تحميل رواية «نبض دافي» PDF

نبض _ دافي

Nabà _ Baqer

الجزء الرابع عشر.....

_____________________________

   كيف نصبر ؟

_ مثلما نصوم تماماً .. متأكدين ان أذان المغرب.    سيأتي..

_______________________________

بوستهن وضيفتهن وكعدت وهنه كصني كص سونار ماشالله عليهن مو عيون شوكت ما ارفع راسي الكاهن مركزات بيه... ماتحملت خليت وطلعت وعفت امي منطلقه بالكلام وياهن عبالك تعرفهن من سنين..

رحت لغرفتي وبعد ماطلعت ...

لحد ما راحوا اجتني امي للغرفه وهي فرحانه

دكول خوش ناس وحابتهم ومرتاحه لامه

ادري ماما انتي القبلهم هم حجيتي نفس الشي

وسويتيهم انبياء الله بأرضه وماكوا منهم..

وشفتي شلون طلعوا... وشنو سواو

ميخالف بنيتي بس اني كلبي يكلي هالمره راح تنسعدين امه واخواته حبابات ولسانهن حلو

انشالله اذا هاي القسمه تسعدج اريد من الله يتممها...

بيني وبين نفسي جنت ادعي العكس

ياربي كون ماتم وابقه طول عمري بدون زواج يارب

بس بعدين اذكرت شغله !!!!

اكول ماما شو من حجيهم مبين همه مو منا يعني

موبغداديين. ؟؟؟

اي يمه همه أصلهم عماره بس شغلهم هنا ومنتقلين

لان يشتغلون بالبانزين والنفط وعدهم بانزين خانه (محطة تعبئة وقود ) وهمه كلهم يشتغلون بيها...

زين لعد ليش عريس الغفلة مايشتغل وياهم؟؟

والله يمه العرفته الولد مايكدر لان مدري عنده حساسيه بالقصبات مدري كالت ربو ومايتحمل ريحة البانزين....

بس شنو يايمه طارن بيج من شافنج وامه كلساع وكالت حبيتها وخشت قلبي ونشالله اصير من نصيبنا

وبقن بس يسألون وبعدها يجي الولد وشوفينه ويشوفج وانشالله اذا جانت قسمتج فتكمل على خير ..

اي مواني الدوري العراقي حتى نشالله اصير من نصيبهم  ... والله يالله  يحجون الواحد كوه...

عدن كم يوم والموضوع سكته واني فرحانه

لان خلصت و الحمدلله شويه شويه بديت ارمم نفسي من جديد وارجع مثل قبل ..

وخصوصاً مرض سوسن كلش فادني لان الشغل كله صار علي اضافه للطبخ والعجن والخبز فالنهار كله اخلصه شغل وبالليل اذب نفسي شهيده بالفراش

بدون تفكير ودموع وحزن..

يعني اطبق المثل الي يكول

(مصائب قوم عند قوم فوائد )

لا خطيه الله يكومها بالسلامه وتجينه بنوته حلوه

لان كلش داتتأذه وهي بعدها بأسبوعها الخامس ....

لليل اجه مهيمن كالب الخلقه ومايتحاجه بس يصيح

ويرزل حتى ابنه ما سلم منه هم أخذ المقسوم ونام ودمعته على خده خطيه..

مافهمنه شبيه ولو هو موجديده هاي بس يعني لازم اكو سبب..

وهالمره كلنا نريد نعرف السبب...

امي حاجته كلها بعدين

بس جان يسأل عن ابوي ..

شويه واجه ابوي من الكاظمية جان رايح ويه جماعته بالمنطقه رياجيل كبار ما عدهم شغل وعمل كلهم تقاعد

فمخلصينها مزارات وتسيورات وكعدات بالكهاوي الشعبيه اللي موجوده بمنطقتنه برأس الشارع فيروح يخلص العصريه وياهم...

المهم رجع الوالد صبينه العشه وتعشينه

وشربوا جايهم وشويه ودخلوا للاستقبال وسدوا الباب

اني هنا الدوده شتغلت بقيت رايحه راجعه اريد بس اسمعلي كلمه...

الفضول دمرني

اريد اعرف شنو عدهم حتى يسون اجتماع مغلق

مرت ربع ساعه وعدت النص ساعه وراحت الساعه

وهمه ماكوا وكأن الإستقبال بلعتهم...

هناا الفار كام يلعب بعبي على كولة المصرين

صرت اجيبها منا واوديها منا ...

وكلبي كرصني وتسلل الخوف الي من سمعت صوتهم بده يعلى وخصوصاً من اجه اسمي بالنص ...

عرفت  السالفه بيها اني ...

صرت ارجف واردد

{وجعلنا من بين أيديهم سداً ومن خلفهم سدا فأغشيناهم وهم لا يبصرون  } ...

ومتت خوف مع اني مامسويه اي شي حتى الشارع

مشايفته بس الخوف بهذل احوالي ...

لحد ما طلعوا وكلمن راح لغرفته واني عبالك وحده عدها ولاده يارايحه ياراجعه...

مهيمن راح لغرفته ينام وامي هماتين راحت وره ابوي وطفوا ضوا غرفتهم والبيت صار صنطه وكلها نامت

إلا اني النوم جافاني...

شيصبرني لباجر حتى اعرف شنو السالفه..

والله وصلت لمرحله صرت امشي واغني

(شيجيب باجر واصبر شلون ) ...

بألف يا علي ياله نمت وثاني يوم من غبشه

كعدت ريكتهم وطلعوا لاشغالهم واني ماكوا

سالفه ابالي بس اجتماع البارحه...

امي وضعها ماعاجبني شكلها مهموم

وحتى ابوي شكله مانايم وحتى مو مثل كل يوم

يسولف ويحاول يضحكني ويغير علي جو

ماكو اليوم اكل لكمتين وطلع لشغله

ومهيمن خوب هذا من الله معصب وميتحاجه

يمكن امي جايبته بعركة  لو بوقت تأخير الرواتب

لان هذن الوقتين

الواحد يعصب ويصير مايتحاجه...

بقيت النهار كله اني اشتغل وعيني

على امي اريدها تحجي ماكوا

والمشكله كلبي حاسسني اكوا شي !!!

بس شنو هذا الشي الله اعلم وأمي تعلم 

بس شون اخلي نفسي هم تعلم هاي اللي يرادلها

مخمخه وتفكير...

لهذا فكرت بخطه جهنميه بس تنفيذها

يتوقف على سرعتي بأكمال اعمالي الشاقه

فشسويت بسرعه.. بسرعه كملت كل الشغل وطفيت الطباخ

جوه الجدوره ورحت سويت ماعون فاكهه وعصير

طبيعي رتبتهن بصينيه وحطيت ماعون كيك وكاسة

كرزات مشكل

وسويتها صينية كعدة نسوان وغيبه ونميمه مرتبه

ورحت لسوسن لغرفتها...

لان اكيد هي تعرف لان اخوي الأستاذ روميو شكد

ماهو حقنه وماينبلع بس يحبها لمرته ومايضم عليها

شي ...لهذا فكرت اعرف السالفه من المصدر المقرب

للمصدر الرئيسي...

شلوني ولا اشطر صحفيه بال CNN

متخطط لرصد الأخبار مثلي...

المهم دكيت الباب ودخلت

شفت ام السوس نايمه وكفشتها واصله لتكريت

وفاتحه ال TV على قناة دينيه ..

تره كلش متلوكلج الديانه..

على ساس تلوكلج تعاي هاي شنو يعيني .. يعيني

نمنميات وكذا وذاكرتني بعد ... خيرج شو ما ارتاحيتلج

مو صوجج صوجي اني الكملت شغلي وكلت اجي يمها

اونسها شويه إبدال مباقيه لوحدها..

اكوم اكعد يم امي احسن ..

لا ولج تعاي اشاقه شبيج بسرعه صدكتي..

تعاي اجيتي بوقتج لأن جعت ..

هو انتي ياوقت ماجوعانه.. عوزج بس تاكليني ترا خوش بيه لحم والله ..

عوووع لعبتي نفسي  عابتلج  .. اكلج الجهال وين

شو مالهم صوت ..

جهال !!!!!!

لا حبي كولي الشواذي السعالوه الملايجه مو الجهال 

المهم الجبير الغبير كاعد يلون بالاصباغ اليوم صاير

دافنشي.. والثاني كالعاده بحظن البيبي الحنونه...

عوفج من الجهال وكليلي شبيه رجلج من البارحه لليوم

عالن الاستنفار علينه ومدخلنه بحالة تأهب قصوى ...

هممممم  كولي هيج من البدايه  يعني هاي الصينيه

موحباً بيه .. مسويتها حتى ترشيني واكلج السالفه...

ايون يحبي وبعدين شنو انتي وجبة كنتاكي لو بطل ببسي حتى حباً بيج ترا ماخذه بروحج مقلب والله

المهم غردي عزيزتي واطربيني شنو من

مصيبه منتظرتني...

اممم اكلج بس ماظوجين ولا دخلين بحالة اكتأب

مثل عادتج...

الله يستر ..  احجي بالله

الناس الي اجو عليج قبل فتره جاين وسألين

بالمنطقه و واحد ناقص غيره

كايللهم انتي مطلقه ووو

وشنو احجي شبيج كمتي تمتمتين...

نبض فدوه لا ضوجين بس حاجين عنج حجي موخوش وصديق مهيمن خابر ومعتذر عن الخطبه..

بس فدوه موضوجين..ولا تقهرين نفسج

هاي الناس ماعدها بس القيل والقال...

ماحجيت شي اكتفيت بالسكوت هو الوحيد الي

يكدر يعبر عن احساسي هسه...

ابد ماضجت لان ما تم الموضوع لان اني اكيد مجنت

حوافق..

بس القهرني سمعتي اللي صارت بالارض ...

من بعد هذا اليوم رجعت لعزلتي والسكوت صار هو

عنوان حياتي ...

شكد ما احاول انسه او اكمل حياتي بشكل عادي

وارجع نبض القديمه الي تضحك وتحشش..

ما انجح ليش لان

لازم اصير اشياء نغص علي ...

وترجعني للمربع الأول...

امي خطيه شبعت قهر وحتى ضغطها يوميه

صاعد ورايحه للمضمد لو للطوارئ..

واخوي وسندي جان كل مايصير شي لو احد حجه

يجي علي ويكعد يرزل ويغلط... هاي ماعدا النظرات

الي احصلها بالكومه والكعده..

بس حسين الوحيد من أخوتي الي جان يذكرني من يطلع .. بالحلويات  وهو الوحيد الي ماسمعني كلام

ولا اذاناي بأي تصرف بالعكس هو جان يوكف

وياي ضد مهيمن...

وهو الجان ميقبل اي احد يسمعني كلمه حتى مره

من المرات رادو يجونا بيت عمو ...

واني ضجت لان من يجون بس يسألون

ويطقصون...

ماناويه ترجعيله؟؟

لو

هم تشتاقيله؟؟؟؟ !!!!!

وطبعاً هاي سوالف فاطمه

من تسألني ابقه مفهيه بوجها شجاوبها بالله

يعني هي هاي هم اسأله تنسأل اشتاقله!!!!!!

هي يالله

شو اني ادعي عليه بكل وقت

وهاي جايتني دكلي ترجعيله

لهذا بس شافني ضجت صاحلي

نبوض اليوم ماعندي شغل شنو رأيج نطلع للألعاب

اني سمعت اسم الألعاب واني طرت من الفرح

بسرعه رحت بدلت وجهزت نفسي

وطلعت انتظره بالحوش بهاي الاثناء دخل ابوي

ومنير الي بس شافني مبدله كعد يسأل

عمه وين رايحه

طالعه اني وعمو حسين

جاوبته وذكرت اني مامستأذنه من ابوي

رحت عليه ...

الله يساعدك بابا

ويساعد بختج بنيتي شنو اليوم كاشخه والعيون تلمع

شكو عساه خير ...

اني خجلت لان بدلت وجهزت نفسي بدون حتى ما انطيه خبر عاد بتسمت وكتله

ااا حسين كلي نروح للالعاب اءاء ميخالف اروح وياه

ابوي طكها بضحكه ومبينه طالعه من كل قلبه وبعدها

كلي

ههههه انتي بدلتي وكملتي وجاي ادكليلي هههههههه

روحي بويه تونسي... زين عندج فلوس او اوكفي هاج

خذي ذن حطيهن بجنطتج وديري بالج على نفسج

ولا تيهين اخوج خلي ايدج بأيده..

اني بست راسه وكتله شنو بابا قابل طفله اني وكاعد

توصيني لاتخاف مااضيع باقيه على قلبك ماتخلص مني ههههه

عمه اني هم اريد اروح للالعاب

درت وجهي وشفت منيرو اللزكه مبدل و واكف

لا والله عبالك اخذك وياي ماكو يلا روح لامك احنه مناخذ زعاطيط ويانه...

شو اني بعدني مامخلصه كلامي هذا كعد بالكاع وصار بيجي ويشمر برجليه ودموعه صارن عبالك شلال..

اني بقيت صافنه عليه وفاتحه حلكي مترين

ابوي كلي

يابه خذيه وياج خطيه خليه يغير جو شويه..

اخذته حتى اخلص من هوسته...بيومها تونسنت ونسه

مصايره...مخليت لعبه ماصعدتها.. وضحكت ضحك

احس بطني انشكت بالنص من كد الضحك..

صدك نسيت كلشي ورجعت طفله صغيره

بس ياراحه ما أتم مادام مهيمن موجود بحياتي

من رجعنا لعب بينا لعب وكلبها علينه عزه..

وبيومها تعارك هو وحسين لان طلعني 

و شنو اطلعين وانتي سيرتج على كل اللسان ..

كافي علينا فضايح...

من هذا اليوم اني بعد ماطلعت

وحتى القرابه صرت ماروحلهم

عزلت نفسي بالبيت

وهملت نفسي وشكلي رجع ذبل 

وصرت ادفن نفسي بالشغل

خصوصاً سوسن متكدر تتحرك هواي ولازم بس تنام

لهذا اني صار مهربي من واقعي الشغل

ما اخلي شي ما اجلفه من الحيطان والاصغر حاجه بالبيت ...

ورجعت سالفة الخطابه تتكرر

ونفس الحاله يجون يشوفوني وبعدها يرحون

ومانشوفهم... والسبب الجوره والمنطقه

سوني طالعه وياه ومدري شنو مسويه وهو مسويلي

لحد ما البارحه هم اجه صديق صباح والولد من اربيل

مو من بغداد

اجه هو وامه واخوه

كعدنا كلنا بالاستقبال واني بعدين اجيت الولد جان

حلو اشكر وعيونه ملونه وامه كولش حبابه اني نفسي من شفتها ارتاحيتلها بس اخوه جان شكله يخوف

مبين نفس طينة مهيمن لان هم حواجبه معكوده

والواضح حجايته هو المسموعه لان جانوا

بكلشي يستشيرونه...

بعد مراحوا الصراحه تمنيت أتم هاي الزيجه حتى بس اخلص من حياتي الي داعيشها ...

بس الي صار هو ...

عدن كم يوم وخابر صباح

يكول اخوه سأل بالمنطقه وكايليه نفس الكلام

ومعتذرين عن الموضوع...

حسين من سمع كولش اتأثر وطلع هاد يريد يحط

حد لهذا الكلام ...

طلع لليل رجع بس حاله مدري شلونه ...

وهم رجعوا اجتمعوا بالاستقبال..

بس هاي المره اني ما اهتميت ولا حاولت اعرف

لان خلاص الموضوع صار واضح وضوح الشمس ...

بس الي ماجنت حاسبه احسابه هو ....

.

.

.

.

.

.

.

.

.

.

حسين ...

من يوم الي فصخت بيه نبض والكلام صار يطلع أشكال الوان ..

صرت واني كاعد بمحلي يجيني الحجي..

والأكثر سببه الكرايب..

النسوان وين مايرحن يحجن

واحنه بمنطقه شعبيه... يعني الناس هناا

تموت على هيج سوالف...

حتى الخطابه يجون وخوش قسم بس مع الأسف يرحون بس يسألون ...

اني بعد ما كدر اسكت لان فاض الصبر بيه

لان شكد ما احجي وأكول ماكوا هيج شي ..

ماكدر اسيطر على الحجي ... لان لا واحد ولا ثنين

اليوم رحت للأسواق الرئيسيه الموجوده بالمنطقه

لان اي واحد يجي يريد يسأل يروح ياللاسواق يا للحلاق.. هاي المكانين الي عدهم السيفي الخاص بكل سكان المحله...

دخلت وكلت السلام عليكم

جاوبني ياسر ..

وعليكم السلام  ياهلا بأبوعلي وين هالغيبه

جاوبته واني مثكل وجهي عليه ..

هلا بيك.. موجود بالمحل تعرف شغل وموسم هذا

جاوبني ...

الله يرزقك.. ايي تفضل وسحبلي الكرسي اني هم كعدت وهو حط كدامي عصير وكيك

رجعته عليه

هو ستغرب ردة فعلي

سألني ...

هاا بوعلي شصاير وماتريد ضيافتي..

جاوبته..

ياسر بدون لف ودوران انته الي ادكول للناس الي تجي تسأل عنه وقصدهم الخطبه من بيتنا...

ياسر سكت شويه ..

وبعدها كلي ..

شوف حسين اني راح اكلك والله شاهد علي ما مكذب بكل كلمه راح اكولها ...

صحيح هواي يجون يسألون بس وستر اختي ماحاجي بحرف موزين عنكم لان اني اعرفك واعرف انتوا شنو

بس جانوا يطلعون مني يرحون يسألون الشله التكعد

برأس الفرع... وانته تعرفهم شنو من شله هاي ..

النبي مايسلم من هم

ولبارحه كدامي صاروا يحجون عن كم عائله بالمنطقه وانتوا وياهم واني والله شاهد علي

ماسكتت ألهم تعاركت وياهم وتضاربنه

وطردتهم وهسه اي واحد يجي اني اطرده

لان هاي أعراض ناس واني هم  عندي عرض

وماقبلها على غيري مثل ما اقبلها على نفسي ...

والله يا ياسر ماعرف شكلك عذرني لان جان اسلوبي جاف وياك بس انته هم تعرف حقي لان اختي سمعتها اطشرت... وصار الكل يحجي بيها

وهي لأبيها ولا عليها ... كل ما بالموضوع انخطبت

وماصارت... يعني لا صاحبت ولا نهبت ...

كله صار بشرع الله ورسوله..

وكدام الدنيا كلها...

على العموم اني هاي الشله اعرف شلون اكص السانهم

واعلمهم شلون يحجون بأعراض العالم...

يلاا اني اترخص ومشكور على كلشي...

ولا تزعل مني لان انته صاحبي واني شلت عليك بس هسه اني المديونك وتندعيني عزيمه

حبيبي ابوعلي انته غالي وهذا حقك واني لو مكانك اسوي نفسك واكثر... وعزيمتك واصله بس قبلها اني اليوم جنت ناوي امرلك للمحل

لان جنت رايد استأذنك بموضوع بس مدامك انته هسه هنا راح اكلك...

كول ياسر واني خادم وركبتي سداده

تسلم والله ماتقصر..

بس جنت رايد اكلك.. اريد اجيب الأهل واطلب ايد المستوره اختك شتكول... خوماعدكم اعتراض!!!!!

يتبع

________________

اعتذر منكم بس الأيام الجايه

مراح اكدر انزل ولا اكتب

لان اخوي البارحه سوه

عمليه ...

ومن البارحه لليوم الخطار

ماوكف..

مجاميع مجاميع

واحتمال اسبوع احنه راح نبقى على هالحاله

وبهاي الحاله مراح اكدر اكتب

لان تعرفون الخطار

يخلصها 

جاي .. مي .. غده .. عشه

يعني من الصبح لليل احنه وكفه وحده

بس انشالله احاول اكتب ولو نص بارت

وانزل..

بس اذا ماكدرت الله والعاذرين...

مع حبي واحترامي للجميع ❤

Nabà Baqer

Dan 😘

نبض _ دافي

Nabà  _ Baqer

الجزء الخامس عشر.....

بالبدايه احب اشكركم من كل كلبي على

حبكم وكلماتكم دعائكم بالشفاء

لاخويه...

كولش هوايه فرحتوني

فعلاً حسستوني احنه

عائله وحده ..

ربي لا يحرمني منكم ..

والي أطلبه منكم تدعوله كون نتيجة الزرع تطلع

سليمه والغده تطلع حميده

لان منتظرين نفرح بزواجه على فرحة الزهره

ومانريد اي شي يبعد الفرحه عنه ولا يفجعنه بيه ..

بجاه هذا الشهر 🙏🙏

_____________________________

وليعلم آلله اني بذلت حتى ، ذبلت 🥺 🥀

_____________________________

حسين ...

من سمعته بقيت ساكت لااكدر

اكله تفضل ولا اكدر اكله لا

لان اذا كتله ايي وراح يجي

اعرف نبض مراح توافق ومهيمن راح يجبرها

حتى بس يخلص من الكلام ..

ويسكت الناس ...

واذا كلت لا ..

يجوز تطلع خوش قسمه واضلمها

بقيت محتار شأكله بعدها كتله هلا بيك

بأي وقت ..

ومادري اذا سويت زين لو شين

عفتها يم الله ..

رجعت للبيت واني بس افكر

وحتى احطهم بالصوره باليل اجتمعت بيهم

وكتلهم على هاي الشله الي رحت وطيحت حظهم

ورحت للمختار هم كتله عليهم وهو ماقصر

راح لاهاليتهم واحد واحد

ومنعهم من التجمع بالشارع...

وبعدين كتلهم على سالفة ياسر

مهيمن كيف وكال

مابيها شي ياسر خوش ولد

بس امي وابوي ماقبلوا

ليش يمه تريد اذب اختك هيج ذبه

شبيها وزوجونها لياهو الجان

شو جمال وشهاده وأخلاق

اني ماقابله... ومراح اقبل

وانته ابومهيمن شو ساكت..

والله يا أم مهيمن الولد خوش ولد

هم أخلاق وسمعته مثل المسك

وهمه ناس على كد حالهم لاعدهم زايده ولا ناقصه

امهم متوفيه وابوهم  خوش رجال بس صار وياه

حادث وراحت رجليه..

وبنيتهم هم جنها نبض نفس الاخلاق..

بس يابويه...

اني هم ماريد انطي اختك...

ولاتنسه اختك مصارلها هواي من طالعه من تجربه

اخذت منها ما اخذت..

اني حتى هاي القسم الي تجيها مراضي عنها

بس انته جنك ماتصدك أحد يدك الباب

عبالك حمل وتريد تخلص منه ..

مهيمن ...

لا يابه شهل حجي شنو حمل

انته تدري نبض اعتبرها بنتي مو اختي 

بس يابه الحجي كثر ..

والناس الساناتهم ماترحم

وياسر ابن المحله ويعرف كلشي

ورغم هذا اجه ودك الباب..

بعد ليش نرفض..

وهي هم موطفله حتى نكول بعد وكت

دخلت للعشرين والبكدها فاتحات بيوت

وعدهن جهال..

واني برأيي هاي انسب قسمه الها

وهم يمنه بالمنطقه..

والولد وحيد لاعنده أخ ولا كومة خوات هي وحده والاعرفه عنها صغيره بعدها تدرس..

يعني مراح تتعذب..

مهيمن يسولف واني مامقتنع لان جنت ناوي اخليها ترجع لجامعتها بس من باوعت وشفته شلون قنع ابوي وحتى امي شكلها اقتنعت من عرفت راح اصير قريبه

عليها وماعدها عيال عيذبونها..اقتنعت واني انجبرت اسكت... لان اني هم بيني وبين نفسي مقتنع من ناحية الولد ... بس وضعيته وعيشتهم هاي الي ماجنت مرتاحلها...

ثاني يوم....

نبض ...

جنت كاعده بالكاع وألف كبه للغده

اجت امي كابلتني وكعدت

باوعتلها عرفت عدها سالفه

احجي يمه شكو

امي باوعتلي عود شتقصدين

ماما ترا اجتماعاتكم هليام كثرانه واعرف اني محور هاي الاجتماعات واعرف انتي هسه عندج سالفه فأحجي لا تترددين...

يمه منج خوب انتي مفتحه بالبن اي عندي سالفه واريدج اسمعيني بدون ما طفرين مثل كل مره ...

اليوم جايج ناس... الولد من المنطقه خوش ولد

وخوتج موافقين وكلنا موافقين موبس اخوتج لان

هاي خوش قسمه ..

لهيج اريدج ترتبين نفسج للعصر زين يمه ..

اني جنت الف واسمعها من كملت كلامها كتلها

اكلج يمه اني هيج صايره حمل عليكم

هيج تردون بس تخلصون مني ..

يوميه جايبيلي ناس شكل ويوميه لبسي وطلعي

وتاليها يرحون ومايرجعون ترا مصارت عيشه هاي

كافيي

رحموني ترا اني بشر من دم ولحم وإحساس

يعني مومطي حتى تحملون عليه وتردونه ينفذ ويمشي بشوركم وهو ساكت...

زواج مازوج وشسون سوو

لجججججججج نبببببببببض ...

حيوانه عديمة التربيه ..

تصيحين على امج ولج

.. هاي الجامعات هيج تعلم وتربي... ام التعليم والدراسه.

شو تزوجينه ورجلج فوك راسج.. وإذا اسمعلج صوت

احط راسج بالبلوعه وانحرج افتهمتي...

لا مافتهمت كافي حرام عليك انته اخ انته

انته انتقام.. بلاء من رب العالمين ونزله علينه

دمرت حياتي...

موتتني بالحيا..

مكفاك مستقبلي الضاع... لو سمعتي الي صارت جوه الرجلين بسببك... مية مره كلت ماريد لا زوجوني

بس انته لاا شلون أحد يعصيك..

كمت وقنعت البيت كله وزوجتوني لذاك الحيوان

ورجعت اتحاربني بالصغيره والجبيره

حصره علي اسويلي حاجه لو اريد اطلع لمكان

وكلت...

ماكوا عود من تتزوجين وطلعي وسوي البعجبج

هاي اذا اله نيه ياخذج...

لك حسستني اني عار ولازم تتخلص منه

مرض وتريد تبعده بأي طريقه...

ليالي تعدي علي اخلصها بجي..

وسؤال واحد بس الي اتمنه الكاله جواب...

ليششش.. ليش اخوي يريد يخلص مني

ليش المعتبرته سندي... نابذني ومرخصني

وبايعني بالرخص.. ليششششش ولك ليشششش

جنت احجي بكل حركة قلب ودموعي وشهكاتي

ملن المكان... ما حسيت غير انجريت من شعري

ونسحلت...

وامي تعيط وتتصيح

ولك عوفها الله لاينطيك ولك اختك هاي عوفها

مهيمن عوفها ولك اغضب عليك اذا جستها

وهو ماكوا ولا كأنه يسمع اخذني سحل من شعري شمرني بالغرفه وقفل الباب ونزل علي ضرب

بالحزام...

يضرب ويغلط

حيوانه مامربايه اليوم موتج على ايدي

ولج تصيحين بوجهي... اني تكليلي ولك

اليوم اعيد تربيتج من جديد ..

لج فوك عارج.. جايه بكل عين صلفه تحجين وتصيحين

بسيطه ولج بسيطه...

ويه كل كلمه يكولها جنت احصلي ضربه

وجهي .. رجلي .. ضهري  ... اديي

ضرباته جانت تتوزع بكل مكان بجسمي

دموعي جفت وصوتي انبح من كثر العياط والبجي

وجسمي خدر كمت ما احس بيه

وهو تعب وصار يتنهد من كد ماضربني

كابلني وكعد واني ضميت

راسي منه خفت لا يضربني بوجهي

رفع راسي من شعري وعينه صارت بعيني

حجه بصوت متقطع من سرعة تنفسه

وعيونه محومره وكصته تذب عرك

شوفي لج صوت ماريد اسمعلج دمعه ممنوع تنزل

تبقين هنا محبوسه بغرفتج... طلعه ماكوا

خلقتج ماريد اشوفها لحد ما تنكلعين

اسبوع بس وترحين... وعساج مارجعتي..

بعدها هد شعري بكل قوته بحيث راسي انضرب بالكاع ورتفع مرتد...

بعدها فقدت الوعي ...

بعد مدري شكد حسيت  نفسي بفراشي وامي كاعده تقره علي وصوت بجيها زرف قلبي تبجي بحركه

...

حركت نفسي  ردت اعدل نومتي حسيت اعظامي  اتفككن والالم جان يسري بكل جسمي عطت بشهكة بجي لان ماتحملت كل هذا الوجع

امي خطيه فزت تمسح على راسي وصيح

اسم آلله يمه اسم آلله.. بيه ولابيج كون

يمه نبض اسمعيني يمه باوعيلي بس فتحي عيونج

جنت اسمعها بس ماكدر لاافتح عيوني ولا اكدر احجي

عيوني ثكيله واحس حراره تطلع من كل جسمي

اديي اريد احركهن ماكدر ثكال ماينرفعن

وراسي يوجعني بقوه...

سمعت صوت الباب انفتح..

هذا صوت سوسن تحجي ويه امي اريد افرزن شيحجن ماكدر.. بعدها حسيت بجكة ابره...

يمكن ضربتني ابره بس مال شنو ماعرف..

بعدها رجع النوم غلف عيوني وستسلمت اله...

ياسر ...

جانت امنيتي ارجع اكمل دراستي الجامعيه

رحت وسألت كالوا بس مسائي ولازم تدفع

٣ملايين ..

زين اني منين أجيب ال٣ ملايين

خليت وكعدت وشلت هاي الفكره من بالي ..

وبقيت لازم الاسواق حياتي صارت عباره عن محل

من الصبح لليل بالوحده بالثنتين ياله أسد المحل...

لان اني الاسواق الوحيده بالمنطقه الي توفر كلشي

لهذا اكوا سحب قوي...

شويه شويه بديت أكبر بالمحل..

لحد مصار سوبر ماركت..

والحمدلله الحال تحسن و وضعنا المادي صار بعد احسن ...

أملي صار بشمس بلكي هي تكمل وتحققلي حلمي

واصير مختبريه..

لان هي هم حلمها تكون بمجال الطب..

لهذا من هسه سويتلي صندوق وخصصته بس الها

اريد اجمعلها فلوس للسادس..

ماريد أقصر وياها بشي ...

فديوم جنت كالعاده واكف بالمحل وفاتن سيارات

كلها فخمه وراقيه طلعت باوعت شفتها طلعت كبل

وطبكت بالفرع المقابيلنه...

سألت طفل كتله هاي شنو السيارات

كلي لبيت ام مهيمن اليوم خطبة بتهم..

بالبدايه ماعرفت منو بيت ابومهيمن بس بالليل

اجوا شباب كالولي

... تجي ويانه للكهوه اليوم العبه

ريال مدريد ويه فالنسيا...

كتلهم ايي انتظروا بس اقفل الاسواق واجي

قفلت المحل ورحنه نتمشه بالطريق كتلهم

شنو حسين ماكوا  ... يابه خابروه لا يعتب لان رايحين بدونه...

جاوبني واحد من الولد ..

يابه حسين اليوم مختفي.. خطبة اخته اليوم وخابرته

يكول عدهم خطار مايكدر يطلع...

هااا بالخير انشالله..

كلمه حجاها الساني واذاني قلبي من عرفتها انخطبت

أيام خلصتها واني عيني عليها من تطلع الصبح ويه اخوها جانن عيوني تحرسها وعقلي يبقى

مشغول بيها...

لحد مترجع واني ابقى مراقب الطريق

منتظر جيتها...

من تمشي جنت احسها تعزف على أوتار قلبي

برائتها وجمالها ونظراتها كلشي بيها يسحر

ويجذب...

ليالي واني جنت احلم بيها ...

ولساني مابطل يدعي ربي يرزقني اياها

ويخليها اصير حلالي...

بس بعد صارت بذمة رجال غيري ..

لازم اشيلها من راسي..

وادعيلها بالراحه والسعاده..

مرت الايام والاشهر وجنت اشوف خطيبها

يفوت من يم محلي بسيارته الراقيه..

وكشخته الي ادل على يسر حاله ..

من جنت اشوفه اكعد اقارن حالي بحاله

الكه الكفه تميل اله بكلشي...

حقها اذا ارتبطت بيه شاب مرتب وانيق وحالته زينه

قابل تباوع لواحد مثل حالتي...

كل هذا جنت اضمه بقلبي واني مطحون طحن من القهر بس مابيدي شي اسوي...

بس بيوم صار شي رجعلي ضحكتي والأمل من جديد

جانت الدنيا مغرب...واكف اوزن شكر لمره ودخلت ام عقيل هاي مره جبيره بالمنطقه بس شنو تعرف أخبار المنطقه كلها ..

سلمت ورديت عليها السلام

خاله تردين بس شكر ؟

لا يمه انطيني وياك من هذا الجكليت لوليدات ابني

اي خاله ادللي أخذت كيس وكعدت انوعلها بالحلويات

وحجت ام عقيل ...

خيه ابنج ما رجع مرته ؟

جاوبتها المره...

لأخيه منين فلك طرها تريد تطلك

يا خيه طلكوها ختولي وزوجيه اغاتها

خيه شيطلكها وعنده منها ثنين ولد منو يربيهم

اني هلشوفة عينج مابيه اعين نفسي رجلي خراب

يعيشون خيه شعليهم.. بعدين هاي نبض بت ام مهيمن

مو اطلكت وهي حتى ما ماخذينها ... ماتاخذينها لابنج

هنه يسولفن واني بالي كله يمهن من سمعت اسم نبض رفعت راسي وعفت كلشي وركزت وياهن ..

ومن كالت اطلكت وهي ما ماخذينها احس الفرحه ترستني وبتسامتي ما سيطرت عليها

حته المره انتبهت علي وسألتني

يااا خاله شبيك تضحك ويه روحك

بقيت ساكت ماجاوبتها وهي هزت ايدها وراحت

بيومها سديت الاسواق من وقت

ردت بس اختلي بروحي ...

اريد استوعب الكلام السمعته...

صدك لو يتهيألي ...

ثاني يوم تأكد الخبر من اجوا شباب

وحجوا بالسالفه كدامي ...

بس الضوجني الحجي الي صرت اسمعه

كاموا يألفون قصص.. ويطعنون بأعراض الناس ..

أكثر من مره يحجون عليها كدامي واتعارك وياهم واطردهم...

وهاي الفتره أكثر من مره يجون ناس يسألون عن اخلاقها وسمعتها واعرفهم خطابه...

من اجاوبهم وامدح بيها احس قلبي ينعصر ويه كل كلمه تطلع مني ...

يوم عن يوم صرت اخاف لا اخسرها مره ثانيه

وفكرة اروح واتقدم الها شاغله تفكيري بس اخاف

خاف لا انرفض بسبب وضعي المادي ...

لان شكد ما اني اشوف وضعي زين والماده زينه

بس ماتجي قطره بحر خطيبها السابق...

لهيج جنت متردد...

بس من اجه حسين البارحه وسألني عن الحجي الي دايطلع ... و وضحتله كلشي .. وتفهم الموضوع

تشجعت افاتحه بموضوعي...

ومن حاجيته وسمعت رده ارتاحيت وتحمست

افاتح والدي بالموضوع

ومن حاجيته وشفته فرحان وما عنده أشكال خصوصاً اني حطيته بالصوره وماضميت عنه اي شي

حتى الحجي الي طلع عليها ...

بس هو ماهتم خصوصاً من شاف فرحتي واني اسولفله عنها ...

يابه البنيه بعدها ماطالعه من بيت اهلها

يعني ما ماخوذه حتى نكول موخوش وحده

وبعدين هي جانت مزوجه بشرع الله ورسوله

واكوا هواي قسم هيج توصل ليوم الزواج واكوا بيهم بالزفه وتخرب ليش لان الله ما قسم يكملون

مو لان بيهم عيب

لا بس هي قسمه وكل انسان

ينولد وقسمته مكتوبه بكصته...

بس ربك يسوي هيج

حتى يبين لبني آدم اشياء هو مجان منتبهلها..

لو يختبره بهيج مواضيع حتى يشوف صبره ويبينله

الي وياه والي عليه ...

وهاي البنيه حالها من حال هواي بنات ارتبطت

ومصارت يعني لا جرمت ولا زنت ...

بس خوفك من النفوس الضعيفه الي متخاف من ربها

وما محسبه حساب لكبرها وكاعده تلعب بأعراض الناس

وتخرب بيها ...

لهيج يابويه اذا جنت هاويها للبنيه ورايدها

توكل بالله واني اخابر على عمامك وعماتك

همه يخطبونها الك ...

من سمعت كلام ابوي ارتاحيت وحسيت اول مهمه تمت

بقت بس موافقة البنيه واهلها ...

لهيج اليوم كعدت من الصبح رحت اشتريت ملابس جديده وزينت ...

ورجعت لكيت عماتي ثنينهن يمنه ومرة عمي الجبير

وشمس الخبله فرحانه وتمشي وطبل وتغني ...

عريسنا جوكليته حامض حلو اباكيته..

ههههههه خبله موبيدها

للعصر اخذتهن ورحت.. دكينه الباب طلع اخوها الجبير

سلم علينه ودخلنا

النسوان دخلن جوه واني فوتني للاستقبال

كعد يمي حسين وأبوها واخوها الجبير ...

سلام وكلام وكعدنا نسولف عن البلد والوضع

وبعدها جبنها على البيوت والأراضي..

وشدارس وشمخلص سولفتلهم كلشي عني

وعن امكانيتي...

وفتحت وياهم موضوع الخطبه ...

والحمدلله جان جوابهم الموافقه بس اكوا شغله

حيرتني وهي استعجالهم..

رادوا الخطبه والمهر بيوم والعرس بعدها بسبوع

اني تفاجأت لان مجنت حاسب احساب هيج بسرعه بسرعه ...

بقيت محتار شلون راح ادبرها لان اني جنت مخلي ابالي أخطب وره شهرين تلاثه العرس هم البنيه تتعود علي واخليها تحبني وهم اني احظر

الغرفه واصبغ البيت ..

بس بعد ماعندي حل غير اوافق واني الشيطان

صار يلعب بعقلي ليش هيج بسرعه حتى المهر ماطلبوا

كالوا احنه مشترين رجال ...

بس اني ما قبلت وحطيته خمسه بخمسه

وتفقنا المشيه على الخميس هذا يعني بعد سبوع لان احنه هسه بالاحد ...

والخميس الوراه العرس اذا الله راد ...

بعدها رجعنا للبيت ..

عماتي كامن يحجن لان البنيه ما طالعه الهن بس امها ومرة اخوها...

وهي يكولون مريضه فلاونزه نايمه بالفراش ...

هنا زاد شكي أكثر بس بعدها لعنت الشيطان..

وماخليته يخرب علي فرحتي...

ثاني يوم طلعت شكو عندي فلوس حسبتهن طلعن

خمس ملايين ...

عمامي تكفلوا واحد عليه الغرفه والثاني عليه صبغ البيت لان ولده كلهم يشتغلون بالصبغ ...

بقه بس فلوس المهر والعشه من هاي الخمسه طلعتهن

طلعوا العماله يصبغون ويرتبون واني والولد وياي وابوي وشمس وديتهم ابيت عمي ...

يومين احنه بس شغل من الصبح لليل

البيت كله صبغته وجددته...

بس غرفة ابوي ما قبل أحد يغير بيها شي لأن يكول

هاي الغرفه الي بيها ذكريات ويه امكم الله يرحمها

شمس رادت غرفتها كلها وردي .. سويتها الها

وغرفتي صبغتها كل ضلع لون وسويتلها سقوف

ثانويه وترستها اضويه...

صارت تخبل ...

والغرفه اشتريت تركيه لونها صاجي ومنقش بزغارف ذهبي كلش حلوه فخمه ...

بقت بس البرادي والتحفيات هاي عليها هي تختارها

بفترة الخطبه...

باجر انشالله المشيه ...

كلشي جهزته القاط اشتريته

وعمامي والولد كلهم وكفولي خوش وكفه

ماجنت متصور وكفتهم هاي..

ثاني يوم كعدت من الصبح لان المعازيم هوايه

وجنه عازمينهم على الغده حتى بعدها

نروح لبيت أهل البنيه..

للضهر اني ماكعدت من مكان لمكان

ودي الاكل جيب كيكه ناخذها لبيت العروس

جيب مي .. جيب  جيب افتر راسي

لحد ما كملنا غده رحت سبحت

ولبست القاط واجه الحلاق للبيت سوالي

تسريحه ورتبني...

وطلعنا لبيتهم  أخذت المنطقه كلها..

حتى يشهدون هي بعد صارت مالتي حلالي

و محد اله حق يحجي عليها كلمه ...

دخلنالهم لكينا استقبالهم مليانه زلم

سلمنا تعارفنه وبعدها شيخنا هو الي تكفل

بطلبها من اهلها...

همه بسرعه وافقوا لان بعتبار احنه متفقين من قبل

وهاي مجرد اشكاليات كدام الناس 

حتى يكون كلشي علني ..

قرينا الفاتحه وبعدها عقدلنه السيد وصارت حلالي

ومريتي وانشالله كلها سبوع وتصير ابيتي...يتبع

__________________________________

بنات حبيت. انوه الي عدها موضوع وحابه اطرحه كقصه...

او عدها احداث ابالها وحابه اسردها بأسلوب قصه

خلي تتفظل عندي بالخاص...

تكتب كل الاحداث او المشاهد الي بالها او حتى الفكره

واني حرجع اراسلها

وبالنسبه لقصة نبض دافي

اريد رأيكم بيها لحد الان

شلون شوفونها..

واريد تفاعلكم يزيد وياها

اذا حابينها..

ورجاءاً بدون كملي لو شوكت تنزلين

لان احنه متفقين

التنزيل ماله موعد محدد..

لهذا ارجع واكول

انتظروها تكمل

واقروها كامله للي متحب تنتظر أو ادكول

دانسه الاحداث

طبعاً اني اعتذر بس والله موبيدي مجبوره

وشكراً

Nabà Baqer

Dan ❤😘

نبض _ دافي

Nabà  _ Baqer

الجزء السادس عشر....

______________________________

وكعنه ة بناس تعبد ناس

ولا جن الله خالقهه ! 🔕🔇

________________________________

نبض ....

يومين اني نايمه بالفراش لزمتني صخونه موتتني تموت...

لا اكل ولا شرب .. وجسمي كله يون علي ..

امي خطيه سهرانه فوك راسي الليل كله وبالنهار

لوسوسن لو حسين ..

ابد ماعافوني ابوي خطيه من عرف تعارك ويه مهيمن

وحتى راد يضربه وهاي اول مره اصير ..

لان ابوي هواي يحترم مهيمن وهو الي خلاه يشيخ

فوك روسنا ... بحكم هو الجبير وأبو البيت من بعد

عين ابوي ..(اسم الله ) ...

وخطيه بعدها سمعت بيه متخربط وناقلينه للطوارئ

وطالع ضغطه معلك وسكره وهمزين ما رايح بيها ..

اني من سمعت بيه هيج شبعت بواجي

وردت بس روحي اتعيني واكوم اشوفه ماكدرت

احس نفسي ميته ..

حسين كال هاي لان متاكلين حاولوا وياي ماكدرت

حلكي مر وبلاعمي مجرحه توجعني ماكدر اكل

لهيج راح وجاب المضمد شدلي مغذي ...

ثالث يوم بديت اتعافه.. كومتني امي للحمام سبحت

بس احس سجاجين تنزل على جسمي مو مي

جسمي كله يحركني ويأذيني...

كملت بيه ومابيه وطلعت لكيت امي واكفتلي جانت بباب الحمام ... بس شافت الباب انفتحت اجتني لزمتني من ايدي ومشتني للغرفه ...

كعدتني على السرير وحطت الغطه علي ادفيني لان احنه هسه بداية شتا هاي اول برده بيه ..

امي جابت المشط وكعدت تمشط شعري واني جنت غركانه بأفكاري...

هاي عدت سنه علي واني حياتي

انكلبت كلها بهاي السنه... هيج وقت العام اذكر

من اجت سوسن وكلتلي اجوا نسوان طلعيلهم

وطلعت ولكيتها امه لاسامه..

من ذاك اليوم لهذا اليوم اني مارتاحيت

جان يوم شؤم علي ...

عمري مراح انساه...

يمه نبض مدامج صحيتي والحمدلله صحتج رجعتلج

يمه لازم تعرفين تره الولد اجه هو واهله

واخوج وابوج انطوج وحددوا الخميس الخطبه والمهر

والخميس الوراه العرس...

يمه ماريدج تنقهرين.. هاي قسمتج يمه ولازم ترضين بيها ... ولو اني على عمه عيوني وافقت بس يمه

احسنلج من الكعده هنا ...

اخوج بعد مايعوفج ولا الناس الساناتهم ترحم..

تزوجي يايمه وخلصي...

بلكي يطلع خوش ولد ويرحم بحالج...

حجيت بصوت ضعيف...

ليش يمه كليلي ابوي ليش ماحاجه... صباح .. حسين وينهم ليش عايفين مهيمن يتحكم بينا ودمر حياتي ..

امي اخذت راسي بحظنها وصارت اتمسد عليه ..

يمه ابوج هالتشوفين حالته سكره وضغطه يوميه صاعدات وحتى نظره قل ومابيه حيل المصايح...

وخوانج لا تعتبين عليهم ... حسين ما قبل ولو شوفين

شسوه من اجه وشافج امدمايه بالكاع..

شالج وركض بيج للمستشفى وهو يتحلف ويتوعد

ومن طلعتي لعب لعب وحتى راد يدز على الولد

ويلغي كلشي بس ابوج ماقبل...

كله

..خلي تتزوج وتخلص من مهيمن لان اذا تبقى هنا

تموت ...

يابه هي شنيه قابل الدنيا  سايبه لو مالها ضهر حتى مهيمن يموتها... اذا انته يابه ماتكدر تحميها اني اوكفلها

وفنه اليحجي وياها لو اعرف اخذها واسافر ولا اقبل أحد يأذيها بعد ...

كافي رحموها...

بعدها ابوج لليل تخربط علينه من وره القهر .. وهذاك هو نايم بالفراش وعلاكة الدوا شكبرها يم راسه..

وصباح يمه هذا اخو روحه مو اخو أحد...

لا تعتبين عليه ولا تعتبريه موجود...

اصلاً هو نفس طينة مهيمن ونفس التفكير ...

لهيج يايمه اريدج تزوجين حتى تخلصين... الولد يكولون خوش ولد وماعنده بس ابوه رجال مقعد واخته صغيره بالمتوسطه... وامه متوفيه..

وهم قريبه علينا بُعد فرع واحد ... شوكت مايعجبج

ادكدرين تجين ونجيج... زين يمه

شلت راسي من حظن امي ومسحت ادموعي وكتلها واني احس بعد مشاعري كلها خدرت كمت ماهتم بأي شي ...

زين يمه شسون سوو بس يكون بعلمكم من اطلع من هذا البيت بعد اتحلمون اشوفوني ويحرم علي دوسة عتبته...

ورحت لفراشي تلفلفت ونمت...

بعدها عدن الايام وهمه يحظرون للخطبه اني باقيه حابسه نفسي بالغرفه ابد ما اطلع...

كلشي ماسويت ولا شتريت همه تكفلوا بكلشي امي وعماتي وبنات عمي حظرن كولشي...

ليوم الخطبه الصبح طلعت للصالون واني عبالك رايحه

لعزه..

دموعي تصب وضعفانه وذبلانه وحالتي حاله ابد موشكل عروسه...

دخلنه للصالون اني وجنة بيت عمي ام الصالون كالتلي شتحبين اسويلج...

باوعتلها ورفعت اكتافي بمعنا بكيفج...

هي ستغربت...

كلتلي...

شكلج مغصوبه عليه!!

وفعت نظري عليها ونزلت دمعتي وهي تنهدت بقهر وكالت ...

الله يساعج.. انشالله يطلع خوش ولد ..

وبدت تشتغل بيه واني مغمضه سوتلي شعري بالبدايه

وبعدها دزتني للطابق الفوك حتى يسولي مكياج صعدت وهم كعدت ونفس السؤال انعاد وهم رجعت جاوبتها بنفس الطريقة...

كلتلي غمضي عيونج وسلميلي نفسج وراح اطلعج اميره...

غمضت وهي بدت تشتغل ساعه وبعدها كلتلي يلا فتحي ونطيني رأيج

فتحت عيوني وعدلت كعدتي وباوعت لشكلي جان طالع حلو ... كل التعب والذبول جان مختفي ..

بعدها نزلت جوه اجن ثنين بنات وحده دهنت جسمي وبوطرته والثانيه لبستني الفستان والإكسسوارات

وحتى العطر هنه رشنه الي

جنة بيت عمي كولشي مسوت...

بعدها اجه حسين أخذنا للبيت دخلت لكيتهم مسوين

كوشه متفقين ويه بيج بالانستغرام جاي مسويها

كعدت واجت امي باستني براسي وبخرتني

وره شويه اجوا المشايه قروا الفاتحه وبعدين صاحولي

حتى نعقد ...

كل هاي المراسيم مرت علي من قبل وهسه رجعت انعادت... وبنفس الطريقه بس الفرق بين هذيج المره وهاي المره هو البرود... العام من جنت كاعده على الكرسي ودايعقدولنه جان متملكني الخوف والرجفه

هسه ابد محسيت بأي شي ...

برود رهيب اتملكني..

من اخذني وكعدني بباب الاستقبال وحطن جوه رجلي

انجانه بيها مي ورد وغلفني من فوك بوشاح ابيض

هاي التفاصيل مسويتها قبل هاي اول مره اسويها

بنفس الوقت مهتميتلها..

ومن انطيت موافقتي واعلنوا زواجي من هذا الشخص الي شكله مشايفته وحتى اسمه قبل شوي عرفته من اخته... الي اول مشافتني ضحكت واجت بوستني

وجانت فرحانه بس مانطيتها اهميه...

جنت عباره عن عيون تباوع وبؤبؤء يتحرك بس ...

بعدها راحوا واني رجعت لغرفتي ولعزلتي...

ثاني يوم الصبح اجت عمته ومرة عمه حتى نروح نشتري الذهب والجهاز...

طلعت وياهم وحرف ماحجيت كله جان على ذوقهم

كلشي ليكلولي عليه اكول ايي ...

مانطيت رأيي بأي شي ...

رجعنا للبيت وكالن العصر يجي خطيبج يريد يشوفج ويحجي وياج...

اني اصلاً جنت رايده احجي وياه لهيج ماعترضت

للعصر اجه اني لبست عباتي الخليجيه ولفيت شالي

ورحت...

دخلت جان كاعد يمه حسين بس كلت السلام عليكم

وكعدت ومباوعتله حتى ...

هو رد علي وحسين كام طلع اني بقت عيني عليه من طلع .. ومستغربه ليش طلع وعافنه لوحدنا ...

اني طلبت منه يعوفنه لوحدنا لان رايدج بموضوع

باوعتله بنظرة عدم اهتمام من سمعت كلامه ..

وهو عدل نفسه ونتصب بكعدته جان مباشرتاً مقابيلي

وكال

... شلونج ..

زينه ..

مبروك مباركتلج البارحه لان جانت هوسه وماكدرت ادخل ...

كتفيت بالسكوت مجاوبته اي شي ..

وهو رجع كمل كلامه وعيونه تتفحص ملامحي اعتقد جان يدرس ردة فعلي.. اني جنت استقبل كلامه واني

كاعده بشموخ ورافعه راسي ومقرره احط شروطي بنفسي ومن هسه  وما اهتم بأكبر واحد ...

ياسر ...

اول شي اعرفج بنفسي اعرف شغله اضحك  مرتي ماتعرفني ولا شايفتني بس راح نتعرف هسه

اني ياسر صادق خطيبج خريج سادس اعدادي عمري

ادكدرين ادكولين 24 سنه لان هذا الشهر يقبط ال 24

صاحب سوبر ماركت الياسر الموجده بالفرع المقابيلكم

الحمدلله امورنه الماديه زينه ...

عايش اني واختي و والدي الله ينطيه الصحه والعافيه 

الوالده متوفيه بحادث سياره ضربتها وتوفت بلحظتها

ماعندي لا زايده ولا ناقصه ناذر حياتي لاهلي ...

ما اتواجد هوايه بالبيت لان ماعندي أحد يلزم مكاني

لهيج ابقى من الصبح لليل بالمحل بس وقت الوجبه أعزل ومرات اكل بالمحل ...

هايي اني هسه اريد اعرفج...

نبض ...

من بده يعرف بنفسه اني ماجنت مهتمه بس من كال

صاحب اسواق الياسر بسرعه عرفته...

نفسه الولد الي جنت اشوفه يوكف بباب المحل من اروح الصبح ومن ارجع الضهر وجان يسلم على حسين

ومبين صداقتهم قويه...

سويت نفسي ما مهتمه وما أعرفه...

ومن كمل وكلي هسه دورج..

راسن استقمت بكعدتي وجهت نظري عليه بحده

وبديت احجي و اعرفه بنبض الحقيقيه!!!!!

اني نبض موسى خريجه سادس داومت سنه أولى جامعه قسم تاريخ وكعدت لان خطيبي السابق طلب هذا الشي واهلي امتثلوا لطلبه...

عمري 19 سنه

عمري ماحبيت ولا ارتبطت ولا آمنت بشي اسمه حُب

انسانه جامده معقده غير مهتمه ..

لهذا السبب فصخت خطبتي من صديق اخوي وزميلي بالدوام...

اكيد تعرف الكلام الي طلع والقصص الي أللفوها عني

من وره هذا الكلام وكل الي مريت بيه كرهت جنس آدم

ورفضت ازوج بعد

وكل الي تقدمولي جنت انوي اطفشهم بس أهل المنطقه

آلله يعافيهم همه تولوا هاي المهمه عني وطفشوهم

ياسر ...

زين شمعنه اني وافقتي علي

نبض ....

منو كلك اني  وافقت عليك ..

شقصدج؟؟؟!!!!!

قصدي اني موافقت برضاتي اني نجبرت بعد ماانكتلت

وتعذبت ...

شنووو ؟؟؟؟!!!!

انجبرتي!!!!! يعني هسه انتي مرايدتني بقناعتج.؟

اذا هيج اني ماقبل واعتذر راح اروح احجي ويه اهلج

كام طلع واني بقيت بمكاني ابجي على حالي ..

وسأل نفسي ليش حجيت وياه هيج

هسه يروح لمهيمن ويرجع علي يشبعني كتل ...

لليل اجه حسين دك باب غرفتي

تفضل

كاعده

بلي

نبض حبيبتي ليش سويتي هيج ؟

شسويت؟؟

الحجي الي كلتيه لياسر مالمفروض تحجيه

واني شحجيت غير الحقيقه

ميخالف بس موكلشي ينحجي اكوا اشياء

المفروض منحجيها ونحتفض بيها لنفسنا حتى لو جانت حقيقه... يعني هسه انتي شستفاديتي من كلتيله ؟؟؟

بقيت ساكته ماعرف شجاوبه

..صدك اني شنو استفاديت ؟؟ بس ردت اثأر لنفسي

وثاري اجه بالشخص الغلط المفروض اثأر من اهلي

مو منه لان هو ماله دخل ولا يعرف اي شي ..

على كلاً هذا الحجي بعد ميفيد لان انتي حجيتي وكملتي بس اريدج بعد تنتبهين للكلام الي يطلع منج

حتى لا تنظرين.. تدرين هو جان مصر يفصخ بس اني

حاجيته وقنعته يصبر عليج لان انتي تمرين بضروف صعبه ونفسيتج تعبانه...

ليش سويت هيج انته هم رخصتني؟؟!!!!!

حسين اجه علي وحظني من بعد مجان واكف واني كاعده على السرير..

لج نبض ارخصج شنو ؟؟ صدك تحجين!!!!

ولج انتي غاليه واغلى من روحي بس سويت هيج

علمودج... اريدج ترتاحين

وتخلصين من مهيمن وعذابه..

وصدكيني لو ما ادري راحتج وسعادتج ويه ياسر

جان فلا قبلت عليه ولا انطيتج اله ..

بس ياسر ذهب ولو تفترين العراق كله مراح تلكين مثله

صح هسه الكلام الكلتيه سوه فجوه بعلاقتكم بس ادري بيج راح اصلحين كلشي وتحبينه لياسر وتخلينه يحبج

ولو هاي اني ضامنها لان ماكوا احد يعرفج مراح يحبج

بس اريدج اصيرين سباعيه وتحتوين رجلج وتتصرفين بعقل ... لان مهما كان الرجال طيب قلب وما بيه اذيه

بس تبقى عنده رجولته وكرامته أهم شي والي يوصللهن ...

يأذيه ويحقد عليه...

وانتي بكلامج اليوم ورفضج اله هنتي رجولته وكرامته

ولوما خايف على سمعتج جان عافج

بس هو كلي ...

اختك اليوم برفضها اذتني واني جنت حالف اعوفها

بس انته وأهلك وكفتوا بوجهي..

لان اذا عفتها هسه سمعتها راح تنسحك وخصوصاً

هي فاصخه من قبل ...

لهيج راح اعوفها بس اكلك اياها كدامك مراح اعديها

الها...

هااا هاي شنو شو كدامي وتهددني تأذي اختي

لا ياسر موهاي المرجيه منك ...

عود اني سولفتلك كلشي .. وعبالي بس تعرف راح تعذرها ... مو تكعد تتخلفلها لا وكدامي بعد

حسين خليك مكاني وخطيبتك ثاني يوم خطبتكم ودكلك والله اني مااريدك وانجبرت عليك جبر

كلي شتتصرف وشسوي... ؟؟؟

حقك والله حقك واني راح احجي وياها وإذا تريد

عاقبها بس مو تأذيها بالكلام لو بالضرب اكوا هواي طرق

عقاب بدون اذيه...

وهاا لا عبالك اني اقبل على اختي بس لان انته صاحبي وهي اعرفها غلطانه اكتلك سوي هيج ... بس موياخذك

الواهس ويوميه كاتلها ترا وراها زلم خشنه مايطلعون عليك صبح اذا اذيتها بحرف...

هههههههه ماعرفتلك والله من بابه ادكول عاقبها ومن بابه لا تأذيها لان وراها زلم خشنه

يابه على راسي هي وزلمها بس هم اذا غلطت تاخذ جزاها ...

نبض ...

من سولفلي حسين كلامهم... ارتاحيت

راح الخوف مني اهم شي مهيمن ميعرف شخبصت

اني ...

نمت واني افكر بحياتي وبالمستقبل

شنو راح يصير وياي ...

مابقه شي تقريباً خمسة أيام واطلع من هذا البيت

واروح لحياة جديده وناس جدد

حياة غريبه علي

ويه ناس غريبن علي .. كولشي ماعرف عنهم ولا شايفتهم...

ثاني يوم اجه ورحنه حللنه وكالوا يومين وروحوا للمحكمه عقدوا

من رجعنا انطه فلوس لأمي وكلها

خاله هاي فلوس صالونها والبدلات وإذا ماكفن

كليلي واني ادز بعد خلي اسوي كلشي بنفسها ...

هو وامي بقوا يتناقشون واني مخليني خارج قوس

لا كأني اني العروسه وصاحبة الانه..

اني هم سكتت ولا علقت ولا خليت بالي يمهم ..

وره يومين رحنه عقدنه ومن رجعنا العصر رحت

للصالون حفتلي وجهي وحواجبي ماقبلت تشيلي منهن

هواي سوتهن بناتيات كلها حجت علي

علبو عروسه و مايصير بس اني ماهتميت

ونضفلي جسمي لان باجر الحنه وتفقنه وياها

نجيها من الصبح باجر حتى نكمل من وقت ..

طبعاً هذا كله جان ويه جنة بيت عمي هي الي تكفلت بكلشي لان سوسن بعدها نايمه ومايصير تتحرك..

خطيه كل ما اكعد يمها ادكوم تبجي..

ادكلي ..

تمنيت اني اجهزح بيدي واسويلج كلشي بنفسي وما اخلي اي وحده غيري تتكفل بعرسج..

اني جنت اخفف عنها بالشقه والضحك حتى لا تنقر

لان موزين عليها وهي أصلاً مابيدها شي ...

المهم من رجعنا لكينا مرة عمي حاجزه بدلة الحنه والعرس بالانترنيت ومطيتهم العنوان وباجر يوصلن للباب ومتفقه وياهم على السعر...

شوفتنياهن حلوات ذوقها حلو ...

ثاني يوم كعدت الفجر لصلاة الفجر صليت وبقيت اقره قرءان وبعد ما نمت لحد ما كعدن الحبايب

بنات عمو وبنات عماتي والجناين والبيت صاير خبصه

غرفتي صايره ملجئ للمشردين منو الماعنده مكان

جاب مخدته ونام يمي بحيث ما ينشاف بس الروس

والرجلين..

طلعت بره شفت ابوي واكف يتوضأ رحت صبحت عليه

وبسته براسه ...

سوده علي صحته رايحه ومابيه حيل يوكف السكر والضغط موتنه كله بسببي ينقهر ويضم بقلبه من وراي

رحت سويت ريوك وكعدت امي هم صبحت عليها

وكعدنا نسولف عن النواقص وشنو بعد محتاجين

اجه ابوي كعد ويانه وبدينه نتريك بعدها كعدن الحبايب واجن تريكن اني كمت البس حتى يوصلنا

حسين للصالون

طلعت من المطبخ شفت مهيمن واكف يغسل باوعتله وهو هم  باوعلي بنظرات غريبه عاكستها المرايه

الجانت كدامه ...

عفته ورحت بدلت وكعدت انتظر حسين يكمل ريوك

خطيه هو بسرعه اكل و كام ودانه...

مهيمن...

السلام عليكم...

اعرفكم الكل كارهني وحاقد علي وعبالكم اني ضالم

بس قبلها خلوني اعرفكم بنفسي ولو متأخر

بس يكلك (تأتي متأخرٍ افضل من أن لا تأتي ابداً)

اني مهيمن موسى ...

الاخ الأكبر والابن الأكبر لهذا البيت مواليد 85

متزوج من بنت خالتي سوسن وعندي منها منير وسراج

ومنتظرين المولود الجديد انشالله تطلع بنوته..

كلش احب البنات وجانت امنيتي خلفتي اصير بس بنات لان هنه أحن من الولد على أهلهم..

بس بعد رب للعالمين اله حكمته وماحققلي امنيتي..

اعرف هسه ادكولون اذا انته هيج تحب البنات لعد ليش

هيج تعامل اختك الوحيده !!!

اني اكلكم ...

اني صاحب معارض اثاث وغرف نوم

وبحكم شغلي باليوم الواحد تمر علي هواي نماذج

بنات شابات نسوان كبار  وعوائل ...

شباب عرسان...

وبحكم شغلي بالسوق اعرف سوالف البنات كلهن

ومكرهن وحيلهن وزحفهن...

لهيج اني جنت صارم بتربيتي لنبض ...

نبض موبس اختي هاي بنتي من هي صغيره

جانت ماتنام اله على ايدي ومن اجي من الشغل هي تتلكاني بضحكتها وكصايبها جنت اشيلها وافرها والعبها

واخذها اشتريلها...

سنه عن سنه جانت تكبر كدام عيني ويزيد خوفي عليها

وحرصي وتشددي بس مو بشك او قلة ثقه

لا والله شاهد علي جان نابع من خوف

اخاف لا هاي الورده الي جنت اسكيها بحناني وجانت تكبر كدامي خايف عليها لا تذبل بيوم لو يجي أحد ويكطعها واخسرها...

حتى دوامها جنت رافض اداوم جامعه لان هذا مجتمع مختلط...

وهي بريئه وفطيره بكلشي اصدك وبسرعه اثق بالناس

والي مايخافون الله هواي ....

وخفت لا يضحك عليها واحد بحجة الحب والغراميات

وتاليها يعوفها وهنا راح اخسرها ...

ومن اتقدم الها صديق حسين ...

اني فرحت لان جانت خوش قسمه ... لان سألت عليهم كلها حمدت بيهم ... وهم الولد شاب صغير بعمرها...

هي جانت رافضه وحجتها لان صديق حسين

وهي تدري بحسين عنده مكسرات...

وكلنا ندري ..

بس اني رحت وسألت عنه بكل مكان وعند أكثر من واحد وحتى كلفت جماعه سألت عنه عند أقاربهم

وكلها جان جوابهم واحد ...

كلش خوش ولد فوت بزودك ولا تتردد...

اني من سمعت كلامهم اقتنعت وايقنت ان هو يختلف عن حسين لهيج اني جنت مصر أتم هاي الخطبه

لان هي ماتعرف مصلحتها زين مثلي ...

ماتعرف الناس

عليها بس بالضاهر ...

قنعت الكل وخليت امي تقنعها وسوسن حجت وياها

والحمدلله تمت الخطبه...

ويه الخطبه صار يخابرها ويسهر وياها بالتليفون واني هذا الحجي مايصرفلي اريد يسولف وياها يعجل بالزواج ...

وكام يجيها ويوميه طاب طالع علينا ولازم لو اني لو الولد موجودين لان ما قبل يبقون لوحدهم ..

كلشي يسويلها بحجة مرتي وبعدين يفلت و وين انلزمه

واني هم ماتفوتني سوالف المخطوبين..

لان اني هم بيوم من الايام سويتها بس الفرق بينا

سوسن جانت حبيبتي الي جنت احبها من الصغر وبنت خالتي بنفس الوقت...

بس هذا غريب حتى لو الدنيا كلها كالت عنه زين اني

ماكدر اثق بيه واعوفله الساحه فارغه...

وره بفتره اجت امي كلتلي ..

يمه خطيب اختك يريد يطلع وياها يكلها كل المخطوبين يطلعون ويتونسون إلا احنا ...

اني من سمعت كلام امي كمزن عندي

ورفضت رفض قاطع...

وكتلها يريد خلي يعقد عليها محكمه و وين ومايطلعون خلي يطلعون لان بحكم يصير زوجها شرع وقانون

عقدوا محكمه وطلعوا تغدوا وراحوا للكاظم عليه السلام...

وعدا عليهم اربع اشهر همه مخطوبين الناس بدت تحجي ... وعمامي والولد

الكل كلما يشوفوني يحجون لان احنه ماعدنه هذا الشي ... كل بناتنه الي يزوجن شهر وياخذونهن

حتى اني من خطبت رجل خالتي بيوم المهر شرط شهر ويتم العرس لان الخطبه اذا اطول يصير بيها مشاكل

لهيج جنت استعجلها  لمصلحتها ماريد حجايه تجيها بس هي جانت تاخذها بغير نظره ..

عبالها مستثقلها لو رايد بس اخلص منها

ماتدري هي اني يوميه افكر شلون بيه من تزوج

شلون راح اكدر اكعد الصبح وماشوفها كدامي ولا اسمع صوتها الي تهرج بيه البيت وشفاها وعركها ويه منير وحسين ...

جنت أكثر شي افكر بيه هو الشي ..

بس بعد الله سبحانه كاتبلنه غير شي

والحمدلله من عرفناهم على حقيقتهم من اجت امه وصارت اتلعلع بصوتها وتحجي عليها ...

ماتحملت عطت بوجها ورزلتها وطردتها  وتمنيتها زلمه

حتى افرك حلكها فرك...

وجنت ناوي افصخها وطبهم مرض

بس من اجه الرجال ابوهم واعتذر هو وابنه

كلت انطيهم فرصه لان ماريد اختي تتطلك وهي بعدها ببيت اهلها من وره مره ...

اصالحوا ورجعت الامور لطبيعتها بس الي ما رجع هي نبض حالها تغير وصارت تذبل كدام عيني ومن أسأل

سوسن ادكلي

مشاكل هي وخطيبها..

اني عرفت هاي السالفه ليش كتلهم استعجلوا بالعرس لان اعرف اذا اطول راح تخلص بس عرك ومشاكل...

جان عبالي مشاكل عاديه بس عمري ماتخيلت

الموضوع واصل لمرحله ماينسكت عنه وهي جانت ساكته....

يابه من كعدت وسولفت  عن سوالفه وطيحان حظه غير احس الدم كام يغلي بعروكي

عصبت عليها وضربتها ورحت دميته ادمي اني وحسين

وطلكناها منه وخلصنا منه ...

بس قهرتني من سكتت شنو جانت شايفتنه

موبعينها موزلم هيج ما وماتتحامه بينا وتجي

تكللنه عنه....

زعلت منها وشلت بقلبي عليها وصرت اعصاب وردتلي

بس وأحد افرغ غضبي بيه ...

وزادها الكلام الصار يطلع من الجوارين اني ماجنت ادري لأن اخلصها بالشغل بس من بدو يجونها الخطابه

ومن خابرني صديقي وتعذر ومن كتله

خير اكوا شي كلي

والله هيج وهيج سمعنا حجي والولد بطل بعد مايريد

من سمعت كلامه احس مثل الي نظربت على راسي وانعكد الساني بقيت ساكت...

شحجي وشكول وكل هذا الحجي طالع على اختي الي خلصت عمري احافض عليها حتى لا اشوف هذا اليوم

تاليها اجه واني السبب...

ايي اعترف اني السبب

بس جان عبالي لمصلحتها

لان شكد سألت عنه وشكد اطقصت

كلها مدحت بيه وبتربيتهم...

وماجنت مصور بيوم يطلع هيج نذل وخسيس

....

الكلام صار يزيد ماينقص وكل الي

ديتقدمون ينكالهم نفس الحجي ...

لحد ما تقدملها ياسر ..

صحيح الولد حالته الماديه اقل من عدنه

بس اخلاقه اني هاي المره الي اشهد عليها

لان همه عمر صارلهم هناا بالمنطقه

واعرفهم من جنت اني صغير ...

اعرف امهم الله يرحمها وابوهم رجال والنعم منه

لهيج جبرتها توافق عليه ..

بس ماجنت ناوي امد ايدي عليها ولا جنت رايد يصير كل هذا وتشيل بقلبها علي وتشوفني وتعبر بدونه مسلم

علي ...

بس وقتها من دخلت للبيت وسمعتها معليه صوتها على امي واني جنت راجع تعبان و راسي جان يوجعني

من التفكير بيها وبهذا الحجي اريد بس اسكت حلوك الناس .. عطت بيها وهي ماسكتت

لاسنتي وعلت صوتها علي

بعد صار الي صار ....

نبض ...

جنه بالصالون مكمله مكياجي وشعري

وبعد بس البس البدله دك تليفون

زينب جنة عمي

فتحت الخط شو هاي شويه وعااطت

شنووووووو إلى رحمة آلله وهسه شلون

اني من سمعتها خرطت العافيه

احس أعصابي كلها صارت ترجف اريد اوكف ما أكدر

زينب احجي منو مات ؟؟؟؟؟

ولج احجي شبيج صافنه بوجهي !!!!!!

يتبع

•لربما ينتظرك شيئا 💛🌿

•أحب إلى قلبك مما فقدت 🌺

Nabà Baqer

Dan ❤😘

نبض _ دافي

Nabà _ Baqer

الجزء السابع عشر....

____________________________________

              💚🔇❤

وين المكان اللي يبيع ابتسامات ؟

انا حزين ولازم أني اجامل

عربيد ياليل العتب والتفاهات

إيش أنت لقلوب السواهير حامل ؟

دليت لظروف القصيده معاناة

وصار القلم يدمع بحضن الانامل

ماتنفع الموجوع قولة:(سلامات )

للي غدى جسمه من الجرح خامل

تولد من ارحام الخوافي علامات

لو الوهم يلعب على الحق زامل

أنا خطأ ؟ نفس المسائل اجابات

أنا خطأ يوم اطلب إنسان كامل

كل ما أتذكر سيرتي بالعلاقات

محد دملني بالوفا... كنت دامل

الانعزال يكبر... ويصنع الذات

والراحه: انك تنعزل ما تعامل

والاحتكاك يشوه أحلى البدايات

والاختصار: لراحة البال عامل ..

               🖤🔕💔

____________________________________

نبض ...

جنه بالصالون مكمله مكياجي وشعري

وبعد بس البس البدله دك تليفون

زينب جنة عمي

فتحت الخط شو هاي شويه وعااطت

شنووووووو إلى رحمة آلله وهسه شلون

اني من سمعتها خرطت العافيه

احس أعصابي كلها صارت ترجف اريد اوكف ما أكدر

زينب احجي منو مات ؟؟؟؟؟

ولج احجي شبيج صافنه بوجهي !!!!!!

منو مات ...

زينب بقت مفهيه بوجهي واني عقل ماضل

براسي ... كمت اهز بيها وعيط بكل صوتي

كل بالي ابوي لو امي صار بيهم شي ..

كل البنات الي موجدات جانن بالصالون  التمن علي يهدن بيه ...

زينب ... كافي نبض مسحي دموعج مو اهلج بس

محمد خابرني وكال حسين جايجن لان ابن عم

خطيبج توفه هسه ... اووف شلون حظ عليج

هسه مالكه يموت إلا اليوم ...

منوو؟؟ يعني اهلي مابيهم شي مو ؟ الله عليج كولي الصدك!!!

لا والله مابيهم شي شبيج اتفاولين عليهم

يلاا كومي هاج لبسي عباتج راح يجي حسين

لبست عباتي ولفيت شالي ودموعي بعدهن يتجارن

لهسه الهبطه بيه وجسمي بعده يرجف

اجه حسين وطلعنه ...

صعدت بالسياره وحسين جان يسوق بسرعه

نبض حبيبتي لا ضوجين كل تأخيره وبيها خيره

هسه راح اذبجن بالباب واروح ويه ياسر خطيه

حالتهم حاله...

هاي اجتهم لا عالبال ولا عالخاطر...

شاب مرتب و اخلاق

البارحه باليل جنه سهرانين سوه

الله يرحمه ..

شلون مات ... سألته واني امسح بدموعي ويرجعن

ينزلن مادري على شنو من الهبطه لو من حظي الفكر

اللي حالف مايخليني اتهنه بأي شي.. حتى بعرسي

مالي فرحه...

وكع من الطابق السابع

هو يشتغل خلفه وجان صاعد فوك عماره  بالطابق السابع يشتغل

وزالك و واكع للكاع والضربه جايه براسه ماملحكين

عليه ميت قبل لا يوصلون للمستشفى...

.... الله يرحمه

..... يلاا نزلن وحظرن نفسجن العصر اجي عليجن اخذجن

دخلت للبيت تلكتني امي ..

هاا يمه جيتي ... سوده علي يمه مامكتوبلج الفرح

يلاا يمه فوتي وكولي الحمدلله على كل حال

خليني اروح اشوف ابوج خطيه من سمع انقهر

اوف يأهل الرجال على كلشي ينقهر..

عفت امي تسولف ويه روحها ودخلت للغرفه

صدت عيني على المرايه..

تسريحتي ومكياجي وهاي البدله الي بأيدي

شسوي بيهن ذني بعد ...

شمرت العلاكه بكل قوتي وكعدت على السرير

ونزلت دمعه مني بسرعه مسحتها

وكمت سبحت ورجعت نمت ...

لان كاعده من الفجر ونهبطت احس بعد مابيه طاقه

وهم لازم اصحصح لان ورانه روحه للفاتحه العصر...

العصر كعدت تغديت على السريع ولبست اسود وعبايه

زينبيه لان الولد ماقبلوا اطلع بصايه

كالوا الشارع مليان زلم ...

زحمه امشي كدامهم هيج ...

المهم دخلت لبيت عمهم اني وامي واحنه منعرف ولا وحده من الموجودات...

كعدنه بالاستقبال جان متروس نسوان بس ماكوا شي يدل على الحزن بوجوهن ... جانن عباره عن مجاميع

وكل مجموعه ماخذه صفحه ويسولفن...

بس خوات الولد خطيه جانن ذابحات نفسهن بالبجي والطم...

امي سألت عن امه للولد كالوا متخربطه وناقلينها للمستشفى...

خطيه الله يساعدها.. ويصبرها على مصابها..

ولا يفجع اي أم على ضناها...

بقيت كاعده وعيني على الطالع والطاب..لان موقعي جان يم الباب... شويه وجابوا ام الولد

رحنه سلمنه عليها وهي خطيه بس شافتني حظنتني

وصارت تنحب وتحجي وصوتها مبحوح من العياط..

راح ولج خاله راح وليدي راح ابوطول الحلو راح الجان فرحان ويهوس لابن عمه يريد يفرح بعرسه

تاليها زفيته للمقبره... ولكم جيبولي اياه

حيييدر يمه تعال شوف حال امك يمه ...

يمه لفاك التراب كون لافني ولا لافك يابوالملكه الحلو

بعدك يمه الموت موالك يمه لعدوك يمه تعالي

ولللللللكككك يييييييممممممممه....

هي تحجي والنسوان وخواته صارت كلها تعيط وتبجي على حالها ..

ونوب زيدتها من اجت الملايه وصارت تنعه على فراك الولد ... ماتحملت المره وهم رجعت اتخربطت وشالوها

الزلم شيل للطوارئ..

اني ماكدرت اتحمل احس اختنكت اول مره احظر عزه

واشوف هيج اشياء ...

ماما فدوه خلنروح بعد ماتحمل احس راح اتخربط

يلا يمه كومي هم صارت الدنيا ليل .. باجر عود نرجع

كمنه اني وامي ..

امي راحت سلمت على البنات وطلعنا وكفنه بالكراج بين ما اجه حسين طلعنا لان صايره لخه من الزلم

رجعنا للبيت ... سوينا عشه وتعشينا اني وامي وابوي

الولد بالفاتحه..

ثاني يوم هم رحنه الصبح ونفس الأجواء جانت للعصر رجعنه....

يومين وشالوا الفاتحه بس بقت الناس عدهم لحد السابع ...

وره السابع اجه مهيمن كال العرس إتأجل لدورة السنه

بس شنو جان منفوخ من الاعصاب..

امي وابوي كالوا حقهم.. لان الي راحلهم شاب صغير

مو رجال جبير حتى نكول هو جبير وراح الدار حقه

بس هذا شاب بعده بأول عمره..

ابوي وحسين جان رأيهم نفس امي بس الحقنه

الي عندي جان شكله مقابل بس مجبور يسكت...

ياسر ....

جنت كلش متحامل عليها وجنت ناوي اعاقبها

بطريقتي... لحد ماتحبني ياله ينتهي عاقبي الها

لان نفسي ما ترضاها ابقيها بذمتي وهي مارايدتني

ولا اكدر اعوفها...

لهيج قررت اكمل بالزواج هذا على حسب الاصول وبعدين اعاقبها ...

بأسبوع واحد كملت كلشي ...

اني والولد وأصدقائي...

ابوي الله يخليه فرحته جانت غامرته وجان منطلق ويه عمامي وعماتي الي صارلهم اسبوع همه عدنه ويحظرون ويانه ويساعدن بشمس لان هي صغيره وكلشي ماتعرف...

واجواء الفرح جانت اول مره تدخل لبيتنا من سنين

وجنه كلنا عايشينها لحظه بلحظه...

جنه بالنهار نخلصها شغل اني ولد عمي وبالليل

سوالف وضحك واركيله ونسويها كعده معدله

هاي اول مره اني اختلط ويه الولد

جنت طول عمري منعزل عنهم لان الاسواق رابطتني

لا اكدر اطلع ولا اسافر

وهمه جانوا مخلصينها طلعات وسفرات...

واحد من ولدنا اسمه حيدر شاب صغير عمره بالعشرين

يحبله وحده وكاعد يشتغل حتى يلم ويخطبها...

هو خريج اداره واقتصاد جامعة الإمام الكاظم عليه السلام وماكوا تعين فيشتغل بالبناء...

كال

... اني باجر اطلع للشغل لان ابو العماره مايقبل انسخت بس راح افلت من وقت والحك على الحفله

كتله ...

ولك حويدر هي مال شغل دكعد هليومين حالك من حالنه شوفنا كلنه معطلين وبعدين عود ارجع كمل ...

لاوالله ومنو ينطيني يوميتي انته ... ولك ياسر ماتدري شلون مكسور ضهري واديي مجرحه حتى بس المهن فلس على فلس حتى اخطب الي احبها...

ما أعزل بس المهن وانته تكلي اكعد ..

هاي اليومين المايعجبنك بيهن خمسين الف....

يابه اكعد واني انطيك اياهن بس ابقى بالخوه لا تروح

تسلم والله بس ماكدر اعذرني اني لو ما اطلعهن من عرك هل كصه ( وهو يضرب كصته بأيده)  ما رتاح

ولا احسبهن افلوسي...

ثاني يوم كعدنه لكيناه طالع ... جان يوم الحنه الولد كنسوا الشارع وتفقوا ويه مطعم يسوي لفات كص

وقواطي ببسي وخواته الغازيات

وتفقوا ويه رادود يجي...

كلشي كمل .. العشره دك التليفون على عمي ..

اباوع لعمي  بسرعه صاح

يابوووويه ياحويدر وطاح بالكاع رحنه نركض عليه

كومنا وهو يبجي مثل النسوان...

علي ابن عمي الثاني صاح

ولكم حيدر واكع من فوك العماره وميت بكاعه

احنه بس سمعنه ركضنا للمستشفى جانوا ناقلينه

لمستشفى ال***  جانت قريبه علينا بسرعه عشر دقايق وصلنه سألنه كالوا تلكونه بالثلاجات...

رحنه سألنه الطبيب وستفسرنه سبب الوفاة

كال

... نتيجة نزيف حاد بالماغ من أثر السقوط...

طلعناه من الثلاجه وسوينه ورقة الوفاة واخذناه للمغيسل واحنه مامصدكين..

عود صدك مات هذا الجان اليل كله مخلصها علينا ضحك وتحشيش وما خله واحد ما قلد عليه وصنف

هسه لافه الجفن وراح يغطيه التراب..

اووف يافكدت الاخوا تكسر الضهر...

دفناه ورجعنا وبنفس الشارع الي ناوين نسوي بيه  عرسي نصبوا فاتحته...

وتحزمت الزلم والشباب كلها...

يومين الفاتحه واحنه كلنا على دمعه وحده

شباب وشياب اليعرفه والمايعرفه...

ولحد يوم السابع والناس مستمره تجي

اهله خطيه بالضيم امه ماصحت كل شوي متخربطه

ضغط شكل عدها وسكر وضربتها جلطه خفيفه بالدماغ

وابوه حالته انكس بس كاعد ويبجي...

حسين ومهيمن ماقصروا ابد يومين الفاتحه همه ويانه

وكفولي وكفة ما انساها...

اتاجل العرس لبعد سنه...

اني ماجنت حاط بالي وياه بس ابوي كلي عيب

انطيهم موعد للجماعه وكلهم بعد سنه لان مايصير ويبقون ناس غربه لومنا وبينا جان سكتنا بس هذول غربه...

لهيج حاجيت مهيمن وهو مكال شي بس جان شكله ضايج... وشسويله اصلاً ماخليت بالي يمه لان البينا كافينا مومال افكر بأي شي ...

عدة أربعين يوم أخذنا كوسترات ولمينا بيها كل القرابه ونطلقنا للنجف... بهذا اليوم رجع اتجدد علينا الحزن

وعبالك هسه مات ...

اهله ذبوا روحهم على كبره واحنه جنه واكفين داير مداير الكبر ونبجي... بعدين اجه واحد كعد يقرا سورة ياسين وشغلنا بخور ورشينا الكبر مي ورد

وخلصنا النهار هناك ورجعنا باليل وصلنا بغداد

جانوا قسم من الشباب باقين بالبيت علمود العشه

والثواب بس وصلنا صبوا العشه وتعشت الناس

وفضت... وراها جنه كاعدين بالشارع والنوم مجافينا

هذا الصافن ذاك اليشرب جكاير ودموعه بعينه

جنه كلنا كاعدين ونذكر ايامنه وياه الله يرحمه ...

اجاني طفل صغير من الموجودين كلي عمو عمو ماجد

يصيحك... اني كمت دخلت للبيت لكيته كاعد بالاستقبال ويمه ابوي وعمي الثاني ومره عمي ام المرحوم ...

السلام عليكم

جاوب الكل ب وعليكم السلام

هاا عمي صحتلي

ايي يابه تعال هنا يمي ... بويه ياسر اخوك راح لدار حقه وهذا يومه ومابيدنا شي ... لا نكدر انرجعه ولا نكدر انغير الي صار ... ويابويه هاي الدنيا ماشيه

وماتوكف وانته يابويه المفروض هسه عريس

وزافينك على مريتك بس ربك اجل شي بشي ...

واهل مرتك ناس غربه وانجان قدروا حزنه هسه بعد شكم شهر ما يقدرون والناس اصير تحجي

ولهيج يابويه هاي اني كدام ابوك وعمك ومرة عمك

اكلك بويه عرس وجيب بنت الناس لبيتك ولا اطولها

والحزن هو حزن القلب ...

عمي شتحجي ياعرس هذا وحيدر ترابه بعده رطب

لاعمي ما توقعتها منك تريدني افرح واخوي وابن عمي

ما صارله اربعين يوم من دافنينه... لا والف لا

تخبلت من سمعت كلام عمي وحجيت واني خانكتني العبره وماريد اطلعها كدامهم صدك يحجون ياعرس هذا واني بعدها ليلتنا الاخيره محفوره بدماغي وكل ما اذكره اكوم ابجي مثل الطفل ...

طلعت بعصبيه وعمي صاح علي ...

تعال بويه لا تشل حالي تراني مابيه حيل ... حيلي راح ويه الغالي ...

باوعت عليه واني متخصر ورفعت راسي للسما وصحت

يالله

بصوت مخنوك  ورجعت كعدت وهو رجع لنفس الموضوع واني رفضت رفض قاطع...

بس الي صدمني ابوي وعمي وحتى مرة عمي جانوا موافقين على كلامه... بس اني موكادر استوعب..

صعبه ياناس كلش صعبه... شلون الي عين افرح

وحنه الحزن مخيم علينا...

ساعه همه يقنعون بيه بعدها ستسلمت لملحتهم بس بشرط ...

بدون لا زفه ولا عرس اروح اجيبها من بيت اهلها واجي

وافقوا وهذا رأيي الكل جان ...

ثاني يوم رحت لمهيمن وكتله بالسالفه هو وافق

وكلي هي مرتك بعد وانتم عدكم حزن واكيد مومال زفه وفرك بس لو تأجلونها موحلوه هسه اسونها...

واني هذا رأيي بس تعال قنعهم... ماكوا قافلين

بس اني مراح اخذها هسه انتظر فد شهر وانشالله اخذها...

براحتك بعد انته ادره...

نبض ...

عده أربعين يوم على الوفاة

واليوم اجه مهيمن بلغنه بالقرار مالتهم

اني من سمعت بجيت وماقبلت ولا ولاول مره اعترض

على شي ... رفضت ..شنو اطلع بدون لا حنه ولا عرس

ولا البس البدله البيضه حالي حال البنات..

امي غصت من البجي وهم رفضت...

ولكم شنوا بنتي فصليه وانطيها هيج ..

ليش ولكم هيج مستثكلينها وتردون بس تخلصون منها

موكلتوا سنه و وافقنا ... شنو هسه جايين تردون تنطونها هيج مثل المسويتلها مكسوره بالسكيتي..

لا والف لا ما اطلعها لا بزفه وشتردون اسوون سووا...

يمه لا تخبليني شنو الماتقبلين الناس عدهم عزه ومايردون يطولون بالخطبه يعني شلون انكلهم وآلله الحجيه ماتقبل لا ازف بتها بهوسه.. تره موحجي هذا

يمه ... يابه انته احجيلك كلمه تره اذا ابقى هنا شويه بعد يجلطني...

خله وطلع وابوي لزم امي وكعد يحجي وياها وهي رافضه... اني من شفت رفض امي فرحت وطمنت

رحت لغرفتي وعيني صارت على كنتوري فتحته وشفت جهازي كله جان بعده بالكيس...

من كالوا إتأجل العرس لبعد سنه طلعته من الجنط وصفطته بالكنتور بس ما ستعملت منه ولا قطعه ...

ثاني يوم امي جانت شاده راسها ودايخه وضغطها مرتفع...اجيت يمها واني بيدي استكان جاي نومي حامض ..

على كيفج ماما ويه نفسج ليش هيج تقهرين بروحج

وضغطج صاعد من البارحه لليوم...

يمه غير هاي ام الولد تعيش مرتاحه ... واني هاي راحتي شوفيها من وره ولدي ... ولكم ليش هيج حتى ابوج قابل على خريطهم هذا ... اخ ياراسي راح يطك من القهر عساها بحظك وبختك يا أسامه يابن نعيمه

يوم الي دمرت حياة بنتي...

كافي ماما فدوه هاج شربي ولا تقهرين بنفسج بعد واني قابله هاي هيه خلي شيسون يسون مدام بابا هم قابل هاي هيه بعد ...

شربت امي الجاي ونطيتها دواها  ورحت كملت شغلي

والبيت جان كئيب وفاهي لان سوسن والجهال ابيت جدهم راحت اهناك يم اهلها يم امها وخواتها يهتمن بيها اني هنا ما الحك لان البيت كله علي وماعدا طلاباتهم الي ماتخلص وامي مابيها حيل روحها...

الضهر من رجع ابوي والولد انطيتهم موافقتي

ورجعت جددت العهد بيني وبين نفسي

بس اطلع منا بعد ما ارجع ...

بعد مرور شهر ...

وقبل اليوم ألي راح اروح بيه اجه حسين كلي خطيبج

بره يريدج...

لفيت شالي وطلعت بدون ما شوف شكلي

لكيته واكف بالحديقه ..

السلام عليكم ... تفضل ليش واكف بره

عليكمالسلام  ... لا مايحتاج هي حجايتين رايد اكلج بيهن واروح ...

بهاي الاثناء طلع حسين ...

هاي شنو ابو النسب بعدك واكف بره تفضل تفضل

وباوع علي بنظرة غضب ..

والله معلي كتله يدخل بس ماقبل ..

دخل للاستقبال وحسين طلع شكله جان يريد يطلع لان جان كاشخ ...

كمت جبت كيك وببسي ومي قدمتله وكعدت كدامه هو شرب شويه مي وحجه بس جانت ملامحه حاده

ومعضبه...

اسمعي يا بنت الناس انتي حقج اطلعين من بيت اهلج بزفه وعرس وبدله بيضه... بس الضروف حكمت هيج اصير... حاولت أأجل بس محد قبل وحتى اهلج اعتقد جانوا ضد التاجيل بس ميكدرون يحجون لهيج اني وافقت ... وبشرط  واعتقد شرطي وصلج وعرفتيه...

هاي اولاً

ثانياً ... انتي راح ادخلين لبيتي بس مراح ادخلين لغرفتي ولا راح تكونين مرتي...

لان كرامتي ورجولتي ماتسمحلي اتقبلج مره الي وانتي مجبوره علي ورافضتني... لهيج راح تكونين انتي بغرفه واني بغرفه... عجبج اهلاً وسهلاً ماعجبج كولي حتى انفضها...

جنت اسمعه واني اغلي حقد وكره يحجي وياي من وره خشمه وفوكاها هو يقرر ويتصرف من كيفه ويريدني

اوافق... ااخ لو ما مجبوره جان شمرت الحلقه بوجهه وعود شيصير خل يصير حتى لو يموتني مهيمن...

هزيت راسي بالموافقه واني مختنكه لو حجيت كلمه وحده يمكن انفجر... وهو بسرعه طلع واني رحت لغرفتي ابجي والكره تغلل لقلبي ناحيته...

قبل هاي الحظه ماجنت حاسه اتجاهه اي مشاعر بس هسه صرت اكرهه كره العمى...

ثاني يوم ....

:

:

انظر الى غرفتي التي شاركتني كل اوقاتي

السعيده والحزينه ..الى خزانتي التي

لطالما تذمرت امامها وانا أنوي الخروج

وبحجة ليست لدي ثياب لألبسها ..مع العلم

هي كانت تكاد لا تنغلق من كثرة الثياب ..

انظر الى مرئاتي التي كم قظيت معها اوقاتاً

كثيره وانا اشكو لها حالي مره .. واشاركها سعادتي

مرة اخرى ..

انظر الى تلك الانسانه التي منشغله بحزم امتعتي

وهي تكاد لا ترى من سيل دموعها ..

وأتسائل لِما هي تبكي ؟

هل لفراقي ؟

أم لحالي وما ارماني به زماني ؟

أم لأنها كانت احد الاسباب التي آلت بي ألى هنا !!

ربما الى جميع الاسباب تبكي !

لكن لما انا لا ابكي ؟

هل نفذت دموعي ؟ .. أم لم يهن عليهاا السقوط اكثر

فهي قد كانت رفيقة دربي في الاشهر السابقه ..

ربما هي الاخرى قد أملها وظعي وكمية احزاني

فتركتني وحدي .. ادوي الامي..

حالها كـ حال الذين تركوني اواجه

مشتقبلٌ مجهول

وماظيٌ مرعب

وحاظرٌ مؤلم ..

هياا ...

هيا يانفسي قومي فقد حان وقت الرحيل

لبدء عمراٍ من مكاناً جديد

وترك عمراٍ  كان يحمل في طياته الكثير

هياا ..

واجهي كل شيء بقلبٍ من حديد

واتركي كل ما يؤدي ألى البكاء والعويل ..

حملت حقيبتي وخرجت خارج غرفتي ..

لأرى الوجوه مظلمه ..

يكسيها الحزن ..

تغيبها البهجه ..

نظرت اليهم بأستغراب ..لِما كل هذه الدراما

هل يعقل انهم حزينين لفراقي ..

أم انها مجرد تمثيليه يقومون بهاا أمام ما يُسمى زوجي ..ليضهرو له مدى حزنهم على فراقي ..

لم أعد قادره على فهم مايحصل حولي ..

ولا أريد الفهم حتى ..

كل الذي أرُيده هو الخروج من هذا المكان !!

لم أعد قادره على البقاء فيه اكثر من هذا !!

كل شيء فيه يخنقني حتى هذه الازهار التي

كنت استمتع بسقيها  واستنشاق عبيرها اصبحت تجلب لي التعاسة والشئُم ...

نظرت الى زوجي وعيناني تناجيه ليخرجني من هناا

هياا قم ..لاريد المكوث هناا اكثر

هياا لنذهب ..

لا اريد تلك المشاعر التي دفنتها الخروج

من جديد ..

لاشعر بالحب والحنين نحوهم ..

لا أريد ان يجبرني قلبي مجدداً للسقوط

تحت اقدامهم ..

لطلب العفو والسماح عن شيء انا لم افعله ..

لا اريد اي من هذا ..اريد فقد الخروج لأتركهّم

وراء ظهري .. وكأن الله قد خلقني من غير أهل ..

من غير أم ..وأب ..وأخوة ..

الحمدلله ..

قد حدث ماكنت اتمناه ..

كم اشعر بالامتنان لك يازوجي لانك افصحت

عما كانت تناجيك به عيناي ...

وكم كرهت نفسي وقدري وكل الذين من حولي

عندما خرجت من بيت أهلي وانا محمله بذنبً

لم ارتكبه ...

رحماك يارباه ..

رحماك يامن خلقت سكان الارض والسما ..🌸

:

:

:

دخلت للبيت واني احس روحي يتيمه ...

كلشي بياا يعبر عن هذا الأحساس  ..

من عيوني اللي تتلفت بحيره ..

واطرافي اللي ترجف بخوف ..

وحتى هذا البرد اللي ديتخلل بجسمي هم ديگولي تره انتي هسه وحيده بدون ظهر بدون سند يعني حالج حال اليتيم بس أكو فرق بيناا

اليتيم الله ابتلاه بفقدان اهله حتى يختبره بصبره

وأيمانه ..وبنفس الوقت ميتخله عنه ويكون هو الظهر والسند اله ويوگف وياه بقوته الألهيه ....

بس اني شنو .؟؟

اني عندي أم عايشه ..وأب عايش ..واخوان اكبار عايشين هم .. بس اعتبر يتيمه بقيت وحدي وتعاقبت وزوجت شخص ماعرفه ولا شايفته بيوم

وبسبب شنو ؟؟

بسبب شي اني مامسويته ولا اعرف عنه أي شي

صدگو بكلام الناس واني بتهم وتربيتهم ماصدگوني

انكتلت ونهانيت وصرت وحده موزينه وملعوب بيها

وو ...كومه حچي انگال عني بس لأن مگدرت اكمل خطبتي من أنسان مريض فاسد حقير كل الصفات المنحطه بهذا الكون تنطبق عليه ..

فصخت خطبتي منه ..وياريت ما فصختهاا لو أدري باقيه ويه هذاك المريض ولا خسرت كل هاي الخساير وضطريت اعوف اهلي وبيتنه واجي اعيش عند ناس غرب علي ..ماعرفهم ولا عرفتهم بيوم ..واصير فرد منهم وفوگاها مرة ابنهم ..

... فوتي بنتي ليش واگفه سمي بأسم الله وفوتي بيمنتج ..

فزيت من سرحاني على صوت لفت براسي اريد اعرف مصدره  .. شفته رجال متوسط العمر جان گاعد على كرسي متحرك .. وجهه رحماني وعيونه بيها حنان وطيبه ذكرني بعيون ابوي ..

اشرلي اجي يمه رحت امشي بخطوات بطيئه خجلانه على مستغربه ..

وصلت يمه حطيت جنطتي الجنت شايلتها بالگاع ونزلت لمستواه ..بست ايده وسلمت عليه بصوت يرجف ..

..شلونك عموو ..

..ابتسملي بحنيه ومسح على راسي وگلي ..بنيتي اني ابوج مو عمج گليلي بابا بويه باليعجبج ..

..دمعت عيوني لكلامه ولحنيته تمنيت ارتمي بحظنه وابجي قهر هاي السنه المرت علي كلهاا  بس خجلي منعني .. شلون اگدر اسويها واني ما أعرفه هسه يالله اتعرفت عليه .. بس حنيته والطيبه اللي استقبلني بيهاا هي اللي خلت عندي هذا الشعور

..مگدرت اجاوبه ..حسيت اذا حجيت هسه راح تنزل دمعتي قبل لاتطلع الكلمه مني ..و موحلوه هاي أول يوم ألي بهذا البيت ابديه بدمعه ..

..هو هم عافني براحتي بس اشر للبنيه الجانت واگفه گلهاا ..

.. شموسه يابه اخذي اختج لغرفتهاا ..أويلي على هاي الكلمه شگد اتمنيتهاا بيوم ..تمنيت كون عندي اخت ..اشاركهاا حياتي وسراري بس الله مانطاني اخت بس عوظني بسوسن الي هم راحت ويه الراحو ...

رحت ويه هاي البنيه فتحتلي باب غرفه جانت صغيره وعباره عن وردي ..حيطانها والاثاث وحتى الزوليه البلگاع جانت ورديه وبيهاا ورد سمائي واخظر ..

الثريات ذهبيات والبردات طبقتين الاولى شيفون ابيض والثانيه ورديه ستن بس ثخينه ...

عيوني جانت تنطق اعجابهاا بكلشي اشوفه ..حيل حبيتهاا ..ورتاحيتلهاا ..ذكرتني بغرفتي الجانت ببيت أهلي ..هم جانن الاخشاب ورديات بس الحيطان بيض ... حطيت جنطتي ع السرير الي جان صغير لنفر واحد وعليه دبدوب كبير يجي بگدي لونه كريمي وبيه فيونكه حمره ملفوفه على رگبته

(الرقبه ) ...

..وسألتها بخجل .. هاي غرفتج مو ؟ جاوبتني بأبتسامه ..جانت غرفتي وهسه صارت غرفتج ..بعدها مدتلي ايدها وحجت ..

ماتعرفنه على بعض ..اني شمس أو ادگدرين ادگولين رسل باليعجبج .. البنت الوحيده بهذا البيت بس هسه الحمدلله بطلت وحيده لان انتي اجيتي يمي

سكتت شويه وبعدها رجعت حجت بتردد ..

..أني حبيتج من زمان من يوم اللي گالي عنج ياسر

واعتبرتج اختي ..اتمنى انتي هم تعتبريني اختج

ونصير خوات منصدگ ..ونشارك بكلشي مثل الخوات الحقيقيات ..

... ياربي هاي البنيه كتلة برائه ..وكلشي بيها حلو وينحب ..جاوبتها وردت اطمنها لان جانت تحجي بتردد مثل الخايفه.  خاف مايعجبني كلامها ..

.. هلو اني نبض وماعندي اسم ثاني مع الاسف طبعاً

(ضحكت واني هم ضحكت وكملت ) واني هم وحيده مثلج وماعندي خوات بس جانت عندي وحده اعتبرها اختي وخسرتها ويه الخسرتهم ..وبعدين اسولفلج عنهاا ..ودگدرين تعتبريني اختج وصديقتج

وشريكة اخبالج وفرحج والله لا يگولها حزنج ..

وبكلشي تردين حنكون شريكات ...هااا شنوو گلتي ؟

...أمممممم نبض اگدر اسوي شغله ؟

جاوبتها بأستغراب لان اني حجيت وانتظرت جوابها ماكو جانت بس صافنه علي ببلاهه وابتسامه خبله اضحك ..شنوو ؟؟

.. أگدر احظنج ؟ ..حجيت بضحكه واني مومستوعبه طلبهاا ..شنوو ؟ بس بعدها فتحتلها ادي الثنين من شفت عيونها صار بيها لمعة دمع

وهي طفرت بسرعه وحظنتني بقوه وره شويه بعدت نفسها من حظني  وگلتلي ..

.. احم يلا عيني استمتعي انتي بغرفتج واني اروح احظر الغدا لان بابا عنده علاج الظهر

..گتلها ماشي

وهي عافتني وراحت ..افتريت بالغرفه وصرت اتفحص كل شبر بيهاا ...كلش حبيتهاا ونفسيتي ارتاحتلهاا .. فتحت الكنتور ابو بابين الي جان محطوط بالزاويه ويمه ميز تواليت صغير ..

فتحته شفت الخانه الاولى جانت قسمين واحد صغير لتصفيط الملابس والقسم الجواه جان كبير طولاني وبيه تعاليگ فارغه ...فتحت الخانه الثانيه جانت مقسمه قسمين حجمهن وسط ويتوسطهن جرار فتحته جان عريض وعلوه مناسب احط بيه ملابسي الداخليه ..

..رحت لجنطتي اللي جانت جلد وحجمها وسط مجنت حاطه بيها هواي ملابس جبت بس الاحتاجهن وسوسن گلتلي اني ادزلج البقيه بعدين ..مادري اذا راح ادزهن لو لا .. احتمال مهيمن يمنعها وميخليها ادزهن ...

رتبت ملابسي بالكنتور كلهن صارن بس قسم واحد وباقي الكنتور بقه فارغ ..

وبدلت ملابسي لبست دشداشه خياط برنسيسه لونها نيلي ولفيت شال بيجي وياها وبقيت گاعده استحي اطلع .. بقيت قرابة الساعه واني بس اصفن حفظت كل شبر بالغرفه من گد ما باوعت بيها ..

اتمنيت كون عندي موبايل جان خابرت على أمي گلبي ماكلني عليهاا .. اريد بس اسمع صوتهاا ..سوده عليه شگد بجت البارحه حتى حسيتها راح تتخربط و وجها صار اصفر كركم ...

شحچي عليك يامهيمن حرمتني من ابسط حقوقي وتاليهاا ختمتها وياي بظلم چبير كلش چبير ما أسامحكم لا انته ولا حسين حتى صباح هم ما أسامحه لان عافني وسافر وماهتملي ولا رف گلبه علي ...

...اندگت الباب ودخلت شموسه بكفشتها الذهبيه الواگفه وصايره عبالك صدگ شمس

..هلو مرة اخوي العزيز كيفك انشالله امنيحاا  طمنيني انشالله عجبتك العئده عناا ...

.. جاوبتها واني اضحك ..اهلاً بيج عيوني بس ترا ميلوگلج الحچي اللبناني خليج ع العراقي احسن ..

لوت اشفايفها وسوتلي بأيدها عود ظاجت ..عابتلج ماسوين واهس واحد يطلع مواهبه للعلن ..يلاا گومي اتغدي لو اجيبلج غداج هناا ..

..اي والله اجت بوقتها لان طگتني الجوعه .. منو ومنو يتغدا ..جاوبتني وهي عاقچه عيونهاا

.. اني وياج والجني ثالثنه ..

.. بسم الله من هيج سيره عابتلج سئلتج مثل الناس جاوبي هم مثل الناس يعني ألا تخوفيني واني بدون شي شلون شجاعه فديتني ...

...يهاااهااااا نبوضه حبيبتي خفتي اوووي گووجي گوجي خاافت الرقيقه ..دمشي امشي تخوفيني بابا انتي الجني بنفسه اذا شافج يحط نعاله جوه أباطه ويشرد بروحه العزيزه ..

..ليش ولج موزعلت ومديت شفايفي بزعل ..هي بسرعه گمزت واجت گعدت يمي وحجت بسرعه عبالها صدگ زعلت ...

..نبض اسسفه اسسسفه حبي والنبي مقصدي بس جنت اشاقه ..اسسفه اذا جان شقاي ثگيل وماحبيتيه ...

عجبني خوفها وحبيت العب بأعصابها شويه .. لا اني كلش ضجت يعني اني الجني يشرد مني ياضالمة النفس ...

..هي باوعت لوجهي وحصرتها الضحكه حاولت اتخبيها وحجت بنفس مقطوع ..اسفه حبي موقصدي يلاا وهااي بوسه بس لا ازعلين مني ..

بس نبض قلبي اريد اسئلج سؤال وجاوبي بدون زعل ...

..عقدت حواجبي واني منتظره سؤالها لان شكلها جان جدي من تحجي خالي من تعابير الشقه ..

.. اگولج نبض قلبي عود هاي حواجبج ليش هيج جنها عشيره مطشره ..

.. لااااا يااعوبه واني لزمت گلبي وحسبالي راح اسئلين سؤال خطير ..طلع سؤالج تافه مثلج ..

....هههههههههههههههههههه نبض بروح الميتين جاوبي هعهعههه شبيج هههه ههههههههههه

..رسل كافي ضحك لا تموتين ..

..ههههه اسفه حبي بس والله شكلج خصوصاً وانتي عاقده حواجبج تحفه ..بس گليلي انتي ماحافتهن من قبل ؟

.. لا حفيتهن مره وحده وهسه كافي حجي گومي نتغده لان مرغلني الجوع ..

طلعناا بره بيتهم بيه شبه من بيتنا هم حوشهم ماليته النباتات والخظار ..

رحت وياها للمطبخ صبينه غدا جان مرگة باميه وتمن عنبر وخظره ولبن زبادي حطينها بصينيه وگعدنه بالمطبخ بالگاع وفتحنه المدفئه وگعدنه ناكل

ونسولف شويه ونسكت شويه ..

بعدها قطع علينا الصمت حمحمه ..بسرعه حطيت شالي ع راسي ودنگت راسي بماعوني .. وهو دخل وگال

... السلام عليكم

جاوبنا ثنينا ..وعليكم السلام .. بعدها وجه كلامه لشمس

.. شموسه غداج حبي

ادلل حبي

عافت خاشوگتها وراحت صبتله وسئلته .

.. وين تاكل ؟

جاوبها واحس نظراته جانت علي .

.. وديه بغرفتي

طلعت شمس والصينيه بأيدها وبقينه بس اني وياه بالمطبخ ..

بقيت العب بالتمن وهذا السكوت وترني وخله دگات گلبي تزيد عن المعتاد اضعاف مضاعفه ...

بهذا الوقت جان كلشي مسموع صوت اميال الساعه وهي تتحرك ..

صوت غليان المي اللي بالقوري ع الطباخ ..

صوت صرير الحشرات اللي فجئه صار مسموع و واضح مع العلم هو قبل شوي مجان موجود ..

حتى صوت نفسنا الي يصعد وينزل هم جان مسموع

وكل هاي الاصوات جنت اسمعلها واني التوتر شد اعصابي ...

ابدي اگوم اعيط بوجهه واگله ..

.. كاااااافي اتباوع  شيل عيونك مني ابدي احط اصابيعي بعيونه وافگسهن اله ..

كاارهته كره العمى ..مع العلم هو ماله دخل بكلشي صار وياي ..بس گلبي احتله الكره لكلشي موجود بهاي الدنياا ..

كل الاشخاص  الي داير مدايري صرت اشوفهم اعداء الي !!!

ماعدا شمس وعمو ابو ياسر ..

.. يلاا حبي روح اتغدا قبل لا يبرد الاكل ..

.. جاوبها بـ أي وطلع واني حسيت نفسي اتنفست الصعداء ..

بعد مرور اسبوع بدون احداث مهمه تذكر ...

فتحت عيوني بنشاط غريب اول مره يزورني

حتى اني استغربت من نفسي

اول تالي اگعد من وحدي للدوام ..

بدون عرگ وصياح ودفرات ..

طلعت واني لافه روحي بأدي وكاشه من البرد .

رحت ركض غسلت وجهي ورجعت لغرفتي

مشطت وسويت ثنين ظفاير ولبست صدريتي

وكملت ملابسي بحيث قبطت نفسي من فوگ

لجوه بالملابس درع لحتى يحمني من البرد القارص

شلت جنطتي وطلعت للمطبخ شفت نبض واگفه

تگلي بيض وريحة الچاي اجنن ..

صباح الخير يحلو ..

.. صباح النور يروحي يلاا هاج تريگي لا يجيج الخط وتبقين ادگمزين مثل البارحه وطلعين بدون متاكلين

..ايي والله

اووف يانبض هذا ابو الخط شگد مصقط

لوشايفه عينه شگد زايغه وبس يذب حجي ..

نبض .. حطيت كوبي وگعدت يمها ..ولج وليش ساكته لهسه گلي لأخوج خلي يحطله حد ..

.. ماگدر نبض اخاف هذا ابو الخط عنده شلة شباب شرانين ويدورون للمشاكل حكة خشم وياسر وحيد ماعنده احد وياه ولا عنده ظهر يستند عليه لو صار شي ..

.. شمس بس مايصير اسكتين لان اذا هيج معناها انتي بخطر ويه هذا ..لازم اتبطلين منه وشوفيلج خط ثاني ..

.. اي هو اني دادور بس ماكو لان كلها امقبطه هسه ..يلاا حبي اني رايحه ..اگولج صدوگ ياسر بعده نايم ..

..لا طلع اليوم عنده مسواگ راح يجيبه ..

.. هاا يعني الاسواق اليوم يعزل ..

..لا سمعته يگل لعمي راح يبقي ولد صديقه ثقه بمكانه بين ميجي ..

.. همم زين يلاا حبي قبلاتي .. حطيت جنطتي ع كتفي ولزمت كتابي اراجع وامشي وصلت للباب

فتحته صار بوجهي ولد شاب ..

نزيت ورجعت خطوه وره واني متفاجئه ..

..نعم اخويه رايد شي ..

باوعلي من فوگ ليجوه وهو رافع حاجبه ...

(ياربي هاي النظرات موغريبه عليه ) بقلبي ..

..عفواً يولد اكو شي رايد شي .. بقه ساكت بس عيونه اخترقتني مثل الاشعه .. حسيتها دخلت لعظامي .. بعدها حجه ..

.. صيحيلي نبض گليلها حسين يريدج ..

..حسين منو؟؟ ..

.. اخوها ويلاا صيحيها بدون حجي زايد ...

.. شنو هلاسلوب الزفت هذا رحت صحت لنبض وطلعت صعدت بالخط وهو عيونه تلاحگني جانن عين علي وعين على ابو الخط هواي ركز عليه بنظراته .. شكله ماعجبه ..مع العلم همه ثنينهم  وجهين لعمله واحده ..

بس ياربي والله شكله موغريب علي ..

احس نفسي شايفته بس ووين ؟ وين ياربي

.. ياا ياا  عزااااا هذا نفسه ابو جگاره عززا اي والله هو نفسه ...يتبع

____________________

وهذا البارت ما نطاني قلبي اعوفكم بدون ما اكمله

لهذا سهرت وكملته...وطبعاً هذا بارت كامل مونص

عدد كلماته ٤٤١٠ كلمه ... اطول بارت اكتبه بحياتي بزمن قياسي 😂😂

طلع كل البلا بيه واني مادري

ايي غير اني مااحجي 😎😎😎😉😉

اتمنالكم قراءه ممتعه....

ارأكم تهمني لاتبخلون علي بيها ...

وبالمناسبه اني اعرف متابعيني واحد واحد

كلكم اعرفكم اقصد الي يتفاعلون...

بس المفاجئه اليوم تعرفت على ناس جدد اول مره اشوفهم ...

احب ارحب بيكم واكلكم

اهلا بيكم بعائلتنه الواتباديه وانشالله تبقون على طول

منورين حسابي بتصويتكم وتعليقاتكم 😘

موترجعون تختفون تره تصير موخش 😅 اهد عليكم مهيمن اخلي يمشيكم على الصراط المستقيم 😂😂😂😂

Nabà Baqer

Dan ❤😘

نبض __ دافي

Nabà _ Baqer

الجزء الثامن عشر.....

____________________________

مآشـيهہ‏‏

بطريق العمر

خلصت حياتي اوهام

شما أسأل اعله الفرح

كالوبعد كدام

وشفت الصديق الوفي

للضهر خوش حزام

وعمري كضه بلاوزن

للطلع وزنه اغرام

وبيت الحزن من حجر

وبيت الفرح من جام

التحسبهم سيوف الك

طلعوا عليك إسهام

موجنه ذيج البشر

لا بالحقيقه أصنام! 🌸🎎

_____________________________

نبض....

من سمعت بأسم حسين طرت من الفرح بسرعه لفيت شالي وطلعت ..

واني فرحتي ما انطيها لعزيزي موجن حسين الي اجه عبالك اهلي كلهم حملوا واجوا فتحت الباب مال الشارع

لان جان مردود شفته منتجي على الحايط وعينه بالفراغ ويصفر بسرعه صحت ...

حسين حسوني

وهو التاف علي وحظني واني تعلكت بركبته وصرت اشتمه بيه ريحة اهلي ..

ولج ولج شبيج خنكتيني ههههه

ههههه مشتاقتلك امي شلونها ابوي سوسن منير سراج مهيمن كلي شلونهم ...

بعد بعد المختار والمحافظ وشيخ العشيره ورئيس الوزراء هم ليش خطيه بقت عليهم ... لج شبيج اليسمعج يكول صارلها سنين بعيده لو ما هي سبوع

مسحت دمعتي وابتسمت بألم

....حقك هي اسبوع عندك بس عندي عبالك سنين...

صدك نسيت تفظل ليش بعدك بالباب...

هو باوعلي بعين ونص ولج انتي موخوش مضياف عايفه خطارج وباقيه تثردين سوالف...

هههه اسفه من فرحتي بجيتك نسيت والله...

فدوه لقلبج ولج بعدني مامصدك انتي صرتي مزوجه وأم بيت هههه بس لايكلج...

اني كتفيت بابتسامه بارده وهو كمل ...

كليلي شلونهم وياج ياسر خوما سمعج شي اذاج

لا ابد بالعكس كلش حبابين واني حبيتهم وتعودت عليهم ...

اني من كلت حبيتهم باوعلي بتك عين وعرفت قصده بسرعه ضربته على كتفه بالشقه...

لاتباوع هيج لافكسها الك ههه

هههه ولج صايره شقاوجيه وتخوفين هههه يالله رايح اني وسلميلي على رجلج.. وهاج هاي ملابسج دزتهم الج امي تسلم عليج ودكول باجر اني يمها لان اليوم يردون يودون ابوي للطبيب علمود سكره..

اني من سمعت بابوي بسرعه فزيت وفتحت عيوني بخوف وهو بسرعه اشرلي بأيده بمعنا  اهدي اهدي

ماكو شي لاتفتحين عيونج هيج جنهن عيون بومه كلشي مابيه الحجي بس جاي يدلل شويه على امج يكول هاملتني إبتسام هاي الفتره خليني ادلل عليها..

اوووي انزول عليك بكلشي تحشش وتقشب.

ههههه غير انتي فتحتي مغارة علي بابا يلا رايح اني

يااا وين تعال شبسرعه عاد ادخل اشرب مي 

ماريد علجايات انشالله...ااااااا اكلج نبض

صدك  هاي البنيه الطلعتلي منو

يابنيه؟؟؟

هاي ام ضفاير الي طلعت هسه راحت للمدرسه

هاا قصدك شموسه هاي حماتي

ليش تسأل ولك موعساس تبت وانهديت

ادري لخاطر ربج هسه اليسمعج شيكول

مويكول هذا جان أمير بداعش وتاب وانهده..

ههه خوش تضيع سوالف هسه كلي شعندك تسأل

مااااعندي شي يابه ابتليت سألت خومابتليت هااء اهاا

ياكمله رجعي لمكانج

.. يلااا بأي وسلميلي على صكارج...

راح واني عيني وراه ومبتسمه

دخلت اسحل بالجنط جانن ثنين كبار حطيتهن بالغرفه ورحت لمعو شفته كعد صبحت عليه ورحت سويتله ريوك وكعدت يمه بقيت اسولف وياه...

اريد اكسر عليه وحشة الوحده لان هو مايسولف هواي ولا يطلع اكثره يصلي ويقرأ قرءان ذكرني بنفسي

ذيج الفتره شكد قريت و3 مرات ختمته... ونشالله ابدي بالرابعه...

بعد ماكمل  شلت الصينيه ونطيته كلنس مبلل مسح حلكه واديه لان هو ما اكل بس خبز وحليب وبعدها ساعدته يكعد على الكرسي المتحرك وطلعته بره بالحوش يم البلبل كعد يلعب بيه واني رحت للمطبخ قررت اسوي مقلوبه

طلعت غراضها وبديت اسويها

وبين مايستوي الدجاج رحت لغرفة عمي نظفتها وطلعت الملابس الوصخه حتى اغسلهن من تجي الكهرباء ورحت طلعت ملابسي معندي هواي بس هيج نواعم وملابس شمس هم طلعتهن..

بقت بس غرفته وصلت يمها وترددت افتحها ولامره داخلتلها وشايفتها كله شمس هي تنضفها..

ردت ارجع وماادخل بس الفضول حركني وفتحت الباب

ونصدمت بيها ...

اجننننن بكل معاني الكلمه...

راقيه بشكل ونازكه بس جانت ضلمه مديت ايدي للنقطه (مفتاح الكهرباء ) وشغلتها

ونفتحت كل الاضويه الي بالسكف والي بالحيطان مابين اصفر وابيض صار الانعكاس رهيب ويه لون الاخشاب والسقوف الثانويه....

بقيت امشي واتلفت واني متعجبه اول مره اشوف هيج ذوق حلوو...

لملمت الملابس المشموره بالكاع وصارت عيني على مين التواليت رحت يمه باوعت لنفسي بالمرايه

وجهي راجع لرونقه وحتى سمنانه وصايره عندي خدود تلمستهن وعدلت شالي الي ابد ما انزعه...

ونزلت عيني على العطور والغراض الجانت عليه

جان اكوا 3 عطور واحد اسمه شيخ زايد و واحد اسمه العود الأبيض و واحد جان بالانكليزي واسمه طويل

تعاجزت اقراه بس عجبني شكله..

الشيشه جانت سوده وملمسها مخمل قربته على خشمي

وشميته واخذت شهيق طويل واني مغمضه العطر رهيب وحسيته اتغلغل بأعماقي وريحني من كد ما نازك

وهادئ ... رجعته لمكانه وشفت فرشه مال شعر ومشط

ونيفيه مرطبه جونسن للادين..وساعه ومحبس..

لزمت المحبس لبسته جبير على صبعي عبالك اسوار مو محبس رجعته لمكانه و رجعت التافيت اباوع

الزاويه جان معلك بيها تشيرت وتراك بيتي

فتحت الكنتور مجان بيه هوايه ملابس واكثرها عبالك مال شياب الوانها غامقه ومديلاتها مال جيل الطيبين

سديته وطلعت خاف يجي على غفله ويشوفني هنا ...

حطيت الملابس بالغساله وفريتها بمأن الكهرباء اجت

الحك قبل لاتطفه لان بالشتا مينطونها هواي وخصوصاً الصبح ...

ورحت كملت الغدا بين ما أذن دخلت لغرفتي اصلي

صليت الفرض الأول وكعدت أسبح سمعت صوت بره

كمن فتحت الباب ووكفت اشوف منوا الي اجه ..

شفته دخل وهو شايل كارتونه جبيره و وراه ولد دخل هم محمل كراتين الولد عينه بالكاع مارفعها

واني رجعت وره وبقيت أسبح بالسبحه وعيني عليهم ميشوفوني فجئه سمعت شي وكع مديت راسي صارت عيني بعين ياسر الي جان مدنك يلم بالغراض بسرعه خزرني واشرلي دخلي ..

اني دخلت وطبكت الباب ورجعت اكمل صلاتي وبعدها عيونه ابالي اول مره انتبه الهن لونهن مثل لون عيوني

ماعرف شلون كملت صلاتي من وره الشيطان اللعين خله عيونه متفارك خيالي..

لميت السجاده وسحبت الشال اريد البسه كدام المرايه شميته بيه ريحة طبخ باوعت لثوبي بيه طكعه سوب مدمر من طبخت...

بسرعه رحت سحبت الجنطه ورفعتها للسرير وفتحتها شفت ملابسي كلها بيها ... احتاريت شنوا البس كلهن الوان فواتح وهمه بعدهم محزنين...

طلعت دشداشه قديفه لونها زيتوني ومشتغله بتطريز ذهبي واصير مقسمه على الجسم ...

لبستها صايره ضيكه لان سمنانه بس حلوه علي لايكه لبياضي بقيت اتأمل نفسي وهم رجعت اذكرت  عيونه

بقيت ادندن وارتب بشعري ورشيت عطر اسمه ( شهره ) يخبل اموت عليه ولبست حلقتي الي ابد ما لابستها بس اليوم مدري شبيه شكلي انظربت على دماغي...

يلااا هسه شمسويه قابل هي حلقتي لبستها وخلص ...

بعدها لفيت شال بلون التطريز وطلعت صار مقابيلي كلش ماباوعتله وكملت طريقي للمطبخ رتبت الغدا

وردت اطلع وهو دخل صرنه وجه بوجه لدرجه أنفاسه

صارت تلفح بوجهي...

متت من الخجل بسرعه دنكت راسي وطلعت ركض

لغرفة عمو دخلت واني اتنفس بسرعه ...

يااا نبض هاي شبيج ... عزاا شكد عيب

.. كمت احجي بيني وبين نفسي كلام مامترابط من كد خجلي ...

هاا يابه شخيرج

هااا انتبهت لعمو عيونه علي

لاا عمو ماخيري بس اجيت اشوفك كملت صلاه حتى تتغدا...

ايي يابه كملت هاج هاي السجاده بس بويه شبيه وجهج احمر بس لا احتركتي بالطباخ ..

هااا وجهي !!! ااا لاا عمو لا ماحتركت بس مادري شبيه هسه اشوفه ! ااا يلا هسه اجيب غداك ..

السلام عليكم... الله يساعدك يابه

عليكم السلام... رديت السلام وطلعت بسرعه بس شفته دخل للغرفه ...وبعدني خجلانه من موقف مساعه...

رتبت الصينيه لعمو وطلعت واجت شمس من بره

هااا الله يساعدهم

ويساعدج يلا بسرعه بدلي حتى نتغدا

ايي عفيه ميته جوع شنو الغدا

مقلوبه ...

اووووي قبانوو انا للي مسويه مقلوبه تدرين اموت عليها وماعرف اسويها ...

ضحت على شكلها شلون كمزت من سمعت اسم المقلوبه ..يلاا لعد بسرعه بدلي ولحكي عليها لاتخلص

راحت تركض قبلي لغرفه ابوها واني بعدها دخلت شفته كاعد يلعب بفونه يم الجربايه وشمس واكفه فوك رأس ابوها وسولف وتضحك وياه حطيت الصينيه بحظن عموا ونطيته الخاشوكه بيده ولتفتت على شمس ...

يلاا ولج هاي بعدج مامبدله...

ايي هسه بسرعه ابدل

زين يلا ... ورحت جبت غدانا وكعدنه ناكل يم عمو بالغرفه ... وره ماكملنا اني غسلت المواعين وشمس سوت الجاي ...

بعدها كلمن راح لغرفته ينام اني ما جاني نوم كعدت ارتب بملابسي الي ترسن الكنتور وزادن بعد

ولا جنت ادري عندي هلكد ملابس ...

كملت وصعدت الجنط الفارغه فوك الكنتور وتمددت بفراشي وغمضت عيوني واني افكر بكلشي وأكثر شي الوقف الي نحطيت بيه اليوم كل ما اذكره تصير رجفه بجسمي واحس اصخن من الخجل ...

عزاا شون عيب عوزي شويه وادخل بحظنه ...

اووف كافي نبض كافي انسي ونامي ...

شمس ....

الصبح من طلعت بالخط بقيت بس افكر بهذا الولد معقوله الصدفه خلته يطلع اخو نبض ..

سبحان الله...

بس شلون عليه اسلوب بيئه وزفت اليشوفه ويشوف اناقته ميكول اسلوبه هيج ... صدك لو كالوا المظاهر خداعه...

بعد ما وصلنا للمدرسه نزلن البنات كلهن واني آخر شي لأن اني كاعده بالاخير صاحلي ابو الخط اسمه جعفر

شمس اريدج بسالفه

حاجيته من غير نفس لان اعرفه هو شنو ..

خير شكو ؟؟

على كيفج يابه احجي هي كلمتين رايدج بيهن

اني تنفست بنفاذ صبر وكتفت ادي وهو كمل

شمس اني رايد اتقدملج شدكولين ...

فتحت عيوني متعجبه من كلامه وماعرفت شردعليه بقيت ارمش بعيوني ببلاهه وهو كمل كلامه وجان مركز بملامحي ...

ماريد منج هسه الجواب الأحد رجعيلي جوابج وياريت كون موافقه ... لان صدكيني اعيشج أحلى عيشه واخليج اسعد انسانه بالكون...

عزااا بعينك هذا شكاعد يمسلت شو راح زايد عزااا

بقيت اسولف بقلبي ولساني انشل مولان فرحانه لو موافقه بس لان متعجبه كلامه وخصوصاً هو واحد نسونجي تكه ماكوا مامخلي بنيه ما مصادقها..

خليت ودخلت للمدرسه واني شارده الذهن وبالي يم هذا الي مكيف بروحه

لا وجاي يحجي وياي بحيل صدر

وهو جنه صرصره مكتوله بنعال...

ضعيف وشعره صابغه اصفر واكف من الوصخ

وملابسه من شفته وشافني هنه هنه مايغيرهن ولا يغسلهن... كاتله الوصخ لا وفوكاها محفحف و  وجهه احمر جنه بنيه ولا شعرايه بيه ...

خلص الدرس الأول واني مفاهمه منه شي

الدرس الثاني جانت بنيه ويانه ماكوا سألت عليها المراقبه و وحده جاوبتها

زمن تره سهام طلعت دزت عليها المعاونه وطلعت للبيت

زين يعني مجازه مو ؟؟

مادري ...

اني جنت كاعده برحلتي وحاطه ايدي على خدي وباوع على البنات اجت يمي وحده كالت

شمس هذا الواجب حليتيه

باوعت عليه رياضيات

ايي حليته اخذي الدفتر بالجنطه

هي فتحت الجنطه وطلعت كل الدفاتر وكالت ولج منو بيهم ... شنو جيبي هذا خذي ورجعيلي اياه بالفرصه

ايي هسه اكمله مدامنه شاغر...

صدك سمعت سهام طالعه ويه ابو خطكم

اني عقد حواجبي ومنتظرتها تكمل وبنيه كاعده مقابيلنه بس سمعت نطت يمنه وصارن يسولفن واني بس اسمع ...

ايي ولج هي كالت للمعاونه عود ابوها موصيه يطلعها الدرس الثاني بس هي جذب رايحه وياه للجزيره

منو كلج ؟؟؟

هي كايله لجوان صديقتها راح اطلع وياه للجزيره

وذيج طاشتها بين البنات !!!

بناااات شعدكم هسه ...

جنه مسوين دائره مغلقه ونحجي وفزعنه صوت المدرسه رفعنا روسنا شفناها مدرسة الكيمياء

اهووو لاهلاا بس تسمع شاغر هسه تاخذنا

ست عدنه عربي

هاا عربي زين لعد طلعن كيميا لان مدرسة العربي اليوم مجازه...

البنات كلهن صاحن اهووو

وهي سمعت وكعدت ترزل وتصيح بعدها كامت تشرح

واني بالي ابد مويمها بالي يم هذا الي طلبني الصبح

وطلع ويه زميلتي بالصف بنفس الوقت...

شهالصلافه الي عنده ...

صدك الي كال الي استحوا ماتوا...

خلص اليوم عادي بين ادروس وشرح ولغوه وعياط

ولا عبالك بنات اعداديه.. دك الجرس يعلن انتهاء الدوم شلت جنطتي وطلعت شفته واكف يم الكيه

انطينه نظرة احتقار وصعدت وبعد ولا باوعتله

بس هو عينه جانت علي من المرايه..

الطريق صار اشطوله اريد بس اوصل ...

همزين اليوم خميس يعني انام وما اكعد لحد الليل ...

وصلنا لمنطقتنا نزلني يم الباب وكلي شمس عود

فكري ... اني بالقدره لزمت نفسي عنلا اضربه بحذائي

لهذا السافل المنحط...

دخلت شميت ريحة الاكل وطلعت مقلوبه

افيششش شكد احبها بس مع الأسف ماعرف اطبخها

شكد حاولت بس ماتضبط عندي ...

وجود نبض بحياتنه كلش هوايه فرق ..

كلش حبيتها وحسيتها اختي صارلها اسبوع عدنا بس بهذا الاسبوع كدرت تكسب ثقتي وافتحلها قلبي واشاركها كل اسراري ..

بس باقيه حسره بقلبي اعرف هي شنو صاير بينها وبين ياسر حتى كلمن ينام بغرفه .. كلما اسألها تتهرب ومجاوبني ..

بعد ماكملنا غدا فتت اخذلي قيلوله ماكعدت لحد ماسمعت صوت الاذان طفرت عبالي ثاني يوم لان الدنيا ظلمه كل ضني الدنيا فجر بس من طلعت وشفت ابوي كاعد بالحوش رحت ركض بسته براسه ..

مساء الخير باباتي .

مساج الله بالنور بنيتي ليش نايمه لهسه بويه مايصلح نوم المغرب ..

ادري بابا والله بس تعبانه وماحسيت على نفسي ولوما صوت الاذان جان كملتها للصبح .. هسه كلي اخذك لغرفتك اصلي شكلك بردت وشفايفك ازرگت .

الله يساعدج بنيتي ايي والله خذيني لايفوتني فرض المغرب وانتي لبسيلج شي ثخين لاتتمرضين ..

انشالله .. تخذت بابا لغرفته توضى وحطيتله السجاده والتربه والسبحه بحظنه على المخاد وقربت عليه المصحف وطلعت للمطبخ يم نبض ...

مسااااء الخير

ياهلا مساء الخيراات صح النوم

صح بدنج شداسوين .

داسوي عشا فاهيتا تاكلينها ؟؟

ايي طبعاََ اكلها اصلا اني كلشي استقبل

هههه معده لو جاروب نسائي ...

لاتقلدين يلا خليني اصلي حتى اجي اساعدج

ماعندي شي هياني كملت بس المقبلات عليج واني همات رايحه اصلي

تمام لعد صلاه مقبوله مقدماََ

دخلت اصلي بعد ماكملت طلعت وشالي برگبتي لان ادري بياسر مايجي هيج وقت ...

الحلو بهذا البيت محد يدخل باحد يعني اني البس حجاب وانام لوحدي محد يسأل ليش ؟

او يدخل عدا شمس كم مره سألت وتهربت من جوابها وبعدما عادتها ...

واكثر شي حلو هو حبهم لبعض وحياتهم البسيطه الخاليه من التعقيد والممنوع والحرام ...

اشوف شمس هي هسه اعداديه وبعدها مامحجبه بالغرم من همه بمنطقه شعبيه بس محد جبرها تتحجب

ومن سالتها كالت

... شوفي نبض من احنه صغار اهلنا علمونا على مبدأ انت حكيم نفسك تريد تكون زين لو تكون شين

  عندك عيون اشوف

وعندك عقل يفهم

ويستنتج ويحلل الصح من الخطأ

وحتى انطونا حرية الاختيار وعمرهم مجبرونا على شي

ولا فرضوا علينا شي حتى باختيار مذهبنا لان اهلي كل واحد من مذهب شكل ...

لهذا تشوفينا هيج وتشوفين محد يحاسبني على حجابي لان يكولون الحجاب لازم قناعه ومحبه مو كره واجبار حتى تكملين حياتج وانتي حابتها بكل تفاصيلها

كلش عجبتني طريقة تربيتهم وتمنيت لو احنا مثلهم

وسألت نفسي لو اني تربيت بنفس الطريقه وخلولي حرية الاختيار ... ياترى راح البس الحجاب لو لا

وراح اكون نفسي اني الانطوائيه والي ماعدها ثقه بنفسها

لو راح اصير مثل شمس عايشه كالفراشه ترفرف من مكان لمكان وتنشر الفرح والضحكه بكل مكان لأنها ماعاشت كسرة الخاطر من اقرب الناس الها  

الله يسعدها ويجعل الفرح منهاج طريقها كلش حبيتها وغيرت هواي بيا وخلتني اضحك واسولف بدون خوف

وحده كسبت ثقة الثانيه ..

تقدمت للمطلخ من بعد ماجنت واكفه بالحوش ..

اممممم شهالروائح شهالمناظر

عجبتج هاي مقبلات امريكيه وهاي لبنانيه

والله طلعتي مبدعه مجنت اعرف عندج هيج مواهب

هههه مواهب مره وحده منين يحسرا الله ينطي اليوتيوب لوما هو جان اني بالضيم ...

اسم الله عليج من الضيم يلا خلينا نودي العشه هسه عمو تلكينه جاع .

زين انطيني اني اوديه وانتي روحي صيحي لياسر

لا حبي ماحزرتي اني اوديه وانتي صيحي اخوج

تؤ تؤ تؤ اني الي اوديه وانتي الي صيحين زززووووجج

وشددت على الكلمه الاخيره ..

باوعتلها بنص عين واعرف غايتها من هذا الاصرار شنو

ومن لاجاره رحت واني اقدم رجل وارجع رجل كلش مستحيه شلون اصيحه خاف يمه ناس ..يارب ساعدني

احم احم ياااسر .. ياسرر

شلون بالله مايسمعني .. رجعت اصيح  ياسر تعال اتعشه بهالوقت طلع هو واني جنت ماده راسي واصيح بالممر الي يربط بين المحل والبيت

ماشوف غير بطن صارت كدامي فتحت عيوني على وسعها وصرت ابلع بريكي ورفعت عيوني بالبطيء لحد ماصارن بعيونه بسرعه عدلت وكفتي ورجعت خطوات لوره ...

وهو جان واكف وعلى وجه ملامح استغراب

شعندج هناا ؟؟؟!!!!!

دنكت راسي فشلانه وكتله جاي اصيحك تتعشه ومديت ايدي ارجع شعري ليوره وهنا اتذكرت اني ملابسه حجابي بسرعه رفعته من ركبتي حطيته على راسي وماحس غير شعري كله انكلب على وجهي وفوكاه الحجاب مدري شلون صار

صرت عبالك جنيه ..وهو واكف كدامي وگوه كاتم ضحكته ..

من فشلتي خليت وركضت للمطبخ واني اغم بنفسي

شبيه اليوم كلساع احط نفسي كدامه بمواقف بايخه خرررب هبل هسه شيكول عليه . .اقل شي بحقي كلمة ثوله ايي والله صدك اليوم اني مثوله ...

بقيت كاعده بالمطبخ استحي اروح يمهم واگابله واگعد

على العشه ...

شنو ماناويه تجين ؟؟؟؟

درت وجهي من سمعت صوته وشفته واكف كدامي اني بسرعه نزلت راسي خجلانه واشرتله ايي

يلا لعد منتظرج !!!!!

هاااا ..رفعت راسي وصرت ارمش سريع بعيوني مثل الثوله  من سمعت اخر جمله وحسبالي مو الي صرت اتلفت يمنى ويسرى ماشفت احد بس اني وياه جنه موجودين .. معقوله جان يحجي ويااي ؟!!!!!!

يعني صدك الي سمعته وكال منتظرج !!!!!!!!!!!!

منتظرني اني !!!!

شبيج تتلفتين يلا امشي

رجعت اباوعله وشفته ماد ايده

لا هسه اكيد داحلم وهو مامادلي ايده ويريدني الزمها واروح وياه اكييد ..

يابه شوكومي تعبتيني تراا

رفعني من اكتافي وكومني ولزم ايدي بايده قوي ومشه واني وراه امشي واتعثر وبعدني مامستوعبه الي دايصير .

دخلنا بالغرفه وكعد واني مقابيله وصار ياكل واني شلت لكمه حطيتها بحلكي وعيني عليه اريد استوعب تصرفه

البارحه اني والماكوا سوه ... واليوم منتظرني وتعبته

غريب هذا الانسان ..

يابه مطاير ترا .. همست بأذني شمس

هااا

كملت بنفس الهمس ..اكلي شبيج صافنه بالولد وختمتها بغمزه ..

اني حسيت على نفسي ونزلت عيوني وكملت اكلي بس موبيدي كلشوي عيني تنرفع عليه وهو ولا يمي ياكل ولازم فونه ولا يدري بالدنيا ملتهي يراسل ..

واني هنا الفضول كمز عندي

يريد يعرف يراسل منو؟؟؟

واني ويه فضولي بهذا الشي ...

حاولت اشوف لو الگطلي كلمه ماكوا مايبين

وهاي العوبه كاعده تضحك علي وتغمز بعيونها عساهن الفگس ..

وثول شبيج ترا عادي بس فضول

ايي صحيح صدگتج هههههههه

انزول حتى انزول ..موصوجج صوجي اني الي مكابلتكم انتي واخوج اكوم احسنلي ..

شلت الصينيه وطلعت واني اغلي قهر من بابه يهتم ومن بابه يطنش ويضربني عرض الحايط

هسه اني ليش مهتمه وعساه لاهتم عبالك حياتي متوقفه على اهتمامه ..

لا هي موهتمام بس وضوح يعني الانسان يكون واضح

يابيض ياسود مايصير يكون ومبهم ومو واضح ..

اووووي نبض تالي عمرج صرتي تحجين ويه روحج من وره واحد كاعد يلعب باعصابج ...بس بسيطه مثل ما انته تعاملني راح اعاملك

العين بالعين والسن بالسن والبادي اضلم 😈 ...يتبع

        ------------------------------------

باجر تلمنه القيامه

ونحجي يم الله

الصدگ ...🍁🍂

        ---------***----------***---------

Nabá baqer

Dan 😘❤

نبض __ دافي

Nabà __ Baqer

الجزء التاسع عشر و ماقبل الاخير 😻......

_______________________________

كان خطأي الأول

أنني دائماً رحيمه بالآخرين قبل نفسي تلقيت الصفعه

لكنني لم أنسى الدرس ...🌸

_________________________________

ياسر ...

طلعت من بيت اهلها ودموعها تارسات وجها

عصرني عصر منظرها

وحقها كل بنيه تتمنى تطلع من بيت اهلها بموسيقى وفستان ابيض وحفله حلوه ..

شنو ذنبها هي بأحزانه .. بس مابيدي شي عليها

حاولت ااجل بس محد سمع وقتنع انجبرت اسوي هيج

بس الغريب هي ماودعت احد كدامي

ابوها وخوانها كلهم جانوا واكفين ماسلمت عليهم ولا

نطقت بحرف بس انطتهم نظره اني شخصياََ صفنتني

وماعرفت افسرها بس همه اعتقد عرفوا معناها لان نزلوا روسهم ومانطقوا بحرف ..

اخذتها لبيتنا واني مفهم ابوي على كل شي بس ما كتله على رفضها الي .. لا فهمته احنا راح نبقه فتره بعيدين عن بعض بين ما اني نفسيتي تتعدل واطلع من جو الحزن وهي هم تتعود علي لان اني لا رحتلها ولا حجيت وياها بالتليفون ومادري اصلاََ اذا عدها اولا

هو ماقتنع بكلامي بس ما ضغط علي

كلي بكيفك الي يريحك سويه

لهذا دخلتها للبيت واني رحت للاسواق فتحته

من رجعت الضهر شفتها هي وشمس كاعدات بالمطبخ

حاجتني شمس وجاوبتها واني بالي وعيوني كلهن يم الي كاعده زمطيتني ضهرها وحجابها على راسها

طلعت شمس وبقينا لوحدنا واني مستمر اشبع عيوني بشوفتها بس هي جنت احسها بالگوه متحملتني ومطايقه وجودي لهيج قررت استخدم وياها اسلوب

الاهمال ..

وقررت اخليها تحبني بس على نار هادئه موفجئه

اجبرها علي وعلى حبي لا اخليها هي من وحدها تجي وتعترفلي بحبها ..!!!

لهيج اول اسبوع اتبعت وياها اسلوب الاهمال

هملتها ولا كأنها موجوده وكل اموري جانت تقوم بيها

شمس وهي حتى نظره منظرتلها ..

بس ببني وبينكم جنت بالگوه مصبر نفسي عنها

احبها ورايدها وهي حلالي بس ماگدر اوصللها لحد ما تستوي على نار هادئه ويطلع طعمها ...

مثل الاكل اذا اكلته وهو عاصي وني مراح تحس بطعمه وراح يأذيك بس اذا طبخته على نار هادئه وخليته لحد ميطاع مونته وصبرت عليه هنا حتحس بطعمه وحلاوته وتحس بالسعاده لانك سويت من اللاشيء .. شيء

وقلبها هسه هم قاسي وصعب بس بالمستقبل راح يليين ويطرا وراح ادخل حبي بيه واخليه يتوغل بيه

بس يرادلها صبر

وآآآآه منين اجيب الصبر ..

يلاا الله المعين ...

اليوم من بعد كل هاي المواقف الي انحطت بيها كدامي وشفت شلون تأثرها وخجلها قررت ابدي وياها

بالمرحله الثانيه من الخطه ...

وهي اشغل بالها بالتفكير بيه واستخدم وياها اسلوب

الاستفزاز

واول خطوه جانت هي البارحه من دخلتلها للمطبخ وشفتها شلون خجلانه استخطيتها وقررت اخفف عنها الخجل وانسيهااياه بالاستغراب ..

وفعلاََ نجحت بهذا الشي لان طول مجنه نتعشه هي جانت عيونها علي واني جنت مسوي روحي داراسل

بس بالحقيقه جذب جنت بس العب باعصابها

وهي ماتعبتني بسرعه  تنرفزت وكامت وهي تحجي ويه روحها واني شبعان ضحك عليها بداخلي ...

عبالك طفله بسرعه تنثار وتستفز  وهذا سبب ثاني خلاني ازيد بحبي الها وشغفي بالوصول لقلبها وتملكه

لهيج اليوم الصبح كعدت شفتهن كاعدات هي وشمس ويسولفن بالمطبخ بس دخلت هنه سكتن

ما اهتميت كعدت و صبحت عليهن

صباح الخير ..

جاوبني ثنينهن بصباح النور هي جاوبت من وره خشمها واصلاََ حتى مباوعت علي ... من شفتها هيج سوت

حجيت وياها ..

نبض حضريلي ريوكي وبعدها روحي حضريلي الحمام

حتى اسبح ومن اطلع الكاج محظرتلي ملابسي لان عندي طلعه مهمه وياريت تختارينهن بذوق راقي !!!!!!!! ,,,,,

نبض ,,,, لااااا هذا اكيد يشاقه باوعت عليه بتعجب وهو ولا كأنما كاعد ويلعب بفونه وينطي الاوامر عبالك الجاريه مالته ,,,

والله ولا اسوي اي شي شنو هذا اشايفني بنكلادشيه حتى يتأمر علي ...

باوعت الشمس وسويتلها اشاره بالهوا يعني اني معلي ماسوي اي شي وهي فتحت عيونها واشرتلي

بمعنا يموتج اذا مسويله

رفعتلها حاجبي واني مخايفه ولا يهمني شيسوي خليسوي ...

اذا كملتي يامدام سوالف الصم والبكم ياريت اسوين الي كلتج عليه ...

بقيت متعجبه هذا شدراه دنسولف بالاشاره وهو حاط راسه بجهازه ولا رفعه ..يمه اسم الله بس لا حاطله عين برگبته ..درت سويتله بيض خبط وجاي وصمون

وحطيتهن كدامه ...

يلااا ياقوم اني رايحه اكمل نومتي الحمدلله الكرش وتمت تعبأته بنجاح وبقى بس اخذلي غفه ع السريع

واكعد وزن

ياسر ,,, ايي مواكول شعجب كاعده من الصبح واليوم عطله طلع الكرش مكعدج

ايي والله لوما طگتني الجوعه ولا اكعد بس بعد

انجبرت اكعد اعبي بانزين وارجع اكمل مسيري بالنوم المطولي هههههه يلااا بايي 

الله وياج حبيبتي نوم العافيه .

اني جنت واكفه واباوع عليه شلون يسولف ويضحك وياها ولا معبرني بس من يريدله حاجه يعرفني  كمت اقلد عليه بيني وبين نفسي

الله وياج حبيبتي نوم العافيه

حبتك حيه ام سبع روس مو راس واحد

ابو صماخ ابو عيون موحلوات انننن

بعدين طلعت احظر الحمام لشهريار وهاي العوبه من صدك رجعت نامت وعافتني وحدي !!

انشالله كون بس يوگف جوه الدوش يخلص المي الحار وينزل عليه مي بارد امييين رب العالمين

انشالله كون توكع المنشفه من ايده بالگآع وتتبلل ويصيح علي اجيبله غيرها واني ماجيبله وابقيه يتعفن هنا بالحمام واشفي غليلي منه لهل متعجرف الحقير

ابو خشم ....

جنت اشتغل وادردم عليه بصوت عالي

وكمزني صوته

خلصتي ؟؟؟؟!!!!!!! 

التفتت وشفته واكف وراي ومنتجي على الحايط ويباوعلي بنظرة مدري شلونها ويبتسم ..

اني حبست النفس واريد انطق كلمه ماكدر بقيت بس ابلع بريكي وشغله وحده ابالي

بس لاسمعني عزااا والله اروح بيها اذا سامع

لا يربي لا فدوه لنبينا محمد كون ماسامع ياربي فدوه

ااااا حظ رتل ك الحما م

بالگوه گدرت انطق واني احاول اتهرب بعيوني بس هو بعده واكف ولا حرك ساكن وفوگاها صافن بيه

ادري شماكل لحم مطايه حتى بس اصفن

  شكد يصفن

واخيراََ نطق تمثال ابي هول

زين شكراََ  ويلاا طلعي شنو عاجبج تبقين يمي هنا وغمز

عزاااا هذا شيحجي شگد مايستحي ومنحرف

طلعت اركض واسمع ضحكته وراي

ضحكه بلا سنون انشالله يامنحرف يااخلاق سزز 

رحت لغرفة عمو اشوفه گعد لو بعده حتى ابلغه بجية امي اليوم لكيته بعده نايم موعوايده بس يمكن لان

گعد الفجر للصلاه وتاخر ياله رجع نام .

طلعت على كيفي حتى لايفز ورحت لغرفة المكروه

احظرله ملابسه لبيكاسو عنده موعد مهم

(بيكاسو هو عارض ازياء وسيم جداََ وهو الي طلع مودة اللحيه العاليه والشارب المفتول )  ,,,,,,

دخلت للغرفه وشفتها شلون ظلمه ودافيه تشهي للنوم

وبيها عطر طيب هادئ .. فتحت البردات وشغلت الاضويه لان اذا ابقه بيها دقيقه بعد وهي ظلمه بسرعه اغفه واني واگفه ...

بس شلون خبيث ماخذ الغرفه الدافيه اله واني منطيني الغرفه البارده حتى تدفئه مابيها اموت من البرد بالليل

لوما اتغطه بلحافين جان هسه اني بعداد الموتى من البرد واستحي اطلب صوبه لو هيتر لان هنه ثنين موجودات صوبه نفطيه بغرفة عمو وهيتر كهربائي بالحمام ,,,

فتحت كنتوره واحتاريت شطلعله ملابس وهنه كلهن من زمن جدو الله يرحمه عريضات ومديلاتهن تخزي

مومال شباب ,,,

طلعت بنطرون قماش اسود حلو قماشته بس مبين عريض يرادله تقريم ويطلع توب التوب

وباوعت للقمصان اكثرهن مقفلات بس 3 ساده

طلعت واحد ازرق جويتي ساده وهم عريض شسالفه

ليش هيج ملابسه عريضه !!!!!!

حطيته على السرير هو والبنطرون وشفت عنده معطف

اسود معلك طلعته حلو عبالك من هذا الي يلبسه مراد علم دار بمسلسل وادي الذئاب

هم حطيته وياهن

ودرت اريد اطلع وهو دخل يفرك بشعره بالمنشفه

نعيماََ

الله ينعم عليج ,,, هاا حظرتيهن ؟

بلي هذن بس سؤال ؟

جواب

ليش هيج ملابسك كلهن اعراض

حط المنشفه ع الكرسي وباوعلي وهو طابگ حواجبه

شنو اعراض على شنو قصدج

قصدي البناطير والقمصان كلهن اعراض ومديلاتهن قديمه !!

والله هذا ذوقي ومطالب رأيج بيه وهسه اريد ابدل واشر على برا 

عابت فشلني ,,, انطانياها هجمه مرتده بالگصه ,,

هي طلعت واني رحت للكنتور باوعت بيه وشفت الفرق بين ملابسي والملابس الي يلبسهن اخوها فرق شاسع ..حقها مايعجبها

كل بنيه تتمنى زوجها يكون انيق ومهتم بنفسه .. لهذا منا ورايح اهتم بأناقتي اريدها تحبني من بره ومن جوه

ونشالله باجر  اخذ حسين ونروح نشتري ملابس جدد على الموديل  اغير استايلي كله وهذن كلهن اذبهن ...

بس هسه خليني البس سريع واروح وارجع قبل لا يجون اهلها لان حسين البارحه بالليل اجه يشتري من الاسواق وگتله ادخل رفض وگال

باجر احنه يمكم لان الوالده تريد تجي تشوف نبض

كتله هلا بيها باي وقت بيتها هذا  الصدر الها والعتبه النا ,,,

كملت تبديل ورشيت العطر ولزمت المعطف بايدي وطلعت

ماشفتها يمكن بغرفتها خليت وطلعت واني اذكر

سوالفها شون تدعي عليه هههههه حتى دعاويها مال جهال ههه ياربي هاي البنيه شنو بيها ماينحب

كتله من البرائه وتمشي عالگاع ..

صدك اذكرت هي ماعدها جهاز لازم اجيبلها واحد تخليه يمها كلشي يصير تخابرني

لان اذا الله يسرها وهاي الشغله الي رايح بيها تضبط مراح بعد ابقى يمهم وحتى الاسواق احتمال اسده

وراح يبقى بالي مشغول لهيج اتصل بيها اطمن واريح بالي وهم اسمع سنفونية صوتها ..

شمس ,,,,, الصبح سوالف لنبض عن هذا الصرصره ابو الخط  وطلبت نصيحتها شنو اكله هو طبعاََ اني رافضه

بس ردتها تعلمني شلون ارفضه بدون ميحسبها اهانه

او اجرحه ...

لان هو صح مينبلع جنه حباية فلاجين بس بنفس الوقت خطيه ماريد اجرحه وهو مامأذيني بصيغه مباشره ....

كالتلي ...

عادي اعتذري منه وكليله بعدني صغيره مومال زواج

واهلي رافضين فكرة زواجي هسه .. انشالله الله يعوضك وتلكه الانسانه الي تحبك وتسعدك ...

وديري وجهج وروحي لا تنطينه مجال ياخذ وينطي وياج بالحجي ...

اني سمعت نصيحتها وقررت اطبقها لان راسي داخ من

گد ماالليل كله خلصته افكر شأگله ..

بهذا الوقت گعد ياسر وبدت المناوشات بيناتهم واني كاعده بنصهم جني فزاعة خظره وبس اضحك عليهم

اخير شي قررت اروح اكمل نومتي واخليهم لوحدهم بالكي تتحسن علاقتهم 

ولو تعجبني عركاتهم عبالك داتفرج مسلسل تركي

بس ماريدهم يبقون هشكل اريدهم ينجمعون سوه ويحبون بعض لان ثنينهم لايگين لبعض ...

حسين ,,,,,

جنت نايم واحلم بوحده شلون صاكه تكتل كتل

وماحس غير نزلت علي بروده بحيث كمت مفزوع

واتلفتت ومن اباوع الگه نبع الحنان واكفه وبيدها

دولكة مي واني متنگع من فوك ليجوه ,,,, 

ليش هيج حجيه ليش ماتخافين الله مادكولين ابني نايم بالنعيم اااقصد نايم تعبان اعوفه يرتاح

هسه الله يرضاها محمد نكعتيني هيج بالله تمرضت

وصرت انكت بهدومي اوخر المي بس شيوخره اذا هي مسبحتني نبع الحنان تسبح خليت ونزعت التشيرت وشمرته بالگاع ورحت طلعتلي واحد ثاني ,,,,

والله يايمه اليجي من يده الله يزيده صارلي شگد اكعد

بيك وانته ذاب روحك جفي وفاتح حلگك مترين ادري

حتى الميت هم جان كعد على صياحي

ايي وتنگعيني مو بس بسيطه الا اقفل الغرفه بعد منا وهيج لان الضاهر انتوا اليعيش وياكم مايرتاح ابد

بس بس كافي لغوه وامشي تريك حتى توديني لاختك

عود صايرلي رجال ويهدد

الا اقفل الغرفه هي يالله وتقلد علي وتفر بأيدها

اني بقيت مصدوم بمكاني وفاتح عيوني على قصف الوالده الي

,,,,  خررررب ادكلي مو رجال

يممممممه بعد شكبرني اصير حتى تحسبيني رجال لخاطر الله ,,, صحت وراها وهي ولا يمها عافتني وراحت واني بقيت اباوع للفراش الي صار مسبح لو

لنفسي

خرررب هبل شوف شسوت بيه حتى اوديها لبتها

والله مال هسه اضربها بوري وارجع انام واخليها تعيد حساباتها وتعرف منوا المورجال ..

بس لحضه لحضه تريدني اخذها لنبض يعني اشوف الشگره ام ظفاير

هلااااااااا العب بيها يابسميره

صدك جذب حجيه اني الما اخذج

اخذج واني الممنون

نزلت واني اطگ اصبع واهز رگبه

غسلت ورحت لگيتها كاعده بستها براسها

صباحج ورد وفل وياسمين يااحلى واجمل ام بالدنيا

هلا صباح خير شعندك نازل فرحان وتتلوگ قبل شوي جنت تهدد واقفل واعزل وبالك عني

طبعاََ نبع الحنان جانت تحجي وياي وهي تباوعلي بشك

واني كعدت كدامها وسويت نفسي الابن الندمان الحزين الي بعدله طخه وتنزل دمعته

قرفصت گدامها ولزمت ايدها وبستها

ليش هيج ضالمتني ياروحي انتي وقلبي ونبضاته

سامحيني يوم( ورجعت بست ايدها ) سامحيني لان رفعت صوتي عليج وصرت عاق ,,,,

كلشي بالدنيا عندي يهون الا رضاج

شتردين اسوين سوي موبس مي لو تنكعيني بتيزاب

هم اقبل وعندي مثل العسل على قلبي مدامه من اديج الحلوه هاي ياقمر يافله ياااا ,,, كافي كافي لواكه

صارلك ساعه تتلوك كول شعندح  لاعبالك مشت علي

الكلمتين ذني لايمه ترا انته اوليدي واني عاجنتك وخابزتك على اديي كول شوراك

التفت لوراي ورجعت باوعتلها

كلشي ماوراي والله

الله يطوللللك يااااخلك حسينووو كول شعندك وفضني اريد اروح لاختك هميالله لانتأخر .

ماعندي شي يوم ماعندي بس ريوك عدكم لو لا

اكوا روح سويلك مابيه حيل اكوم

خادم صغير اني اسويه ليش لا  واذا تردين حتى الغدا اني اسويه ..

والله مامرتاحتك هاي لواكتك وراها شي (وتباوعلي بعين ونص)  

هههههههههههه ليش اضلمين بختج يابسومه ترا اني رجال فقير وعلى باب الله ,,,,

كملت ريوك وصعدت كشخت كشخه فول وسبحت بالعطر ونزلت لكيت امي لابسه عبايتها ومنتظرتني

بس شافتني رأسن طلعت

وصلنا دكينا الباب فتحها ياسر سلمت عليه وهو هم سلم على امي وباسها من راسها ودخلنه بالاستقبال

شويه واجت نبض الضحكه من الذان للذان طفرت بحظن امي تبوس بيه ,,,,,

والحجيه ماصدگت لكتلها سالفه حتى تحرر تانكي الدموع الحاطته بعيونها ...

لاوالحلو ثنينهن اتگابلن وكعدن يبجن ويلولن

ادري ياحجيه جايه تشوفين بنتج الي مزوجه ولتوجبين بفاتحه شو خلصتنها بس بجي كلشي مافتهمنه ..

امي مسحت ادموعها بشيلتها وباوعتلي بطرف عينها

اسكت انته ومالك دخل اليوم صاير كلش اخفيف ومامرتاحتلك ,,,, اثگل يمه اثگل ترا الثگل نعمه للرجال

خررررب لاحجيه رحمه لجدج لاتقصفيني مومسحتي بشخصيتي الگاع ذهاباََ واياباََ  هاي وعود احنه طالعين خطار ,,,

لعد اذا هيج اسكت واكرمني بسكوتك احسن ماكلشوي امسح بيك الگاع

استغفرالله الله يطولج ياروح

وانته متونس مو فاتح حلك بالعرض

فرحان بالقصف ,,, ججيه ماتقصفين نسيبج هم لو بس

كادره علي لن فقير ,,,

شبيه نسيبي شو ورده مال الله وذهب مومثلك اخفيف وتهش وتنش ,,,,

ياحيالله من جانه ..

دخل علينا ابوياسر بكرسيه

والشگره جانت ادفعه اني من شفتهم وكفت على حيلي

عود احترام لابوها بس الصدگ  من شفت جمالها رجلي من وحدهن وگفن لوهيج الجمال لومينراد ..

سبحان من صورها

موبنيه عبالك لعابه

مشيت بخطوات بطيئه سلمت على ابوياسر وعيني

كلشوي تروح عليها بس هي جانت تباوعلي بنظرات

انزعاج وكره استغربت وبقت ابالي ولازم اعرف ليش ؟

شلونج خاله رسل

الحمدلله خاله زينه

دومج انشالله يمه انتي بياصف

خاله اني رابع علمي

اللهم صل على محمد وآل محمد يمه ولامبين عليج

ناعمه الله يحفظج ويستر عليج ..

تسلمين خاله ...

اگول يمه شنو

رأيج لوجيبيلج هيج جنه تغيرلج النسل

شششش والك يامضروب نصي صوتك لايسمعونك

يمه هسه شكلتي ..دخطبيلي اياه شخسرانه انتي كل المصاريف عود اني ادفعها انتي مادفعين شي من جيبج

والك اسكت كافي ..

ااا نبض حبي اخذي خاله جوه حتى تاخذ راحتها

هااا باوعت عليه واني مامستوعبه الي سمعته

هو صدك كال حبي لويتهيألي ؟؟!!!!!

فزيت على ندسة امي باوعت عليها واني بعدني بالي يم الكلمه الي سمعتها

يمه شبيج متصفصفه بالوجوه ورجلج صارله شكد يحجي وياج ..

هااا يحاجيني !!!

باوعتله لكيته عيونه علي وشبح ابتسامه جانبيه بوجهه ..

هناا عرفت شنوا قصده يريد يبين كدام اهلي عود زواجنه حقيقي وعلاقتنا طبيعيه

شكد حيال ومكار

احم يالله ماما تعاي يمي بالمطبخ حتى تنطيني رأيج بطبخي ..

يالله يمه كومي من رخصتك خويه

مرخوصه خويه اخذي راحتج 

طلعنا اني وامي وشمس للمطبخ كعدنا وسولفنا وسألتها عن ابوي كالت

زين يمه بس سكره مامنتظم ذيج الفتره

والبارحه اخذناه اني واخوج للطبيب وانطاه ادويه و وصاه كون لاينقهر ولا يتوتر ..

زين ماما هو شعنده على شنوا ينقهر

يمه ينقهر عليج من يوم الي زوجتي بيه لليوم هو دمعته مانشفت كل وقت يذكرج ...

تنهدت بقهر واني بس الله يعلم شكد مشتاقتله وطاكه روحي على شوفته بس حلفاني الي مانعني مااطب ذاك البيت واروح اشوفه ...

دعيت ربي يعافيه وينطيه الصحه والعافيه

وعسى ولعل يرزقني شوفته عن قريب ...

وذكرت سوسن

صدك ماما شخبار سوسن ؟؟ 

والله يايمه زوينه يوم ها ويوم ها على الله

الدكتوره كلتلها بس هذا الطفل وبعد لازم ماتحبل لان رحمها مايتحمل ولاسامح الله خاف يشلونه الها

بقينه نسولف واسألها عن اخبار العشيره وعبالك صدك عايفتهم من سنين مو اسبوع ههه بس صدمتني من كالت فاطمه انخطبت لواحد شرطي يصير ابن صديق ابوها ..فرحتلها وتمنيتها تعقل وتركز وتنسه سوالف المزعطه الي جانت اسويهن ..

بهالاثناء دخل علينا ياسر 

اني جنت كاعده عالكرسي وامي كاعده كدامي

وهو اجه وكف يمي وحاوطني بأديه اني جفلت وصرت كلي ارجف وبردت وحتريت هو يمكن حس برجفتي

عصر كتفي بأيده وبعدها كام يمسح عليه

رفعت راسي عليه وبلعت ريكي هو جانت عيونه

عين على امي وعين وياي تراقب حركاتي عينه صارت

على بلعومي من يصعد وينزل وبعدها رفعها لشفيفي

لثانيه خدرت عيونه وزادت عصرته على ايدي اني نزلت عيوني مستحيه واحس اخدودي راح ينفجرن من الخجل امي انتبهت علينا وبتسمت واني هنا لوذبحوني متلكون قطرة دم بيه ...

شكد عيب كدام امي واحد صفن عالثاني ونسينا نفسنا

هو كمل سوالف وي امي عادي ولاكأنما وبعدها

وصاني استعجل بالغدا وباسني براسي وطلع

وامي عرالك ماصدكت يطلع وهي استلمتني نصايح

يمه رجلج خوش وليد اريدج تصيرين معدله وتحافظين عليه وتكسبين قلبه .. بعد هو صار كل دنيتج وسندج وعزوتج ومالج غيره احد بعد الله

لايفيدج اب ولااخ غير رجلج وصاحب بيتج ,,,الخ

وووو كومه حجي واني ماعلى الساني غير كلمه حاظر ونشالله ماصدكت اذن حتى تكوم اصلي بلكي تنسى هاي السالفه

وهذا اني اعرف شلون اصرف وياه و اوكفه عند حده

عبالك لعبه عنده ساعه يهتم وساعه يهمل والله يالله

بعد الصلاة صبينا غدا ولتمينا كلنا على سفره وحده

بس لاحظت نظرات حسين لشمس وانزعاج شمس منه

هناا خفت لاياسر ينتبه وصير موخوش وتخرب بيناتهم

اشرتله بعيوني وعضيتله شفتي وهو ولا يمه ...

اوف ياهل ولد مايتوب ابد بعده على سوالفه انوب عاف البنات كلها واجه لحماتي يريد يزين راسي ويدمر حياتي وهي منا شلونها تخبل

بعد الغدا امي وحسين شربوا جايهم وراحوا

وماصدكت شوكت يرحون كل الوقت كاعده على اعصابي وخايفه.

.شدعي عليك ياحسين ماخليتني اتهنه بشوفة امي ...

بعدها وكفنا نغسل المواعين اني وشمس الي بالها مدري وين احجي وياها ولاتسمعني وكل شوبه اضربها تنتبهلي وشويه وترجع لصفنتها .. متأكده عدها شي

بس ما سألها الا هي تجي تحجيلي من كيفها ..

بعد ماكملنا المواعين رحنه كعدنا بغرفة عمو

احنه اليوم كله نخلصه يمه بس وقت النومه نتوزع لغرفنا ...

كعدنه اني وشمس نتفرج مسلسل بجهازها ع اليوتيوب

وجانت الدنيا مغيمه والسما صايره مظلمه

دخل ياسر مقبط بمعطفه ولاف راسه و

وجهه باللفاف

وبيده علاكه ..

شمرها بحظني ونزع اللفاف و وكف يدفه ع الصوبه الي جانت بنص الغرفه

اني ستغربت شنو بيها فتحتها ..

وجان الكه تليفون گلگسـي حديث

لزمته واني مومصدگه وسألته

هذا المن ؟؟

الج فتحيه شوفيه يعجبج اذا مايعجبج  حتى نروح اني وياج نبدله بواحد على ذوقج ...

طلعته من العلبه جان يخبل شكله فضي بيه انعكاس الوان الطيف السبعه وخفيف وشكله كشخه

فتحته لكيت بيه شريحه ومعرب ومرتب كامل

ابتسمت بفرحه ورفعت راسي على ياسر حتى اتشكره

شفته واكف يباوعلي ببتسامه وعيونه مضيكهن ومركز

بكل تفاصيلي الفرحانه من لمعة عيوني لضحكتي الي مداكدر اسيطر عليها لرجفة ايدي ...

ضعت بضحكته وبشكله الي يوميه داركز بيه اكثر

واشوف بيه ملامح الرجوله الي جنت اتمناها

وفجئه التليفون انسحب من ايدي باوعت شفتها شمس

ماخذته وتكلب بيه وتباوع

ياااااا شوفي شون حلوو احدث من جهازي

تتبادلين ؟

اجيت اجاوبها بس سبقني ياسر الي خمش الجهاز من ايدها وكعد بصفي لزگ وكال

شو جيبي هاي ابدال لا دگليلها بلعافيه  وبعدين شبيه جهازج مصارله سنه عندج

بالعافيه حبي انشالله تبدلينه بالاحسن منه

جاوبتني شمس ودارت نظرها على ياسر تكمل وياه

واني گاعده بنصهم من يميني شمس ومن يساري ياسر

الي عطره ذوبني وقربه رجفني

صرت بمزيج من المشاعر

بسبب قربه مني لهاي الدرجه فقط بينه شبر او اقل

مابيه شي اخويه العزيز الغالي بس ترا انته گلتها

صارله سنه واكيد بهاي السنه نزلت نوعيات جديده وحديثه واني اريد جهاز جديد حالي حال نبض

(تحجي بطفوليه وماده حلكهه مترين ) 

جهاز جديد ماكوا وابو المثل يكول

مد رجليك على گد اغطاك ,,,, زينن ست شمس ؟

زين استاذ ياسر جاوبته بأنزعاج وحطت راسها يم اذني وحجت بهمس

عابتله هذا رجلج شكد بخيل

انطيتها نظره انزعاج ولتفتت لياسر الي كعد يعلمني عليه ودخلي رمز الشبكه ونزلي برامج الفايبر و واتساب

وانستغرام بس الفيسبوك

مقبل اسوي واني هم مااريده لان ماعرفله ولا احبه  وحطلي رقم حسين اخوي ورقم ابوي وهذا اكثر شي فرحني يعني هسه اكدر اتصل عليه شوكت ماريد وافتح كامرا واشوفه صوره وصوت ...

هسه تعلمتي شلون سهل مابيه شي صعب

اي شي ماتعرفيله كوليلي عليه

نطت شمس من يمها وكالت

    وليش مادكلي  اني مثلاََ 

هو مد راسه عليها وكلها

ممكن تنجبين عزيزي ؟..

ايي عزيزي ممكن !! عابتلك

ههههههه جنكم توم وجيري بس تتناكرون

ههه اني توم ورجلج جيري وطلعت السانها تعيب

ضميه لا اكوم اكصه وعدل گعدته بعد ما حط الجهاز

بأيدي وحجه ويه عمو الي هم جان لازم جهازه ويكنك

شويه وينتبه علينه شويه

يابه قبل فتره اجاني عمار ابن ابو خالد وكلي بدائرته

طالبين موظفين ورواتبهم زينه اني كتله اني خريج سادس يعني ماعندي شهاده جامعيه هو كلي ميخالف قدم شخسران  وصدك قدمت

بس ماجنت متأمل انقبل

والبارحه خابرني وكلي نروح نشوف اسمك طالع لو لا

واليوم الصبح رحت والحمدلله اسمي جان ضمن الي

ماخذينهم ...

ايي الحمدلله ابني الله يفرحك مثل مافرحتني هسه

الله يوفقك ويكتبلك الخير على وجها زين هاي الوضيفه حكوميه ؟

اهليه ؟؟

لا يابه حكوميه تابعه لوزارة الكهرباء بس اجور يوميه

وراتبها زين مواقل من اربعميه ووياها زوجيه يعني خير من الله .. وبلكي اذا شافوا شغلي زين يثبتوني عالدائم

انشالله ابني تفائلوا بالخير تجدوه اهم شي هسه انته طلعت من الاسواق وحبستها

والله جنت شايل همك

اكول شكم دوب تبقه انته لادراسه

لاوضيفه لاراتب حكومي حالك حال صحبانك ..

الحمدلله يابه هذا كله بركة دعائك ...

مبرووووك يسوري حبيبي

الله يبارك بيج كفوش يوم  الالج وتتخرجين وتتوظفين

شمس رفعت اديها للسكف وراسها وصاحت

ااااااااااااميييييين رب العاااااالمين

مبروك ,,,,يتبع 

--------------------------------------------

برداََ وسلاماََ ياموطني 😢🙏

Nabá baqer

Dan😘🌺

نبض ___ دافي

Nabà __ Baqer

الجزء عشرون  .......

      _________________________________

  ياعشكهم *"

"* هيل ماعبرت سنينه

شما يمر بينه العمر *"

يكثر حنينه

🌸--------------------🌸

م

بروك ,,

الله يبارك بيج هاا شلونه الجهاز عجبج

ايي كولش حلو شكراََ

بالعافيه وهاي الشكراََ رجعيها لان انتي مرتي يعني مسؤله مني وواجبي هذا

بقيت اباوع عليه وهو رجع يسولف ويه عمو

وصدى كلمة مرتي يرن براسي

اذا مرتك اني ليش باعدني عنك ؟؟؟!!

سألت هذا السؤال بيني وبين نفسي وتمنيت لو عندي الجرئه والشجاعه واسأله اله حتى احصل الجواب الي

يريحني عن التفكير ...

بعد مرور اسبوع ...

مثل كل يوم كعدت من وقت لفيت نفسي بروبي فوك

ثوبي وحطيت شالي على راسي وطلعت خطف

للمطبخ لان جانت الدنيا تمطر والحوش كشف

والكاع منكعه

دخلت للمطبخ سديت الباب والشباك وشعلت عيون الطباخ وحده للبيض والثانيه لقوري الجاي

والثالثه الي ادفه عليها لان ادي يبسن من البرد

قليت البيض وغله الجاي نصيته حتى يخدر براحته

ورحت طلعت جبن شيدر وطماطه وزيتون من الثلاجه

رتبتهن بماعين و وياهن البيض والاستكاين

وحطيتهن بصينيه وطلعت بسرعه لغرفة عمو

صبحت على عمو وحطيت الصينيه ورجعت طلعت

اجيب القوري والشكر من رجعت للغرفه لكيت ياسر

جاي من الفرن مال صمون وشمس مكملة تبديل ملابسها ..

كعدنا نتريك ونسولف عن المطر والشوارع الي غركانه

وياسر اليوم يباشر بالدوام

يفكر شلون راح يطلع لان يكول هسه بالكوه اجيت اكمز ادكمز من المي والمجاري الفايضه

لهذا خابر على صديقه يمر عليه ويطلعون سوه بسيارته

للدوم لان ثنينهم يشتغلون بمكان واحد ...

شمس كملت اكلها وطلعت لدوامها

وياسر وراها كام يبدل

واني كمت غسلت لعمو ولبسته جواريب وغطيته بعد ببطانيه لان ماكوا نفط

نشغل الصوبه ..قبل يومين وزعوا نفط ع البطاقه

بس طلع كله مي وخرب الصوبات لهيج

ياسر كال عوفه هذا واني اروح اجيب من المحطه

وعلى عينا صارلها يومين مطر والشوارع مفيضه ومحد يكدر يتحرك ..

بعدها رحت للمطبخ غسلت المواعين ونظفته وطلعت

سبيناغ عندي مثروم بالمجمده اطبخه للغدا

لان هاي الاكله شتائيه بأمتياز ودفي وبيها فوائد هوايه

بين مايحتل رحت لغرفة عمو ارتبها

جنت اشيل بالفرش لان اني صارلي ليلتين انام هنا

لان غرفتي ثلج لاصوبه لا تدفئه

لهيج تهجرت يم عمو وشمس ع الدفو

لميت الفراشات وجاي اغطي النظده ودخل ياسر

وعطره دخل قبله جديد اول مره اشتمه وقوي بس طيبه ريحته ..

وكف يحجي ويه عمو واني درت وجهي عليه

وبقيت مذهوله بمكاني من وسامته وكشخته

وجماله اول مره اشوفه هيج أنيق وحلو ومهتم بنفسه

بقت عيوني عليه واحس نفسي راح انفجرمن القهر

شعنده هيج زالغ نفسه زلغ وكاشخ

لا والبس كله مخصر ومنسق يخبل

طبعاََ ليش مايكشخ ويترتب موراح يداوم بدائره

واكيد هناك موظفات وصبايا ولازم يطلع حلو گدامهن لعد مثل حظي من اجه اخذني من بيت اهلي

جانن ملابسه مبهذله وفوكاها شمرني بالبيت صفر على

اليسار لا الي قيمه ولا اهميه وحتى مامعبرني ولا معتبرني مرته ...

ااااخ يالقهر انشالله كون ماتتهنه بملابسك ذن

وكون بس تطلع منا تجي سياره وترشك رش مي مجاري من الشارع وتنجبر ترجع

تغيرهن وهم من تطلع تجي سياره لاخ وترشك

وهم تغيرهن وتبقى كلساع لحد ما تكعد وتسكت وبعد ماتروح

اااااااااميييييين رررب العاااااالمين

ررررررربي انته جاهي ورجائي استجب دعائي رررربي

بقيت من كل عقلي ادعي وادعي بس مانقبل دعائي وراح واني بقيت اكل بروحي من القهر

بالله شدعي عليك ياحسين يوم الي اخذته وغيرته الي

180درجه وكلبته على البطانه .

منو عتب عليك منو كلك

ااااخ منك كون ااااخ مصايبي كلها من وراك ابو البلاوي

شبيج يابه تمشين وتحجين ويه نفسج ؟

هااا لا عمو مابيه بس سالفه ابالي

انشالله مگضيه بنيتي بس يابه تعاي انطيني اللگن

خليني اتحظر للصلاة هم يالله

ياصلاة عمو بعد وقت

لابنيتي الساعه 12 الاربع هم ياله

باوعت للساعه ايي والله هاي صدك وقت الصلاة

ولا حسيت على الوقت يمكن لان مغيمه وماكوا شمس

حطيتله الغراض يمه وبقيت واكفه على راسه حتى اخذهن بعد ميكمل واني اغلي اغلي من القهر

بعد ماكمل شلتهن وطلعت للمطبخ وهمزين سكت المطر

وطلع ضوا حتى اكدر اعرف اشتغل

وكفت احمس بالجدر واني منفوخه واليحجي وياي كلمه انفجر بوجهه ..

شويه وسمعت الباب انفتحت طلعت اركض عبالي هو اجه طلعت شمس

هااا الله يساعدج

ويساعدج شبيج كالبه الخلقه وتحجين من وره خشمج

مااابيه ليش شبيه هاا اشايفتني يعني

يااا نبض شبيج ترا ماكتلج شي ليش هالصياح

اني هنااا بعد ماتحملت اضم ادموعي اكثر من هيج 

وهنه عبالك ماصدكن اسمحلهن بالنزول

صارن يتسابقن على خدودي مثل الشلال وشويه شويه

صرت ابجي بنحيب واشهگ 

شمس خطيه تخبلت من شافت حالتي ركضت علي حظنتني وصارت تحاول اتهديني بس اني وين

كمت ازيد وازيد بالبجي وهي نخبصت ماتعرف شسوي

بعدها سحبتني من ايدي ودخلتني لغرفتي

كعدت على السرير وهي يمي لازمه ايدي ودكلي

ابجي طلعي كل الي بقلبج

بقيت لحد متحسيت نفسي ارتاحيت وهاي الحسره والخنكه الجانت نايمه على قلبي انزاحت ياله هديت ومسحت ادموعي وكمت وهي كعدتني

وويين ؟ كعدي ماكوا كومه منا لحد مادكليلي شبيج ليش هيج حالتج عبالك وحده رايحلها عزيز

شمس فدوه عوفيني مابيه بس شويه جنت محتصره وبجيت ورتاحيت

شمس ماقتنعت بكلامي من شكلها ونظراتها واكد هذا الشي كلامها

ايي وعبالج اني صدكتج .. احجي شبيج تره هاي الدموع والشهكه مومال وحده محتصره لو مختنكه

مال شي ثاني اكبر من هيج ..احجي صاير شي بينج وبين ياسر وره مارحت ؟!

اخذت نفس عميق وذبيته على شكل حصره وحجيت

اااااه شمس مادري شبيه صارلي فتره احس اموري كلها متخربطه وتفكيري مشوش والسبب اخوج

عقدت حواجبها بستغراب واني كملت

اخوج كاعد يتونس بتعذيبي وحرگة اعصابي

يوم يهتم بيه ويسأل عني ويكعد يسولف وياي ويصفن بيه ويتعامل بحنيه ويخلي احوالي كلها تتخربط

ويربط تفكيري بس بيه

وعشره يهمل ولا كأني موجوده ويطنشني وحتى ميباوع بوجهي وهم يخليني بس افكر ليش يسوي هيج

شنو غايته من يلعب بأعصابي ...

لج شايفه من يهملني شيصير بيه اصير عبالك مهرج اسوي كلشي حتى بس الفت انتباهه واخلي يباوعلي

وهو ولا كأنه ...

لا وهسه كام يشتغل بدائره ويه موظفات وصبايه ولوشوفين كشخته من طلع الصبح عبالك عريس

قميصه الابيض وقاطه الاسود ورباطه وشعره الي اموكفه ولحيته الي محددها وخوب العطر

هذا بحث اخر قبل لايدخل للغرفه هو دخل قبله يعط

واني باقيه مثل اللسليمه اكل بروحي قهر وطلع ولا عبرني ولا كأني واكفه كدامه حتى كلمه محتاجه شي ماكالها مثل كل مره

كليلي كل هذا ودكليلي شبيج ..شبيه بعد راح انجلط واموت واخوج السبب

اسم الله عليج حبيبتي شمس حجت هيج وسكتت وعبالك تريد تحجي شي ومتكدر ادكوله

شبيج احجي كل الي بقلبج لاسكتين

يعني احجي ومازعلين مني ؟؟

طبعاََ

شكو احجي والله مازعل

نبض ترا كله هذا من ايدج

هاا حجيتها بستغراب وهي كملت

ايي منج من يوم الي اجيتي هنا وانتي باعده روحج عنه  لا تحجين وياه ولا تهتمين بيه وفوكاها اربعه وعشرين ساعه خانكه روحج بالحجاب ودشاديشج ذني جنهن مال بيبيتي وانتي عود عروس جديده

شلون تردينه مايهملج وهو الا يطلب الحاجه منج ياله اسوينها والا هو يحجي وياج ياله تحاجينه

شوفي حالج الله عليج هذا شكل وحده مصارلها

تلاث اشهر من مزوجه حواجبج تارسات وجهج وشواربج خاطات جنج ولد مراهق هسه خاطات شواربه

سكتت ما حجيت لان حجيها كله صحيح بعدها كتلها

ادري اني غلطانه ومعترفه بغلطي بس كليلي هسه شسوي شلون اخليه يهتم بيه وبعد مايهملني ولا يحرگ اعصابي ..

اني اكلج اول شي نروح للصالون تغيرين من شكلج

لنفسج مو بس اله انتي حتى ترتاحين ونفسيتج تتغير

زين غيرت شكلي وبعدين اروح اكله تعال اهتم بيه ؟؟!!!!

لااا طبعاََ شنو ترحين انتي بالعكس اريدج انتي الي تخلينه عقله بيج ويفكر بيج ويهتم بعد بيج بس بدون ماترحين انتي اله

شلوون؟!!!

اني اكلج شلون بس هسه خلينا نتغدا والعصر انروح اني وياج وندز على عمتي تجي تاخذنه للصالون

زين

تمام يالله لعد اني اروح اكمل الغدا وانتي بدلي وطلعي غسلي الحوش مدامها الدنيا سكتت بعد ماتمطر

تمام ..

بعد ماتغدينا خابرت شمس على عمتها وكلتلها انريدج تاخذينا للصالون

هي مكالت شي بالعكس كيفت وكالت شويه واجيجن

احنه نظفنا البيت وحسبنا حساب خاف نرجع متأخرين  لهيج حظرنا العشا وسلفناه

وستأذنا من عمو وبدلنا اني لبست صايتي وجواها بنطرون كابوي وبدي ولفيت شالي بهمال طريقه حلوه تعلمتها من النت وطلعت تخبل على وجهي

وشمس لبست لنطرون اسود وبلوزه حمره حياكه ومعطف اسود وفتحت شعرها حتى يدفيها

وطلعنا وصلنا يم باب الحوش انفتح الباب دخل ياسر

اول ماشافنا بسرعه عقد حواجبه وسأل

ووين انشالله ؟؟

رايحين ويه عمه للسوگ شمس حجت واني باوعت عليها ليش كالت للسوگ موللصالون ؟؟؟!!!!!!!!

هو باوع علي ورفع حاجبه وتقدم علي واني رجعت ليوره وطخيت بالحايط

وانتي مدام شنو رجلج خراعة خظره حتى ماكلفتي نفسج تنطينه خبر بطلعتج لو اصلاََ انتي ماحاسبتله احساب ..

اني بلعت ريگي بخوف من نبرته الجافه ونظراته النار

وهزيت براسي بمعنا لااا وعيوني راحت لشمس تستنجد

بيها بس هو جانت ملاحظته اسرع من رد شمس

بسرعه كلي

عيووونج علي وجاوبيني مواحجي وياج

هااا احم مادري ماعبالي ماتقبل بس احنه كلنه لعمو

وانتي مزوجه عمج لو مزوجتنيييييي

عااط بيه بصوت رجفني وبسرعه نزلت دموعي من خوفي لان شكله كلش جان يخوف اول مره يصير هيج ويصيح

خلاني العن الساعه الي طاوعت بيها شمس ومشيت وره افكارها الي راح توديني وره الشمس 

شبيك عمه صلي على النبي شجاك مادكلي اجيت من بره متحلف  اخذتنا حاصل فاصل بصياحك وتحقيقك ورعبت هل مگروده  موهيج ياعمه  غلطت علمها فهمها

موتصيح وتحاسب مرتك صغيره ويجوز ماتعرف المفروض انته الجبير الفاهم العاقل تعلمها وتنبها بعد ماتعيدها واذا عادتها عود ذاك الوقت الك الحق تصيح

تعصب ..

عمه جانت تحجي واني دموعي تنزل بصمت ولازكه نفسي على الحايط خايفه منه وهو حاط وجه بوجهي ومركز علي بعصبيه بس جان ساكت يستمع لعمته لان هو كلش يحبها ويحترمها ويسمع منها

والحمدلله كلامها كدر يأثر بيه ويهديه  بعد مني ورفع شعره بيده وصار يستغفر بصوت عالي وبعدين رجع باوع علي وكال .

هالمره راح اعديها لخاطر عمتي بس مره ثانيه اذا انعادت قسم بالله مااعديها واخليج تتندمين بكد شعر راسج لان اني كلشي ولا احد يستغفلني ويصعد فوگي

ويعبر زينننن مدام نبض صار معلوم

هزيت براسي واني احمدربي بكلبي لانها عدت على خير

بدون ما احصلي كتله على شكله هذا

بعدها وكف عدل وتخصر وعيونه اجولت علي من فوك ليجوه وتقدم واني متت خوف

ياربي وين انطي وجهي وين البد

عزاا هذا راح يلزك بيه شيريد يسوي

بلعت ريكي وعيوني صارت بعيونه من حط وجهه بوجهي واني حبست انفاسي وبقت بس انفاسه تظرب بوجهي رفع ايده قربها مني واني

تلقائياََ غمضت عيوني عبالي راح يضربني

وبقيت منتظره الضربه بس الي صار فاجئني

من حسيت بأيده تمشي على خدي ونزلت لشفايفي

فتحت عيوني بخجل من حركته وهو مسح شفتي

بصبعه السبابه وبعد ايده بسرعه من شاف تأثيري

برجفة اشفابفي وخدر عيوني

لمسته جانت حنينه بشكل

عبالك لازم ورده ويخاف عليها لاتنخدش بأيده

ابتعد خطوه وره ومسح وجهه بايده وستغفر ربه بعدها باوعلي وهو مضيك عيونه

لفي شالج عدل ونزليه على صدرج وروحن بسرعه وتعالن

ووجه سؤاله لعمه

عمه وين رايحات لياسوگ

عمه ماخذتهن لسوگ****

زين عمه موتتأخرن وديري بالج عليهن وهو يباوعلي

شقصده هذا شنو طفله اني حتى يوصي عمته عليه !!

بعد مالفيت شالي زين مثل ما أمر وغطيت نفسي بيه الحمدلله حصلنه تصريح الخروج

رحنا للصالون يصير قريب من السوگ الي كالت عليه عمه ..

اول مادخلنا ام الصالون كالت تفضلوا عيوني شنو تردن اسون

عمتي سحبتني من ايدي وحطتني كدامها من بعد ماجنت واكفه وراها وكالت لام الصالون

عيوني هاي بنتي عروسه واريدج ترتبينها وجهزينها من فوك ليجوه

هي باوعت علي وكالت  اصلاََ هي تخبل وميحتاجلها شي بس ترتيبات بسيطه وتطلع اميره بس بالله حبيبتي نزعي شالج خليني اشوف شعرج

فتحت شالي ونثرت شعري وهي شافته وكالت حلو بس يرادله تغذيه وتغير لون وشنو رأيج لو نغير قصته همات

كتلها بكيفج شنو الحلو سويه

كالت زين لعد روحي للبنيه ذيج خلي تغسله الج

رحت جانت بنيه واكفه يم باب دخلنه من هذا الباب طلع حمام غسلتلي شعري ولفته بالمنشفه وطلعت

الله تعاي بس ياريت لو تنزعين عباتج حتى تاخذين راحتج بالكعده لان راح اطولين

اني ذبيت عباتي وبقيت بالبنطرون والبدي وهي ستلمتني اول شي نشفت شعري بالشسوار وبعدها بدت تحط ماده مدري شلون اصير سألتها كالت

هاي تغذيه لشعرج لان تعبان من الاطراف

بعدها عافتها على شعري كالت ساعه وابدي اسحبها

بعدها حفتلي وجهي وحطتلي قناع تغذيه لان المسام مفتوحه ومنظفه حتى يستقبل التغذيه بشكل صحي

بعد ماعدت الساعه سحبت شعري بالكاويه وبعدها غسلته من الماده وجففته صار عبالك مي يخبل

الكسره الي جانت بيه راحت ونزل شلال على ضهري

بعدين طلعت كتلوك وكلتلي اختاريلج لون حتى ان صبغه بقيت محتاره وشاهت عيني لان كل الالوان حلوه واني ولا مره صابغته من قبل حتى اعرف

هي من شافتني هيج محتاره كالت عوفيه عليه اني اصبغه وصدك جابت عصارات وصارت تخبط واني عيني عليها وبداخلي خايفه لا يخرب لو يطلع موحلو ويحترگ شعري

بس بعد ماصبغته وبقيت نص ساعه وغسلته وجففته

طلع ييييخببل

لونه ماروني مدري برغندي على بنفسجي لون عجيب غريب وطالع يجنن على وجهي ومسويني اشع

بقيت متعجبه على شكلي صدك طلعت عبالك اميره هي تباوعلي وتضحك سألتني هاا شنو رأيج ؟

عاااشت ايدج ايجنن جاوبتها ودرت على شمس

شوونه

يخبلل طالعه صاكه الله يعين قلب اخوي

هسه بس يشوفج يصير بيه سكته قلبيه

اسم الله عابت شهل فال

هااا ولج شوف الحب شوف يعمل عمايل

ههههه كافي ولج فضحتيني عابتلج

عمه جانت بس تضحك على سوالفنا وبعدها ام الصالون

كالت

شنو رأيج هسه اقصه الج مدرج بس على طوله راح يطلع يخبل عليج

باوعت بالمرايه وحاولت اتخيل شكلي ماكدرت

وبعدها كتلها تمام قصيه

هي بللته وكامت تقص واني مدنكه واباوع

لشعري شلون يطيح بالكاع

وبداخلي مامتندمه عليه بالعكس فرحانه بالتغير

بعد ماكملت وشسورته طلع يجنن شلون صار طبقات

مبرومه ليفوك

بس شو قصر طوله

هي موكالت راح اسويه على طوله ؟؟

سالتها وهي فهمتني هو يصير هيج بعدها لفيت شعري وستلمني تنظيف جسم وصلخ ونتف

ملخني تملخ لحد ماكملن اني احس روحي طلعت وجسمي صار احمر وكله يوجعني بعدها جالت خلطه

وحطتها لكل جسمي بس تلبگ

خلتني اطفر

لج خرررب هاااي شنو ولج شحطيتيلي

ههههه شبيج اثبتي هذا تشقير حتى يوحد لون جسمج

وبنفس الوقت اذا اكوا شعر ناعم ماطالع بالشيره يصبغه اصفر وميبين ...

عزااا بعينجن شهل سوالف منين تعرفنها

ههههه ولج شنو منين نعرفها غير شغلنا هذا

يلا كملنا ابقي هنا بس ينشف غسلي وطلعي

زين

بقيت واكفه واني لا اكدر اكعد من وره هذا الي حاطاته الي بقبت متصنمه وواكفه لحد مانشف غسلت ولبست ملابسي وطلعت ورجعن استلمني بدكير ومنكير

بزعت روحي وطلعت على ماكملنا

بس شنو شكلي النهائي طلع يخبل حتى ستحيت شلون اطلع بالشارع وجهي يجيب التايه ...

يلاا عمه عفيه خلينا نرجع للبيت تعبت وياسر هسه يكوم يحجي لان تأخرنه وراح يصير الليل

لااا وين نرجع البيت امشي نروح للسوگ نشتريلج كم حاجه شمس حجت وعمتي ايدتها واني بقيت اتحلطم مثل الطفله وعوزي شويه وابجي من التعب

انجبرت امشي وراهن مسيره وهنه اخذني للسوگ

وصارن يشترن ويحملن علاليك واني شغلتي جانت   بس اكول حلو لو موحلو وهنه يدفعن الفلوس ويشيلن

الكياس

يمكن عشر علاليك صارن يالله قررن نرجع للبيت

رجعنه لكينه ياسر مدخن من الاعصاب بس شافنه راد يعيط بينه بس عمتي سكتته وهو تلقائياََ بس شاف وجهي بهتت ملامحه وصار يباوعلي بنظرات تخبل تمنيت اطول بس كالعاده بس ينتبه لنفسه يبعد عيونه

ويسوي نفسه مامهتم

عمتي راحت لبيتها واحنه كمنه انصلي

اني دخلت للغرفه فتحت شالي وكفت كدام المرايه

اباوع لشكلي اول مره ادري بنفسي هيج حلوه

بقيت اتلفت واباوع لجسمي شلون صاير حلو سمنان

وخصري صاير زغير وصايره عبالك ساعه رمليه

باوعت لاديي شلون يلمعن وناعمات واضافري يخبلن

يعجبني بس اباوع عليهن

بهاي الوقت اجت شمس وهي تتلمض بعيونها

هاا شبيج شو تلمظين شنو كهرباتج ضعيفه لو جاي يطفن اعيونج ..

لااااا بس مشوقه اشوف ردة فعل ياسر من يشوفج

شفتيه شلون صار يباوعلج من دخلنا وشاف وجهج

شلون بارز وصاير احمر من الخيط ...

ايي انتبهت بس شنو شمس احس كلبي يدك سريع وخايفه ومستحيه مدري شبيه

اشش بالله ما اسكتين خايفه ومستحيه

منيين بالله هاا

شو رجلج هو قابل غريب

يلاا هاج هاي العلاليك طلعيلج تراك من هاي الجدد لبسيه وفتحي شعرج وحطي عطر وشويه حمره وكحله وامشي انحظر العشه ...

لااااوالله خااف ماتقبلين البس تراك واحط كحله وحمره والله كلشي ما اسوي هاء اها راح البس ثوبي والف حجابي واطلع وهاي سوالف الاستهتار مااسويها اني مو ثوبي ...

شمس ضربت كصتها وحجت وهي عوزها شويه وتاكلني

ولج لاتخبليني استهتار شنو قابل كايلتلج طلعي بثوب النوم وبعدين منو الي جانت تبجي ودكول هاملني وعايفني صفر عاليسار ومدري شنو

وتريد بس تلفت انتباهه

ايي بس استحي والله

شووو عوفي المستحه وتعاي هاج لبسي هذا الاتراك

يالله وشعرج عوفيه مفتوح وحطي كحل وحمره قليل ماروني مو وردي

وهاا قبل لا انسه من اطلعين ديري بالج تباوعيله لو تنطينه اهميه لبسيه وعتبريه ماموجود واريدج تتصرفين على طبيعتج وهذا خجلج شمريه بالشط

ماشي

يلاا اني طالعه انتظرج بره ,,,,

طلعت وعافت بيدي تراك وردي فرو بقيت اباوع عليه

واني متردده شلون البسه والله استحي

بعدها لبسته جان كولش حلو 3قطع بجامه وبلوزه وفوكاهن روب يوصل لنص الفخذ كولش حلو يدفي

لبست قدم ابيض برجلي وشعري نثرته على امتوني جريت عيني بكحل وحطيت شويه حمره ماروني مات

واحمر خد ورشيت عطر هههههه صارلي واهس

ونسيت المستحه هههه

بس صدك طلعت اخبل صاكه فديتني

طلعت ركض للمطبخ جانت شمس واكفه تحمي الاكل

بس دخلت هي صارت اصفر وتصفگ واني صرت اتبختر بغرور

بعدها ودينه العشه بالغرفه عمو بس شافني ابتسم

واني خجلت ودنكت راسي

عززا شكد عيب من عمو هسه شيكول علي

كعدنه ووهو راسه جان بجهازه ومامنتبه

لحد ماشمس حجت وياه

يالله ياسر شنو ماتريد

لا جيت اجيت

عاف جهازه ورفع راسه واجت عينه بعيني اني بسرعه بعدت نظري وشغلت نفسي بالاكل

بس هو بقى بمكانه واحس عيونه علي

واني صح جنت مستحيه بس مستمتعه

وحسيت بنشوة الانتصار على اهماله ولفت انتباهه

وشده الي لدرجة داحسه ميكدر يبعد نظره عني

وهذا الشي رفع معنوياتي وخله الانثى الي بداخلي تريد بعد اكثر من النظرات بس كلشي بوقته حلو

اكلت بشهيه مفتوحه وصرت اشاقه وي شمس واضحك

وخصوصاََ من اذكرنه طلعتنا اليوم

كمنا نظحك على المواقف الي نحطينا بيها

وخصوصاََ من جنه واكفين نشتري فاكهه واجه واحد حط وجهه بوجهي واني عطت من الخوف ورجعت

وره وهو بسرعه راح وهذن بقن بس يضحكن علي

محد بيهن اجت وخرته مني

ههههه ولج والله من حط وجهه بوجهج اني بالبدايه خفت بس من شفته شلون يباوع عبالك يدور على شي ضايع بوجهج لو يريد يتأكد انتي صدك لو جذب

متت ضحك اريد الزم نفسي من الضحك ماكدر

عابت يلا كومي غسلي المواعين موبس بيج اضحكين

هههه حاضر سيدي وضربتلي تحيه

من بعد مراحت اني بقيت الملم بالغرفه حتى نفرش لان تعبانه واريد بس انام

فرشت فراش شمس واجيت اريد افراش فراشي بس هو جان كاعد بمكاني الي انام بيه

بدون زحمه هذا مكاني واريد انام

باوعلي ورجع باوع داير مدايره

شنو مكانج اني تنامين هنا ؟؟!!!!

بلي انام هنا واريد هسه افرش ممكن ادكوم مناا

رفع حاجبه وسألني

وليش تنامين هنا موبغرفتج

جاوبته بتملل من اسألته الي متأكده دايسألها حتى يماطل ويبقى اكثر وقت يباوع علي لان اني واكفه وهو كاعد ومن يرفع راسه ويسولف وياي عينه تتجول علي من فوك لجوه

لان تطفه الكهرباء وتصير ضلمه واني اخاف ابقى لوحدي

هااا ايي احم زين ليش تبقين لوحدج

جاوبته وبتسامتي بالكوه مسيطره عليها من شكله الي صار مدري شلونه من كتله اخاف لوحدي ههههه اصلاََ اني ليش كتله هيج وماكتله الصدك ؟!!!

لعد منو ينام يمي وشمس يم عمو متكدر تعوفه لوحده تعرف يجوز يحتاجها بالليل ..

هاا ايي صار معلوم يعني هسه لازم اكوم مو ؟؟

بلي !!!

هو كام واني فرشت وحطيت بطانيتي وتجرئت نزعت الروب كدامه وهو واكف وبقيت بس بالتشيرت والبجامه وثنينهن جانن ضيقات علي وبارزات جسمي

همزين عمو جان رايح بسابع نومه بعد ماخذ علاجه

تمددت واجت شمس هم نامت وتغطينه على النص

وبقينه نسولف وهو راح لغرفته وشويه واجه

شمس اريد شاحنه

ايي ..كامت شمس انطته الشاحنه اخذها وره شويه هم رجع ءاءاءا شمس اريد شسمه ءاءا هاا اريد بطانيه

ذيج البطانيات ياسر اسحبلك وحده

راح اخذ وحده وبقت عينه علينا وجان محتار

ومثل الي عنده سالفه وميعرف شلون يكولها

اني من شفته هيج عرفته بقى يدور حجج حتى يجي هنا لهيج خليت ونمت ....

شمس ...

كعدت الصبح من بعد متريكت وبدلت اجه علي الخط

وطبعاََ مو نفسه ذاك خطي بدلته

لان ذاك من رجعتله ردي بالرفض خله وطردني وكلي

اني بعد ما اوصلج شوفيلج خط ثاني

اني بوقتها بقيت اغلي قهر وتمنيت لو اكدر اضربه لهل عديم الشرف والغيره لان رفضته بطل ياخذني بخطه وهو يعرف ماكوا خطوط وكلها مقبطه

بقيت يومين اروح مشي وارجع مشي بعدها صديقتي كلت لخطهم وقبل اروح وياهم بس شنو ماعندي كرسي ومتكسره تكسر بالكعد

يلاا احسن ما اروح مشي ولوحدي والدنيا تخوف خصوصاََ الصبح محد ماموجود بالشارع بس اني اموت من الخوف وفوكاها الشوارع اصير ضباب ومينشاف شي الله ينطي نوارس الي قنعت ابو خطهم حتى ياخذني ... 

طلعت صبحت على البنات وكعدت ومن طلعنا من فرعنا شفت حسين اخو نبض بقيت اباوع عليه شكله ولبسه واناقته كلش يعجبني بس مع الاسف طلع واحد ماعنده لا اسلوب ولا اخلاق وعيونه نكسه

مانسيت يوم الي اجو عدنه هو وامه شلون جان يباوع علي عيني عينك ولا حسب حساب ابوي ولا اخوي

بقيت عيني عليه وهو مثل الي انتبه اكوا احد يباوع عليه بسرعه اندار على جهة السياره واني بسرعه دنكت راسي سويت نفسي داقره بكتابي وطلعت السياره

بطريقها واني بقيت خايفه بس لا لمحني اباوع عليه

اووف هسه اني شجاني وباوعت ولا اكعد راحه

بقت اكل بروحي من التفكير لحد ما طلعنا من الدوام

مشيت بخطوات تعبانه للخط وصعدت وحطيت ايدي على خدي وكعدنا ننتظر البنات يكملن حتى يطلع الخط

بعدها بالنص ساعه ياله وصلت للبيت

دخلت شفت نبض سلمت عليها وسلمت على ابوي وبدلت ملابسي ولفيت راسي ونمت بدون غدا

لان كلش ضايجه من نفسي واحتقرتها

صرت حالي حال بنات خطي السابق والي اني نفسي جنت ما راضيه على تصرفاتهن ولا احبهه هسه صرت

مثلهن ....

للعصر كعدت شويه خافه الضوجه تمطيت وكمت طلعت بره شفت عمه حنان عدنه ركضت سلمت عليها وفرحت بشوفتها لان هي ساكنه بديالى وكل كم شهر يالله تجي كم يوم وتروح ...

شلونج عمتوووو مشتاقتلج موووت

حبيبتي شموشه واني بعد مشتاقتلكم كلكم واجيت اليوم هم اشوفكم وهم اشوف جنة اخوي الحلوه

يولي شهل جمال شهل نزاكه

ههههه فدوه لعمرج عمه خجلتيني واني بعد والله كولش فرحت بتعرفي عليج وشوفتج

بقينه كاعدين نسولف وعمه جانت سوالفها تخبل

وكلها طاقه وروح شبابيه وتشبه شمس نفس الشكار والجمال وهماتين مامحجبه

عمرها 60 سنه بس الي يشوفها يكول بال30

منكد ماناعمه ورشيقه ومهتمه بنفسها وبلبسها وكولش نازكه عدها ولد جبير ضابط بالاستخبارات وثنين بنات وحده صيدله وحده علوم طبيه وثنينهن مزوجات ومخلفات يعني طلعت بيبي والله ولا مبين عليها

الله يخليها ويحفضها لزوجها والأولادها ...

شويه ودخل عمو ابو ياسر وياسر جان يدفعه وعينه علي ...

اني سويت نفسي بالي يم عمه ولا اهتميتله

وهو بقه يحوم كلشوي وكايل على شغله ويباوع علي يريدني اني الي اكوم بس جانت شمس هي الي ادكومله لو تحاجيه وهو احسه وصل مرحله بعد مايكدر يضبط اعصابه لا ينفجر بيه

ههههه ادري طوختها وياه بس خليه يستاهل مثل ما سوه بيا سويت بيه شربته من نفس الكاس الي جرعني اياه ذيج الفتره  ..

لليل من ردنا انام اني بقيت محتاره وين انام

هم لازم ارجع انام بغرفتي يعني ارجع للبرد

اووف ياربي

هااا شبيج شو تحجين ويه روحج شصاير ؟

لا مصاير شي بس اكول هم راح ارجع انام وحدي بالغرفه وهم بارده وارجع اموت من البرد

ياااا ايي والله اني شلون نسيت هاي السالفه ههههه جية عمه موبصالحج ههه

لااا ولج لادكولين هيج بالعكس كولش حبيتها وفرحت بجيتها  بس اااه اوووف يلاا امري لله اروح انام بالغرفه واتغطه هواي وانام بجواريبي وروبي

لااا راح تنامين يمي بالغرفه !!!!!

ثنينا درنا وجهنا على الصوت طلع ياسر جان واكف ورانا وسامع كلامنا كله

لا عذرني اني مانام بغرفتك عندي غرفه وانام بيها

نننننبببيض ترااا باقيلي شعرايه وحده وافقد عقلي واصير مخبل وساعتها راح اندمج على كل تصرفاتج ويايي فخليني محتفض بهاي الشعرايه وسمعي الكلام احسنلج ..

جان يحجي وياي وهو ضاغط على نفسه لا يعيط بس شنو جانن دمراته كلها ناطه من عصبيته

اني مااهتميت وجاوبنه

والله نوم بغرفتك ما انام وموبكيفك هيه حتى تمشيني بمزاجك وعلى هواك وتقرر وين انام وين اكعد

جان يباوع علي بعيون مفتوحه من العصبيه وخابطه حمر و وجهه كله مشنج من الغضب عاااااط بصوت قوي

شششششمممسسسسسس طلعي بره

شمس بسرعه ركضت بره واني من خوفي ردت الحكها بس وكفتني ايده الي لزمت ايدي وسحبني قوي عليه

لدرجة انخلطت انفاسنا سوه 

ششووفي لج انطيتج عين زياده عن الزوم بس اني اعرف منا وهيج شلون اتعامل وياج

سمعيني زين وخلي كلامي ابالج

ترحين هسه وتنامين بغرفتي و وياي على نفس الفراش

ومن باجر تحولين غراضج كلها للغرفه

وتقومين بكل واجباتج اتجاهي اكلي شربي ملابسي

كلها تصير مسؤليتج ومن احجي وياج تجاوبيني وموتخليني احجي ويه نفسي افتتتتهمتتي

اااااااااافتهههههمتتتي عاط بيه واني من الخوف ضاعت الحروف من الساني اريد انطق ماكدر وهو فوكاها جان يحجي بوجهي ويعت بأيدي اشرتله ايي وهو سحبني من ايدي واخذني وياه للغرفه

نام على السرير ونزع تشيرته وبقى بالداخليه وحط ايده على عيونه

اني متت من الخجل والخوف بقيت واكفه وافرك بايدي وابلع بريكي وهو رفع ايده من عيونه وخزرني واشرلي براسه نامي اني من الخوف بسرعه اجيت ونمت بس بالحافه وبقت عيوني مفتوحه وبالي كله يمه

وجسمي كله يرجف مادري شبيه يمكن لزمتني البارده

وبقيت كلساع اتكلب وهو حس علي

شبيج لخاطر الله ناامي وراي كعده من الصبح

اني جنت ارجف لهيج من حجيت بينت رجفتي لان حجيت متقطع

ا ا انش ا الله

هو عقد حواجبه وزحف بنومته ولزم كصتي واني تلقائياََ غمضت عيوني لان ايده جانت دافيه واني جنت قالب ثلج هو انتبه لرجفتي بسرعه سحبني لحظنه

شبيج ليش هيج ترجفين هااا شبيج احجي

ممم ما اا در ي

حجيت كوه وهو عصرني بحظنه وصار يمسح على ضهري

كافي بنيتي كافي هدي شبيج جبانه بسرعه خفتي

تراا هاي بروفه لعصبيتي بعدج ماشايفتني على حقيقتي من اعصب اكوم ما اشوف طريقي هههههههه

اشاقه شبيج كافي حبيبتي كاافي ويالله نامي ولا تفكرين بشي بعد هذا الحظن صار مكانج ومصدر امانج  ومايتغير بعد

زين ؟

اشرتله براسي وحشگت نفسي بحظنه وعطره تغلل بيه ودفوا حظنه نساني رجفتي وخوفي ونمت براحه اول مره اعرفها من زمان ,,,,

الصبح كعدت على بوسته بخدي

فزيت بسرعه وبقت عيوني مفتوحه بين ماستوعبت اني وين وشداسوي هنا وشنو صار البارحه يالله

وعيت زين باوعتله شفته عاكس ايده ومثبت راسه عليها ويباوعلي ببتسامه تخبل وعيون تلمع فرح

اني متت من الخجل بسبب نظراته وخطيت راسي بالحاف وهو ضحك بصوت عالي وسحب الحاف من فوگ راسي

هههههههههههه صبااح الخير ياحلوو

جاوبته بخجل صباح النور بسرعه كمت

من الفراش وكفت لميت شعري الي ستغربت من لكيته مفتوح واني اذكر نمت واني رافعته بالقراصه

عوفيه مفتوح بعد لا تلفينه

هااا

اشر بعيونه على شعري وكال لا تلفينه احب اشوفه مفتوح على امتونج

اشرتله بخجل وطلعت واني لافه نفسي بأيدي من البرد

الجو صاير يركص

غسلت وجهي وفتحت الطباخ جوه القوري وسويت الريوك بعد الريوك كمنا اني وشمس الي غابت اليوم ادكول ماعدنا شي

ونقلنا كل غراضي لغرفتي الجديده هههههه

شكد فرحانه بهاي الكلمه

ومن فرحتي صرت امشي واغني وطايره طيور

واحس الكون ماسايعني من السعاده

بعد ماكملنا نظفت الاخشاب والكاع وعطرتها وفتحت التدفئه بيها

ورحنه نسوي غدا على راحتنا لان عمه حنان وعمو اليوم معزومين عند بيت عم ياسر الجبير وراحوا من الصبح وشمس ماراحت وياهم حتى تساعدني

وياسر بالدوام

لهذا طلعنا خفايف وسويناها وتغدينا

واني رحت اسبح وشمس راحت لغرفتها تنام

شمس ...

دخلت لغرفتي  وشفت جهازي 3مكالمات لم يرد عليها من رقم غريب بالبدايه استغربت منو هذا الرقم بس بعدين كلت يجوز لوحده من بنات الصف ..

هملته وماهتميت ونمت بعدني هسه اريد اغفى ودك الفون سحبته واني مطفيه من النعاس شفته نفسه الرقم فتحت خط وحطيته على ذاني بدون ما احجي

الو شمس ليش ماتردين من اتصل

سمعت صوت رجال وكمت مفزوعه وطارت ام النومه

الجهاز بيدي واباوع عليه وعلى الرقم واني كلي صرت ارجف من الخوف وذاك اسمعه يصيح

الو ,,الو شمس وينج

من خوفي بسرعه قفلت الجهاز ودفنته جوه الفراش وكعدت على السرير مفزوعه وكفشتي واكفه وميته خوف

هذاا منين عزززا ونوب يعرفني ويعرف اسمي

عزااا بعينج شمش عززاا

هسه شسوي ياربي شسوي

بقيت محتاره وخايفه

لان اول مره يصير وياي هذا الشي

رقمي ابد مانطيه لاحد بس لكم وحده ثقه وياي بصف واهلي ومن زمان اني عندي تليفون ولا مره احد خابر

بالغلط او خطأن بالرقم ..

بس بس هذا يعرف اسمي يعني ما مخابر بالغلط

عزاا بعيني هسه شون

احسن شي اعوفه مقفول

ايي احسن

بقيت اضرب اخماس بأسداس بعدين راسي احسه قبط من التفكير خليت وطلعت سويتلي كوب نسكافي

وكعدت اتفرج TV وتقريباََ عدت ساعه ونسيت السالفه

وبعدين حسيتها تافها

واني انطيتها اكبر من حجمها

كمت لغرفتي طلعت الجهاز فتحته

وبعدها طلعت الرقم حطيته بالقائمه السوداء

وهاي الفقره  جنت ناسيتها بس من هديت اجت البالي

وبقت سالفة اسمي الي يعرفها هي الي امدوختني دعيت ربي كون تعدي على خير

ويطلع هذا الموضوع مجرد اشتباه وتشابه اسماء

من رجع ياسر من الشغل لاحظ علي التوتر

ومن سألني كتله

مابيه شي بس يمكن لان مانمت الضهر

هو بقى يباوعلي بشك وحسباله مريضه واني

صرت اضحك واشاقه ويه نبض حتى اخليه يطمن ماكوا شي ...

بعدها هو راح لغرفته حتى يرتاح وصاح على نبض راحت وياه

واني بقيت كاعده وسالفه اجيبني وثانيه توديني لحد ماغفيت واني كاعده ..

نبض ,,,

بعد ماسبحت طلعت لغرفتي مشطت شعري وعطرته

ولميت خصلتين من كل جها وثبتتهن بقراصه على شكل ورده لونها وردي كرستال

وتعطرت وجريت عيني بكحل وحطيت حمرا بس هاي المره طوختها شويه اكثر من الايام الراحت ..

وبعدها رحت طلعتلي تراك ثخين رصاصي وبيه

ورد ناعم وردي القميص مالته يوصل للكمر

ولبست قدم ورديه

صرت عبالك باربي ههههه كله وردي

بعدها رحت حظرت الخمام لياسر لان هسه هو على جيه وصدك من طلعت من الغرفه لكيته جاي

الله يساعدك

ويساعدج

وغمز وكلي  هاي شطالعه اني من الخجل صرت ماعرف وين انطي وجهي بسرعه طفرت للمطبخ احظرله الغدا

والضحكه مامفاركتني

اول مره اجرب هذا الاحساس

شي كلش حلو يدغدغ القلب ويخليه يتزايد خفقانه من الفرح ... دعيت ربي كون يحفظلي سعادتي هاي

ومايحرمني منها ...

بعد ماطلع من الحمام وديتله الغدا وكعدنا كلنا بين سوالف وضحك بعدها بشويه راح ينام وصاحلي

من دخلت للغرفه لكيته متمدد عالسرير وبس بالفانيله الداخليه والبجامه بسرعه نزلت راسي مستحيه

بعدني ممتعوده عليه

اشرلي انام يمه واني تقدمت بخجل ولفني بحظنه وغمرني عطره وراسي على صدره وايده جانت تتمشى على زندي والهدوء محاوطنا والضلام مغلفنا وبس صوت النفس ينسمع ...

نفسي جان يصعد وينزل بتوتر ورجفه من المشاعر الي حسيتها ودكات قلبي الي صارت الف بالثانيه ...

وهو احس دكات قلبه مواقل مني ثنينا جانت مشاعرنا فاضحانه من تصرفاتنه بس جنه محتاجين تنازل وواحد يتنازل ويبدي ببوح مشاعره ويعترف بحبه ...

اني جنت مستصعبه الموظوع مع العلم اني حبيته ورتاحيت للعيشه وياه وبدي ابقى طول عمري يمه وبحظنه بس جان شي يمنعني اخطي اي خطوه ليكدام

لهذا هو الي بده من رفعني عليه وصار وجها بوجهي وهمسلي

... نبضي حياتي كليلي هذا حلم لوحقيقه وانتي هسه بحظني وبين اديي اذا حلم لا ادكعديني منه عوفيني اعيش كل عمري بيه وإذا حقيقه فخليني اصدك

وكلي القلبي خليرتاح لان محبوبته صارت ملكه

بعدها قلبني وصار هو فوكي وجهه بركبتي ومستمر بهمسه وبغزله واخر شي سمعته هو انتي نبضي ... ( نبضي الدافي ) وبعدها ذبت ومعت بين اديه ولساني وعقلي وكل كياني صار مغيب من تأثير كلامه ونفسه ولمساته ...

وصرت مرته بالقول وبالفعل ومن هاي الحظه فتحنا قلوبنا لبعض وسولفلي عن حبه وعشقه الي من جنت طالبه لهذا يومنا واني سولفتله عن كلشي مريت بيه وصار وياي وخلاني اتعقد وافقد ثقتي بكل جنس آدم

واعتذرتله عن تصرفاتي بفترة الخطوبه...

وطوينا صفحة ذيج الأيام وبدينا بصفحه جديده بهذا اليوم ....

والحمد لله من صار هذا الشي وربي عوضني بياسر عن كل ذيج أيامي بس بقت شغله وحده مظوجتني ومضوجته وهي غيرتي

اغاااار عليه بخبال لدرجة اني مرات اتعجب من نفسي

بس موبيدي من كد ما احبه واخاف لا اخسره ابدي ولا يطلع وحتى دوامه ابدي يبطل ويرجع للأسواق لان أغار عليه من الموظفات الي وياه وهو عيوني ما مقصر بالجمال والأناقة والعطر الي يسبح بيه قبل لا يطلع عبالك رايح لزفته مو لدوامه

وأكثر مشاكلنا من وره هاي السالفه

بس مانطول بالزعل بسرعه يصالحني لان ثنينه منكدر

على زعل بعض

والحمدلله بهاي الفتره رجعت علاقتي تحسنت ويه اهلي وصرت اروحلهم بس ما ابات لان حبيبي ميقبل

يكول شون ينطيج قلبج تغفين ببيت اهلج وتعوفين

حبيبج يتلوع بفراشه موكادر يغفه بدونج

ههههه قنعني ولو اني هم نفس حالته صرت ماكدر

ابعد عن حظنه وعطره  بس بنفس الوقت أشتاق لاهلي واحن لغرفتي وللنومه بيها ....

بس بيوم فاجأوني من اندك الباب ودخلت امي ومرة عمي من شفتهن خفت لان جيتهن مومال تسيوره

ضيفتهن وكعدت يمهن وعمي هم طلع سلم عليهن وبعدين اخذته شمس للمحل الي من اجت وسلمت امي

ماشالت عينها عنها كصتها كص من فوك لجوه لحد مارجعت للغرفه حتى تدرس ...

واني باقيه كاعده وعيوني عليهن وعقلي يشتغل بالتفكير والقلق والخوف موتني لان جيت مرة عمي هي الي قالقتني لو امي الوحدها جايه جان كلت عادي تسيوره بس مرة عمي ولا مره جايه لهنا يعني اكيد جيتهن بيها أنه ....

واهنه مايكولن ومخلصاتها بس سوالف واني من كد التوتر مردت اصابعي مرد ....

ماما ابوي زين ؟؟

ايي يمه الحمدلله صحته عال العال ويسلم عليج

زين الحمدلله !!! و الولد زينين صباح شلونه بعده مستقر بأربيل ماناوي يرجع لبغداد

ايي يمه زينين واخوج يكول اني هناك عيشتي بعد وتعودت مومال ارجع اكول يمه نبض حماتج شكد عمرها

هااا شنو ماما ليش اسألين عن عمرها

هسه دجاوبي

عمرها 18 بس ماكتيلي ليش السؤال

ايي زين يعني جبيره ... والله يايمه هاذا اخوج صارله فتره متخبل علينا زوجوني  وزوجوني وذابح روحه عالزواج والا يريد حماتج واليوم اني اجيت اني ومرة عمج حتى نشوف اذا ينطونها النه والصراحه يايمه اني استحي احجي ويه عمج (قصدها عمو ابو ياسر )  فلهذا اريدج انتي ادكليلهم وترجعيلنا الجواب حتى نجي رسمي نخطبها ....

والله يايمه مادري شكلج بس تفاجأت حسين وشمس

ماعتقد يتوالمون وخصوصاً ابيتنا لان يمه احنه عدنه كلشي مايصير وحرام وهمه هنا ماعدهم هيج وخصوصاً شمس اهلها مايمنعونها من شي وكل الي تريده يصير

فماعرف اذا راح تكدر تعيش ويه حسين لو لا

هااا يمه شو جنج سديتيها بوجهنا خوب كولي ماينطون وفضيها بعد هاي الحجج الشنو .... صايره ولا اعرفج

ويمكن بعده الحقد بقلبج على خوانج

ولتفتت لمرة عمي يلااا خيه امشينه

من سمعت كلام امي بسرعه كمت كعدت بصفها وبستها بخدها وبراسها وهي دارت وجها عني زعلانه

ماما والله مو قصدي والنبي اني حجيت هيج لان اعرفهم لاخواني  مولان شايله بقلبي عليهم

بعدين شنو ما اكيف شمس اصير جنتنه ومن نصيب حسين بس كلت هشكل حتى خاف لاسامح الله ويرفضون يكون عدكم علم بالأسباب ولا شيلون بخاطركم..... ترا حسين اخوي وشمس صارت بحسبة اختي وثنينهم اتمنالهم الخير والسعاده

فدوه لا ضوجين مني واني بالليل راح احاجيهم واشوف شنو يكولون....

امي راحت من بعد ما راضيتها وبالليل فتحت الموظوع ويه ياسر

كييف وماكال شي بالعكس كال

وين اكوا مثل حسين شاب والنعم منه شاغول واخوا خيته انطي اختي واني مغمض كافي علي هو اخوج

وعمو هم جان موافق بس شرطه تكمل دراستها ميريدها تعوفها يريد شهادتها تبقى الها سلاح وسند تستند عليها خاف لاسامح الله بيوم من الايام اجور عليها الأيام الله لايكولها...

بقت بس شمس الي من فتحت الموظوع وياها رفضت رفض قاااطع وكالت

مسسسسسستحيييل لو يبقى آخر واحد بالكون ما اخذه

شكد حاولت اعرف السبب بس ماحجت بس رافضه

بقيت كم يوم وهم رجعت فاتحتها وجوابها جان الرفض نفسه ما تغير بس هاي المره اني اصريت اعرف السبب

شنو شبيه حسين حتى هيج كارهته ومطايقه تسمع حتى بأسمه ومن سولفتلي عن لقائهم اول مره ببداية زواجي وبعدها بيوم الي اجوا للبيت بالعزيمه ونظراته الها الي حست بيها مونظفيه ومنها وهي كارهته وطايح من نظرها والاخ مزودها من ماخذ رقمها وكايم يتصل عليها وترفضه وتمسح الرقم ويرجع يتصل لحد ما مره مجاوبه عليه ومرزلته رزاله غسل ولبس وقافله الخط بدون ما تسمع جوابه ....

وبعدها بيومين داز امي تخطبها اله ....

اني من كلتلي عن كل هذا سكتت وماعرفت شأكول لان حطني بموقف بايخ والسكوت جان هو مهربي من الفشله

رجعت الجواب الأهلي بالرفض وحسين تخبل خابرني

يصيح ويهدد ويتوعد

.... شنووو هي بكيفها ترفض سمعي نبض وصليلها كلامي وكوليلها يكولج حسين انتي اله ولغيره متصيرين ولو اعرف يوميه اجي اخطبها هم اسويها لحد ما اخذها

وإذا مو برضاتها بالغصب بس مال تصير لغيري هاااي من سابع المستحيلات وفهميها هذا المطي النايم ابراسها خلي توخره وتوافق احسن الها ولا تخليني اطلع اخبالي عليها ......

جااان يحجي واحس اعصابه مشعوطه من العصبيه والغضب حتى اني من يمي خفت لان حسيته يريد يطلع من الجهاز منكد الأعصاب....

وشمس مجانت اقل منه بعصبيتها من بلغتها بكلامه

عاطت وصاحت وكومت الدنيا وماكعدتها وكالت

شوووفي نبض هذا اخووج لو يبقى آخر رجال بالكوكب والله ما اقبل بيه ولو يصير نبي ولومو يهدد وبلغيه وكليله ادكلك شمس ترا كلامك هذا ماهز شعره برمشي موعاد خوفني واعلى مابخيلك اركبه...وزواج مراح ازوجك عسى ماازوج مشرد صايع مستهتر ولا اخذك انته

الصراحه اني من سمعت كلامها ضجت وماقبلت على اخوي بس قررت ابقى خارج قوس ولا ادخل لان ثنينهم عزيزين علي وماريد اخسرهم لهذا اكتفيت بس اصير مرسال وكل شويه موصله رساله لواحد بيهم ....

حسين من يومها ومن بعد رفضها الثاني نفذ كلامه وصار يوميه جاي وخاطبها وهي نفس رفضها وهو ولا مل ولا تنازل بقى مصر عليها وجملته الي دائما يكولها

.... لو هي لوماريد مره تتوسد بحظني لو اعرف انتظرها العمر كله ولا أمل ولا اتنازل عنها وخل تتحمل اخبالي لان ما كايللها تجي وتتربع بقلبي وتاخذه الها ملك دائم...

واستمر لحد ما صار سنه هو يوميه جاي لحد ما لانت وقبلت واجه خطبها وهو طاااااير من الفرح ومن عقد عليها ابده يشيلها وياخذها للبيت كل شوي وبايسها ولو حاظنها لايستحي ولا يخجل

والمكروده مايعه من الخجل والمستحى احسها صخنت من جرئته كدام الكل لا ستحى ولا خجل هههه

وبعدها بشهرين تم زواجهم لان بالكوه كدر يصبر هاي الفتره وطلع بيها ببيت لوحده أجر بس يمنه بالمنطقه

ومن سألته ليش واحنه بيتنا فارغ بس مهيمن ومرته بيه

ويه اهلي كلي ....

.... نبض اني تلوعت وطاح حظ حظي ياله اخذتها وماصدكت من قبلت وصارت الي اريدها ادللني ادللها وتدلعني وادلعها وكون تاخذ راحتها بالبس وبالكعده خوما تخلص اليوم كله لابسه حجابها وتفتر بيه واني كلشي ما شايف ....

وفوك هذا انتي تعرفين مهيمن وطبعه مايقبل على اي شي ويدقق بكلشي لهذا اني اشتريت راحة بالي وطلعت وبنفس الوقت ماريد بيوم يصير زعل بين الإخوان بسبب اشياء تافهه ....

من سمعت وجهة نظره اقتنعت وشفت كلامه صحيح هو هم حقه بعده عريس ويريد ياخذ راحته  وإذا عاش يم اهلي شمس اصير حالها حال سوسن من الصبح لحد الليل حجابها على رأسها ولازم كون تلبس دشداشه ولبس مستور ومحتشم

وشمس وينها وين الدشداشه هي الحجاب وبالكوه ياله اقتنعت تلبسه وهم حسين جبرها 

الله يسعدهم ويسعد كل زوجين بجاه حبيبنا النبي ....

واني وياسر وطفلي  الي جاي فالطريق وياهم ....

ههههه ايي اني حامل واخيراً وراح اصير ام وانشالله راح اكون نعم الام لطفلي ومااخليها تعيش نفس الي عشت بيه اذا جانت بنوته وإذا ولد راح اربيه واخليه يطلع مثل ابوه نفس الصفات والأخلاق الله لا يحرمني منه ...

                       ........... تمت ...............

السبت 12 تشرين الأول

الساعه 9:28 دقيقه مساءاً

بتوقيت بغداد ...

-------------------

لهنا وتنتهي قصتي وياكم بحلوها وبمرها

وبأخطائها وبصوابها...

اتمنى كون وصلت جزء من معاناة شأبه عراقيه

وكدرت بحروفي اشاركها وياكم بكل الي مرت بيه

واتمنى كون الكل ياخذ العبره من الي عاشته نبض ولا يكرر نفس أخطائها صح كانت ناتجه عن قلة معرفه وبرائه بس كانت نتائجها مؤلمه الها مولغيرها...

واعتذر عن تاخيري وعدم التزامي بموعد محدد

بس اني كلت ماعندي وقت معين للتنزيل لهذا اني اشكركم من كل قلبي على سعة صبركم وتحملكم

وأتمنى كون ماشلتو غيبتي بسبب القصه 😅

ونتظروني بقصتي الجديده

متلازمة التملك...

حقيقيه بأسلوب دراما رومنس حزن وفرح

تحجي عن مرض يعاني منه الأهل وهو حب التملك

والسيطره على حياة أبنائهم والاجبار بتنفيذ رغباتهم حتى لو كان هذا الشي يدمر حياة الأبناء ويعدم شخصيتهم وكيانهم ....

القصه لعائله بغداديه حقيقيه

راح ندخل بيتهم ونعيش تفاصيل حياتهم

ونشارك بناتهم وأبنائهم كل معاناتهم ويه امهم المتملكه

المسيطره صاحبة الشخصيه القويه حتى أمام زوجها وأخواتها وجيرانها !!!!  ...

ورجاءاً الي مامتابعني خلي يتابع حتى يجيه الاشعار من تنزل القصه الجديده ويتابعها ويانه ❤

قريباً

Nabà Baqer 😘

The end now 👋

And I will bag soon

نبض _ دافي

Nabà _ Baqer

الجزء الرابع عشر.....

_____________________________

كيف نصبر ؟

_ مثلما نصوم تماماً .. متأكدين ان أذان المغرب. سيأتي..

_______________________________

بوستهن وضيفتهن وكعدت وهنه كصني كص سونار ماشالله عليهن مو عيون شوكت ما ارفع راسي الكاهن مركزات بيه... ماتحملت خليت وطلعت وعفت امي منطلقه بالكلام وياهن عبالك تعرفهن من سنين..

رحت لغرفتي وبعد ماطلعت ...

لحد ما راحوا اجتني امي للغرفه وهي فرحانه

دكول خوش ناس وحابتهم ومرتاحه لامه

ادري ماما انتي القبلهم هم حجيتي نفس الشي

وسويتيهم انبياء الله بأرضه وماكوا منهم..

وشفتي شلون طلعوا... وشنو سواو

ميخالف بنيتي بس اني كلبي يكلي هالمره راح تنسعدين امه واخواته حبابات ولسانهن حلو

انشالله اذا هاي القسمه تسعدج اريد من الله يتممها...

بيني وبين نفسي جنت ادعي العكس

ياربي كون ماتم وابقه طول عمري بدون زواج يارب

بس بعدين اذكرت شغله !!!!

اكول ماما شو من حجيهم مبين همه مو منا يعني

موبغداديين. ؟؟؟

اي يمه همه أصلهم عماره بس شغلهم هنا ومنتقلين

لان يشتغلون بالبانزين والنفط وعدهم بانزين خانه (محطة تعبئة وقود ) وهمه كلهم يشتغلون بيها...

زين لعد ليش عريس الغفلة مايشتغل وياهم؟؟

والله يمه العرفته الولد مايكدر لان مدري عنده حساسيه بالقصبات مدري كالت ربو ومايتحمل ريحة البانزين....

بس شنو يايمه طارن بيج من شافنج وامه كلساع وكالت حبيتها وخشت قلبي ونشالله اصير من نصيبنا

وبقن بس يسألون وبعدها يجي الولد وشوفينه ويشوفج وانشالله اذا جانت قسمتج فتكمل على خير ..

اي مواني الدوري العراقي حتى نشالله اصير من نصيبهم ... والله يالله يحجون الواحد كوه...

عدن كم يوم والموضوع سكته واني فرحانه

لان خلصت و الحمدلله شويه شويه بديت ارمم نفسي من جديد وارجع مثل قبل ..

وخصوصاً مرض سوسن كلش فادني لان الشغل كله صار علي اضافه للطبخ والعجن والخبز فالنهار كله اخلصه شغل وبالليل اذب نفسي شهيده بالفراش

بدون تفكير ودموع وحزن..

يعني اطبق المثل الي يكول

(مصائب قوم عند قوم فوائد )

لا خطيه الله يكومها بالسلامه وتجينه بنوته حلوه

لان كلش داتتأذه وهي بعدها بأسبوعها الخامس ....

لليل اجه مهيمن كالب الخلقه ومايتحاجه بس يصيح

ويرزل حتى ابنه ما سلم منه هم أخذ المقسوم ونام ودمعته على خده خطيه..

مافهمنه شبيه ولو هو موجديده هاي بس يعني لازم اكو سبب..

وهالمره كلنا نريد نعرف السبب...

امي حاجته كلها بعدين

بس جان يسأل عن ابوي ..

شويه واجه ابوي من الكاظمية جان رايح ويه جماعته بالمنطقه رياجيل كبار ما عدهم شغل وعمل كلهم تقاعد

فمخلصينها مزارات وتسيورات وكعدات بالكهاوي الشعبيه اللي موجوده بمنطقتنه برأس الشارع فيروح يخلص العصريه وياهم...

المهم رجع الوالد صبينه العشه وتعشينه

وشربوا جايهم وشويه ودخلوا للاستقبال وسدوا الباب

اني هنا الدوده شتغلت بقيت رايحه راجعه اريد بس اسمعلي كلمه...

الفضول دمرني

اريد اعرف شنو عدهم حتى يسون اجتماع مغلق

مرت ربع ساعه وعدت النص ساعه وراحت الساعه

وهمه ماكوا وكأن الإستقبال بلعتهم...

هناا الفار كام يلعب بعبي على كولة المصرين

صرت اجيبها منا واوديها منا ...

وكلبي كرصني وتسلل الخوف الي من سمعت صوتهم بده يعلى وخصوصاً من اجه اسمي بالنص ...

عرفت السالفه بيها اني ...

صرت ارجف واردد

{وجعلنا من بين أيديهم سداً ومن خلفهم سدا فأغشيناهم وهم لا يبصرون } ...

ومتت خوف مع اني مامسويه اي شي حتى الشارع

مشايفته بس الخوف بهذل احوالي ...

لحد ما طلعوا وكلمن راح لغرفته واني عبالك وحده عدها ولاده يارايحه ياراجعه...

مهيمن راح لغرفته ينام وامي هماتين راحت وره ابوي وطفوا ضوا غرفتهم والبيت صار صنطه وكلها نامت

إلا اني النوم جافاني...

شيصبرني لباجر حتى اعرف شنو السالفه..

والله وصلت لمرحله صرت امشي واغني

(شيجيب باجر واصبر شلون ) ...

بألف يا علي ياله نمت وثاني يوم من غبشه

كعدت ريكتهم وطلعوا لاشغالهم واني ماكوا

سالفه ابالي بس اجتماع البارحه...

امي وضعها ماعاجبني شكلها مهموم

وحتى ابوي شكله مانايم وحتى مو مثل كل يوم

يسولف ويحاول يضحكني ويغير علي جو

ماكو اليوم اكل لكمتين وطلع لشغله

ومهيمن خوب هذا من الله معصب وميتحاجه

يمكن امي جايبته بعركة لو بوقت تأخير الرواتب

لان هذن الوقتين

الواحد يعصب ويصير مايتحاجه...

بقيت النهار كله اني اشتغل وعيني

على امي اريدها تحجي ماكوا

والمشكله كلبي حاسسني اكوا شي !!!

بس شنو هذا الشي الله اعلم وأمي تعلم

بس شون اخلي نفسي هم تعلم هاي اللي يرادلها

مخمخه وتفكير...

لهذا فكرت بخطه جهنميه بس تنفيذها

يتوقف على سرعتي بأكمال اعمالي الشاقه

فشسويت بسرعه.. بسرعه كملت كل الشغل وطفيت الطباخ

جوه الجدوره ورحت سويت ماعون فاكهه وعصير

طبيعي رتبتهن بصينيه وحطيت ماعون كيك وكاسة

كرزات مشكل

وسويتها صينية كعدة نسوان وغيبه ونميمه مرتبه

ورحت لسوسن لغرفتها...

لان اكيد هي تعرف لان اخوي الأستاذ روميو شكد

ماهو حقنه وماينبلع بس يحبها لمرته ومايضم عليها

شي ...لهذا فكرت اعرف السالفه من المصدر المقرب

للمصدر الرئيسي...

شلوني ولا اشطر صحفيه بال CNN

متخطط لرصد الأخبار مثلي...

المهم دكيت الباب ودخلت

شفت ام السوس نايمه وكفشتها واصله لتكريت

وفاتحه ال TV على قناة دينيه ..

تره كلش متلوكلج الديانه..

على ساس تلوكلج تعاي هاي شنو يعيني .. يعيني

نمنميات وكذا وذاكرتني بعد ... خيرج شو ما ارتاحيتلج

مو صوجج صوجي اني الكملت شغلي وكلت اجي يمها

اونسها شويه إبدال مباقيه لوحدها..

اكوم اكعد يم امي احسن ..

لا ولج تعاي اشاقه شبيج بسرعه صدكتي..

تعاي اجيتي بوقتج لأن جعت ..

هو انتي ياوقت ماجوعانه.. عوزج بس تاكليني ترا خوش بيه لحم والله ..

عوووع لعبتي نفسي عابتلج .. اكلج الجهال وين

شو مالهم صوت ..

جهال !!!!!!

لا حبي كولي الشواذي السعالوه الملايجه مو الجهال

المهم الجبير الغبير كاعد يلون بالاصباغ اليوم صاير

دافنشي.. والثاني كالعاده بحظن البيبي الحنونه...

عوفج من الجهال وكليلي شبيه رجلج من البارحه لليوم

عالن الاستنفار علينه ومدخلنه بحالة تأهب قصوى ...

هممممم كولي هيج من البدايه يعني هاي الصينيه

موحباً بيه .. مسويتها حتى ترشيني واكلج السالفه...

ايون يحبي وبعدين شنو انتي وجبة كنتاكي لو بطل ببسي حتى حباً بيج ترا ماخذه بروحج مقلب والله

المهم غردي عزيزتي واطربيني شنو من

مصيبه منتظرتني...

اممم اكلج بس ماظوجين ولا دخلين بحالة اكتأب

مثل عادتج...

الله يستر .. احجي بالله

الناس الي اجو عليج قبل فتره جاين وسألين

بالمنطقه و واحد ناقص غيره

كايللهم انتي مطلقه ووو

وشنو احجي شبيج كمتي تمتمتين...

نبض فدوه لا ضوجين بس حاجين عنج حجي موخوش وصديق مهيمن خابر ومعتذر عن الخطبه..

بس فدوه موضوجين..ولا تقهرين نفسج

هاي الناس ماعدها بس القيل والقال...

ماحجيت شي اكتفيت بالسكوت هو الوحيد الي

يكدر يعبر عن احساسي هسه...

ابد ماضجت لان ما تم الموضوع لان اني اكيد مجنت

حوافق..

بس القهرني سمعتي اللي صارت بالارض ...

من بعد هذا اليوم رجعت لعزلتي والسكوت صار هو

عنوان حياتي ...

شكد ما احاول انسه او اكمل حياتي بشكل عادي

وارجع نبض القديمه الي تضحك وتحشش..

ما انجح ليش لان

لازم اصير اشياء نغص علي ...

وترجعني للمربع الأول...

امي خطيه شبعت قهر وحتى ضغطها يوميه

صاعد ورايحه للمضمد لو للطوارئ..

واخوي وسندي جان كل مايصير شي لو احد حجه

يجي علي ويكعد يرزل ويغلط... هاي ماعدا النظرات

الي احصلها بالكومه والكعده..

بس حسين الوحيد من أخوتي الي جان يذكرني من يطلع .. بالحلويات وهو الوحيد الي ماسمعني كلام

ولا اذاناي بأي تصرف بالعكس هو جان يوكف

وياي ضد مهيمن...

وهو الجان ميقبل اي احد يسمعني كلمه حتى مره

من المرات رادو يجونا بيت عمو ...

واني ضجت لان من يجون بس يسألون

ويطقصون...

ماناويه ترجعيله؟؟

لو

هم تشتاقيله؟؟؟؟ !!!!!

وطبعاً هاي سوالف فاطمه

من تسألني ابقه مفهيه بوجها شجاوبها بالله

يعني هي هاي هم اسأله تنسأل اشتاقله!!!!!!

هي يالله

شو اني ادعي عليه بكل وقت

وهاي جايتني دكلي ترجعيله

لهذا بس شافني ضجت صاحلي

نبوض اليوم ماعندي شغل شنو رأيج نطلع للألعاب

اني سمعت اسم الألعاب واني طرت من الفرح

بسرعه رحت بدلت وجهزت نفسي

وطلعت انتظره بالحوش بهاي الاثناء دخل ابوي

ومنير الي بس شافني مبدله كعد يسأل

عمه وين رايحه

طالعه اني وعمو حسين

جاوبته وذكرت اني مامستأذنه من ابوي

رحت عليه ...

الله يساعدك بابا

ويساعد بختج بنيتي شنو اليوم كاشخه والعيون تلمع

شكو عساه خير ...

اني خجلت لان بدلت وجهزت نفسي بدون حتى ما انطيه خبر عاد بتسمت وكتله

ااا حسين كلي نروح للالعاب اءاء ميخالف اروح وياه

ابوي طكها بضحكه ومبينه طالعه من كل قلبه وبعدها

كلي

ههههه انتي بدلتي وكملتي وجاي ادكليلي هههههههه

روحي بويه تونسي... زين عندج فلوس او اوكفي هاج

خذي ذن حطيهن بجنطتج وديري بالج على نفسج

ولا تيهين اخوج خلي ايدج بأيده..

اني بست راسه وكتله شنو بابا قابل طفله اني وكاعد

توصيني لاتخاف مااضيع باقيه على قلبك ماتخلص مني ههههه

عمه اني هم اريد اروح للالعاب

درت وجهي وشفت منيرو اللزكه مبدل و واكف

لا والله عبالك اخذك وياي ماكو يلا روح لامك احنه مناخذ زعاطيط ويانه...

شو اني بعدني مامخلصه كلامي هذا كعد بالكاع وصار بيجي ويشمر برجليه ودموعه صارن عبالك شلال..

اني بقيت صافنه عليه وفاتحه حلكي مترين

ابوي كلي

يابه خذيه وياج خطيه خليه يغير جو شويه..

اخذته حتى اخلص من هوسته...بيومها تونسنت ونسه

مصايره...مخليت لعبه ماصعدتها.. وضحكت ضحك

احس بطني انشكت بالنص من كد الضحك..

صدك نسيت كلشي ورجعت طفله صغيره

بس ياراحه ما أتم مادام مهيمن موجود بحياتي

من رجعنا لعب بينا لعب وكلبها علينه عزه..

وبيومها تعارك هو وحسين لان طلعني

و شنو اطلعين وانتي سيرتج على كل اللسان ..

كافي علينا فضايح...

من هذا اليوم اني بعد ماطلعت

وحتى القرابه صرت ماروحلهم

عزلت نفسي بالبيت

وهملت نفسي وشكلي رجع ذبل

وصرت ادفن نفسي بالشغل

خصوصاً سوسن متكدر تتحرك هواي ولازم بس تنام

لهذا اني صار مهربي من واقعي الشغل

ما اخلي شي ما اجلفه من الحيطان والاصغر حاجه بالبيت ...

ورجعت سالفة الخطابه تتكرر

ونفس الحاله يجون يشوفوني وبعدها يرحون

ومانشوفهم... والسبب الجوره والمنطقه

سوني طالعه وياه ومدري شنو مسويه وهو مسويلي

لحد ما البارحه هم اجه صديق صباح والولد من اربيل

مو من بغداد

اجه هو وامه واخوه

كعدنا كلنا بالاستقبال واني بعدين اجيت الولد جان

حلو اشكر وعيونه ملونه وامه كولش حبابه اني نفسي من شفتها ارتاحيتلها بس اخوه جان شكله يخوف

مبين نفس طينة مهيمن لان هم حواجبه معكوده

والواضح حجايته هو المسموعه لان جانوا

بكلشي يستشيرونه...

بعد مراحوا الصراحه تمنيت أتم هاي الزيجه حتى بس اخلص من حياتي الي داعيشها ...

بس الي صار هو ...

عدن كم يوم وخابر صباح

يكول اخوه سأل بالمنطقه وكايليه نفس الكلام

ومعتذرين عن الموضوع...

حسين من سمع كولش اتأثر وطلع هاد يريد يحط

حد لهذا الكلام ...

طلع لليل رجع بس حاله مدري شلونه ...

وهم رجعوا اجتمعوا بالاستقبال..

بس هاي المره اني ما اهتميت ولا حاولت اعرف

لان خلاص الموضوع صار واضح وضوح الشمس ...

بس الي ماجنت حاسبه احسابه هو ....

.

.

.

.

.

.

.

.

.

.

حسين ...

من يوم الي فصخت بيه نبض والكلام صار يطلع أشكال الوان ..

صرت واني كاعد بمحلي يجيني الحجي..

والأكثر سببه الكرايب..

النسوان وين مايرحن يحجن

واحنه بمنطقه شعبيه... يعني الناس هناا

تموت على هيج سوالف...

حتى الخطابه يجون وخوش قسم بس مع الأسف يرحون بس يسألون ...

اني بعد ما كدر اسكت لان فاض الصبر بيه

لان شكد ما احجي وأكول ماكوا هيج شي ..

ماكدر اسيطر على الحجي ... لان لا واحد ولا ثنين

اليوم رحت للأسواق الرئيسيه الموجوده بالمنطقه

لان اي واحد يجي يريد يسأل يروح ياللاسواق يا للحلاق.. هاي المكانين الي عدهم السيفي الخاص بكل سكان المحله...

دخلت وكلت السلام عليكم

جاوبني ياسر ..

وعليكم السلام ياهلا بأبوعلي وين هالغيبه

جاوبته واني مثكل وجهي عليه ..

هلا بيك.. موجود بالمحل تعرف شغل وموسم هذا

جاوبني ...

الله يرزقك.. ايي تفضل وسحبلي الكرسي اني هم كعدت وهو حط كدامي عصير وكيك

رجعته عليه

هو ستغرب ردة فعلي

سألني ...

هاا بوعلي شصاير وماتريد ضيافتي..

جاوبته..

ياسر بدون لف ودوران انته الي ادكول للناس الي تجي تسأل عنه وقصدهم الخطبه من بيتنا...

ياسر سكت شويه ..

وبعدها كلي ..

شوف حسين اني راح اكلك والله شاهد علي ما مكذب بكل كلمه راح اكولها ...

صحيح هواي يجون يسألون بس وستر اختي ماحاجي بحرف موزين عنكم لان اني اعرفك واعرف انتوا شنو

بس جانوا يطلعون مني يرحون يسألون الشله التكعد

برأس الفرع... وانته تعرفهم شنو من شله هاي ..

النبي مايسلم من هم

ولبارحه كدامي صاروا يحجون عن كم عائله بالمنطقه وانتوا وياهم واني والله شاهد علي

ماسكتت ألهم تعاركت وياهم وتضاربنه

وطردتهم وهسه اي واحد يجي اني اطرده

لان هاي أعراض ناس واني هم عندي عرض

وماقبلها على غيري مثل ما اقبلها على نفسي ...

والله يا ياسر ماعرف شكلك عذرني لان جان اسلوبي جاف وياك بس انته هم تعرف حقي لان اختي سمعتها اطشرت... وصار الكل يحجي بيها

وهي لأبيها ولا عليها ... كل ما بالموضوع انخطبت

وماصارت... يعني لا صاحبت ولا نهبت ...

كله صار بشرع الله ورسوله..

وكدام الدنيا كلها...

على العموم اني هاي الشله اعرف شلون اكص السانهم

واعلمهم شلون يحجون بأعراض العالم...

يلاا اني اترخص ومشكور على كلشي...

ولا تزعل مني لان انته صاحبي واني شلت عليك بس هسه اني المديونك وتندعيني عزيمه

حبيبي ابوعلي انته غالي وهذا حقك واني لو مكانك اسوي نفسك واكثر... وعزيمتك واصله بس قبلها اني اليوم جنت ناوي امرلك للمحل

لان جنت رايد استأذنك بموضوع بس مدامك انته هسه هنا راح اكلك...

كول ياسر واني خادم وركبتي سداده

تسلم والله ماتقصر..

بس جنت رايد اكلك.. اريد اجيب الأهل واطلب ايد المستوره اختك شتكول... خوماعدكم اعتراض!!!!!

يتبع

________________

اعتذر منكم بس الأيام الجايه

مراح اكدر انزل ولا اكتب

لان اخوي البارحه سوه

عمليه ...

ومن البارحه لليوم الخطار

ماوكف..

مجاميع مجاميع

واحتمال اسبوع احنه راح نبقى على هالحاله

وبهاي الحاله مراح اكدر اكتب

لان تعرفون الخطار

يخلصها

جاي .. مي .. غده .. عشه

يعني من الصبح لليل احنه وكفه وحده

بس انشالله احاول اكتب ولو نص بارت

وانزل..

بس اذا ماكدرت الله والعاذرين...

مع حبي واحترامي للجميع ❤

Nabà Baqer

Dan 😘

نبض _ دافي

Nabà _ Baqer

الجزء الخامس عشر.....

بالبدايه احب اشكركم من كل كلبي على

حبكم وكلماتكم دعائكم بالشفاء

لاخويه...

كولش هوايه فرحتوني

فعلاً حسستوني احنه

عائله وحده ..

ربي لا يحرمني منكم ..

والي أطلبه منكم تدعوله كون نتيجة الزرع تطلع

سليمه والغده تطلع حميده

لان منتظرين نفرح بزواجه على فرحة الزهره

ومانريد اي شي يبعد الفرحه عنه ولا يفجعنه بيه ..

بجاه هذا الشهر 🙏🙏

_____________________________

وليعلم آلله اني بذلت حتى ، ذبلت 🥺 🥀

_____________________________

حسين ...

من سمعته بقيت ساكت لااكدر

اكله تفضل ولا اكدر اكله لا

لان اذا كتله ايي وراح يجي

اعرف نبض مراح توافق ومهيمن راح يجبرها

حتى بس يخلص من الكلام ..

ويسكت الناس ...

واذا كلت لا ..

يجوز تطلع خوش قسمه واضلمها

بقيت محتار شأكله بعدها كتله هلا بيك

بأي وقت ..

ومادري اذا سويت زين لو شين

عفتها يم الله ..

رجعت للبيت واني بس افكر

وحتى احطهم بالصوره باليل اجتمعت بيهم

وكتلهم على هاي الشله الي رحت وطيحت حظهم

ورحت للمختار هم كتله عليهم وهو ماقصر

راح لاهاليتهم واحد واحد

ومنعهم من التجمع بالشارع...

وبعدين كتلهم على سالفة ياسر

مهيمن كيف وكال

مابيها شي ياسر خوش ولد

بس امي وابوي ماقبلوا

ليش يمه تريد اذب اختك هيج ذبه

شبيها وزوجونها لياهو الجان

شو جمال وشهاده وأخلاق

اني ماقابله... ومراح اقبل

وانته ابومهيمن شو ساكت..

والله يا أم مهيمن الولد خوش ولد

هم أخلاق وسمعته مثل المسك

وهمه ناس على كد حالهم لاعدهم زايده ولا ناقصه

امهم متوفيه وابوهم خوش رجال بس صار وياه

حادث وراحت رجليه..

وبنيتهم هم جنها نبض نفس الاخلاق..

بس يابويه...

اني هم ماريد انطي اختك...

ولاتنسه اختك مصارلها هواي من طالعه من تجربه

اخذت منها ما اخذت..

اني حتى هاي القسم الي تجيها مراضي عنها

بس انته جنك ماتصدك أحد يدك الباب

عبالك حمل وتريد تخلص منه ..

مهيمن ...

لا يابه شهل حجي شنو حمل

انته تدري نبض اعتبرها بنتي مو اختي

بس يابه الحجي كثر ..

والناس الساناتهم ماترحم

وياسر ابن المحله ويعرف كلشي

ورغم هذا اجه ودك الباب..

بعد ليش نرفض..

وهي هم موطفله حتى نكول بعد وكت

دخلت للعشرين والبكدها فاتحات بيوت

وعدهن جهال..

واني برأيي هاي انسب قسمه الها

وهم يمنه بالمنطقه..

والولد وحيد لاعنده أخ ولا كومة خوات هي وحده والاعرفه عنها صغيره بعدها تدرس..

يعني مراح تتعذب..

مهيمن يسولف واني مامقتنع لان جنت ناوي اخليها ترجع لجامعتها بس من باوعت وشفته شلون قنع ابوي وحتى امي شكلها اقتنعت من عرفت راح اصير قريبه

عليها وماعدها عيال عيذبونها..اقتنعت واني انجبرت اسكت... لان اني هم بيني وبين نفسي مقتنع من ناحية الولد ... بس وضعيته وعيشتهم هاي الي ماجنت مرتاحلها...

ثاني يوم....

نبض ...

جنت كاعده بالكاع وألف كبه للغده

اجت امي كابلتني وكعدت

باوعتلها عرفت عدها سالفه

احجي يمه شكو

امي باوعتلي عود شتقصدين

ماما ترا اجتماعاتكم هليام كثرانه واعرف اني محور هاي الاجتماعات واعرف انتي هسه عندج سالفه فأحجي لا تترددين...

يمه منج خوب انتي مفتحه بالبن اي عندي سالفه واريدج اسمعيني بدون ما طفرين مثل كل مره ...

اليوم جايج ناس... الولد من المنطقه خوش ولد

وخوتج موافقين وكلنا موافقين موبس اخوتج لان

هاي خوش قسمه ..

لهيج اريدج ترتبين نفسج للعصر زين يمه ..

اني جنت الف واسمعها من كملت كلامها كتلها

اكلج يمه اني هيج صايره حمل عليكم

هيج تردون بس تخلصون مني ..

يوميه جايبيلي ناس شكل ويوميه لبسي وطلعي

وتاليها يرحون ومايرجعون ترا مصارت عيشه هاي

كافيي

رحموني ترا اني بشر من دم ولحم وإحساس

يعني مومطي حتى تحملون عليه وتردونه ينفذ ويمشي بشوركم وهو ساكت...

زواج مازوج وشسون سوو

لجججججججج نبببببببببض ...

حيوانه عديمة التربيه ..

تصيحين على امج ولج

.. هاي الجامعات هيج تعلم وتربي... ام التعليم والدراسه.

شو تزوجينه ورجلج فوك راسج.. وإذا اسمعلج صوت

احط راسج بالبلوعه وانحرج افتهمتي...

لا مافتهمت كافي حرام عليك انته اخ انته

انته انتقام.. بلاء من رب العالمين ونزله علينه

دمرت حياتي...

موتتني بالحيا..

مكفاك مستقبلي الضاع... لو سمعتي الي صارت جوه الرجلين بسببك... مية مره كلت ماريد لا زوجوني

بس انته لاا شلون أحد يعصيك..

كمت وقنعت البيت كله وزوجتوني لذاك الحيوان

ورجعت اتحاربني بالصغيره والجبيره

حصره علي اسويلي حاجه لو اريد اطلع لمكان

وكلت...

ماكوا عود من تتزوجين وطلعي وسوي البعجبج

هاي اذا اله نيه ياخذج...

لك حسستني اني عار ولازم تتخلص منه

مرض وتريد تبعده بأي طريقه...

ليالي تعدي علي اخلصها بجي..

وسؤال واحد بس الي اتمنه الكاله جواب...

ليششش.. ليش اخوي يريد يخلص مني

ليش المعتبرته سندي... نابذني ومرخصني

وبايعني بالرخص.. ليششششش ولك ليشششش

جنت احجي بكل حركة قلب ودموعي وشهكاتي

ملن المكان... ما حسيت غير انجريت من شعري

ونسحلت...

وامي تعيط وتتصيح

ولك عوفها الله لاينطيك ولك اختك هاي عوفها

مهيمن عوفها ولك اغضب عليك اذا جستها

وهو ماكوا ولا كأنه يسمع اخذني سحل من شعري شمرني بالغرفه وقفل الباب ونزل علي ضرب

بالحزام...

يضرب ويغلط

حيوانه مامربايه اليوم موتج على ايدي

ولج تصيحين بوجهي... اني تكليلي ولك

اليوم اعيد تربيتج من جديد ..

لج فوك عارج.. جايه بكل عين صلفه تحجين وتصيحين

بسيطه ولج بسيطه...

ويه كل كلمه يكولها جنت احصلي ضربه

وجهي .. رجلي .. ضهري ... اديي

ضرباته جانت تتوزع بكل مكان بجسمي

دموعي جفت وصوتي انبح من كثر العياط والبجي

وجسمي خدر كمت ما احس بيه

وهو تعب وصار يتنهد من كد ماضربني

كابلني وكعد واني ضميت

راسي منه خفت لا يضربني بوجهي

رفع راسي من شعري وعينه صارت بعيني

حجه بصوت متقطع من سرعة تنفسه

وعيونه محومره وكصته تذب عرك

شوفي لج صوت ماريد اسمعلج دمعه ممنوع تنزل

تبقين هنا محبوسه بغرفتج... طلعه ماكوا

خلقتج ماريد اشوفها لحد ما تنكلعين

اسبوع بس وترحين... وعساج مارجعتي..

بعدها هد شعري بكل قوته بحيث راسي انضرب بالكاع ورتفع مرتد...

بعدها فقدت الوعي ...

بعد مدري شكد حسيت نفسي بفراشي وامي كاعده تقره علي وصوت بجيها زرف قلبي تبجي بحركه

...

حركت نفسي ردت اعدل نومتي حسيت اعظامي اتفككن والالم جان يسري بكل جسمي عطت بشهكة بجي لان ماتحملت كل هذا الوجع

امي خطيه فزت تمسح على راسي وصيح

اسم آلله يمه اسم آلله.. بيه ولابيج كون

يمه نبض اسمعيني يمه باوعيلي بس فتحي عيونج

جنت اسمعها بس ماكدر لاافتح عيوني ولا اكدر احجي

عيوني ثكيله واحس حراره تطلع من كل جسمي

اديي اريد احركهن ماكدر ثكال ماينرفعن

وراسي يوجعني بقوه...

سمعت صوت الباب انفتح..

هذا صوت سوسن تحجي ويه امي اريد افرزن شيحجن ماكدر.. بعدها حسيت بجكة ابره...

يمكن ضربتني ابره بس مال شنو ماعرف..

بعدها رجع النوم غلف عيوني وستسلمت اله...

ياسر ...

جانت امنيتي ارجع اكمل دراستي الجامعيه

رحت وسألت كالوا بس مسائي ولازم تدفع

٣ملايين ..

زين اني منين أجيب ال٣ ملايين

خليت وكعدت وشلت هاي الفكره من بالي ..

وبقيت لازم الاسواق حياتي صارت عباره عن محل

من الصبح لليل بالوحده بالثنتين ياله أسد المحل...

لان اني الاسواق الوحيده بالمنطقه الي توفر كلشي

لهذا اكوا سحب قوي...

شويه شويه بديت أكبر بالمحل..

لحد مصار سوبر ماركت..

والحمدلله الحال تحسن و وضعنا المادي صار بعد احسن ...

أملي صار بشمس بلكي هي تكمل وتحققلي حلمي

واصير مختبريه..

لان هي هم حلمها تكون بمجال الطب..

لهذا من هسه سويتلي صندوق وخصصته بس الها

اريد اجمعلها فلوس للسادس..

ماريد أقصر وياها بشي ...

فديوم جنت كالعاده واكف بالمحل وفاتن سيارات

كلها فخمه وراقيه طلعت باوعت شفتها طلعت كبل

وطبكت بالفرع المقابيلنه...

سألت طفل كتله هاي شنو السيارات

كلي لبيت ام مهيمن اليوم خطبة بتهم..

بالبدايه ماعرفت منو بيت ابومهيمن بس بالليل

اجوا شباب كالولي

... تجي ويانه للكهوه اليوم العبه

ريال مدريد ويه فالنسيا...

كتلهم ايي انتظروا بس اقفل الاسواق واجي

قفلت المحل ورحنه نتمشه بالطريق كتلهم

شنو حسين ماكوا ... يابه خابروه لا يعتب لان رايحين بدونه...

جاوبني واحد من الولد ..

يابه حسين اليوم مختفي.. خطبة اخته اليوم وخابرته

يكول عدهم خطار مايكدر يطلع...

هااا بالخير انشالله..

كلمه حجاها الساني واذاني قلبي من عرفتها انخطبت

أيام خلصتها واني عيني عليها من تطلع الصبح ويه اخوها جانن عيوني تحرسها وعقلي يبقى

مشغول بيها...

لحد مترجع واني ابقى مراقب الطريق

منتظر جيتها...

من تمشي جنت احسها تعزف على أوتار قلبي

برائتها وجمالها ونظراتها كلشي بيها يسحر

ويجذب...

ليالي واني جنت احلم بيها ...

ولساني مابطل يدعي ربي يرزقني اياها

ويخليها اصير حلالي...

بس بعد صارت بذمة رجال غيري ..

لازم اشيلها من راسي..

وادعيلها بالراحه والسعاده..

مرت الايام والاشهر وجنت اشوف خطيبها

يفوت من يم محلي بسيارته الراقيه..

وكشخته الي ادل على يسر حاله ..

من جنت اشوفه اكعد اقارن حالي بحاله

الكه الكفه تميل اله بكلشي...

حقها اذا ارتبطت بيه شاب مرتب وانيق وحالته زينه

قابل تباوع لواحد مثل حالتي...

كل هذا جنت اضمه بقلبي واني مطحون طحن من القهر بس مابيدي شي اسوي...

بس بيوم صار شي رجعلي ضحكتي والأمل من جديد

جانت الدنيا مغرب...واكف اوزن شكر لمره ودخلت ام عقيل هاي مره جبيره بالمنطقه بس شنو تعرف أخبار المنطقه كلها ..

سلمت ورديت عليها السلام

خاله تردين بس شكر ؟

لا يمه انطيني وياك من هذا الجكليت لوليدات ابني

اي خاله ادللي أخذت كيس وكعدت انوعلها بالحلويات

وحجت ام عقيل ...

خيه ابنج ما رجع مرته ؟

جاوبتها المره...

لأخيه منين فلك طرها تريد تطلك

يا خيه طلكوها ختولي وزوجيه اغاتها

خيه شيطلكها وعنده منها ثنين ولد منو يربيهم

اني هلشوفة عينج مابيه اعين نفسي رجلي خراب

يعيشون خيه شعليهم.. بعدين هاي نبض بت ام مهيمن

مو اطلكت وهي حتى ما ماخذينها ... ماتاخذينها لابنج

هنه يسولفن واني بالي كله يمهن من سمعت اسم نبض رفعت راسي وعفت كلشي وركزت وياهن ..

ومن كالت اطلكت وهي ما ماخذينها احس الفرحه ترستني وبتسامتي ما سيطرت عليها

حته المره انتبهت علي وسألتني

يااا خاله شبيك تضحك ويه روحك

بقيت ساكت ماجاوبتها وهي هزت ايدها وراحت

بيومها سديت الاسواق من وقت

ردت بس اختلي بروحي ...

اريد استوعب الكلام السمعته...

صدك لو يتهيألي ...

ثاني يوم تأكد الخبر من اجوا شباب

وحجوا بالسالفه كدامي ...

بس الضوجني الحجي الي صرت اسمعه

كاموا يألفون قصص.. ويطعنون بأعراض الناس ..

أكثر من مره يحجون عليها كدامي واتعارك وياهم واطردهم...

وهاي الفتره أكثر من مره يجون ناس يسألون عن اخلاقها وسمعتها واعرفهم خطابه...

من اجاوبهم وامدح بيها احس قلبي ينعصر ويه كل كلمه تطلع مني ...

يوم عن يوم صرت اخاف لا اخسرها مره ثانيه

وفكرة اروح واتقدم الها شاغله تفكيري بس اخاف

خاف لا انرفض بسبب وضعي المادي ...

لان شكد ما اني اشوف وضعي زين والماده زينه

بس ماتجي قطره بحر خطيبها السابق...

لهيج جنت متردد...

بس من اجه حسين البارحه وسألني عن الحجي الي دايطلع ... و وضحتله كلشي .. وتفهم الموضوع

تشجعت افاتحه بموضوعي...

ومن حاجيته وسمعت رده ارتاحيت وتحمست

افاتح والدي بالموضوع

ومن حاجيته وشفته فرحان وما عنده أشكال خصوصاً اني حطيته بالصوره وماضميت عنه اي شي

حتى الحجي الي طلع عليها ...

بس هو ماهتم خصوصاً من شاف فرحتي واني اسولفله عنها ...

يابه البنيه بعدها ماطالعه من بيت اهلها

يعني ما ماخوذه حتى نكول موخوش وحده

وبعدين هي جانت مزوجه بشرع الله ورسوله

واكوا هواي قسم هيج توصل ليوم الزواج واكوا بيهم بالزفه وتخرب ليش لان الله ما قسم يكملون

مو لان بيهم عيب

لا بس هي قسمه وكل انسان

ينولد وقسمته مكتوبه بكصته...

بس ربك يسوي هيج

حتى يبين لبني آدم اشياء هو مجان منتبهلها..

لو يختبره بهيج مواضيع حتى يشوف صبره ويبينله

الي وياه والي عليه ...

وهاي البنيه حالها من حال هواي بنات ارتبطت

ومصارت يعني لا جرمت ولا زنت ...

بس خوفك من النفوس الضعيفه الي متخاف من ربها

وما محسبه حساب لكبرها وكاعده تلعب بأعراض الناس

وتخرب بيها ...

لهيج يابويه اذا جنت هاويها للبنيه ورايدها

توكل بالله واني اخابر على عمامك وعماتك

همه يخطبونها الك ...

من سمعت كلام ابوي ارتاحيت وحسيت اول مهمه تمت

بقت بس موافقة البنيه واهلها ...

لهيج اليوم كعدت من الصبح رحت اشتريت ملابس جديده وزينت ...

ورجعت لكيت عماتي ثنينهن يمنه ومرة عمي الجبير

وشمس الخبله فرحانه وتمشي وطبل وتغني ...

عريسنا جوكليته حامض حلو اباكيته..

ههههههه خبله موبيدها

للعصر اخذتهن ورحت.. دكينه الباب طلع اخوها الجبير

سلم علينه ودخلنا

النسوان دخلن جوه واني فوتني للاستقبال

كعد يمي حسين وأبوها واخوها الجبير ...

سلام وكلام وكعدنا نسولف عن البلد والوضع

وبعدها جبنها على البيوت والأراضي..

وشدارس وشمخلص سولفتلهم كلشي عني

وعن امكانيتي...

وفتحت وياهم موضوع الخطبه ...

والحمدلله جان جوابهم الموافقه بس اكوا شغله

حيرتني وهي استعجالهم..

رادوا الخطبه والمهر بيوم والعرس بعدها بسبوع

اني تفاجأت لان مجنت حاسب احساب هيج بسرعه بسرعه ...

بقيت محتار شلون راح ادبرها لان اني جنت مخلي ابالي أخطب وره شهرين تلاثه العرس هم البنيه تتعود علي واخليها تحبني وهم اني احظر

الغرفه واصبغ البيت ..

بس بعد ماعندي حل غير اوافق واني الشيطان

صار يلعب بعقلي ليش هيج بسرعه حتى المهر ماطلبوا

كالوا احنه مشترين رجال ...

بس اني ما قبلت وحطيته خمسه بخمسه

وتفقنا المشيه على الخميس هذا يعني بعد سبوع لان احنه هسه بالاحد ...

والخميس الوراه العرس اذا الله راد ...

بعدها رجعنا للبيت ..

عماتي كامن يحجن لان البنيه ما طالعه الهن بس امها ومرة اخوها...

وهي يكولون مريضه فلاونزه نايمه بالفراش ...

هنا زاد شكي أكثر بس بعدها لعنت الشيطان..

وماخليته يخرب علي فرحتي...

ثاني يوم طلعت شكو عندي فلوس حسبتهن طلعن

خمس ملايين ...

عمامي تكفلوا واحد عليه الغرفه والثاني عليه صبغ البيت لان ولده كلهم يشتغلون بالصبغ ...

بقه بس فلوس المهر والعشه من هاي الخمسه طلعتهن

طلعوا العماله يصبغون ويرتبون واني والولد وياي وابوي وشمس وديتهم ابيت عمي ...

يومين احنه بس شغل من الصبح لليل

البيت كله صبغته وجددته...

بس غرفة ابوي ما قبل أحد يغير بيها شي لأن يكول

هاي الغرفه الي بيها ذكريات ويه امكم الله يرحمها

شمس رادت غرفتها كلها وردي .. سويتها الها

وغرفتي صبغتها كل ضلع لون وسويتلها سقوف

ثانويه وترستها اضويه...

صارت تخبل ...

والغرفه اشتريت تركيه لونها صاجي ومنقش بزغارف ذهبي كلش حلوه فخمه ...

بقت بس البرادي والتحفيات هاي عليها هي تختارها

بفترة الخطبه...

باجر انشالله المشيه ...

كلشي جهزته القاط اشتريته

وعمامي والولد كلهم وكفولي خوش وكفه

ماجنت متصور وكفتهم هاي..

ثاني يوم كعدت من الصبح لان المعازيم هوايه

وجنه عازمينهم على الغده حتى بعدها

نروح لبيت أهل البنيه..

للضهر اني ماكعدت من مكان لمكان

ودي الاكل جيب كيكه ناخذها لبيت العروس

جيب مي .. جيب جيب افتر راسي

لحد ما كملنا غده رحت سبحت

ولبست القاط واجه الحلاق للبيت سوالي

تسريحه ورتبني...

وطلعنا لبيتهم أخذت المنطقه كلها..

حتى يشهدون هي بعد صارت مالتي حلالي

و محد اله حق يحجي عليها كلمه ...

دخلنالهم لكينا استقبالهم مليانه زلم

سلمنا تعارفنه وبعدها شيخنا هو الي تكفل

بطلبها من اهلها...

همه بسرعه وافقوا لان بعتبار احنه متفقين من قبل

وهاي مجرد اشكاليات كدام الناس

حتى يكون كلشي علني ..

قرينا الفاتحه وبعدها عقدلنه السيد وصارت حلالي

ومريتي وانشالله كلها سبوع وتصير ابيتي...يتبع

__________________________________

بنات حبيت. انوه الي عدها موضوع وحابه اطرحه كقصه...

او عدها احداث ابالها وحابه اسردها بأسلوب قصه

خلي تتفظل عندي بالخاص...

تكتب كل الاحداث او المشاهد الي بالها او حتى الفكره

واني حرجع اراسلها

وبالنسبه لقصة نبض دافي

اريد رأيكم بيها لحد الان

شلون شوفونها..

واريد تفاعلكم يزيد وياها

اذا حابينها..

ورجاءاً بدون كملي لو شوكت تنزلين

لان احنه متفقين

التنزيل ماله موعد محدد..

لهذا ارجع واكول

انتظروها تكمل

واقروها كامله للي متحب تنتظر أو ادكول

دانسه الاحداث

طبعاً اني اعتذر بس والله موبيدي مجبوره

وشكراً

Nabà Baqer

Dan ❤😘

نبض _ دافي

Nabà _ Baqer

الجزء السادس عشر....

______________________________

وكعنه ة بناس تعبد ناس

ولا جن الله خالقهه ! 🔕🔇

________________________________

نبض ....

يومين اني نايمه بالفراش لزمتني صخونه موتتني تموت...

لا اكل ولا شرب .. وجسمي كله يون علي ..

امي خطيه سهرانه فوك راسي الليل كله وبالنهار

لوسوسن لو حسين ..

ابد ماعافوني ابوي خطيه من عرف تعارك ويه مهيمن

وحتى راد يضربه وهاي اول مره اصير ..

لان ابوي هواي يحترم مهيمن وهو الي خلاه يشيخ

فوك روسنا ... بحكم هو الجبير وأبو البيت من بعد

عين ابوي ..(اسم الله ) ...

وخطيه بعدها سمعت بيه متخربط وناقلينه للطوارئ

وطالع ضغطه معلك وسكره وهمزين ما رايح بيها ..

اني من سمعت بيه هيج شبعت بواجي

وردت بس روحي اتعيني واكوم اشوفه ماكدرت

احس نفسي ميته ..

حسين كال هاي لان متاكلين حاولوا وياي ماكدرت

حلكي مر وبلاعمي مجرحه توجعني ماكدر اكل

لهيج راح وجاب المضمد شدلي مغذي ...

ثالث يوم بديت اتعافه.. كومتني امي للحمام سبحت

بس احس سجاجين تنزل على جسمي مو مي

جسمي كله يحركني ويأذيني...

كملت بيه ومابيه وطلعت لكيت امي واكفتلي جانت بباب الحمام ... بس شافت الباب انفتحت اجتني لزمتني من ايدي ومشتني للغرفه ...

كعدتني على السرير وحطت الغطه علي ادفيني لان احنه هسه بداية شتا هاي اول برده بيه ..

امي جابت المشط وكعدت تمشط شعري واني جنت غركانه بأفكاري...

هاي عدت سنه علي واني حياتي

انكلبت كلها بهاي السنه... هيج وقت العام اذكر

من اجت سوسن وكلتلي اجوا نسوان طلعيلهم

وطلعت ولكيتها امه لاسامه..

من ذاك اليوم لهذا اليوم اني مارتاحيت

جان يوم شؤم علي ...

عمري مراح انساه...

يمه نبض مدامج صحيتي والحمدلله صحتج رجعتلج

يمه لازم تعرفين تره الولد اجه هو واهله

واخوج وابوج انطوج وحددوا الخميس الخطبه والمهر

والخميس الوراه العرس...

يمه ماريدج تنقهرين.. هاي قسمتج يمه ولازم ترضين بيها ... ولو اني على عمه عيوني وافقت بس يمه

احسنلج من الكعده هنا ...

اخوج بعد مايعوفج ولا الناس الساناتهم ترحم..

تزوجي يايمه وخلصي...

بلكي يطلع خوش ولد ويرحم بحالج...

حجيت بصوت ضعيف...

ليش يمه كليلي ابوي ليش ماحاجه... صباح .. حسين وينهم ليش عايفين مهيمن يتحكم بينا ودمر حياتي ..

امي اخذت راسي بحظنها وصارت اتمسد عليه ..

يمه ابوج هالتشوفين حالته سكره وضغطه يوميه صاعدات وحتى نظره قل ومابيه حيل المصايح...

وخوانج لا تعتبين عليهم ... حسين ما قبل ولو شوفين

شسوه من اجه وشافج امدمايه بالكاع..

شالج وركض بيج للمستشفى وهو يتحلف ويتوعد

ومن طلعتي لعب لعب وحتى راد يدز على الولد

ويلغي كلشي بس ابوج ماقبل...

كله

..خلي تتزوج وتخلص من مهيمن لان اذا تبقى هنا

تموت ...

يابه هي شنيه قابل الدنيا سايبه لو مالها ضهر حتى مهيمن يموتها... اذا انته يابه ماتكدر تحميها اني اوكفلها

وفنه اليحجي وياها لو اعرف اخذها واسافر ولا اقبل أحد يأذيها بعد ...

كافي رحموها...

بعدها ابوج لليل تخربط علينه من وره القهر .. وهذاك هو نايم بالفراش وعلاكة الدوا شكبرها يم راسه..

وصباح يمه هذا اخو روحه مو اخو أحد...

لا تعتبين عليه ولا تعتبريه موجود...

اصلاً هو نفس طينة مهيمن ونفس التفكير ...

لهيج يايمه اريدج تزوجين حتى تخلصين... الولد يكولون خوش ولد وماعنده بس ابوه رجال مقعد واخته صغيره بالمتوسطه... وامه متوفيه..

وهم قريبه علينا بُعد فرع واحد ... شوكت مايعجبج

ادكدرين تجين ونجيج... زين يمه

شلت راسي من حظن امي ومسحت ادموعي وكتلها واني احس بعد مشاعري كلها خدرت كمت ماهتم بأي شي ...

زين يمه شسون سوو بس يكون بعلمكم من اطلع من هذا البيت بعد اتحلمون اشوفوني ويحرم علي دوسة عتبته...

ورحت لفراشي تلفلفت ونمت...

بعدها عدن الايام وهمه يحظرون للخطبه اني باقيه حابسه نفسي بالغرفه ابد ما اطلع...

كلشي ماسويت ولا شتريت همه تكفلوا بكلشي امي وعماتي وبنات عمي حظرن كولشي...

ليوم الخطبه الصبح طلعت للصالون واني عبالك رايحه

لعزه..

دموعي تصب وضعفانه وذبلانه وحالتي حاله ابد موشكل عروسه...

دخلنه للصالون اني وجنة بيت عمي ام الصالون كالتلي شتحبين اسويلج...

باوعتلها ورفعت اكتافي بمعنا بكيفج...

هي ستغربت...

كلتلي...

شكلج مغصوبه عليه!!

وفعت نظري عليها ونزلت دمعتي وهي تنهدت بقهر وكالت ...

الله يساعج.. انشالله يطلع خوش ولد ..

وبدت تشتغل بيه واني مغمضه سوتلي شعري بالبدايه

وبعدها دزتني للطابق الفوك حتى يسولي مكياج صعدت وهم كعدت ونفس السؤال انعاد وهم رجعت جاوبتها بنفس الطريقة...

كلتلي غمضي عيونج وسلميلي نفسج وراح اطلعج اميره...

غمضت وهي بدت تشتغل ساعه وبعدها كلتلي يلا فتحي ونطيني رأيج

فتحت عيوني وعدلت كعدتي وباوعت لشكلي جان طالع حلو ... كل التعب والذبول جان مختفي ..

بعدها نزلت جوه اجن ثنين بنات وحده دهنت جسمي وبوطرته والثانيه لبستني الفستان والإكسسوارات

وحتى العطر هنه رشنه الي

جنة بيت عمي كولشي مسوت...

بعدها اجه حسين أخذنا للبيت دخلت لكيتهم مسوين

كوشه متفقين ويه بيج بالانستغرام جاي مسويها

كعدت واجت امي باستني براسي وبخرتني

وره شويه اجوا المشايه قروا الفاتحه وبعدين صاحولي

حتى نعقد ...

كل هاي المراسيم مرت علي من قبل وهسه رجعت انعادت... وبنفس الطريقه بس الفرق بين هذيج المره وهاي المره هو البرود... العام من جنت كاعده على الكرسي ودايعقدولنه جان متملكني الخوف والرجفه

هسه ابد محسيت بأي شي ...

برود رهيب اتملكني..

من اخذني وكعدني بباب الاستقبال وحطن جوه رجلي

انجانه بيها مي ورد وغلفني من فوك بوشاح ابيض

هاي التفاصيل مسويتها قبل هاي اول مره اسويها

بنفس الوقت مهتميتلها..

ومن انطيت موافقتي واعلنوا زواجي من هذا الشخص الي شكله مشايفته وحتى اسمه قبل شوي عرفته من اخته... الي اول مشافتني ضحكت واجت بوستني

وجانت فرحانه بس مانطيتها اهميه...

جنت عباره عن عيون تباوع وبؤبؤء يتحرك بس ...

بعدها راحوا واني رجعت لغرفتي ولعزلتي...

ثاني يوم الصبح اجت عمته ومرة عمه حتى نروح نشتري الذهب والجهاز...

طلعت وياهم وحرف ماحجيت كله جان على ذوقهم

كلشي ليكلولي عليه اكول ايي ...

مانطيت رأيي بأي شي ...

رجعنا للبيت وكالن العصر يجي خطيبج يريد يشوفج ويحجي وياج...

اني اصلاً جنت رايده احجي وياه لهيج ماعترضت

للعصر اجه اني لبست عباتي الخليجيه ولفيت شالي

ورحت...

دخلت جان كاعد يمه حسين بس كلت السلام عليكم

وكعدت ومباوعتله حتى ...

هو رد علي وحسين كام طلع اني بقت عيني عليه من طلع .. ومستغربه ليش طلع وعافنه لوحدنا ...

اني طلبت منه يعوفنه لوحدنا لان رايدج بموضوع

باوعتله بنظرة عدم اهتمام من سمعت كلامه ..

وهو عدل نفسه ونتصب بكعدته جان مباشرتاً مقابيلي

وكال

... شلونج ..

زينه ..

مبروك مباركتلج البارحه لان جانت هوسه وماكدرت ادخل ...

كتفيت بالسكوت مجاوبته اي شي ..

وهو رجع كمل كلامه وعيونه تتفحص ملامحي اعتقد جان يدرس ردة فعلي.. اني جنت استقبل كلامه واني

كاعده بشموخ ورافعه راسي ومقرره احط شروطي بنفسي ومن هسه وما اهتم بأكبر واحد ...

ياسر ...

اول شي اعرفج بنفسي اعرف شغله اضحك مرتي ماتعرفني ولا شايفتني بس راح نتعرف هسه

اني ياسر صادق خطيبج خريج سادس اعدادي عمري

ادكدرين ادكولين 24 سنه لان هذا الشهر يقبط ال 24

صاحب سوبر ماركت الياسر الموجده بالفرع المقابيلكم

الحمدلله امورنه الماديه زينه ...

عايش اني واختي و والدي الله ينطيه الصحه والعافيه

الوالده متوفيه بحادث سياره ضربتها وتوفت بلحظتها

ماعندي لا زايده ولا ناقصه ناذر حياتي لاهلي ...

ما اتواجد هوايه بالبيت لان ماعندي أحد يلزم مكاني

لهيج ابقى من الصبح لليل بالمحل بس وقت الوجبه أعزل ومرات اكل بالمحل ...

هايي اني هسه اريد اعرفج...

نبض ...

من بده يعرف بنفسه اني ماجنت مهتمه بس من كال

صاحب اسواق الياسر بسرعه عرفته...

نفسه الولد الي جنت اشوفه يوكف بباب المحل من اروح الصبح ومن ارجع الضهر وجان يسلم على حسين

ومبين صداقتهم قويه...

سويت نفسي ما مهتمه وما أعرفه...

ومن كمل وكلي هسه دورج..

راسن استقمت بكعدتي وجهت نظري عليه بحده

وبديت احجي و اعرفه بنبض الحقيقيه!!!!!

اني نبض موسى خريجه سادس داومت سنه أولى جامعه قسم تاريخ وكعدت لان خطيبي السابق طلب هذا الشي واهلي امتثلوا لطلبه...

عمري 19 سنه

عمري ماحبيت ولا ارتبطت ولا آمنت بشي اسمه حُب

انسانه جامده معقده غير مهتمه ..

لهذا السبب فصخت خطبتي من صديق اخوي وزميلي بالدوام...

اكيد تعرف الكلام الي طلع والقصص الي أللفوها عني

من وره هذا الكلام وكل الي مريت بيه كرهت جنس آدم

ورفضت ازوج بعد

وكل الي تقدمولي جنت انوي اطفشهم بس أهل المنطقه

آلله يعافيهم همه تولوا هاي المهمه عني وطفشوهم

ياسر ...

زين شمعنه اني وافقتي علي

نبض ....

منو كلك اني وافقت عليك ..

شقصدج؟؟؟!!!!!

قصدي اني موافقت برضاتي اني نجبرت بعد ماانكتلت

وتعذبت ...

شنووو ؟؟؟؟!!!!

انجبرتي!!!!! يعني هسه انتي مرايدتني بقناعتج.؟

اذا هيج اني ماقبل واعتذر راح اروح احجي ويه اهلج

كام طلع واني بقيت بمكاني ابجي على حالي ..

وسأل نفسي ليش حجيت وياه هيج

هسه يروح لمهيمن ويرجع علي يشبعني كتل ...

لليل اجه حسين دك باب غرفتي

تفضل

كاعده

بلي

نبض حبيبتي ليش سويتي هيج ؟

شسويت؟؟

الحجي الي كلتيه لياسر مالمفروض تحجيه

واني شحجيت غير الحقيقه

ميخالف بس موكلشي ينحجي اكوا اشياء

المفروض منحجيها ونحتفض بيها لنفسنا حتى لو جانت حقيقه... يعني هسه انتي شستفاديتي من كلتيله ؟؟؟

بقيت ساكته ماعرف شجاوبه

..صدك اني شنو استفاديت ؟؟ بس ردت اثأر لنفسي

وثاري اجه بالشخص الغلط المفروض اثأر من اهلي

مو منه لان هو ماله دخل ولا يعرف اي شي ..

على كلاً هذا الحجي بعد ميفيد لان انتي حجيتي وكملتي بس اريدج بعد تنتبهين للكلام الي يطلع منج

حتى لا تنظرين.. تدرين هو جان مصر يفصخ بس اني

حاجيته وقنعته يصبر عليج لان انتي تمرين بضروف صعبه ونفسيتج تعبانه...

ليش سويت هيج انته هم رخصتني؟؟!!!!!

حسين اجه علي وحظني من بعد مجان واكف واني كاعده على السرير..

لج نبض ارخصج شنو ؟؟ صدك تحجين!!!!

ولج انتي غاليه واغلى من روحي بس سويت هيج

علمودج... اريدج ترتاحين

وتخلصين من مهيمن وعذابه..

وصدكيني لو ما ادري راحتج وسعادتج ويه ياسر

جان فلا قبلت عليه ولا انطيتج اله ..

بس ياسر ذهب ولو تفترين العراق كله مراح تلكين مثله

صح هسه الكلام الكلتيه سوه فجوه بعلاقتكم بس ادري بيج راح اصلحين كلشي وتحبينه لياسر وتخلينه يحبج

ولو هاي اني ضامنها لان ماكوا احد يعرفج مراح يحبج

بس اريدج اصيرين سباعيه وتحتوين رجلج وتتصرفين بعقل ... لان مهما كان الرجال طيب قلب وما بيه اذيه

بس تبقى عنده رجولته وكرامته أهم شي والي يوصللهن ...

يأذيه ويحقد عليه...

وانتي بكلامج اليوم ورفضج اله هنتي رجولته وكرامته

ولوما خايف على سمعتج جان عافج

بس هو كلي ...

اختك اليوم برفضها اذتني واني جنت حالف اعوفها

بس انته وأهلك وكفتوا بوجهي..

لان اذا عفتها هسه سمعتها راح تنسحك وخصوصاً

هي فاصخه من قبل ...

لهيج راح اعوفها بس اكلك اياها كدامك مراح اعديها

الها...

هااا هاي شنو شو كدامي وتهددني تأذي اختي

لا ياسر موهاي المرجيه منك ...

عود اني سولفتلك كلشي .. وعبالي بس تعرف راح تعذرها ... مو تكعد تتخلفلها لا وكدامي بعد

حسين خليك مكاني وخطيبتك ثاني يوم خطبتكم ودكلك والله اني مااريدك وانجبرت عليك جبر

كلي شتتصرف وشسوي... ؟؟؟

حقك والله حقك واني راح احجي وياها وإذا تريد

عاقبها بس مو تأذيها بالكلام لو بالضرب اكوا هواي طرق

عقاب بدون اذيه...

وهاا لا عبالك اني اقبل على اختي بس لان انته صاحبي وهي اعرفها غلطانه اكتلك سوي هيج ... بس موياخذك

الواهس ويوميه كاتلها ترا وراها زلم خشنه مايطلعون عليك صبح اذا اذيتها بحرف...

هههههههه ماعرفتلك والله من بابه ادكول عاقبها ومن بابه لا تأذيها لان وراها زلم خشنه

يابه على راسي هي وزلمها بس هم اذا غلطت تاخذ جزاها ...

نبض ...

من سولفلي حسين كلامهم... ارتاحيت

راح الخوف مني اهم شي مهيمن ميعرف شخبصت

اني ...

نمت واني افكر بحياتي وبالمستقبل

شنو راح يصير وياي ...

مابقه شي تقريباً خمسة أيام واطلع من هذا البيت

واروح لحياة جديده وناس جدد

حياة غريبه علي

ويه ناس غريبن علي .. كولشي ماعرف عنهم ولا شايفتهم...

ثاني يوم اجه ورحنه حللنه وكالوا يومين وروحوا للمحكمه عقدوا

من رجعنا انطه فلوس لأمي وكلها

خاله هاي فلوس صالونها والبدلات وإذا ماكفن

كليلي واني ادز بعد خلي اسوي كلشي بنفسها ...

هو وامي بقوا يتناقشون واني مخليني خارج قوس

لا كأني اني العروسه وصاحبة الانه..

اني هم سكتت ولا علقت ولا خليت بالي يمهم ..

وره يومين رحنه عقدنه ومن رجعنا العصر رحت

للصالون حفتلي وجهي وحواجبي ماقبلت تشيلي منهن

هواي سوتهن بناتيات كلها حجت علي

علبو عروسه و مايصير بس اني ماهتميت

ونضفلي جسمي لان باجر الحنه وتفقنه وياها

نجيها من الصبح باجر حتى نكمل من وقت ..

طبعاً هذا كله جان ويه جنة بيت عمي هي الي تكفلت بكلشي لان سوسن بعدها نايمه ومايصير تتحرك..

خطيه كل ما اكعد يمها ادكوم تبجي..

ادكلي ..

تمنيت اني اجهزح بيدي واسويلج كلشي بنفسي وما اخلي اي وحده غيري تتكفل بعرسج..

اني جنت اخفف عنها بالشقه والضحك حتى لا تنقر

لان موزين عليها وهي أصلاً مابيدها شي ...

المهم من رجعنا لكينا مرة عمي حاجزه بدلة الحنه والعرس بالانترنيت ومطيتهم العنوان وباجر يوصلن للباب ومتفقه وياهم على السعر...

شوفتنياهن حلوات ذوقها حلو ...

ثاني يوم كعدت الفجر لصلاة الفجر صليت وبقيت اقره قرءان وبعد ما نمت لحد ما كعدن الحبايب

بنات عمو وبنات عماتي والجناين والبيت صاير خبصه

غرفتي صايره ملجئ للمشردين منو الماعنده مكان

جاب مخدته ونام يمي بحيث ما ينشاف بس الروس

والرجلين..

طلعت بره شفت ابوي واكف يتوضأ رحت صبحت عليه

وبسته براسه ...

سوده علي صحته رايحه ومابيه حيل يوكف السكر والضغط موتنه كله بسببي ينقهر ويضم بقلبه من وراي

رحت سويت ريوك وكعدت امي هم صبحت عليها

وكعدنا نسولف عن النواقص وشنو بعد محتاجين

اجه ابوي كعد ويانه وبدينه نتريك بعدها كعدن الحبايب واجن تريكن اني كمت البس حتى يوصلنا

حسين للصالون

طلعت من المطبخ شفت مهيمن واكف يغسل باوعتله وهو هم باوعلي بنظرات غريبه عاكستها المرايه

الجانت كدامه ...

عفته ورحت بدلت وكعدت انتظر حسين يكمل ريوك

خطيه هو بسرعه اكل و كام ودانه...

مهيمن...

السلام عليكم...

اعرفكم الكل كارهني وحاقد علي وعبالكم اني ضالم

بس قبلها خلوني اعرفكم بنفسي ولو متأخر

بس يكلك (تأتي متأخرٍ افضل من أن لا تأتي ابداً)

اني مهيمن موسى ...

الاخ الأكبر والابن الأكبر لهذا البيت مواليد 85

متزوج من بنت خالتي سوسن وعندي منها منير وسراج

ومنتظرين المولود الجديد انشالله تطلع بنوته..

كلش احب البنات وجانت امنيتي خلفتي اصير بس بنات لان هنه أحن من الولد على أهلهم..

بس بعد رب للعالمين اله حكمته وماحققلي امنيتي..

اعرف هسه ادكولون اذا انته هيج تحب البنات لعد ليش

هيج تعامل اختك الوحيده !!!

اني اكلكم ...

اني صاحب معارض اثاث وغرف نوم

وبحكم شغلي باليوم الواحد تمر علي هواي نماذج

بنات شابات نسوان كبار وعوائل ...

شباب عرسان...

وبحكم شغلي بالسوق اعرف سوالف البنات كلهن

ومكرهن وحيلهن وزحفهن...

لهيج اني جنت صارم بتربيتي لنبض ...

نبض موبس اختي هاي بنتي من هي صغيره

جانت ماتنام اله على ايدي ومن اجي من الشغل هي تتلكاني بضحكتها وكصايبها جنت اشيلها وافرها والعبها

واخذها اشتريلها...

سنه عن سنه جانت تكبر كدام عيني ويزيد خوفي عليها

وحرصي وتشددي بس مو بشك او قلة ثقه

لا والله شاهد علي جان نابع من خوف

اخاف لا هاي الورده الي جنت اسكيها بحناني وجانت تكبر كدامي خايف عليها لا تذبل بيوم لو يجي أحد ويكطعها واخسرها...

حتى دوامها جنت رافض اداوم جامعه لان هذا مجتمع مختلط...

وهي بريئه وفطيره بكلشي اصدك وبسرعه اثق بالناس

والي مايخافون الله هواي ....

وخفت لا يضحك عليها واحد بحجة الحب والغراميات

وتاليها يعوفها وهنا راح اخسرها ...

ومن اتقدم الها صديق حسين ...

اني فرحت لان جانت خوش قسمه ... لان سألت عليهم كلها حمدت بيهم ... وهم الولد شاب صغير بعمرها...

هي جانت رافضه وحجتها لان صديق حسين

وهي تدري بحسين عنده مكسرات...

وكلنا ندري ..

بس اني رحت وسألت عنه بكل مكان وعند أكثر من واحد وحتى كلفت جماعه سألت عنه عند أقاربهم

وكلها جان جوابهم واحد ...

كلش خوش ولد فوت بزودك ولا تتردد...

اني من سمعت كلامهم اقتنعت وايقنت ان هو يختلف عن حسين لهيج اني جنت مصر أتم هاي الخطبه

لان هي ماتعرف مصلحتها زين مثلي ...

ماتعرف الناس

عليها بس بالضاهر ...

قنعت الكل وخليت امي تقنعها وسوسن حجت وياها

والحمدلله تمت الخطبه...

ويه الخطبه صار يخابرها ويسهر وياها بالتليفون واني هذا الحجي مايصرفلي اريد يسولف وياها يعجل بالزواج ...

وكام يجيها ويوميه طاب طالع علينا ولازم لو اني لو الولد موجودين لان ما قبل يبقون لوحدهم ..

كلشي يسويلها بحجة مرتي وبعدين يفلت و وين انلزمه

واني هم ماتفوتني سوالف المخطوبين..

لان اني هم بيوم من الايام سويتها بس الفرق بينا

سوسن جانت حبيبتي الي جنت احبها من الصغر وبنت خالتي بنفس الوقت...

بس هذا غريب حتى لو الدنيا كلها كالت عنه زين اني

ماكدر اثق بيه واعوفله الساحه فارغه...

وره بفتره اجت امي كلتلي ..

يمه خطيب اختك يريد يطلع وياها يكلها كل المخطوبين يطلعون ويتونسون إلا احنا ...

اني من سمعت كلام امي كمزن عندي

ورفضت رفض قاطع...

وكتلها يريد خلي يعقد عليها محكمه و وين ومايطلعون خلي يطلعون لان بحكم يصير زوجها شرع وقانون

عقدوا محكمه وطلعوا تغدوا وراحوا للكاظم عليه السلام...

وعدا عليهم اربع اشهر همه مخطوبين الناس بدت تحجي ... وعمامي والولد

الكل كلما يشوفوني يحجون لان احنه ماعدنه هذا الشي ... كل بناتنه الي يزوجن شهر وياخذونهن

حتى اني من خطبت رجل خالتي بيوم المهر شرط شهر ويتم العرس لان الخطبه اذا اطول يصير بيها مشاكل

لهيج جنت استعجلها لمصلحتها ماريد حجايه تجيها بس هي جانت تاخذها بغير نظره ..

عبالها مستثقلها لو رايد بس اخلص منها

ماتدري هي اني يوميه افكر شلون بيه من تزوج

شلون راح اكدر اكعد الصبح وماشوفها كدامي ولا اسمع صوتها الي تهرج بيه البيت وشفاها وعركها ويه منير وحسين ...

جنت أكثر شي افكر بيه هو الشي ..

بس بعد الله سبحانه كاتبلنه غير شي

والحمدلله من عرفناهم على حقيقتهم من اجت امه وصارت اتلعلع بصوتها وتحجي عليها ...

ماتحملت عطت بوجها ورزلتها وطردتها وتمنيتها زلمه

حتى افرك حلكها فرك...

وجنت ناوي افصخها وطبهم مرض

بس من اجه الرجال ابوهم واعتذر هو وابنه

كلت انطيهم فرصه لان ماريد اختي تتطلك وهي بعدها ببيت اهلها من وره مره ...

اصالحوا ورجعت الامور لطبيعتها بس الي ما رجع هي نبض حالها تغير وصارت تذبل كدام عيني ومن أسأل

سوسن ادكلي

مشاكل هي وخطيبها..

اني عرفت هاي السالفه ليش كتلهم استعجلوا بالعرس لان اعرف اذا اطول راح تخلص بس عرك ومشاكل...

جان عبالي مشاكل عاديه بس عمري ماتخيلت

الموضوع واصل لمرحله ماينسكت عنه وهي جانت ساكته....

يابه من كعدت وسولفت عن سوالفه وطيحان حظه غير احس الدم كام يغلي بعروكي

عصبت عليها وضربتها ورحت دميته ادمي اني وحسين

وطلكناها منه وخلصنا منه ...

بس قهرتني من سكتت شنو جانت شايفتنه

موبعينها موزلم هيج ما وماتتحامه بينا وتجي

تكللنه عنه....

زعلت منها وشلت بقلبي عليها وصرت اعصاب وردتلي

بس وأحد افرغ غضبي بيه ...

وزادها الكلام الصار يطلع من الجوارين اني ماجنت ادري لأن اخلصها بالشغل بس من بدو يجونها الخطابه

ومن خابرني صديقي وتعذر ومن كتله

خير اكوا شي كلي

والله هيج وهيج سمعنا حجي والولد بطل بعد مايريد

من سمعت كلامه احس مثل الي نظربت على راسي وانعكد الساني بقيت ساكت...

شحجي وشكول وكل هذا الحجي طالع على اختي الي خلصت عمري احافض عليها حتى لا اشوف هذا اليوم

تاليها اجه واني السبب...

ايي اعترف اني السبب

بس جان عبالي لمصلحتها

لان شكد سألت عنه وشكد اطقصت

كلها مدحت بيه وبتربيتهم...

وماجنت مصور بيوم يطلع هيج نذل وخسيس

....

الكلام صار يزيد ماينقص وكل الي

ديتقدمون ينكالهم نفس الحجي ...

لحد ما تقدملها ياسر ..

صحيح الولد حالته الماديه اقل من عدنه

بس اخلاقه اني هاي المره الي اشهد عليها

لان همه عمر صارلهم هناا بالمنطقه

واعرفهم من جنت اني صغير ...

اعرف امهم الله يرحمها وابوهم رجال والنعم منه

لهيج جبرتها توافق عليه ..

بس ماجنت ناوي امد ايدي عليها ولا جنت رايد يصير كل هذا وتشيل بقلبها علي وتشوفني وتعبر بدونه مسلم

علي ...

بس وقتها من دخلت للبيت وسمعتها معليه صوتها على امي واني جنت راجع تعبان و راسي جان يوجعني

من التفكير بيها وبهذا الحجي اريد بس اسكت حلوك الناس .. عطت بيها وهي ماسكتت

لاسنتي وعلت صوتها علي

بعد صار الي صار ....

نبض ...

جنه بالصالون مكمله مكياجي وشعري

وبعد بس البس البدله دك تليفون

زينب جنة عمي

فتحت الخط شو هاي شويه وعااطت

شنووووووو إلى رحمة آلله وهسه شلون

اني من سمعتها خرطت العافيه

احس أعصابي كلها صارت ترجف اريد اوكف ما أكدر

زينب احجي منو مات ؟؟؟؟؟

ولج احجي شبيج صافنه بوجهي !!!!!!

يتبع

•لربما ينتظرك شيئا 💛🌿

•أحب إلى قلبك مما فقدت 🌺

Nabà Baqer

Dan ❤😘