تحميل رواية «ماء مغلي» PDF

..♣️🩸   ماء مغلي  🩸♣️..

* adzzon *

ريري نزلت بالكاع حضنت امي وتصيحلهم

-كافي راح نموت كااافي

بس الحجي ماهتم لهالشي ولا ابويه

وعلى هدوئهم كاعدين ويشتغلون بفك السحر الي بين ايدهم ..

ريري تعيط عليهم حتى يوكفون شغلهم

لان الصوت مينحمل .. وماضل شي بمطبخنا عامر ..

وهمه مستمرين مايهتمون .. جرو الابر وكصو قماش الجيس وغسلوه بالخل والمي

وملح وصارو يطلعون منه البلاوي المشدشده

واول مافتحو واحد منهن كبل صارت ضربات على باب غرفتنا

وريري وسيف اثنينهم هنا تخبلو ..

سيف ضل يضرب بالباب ويصيح ..

- فكووونا من شرررركم لا اله الااااا الله

لااا اله الااااا الله

دخيييييلك عليييي عليييي

ريري ضلت بس تصيح كل ما سيف يرجع يضرب وامي تهدي بيهه بس هي فصلت بعد

صحت على سيف وخليته يجر ريري من حضن امي ويجيبيهه الي ..

كبل كلتلي..

-لك انته شلون ساكت وكاعد هيج

شبيك مدتسمع شديصير !!

خليتهه تتدنى يمي كلش وضلت مخليه راسهه على جتفي وانه امسح وجهه واكللهه

- انه ماخاف ادري كلشي راح يخلص

ادري قوتهم بس تخويف

مايكدرون يطبون هنا وياذونا

انه خايف بس عليج لا يطح عقلج بعد منين اجيب مثل عقل رور !!!؟

- ضل عقل قنادر نعلى على شرفه اليكعد وياكم

-هههه لاتجفصين بويه خلي هيبتج حاضره

- اوووووف لك حيداااار راسي انسطر من الصياااح والهوسه

راسي صار طبل شوكت يخلص عاد اريد ارتاح

- هسه ماضل شي ماضل شي

انتي خلي كلبج قوي وطنشي

شتسمعين وتشوفين طنشي كأن كلشي ماكو

فكري بشي حلو اي شي خلي بالج بعيد منا

- زين انته ماطلعتني منا وضلو اشتغلو بكيفكم

شكو بقيتني

- اخاف عليج غير

انتي اذا مو يمي وتنحفظين بالتحصين وياي

كلشي يجوز يصيرلج

هسه حتى اخوتي مو طلعو بس ابويه ذاكرهم بالتحصين اول مابدا

ذكرتيني خلي اخابرهم اشوف احوالهم

ضلت كامشه ايدي وانه خابرت على عزيز

ميجاوب.. اكثر من مره دكيت ونفس الشي

خابرت عادل هم ميجاوب .. عفتهم بس ضل بالي يمهم ..

ضليت اباوع لابويه والحجي شلون جاي يفتحون ويكصكصون بالعكد الي مخيطه بيهه اطراف الجيس ..

وهمه شاكيه من النص بس الاطراف ضلو هم يفتحوهه لان كل عكده الهه دور بالشغل ..

امي فاتحه القران وتجود بسوره البقره

وسيف كاعد يم الباب ومخلي ايده على راسه

وجسمه يرجف ..

من احاجيه بس يباوعلي شويه ويرجع يندار يباوع لابويه ويضل ساكت ....

اتلمس بايد ريري وهي رجعت صحصحت

وعدلت كعدتها وضلت تعدل بنفسها وبعدين

راحت كعدت يم الحجي ..

يريد يوخرها وهي متقبل بعد ضلت تتفحص وياهم .. وتشوف كل شغله مدحسه بالجيس ..

طلعو منه اربع شدات طوال مال قماش

كل وحده تطلع بعرض اصبعين ملفوفه ومثبته على عود اسود واللفه الي مثبته بسيم مو بخيوط ..

ضلو يغسلوهم ويفتحون وحده وحده. .

اول وحده طلع بيها صوره عزيز ..

مرسوم على ركبته مثل طوق بخط اسود

و القماشه جانت فانيلته البيضه ومكتوب عليها طلاسم بالزوايا ومشدشده وبالوسط محطوطه صورته مخيطه خياط بالفانيله

والكتابه على اطراف الصوره كل جهه كتابه شكل ...

ابويه صاح سيف وكاله ...

- تعال شوف بويه مو صغير انته خلي عينك مفتحه على نفوس اهلك

شوف عمك بيا ضيم ومحد يدري عنه

سيف يباوع وعاصر ايده وهو جسمه يرجف

وضل كاعد يم رجل ابويه .. سألت ابويه ..

- بويه شمكتوب عندك  !

- طاعه و خرس اللسان 

الله لا يهنيهن بعيشه

ضل ابويه والحجي يفتحون خياط الصوره

وشالوهه نكعوهه وضلو يكصكصون الخيوط الباقيه والفانيله وكلهه نكعوهه بالخل والملح

والحجي متكفل يقرا الايات عليهن ويغسلهن

ويختمهن ..

فتحو الثاني وهذا طلع مال امي ..

بيه كص من شيلتهه ورسم بنيه بورق وهم مخيطه بالقماش ومثبت على خواصر الرسم

دنابيس ..

ابويه صاح لامي وهي صدقت واندارت يمهم

ضلت تباوع وتوحد الله ..

كالت ..

- عسى ضيم عافيتي مايتعداهن ولا تقبلهن كاع يوم الممات بحق اسم الله الفرد الصمد

- علويه شمكتوب عندج

- ولك يمه خاطاتلي على حزن العمر

الفقر و مرض بلا شفاء ولا موت

- لا اله الا الله ربي يعيده عليهن اضعاف

وهو ابو الحق مايرضى بهالظلم الحمدلله

سهللنه وصوله بهاليوم

ضلت امي بس تباوع وتقرا المكتوب وتتحسب عليهن ... 

تكفله الحجي يبطله وابويه اخذ الثالث

وهالمره طلع لابويه ...

جان مثبت على فانيلته سبع كلبسات حمر

بالنص مخلين وحده وجواهه على اليمنه

تلاثه واليسره تلاثه ومن الجهه الثانيه معوجات حتى مايوكعن ..

يم كل كلبس مكتوب .. شلل ..

ريري جانت تقرا بصوت عالي كلشي تشوفه مكتوب بيهه ومخبوصه  .. كالتله ..

- يابه يلااا لتضوج هاي راح تخلص بعد

والحجي يطكلك بطلين مي مرتبات من حسه الحلو وترجع توب

وبس ترجع عافيتك وتمشي الا اوكف اهلهلك

مو تكول عيب ومدري شنو تره مال فرحه هاي

ضلينه نضحك بس سيف مدلغم وراسه يرجف

ويعصر بايده وساكت ..

جان مكتوب بزوايا القماشه لابويه

( حزن العمر .. فقر .. شلل .. ذل العيشه )

ريري ضلت تهونهه على ابويه وتتشاقى وياه

وهو انطاه للحجي يتكفل بي ورجع اخذ الرابع ..

الرابع طلع لاختي ( الحوراء)

امي كبل شهكت من قرت اسمهه .. وضلت تدعي عليهن ...

هي اختي مالها دخل باحد تجينا خطار كل جم شهر وتروح .. ليش ياذوهه !!!

خاطيلهه على فقر وتعب الذريه و كره الزوج

اخذهن الحجي تكفل بيهن ..

وضل ابويه عاد يفتح الجيس ويغسله من جوه

ولكه بيه ورقه ملفوفه بلاصق اسود ..

ضل يفتح بيهه وهي مطبكه صغيره بين مافتحهه وجاي يقرا بيهه كبل انضربت

المرايه وتكسرت ..

سيف جفل وكام من مكانه والجام مطشر يم رجله .. وامي ساده اذانهه وريري مجلبه برجل الحجي ..

وابويه كامش الورقه وصافن .. صحتله ..

- بويه عوف كلشي بس اقرالي هاي منو اسم منو هاي مكتوب

باوعلهه وصاح ..

- اعووووذ بااالله

- هااا بويه فهمني .. المن هاي !!

- بويه هاي لام فاطمه

— هاااه ! شمكتوب !

- الثبات على الطاغوت

- بس هيج !

- اي بس هاي مكرره على كل الورقه

ضلينه واحد يتصفن بوجه الثاني ..

وسيف جر الورقه من ايد ابويه وشككها

وذبها بالماي .. وشال الجيس هم كصصه

وشمره بالماي وكاللهم ..

- كاااافي جدي رحمه لاهلك كافي خلي نخلص مانضل للصبح احنه هيج

اشمروهن وخلصونه وبيعو البيت وخلي نطلع نرتاح وخلي كلمن يعزل بيت مانضل بعد نعيش سويه كلمن يعزل ويحير بروحه

امي جرته وكعدته يمهه وتكله ..

- لاا يمه شلون نتفرك واحنه مانكدر على فراك وليداتنا وعويلهم خلينه نصبر والفرج عند الله

- ماكو فرج علويه هيج احسن حل كلمن يضل بعيد من الثاني و ولدج دزي عليهم وشوفيهم

- هااا وانته هم افاركك ! تكدر تفارك حبوبتك

- لااا انه اعيش وياكم

خلي اهلي بيت يكعدون واهل عمي عزيز بيت وانه وياكم وعمي حيدر بيت

ضليت صافن على حجيه معقول سيف

يطلع ويانه زين وماراضي على اهله !

زين والي شفته عليه !!!

ابويه دزه يجيب سله زباله والمكناسه ويلم الكزاز ... وريري راحت وياه واجوي ضلو ينظفون ..

وضلت ريري تمسح ومن راحت غسلت واجتي كالت ..

- اكوللكم شو المطبخ كلشي مابيه

مرتب على حطه ايدي !

ضحكت بوجهه وكلتلهه..

- مو كلتلج بس تخويف وكلشي يروح

- لعد الصوت الي نسمعه شنو !!

شلون صوت تكسير وكلشي ماكو مكسر!

- خباثتهم وخوفهم بس همه قوم ضعفاء

يخافون يطلعون منا ويسوون كل الهوسه هاي حتى احنه نخاف ونعوفهم

بس الحمدلله صبرنا وتعدينا الاكبر ماضل الا القليل ان شاءالله..

- امممم اووكيي

زين هسه يعني خلص صرتو زينين لو شنو!

- العافيه بالتداريج بعد شويه صبر

ضلينه كاعدين كلنه وسيف اخذ ابويه حتى يغسل ويتوضى من جديد والحجي بعده يقرا الختم على الي منكعات كدامه ..

قربت صلاه الفجر وامي صارت تكول لريري كومي توضي ونصلي سوه

وريري تباوعلي وساكته ..

الحجي هم وصاها تصلي وتهدي بالهه وتقرا التسبيحات وهو بس طلع اجتي يمي ..

تشاورني ..

- كول لامك خلي تعوفني شطلعتلي بهالسالفه النوب !!

- ريري صلي هسه شكو بيهه

انتي محتاجه للصلاه هسه

- لك بابه ياصلاه ! اني شكول صلاه !

اضحك على نفس لو اضحك على الرب

ما اصلي مو دروبي هاي

- ميخالف رور الهدايه حلوه وانتي هيج شويه شويه تبدين بالطريق الصحيح والله حياتج تتغير للاحسن بس تتقربين من رب العالمين وهو غفور رحيم

- ماااريد معليك بيه

اني ماريد انهدي عوفني هيج اتلطش وحدي بالحرام معليك انته لتدخل

اجي هسه اوكف اصلي ! هههه ولك بيا وجه اوكف واصير مثلكم يالساده

اني بهيج سوالف ماجذب

بالديانه اني ماتدخل لان ماترهم وياي شكو افشل نفسي !

طلعلك فد جذبه وسكت امك يلا اني راح اطلع بره اشم هوا اختنكت منكم

راحت وامي ضلت تسألني شبيهه وكلتلهه

مخنوكه تريد تكعد بره ع الهوا ..

طلع الضوا يلا هي رجعت وتمددت بفراشهه

وامي مانامت ضلت تطلع شويه وترجع وهي تسبح ..

انه ضلت بالي سالفه ام فاطمه ورد فعل سيف

اشكال حسبتلهن بس مافهمت المضبوط شنو!

هستوني غفيت واسمع صوت ريري تكعدني

باوعتلهه ...

- شكو

- لك اكعد اخوتك رجعو وعزيز منتهي فدنوب حالته

- لا يالله

شبي وينهم هسه !

- ابوك والحجي وسيف وعادل كلهم بره بالحديقه يم عزيز وهو عبالك متزوهر مدري شبي

يلطخ بنفسه بالكاع وبس يتقيء وشكله يخوف

عادل يكول من قبل الفجر هو هيج وشكد حاول يسيطر عليه وماكدرله عاد جابه هنا

- دخيلك ياربي رحمتك

اخذت العكازات وهي ساعدتني وطلعت الهم بره .. شفته كاعد بطرف الحديقه ويمه سله زباله كامشهه سيف اله وهو بس يتقيء ويلوب يفر بروحه منا ومنا ويدنك للكاع يضل يضرب راسه بيهه ويجره عادل يكعده

والكل مخبوصين وياه ..

امي تغسل بوجهه وهو ضال بس بالفانيله

وهي تغسل صدره وركبته وتحاجيه وتبوس بي وهو مره يخنك بروحه ومره يعصر بطنه

ويرجع يذب روحه ع الكاع ويون ..

ابويه كامش بطل الماي ويقرا عليه والحجي

يدك بالعوجيه بالطين مال الحديقه يمشي

ويدكهه بي ويدنك يكمش شويه منه ويعوفه

ويكمل مشيته ..

ابويه انطه البطل لامي شربته لعزيز وهو يشرب منا ويذبه منا .. وضل على هالحال

ابويه ينطيه بطل وره الثاني وهو بس يشرب ويذب الى ان خوت روحه واخذوه عادل وسيف جر للهول ..

نوموه بفراشي وانه اجيت مسحت وجهه واحاجيه وهو بس يون ..

غطيناه وضلينه كاعدين يمه ..

وطب الحجي شايل بايده لبخه طين

كبل حطهه بايد عادل ..

عادل بس مسحهه شويه وشافهه كبل ذبهه من ايده ..

جانت قوطيه مربعه صغيره وكلهه طين هي مقفوله بس ماعرفنا ليش عادل ذبهه ؟

صحت لسيف جابهه الي .. ردت افتحهه بس بيهه قفل دزيته يجيبلي شي اكسره بي وعادل كبل اجه وجرهه من ايدي وانه ضليت مجلب بيهه وهو يجر وانه ماخليه ضلينه نتصايح

انه وياه وهويدك رجله بالكاع ويصيح عليه

عوفهه لا تفتحهه ..

طب سيف وشافنه هيج كبل شمر بحضني الجاكوج وجتف ابوه وجره ويكلي ..

- عمي افتحهه بساع افتحهه معليك بابويه

هستوني ضربت القفل وعادل اندار وضرب سيف على وجهه سطره .. ورجع عليه وكمشه الحجي ورجع وياه سيف واخذوه

جوه وريري قفلت باب الهول .. وهو من بره يصيح ويسب بيه ..

كسرته القفل وفتحتهه للعلبه ..

واشوف جيس شفاف مشدود من فوك بجلد حيه صفره ..

جنت اكمشهه وتكش نفسي بس شلون ماجان فتحتهه وريري واكفه يمي ومخليه سله زباله

كبل شمرته بيهه ..

من نفتح الجيس كبت الريحه .. لعبان نفس وجيفه ماتنحمل ..

كبل سديته ماكدرت اتحملهه ريحه تكتل

ريري جابتلي علاليك لبستهن بايدي وهي شدتهن وعلى وجهي هم خليت وصله وشديتهه من وره .. يلا رجعت فتحت الجيس

جان ليفوك وغف اسود على حاله مادري شنو اصله ..

فرغته بالزباله ومديت ايدي بالجيس وضليت اطلع واخلي على جهه العلبه الثانيه ..

طلعت جمجمه صغيره و لحم نَي وتايخ

وينكط من هذا الوغف الاسود ..

دزيت ريري جابتلي نجانه ماي وبطل خل

وجيس ملح ..

غسلت الجمجمه بالخل ونظفتهه وصرت اكلبهه منا ومنا ...

اريد افهم هاي مال شنو ! ياحيوان ! مافهمت

خليتهه على جهه وغسلت هذا اللحم التايخ

وريري واكفه فوك راسي وساده خشمهه وكل شويه تكول راح اذب من راسي لعبت نفسي

تروح تطلع شويه وترجع يمي ..

عادل ماله صوت بعد وامي ضاله كاعده يم عزيز وابويه جوه يم عادل .. وانه وريري

متكابلين على مصيبه هاي الجيفه الما مفهوم منهه شي . .

صرت اقرا ...

بسم الله الرحمن الرحيم

«اللّهُ لاَ إِلَهَ إِلاّ هُوَ الْحَيّ الْقَيّومُ لاَ تَأْخُذُهُ سِنَةٌ وَلاَ نَوْمٌ لّهُ مَا فِي السّمَاوَاتِ وَمَا فِي الأرْضِ مَن ذَا الّذِي يَشْفَعُ عِنْدَهُ إِلاّ بِإِذْنِهِ يَعْلَمُ مَا بَيْنَ أَيْدِيهِمْ وَمَا خَلْفَهُمْ وَلاَ يُحِيطُونَ بِشَيْءٍ مّنْ عِلْمِهِ إِلاّ بِمَا شَآءَ وَسِعَ كُرْسِيّهُ السّمَاوَاتِ وَالأرْضَ وَلاَ يَؤُودُهُ حِفْظُهُمَا وَهُوَ الْعَلِيّ الْعَظِيمُ *

لاَ إِكْرَاهَ فِي الدّينِ قَد تّبَيّنَ الرّشْدُ مِنَ الْغَيّ فَمَنْ يَكْفُرْ بِالطّاغُوتِ وَيْؤْمِن بِاللّهِ فَقَدِ اسْتَمْسَكَ بِالْعُرْوَةِ الْوُثْقَىَ لاَ انفِصَامَ لَهَا وَاللّهُ سَمِيعٌ عَلِيمٌ *

اللّهُ وَلِيّ الّذِينَ آمَنُواْ يُخْرِجُهُمْ مّنَ الظّلُمَاتِ إِلَى النّورِ وَالّذِينَ كَفَرُوَاْ أَوْلِيَآؤُهُمُ الطّاغُوتُ يُخْرِجُونَهُمْ مّنَ النّورِ إِلَى الظّلُمَاتِ أُوْلَئِكَ أَصْحَابُ النّارِ هُمْ فِيهَا خَالِدُونَ »

بسم الله الرحمن الرحيم

وَقَالَ فِرْعَوْنُ ائْتُونِي بِكُلّ سَاحِرٍ عَلِيمٍ * فَلَمّا جَآءَ السّحَرَةُ قَالَ لَهُمْ مّوسَىَ أَلْقُواْ مَآ أَنتُمْ مّلْقُونَ * فَلَمّآ أَلْقُواْ قَالَ مُوسَىَ مَا جِئْتُمْ بِهِ السّحْرُ إِنّ اللّهَ سَيُبْطِلُهُ

مَا جِئْتُمْ بِهِ السّحْرُ إِنّ اللّهَ سَيُبْطِلُهُ

إِنّ اللّهَ سَيُبْطِلُهُ

إِنّ اللّهَ لاَ يُصْلِحُ عَمَلَ الْمُفْسِدِينَ *

إِنّ اللّهَ لاَ يُصْلِحُ عَمَلَ الْمُفْسِدِينَ *

وَيُحِقّ اللّهُ الْحَقّ بِكَلِمَاتِهِ وَلَوْ كَرِهَ الْمُجْرِمُونَ »

من كملت غسله ووكع كل المي الوصخ والدم المكتل الي بي .. صرت اكلبه واشوف شنو هذا احاول افهم اصله شنو ؟

جان لونه ابيض ومتعرج ومثل صونده صاير

طويل وملفلف مشدود من الجهتين ...

ضليت افتحه وانفض بي وكع الي بداخله

جلد حيه صفره ومخيط بسيم ..

فتحته وذبيت السيم وضليت اعدل بي واقراه على الضوا ..

مكتوب ..

اسماء خدام الجن وكلهم مطلسم جوه اسمهم

ومحطوط بنص الجلده ( عين ) بعدهه بتميتهه

عين حيوان ولونهه اسود .. وكلشي ماعليهه لا خيسه ولا دم ولا دود ولا اي شي ..

انه اشيل واحط على جهه وريري تكعد تتفحص وراي ..

اخذت الجمجمه وضليت اكسر بيهه واقرا ..

بسم الله الرحمن الرحيم

وَقَالَ فِرْعَوْنُ ائْتُونِي بِكُلّ سَاحِرٍ عَلِيمٍ * فَلَمّا جَآءَ السّحَرَةُ قَالَ لَهُمْ مّوسَىَ أَلْقُواْ مَآ أَنتُمْ مّلْقُونَ * فَلَمّآ أَلْقُواْ قَالَ مُوسَىَ مَا جِئْتُمْ بِهِ السّحْرُ إِنّ اللّهَ سَيُبْطِلُهُ إِنّ اللّهَ لاَ يُصْلِحُ عَمَلَ الْمُفْسِدِينَ * وَيُحِقّ اللّهُ الْحَقّ بِكَلِمَاتِهِ وَلَوْ كَرِهَ الْمُجْرِمُونَ »

بسم الله الرحمن الرحيم

« قَالُواْ يَمُوسَىَ إِمّآ أَن تُلْقِيَ وَإِمّآ أَن نّكُونَ أَوّلَ مَنْ أَلْقَىَ * قَالَ بَلْ أَلْقُواْ فَإِذَا حِبَالُهُمْ وَعِصِيّهُمْ يُخَيّلُ إِلَيْهِ مِن سِحْرِهِمْ أَنّهَا تَسْعَىَ * فَأَوْجَسَ فِي نَفْسِهِ خِيفَةً مّوسَىَ*

قُلْنَا لاَ تَخَفْ إِنّكَ أَنتَ الأعْلَىَ * وَأَلْقِ مَا فِي يَمِينِكَ تَلْقَفْ مَا صَنَعُوَاْ

إِنّمَا صَنَعُواْ كَيْدُ سَاحِرٍ وَلاَ يُفْلِحُ السّاحِرُ حَيْثُ أَتَىَ

إِنّمَا صَنَعُواْ كَيْدُ سَاحِرٍ وَلاَ يُفْلِحُ السّاحِرُ حَيْثُ أَتَىَ

وَلاَ يُفْلِحُ السّاحِرُ حَيْثُ أَتَىَ »

بسم الله الرحمن الرحيم

« قُلْ أَعُوذُ بِرَبّ الْفَلَقِ * مِن شَرّ مَا خَلَقَ * وَمِن شَرّ غَاسِقٍ إِذَا وَقَبَ * وَمِن شَرّ النّفّاثَاتِ فِي الْعُقَدِ * وَمِن شَرّ حَاسِدٍ إِذَا حَسَدَ»

كسرتهه وجريت ورقه جانت ملزوكه بالعظم من فوك بس ملفوفه بالطول  ..

فتحتها من اللاصق الي بالاطراف وبعدين فكيت الخيط وكطعته وقريت مكتوب بدايه الورقه ...

ناديتك يا ( د .. طا .. ـه ) ..

ان تجعلي عادل ابن (..) لا يرفع صوته علي

ولا يحرك لسانه معي

اجعليني انا الملكه وهو عبدي فحققي مرادي وودي ..

ومرسوم نجمات سداسيه بالاربع جهات ومكتوب فوك كل وحده

طاعه .......................... خضوع

.                                          .

.                                          .

.                                          .

خوف ........................ عمى العقل

بالوسط ملزوك شمعه حمره ومعكد عليهه الخيط .. شلتهه وكطعت الخيوط وهي كصيتهه وذبيتهه بالماي واجيت اقرا الي بالمربع الوسط الصاير بين الكلمات ..

قريت فوك مكتوب اسم اخويه وجوه اسم مرته

وعلى الجهات اسماء امهاتهم وبالنص

( طاعه عمياء وعمى العقل )

استغفرت ربي وشوفته لريري خربت ضحك

وكالت ...

- ام الوصخ تريد تصير ملكه بعد ط...ي

هو ضل الحظ بس للجايفات امهات الدود والطيانه اهمداااها على هالنفس الكشره

مالي خلك احجي شي وياهه .. كبل اخذت الورقه نكعتها بالماي وقريت ...

بسم الله الرحمن الرحيم

«وَدَّ كَثِيرٌ مِّنْ أَهْلِ الْكِتَابِ لَوْ يَرُدُّونَكُم مِّن بَعْدِ إِيمَانِكُمْ كُفَّارًا حَسَدًا مِّنْ عِندِ أَنفُسِهِم مِّن بَعْدِ مَا تَبَيَّنَ لَهُمُ الْحَقُّ فَاعْفُوا وَاصْفَحُوا حَتَّىٰ يَأْتِيَ اللَّـهُ بِأَمْرِهِ

إِنَّ اللَّـهَ عَلَىٰ كُلِّ شَيْءٍ قَدِيرٌ

إِنَّ اللَّـهَ عَلَىٰ كُلِّ شَيْءٍ  قَدِيرٌ»

بسم الله الرحمن الرحيم

«فَإِنْ آمَنُوا بِمِثْلِ مَا آمَنتُم بِهِ فَقَدِ اهْتَدَوا وَّإِن تَوَلَّوْا فَإِنَّمَا هُمْ فِي شِقَاقٍ فَسَيَكْفِيكَهُمُ اللَّـهُ وَهُوَ السَّمِيعُ الْعَلِيمُ*

فَسَيَكْفِيكَهُمُ اللَّـهُ وَهُوَ السَّمِيعُ الْعَلِيمُ

صِبْغَةَ اللَّـهِ وَمَنْ أَحْسَنُ مِنَ اللَّـهِ صِبْغَةً وَنَحْنُ لَهُ عَابِدُونَ»

نكعتهه كلش تبللت واخذتهه شكيتهه ونثرت كل نص بجهه وكصيت هذاك اللحم وخليت كل نص بعلاكه وجمعتهن كلهن بسله الزباله

ودزيت ريري تشوف عادل شلون حاله ..

بعدني امسح ايدي واجتني تركض وتكلي ..

- لك هذوله مربطيه وشادين حلكه لك خطيه

ليش هيج هو عايزه ضيم

- هسه هو زين ؟

- شمدريني زين لا شو هو بس يفرفر براسه ويون وابوك يكول مابيه شي

عزا عزاااا هاي شلون بيكم يكوم واحد ويوكع الثاني شلون وتالي بحالكم

اخذت العكازات وهي اجتي سندتني ورحت للغرفه .. وشفته شلون سيف مجتف ايده وكامشهن والحجي كاعد يم راسه ويقرا عليه

ورجليه شاديهه وحلكه شاديه

حجيتلهم الي شفته كله وكلت لسيف يفكه وكعدت احجي وياه واكله تسمعني وهو بس يباوع بالوجوه ...

ضلينه بالساعتين وياه نحاجيه ننطيه ماي يشرب وهو بس يتصفن وتالي حط راسه ونام

ضلينه احنه واحد يتصفن بوجه الثاني ومانعرف شنحجي ...

اجتي ريري جابتلي ماي وصابون ومعقم

غسلت ايدي وعقمتهه وبدلت ملابسي والنوب جابتلنه الريوك ...

محد يرضى ياكل .. وانه لعبانه نفسي بعدهه الريحه بخشمي تضرب ...

ضلت هي تسوي لفات وتخوط بالجاي وتحط بيد كل واحد بينه ..

حتى سيف كعدت يمه وتقنع بي ياكل وهو مدلغم .. مااكل بس اخذ الجاي يشرب

الحجي اكل وامي هم ودتلهه اكلهه ..

وابويه كعدت ساعه تقنع بي وهو يكللهه روحي ممروده على ولدي ماكدر اكل وهي تلح وياه الى ان خلته ياكل وانطته دوه الصبح

وراحت ...

صاحت على سيف وراحلهه وبعد ماشفتهم

ضليت احجي ويه ابويه بحال اخوتي وشلون نخلص من نسوانهم وهو يكلي الجهال يكسرون الظهر ..

اجتي ريري وشايله سطل مسح وماسحه ووصله كلهه جديده ... وكالت ...

- يلا عيوني وعمري انتو بعد كلبي حولو كعدتكم بالحديقه يلا خوش جو حلو روحو

وخلوني انظف براحتي

كمنه طلعنه وضلت هي وسيف جوه ..

كل شويه اشوفهه مطلعه شغله بره تشرهه على الشمس .. وامي وياهه تدقق عليهه وهذيج تصيح اعرف اكعدي ارتاحي

وامي تمشي وراهه ماتكعد ..

كلشي طلعته بره حتى التخم وكل هذا وعادل وعزيز نايمين بمكانهم ماطلعلهم حس ..

انه جنت اقنع ابويه نسوي كعده ويه اهلهن ونحجيلهم الي شفناه كله وبعدهن الغراض ماذبيناهن ونشوفهن الهم ونخلي الولد يطلكون ونخلص ...

وهو يكلي عيب هاي بيهه كسران وجه وهمه كلهم عمام وخوال النه ماريد تتخارب النفوس من وره النسوان ..

والحجي هم مأيد ابويه ويكول .. لو يتطلكن يموتن شكو واحد بالبيت والسحر مايضعف لو اشتغلنه من بعيد هنه كلشي يعرفن على العايله وكلشي عدهن مو غشيمات ..

وضلينه بحيره وياهن ... وكل شويه اقترح عليهم راي وهمه يفسروه لبعيد ..

ريري كضتهه تجلف بالبيت ما خلت شي

حتى فراش الغرف طلعته شرته بالسطح وسيف يجي يكلي ..

راح نفتح غرفه عمي عزيز خاف نصيحلكم عود الحكونه ...

وانه كعدتلهم جوه على الدرج وكل شويه اصيحلهم هاااا شلون الوضع ويكلولي زين

وهيج امنت عليهم ..

كل ماباوع للدرج اذكر جره رجلي واكعد احسبهه بالعقل شلون رجل ترجع تطبك من وره بالبايات ! وانه نازل !

صارت صلاه الظهر وهمه بعدهم ينظفون

وكلشي اخذوه جلف وتعقيم وامي مستلمه المطبخ .. ذبت شكو بهارات وشكو شي بالمجمده وكل الجداري شالتهه طلعتهه وتصيحلي ..

كلشي اريدك ادز مرتك للسوك وتجيبلنه كلشي جديد وهالنسوان لبيتي بعد مايطبن

الا يدفنني بكبري يلا يحطن رجلهن بيتي بعد

دزيت سيف يجيبلنه غدا من بره وامي كلشي شالته وشمرته حتى الكلاصات والخواشيك

فرغت المطبخ وخلته يصفر .. وضاله تجلف بي وهو بعده نظيف على ايد ريري واحمد نظفوه بدايه العيد ..

كلشي خلوه يلمع وامي بخرت البيت وكايمه تمشي بحيلهه وكل خطوتين تمشيهه تصلي على النبي ومتحزمه وشالت البيت هي وريري شيل ..

تغدينا على الكاشي صارت كعدتنا لا فراش ولا طبلات ولا تخم كلهه بره ..

وانه بالف ياعلي دبرتهه اكعد وبعد ماكدرت اكوم ضليت على كعدت ماد رجلي واخابر احمد حتى يجينه العصر ...

اخوتي على نومتهم مالهم حس ...

والعصريه بس وصل احمد وسلم امي حطت بايده الفلوس ودزت وياه ريري للسوك

وضل سيف يجلف بالغراض البره طلعوهه ..

انه بطبعي اكره مره تطول بالسوك

اصير اعصاب حتى لو مو وياهه بس اتسودن من هالشي ... وهاي ادك عليهه ماتجاوب فورت اعصابي ..

دكيت على احمد وكلتله ينطيهه التلفون ..

وطلعت بيهه كل اعصابي وهي ما ردت شي بس كالت اوكي وسدته ..

من رجعو محملين كومه علاليك ذبتهن وراحت سبحت واجتي انطتني دوايه وشاورتني ...

- اعصابك على نفسك اني داسوي شغلي حسب الاصول كلهن بقن يومين واعوفك وامشي وارتاح مني

خلت الدوا بايدي وراحت ...

وانه جمد الدم بيه ... يعني صدك هاي خلصنه

وراح ترجع !

وفلوسهه !!! واهلي !

ضليت افكر بيهه لحد مارجعت مره ثانيه وجايبه العشه ... اكل واباوعلهه وهي تسولف ويه احمد وسيف ويضحكون ولا خلت عينهه بعيني ..

خلصنه اكل وجابتلنه الجاي وكعدت ويه الحجي بس تتشاور هي وياه ...

جان تكوم وتروح على امي تشاورهه وامي كالت ..

- يلا امشونه نكعد الولد ونبات الليله بضريح امير المؤمنين

ابويه كبل ايدهه وصاح على احمد وسيف يرحون يكعدون اخوتي ..

وريري ركض راحت جابت ملابس لابويه والغتره الخضره وحتى شحاطته لبستهه اله

وهو بوس راسهه ضلت تضحك وراحت النوب جابت ملابس لعادل وعزيز وانطتهم للولد لبسوهم ..

وضلو ينتظرون امي لبست واجتي و اخذو فراشات وياهم وراحو ...

ضلينه بس انه وريري بالبيت ...

هي طلعت قفلت الباب وراهم وصعدت جابت ملابسهه واجتي بدلت جوه يمي ..

لبست الدشداشة الستن الي على خضار لونهه

وخلت مخدتهه بالكاع ونامت على بطنهه

ضليت اباوعلهه وكلتلها..

- رور مو تزعلين مني بس انه اكره طلعتج للسوك وتتاخرين

- عادي مصار شي

- تره لا عبالج ترحين وخلصنه

بعدنا هسه بدينا

-اووكي

- تعبانه مبين متكسره اليوم

- اي متعوفني انام لعد مدامك تعرف

- تعالي نامي يمي خاف يصير شي انتي

بحضني متخافين

-ماريد شكرا

لفت راسهه بالغطى واندارت ..

ضليت انه اغفى واكعد اخاف يصير شي

فمانمت زين بس اغفى شويه وافز اباوعلهه واباوع للباب واخابر على احمد اتطمن على الاهل ...

واخوتي هناك بس زارو رجعو كضوهه نوم

واحمد يكلي ابويه مكابل ضريح الامام ويبجي

وماخله واحد ما دعاله ...

يمي تلفون ريري وضال اكلب بي وهي شكد ما طول اليوم تلفونهه بايدهه ومشغوله بي

شكد ما فارغ من اكلب بي حتى ممل

بس كانيور مستولي على التلفون والتطبيقات كلهه ...

حسيت عليهه فزت .. ضليت اباوعلهه وهي كامشه الغطى على صدرهه وتتلفت بالغرفه

كلتلهه...

- شبيج رور

- سمعت صوت

- صوت شنو !

تعالي يمي واحجي

اجتي كعدت يمي على فراشي وتكلي ..

-  صوت مادري يمكن مال مشي بس هيج هوايه ديمشون مثل مشيه العسكر

- خاف جاي تحلمين والصار مو هين اكيد عقلج يضل يصورلج هيج شغلات

- لاا ما حلمت لان مشفت شي بس سمعت صوت وهيج احسه جاي من الكاع  مو من فوك

صوت مشي هواي قوي مادري ليش سمعته بس متأكده منه

- الله اعلم

ان شاءالله ماكو شي

تعالي نامي وانه هسه اقرالج ايات وتصفي بالج

نامت على ايدي وانه مادري شلون طلعت وياي وكلتلهه...

- ولج حيل مشتاقلج بحضني

- ممبين عليك

ضحكت وشميتهه جان تكلي ..

- اذا تريد تترومنس براسي هسه خلي اكوم احسن تره كلش مالي خلك لو تصفي بالي لو تعوفني انام

- شبيج انتي ليش جاي تضوجين مني هيج !

هسه شمسويلج !

- اهووو حيداااار لتضوجني

- اضوجج على شنو ! هو انتي الي مضوجتني

صايره حيل بعيده مني

- ليش واني شوكت جنت قريبه منك !

- لاا جنتي قريبه وبكل شي وياي هسه صاير ماشوفج الا بالليل وتجين هلكانه بس عوفني انام هاي التعرفيه وياي

- ولك حويدر اسكت لا اطكك بسحر طاعه اكلبك طلي بايدي اسكت لاتضوجني بعد عرفت درب السحوره اسمطك اسمطك بس تضوجني

- ليش ماانه اطكج بسحر عكد اللسان واخلص من لسانج الرشاش هذا ونعيش عيشه سعيده

- عيشه المصخمه وياك

- هااا ولج انه هيج تغث عشرتي !

- حييييل بس تنك انته تبط الكلب

هسه شستفاديت من حضنك !

لا نمت ولا صفى راسي بس حجي حجي هو اني مسطوره عايزني بعد حجي ولوك لوكلك

- يلاااا يلااااا نامي اسكتي بس اسكتي

انه اجرم بروحي من احاجيج

خلي اضل وحدي وساكت احسن

ضلت منداره ونايمه على ايدي وانه اغمض وارجع اباوعلهه ..

رجعت اندارت وخلت راسهه بركبتي

وتكلي ..

- ولك داحس عقلك شطح

- ثابت مكانه لتخافين

باستني بركبتي وانه اخذت نفس قوي كلتلها..

- جاي احس نفسي متغير

-ادري بيك

- رور تدرين انه ماريد اعوفج واذا صار وانتي ردتي تعوفيني وترحين لتعوفيني هيج

رجعيني مثل كبل نسيني كلشي وروحي

ماردت عليه بعد وضلت حاضنتني ونامت

وانه هم نمت هيج مرتاح ...

والصبح حسيت على دكت الباب قوي

كعدتهه وبين ما لبست ملابسهه وانه اخذت العكاز وطلعت يلا فتحت الباب ..

طبو اهلي وسيف واحمد شايلين علاليك واخويه عادل يدفع بابويه وعزيز يضحك

وحضني والحجي كالو ضل بالامام ...

كعدت وياهم واسئلهم شصار مصار وياهم

وهمه يحجولي على الاجواء شلون حلوه هالسنه هناك ...

واخوتي مبين عليهم زينين بس عادل بعده يصفن ويحجي شويه ويرجع يغمض

امي كبل دزت الولد نزلو الجدريه الجبيره

والبريمز وصارت تطبخ الزرده ....

وريري وصيتهه تسبح وتعلي جسمهه مثل ماشرحتلهه بالتفصيل مره ثانيه وبعدين راحت تشتغل ويه امي تعاونهه ...

طبخو ووزعو للجيران وريري كل شويه تصبلهه ماعون وتاكل وتنطيني اكل منه

وكاعدين بحب الله لمتنه ومرتاحين

جان يدك تلفون عزيز وضل يحجي ويه اخو مرته وكاله ...

- المره بقوهه يمكم بعد هذا حدي وياهه

ضلو يتلاغون بالتلفون وعزيز حجايتين حجاهه اله وسد الخط ....

عادل سألناه وكال مادري ...

عفناه على راحته ... وثاني يوم لليل

اندكت الباب ....

وطلع سيف يفتحهه .. وكبل صاح لابوه

راح وياه .. ورجعو ووياهم ام سيف

شايليهه من ايدهه ورجلهه وخلوهه على القنفه ...

.

.

.

يتبع 💕

..♣️🩸 ماء مغلي 🩸♣️..

* adzzon *

اندكت الباب وطلع سيف يفتحهه ..

وكبل صاح لابوه راح وياه .. ورجعو

ووياهم ام سيف شايليهه من ايدهه ورجلهه وخلوهه على القنفه ...

كلنه نباوعلهه وصافنين ..

المره حلكهه معووج وعينهه محوله وفجها كله مديور على اليسره .. اصابع ايدهه معووجه ومطبوكه ايدهه ويه ركبتهه

وبس اتئتئ..

طب اخوهه ويسلم من يم الباب لحد ماراحت ريري وامي جوه يلا طب يمنه ..

سألناه عليهه وكال ..

اليوم ويه صلاه الفجر  ماسمعنه بس صياحهه

وجانت بالحولي فوك يم الغرف بين مارحنالهه لكينه هذا حالهه ..

ماخذيهه للمستشفى عبالهم جلطه بس مابيهه شي وضلو محتارين بيهه وعادل قافل تلفونه

فجابوهه النه ...

انه ماستخطيتهه ولا هتميت لحالهه وسيف نفس الشي بس متجتف ويباوعلهه

عزيز ضل على كعدته ماتدخل بشي

وابويه يباوعلهه ويستغفر الله وكال لاخوهه يروح لبيتهم ...

من طلع انه ضليت احجي عليهه وابويه ما رضى كال حرام نتشمت بمريض

اجتي امي ووكفت يمهه وتفلت بنص وجهه

وكالت ..

- يالحرام بيج حتى هوا الله

هاي حوبه المظلوم والسحر يرد على الساحر ولو طال الزمان وسطرج ابو الحسنين هناك رحت يم بابه  ونخيته وحاشاه يرد مظلوم

ضلي على نومتج هاي ولا منا الي يوصلج

والي يحط ايده ويداريج انه تبريت منه تعلعلي وضوكي لوعه العافيه

حمدوالشكر ربي بردت كلبي واخذت حكي

ويوم الي ان شاء الله اشوفه بالاكبر منهه ونخلص من شرجن وبلاجن بجااه ابو الحسنين

كلهه ساكته لان امي حجايتهه صحيحه

ولوعه كلبنه كلنا هي حجتهه ..

ضل بس ابويه يكول ..

- بويه حرام نتشمت بني ادم وهو عليل ومريض و حرام نخليه بينا ذليل ونتشفى بعازته للعون

لو تردوهه لاهلهه لو يتكفلهه زلمتهه مال تخلوهه هالشكل مارضاهه انه

هاي  مو من شيم ال البيت يتشمتون  بعدو مريض واحنه منهم نسل وعلى خطاهم ماشين

غير الفعل الخير ويه الوادم مايبدر منا

- بويه على هالراس حجيك بس هاي مو شكول رحمه وخير واليزعل مني خلي يزعل

انه ضكت المر منهن و الي مايقدر الزين

ويكيدلي ويكيد لاهلي ماله رحمه بينا

- لاا يابويه مو هيج الحجي

احنه مالنه شغله بيهه بعد بس لا ناذيهه

لا نذلهه وهي عليله ونتشفى بعازتهه النه

حرام هالشكل

انه اكول لو تردوهه لاهلهه لو بعد يتكفلهه رجلهه وولدهه

- كيف عادل بعد هي مرته وهو يقرر

يريدهه يمه ياخذهه فوك ومتطلع من غرفتهه

وهو يحير بيهه

ميريدهه هسه خلي يرجعهه منين ماجابوهه

ضلينه نباوع لعادل وهو يباوعلهه

وهي بس تحرك براسهه وتئتئ وايدهه معوجه اصابعهه مثل مكرفصات هيج ومطبوكه ايدهه بركبتهه يم بلعومهه ومبين رجلهه هم متيبسه ..

سيف كال ..

- عمي انه اكول خليهه هنا وتضل بغرفتهه

احسن هيج واحنه نداريهه

- اخذهه انته وابوك فوك ومالنه دخل بيكم

بعد .. تعيش تموت بايدكم مانتدخل ولا تعتبون علينه بشي

ضل سيف مدنك راسه وراح يريد يشيلهه وعادل بس يتصفن عليهه .. ضل سيف يحاجيه يلا ركز وياه وشالوهه وراحو ...

ابويه وامي ضلو يتعاركون امي تكله ليش تخلوهه تبقى وهو يعتب عليهه شلون حجت ودعت وتشمتت هيج .. وريري اجتي تشاورني ..

- اكولك حويدر

هاي طنطول خاف تمثل ! شو اني ماصدك بسوالف سطره ابو الحسنين

- رور هو صدك اهل البيت ياخذون حوبه المظلوم مو مبالغه من امي تره

بس هاي انه هم اشك بيهه تمثل مادري بعد انتي ضلي عينج عليهه وشوفيلنه صدك جذب

- شايف اذا طلعت تمثل اويييلييي اويللييي

الا اشحطهه واخليهه جوه رجل امك وننزل عليهه دك وكفش والا ازوركهه واشيش امك عليهه واخليهه تتمنى صدك لو مشلوله

- هههههههههه سباااعيه ادري بيج

استلميهه رور بعد صارت بايدج

- ديلاااا اووكيي

اسمع هسسسه انيييي بالي ديفكر بعزوز اخيك

- شبي !!

- اريد اجيبله بنوته تكعده وزن

- ريرررري ايااااااج توصليله

- ههههههههااااييييي حووووبي

منا لباجر احسب عزوز اصبح مراهق

واخليه ينسى عشيره حنفيش ام الگلك

- لج صدك تحجين !!!  لتورطينه يمعوده احنه ماصدكنه نخلص من هالنسوان

بعد تجيبلنه الاضربين !!!

- لك بااااابه بس ونسه شبيييك

واذا اخوك بي زود خلي يكول اريد ازوج واطك حنفوش بمره لعابه والاااا اجيبله لوززه بالباكيت هو يفتحهه

- استري علينه ريري لا نريد لوز ولا جوز ولا كلشي من بناتج

عوفي اخوتي رحمه لذاك الاب عوفيهم خلي يرتاحون من نسوانهم شكو مدوخه روسهم

والله انه لو بدالهم ويصير بيه هيج الا احلف بعد ماعاشر مره

صوت مره بعد ماريد اسمع

بويه لعبان نفس هم ينحملن النسوان !

- عوومرييي هي كل مره مررره !!

دشوف الكيك العندك شوووف

هاي مثلي النسوان التبرد الكلب والجلاوي

- هههههههه وتشعل ابيي بس تفتح الشاجور هذاك تعرفينه مو ؟

- شنوه ! ماعرف اني هالسوالف بعدني صغنونه انته شدتحجي فهمني يااا كووولشي مفهمت عليك

- ايباااه ولج رووور ولج مو كلبي شيب

منج ولج خليني ساكت احسن

امشي روحي شوفيلنه طنطل تحرك لاا ؟؟؟

ضحكت بخباثه وراحت .. وانه فتحت تلفونهه

الكلكسي وفعلت الواتساب مالي وراسلت

ابو سعد (السحار) ....

دزيتله رسايل هواي وحجيتله بيهن على الصار هالايام وختمتهه بطنطل وحالهه..

بين ماانه باقي انتظر جواب منه وصلت رساله على الفيس مكتوب بيهه..

' شلونج بابه '

ترددت افتح رساله لا؟؟؟

ضليت اباوع للشاشه ووصلت رساله ثانيه

' بابه حولت اليوم من الصبح الفلوس

لويش ما دزيتيالي تاكيد  الاستلام ؟؟ '

رحت فتحت البريد مالهه ومالكيت اي رسائل بالوارد ! كلشي فارغ ماكو اي رساله هنا

كلت يجوز بجهازهه الثاني ..

وصلت رساله نوب ..

' بُنيتي مشتاق لجمالك  '

' صوري الاحبها طال حرمانها '

' وحيد بدون صوتك بابه لا تطولين الغيبه '

اقرا الرسايل بدون مافتحهه وحفظت اسم حسابه كلت يجوز احتاجه بيوم ...

اجتي هي وانطيتهه تلفون .. من قرتهن

طلعت بره تخابر ..

صار بالي هنا سؤال ..

اذا هالكد يحبها ومؤثره عنده ليش عايفها

وحدهه.  ! ليش مامعترض على زواجهه مني وعايفهه عايشه وياي هالظروف بدون مايسال على شي ؟؟.

طولت مكالمتهه وتالي رجعت كعدت يمي

كلتلي ..

- عمي يسلم عليك

- عليكم السلام

قريت رسايله مبين هواي يحبج

-اي

- شبي وضعج مو تمام !

ضلت صافنه شويه وكلتلي..

-حيداار اني انانيه ؟

قريت جدية سؤالها بملامحها.. كلتلهه

- اي احس عندج نوع من الانانيه

بس انتي طيبه كلب نفس الوكت

- زين اني من اسوي الشي الزين الي

اطلع انانيه !

- ليش جاي تسالين هيج

فهميني السالفة شنو؟

- هيج ماكو شي انسى

راحت منا وانه ضلت بالي سالفتهه ..

كلت هذا بس لا يريدهه تتزوج هناك يمه لمصالحه وهي متقبل وحاجي عليها بالانانية!!

بس هو ممبين وياهه هيج ؟؟

اخذت عكازاتي ورحت ادورهه .. شفتهه

كاعده بالمطبخ وحدهه وتفر بطرف الشال على اصابعهه ..

كلتلهه..

- ها رور شو فدنوب خانسه  ! تخوفيني هيج شبيج ؟

- دارتاح ميصير واحد يرتاح شويه

- لاا مو انتي راحتج غير شكل .. كليلي شبيج ؟

- اريد كانيور

- صدددك تحجين !!!

- اي ايي اييي صدك لعد صارلي شهرين محرومه منه متفكر انته بيه !

متعرفني الوب عليه !!

شوف ولك حويدر الك هالاسبوعين بالزايد اذا مصرت زين وتاخذني اله .. اعوفك وامشي بعد سحوره وخلصناهه شتريد مني مبقيني يمك !! 

- علكيفج علكيفج بويه شجاااج

ماخلصنه منو كلج خلصنه !

- شكو بعد مو حنفيش حتطلك وطنطول انشلت ووكعت والسحر وفتحتوه شتردون مني بعد !

- يعني مادري بالضبط بس بعد ماامنه كلش

وبعد ملوكه لتنسيهه

هسه انتي شكو مستعجله على الروحه !

- ضجت اريد ارجع لبيتي

اريد اخذ كانيور بحضني مشتاقتله فدمره مداتحمل فراكه اذا اضل هيج

تلكاني ابجي عليه ومااسكت الا هو بحضني

- تسودنتي شبيج!!

هو جلب

- وشبي الجلب ! شو تستهزء!!!

كم مره منبهتك لتحجي عليه

هذا روحي والحجايه الي تنحجي عليه

تدك بكلبي واني اجفص بطنه الي يحجي عليه

- هيييي شبييييج نهديتي

هسه انه شحجيت! 

جاي اكلج متسوى دموعج عليه هيج اقصد

-اووووي حيداااار اسكت فدوه مالي خلك

ضبط امورك ولراس الشهر رجعني لبيتي

وبعد لتكلبني

- هاا هيج ضايجه مني !

- اييي حيييل شبعت من مكابله وجهك

عوفني فد سنه يلا تجي تسال عليه هاي اذا بقيت تذكرني واذا مذكرتني عادي بعد احسن

- ها هيج يعني !

- اي هيج

- زين هاذ هوه بس يجاوبني ابو سعد واشوف شيبقى شغل نسوي وافتح رجلي وثاني يوم ارجعج

- اووكيي

ضليت واكف اباوعلهه وهي دايره وجهه

عني .. طلعت من المطبخ ورحت بره جريت كرسي وكعدت ويه حد الحديقه ..

مادري ليش احس بعد وكت على روحتهه

مو هيج جان بالي حساب لجيتهه ..

اكو بعد بالي هواي شغلات اريد اعرفهه بس ماجاي اركز بيهن ...

اخذتني الافكار وماحسيت الا على ايدهه تدغني بجتفي وتكلي ..

- كوم فوت خلي نام .. اهلك راحو جوه يلا

تره نعسانه

رحت وياهه جوه وتمددت بفراشي وهي بفراشهه شويه جان تكلي ..

- تره صخيمه صدك مشلوله

- شيثبت !

- شفتهه وحده بالغرفه عايفين بابهه مفتوح وسيف وابوه بالغرفه ثانيه سادين بابهم وكاعدين

وهي تبجي وتونون مارحتلهه بس ضليت من بعيد اباوعلهه

- استغفر الله

ليش وصلت نفسهه لهالمواصيل !!

انه متعجب على اهلهه شلون نطاهم كلبهم يجون يشمروهه هنا وميسألون !

لو اخيتنه هاي والله مانخليهه تغيب عن عينه

لحظه

- عادي نفسيات الناس مو كلهه متشابهه

سكتنا بعد ... وهي نامت ضليت انه سهران

مامرتاح ابد ..

اكلب بالتلفون وفزيت على صوت ريري

شهكت شهكه جفلتني بيهه ..

كبل شغلت فلاش وضليت اضوي عليهه واكعد بيهه وهي فاكه حلكهه ومغمضه

جريت العكازات ورحت وكفت يم راسهه وادغ بيهه بالعكاز واكعدهه وويييين يلا كعدت ..

مديتلهه ايدي وكمشتهه وايدهه جانت ناار

كامت وضلت تكلي ..

- لك شبيك متنام انته بومه !

- ريرررري

شبيج !

- شبيه ! نايمه مثل الاوادم انته الي شبيك !

- انه فزيت على صوتج شهكتي من كل كلبج

وصار ساعه اكعد بيج شبيج فاقده ! نومتيش هاي !!

- هاا صدك !! تره مابيه شي بس عركانه

- جسمج حاار مفور روحي غسلي

- تعال وياي وين اروح وحدي بنص الليل !!

رحت وياهه للمغسله جاي تغسل ورفعت راسهه تباوع بالمرايه وعاطت وكبل سدت حلكهه ...

كمشتهه واكللهه شبيج ؟؟ وهي بس فاكه عيونهه ومدمعه  ..

عطت عليهه وهي اخذت ايدي خلتهه على ركبتهه .. واشوف بيهه اثر خراميش

مدمايه ركبتهه بنص اثر الخرمشه

صايره خطين على جهتين البلعوم

صارت عيني بعينهه .. انه ارجف خوف عليهه وهي بس دموع وساكته ...

جريتهه حيل لحضني وضليت ابوس براسهه واكللهه ..

- ميصيرلج شي رور لتخافين والله ماخلي مخلوق منهم يأذيج

وماعوفج وحدج بعد والله ماعوفج وماتهاون بيج

ضلت حاضنتني وامي طلعت من غرفتهه

وتسأل شكو .. وانه بس اباوعلهه ماعرف شحجي ...

اجتي علينه وضلت تمسح على شعر ريري

وتسألهه شبيهه وهي شوفتهه ركبتهه

وامي كبل تعوذت من الشيطان واخذتهه تغسللهه وتقرا على الجرح بركبتهه المعوذات

رحنه كعدنه يم ابويه هم جان كاعد على اصواتنه .. وضل يهدي بريري ويطمنهه ماكو شي ويقوي بنفسيتهه ..

بس انه انعميت خوف عليهه ...

من ساعتهه بعد ماعفتهه وحدهه ..

امي على الفجر تنومهه على رجلهه وتفتح القران وتختم سوره كل يوم على راسهه

وابويه يرقيلهه على الماي ويشربهه ويخليهه تسبح بي ..

وبالليل ماخليهه تنام بالكاع وحدهه الا

يمي على الجربايه وبحضني وهي تغفى انه اضل امسد على راسهه واقرا كل ايه تحضرني ..

طنطل بعد ما وصلناهه ولا نسأل عليهه

بس نسمع عادل يتأفف من حالهه ويريد يجيبلهه اختهه تداريهه يكول لعبت نفسي ماتحملهه بعد ..

وامي ماترضى احد من اهلهه يعتب بابنه

وكل ساعه عركه شكل بينهم ..

سيف عايف الفوك ولا يوصله ومكابلنه وكاعد النهار كله على التلفون لو يروح لبيت السيد يضل يمهم .. وبالليل يصعد ينام بغرفته ومرات ينزل ينام يم اهلي ..

عادل اسبوع واحد ماتحملهه واخذهه لاهلهه

وضلو الجهال حايره بيهم ريري وامي

وعزيز هم جاب جهاله وضل البيت لريري

كله عليهه ...

امي استلمت الطبخ وريري تداري الجهال

وتنظف وتغسل ملابس وعينهه على الكل

بيت اهل ام فاطمه ( حنفيش) كل يوميه

يدكون تلفون على عزيز يعاتبوه على بنتهم

وهي مريضه وميسال عليهه وصارله بالشهرين  عايفهه ويحاججوه بالطلاك

وهو يضل ساكت

واخر شي يكللهم المره ماريدهه وكلمه منا ومنا يسد الخط ...

ابو سعد مارجعلي خبر ولا شاف الرسايل

طبينا محرم ... ٢٠١٥... نص شهر العاشر ..

الجهال بدت مدارسهم وحملهم زاد على ريري ... 

هي تجي تفرغ كل اعصابهه يمي وترجعلهم بالعيني واغاتي ..

تكعد  من السته تحضر لكل واحد علاكته بيهه اللفه والعصير والنساتل والف تدحسه وياهن

ومرتبه جنطهم يم الثلاجه تخلي بجنطه كل واحد علاكته .. وبطل الماي تلفه بجيس صغير وتخلي بالجهه مال جنطه ..

وامي توكف تسوي الريوك وهي تصعد تكعدهم وتضل ويه البنات تلبسهن وتمشطلهن

والولد ترتب قمصانهم و احنه ولدنا وكح ماينجرعون اضل بس اسمع صياحهه عليهم

حتى يسمعون كلامهه ..

وتنزلهم شحط حتى يتريكون .. وانه كاعدلهم بالمطبخ ...  العنده نشيد  حفظ اكله يقراه واسمعله وهو ياكل ..

والعنده تعاريف وتعاليل هم اسئله بيهن ويضلن البنات يمتمتن بالجواب وانه انتظر اسمع الزبده وينهه ..

ولحد ما ينزل سيف وياخذهم وياه ويطلعون احنه عدنا انذار ..

كل مايطلعون تجي ريري تكعد يمي وتخلي راسهه على جتفي وتكلي ..

- فركلي ولك انهلكت من صخام بعيونجن يامهات السحوره

مايعرفن بس يخلفن ويذبن

سممم كون ببطونهن المدوده

- جا انه شكول الليل كله ادرس والصبح يفرمتون عقولهم

ولج بويه انسليت

دخيلك ياعلي شلون ينجحون جانو !

- بالسحوره اكو غيرهه

فرك ولك فرك ااااخ لك هذا كرفش جني على امه يحب  الطيانه

كل يوميه اجلف قميصه من يرجع وبنطرونه مطين سابح بالطين

عفيه ولد ماتورث من امك بس الوصخ

انه وامي نضحك على سوالفهه .. امي صارت عاديه عدهه سوالفنه وتحب كعدتنه

و روحهه وعقلهه كله ويه ريري

تخاف عليهه من كل شي .. اذا ريري تريد تصعد لغرفتهه تروح تصعد وياهه لو العصريه تخلي سيف وياهه

والفجر حتى لو احنه نايمين ومتحاضنين تجي

يمنه تبوس بروسنه وتضل تندعيلنه

مرات اشاقيهه واكللهه عوفينا ماخذين راحتنه بالنومه لترحين تشوفين شي منا منا وهي تضحك وتكلي كلشي ماوراكم انتو بس محاضن حافظتكم واعرفكم من عوينكم

امي جانت كبل ماتخلي احد يجيب توزيع

ويفتر بالجداري على البيوت التطبخ بمحرم

اذا احد يجيب لبيتنه ناكل واذا لا محد يروح

بس هالسنه لخاطر ريري لان هي كلتلهه ما ضايكه اكلهم فخلت الجهال يجيبون ..

وتالي  كضنهه علينه غدا عشه قيمه ، هريسه .. اذا كلش يردن يغيرن فاصوليه

مال توزيع ..

انه احجي عليهن هنه بعد طباخ ماشافنه بس كاعدات وجرش سوالف لو يخيطن ..

وهنه قافلات الا يخلص كل التوزيع يلا يطبخن ..

وامي تكلبهه عليه محاضره دينيه

وتطلع منهه ..

وريري متعذرتلي بماعرف اطبخ عوفني مرتاحه ...

صارت ليله العاشر .. وهاي ليله المحيى

والكل سهرانه .. الجهال كلهه بالموكب بره براس الفرع واخوتي وامي  وحتى سيف بالامام علي (ع) ..

بس انه وابويه وريري ضلينه بالبيت ..

ابويه عايفيه بغرفته يصلي واحنه بالهول كاعدين ناكل لبلبي ..

سألتني ..

- اكولك

هسه اني صار عشر ايام استجوب امك على سالفه محرم

وخوش حجي حجتلي

بس ضلت بالي سالفه

-شنو؟

- شوف طبعا اني سامعه بالحسين بس ماعرفه

عرفت هو ابن امير الخلافه المظلوم بس مادخلت بي يعني هيج بس مجرد طلع اسمه ويه سيره الحياه عن الامير علي وهيج عرفته

- اي

- اي اسمع ناس يحلفون بي وانته منهم طبعا

خابصني والحسين والحسين بس ماثارني الفضول اعرف شبي مابي

بس من قبل جانت شغله بالي على محرم

اكول شمعنى هاي الناس الزينه والموزينه

هيج وفيه وتهاب شهر محرم !!

يعني اني عندي هناك من يجي شهر محرم الملهى يعزل .. المحلات للشرب نصهه تعزل

والي يبقى مفتح لازم يلزموه  ينعلون اهله

فيضل يفتح بالختله

- ايي

- والزبائن شكد اكولك يعني ٩٠ بالميه

يطكهم الشرف بهالشهر .. حتى بالتلفون منهم ينسحبون ...

يعني ناس تكلب نفسهه كلاب علمود شهر !

جنت اكول شبي هالشهر ! شكو حتصير القيامه !

تالي طلع شهر حزن معظم عندكم

- عند الامم كلهه مو بس عندنا

- اييي هنا هم اجيك بسوال اصبر خلي اكمل هذا

اي ف شنوو .. اني استغرب قمه الوفاء والاخلاق الي تصير بالناس بس هالشهر وبعدين ينكلبون طناطل مثل الجماعه

يعني فهمني همه من شنو خايفين هيج ويجرون عدل ؟

- هاااا شوفي اجيج وحده وحده

اول شي الامام الحسين عليه السلام تارك بكلوبنه محبه وثار

هسه انتي اي شخص تحبيه ويموت مظلوم

ينقتل بابشع طرق لازم يضل ثار بكلبج على الي كتله مو صح ؟

- اهجم الدنيا على راس الكتله اني ماسكت واحط ايدي على خدي وانتظر معجزات السماء 

- اهاا زين جا  شلون اذا هذا امامنا وابن امامنا وابن نبينا وحبيبنا ورحمه الله بالارض النه ويموت محروم وعطشان وغريب

وتنسبي العيال واتتذبح العشيره والاصحاب وكلهه ظلم بظلم

يعني هي ايام ماجرت مثلها بالبشريه

من جيل لجيل ظل هذا الثار يتوارث

بكلوب الناس محبين اهل البيت

فهذا الثار من طقوس احيائه وتجديده

هو نصب العزاء .. يعني من جاي ينصبون مواكب والناس تترك اشغالهه واعراسهه وحفلاتهه و تلبس الاسود وترفع الرايات السود هاي كلهه شنو ! جاي نجدد الحزن ونجدد الثار ونقيم العزاء لاهل البيت الي استشهدو هاي الايام

فهذا الوفاء لشهر محرم هو احترام لتضحيه هاي النفوس الزكيه الي راحت استشهدت حتى احنه نعيش على دين الاسلام

من يوم الي ضحو بي للاسلام ضلت الناس

تفكر بمصابهم .. مصابهم مو هين وينسي

مصابهم فتح عقول وكشف بني اميه على حقيقتهم بهذاك الوكت

جانو مستولين على الاماره ومستضعفين الناس وعاكسين صوره الاسلام كلهه

كدامهم .. بس قتل ال بيت النبي سوه فاجعه عدهم خلاهم يشوفون شكد ظلمه وكفره الي مدعين الدين وماخذين السلطه عليهم

هذوله همه صار منهم وبيهم الي يخطط لاخذ الثار ويتعاون ويه هواي اشخاص الهم بطولات بوكتهه ..

فالمعنى هنا هو تجديد العزاء وتجديد الثأر والااااهم هو تعزيه امامنا الحجه عجل الله فرجه الشريف ..

- شوف هسه انته دوختني بالازيد

طيرت حتى هذيج الاسئله العندي

منو هذوله اهل البطولات من اخذ بالثار !

شلون ياخذون ثار ! ياحجه هذا ! هم بعد عدكم ائمه ! شو امك تعددلي ومايخلصون !

- ريررري

عيني انتي ليش ما تجيبين ورقه وقلم وافهمج انه احسن

-هااا هيجي سالفه ادوخ !

- اي الج كلش ادوخ

كومي جيبي واليوم نحييها سوالف

والله لو رجلي تعيني جان اخذتج ورحنا هسه لضريح امير المؤمنين

شايفه شلون اجواء هسه هناك تبجي وعلي تبجي

الشبر الواحد ماتحصلين  محط رجل بي

الا بالشافعات

- زين شكو هيج ليش شدعواهم !

يعني اووكي تحبوهم وكذا بس اوفر

انطو لنفسكم مفكه هسه همه طايرين !

- ولج بويه انتي ماعندج هاي شراره حب اهل البيت

لو تنحط بصدرج شراره حبهم بعد تضلين مكابله حتى التلفزيون وتبجين من تشوفين المزار وانتي مو هناك يمهم

انه هسه اتمنى لو بس اروح اوصلهم وبس اسلم عليهم واعزي امير المؤمنين وارجع

وعلي روحي ممروده وماكلني القهر لان كاعد بالبيت

انه وييين كل سنه من يوم الثامن انه هناك بضريح الامير ... عدنا مواكب وننزل دك زناجيل ونرتب للمجالس وليله العاشر

بعد هاي انه هناك اضل واكف ويه جماعتي

فوك على االرافعات مال كاميرا ..

ويه جماعه التصوير ..

لان اذا توكف جوه تنداس لو تاخذك الروجه تشمرك شوف فوك منو ..

اذا انته مو من اهل الموكب الي يدخل للضريح تروح بالرجلين ...

فهناك مسنترين مكانه نضل واكفين نباوع

و ويه كل قصيده لموكب يجي احنه تلكينه مندمجين وياهم ...

وهااا طبعا احنه كل شويه نريد نوكع

لان هذوله من يطبون يرجووون الكاع رج

تعرفين شنو رج ..

وعلييي لو كلبج جلمود وصيهونيه انتي

هم اذا اوكفج هناك عشر دقايق تفقدين بجي

وكلبج غصب ماعليه يحن لاهل المصاب

هذوله  معجزتهم من الله هو حبهم بكلوبنه وهمه مفاركينه من سنيييييين واحنه حتى زمنهم ماحضرناه بس صرنا اكثر محبه بيهم من كل جيل ومن جيلهم نفسهم ماحبوهم مثلنه

انتي ماشايفه الجماعه هناك شلونهم

مسودنين وعلي طابين نازعين عقولهم

بس لطم وبجي وبالهم كله بس ويه صيحه

' ياااعلييي  حيددددر '

- معقول هيج اكو لو تبالغ احجي الصدك

- هسه انه ماحجيلج راح اشوفج بعينج

بس اول شي جيبي ورقه وقلم حتى تفهمين كلشي عدل

راحت كبل جابت دفتر وقلم وكعدت يمي

ضليت اكتبلهه من النبي ادم الى ان ختمتهه بالامام المهدي (عج)  ..

وعدتهه عليهه اكثر من مره .. ورسمتلهه اسهم ان هذا ابن هذا وسويتلهه مثل الخريطه

بس رسمت بيهه نجف وكربلاء ..

كل وحده منو بيهه مدفون ..

بعدين من فهمتهن وربطت عندهه .. طلعتلهه باليوتيوب بث مباشر بكربلا لليله العاشر وضليت اسولفلهه عليه..

وراهه طلعت مال نجف .. كلتلهه..

- شوفي هالليله بالنجف اقوى الاجواء من كربلا

-ليش مو هناك اهل الانه

- اي صح همه اهل المصاب هناك بس احنه اهل نجف محد يلحكنه بالمواكب واجواء محرم

لا بطبخ لا برواديد لا باللطم كلششي احنه

مرتبه اولى بي

وهنااا بضريح الامير تقريبا ٨٥ بالميه نجفيين

همه الي يحييون العزاء هالليله فيصير الجو قوووي هنا لان بس لاهلهه وهمه بدون شي حاميين نوب ينجمعون كلهم فد مره

يكلبوهه اضرب من كربلا

كلتلج يرجون الكاع رج .. الصوت مال دك صدورهم يرج بالضريح وهو شكد مفتوح وعالي بس تحسيه كله جاي يدك مره وحده براسج

اهل كربلا هم مضبوطين بالمواكب بس شنو

تصير عندهم خربطه .. لان كل المحافظات تلتم هناك وناس تجر وناس تعر مو كلهه تمشي بترتيب .. والي يجون من المحافظات بيهم تعب ما يدكون مثل الي همه بعدهم بحيلهم ومامتعبهم طريق ولا سهر هناك

وهم النجفيين شغلتهم هاي ..

احنه محرم روح كلبببنه

احنه هنا شلون اهل صنعه .. هاي صنعتنا محرم منين ماديرينا نبدع بي

- بس تره واوووو

كولشش واووووو

المكانين عجييييب تدري هسه اني احس فرحانه

- هاا يالله شنو السبب

- لان عرفت شديصير لو شايفتهه قبل جان ضجت لان مافهمكم

هيج احس نفسي منبوذه او مو عايشه مثل الناس

بس هسه من شرحتلي كلشي فهمت هواي شغلات صرت احس اكو جزء بدأ ينملي عندي جان فرااااغ تااام

اني صح ماحبهم مثلكم بس يجوز بعدين اضل ابحث عن سيرتهم واحبهم اكثر منكم

- نافسيني بمحبتهم وصيري اضبط مني بكل شي بالدين

انتي تستاهلين الزين ومكانج مو الج والله

ضحكت وباستني بخدي .. وخلتني اضحك

واباوعلهه وهي بس تبتسم ..

عدلت شعرهه وتكلي ..

- يلا شغل خلي نشوف بعد شكو ماكو

- تعالي بحضني واشوفج بعد

- ماااا شكو هسه وكت حضن !

-وانتي شكو هالكد تضوجين من حضني !

-انته شكو هالكد تحبه !

- ااانه احبه كيفي احبه

هيج ترتاح نفسيتي بي .. انتي يضوجج ؟

- اييي يعني

خليت ايدي على جتفهه وجريتهه الي وضليت مخلي راسي على راسهه واطلعلهه غير فيديو

- شوفي هسه راح اشوفج التطبير

- اييي بله شوفني امك تحجيلي حيداار يطبر بس مافهمت

شغلتلهه الفيديو عن التطبير وشويه وهي وكفته وكلتلي ..

- لك هاااي شنووو. !!!

تذبحون نفسكم !!! عزاا

- لاا رور مو ذبح هذا تطبير بس هيج شكه راس بالقامه شويه

- لك يا شويه دشوف الولد سابحين بالدم

هاي انته هم هيج ! 

- اي جا ربي وحد !

شوفي هاي الليله الولد كلهه كبار وصغار

تلبس الجفن الابيض .. يعني هيج شلون

الصدريه يصير وينشد من النص وينشد منه شويه وصله بالراس ...

وكلمن عنده قامته يضل يدك بيهه على بدايه الراس بس مو بالحافه الحاده لا هيج بالعرض

ويه اللطم والقصايد على نمطهه تصير الدكه بيهه على الراس هاي شنو هيج يخدرون المكان حتى الصبح من يضربوه مانتاذى وكبل يطلع الدم

- عزااا تره ماله داعي يعني شكو تجرحون نفسكم وحتى الجهاال عزاا جهال شكو مطبريهم !

- بويه هذا التطبير اصلا بي فايده للجسم

هذا مثل الحجامه بس اكو ولد الله يسلمهم يفقدون ويصير جرحهم الا خياط يلا يوكف الدم

احنه نطبر بس بعد مانلح على المكان نعوفه هو ينزف لحد ماينشف من وحده وكافي

اكو غيرنه لاااا هذاك يفقد من يسمع المقتل الصبح و ويه جو المواكب بعد ينهار يضل يعيد الطبره براسه اكثر من مره ويصير عنده طبرتين او طبره غميجه ... وهذا هو الي يسبح بالدم

- هااا زين هو شلون هيج يفقد ! ميتخربط من النزف

- اي اكو منهم يتخربطون بس الاكثريه لا

لان كبل يركضون وراهم بصياني الحلاوه

البقلاوه والزلابيه هاي بس يكمل التطبير

ياكلوهن ويكعدون يتحضرون لركضه طويريج

- اكولك صبر وحده وحده

هسه دفهمني شكو هيج انتو تفقدون وتطبرون بنفسكم ! بعدين فهمني طويريج شنو منو وين !

تره اني مو يم محرم كوولششش

غير الحجي على السبايه الي حجته امك ماعرف بعد الا الي زيدتهن بالحجي انته هسه

- ماشي ماشي

شوفي سامعه بالتصوف ! او الدروشه ؟

- صوفيين اعرفهم

-ايي والدروشه هاي تقريبا يعني نفس شي

هذوله الدراويش من يقيمون الذكر بعد هم يفقدون يعني احساسهم يصير بس بالله ماعليهم بكلشي يمهم حتى جسمهم مايحسون بي

ياخذون الحربه يدججون نفسهم بيهه ومايحسون بشي ولا ينزل منهم قطره دم

هذوله جماعتنا هم هيج على حب ال البيت

وحب الحسين انتي شايفه شنو يعني حب الحسين بكلب بشر !

نار هاي احنه عدنا محبته نار بكلوبنه شرارتهه ماتنطفي واحنه متعودين على المواكب وتالاجواء الحسينية من صغرنا

فهالشي متشبع بينه

من ينقري المقتل مال واقعه الطف واحنه بالامام والمصاب حاضر بينه كأنه هسه جاي يصير ونعيش المظلوميه نفسهه تنعاد عبالك كدامنه .. بعد مااايضل اي شعور بينه

الي يطبر ويلطم بنفس الوكت هذا تلكيه فاقد مايفكر بشي بحياته بس مقهووور ذابحه الحزن على الامام ... نحبه احنه مو بانصاف حبه عدنا ..

اذا ينصاح هناك ياحسيييين احنه كلوبنه ترجف جلدنه يكزبر والي مايحس برجفه بضلوعه من يصيح ياحسين بعالي الصوت ويه البقيه هذا مو حُسيني

لا تعتبين ولا تستغربين من المطبرين هذوله مجانين عشاك للحسين ..

التطبير اجه عن السيده زينب عليها السلام

هي ساعه ماعرفت اخوها انذبح طبرت راسهه اكو روايات تكول بعمود الخيمه واكو تكول بحافه الهودج الي على الناقه

بس الاكثر صحه هي بعمود الخيمه والله اعلم

اي فمنها طلعت شعيره التطبير وهم احنه نستذكر بيهه طبره الامام علي (ع) لان هو من مات مضروب براسه فهذا على هذا نجمعت عدنا وثبتت شعيره التطبير

وانه هسه موصي هنا اثنين ولد عدنا بالمنطقه

الصبح يطلعون ياخذون صياني مال الحلويات يطلعون بيهه لموكبهم هناك

وصيتهم يمرون عليه حتى اروح الحك بالتطبير وياهم

- عزاا شيوديك انته مو مريض ! اكعد واسكت

- وااالله ماكعد جا هي مره كل سنه واضيعها !!

مو كافي ضيعت هالايام كلهه وضيعت المحيى هناك ولا خدمت بموكب لا حضرت مجلس ولا اكدر اشارك بالركضه ولا اروح ازور الائمه وهم ما طبر !!!

وعلي انجلط ماتحمل كلشي ماشارك واضل اتصفن .. كلبي يوجعني وعلي

- يبووو زين شلون بيك خاف تتخربط

هو انته شضال بيك وتروح اطبر !!

- اعيش وعلي احتيي من جديد لتخافين

ماسامعه هذا الشاعر محمد الحجيرات يكول ..

انه مااملك وجودي .. كل وجودي بين ايديك

شلون يصير وانه ملكك .. ابخل بدمي عليك

ترديني اعز الدم على مولاي !

- اووكيييي .. زين تاخذني وياك ؟ اريد اشوف من قريب

- لااا والله لو ما رجلي جان اخذتج من هسه

بس هيج ماكدر صعبه كلش احير بيج احير بروحي شلون امشي

بس افتح رجلي اخذج لكل الائمه وحتى بالاربعينيه هم نطلع مشايه انه وياج وناخذ ابويه وامي ويانه واشوفج احلى اجواء

- اييي اوووووكييييي

ضحكت واشرتلهه على خدي وهي ضحكت بصوت عالي وباستني ..

صرت اشوفهه ركضه طويرج واحجيلهه عليهه وبعدين تمددنا وفتحت بالحاسبه تصوير واقعه الطف وضلينه سهرانين عليه وانه كل شويه اوكف الفيديو واحجيلهه شي عن هالمقطع وللفجر احنه كاعدين ...

دزيتهه لبوفيه امي تجيبلي القامه والجفن

و ضليت اتحضر للتطبير وهي مكابلتني

وتتفحص براسي تدور مكان الجرح القديم

طلعت ويه الولد وهناك ردتلي روحي

صح ضال كاعد على جهه يم الموكب بس

مرتاح من انه قريب وياهم ..

والولد رايح والجاي يصيحلي سلامات

المطبرجي اجاني على كعدتي وضل يكلي معذور انته ومريض بس انه كلتله

-مريض برجلي راسي مابي شي اطبر

طبرني وانه مخلي كلينس على خشمي

وريري كل شويه مخابرتني .. من طبرت هم شويه وخابرتهه كلتلهه وهي توصيني اخذلهه صور ...

صورتلهه فيديو وجمعتلهه حلويات وضليت كاعد اخابرهه واحجيلهه كلشي كدامي اوصفه الهه ... حتى اهل الجاي .. حتى الرايات احجيلهه شجم وحده هنا كدامي وكل لون المن ينتسب ...

رجعتلهه ب ٣ الظهر وهي كبل تلكتني تتلمس بوجهي وتضحك تكلي ..

- لك تخوف بس حلو

ضحكت ودنكت راسي على راسهه لطختهه بالدم وكلتلهه..

- طبرتج بدمي بعد شتريدين دم حيدر السيد هذا

- هههههه لك وشل دمك دتعال اكعد مدايخ ؟

- كلشي مابيه اصلا مرتاح فدنوب بس انه اكلج معوز حضن ييي جا انه ماجذب بكلشي  صريح

- ههههههههههه لك هسه ابوك يطكني برزاله

ثانيه على ضحكتي

- هااا شسويتي وترزلتي بالاول

- شسويت بس اجيت اعزل و جبتله الريوك

وهو رزلني يكولي ميصير لا تنظفين ولا تسوين شي حتى اكل ميصير تسوين

ولحد هسه يلا اكل هاي قبل شويه يلا حط لكمه بحلكه

- هاااا اي عادي رزاله ع الماشي هاي

مو صح ميصير تلتهين باي امر لان هذا وكت حزن

-ديلاا فهمت

طبيت جوه وهي محضرتلي ملابس كبل مااغسل كلتلي خلي ناخذ صوره هيج بالدم

واخذنه صور سوه يلا غسلت وبدلت

وكعدت اكلت وياهه هريسه .. اثنينه نحبهه بالملح ماعانيت وياهه بهالشي ...

وكعدت اشوفهه التصوير وهي تسألني على امي شوكت ترجع .. وكلتلهه باجر لان هالليله

تحييها مواساه للسبايا وهم تروح تزور بكربلا

نامت يمي وللمغرب يلا كعدنه على صوت ابويه .. وبهالليله شوفتهه فلم السبايا وهم حجيتلهه عليه .. وثاني يوم من الصبح امي واخوتي اجوي ..

امي كبل لا تسبح ولا تاكل حطت جنطتهه وصاحت ريري .. وضلت تفردش الغراض الي بيهه بنص الهول ...

انطتهه سبحه وتربه وازار صلاه و

علك شدته على بطنهه وتكللهه ...

- زورته الج ونخيت ابو الحسنين ونخيت ابو عبدالله الج وردت الله يرزقكم بوليد ويملي حضنكم و يفرح  كليبي و حلفتهم بالعزيزه زينب وغربتهه

وان شاءالله مايردونا

ضلت ريري فاكه حلكهه وتباوعلهه وترجع تباوعلي .. حيرتهه نفسهه عندي

انه ادري كلشي مايضبط بينا .. فتجاهلت الحجي كله وضليت ساكت ..

ردت امي انطتهه كلاده طويله وبيهه اسم ياعلي فضيه .. وريري كبل لبستهه وبوست امي تشكرتهه .. وامي توصيهه تصلي وتلتزم بصلاتهه وريري بس تكول اي ..

انطتني امي دهينه وعلك مزور .. ضليت اضحك واكول لريري..

- ولج اخذتني مكاني عند امي

جانت حصه الاسد بس الي

هسه كلشي ماحصلت هالدهينه هسه تجي تاخذهه وتوزعهه الكم ومنطيتني خيطين من العلك ! والله وووكت

- ههههههه حيييييييل صغيرون انته وتدلل على امك كافي ماشبعت

دنكت عليهه شويه وكرصتهه من ظهرهه

وضلينه واحد يخبث على الثاني ونتناكر

لحد ماامي دزتها تسويلهه اكل يلا راحت

وهدينا...

بفجر هذا اليوم ريري نايمه بحضني وهم جفلتني بشهكتها ... وهالمره زادت واكثر من مره تشهك وانه اضرب بوجهه اكعدهه وهي ماتكعد ..

اخر شي شهكت وجسمهه نرفع شويه ورجعت هدئت ... ضليت اهز بجسمه وهي كعدت ...

تباوعلي وخلت ايدهه على حلكي ونزلتهه على ركبتي ورجعت غمضت ..

شكد ضليت احاجيهه واضرب وجهه وهي ماتكعد ... ضليت اصيح لامي لحد مااجتي

وحجيتلهه حالتهه وريري فاقده امي تغسللهه وتكعد بيهه وهي ولا حس ..

اباوع لركبتهه مابيهه اي اثر هالمره

بس ضليت اتفحص جسمهه .. زندهه ويم اذانهه وماكو شي ..

بس النص بين صدرهه طكع على ثوبهه دم

لما جريته واشوف شخوط شخوط مسطرات

على طول صدرهه لحد بدايه بطنهه هاي كلهه شخوط مايله ومدمايه ...

ضلت امي ادك على صدرهه وتنخى ياعلي

وانه كامش وجهه وبس اصحي بيهه وايدي ترجف ماعرف شسوي واحميهه ..

صار وجهه اصفففر  وشفايفهه بيضت وخفت لا بعد ماتتنفس زين

ضليت اصيح على اخوتي وامي لبستهه الدشداشه والحجاب وكبل اخذناهه للمستشفى

انه العن هالرجل الي ماعانتني اليوم وخلتني متبهذل .. اجر بيهه جر يلا كدرت الحكهم وين مااخذوهه ...

ضليت بس ادعي ربي يحفظهه هي مالها ذنب بشي ماريدها تنصاب باذى بسببي ..

خلولهه اوكسجين ونفس الشي حالهه ..

خليت دكتوره تكشف على صدرهه وراهه

كالت يسون تنظيف للقصبه الهوائيه

انه وامي واخويه عزيز وسيف كلنه واكفين نندعيلهه ... والدكتوره مخبوصه بيهه

ماانسى هاللحظه ليوم الدين ...

انه واكف بالعكازات ومغمض وبالي بس يمهه اندعيلهه وسمعت صوت الدكتوره

فتحت عيني باوعتلهه وهي باوعتلي بنظره

يأس وحزن وانطتني جيس شفاف وراحت وهي ساكته ....

الجيس بي دود فارسي كبار وكلهن دم

بعد ما شفتهن ماكدرت اوكف على حيلي

وكعت حتى العكاز وجلبت بجتف سيف

رجع انطاني العكاز وضل ساندني ويباوع للجيس وانه حتى صوتي احسه اختفى

مشيت ورحتلهه .. جانت امي يمهه وهي على نومتهه وبوجهه الاوكسجين ....

عزيز جابلي كرسي كعدت ومديت رجلي وضليت كامش ايدهه ...

بجيت هنا وضليت ساد حلكي واباوعلهه

ادري بيهه ماراح تسلم بعد .. ادري ضيعتهه

وربطتهه بعذاب العيشه ...

يجون يضربوهه ابر ويحولون على ايدهه الثانيه هاي انه ماعفتهه ولا وكفت دموعي

فصلت عن الدنيا كلهه بس افكر بيهه شلون انه جازفت بيهه هيج !!

شلون لو ماتت مثل نسوان اخوتي واضل عايش وشايل خطيتهه بركبتي وهي يتيمه

عيشتهه غبره وتصير موتتهه غبره وكله انه سببه ...

جانت عايشه براحه بال وانه الجبتهه لنص الاذيه وبعد ماتسلم بعيشتهه ...

حسيت عليهه تحرك ايدهه بايدي .. وكبل شلتهه خليتهه على وجهي .. واريد احجي ماكدر مخنوك فد مره حتى الشهكه ماتطلع مني ...

ضلت تباوعلي وجرت الاوكسجين من وجهه

وامي اجتي تحاجيهه وتبوس بيهه .. وهي كبل كالتلي..

- حيداااار اني جنت مو هنا

هزيتلهه براسي وهي كملت حجي..

- جنت ويه خمس نسوان

بيت مابيه سكف بس حياطين واني كل مره يشيلني  اثنين ويعلكني على حايط ويضلن لازماتني ويجن اثنين كل وحده توكف يم رجل مني وتنكلب دود كبار وتضل تمشي على جسمي والخامسه تشيلهن مني وترجع تخليني على غير حايط ويرجعن ينكلبن دود ويمشن عليه

ضلت تكح وتكح وتتفل دم ... وانه حتى كلمه اسم الله ماكدرت اكللهه .... ضال بس اسمعلهه وكامش ايدهه .. وماعندي كل حيل

ارتاحت شويه ورجعت تكلي ..

- الخامسه طلعتني من البيت واني ماكدر اصيح خانكتني باثنين اظافرهه مادري شلون مشتني وطلعتني بس رجعن اثنين منهن علكني على شجره يابسه وبشعرهن يجرن ويلفن بايدي والدود رجع صعد عليه واني اصيحلك واصيح لامك وانتو ماكو

كل الدود دخل بخشمي واني اختنك واشوفهن ساجدات جوه الشجره

صدكني جنت احس كلشي ماجنت احلم

جنت كاعده وكلشي اتذكر ماجنت نايمه

اني من انته غفيت جنت اسمع صوت مشي العسكر وضليت كاعده اركز بي وبعدين رحت ويه هذني اخذني لهذاك البيت واني كلشي اشوف بس ماكدر اوكف وارجع

دنكت على ايدهه خليت راسي عليهه وابجي بدون صوت ... بس ماجاي اكدر اهدي نفسي

حسيت وكعتهه هي الاخيره لكل حيلي على اهلي ..

ضلت بس تكح وامي تمسح بحلكهه وخشمهه

كله دم .. وهي ترتاح وباصابعهه تمسح دموعي وتبتسم .. 

رجعت عليهه دكتوره وتباوعلي نفس هذيج النظره .. وانه اباوعلهه بدمعتي ..

كتبتلهه بخاخ وكالت اذا تختنك استعملوه الهه

وطلعناهه ...

الطريق كله هي زينه وتضحك تكول لامي

- هاي الحنافيش طكني بسحر بس خوش لمه مسوين .. صدك اكولج عيني علويه متعرفين هذني السحارات ليش شعرهن طويل ويخبل

يعني هو صح خايس وكله وصح بس طويل خرب بعرضهن مو شعر حبل هالمتنه

شو اني شعري هالكداته وخفيف صرفت عليه فلوس يابو فلوس يلا خليته بي خير وميوكع

بس مصار طويل

بس يلا هو الحظ للزركات حتى الشعر ماخذاته مربع من عدنا

نزلنه من السياره وطبينه البيت وبس عبرت باب الهول كبل ضلت تعيط وساده اذانهه

امي اخذتهه بحضنهه تسمي عليهه وجرتهه كعدتهه وانه ارفع براسهه وافتح بعينهه واحاجيهه وهي بس عياط وساده اذانهه

شمرت العكازات وكعدت يمهه .. حضنتهه وهي بس تضرب بيه وانه اسمي عليهه اقرالهه ايات وهي تزيد عيااااط وتضرب براسهه .. جرت حجابهه وانه اجر بايدهه

وهي تضرب راسهه بصدري

امي جابت القران فتحته بوجهه وهي ادفع بالكتاب والدم يجري من خشمهه وضلت تشهك وتختنك ..

نومتهه وضليت انطيهه من البخاخ وهي تاخذ نفس وتكح وترجع تتشاهك ..

امي ثبرت البيت بالصلاه على محمد وابويه يمهه يغسللهه وانه مادري شسويلهه منين

مااكمشهه تدفعني وتعيط ..

ضلينه اليوم كله احنه على نفس الكعده وياهه

وهي تهدا شويه وترجع تعيط وتحفز من مكانهه تضل تلوب بالهول وساده اذنهه

وامي وراهه تهدي بيهه وتقرالهه ايات

وهي نفس الحال من تتعب تضل تتشاهك

وتنكلب صفررره ويتلاحكولهه سيف وعزيز يجيبوهه ينوموهه ويضلون يخلولهه من البخاخ ..

وانه لا حيلي الي يعيني ولا رجلي الي نصحت وياي هاليوم ولا بالي شي واسويه بهالحال... ولا هي الي تخليني اوصل يمهه

تضل تدفع وتعيط بس اوصلهه ...

صار الغروب وكملو اهلي صلاه وهي بس تباوعلهم وهاديه ... ومن ظلمت كلش

ضلت تصيحلي وتريدني اجي يمهه ...

كعدت يم راسهه وهي خلت ايدي على وجهه وتكلي ...

- مادري شبيه حيداااار بلعومي مجرح

ونفس نار بصدري دايصير

دنكت راسي عليهه بوستهه وشاورتهه ...

- رور تحبيني ......

.

.

يتبع

** ردتو برتوت وماكدرت الاحداث ماتنكطع

فكملته بارت طويل .. هذا اصفنوله شويه

ويجيكم الثاني اعتذار و محبه 💕**

..♣️🩸 ماء مغلي 🩸♣️..

* adzzon *

كعدت يم راسهه وهي خلت ايدي على وجهه وتكلي ...

- مادري شبيه حيداااار بلعومي مجرح

ونفس نار بصدري دايصير

دنكت راسي عليهه بوستهه وشاورتهه ...

- رور تحبيني !

-هاااي شبيييييك

- بس كليلي تحبيني ! حتى لو ذره محبه

اي شخص تعتبريني بحياتج اخوج صديقج ابوج رجلج حبيبج اي صفه من هذني الي بيهن محبه عندج ؟؟

كليلي اي او لا

- اي

- زين يعني الي خاطر عندج واحلفج بخاطري !

- اي

- الحمدلله .. بيج حيل تكومين نكعد جوه براحتنه ؟

- اريد اسبح داحس نفسي حيييل وصخه وكارهه روحي

- جا يلا امشي

اخذت العكازات ووكفت وهي كمشت بالعكاز ورحنه لغرفه ابويه ..

هي مخليه ملابس الهه هنا بوفيه امي لان احنه مانخليهه كل شويه تصعد وحدهه

للطابق الثالث ..

طلعت ملابسهه وتباوعلي .. ابتسمتلهه

ورحت كدامهه طلعت للحمام ..

اجتي وتكلي ..

- تره عادي اسبح وحدي مو مكرمه

صحصحت هسه اوووكييي تكدر تروح

- لااا انه عاجبني اضل وياج

-هي باليعجبك ! ماريدك يمي تكعد تبصبص وتفتح عشره عشره

روح اني ماطول بالسبح

- روور وعلي بالي غير الي بالج

تعالي ومعليج وعلي ماسوي شي ولا بنفسي ابصبص منا ومنا

جريت ايدهه وهي عاوجه حلكهه وطبت للحمام .. سدت الباب وانه كعدت على السكنلي هنا مخليه الي .. وضليت اباوعلهه

وهي متخوصره ..

- يعني هسه شستفاد من كعدتك هنا

حتى بالحمام مكابلني !!!

يااخي عوفني بشر يريد يرتاح وحده

خصوصيه هاااي مو بكلشي تحشر نفسك

- مريتي انتي عادي عادي

يلا نزعي وخلي نسبح

- شو مستهتر ولك !

- وعلييي مامستهتر جاي اكلج نزعي حتى نسبح هسه شني ! تسبحين بهدومج !

- مامرتاحتلك اااابد وبس اشوف عقلك شطح

كبل اطلع ضيم كلبي كله بيك

بعد كلتلك فديربالك

ضحكت ونزعت ملابسي .. شمرتهن الهه

وهي اخذتهن شمرتهن بالسله بعصبيه

ونزعت ملابسهه واجتي فتحت الدوش

وضلت دايره ظهرها الي وتسبح ..

ضليت اباوع لجسمهه واتمعن بالرصعات

الي باخر ظهرهه ..

مخلي ايدي على خدي وصافن عليهن

وهي اندارت وشافتني هيج كبل شمرت مي على وجهي ..

- هااا عوينجي متكدر ادري بيك اذا مو تشطح بعقلك متجوز

- ههههه لج انتي اجنبيه ؟

بروح ابوج كليلي الج اصل اجنبي ؟

- لاااااااا شيوديني عليهم !

لو اهلي اجانب اجي اكابلك واكعد !

- مااصدك

بيج كلشي اجنبي

ااخ بويه .. اشوف ومااطول

- ديلاااا عاد لحيت

مو كلت بطل هالسوالف مالي خلك

مو وكتك كولش

- تعالي شو بس انتي تسبحين

جا وانه !

جرت الدوش اليدوي وخلته بحضني ..

- انته اسبح مالي خلك دلال تره روحي طافره

ضليت اغسل جسمي وهي تغسل شعرهه

شويه وكامت تكح وكعدت بالكاع ..

ضلت تكح وتتفل دم ...

انه ماكدر اكوم واكعد يمهه وكاره نفسي من وره رجلي الي تسكطت بعازتي الهه

ميلت جسمي لجهتهه وجريت ايدهه وهي كامت واجتي وكفت يمي وتمسح بعيونهه

ضليت ارشلهه مي على ايدهه وتغسل حلكهه

وخليتهه تكعد على رجلي اليسره ..

ضليت مخلي ايدي على وجهه وهي تكلي ..

- حيداار داحس بلعومي بي شي ديحركني

هذا النفس كوله نار احسه يلهب هنا بنص ضلوعي

خليت ايدي على اثر الجروح بصدرهه واكللهه ..

- هناا ؟

- اي داحس بثكل بي وحااار فد مره هيج

من اخذ نفس عبالك ينزل يلهب

- رور انتي قويه لتخافين مااعوفج مريضه هيج بس خلي ايدج بايدي وثقي بيه وانه اعالجج بنفسي

مو كايلج اي شي يصيرلج انه اعالجج ماعوفج .. فلتخافين بس اصبري شويه

وضلي متمسكه بيه وكلشي يرجع زين

وداعت جمالج

بوست خدهه وهي بس تباوع بعيوني وتالي كامت رجعت غسلت شعرهه وانه هم غسلت شعري وشطفت جسمي وهي سدت الدوش

كلتلهه ..

- ماشفتج غسلتي مثل ممعلمج

- هسه شبيه اااني هو بس عركانه

- ميخالف هذا يحفظ جسمج من كل مس شيطان ارجعي اغسلي يلا هي ثواني

رجعت فتحت الدوش وغسلت مثل مامعلمهه

بعدين راحت تلبس واجتي تنشف شعري

اخذت الخاولي منهه ونشفت باقي جسمي

ولبست وطلعنه ..

كعدنا بغرفه ابويه .. هي ضلت تمشط وانه اعدل بالمخاد لكعدتي ...

كملت تمشيط واجتي خلت راسهه على رجلي وضلت مغطيه عيونهه ...

درت وجهه عليه وكلتلهه..

- رور مو صار الوكت تصيرين نفس ديني

ضلت صافنه بوجهي بعدين كلتلي..

-لا

- لا هذا انسب وكت

بعدين انتي اصلا كلشي جاي تتعلميه هو من الاسلام كلشي تحبيه هو من الاسلام

انتي تحبيني وتحبين اهلي واحنه مسلمين

بعد يعني على محبتنا على ماتحبين دينا ؟

- احبه اي بس ماعرفه زين

- ادخلي بي وتكومين كلشي تعرفيه وتتبعيه

بسهوله

- هسه شطلعتلي بهالسالفه

اني بيا حال !!

- رور لااازم تسلمين وتبدين تصلين وتعينين نفسج حتى ترجع عافيتج

- ويييين ،. ماااصليي لتفكر بهالشي

-ليش بويه شبيها الصلاه وكارهتها !

-ماكرها بس ماااافهمها

-اشرحلج كلشي عليهه مو فد معضله هي

بس لازم تصلين لازم تقوين ايمانج

- ماااصليييي

اول شي مابيه حيل

ثاني شي اني مو شكول صلاه

ثالث شي ادري بروحي مالتزم بيهه

شكو بعد افوت نفسي بشغلات مو كدهه !

- بويه انه وياج ماعوفج اخليج تلتزمين بيهه وتحبيهه لا تعاندين ولج

- اكولك شبيك انته هااا !!

يعني اني حتى لوووو صرت زينه وملتزمه بيهه ،حياتي متخليني اكمل بزيني هذا اوووكي

افهمني اني ماريد اليوم اصلي منا وارجع باجر اطك البطل واجر بيك وره الثاني

وانعل باهل فلان وعلان

- عوفيهن كلشي عوفي لترجعين هناك بعد

بيعي كلشي واخلصي واشتري اخرتج

- منو يخليني اعوف !

ناسي لو شغلي لو عمي لو زماني الاعوج !

اعوفهن وين اروح !!

- شبيج رور وانه وين رحت عنج !

- انته تاليتك تعوفني اذا مو اليوم باجر

بعد سنه سنتين ... تعوفني ماتضل وياي

مو زين لحد هسه جارعني وكاعد وياي

لو ما مصلحتك جان بفلس ماتكلبني

- هسه انتي ليش هالكد متشائمه كولي يالله وابدي كلشي من جديد وربج يدبرلج احسن عيشه اذا وياي واذا بدوني

- عيووونييي اني مو متشائمه اني داحجي الواقع

يعني مثلا صرت مسلمه وصرت متدينه مثل اهلك واختك واستشرفت ورحت بعت كلشي عندي و اجيت وكلتلك خلي نكمل عيشتنه سوه

ماعندي بعد احد بحياتي كلشي عفت بس انته ضليت الي

راح تقبلني ؟

ضلت تباوع لعيوني وانه اسأل نفسي نفس السؤال .. راح انسى كلشي واقبلهه مره الي وام بيتي وجهالي تصير ؟!

ضليت ساكت شويه وكلتلهه..

- اذا شوفتيني انتي صدك تغيرتي وتحجيلي كلشي عنج الزين والموزين

وتبقين وفيه الي وتشوفيني صدك تستاهليني

اتقبلج واحطج على راسي

- جذاااااب هذا حجي الليل عمري

بس يصبح الصبح وتفتح عقلك زين

بعد بوجهي متباوع

- لااااا والله وجلال الله مو جذب

- مااصدكك لتحلف

- شوفي رور انه من ساعه العرفتج كلشي احجيلج وصريح وياج

ولهالساعه انه ماجذبت عليج بشي وكل العندي احجيه الج

وهسه اعترفلج ... حتى لو اطلكنه انه ماتزوج ولا عاشر مره غيرج

انه ما أمن بالنسوان واذا سمعتي عني تزوجتلي مره منا فكولي هذا حيدر طكوه بسحر وغسلو عقلو واخذوه زوجوه وهوه اعمى كلشي مايدري

لان ااانه اعيش محروم و وحيد واموت وماعندي ولد يشيل اسمي ولاااا اتزوجلي مره منا لو جانت بنت النبي هم راح اشك بيهه

بعد ماكدر اصفي نيتي على مره لو منين مايجيبوهه ... الي شفته مو هين ويضل طابع براسي للموت

والله هسه اي مره ما أمنلهه

تغدرني ساعه الساعه بس ميعجبها طبعي

كبل تمشي تكمش درب السحوره وترجع عليه نفس العله

خوو اذا طلعت زينه يعني وتخاف الله

متمشي للسحوره تروح تكمش درب ام الخيره

ورشرشه للمحبه

وهي وحده اضرب من الثانيه هاي تلبس جن وهاي تربط بسحر وبالحالتين انه مطيوح حظي

ضليت ارفع بشعري واكللهه ...

- بس انتي أمن بيج ماتغدريني بهالطيحان حظ هذا

و ماكسر بخطيتج والله انتي بعدج متعرفين كلبي شلون صافي ..

والله هسه شكد ماحياتج هوسه ولعبان نفس

والله يعلم شعندج ماعندج وماترضين تحجيه

بس اذا عفتي كلشي ومشيتي بالتوبه وردتي قرب الله وردتيني اضل وياج والله ماعوفج

ولا اعيرج بشي ولا اذكر طاري الراح ابد

بس كون توفيلي بكل لحظه وتقدرين كلشي اسويه الج وتلتزمين بايمانج ودينج بعد كلشي ماريد منج

لان انه صراحه غيرج مره بعد ماعاشر

لو يصير عمري مية سنه بس بحاله وحده

يمكن تلكيني متزوج الا اذا تكطعن خيوط عقلي وطكني بسحر مصخم مثل وجوهن

يلا اتزوج بعد

وهااا هم تحجيلي كل شي عنج .. خوما نعيش هم عمياوي !

كعدت وضلت تعدل ملابسهه وتكلي ..

- احس هذا فخ لحياتي

ماكدر امن بحجيك كبل اعذرني

- براحتج بس انه حجيت الي بكلبي

بعد انتي بكيفج شوفي نفسج شتهوى وسوي

- اووكي

- يلاا نرجع للدين

- ماا اصلي مو هسه مستحيل لتحاول

- زين انطقي الشهاده خالصه لوجه الله واعلني ان دينج الاسلام

- شكو هالكد تلح ويااااااي

- ريري اذا مسويتيهه كلشي اعالجج بي ضايع بمهب الريح

ماراح تفهميني ولا تعينيني بي راح اضل اتعب وحدي وانتي كلشي ماتستلمين

- اييييي ماااريد لتعالجني هسه شبيه اني

هو سحر صخيمه يطبه مرض ان راح وان ماراح شسويله اوووي لعبت نفسي من سيرتهن

عوفني وحدي لتضل تلحكني خلي ارتاح وحدي

- شبيييج انتي نكلبتي هيج مو جاي نحجي وشلونه ! شجاج

- انته متفهم !!! لك اني دالوب

صار كم يوم كاطعه التدخين وروحي شايغه

وحتى الشرب خلص عندي وداصبر نفسي بكلشي اشتت تفكيري بس دااااتعذذذب سمعتتتتتت

فوك ضيمي هذا ااااني مخنوكه مخنووووكه

صدري ناااار

عوفني مطايقتك ولا طايقه الدين ولا اي صخام بهالدنيا

طلعت من الغرفه وانه ضليت بس استغفر الله

صعب تنعدل وياي صعععب حيل صعب

شكد ماانه جازفت وكلت انسى كلشي واتقبلها

شكد مااهي صعبه ومايلين راسها ..

هديت اعصابي وصرت اعذرها واكول حقها هذني ادمان بدمها غصب عنها تصير اعصاب ونفسها تضيك ...

نامو امي وابويه يمنه بالهول ..

ريري يم امي نايمه وكلشي هدوء

للصبح امي واكفه من الدرج تصيح الجهال

حتى ينزلون يتريكون واخوتي من فوك صوتهم وياهم عراك ...

ولحد ماطلعو يلا كعدت ريري واجتي يمنه بالمطبخ ... امي تحبها تعاملها كأنها بنيتها

مو جنتها .. هيج اداريها وتشوفها بعدهه صغيره حديثه بعيونها ...

امي جانت تعجن وكملت غسلت واخذت مي العجين طلعت رشكته بالحديقه وريري

بايدهه كلاص الحليب كبل شمرته وضلت تعيط ...

كابلناهه انه وامي نسمي عليهه نحاجيهه

نريدها بس تفهمنا شي وهي ابد فصلت بعد

ساده اذانها وتعيط وترجع تعصر براسها

وبعدين تضل تتشاهك وتكمش بيه متكدر تتنفس وتضل فاكه حلكهه وتشهك وامي

تنطيني البخاخ اخليلهه وهي تاخذ نفس وتضل بس تكح وتتفل دم ...

تضل تفتر بالبيت تلوب وتصيح صوت براسي راح يشك اذني ..

شويه وتهدأ تضل متمدده وراسهه بحضن امي

بعدهه مارتاحت وترجع لنفس الحال ..

واحنه كلنه انذار وياهه ... على رمشه عينها نفز وياهه ..

خابرت الحجي وضليت احجيله كلشي عليها

وكالي باجر من الصبح يمك بس صبرها هالليله ..

رجعت اخابر ابو سعد وشكد يدك ومايفتح خط

وانه مصيبتي رجلي .. مخليتني ضعيف حال

جان رحت لبيته وفهمت شي عليهه ..

امي عافتهه وراحت حتى تخبز تأخرت

وعايفه العجين ..

وانه كعدت يمهه وجريتهه وهي خاوي جسمهه .. حتى راسهه مو ثابت ضاله مدندله راسهه وراخي جسمهه ..

خليتهه مرتجيه على حافه القنفه وكمشت راسهه ضليت اصحي بيهه وخليتهه تفتح وتضل تباوعلي .. وهي وجهه عبالك ملامحه فارغه احسهه ماجاي حتى تشوفني ..

ضلت تكح وانه جريت الكلينس امسح الدم الي يتحمع بحلكهه .. ومن اخذت نفس شويه

ضليت اشاورهه ...

- ريري تسمعيني مركزه وياي !

- اي اي

- انطقي بالشهاده يلا

- مو احجيهه بالسبح بعد شكوو مابيه حيل ديانتك الزايده عوفني تعبانه

- ميخالف هاي اهم شي يلا ياعيني انطقيهه

انتي هذيج تحجيها وممقتنعه بيها ادري بيج

بس لخاطر النظافه لان انتي تحسستي بهالسالفه

ضلت كامشه فانيلتي ومدنكه بس تكح

و الدم مالحك امسحه الها يكت من حلكهه

رفعت راسها واكللها..

- وياي يلا كولي

اشهد أن لا اله الا الله

يلاا رور يلا عيني نفسج يلا لاتخلين الشيطان يضعفج ويستغلج

باوعي بعيوني وضلي مركزه ويااي يلا

وياي كولي اشهد أن لا اله الا الله

شهكت وجلبت بركبتي وانه كامش وجهه

وعيني بعينهه .. بوست راسهه وكلتلهه..

- لا تحمليني ذنبج والله خطيتج بركبتي

وماتحملهه .. لخااطر اعزازج عينيني

يلا رور انتي محبتج للاسلام مو لغير دين

وحدي الله واطلبي عونه

- داختنك الهوا براسي بس صدري مخنوووك

اخذت البخاخ وانطيتهه وهي تجر نفس من كل كلبهه وتضل تكح ...

كمشت ايدهه وكلتلهه ..

- يلاا رور لاتضيعين روحج وتضيعيني

انه والله ماعيش اذا متي بسببي انه متحمل ذنبج انه سبب كلشي بيج دخيل الله

لا تخليني متعذب هيج بس طيعيني هالمره

ضلت تكح وتهز براسهه اي ..

خليت وجهه بين ايدي وضليت اكللهه ...

- يلا وياي ركزي

اشهد ان لا اله الا الله وحده لا شريك له

- اشهد ان لا اله الا

وخرت مني وضلت تكح وتذب دم من حلكهه

رجعت اخذت نفس وكالت ..

- اشهد ان لا اله الا الله وحده لا شريك له

- واشهد أن محمدًا رسول الله

- واشهد أن محمدًا رسول الله

ضلت كامشه راسهه وتعصر بي وانه جريت ايدهه وضليت ارفع براسهه واكللهه ..

- يلا مو تحبين علي

يلا كولي اشهد ان عليًا ولي الله

- اشهد إن عليًا ولي الله

تكح وتعصر بفانيلتي وانه اسمي عليهه

وضلت هي جره وحده بالكحه الا ان ضلت تتقيء بس دم ..

خليتهه تتمدد وضليت امسح وجهه وركبتهه

كلتلي ..

- اني صرت مسلمه بس انتو تضلون نابذيني

مو علمودك اني اسلمت بس لان حسيت اني محتاجه رب

- معليج بالناس همه مايعرفوج

انه اعرفج ومانبذج انه اعرف الزين الي بيج

وكافي انتي ممحتاجه للناس شكو تهتمين !

- ليش متكرهني ! ولا مره شفتك كرهتني وجزت روحك مني

- مادري من الله نفسي مرتاحتلج

- حيداار تكدر ترجعلي عافيتي لو لا

كولي الصراحه لتخليني اتأمل جذب

- بعون الله اكدر

- واذا مكدرت وتاليتي اصير عايشه عيشه مصخمه واموت موته مصخمه

- اموت وياج هم تضل بيه روح على ذنبج !

وعلي ليله والحكج انه كلشي ولا ضميري

يجركني حرك وعلي

- ههه عرفت نقطه ضعفك ياا حويدر

- فطير وعلي مفضوح

ضلت تضحك شويه وكامت تكح وتأشرلي على ظهرها .. ضليت ادك على ظهرها

وهي تكح وضلت تتقيء ..

ويه الدم هالمره وكع نمل نفسه هذاك

ضلت هي مغمضه ونايمه والدم بعده بحلكهه و وجهه ..

رجعت مسحته وغسلت وجهه وامي اجتي

جايبتلهه كرصه خبز حار وزبده ودبس

شافت حالهه وضلت فاكه زيجهه وتدعي

على الي اذوهه ..

اخذت التلفون وصورت كل الي ذبته

كلت يفيد نفهم منه شنو اصل عملها ...

ابويه على نفس هداوته بمكانه ضال ويسبح

وماخله عينه علينه ...

ضلت هي نايمه ساعه ورجعت لنفس حالهه

تختنك وتضل تعيط من صوت براسهه وكل شويه تكح والدم ويه كحتهه وساعه تريدني ساعه تتخبل بس اوصلهه ..

لليل وره الغروب يلااا سكنت ...

كلت لابويه نسويلهه جلب عمل وكالي باجر من يجي الحجي ...

امي تعبت من البيت والجهال ومشاكلهم

مايكعدون راحه واخوتي بالشغل مايرجعون لليل وهي تضل حايره بيهم ..

وريري اخذتهه بغرفه ابويه هناك ضليت قافل الباب وكاعد وياهه .. لان هي تلوب ماتكعد

وانه ماكدر اضل افتر وراهه رجلي ماتعيني

فضليت مكابلهه بهالغرفه تكح تعيط تختنك انه يمهه ...

بالليل هي تهدأ ترجع لوعيهه زين وتضل تكول جوعانه واريد اسبح وتضل تجفص وياي بالحجي وتكلي اوصي احمد يجيبلي

تكه جكاير ..

ونضل ناكل ونسولف نتناكر هواي

وتاخذ تلفونها تستلم الجماعه دك رزايل

وتخابر لكانيور كاميرا تضل تناغيه

ونضل انه وياهه ندرس الجهال وتوكف تغسل ملابسهم وملابسنه ...

ورايحه جايه تسب وتنعل بطنطل وحنفيش

وتالي تبدل وتجي تنام يمي بالغرفه .. واهلي حولو بالهول ...

ماحاجيهه ادري بيهه تعبانه وانه هم تعبان

اعوفهه بس نايمه على ايدي واغمض

اغفى ومن تصير الصلاه ويه ما توه يكسر الجو هي ترجع تختنك ... وينعاد نفس الحال

ضليت اخليهه بحضني واقرا يم راسهه القران وهي تبجي وتعيط وتعض بجتفي تريد تكوم

وانه ماخليهه ...

لحد ما طلعو الجهال للمدارس امي اجتي واخذتهه مني .. امي تريد تفتهم منهه شبيهه

اليوجعهه شنو ! الي تشوفه شنو !

هي بس تبجي وتعصر براسهه ...

خابرت الحجي وكالي بالطريق جايين ..

امي كامت حضرتهه لبستهه طويل وحجابهه

واخذتهه بالهول ...

سمعت الباب اندكت قوي .. طلع اخويه عزيز يفتحها ورجع هو والحجي ...

سلم وكبل صاحلهه ...

- رااايه اشو ماتلكيتيني اليوم بويه

هي بس تباوعله وتشهك ودموع .. ضل هو واكف يم الباب ويأشرلهه يريدهه تجيه ..

امي كومتهه وهي راحت تمشيله وتمسح بوجهه ... وهو تلكاهه وضل كامش ايدهه ويباوعلهه وهي تبجي وترد تمسح بدموعها

كاللها...

-سبحتج وينهه. ؟

- فوك

- شتسوي فوك غير تضل بايدج !

كالو رايه مخنوكه وتعبانه واجيت متعنيلج

حتى ما تريكت كلت نتريك من ايدج

هااا ماتمشين تسويلنه لكمه بويه !

- اي اووكي تاكل فاهي ؟

- لا نص ملح انه الحمدلله مو مريض ضغط

والعافيه رزق والحمدلله

راحت وامي وياهه .. وامي ضاله شايله البخاخ بايدهه خاف ساعه الساعه تختنك

رجعت احجيله كلشي يصير وياهه وابويه كاله .. كشفت الهه كتاب وكلشي بي مبهم

واحتاجيتك ..

انه هنا خفت بس لا اسمهه الجذبي هيج يأثر

ومابينت عند ابويه !!!

لان هو كشف كتابه بالمضبوط ماشفته محتار عليه بيوم ...

ضل الحجي ساكت ويباوعلي وانه كمت اعرك هالسالفه حيل خوفتني ...

كالي الحجي...

- اكلك بويه انته ليش متهاون بعقد المحكمه لليوم ؟

- هاا .. مصار مجال من سالفه لسالفه كضيناهه

- هاي دنيا ماتتأمن ياحيدر

على فرحه الزهره اعقد محكمه وثبت حقوقهه

هاي مو سالفه تنسكت عليهه وتتأجل

- اي ان شالله بس تصير زينه على فرحه الزهره نعقد بعد ماناجلهه

- زين اسمع

من تفتح رجلك بالسلامة تاخذهه وتبات بيهه بضريح امير المؤمنين (ع) وحدكم روحو

ومصباح ثاني يوم تعال لبيتي غداكم عندي

- ان شاءالله

اجتي جايبه الريوك خلت الصينية على الطبله

وكعدت يمي .. درت وجهه عليه واكللهه زينه

تأشرلي لا وعيونهه مغوركه دموع بس تنزل دمعه كبل تمسحهه ...

الحجي اكل واخذ كلاص الحليب شرب قطرتين وانطاهه الكلاص كللهه اشربي كله

هي بس شربته وخلت الكلاص على يده القنفه

كبل كامت وراحت ركض للمغسله ...

اخذت عكازي ورحتلهه .. شفت الحليب الي شربته انكلب دم احمر على سواد

على وكفتنه اجاهه الحجي وضليت احجيله وهو يكلي خلي تنام ترتاح ..

اخذتهه للغرفه وضلت نايمه على ايدي وانه اقرالهه قران وهي تكلي ...

- لك كلششششي مافهم منك انته شدتحجي براسي هو من دون شي مسطوور لتزيدهه عليه

- هاي الايات تبعد عنج كل مس وكل شر

وعمل سوء مره مرتين تكومين تفهميهه

هسه انتي بس اسكتي وحاولي تركزين بصوتي لاتخلين بالج يروح بغير شي

-لك صخيم متعوده على صوتك مواويل

باذني يدك مو هيج ايمان وقران داستغرب

ضحكت ورجعت سميت بسم الله واقرالهه بتجويد ... بالبدايه مرتاحه بعدين رجعت

لوجع راسهه والعياط ...

دكو الباب و وخرت عنهه وصحتلهم يجون ..

وهي بس انفتح الباب كامت طلعت وهي تبجي ...

امي راحت وراهه وانه لحكتهم وهي ضلت بالحديقه تريد تجر نفس وتتشاهك والحجي

عايفهه ويباوع على البيوت .. يباوع لستاره بيتنه للشجر .. جوه السياره ..

ماسكنت ولا كعدت بعد .. والحجي عافهه وطب جوه كالي لليل نتفاهم ...

ضليت يمهه انه ماكدر اوكف هواي وهي ماترضى تكعد ... وضليت محتار وياهه

امي مافاركتهه وتغسللهه كل شويه وتسمي عليهه وهي تتخبل بالزايد ...

ضلت اثنينه متريدنا وكاعده وحدهه بزاويه الحديقه ... مكرفصه نفسهه وتبجي وتمسح بجسمهه وتحك بي وترجع تعصر براسهه

واحنه صرنا نتمنى جيه الليل لخاطر ترتاح

ورجعو الجهال من المدارس وتغدو ونامو وانه وياهه بنفس كعدتنه ضالين بالشمس

امي تروح وترجع علينه وهي ماترضى

الي يحاجيهه تكب بوجهه ...

امي تكعد يمهه تتوسل بيهه تاكل لكمه وهي تدفع بيهه وتعيط وتشيل الاكل وتشمره

وللمغرب على هالحال ... فجأه هي تمددت بمكان كعدتهه ونامت ...

رحت كعدت يمهه وشلت راسهه خليته على رجلي ... وهي تكلي ...

- داموت حيداااار شوفلي حل

اكره ضعفي هذا اكرهه لتخليني هيج مذلوله نفسي

دنكت بوست راسهه وضليت اقنعهه نطب جوه ونكعد ويه الحجي وهي قبلت وكامت

بس روحهه خاويه ...

تتلمس بالحايط وتمشي .. لحد ماطبينه الهول

تلكتهه امي واخذتهه غسلتلهه وجابتهه

كعد يمهه الحجي وكللهه...

- منو يعرف اسم امج

-محد يعرفه

- زين احجيلي شتشوفين تسمعين بهذا النهار كله

- ما اشوف شي بس صوت براسي مال هوا عااالي

واحس صدري ينسحب ليفوك واختنك

وجسمي يضل يحكني ركبتي احس واحد يجرني منها ويفر بيه هيج ادوووخ فدمره راسي ينسطر

باوعلي الحجي وكالي ..

-فهمت ؟

- اي فهمت بس شلون !

- شياطين بعد يسوون من الماكو اكو

- يفيد الجلب بي ؟ هي قويه تتحمل وسباعيه متخاف من شي

- جا نتوكل على بركه الله

كلتلهه تكعد بالكاع وهي ضلت تسالني شنو شنسوي ؟؟ وانه اطمنهه ميصير شي بس تضل هادئه وتطيعنا ..

ابويه انطاهه القران كاللهه صلي على النبي وسمي بسم الله وفتحي ... فتحته وانطته اله وهو باوع بي شويه وكال ...

- مشافاه باذن الله

ضل ساكت وانه اعرف ابويه باله شي .. شاف شي ومحجاه ... خليت بالي بس وياهه .. الحجي جان يحضر الغراض ورجع هو وامي كعد كدامهه وخله النجانه والغطى كدامهه وكاللهه تخلي ايديهه عليه وتضل تردد وراه شنو يكول ...

ضلت ريري تردد وراه ومن وصل لوكت انه يفتحه ويشوف شنو موجود ... هي كامت تكح وتاشرلي على البخاخ ..

امي كبل انطتهيااه وضلت تاخذ نفس وترجع تكح .. والحجي بعده ينتظرها ... من هدئت شويه خلاها تفتحه بنفسهه

والصدمه هنا بس لعابه بنفس لون شعرها ونقاط بشرتهه الحمره منقطيهه بالقلم ومربوط على ايديهه شعر اسود بس كل ايد ملفوفه بخصله كامله من الشعر ... والدنابيس صايره خمسه واحد وره الثاني منبتات بنص الصدر واللعابه بلاستك مو قماش ..

ريري شالتهه واجتي وتكولي ........

- عزا حيدااار هاي صدك لو اني طبكن عندي !!

- لاا صدك صدك هذا كيدهن ونفس الي شفتي نفسج بي

- يعني اني شلون رحت شلون تحولت هيج شلون !!! كلشي مدافتهم !

- انطيهه للحجي واكعدي يمي وافهمج

انطتهه اله وغسلت ايدهه واجتي كعدت يمي .. ضليت احجيلهه مشاور ...

- هذوله مو ميعرفون اسمج فمسويج مجسم وينسبوج بنت حواء ويمشي الشغل

- صخااااامات حتى هيج مااسلم منهن !!

- الي يريد ياّذي كلشي يسوي ويخترع .. هاي انتي من جنت تشوفين هيج ذاك اليوم . هاي جان الشغل جاي يصير على المجسم هذا بس انتي لشعورج يوصل كلشي جاي يصيرلج

الحمدلله اتلاحكناله من البدايه

- يااااااااااا صخامات ..ااااخ ولك هذا حجيكم ميجلب بشر ! جان حطلياهن بالنجانه واكعدلهن ركبه ونص الا افلسهن تفليس

جايفات كادرات ع البعيد البعيد البرابيك هذني اكصصص ايدي اذا ماطلعن عصابه ومفتحين مكوده باسم السحر بيناتهن

- ايي اييي ارجعي رور ارجعي هدي عليهن محد دواهن غيرج

ضلت تهز برجلهه واطكطك اصابعهه وانه باوعت للحجي بدا يفتح الشعر من الايد وهي تزيد بطكه اصابعهه وتصك بسنونهه

كمشت ايدهه كبل باوعتلي بعين تجدح وكلتلي ...

- وخر لتجي يمي

- رور لا تخافين كلشي اله وكت شويه وينتهي

- حجي يفيدك

عافتني وكامت طلعت من الغرفه بكل هدوء وانه دزيت امي وراهه .. بين ماخذت العكاز ورحتلهه ..

شفتهه صعدت فوك وهي اطك ركبتهه انه اصيح عليهه وامي وراهه وتصيح حتى توكف وهي ماهتمت كملت الدرج وصعدت لغرفتهه وقفلت الباب وامي تخبلت ...

ضلت تصيح علينه البنيه راح تروح من ايدنا والحكوو الحكو ...

ضليت اصيح لسيف وهو اجاني بسرعه ودزيته عليهه ... ضل يدك بالباب ويريدهه تفتح وهي ماترد على احد ...

وبهاللحظه رجع عزيز .. وانه ضليت اصيح لسيف يكسر الباب ..

وعزيز من فهم السالفه صعد ركض وضل هو وسيف يحاولون يكسرون بالباب وانه انبح صوتي من صياحي الهه وهي ماترد ..

رحت على الحجي واتوسل بي يوكف ويعوف كلشي لا يروح يصيرلهه شي مانعرف احنه طبيعه عملهم شلونه وخاف اكو غيره بعد وهو يكلي لتدخل .. ضليت اتلاغى وياه وابويه هم وكف وياي بس هو ماقتنع ...

وبعدنه نتلاغى وضل سيف يصيحلي .. رحت يم الدرج وانه رجلي ضلت تصل عليه من فوك ...

ضل يكلي ...

- المره ملبوسه جن .... مكصصه شعرهه ومسفطته على الفراش

ضليت ادك على راسي واصيحلهه وهي بس صوت ضحك ينسمع منهه ..

رحت على الحجي وجريت اللعبه من ايد وشمرتهه بالكاع .. جان هو شايل الشعر الي بالايد منهه والباروكه هم

ضليت اعيط عليه واكله على الصار بريري .. وهو يريدني اهدا وعافي وراح صعدلهه .. ضليت انه جوه احرك بروحي واصيح عليهم ينزلوهه ..

كلبت البيت بالصياح والجهال كلهه واكفه يم الدرج وتبجي .. وانكلب البيت هوسه للضالين ...

نزل عزيز شايلهه بين ايديه وهي ولا نفس ...

خلاهه بالغرفه وضليت كاعد يم راسهه .. واصحي بيهه اغسللهه وماكو فاقده فدنوب ....

مامنتبه على احد بعد بالي كله يمهه ... احاجيهه اريد منهه بس حتى لو ترمش وكمت اصيح لعزيز يشغل السياره ناخذهه للمستشفى

اخاف اختنكت بعد ماتكدر تاخذ نفس وتروح بيهه ...

والحجي جاب كشف رجليهه وذب عليهن ماي حار .. اني صحت عليه ........

- لييييييش حجيييي رجلهه لااا تاذيهه

هي كبل ويه حجيي عاطت وضلت تكوم بنفسهه وتكح وامي كبل خلت سله الزباله بحضنهه وهي ضلت تتقيء بس شعر ودم

غسلتلهه وحضنتهه وهي تكلي ...

- انته راح تموتني عوفني ماريدك ماريد اهلك ماااااريد رجعني لبيتي

رجعني ماريدكككككم رجعوني لبيتتتتي اريد اضل بيتي رجعوني

- كلشي يصير زين والله بس صبر شويه رووور عيني انتي بس اصبري وياي شويه

- مااااضل وياااااااك عوووفني اكرهكم وااحد واااحد اكرهككككم

الحجي كال عوفوهه وحدهه ... وطلعنه كلنه وعفناهه وحدهه بالغرفه ..

اخذني للمطبخ ضليه بس انه وياه نحجي .. كالي ..

- مرتك مو هنا تتعالج .. البيت شكد ماجاي نتعب بي يرجع ينملي مثل كبل ومرتك ضعيفه ايمان وبيهه فد ثغره كلش سهله للجان اانته بعد ادرى بمرتك وجاي تفهم عليه .. انه احجيلك الي عرفته وانته تفهم القصد وين انه ماعرفه بس انته تفهم والقرار عندك

نطلعهه منا باجر بحالهه هذا لو ننتظرهه ترتاح

.

.

يتبع

..♣️🩸 ماء مغلي 🩸♣️..

* adzzon *

طلعنه كلنه وعفناهه وحدهه بالغرفه ..

اخذني للمطبخ ضليه بس انه وياه نحجي .. كالي ..

- مرتك مو هنا تتعالج .. البيت شكد ماجاي نتعب بي يرجع ينملي مثل كبل ومرتك ضعيفه ايمان وبيهه فد ثغره كلش سهله للجان اانته بعد ادرى بمرتك وجاي تفهم عليه .. انه احجيلك الي عرفته وانته تفهم القصد وين انه ماعرفه بس انته تفهم

- مرتي مابيهه شي بس هي مملتزمه بصلاتهه

- وتحسب هذا الشي هين !

- لا حجي بس القصد يعني .. هسه وين ناخذهه

- لبيتي انتعاون عليهه انه وياك ونرجعهه نظيفه من كل شي وتالي نرجع ناخذ اهلك من هالبيت ونكمشه ثلاث ليالي نطهره يلا نرجع اهلك هنا وباذن الله مايرجع شي بعد

- ان شاء الله حجي .. هاذ هوه على بركه الله نتوكل

رجعت لامي حجيتلهه وطلبتهه تحضر غراضهه وطبيت عليهه .. لكيتهه متلفلفه بالغطى وممبين منها شي ...

ذبيت عكازي وكعدت يم راسهه شلت الغطى منهه وهي فزت وضلت تباوعلي ..

دنكت بوستهه وهي كلتلي ...

- حيداار اسمع اذا ضل هذا حالي بعد يومين النوب لتعالجني ولا تعب نفسك ويايه ..

سلاحي تندل مكانه اخذه وطلقه وحده براسي وانتهى بعد .. واهلك اخذهم واطلعو منا كل النجف عوفوهه وعالجو نفسكم بعيد عنهم وخلص كلشي بعد لتضل تدوخ نفسك

بهذا وذاك

- من كل عقلج تحجين !!!

- ايي هو راح يضل عندي عقل بعد ! هسه بالباقيات براسي داوصيك

- انجبي احسن .. لو تحجين حجايه براسهه خير لوسكتي احسن لتعبين نفسج

- حيداااااار اني ماااا اعيش مذلوله حتى لنفسي ماارضى انذل ... وداتعذب هيج من احس على نفسي

- رور صدكي ماخليج بهالحال راح اخذج من هسه نطلع لبيت الحجي ومارجعج هنا الا ترجعين قويه

- انجب ولك اني قويه هسه وقبل وبعدين مانتظرك تقويني

- ههههه ايييي هاي رور الاعرفهه .. وعلي تسودنت عليج وانه رجلي هاي ذالتني والله حاركه روحي باجر اروح افتحهه زينه مو زينه بعد افتحهه

- اي عفيه حتى تضل كل عمرك سكط

- اعالجهه بعدين بس هسه احتاجهه

- اكعد راحه لك .. نشلع باب كلبي واني اتعب واداريك هسه تروح تضرب كلشي بعرض الحايط وترجع للصفر !

- هسه اروح افحص واشوف تره صار اكثر من شهرين .. طلابه بعد !!

- حويدر اذا مو زينه لتعاند وتفتحهه اصبرلك كم يوم ماوكفت الدنيا على رجلك !!

- الله كريم ..

ضليت ارفع بشعرهه واشوفه من كدام مامكصوص بس من وره خصل كامله كم نهايه راسهه.. انقهرت عليهه والله غصه بكلبي صارت وانه اشوفهه شلون ذابله وهي الي جانت تضوي بكل ساعه بعمرها ..

حضنت راسهه وضليت ابوسهه وهي دفعتني وكعدت ..تكلي..

- ديلا ماله داعي حنيتك الزايده هاي ... هنه خصلتين ماكصيت وريدي تره شعر وراح ...

ضلت تلم بشعرهه وتعدل ملابسهه وتكلي..

- الحك اسبح قبل منروح لو مستعجلين

- لا هناك اسبحي

- من ط..ي هسه يكابلني كوشر نسوان ويكعدن بعد وين الحك اسبح .. عوفني هسه اسبح دقيقتين ماتاخر

- لااا رور اخاف عليج تضلين وحدج بالحمام بهالليل وانه استحي اطب وياح وكلهه هنا عينهه علينه

- اي شسويلك هسه متعوده عليك وياي ! ضل هنا عادي هو الجني بكل مكان يطلعلي شتفرق اذا بالحمام ! هو عايش بيه بعد شكو وين ماروح اني شايلته وياي عادي بابه عادي ليل صبح عصر متفرق

عاندت وطلعت وانه احاجيهه مترد مطنشه الحجي ... راحت تسبح وانه ضال واكف يم الحمام انتظرهه .. ماتاخرت وطلعت تكلي ..

- ايبااه يابو كلب الرهيف مشتول علمودي و مكابل الحمام .. بطلهه للواكه بابه عادي روح اكعد وين ماجان تره اهلك ماكو وتصبغ كدامهم

- اول شي .. نعيما.. ثاني شي انه بالي يمج مو تمثيل هذا زين عيني

- ديللااا عوود صدكتك اوووكييي

راحت للمطبخ وانه عدت بالغرفه اشوف امي شحضرت من غراض النه .. واجتي ريري صابه ماعون تمن وعليه مركه وبايدهه خبزه وكعدت تاكل وتكول ..

- اشو انتو حتى الجني مالتكم ساد حلكه .. ادري عفيه جنانوه ماتشتهي لكمه .. هذا راح يسويني مثلك حويدر راح نصير زوج عظام ابشرك

- لاااااا اسم الله عليج هسه نخلي الحجي يوصيه ياكل وياج شويه على واهسج يربرب يصير خوش جني مدعبل

- هههههههههه ينكلب حنفيش .. لك اني اشك هذا من جماعه طنطل مبين مسلول مثلهه مسلوع يجوز غارت من جسمي ولزكتني بهذا

- هههههه هسه نحركهم اثنينهم .. شحده اليندك بريري شحده

- ديلاااا دنشوف عضلاتك

امي تضحك وتمشط بشعر ريري وهي تاكل ..

وصل حفيد الحجي وطلعنه بسيارته بس انه وريري .... وصلنه بيتهم نص الليل .. الحجي هنا عنده مضيف جبير بس للناس الي تنشده فكعدنه بي وهو جاب ريحه مسح على راسنه منها واجتي الحجيه سلمت واخذت ريري وياهه .. فرشولي هنا نمت وحدي وهي جوه نامت يم النسوان ...

الليل كله افز واخابرهه اسالهه شلونهه اذا اكو شي صارلهه او اذا مختنكه وتكلي كلشي زين بس شويه كحه ..

كعدت من الفجر على صوت الحجي وطلعت اغسل من رجعت لكيتهه كاعده بفراشي وكامشه راسهه ..

ضليت كاعد يمهه واشاورهه وهي متحجي شبيهه بس تعصر براسهه وتبجي ..

الحجي كمل صلاته واجاهه ..

ضل كامش راسهه ومغمض وهي تشهك وتعصر بايدي .. شويه وعافهه الحجي وصاح على الحجيه تاخذهه تغسللهه وتوكلهه

من طلعت كالي ..

- اليوم باذن الله نشد العزم عليهه .. انته تعرف المطلوب منها شنو فاكعد بويه علمهه

- ان شاء الله حجي بس خليني اكعد وياهه كبل وكت

- اي اي هسه نتريك واخذو راحتكم

تريكنه وجابتهه الحجيه وطلعو اثنينهم ضلينه بس انه وياهه ...

حضنتهه وهي تكلي ..

- دااتعذب حيدااار راسي اشكال الصوت بي

- هانت ياعيني هانت والله ماضل الا القليل بس صبر شويه وقوي نفسج يلا لاتخلين شي يتغلب عليج

- اذا ماصرت زينه وشفتني بديت اتخبل كبل اخذني واكتلني لتعوفنيي اعيش بعد حتى لو يومين هيج

- عوووفي الكتل والموت انه جاييبج اعالجج وارجعج زينه .. تعالي هسه خلي اعلمج تسبيحات

خليت راسهه على جتفي وضليت كامش اصابعهه واقرا بالتسبيحات وهي تردد وراي وانه احسبهن على اصابعهه

كملت التسبيح كلتلهه ..

- رور هسه انتي حتكعدين ويه الحجي هو راح يسحب منج كلشي متعبج ... لتخافين وطولي خلكج وياه .. هو يعزج ويرتاحلج ويريدلج الزين خلي هالشي بالج ثبتيه زين عيني

- اييي اووكي

- اهم شي تتوكلين على الله .. انتي ادري بيج كلبج طيب وتحبين رب العالمين وعالمه بي وبقدرته اريد بينج وبين نفسج تضلين توحدين الله وتطلبين منه العون

- يعني شكوله ؟

- كليله شيطلع من كلبج وانتي محتاجته احجيله لا تصفطين كلام بليغ احجي الي بكلبج وهو سميع وعليم بكل شي

- اووكيي زين انته تعوفني ؟

- لااا هنا كاعدلج وين اكدر اعوفج !

- اذا تخبلت شويه غلس اووكي مو بعدين ارجع الكاك كلشي حافظ عليه

- بويه وعلي انه روحي تشوغ من اشوفج تنهارين هيج .. ويين انتي بالج وانه وين

- بلكت حجيك صدك وماتاخذهه لزمه عليه

- ولج ثقي بيه بعد شسويلج اكثر وتخلين ثقتج بيه !!

- الحذر واجب

ضحكت وبوست خدهه كلتلهه ..

- ضلي حذره بعد احسن بس انه يمج لتنسين من تخافين او تتاذين من شي بس انداري تلكيني يمج

- اووكييي

- يلا اصيح للحجي ؟ جاهزه

- اييي ديلا عاد متفضوهه شكد روحكم طويله

وخرت مني وانه صحت للحجي شويه وطب .. انطاهه رايه خضره وكاللهه تضل كامشتهه متهدهه ابد .. خلاهه تنزع قراصتهه تراجيهه وحلقتهه و ضلت هي كاعده يم رجله وهو بدا يعزم عليهه ..

شكد شفت منهه مواقف ثابته وقويه بس هذا الموقف عجزت افهم قوتهه بي ..

جنت محسبلهه راح تنهار وماتكدر تكمل .. او تتخربط .. بس هي احسهه كامشه عقلهه بايدهه مثبته ..

مس الجن ويه تاثيرالسحر بهيج شخص ضعيف ايمان شي كلش جبير ويتعب صاحبه انه ادري مو سهل عليهه بس هي سيطرت على نفسها ...

كامشه الرايه عاصرتهه بايدهه ومغمضه بس دموع تنزل .. ولا نفس ينسمعلهه حتى الحجي كل شويه يدنك لجهتهه يباوعلهه ويكمل تعزيم .. صار يغسللهه بايده ويحاجيهه وهي تردله عادي بهدوء ..

مرت الجلسه وياهه بكل هدوء .. تبجي بس ماطلعلهه صوت وعلى نفس كعدتهه .. كاللهه كومي روحي اتمشي بره شمي هوا وارتاحي

وهي مسحت وجهه وكامت بس خطوه وحده مشتها ووكعت من طولها ...

جرهه الحجي للفراش وضليت انه كاعد يمهه اغسل وجهه اكعد بيهه بس ماكعدت ..

وصيت يجيبون البخاخ من جنطتهه .. وضليت احاول وياهه تصحى وهي تحس بيه بس تتلمس بايدي ماتحجي شي ..

خليتهه تاخذ نفس من البخاخ .. وعفتهه تنام ترتاح ....

حجيت ويه الحجي وكالي سباعيه وعلى باب شفاء ان شاء الله ...

أمنتهه يمهم و طلعت ويه ابنهم اشوفلي دكتور

لرجلي ...

وره ماحصلت سره وحجيتله الحاله كلهه

طلب اشعه ورحت سويت وهم سره

وتااالي يلا كدرت ارجع اطب يمه وشافهه زينه بس حولني علاج طبيعي ..

واضل لابس مشد على الركبه ومقويات اخذ ..

ارتاحيت من فتحتهه بس صعبه مشي صارت

احسهه مجبنه .. وكبل رحت سويت جلسه علاج طبيعي ولانت شويه .. بس ضليت امشي على اصابعي من اطخ كل رجلي بالكاع تأذيني ...

كلت الحمدلله تهون بس خلي ارجع اخلص من العكازات ...

صارت رجعتي العصر .. اخذت وياي حلويات كلت ريري صار هواي مقصر وياهه

حسبت حساب للبيت والهه خاص ..

من وصلت والحجي شافني امشي زين وذيت العكازات كبل دز على ذبيحه فجران دم

وانه اتوسل بي يعوفهه ماتلزم وهو مارضى

وخابر على اخوتي يجيبون الاهل ويتعشون هنا اليوم ...

كاعد ويه الحجي والولد وبالي يمهه .. شويه والحجي دزني ويه هذا حفيده الجبير يطلع اصغر مني باربع سنين ...

دزني جوه حتى اشوفهه ...

طبيت بغرفه الحجيه سلمت عليهه وهي طلعت وعافتنه ...

كعدت يمهه على الجربايه وضليت اكعد بيهه

اكرص بخدودهه وهي بس تعكد بحواجبهه

طلعت قطعه بقلاوه وخليتهه بحلكهه عاد كعدت و ضلت تباوعلي ...

اكلتهه وكلتلي ..

- شو مستخف شبيك متشوفني نايمه

بطل خباثتك احد كالك جوعانه

- هههههه ولج روووور مشتاقلج وعلي

- ديلاا ادري جديده يعني

وينك من الصبح لهسه دايح

- انجبببي ولج دايح شنو !

جنت بالدكتور

كبل باوعت لرجلي وضربتني عليهه ..

- هاااا ولك فتحتهه وفتحتهه

- حتسكطيهه من جديد شبيييج

- ديلاا مو تفاجأت.. خوما بيهه شي بعد

- لا زينه من فوك بس هاي القدم توجعني من ادوس عليهه الا امشي على اصابعي يلا

- ايي جان بقيتهه بس هاي وافتح الفوك

- ماااريد ولج طكت روحي بالحسين مليت

هسه جم يوم وترجع تلين لازم اضل ادهنهه صبح وبالليل واسوي تمارين

- اييي اووكي ديلاا همزين صرت زين

وخشمك مافحصته

- لا بعدين بس اكلج جاي احسه صغران

هيج من اكمشه من فوك شو مو عالي

- هههههه غير سوولك خشم جديد كلتلهم انحتوه نحت

- هااا جا ماتخليني افتحه صار شكد مكافي مو نسيت حتى النفس وعلي

- روح دكتور وهو يفتحه الك ويكولك زين لا

خوما بكيفي السالفه ياااحووويدر

- يلااا بويه زين زين

اكلج شلون صرتي ؟

- زينه شبيه زينه متشوفني زينه

- لااا وجهج تعبان عيونج مبقبقه

تره خفت عليج وعلي شبعت هبطات هالايام

- ديلا عادي

- متاكلين بعد جبتلج علبه مشكل

كلت رور مقصر وياهه صار هواي

- اي شكرا

جيب خلي الكط شويه

كعدت وخلتهه بحضنهه .. ضلت تاكل وانه اباوعلهه .. شالت قطعه وخلتهه بحلكي

كلتلهه..

-اهلي راح يجون عزمهم الحجي على العشه

راح يذبحون لسلامتي

- اووكي

- رور احجيلي شلونهه جلسه العلاج اليوم

اذتج ؟ شفتي شي ؟ سمعتي شي ؟

- وجع بجتوفي صار ورجلي نملت

بس الصوت خف هواي من راسي

- الحمدلله بعد ؟

- صدري يحركني هواي لحد هسه بعده

بس الخنكه خفت مو مثل الاول

- يالله زين زين الحمدلله

يعني من جنتي تبجين هاي من وجع جتوفج ؟ لو شنو بالضبط ؟

- لا بس هيج لا ارادياً

مادري شصار ماركزت زين

- ماشي خلي تولي السالفه لا تفكرين بيهه

هم دعيتي ؟

- اي بالبدايه دعيت

بس دعوه على كدي يعني

- والله اتمنى اعرفهه .. تحجيلي ؟

- شعليك شي خاص هذا

- هسه هم هاي خاص ! احجي هسه شكو !

مو انه بكلشي بالدين وياج لازم اعرف تطوراتج

- يعني بس كلت ..

ربي انته خليتني اعيش قويه لا تخليني اليوم ضعيفه حال

اني عشت من قبل اعرفك قويه و وياك اريد اصير اقوى لا تذلني لنفسي

بس هيج .. كلتلك دعوه على كدي

اني ماعرف ادعي منا ومنا بس هاي الاريدهه واعرفهه

بوست خدهه وكلتلهه..

- والله واستجاب دعائج يا رور انه من ساعتهه واتعجب على صبرج وهدوئج

وانه ادري بنفس الوكت جاي تتعبين مو هينه عليج

- لا عادي

تره لاويت دنيا اني ما توكعني سحوره البرابيك

- هههه والله كفو

هيج اريدج ترجعيلي توب التوب حتى نشد عليهم فد شده

- براسي افكاااار شيطانهن مايدبرهه

بس صبر شويه الا اسحكهن بالنعال واخليهن يصيحن الغوووث ومايلكنه

- هههه عفيه عفيييه .. بعد الساحه الج

رجعت تمددت وانه هم تمددت يمهه

حضنتهه وهي تكلي ..

- لك صاير فدنوب حنين انته شبيك

تره مارتاحلك هيج

- ولج بويه شترديني اصير وترتاحيلي !

وعلي حتسودنيني

- ديلااا ماريد شي

بس انته تخرب ع الحضن

- صاير بي مدمن

عضيتهه من خدهه وهي اندارت وضليت حاضنهه .. ونمت ...

كعدت على دكه الباب .. ورحت فتحت والولد كالي وصلو الاهل ..

طلعت رحتلهم وكلهه فرحت برجعه رجلي هيج ..

شويه وحطو العشه .. تعشينه وضلينه نشرب الجاي جان يدك تلفوني ...

باوعت هذا ابو سعد ..

كبل طلعت بره جاوبته ...

- الو ها خويه شلونك

- هله عمي وينك ! ماتكلي وين اختفيت !

- ماخذ جرعه والبارحه يلا طلعت من المستشفى

- الله كريم خويه تهون ان شاء الله

شلون صرت هسه

- زين هاي انه اوصل الموت كل يوم ومااموت مكتوبلي اتعذب

- الله يرحم بحالك ياخويه ان شاء الله متشافي

- ان شاء الله.. قريت رسايلك بس احجيلي الحال هسه شنو عندك

- والله الحال مو خوش .. البيت بعده مانظف

ومرتي لاحهه من شرهم وهسه مطلعه بغير بيت اسحبه منهه

- لااا .. زين كلي اعراضهه شنو

- من طلعه الفجر تبدي تتاذى راسهه وتحس صوت بي تكول اشكال اصوات تختنك

وتكح كله دم ونمل اسود كبار وجسمهه يحكهه

ولليل هي تسكن وترجع تهدا وتاكل وتسولف عادي بس النهار كله هي بجي وعياط وماتثبت بمكان

- زين انه حراجع رسالتك عليهه اتذكر كاتبلي حلم او هيج شي

بس ادقق بيهه واخابرك

-براحتك

سديته منه وضليت واكف انتظره يتصل ...

شويه ورجع خابر ...

- اسمع خويه

على حجي الرسايل هذا مدفون

وعلى حجيك هسه هذا هوائي

- شلون هيج !

- مثل مااكلك ... هذا انه متأكد منه

حالهه الهيجان والاصوات من شي والحال الثاني عدهه من شي غيره زياده عليه يعني

اسمع .. هذا ينربط برجل طيره تضل تحوم على بيتكم دوروهه واخذوه من رجلهه مربوط تلكوه ...

هاي تضل كل ماتطير هي تهيج ومااا تسكن الا ما تحط الطيره بمكان يلا تلكاهه ترجع زينه ..

فتشوفهه بالليل مابيهه شي والنهار تحير شتسوي بنفسهه

- لا اله الا الله.. خويه الف رحمه عليك

وعلي وكفتك هاي ماتثمن عندي

جان ضليت حاير وتايه

- لااا هسه مثل ماحجيتلك روح دورهه وميه بالميه تلكاهه للطيره

وشغله الثانيه .. على الي طلع عندكم هذا للمرض تحديداً السل يعني لو مامستعجلين بي

جان بعد كلكم تتمرضون بمثلهه لان سل هذا

يعدي وانتو ماتدرون بي

- دخيلك ياربي شهالنااااس

- اي انتبهو منها حتى لو عزمتو عليهه

فكيتو السحر لكيتوه بس راجعو دكتور احسن

مدامهه بالبدايه

- اي اكيد ان شاء الله

- وراح احجيلك فد خبر هسه عرفته

هسه كبل ماخابرك اجاني علمه

- اي شنو ؟

- مو جنتكم مريضه

- هنه اثنين ياهي منهن

- وحده واصله حالتهه فد مره

-اي الجبيره هاي كلتلك عليهه

- اي انه مامنتبه علييهه بالرساله بس اسمع

هاي الجماعه ضاربيهه هي غلطانه وياهم

وضاربيهه ومرضيهه من كل شي

بسس جماعه يمكن من اهلهه او احد شريك وياهه ماعرف بالضبط بس هذا يريد يرجعهه زينه بمداراتهم

جاي تفهمني !

- يداري المن بالضبط !

- الي غلطت وياهم يرجع يحضرهم ويفهم غلطهه وين منهم ويتفاهم وياهم

-وترجع زينه !

- اي ترجع اذا تفاهمو وياهم يرجعوهه زينه

بس اسمع المهم هنا شنو

المره هاي عابده شيطان منتهين منهه

اذا اجي احجيلك بالتفاصيل العرفتهه

نطول وانه جاي اتعب بالحجي صدكني

بس اريد انطيك المهم

هاي مو ضعفت وغلطت ونكشفت بنفس الوكت .. اذا هسه تصير زينه تريد ترجع لحياتهه لازم تدفع شي مثل قربان رضى

يعني شاون احنه عدنه ننطي لفلان هديه حتى نتصالح ونرجع حلف سوه .. هيج راح يصير

فديروبالكم على اهلكم وناسكم

اذا رجعت زينه فمليون بالميه واحد من الاهل عائلتكم او غيركم راح يصير ضحيه بس بيا طريقه بعد مادري

- متاكد خويه !!!

- متاكد ماحجيلك شي من جيبي

- زين شلون عرفته هيج بالتفصيل !

جا من جنت اسألك على راس البله ليش ماتكلي !

- والله جنت شاك باثنينهن بس انته هسه رسايلك والاحداث الصارت هواي وضحت شغلات

وهسه هذا الحدث اجاني علمه كلتلك هاي كبل ماخابرك هالمخابره وانه مفهمك على سالفه قربان الشياطين مو جديده عليك

- لا مو جديده فاهمهه

مانكول غير الله اليستر

مشكور خويه اخذ راحتك وان شاء الله متعافي عن قريب

سديته منه .. وضليت افكر بهالاخبار

منين ماريدهه تصفى هالعيشه يطلع الجاي يحفرلهه بعد وبعد ...

بس هذا منو الي اله ايد ويه ام سيف واصل مرحله هيج استعداد عنده يجازف وياهه ؟

رجعت كعدت جوه و وصيت سيف باجر يرجع للبيت وياخذ واحد من الولد وياه

ويدور الطيره ..

وهم خليتهم يطلعون يدوروهه خاف جايه على هالبيت ...

وضليت انتظرهم .. واجوي مالاكينهه

ثاني يوم الصبح انه صعدت لسطح بيتهم ادورهه وماكو .. نزلت وبره على الشجر على السياج يم الجيران هم ماكو ..

وهي ريري جاي تتعب جوه .. صايره متعيط بس تكضيهه بجي وعصر بنفسهه ...

لليل انه مجودر بالشارع .. اتاني طير اليحط هنا ...

تعشيت ورجعت طلعت .. وضليت ادك الباب على جيران الي بسدهم يشوفولي على سطح بيتهم طيره غريبه برجلهه شي ...

و واحد منهم لاكيهه وره التانكي مالهم ..

عاد لكيت الطيره ...

ومثل ما وصفهه ابو سعد بالمضبوط ..

ملفوف برجلهه السحر ومتيب باسود ..

اخذته فتحته وضليت حابس الطيره ..

قريته للجنون وذهول العقل ...

طبيت للبيت وشوفته للحجي وحجيتله كل شي عرفته ... وتكفلنه بابطاله بس ريري هنا انهارت ...

ضلت بس عياط واريد امشي يمهه مايخلوني

لان نسوان يمهه مايخلوني اطبلهه ...

تلاغيت وياهم وكلتلهم كلهه خلي تطلع من يمهه عوفوهه الي ..

عاد الولد طلع النسوان ورحتلهه ...

قفلت الباب وضليت وياهه ...

تهلس بشعرهه وتعيط وتريد تضرب راسهه وتخرمش بنفسهه .. وانه اكمش ايدهه وامنعهه بس جانت فاقده فد نوب فاقده ..

جريتهه جتفتهه وكعدت بالكاع وخليتهه بين رجلي وضليت مجتفهه بحضني ..

وهي تعيط وتنفض بجسمهه تريد تكوم

بس ماخليتهه ...

ضليت اذكرهه بالتسبيحات واحاجيهه بهداوه

وهي تشهك وتبجي ..

صرت اقرالهه سوره المزمل واعيد بيهه

وصلت خمس مرات وهي كامت تكح

عفتهه وكمت جبتلهه الماي .. غسلت حلكهه من الدم وشربتهه .. وضليت اغسل وجهه

وهي ذبت نفسهه ع الكاع ..

شلت راسهه وخليته على رجلي .. وضليت اعدل بشعرهه واقرالهه التحصين ...

شفتهه غفت خليت راسهه ع الكاع وكمت اخذت المخده والغطوه واجيت خليتهه جوه راسهه ونمت يمهه وتغطينا ...

ضليت ابوس بوجهه .. ماريدهه تتعب هيج

اموت بعذاب ضميري من اسمع عياطهه

ضليت سهران وياهه بس تسبيحات وقران

ابويه من زمان معلمنه على سوره المزمل

تفيد لهيج حال ... فحافظهه من زمان ..

كعدت بعدين بس تباوعلي وتضحك ..

كلتلهه..

- ها رور شلون صرتي

- اصير زينه طبعا شتدري بيه

- الف حمدلله إن شاء الله دايما زينه

- حويدر بختك وبخت جدك جبير

-هاا شعجب بدرت منج !

- شفتك بالحلم

شايل غتره ابوك الخضره وتمسح بجسمي

واجيت تخليهه على راسي واني اكولك صارت وصخه عوفهه لان جسمي جان مدري شبي مثل تراب مكوم هنا وهنا

وانته شوفتني اياهه مابيهه شي وخليتهه على راسي

- اللهم صلي على محمد وال محمد

والله مو كلتلج انه اعالجج جنت ادري راح

توصلج هالرؤيه

تره انه عندي غتره خضره وهاي غترتي مو غترة ابويه

- مشايفته عندك ولا لابسهه انته !

- اي هاي مضمومه يم امي البسهه بس بمحرم من اطلع للمجالس

عندي دشداشه سوده ألبسه والغتره الخضره

بس هالسنه ماحضيت بلبسهن إن شاء الله بس نرجع البسهن وتشوفيهه

- اووكي

- تدرين انه هاي الرؤيه حاجيتهه الي امل

اختي الله يرحمهه

هم مره تعبت هيج من فك العمل مالهه

وانه وحدي ضليت وياهه سهرت وياهه ليلتين بس انه وياهه بالغرفه ابويه كفلني بيهه لان جان تعبان ماكدر بعد يكمل وياهه

ضليت يمهه ليلتين انه اداريهه ومن صارت زينه ورجعت صحصحت حجتلي نفس هالرويه بس كالتلي بوكتها جان بجسمها فقاقيع واطك كل ماامسحهه بالغتره

انت تكليلي تراب

يعني المعنى واحد

- هم بيك البله حويدر

غير تكولي عندك بخت جان ماضوجتك

- هههه والله حتى لو تضوجيني ماذيج

انه مااكره احد ولا ادعي على احد

بس هذنيج السعالوه لان يستاهلن

- زين حويدر اني هسه احس انضحك عليه

يعني انتو كلشي تعرفون .. وكلشي كدرتو تسوون

جبتني هنا شكو ! شستفاديت مني !

شو هم وكعت وبليتك بيه !!

- لا شوفي رور

انه والله جنت بحاجتج وبعدني بحاجتج

احنه صح نعرف كلشي ونعرف نعالج

بس مشكلتنه كل تعبنه يضيع

هسه شكد تشوفين نتعب للواحد هذا كله بالزايد يعديله شهر شهرين زمان ويوكع بالانكس منه بعد

هسه اختي امل الله يرحمهه شكد تعبنا عليهه

ماعفناهه يوم اذا مو احنه نداريهه من كل شي

وحاجيلج شكد تعبنه الهه .. بس تصير زينه منا توكع منا يعني هيج بعدهه ماتلحك توكف على حيلهه تجيهه الاكبر منهه توكعهه

فمشكلتنه بالجاي يزيد فوكه فوكه

انه هذا الي ردتج تعرفينه وتخلصينه منه

- هاااا اووكييي

صح هسه تذكرت انته كلتلي مره اني اعرف شنسوي بالسحر بس اعرفيلي منو

هسه فهمتك

- اي عفيه

وهسه جاييبلج خبر من ابو سعد

من تصيرين زينه نحجي بي

-اوووكي

خلت ايدهه على ركبتي وبعدين حضنتني

ضحكت ودنكت على راسهه وكلتلهه ..

- هاا هسه انتي ادورين حضن

- داجرب شلون ترتاح بي

- ريري ارجعيلي زينه وعلي كل عيطه منج تشك كلبي ماتحمل اشوف اذيتج بسببي واسكت الله يخليج شدي حيلج وانه عهد عليه

ماخليج توصلين مواصيل الي راحو

- اني مااموت بس اتعب شويه

وارجع عادي

اني عندي ثار داتحمل كلشي علمود اوكف بقوتي واخذه

- الف رحمه على اهلج

هذا الحجي الزين

ضلينه نايمين هيج للصبح .. هي كعدتني

تريد تطلع للحمام .. وطلعت وياهه

غسلنه وضلينه كاعدين بالمضيف يم الحجي

وحجتله هي الرؤيه وهو تبشر بيهه خير

وكعدت احجيلهه على ابو سعد والاخبار الجديده وحجيتلهه على الطيره ..

وهي تكلي عوفني افكر .. سبحت و من طلعت وصيتهه تخلي السماعات باذنهه

وتسمع قران .. لان هي تكولي ماعرف اقراه ولا افهمه ..

هاليوم مر بهدوء وثاني يوم رجع الحجي يعزم عليهه وهم نفس هدوئها ورزانتها

و اليوم الرابع الحجي راح هو وابويه لبيتنه

وضل بس اخويه عزيز وياهم هو ياخذلهم الاكل ويشوف شيحتاجون ...

احنه ضلينه بيت الحجي .. امي هي تعرف ترقي لنفسهه وجاي تتحسن وريري شفتهه

صارت احسن بهواي من اول يوم ..

كلتلهه اخذج نزور ماقبلت ... تكلي مامستعده بعدني ...

بديت احجيلهه على تفسير القران

والسور الي عودتهه تسمعهن ..

هي تحب كل ايه تعرف شنو القصد منها

وانه الي ناسيه اطلعه الهه بالنت ونقرا اثنينا

ونتطرق لهواي احاديث بسبب التفسير

ارجعلهه على هواي مواضيع

وبهالايام صارت علاقتنه اقرب

نكعد الظهريه كلهه سوه بالمضيف ونتناقش بهالامور وهي اغلب الوكت تستمع الي

وتجي ثاني يوم تسألني شخطر بالهه على مواضيعنه

والليل مانام سوه بس نتراسل .. عندي تلفونها الكلاكسي وهي عدها الايفون ..

وبعد ماعبرت ٣ ايام على روحته الحجي وابويه لبيتنه رجعو وكالو نروح كلنه نزور

ونمر على قطاره الامام علي يلا نرجع للبيت

ريري جانت متردده وحاولت وياي انها متروح .. بس مانطيتهه مجال وخليتهه تروح ويانه ..

هناك عفتهم كلهم وبالعاده انه متكفل ازور ابويه هالمره خليت سيف هو يتكفله

وضليت ويه ريري ...

نمشي وحدنه واحجيلهه هذا شنو وهنا شكو

وكل المكان فصلته الهه تفصيل ..

عرفتهه طقوس الزياره شنو وكل شغله اعيدلهه مرتين وتكلي فهمت هاذ هوه يلا اعوفهه ..

وصلتهه لباب الدخول وعفتهه ورحت زرت

يابويه شكثر جنت مشتاق لريحه الضريح

زرت واندعيت الشفاء للكل والرحمه لاخوتي

ودعيت لريري بالهدايه وصليت الي والهه الزياره لان هي ماتصلي لحد هسه مترضى تصلي ولا نحجي بموضوع الصلاه ..

طلعت وضليت ادور عليهه .. من شفتهه

ضلت تكلي ..

- تره اني يعني بس جنت اشوف شكو ماكو جوه ورحت يم الشباك هذا المربع صاير

بس ما زرت مثلكم

- لييش رور جا شحجينه !

- مادري حسيت المكان كلش حلو ونظيف

شفت نفسي ما موالمه هنا

حتى منطاني كلبي احط ايدي على هذا الشباك

حسيت مو لائق قربي هيج من الامير علي

فانسحبت ضليت بس اباوع

بس يعني سلمت عليه مثل ماعلمتني

- لااااااااا لااااا ليش هيج

انه شكايلج جم مره حاجين بالرحمه والمغفره

ليش تضلين ممقتنعه !

- مقتنعه بيهم بس اني اشوف وجودي مو مناسب الهم

يعني احبهم من بعيد لبعيد احسن

شويه اللمس صعب عندي

- بس انتي كلتي راح تغيرين نفسج

كلتي الشرب راح تتركيه وصا. هواي تاركته

بعد شنو !

انطي لنفسج مجال لقرب اهل البيت

- بعدين هسه ممستعده

عفتهه براحتهه واخذتهه نفتر بالسوك

ماعجبهه تشتري شي كلشي اكللهه متريد

وتالي رجعنه يمهم وطلعنه لقطاره الامير

اخذتهه هناك غسلت واخذت صور وطولنه هناك يلا رجعنه لبيت الحجي ... وثاني يوم طلعنه لبيتنه الصبح ..

طبينه البيت كلشي مغسول وريحه البخور تعط بي وقرآين مفتوحه بكل غرفه ..

اخذنا نفس براحه وحمدنا الله على فضله ونعمته ...

صعدنا لغرفتنا بعد طول غياب .. اخذنه راحتنه مثل كبل ...

ريري كالتلي اترك الشرب بس التدخين ماكدر افكر بشي اذا مادخن ...

جبتلهه الجكاير وكلت ابدي وياهه بالتدريج

وهنا بديت ادور على شغل ....

عندي فلوس مال المحل بس شلت ربعهن انطيته للسلفه وخلصت منها والباقي ضميته الهه ...

ادور على شغل بكل مكان ومالكيت شغل يسوى ...

شافتني حاير بامري وانه احجيلهه ماضم عليهه شي .. عاد كالتلي ...

- تريد تعيين ؟

- تكدرين !

اخذت نفس من جكارتهه .. وتبتسم

كملتهه وطفتهه واجتي يمي ..

خلت ايدهه على لحيتي وكلتلي ..

- اعينك بارقى مكان ، اخليك تستلم احسن راتب ، واحسن امتيازات الك اصعدك ارقى سياره

مفتاح ارقى بيت اسلمك ،

اوصلك للقمه

اي حلم بنفسك اكدر اوصلك اله

بسس لا تنكر فضلي بيوم

اخليك سيد قومك املكك اشياء لاتعرفها ولا مفكر بيها

كلشي عندي امكانيه اقدملك

كل صنف بالحكومه اعرف شلون استفيد منه

مايصعب على عقلي شي

اغير حياتك كلهه وماريد منك اي مقابل

بس لا من تشبع تعض ايدي

- ليش تنطيني كل هذا بدون مقابل !

- اريد افيدك ... اني عندي امكانيه لكل شي بس ماعندي احد بحياتي افيده

انته هسه كل عائلتي .. كل ناسي صرت

انطيك كلشي تحلم بي وبفلوس حلال

لتخاف ماضيع تعب ديانتك

- متأكده بدون مقابل !

- مامحتاجه فلوس تردلي بيهه تعبي اريدك بس لا تنكر فضلي .. لا بيوم ما تعلى تكوم تشوفني مو من مستواك تره بنفس الايد الي علتك هي تكدر تنزلك اسفل سافلين .. لا تستهين بطيبتي وياك تره برمشه عين اذا زليت وياي بعد تشوفني غير وحده وياك

ضليت اباوع بعينها واستوعب كلامها وهي تتلمس بلحيتي .. ورفعت نفسها باستني بطرف شفتي ..

كلتلي ...

- بالك شغل تتمناه ؟ لو اني اختارلك ؟

حضنتهه وبوست ركبتهه وكلتلهه...

- انتي اختاري اني مابالي اي شي .. وأمني بيه اني ماتغير عليج صدكي مو طبعي اغدر اني من اهل الله ماريد استغلج والله

- بديت اوثق بيك بس لا تحسب نفسك سيطرت

- كااافي الله يخليج لا تضلين متخوفه مني انه والله مو بالي اكيدلج بشي انه صريح وياج من اول يوم وماتغير وعلي ماتغير عليج

- اوووكي زين لعد انتظر خبر تعيينك بس لاتكول لاحد

اشتغل وكون نفسك بسكوت .. الناس حساده نِعم

تأملت خير ... لان محتاج للشغل ماكدر اضل هيج براسي كومه مصاريف .. هي علاجهه

وعلاجي وعلاج الاهل والكهرباء ومصرف البيت ...

من يومها بعد مافتحت الموضوع وهي ادخن وتكولي ...

- راح اضرب شياطينهن بشيطان اضرب من العدهن

بس بعد لتدخل بشغلي

شسوي شصخم لتفك حلكك وياي

- احجيلي الناويه اله شنو خلي افتهم

- مو هسه خلي اضبط كلشي يلا احجيلك

بس ابجيهن و داعت كانيور الي مفرفح كلبي عليه الااا ابجيهن دم

- بووويه تخوفين

من تشتغل تفكير وجكاير بعد لا ضحك ولا شقى ..

وره اسبوعين ..

متعشي وصاعد اتمدد بغرفتي و

شفتها ضحكت واجتي خلت التلفون بايدي

باوعت وضليت اكلب بالصور وصحت عليها بعلو صوتي ...

- ريررررررررريييييييي ولج هااااي ليييييييشششششش

طلعت من الغرفه وتصيحلي ...

- ههههههيييي تدلل حياااااتششششييي

جانت صور لكتاب تعييني ...

اسمي مثبت على عنوان الوظيفي

( وزاره الداخليه / دائره الاتصلات / نظم وتكنولوجيا المعلوماتيه )

نزلت ركض ورحتلهه للمطبخ ..

- ولج وين ورطتيني انه شمفهني بشغلهم

- اي ليش شبيهه

طبعا ردت اعينك بالخارجيه الصراحه

اول شي تواصلت هناك بس الجماعه

كبل كلولي شيعي لو سني

كلتلهم شيعي وسيد كالو ماتفيده يتعبوه هنا

يكسرون حاله

فشفتلك الداخليه ماعجبتك ؟

- لج بويه افهميني

انه ويني وين العسكر هذوله مدري شنو شغلهم انه رجال بسيط على كد حالي وين شمرتيني

- اي اني كلتلك راح اصعدك للقمه

وهاي اول بايه

بعد الجايات هواي

- ادرررري هسه انه يخلوني هناك علم فهم

ششتغل ! مافكرتي هو شهادتي معهد

- اي تعلم شنو الصارو احسن منك !

لو ماعندك عقل وتشغله.

- استغفر الله

ريري ورطه هاي احسهه

- راح تتغير عومرري انته مو ورطه هاي تغيير للاحسن

- زين شلون دبرتيهه بالدااااخليه هيج كبل بتلفون !

- طبعا بتلفون غير ناسي هواي

بس هالتلفون تدري شكد دفعت حقه !

- شكد !!

- هههه سيااااره لووك كي

هي وصلت البارحه اليوم اندزتلي الصور لكتاب تعيينك باقي كم توقيع واحضرلك الجنطه وتروح تدريب شهرين تسيطر اسطه معلومات

.

.

. يتبع 💕🌷

..♣️🩸 ماء مغلي 🩸♣️..

* adzzon *

- زين شلون دبرتيهه بالدااااخليه هيج كبل بتلفون !

- طبعا بتلفون غير ناسي هواي

بس هالتلفون تدري شكد دفعت حقه !

- شكد !!

- هههه سيااااره لووك كي

هي وصلت البارحه اليوم اندزتلي الصور لكتاب تعيينك باقي كم توقيع واحضرلك الجنطه وتروح تدريب شهرين تصير اسطه معلومات

- هاي انتو شنو تشتغلين!!!

ماصدك هيج عندج معارف ويسون كلشي تطلبيه بهالسرعه ! انتي شغلج شنوو !!

فهميني عقلي مجاي يستوعب !

اخذت كلاص الماي وضلت واكفه يم البراد

وتشرب .. بعدهه بايدهه وصارت تكلي..

- راح احجيلك شلون اشتغل بعدين افهمك

شنو اسم شغلي

-اي شي بس خلي افتهمج

- شوف هسه اني وين اشتغل بالملهى

عيني وناسي وليلي كله هناك اووكي

اني هناك عقل وعين مفتحه على كل كواد يفوت ويكعد على ميز

انطيك مثل ...

سهره حضروها فد خمس اشخاص من الدفاع مثلا .. اني كاعده بمكاني ويجيني خبرهم

يحجولي هذوله كذا شغلتهم

شسوي انطيهم ترحيب بالاسم وميز مرتب مجاني لكل السهره

من خبرتي بالناس صرت من الشكل اعرف هذا يا نمط يحب فاخلي نمط السهره على الي بمزاجهم

اعبرهم ٣ساعات يبدون يدوخون وادزلهم بنيه تجرلي لسانهم .. راح تميز الجبير بينهم تنطيني اشاره ..

همه خمسه اسحب منهم اثنين ويه البنات اخليهم ينسطرون بيهن ويتركون السهره ويطلعون وياهن

بقو ٣ واحد منهم راح يسيطر على الكعده ويصير هو المتكلم ، واحد راح يتعب ويطلع

واحد يضل يتصفن .. اخليه يمل ويبدا يغار

ادزله بنيه وكاس خاص اله وسلام مني

راح ينسحب وياهه لغير طاوله

منو يبقى. .. بس الجبير بينهم هذا راح يسترسل بطولاته ويتفاخر. بالعنده

والي كاعده وياه مو اي وحده هاي الي تقنع عقلي يعني ماخذتها. لكط من بين الكل

تخليه ينطيها اصله وفصله واصل الي وياه وتاخذ الرقم و كلشي اني محتاجه اعرفه تجيبه الي

راح يطلع وحده هيج نماذج مايحبون ياخذون بنيه طولو حجي وياهه .. الي يبدون بالحجي هذوله ماناوين للجنس

بس يريدون يشبعون غرورهم يغيرون جو ويطلعون

المهم هسه صار عندي ورقه بالدفاع

ابدأ اداريه .. اتصال بعد كم يوم ودعوه خاصه لحفله Vip خاصه بس اله

راح يجي ويحاول يبين نفسه انه كبير شأن

واحنه نمشي على مايه .. هم نرضي اكثر

هنا اتعرف عليه مجرد سلام وكلام عادي لدقايق وبدون مانكعد واتركه ويه هذيج نفسها

راح تحجيله على شغله وهميه وبسيطه على اساس هي محتاجتهه وهو يكوللها عندي حلها وادبرها الج .. يطلع هو اليوم منا ثاني يوم تندزله هديه

بأسمي .. شكر لانه يساعد وحده من اعز صديقاتي ..

شراح يصير.. هنا صار قريب النه وكت الي نحتاج شي ندك تلفون عليه عادي بينا ميانه بهالشي

بس شنو ماتعبه اخليه بس يشبع عدنا سهرات مجانيه ..

المهم اني خليته بالجيب ..

وره فتره مثلا نفس العين الي لكطت بيهه هذا

الكط بيها واحد محتاج شغله بالدفاع

ادز عليه ونكعد نحجي بسريه بنفس الغرفه الي كعدتك بيهه ويه ذاك الدكتور ..

- اييييي !!

- اي اعرض عليه المساعده وانطيه ضمان ان الموضوع يضل سر وفلوسه ترجعله ضعفين اذا مادبرتهه

راح يوافق لانه يااما تعبان من فرفره المعاملات ياما سالفته داجه ورادلها شهور فميصدك يلكى حل سريع

اروح اخابر على ابو الدفاع احجيله الموقف

قبل يدبرها ثاني يوم تندزله الفلوس

مثلا مليون لشغله هي تمشي ب٥٠٠ الف

اخذ اكثر من المطلوب اشتغل اسرع

كمل الشغله ادك تلفون على ابو الانه

هالكد تدفع وتجي باجر تستلم معاملتك مثلا او تروح تلكاهه حاضره ..حسب نوع الشغله

يجي هو مثل الورد يخلي الفلوس ويروح وهو الممنون .. مثلا اني دفعت مليون لابو الدفاع

بس اخذ من الولد هذا ٧٠٠ لييش ؟

حتى يذيع بين معارفه ان عندي واسطه اكدر اساعدهم وبسعر قليل

بينما ابو الدفاع هو ورقتي .. انطيه اكثر

المهم يبقى جوه ايدي ..

راح هذاك يجيبلي غير ولد محتاجين واسطه

هم راح ارجعله وهالمره بدل المليون انطيه

٣ ملايين ..

شصار هاي اني مرتين شغلته بفلوس مره الثالثه من ادك عليه تلفون يستحي ياخذ مني بعد ويكوم يزامط وخليهه عليه

اخليه براحته بس بدل الفلوس ادزله عشه

اله وللي وياه عشه من هذا التوب

او ادزله قالب كيك معدل وكارت شكر

او عطر ماركه اي شي المهم اخليه شبعان

شيصير بعد لو سنه تمر وارجع ادك عليه تلفون يعوف الي بيده ويجاوبني ويمشي لشغلتي وهو الممنون

ضليت بس فاك عيوني عليهه وماعرف شحجي !!!

كعدت بالكاع وكالت ..

- انطيك مثل ثاني ..

تاجر عنده مشاكل بتخريج بضاعته سياراته الحمل يطولن يلا يعبرن الميناء وهو من كد ما يتعارك هناك صارو يعيلون وياه ويبقون بضاعته نايمه بالشهر هناك ميطلعوهه

هو من يجي يسهر يحجي هالشي بين الكاعدين لان همه ياخذهم وكت بالسوالف

فاول يوم اني اعرفه .. ثاني يوم اعوفه .. ثالث يوم ادز عليه .. اعرض عليه المساعده

اني بنفس الوكت عندي عرف بجماعه الميناء

يعني فد اربعه اعرف هناك

اتفق ويه التاجر امشيله بضاعته مقابل

عشر ملايين .. هو تاجر عنده العشره مثل شمره العصه يشمرهن مايهتم كبل يجيبهن

اني شسوي انطي خمس ملايين لاثنين ولد

همه كل واحد بقسم ..

اخلي واحد يركز على اسم التاجر دائما يسهل عبور بضاعته وواحد يمشيهه هالشهر بسرررعه بحيث كبل يندك تلفون عليه من السواق ان صار دورهم وخرجوهم

كل واحد حصل مليونين ونص ..

الخمسه الي بقن بجيبي .. والتاجر رجع شغله زين والولد استفادو واني استفاديت وراح ارجع هذني الخمسه اشغلهن لغير واحد الكطه واستفاد من منصبه ويييييين ماااجان

وهذا التاجر راح يجيبلي بعد فتره هم جماعه

نفس المشكلة عدهم وهالمره همه يعرضون سعر اكثر مقابل تسريع شغلهم وكم ملاحظه يريدوهه ..

ارجع اشغل نفس الولد بنفس المبلغ لاكثر من اسم .. والباقي من الملايين كوله الي

وهكذا .. اشتري ناس بمساعده ناس

متهمني الفلوس الي ادفعها المهم احصل

شغل جوه ايدي وكت احتتج ادك تلفون ماتعب نفسي واتوسل باحد

- انتي عبرتي كل توقعاتي

- عادي مو جديده عليه ولا عليك

هذا شغلي بجماعتنه يسموه

( سمسار الجيب )

فيعني اني اكعد استفاد من الي يجون

اكثر من همه مستفادين

ادور منصب ادور شغل . . الكط الحيال وينه وينه هذاك احاوطه من كل جهه واخليه اول واحد يوكف ينتظر جيتي

هذا عندك الرائد جميل .. تعبني بالبدايه لان هو ثعععلب داهيه .. ضليت وراه وراه الى اااان لكطت نقطه ضعفه عرفته سادي

واستغليته بحبيبته .. صار هسه اكثرررهم

ممنون الي

وغيره وغيره .. شوف هسه جهات اتصال تلفوني مابيها رقم هيج حافظته اني اكولك بس ابو مطعم هناك اوصي منه لان قريب عليه

بس البقيه كلههههم هذوله للشغل والفايده

ماحفظ رقم ماحتاجه ولا بس للونسه والسوالف ماعندي هالشي

لو يفيدني ويحصل رقمي لو يضل ع الفيس شوكت ميعجبني ارد عليه ومن مره وحده اطفشه بعد ميدز شي هاي اذا ماستفاد منه

- عجيبه انتي عجيبه

شعلمج هذا كله !! انتي بعدج صغيره شوصلج لهيج ناس !

- اني صغيره عمر بعينك

بس غيرك يحسبوني راح اصير ثلاثينيه

جسمي جان اضخم من هسه واني اكبر بشكلي هواي .. بطريقه اللبس الحجي المكياج كلهه تغير وتكبر الواحد

فمستحيل احد يصدك منهم اني من جنت عمري ١٨ سنه عندي لسته ارقام موظفين وزارات باعلى المناصب يكدرون يوصلوني

- زين ماشي هسه انتي عندج كل هالامكانيه

ليش متسغليتيهه الج !

ليش ماتوظفتي باحسن وزاره وصرتي بمنصب زين مو احسن من هالشغل !

- جنت اكدر وانعرض عليه هوااي شغل

واحد منهم مديريگرك طلب مني زواج ويعيني وياه وكم شهر كالي اخليج اعلى منصب مني

بس صيري الي و ماقبلت

ولو يرجع الوكت هم ماقبل

- ليش ؟

- مااحب احد يفضل عليه

اني الي يسويلي شغله اني افضل عليه اغركه فلوس بحيث بعد لو اجفص بطنه ميطلعله صوت كدامي

واني ممحتاجه للوظيفه والفلوس شوف هسه لو اكعد بيتي واسكت كلشي ماسوي هم تجيني فلوس

عندي تقاعد ابويه وعندي دار الازياء وعندي عمي ..

دار الازياء فتحته من جان عمري ١٧ سنه

تدري لو لااا

- انتي فتحتيه بفلوسج لو بمساعده عمج !

- تشاركنه بي ردت ارجعله فلوسه ومقبل

لحد هسه اكوله اكطعهن من اجوري واخذهن ميقبل يكولي هديه الج ماريدهن

- اي بعد هو عمج شكو حديه وياه هيج بالفلوس !

- احسن بالفلوس لو اخوك هم يذلك بيوم

واني ماريد لزمه عليه حتى لو من عمي

- يعني هم تلعبين هاللعبة عليه بيوم ؟

- اني لاعبتهه عليك من اول ما تزوجتك

ميحتاج هسه اكعد افكر شستفاد منك اني اصلا من البدايه اعرف شأريد

- لااااا يالله !!

شتردين مني ! ريري انه انطيج فلوسج كلهن والله لو اعرف اجديهن ما ضحك عليج

انطيج كلشي اتفقنه عليه بس لا تسويلي هالملاعيب

- شبيك بابه هسه اني حاجيتلك على فلوس !

هي شي اكيد فلوسي تجيني واذا انته صرت تتشيطن براسي اعرف وعندي الي يجيبهن منك .. هالسوالف مادوخ نفسي بيهه

اني بس استفاد منك للمستقبل انته ماحصل بعد منك بحياتي خوش لكطه لكطتك

- متحجيلي هسه شتردين مني خلي افتهم

يعني مصايره هاي واحد عينك عينك مستغليه ويسكت !

- اي تسكت غصباً عليك تسكت

لانك وقعت ووعدتني شوكت مااا نتطلك تسويلي كلشي اريده قبل الطلاك

انته الي دكيت صدرك وقبلت ماجبرتك اني

بس عرضت عليك شرطي

- بس هسه صار بينه عشره

يعني واذا حجيتيلي شنو راح اعوف الشرط !

والله اسويلج كلشي تردينه كبل مانتطلك

بس ماتحمل هيج تضلين ويااااي

تلعبين عليه بعقلج هذا وتستغليني

احجيلي وماقصر وياج وعلي

بس لا تغدرين بيه بملاعيبج هاي

- حويدر اني ماغدر الفين مره كلتلك ماغدر

اني اخذ الي اريده وجه بوجه

انته ضامتك ذخر لمستقبلي اني ماعندي احد قريب عليه .. المهم قبل مانتطلك احجيلك

وانته مجبور تنفذ بدون مجادله

بس احجيلك الصراحه اذا تريد تأمن بشر بحياتك أمن بيه .. اني ماغدر بس استفاد عينك عينك

على الاقل انته تعرف سوالفي كلها ما اجيتك بوجهين .. هذاك اليضحك بوجهك هو الي خاف منه .. بس الي مثلي ما يأذيك لان شاركك بخيسته وهم اعرف انته متفيدني بشي

غير الي للمستقبل .. هذني سوالف جيب و ودي ميهمني مادورهن وياك

- انه أمن بيج

بس ان شاء الله تضلين وياي هيج

مانغدر منج بيوم لان ساعتهه يجوز اجرم بيج

- اني تأذيني وتزل وياي أذيك واكرهك عيشتك

تبقى وياي زين وماتطعن بيه ولو بكلمه

اخليك بنص عيني .. اخليك تمشي على ذهب والي تفكر بي وتتمناه اجيبه الك لو بعده ما نخلق اخليهم يخلقوه الك

اجتي يمي خلت ايدهه على ركبتي وتكولي ..

- كلشي اصيرلك بس كون تضل بسدي لا تصير وراي وتطعني

- وعلي مااعرف بالغدر شي

-اووكي ضل مثل مانته لا تغيريك الدنيا

تره ملذاتها اني احصلهه الك لا تبيعني علمودها

- لا ان شاءالله مابينه هالشي وبدينا بطريق الثقه من اول يوم ونضل مكملين بي

أطمني ماغدر اهلي وانتي صرتي من اهلي بعد اذا اغدرج اغدر نفسي

- نشوف يا حويدر لشوكت تضل وفي الي

طلعت وراحت يم امي .. وانه رجعت صعدت لغرفتي وضليت افكر بحياتي الجديده راح اكدر أتأقلم ويه هيج ناس لا ؟؟!!

اجتي بدلت ونامت يمي .. كلتلي..

-حويدر شوكت تاخذني لبيتي

تره طكت روحي

- انطي صبر صيري زينه واخذج

- يييي ماااصبر بعد اريد كووووونييي

اريد اروح للصالون اعدل جهرتي الخيسه

اريد اروح اتعااارك ضايجه ضاااايجه

ماتحمل هالكد ناس مؤدبه داضوج منكم تره

-هههه روور ماتشترين راحه بالج بويه مو احسن

- هناك راحه بالي هنا انتو تبطون الكلب

باردين باااردين يممممه لك ضاااايجه

اذا متاخذني هاليومين اطلعلك عركه من جوه الكاع اخليك تشرد من البيت

- صبررررج بوويه صبرج

فتحت كاميرا ويه كانيور وعافتني اتصفن بالسكف وحدي ...الى ان ايست منهه ونمت

ثاني يوم جان عدنه مجلس .. من العصر سبحت ولبست الدشداشه السوده وضليت بغرفتي الف الغتره الخضره ..

كملت ترتيب وعطر والمحفظه والموبايل اخذتهن .. ردت انزل بس كلت لا خلي تجي رور تشوفهن يلا .. اريد اشوف رده فعلهه

جوه متاخذ راحتهه ..

ضليت انتظر وانتظر وهي ماكو

عاد خابرتهه وكلتلهه تصعدلي ..

اجتي كبل فتحت الباب بهجوم وتكولي ..

- شبيييك انته شوكت تبطل هاي سوالفك

تعالي بساع تهبطني متحجي شكو لو الا تصعدني تلث طوابق وتشنج رجليه

- شبيييج بويه انطي مجال لنفسج

اخذي نفس جايه هداده

- ديلااااا

شو كاشخ وين النيه !

- مجلس عدنا واطلع ويه جماعتي

- زين عود اخذ تلفوني وياك شكو شامره هنا منطيته للحايط متحطه بجيبك وتصورلي لو متفكر بهاي بس لنفسك تروح تشوف

- والحسين اخذه واصورلج ماشي بس علكيفج

- ديلااا اووكي

اكولك شو خلقتك منكلبه بهاللبس

طالع خوش حويدر

مشايفتك بالدشداشه بس لو بيك لحمممه منا منا جان خوش صرت توب

- هو انتي بقيتي عليه نفس للاكل

- ديلاا ع اساس شلون جنت انته ماكو هيج معبي الثلاجه بطنك

شو كوم خلي اشوف طولك الفارع بعد عيني

-ولج انتي حتسودنيني

مافهم حجيج وياي شنو !!!

-شنوووو الشنوووو

داشوفك لعد صايحني على صخام وجهي

تكوم لو لا تره حنزل

كمت ورحت عصرت وجهه وضليت اعض بيهه وهي ادفر .. وخرت وكلتلهه..

- لج جاي تحسسيني متزوج احمد

رجعي تلوكي هنا يمي هم دخيل ربج

صوتج جاي يصفر اذني

- ديلااااااا عود انته شلونك

مهند زمااانك بالروماااانس

دروح بابه امشي روح انزل حتى شوف ماريد بعد اشوفك

- ياااابويه وعلي نازل وشارد منج

انه حخلي هاي ايام نص الشهر ويه ايامج

حتى ماعتب عليج بعد كبل اعوفج وامشي

-هو هذاا الفالح بي بس تشرد

دروووووح عايزه على حنيتك اني

اوكف ولك لاتنزل خلي اني انزل قبلك

امك جايبلتي لفه كباب وبطل لبن جان بارد هسه جمر من وره سوالفك البايخه

خلي اركض الحكله

ضل انته اشبع بنفسك بالمرايه ورش بعد عطر رش خلي يشمك حتى الامام بكبره هم يجر نفس من عطرك

ركضت نزلت وادبج على الدرج وانه انزل وراهه براحتي واضحك وهي كبل ركضت يم امي ...

طلعت من البيت وكلت التووبه بعد اعيدها

هيج اهميه مانطيها لو اموت بعد ماسويها ..

حضرت المجلس ولليل رجعت .. وكبل استلمتني تحقيق ...

منو أصدقائك ؟ كم بيت يبعدون من بيتنا ؟

ليش بس هذوله تطلع وياهم ؟

من شوكت تعرفهم ؟

متزوجين لو لا ؟

وشوزعولكم هناك ؟

وشلون تلطمون ؟

وشيقرولكم هناك ؟

وانه واكف باب المطبخ واجاوبهه كلشي يلا

خلتني اطب اغسل وارتاح ...

اخذتهه ثاني يوم لبغداد .. لان الليل كرعت راسي لو ابقى بعد يوم ثاني ماخذهه تحرك البيت على راسي ..

تدور عركه على كل حجايه .. وانه اسوي نفسي نايم ..

اخذتهه وتغيرت نفسيتهه ..

رجعت رور الحبابه ..

اول ما وصلنه هي دكت على حبزبز اخذلهه كانيور للبيت ...

وهناك شمرت العبايه والحجاب والبوشي

وضلت بس حاضنه بكانيور وتناغيله

- يمه الجلوبات يممه حبيبي روووحي رووحي ولك شلووون اني انثولت وقبلت افاركك واكعد ويه الصخايم

اوويلي الوليدات اوويلي يمه دنافيش جلوباتي

لك فدوه لصوتك لك اوووف اووووف عوي حبيبي عوووي خلي انطرب وطز بعشيره الخلفو طنطل وصخيماتهه

-لج حتنجلبين وياه شبيييج انطي لنفسج مفكه مطاير

- شعليك انته جلبي هو لو جلبك !

لتدخل بيني وبين كوووني اوووكييي

- يطبج مرض انتي وجلبج

حطلع اجيب غدا

- كوووني ياكل لحم شرح وعظام تازه كون نظاف اوووكييي

- استغفر الله اااانه شعليه بجلبج

انتي جيبيله

-ديلااااا معايزين عليك

هسه حبزبز يجيب

نزلت غراضهه وطلعت للمطعم اخذت غدا

وشربت جاي هناك كبل ماتغدا لان المحروسه هنا تنساني لا جاي لا ماي .. وجهي ووجه الحايط متكابلين ...

رجعتلهه تغدينه واندكت الباب ..طلعت فتحتهه وحبزبز واكف وشايل علاكه اللحم

وبطل الشامبو مال كانيور ويضحك بوجهي

ويكلي ...

- استاذي عيني شلونك

- هلا بيك

- ديربالك على ستنا وهالله  هالله بيها تره ماكو اطيب من ستنا اي وشتريدون اني حاضر

- زين مشكور الله وياك

سديت الباب وطبيت كلتلهه..

-هذا الطلي مالج يوصيني عليج

-ديلاااا عاد بلكت تسمع الوصيه

اخذت العلاكه وراحت غسلت اللحم وكعدت يم كانيور توكله بايدهه وانه كلتلهه..

- هسه شتردين تسوين هنا !

بس تكابلين جلبج وتكعدين مو ؟

- اي اليوم بس لكووني

وباجر يبدا الشغل

- شعندج !  ؟

- اشوف شعندي واروح اسوي

اكولك روح اخذ السياره غسل وتشحيم

شو حسيتهه وصخه من جوه متربه

خوما اصعدهه وصخه ! اريدهه تلمع بالباب تطبكهه اوووكييي

- اووكيي ست اووكي

-هههه بايخ  متلوكلك اللواكه وياي

عفتهه واخذت السويج وطلعت ...

وديتهه للغسل .. وضليت كاعد على الرصيف افكر بس لا تريد تروح تسهر ؟ واذا راحت شلون ؟

زين انه اعوفهه تروح لو امنعهه ؟

رجعت للبيت وطبكتلهه السياره تلمع بالباب

وطبيت اسمع صوتها ويه كانيور مشتغلين خبال ...

وكفت اباوعلهه تسبح وياه بالبانيو .. ومطربسه الدنيا بالمي والصابون ..

وكفت يمهه بالحمام ...

- حتى بالسبح وياج ! شبيج مسودنه بي

-احبه شبيك انته متعرف الحب شنو

داكولك احبه احببببه روحي بي جلوبببي

اووووف من هو وياي ارتاااح ارتاااح

- ناس تحب اوادم مو جلاب

- اسكت لا اهده عليك واخلي يعرفك الجلاب شنو

لتحجي على كوووني هذا قلبي قلبببي روحي كل شعور بيه هو اله وحددده بسسس وحده

- تغثيييين انتي تغثييين انه ماتحملج هيج

رايح انام

- عووف الغرفه الي ولكانيووور نعتني بنفسنا ونشف من نكمل سبح

روح نام ع القنفه

-صبرك ربي صبرك

رحت طفيت الاضويه ونمت على القنفه

هي هالكدهه ورجلي اطول منهه .. رفعتهن  عليهه ليفوك ونمت ..

حسيت عليهه تكعدني.. باوعتله لابسه متكشخه وضاربه المكياج ...

- شكووو وين ويييين

- كووم دنطلع نفتر ضايجه اريد اشوف ناس

شارع صخام كوم عاد نتعشى بره اني وياك وكوووني

- هم خليتي بالنص

ماطلع وياه

- مو اروح واعوفك

اخذه وضل انته تصفن وحدك هنا

- متعوفي يم ذاك الطلي واحنه نتعشى ونرجعله

-لاااا اريد اغيرله جو خطيه صار هالاسبوعذاك الطلي المعزا ممطلعه وبس رابطه

دكووووم عااد يلااا تجي لو لااااا

-ريررري ريرررري

-شكوو شكووو فوك ماطلعك ! اني صوووجي وافكر بيك لو عايفتك منهمد ورايحه شابعه ونسه وجايه وانته متدري

مو احسن

-هييييي انجبي شويه هستوني صحيت انطيني صبر بس خلي اجر نفس سطرتيني

-ديلااااا فضني عاد

كعدت واباوعلهه ..لابسه بنطرون رصاصي

وفانيله  ابيض صلوخ  فوكاهه شي مشبك نيلي وكصير ويه حافه البنطرون ورافعه شعرهه ذيل حصان ومخليه سلسله كانيور بيدهه

- هاي هيج تطلعين وياي لو منتظرتني اكعد وتبدلين للطلعه!

- اكوله مكمله بس امشي عاد كوم غسل وجهك فضني يلاا

- وين بوووويه وويييين

يعني تطلعين وياي ولابسه صلوخ !

بنطرونج حيطك وزنودج كلهه طالعه

صدرج شعلوه لج حتى بطنج مخيله من الفانيله صدك تحجين !!!!!

- اي واذا !

- ياااا واذاااااا ريري شبيييج !!!

وين عقلج !  المن مصلخه وطالعه الممممن ارد افتهم الممممن !

- هيج اني يعجبني هاللبس والبسه مو بالي احد تره

- البسسي هناا بيتج البسي كيفج

بس طلعه بهيج لبس ماااكو لووو تطك نخله براسج

-تره معليك بلبسي اووكي

عليك بيه هناك بيتك مو بيتي

- خراااا بيج وبيتج

لتطلعيني عن طوري

تردين اطلعين وياي تمشين تذبين كل هذني وتسترين روحج ونمشي نطلع غيرهه ماكوووو واذا طلعتي الباب اكسر رجلج وعليي اكسرج واعوفج وامشي ونعلى على والديه الي يكابلج بعد

رحت غسلت وانداريت اشوفهه بعدهه واكفه

  جضيت بيها...

- يعني ترديناااا نتخارب من وره لبس !

ضاله معانده عليه

لو مصلخه لو متمشين بين الناس !

- محجيت شي لتعيط

- امشي بدلي ريري مااااريد اتلاغى وياج روووحي البسي اي شي بس رووحي

- ماااريد اطلع بعد

طبت لغرفتهه وسدت الباب ..

ضليت ادك الباب واكللهه ...

- لتدورين سوالف جهااال وياي

مو كرن  انه كاعدلج هنا وتردين اخذج مصلخه وافتر بيج

حسي شويه افهمي عيب هالشي عيب

رجال ماخذ مرته مصلخه هيج ويفتر بيهه شيكولون عليه الناس !!!

لا تطلعين هسه بعد احسن بس مرة الثانية حسبي حسابي من تلبسيلج هدم وشوكت مااطلكج روحي صيعي بكيفج

طلعت كعدت بالشارع واباوع للمنطقه

واكول لنفسي ..انه وين كاعد ! شجابني لهالناس !

سمعت صوت كانيور هرج البيت رحت طبيت واشوفه واكف باب الهول وينبح

ويباوعلي ..

كبل رحت لغرفتهه وشفتهه مخليه السله يمهه

وتكح وتتفل الدم بيهه ..

كمشت ايدهه ترجف ..  ضليت افركلهه وبعدين اخذتهه غسلتلهه وهي دفعتني

جريتهه حضنتهه وهي تكلي ..

- اخاف صدك بيه سل وتروح تتمرض

عوفني لتتقرب مني

-لا اسم الله .. سل بعدوينا

امشي نطلع لدكتور زين  هذاك الاخذتج عليه زمال مافادنا بشي

- مو متطلع وياي

- اكبعج بايدي واطلعج

تضل عليج تشلين حالي

والله يمكن بيوم تخليني اطلكج بساعه عصبيه ومادري بروحي

-واذا شتفرق عندك بالحالتين تخلص مني

- سدي حلكج كافي عاد اليوم هواي جفصتي حجي وحركتي كلبي

هسه مو مريضه انتي ماتسكتين شويه

دفعتني وراحت لغرفتهه تمددت وخلت المخده على راسهه ..

فتحت كنتورها وضليت اكلب بملابسهه

شفت عدهه جبه سوده كلتلهه..

- تلبسين جبه ؟

-اييييع ولك هاي مال سوك مال طلعه ركضه

عوفهه عوفهه

-جا شعندج ! كله مشلح !!!

البسي عباتج بويه احسن لبس واكثر شي يلوكلج

-لووو اموووووت ماطلع بيهه

عزااا تريدهم يضحكون عليه هناااا !!

يشوفوني لابسه عبايه ودرع كامل وطالعه !

- جا من تطلعين موريه جسمج عادي

بالعبايه تستحين من الناس !

- لك باااابه ممتعوددده هنا شي وهناك شيي

هنا ناس يعرفوني اطلعلهم هيج غير يجفلون

-جا كومي دبريلج شي مستور

جريت ايدهه وكومتهه وضلت تكلب بملابسهه .. وطلعت ثوب طويل مشجر ناعم

وبي ردان تلث ارباع

- باوع بس هذا عندي يمشي ويه الستر

البسه لو انام  !

- البسي بويه البسي

كون مايطلع ضيك

كبل نزعت ملابسهه ولبسته .. اجتي عليه سديتلهه سحاب وكلتلي .

-يلا امشي تره اختنكت

- حجابج وين !

-بط..ي

مالبس لتلح وياي

-  جا مانطلع ضلي مختنكه هنا وموتي

شسويلج

-حيداااااااااار وتااااالي شلوووون بيك

- طلعه وياج مفرعه هيج ماطلع لووو تموتين هسه كبالي ماطلعج هيج

- يبوووو يبووووو ويه السااااده يبوووو

يوم الاكشر العرفتك يوووم الاكشر

-البسي يلا تردين تطلعين وياي تحجبي ونطلع

ضلت تلوب بالغرفه وتالي لبست حجابهه

واخذت جنطه ثانيه غير المحضرتهه يلا طلعنه ...

بالسيارة باوعتلها وضحكت ..

-هسه صار شكلج مال متزوجات

-اي وطالعات بالدفرات

-لج وعلي انتي هيج احلى

- ايييي دخذني عاد لصخيم خلي يفك ريتي

مو طكت روحي مخنوكه

- صار بويه صاار بس اعصابج

ضلت تنزل الجامه وتتافف .. وانه عيني على الشارع ادور دكتور صدريه ...

لما لكيت واحد مسطر كومه شهادات يلا طبكت ونزلنه عليه ...

ضلينه فحوصات واشايع ومن مكان لمكان افتر بيهه وهي خبصتني بسرعه وفضني

كانيور ضال وحده بالسياره ..

رجعنه للدكتور وهي بس تريد تطلع تروحله

وانه كضيتهه عرك وياهه .. ماصدكت وصلنه السره وخليت بالي ويه الدكتور

فهمت منه ...

عدهه التهاب وتقرحات هي تخليهه تذب دم

بكحتهه .. ومنعهه من التدخين ..

بس طلعنه للسياره جرت الباكيت من جنطتهه

وتريد تدخن ...

وضلينه نتناكر على الجكاره .. هي تكلي ماعيش بدونهه ماكدر وانه احجيلهه صحتج

وهيج وهيج وميفيد عناد راس يابس

صفينا على تقليل بالتدريج ...

رادت نشتري ملابس واخذتهه ..

نزلنه نمشي ويانه كانيور كامش السلسلة

وهو يمشي بهداوه ويه مشيتنا ...

وكل الناس عينهه عليه لان هو جبير يخوف

كلساع اكللهه شورطتينا بي وهي تزعل لان احجي عليه ...

اوكفلهه باب المحل وضال حاير بكانيور وهي تروح تختار وتجيني اشوفه زين تاخذه مو زين تبدله ..

اخذت كله اثواب ورهمت حجابات ورادتني اشتري ماقبلت كلتلهه بس خلي نرجع ونخلص من هذا المجلوب على الرايح والجاي يركض وينبح ..

اخذنا لفات للعشه ورجعنه للبيت .. تعشينه وهي راحت تسوي فراش لكانيور يم السبلت

خلته هناك ينبطح ويتختخ واجتني تكولي ..

-هسه اني شنو يعني تحجبت بعد ؟

شو مداستوعب يعني

- شكو بعد مو اشتريتي لبس محجاب

هم ناويه تشمريهن وترجعين لهذنيج الخلكان !

- يبوو هسه مو داسألك مثل الاوادم

- اييي صرتي محجبه بعد كله هيج

- شو سالفه تعب

لك عيني حر موت حررر

ملفلفه منا وملفلفه منا ادري شلون اتنفس لك اموع اني ماتحمل اختنك يممممه موتي على ايدك يالسيد يابن السيد

- هههه موتي على ايدي شحلاتهه وتصير صدك

- ياااا شبيييك تريدني اموت وتخلص مني !

- والله الصراحه

اريدج على ايدي تعيشين تموتين بعد كيفج

بس المهم هنا

- مستخف حرااام طلعت عينك

- هههه لمرتي هسه طالعه لغريبه

- ديلاا اووكي

- اكلج رور

اليوم جنت افكر بشي

-اي ؟

- احنه .. عشرتنا تاليهه وين توصل ؟

- اني هم افكر الصراحه بس هي مبينه

نتطلك وكلمن يحير بروحه

- زين واهلي شكللهم !  طلكت على شنو !

همه على محبتج هاي هسه وعلي يطردوني من البيت اذا اطلكج

- ههه حييييل تستاهل

لعد اكو واحد يعوف هيج مره بس المطفي

- هسه انه ماعفتج بس جاي اكول يعني

- يعني هسه انته شتريد ! احجيلي الزبده

- ماعندي زبده صراحه بس هيج اناقشج

جاي اشوف شمفكرتلي

- اني اتمنى نكمل سوه بس ماترهم

فما اتعب نفسي بنقاش وياك هنا

هي مبينه تاليهه وين

- اكلج يعني هسه لو فرضاً جان زواجنه بظروف عاديه وحياتنه زينه مابيهه صعوبات

جان حبيتيني ؟ ؟ ؟

- اي صراحه جان حبيتك

- هاا ليش ؟

- انته حنين وعلى نياتك وتتحملني بخبالي

واهم شي اتونس من اتعارك وياك اني كلش احب هالفقره اكو ناس هيج العركه وياهم بيهه لذه

انته كلش احب اعاركك .. صح اضوج من ملحتك بس اوووكي هي حلوه

- يعني هسه تحبيني ؟

-لا طبعا

مو الي بالك ولك

هيج اني ثوله اوكع بيك حب وغراميات وتاليتي اكابل المخده واشبع بجي على حظي من تعوفني !!!

- بس انه تعلقت بيج

وعلي هواي افكر شلون راح اعوفج !

-عادي تتعود شغله كم شهر وتنسى

- وانتي هم تنسيني ! يعني ترجعين تعيشين عادي ولا كأن انه رجلج وعشنه وضحكنه واكلنه وسوينا اشكال مصايب سوه !

- ماله داعي انساك بس اتعداك يعني عادي

اني ماراح اموووت نفسي بتعلقي بيك

ولا راح احبك ولا اتأمل وياك شي

تروح اكولك بيباي واسد بالك منا بحلوه ومره

وارجع اكمل حياتي عادي مابيهه شي

- ياقوه كلبج

والله انه بس احجيهه ينغز كلبي عاد شلون تصير مادري

- تصير هسه فد معضله انته لتروح زايد وياي اووكيي ضل داىما فكر انته جايبني اشتغل عندك وتطلكني بعد كم يوم

هيج ذكر نفسك احسن

- انتي هم هيج ؟

- لا اني مرسخه هالشي بالي

ماذكر نفسي بي

شوف حويدر

اني مدامني عايشه وياك وعلى ذمتك ابقى مداريتك ومداريه اهلك واني احبكم من كل كلبي صدكني انتو ناس طيبين تفكون الكلب وتكعدون بي

بس اني اعرف حدي وين .. لا اطمع وياك بشي ولا افكر اربطك بيه بأي درب ..

لا بيوم اورطك وياي بطفل ولا اورطك بمشاعر ولا اورطك بحجايه يم اهلك

انطيك كل الي تحتاجه لحياه زينه مرتبه

واعوفك تعيش مرتاح يلا اروح  وما بيوم استغلك اني اعرف المن استغل والمن اورط وانته ماريدك منهم ..

مدامك وياي زين اني زينه ..

وشغلي الاجيت بي اسويه واخذ فلوسي واروح بساعتهه يلا اطلع من خطيتك بعد

مالك حق بيوم توكف تعاتبني على شي

- والله انتي معدله رور

احب عقلج وياي .. خليج هيج حتى لو انسى ذكريني لان انه احس نفسي جاي اتغير

وماريد نوصل مرحله ننحرج بيهه فضلي ذكريني دايما بهالحجي

- اووكي

عافتني وراحت لغرفتهه ..

خليتهه شويه براحتهه هناك بعدين رحت دكيت الباب عليهه وهي كبل فتحتلي

وانطتني ملقط وتكلي ..

- يلاا همزين ماعندك شي تعال نظف حواجبي شو اني تعبت بعد مابيه حيلهن

- لا والله! اشتغلج حفافه !

- ايييي واذااا هسه انتي كلشي اشتغلتلي

ضلت على هاي

تمددت وتكلي..

-يلا حويدر بداعت العشره

تعال هيج شعرايتين بس خلصني منهن

مخربات وجهي يلا تعال حباب شوف علمودك نومت كانيور بعيد عني وخليت الغرفه الك يلا متقدر

- والله انتي كلبتي ام حياتي

كعدت يم راسهه وضليت ادبرهه الكط حواجبهه ورتبتهن بكيفي .. هنه خفاف

رتبتهن شعرايه شعرايه واشيل الزايد

كملت وشافتهن .. باستني وراحت غسلت

اجتي ونمنا كل واحد بجهه ...

الصبح كعدت لكيتهه طالعه .. خابرتهه مغلق جهازهه..

ضليت من الضوجه اغسل بالباب واغسل داير مداير البيت هو ممر صاير عليه شباك الغرفه  .. جان كله تراب .. غسلته ورحت سبحت وطلعت افتر بالمنطقه واباوع للوجوه السود هاي ..

كلهم هنا نص عين مفتحين والوجه اسود على ازرك .. مبهذلين لبس .. جهال يفترون وبايدهم الجكاير والرجلين وصخه والشعر وصخ ...

مكان ماينفهم راسه من رجليه ...

براس الشارع واحد جايجي .. شربت منه واخذتلي بسكت وياه اكلت .. ورجعت للبيت

كابلت كانيور وكعدت ....

رجعت اخابرهه هم مغلق .. اباوع للساعه

عبرت الاحدعش ... وافكر بس وين هاي تروح من الصبح !!!

خابرت على اهلي كضيهه حجي وياهم

وسديته وضليت افتر بالبيت اكلب بهاي وهاي

وارجع اشغل تلفزيون ... لحد ما رجعت بالثنتين الظهر ...

لابسه ثوب طويل من الاشترتهن بارحه وحجاب وكعب ..

- وين جنتي.  ؟

- شغله سريعه رحت سويتهه واجيت

لك هذا يخنك يمه مقبط من كل مكان

كعدت ونزعت حجابهه شفتهه مسويه شعرهه ظفاير ..

-هاي انتي منو يظفرلج!

وين ترحين من الصبح فهمينننني

-شعليك شغله خاصة هاي لتدخل بيها

-ليش من تطلعين متكليلي

ليش تمشييين مدري وين وانه مادري بيج!!!

مخليتني حجاره وياج !!!

- حيداار شبيك كلشي وسويته هوسه شكبرها

-انتي تجبريني اغير طبعي وياج

منطيج حريتج بكل شي بس انتي متحترمين

لو مخليتلي احترام متسوين هالسوايه

جان كلتي اكو رجااال بالبيت عينه عليه

عيب اضربه عرض الحايط وامشي بس انتي

على حل شعرج تمشين مايهمج ولا يوكف بعينج شي

-اييييي بس اني ماريد اكولك وين اروح

شكو تجبرني

- ولج بويه يطبج مرض روحي لجهنم بس كليلييي كليليييي راح اولي اطلع هالكد اطول وارجع عندي شي مستعجل احجي شي

جاهل انه وياج تعوفيني وتمشين وترجعيلي بهدايا ! وعلاليك غراض!

شوكت تصحين على روحج وتحسبين نفسج متزوجه وخيالج لازم اعرفه وين يروح

ضلت تخوزر وتباوعلي ... عطت عليها

باخر حجايتين...

-لوووو تحترمين ونعيش سوه لووو هسه هنا بعد ننهي كلشي وضلي صولي بالشوارع بكيفج

ماتحملج هيج انه مااااتحملج

كدام عيني شتردين تحجين تسوين سوي

بس ورااااي لااااا

يعجبج تنعدلين وياي كولي مايعجبج كليلي روح ماريدك وهسه اطلع وزمااال بعد اليحاجيج ويوكفلج باب

راحت لغرفتهه وركعت الباب بعصبيه

وانه ضليت افرك براسي واخذ نفس اهدي نفسي ..

غمضت وضليت مخلي ايدي على عيوني ورجعت راسي .. جنت اكول هسه بعد راح تجي تنطي شروطها وشكد فلوسها واعوفها بعد مالي شغله بيهه هي صعبه وعناد ماتنجرع ...

حسيت عليهه يمي حضنتني فتحت عيني وضليت اباوعلهه .. لابسه فانيله وشورت ومخليه راسهه بركبتي ...

-هااااا شقررتي ؟

- اووكي انعدل انعدل بس لا تنكلب عليه هيج

- بعد ماكو عناد

مثل ما مشاركج بكل شي هم تشاركيني

انتي مو توكفيني باب المطبخ تسوين جرد على كل طلعتي يلا ترتاحين .. ليش من توصل يمج تيبسين راسج ؟

- مامتعوده انطي حجايه عليه لاحد

-انه هم ممتعود بس الج اتصرف غير شي

تغيري وياي ريري والله تعبتيني بالحسين ميصير هيج كل شغله صياح وعراك يلا تفهميها

-ديلاااا اووكي اووكي

خلت ايدهه على لحيتي وضلت تبوس عليهه

وتكلي ..

-اسفه بعد ماضوجك

- كولي وداعتك

-ههه وداعتك حويدر بعد ماضوجك تره داعقل هااا لا عبالك داتغير بس طول خلكك وياي

- زين نعمه

- شوف رحت اشتريتلك لبس لدوامك الجديد

صارت اطلعلي الملابس كلهه ستر وقمصان واحزمه ....

-شكرا رور بس انه اضوج من الستر

- رايح دائره لازم تغير ستايلك

كوم البس داشوفهن عليك تره هاي ستر سبورت يعني تكعد على جسمك فيت متبهذلك

-عوفيهن بعدين مالي خلك هسه

عافتهن واجتي كعدت بحضني وضلت تبوس بوجهي ..

- شبيك هم بعدك ضايج مني ؟

- اييي

- دكافي يااا هسه شكو تضل مطنكر هيج

كلتلك حتغير كافي عاد

تره ماعرف اضل اراضي بيك كلتلك اسفه هي كل شويه نعيد

درت وجهي عنهه وهي ضلت كاعده على رجلي وحاضنتني ...  تلعب بشعري وتبوس ركبتي .. وانه احس نفسي اريد امتلكهه

بس الي واخذ راحتي وياهه ماضل احسب حساب لكمشه ايدهه اكول ماعيدهه

بس ضليت اذكر نفسي حالنه شنو ..

وعلى صوت دكه الباب هي وخرت وانه كبل طلعت .. حسيت هنا جريت نفس ..

شفت حبزبز جايب الغدا .. اخذته وطبيت خليته على طبله ورحت غسلت واجيت لكيتهه فاتحتهن وصرنا ناكل وساكتين ...

كملنه غدا وهي راحت نامت وضليت انه نايم على القنفه .. وره شويه اجتني ..

- حيداار امشي خلي نرجع لبيتكم

- هاا شعجب !

- ماعندي شغل بعد لغيت كلشي ماريد نضل نتعارك

خلي نرجع هناك ونصير صلح احسن

- يلا بعد احسن

حضري غراضج وامشي نرجع

وصلنه كانيور للشارع نزلناه يم حبزبز وطلعنه للنجف ..

وصلنه بالليل .. اهلي لكيتهم حاطين الجهال همه ودفاترهم ومكلوبين مدرسه ..

ضلت ريري وياهم وانه عفتهم ونمت

ثاني يوم الظهر اجتي كلتلي ..

- اخوك عادل مصاحبله وحده

- عليييج علي !!

- اكص ايددي اذا متطلع من كرابتكم

- شمدريج !! احجيلي

- بنته مو هسه رجعت من المدرسه وماخذه صفر بالقسمه جانت تبجي واني دافتهم منها  ليش  متجاوب تكولي ابويه كل ماروحله بالليل بس يخابر يخابر ويطردني من الغرفه

- يجوز مصاحبله وحده بالفيس شي شمعنى كرابه قفلتي ؟

- لان اني سامعته مره يخابر بالمطبخ ويكوللها

كلهم نايمين ومادام عمتي بايته بره اصعدي خلي اشوفج

يعني يريد يفتح كاميرا اخيك عيني

- لاااا لاا معقول عاادل ! لج هذا معقد اضرب من سيف وينه وين هالسوالف!!

- انته المعقد اخوتك فرري عوومري

اني شكيت بي بس ردت اتأكد وبنته بعد ثبتتهه عليه

- زين بس اكعدي خلي افتهم

هسه هو مصاحب منو ؟ بنات عمتنه ؟ لج عندي جيش بنات عمه ياهي منهن هاي !

- شمدريني بعد نبحوش وراه ونشوف

راحت وضليت انه عقلي قفل على عادل

هذا المن مصاحب !! 

ضلت عينه عليه بالبيت وهو ميخابر بس بغرفته .. نريد نسمع حجايه ماكدرنا

صار يوم طبخ عدنا .. جمعنه الولد وحضرنا الجداري بالشارع والحطب .. ومن الليل كعدنا نحضر القيمه  و التمن ..

ريري ويه اختي وامي جوه واحنه الولد وصحباني من المنطقه وصحبان سيف ملتمين نطبخ بره ...

للصبح وزعنه وطبيت ارتاح .. ردت اسبح

وجاي اطلع ملابسي واجتي ريري حضنتني

وتكلي ..

- عاشت ايدك حويدر خوش قيمه

بعد راح نشبع بيهه اسبوع ماسوي غدا

- هههه والحسين كرهتيني الاكل

- درووح بطران

اكولك تره دكو عليه تلفون يريدوك تروح

تكمل معاملتك

- هاا يالله خير ان شاءالله

باجر اروح

- اسمع همه راح يثبتون اسمك هسه بس

وره الاربعينيه كالو ياخذوك دوره يلا تبدا بالشغل

- اي همزين جنت شايل هم الزيارة والله

عشتي رور وكفتج هاي عمري مانساهه

-ديلا اوكي

رحت سبحت واجيت نمت ... حسيت عليهه

هم اجتي نامت وحضنتني بس انه ضليت على نومتي مانداريت عليهه ..

ثاني يوم طلعت لبغداد وهي منطيتني رقم

ولد ثنين .. واحد خابرته اول ماوصلت هو تلكاني واخذني افتر وياي بتكميل المعامله

والثاني خابرته على اخر شي دزوني عليه

هو كبل مدري منين طلع .. اجه سلم واخذ الفايل مني ..

ضليت واكف بمكاني ورجع وره دقايق

انطاني اياه وكالي روح واحنه نخابرك وكت الدوره ...

طلعت وخابرتهه بشرتهه وهي كلتلي

اوكف انتظر ولد راح يجي لابس سبورت ابيض وكابوي وهو كصير واشكراني

كلتلي انتظره يم الكراج ...

وكفت انتظر بي .. واتلفت .. ولمحته

اجه يمي سلم وانطاني علاكه مكبوسه من فوك وعليه ورقه مكتوب 'واصل كاش'

اخذتهه منه وصعدت بالسياره ... خابرتهه

- رور هاي استلمتهه العلاكه بس شبيهه

- غراض الي موصيتهن عوفهه لتفتحها

اطلع هسه وانتبه على طريقك

سديته منهه وطلعت للنجف ... طول الطريق هي تخابر تسألني وين وصلت واذا تعبان او جوعان .. ونسولف نضحك شويه وتسده

لحد ماوصلت البيت ..

لكيتهه محضرتلي الغدا كبل كعدت اكلت

وبعدين صعدت ابدل وهي يمي فتحت العلاكه

بعدني البس التيشرت وهي وكفت يمي

وانطتني علبه مال تلفون ...

- هاي هديه وظيفتك وسلامتك هم ماجبتلك شي ضليت حاير بيه مريضه

- لااااا بويه ليش تكلفين نفسج

انه عندي المهم انتي صرتي زينه شسوي بالهدايا

-لاا ميخالف

اني جنت موصيه معاميلي ابو الموبايلات

اول مينزل الايفون 6 بلاس يحجزلي اثنين

وهذا هديتك اخذه افتحه شوف يعجبك لونه ؟ لو نغيره !

اخذته منهه وحضنتهه .. ضليت ابوس بوجهه

وكلتلهه..

- انتي ماكو منج

وعلي احب كلبج الطيب مايهمني تلفون بس فرحت تفكرين بيه ومحسبتلي لكل شي

- اووكي تدلل

ضحكت وعضيت خدهه .. وهي صارت حمره ..

كعدت افتح التلفون وشفته رفيع ورصاصي

وحتى بطاقه الحساب وياه ..

ضليت ابوسهه واشكرهه وهي تخجل متريد

بس اكوللهه شكرا وكافي ..

تلفونهه ذهبي وتلفوني رصاصي ..

اول صور اخذنه سوه واحنه نايمين

من يومها بعد رجعنه للمراسله طول اليوم

وره يومين .. نايم العصر واجتي تكعدني وتكلي ...

- كووم حيداااار سيف مريض كووم شوف شبي

حفزت ورحتله ركض ..

شفته يرجف وصخونه داكته وبس يتقيء

اخذته غسلتله وهو ضل يشاورني ..

- عمي راح اموت انه راح اموت

- لاااا بويه كول يالله مابيك شي

- لاا والله راح اموت

انه صار جم يوم اشوف نفسي مذبوح

واكعد الكه روحي عركان كل يوميه اشوف روحي واكف واشوف نفسي مذبوح

- ماكو شي ان شاء الله ماكو شي

امشي انزل يم اجدادك وطمن كلبك واذكر الله ماكو شي

اخذته جوه وخليته يم ابويه ورحت ويه ريري بره حجيتلهه وهي كبل كلتلي ..

- شووووف راح يموتنه امهات السحوره

- لج يعني معقول تذبح ابنهه ! لج ابنهه هذا ابنهه

- شمدريك هي الي تذبحه !

هي مسكطه بس اكو غيرهه دايشتغل

واكيد عدهم لزمه على سيف ويردون يخلصون منه متتذكر شسوه بحنفيش؟

- دخيلك ياربي

دخيلك ياعلي وتالي وياهم وتااالي

طكت اصابعهه وضلت تباوع منا ومنا وبعدين كلتلي ..

- ليش مانتغدا بيهه قبل متتعشى بينه !

شتكووول احرك الحجر الاخير واسويلهه كش ملك

- شتسوين ! والمن ! لطنطل !

- اي اموتهه ونخلص بعد هي عيشتهه سكط

والكل بزعانه روحه منهه

خلي نخلص العالم من شرهه وندزهه للمحكمه العليا

شتكووول ابلش بيهه ؟ كلشي محضره

باجر يطلع تابوتهه من البيت

- وسيف ! واذا ضل هذا الشي عليه ؟

- سيف انتو تلاحكوله من هسه

اخذه واطلع للحجي خلي يشوف علته وين

واني هنا استلم الباقي

- ريري راح نصير مجرمين !

- تريد تخسر ابن اخوك ! وينهدم بيتكم بعد

لو نخلص ونسويلهم بيباي

اختار يلا القرار الك

اخلصك من طنطل واكشفلك الي وياهه

لو تضل تندب وتنعى على اهلك بعدين ؟

ضليت افرك بوجهي واحس النفس ضاك بصدري ..

ماكدرت اكللهه اي ولا لا .. عفتهه ورحت

اخذت سيف وخليته بالسياره وطلعت بي للحجي ...

حجيتله كلشي وجانت ايدي ترجف اعصاب ماضلت بيه ..

وهو تكفل بي بعد .. كعد سواله جلسه وندب جدنا علي اله والليل كله هو وياه سهران

انه اسويله كمادات وهو يأمن بي ..

عادل نص الليل اجانه يشوفه ..

وللصبح احنه وياه ماعفناه وثاني يوم النهار كله متناوبين عليه هو بس يرجف من الصخونه ..

للمغرب خابرتني ريري ...

- اكوولك حيداااار

سر بيني وبينك

-شنو ؟

- طنطل ضربتهه جلطه وماتت اووكي

-لاااااا ريررري لاااااااا

- عاد اني اخاف على نفسي هم

واخاف على سيوفي

لازم اسويلهه كششش ملك واروح اكطع راس الحيه الاصلي

-ريرررري يااااااالله لج ذنبها

- بركبتي معليك

اني مليانه ذنوب عادي عادي

يلا عود سوي نفسك متفاجىء من تسمع الخبر

اوووكيي

چاووو حبيبيييي

.

.

. يتبع 💕🌷

..♣️🩸 ماء مغلي 🩸♣️..

* adzzon *

للمغرب خابرتني ريري ...

- اكوولك حيداااار

سر بيني وبينك

-شنو ؟

- طنطل ضربتهه جلطه وماتت اووكي

-لاااااا ريررري لاااااااا

- عاد اني اخاف على نفسي هم

واخاف على سيوفي

لازم اسويلهه كششش ملك واروح اكطع راس الحيه الاصلي

-ريرررري يااااااالله لج ذنبها

- بركبتي معليك

اني مليانه ذنوب عادي عادي

يلا عود سوي نفسك متفاجىء من تسمع الخبر

اوووكيي

چاووو حبيبيييي

سدته وانه رجعت جوه وراسي مسطور

اباوع لعادل وسيف و وجهي يزخ عرك

من صدمتي ماسألتهه شلون ماتت ؟؟

طلعت اريد اخابرهه وتلفون عادل دك

وهو هم طلع وياي بره ..

يحجي بصوت ناصي بعدين ضل فاك حلكه ويباوعلي ...

كبل سده وكال..

- لك خويه هاي ام سيف ماتت هسه

ضليت ساكت ميطلع وياي الحجي .. كلبي يرجف خوف .. صرنا مجرمين .. ولحد هسه ماعرف بيا طريقه ماتت المره !!!

ضلينه واحد يباوع للثاني واثنينه مصدومين

تالي هو طلع من البيت وانه خابرت ريري

كبل جاوبت ..

- هاا عوومري

- لج شصخمتتتتتي بيهه احجيلي شسويتي

شلون وصلتيهه ! خوما بقيتي عليج دليل

ريري راح انجلط وعلييي وين وديتينا ! ولج موت هذا مووت استغفر الله

- اييي دنطي صبر شبيك خلي افهمك

تره كلشي مضبط لتخاف

كلتلك اني راح اضرب شيطانهم بشيطان

وجريتهن هالحيايه من جحرهن خليتهن يطلعن للموت بنفسهن

لتخاف ماااكو اي دليل علينه لو بعد ميه سنه محد يشك بينا ولا يلكى علينا دليل

- شلوووون شلووووون

شوصلج الهن ! طالعه من البيت ومادري. !!!

-لااا ولك بابه شبيك شيطلعني ! افضح روحي بروحي!!!

-جااا شصخمتي فهميني !!!

- اسمع عيني

من يوم الي وجع راسي خف ورجعلي حيلي

اني جبت وحده من جماعتي خليتهه تروح لبيت اهل طنطل

- ولج هااااي شوكت !!! ليش متحجيلي !!

- اي بس احجيلك مراح تقبل

واني اريد كلشي ع الحاضر وبتكيك يصير

لان جنت ادري راح يوصل السره لواحد من البيت فلعبتهن قبل ميلعبنهه علينه

- هاي يعني دزيتيهه تكتلهه !!

ولج خاف يكمشوهه شيخلصنه بعد !

- ولك لاااا لااا

البنيه راحتلهن على اساس داتدور على بيت علويه وتريد تشوف لرجلهه وعمتهه متعبيهه

وتريد تخليهم زينين وياهه

المهم هي دكتلهم اليتيمه وكسبتهم

عرفوها على اساس هي غنيه وجايه متخفيه

وكلتلهن شتريدن انطيجن بس دلني على وحده شغلهه مضبوط وتخلصني من عمتي شالعه كلبي

عيني واهل طنطول كلهههن دكن صدرهن

وكللها يمنا شغلتج وصلتي

وضلن على اساس هنه علويات ويساعدنهه

- حركهن علي ان شاء الله وخلصنه من شرهن ولج هاي ياهي منهن الي اشتغلتلهه!

- ام طنطول ويمكن اختهه هي عدهه اخت

مو !

وحده كالت عليها وجهه نصه محروك

- ايي اييي هاي هناك عايشه وياهم بس مو اختهه لا هاي بنت واحد من خوال طنطل

من زمان هي مادري شلون احتركت بس امهه راحت جابتهه تعيش وياهن

- ايي هاي شريكه بالسحوره

هسه بعدين احجيلك شرايدات منهه حتى يسولهه حجاب مدري شنو

بس خلي اريح بالك من طنطل

-احجيلي اي شي بس خلي ارتاح

لج ازخ عرك هسه كلهه تشك بيه من شكلي

وياخذوني تحقيق

- ولك شبييك حويدر شد حيلك ولك حتخبلني ادري هسه هي طنطنل متكولي شكاتلين ابوووك

موووت الكرفهه وخلصنه منهه بعد شكو خايف هاي نفتحت الساحه النه هسه

- لج بزون كاتلين بزون ! نفس هاي رووح وجهال تيتمو

-ديلاااا ع اساس شلون ام هي وشلون تربيه عدها !

لتخاف حبيبييي انته عووومرري

طنطنل كتلهه دكتور واحنه لا منهه ولا عليهه

-دكتوووور. !!!!!

- ايييي دوووكتووور حياااتششي

البنيه الي دزيتها ضربت وياهن ميانه

وسالفه منا وسالفه منا حاجيات على طنطل شلون مشلوله عود هاي الام المسكينه كاضيتهه مداره وياهه وصرررف على الدكاتره وماعدهه وبنتهه رجلهه شامرهه

لا يسال ولا يدز مصرفهه ولا ياخذهه دكتور

وكله براس امهه هي معيشه العائله

حتى شنو تخليهه تنطيهه بعد فلوس

وهذيج كلتلهه اني اعرف دكتور شاطر

وهسه اكول لرجلي يخابر ويحجزلكم

وااانيي بنفسي اجي ويه السايق واخذكم

ومقنعتهن .. هالحجي شوكت قبل خمس ايام

وبنفس الوكت اني مضبطه ويه واحد من جماعتي هذا اسميع تعرفه مو ؟

- اي بوووويه اي اعرفه

شلون ماعرفه هذا ايدج اليسره

-اييي عفيه صرت خوش تفهم عليه

هذا اسميع بس بالثكال ادزه

وهو رايح مضبطلي ويه دكتور هو مو دكتور هيج ممرض بس يعرف يعني

المهم من البارحه انطيت خبر للبنيه تسويلهه كش ملك

عاد هي من الصبح ماخذه سياره وياهه ولدهه

يعني طليانهه اووكيي

ورايحين ماخذين طنطل وامهه واخوتهه

اثنينهم وماخذتهم لبغداد كبل للمستشفى

جاي عليهم هذا الممرض ع اساس هو دكتور

ومخليهم يسوون فحوصات وكلشي حسب الاصول وهو بهالاثناء منطيهه ابره لعبت بيهه فلك شويه شويه

مسويلهم رنين وكايللهم بقوهه هنا بين متطلع النتيجه .. و عاد من مستلميه كاللهم هاي مجلوطه وبالدماغ وحالتهه فدمره ورادلهه عمليه ولااازم هاليومين تسويهه تره عدهه جلطه ثانيه بس خفيفه وتضل هيج تموت

وانطاهم مبلغ هالكبره للعمليه وهمه كبل جرو بوشهم ميردون يدفعون اهل فليس هذوله

وهاا هو كاللهم لازم هسه تطلعون من بره تشترون ابرتين سعر الوحده ٤٠٠ الف

يبسهه عليهم فدنوب وخلاهم ياخذوهه ويشردون

لا ابره ولا عمليه ولا دوا كلشي ماخذو وطلعو على اساس هذا دكتور قفاص وكلشي ميفهم وهنا يداروهه ويسفروهه بره احسن

هيج طلعو بهالدرب

- لااا اله الا الله

لج انتي شنوو !

هذول شنو !

انتو من ياطينه مخلوقين !

- ولككك شكو تجمعني وياهم !

هذوله شياطين اني بس اشتغل بعقل

اووكيييي

- زييين وتااالي !!

- وصلو للبيت والدوا ماخذ مفعوله بيهه

لحد ما من صدك جالطهه بساعتهه

- يعني هسه احنه ماعلينه شي لا من قريب ولا بعيد!

-اااااببببد ولاا بشعرايه احد يشك بينا

خليتهه كلهه توكع براسهم همه الاخذوهه دكتور وهمه الي ماقبلو يعالجوهه وماتت

بس هيج

- فلك طرج ياريري

- ههههههه حيااااتشيي تدلل

راح اخذلك العائله مقاوله كله سم وموت

- لاااااااا كااااافي بس هاي شيطان وخلصنه منهه كافي بعد ابد لتلعبين هيج ملاعيب ويه احد

كافي والله هي هاي والله يعلم شكبر الذنب صار بركبتنا

- حويدر ذنبها بركبتي اني الخططت وكتلت ودفعت فلوس كتلها انته كلشي ماتدري طالع منها اوووكيييي

- وانتي عادي عندج !

- عادي لهيج شكولات كلش عادي

اااخ لو بس جايبتلي بطل عاد لو قوطيه

الااا هسه اطكها واحتفل بموتتها

لك هااي من وراهه ومن وره اهلها الشياطين اني اجيت اموت ولا بيهه ولا عليهه

- هسه كافي عوفيها ولتسوين شي خليج هادئة بالبيت والجهال ديري بالج عليهم

-اووكيي اعرف اتصرف ميحتاج توصي

يلاا انته اكل شي اكيد هسه وجهك انكلب اصفر وتروح تفضح روحك شويه ضبط نفسك

- زين زين

روحي يلا شوفي الجهال

- يلاا چااااووو

كبل خليت تلفون بجيبي ورحت غسلت راسي كله وارشك بالماي على وجهي ..

الخوف ياكل بكلبي .. وضميري جاي يمردني مرد

غدرت اخويه وغدرت عمامي و يتمت الجهال .. يتمت سيف وانه عيني بعينه

وموتته امه بفلوسي راح ادفع حكها ..

اريد اعوف كلشي وامشي ماريد اشوف احد

حتى نفسي ماريد احس بيهه ..

موت هذا موت .. وين وصلت روحي !!

ضليت كاعد بالشارع ومادري شسوي !

شلون اعيش واكابل اخويه وانه ومرتي كاتلين مرته !

خابرني السيد .. وبنفس اللحظة ريري دزت رساله ..

' خابرني هسه يلا '

رفضت السيد وخابرتهه ..

- ها شبيج

- حيداار كااائن من يكون يسألك على موتتهه كول مادري

سوي نفسك لحد هسه متدري كلشي ديربالك تحجي حرف ولا يبين على صوتك تجذب

فهمتني

- اي ماشي

- شبيك شو ممرتاحتلك ! تعبان ؟ بيك شي

- ممروده روحي

لج غدرت اخويه ريري وين اروح من ربي

ميتم جهال وانه عمهم ولج عمهم

ماجاي اتحمل روحي ولج انه مو هيج ريررري مووو هيج ماكدر اعيش وبركبتي ذنب احد وعلي انه بلساني ممطاول على احد مو النوب اجي اكتل !

- ادري صعبه عليك بس تتعود

راح تضل تعبانه نفسيتك فتره بس تعيش عادي لتخاف تعيش وتنسى

وتره هي تستاهل هالشي خلي بالك انته مسوي زين لاهلك هاي لو عايفيهه بعد يوم واحد جان انطاح حظنا

- بس اخووويه ريررري اخوويه

-اخووك شبي شبييي

مو عايش احسن عيشه من ولت وعافته

وخلص منها

لعد اكو رجال يعيش ويه هيج شكول زفره ويرتاح !

وداعتك هسه تشوفه شلون ينشنش ويصير هالعرضه من الراحه وراهه

اصلا هسه يمكن يدز شكر خاص لملك الموت لان اخذ روحهه وخلصه من جيافتهه

لتضل تحرك بروحك كافي انساهه خلي تولي

وحاول ترجع للبيت باجر

- ماكدر ارجع واعوف سيف

-جيبه وتعال وجيب الحجي وياك

انته لازم تضل يمي تره داحس بيك شلون الا شويه وتبجي

تعال واني اعرف اخليك تتعده هالخبر

اووكييي

- ماشي ماشي

سديته وضليت اجر نفس قوي وخابرت السيد

- ها خويه شلونك

- لك عوف كلشي تعال كلي هاي منو موتهه

لمرت اخوك !

- هاا ياهي ؟

- ياهي ! ولك مرت عادل كالو توفت

شني ماتدري !

-لاااا شدراني انه ملتهي بسيف مو بيتنا

هنا انه بالكوفه

- يعني ماتدري شي على موتتهه ! زين هاي مرتك ما سوتلهه شي ؟

- ليش تسويلهه !؟ هي مره مريضه ومشلوله

وبيت اهلهه شعلينه بيهه

- هااا جا انه عبالي عرفتو شي عليهه جبير

واشتغلتوهه

-هااااي شبيك سيد احنه وين النه دخل بهالسوالف

مره ماتت احنه شكو تره حجايتك جبيره

- شدعواك خويه

جا غير احنه بالبلوه سوه و واحد يفهم على الاخر

وشكيت مسوين شي ومادري بي

- لااا مسوين ولا واصلين كلمن بصوب وكلمن حاير بشغله

انه محتار بالوليد مريض وهي محتاره بالبيت والجهال بعد شوكت نوصل ونموت !

عوفنا رحمه لاهلك خلي اخابر عادل من رخصتك

كبل سديت الخط وضليت اعض باصابعي

انه شلوون تغيرت وصرت جذاب وكتال وغدار باهلي !!!

بالف ياعلي هديت نفسي وطبيت جوه

كعدت اباوع لسيف وهو نايم ..

حجيت للحجي على موتته امه وماكال غير انا لله وانا اليه راجعون...

خابرت عادل اشوف الوضع عدهم شنو

وطلع هو واهلهه بالمستشفى ..

ليله مُره مرت عليه .. كضيتها بس استغفر من ذنبها .. ماغمضتلي عين .. للصبح اخذت الحجي وسيف ورجعت لبيتنه ...

من وصلنه وارتاحينه يلا كلت لسيف امك توفت ... وهو ماحجى شي بس ضل يباوعلي وساكت .. بعدين غطى راسه واندار ..

ردت اطلع اروح لعادل اوكف وياه وريري عرضتلي ...

- متروح لمكان ابقى هنا شعليك بيهم !

- ولج بويه اخويه وحده مكافي انه الخليته مشدوه الحال

خلي اروح اشوفه شمحتاج

- كلتلك متروووح

ماضلت الفاتحه عليك

هناك عزيز وولد عمك كلهم واخوتهه وجماعته ..ممحتاج شي كلهه وياه

ابقى هنا انته حالك رايح كاضي من التعب

لتروح توكع يصيرلك شي .. شيفيدني ساعتهه

طنطل لو عادل !

ضليت افرك براسي وابويه صاح عليه

يسالني شوكت اطلع .. وهي كبل كرصت ايدي و راحتله تكله ...

- يابه حيدر خلي ميروح

هنا محتاجيه .. سيف محد يكدر يداريه بس هو والجهال هسه ينكلبون بجي وهوسه ماكدرلهم وحدي مو مال يطلع ويعوفهم

ضل ابويه يحاججهه بالعيب وهي قنعته

بس اليوم بين مايهدأ الحال و وضع سيف يتحسن ..

اخذتني كبل فوك .. مرينا على الجهال

جانو نايمين بعدهم .. وصعدنا لغرفتنا

كعدت ع الجربايه وهي سدت البرده والضوا واجتي حضنتني .. خلت راسي على بطنهه

وانه صدك انهاريت هنا ..

طلعت كل الي بكلبي ..

بجيت وانه اكللهه..

- ماريد اصير مجرم وعلييي ماكدر اطيق نفسي وانه غادر باخويه

والله بعينه ماكدر اباوع

وكفه يم ابويه ماكدر اوكف

لج ريري شلون بيه !!! شلون بيه وين اروح من ربي !!

- حيداار شبيك شبييييك

انييي الكتلت موو انته اوووكي

انته كلشي متدري ومتعرف الصاير ماعليك ذنب هي كلهه براسي عادي اني فايلي يم الرب مليان خطوط حمر واعرف تاليتي وين

انته تضل زين وماعليك ذنب بشي

- دخيلللك ربي وين وديت بروحي ويين

- اسمع حويدر

هاي موتتهه هسه حتى السمه طكت هلاهل

لان استلموهه

لك بابه هاي مو شيطااان مو كل بلاوي الدنيا بيهه .. مو مصخمه عيشه اهلك عوفهه خلي تولي تنكبر شكو ذابح روحك بالقهر !

موووتتهم صدكني هسه لو الكه وحده بعد هم نفس طنطول الاا اكتلهه مابقيهه تشم الهوا

لك هذني هجامات بيوت شمدريك كم واحد ارتاح هسه بموتتهه !

- ادري ادررري

انه بس كلبي حاركني على اخويه

- شبي اخوك ! شحلاته ذاك وينه شبي

شعبالك هو ميت عليهه !!! لك هسه ماااصدك خلص منها وفرغله الجو

مو ذاك وينه يدك تلفونات للصبح وعايش حياته وشامرهه ماهمته تعيش تموت

بعد شكووو

بله لو بيهه خير ومره زينه والهه ناس تحبهه جان كلنه اي واحد ينقهر بس هااي قندره متسوه عوفهه خلي تولي

هسه اخوك شهرين ويكول اريد اتزوج

وعود اوكفله بعرسه ورد حك الخوه

- كلشي سهل عندج كلششي سهل

اااانه كلبي مو مثل كلبج

ماعرف اذيه بشر هاااي راح تضل تدك بكلبي

واوهس بيهه

- حبيبييي

ماكو واحد كلبه ما يحس بس الدنيا غابه

لو تكتل وتعيش لو تنكتل ويعيشون عليك

اني من اكتل واجازف هاي علمود انتو تعيشون براحه هسه لو عايفيهه ما جان امهه هجمت البيت على روسنه من جديد !

ماجان سيف هسه انته واكف تغسله وادفنه!

مووو لو لااااا

على الاقل هسه كسبنا وكت

امهه راح تلتهي بالفاتحه كم يوم وتعوف سالفه سيف وانته استغلهه وروح حصنه سويله شي

هذا ابن اخوك هذا عزوته تريد تنفع اخوك

روح احفظله ابنه .. انته دتسوي زين دتكسب حرب وبالحرب الكتل مباااااح اووكييي

تمددت ونمت على ايدهه.. ضلت ترفع بشعري وتكلي..

- راح نخلص مابقى شي وترجع مرتاح بحياتك واهلك يصيرون زينين وتنسى كل هذا تنساه وتتعداه

انته قوي وكلبك الطيب وخوفك على اهلك هو راح يخليهم عايشين بامان

- راح انسى ؟ واعيش عادي !

- تنسى كلشي تنسى وتعيش احسن من قبل

اخذ كلمتي دولار

الموت نقطة تغيير تعبرك عشر سنين ليكدام

وانته راح تتغير للاحسن

- ضلي وياي بكل حياتي لتعوفيني وحدي

انه ويه نفسي ضعيف بس يمج احس اقوى اصير

وعلييي اذا اضل وحدي بهالحال انجن لو يدكني المرض

- ماعوفك شبيك وياك ضاله

وانعل شيب الخلفه الي يوصلك ويتعبك

نام كافي عاد تفكر وتوهس

عوف كلشي عليه ونام مرتاح معليك بعد اني ادبر كلشي

غمضت وانه احضن بيهه وهي تخلي اصابعهه بنهايه ركبتي تصعدهه شويه بشعري وترجع تتلمس بركبتي ..

خليت بالي بس ويه ايدهه ويه ريحتهه

وشلت من بالي كلشي وغفيت ..

من كعدت هي ماكو .. نزلت ادورهه

ولكيتهه بغرفه الجهال ..

منومتهم على رجلهه كل واحد بجهه

وتحجي وياهم وتمسح على شعرهم

ضليت اباوعلهه وهي ابتسمتلي

رحت كعدت يمهه وضلينا نحاجي بالجهال ونسكتهم من بجيهم ..

اخذناهم جوه وخلت الاكل وكعدتهم يمي

اوكل بيهم وضلينه لليل احنه واحد يشوف سيف وواحد يرجع يضل ويه الجهال

حتى بالنومه ضلت يمهم وثاني يوم رحت للفاتحه.. وهي كل شويه تخابرني تسألني شلونك ؟ لتضوج وتضل تفكر .. اقرا الفاتحه وارجع لتضل هناك ..

وانه هم ماتاخرت .. فهمت عادل على ان اضل ويه الجهال متكدرلهم ريري وحدهه

وهو عاذرني ويوصي عليهم

ورجعتلهم مشتريلهم اشكال حلويات و

نقنع بيهم ياكلون وينسون ..

سيف بعده مريض مابيه حيل حتى يحجي

الحجي يروح للفاتحه ويرجع يكابل سيف ويكعد ...

عدينا اول اسبوع بتعب بس كل ما ريري

تشوفني اتعب بالجهال ومايقنعون تجي تحضني شويه وتذكرني هيج احسن واحنه اشترينا الهم عيشه الزينه ...

سيف اخذه ابوه والحجي لضريح الامام علي (ع) .. وباتو هناك و٣ايام يلا رجعو

والكل عينه على سيف ضلت ..

امي تكعد يمه وتوكله بايدهه وريري مكضيتهه تتعلم شلون يسوون شوربات وعصاير وتسوي مثلهم والتنجح تنجح

والتفشل شيل وشمر ..

مشت الايام والجهال صارو بمسؤوليه ريري

اني ادرس وهي تتكفل بالباقي ..

سيف تحسنت حالته وماطلب يروح يزور كبر امه او بجى عليهه ولا ذكرهه بالطاري

رجع لدراسته و طبيعته ..

العشره الاخيره من محرم ..

طالعين ننصب الموكب بمكانه مثل كل سنه

وكلهه هنا تقسم الشغل عليهه ،،ولد عمامي ولد خوالي وولدهم هم .. ولليل يلا رجعت

للبيت ..سبحت وكعدت ويه ابويه احجيله

شسوينا اليوم ومنو اجه ومنو راح ..

وهو كالي باجر اخذه يضل كاعد بالموكب

صعدت ارتاح واجتي ريري كبل كلتلي..

-لانوم ولا عزا بعينك تكعد تشوف صخام عمامك ودورلهم حل

- ياااساتر يارب شكو !!؟

- لك هذني شنووو شنوو

عزااا بعينهن وعين الخلف شكولهن

ولك مجلبات للبنيه الااااااا تجين تاخذين العمل وتدفعين حقه

-اي متروح تاخذه وتذبه وتخلصنه

-لك دصحصح ويااااي حويدر ولك بلااوي جامعتلك حجي

لك تدري شيريدن من عدهه !

-شنو ؟

- يردنها تتصلخ يمهن وتوكف على طشت

وتجي ام وجه المعطب تجرح افخاذها ولااازم يضل الدم بالطشت يلاا تشتغل عملهه

- لاااا اله الااا الله

- وطبعا البنيه صارن يسيطرن عليهه

تكول شكد مااحاول وياهن اخلص منهن

الكه نفسي دانصاع الهن الا شويه

واليوم بدون وعيهه جايتهن وعلى اتفاق بينهن بالليل ..لازم تجي وتنطي من دمها حتى يشتغلن لعمتها

وتنطي من ميها حتى يشتغلن لرجلهه

وهمزين ااااني تلاحكتلهه قبل متوصل

هيج بالصدفه دكيت عليهه وكلتلي اني رايحتلهن وهيج هيج ديصير وياي

عاد كلتلهه كسري خطج والنجف بعد لتوصليهه

-استغفر الله استغفر الله

هااي شلووون بيهن شلووون

- شوووف شطلعن مو بس سحارات وطلعن سحاقيات خاااف متدررري يالسيد

-سحاقيات شنو!؟

-عزااا يمه عزااا

لك لتجلطني اني بدون شي رب مابراسي

لك انته بشر بشششر

- هسسسه شبيييج

جاي اسأل مثل الاوادم جااوبي

- ولك سحاقيات يعني يحبن البنات

- شيحبن منهن !

- وووولك صخااااام بعينك

ولك ينامن ويه بنااات شبيييك

لك عقلك شمحشيييه !!

-انجبي انجبي لتضليت تمسلتين

شعرفني انه سحاقيات ومدري شني

مادري بيهن شايفتني يوميه طالع بدرب جديد

هو هالبيت اكعد بي اطلع للمحل

راح المحل ضليت مكابلج وكاعد بعد منين افهم هالسوالف المانزل ربي بيهه من سلطان

- لك انته صدك بعدك بيبي

اني عبالي تغيرت بس بعدك خام

- ههههههه ولج هوو انتي مررتي  وشكبرها الميانه الي بينا ومافاتح وياج هيج مواضيع

ترديني اروح ادورهه مدري منين !

- لاااا عزا انته اوووفر

صدك نسويلك تمثال للرجل العفيف اللطيف

لك انته صدك سيد

- بووويه جا اغشج !

- اييي ديلاااا

هسه شنسويلهن ؟

- بس فهميني شغله يعني ياهي منهن تريد بنات ؟ صدك هاي تجيبهن حتى هيج يعني تسويلهن مدري شنو

- اي ايييي

غاويه بنااات تحطهه وت....هه

-زين بس صوتج علكيفج

- ديلاااا

هسه لا كلش تصير مؤدب مابيه حيل كل كلمه افهمك عليهه

هي هاي ام عطوب تنزل عليهن دك شغل

- زين هاي شلون يخلنهه ! وهنه متزوجات

معقول متلعب نفسهن ؟ من شكلهه او حالهن هذا ؟

- اكوووله مغسولات دماغ يجن منصاعات الهن

لك هاي الدازتهه شيطان بعينه

بعد شفت شلون اخذت صخامه موتتهه

بس هسه صارت تنثول من يحاجنهه

كبل تكول اي شيريدن وشيفهمنهه تكول اي فهمت مافهمت

- لاحول ولا قوة الا بالله

هذني ويييين يردن يوصلن الهييي ماتخلصنه منهن والله كلوبنه شيبت منهن

- هذني اني اخلصك منهن

حطيتهن براسي بس بعد اريد وكت

واروح اشحطهن وكبل ادزهن لطنطول

- استررررري عليييييه

لا تورطيني بعد بشي

- اورطك واورط عشيرتك

لعد تريد نضل نباوعلهن ونسكت !

-ريري مو بالموت والكتل تنحل الامور

- لاااا لعد نروح نرزلهن !

اني اروح اكوللهن تره سيد حيدر عرف بيجن تسون سحوره ويكول بعد لاتسونهه عيب

وهنه يكعدن حبابات ويلزمن درب الكعبه

هيج تريد !!!

- لج بوووويه افهمي الكتل حرااام

انه اجي اوصخ ايدي بيهن

- اي اي توصخ ايدك بيهن

لان انته من خليت رجلك بالدرب هذا بعد تتحمل كلشي يصير

وهاي نهايته مبينه تعرف ام السحوره منو وتتخلص منهه .. شلوووون تتخلص منهه !

تكتلهه ...

مالهه غير تفسير تره

- ماريد اتورط بالدم ريررري انه ماصدكت كدرت شويه انسى هذيج النوب تخلين هذني الاثنين بركبتي !

ياعيشه هاي الاعيشهه وانه مسطر دم النسوان بركبتي وكلهن من اهلنه

- خراااا على اهلكم

لك هذني هم بيهن تفكير !

اكولك شوف لتعبني

متريد تجازف وتكتلهن روح خبر عليهن شرطه  وفضنا

- اي ونشهر نفسنا بالمنطقه

والرايح والجاي يصيح بيت الساده نسوانهن سحارات

- قناادر على روس نسوانكم

شسويلهن لعد هي جذب

باوع ماكو غير حل لو تسجنهن لو تكتلهن

امااا اذا الملاك الي بداخلك طلعله حس

اني اجي اطبره واخلص اوووكييي

- ماااااريد اكتل احد مااااريد اصير مجرم افهمينييييي

-يبوووووووو

حيداااار لك هذني سحااارااات لك حتى بافلام الكارتون هم يكتلوهن ويعيشون عيشه سعيدة

ومحد ينقهر عليهن

انته شبييييك !!!!!

- ااانه كلبي نظيف ماريد اتغير واصير غدار بنص اهلي

اروح اوكف على فواتحهن وانه الي كاتلهن!

وعليييي كاره رووووحي لتزيديهه عليه

-لعد من جبتني شتريد !

ردتني اطلعلك ام السحوره وطلعتهه

يلا شتسويلهه؟؟؟

- عوفيني افكر

-فكر منا لما تمل هو ماكو غير هالحلين

تريد اطمطمهه وتخلص العشيره منهن سكتاوي وتحفظ وجه عمامك كدام الناس

تروح تكتلهن بدون محد يدري

تريد تشهر عشيرتك والخلفوهن تروح تخبر عليهن ويشحطوهن للسجن

هااا وديربالك تستشير احد غيري بهالسالفه

تره سرنا بس يطلع لثالث راح نتأذى

ديربالك تنطي كلممممه من الي نحجيهن

- ماااحجي ماحجي هو منو اكو واحجيله على صخام الوجه

- زين ديلا فكر حتى نتصرف

طبعا نسيت اكولك

اكو بعد وحده ثالثه وياهن بس ماعرفتهه بالضبط منو

فد اسبوع هيج واجيب اصلهه وفصلهه

بس داشوفك تره هذني عصابه

- ياااابوووووويه وترديني اكتل ٣!!!

- لووو عشره يصيرن هم تكتلهن

لعد هي لعب جهال ! حرب هاي حرب ويه شياطين لو يطيحون حظك لو تكلب سحرهم عليهم

تعبتني راح انام وانته فكر

بدلت ونامت وانه ضليت كاعد افكر وعقلي بعد ميستوعب كبر وصاخه اهلي وناسي

وين بعد يوصل بيهم الكفر والطيحان حظ!

تمددت وحضنتهه .. خليت وجهي على وجهه

واكللهه..

- رور شلون نعيش واحنه كتالين اهلنه !

- نعيش عوومري نعيش

مو خلصنه من صخامه وعشنه هسه شلوناتنه

- بس هذني راح يصيرن اربعه بروسنا

- حيداار انته فهمت الي حجيته لو ماركزت وياي ؟

-ياهي منهن تقصدين؟

اندارت عليه وضلت تكلي..

- هذني دياخذن النسوان يستغلنهن فلوس

وجسم

هنه ميكدرن يفوتن رجال للبيت شصارن

هنه الي ينامن وياهن حتى ياخذن اثرهن

يعني شنوو هذا مو عااار عدكم !

بيت صاير مكوده ومسكون شياطين مو كارثه هذا لو لااا

مايستاهل الكتل والذبح ! اني لو بدالك اروح احركهن هنه والبيت واخلص بس انته روحك طويله

- هو كل الي تحجيه صح وهذني مال موت وحرك والله حرام بيهن العيشه مسودات وجوهنا بس انه اخاف من الذنب ماريد اوكف يم ربي اتحاسب عليهن وهنه مايسون اضيع صومي وصلاتي عليهن

- متتحاسب شكو دتتحاسب !

اصلا دتسوي زين لاهلك وللعراق كوله

هذني كم بيت يهجمن ! كم عائله هسه اتعس من حالكم كله من وره سحورتهن !

لك هو القانون من ياخذهن هم يلعب بيهن لعب وميستخطيهن انته بعد هالفطاريه شكو

- الله كريم

الكاتبه ربي يصير

جان بموتهن على ايدي راح يموتن وان جان موتي على ايدهن هم اموت بعد امر الله هذا

- ماااااكو هالسوالف

عومري اني راح اشتغلهن تخطيط وبس الكط الثالثه اسويلهن كش ملك

- بس تأكدي من كل شي

لا نظلم احد كون كلشي بدليل

-اي اي اعرف

رجعت نامت وضليت انه اغفى واكعد ممرتاح.. الى صبح كعدتهه ونزلنه

تريكنا وضليت وياهه شويه واخذت ابويه

والجهال كلهه وطلعنه للموكب ..

بالليل رجعنه وانه اتصل عليها كل اليوم متجاوب ... فمن رجعت كبل صحت عليها

اريد اشوف وينها. ؟

ومانزلت .. عاد صعدتلها ... لكيتها نايمه

شغلت الاضويه وضليت اكعد بيهه

وكعدت عصبيه ..

- شبيك شبييييك شكوو شتريد هجمت الامه شكو

- ليش مجاوبين مو اخابر ؟ متشوفين تلفونج!

-بكيفي ماريد اجاوب لزكه انته لزكه

اربعه وعشرين ساعه وياي عوفني ياخي عوفني تعبت منك خلي ارتاح

- هااااي شبيييج والثول شجاج

جرت الغطى وتلفلفت .. كعدت يمهه وخرت الغطى منهه وضليت ارفع بشعرهه وافرك بوجهه وهي ادفع بايدي ..

- حيدااااار مالي خلكك وخر بابه وخر شبيييك

- لج ضايج وحدي وين تولين انتي مجاوبين

جنت اريد اشوفج الموكب والمشايه والتوزيع

فاتتج

- ااووووف ماريد باابه شلحيت ويااااي

- شبيج شو من وكت صاعده؟

- حيداار وتالي

تعبانه متشوف يعني تعبااانه كارهه روحي عوفني لتحاجيني

-هااااااا

اكلج اليوم شكد ؟

عشرين وعبرناه يعني اليوووم ٢٨ حييل شبساع خلص الشهر

- اي ايييي لعد وخر انذار هالايام لتوصلني

- هاااااا وانتي شدعواج هيج تتخبلين

هسه بس انتي مره

- باااابه معليك معليييييك شغله تخصني هاي معليك لتدخل

- ههههههه وعلي تونسيني انتي

- يبوووو يبووووو حيداااار اروح انام بالسطح واخلص منك

داكولك مالي خلك لتلح وياي

- اصعدي يلا بلكت تكتشفيلنه شي منا منا

بصوتج هذا حتى الجني يطفر ويعوفج

- دووووليي شكد تغث

بشر مايفهم واحد تعبان طالعه روحه

كوه يتحارش ويجيب الاهانه لنفسه

- انجبي لج

جاي اكلج ضايج وهم ماحبج تضلين هيج مبومه

متفكيها هسه هي شني !!

- اوووف يممه

كون اجيب وجع بطني بطنك واريد اشوف زلمه اليفك حلكه ويزامط براسي بعد

- ههههههههههه يااااابويه المره رايحه داكهه الوجع

بس اكلج انتي ذاك الشهر مو هيج

شنو هي بالطخات لو شلون ؟ فهميني !

- معليك هسه اكعد احجيلك سوالف نسوان

شتستفاد !

- ازيد معلومات ههههه كلشي حجيتيلي ضلت على هاي هم احجيهه

لان انه ماشايف مره تتخبل بهالايام غيرج

بس انتي تنكلبين عفريت عليه

- هو حظي هم يكعد مثل النسوان

عوفني رحمه لجدك رحمه لاخوتك عوفني

تره كلمه الثانيه بعد انزلك لامك حافي تركض

طااااكني خبااال مامثله خبال

لتوصل يمي زيييين

- ههههههخخخخخخخخخ

رووور هاي شجم يوم تضلين معاديتني

بربج بس كليلي حتى اعوفج بعد حتى الغرفه مااوصلها وضلي لطشي خبال براحتج

- اييي بعد احسن

لتشوفني وجهك ريحتك ماريد اشمهه

لتوصل حتى ملابسك لتذبهن هنا

وعطرك هذا بس اطخه تجرم بروحك

تره معدتي كالبه وكلشي ماتحمل من صدك لتستفزني حيداار هاي ايام انذار اووكيي

- يلا يلااا ماشي

بس شجم يوم

- معلييييك اني شوكت ماصير زينه

ارجعك للغرفه هسه تعوفهه الي وتروح

ضل كاعد بالموكب احسن لتجي بعد

- ههه ولج اشتاقلج ماكدر

- لتخبلننني يا قنادر اكوله لعبانه نفسي يكولي اشتياق ولي وليييي انته رادلك كلب ممدشن

عضيتهه من زندهه وهي تعت بشعري

طلعت حركتي بيهه يلا عفتهه ونزلت

نمت جوه ..

وثاني يوم كاعدين نتريك وهي بس تتافف

وانه اباوعلهه واضحك .. طلعت واخذتهم وياي وكضينا اليوم بالموكب وهم ارجع الكه ملابسي بالحمام الجوه وفراشي بالهول وامي تسال شعجب نازل جوه واكللهه متعاركين

وضليت اربع ايام انه اشوفه هيج ساعه لو ساعتين باليوم كله .. ومنحجي بس انه اضحك عليهه وهي تخوزر ..

بالليل دزيتلهه رساله كبل مارجع ..

' ياام الغيره بشري شلونه المزاج

طكت عظامي من نومه الكاع حيصير اسبوع ماكافي متهجول '

شويه ودزتلي ..

' ديلااا اووكيي اليوم تمام مزاجي

حتى اشتاقيتلك '

كبل ضحكت بعلو صوتي وانه بنص الموكب

ودزيتلهه ...

' جايج وعلي ماطول ساعه يمج '

كبل اخذتهم ورجعنا .. من وصلت البيت

شفتهه كاعده بالهول ويه امي ..

ضليت اباوعلهه واضحك وهي تضحك

كامت مشت كدامي ورافعه خشمهه

وحاصره الضحكه ..

طلعت وراهه واكلهه ..

- يابنيه شايفه مرتي العفريت وينهه

اندارت وتكلي ..

- ولك ياعفريت هذاا !!

- عندي مره عفتهه عفريت مدري وين اختفت هسه

خاف تجفت عليه ساعه الساعه وتجلطني

جاي ادور عليهه

- ايبااااه يدور مرته

شلون خواف عاد انته ماكو هيج

- هسه ماشفتيهه يلا بعد احسن خلي اخذ راحتي

جريت ايدهه وصعدنا ..

طبينا للغرفه وهي كبل دفعتني ..

-هااا حويدر ضاله بالك عليه خبالي مال ذاك اليوم

- ولج هو يوم يومين شاتلتني اربع ايام

ادري هسه انه بيه جرب والعب نفسج لا توصليلي لا تكعدين وياي

لا تراسليني شبيج الله خبلج عليه !

- اييييي اني ماحب احد هيج وكت تلعب نفسي ماطيق حتى روحي وانته تجيب وترشرش عطر ااايييييع يممممه اموووت

تنكلب معدتيييي

- هااا وهسه هم بعدج تلعب نفسج مني !

- لا صرت زينه

اييييي شلوووونك اخبااررك

شكووو ماكووو صار هواي ممستجوبتك

- كلشي ماعندي طاكني الملل

لج وعلييي بزعانه روحي

هسه انه صح كاضي يومي بالشارع بس ضايج هيج افتر مدري شأريد وين اروح مادري

انه اكلج يمكن شربتلي قوري جاي من الصبح لهسه وشبعت كعك وشبعت ركي و لفات كباب على فلافل مشكل بس ضايج

- تعال اكلني بعد وتونس

شمبقي انته !

لعد اني شكول مكابله وجه الحايط وكاعده

- ههههه اخذج ؟

صدك ترحين وياي مشايه

من باجر نطلع وحدنا نمشي براحتنا لحد مانوصل كربلا نشبع سوالف بالطريق

- لااااااا مااروح

- ليييش مو وعدتج انه اخذج تذكرين مال يوم العاشر

-ايي بس هسه غيرت رأيي ماريد اروح

حضنتهه وعضيت وجهه وكلتلهه..

- ليش ولج هاي متتفوت الزياره

- ماحب اجذب بالديانه حيداار شوكت تفهمني

انته دتحرجني بالزيارات وامك تحرجني بالمجالس صارلهه اسبوع داكه رجل الااا تطلعين وياي مجلس يابه ماريد لزكت

فد لزكه همزين اخذت عذر هالايام هسه باجر ترجع لنفس القوانه

- رووووور هذا هو محرم مجالس وزياره

جا شلون يصير الحزن

- اييي مادري شو شعوري مدري شلونه

احس اني هناك ماارهم لتوديني يم الامام

اني احبهم من بعيد بس ماكدر اوصلهم

هسه حتى الرب احبه بس ماوصله بصلاه وهالسوالف ادري اضحك على روحي بيهن

- لاا لاااا

بويه انه جم مره كايلج الله يحب الكل وغفور رحيم

- يعني شسوي بالمغفره واني راح ارجع لنفس القنادر

- لترجعين للقنادر بويه احد جابرج !

- لعد وين اولييي

هو من الصخامه للصخامه بعد شكو

- هسه اخليج تطلعين من الصخامه

- وين توديني ؟ لشيب اهلي ؟

- معليج معليج انه ادبرهه

اخلصج من الصخامه والقنادر وكلشي

- بلا شقه حويدر هو طيحان حظ علني بعد شكو تصير القس براسي

- بووويه معليج هسه انتي الج الصافي

بس كليلي

اريد اتغير وبعد هناك مارجع

وجحش ذاك الميدبرلج احسن عيشه

- يعني تشوفني اكدر ؟

-انتي تريدين ؟ اذا تريدين اكيد تكدرين

- احسك تبالغ

باوع اذا عندك فد مصلحه كول لتضل تلوت وياي

- ولج بويه انه احجي هندي !

جاي اكلج نروح مشايه

يامصلحه هاي !

- هاااا ديلاااا اوووكييي راح اصدكك شويه بس

- هم نعمه .. هاا نرووح ؟

نطلع من باجر الصبح تردين ناخذ اهلي لو بعدين ارجع اخذهم ؟

- لاااا شنو ناخذهم ويانه خطيه يضلون يتصفنون بالبيت وحدهم !

- زين جا هسه ننزل نحضر كلشي والصبح براحتنه نطلع

حتى نزور هالايام خفيفه شويه مو مثل اخر يومين تلتم المواكب وبعد ماكو نفس

- اممم اوووكييي بس اذا هناك كلبي مانطاني افوت ازور مو تجبرني تعوفني بره اوكيييي

- ماشي ماجبرج

يلااا رووور امشينا ركض جوه

-هههه يلااا

.

.

يتبع 💕

The next part in midnight 🕛

..♣️🩸 ماء مغلي 🩸♣️..

* adzzon *

ساعه ٨ الصبح .. جو كسر ببروده شهر الاحدعش ..

امشي وادفع ابويه بعربانته .. وامي متحزمه وايدهه بايد سيف  تمشي كدامنه ..

ريري ويه حد مشيتي تدفع بعربانه ملوكه

ولابسه السواد وانه كصيتلهه من طرف غترتي الخضره وشديتهه على كصتهه

السيد رغم معارضته للزياره هالوكت

بس طلع ويانه حتى من نوصل هو يزور بنته

ويمشي هو وابنه كدامنه ويه حد مشيه سيف وامي ...

ريري قفلت تلفونهه وعافته بالبيت واخذت وياهه سبحه الحجي ..

ضلو اخوتي بالبيت ويه جهالهم

واحنه توكلنا لزياره الامام الحسين عليه السلام..

ملوكه فرحانه هي عمرها مطالعه لمكان

هاي اول طلعه الها وتشوف هالكد ناس ومواكب وريري ماخلت شي بنفسهه

كل موكب اذا بي تشابيه او مخلين دلال

تكلي نوكف خلي ملوكه تشوف وتصور

بايبادهه ..

وانه مخليهن براحتهن .. وكل شويه نوكف

اجيبلهن شي ياكلن .. وانطي لابويه واغسله

ونرجع نكمل مشي ...

صارت صلاه الظهر ووكفنه حتى نروح نغسل ونصلي .. وريري ضلت مجلبه بيه

- حيداار هسه امك تفشلني على الصلاه

هي بالبيت وتنك فوك راسي هنا شتسوي بيه

- رور امي تحجي لمصلحتج

لشوكت تضلين متصلين !

- مااعرف شمفهمني بيهه

- هسه تردين تصلين لو تشردين منهه؟

- مادري شنو الاحسن ؟

- تصلين طبعا

اعلمج. ؟ حتى تنحسبلج زياره مضبوطه من تلتزمين بصلاتج

- بس خلي افهمك شغله

تره اني وحده كلش مو زينه يعني مكسرات الدنيا كلهه بيه

عادي اصلي ! يعني الرب يقبل لو لا ؟

- يقبل يقبل ومنتظرج تواصليه وتدعيه وهو يغفرلج على كل شي راح

-هاا اووكي

كولش حباب هو مو ؟

يعني مثل ماسمعت منكم انتو داىما تشوفوني هو كلش حباب ويه الناس ورحيم بس اني من اقرا اكو هيج هواي اشياء تخوف صراحه

عبالك واحد متوعد للثاني بالاخره

- لاا بويه لكل شي تفسيره لا تاخذين حجايه وحده وكبل

هسه انه ماحجيلج اخليج تحسين مو احسن ؟

- بشنو احس ؟

- تحسين شلون ربنا يحب الكل وحتى الموزين هم اذا يحب رب العالمين راح يغفرله كل شي ويخليه قريب اله

-هااا اووكي اذا هيج اووكي

زين بس سؤال اخير

انتو بالصلاه يعني هم تحجون ويه الرب هيج تعبرون وكذا لو بس ايات واطلع كبل

- ههه لااا نحجي نحجي هي الصلاه موعدنا بضيافه رب العالمين وكلمن يحجي الي بكلبه

شوكت انتي مايعجبج تحاجين ربج روحي صلي ركعتين واكعدي سولفي الي بكلبج كله

شكد ماتردين تحجين احجي وكبل راح تحسين روحج صرتي زينه

- اوووكييي سويتلي واهس اصلي لان من زمان جنت اتمنى احاجيه

عندي حجي بكد الدنيا بس كون ميضوج مني لان هواي الح اني ادري بنفسي

- عادي ميضوج من احد ربنا هو يريدنا نضل نحجي وياه مننساه

امشي خلي نروح لامي نكللهه شويه ونرجعلهم حتى اعلمج  تصلين

بقيت ابويه يم السيد وابنه  وسيف ورحت لامي انطيتهه خبر واخذت ريري ومشينا

كدامهم بهواي ..

شفتلي مكان وره موكب وكعدتهه على طابوك

ورحت اخذت دبه ماي منهم ورجعتلهه

خليتهه اديرلي ماي وانه اتوضى بصوت عالي واسمعهه ..

بعدين كعدت احجيلهه كم ركعه بكل صلاه

وشنقرا بيهن وهنا كلتلي ..

- بس اني ماعرف هذني الايات ماحافظتهن

- ميخالف هسه اعلمج عليهن حتى لو لتصلين الظهر ضلي احفظيهن بالطريق وبالمغرب صلي واقريهن

- اووكيي

وكفت كدامهه وهي كاعده تباوعلي

وصرت اعلمهه كل حركه بالصلاه

والي تسألني عليهه ارجع اعيدهه الهه

خليتهه تحفظ التسبيح وكتبتلهه السور بالملاحظات وخليت تلفوني بايدهه

وكلتلهه تضل كل الطريق تحفظ بيهن سوره سوره ...

وكفت انفض ملابسي وهي كلتلي ..

- هسه شو نسيت الاذان شلون منو بالبدايه فلاح لو صلاح هههخخخ نسيت

وهاي  خير العمل شوكت اكولهه ؟

- استغفر الله ريري ركزي وياي

احسبيهن على ايدج وحده وحده وعيديها مرتين زين

-اووكيي يلا بس اخر مره عيدلي دافتهم هذني وين اكولهن

رجعت اخذت اتجاه القبله واعيد الاذان

كملت وكلتلي ..

-ماكتبتلي هاي ام رفعه الايد بالنص وبالبدايه هم ماحفظتهن تره

- اسمه قنوت ريري

هسه اكتبلج

-باوع اسهل واحد اوكييي

اخذت تلفون وجاي اكتبهن الهه وسمعت صوت واحد ورايه .. انداريت وشفته

رجال جبير محزم وراسه ولحيته كلهه شيب

وشايل سجاده وتربه ...

سلمت عليه وهو كالي ..

- الله يجعلها بميزان حسناتك بويه كون

وين ماتدير وجهك متوفق ودربك راحه

- اشكرك عمي اشكرك

- والله انه من اول ماخذت المره بهالصوب

خفت منك وضلت عيني عليك بس والعباس من شفتك تتوضى وتعيد وتاذن وتعيد الهه

والعباااس كلبي رجف وكلت الا اطلع من خطيته

شلت ذنبك وظنيت بيك سوء ابريني ذمه بويه

-لااااا عمي مبري الذمه ومابينه شي

وهذا من زين اصلك داير بالك على كل غريب هنا بضيافتك

- والله انه كلت عجب ماخذهه بخيمه النسوان

اخاف نيته جايده !

وضليت واكف واباوعلك اريد افتهم سالفتك

شموكفك بالتراب تصلي ؟

المره مو من دينا ؟ ولي امرها انته لو غريب؟

-لاا لاا عمي هاي مرتي

بس هي دخلت الاسلام جديد

انه من دين وهي من دين تزوجتها وماتعرف على الاسلام شي ورادت تتعلم صلاه وكبال اهلنه صعبه عاد اخذتهه بعيد وجاي اعلمهه

ضحك من كل كلبه واجه حضني وباسني

وكالي..

- شكبرها يم الله شكبرها بويه اجر وعافيه الك

والهه الله يثبتكم على الصراط المستقيم

اتمنى تقبليها مني بويه هاي هديه مني

صلي وتذكري بيها حب ابو عبدالله

اهو ما يدعي لزيارته الا اليحبهم وهاي رزق من الله الزياره وحب الله واهل بيته

اذكريها كل عام بهديتي هاذي وهي عليهه

نفس زوار ابو عبدالله وأن شاء الله الثبات على

الدين

اخذتهن منه وشكرته .. وضلت حاضنتهن وكمشت ايدي وسلمنه عليه ومشينا

كلتلي ..

- شكد جنت بفراغ فلوس الدنيا واملاكهه كلهه ما ملته الي

اليوم حجايه وحده من هالرجال خلتني احس شكد اني امتلك شي جبير ومايتثمن

- الدين والعباده هي غذاء الروح اذا روحج ماتتغذى تضل تعبانه وميته وعمرج كله متعب يصير

- زين بعد اني راح اصلي كله على هاي

التربه والسجاده .. بس كون احفظهن اليوم

كلهن

- تحفظيهن سهلات هنه

تريدين اكنك وتفتحيهن باليوتيوب تسمعين احسن ؟

- لااا خلي هيج اقرا واحفظ

شفت ابوك بس يقرا ويسبح بالطريق

واني كاضيتهه تمضحك ضجت صراحه

اريد اصير شويه جديه واسوي هيج شغلات مال دين

- ههه سوي عيني انتي كضيهه قرايه بهذني واحفظيهن هااااي احسن شي تسوي بطريق زيارتج

-اوووكيييي

هسه عود كول لامك صلينه اوووكيي

- زين بويه زين

رجعنالهم وانه طبيت صليت بسرعه مال العصر وطلعنه نكمل مشي ..

ريري عافت ملوكه ويه ابوها وضلت كامشه تلفون وتمشي يمي وتقرا ..

انه عفتهه بعد ماحجيت شي وقاطعتهه

هي مخليه ايدهه على ايدي وانه ادفع بالعربانه وتمشي على اثر مشيتي ..

وره ساعه كلتلي ..

- حيداار اخذ تلفون وسمعلي

-اقري هيج حافظهن

-اي صح نسيت

يلا بيمن ابدا بالسور مو ؟

- اي كيفج شحفظتي كليلي

- زين دنك شويه دتسمعني

دنكت وعلى مشيتنا صارت تقرا سوره

الفاتحه وانه من اسمعهه تقراهه احس

كلبي انشرح .. كل كلمه احسها رهمت الها وهي اول مره تقرا شي بالدين ..

كملتهه وانه شاورتهه..

- لج بويه صوتج وصل كلبي

-هههه صدددك ! يعني زين حفظتهه مضبوط لو لفظ غلط اكو؟

- لا كله مضبوط عفيه والله سباعيه

رور انتي حتى على نفسج قويه

- طبعااا عوومرري طبعاا

اني ام نفسي اعرف شلون امشيني عدل

- راايه وعلللم بعد بيتي

كملي بعد شحفظتي

قرتلي سوره التوحيد ومن صدقت كلتلي ..

-طبعاا حبيت الايات حلوه

داحس اني داعرف اعبر هيج عن المحبه والايمان وكذا

- انه هم جاي اسمعهه واحس بيهه شلون مرتبه على حالج سبحان الله رب العالمين كل كلمه منزلها بيهه حساب وكتاب مانفهمه

-اييي كلش طبعا اني اقرا وافهم اني شداحجي عبالك داعيد كل شويه اعيد اني بالاسلام هيج داحس

- الحمدلله رور حبت الاسلام

-حبيت الدين بس محبيت كل الناس الي بي

حبيتكم انتو بس اكو غيركم اكرههم وماتنعدل نظرتي عليهم

-ميخالف العافيه درجات

حبي على راحتج

كملي يلا احفظي الباقي

-اكولك هاي سوره القدر

هاي شنو منزلينه ؟ وهاي ليله شوكت تصير؟

- هاا هاي تنزيل القران

يعني هنا ان رب العالمين نزل القرآن على نبينا محمد صلى الله عليه وسلم بهاي الليله

وهاي تصير برمضان اكو ليالي قدر ان شاء الله تحضريها هالسنه

- اووكييي

زين هسه بس هذني احفظ ؟

- اي احفظي هذني هسه وبعدين من تضبطين كلش الصلاه اعلمج غير سور وكومي اقري كل صلاه سوره شكل

- اوووكييي

شو الشغله تونس هههه مادري اني تافهه زياده

- لااا هاي لان عاجبتج متحمسه الهه

-اييي ديلااااا ادري اووكي

كملنه مشي وهي تقرأ ..

بدت تظلم عاد وكفنا ودورنا مبيت النه

ثبتنا على موكب .. وراحن ريري وامي وملوكه بجادر واحنه بغير جادر ...

وصارت صلاه المغرب ..

صليت وطلعت رحت دزيت واحد من الجهال بره كاعدين .. خليته يصيحلياهه ..

وضليت انتظر وره وين يلا اجتني ..

-هاا بشريني ؟

-لك ماكوو هيج عزاا فدمره حلو

هههههه لك اني لازمه السجاده وخبصت النسوان وين القبله وين القبله

وبعده يأذن واني كبل اخذت موقعي

-ههه ياالله يالله

- بس عزاا فدشي واوووو ماعشت هيج شي بحياااتي تره يجننن

لك شكرا حويدر راح اصير ادعيلك بعد هااا

صرت مؤمنه

- الف حمدلله صار اسلامج على ايدي

رور شيجي بالج سؤال بالدين اسأليني

لاتخجلين من شي زين

-ايي اووكيي

بس اكولك يعني هاي انتو هم هيج تتونسون بالصلاه لو اني دابالغ لان اول مره ؟

- والله احجيلج الصراحه

مو كلنه مثل احساسج

-هااا زين لعد اني شبيه ؟ يمكن فتت زايد

لان ماحاسه هيج بشعور روحاني من قبل

- يمكن .. ويمكن لان انتي استشعرتي كل كلمه وحركه فهيج عشتي اللحظه

- اييي كولشش اندمجت

اكولك هسه بعد منصلي منا لباجر ؟

- كيفج رور الصلاه الها اوقات ثابته بس اذا انتي عاجبج تصلين كيفج كل وكت الج

-زين لعد اني هسه شسوي ؟ اكولك هاي نسوان جايبين وياهن كتب مدري شنو

شو اني ماعندي مثلهن منين اجيب ؟

-ههه رووور عيني انتي

شويه شويه اعلمج كلشي

هذني هنه من البيت جايباتهن

- وانتو شو ماعدكم بالبيت ؟ لعد غير امك تاخذ وياهه !!

- امي عدهه كتاب صغير تقرا بي وابويه عنده كتب هواي بس ضامهن

هسه من نوصل كربلا اشوفج مكاتب شكبرهه شكدهه كلهه كتب شيعجبج اختاري واشتريلج اقري بي

-اي بعد احسن خوما اضل بدون كتاب هم اقرا اتعلم شي منا منا

زين هسه اني راح انام واذا كعدت يمكن اصلي واذا صليت اكولك عود الصبح احجيلك

- اي عفيه وكبل ماتنامين اقري هاي تسبيحات ونامي والصبح كولي لامي بس تصلون الفجر نطلع زيين مو تعطلونه

- اووكيي يلاا چااو

راحت وانه رجعت للجادر .. تمددت يم سيف

وضليت مفتح عيني بس بغير عالم ..

بالي هواي اسئله عاد حفزت وكمت رحت

يم ابويه ..

هو بعده كاعد يسبح .. وانه كعدت يم رجله

كمل تسبيح وباوعلي وضحك كالي ..

- وجهك زايد نوره بويه ان شاء الله خير

- اي الحمدلله حجي خير خير

بس انه جاي استشيرك بسالفه

- ان شاء الله افيدك كول بويه

- حجي يعني هسه مثلا واحد زاني وشراب خمر ومايعرف بالدين شي وبعدين اسلم

زين حاله هنا شنو ؟

- شلون مايعرف بالدين شي ؟ يعني ملحد ؟

- لا هو مو ملحد بس عايش وحده مامتعلم على دين ولا يعرف انبياء وائمه يعني عيشه الشارع متعلم ديانه

بس هو يحب الله وكلبه طيب وايده سخيه

وصار مسلم وترك الزنى والخمر وبدا يصلي

هذا ينغفرله مو ؟

- ماطول هو على غير معرفه بالاسلام وتعاليمه وعلى غير معرفه بربه وعايش نعتبره على وراثه بيئته يعني عايش بجهل

فهو مسامح

- هاا الحمدلله زين هو جان يسعى يعرف الدين ويبحث عن صفات الخالق وشلون يعبد الرب يعني هو جاهل بس يفكر بالخليقه

- اي وانهدى بعدين ؟

-اي انهدى صار يحب الاسلام وفرحان بي كلش فرحان

- هاذ هوه بويه مغفور له بأذن الله

ماطول سعى يغير نفسه ويدور حك الله عليه ويتفكر بالخالق فهو يعتبر ضايع وتايه بالدنيا

ومن اسلم بعد سقطت عنه الموبقات وكل مايسعى يزيد بالعباده والعمل الصالح كلما ينغفرله اكثر ويتوفق اكثر

- زين حجي اكثر شي يفيده هسه شنو

يعني يصلي الي فاتته من كبل لو يصوم

لو شيسوي يعني يعوض عن ذاك العمر الضاع

- الصدقه بويه خليه يتصدق عن نفسه

وهيج ناس مانكلفهم بالدين من البدايه

هذا بعده جاي فرحان هو لاكي درب نور خفيف على روحه ،اذا تزيد احكام وفرائض عليه جايز ينفر او يرتد اذا شاف الدين ثكل حمله عليه

-اي صح

-اي لازم تخليه يبدي بالخفيفات ومثل كل ما يخلص صلاه يوم يصلي ركعتين شكر لوجه الله وهاي كفيله تعوض الفات من العمر

المهم بويه الانسان كلبه صافي

والعباده هي اجتهاد وكلمن وقدرته واجتهاده

ومايكلف الله نفسا الا وسعها

هو بعد من يحب ربه ويحس اكو على نفسه اثم لازم يخلص منه هو من ذاته يكوم يدور زين العباده ويجتهد بيهه وربك هو الي يوفق ويهدي من يشاء

- والنعم بالله

- منهو هاذ الي تعرفه اسلم جديد؟

- ماعرف احد بس هيج سمعت سالفه وضلت بالي كلت هذا زاني والي نعرفه الزاني ماينغفرله

- احنه وادم عباد لله هو الي يقرر هذا ينغفرله وهذا لا

هو اعلم بالناس وماطول ربك هداه وخلاه يتوب ويسلم فهو بأذن الله منغفر له

والله يحب يصلح البشر مايحب يكسره بالاحكام

- الحمدلله ربنا غفور رحيم ان شاء الله تنكتبله مغفره

مشكور حجي الله يديمك النه

كمت بوست راسه ورحت تمددت وانه مرتااح وعيني تراقب صلاه ابويه انتظره يكمل حتى اخذه لفراشه انومه وانام واكعد الصبح اشوفهه شلونهه ليلتهه ؟

ضليت احوص بمكاني الى ان اخذت ابويه نومته يلا ركدت ونمت .. وعلى اول ماحسيت بروشه الولد الفجريه كبل كعدت

وطلعت بارده واغسل بساع بساع

ورجعت صليت وانتظرت ابويه يكمل صلاته وطلعنه ننتظرهن لما اجني ومشينه شويه وكعدنا نتريك ..

احنه من ناكل نوكف بمكان كون هنه يندارن براحتهن ويرفعن البوشي وياكلن مو بنص الناس ..

فهناك واكف يمهه وهي ترفع بوشي شويه وتاكل وتنزلهه . .

فهي رفعتهه شويه وانه خليت ايدي على وجهه تلمسته شويه ووخرت ..

كلتلي..

-شكوو شبيك

- هيج بس عجبني اشوف وجهج شلون بارد

- هااا طالعه عينك مو بزياره ولك اكعد راحه

هاي مطلعت حنيتك بالبيت هسه بالشارع يلا حنيت لوجهي ؟

- ههههه وعلييي انتي تخليني ابتلي على نفسي بس اسويلي شغله وياج

-ديلااا اووكييي مابيه حيل عركات من الصبح تره نعسانه نعساانه

- مانمتي زين؟

- لاا بس افكر افكرر اوووف خليني انام ظهر شويه مو تنسى

-ماشي بس شتفكرين ؟ بيمن ؟

- هيج افكار داشوف حايتي وين جانت وين صارت

- بعد للاحسن ان شاء الله

كملنه طريقنه وانه بديت احجيلهه على كل شي يخص الاربعينيه .. وابويه هم شاركنه السوالف ..

وضلينه نمشي براحتنه مانستعجل نرتاح هواي ونتاخر وره مانصلي الظهر حتى ينامون شويه ونتأخر بالوكفه للاكل علمودهن لحد ما وصلنه باليوم الثالث الصبح احنه بين الحرمين ..

هنا ريري جلبت بيه وترجف .. عفت ابويه يم السيد وضليت وياهه ..

-شبيج رور شبيج

- مااريد ابقى هنا طلعني عفيييه

-ليش شكو شكو شصار خلي افهم

- دااحس هيج رجفه هناا بصدري عفيه

ماريد ابقى ماريد اني مو هنا مكاني

اني مو مال هيج اجواء دشوفهم شلونهم وباوع اني وين حاشره نفسي كوه بينهم

- كولي يالله ريري ليش هيج تنقصين بنفسج

انتي زينه واسلمتي وهذوله ائمه لكل مسلم

لازم يجي يزور بذكرى وفاتهم

- اي من بعيد عفيييه ماافوت جوه يمممه عزااا الصوت والجو ديربكني دارجف عفيه شبيه ماريد اضل هيج

- بس جري نفس جري نفس

وانه وياج نفوت براحتنه نزور من بعيد

تهدين وتألفين الجو بعدين اذا يعجبج طبي زوري جوه .. زين هيج؟

- اي زين

ولك مو تعوفني ويه امك تاخذني شحط

ابقى وياي

- اي اي ادري باقي وياج بس صبر

هسه ادبرهه

اخذتهه ورحتلهم كلتلهم يخلون ملوكه يمنه

ويرحون يزورون وبعدين احنه نزور وناخذ ملوكه براحتنه ..

السيد اخذ ابويه وسيف وابنه وراحو وحد وامي وحد ..

اخذتهن وعبرنا تفتيش وضلينه بالصحن

كاعدين بالبدايه ..

احجي لريري على المكان واهدي بيهه

وحجيتلهه على كلام ابويه

وهي بس ساكته وتباوع كلشي متحجي

رحت جبت كتاب وكعدت اقرا الزياره

وهنه يردن وراي .. كملنه وكعدت احجيلهه

- رور هسه انه بيوم يجوز اعوفج واهلي يعوفوج وانتي اصحابج هم يعوفوج او يجوز يوم تحتاجين احد بس متردين احد من الي تعرفيه

هذوله الائمه صاحب لكل وحيد ومنهم شفاء لكل عليل .. انتي خليهم اصحابج انتي بديتي كلشي زين عوفي الراح وره ظهرج وخلي بعد بحياتج بس الناس الزينه

صاحبي الائمه همه مايأذون احد ولا ينكرون احد يحبهم حتى لو شمهما مسوي يقبلوه ويدعوله بالهدايه

- ادررري بس اني استحي ماكدر افوت يمهم استحي صدكني ماتجرأ

- ليش تستحين ؟ انتي جايه تكملين عبادتج

وانتي تعنيتي هذا الدرب كله المن ؟ غير للامام تزوريه !

- اي بس استحي منه عفيييه داحس هيج مدري شلون يباوعولي عبالك ديذكروني بكل شي

- ميخالف هاي رهبه المكان عادي همه اهل البيت الهم رهبه بكلوب محبيهم هذا شي زين

بس انتي شدي حيلج وامشي طبي بزودج

- واذا ماكدرت ازور مثل هذيج المره؟

- اذا مازرتي تطلعين خسرانه

وبعد انتي بقت يمج

عدلت لفه الغتره على راسي وكمت

ضليت اكللهه ..

-كومي يلا خلي نزور ورانه طريق

- ماا مافوت اضل هنا انتظركم

-ريررري لا تضيعين تعبي بيج بهاي افكارج

كومي زوري ترتاح نفسيتج

-استحي ماروح منا قريت زياره وكافي

-ماكو هيج حجي تضلين متعلمه على هالحال

امشي كدامي يلا وعلي اذا ماتمشين بعد مادخل بيج وحجايه ماحاجيج بعد لو تموتين

اخذت ملوكه ومشيت شويه وانداريت اباوعلهه وهي اجتي مشت وياي

كلتلهه..

- تزورين وتسلمين مثل مامعلمج

وتحجين شكو بكلبج شيجي بالج احجي

لتخافين انتي سباعيه ماكو شي يخوفج بالدنيا كلهه

- زين هم اكو هيج فد اشاره اذا مثلا ميحبون فد واحد او ميريدوه يمهم ؟ حتى افتهم وانسحب

- ماكو لاا ماكو همه يحبون الكل طبي بزودج محد يكرهج هنا روحي انتي جاي تعيشين لتخافين محد يرجعج من طريقج الجديد

ضليت واكف اباوعلهه شلون تمشي وتتلفت عليه وانه اشرلهه روحي .. وشفتهه طبت يلا اخذت ملوكه ورحت لجهه الرجال ..

شلتهه وزورتهه الامام ودعيتلهه بالشفاء

وشفتلهه مكان كعدتهه ووكفت اصلي

بعدين اخذتهه وطلعت .. شفت ابويه والبقيه كلهه موجوده بس ريري ماكو ..

ضلينه ننتظرها وانه افتر منا ومنا اكول خاف تيهت .. وصدك طلعت متيهه ولحكتهه جبتهه

اعرفها من سبحتها وشاره الغتره على راسهه

كمشتني وتبجي .. اريد افهم منها شي ماكو

ضليت وياهه واكف لحد ماهدت وصارت تكلي ..

- تره مادري ليش ابجي بس هيج مادري شبيه

- عادي ميخالف المهم زرتي ؟

-اي وجانت تخوف يعني مو تخوف بس هيج مدري شلونهه بيهه فد شي يوجع كلبي

- هااا جا كتلج اخليج تحسين شفتي شلونه الاحساس هنا ! تعذريني بعد من امشي لخاطرهم وانه مكسره رجليه

- اي اعذرك ماجنت اعرفهم يعني مادري ليش اهلي بذاك الوكت ماجابو طاريهم

لو حاجيلي عليهم جان من زمان استفاديت منهم بحياتي

بس ماعرفهم وروح ابويه بس منك عرفتهم

- ميخالف الجاي احسن ان شاء الله

هسه امشي نكمل بعد زياره ونكعد نرتاح واخذج للمكتبه اختاري كتابج ونرجع لبيتنه بسلامه

اخذتهه وطلعنه ويه الاهل كملنه زياره

وبعدين اخذتهه للمكتبه شوفتهه اشكال الكتب والاثريات .. وهي تكلي انته شتشوف ياكتاب يفيدني اختاره ..

عاد اختاريتلهه كتابين .. واحد بي جزأين تفسير قرآن والثاني كتاب مصباح المتهجد ..

وطلعنه عاد ناكل ونشتري منا ومنا لحد ما حصلنه سياره ...

ورجعنه لبيتنه بخير وسلامه ... وكبل للنوم

ما صحينا لثاني يوم ...

هنا صارت مشكلتنه الصلاه .. ماترضى تصلي كبالي ...

احجي ازعل منهه اعوفهه واطلع مانام يمهه بس كلشي ميفيد وياهه .. كالت ماصلي الا وحدي وقفلت ماتصلي الا وحدهه لووو تخليني اصلي جوه وهي فوك لو تنتظرني اطلع يلا تصلي ..

كملت الاربعينيه ورجعت المدارس وهنا اجاني اتصال حتى التحق بالدوره التدريبيه

والمكان جان صدمه الي ...

الدوره جانت بلبنان خومسطعش (١٥) يوم للمعلومات ..

رحت حاجيت ريري ..

- لج هاي وين ياخذوني !

- اي لعد غير لازم يعلموك شغلك

- هو انه بعدني شفهمت وكبل اخذوني لبنان

بله هناك سألوني شي عن الشغل شكللهم انه خريج معهد ومفتحلي محل مال نت !

وجاي اشتغل بوزارتكم !

- عيونييي انته كووولشي مدبر

اصلا هسه انته عندك شهاده ماجستير خاف متدري

- علييييييج الحسينن انه عندي ماجستير !

منين اجتني ولج !

- شنو غير اشتريتهه لعد دفعت سياااره

بس علمود توقيعين !!!

غير كلشي رتبته وهاي بعثه حبي بعثه لاهل الماجستير بس يدزوهم لبنان

- ريرررري على بختج انه ويني وين هذوله

هسه اكعد مصفر كدامهم لا فهم ولا علم

والله احس راح افشل نفسي بهالروحه

- تدبر عيوني تدبر

معليك كلشي محلول هاي بس شكليات كدام الوزاره مشيهه ومعليك محد يكدر يطلعك من وظيفتك لووووو هسه يدكون طبول انته متوظف متوظف

هسه هناك حتى لو يمتحنوك وترسب تلكه نفسك ناجح بالاخير وشهادتك من اعلاهم

روح تونس شوف دنيا تعلملك كم شغله وتعال

- والله لو باحلامي هم مافكر اروح لبنان

واكعد ويه بعثات !

- اني هم جنت باحلامي ماتخيل نفسي الزم حجاب وشوفني هسه شلوني !!

انكط ايمان وعباده

-زين اكلج انه ماعندي جواز شيوديني وهمه بعد شجم يوم يطلعون !

-ياااحظي اكو رجال ماعنده جواااز بهالوكت

-اي شسوي بي ؟

ماجاي بالي لان انه مو غاوي سفرات

- ديلااا ادبرلك جواز حضر مستمسكات

ويجيك الجواز بعد شتريد امر خدمه

-ادبريهه جواز بسرعه !

-ولك اني جناسي على اللبس اشيل وياي

مادبرلك جواز ! ورسمي هم !

اصلاا اسهل من هالسالفه ماكو

هسه تلفون واحد يفتحولك قائمه ويرتبون جوازك هو شكو اسهل من الجناسي والجوازات ! ! بس ازركه بفلسين يكوم هو يفتر بيهه على البقيه حتى توقع

- زين هاي شكد ادفعلهم ؟

- اني ادفع انته الك الصافي

- لااا شلون ماعوف كلشي عليج

كافي الدفعتيه ماريد بعد شي والله كافي

- حيداار هذا مقابل تعبك وياي هالايام وعلمتني هواي شغلات اريد ادفع حقها

ماحب اخذ بلاش كلشي انطي حقه

-بس انه ماريد

-اني اريد وانتهى سد الموضوع

اني فلوسي هواي اريد اخلصهن شعليك انته

هسه روح احجي لاهلك على سفرتك وشغلك احسن متفكر بالفلوس

- بس اردهن الج والله

-اي طبعا راح اخذ الفوكك والجواك من اروح عومري كلشي بحسابه

عافتني وراحت .. وانه كعدت يم اهلي وحجيتلهم شلون دبرت واسطه وللتعيين طلعلي وضليت استجواب بالساعتين وياهم

ثاني يوم اجاني اتصال واحد من ولد يشتغلون عند ريري جاي وينتظرني بالفلكه

صعدت اخذ مستمسكات وشفتهه لاغيتهه ليش متكلي راح يجي وهي تكلي مادري بي دزيتله بس رساله وهو بعد مارد ...

رحت وديتهن اله وهناك وعرفت هذا واحد دازه حتى ياخذهن ..

ضليت احضر للسفره وانتظر الجواز

وحصلته حسب الاصول سافرت لبنان ويه ناس ماعرف ولا واحد بيهم ...

ريري تراسلني كل شويه وتكلي ..

' لا تحجي عن نفسك لاي احد '

' ركز بفايلك واحفظ كل معلوماتك واذا سألوك انطيهم نفسهن لا تخربط '

' المن تابع ليا جهه كول شي خاص ولتنطي جواب محدد ، عوف السؤال معلك '

هاي كل شويه تعيدهن عليه .. وانه وين اروح اجي كله احجيلهه .. اصورلهه واذا مجال صارلي اخابرهه .. واحجي ويه اهلي واشوفهم المكان ..

دخلت محاضرات فخمه .. من ناس وترتيب وطريقه شرح .. وجنت اخلي كل تركيزي وياهم ماريد افشل ..اريد اطلع كد شهادتي الي بالوجه صارتلي ...

من اطلع من المحاضرة بس سلام هيج ويه الولد والباقي وحدي اكعد أشر المهم من الشرح واراجع اثبت معلومه بالي وبعدين اطلع افتر واحجي ويه ريري

بالليل مانام اذا مانفتح كاميرا ونحجي

وحتى شلبس اليوم هي تختارلي ومن اطلع اصورلهه وكله تكلي اووكي حلو وتمام

بس هذني حافظهن منها ...

عبرت عشر ايام وصارت تكلي اراجع دكتور هنا واشوف فحوصاتهم بلكت اضبط

اقتنعت ورحت سويت فحص والنتيجة نفسها تقريبا ماتغيرت .. بس هالمره كتبلي جدول علاج و وصاني كل فتره ارجع افحص

استلمت تقدير جيد جدا وحيل فرحت بي جبته بدراستي مو بمساعده احد ..

ورجعت لبيتي مشتاق للكل .. وفرحان ماواسعتني الدنيا بفرحتي ...

اكثر اشتياقي طلعته بريري ضليت حاضنهه واشمشم بيهه .. وشوفتهه الشهاده فرحتلي هواي وضلت تمدح بيه وتكلي تعلمت اطبخلك فاصوليا وباجر اطبخلك بمناسبه رجعتك

وره اسبوع دزو عليه للدائره .. عبالي راح يبدا الشغل بس همه دزوني تدريب عسكري

لان جسمي ضعيف ومبين ماواصل عسكريه ولا خادم بمكان وهذا جلب للولد الوياي الا ادخل تدريب عسكري ..

رجعت ضايج لازم ازين شعري ولحيتي

وادخل تدريب عسكري !

ريري من سمعت كالت ..

- يلا بلكت اطكلك عضله منا منا

-ريري رايح بنص التعب شبيج !

-ديلاااا راح ترجع احسن من قبل

بس لتختلط باحد ضل سطحي ويه الكل وعليك بنفسك

ولتصير سرسري ابقى سيد حويدر العلم

- مانحرف لتخافين

بس الله يعلم وين راح يشمروني بنص هذا البرد

- وين ماجان اني وياك

اعوفك تدرب على الي بالهم بس اذا صار شي دك تلفون و معليك بالباقي

حجيت لاهلي على روحتي الجايه وبس يندعولي ارجع بالسلامة..

السيد عرف بوظيفتي وكبل كالي جاي تتعين بواسطات الدعاره !

تلاغيت وياه مارضيته يحجي عليهه وبعد من ذاك اليوم ما حجيت وياه كلمه ..

اجاني خبر لازم اطلع موعد التدريب صار وكته ..

واكف بالحمام اريد اخلي المكينه على شعري وكلبي ماينطيني ..انه حيل معتني بي ومرتبه

وهو اسود ثخين وبي لمعه ..

اجتي ريري وضلت تلطش حجي ومنا منا

لحد ما زينت شعري ..

ضلت تضحك على شكلي وتكلي راس البصلايه ..

عضيتهه من جتفهه خليت روحهه تشوغ

وراحت زعلانه ...

رجعت زينت لحيتي وسبحت وطلعت

صعدت للغرفه ولكيتها متمدده . . كبل اندارت وتغطت ..

طفيت الضوا ورحت نمت يمهه حضنتهه وهي ادفع بيه ..

- شكو شتريد

- شبييج هسه مو جاي نتشاقه ليش تزعلين

- لك سنون تماسيح عندك عزا بعينك

جتفي ورم .. مال الهمش كون بيك لحمه جان رديتها الك

- هههه وعليي إنتي تسودنيني ماحس بعد من اعضج لان اطلع حركتي بيج

-ديلااااا  كافي لتحاجيني ماريد اسمعك وخر ونام يلا يلا

- شبييج رور باجر رايح وعايفج بعد فوك الشهر ماشوفج

-اي بعد احسن اخلص من الهمش هذا

شدعيلك حويدر جتفي صار حجاره

- ياااابويه وعلي ماعبالي هيج تصير عضتي

جيبي ابوسه

-شتبوس؟ اكو عضه تروح بس تبوسها بطلهن سوالف القيصر هاي متلوكلك

ضحكت وانه مخلي وجهي بركبتهه

وهي ادفع بيه .. عاد عضيتهه خفيف من ركبتهه وهي وخرت وكعدت ..

-شبيك بااابه شجاك انهمشت بالعض

جوعان انزل اجيبلك اكل وتخلصني !

عوفني شهالملحه حس بشر ديضوج حسسس

جريتهه وعصرت راسهه على صدري

- لج هيج اريد اشبع بيج

- شكو طايره اني

- بويه اكلهه راح اولي باجر ماشوفج بعد

-ديلااا هسه شسويلك ! تريد اروح اتدرب بدالك يعني ! متروح هسه شغل هو لو قنادر

-يااابويه ولج وتالي وياج

-شتريد هسه تره خنكتني

متنام هسه مو خابصني بشغلك وروحتك

نام يلا دنام

-روحي روحي نعلى عليج تندميني على كل مره اوصلج بيهه

-اي احسن حتى بعد متوصلني

انداريت وعفتهه .. اريد انام ماكدر شي جاي يفور دمي ...

ضليت بس اتكلب بفراشي وهي صاحت

-شبيييك متنام

- شعلييج انتي ماريد انام

-يبوووو حويدر شتريد كولي

- هسه انه حاجي وياج واصلج

كلشي ماريد منج تحمليني هالليله وباجر بعد تخلصين مني ونامي براحتج

اجتي حضنتني دفعتهه وتغطيت زين

جرت غطى من راسي وضلت تبوس باذني

-ولك ماريد اخلص منك بس تره ضايجه لان حتروح

-مبين موته روحج عليه

- لااا متعرف احساااسيي

ولك اني ضايجه شسوي لازم اعاركك وانته لحيت بالعض انهمشت هم ضوجتني بعد ازيد

بس يلا تره بالي يمك اووكيي

- شسوي بي ! روحي ريري هالسوالف متفيدج بعد

انتي من تخربين واهسي اول مره بعد ماكو مايرجع من يعجبج

-ديلااا هسه شصار

حيدااار لطنكر ولك دنحجي

يبووووو طنكر حويدر بعد شيفضهه

ضلت تتحارش وتريد نحجي بس قفلت عليهه ماحاجيهه .. وعفتهه لحد ما ملت ونامت

غفيت شويه ومن كبل الفجر انه موقت تلفون

كعدت على صوته .. ونزلت اغسل ورجعت فوك اريد ابدل ملابسي وماشفت ريري

مادري شوكت كعدت ؟

لبست وتأكدت من كل غراضي بالجنطه

وصليت الفجر وبعدني جاي اسبح وطبت ريري جايبه صينية الريوك ..

لميت السجاده وهي اخذتهه من ايدي

واجتي خلت ايدهه وره ركبتي وضلت مبرطمه وتباوعلي ..

-هااا شكو

- نتصالح ؟ يعني خاف تروح تموت او اني اموت بين مترجع

منموت زعلانين مو احسن ؟

- اموت زعلان منج احسن حتى تحسين شكد جاي تحركين كلبي بلسانج اليلعلع

-ديلاااا هسه شحجيت !! تره انته ضوجتني

مو زين داصالحك

ولك اخر مره تصالح لو لااا

يلا مو عايفه نومتي والجو ثلج ونازله اسويلك ريوك متقدر !

باوعتلهه ورافع حاجب وهي سوتلي هاي الضحكه ام السنون 

وجرت ركبتي حيل عليهه ...

-حويدددر ماخليك تطلع اذا منتصالح يلا اني مؤمنه ميصير ابقي ناس زعلانه عليه لتخرب ايماني

جريت نفس وخليت كصتي على كصتهه

- لخاطر ايمانج اصالحج بس لخاطر ربج الي تحبيه لتعيدين وياي هالسالفه من اجيج بس تخربين واهسي صدك انغث منج

-ديلااا ماعيدهه بعد اوووكي

تعال اكل وهناك اخذ وياك شي بالطريق هم اكل لاتضل ساد حلكك

وضل خابرني كل شويه فهمت مو كل ساعتين لا هيج كل شويه لحد متوصل

-اييي بعليي ذكرتيني

خلي ابدل تلفوني هذا يسحبوه مني هناك

وخاف ينعلس

رحت طلعت تلفوني القديم النوكيا وكعدت اضبط السيمكارت بي واخذت الشاحنه

وكعدت اكل وهي يمي كاعده ومخليه راسه على جتفي وحاضنه ايدي ..

وكلتهه شويه وبعدين كمت لبست كبوس براسي وهي حضنتني ..

-حيداار لا تخاف من شي صير سبع وديربالك على نفسك ومعليك باحد هذولاك كلهم سرسريه انته لتعاشرهم اببد

- الله كريم

ديربالج على اهلي رور بامانتج همه

- اوووكيي

كمشت وجهه وبوستهه وهي تبتسم

نزلنه سوه ولكيت امي كاعده على الدرج

حضنتهه وهي تبجي .. ضلت تندعيلي

وتشم بيه ... بوستهه ورحت على ابويه

سلمت عليه وطلعت جانت تنكط مطر خفيف

وبعده الجو اظلم مغيم شهر ١٢...

واكف افتح سركي باب الشارع وسمعت ريري صاحت ..

-حيدداااار

باوعتلهه وهي اجتي تضحك ووكفت يمي

كمشت ايدي ورفعت نفسهه شاورتني ..

- اذا رجعت بسلامه و جان  اليوم مطر

نفس هسه راح احجيلك شي متتخيله شنوو

- شي يخص منو شنو ؟

- يخصنا يعني بدون سحوره

-هههه اهممم شي هاي خلصان منهه

جا حضري نفسج ارجعلج والوعد وعد بويه

.

.

يتبع 💕

..♣️🩸   ماء مغلي  🩸♣️..

* adzzon *

وكفت أفتح سركي باب الشارع و سمعت ريري صاحت..

_حيدااار

باوعتلهه و هي أجتي تضحك و رفعت نفسهه و شاورتني ..

_اذا رجعت بسلامه و جان اليوم مطر نفس هسه راح أحجيلك شي متتخيله شنوو

_شي يخص منو شنو ؟

_يخصنا يعني بدون سحوره

_هههه أهم شي هاي خلصان منهه جا حضري نفسج ارجعلج و الوعد وعد بويه

مشيت و انه متوجه لبغداد مااخذت سيارتي طلعت عبريه ..

و انه أفكر شنو الشي الي تريد تكلي عليه دك تلفوني

شفت ريري تتصل جاوبتها و رأستن كالتلي ... وينك وانطيني الاحداث

حجيتلهه صعدت وبالطريق هستوني ..

دخلت بغداد و اتصلت عليها أبلغها جانت نايمة حاجيتها و بعدين رحت يم الولد الي تكفل يمشي وياي اول مره اجيت هنا

هو ضل وياي و يفهمني وين أروح و أجي لحد ما وصلنا للمكان و عافني وراح

بأول يوم جان كلشي عادي ما ضغطو علينا الجماعة الوياي ما أحتكيت بيهم غير السلام و التعارف طبعاً حسب توصيات ريري نمت من تعب اليوم و دوخة بدون ما أحس

وثاني يوم بدأ الحجي الصدك ...

تلفون ممنوع لليل يلا نستخدمه .. تدريب بالبرد من كبل مايطلع الضوا ..

اكل قليل وبارد .. ودك اوامر وصياح

ارجع بالليل للفراش اريد احرك ايدي مابيه

اتمدد افتح تلفون الكه الامه معتلكه رسايل ومكالمات .. اطلع بالبرد اوكف اخابر ريري احجي وياهه شويه كد خمس دقايق هاي اخليهه تنطيني احجي ويه اهلي واوصيهم يسلمون على اخوتي واسده وارجع كبل اذب روحي للفراش واناام ...

اكعد ب ٣ الفجر اريد احرك رجلي متشنجه

اضل ادهنهه واسوي احماء بيه مابيه

والبس واطلع ...

هنا الولد كلمن شغلته شكل .. مو من مكان واحد جامعينه للتدريب ...

وقليلين نطلع كلنه ٣٠ واحد بس محد يكول هو ليش تحول لهذا المعسكر بس نعرف هذا من يا محافظة...

اي معلومات شخصيه عن اي احد بينا محد يعرف بالثاني .. لا ابوك شيشتغل ولا اخوتك ولا شدارس وشعندك شهايد ولا شلون تعينت

كلششي منعرف ..

هاي بس نطلع نجرش بالبرد سوه ونفذ اوامر ولا نحجي سوه ولا نضحك كلمن وحده

أتصالاتي ويه ريري قليلة لأن بالليل تعبان أنام كبل .. بس لازم انطيها تقرير مفصل

"شنو ينطوك أوامر؟"

"شنو ينطوك أكل؟"

" تاكل زين؟"

"هم تحجي ويه الوياك؟"

"خو ما يأذوك ؟كلي لا تضم شي "

" رجلك توجعك ؟"

تاخذي مني تقرير مفصل و انا يا دوب ألحك أسأل ع أهلي و أطمن عليهم

بس فهمت هي ملتزمة تصلي هالشي فرحني أنها ما تصلي بس من انه موجود يعني صدك تريد تتقرب للرب هالشي خلالي أمل أنها تتغير

وبهذا كله انه ما راح من بالي الشي الي تريد تكلي عليه يمكن تحجيلي عن نفسها الما أعرفها . او اهلها المجهولين ؟ و ساعات أكول خاف تريد ترجع و تعوف الشغل ..

لو تطالب بفلوسها و أحتار شلون أدبرها و هي حسابها ثكل ...واحتاريت بسالفتهه...

عبر شهر وضل بعدلي شهر ..

نص شهر الواحد ٢٠١٦ ...

جان اكو واحد من الضباط شقايجي وحلكه ميسكت ويه الرايح والجاي يحجي

هذا كل مااشوفه اسأله ..

يايوم خروجنا بالضبط .. وهو كل مره ينطيني يوم شكل ..

وصيته مره وحلفته بروح اعزازه بس يعرفلي يايوووم بالضبط . .

والله وره اسبوع هم شفته سلمت عليه وهو كالي يوم ٢/٣.. كلتله اخر كلام كال والله اخر كلام ..

من يومها انه كل سبت اروح لواحد من الحراس ادفع الفين حتى افتح تلفونه واشوف الطقس .. يايوم بهذا الاسبوع مطر !!

ومن ارجع اسجلهن بورقه عندي يوم كذا بي مطر واضم الورقه جوه الدوشك ..

وصلنه شهر الثاني وانه هم رحت دفعتله الفين واخذت اشوف الطقس طلع يوم نزولنه ماكو مطر ..

رجعت ضايج .. هاي انه احسبهن يوم يوم

وتاليهه من صارت طلعتي ماتمطر !

كلت والله ماارجع واضيع هالفرصه وياهه

خابرتني وتكلي مابقى شي ٣ ايام وترجع

واشتاقينه الك وملوكه هنا يمنه تنتظرك كل يوم تسال عليك ..

عاد كلتلهه يمكن اطول بعد اسبوع صارت خربطه هنا ويجوز نتأخر ..

ضلت تجيب وتحجي واخابرلك فلان واحجيلي بالمضبوط المشكله وانه كطعت حجيها بتعبان راح انام...

وضلت كل يوم تعيدلي نفس الحجي وانه من البدايه موصيهه ماتدخل بشي بعد ..

صار يوم ٢/٣ وللعصر كل الولد طلعت

ضليت انه ماطلعت ...

رحت لهذاك الضابط .. كلتله اريد اضل فد خمس ايام هنا بالمعسكر وشتريدون حاضر

عاد هو ضحك وكالي اجيت بوكتك ..

كالي بدل ملابسك واكعد انتظر ساعتين وادز عليك ..

بدلت لبست تراكسود وكعدت انتظر ..

وتالي دزو عليه .. رحتلهم وشفت اربعه وياه كل واحد بعرض الباب كمشني واحد منهم من ركبتي وضل يسألني شعندي باقي ؟؟

كلتله شي خاص كالي احجي ماعدنه خصوصيه ...

اباوع بالوجوه كلهه تفر بشواربهه ونافخه صدورها .. زين انه شحجي ؟.

وهذا يعصر بركبتي ويهدد لتجذب واشمرك حبس .. وانه ماحجي .. راد حاول وياي

ماحجيت كلتله شي خاص بالاهل بس خمس ايام اريد ..

عاد كالي تشتغل عامل عدنه تأسيس حمامات جديد ..

كلتله حاضر .. وبساعتهه كبل رحت ويه العمال ..

الحمامات هاي خاصه بس الهم ومفلشين الارضيه كلهه ونص الحايط وانه كعدت اشيل انقاض من جوه بكواني احولهن بالعربانه واطلعهن بره ...

وهاي كضيت كل يوميه انه اكابل العمال همه يشتغلون وانه انظف المكان اشيل انقاض لو اجيب مي ، جاي .. و بالليل اطلع للحارس بره بالكرفان ادفع الفين واشوف الطقس يايوم

تمطر ..

وكل يوميه ادعي يارب تمطر هالاسبوع

امشي وادعي حتى وانه اشتغل استغفر بنيه المطر ...

همه الجماعه عينهم عليه وحتى على التلفون من الحارس صارو يسألون شسوي بي

واستجوبو الحارس وكللهم بس على الطقس

ضلو بشك عليه بس انه كلشي ماعندي

كبال عينهم بس اشتغل وساكت حتى جنطتي يمهم ماعندي بس بجامتين ابدل بيهن والتلفون سحبوه يمهم ضليت بس بالليل اروح يم بابهم اخابر الاهل بساع واسده ...

وخلصت خمس ايام وبعدهه ماكو مطر ..

وانه ماحجيت بعد ضليت ملتهي بالشغل ادوره دواره ادعفس ويه العمال والليل اكضيه انظف المكان كله كنس وغسل يجون الصبح كلشي نظيف ويكملون شغل للبره هم طلعو يغيرون الارضيه ... وانه داير مداير شغلهم كله انظفه ..

تعبت من الشغل والفكر على هذيج الحجايه اكلت روحي ليل نهار انه لو ادعي للمطر لو افكر شتحجيلي ؟

عاد خابرتهه كلتلهه تحجيلي بدون مطر

كلتلي لا على حجايتنه نضل كلتلهه واذا ماكو

كالت عوفهه بعد مالهه نصيب تنحجي ..

زين انه تعبان وصبرت صبرت تالي اروح كلشي ماحصل ؟

مارجعت ضليت مكمل ويه العمال عديت وياهم سبع ايام جان بهاليوم اشوف طقس عكب باجر بي مطر ..

رجعلي كل الحيل .. وثاني يوم كضيت كل شغلي بساع بساع ولليل رحت سلمت على الجماعه وتشكرت منهم وهمه ارتاحولي ماشافو مني شي مو زين من اول يوم جيتهم بي لهاليوم وضلو يسألوني شعندك ويه الطقس رايح راجع تشوفه ؟

كلتلهم انتظر المطر .. كلهه ضحكت وانه اضحك بس واحد منهم كال ..

' الله يعينا على بلوه النسوان '

طكوهه بضحكه اعلى وانه ترخصت وكبل طلعت رحت غسلت وزينت لحيتي وحاط جنطتي يم راسي ونايم .. موقت تلفون مثل كل يوم على ساعه ٣ .. وكعدت هالمره

كبل طلعت للساحه باوعت الجو كلشي اظلم كلت هسه انه ششوف ؟!

رجعت لبست و مشيت اسلم على الرايح والجاي وانه مكمل اوراقي كلهه كبل طلعت

ساعه اربعه ونص انه بالسياره طالع للنهضه ..

ومناك صعدت النجف وبايدي التلفون كل شويه اكول هسه اخابرهه وارجع اكول لا بعد

خليي اوصل ابعد ...

و كل شويه افتح الجامه اتحسس المطر وارجع اسدهه .. يابويه شكد دعيت يلا نزل

هالمطر ..

يوم ٢/١٠ الاربعاء ساعه ٩ الصبح انه نزلت امشي جوه زخه المطر ومخلي التلفون على اذني مغطي بكل ايدي واخابر ريري ...

امشي بسرعه ونفسي عالي وهي جاوبت ..

- ها حيدار

- اطلعيلي انه راح اوصل الفرع

- عزاا رجعت هنا انته !!

- ولج اتنكعت نعلى عليج انشل حالي

عوفي كلشي بيدج واطلعي وحدج لتكولين لاحد خلي اشوفج بالباب يلا

- ييييييي يلاااا اووكيي

سديته ودحست التلفون بجيبي وسرعت مشيتي اكثر و النفس اسمعه من لهثتي

وصلت البيت ورفعت الجنطه على ظهري

ومديت ايدي افتح الباب وطبيت لكيتهه واكفه وره الباب وتمسح بوجهه من المطر ....

ضحكت وانه اشوفهه ذابه الاسود ولابسه

بصلي وكاضه شعرهه جوه ركبتهه ومغيره لونه للشكارات وفاتحته ..

صحتلهه وانه اضحك ..

- ولج روره شصايره !!

كبل حضنتني وانه خليت الجنطه على السياره

ودنكت حضنتها حيل ورفعت وجهه ..

- يلاا احجيلي شعندج

- هههههه ولك ضاع الحجي

- وعلي احطج واموتج هسه تره انطاح حظي حتى حصلت المطر احجي بساع كبل لا يخلص

- ههههههههههه زين بس لحظه خلي اجمع حجي

ضليت اباوعلهه وهي مغمضه واخذت نفس قوي وتعلكت بركبتي وكلتلي ...

- انته اول

- اي ؟

- وتالي الحبايب

انته اول

واخر

بشر احبه من كل

عقلي وكلبي

رجعت راسهه وباوعتلي وهي تبتسم ومحمره الخدود المرفوعه .. وانه بصدمه جنت ..

دنكت خليت خشمي على وجهه ..

- والله ؟

- هههههه والله ولاول مره احلف

ضحكت بعلو صوتي وانه كامش وجهه

وهي ضربتني على جتفي ..

ضليت ابوس بوجهه وحاضنهه وضيعت الحجي ...

جان تطلع امي وضلت تصيح هلا هلا ..

عاد كبل وخرت منها ورحت حضنتها

وهي تحجي عليه لان ضال واكف متبلل

وتحجي على ريري ...

ريري اخذت الجنطه وطبت كدامي

وانه رحت سلمت على ابويه وصعدت

لغرفتي ركض اعبرهن بايتين بايتين ..

طبيت وانه بعدني الهث بالنفس وهي واكفه تطلعلي ملابس ..

اباوعلهه وبس اضحك ماعرف شحجي ..

احس كل شي تخربط ..

انطتني ملابسي وطلعت بسكته كل شي محجت بعد ..

بدلت وضليت كاعد افرك بايدي وافكر

هسه انه شحجي ؟ شسوي ؟ زين انه احبهه لا ؟ !

شلون احبهه ! ! وشلون مااحبهه وانه كضيت حيلي حتى اسمع منهه كلمتين !

بعدني على هالتفكير واجتي جايبتلي الاكل

خلت الصينيه يمي وكعدت تخوط الجاي

وتكلي ...

- اكووولك تره عادي لتحبني ولاتكولي شي

اصلا ماريد اسمع منك شي اني بس هيج

حبيت احجيلك الي بكلبي

كمشت ايدهه وكلتلها..

- يعني صدك تحبيني ! يعني عشك وحب وهيج لو غير شي !!

- يااا شبيييك حيداااار يعني شنو الممفهوم من حجيي

- ولج وعلي مصدوم

سبعين الف فكره اجتي بالي من ساعه الطلعت لكبل شويه بس هاي ماطخت بالي

- عااادي انته دائما متلكطهه جديده عليك !

- لاااا بس انتي فدمره مو مال حب

-هااااا !

- اقصد جنتي شالعه كلبي بس اطخج

تعيطين وتكرهيني روحي

شوكت حبيتيني مادري !

- شعليك انته شوكت

المهم صار وخلص

- يعني جنتي تحبيني وتكليلي روح مطايقتك !

اكلج مشتاقلج تكليلي شسويلك !

احضنج ادفعين بيه !

اريد ابوسج تفشليني وتكليلي لتصير قيصر براسي بطل لوااكه حويدددر

ضلت تضحك وانه جريت وجهه عضيت خدهه كلتلها..

- هاااا شو عاجبتج هسه العضه مادفرين وتعيطين

- مو صرت كيوت بعد ماعيط

- وعلي تجذبين

ماصدكج

- ديلااااااا شسويلك اوووي تره بطيت كلبي

هسه هو حب لو قنادر

يطبك مرض لتحب هسه ضاله عليك

ساعه السوده الحجيت بيهه ابتليت على روحي لو ضاله اتكافش وياك هواي احسن

- ايييييي ايييي هيج فجري مشاعرج الصدكيه هيج ضلي حاميه

سوالف الكيوت مو الج رور ماتعجبيني بيهه

- ديلااااااا فهمت لتضل تلح هسه كلمه وحجيناهه ابتلينه خوما ابتلينه

- اييي

بس وعلي مشتاقلج

- اي اني هم

- بس هاي !

- شكووو بعد !!

تره بس عبرتلك عن مشاعري

دتعرف مكانتك شلونهه

بس مو كلساع احبك واشتاقلك وبوس وحضن ماااكوو اضوج هيج اووووكييييي

- لااااااا عليج علي !

يعني انه لا هيج ولا هيج ربحان !

بويه جا ضليتي تكرهيني احسن هسه انه شستفاديت !

- يبوووووو

حويدر تاكل لوو لاااااا

تره لحيت بالحجي وجايك برد مابيه انزل اجيبلك غيره

قدرني شايلتلك صينيه لهنا حتى تاكل مرتاح

شويه خلي عندك تقدير احساس صخام بعينك

- بعينج ولج

تعبان ومطيوح حظ حظي يلا وصلت

شويه صوتج خلي خفيف ناصي هادىء اي شي بس لا يضرب بالراس رحمه لاهلج

- ديلااااا حسكت اووكيي

اكلت واباوعلهه .. اشوف التغيير بيهه واركز اكثر ..

كلتلهه..

- ليش مكلتيلي نزعت الاسود

- امك مقبلت اكول

- هااا زين شوكت طلعتي اشتريتي هاي دشداشه ومادري ؟

- ماطلعت وصيتهه من النت

- ومنو استلمهه ؟

- سيف

- زين شوكت طلعتي صبغتي شعرج وكصيتي ؟ انه مو موصيج ماتطلعين لمكان!

- ماااطلعت خابرت البنات الاعرفهن بالصالون وجابهن الي حبزبز

يعني كصيت وصبغت وحفيت بالبيت اووكييي

- اي عفيه عفيه

زين هاي من شوكت ذبيتي الاسود ؟ وعادل خاف ضاج ؟

- لااا شكو يضوج

اصلا هو احنه شايفيه !

ها وتره اني جنت البس الوان غامق هذيج الايام من بدايه شهر الثاني امك كلتلي نذب الاسود بس من كلتلي وصلت اني جنت اعزل غرف الجهال وكبل صعدت بدلت ونزلتلك

- يعني بس انه شفتج بهذا اللون!

- اييي

- وانتي شكو تكولين ايي من وره خشمج

شو جاي احسج بالكوه جارعتني

وحجيج معلك !

- يبوووووو

هسه يعني واحد شلوون يحجي

تريد اسيحلك عسل على الحجي وترضى !

- كلشي ماريد

بعد اصلا لتحجين وياي

نزلي صينيه ولتصعدين بعد عوفيني انام

حتى غدا ماريد لتجين وتكعديني انه شوكت مارتاح انزل

كبل اخذت صينيه وطلعت ..

نزلت للحمام غسلت وصعدت تمددت ..

وجان تنفتح الباب بساع وطبت هي تكلي ..

- شوف ولك لاتضل تزامط براسي هسه

لان عرفتني احبك تره فيوزات هذني فيوزااات اذا طبكن اشعل صفحه الخلفوك

لو مو حبيبي انعل عشيرتك بس تتكبر وتاخذهه حجه وتفرض نفسك عليه

-هييييييي

شبيييج من نعلى عليج هسه انتي كلشي عندج

حط وطك وانعل

- اييييي هيج اااني هيج ميغيرني لو ابو الحب

احبك وحد وطبعي وحد

- جاي اذليني انتي بحبج شني !

فهميني شسالفتج

وكفت كدامهه وهي تتافف وادير بوجهه

- مصختيهه والله

شتردين توصلين !

- شأريد يعني ! دتشوف حجيي بي شي اريده !

داكولك بس لتكعد تضبط براسي اوووكييي

- ومتعرفين تحجين باسلوب

جا انه صارلي فوك الشهرين شابع تعب

وضيم وساعه الاجي ارتاح كل طاقتج بالعرايك تطلعيهه وياي !

وتكليلي بس انته احبك ! لااا هواي ربحت

هاي اذا انه الي تحبيني يبستي ريكي وسطرتي راسي

بدال ما تكعدين وياي تشوفيني تحاجيني شي يريح البال .. كبل درب المشاكل تركضيله

- ابووووويه لعد الكالي لتجين يمي بعد ماريد احاجيج ولا توصليلي !

- انه اكولها لان تشلعين كلبي وانه جاي تعبااااان تفهمين ! ولج كاعد من ٣ حسي شويه افهمي تعبااان

ضلت عاوجه حلكهه وتباوعلي صفح

بعدين كالت ..

- يعني هسه تريدني يمك لو لاااا

- ترجعين كيوت ؟

-لاااااا بخبالي مو متريد كيوووت بعد ..

- كمليهه شعجب ضربتي بريك

- هسه ديلا معليك

- هههه لج وعلي اخبل منج ماشفت

كمشت وجهه وعضيت خدهه ..

- لج صايره فول صاكه

عجبني شعرج صح كصير بس كاعدلج كلش

مغيرج صدك صدك عجبتيني وفاجأتيني من شفتج بهالشكل

- اي ادري

اكولك تره طاكتلك عضله

- ههههه هم ادري

ضحكت وضلت ترفع بشعرهه ..

كلتلهه..

- ولااابسه الذهب هاي كله علمودي !

- ايييييي

- كولي اي هيج اي بنزاكه شويه شكو تمدين بيهه من وره خشمج لترجعيني اعصاب

- ديلااا

اي اييي عوومررري ايييي اووكيي هيج

- كِلششش اوووكي

اخذتهه للجربايه تمددت وحضنتهه ..

وهي ضلت تشم بركبتي وتكلي..

- طك كلبييي من الضوجه وحدي هنا احس متيهه نفسي

اشتاقيتلك حويدر

- وعلي انه مفرفحه روحي على الرجعه

بس جنت انتظر المطر

- شنو ! ؟

- خلصنه تدريب كبل اسبوع بس ماكو مطر مارجعت ضليت هناك اشتغل عماله بلاش

وادفع فلوس حتى اكنك واشوف اخبار الطقس

شوكت مطر وارجعلج

-لاااااا بربك !

لتسفط رومانسية براسي احجي صدك

-والله شبيج

جا غير الوعد وعد يابويه جا نخلف بالوعد !

- لك جذاب صدك يعني كاعد تنتظر المطر

- وعلي من شهر الواحد انه احسب ليوم يخرجونا وشوكت تمطر

حتى اشوف تصدف لا ؟ وتاليهه ماصدفت

كضيتهه دعاء ربييي مطرها علينه ربيي

- هههههههههه لك بيك البله حويدر خوش تنفع للحب

عبالي راح اطنش صدك تفاجأت بيك

- لج غير انوكل كلبي حتى يجي هاليوم

بس ردت اسمع حجايتج بالمطر شنيي ؟؟؟

- هااا وحلوة لا ؟ تستاهل الصبر؟

- ابو الحلوه

جا غير دماغي رست من سمعتهه

وعلي هسه يلا رجعت اعرف احجي

-ههههههههههه

بس خلي افهمك شغله

تره ادري بروحي ماضل وياك ادري راح ارجع منين ماجبتني وماضايجه ابد ولا اريد منك اي شي لا تغير شي بحياتنه عادي ضل مثل مانته

ادري حتى لو عندك مشاعر شويه الي

فيجي يوم وتوكفهه بحدهه فلتغير شي حتى لتعب نفسك وياي

- جا ليش تكليلي احبك وماترديني احبج!

- انته متعرف شكبر معنى الكلمتين الحجيتهن الك

اني ماستحي ولا اتردد من مشاعري

لاني اول مره احس عندي مشاعر

خفت صراحه اتندم اذا ماخليتك تعرف شكبر معزتك عندي

لاني ماعشت ويه احد حتى انطيه معزه

اريد احب بشر بس اني عايشه وحدي

والي مكابلتهم مو وجه محبه

فمن حسيت انته كولش مؤثر عندي كلت

احجيلك هيج بس اريدك تعرف يعني بس اريد

اشوفك وياي وتعرفني احبك هواي

هيج بس ماكدرت اضمهه ماريد اضيعهه

دتفهمني ؟ لو هوسه داحجي ؟

- افهمج شلون مافهمج

زين هسه اذا رجعتج عادي لو تغيرت بعد عدنا هالسالفه ؟

- لا عادي بابه داكولك عادي

اصلا لتغير شي

ادري احنه ممتراهمين بس اني حجيتلك لان ماريد اروح وهناك اخاف اتندم لان ماحجيتهه

- هااا

يعني متردين مني شي بالمقابل! احبج لو ماحبج عادي ؟

-عادي شسويلك يعني

هاي مشاعرك كيفك خوما اجبرك تحرك مشاعرك الي

بعدين اني داكولك ماريد منك شي

لتكولي اي شي ولتغير شي خلينه هيج مثل ماتعودنا بس داشوفك تره بس انته بحياتي

اني كضيت عمري كارهه الناس كلهه

قائمه الحب عندي فارغه حتى اهل مابيها

هسه بس اسمك وحده تسجل هناك وهااا لعلمك اني قائمه حبي بيهه مجال بس شخص واحد بالدنيا وتقفل بعد لابويه ماتنفتح

- تحبيني كل عمرج وماتردين مني شي!

- بس اشوفك باحسن مكان وارقى حياه عندك

وحتى اذا تريد سلام لتسلم عليه ميهمني

لان اعرف انته ممجبور عليه

اني وحدي طلعت من الشروط ووحدي اتحمل كلشي

- زين هسه انتي ماتحبين غيري ولا تكدرين تغيرين المكان لاحد بعدي

-اي

-وانه ماتقبل مره غيرج ولا راح ادور وراج مره لو تطلع كدامي بنت عمران  بنفسهه

هم اكول ماتورط بيهه وكايلج انه ثقه بالنسوان عندي صفر بس انتي امشي بحجايتج مغمض

من الله صارت عيشتي ماكدر اذا ماخليج وياي بكل تفصيل بيهه

هسه انه لو اوكع بمشكله مادور اخوتي اجي كبل اكلج

لو ردت اضحك ماروح لجماعتي اجي اعضعضج كل الضحك والونسه تجيني

حتى والله انه هناك كل ما اكعد صبح اكول هسه لو رور يمي حضنه وحده تخليني اصحصح وانزل ويه الجماعه هداد

- شوف شكد مأثره بحياتك

بس راح تعوفني

- انه كايلج ترديني وياج تعوفين كلشششي وتضلين بس الي وتحجيلي كلشي

- ماكدر احجيلك اني بس احجي كبل تعوفني وتشرد

وهو انته اصلا عايفني عايفني فخلي اروح وذكرى حلوه تضل احسن

- بس انه ادري اتأذى وراج

انه من البدايه ماعرفت اضبط روحي وياج

اعوفج ماوصلج ماحاجيج بس خلي ماشوفج كدامي اضل طافره روحي

- يعننننييي تحبنييي حدوررره

- مغلوب عليه وعلي صدتيني بهوسه خبالج

-ههههههههههههههه

لعد هسه شلون ؟

- شلووون والله مادري

بايدج بويه كلهه بيدج

كلبي وعشيرتي واهلي كله بيدج

كيفج تردينا حاضرين يمج ماتردينا النه الله

خلت راسهه بركبتي وجرت الغطى علينه

كلتلي..

-ماريد احجي شي هسه عوفها بعدين

اجل الموضوع

- يلا ماشي

نام سوه امي متريدج بشغل مو؟

- ايي

-زين بويه زييين ناام بدفو بوويه هناك عظامي تصل صليل بالبرد

شوف الدفووو والحضن بووويه شووف لو بحضن مرته واحد يرتاح لو جذب اكو راحه

ضلت تضحك وتبوس بركبتي وانه بساع غفيت وهي نومه نومه للعصر يلا كعدت ..

كعدت ويه اهلي وهي يمي كاعده وتصور

بالختله .. اباوعلهه اضحك واندار وهي تاخذ لقطات لكعدتنا لو سيلفي سريع ..

لليل تعشيت وطلعت اجيب شي نتعلل بي

ومن رجعت جاي انطي لاهلي وامي كلتلي ..

- اكلك يمه ليش ماتعقدون محكمه هالايام

والجو طيب والوضع زين وكبل مايبدا دوامك وبعد مايصحلك مجال

- اي إن شاء الله بس خلي ارتاح وابدا بالمعامله

- اي يمه مرتك خوش مره لا تكسر بيهه

الدنيا ماتتأمن وبنات الناس مولعبه لازملهن حقوق

- سهلة علوية سهله لا يضل بالج

صعدت شفتهه متمدده ومدندله راسهه من الجربايه ..

- هاا رور شو كالبه الوجه شبيج

- دافكر هسه شكو

شجبتلي وياك ؟

- مشكل شغلات كومي اخذي بكيفج

اجتي اخذت العلاكه وهي لابسه بجامه ردان وثخينه .. كرصتهه من رجلهه وكلتلها..

- راحن الشورتات بعد حولنا للبجايم

لا شوفه لا لحمه

-هاااا عود موصيتك لتستهتر

- بويه اصلااا انه مؤدب للنخاع

بس شني مرات الادب هم مينراد

- طلعهن طلعهن سوالف المستهترين طلعهن عوومري انته

- بعد بعد خلي اعقدلج محكمه ويصير الحجي معدل

- هاااا امك قنعتك

لك يوميه تعيدلي نفس القوانه

اعقدو واعقدو يابه منريد بعدين لااا شلون ميصير

هسه عبالك اني ميته بالملايين التحطهه الي بالورقه

- جاا غير نخاف عليج ياروره

-هسه صدك تريد نعقد ! شنسوي بي تره ماله داعي

- والله صراحه صراحه

اذا رهمت عيشتنه نعقد واذا لا عوفيهه

- اي اووكي

كعدنا ناكل واسولفلهه على ايامي هناك شصار ماصار وللصبح يلا نمنه

صرت اشوفهه كلش تغيرت وياي

عينهه من تباوعلي احسهه تايهه بس بيهه ضحكه ..

من نحجي بطلت تعلي صوتهه تهتم بكل شي الي بس متكلي احبك ..

تنام تكعد وتاكل وياي وكل سوالفنه سوه وتسوي كلشي يشوفني هي شكد جاي تتعبلي

وميزتني من الكل بس ماتحجيها ..

طبيت عليهه مره العصر للغرفه ولكيته تخابر

ومن شافتني كبل نزلت تلفون وسدته واجتي تمسح مكالمه كمشت ايدهه ..

اريد اجر منهه تلفون وهي مجلبه بي ضليت الاوي ايدهه واصيح عليه..

-منووووو هذاا ليييش تضميه عليه

- شغل حيددددر شبيك

-ياااشغل لاتسودنينييي

ماكوو شغل بعد

جريته من ايدهه وفتحته وشفت المكالمه

ويه صخر .. جريت ايدهه وضليت عاصرهه

- هاي شعندج وياه !

شكو تخاابريه شتردين منه.  !

- شبييك ويااي داكولك شغل

يعني متفهم

-اييي ايي مافهم احجيلي فهميني

شغليش هذا ! احنه شحاجين !! هااا شمتفقين

مو ماكو تلفونات الا كدامي ! ليش هاي بالختله !

- ماعندي شي اضمه عليك

هذا هسه خابر ديكولي اكو بنات اسيرات يم داعش اذا اريدهن حتى يروح يشتريهن

- خراااا على بناتج

ليش تسدينه من اجي ليش متكملين حجيج !

وفوكاهه تمسحين مكالمات ! ليش تسوين هييييج فهمينننني

- ماريد اضوووجك

سديته حتى لاتضوج من تشوفني احجي

بس هيج وداعتك

- جاي تخربين الي بينه دير باااالج تضمين عليه شي

احجي وسوي كلشي كدااامي بس لا وراي اشوفج تغافليني

انه واثق بيج لا تكسرين الثقه بينه

-لااا حيداار لااا

مااكسر ثقه ولا اغافلك اني كلشي داحجيلك

وتلفوني شوكت مايعجبك دتاخذه بعد شكو ماضامه شي عليك

-بس هاي لو ممسوحه المكالمه جان نضمت

حتى لو تدريني اضوج لتمسحين كليلي انه سويت هيج شي يضوجك

بعد من راح تحجيلي راح تكسبيني انتي من اول يوم كسبتيني بصراحتج وياي لا هسه

تغيريهه

تقربت باستني وضلت تعتذر مني

كلتلهه..

- شتسوين مشتريه بنات ! مكافي العندج !

- هذني  من قبل موصيته اذا يلكاهن يسوي المستحيل ويروح يجيبهن

- دخيل الله كدرتج على المسبيات

- هسه عوفهن مو اكيد هاي بس خبر

- ريري عوفي الشغل وانه راح اباشر بدوامي واعيشج احسن عيشه تدرين بيه ماقصر عليج بشي

- مااكدر حيداار

-اييي ليش متكدرين

كليلي ! يعني تخسريني انه عادي عندج !

جاي تفهمين شنو تخسريني !  !

- لا تحرجني هيج لا تستغل ضعفي بيك

- لااا انه ماستغلج بس انه جاي انوكل بناري وحدي

تدريني اريدج وتدريني متعلق بيج والحجايه منج الوب عليهه

اذا نمتي ومنطيتني ظهرج انه اتنرفز

اشوفج تراسلين وانه اشيط باعصابي واسكت بالف ياعلي جارع نفسي وانتي تكليلي ماكدر اعوف شغل ! ولا ترديني اعيشج !

ريري انه اختلفت وياج انه حبيتج متعلق بيج افهمي بعد انتي اختلفتي عندي شغلج هذا جاي يكطع بلحمي

عوفيه خلي اعيش لا تذبحيني كل يوم بكل الو تحجيهه

كعدت وضلت تهز برجلهه وانه كلتلها..

- بشنو جاي تفكرين !

تخسريني لو اطاوعيني !

لعلمج اليحب ميفكر يختار

انه جان الاختيار هذا عندي وماكدرت اوصل واختار كبل كلتلج رايدج قفلت نفسي ماترغب غيرج ولا اكدر بلياج

شوفي انه كلشي نسيت وشلته من بالي

لان شفتج على مايي تمشين حتى لو تكابرين بحجيج شويه بس تردين خاطري

شفتج صريحه وياي وامنتلج هااااي خلتني

امسح كلشي اعرفه عليج واريدج بس انتي

وانه اغيرج واخليج مثل الي بالي وزين الي

بس راح تقدرين !!!

لو يضل شغلج فوك الكل !

ضلت تبجي وتكلي ..

- مااااكدر ماااكدر

انته تعوفني بيوم ماتقبلني بعد ادري بيك ما تكمل وياي

- كاااايلج ماعوفج

صيري مثل الاريده واخليج على راسي

شتعرفيني اغدر بيج !

انه القبلتج بشربج وتدخينج وطلعتج ولبسج

واوامرج وصوتج العالي والفشار والروحه والجيه المادري وين كلهه هاي قبلتهه تالي من تصيرلي مره وعلى مايي تمشين ماقبلج !!!

- حيداار انيييي كلبي يحسنييي مانكمل سوه

- والله بيدج

انه حجيت العندي بعد انتي كيفج

اذا تشوفيني مو كد كلمتي لتحبيني ولا تمثلين عليه اهتمام ضلي بعيده احسن

- ماااامثل عليييك  شي

-لااااا تمثلييييه من تكدرين تخسريني وتمشين مايهمج امري هذا تمثيييل احسبه اهتمامج

لو تحبيني صدددك جا سويتي كلشششي في سبيل تضلين وياي

- ااني اخاااااف انته متريدني وتنبذني بيوم

كلتلك راح احبك وماريد منك شي لان ادري متكدر تكمل وياي

- انته تفكرين بس بنفسج

مافكرتي بيه انه شسوي من ترحين !

تدريني ماااااااطيق غييييرج مرره

تعوفيني لييييش !!! ليييش !

تجرعيني سم بعشرتج ويه حبج لييش

ماكافي ضيم عمري الراح تردين تكمليهه بالجاي هم تخليني متعلعل !

ااااانه من احجي واعااااتب ادري بنفسي ماكدر افاركج ادري ااانه جافص لراسي

بتعويدي عليج

شايفه هذوله الجهال ايتام هسه همه عاشو بلا امهم وكدرو مافرقت عدهم ليييش اكو من داراهم ضل مثل ضلهم وياهم وياهم

انه راح ارجع وحدي اتصفن منو الي يداريني ؟

تعرفيني لا من الي اصاحب كل يوم وحده

واعوض مكانج ولا من الي مكضيهه فرفره

والتهي وانساج ولا من الي يكدر يوكف تفكير

ويعيش مثل الاوادم

اااانه علتي التفكير افكر هواي افكر بكل شي

بكل دقيقه بينا انه افكر بيها بكل شي افكر

حتى بلون لبسج افكرله ياهوه الكاعدلج احلى مال يوم لو بارحه ؟

زين انه بهالحال شلون بيه ؟ عفتج ورحتي وكدرتي تنسيني زين انه شينسيني ؟

اجي اصعد هنا ادورج اريدج يمي انه هسه اذا ماتحاجيني اجيج الف شغله اسوي حتى نحجي وتضلين يمي وجايه تكليلي تعوفني متريديني ؟

تمسح بدموعها وترجع تبجي وتمسح

لحد ما كامت واجتي حضنتني وكملت بجيتها

- ولج وعلي ممرود كلبي ولج لا تخليني بعذاب العيشه خلي نخلص ريري وعلي رايد اعيش مرتاح ومختارج وناسيلج كلشي بيج ناسيه ..

انه جاي احاول وياج ماريد اخسرج ادري بروحي غيرج بعد مااخذ لو اموت وحدي بهالغرفه هم ماخذلي مره انه نفسي ماتتقبل ياهي الجان وانتي على الفطره والله هويتج

وجنت صاد عنج وعلي ايدي اجر بيهه جر اذا تريد اطخج بس ماكدر مغلوب عليه نفسي غالبتني

رفعت نفسهه وضلت مخليه راسهه بركبتي وتبجي ..

- ولج شبييج تبجين شبيج لا تشلين حالي

شبيج بويه ماترديني احجي اسكت اعوفج !

- لااااا

ماريد اخسرك اني ماعندي احد

ماعشت صدك بس يمك

بس اني ماستاهلك انته كلش نظيف واني كلي ذنوب كل حياتي غلط

حتى حرام اصير نصيبك

- انه قابل بيج انه اشوفج نظيفه

انتي لو بس تختارين حياتج انه ارتاح

- حيداار اختارك بس اذا غيرت رايك

لا تجرحني بحجي بس كولي اريد ننفصل واني افهم بعد لتحجي شي غيره

- عوفي هذا هسه

اسمعيني انتي بالاول

شغل ماكو من اليوووم ينتهي كلشي

تلفون يتغير الخط

شكو عندج شي بحياتج تحجيلي لو جنتي سفااااحه هم تحجيلي ونسد كل باب ونعيش سوه

- حيدااار شغل مو بيدي بيد عمي اني مو شوكت مجان اكدر احصله

- ميخالف ننتظره بين مايخابرج انتي تحجيلي كل شي وعمج انه احاجيه ونسد كلشي بعد

اخذج نعقد ونعيش

براحتنه تعبت والحسين التفكير هلكني

- بس لا تستعجل بشي

اني اخاف تغير رأيك من تسمعني

- احجي خلي افهم شعندج

تعاي كعدي وفهميني

هاي انه اليوم كاعدلج واريد افهمج

راحت شربت ماي واجتي كعدت يمي

كمشت ايدي وضلت مدنكه كلتلي ..

- اسألني داعرف شحجي

- ماعرف شعندج حتى اسالج

انتي احجي شنو الخايفه منه احجي

- زين

اني احبك لتنسى اووكي

- بويه وعلي روحي تحيى بكلمتج هاي

- ههه

جان عندي اهل مثلي مثل كل ناس

ام واب واخت توأم تشبهني عيناً

ماتو كلهم واني بعدني عمري ١١ سنه

بس كلشي اتذكر عليهم عبالك ذاكرتي اقوى من هسه بوكتهم .. كل تفصيل اتذكره عليهم واحد واااحد

- شلون ماتو ؟

- كلهم تمرضو واحد عدا الثاني وماتو

اني مادري شلون عشت مادري ليش عشت اصلا جان المفروض هم اموت وياهم

بس وحدي بقيت

تدري اني ماندل قبرهم وين ؟

- ليش ماتندليه ! ما حضرتي دفنهم !

- لا ماخلوني

منطقتنا كاعدين بيها ايجار وجانت البتاويين قبل منطقه تجمع كل العربيين الشغيله بالعراق

جان جيرانه سودانين همه اخذوني بيتهم من مات ابويه لان ابو الايجار بنفس اليوم قفل البيت والغراض البي مانطاهه

اختي ماتت بالبدايه صغيره ماتحملت المرض

امي جانت ماكو ويانه

ابويه مات اخر شي

جان مهندس راقي ومنضبط بشغله بس صدام بهذله لو ماهو جان اني عشت بين عشيرتي

واصلي

- ليش ابوج منين ؟ ليش كاعد بالبتاوين ؟

- ابويه جان هارب ماخذ امي بزواج سري وهاربين لهالمنطقة

- صددك !!

- هههه صدك حتى زواج محكمه بااخر كم شهر قبل لا يموت ابويه يلا كدرو  يتزوجون

- لييش !! يعني احدعش سنه ماكدرو يعقدون!

- اي شفت الحظ !

جانو خايفين لا اهل امي يعرفون مكانهه من تتسجل وتغير هويتهه وابويه يريد يسافر وصدام ميخليه جماعه جانو يجوه يكلوله ديربالك تطلب سفر تنعدم ماكو تخاذل بالدوله

عدنا الكل تخدم الوطن بعد

- ابوج منين اصله ؟

هسه انتي شسمج الحقيقي !

- مو تضحك

- لااا كوليي شنوه

- اسمي فله .. ابويه يدلعني فله

اني اسمي فُل محمود

ابويه ___ وامي _____

- علييييييييييييج علييي اذا صدك !!!

.

.

.

يتبع 💓

يلا منو تكمل الفراغات ؟؟؟

..♣️🩸 ماء مغلي 🩸♣️..

* adzzon *

- اسمي فله .. ابويه يدلعني فله

اني اسمي فُل محمود

ابويه مصري وامي إيزيديه

- علييييييييييييج علييي اذا صدك !!!

- هههه سالفه ادوخ مو

- لج شجاب هاذ على هااذ !  صدك تحجين !!

- وداعتك حدورتييي

مرتك مصريه ههههه تريد تصدك متصدك كيفك بعد

- والحسين انه اذا ما شطح عقلي من السحوره يشطح من وراج

ولج صدك صدك هسه انتي مصريه !

- مصريه بدم شويه كوردي على إيزيدي

وصفيت مسلمه ومرت السيد العَلوي

ومادري بعد شصير الدنيا متنحزر

- بالحسييين اشبج من عيشتج ماشفت

- اي اني هم

- ابوج شعرفه بامج !

زين ابوج مسلم ؟

- ابويه مصري صعيدي مسلم

اهله صعايده فلح الي اعرفه حسب الي سمعته من ابويه اخر ايام

عدهم هواي اخوه وخوات وجان متعارف عدهم واحد من الولد بس هو الي يدرس

ويطلع للمدينه والبقيه يبقون على الاملاك

فأبويه هو الي شد حيله بالدراسه وكمل المدرسه وطلع للمدينه دخل كليه هندسه

وتخرج وهو باني احلام جبيره ميريد يرجع للصعيد يضوج من حياتهم المتشدده

عجبته عيشه الباشوات والحضريه

ويريد يأسس حياه غير شكل

اهله دزو عليه من عرفوه تخرج حتى يزوجوه وهو مارضى يرجعلهم كال اريد اكمل بعد دراسه .. وهناك وكتهه الفلوس قليله العيشه عدهم بالمدينه غاليه وهو طالب

كل وكته بالدراسه لان هندسه ومنافسه بين الطلبه عدهم لازم يطلع من الاوائل حتى يوفر مصاريف .. فجان ميشتغل بس على الي يدزوله اهله فلوس يعيش بيهن

من تخرج اهله مقبلو بعد يدزوله فلوس

يريدوه يرجع وهو يريد يكمل بعد دراسه

فصار يشتغل حمال .. ياكل وجبه باليوم والباقي يكول

' كسره العيش ' يضمها من يجوع بالليل ياكلهه .. يعني الخبزه ميكملهه بوجبه وحده

يضم منهه لليل

فلوسه يجمعهن ويستعير  بيهن كتب من المكتبه حتى يطور نفسه بالهندسه وحتى اطروحه الماجستير جان يكعد بالمكتبه

يطلع عليهه ساعات هو يضل ينقل من عدها معلومات بدفتره ويرجع بالليل يقراهن

صار كولش محترف بالهندسه ويسوي مخططات لمشاريع وياخذهه يفتر بيهه على المكاتب بالدوائر يريد احد يشتريهن منه

او يشغله على هاي خبرته محد يديرله بال

لان مصاريف محدوده مو مال مشاريع فايخه عدهم هيج الحال

- اييي

زين مارجع لاهله وهناك يجمع فلوس ويشتري كتب ويدرس ليش ضال بعيد وكاتله الضيم !

- هو يكول بس ارجع يزوجوني لبنات عمهم مدري خالهم المهم عدهم مره حاجزيهه اله

وهمه هناك ماعدهم احد يطول هالكد ميتزوج

بناتهم بعدهن عشر سنين ويزوجوهن

جبريتهن ياخذوهه ١٤ سنه وحتى الولد

هم ١٥،١٤ يزوجون والكبار ياخذون بعد ثانيه وثالثه

- اييي صعيد بعد معروفين

- اي فهو ميريد يتزوج مناك يريد حياه غير حياتهم

جان بنفسه ياخذ شقه ويتزوج وحده مثقفه

ههههه اتذكر يكول ردت بنيه ناعمه ورقيقه

تخلي ايدها الناعمه بحياتي وتحليها

- والله حقه جا هي البنيه العفريته ماتنراد بالعيشه

- تنررااااددد عينيييي

من اكو طناطل وحنافيش لازم ينضربون بالعفاريت

هاي لوكت الصدك تنضم هذيج المايعه

تعوفك وتشرد بالعزيزه

-هههههههه

ولج بويه انتي ليش تاخذين على روحج

انه جاي احجي على هذنيج مو يمج انتي

فله بعد ياهي التصلج

-اي ديلاااااا اوووكييي

- اييي وتالي وين عرف امج ؟

- هو عاد مو ضل يدور شغل وماكو

ومخططاته ضلت محد اشتراهه منه

ولا احد اعترف بي مهندس واله عقل

جبير لان مامحصل ماجستير وهو ماكدر يقدم عليه بسبب الفلوس

فبقت بس شهاده الكليه والمنافسه هواي وهو ماحالفه الحظ بشي هناك

عاد صارت حرب ايران والعراق فتح الاشغال للعرب هنا فكلهه هبت للسفر

وهو راح لاهله ديكوللهم اريد اسافر للعراق هناك احصل وظيفه محترمه وادزلكم فلوس

وهمه مقبلو جلبو بي ميريدون ابنهم يطلع من عدهم ويروح هناك يتزوج عراقيه بس ابويه قافل مايعيش عيشتهم يريد عيشه رفاهيه ويحصل حق تعبه

فعنده وحده من خواته زينه وياه وتفهم احلامه

فساعدته انطته فلوس وهربته وهو من طالع منهم كبل مسافر للعراق ..

- والله هالرجال طموح بشكل

يعني كدر يعوف اهله وبلده ويطلع فارغ الجيب بس حتى يعيش باحلامه !

- اي لعد ابويه درس وتعب وعنده عقليه جبيره يريد واحد يقدر ذكائه موهبته بالهندسه

مو يصير فلاح وشايل البندقيه ويفتر بين المزارع  !

- حلمه هذا ان شاء الله عيشه زينه جابله؟

- اي طبعا

ابويه ضل وره حلمه ومن اجه هنا وشوفهم الشهاده والمخططات وظفوه مهندس وصار مهندس طرق وجسور وكل شهر يطلع لمحافظه ماعنده مكان محدد يعيش بي حسب شغله وين يدزوه يروح

وهو مثلا بوكت فراغه يطلع يفتر بالمنطقه الكاعد بيهه .. وهو يحب يستكشف اثار البلد

ويشوف كلشي بكل محافظه

فحتى لو بالليل يفرغ من شغله يطلع يفتر

حتى لو كدامه كاع فارغه يروح يتمشى

يشوف المكان ..

وينام كله بره ابد مينام بغرفه .. كله ع الهوا بره ينام .. عنده راديو صغير يسمع بي

نجاة الصغيره ويسمع ام كلثوم هاي قبل مينام يضل يشغل بي بلكت تطلع اغنيه شي يسمع بالليل ونادرًا يحصلهه بس يضل يتأمل يبثوهه

- الله على زمن كبل شكد بسيطه اهله

- ايييي راح الزمن ويه ناسه

- اييي

وتالي.  ؟

- راح مره لسهل سنجار وهو سامع بمعبد لالش وياه جماعته طالعين يوم الجمعه من الصبح للمعبد ديشوفون الاثار يعني

فصادف وكت روحتهم ويه وكت احتفالات  الايزيد

جان عدهم ' عيد مربعانية الصيف '

مدة  هذا العيد ثلاثة أيام ويبدأ يوم  ١١  من تموز الشرقي

همه عدهم تقويم شرقي شمسي يعتمدون عليه بتاريخ الاعياد

- شنو هذا عيديش ؟ شيسوون بي؟

-  شوف قبل  هذا العيد عدهم صوم لمدة أربعين يوم ،  مو كلها تصوم بس رجال الدين

وبقيه  الايزيديين يروحون لمرقد شيخ عدي

هناك يسوون الاحتفالات والمراسيم الدينية

يعني يروحون بس يشاركون بالوليمه وبقيه طقوس الاحتفال

- زين ادري هذا العيد على شنو ؟ ليش يصومون ؟

- هاا شوف هو اكو عدهم عيد مربعانيه الشتاء والصيف

الايزيدين عدهم  بهذا اليوم اربعين رجل كملو  تعلمهم أصول الدين اليزيدي على ايد الشيخ عدي بن مسافر

فيحتفلون بي

- هااااا زين بويه زين

- اي هنا حظ ابويه وكلبه الفطير وين وداه ؟؟

وداه على بنت واحد من رجال الدين الي مستلمين المعبد او تريد تسميه مرقد الشيخ عدي هو كله لالش متفرق يعني

- اااااان اخووووك

شجابه عليهه !!

- مو اول يوم رايحين همه جان هذا ثاني يوم احتفال عند اهل امي

فرايحين مسلمين على الشيوخ الكباريه هناك

ومعرفيهم نفسهم مهندسين ومن مصر وجايين بفضول لطبيعه المكان والاثار وهذوله رحبو بيهم

الايزيد بطبعهم ناس مسالمه كلش

ناس داعيه للسلام

فمخليهم وياهم لحظه بلحظه وهمه ميعرفون عربي كلش يحجون مكسر وهذوله يحجون مصري ومحد يفهم على الثاني كاضيهه بس شوف وضحك واشارات وحجي مكطم المهم توصللهم الفكره

فابويه وجماعته ضالين يفترون ويصورون

بس المكان الجماعه ميقبلون احد يصور ناسهم وهمه احترموهم وماخذو بس للمكان يعني والهم .. هناك لليل ضالين يفترون

وشايفين اكو كم بيت بيهن نار ورايحين ركض يطفوهن

همه مايفتهمون هاي النار عدهم شي من طقوسهم جانو خايفين على اهل البيت لا يحتركون وركض ركض يطفوه

وهو مو بيت مثل هاي بيوتنا لا هيج يعني اني مشايفتهم بس حسب وصف ابويه يكول مثل اكواخ شلون بعد شكلهه مادري

بس من راحو يطفون النار طالعه ركض عليهم النسوان وضالات يتعاركن وياهم

همه ميفتهمون شي من حجيهم بس يكللوهن احنه نعتذر لازعاجكم احنه خفنا عليكم

بس هنه مستمرات يحجن عليهم

- هااااا يعني هذا اصلج بويه اصلج حار وحاد الحجي

- اييي منين مالتاف جماعتي يجدحون

- هههه وعلي انه قسمتي مامثلهه قسمه بالبشريه

- ايي اوووكييي ادري مو خوش لتضل تلح

كلساع تعيد شبييك

- مالحيت ولج جاي اكلج غريبه ماكلت مو خوش

-ديلاااا اوووكي

- زين اكلج هسه امج وينها من السالفه كلهه؟

- هي هنا طلعت بنت واحد من هذوله البيوت او الاكواخ المهم هو مكان اهلهه هذا يعني كل واحد اله بيت مثل بيت عمهه وبيت اخوهه وهي بيت ابوهه وهيج

-ايي

- اي مو صارت اصوات وهوسه فأجوي الولد ديفتهمون الصاير ومشكلتهم بالحجي

محد يفهم الثاني

فدزو على اخو امي هو شويه يفهم عربي

اكثر من البقيه

هذا جان اخوهه الوسطاني هو صار يفهم من جماعه ابويه ويحجي لاهله وضلو يضحكون وتفاهمو وسدو السالفه

ثاني يوم هم احتفال عندهم هذا يوم الثالث للعيد .. جماعه ابويه ميكدرون يتاخرون

لازم للظهر همه راجعين للمشروع ويستلمون المسائي هيج عدهم ماعرف شلون همه جانو مرتبين شغلهم بس هيج يعني لازم يرجعون

ديطلعون ويسلمون على الشيوخ وهمه ينطوهم تبركات وعدهم بنات صغار يشيلن توزيعات هاي مال تبريكه يعني

فينطوهم ابويه هنا شايف امي جانت هي الي

تشيل التبريكه وتنطي للبنات حتى يودنهن

ابويه يكول اني شفتهه بالشمس واكفه كدامها ميز طويل مليان اشكال وانواع الاكل

وهي ترتب وتنطي للبنات كل وحده تروح لجهه توزع ..

يكول امي بالشمس صايره حمره وايدهه يكول جانت لابسه بيهه اساور ورد وبيهه شرايط طوال .. فهي عركانه وترفع ايدهه تمسح وجهه وهو عينه على ايدهه شلون هيج ناعمه وحلوه بأسوار الورد

يكول ضلت بالي ومدري شلون مسويله سالفه ومغافلهم ورايح يمهه .. يكول ماحجيت شي بس وكفت كدامهه على مسافه بينا وردت بس اشوف شكلهه اوضح راد يشوف ملامحهه زين لان هي مكلوبه حمره كلشي مينفهم منها

ضل واكف يباوعلهه وهي جفلت من شافته يكول كبل اني ضحكت وهي خافت ضلت مغطيه بالتول على وجهه ورايحه

ابويه ضخم راسه جبير وجسمه عريض وطويل هذا جف ايده يطلع بكد وجهي

بعد صعيدي شايفهم شضخمات الواحد

-اييي ماشاءالله عليهم جثيثين

- اييي فأمي جفلت من شافته كبالهه وهو هيج حاط كل باله وياهه

رايحه وعايفته وهو هم راجع ويه جماعته

للمشروع بس يكول ضليت وين ماروح افكر شلون ايدهه حلوه وناعمه وهذا اسوار الورد نزعته لو بعدهه تلبسه ؟

-ههههههه الله ياكلب الابيض يودي بروحه للموت

- اييي كلب ابويه شل حالي

المهم ..

ضال ابويه يسأل عن تاريخ اعياد الايزيدين

وصدف عدهم عيد ويه عيد الاضحى

يسموه ' عيد القربان '

هذا بأول يوم من أيام عيد الأضحى ويسموه هم عيد  الحج ،

هو رايحلهم بهذا العيد وهناك نفسهم رجال الدين الي رحبو بي اول مره هم رحبو بي بالثانيه وهو جان مشتري وياه هدايا الهم

وهم حضر وياهم العيد ورايح وياهم صاعد للجبل .. هم عدهم جبل عرفات همه يروحون يصعدون عليه يرتلون اناشيد دينيه ويرجعون من الجبل ومره ثانيه هم يروحون لحد الصبح يضلون هيج بس دعاء واناشيد دينيه

هو وياهم وياهم بس يدور بعينه عليهه

لحد ما شايفهه بالليل تتمشى ويه البنات الصغار يروحن يغسلن بالحوض وهو المكان مفتوح كدامهم فيروح هو يوكف من بعيد ويباوعلهه .. هي منتبهه عليه ضال يأشرلهه خلي نحجي .. وهي عافته وراحت

يكول ابويه بيومها للصبح اني كاعد افكر شسوي اريد بس احاجيهه وشلون راح تفهمني؟

فالصبح هم احتفالات عدهم فهو شايف نسوان كبار يسوون سوار ورد وكاعد وياهن مسوي واحد على ذوقه ومخلي بي الشرايط وكلشي

حسب الاصول مرتبه وضال شايله ويفتر بي

يدور عليهه لحد ما لاكيهه هم واكفه يم الميز وتوزع بالاكل ..

رايح مخلي يم ايدهه السوار وعايفهه وماشي بعيد عنها ... ضل يباوعلهه من بعيد وهي تباوعله عاد لابسه السوار ..

يكول ابويه من لبسته هو ضال يضحك ويمشي ويكرص بخده ويرجع يندار يباوعلهه

وهي تضحك وتصير حمره طماطيه

هنا ابويه بعد ضل كل جمعه من الصبح يجي عليهم بحجه عاجبه المكان ويتعب من الشغل يجي يمهم يرتاح .. وهو يضل بس يباوعلهه

وين متروح يطلع فد سالفه ويروح لنفس طريقهه

لحد ما فد مره كدر يحاجيهه بس كايللهه

نتزوج ويأشرلهه هيج باصابعه يعني نصير سوه وهي تردله بلهجتهه مايفهم عليهه

فراجع على هذا اخو امي الي يفهم عربي زين شويه وكايله علمني لهجتكم وضال يكتبله

كل مره شكم كلمه اساسيه بحجيهم وابويه يحفظهن من يرجع لشغله

نقلوهم لغير مكان بالشغل وبعد ماكدر يرجعلهم الا وره اربع شهور صايرله مجال ورايحلهم وهناك يكول هي مثل جانت تنتظره من شافته جايهم وهو يدور اخوهه صار صاحبه يعني فتعرف بي جاي عليهم وتشوفه

يكول مسلم عليهه بنفس لهجتهه وهي ضاحكه ورادتله السلام كاللهه نتزوج وهي مفهمته يعني اهلي ميقبلون ولتحجي بالموضوع

- ليش ميقبلون اهلهه ؟

- اول شي همه حياتهم تختلف عنا

- ليش شبيهم يعني ؟

- شوف همه عدهم يعني الناس ٣ طبقات

مثل الهرم .. شيوخ ، ابيار ، ميريدين

هذوله بيهم طبقات ومناصب مثلا عندهم الامير ( الرئيس الديني والدنيوي )

وبعدين البابا هذا هم شيخ من شيوخ الشيخ ملك فخر الدين .. اكيد متعرفه بس دافهمك عليهم

- والله اول مره اسمع بيهم

- ايي عادي ..

المهم هذوله حرام عدهم يتزوجون من غير طائفه وممنوع عدهم يتزوجون بين الطبقات

يعني طبقه الشيوخ متاخذ بس من الشيوخ

وكذلك الابيار والمريدين

- امج جانت من طبقه الشيوخ

- اي اهلهه رجال دين مهتمين بالمرقد

يعني اني علويه مثلكم بس من نوع خاص

-ههههههههههه وعلييي صدكتي

علويه كشكوليه

- شعبالك لعد كارثه بشريه ااانييي

- عليج علي فهميني شلون تزوجو !

- هو مو ابويه ضل وراهه يسأل على سالفه زواج منهم ولكاهه مسدده بوجهه

وهو كلش حبههاااا لامي تخبل عليهه

يكول اني ماعرف عليهه بس اسمها واهلهه ميقبلون يزوجوهه لغير جماعتهم

-شسمهه امج؟

- اسمهه   زنار 

- لفظه حلو بس معناه شنو ؟

- الحزام او القوه هيج يعني

- وهي مثل اسمهه ؟

- اي قويه بحب عائلتها بس شلون كدرت تقتنع وتشرد ويه ابويه مادري !!

- هو شلون فاتحها بالموضوع ؟ ماخاف من اهلها !

- مو هي عليهه العين للزواج وهي شابه حلوه وبنت ناس اغنياء الي من طبقتهم يتوددون لاهلهه بس قسمتها ماترهم ويه احد كبل يصير فد عارض واهلهه مينطون

ابويه صار يعرف يحجي مثلهم وضل يكتبلهه رساله ويدزها لبيتهم بسله مال عنب هي تعرف من تجي سله العنب كبل تركض  تاخذ الرساله وتقراهه وتشككهه وتحركهه حتى اهلهه ميعرفون بيهه

هاي ابويه كل كم شهر يلا يدزلهه رساله

على حسب شغله شوكت يكدر يتفرغ يومين

كبل يطلع لمنطقتهه

وعاد هو بعد تعب ويريدهه راح جازف وحجى ويه اهلها .. تخبلو ساعتهه وهو حتى كللهم ابني بيت يمكم واكعدهه بي وتضل كدام عينكم شبر واحد ماطلعهه من المنطقه

واسويلهه ارقى بيت وحتى من فلوس راتبي اخصص منه للمعبد وماقبلو

حتى كللهم اغير ديانتي واتزوجهه هم مقبلو

كلشي يكللهم ميقبلون وضلو مشددين عليهه متطلع ولا شافهه بعد 

أيس منهم وابويه يكول من كد ما حبيتها وضلت نفسي بيهه ومنعوني عنها كمت بعد ماكدر امشي احس عظامي ثكلت عليه

دزلها اخر مره بسله العنب رساله مقترح  عليهه تشرد وياه لبغداد وهناك يتزوجون

وشتريد ينفذلهه وكاللهه كل راتبي بايدج وكل املاكي بمصر اسجلهه الج بس لتعوفيني اموت وراج وحاجيلهه شلون هو مريض هسه وماعنده احد يداريه

وضال ينتظرها يومين يكول المكان كله جبلي

وهو هناك يكعد ينتظر بيهه بلكت تطلع

وصدك جايته بنص الليل شايله لفه ملابس على ركبتها شادتها وجايته ملثمه

ابويه يكول من شافهه ولهفته الهه وماصدك اجتي يمه كبل شايلهه وراكض بيهه يكول الحيل منين اجاني مادري

-ههههههههههه شالهه وركض !

- اي شالهه خايف لا يطلعون وراهم ويلحكوهم فشايلهه على جتفه وراكض بيها

ومن سياره لسياره ويكول عايف موقع الشغل

حتى لحد يلحكه هناك خاف يحسون عليهم

ورايح بيهه لكركوك هناك ضالين اسبوع

وبعدين رايحين لبغداد ..

كعدو بالخان .. هذوله الي يستأجرون بي غرف كل عائله الهه غرفه تعرفه ؟

- اي اعرفه اعرفه

- هو هناك كعدو اسبوع جهزهه من كل شي

وتزوجهه كاللهه اتزوجج على الاسلام

وهي موافقه بس شرطت عليه يبقيهه بعدين على طبيعه دينهه وموافق ابويه من يومها شتريد امي اي شرط تخلي ابويه كبل يكللها

' حاضر ياست الكل '

- والله والنعم من ابوج

الله يرحمه برحمته الواسعه

- تدري امي شكد جانت حنينه

يعني ابويه شكد ماهو يحبها وروحه بيها

بس مو مثل حنيتها

هي كلششش حنينه عليه هيج جانت من يرجع ابويه من الشغل توكف تتلمس بوجهه وتبوسه

والا تخليه يضحك يلا يفوت البيت وتخلي اكل وحدهم واكل النه ..

من ياكلون متحاضنين وهو ابويه يعني الي يشوفه يخاف  من شكله لان ضخم ضخم

وملامحه قويه خشنه وصوته هم

بس امي من تكعد يمه يصيرلك هالكدوته

يلوف براسه على اصابعهه وبس يضحك سالفه تضحك متضحك هو يباوعلهه وضحكته هالكبرها

- جا الحب بويه يكلب الوادم

- اييي

خطيه ابويه حتى حجي صار يحجي مثلهه

وهي تكوله علمني عربي مثلك احجي ويعلمهه بس الي يعبر بيها بحبه الها

مثل ' حاضر ياست الكل '

' ام الورد '

' أنيستي '

' حبيبتي '

' مرات محمود '

هاي من شويه يشاقيها يصيحلها

يا مرات  محمود

- الله عليه

معدل بالحب ابوج  يا فله

- هواي حبها خطيه هوااي

مات وهو مقهور عليهه شكد جان يتمناهه يمه

بس دنيا غبره خلته يبجي  عليهه وهو ديموت

مسحت دمعتها ورفعت شعرهه وضلت صافنه ..

حضنتهه وهي كلتلي..

- اني اهلي زينين وكل طيب الدنيا بيهم

عاشو طيبين وماتو طيبين

بس اني مو مثلهم

- لاا انتي من نسل طيب اكيد طيبه

وبعدين انه ماعرفج يعني ؟ ماعرف كلبج وطبعج شلونه ؟

تنحطين على الجرح انتي ولج رور لاااا

بعد اصيحلج فله

- امووووتك بس تصيحلي فله

حيداااار اسويهه سم عليك لتحجي اسمي

ابقى على ذاك اوووكيييي

- ليييش بويه ماحجي !

جا بعد عرفته  ! طلابه هي ! نضل مجلبين بريري مدري منين اجاج هالاسم وخربج

انتي فله عيني فله شتسوين بهاي الاسامي البايخه

- ماااااعليك اني اريده عاجبني

تحجي لوو لاااا

-لاااااااااا مااحجي

اصيحلج فللله مريتي فله ليش ماحجيه شني بايك !

- اهوووووووو

داكولك ماحب لتحجي

يضل هذا وذاك هم يسميني فله واضوج اضوووووووج هذا الاسم بس لابويه مو الكم اووووكييييي

- جا ابوج اعز مني !

جا انه حبيبج !  مالي معزه عندج!

-اووووف حيداار يعني ادري تحبني اووكي بس ممتعوده احد يصيحلي بي اضوج

- زين نبقى على رور ماشي بس شوكت ما يعجبني اغازلج احجيه.. زيين. !

- بس بيناتنا ميسمعه احد من اهلك

- اي ماشي

- ديلااا راح انزل اشوف امك شتريد متريد هسه تكول جنكلت فوك وعافتني

- ماكملنه حجي بويه وين

- داشوف امك شبيك

بعد شكو نحجي ماتعبت تره يبس حلكي مابيه بعد احجي عوفني ضجت

- زين زين روحي بكيفج

بس بالليل نكمل

- اوووكييي ديلااا فهمت

- زين جا انه حطلع

- وييييين مصارلك ساعه رجعت شعندك

- اطلع بره شعندي ! جا اضل مكابل الحايط

خلي اشوف الولد اكضي وكت يمهم بين ماتعدلين مزاجج

- ديلاااا بس على العشه ترجع اووكيييي

ماضل كل شويه اسوي صينيه واغسل صينيه

ترجع اخليك تاكل ، تتاخر انته تسوي لروحك

اووكييي عوومري

- عيني انتي ارجع والله بالباب اوكف بس تظلم ارجع زييييييين

- اي عوومري كولش زين

نزلنه وطلعت بره وكفت بالشارع ورجعت افكر بحجيها ... واكول لنفسي ..

-هسه انه مرتي مصريه ! ويزيديه ! وهم بيهه اصل كردي ! وعدهه اربع جناسي كل وحده شكل ! وانه احبها !!! 

انه السيد النجفي اتزوج مصريه يزيديه !

وعلي لو يدري ابويه يموت بساعته مالحك حتى افهمه شلون صارت ..

صدك ضليت مسطور واريد بس ارجع يمهه واسمع باقي الحجي .. واصفي افكاري ..

اول ماغربت طبيت البيت وصليت وضليت كاعد انتظر العشه .. اجتي خلت صينيتنه

انه وامي وهي ناكل وحد .ابويه وحد ،

الجهال وحد ، واخوتي اكلهم كله بره بس ريوكهم امي تسوي ..

تعشينه ورحت يمهه بالمطبخ هي تغسل مواعين وانه اعزل على ايدهه .. وساكتين

مانحجي شي ..

اخذنا الجاي وكعدنا باب المطبخ بره

كلتلهه..

- اريد احجيلج شغله بس كبلهه كليلي امج وين جانت من مات ابوج ؟

- راحت لاهلهه تطلب فلوس حتى تاخذ ابويه واختي تعالجهم وبعد مارجعت

هناك كتلوهه وماتت

- لا اله الا الله

زين فلوس ابوج راتبه ماكفى علاج !

هو بشنو تمرض

- ابويه جان هواي يطلع من البيت يغيب فد شهر شهرين يلا يرجع كم يوم وهم يروح لغير مكان

حسب موقع شغلهم شوف وين يطلبوهم

يروح ونضل احنه وامي وحدنا بالبيت

فمره رجعوه جماعته وهو مريض صاير عنده التهاب فايروسي بالكبد بس من نوع

حاد ..

امي نامت وياه مستشفى واحنه بالبيت وحدنه

اكو مره جيرانه هي شتطبخ تجيبلنه ناكل بس منطلع من البيت ابد ومنفتح الباب بس الهه

العلاج امل كله تشتري غالي وعدنا فلوس ايجار وهو بس راتب ابويه عدها فمتكفي الفلوس .. طلعوه من المستشفى وضل ويانه بالبيت بس لازم يضرب ابر وعلى بين مايصير وكت الراتب وجماعته من يفرغون يجيبوه اله يلا نكدر نشتريهن

فامي عدهه مكينه خياطه هي الراتب كله بايدهه فجانت مشتريتهه ووياهه اطوال قماش

وتخيط بس النه

صارت تخيط للناس و الي تحصله تروح تجيب بي ابر لابويه ..

وجانت مقدمه بالصحه على علاج مجاني

بس ماحصلت .. تعبت خطيه بالفره بينهم

وتالي عافتهه وضلت تخيط و نص راتب ابويه صار ياخذ فالوضع كلش تغير عدنا

جان ابويه معيشنه بعز .. امي متعوده على عيشه الترف وهو ماغير عيشتهه كل الزين يجيبه الهه ومتنزهات ياخذنا وكل مكان يروحله لازم يجيبلنه فد شي وياه

يعني جان عدنا العاب محد بالمنطقه عنده مثلهه ومن نطلعهه بالشارع يضلون جهال يتوسلون يلعبون بيهن ويانه ومرات يبوكوهن منا

تالي صار الفلس امي ادوره دواره بالاخص وكت حصار والدنيا ضيم ...

اختي ( ياسمين) نعدت من ابويه

هي تحب عصير الزبيب وامي من تسويه تبقي بس لابويه لان ميكدر ياكل هواي

كله عصاير تسويله كل مره تحاول تغيرله شكل  ..  فهي تروح تشرب من نفس السراحيه الي يم ابويه واني شكد اتعارك وياهه اكوللهه هذا مو النه ميصير نشرب

بس هي تعاند وكل مره تروح تغافلهم وتشرب منه الى ان تمرضت

بعد من تمرضت امي انهارت كلش شافت واحد واحد ديوكع كدامهه وهي تعبت من الحيره بالعيشه والعلاج

وهي كلش تحب ابويه مكضيتهه بجي عليه

وهو فد مره صار مايكدر يمشيله خطوتين

فخافت عليهم وكالت اروح لاهلي أشوف بلكت من يعرفون وضعي وعندي بنات صغار يحنون عليه ويساعدوني بمبلغ

شويه احسن من حالهم

ابويه ماقبل عليهه تروح شكد راد منهه متروح ويكللهه ابقي يمي اموت على ايدج

لا ترحين يغدرون بيج هذوله اني الهم عدو صرت مستحيل يساعدونه

بس هي جانت متأمله بيهم وصتني على اختي

وراحت بعد مارجعت

اختي ماطولت وره روحتهه اسبوع وماتت

وابويه شبع قهر عليهن وهو صحته منتهية وهم مات وراهن يعني نفس الشهر كلهم راحو

شربت اخر شي من الجاي وخلته بالكاع

وكالت ...

- هاي اني مادري شلون رهمت واجيت للدنيا ومادري شكو عشت وحدي

المهم بعد لا تسألني على اهلي وعيشتي هاي حجيتلك كل شي

- رور كولي الحمدلله على كل حال

الله بكل شي اله حكمه

هسه انتي عشتي حتى تفيديني

عشتي علمودي انه هم ربج محسبلي حساب راح اتعب بعيشتي وانتي تحليهه الي

- اني ادري راح احلهه

راح اصفيهم واحد واحد كل شي مفكرتله بس بعد ينراد وكت

بس تاليتك حالك حال ابويه وهذا الخايفه منه

- لاااا بويه شطالبتني ! لا عليج الحسين لا تحجيهه

بويه هسه نعقد محكمه ونصفي عيشتنه ونضل مرتاحين

- لتضحك على نفسك وعليه حيداار

يعني احنه كم دوب نضل نجذب على اهلك !

هم يجيهم يوم ويعرفون الي بينا ساعتهه

شيصير ! شتكدر تفهمهم !! تجي تحجيلهم حياتي شلون بدأت ؟ لو شلون جنت تنفذ شروطي بالبدايه ! 

- مااااندخل احد بينا والي مايردينا هنا نعوفهم ونمشي

- لتصير مثل اهلي ركضو بدون عقل وتاليهه وكع الزمان كله على روسهم

- رور احنه نختلف

احنه متزوجين بين اهلنه وعايشين براحه

مشاكلنه بس بينا ماعدنه طلاب ثار

- هسه ماعدنا بس باجر شمدريك شيصير ؟

عرفو اهلك وطردوني من البيت انته وياكن توكف ؟ وياي لو وياهم ؟.

- طبعا اوكف وياج جا اعوفج وحدج !

- زين اجيت وياي وعشنه هم وحدنا

راح نصير مثل اهلي

امي لو مفكره وكتها قبل ماتشرد وتتزوج

لو بس مفكره وكايله اني من اعيش ويه رجال هو لا البلد بلده ولا عنده عمام وخوال هنا

ولا يعرفه احد زين صار عليه شي ؟ اني وين اروح ؟ اذا صار عندي جهال منو الهم وراه !

لو مفكره هيج جان اني ضعت ! كول

جان صرت هيج !

- لا والله

جان لموج عشيرتج والكرابه

- اقلها جان عندي ناس من دمي يتحملوني

جان عندي عمه لو عم لوو حتى ابن عم

واحد منهم زين ويداريني

جان هذوله دفعو فلوس علاج لابنهم

وحتى لو هو مات تبقى امي موجوده

جان صار شي يهون على شي

بس هذا الثول بالحب والركضه تاليهه مُر

من هي ركضت وياه بليله ظلمه هاي حفرت كبري بالعيشه

هسه هم تريد تعيد المأساة نفسهه

نروح وتاليها هم يمر الزمن ونحتاج احد واني لا عندي اهل وانته اهلك طاردينك

- عيني انتي افهم شلون ضلت بالج خوفه

من هيج زواج بس احنه لانفكر بالموزين

هنا نسيتي اهلي شكد يحبونا واهلي طيبين

حتى لو طلعنا منهم واحتاجيناهم يفزعولنه

- لاااا

الزواج الي ينبني على غلط يضل كل عمره غلط

- يعني هسه رجعتي ماترديني !

- اريدك اني مااريد بالدنيا غيرك

بس اذا نقرر نكمل بهيج ارتباط لازم مانمشي عمياوي

- شترديني اسويلج بعد ! جاي اكلج اعقدلج بالقانون وبيتي بين اهلي مكعدج شسوي اكثر ! فهمينننني!

- نحجي لاهلك الصدك كله

- لااااااااا ضرب عقلج انتي وعليييي

- اي ليش نجذب ؟ ونضل ضاميهه؟

نحجيلهم يعني همه شنو ميدرون بسوالف السحوره !

- ولج بويه انه سبعين جذبه مجذب يلا دبرت عيشتنه لهاليوم

اجي هسه ياجذبه منهن احجيهه !

ترديني اتفاشل وياهم وعلي ابويه بعد ميخلي عينه بعيني

- لعد. شلوووون

ماريد شي يضل مخوفنا لو نعيش براحه بال لو لنفوت بهالطريق احسن

- ريري هاي حياتنه غصب علينه صارت

هيج .. نحجي ما نأذي الا روحنه

خلينه ساكتين وساترين على انفسنا احسن

بعدين هو ياهو اليجي يحجي بسالفتنه !

هو بس انه وياج نعرف بيهه يطلع الحجي من عدنا يعني !!!

- ليش وابن عمك

هذا خطر بحياتنا تره

- هذا ميدخل شفتيه صار شكد ماحجه شي ولا ادخل بعيشتنه

بعدين انه من اريد اكمل حياتي هيج هو شكو يحكمني يعني ! 

- هو هذا خوفي

ميخليك بعد تكمل وياي ويروح يفتن هنا وهنا

- لاا لااا ميسويهه هذا مايحجي بعرض العالم

مو النوب يجي يحجي على مرتي !

- ممرتاحه صراحه

حيداااار اني اذا عشت وياك براحه وحب وبعدين يجي شي يخرب عليه كائن من يكون

ماارحمه

اني احجيلك .. اني شرانيه الي يندك بحبايبي

ويندك بيه ماارحمه .. اصير انكس من هذني السحارات واروح أذي ماخليه يتهنى

فلا توصلني لهالمواصيل اني بعد اريد اتوب من اذيه الناس

- استغفر الله

ريري شسوي ؟ الي اكدر اريح بالج بي شنو !

- لتسوي شي

هسه انته شعرفت عليه وهيج كتلت روحك على عيشتنه !

- انتي راح تحجيلي كلشي هذا اتفاقنه بعد شكو

- شحجيلك بعد.  !

-شلون عشتي وره اهلج  شصار شلون وصلتي هيج كلشي كملي

- ماكو شي ينحجي بعد

يعني طفله وصبحت لا اهل ولا عمام ولا خوال ولا حتى بيت يلمهه ..شلون تعيش؟

شتريد احجيلك تفاصيل ! اوصفلك شلون اكضي اليوم وين اروح واجي ؟ لو شنو جنت احس ؟

اني ماريد احصلك بشفقه عليه

هسه لو اكعد احجيلك ابجيك كل دمع عينك

بس ماريد تضل وياي لان مقهور لو تكول خطيه

انته تعرفني بالموزينات الي بيه بعد تقبلني هيج اقبلني .. تشوفهه صعبه عادي كول

واني ماتغير وياك اصلا يمكن تصير اسهل علينه

- انتي بيج شي بعقلج !!!

انه رايد استخطيج ! جاي اكلج اسمع منج كلشي وانساه ونعيش شبيج بعد تجرين وتعرين بالسالفه

- ايييي يعني شحجيلك

بنيه تعيش بنص الشارع شتصير !

هو شكو غير الجرايم والاغتصاب والشرب والعربده والصياعه !!

هذني كلهن بيه .. كلهن جروني بدروبهن

وصرت الي عرفتني بي .. لا اخاف ولا اهاب ..

كبحيه وشرانيه والدم تارس ايدي

وام دعاره و وحده زايعتها الكاع من شرها

وعقلي يفرغ جيوب ويودي لدواهي ومسويه مصايب بكد شعر راسي

بعد شتريد احجي !

ضليت ساكت واباوعلها وهي نكلب وجهه احمر ومتجتفه ومدلغمه الوجه ..

- بس احجيلي شغله اخيره وصارحيني بيهه

- شنوو

-  انتي هم طالعه ويه ولد ؟ مثل بقيه بنات هناك

ضلت صافنه بوجهي وبعدين كالت..

- هذا سؤال بربك !

يعني انته نسيت وين عرفتني !

- لا مانسيت بس اريد اتأكد

- ليش يعني عندك شك !

- صارحيني هسه شتفرق عندج الحجايه كوليهه

- تره صعبه اووكيي

- ميخالف هو كلشي صعب كمليهه عادي تعودت متغير شي

ضلت تعض بشفتهه وادير وجهه كل شويه لجهه .. باوعتلي وضحكت بوجهه .. كب كالت ..

- اييي ديلا ارتاحيت

- لااا تجذبين

-ياا شكو اجذب ! تره ما نازله  من الجنه اووكييي جايه من الشارع عومري شتريدني اصير !!

- شتصيرين صيري المهم انه اريدج

- بايخ هواي

- رور هذنيج كلهن منسيات الج وهاي الشغله انه ادري بيهه مو عندج فنعيش براحه ان شاء الله

- شلون مو عندي بله ! لعد اني شلون نمت وياك ! تره دتخيط وتخربط عيوني مو حجيتلك شويه على اهلي عبالك اني بعدني هذيج الصغيرونه !! 

- هسه انه رجال وافهم

اكو شي بس مو كل شي

-شنو شي شنو كل شي ! ؟ شدتحجي انته

- امشي نجرب واحجيلج قصدي

- لااااا صدك  !

ياتجربه شبيك حيداااار

- هسه انتي مو مرتي واحبج وتحبيني

وانتي ماعندج شي تخافين منه امشي وياي

اريدج مرتي واريدج  امشي 

- تره مالي خلك اوووكييي

يعني متحس انته صارلي يوم كله احجي باهلي وكلبي محروك تجي هسه مرتي واريدج

ماااكوووو مالي نفس ومابيه حيل اصلا

- زين يلا اعذرج

نعوفهه للصبح  ماشي

- شبيك غباشي بالنومه !! هسه طايرين

- جااا لا بالليل ترضين لا الصبح والظهر تكضيهه جهال ومطبخ ومسح شوكت اخذ راحتي وياج !

- هسه مو كلنه بعدين

شكو كلشي مستعجل بعدنا حتى ممتفقين على العيشه

- ميخالف خلي نجرب وبعدين نتفق

- تره مو لعبه بايدك يوم يعجبك تنام وياي ويوم تجي تكولي مانرهم

اني علمودج هيج ماريدك توصلني

- بس لتنسين انه وصلتج مره وما كشت روحي منج لهاليوم

يعني مافكرتي انه هيج ماعندي احساس

- انته دتكولهه وصلتنننييي اوووكيي يعني شنووو !!!

- بس انه عرفت غير شي

وبس نعيدها افهمج شلكطت عليج سالفه

- دتتحيل للنومه انته

- لاا والله هسه انه لو اريد اجبرج واخذج

بس جاي احجي بتفاهم

بعدين انتي اول وتالي تنامين وياي وبوكتهه احجيلج شعندي

- اي بس اذا اني بنيه ماجازف هيج وياك

مو صح !

او شكو اضمهه عليك .. جان استفاديت منهه

وكسبتك الي .. لو من باديه احجيلك وكايلتلك تره بنيه محد واصلني ماجان كيفت وباجر تروح تركض لمعامله المحكمه !!!

ضحكت وعضيت خدهه ..

- ولا يهمج باجر اصبح بالمحكمه

- هااااي شبيك هسه متوازين

داكولك بس هيج حجي مو اريدك تروح

دافهمك شغلتي شويه شغله لمخك وياي

- انه رجال وافهم بعيني جسمج مو بعينج مثل متوصفيلي

الي فاهمه انه يكفيني

ردتج صريحه وياي هالمره وخذلتيني مادري ليش تجذبين

- مااااجذب كووولشي موجود بعينك شفته وعشته بعد شكوووو هالمسلته

- يلااا يلاا كيفج

المهم تحضريلي اريدج كلش قفلت نفسي عليج هسه

- لووووو تموووووت

- ههههه حطلع اجيب جباسه للجهال وارجع الكاج فوك

- حيدااااار لتبدي بالصخام هذا داكولك مالي خلك متشوف روحي ممروده

- اداريج حبيبه اداريج جا غير اريد راحتج

- مااااريد راحتي من تبطل سوالفك

- لااا معليج انتي حضني ينسيج كلشي عوفيهه عليه بس روحي صعدي انه هسه خمس دقايق وراجعلج

وكفت وهي هم وكفت وكلتلي..

- بيك خير فوت للغرفه

راحت جوه وانه ضحكت عليهه وطلعت للشارع ..

.

.

يتبع 💕

" واما عن الـوِد فخسارةًُ  أُسيء اليهِ

واما عن العُذر فلا عُذر

انا مُلك ابي ولا عُذر اُصيغه من عافيته لتبريري

وقتي يُستقطع ليس لاحد سوى تلك الي قلدتني ذكراها .. واجب علي رسمها كتابيًا ولست عن واجبي متخاذله "

..♣️🩸 ماء مغلي 🩸♣️..

* adzzon *

وكفت وهي هم وكفت وكلتلي..

- بيك خير فوت للغرفه

راحت جوه وانه ضحكت عليهه وطلعت للشارع ..

اشتريت للجهال واخذت النه علاكه ورجعت

انطيت للجهال واخذتهم وياي فوك كلمن راح بغرفته هو واخوته وضليت واكف انتظرهم يخلصون هوستهم وكلمن ينام بفراشه يلا صعدت لغرفتي ..

افتح بالباب مقفول .. ضليت ادك الباب واصيحلهه وهي تكلي ..

- نام يم امك عووومري الغرفه اليوم اليييي

- رجعنااا للخبال ولج افتحي هسه كل يومين شاحتتني ادري هي غرفتي لو غرفتج !

- بكيييفيييي ماافتح

- رور افتحيي عيني انتي هسه انه رايدج

شسوي بامي نارللهه ! جا شلون مره انتي

- قنع نفسك نووومه هنااا ماكووو بعد انته طلعت عينك متتأمن

- هسه بايك ! ولج حبيش هذا لخاطر الحسين

افتحي نعلى عليج خلي نحجي جوه فضحتيني

- روووووح عووومررري روح للماما

حياااتشششي انته

- انجببببيييي مستخفه

افتحي جايبلج كرزات

- مااااريييد

- نساتل

- ام شكد ؟

- خمسمية جايبلج ثنين

- وبعد ؟

- جبس خمطتلج واحد من الجهال

وعلي اذا متفحتين انزل انطيهن لحوري وزنوبه وهنه نتفه مينطنج بعد

- اووووي ديلااااا ماريد شو عاجبني انام هوااااي

شمرت العلاكه بالكاع وضليت ادك ع الباب

واحرك باليده وادفر برجلي بالباب ونتعارك

جان يصيحلي سيف ..

- هاا عمي خير صاير عدكم ؟

- روح عمي نام روح هيج خبالات الليل

هو راح جان عادل يفتح باب غرفته وهم ضل يسأل شكو وسيف كاله عاد رجع لغرفته يضحك ..

ضليت كاعد وره الباب مرتجي عليه

وفتحت جيس الجبس ضليت اكل واكللهه...

- ولج مالكطج هسه الكطج الصبح

كاعدلج انه شعندي لا شغله ولا عمله

بس اطلعهه بيج اصبريلي

كل شويه اطركع بالجيس واكركط جبس براحتي ..

ضليت ادفر بالباب واصيحلهه تنطيني بطل ماي ولحيت عليهه عاد فتحت الباب شويه ومدتلي البطل انه بدل ماكمش البطل كمشت ايدهه وجريتهه لزكت بالباب ..

ضلينه نتدافع بالباب تالي انه دفعتهه حيل

وانفتحت الباب عثرت ووكعت وياهه

وهي كبل دفعتني وشردت يم الثلاجه

كمت قفلت الباب وجريت المفتاح دفعته من جوه الباب بره وطكيت اصابعي ..

- مكابلج  مكابلج مررررتي وجه بوجه اليوم والثار ثار

- ولك صخيم جنت اشاقى ياثار هذا

هسه مو فتحت وانطيتك مي شو متقدر

- لااااا هو شخليتي ! فضحتيني كدام اخوتي

صار ساعه ادفر بالباب شاتلتني بالبرد كاعد ع الكاشي ثلجت

- ديلاااا شسويلك احد كلك اكعد

ضل واكف يعني متعرف بارده فوك!

- وانتي شلوووون تقفلين باب وتعوفيني بره اصيح

لويت ايدهه وعضيت اذانهه وهي ادوس على رجلي ..

- صاير مجلوب حلكك بس اكل وعض

- انتي ردتي هيج

جنت شلوني وياج مدللج وعايفج بس انتي جلدج يحكج تدورين عراااك

- حويدر صلح يلاا صلح كافي

صارت وحده بوحده

- يلااا تعالي نتصالح برومانسيه

- قناااادر احسن

- ولج وعلي ماحس روحي مزوج لا وجماله احبج شكول حب انتي !

مال اوكفج بالفلكه واسلمج كيه وعلي بس هناك تنفعين

- ديلااا وديني خلي اخلص من شكولك

فوك راسي من صبح لليل تنك تنك

تبط الگلب

اني كلبي سكط لو ما سكط ماحبك

- ايبااااه شلونج انتي مشرمتهه بالحب

ريري تنعدلين وياااي لو لاااااا

- ليش هسه اني عوجه ! شو متعرف تحجي انته

- ولج بويه اريدج هيج تشغليلي مشاعرج كلبج صخامات اي شي بس لا عوفي المناكر هسه شبعنه منه كافي خلي نغير

- مااااكووووووو رادلك خلك هالكبره واني خلكي بكد زرف الابره ماتحملك

- اكلج هسه انه اجدي منج

خاب وليييي

دفعتهه ورحت ابدل ملابسي .. جان تصيحلي ..

-اكووولك هسه انته عقلك وين !!

من قفلت الباب وشمرت المفتاح بره

غير تجيب العلاكه داكل يلا تقفل

هسه لا خلصت منك ولا اكلت شي شيسموهااا هاااي !!!

- راحت عليج بعد كلتلج افتحي بنزاكه واخذي ماكو

عفريت البيج ميخليج

- يبووووووو مغثه مغثثثه

تمددت يمي وتباوعلي صفح ودارت ظهرهه

تكلب بتلفونهه جريته منهه ..

- شبييييك ولك شخبلك عليه اليوووم

هسه صخام  واحد ميشوف شبي

- مشبعتي منه

مو انه يمج شسوين بتلفون !

بعدين انتي متبطلين سولتج الكشره هاي

تنامين ودايره ظهرج ! هاي هم متعرفيهه هم احجي ونتعارك يلا تنعدل !

- هسه شلووون حيداااار تره بطيت كلبي

لحيت لحييييت هواي

نوومه ماكو لووو تلطخ راسك بالحايط

بطل ملحتك ماكووو متحصل شي

- ليش بويه ! جا هو حبيش هذا !

ولج يالنجره انتي تطلعين خبالج بس وياي !

مو بعد يومين واروح اولي منا ماشوفج

شبيج احساس ماكووو

متفكرين !!!

- اي ديلااا هسه واذا رحت متعوده عليك بحضني اني ! روح شسويلك

- هااااا زين خلي اروح واشوفج تخابرين عليه كل نص ساعه وعلي حرف ماحجيلج شيصير وياي هناك

- اشك حلكك سويهه وشوف الدنيا اهجمهه فوك راسك

جريت شعرهه وكفختهه وضليت حاصر راسهه بايدي ..

- تشكين حلكمن ولج ! مو هسه اسطرج وافلش فجج ليش توازيني بالموزينه

- ديلاااا اسفه يلاااا كافي رحمه لجدك

لك حنفجر حيدااار ماتحمل ملحه كااافييييي

دفعتهه وهي ضلت تعدل شعرهه .. باوعت الساعه صارت ١:٤٠ ..

كرصتهه برجلهه وهي تخنزر ..

- هااا نجرب لا يلا نلحك نشوف براحتنه كبل الصلاه

- يااا ملحه ملحه ولك جنك عجوز ماكلين عشاهه شبيييك

- شوفي والحسين اذا عفتج هسه بعد مااصلج لو تحركين روحج

- ليش يعني شدعواك

- ااانه هيج من تخربين واهسي بعد انتهى

من اريد اليوم يعني اليوووم

عذر ماعندج لا شغل بيت ولا خطار ولا تعبانه ولا مريضه كلشي مابيج بعد عنااادج ليييش !!!

ضلت تجرجر بالبطانيه وتأفف وانه اكلب بتلفونهه وبعدين قفلته وخليته ويه تلفوني بالمجر ثنينهن مقفلات ...

باوعتلهه وهي تكلي ..

- ديلااا اوووكي تعال

- والله تعبتيني صار فوك ساعه اتكافش وياج

شويه واهسي خرب

-يعني متريد ؟

- لااا رجعي سويلي واهس

يلا شلون حبيبه انتي !

لا وفوكاها لابسه كل فروه بكبر راسج

منين جايبه هالبجايم !

- يبووووووو حيدااار

- صوتج هذا لطلعيه فوك حبيبه خليه بس جوه للجهال هيج عيطي بيهم

يمي شويه نزاكه خلي احسج مرتي ياااابويه ولج كلبي شيب يالحسسسين

- يبووو هسه قنادر الحب هاي شكوو

يعني كلشي نازك ومايع متحبني هيج !

شلون اغيرلك صوتي ! ماينصى شسويله

يعجبك هيج يعجبك

مايعجبك ضل احسن بعد لتحجي وياي حتى لتعبني

- ريررررررري وصلت حدها وعليييي

تنعدلييييين لو شلووووون !! نتخارررب !

هيج تردين ترتاحين !

هاي تشلعين كلبي تخلينه كل واحد بصوب ويرتاح كلبج ! هيج الحب عندج !

كووووليي خلي افهمج

- لااا هسه انته شبيك حامي هيج فدمره

تره احبك يعني بس مادري انته تلح واني اعصاب

- للااااا تردينا كل يوم نكب عركه يلا ترتاحين بعيشتج وياي من تشوفيني مشلول الحال يلاا تختخين

- لاااااا داكولك لا هسه شكو تلح نفس سالفه

ديلا هسه كافي شو عطشت اني .. انته ماعطشت ؟

صرفنا حجي هواي

ضليت افرك وجهي واخذ نفس وهي

راحت تشرب ماي واجتي انطتني شربت

و هي راحت فتحت الكنتور ..

اجتي نزعت بلوزها وخلته على وجهي ..

- هااااا

- لتشيله من وجهك تره اخربلك كلشي

ضحكت من لاجاره .. ضليت كامش البلوز على وجهي واحرك خشمي بالفرو  وهي اطكطك ..

تالي اجتي شالته من وجهي .. فتحت تك عين اباوعلهه وهي واكفه متخوصره ولابسه

ثوب كصير ازرك وصلوخ ومخليه حمره

ضحكت وجريت ايدهه ..

- صدقه لربج هسه خوش مره صرتي

- ديلاا اووكيي

- هههه لج والحسين احبج لتشلعين كلبي

باستني بعيوني واجتي خلت راسهه على صدري وضلت تتلمس بايدي ..

- حيداار ادري هم الح اني بس اخذني على كد عقلي وجاوبني

- كولي شنو بالج

- يعني هسه معقول انته هيج تحبني ونفسك بيه ! يعني مقتنع هيج كلش كلش بيه

لو تريد تكضي الوكت هذا بينا هيج بالحب وهالشغلات وبعدين تعوفني ؟

اني شكد مااريد اصدك اكول لاا مو مال احلام وضربه الحظ هاي مال سندريلا متكعد وياي 

فأذا عندك نيه تعوفني وتريد تتونس من هسه كول حتى بعدين ماعتب عليك

تره عتبي ثكيل والمشاعر مو لعبه بالاخص عندي لان هاي اول مره بعمري اشغل مشاعري لبشر ..

ماريدك تحافظ عليها بس اريدك صريح وياي احجيلي نيتك وياي شنو حتى اعرف شلون اتصرف وياك وماشلع كلبك

اخذت ايدهه خليتهه على وجهي ومشيتهه على حلكي وهي تكلي ..

- هسه اني وين وانته ويييين

مو داحاجيك

- شبيج جاي اقيس مشاعري ونفسيتي

اريد اقيس على مقياس ابوج

- ايي وشطلع وياك !

- جاي احس بابوج خوش عنده مقياس

وعلي يجيب رجفه الكلب على الاصابع

اسمعي   انه مادوخج ولا دوخ نفسي

احجيهن الج بالقلم العريض

- ايي هيج طكهن بوجهي لتضم شي

- اسمعي ..

انه رجال مو إجتماعي ومااحب اعيد واصقل بالحجي

احب اليفهمني مره وكافي بعد هيج اخليه بسدي واطلع من سالفه تعال فهم شأريد

يعني انه فووك ماعندي ثقه بالنسوان هم مالي خلك تعال اتعرف من جديد

هم تعال جيب واخطب وتعرف وحضر عرس وبعدين بالزواج تعال اسألهه شعندج ماعندج وشتحبين متحبين .. واريد هيج واهلي هيج وهم تعال جمع حبجيات

سالفه تعب صراحه

اتعاجز منهه .. هسه انه ليش مكيف عليج

لان عرفتج بالعشره فهمت عليج وفهمتي عليه

تعال هذا الي بينا كله روح ارجع سويه من جديد ويه ثانيه هاي منين اجيبلهه خلك !!!

وهم شغله واحد يكلك اخذ بنت الاصل والفصل وبنت فلان وفلان

هاي ماقتنع بيهه .. لان صار بهالزمن البنيه مالها دخل باصلها واهلها .. كلمن على حل شعرها تمشي .. اذا مو بالعلن بالسر تلكيها اشكال عدها .. وتجي تلبس وجه البراءه بعدين وكت الصدك كدام الناس

هاي احنه مو اخذنا اثنين نسوان من احسن اهل وعمامنا ونسبهم ينحلف بي واهلهم كل واحد مضيفه يوكل عشيره والديانه عدهم شارع على علم .. تالي شطلعن ؟؟

انكس البشريه هنه .. فهي شغله بذات الانسان زين يبقى زين مو زين اهله مايشفعوله

وهم انه اتعب انتن النسوان تعبن كل وحده رادلهه دهر يلا ينضبط كتلوكهه ..

وانه احب الي يطخ كلبي ويعرف يداريني ويسويلي جو بحياتي لان انه طبعي بارد .. لنفسي مااسوي شي يونسني .. اضل عادي كاعد وساكت منا لفد يومين جره وحده هم ماهتم

تجيني وحده تتزعل براسي ليش ساكت وليش وليش وتريد كلشي مني وانه لروحي ماغير جو اجي النوب اصنعلهه جو خيالي !

انه ماحب الي بس تتشكى وتنك براسي

وخلك ماعندي اتعرف من جديد والعشره انه اقدرها مره طبعت بكلبي بعد اكتفيت ..

مرتاح وياج كلشي تعرفين عليه ومشيتي بعيشتي فهمتيها ماتبطرتي من شي

نكعد انه وياج نتقاسم باكيت الجبن الي باقي بي نص من وره ريوك الجهال وناكل بصمونه وحده ونص نطلعه من الخبز الباقي مال بارحه الكاج ترضين بي وما تضوجين ولا تتبطرين وانتي جان ريوكج بعدال فلوس غدا هنا اجيبه ! 

بالعشه نوكف نسوي ماعون بيتنجان وطماطه

ونكعد نجرش سوالف وناكل وضحكتنا شعلوهه وما جيتي فد يوم تبطرتي من اكل وضليتي تجيبين وتحجين بعيشتج ومطاعمج وفلوسج

هاي شغلات انتي متحسيها مهمه بس انه عندي اساسيه بحياتي ..

كايلج انه افكر هواي بكلشي بكل تفصيل تلكيني مسويه هالكبره براسي

فأدقق بكل عيشتنه واكعد اقارنهه بلووو متزوج غيرج هم هيج تسوي ؟

يعني هذني ابسط شغلات انه افكرلهه

وادقق بيهه .. فسالفه التتونس بيه وتلعب بمشاعري هاي بطلي لتحجيهه

لو اريد جان من زمان سويتهه

بس انه اريدلي مره تشاركني نفسي هيج تفهم برودي .. تعرفني ممل بس متضوج مني ولا تعيش وياي هيج بس مظهر ..

اريدهه هيج ويه روحي .. كون من اوكف وياهه احس روحي راح اتلبس بيهه من كد ماهي قريبه ويه روحي .. هيج انه احتاج مره بحياتي ولكيتهه بيج بعد ابصم هنا مادور ثانيه

صعب انه عقلي ونفسي صعبه مو بساع اتأقلم ويه بشر ..

- امممم حجيك مقنع عوومرري

واعرفه صدك بيك بس مادري شلون تحملتني وانته هيج مالك خلك تتعب لنفسك

- هههه مو جنت مجبور اسايرج لحد ماتعودت عليج بعد حبيت جوج وياي

هسه شايفه لو تسوين هاي الطنكيره مالتج

تضلين رافعه خشمج ومالج دخل بيه اليوم كله

عايفتني وكلشي هدوء وعلي احس روحي كاعد على نار واريدج بس ترجعين تفكين مزاجج

- هههههههههههههه

فديتك حيااتششي

كعدت بين رجلي وجرت ايدي كعدتني وصرنا وجه بوجه .. كلتلي ..

- حويدر هسه يعننننيييي

اني ماعرف اعيش بدون شروط وضوابط

هيج احس روحي مأمنه حياتي

تقبل نعيد شروط العقد ؟

- هو مالازم نعقد جديد يافله

حتى يصير زواج مضبوط

- اييي هسه شمعرفني هاي سوالف دينيات عندك انته دبرهه

المهم شروطي

- انه هم اخلي شروط جا كلهه الج وتعال ياحيدر نفذ !

- ههههه يلااا اووكيي هممم الك

يلا ابدا انته بالاول

كمشت اثنين ايديهه وكلتلهه..

- شرط الاول : تداريني لاخر عمري ماتملين مني

- اووكييي

- كولي وعد شسوي بالاوكي

انطي وعد حتى اعاتبج على وعدج

- وعد وعددد

- الشرط الثاني : تبقين بس الي كل عيشتج كبل تنسيهه هيج كلهه تحركيها بعد مايبقالهه اثر بحياتنه

- وكانيور ؟

- لا هذا بقي يمكن اجيبه الج اخلي بالسطح

- اييييييي فدييييتك حبيبيييييييي

-هههه والله لمصلحتي اجيبه لان انتي خبالات وهذا يعقلج شويه وياي

- اووكيييي ميخالف

وعد اعوفلك كل شييييي بس انطيني وكت كم يوم ومابقي اثر لاي شي ماخلي شي يخرب حياتنا وداعتك حدوره

- اي اي هيج فرحي كلبي

يلا الشرط الثالث : كل يوم احنه سوه لازم تعبريلي عن حبج .. حجي فعل اي شي المهم متعوفيني بدون حب

مو تكليلي مالي خلكك وعلي بعد ماسامحج عليهه هسه جاي اعبر انه بس بعد لاا

- لااا يلا وعد

انته تستاهل الحب

- ايييي يااارب رحمتك بدت الراحه بكلبي

اي شرط الرابع : تشاركيني الي بالج زين وموزين .. وانه كلشي احجيلج ومشاكلنه سوه نحلهه مو نكضيهه زعل

- اوووكييي وعد نحلهه سوه واشاركك بس مو ماازعل لان ادري بنفسي طنكوره

بس صالحني مو كلهه عليه

- اي اصالحج جا شعندي غيرج

الشرط الخامس : تسمعين كلامي بدون عناد

انه من احجيلج شي واريدج تسوي هذا لمصلحتنا مااضرج بي

وانتي كليلي اذا مافهمتي قصدي منه بس خلي شغله طابعه بالج انه لعيشتي ماسوي شي الااا مدروس ومبرمج عدل

- اووكييي ديلا ماخلصت شروطك صارن خمسه كافي

-ههه يلا كافي

دورج

- اوووولاااً : متخذلني بيوم واذا صار وسويتهه لو بحجايه وحده تمس كلبي

راح اضرب شروطك عرض الحايط

واسوي الي براسي اووووكيي !!!

- بعون الله ماخذل كلبج بس مو بزعله وحده بسيطه ترحين اطيرين كلي بينا

-لااا ولك اعرف الزعل من الخذلان افتهم مو ثوله

اي ثااانيا : عينك تبقى الي وعقلك الي .. تره بس تشغل عينك هنا لو هنا الكطك متعرف انته حساساتي شلون تشتغل وياك

-ولج بويه وين اكو بحلاتج واباوعلهه

سدج امين هاي الج مختومه وعد

-ديلاا لعد ثالثاً: اذا صار فد اشكال بحياتنا

و مثلا شفت مني شي بعد ميعجبك تكمل وياي عليه ،اوو ، صارت مشاكل قويه بينا وماردتني بعد

لا تحجي كلمه تجرحني بيها

ولا تذكرني بأصل عيشتي لان هسه راح اعيش وياك خام شتخط من حرف امشي عليه

بس اذا صار شي وغير  الي بينا

تعااال وكولي خلي ننفصل تعبان من عيشتنا

و داعتك كلمه وحده ماناقشك كبل تلكاني اعوفلك كلشي واروح

واضل احبك حتى لو الانفصال ماراح يغير مشاعري الك

- ماشي هذا خوش شرط مأمنه نفسج بي

-اي رابعًا: تتحمل مزاجي ماجذب عليك واكولك اصير كيوت كلش دائمآ تره هاي الحروره الي بيه متخليني اسكت واكعد

بس يعني اكدر اداريك واسويلك اجواء حلوه بس خبالي ساعه ساعه يطفر مو تكول ماكالت

-ههههه اعرررف وعلي اعرف

وراضي بمزاجج المهم ينفذ شروطي

-اي اي انفذ

خامسًا : تعقدلي محكمه بجنسيتي الاصليه

يعني مال  فل

- اي صار

اصلا انه هذا اسمج الروان من البدايه ماحبيته

فله كلش كعد على كلبي

- اوووكيييييييييي

لعد متفقين هسه اصيرلك صدك فل

هههه بعد ماتوتر من شي

- تعبريلي هواااي بمشاعرج

- اي هوااي كولش هواااي

تحاضنه وضليت ابوس بيهه وهي تضحك

صرت اتلمس بجسمها واخذت راحتي وياهه

وهي التزمت سكوووت ..

مجلبه بالفرشه وتباوعلي وساكته .. اذا صارت عيني بعينهه بس  تبتسم وتضل ساكته حتى صوت نفسهه او تعبرلي بشي بصوتهه ماسمع ..

عفت كل شي .. وجريت الغطى نمت عليهه وتغطيت وضليت اشتم بركبتها ..

- شبيج ؟

- مابيه شي

- مو كلتلج كاشفج بس انتي تعاندين

ليش احرجج احجيلي بنفسج احسن

- حيداار هسه شفتني عفتك وكمت مو كلشي منطيتك مو مرتك هسه وياك لو لاا

- لا مو وياي ابد مو وياي

لتنطيني شي بس ترضيني بي وتخلصين مني وتكومين

حجيتلج نفسي وشأريد منج وياي شتتصرفين

-زين ديلا اتعلم على طبعك اووكي

- ليش متنرفزه ! ضوجتج !

- لاا بس هيج مزاج ضرب

- حبيبي اسألج ولتخجلين كليلي الي بيج

خلي افهمج هذا من حقي اعرف كلشي عليج

- ادري شراح تحجي

وماريد احجي تفاصيل عفيه

- زين بس كلمه وحده بردي بيهه كلبي

شيجي بالج وياي هاللحظه ؟ هاا

انه اشوفج مو وياي واحسج مو ام تجربه مثل ماتجيبين وتحجين

اخذت نفس قوي وخلت ايدهه على وجهه

وكلتلي..

- حادثة اغتصاب جبيره

بوست خدها ونزلت دمعتها .. مسحتها ورجعت بوست كل وجهه وهي تباوعلي وتبتسم .. كلتلهه..

- ماشي ميحتاج تفاصيل ولا حجي بعد

انه فاهم كلشي

عرفتج من اول مره مو ام تجربه

جسمج مسيطره عليه بعقلج لو هسه انه افقد وياج انتهي انتي تضلين ولايمج الموضوع

لو مجربه جان بينت عليج بصوتج بحركه جسمج انتي كلش بااارده مابيج احساس

حتى رغبه بجسمي ماعندج .. كبل جنت اكول يجوز انه مااعجبهه بس هسه اختلفت

تحبيني بكل شي بس هنا عبالك انه مو حبيبج

منين مالمسج تجفلين وتعقجين الوجه  حتى من جنت انومج بحضني واتحارش بيج مرات انتي ماتطيقيني

لو مثل ماتحجين وتصفطين عليه جان كيفتي على الشغله بس انتي بوخه طلعتي

ضربتني على ظهري وضحكت ..

-ديلااا فهمنا

-هههه ليش تصفطين جذب عليه هنا ؟

مو رجلج انه  ! لهالدرجه شايفتني غشيم !

- هيج اني مرتاحه

- بعدج صعبه وياي بعدددج

وادري بيج تطولين يلا ترخين عقلج وياي

- اي ديلاا كافي

عفيه حباب خلي نام احس تعب تععععب بيه فدمره

- شوكت تعوضيني ؟

- بس اشوف روحي مرتاحه اعوضك

- زين براحتج انه بس جنت اريد اشوفج تره انه مو غشيم بيج انه افكر بكل تفصيل

تفكيري حتى حجي احجيه الج مايكفي وتفهميه

- حلو اني احب الي يشغل عقله وياي

ضل هيج اكيف عليك

على هالحضنه ضلينه نايمين ... والصبح

كعدت متأخر وباوعت الساعه  ١٠ صبح

ريري نايمه بعدها ..

فتحت تلفوني وخابرت سيف ..

كلتله يصعد ينطيني مفتاح من جوه الباب

اخذته وفتحت الباب وشلت العلاكه مال حلويات البارحه ضاله بره وخليتهه يم راسهه

ونزلت اسبح ...

ضليت كاعد جوه ويه امي وهي بعدين نزلت

اجتي تباوعلي وتضحك .. امي طلعت من المطبخ وهي كبل اجتي باستني بشفتي

وتكلي ..

- احبك انييي

رفعت وجهه بايدي وعضيت شفتهه

كلتلهه..

- يالراحه انتي

سوت ريوك وكعدنا اكلنه سوه .. وراهه طلعت اتسوك وهناك باوعت للمحل واشوف شكد تغيرت الايام .... جان اقصى حلمي

اشتري لابتوب ابل واربطه على برج خاص بيه ..

هسه وييين .. زوجه وسفر و وظيفه وسياره

و الله يعلم بعد وين توصلني الدنيا  ..

رجعت للبيت وتغدينا وكاعدين العصريه باب المطبخ فارشين وكاعدين شويه شمس دافيه وجو طيب .. والجهال هم ويانه كاعدين

جاي اكلب بالتلفون  ورفعت عيني باوعت لريري شفتهه صافنه عليه .. بعدين كبل صاحت ..

- كرفش اركض جيب النعال اررركض ولك صخيم بساع

هذا كبل حفز وجر النعال خلاه بايدهه وهي نيشنت وراي وصاحت ..

- وخر انته منا لا يوكع بيك

وخرت وجان تصلخ ابو بريعص صلخه بنص راسه وكعته بالكاع .. وشمرت النعال لكرفش ..

- يلا ولك كوم شيله وذبه بالزباله

هذا مدحدح ويركضلهه ركض ..

وانه كلتلهه..

- بالحسين امي ماتنيشن هيج بالنعوله

لج انتي شنو !

- امك فاهيه خوما مثلهه اني !

همزين جوه متسمعني جان حطت شيلتهه وكامت تنوح وتبجي

- وووولج لاتجيبين امي بالشي لا تخلينه نتخارب

-ديلااا هسه شكلت

تره احبها اووكيي بس داحجي الصدك

- بس كلبج قوي عبالي تخافين منهن خواتي جانن يتصركعن من يلكن بريعص

- عشتووو اخاف شكو !

هو صخيمه هالكدهه كفخه وحده اشل حاله واشمره بالمزبله

ماعندي عيارة النسوان اني مايخوفني شي

- هههه والنععععم مرتي سبعه سبععه

كامت تمسح الكاع واندكت الباب .. طلعت واشوف حسنين جايب ملوكه وهي تبجي

اخذتهه منه وهو يكلي ..

-خويه رحمه للعزاز خلي مرتك تحاجيهه

البنيه لا اكل ولا شرب تكول مرت خالي زعلانه عليه روح خلي تصالحهه وفكوني رحمه لاجدادكم وبختكم

- سهله خويه سهله توكل انته وانه اجيبهه الكم

راح وطبيت للبيت صحت لريري و هي بدال ماتجي عليه راحت للمطبخ ..

وهاي كامت تبجي بعد ازيد ..

طبيت للمطبخ وشفتهه تغسل ايدهه وتفرك بيهه .. كلتلهه..

- شبيج ويه ملوكه  !

- شبيه ! شمسويتلها!

- على اساس زعلانه وياها مدري شبيج

ليش هيج ؟ البنيه طاكه من البجي

- اووووي عووومري

ملوكه مخليه راسهه على ظهري وانه شايلهه

واجتي ريري اخذتهه مني ..

وضلت تبوس بيهه وهذيج تبجي ..

راحت وياهه للهول وكعدتهه وضلت تنزعهه عبايتهه وتبوس بوجهه وتعدل شعرهه وتبسبس وياهه وملوكه بس حاضنتهه وساكته

وكفت يمهن ..

- ريري ليش تبجين ملوكه ! شعجب !

- امليكه حساسه

كلتلهه اريدج تداومين مدرسه واني هنا اقريج ويه الجهال وهي متقبل تكولي ماحب الناس

وماحب الجهال بالمدرسه وماحب المعلمات

عاد كلتلهه لازم تحبيهم وتكليلي اي اريد ادرس واخذ شهاده واصير شاطره

واذا متكليلي هيج بعد ولا اجيج ولا احجي وياج

- وهي مكالتلج ؟

-اي بعد هي مادزتلي خبر واني مرحتلهه

عبالهه صدك زعلت منهه

مو اني جنت موصيتها تكول لابوها وهو يكولك حتى اعرف بيهه

ومبين هي مستحيه تحجي لابوهه وعبالهه زعلت منها

- هااا زين بويه سهله هاي عبالي سالفه جايده

تصالحن تصالحن

وسويلهه اكل ابوهه يكول كلشي متاكل لهسه

- ياااعووومري ولج انتي شلون بيج

افصلج عالم على كدج مال امورات

واعيشج بي !

دشويه تلحلحي منين اجيبلج النجاره ولج منين هم لو بسوك ماحصلهه واشتريهه الج

ضلت مدنكه عليهه وتبوس بشعرهه وتكللهه..

- ولج بنوته اني مازعل منج غير بنص الكلب كاعده يم خالج انتييي

بس هيج اريدج تصحين على نفسج .. الصارو مو احسن منج ولا اذكى منج

انتي بس رادلج شويه اطلعين من جحرج هذا وتصيرين توب

- اي ملووك خالي حلوه المدرسه وهسه انتي بعد هواي يلا تسجلين بس صيري سباعيه من هسه وريري كلشي تعلمج بالدراسه

- حتى ملابس وجنطه ودفاتر اشتريلج احلى شي ولااا وحده من بنات المدرسه عدهه مثلهن

نباوعلهه وهي تدحس براسهه بحضن ريري

ومتجاوب .. اشرتلي ريري اروح واعوفهن

ورحت بره يم الجهال ..

دزيت واحد منهم للمحل يجيب كيك وعصير لملوكه .. واخذتهن الهه .. ورجعت عفتهن وحدهن ..

ولليل بعد من رادت تسوي عشه يلا شفت ريري .. وكفت وياهه بالمطبخ وهي تحجيلي ..

- هاي تخجل من مرضهه لان متكدر تمشي

تكول محد يحبني هناك ومحد يصاحبني

- استغفر الله

هاي معشعش بيهه خوف

-اي هواي

متشوف من هسه فتحتلهه موضوع المدرسه

لان رادلهه وكت هاي لازم واحد يضل يلح وياهه الى وكت السنه الجديده ونسجلهه

تره هاي نص مرضهه نفسي وهي طفله

اذا ماخليناهه تصير قويه هسه بعد عمرها كله تكضي بنفس الحال هذا .. خوف وبجي وكأبه

- الله ويدج رور طلعيهه من محنتها هاي

وفرحي اخيتي بكبرها

خطيه هاي يتيمه من تتعلق باحد بعد تتدمر بس يعوفهه

- ايي انقهرت عليهه كوولشش

معبالي هيج تضل تفكر بيه

بس بعد راح اشتغلهه منا وهيج غصبا عليهه اغيرهه

بس كول لابن عمك يعوفهه يمي واني اسويلهه نظام جديد وارجعهه اله اميره

- اي خليهه هنا احسن بيناتنه شويه ترتاح هناك وحدهه ضاله

بس مو تضلين مكابلتهه وتعوفيني تاخذيهه حجه

-لاااا ابو الگلب انته شلون اعوفك حويدر

وكفت يمهه حضنتهه واشاورهه ..

- مارتاحيتي اليوم ؟

- بعد بس اليوم حباب

- يلا ماشي اخذي راحتج اليوم هم

خلي اشوف وين تصفى وياج

عفتهه تضحك وتكمل عشه ورحت اشوف ملوكه كاعده ويه سيف وهو يلعب بالايباد مالهه ويشوفهه اللعب ...

لليل ريري خلت سيف يصعد ملوكه فوك لغرفتنا .. وانه كاعد جوه اباوع تلفزيون بس ضايج ... عفته وصعدت يمهن ...

لكيتهن مفردشات بالكاع صبغ اظافر ومكياج

وريري وجهه ملغمط مدري شلون وملوكه كبل دحست الي بيدهه ..

- شجابك عيني خالوووو شصعدك

متشوف كعده بنات

- نعسان لمن غراضجن يلا خلي نام

- نهجم بيتك

خالج ينعس احضان كل اليوم هو هيج نعسان عادي لتستغربين

-وووولج لسااانج ياثوله

-ديلاااا اووكي

كامت تلملم غراض وتشاور بملوكه ويضحكن .. كعدت تمسح بوجهه واظافرهه

وبعدين جابت ملوكه وخلتهه بالنص بينا وضلن يباوعن كارتون بالايباد ..

عفتهن ونمت ...ثاني يوم كعدت شفتهن متحاضنات .. ضليت اكول سبحان الله

صار نصيب محنة هاي لاهلهه بحضن هاي

اليوم كله هنه سوه ملوكه اذا مو يم ريري يم امي لو سيف ومرتاحه بينا ..

العصر اخذت تلفون ريري وكلتلهه ..

- خابري عمج واحجيله على الشغل يلا ليش تاجلين

- اي اووكي

مااجلت بس نسيت التهيت بملوك

-احجي كدامي ماكو وحدج

كالت اووكي وضلت تراسل بي وتنتظر يخابرهه .. واحنه صعدنه غرفتنا ننتظر اتصاله ..

خابرهه وهي حجتله على انها تريد تترك كل شي وتبقى عايشه وياي والصدمه هنا صار هو يعيط عليهه بحيث هي وخرت تلفون من اذنها وضلت تحاول وياه وهو سده بوجهه

بعدهه مالحكت تحجيلي رجع خابر ..

جاوبته وكبل مدتلي تلفون .. حجيت وياه بعدني بس سلمت وهو كال

- خويه الله بالخير

سوالف الحلاوه هاي لتاكلهه براس بنتي

لا عقد ولا حجي روميو هاي بطلهن

انته بعالم واحنه بعالم .. جامع بينا بس الشغل

- شغلنه ماشي مثل ماهوه بس مرتي ماريدهه بعد تطلع لطريق مايرضيني وهذا حقي عليهه

ماجاي اضحك عليهه انه رايد مصلحتهه

- مصلحتهه اني ادري بيهه اكثر منك

تريد ادزيالي بعدين مكسوره كلب ! واني اسكت ! لو نروح نسويه دم بينا !

لاااا تلعبون بالنار شغلي اووولى من شغلك هاي اولا

وعيشتهه ماترهم وياك هاي ثانيا

والكلمه الاولى والاخيره الي

اذا دريت بيكم ماشين بطريق غير المخطط بي من البدايه اهجم امه الثقلين فوك روسكم

واذا ماتعرف طبعي اسألهه هي مو غشيمه بيه

كبل سد الخط وانه ضليت اباوعلهه

وهي تهز برجلهه ...

- هذا شبي عمج مسودن !

-اوووووف اووووف

- شيريد فلوس ويعوفج ! كليلي شنو غايته

او هو اصلا منين طلعلج هذا العم !

- هذا هيج هو رباني بس استملكني

- شلوووون يعني !!! احجي كلشي

- هيج جنت صغيره وهو اخذني بيته

رباني وصار كلشي يعلمني شغل تصرف

نصايح كلشي كلشي

حتى التايكواندو والسلاح هو علمني عليهن

بس يريد كلشي بالمقابل

- يعني يريدج تضلين تشتغلين اله!

-اييي لان هو عنده عداوه هنا بالعراق ويه هوااااي ناااس

وواحد جبير هنا خلصه منهم بس استلم من عنده الملهى والبنات وشرط يمشي الشغل بنظام وكلشي زين يجي لرجليه وفلوس وكلشي بدون مايتدخل وعمي لازم هو يدبرهن اله كل العمر

فصرت اني بالوجه اشتغل بدال عمي واشيل وانطي لهذاك ابو صماخ وعمي يعوضني بفلوس من شغله بره لو من المعارض

وهيج ماشيه حياتنه

- هذا عمج كواد اصلي ماكول غير هيج

- هسه شسوي ؟

- ارجعي حاولي وياه لحي عليه

مو تكولين يحبج وماعنده غيرج

- ايي يحبني بس الشغل شغل

انته متعرف هذوله الناس بشغلهم يذبحوك علني ولا تخربه الهم

-ماااادري رور

حاولي وياه بس خلي يجفينا شره ومانريد بعد منه فلس واحد كلشي عوفي اله واخلصي من مذلته

-انطيني وكت افكر شسوي واقنعه

حضنتني وكلتلي..

- ضل وياي لا تتردد وتعوفني علموده

- لاااا والله ماعوفج هو زلمتيش هذا ويخوفني واعوفج اله ؟

اخلصج منهم كلهم وانتي تخلصيني من شياطين اهلي ونعيش براحه بأذن الله

سدينه السالفه ثاني يوم وصلتني رساله بامر مباشره بالوظيفة...

جان لازم اروح اباشر بغداد واشوف شلون يصير دوامي بعد ...

ريري تحضرلي جنطه ملابسي وانه متمدد واباوعلهه ..

تطلع بالقمصان وترهم لبسه وتكلي..

- القميص الرصاصي ينلبس ويه بنطرون نيلي اووكي

-لاا انه ارهمه ويه الاسود

-لاااا نيلي يعني نييييلييي ودز صوره واشوفك لابسه ويه الاسود بعد احلف ماحضرلك لبس

- يلااا صار صار

- ضل اكوي ملابسك كل يوم بالليل مو تكعد صبح حاير .. خلي كل شي مرتب

وتذكر ... الي يتملق بوجهك جامله بس لتصدك حجيه

والي يتكبر عليك طنشه حتى نظره لتنطيه

هذوله يدورون الزله للعداوه

والي يريد يعرف شي عنك تعرف شلون تصده بعد تعلمتهه

- اي حبيبي مفهومات

- واني وصيتلك حافظات للتلفون هسه معميلي يوصلهن للدائره من تداوم

هاي كل لبسه تخلي وحده ويه لونهه

اووكييي

- رور ادري تحبيني بكل شي متميز بس هاي مالهه داعي هو تلفون هسه قابل ربطه وابدلهه !

- ههههههه ولك اريدك شيك

رجلي لازم فول شياكه والناس تباوع لطوله وتتحسر

سوي مثل ماكولك ومعليك اهم شي ترضيني اووكييي

- صاااار حبيبي صاار

- وهااا بقت شغله اريد اوصيك تسويهه

روح حول السياره باسمك لان هذولاك ينبشون وراك متاكده

- ماتسوى عيني هي سيارتج ماخذهه لاسمي

- حويدر مابينا فرق اني كلشي املكه هو الك

انته كل اهلي كلشي بيه وعندي الك

اخذها حولهه حتى محد يلزم عليك حجايه

هذولاك نحسين يحبون منصبهم الهم

الجديد بينهم يدورون وراه زله وماريد يعرفون هاي سيارة بنيه ماخذهه

خليهه باسمك وخلي كلبي يطمن عليك

اني اعرف عقولهم شنو فاخاف لا يسمعوك حجايه

- ماشي جا نسوي وكاله بينا

- كولهه الك عوومري مايهمني شتسوي سوي

ضلت ترتب غراضي واجتي لحضني

كلتلي ..

- ادللك ؟

- للصبح حبيبي انتي ورانه فراك

ضحكت وضلت تبوسني وتشم بيه وتضحكني وشبعتني بحضنهه .. بس باقين سطحيين

شفتهه ما رغبت هالشي وانه بعد ماجازفت بالي رده فعل من ذاك الصارلي ..

اكتفيت بيهه هيج .. احساس المحبه منهه مخلي دفو بنص روحي ومعوضني كلشي

للصبح وياهه كاعد كل ماتكلي نام اكللهه بعد مشتاق .. وطلع الصبح واحنه كاعدين

لبست وودعت الاهل وطلعت ...

وبدأ الدوام عندي ..

شغلي مدني والمكتب مقسم هواي حاسبات

وموظفين .. اخذت نظره على كل القسم وبديت اشوف شغلي ..

تلفون داخل القسم ممنوع .. يتسلم بره

كلشي معلومات وامنيه خاصه الي يحط عينه بحاسبه غيره يفتح عليه باب ماينسد بعد

اطلع بالليل اتمشى بالشوارع واخابرهه

نضل نسولف فوك الساعه .. وتوصيني شالبس باجر وادزلهه صوره كبل مانام يلا نسد التلفون ونام ..

بديت بمعامله السياره وضليت كل كم يوم اراجع عليهه ..

الصبح كبل ماطلع اصور على المرايه وادزلهه تكلي تمام وادزلي بوسه واطلع ..

لبسي كله بناطير قماش وقمصان

مرات ستر حسب الجو والنفسيه

واغير الحافظه ويه لون القميص او البنطرون عندي ست حافظات ( نيلي ، اسود مشخط بابيض ، زيتوني ، رصاصي ، جوزي جلد ، سمائي بتحديد ابيض )

حياة غير شكل هنا .. كلشي تشوف لازم تسكت .. اشكال جرايم كلهه تقراهه وانته ساكت ولا رده فعل تطلع منك ولا كلمه تحجيهه على فلان او فلان ..

كله سجل وراقب واسكت ...

تقريباً وحيد لو ما هي وياي .. اكضي باقي يومي وياهه بالتلفون ..

ماكدرت ارجع لازم اضل شهر واخذ اجازه يومين اروح اشوف بيهه الاهل وارجع واضل هيج الى ان اكدر احصل نقل للنجف

ضليت مشتاقلهه وهي كلش حنينه وياي

تتعارك صح تطلع فيوزاتهه بس تعودت اذا ماتتعارك هي انه ادورلي سالفه انرفزهه

واضحك عليهه

بس تحبني كل عقلهه ويايه .. صح انه اقفل تلفوني واسلمه بره القسم وهي تدري بي

وتعرف وكت طلعتي بس اطلع الكاهه

مامبقيه رساله مادزتلي ..

اشعار على صور الهه وكل شويه

اشتاقيت لحبيبي كل ساعه ضبط يصير بيهه صفرين هي تدزلي ( اشتاقيت لحبيبي )

وهاي انه من الصبح للعصر يلا استلم تلفون وهي على عدد الساعات الكاهه دازتلي

مخليتني ماشوف بيومي شي غيرها

واذا اريد اطلع اشتري قوطيه ببسي اشتريها وانه اخابرهه .. واسمع كل حجي البيت وياهه

دزتلي هديه توصيل بمناسبه كملت معامله تحويل سياره وصارت لاسمي

مداليه فضه محفور عليها ( سيد حيدر )

علكتهه بالسويج ودزيتلهه صورتهه

وضليت اتشكرهه وهي حلو بيها تكلي

كبل ماتوصي هديه او تراسل بيج

تحجيلي انه بالي هيج شي اريد اجيبه

او بالي اجيبلك هديه وراح اراسل وبعدين توصلك وتعرفهه ..

اشتريتلهه خط جديد ووكت رجعتي لبيتي

بدلت خطها .. وبقيت خطها القديم بمحفظتي

هيج هواي ارتاحيت وطمنت نفسي عليها

عمها سمعت منها كلتلي سكت بعد مايدخل

بس هو وره فتره من قفلت خطها وبدلته دزلي

رساله ...

' اذا بيوم نامت وبعينها دمعه منك اصيرلك عدو ربك مايخلصك مني '

شوفتها الرساله وكالتلي امسحها وانسى كلشي

سدينا باب العيشه هذيج بعد ..

ردت اقدم على المحكمه وكلتلي هويتي الاصليه مو هنا لازم تاخذهه من تامينات البنك هناك اضم شغلاتي الخاصه

ماجازفت هنا كلتلهه .. نعقد نفس الهويه هاي لان راح ينكشف كلشي بهويتج هذيج

وضليت اقنعهه لحد ما وافقت ..

عاد قدمت لعقد المحكمه وكلت محامي بيهه وطلعت لدوامي ...

هناك وره اسبوع جاي نحجي وريري كلتلي ..

- عزيز يريد يرجع مرته

- وااالله اتبره منه لو جابهه

هذا شجاه صدك تحجين!

- امك كلتلي .. صار كم يوم يقنع بيهه ويتحجج بالجهال يردون امهم وزحمه اضل اني حايره بيهم وهمه اول وتالي يردون ام تداريهم ومن هالحجي

ويريد يرجعها وامك زعلانه عليه

- خلي تزعل حيل بي

والله لو مالعيبه الا اخابره هسه واكرهه روحه واكره بيها بس هسه يكلي شعليك تدخل بيني وبين مرتي !

-اييي

اكولك خاف هاي مسويتلهه لعبه ثانيه عليه

خاف هم طاكته بسحر مال ثول

- اطكه جا بعيده عليها !

خلي اخابر الحجي يفتحله كتاب ويشوف امره

سديته منهه وخابرت حجينا .. فهمته سالفه

وهو ضل وياي بالتلفون وفتحله كتاب ورجع كالي ..

- راح يرجعهه موضح عندي راح ترجع مرته لعزيز والله اعلم

.

.

يتبع 🌷💕