تحميل رواية «اسرار قدس» PDF

يبس ظلهن وراك وعرگ ضيّهن نار

إبخهن بالصبر وألگاهن يسعرن عيوني

(عباس العبادي)

دخلت البيت وظهر محمل هموم.

اذكر أول دخْلتي لهالبيت... بنفس الخطوات أمشي وراه. جان كلبي فارغ وعقلي ما عنده سالفة.

أثاريها المحبة هموم راحة بال الكلوب الفارغة.

لو ضالة بلا حب جان ما شلت هم، ولا هسه آني حال الأسيرة الماخذيها غصب وبايكينها من أحلامها.

مثل وردة بنص بستان تزهر وانلكطت إعدام من مكانها وميها وكاعها حتى ترضي أناني رايد يشمها.

هيج إحساسي واني أمشي وراه.

بس العيون تدور... تدور واحد وعدته ما أخطي هالخطوة وخليت بگلبه أمل أردله وما جنت كد الوعد. أتْدور عيونه خاطر تشوف شلون تموت أحلامه بگلبه.

بس ما شفت عيونه!

دخلت البيت.

كال أبو وهب: تفضلي.

حجاها بصوت مسموع وواضح وصاح: سرااااب.

طلعت سراب من قرفة أمها: ها يابه.

- سلمي على مرت أبوچ قدس، وينهن ذني؟

دنجت باوستني وسلمت وردت عليّ: أمي وعفاف جاي يخبزن وأميرة ما أدري عنها.

- اندهي على عمتچ كليلها أبوي يريدچ.

مشت فتحت الباب على الحاجة.

واني عيوني أتْدور البيت وأدحك بالقرف وإحساس الخنكة تارس صدري. حجه: نزعي عنچ العباة خافها مضايگتچ.

- أروح لقرفتي؟

- انطري أحاجيهن وأوصيهن عليچ خاطر لا أحد يگربچ لو ياذيج.

سكتت. طلعت الحاجة: هلا يمه.. اجيت.

- هلا حاجة اكعدي عدي جلمتين أحجيهن.

كعدت وهي دايرة وجهه عني. اجت أميرة طلعت من القرفة مالتي ما أدري شعدها بيها. من شافتني جن تصرگعت وعيونها وجن نار. كربت أطمّش بلا حجي. حاجاها: صيحي عفاف وعواطف.

اندارت على سراب أشرتلها تصيحهن وهي تدحك بالحاجة وبحركة بوجهه جن تستفسر منها. اندارت عنها الحاجة ما ردت.

اجا مصطفى ابن أميرة كعد بحضن أبوها.

وركض محمد يتسابق وياها خاطر يكعدون يمه. ضحك وهو يحبهم ويلاشيهم. زگحت بيهم أميرة: امشوا غاد أبوكم مو بحالكم هسه.. سراب أخذي إخوتچ كوووومي تحركي.

ما رد أبو وهب. اندار عليّ يكلي: جوعانة؟

واندارلهم: غداكم شكثر بعدله ويجهز.

محد بيهم جاوبته بس نور بتّه كالتله: بس يخلصن خبز يابه.

دخلت عواطف وهي بثوب الخبز فحتانة. حجت: يا ويل گلبي وجيت من الحر.

اتفاجئت بكعدتي وأبو وهب هين. ضلت تدحك. دخلت ووراها عفاف شايلة صينية الخبز تخطتها وخلتها جدام الحاجة. شافتني بس سوت روحها ما مهتمة. صاحت بنور: يولي ما تشعلين المبردة احترگنا حرك.

حجت سراب: سحب هاي ما تتحمل مبردة مشغلين ماطور للبستان.

عفاف: طفي دطفي الماطور نعلبوه متنا من الحر.

تحجي ورافعة حاجبها ومتضايكة من وجودي مبينة. دخلت ورا عفاف للحمام غسلن اديهن ورجليهن واجن. حجت عواطف وهي تصيح على بتها: كومي صبي الغدا ما طوله الخبز حار.

الحاجة مدت إيدها للصينية تبرد الخبز وتحط وحدة فوك اللخ. حجه أبو وهب: هدن هسه واكعدن رايد أحجي وياچن خاطر أكوم أصلي فرض الظهر راح يآذن.

كعدن كلهن وانتبهتله. حجه: قدس مرتي وردت ليجاي وحالها من حالچن. تالله الأسْمع وحدة منچن حاچيتها لو غالطة عليها وما محترمة.. لا أحط ظهرها وأكسرو. الكلام يتعداج يا حاجة وما عليچ زود بس انت جدامي مسؤولة لو صابها شي.. سمعتن؟

عواطف: بالمبارك عليك تشوف خيرها إن شاء الله.

اندَار عنها وهو يدحك بيّ ويكول: الله يسلمچ.

أميرة: ورضيت تطلع وتشرد من البيت وما عليها حساب؟

ريسان: أحاسب اللي أريد أحاسبها وأعفي بكيف ما جا بخاطري محد له جلمة يمي.

سكتت عن الرد وكامت بسرعة وهي تصيح بعفاف: كومي نكضي البتيتة على ما يخلص الأذان ونتغدا. كومي.

كامن اثنينهن وعواطف راحت لبتها تساعدها بتجهيز الغدا. وأم خطاب خلصت صفطت الخبز وصاحت على نور تجيبلها علاكة الخبز. أبو وهب كام من مكانه راح يتوضى.

الجهال يتصايحون بنص الهول وواحد يركض ورى الآخر. كمت من مكاني خاطر أمشي للقرفة مالتي. لكيت وهب نايم بفراشي. اندرت لأبو وهب وراي حجيت وياه:

- فد كعده.

صاح أبو وهب وهو يتعداني ويفوت للقرفة: وهبببب كم من هين يول المرة تريد تحط غرضها.. وهبببب.

شال راسه دحك على أبوها فوگه واني وراه.

حط اديه على الگاع وعان روحه وكام. ما لابس قميص فد الشورت. صاح أبوها: أنا جم مرة كايلك لا تتصلخ والبيت بيه حريم.

- يابه نايم ما چان أحد هين.

طلع من القرفة وهو يصيح على أخته تجيب هدومه. صك وراه الباب أبو وهب وظليت فد آني وياه بالقرفة: ارتاحي على ما يصير الغدا.

جر سجادة مصفطة بطرف الشباك ومدها. وگف يأذن. واني جريت جنطة هدومي وفتحت البوفية ملابس وهب والبنات. جاي أطلع بيهن طبت نور: بس ملابس وهب يريدهن.

- خذيهن هاي الملابس أريد أحط ملابسي هين.

- بس هاي بوفيتنا وين نحط ملابسنا عجل؟

- مدري فد آني هم ملابسي بجنطة أريد أصفطهن بخانة.

جرت فد هدوم وهب وطلعت ضايجة لين گتلها شيليهن. عفت الجنطة على حطتها ما فتحت ولا حطيتهن بالخانة لما عرفت وين أحط هدومي.

گام يصلي.

كعدت على الفراش. صرت وراه وأدحك عليه.

كارهته وكارهه وجوده ووجودي يمه. ثگلان على گلبي شلون راح أكابل خطاب وشلون راح أشوفه. وشلون راح يشوفني.

أتمنى الگاع تنشك وتبلعني.

ملك الموت يمر وياخذني ولا أعيش اللي جاي أعيشه. گلبي لشخص واني لشخص ثاني. حفرة منين ما أفتر أكع بيها وما أعرف شلون راح أخلص روحي وأصل بر الأمان وأحط عد الرادني.

دمعت عيوني واني أدحك بيه.

خلص صلاته اندار يدحكلي: مهضومة؟

- ماكو شي.

- لا تتضايكين عزمت العمام والمنا ومنا العصر نسويلچ هوسة وصفكة وجقليت. كومي أعدلي روحچ لا تظلين معبسة وجهچ ياله.

گام من السجادة لمها.

واني گمت من مكاني. سألته: هدومي وين أحطهن؟

- مو هاي البوفية.

- نور تكول مالتنا.

- خلها تولي ذبي هدومهم عد أمهم تحير بيهن وكومي تغدي.

حجاها وطلع.

صاير واحد ثاني وأسلوبه مختلف وياي.

هو متغيّر لو شنهو الوراه؟

شلت الهدوم رحت أوديهن لقرفة عواطف.

مرت جاي تحط الجدر صاحت: وين وين موديتهن؟

- هدوم وهب والبنات بالبوفية مالتي.

- مالتچ شنو من يوم يومها هالبوفية لهدوم جهالي.

- أبو وهب كال انطيني إياهن.

حطيتهن بالكاع ومشيت. طلعت برا صاح أبو وهب: وين يولي؟

- فد أغسل.

- داخل اغسلي لا تغسلين برة البيت.

تنهدت وفتت للحمام غسلت وجهي.

ما چاتلتني الغسلة روحي تريد تطلع ما هاوية الطبة.

كعدت يمه.

فد روحي محصورة مختنگة حيل أريد أبجي وما أكدر. رايدة أصرخ أحس اكو صرخة بصدري تسعر مثل النار بداخلي. حيل خنكتني كل هالوجوه ما أهواها.

مَدّن السفرة أشرلي أجي يمه.

كعدت وهن گامن يخلن بالسفرة. مرقة بيتنجان وعليها كرفس وخبز ومواعين بيها بصل مقطع وطماطة. الكل تجمع ياكل فد خطاب ما هو.

حجه أبو وهب... اليوم منتظر خبر لو حصل وصار بحيل الله راح أجيب خروف وأذبحه تا أشبعكم لحم.

صفگ وهب: هله هله ببوي صدگ راح ناكل لحم.

- بس ادعي إن شاء الله يصير.

الحاجة: وشنهو الخبر؟

- عملية جهادية بنص سوق بالثورة.

حجت سراب: سيارة مفخخة؟

ما جاوبها. حجت عواطف: السوق مو بيه نسوان خط... قاطعها.

- اتزقنبي واسكتي مو انت تعلمينا شغلنا.

الكل سكت.

آني غمست بالمرقة شوية وكتله: رايحة أعزل قرفتي.

حط إيده على رجلي وحجه: حاجة العصر راح يجون كرايبنا دزي وهب للسوق وكلوله شمحتاجين رايد أسوي صفكة وهوسة لقدس خاطر اليوم تكضي ليلتنا.

هزت راسها وما حجت.

دحك عليّ وكال: معتازة شي من السوق يجيبوه الج.

- لا. فد أريد أروح للقرفة.

- روحي.

اختنكت حيل گمت من المكان.

گومتي صارت بسرعة. أحس الگاع افترت بيه. مديت إيدي أريد ألزم بشي خاطر لا أكع. بسرعة گضبني أبو وهب: شجاج؟

- دخت.

رجعني كعدني هدا راسي وهو يكلي: يولي ما گلتلي.. أحاجيج مريضة انت؟

- فد أريد أنام أحس روحي تعبانة.

صاح: سراب عينيها.

گامتلي وسندت إيدي مشيت للقرفة. دخلتني جريت إيدي: روحي تقدي اني راح أرتاح.

عافتني ورديت الباب.

شلت الفراش كلبتو ونكثته ونكثت المخدة وتمددت ودرت وجهي. أخذت طرف من حجابي حطيته بحلكي وگمت أبجي بخنكة خاطر لا يطلع حسي.

روحي ولعت. أحس نار بصدري تفور.

شوي واجا دخل للقرفة سويت روحي نايمة. فد الشهكة بصدري. من شافني نايم سد الباب وطلع.

كعدت ويا روحي شبعت بجي. ما أعرف شلون راح أخلص من هذا السجن. ما أريده.

العصر گعد أبو وهب طلع برا.

ليقاد گاموا يجون خطار. اجت سراب بيدها علاكة: هاي أبويه جابها الج.

- شنو؟

- هدوم زينة تلبسينهن جدام النسوان.

هزيت راسي. رادت تطلع سألتها: أكلچ.

اندارت: ها.

- فد تعاي سدي الباب.

دخلت وسدت الباب: شصار عقبي من شردت؟

- ما صار بس الحاجة گالت لابوي غلطت علينا وكامت تصيح وطلعت من البيت.

- وخطاب؟

- شبي؟

- يعني هم جانوا يتعاركون على البيت؟

- عمام خطاب بيومها اجوا وحچوا ويا أبوي.

وراها هم اجوا وأبوي ما يرضى يطلع يگوللهم گبل الـ ٦ أشهر ما أطلع أنا زلمة عندي عوايل وجهال جثيرة وين أمشي بيهم.

فعمه راد من ابوي ايجار على الست اشهر اليكعدهن.

– وابوج رضى؟

– اي بس كاللهم ما انطي مال ست اشهر انطي كل شهر بشهره لخطاب.

– وخطاب وين راح يعيش؟

اخذ الدوانية خله بيها سرير اله وكام ما يدخل للبيت. صارت غرفته ياكل وينام غاد ما يطبلنا ولا يجي.

– هو موجود؟

– ما يجي بالنهار. من تغرب الشمس يدخل للبيت وبالدوانية. وابوي منعنا نخدمه لو نسويله اكل.

– عجل ياهو اليطبخلو؟

– مخلصها برا. ولو راد الحاجة تسويله على الجولة. ليش تسالين عليه؟

– فد ردت اعرف شصار بعدين.

– البسي وتعاي اكو نسوان بالهول متانياتج.

– هسه.

راحت تنهدت وتحسرت بقهر.

لبست هدومي. جن لابسة ثوب عدام. هم احمر بس ملمع. ولبست شرشوبة تنحط على الراس للزينة.

طلعت عدهن سلمت عليهن. نبتني وحدة: عيونج فاهيات. اكو عروس بلايا كحل؟ امج ما اشترتلج سواكاتج؟

حجت اميرة: بطرك العباة اجتي يولي شتحجين. جايبها من الجول.

فكت حلكها: ول يبختج جايبها من الجول. غدي. شنهو كليلات النسوان ويدور الجول؟

اميرة: بعد ما تدرين حظ الكبايح بالسما لايح.

– اعلى كولتج يميرة. وحظ الملايح بالكاع طايح.

ضليت كاعدة ما ارد.

حجت وحدة: بس حلوة. شنهي ابو وهب شايب والبت ازغيرة؟

حجت عفاف: هو هالدورها. انت ما تعرفين الزلم ما تهمهم هالسوالف. المهم عدهم البت زغيرة تردهم لصباهم.

حجت يمي مرة: عدي كحل تريدين احطلج؟

– بكيفج.

طلعت من جنطتها كحل عرب وحطتلي. وطلعت حمرة حمرا حطت لحلكي وخلت شوية على خدي منا ومنا ودعكتهن.

حجت وحدة: يا ابتسام شسويت بالبت دخيل بختج.

– يا حلوة صارت مو احسن ما وجهه فاهي.

– يولي يا فاهي لغمطي. البت جانت شحلاتها.

– لا هسه العيون فتحت بالكحل والخدود صارن طماطة.

حجت: دعكيهن بعد يولي دعكي.

كمت ادعك بخدودي.

وضليت كاعدة. اللخ حجت: شو احسج ضايجة ومكهورة. شني مغصوبة على العرس؟

– لا.

– عجل شجايلج؟

– فد بطني توجعني.

ضلن يحجن بيناتهن.

شوي ليقاد وحدة كامت تقنيلهن وتنشدلهن وهن يصفكن. وحدة كضبت صينية واللخ شلعت القبق مالت الترمز وكامن يدكن عليه ويقنن.

صاح وهب: ابوي جاب طلي. ابوي جابلنا طليييي.

الجهال طلعت تركض.

والنسوان تصيح: يا شني ما شايفين طلي؟

طلعتله اميرة وعفاف يساعدنه.

ذبح الطلي وسلخه وكاللها: شكثر يحتاجلو ويصير؟

كالتلو: ساعة يجهز.

دخل سلم على النسوان من الباب وصاح: حاجة يمه. كومي احكمي خاف ما يدبرنها وحيدهن. كوميلهن.

كامت الهن. دحك عليه.

وصاح: شلونها ام فؤاد؟

– شايف الخير ومهنى ان شاءالله.

– الله يسلمج.

سالته وحدة: صدك من الجول؟

– اهلها عايشين بالجول. البت طينة من اهل الله هل رغبتها. تا نجيبلنا وحيد زغيرون نلعب عليه.

ضحكن وياه.

حجه: قدس.

انداريتله. اشرلي اجي.

مشى جدامي: تعاي الوث رجلج بدم.

جيتج خير. العملية تمت على خير. اشبعج لحم اليوم. ياهو الحاطلج ذن السواكات؟

– المرة حطتلي.

– تا تجهزين روحج الي الليلة. ها .. يا ملعونة.

حط ايده فوك جتفي ومشاني يم الطلي.

نسوانه طلعن جدر جبير وبريمز جبير نصبنه وغسلن اللحم وسراب تكشر بالبصل وتذب فوك اللحم والحاجة تحط دهن وتوجه بيهن.

طلعن جدورة بعد.

النسوان طلعن كلهن برا لان طفت الكهرباء وصارت ظلمة برا والمغرب كرب. كامن يعاونن بالطبخ. هدرن التمن والمرك على النار.

اذن المقرب.

اجو ازلام على ابو وهب.

صاح على وهب خاطر يجيبلهم بساطات بالبستان يكعدون.

وهب يجيب بساطات.

وسراب تجمع سجادات صلاة.

ونور تحضر دولكات ماي وتكسر ثلج من القالب البترمز وتحط وتكاسر.

وعفاف شالت المعجنة وراحت تخبر هي وعواطف مرة لخ. واميرة يم الجدر وام خطاب واكفة وتسولف ويا النسوان الحطلهن فراش وكعدن. اجت الكهرباء بس طابتلهن الكعدة برا.

اني واكفة ادحك احس ضايعة بنص هالهوسة.

وبنص هالهوسة. طب خطاب.

عد ما شفته طب من الباب. مدري شصاب كلبي. العرك ما ادري مني نضح بسرعة وكلبي جن يدك دمام وبطني عصرها الوجع عصر.

وكفت تبسمرت بمكاني ما اعرف شسوي. فد ادحك بلا شعور. هو ما انتبهلي. دحك بالزلم هز ايده مشى سريع لباب الدوانية دحك النسوان. بس ما صدت عينه عليه فات وما شافني.

ادحك ابو وهب. كاعد ليقاد.

ام خطاب يم النسوان. اميرة وهب البنات.

كلهم داير ما دايري. فد محد دحك بوجهي وشاف حالي جان عرفوا وجهي شح لونه.

طلع من الدوانية اجا وجهه بوجهي. كلت شافني وبطني صار بيها اعصار. فد ما ميزني اندار عني. ورد رجع راسه بسرعة يدحك.

وكف بمكانه.

طشت مال عرك انصب فوكي.

الحرارة البجسمي وصل لعيوني كامت عيوني تقوش.

تكرب مني: شتسوين هين يولي؟

شهكت وجنه ملك الموت يكربلي.

انداريت منه عفته وراي ومشيت للمطبخ.

صاح من وراي: ييييييييمه.

ركضت امه.

ظليت واكفة بالمطبخ اريد اكضب حيلي.

الكاع معد تشيلني. اسمع سراب تكل لاميرة: شبي خطاب؟

– شاف الشوفة وتصركع جنه حالي. اكولي اشتغلي بس اشتغلييييي.

مشت عنا.

طلعت من المطبخ للهول رحت لقرفتي.

اشهك وكوة اجر النفس من صدري. دحكت بالمرايا اللازكة بعجين بالحايط. المراية قديمة وبيها خيط سواد. عيوني مكحلة والكحل نازل لجوات عيني والحمرة على خدي وحلكي ملغمطات. ابشع مرة اشوف روحي بيها. مو بس وجهي مشوه. روحي تشوهت. كلبي تشوه. كلشي بيه تشوه.

النفس الاجرة من صدري احس بالموت وياه.

كامت دموعي تجري. الكحل سال ويا الدموع وصار خطوط سود بدموعي.

جاي ابجي ما احس الا خطاب دفع الباب وطب.

فزيت من مكاني ادحك بيه. حجه: خنتيني وجيتي وياه؟

طبت امه بسرعة: يول يالصكعة امشي خالك هين اطلع.

– انعل ابو خالي يمه. المرة مرتين تفتهميييين. شنهو مررررتي؟

– ولك اطلع راح تهجم البيت فوكنا.

– ينهجم البنية الي.

– هاي الاجت وياه خطاب يمه نسوان هين لا تفضحنا. خطاااب.

دفعتني. اطلعين من هين انت امشي.

جرني: وعدتيني ما ترجعيله. وعدتي تخابرين. وعدتيني ما تصيرين لغيري. وعوووودج وين؟

صفكت امه على وجهه ودفعتني من القرفة حيل.

ركضت للحمام. كام يصيح وامه تحط ايدها على حلكه وتحاول تطلع بيه.

سديت باب الحمام قفلتو وهو اظلم.

كعدت ابجي لكل حيلي.

لشوية اجت ام خطاب دكت الباب عليه بالحمام: يول هين.

– ها.

– فتحي الباب احاجيج.

فتحت الباب. حجت: ابخت الله اذا تعرفين الله تصعدين تفهمين وتكليله ما اريدك وابعد عني. اذا صل هذا حاله راح يشهرنا بين الاوادم. صعدي يولي.

– واذا شافوني؟

– انا اغطي عليج بس صعدي. هدي ولو ما هديتي لا اخلي ابو وهب ينحر اركبتج. صعدي.

سوتلي مجال وصعدت للسطح.

لكيته يدور بحركة. من حس بحركة بناحيتي دحك عليه بسرعة. شافني كربني بهمة: شعدج راجعة لهين؟

– ما رجعت براضي.

– لا تكولين غصبوني. انا كتلج خابري.

– ومنين اخابرك؟

– رقمي اطيته الج قدس. لا تحججين جاية تخونيني كبال عيني.

– امي وعدتني اذا اردله راح اطلكني منه.

– يا وعد يولي. ناصبلج عرس وعازم الوادم جنها فاتحتي. يولي مو عرسج. رايدة تحركيني لييييش. وعديتي ما تردين.

– والله امي كالتلي اطلكج منه. فد ردي.

– وراح يكربج ياخذج الليلة. يولي. اني الخذيتج واني الرسمت روحي بجسمج. شلون تنطينه روحج يولي. شلون؟

– لو ما رضيت بالرجعة شلون اصير الك. ما واح يطلكني.

– وراح يرضى لو خذاج.

– امي تكول اي. ما اعرف شنهو البراس امي. فد هي تكول هيج.

– قدس لا تجننيني. شلون ترضين تجين ويااااه. شلون؟

– لا تشهرني ابخت الله عليك. خطاب اني جاي اموت. لا تتصورني رايدته. والله من اشوفه يمي اتمنى اكتل روحي واخلص.

– جهزي روحج نطلع منا اليوم.

– لو جان هذا الحل. اني الاكلك اخذني وياك. لا تردني. بس لو شردنا هم ما يطلكني.

– ولا يطلك. امشي اكلج.

– اكتلني هين واكتل روحك احسن ما نجور بالحرام. احنا مكتولين مكتولين. تتصور لو شردنا ما يلكانا؟

– دحجي يولي بالحرام. لا ما طلعتيلي اليوم بالليل ومشيتي وياي لا اسمم عيشتج وعيشته ابالله ما اخليج تشوفين الراحة يوم لو اختاريتي.

– اني اخترتو؟ الله ياخذني لو جان اخترته.

اني مثل طير مذبوح بعشه. مالي حيلة ولا تكلي اشردي. شردتنا لو بيها فايدة من ذيج الشردة نهج وما نرد. بس مالها تالي. نعيش بالحرام ونموت مكتولين.

– سوالف المالج حيلة لا تسولفيهن وياي. والله لو ما جيتي وياي واخترتي لا اسممج. تحدرين هسا تلمين كل غراضج وتبلغيني وكت عشاهم اطلعين وياي. بسرعة.

– خطاب ما اكدر.

ابو وهب كتال وينخاف منه. اخوي راح بسببه. ولو شردت عنه يجري على اهلي مثل ما جرى على اخوي.

– مو كل عمرج تصيحين اخوتي عسرين. هسه براسي تا اطلعين المحنة يولي.

– يضلون اهلي. اكلت وشربت ونمت وياهم والعشرة ما تهون. واطي بيهم. لو شردت منه ما يخليهم بحالهم.

– عجل اختاري. يا انا يا هو. ولو اختاريتي هو وفضلتي اهلج علي؟ مودعة بالله. بس والله ما اخليج تتهنين.

حجاها وتعداني. انداريت وراه ادحج ودموعي تجري. مشى شوية واندار دموعه تجري: يولي رايدج تعاي.

شهكت وكمت ابجي وجسمي كله يهتز ببجاي. احس البجي يطلع من جوات روحي مو من عيوني.

رد واخذني بين اديه. اديه على عيوني وهو عاصرني بحضنه. حط راسه فوك راسي وكام يبجي مثل ابجاي.

بعدتو من عندي.

كضب وجهي. حجيت: والله مو بيدي خطاب. والله اتمناك. فد مو بيدي. امي الرادت هيج وناويه على كتله. امشي لامي وساعدها تكتله تا نرجع سوا.

جاي احجي صعدت امه.

من شافتنا هيج زلغت وجهه وشهكت: يصخام التصخمتو. واني الصعدتج اله. تبعدين تكعين بحضنه يولي.

عافني بسرعة ونزل وهو يمسح وجهه بعصبية وحركة. كمت بمكاني ابجي. حجت: نايم وياج صدك يولي؟

دحكت بيها. امي القصبتي ارد. والله ما رايدة ارجع لهين.

– يولي احجي كاربج صدك.

هزيت راسي واني امسح بوجهي. لطمت وجهه: يولو لا. ما بليتونا بمصيبة ما ترتاحون. شلون كربج. شلون اطيتي روحج يولي. مو مهجومة معرسة انت. يمتى اطيتي روحج؟

– سالي هو.

ردت امشي.

جرتني : يولي ولو كربج اليوم ولكاج مو بنية

– يعني شنو يلكاني مو بنية

– خله يكربج ولو لكاج بهالحال لا احط الورور بيدا واكله اغسل عارها هالعار بت الجول

حجتها ونزلت

مسحت وجهي ونزلت وراها بسرعة

صارت نزلتنا سوية ابو وهب طلع بوجهنا حجه : شنهو يم احمد وينكم

– البت هاي اختنكت وصعدتها فوك هم احاجيها وهم انصحها تصف وياك واطيعك

دحك عيوني مورمة حجه : شجالو حالج يولي

– بطني توجعني جثير

– وشجاها بطنج بهالساع

– ما ادري

حجيتها وتعديتو .. كضبني : حالج ما يعجب وانا الما يعجبني اعدلي بس بطريكتي .. خوش

هزيت راسي

تبسم وحط ايده على جتفي : طبختو للطلي وكلتلهم لحمة الفخذ محد ياكلها غير قدس .. دهينة وراح اطيب بطنج .

– شكرا

– غسلي هالهوسة العلى وجهج وتعاي يلا خاطر نصب

– ماشي

رحت قسلت وجهي بالصابونة

ومشيت برا .. دحكت الدوانية ضواها مسدود .. تعديتها ورحت يم الجدورة .. ام خطاب واكفة دحكت علي من فوك لتحت .. تنهدت واندارت عني

جابوا صبوا بيهن تمن وفوكهن مرك وحطوا لحم وغطوا بخبز ودوا صينيتين للزلم .. وتلث صياني للنسوان .. فرشنا سفرة بالهول والنسوان كلها التمت

صاح ابو وهب كبل لا اكعد : عشاج لوحيدج لا تكعدين عزلتلج شلون لحمة اطيب كلبج

– اروح لقرفتي

-روحي اذا تريدين الله ذاب صرتج بهالغرفة من اجيتي ولهالساه غرفني ويا غرفتي

حجت وياه وحدة

احنا النسوان سرنا بالغرف

رداها : ابالله من جبتها ولهساه غرفتي ويا غرفتي

حجت اميرة : عجل الما شايف شيسوي بت وجايبها من الجول منيلها غرفة كبل وتصيرلها ..

ردها : كملي عشاج يولي

حجت المرة اللخ : عجل اهلها وينهم ابو وهب ليلة عرسها ولا واحد من اهلها هين شنهي ميتين

– انا من زمان ملجت عليها لجن صارت مشاكل ورديتها من ردت اخوها مات جتلوه الامريكان وامها كالت خذها بلا هوسة ما بينا واحد له خلك يفرح

– مساجين

– اي والله بعد قسمتهم شتسوي

– الله لا يطي هالامريكان ذول ولونا

– الله كريم نكضيهم ما يضلون

– ها

– والله وداعتج لا نردهم لبطون امهاتهم .. واليوم اول الغيث

– شنهو الصار

– فتحي الاخبار وشوفي الدنيا مكلوبه

– عليش

كام يحجي وياها

اني كعدت بقرفتي .. شوية قاد

طب ابو وهب وشايل صينية متبلة لحم وحجه : فتحي المبردة : خل نتعشى انا وياج

حطه كبالي

واني كمت فتحت المبردة .. من اشتغلت ولفحني هواها .. جن ريحة خطاب بيها .. انعصر كلبي بريحتها .

انداريت .. كعد هو على فراشي وسرفن الردن

واشرلي يمه : كربي اكعدي هين

كعدت يمه .. ريحة اللحم طبت بخشمي

لاعت روحي .. كام يكلب بالتمن بيدو ويخبط شال وحط بحلكه ونكث من ايده بالماعون ورجع خبط وجر من اللحم وحجه : فتحي حلكج

– ما احس مشتهية

– دفتحي حلكج اكلي شنهي ما احس .. فتحي

وكلني بيدة .. لعبت روحي

لجت اللكمة بالزور .. فد احس روحي تريد تطلع

كام ياكل هو ويندسني .. كمت احط بحلكي فد ما جاي اتحمل الى ان حسبت روحي راح ازوع .. كمت بساع صاح : وييين

فتحت الباب ما لحكت زوعت بالباب على صفحة .. هو كام يصيح والنسوان كشت روحهن جاي يشربن جاي

ما بطلت روحي زواع كمت اذب من عمدتي ومرار كتلني احس روحي تطلع واني ازوع حتى دموعي جرت .. كمت كوة اصيح اريد ماي

صاح : يول سراااب جيبيلها ماي من خ…. بهالمسية الكلها زواع .. خلصتها علينا بطني وبطني ليما كششتنا منا الاكل

جابتلي سراب ماي ..

شربت .. صاحت عفاف : امسحي زواعج لعبت ارواحنا من كون كبر

حجيت ويا سراب : بيمن امسح

– اطيج وصلة زايدة لمي ورجعي عليه بوصلت المسح مسحي لماي وتايت حتى لا تضل زفرة

– انطيني

انطتني الوصلة مسحت ونظفت

وديت الوصلة للحمام .. طفت الكهرباء .. ضليت واكفة بالحمام اخذت نفس .. اسمعهم يريدون يطلعون.. كامن يسلمن

دنكت للوصلة مصتها بالظلمة وحطيتها على صفحة .. وطلعت اتلزم بالحايط .. كضبت احد .. حجه وهب : ها ياهو

وخرت منه .. اجت الكهرباء

دحك بيه ومشى عني .. رجعت طفت الكهرباء بسرعة .. وكفت بمكاني .. اجت جاي امشي لقرفتي .. طفت

دخل ابو وهب يصيح : ولد القنادر ما جاي تشوفون الكهرب تروح وتجي … طفرا الزايد ولد الجلاب

تراكضوا الكل اطفي بالظلمة

اجت اني واكفة كريب من باب قرفتي .. دحك عليه : شلون صرتي

– احسن

تعداني ومشى شقل التلفزيون .. مشيت للمطبخ حتى اشرب ماي .. سراب جاي تقسل الصحون حجيت : خطاب موجود

– لا طلع ليش

اندفعت من وراي .. فزيت

طلعت ما خطاب دفعتني وهي تمشي وتتخطاني .. بمعنى سمعتني .. ظليت ادحك وراها … صاح ابو وهب : قدس

مشيت للهول .. اميرة مدنج جاي تجر الهول تمسحه .. مشيت صاحت : وعمى ما تشوفيني جاي امسح

ابو وهب : على كيف بختج يولي .. جيبيلي ماي قدس بس كون بارد

رجعت للمطبخ جبت الدولكة مالت الثلج ترستها من الحنفية وزوتها ماي وخذيتها اله .. شرب بالدولكة

ورجع يدحك بالاخبار

دحكت .. اخبار عن انفجار وشهدا ودم وهوسة .. هو يدحك وخابر واحد يضحك ويحجي وياه بلغز ويباركلو

سد الخط وكال : كربي هين يولي لشو كربي هليني اتهنى بهالخبر

كعدت يمه اخذ حنجي كضبه وباسني بخدي وكال : وجه خير عليه

اميرة صارت عيونها بكصتها وعفاف جانت كاعدة .. كامت بسرعة وراحت لقرفتها .. ام خطاب كالت : انا رايحة اقرا كم سورة من الكتاب الكريم ما طولها اكو كهرباء

ابو وهب مركز بالاخبار .. حجت اميرة : ليلتك يم عواطف

ما رد عليها .. حجت : منهو بحالي بعد لا يسمعلي ولا يشوفني اليكول جلب بهالبيت اني … مصطفى محمددددددددددد

ركضوا جهالها كدامها صفكت ابنها على راسه : دمشي امشي فوت جوا

وكع الجاهل على وجهه صاح ريسان : شجالج يولي اكوم اكسر عظامج هسه

دنجت لابنها وجرته من هدومه وشالته : امشييي

دخلت جهالها وصفكت الباب وراها صاح : هااااه مو اكوم امييييرة

اندارلي ويقمزلي : غارت منج

– والجاهل شنهو ذنبه يكع هالوكعة الكشرة على وجهه لين قارت

– اميرة تعشكني اكثر وحدة تحبني بنسواني

وانا هم احبها واحترمها .. بس راح احبج اكثر زعم انت الزغيرونة والزغيرون دومه مدلل

ما رديت

حجه : سبقيني للغرفة واكو ثوب بالعلاكة جبتو اليوم رايد اشوفج بيه

– ابيض جنه حرير

– اي هذا

– فد هذا اتك … العفو هدوم كصيرة يعني

– رجلج انا والي حك اشوف هاللحم الابيض واتهنى بيه .

– ما عرف البسو

– بس البسي يولي مثل الثوب شنهو الما تعرفينو

– فد استحي ما احب

– امشي عاد رجلج اني لا تكولين استحي منا وجاي .. امشي لبسي وانا لاحكج

مشيت للقرفة .. خذيت الثوب ادحك بيه شلحة كصير شلون البسه ؟ توني دخلت فات وراي : بعدج يولي ما لبستي

– فد كصير

كضب ثوبي ورفعه .. لزمت ثوبي : لا

خزرني وصاح : هششش لا تبعدين ايدي .. هالمرة سويتيها مرت الاخرة لو عديها اصير وياج مو خوش

حجاها واندار .. طفى الضوا وكرب داس دكمة المبردة اشتقلت .. من اشتقلت ودب هواها .. غمضت عيوني وجن خطاب يمي

كضب ثوبي رفعة

اذا انهره يكتلني واذا اعوفه تلعب روحي منه

كشعر جسمي ودموعي هلت .. غمضت عيوني وكمت اجبر روحي اتخيله خطاب حتى ارضاه وما ابعدو

جردني وما لبسني الثوب انهد عليه

فد ما يصير خطاب .. بحضن خطاب ما حسيت ولا شعرت بشعور الخوف .. وياه وعلى كثر ما تيهني بهواه .. كلشي وياه جان حلم ما بيه وجع ولا خوف .

فد هذا لا .. احسه شايب

كام يعض بزني ويعصر بيه .. قصبا عني ما اتخيله خطاب .. اتأذيت ولعبت روحي : فد ايدي .. جاي توجعني

– اكربي يولي

يجرني حيل وذبني للفراش .. كام يحاول وياي فد روحي ما تهوى .. استلذ من اني ابعده مني كام يزيد ويصير اعنف .. كمت ابجي حيل ..

عد ما كربني .. استقرب وكام مني

– يولي انت بنية ؟

– شنوه ؟ فد وخر

كام مني وذب الجرجف فوكي وشقل الضوا كمت اقطي روحي .. جر الجرجف مني : دم ما يطلع منج ليش ؟

– ما ادري

ذب روحه وكام يعصر ويجر بشعري .. كمت ابجي حيل ابعد بيه وهو يكضب بيه حيل .. دفعني : يولي مو بنية انت ويامن لاعبة كبلي

– ما عرف شلاعبة

جرني من شعري حييييل : يولي اتمشيهن براسي سوالف الثول .. ويامن نايممممممة كبلي احجيييي

– ما لاعبة ويا احد

ضربني جف ورجعني للفراش

بسرعة جريت الجرجف تقطيت بيه .. كضبني من راسي : يولي جاية تلعبين عليه بت القندرة لج ياهو اللاعبة وياااااه احجي

– ما لاعبة ويا احد والله

جرني من شعري ودنج عليه يخزرني ويحط عيونه بعيوني : احجي الصدك لا تخليني هسه احط جيلة براسج وانهيج

اندكت الباب .. صرخ ابعدواااااا من هين

حجت ام خطاب : شجاريلك خلنا نفتهم البيت انترس صياح

ذب هدومي وصرخ : لبسيهن

لبست هدومي وهو وفتح الباب وطلع .. وكفته ام خطاب : شنهو الصار

عواطف وعفاف واميرة وكلهم واكفين يريدون يعرفون شكو .. كمت البس بسرعة وهو دفعهم ومشى .. توني كمت ما احس الا هو يطب وبيده المسدس

من شفت بيدو سلاح كمت ارجف من الخوف .. كضب راسي وحط المسدس براس : يولي بالله لو ما حجيتي وكلتي ويامن مصخمة لا افرغ هالمسدس براسج ااااااااحجي

– ما عرف والله ما عرف

ثار طلقة جابها بالكاع خاطر يخوفني

كمت اصرخ والبيت انخبص خبص .. صياح وبجي وهو يصرخ ويكلي : احجيييييييي

جرني من شعري سحلني من القرفة والمسدسد بيده كم اجر بروحي منه دفرني برجله وهو يفشر عليه ويجرني ويكلي : اليوم ادفنج والله

كمت اصرخ من كل كلبي : عليكم الله خلصوني والله ما مسوية شيييييي خلصوووووووني …

وآنا بروحي حزن ديرة

وملامح خوف

وحرب چذبة، وحلم تايه

ونهر ثالث حفر خدي

غريب بكاع متلمني

چم ليلة

اذب دموعي ع المامش

ولا ادري.

كمت اصيح من كل كلبي ( الحكوني )

والكل يتطمش بلايا ما يتكرب .. اصرخ واجر بروحي منا .. فرفحت بين اديه وهو يجر بيه من البيت

رادت تدخل عواطف ..

كضبتها الحاجة : كضبي بزرج وردي دارج .. بت الجول ترد للجول لا توجعون روسنا بيها

كام يجر بيه للبستان

محد بيهم كرب وكاله افتهم منها

محد خاف الله بيه وحاول يمنعه

حسيت روحي بنص ذياب وكلها فرحانة بدوستي هاي والكل ما راقبتني بهالبيت

كضبت بالباب وهو يجر حيل من شعري

واني اصرخ عليهم ( عليكم الله لحكوني ما ارييييييد اموووت )

اندارت الحاجة وصاحت : كلمن لغرفتها ياله مرة ورجال يتصافون

وهو يصرخ : كح... ويامن نايمة ويا غيريييي ذبتج امج علي عاااااايبة اليوم ادددددفنج

ضرب اديى بحافة المسدس فلتاهن

وما يحس الا واحد يجي من ورا وهو يجرني من الباب ويدفعه عني ..

تكوم ابو وهب بالكاع والمسدس فلت من ايده .. ويا الدفرة صوت خطاب صدع بذني : حدك عنهااااااا

وجر المسدس من الكاع

ام خطاب من شافت خطاب بهالحال انجنت ركضت عليه وابو وهب كام لحيله .. خطاب سحب اقسام وهو يكله : خذيتها مني وتريد كتلها .. خذتها ليييييش لييييش

ام خطاب : المسدس عن خالك وووووووولك

ابالله ارميكم كلكم واخركم هييييي واحرك البيت بجثثكم ...

جاي يصيح ما يحس خطاب الا وهب كمز فوكه ويتلاوى ويا ع المسدس .. اتراكضن النسوان كلهن

وابو وهب ذب روحه على خطاب

هو ونسوانه وابنه لفوا خطاب لف وجروا المسدس من ايده .. ام خطاب فرفحت ذبت روحها ذب على ابنها

ادحك عليهم بهالحال مرعوبة ..

معدتي كامت تكلب .. احس المي ينزل من حلكي بلا شعور .. العرك يجري من جسمي مثل الماي

هوستهم جدامي كمت احسها هوسة ما استوعبها .. اريد احرك رجلية الخوف والرعب شل رجلية ..

ام خطاب دفعت ابنها من الهول وجرتني وابو وهب كضب براسي .. وهي صارت بيني وبين ابو وهب

هو يجر وهي تهدي بيه

رد خطاب ووهب تلكاه يتلاوى وياه

جابة بضربة على عيونة .. واندار على ابو وهب تلازم وياه

كامت ام خطاب تصرخ بنصهم

ابو وهب يفشر ووهب يصيح وخطاب يصرخ من كلبه من عرفت اسمع ياهو منهم .. فد اجر بروحي منهم

ما احس الا معدتي كلبت

وهم جاي يصرخون زوعت عليهم .. كلهم تطافروا

كمت اذب من راسي وحاطة ايدي على صدري احس روحي جاي تطلع من جسمي

كامت ام خطاب تصيح ( من غضب الله على راسج من بت خليت الوادم تتشابج من الروس يولي الله يصكعج ولا يخلييييج .. كربي هيين )

اسمع ابو وهب وهو يكلها : لو جان ابنج الماخذها لا احط الجيلة براسهاااااا وبراسسسسسسه

حجاها وصرخ يريد يكرب مني

اني اكح واهوع .. عصبي ويمشي بحركة وهو يريد يكضبني بعصبية من راسي .. داس ع الزواع وفات كول .. كضب بثوب وتزحلك فوك الزواع

ام خطاب تجر بابنها يصيح

على طيحت ابو وهب صرخت واجته

هو كام لحيله .. شلون وكع بزواعي .. كضب براسي يجر بيه جوا

النسوان كلهن فلتن من شافنه بهالحال محد بيها كابلته .. خطاب يصيح برا وامه تمنع بيه

خذني صعدني فوك ...

خطاب : لو كضبها لو كتلها وحك الله بعرشه اكتلا ...

يول ابعد منها تمنجدنا البت مرتو استر علينا

راح يكتلها وانت واكفة جدااااامي ابعديييي

انا اروحلها انت لا تفوت من توكف وياها ما تشفعلها يكتلك ويكتلها

هو الباكها مني هو الجنى على روحه ولو جانه خالي وحقير ثلثين الولد ع الخال والله لا اهدم كلشي عمره فوك راسسسه

حجا وهو يريد يتعدها كامت تجر بيه : استر عليه ابني مالك غرض بيها هو وياها ينجازووون ولك خطاب راح اطك واموت والسبة انت يمممممه

بعدها وراد يفوت كامت ادك عليه وتجر بيه : انا اصعد بس انت ابعد ولك ابعد يهالصكعة يربي انولينا

بحك لاحمد وحك السنين الضاع بيها لا سوا بيها شي لا انت ولا اخوج ولا هالبيت يسلم من شري ... اصعديلها راااااح يكتلهااا

اطلع وانا اصعد .. ما اصعد ولا اخليك ما طولك هين اطلللع

عافها وراد يصعد

كضبت بيه عواطف وامه يجرن بيه حجت ام خطاب : يولي اكضبي اصعد لابو وهب اشوفه ، ساعة الكشرة عسنها يوم اللفتنا بت وسام

صعدت فوك ودخلت على الغرفة ..

لكت ابو وهب يخنك بقدس ويكللها : ويامن جنتي احجيييييي المن اطيتي روحج

ابخت الله بسك ، عنها البت راح تمووووت

جرتها من بين اديه وهو يكللها : تالله لو عرفت الغالط وياها ابنج لا ادفنو كبال عينج

ودي على امها تشوف حال بتها وتاخذ منها الحك .. وسام وبتها رايدات يشبجن لحية بلحية .. مننن خطاب من صوب ووافكن عليك من صوب المثلهن وين يعرف الشرف .. ردها لامها وفكنا .

اذا ما حجت وكالت ويامن غلطانة لا اليوم انهيها

ما راح تكللك ولا راح تشفي كلبك بجواب ردها لامها وحاسبها شلون اطتك بت عايبة .

لا اردها ولا اطيها ابد والله ادفنها هين بت ***** انا تلعب علي بت الجول وتغشني ... لا اليوم اربيها

قدس تبجي بزاوية ولامة روحها

وابو وهب يصارخ ويريد يكضبها .. وام خطاب صايرة كباله وتبعده عنها .. طلعته من الغرفة وهو مستمر يصيح وهي تكله : بت الجول تسوى تعمل بحالك هج ، دحج روحك اعلى ساعة يوكف كلبك ليا مال .. لوسام لو لبتها

يا يابه يابوية .. يولي جابليني وكليلي شلون لو خطاب الكاربها ترديني لو حطيت الجيلة بكلبه

خطاب ما يسويها .. خطاب مثلك مغشوش بيها .. فكرك وسام غشيمة ساعة التطيك بت بكبر بزرك لا مهر ولا شروط لو ما جانت عايبة .

لونها عايبة جان كالت

رد البت لامها خوية وادحر هالمصايب عن هالبيت ورد الماي لمجاريها .. شحاليلي من يوم الاجت ولليوم وانت وابني غديتو دماية

ان جان الغلط من ابنج تالله ما يخلص من ايدي

اكسملك ابالله خطاب بري من اثم هالزانية .. خطاب ابني واعرفه ما يسويها رادها ومن ما صارت ايس منها .. بس هوستها هاي غوى وانت مثل ابوه ان ما حملته ياهو اليحمله انا ادري تعدى حدوده وياك بس انت ابو والابو يعفي

لا بالله ماني عافي .. خلها ابالج لو جانه هو الغلطان وياها لا افني من هالكاع .

حجاها وكام نزل على الدرج وهو يصيح : باب الغرفة الفوك لو احد كربها لو انطها رشفة ماي لا اصلبو صلب وانعل والد والديه ... سمعتوووووا

محد رد البيت صار هدوء

ام خطاب نزلت وراه راحت لابنها الكاع بغرفته على نار يتنطر خبر والغيض بكلبه طافح ويريد يهج ويخاف بهجته يعمي عليها وكاضم غيضة بصدرة مثل القابض بيدة جمرة وعاصرها .

دخلت عليه امه .. كاملها بهمة يسالها بلهفة : شسوالها ؟ كون اذاها وحك عرش الله احركه

دحج يول كلبي الفضي چل من منك لو ما نهيت عن هالبت وبعدت عنها والله يا خطاب لا ادعي عليك من كلبي واتبرى منك

احجيلي شسوااااالها

حبسها ونزل عنها وباجر يودي على امها يستفسر منها ..

دحجت منا منا

مشت ردت الباب وتكربت منه : يمته خذيتها يمصكوع البت مو مرت خالك شلون تكربها وهي على ذمته

البت الي وتضل الي ولو ضلت هين اقسم بالله ما اجوز منها .. لا كل ليلة تجريني من فراشها ولا اجزعكم وانعل الساعة البيها صرت منكم ...

كلكم خنتوني كلكم

عاملتكم ومشيت وياكم مثل الماي

لا فد يوم عصيت خالي ولا مشيت بغير مايج احمل الغيض منكم واسكت وما احجي .. بس توصل خالي يحاربني ببنية حبها كلبي وانت تصفين وياه والله اجزعكم

ولو عملت هج تخلص ؟ يول تنجتل وتضل بس الدموع سجابة عكبك جوز من بت وسام ولك جوز اشفت منها وهايم بيها شو دثو ها عرض افادها يمصكوع يول

كلمة وحدة ضد خالي ما حجيتي جاي تساليني ليش احبها .. هالليش احجيها لاخوج كليله من دون بنات الدنيا كلها ما لكى غير الانا ردتها .. ورايدة تسلمين مني والله اجزعكم

وحتى هي اجزعها

من اختارت اتضل وياه وتخاف على امها واهلها منه واطت بيه .. والله لا اراويكم الويل .

حجاها وطلع من الغرفة

وامه ادك على راسها من هالضيم هاذ

مشى الليل وخيم هدوئه على هوسة الكلوب

خطاب هج من البيت

وام خطاب عين على باب الكراج تناظر خطاب وعين على الدرج تخاف لا ابو وهب يصعد ويسويلها شي ويعلك ابنها ويا خاله .. ابو وهب ركد بالهول دايخ بمصيبته .. والكل هدا لحد ما صارت الساعة ١٢ وابو السحب طفى الكهرباء وخيم الظلام ع البيت .

صبح الفجر

والكل نايم بس خطاب كاعد برا

يخاف تغفى عينه ويكتلوها وهو السبب بكل الجاي يصير بيها ...

كعدت اميرة اول وحدة

دحكت ابو وهب نايم على البساط بالهول

عواطف وابنها وهب وبناتها نايمين بغرفتهم

ام خطاب خذاها النوم .. مشت برا لكت خطاب : بختها جبير هالبت ومناطر للصبح تخاف جتلتها

اندار من سمع الصوت

شافها اميرة تنحى عنها وذب الجكارة وكام

مشت وراه : اذا جنت رايد تشردها وتشرد وياها اساعدك

مشكورة جهودج

لا تتامل ما راح يطلكها ولا راح يذبها .. شايب مثله وحصلت بيدة وحدة بكد بزرة ولحمتها ترفة ما راح يعوفها واتذكر احجايتي

امشي عني لا افرغ هم كلبي بيج

انت تريدها وانا ما احمل شوفتها هين خلنا نتساعد

احط ايدي بيد ابليس واتساعد وياه الا انت

انت الخسران

جر باكيت الجكاير من جيبه سحب منه جكارة ورده واخذ الجداحة يورث اميرة ادحك عليه ..

سحب نفس من الجكارة ودفع الدخان واندارلها: شنهو التكدرين تسوينه؟

– الما يخطر على بالك اكدر اسوي.

اتبسم باستهزاء: اذا جنتي هيج كوية وكادرة امنعيها تصير ضرة على راسج وابعديها من البيت. لا تصفطين عن روحج بطولات وانت صفر على الشمال بهالبيت.

حجاها وعافها وابتعد.

حجت وراه: تشوف والايام بيناتنا.

ما رد عليها. رجعت للهول ابو وهب نايم والكهرباء طافية. راحت للمطبخ كامت تشتغل وتسوي هوسة خاطر يكعد ابو وهب. وكعد روحه بكصته ما يتحاجى.

صاح: ياهو البالمطبخ؟

طلعت راسها: امرني.

– جيبيلي ماي بارد.

– الثلج مايع بس الماي بعده بيه خيط بروده.

– كلشي الجان جيبيلي ماي.

صبتله ماي من الترمز جابتله. شرب.

وهي تكله: الف عافية ان شاءالله ينحرك كلبه كون كلمن حرك كلبك. ليلة ما تهنيت بيها مثل البشر سودة عليه. فوكها نايم هين بالحر.

– اي والله ما طلعت ليلة يلعنها من بنية. انا تسوي بحالي هج؟

– ما عرفت ياهو الغلطانة وياه؟

– اخبر امها واخوتها يجون ويشوفون صرفة وياها ولو طلعوا غاشيني تالله لا اندمهم.

حجاها وكام صعد فوك. فك الباب لكى قدس متمددة بالكاع وفاكدة. دحك الكاع مدمرة. هم مزوعة: يلعنها من بنية من ساعة الجبتها ولهساه ما شفت منها غير الزواع.

نزل نسوانه كاعد.

خلص ريوكه وفضوا البيت وهو حذرهم يصعدون فوك ويصلوها. خطاب بالدوانية كاعد. عزلتله امه اكل وجابته. لكته متمدد ع القريولة وحاط ايده على عيونه. من حس احد اجه اندار. شاف امها. كعد من مكانه ونزل رجليه من القريولة: شسوالها؟

– ما سوالها شي راح يخابر على الكشرة امها واخوتها هم ياخذوها ويغسلون عارهم عليش يتلوث بدمها.

– بعدها محبوسة؟

– مندفسة فوك ما ادري عنها.

– وديلها ماي.

– ريوك ما تريد اوديلها. تالي الشيب اصير خدامة لبت وسام.

– الجاي يصير بيها كله انا سببه.

– لونها بت بيوت مستورة ما اطت روحها لزلمة هواها.

– لا تودين. انا راح اوديلها.

– اكعد عنك يول رايد جلطتييييييي يول فتيت كلبي التالي وياك شلون.

– اذا ما تبعديها من هالبيت ما اجوز منها والله.

– البت صارت مرت خالك استحي روحك يول ابوك ما جان ردي اعليمن طالع انت.

– على اخوج مو هو الخلى عينه على وحدة ابن اخته عاشكها. انا رايد اطلع عليه واخلي عيني بمرته ومو بس احط عيني لا اشاركه بفراشه والله.

– والله التحلف بيه لا اكصبك واكتلك بيدي ولك خاف ربك يول تكرب مرة متزوجة شنهو انت.

– روحي سوالف الدين يم اخيج الفرحان امس مفجر نسوان وجهال بسوك. يمه ما تفكرين بالله اللحم التهبدين بيه وتاكلين اطيب من سوالف الله. بس يمي تسفطيهم.

بالله لا اكفر بالدين الانتم على ملته.

اصير ملحد ولا اصير منكم يا سفلة.

دفعها هي والماعون وطلع وهي تكول: شلون الله ما يكلبها بينه وهالولد هذا حتى بالله ما يامن. يطركاعة السودة الطاحت على روسنا.

راحت لابو وهب سالته: خابرت اهلها؟

– محد منهم يرد لا امها ولا اخوتها.

– شيلها وذبها عد اهلها شعدك مخليها هين.

– رايدتها لابنج سليمة.

– غدي عاباني الله لو ردتها. انا اهوى بت وسام مرة لابني شجرى بحالي.

– حجيتي ويا ابنج ان جان هو ورا السالفة؟

– حرام يحلف كل يمين هاكبره هو ما كاربها ولا واصل ليها البت مشوهة من البيضة.

كام منها ومشى.

صعدت لقدس لكتها كاعدة تبجي: وتبجين يول فوك شينج. شبجتي الخال ويا ابن اخته وكعدتي تتمسكنين. يولي ما خفتي احد من اطيتي روحج ما فكرتي بسمعة اهله شرف اخوتج عرضهم لو مالكم شرف.

ما ردتها قدس.

تفلت عليها وطلعت سدت الباب وكالت لابنها: انطيتها ماي واكل بلايا ما يدري خالك بس لا تكرب ولا تحط روحك.

قدس: انحبست بهالقرفة الفارقة.

لا بيها فراش ولا مروحة. روحي راحت بيها.

مدري شصابتها روحي كل ما ادير ازوع. ومن فرقت بطني كمت بس احاول ازوع وما يطلع وياي بس روحي تروح.

ابعد روحي خاطر ما اشتم.

بس القرفة تلوثت كلها وحالي ما يسر.

الليل كله ابجي بالظلمة. لحد ما بهتت روحي وفكدت.

حسيت على ريسان من طب يدحك بيه ما كعدت خاطر لا يرد يكتل بيه. من رد الباب كعدت.

افكر بروحي وتاليتي ويا هالحال ما عرف مصيري شنهو. راح يكتلني يخليني خطاب شنهو الراح يسوي ما عرف.

كمت اتذكر موقف خطاب امس.

من بينهم كلهم فد هو جان فازعلي. لولاه الله يعلم بحالي جان ساعة قضب حط جيلتو براسي وجتلني.

على كثر ما عركت وصيحت وبجيت العطش لاحني اريد شربة ماي ماكو. ومعدتي فارقة وبس اهوع.

اصبر بروحي فد بديت اتعب.

ساحت روحي اريد احد يطب يسال عني ماكو.

لا احد صعد ولا احد كرب.

مشى اليوم ومحد بحالي.

صار العصر وهم محد منهم بين ولا ابو وهب صعد. حتى امي ما جت ولا كربت.

العطش وصل بيه مراحل صعبة.

كمت ما اكدر ابلع ريجي على كثر العطش.

متمددة بالكاع وانوح واصيح: فد اريد مااااي عطشانة. جيبولي مااااي.

محد بحالي.

منبطحة بالكاع وروحي ذايبة وتمر ذكرياتي كلها جدام عيني. شكثر جنت ما راضية بعيشتي واني اكل وانام. صرت اتمنى ايامي ذيج.

ابجي بدموع واكله: ربي ما راح اتكبر عليهن. والله فد ردني حت لو اخوتي يطكوني انا ارضى فد كافي هين تعبت.

لليل فتح الباب ابو وهب.

مالي كوة ولا روح حتى ما دحكت بيه.

كضبني من راسي وكال: تحجيلي الصدك اهدج ما تحجين راح تضلين هين منا ليما تيبسين من العطش وتموتين.

– فد اريد ماي راح اموت.

– ويامن نمتي كبلي ولج. احجي.

– راح اموت ابوس ايدك فدوة فد مايييي.

– انطيج لو حجيتي ولو جان الحجي ما يعجب بس احجي وكليلي وريحي افادي الكاربج ياهووو.

– اريد ماي عليك اااااااالله.

كام وانهد بيها يخنك ويعض ويدفر بيها.

شوه وجهه بس يريدها تحجي وما حجت لحد ما تاخت بيده. دفعها منه ورد طلع وسركى الباب ووصى الكل محد يكرب منها.

خطاب يوصي امه تنطيها اكل وامه تكله (اطيته) وتجذب عليه خاطر تبعده.

ابو وهب ما خابر امها راد يضغط عليها ويعذبها حتى تعترف بنفسها وتكول اذا جان خطاب الماخذها لو غيره. بس ما حجت.

بالليل وعد ما هدت الدنيا.

وابو وهب نايم بالهول. خطاب تسلق الحايط وعبر من السياج جلب بحايط السطح وعبر فوك. دحك للدرج محد اكو.

كرب من الباب. رايد يحجي وياها.

الدنيا طلمة والكل نايم. فتح السركي على كيف ودخل.

داس دكمة على تليفونه وضوا بالغرفة.

قدس فاقدة ووجهه مشوه من الضرب. كام يقرب التليفون على وجها ويدحك عدل. شافها مشوهة. كام منها يفرك براسه. يفتر منا ويجي منا. راد يفتح الباب وينزل بابو وهب يكتله.

هد الباب ورجعلهت تقرب من عدها: قدس. قدددس.

يحركها كامت تون. حط ايده على حلكها: يولي كعدي احاجيج قدس.

– ماي اريد ماي.

– كل الجاي يصير وياج من وراي. لا من وراج يولي كتلج ما يرحموج دحكي شمسوين بيج. كومي وياي لا تبقييين قدس.

– ماااي ماااي.

– محد منطيج ماي؟

– اريد ماي راح اموت.

– يولي خل اخذج ونروح منا كومي.

– اريد ماي.

ضل يدحك بيها دموعه تجمعت بعينه.

كام منها وراح طلع من الغرفة. ومشى للسطح نزل من نفس السياج وطفر بالبستان. ترس البطل ماي واخذ كرصة خبز لفهم وخلا البطل بجيب والخبز بجيب ورد طفر للسياج. صعد للسطح. محد اكو.

فات للغرفة الهي بيها ورد الباب.

تكرب منها حط ايده جواها ورفع ظهرها خلاها بحضنه وفتح بطل المي. حطه يم حلكها. كضبته تشرب ويوكع على هدومها.

قدس: ميت وحييت ببطل الماي الجابه اليه شربت حيل لحد ما رويت رجعت راسي من البطل.

احس روحي جانت زرعة يابسه وروت.

الماي يجري بعروكي. بردت على كثر ما رويت.

حجه باذني: قدس.

وعيت البحضنه خطاب. اعضائي بدت تشتقل كمت اسمع كمت اعقل كمت اشم. عرفت اليمي خطاب وسمعت صوته. وشميت ريحته. درت راسي بهدومه ولزمت بقميصه حيل وكمت ابجي.

ما اشوف شي.

ظلمة فد احس بيه. روحي امنت بنص هالوضع الصعب. ابجي بخنكة وهو احس يبجي.

كام يمسح بوجهي ويهمسلي: كومي وياي نروح منا قدس كافي ابخت الله خلصي روحج وخلصيني. ما راح يفكون منج لحد ما يكتلوج كومي.

– ضل يمي لا تروح.

– يمج اني يولي بس كومي وياي.

ابجي بخنكة وكوة اهمس واحجي.

اريده حيل من كل كلبي. فد هو مو مالي ولا الي حك بيه واني بهالوضع تهت اخلص روحي واشرد وياه واعوف اهلي والعيب والحرام وراي لو اضل بنص هالنار احترك كل يوم؟

لازمة بيه حيل. وخاتلة روحي بروحه.

كام يمسح بوجهي ويهمس ورفع ظهري اله. كربني منه. نفسه صار كريب عليه. طب بروحي.

حط شفته على شفتي وكام يبوسني.

بعدته مني: خطاب روح لا احد يشوفك.

يهمس وهو وجهه يم وجهي ونفسه ويا انفاسي: ما اعرفج بهالحال امشي وياي.

– خطاب ما راح نكدر نعيش.

– راح نعيش اوعدج نعيش بس كومي.

– روح خطاب فدوة لا تزيد الوضع فوك ما هو صعب.

– قدس لا تموتين كلبي يولي كومي وياي والله يكتلج.

– خطاب كوم منا روح. عوفني.

حاول وياي راد ما رضيت كمت ادفع بيه ووخرت منه. عافني وهو يكلي: وعد راح الكى حل لهالوضوع وراح ننجمع وتصيرين الي. وعد.

كام مني وسركى الباب ومشى.

تحسست المكان اكو ريحة خبز. لكيت على ثوبي خال الخبز اكلتها بسرعة من الجوع وبقيت كاعدة. محد حس ولا احد كرب.

للفجر اني متمددة وكاعدة.

فات ابو وهب. لميت روحي بسرعة من عندو.

ضل يدحك بيه. استقرب حالي.

امس جنت مواته هسه كاعدة واصفن وكلشي ما بيه.

دحك بطل الماي بالكاع فارق.

تكرب منه شاله: ياهو الطاج ماي؟

جريت روحي بخوف ولميتها.

كرب مني: ياهو الاطااااااج ماي حاجيييني.

انهد بيه دفرات. يضرب ويكتل.

واني اشكف بدي طكاته واصرخ. محد صعد ولا احد كرب. نزل الهم هايج يريد يعرف ( ياهو الاطاني الماي ).

محد بيهم حجه ولا رد.

صيح كسر بالبييت كلها شردت بغرفها محد كابله. خابر على وسام ردت كاللها ( اليوم تجين تحةين هالعايبة الذبيتيها علي بلا شرف اني تطيني بت ملعوب بيها وتنوميها براسي ساعة وانت وولدج اليوم انعل والديكم ).

ساعة وبسام بالبيت.

دكت الباب واجت طلعت الها الحاجة: مالج زلام جاية اعلى بتج العايبة وحيدج.

وسام: ازلامنا بالموصل غاد. بعد ما خسرت ويحد منهم ما اريد اخسرهم ولا ارضى يكربون. شجرالها البت عدكم.

– ما تدرين عن بتج معيوبه.

لما وصلها زلمتها ما لقاها.

- وياهو الكال لكم هي بت؟ أنا كلت هي بت بيوت.

- وتكولين بتك مو خوش؟

- بتي ما وقفت بفجريات الله، أدحك من بعيد. الصوج من المعيوب ماهو ابتي.

- تدارين عيوبها يا عايبة.

- ردي عيب ابنك وعايبيني ببتك. ابنك حاط عينه على مرة خاله، وأنا ألف مرة نهرته عنها، وهي ما تريدها، وهو بلا إحساس يذب روحه.

أجا أبو وهب ووسام تحجي بدوف، فهم قاطع الكلام:

- ياهو البلا إحساس يا وسام؟

- ابن اختك. أنا كلت لك الولد يفتر ع البت، وبتي ما عندها شي وياه.

- البت معيوبة.

- هي ماهي بت خاطر تنعاب. قدس من الأول ماهي، صابها حادث وتعدوا عليها وهي زغيرة، عد ما أنا كنت مسجونة.

- وياهو اللي يثبت اللي تكولينه؟

- لو رايد شهود أجيب لك. ناس كثيرة تعرف بالزلمة اللي تعدى عليها عد ما كانت جاهلة، وذبوها عد ناس يربوها من ما كدروا عليها ربّاها أهل الكلعة، ليما جيت أنا.

يوم طلبتها ما عزيتها عليك، تاليتك تعيبني بيها وتحسبها علي.

- ردها إن ما كنت رايدها، البت هذا حالها من هي وزغيرة. بس شحال ابن اختك؟

جلت قلوبنا منه، غاد ما نفتك. وين ما نمشي يلحقها. ولو رايدتها البت ما يمنعها شي بليلة وضحاها تشرد وياه، ولا من شاف ولا من درى. وكبل ضاعت، وردت وما ذبت روحها لابن اختك. بيا حق تعيبها إنت وأختك يا أبو وهب؟

- وهي ما هاويته.

- إنت تعرف بقدس طينة، وما تعرف الأسود من الأبيض. وكتلك بنية على نياتها. تجيرون ع حالها بيا حق؟

- وعليش ما كلتي البت مو بت بيت؟

- الله يحفظك، بس إنت مو شاب خاطر أحط بالي ترد لك بكر. البت بت 18 سنة، البكدها خلفن، وهي عندي. أخاف أطيها للشاب ويعيبها، وأمنتتها عندك، وإنت تعرف الحق وما تظلم مرة. هيج تجور عليها.

- حاشى أظلم وحدة، أنا أحكم بالحق، بس اسمعي وأدركي. تالله لو سمعت عندها شي ويا أحد لو طلعت عليها سالفة...

- ركبتها تحت جدامك يا أبو وهب.

سكت وهز راسه:

- يصير خير.

أم خطاب تدحك ع وسام، تجذب عينك عينك. والفت لها قصة، وهي قاعدة وسوت بتها مضيومة من هي زغيرة، وبرتها من إثمها ويا خطاب. احترق قلبها وحسبتها هي المنّة. خطاب ابنها ورايدة تشبج بين أهله وعياله خاطر تشوش عليه. اندارت وهي تكل لأبو وهب:

- صدكت فلمها؟ بتها مضيومة من الزغر. بت الجول تجذب يا أبو وهب، اطها بتها وافتك من غواهن.

قامت لحيلها وسام وهي تكله:

- ما جيت أشوف بتي. أعرفها عد زلمة، لجن ما أكدر أضل ببيت، أنا متهمة بالجذب بيه.

عافت المكان وطلعت. أبو وهب لحقها.

ضلت تدحك عليهم أم خطاب من بعيد وهي تكله:

- ما تسلم دامك تصدق هالعجوز.

ركبت وسام وياه بالسيارة.

دحكت خطاب يدحك عليهم من بعيد وواكف بالبستان. استغربت وقفة ابنها يناظر.

تكربت له:

- شفت، وإنت اللي تريد بت الجول مرة؟ جذبت عينك عينك ع عيب بتها، طلعتها مضيومة ومتعدين عليها من جانت بالسجن، لو ما أدري بصخام وجهك ويا بتها إلا أصدق.

- ما تفرقين عنها بشي.

- تحطها وياي يا النذل؟ أنا تشركني ويا وسام؟

- إلا هي أحسن منج. جذبت خاطر تخلص بتها من حبل إعدامها. ما تجذب وتكول إنطيتها الماي والبت ميتة.

- يول أنت سقيته.

- ما بس سقيته. راح أضل أقربها كل يوم، وراح أعيشك الرعب كلكم. ولو أظن اليوم تقضي.

- شنهو البالك يا خطاب؟ شنهو اللي تقضي؟

- رايح أصعد أشوفها. اشتقت لها.

- خطاب أحاجيك. خطاااب عدك.

جاي يمشي ما تحس إلا صوت انفجار كلش قريب.

فزت من حيلها وطلعت للباب تركض، والنسوان طلعت تركض.

وخطاب يمشي عكس السير. الكل يركض للباب وهو يركض ع الدرج. فتح السركي وفتح الباب عليها:

- وعدتك راح أحل كل شي.

انه الشط الجبير الشايف وعايف

شجابني كبال بيرك جني ما شايف!

فك الباب بهمة وطب: وعدتج راح احل كلشي.

دحجت بيه مستقربة: شصار؟

- امج جانت هين وحجت كلشي.

- شحجت؟

تكرب مني.. كمت من مكاني بسرعة: ما راح يضل هذا وضعنا وكل الصار راح يمر ونعيش مع بعض، وعد.. بس لا تهدين ايدج من ايدي.

- شراح تسوي؟

- راح اتمسك بيج حيل وما اهدج.

سكتت.. مشى عني وعاف الباب مفتوح.

اخذت خطواتي وخطيت خاطر اطلع وراها.. رجلي بيها الم كلش قوي.

من كثر الطك احسها نفسخت.

طلعت من القرفة اسمع هوسة جوا.. ما عرفت شصاير.. احترت انزل لو اضل مكاني.. كمت احاول اسمع.. الهوسة بعيدة والكل برا.

مشيت للسطح وكمت ادحك من فوك السياج ليفوك.. الناس ملتمة بالباب.. اميرة تلطم على وجهه وعفاف تملخ بروحها.

انداريت بسرعة ونزلت للبيت.

جاي اطلع الكراج.. مريت من الدوانية خطاب كاعد بيها وفاتح.. بعدني جاي اريد استوعب شصاير مشت مني اميرة وفاتت على الدوانية وهي تصرخ على خطاب وتكله: كاعد هين ولا جن خالك الانضام.. احر ما بكلوبنا ابرد ما بكلبك ما عدك غيرة ما تكول الغرب فزعت وانت هين ما ما حركت روووووحك الزلمة ما ندري عدل ميت كوووووم.

- اطلعي وسدي الباب.

- انت السويتها اكص اديني لو ما انت الحطيت الرمانة بسيارته.. انت السويت بحاله هيييييج.

كام من مكانه كضب طرف الدشداشة من جتفها وجراها وكاللها: انكلعييييي.

بعدني جاي ادحك.. على هوسة اميرة.

امي صارت كبالي ويا الهوسة.. عفت خطاب واميرة وراي ورحت لامي.. بس دحكتني واني جايتها اجت عليه.

جرتني ومشت ليقاد: تعاي هين لشوف.

شصاير بحالج يولي ياهو العامل بوجهج هجي.

- مو هذا الطيتيني اله وكتيلي رجعي.

- وكت الاطيتج ما ادري بيج مصخمة وجوهنة يمصكوعة بس احسابج يصفى بعدين، صبرج عليه بس.. تهيري نروح.

- شنهو الصار؟

- ما ادري شنهو الصار كالي عدي جلمتين وياج رايد احجيهن.. طلعت وياه حجاهن واسترخصت منه امش.. ما احس الا سيارتة كابة براي.. شالو ابنه والطرف ومشوا للمستشفى.. خلينا نلحكه.

- فد اذا طلعت راح يجتلني.

- محد مراح يجتلج لا تضلين مضعضعة وتخافين من خيالج بهالحال ضرايرج ياكلنج ويشربنج.. امشي منها نروح للمستشفى نشوف صرفة لوجهج صاير فروع الشورجة.

دخلت للبيت والهوسة كابة.

فتت لقرفتي جريت ربطة لفيتها على راسي ولبست العباة وطلعت.. صدت بوجهي عواطف عيونها مورمات بجي وخشمها احمر حجت: وين مولية يولي هم شاردة اكعدي واسكتي لا تعمين على روحج.

- ما شاردة راح اروح ويا امي للمستشفى.

- يولي ترحين للمستشفى.. ما عدنا نسوان تطلع وتصل مستشفيات من نتمرض تجينا الحجية بيت ام باسم تخبط النا هالعلاجات ونطيب.. شعدج رايحة.

- ما ادري امي كالت.

حجيتها وامشي رحت لامي.. لكيتها ادحك بخطاب.. دحكت عليه داير وجهه عنها.. حجت: هو والورا الحادث.

- يا حادث؟

- يسمجة ماي امشي.. تسبحين وما تدرين بارض الله شصاير.. امشي.

مشيت وراها جاي نطلع صدت بوجهنا ام خطاب داخلة للبيت من شافت امي فزت وكامت تصرخ: خله من تحت راسج الصار وبايكة بتج العايبة فوك سوايتهاااااا.

امي ما دحكت بيها ولا وكفتلها كملت مشيها جنها ما شايفتها.. اني وكفت من صيحت خفت ما ترضى اطلع.. طلعت امي ورجعت مدت راسها: هيييي يولي.

رحت لامي بسرعة وهي تمشي بسرعة وعبايتها الهوى يهفي بيها.. حجيت: خاف ما ترضى ام خطاب عسرة.

- امشي يولي صكعتي كلبي.

مشت واني وراها بالزور اخط جدمي توجعني.. حجيت: على كيفج ما اكدر امش.. انقطع كلامي من طلع خطاب جدامنا.

حجت امي: لو جنت مفكر الفيل يموت بشخاطة حط عكلك بشيشة.

دحك بعيني خطاب.. صرنا وجه بوجه: وين رايحين؟

وسام: نأدي الواجب ومنها نشوف صرفة لوجهه يعالجوووه من اثامك.

ادحك وجه خطاب مو مثل اول ما صعدلي.

ضايج.. عافته امي واخذت سيارة من الشارع ركبنا بيها اني وياها ومشت للمستشفى نزلنا عدها.

تمشي وتسأل وتستفسر عن ابو وهب.

اني امشي وراها مثل البطريك ما اعرف كاعي من سماي.. وصلنا لقرفة جبيرة حيل بيها هواي قريولات وناس نايمة عليها وابو وهب نايم على وحدة منهن.. وصلتله امي وكالتله: خطتك العثرة وعثرت اعداك شنهو الصابك يبو وهب وشجرالك.. انت يصير بحالك هيج.

هو جن فاكد.

ويون ومدي شمعلكين بديه وشحاطين وبيش لافينه.. كربت منه وكضبت ايدو: حسافة الشهم هيج يجراله حسافة.

فتح عينه وهو يون حجتله: دحك هالبت شوف.

ملخت شعرها زلغت خدودها كطعت روحها تصيح تكول كله من وراي الجراله لو ما طلع متضايك مني ما يصير وياه هيج.. دحك دموعها وخننها يجرن سوا.. ابو وهب الذهب الكلوب بعدك مسعرة.

يون هو ويكللها: وهب وينو طلعوني منا لا تخلوني.

- بس حالتك يبو وهب خل يشوفون جرحك.

- مثل ما اكلج وسام طلعوني.. صيحي وهب وطلعوني.

- هسه ادحك وينو.

مشت وخلتني يمه.

هو كام يون دحك ورفع ايده.. جيت يمه كضبت ايدو.. شد عليها وكام يصيح: اااااخ.. قدس بيج شارة يولي ظلمتج.

ظليت ساكتة وهو يحجي.

ضل يون ويصيح ومضبضب من ايده ورجله وظهره ولارسه ملفوف.

حجيت: شنهو الصار؟

ما رد علي بس كام يون.

اجت امي ووهب واثنين زلم كاموا يحجون وياه خاطر يبقى لان جرحه قميج.. بس هو ما رضى كال الهم ( طلعوني وشوفولي طبيب يجينا غاد للبيت ما اضل هين).

طلعنا بسيارة.

صعد وهب ليجدام.

وصعدوه هو كال الهم: خلي قدس تصعد وياي.

حجت امي: خلهم ياخذوك وانا خلني اجيك عليها اشوف عليش تعرج.

- عيفي رجلها صعديها.

ما رضى اداوه.

صعدت وياه ما كدر يكعد على حيله.

كالت امي: حطي راسو على رجلج عيني بساع.

سندت ظهره وتمدد وحط راسه على رجلي وسود السيارة.. مشت للبيت وهو ميت من الوجع منين ما طكت السيارة بطسة يصرخ.

وصلنا للبيت.

سندو وهب و وواحد من كرابته: سلامات سلامات.

خذوه كاللهم: بغرفة قدس.

حجت امي: اي عمت عيني دمعتها ما نشفت عليك من رحنا تكلي ( بس اشوفه ويرتاح كلبي تحس هي السبب كتلها ذكري الله حادث وصار كطعت روحها).

تحجي وهم يمشون بيه لقرفتي.

مدري ياهو الصدكها بحجيها يمكن حت هو ما صدكاها زعم ما بجيت ولا دمعت عيني عليه ابد.

دخلوه وكلها دخلت بقرفتي.

واميرة شلالات دموع ذبت عليه وتكله ( ريتني بدالك يماي عيوني).

ام خطاب وعواطف وعفاف والجهال واثنين من كرابتهم صارت القرفة كون.. اني برا واكفة ادحك عليهم.

عفتهم ورحت اقسل فد كلش جوعانة.

قسلت ورحت للمطبخ اريد شي اكله.. دحكت خطاب طالعة روحه يدخن وواكف بالبستان.

ضليت ادحك عليه.

اجت من وراي سراب: شجاي تسوين؟

فززتني: شبيج راح كلبي.

- شتريدين؟

- فد اريد خبز جوعانة.

- ابوي راح يموت وانت لاهية تشبعين بطنج؟

- عجل جوعانة شسوي.

عافتني ومشت.. اجا محمد كال: امج تريدج.

رحتلها: ها يمه.

- وينج يولي نسوانه مكابلاته واني ما دارية عنه.

- يمه فد جعت رحت ادورلي خبزة.

- يولي الدنيا كايمة والشبج متلايمة وانت ادورين علف لبطنج.

- يمه جان حابسني ما ماكلة شسوي قير جوعانة.

- يولي راح اشك هدومي من وراح امشي صكعج الله لاهية ابطنها امشي يمه.

مشيت ضيجانة وكلش جوعانة.

اذا كلهم يمه اني شراح اسويله.. ادحك يتسابقن.

اميرة تبجي وتعلي بصوتها وعفاف تكله ( خمشت كلبي يبو طول الحلو ) وعواطف تنوح.. شوا اني ما عرف اسوي هيج.

عفتهن وتكربت منه: يمه هو شلون صار بيه هيج اني ما فاهمة.

- انت افهمي بطنج وخليج من هالامور.

كامت وحجت بحس عالي: انا اشيل الزحمة عنكم غاد متانيني.. اخذ قدس وياي يبو وهب لو تعتازها.

حجه وهب: وعليش تاخذيها على صخام وجهه المفروض هسه ابوي حاط جيلة براسها وكاتلها.. وتعاي شطلعاها من فوك وياهو السمح الها.

حجت ام خطاب: ابوك تعبان لا تضيك خلكه.. اخذي بتج واشفينا شرج وشرها.

حجه ابو وهب بصوت مريض: ما تروح قدس هين مكانها وهذا بيتها.

حجت اميرة: شنهو نسيت سوايتها وفعلها شلون ترضاها تخلي بت معيوبة.

حجت عواطف: البت ما معيوبة لا تظلمين بختها ابو وهب اعلم بحالها احنا ياهو ونعترض على امره.

عفاف: اي والله هو ابو الشور والعريف من عمري اعلى عمرك كون ابو ضحكة الطيبة ابو كلب الذهب خلافك نضل هيج مثل الصفر بلايا رفيج.

اميرة ادحك على عفاف وتخزر بيها: كبل شوية تعلفين وهسه دموعج مسويتهن شلال.. اكوم اسويله تشريبة تشد كلبه.. وخرن عني شوي ما اتحمل سمجن وجذبجن.

كامت منهن.

اني ادحك عليهن وعلى هوستهم.

اندرت اشوف امي وين.. ما هي.

طلعت ادورها لكيتها رايحة.. ام خطاب طلعت وراي خزرتني وهي تكلي: خطاب وين؟

- مدري عنه.

طلعت ادوره ما هو..

عفتها ورديت للمطبخ ادور كرصة خبز.

شفت العجين مختمر وطايح صحت على سراب كالت: الخبز على امي وخالة عفاف.. يمممممه.

اجت اميرة ردتها: وغمة ما تشوفين ابوج مريض تجوعرين بنص البيت شبيج.

- العجين تبدى غير تخبزه.

اندارت عليه: وما تخبزي انت شنو ناقصج طول لو عرض لو نغيوة وما تعرفين.

لا تطلعي حضرية وتصيرين براسنا النازوكية.

– اعرف فد ايدي هاي توجعني ووجهي مضروب ما اكدر.

دفعتني: يلا عاد يلا بلا عيارة شيلي العجين شنكي وخبزي.

اندارت لسراب تصيح بيها: دليها على صينية الطحين انت.

عافتنا ومشت.

مشت سراب حتى تدليني صينية الطحين.

فد اني صدك ما اكدر اخبز ايدي توجعني ما عد جذب عليهم.

عفت سراب ورحت كعدت بقرفتي يم ابو وهب.

دحكت الجنطة مالتي خذيت منها ملابس ورحت خاطر اسبح زعم هذا احس بروحي وصخة من ليلة الكربني ولهساه ما سبحت.. ضجت من روحي.

دخلت سبحت بسطل ماي واسمعهم يصيحون قدسسس، قدددس وين راحت.

ما اجاوبهم.

كملت سبح وطلعت حجت عفاف: يولي مو جاي نصيح عليج وينج.

– جاي اسبح ما عد اسمع.

– عليش ما طاركة العجين والخابزته.

– ايدي توجعني.

– ايدج توجعج مو.

هدت عليّ ركضت للقرفة مالتي دفعت الباب وطبيت حيل فز ابو وهب صرخ: بنات الجلب انا حال الموت عالي وانت تتكاونننننن وووووووهب.

– ترضاها تغلط علي وتكلي بس تحجين اكلل لابو وهب.

– ما غلطت والله اني فد سبحت اكلها ما اكدر اخبز ايدي تاذيني ركضت وراي تريد تكتلني.

كام يصرخ: وووووووهب.

اجا وهب وريسان يكلو: اجلدهن ذني بنات الجلاب انا واصل الموت وهن يتكاونن فوكي اجدهنننن.

كفخني على راسي ودفع عفاف: دكافي دكاااافي مو ابوي مريض ما تفتهمن غير الكوووووان.

رد دفعني على الحايط.

كتله: اني شعليه قير هي تريد تكتليني ايدي توجعني اني.

احجي وطلع عفاف من القرفة وكالي: ولي خلي ابوي ينام اطلي برا.

حجه ابوه وهو داير ليقاد: هدها وسد الباب.

عافنا وسد الباب.

بطني انلوت من ضليت وحيدي وياه.

دحك عليّ بصوت ونان حجه: كربي نامي بصفي وحطي راسي عدج.

ضليت ساكته.

صرخ: مو احاجيج.

تكربت منه حجه: كربي.

تمددت يمو حط راسه على صدري، يون.

تجمدت بمكاني.

معرفت شسوي.

حجه: عليش سابحة؟

– وصخة جنت.

– وعليش وصخة ويامن نايمة.

ضليت ساكته.

دحك وهو عاكد حواجبه ويخزر: اتسبحين عليش.

– انت من يوم الكربتني وجريتني بالكاع احس صرت وصخة ما غسلت.

– ها، اي... ذكرت.

– عرفتي تغسلين غسل الجنابة ترا تظلين نكسة اذا ما تغسلين الجنابة.

– شنهو الجنابة.

– تسمين على روحج وتتغوسلين.

– اي اعرف سميت.

– شلون تعرفين؟

– من الدورة.

– يعني سميتي وغسلتي.

– لا.

– عجل شلون.

– مو ما عندي دورة عليمن اسمي.

– يولي جنابة.. انا ويامن احجي. انت ينرادلج كلب ما مدشن.

رد وهو يون من جسمه.

بقى شوية وابتعد احتار بروحه منين ما يجيب نفسه يتوجع واني جوعانة اريد فد اكوم اكل احس روحي راح تخرط من الجوع.

ربك على هالكعدة وجابو صينية اكل.

كعدت عفاف كالتله: سويتلك شوربة عدس يضي عيوني اكعد اكلك لكمة.

– هدي هسه ما اكدر راح اموت.

– اسم الله اعليك من اسم الموت لا تحجي هيج وتلجم كلبي.

كامت تون واني ادحك بالصينية والخبز حار والشوربة حارة وبطني تصفر من الجوع.

كام يون هو وهي تحاجي واني عيني بالصينية.

كتله: تاكل لو اكله.

صرخت: يااااااا تاكلين شنهو ولج انت ما تستحين زلمة ضايمة الضيم وانت تسالينه تاكل لو اكل ولج ما بقلبج رحم.

– اني عد اسالو ياكل لو لا شبيج وياي.

صاح: يولن انت ما عدجن مكان تتكاونن بيه بس فوك راسي اذا اكوم انحر اركابجن احد يلوني بنات الجلب.

رادت تحجي نهرها وطردها.

كامت من عده وضل الباب مفتوح سكتت.

مديت ايدي على كيفي كطعت طرف الخبزة وخليتها بالشوربة.

جاي اسحبها اريد اخليها بحلكي.

دحك عليّ.

ذبيتها من ايدي بسرعة وكمت ادحك بالباب.

حجه: اكلي يولي ما اريييييييده.

حجاها وصاح من رجله: اااااااااخ.

اني طحت بالشوربة تقميس.

من خلصت الخبزة شربتها.

خلصت فد بعدني جوعانة كتله: راح اجيبلك بعد.

كمت لحيلي رحت للمطبخ جاي يصبون عشا.

حجيت: ابو وهب يريد بعد.

صبتلي وانطتني بعد خبز.

حجت عفاف: المن هذا.

– ابو وهب راد اني معليه.

– فد جذابة انت يمة منج ولج مو خذيته وكال ما اريد.

– قير هو يريد اني شعليه.

اخذت الصينية ورحت للقرفة اجت وراي كالتله: تريد بعد.

ما جاوبها حطيت الصينية وكتلها: صوت عالي هو مريض.

وسديت الباب ضلت تغلط عليّ وهي تبتعد من الباب ما درتلها بال.

كعدت كبال الصينية اكل.

شال راسه يدحك: يولي ثور.. بس من الاكل اتجرشين براسيييي.

– قير جنت معاقبة وما ماكلة بعدني جوعانة.

ضل يدحك بوجهي صافن.

كمت اكل ومسحت الماعون.

زين شبعت هسه هو رد نام.

شوية اجا وهب كاله: عدنا خطار يريدون يشوفوك.

كالو: ما اكدر اشوف احد عيفني منهم وشوفلي طبيب راح اموت من الم رجلي.

راح وهب شوية وجابله مضمد.

دخل كال: كومي منا بسرعة خل يطب المضمد.

كمت من القرفة ركض رحت للمطبخ.

فات الزلمة عالجه وطلع.

طبت ام خطاب طبيت وراها ادحك عليه بخزرة سالته: شكالك المضمد.

ريسان: يكلي ينرادلها طبيب اطاني مسكن ولازم باجر يشوفها طبيب.

– وعليش ما تروح طبيب.

– باجر اشوف طبيب. اذا رجعت الشرطة لا تكلولهم هين كلولهم ابغداد شالوه يعالجوه.. ولا تطين اسمي الكامل ديري بالج.. واصرفيهم وكليلهم حادث.

– بس وهب كاللهم رمانة.

– يرجع يدون اقواله ويغيرها ما اريد شرطة تورد هين.. خوش.

– بعون الله. شلون حالك هسه ما صرت احسن.

– اطاني ابرة مسكن كال تنام عليها لحد ما باجر يشوفك طبيب.

– بعون الله.

اندارت عليّ: ديري بالج عليه عينج لا تغفى وتنام عنه اسهري الليل وضلي عده لحد ما يفج الصبح ونشوف طبيب يعاين حالته.

ضليت ساكته.

اندارت: سمعتي احاجيج.

– اي سمعت.

– عجل ما تجاوبين عظم بلسانج.

– من شفنا طولج بهالبيت ما لفتنا غير المصايب.

حجه ابو وهب: اذا جان ابنج يضن اعديها الها تالله لا اطلع هالوجع من عيونه.

اندارت: خطاب ماله ايد بالصار.. تعرف خطاب وتعرف كلبه.. ما ياذيله سمجه.

– تبين الاخبار ونعرف الحك بس لو جان هو الفاعل حضريله الجفن مالو يسليمة.

اخذت نفس وتنهدت بحسرة.

اندارت ادحك عليّ بخزرة وطلعت من القرفة.

ضل هو يون ومقمض عيونه.

من اكلت وشبعت احس راسي كام ياذيني.

جريت مخدة ونمت ليقاد عنه.

جبت راسي منا اردو منا يون عليه كن الطك والضرب كله طلع عليّ هسه.

بالزور كدرت عيني تغفى وتنام.

ما حسيت الا الفجر ابو وهب يون من رجله.

اجا وهب والحاجة واميرة واني امددة على مخدتي راسي احسو هاكبره ما اكدر اشيله مسطورة سطر ولعبانة نفسي احس بس اكوم ازوع.

وهم يحجون يم راسي.

زادت على الوضع وطفت الكهرباء.

صارت ظلمة الضوا بعده هسه يطلع ماكو شمس.

صارت حارة فتحو شباك وهم يحجون وياه وهو يصرخ من رجله كلش متاذي.

راسي ع الوسادة مسطورة وفرتني الحاجة برجلها: يرلي كومي شوفي زلمتج مثل الدثو نايمة كووومي.

اميرة: هاي فد حية ركضة ووحدة ما تنكدر.. بس لابسة ثوب الغشيمة واسوي روحها كلشي ما تعرف وهي ملعبة الحبلين.

شلت راسي ادحك ابو وهب.

من شلت راسي.

حسيت معدتي كلبت.

كمت بسرعة اركض ورحت للحمام ذبيت معدتي كلها.

ضلت ادحك وراي ام خطاب.

اني احس روحي تطلع ما جاي اتنفس.

ضلت واكفة يمي.

قسلت وطلعت امسح بعيوني مختنكة.

خذتني من زندي وجرتني ليم الدرج ودحكت منا ومنا.

ماكو احد.

حجت بسكوت: خطاب يمتى كربج.

– عليش؟

هزت ايدي: احجي يولي لا اصفكج على حلكج.

– بيوم الشردت منا.

ضلت ادحك بوجهي.

شفت الحيرة بوجهه.

ردت سالت: يمتى اخر مرة اجتج الدورة؟

– اسبوعين يمكن.

تنهدت: اي زين.

– عليش؟

– هيج ماكو شي امشي اكضي شغلج لا تظلين حاسبة روحج عروس وما تستغلين حالج من حالهن ياااالا.

دفعتني واني ضليت افكر يمتى اخر مرة جايتني.

اسبوعين؟

لا والله مو اسبوعين من زمان من كبل لا امي تطيني لابو وهب باسبوع.

بس ليش تسال على الدورة مالتي.

حت هاي تدخل بيها وتحجي.

عفت ورحت للمطبخ لكيت عواطف: صباح الخير.

– صباح النور.

– اني ما اكدر اخبز والله ايدي توجعني فد اكدر اسوي الريوك.

– تعاي سوي بدالي خل اطلع ويا عفاف اجيم التنور.

كعدت بمكانها جدام الجولة.

ادحك سلة طماطة وثلث بيضات وهاهية.

مرت من عدي اميرة.

حجيت: وين التختة اريد اثرم الطماطة.

– ثرميها بيدج عليش تختة.

– شلون.

كربت من عدي كضبت الطماطة وكامت تكصص وتذب بالطاوة.

– شكثر اسوي.

– سوي السلة كلها.

– عجل يراد بعد بيض.

– سوي ذني ومعليج يراد بعد بيض مفتحين بنك لامج هيج ونصفطلج البيض.. بت القصور لو ما جاية من الجول مسوية روحج متعجبة سلة طماطة عليها ثلث بيضات.

– قاد عدي دجاجات بياضات.

– ياهو الكالج عدي بال اسمع شجان عدج وشما جان اشتغلي وانجعمي يلا.

مشت عني ثرمت سلة الطماطة مثل ما علمتني من استوت ذبيت عليها ٣ بيضات.

بس ضاعن كون تلكى اثر بيض.

خلصت الطاوة نزلتها ورديت الغطا.

خلصن خبز واجت عفافحطت صينية الخبز وشالت الغطا: شو بس طماطة البتيتة وينها.

– عواطف خلت بس الطماطة ما كالتلي بتيتة.

حجت عواطف من وراي: يمصكوعة اني حجيت فكيت حلكي كتيلي اسوي بمكاني كتلج سوي حسبالي تعرفين.

عفاف: وهذا المن نطي ليا حلك.

عواطف: جيبي من الحاجة بعد بيض وخل نسوي هذا شيكفي.

دفعتني: امشي جيبي بيض من الحاجة ولي خل اسوي طماطة بعد.

رحت للحاجة اكللها شو انكلبت عليّ طنطل.

خايسات جايفات.

مالت بس اكل وكهكهة كل خير ما يجي من وراجن.. بيضة ما اطي تبذرن بهالاكل ووحدتجن افادها افاد ثور.. التخلص تاكل خبز گفار هاكد ما اطي.

مشيت هن بالمطبخ تلاثتهن معقجات وجوهن ضايجات: وهسه شني بس هذا.

اميرة: صوج عواطف من خليتي الاكل بيدها ما تعرفين تعلميها هاج يلا هذا ليا حلك نطي.

عواطف: وانا شداني بيها ثولة ومكموعة كالت اسوي كتلها هاج.

عفاف: الكتلة بيها هاي ام الفتن ام ثرب اطيها بس اكل عود هم اخليج تاكلين والقران اموتج جوع حتى خبز وجاي ما انطيج.. الكل يطيح بثربج وجهالنا تضل تغرغي اعلى حلوكها الذبان.

– اني شعليه قير انتم ما قتولي.

دفعتني ومشت عني.

مشت اميرة: لو السالفة بيها تفلكح وسوالف الهتس بتس جان بسرعة عرفتيلها يم راسين.

هم دفعتني ومشت.

ضليت ادحك على عواطف. حجت: أنا صوجي اعتمدت عليج.

صاحت على بتها وراحن كعدن ياكلن.

كعدت وام خطاب ماعونها كدامها ما تاكل. بالطاوة .. وهن حطن الطاوة كدامهن وكل وحدة حاطة جهالها منا ومنا وتسوي لفات واني بطرف السفرة. دحكت شو ما عزلوا لابو وهب بلكي ما ياكله واني اكله. حجيت وخبطت: عجل خطاب ما تعزلوله ريوك؟

خزرتني ام خطاب: وانت ياهو مالتج بخطاب؟

أجيب النعال وأكطعه على راسج نوبة اللخ من تجيبي على السانج.

- أنا قصدي ابو وهب ما خطاب. قلطت.

أميرة: يعايراتِج يولي انت بس الله يستر منج.

ادحك الطاوة خلصت لفات لجهالهن. ردت جاي يم عفاف. عاندت ما تطيني. عواطف زتت عليه كرصة خبز. فد شاكل وياها.

كلت الخبزة وحدها.

وكامن لمن السفرة. جاي اروح للقرفة.

صاحت الحاجة: غسل الهدوم شغلج. لمي الهدوم وطلعي يم الحنفية اغسليهن كبل لا تصير الـ ٩ وينكطع الماي.

- خوش.

رحت للحوض خذيت الطشت والتايت وفتحت الماي. شو ذن كل وحدة منهن طلعتلي كون ملابس من قرفتها وكاللي: هاج غسلي.

ادحك سون يمي تل مال هدوم. كعدت اقسل وما يخلصن. بـ 4 ساعات احس ظهري صار عصة ما يتحرك. كمت اقسل شلون ما جان بس أحطها بالمي بللها وادعكها واذبها بالسطل.

صحت: سررررراب وين الحبل؟

خطاب: ذاااااك.

دحكت عليه. غمزلي واشرلي اجي.

دحكت ع البيت الكل ملتهي. شلت سطل الهدوم ومشيت: وينو المشر؟

- ذاك جدامج.

كربت اشر بالملابس. هو ليقاد عني. فد ما كدام العين. حجه: شنهو وضعه؟

- فد يصيح من الالم.

- ما مات العار رمانة بسيارته وطلع منها شحط بعد ويموت.

- انت الفجرتو؟

ضل يدحك عليه: وين نمتي بالليل؟

- بقرفتي.

- يولي هو بغرفتج شنهو نمتي بغرفتج. نمتي يمو؟

- انت كتلي حليت الموضوع. وين الحل؟ راح ارجع مرتو.

- اني ادري بيه يطلع منها. كلت مات بس ما مات.

- وماكو حل قير يموت.

- يول ليكون تحنين عليه؟

- ما احب الكتل. ما زين.

سكت: شلونها رجلج؟

- بعدها توجعني.

- لا تتقربين منه ولا توصليه. اليوم باجر اني راح احل الوضع ونخلص منه. اذا ما مات بهاي يموت بغيرها. وين يروح مني؟

- هو خايف يكشفونه الشرطة. ما يرضى يروح للمستشفى. عليش ما تبلق عليه وتعوف الكتل؟

- وشيفيدني لو بلغت وتظلين معلكة بيه وما يطلك. خو بلا ما نكتله ونبلغ نشرد. اذا هيج انا رايد خلاصج ما رايده هو. يا يطلكج يا تصيرين ارملة. مالها غير حل.

جاي يحجي اجت اميرة من بعيد. كمت ادحك عليها. هو افتهم ومشى من ورى البيت. حجت: هاي اهدوم صفاوي هم غسليهن.

- خلصت بعد ما اقسل.

- هذا شغلج. غسلي وسكتي.

- خليها على باجر.

جرتني من جتفي: دحكي يولي. امشي وياي عدل لا وربج اخليج عبرة لمن اعتبر.

عافتني وذبت الهدوم بوجهي.

ذبيته من وجهي بالكاع وتفلت عليه: اقسل هدوم عشيرة هم مو هيج. ما اقسل.

دحكت بخطاب مدنج ومبتسم. رد رفع راسه يدحكلي والشمس بعيونه ويكشر العود مال الشجر بالسجينة.

رحت جبت الهدوم المقسولة اشرها بس شو ما هو؟

شريتهن كلهن ورجعت. رجلي تون عليه وراسي انصكع من الشمس. لعبت روحي احس اريد ازوع بس ما جاي اكدر.

ابو وهب ام خطاب كاعدة يمو.

ووهب وبناته. وهو متالم. اني دخت. فد اريد انام. راسي كمت ما اشوف منه.

صاحت اميرة: غسلتي هدوم صفاوي؟

ما رديت عليها.

طلعت ورجعت ترعد فوك راسي: انت شنو عود تخبثين. هسه تكومين تغسلي. يلاااا.

- راسي يوجعني. باجر اقسلو.

- كومي لا اسحلج سحل والقران. كوووومي.

صاح وهب: هاي شكووووو؟

كامت تتبجبج وتكله: من دون الهدوم مخبثة وياي. لا تغسل هدومي ولا هدوم جهالي. هسه اني ما اطبخ. ما تاكل من اكلي.

رديتها: الريوك اني طبختو وما خليتوني اكل. والهدوم قسلتهن. ضل بس هدوم ابنج. النزعهن كتلج باجر.

تكربت مني وهب: انت عود شني تسبعين لو تريدين تصيرين لوتية؟

- انت لا تدخل.

حجيتها شو هذا كبل جابني ابوكس على وجهي.

وكضبني من راسي وركعه بالحايط ودفرني برجله: بت النعال. من تردين والله اعدمج.

غصبا ما عليج هسه تكومين تغسلين.

كمت ابجي وكمت: والله ما اغسل.

- تعاندين انت يولي؟

طلعت الحاجة: شجالكم ما تستحون؟ ما تكولون هالبني ادم جاي يون من الوجع؟ ماكو احترام.

- اذا ما كامت غسلت هدوم اخوي هسه اسحل البيت بيها.

- ما اقسل.

الحاجة: تعاندين انت شنهو؟

- ما اعاند. راسي يوجعني وظهري تعبت. والله راسي دايخ ما اكدر. وفد اطلع بالشمس احس روحي تريد تزوع. ما اروح.

حجيتها وردت امشي للقرفة.

كضبني وهب من راسي. يجر بيه: التعاندني منو؟ التعاندنيييي يااااهي؟

صرخت بيه الحاجة: حيل وياها ادبها. هاي البت ما ضايكة الادب.

طلع يجر بيه واني ابجي واجر براسي. كاضبني من كباية شعري من فوك الحجاي ويجر. كمت اصرخ واكلو: وخر مني شنهو اطكني. وخررر.

وهو يريد يوديني للحوض.

ما يحس الا خطاب كضبو من ركبتو وجره مني حيل.

سحبت روحي ووكفت على صفحة. خطاب بسرعة ايده جره مني وركع راسه بالحايط وجربه بدفرة بنص بطنه. وكع حيل على مقعده.

كام ذاك من حيله وهو يصرخ: خرب انه اذا صدك... تعال.

وفز على خطاب يريد يهمشه.

اني عفتهم وطبيت جوا ابجي. تراكضن عواطف وام خطاب.

دخلت يم ابو وهب. حالته حالة. وجه اسود من الالم وعركان. كمت اصيح: متزوجني حتى ابنك يكتلني. ما تريدني رجعني لامي. ما اريد اصل هين. من اجيت ولهسه بس اطكون بيا وتضربون. ما اريد. خابروا على امي ارجع لاهلي. ما اريد اضل هين بعد. ما اريد.

كام يصيح عليه: بت الجلب. اني مريض وانت تصيحين فوك راسي. انجعمي وسكتي عني.

فات وهب. اني فزيت ورا ابو وهب وهو يريد يجرني. صاح: ولد الجلااااب. فوكاي ولكمممممم. فوكاااي.

كام يصرخ وهب: الكح**** تفزع صاحبها عليه وتخلي يطكني. اليوم انعل والديها.

صرخت: ما فزعتو. والله هو ركض. اني ياهو مالتي. انت كتلتني.

ابو وهب دفع ابنه وكام يفشر عليه ويغلط ويكله: ياهي الك* م*** على ذمتي وتفشر عليها. الفي كحا**** وتفشر عليها.

كاله: خطاب فزعلها.

_ انعل ابوك لابو خطاب لابو الساعة العرفت بيها امك. اطلع منا م****.

طلع وهو يصرخ بالبيت. دفعني من فوكه: امشي من فرك راسي. طايحة الحظ. شعدج ويا خطاب وتفزعي. اكوم اذب كل وجع الله بيج. بت الجلب.

_ انت صدكتو. اني ما فزعت احد. هو وحدو اجا. كوم ردهم. اثنينهم. اني ياهو مالتي. والله راسي يوجعني. كافي اريد ارجع لاهلي.

_ انطمري. قاد ولي.

_ والله ما اكوم اشتقل بعد. لو هسه يضلون بدون هدوم.

_ اليوم اشتغلتي وياهن وهرجتينا. بت الجلب. انطمري. راسي راح ينفجررررر منج.

طبت ام خطاب رادت تحجي. صاح: سليمة فكي عني. وخلي ابنج يجوز ولا يكرب من البيت. لا اكوم اشعلها فوك راسه.

رادت تحجيله عليه. صاح: هدي. هاي الطايحة حظ تنطمر وتخلصنا.

الحاجة: وكت نوم النسوان تشتغل. وهي حضرتها مطمورة.

كام يصيح ويغلط عليهم. طلعت من القرفة.

اجت الكهرباء. شقلت المبردة. ووجهتها عليه وذبيت مخدة انام. حجه: تعاي يمي.

صحت: ما اريد.

صاح: تعاااي جااااي.

_ ما اريد. عووووفني. راسي كاااافي.

حجيتها وبجيت كمت اصيح: راسي موتني. كافي عوفني.

_ يولي نامي. عساج لا تكربين.

حاطة راسي وبالربع ساعة ابجي. صاح: ما مليتي بجى. مو طردتهم وكليتج تنامين. تونين لتوالي اهلج. بت الجلب. مرضتيني.

كمت من مكاني. اني عد ابجي من راسي ما منكم. عوفني ابجي. لا تحجي وياي.

سكت وضل يون واني ابجي.

كام يصيح عليهم. اجت عفاف كاللها: جيبلها حب وجع راسي. شوفي راسها شبي. تون منه.

- وهب جرني منه. وكام يوجعني والشمس صكعتني. جاي يوجعني.

- خل يولي هالارعن. بس جيبليها وجع راس. صكعتني. ابجيها.

ضلت ادحك ما عاجبها شلون يطلب لي دوا.

راحت جابتلي واجت. شربته. هستوني معدتي كلها كلبت.

طفرت من مكاني بسرعة رحت زوعت بطني كلها.

رجعت لمخدتي ابجي.

بس من زوعت ارتاحيت. هو يسالني.

شبيج شلون صرتي؟ ما اجاوبه. فد دايرة ومتقطية بالازار واون لحد ما قفيت.

ما كعدت قير العصر.

اميرة دفرتني برجلها.

ادحك ابو وهب ما هو. صاحت: كومي منا. كووومي.

تتمسكن يمه وهو مكطوع كلبه. تكول الوجع بيه. يصيح جيبولها. كووومي.

_ وين اكوم؟

_ كومي سوي الجاي. يلا.

_ الحاجة مو هي المسوله ع الشقل هين. هي التكلي ما اخذ الاوامر منج.

_ يول شوف هاي الزرزور. هم يكاكي. ترا ادولبج والله.

_ اي عود خوش. روحي خليني انام.

_ كومي لا ابتلي بيج هسه. كومي.

_ ما اكوم. واني ما خدامتج. مثل ما انت زوجتو هين. اني نفسج. ما تحكميني. حسبالج تهيضين وهب عليه. روحي يلا.

ضلت ادحك عليه: يولي الج حيلي. توكفين بوجهي.

رجعت راسي للمخدة وانداريت.

طب وهب وهو يرجع ابو من الحمام للقرفة.

حجه ابو وهب: اجا الدكتور. طلعن منا.

كمت شلت القراض بسرعة ومشيت.

دخل الدكتور عاينه كالو: رجلك لازمها عملية.

كالو: ما اكدر. شوفلها حل غير العملية.

_ ما اكدر. لازم عملية.

_ بالوكت الحالي ما اكدر اسويها. اكتبلي علاج.

كتبله علاج ومسكنات.

وطلع الدكتور. واجن كلهن يمه يقنعوه بالعمليه. بس هو يكللهن: هسه صعب. ١٠ ايام ادبرها.

وهن يحاولن يفهمنه بعشرة ايام احتمال تسكط رجله.

ما رد عليهن. شافني مريت. صاح من بينهن: شلون صرتي يولي. كربي هين.

_ بعدو راسي يوجعني. فد جوعانة.

الحاجة: شوي بعد يصير العشا وتسمممي.

ابو وهب: ميخالف. على كيفكم وياها. كافي عاقبتها. يومين وطلعت مسيجينة مضيومة من هي وزغيرة.

ام خطاب ظلت مبحلكة بيه جيف مصدك.

رادت تحجي. سكتها وكاللها: اطيها كرصت خبز وبيضتين خل تاكل.

فزت اميره: عاد لهين وبسك ريوك. ٤ عوايل بـ ٣ بيضات وتريدلها بيضتين وحدها. شنهو سحرتك لو شلعبت بعقلك؟ بعدها بس يومين جتك ونمت على شليلها من تخلف منك. شلون تحطلها تمثال وتعبدها؟

كام يصيح عليها وصار عصبي.

استقربت تعاطفوا وياي. ولو اذا اشوف هو من اول ما اجيت هو هيج طبعو. كبل لا يكتلني ذيج الليلة جابلي صينية اللحم عدي وراد يوكلني بيده. وكبلها شردت وتوقعت راح يكتلني اذا رجعتلو. بس من رجعت سوالي حفلة خاطر لا اضوج واهج من البيت.

بس ليش جاي يتصرف وياي هيج؟

سويت بيضتين طكيتهن بالدهن على ٣ طماطات وكرصتين واكلت لحد ما شبعت. فد من اشبع معدتي تكوم تلعب. مدري شجاريلها. ما جنت هيج.

من اجيت عدهم احس تسممت معدتي ما جاي تتحمل اكلهم ولا جوهم.

بالليل اجاني ابن عفاف، جانت ظلمة، هو عمره بـ 9 سنوات ندهني كال:

"تعاي اطيني ماي."

"امك وين؟"

"بس تعاي."

حسيته يريد يكلي شي، كمت وياه.

طلعت شاورني:

"خطاب يريدج برا."

دحكت على القرفة ظلمة وابو وهب على المسكن نايم.

اكو فانوس بالهول، تعديت وطلعت برا.

بسرعة جرني خطاب:

"وين نايمة؟"

"بالقرفة شبيك."

"هو يمج؟"

"اي فد من ذيج الجيهة."

"دحكي اريد منج شغلة."

"شكو؟"

"علاجه بيه شراب."

"شنو شراب؟"

"يولي شيشة ويشربها."

"اي اكو."

دحك منا ومنا وحجه بصوت ناصي:

"دحكي يولي باجر راح اجيبلج شيشة تفرغين العدة وتديرين بيها الاجيبها الج خوش."

حسبالي لهفة كلبك تدوم..

طلعت رسم ع الرمل مرسوم

قدس: رايد تسممه؟

- مالنا غير طريق نخلص منه، شوفيلي شيشة الدوا مالته ودزيها الي.

- اني ما ادبرها اخاف.

- منين تخافين؟

- انت عليش تجتله؟

- تغشمين روحج؟

- ليش نقتله؟ اني ما أحب الجتل.

- خالي إرهابي وقتل حلال.

- وانت رايد تقتله؟ لا إرهابي.

- يولي خذاج وباكج مني، شنهو الجرم أكثر من هذا؟ حلمت بيج وقتلت أحلامي وخذاج.

- ما أدري، اني أخاف.

تنهد ودحك منا ومنا: عجل لا تشغلين بالج بيها، اني أحله.

- شتسوي؟

- اني أنفذ، كلت لج عليه.

- تكتله؟

- ما راح يطلكج ولا راح يخليج إلي. إذا ما مات بعمرنا ما نصير لبعض.

- والا موت؟

- انت عليش خايفة؟

- خطاب، اني ما أحب الموت.

- روحي هسه واني أحله.

ردت أندار، كضب إيدي: سمعت مريضة، ديري بالج على روحج.

- راسي ومعدتي يوجعوني.

- اني الصبح أجيب لج دوا، روحي ارتاحي.

عفتو ودخلت جوا.

رحت غسلت بالحمام ومشيت للقرفة. أبو وهب جان يون.

أول ما فتت، سأل: وين جنتي؟

- بالحمام.

- كل هالمدة بالحمام؟

- بطني توجعني.

- شجالج راسج، معدتج، بطنج.. شصاير لج يولي؟

- ما أدري.

- تعالي جاي.

- لا، أريد أنام.

- يولي عليش تتفلتين مني؟ ما أتقرب لج، هالتشوفيني مجطول لا أشيل إيد ولا رجل. أكربي.

- أها، أحاجيج.

- رايدة أنام.

- أي، تعالي نامي يمي. عليج مجنفة ليغادي؟

- مو من تجي المبردة تصير عليه هين.

- قدددس تعاي ولا تخليني ألح وياج. كربي لشو.

تكربت عنده.

فتح لي إيده، رجله حاط تحتها مخدة ونايم على ظهره.

حطيت راسي على إيده. حبني بخدي وحجه: عليش ما كتيلي أنا متعرض لي من الزغر وهيج صاير وياي؟ عليش خليتيني أقتله؟

- ما أدري.

- شنهو الما تدرين بيه؟

- ما عرف شصاير وياي قبل، وحتى من كتلتني ما أعرف ليش لازم يطلع دم. اني كتلك ما عرف وانت ما صدكتني.

دحك علي، رجع حبني وحجه: البنية الشريفة والمحد جاربها قبل ونايم وياها، من يوصلها زلمتها أول مرة يطلع منها دم.

هو يحجي اتذكرت حالي ويا خطاب من كام يجري دم.

حجيتله: يعني البنية التنام ويا اثنين مو شريفة؟

- شني هالسؤال؟

- لا، اني أعرف مو شريفة، فد يعني إذا واحد قبل يعني.

- ليش تسألين هالسؤال؟

- رايدة أعرف.

- التخلي غير زوجها يكربها مو شريفة وزانية، والله غاضب عليها وبيوم القيامة الله يدخل بيها سيخ من نار عقاب على السوته.

- وإذا يعني ما متزوجة؟

- حتى الما متزوجة الزانية، هي أي وحدة تخلي واحد يكربها بدون زواج، الله يحرقها بنار جهنم وينترس كبرها عقارب رحايا ياكلنها من تموت.

ضليت ساكتة.

فد الصار ويا خطاب كلو جا بالي، ضجت حيل.

يعني هسه الله ما راضي علي؟

حجه: بيش تفكرين؟

- ما أفكر بشي.

- أنا ما بس رجلك، اعتبرني أبوك، أخوج وأهلك. من أسألج جاوبي لا تخافين. أني أعتبرج مثل بتي قبل لا أعتبرج مرتي، وانت حلوة وخوش بنية. لا تتكاوتين وياهن اللي يأذيج منهن، بس عطيني اسمها.

- زين، اني أريد أعرف شي. الله يسامح واحد يقتل شخص؟

- الله يسامح الكل إذا تابوا وصاروا زينين.

- ياهو الكال يعني إذا واحد يقتل الناس شلون يسامحه؟

- ضل يدحك علي (تقصديني).

- لا.

- احنا الجاي نسوي الله يرضى بيه؟

- شلون يرضى بيه؟

- هسه ما أريد أدخلج بأمور أكبر منج، بس أجاوبج على سؤالج الله يسامح لو لا. الله بالقرآن يكول (إن الله لا يغفر أن يشرك به ويغفر ما دون ذلك).

- يعني شنو؟

- يعني الله يسامح الكل إذا تابوا عن الغلط، بس ما يسامح اللي يشرك بيه، ما يسامحه. واحنا جاي نقتل اللي يشركون بالله.

- يعني أنتم ما تقتلون الناس؟

- لا، احنا نقتل الكفار، الهم أمريكا والمشركين اليدعون غير الله. هم نقتلهم وهاي حلال.

- هااا، واني حسبالي حرام.

- لا مو حرام. اني أسوي الحرام. هالتشوفيني أصلي وأصوم وما أرضى بالحرام.

سكتت. ضل كاضب إيدي ونايم واني صافنة بالسقف.

دحكت بيه: يعني هو مو قاتل؟

شو يكولون يقتل الناس. ما أدري صح لو غلط.

ضليت صافنة وأفكر.

اني ما أكدر أقتله، ولا أرضى ينجتل بسببي.

لو أدحك على روحي وما أحسبها، اني وأشوف وحدة اتفقت ويا واحد حتى تقتل رجلها لحد الموت خاطر تاخذ واحد يحبها، راح أحجي عليها وأغلط وأشوفها مو زينة. شلون أسوي هيج؟

مو كل شي بيد الله؟

إذا الله رايد يموت راح يموت، وإذا الله كاتب لي أطلق منه راح يطلقني. ما يصير أتفق ويا خطاب وأخليه يقتله، حتى لو جان هو مو زين، يمكن يصير زين؟

هو لا غصبني على عرس ولا خذاني بالزور من أهلي.

حجه ويا أمي ورادني، وأمي كالتي، واني وافقت.

صح ما جنت أعرف هو ماخذ ثلث نسوان.

بس بعد غير الله كاتب لي قسمتي هيج.

اني أروح أعارض الله وأقتل ريسان خاطر آخذ ابن أخته؟

الله راح يعاقبني ويمكن يسويني قرد.

ويمكن يحرقني بالنار. اني أخاف من النار.

وحتى جدام الناس عيب.

جدام الله والناس ما يصير، وهو جاي يعاملني زين. اني ما أقدر أصير حقيرة وأقتله حتى آخذ خطاب.

فد خطاب يحبني قبله.

واني حبيته. بس اني متزوجة وأبو وهب ما يطلقني.

شلون ياربي؟ شلون راح تنحل؟

راسي راح ينفجر من التفكير.

تأخرت بالتفكير يلا نمت.

لشوي قاد، دخلت أميرة حتى تسأله يريد ريوق، كال الها: ما أريد، بس سدي الباب.

- أي، بس كعد قدس خلها تخلص شغلها.

- مريضة، راسها يوجعها، هديها نايمة.

- أكلك ريسان، شسالفتك وياها؟ شو هيج بسرعة رخيت الحبل؟ الله وصرت لها حزام؟ خير؟

- سدي الباب أميرة، خل أكمل نومتي.

أحس على حجيهم بس ما كعدت.

انداريت، أنطيته ظهري، وهو ضل نايم بمكانه.

لشوي قاد، كمت أسمع دبجة وهوسة الجهال والنسوان وحجيهن وصياحهن، والكهرباء طافية وحارة. مديت إيدي ومطيت جسمي. صحه وهم تحرك.

دحكت بيه، كال: إذا كعدتي سوي لي أكلة واستكان جاي، رجلي جاي تأذيني، خل آخذ علاجي.

- أي.

كمت لحيلى، لعبان نفس قاتلني.

الدوخة تموتني. جاي أروح للمطبخ رجعت للحمام فرغت معدتي وغسلت ورحت للمطبخ، تلكتني عفاف: صباح الخير يعروس، شني توج ذكرتي تكعدين؟ ما تكولين شغل بيت، شني خداميج إحنه هينا؟

عفتها ما رديت، واندارت ظهري للحاجة بالهول: عطيني بيض أبو وهب رايد ريوق.

- بحلكج عظم ما تعرفين تكولين صباح الخير، بس عطيني.

- غير هو كالي أريد ريوق.

- بس أكل، كل خير ما بيجن.

كامت لحيلها وهي تقلط وتدعي علينا جيف طلبت أكل.

واني طلبته لأبو وهب حتى ما كلت لها لي.

أطتني، سويت له ريوق وخذيته.

أكل شوية وشرب جاي وكال: عطيني علاجي.

أطيتة الدوا، 3 حبوبات وشراب واحد، والباقي إبر بالليل يضربهن.

أخذو وكال: ذكريني الظهر أخذه.

- خوش.

عفت منه وكعدت أتريك بالصينية. خلصتها وكمت لميت الهدوم ورحت غسلتهن كلهن وقسلت الكراج.

خطاب جان موجود بالبستان، أحسه يدحكني، فد ما دحكت بيه وحاولت ما أختلط وياه. ما عرف وين أريد أوصل، بس الجاي أسويه هو الصح، بعد ما أدري.

شعوري مختلط.

بين قلبي يهوى خطاب، شاب ويحبني ويفهمني.

وبين صوت بداخلي يكلي: التسوينه حرام وما يصير تهدين زلمة لخاطر زلمة آخر تحبينه. اني الرضيت واني الوافقت بيه واني أتحمل إثمي.

بس قلبي ما راضي بهالحجي.

شفت حنية بخطاب ولهفة وشوق ما شفتها وحسيتها من أحد. يمكن لأن أول واحد أحبه بحياتي.

فد شعوري الجاي أعيشه بهالوضع مو حلو.

ما أعرف شريد وشنهو اللازم أسوي.

خصوصاً معدتي وراسي مدري شجالهم.

لا هو مرض ويكضي بيومين ولا له علاج.

أشرب بالدوا شوية ويرد، وكلش تأذيت من وجع راسي، النملة إذا تمشي بالكاع أحس خرافيش رجليها براسي، شلون واني بنص بيت متروس جهال وناس. متت من هالشعور.

.. رادت أدخل أستراح.

صاحت علي أميرة: تعاي نظفي الخضرة.

خذيتها وكعدت أنظف بيها.

خلصتها، أنطتني عواطف أماعين جوا إيدها وسخة، كالت: (غسليهن). قسلتهن.

فد أحس راسي راح ينفجر.

ردت أدخل قرفتي، الحاجة ووهب كاعدين يم أبو وهب، ما أكدر أتمدد يمهم. تمددت بالهول.

باب المجاز مفتوح.

خطاب يمر. جدامه متمددة.

ما ارتحت. كعدت لحيلى.

أفتح بعيوني كوة ويردن يغمضن من وجع راسي.

صبن القدا.

ما اشتهيت، أحس روحي كلش لعبانة، وأخاف آكل وأذبه من معدتي وأتأذى من شعور أفرغ معدتي، لا أحس روحي تطلع واني أرجع الأكل.

محد منهن صاحتني من ما كعدت، حتى الحاجة.

ما صاحت. كمت من الهول حتى أفوت للقرفة، لكيت أميرة كاعد تقدي أبو وهب. صاحت عفاف: قدسسسس.

- ها.

- جيبيلنا دولكة الماي.

جبتها. حجت: ما طولج واكفة، جيبيلنا الخبز بعد ع الرف.

جبتو رجعت. ما طولج واكفة الملح الملح.

زقحت: شنية ابتليت وكفت، كوموا أنتم.

صاحت: شدعواج عيني، شصخرناج؟ جبتيلنا كم حاجة. شو ثور ومبطوح نومتج ظهاري.

ما رديت، عفتها ودخلت للقرفة، فد حواجبي أطبكن. صاحت الحاجة: سويلنا جاي.

صحت: أهوووو، شنية كله علي؟

بسسس تعبت ما أكوم والله.

صاح أبو وهب: حسج يوووولي حسججج!

- صيح بيهم والله راسي يوجعني ما أكوم بعد ما أتصخر.

كامت الحاجة واجت تهدّ علي وكضبتني: صياحج هذا ويامن يولي.. عليَّ.

صاح أبو وهب: هديها أنا أعلمها الهاطيحة حظ هديها.

دفعتني وهي تكلي: اسمع حسج نوبة اللخ إلا أدَفنج.

حجتها وطلعت.

- شني بس قدس قدس قدس؟ أريد أنام تعبت.

- يولي مو تصيحين على الحاجة بحلج هي بعمرج احترمي.

- هن ينحشنها عليَّ ما أكوم بعد.

- تعاي جاي أكربي شبيج.

صحت: ما أرييييد.

عفتو وجريت مخدة نمت على صفحة.

ما حجه.. ظليت نايمة.. لشوي رادوا يكعدوني ما كعدت.. للمقرب يلا صاح: اكعدي ما يصلح تنامين المغرب.. غسلي وجهج واكعدي.

كمت للحمام أريد أغسل.. الماي مكطوع.

طلعت للحنفية البرا.. هم الماي مكطوع.. رحت للمبردة مال الدوانية جريت مي من البرميل مالها.. أغسل حجه خطاب.

- وديتلج دوا بيد صفاوي كبل شوي أطاجياه.

- توني كعدت ما أدري.

أحجي وعاكدة حواجبي راسي وجعني.

حجه: شبيه راسج يولي دحكتج الظهر نايمة مردتي كلبي.. كليلي شبيج.

- ما بيه شي.

عفته وجاي أمشي حجه: قدس؟ شبيج وياي؟

- مو كتلك ما بيه شي.

ضل يدحك.. حجه: ديري بالج على نفسج واخذي دواج.

عفتوا ودخلت للبيت.

أدحك روحي.. هسه أني المن؟

لأبو وهب لو لخطاب.. كعدت أبجي بالمطبخ وحدي.. اجت سراب: أبوي يريدج.

- ما بيه حيل.

- أبوي يريدج دكومي.

- هسه اجي روحي.

راحت ظليت كاعدة وحدي بين وجع راسي وكلبي دموعي تجري.. ليش وشبيه وشريد ما عرف.

لح كل ساع يدز واحد.

كمتله.. ضل يسأل شبيج وراسج شبيه.

بقيت متمددة صاحت الحاجة خاطر أكوم أعاونهن بالعشا ما رضى هو كال: عوفوها مريضة خلوها بحالها.

جابت عفاف العشا بس جان متألم حيل ما كدر يتعشى كال حطي.. لشوية قاد طلب مني أكربله الصينية.. كربتها.. كال: اكلي.

كلت شوية وما اشتهيت.. كال: شربيني الدوا.

جريت العلاكة ردت أشربوا.. دحكت علاكة العلاج مفتوحة والشراب عليها.. دحكت بالشراب لونو أبيض فد جان لونو شفاف.

عرفت خطاب جاي يسموه.

حجه: اطيني شبيج.

- فد خل أجيب خاشوكة.

- مو هاي خاشوكة.

- ما نظيفة ما نظيفة.

- ارتبكت وادية كامت ترجف ردت بس أكوم أحس إذا شربته بيدي هال المشروب راح يموت جدامي واني ما أكدر أقتل بشر.

جبت خاشوكة واجيت.. دخلت القرفة.

سويت نفسي أعثرت ووكعت الشيشة من إيدي: الثول حتى ثول.. كسرتي يولي.. عمية ما تشوفين.

الرجيف كضّب كلبي.

تخرذلت.. ردت أعبر الكزيز دست عليه.

انشكت رجلي.. وخرت منه.. صاح: ي يولي شجاج انصكعتي سراااااب.. ول هيييييين.

كعدت لحيلي وكمت أبجي حيل.

انثبر بحالي ما عرف شيسوي كام يصيح: ول هيييين.

اجته عواطف كال الها: رمي الكزيز وشوفي هال المصكوعة شجالها تصركعت وانشجت رجلها.

كومنتني وكال: يولي رجلج جاي نجري دم دكومي غسلي شو دكومي.

جرتني وطلعتني من القرفة رحت برا أغسل.

كعدت أغسل وأبجي.. اجت بوراي شايلة المكرافة ولامة بيها الكزيز كالت: هسه متكليلي شبيج تراج تتعايرين هواي هي لحست كزازة شجاج.

طلع خطاب من القرفة على حس عواطف.. حجه: شبيها بعدو راسها؟

عواطف: لا بس كسرت شيشة الدوا مالت أبو وهب وذاك تصركع وهي شجت رجلها.. فوت يمعود لا تزيدها وتصير هوسة أمش.

ضل واكف وعاكد حاجبه.

اني ما دحكت بيه.. غسلت رجلي وعواطف راحت تذب الكزاز.. كرب مني: كسرتي شيشة الدوا عمد يولي؟

- ما أريدك تكتله ولا أريدك تفكر بيه.. عوفني بحالي وخلي كل واحد يشوف حاله.

حجيتها ببجي وعفت رجلي وجاي أروح.. كضّبني: شني هاي مالت كل واحد يشوف حاله؟

- ابعد ايدك خطاب.

- تعاي هينا اكفي.. شجاي يصير وياج.

- لا يشوفنا أحد ابعد.

- خل يشوفنا ال**** شني تلعبين علي انت شنهو هالحجي؟

جريت إيدي منو راد يسحبني فتت للبيت.

فات وراي.. ندرلتو: أفهمك بعدين عليك الله روح.

- تعاي جاي فهميني لا تخليني أقلب البيت فوك راسج.

عفتو وجاي أمشي طلعت أميرة بوجهي.. وكفت أدحك حجت: شعدج وياه.

عفتهم ومشيت فتت للقرفة.

دخلت أبو وهب يصيح.. كعدت وحطيت راسي بين رجليه أريد فد أخلص من كل هالمشاكل والوجع ما أريد كلشي فد رايدة أعيش بهدوء حت لو أتعب بالشقل وأميرة وعفاف يشدن وياي عادي أكدرلهن المهم ما أريد أضل بهالوضع وما أعرف المن أميل كلبي بصفحة وأني بصفحة.

اجت عواطف شربتوا الدوا.

وضل يصيح عليَّ خاطر أجيه ما سمعته ولا كمتله.. الليل ما عرفت أنام.. وهو ساعة يون ساعة يقفى.

للصبح ما نايمة.. من كعدوا البيت أني كعدت وياهم.. جانت جاية الكهرباء بالهول الجهال مشقلين أفلام كارتون.. وصوت المبردات بالبيت يون.. دكيت الباب على الحاجة.. صاحت: ياهي.

فتحت الباب: كاعدة.

عكدت حواجبها: شرايدة؟

- عندي سالفة ورايدة أحاجيج.

- شنهي؟

- بيني وبينج.

البنات جانن متمددات بقرفتها اندارتلهن: كومن شوفن أمجن كضت الخبز كطعت أرواحنا من الجوع كووومن.

كامن وطلعت من القرفة.

كربت يمها وكعدت دموعي جرت.. حجت: شجاري لحالج يولي.

- أعرف انت ما تحبيني وما تريديني بالبيت فد ه الشي مو بيدي.. هي قسمتي جابتني هين.. من أنا وزقيرونة خذتني أمي من الربوني فد ما حسيت هي أمي لا فد يوم نصحتني ولا علمتني فد تقلط وتصيح وتتكاون وياي.

- شرايدة مني يولي.

- أني حايرة وما عرف وين أروح وماكو قيرج جبير بهالبيت أحجيلو ويفهم البيه تريدين تزكحين بيا تريدين تطكيني عادي ما راح أزعل فد نصحيني وكليلي شسوي.

جاي أحجي طبت أميرة: حاجة بس بيض.

سكتت وهي اندارت لبوفيتها اطلع بيض.. أميرة أدحك عليه.. جيف أبجي وعيوني مدمعة.. حجت: شبيج.

جرت البيض الحاجة ومدتلها إيدها تناولها وتكللها: انت ياهو مالتج اخذي البيض هاج وفاركي ياااله.. ولي.

سدت الباب أميرة ومشت.. اندارتلي الحاجة: شنهو العدج احجي.

- أني بيوم الجتلتوني وطلعت شاردة من هين لكوني ناس رادوا يدوني لهين وخفت تحركوني وبيت أهلي بالجول ما اندلهم وين.. اطيتهم فد اسم خطاب كلت يوصلني لاهلي.. واجاني خطاب وخذاني لبغداد.

قاد خفت أرجع لاهلي خاف أبو وهب كاينلهم علي شردت وأخوتي عسرين وخطاب كالي (ضلي يمي أني آخذ بيت ونتزوج ونعيش أني وياج ومحد يكربنا).

رضيت فد خايفة.

كربني مرة.. وطلع دم فد والله ما أدري قلط لو حرام حسبالي من كال راح نتزوج عادي وحت ما عرف البنية يطلع منها دم وهاي السوالف.

- من كربج خطاب طلع منج دم.

- أي فد كالي لا تخافين أحنا بعد صرنا متزوجين.

- اتزوجتو؟

- لا الشيخ ما رضى يعقد إلا واحد من أهلي ومن كتلو عاقد زكح بينا كال متزوجة ما يصير تعقد إلا الملج عليها يطلكها واحترنا وما عرفنا الحل هو رادني أضل وياه بلا زواج فد أني ما رضيت كتله رجعني لبيت أهلي ولو رادوا يكتلوني أني راح أخلي مرت أخوي تشردني منهم فد ما جتلوني بس بسطوني أخوتي.

- رجعتي عفتي لو شنهو رجعتكم.

- رجعت خاطر أخلي أمي تطلكني من أبو وهب وهي كالتلي أطلكج فد من مات أخوي كالت رجعي كمت أبجي أحجي ما رضت حكمت علي إلا أرجع ورجعت.

- والرايدته مني شنهو؟

- أنا واعدت خطاب أردله وما أرد لأبو وهب فد أمي ردتني قصب وهو من رديت لهالساع مجنون ويريد يكتلو.. هو ورا الانفجار وحاله ريسان هاي.. ومن مات طلب مني أسممه ما رضيت.

نهرتني: امشي عني جذابة خطاب ما يسويها ويجتل خاله.

- والله ما عد أجذب تريدين روحي سالي.

ضلت تدحك.. وكونج طاوعتيه.

- ما رضيت هو راد يفرق الدوا مالت أبو وهب ويحط بدلها سموم فد ما رضيت وأمس من ردت أشربه الدوا شفت الشراب متقير عرفت خطاب جاي يموته خفت حيل وكسرت الشيشة وحتى انشجت رجلي وهو درى أني سويت هيج.. ومجنون وما أعرف شسوي.

- انت جاي تلعبين عالصوبين يولي.

- والله لا أني فد محتارة وما عرف شسوي من جهة ما أريد أقتل وأذي أحد ومن جهة.

- ومن جهة شنهو تريدين واحد غير رجلج يولي خافي ربج انت بذمة رجال تفكيرج هاذ ينهزلو عرش الله التخون زلمتها الله يحرقها بنار جهنم.

- وخطاب.

- خطاب شنهو ولج انت مو بركبة رجل لو لا.

فاتت عفاف: تعاي تريكي حاجة.

- امشي غاد هسه اجي.

- خير اكو شي.

- انعل أبوج لابو توالي أهلج امشيييي.

سدت الباب وطلعت.. اندارتلي: سمعي يولي جري عدل واحترمي روحي وحق هو الله اخلي ريسان يكصبج.

- أني رايدة أمشي عدل واجيتج حت تدليني شلون أمشي.

- ابعدي من خطاب وجوزي منه.

- ولو هو ما رضى.

- وانت متانية يرضالج يولي انت بركبة رجل حرام عليج يمة.

من كالتلي هيج.

دنجت وضلت دموعي تتجارة.. حجت: صالج مدة عدنا بالاول كرهتج وبعدني كارهتج بس جان ضني بيج مثل أمج لجن من عاينتج طلعتي وحدة ثولة وما تعرفين راسج من كفاح.. إذا ما جانت الج أم تنصحج تاخذين نصيحتي لو نصحتج.

- والله آخذها.

- عجل ابعدي من خطاب.

- وإذا سوا مشاكل.

- تعاي وكليلي واني أنهره عنج.

الما يفتح زنبيله محد يعبيله.. لو ما شاف منج وجه مرة مرتين ما عبرتي يكوم يعوفج وماله غرض بيج ويخليج الحالج.

- وهسه شني شسوي؟

- كومي غسلي وسمي باسم الله ولا تكربين منه ولو لح أنهري وكليله عيب حت لو خالك سوا ما سوا مالي غرض أني مرة ومحترمة ما أرضى أخون زلمتي وأنا على ذمته ابعدي مني.

كومي يلا.

- ماشي.

كمت منها وقررت أبعد من خطاب حت لو كلبي يحبه ما يصير أضل وياه وأني على ذمة أبو وهب.. ما أكدر أضل بينه وبين ريسان.. عود لو فد يوم ريسان طلكني لو مات ذاك الوكت أفكر بخطاب بس هسه ما يصير أفكر بيه وأني متزوجة عيب وحتى حرام الله ما يرضى.

كمت تريكت وياهن.

وخلصت شقلي خطاب ما جان موجود بالبيت.

صار الظهر أبو وهب نقلو وهب لقرفة عفاف حتى أدالي يكللهم: قدس هوس الله بارض الله دثو تنام ما تدري عني أضل أون للصبح ما تدري بحالي.

اني هم ارتحت من عاف قرفتي.

سديت الباب وتمددت بفراشي.. الدنيا ظهر الكل بالبيت هادي.. موجودة كهرباء فد ما مشقلين مبردات ما تتحمل بس بنكات.. متمددة وفد صوت البنكة بالقرفة.. اندك الشباج.. فزيت وكمت أدحك.. جريت البردة.

شفتو خطاب وعاكد حواجبه.

أشرلي أجى.

فتحت الشباك.

"شتريد؟"

"تعاي للدوانية احجي وياج."

"يروّح احد يشوفني، عوفني."

"تعاي لا تخليني اندمج، والله تعاي رايد احجي وياج."

هزيت راسي وطلعت. رحت لقرفة الحاجة، جانت متمددة وحاطة الراديون يم راسها وتسمع، والسبحة بيدها تسبح. من دخلت، دحكت: "هاا يولي."

"خطاب."

"شماله؟"

"يريدني اروح للدوانية، اكله ما اريد. يكلي اندمج، لا ما اجيتي."

"ضلي هين ولا تمشين، انا رايحة."

كامتله واني صليت بقرفتها. مشت، حاولت ادحك واسمع شكو. ما سمعت شي، فد امه طولت يمه. رجعت لقرفتي، تمددت.

ليقاد صاح عليه ابو وهب: "قدددس، يولي، هيييين!"

كمتله من قرفتي. رحت له بقرفة عفاف. حجه: "شعندج امس ويا خطاب؟"

"والله ما عندي شي."

"اميرة شافتكم وهو يحاجيج، شعده وياج ولج؟"

صاحت الحجية: "اميرة ام العلوم، صدكت بيها ما عدها شي، ولا خطاب كارب هين ولا واصل. تصدك اميرة؟ دخيل بختك."

حجت اميرة: "شفتهم بعيوني امس عد ما شجت رجلها وهو يحاجيها."

قدس: "يكلي لا تقسلين بعد بماي المبردة مالتي، فد الماي مكطوع، بيش اقسل؟"

حجه: "لا تكربين منه، ولو حاجاج لا تردين عليه، خووش."

"ماشي."

حجت الحاجة: "لا خوش بت وسباعية ما تتوصى، انا كبل حسبالي مثل امها، بس خوش بت."

حجه ابو وهب: "لا خوش بنية حبابة، بس اوجهه، لا تغلط، لين من تغلط ادفعها الثمن غالي، هل ما اريدها تغلط."

الحاجة: "لا ما تغلط ان شاء الله."

اميرة: "الله مثخن لبنكم انت وهالدثو هاي."

"شفت سمج يكطع اللبن، كلت احول عليها اخير منج."

"هسه صرت انا كخة وهي اخير مني، الله يرحم."

"فكّينا سمج ياله."

ما رديت على حجيها. فد حجي الحاجة شجعني اتكوى اكثر وابعد من خطاب وارضى بقسمتي. والله يفرجها.

كمت للمطبخ. كعدت اكشر بتيتة سلك اني وسراب. كشرنا بالثلاث كيلوات وحمسناه. فد ابو وهب ساءت حالتو كلش. كام يصرخ حيل، صوت بالسما وصوت بالكاع. خابر على الطبيب، كالو: "اني كتلك لازم عملية، اذا تضل هذا حالك تسكط رجلك."

ضل حاير ويخبر، واتفق ويا واحد من ربعه يطلع للاردن، قاد هناك يسوي العملية. واتفق وياه. كل هاي الهوسة واحنا نحضر بالعشا. صبينا وكضينا، واني اللعبان نفس، كلش تعبني.

اجو ناس من كرابة ابو وهب، مدري ربعه. هم جاي وماي وبالهول، وانحبسنا بالمطبخ ليما مشو. طشينا. فتت للقرفة ارتاح.

توني فتحت الباب وفتت بسرعة من التعب. الا خطاب متمدد على فراشي. فزيت: "شعدك؟ لا احد يشوفك عدي واشتهر عليك، الله روح."

"اودي عليج تودين امي."

"خطاب روح الله عليك، والله شافك ابو..." قاطعني وصرخ: "نعلبوهم لابو اهلهم، انت تلعبين علي."

دفر الدولكة برجله. هميت عليه اكضبوا واكلو: "صوتك راح تشهرني، صوووتك!"

ادحك ع الباب. مشيت قفلته. "خطاب عليك الله بس."

"شنهو البس وعدج وينه؟ من كتيلي ما راح اردله وراح اطلك منه وارجعلك، كلتي امي ورحت لامج واتفقت وياها، وساعة الاريد انفذ واخلصج واخلص وضعنا، تخربين الاول والتالي وتكسرين الشيييشة."

"ولو ما ما يعرفو مسموم، ما اكدر اخاف."

"يولي ارهابي هو، يا مستشفى تلفي وتدور جتاله. لو يفطس محد بحاله، تفزعيلو ليييش؟ لا كربتج ولا خليتج تعرفين، يا شيشة حطينها اله؟ عليش تفزعيلا؟"

"خطاب اني رضيت بقسمتي وبعد ما اريد شي."

دفعني: "تقررين من كيفج انت يولي؟ ووعودج الي وحجيج وذاك الحضن والبجي من عفتج تعلكيني بيج وتكليلي خلصني، وتاليتج تعوفين وترضين بيه؟ جاي تلعبين على الحبلين انت، ياهو اليفيدج ضاله وياه."

"هو من الاساس رجلي وقلط وياك، ما اريد اعيد القلط."

كرب مني وكضب ركبتي. "من فتحتيلي روحج ونمتي على صدري تسميها غلطة؟ من بجيتي وعلكتي روحي بيج وخليتيني ايام وليالي اتمحرك لحالج واحير بيا طريقة اخلص بيها من اهلج."

"على كيفج تمحيني وتذبيني وتشوفين غيري."

"لعبة عدج اني."

"خطاب وخر ايدك وروح منا، ماكو شي بالزور."

"بفعلج هذا ما تفرقين عن خالي بشي. خالي كتلو رايدج وخطبج عني، وانت كتلج رايدج واطيتيني روحج ووعدتيني ما تطين روحج لغيري، وهسه تبيعيني بسهولة؟"

"شتريد تعتبرني اعتبرني، مو كد الوعد مو خوش، عادي، اني ما اكدر ابقى وياك بالحرام."

كرب مني. رجعت للحايط. "يولي جاي تمشين الحلال والحرام براسي. اليومين النمتيهن بحضني شنهو؟"

"غلطة وما اريد اعيدها."

حصرني على الحايط. كمت ابجي: "خطاب اطلع عليك الله."

"مستعدة تتحملين هالغلطة؟"

يحجي ويهمس باذني ونفسه بركبتي. كزبر جسمي. جر الربطة من راسي. رفعت اديه ابعدو مني، كضب اديه وحشر صدرة وحصرني بالحايط. كامت دموعي تجري. "عليك الله عوفني."

"للغلط ثمن. مستعدة تتحملين هالغلط؟"

"ما اريد، فد عوفني."

كام يضك وجهه ويا وجهي. كمت ابعد بوجهي منه وهو يكرب اكثر. دفعته عني، سحبني حيل وردمني بالحايط. ولك جسمه بجسمي ولازمن من ركبتي: "هسه كمتي تكشين مني وتبعديني؟ انا تلعبين علي يولي."

"خطاب وخر بعدهم كاعدين. خطاب روح."

"حسبالج بقرارج هاذ اخليج تتهنين يولي؟ مو اني الينلعب عليه. انت وخالي اشوفكم نجوم الظهر والله."

"وخر عني وخررر."

لزك شفته بشفتي وكام يبوسني حيل. اريده ابعده مني. اديه تكول حديد ما ينجرون، كاضب ركبتي وحاط شفته بشفتي حيل. كمت ادير براسي منا ومنا. كام يمص بركبتي حيل ويعض. كمت ابجي واهز بجسمي: "وخر مني ووووخررر."

ذبيت روحي عليه حيل ودفعته.

مسح حلكه وهو يكلي: "كدامج طريقين مالهم ثالث."

"خطاب روح راح تفضحني."

"دحكي لج، ما طولج اختاريتي تعيشين بهالبيت وتضلين بيني وبينا وامشيتها براسي سوالف شرف. اختاري لو تكملين وياي ووياه وتضلين ترضين شهواتنا اثنينا. لو تصيرين شريفة صدك وتروحين تعترفيله انت شطيتيني بذيج الليلة."

كمت ادفع بيه. كضب وجهي بقوة: "لا ما اختاريتي واحد من هالخيارين، راح انا اعترف بكلشي كدامه واتعذر منه واكلو خالي اعذرني اني غلطت وياها وما رايد اخسرك وانت بمثابة ابوي، لخاطر وحدة ما تسوة تخش بين الولد وابنو."

"انتم دخلتوني اني ما دخلت."

"مالت غشيمة وتتمسكنين بح، خلصت وياي، اذا ما اختاريتي ورديتيلي جواب راح اسوي الكلته وجربيني اسويها لو لا."

"والله حرام عليك، ليش جاي تسوي بيه هيج خطاب؟ اني امنت بيك وانطيتك روحي، كلت ما يغدرتني تفضحني ليش؟"

"ياهو الغدر؟ ياهو انا الغدرتج لو انت؟"

"ولو بديتي الغدر انا اكمله وامشي وياج بيه. والبينا زود يكمل."

"والله اخاف يذبحني."

"وذبحتهم من تختارين واحد، خلك ذباح ارهابي عليج حيل ما يجيلج. منو ومني."

راد يطلع، كضبتوا: "وين رايد تفضحني؟ جاي تسمع اكو صوت بالهول."

"ميهمني، انت الدعيتيني لغرفتج وكل ليلة نكررها."

قمزلي وذب بوسه بالهوى وكرص خدي. فتح قفل الباب وطلع.

گلبك مثل باچر ماعرفته شضام.

فتح الباب وطلع من القرفة.

جانم عواطف وبتها واكفات. ضلوا ابحلكين عد ما طلع خطاب من قرفتي. دحگوا عليه مستقربين.

طلعت بسرعة من قرفتي دخلت لقرفة الحجية عيوني تجري واني اكلها: احجي وياه اني تعبت منه ما عد يعوفني لحالي.

فزت من بكانها وهي تكلي: ها يولي؟

فاتت عواطف تكلها: خطاب فتح قفل غرفتها وطلع.

خمست خدودها وصرخت: شلون بيه بهالولد يربيييي.

عافتني ومشت. ضليت ادحك وراها وابجي. وعواطف تسعل: شجان يسوي بغرفتج؟

يهدد بيا.

شيريد؟

ما ادري.

عفتها ورحت امشي لقرفتي سديتها وكعدت ابجي لوحدي.

معد اعرف اني وين والمن.

السويته صح لو قلط؟

اترك خطاب وارضى بقسمتي لما الله يفرجها لو اضل وراه. اتراجع شلون واني على ذمة ابو وهب. ما يطلكني وامي ما بين منها خبر.

يوم الاجت لهين هانتني اله ما نصفتني سوتني وحدة جاتلة روحها عليه. امي شنهو التريده؟

وخطاب وين اوصل وياه؟

براسي خبصة ما عرف شلون احلها.

اذا سواها خطاب صدك شلون؟

وراح كال لابو وهب اني جنت وياه من طلعت من البيت. وكتها انجتل لا محالة.

فد شلون ارضى اضل هيج ويا خطاب واني على ذمة رجال. اطلكت من ابو وهب وما اختاريته. جنه امري بيدي حتى يخيرني.

دخلت عليه الحاجة: ها.

شكتيلو؟

كتلو ما يكرب منج بس هالولد هاذ مدري شصايب بعكله. فعلة ريسان هاي جننتو ما خلت براسه عكل. خطاب اسميه السبع عاكل وفاهم من يوم فعلة ريسان ولليون جن تخبل وماهو بعكله.

فد اخاف يفتن على سالفتنا جدام ابو وهب والقران يذبحنا.

من اليحبك لا تخاف. وانت من خطاب لا تخافين حجيه مثل دخان النار. يغوش ويخنك بس ما يحرك. وهو من نار كلبه جاي يعمل هالفعايل.

يعني ما يسويها؟

ما اضمنه الج بس لا تخافين منه ولا تكربيه. كل ما بعدتي روحج عنه يكون احسن.

اطمت لحجيها واعتمدت عليها تبعده مني.

بلكي الله يعوفني لحالي. كفلت القرفة وظليت ادور منا وارد منا لما نمت.

ثاني يوم.

كعدت الصبح الساعة ٦ نشيطة.

ما جان احد كاعد. رحت للمطبخ قسلته.

عجنت معجنة جبيرة وقطيتها.

وثرمت الطماطة والبتيتة حمستهن. كعدت عواطف: ياهو العاجن؟

اني كلت من تكعدين خاطر فد تخبزي.

زين ما سويتي. هدي من ايدج عفاف تكمل الريوك واني وياج خل نخبزه.

كمت وياها طشيت الطحين بالصينية وكمت اشنك وياها العجين. حجت: خطاب شعده وياج؟

ما عرف.

انا اعرفه يودج واعرف مالج صوج وياه بس ديري بالج مو بس منه.

منين؟

انت ضرتي صحيح بس الله يشهد ما احسبج ضرة بكثر ما احسبج بنية حالج حال بتي سراب. ما اغير منج ولا اضوج بس الوياي مو مثلي. عفاف واميرة شرانيات وكلشي مو زين توقعي يطلع منهن. يتهمنج. يتمسكنن وياج لحد ما يوطنج ابد لا تامنيلهن. لو وحدة منهن شافت الشفته انا امس جان الخبر هسه يم ابو وهب وناحر ركبتج.

خطاب هو الما يعوفني.

خطاب زلمة سبع والجاي يسوي مو ثوبه ويرد لعكله لا تخافين منه. خاف على روحج وديري بالج.

هزيت راسي وكمت للتنور هيجت الچيم ومسحت التنور.

شالت الصينية وحطتها. خذيت شنگة من الصينية لوثتها بالطحين وخبزتها بيدي وفريتها وخليتها ع المخبازة وطركتها بالتنور.

خبزتج حلوة غاد عد اهلج تخبزين؟

من اني عمري ١١ اخبز.

ياهو العلمج امج؟

لا مرت اخوي. امي ما تعلم.

عليش؟

ما ادري. عيشتها وياي فد صياح واوامر.

ابوج وين؟

ما عرف.

ما تعرفين ابوج؟

اعرف اسمه.

بس!!

اي.

سالفتج هم داجة.

سالفتي اني بروحي ما فاهمتها خاطر ادج.

العيشة هين اصعب من التتصوري. واسرار هالبيت اصعب من اسرارج.

شلون؟

اولها ام وهب.

ام وهب! ليش ما انت ام وهب؟

هذا اليعرفو وهب والكل يعرفه ما يعرف سره.

عجل ياهي امو؟

احجي واني امد ايدي للتنور واطرك واندرت الها اطيها المخبازة واركز بحجيها. تكربت عفاف سكتت عواطف واشرتلي اسكت. ووكفت عفاف: اليوم اثنينجن شني صرتن صويحبات؟

خلصيتي الريوك؟

يا كلابهم اليوم الريوك مو عليه.

عجل خبري اميرة تجهزة بسع خل نكضي شغلنا. يلا.

اميرة تكول مالي غرض مكابلة ابو وهب متوجع.

قدس: اني ثرمت الطماطة والبتيتة فد حمسيهم.

والله مالي غرض انا اليوم البيت علي مو الطبخ.

عواطف: كملي قدس الخبز خل اروح لاميرة.

مشت عواطف. كعدت عفاف للصينية تلوث الشنكة بالطحين وتطركها تخليها ع المخبازة. ناوشتني: هاج. شحجت وياج عواطف؟

تحجي ع الليل تكول حارة نصعد فوك نخاف تجينا طلقة تايهة ننام جوا ننحمس من الحر.

تريدلها هوى عطيفة ام الذكن.

ذبت العجين من ايدها وكالتلي: كملي خل اروح اشوف التسوي الريوك شني جعنا.

وكفت للخبز الحار كصت نص كرصة ومشت.

اني كملت الخبز وخذيت الصينية مال الخبز وطبيت. محد بيهن حامسة الطماطة والبتيتة. عواطف تكول اميرة واميرة تكلها اني ملتهية بابو وهب خلي بتج وعواطف تكللها. انت كل شغلج تذبينه براس بتي. بتي نايمة.

واميرة تردها: باجر عكبة من تعرس هم تضل نايمة وتعلميها ع الخباكة. كعديها وخلي تخلص الريوك.

عواطف: لا والله ما اكعد بناتي الشغل شغلج روحي كملي ووحدة من عدنا تكابل ابو وهب.

صرخت: تريديني اعوف زلمتي لخاطر شغل من عقلج يا شغل يا بطيخ نور عيوني هذا اذا ما اداري بماي عيني واحطه بكلبي واشيل الوجع عنه شنهي عيشتي وشنهو الشغل هسه لو تنكلب الدنيا ما اهده لا والله.

تحجي وتسمع ابو وهب.

وعفاف تكللها: كلنا نداري ونحطه بعيونه شعدنا غيره خيمتنا وعزوتنا بس كل وحدة بينا تكمل شغلها والثانية اداري.

اميرة: لا والله عسمى البيت يخيس ما عدي شي اهم من زلمتي ونور عيني.

طلعت الحاجة: الساعة راح تصير ب٨ ونص ريوكجن وين؟

اميرة: غير قدس ثرمت المخضر وعافته.

قدس: اني ياهو ماتي جنت كاعدة وما عدي شي ثرمته كلت يمتى ما يكعدن خاطر يخلصن بسرعة.

صاحت الحاجة: بنات الجلاب تتكاونن على حمسة مخضر من الصبح امشننن.

دخلت اميرة بقرفتها وسدت الباب.

وعفاف طلعت برا تقسل الكراج وعواطف عاندت لا هي تحمس المواد. واني جعت حيل كاعدة من الصبح وما ماكلة وكامت روحي تلعب. شعلت الجولة وحمستهن وسويت الريوك.

سراب خدرت الجاي.

ونصبنا السفرة. الحاجة كالت: بيت حمدان راح يجونا نظفن الهول عدل وتحضرن للغدا. يضلون للغدا.

كضينا الريوك واني طلعت للهدوم اقسلهن.

وهن كل وحدة راحت الشقلها. فد اميرة مكابلة ابو وهب.

شطفت الهدوم واني اراقب القرفة مال خطاب ما طلع منها ابد. اخاف لا يطلع ويشوفني ويرجع يهددني.

شريتهن كلهن وترست سطل من البوري البرا وهذيته للحمام خاطر اسبح. وكف وهب: شعدج بيه؟

رايدة اسبح.

وعليش اتسبحين ما صالج تلث تيام من سبحتي.

وانت ياهو مالتك احتريت ورايدة اسبح شني تحاسبني؟

دفعني من جدام الباب فات وصكه. صحت: الكبر كون.

طلع من الباب حطه ايدو على وجهي دفعني وهو يصرخ: ياهو الكبر بت****.

الحاجة واكفة صاحت عليه دفعتو مني وكتله: طايح الحظ.

صاحت بيه: لا تغلطين علي ولج.

وهو هد يريد يكضبني دفعتوا مني.

هو يصيح وهي تصيح فات للحمام صفكه وهي تكلي: نوب اللخ من اسمعج غالطة عليه الا السانج اكصه.

عجل ليش يقلط وياخذ مايي؟

على الماي تتكاونين من خفت شوفتج كحط ماي.

اي الماي ما يجري بالبوري مال الحمام ترستو من برا وهو خذا اريد اسبح.

وشعدج سابحة معاشرة رجلج وسابحة روحي اكضي شغلج ولا توذنين بروسنا عيب خطار راح يجون نلتهي بمكاونكم.

عفتها وطلعت برا.

حرانة حيل ولعبانة روحي. كضبت الصوندة وحطيتها فوكي وسبحت بهدومي فد اريد ابرد متت من الحر لا كهرباء لا ماي جوا وفد نشتقل.

حاطة الصوندة فوكي والماي يجري علي.

دحكت خطاب ليقاد بالبستان شفتو. ذبيت الصوندة من لمحته ورحت للبيت امشي والمي يجري من هدومي. تعديت الهول والماي يصب مني. صاحت عفاف: يولي يصكعة الله مو ماسحة اني شنهااااااي.

عفتها وفتت لقرفتي قفلتها وبدلت هدومي.

راحت لابو وهب تشكي. اندكت الباب علي. اني جاي امشط صحت: هسه شوووووية واجي.

سراب: ابوي يريدج.

انزل بشعري حتى مجبن.

هو ناعم فد صاله يومين ما ممشط كله هين شقل بشقل وتبتلي على روحك اذا تريد تسبح حسبالك جاي تسوي جريمة مو سبح وتصب على روحك ماي وتطلع.

خلصت شعري.

ولفيت ربطتي ورحت لابو وهب: ها.

وعلاه فوك علاه الهاااا شنهو؟

سراب كالت ابوي يريدج.

من اريدج تجيني تكولين امرك ابو وهب رايد شي مني. تعلمي الاحترام بت الجول.

خوش.

شعدج سابحة؟

احترت.

ما مرتاحلج وكلبي لاعب منج.

شسويت؟

نوبة اللخ الا افرك حلكج.

شعني شني ما اسبح؟

اكلي ***** لا تجاوبين. طايحة الحظ السبح يوم الجمعة الكل يسبح التسبح بغير يوم عدها اسباب جلبه.

سكتت.

ضل يقلط ويتجاوز لحد ما جتي الحاجة وكالتله: حمدان اجا.

صاح على وهب ساعدو ونقلوا للهول.

واحنا نحجزنا بالمطبخ نجهز للقدا.

جاي

حجت عفاف: خلي أخدر الجاي وإنت حضري السكاكين.

حضرتهن.

دخلت أميرة تحجي: ما الله ياخذه ويفكنا.

عواطف: شكو؟

خطار جايين والهول يكتل حر وخطاب شاعل المولدة وبس للدوانية مشغل مبرّدته ومتمدد ع الهوا. أكله حوّل للبيت يكلي توني جاي من الشغل تعبان ولي مني.

عواطف: غير مولدته هو مشتريها.

إنتِ ادافعيله؟ الخطار ماتوا من الحر.

والخطار ما يعرف بالوضع شني، جاي من أمريكا هسه تصير بـ 12 ويحول أبو السحب ونشعل الهوا.

عفاف: خدر الجاي صبّي وخذيه.

قدس: أنا أخذه؟

أي وشبيج ناقصج إيد، ناقصج رجل.

مو خاف أبو وهب ما يرضى أفوت جدامهم.

وهب طلع، شنسوي؟ صبّي.

صبّيت الجاي. وشلتوه.

أبو وهب صاير جدام باب المطبخ. أشرتله يدخل؟

صاح: تعاي يولي جيبي الجاي لأبو مازن.

تقربت، حطيت الصينية ودحكت بالخطار. زلمة يطلع عمره بـ 50 ومه مرة يطلع عمرها فوق الـ 80 سنة. سلمت ع الرجال ورحت للمرة أبوسها.

ضلت تسألني: منين إنت؟

حجى أبو وهب وطاعا عنوان غلط.

كالت: تعالي جاي، كعدي يمي.

أجيت وكعدت يمها وهي وأبو وهب وأبو خطاب والرجال يسولفون شلون صار الحادث وشلون راح بيه. وأبو وهب يكوللهم عداوات. حسب ما افتهمت، أبو وهب ما فد شاك بخطاب عنده أكثر من عدو وتربصيله ويريدون يكتلونه ويحجيلها للمرة. بس يكوم منها بخير يميز عدوه.

ضل الرجال يسأله عن العلاج وهو يكله: أريد أطلع للأردن.

حجت المرة: عليش ما تروح لفدعة؟

فدعة ياهي؟

كالتله: مرة تشتغل بطب العرب، أطيح على علتك لا تعتاز عملية ولا طبيب. روحلها وشفاك عدها بإذن الله.

والرجال صدّك أمه وكام يمدحلو وكالوا: نخلص غدا وآخذك الها.

حجت الحاجة ورادت تكومني: قدس، كليلهن يستعجلن بغداهن.

رحت وصيتهن وكعدت أشتغل وياهن. قضينا الغدا وفرشنا سفرة بقرفة الحجية. والمرة كامت قاد وصينية لأبو وهب والرجال وولد أبو وهب.

رحت أجيب الخضرة من المطبخ ورجعت أريد أحطها بالسفرة. حجت المرة: إنتِ حامل يولي.

دحكت بوجهه: لا.

الحاجة: ما صارلها أسبوعين من خذاها.

عيونها فيها نساوة حبالة طابات بنكرة، يمكنها شايلة.

ضلت الحاجة تدحك بوجهي، أشرتلي أطلع.

عفت الخضرة وطلعت من القرفة. من كالت الكلمة وأني راسي انضرب. شنهو حامل؟ حامل منين؟

أني ما صارلي أسبوعين عد أبو وهب، شلون حامل؟

الكل بالهول وبقرفة الحجية ياكلون. فد أنا بالمطبخ صافنة.

دايخة بزماني حسيت بحركة يمي. درت راسي بلا اهتمام، شفت خطاب. فزيت من كل كلبي: شرايد؟

سويتي الكلتلج عليه.

صاح أبو وهب: يولن وحدة منجن تترس المبردة هواها حار.

عفته ومشيت. منو توقعت راح يكضبني؟ فد ما وكفتي.

رحت بسرعة حطيت الصوندة بالمبردة. لكيتو يدحك بالجدور فارغة. شافني عاف المطبخ وطلع وهو عاكد حواجبه.

الحجية دوم توصي عواطف تعزل الخطاب من أكلنا وتحطه فوك الرف. مديت إيدي لكيت ضامة جدر صغير تمن وفوكه كاسة مرقة. حطيتهن بمواعين وحطيت صحن زغير سويت زلاطة طماطة وخيار وبصل ومشيت جبت كرصتين خبز. خذيت الصينية وطلعت لقرفتو. فتحت الباب، هو متمدد ع القريولة أم النفرو مشغل الراديو يسمع. من شافني كعد من حيله: شعدج جايه لهين؟

أنا فد جايه أكلك ما بيدي شي، أنا أسوي وما أحب أكتل بشر ولا أحب أشوف أحد يكتل.

يولي أمج وسام سوالفج هاي بعد ما تخدعيني بيها. جنت أظنج بريئة، بس عرفت طينتج وصبرج علي.

أنا لا إلهي غرض بأمي ولا أعرف شقلها.

عجل والجول؟ امشي اطلعي برا ولا تشوفيني وجهج.

وكت اللي أمنت بيك، طيتك روحي وثقيت بيك. ليش تسوي بيه هيج؟

خذيني درس صعب واتعلمي منه. بعمرج ما تأمنين أحد. شيلي الصينية وفارقي.

عفت الصينية وطلعت. عفاف جاي تشيل الصوندة من المبردة. حجت: شعدج يمه؟

الحاجة كالتلي صبّيله غداه ووديه إله.

سكتت مني.

كضوا الغدا وطلعوا للعرب وضلينا نشتغل ونغسل البيت.

اندرت لعواطف أسألها: شلون الوحدة تعرف نفسها حامل؟

من دورتها.

شلون؟

تحسب لدورتها، إذا متأخرة تحتاط من الثقيل لحد ما تتأكد ما تجيها الدورة وبطنها تعلى.

وشكثر تتأخر؟

عليش تسألين؟

مو هاي المرة تكلي إنتِ حامل.

يولي توج جيتي يا حامل، مو بأسبوع وأسبوعين. إذا تأخرت شهر ما جتج، ثانيتها واحتاطي إذا انقطعت فرد نوب معناتها حامل.

تحجي وهي تعزل بالصحون ع الرف.

ضليت أدحك بيها وأريد أتذكر من يمتى دورتي كاطعة، ما أتذكرها!

أمسح وبالي انشغل بهالسالفة.

من ملك عليّ أبو وهب ولهسه ما جايتني.

آخر مرة اللي جنت ببيتنا قبل لا يملج. من رحت ويا خطاب ورجعت لأهلي ما جتني، ومات أخوي وشلنه وضليت أسبوعين عد أخو نهلة، فد ما جتني عدهم.

مرت عواطف سالتها: يعني إذا متأخرة شهرين وشوية؟

ما جايتج كلش.

آخر مرة اجتني قبل لا يملج عليّ أبو وهب.

قبل شهرين.

أي.

وشهرين منين كاربج هو؟

لا فد أريد أسأل إذا شهرين حامل.

أكيد حامل، بس خاف لأن اتزوجتي جديد تخربطت عليج.

هي تتخربط إذا الوحدة تعرس؟

أي تتخربط، تصير. لا تفكرين بيها. يييييه. هالدورة شثقل همها، لو تأخرت نحسبلها ألف حساب، لا حبلى. بس ما طول تأخرت عليج وإنتِ عروس جديد معناتها مخربطة مو حمل.

سكتت فد ضل بالي مشغول.

هي متأكدة مو حبلى، زعم ما تعرف بسوايتي ويا خطاب.

فد معقولة أنا حامل. مجرد ما اتخيلت الموضوع انلوت بطني وانخمط كلبي. فد لا صدك أكتل روحي.

أنا بعدني على ذمة أبو وهب، شلون؟ يعني لازم أبو وهب يطلقني! وشلون يطلقني؟ ما يرضى، وإذا كتله يقتلني.

فرق البيت. أم خطاب مشت ويا أبو وهب ووهب ياخذون ريسان لهاي المرة. والكل دخل لقرفهم يرتاحون ما طول الكهرب جاية.

كعدت بقرفتي ومحتارة شلون بحالي. معقولة أنا حامل.

لا ما أصدك، أنا ما أحمل. فد شلون ما أحمل وخطاب بذاك اليوم كربني، واليكربها زلمة تحبل. لا أنا ما سامعة وحدة تحبل من غير رجلها. يمكن بس إذا زوجي أحبل. إذا مو رجلي حتى لو يكرب ما أحبل، لين مو رجلي.

أنا ما فد يوم سامعة وحدة هيج حملت من غير رجلها.

يا ربي، وأنا وين شايفة ناس خاطر أسمع؟ هو عشت بالجول مكابلة الحلال، حتى لق لق الدجاج عرفتها، وأعرف الهايشة من تحبل شتسوي وشلون يصير أسلوبها عسر، وأعرف الدجاجة من تكاكي إذا تريد تبيض لو غير شي. أعرف بالحواوين أكثر من البشر.

طفت السحب الساعة 4. الكل طلع برا بالهول.

التقسل جهالها والتخدر الجاي. والحطت بنتها تفلي بيها يم باب الهول على ضو الشمس.

أنا كعدت بالهول، فد بالي هوسة.

حطت عفاف صينية الجاي وصاحت: هي إنتِ الثور، أحسبج بالجاي لو ما تشربين؟

أشرب. فد ما كلت شي، ما تغديت.

وما كعدتي؟ ياهو الكضبج؟ ضليتي تتخوتلين بالغرفة من الكل ركد.

حجت عواطف: جيبيلج خبزة واكليها ويا الجاي ولا تضلين جوعانة.

أميرة: لو رايحة وياهم، كلبي ضال ع ريسان.

رفعت حاجبها عفاف وكعدت وتدحك من ورا خشمها وصاحت بعواطف: دكربي شني؟ أتوسل بيجن.

كامت غسلت إيديها من راس بنتها وأجت كعدت.

أنا جبت خبزة وكابلتهن. أميرة جرت استكان الجاي وتسوي روحها مهمومة ع أبو وهب، وتصرفها مبين تمثيل.

ضلن يحجن ويجيبن طاري ناس من قرابتهم. هاي هيج سوت وذيج هيج حطت. وأنا دايخة بزماني وبعلتي.

انتبهت ع عواطف تكول: إذا أبو وهب راح للأردن، أنا أروح لأهلي أرتاحلي جم يوم شوية.

عفاف: أنا هم أروح.

أميرة: وإذا كلنا نروح، ياهو اللي يضل بالبيت؟ غير الحجية تقلبها عزا فوق روسنا.

عفاف: قدس هين، شعدها رايحة؟ بعدها جديدة.

أميرة: أي، إذا تضل إحنا نروح. ولو راح ما راح أتهنى، راح يضل بالي كله يم ريسان. أتمنى لو أروح وياه.

عفاف لوت حلكها: كلنا نتمنى، قابل بس إنتي.

عواطف: يمكن أجو.

حجت والحاجة طبت وكالت: كومن بسع، اطني هدوم وجراجف نظيفة لأبو وهب.

شكو؟ وينه هو؟

ضل عد المرة، كالت يضل هين لحد ما يطيب.

فزت عفاف تحضرله وعواطف تسأل: شني مستشفى هي؟

لا يا مستشفى، حاطتلها حجرة هاكداتها وتارستها من ذني مالتها مالت طب العرب وحاطتلها قريولة زغيرة للييجونها وتعالجهم.

وراح يضل يمها؟

أي، تكول لازم ألف رجله بـ لحم ويضل هين، يومية أدهنها وأفركها إله وأرد العظم لمكانه وأداوي.

تلفه بلحم شلون؟

شمدريني، الناس تمدح بيها، خل نشوفه بلكت الله يطيب وما يعتاز روحة الأردن.

لملها القراض التعتازهن، خذتهن وردت ويا وهب.

جت السحب بـ 7. سوينا عشا، تعشينا ع المبردة وطشينا لقرفنا.

للـ 9 ردت أم خطاب. جنت متانيتها خاطر أحاجيها.

طلعت وهي تطي عباتها لسراب ووهب متمدد بالهول. حجت: غسلي عباتي باجر أرد بيها.

دحكت بيها: يولي وجهج ما يبشر بخير، شنهي؟

رايدة أحجي وياج.

فازت للقرفة، صاحت ع نور، طردتها هي والجهال من القرفة. طلعوا. كالت: سدي الباب وكربي.

سديته. حجت: شنهو بعد خطاب؟ شعمل؟

خطاب مصيبة أكبر.

عجل هو الشافج شيشوف غير المصايب؟ شنهي أحجي؟

الدورة ما جايتني من قبل لا يملج عليّ أبو وهب.

سكتت. عواطف تكول اللي تتأخر عليها الدورة حامل، والمرة سمعتيها اليوم تكلي حامل. أنا كلش خايفة.

إنتِ تعرفين شجاي تحجين؟

أعرف، بس ما أعرف شسوي.

اللي تسويه لو صدك طلعتي حامل، تحركين روحج وتدفنيها. اللي تحبل من غير رجلها (كح***) وبز بطنها نغل، موتتها أحسن من عيشتها.

وأنا شلون أتأكد إذا صدك؟ ما أعرف.

باجر آخذج للمستوصف أشوف إذا صدك لو لا. بس لو طلعتي صدك، لا أعرفج ولا تعرفين، ولا الساني يطيح ع لسانج. بعملتج هاي تصيرين نكسة، وكل من يكربج يشيل إثمك.

طلعت منها دموعي تجري.

ما نمت ولا شافت عيوني النوم. طفت الكهرباء الساعة 12.

وهب وخواته صعدوا فوق ينامون. طلعت برا مختنكة حيل.

شلون لو صدك حامل؟

تكلي اكتلي روحي. أنا أخاف أكتل روحي، شلون؟

أنا والله ما حسبتالي يصير هيجي.

لو أدري هيج غلط ما سويته.

حسبالي صار رجلي.

وحسبالي بعد ما أرجع لهين.

شلون راح أخلص روحي؟

يمكن مو حامل؟ ومثل ما كالت عواطف، متخربطة علي.

أرد أذكر مرت أخوي لما تحبل، نساوتها وجعان راس وزواع.

ضليت أقارن روحي. اتذكرت لعبان نفسي ودوخة راسي المستقربتهن.

حطيت راسي بين رجليه وكمت أبجي حيل.

أبجي واجتافي تهتز ع قوة البجي.

أريد حل، بس شلون الحل؟ إذا طلعت حامل، شلون أكتبه؟ لو أكتل روحي؟

على حالتي هاي سمعت حركة يمي.

فزيت حيل واندريت

خيال واحد واكف فد ظلمة ما أشوف

كمت على حيلي: ياهو

خطاب: من شنهو جاي تبجين

- خايفة

- لا تخافين مني، حتى لو نويت أذيج كلبي ما يطيني

- ما منج

- عجل منين

سكتت ورد أمشي، كضب أيدي: ياهو المأذيج انطيني اسمه

- انت

عفته ومشيت أبجي ودخلت للبيت

هم زين ما لحكني.. تلمست ووصلت لقرفتي فتحت الشباك وكعدت أبجي، أندب حظي ألوم بروحي معرفت شسوي بنفسي وشلون أجازيها على السويته.. أتمنى لو بس أكدر أكتل روحي وأخلص

ما أدري يمتى قفيت

حسيت ضوا القرفة اشتعل من اجت الكهرباء، فد لا فتحت ولا بيه حيل أكوم أطفي.. ظليت متممدة ونايمة على المروحة

بين الحلم والحقيقة حسيت انطفى الضوا

واشتغلت المبردة هواها لفحني ارتحت واندريت أنام على صفحة وكشت روحي من ضربني الهوى.. أزار انحط على جسمي

حسيت واحد كاعد يم راسي.. ما فتحت عيني جان الموضوع مخلوط براسي اتخيل بحلمي لو صدك.. لحد ما انسدت الباب بقوة وانحبس الهوى.. صار طبة فزيت

دحكت الضوا مطفي والمبردة مشغلة واني متغطية!

ياهو القطاني؟

النوم بعيني

ما عرت للموضوع.. جريت الأزار وكملت نومتي

لثاني يوم الحجية ندهتني خاطر أكعد تاخذني للمستوصف

شقل البيت هين كل يوم على وحدة تنظف الهول والمطبخ والكراج والحمام وحتى قرفة وهاب زعم ريسان ما يرضى نخدمه لو ننظفله فد خوف من الحاجة الكل تنظفله وتعزله الأكل.. والما تسوي هيج تشد وياها الحجية

والبي تشد وياها الحجية الله قاضب عليها تمرمرها

جان بهذا اليوم شقل البيت المفروض علي أول مرة

من لبست العباة ونويت أطلع ويا الحاجة اعترضت أميرة زعم دورها وراي وبما إنو أني طالعة يعني شقلي يتحول عليها

صاحت بيها الحاجة وكالتلها: أكضي شغلج بلا كركة

لبست نقاب وطلعت ويا الحاجة بسيارة وصلنا للمستوصف واطتني شيشة وعلمتني شلون أسوي كالت يسمووه تحليل أدرار

سويته وكعدت أنطر وهي تلوم وتحجي وتقلط

وما تستحي وما عدج تربية لو أحد مربيج ما تطين روحج لزلمة وانت على ذمة زلمة آخر.. ما استحيتي ما خفتي ما اختشيتي ذبيتي روحج جواه شكال عكلج

تحجي واني مدنجة عاكدة حاجبي

مدري أحير بكاعي مدري أتضايك من حجيها وقلطها

طلع التحليل وصاح (قدس عبد اللطيف)

كامت هي واني فزيت وراه، اطاها الكاغد وكاللها: هاج حجية

حجت: يمة بس شوفلياه شني حامل لا

حجه: حامل حجية حامل

من حجه هيج روحي خرطت

معدتي انكلبت.. بطني نلوت عيوني قوشت

صوفرت وكام جسمي يتضح عرك

اندارت عليه ووجهه أصفر

حاجاها: بتج لو جنتج حجية

- الله يطيك العافية

عافته ودفعتني.. أمشي عزاج الله وشهرج على هالشهيرة هاي

حامل يولي وانت على ذمة زلمتج.. شلون حاجيني أذبحج أحركج شسويلج وأفتك منج

أمشي ودموعي تجري

طلعنا المستوصف وهي تعد وتصف وتقلط

حرت بكاعي وهي تسأل: شكول وشحجي كليلي شلون يولي شلون اتذبين هالبلوة البطنج.. يولي نكسة تعرفين شنهو النكسة ابطنج جاهل مو من رجلج.. يولي شايلتلج نغل شهرج الله كون

حجتها جاي نعبر الشارع ودفعتني ع السيارة

بسرعة السيارة وكفت.. راح كلبي ذبيت روحي ع السيارة وطحت للكاع.. أدحك بروحي بخوف وأريد أستوعب اني اندعمت لو لا صارلي شي لو لا

نزل السايق وهو يكللها: دفعتي على سيارتي شني رايدة تورطيني انتم ذبتيها جدامي ما تخافين الله

دنجت أليه وهي تكله: انت جاي مسرع شدرانا تزرك هيج جفت بلا ما تدك هورن اصخااام

- شدك صخام ماشي بدربي انت الذبيتي

- اصعد سيارتك وامش مالنا هلك كومي انت يالبلوة من شالج الله وفكني منج

- اذا ويا بتج هذا لسانج ويا الناس شلون

اندارتله: رايد أراويك شلونه لسانج جلب ابن الجلب أبعد لا أحط امك فوك أبوك

- استحي على روحج مرة شكبرج تفشرين

- أمشي أنعل أبوك لابو أهلك.. كومي بت الجلاب بلاني الله بيج أردج و أدفنج بالجول الاجيتيني منه ساعة الكشرة الشفت ركعة وجهج

كمت أدحك بروحي

أعدل بالنقاب مالتي دموعي تجري.. رجلي أحس بيها تجري دم تحركني كامت وحارة.. عافت الزلمة ومشت وكفت فورتات صعدنا بيها.. وتكلي: ذبيتج جوا السيارة وما صار بيج شي يولي عار وما يصيبج شي.

جابت الطريق كله تقلط

وصلنا الشارع نزلنا نمشي وهي مستمرة تعيرني

ساعة بأمي.. ساعة بوضعي.. ساعة تفشر عليه شلون أطيت روحي

حجيت: هو إذا من خطاب كلي لخطاب بلكي يعرف دكتور ينزله

حجيتها وعساني لا حجيت

كفختني على راسي.. وكعت على وجهي بالتراب من قوة الكفخة الكفختها راسي وكضبتني: من تجيبني سيرة خطاب أنعل والديج.. ولو درى خطاب بوضعج محد يفكج مني والخلكج أحركج وأكل لابو وهب حبلة من غيرك وأبليج وبطلقتين يفك حالج.. أياج وبالج تجيبين سيرة خطاب لو تكولين من خطاب لو تكولين لخطاب ويديري بيج ما أشهرج وأخلي وهب وريسان يندارون عليج وحت أمج يكتلونهت وياج

تحجي واني واكعة بنص التراب

عافتني ومشت عنت روحي وكمت وراها أمشي لحد ما وصلنا البيت.

كضبت ايدي وكالت: أياج وبالج أسمعج حاجيية لاحد هالسر تضمي ويا النغل مالج ما أريد أحد يعرف بيه

دخلنا للبيت كبل للقرفة

قفلتها عليه أبجي ألطم على وجهي أملخ براسي

شلون غلطت.. شلون أطيت روحي.. شسويت بنفسي

كله من أمي الما علمتني الغلط من الصح ووكعت هالوكعة بروحي.. أكتل روحي أحركها والله أخاف ما أتحمل

ولو ظليت أدري بتالي روحي يكتلوني

شلون أخلص.. أحجي لخطاب وأشرد وياه بجاهل نغل واني على ذمة قيره.. لو أصبر لحد ما يعرفون سوي وأنفضح ويجتلوني

مر أمر من مر

ونار أسعر من نار ما أدري وين أروح بروحي

اندكت الباب واميرة تصيح خاطر أكوم أمسح الليت ما رديت على كل واحد.. سمعت أخو عواطف أجا خذاها هي وبناتها

للظهر الساعة ٢ ابو اميرة مر وأخذها هي وجهالها

والعصر عفاف وصت وهب يوصلها لاهلها جريبين علينا

طلعتله الحاجة وهي تكله: وصلها ورد خاطر نمش لابوك.

فرق البيت محد ضل فد أني والحاجة

ضربت ع الباب وصاحت: فتحي يالفضيحة فتحي من ذبيتي روحج جواه ما استحيتي هسه مستحية من عملتج فتحي الباب

فكيته مشت عني

مشيت الها.. طلعت من قرفتها حطت جيس بيدي: شني هاذ

- من أطلع من هين تحطين هالسم بكوب ماي وتتجرعي.. خطاب ما يرد لليل وأنا ووهب عكب أذان المغرب نرد.. أرجع ألكيج مسممة روحج ومفتكة منج

ولو رديت وما لكيتج مسممة روحج نندار عليج أنا ووهب نسممج بالزور ونذبج بالساحة.. وانت تخيري تكتلين روحج بكرامة لو تنجتلين وتشربين السم بالزور

- فد أني أخاف

خزرتني: هشششش لو سويتي هالشي الله يعفي عنج أخير ما تجيبين نغل ويحركج بنار جهنم سمي روحج أحسن ما نسمج..

هذاك انت وهذا عمري

لا حويته ولا حويتك

حطت السم بيدي ومشت عني

ضليت أدحك وراها، لو أجتل روحي لو يجتلوني

شلون بيه؟ وين أنطي وجهي ووين أروح؟

ظليت كاضبة السم بيدي وواكفة بالمطبخ أدحك، انطبكت الباب وراحت

كمت أبجي من كل قلبي وأدعي ربي يطلعني من هالمصيبة

أدري غلطت أدري سويت مو زين، فد ما أريد أموت أخاف

أجت الكهرباء، فد أني بالبيت

كمت من المطبخ كعدت بالهول

فد صوت المروحة بالبيت، السم جدامي ودموعي تهل

انطبكت الباب، فزيت شلت السم وكمت

حسبالي هي ردت، ماكو أحد فات

عجل ياهو الطبك الباب؟

دحكت بالكراج ماكو أحد

رديت حطيت السم بوطرة، يصير يمكن مال فيران مدري مال بريعصية

وردّيت وكفت بالمطبخ

عليش تريد تقتلني؟

عليش ما فكرت تنزله من بطني؟

مرت أخوي سقطت جاهل كالتلها أمي: هاي من شيلة المحفوغة، عليش ما أسقطه أهون لي من الموت

واكفة وأدحك الهول جدامي

فات خطاب على الهول، باب غرفتي مفتوح

دحك بنص الغرفة ما لقاني، كعد بالهول وشعل أغنية بتليفونه وكعد بالكاع مد رجل وثنى رجل

أني جدامه فد ما انتبه لي، ضو المطبخ مطفي والهول مشتعل

مشيت من المطبخ دخلت الهول، صدت عينه بوجهي

حجه: ليش وحدك بالبيت؟

- عندك رقم أمي

- شرايدة بيه؟

- كلهم راحوا لأهلهم، فد أني ضليت أريد أروح بس الحاجة ما ترضى

- ورجلك الأفندي وينو؟

- راح يضل عد وحدة بالعرب تداوي، وعب والحاجة راحوا له

- وتظنين أمي تجي هسة خاطر تاخذك؟

- أريد أمي، ما أريد أضل هينا

- شجاريلج عيونج باجية؟

من كال هيج بجيت بالزايد

لم رجله وكعد: شبيج يولي بجيج هذا منين؟

- فد أريد أمي

- رايدة آخذج الها

- لو خذتني أنت ابتلي

- ياهو اليبليج أكص راسه

- أي أنت تكص، آني أخاف

- أخبرها، آخذ العنوان وأنت جهزي روحج

ومن أوصلج غاد عود كولي أمي اجتني

ضليت أدحك عليه: ماشي، خوش

- دبدلي عجل بين ما أجيب سيارة وأجي

ركضت بسرعة جريت العباة وخذيت الأعتازة بسرعة وطلعت قبل لا تجي وتنفرد بيه

خل أروح لأمي تجاريها، هي عسرة وأمي عسرة يتجارن، آني ما بكدهن

توني طلعت الهول، طب خطاب: ها خلصتي؟

- أي خلصت، فد أكلك

- شنهوه؟

- لا اجت أمك ودرت بيه رايحة لأهلي، راح تكل لأبو وهب علي

- وتكله منين خايفة؟ دمشي مو كلهن راحن لأهلهن

- أنت ما ضايج مني؟

- يولي دمشي لخاطر الله

مشيت وراه السيارة بلا سايق: عجل شلون راح نروح إذا ما بيها سايق؟

- أنت ثولة بالفطرة لو اجتهاد منج يولي؟ صعدي

صعدت ورا ضل يدحك: شنهو السايق مال أمج أنا؟ صعدي جدام

- مو خاف أحد يشوفنا

- والرايد يشوفنا ما راح يشوفج وأنت تصعدين ورا، بس من تصعدين جدام

كعدت ليجدام وهو صعد يدرم: هم زين الله ما خذتج، خالي أولى تموتين الواحد ناكص عمر بثولج

سكتت ما رديت، فد استهضمت كلش

من مشت السيارة جرت دموعي، اندار علي: حتى من الحجاية الطايفة تبجين

- آني ما أبجي منك

- عجل منين؟

- من همومي

- وشنهي همومج؟ أنا وتنازلت، ما أريد البايعني ما أشتريج

ودامج فضلتِ عليه ريسان بالعافية تتهنين أنت وياه

- آني فضلت هو، آني الي راي خاطر أفضل

- يولي شجاريه على كلبي، بيش عايل وياج؟ آني كتيلي هدني وهديت، ما سخيت أذيج رغم كادر وأسهل ما عندي بس ما سويتها

- كتلك آني ما أبجي منك، ما منك شبيك

- عجل منين؟

- كتلك من همومي

- وشنهي هي همومج؟

سكتت وفد عيوني تجري

ما حجه، لحظة هدوء فد حسيت واني اجر بخشمي وأبجي

تنهد وحجه: لو ما حابج جان كل البيج والبيه ما صاير

سكتت ما رديت

وصل قاد، منطقة ما شايفتها، فد هم زرع وريف ما مثل بغداد من رحنا، فد بيوت وشوارع مبلطة

ضل يخابر بأمي، دلته ووصلت بيت مأجرته أمي وكاعدة ولامة نسوان أخوي بيه

وصل قاد صف باب البيت، طلعت أمي لاكته، نزلت من السيارة وهو نزل: وصلتها لي جاي لو سأل أحد كولي آني المشيت أجيبها

- سهلة تفضل

- مستعجل

- رايدتك بموضوع

- الموضوع ما عاد يهمني، أنت وخالي حيلكم بينكم

- شنهو الصار؟

- أكاون لأجل أحد بايعني، عليش مجنون؟ كلمن يختار دربه وآنِ بدربي مالي بقيد أحد

حجاها وصعد

اندارت عليه أمي: شنهو الصاير؟

- جزى مني من ساعة الكتله: ما أريدك

- وأنت شنهو التريدينه فهميني، لا راضية بقسمتج ولا راضية بهالمصيبة، شلون وياج؟

عفتها ودخلت للبيت وهي تتبعني: مصيبتي البطني أمضى منه

- وشنهي المصيبة الجديدة؟

أجتني نهلة سلمت علي: هله ولج ياهو الجابج؟

- خطاب

- عزا العزاج وشعدج اجيتي وياه؟ عليش تبجين؟

دحكت بوجه أمي: شكو؟

أجن بنات أخوي يتراكضن لي، حبيتهن

من حضنتني عبير، حضنتني حيل وهي تصيح لي: مشتاقتلك

حسيت بالبراءة الجانت بيه من جنت عاشية وياهن

ما جنت ملوثة مثل حالي هسة، حضنتها حيل وانهديت بالبجي

جني وحدة مجلبة بأيامها ذيج وبماضيها، ما تريد ترد لواقعها

حجت أمي: شنهو راح نضل نسألج؟ أحجي شجاريلج؟

عفت بت أخوي ودخلت بالهول

دخلوا وراي، فد عيوني ما هدّن

حجت نهلة: شنهو شصاير؟ دحجي

- ما بيه شي، فد مشتاقتلكم

وسام: توج تكولين المصيبة البطني أكبر، شنهي المصيبة؟

- بعدين أحجي

نهلة: أكوم أحضر العشا ما طولج اجيتي

أدحك عليها لابسة الأسود ومنكبة بالبيت وضعفانة حيل

مو نهلة مالت أول، الظاهر تعبانة حيل

من طلعت من الغرفة أمي صاحت على بنات أخوي يروحن قاد

طلعت، دارت لي: أحجي يولي شنهي سالفتج؟

- آني حامل

- يصخام الصخمج إن شاء الله.. شلون حامل يولي؟

- ما أدري، كولي لي شلون أخلص منه

- شلون دريتي بروحج حامل؟

- أم خطاب أخذتني للمستوصف

- وخطاب يدري؟

- لا تكلي إذا درى، أخبر أبو وهب وأخليه يكتلج

- فوك شين سواية ابنها كواة عينها

- ذبتني جدام السيارة خاطر أندعم وتكاون وياها السايق، وردت أطتني سم تكلي: إذا اجيت وما لكيتج شاربته أشربه زور عنج أنا ووهب وأموتج

- يكلابهم وابنها سالم مسلم من عملته، ياهو الواطاج؟ أنت الواطيتي أو هو؟ حاجة مالت نخل حشى بيت الله منها

- الحل شلون؟ كلي لي

- الحل يمها، من تريد كتلج تكتل ابنها وياج، ومن تفضحج ابنها ينفضح وياج، مالت تذبج جدام السيارة لو تحط بيدج سم، شافتج ثولة ورادت تموت، شينة ابنها بيج، وين أبو وهب هسة؟

حجيتلها، سألتني عليها كتلها: وحدها بالبيت

كالت: كومي

- ووين أروح؟

- نردلها ما طول ماكو أحد بالبيت

- إذا أردلها هسة تبتلي بيه

- أمداج لو خفتي منها يولي، عليمن طالعة هيج مضعضعة؟ كومي

كمت وياها صاحت: هيين، إحنا رايحين

طلعت نهلة: وين؟

- أردها لعيالها

- راح نكضي العشا، شنهو طلعتكم؟

قدس: خليها باجر نروح، فد أريد أرتاح، ما أريد أرجع الهم هسة

- وباجر ياهو اليمها؟

- محد، النسوان راحن أسبوع ياله يجن، وفد هي بالبيت

نهلة: هو شكو؟

وسام: ماكو شي، اكضي شغلج ياله

كعدت عبير ترست المبردة واني تمددت جدامها

شكثر بجيت وراسي خوى، وأهلي ما أحسبهم ذولاك الأهل الزينين، فد مجرد حاطة راسي ببيتهم أحس روحي بأمان وارتحت

سوت نهلة العشا وجابته، آني نايمة

رادت تكعدني ما كعدت، عزلت لي عشاي وظليت

بيت خالي بالليل سيروا، استقربت خالي عايش هين؟

شجابوا ويمتى إجا وشلون؟ ما فهمت شني سالفتهم

فد ضليت بفراشي ما كعدت أبد خاطر لا أسلم، عرفوا ما يودني

ساعتين وراحوا، كعدت أكلت شوية، فد ما اشتهيت

سبحت وغسلت روحي ودخلت للدوانية، أمي متمددة، حجيت: شنهو الحل باجر؟

- تروح وياي وناخذج لجدة تسويلج عملية تنزل الجاهل

- هيج بهالسهولة؟

- آني الرايدة أنشد بالسهولة، أطيتي روحج يولي، ما حسبتي حساب، ما كتيلي شلون أطي روحي وأني شاردة؟ كضبوني وما صرت اله، شلون ما حسبتي؟

سكتت

وهي سكتت من سمعت أحد تقرب، لفت راسها ونامت، حجيت: عجل خواني وينهم؟

- بالموصل

- يمتى يجون؟

- غاد يشتغلون

لفت راسها ونامت

واني ضليت بظنوني

لثاني يوم الصبح رحنا آني وأمي لبيت أبو وهب، وصلنا قاد، خطاب ما هو، فاتت أمي على البيت بلا ما تدك الباب صاحت: أم الوليد

طلعت الحاجة وهي تصيح: ياهي؟

وسام: آني أم مروان

شافت أمي وعيونها خوزرن: شلونج يسلمى؟

- جايبة بنتج العايبة ورادة، وأنت حسابج وياي، بت الجلب تطلعين من البيت بلا علمي

- ابنك جابها

وإن كانت بتي عايبة فابن العايبها ومن تحطين السم بيدها خاطر تقتل روحها ابنك يتسمم وياها.

خزرت أمي وكالتلها: امشي نكعد نتفاهم بغرفة خطاب الكاع محظورة.

جان وهب موجود فد نايم.

مشينا لقرفة خطاب وكالتلها: البت الزينة ما تطي روحها لواحد إذا جان على الزلمة حتى الكحبة يعاشرها.

واليعاشر مرت خاله خاطر يكسر عين خاله وما كفاه عملته هاي جنى عليه وفجر سيارته.

صاحت: خطاب بريء لا اتهمين ابني بأثام غيره ابني ما يسويها.

عجل سالي إذا ما تعرفيه.

وإحنا نضل نتشد شوفي حل للمصيبة بالبطن بتك.

البطنها أنتم تتحملون إثمه إحنا ياهو مالتنا نروح لجدة تنزله وأنتم ادفعون حسابها.

أنتم ياهم خطاب لو درى بيها حامل ما يهدها ويتجنن فوكي ويروح يقتل خاله.. لو على موتي ما أخلي خطاب يدري.

عجل تحملي إثم ابنك وامشي ويانا.

الفتحت روحها للزلم تحتار بأمرها مو هي تخم وأني أكع بقيد فعالها.

الفاعل والمفعول مسؤول عن هالاثم تروحين وياي للجدة تروحين ما تروحين أبريها وأذبها براس ابنك.

ما أروح أنا وياجن خطوة امشن انتن وشكثر التكاليف كلي.

عجل نخبرك بالجية.

خذتني أمي ومشيت أدور على جدة.

وصفولها على جدة ورحنا لها عد ما وصلنا كالت: ما أشتغل هيج أخاف الله ما أسقط جاهل الله كاتبه.

وصفولنا غيرها ما رضت.

دورنا ردنا تعبنا ماكو.. رجعنا للبيت.

ثاني يوم وصفوا لأمي جدة ببغداد خذتني وراحت.. عد ما وصلنا غاد كالتلها: آخذ مليون ونص على العملية وتوقعين على ورقة تعهد ما تحاسبيني في حال صار بالبنية شي ماتت انفجر رحمي أنا مالي غرض ولا تهدين عليه.

من حجت الجدة هيج كام جسمي يرجف من الخوف.

ردت أمي خبرت على أم خطاب كالتلها: تكاليف العملية مليون ونص.

صرخت أم خطاب وكالتلها: يامن تنفضين البيت كله وتبيعين أغراضه ما يجيب المليون ونص شنهي كاعدتلجن على بنك.

كالتلها: والله هذا اللي لقيته إذا لقيتي حل خبرينا.

وأنا شنهو وألقى الحل ابن ابن بتك وبطنها.

وأبوه ياهو.

اللي يجي من الحرام ما ينسأل أبوه ياهو يصبح ابن أمه.

عجل نخبر أبوه ونشوف إذا يعترف بيه لو ما يعترف.

لو خطاب عرف وروح الراح بدرب الله وما رد لا أهجم بيتج وأخليج تبجين بدل الدمع دم على بزريتج.

تهدديني بزريتي يولي.

خطاب ما تكربين منا ولا توصليله.

جدامج يومين تلقين جدة تنزل الفضيحة اللي ببطنها ولو ما نزل أحط العلم بيد خطاب وهو يتصرف بيه.

سدته أمي منها.

وكعدت أنطر منها.. ثاني يوم خابرت على أمي تكللها: لقيت وحدة تنزل الجاهل جهزي بتك الفجر باجر الساعة بـ 5.

كالتلها: شنهي جيابة هاي لو دفانة.

خلنا نفتك من فضيحة بتك وعود صنف.

محد جاب هالفضيحة لينا غير ابنك وفعايله لو متربي ما يواطي مرت خاله.

الشورة مو عليّ على اللي طته روحها لو مربيتها عدل جان صانت روحها بس ما ضاقت طعم التربية.. بس عليمن تطلع بعد إذا انت أمها.

ضلن يتراشكن بالحجي لحد ما وحدة سدته بوجه الأخرى.

ثاني يوم جهزت روحي الفجر وخذتني أمي لكت أم خطاب منتظرتنا يم باب المرة الجدة.

حجت أم خطاب: ضلي هين لا تدخلين المجان ما يسع.

إن جانه ما يسع.. وسعي انت شعدج طابة.

حجت: أنا اتفقت وياها وأريد أحاجيها وكالتلي توكفين على العملية خاطر إذا صار أي شي أتحمل مسؤليته.

وتتحملين مسؤلية لا صار أبني شي.

الصار والما صار المهم نفتك من الفضيحة اللي ببطن بتج.

دخلت ويا أم خطاب.

البيت أجرب تعبان كلو ماخذ رطوبة.

فتت وياها فتحتلنا الباب مرة سمينة وسمرة حجت: هلا فوتن.

أم خطاب: هاي الفضيحة اللي رايدة تخلصينا منها.

سهلة بس جبتي الاتفقنا عليه.

أي جبت.

جاي أطلع الفلوس ما تحس إلا أمي وراها وتسأل: شكثر ذني.

150 ألف.

دخلنا وياها للبيت فد جسمي ما أحس بيه من الخوف.

بطني انلوت لوي أجدامي كوا أجرها.. دخلت الحجرة.

القرفة صبابة وحط الحايط مصبوب وأكو قراض شوية وقريرلة مال مرضى كالت: تمددي هين.

القرفة حيل صغيرة بكبر الحمام مالنا.

وبيها كلوب أصفر مو أبيض كمت أرجف من الخوف. حجيت: فد كون بنج أخاف أنا.

منين أجيب لج بنج يولي نامي.

حجت أمي: الشغلة تعرفينها لو جاية تجربين بيها.

أنا اتفقت ويا أم الولد وهي تعرف الحجي.

أنا أم البنية والحجي تاخذيه مني شنهو اتفاقك.

حجت الحاجة: اتفاقنا تسوي العملية وإحنا نتحمل النتائج خلها تفكنا دخلها تفكنا.

ولو ماتت بتي.

جان تكول الجدة: أنتم تتحملون لحد تجيب اسمي ولحد تندلني أنا مالي غرض. تنام لو لا.

حجت الحاجة: أي أي تنام انمطلي يولي.

أخاف يمه أخذوني مستشفى.

دفعتني الحاجة: دنافي فكينا نامي.

تمددت على القريولة وأنا أكضب أطرافها دموعي تجري لوحدها منا ومنا.. جرت إيدي.. تتصرف بقوة من تجر إيدي تخمش قلبي بحركتها لفت عليها وصلها وشدتها مدري شسوت.. ردت فتحتها وأطتني أبرتين بالعضلة.

رفعت ثوبي أنا أدفع بيها. صاحت: لا تدفعين إيدي وخرررري.

كمت أصرخ: ولج يمه أخذيني ما أريد عليج الله أخذيني.

وسام: آخذج وين أحسن ما تنكتلين وننفضح أكضيها اصبري.

يمه لا تعوفيني يممممممه ما أريد.

مدت إيدها تفحصني كمزت من مكاني كمت أصرخ وأكلها ما أريد عوفيني ماااا أريد.

قامت تصيح عليهن خاطر يكضبن إيدي.

لزمتني أمي وأم خطاب وأنا أصرخ كضبت المقص وكصت بلحمي فارت روحي من الوجع والدم أحسه كام يصب صب سديت رجليّه وكمت أصرخ بكل علو حسي: هدووووني ما أريد خل أموووت هدووووني كااافي عليكم الله عووووفوني.

چنت اودهم ..

چنت اظن سدرة بـ ظهاري الصيف

تچويني الشمس واگعد بـ سدهم !

(للكبير كاظم اسماعيل الكاطع)

تجر بيه وتريد تفتح برجليه

اصرخ بكل علو حسي : عوفوني ما ارييييد هدوووووني

ام خطاب تجر بديه حيل واطكني وتصيح : بت الجلب خلها تطم فضيحتج يالشهيرررة فكي نفسج

كمت اصيح : يمه عليج الله طلعيني ما اريد عووووفني يمه فدوة اشتريني يممممممه ابوس ايدج لا تخليهم يموتوني

وسام : ما تموتين بس اتحملي خل تكضي

يمه والله اموت بس بس ما ارييييد يمه عليج الله طلعيني

اصرخ وام خطاب اطك بيه

والجدة تحاول تفك رجلية الدم ترس السدية ترس واني اصرخ حيل .. ذبيت روحي من القريولة على امي انحصرت وياها بالحايط تعلكت بيها من جلة حيلتي اريد منها فد تخلصني منا

الوجع اكلني اكل موتني واني اجر بدين امي واعصر بيها ، الجدة كامت تصيح وتقلط وام خطاب تصرخ وتكللها : شو وخري عني شوية بس اطنياها هل ما تستحي خايفة من جكت مكص ما خايفة من الفضيحة الراح تلفي فوك روسنا

امي كامت تجر بيه للسديا وتحاول ترجعني

وام خطاب بثنين اديها اطكني وتفشر عليه ، كامت امي تصيح وتفشر عليها وطكتني ، كله من ورا فعايلج وعمايلج العايبة تعايرنا نامي وخل تكضي

ابجي بينهم واجر ادية منهم

الجدة وامي وام خطاب فد يريدني اصعد على السدية ، فرفحت روحي واني اتوسل بيهن يعوفني الوجع ما ينحمل ما اكدر

دفعت امي وزركت منها وطلعت برا المكان لحكتني ام خطاب وكضبتني من راسي ونزعت النعال وكامت اطك بيه : وين رايحة ولج رايدة فضيحتنا

ما اضل ما اريد عوووووووفوني

شو كربييييي

تجر براسي وامي تصرخ : بس تحملي فكيناشهرتينا الله يشهرج اخوتج لو دروا بحالج جيلة ينوموها براسج ويفتكون منج

خلوهم يكتلوني فد ما اريد انام هين ما اريد عوفوني

تلاثتهن تعاونن عليه يردن يجرني للسديا

الدم كام يجري من رجلية

من حلاة روحي كمت اثكل بنفسي للكاع ما اكوم وياهن وهن يجرن

التكفخني والتدفرني برجلها

انتهيت .. مدري شلون فلتت ايدي من ايد ام خطاب ، فزيت بسرعة كمت وطلعت للشارع لحكني للشارع .. ذبيت روحي على سيارة فايتة وكف ابو السيارة بسرعة

وكفت امي وام خطاب يصرخن علي : يولي دلنج رددددي

نزل ابو السيارة واني اصرخ واكلو : يريدون يكتلوني فدوة خلصني ما اريد اموت عليك الله والله اخاف فدوة ابوس ايدك

وسام : انا امها هالعرمة تنحر عنا .. تعاي

كام الرجال يصيح : سمو باسم الله يابه كولوا يا الله

ام خطاب : منين يشوفنا الله وهالفضيحة ما تنطم

يبعدهم عن ويريد يهدي بيهم واني ارجف وابتعد منهم وابجي واكلهم ، كافي تعبت والله عوفوني كافي

دحك بيه الرجال ملابسي ورجلية كلهن دم

تخبل كام يصيح : صعدي اوصلج للمستشفى خوية اصعدي

امي تخزر بيه وتريد فد تهمشني

وام خطاب تتكاون وياه

فتحت باب سيارته وصعدت وهن يتكاونن ويكلله : لو خذتها نورطك ونكول باكها

عود كولن وشتريدن تحجن احجن

صعد بالسيارة وهن كضبن باب السيارة ويصيح : ول يدلنج نزلي

ام خطاب : راح اخبر ابو وهب عنج لا اخلي ينحر راسج انزلي

داس بالسيارة والباب مفتوحة وعافهن وراه

انحب وابجي واصيح من الوجع وهو يكلي: بس مدي نفسج سدي الباب

سديته وهو داسلها للمستشفى ويسالني : منو ذني

ما جاوبتو فد ضليت ابجي واتلوا من الوجع

الربطة احترت بيها احطها على راسي وتنزل جريتها وشديتها على ركبتي خاطر لا يطلع شعري

وصلني اباب مستشفى

جانوا اكو حرس وشرطة كاضبين اسلحة بالباب اني خفت حيل .. حجالهم كاللهم : هاي بنية جانوا لاحكاتها اثنين نسوان رايدات يكتلوها .. والبنية جاي تنزف

اجو عليه الزلمة لابس عسكري كاضب سلاحة كمت ارجف من الخوف ، حجه : منين انت خوية

اني ما سويت شي والله فد هن رادوا يكتلوني

اي منين بس كليلي منين

ما ادري شسمها ما عرف

-دنزلي نزلي لا تخافين احنا اخوتج

فتح الباب واني اتلوى من الوجع والوب وابجي ، دحك الدم العلى ثوب ورجليه وهو تخبل كام يصيح ويندهلهم يسعفوني

كالي :انزلي انزلي انزلي بسع

نزلت من السيارة ، فد وكفت على طولي قوشن عيوني واحس الدم معد يصل راسي

هي وكفة هي حدرة للكاع

ما دريت شصار عكبي وشسوو

صحيت على روحي وسط هوسة وهم يمشون بيه على سديت .. كمت اون محد بيهم سالني

حطوني على قريولة ثانية وضلن فد بنوات وحدة جرت ايدي وشدتها وحطت بيدي شقلة ما اعرفها واللخ ربطت على ايدي كماش وكامت تدوس وفخت الكماش بيدي

اني اون من الالم ، حجت وياي وحدة : شسمج

كوة حجيت : قدس

قدس شنو

جاي احجي وهاي حركت الشسمه بيدي وحطتلها صوندة معلكة ببطل مي ، ردت حجت : قدس شنو امي

قدس عبد اللطيف

كتبت وحجت : شبيج ليش هذا الدم

حامل

انت حامل دا تنزفين

حجت وياها الثانية كامن يحجن كشفني سديت رجليه بسرعة ، صاحت : لا تسدين رجليج فتحي

لا فدوة والله ما اريد

اداويج بنتي هيج تموتين فتحييي

لا عليج الله فدوة ما اريد

لا اتعبيني افتحي

حجت وياي الثانية : ما تاذيج بس رخي نفسج لا تتشنجين

كضبت ايدها وكوة فتحت بس دحكت خزرتني : يولي شمسويات بيج هاي شنو

رادو يسكطون الجاهل فد يوجع المكص

شلون تسقطيي ووين رحتي مخبلة انت اكو واحد يسلم نفسه هيج

تحجي وتكل للبصفها ، لج تعالي تعالي شوفي

دحكت وياها عبست وجهه : ليش هيج مسوية بروحج عقل براسج انت تروحن للفلانة وعلانة تورطن نفسجن وترجعللنا بهالحال شلون نستقبلج هسه .. منو المسوية بيج هيج

والله ما اعرف هي ام واخت رجلي رادن هيج كمت اصيح ابجي اكلهم ما اريد كتلني

عزه هن الاخذنج

اي والله هن كالن ما تتوجعين فد وجعني حيل

رزق الله ماس تتخسر على جاهل وانتن تريدن تشمرنه ليش

حجت اللخ : يحتاجلها خياط

خل نشوف الطفل مسكطاته شنو وضعه ميت حي

جابت جهاز حطته على بطني

كضبته خزرتني وحجت : بعدي ايدج

فدوة بس لا توجعوني كافي تعبت عليكم الله ما اريد

ما ردت عليه اندارت لصاحبتها : ماكو نبض

حطيها ع السونار وجيكي وضعها حتى اذا ميت ننقلها كورتاش

خلصي المغذي وكومي ع السونار

حجت ويا الثانية وكعدت توصيها حجي ما افتهمتو .. رجعت راسي كمت اون .. اسمع صريخ نسوان يصيحن من كل كلبهن .. ما افتهمت ليش هيج يصرخن فد خفت

كامت دموعي تجري منا ومنا واني مرجعة

اجت حجت وياي : رجلج وين

عد وحدة خذو يتعالج

شبيه هو

طكت عليه رمانة بسيارتو

انت من وين

ما عرف فد اسمع اسم ( ...)

ريف انتو

اي

هسه منو من اهلج وياج

ماكو احد ابو السيارة جابني شردت من ام وحماتي تكاونن وياي لان ما رضيت افك روحي

هم الرادو ينزلون الطفل ؟

اي

نزلته لو شسوت

فد كصت بالمكص اني شردت

ضلت تكتب : خلصي المغذي وتعاي ع السونار

رجعت راسي اجت الثانية : ليش يريدن ينزلوه امج وحماتج

يكولن نغل

عكدت حواجبها : ليش انت مو متزوجة

هزيت راسي وكمت ابجي ، حجت : اذا متزوجة ليش نغل

مو من رجلي

صخام لعد منين

من ابن اخته

عزاااا العزاج وشلون حبلتي من ابن اخته

فدوة فد لا تكولن والله رجلي ارهابي اذا درى يجتلني

ارهابي ؟؟؟؟

اي والله يذبحني فد يسمع

التمن بالاربع بنوات يحجن وياي ويستفسرن

انخبصن بيه ويسالن .. رجعت وحدة رادت تفحصني هم خفت فد صاحت بيه : لا تخافين

كضبت بالقريولة وكمت ابجي واعصر بروحي كامت تصيح : لتعصرين فكي خل افحصج

كمت ابجي بصوت عالي اذتني

وخرت عني وهي تكلل لصاحبتها : اكو توسع اصبع

خاف نازل ؟

سالتني : نزل منج شي لو بس دم

لا فد دم

ما نازل بس اذا ضل هيج تسقط

خل سيكط اني ما اريدو

طبعا متردي اذا جايبته من غير رجلج ما تستحن ما تخجلن

ما رديت ضليت فد ساكته

كمل المغذي .. شلعته من ايدي كالت : كومي ع السونار

رحت وياها لقير قرفة

كالت : انتظري هنا

بالنص ساعة اني كاعدة انتظر لحد ما وصل دوري

نومتني وفحصتني بالسونار

كالت الطفل موجود ونبضه زين بس نازل

وشلون يسكط

ليش انت تريدين توكعي ؟

اي ما اريده

متردي المن خلفتي

ندستها وحدة وشاورتها اندارتلها : صدك عود

اي والله

كتبتلي على كاغد واطتنياه كالت : هاج اخذي وروحي للاستشارية النسائية

وين صايرة

كبالج ع اليمنة بس اطلعين

نزلت من السديا

طلعت رحت للكالتلي عليه اطيتها للبنية الفحصتني : الطفل موجود

وشلون ينزل

حبيبتي متساليني هذا السؤال احنا منزل طفل بس اذا جان ميت اذا عايش ممنوع نتحاسب

حجت وحدة وكالتلها : اكتبيلها //:٥(!— فد اسم علاج بالانكليزي

ردتها : واروح اتحمل مسؤليتها

دا تكولج نغل

ما سمعتيها تكلج رجلها ارهابي نروح نتورط شلنا علاقة نأدي عملنا وما نجيب المساكل لروحنا ..

الغلطت هي تحير بروحها

هم صدك اني نسيت سالفة ارهابي لا عيني مشيها وختولي

رفعت الورقة بوجهي وكالت: روحي لصالة الولادة

شراح تسوولي

ننطيج علاج ما نكدر نسوي شي من بعد الولادة او الاسقاط يلا نكدر نخيطج تتعسر ولادتج بالمستقبل اذا خيطناج هسه

وهسه شلون

يولي دهاج بس روحي لدكتورة نور تكتبلج العلاج واطلعي

وينها هي

بصالة الولادة اميييي روحي

خذيت الورقة ورحت لصالة الولادة دخلت

الصوت يخرع الميت نسوان يصرخن من كل كلبهن .. كمت ادحك عليهن استحيت انداريت منهن فد لعبت نفسي كلش دخت

ردت اطلع صاحت وراي وحدة: شرايدة يبنية

انداريتلها واشرتلها بالوركة اجت خذتها من ضلت تقرا بيها مشت انطتها للدكتورة كتبت بيها وكالتلي: هاج اطلعي

طلعت من صالة الولادة

لعبانة روحي فرغت معدتي كلها بسطلة الزبل

وكفت ادحك وابجي وين اروح شسوي

شلون راح ارجع

شلون راح اخلص روحي

اني لو ما كايلتلهن ارهابي يمكن يساعدني وينزلنه شسوي هسه مشيت للاستشارية وكفت يم البنية الحجت وياي: ها كتبتلج

اي وين اروح

اخذي العلاج واطلعي وارتاحي لا تضغطين على نفسج

نزلي عليج الله اني جذبت عليج هو ما ارهابي

ماله علاقه امي هاي مسؤلية يبطلونا من شغلنا لو سوينا شي ممنوع

عجل اكتبيلي دوا شي ينزل عليج الله والله ما اكول انت

ممنوع امي روحي اخذي العلاج من الصيدلية واطلعي

عافتني ومشت

كمت امشي وابجي ما عرف شسوي وشلون ارجع لبيت اهلي فد رقم خطاب حافظتو عد ما انطانياه كبل خفت يضيع مني وحفظتو .. بس منين اخابره

ضليت حايرة

كعدت وطولت بكعدتي

ساعة ابجي وساعة اصفن بحيرتي

لا لابسة عباية لا عدي ثوب اغير هذا ثوبي الكه دم شلون اطلع .. وحتى الالم بعده بيه من اتحرك انلجم وصعبة حركتي ضليت راكدة بمكاني

لحد ما جالي واحد سالني: ناطرة احد خوية

لا فد اريد اروح لاهلي وما اندل واريد عباية عباتي ضاعت وثوبي وصخ

اهلج وينهم

ما همه

ما عدج رقمهم خابريهم

ما عدي تليفون

حافظة رقمهم

لا فد حافظة رقم خطاب

خطاب ابوج لو اخوج

كرابتنا

هاج هذا تليفوني وخابري

كضبتو ما اعرف اكتبو

اخذو مني وكال: رديلي رقمه

رديته اله .. دك عليه رن رن رن ما رد

رجع اتصل مرت اللخ ما جاوب

خوية ما جاي يجاوب ما حافظة رقم غيره

لا ما حافظة

وهسه شلون

فد اريد عباية استحي اكوم جدام الناس هيج بثوبي

هسه اشوفلج

راح شويه واجاني هو ومرة جبيرة تستفسر مني بعد خفت احجيلهم خاف هم يحجون عليه لو يخافون مني ما رضيت احجي فد طلبت عباة

راحت المرة تريد تدبرلي

والزلمة انشقل عني واني بمكاني

شويه واجا كال: هاي هاي خوية احجي ويا

ياهو

كرابتكم الاتصلتي عليه

خذيت التليفون .. خطاب يصيح: الو ياهي

كلت: الو

منو

اني

منهو انت… بسرعة قطع كلامه وكال

قدس !!!

اي

يولي شجالج

كمت ابجي .. احترك حرك كام يصيح: ول بابا بس حاجيني وين انت

بالمستشفى

شموديج غاد امج وين

انقطع الخط

كمت ادحك بالتليفون وابجي: شو سكت

خاف خلص رصيده

رجع الزلمة دك عليه تعذر منه كاله: خلص رصيدي فدوة بس كلي هي وين

اطاه العنوان وسداه كال: هسه يجيج

شوية واجتني المرة جايبتلي عباية ملحة: هاي تفيدج كوة دبرتها جابولياها

خذيتها وكمت توجعت كمت اتلوى

حجت: مسوية عملية

لا .. فد الدكتورة كالت روحي جيبي هذا الدوة

باوعت بالورقة: هسه اجيبه

خذت الورقة وراحت جابتلي علاكة مال دوا كالت: ابره هاي لازم تضربيها هسه

اخاف من الابرة

شلون لعد ميصير لازم تاخذيها

فد لا توجع

لا لا متوجع بس تعاي

مشيت وياها كوة امشي الجرح خيطني تخيط من الالم مشيت جوا كالت: بالعضلة هاي مو بالوريد متصير .. انداري

لا فدوة خليها بيدي

انداري احبيبة متوجع

ضربتني بزة تشنجت منها وبعدين راح الوجع

ردت اروح كالت: اكفي بعد ابرة

كافي

اضربلجياها احسنلج علمود يتسكن الوجع تكومين ما تحسين

هاااا صدك

اي والله ديلا سباعية لتخافين

بزتني نوبة اللخ

وطلعت بالزور امشي كعدت

العباية كصيرة علي .. ووصخة فد المهم اقطي روحي بيها واتستر هيج احس بروحي عريانة

سكنت وصدك الالم راح فد دخت حيل وتعبت

شوية ووصل خطاب وويا الرجال الخابره كاله: هاية

يولي شجابج هين

لا تسال فد اخذني لاهلي

شصاير وياج

كمت امسح بدموعي وما اجاوبه .. ضل واكف: غير افتهم شوصلج الهالحال يولي صاير وياج شي احجيلي شنهو الاسباب

رجعني تعبت

كومي شو يولي انعل ابو ساعة السودة لابو ريسان لابو اليوم العرفتو بيها

سندني بيده وطلعني من المستشفى: شصارلج

فد نزفت دم وطلعت من بيت اهلي

نزفتي شني عليش نزفتي

ما ادري

ووحدج اجيتي للمستشفى

اي

يولي سولفيهن ع الدبة مالت اطلعين بلا علم اهلج وتجين لمستشفى بعيدة عن بيت اهلج ما اصدكها .. شصاير احجي الصدك

ما جاوبته فد ابجي

سكت .. دحك عليه رد حجه: من اسبوع واني اشوفج بس تبجين وحالتج حالة .. غير تحجين شصايرلج شجاريلج

ما يرضون

منهو الما يرضى

امك

ما ترضى بشنهو

خطاب والله اني تعبانة بس وصلني

اي غير افتهممممم حالج

لا تصيح كافي تعبتوني كااافي .. اكتلوني وريحوني بس كافي تسووون بيه هيج والله تعبت

ول يصكعة اني اصيح بيج كارهج لو جيت محتركة روحي عليج بس رايد افهم شصاير وياج كليلي لا تخافين من احد

كلما تكرب مني تزيد المشاكل علي .. وصلني وروح معليك بيه

سكت واحتقن كام يسوق وهو ساكت وحواجبه متعاكده .. وصلني لباب بيت اهلي فتحت الباب ونزلت كوة اتحرك من وجعي ..

ضل بمكانه هو ما تحرك

اندتله دموعي تجري: مو بيدي يجتلوني

اندار يدحك عليه: حتى لو ردتك مو حكي احويك

اني ما عرف اجتل احد .. اجتلوني وفكوني من العذاب الجاي اعيشه

هز راسه و لاف مالت السيارة بس دمعت عيونه

اندرت عليه: لاف السيارة ومشى

دكيت الباب مالت اهلي

طلعتلي نهلة .. من شافتني بهالحال فزت: ءءءءءء اسم الله شجالج يولي

فد دخليني

وين رحتي

امي هين

اجت من زمان تكول شردت مني عليش شصاير

طبكت الباب وراي: غير افهم شجريلج

ما حجيت فد دخلت الدوانية لكيت امي

نفخت ريشها عليه وهدت تريد تهمشني جرتني نهلة وراها كامت تفشر: ولج ام الزلم فوك ما شايلة فضيحة ابطنج اتشردين من عدنا وتخلين تخافين انت ادكين .. رحتيلج ليلة وحدة ويا زلمة رجعتيلنا حبلة عبل لو نهدج هدن شتسوين تك*****

صرخت نهلة وصفكت على وجهها: دخيلك ربي شنهو حبلى شنهو ياهي الحبلة … منين

منين ساليها منين شوفيها شمفينة وشلاعبه بروحها هاي لو دروا اخوتها شيسوون بحالها

شلون حبلى يولي احجي

ما احجي فد واكفة وابجي

كامت امي طكتني بثنين اديها بعدتها نهلة عني وجرتني جوا تحاجيني تريد اني فد دموعي تجري

عافتني وحدي وصكت الباب

بجيت لحد ما نهد حيلي وتعبت حطيت راسي ارتاح .. هودت ونمت

كعدت بالليل نهلة كاعدة شوية قاد هي وبناتها

شلت راسي .. كربت مني خاطر احجيلها

سولفتلها الصار وياي كله

كامت تلوم بيه وتغلط عليه وترد تنصحني وتدور حلول .. ضليت عد اهلي وهي تحاول تلاكيلي حل اطلعني من الورطة الاني بيها

ساعة تشربني زيت خروع

ساعة تشربني جاي دارسين

ساعة تلزمني سطولت الماي متروسة وتكلي امشي .. احتارت شتسويلي خاطر الجاهل ينزل بلا عملية ماكو ما نزل .. عجزنا بيا طريقة

فد التزمت بالعلاج الاطتنيا المستشفى اذا ما خذته اتاذى من اخذه ارتاح ..

ضليت عدهم اسبوعين

خذتني نهلة ويا بناتها وردينا لبيتنا القديم حشنا الزرع وووردنا الحلال وردينا .. البيت الكاعدين بيه ما يبعد جثير عن بيتنا القديم فد جان يم الجول ما يم البيوت

دزوا عليه هواي عيالي ما رحت

اجت ام خطاب ما طلعت ولا وضيت اشوفها

مر خطاب كم مرة يسال ما طلعتله

لحد ما اجا ريسان ووهب .. جنت كاعدة بالقرفة مالت نهلة وبناتها من كالتلي: رجلج هين

حسبالك كالتلي: عزرايين مو رجلي

انلوت معدتي والخوف سرى بكل جسمي فد لا كالتله ام خطاب ودرى بامري: ما اريد اروح

والله ما ادري شكلج يا قدس سالفتج تصفن المطي ما يدري الواحد شيكول وشينصحج .. تظلين هين ننفضح تردين ما ينعرف حالج شنهو

ضل هين فدوة لا تخلين امي تردني

بيدي يبعد امج احل اربط اني لا حيلي حيل اول ولا الي خلك اجاريها

كليله ما هين هي بالجول

كالتله امج هين وما ترضى تروح

عجل شلون ما اريد اخاف

دمشي واحجي وياه انت وشوفي شيكلج

راح يصيح عليه ويطكني وياخذني بالزور

وهيج ما يكدر يدخل وياخذج زور دكومي احبيبة وشوفي واتحاجي وياه

كمت وياها تعاكبنا ويا امي: رجلج مو يريدج عليش مخوتلة وما اطلعين

نهلة: انت رايدة جتلتلها شلون ترد

وهين ما تنكتل خل ياخذها وشيسوي بيها غاد يسوي مو هي الغلطت وما خافت احد خل تتحمل اليجرالها احنا ياهو مالتنا نتحمل عارها

بنية زغيرة وغلطت ما تدري اااااااالله الاحد الله من فوك بعظمته يعفي ويغفر وانتم توكفون وكوف لذنب ابنادم ..

عجل ما ردت أحويها وأحوي فضيحتها عد الجدة، وشردت وخلتنا نتصايفك. صلافتها ما تنحمل، رديها لي، هو اللي يتحمل إثمها وإثم ابن اخته.

نهلة: شنهو من قلب عندچ؟ بتچ تذبينها للجلاب ذوب؟

– مالچ غرض بيها، بلكت غاد يكربها ويختلط حابل بالنابل وتصم حلكها وتسكت.

– يا، وتريدي يكربها وهو هذا حالها.

– عجل أحسن من الفضيحة، وتاليها تنجتل. ترضين بيه وتصيرله مرة وتخلي الجاهل برقبته، وأم خطاب أعبها العوعو، لا تحجين ولا تنصين، خاف لا ابنها تلوحه أثامها.

قدس: ما أريد أرجع، حرام عليّ ما أقدر أعيش وياه بعد. عوفيني بالجول وحدي، حتى لو أموت ويا الحلال، فد لا توديني.

– وشني الجول؟ ما يندله خاطر البدج بيه. دمشي، الزلمة ناطر، امشي خايفة أم الشلم بلم أطت روحها وجاية تريدنا نطمّطِم عملتها الفاينة.

حجتها ودفعتني جدامها، وكامت تصيح عليّ. دخلتني عليه.

هو كاضب عكازة، حجه: شنهو معناتها يولي؟ من يودون عليچ وما ترضين تردين.

– طلكني فدوة، أني ما أتحمل نسوانك وجهالك. تعبت، ما أريدهم.

بعدني جاي أحجي وما أحس إلا عكازته فوك راسي يضربني بيها. قمت أصرخ وهو يكل لهب: اسحلها للسيارة، أني أعلمها ياهي اللي تكلي طلكني وتحجيها بوجهي. الظاهر يولي، إنت شبعوج أجل وكبروا ثربچ، لچن محد مشبعچ تربية وكايلچ بس الـ... تكل الزلمتها طلكني.

قمت أبجي بقوة وأصيح: ما أريدددددد، عوفوني. يمه عليچ الله لا تخليهم ياخذوني، يمممممه، لا تبيعين، صيري أمي يوم مرة وحدة بحياتج، ولا تبيعينني الهم. ولج يممممه.

صاحت: مجان البنت يم رجلها ما بعتچ لأحد. ردي لرجلچ وبالج أسمع حسچ.

جروني وأدحك بنات أخوي كامن يبجن ويصيحن وراي. نهلة ما تدخلت، مدري ليش هالمرة، عافتني وما دافعتلي.

جرني وهب للسيارة وأمي أطته العباة، ذبها عليّ وصعد أبو وهب ليجدام، وهب يسوق. داس بالسيارة وطلعت.

الدرب كله يتحلفلي، أذبحچ، أصلبچ، أقطم راسچ، أجلدچ.. لحد ما وصلنا البيت. صاح: ووووووهب، ناوشني الخيزرانة واسحلها لغرفتها.

سحلوني لغرفتي.

ولزم الخيزرانة وهو يكلي: ياهي اللي تصيح طلكني؟ شو يولي عيديها.

حجاها وجلدني بالخيزرانة. قمت أصرخ: لا لا، عليك الله لا.

جلدني نوبة. الله.

وكام يجلد بيه جلدة ورا جلدة لحد ما سلخ جلدي. صار أزرك من الجلد بالخيزرانة. قمت أبوس برجله بس يعوفني، أحس روحي راح تطلع بيده.

دفرني من رجله.

وصاح: أسمعچ نوبة اللخ تكولين طلكني، لو ما أحمل نسوانك لو عيالك، لا أدفنج بمكانچ بت الجلب. تهدين البيت من كيفچ وتطلعين تروحين لأهلچ بلا إذن، ولا أحد كايلچ، روحچ حاسبة البيت، مـ... جلببببببه.

أسمعچ نوبة اللخ تكولين أخذني لأهلي، لا أجلدچ وألعن والدي والديچ بت ******

يحجي ويفشر ويقلط، وأني طحت بمكاني، جسمي كله مصلوخ صلخ. حركني حرك من الوجع. أنوح أبجي، أدعي الله ياخذ عمري. عجزت بهالوضع، شسوي.

شوية ودخلت أميرة: عيني سوالف المجروحة ولين طاگچ، لازم تاخذيلج شوط استراحة. ما تمشي عندي، كومي خلصي شغلچ وسويلنا العشا. وباچر البيت والهدوم عليچ. يلا كومي.

مسحت دموعي وكمت.

رجلي ما أكدر أكف عليها. سندت روحي للحايط وكمت.

أحسها ورمت، ما أدري انسكرت مدري رض، ما جاي أكدر أدوس عليها.

رحت أعرج للحمام، غسلت وجهي وذبيت على روحي مي. طلعت للمطبخ. محد كالتلي شلونچ لو حجت وياي. جبت سلة طماطة أثرمها ودموعي تجري.

مرت عفاف: سراب، سلكت البتيتة ذيج، عود كشريها وحمسيها هي والطماطة وسوي وياها مسمة، وخدري جاي من تكضين همي. ايدچ يلا راح يأذن على شغلچ هذا، حنيصك ربي عشاج هو والسحور.

ما رديت عليها. ضليت أثرم والدمعة من عيني تجري على خشمي وتنزل، وأمسح وجهي بثوبي وأكمل ثرم.

جت نور بت عواطف كالت: أساعدچ.

– بكيفچ.

– راح أكشر البتيتة.

كعدت وجرت الدست مالت البتيتة السلك، كامت تكشر وتحط بالطاسة. وصاحت على سراب: سراااااااب، تعاي علكي الجولة. سراب.

جت علكت الجولة وحطت الطاوة الجبيرة ودهن من التنكة.

مرت أم خطاب كفختها على راسها: ردي من الدهن، شعدچ بيه؟ هذا كله رايدة تحمسين كلوب الوادم؟ هن بتيتات، خاشوكة دهن تارستها ترس. خوالچ يجبولنا الدهن وتبذرررين. ردي.

– أي عمه، راح أرد.

اندارت عليّ لاوية خشمها وخازرتني. درت عنها.

حجت: أخيرلچ الصار وياچ، يصلفة. كل اللي يصير وياچ حيل بيچ وازود. وأنا وياه لا، ما ذلّيتچ مذلة ما أرتاح. تعرفينا وتشردين بت الجلب.

حجتها ومشت من عندي.

حجت نور: شبيها عمتي وياچ؟

– ما أعرف. فد إيدي جاي تحركني من الطماطة مجروحة.

– أطيني، وأنتي كشري البتيتة.

جريت دست البتيتة وهي خذت الثرم عني. حجت سراب: هاي أميرة هي الوزته عليچ. والله أني سمعتها تكله، حجينا وياها وكنالها إنت جديدة، ضلي هين يم الحاجة. كامت تنتر بينا وتصيح، إنتو ما تحكموني، واني مليت منكم. وراح وحدها تكول الحاجة، بس هلتنا نطلع، ماخذة عبايتها وطالعة من البيت وحدها. خلتو يجي عليچ شايش.

– هو شوكت أجا من العرب؟

– أمس.

حجتها وهي تجر بتيتة من السلة، تمردها بيدها وتذبها بالطاوة، وذبت فوكهن نص الطماطة. حمستهن وقطتهن. أني قمت أجيب القوري، رجلي حيل توجعني. دحكت خطاب دخل للبيت.

قامت دموعي تجري من شفته.

تمنيت لو ماشية وياه ولا حالي هذا. ورطت روحي، ما أدري شلون تكضي بحالي هذا ويا الفرخ البطني.

خدرت الجاي، وراحت نور تحضر السفرة.

حطينا الأكل. أبو وهب كاعد على راس السفرة وأمدد رجله على وسادة. حطيت الأكل ومشيت أعرج لقرفتي. صاح: ووووين؟

– ما أشتهي.

– اكعدي لا أكوم أصلخچ نوبة اللخ. كعدددددي.

كعدت بطرف السفرة، بس عواطف جرت خبزة وخلتها كبالي أني وبناتها وندستني: أكلي.

كصيت من الخبزة أقمس ودموعي تجري.

شلت راسي، صدت باميرة أدحك بعواطف بخزرة. دحكت بعواطف مدنجة تاكل وتشرب جاي. شالت واسها، شافتها اندارت أميرة وهي ترفع بحواجبها وتتنهد. حطت لكمة بحلكها وحجت ويا أبو وهب: أصبلك بعد جاي، يعيوني؟

– صبي.

قمت من مكاني. حجيت: شبعت، رايحة أغسل الصحون، الظاهر بين ما تكملون.

ما حجه وياي ولا دحكلي.

فد الحجية تخوزرني. مشيت للمطبخ. خطاب جان جاي للمطبخ، وكف من شافني: يمتى جيتي؟

جروا دموعي، بس حجه وياي.

انداريت عنه وما رديت. كعدت جدام الحوض. حجه: شبي وجهچ يولي؟

– عيفني بحالي وبس. كل اللي جاي يجرالي من وراك أنت. فد أبعد مني ولا تكرب، وأني أصير بخير.

– ياهو اللي طاگچ؟

– بعد صيح، خله يرجع يجلدني. صيح، أنت بيش متأذي؟ فد أني الواكعة بيها. روح مني.

ضل واقف متصنم وهو يدحك بيه: يولي، هو طاگچ صدك؟

– مالك غرض أنت، أني ورجلي. أنت لا تدخل، خووووش.

أتصنم بمكانه، ما فارق. فتحت البوري وكمت أغسل بالدست.

عافني ومشى. جليت الصحون ومصتهن.

ورحت لقرفتي.

بالليل أسمع صوت خطاب يتكاون ويا أمه.

هي قرفتها لازكة ويا قرفتي. قمت فتحت الباب، ويتكاون. يكللها: خليتي يضربها وما شلتيها من تحتو؟ رضيتيلها تنجتل على أيدددديه؟

– مرة ورجالها، أنت ياهو مالتك؟

– لا تكولين مرة ورجالها. تعرفين أخوج اللي خذاها مني، شتعودلي وتعنيلي؟ جاي تعاقبين من تخليها تحت رحمتتتتته تنجتل؟

– أنساها، ولا تحط روحك وياها، مالك غرض بيها. تورطنا، البنت مو خوش بنت، تروح تجيبلك مصيبة.

– أنا أكبر مصيبة طحت فوق راسها. ساعة السودة اللي حجيت الخالي عنها، وكلت رايدها، لو عايفها ببيت أهلها، أخيرلها وأخيرلي. كل اللي جاي يصير بيه وبيها، من وراج أنت. أنت ساس البلة كللللله.

– عجل شتريد؟ أارضالك يكرب مرت خالك؟

– بس رضيتي الخالي من خذاها منيييي؟ مووووو؟

– ساعة البيضة، كن خذاها منك وما صارتلك مرة. أنا لا أودها ولا أجرعها.

– ولا أني الجارعج وجاره حقدج وظلمج هذا. بس وربك ما أعوفها لأخوج، والله ما أعرفها، وتشوفين.

– تهدد ولك؟ مو ساومتها ببيت؟ مو رضيت تاجر البيت والبستان لخالك وتنازلت؟

– أنا ساومتها. تديرينها عليّ؟ أنا رديت خالي يطلع من البيت، وأنت اللي نمتي براسي وكمت تصيحين، أتبرى منك لو شردت خالك وعيالك. هسه جاية تعايريني؟ بس سهلة بعيني. والله وتذكريها، كلشي خذيتوه مني، أرده. بس اصبرولي، لا أوقعكم واحد واحد، بس حاطكم على نار هدرة. هذا أنا وهاي أنت، وتذكريها.

فتح الباب.

أني طبكت الباب مالي.

رجعت لفراشي. من دون العالم كله، بس هو الواكفلي ومشتريني. الباقين كلهم بايعيني، حتى أمي.

ضليت الليل كله أبجي.

لا أكدر أصير اله وأرتاح، ولا أكدر أشوفه كبالي وأبعد.

ثاني يوم الصبح.

كعدت بلا صباح الخير. حجت أميرة: سوي الريوك.

عواطف: الريوك عليچ والبيت عليها، وأنا وعفاف راح نطلع نخبز.

– وأنت ياهو مالتج؟

– لا تذبين شغلچ براسها. كل وحدة بينا تكضي شغلها.

– تعاي جاي، أنت شعدچ وياي هاليام؟ شو شادة حيلچ عليه؟

– تعرفين شعدي وياچ.

تحاجيها وتخزرها.

– لا، شو ما أعرف، بالله حاچيني.

– روحي اكضي شغلچ، روحي.

– لا تدخلين بشغلي. امشي قدس، سوي الريوك.

عواطف: طلعي غسلي الكراج، الريوك عليها، يلا، امشي.

– جايه تحطين كورج وياي أنت؟

– أي، أحط. أرد أشوف شتسوين.

– تكدرين لي أنت يولي؟ كبلها حذرتچ هواي وما سمعتي. شنو نسيتي؟

– تفتخرين بحيلچ وخباثتچ. ما طول الله يعرف الحق، ما أخاف من كل بشر.

– هين، نشوف. امشي قدس، اكضي الريوك.

عفتها وطلعت للكراج. تخصرت: مفترات عليّ اليوم ومتفقات. سهلة.

طلعت اقسل الكراج.

هن ضلن يتحاجن بيناتهن.

صاحت عليه خاطر اجي اسوي الريوك.

ما درتلها ولا حجيت وياها.

طلعت لكتني ما رادة عليها وجاي اقسل.

تخوصرت: مفترات عليه.. سهلة اراويجن اني لو انتن.

ما دحكت عليها.

مشت هي ع الحجية تكللها: ردي قدس وحجيها.

لكيتها اتخش بالدوانية مدري شعدها وي خطاب.

حذريها حت لو الشغل عليها لا تخليها تكرب غاد.

وحدة من عدنا تروح تنطف غرفته على حورها بس عي بس تريد تلج وياه.

جانت سراب بالغرفة وهي تفتن يم الحاجة.

الحجية رايح بالها بعيد.

اجتني شايطة: بت الجلب لو كربتي غرفة خطاب الا اكصب رجليج.

ما متكربتلها جاي اقسل.

انجعمي ولا تردين بوجهي من تردين.

والله احشم ريسان عليج مثل ما حشمته امس وخليته يجلدج.

هالمرة يحز ركبتج.

انت ليش تلوميني بس اني ما الومين ابنج.

اني جنت بعيدة عنكم وحت ما اعرفكم.

ابنج الجان يراقبني الصبح واخوج الاجا خطبني.

وانت وافكتي بهذا ورحتي نمتي ويا هذا.

كفختني: الج عين يدلنج وتراددين يولي.

من اسمع حسج الا احشمنهم عليج.

ولا ابالج اخليج والله وسماواته لا ما خليته ينهيج من الكتل لحد ما تموتين.

لو يموت اللي ابطنج وافتك منكم.

قمتني باثنين اديها ومشت.

تنهدت: دخيلك ربي صبرني والله تعبت.

اديه مزوركة جسمي مزورك رجلي مورمة وبالزور ادوس عليها.

خلصت الكراج دخلت لكيت ابو وهب جاي يطلع من الحمام.

دحكت بيه وتعديته.

صاح: ما تعرفين تكولين اصباح الخير.

اكوم اجلدج نوبة الاخرى يولي.

صباح الخير.

لا صبحج الله ولا شافج اذلفي لا بارك الله بعمرج.

دخلت لقرفتي اتنهد فد رايدة اتحملهم.

مدري شمسوية بدنياي والله يمتحني بيهم ما ينحملون.

عزلت قرفتي ونظفتها خلصن ريوك.

كعد ابو وهب واميرة تكله: قدس مدري بيش شايخة علينا.

توسلت بيها بس تساعدني بالريوك عدي جهال وهي فارغة.

لا دحكت بوجهي ولا جني حاجيتها.

مو طلعت اقسل الكراج وانت الريوك اليوم عليج.

زكح هو: ومن عدها جهال وانت فارغة ما تعرفين تعاونيها.

جنت...

قلطعني.

هشششششش انعل ابوج لابو ساسح السكط بت الجلب.

كعدت بالزور واني اسمع قلطه وشتيمته.

حجت الحجية: قدس كلش شاخت جن مالها رداد.

اذا ما تجعمها وتضبها باجر عكبة تصير مثل امها لا تنجرع ولا تنكدر.

وشويت اني فد طلعت اكضي شقلي بين ما يخلصون الريوك.

كلت عواطف: كل وحدة بينا عليها شغلها.

العدها جهال الما عدها جهال تنظم وكتها شني عندج جهال تحير بشغلج.

معاونة شوية شني ما تصير تعاوني.

من فارغة تعاونج غير تكمل شغلها اول.

صاح ابو وهب: صمن احلوكجن لا اكوم اترس روسجن رصاص وافتك منجن.

كلنا سكتنا.

اميرة سوت روحها اختنكت وكامت دوعاها تجري وما تتريك.

دك على رجلها وكاللها: اكلي.

لا والله احس روحي عدوتهن ما بيهن التحمل مني جلمة.

شحدهن اكصبهن والله.

يا شحدهن كلهن متفقات عليه يتعاونن بيناتهن واني جني وحدة بيه جرب شادات كورهن وكوري.

انعل والديهن والله ام مصطفى الغالية اكلي ول يابه.

عفاف كامت تشرب الجاي وتتنهد وترفع بحاجبها وادور وجها.

وعواطف تضايكت وكامت تصيح على بتها: امشي جيبي الشكر كووووومي.

صاح ابو وهب: لا تصيحين لا اكوم احط الطاوة براسج.

انا وبتي ما جاي اصيح على احد.

يولي لا تخليني اكوم اكفر بيج بت الجلب.

سكتت.

كمل: لا ما يزهكني من الصبح ما يرتاحن بنات السكط دنعل ابوجن لابو الجابجن علي.

الكل سكت ومحد ضل اله خلك ياكل.

فد اميرة ضلت تحجي: شكثر اصبر الهن واكول اخياتي واشيل شغل عنهن وهن يكرهني كره ما صاير.

شكثر اغطيلهن واكول ميخالف ولا يصير بعينهن.

شكثر شفت على قدس وشكثر اضمضملها وهي عونه ما بيها.

اشفتي علي ليش هيج تفتنين والله حرام عليج.

رد هو: اشايفة عليها يولي.

خزرتها الحاجة.

كملت وفرتها: ليش بس قدس.

ذاك اليوم اختي شايفة عواطف وهي تفرفر ابناتها بالسوك وحتى بدون نكاب.

حجيت فتنت كلت.

عواطف: صخام بعينج كون يولي ليش هيج حية خافي ربج.

صدك ماخذة بناتج ورايحة.

اكو مرة ما تروح للسوك من تروح لاهلها اطوني اخوتي مصرف رحت اشتريت.

وبكيف اخوتج يولي اطلعين لو بشوري.

رحت على مود بناتي معتازات كون هدوم مال بنات ما عدهن ضالات وحدة تاخذ من اللخ وانت لا تطيني ولا تخليني اروح.

ومن ما اخليج تروحين اطلعين بلايا شوري.

بس اني الطلعت شني هن ما طالعات.

عتبة الباب ما وصلت زلمتي مريض وتعبان يا سوك يا هدوم يا من كلاب الدنيا الزاد مالي نفس اضوكه مو افرفر بالسواكه ولا جن رجلي بشدة.

كام من مكانه.

جر الخيزرانه من فوك الديلاب.

وصاح: عواااااطف.

عواطف اندارت لاميرة: بذمتج كون يالمسمومة الله لا يوفقج ان شاء الله.

سراب ندهت الحاجة: فدوة عمة كومي لابوي.

رادت تكوم امها والحاجة تكللها: ومن تخاف امج شعدها بالسواكه ورجلها مريض.

ينجازن هن وزلمهن مالي غرض.

نفضت ثوبها وكامت منقهرة من رد الحاجة.

وهو يصيح: ويييييينج.

هي مشت للقرفة.

والكل طش.

الحاجة كامت لقرفتها.

واحنا كل وحدة كامت لشقلها.

ضلت بس نور وسراب يشيلن بالسفرة وعينهن على قرفت امهن.

صياح ابو وهب عواطف فزز البيت كله.

كام يضربها بالخيزرانة صوت الضربة على جسمها واحن بعيد نسمعها.

انظف بالبيت واعزل.

وجسمي كشعر كله من حسها وهي تتوسل بيه يرحمها وما ينرد منها.

محد بيهم تحرك.

لا الحاجة طلعت ولا نسوانه.

ووهب ما ادري وينه حتى ما فزعلها ولا شافها.

فد بناتها واكفات برا يتباجن.

كعدن ضياء من النوم.

يطلع عمره ١٣ سنة.

فز وراح لقرفة امه خاطر يفازعلها.

كضبوا ابو وهب كفر بيه كفران جيف وكف بوجهه وراد يوكفه عن طك امه.

فوك كتلتها عواطف كامت تذب بيه وتطرده وتحاول تبعده.

ذبت روحها على ابنها خاطر ما يضربه.

فزعن بناتها وذبن روحهن على امهن.

كضبهم جلدهم اربعتهم.

وكفت ادحك وابجي.

لا اكدر اذب روحي واحاميلهم جسمي كله يون من جلدة امس ولا اتحمل اشوفهم ينطكون هيج واسمع حسهم.

صاحت عفاف: اكضي شغلج انت الا يردلج يكتلج وياهن.

امشيييي.

خطية واحد منكم يحاميلهم والله حرام يطكهم هيج.

اشتغلي معليج.

جاي تحجي.

طلعت عواطف من القرفة تصيح: كافي طكت روحي منك ومن فكرك كاااااافي جزعت يا ناااااس جزززززززعت.

ما يوم نصفتنييييي.

ما يوم رحمتنيييييي.

اسمك تكصب بيه وابزرييييييي.

شنهو ذنبا شسوييييييينا وياك.

خذيت علي اربع نسوان لا يوم حجيت ولا يوم فكيت حسي ويااااااك.

ولكم تعبت طكت روحي منك جززززعت.

فوك الفكر والضيم يومية ننطيك يومية ننهان.

شنهو السويته اشتريت اسلابات البناااااااتك.

اكو يوم حسيت عليهن شمعتازات.

دريت بحالهن اشبيهن ما بيهن لو ما اهلي ياهو بحاااالهن.

طلع وراها يعرج وهو يكللها: يولي حسج يعلى بالبيت.

كامت تصرخ وهي تزكح بوجه: يعلى بوجهك يييييييييعلى كونك ظااااالم تعبنا من ظلمك وضيمك تعبنا.

صاحت عليها الحجية: حسج بت الارادم شهرتينا.

يعرج حيل ورجع كضبها من راسها ويسحل بيها.

جاي تشكف عن رحها الضربة دفعت ايدو صارت الدفعة على رجلو بسرعة وكع للكاع.

طاح لو تخبل عليها.

كضب العكازة وباثنين اديه كام يضرب بيها.

دفعته منها وتكله: احرك روحي واخلص منكم.

احرك روحي.

طلعت للكراج مفرعة ومفرفحة.

جابت دبة النفط وكامت ترش على روحها.

تراكضنا اني وبناتها نجر بيها.

كامت تدفع بينا بقوة وتصيح: وخرن مني بنات الاوادم خلني اااااخلص عوفني ارتااااااح منكم.

ولكم تعببببببت.

هو يصيح: خلوها تحرك روحها ابعد منها اذا شريفة سويها وفكيني منج.

اسويها والله اسويها واخلص من ظلمك تعبت عمرك ما نصفتني ورحمتني تعبببببت.

ذب عليها الجداحة كالته وهو يكله: اذا بت ابوج سويها وفكينا من شرج بعدن منها.

كضبت الجداحة واحنا نلزم بيدها.

وهو يصرخ عليها.

اجر بيدها وسراب تتوسل بيها ونور تخبلت كامت تدك على راسها مثل المخبلة وبيها حالة نفسية.

ضياء ركضلها ويبوس بديها ويكللها: فدوة يمه عووووفيها اطيني الجداحة.

كامت تصرخ وتكلهم: وخري مني اكلكم خلوني اخلص تعببببببببت.

جرت روحها وجدحت الجداحة بسرعة ايدها وهي سابحة بالنفط اديها والثوب كله وج.

كامت الجهال تصرخ عفاف تركض وتصيح جيبن ماي.

ضياء يحضن بيها ويريد يطفي بيها.

كامت تصرخ من كل كلبها وهي تحترك.

وريسان يدحك عليها ما حرك ساكن.

انخبصنا كمنا واحد يضرب باللخ.

نريد نطفيها ما نكدر.

وجت من فوك ليجوا.

الحجية كامت تركض تريد تجيب بطانية.

وعفاف ع المي.

واني كمت اضرب على وجهي واصيح: راح تمووووت احترررركت راح تمووووت.

طب خطاب من حلاة روحه نزع قميصه ويضرب بيها يرد يطفيها وهو يصيح: بطااااانية جيبو بطااااانية.

طلعت الحاجة وبيدها البطانية.

جرها من ايدها بسرعة ولفها بالبطانية ووكعها للكاع.

وعفاف ذبت الماي عليها.

سراب تهسترت كامت تشلع براسها وتصيح: امي ماتت ولكم امي ماتت مااااااااتت.

يحرك بيها خطاب يحاجيها ما ترد.

الحاجة تهز بيها.

احتركت من فوك ليجوا.

وضياء كله حروك.

وريسان يصيح: كتلت روحها الله لا بارك بيها من نعلت الله على اليوم الشفتها بيها.

انهد بيها غلط.

بس صوته ضاع بنص صريخنا وصريخ بناتها.

خطاب شالها من الكاع وطلع يركض.

كلنا تراكضنا وراه.

ذبها بالسيارة والحاجة صعدت وياه.

واحنا ضلينا بالباب نبجي ونصرخ.

طلع ريسان وهو يلف الشماق على ركبته ويعرج على العكازة ويصرخ:

دخلن جوا بنات الجلب شهرتنا لا بارك الله لا بيجن ولا بأمجنه.

حجاها وطلع وسد الباب وراه.

كامت سراب تضرب على وجهه وتصيح:

أمي ماتت راحت أمي راااااااحت.

نور بس تصرخ بدون حجي وتشلع بشعرها.

أني كعدت أبجي بصياح بدون شعور. عفاف تبجي. أميرة ما هي.

الجهال كلها تبجي.

ساعة احنا فد نبجي ما نعرف نكوم ولا مستوعبين الصار. بادت ادينا الخوف أكل قلوبنا والحيرة عليها حركتنا حرك.

ما ندري ماتت لو بعدها عايشة.

بناتها تخبلن. ساعة دكن على روسهن ساعة يصيحن مثل المجانين.

ندستني عفاف:

كومي مسحي البيت خاف يجونا الوادم كومي صار سيان.

كمت للهول أدحك الهوسة والسواد من الحرك الصار. ريحة لحمها وهو يحترك بالهول يكش البدن. دموعي تجري شلت الهول وطلعت أترسه من برا.

ورجعت أمسح.

شفت أميرة بالمطبخ جاي تطبخ.

جريت البيت للمطبخ ووكفت أحاجيها:

إذا ماتت بذمتج انت الفتنتي عليها وجتلتيها.

أميرة:

امشي لج امشي هم العكروك اله ضروك. كملي شغلج يلا.

أني:

شستفاديتي من فتنتي؟

أميرة:

كملي شغلج لا أهفج بالجفجير والله.

أني:

حوبتها تطلع بيج إن شاء الله.

أجت شالتني من جتف دشداشتي:

تدعين عليمن يولي؟

بعدتها عفاف:

دكافي ما كفاجن الصار بسجن كلوبنا خلصت كاااافي.

بعدتنا من بعض.

وأميرة تخزر بيه. مسحت البيت كله.

وصارت الساعة ١٢ وماكو خبر عن عواطف.

كلوبنا نار. صبت أميرة القدا وصاحت:

يلا تعالن تغدن.

عفاف:

يا غدا يولي اكو أحد ضلتله روح ياكل بيها.

أميرة:

شلون يعني نموت جوع الجهال هاي شلون ما تاكل نلزمهم حداد عواطف احتركت.

كبت عليها سراب:

كله من وراح حركت روحها الله لا ينطيج الله يحركج بنار جهنم مثل ما حركتيها.

كامتلها:

تعاي هين يولي عليمن هاي تعلين صوتج.

كربت منها ملشتها من شعرها وطكتها راشدي.

دفعتها سراب وكامت تدعي عليها. انهدت عليها أميرة تكضبها من شعرها.

فزعتلهن أميرة فاككتهن ودفعت سراب ليقاد وجرت أميره وهي تكلها:

بنات أمها احتركت جدامهن عوفيهن كرصيها شوية ما مليتي.

كعدت أميرة وهي تقلط على سراب وتوكل بجهالها وتاكل هي. سراب كاعدة على صفحة مالها واهس توكل جهالها كامو يلوصون بالاكل.

كامت أميرة تصيح:

هسه عرفناج كاتلة روحج وتمثلين وعو كاتلج القهر على ضرتج كومي لجهالج شوفي شسوو.

عفاف:

يولي كلج سم أعوف بالله منج.

أميرة:

مو اقل منج أكلها أنا سمي واضح مو مثلج من تحت لتحت.

عفاف:

دسكتي حسج ما أتحمل أسمعه.

أميرة:

اي روحي حركي نفسج وفكينا ياهو الكاضبج.

صرخت أني:

انت بقلبج رحمة ما تنقهرين لا تنقهرين ما تعرفين تسكتين كلنا بالبيت ما متحملين نسمع صوتج اسكتيييييي.

أميرة:

اكلي خ**** كضبي دودتج على خطاب وعود أحجي مدودة وهي على ذمة رجل وجاية تحجيلي أخلاقيات.

أني:

خليني أصير شما أصير فد ما أصير مثلج كلبج أسود.

أميرة:

كلابهم وانت وين تلحكين توصلين لنعالي خاطر تصيرين مثلي مصدكة روحج يولي؟

عفاف:

راح تاكل **** بروسنا عيفنها لحد تحجي وياها.

أميرة:

ال**** بحلكج لا تغلطين لا تخليني أهينج بالنعال والله.

أني:

ياهي هاي التهينيها بالنعال؟

كامت لحيلها وتلازمن.

كامت سراب جرت الخيزرانة مالت أبوها وتولت أميرة بيها كامت تصرخ. أني من حلاة روحي أصيح:

حل حل.

وأجر بشعرها.

جريتها جرة من راسها للكاع.

نور تدفر بيها وسراب تجلد بيها وأني أملخ بيها.

والتمينا عليها أربعتنا كطعناها تكطع.

فكت روحها من عدنا وهي تقلط وتدعي علينا.

وراحت ضمت روحها من عدنا بالقرفة. غد بعد كلبي ما برد منها على الصار بعواطف بودي أذب النفط عليها هي وأحركها يلا يبرد كلبي.

المرة وجت جدامنا لا اهتزت ولا حست.

كمت لميت البيت.

جاي أمسح طب وهب وهو يصيح:

ولكم أمي مااااااتت مااااااااتت.

فزينا كلنا وطلعنا نتراكض.

صرخت عفاف:

منين عرفت؟

وهب:

جنت بالمستشفى ما لحكوا عليها ماتت ولكم مااتتتتتتتت.

صرخت وخلت ايدي على حلكي.

بناتها كامن يصرخن ويلطمن على وجوهن ويجرن بوهب ويكللنا:

جيبلنا امنا نريدها اخذنا الها نريد امنا نريدهااااااا ما تعوفنا امنا ما تعووووفنا.

نور تصرخ يمه.

وسراب تصرخ وتكلها:

ليش عفتيناااااا يمه؟

ليش ما فكرتي ابنااااتج ليش ما فكرتي بينا ليش عفتينا للما يرحموووون يمه رجعي ما نكدر بدونج ولج يممممه.

لازمة راسي واصرخ بلا شعور وياهن.

عفاف حطت ابنها بحضنها وكامت تبجي واجتافها يهتزن من البجي.

شوية ودخلت مرة تصير اخت عواطف.

لطمت على وجهه وصاحت:

امجن وييييين يولن.

جابلنها سراب ونور يصرخن وياها ويكللها:

خالة امنا عافتنا حركت روحها وعافتنااااا امنا راحت عافتنا عافتنااااااا.

كامت تشك بهدومها بنص البيت.

الناس الجيران لفوا علينا. ناس انكلبت على البيت.

لحد ما اجا ابو وهب عاقج وجهه عصبي شاف الكل ملتم. صاح:

شعدي مضيف الخلفوكم يلا كل واحد لاهلها ما عدي فاتحة ولا سوي يلا.

صاكت وجهه عفاف:

يا ريسان تطرد الوادم ريسااان.

وهو يصرخ:

يلا من هين ما اريد أدحج أحد يلااااا.

فزت اخت عواطف وهي تكله:

كلو من ضيمك جتلت روحها كله من ضيمك انتحرررررت.

صرخ:

نعلت الله على روحها التكتل روحها بالنار واختج للنار راح لحكيها وولي وراها يلا من بيتي.

كامت تتكاون وياه وتقلط عليه.

كضبها وطردها من البيت.

بناته كامن يصرخن ويتوسلن بيه يروحن لامهن.

كضب العكازة وتولاهن كتل وهو يكلهن:

التترحم على امها اكص السانها امجن كافرة وراحت لنار جهنم التكتل روحها كفرت بالله من اسمعجن تبجن على امجن الكافرة اكصبجن.

جرتهن عفاف من عندو وضمتهن بغرفتها.

كام يصيح بالبيت:

ما اريد احد يذكرها هين ولا اسمع واحد يترحم عليها. الاسمعووووا يذكرها لو يبجي عليها احركو واخلي يلحكهاااا.

واليجي لهين تطروه.

ما انصب لها عزا هالكافررررة كفرت بدين الله وانتحرت الكاااافرة المررررررتدة.

كلنا التمنينا بقرفة عفاف خاطين ادينا على حلوكنا نبجي بسكوت.

سكت وهدى واحنا على نفس البجية. جابتله اميرة ماي وكالتله:

اشرب وطفي نار كلبك عليمن تحرك بروحك على هالكافرة الحركت روحها وما خافت من ربك اذا ارتفع ضغطك لو شكل وياك مرض ياهو اليفيدك هي لو بزيتها النكسة مثلها.

فزت سراب من بينا وطلعت وهي تكللها:

امي مو نكسسسسسه امي اشرف منج يا ساقطة يا ام الززززززلم.

صرخ ريسان:

جيبوها جيبوها هاي هل أربيها مثل أمها جيبووووها.

جرتها عفاف وكفلت الباب واميرة ضلت تضرب بالباب وتكلها:

طايحة الحظ تصيحين وابوج موجود امج لا عرفت تربيجن ولا عرفت تحويجن جلباااات متكولن هالرجال عصبي مو وكتها تستحن تخجلن انتن بس الله يستر من عرامتجن وصلافتجن.

صرخت عفاف:

ولي من هين انجعي اميرررررة.

أميرة:

يطلعلج حس انت يالمسمووومة سمج اصفر يبث علينا مسوية روحج حزنانة وكاتلاتج بناتها.

صاح ريسان:

بسسسس.

أميرة:

ما يخلنك ترتاح حسبالك يعيفنك شوف اذا ما فتنن عليك للناس ويكولن هو الاطاها الجداحة وخلاها تحرك روحها.

كام من مكانه وفك الباب علينا:

اسمعن ولجن دحجن هين.

كلهن التفن ورا عفاف وهي تجر بيهن وتحاميلهن. حجه:

الاسمعها تفتن علي وتكول انا الناوشتها الجداحة اجتلها وادفنها بليلة ظلمة. وما ارحم وحدة منجن الشهد منجن عفاف وسراب ونور وقدس. الحاجة واميرة ابعدهن اتضلن انتن لو فتنتن علي وحجيتن تعرفن شجرم بيجن.

عفاف:

والله ما نحجي شلون نفتن عليك ليش شيضللنا اذا انت رحت محد تفتن عليك والله.

اندار عليه:

سمعتي ولج.

وضك عكازتو عليه:

والله ما أكول.

سراب:

يابه ما نحجي والله بس هلينا نروح نودع امنا كبل لا يدفنوها خل نشوفها بس أخر مرة أبوس رجلك يابه.

صرخ:

هششششش وووووووولج ما عدي بت تحجي سرررراب.

وضك عكازتو عليها:

امج كافرة يولي البجي عليها حراااااام.

الاسمعها لو احس بيها تبجي على امها ادفنهااااااا.

ضمت روحها ورا عفاف وهو اندار يمشي ويصيح بالبيت:

ما اسمع وحدة تبجي عليهاااا الاسمعها تترحم لو تبجي على وحدة كافرة جتلها حلااااال. اميرة شغلج هاذ تكليلي يشكو وحدة. ولو فتنت علي وحدة لو حجت بس جيبيلي اسمها تالله لا ادفنها وهي حية.

حجاها وطلع من البيت.

وكف اميرة يم الباب مخوصرة:

وهاي حط اركابجن بيدي حسبالجن اعديها الجن من اطكني؟

محد من عدنا جاوبتها.

مشت وهي تقني جياد بينا:

الدنيا ربيع والجو بديع افل على كل المواضيع. افل افل افل ههههههههههههه. وهاي خلصت من وحدة منجن. باقي اثنين.

قدددددددس حضري جفنج. دورج ورا عواطف يقددددس هههههههههههههههه.

سراب:

لا ما يجي يوم احركها بيدي واخذ ثار امي منها ما يبرد كلبي منها.

عفاف:

اششش سكتي يمصكوعة لا تروح تسمعج عيفيها.

قدس:

ونضل تحت جدمها يمتى ما عجبها فتنت علينا.

أميرة:

اسكتي انت اللخ يولي بس تفتن عليج واتهمج ويا خطاب. تلحكين عواطف ركض.

قدس:

ميهمني أموت لو أعيش. مسميها عيشة هاي تنجلد وحدة وتنحرك وحدة. ويمنعنا حتى من البجى عليها. يا عيشة نموت ونروح يم الله ارحم منه ومن عيشته.

أميرة:

يولي هش لا تعمين على روحج.

قدس:

اعمي ما عمي ما عدت اخاف منهم هي موته موته جزعنا كافي الشفنا اليوم احتركت كدامنا محد بينا كدرت تسوي شي. ماتت مكابيلنا واحنا لا حول ولا كوة. عيشة هاي اني اريد اموت احسن من العيشششة.

طبت الحاجة وهي تون وتصيح:

يمصيبتجن يبنوااااات يمصيبجن يمه. شهرنا ابيجن جدام الوادم تمنجدنا يممممممه.

كل احنا اطافرنا الها.

صرخت وكعدت بالكاع فكت شيلتها وصاحت:

مرة بساع بساع راحت من ادينا يولننننننن شحالجن يممممممه.

كابلناها وكمنا نبجي.

وهي تصيح:

تعزينا وتصخمنا يولنننننننن.

نبجي بقوة. ركضت عفاف تجيبلها ماي.

اخذت الكلاص كطعت بجاها وشربت. حست حلكها وحطت الكلاص وحجت مفرفحة:

شهرنا وخزانا يولن جدام الوادم يصيح كااافرة. جرني وجر ولده من جنازتها يعععععع.

عفاف:

وعليش رضيتي تجين؟

الحاجة:

بس ردت أسكته يولن الوادم كلت وجوهن ولدها ما يوكفون بجنازتها بس خطاب يتراكض منا ومنا.

عفاف:

ضياء شلونه؟

الحاجة:

شلونه. حال الضيم حاله. حال الضيم حاااااااااااله يولن انفجعنا هاي المصيبة الما جانت ع البال.

يولن ما يرضى يسويلها عزا

ولا يرضى نكف بجنازتها

سراب: لا يسوي فاتحة هسه

بس كليله نروح لخوالنا نخابل بيبي وخالتي عمة فدوة

سكتي يولي يذبحنا ريسان

طغى طغى ريسان ما ينكضب اليوم

جار بظلمها اعليها

بجت: يا عواطف يا مصيبتج

ولج عليش تيهتي بنياتج يولي

المن خليتيهن اليا ضيييييم

عليش جتلتي روحج

صرخت نور: امي ما كتلت روحهااااا

انتو الكتلتووووها

هي بس هددتكم بروحها

رادتكم بس تفهموها بس تنصفوها

صاحت ارحموني ارحمووووني ارحمووووني

محد بيكم رحمها لحد ما سلمت روحها لالله يرحمها

امي ما كتلت روووووحها انتم الكتلتوووووها

كامت تصيح

ما ردت عليها الحجية

ضلت بس تبجي بقوة واجتافها تهتز من البجي

طب ريسان على حس نور

صرخ: اني شكلت يولي

يولي حسج يطلع بالبيت يولييييي

واجاها بعكازته

فزينه عليها كلنا والحجية وكفت بوجه

كامت تصيح: بسك بنوات انفجعن بامهننننن

بسك جووووور يتيمات اصبحن

خاف الله بيهن

انا ما اخاف الله يسلييييمة

اليمنع بت من البجى اعلى امها ظلم

بسك منهن خلهن يروحن لخوالهن

يذبن حيلهن اعلى امهن عووووفهن

تالله التطلع من هينا لا اكصبها

والله وابالله اجرم بيكم جريمة

يحجي وهو يرفع عكازتو ليفوك ويهدد

نزلها يتجى عليها وكعد مكابيلنا

ينعل بروح عواطف

ما تحملن بناتها راحن لقرفت ابهن

يبجن وينوحن بصوت عالي كام يصيح

تكاونت وياه الحجية سكت عنهن

اجت اميرة كعدت يمه

سالته: هسه شني اهلها راح يسوون الفاتحة

مالي غرض لا بفاتحتها ولا بدفنتها

هم اليحيرون بيها

سليمة خبري ابنج وكليله خطاب رد مالك غرض بدفنتها

الزم خطاب اكدرله انا وارده

اجتله والله

دهيد شجاج انجفيت بجتل الوادم مصيبة اصبحت ابيتك وانت تهدد هيد لا الله يكلبها بيناااااا

يكلبها بينا من اثمجن وزووووورجن

جيف ما حجبها حالي حطت روحها وجتلتها

لا خافت من الله ولا عذابه

خليت براسها عكل خاطر تذكر الله

جلدتها لحد ما فكدت عكلها

مرة صاحية معدلة نسوانك هيج تعمل بحالها

بالله اسكتي عني سلييييييمة تراه خلكي لهيييين

واضل اكضب ابنج واكصبه لو كربهم

ابني زلمة محسوب على عمامه ما تحكمه انت ولا تكوده

انعل والدي هالسافل

سكتت عنه

فد صوت نياح سراب ونور بقرفة امهن

المل سكت

شوية وكام من عدنا

حجت عفاف: مو كودة حرام ومنتحرة

بخل يكول هي راحت راحت بعد عليش ادفع فلوس دفنة وجفن وكبر

سوا هالفلم خاطر يكربس عالمصاريف براس اهلها وذبها براس الحرام

زكحت بيها الحاجة: هششش سكتي لا يسمعج

حجت اميرة: حجايتج هاي جبيرة يعفاف شني ريسان بخيل ويبخل بدفنة وجفن الحركت روحها وهي تنعله شناطرة يكلل كبرها ورود

كامتلها الحجية وهي تخزرها: محد عزانا وصخم روسنا غير فتنتج وسمج من تحجي وتفتنين على وحدة نوبة اللخ الا اكضبج واملصجججججج

وذبت روحها عليها وعضتها من جتفها حيل

كامت تصرخ

ابو وهب ما هو

كامت تريد تجر وحها من الحجية

ملشتها من شعرها نص كذلتها اجت بيد الحجية

كامت تصيح وتبجي والحجية تكلها: دفتني وشوفي انا لو انت

روحي وكليلة الحاجة كتلتني وفتني

سويها يولي اني الارييييييدج اسويهااااااا

ركضت وراها ذيج راحت تركض

ابو وهب ما هو بالبيت

والكهرباء مدري شبيها

لا اجت ولا حولت

صار المغرب والبيت اظلم

انسحنت روحي

حيل تعبت

لا اكل ولا شرب وصيحت وبجيت هواي وحارة

احس بعد تبنجت لا اكدر اشيل ايد ولا رجل

الحاجة ودت واحد من الجهال على ابو السحب

رد يكللها: حاجة يحول اليوم ٨ بالشهر ودولي فلوس خاطر احوللكم

عجل يابه وكته هذا عرس ويا عرسنا

ياهو العده هسه ويطي

روح كله بس اليوم باجر ابو وهب يجي ويطيك

كتله ما يرضى

ابوك وين

ما هو

يربي بيمن نحير بمصيبتنا لو بمصيبة الحر

عفتهن ورحت تمددت بقرفتي

انصلخنا صلخ من الحر واني جلدي محزوز ومجرح من جلدت امس

رحت للحمام كوة اجر بروحي جر

الكل هدا وماكو صوت بالبيت ولا جن الصبح مات من عدنا واحد

البيت هادي

جن ميتتلنا دجاجة مو مرة

يا رخص ارواحنا بهالبيت

دخلت للحمام وذبيت جم طاسة ماي على روحي واني بالثوب خاطر يسكن الوجع مال جسمي وما يحركني وياذيني

ها

كهرب عليش ماكو

يريد فلوس

والحاجة ما اطت

لا تكول ما عدها

عجل راتب رجلها مالت الرعاية وين يروح اذا هي الما عدها كلشي بهالبيت علي كلشي بهالبيت انا الادفعه ادفع ايجار لابنها وادفع سحب الها

عفته يحجي مالي خلكه ورحت للقرفة

شو هذا لحكني

تمددت كعد بقرفتي حجت: انت مبللة يولي

جلدي يحركني من اعرك نكعت روحي بماي

مد ايدو يتحسس جسمي: عمت عيني هاي من طكت امس

وخرت عنه

نتر: عليش تنهريني عنج يولي

تعبانة وجسمي يوجعني

التنهل رجلها كح

تدرين لو لا

بعدت روحي منه

ولا جنت مرته اليوم حركت روحها يدور فراش لا بعينه ولا بحاجبه زهكت روحي منه شرخصنا عده يكربنا ومن نخالف يحركنا وما يسال عنه ويستحسف مكان كبر يشتري نندفن بيه يذبنا على اهلنا

بعدته مني حيل

اتخبل

شو هذا ذب نفسه عليه يريدني

لعبت نفسي منه

دفعته مني

صاح: ادفعييييني انا اليوم اعلمج تعااااي هين

سحبني بيدو ودفعني للكاع.

تولاني بوكسيات وطك.

شلون دفعته مني؟ ريحته ما تنحمل جن كابلي خنزير. حارة وظلمة واصيح وادفع بيه عني وما أدري الطكة منين تجي بالوجهي بالظلمة.

جر هدومي وتكربلي.

جرحي بعده ما طايب. زعم الدكتورة؟ لا خيطتلي الجرح ولا داوته. على العلاج راح الوجع. فد الجرح ضل حتى من أتشطف بالحمام أحير بروحي أخاف أنلجم.

عاد ما كربني.

أحس روحي طلعت من جسمي على كثر الوجع.

كمت أصرخ، أصرخ اللي يطلكن بصالة الولادة.

أدفع بيديه وأحاول، فد أدفع عني ما كدرت. لحد ما كام من عندي وهو يقلط: "بت الجلب تمنعيني منج؟"

"المن رايدة وترديني؟"

"أبالج أحد؟ أحجي.. أحجي وووووولج!"

جرني من راسي وأني أبجي وأتوسل يعيفني. الوجع الصار بيه ما ينحمل.

كام مني، دفرني برجله ومشى.

كعدت أبجي. فد ما جاي أحمل الوجع، ما ينكعد عليه. كمت لحيلي. أروح من هينا، أجي لهين. الوجع دمرني دمار.

أجت الكهرب.

طلعت برا سبحت وقسلت. أريد الوجع يهيد مني. ما جاي يفكني. وكفة ما جاي أوكف. رحت لقرفة الحجية دكيت الباب. فتحتها.

شالت راسها من الوسادة: "ياهو؟"

"أنا. فد رايدة حبة مسكن عندج."

"صيدلية أهلج عندي وجاية تنشدني؟ عليش صريخج عالي بالبيت مساعة؟ ما تستحين؟ ما تكولين الناس عدهم مصاب؟ ما نفتك من صراخج."

سديت الباب منها وطلعت برا.

أريدلي شي ألهي روحي من الوجع. ماكو. يحركني حرك. أحك رجل برجل من شدة الوجع.

رجعت للقرفة. ما عرفت شسوي. احتاريت.

دكيت الباب على قرفة عفاف. صاحت: "ياهو؟"

فتحتها. نايمة هي وجهالها. كتلها: "ما عندج مسكن؟"

"منيني؟ دروحي يولي. فززتيني. حسبالي مدري شكو."

رجعت للفراش. سديت الباب.

حاولت أرد لفراشي وأنام. فد ما جاي أكدر.

سمعت صوت برا. طلعت. لكيت خطاب جايب ضياء. كاعد ينوح بالبستان على أمه.

توني جاي أكرب منهم.

سمعت الباب انفتحت وصوت أبو وهب يصرخ: "ابن الجلب، من أكلك ترد! اترد!"

ركضت وطبيت للبيت.

صرخ ضياء: "ما تحكمني. افتهمت؟ أروح يعني أروح. جتلت أمي بيدك. أنت الجتلتهاااااا. لأخذ حكها من عيونك. وووووووالله!"

فز عليه: "ياهو التدينه بحك يول؟"

حدر هين دشوف. أكررررررررب. لبدت جوا. لا يشوفني. خطاب أخذوا ودخلوا بقرفته. وأبو وهب وكف يصيح بالبيت.

"أمكم ظالمة. ظلمت نفسها وظلمتكم."

"ضعيفة نفس. انتحرت. والينتحر عند الله كافر."

"واكفلي أبفاتحتك خوالك وحاطتي وراك. ولا جني كلت ما يكرب فاتحتها أحد. يطلبني ثار ابن الجلبة. لا أربيكم من جديد على ايدي. والله بالله."

محد رد عليه. ولا أحد طلع له وحاجاه.

حجه لحد ما مل. ومشى.

فات جوا. أني بقرفتي. شفته دخل قرفة أميرة.

ضليت بمكاني. أحوس بالساعة والساعتين. والألم ما جاي يفكني. حرت بروحي. شلون.

طفت الكهرباء. طلعت بالحديقة أفتر. ماكو أحد.

فد أتوجع. أكضب بالشي وأعصر.

وصلت بيه أبجي من الوجع. كعدت كوة ع الكاع. حطيت راسي بين رجليه وكمت أبجي. أريد أفهم تالي وضعي شنهو؟

لا أني اله على وجه. ولا أنا لخطاب.

والبطني ما جاي ينزل. الليلة راح تنعاد ألف ليلة.

يكربني وأني بطني ابن غيره. شلون راح أعيش أبسط هالنكاسة؟ أحس كلي نكسة. وشما يكربني أنكس أكثر. ما عرف شسوي وأخلص من وضعي هاذ.

يوم الردتني أمي كالت: "راح أكتله وراح أخلص منه. وما راح أخليج بهالوضع." فد ما أشوفها عدها نية جتل. ولا رايد تفركني عنه. بالعكس. رايدة تخلص من همي. ما رايدة أضل حمل عليها بعد موتت أخوي وشردت خواني.

ياهو الألي بهالدنيا؟

منهو اليسمعني؟ ويا هو اليعرف شبيه؟

من ٥ ساعات أبجي من الوجع. محد بحالي.

شلون راح أخلص عمري بهالعيشة. تعبت. ما جاي أكدر أتحمل.

جاي أفكر. سمعت أحد وكف وراي: "شعندج هين؟"

فزيت من مكاني وكمت أدحك. خطاب: "عليش جاي تبجين؟"

"متوجعة."

"منيش؟"

"وجع ابطني. رايدة مسكن. ومحد يطيني."

"شبيها بطنج؟"

"فد توجعني. أريد مسكن."

"بس خل أشغل المولدة وأجيبلج. لا تبجين."

دخل للبستان. جر خيط المولدة وشقلها.

اشتعلت. فد قرفته. تكرب: "امشي. كعدي يم ضياء بغرفتي. لا تضلين بالحر."

"لا يشوفني أبو وهب. أخاف."

"ما راح أضل هين. أنا راح اطلع. امشي."

مشيت لقرفته. ضياء متمدد على قريولة خطاب. وأيده مضبرة. وجهت الشباج مال المبردة لمكان وكعدت. جريت مخدة وتمددت جدامها. فد كلش تعبانة من الألم. جاي أحاول ألهي بهوى المبردة وبرودتها وأنسى الوجع. كمت أقمض.

ندهني خطاب.

شلت راسي. شفته جايبلي حباية وكلاص ماي: "هاج. اشربي."

"أشنو هاذ؟"

"بونستان. اشربي. راح ترتاحين."

أخذت الحباية من إيده. وشربتها ورجعت راسي.

هو سد الباب علينا. أني وضياء. وخلا فتحة صقيرة بالباب ومشى.

سكن الالم. ما حسيت ولا شعرت بشي بعد.

فد لكيت بطانية عليّ. ما أدري ياهو المقطيني. فد ضياء ما هو كايم.

شلت راسي. دحكت القرفة. فد أني بيها.

نمت. ما حسيت بكلشي. بس شلون نومة باردة ومريحة. ما طفت الكهرباء. ولا عركت.

كمت. طفيت المبردة وطلعت. راوية نوم ومرتاحة.

دحكت خطاب نايم بالكراج. فارش جودلية ونايم عليها. دحكت عليه بلا قميص.

بسرعة بالي ربط على ذيج الأيام الكضيتها وياه.

ضليت أدحك بيه وأتذكر. شلون جان يحطني على ايده ويلعب بشعري ويقازلني ويقنيلي. يومين كضيتها وياه. بس تساوي عمري كلو. يومين حسسني بيهن أني إنسان. بكل عمري محد حابني لو مهتم بيه. باليومين العشتهن وياه حسيت بروحي اله قيمة. وواحد يهتملي ورايد راحتي ورايدني. فد خطاب عيشني هالشعور.

مو فد اليومين العشتهن.

بكل وكت محد يهتملي. ولا أحد يسمعني غيره.

أمس أفتر جدام الكل وأبجي من الألم. محد كال شبيج. ولا أحد دارلي بال. فد هو. ما بس جابلي علاج. نومني بقرفته. وخلا الهوى البارد مشتغل علي للصبح. وهو نايم بالحر برا.

ضليت أدحك بيه.

طلعت سراب: "ضياء وين؟"

"ما أدري عنه. جان نايم بقرفة خطاب."

"أريد أحاجي على فاتحة أمي. شسوا ما سوا؟"

"ما سوا. أمس أبوج تكاون. وجابوا لهين."

"معقولة خوالي يسكتون على موتت أمي هيج؟"

"ما أدري."

عفتها ودخلت جوا أحضر الريوك.

خلصته. أسمع سراب تحجي ويا وهب تكله: "أنت شنو ما تحس على دمك؟ أمنا ماتت وأنت تكلي شسوي."

"أي شسوي؟ غير أبونا لا يرضى نحضر فاتحتها ولا نسوي شي. شني بيدي بعد؟"

"وتسكت على سواية أبوي هااي؟ هو الجتلها."

"وشرايدة؟ أقتل أبوي؟"

"الجتل شوية بحكه على السواه بأمنا والجاي يسوي بينا."

كضبها من هدومها: "لو عدتي هالحجي نوبة اللخ أكص لسانج يولي. رايدة تقتلين أبوووي؟ دايحة."

ذبها من ايده ومشى.

كعدت تبجي. ونور كعدت يمها تبجي وياها.

أني أشقل وحايرة بوضعي ويا هالعايلة. شلون أخلص منهم؟ لو من اللي ابطني؟

جاي أشقل. مرت أميرة حجت: "أي عفية. هيج أريدج تشتغلين. وحلكج ما تفكينه."

ما رديت عليها.

دحكت على سراب. تخوصرتلها: "عيني ست الحسن. بعدج تلطمين؟ يمتى نكضي شغلنا إذا مخلصتها تبكبك. اسمعي. من هين وغاد شغل أمجن أنت تشيلنه. الخبز. البيت. التنظيف. عليجن. افتهمتننن. ما ماتت وعافت شغلها بروسنا. أنتن التتحملن موتتها. أحنا معلينا."

ما ردّن عليها.

رادت تمشي. ردت وكفت وكملت: "وها. أزيدجن. خاف ما رضيتن. ووكت العدي شي مهم. هم تكضن شغلي بمكاني. من كون أني صرت بمكان أمجن. خووووش."

ضحكت ومشت من عدهن.

كامت نور وراها. كضبتها سراب: "كعدي."

"ونرضى تشغلنا خدامة عدها؟"

"ولو ما اشتغلنا تخبر أبونا يجتلنا."

"والله لو يموتني ما أشتغل عدها. ولج كافي. فاتحة أمنا منصوبة ابيت خوالي. وأحنا هين تتأمر على روسنا أميرة."

"وشبيدي؟ رايدة ننجتل فوك قهرنا هذا. اتحاشيها وفكينا."

حجيتها وهي تحس دموعها كامت. راحت لقرفة الحاجة. أني خلصت الريوك وعزلت ريوك خطاب. ونصبت السفرة.

كعد أبو وهب يخزرني. كعدنا كلنا ع السفرة. فد محد يشتهي ياكل. بس يلوكون بالاكل.

أني كلت لكمة وما اشتهيت. كمت: "رايحة أقضي شغل الهدوم."

محد رد عليه. ولا انتبهلي. مشيت للمطبخ. خذت الماعون مال الريوك. أخذت كاسة جاي. رحت يمهم. صبيت. حجت عفاف: "المن؟"

"الي. راسي يوجعني."

هم محد حجه.

تحس كل الكاعدين ع السفرة كلوبهم تسولف. ومحد داير بال لأحد. خذيت الكاسة ورحت خليتها بالصينية وافتريت. خطاب كايم. فد الجودلية بالكاع.

طببت الصينية للقرفة.

لكيته جاي يلبس. يلف اليشمق على ركبتوا. دحك: "شنهو هاذ؟"

"ريوك."

دحك عليه: "وعليش حايرة بريوكي؟"

"كلت أجيبه الك."

"مشكورة. أني طالع للفاتحة. ما أتريك."

حسيتو ردني. ما عرف. ما حب السويته. حجيت: "بيك شي؟"

"ليش تسألين؟"

"فد سألت."

تنهد: "مو شغلج. روحي اهتمي بغيري أحسن."

عافني ومشى.

خليت الريوك بقرفته وطلعت. وراي. فد حركته هااي ضيجت خلكي. ما جنت حسبالي يردني. هو فد سوال عادي. ليش هيج ردني وكأنه ضايج مني؟

أمس جان ما بيه شي. جابلي علاج وماي. ونومني بقرفته ع الهوى. هسه شبيه؟

رحت لميت الهدوم وكعدت أجلف. فد راسي أيفتر بيه: "ليش هيج سوا."

مر اليوم كلو. باهت.

سراب واختها بقرفتهن.

أحنا كل وحدة بينا ما طايكة اللخ. نكضي شغلنا. وكل وحدة بقرفتها.

ضياء عاند أبوه ووقف بفاتحة أمه. أبو وهب ما راح له، فضل يتوعد له.

الحاجة بقرفتها، ساعة تنوح ويا البنات وساعة تقرا قرآن.

لليل، الكل هَمَد بحجرته.

سمعت طكطكة بالمطبخ، مشيت لكيت خطاب.

حجيت: تريد شي؟

– لا، خذي راحتك.

ضليت واقفة وهو يدور: جاي أدور على أكلك.

– يولي روحي، أنا أدبر أمري.

– عليش هيج تعاملني؟

– عليش؟ شنهو العليش؟ ما رايد منك شي.

– انت كارهني؟

– عليش كارهك يولو؟ ما عندي وياك شي خاطر أكرهك.

– ما عندك.

– روحي ول يابه، فكيني يرحم أبيك.

دنجت جوا الرف، طلعت له أكله وحطيته على الرف ومشيت.

كعدت بقرفتي، ما أدري ليش محترقة روحي. أنا البعدته، وأنا الكتله ما أريدك، وأنا الكتله ابعد ولا تقرب مني، وهذا السواه.

عليش ما مرتاحة؟ شرايدة؟

فد هو اللي يهتم بيه، فد هو اللي يهتم لأمري.

هو اللي يدحك بوجهي مرتاحة لو لا، متوجعة لو زينة. فد هو بهذا العالم يدور راحتي.

أنا ليش ما حويته؟

شلون أحوي وأنا على ذمة زلمة؟

فد هذا الزلمة ما أريده، ما أحبه، ما أجرعه. من أول يوم شفته ما أتمنى أخلص عمري أتسابق ويا نسوانه خاطر أحظى بيه، ولا رايدة أحظى بيه من الأساس. فد أدري ما يطلقني ولا راح يعوفني بحالي.

رجعت بذاكرتي لليوم اللي شفت خطاب يدحك عليّ من بعيد ورحت فتنت عليه يم أمي.

كمت أبجي. أنا عليش هلكثر ثولة؟ واحد يحبني رحت فتنت عليه. أنا خربت حياتي بيدي.

وضليت لا أنا لهين ولا أنا لهين.

بجيت هواي على وسادتي. فد من أسأل روحي ليش أبجي ما أعرف الجواب. رايدة أرجع لخطاب؟ لا. رايدة أرجع لأهلي؟ لا. رايدة أضل هين؟ لا. أنا شرايدة وعليش جاي أبجي وشريد؟

كل الرايدته أخلص من أبو وهب، بس ما أريد شي ثاني. هو سبب قهري وحالتي هاي، إذا خلصت منه خلصت من كلشي. أكدر أرد لأهلي بدون ما أمي ترجعني بالزور، وأكدر أحب خطاب بدون تعذيب الضمير.

كعدت ثاني يوم، خطاب ما هو.

أنا على نفس الشغل، ما لي خلك أحد بالبيت ولا أحاجي واحد من البيت.

جنت كاعدة أجلف بالجرجف مالت الحجية، أجا أبو وهب.

حجه: الليلة احسبي حسابك.

دحكت عليه: المن؟

– أنا زلمة ما أظلم حك مرة، وكل وحدة منجن الها ليلتها، والليلة يمك.

– فد انت أول البارحة جنت يمي، اليوم يم عفاف.

– يولي جاية تنهريني انت؟ أبات عد التعجبيني.

تبسملي وغمز: وأنت تعجبيني.

كعد يمي: لحمايتك بيضة ترفة تونس.

سكتت منه وهو يحاجيني هيج، كشت روحي منه، شايفني كومة لحم عاجبه مو بشر.

حجه: لو مشيتي على هواي وخليتيني أكربك، لا أدللك دلال، لا أخليج فوق روسهن كلهن، وكلهن يخدمنج. أنت بس فكيها وياي، رجلج أنا.

سكتت.

حجه: تعرفين اللي تنهر رجلها لو ما تطي حقه، الله يذبها بالنار، ويوم القيامة تنحرك بنهار جهنم، وكل ما قلت لجتج النار يطلعلج لحم جديد وهم الله يحركه لأن منعتي رجلج منج.

جاي يحاجيني وعود يريد يقنعني، وكفت أميرة.

– ها؟

اندار متضايق: تفترين وراي ها؟

– أجيت أشوفك خاف معتاز شي.

– امشي، ما رايد شي.

– جاي تطردني؟

– دمشي ول يمر، عدي سالفة مهمة ويا مرتي الزغيرة، هدينا.

رفعت حاجبها ومشت. رد يدحك لي: ها.

– شنوه؟

– يولي ثولة أنت يولي، صار لي ساعة أحجي وأشرح أنا رجلج، وما أريد بكل ليلة وياك أكتلك وأهدك، رايد أحطك على أفادي وألاعب أثمارك وأندل حلالي على كيفي، ما بهوسة وهرجة وشهيرة.

وكف وهب: بويه.

– وسمامة، ما أعرف أحجي لي كلمتي وأداري أمري، كل ساعة واحد جاي وكاطع حجايتي، شرايد؟

– خوالي اليوم ينزلون الجادر ومتحلفين بيك.

– متحلفين بيا؟

– أي، عجل واصلهم خبر أنت نaught أمنا الجداحة، بس جانوا رايدين تكضي فاتحتها بدون هوسة خاطر يتفرغون لك.

– وأنا ياهو مالي بيها مرة احتركت وراحت لدار حقها، شلي غرض؟

– أنا جنت غاد، ردت أقنع ضياء بجيته لهين وما يخالف أمرك، بس السمعته هذا وجيت أحذرك. بعد صلاة المغرب ينزلون الجادر مال الفاتحة، وعقب صلاة العشا يندارون عليك.

كام بسرعة ودخل يكلل لنسوانه: (حضر لي علاكة هدومي بسع). حط له دشداشين وجم غرض وطلع قبل أذان الظهر.

شريت الملابس، كملتهن ودخلت عفاف جاي تقلب بالتمن. دخلت أميرة بس ترجف.

– أكولجن كون يهدون عليه؟

عفاف: من تعرفين بروحج ظالمة.

– أنا ياهو مالي ما كربتها بشي، ولا أنا اللي قتلتها.

– أنت فتنتي، والله يقول الفتنة أشد من القتل. ذنبك أعظم من قتالها.

– أكول انت اسكتي واشتغلي. يلا... يلاااا.

مشت جهزت أغراضها وطلعت تجرجر بجنطتها وجهالها. حجت الحاجة: وين مولية؟

– رايدة أمشي لأهلي.

– ما صالج أسبوع من رديتي من أهلج، شنهي البيت خري مري، يمتى ما طخ براسج لميتي ومشيتي.

– ما سمعتيهم رايدين يهدون علينا، أنا شلون أأمن روحي.

– وأنت عليش خايفة إن جانت طلباتهم ويا أبو وهب؟

– لا، أنا ما خايفة، بس الواحد يأخذ حذر.

– ردي الجهال واركدي بحجرتك يالا.

– لا أروح، ما أضل.

– وشنهي بكيفك تروحين؟

– ما أضل، أكولك هسه يحسبوني أنا سبب موتها ويذبوها براسي.

تحجي وحلكها يرجف وهي تكول: وهب وينه؟

سراب كضتها وجرت جنطتها: رايدة تشردين وذنب أمي بركبتج، حسبالج أتفلتيين؟ والله حتى لو بأيت أهلج أدليهم عليج وأخليهم يلحكووووج يا ظالمة.

كامت تصرخ أميرة: امشي لج داااايحة، تتجاوزين عليّ وأنا بحسبة أمي. طايحة الحظ بلا تربية.

– أنت بحسبة أمي؟ أنت نعال ما أخليج وأمشي بيج، مو أخليج بحسبة أمي.

– ما عليج عتب، تربية أمج علمتج ع الدياحة والسواقة، شترجيه بيج.

رادت تتكاون وياها أميرة، جرت جهالها وضمت روحها بقرفتها تنتظر وهب خاطر يشردها لأهلها، تخاف تطلع وحدها.

جت سراب للحاجة، خذت تليفونها ومشت لقرفتي. خابرت لخطاب تبجي وتكله: بس رايدة أحجي ويا وحدة من خالاتي، تكدر فدوة بس أحاجيهن، ما أريد دم أمي وحقها يروح وتشرد أميرة.

خطاب: أنا بجادر الزلم ما أكدر أصل ليغاد.

– بس أطلب وحدة من خالاتي وخابر، فدوة لا تردني.

– دروحي هسه، خل أشوف شلون أدبرها.

سدته من عنده وحجت: والله لا أخلي خالاتي ينعلن والدي والديها، بس خل تصبر لي أميرة.

ضلت كاعدة يمي بالقرفة، شوية وقاد أجا خطاب دخل للبيت. صاح بالبيت على ترمز جبير راده من عفاف تحضره إله.

طلعت له سراب بسرعة: ما مشيت لخالاتي.

– يمعودة صايرة هوسة، الدنيا كايمة غاد، وين أكدر أقرب النسوان.

– أي دز على وحدة منهن، هي تطلع لك.

– وأنا ياهو الأعرفه منهم خاطر أدزه، عيب بابا، اكعدي.

– أميرة تريد تشرد، ما أخليها تفلت بعملتها، والله.

– لج يولي عليش ما تركدي أنت، بكدها تكدرين لها... لا تعمين على روحج وعلى خواتج، اكعدي وعوفي السالفة للزلم.

واكف يحاجيها وهو ينتظر عفاف تطلع له الترمز.

اندار يدحك لي منتجية ع الباب، أطمش عليهم. دحك بوجهي وتنهد، اندار يصيح: يلا عفااااف.

ضليت أدحك عليه.

سراب ضلت تبجي. حجه وياها: يولي تبتلي على روحها لو طلعت من البيت. كبل ساعة البيت داير ما دايره راقبوه. ابعدي أنت ولا تخلين دايرة السوء تدور عليج، ديري بالج على نفسج واختج واكعدي.

حجاها اندار دحك لي بخطفة سريعة ومشى.

حجت الحاجة: اسمعي حجايته يولي، ما طولج بهالبيت، لا تعادين أحد، أبوك لا خوالج، ولا الأكبر منهم يكدر له. بس يرد ويعرف أنت الحشمتي خالاتج، شيخلصج من إيده.

كعدت تبجي والحاجة تكول لها: صبري وصيري سباعية وشيلي حمل إخوانج، لا تظلين بس تبجبجين، صيري لهم أم بدال أمهم وشيلي مسؤوليتهم.

– شصير أمي بكبرها ما كدرت تحمي واحد من عدنا، وجتلت روحها، أنا شلون أحمل؟

– يولي، عد ما تصبحين أنت راعية هالبيت، محد تفج السانها وياج.

ضلت تدحك عليها: شني يعني؟

ندستها وضكت على رجلها وهمست: أنا رايدتج لخطاب. لو صرتي لخطاب، شحدها اللي تكربج وتحاجيج، البيت بيتج والمكان مجانج، ورجالج بظهرج.

سكتت ما حجت.

أنا قمت بساع، ما أدري ليش الموضوع ضايقني.

أنا ما عليّ، تزوجة اللي تريدها، أنا ياهو مالي، لا حقي ولا هو مالي. شعلي؟

رحت لقرفتي، بس أحس دمي وج نار.

عيوني كبت، النفس كام يضيق.

ما عليّ، أنا أدعي الله يفكني من ريسان وبس، ما عليّ بيهم.

ليش مختنقة؟

ليش دموعي جاي تنزل؟ أنا ما عليّ.

أنا ما أريده، قلبي ليش ما جاي يصدقني، أنا ما أريده.

جاي أبجي، دخلت سراب: شبيج؟

– ما بيه شي.

– مو حسيت من عمتي حجت بخطاب ضايقك الموضوع؟

– ماكو شي يربطني بخطاب حتى يضايقني، هو الرادني، أنا ما عندي شي وياه.

– ولهسه رايدج؟

– ليش تحاجيني بهالموضوع؟ لا الوكت وكته ولا الزمان زمانه.

– حجي عمتي صحيح، ما راح أكدر لأميرة وأخذ حيفي منها، لا ما أخذت خطاب.

– وهو يرضى؟

دحكت عليها: وأنت شعليج؟

– عجل ليش جاية تسولفيلي بالموضوع إذا أنا شعلي؟

ضاجت مني وكامت.

تنهدت، أحس روحي بضايع.

شعوري كلش ضايع، مو بكيفي ما أبجي من كد ما ضايقني الموضوع، عيوني ما جفن، وأرد أسأل روحي، شبيه وليش متضايقة وشحكي بيه؟

كاعدة بقرفتي سمعت وهب يحاجي أميرة يكول لها: المنطقة خوالك ترسوها، لا تطلعين ولا توصلين أهلج، كعدي هين.

حجت الحاجة: وخوالك ما عندهم علم، أبوك ما هو؟

– اسألي ابنك الصاف وياهم علينا.

– يولي نطفة نكسة أنت، أمك اللي ماتت ولا هامك. كون هسه أنت الواكف بالفاتحة وتهدي بخوالك على أبوك وتصلح الحال.

– أنا ما أوقف ويا غير أبوي، أبوي عندي حتى فوك الله.

نترت بيه الحاجة وكالت له: استغفر ربك يالكافر، لا تكفر بالله يالردي.

– آخر من ابنك الصاف ويا خوالي الغرب على خاله اللي رباه.

ضلت تتكاون وياه الحجية.

أدحك وضعهم كلش مخربط، من أربط حلقة بحلقة أضيع. أذكر عواطف كالت لي هو مو ابنها بس ما يدري، ووضع وهب مدري شلونه، لا هو يكره أمه ولا هو الفازعلها، وضعه يحير، أحس موضوعه سر.

البيت وضعه مدري شلونه.

بيت واحد بس گلب ما رايد گلب، وعايشين بالقدرة، ناكل ونشتغل وننام. خلصنا العشا وشلناه.

أميرة متهسترة، تروح وترد، ما تعرف شتسوي.

وهب كاعد بالهول، الحاجة يمه، أبو وهب شارد، ومتوقعين بأي لحظة أهل عواطف يهدون علينا.

صارت بـ ٧ بالليل، حجت الحاجة: كلمن يقوم لحجرته يالا، كفانا هم ونحن ننتظر قضيّتهم.

توني جاي أشيل الصينية للمطبخ.

ما نحس إلا البيت انرشك برصاص، الصوت هز البيت هز. ويا الصوت طفت الكهرباء.

انرعبنا رعب بس الصريخ يطلع من البيت.

الباب كان مفتوح، والجَدْح مال الطلق يمشي من الباب.

كمت أصرخ من كل قلبي من الوجع والرعب. كضبتني نور خايفة تصرخ، واني ذبيت روحي على وهب أحتمي بيه.

كمت الحجية تصيح:

"آآآآآآه يا الله وأكبر ولونا يمه... ولونا والبيت بس حريم ما بيكم زلمة تهدون على النسوان... يا أهل هالآدم!"

كام وهب يصرخ:

"أبويا مو هينا، مو هينا... كافي!"

الطلق ما يوقف، وإحنا واحدنا يلتف على الآخر من الخوف. الجهال كامت تتصارخ، كلوبها طلعت من صدورها. وأميرة فقدت، كامت تدك على راسها وتصيح:

"راح يكتلونا ييمه، راح يكتلونا! أبو وهب عافنا للموت... عافنا وما فكر بينا، راح يكتلونا ييمممممممممممه!"

وانفجر الشباك اللي بالهول.

كلنا جفلنا وكمنا من مكانه نتصارخ.

انحصرنا بزاوية البيت كلنا، فد لكتنا الشدة من الخوف ترجف.

سكت على غفلة.

ظلمة، عيوننا تناظر وحس قلوبنا ينسمع.

حجت عفاف:

"شرد بروحه وعافنا بنص النار؟ شنهو من زلمة يا ريسان، ويطيق تهد نسوانك وجهالك يتلكون التفج عنك؟"

طلعت الحاجة وصوت خطاب يصيح برا ويكلهم:

"خالي مو هينا، بس النسوان بالبيت..."

وهم يتكاوتون وياه.

طلعت الهم الحاجة وهي تكللهم:

"ما بيكم زلمة اليستحي على روحه... تهدون على بيت تعرفون صاحبه ما هو؟"

صرخ أخو عفاف وهو يزكح:

"أخوج مطلوب دم، ما نفك منه لحد ما ناخذ بثار أختنا من عنده... وهسه تطونا بناتها وبزريتها؟ لا نرش أرواحكم برصاص! اطونا بناتها!"

طب وهو يحشم خواته يطلعن ويكللهن:

"طلعن وياهم بسرعة! امشوا!"

لبست الربطات والعبي وطلعن يتراكضن يتصارخن بوجه خوالهن ويتباجن... فد صريخ وناس تصيح على ناس بوسط بجي ونياح. النسوان ما عدنا نفهم شي من برا، ونخاف نطلع وننرش.

ضلينا مكمبصين من الخوف جوا، وواحد ملبد بسد الآخر.

توهن طلعن البنات وصياح برا، وما نحس إلا جوكة نسوان ملثمات فاتن من نص الزلم، وكل وحدة منهن بيدها المكوار والفانوس بيدها الثانية.

أول ما ولّن، الحاجة.

التمن عليها بالمكوار طكتين، ثلاث. توسدت اللي كاعد، وخطاب يتلكاها. طبوا علينا بمكيارهم وملثمات، والكهرباء طافية وشايلين الفوانيس.

يمه، شفتهن لو روحي خرطت من الخوف.

ركضت لقرفتي، وكضبتني وحدة منهن وبالمكوار على راسي.

أحس راسي انكلع من مجانه، وانهدت عليه بمكيارها وتصيح:

"اليوم نحركجن مثل ما حركتنها، كح... تفتنت عليها يم رجلها وحركنها! اليوم ما نخلي وحدة منجن!"

كمت أصرخ وأكلها:

"والله إني جديدة، معليه، إني ما حركتها! أميرة هي اللي فتنت، والله ما إني!"

عافتني وتصيح بالبيت:

"أميرة وينها؟ وينها أميرة الكح*****؟"

كمت قفلت الباب وراها وأرجف وأصرخ:

"معليّه إني، والله إني معليّه! جديدة، جديدة! ربي خلصني منا بس تعبت، ما أريدهم... عوفوني، إني معليييييه!"

كمت أصرخ بلا وعي من الخوف.

وحدتهن جنها رجال، لافات الشيل على خشومهن بس عيونهن طالعة، وكاضبات الفانوس والمكوار، حسبالك فلم رعب. طبوا علينا.

فتشن البيت، رادن... ما لقن أميرة.

كامن يدفرن الباب علي وعلى باب عفاف.

كمت أصرخ من كل قلبي... كاضبة بالكفل وأدفع بالباب خاطر لا ينكسر علي.

لحظات رعب عشتها تساوي هدت الأمريكان اللي هدوا علينا وقتلوا أخوي... بس الأمريكان ما قتلونا، أذونا تلونا بتفكهن، وقتلونا أنا وعفاف والجهال. فد أميرة ما طاحت بيها.

طلعت أميرة بعد ما سمعت الهوسة هدّت، والحجية طلعت الهم، عايفة جهالها وصاعدة للسطح. تشلبت على سياج الجيران وذبت روحها عليهم واختلت عندهم. وأنا وعفاف أكلنا الجتل بدالها.

من الخوف الجهال فتنوا على أميرة وكالوا:

"صعدت فوق!"

ذني النسوان كلهن صعدن على السطح يدورونها، ما لقوها فوك.

نزلن خاطر يطلعن للجيران يدورونها.

ردت أطلع من القرفة خاطر أدحك شصار. فتحت الباب ودحكت، ما أشوف غير ضوء النار جاي من قرفة أميرة تشتعل.

كمت أصرخ:

"ناااااار! راح نموت، احترقناااااا!"

طلعت عفاف من القرفة.

كمت تصرخ وتركض للحمام، الماي مقطوع. طلعت ليبرا تحشم الناس. ركض وهب وخطاب، عافوا أمه وركضوا جوا. أهل عفاف ما عدنا نسمعهم.

الجيران تراكضوا لنا يطفون بالنار، قرفة أميرة احتركت كلها.

كاموا يتراكضون بالماي والتراب.

بالنص ساعة يلا كدروا على النار وطفوها.

بس بعد ما انهد حيلنا وراحت أرواحنا من الخوف.

حقدت على أبو وهب حقد، عد ما خاف فد على روحه وعافنا بنص هالنار وإحنا بس نسوان وجهال. فر بروحه.

عد ما طفوا النار.

والناس طلعت من البيت، اندحك البيت أظلم جنها مقبرة. عفناه وانجمعنا بقرفة خطاب، وفد لايت يضوي بينا.

الحجية راسها ملفوف، جاتليها. إحنا روسنا مدامية من المكوار مالهن.

الحجية طاير قلبها على خطاب خاف ياذونه.

لأن طلع منطينا علم بدكة البيت، بس ما عنده علم بهدت النسوان اللي هدّت على أمه. فتكاوت وياهم ومخابر عمامه. منخابر عمامه، أهل المرحومة لافين أرواحهم وطالعين، حتى نسوانهم طالعات من المنطقة.

الحجي تون وتكول:

"خطاب راح يذب روحه بالسالفة ويصير بوجه المدفع. ياهو اللي يجيب لي خطاب يمه؟ فد هذا الولد عندي، ربي! كلشي ما أريد غيره... يمه ابني راح يروح يمه!"

تريد تطلع وإحنا كاضبين بيها مكسورة وراسها كله دم.

"لا تخافين، محد يكرب خطاب. بس احجيلنا شصار."

جاي يحجون، دخل خطاب للبيت. صاحوا:

"تعال يا السبع، شنهو الحصل؟ علمنا!"

اترخص من عمه، راح شغل المولد وحول على قرفته وشغل الضوء. الزلم وكفت باب القرفة لأن إحنا النسوان منجمعين بالقرفة. حكوا وياه.

كال لهم:

"البيت ماجره لخالي ومالي حق أمنعهم بثارهم. استرخصوني بدكة الدار وكلت الهم مرخصين، ووكفت وياهم بفاتحتهم. ٣ أيام الفاتحة إني واكف جنها فاتحتي وما قصرت. تالي يهدون جوكة نسوان على أمي. أمي ياهو مالتها؟ مالي غرض بنسوان خالي، هو عار وفر وهدّ حريمه، بس أمي محسوبة علي. من غافلوني وهدوا عليها، ماني ساكتلهم."

كالوا له:

"حقك."

خذوه وطلعوا وياه لبيت أهل عواطف.

ووهب حول المولد للبيت وشغل الكهرباء. البيت صاير خرابة، التراب، الدخان اللي على الحياطين، الخنكة. قرفة أميرة سودة محتركة كلها. البيت مقلوب كلاب.

مندري ندحك نبجي نخاف.

بهالاثناء، طبّت جارة لنا ووياها أميرة.

مشت الحجية تعزيها وتحجي وياها على مصيبتهم.

واكفين يم الحجية وهي تسولف للمرة على انتحار عواطف.

ما نحس على أميرة إلا تصرخ:

"ابني وينه؟ مصطفىىىىىىىى وينه؟ ييمه ابني ما هو ييممممممممممه..."

واكفين يم المرة والحجية تحجيلها على الحصل.

الا واميرة تصرخ: ابني ما هو.. كلنا فزعنا ندوره. ناس طلعوا للبستان وناس صعدوا فوك.

واحنا ندور بالقرف ماكو، ولا قرفة موجود بيها.

للشارع طلعوا يدورون وماكو.

اجا خطاب وعمه وياه وتلكته اميرة تصرخ تكله: ابني ما هو، الحكوني مصيبة وطاحت على راسي، ابني وينننننننننننه.

دخل خطاب يسال: دورتوه بالبيت فوك السطح.

الحاجة: ما هو الولد، عمت عين امه كون ابنج وينه يوليييي.

اميرة: ما دريت عنه، امنته عد عفاف ومشيت.

صرخت عفاف: يمتى امنتي عدي؟ شو انرشكنا برصاص، ما شفت غير فروخي حطيتهم تحتي وما دريت باحد غيري. وين عفتي جهالج ووليتي؟ ذبنج لا تذبي براسي.

اميرة: وبخت الله كتلج كضبي جهالي يولي ومشيت للسطح.

عفاف: وبخت الله التحلفين بيه لا سمعتج ولا شفتج حتينه.

خطاب طلع يدورهم برا.. والناس ادور.

اميرة تصيح: صوجي اني امنتهم عد الغلط.. صوجي اني، كله مني راح وليدي ييمه.

تلطم وتبجي وكاعدة بالكاع.

واحنا واكفين عجزنا وين اندوره.

حجه ابن عفاف: خاف بالغرفة المحروكة.

التفتت عليه الحجية: وشعده لهساه بالغرفة المحروكة.

حجوا هيج واميرة فزت من مكانها تركض لغرفتها المحروكة.

رادت تطب ظلمة، ضواها من النار كل الكلوبات والكهربائيات طاكة.

والحيطان سودة محتركة.

القرفة ظلمة هندس.

ركض خالد ابن عفاف يطلع عمره ١١ سنة.

جاب اللايت اللي بقرفة خطاب واجا يركض.

واميرة بالظلمة تفتر وادحك القراض محتركة وكوم كوم صايرة.

الكنتور صاير حطب واكع كلو نص محرك نص مكوم.

كامت اميرة والحاجة يدورن بنص الانقاض.

صرخت الحجية وكامت ادك على راسها.

كلنا التمينا عليها: والجاهل محترك حرك حاله هال القراض وعالك تحت كوم الكنتور الواكع.

اميرة دحكتوه صرخت وخذتو بين اديها.

كامت تصرخ من كل كلبها.

احنا كمنا نتصارخ.

اميره كاضبتو بثنين اديها، جلدو متفحم صاير فحمة.

ال جاهل ادحك بيه وترده اكلبها وتصرخ: ابنيييييييي يييمه ابني حاجينييييي.

طلعت من القرفة ابجي.

طلع بوجهي خطاب وهو يركض دخل للقرفة.

صرخت الحجية وهي تتلكاه وتكله: الولد مفحم ييممممممه، حركوا وليدنا يماااااااا.

دنج على اميرة بهمة يريد يجره.

كاميرة ما تطي مخليته على كلبها وتصرخ.

زكح بيها خطاب وجراه من اديها.. وركض بيه.

اميرة ما تحملت تكوم.. وكعت وانسحنت روحها بمكانها.

ركضنا ورا خطاب.

وعفاف التهت تصحي باميرة.

شالو وطلع خطاب من البيت.

والحاجة جرت عباتها وكاضبة راسها ملفوف وتصيح: انولينه ييمه انولينااااااااا، مصايب الدنيا ادهدت اعلى روسنا وحدة ورى الثانية.. شمسويييين بدنياااااانا ربييييييي.

ضليت برا ابجي.

اريد استوعب العيصير معانا، معد افتهم.

روحين زهكت بهالبيت خلال ٣ ايام.

هدت الرياجيل ودكة البيت.

النسوان وجتلتهن والطك البراسي احسه مفشوك.

حركة القرفة.

واخرها الجاهل.

ارواحنا كلش تعبت.

حتى دموع ما عاد ضلت بيعونا، فد نبجي صريخ بدون دموع.

ليش كل هذا عديصير بينا؟ مصيبة فوك مصيبة.

ناس تاكل ناس وناس تحرك ناس.

عفاف ذبت ماي على وجه اميرة.

صحت وطلعت تركض من البيت.

بالزور لحكناها وحطينا العباة على راسها.

لبستها بلا ربطة وطلعت تركض بالشارع فاكدة وتصرخ: ابنييييي يييمه ابني احترك ييممممممممه.

ضلينا فد واكفين بالباب اندحك وراها ونبجي.

اجا وهب تالي الونة مدري وين جان.

خبروا خالد بحركة مصطفى.

لحكهم يركض.

كعدنا فد اني وعفاف وجهالها حنين وخالد ومهند.

ومحمد ابن اميرة الثاني.

ندستني عفاف: كومي يولي، البجى ما يرد احد ولا يفيد احد. كوميلنا.. خلي نشعل الماطور ونسحبه بلكت الله يسحب هاطر. اني اغسل البيت بصوندة ومكناسة وانت وراي بالماسحة.

كمت وياها فد كوة اجر بروحي.

راسي من طكت المكيار احسو صار نصين وانملى دم.

فد ما فاكة الربطة.

شعلنا الماطور فد ما سحب.

ترسنا الماي من البرميل مالت المبردة مال خطاب.

حطينا فوكو تايت وطشينا بالبيت.

هي تجر بالماسحة الوصخ والماي واني وراها بوصلة امسح.

فد احس راح اكع.

كمت اطوطح الدنيا كامت تروح وتجي بعيني.

واحس الكاع تروج تحتي.

كضبتني عفاف بسرعة كتلها: راح اكع.

عفاف: شبيج يولي.

كضبتها ردلي تركيزي الا هديتها.

صاحت على ابنها يمسح بدالها واني كعدت وهي كملت عني.

قسلت البيت كله.

فد قرفتي بعدها هوسه وما بيه اكوملها، حاطة راسي وانوح.

الص صار تعبني حيل.

قير وجع راسي والدوخة المصاحبتني.

لليل رد وهب وياه الحاجة منسحنه روحها ووياه اميرة فاكدة من الصريخ والبجى على ابنها.

وخطاب واثنين من كرابتهم راحو يدفنون الجاهل.

وودوا علم لاهل عواطف بالصاروياهم خاطر يحسبون حساب على السووه باهل البيت من دكو وهم يعرفون محد بالبيت قير النسوان والجهال.

اميرة ما قفت ولا نامت الليل كله تنوح وتبجي على ضناها.

فد اني ما كعدت وياه صحيح منقهرة على الجاهل.

فد هي بسببها مات، فلتت بروحها وعافتو ما فكرت من شايلات الفوانيس والمكيار يمكن شيسون بجهالها.

ما فكرت قير بروحها.

للفجر رد خطاب منتهي دافن الجاهل وراد.

تلكته اميرة تصرخ: ابني وين وين وديت ابني احجيييييييلي.

كعدنا على صريخها كلنا طلعنا.

الحاجة وعفاف كامن يبجن وياها.

فد اني بس ادحك ما بجيت.

تعبت من البجى.

شوية وانهالوا علينه الخطاطير من كل بكان.

نسيت القهرة والنهيت.

اشتقل اني وعفاف نطبخ ونخدر جاي.

عد ما حققوا بالسالفة.

تبين الجاهل من امه عايفته رايح من الخوف من الطلق لابد بكنتور امه.

النسوان جايات شامرات الفوانيس هن ونفطهن بالقرفة.

واجة القرفة كلها مشتعلة نار وهو محبوس جوا.

ما سمعنا صياحو لان كلنا بذاك الوكت نصيح وهوسه محد يسمع احد.

التهينا النهار كلو نخدم.

تعب نفسي وجسدي.

احس الجتل عدهم كلش رخيص.

اني الهايشة من جانت تعوشر وتتعسر ولادتها تضيك روحي وانكهر عليها وحتى ابجي.

ذوله شلون هيج يجتلون بلا وجع كلب.

للعصر وصل بيه التعب مرحلة بعد ما اكدر اتخطاه.

كعدت منين ما ادحج قهر وتعب ومصيبة.

قير البطني.

لهيت بالمصايب وهو يوم يوم يكبر ويتعلك بيه وما يكع.

چلب فد تچليبة.

صفنت كلت ذوله هيج على مشاكل طايحة تجاتلون وحركوا بيوت وراحو اثنين ماتوا.

عجل لو عرفوا بسالفتي شيسوون؟ يموتوني كبل بلايا حچي.

كعدت ابجي والناس برا هوسة.

دخل خطاب بيدة دولكتين صاح: ترسولي ذني بساع.

دحك فد اني بالمطبخ.

كمت من حيلي دموعي بعيوني.

خطاب: شبيج.

اني: ما بيه شي.

خطاب: عجل عليش تبجين.

اني: هيج.

حجيتها مختنگة.

سكت ترستله الدولكتين ماي وخذاهم.

خلصنا وذان المغرب صبينا اكل للخطار.

الاكل صار بيه نقص.

الحاجة تكطر تكطر ناس كومة وفد كيلوين لحم ومركة تبسي جدر شكبرة.

اللحم صار فد للزلم، النسوان ما ضاكنه ونصهن طلعن بلا عشا ما كفى نصبلهن.

طلع الكل.

ضلوا بيت اهل اميرة يمها منوميها بقرفة عواطف.

وناس كرابتهم كاعدين بالهول.

الحاجة كالت: جيبلي كاسة جاي وكرصة خبز. ما كلت، جتلني الجوع.

كمت خاطر اخدرلها الجاي.

صاحت كرابتهم: صبيلي جاي وياج.

صاحت الحاجة: صبي للكاعدين.

رحت خدرته وصبيت وكدمته الهن. كالت: روحي جيبيلي الخبز.

مشيت للمطبخ، دخل خطاب وبنات عواطف وياه. ما سلمن، فات للبيت كبل. ما اندرتلهن، ما طولهن ما سلمن. وكف هو: شلون صرتي؟

زينة.

ركضت وديتلهن الخبز. عود ردت اكعد وياهن آكل. كمت ارجف من الجوع. شو كلهن جرن خبز وكعدن ياكلن ويسولفن. رجعت خطاب واكف بالمطبخ. اني أدرم بيني وبين نفسي: ولا جنهن كادات بعزا، يجرشن ويشربن جاي. محد جاي ع الميت. كلهن جايات ع السوالف والاكل. واحنا طاح حظنا من التعب.

شجاريلج يولي؟

محد بيهن تكول عيب تستحي على روحها. من امس لليوم مصيبة ورا مصيبة. بدال ما نرتاح نكعد نخدمهن. خبز ما هللي جرشنها. مليت منهن. بودي اطردهن كلهن. تعبناااا.

روحي ارتاحي شعليج بيهن.

وامك التخدم علي؟ عايفة البنات كلهن وما تشوف قيري. تعاي روحي روحي تعاي. حتى لكمة ما حاطة بحلكي. فد اركضلها وكون ترضى.

عد احجي، صاحت الحاجة: قدددددس.

هااااك. حتى كرهت اسمي والله.

بجيت ومشيت. من لا جارة. دخلت: ها.

يولي ما ضل خبز.

لا.

شني ما خابزات؟ هواي ناس عدنا. ما حسبتن حساب.

مو اني العجنت عفاف.

وحدة تذبها براس اللخ. شو كربي فرجي رجلية تعبت.

ضليت ادحج عليها. صاحت: مو احاجيج.

رحت يمعا. كعدت وهي مادة رجليها. كمت امرغ وافرجلها.

فات خطاب بيدو ماعون تمن فوكه تبسي ووذرة لحم. صاح: قدس.

كلهن دحكن عليه. حجيت: ها.

هاج كومي اخذي هالماعون بقرفتج.

حجت الحاجة: ضام الاكل والناس طلعت جوعانة واللحم مجلجل يمك.

يمه هاي حصة الشيخ ضميناها اله بس ما اجا.

دجيبها جيبها هل اكلها عجل. ميتة من الجوع. القهر ما خلى على حالنا حال.

صاح: مو احاجيييج.

كمت اخذ الماعون منه. حجه بصوت ناصي: اخذي لغرفتج واقفلي الباب تعشي ونامي لا اطلعين بعد.

صدك خذيته بقرفتي. اكلته كله لحد ما شبعت. طلعت فد حطيته الماعون برا وقسلت ورجعت. صاحت عليه الحجية. سويت روحي ما سمعت. ذبيت روحي مثل الميت ع النوم.

قاد والباب اندكت وانزبدت ربد.

فزيت كمت بسرعة. فتحت الباب. فاتت الحجية تكلي: الشيخ اجا. وين الماعون الضمه خطاب يمج؟

يا ماعون؟

هذا العليه وذرة لحم يريده ياله بسرعة.

ما عندي انطيتياه.

لا ما عده. هو الوداني عليه.

هو الوداج.

دفعتني: دجيبي الزلمة يريد ياكل.

فد اسال خطاب.

شتسالين دجيبي.

ما عندي.

اني شفتج بعيني دخلتي لهين. طلعي شني حاطة عينج عليه رايدة تلهمي؟

حاجة خطاب هو الاطانياه وكالي اكلي.

كضبتني من ايدي: وخطاب شعده وياج ويطيج اكل؟ شكاربتله يولو؟

جريت ايدي منها: ترا طلعت روحي. مكعدتني من النوم على ماعون تمن ولحم. تعبت شني كااافي.

طكتني راشي بسرعة ودفعتني: يولي لبالج ناسيتج وناسية البطنج. خلينا نكضي من هالمصايب. لا ما حجيت لابو وهب وخليته يكص راسج فلا اطلع بت ابوي.

احجي المن تريدين تحجين. احجي. ما تهدديني ولا تخوفين. ازود من الشفته. ما ضلت مصيبة ما وكعت على روسنا. فلا اخاف بعد. بطرك روحي. الرايد ياخذ روحي يسويلي فضل وافتك من هالعيشة.

حجيت وطلعت ابجي من القرفة.

ضلت تصيح وراي. طلعت برا. خطاب جاي يدخل للبيت. تلكيته: موديها بهالليل على ماعون اللحم. مو انت الانطيتنياه. عليمن تودي بعد؟

يا ماعون يولي؟

ماعون الاكل الانطيتنياه.

يولي وحك الله ما داز احد. ياهي الاجتج؟

امك.

معليج بيها. فد رايدة تتاكد. الماعون ضميته عدج لو اطيته الج؟

وشكو اطيته اليه؟ جان اطيته لسراب ورضيت امك. بعد كافي. اني تعبت والله تعبت. ما اتحمل واحد يطكني ويصيح عليه. عوفني اموت من الجوع. ما اريد شي. فد عوفوني.

لا اكفي سراب. شها غرض بالسالفة حطيتيها؟

ما امك رايدة تخطبها الك.

تبسم: دطبي جوا.

ضحكت: يعني موافق؟

اليكتبه الله هلا بيه. هسه دفوتي جوا.

ها خوش. عجل تتهنى.

اختنكت حيل ومشيت. العبرة جرعتها. فد عيوني ورمن من الدموع.

فتت. كضبتني سراب: شراد منج خطاب؟

ما راد مني شي.

كضبتني: وشبيج ضايجة؟ اكفي ردت اكلج راح انام بغرفتج انا ونور اختي.

نامي ياهو المانعج.

عفتها ومشيت لقرفتي. تمددت.

اجن هن فرشن وتمددن. ساعة يحجن ساعة يبجن.

اني النوم طار من عيني. كمت للمطبخ. الكل نايم والبيت مطفي. فد المراوح مشتقلة ومبردة. خطاب مشتقله. وكفت بالمجاز. ريحة المبردة وهواها يوصل وهو فاتح الباب.

اشتميتها. تنفسته حيل.

انتجيت ع الحايط. قمضت عيني واخذت نفس حيل. رايدة بس اخلص من التعب والقهر الشفتة هاليومين. ارواحهم احس بيالبيت جاي تخنكنا كلنا. محد بينا جاي يرتاح وينام براحة.

على هالحالة فات خطاب من ورا ثاري. جان حاط الصوندة بالبرميل وكاعد ينطرها تنترس. ما طول الما يجري كبل لا ينكطع. من مر اني وكفت ردت امشي. صاح بصوت ناصي: ول هييين.

دحكتو. اشرلي بيده (تعاي).

مشيت: ها.

تعاي احاجيج.

دخلت سد الباب. ضليت ادحك عليه: شرايد؟

رايد اعرف شبيج.

خطاب لا احد يشوفنا سوا.

مو مهم. المهم اعرف ليش هالكثر تبجين.

الصار وياي. تشوف الجاي يصير هين؟

روحين زهكت هين وارواحهم جاي تخنكني.

كبل هالحوادث انت حالج مو عاجب. حاولت ابعد عنج كلت يمكن تهديدي خوفها. بس العرفته البيج مو مني.

امبلى منك. كل الصار والجاي يصير والراح يصير منك.

شنهو السويته؟

ما تتصور شنهو السويته بيه وبيا حال خليتني. ابعد مني خطاب وعوفني بحالي فدوة.

حجيتها وجاي اريد افتح الباب واطلع. مد ايدو من وراي وكضب ايدو. اندرت صرت بين الباب وبينه: متاكدة رايدة اعوفج؟

دنكت وغمضت عيوني وهزيت راسي (اي).

بجيت. رفع راسي: اكو احد بكثري يحبج؟

ضليت ادحك بعيونه. كمل: اكو احد بكدي يفهمج ويهمه امرج؟

لا.

ضل يدحك بعيوني تصب. مد اديه كضب وجهي ومسح عيوني. اثنينهم: الله ياخذني ولا يريحني لو ردت اذيج يوم. حتى ذاك اليوم الهددتج بيه من كثر قهري. والله ما رايد شي. غير اشوفج كدامي وبس. ما رايد اكثر. لا رايد اكرب ولا رايد شي ثاني.

هاهية اني سلمت امري لالله. الكاتبه وراضي بالترضينه. مو قليل حيلة. كليلي خطاب اليوم اريدك. من هالساعة من هاللحظة اخذج ونروح بعيد. بس ادري ما يرضيج تضلين معلكة.

يعني راح اتانيني وما راح تتزوج؟

اتانيج؟

ابو وهب ما اكدر اضل وياه. خاص بوضعي هاذ. يجي يوم وراح اخلص منه.

شبيه وضعج؟ اني الرايد افهمه. شبيج؟

بيه كون سوالف ما استرجي احجيهن. ولو حجيتهن ما افتك.

شني هن؟

اني فد رايدة افتك من ابو وهب. بس ما اريد تجتله. اني ما اريد احد يموت بسببي. كافي موت تعبت.

بجيت. مسح دموعي.

و ظل كاضب راسي: يوم من الايام راح تخلصين منه. هذا وعد.

شلون؟

خليها للايام.

سكتت. تكرب باس خدي على كيف.

وخرت: خطاب.

جاي اوخر منه. كضب راسي باثنين اديه ووكف وياي طول بطول وضل يبوس بحلكي. بعدته مني حيل ودفعته وانداريت فتحت الباب اطلع. هو راد يكضب ايدي يوكفني ويحجي: قدس.

ما لحك يلزم ايدي. طلعت وهو وراي. ما احس الا سراب بوجهي: شجاي تسوون؟

عفتها ومشيت. هو وكف: جنت رايد انطيها حبوب مسكن. راسها جاي يوجعها.

وعليش ما طلبت من عمتي؟ ليش منك؟

ما طلبت مني. اني سالتها. روحي نامي باجر هواي ناس يجون.

دخل لقرفته واني مشيت لقرفتي. اجت وراي: عود حسبالج ما ادري شجنتم اسوون؟ جان ديبوسج ورا الباب.

يتخيلج.

يتخيلج انت. احنا اغبياء. بس احنا مو اغبياء. على ذمة ابوي وتخوني ويا ابن اخته.

اني ما خاينة احد. اني فد رايدة الكل يعوفني بحالي. وارجع لبيت الجول اكابل الحلال مالي وارعاهن. اهنالي من عيشة الشر العشتها وياكم.

اي تروحين غاد حتى يفرغلج الجو. يمتى ما راد خطاب يجيج.

تصبحين على خير.

من عرفتي عمتي رايدتني اله وانت الدود كاتلج.

والمثلج محتركة امها كبل ٤ ايام واخوها امس حركوها. لا تحجي. ولا عينها تفكها من المصايب الجاي تكع فوكنا. ما حايرة بياهو الرايدج وياهو التريدي.

مو انت التحزرين. اني حزنانة على امي لولا. بس باجر تكعد عمتي واخليها تشوف حل وياج.

انداريت وانطيتها ظهري.

حاولت انام. ردت ما كدرت.

هي نامت. للفجر كعدت. طلعت طحين وعجنتو.

كعدت عفاف. شالت وياي البيت. خبز وطبخ وتنظيف وخطار وناس تروح وناس تجي. للعشرة كالت عفاف: امشي كعدي سراب واختها يعاوننا. امشي.

امشي انت كعديهن. اني ما يردن مني.

راحت كعدتهن. سراب تنتر وتكول: البيت الاحتركت بيه امي. ابرة ما اشيل منه. ولا الي علاقة بيه. ولا اشتغل.

عجل ياهو اليخدم؟ اني وقدس طاحت ادينا ورجلينا وما جاي نلحك. المن نصير للخطار للببيت للطبخ للجاي. كومي اقلها اكفي ع الجاي.

عاندت ما تكوم.

كامت تتصايح وياها عفاف.

راحت لعمتها تبجي تكللها: عفاف كعدتني من النوم تصيح عليه تريدني اكوم اخدم.

مشت وراها عفاف وهي تكلها: يولي طايحة الحظ. خادمتني خادمة اهلي. اخوج ميت والخطار خطار اهلج. بعد شنهو الاريدج تخدمين؟

صاحت الحاجة: وانت ما تعرفن تكضن الشغل الا هي وياجن.

ما جاي نلحك والله. اكلها تكف ع الجاي.

صاحت مرة من الكاعدات: احسبيها بتج. سوالف مرت البو حرام ما يصير. هسه لو بتج وهذا حالها ترضيها؟

جان كسرت راسها خاطر تكوم تعاوني.

مرت أبو كاتلتها مدميتها شمسويتلها أنا ومرت أبو أحجي حجاية حك. بس هن دواهن أميرة وبخت الله، أني أفازعلجن منها بعد. والله فلا أفظعلجن وشفي. أصيّر مرة أبو لو لا؟ ما طول هيج.

كامت تحجي بنص البيت. النسوان أكلنها وشربنها.

أني عين ع البريمز عليه تمن، وعين ع الجولة عليها الجاي. وجاي أجلف بالماعين وأحط بالصينية.

أجت عفاف حضرت الاستكاين. فات خطاب حجه: الجاي ما خلص.

صاحت عفاف: عدي عشر ادينا. لازم كلشي نخلصه بنفس اللحظة. كلها تريد وكلها تحجي ومحد راضي. من ساعة السودة كون بيوم شفت هالبيت.

ضل يدك خطاب صاح: ووووهب. وووووهب.

أجا يركض: ها.

ــ طلع الجولة برا ومعجنة الاستكاين والزم الجاي عنهن يلا.

ــ أني وين أكدر؟ ما تشوفها حارة تكتل.

ــ أمشي لا أصلخك بجلاق أشگگ شگ. والله أمشيييي.

حجاها وفات على الهول صرخ: نسوان شكثرجن؟ ما بيجن وحدة براسها خير تكوم للمطبخ؟ بس اثنين الواكفات واتفشلنا. جاي صار ساعة ما حاضر.

كامن نسوان من كرابتهم أجن يعاوننا.

أني خلصت التمن وعفاف خلصت المرك. وخطاب جاب المواعين الكبار خاطر نصب. وكف ينطيني أب وهو يحجي ويا عفاف: من أمس الصبح أطيناه خبر غير يجي خطاره. أني شايلهم صالي ٥ ما طالع لشغلي وهو شارد.

ــ أنت الخابرته؟

ــ لا خليت وهب يخابره. بس غير يجي. طكت روحي من أنعل اليوم الشفته بيه.

عفاف: يول وياهو البيهم عده إحساس؟ كلهم عايشين دور الحزنانين. وأحنا الواكعين بيها. يكعدنا الفجر لحد الليل وأحنا نركض. وياريت لو بوجه أبيض. أمس الناس طلعت جوعانة.

ــ وأني مو جبت ١٠ كيلوات لحم؟ عليش ما كفى.

ــ يا ١٠ كيلوات؟ غير الحاجة ما رضت تسوي غير كيلوين. تكلي هي الناس جاية تاكل لو تحزن ويانا. ريحة لحم بالمركة كافي وفشلنا والله. طلعت بوجهنا.

جاي يحجون ويا عفاف وسراب واكفة ليغاد وأني أصب. گمت أكضب بظهري أحس وكف من الألم. بعد ما أكدر أشيله. انتبهلي هو حجه: عنج أني أصب.

تگرب مني وأخذ مني ودنگ وهو جريب مني.

ضليت واكفة وكاضبة الجدر وأحاجي عفاف: جيبي المواعين خل نصب للنسوان فد نوبة.

تگربت مني سراب: وخري خل أساعدج أني أصب.

ضليت أدحگ بيها.

وخرت واطيتها المكان واني رحت أطلع لخضرة.

أجا وهب يشيل الصينية. عاف خطاب الصب الها وحجه وياي: بس الخبز جيبي بسرعة.

اندرت للرف حتى أجيبو.

ما نشته. وكف ومد طوله وجر الخبز. فتحته وهو بيده. گمت أحسب ١٠ كرص: كافي.

ــ أي بس كافي.

أخذ الخبز وراح وداه. ورجعلي جاي نصب بمواعين النسوان صاح: سراب حضري الجاي بسرعة على ما يخلصون.

ــ وينه؟

أشرلها بالكراج ومد طوله للخبز. جر كرصة كام ياكل من الجدر. أني رحت أودي الأكل والخضرة للنسوان. رجعت لكيته لاف لحماية بنص كرصة ومسويها لفة. غمز وأشرلي أخذها. تقربت منه: أكليها.

أخذتها من ايده وكعدت أكل.

سراب أدحج. حجت: جيبي الستكاين قدس.

ــ يمج المعجنة مال الاستكاين.

ــ الماي وصخ.

ــ أي فد خضيهن وخليهن بالصينية.

ــ تعاي خضيهن خل أصب.

عافنا خطاب ومشى يشوف الزلم شمحتاجين.

گضينا هوسة الغدا وسراب أدحج بيه بودها تاكلني. بيوم وليلة انكلب حالها مدري شبيها.

للعصر أجا أبو وهب. گام يصرخ ويدك على راسه وهو منقهر على ابنه وسوه روحه موات ووكع بالكاع ويصيح: اليوم آخذ ثاري منهم. اليوم آخذ ثااااري.

والناس تهدي بيه وتلزم وتجره خاطر ما يطلع.

طلعت أميرة گامت تدك وياه وتلزم بيه وتصيح: (كتلوا ابني ريسان). وفد صياح وهوسة ما حركوا شعرة بكلبي وانگهرت. ما يستاهلون. اثنينهم سبب بالصار. هو فلت بروحه وعافنا. وهي فلتت بروحها وعافت ابنها. وهسه مسويلهم تمثيليه ويصيحون وعود منهارين من البجي. وهو محد راح بيها غير الجاهل المسكين اللي لا بيها ولا عليها.

أبو وهب من شاف الناس تلزم بيه وتجره.

حمى حيل اخذ سلاح وراح هد على أهل عواطف. رايحين ناس كرابتهم هادين وياه. رمي وهوسة وصيحة. مجتول واحد منهم و٣ مصوبين.

خطاب من شافهم هيج وناس تهد على ناس.

عاف البيت وطلع حتى لا يصير بالواجهة ويطلع هاد ويا خاله.

رجعوا وابو وهب يهدد ويتفاخر: كاتل منهم واحد.

عليش ما اجتي أخبارية؟ گالوا: الشرطة جتي.

وما تحس إلا طفارهم بفلس. گضبوا السطح واتشاردوا وعوفوا فد وهب. وكفت دورية شرطة. طلعت الهم الحاجة گالتلهم: طلعوا ولهساه ما ردوا. كلوبنا نار عليهم. حركوا بيتنا وطاحولنا بالمكيار. نسوان وجهال فشخوها وحركو جاهلنا زغير عمره ٥ سنوات. ييمه ولونا ولية.

گلتلهم وشربتهم بالصريخ والبجي بالباب خاطر تغطي على أبو وهب يشرب ما يريد يتواجه ويا الشرطة وهو مطلوب الهم بتهمة إرهاب.

جاي تهوس وتصرخ الحجية.

واحد من الشرطة همس باذن الشرطي الثاني وما نحس إلا ركبوا الدورية وشغلوا صافرة الإنذار.

گامت تلطم الحاجة وتصرخ: راح ريسان ييمة راح بيها الزلمة. دخييييلك ربي. انولينا.