطلع بعد يرضيك هذا ؟
نبرة العصبية الي بصوتي خلته يرفع حاجبة  بعتب وتأنيب
هز راسه مستغرب

-!روحي ساعدي مرت اخوج

- البيت كله عليه ليش اساعدها بالفلافل !

اتقدم بخطواته وهو ما مهتم يريد يروح لغرفته

- ليش بابا ؟

- ليش شنو

-ليش ما كلت الي

-  شكول الج اشبيج باباتي

- بابا انت تحبني؟

هز ايد وكمل مشي  وشفت لمحة استهزاء بزاوية شفته من ابتسم ...

- ليش اني مالي قرار 
ولا الي كلمة مقتدى احسن مني

عكدلي حاجبه و كان صوت قلبي يخفق مثل زخة مطر على قطعة حديد

والخوف من اعيونه ما ردعني
اجتني حالة اعتراض اني ما اعرفني بيها! تراجعت للخلف من التفت عليه بكامل جسدة

-فاطمة كان الها كلمة وقرار
حتى رقية تتأثر بقراراتها الا اني

-اي وبعدين

- ليش رفضت خليل بلا ما تأخذون رايي

رفعل حاجب تسبب بتجعد جبينه اربكني حيل

- ليش ما ادري اصلا انتم رافضين ورايحين  وهو حالف وياسر كافلة
هو من طرفه   و و
اعتقد لو من طرف محمد
لو كان مدري ايش توافق

سكوته خوفني و طير الكلمات مني كان يحك بلحيته و وجه مدنك ما اشوف تعابيره و لأن ما سكتني خفت ولكيت نفسي اكول تفاهة، الكلام الي كنت محضرته طار ..
كنت اريد اكولة

اني واثقة من أن ياسر ضامنه واعرف انت كان اقتنعت بيه لو لا رأي محمد
الانسان ما معصوم اني نفسي سويت افعال غبية هو مرحلة بسيطة واهلة تداركو امرة  ، انت كنت واثق بيه على معرفتك السطحية اله  من خلال مرتضى ليش هسة تغير رأيك بيه بمجرد معرفتك لشي غبي سواه ليش اني مو بحسبانك ولو تبلغني اعتقد اني ناضجة واعرف فرصي قليلة بسبب معرفة الاقارب بالي صار حتى لو ما متأثرين بالاشاعات بس قصة مرضي السابق تبعد و لحد الان بعد ما فسخت من عماد محد حاول يخطبني من الاقارب .. والاغراب مجازفة اكبر من خليل تعد فرصي محدوده حتى لو هسة صغيره.الكلام هذا كله طار وما نطقت منه غير

- ياريت لو ماخذين رأيي...

كنت احك بأيدي واحجي ما وعيت الا وهو رافع وجهي عليه بقوة خرعني ونفضت نفضت ..

- اذا الشخص ما مقتنع بيه ما أجي أسال رأيج
رايج ينوخذ بيه من اني بالاول مقتنع
واريد انطي
وكفتج هاي خيبت امالي بيج
هدني و راح وتنهد  بقهر واضح من اعيونه يبثة

- هاي الوكفة لا تنعاد يا زينب لا أصرف وياج تصرف اندم عليه

اتقدم عني خطوة وتراجع بقرار طلعته التفت عليه بس وجه

- ليش مهتمة ياما يجون غرب و ارفض ؟

مع الاسف يا زينب توقعتج اوعى من هيج واني الي متأمل بيج واكول يجي يوم واشوف وحده من بناتي محاضرة دينية و صاحبة شهادة افتخر بيها بس طلع عندي حق من عفيتج منها من قبل مو كفأة

ما فهمت مغزى كلامه هذا كله لأن عاتبته ليش مجاهلني  ؟ تجرأت وسألت لأن بكبائر امورهم اني الي بوجه المدفع ليش باالي يخصني مجهولة القرار؟

دخلت شهد بعد ما  طلع طلعت  سامعتنا اجتني اخذتني لغرفتي و تلومني

- شسويتي شسويتي

-كلشي ما سويت واذا سألت ابوية ؟

- ما سمعتي كلامه
ما فهمتي شنو يقصد ؟

- شنو يقصد هذا كله لان مجرد جادلته ما يحب احد يكون اله صوت غيره
تعبنا وياه

- زينب انت الغضب خلاج غبية
أبوج ع باله  انت عندج علاقة ويه خليل

شهكت فاتحه اعيوني مستنكرة كلامها

-لا لا ابد شدتحجين

- مبين من كلامه ما فهمتي معناه
اكدتي ظنونهم و بهذا التصرف
انوب اذا عرف اليوم خليل معزوم يم ياسر وانت رحتي  مقتلج اليوم والله

لج مرتضى لولا اصرار ياسر عليه هو نفسة ما راح وحتى من حضر العزومه اجه بساعة الاكل كعد اشوية وطلع اخوج  متحرج من خليل

بلعت ريكي بخوف وندم وكعدت جافلة
لحد ما كدرت اتحمل و رحت اشوف الاخبار  وكفت كدام غرفتهم اريد اسمع شي هدوء انطيتها ضهري و كانت ايدي على صدري امسحه بتوتر و شرود افكر اني ليش مشتته و اتصرف بغرابة صرت ما اعرف روحي ليش مدا اتقبل شي من اهلي
انفتح الباب رعبني التفتت عليه

كان مغير ملابسة استنكر وكفتي

- شسوين اهنا

-ها اني اني

- تسترقين سمع ؟

- لا لا كنت كنت

همست
-كنت اريد اعتذر

صد اعتذاري بنظرة جانبية قاتلة
- بعد خابت امالي بيج ومشى الحال ماكو دراسة لا السنة الجاية ولا بعد دهر

- لا لا ان

- انتهى الكلام انطيتج فرصة واثبتي بجدارة أصحية نظريتي

- مالك حق بابا

رفعلي حاجبة  وهمس يم اذني

- الي حق

- صدكني ماعندي شي

- اسكتي احسن ، لا جادلين دخل نص دخله للغرفة نصه يمي وملتفت على امي

- سمعتي بأذنج بتج بعد مالها طلعة من بيتنا وقريبا ازوجها وانهي هاي المهزلة توكف كدامي تجادلني باالي ما اتعرفه

رحت لطريق ما اعرف لوين ولكيت نفسي بوسط الاستقبال محتارة
اني غلط لو وياي حق  على انفلات اعصابي ؟
على كل حال عند بابا اكيد غلطت غلط كبير لدرجة لا تسامح بيه ومن صغري تعلمت اتحمل نتائج اقل غلطة حتى لو هي صح صرت صلدة من خسارات البارحة واليوم ...
مرت الايام  واني بتشتت و اعادة لأحداث الماضي الي صارت و طلعتي من بيتنا تنعاد عليه ساعة الوم ساعة اقدر حالتي...

،

وكفت كدامها محتارة شنو التصرف الصحيح الي اتبعة وياها العناد والتذمر زاد عدها و صارت اهواي ما تحترمني

-بتول لأخر مرة اكول الج كومي لا تلعبين اهنا غسلي

ما دارت بال الي و ظلت تحفر بالارض .  وراحت شلعت غصن ياس و تحاول تزرع .

-بتووووول

- يوووه روحي جاي ازرع ما اغسل

- بلكت يطلع الج سلبوح ياكلج

ما دارت الي بال رحت لامي الي ابد ما حجت بهذاك الموضوع ولا حتى لامت !

ساعدتها بالتبديل و رحت كعدت يم شهد بالمطبخ اشرف على طبخها دا تتعلم هليام جيدة بدت تطور ..

شهد
- العصر يجون  ام و خوات السيد

-يا سيد

- ابو مصطفى

-خيرهم  صرت اكرهم من كرهي لأبنهم

- لهلدرجة  !؟ 

- اي كله بسببه الزعل الي بيني وبين بابا

تنهدت بضجر
- ما ادري اللوم مو على السيد بس الصراحه ابوج صاحب قرار ترة

- هسة ما علينا كولي الي شسوي ويه بتول هاي صايرة فد نوب خاف تحرجني كدام بيبتها وعماتها

- ههههههه هي بس ويانه تعاند من احد موجود تصرف عدل

- داقتني عنيده و شخصيتها صعبة ما اعرف عليمن طالعة!

- على مرتضى هههههه

-هههههه مرتضى ! ما اعتقد اكو اثلج منه هاي عصبية نار

،،

غيرت ملابس امي وعطرتها و حطيت شال على راسها ضامه شعرها المشيب و اخذتها للأستقبال وفتحت الها التلفزيون على ما يجون الخطار. ورحت غيرت ثوبي الكشمير الي ثوب شيفون مبطن اسود و مشطت شعري كعكه و ظلت كم خصلة مرولة ككذلة على جوانب وجهي تعطرت وطلعت للباب من رن الجرس ..

هالمرة جايه بتها الي كانت ويه المرحومه اثناء الحادث و وجه متحسن نوعا ما بعد التجميل و اختهم الصغيره ..

بعد السلام والضيافة  اني كعدت يم امي و عبود بحضني و شهد دخلت سلمت وكعدت يمي

ظلت بتهم تباوع لشهد وكالت
-ما شاء الله حلوة كنتكم ناعمه

مجاملات وكلام زايد اني باتعس حالة اسمعه مبيه حيل لاحد و لا اتمنى يجينا خطار من طرف السيد حيل كارهه طرفة 
همست بهاي الجملة لشهد
-حيل كارهه احد من طرفة اشوكت يرحون

-يا عزيزتي كارهه الي من طرفة وهو ابنه بحضنج ؟

-هااا !!
امه باغتتني من سألت عن دراستي
امي جاوبتها ببطء
-السنة الجاية ترجع اجلت هاي السنه بسببي

- ها خطية

بتها سألتني-يا مرحلة

-ثالثة

- ها زين اكلج خالة اذا اجه نصيبها تنطوها هالحلوة لو الدراسة تمنع؟

خزرت السجاده واني محنية النظر عليها من بتهم الكبيرة سألت هذا السؤال وامها ضحكت
وكالت لبتها- اكيد البنية ما عامرة ببيت ابوها

جاوبتهم امي -تكمل دراسة والله كريم

كلت بقلبي يا دراسة هاي يا امي وزوجج حرمها عليه وانت ساكته

ام السيد - هسة كولي الي شسوي ويه تقي وصديق اليوم ملخو نفسهم بجي بس سمعو بيه جاي الكم  رادو يجون

امي-ليش ما جبتيهم

-بس اجيبهم يظلون يمكم وما صدكت اشوية تحسن سلوكهم كانو حيل حديين وبس يردوكم وانتم حملكم كبير ما عازيين حاولنا نحتويهم
منا من ابوهم  يلزم اطراف عائلته من جديد ..

ظلت توصي بأمي تحجي ويه ابوية يحجي وياه هو يتأثر بيه خل يلم اولاده ببيته ويجيب من ترعاهم ..

شهد- ترة ام السيد نظراتها كلها عليج مبتسمة بيهن غاية

- اش لا يسمعوج
،
راحن وسالت شهد

-اكلج حتى انت انتبهتي لأمه ؟
من زمان اني حاستها مو طبيعية اتجاهي نظراتها

- لج اكلنج اكل وبس يسألن بيج ويحجنج مبينه ذيج وينها الجية الج مو لأمج

كنا نحجي واني  اغسل صحون وكلاصات الضيافه
-شنو
يمعوده الي بالي يخوف لا تأكدي الي

-بعد ما جابت  طاري السيد سالتج اخته عن عمرج
شنو معناها
بعدين هنه بشنو يهمهن عمرج و تحصيلج الدراسي و سؤالهن ل امج عنج ينطوج لو لا ؟

- شهد لا تكوليها

-وكل اشوية وكالت امه الاطفال متعلقين بخالتهم
و اريد ابوهم يستقر و حاجي الشيخ يتأثر بكلامه يريدن يزوجنه هاي واضحه
والعروس هم واضحه منو!

حطيت الكلاص بغضب وكلت

- لو تنفتح الارض نصين لو تنخسف السما على الارض لو توكع النجوم على الكاع ما افكر بس تفكير بالي هنه قاصدات
عوووع زوج اختي ورجال كبير
يووه جسمي كزبر والله

- بس مبين راح يخطبوج بس السيد يفكر يزوج

-  يبوووه شي مقرف مستحيل السيد يفكر همين اشوف بنظراته الي كطفلة اخت صغير حتى ذاك اليوم كالي بوية
شت ذني تخبلن أمهاته

-مدري اذا قنعوه
فرضا قنعوه انت شنو راح يكون جوابج والاطفال من صدوك متعلقين بيج

- ارفض طبعا مجرد الكلام أشمئزيت منه
لج اني لهسة يتخيلي فاطمة ارجع اشوفها من جديد ماكو نهاية فراق
لهسة مدا اتخيل الي بالقبر هي
زوجها بعده زوجها مو ارمل

احسه مثل ياسر اشمئز منه وما اشوفه غير رجل أختي

-عابت تشمئزين من اخوية

اتخوصرت الي مبتسمة

- ههههه مو قصدي هو مقرف قصدي هو رجل اختي يعني شي محرم احسبه شي غير مقبول التفكير بيه

-ههههه فهمتج بس يا حلوة اكص ايدي اذا ما امه وخواته مخليات عينهم عليج

غمزت شهد وراحت واني هزيت ايدي
-هاي الي عايزة تهي بي بطرانات حتى لو مو رجل اختي هو شخصياً حاقده عليه ...

•ياسر

تعبتني اصطريت اخذت باكيت جكايري وتليفوني واطلع واعوف الها الغرفة

اجت وراية للهول

- ياسة ترة اعوفلج البيت واهج

- راح اسكت تعال ارجع للغرفة

-بعديش ما صدعتي دماغي

جانت تعابت وتحجي ما راضية لان العزومه جانت ببيتي الثانية ليش مو بهذا ، انه لأن اهناك خواتي شهد وكوثر و خليل قريب عليه سويته اهناك ..
ورجعت هم تعاتب لان ما اخذتها لعرس خليل...انه ما خليتها اتروح لان ماكو عرس بس اهل البنية مسوين كعده بسيطه مولد نسائي راحت اله امي وخوات العريس  وخواتي ، اذا وديتها لازم اخذ مرت ابوي وامي ما تواطنها ومحد عزمهن

هي ظلت تحرك بروحها لأن رقية راحت كل ظنها مقدمها عليها أجتماعياً ..

كمت وياها راجع للغرفة

- اي عيني حصرة علينا الكلمة

خزرتها

-سكتت سكتت بس ترة ظلم

- يا بت الاوادم
امي ما تواطنج الا اكولها ...
خليج انت لمناسبات عمامي وهي لمناسبات خواتي و اهلي لا تعبني
حضنت زهورة ونيمتها وانه اعاين اعليها متغيرة وبدت تكبر ماخذه اعيوني الوساع و من امها البشرة الحنطية
-جعل  بگلب علي رحمة ورأف عليج

- ياسر انه حامل

- جا صدك تحجين

- اي والله

- جا هلا بيه

-ادريك ما فرحت انت ما اتريد بس شسوي شو صار حمل

- على حسابج غير بتج بعدها صغيرة وبعدج ما مكضية اجازة امومتج تحبلين جا انه حاير برقية اطلعين انت
ههههههههه

- يا جا شو تضحك 

- شسويلج
الله يتمم على خير نامي نامي ..

،

سمعت الخبر رقية من كوثر و ظلت تلح على طفل وانه الي مخلي كوثر تذكرها وتبلعها حب صارت تتوسل اكطعه

نايم بفراشي واضحك اعلى روحي رقية وهم عرفت تزعل مطيتني ضهرها

- حبة بركة عايفتني وانه باجر مو يمج
ومنو يكول عايش لعكبة يبت ادم تعالي ليه لا اموت  واظلين بحسرتي

اندارت شاهكة

- ا اسم الله
عليك عليك مديت ايدي الي اجت حطت راسها عليها و هي تمسح بوجهي

- اسم الله اسم الله
ما تموت وتعوفني
-جا ليش تزعلين عليه

- ما زعل زعل بعد بعد

باستني بخدي

-ما رضيت انه اريد غيرها ...

- ما ما الا اتخليني اجيب طفل طفل مثل مثل ياسمين

- وعلاوي خطية  ينقهر من يشوف امه هالحلوة محتارة بغيرة وانه هم انقهر جا طفلين بعد ما اشوفج

- لعد لعد هي هي احسن مني اصير ٢ واني واحد

ضربت وجهي وضحكت من كلبي

-اخ يابة انهجم بيت الغيرة راح تهجم بيتي
رقاوي ابوج شارط عليه ما احملج فوك طاقتج ماكو خلفة هذا شرطة تردين يرجع ياخذج مني

هزت راسها بلا

-جا تعالي احبج مشتاگلج
ولا اشلعين جلاويي

-شنو يعني جلاويي

-الكلية

- كلية نفسها الي تدخلها زينب

ضحكت مذكر فترة الخطوبة ظنيتها بوقتها تحشش عليه

حضنتها متوغل بعطر حبي الها...

▪︎زينب

كنت أقرا  بالفيس منشور حظك  من عدد حروف أسمك ..
طلع الي
مرح تحب النكت و تعيش في حالة حب دائما محظوظ في اقتناص الفرص

-يالله يا الله يا حب هذا يا فرص جذابين

بتول بلغتني امي بالهول اتريدني ..
طلعت تأفأف  لأن ادري بيها يم ابوية كاعده واني هليام اتهرب منه ..

وكفت يم الباب ما دخلت

-جيبي الجاي والجرك
مرت اخوج خدرته ..

رحت للمطبخ صبيت الهم جاي وحطيت الجرك  عصرونية و دخلت حطيته على الميز كدامهم وكعدت اخوط بستكان امي .. ودرت بالصحن الشاي وقربته يم حلكها اشربها ايدها ما تحركها يا دوب تتكلم وهاي بعد شهر من وكعتها الا بدا كلامها مفهموم .

بابا يقضم بالجرك وعينه على الكتاب الي يقرأ بيه ...

- حسن ... حسن

رفع عينه عليها

- زينب السنة التجي تدوام

رجع يقرأ وما رد عليها
شربتها اخر رشفة وكالت  بتصميم اقوى

- انت راح تشتري سيارة خليها تدوام و اتحملها سنتين وصلها وردها
حريمة  يروح تعبها

ما رد عليها واني اغمز لامي تكمل بعد اكثر تلح

- اشبيج زوبة لا تخافين تدوامين هو ابوج بس زعلان عليج  لان جادلتيه وما احترمتي

همست
-اسفة ..

- مو حسن كول اي
فرحها هاي زوبة الي تحبها

ما جاوب ولا كأنه يسمعها ..

ضحكت  بهدوء يا دوب صوتها طلع

-روحي شوفي شغل شغلج
وافق ابوج معليج

رحت طايرة طيور لان سكت والسكوت علامه الرضا ما صدها تعرف ماما اصيده واتحصره حجت وياه بدلال و اصرار وهي مريضة  تتغلا عليه ..

،

خلصت لف دولمه بس ما كمت كبسته ظليت اعدل بالي لفتهن شهد من راحت
استحي اخجلها  واني الا كلش معدلات مثل قماط الطفل .
-اي وبعدين

التفتت عليها لكيتها لازمه خاصرة وحده وكاشفتني

ضحكت

- اي سولة مو بيدي ذني مجعمرات ملاتج

هزت ايدها وكالت
-منو يقرة منو يكتب يابة كلها راح اتروح بالبطن
.رشيتها خليط دبس الرمان وليمون وملح و معجون وحطيتها على النار ..
رحت اسوي طحينة حمص سمعت صياح
زلم..

خفت اليوم بابا عازم زوج المرحومه واولاده ومن اجه اخذه بالاستقبال وسدو الباب عليهم ليش اصواتهم هسة طالعة

طلعت من المطبخ بترقب و شفت شهد همين واكفه تسمع الكلام من خلف بابهم

شاورتها

-شكو

-مدري

صياح السيد على والدي !

-لج ليش يصيح على ابوي

-انت معليك هاي الي فهمتها من بين كلامهم أثنينهم صياح !  

دفعنا مرتضى وفتح الباب دخل عليهم شفنا السيد يلملم بغراضة اجهزته وسويجه

و والدي

- مو حياة هاي اولادك راح يضيعون واني جدهم

شوف نفسك والتفت على روحك ضيعت تعب بتي بأشهور

السيد -هاي اني وهاي طاقتي حياتي لحد يدخل بيها  وسد الموضوع

مرتضى- صلو على النبي كولو يا الله ما يستاهل الموضوع هالعصبية

- لم اولادك ولا تخلي امك وابوك حايرين

- في امان الله

خلة و يريد يطلع  مرتضى ما يخليه
يطلع هيج
وابوية معصب عاف الاستقبال وطلع . 
وما ظل اخذ اطفاله حتى عبود بس ظل يبجي وهو يطلع رجعه الي بيد مرتضى ..

و واضح بداية خصام بين والدي والسيد بسبب الي صار  اعتقد بابا اتكلم بالوتر الحساس وتعمق وصار هالخلاف
واكو مسرة بداخلي غير مقصودة
اتجاه خصام بابا لمحمد !

مرت الايام مصطفى ما كطع عنا دوم يجينا و مرات يجيب قاسم وياه. 
بتول يومين من راحت ابوها رجعت 
يمي ..

اجتنا بيبي واشكد احبها حنينة حيل ..
فرشت بالليل الها يمي . 

شربت دواها واني طفيت الضوة وفتحت ضوة النوم احمر و انطرحت على الارض ابصفها ويمي الاطفال

- زنوبة تحبين بزر اختج..

- اي اكيد احبهم وعبود احسه ابني مثل علاوي

- زنوبة يمكن يردون ياخذوج لمحمد

- شنو هذا الكلام بيبي

كلتها واني ما مصدومه اعرف بنواياه اهلة

- امنين عرفتي بيبي

- ابوج كال ابو السيد ملمح لأبوج
بس منتظرين السيد يوافق يزوج مرة ثانية

- السيد رجال كبير واني صغيرة احب اولاد اختي شي واخذ زوجها منها شي ثاني

-زوج منو اختج الله يرحمها

-بيبي!، احسج جاي تحاولين اتقنعين بيه ؟

- اي جاي اقنع مو احاول
من سمعت المغرب من ابوج الكلام فرحت لأولاد اختج والج الرجال ما يتخير عن ابوج ليش تاخذه الغريبة

- يا بيبي سدي السالفة

- عيب ولج اسكتين جدتج

- بيبي ازوج رجال اربعيني ورجل اختي ؟

-لعد اشبيه الاربعيني ولج عوبة 
الاربعيني يدلل والعشريني يعلل

سكتت كارهه احديث اريدها تسكت ودرت وجهي عنها واني افكر بمواجهة اكيد راح اصير قبل موعد دراستي بس كون السيد يظل صامد وما يفكر بالزواج لان راح اصير اني بوجه المدفع وهذا الشي موخفني حيل ارعبني محمد شي مقدس عند بابا اشلون اواجه برفضي يارب ساعدني ..

مرت الايام ونسيت السالفة لأن السيد الظاهر قوي ما ضعف و وافق بسهولة
احترمت وفائة لزوجته  الصراحة

كنت بغرفتي العب بتليفوني وعبودي يلعب يمي ..

اتصل بيه والدي

- ها بابا

- زينب امج يمج

- لا ليش اتريدها اروح يمها

-لا
اكلج حضري عصائر دزي مقتدى على كارتونه و ماي على السريع دزي

-ليش بابا

-دزي بوية وخدري جاي هم

سد الخط بلا ما يفهمني ليش ادز ..
دزيت مقتدى ورجع خابر

-عدلي الاستقبال بوية جاية زلم النا !

-منو بابا

- شيوخ والسيد حضري بوي

وهم سد الخط

السيد !

هو بهاي الفترة تصالح مع والدي واعتذر منه بس خارج بيتنا
وما اجانه ابد ليش اليوم يجي و يجيب وياه زلم شكو !

رحت كلت لامي كالت

- ما ادري يمة

يتبع ..