تحميل رواية «نداء القلب» PDF

#نداء_القلب

الجزء الخامس عشر

اماسي الليل

رشا: رجعنا للامارات ... ورا تقريبا اسبوع .. اجونا فيصل .. وتمارا والصغار ... يتغدون يمنا ....

(طبعا ابويه وامي اتفقوا ميجيبون ... سيرة موضوع الخطبه كدام فيصل حتى لتوصل لتماره ومنها لاهلها ويسوون مشكله .... گالوا ننتظر النتيجه تطلع وراها ابويه يحجي ويا الكل بالموضوع

يزن بقى بعمان قدم على فيزا ... وابويه ساعده عن طريق جماعة يساعدوا ...ينتظرها تطلع يله يرجع .... لاهله ....حتى يروح وياهم للمشايه ... )

بنفس هاليوم ...دخلت تمارا يمي للغرفه ... رجعت تدوددلي .... اني جنت اعرف السبب لان خلصت الكليه ... وابويه بوقتها گلهم من تخلص ... ذاك الوقت هي تقرر اذا توافق او.. لا على مثنى ...

اجتي يمي بحجة دترضع ابنها سألتني ...تونستوا بعمان ...

جاوبتها الحمد لله شفنا البنات وابويه غير جو

من دتنتجي على ظهر الجربايه شالت المخده دتخليها ورا ظهرها ... انتبهت على سبحة يزن ... شالتها حسيت سؤالها مال وحده مفتهمه متخص احد من اهل البيت ... واني هم ارتبكت من جوابتها

تمارا: هاي مال منو ؟

رشا: هاي مال ابويه

تمارا: اممممم هاي رجاليه مو مال تسبيح

رشا: اي معرفت اجاوبها شي اتحججت ارتب بالمجرات...

بس حسيت نظراتها ... بيها خبث

بداخلي... كلت خلي تفهم بلكت يفكون مني ...

امي جانت تحلل موضوع لطشتهم بالطمع ... لان ابويه متمكن

ماديا ... وعدنا املك ببغداد ... ومن طلعنا ... انطى لفيصل

ولمهيمن ... يشترون شقق ... وشغل خاص بيهم ماعدا شغلهم

بأختصاصهم ...

واحنه البنات من سوا العمليه ... مخليلنا رصيد بالبنگ النا ...

ماعدا املاك بعد عمر طويل تتوزع بالشرع ... طبعا هالموضوع مجنت اعرف بي الا من قبل ميدخل ابويه للعمليات ... بيوم وصى مهيمن على هالامور .... جنت حاضره وسمعت ... وطبعا فيصل وتمارا هم موجودين .....

من بدت تمارا تتغير وصارت ورا العمليه تتوددلنا ... ودائما تجي

واسلوبها تغير ويا امي ... وماعدها سوالف غير بأهلها ... وشلون يحبوكم وابويه يحب رشا وامي تموت عليها ... ومن هالسوالف ... ورا هالموضوع امي حللت الشغله شغلة طمع

تگلك ليش هالورث يروح لغريب خلي يروح لاخويه ....

وراها استلمت نتيجتي ... ابويه

فتح الموضوع ويا عمي الجبير يمهدله وگله اني ما اجبر بنيه على الزواج ... والبنيه متقبل بمثنى تگول مثل اخويه ....

وبقى يحجي ويا وقنع عمي ... بدون ميگله ... بموضوع يزن ...

اتفقوا ينتظرون تطلع الفيزا يله ابويه يحجي ... بيزن والخطبه ويا عمي

طبعا ابويه رد خبر لعمي ابو مثنى ... گله ماكو قسمه ...

وعمي زعل ... منه ... ومنها تمارا عرفت .... اهلها گايليها

هي موصله الفيصل .... اختك متريد مثنى لان عدها علاقه ...

بيزن ... من قبل ما يتقدملها مبينه ... وگايلتله على موضوع السبحه ... وابوك وامك ... يريدون يطمطمون سالفتها ... فموافقبن عليه حتى ... محد يعرف .. بالموضوع

طبعا هالحجي عرفته من فيصل ... بيوم دخل علينا الظهر راجع من الدوام ... اول مفات .. صاح عليه ... اجيت بعدني ممسلمه

عليه ضربني ... وگام يعيط ... ابويه تخبل ... وميكدر يگومله ...

وامي تعيط عليه تريد تفگني منه متكدر ... ما احس الضرب من وين يجيني ... بس اسمعه يگلهم اتريدون ... تخلوني مضحكه

لبيت عمي ... تدرون بتكم عدها علاقه ... بيزن ... صار سنين وتريدون تنطوهياه واتخارب اني ويا مرتي وعمي ... وتخربون بيتي ... ابويه بقى يصايح ويا حتى سبه

ذاك فقد گلهم خيرنا وفلوسنا تروح للغريب ... ليش مو هذا ابن اخوك اولى .. من الغريب ...

امي گلتله مرتك واهلها طماعين ولا اامن انطيهم بنتي ... على الاقل بيت عمي عدهم خير من الله ميفكرون بماديات

ابويه گله ليش روان وريام مو رياجيلهن غرب ... شو ما كلت حرام فلوسنا تروح للغرب ... لو هاي سوالفك مدخلتها براسك مرتك ... گله ماعندي بنيه لمثنى ... والي يزعل خل يزعل ...

ما اجامل وادور خطرانيات براس بنتي ... تالي اذا تمرمرت

ميفيدني الندم ... فيصل گله اذا انطيتها اني لا اعرفكم ولا اعتب هالبيت ...لو يدزولي خبر واحد منكم راح يموت ( امي وابويه) ما

اجي ... ابويه طرده ... طلع ...

بنفس اليوم ... ابويه فقد من الاعصاب .. اتصل على يزن

گله انطي خبر لابوك ولعمامك اني موافق وهسه راح اخابر على اخويه الجبير يستقبلكم ...

يزن بعمان ... گله اليوم انطيهم خبر وانتظر منك شوكت يروحون ... لليل اتفقوا باجر يطلعون لبغداد ... عمام امي وابو يزن واخوته ....

طبعا بهاليوم اني مشفت النوم للصبح ... خفت لا يصير شي

الي مطمني يزن بعمان ... يعني مثنى ميكدر يسويله شي

ولا صار بيني وبين يزن اي تواصل ولا يدري بفيصل والي سواه بيه بس اسمع اتصالات يزن بأبيويه ... يتفقون على المقدم والمؤخر ... ويزن ينتظر تطلعله الفيزا ويجي نعقد ....

ثاني يوم للمغرب ... تمت الخطبه .... وعمي استقبل اهله وقروا الفاتحه ... كل التفاصيل عرفتها من نور ....

لليل ... اتصل عليه يزن ... جان حاس اكو شي صار ..

وابويه على غفله ... انطاه الموافقه يرحون ....

يزن : الو

رشا : الو

يزن: اليوم يله ارتاح قلبي .... ممصدك عدت سلامات .. وصرتي خطيبتي

رشا: الحمد لله

يزن: رشا شبيج... صاير شي ... شو صوتج مو مال وحده فرحانه

رشا: لا مابيه شي بس جنت قلقه... لا تخرب مثل ذيج المره

يزن: رشا احجي شنو القصه ... بقيتي بالي حتى الفرحه طيرتيها

رشا: جنت مخنوگه لدرجه بدون وعي گمت ابجي واحجيله الي صار

يزن: من سمعت الصاير وعرفت بي ضاربها احس نار وشبت بيه) ... والله الي بعد ايمد ايده عليج لا امسح بي الگاع ....

بس خلي نعقد وراها ... خلي يرگعون راسهم بالحايط ...

رشا: يزن لخاطري لترجع ..هسه والله اخاف عليك ...

يزن: لا مناوي ارجع الا احصل الفيزا واجي نعقد يله ارجع

اصلا دا افكر ... نستقر بعمان ... من نتزوج ...

رشا: ان شاء الله

يزن: ياقمر اتحملي لخاطري شغلة ايام ان شاء الله ويدزولي خبر ... ادعي تطلع واجيج ... لان اتفقت ويا ابوج اذا ما طلعت انتوا تجون ... هنا نعقد

رشا: اعرف گلتلي امي .... ان شاء الله تطلع

يزن: دعسوقه لتفكرين ... خليها على الله

رشا: يزن والله مو بيدي ... ما مرتاحه احس نفسي

يزن: اكو شي ضامته عليه ...

رشا: لا والله بس قلق ... ما ارتاح اذا ما اشوفك يمي ... من نعقد ... بعد اطمئن

يزن: اطمئني حبيبتي ... وتفائلي ...اول عقبه خطيناها ... الحمد لله

رشا: بقينا اسبوعين صح نتواصل بس ما عندي احساس الفرحه

الي جنت متخيلتها ... بقى الخوف مسيطر عليه والقلق لتروح الفيزا متطلع ... مابقيت دعاء ما دعيته ... يوميه بصلاة الفجر

ادعي .. تطلعله الفيزا ونعقد ... حتى هم هو يرتاح واني ارتاح

نفسيتي ادمرت ... جنت احس هالسكته.. وراها اذيه ...

ممصدكه ... تمت الخطبه بسهوله ...

ويزن بقى ما مرتاح وقلق يفكر بالفيزا ... وينتظرها ... تطلع

حتى .. ماعدنا واهس نسولف مثل قبل ... سوالفنا كلها ...

عن المستقبل ... شكد يحاول يغير نفسيتي ... بس الي بداخلي بقى مسيطر عليه

الى ان بيوم .... اتصل عليه الصبح

الو صباح الخير

رشا: صباح النور قلبي

يزن: حبيبتي انتظريني باجر جاي هسه استلمت الفيزا ...وحجزت

رشا: طلعت الحمد لله ... اف هسه ارتاح قلبي ... يزوني والله مشتاقتلك موت

يزن: مو بكدي بس اريد الصبح يطلع دعسوقه ... هالمره شوكت ما اريد اشوفج ... تلگيني يمكم بالبيت

رشا: اوف والله لحد هاللحظه ممصدكه ... الا اشوفك گبال عيني ...

يزن: باجر ان شاء الله من اوصل ... نطلع ناخذ الحلقات

رشا: ان شاء الله ...

ثاني يوم .... بقينا متواصلين بالتلفون ... ممصدكه ... راح اشوفه ...ولا يهلي اسد التلفون ويا الى ان ركب الطياره ...

اعد الدقايق ... لحد ميوصل ... گلت اللهي نفسي ... لان احس قلبي من دكاته راح يطگ

ماما... راح اروح للصالون ...

خوله: روحي ... ماما وجيبي كم شغله بدربج ... للعشا ...

رشا: ان شاء الله

الاب: قلعت الطياره

رشا: اي بابا قبل نص ساعة ...

وصلت للصالون ...من الفرحه ما اعرف شنو اسوي ..اريد

اسوي تغيير .. يحسسني اني عروس

خصلت وسويت منكير ... وسويت مكياج .. وطلعت للمول ... اشتريت ... ملابس جديده ...وبجايم ودشاديش ... بس اريد اللهي نفسي عن الوقت ... دخلت للماركت .. اجيب الي وصتني عليه امي .. دگ عليه ...

يزن: طلعت من المطار ... بس اوصل للفندق ..ساعة اني يمكم

رشا: الحمد لله على السلامه ... اني طالعه شويه وارجع للبيت

يزن: وين طالعه

رشا : جنت بالصالون وهسه بالمول دا اسوگ ... تريد انتظرك تجيني لو ارجع للبيت

يزن: لا ارجعي ... حتى امر اسلم وراها نطلع ... لسوگ الذهب

رشاوي بدلت نص ساعة اني يمكم مو تتأخرين

رشا: لا حياتي ما اتأخر ... اخذت المسواك ورجعت ... للبيت

فتحتلي الباب امي .... ماما يزن هسه شويه ويجي ... حضري نفسج حتى نطلع لسوگ الذهب ...

خوله: خلي اكمل الي بأيدي ... عود من يجي افوت ابدل

رشا: دخلت لغرفتي .. بين اطلعله بحجاب لو ... بدونه ...

وحرت شنو البس ... اخر شي قررت ألبس .. كوستم بنطرون ويا ستره ... طويله ... وذبيت الحجاب على النص ...

ويا دكت الجرس ... راحت روحي ... لو ما عيب من امي وابويه

اطلع اركض .. اني افتحله الباب بس مترهم ... لازم ابيع ثكل

فتحت باب غرفتي ... سمعت صوته يسلم على ابويه وامي

اوف يا ريحه هلي ... اروح فدوه لهالصوت ... كلت انتظر خمس دقايق واطلع .. احس عيني على الساعة الميل طول بفرته ... ورجلي ما سكنت دقيقه ... صارت ٣ دقايق وطلعت ... متحملت

فتت للصاله ... بيدي صينيه ... صار بوجهي ... على ابتسامته ابتسمت ...

ونظراته هالمره حسيتها غير ... گصني من فوگ ليجوه ...

الحمد لله على السلامه قدمتله العصير

يزن: من شفتها دخلت ... قلبي كمز ... وروحي راحت ...لابقى عندي مستحى نسيت ابوها وامها كاعدين ويايه .. بقلبي والله باجر متحلفلج ... لو بيدي هسه اخذها اعقد عليها ....

الله يسلمج ...

رشا: كعدت وياهم شويه امي گامت تبدل .... نص ساعة ..

دخلت امي ... گالت يله ...

رشا: جنت مثوله نسيت اني ملافه الحجاب ذابته هيج

الا من يزن گلي ... سوي حجابج حتى نطلع ... رحت للغرفه لفيته .. لگيته بالباب ينتظرنا طلعتله بين متطلع امي

اشتاقيتلك

يزن: مريتي شو محلوه ... خو ما گصيتي شعرج

رشا: ابتسمت لا مكصيته بس خصلت ... حسيت مو بس نظراته حتى كلامه هالمره غير

طلعت امي ... رحنا لسوگ الذهب ... گلها لامي خلي ناخذ النيشان فد مره ... اختاريت سيت وحلقه وهو حلقه بلاتين

لبسناهن يم الصايغ ... وراها رجعنا للبيت ... دخلت بدلت بجامه وطلعت احضر العشا ويا امي ... بالمطبخ ... من كملنا ..

امي گلتلي ناكل على ميز المطبخ لو على ميز الضيوف ... جاوبتها ما ادري بكيفكم

گلتلي روحي اسأليهم ...

طلعت ... سألتهم ... گالوا بالمطبخ ... اتعشينا ... وراها اتفق ويا اهلي يجي هو بيت ابو طه يجيبون الشيخ حتى نعقد .... امي هم اتصلت عليهم گلتلهم باجر غداكم يمنا ... بعدها راح للفندق

لليل دزلي ...

يزن: الصبر الي صبرته صار سنه ونص بكفه والصبر الي صبرته اليوم بكفه ثانيه

رشا: ليش

يزن: باجر تعرفين يله روحي راح انام ولتكعديني ... الصبح

خليني نايم

رشا: ثاني يوم ...رحت للصالون ... وراها رجعت .. لبست صايه بيضه مغربيه وياها شال ...

من اجوي طلعت يم امي والبنات ... ( ام طه وبتها وچناينها اثنين ... ) وبالصاله ( ابو طه ويزن وولد ابو طه ٢ )

صاحوا عليه حتى نعقد ... دخلنا كلنا يمهم بالصاله ... عقدنا بس من الخجل ما بقى بيه قطرة دم من دخلت الى ان طلعت مكدرت اخلي عيني بعين يزن ...

الى ان صار وكت الغدا ... طلعت ويا امي .. والبنات ويانا ساعدونا نحضر السفره ... صاحني ابويه ...

رحت لگيت يزن واگف ... گلي اريد اصلي ... طلع ويايه .. دخل للحمام ... وراها دليته الهول ... گتله بعدها العصر مصارت

يزن: صلاة شكر ... انت هم صليها ...

جاوبته هسه اروح اصلي ... وراها تغدينا.. بقوا شويه ورا الغدا وراها گالوا يله نترخص ... وگف يزن بصفي .. گلي من يطلعون

اخذي راحتج بلبس ...

التفتت عليه ... خازرني ويبتسم ...

دخلت .. لبست نفنوف بولو نيلي ويا الركبه ونص ردن ... طلعت لگيتهم گاعدين بالهول ... كعدت وياهم ...

يزن گال ... نطلع كلنا ...للمول وراها نروح نتعشى بمكان

اهلي گلوله ... روحوا انتو .. غير وكت نطلع كلنا ...

اتفق ويايه ساعة ونطلع ... وراها بقينا وحدنا ...

يزن: تعالي بصفي ... ترى مرمروني ...

رشا: ترى ابويه هسه يجي وامي بالمطبخ بصفنا

يزن: يعني متجين ... راح اكوم اغسل

رشا: راح .. وصاحني رشا ... رحت ديغسل ... اريد فرچة شعر

روحي بدلي نص ساعه نطلع

رحت جبتله الفرچه مديت ايدي انطيهياه .... جرني حضني

يزن: اويلي يابه ... مريتي بحضني ...

#نداء_القلب

الجزء السادس عشر

اماسي الليل

حقوق النشر محفوظه يزن: صباح الخير

رشا: صباح الخير

يزن: گومي بدلي امرلج فد ساعة نطلع

رشا: شوكت لحكت تشبع نوم ... مو للصبح تحجي بالتلفون

خليها نطلع نتغدا بالمول ...

يزن: ساعة  الكاج متحضره ...

رشا: ماشي .... مرلي طلعنا تريكنا بكافيه ...

يزن: اريد اخذ كاميرا ... حتى ناخذ صور

رشا: طلعنا للمول اخذ كاميرا ...

يزن: لازم من ارجع اشحنها .. باجر نروح لاتلانتس ناخذ صور

هسه خلي  نفتر ناخذ كم شغله محتاجها ...

رشا: لتگلي هم راح تشتري عبايه ....يهمس بصوت ناصي

يزن: شسوي بالعبايه... واكدر احضن صاحبتها... هالمره مطول

داكيلي فيزا شهر ... يعني كاعدلج مابراسي غيرج ...

رشا: ترى انت طالعه عينك ...

يزن: ابتسمت ليش احمريتي ... طالعه عيني بحلالي وبرضاة الله

رشا: شنو تريد تاخذ شغلات ....

يزن: نفتر ونشوف ... انت ِهم ابدي اخذي ...ماطول اني موجود ... جهزي كل منطلع كملي امورج

رشا: دنمشي وگف گلي تعالي ندخل هنا ... دخلنا هو محل رجالي نسائي واطفال ...دنفتر اشرلي اخذي هذا ...شفته

استحيت جاوبته غير مره اجي اخذ هالامور من امي ويايه

يزن: ابتسمت دروحي اخذي ...هسه

رشا: اخذت شغلات هو اختارها ... يله نرجع نتغدا تعبت

رجعنا تغدينا ... گلي اروح ارتاح  والعصر امر ....

للمغرب رجع كعدنا وحدنا ...بالصاله

يزن: دا اقنع بالولد وامي نستقر بعمان ...

رشا: وشغل احمد شلون ....بله انت وياسين عدكم شغل حر ومنتصر كليه

يزن: اي عادي مو دا اشوف كومه دكاتره عراقيين بعمان ومنتصر يكمل بعمان ماعنده مانع

رشا: انت تتوقع  احمد يقبل ...

يزن: اذا الح عليه اقنعه لان هو هم متذمر من وضع بغداد..وسالفة الاغتيالات دكاتره واساتذه وصيادله وهو بأبن البيطار المناطق الي حولها كلها مشاكل ...وكل اسبوع يله يروح لمرته وابنه ... اذا عليه سهله بس امي قافله متقبل ...

صدك لحد هسه فيصل ماعنده علم عقدنا ...

رشا: ما ادري مهيمن وخواتي يدرون اذا صار بينهم اتصال اكيد راح يعرف بس ما اتوقع يدري ...

يزن: بس ميصير اني لو ما استحي ادخل جان حجيت ويا ابوج

رشا: ابويه صح هادئ وواعي ... بس من يصير عصبي يفقد

وميقبل احد يناقشه بقراره ... وورا ما سوا العمليه كلش يتحسس

ومن صارت المشكله ويا فيصل قفل عليه امي هم گلتله لازم تنطي خبر  مقبل وصار عصبي جاوبها اني ابوها امرها يمي  ( ما كدرت اوضح ليزن فيصل يجاوز على ابويه بالكلام ولذلك ابويه قفل عليه وگلها لامي من اليوم هذا ابنج مات بنظري )

يزن:  زين انتوا مصار شي جديد على شغلة لم الشمل الي كلي عليها ابوج من احنه بعمان

رشا: لا بعد ... بس المحامي منطي خبر المهيمن ماشيه بالاخص ورا ما دز تقارير بحالة ابويه ...

يزن :ابوج بكلشي مشى ويايه الا بسالفة ميتم الزواج الا قبل ميسافرون بله ما سافرتوا بعد سنه ...

رشا: مابدينا شي نتحمل ...جرني لحضنه

يزن: لج والله مابقى عندي صبر ...

رشا: سندت راسي على صدره ..لزمت خده .. حار  رفعت راسي يزوني شو مصخن

يزن: ابتسمت لا بس اجدادي محتركه ...

رشا: هههههه.... يزوني اموت عليك .. بس بلا هالنظرات الشريره

يزن: ههههه مو المشكله ما اكدر اسوي شي اهلج مرابطين حراسه ...

ورا ... كم يوم جنت طالعة ويا يزن ... من رجعت ... امي گلتلي

فيصل اتصل على ابوج ...سأله على صحته وگله لتزعل مني انت ابويه شعندي غيركم انت وامي ... بس ابوج بقى على وضعه عاد گايله هالايام نمرلكم ... كلت  الحمد لله ... راح تنحل المشكله ...

ورا كم يوم  يزن وابويه بالهول واني وأمي بالمطبخ .. اندكت الباب ... اخذت شال  ورحت افتح الباب ...شفت مثنى وفيصل ... من العين ...قلبي هبط .. رجعت گتلها لامي فيصل ومثنى بالباب ... رحت جبتلها شال ..گلتلي روحي يم ابوج و ... فتحت الباب .. دخلت يم ابويه ويزن ...ابويه سألني منو من الارتباك والخوف جاوبته يمكن فيصل اجى .. مكدرت اگول مثنى كدام يزن

بعدني ممكمله ... دخل فيصل ومثنى ..

مثنى : هذا شعنده هنا ..

فيصل : لج انت شعندج كاعده وياهم  امشي فوتي لغرفتج

رشا: اجى عليه فيصل ...رحت ورا يزن ابويه گام يصيح عليه

احترم نفسك ممكعدها ويا غريب هذا رجلها

مثنى وفيصل ... زوجتها من ورانا

يزن: التزمت السكوت احتراما للبيت واهله .. بس هالاثنين فاتو بصدمه .. كلش سريع رد فعلهم ... من شفت فيصل يتهدد على رشا

جاوبته لفيصل ... انت اخوها على عيني وراسي ..بس اني رجلها وما الك حجايه عليها ...

مثنى : انت حسابك ويايه بعدين ...

يزن: شوف ترى اني ساكتلك احتراما لعمي ... ولاهل البيت

احجايه زايده اندمك

مثنى : امشي لك صاير براسي رجال

يزن: الرجال الي حلف بشاربه ووفى  ...

رشا: بس صياح وفيصل گام يخربط بالحجي ويا بويه ويتجاوز بالكلام ...  وابويه صار اعصاب ...وامي مخليه ايدها على قلبها ... واني جسمي كله يرجف وواگفه ورا يزن .. وخايفه من الملاطش مالتهم ... بس يزن ابد ما انثار بكلامهم ... بقى واعي للكلام الي يطلع منه ... بالاخص ويا فيصل بقى كلامه موزون مراد يصير بينهم تجاوز ... بس مثنى ... گام يعيط على ابويه گله تنطيها للغريب واني ابن اخوك عزيتها عليه ... ترى هذا كاتل روحه على الفلوس  فيصل گال يحلم اخلي ياخذ فلس

يزن فقد هنا ... ضرب مثنى (انت مو مال احترام)  ...فيصل جر مثنى  حتى يفاككهم وبقى يحجي على ابويه هاي الردتها   ( فيصل بطبعه ميتعارك بس لسانه سليط بس بحياته ما صايرتله مشكله ومتلازم ويا احد ) ...اني بقيت مجلبه بيزن ... وامي هم لزمته ....گلتله انت عاقل لخاطر عمك 

مثنى: حسابك ويايه بعدين ...

يزن: اركع راسك بالحايط

رشا: ابويه ... عاط لكم انتو متستحون فضحتونا هسه الجيران شيگولون  وانتَ مثنى كلمن يشوف الناس بعين طبعه ... وجه الكلام لفيصل ( فيصل) ترى بعدني بحيلي ... لان انت ولا غيرك .. تستكوون عليه ... اذا صار براسك خير فالفضل الي ...اني وصلتك ... والفلوس فلوسي  ... ولا يزن ولا اهله محتاجين

استحوا على نفسكم ... خزيتونا ... الي يشوفكم اتذابحتوا على الفلوس يگول ولد فگر ...

وثانيا موضوع وانتهى ما اريد مشاكل ...بعد الي يعجبه اهلا وسهلا والي ميعجبه ما اريد اشوف خلقته ...

طلع فيصل ومثنى ...

يزن گله لابويه عمو لتزعل مني اني معتبرك مثل ابويه ... بس شغلة فيصل ماعنده علم بالعقد ... خليته بموقف كدام نسيبه

يحقك بي .... ابويه جاوبه عمو انت اكو امور متعرفها .. لتحكم من الكلام

رشا: وراها بقينا اني ويزن وحدنا ... يزن مو تروح لبغداد هالفتره ... فدوه

يزن: لا مااكدر اروح ... عندي شغل وناوي انتظر ...لحد متجين علمود نعقد محكمه هناك واطلعلج اقامه على اقامتي

رشا: اي حتى هالايام منطلع تعال اشوفك بالبيت

يزن: رشا شنو القصه منين تخافين ...موضوع وانتهى عرف صرتي مرتي من شنو تخافين

رشا: والله اخاف ليغدرك

يزن: كلشي ميسويلي ...وانت اذا يجي مره لخ تفوتين  بغرفتج

رشا: اروح فدوه للي يخاف عليه وميخلي اخويه يضربني

يزن: مرتي محد يضربها بس اني هههه

رشا: صدك تضربني

يزن: ما ادري ... بس انت لتوگفين بوجهي ولا تحسسيني انت گويه .. لان يجوز اقسي وياج ... اذا عصبي

رشا: اني متوقعه هالكويلات ... من سالفة الصوره ...

يزن: اسمعي كلام ولتعاندين ... متطلعي كويلات

رشا: مرت الايام ... بسرعة وهالمره اخذنا صور بكل مكان انروحله ورجع يداهرني على فرق الطول لان خبلته من نطلع واريد اشتري حذاءلازم اخذه عالي مره رجعنا للبيت

طلعت الحذاء لبسته گتله حلو مو

يزن: شكله حلو بس عالي كلش يرهم وياطولج

رشا: لا والله ترى انت تغار متريدني اصير بطولك

يزن: هههه بطولي رايدلج طبله

رشا : رحت بصفه شويه واوصلك بعد شكو

يزن : انت عندج عقده طول ويايه خلي اعالجهه

رشا: شالني ...هههه نزلني

يزن: ها هسه ارتاحيتي صرتي اعلى مني  حتى راسي شفتي من فوگ

رشا: نزلني الله عليك لتفوت امي لو ابويه

نزلني  وخلى گصته على كصتي

يزن: لج بابا اني احب طولج بدون هالعالي ...حضنتها

شوفي  حتى اكدر اخلي راسي على راسج

رشا: سافر يزن لعمان ... بس هالمره الوداع اخف لان مرتبطين ... واعرف بعد فتره ... اروح لعمان واشوفه

ورا فتره طلعلنا لم الشمل ... بقى ينتظرون موعد السفر ...

اتصلت على يزن الو

يزن الو

رشا: يزوني حصلنا لم شمل ... وهسه دا افكر ... ليش متخليني اروح وياهم ... احصل اقامه ... حتى اسحبك ويايه

يزن: اي ليش لا ... وجهالج وياج لو تبقيهم يمي ...

رشا: ترى دا احجي صدك والله مدا اداهرك

يزن: شنو الصدك بله .... اني كاعد انتظر ... يوم يوم يطلعلكم حتى تجين لعمان ... كمل امور الاقامه وراها ... نحدد موعد الزواج .. وانت تريدين تروحين وياهم ...

رشا: يزن الوضع بالعراق ... مو أمان ... نطلع بس ناخذ جنسيه ونرجع نعيش بعمان ...

يزن: سدي الموضوع رشا ...

رشا: فكر بي ... لتستعجل وبدون عصبيه لخاطري

يزن: استغفر الله ... ترى غثيتيني ...يعني عندج عادي ...تبقين

بعيده عني شهور ويجوز تتعدا السنه والسنتين

رشا: اتحمل ... احنه اول وتالي مرتبطين ... اسحبك ونتزوج ...

يزن:سدي الموضوع لو اسد الخط

رشا: يزن فكر بي ... لتعاند .... سد الخط بوجهي ...

اف شكد عنودي الي براسه براسه ...

سولفتلها لامي ... بقت تلومني ... گتلها مو انت كتيلي لو يزن يخليج تجين ويانا

رزلتني كلتلي كلت لو ما كلت روحي گليله ...

كتلها انت ورطيني ... وكليلي لو .... بقى يومين زعلان ..دزيتله مسج

شوكت يحن الحلو

يزن:  لا حلو ولا زعلان... بس ملتهي ادورلي مره حتى بين متسحبيني ما ابقى عزابي

رشا: صاير اريحي .... وتنكت

يزن: لكيت وحده حلوه بس مو مثل البلوه العندي ....

رشا: انت لو تريد كلشي على مزاجك لو اصير بلوه ...امشي مره على مرامي

يزن: اي والله تالي عمري مرتي تمشيني ... صايره گويه ..على البعد ... هينه ما باقي شي وتجيني ...

رشا: دكيت عليه  يزوني ...

يزن: شكو

رشا: مشتاقه

يزن: واضح ...نتحاسب

رشا: وداعت يزوني ...صار يومين اريد ادك بس اخاف بعدك

اعصاب

يزن: شكو مغلق تلفونج ...الليل كله متكولين عندي رجال ...

رشا: خلص الشحن ومتوقعت ادك بقيته للصبح بدون شحن

اليوم وياك للصبح

يزن: لا ميحتاج روحي نامي ... لكيت بديل يغرد بأذني الليل كله

رشا: حتى اذبحك

يزن: انت تفكيرج سئ رحتي گبل على النسوان لو اريد ادور خايف منج

رشا: حبيبة قلبك ... أليسا

يزن: ههههه هيه  جري عدل .. اسبوعين وانت يمي ..البارحه حجيت ويا عمو ...

بعد أسبوعين

رشا: هاي اول مره راح نلتقي ...واحنه مرتبطين ... صار مشايفته  فتره طويله ... اهلي وصلوني للمطار بقوا ينتظروني برا الى ان ركبت الطياره لان هاي اول مره اسافر وحدي  ... وهو  وريام يستقبلوني بالمطار

من وصلت ... وطلعت اتلفت .حتى اشوفهم ... مكدرت اميزهم لان هوسه ... لحد ما خلصت  القاطع ..وطلعت بين الناس فجأة طلعوا گبالي هو وريام

حضنته  بوسته من خده ...يزوني مشتاقتلك بقى حاضني

يزن: اني هم مشتاقلج ...يا روح يزن ( اويلي يابه ..شمتحمل قلبي على فراگها )

ريام: ولج مو اني اختج شو معبرتيني

رشا: ههه حضنتها ريوم مشتاقتلج قلبي

ريام: اني هم مشتاقتلج قلبي ...شفت اختي سباعيه دبرتها واجتي وحدها

ترى خبلني من البارحه لليوم ... اخاف مدبرها  تجي وحدها

يزن: هههه غير اخاف عليها ...

رشا: مشيت على تعليماتك .. كتبتها بورقه لتخاف عليه ...

ثاني يوم سوينا تحليل دم .... ورا ٣ ايام عقدنا بالمحكمه ...

وقدملي على اقامه ...

اتفقنا ... من تطلع الاقامه هو يرجع لبغداد يرتب كل الامور واني ابقى يم ريام ... من يتحدد موعد العرس ... يجي ياخذني للعراق ابقى يم خالتي ام نعمان وبيبيتي ... لان اهلي ميصير

يوصلون للعراق وريام مقدمه un

بس رغد وروان  گلولي يجون  .... على عرسي بتكريت ....

ريام : يزن ليش متسووي بعمان

يزن: مو اخاف من سالفة الفيزا ... اخاف متطلع لكل اهلي ..

والصدك امي قافله تريده بتكريت يم اهلنا ...

رشا: اي احلى هناك يم اهلنا هنا ماعدنا احد ... واحنه كاعدين دزلي مسج

اختج ورجلها ... مرابطين حراسه ... ترى عاقد عليج مرتين ...

اخاف ناسين

ابتسمت ... يخافون عليه منك

يزن:  هينه مرجعج ويايه لتكريت .... يم اهلي ابيع المستحى

بوسيني بمسج

رشا: هههههه هاي شلون

يزن: رهميها شلون مجان ... ترى راح افشلهم

رشا : دزيتله سمايل  ها وصلت

يزن: اويلي يابه ... وصلت يا قمر  وراحت روحي

الاحداث ما قبل النهايه

نلتقي في الغد

#نداء_القلب

الجزءالسابع عشر

اماسي الليل

حقوق النسر محفوظه

خوله: هاماما... ماكو أخبار على الاقامه ماطلعت

رشا: والله بعد راح يزن سأل گلوله بعد مطالعه

خوله: ريام گالت الشقه حلوه ...

رشا: اي ماخذها چبيره ... علمود الولد وخاله اذ قرروا يجون نكعد سويه

خوله: زين كملتوا كل الاثاث ...

رشا : خلصنا المطبخ والهول  .... بقت بس غرفة النوم ... نطلع هالايام ... وناخذ وحده لبيت احمد اتفقت ويا نور ادزلها صور وتختار ... والبقيه گلي يزن من ينطونا خبر  يجون ... نأثثلهم غرفهم ...

انتو شوكت تجون ...

خوله: ابوج گال هالايام يروح يحجز  احتمال اسبوع ونجيكم ... قبل ليحددولنا موعد طيران ومنكدر ... نشوفكم

رشا: علواه تجون والله مشتاقتلكم ... ماما عود اوصيج أتجيبيلي غراضي وياج ... ..يله قلبي ... الله وياج

ورا كم يوم ....اتصل عليه يزن حتى نروح نشتري غرفة النوم ...

الو ..الو رشا خلصتي

رشا: ماعندي شي دا انتظرك ... مر عليه رحنا لشارع اسمه شارع الجامعه بي محلات اثاث وغرف نوم لان قبلها ... رحنا بالمول اكو محل هوم سنتر ... عجبتني بي غرفه بس يزن گلي خلي نفتر ونقرر

دخلنا عجبتني ... غرفة نوم جلد ... لونها على فضي ... هاي حلوه

يزن: رشا جلد يشخط وبس ينضرب .. يروح منظر الغرفه

رشا: يزن شگد تنقنق ... شنو احنه جهال ونشخطها

يزن: ليش قصدت احنه نشخطها لو من يصير عدنا طفل

رشا: عود نبدلها

يزن : ابتسمت اني ما ابدل غرفة نوم الا ابدل المره وياها

رشا: مسموحلك تحلم  .. ما احاسبك عليه ولو ادري متكدر تستغني عني ... اذكرك شنو حجيت البارحه ... بتلفون لو تذكر

يزن:   ضحكت)جنت مسطور بكلامج نسيت عود ذكريني   ... هاي حلوه لونها بيتنجاني

رشا:  لا متنسى ... وهاي راح موديلها

يزن: ادري شنو راح نلبسها غير ناخذ شي تكمه ...

رشا: اني عجبتني هاي لو الي شفناها بالمول الابيض واسود حبيتها  فدوه لتصير نحس والاتمشي حجايتك

يزن: يولي منو النحس ... بالامارات بدلت العرس مو مقبلت عليها وكتلتي روحج الا تاخذيها تالي گتلج اخذيها ...

رشا: هاي لان دخلت مزاجك بعدين  گتلك من اطلع اللبس شي فوگاها ... گتلي اللبسي العبايه البيضه ... الي عندك بتكريت ( ضحك)

يزن: يله فضيها واختاري الي تريديها ... دا امشي على مرامج اريد اشوف تاليها وياج ...

رشا: ابتسمت... همستله يزوني  احبك ..ناخذ الجلد عجبتني ... و اخذ صور لبقية الغرف أدزها لنور

يزن:   ابتسمت بلا هالنظرات يا قمر تغويني ...  يله  اخذيها براحتج ...

رشا: دزيت كل الغرف الموجوده والغرفه البيضه والسوده لان عجبتني قنعت نور عليها ... دزتلي اخذوها حلوه

دفعنا فلوس الغرفه وانطونا موعد يجون يشدوها بعد يومين ...

بعدها طلعنا للمول اخذنا لبيت احمد غرفتهم... العصر گالو يجون يشدوها ...

يزن: اذا ماعندج بعد شي للمول خلي نتغدا بمكان حتى ...حتى اللحك ارجع ... انتظرهم يجيبون الغرفه

رحنا لمطعم ...  كعدني بصفه ..و لازم ايدي

يزن : خلصي كل احتياجاتج ... حتى بس تطلع الفيزا ... ورا ميرجعون اهلج... احجز ... نروح لتكريت ...

رشا: ماعندي شي ... ووصيت امي اتجيبلي .. بقية غراضي من تجي بس بقى اخصل .. قبل منروح ...

يزن: بقي نفس اللون مو تغيري ....

رشا: هو نفس اللون ...

يزن: من يجون اهلج  ناخذهم ونروح للبحر الميت

رشا: لا ما اريد لان اسمر وورايه عرس ... ورا الزواج من نرجع لعمان نروح

يزن: احسن حتى احجز غرفه وحده ونروح وحدنا ... انوب طلعتلي سالفه ... جية خواتج لازم ... نحدد موعد الزواج على جيتهم ... لو عليه ... بس نرجع لتكريت ورا يومين اسوي العرس

حتى لتگليلي نحس ... دا اسوي الي تريدي ... مخليج براحتج

رشا: هههه انت تكسر وتجبر والله متسوي شي اذا مو انت مقتنع بي  يحجي ويايه واحسه بنظراته يريد ياكلني

يزن: يولي لو عليه باجر اسوي عرس هنا ... بس صابر عليج ...

بنيتي كلها اطلعها هههه... هالطول البال ورا العرس متشوفي

گتلها  لامي كلكم  تروحون  لبيت احمد  اتباتون اريد ابقى ويا مريتي وحدنا بالبيت ٣ ايام لحد يدك الباب

رشا: راح تبقى على نفس الحب ورا الزواج ... لو من اصير يمك

تتغير

يزن: انت بأيدج تخليني ابقى  على هالحب ...

رشا: ابقى لاخر يوم بعمري اموت عليك ... بس انت هم بأهتمامك أتخليني اصير مثل متريد ...

بس شغلة العصبيه مخوفتني منك ... لان تقفل ... واحسك صعب

يزن: هالصفه مو بيدي ... حتى اذا اقسى عليج بالكلام ... المفروض تتحمليني لان تعرفين  الي بقلبي

رشا: بس مرات تأذيني ... بكلامك واكو مواقف لحد هسه من اتذكرها انغث منك ...

يزن: من تصيرين يمي كلها انسيجياها ... بساعة صلح

رشا: ورا ما نصبوا الغرفه ... رحت ويا ريام انقل غراضي ...

سفطت ملابسي بالكنتور

من شافها طلعت ...من الغرفه ... دخل وسد الباب ... گتله هسه تجي دجيب باقي الغراض ( ابتسم ) گلي سديته حتى تحس ....  ضحكت يزن افتح الباب عيب

يزن : لويش عيب مرتي ... خلصتي

رشا : بعد شويه واخلص حتى افرش الفرشه ... لف ايدي على بطني ودفن وجهه بشعري

يزن: اويلي يابه مدوخني هالقمر ...

رشا: والله ما اريد من رب العالمي غير يحفظك الي ...كل عمري العشته قبل ما اشوفك ما محسوب ...من يوم الي شفتك

على اللألم والقهر الي شفته بفراگك والعرقله بزواجنا ... بس احلى ايام بحياتي

يزن: وانتِ هم  احلى شي بحياتي ... مرتي وصديقتي ...

راحتي وياج ... وامنيه ردتها من رب العالمين وماقصر ويايه ...

صرتي الي ...

رشا: مرت الايام اجوي اهلي اسبوع جانت الاقامه طالعه قبل وصولهم ... بهالايام قضيتها وياهم ... اريد اشبع منهم قبل ميسافرون ... ابويه وصى يزن عليه گله عمو ... خلي بالك مرتاح

حجزنا ... للعراق ... ورا ٤ ايام من سفر اهلي ...

اخذت امور بسيطه ... اطلعني شهر ... وكل غراض العرس ...

ويزن اخذ قاط  رمادي ( بين الاسود والرصاصي )

حسيت بي فرحان اكثر مني ... اني لازمني الارتباك ...

بالمطار يعاملني مثل الطفل الي اهله مأمني عد احد ...

من ركبنا الطياره ...سألني خو ماعندج ... خوف وسوالف .. تتخربطين وتقئ... حتى استعد ضحكت جاوبته لا ... لف راسك ونام ... معليك بيه ...بقى يداهرني ... الطريق كله ... جان وكت بداية شتا ... من البرد طلبنا غطى ... تلفلفنا بي سوا ... بقى ملهيني بالسوالف والضحك ... الى ان ... نزلت الطياره ....

گلي من انزل بالمطار اشتم ريحة اهلي ... والگى راحتي ....

سألته لعد ليش ردت نستقر بعمان ...

يزن: اخاف على احمد ... قبل فتره ولد صيدلاني ... ويا هسه متخرج ... اغتالوا خطيه ...

لذلك اريد ابقى بعمان ... حتى يجون ورايه ... امي اعرفها متتحمل نفترق ... اخر شي راح تستسلم وتوافق تجي ... وهالفتره بدت تلين لان تخاف على احمد ... وضع بغداد تعبان كله اغتيلات ... ... وحطف بس الله يحفظه ...

رشا: ان شاء الله انت هم هالمره لح عليهم وقنعهم يطلعون ويانا ... حتى انت هم ترتاح ... وميبقى بالك يمهم

يزن: رشا كل اخوتي عزاز وما اتحمل اذيتهم بس احمد ... عندي غير شكل معزته خاصه ... يقراني حتى بدون ما احجي ...

اذا لا سامح الله صار بي شي ... يكسرني طول العمر ...

انتِ هم... من نوصل ابقي قنعي بنور حتى تأثر عليه ... احنه اذا نطلع اثنيناتنا ... امي تنجبر تطلع ... ويانا والولد هم

رشا: ان شاء الله

وصلنا لتكريت ... واني بالسياره ... تمشي أتذكرت  من وصلنا اني وامي هالمره شفتها حلوه وفرحانه ... بس اريد اوصل واشوف اهلي ... وكل مكان الي بي ذكريات ويا يزن ....

اريد اتذكر ... كل تفصيله من اول يوم شفته بالحنه ... ووراها التقيت بي ... بيت بيبيتي .... ويوم صارحني ... صدك هالمكان بي ريحة اهلي ... لان هو كل اهلي وناسي ....

اول ما وصلنا ... گلي نسلم على بيبيتج ... وخالتج وراها نروح لبيتنا تبقين ..ويايه لليل يله ارجعج ...

وصلني يمهم ... كعد شويه ... گلي ساعة وامرلج ... اترخص وراح ..حتى يسلم على اهله ...

ورا ساعة... مرلي ... جايب عباتي الرصاصيه گلي اللبسيها من نطلع ...

دخلنا لبيتهم ... استقبلونا بالهلاهل ... خالتي وخواته وغفران ونور ...

خالتي..صاحبة ملگى .. بقت تسألني على امي وابويه ...

جاوبتها الحمد لله مليحين ... اباوع على يزن يبتسم

طبعا يحجون تكريتي واني افتهم عليهم ... بس بعدني ... بين سطر وسطر مو كلش ضابطتها...البنات يحجون ويايه بغدادي

سجى: اذا عندك نقص دوب تلحقين ...

رشا: لا ماعندي شي ... كلشي كامل ..جبتلكم هدايا بس والله ملحگت افتح الجنط ... يزن بسرعه اجاني

نور: هسه من يجي احمد اني اروح افتحها ... هههه

يزن: هسه اتصلت عليه گلي يم الولد ...على جيه ...

رشا: طلع يزن بقينا اني والبنات .. بدت نور تشاقى ويايه ..

والبنات ..يضحكون ... جنت بعدني مماخذه عليهم ... دخل احمد

احمد: ياهلا ... مشتاقين الحمد لله على السلامه

رشا: الله يسلمك ابو حمودي

احمد: وين العريس ...

نور: ما ادري يمكن فوگ بغرفته ...

يزن: صعدت سبحت  واتذكرت اطلع لرشا العبايه انطيهيا طلعتها ورشيت عليها عطرها  ... اشتميتها  ...

دخل عليه احمد ... من تسالمنا وحضنته ...

احمد: يويل شو بيك عطر نسوان ههههه

يزن: غلست شخبار الولد

احمد: باجر گلولي نطلع ... سوا من عرفوا بيك موجود

يزن: ان شاء الله ... نزلنا للهول ... طول الوقت عيني ما فارگتها ... حسيتها خجلانه بعدها ما متعلمه عليهم ... خليتها بعيده عني حتى  تاخذ عليهم ...

من جان احمد بس موجود جانت ماخذه  راحتها .. بالحجي  لان عدها ميانه ويا هو هم يحب المداهر مثلها ... ويشاقى

بس من دخل ياسين ... شفتها  تقيدت ...

رشا: من صبينا العشا ... كل البيت التموا على السفره  ... حاولت اتصرف طبيعي وياهم ... بس بعدني مامتعلمه عليهم وعندي خجل .. احس نفسي خطار

ساعدت البنات صاحني يزن اكعد بصفه ...

احمد... يداهر ...صاح مرتي وين خلي تجي تكعد بصفي ...

اجتي نور لكتنا نضحك ... گالت شبيكم

خاله گلتلها ... اكعدي بصفه هذا يغار

احمد : لا والله يمه بس هذا ابنج ميكعد راحه ... يفتح علينا باب

يزن: شو متاكلين ... تستحين

رشا: لا والله بس ما اشتهي

يزن: دكلي .. وتعلمي على البيت واهله لتستحين 

رشا: لليل ... گلي يله اوصلج ... احمد چلب گلي تعالي باتي يمنا جاوبته لا والله غير وكت مترهم اليوم ... حتى مشفت بيبيتي ... بس ساعه ....

يزن: غير وكت اني اجيبها تبقى يمكم ...

رشا: من طلعنا  للكراج خلى ايده على چتفي ...

رفع وجهه للسما

يزن: تذكرين من جنتي كاعده على المرجوحه ... وگتلج ها يالبغداديه تخاربنا من اول يوم..

بهاليوم حبيتج ... ورجعت للبيت سألت البنات عليج ... امي عرفت براسي غايه .... گتلهم هالبنيه اني رايدها ...

بقيت الليل كله ارجع الاحداث من اول ما طلعتي من القاعه الى ان ... عفتج بالحديقه ورجعت لاهلي ... من يومها انت ويايه بكل  ليله ... قمر ليالي التكريتي ... بعد ايام تصيرين مرتي ام جهالي

رشا: اني اول مشفتك  ..خفت منك ... وماركزت بشكلك ... بس من دخلت للهول وامي گلتلي غير اتسلمين .. التفتت عليك

انثولت من شفتك ... اخذت قلبي بالاخص من سألت نور على الكلمه والتفتت عليه تبرر الي صار ... من يومها قلبي ذايب بحب التكريتي ... وصلني لبيت بيبيتي ... من دخلت بقى هو واكف بالباب غمزلي ... اجى ابات  يمكم ...

رشا: يزوني تصبح على خير

هالايام جانت احلى ايام ...قضيناها سوا ...

ورا كم يوم رحنا للشط .... بس كتم على انفاسي لان ... شاف اكو هواي عوائل .. وشباب يسبحون ...  ما سبح حتى ليعوفني وحدي ... بقينا كاعدين ... يتغزل ويسولف ...

رشا: شكد احب  هالمكان ... كل ما اشوفك تبتسم يخطر على بالي هالمكان

يزن: ابتسمت ...ليش

رشا: اتذكر من جنت تسبح كل متغطس تطلع تباوعلي وتبتسم

مشتغل مراقب ... ما لحگت اتحرك  لگيتك ورايه  حدري هين ونزلي البنطرون ( صافن بوجهي وعينه بعيني احس تطلع من نظراته حب  ... وابتسامته على وجهه ...تخليني هيمانه  بحب هالرجال )

يزن: غير من ما شفتج ويا البنات فزيت اتلفت ... لكيتج تتمشين

بعيد عنهم ومطلعه رجلج ...  احترگت وگتلج نزلي ما اخذتي الكلمه من اول مره اجيت اسطرج براشدي بس مجان الي حكم عليج وقبلها يم السياره شفت العبايه حلوه عليج ... وتلفت نظر تخبلت ..مخليتيني بيومها اخذ راحتي واتونس ويا الولد بالي كله يمج... رجعتي عاندتي من گتلج لفي الشال ... يايابه بيومها ...

شلعتي قلبي

رشا: هههه انت شلعت قلبي ولليوم شالع قلبي تنقنق

يزن:  والله اني هيج مجبوره تتحمليني ... اذا ما  اغار عليج واخاف على عرضي معناها مو رجال ... وگفت مديتلها ايدي

يله خلي نمر على بيت خالي ... حتى وراها نرجع

هالايام الي مرت رجعلي بيها كل الذكريات الحلوه ...وكل يوم احبه اكثر من القبله ... علاقتنا صارت اقرب ...  وكلامه وتصرفاته صارت اجرئ ..لان اغلب اليوم نقضي سوا ... لو بيت اهله لو بيت خالتي نور ... لو نطلع نروح لبيت ابو لو لبيت خالتي ام نعمان ..لو لبيت خواته ...  وكرايبهم بنفس الشارع بس وكت انام يرجعني لبيت بيبيتي ....

بهالفتره رغد ردتلي خبر على موعد اجازة نعمان ... وروان گلتلي .. شوكت تحددون الموعد احجز واجي لان تترك .. ولدها يم ابوهم .... اهلي سافروا يم مهيمن ... وبيناتنا اتصالات ...

ويزن يتواصل ويا ابويه ومهيمن ...

وبيوم اني يمهم ... خاله گالت انتو غير تشترون غرفه ... نوم

يزن: قابل اني باقي هنا واخذ غرفه ... اطبگ چربايتي وچرباية احمد ... ورا العرس ... بقى كم يوم وارجع ... لعمان ... واخذج ويايه

گلتله اني ما اطلع ... روحوا انتو ... صار بيناتهم نقاش .. ويزن صار عصبي .. گلها مدشوفين الوضع ...وهذا ببغداد وحده 

متخافين يخطفوا ...

گلتله بعصبيه اخذ اخوتك وروحوا ... اني هنا ابقى يم اهلي ..

وابوك موجود ... يزن مقبل .. وختمها بزعله وطلع ...

ورها كم يوم گلي خلي نطلع ناخذ غرفه ... امي قافله واني مجبور اجي اشوفهم ... حتى عدنا مكان ..من نبقى ...

اخذنا غرفه ... ونصبوها ... سجى جابتلنا فرشه عرس بيضه فرشتها ..  وعلگنا بردات جديده ...من خلصنا صعد گال اريد انام ... خلصتوا  ...

سجى: بعد ميصير تنام بيها الا بيوم العرس ... مدشوف فرشنا الفرشه

يزن: ارجعوا افرشوها مره لخ ... صعبه

سجى: ميصير ... نام بغرفة منتصر .... ودولك جربايتك هناك

يزن: ترى هاي السوالف كلها كلاوات ...

رشا: للعصر نزل .... گلي عود اصعدي .. سوي الفرشه

گتله ليش نمت بالغرفه ...

يزن: ما اعرف انام الابمكاني ... وهذا شفته يتبسبس بالتلفون ... عفته براحته ورحت لفراشي

سجى : عاد انت معروف بالعناد .... مو گلنالك ميصير

غفران ... هاي السوالف متصرف عند الرياجيل ... بس يمنا

رشا: ورا شويه گاعد بصفي همسلي شافني ضايجه

يزن: شكو

رشا: مو گلولك ميصير تنام لو هو عناد

يزن: ابتسمت..عاد والله النومه بيها مو مريحه ..  عريس بغرفه جديده وفرشة  عرس قصروا ما صعدولي العروس

رشا: ابتسمت ... ابقى بهالمداهر وسوي الي براسك

يزن: لج بابا هاي كلها كلاوات ... وخرافات ..

رشا: بعض المواقف تخلينا نؤمن بالخرافات ونعتقد بيها ... لكن ماهي الا تشائم واقناع العقل  بحدوث الشر

قبل العرس تقريبا ب١٢ يوم .... مر عليه كالعاده ... حتى ياخذنا

اني وبيبيتي  ونور هم تبات يمنا لان رجلها مموجود ويوم الي يجي يروحون لبيتهم ... بهالفتره تعلمت على البيت واهله ...

بدينا نساعد غفران بالغدا ...  اجى يزن سأل نور ... احمد شوكت گلج اليوم يجي ...

نور: العصر لتگلي ... راح تطلعون ويا الولد ...

يزن: ابتسمت  طبعا متفقين من البارحه ... نلتم

نور: يزن والله مدنلحگ نشوفه يجيله يومين ... تكضون  اليوم ويا الولد لليل...دكعدويا مرتك جيبها وتعالوا يمنا  للبيت ... نسهر سوا

يزن : مرتي كدام عيني من الصبح لليل ... اخويه اسبوع يله اشوفه ...باجر نكضي يمكم بالبيت اليوم متواعدين ويا الولد ...

رشا: بقيت اباوعله بنظرات عتب ... هو يبتسم ... من شاف نور .. التهت ... عضلي شفته ودزلي بوسه بالهوا ... درت وجهي  اسولف ريا نور وغفران ....

يزن: طلعت اتصلت على احمد الو

احمد: الو

يزن: شلونك ...شوكت تجي ...اليوم عليها

احمد: هلو ... اليوم مراح اجي ... شو الولد بالدوام گالوا صار يومين انتبهوا اكو سياره .. تفتر يم المستشفى وضعها مو طبيعي ... فاتفقنا نبقى نبات بالمستشفى وباجر الفجر اجي

يزن: خو ماكو شي بقيت بالي

احمد: لا ان شاء الله ماكو شي ... لتقلق ... بس لتحجي لاحد ... گلهم عدهم حاله طارئه ...

يزن : ماشي ... ابقى طمني ...

احمد : ان شاء الله ... ماكو شي ... اتفق ويا الولد على باجر

يزن: ان شاء الله ....

سديت الخط بس بقيت قلق وبالي يم احمد ... قررت اطلع لبغداد ورا الغدا ... اروح اجيبه ....

رشا: قبل منصب الغدا صاحني يزن ... بغرفة خاله ... رحتله

نعم

يزن: تعالي ...

رشا: دخلت وگفت كباله لزم  وجهي ...

يزن: شبي الحلو

رشا: مابيه سلامتك ...

يزن: يولي شعندي غيرج ... انت النفس الي اتنفسه ... بس الولد ( ولد عمي واصدقائي) ما اشوفهم فتره ومن يجي احمد ... نغير جو وياهم هالكعدات متعلمين عليها من قبل ... فهالفتره د التقي بيهم .. لان من اسافر بعد ما اشوفهم اگابلج واكعد ...

رشا: يزوني ... اخاف مليت مني

يزن: عمي ما اطلع اليوم ... بليل .. بس اروح اجيب احمد ... ونسهر وياهم بيتهم...

رشا: ابتسمت .. لا روحوا تونسوا اليوم  وباجر تقضي ويايه

قرب وجهه من وجهي ...

يزن: اموت عليج وعلى هالشفايف ...

رشا: يهمس بأذني ... امل من روحي ومنج ما أمل

ورا الغدا  گلهم ... اتفقت ويا احمد امرله

صعد بدل ملابسه ... دخل للهول ... ديشرب چاي ... سألته شوكت تطلع

يزن هسه ... ان شاءالله

رشا:  دوگف خلي اقرالك الدعاء .... ( اول مره خليت القرآن على راسه وقريتله ادعية الحفظ من جان ويايه بالامارات وديرجع لعمان وانطيته قرآن صغير يخلي بمحفظته... ومنها بقيت يوميه اقراله الدعاء من موجود اخلي القرآن على راسه ومن لا اقرا بقلبي ) رحت اخذت قرآن من غفران ... وخليته على راسه

قريتله دعاء .. الحفظ والسفر ...

من وگف باسني من راسي وطلع

يزن: طلعت : لبغداد ... بنص الطريق اتصلت على احمد گتله اتحضر اجيت اخذك

احمد: شكو اجيت مو كتلك باجر اجي الفجر. ارجع

يزن: راح اوصل ... اتحضر

رشا: ورا كم ساعة ... المغرب ... سمعت خالتي  عاطت ولدي ...

ركضت ... ما اتذكر بس سمعت ... مضروبين وحالتهم خطره ...

بس اتذكر عطت وعياط البنات بأذني بعدها ما ادري بالدنيا

#نداء_القلب

الجزء الثامن عشر والاخير

اماسي الليل

حقوق النشر محفوظه

بعد٥ سنوات ....

خوله: وينج رشا ... مو الولد ديبچي ... فتحت باب الغرفه

ولج ماما ... انت ليش تعذبين روحج ... وتحبين القهر ... مو من اشوفج مطلعه صوره ... اموت قهر ...

الله يرحمه خلي مرتاح ليش تعذبي وتخلين باله يمج ... ترى الميت يحس ... بالناس الي يحبهم ...

تدرين هسه اتخيله ... يعرف انت ولدتي وديشوف القاسم وفرحان بي ... ترى الميت مرتاح ... لكن احنه الي نتعذب ....

كلنا على هالطريق ... كافي ماما حبيبتي ...

رشا: ( اشهك) من يوم الي توفى احس انكسرت ... وفقدته

ماكو رجال بالدنيا ... راح يحبني مثله ... ولا يخاف عليه مثله

خوله : ميخالف ... اترحميله احسن من هالبچي .... وهاج ابنج خطيه رضعي ...ترى راح يغفى جوعان

ترى الحاله الي انتِ بيها كآبه ما بعد الولاده ....تبقين تذكرين امور تقهر حتى تبچين وترتاحين ... اني هم راح اعوفج تذكرين ... بلكت ورا هالبچي ترتاحين ...

رشا: جيبي ارضعه من ينام انام ويا ....

اخذت ابني ..نيمته بصفي ارضعه ... اللعب بشعره ..

يوم الحادث

صحيت ... صارت غفران كدامي ... بلحظتها ما اتذكرت ...ثواني ... نزلت دموعي ... واحس نفسي ثگيل وجسمي ميشيلني ما اكدر احركه ... وقلبي مقبوض بتوسل واستنجد غفران شصار بيزن ... الله يخليج احجي ...

غفران: رشا ادعيله يزن دخلوا عمليات .. هو واحمد ....

رشا: من حلاة روحي اصيح بلا وعي احس اريد اأذي نفسي ما اعرف .... شلون اضرب وجهي ولا ادگ على رجلي ولا املخ بشعري كل هالامور ما سويتها لان مراح تطلع النار الي جوايه

احس جسمي فارغ مابي روح ... ولا عقل ... كل الي كدرت عليه حتى ارتاح ... سجدت ياربي رجعه الي ... ورجع احمد ويا ولتموت قلبه ..وتقهره على اخو

حسيت هالسجود ... امتص ألم وحسره قلبي ... بقيت ساجده وادعي بقلبي ودموعي تنزل بسكوت ... ياربي مثل ما خليته بطريقي ... خليني اكمل ويا لاخر يوم بحياتي ...اصعب شي هو الانتظار ...ونظرات القهر الي أشوفها بعين الكل

محد يكدر يصبر الثاني كلنا مبتلين ... كل واحد يعبر عن حزنه بطريقته خالتي تنوح وتعبر بالكلام واني وسجى دموع بسكته ... ونور تباوع على ابنها وتحجي ويا وياسين ومنتصر حالهم اصعب من حالنا لان ألمهم مكتوم .. بصفنه ووجه مطعون ... وترقب لساعات ودقايق حتى ينفتح حظر التجوال ببغداد ويطلعون

وصلت مرحله الانهيار لكن بسكته واحس بعد ماعندي طاقه لا ابچي ولا افكر ... اتمنيت اغمض عيني وتنتهي حياتي لحد هاللحظه وهو عايش ولا اسمع خبر موت ... غيابه خلاني اصرخ بداخلي بلا صوت وابچي بلا دموع ... قلبي موجوع وجع حرمان وخوف واشتياق ... اتمنيت اشوفه ولو لحظه

حبه بداخلي جان قوه ... خلتني اتمالك نفسي ... واروح على غفران اطلب منها سجاده وقرآن .... ردت مكان اختلي بي ويا رب العالمين ... صعدت لغرفتنا ... اول ما فتحت الباب ... عيوني مغشيه بالدموع حسيته موجود .. بملابسه الي مخليها على الفراش ... والفرشه مخربطه وساعته الي اخذناها سوا من الامارات مخليها على الميز الجانبي يم راسه ..

وميز التواليت مو مثل ما رتبته ... وين مجايه ايده مخلي عطر ... وفرچة شعره

وسبحته ونظاراته ... بداخلي احجي ويا يزوني شوكت ترجع والله اشتاقيتلك ما اتحمل غيابك ... ارجع حتى ارتب الفرشه وابقى اتذمر وانت أتخربطها ... راح تبقى مخربطه الى ان ترجع ... وملابسك مراح اصفطها انتظرك ترجع وتلبسها ... والميز خلي يبقى مبعثر ... ماطول ايدك بي ... تعلمت درس بغيابك ارضا بكلشي منك بس خليني اشوف ابتسامتك من تدخل عليه ... راضيه بعصبيتك وعكدت حاجبك راضيه بقفلاتك... وزعلك .. راضيه بنقنقتك وبغيرتك الزايده ....

يزوني اشتاقيت للخزره ... والنتر اشتاقيت لليولي

غمضت عيني ...وبداخلي اتخيله فتح الباب ودخل يضحك

يولي رتبي الغرفه ولتذمرين ... احجي ويا بقلبي لاما اذمر بس انت ارجع وخربطها لتبقيها على حالها ... فتحت سجادتي وگعدت اناجي ربي ... بشهكات ... وتعب وكلام متقطع بالگوه يطلع ...

صليت ودعيت اله ولاحمد ... وبقيت للصبح اقرآ سور ...لحد ما

حسيت براحه خلتني ابعد كل التشائم وبداخلي اتفائل بالخير ... اصبر نفسي ... وانتظر خبر ....ما ردت انزل ...

ما اريد اسمع ولا اشوف شي يخليني افقد الامل ....

للفجر صليت ونزلت ... الولد ... ديتحضرون يطلعون ... وياهم عمي وكرايبهم جان بينهم عمار (صديقهم وابن عمتهم ) دخل للمطبخ سلم ماعندي حجايه ويا بس سلام ... لكن فقدت الامل على حال الولد ( ياسين ومنتصر) مراح اعرف شي منهم ...لان راح يلتهون ...من ديطلع من المطبخ .. صحته عمار التفت

نعم ... الله يخليك طمني عنهم بأستمرار كل متعرف شي ... لان ما اكدر اطلب من الولد هالشي وهم بهالحاله ...

عمار: ان شاء الله ... اطمنج على رقم نور ...لتخافين بلغونا يزن

صح اصابته مؤذيه بس اتعدى مرحلة الخطر لكن احمد حالته خطره

رشا: من سمعت اتعدى الخطر ردت روحي وبنفس الوقت بقيت قلقه على احمد لان اذا يصير بي شي معناها يزن يتأذى وراه ...

قبل ليطلعون الزلم ... خالتي بقت تبچي تريد تروح وياهم ... عمي ماقبل

ورا عشر دقايق ... دخل ياسين يمنا اني ونور وسجى وغفران ... وعبير اخت يزن الچبيره ... ( ساكنه بغير محافظه)

ياسين : نور ورشا ... تحضروا بسرعة اتروحون ويانا

رشا: بسرعة لبست عباتي وشالي ... واخذت القرآن ... ويايه اقرا بي ... نور تركت حمودي يم غفران وسجى ...

من وصلنا .... الولد افتهموا .. احمد ... بالعنايه المركزه ... من الليل مستخرجين الطلقه بالبطن مخترقه المعده و يزن ... اصابته بالفقرات العجزيه ( اصابه جزئيه بالنخاع الشوكي) ووعنده كسر بالفخذ .. والساق )

بس طمنونا وضعه مستقر

خالتي جانت منهاره لان تحس بتأنيب الظمير ... لان عارضت موضوع السفر ... قلبي شكد جان ممرود انمرد عليها اكثر ... واسيتها وگتلها ... حتى لو قابله .. بالسفر راح يكون ورا زواجنا ... يعني هم ينصابون ... لتحملين نفسج ذنب هذا امر الله ... ادعي يرجعهم بالسلامه ... نور مثل حالي ماكو صوت بس دموع وندعي ... وننتظر ... خبر يرد روحنا ...

مرالوقت ... اجى ياسين علينا ... وجه الكلام لخاله گلها ... يزن صحى ... بس عنده مشاكل بالجزء السفلي ان شاء الله خير

من سمعت ... احس اريد اتنفس صدري ثگيل ميجر النفس من التعب .. والخوف .. وبداخلي .. الحمد لله رجعتلي ... وراح اشوفك من جديد ... الف الحمد لله والشكر على كلشي ...

شنو حالته ووضعه بس يشتم الهوا فضل ونعمه ...

خالتي صح فرحت ونور نفس الشي ... بس بقت اكو غصة وخوف على احمد ... ياسين طلب منها ياخذها اشوفه ... رادت تگوم

مكدرت لان تعبانه والهبطه والخوف والقلق اخذ حيلها ...

ساعدتها ... ياسين گلي ... هسه يطلعوا لغرفه .. عود اجي اخذج

اشوفي ... جاوبته ان شاء الله المهم هو سالم

نور سألته على احمد گلها بعده ...ينتظرون يمر وقت .. ان شاء الله متصير مضاعفات ... اذا مرت بسلامه ... يتعدى الخطر

ادعوله ...

راحت خالتي .. وياسين ... ورا عشر دقايق ... رجعت ويا منتصر ...گالت خلي نروح يم غرفة يزن نگعد ...

رحنا رحت افتح الباب احس قلبي راح يطلع ... ملهوفه على شوفته فتحت الباب لگيت عمي وعمار وياسين يمه بالغرفه شفت

وجهه تعبان وبعده دايخ ... الدموع غوشت عيني ...احس مو وكتها اريد اشوفه زين اشبع عيني منه واطمن قلبي عليه تقربت منه..وبداخلي احجي ويا امي وابويه ويا نور عيني ..الحمد لله من رجعتلي ... ربي يعلم اذا صار بيك شي تموت روحي وفرحتي وياك ... بوست راسه ولو وحدنا

جان بوست كل مكان بوجهه ... ممصدكه .. حس عليه من لزمت ايده ...بس بعده لسانه ثگيل ...بقيت شويه وطلعت .. من دخل الدكتور ... وراها طلعوا الولد والدكتور ... ياسين گال ادخلوا يمه

دخلنا اني وخاله ونور ... خاله بقت واگفه فوك راسه تبوس بي ...

وتتحمد على سلامته ... لحد ما بدا يحجي .. ويشوفنا زين .. سأل على احمد ... خاله گلتله بخير ..

نور تحمدتله بالسلامه وطلعت لان عرفتها متحملت وخافت تبچي ويحس ... خاله طلعت وراها بقينا وحدنا ...

هناحسيت كل القوه الي صبرت نفسي بيها كل هالوقت خلصت وكل الدموع الي نزلتها ... مو مثل هاللحظه ... فقدت ... حضنته وابچي بحضنه ..

لو تدري شصار بحالي من البارحه لليوم وشلون تحملت ... هسه رجعتلي روحي ... ابقى ويايه طول العمر ...لتعوفني .. خليني بحضنك ... ما اتحمل غيابك ... ولا اكدر اعيش بلياك

يزن: حبيبتي لتخافين مابيه شي ...ليضل بالج...

رشا: بوست كل مكان بوجهه وبداخلي ادعي يطلع احمد بالسلامه ونفرح بي يااللهي لتوجع قلبه بأخو ... ياربي

رحمتك مثل ما رجعته الي رجع اخو اله ولمرته ... ياللهي

ارحم بحاله ... ولتفجعه بعزيز قلبه ...

بقيت ويا ... لحد ما غفى ... طلعت ملكيت لا خاله ولا نور بس منتصر مدنگ راسه وعيونه حمر .. فزيت سألته ... على احمد ... گال ماكو شي ... بعده ... ونور وامي ..راحوا يم ابويه والولد ... ينتظرون ...

جريت حسره ميته قهر على منظر هالولد ... احس راسي راح ينفجر و دموعي مراح تنشف ...بقلبي اصرخ ... ربي رحمتك ... الطف بحالنا وبحاله ....لخاطر ابنه .. حتى ما لحك يشبع منه ... وخالتي تموت وراه ... ارحم بحالها... وبحال امه ... وبحال رجلي

انت اعلم الي بقلبه.. بعدها رجعت دخلت ... يم يزن ... لگيته بعده نايم ... والمغذي راح يخلص ... طلعت لمنتصر گتله صيح احد المغذي راح يخلص ... راح اجتي الممرضه ... ومنتصر ما رجع ... بقى بالي ...

طلعت للممر اخاف گاعد برا ماكو .. احد ... من الخوف والقلق والصداع احس راح اوگع من طولي ..

دخلت لگيت يزن گاعد ...سألني على خاله گتله قبل شويه جانت موجوده راحت اتشوف احمد وترجع ... ( هو يعرف احمد مابي شي ونايم بغير غرفه) وگفت بصفه لزمت ايده ...

يزن: ليش احمد مامر ...

رشا: لا

يزن: لعد اني حلمان ... اتخيلي من جنت مخدر دخل ويتشاقى گلي گوم يويل ... وصلني للبيت ...

رشا: لا قلبي حلمان ... (بقلبي) ... ان شاء الله صدك يرجع للبيت

يزن: شنو وضعه وين منصاب متعرفين

رشا: لا والله ما اعرف ... هو هسه بغير غرفه ... يمه خاله ونور ... ان شاء الله مابي غير العافيه

يزن: الحمد لله ...

رشا...يزوني ارجع نام قلبي( دا احسه ما مرتاح لو اكو ألم ... لو قلبه حس بأخو) بقيت اقرا على راسه .. الى ان غفى ....

وراها بشويه دخل ياسين وجهه فرحان ...

ياسين: الحمد لله احمد طلعوا ... ماكعد يزن

رشا: الف الحمد لله ... لا كعد ورجع نام ... احمد وضعه مستقر

ياسين: الحمد لله عدت على خير ... وضعه احسن من يزن

رشا: وگع قلبي ... ليش شبي يزن

ياسين: خلي نحجي برا ليروح يكعد

رشا: طلعت واحس جسمي كله يرجف ... ابو مصطفى خو ماكو شي بقيت بالي

ياسن: لا ان شاء الله ماكو شي ... بس لازم تعرفين وضعه ... يزن حاليا ميكدر يمشي

و يحتاج عملية زراعة بلاتين .... حتى بالمستقبل يكدر يمشي ...

ويرجع طبيعي

رشا: من سمعت عمليه ... رجعلي نفس الخوف والقلق ... وظاهر صدك دموعي مناويه تنشف ... اكو شي راد يحجي ويايه بس معرف .. يوصله ولا اني فهمته ... بوقتها ...

بعدها اجتي خاله ... هالمره بقى بالها يم يزن .. لان هواي ينام ... سألنا گالوا حتى ميحس بالالم ... دينطوا ابر مسكن ...

اترخصت من خاله اروح اشوف خالتي نور واحمد ... راح ويايه منتصر ... دخلت سلمت على احمد ... شكد تعبان ومابي حيل يحجي بس بعده ... على طبعه ... سألني على يزن ...گتله الحمد لله ... بقيت شويه ... ومن أترخصت ... اروح لان هسه يزن كعد ...

احمد: گليله احمد يگلك اليوم متفقين نسهر ... بس الحمد لله سهرتنا ماصارت ويا اهل الگبور ...

رشا: ابتسمت لا اسم الله عليكم ...

احمد : بوسيلياه ...

رشا: ان شاء الله يله اخذو راحتكم ... من دخلت للغرفه ... ولكيت يزن گاعد ... وصلتله رسالة احمد ... ابتسم بألم ... سألته يوجعك شي گلي شويه ...

من طلعت خاله راحت اتشوف احمد ... گتله احمد وصاني بوسيلياه ...طبعتها على خده ...

يزن : تعالي اكعدي بصفي ...

رشا: بقى لازم ايدي ... غمض بعده تعبان ... بديت احرك ايدي بشعره الى ان رجع نام ...

بهاليوم بقيت اني وخاله ونور وياسين ... بس عرفت عمي ومنتصر راح يبقون بيت ابن اخت خاله ...

ثاني يوم ... الظهر ... دخل الدكتور وياسين وعمي ... اني وخاله طلعنا ....

ورا ما طلع الدكتور طلعوا ... عمي گلي .. ادخلي ... يزن يريدج

دخلت ... ها يزوني

يزن: تعالي اكعدي

رشا: حسيت بي مغثوث وضايج ومقهور ... يزن شبيك اكو شي يأذيك

يزن:لا بس هسه عرفت اني ما اكدر امشي ولازم اسوي عملية ازرع بلاتين ... حتى اكدر امشي بالمستقبل ...

وعندي اصابه احتمال تأثر وميصير عدنا طفل ....

رشا: ادري من البارحه گلي ياسين ... لتهتم ولا تفكر خليها على الله ... الحمد لله من طلعت سالم ... ونفسك بالدنيا

يزن : حتى لا اظلمج ويايه فكري ... تتحملين وضعي وبالمستقبل يجوز ميصير عدنا اطفال ... تتقبلين هالوضع

رشا: دمعت عيني من شفته مهموم ... ويحجيها بحسره ... خليت عيني بعينه ... يزوني الله عليك تتخيل اكدر بلياك يوم واحد ...

اني ما صدكت الله رجعك الي ... تتوقع توگف بيناتنا رجلك لو طفل ... والله اشيلك بعيني طول العمر ... وان شاء الله ترجع تمشي مثل قبل ... والاطفال هاي بيد الله اذا ما كاتبلنا ...

لا اعتراض على حكمه ...

يزن: جريت نفس جنت محتاج اسمع منها هالحجي صح اعرف الرد من قبل ما احجي وياها ... بس شي بداخلي خلاني افتح وياها هالموضوع ... والحمد لله ارتاحيت

ابتسمت ياقمر ترى حجيت وياج حجاية التنگال ... ادري بيج متعوفيني ... لان لزگه

رشا: ضحكت ... اي والله لزكه وما اتخيل حياتي من غيرك ...

ومن غير هالضحكه ... اموت عليك ... الله يحفظك الي انت تكفيني عن العالم والاطفال والدنيا كلها ...

يزن: اكو شغله ثانيه حجيت ويا ابوج من اتصل عليه گتله وضعي ميسمح اسوي عرس ومحتاج رشا ويايه ... هالفتره ... اداريني ... وافق تبقين تباتين ويايه ...

رشا: براحتك ... الكل يعرفون موعد عرسنا ... والظرف الصار ...

ورا ايام ... رجعنا لتكريت ...احمد ... من صار زين وعرف بشغلة يزن ... حسيته بنظراته ميت قهر ... بس بقى ياخذه بالمداهر ويضحكه ... يگله هالفتره ... اذلك يويل ... اخذك يم الولد فنك تفتح حلگك وتگول يله خلي نرجع ... ابقيك تحوص الى ان اني اريد ارجع ارجعك ...امرك بيدي ... بعد

اشوف يزن يضحك ... وقوي ما متأثر لان الاشخاص الي يهتم الامرهم ... يشوفهم مساندي ... وماخذين الموضوع .. بسهوله

واني وحده منهم ... (اتفقوا ... بس الولد تتحسن صحتهم ويتحملون سفر نطلع لعمان ... يزن يسوي العمليه هناك )

اول يوم وصلنا لتكريت ... خلوا بغرفة خاله ... واحمد.. بغرفة (غفران ) .... خاله مقبلت يروح لبيتهم الا من يصير زين ...

بهاليوم ... الولد گلوله ليزن اذا تحتاج شي صيحلنا ... گلهم لا اخذوا راحتكم رشا يمي ...

خاله ... صاحتني .. گلتلي مو تستحين منه ... هو رجلج ... ومحتاج اداري هالفتره ...هو يستحي مني ومن اخوته ... بس انتِ مرته يمون ينكشف كدامج ...

گتلها خاله .. ارتاحي ... والله اداري بعيني ... لتشيلين هم ولا اتفكرين بيزن ... ارتاحت من كلامي ... اترخصت ورجعت يم يزن

ها قلبي ... مرتاح ..

يزن: الحمد لله ...

رشا: راح ادفيلك الغرفه اخاف بارده عليك حتى اغسلك

يزن : يله براحتج....

رشا: خليت خالتي تلزملي طاسه حتى نغسله شعره بعدها طلعت خالتي ... بمنشفه خليت صابون ومسحت المناطق الي مابيها ضمادات ...

وراها رجعت بمنشفه بيها مي دافي ..مسحت الصابون ...لبسته دشداشه

ونشفت شعره وخليتله عطر ... لزم ايدي بوسها ....

يزن: هسه ارتاحيت ...

رشا: قلبي خلي اودي الغراض وارجعلك ... حتى تاكل عندك دوا ...

يزن: نعست اريد انام ... ودي الغراض وتعالي ... يمي

رشا: بين ما وديت الغراض ... وسألت خاله على الاكل مصار ...

گلتلي شويه بعد ... رجعت لگيته غافي ...مثل الطفل من يسبح يرتاح ... وينام ...

تركته وطلعت ... الى ان صار موعد العلاج ... اخذت الاكل ورحت كعدته ...

يزوني كوم اكل حتى تاخذ الدوا ... ساعدته رفعت راسه

يزن: جنت مشتاقلها صح گبال عيني .. بس جان راسي ملتهي بالمرضه ووضع رجلي ...و شلون راح تتكيف رشا ... ويا وضعي كلامي وياها كله جاف ... ومابي اهتمام ... تقصدت

من البدايه اخليها هي الي اداريني ...حتى اذا ما كدرت تكمل ويايه انطيها حريتها بس اعرفها بداخلي ومتأكد راح تتكيف ويا الوضع واداريني ..ومتتخلى عني ... لان اعرف حالتنا تعدت الحب والعشق ..اعرف كم الحب الي بقلبها من نظره عينها ...

بالاخص ورا .. الحادث احسها تخاف عليه اكثر ...ودائما احسها على وضع رجلي تحمد الله لان رجعني الها وما اخذ امانته

دعسوقه مشتاقلج ... طلعي عقدة الطول هالفتره ... صرتي اطول مني ...

رشا: اي والله ذكرتني انتقم منك ... يا روح الدعسوقه اشتاقيت اسمع هالاسم

يزن: اخلص الاكل وتعالي نامي بصفي ... ارتاحي ...من الصبح كاعده ...

رشا: لا أفرش بالگاع اخاف اطخ جرحك ... برجلي من انام وااذيك ... گلي لا ... نامي يمي

خلص الاكل ... وديت الصينيه رحت سبحت لان حسيت نفسي هلكانه من التعب والنعاس ... وخفت لا يحتاج شي ... كلت اصحصح طلعت سويت جاي شربته ...ورجعت للغرفه يمه ... يزن: نعيما ... تعالي خلي راسج هنا .... اشرلي على صدره ... تمددت وخليت راسي على صدره ... بقى يلعب بشعري ويشتمه وبوس راسي ... رشاوي انت بت اوادم ... والله يحبني خلاج بدربي ...

رشا: انت هم ورده ولو الف الدنيا ما الگى اظافرك... ولا احد يحبني مثلك ...ما انسى الي سويته وشكد تعبت ووفيت ويايه لحد ما عقدنا ...الله يحفظك وترجع مثل الاول واحسن

يزن: انشاء الله ... بس اوگف على رجلي اسويلج عرس ....

رشا: ماكو داعي الكل عرف هو الغرض منه اشهار ... وهنا اهلنا

عرفوا الظرف ... لغى العرس ... واهلي يعرفون ... واخوتي اتقبلوا الوضع

يزن: كل اهلج متوقع اتصالهم لكن فيصل متوقعت راح يتصل....

رشا: قبل جان بسبب مثنى .... ومن اهلي ديسافرون رايح لابويه معتذر منه ومصالحهم ... وانت ويا مابينكم شي وصرت نسيبهم اكيد بهيج ظرف ... يسأل عليك ...

مرت الايام ... سافرنا لعمان ورا ما الولد وضعهم الصحي سمح بالسفر ....ويانا بيت احمد وبيت ياسين وخاله

بس منتصر بقى يم عمي ... علمود دوامه ...فتره ويسوله اقامه ..ويقدموله قبول بجامعه .... بعمان ...

بهالفتره يزن يستخدم كرسي ... من وصلنا للشقه ودخلته لغرفة النوم حسيته انقهر ...

يزن: سبحان الله متهنينا بموضوع ارتباطنا الخطبه والمهر نغص علينا ابن عمج واخوج ... ومن ردنا نسوي العرس طلعتلنا هالسالفه ...

رشا: لفيت ايدي على رگبته وبوست راسه ...يزن لتذمر قلبي.... دائما احمد الله حال احسن من حال...

ان شاء الله وضع مؤقت بين متسوي العمليه ... وراها ... ترجع تمشي ..وترتب كل امورنا ... اني قابله بهالوضع ....ووياك على الحلوه والمره ...

يزن: وهو اني شمصبرني ... ومهدي بالي غيرج ...

رشا: بهالايام جنت اتونس من يدخل احمد ونور يمنا للغرفه ... وياسين وغفران ... وخاله كلهم ينجمعون ... يبقى احمد يداهر يزن ..يغير نفسيته....من هالمرات بليل سمع يزن نتر بيه ..

هذا التلفون شو مطفي مو كتلج خلي على الشحن

رشا: والله نسيت اخلي ... جيبه

يزن: عوفي ...اذا ابقى اعتمد على فلان وعلان يطيح حظي

رشا: بهالفتره كلش اكتئب من كعدت البيت وحبسة الغرفه ...

هاي مرات الولد ... يطلعوا للهول ...

من ينقهر ويضوج يدور حجج عليه حتى ... ينفجر ...مرات انغث من كلامه ...بس بسرعة احس على نفسي ... وعلى وضعه احاول ..اصالحه واداهره ... حتى يفك)

:انت ليش تغثني بهالحجي ... وتحسسني اني مقصره وياك ... علمود الشحن

هسه اجيبلك توصاله وشاحنه خليها بصفك ... حتى لتعتمد عليه

انت اشحن...طلعت روحي كلشي ميرضيك ... ( حسيت على نفسي غيرت الموجه)

يزوني وضعيتك وعصبيتك على التلفون تخوف اخاف عندك( غمزتله )شي

يزن: شعندي مگابلج وكاعد ... وين شايف احد حتى يصير عندي

رشا: حتى ما اذبحك ... بس اتفكر ...

احمد: سمعته ينتر بالبنيه ... گتلها لنور .. امشي نكعد يمهم هذا ضايج وراح يطلع ضوجته عليها ... اول ما دخلت قلدت رشا يزوني شلون صرت

يزن: ههههه الحمد لله ... ها يويل تقلد على مرتي

احمد: يويل قبل متصير مرتك ...احنه حبايب .. جر عدل وياها ... رشاوي متزعل مني

رشا: ابتسمت لا ما ازعل ....

احمد: لعد شبيج ماعلمتي خالتج هالسوالف ... حمودي عيني قلبي ..هسه قبل احمد بيها مجال ... انوب من اتصيحلي ابو محمد .. احسها واحد من جماعتي

نور: هههه لعد غير عندك ولد اسميك بأسمه ...هاي فوگاها

يزن: رفعت حاجبي واباوع عليها واحجي) ...مو مرتي تراعي ظرفي تقشمرني بهالسوالف ...

اصبر عليها .... بس اوگف ... راح تنهد بيه

رشا: ابتسمت بقت بس نظرات بيناتنا ( عرف بالاول عصبت وبعدين بدلت حتى لينغث)

احمد: شو ساكته لو دزيتيله رساله مشفره .... ههههه

يزن: ابتسمت ) يويل عوفها لتلح وياها ...

نور: والله بت اختي ... فقيره متكدر عليكم ...ساعة الي تگبون

تفقدون ...

احمد: اسمع ترى هذا الحجي موجه الك ... بصيغة جمع

جر عدل ترى الاخبار بس توصل لخوله ..تخرب امورك

يزن: براحتها متكدر تتحملني ...خلي يدزون عليها ..وتروح

رشا: ليش بدر مني شي خلاك تحس مدا اتحملك ...

احمد: والله عمي انت ورده مال الله ... ولا هذا منو يتحمله ...

قنقينه .. ويتعيقل براسج انت منطيته وجه ومدللته

نور: انت اجيت تعلگها ... بينهم

احمد: ههه لعد بس هو يذبلي قنبله ويخليج تتخبلين ونختمها بعركه ... خلي يضوك ..

يزن: سمعت قبل يومين رايح ... ويا رجل ريام ... مطعم بي راقصه ... تدرين برجلج

نور:لا والله ما ادري ... يزن گول والله مدتشاقى

احمد: خليت ايدي على وجهي وضحكت ... الله لايوفقك ...شويه تسمع العيطه ... هاهيه صدكت ...

يزن: هههه هاي كرصة اذن حتى ...لتوصل يمي وتخرب بيني وبين مرتي ... ترى كذب

نور: اممممم هسه تبين اباوع لاحمد بنظرات

احمد : وداعت محمد كذاب .. امشي ...

رشا: بقيت مغثوثه من حجايته ... واحس قلبي يدك سريع ...

من سألته حسيت مقصره وياك ...ما رد ... والتهى ويا احمد .

تحتاج شي راح انام ....

يزن: لا سلامتج ... شو نايمه بعيد ...تعالي نامي على ايدي ...

رشا: هنا مرتاحه ....

يزن: حدر هين ياقمغ...

رشا: كمت بعصبيه...عوفني خليني براحتي ترى والله انام بالهول ... مو كلشي على مزاجك ساعه ...خلي يدزون عليها وتروح ....وساعة نامي على ايدي ...

يزن: اويلي يابه كويلات القمر ... طلعت ... منو يخليج تروحين

اكسر رجلج غير ....

رشا: واني مگتلك اريد اروح حتى تكسر رجلي انت الي گلت ...

واذا تريد اروح باجر ... اخليهم يطلعولي فيزا واروح ... حتى ترتاح مني ( خزرني )

يزن: نصي صوتج شو مستگويه ... ترى مباقي طول العمر بهالحال ...انتبهي ...

رشا: عفته وتمددت على القنفه الي بالغرفه ..جنت محتاجه ابچي ... على كل لحظه حلوه اتمنيتها ومصارت ... على اهلي الي سافروا وبعيدين عني ... على عرسي الخرب ... وتزوجت بدون زفه ... على رجلي ووضعه الصحي ... ونفسيته تعبانه

لان ممتقربلي .. ويتحسس من وضعه ويايه وقلقه من ورا العمليه ...يطلعها عليه بالعصبيه .

يزن: خليت ايدي ورا راسي ... جريت حسره ..البنيه الي كتلت روحي عليها حتى تصير الي ... ومن صارت وانجمعنا بغرفه ... ما اتهنيت بيها ...بعدها صغيره وسالفة علاجي ... اطول اكثر من سنه ... خايف لا متتحمل ..حياتها ويايه ..واظلمها ...

من حجيت كدام نور .. براحتها اذا يريدون يدزون عليها خلي تروح

ردت انطيها فرصه أ تفكر ... اذا ما مرتاحه ...ترجع لاهلها ...

لو ننفصل لو تنتظرني الى ان اتحسن ...

بس من سمعتها دتبچي ... عرفت مقهوره مني ... قلبي انقبض اتمنيت اكدر امشي واروح اشيلها واصالحها ...

يزن: رشاوي اتجيبيلي مي لو اصيح احد ...

رشا: مسحت ادموعي ... مباوعت بوجهه هسه اجيبلك

يزن: تعالي جذب ما اريد ... اريدج انتِ ....

رشا: رحت تمددت خليت راسي على صدره ...سمعت دكات قلبه ... سريعه ... لف تك ايده وحضني ...

يزن: كزكزت عليها...اريد ادخلها بنص قلبي) ... وحق الله ...

ما اكدر بلياج بس ادلل براسج ...لان ادري انت الوحيده الي تتحملني ...

رشا: اني هم ما اكدر بلياك ..ومرتاحه لهذا الوضع ماطول

انت ويايه بنفس المكان وتالي الليل ...انام على ايدك ... مرتاح بالي .. الله جمعنا سوا .. وما انحرمت منك ..

اجى موعد العمليه ... شكد جانت الايام ذيج صعبه هاي اصعب ...هو تعب واني هم تعبت من القلق ... والتفكير ... كرهت شي اسمه مستشفى وغرفة عمليات ... الى ان طلع من العمليه اني متشاهده ...و الالم الي تحمله ورا العمليه ( زراعة البلاتين) بحياتي ما انسى نظراته من يلوب متأذي.. يكتم الالم اكن يبين على وجهه بتعب وينطعن ... جنت اگابله واكعد ابچي ... مابيدي شي يهون عليه ... ولازم يبقى البلاتين بجسمه فوگ السنه ... بالاخص جان شتا والبرد يأذي ....

ادخل عليه الگاه لازم وجهه ... تعبان

ها قلبي ديأذيك

يزن: رشا راح اموت ....

رشا: فتحت التدفئه وجبت بطانيه اضافيه ... غطيته ودخلت بصفه اللعب بشعره ... من اشوفه يتألم احس الم ووجع بجسمي .. احاول الهي ..ابقى اسولف واتشاقى ويا

اتحمل قلبي ... ان شاء الله فتره وتعدي وترجع توگف على حيلك

وتشيلني مثل قبل ... ومن امشي وياك احسك مظلل عليه ...

ان شاء الله من اتصير زين نروح للبحر الميت وحدنا..

يزن: فركيلي جسمي ... حتى يخف الالم ... وانام ...

رشا: ورا ربع ساعة لگيته نايم ...

مرت هالاشهر بمرحلتين المرحله الاولى ألم وتكيف جسمه ويا البلاتين ... والمرحله الثانيه الألم والعلاج الطبيعي ... حتى يبدي يوگف على رجله ... ويساعدون الساق تتحمل ثقل الجسم

مر بمعاناة وكم مره ميتحمل الالم ويگول ... ما اريد امشي خلي يشيلولي البلاتين بعد ما اتحمل ألم تعبت .. واكثر من مره ...احس بي تنزل دموعه ... من الالم ويكابر لكن بعدين ... تعلم على الالم ... وبقى صابر الى ان بدا يوگف .. ويخطي ... (احنه بهالفتره قدمنا يو ان ويا بيت احمد ... بس بيت ياسين وخاله ومنتصر يبقون بعمان) ...الولد اخوته ساعدوا ..بعد جلسة العلاج الطبيعي ... يبقون يمشوا بالبيت .. حتى تتحرك المفاصل ومتتيبس ... درجة اصابته ( بالنخاع الشوكي والفقرات العجزيه... جزئي يحس ويتحرك لكن اصابة كسر الفخذ وعملية البلاتين ... اخذت وقت حتى يكدر يمشي ... ) بالفتره الي بدا يخطي بيها ...حاول يتقربلي ...ويمنعه احساسه بالالم ...لان هو حتى كعده ميكدر يگعد الا على مخده طبيه مخصصه للي عدهم مشاكل بالفقرات العجزيه ...ومساند للظهر ...

مر كم شهر ... وبدا وضعه يتحسن وتخف ألامه بالتدريج بدا يمشي بالعكازات ... فد يوم نايمين الصبح ... گعدت سمعته دياخذ موعد ..عند الدكتور ...

صباح الخير

يزن: صباح النور ...

رشا: عندك مراجعه اليوم .....

يزن: اي يم دكتور ... حضنتها .... وهمست بأذنها ... احتمال

من ارجع ... احجز ونروح للبحر الميت فد ٤ ايام ...

رشا: التفتت اليوم... التقت نظراتنا فهمت ... الي قصده

يزن: اي اليوم ...رتبي امورج ... وتحضرلي يا قمر

رشا: للعصر طلعنا ... وصلنا للبحر الميت ... حاجز غرفه بطابق الارضي .. بس نفتح الباب اطل ... على مسبح صغير ... مال اطفال ...

تم زواجنا... بالليل طلعنا كعدنا برا الغرفه ...

يزن: بقت بس شغلة الاطفال ... لحد اليوم ... نسبة يصير عندي طفل كلش ضعيفه ... محتاج عمليه بالمستقبل ...

رشا: كافي الله يخليك عمليات قلبي بعد ميتحمل ... خلينا راضين بحكم الله والي كاتبه نشوفه ...

يعني اذا مصار شنو بأدينا ... الله ما كاتبلنا ... يزن فدوه كافي تفكر بأمور ... لا انت ولا اني نكدر نغيرها ... ترى الايام دتمر واحنه معايشيها كلها قهر وألم ... ما صدكت وضعك وصحتك تحسنت طلعتلي بسالفة الاطفال ....

بداعتي ... لتخليها بالك اذا عليه والله اني قانعه وراضيه بقسمتي المهم عندي انت ويايه

يزن: الله كريم ... هسه منحس تمر كم سنه ... نتمنى طفل ..لهذا السبب ما اريد اهمل نفسي وابقى اتابع ... وشوكت ما صحتي تسمح اسوي العمليه ...

رشا: الله كريم ... ابتسم بوجهي

يزن: يا قمر ليالي التكريتي شكد صبرتي عليه وتحملتيني ...

رشا: يزوني لو تدري الي بقلبي الك مجان حجيت هالحجي

يزن: احب هالنظره.... وصاحبتها ... ملوعه قلبي... مخليتني ضعيف كدامها ...

رشا: رجعت حياتنا بهالفتره طبيعيه ... ورجعنا نطلع ... للمول وللسينما وللمطاعم ... وعوضني عن كل الاشهر الفاتت ...

*بسبب حادث احمد ويزن ... وتقارير الطبيه مال يزن ... مشت شغلة اليو ان وحددولنا موعد سفر ...

هنا مرت تقريبا ٣.٥ سنه من اول ما التقينا ...

الوداع جان صعب ... لكن الولد جانو محتاجين يبدون حياة جديده ... وينسون الي صار ... واحمد يرجع يمارس اختصاصه بعد ما يدرس هناك .... يزن رجع يمشي طبيعي ... اهلي ومهيمن كاعدين بغير ولايه بس دائما يجون او احنا نروحلهم ... والدي توفى .... بعد وصولنا ب كم شهر ... جانت كسره بالنسبه الي ... احس فقدت جزء من حياتي وقلبي ...يزن ورا فتره سوى عمليه ...

لكن مصار عدنا طفل ... بقت حياتنا ... طبيعيه بيها الحب وبيها المشاكل ... بس هو طبعه يفور ...ورا شويه يهدء

من اول مشكله رفع ايده عليه بس مضربني ... گلي لتوگفين بوجهي من اني عصبي ... ولاتراددين ... عندج شي من اهدء احجي لان اذا اضربج مره مرتين ... تاخذ ايدي ... فأخذي كلامي ... منها تعلمت من يصير عصبي ... ما اتواجد ويا بنفس المكان .. اكذب اذا اگول اسكت لا ..اذب حجي بس من اشوف الشغله كبرت وراح يفقد ... اسكت ...واقفل الباب على نفسي ...

الاغلب يطلع يروح لبيت احمد ... ويرجع ولا كأنه صاير شي قلبه طيب .. ومن ابقى زعلانه منه يجبرني نتصالح ... بالعصبيه .. يبقى عصبي ويتحجج .. عليه بس ارجع احجي ويا ..يرجع يبتسم ويضحك .... ونستنا ولهونا ويا بيت احمد ... وجهالهم ... صار عدهم ٢ولد وبنيه ...

كلش حلوه بيضه ودبدوبه تشبه بيبيتي ... يزن يموت عليها ... مرات على غفله يطلع ورا شويه يرجع جايبها ويا ... يخليها على بطنه يحجي وياها عمو ...ابوج ملتهي بشغل اني كاعدلج ركبه ونص ... اكتم على نفسج ...ومره ديلعب وياها بالغرفه ... اسمعه يصيح يروحلج فدوه ببه فهمت گلتله بَبَه... اول مينطق الطفل ...جنت بالمطبخ

صاحني يضحك تعالي

يزن: اسمعيها ...تگلي بابا ...

رشا: بت خالتي لوكيه ... مغزر بيها الشيل .... هههه ... عضلي شفته

يزن: احب خيريه( بيبيتي ) وبناتها( امي وخالتي) واموت على حفيداتها ( اني ودانه بت خالتي نور )

تعالي بصفنا ...

رشا: تمددت بصفه ودانه بيناتنا

يزن: رشا حلو طفل ينام بنصنا ... جريت نفس بحسره

رشا: هي هاي بتك ... بعد شتريد هسه اذا تخابر نور تگلها راح

ناخذها تتبرع بيها

يزن: اليوم ما ارجعها انيمكم على ايدي ...

رشا: للمغرب اجى عليها احمد ... هم ميكدر بلياها

هلو

رشا : هلو

احمد : جيت اخذ القمر اشتاقيتلها الحقيره مكانها خالي

رشا: ( يزن سماها قمر ومشت) ادخل بالهول ...

من دخل شافت ابوها ضحكت ... گلها تعالي ... بسرعة لفت وجهه وختلت بحضن يزن

من بقت بحضن يزن ومقبلت تروح لابوها ... حسيته فرح ..

بداخلي انقهرت علي ... دعيت ياربي ارزقنا بطفل ..لتخليها بنفسه ... مهما يكون ذولي مو جهاله حتى لو يحبهم ميعوضوا

يزن: روح اليوم تبات يمنا

احمد: يويل ما اكدر بلياها

يزن : اذا قبلت تروح اخذها واذا لا. تعالوا باتو يمنا ...

وصدك خلاهم يباتون ونيمها على ايده للصبح ...

ومره زعل مني ... وبقى كم يوم ميحجي ويايه ... وميجيبها يمنا للبيت ... لان عدنا فازه ..كل شويه تروح عليها ... خفت لتنكسر وتجرحها ..ردت اعلمها ... لزمت ايدها ضربتها خفيف گتلها بو هي الفطيره تضحك ... واني مخنزره عليها ... شلت الفازه صعدتها ... ثاري هو واگف ديشوف الي سويته ....

عاط بيه ليش ضربتيها علمود الفازه ... لزم الفازه فلشها بالگاع ...واخذ دنو ... وطلع ... للمغرب يله رجع ...فات ذبله حجايه

يزن: اخاف تغارين منها بعد ما اجيبها ... ارتاحي

رشا: انصدمت شلون مخلي باله هيج فكره ... رحت ورا للغرفه

گتله انت دتحجي صدك لو تريد تغثني ... هاي بت خالتي وبت اختي .. انت تعرف شكد احب امها معزتها مثل خواتي ... يعني بتها بنتي ...واني شايفه امها هيج اتعلمها

فسويت مثلها خفت عليها .. بس ما ادري بيك ... هيج لئيم ومتحيز .. بيومها انقهرت من عنده ...

دخلت للغرفه الثانيه ... نمت بيها ... بقى كم يوم قافل ...اني هم بزعته ما التقي بي .. على كد اطلع اسويله اكل اخلي وادخل ...

هو يضوج ... يطلع اعرف يروح يشوفها ...اتصلت على نور گتلها يزن يمكم گالت اي ... ليش متدرين گتلها لا من ورا بنتج ضربتها على ايدها ميحجي ويايه ... گلتلي ولج ترى هم هيج نحسين على جهالهم ... اني هم احمد ويزن اكثر من مره يحجون عليه من اضرب واحد من جهالي .. احمد يتخبل .. وهم يزعل ...

يحسسني اني مرت ابوهم هههه

اگلج راح اجي كأنه لا انت تدرين ولا اني ادري هو موجود ... اريد اضرب دنو كدامه ... احرگ قلبه

بدلت ورحت ... لگيته بالهول متمدد ويمه الجهال ... وضرتي بحضنه

رحت يمه اخذها ... مقبل گلي عوفيها ...مديت ايدي لزمها

مبتسم ...حس بالي شي ... جريتها منه ... خليتها تضحك (دنو )وضربتها على خدها .. برطمت تريد تبچي ... انطيتها اله هسه رضيها... المهم حرگت قلبك ... لزم ايدي مبتسم ويعصرها حيل ...يولي ثاريج مخبله ...

اخ عوف ايدي اريد اروح ...

يزن: دبقي شويه ... حتى نرجع سوا ...

رشا: ما اريد ارجع وياك ... خليك ويا بنتك ...

شالها كعدها ...يحجي وياها

يزن: عمو راح اخذ بت خالتج اصالحها ... وارجعلج ...

رشا: ( كامت تبجي عليه) گتله ما اريدك اتصالحني ... ابقى يمها اصلا مرتاحه منك ( ابتسم)

يزن: دمشي كدامي ...رشا: نور ... راح ناخذ ضرتي ويانا ...اموتها كتل

يزن: شحدج

نور: اخذوها خلصوني منها

رشا: ورا ها بأشهر بعد ما شلنا فكره الطفل وصارت دنو بتنا ...

تعرفت على بنيه حامل صارت صديقتي ... وكلش داريتها فتره الحمل لان احبها وفرحانه الها ... وهي البنيه هم ... ابد ماعدها ... انانيه او خوف مني كحسد او عين لان ماعدنا اطفال ... بالعكس جانت اتشوفني السونرات ... ومشاركتني فرحتها صارت مثل اختي ...من قرب موعد ولادتها گلتلي رشا والله يگولون المره بالطلق دعائها مستجاب والله الا ادعيلج الله يرزقج بطفل ... من كل قلبي ...

قب ل ولادتها بأيام جنت يمها ... وهي دتحجي ويا اختها بالتلفون سلمت على اختها ... متدري التلفون سبيكر سألت زينه رشا عدها اطفال

زينه جاوبتها ... هي تسمعج ...

گتلها لا والله جانت اكو مشكله .. وتعالج منها ... وهاي صارلنا

سنتين وشويه مصار ... واني احجي وياها دموعي نزلت ... جان رمضان بوقتها

البنيه گلتلي ... والله اني عندي حدس ... هسه اجى بالي ... يصير عندج ولد ... ومن اليوم والله يوميه ادعيلج ... بصلاتي وقبل اذان الافطار گتلها الله يسمع منج بس بداخلي مجرد كلام ما تأملت بي

ورا ما ولدت زينه ... بقيت اداريها ويزن تعرف على رجلها وگاموا يجونا واحنه نروحلهم ...شهر ونص ورا كلام اختها وولاده البنيه ... گتله يزن اريد اروح اسوي تحليل .... تخبل ... ممصدك

گلي متأكده ممخربطه گتله لا ... ورا شويه طلع جابلي تحليل حمل ... سويته بس ما متأكده من النتيجه .. شفتها حمل ... سألني يزن ها ... گتله ما اعرف خلي اشوفه لنور طلعنا لبيت نور شوفته الها گلتلي ولج حامل .... يزن طار من الفرح ... وعلى فرحته حسيت احمد هم طاير .. وگلي ... باجر اني اخذج

ويايه للمستشفى ... سوي تحليل دم ... وتچييك مال حمل .. كل شهر ... بيومها رحت لزينه گتلها خابري اختج گليلها طلعت حامل صدك

منها بدت رحلة حملي ... وامي اجتي يمي ورا شهرين تقريبا يزن اشتغل بشركه تعلم لغه ودخل دوره حاسوب وبرمجه ...

هالمره زينه ونور هم الي داروني ... حتى اكل يطبخون ويدزولي ... يزن صارت عنده حاله قلق ...يريد هالطفل يجي بأي طريقه حتى لو يعرف يدگني ببسامير حتى ما اتحرك

تغير...بقى يحافظ على نظافة البيت لان يشوف امي تشتغل يستحي منها ... فگام من يريد شي اكله حلويات معجنات يحجي لخالتي نور يمون عليها حتى مرات يوديلها ملابسنا تغسلها ... هي واحمد مقصروا ... فرحانين مثل لو الطفل الهم ... ولدت ... ولد سميته القاسم ... يزن جان ويايه طول وقت الولاده الى ان طلعوا الطفل ...حسيته مرتبك ... مامستوعب هالطفل النا ... بقى لتالي اليل ... يصفن عليه وهو بفراشه

وراها بفتره ... صارت بيناتنا مشكله ...

__________________________________________________

رشا: حسيت على صوت بأذني وهو بصفي

يزن: حبيبتي ليش منيمه الولد بصفج ليروح يختنگ ...

رشا: ما ادري جنت ارضعه وغفيت ...

يزن: بعدج زعلانه ...

رشا: على شنو ازعل ... عادي تعلمت على طبعك

يزن: عفيه ...وتعلمتي الخبالات ...هم ... وحاجيه عليه ... بحيث خوله بسمرتني بصوره غير مباشره ... (الله يرحمه ابوها جان شكد يحبها ماكو مثل الاب ) ... على اساس بتها فقيره واني الظالم

رشا: .محجيت شي

بس شافتني اتفرج بصور ابويه ... لا انت جبرتني اعلي صوتي

يزن: غمزتلها لا والله استگويتي ... امج موجوده ... وتدرين استحي منها ...

عاد البارحه خليتيني افقد و ابيع المستحى

رشا: انت منتبه على نفسك ملتهي الاسبوع كله شغل .. ونهاية الاسبوع تگضي ويا احمد والولد ... من يوم الي ولدت متدري بيه

يزن: غير عبالي من اطلع انطيج فرصه ترتاحين ... متلتزمين بيه

وثانيا حتى لو اگابلج مراح تستفادين مني كلشي ما اعرف عن حديث الولاده ... لو يصير بكد دنو .. اول ما بديت اللعبها ...بيها مجال اشيله اطلعه افتر بي ... بس بعده صغير واخاف عليه ما اعرف اشيله ...

رشا: واني متفكر بيه ... متحس اضوج ومتعلمه عليك .... فجأه

انت بجهه واني بجهه ... شكد متغير ويايه راح ذاك الحب

يزن: اويلي يابه القمر اليوم ... يعتب ... الحب صار بالقلب والافعال مو بالكلام ...

قبل احجي لان ماعندي شي غير الحجي يثبت حبي الج .. .. بس هسه انتِ مرتي ام ابني ... وصار كم سنه عايشين على الحلوه والمره .. هذا اكبر اثبات على الحب .

رشا: هاي انت تقتنع بهالحجي اني ... ما اقتنع اذا ما اسمع حجايه حلوه منك ... تحسسني بعدك تحبني..... ولتگلي اني وين افكر وانتِ وين تفكرين ... حفظتها ...

يزن: ههههههه صايره گويه ....يا قمر ليالي التكريتي ... اموت عليج .

انتهت قصة يزن ورشا....لكن الحب الصادق النقي

يبقى.. بالگلب.. طول العمر

والافعال تأكده مو بالكلام

يابتكوني ...لألي.....يالغيري....مابتكوني

تصويت على القصه لو اعجبتك