تحميل رواية «صدمة العمر» PDF

صدمة العمر

بقلمي ام آيه

القصه حقيقيه ومن لسان صاحبتها

عمتي ام هاني كعدي زينب شكلها دتجيب

ام هاني:ياصاحب الفرج يالله كمت بنيتي كمت

اني الحجيه ام هاني عندي خمس ولد وبنات

3 ولد مزوجين يمي لان بيتنا جبير واني معتزه بيهم لان همه عزوتي من بعد ما ابوهم اتوفى

الجبير هاني عنده كافتريه بالسوك وزوجته سلمى بنت اختي الي دتصيحني وعدهم احمد ومحمد ومحمود

وابني الثاني رضوان موظف بالبلديه مزوج تماضر بنت اخويه وعدهم سعد وقمر ومالك

خالد معلم يداوم باابو غريب باطراف بغداد وطول الوكت مو يمنه

مأجر ويه معلمين بيت صغير وكل خميس يجينا

متزوج زينب غريبه تصير بنت جوارينه

وعدهم توم (سامر وسمر )وره 3 سنين يالله سووا طفل ،وهسه حست راح تجيب وخالد مو موجود.

وعندي بنات 2 ورده وجوري مزوجات ومخلفات

ام هاني:ها بنيتي شنو حاسه

زينب:عمه بعد مابيها مجال تعبانه كلش وذبيت العلامه

ام هاني:يامسهل هسه نروح لام جبار واجيبها (الجده الي تجيب اسمها ام جبار تصير اختي)واني جنايني كلهن يجيبن عدها

سلمى حضري مي حار بين منروح اني وهاني نجيب ام جبار شغله 10دقايق

سلمى:زينب ادعي يكلج الدعاء وكت الطلوكه مستجاب

زينب:ياربي سهلي ولادتي وهونها عليه،واحفظلي ابو جهالي واجعل اولادي وبناتي من الصالحين

ام جبار:ها زنوبه نويتيها اليوم،الله يسهل ان شاءالله

زينب:عمتي وسلمى فوك راسي ويقرون على راسي واني داتكطع وبعد معاناة جبت والحمدلله

سلمى:زينب جبتي بنيه تشبه الكمر

ام هاني:اني كلش اخاف من العيون وأمن بالحسد شفت البنيه جنها الملاك راسا صليت على النبي واخذتها من ايد سلمى اخاف من عيونها

واحنه بطبعنا نحضر مي ونسبح الطفل اول ميجي للدنيا وركض ركض شاهدتها ولفلفتها ماريد احد يشوفها

ام هاني:صلوات على محمد شنو من حسن

العيون زرك والوجه كيمر والحلك مصقوله

ام جبار:الحمدلله على سلامتها وبالمبارك عليكم ماجاكم

ام هاني:دك التلفون الصبح ابني خالد وبشرته بالبنيه و وصفتلهيا وكال يمه سموها(ملاك)

زينب:ملاك طلعت اسم على مسمى ماشاءالله وعمتي متخلي احد يشوفها بس اني وابوها حتى بالبيت قليل تخليني اطلعها تكول تنظر وتنحسد

وحتى بيت اهلي مطبيته الاوره 40 وحلفتني يمين ماخلي وجها مكشوف

وعمتي دائما تحط على وجها صخام مال ورقه محروكه ومبخره وتوصخ وجها حتى متنحسد

صار عندي وره ملاك وبدون ماادري مباشرة هم توم (ساري وساره)وبينهم وبين ملاك سنه

اني طالعه على عمتي اخت ابويه اجيب توم لان سبحان الله وهاي حقيقه

يكولون اذا الوحده عمتها اخت ابوها تجيب توم هي احتمال جبير هم تجيب توم واني طلعت عليها

زينب:كبروا جهالنا وصاروا ماشاءالله هوايه بالبيت

وخالد ثبتوا دوامه باطراف بغداد باابو غريب مرتاح ويه زملائه وانطوا قطعه كاع هناك وشويه شويه كدر يبني بيها واخذنا ويا

ولو عمتي مقبلت وانقهرت بس لازم نخفف الحمل شويه

خالد:الحمدلله كدرت اسويلي بيت واستقل ويه مرتي وجهالي

اني احب بناتي وولدي كلهم بس ملاك قريبه على كلبي حيل

كبروا وسامر دخل معهد نفط

وسمر اجه نصيبها من كملت سادس وتزوجت اخذها ابن عمي لابنه متخرج ومتعين وسكنت بغداد

وهسه عندي ملاك تدرس خامس ادبي وساره وساري رابع اعدادي

ملاك هو اسمي وحاليا عمري31 سنه راح ارجع بيكم لبدايه قصتي

صرت صف خامس ادبي ومعروفه بعائلتنه جميله واحلى وحده بيهم

طويله ورشيقه وبيضه وعيوني زرك وشعري عسلي بشكار

ودائما من وره شكلي اتمرض وابقى نايمه بالفراش

الجمال الزايد مو غرور مني بس حقيقه يكون نقمه

لااصحابه

وعباره (هنياله لياخذها)دائما جنت اسمعها من هوايه ناس

بابا مدللنا وناطينا الحريه ونتصرف براحتنه بس كلشي بحدود

بدت تسوء الاوضاع وصار السقوط وتدهورت الوضعيه وانجمعنا احنا كلنا عمامي وعماتي

ورحنا للدجيل

جدي عده بيت وبستان ورثه من ابو وبي اثاث جان جدي قبل ياخذهم يصيفون بي

رحنا لان أمن من بغداد نظفنا وكعدنه بي كلنا الما خلصت الحرب

لبسوني حجاب وهدوم عراض واني الوحيده من البنات محبوسه بالبيت والباقين عادي يطلعون للبستان بس وياهم الولد طبعا

ملاك:احمد ابن عمو هاني يبقى عينه عليه بس اني كلهم معتبرتهم اخوتي ومحاطه احد بالي

اجتي عمتي جوري من بغداد وشافني ابنها سعد كلش حباب

نكعد ونسولف سووا بس ماعندي مشاعر تجاها

بديت احس دتصير مشاحنات بين احمد وسعد بسببي

ومره من المرات طلعنه على صياح بيبي

ولكينه احمد وسعد متضاربين من ورايه

واني حيل استحيت وانقهرت وكرهت حتى شكلي

اثنينهم يريدون يزوجوني

وبابا نحط بموقف محرج وكلهم ثنينكم ماانطيكم لان انتوا الاثنين غالين ومافضل واحد على الثاني

مرت الايام وصارت شويه حزازيات بين اهلي وبين بيت عمي هاني وبين بيت عمتي جوري

وكله من ورايه كلش جنت اختنك واضايق

فد مره طلعت العصريه كعدت بالحديقه وحدي وهمه بيوتهم بنص البستان

والبنات والولد جانوا رايحين يم الشط كلش قريب علينه

بس اني ممنوع اطلع وهذه اوامر بيبي تكول(انتي جمالج مطمع بنيتي)يعني تخاف عليه من اقرب الناس

واني كاعده حسيت احد يباوع عليه وخفت وطبيت جوه اركض

🌸🌸🌸🌸🌸

يسعد مساءكم ياحلوات

شوفني كم متابعه ويايه وعجبتها المفاجئه ☺

وكلما التفاعل يزيد ارضيكم اكثر😘😘😘

ام آيه

صدمة عمري

بقلمي (ام آيه)

ملاك:كاعده بالحديقه ولمحت احد يباوع عليه من البيت الي بصفنه بس منتبهت منو وطبيت اركض جوه من الخوف

اني ام أكرم من سكنه بغداد من صارت الظروف موزينه اجيت كعدت بيت اختي بالدجيل

عدها بيت صغير بالقريه متروك وهمه عايشين بالمدينه

جبت ولدي الاثنين أكرم وليث وبنتي موج وكعدنه بي بين ماتهدء الوضعيه ونرجع لبغداد لان اخاف عليهم

وماعندي غيرهم وابوهم مستشهد سنه 85 بحرب ايران

وعندي 2 بنات مزوجات وكل وحده هاجه ويا عيالها.

ام أكرم:جنت طالعه بالبستان وشفت بنيه كاعده بحديقه البيت الي يجاورنا

جميله بشكل وعجبتني وتمنيتها لاابني أكرم رحت وحجيتله عليها

ام أكرم:يمه أكرم تعال بسرعه شون شفت بنيه ماكو بحسنها  شنو طول وشنو شعر وشنو عيون كمر والله كمر

ام أكرم:تعال شوفها كاعده بالحديقه الي بصفنه

أكرم:جتني امي وصاحتني دأشوف البنيه ومن شفتها

ماشاءالله سبحان الي خلقها

البنيه حست علينا دنباوع عليها طبت تركض

ام أكرم:ها يمه أكرم عجبتك

أكرم:شنو عجبتني يمه هاي مو بشر

من يكول اهلها ينطوها ومن يكول تقبل بيه

ام أكرم:اذا عاجبتك معليك بكلشي ،وداعتك بس كول اريدها ،الا اخليها تصير مرتك

أكرم:يايمه لتأمليني وبعدين من تشوفني ترفضني

ام أكرم :خليها على امك ومعليك

ام هاني:ويه المغرب وندكت الباب وطبتلنه مريه،جنا كاعدين اني وجنايني وبناتي 

البنات كامن طلعن مبقن كاعدات ويانه

عرفتنه على نفسها وطلعوا ساكنين بالبيت الي بصفنا

بيت اختها جانو جوارينا قبل واسمهم بيت ام هاشم ام أكرم:وره التعارف والسوالف دخلت بالموضوع

وكتلهم شفت بنيه حلوه عدكم شكره وعيونها زرك وظفيرتها شكره وابني شافها وانعجب بيها

وهسه جايه اخطبها اله

ام هاني: بقيت متفاجئه هاي دتنطي تواصيف ملاك بنت خالد

ام أكرم:ابني اشكراني حلو وحباب وخوش ولد وموظف بدائره الكهرباء وبيتنه ملك واسألوا علينا بيت اختي ام هاشم

وهذا عنوانه بغداد هم سألوا علينه

ام هاني:البي خير يقدمه رب العالمين ان شاءالله

مع السلامه

مع السلامه زارتنه البركه

ام هاني:ها زينب شنو رأيج بخطابة بنتج مبينين خوش ناس

زينب:والله ياعمه ماعرف شنو اكلج ،الرآي رآي ابوها

ام هاني:دكومي صيحيلي ابوها لعد خل احجي ويا

بس لتحجيله انتي

زينب:اي عمه،رحت على خالد جان متمدد بالغرفه

خالد كوم عمتي رايدتك بشغله بسرعه

ابوسامر:ها يمه كالتلي زينب تريدني

ام هاني:استريح وليدي،

شوف خالد بنتك ملاك حلوه وانت منحرج ويه اخوتك وخواتك من وراها

متكدر تنطيها لواحد منهم وتزعل الثاني..

وهسه جتي مريه تصير اخت ام هاشم جوارينه قبل وخطبتها لاابنها وتكول عليه حلو وحباب وموظف بالكهرباء وبيتهم ملك

ولو ياابني يعز عليه تطلع بنيتك للغريب بس اوظاع البلد صارت تخوف والعنده بنيه يزوجها ويستر عليها ويرتاح من همها بهيج ظروف

ابو سامر:الله يسهل يمه

ابو سامر: شاورت اخوتي بالموضوع وشرحتلهم موقفي وماكدر ازعل احد بيهم

ولو جنت اتمناها لاابن اخويه بس هم مااكدر ازعل اختي

اخوتي تفهموا الموضوع وسألنه على الولد عند بيت ام هاشم ومدحوا بي

ودزينه جماعه سألوا عليهم بغداد هم مدحوا بااخلاقه

ابو سامر:يمه رجعي جواب للمره بالموافقه

ملاك كاعده اني وبيبي وامي بالهول وسألتني امي

زينب:ملاك انتي شنو رأيج ماما بالموضوع

ملاك:همزين فكرتوا تسألوني بعد وكت

بيبي اني مااقبل بي اذا مااشوفه

ام هاني:ولج مو عيب لتفضحينه ابوج والولد شايفي ويكولون حليو وحباب

زينب:عمه مابيها شي ،نكول ﻻمه يوكف بالبستان وملاك تشوفه من جوه من وره الجام

ام هاني:دزيلي واحد من الجهال عليهم يصيحولياها

ام اكرم:اندك الباب وطلعت افتح

خاله بيبي تريدج

اي حبيبي كولها دقايق واني يمها

أكرم:ها يوم دزوا عليج دينطوج الرفض

لا يمه ان شاءالله خير،خل البس عباتي واروح عليهم

ام هاني:تفضلي ام أكرم زارتنه البركه

زاد فضلج حجيه

ام هاني:عيني ام أكرم احنه سألنه عليكم وعلى الولد والحمدلله الناس مدحت بي وبأخلاقه ،بس بقت البنيه تريد تشوفه وهذا حقها

ام أكرم:اي حجيه هذا حقها هسه اروح اصيحه

ام هاني:لا ام اكرم مترهم هيج

خلي المحروس يوكف بالحديقه وبنتنه ملاك تشوفه من وره الجام لان ابوها وعماها ميقبلون تشرف على غريب

ام اكرم:ادللي حجيه غاليه والطلب رخيص

ام اكرم :رحت اركض للبيت وطلع ابني وكف بالحديقه واحنا مابيناتنه سياجات

ملاك:شفت الولد كلش حلو طويل بجسم وشكله حيل ينحب سبحان الله راسا دخل كلبي..

ام اكرم:صارت الخطبه واشتريتلها نيشان بسيط وحلقه وتراجي وكلاده وسط لان الظروف مو زينه بس كتبنالها خوش مؤخر

ام اكرم:واهلها دوروا بس الستر ..اهلها رادوا حفله نيشان بس مسوينا لان محد من كرايبنه موجود

ملاك :صارت الخطوبه وجابولي الذهب والنيشان ،ولامره اجه علينا اكرم،لان مو راهمه بعدنه معاقدين

بس جنت يوميه ابقى اتفرج عليه من الشباك شلون حلو ومرتب وحبيته ولاول مره احس بهالشعور

ام هاني:وره فتره هدءت الظروف وقررنا نرجع ،وملاك عيالها هم راح يرجعون

ام أكرم:احنه راجعين باجر ان شاءالله راح نروح نرتب وضعنا لان ابني مستعجل ويكول تبقى يمي حتى مااظل اخاف عليها واوهس بهيج ظروف

ملاك:اسمع كلامها وفرحانه من تكول يريدني يمه

ملاك:رجعوا عيالي واحنا وراهم بيومين والتهينه تنظيف ونلملم الجام المتكسر .

وره اسبوعين اجتي عمتي واكرم الصبح

واخذوني اني وامي سوينه تحاليل علمود ثاني يوم الثلاثاء نعقد بالمحكمه والخميس ياخذوني

ملاك: اجه يوم العرس وسوينا بيت بيبي بغداد وبيناتنه بس الكرابه

شكد مفرحانه راح اعيش ويه اكرم وشكد مامقهوره شلون راح افارك امي وابويه

زينب:يمه بنيتي اسم الله على هالحسن والجمال محروسه بحفظ الله ويارب يسعدج ومتشوفين يوم حزن بحياتج

ملاك:امي تحجي واني ابجي وسكتوني حتى ليتخربط المكياج..

اجتي الزفه وشفته بس من طب شنو شايل حسن يخبل

وجانوا سيارتين بس اهله لان الاوضاع بعدها

اخذني وطلع واني ولارفعت عيني طول الطريق هلكد مامرتبكه وهو ولاكلمه حجه ويايه

وصلنا للبيت وبس خواته وازواجهم موجودين همه وحدهم عشيره ..

صعدوني للغرفه وهو بقه جوه ديسلم ويصعد

ملاك:طبيت للغرفه وشفتها كلش حلوه ومرتبه وراسمين بالجكوليت والورد على الفرشه وحاطيلي سيت ابيض على الجربايه

متت خجل شلون راح البسه..

اني كاعده على الجربايه وسمعتهم صعدوا بالهلاهل والهواسات للغرفه وحيلي نهد من الخوف

طب للغرفه وسد الباب واجه عليه وكف كبالي واني مدنكه ميته مستحه

وللحكايه بقيه

صدمة العمر

بقلمي (ام آيه)

ملاك:اتقرب مني اكرم واني راح يغمى عليه من الخجل ومد ايده ورفع راسي

وجانت الصدمه !!!!

شفت شخص غريب مشايفته قبل

اكبر مني 20 سنه تقريبا وشكله اسمر ومربوع

ملاك:انت منو وشعندك طاب للغرفه مالتي

اكرم:اني زوجج

ملاك:شنو زوجي فقدت اعصابي وكمت اصيح

وين زوجي اريد زوجي اكرم

اكرم:اني والله اكرم زوجج

ملاك:لتخبلني زوجي اكرم اشكر وطويل وحلو

اكرم:اي هذا اخويه ليث

ملاك:مستحيل شنو ليث شنو اكرم لتخبلني

مستحيل اخوك اكيد اني داحلم وهسه هذا كابوس

ملاك:كمت الطم واضرب على وجهي واصيح

اذا انت اخو شتسوي لعد بغرفتي،جيبولي رجلي ياربي شنو الي ديصير وين رجلي

اكرم:البنيه نهارت وفقدت وبس تصيح وتبجي

لزمتها من ايدها وكعدتها وكتلها اني افهمج الموضوع

اكرم: اني زوجج والله العظيم

وذاك اخويه ليث يصير حماج

ملاك:شلون يعني مو اني ويا كطعنه مهر بالمحكمه

راح اتخبل فهمني

اكرم:بس هدئي واني افهمج لتضلين تبجين

امي شافتج وعجبتيها وكالتلي عليج واني شفتج وحيل عجبتيني

اكرم: يمه هي وين واني وين اكيد متقبل بيه؟

ليش يمه شناقصك الف وحده تتمناك

اكرم:يمه لتخليني اتأمل واحلم وبعدين ترفضني

وكالتلي اذا عجبتك معليك خليها علي واني كتلها يمه لتخليني احلم اكيد متقبل بيه

وداعتك اني امك والا اخليها تصير الك.

جابت اخويه ليث الي شفتي طول بجمال وياهو الي يشوفنا ميصدك احنا اخوان

واخويه ليث رفض يشارك بهاي المسرحيه بس امي هددته وكالتله والله اتبره منك واطردك

كالته اخوك خطيه نفسه بالبنيه وسويها لخاطر اخوك

وليث جان يجي عليج على عمه عينه

وشفتي صار كلشي بسرعه وحتى حفله نيشان مسوينه حتى لينكشف الموضوع

ملاك:اسمعه مصدومه وابجي

زين شلون عقد عليه لعد بالمحكمه

اكرم:جان عدنه عرف بالمحكمه رتبنه الموضوع وسويت وكاله لااخويه علمود يكطعلج مهر بالوكاله عني

ملاك:هو يحجي واني الطم على وجهي

ملاك:مستحيل اني اقبل بهيج زواج بالغش والكذب

انتو خدعتوني

اكرم:بس اني حبيتج والله العظيم

ملاك:شنويعني حبيتني زواج كله كذب وخداع

وكمت بالبدله جان اكو تلفون بغرفتي وخابرت على بيت بيبي وطلعتلي ساره اختي...صيحيلي امي وابجي

ماما جيبي بابا وتعالي هسه اخذوني وسديته

زينب:اسم الله الرحمن شبيها بنيتي

خالد الحكلي هاي ملاك تبجي وتصيح تكول تعال اخذوني

سامر وساري:بابا احنه نجي وياكم

خالد:كعدوا وسكتوا بلا فضايح خل نروح نفتهم السالفه

ملاك:وصلوا اهلي وصعدتهم الحيه عمتي علينه

ابو سامر:شصاير خير

اكرم:ساكت وخجلان

ملاك:بابا ذوله غشوني وهذا طلع رجلي والاشكر طلع اخو همه جذابين ومخادعين

ابجي وبحركه بابا اريد اتطلك منه وهسه رجعوني وياكم للبيت

زينب:بس دموعي تبجي على بجي بنتي وساكته من الصدمه

ابو سامر:صدك صدمه وشلون كدروا يغشونا ويحركون كلب حبيبه كلبي،بس مابيدي شي اسوي احنا عايشين بزمن اسود والناس مترحم

ملاك:يله بابا اخذني وياك

اكرم:عمي اني طلاك ماطلك واحب مرتي واريدها

ابو سامر:بنيتي ارضي بنصيبج وقسمتج،شيخلصج من الناس اذا اخذتج هسه

راح يطعنون بشرفج وتتدمر حياتج يابنتي

فكري بنفسج وفكري بااخوانج محد ينطيهم مره وفكري بااختج محد يخطبها

اووف لازم ترضين بنصيبج يابنتي

ملاك:بابا واني مفكرتوا بيه شفت شخص و انعجبت بي واتخيلت حياتي ويا و تالي يطلع حماي و عايش ويايه بنفس البيت

ابو سامر:بابا ارضي بلي قسمة الج ربج

وحجاية و كلتها الج طلاك ماكو و طلعة من هذا البيت ماكو

موتالي عمري الناس تاكل وجهي ويكولون معرف يربي بنته

زينب:ماما حبيبتي ربج قسملج هيج شي ارضي بي و ربي يعوض صبرج خير والولد حابج و رايدج (اخذي الي يحبج ولا تاخذين الي انتي تحبي)

الي يحبج يابنتي يسعدج و الي اتحبي انتي يتعبج ملاك:اني من اليوم احس روحي متت

ملاك:راحوا اهلي ولازم اواجه مصيري بنفسي لان اقرب الناس الي اتخلوا عني

اكرم:كلش احتقرت نفسي لان وافقت امي وشاركت بهالمسرحيه بس شسوي لكلبي رادها

ملاك:اجه عليه اكرم يحجي ويايه وكتله شتريد تسوي سوي اني من اليوم متت

اكرم:متحملت كلامها وبنفس الوكت عذرتها

لا اني اعوفج تتقبليني كزوج براحتج مو اني والزمن عليج

راح اطلع وكومي طلعي هدوم وهذا الحمام بصف الغرفه فوتي اسبحي وارتاحي بين مااجيبلج العشه

ملاك:ماريد زقنبوت لان اريد اموت واخلص من هالضيم

اكرم:كله الي كالته حقها،اخذت هدوم الي ورحت للحمام دبدل وانزل اجيبلها العشه

ملاك:صافنه على حالي بجي وقهر وحركه كلب

واقرب الناس الي اتخلوا عني بااصعب الظروف

طلعت هدوم من الكنتور ورحت طبيت للحمام

وبقيت جو المي ابجي بحركه وقهر

صليت ودعيت الله يبرد النار المشتعله بنص كلبي ويعيني على حياتي المجهوله

وشلون راح اعيش ويه شخص مااحبه ويعرف كلبي يم اخو

اووف ياربي والله بعدني صغيره على هالضيم والقهر

اكرم:نزلت لكيت خواتي رايحات كلهم وليث طالع

وجانت بس امي وموج

اكرم:والله يايمه الي سوينا بالبنيه اكبر حرام وراح نكسب خطاها

ام اكرم:يمه هي كم يوم وتتقبل الوضعيه وتتقبلك بس يرادلها شويه صبر

قبل منو جان يشوف العروس لو العريس

كلمن يتفاجئ بيوم عرسه بنصيبه

صدمة العمر

بقلمي (ام آيه)

ابو سامر:رجعنا اني وزينب لبيت امي وشايلين بكلوبنا هم وحسره تهد جبال،

وجانوا كلهم ينتظرونه امي واخواني و ولدي و ولد اخوتي يريدون يعرفون شنو القصه

ام هاني:ها خالد احجي شكو شبيها البنيه خابرتكم تبجي

زينب:اني متحملت كمت راسا ابجي ، سامر كام يصيح شبيج ماما احجي شبيها ملاك

ابو سامر:اخوتي الكبار و ولدي كاموا يصيحون يريدون يعرفون السالفه

سولفتلهم القصه كلها  واتفاجئوا

هاني/ابو احمد:هيج منهم ومن اصلهم شنو البنيه تايهه وماعدها ظهر هسه نروح نجيبها وننعل صفحه اهلهم والجابوهم

رضوان/ابو سعد: نعله علا صفحه اهلهم النصابين ولد الحرام هسه نروح نطلكها من هذا العار ونرجعها شنو تايهه وماعدها حزام ظهر

ام هاني:اي ولدي(عمامها ولد عمامها واخوانها) روحوا كلكم هدوا عليهم وجيبوها وعلموهم بنات الناس مو لعبه وهي مو مكطوعه

انتوا اهلها وعزوتها وسندها،والبنيه مو بايره وازوجها لااحمد ،

وهي من البدايه لازم ياخذها احمد بس خالد مراد يزعل اخته وانطاها للغريب

ابو سامر:اسمعهم كلهم يهوسون ويهددون وامي انطتهم الضوه الاخضر،صحت بيهم سكتوا

ابو سامر:كافي عاد مو هيج الحجي هي مو مال هد وهوسات،البنيه بعصمه رجال ومن ناخذها بالغصب من عنده،يعني البنيه تنفضح

والناس بعدين يصدكون وياكلون وجهي ويكولون معرف يربي

وبسبب كذبه راح تأثر على اخوانها محد ينطيهم مره واختها محد يخطبها

اني حليت الموضوع وكتلها ارضي بنصيبج بابا والولد مبين عليها يحبها ورايدها

هاني ورضوان:مو حلو بحقنا هذا التصرف خالد انت محطيت النه قيمه

خالد :اخوتي زعلوا وبعد ميتفاهمون ،كمت اخذت ولدي ومرتي ورجعت لبيتي حتى لتكبر السالفه اكثر

اكرم :كاعد جوه ادخن والف حسره تحرك بكلبي

اكرم:يوم ليش اني هلكد مبين بيه الكبر وشكلي مو حلو

ام اكرم:والله يا وليدي مو ناقصك شي بس هي متفاجئه والله يهديها عليك وتحبك مثل متحبها انت

موج:والله اني حذرتكم من البدايه وكتلكم حرام راح يصير بالبنيه شي من راح تعرف بس انتوا ركبتوا راسكم

اكرم:دكومي موج صعديلها الاكل خل تاكل خطيه هسه جاعت اكيد

موج:دكيت الباب وفتت وشكلها حيل يقهر عيونها مورمه،ملاك هاج اكلي شويه

ملاك:حاقده عليهم كلهم ومودي اشرب من دمهم.......ماريد شيلي مو جوعانه

موج:حقج تنقهرين بس والله اكرم يحبج وامي الي سوته صحيح انانيه

بس هذا كلب الام على ضناها شافت اكرم حبج وهيه سوت المستحيل حتى تصيرين اله وتسعده

ملاك:اي مو اني سياره عجبته لو غرض وراد يشتري. مو بشر اني محد فكر بيه وبمشاعري طول خطوبتي افكر  بشخص واحلم بي وتالي يطلع حمايه

مخفتوا من الله ياظلام

ملاك:يوم العرس هو احلى يوم لكل بنيه وتحلم بي وانتوا بعملتكم هاي كلبتولي يوم اسود واسوء يوم بحياتي

راح ابقى مسلمتكم بيد الله ودعوه المظلوم مستجابه

حسبي الله ونعم الوكيل عليكم

موج:حطيت الاكل ونزلت جوه لان كلامها يغث بس هي حقها

اني ليث حاليا عمري 38 موظف بالرقابه الماليه

بدت قصتي من جان عمري 24سنه وجنت فاتح اسواق على الشارع عايش منها واموري عدله ومرتب وضعي بين ميطلع تعيني

شكلي حلو وطويل،حبيت وحده ويايه بالكليه بس للاسف خانتني ويه اقرب صديق الي وانصدمت بيهم اثنينهم ومن ذاك اليوم مدك الحب بابي وانعدمت ثقتي بالبنات

امي طلبت مني اشارك بمسرحيه زواج أكرم اخويه

واني رفضت بالبدايه

وصارت مشاكل هوايه بس هددتني تتبره مني ويطردوني

ومن كلتلي اخوك يريدها انجبرت وقبلت لان هو اخويه الوحيد والجبير مالنه وكسر ظهره علينه حتى نكبر ونصير

فاني عمره كله يشتغل عماله بالعطله علمودنه

وبالمدارس يداوم الصبح بالمدرسه والعصر يشتغل بالكهوه حتى يعيشنه

ليث:اني شاركت بهالمسرحيه بس الله شاهد على عمه عيوني وبالغصب

المشكله اني من شفت البنيه راسا دخلت كلبي وتعلقت بيها سبحان الله بيها سحر جذبني

مشيت وياهم الى ان اجه يوم العرس ورحنا لبيت العروس و وصلت الزفه لبيتنا

وهنا وخلص دوري راسا بدلت وطلعت

طفرت روحي شلون راح تصير بحضن اخويه

اتعوذت من الشيطان من هالافكار بقيت كاعد بالاسواق مالتي ولليل ورجعت

رجعت لكيت البيت سنطه عبالك عزه اكو بالبيت مو فرح وشفت اكرم متمدد بالهول

رحت على موج لغرفتها..ها موج شكو شو البيت هدوء واكرم نايم جوه وعايف مرته

موج:اسكت مو ملاك من شافت اكرم فايت عليها للغرفه تخبلت وكامت تدك وتلطم على وجها

وتصيح عليه انت مو رجلي جيبولي رجلي ذاك الحلو

وخابرت على اهلها وجوي  تريدهم ياخذوها،

بس ابوها خاف من الفضيحه وكلها كعدي بيتج وارضي بنصيبج

وهيه خطيه من عرفت لسه حابسه روحها بالغرفه بس تبجي

ليث:خطيه الله يعينها،صعدتولها اكل

موج:شلون لعد،اني وديتلها الاكل وسمعتني حجي وعفته يمها ونزلت

موج:تدري البنيه حبتك خطيه وحتى كالتله لااكرم

كالتله طول خطبتي افكر بي واحلم بحياتي ويا وتالي يطلع اخوك

ليث:انصدمت من كالتلي تحبني،واكرم شكال

موج:مقهور وعايفها براحتها

ليث:الي افتهمته من موج يعني مصاير زواج حقيقي بيناتهم..انقهرت كلش على اخويه ورحتله وعلى عمه عيوني حجيت ويا هالحجي

ليث:اكرم كوم اصعد نام بغرفتك وهي بمرور الوكت تبدي تتقبلك،انت خوش ولد وحنين وهسه بتصرفاتك تكسبها

ليث:اني بداخلي ممرود و واثق راح يجي يوم ويصير زواجهم حقيقي لان اخويه كلبه طيب حيل واكيد راح تحب حنيته

بس هو هذا الي لازم يصير

ليث:من اليوم راح ادوس على كلبي واباوعلها بنظره الاخت،وحرام عليه اخون اخويه

واني ضايق طعم الخيانه من اعز اصدقائي شكد صعب

اكرم:من حجى ليث ويايه برد كلبي شويه من ناحيه اخويه،ومعناها هو محاطها باله

كمت صعدتلها

صدمة العمر

بقلمي(ام آيه)

ملاك:صار الوكت متاخر واكرم مبين لحد هسه، اكيد مراح يصعد ينام بالغرفه

قفلت الباب عليه ونمت،عزلت الغرفه وبدله عرسي الشئم شمرتها بالكنتور وشلت الورد والجكليت الموجود على الجربايه ولميت الفرشه البيضه وخفيت هالمهزله

نمت على الجربايه ودموعي حركت خدودي حتى دمعي نشف وغافيه ومحسيت غير على دكه الباب

كمزت اركض حتى ردت اوكع من الجربايه وصحت ...منو منو

ملاك:لازم ارضى بنصيبي لان اهلي عافوني وحتى لو طلكت وين اولي وين واروح..

اكرم:اني اكرم  افتحي،اكدر افوت للغرفه

ملاك:فتحتله الباب وفات ومباوعت بوجهه ابد

اكرم:جان شكلها حيل يقهر وبعدها صغيره وانظلمت. خدودها صايره حمره دم ومشككه تشكك من اللطم و البجي

والاكل على حطته مو ماكله شي منه ، انقهرت عليها كلش..

اكرم:ملاك لتقفلين الباب نازل جوه هسه اجي

ملاك:لعبانه نفسي منه مودي اخنكه

نزلت جبتلها مرهم من الثلاجه ومي بارد وسويتلها طاوه طماطه وبيض بس هذا الي اعرف اسوي وصعدتلهيا

اكرم:تعالي احطلج هذا الدهن لخدودج فد مره رايح

وجهج  من البجي..

وتعالي اكليلج كم لكمه،ماعرف اسوي بس بيض وطماطه ترى

ملاك:حسيت بي حنيه بس لو يموت ماخلي يطخني

ملاك:ماريد اكل عوفني اني انجاز بروحي

اكرم:تعالي كعدي هنا كلتها بنتر

ملاك:جرني من ايدي وحطلي دهن غصب عني وجبرني اكل

اكرم:مو عبالج داسوي هيج علمود اريد شي منج ،

لاانتي متوهمه،

اطمئني كتلج مااجيج كزوج الا من انتي تتقبلين

بس هسه انتي ملزومه مني ولازم اهتم بيج

ملاك:اكلت شويه وهو فرش فراش بالكاع نام واني نمت على الجربايه..

ملاك:ذبيت روحي من التعب لان هدني البجي هد

اكرم:اباوع عليها شلون نايمه واني اتكرضم عليهة تكرظم

ملاك:كعدت الصبح على صوت هلاهل يمكن امه ..واكرم مجان بالغرفه كاعد مرتب فراشه وحاطه بالكنتور.

ليث:كعدت على صوت امي كامت تهلهل وسمعتها تبارك لاكرم وتكوله بالمبارك يمه منك المال ومنها العيال ،عرفت تم زواجهم

ليث:شو حسيت بروحي اختنكت وانقبضت روحي

كمت بدلت وطلعت تريكت بالسوك ورحت للاسواق مالتي

اكرم: صعدت للغرف وشفت ملاك كاعده......ها صباح الخير ملاك شوكت كعدتي

ملاك :صباح النور ،مااباوع بوجهه،توني

كعدني صوت الهلاهل..

خير فرحني وياكم شكو

اكرم:البسي شي مرتب ونزلي جوه حتى تصبحين على امي ونتريك وياهم

واتمنى تتصرفين طبيعي ومتحسسين اهلي بشي الله يخليج..

لان فهمت امي تم الموضوع بيناتنه

ملاك:ها من هيج كامت تهلهل ،عادي الجذب والغش عدكم بهالعائله

اكرم:بلا تجريح رجاءا

ملاك:شو انت ماخذ الموضوع عادي ولاعبالك انت وامك واخوك وكلكم لعبتوا عليه وغشيتوني

اكرم:غلطه وصارت ودادفع ثمنها اني

ملاك:واني هم دادفع ثمنها اكثر منك ومن امك

ملاك :اخذت كلابيتي ورحت بدلت بالحمام ورجعت للغرفه واكرم كاعد على الجربايه ينتظرني حتى ننزل سويه..

وكفت كبال المرايه مشطت ورفعت شعري ذيل ومحاطه كلشي بوجهي

اجه اكرم من ورايه وخر القراصه وكلي بقي مفتوح احلى وشال العطر ورشلي على ركبتي

ملاك:اكرم لتعيدها بعد رجاءا

اكرم:اوف راح تشلعين كلبي،اخذتها ونزلت

ملاك:نزلت والغضب مالي كلبي تلكتنه عمتي الحيه بالهلاهل  وحضنتني بس اني وخرت منها وحست بيه دارفضها

وموج هم باركتلنه وحضنتني وكالتلي والله انتي محضوضه بااكرم والايام راح تثبتلج..

ملاك:تريكت وياهم ولعبانه نفسي منهم كلهم..

عيوني تراقب ليث..

صار الظهر وهو ماكو ....صعدت دبدل كلابيتي ضايقتني لان  بيها شغل وثكيله ،رحت دالبس وحده خفيفه واتمدد شويه

ملاك:وره نص ساعه نزلت

وبنزلتي صار ليث بوجهي وصارت عيني بعيونه

هو حسيته ارتبك سلم عليه

ليث:مبروك ملاك شايفين الخير وعفتها وطبيت للغرفه،استغفر الله ياربي ميصير افكر بيها لان صارت مرت اخويه

ملاك:والله داموت الف موته من شفته حيلي كله يرجف شلون راح تكضي ياربي

(بنات يجوز انتو تلوموني وتكولون حرام وهو هسه صار حماج،بس شي خارج عن ارادتي لان من حبيته ،حبيته كزوج مجنت اعرف هذا حمايه،يعني بصعوبه راح انسى واتجاوز حبي اله)

ملاك:صبوا الغده وفرشوا بالكاع واكرم اشرلي اكعد بصفه كعدت وليث كعد كبالي

واني بالكوه اكلت مستحيه ومنزعجه وحسيت ليث مرتبك ...

ملاك:اكرم كدام اهله كلش مداريني ومهتم بيه يحط كدامي بالاكل وشال قطعه لحمه ولفها بخبزه وانطانياها..

ليث:شفت اكرم شلون مداريها اشتعلت بيه النار ،عفت الاكل وكمت بسرعه

ام اكرم:ها وين يمه ليوثي

ليث:شبعت الحمدلله

ملاك:صعدت الظهر وبقيت بس ابجي شلون راح اتحمل اشوفه كبالي وكلما اشوفه تهيج مواجعي

دورت بغراضي الي جبتها من اهلي على كاسيتاتي وطلعت اغنيه سميره سعيد (تقدر تقولي) اسمعها وابجي جتي على الجرح

والله مو سهله عليه هالالم والعذاب

صدمة العمر

بقلمي ام آيه

ملاك:مر النهار عليه صعب وكوه مشه ومشفت بي ليث بس من اج الظهريه على الغده،

لان يبقى طول الوكت بشغله بره البيت

صعدت للغرفه بدلت ولبست تراكسوت ونمت

وبعدين صعد ورايه اكرم طلع فراش وفرش ونام بالكاع ومر الاسبوع واحنا نفس الروتين

اكرم:اباوع عليها واتحسر ، عايفها على هواها بس هم للصبر حدود

ملاك:اكرم مداريني بالاكل وميجي يمي ابد ولايجبرني على شي عايفني براحتي(تفهمون شنو اقصد)

صارت يوم السبعه

وسوتلي عمتي سبعه وعزموا اهلي بيها وجتي ماما وخالاتي ونسوان عمامي وبيبي

واتلكتهم عمتي ام اكرم..هله بيكم كل الهله بالحجيه وحبايب الحجيه نورتونا وشرفتونا

ام هاني:ماعليكم سلام من وره عملتكم السوده الي سويتوها بنتنه

ام اكرم:حجيه صار سوء فهم وحقكم علينه وهسه العروس والعريس اتزوجوا ومرتاحين

ام هاني:الله كريم كلشي يبين بعدين ونشوف

ام اكرم:اني حسبت حساب هيج يوم

اتعمدت اخذلها ذهب قليل بالخطوبه حتى اضم الهبره الجبيره للسبعه لمن يعرفون بالسالفه واسد حلوك اهلها

ام اكرم:تعال كرومي سلم على نسابتك

اكرم:فتت سلمت على اهل ملاك وبست ايد بيبيتها

وشفت ملاك طالعه مثل الكمر لابسه بدله حمره كلش حلوه

حبيبات ملاك:شوفوا خطيه شكبره بكد ابوها ياويلهم من الله على هالعمله الي عملوها بهالطفله

هيه وين جنها الكمر وهو وين حتى مبين اكبر من خالد ابوها

ام ملاك:اسمعهم واتكرضم على حال بنتي الي الف واحد تمنا تراب رجلها،وتالي قسمتها وكعت بواحد بكد ابوها..

ملاك:اجه اكرم بوس ايد بيبي واجه عليه باسني من راسي ولبسني تخم ذهب هديه عرسي

واهلي تفاجئوا بالهديه وهو طول ماموجودين يداريني

وحسيت اهلي فرحوا وارتاحوا شويه.....للمغرب وطلعوا كلهم وراحوا

واني صعدت حتى ابدل ملابسي وارتاح.... فتت شفت اكرم متمدد على الجربايه

رحت على المرايه فتحت التسريحه ودانزع بالتخم بس مداكدر افتح القفل

اكرم:كمت عليها داساعدها وافتح العقد طخت ايدي بركبتها وانتهيت كوه لازم روحي

ملاك:ارتبكت من طخني ووخرت راسا كتله رجاءا اكرم عوفني وحدي اريد ابدل

اكرم:حيل اتمنى قربها واني رجال وصعب عليه اتحمل هالعذاب،

بس لازم اطاوعها وامشي على مرامها.....

وابقى ادفع الثمن الما تكوم تحبيني من نفسها.

مر على زواجنا شهر وشويه واكرم بعده صابر عليه. واكرم وره السبعه رجع للدوام

ملاك :فد يوم كعدت من النوم ولبست برموده فانيله لونها بمبي ....

البس الصبح بشغلي ملابس خفيفه حتى اخذ راحتي بيها و لان اعرف اكرم وليث بشغلهم وميرجعون للظهر

نزلت اتريك وياهم واساعدهم ،علاقتي ويه عمتي سطحيه على كد السلام والشغل.

بس موج حبابه كلش وهوايه تساعدني بالبيت وتخفف عليه عمرها 22 سنه مكمله ثالث متوسط وكاعده بالبيت متحب الدراسه.

ام اكرم:ملاك عجني وخبزيلنا اليوم خبز حار على الغده

ملاك:عمه ماعرف اخبز وبحياتي كلها م واكفه على التنور

ام اكرم:اي هسه اوكفي، الوحده من تزوج كلشي تتعلم خو متريدين تبقين متتعلمين

موج:ملاك ولايهمج حبيبتي عجني واني اساعدج بالخبز ميخالف

ملاك:نظفت البيت كله واخر شي عجبني انظف غرفه ليث واول مره افوت بيها ..

فتت وشفتها شلون حلوه ،ماعرف ليش حسيت عندي شي بيها يخصني  نظفتها وبقت بس الاخشاب

رحت للمطبخ دجيب قطعه قماش نظيفه وملمع اخشاب وارجع

ليث:دارتب بالرفوف مال الاسواق و وكع عليه بطل عصير زجاجي ودمر ملابسي،

عفت الولد الي يشتغل عندي ورجعت للبيت ابدل ملابسي

طبيت للبيت جانت امي واكفه بالباب ويه جوارينه وفتت للغرفه نزعت تيشيرتي وشمرته على الجربايه ورحت داطلع تيشيرت ثاني من الكنتور

ملاك :رحت جبت الملمع ورجعت فتت لكيت تيشيرت على الجربايه ،وحجيت ويه روحي

هذا جابه هنا للتيشيرت ،هستوني رتبت الغرفه

ليث:فاتت ملاك ومنتبهت عليه موجود لان الكنتور بجهة الباب والجربايه مقابيلها،واكف داطلع تيشيرت وحيل ارتبكت

بقيت ابلع بريكي شلون حسن بحياتي مشايف هيج جمال ،من اشوفها انسى هيه مرت اخويه

وبعدين اتندم شلون عيني جتي عليها

ملاك: انداريت وشفت ليث واكف يباوع عليه ومتت خجل نازع تيشيرته وجسمه وشكله يجنن

صارت عيوني بعينه ودنكت وطلعت بسرعه

ملاك:صعدت اركض لغرفتي وبقيت ابجي على حضي الى متى ابقى هيج متعذبه

وشكد ماابقى صابره هو راح يبقى مجرد حمى اليه

لبست دشداشه ونزلت خاف بعده موجود

اختمر العجين وساعدتني موج بالخبز

الي اني خبزته كله محرك لو واكع لو معجن بعدني اول مره اخبز

صار الغده ورجعوا الولد من شغلهم وصبت عمتي

واحنه على الغده وشافت خبزي وكامت تحجي عليه

ام اكرم:من كل عقلج ملاك هذا خبز جان استحيتي على نفسج من خبزتي هيج خبز

ملاك: عمه مو كتلج ماعرف بس انتي لحيتي الا اخبز

ام اكرم:فوك ماخبزها يلعب النفس ومينأكل النوبه تراددني

اكرم:يمه شنو كلتلج البنيه لا راددت ولاشي ...كالتلج متعرف تخبز ....واني ماقبل تخبز بعد لان صغيره ولتحترك،اني اجيبلكم خبز من بره

ام اكرم:اي عيني خايف على المدام ومايوم خفت على امك لو اختك بالخبز

ملاك:رادت تسويلها سالفه عمتي بس اكرم مقصر وياها ودائما يوكف ويايه ضد امه..متحملت الحجي

عفت الاكل وكمت

ملاك :الحمدلله وكمت

اكرم:تعالي كملي

ملاك:شبعت ماريد بعد

اكرم:اني هم شبعت بعد ماريد

ملاك:مرت الايام وبقت عمتي تضوجني لان تشوف اكرم حيل مداريني وطابك ويايه

دنسوي بالعشى اني وموج وجتي عمتي

ملاك:باجر تحضرلي اوديج للدكتوره اليوم رحت اخذتلج موعد ،

شو طبيتوا بالشهر الثالث وماكو حمل

اكرم :بالصدفه سمعت حجي امي الي متكعد راحه من تحط احد براسها بعد هاهيه الا تبزعه......طبيت عليهم وكتلها

اكرم: لايمه متروح للطبيب مرتي مابيها شي بعدها صغيره واحنا ممستعجلين والله يسهل عوفيها لتلعبين عليها

ملاك:حنيه اكرم وطيبه كلبه يوم بعد يوم يزيد

وهذا الشي يأذيني هوايه

من وره تصرفاته انجبرت اخضع للواقع وكام يزيد احترامي اله ،وكمت انقهر عليه

وشفت مامنا فايده عنادي وهو لليوم صابرلي

حتى الله ميقبل عليه

وليث يبقى حلم الي وادري مراح اكدر امنع نفسي عن التفكر بي

فلازم اتقبل اكرم كزوج بس عمره ميصير حبيب الي

اتعشينا وكملنا شغلنا اني وموج

وهمه بقوا جوا يتعللون عفتهم وصعدت سبحت ولبست سيت النوم الابيض وكعدت انتظر اكرم...

للقصه بقيه

صدمة العمر

بقلمي ام آيه

اكرم:امي دتضغط على ملاك بشغله الاطفال هوايه بس امي هم حقها تريد تشوف جهالي

واني مابيدي شي بس اصبر لان مااكدر اجبرها حتى تتقبلني ومنا ل6 اشهر اذا بقينا على وضعنا ،اعوفها تروح لحال سبيلها

اكرم:كملت التعليله ويه امي وموج لان ليث من تزوجت لسه نادرا يلفي بالبيت كله طالع

صعدت واتفاجئت وبقيت ساكت ممصدك

اكرم :ملاك شطالعه هاي شنو.... شعجب

ملاك:كافي صبرت عليه هوايه اكولها ومستحيه ...بس مو متلهفه وفرحنه بالعكس مشدوده الاعصاب ومضغوطه

ملاك:اجاني بشوق وعاملني بحنيه بس اني دانذبح الف مره واني بحضنه ....مااكدر ابادله المشاعر لان كلبي مو ويا ....ويه ليث اول حب بحياتي

والله حاولت انسجم ويا بس مو بارادتي...حتى لعبت نفسي بس واجب وانفرض عليه..

تمت ليلتنه وصرت مرته وهو طاير من الفرح...

ومرت الايام وكمت اشوف بعيون اكرم حنيه وخوف عليه ويداريني شلون عبالك بنته

ميبخل كلشي عليه ويوكف ضد امه من يحسها تدوس بطني

ملاك:طبيت للمطبخ وشفت ليث كاعد على القنفه وصافن..... داحاول قدر الامكان اعامله مثل اخويه

ملاك:خير ليث ليش صافن خو ماعندك مشكله بشغلك

ليث:استغربت مو عوايدها تحجي ويايه.... اصلا اثنينا واحد يجنب الثاني....اني كلما اشوفها انذبح ومن اتخيلها بحضن اكرم كلش اتأذه،كاظي وكتي كله بره البيت

ليث:ماكو شي ،هيج شغله بالي ،عفتها وكمت

ملاك:الله ينتقم من الي جمعنا بغير موعد وفرقنا

اذا ابقى افكر بي راح اتاذه وابقى اتعذب

واكرم خوش رجال وميستاهل اخونه حتى لو باافكاري

ملاك:بمرور الايام بديت اتعب وتصير عندي دوخه قويه

حللت وطلعت حامل واكرم الدنيا مشايلته من الفرحه وعمتي كلش غيرت معاملتها ويايه للاحسن

واهلي كمت اروحلهم بعد ماقاطعتهم شهور

داحاول قدر الامكان اتلافى ليث ووجوده بحياتي فطلبت من اكرم طلب لمصلحتنا كلنا

ملاك:اكرم اكلك

اكرم:عيون اكرم أمري حبيبتي

ملاك:شوف اني عاجبني ناجر ونطلع وحدنه

ليش ملاك شكو شصاير ليش امي بعدها تضوجج

لا بالعكس من صرت حامل غير شكل تعاملها ويايه

بس اني اريد اخذ راحتي بيت وحدي البس براحتي واكعد براحتي وانام واطبخ براحتي...وهسه اني بطني شعلاتها والدنيا حاره وطول الوكت لازم البس شي مستر لان عيب من اخوك

اكرم:ملاك اني الجبير وطول عمري شايل هم اهلي وشلت الحمل والهم من صغري من عافنه ابويه وجان عمري 19 سنه

يعني ميصير اعوفهم كلهم ربوا على ايدي والبنات زوجتهم وهسه يشوفوني مثل ابوهم ....شلون تقبليها انتي

ملاك:بقيت مطنكره كم يوم واني كل الي داسوي من مصلحه اكرم حتى احاول انسى ليث

اكرم:يعني راح تبقين هيج لو اطلعج بيت وحد لو تبقين مطنكره ؟؟

شسويلك لعد اريد اخذ راحتي بيت وحدي مثل هالعالم....

لكيتلج الحل

شنووو!!!!

راح اعزل الفوك وانزل درج على الحديقه ،هم نصير وحدنا وهم ابقى بيت اهلي وماعوفهم

ملاك:يله ميخالف خوش فكره ،شوكت راح تبلش بيها ،بس يصير عندي شكم فلس لان العندي متكفي

ملاك:يعني على حجيك اجيب واكبرهم واحنه بعدنا بهالغرفه

شسويلج يابنت الناس هذا العندي ومااكدر اضغط على نفسي.....وما اريد اتداين واتوازه .....جان اخذت من ليث بس ماريد اوازي روحي على الدين واني مو مجبور..

ملاك:اخذ التخم الي جبتليا بالسبعه ورتب بي البيت وهم اذا بقت فلوس انضمها لولادتي

لا مابيع ذهبج ،يعني بشرفج الي يسمعج يكول متوازين،خليها للايام

اووو اكرم والله ضوجتني وهذا كله يأثر على الطفل.

الله كريم ملاك لتلحين ياعيني..

انتي مناويه تاخذين سونار ؟؟

اي اخذ بس بعد يومين اطب بالسادس والدكتوره كلتي اول مطبين تعالي اسويلج سونار

الله كريم حبيبتي هاليجي نعمه من الله

شوف اكرم خل نتفق..

على شنو نتفق؟؟

اذا طلع بالسونار ولد تبنيله الشقه قبل الولاده ....واذا طلع بيه بنيه تبنيلي وره ماجيب .

اكرم:خوش اتفاق واني موافق.

صار موعد الدكتوره وداني اكرم وعمتي اكيد ويايه

بقى ينتظرنه بالسياره بين مكملنا وطلعنا

اكرم:ها بشروا

ام اكرم:اريد البشاره كرومي وليدي

هايمه تبشري بالي تريدي وادللي

وليدي مرتك حامل بتوم ولد!!!

اللهم صلي على محمد ،الحمدلله والشكر الله يتمم على خير ويجون بالسلامه..

ملاك:بجيت من شفت الفرحه بعيون اكرم ،كلش حنين وكلبه طيب

وبديت اتعود عليه كزوج وراح يصير ابو ولدي بالمستقبل..

ملاك:رجعنا وخاله راحت جابت ديوكه اثنين وذبحتها فجران دم وانطتها لوجه الله

وتكول الذبيحه الزينه من يشرفون (علي و عمر)

اكرم:يمه منسمي على اسماء الخلفاء الراشدين لان الدنيا صارت محلوه وطائفيه

ام اكرم:لا يمه احنه منفرق الحمدلله ونسمي على اسماء الخلفاء ونخش بعين اليعترض ويفرق..

وليدي احنه كلنا عراقيين وربنا واحد ونبينا واحد والخلفاء كلهم تاج روسنا والينعت واحد بيهم هذا انسان فارغ وجاهل ..

ملاك:حجي عمتي خلاها تكبر بعيني وهي الله شاهد حيل اتغيرت وتحبني ومداريتني

ملاك:احنا مددين بالجربايه بالليل ودنسولف اني واكرم

اكرم:ملوكه على هذه الهديه الحلوه الي وهبنياها رب العالمين راح ابنيلج المشتمل وتؤمرين امر وتدللين يا ام ولدي.....حجيت ويه ليث واداينت كم فلس ويه العندي ومن الراتب اسددهن اله..

تسلم ابو ولدي ربي ميحرمنه منك

اكرم:بديت اشتغل بالبيت وامي اخذت على خاطرها بالاول وبعدين تفهمت الموضوع

رتبت المشتمل وسديته من جوه ونزلت درج ينزل على حديقه اهلي يعني مو خارجي..

وكعدنه بيتنا وبجنتنا الحلوه

ملاك:اكعد اكرم يمكن دااجيب حيل موجوعه

🎀🎀🎀🎀

بنات اذا بقى التفاعل ضعيف راح اوقف النشر بالواتباد وابقى انشرها بكروبي على الفيس بوك

صدمة العمر

بقلمي (ام آيه)

ملاك:اكعد اكرم  الله عليك يمكن راح اجيب حيل اليوم حيل انوجعت.

اكرم:اي حبيبتي هسه دقايق واوديج ....كومي البسي شي بين ماانزل الغراض بالسياره واروح اكعد امي

ملاك:صعدتلي موج ...ها ملاك حبيبتي دتحسين بروحج عندج ولاده

ملاك:اي والله موج مصاريني متكطعه تكطع وظهري مقسوم بالنص ورجليه كوه واكفه عليها

موج:يله حبيبتي اني وامي راح نجي وياكم

ملاك:لا وين ابقي انتي هنا ترى عمتي كافي ،خطيه انتي بعدج بنيه من هسه تتعقدين

لا يمعوده دسكتي يله انزلي على كيفج لتوكعين من الدرج كولي يالله

يالله ماكو غيره يوكفلي،نزلت وشفت ليث بالطرمه هم يريد يجي ويانه

اكرم:ليث ماكو داعي تجي ويانه

ليث:لا اكرم ميخالف اجي وياكم دنيا ليل وسيطرات وخاف تحتاجون شي بالمستشفى

ملاك:اباوع على ليث وابجي،جان هسه هو بمكان اكرم وذولي ولده بس الحسره بعد ميفيد

ملاك:صعدنا بالسياره وجان الوكت متأخر قريب 5 الفجر واكرم يمشي على كيفه من السيطرات لان الوضع تعبان

وليث كاعد بالصدر واني ليوره بين موج وعمتي والوب وماكدر اصيح من وره ليث استحي

وصلنا المستشفى ودخلوني لصاله الولاده ودخلت عمتي ويايه لان بس مرافق واحد

ليث:اباوع على اكرم شلون قلق ومتوتر

ليث:اووف ياملاك راح تصيرين ام واني داتعذب بنار حبج وادري بيج نسيتيني ومنشغله بحياتج..بس اني كلبي مجوي بنارج جوي

اكرم:موج فوتي يم امي وملاك صارلهم قريب الساعه بس عرفينه ليش هالتاخير

موج:اي هسه رايحه....هايمه اكرم على نار كاعد ليش هالتاخير

ام أكرم:كوليله متعسره ولادتها وقبل شويه انطوها ابر حتى تكدر تجيب اصطناعي

موج:يمه شكله اني روحي انتي كوليله واني ابقى يمها

موج:انقهرت على ملاك بعدها صغيره وشلون دتتعذب وتلوب....بقيت امسح بكصتها لان سبحت من العرك وكاعده اقرالها على راسها قرآن

اكرم:طلعت امي وكالتلي متعسره ولادتها وقلقت عليها حيل ،صارت 8 وهيه مجايب

اكرم:وره شويه انخبصوا الممرضات وطببوها غرفه العمليات

وسألت الممرضه..شكو شبيها شصاير

الممرضه:نبض الجهال بده يقل والمي نشف ومرتك تعبت وحياتهم بخطر كلهم

الممرضه:شنو دمها لمرتك

اكرم : +A

الممرضه :الي نفس فصيله دمها يروح يتبرع بغرفه الدم بسرعه

اكرم:اتخبلت لان اني دمي +B

وامي نفس فصيلتي اعرفها لان دائما اسويلها تحاليل

وفصيله دم موج مااعرفها

ليث:اني دمي +O يعني الواهب العام وهسه راح اروح اتبرعلها

اكرم:الحمدلله ياربي

ليث:ديسحبون دم مني والدمعه بعيني،شوف القدر شلون ديسوي ويانه وديقربنه من بعض

اكرم:سووا العمليه ونجحت الحمدلله ووضع الجهال بخير بس يحتاجلهم خدج وملاك زينه

اكرم:ليث اني راح اخذ سياره اسعاف واروح لمستشفى الطفل حولوا علي وعمر للخدج وهنا ماكو خدج

ليث:لا كرومي اني وموج نروح  وانت وامي ابقوا يم ملاك وبيناتنه تلفونات(بالمناسبه صار عدنه وره الحرب شبكات هاتف محمول)

تسلم ليوثي حبيبي ماقصرت اجازيك بالخير

ليث:اخذت الاطفال وطلعنه بيهم اني وموج وجنت حيل خايف وقلق وحسيتهم عبالك ولدي

سبحان الله نسخه من اكرم سمر ولا ماخذين شي من أمهم

ليث:سوينه طبله دخول للمستشفى ولليل وضعهم استقر جانوا شاربين مي البطن وبالمستشفى سووا اللازم

سحبولهم المي ونعشوهم بالاوكسجين ووردت خدودهم ...بتنه بيهم اني وموج

وللصبح اروح واجي عليهم كلش حبيتهم وحسيتهم الي..

ملاك:صحوني من البنج وجنت دايخه ولعبانه نفسي واصيح...ولدي وين ولدي.... جيبولي علاوي وعموري

اكرم:حبيبتي ولدج زينين ويخبلون

ملاك:من صحيت من البنج اكرم كلي الاطفال بالخدج ،وعرفت دم ليث ديجري بعروكي هسه..

ليث:ثاني يوم كتبولنه خروج وفحصهم الطبيب للجهال وكال صحتهم تمام وكتبلهم حليب صناعي

واخذناهم وطلعنا

ليث:خابرت اكرم.... ها ابو الخلفاء هذا الطبيب جيك الولد وكال وضعهم تمام وراح نطلع وكتبلهم حليب

نجيكم للمستشفى لو شلون

اكرم:ليوثي روحوا للبيت بس بالاول مر للصيدليه اخذلهم حليب..وغراض الممات تلكاها موج فوك بغرفتنه جامعتها ملاك بسله بالثلاجه

اكرم:احنه هم راح نطلع بس تجي الدكتوره تجيكلها خياط العمليه والجرح ونلحكم

ليث:اخذتهم بتكسي ومريت اشتريت الحليب ورحنا للبيت..

موج راسا سوتلهم حليب وشربناهم اني وياها

وصدقه شلون حلوين جنهم البزازين

ورتبنه جربايه لملاك بالهول لان صعبه تصعد لمشتملها حاليا

ملاك:ممصدكه شوكت اوصل للبيت وياله ياله اريد اشوفهم

وصلنا وكايديني اكرم وعمتي..وطبينا للهول وشفت ليث حاط واحد من الولد بحضنه وديشربه الحليب

متحملت المنظر وكمت ابجي

ملاك:شوكت راح يخلص عذابي ،وجروحي شوكت تنسد

كعدوني على الجربايه وحطو ولدي بحضني حاضنتهم واشم بيهم وابجي على هالهديه الحلوه

الي اجتني من السما ويارب يطعم كل محروم

صدمة العمر

بقلمي (ام آيه)

اكرم:ذبحت ذبيحتين لوجه الله على سلامه الولد وملاك و وزعنه للجوارين كلهم وللفقراء وربي يتقبل منا ان شاءالله

ملاك:من جبت بقيت جوه علمود يداروني عمتي وموج وهم امي جتي بقت 3 ايام وراحت..

واني كمت يوميه اشوف ليث من يطلع ومن يطب لان نايمه بالهول ..

ليث:هلو ملاك شلون صرتي وشلون الجهال

ملاك:اووف بحسره وتنهيده .....الحمدلله بخير اني والجهال اشكرك

اكرم:بالصدفه فتت وحسيت ملاك وليث اكو خجل وارتباك بيناتهم

ورسا لعب الشيطان باافكاري و سوس لي

اكرم:بقيت مكابل ملاك كم يوم الما سحبت الخيط و وره 10 ايام

وكتلها ....ملاك اليوم نصعد فوك بشقتنه

ملاك:ليش اكرم خل ابقى كم يوم والله بعدني تعبانه.

لا نصعد فوك احسن واني يمج اداريج كلشي تريدين اسوي..

ملاك:مو هنا موج تساعدني بالجهال بالليل

اكرم:اني اساعدج واذا مدبرتها نخلي موج تبات يمنه

ملاك:براحتك الي تريده سوي

اكرم:امي سبحت الجهال وسبحت ملاك وصعدتهم فوك..

 ليث:كمت اتلهف للرجعه للبيت ورجعت وشفتهم ماكو صاعدين وانقبضت روحي فدمره..ورجعت لحاله الضياع الي اني بيها

ملاك:مرت الايام والتوم كبروا وكاموا يكعدون ومالين حياتي ..وليث بس من اشوفه تهيج المواجع

ملاك:موج اجوها خطابه كرايب عمتي من بعيد شافتها امه الولد بعرس وانعجبت بيها

موج:ملاك لج حيلي يرجف شلون راح نعقد اني وماهر باجر....من يكوم يجيني عود اصيحج يمي

استحي خاف يدور كعدات وسوالف

ملاك:عيشي خطوبتج يولي هاي احلى فتره بحياة البنيه..

وبتنهيده ولو اني معشت كلشي من ذني..

ملاك:عمتي مو على بعضها جنها دتدبر موضوع ..

جان يوم خميس ونزلنه جوه نتعلل ويه عيالي وعموري وعلاوي كبروا صار عمرهم 7 اشهر.

ام اكرم:موج خطار بهالبيت وعلى ساعه ياخذها رجلها ...وبيت اكرم عايشين حياتهم ومستقرين...

بس بقيت انت ليوثي وحيد...

يمه رايدتك تزوج

ملاك:عمتي حجت وجابت طاري زواج ليث شو راسا انقبضت روحي وانحصرت دمعتي ..وليث راسا عينه جتي عليه

ليث:من حجت  امي راسا اجتي عيوني على ملاك وحسيتها ضاجت

اكرم:اني مو غشيم احس بينهم شي حتى لو مو خيانه ..

اني رجال وافتهم حاس ملاك بس جسم ويايه عقلها وفكرها مو يمي

ام اكرم:اريد اخطبلك وشفتلك بنيه من خوش عائله

ملاك:اشتعلت بنار الغيره وبعدهم بس كالوا الفكرهتخبلت .... لعد لو يزوج ويجيبها هنا يمكن اموت

ام اكرم:عيني ملاك اريد ساره اختج ليوثي

ملاك:شنو مستحيل ...اهلي مينطون والبنيه صغيره وانتوا عفتوا كل البنات وركضتوا على اختي....

رده فعلي فضحتني وكمت احجي بنتر وعصبيه

ليث:اتفاجئت برده فعل ملاك مو طبيعيه تحجي وترجف

اكرم:شبيج شكو هالرجف اهدئي شويه

ملاك:حسيت على نفسي وردت اعالج الموضوع...

لا بس الي ردت اكوله اهلي مينطون ساره من وره السالفه مالتي.... وثانيا ابن عمي هاني حاجي بيها واهلي نطوها بس الما تكمل دراسه وتصير رسميه الشغله

ام اكرم:مو مشكله.... ابني الف وحده تتمنى

ليث:يوم اعتقيني اني زواج ماازوج..عفتهم وكمت

ام اكرم:اي مو بكيفك طبيت  26 شوكت اشوف جهالك....وداعتك كم يوم والبسك الحلقه ياابن بطني

ملاك:كلش غثتني عمتي ومادام حطت السالفه براسها الاتسويها

ملاك:اكرم علاوي نام راح اروح اصعده وانت جيب عموري من ينعس

اكرم:اي روحي نيمي...طبعا ملاك لليوم منست ليث متاكد مليار بالميه

اكرم:التفكير كتلني والشك وادري مرتي صاينتني بس الشك كتلني من افكر يجوز ليث باافكارها ...اتخبل من القهر كمت ادخن 3 باكيتات باليوم

ملاك:موج هالشهر ياخذوها واني ملتهيه وياها بالتحضيرات....عمتي كالت الا اسويلها حنه تخبل على حسابي،واعزم بيها كل الحبايب

ملاك:قبل الحنه بيومين عمتي دكت باب باب بالشارع وعزمت بناتهم على الحنه وحتى المتعرفهم عزمتهم

....وادري دسوي هيج حتى تلكه عروسه ليث..

صار يو الحنه وعمتي صرفت صرف لان عازمه نص بغداد حتى تلكه عروس لاابنها

شلعت كلبي اني وبناتها يومين احنه واكفين نخبط كيك

سوينه 12 قالب كيك جبير ومن غير العصاير والحلويات

طبعا عمتي لو يحطوها نص ساعه بالحكم الا تدوخ امريكا بعقلها المدبر هههههه من تريد شي الا تسوي

ملاك:لبست فستان بيج طويل وربع ردن وبي فتحه لركبي..وفتحت شعري ومكياج خفيف حطيت لان ميلوكلي الطوخ ابد ...احسه يكبرني

وعمتي طول الحنه مشتغله محقق ولازمه النسوان والبنات وتقرر بيهن

ملاك:اني كاعده واسمع كرايب اكرم يتبس بسن ويكولن

شنو حسن شايله مرت اكرم والله هنياله عليها مسعد...هم اسمر وهم جبير واخذله شلون وحده

وهسه ليث الحلو يوكع بوحده جكمه وزايعتها الكاع

ملاك:خلصت الحنه وثاني يوم العرس سووا بالقاعه ورحنا اني وعمتي وخواتها وياها وانجمعنا بميز واحد

ام اكرم:يولن باعن هذه ام النفنوف الاخضر شلون حسن وجمال ..والله عبالك مفصله تفصال ليوثي

ملاك:صدك حلوه والغيره كتلتني وعمتي مراح تعوفها ابد

مر اسبوع على زواج موج وعمتي يوميه مطلعتلها سالفه ليث حتى تقنعه بالزواج

ملاك:كمت اشتغل مثل المصراع فوك وجوه حتى ماقصر بشي ومتتحجج عمتي بزواج ليث

واخر شي طلعت بسالفه (اني ادري بيها جذابه)

يمه كلبي يوجعني واخاف اموت وماشوف ضناك

ملاك:وبألف حيله وميله اقتنع ليث

ليث: يمه خطبيها يمعوده وخلصيني امري لله

صدمة العمر

بقلمي ام آيه

ملاك:الله ينتقم منج عمتي على هالشعواط الي عيشتيني بي.....بعد هاهيه حطت براسها سالفه زواج ليث ومترتاح الا تخطبها ومتعوفه الاتزوجه

ليث:امي شافتلي بنيه بعرس موج وحلوه تصير كرايب ماهر رجل موج

وبعد ما سطرت راسي من الملحه كتلها خطبيها وخلصيني

ليث:خطبتها والبنيه مناقصها شي اصغر مني واسمها شهد.....لبسنه حلقات بس اني محبيت استعجل بالزواج ردت اتأنه وبراحتي

ملاك:من خطب ليث ولبسوا الحلقات..كلش تغيرت بتعاملي ويه اكرم

وزادت المشاكل بيناتنه وصرت حساسه من كلشي ودمعتي بطارف عيني .....وبس احد يحجي ويايه بكلمه ابجي رأسا....ودائما اتحجج و اريد اسوي مشكله ويه اكرم.....الغيره شعلت النار بيه شعل..

اكرم:ملاك اصحي على روحج شويه والتفتي لبيتج ولجهالج كافي هالاهمال والخبال مالج

ملاك:ليش بشنو اني مقصره وياك انت والجهال....متعبيني صاروا اثنين مره وحده ومدوخيني وما الحك عليهم وعلى شغل البيتين

اكرم:كمت اتعب هوايه واشكي من راسي بس كلت هذا من الواهس والشك والتفكير تاعبني..

ليث:مرت كم شهر واني خاطب ..وكبروا الملاعين وصار عمرهم سنه ونص وكامون يمشون ومتعبينه

ليث:بديت احضر وارتب بالبيت

ليث:يوم هذه غراض الصبغ والفرش جوه الدرج بس عود انتبهي ليلعبون بيها علاوي وعموري

لان اتفقت باجر يجي الصباغ حتى يصبغ البيت

يجوز على شهر الجاي اتزوج

ام اكرم:بالمبارك يمه كللللليش

ملاك:داحضر بالغده فوك والجهال نايمين واكرم بعده بدوامه ..وسمعت هلهوله لان احنه من الداخل قاطعين البيت بخشب مو بناء

واسمع صوت هلاهل...نصيت الجدر ونزلت اركض

شكو عمه خير فرحينه سمعتج تهلهلين

ام اكرم:ليوثي جاب الصبغ وباجر يطلع الصباغ ويصبغون ويكول اول خميس بالشهر الجاي يعرس

ملاك:انخطف لوني وبقيت ابلع بريكي...وحسيت سجين وانغرزت بكلبي....بيها الخير عمه الله يسهله

ام اكرم:ملاك روحي شوفي الباميه اذا عكدت نصي الجدر،وناكعه التمن طبكي قبل لتصعدين شو رجلي

صبحت مورمه وكوه امشي

اي

ملاك:رحت للمطبخ وبطريقي شفت ليث بغرفته وفاتح الباب وشفته وتلاكت عيونه مسلمت عليه

وعفته ومشيت

ليث:شبيها ملاك بعيونها عتب من خطبت لسه حيل متغيره ...معقوووله!!!!!!!!!

لا لا شنو هالافكار السوده هي بالنسبه الي مرت اخويه تصير وبس..خل اروح واشوف شبيها....ها ملاك شلونج وشلون الجهال

ملاك:ماباوع بوجهه.....زينين احجي بثكل

ملاك:على الخير مبين مستعجل ياله ياله تريد تخلص وتزوج

ليث:ههههههه ليش مااستعجل كافي تعبت واريد ارتاح..احسب الساعات حتى تجي يمي شهوده

ملاك:نصيت الطباخ وشمرت الخاشوكه بالسنك..وبنتر كتله الله يهنيك بشهوده وعفته ومشيت

ليث:(اهنا الغلط،من يكون اكو حب بين اثنين وبدون وعي تنسي كل الروابط والعلاقات،اثنينا نسينا مكانه الحقيقي انو اني اصير حماها وهي مرت تصير اخويه......غصبن عنه كمنا نسمع بالحجي وانثارت مشاعر الغيره عدنه)

ملاك:طول النهار اعصابي فول اجه اكرم وطلعت ضيمي بي

(بنات لتكولولي حرام ..لا مو حرام هو من ايده ..هذا اليزوج وحده بالغش والاكراه ،شمهما تتغير الظروف تبقى المشاعر مو اله)وهو يبقى يتحمل غلطته

ملاك:اكرم التانكي حار والمي يجوي شكم مره كتلك غلفه حتى يبرد..وانت تسمع منا وتطلع منا

ملاك شكد حجيتي لخاطر الله سكتي ورحميني ..متشوفيني دايخ وكاتلني الحر....من جيت لسه بس تتحججين عليه ودوريلج مشكله

ملاك:بدوا يصبغون ويرتبون بالبيت....وعمتي ويه كل حجايه ركعت الهلوله واني من يمي اتخبل وتهيج اعصابي واطلع ضيمي بااكرم والجهال

ليث:يمه سوي طريق ديفوتون العمال.....جبت غرفه النوم اختاريناها اني وشهد حلوه تركيه لونها كريمي وهسه دينزلوها

ام اكرم:كللللللللليش بالمبارك وليدي شايف كل الخير عليها

ملاك:سمعت الهلاهل وطلعت باوعت من البالكونه وشفت ليث دينزل بغرفه النوم

ملاك:كعدت اندب حضي وبجيت الما كال البجي كافي..هو راح يبدي حياته ويعيش ويه وحده تحبه ويحبها..واني اظل مدفونه ويه انسان جبرني الوكت عليه

فتحت صدري لرب العالمين ودعيت بحركه كلب

(الله ينتقم منج عمتي ويحرك كلبج بعزيزج وغاليج مثل ماحركتي كلبي وبجيتيني)

واهلي مو احسن من عمتي من ذبوني هالذبه ومشوا وعافوني..الله يطلع حيفي ويبرد نار كلبي

اكرم:ملاك نيمي الجهال بوكت اليوم خميس

ملاك:واذا خميس ،اني تعبانه وراسي يوجعني ومالي خلك لكلشي..

اكرم:شكد لازم اعصابي وياها بس هسه فقدت واحجي بصياح ..

كافي عاد دمرتيني بس هاملتني ،طول الوكت عصبيه ومتتحجين وشوكت ماريدج تطلعيلي الف عذر ...ادري بيج انجبرتي عليه.... بس هسه اصحي على نفسج محد راح يبقالج بس رجلج ....والعاقل يفتهم

اكرم:طبكت باب الشقه قوي ونزلت كعدت بالحديقه راسي يريد يطك وادخن وحده وره الثانيه

ليث:اول مره اسمع اكرم هيج عصبي وحجه حجي واني راسا اخذت على نفسي وحسيت الي ديصير بيهم كل من ورايه..

فقررت استعجل بالزواج ...حتى اني وملاك نخصمها وكلمن يلتفت لحياته..

خابرت شهد....هلو شهد اذا ماعندج مانع الخميس الجاي نتزوج لان اني مرتب كل اموري..

حتى نعقد الاثنين اليجي والخميس نزوج

شهد:لا عيني ماعندي اشكال براحتك حبيبي

ملاك:كعدت الصبح واني من اريك الجهال انزل يم عمتي انظف على السريع واصعد اطبخ قبل ميجي اكرم..

وسممتني عمتي بسالفه زواج ليث اسبوع الجاي ...

ساعه 11 الظهر ومنشوف الا اكرم طب علينه وشكله تعبان كلش عايف دوامه وطالع وراجع للبيت

يادوب لزم القنفه واتخربط و وكع بالكاع

وللحكايه بقيه.....

🎀🎀🎀🎀

شوفوني تفاعلكم حتى احاول اكملها اليوم