تحميل رواية «لك ياذا الجمال اليوسفي» PDF

ام فالح ...يگولون كاتل مرته نهى وحارك جهالة ، استغفرالله الله يعلم .

فالح ...كولي غيرها يمة الزلمة هذا مايسويها تلث بنات مو من صلبه رباهن وتعب عليهن ورباهن

وحطهن بعيونه وداراهن وزارع بگلوبهن خير

ما يسويها ويكتل

ام فالح ...اكلك يمة يكولون مو اكيد بس الله يعلم ، مو هوا انسجن وطلع بالعفو العام

جا اذا ماكاتل ليش انسجن

فالح ...السجون متروسة سجناء لم تثبت ادانتهم ، مو شي جديد

ياما ناس نحبست بس ظلم

ام فالح ...انه هم اگول هيچ نوبات من اصفنلها بعد الزلمة مات الله يرحمه محد يعلم بالصدك غير الخذاه

فالح ...تدرين انه توة يلا عرفت حر جان ماخذ بت خال هاني ما عبالي هيچ العلاقات شائكة وشي ماخذ من شي

وكبل جم سنة يلا دريت ام هاني وام ورود خوات

جمانة ...ههههه انه عـ عشر سنين يـ يلا عرفت عمة هناء و عـ عمة لمياء خوات

فالح ...هسة عوفنه جمانة خابري لوحدة من البنات

جمانة ...هنة يستخدمن نفس التلفون

...اي خابري وخلينه نمر عليهم نتفقدهم

ام فالح ...اروحن وياكم هم اشوف وعد زحمة مرة حزينة مكسورة لازم كل فترة امرلها

خابرت رن رن ، جاوبتني درة

سلمت عليها وگتلها ...نريد نمر عليكم نسلم ونشوفكم

درة ...بعد گلبي جمانة انه وترف يم بيت عمي فاضل امي نخربطت خذوها هاني ورهف للمستشفى

جمانة ...خيرها؟ ماتشوف شر

درة ...ماادري شبيها والله ننتظرهم يردون شر مايجيج عيوني

جمانة ...طمنينة عليها من يرجعون وان شاءالله بالليل نمر عليكم

درة ...هلا بيكم بأي وقت .. نهيت الأتصال ونزلت التلفون من أذني

رجعت باوعت لبارق ... احس الدم بعروكي جمد بارق عمري وحياتي ماتوقعت يجي يوم والتقي بمرة تكون خالتي واكعد يمها وانه ماعرفها!!

ليش هيج ليش محد گلي؟ ليش ضالة عايشة بچذبة وكل يوم انصدم بشيء جديد

...اوو بعد وراج هواي خطية عشتي يتيمة وماتدرين شي عن اهلج ولا تعرفين اسرارهم هذا اليتيم

يحجي متصنع الحزن بطريقة مستفزة متعمد يشعل گلبي ..

مسح على شاربه وباوعلي من فوك ليجوة بنظرة استصغار

درة ...مستفز

بارق ...حلقوووووومة

جو الكلمة وسوالي بأيده حركة قرب السباية من الأبهام بمعنى شي صغير

كمت من يمة ضايجة للمطبخ لگيت حمودي كاعد كبال ترف ياكلون وميتين من الضحك

درة ...هلو حمودي شلونك

محمود ...هلا .... هههههه ... هلا بيج درة

درة ...لا تغص سد حلكك انتي هم شمالج ميته ضحك راح توگف اللگمة بزردومچ

محمود ... تگلي حلگك جنة منگار بطة

ترف ...باعيله مو يشبه البطبوطة

محمود ...فلك صابچ زلمة شطولني شعرضي سويتيني بطبوطة

ترف ...ليسمعك يگول عمرك الف سنة هوَ كلك كلك ثنين وعشرين سنة

درة ...شافطين ، عفتهم وطلعت للحديقة مختنكة احس اكو غصة بصدري

خـانگتني العبرة اريد ابچي وأصرخ واملخ روحي بس ماا اگدر

حطيت ايدي على گلبي وهمست ...ولك كافي كل ضيمي من وراك شمالك هيج بسرعة ترجف

واذا خالتي شنو شفت منها انه ، كل شي ماشفت حتى جانت وياي على كد السلام

لا اجتلي ولا گالت بت اختي خلي اخذها بحضني واطبطب عليها

بارق ...مگرودة ماتگدر حتى تبچي

التفتت باوعتله بغيض ودرت وجهي عنه .. سكت وضحك بصوت عالي

رجعت التفتت شفته يباوعلي من حطيت عيني علي هزلي جتف ورفع طرف حاجبة وطلع من البيت بكبرة

گمت اشك بي صاحي واتوقع المريض هوا مو همام لا مو اتوقع صرت متأكدة هذا مريض

رجعو من المستشفى قبل لا يوصلون خابرو علينه حتى نروح للبيت

عمة نجوى لبست عبايتها اخذتنة للبيت

وضلت كاعدة انتظرتهم يوصلون سلمت على امي وكامت للمطبخ طبخت غدة النه

هاني ضل كاعد بالصالة يباوع بأتجاه امي بأهتمام بس يحاول يخفي نظراته

اجتة ترف تباوعله بطرف عينها قدمتله عصير بارد

اخذه منها وهو خازرها

خابر عمي فاضل وسأل على امي طمنه هاني ونهى الأتصال

للعصر اجة عمي فاضل سلم على امي وكعد يمنه بالصالة عينه على سبحته يسبح بيها

ويحجي ويا امي

...ام رهف انا لله وانا اليه راجعون ، ما يدوم غير وجه ربچ الكريم

هذا امره ، كل بشر تاليته بامر منه يموت

لا اعتراض على امره

ادريج مرة معدلة مؤمنة ومتعلمة وتعرفين بالدين يمكن اخير مني

والمفروض تكونين اقوة

مو هذا العشم بيج ام الكشمة ابد مو هذا العشم

وعد ...هد حيلي حر

فاضل ...الله يرحمه ويسكنه فسيح جناته التحق بالرفيق الاعلى

شدي روحج ام رهف وكومي على حيلچ ما اريدنچ تضلين هيچ ضعيفة

هزت رأسها وغمضت عيونها بدون رد جفنها مكرمش من مغمضة علامة على التعب

نجوى ...ابو ليث .. حجتها وهزت رأسها

فاضل ...خوية وعد انه اخوج ان شاءالله وتخذت قرار وادريج ماراح تفشليني وتردين زعم الاخت ماتفشل اخوها خصوصا اذا جان رايد مصلحتها

وعد ...قررت؟ شنو قررت خوية

فاضل ...ليث حمل غراضه وشال لبيته لجديد اريدنجن يمي بالبيت تكعدن بسويت ليث الشال منه ، گلبي مامرتاح ولا تغفالي عين وانتن نساوين وكاعدات وحيدجن

وهسة صحتج انتكست عادك يمنه اذا لا سامح الله وجرالج شي البيت متروس زلم

غيث سداد وهاني ومحمود

لابد واحد منهم متواجد عاد ينقلونج للمستشفى

وحدة من البنيات يجرالها شي خوانها موجودين

نجوى اخيتج يمج خاف تعتازينها

وعد ...خوية انه هنا مرتاحة

فاضل ...تزعلين اخوج وتردينه يـَ وعد؟

وعد ...مو قصدي اردك لو افشلك بس بني ادم عظمة ثگيل اذا مو شهر شهرين تستثگلونه وتملون

ويبين هذا الشي على رسومكم ، وتضلون مثل بلاع الموس

لا تكدرون تحجونها وتكولون طلعن و لا .... قاطعها عمي

فاضل ...ما نستثگل ثمرنا

نجوى ...خية وعد والله انه وفاضل تشاورنه ورايدينكم يمنه من طيب خاطر

وعد ...بس عندي طلب

فاضل ...تامرين امر

وعد ...ان شاءالله ورا ما اتحسن واصير زينه واتقبل موت الغالي واكوم على حيلي ارد هنا

فاضل ...هذا هو التردي يجرالج المهم بهاي الفترة تجن يمنه

رهف درة بوية لمن هدومچن ، واحنة نشوف شنهي من الغراض لازم ننقلة لهناك

اودي الولد يشيلونهن

امي مبين عليها متضايقة بس عمي احرجها بكلامه وخلاها توافق ورهف وجهة أحتقن وكامت بهدوء انسحبت ودخلت للغرفة

جبرونة على شي مارايدينا بس من باب الحرص والخوف علينه

بصراحة جنت ضايجة وبنفس الوكت فرحانة

لان امي بدت تتعب واذا نضل وحدنة شلون؟ بله تخربطت صار عليها شي وين ننطي وجوهنا؟

لمينة ملابسنة من العصر لليل نلم اجو ورا العشا فالح وامه وجمانة

وسداد ومحمود

نقلو كم غرض هسة والباقي خلو لليوم الثاني واخذو جنط ملابسنة وياهم

للعشرة طلعنة من هذا البيت لبيت عمي فاضل لكينة البنات سلمنة عليهن وصعدنة امي نامت

غرفة الجهال جان ضال بيها الكنتور ما ماخذينة بيت ليث صار النه ضل بس كنتور امي وترف ينقلونة باجر

رتبت اغراضي وما لكيت الدفتر والبطايق

لا البارحة ولا من لميت اغراضي ولا هسة

عبالك فص ملح وذاب

وطلعت شفت ترف واكفة كبال المغسلة تفرش اسنانها

...ترف ماشايفة دفتر مذكراتي

...لا والله

رجعت اسأل رهف گلتلي ماشايفته

الدفتر هذا بي اسرار والبطايق كلهن من حر ، اذا وكع بيد احد ما يخاف الله يفضحني

كلت الصبح من يرحون على الكنتور اروح وياهم لازم ارجع ادوره

رهف ...حطيت رأسي على المخدة وعيني دمعت ، غرفته بصف غرفتنا بس احنة سويت واله بابه معزول مثل الشقة

هوا لا غرفة بابها كبال للصالة الفوك

درت وجهي بأتجاه الحايط ورا هذا الحايط نايم عزيز الروح الماضلت معزته

ورا هذا الحايط نايم الحبيب العاف بگلبي نيشان لسه ينزف ، غمضت عيني شعور صعب ما ينوصف حتى اوصفه الكم

عشتو وياي تفاصيل قصتي وتفهموني بدون ما احچي

مغمضة عيني دقايق بدون ما اغفه وافكر بحياتي بكل تفاصيلها ، وبكل احداثها

تغيرت اخر فترة حيل تغيررت وهسة همي الوحيد عائلتي ونجاحي

رغم سداد بعده بگلبي ولهسه اتمنة يعرف انه بريئة وماعندي شي ويا ليث

بس ما احس ذيج الاهمية

سداد بعدة من ضمن اهتماماتي بس مو اهمها ..

سمعت صوت ضحكته عالي نزيت وبسرعة طفرت من فراشي مثل النايم وصبو علي ماي بارد ثلج

درة ...اسم الله شخيرچ؟

رهف ...سمعتي

درة ...يضحك تلگي يخابر خطيبته

رهف ...علي بالعافية عبالي امي عيطت ما سمعت زين

رجعت تمددت اراعي الغصة اتنفس بعمق بس حتى ما اشهگ وافضح نفسي

ويمكن شهگتي توصله ويسمعها ويتشفة بيَ

گعدت الصبح كمت غسلت وجهي باوعت لنفسي بالمرايه متغيرة

احس الروح انسلبت مني صرت مثل الجثة

من بعد عين خالي مالي واهس بشي حتى الضحكة ما اشتهيها

لفيت شعري ولبست شالي نزلت فتت للمطبخ شفت فلك واكفة ع طباخ تسوي بيض وسفانة تغسل كلاصات

وسداد كاعد ومخلي ايده ع عيونه ، قاطب حواجبه متألم شبي ما ادري

صبحت عليهم وشحيت نظري عنه ما اعرف اذا رفع رأسه وباوعلي لو لا

مشيت يم فلك سألتها اذا اكدر اساعدهم بشي

كالت حطي الاجبان بالصحونة

...وينهن

سكتت لحظات وراها همست ...ع ميز يم سداد

ما اهتميت ومشيت للميز صارت وكفتي كباله تقريبا ضليت اقطع بالجبن واوزعهن على الصحون

فتحت سفري الگيمر ، رفعت راسي وحجيت بصوت مسموع

...فللللك هذا الكيمر هم احط منه لو لا؟

فلك ...حطي صحنين ثلاثة مو كلها تاكل بيض

سمعت صوت ضحكة سداد باوعتله يضحك مستهزء بطريقة مستفزة ..

رهف ...اكو شي خوية؟

اختفت ضحكته ضل يباوعلي لحظات بعدها كال ... انه ما اكل غير الاجبان والكيمر بالريوگ نسيتي؟

رهف ... ما ادري ما عرف شي عنك

ما اعرف شنو تحب وشنو تكره

لونك المفضل اكلتك المفضلة ولا اعرف شنو تحب تسمع من تضوج

ولا حتى مواهبك ما اعرفهن

...حجيت بصوت ناصي

سداد ...خير ان شاءالله

حجاها وهز رأسه ورجع عقد حواجبه متألم وفرك وجهة حييل بحيث صار احمر ..

ردت اگله الظاهر الليل كله خلص مكالمات ويا الحب

بس گلت ما اريد احسسه ان اني مهتمة او افكر وهيج شي

عزة نفسي وكرامتي ما سمحولي

اعتقد رخصت روحي هواي تحت سقف هذا البيت ، اجة وكت الكشمة

لازم تگعد وتسترجع كرامتها وكبريائها

خلص زمن ليث وسداد هسة اجة وكتي ..

راح اوصل لگلبك ولأعصابك وادمرهن دمار راح اخليك تفقد اخر ذرة صبر عندك وتصيح التوبة انه رهف بنت جعفر كشمة آل نعمان .. مو بس اعصابك وگلبك حتى روحك احرگها .

سداد ...الظاهر ماراح ينزلون وانه محتاج الريوگ حتى اخذ علاج

مو احچي وياچ؟ ررهف

رهف ... ها؟

سداد ...انطيني الكيمر من يمچ

رهف ...صار ، اصبلك جاي؟

سداد ...لا انه اصب لا اتعبين روحج

رهف ...شسالفة اخوي انتَ ماكو تعب

صبيتله چاي وحطيته گباله وجبتله صمونه وخبزة ، جنت اتصرف ويا بشكل كلش طبيعي حتى انه استغربت من روحي شلون هيج مقاومة

وما محسسته بشي ولا عبالك جنة واحد يحب الثاني

ضاج حيل وضل ينافخ عيونه صارن دم ، جهزنة كل شي اخذنة السفرة مديناها وبدو يتجمعون ع ريوك

رحت للمطبخ شفت سداد ماماخذ غير قطعة صغيرة من الصمونة ، حاط ايده ع عيونه يفرك بيهن

من حس بحركتي رفع رأسه شحيت نظري عنه قبل لا يحس انه منتبهتله

اخذت قوي الجاي وطلعت ، عمة نجوى گالت ...وين سداد

رهف ...بالمطبخ استبطاكم وكعد يتريك

نجوى ...صحيله امي خل يجي ويانة على الواهس

هزيت رأسي ومديت رأسي بعدة ع وضعة

...سداد

رفع رأسه باوعلي عيونه صارن كلش حمر هافتات

رهف ...عمة تگول خل يجي يتريك ويانة على الواهس

سداد ... كليلها شبعان

رهف ...اوكي ، عفته ورحت كتلها يكول شبعان وكعدت اتريگ وياهم

صرنة سوية بنفس البيت كل ما اتلاگة ويا ما اباوعله ولا كأن اشوفة

اعبرة واكمل طريقي

حاربته حرب باردة بديت استعيد بيها كرامتي وهوَ بدأ يفقد اعصابه واخر ذرة صبر عنده

ترف ...حموووودي سرمووودي بطبوطة

محمود ...وتالي ويا هاي العطلات لا تگليلي بطبوطة

ترف ...سوي هيج .. كورت شفايفي

محمود ...الله ينتقم منج، حجاها وغطة حلگه

ترف ...هههههههههه جنك لولو كاتي وانه اكول وين شايفة هذا الوجه من قبل

ضل يخرط بخدودة ويصيح بجزع ... صرت لولو كاتي صرت لولو كااااتي بوية فاضل الحگ محمود صار لولو كاتي بزود ست ترف

ترف ...ترة لولو كاتي حلوة ليش منفعل؟

محمود ...غير لولو كاتي نثية ، مثلچ انه ذكر مو نثيه

ترف ...ماكو فرق

محمود ...راح اسطرج والكفل زينب

ترف ...تسطر بت عمك؟

محمود ...لا ما اسويها

ترف ...تسطر عرضك؟

محمود ...لا ما اسويها

ترف ...تسطر شرفك؟

محمود ...عمي كفيلچ العباس ما اسويها بوية فاضل الحگ بت اخوك خبلتني

ترف ... مو صوجك صوجي انه طلعت وياك

محمود ... هو غير انتِ ساحتني من فراشي علمود اخذج للدكان؟

ترف ...النوب اجي وحدي

محمود ...انوم توثية براسچ ماعدنة نسوان يطلعن وحدهن للدكاكين

ترف ...تنوم توثية برأس بت عمك؟

لطم خدة وصاح ...ولك بوية فااضل الحگ ابنك راح يشگ ثوبة ويركض بالشارع عريان

ترف ...اكلك شيل العلاكة مو عيب مخليني مرة واشيل علاكة

محمود ... ما اعرف بهاي السوالف ما ماشي ويا نسوان جيبي جيبي بس بشرط تسدين حلكچ بعد ما تحجين موافقة؟

هزيتله رأسي بس ما شافني لان انه امشي ورا

محمود ...موافقة ترف؟

رجعت هزيت راسي

محمود ...ولج موافقة ترف احجي ؟

ترف ...مو كلتلي بشرط ماتحجين سكتت وهزيتلك راسي

محمود ...يلا اتفقنة سكتي لحد مانوصل وانطيج ربع

سكتت هو يمشي كدامي وانه ورا بخطوة يمشي على كيفة مترهي ، كوة يجر بروحه

والله لهناك وطلعلنه جلب ، محمود گبل جر بوش و وگف حط ايده يمنعني اتقدم

...ولج هذا مسعور هسة يملخنة

...يااااا

...وسماااا من اكول ثلاثة تدورين وجهج وترررركضين بعكس الاتجاه

...شيركضني؟

الجلب نبح حيل علينا ومحمود صاح حيل دوري وركضي

وما تشوفون بس غبارنة ورانة احنة نركض والجلب يركض ورانة ينبح

وانه ومحمود نصرخ خايفين

انتبهت بالكاع عصة وصلابيخ وكفت بسرعة دنكت عليها شلتها وضليت انش بالچلب ومحمود بعدة يركض ما يدري بيه وگفت

الجلب ينبح ويتقربلي وانه انش بي خاف وشرد مني كل ما يوگف اشمر علي صلبوخ

التفتت شفت محمود شابگ العلاكة واكف بمكانه بعيد عني

حطيت ايدي على خاصرتي وصحت ...عمي فاضل الحگ ابنك محمود صار لولو كاتي

چبج الزلم اليخوفها چلب

اجة يهرول باتجاهي ...عندي خوفة من الجلاب مو بيدي عضني شلع لحمة من رجلي من جنت زغير

ترف ...يااا اشوف الاعراض بعدها بيك

محمود ...راح ابسطچ

ترف ...تبسط بت عمك؟

حط ايده على حلگه كتمه حتى ما يغردلي انواع الشتمات والغلطات ..

دخلت للبيت اخذت العلاكة وصعدت شافتني سفانة ع درج خزرتني ، وگالت بصوت ناصي

...شوكت الله يخلصنا

ترف ...من شنووو يخلصچ عيوني؟

سفانة ...لا هيج مو وياچ

ترف ...لا عيوني اريد اسمع واعرف من شنو يخلصچ؟ اذا قصدچ من عدنا عيوني ترة عمي هوا الجابنة لبيته مو بيتچ

باوعتلي بنص عين رادت تنزل ، كملت على حجيي وانه امنعها تنزل

...شفتج صار خمس ايام تخوزرين بينا وامي وخواتي تضايقن وساكتات بس انه ما اسكت والقران اوگفچ على تك رجل مو عبالج عمري 13 يعني فقيرة وماعندي كيد اغطج بالنهر اطلعچ ناشفة

ترة انه اسم مو على مسمى خل يكون بعلمچ

وياني اياج اسمعج تشمرين حجي علينا مرة ثانية منا اشمرج

واشرتها بعيني ع درج

...واخليج مكسرة عيوني

عفتها وراي صافنة وكملت صعدت نزعت العباية والشال ورتبت اغراضي بخانتي

انطيت منهن شي لخواتي ..

درة ...ولجن والله متت الدفتر وين راح والله عقلي راح يوگف لا هناك لگيته ولا هنا

وامي ماتذبة تدري بي خاص بيه

رهف ...ولا احنة نذبة بس والله ما ادري وين ممكن يكون ترف الله عليج مسوية بي جريمة

ترف ...وانه شكو؟ شو انتن صافات سوية وما اشوفچن غير بوكت الاكل لا اعرف شي عنجن ولا اعرف غراضچن

درة ...مو انتِ كل ما تخنسين تسويلچ جريمة

اشرت على روحها وگالت بصدمة مصطنعة ...انه اسوي جريمة؟ يعلم الله انه بريئة

خصوصا من سالفة دفترج جديات ما ادري بي وين وروح خالي

من كالت وروح خالي انعصر گلبي ودرت وجهي عنها

ترف ...شبيچ مخبوصة هيچ شنو بي الدفتر؟ بس لا كاتبتلج بي طرگاعة

رهف ...شسالفة شعدها درة

درة ...لا بس بي ذكرياتنة ويا خالي

ادور ادور ماكو ما لگيته ، مرت الايام هنا يوم يجر يوم كل خميس نروح لخوالي نحضر الخميسية ونرجع بالليل

اخر خميس قبل الاربعينية امي رادت تسوي ثواب على روح خالي

نزلت گعدت يم عمي فاضل وحجت ويا گلتله من رخصتك خوية رايدة اسوي ثواب الاخوي واعزم

و اوزع منه

گللها مرخوصة

وعمرة نجوى گلتلها نروح للسوك نتسوگ والبنات يعاوننة

صدك ماكالن باطل طلعن للسوگ ، وامي نخت سداد لان ماخذة علي

انطته فلوس وگلتله يجيبلها دجاج

سداد ...عمة الدجاج خل اذبة ع مطعم يشوونة النه

وعد ...شتكولين خية

نجوى ...خوش حجي واحنة هنا نسوي مرگة وتمن ومقبلات هم ياله نلحگ

وعد ...هذا هو عمة اخذة ولو راح اتعبك بس شسوي بعد ماعندي غيرك وانه مابيه اروح

نجوى ...شسالفة خية وليدچ هو

سداد ...انه بالخدمة عمة بأي وقت

راح سداد جان الاربعاء العصر

ثاني يوم من الصبح گعدنا بالمطبخ انه ودرة وامي وفلك وعمة نجوى

نركض ركض نجهز ونسوي المطلوب

فدك وترف رتبن البيت ، امي عزمت كل عمامي وعماتي

الناس من الـ10 بدو يجون والبيت متروس عالم ، كلهم اجو هم وعوائلهم لان امي وصت عمة نجوى هيج تعزم

تكول خالج حر جان يحب العزايم ويحب البيت ينترس عالم واطفال

ام فالح اجت جايبة جدر دولمة وگالت ... سويتها على روح المرحوم

تذكرت مرة من ايام گبل اجانة وجنة مسوين دولمة وحباها الله يرحمة

امي مسحت عيونها بشالها وشبگت ام فالح وضلن يبچن ثنينهن ..

صار الغدة مدينة سماط بالهول للنسوان وبالاستقبال للزلم

وسداد وهاني اخذو سفريات وزعوهن ع ناس المحتاجة ، نزلنة الاكل وصدك صار ذاك الغدة المعدل

گعدت ام بارق رفعت رداناتها وطلعن سواراتها الذهب يلصفن ، منا لهنا بكل ايد لابسة ستة عراض

تكول اول طيحتهن والمحابس تارسات الاصابع

حطت الدولمة بحلكها تذوقتها وعفست وجهة ...خية ام فالح حامضة ومابيها حلا شني الشكر غالي يمكم

ام فالح ...لا احنة هيج نحبها وسويتها مثل مانحب ومتعودين

ام بارق ...دجاجكم بي ريحة فحم

نجوى ...اي زعم مشوي على الفحم كلش طيب صاير

ام فالح ...اي والله عجبني وين عدمن شاوينة؟ علمود من نشتهي دجاج مشوي اودي فالح يجيب النة

لمياء (زوجة خالد اخت ام بارق ) ...بس ريحته ماتنجرع فحم

ترف ...اكلن مركة بمكان الدجاج وفضو السالفة

امي كرصتها حيل بخاصرتها وجه ترف صار احمر ، كتمت صرختها

لمت شفايفها وضغطتهم

بارق ...مرگتچن ماصخة

نجوى ...هاج المملحة خية

جمانة بهمس ... شـ شعاجبها هـ هاي كلشي ما عـا عاجبها

ام بارق ...هاي الباذنجانية ياهو مسويها

رهف ...انه مسويتها .. حجيت بيني وبين نفسي بيچ زود وعيبي عليها

ام بارق ...هي حلوة طيبة، مدت الخاشوكة واخذت منها لكمة وكملت حجي

... بس تدرين شناقصها؟

صكيت على سنوني وگلت ...ناقصة عصرة دم بشر وتصير اطيب

رفعت السجينة مال الفواكه وحطيتها بنص التفاحة بقوة وانه اباوعلها بغضب

هي بلعت لسانها حتى ما كملت حجي ..

ام فالح همست ...فلاشة صكرتها

ضلن يضحكن ويغطن بوجوهن بحجاباتهن

خلصنة غدة وصبينة الچاي ، البنات يغسلن مواعين وانه اصب جاي والم بالهول

ام بارق اخذت رشفة من الچاي وگالت ...جايكم خفيف مايعدل الراس

ترف گلتلها بهدوء مستفز ... اذا الچاي مايعدلة احنة نعدلة

ام بارق ...شلون؟

ترف ... اسويلچ مساج خفيف بهاي ايديني اللطيفة

ام بارق ... يا هاي تتطنز علية

ترف ...هاي فوگ ما اعرض عليج خدماتي مع الأسف عليج عيوني

هضمتي بت حماچ عمة

حجت وحدة من عماتي خوات ابوي ... تعاي يمة تعاي عصريلي راسي موتني يوجعني

گامتلها ترف عمتي حطت راسها بحضن ترف

عمتي اسمها نورية گالت لترف ...هاي انتي هم مشتغلة

ترف ...جاشلون من الصبح كاعدة

نورية ... يا مشتغلة ومفترة والدنيا بيها حرورة وهيج ريحتج حلوة ترد الروح

يكون اخذج لزامل ابني من تكبرين يحب النسوان لمرتبات لنظيفات

ترف ...خاف يطلع راسه مصلبخ ترة انه مااخذ واحد اذا موحلو

نورية ... ياااع جاشنهي ولج هذا زامل بنات عمامة كلهن عاشگاته بس ماهن حلوات مثلج انتي جنج تيناية رايجة وريحتج عنبر

ترف ... جا ماشايفته ماكدر احكم

شالت راسها وصاحت ع بتها ...ولج زويبة تعاي تعاي طلعي صورة اخوج بهذا مالج الدلكسي

زينب ... يا اخو منهم

نورية ...الحلو

زينب ...ها خوش

ام فالح ...هههه يااخية تسمون زامل الحلو ومشينها علي هسة يصير متكبر ومغروور

نورية ...شحدة اشلخة شلخ

زينب ... هذا زامل شوفي

اخذت النقال من ايدها تراوي الترف ...بس ترة بالصدك احلى هذني لدلكسيات يخربن الويه

ترف ...حلو زين علي اميه العجين

نورية ...يااا ولج شحلاته روحي ولي ما اخذج اله كون من تشوفينه تكولين يجنن يموت شحلاته

مو علي اميه العجين

ترف ...جا موحلو كوة هية والله يالله شتحطيلها وتطيب

سفانة ...عمي ترف تشيلكم هههههه

ترف ...ههههههه مثل ما مشيلة بيت اخوج ، قبل

لا تصفنين بوجهي سمعتج مرة تسولفين بالنقال تكولين لاختج شيلت بيت فارس اخوي ومرته ماتصعب عليه وعد وبناتها

الكل صفن ترف فجرتلها قنبلة ، الانظار كلها توجهت السفانة بهت وجهة صارت صفرة

تلعثمت وكالت ...لا تجذبين عيب

ترف ...وانه وين اعرف اسم اخوج؟ وين اعرف اخوج عازل ؟

غير من الحجي السمعته منج وانه ما اجذب بعدني طفلة ملاك بريء من الجذب

نورية ....ياع شوف شوف خايبة وانتي ياهي وتشيلين حرمة اخونة وبناتها؟

وين نجوى

ترف ...ونجوى المگرودة شعليها

سفانة ...شبيج عمة خليج حگانية شوية تصدكين بحجي زعطوطة عمرها 13 شني السالفة جا هية هيج

ام فالح ...يمكن البنية فاهمة غلط

لمياء ...والله ما اظن بس يمكن سفانة خايفة على زلمتها بعد تعرفن الماضي ومانريدة يتكرر

ترف غطت وجها وناحت من سمعت حجي عمة لمياء ...يااا بوية يا جعفرر يحجون على بنيتك العفتها ابطن امها ورحت

يابوية هضموووووني يا عمي فاااضل وينك هضمو ترف ياعمي

وتنوح بصوت مسموع ... غطيت حلگي بأيدي انشلت حركتي فلك هاي ترف المايعة العاقلة هيج يطلع منها

نورية بعصبية ...ولج سڤن والله ثم والله اذا وعد طلعت من هذا البيت حتى لو برضاتها اذب الصوج بيج واجيج واعضج بزردومج اشلع واذبة للجلاب

ولج وانتي ياااااهي تردين تطردين ارملة اخوي وبنياااااته وياهوووو بظهررررج؟

سفانة ضلت تبجي لان صارت بموقف محرج كدام الكاعدين ، وكالت ببجي ...يمكن فاهمتني غلط لو تجذب

ترف بنحيب ...گالو على بنيتكك چذااابة يابوية ياجعفررررر تعالي يابوية تعااالييييه وگابلني وابجي وياي

نورية ...ولج سكتي ترفه لا تبجين لا تخليني اكوم امردها مرد هسة هاي السفن شايفة روحها عووود بس ههههيية اسمها انگريزززي

تحجي وتهز بحلگها ماعاجبها

انه وام فالح باوعنة لبعض ولمينه ضحكتنة لان المسرحية صدك تضحك

رهف ...ترف حبيبتي كومي صعدي ارتاحي تعبتي من البجي صارلج ساعة ترشكين بالدموع

نورية ...لا ماتكوووم تكووووم هاي الصفيرة سفن تولي من يمي تريد تطرد مرت جعفر ماصدكنة ردت لينه وترد الماي لمجاريها

تطلعلي زعطوطة سن العگل ماطلعلها ويهة مخنفس تهدم كلشي وتخرب المجرة وتكطع الماي

سفانة صعدت تركض وتبجي وعمتي كابلت ترف ثنينهن ينوحن ويبجن ، ترف شالت طرف صبعها مسحت دمعتها وگالت بنعاوي تتمسكن

ترف ...چا بعد شنسوي عمة ابونة راح وخالنة الربانة رررراح ، وصرنه يتيمات من الصووووبين

ورجعت حطت ايدها على عيونها

ما تحملت اكثر كمت من يمهم لامة ضحكتي كوة تصادفت ويا سداد يم الباب جاي يفوت

فسحتله المجال ، باوعلي لحظات وعبر صعد فوگ

عمتي نورية ماسكتت ماخلت واحد ماگلتله ع حجي هذا وهو صحيح طبعا ترف سامعتها واجت شكت يمي بس انه سكتتها وكتلها سدي الموضوع وغلسي

عمي فاضل حجة ويا جنتة عاتبها خلاها تصير بهدومها بحيث سفانة شكد ضجت عليها تفشلت هواي اليوم رغم انه ما اجرعها

درة ...عفتهم يتعاتبون ورحت للمطبخ اكمل تعزيل بي لگيت بارق كبال باب المطبخ وعمتي ام فالح كباله تحجي ويا وصوت فالح بس فالح ماشفته وين واكف

بارق رفعلي تك حاجب استفزني ، صوته جان عالي

گال ...جا شنو عمة مايجي يوم ودرة تعرف حلقومة تصير اختها من امها وابوها؟

كلها تدري بس البنات الصغار مايدرن يوصللهن حجي اذا مو اليوم باچر ............

درة ...عفتهم يتعاتبون ورحت للمطبخ اكمل تعزيل بي لگيت بارق كبال باب المطبخ وعمتي ام فالح كباله تحجي ويا وصوت فالح بس فالح ماشفته وين واكف

بارق رفعلي تك حاجب استفزني ، صوته جان عالي

گال ...جا شنو عمة مايجي يوم ودرة تعرف حلقومة تصير اختها من امها وابوها؟

كلها تدري بس البنات الصغار مايدرن يوصللهن حجي اذا مو اليوم باچر

شهگت بصدمة فكيت عيوني على وسعهن اباوعلة بسرعة التفتت ام فالح وفالح مد رأسه گال مستغرب ...درية!!

ورجع باوع لبارق بنظرة عتب ، ضليت مصفصفة اجيب الحجي منا وارجعة منا

احس روحي ما جاي استوعب وانسلب عقلي

ام فالح تقربت مني كضتني من زندي وگالت ...بس صلي على النبي وتعاي گعدي نحجي

عيني مركزتها على بارق يباوعلي ببرود ورافع طرف حاجبة

فالح تخطى بارق واجة وگف كبالي امه باوعتله بحزن ورجعت حجت ...عمة درة مو احجي وياج

فالح ...درية؟ تسمعيني الوووو درية الوو ماكو تغطية

ام فالح ...مو وكتك

فالح ...ولج درية باوعيلي بعد اخوچ

درة ...الدنيا وگفت وعقلي جمد بعد ما استوعب يمكن راح اتسودن

جمانة ... يـ يمة وينج

ام فالح ...روحي منا هسة

جمانة ...باوعتلها مستغربة ورجعت باوعت ع باب لان درة مركزة نظرها على الباب

شفت بارق واگف باوعتله بأستغراب شنو جاي يصير

درة ...شبيكم ساكتين احجو شلون ورود او حلقومة اختي

شلوووون صارت

دخل بارق وكال بهدوء مستفز ، وهو حاط ايدي بجيوبه ...سهلة انه اشرحلج امج اجت يم ابوج وطفة لگلوب تسع اشهر وصارو ورود وهاااني تؤم مثل الكمر صلاوات

فالح ...سخيييف اسكت

درة عيونها تجري وتباوع لبارق بحقد وامي خطية فقيرة ماتعرف تتصرف بهيج مواقف تسكت بس عيونها تسولف خوفها

حتى فالح ابو لسان عجز عن الحجي ماعرف يگللها شي ضل مصفن درة مسحت وجهة وباوعت لفالح

...هذا جذاب

...هذا بعينج اسمي بارق

فالح ...اسمة ضارق حتى هذا لا تكولين جنة ضرگة بشة ويريد يغثج يغديلج فدوة ، مسحي دموعج يله

بارق ...شسويتلها؟ غير حجيت الصدگ مااريد دريتنا تضل عايشة بكذبة هو هذا ليسوي زين مكروه

فالح ...لا بارك الله بيك ، ولييي اطلع

نجوى ...دخيلك يا علي شنهي شمالكم

درة ...ولك انتَة ناااقص ناااقص عمري ماشايفة بشر مثلك ماعندك احساس؟ ماعندك گلب

ليش هيج تسوي ، مخليني عمية وماادري بشي ولك ليش هيج تتصرف وتنقلي الاخبار بطريقة موجعة

نجوى ...خبريش مردتوووني احجو .. حجت بغضب

ام فالح ...درت حلقومة اختها

نجوى ...لا والوووووعد ياهو گلالهاااا

...بارق حجة وسمعته

...لا متعمددد يسمعععني متعمد وحجاااها بطريقة مستفزة حتى يقهرررني روح بارق ابشرك ربحت وقهرتني واخذت ثارك مني بس كون الله لا يوفقك

نجوى ...يمة درة لا تبجين بعد عيني الموضوع هذا قديم وما ينحجي بي لهذا السبب ماتدرين

حطت ايديها على راسها بألم ...شهووور شهور يمكم اشوف خالتي وماادري بيها خااالتي لا يوم ولا يومين شهور

محد گلي هاي تصير خالتج!!؟ شلون تعرفون تكتموووون هيج والله عجيب والله عجيب

نجوى ...غير هية عدها مشاكل ويا نهلة الله يرحمها وتگاطعن وتردين الصدك ماتريدجن لهذا السبب ماحجينة

درة اختل توازنها لزمها فالح بسرعة من خصرها انه شهگت بخوف

فالح ...رررراح تطيييح جمانة شوفيلنة عصير من الثلاجة

جمدت شبيج تحررررركي

جمانة ...خ خووش

نجوى ...اللهم صل على محمد وال محمد عين ماصلت ع نبي كعدها عمة ، عتبي عليك بارق شمالك عمة هذا انته المعدل تطلع منك هيج سالفة

ام فالح ...والله زعلانة منك

درة ...الله اكبر ششوف بعد وبشنو انصدم والله بعد ما اتحمل والله رووووحي راحت انسحنت سحنننن ، رووووووحي رااااحت

بارق ...نروح وراها بتكسي ونرجعها

فالح ...ز*** انعل والديك هسة اطلع بررررة لا تخليني اكوم افرك حلگك راح يصير شي بالبنية من وراك

باعي درية السالفة ومابيها خالتج ما عدها خلفة وهية وعمج بحسرة الطفل ، امج جابت هاني و ورود توم شسوت انطت ورود لعمنا اسد الله وخالتج وتسجلت بأسمهم وروبوها

نجوى ...ومحد يكول هاي بت جعفررر كلهااا كالت بت اسد الله حتى جدج الله يرحمة جان عدل خالتج راحت لخوالج بحجة مريضة وحبلة ورجعت جايبة ورود كلولة اسد خلف بنية ومات وهوا مايدري ورود بت جعفر مو بت اسد الله

درة ...شلووون؟

ام فالح ...خذو البت من القابلة ودوها لخالتج خذتلها اسبوعين وكالو جابت بنية ، كلها تدري الا جدج لان

راد اسد يعرس عليها ومايرضا واحد ينطي ضناه لواحد ثاني وان جان اخو

درة ...وانه اكول ليش همام يسميني حلقومة!! لان انه وحلقومة من نفس الام

بارق ...ونفس الوجوه بس لون البشرة والعيون مختلفة

درة ...شنو مضموم عني بعد؟

امي وعد تدري بسالفة ورود

نجوى ...لا ماتدري ماگايللها جعفر الله يرحمه ذاك اليوم سولفتلها انه

وانصدمت وانقهرت عليج مارادت تگلج

فالح ...عمي الواحد حقه ينصدم فجأة يطلع عندة اخت لو انه جا هسة امدد هنا وماد لساني جني صخل

درة ...ولكم رررراح امووت

فالح ...اجليها حبوبة خل اعرس بالاول النوب موتي

درة ...فاالح

نجوى ...مو وكت شقاك

فالح ...اغيرلها جو غير انه مسحون سحن عليهااا هاي درررررية ولكم دررررية ، درة گلبي

خصمت عيوني بشك فالح شعندة ويا درة وليش هيچ مسحون عليها؟ معقولة فالح يحب درة

والله وتطلع منه فالح اخوي عمرة ما عشگ مو بعيدة يطلع واگع بدرة من النظرة الاولى

اذكر يوم رفضت بارق هو جان موجود من اجة وصفها النه

گال سميرة مملوحة ، طويلة ، وملامحها حلوة تنحب سبحان الله اكثر من اختها

رغم اختها اجمل بالملامح بهوواي

هذا عود ماحاجي وياها ولا مسولف وياها

شحال من شافها وتعرف عليها؟

ضلت عمة نجوى تحجي وياها وبارق كل شوية يعلق تعليق سخيف مستفز ..

فالح من منه اخذة وطلعو برة كامت درة صعدت بسرعة

عمة نجوى شاورت عمة وعد ولحگت درة فوگ

وبهيج تكون العزيمة انتهت ..

فلك ... انتهت العزيمة الناس فضت دخلت للاستقبال انظفه لگيت سداد مخلي ايدي على رأسه مدنگ

وفالح گباله يباوعله بحزن

رفع رأسه فالح من حس بيَ ورفعلي طرف حاجبة بمعنى طلعي

درت وجهي سديت الباب بس تعمدت اخلي بي فتحة صغيرة حتى اكدر اسمعهم حسيت الموضوع يخص رهف

كل احنة نعرف سداد يحب رهف ويمكن رفض يخطبها لان عرف ليث يريدها

من اجت رهف لهنا تخبل سداد وصار كل وقته مصدع ومريض وحابس نفسه بالغرفة

ابوي مرة سمعته يگول الامي بصوت ناصي ...التاريخ جاي يعيد نفسه ما اريد اخسر واحد من ولدي

ردت امي ...بس البنية خوش بنية وسداد متأذي سويلك حل

فاضل ...وخطيبته؟

نجوى ...يفسخ احسن ترة يضلم البنية شني ذنبها؟ تاخذ واحد گلبه يم ثانية ، النوب هية بت عمة واسمها مربوط باسمه طول العمر مايگدر ينساها

فاضل ...لا نجوتي لا اذا سداد خذه رهف الاخوان يتخاربون خلي سداد يكمل طريقة ويا خطيبته والبنية حلوة وزينة يجيها نصيب زين وننطيها

نجوى ...رويحتي

فاضل ...ها يَ بعد فاضل

نجوى ...لا تخلي وليدنا محروم من عشگه طول العمر سويلك شي ، انتَ ماتصعب عليك سالفة ليش هنا صرت مربط وماتعرف شتسوي

يعني العالم تنگلك تحل طلايبها وتنگلك الزلم من تعشگ وتصعب عليها .. تروح وتحلها وتاخذ للزلمة الحرمة العاشگها

و يم وليدك ماتگدر؟

فاضل ... سداد اذا خذه عشگه يخسر اخو

واذا ربح اخو خسر عشگه ، وهاي معادلة صعبة انه اعجز يمها

الولد ولدي والبت بت اخوي ومن معزة فلك وفدك

انه ما كاعد اعرف شلون أتصرف يمهم وشلون احل هاي القضية

بيومها صدك انقهرت وماكدرت انام ، كل شوية اكعد افرك وجهي حيل حتى ابعد الافكار من رأسي

ارفع راسي ليفوك اتخيلهم هسة شلون نايمين غرفة بصف غرفة الله يساعد گلوبهم

رجعني للحاضر صوت فالح ، قطع الصمت الجان مسيطر على المكان بسؤال ... سولفلي سداد شوصلك لهاي الحالة

لا ليلك ليل ولا نهارك نهار ، عيونك تعبانة ضعفان والي مسومرك ياتعب منهن؟

سداد ... شحجيلك فالح حتى صرت ادخن

فالح ...لا يا مطي هاي من يمته

سداد ...من ذيج الليلة الكسررت ظهري ومردت گلبي

فالح ...سولفلي

سداد ...شسولفلك فالح انه الهوى صرت احسه كاض خناجر من يدخل لريتي يأذيني

انه صرت صاحب الليل ، عيني رافگها الدمع

الذكريات صارت رفيقتي

مرات اسأل عنها النجمة ، ونوبات انشد الگمر

اگله سولفلي شخبارها؟ شلون دلالها بعدة يهواني؟ لو مجفاها صدگ؟!

من هنا وانته قيس انه شلوني وشمالني

فالح ...هذا كله علمود كهف؟ الله يساعد گلبك من يمي انقهرت

سداد ...فالح انه فوگ لفراگ مغدور من اخوي طعني بگفاي

فالح ...عوف هاي السالفة كلها وكمل حياتك ويا الهام هية تنسيك رهف وابو رهف بعد

سداد ...لو يتجمعن نسوان الدنيا كلهن ما يعوضن ولا يسدن الفراغ العافته بگلبي

اااخ گلبي اغبر مايرضا ينساهاا

فالح ... هسة شلون؟ فهمني شتسوي

سداد ...ماادري جني واحد غرگان وگباله حبل يجاهد حتى يكض الحبل وينقذ نفسه وبنفس الوكت البحر يسحبه للقاع

فالح ...انته من جماعة القاع گول كاع عوف ثقافتك

سداد ...ردتك عون طالعلي فرعون

فالح ...والله انه فالح مو فرعون المهم سداد احجي ويا ليث گله راح افسخ واخطب رهف

سداد ...الهام شنو ذنبها تعلقت بيه صارلنة شهور خاطبين

فالح ...شني ذنبها تاخذك وانتة ماهوايها وبنفسك بنية ثانية؟ عاد من هسة تعوفها احسن

سداد ...بله هاي نكول صح وليث؟ عبالك ماحجيت ويا ولك حجيت ورا ما گلتلي رهف السالفة

فالح ...يمتة من مات حر

سداد ...اي من مات حر الدين ، گتله خوية عرفت السالفة وانه هم ربطت بيومها مبايلي اختفة وفجأة لگيته

تكدر تكول اكتشفت حجيها صحيح من تذكرت سالفة المبايل

فالح ...هاي يمتة

سداد ...بذيج الليلة السودة ، طب ليث للغرفة دقايق وطلع من جان يمي انه ملتهي اصحح واحجي ويا وانه مدنگ ، وبليلتها گبل لا انام اجيت اشوف مبايلي واحط منبه علمود الدوام مالگيته

دورت شوية بالغرفة لگيته محطوط بالشباك

استغربت ، شوصلة هنا؟

اسمع فالح انه عمري ماحاط نقالي بالشباك هاي اول مرة وليث من دخل للغرفة ضل يفتر بالغرفة وقبل لا يطلع التفت گلي اليوم متواعد ويا رهف جوة الحلاوية

انه استغربت دقايق ونزلت وشفت الشفته مااكدر احجيلك بس ماجان كلشي واضح بنسبة مية بالمية

وراها صعدت ودورت نقالي لكيته بالشباك

فالح ...افهم منك دورته من صعدت مو من طلع ليث

سداد ...اي بالضبط هيج

انه غبي ليش ماكعدت وياها وتفاهمنة ليش مافكرت زين وربطت

فالح ...لانك مطي ما شكيت بليث شكيت برهف عبالك البت غريبة

انه ادري ليش شكيت بيها وما شكيت باخوك لان ماتعرف تربيتها عبالك هاي اخلاقها بس انته مطي

وارتكبت خطأ جبير صار لازم تصححه بس كملي بالاول من واجهته الحيوان شگلك

سداد ...نكر بس وجهة يكول كلشي عرگ وتوتر ضل يزخ العرگ منه وصار احمر انفعاله يثبت حجي رهف صح

وكذلك موضوع المبايل من كتله ترة عرفت داز رساله من نقالي نكر كال ممسويها بس وجهة وضحلي كلشي عرفت بيومها انه شگد غبي وحيوان خسرت البنية الاحبها بسبب اخوي

الحل بأيديه جان بكل بساطة احاجي ابوي واعقد عليها ماراح يوصللها اذا صارت بذمتي

بس انه حيووووان غبي

فالح ...رحم الله امرئ عرف قدر نفسه

نجوى ...فلك .. كمزت التفتت باوعتلها

...يلا يمة نظفي شمنتظرة

بنات عمج خلصن

رهف ...الولد جوة من يطلعون انظفه

شلون ادخل انظفه وادنك كدامهم

نجوى ...يمة الحجج يمة طلعي للطارمة محد بيها

بدون جواب طلعت انظفها ما حسيت غير فالح وراي يتحمحم عدلت وكفتي والتفتت شفته يباوع على الحديقة شكد شريف فليح مايباوع

فالح ...انه انظفها طبي جوة

فلك ...لا لالا امي تموتني بعدين تضل كل شوية تكول سووودة عليه عمه فالح نظف الطارمة همدااااج فليكة

ضحك بصوت عالي وتقرب علي اخذ المكناسة من ايدي ...انه اكنسها انتي لكطي الحديقة

باوعتله رفعلي طرف حاجبة ، ارتبكت من قربه

احنة مسوين سور ناصي للحديقة

باوعتله وباوعت لفالح يباوعلي ومركز على وجهي

توترت بلعت ريگي بصعوبة ورخيت شالي

گال ...يله عبري للحديقة

من كل عقلي حطيت رجلي على السور اجيت اطفر للحديقة وطحت على ظهري ورجليني ضلن معلگات بالسور ، صرخت صوت وصل للزركة

دشداشتي عريضة وصلت لنص افخاذي

ظهري صار ع ثيل الحديقة ورجليني معلگات ع سور

فالح شهگ وفك عينه على وسعهن ، بلمح البصر جريت رجلي انشخطت بالسور ولفلفت روحي

عيوني ضلن يجرن دموع ، فالح شبخ السور وصار يمي دنگ عليه

...تعورتي؟ شنووو هذا الدم ليش جريتي رجلج حيييل تعورت بالمحجر

ولج كومي كومي جوة للبيت

جاي اكوم طحت ع وركي متأذية ونزل شالي من راسي انه ابجي وامسح بوجهي ورجلي مليانه دم

وفالح مخبوص متوتر وصار وجهة احمر دم

فالح ...عمت عيني عليج عسا الطيحة الي مو الچ ، ولچ طيحتتتييني

فلك ...انه العثرت انتة تطيح شلون هاي

فالح ...صح انتي عثرررتي بس گلبي طاح گبل طيحتج وتمرغل بالگاع كنس الطارمة وعبر على الحديقة

ضحكت وانه امسح بوجهي هوا ابتسم وجهة قريب من وجهي گال بصوت ناصي ...گومي يلا ما اگدر اگومچ

جان قريب مني عيونه اكلتني اكل

فالح ...دموعچ

فلك ...شبيهن؟ حجيتها وانه اتحسس خدودي

فالح ...لولو ينزلن من عيونچ سبحان من خلق فأبدع

فاضل ...شتسوون؟!!!

الدهشة مغلفة كلامه ويبطنه الغضب ، گمزنه ثنيناتنه مخترعين

الدشداشة صاعدة شوية طالعات رجليني وجوهنة حمر وفالح رايحة روحة خطية خاف لان طحت

منظرنا يثير الشكوك

فالح ...طحت

فاضل ...شلون طحت

فالح ...ااا ... م م ... جاي اشبخ وانجبحت على وجهي رجليني كصاررر

وفلك رادت تنقذني وصاحت لااا ابن عمممي جيتت وراي وهم طاحت وتعورت رجلهااا

تريد تصير الرجلة العنكبوت

فلك ...قصدك الرجل العنكبوت

فالح ...لا انتي مرة يعني الرجلة العنكبوت

فاضل ...هاي متعورة بوية تعاي تعاي

كمت مدلي ايده عبرت السور كضني وكال ...فالح كمل تنظيف عن بت عمك متعورة

فالح ...مو اشتغل عندك انه

فاضل ...انجب لك نظف يلا

ضليت اضحك ع فالح مشيت للبيت ويا ابوي غسلت رجلي ولفيتها بشاش بس بعدة گلبي يوجعني من الموقف شگد عيب فالح شاف رجليني

درة ...ابجي وامسح بدموعي وامي مگابلتني كل شوية تصبرني وتحاجيني

طبت رهف شافتنة وضلت صافنة بعدها كالت

...هاي شبيجن منو مات دخيلك ياعلي

درة ...تعاي سمعي ضيمي تعااااي راح اموت ياربي انه اضل هيج الف سر مضموم عني

وعد ...السالفة الحجيتلج عليها امس سالفة ورود

درة ...ياااا شوووف رهف تدرررري

...امس عرفت انقهرت كلش بس شتسوين يادرة عادي مشيها اعتبريها بت عمج وفضت راحت

وعد ...لو ساكتة اشرفلج

طبت ترف تتبختر بمشيتها التفتنا عليها امي صاحت ...اليوم احرگ صفحتچ

حجتها وعضت اصبعها وطفررت تركض وراها

ترف ...شسووووووويت حجيت ببرائة ماحجييييت شي غلططط زلة لسااان

وعد ...ولج اطب للصالة الكة الناس تتعاتب من وراج ماعرفت اربييييج

درة ...ياربي اخذني

رهف ...يمةة عووفيها زين سوت والله خلت سفانه تبلعم

درة ...ربي موووتنيييي

رهف ...ربي لا تسمع منهاااا هاي فاهية وثولة ورعنة

درة ...بربوكك وليييي ااااخ يمة طلعت عدنة اختت ميته اااخ وانه ماادري

رهف ...هاي اذا طلعت ميته شو احنة يومية ننصدم بعد يومين تدخل علينه تمشي

لان لاحظت شي من يذكرونها مايكولون الله يرحمها بس يضوجون ويسكتون

درة ...هاي العايزة بعد

رهف ...اي غير احجيلج الصدك والشي المتوقعته بعد ما انصدم انه صارت عندي مناعة

فركت وجهي حييل ، ولحكت ترف فكيتها من امي جانت تكفخ بيها

ولا تجوز ولا تنكسر عينها وكالت بشيطنة ... ما اخليها تستقوي علينه سڤن الخايسة

امي عضت السبابة وصيحت ....وللللك حررر وينك بس انته تگدر لهاي الرعنة

بصراحة ضليت اضحك على ترف نزلت لكيت فلك ضايجة ومتعورة رجلها

كعدنة سوية فترة وراها ردنة نسوي عشا انه احتاجيت الحمام ، من طلعت من الحمام شفت سداد مخلي ايدينا على المغسلة ساند روحه ومنصي رأسه

وجهة مبين بالمراية احمرر مااعرف شبي يمكن مريض

رجف گلبي ، حطيت ايدي على صدري منعته ...ولك لا ترجف على واحد ضيعك وما يستاهل

وهوا مغمض مد ايده فتح الماي ، شحيت نظري عنه من صوت الماي عرفته ضل يذب على وجهة ورأسه

طبيت للمطبخ اسوي عشا ويا فلك ، عمتي كعدت تضحك شعرها واكف عيونها منفخه خطية تعبانة

...اختج شلونها

...تبجي يوم يومين وتقتنع

خلص اليوم تالي ليل طلعت من يم فلك صعدت فوگ لگيته واكف يدخن يم باب غرفته شافني ضل مثبت عيونه عليه ، ما اهتميت لوجوده تخطيته عبالك ما اشوفه فتحت باب السويت ودخلت

وبيومها الليل كله ما گدرت انام بسبب صوت گحته مبين متنگ وبس يگح گلبي الليل كله شاب نار ومختنگة بعبرتي ..

امي تخربطت قبل الاربعينية بيومين تعبت كلش هم اخذوها هاني وعمة رجوى وغيث للمستشفى حتى للاربعينية ماگدرنا نروح ، غيث كال فترة نروح وناخذكم ويانة

مشت الايام طلعت قبولاتنة ، انقبلنة تربية بس كل وحدة قسم

درة رياضيات وانه انقبلت عربي

وفلك موازي هم تربية صرنة كلنه سوية بنفس الجامعة

بشرتنا فدك بحملها باركنة الها ، ومن هنا دخلت عمة نجوى انذار لا تنزلين لا تصعدين امشي على كيفج لا تسوين كذا ولا تسوين كذا واصلا هي مدللة حتى شغل ماتشتغل اكثر شي علينه انه وفلك وسفانة

عمي فاضل دز علينه ثلاثتنا نزلنة يمة بالاستقبال فتح علاكة سودة طلع منها تلث كارتونات مال مبايلات

كل وحدة واحد كال هاي هدية بمناسبة نجاحچن ودخولچن الجامعة

راح يبدي الدوام انتن رايحات لمكان جبير وبي ناس هواي كل الاشكال والنفسيات

بيهم ناس نفسياتهم مريضة لو ضعيفة اريدجن تتجنبنهم ولا تثقن زايد بالناس تراهم ما يتأمنون

ضلن سوية طلعتجن وطبتجن سوية

بالنسبة للخط خابرت صادق گتله البنات اريدهن ويا جمانة بنفس الخط علمود كلجن سوية ومنا هم ياسمين بت خالد وياجن

هزينة روسنة موافقين ، انطانة كل وحدة ميتين الف علمود نتسوگ

اخذتنة عمة نجوى للعشار بس شكد بعيد عن الكرنة تذكرت من جنة نروح للجمعيات هم هيج طريق طويل

جهزنة كل شي للجامعة وبدأت سنتنا الجامعية الاولى ..

اول يوم نتسابق على المراية ، وحدة تدفر الثانية حتى تشوف روحها

باوعت لنفسي برضا لبست زي الجامعة تنورة سودة وقميص ابيض فوگه سترة سودة

رتبت وجهي بمكياج خفيف كلش حتى درة حصرتها وحطيتلها هية ماجانت راضية

امي شافتنة صلت على النبي ودعتنة وطلعنة لگينة فلك تنتظرنة ، وكفنة بالحديقة دقايق واجة الخط

تذكرت مبايلي ناسيته هنة طلعن وانه صعدت ركض بدون ما احس انصدمت بسداد

تراجعت خطوتين وكتله ...اسفة ماشفتك

هز رأسه بدون رد عيونه ذابلة صاير اسمر ضل يباوعلي كملت طريقي جريت مبايلي ونزلت لگيته بالمطبخ ما باوعتله وطلعت

يم باب المطبخ سمعته ضرب الميز بقوة ضربة مال واحد محترگ گلبه

مزاجي كله انگلب بس حاولت ما ابين ، جمانة اخذتنة لأقسامنة بحكم هية تندل وضلت ويانة فترة

وراحت

درة ... مكان مزعج مزدحم ما حبيت الجامعة وين المدرسة تخبل

هم جانت غصة بداخلي تمنيته وياي ويكون سندي بهذا اليوم يوصلني للجامعة ويشوفني وانه احقق حلمي

ضليت امشي بالجامعة يابسة موحلوة ضجت اكثر ، گعدت على صفحة اباوع للطلاب بعيوني

ناس رايحة ناس راجعة وجوه ملونة لعبت نفسي اكثر هذا مكان دراسة مو حفلة تنكرية

وحدة تارسة عيونها ضلال اسود والثانية وردي والوانهن صارخة حتى مو خفيفه

واكو لا حلوات ونازكات وما صابغات وجوهن ضليت اقيم البنات والشباب وانطيهم نسبه جمال من عشرة ..

...السلام عليكم شلونچ درة

باوعتلها مستغربة ...عليكم السلام منين تعرفيني؟

...والله ماعرفچ شاب انطاني هذا الظرف وراواني صورتج طلب مني اوصله الچ

...شسمة؟

...ما اعرف اسمه ماگاله ضليت صافنة مستغربة منين هذا الشاب منيله صورتي

اخذت الظرف وسألتها وانه افتحه ...شلون شكله؟

...حنطاوي طويل وجهة بي جرح من خده الايسر عابر على حاجبة الايمن مادري بالعكس هههههه

كملت جملتها ويا ماطلعت الكارت الاسود ضليت مذهولة مصدومة عيوني جمدت على الظرف ريحته تسللت الرياتي هاي ريحه القهوة الموجودة بهاي الكروت متعودة اشمهاا

درة ...وينه وينه؟ يمتة وين شفتي

ضلت مصدومة وكالت ...خوفتيني! الصبح انطانياه انه بيتي قريب اجيت مشي قبل لا افوت للجامعة انطانياه وراح وكلي انتي بقسم الرياضيات ماحبيت ارده خجلت

درة ...راواج صورتي؟ هزت رأسها بـ اي

اوكفي شوفي الصورة هذا الرجال نفسه

ايدي ترجف فتحت المبايل طلعت صورته باوعت بالمبايل ثواني وگالت ... اي هوا گال اذا ماقبلت تاخذ الظرف گليلها من حر الدين نوفل

حسيت الدنيا ضلت تفتر بية كعدت بسرعة قبل لا اتخربط ، ركضتلي لزمتني من ايدي

...شبيج حبيبتي شبيج فهميني هذا الرجال عندة مشكلة وياج اكدر اساعدج ترة بابا ضابط كبير

درة ...لا هذا العزيز الغايب من فرحتي وصدمتي صار بية هيج بس شلوون اشوفة شلون شلون

... ماادري والله اذا شفته مرة ثانية اطلب رقمه

...عندچ فيس؟

...اي طبعا عندي

...انطيج حسابي اذا شفتي يوم انطي اله گليله درة وصتني تگول "يَالعن العين غايب ، عجبتك الفرگة لو لاگيلك حبايب؟"

...تدللين خليني اكتب الحجي هههه خاف انسة

طلعت مبايلها كتبت

...انطيني الفيس مالتج درة

...درة الـبصراوية .

...انه اسم حسابي انغام عيسى ادزلج طلب حتى حسابي يضل يمج بس ليش ترجفين اجيبلج شي تشربي

...لالا مايحتاج فدوة گليلي صدك نفسه؟ شلونه خوما مبين علي تعبانة

...شكله نفس الصورة والله ماعرف تعبان لو مرتاح

عندي محاضرة وكليتي يرادلها مشي اذا هاي نحجي ع ماسنجر

...ماعندي

...عادي اذا شفته امر عليكم تشرفت بيج درة

...شكرا انغام امانة وصليله حسابي اذا شفتي حتى لو ماحاجاج روحي حاچي

مشت خطوات نصيت غمضت عيوني كياني كله يرجف رجعت تركض وگفت كبالي وكالت ...نسيت اگلج وصاني يكول لا تحجي كدام اي بشر يجي يوم وتنكشف الاسرار ويعرفون الصار مني

درة ...لا ابد ابد

كمت بسرعة سألت طالبة گتلها وين الحمامات وصفتلي شرحتلي واشرتلي ع باب رحت بوجهي مدرعمة وفتحت الباب وكفت جامدة مصدومة

الدكتور رفع رأسه متفاجئ باوعلي نزع نظارته وكال ...نعم بابا؟

درة ...اسفة دكتور اعتذر خربطت

...ماصار شي بابا غلقي الباب وياچ

بكل غضب طلعت ادور عليها مالگيتها واجتلي نوبة هلع بنص العالم انفجرت بچي وگبل حطيت ايديني على عيوني مرتبكة خجلانة خايفة ومعصبة

استاذ فاقد ...درة؟ لج درة

شلت ايدي من عيوني باوعتله مثل طفلة لگت اهلها ...استاااذ

فاقد ...دررررة

درة ...استاذ بنية سوت بية مقلب كتلها رايدة للحمام. انطتني غرفة دكتور وخلتني اروح مدرعمة جيتت ع دكتور والله خجلانة

فاقد ...أستخفاف هذا وشي معيب تعالي وياي ارتاحي هنا

مشيت ورا امسح بدموعي باوعلي مبتسم ...صدفة حلوة هاي بس الموحلو بيها اشوفچ تبچين

درة ...انهاررريت استاذ بس انت شتسوي هنا

فاقد ... ادرس ماجستير راح تشوفيني هواي

درة ...والله حسيت بالالفه من شفتك ياريت يومية اشوفك عاد مااحس روحي غريبة

كعدت كعد مسافة عني فتح دگمة سترته ...هسة شلون صرتي بعدج ضايجة؟

...لا لا استاذ ماضايجة صرت زينة

...شيلي هاي الرسميات گليلي فرقد

...انه اذا شلت الرسميات ماراح اكدر احجي وياك استحي

...بعد انتِ درة اسم على مسمى مشهودتلج هناك صافية نقية وكلج خجل وحياء

...وين هناك

...بالگرنة بين الاهل والاساتذة والمدرسات

...شكرا استاذ

تحمحم عدل ياخته ورجع باوعلي مرتبك

فاقد ...عادي احچي وياچ بموضوع وما اكذب عليج بعيدً عن الدراسة انه جيتي مخصوص حتى اشوفچ واحجي العندي

...اي عادي اسمعك استاذ تفضل

...زاد فضلچ .. احم درة بصراحة انه اريد ادز الأهل عليكم يخطبولي اختج رهف

بالبداية جنت متردد كونها طالبة يمي تصرفت وياها بكل امانة نظرة وحدة موحلوة ماباوعتلها اعتبرتها اختي وطالبة بأمانتي

ورا ماخلصت سادس گلت لا لازم اخطي خطوة بأتجاها

الشي الوحيدة المخليني اتردد انتم فقدتو خالكم قبل فترة قصيرة يعني خاف ماترضون هسة تنطون البنية وتعرس

درة ...ماادري جان حاجيت سداد

فاقد ...خجلت والله احس روحي خاينه لصاحبي مااكدر اكله عيني من بنية عمك خاف عبالة انه ناقص واباوع لعرض صاحبي .....

زاد فضلچ .. احم درة بصراحة انه اريد ادز الأهل عليكم يخطبولي اختج رهف

بالبداية جنت متردد كونها طالبة يمي تصرفت وياها بكل امانة نظرة وحدة موحلوة ماباوعتلها اعتبرتها اختي وطالبة بأمانتي

ورا ماخلصت سادس گلت لا لازم اخطي خطوة بأتجاها

الشي الوحيدة المخليني اتردد انتم فقدتو خالكم قبل فترة قصيرة يعني خاف ماترضون هسة تنطون البنية وتعرس

درة ...ماادري جان حاجيت سداد

فرقد ...خجلت والله احس روحي خاينه لصاحبي مااكدر اكله عيني من بنية عمك خاف عبالة انه ناقص واباوع لعرض صاحبي .

...ماادري استاذ امي هاي الفترة مريضة بسبب وفاة خالي ما اعتقد الوكت مناسب

...زين احجيلي ويا رهف اريد اعرف راضية ماراضية حتى يرتاح گلبي

...تدلل .. احجي وياها اليوم واشوف

...هذا هو احنة راح نلتقي هواي ان شاءالله من اشوفج مرة ثانية نسولف

هزيتله رأسي ترخص وگام من يمي راح

باوعت الايدي ترجف رفعت رأسي اباوع ادور على الحيوانة مالگيتها

ماعرف شلون خلص اليوم جنت ارجف ومنتظرة نهاية الدوام بروح مخليه الجنطة بحضني ولازمتها بقوة

ماصدگت وصلت ركضت للحمام قفلت الباب على نفسي فتحت جنطتي طلعت الكارت من الظرف

حسيت بشوغة شهگت وضميته لصدري بسرعة ورجعت رفعته شميته وبسته

باوعت للحروف عيوني من كثر الدمع مغوشات ماا اكدر اقرأ المكتوب

جريت نفس مسحت عيوني حيل وباوعت للكلمات

مكتوب "لكِ في القلب شوق لا تصفه الكلمات ، اعذريني حال بيني وبينكِ البعد .. مو عمد مني فارگتچ يَ عطري مجبور

ديري بالج على نفسچ .. ولا تفشين هذا السر انتظري اطلع گبالهم واكف على طولي واحجيلهم الاسباب

خلي يكون بعلمچ انا عطشان الشوفتچ مثل عطش الجرف للماي منتظر الظروف تنتهي

واغرگ بحضنچ لحد مااموت"

يمكن هاي اسعد لحظة بحياتي ماجاي اصدك شلون هيج شلون صار كل هذا

معقولة هوا مهدد ؟ معقولة الدعلج الخطفني جاي يهدده لو مسويله شي

مو بعيدة يكون ذاب علي تهمة گام حر انهزم

مو مهم السبب المهم عايش والله لو يطلع ارهابي هم ما اهتم وارتمي بحضنه بس اشوفه واگف على حيله مره ثانية ..

غسلت وجهي باوعت لنفسي بالمراية الضحكة ماجاي تفاركني مامعقول الجاي يصير مامعقول

ضميت الكارت وطلعت للغرفة بدلت

باوعت لرهف صافنة بوجهي ...عاشكة؟ من اول يوم

درة ...لا ابد

رهف ...وجهج مال وحدة عاشگة غير عيونج يلمعن والضحكة شاگة وجهچ شگ

درة ...فرحانة

رهف ...فرحيني وياج انه وردة يابسة محتاجة فرحة تسگيني وتخليني اورد من حلة وجديد

درة ...لان جاي احقق حلمي حر جان يتمنى يشوفني داخلة جامعة وادرس تربية

رهف ...الله يرحمه ويغمد روحه الجنة

ضليت مبتسمة ما سديت حلگي ابد حتى موضوع خطبة رهف نسيته

حطيت راسي وغفيت بدون اكل لان شعور الفرح سوالي مغص بمعدتي بعد ما اگدر اكل

گعدت العصر محد فوگ السويت فارغ ، غسلت ومشطت شعري رشيت عطر ولبست شالي

باوعت لنفسي بالمراية حتى خدودي موردات

شوكت اشوفك؟ ما جاي اصدك احس روحي بحلم واخاف افز منه

جريت نفس عميق ضليت اطفر بمكاني عضيت الشال من الفرحة عيوني ضلت تدمع

جنت اضحك ع رهف اذا بجت من الفرح اكول شبيها وين اكو واحد يبجي من الفرح

بس اليوم حسيت بهذا الشعور وبعد ما الومها

بعد دقايق غسلت وجهي جريت نفس اداري روحي ونزلت بكل هدوء شفتهم كلهم مخبوصين ويركضون بالبيت ، ترف شايله فراش ع راسها وتركض

وفلك رافعة دشداشتها وتمسح

طلعت رهف من المطبخ تصيح ....ولچن ررواااح توووصل فلك فلك كملتي الغرفة

فلك ...كملللت جيرة لا تصيحين انه متوترة لا تخبصيني گلبي راح يوگف

رهف ...دخيلك يا علي استرنة

طلعت عمة نجوى تمشي بهمة ...ولجن لا تكثرن ملح على الاكل ،، اريد البيت يلمع

درة شمالج واكفة تعاي اخذيلج وصله المعرض لميوزة حتى الشبابيچ مسحيهن

سفانة ...وصلللت وصلتتتت دخيلج ياام البنين وصلت عمة

ترف ...راح اطفررر كولو عدها دراسة كولو شي

فدك ...تانيني ولچ

ضليت ارمش بصدمة عمة نجوى صاحت ... محد تصعد محد اوكفن استقبلنها كلجن بوسن ايدها وراسها وكلجن تكعدن كبالها

مهاااا ما وصلت شسالفة

رهف ... سلامًا قولا من رب رحيم

فلك ... يا ابو الغوث اغثنة يا علي ادركنا ، تحجي وتفرك باصابعها متوترة

امي وعمة نجوى طلعن برة صحت بصوت عالي من نص الدرج ...غيررر افتهم هاي منو جاية رئيسة الوزراء؟ شمالكم مخبوصين

فلك ... هاي بيبي سعدية جاية ولج بيبييي سعدية تشوفنة الظهر الاحمر

درة ...هية مو عايشة بالاهواز؟ شجابها علينه هسة

فلك ...حظوظنة وين الله يخطبني واحد واعرس ياربي عاجلًا ليس اجلاً

درة ...لا تبالغين شتسوي المرة هسة تطلع طيبة وتجنن

جاي احجي واجاني صوت ... منهي لتچنن وطيبة؟

بلعت ريگي بخوف شفتها مرآة محدبة كاضة عكازة بايدها تستند عليها

تشبه زليخة من صارت عجوز سبحان الله نسخة

درة ...على الطبخة هسة تطلع طيبة

حجيتها وبلعت ريگي بخوف نزلت كعدتها عمتي على القنفة سلمنة عليها بوسنة ايدها وراسها

باستها رهف كالت ...هاي الفرخة بتمن

وعد ...بنيتي رهف

سعدية ... يا بت الحضرية ، ضربت رهف على فخذها وگالت

...خوش بيها لحيمة شمالج نجوى ماخذيتيها لبنچ سداد جنة مندر ديباج من ينام حذاها يتونس

رهف صارت صفرة وكامت تبلعم بخجل احنة كوة لامين ضحكتنة ، حطيت ايدي على حلگي كتمت انفاسي

نجوى ...بعد هوا راد غريبة

سعدية ...گلابة وشگلابة غريبة هيهو تلحگ بنية عمة لغريبة شوف شحلاتها كلها لحم ، ولج بس لا ماخذلة وحدة مبلحسة؟ چفيلچ العباس اخلي يطلگ

نجوى ... هههه لا مريته حليوة بيها سمن

سعدية ...تعاي انتي السميرة احبچ .. تقربت منها بوستها باوعتلي بتأني

...هاي بت نهلة؟ اخت وريدة؟

هزيت رأسي ب اي .. لزمت زري كمزت كتلها ...بيبي ليش تكمصين بزرورنة عيب

سعدية ...عيب بعينج انه اجيت ادورلچن ريولة (رجولة) سمعت البنيات والويلاد كلهم مامعرسين كلت اچي اعدلكم وارد لدياري

نجوى ...عمة غير يركضن على دراستهن يتخرجن ويعرسن الزلم ضاله

سعدية ...ياااع يازلم ضالة بس لا كصدج غرب ، كولي ويلاد عمهن ضاله

خيررر من الله كل وحدة تلفلها واحد

باوعت علينه وكالت ...شمالچن ماتعرفن تزرطلچن ريل يو بس تعرفن تحفحفن حواچبچن خيوط ماتستحن المن حافات

اشرت علينه وباوعت لامي وعمتي ...چفيلچن العباس هذني يدورن ريولة بس يستحن يگولن كلهن حانيات

صرنة حمر من الخجل ضلت تفر بأيدها ما عاجبها رجعت باوعتلي وكالت ...وانتي شمالج معصگلة؟ بله لياخذچ شيلكة بيج لا لحيمة يبوسها لا شحيمة يگرصها سمني شهر اريدج تصيرين بطة من الباب ماتطبين

ولو ماظنج تصيرين بطة انتي يابسة على نهلة طالعة

عمتي خزرت ترف واشرتلها تتقرب

ترف ...هلو بيبي

حجتها وباست راسها

سعدية بغضب ... شنهييي هوهو انتي هوهو ما تستحين تگليلي هو هو

والله اكضج وامطلج هنانة اطلع مصارينج من خشمج هوهو تكلي بت الهوهو

ترف ...لا بيبي هلو مو هوهو يعني مرحبا

سعدية ... ياا هاي انگريزية؟ منين جايبينها؟

ترف ... لا بيبي انه ترف بت جعفر اخر العنقود مو انگليزية ههههه بس انه حلوة عبالج انكليزية

سعدية ... يووووو ز*** ، مسوية روحها انگريزية احجي عدل گولي گواج الله حبوبة كواج الله يدة (جدة) شنهي هوهو بيبي

وعد ...ترف .. حجت بحدة

ترف ...رديت الها بنظرة بريئة ورجعت حاجيت بيبي سعدية ... گواچ الله جدة

...خايبة انتي شكبرج

ترف ... 13

سعدية ... جم غسلة غاسلة

ترف ...يومية اغسل بيبي انه نظيفه

نجوى ...تقصد جم مرة جايتلج الشهرية يمة

وعد ...راح تموتني .. حجت بهمس

ترف ...شنو بيبي شتسوين بشهريتي دكتورة نسائية لو تردين تحسبيلي

ضربتني بالعكازة على رجلي حيل ...انجبي احجي عدل من كون عدلو راسج بحادلة

ترف ...بيبي صار هواي من عمري 11 ماحاسبتهن

سعدية ...يا خوش ، نصت صوتها وحجت يم ذان عمة نجوى

...هاي حل عرس اخذيها لمحيميد يربيها على ايده من كونها فرخة توة فاگسه

هم تخلفلة ويلاد بنات يكبرون ويا امهم وابوهم

نجوى ...لا وين حجية ترف طفلة احنة ماانزوج لا بنية ولا ولد بعمر صغير على الاقل توصل 18 سنة تخلص سادس اعدادي

غمت عمة نجوى ...مابيج حظ وماعندج حرگة گلب على فروخج ذاك سديد شكبرة توة خاطب وصارلة جم شهر ناشف ريجة هسة ضال بحسرة النومة

وهذا محيميد تاليته نفسه

ولج اخذيها اله وعرسيهم فرد يوم سوية

وعد ...لا حجية انه مااعرس بنية قبل لا تاخذ شهادة السادس

سعدية ...سدي حلگج الايگم عساج ابلابوش انتي خذيتي لفريخات ووليتي للولاية حرمتيهن من عمامهن

امي سكتت رجعت فرت ايدها وكالت ...وانتي وعد يمتة يعرس عليج ارفد موجنها صارت طويلة

كلنا شهگنة مصدومين وتحجي بشكل عادي فوگاها

درة ...شنو يعرس عليها احنة ماعدنا نسوان كبار يعرسن

سعدية ...وانتي ياهي مالتچ؟ ولج لمبلحسة انه محاچيتچ؟ شلج شغل سدي حلگج الايگم ولي منا لا اكتلج بالعوجية اطيحلج دگ على راسج

درة ...سكتت عمي سكتت بس لا تكتليني

فلك كرصتني

سعدية ...يجوز وعد رايدة الرجل

وعد ...لا والله

ترف ...بيبي شبيج كاتلة روحج تردين تعرسينة كلنا احنة ماانحب الزلم

سعدية ...هيهووو مايحبن الزلم ومحفحفات ومكحلات

ترف ... جا انتي هم مدگدكة هم تحبين الزلم

سعدية ...يااااااع گلاب الزلم اي والله گلابهم من عگب عين نعمان غمة التغم الزلم عگبه

هاي لدگات لجدج داكتهن جنت معرسة عندي ريلل يحبني ويشبگني جنت بكدج مو مثلجن هسة ضالات بايرات ... التفتت الامي حجت

شوفي وعيدة انه هاي گعدتي هنا ما اردن لدياري اذا مااشوف ارفد معرس عليج كافي الزلمة ماهرج صارلة 13 سنة شنهي السالفة طلعتي گلب الزلمة ومردتي مرد

شهگنة بصدمة كل الانظار توجهت الامي عمة نجوى لطمت خدها وخزرت بيبي سعدية

وامي گبل انگلب لونها وانخلست خلس

سعدية ...شمالج تخزرين نجوى

نجوى ...بس الكبااارية يدروووون بالمهرررر ام بارق ماتدري الزغار هم مايدرون وانتي ذبيتيهااا هيج عادي وفضحتي سر مضموم صارله 13 سنة

باوعت لخواتي صارن صفر ، خوب رهف كعدت ماكدرت تضل واكفة اكثر وتباوع الامي بعتب

درة فركت وجهة وباوعت لبيبي سعدية ...بيبي متوهمة عمي ارفد ما ماهر امي

سعدية ... لا ماهرها من خلفت هاي وطلعت الاربعين مهرها گبال عيني وبحضور فاضل واخوانها من جبيرهم لزغيرهم

وعد شمالج انطرمتي احجي علمي بناتچ شمالج تخافين منهن

بعد ما حسينه غير امي طاحت ركضنة عليها كلنه

سعدية ...الحضرية روحها رچيچة غسلنها هفن عليها لا تموت ويحسبونها مرة براسي وهية 13 سنة زلمتها ما معرس عليها

درة ...من رخصتج سكتي شوية راح تموتين امي بكلامج هذا

سعدية ... هيهووو

فالح ...شمالجنن تصرخن شمالجن ابتلينة حطينه قريب منكم والله راح اهج اشيل

فلك ...غير بيتكم بذاك الفرع

فالح ...غير انتم تودون عليه كل مايصير شي لان قريب منكم هاي شمالهن ملتمات الله اكو تووزيع؟

فلك ...غير عمة وعد طاحت بسبب بيبي سعدية

فالح ...ناخذها للمستشفى

فلك ...لا فتحت عيونها

فالح ...شنو صار؟

فلك ...وانته شلك شغل؟ شعليك لا تتدخل سوالف كبار

فالح ...لا بالله؟ حجة بصوت ناصي كلش ام شامة

فلك ...لا تجذب منيلي شامة وجهي صافي

فالح ... مو بوجهچ بغير مكان

رمشت بعيوني متفاجئة ومستغربة كتله بثول ...مافهمت وين يامكان وين عندي شامة

فالح ... بوكتها ادليچ عليها .

سعدية ...هذا ابن صويدق ولك فليح تعال اكعد حذاي اشبعن منك يدة

فالح ...لا يالله صادوني وانه النچر

حجيت بأستهزاء ...انتَ نچر؟

فالح ... نچر بس مو يمچ ، گبال عينچ اصيرن رچيچ

فلك ...هوا انته گبال كل النسوان هيج تموع روحك مثل الموطة جوة الشمس

سعدية ... يووو هذا عاشگ الفرخة باوعلها ونساني امدا حظج سعدية

فالح ...اجيتج سعدية اجيتج خية سويلي مجال يمچ ، شني هاي الخدود الحمر الا اعرسچ شايفلچ خوش شويب

سعدية ...يااا يدة منين مابية حييل انه الشويب ما يركض عليه يركضن على هذني ليحلسن ويملسن

فالح ...كل الحيل بيج بوسة وحدة من الشويب تردلچ روحچ احنة الزلم مفعولنة قوي

سعدية ...ياا يدة اسكت اسكت انه استحي

ولج انتي ام ثوب احمر روحي شوفي وعيدة ميته عدلة خذنها للحجرة نجوى وبناتها

عافتنة سفانة وراحت باتجاه غرفتي تشوف عمة وعد

ضليت واكفة بمكاني رجعت بيبي تحاجي فالح بهمس ...صگد شايفلي شويب لو تتشاقة

فالح ...ماگلج صدك لو لا اذا ماتوافقين

سعدية ...بيناتنة نوبات احن ليدك (لجدك) بس غيره ماريدن مايجي واحد مثل نعمان

فالح ...ومنين اجيبلج جدي هسة؟ صحلها رجل گالت عور

سعدية ...يدة جدك جان قوي وكل الحيل بي خاف شويبك مابي حيل

فالح ...فلك طرج سعدية تدورين حيل وانتي مابيج حيل تسبحين ، يمكن اذا اخذله بوسة تموتين

طگته بالعكازة حيل وصيحت علي ...مو هذا گصدي افيسد گوم منا ولي ولي لا بارك الله بيك

فالح ...لا لا بيبي ، بطلت ما اجيبلج شويب شوفيلي مرة على ذوقچ

دنت رأسها منة وحجت ... شلون تريدها سمينة رفيعة طويلة شعرها شلونه

فالح بهمس ... اريدها مربربة وشعرها طويل علمود امشطلها واظفرلها بايديني

سعدية ...خوش اخذ بت جعفر رهف

فالح ...لالا غيرها

سعدية ...اخذ هاي لفلك توك تبسبس وياها وتباوع لحلكها عبالك ماشفتك افيسد

شهگت مصدومة باوعولي فالح عدل گعدته وبيبي سوت نفسها ماحاجية شي ..مايدرون بية سمعت كل حجيهم

يمة صخام فالح مو وحيد هم طلع فاسد نفس اخواني ..

رهف ... طلعن كلهن ضلينة ثلاثتنا يم امي نباوعلها بنظرة عتب

أنت بوجع باوعت لدرة هزت رأسها بمعنى سكتي

تقربت منها كعدت يمها ولزمت ايدها وكالت

درة ...صح خبر موجع بس احنة ماضايجين منچ ولا شي وماراح نعاتبچ ابد

شي واحد نريدة منج تكومين سالمة وتسولفين النه وتنطينا الاسباب

هزت رأسها بدون اجابة تنهدت وغمضت عيونها

ترف كالت معترضة ... شنو يعني؟ هيچ عادي نسكت وهي مستغفلتنة؟! متزوجة عمنا واحنة ياغافلين لكم الله نايمين ورجلينه بالشمس

گرصتها حتى تسكت امي عفست وجهة متوجعة

اشرتلها بطرف حاجبي تطلع وانه اصك ع اسناني بغضب

ام لسان ما سكتت رجعت حجت ...راح اسكت هسة بس خليها تكوم سالمة والنة كعدة طويلة سوية

وسمعوني زين اذا ما طلگ امي افضحهم فضيحة والله اسويلي سالفة

رهف ... سكتي راح تموت

درة صرخت عليها ... طلعي برررررة حيوانة

ترف ... عقدت حواجبي بغضب طردوني من يمهم طلعت وطبگت الباب قوي

ما اسمح لأمي تعوفنة وتروح ويا ارفد ولا اقبل تصيرله مرة

محد يحس بشعوري خواتي ما يحسن بس انه اختلف انه 13 سنة انام بحضن امي وماعندي غيرها

ما حسيت بحنان غير حنانها صارتلي كلشي

مو مثلهن عاشن سنين حدر جناح ابوي وبعدين حدر جناح خالي حر

وثنيناتهن سوية صاحبات انه عكسهن ماعندي غير امي حتى خالي حر ما جنت اكعد ويا ولا احجيلة شي ولا احتمي بي بكثر امي لان جنت اخاف منه

امي هية كلشي بحياتي والله ثم والله اذا تعوفني وتتزوج احرك روحي

ضليت افتر كلبي بي نار وعيوني مغوركات ، ما تحملت اكثر توجهت للدوانية عمامي كلهم بيها اجو يستقبلون بيبي سعدية

حطيت شال على رأسي ودكيت الباب مال الدوانية وكفت ع صفحة

طلع همام باوعلي سلمت علي كلي ها ترف محتاجة شي

ترف ...اكو واحد غريب

همام ... بس عمامي وجم واحد من ولدنا ماكو غريب

ترف ... وخر من گدامي ، رمش متفاجئ تخطيته ودخلت بصوت عالي كلت مساء الخير

كلهم كالو بصوت واحد ... مساء الخيرات

همام دخل ورد الباب ورا وكعد يم سداد وغيث ..

ترف ... انه اريد اطلب طلب من عمي فاضل واريدة ينطيني حجاية زلم ينفذلي الاريدة وانتم كلكم تصيرون شهود

ضلو يضحكون حتى عمي فاضل ضل يضحك وكال ...تامر امر ترف لتريدة يجرالها

ترف ... تنفذلي الاريدة

فاضل ... تدللين الج لتردينا يجرالچ بشرط شي ما بي مضرة لأحد

صادق ... ههههههه والله اذا مانفذلج انه انفذلج هاي الحلوة منو يردلها طلب

ترف ... اريدكم تجيبون شيخ وتخلون عمي ارفد يطلگ امي

بهتت وجوهم اختفت ضحكاتهم الصدمة اعتلت ملامحهم وبعضهم ضلو يتهامسون مصدومين

وصلت الأذني كذا كلمة ...شني يطلك وعد ... ارفد ماخذ وعد! عجبة ولا عند الله عجبه

فاضل ...بوية شني هذا الحجي طلعي منانة ونسولف انه وياج بالليل

ترف ...لا ما اطلع انته وعدتني تنفذلي وانه هسة اريد الطلاگ يصير واذا مانفذت انه احرگ روحي ..

حجيت جملتي وانه ارجف من القهر والغضب

خالد ...ارفد ما متزوج امج ترف طلعي منا لا تضلين تحجين حجي ماصخ

فاضل ...الموووضوع طوويل وسالفة شطولها بوية ترف لخاطري طلعي بعدين نحجي ونتفاهم ونشرحلج الاسباب راح تقتنعين

وجهت كلامي لعمي خالد ... بيبي سعدية كالت عاقد عليها بحضورها اظن نص عمامي يدرون ونص مايدرون وهسة صلاوات كلكم حاضرين

ماراح اعيد كلامي انتم شهود عمي كلي التردينه يجرالج ويتنفذ وانه هسة اريد ينفذ

همام ...بوية!! ماتحجي؟ تكسر امي بوية؟ افتح حلگك شمالكم كلكم مصدومين ماتحجون شي امي تموت اذا سمعت هيج خبر

بعد كل هاي السنين تطلع ماخذ عليها مرة ثانية!!

ترف ...مايعرفون يحجون اصلًا شوفة عينك زلم مشوربة ماعدهم حجاااااية وين تردون توصلون بهذا سكوتكم كلشي عرفنا

خالد ...بله امج شني وانتي شني كااافي تعلين صوووتج كبال الكبارية طلعي منااااا يله بت الكلبة بگد الفصمة تعلي صوتها على عمومتها

ما حسينه غير الباب اندفر وانفتح بكل قوته طگ بالحايط كمزت بخوف وما احس غير رهف تدخل حمرة من الغضب حواجبها معقودة وعيونها تنگط شرر

هي طبة وهي هجمة

...حدددك لا تتجاوزة من تذكر امي واختي مرة ثااانية ابو نجم البشر يكبرررر ما يصغررر

فاضل ...رهف لا تزيدينها اخذي اختچ وطلعنننن منا

رهف ... تعااااااي .. عاطت بيه وهي تتقرب مني جرتني خلتني ورا ظهرها وانهدت بيهم غسلتهم غسل

تحجي بنبرة عصبية ، يعلى صوتها بنص الحجي وتنصي من تحس

رهف ...والله عيب وخززززي اخوان شكثرررركم ماگدرتووو تحمون مرة ارملة وتلث بنات؟ والله زحمة وعيب عليكم لو انه منكم اطم روحي من الخززززي

صيتكمم شكبرة واحدكم يصيحوووله شيخ وشاربة هل ثخن وعگاله ماينزل من راسه وهوا مابي خيرررر الأهله ولا كدر يحاااافظ عليهم

عشنة يم خوااالي اقل عدد منكم وما عدهم نفس صيتكم العالي ولا يملكون نفس التملكونه بس عدهم شجاعة وقوة انتم فاقدينهااااا

عدهم شوارب تتباها بيهم ، مو شعر زايد مثل شواربكم

ولا هي ديكور نفس لعدكم

لو صدك بيكم حظ وعگلكم للحگ مو للكشخة جا لميتونا وخليتونا بأحضانكم

جا واحدكم ما غفت عينه اذا ما تفگدنا

عفتونا عشنا بعيد عنكم

عدنا اخت ضميتو علينا ومادرينا بيها الا من كبرنا

جابرين امي على واحد نفسه دنية ما نشف تراب اخوووووو كام ركض ورا ارملته

وبعد شعدكم؟ جم سالفة تعبانة ضامينها ويمتة نعرفها؟!

ساعة السودة الاجينة بيها للكرنة چنة مرتاااحين والناس تتمنى عيشتنا خوالنة مخلينا جوة جنحانهم مدارينا مثل الماي بالصينية

انتم جبتونة هنا والضيم والهم والمصايب صارت تنزل على رؤسنا

عفتونا واحنة صغار وماعدكم قدرة تدارونا وتسعدونا واحنة كبار

خالد ... عود انتي شايخة علينا ؟ طفر من مكانه هاجم علينه

وكف كباله عمي ارفد دفعة وابنه نجم

نجم ...صلي على النبي بوية ساعة عصبية حجيها ماطالع من گلب

رهف ...لا والله كلامي من گلب ولسان انه اليوم اكتشفت انتم مو كفو ومابيكم كل خير وعگلكم فخفخة

گام سداد بسرعة وكف بوجهة وهمس ...رهف طلعي

دفعته بغضب وصيحت بصوت عالي

رهف ...انطيك شي ثاااني عمي فاضل؟ احجيلك شييي يصدمك

انه عشت سنين يم خوووالي سنين دخلتلهم بال99 عمري 7 سنينننن وطلعت منهم عمري 18

يعني 11 سنة ..... قاطعها خالد بصياحه

خالد ... طلعهااااا لا اموووووتهااا طلعها

ونصهم يدفعون بي انه خفت ضليت اجر بيها وهية تصيح

عمي فاضل وگف على حيله ، يصيح على خالد ... اسكت طلعوووو منااااا

ورهف تصيح بصوووت عالي ... عشرررر سنين محد جااااس طررررف ثووووووبي ..... ما ادري ليش سداد احتقن وحط ايده على حلگها

انه من خوفي تراجعت ليورا

رهف تدفر بأيد سداد وتصيح صياحها ما مفهوم وسداد يصيح ... رههففف انتي ماتعرررفين شتحجين عصبية

ارفد يصيح .... كاااافي والمرة ما اطلگهااا

خالد ....هدووووني ارررربي هاي السااااقطة افصم ظهرررها اليوم ما مترباية هااااي تربية خررريج لسجووون تربية حرر المجرم ابن الحرام

هاي تربية حر الكواد و وعد السااااااقطة المابيهااا حظ

رهف دفرت سداد وصيحت على خالد ... يشررررفك ترووووح مليون فدوة لنعاله ولك لمرية لخنيثة انته تحطططط سجين بركبة امي يا عااار الزلم انته تهددد امي وتحط برگبتها سجين!!! يالمابيك حظ ياالطلي

فاااضل ... طلعووووووهم مااا تنحل هييييج ما تنحللل هيييج

البنات اجن يركضن حتى بيبي سعدية على عكازتها واكفة بالباب تباوع

رهف ...ولك خالد الخنيثثثث تروح مليون فدوة للتراب النايم بي خالي على الاقل هوا معدل وحافظ على بنات مو بناته وربانة احسن تربية ، موووو مثللللك بنيتك تطبگ عليها سيارة مظللة وتطلع ماترجع لنهاية الدوام

عررررضك تايه ماتعرف حتى تربي لووو جاي لـخالي ينطيك دروس ويسولفلك شلوووون ربانه

خالد ...لا تجييييبييين سيرة بتي على لسانج

سداد ... ولججج رهف لا تحرگين العالم اكثررر مالها ذنب بنته لا تفضحيين

رهف ... دفعت ايده حيل وصحت لعمي فاضل ...وانته عمي احجييييلك بعد الحجي المضمووووم تريد اطلعلك كل الخيييااااسات

ترف ..

عمي فاضل ضرب عكازته بالگاع بقوة وصاح صوت سكتهم كلهم وكعد الا رهف ما سكتت وكملت

...انه ما تسكتني والله اليوم افضحكم فضيحة متصنعين المثالية مسوين رواحكم انبياء وانتم اكبر ضلام حوبتنا وكسرتنا وحوبة امي ما تتخطاكم

الحوبة تسحگ وتلحگ وتاخذ ثلثين الحگ .

فاضل ...كاااافي رهف كاااااافي راح تموتيني اي احنه مابينا حظ وك** لان عفناجن مابينه حظ لان ماعرفنه نداريجن حجيج صدك ماعندي علي اعتتترااااض بس كااافي كاااافي

أرررفد جيب الشيخ جيب الشيخ وطلگ وعد يلااا بسرعة

سداد نصة شال حجاب رهف حطة على رأسها انترت ايده عدلت شالها وهي تباوعلهم بحقد

أرفد ...ما اطلگ عشگ سسسنين ، الف ليلة وليلى اتااااني وتريدني اعوووف؟

فاضل ...هية ماتريدك كافي بعد لهنا وانتهى المرة صارت يمنة والبنات يمنة ماعندك حجة بعد

أرفد ...والله ثم والله وحاضركم يبلغ غايبكم لو اعرف هاي اخر ساعة بعمري وكلكم واكفين بيها ضدي وتردوني اطلگ وعد

ما اطلگ

عشگ سنين سنننين صاااابرررر من التسعة وثماااانين لهاي الساعة ماراح اطلع منها خاسر لا علمودكم ولا علمود بناتها ولا حتى علمود هناء والولد ...نهى كلامة ومشة بسرعة عبر من يم رهف التقت نظراتهم واحد خازر الثاني

ارتعد گلبي

عمة نجوى جرت رهف حيل طلعتها طلعت وراها درة تمسح بوجهة وفلك وفدك وسفانة صايرات صفر من الخوف دخلنة للبيت بيبي سعدية كعدت وباوعت لرهف

بيبي ما تأشر بأصبعها لا تأشر بعكازتها وتحجي بفخر

...ولچ انتي رهف بردتي گلبي وحجيتي حجي من زمااان بگلبي جنت متانية يچي واحد يحچي عني

نجوى ...لا حجية لا تشجعينها رهف شبكت لحية بلحية، السويتي غلط بغلط فضحتي وحجيتي حجي ماله داعي ليش كرهتي روحج

رهف ...اخررر همي اخلي خالد وحزبه يحبوني عمة جنت يم امي بلسانننها گلتلي لاعب بيها لعب لا ضال شرفها ماطاعن بي ولا ضال تهديد مامهدد

وماكو واحد موگفة عند حدة ساكتين عنه وجاريله واهس انه اليوم كسرت شوكته

سعدية ...وجا انه ليش عفتهم ورحت هناك وليت من شفتهم سكتو عن الظلم ومحد فك حلكة ومن شفتهم عافو البنيات يعيشن يم خووالهن وهم هنا سلف كامل ، بيهم عشيرة ماعرفو يلمون لحمهم؟ لا بارك الله بيكم

نجوى ...حجية فاضل كال وعد تتكتر احسن الها وللبنات ، غير الربع هنا ينگطون سم وشر لو ضالة المرة مو يكتلونها لو يسوولها شي

سعدية ...شني كل ههاي العمام ومابيهم خير يحمون المرة وبناتها لا بارك الله بيهم

جو البيت صار مشحون ماادري شلون مر الوكت وخلص العشاء ، والساعة صارت ب11 الحجية نامت من ال9 تعبانة واحنة كملنة تنظيف وترتيب البيت

باوعت شفت رهف دخلت لغرفة عمي فاضل عقدت حاجبي بأستغراب مشيت على اطراف اصابعي وكفت يم الباب اتسمع عليهم

ما وصلني غير شي بسيط من كلامهم بس صدمني وخلاني ارجف

فاضل ...لالا انتي كلتي اطلع لخياسات كلهن انه اريد اسمع كلشي منج

رهف ...لا عمي جانت لحظة غضب مو صدگ

فاضل ...شمعنى گلتي عد خوالي 11 سنة محد جاس طرف ثوبي وسداد سكتج

يعني واحد من ولدي متعرضلج بس ياهو لو سداد لان كلنه ندري سداد رايدج

لو ليث واحد منهم

ضلت رهف ساكتة عمي گللها ... احجي انه اسمعنچ ماتطلعين منا ما اخليج اذا ما تحچيلي

رهف ...ليث تحرش بية اكثر من مرة ومو بس تحرش سوالي مكايد وحتى شوه سمعتي گايل لصهيب ابن خالي انه ماخذ رهف ، والله شاهد على كلامي وكفيل ..

_احچيلي بالتفصيل الممل كل شيء صار وياكم رهف

بديت اقص علي كل شيء من اول مرة لأخر مرة بأستثناء المرة الي صعدت بيها يم ليث بأرادتي

بوكتها ما جنت برايي وما عليه عتب

جنت كل ما احجيله تفصيله مؤذية اغص بعبرتي ارفع اصابعي امسح دمعة غافلتني ونزلت على خدي وهوا يضغط ايده حيل وكل عروگه ناطه من العصبية

ورا ما كملت كلامي هز رأسه بتوعد وكال

_ هذا هوا بوية حگج انه ارجعة بس گليلي انتي ليش سكتي ما اجيتيلي وحجيتي

واظنه مرة ردتي تحجين وحورتي السالفة

_اي صح ردت احجي وسكتت خوفا من سداد وخفت من شغله ثانية

_خفتي اچذبچ واصدگ ابني

_اي هيج فكرت يضل ليث ابنك ربيته بين ايديك مو مثلي عشت بعيدة وما تعرفون شي عني

يمكن تكول مااعرف تربيتها ويمكن تجذب بس ابني اعرفه وما يجذب

_التاريخ يعيد نفسه لاحظتي هذا الشيء

_نعم لاحظت خصوصا بعد ما سولفتلي امي شلون اجت هنا وحباها ابوي وعمي بنفس الوكت

وصارت مشاكل الهة اول مالهة تالي لليوم ممحلولة

_احجيلي كل شي بگلبچ اتجاهنا لا تستحين ولا تخافين

_تعرفني ما اخاف والضربة لأذتني قوتني راح احجيلك كل شي واريدك هم تجاوبني على اسألتي

هز رأسه بالموافقة فسحي مجال اكعد بصفة على الجرباية ..گعدت وبديت احجي

_امي حجتلي گالت

يمة انه من جبت ترف ورا فترة وصلني حجي عمج ارفد يريد ياخذني انه رفضت وگلت لو على كص رگبتي جا احب ابوج وما ابدله بغير زلمة ، اريد اموت ارمله حتى اكون نصيب ابوج بالأخرى مثل الدنيا

بس هناء (ام بارق) ولمياء اختها وخالد شدو وياي شدة كدر ، لبست بوشيتي وجفوفي ورحت طلعت الهم گتلهم انه ارفد ما اخذة اكعد على بناتي لحد ما تجي ساعتي واودع الدنيا

هذا الحجي ما صرف الهم ، ضلو شادين وياي مرة هدو عليه بشلبه مرة سجين مطبخ ومرة خالد حط مسدس برأسي

جانو يهددوني حتى ارفض ارفد

خالد وهناء ولمياء خايفين مو حبًا بأرفد بس مارادو تخرب مصالحهم اذا خذيت ارفد هناء تتطلگ وراح تخرب علاقة لمياء بخالد

وبالتالي خالد ينجلط لان يدري ورا مرته ورث جبير يخدم مصالحه

خذيتچن بليله ضلمة وشردت وهنا ضلت تجيني تهديداتهم ناخذ البنات وناخذ البنات

انه كتلهم لا تخافون عزلت بطابق ثاني يم اهلي وراح اكعد على بيتي واسكت

دزو عليه گالو ما يصرف النه هذا الحجي تاليتچ تتزوجين على بيتج ويعيشن بناتنه يم رجال غريب ما نعرف شبي ما بي

رفضت ارجع وانطيتهم وعد ما اتزوج بس همة خافو اتزوج بدون علمهم وتعيشن يم رجال غريب ممكن يسيطر عليه ويأذيجن

انه هنا ما اجذب عليج شفت حرصهم وفرحت لان ما يقبلون يخلون بناتهم يم زلمة غريب

ورا شهر فاجئوني من اجو لاخواني وياهم الحجية سعدية وكالو خل نفض السالفة نعقد لوعد وارفد وهي بديرة وهوا بديرة بس حتى نضمن ماتاخذ واحد غريب

انه رفضت بس ضغطو عليه بيجن كالو ناخذهن اذا ما ترضين والله انه دمعتي على خدي غطيت وجهي ودخلت عليهم كتلهم موافقة

وعقدولنة جنت مجبورة لخاطرجن رضيت بالمر بس حتى تضلن حدر جناحي

بعد هذا حجي امي كلش ضجت منكم انتم ضلمتوها وخليتوها تصير زوجة لرجل ماتريدة

واحنة مانقبل امنا تعيش ويا رجال غير ابونه لهذا السبب نريد عمي ارفد يطلگها

فاضل ...ارفد عاشگ امچ من سنين طووويلة ما يرضى يطلگ

رهف _ لا يطلگ المهم ما يتقرب منها ويضلوون هيج مثل الغرب

والله نسوي بأرواحنا شي اذا امي صارت ويا عمي ارفد

فاضل _اذا امج رضت مالجن حق

_امي ماترضا من الاخير هاي

_خوش بكيفها زين وحجيج على ياسمين بت خالد صدگ جذب

بلعت ريگي متوترة كلامي جان صحيح انه شفت بعيني بس حجيت بساعة غضب ما ردت افضحها

_طلع بساعة غضب جذب مني

_خابري عمج وگليله انه جذبت

_لا كرامتي ما تسمح انزلها لخالد والله لو اعرف اموت ما اگلله انه جذبت

هز رأسه وكال _انه احجي ويا هذا هوا طلعي وحگج انه اخذه الج

ترف _من سمعت عمي كال لرهف طلعي صعدت ركض للغرفة صادفت سداد واكف كبال بابنا بس شافني ابتعد ودخل لغرفته امره عجيب هذا الولد

رهف _ طلعت من يم عمي فاضل وبعد ايام اخذلي حقي من ليث راح اسولفلكم كل شي عرفته من عمي بالتفصيل

فاضل _ها ليث بوية شمالك جايلي تفور وجهك احمر دم

گعد گبالي يزفر بغضب وايده ترجف من الأعصاب

_بوية صدك الحجي لسمعته من نجم ما راح تسوي المكاتبه ولا تنطيني الأرض

فاضل _اي بوية الارض هاي مو نصيبك راح تصير نصيب واحد غيرك لا تضوج هية ارض مو فد شي

گال بنبرة توسل _بس بوية انه احلامي كلها واكفة على هاي الارض كلت اجمع جم سنة واتداين منك من صندوگ العايلة وابنيلي مجمع للألبسه والمفروشات وهاي الامور

هاي الأرض راح تاخذني للغنى وتخدمني هواي

انه ما اريد اضل على راتب الحكومة

فاضل _جمع فلوسك واشتريلك ارض

ليث _بوووية الارض مكانها تجاري واذا اريد اشتري بنفس المكان والمساحة يرادلي عشر سنين شغل اذا مو اكثر وانه ماعندي ذبيت كل فلوسي على البيت

فاضل _هسة انته شبيك معصب

ليث _حرمتني من الكاع هاي الكاع بيها تحقيق احلامي

_لالا ما اشوفة شي يستوجب الحزن الواحد ليش يضوج اذا خسرلة گاع لو فد شي يملكه ما اله داعي هذا الانفعال

حجة بغضب _بوية!!!

_بالله عليك سولفلي شعورك هسة شنو تحس شو صار عندي فضول اعرف مشاعرك يمكن انطيها الك

_شبيك بوية؟ احد تارس راسك عليه؟ يعني مامعقولة فجاة تخابر نجم وتكله الارض ماراح تصير الليث

_اعصابك لا تصيح

_ ما مصيح ابوي ما مصيح بس انه مقهوووور

_مقهور ومعصب وايدك ترجف وتحس الدنيا كلها وگفت بعينك جا حرمتك من شي رايده

وخليت احلامك كلها تندثر وكل مخططاتك راحت نخلة بشط

_اي والله ليش هيج بوية بروح نعمان لا تسوي بيه هيج

_قطعة ارض خلتك هيج ترجف وهية ارض مو اكثر

_مو هاي الارض مستقبلي

_ورهف جانت مستقبل سداد وجان هاويها وباني احلامه ومأسس بيته وانته اجيت هدمته گبل لا يبني

اتمنى هسة تكون حسيت بشعور سداد اخوك من خربته ويا محبوبته وخليته يخسر قطعة من روحه والبنيه الجان يتمناها بمستقبلة وحرگت حلمه

بهت وجهة كال بمراوغة _ لا ما خسرته شي انه ما ادري هاويها هسة دريت منك

فاضل _لا يا ليث انه ادري بكل شي صار عندي علم

اشوفك ترجف ؟ الحقيقة ترعب وتخوف

اخوك سداد بسببك حاله صار مثل لأخرس ونباگت سلعته بحضرة ناس عميان

لا يكدر يحجي ويفهمهم ولا هم اليشوفونه

اخوك اخرس جيف انته اخو ومايكدر يحجي ويفضح السويته واحنة عميان ماشفنه شي لان سداد ما حجة والماخذة منه شي غير ملموس ما كدرنا نشوفه

ليث _بوية انه عيني منها من مات عمي جعفر

فاضل _طفلة طفلة عمرها سبع سنين وانته جنت زلمة شلون تحط عينك على طفلة! هسة لو بنية واصله سن التكليف وغسلت (الحيض) نكول اي نمشيها

بس هية جانت طفلة!! هذا مرض مو محبه

انته من عمرها هم نمشيها ونكول حب جهال بس مو واحد عمرة شكد شكدد جان عمرررك شكد

18 لو 19 مو جنت سادس من مات عمك يعني زلمة تحط عينك على بنية عمرهااا سبعة! عجبة عجبة هاي ماصايرة لا عد عرب ولا عجم

ليث _ بعد صارت ومشت شسوي

_لا تسوي شي بس مثل ما حرمت اخوك وبت عمك من احلامهم انه راح احرمك من حلمك

مو بس هيج لا راح احرمك من الكاع لأسباب بعد منها تماديك وتحرشك ببنيه عمك ومكرك وحيلتك السويتها

ومو بس هيج انه عزمت اخوان وعد من يجون ويحضرون راح اكعدك واكعد وياك واجيب صهيب ابن خال رهف وتحجي كدامه الصدك تكله ما ماخذ بت عمي ولا واصللها

نطت عيونه وكام محتقن _وانه انزل روحي كدام هذا الزعطوط

_هذا التكول هلي زعطوط ما دنس بت عمك بالحرام وتحارش بيها اجالها من الباب جية زلم

شوف واذا ما تنفذ والله ثم والله اغير وصيتي واحرمك حتى من الورث

_عمرك طويل بوية انه مستعد تحرمني من كل شي وما انزل روحي

_بكيفك بالاخير انه راح احرمك من الورث وبنفس الوكت احجي ويا الولد بنفسي واطلع جذبتك

_سالفة مااااتت ليش تعيدها

_انته شتكول ليش افتح الموضوع ماله داعي يعني واذا رهف عرضنه وشرفنا وانته شوهت صورتها

ماكو داعي انظف سمعتها هوا شرف نمونه

اطلع برة يلا والجمعة اريدك حاضر قرر عندك وكت تحجي كدام الولد خير على خير ماتحجي الوصية تغيرت

_احجي بشرط ترجعلي الارض

_الارض ما تشم منها متر واحد هاي عقوبتك اطلع يلا

حجيتها ولفيت وجهي وسكتت ..

_بوية الله يخليك؟ مو احجي وياك ليش ساكت تسوي روحك ماتسمع ليش بوية تحرمني من حلمي

ضليت ساكت وهوا يتوسل ويحجي بالخمس دقايق مل ما حصل لا نظرة ولا جواب وطلع من البيت فاير ..

______________________

درة _ بيوم الاجت بي بيبي سعدية وصارت هاي السالفة امي حجت لرهف كلشي وانه جنت واكفة واسمع انصدمت وحسيت روحي صرت نار

رهف راحت للدوانية هادة ركضت ورها شفتها وكفت لحظات وجان صوت عمي خالد عالي وطالع ما حسيت غير رهف دفرت الباب بكل قوتها وطبت عليهم مثل العاصفة شبكت لحية بلحية وكسرت عين خالد وفشلت عمامي بحجيها

بحيث انه دمعت عيني مو خوف لا فخر احسها بحجيها فشلتهم كلش واخذت حقنا

ومن طلعتها عمة نجوى بيبي سعدية گلتلهم _تستاهلون صدك شواربكم شعر زايد يرادلكم تربية ورجولة

لا بااارك الله بيكم عشيرة ماكدرتو تحلون سالفة ارملة وبناتها وتخلون النفوس تصفى بس انه راح احل كل شي هاي جيتي راح اعدلكم واعلمك على الرجولة

كلهم سكتو خجلانين منها ما يكدرون يردون بيبي سعدية هي زوجة جدي الثانية احنة نعرفها مسولفيلنه عليها جانت عايشة يم بيت اخوها

وهسة رجعت فجأة ، صارلها سنين ماجاية للعراق بس عمامي يرحولها دائما هذا الحجي گالته الي عمة نجوى

ناطينها الجدي هدية وهي وبيبي ام ابوي الله يرحمها يخلفن وكونن هاي العائلة الكبيرة الي تعرفتو على جزء منهم ويانه ..

صار الليل سمعنة بيت عمي ارفد متعاركين بيناتهم امي طبعها ماتحجي هواي ان جان الحايط يحجي هية ما تحجي

انه ما اهتميت ذاك الاهتمام بالاخير هم مابيناتهم علاقة مجرد عقد ما يأثر ، تمددت بفراشي لزمت الكارت حضنته لصدري وغمضت عيني استنشق ريحته ابوس ايدك الي خطت هاي الحروف الحلوة

عيني تدمع كل شوية وامسح دمعتي انه حبي الك حب ما ينوصف ابوس حروفك وجن روحي تبوس روحك

خليت الكارت جوة مخدتي ونمت ليلي فرحانه .. نسيت حتى موضوع استاذ فاقد

ثاني يوم بالجامعة وتذكرت حجيت كل شي لرهف كالت كليله رهف بحالة ما تخليها حتى تفكر حزينة على خالها وحياتها ما مستقرة

_هذا رفض

_مادري الي يشوفه هوا اذا يجي بغير وكت يمكن افكر واقبل

هزيت رأسي وبقيت اباوع بالوجوه مبتسمة

_خير يا طير الفرحة غامرتچ

_احس الدنيا جاي تضحكلي المهم شلون شكلي ماخرب مو

_لا لسه حلوة، كرصت خدي وكالت

_ولك صايير كيك كيك خدود وحركات هنيال صاحب النصيب

نصيت خجلانه راحت لقسمها كعدت على صفحة افكر بياسمين ماداومت هسة اهلها يسوولها شي من ورة رهف ماجان صح حجيها ما سترت على البنية

اباوع بالوجوه ادور وجهة بين هاي العالم عندي امل المحه واكحل عيوني اذا مو اليوم غير يوم

نفسيتي تحسنت واحس الهوى صار نقي والدنيا ضحكتلي من جديد

ترف _يوم الجمعة عمي عازم خوالي كلهم ما ادري ليش البنات يركضن شي تطبخ وشي تنظف وانه كاعدة على التلفزيون

اجت امي شالت الستلايت بكبرة وكالت _عيونج عمن لا تدرسين لا شي بس تباوعين للمسلسلات

ترف _بسس اشوف الحلقات الاعادة حبوبة والله طول الاسبوع ادرس

هزت رأسها ب لا وشالته ضمته .. وقفلت الكنتوور

ترف _حرررام عليج حررام

وعد _انجبي نزلي جوة ساعدي البنات خطية جاي يركضن

ترف _شلي غرض انه

_ومرض خوالج على جية وانتي هنا كاعدة تباوعين للمسلسلات ما تستحين خوثة يلا يلا كدامي

تخطيتها ومشيت جاي انزل الدرج شفت سداد وحمودي وعمي كاعدين وفالح وهمام يشيلون بالميز

هذولي الزوج بكل عزة لطامة لازم كل جمعة هنا عزيمة مو عزيمة موجودين

واذا عزمنه زرزور نعزمهم ويانه ماادري ليش من دون كل الولد

جريت ظفيرتي الطويلة حطيتها على صفحة ورتبت گذلي وانه انزل ، صبحت عليهم ومشيت لغرفة فلك القديمة كاعدة بيها بيبي سعدية ..

طبيت شفت بيبي كاعدة شعرها الابيض محنيته وصاير برتقالي مسوية كصايب ثنين

لابسه نظارات وكاعدة فوك السرير تسبح

رفعت راسها باوعتلي كتلها _بيبي عادي اكعد اشوف برنامج بالمبايل يمچ امي ضمت الستلايت

سعدية ...هلا بيج يدة (جدة) تعاي شتردين تسوين سوي بكيفج

شافت المبايل بأيدي كالت _هذا يخابرون بي ويشوفونه نوبات

ترف _اي بيبي مرات يشوفونه

سعدية _ شسمه هذا انه عندي صرصر

ترف _بيبي هذا جلكسي

سعدية _بلكسي، حجت الكلمة وهزت رأسها

_يمة منجن امهات البلكسي

تقربت كعدت جوة ارتجيت ع جرباية ، وشغلت المبايل طلعت برنامج حلو گلتلي علي فلك ينطون بس ابراج ونصايح وموضة ..

فتحته اول شي طلع مقدم يحجي

_اهلا بالشابة الحلوة الي تريد تتغير وتنظم حياتها عن طريق برنا.......

سعدية بصريخ _يبووووووي يبووووي طلعت النه زلم وييين شيلللتي وييين يبوووووي لحكولنه

جرت شيلتها ذبتها على راسها تغطة حتى وجهة وبلمح البصر بيبي تحولت سبايدر مان وطفرت من الجرباية لازمة عكازتها

كمت من مكاني خايفة تقربت عليه ضلت تطكني بالعكازة

_ولللج ما تستحييين مطلعة النه زلم واحنة مفررررعين وعطوبنة طالعات

يبوووووو لحكولنه يبوووووو

تطك بيه وتصرخ والشيلة السودة جبيرة مغطية كل رأسها وما مبين شي بس خشمها لاطشة علي الشيله

ترف _بيبي مايشوفونه هذا ڤيديو برنامج

سعدية _ولكم يبوووووي تريفه حاطتلنه بالبلكسي ڤيڤيو انشهرررنا يالرررضا انشهرنا

ترف _ما يشووووفونة بيبي عورتيني خليني افهمج

سعدية _وخري الزلم وخريهم وخرريهم وخريهم ، وخررريهم

ترف _بعد ما اكدر اوخرهم العالم هسة جاي يباوعون علينه شوفي الولد كاعد يضحك على منظرنا

انفتح الباب فاتو واحد ورا الثاني ، مستغربين بيبي تضرب بيه بالعكازة على ايديني ورجليني وتصيح وخررريهم انشهرنا وانه ميته ضحك حتى حجي ما اكدر احجي

سعدية _فاااضل هااي الفرخة شهرتنة شوف طبتلنه زلم عبالها احنة بعوروبا (اوربا) مطلعتلنا ڤيڤيو بالبلكسي مالها

تحجي وتأشر على المبايل مشمور بالكاع والفيديو مشتغل ، بس غير عمي والولد ماتو ضحك خوب فالح نطن عيونه وما سكت

فالح _حجية هسة كاعد يشوفونه بس بدون هدوم هذا التلفزيون يشيل الهدوم يلا سويلهم حركات اغواء

سعدية _يبوووووووووووووووووووووووي داح عرضك نعمان

فاضل _هههههه حجية هههه هذا مايشوفونه ههه شسالفة ماتعرفينه تلفون نشوف بي مقاطع برامج ولطميات طلعي وجهج لا تخافين

سعدية _هذني غير بالسينما انه ماطابة سينما

فاضل _لا بعد ماكو سينما هسة هذا الجهاز يطلع النه كل شي معقولة ماشايفته گبل

ذبت شيلتها وكالت _لا والرضا انه بيج ياحجرة وبيت اخوي ماعدهم منه بس مسجل نسمع بي لطميات نوبات عبد الحليم حافظ

فاضل _هنا الحجي لا تخافين حجية محد يشوفج

سعدية _ چا انه شمدريني عبالي مطلعه زلم يشوفونه

عمي وجهة صار احمر من الضحك گاللهة _حجية تعاي يمنة نگعد بالهول

سعدية _مابياااس (مابي) ما بياااش انهبطت نزل ضغطي من ورة هاي تريفة

شلت المبايل طفيته ضايجة ، طلعت يمهم شفتهم ملتمين مشيت للمطبخ امي وعمة يطبخن واكفات صفة ويبسبس وبعدها ضلن يضحكن

ورجعت عمة نجوى تشاور امي وامي تهز براسها مرات تبتسم ومرات تضوج

ادري بيهن هسة عمة نجوى وبيبي سعدية يخلن امي تاخذ ارفد لان مرة سمعت بيبي تكول الامي البنات يكبرن ويعرسن وتضلين وحيدة اخذي ارفد يونسچ ويسد وحشتچ من تكبرين

حمودي _ترفه تعاي تعاي ، صاحلي وأشرلي اجي يمهم جان لابس دشداشة ولاف جراوية على رأسه و وجهة مطلع بس عيونه وفالح وغيث مسوين نفسه ويصورون بالكامرة ..

اخذ بشت عمي فاضل لبسنياه ولفلي الچفية فوگ رأسي زين ، لثمني بيها وگال

_شيخة آل نعمان ترفه بنت جعفر

طك اصبع گابلته وطگيت ويا اصبع وهزيت رگبه وهزلي رگبه

هوس _الخيل تلاگن ويا الخيل وصاحن وطربگ طربگ

فالح _ولك سداد گوم شبيك گالب وجهك جنك بوم هونها وتهون يلا يا اخوي

جر سداد حيل وضرب رجله بالگاع بقوة اكثر من ضربه

سوو نفسه

فالح _ها وها وها ..الخيل تلاگن ويا الخيل وصاحن طربگ طربگ

ضلو يدبچون ، انه وحمودي نطگ اصبع ونهز رگبه

عمي فاضل يباوع علينه ويضحك ويفر بأيده وبيبي سعدية تصيح شوف هاي الفرخة ماتستحي من ولد عمها

فالح _همام گول هااا

همام _ هااا

فالح _صبابة ومصبوبة الخوة البيني وبينك

همام _صبابة ومصبوبة

فالح _ها الخوة البيني وبينك .. وتعاي تباركي يامن تحبين وخضر عودنة اليابس من سنين

سداد _وسعدية بس گولي بلي بيج خير وتدللي

سعدية _يا ياا شني معرسة تهوسولي خايبين گعدوو گعدووو يا فلك هاي الزلم مستخفة ماخليتو شي الترف

طلعن رهف وفلك من المطبخ يضحكن ، ودرة واكفة بنص الدرج تباوع علينا

كعد فالح فحطان عدل لثامة وصفگ

فالح _يلا كلكم وراي يا بووووية

_يا بوية

فالح _گالو هلي خذلك مرة

_ياا بوية

_دزيت خطابة اربعة

_ياا بوية

_جابولي مرتي مگبعه

_يابوية

كل السنون مشلعة

يابوية

وانه اعور بلا منظره

يابوية

لملمت كل فلوسي

يابوية

وتوجهت لعروسي

يابوية

وامي تصيح ضروسي

يابوية

وانه اشتغل بالسيطرة

يابوية

جابوها الي تمشي صفح

يابوية

والليل ماتنامة تگح

يابوية

وعلى هل رنة للصبح

يابوية

هي مرة لو مرمرة

يابوية

وشلون بدلة عليها

يابوية

گواني ومخيطيها

يابوية

ومن الشمس رجليهاا

يابوية

طبگه على طبگه مفطرة

يابوية

وطگله هلهلولة شطولها ، عمي فاضل صاح ولكم كااافي شهرتونه شهيرة

احسبلكم خمس ثواني اذا ما تطشون منا اكوملكم بالعكازة خلة طشارهم ماله والي

ترف _حموودي هذا شلون ينفتح اللثام ما جاي اكدر اتنفس

حمودي _انه افتحه تعاي

فتحه واخذ الجفية حطها على جتفه نزعت البشت انطيته اله

_شيخة ال نعمان تنازلت عن الشيخه

_بيها ركص متعبة مااريدها

اجو خوالي خالي اسامه جايب ويا كاتي وجون بوسناها وكعدناها يم بيبي سعدية

بيبي سعدية تحجي وكاتي تكول

_ ترشمولي شيكول بيبي

سعدية _شمالج يدة صچيچة گولي بله وراي صچيچة

كاتي _صشيشة

سعدية _تتعلمين انتي تدربي يومية گولي صچيچة وتتعلمين

كاتي _ليش يتعلم انه هيج مضبوط ما احتاش اتعلم

سعدية _مو هذا من يكبر فرخچ شلون تصيحين علي وترزلينه يمه حفظي سوالفنة تنفعج

كاتي _ تمام صشيشة ولك شون (جون) تئال صشيشة

وبعد غير صشيشة

سعدية _اوگفي اتذكرلج شني جنت اصيحن عليهم

هاا تذكرت .. اگللهم تعالووووو مگاميع

كاتي _تئااال مداميع هاي سهلة احفظه انه انتيني (انطيني) غيرها

سعدية _ لا كافي يدة ما اريد اخربچ عبنج مثغفه هذني كافي نوبة الجاية اعلمج غيرهن

جون طاح من القنفة گلتلي كاتي بغضب _صشيشة

سعدية _يده انتي هم تحنين لديارج

كاتي باوعتلي مافاهمة

ترف _تشتاقين لأهلج

كاتي _اي بيبي بس هاي زلمة ماعده فلوس هواي نسافر من يسير عنده هواي نسافر انه وصشيشة وزلمة مالتي

سعدية _يدة هاي شترطن انه ما افتهمن

كاتي _انته بيبي صشيشة ما تفهم انه اروه يم ماما وبابا من زلمة يسير عدها فلوس

سعدية _هاي الفرخة تغلط عليه ولا لا تغلطين تاتي مادري شيسمونج اركعج بالعكازة اخلي دمج يخرخر

كاتي _انته بيبي ما تئرف تهجي وانه مايفهم

ترف _بيبي انتي ما تفهمينها وهي ما تفهمج ثنينجن سكتن لا تحجن

سعدية _خوش ساكته عمي لا تروح تفشر عليه وانه ما اتحمل عصبية اهبدها بالعكازة اخليها تونون

خلصت العزيمة وراحو خوالي العصر ، انطونة عطلة العيد اجر عمي كوستر وراح نطلع للزيارة حمله جان عيد الأضحى

رهف _وين عبايييتيي

ترف _اشم گفة ايدي

رهف _يمة منج ترف

عفت ترف ورحت ادور عبايتي كملنه تجهيز سوينة فطاير وحلويات واكل للطريق لان طويل وطلعتنة لبغداد مو للنجف مناك نرجع لكربلاء والنجف ونجي للبصرة

لبست بنطلون وقميص خفيف وفوكهن عباية رأس طالع بس قرص وجهي باوعت بالمراية وضحكت جني توم من لبس تاير وصار فقمة

دخلت درة ارحم مني لايگه الها العباية صاحتلي انزل جريت الجنطة ولحگتها لگيت سداد جاي يطلع من غرفته لابس بنطلون وقميص سمائي وشعرة مبعثر على جبينه، لحيته طويله ومو مرتبة

شافني اسحل بالجنطة گال بهدوء انطينياها مد ايده ياخذها صارت عيني على حلقته انغز گلبي بس ما حسسته

شالها وضل ينزل گدامي وانه ورا بخطوة ما حجيت اي شي ، صعدنة وصرنة بمكان واحد انه ويا بيناتنه ترف كاعدة

فالح واهله راحو بسيارتهم همة اربع نفرات ، وأرفد وعائلته بسيارة هم همة عددهم قليل بس خمسة

والباقين بالكوستر ويانه ، لان عوائل وسيارة وحدة ما تكفيهم وهم صارت حصرة نزلو بيبي سعدية صعدوها ويا بيت عمي فالح

الطريق طويل خلصته نوم ، وصلنه ارتاحينه بالفندق ساعتين وطلعنة نزور مجموعات كل مجموعة سوية

سداد وغيث ويانه وامي ودرة وترف وعمة نجوى وفلك ، سفانة وفدك وهاني ما اجو ضلو بالبيت لان فدك حامل وهاني كله مشغول مانشوفة اصلا من الصبح لليل يشتغل

نجوى _جنهم متصافين بيت أرفد ولا جن صاير شي

وعد _وشريد انه منهم خيه الله يهديهم وان شاءالله ام بارق ما تضوج وتحسب وتصدگ انه مااريدة وماعندي شي ويا زواجنة مجرد حبر على ورق

نجوى _غلطانة والله وعد

وعد _لا خية هوا الصح ماغلطت بشي هسة انتي ترضينها على روحج تجي عليج ضرة

نجوى _انه يوم اليجي فاضل يوكف كبالي معرس وماخذ وحدة ثانية يعشگها ، اگله رايحة ورقة طلاگي توصل وراي

حتى لو طلگ الحرمة ماكو فايدة اذا گلبه هاويها شسوي بي وگلبه مو الي

وعد _والله ماادري شگلچ بعد بس انه مااريد ارفد ولا اريد قربه ابد

دك مبايل سداد _الو .. هاا لا والله التفت علينه كال

جمانة ويامن طلعت

گلناله ما ندري

رجع حجة بالمبايل _ماكو مايدرن خاف ضاعت خابرها

ماترد ليش

انه راح اخابرها اوكف

نهى الاتصال وكف ع صفحة يخابر ماكو جواب اخير شي صار مغلق

رجع خابر احد جاوبة عرفته فالح لأن گله فالح ماردت وصار مغلق انته وين راح اجيك

وبهاي اللحظة عرفت اكو مصيبة منتظرتنا بهاي السفرة ....

مشهد ...

جمانة _خ خايفه عباس

عباس _غلقي مبايلچ ومحد يوصل النه غلقي بسرعة

جمانه _ هوا م مب مبايلي مغلق بدون ماتگول

باوعتله متوترة گال _نزلي هسة هنا نعقد ونطلع گبل لأربيل انسي اهلچ بعد هذا اليوم

جمانة _ عـ عباس ر رجعني مو هيج م متفقين

عباس _على يا مال ارجعج؟ ها عيني ترة للصبر حد وانه خلص صبري لا امج ولا ابوج ولا حتى فالح قابلين ينطونج الي احنة هسة شنو لازم نسوي

جمانة _شنو؟

عباس _نعقد وننهزم لاربيل منها نطلع نروح لتركيا لا من شاف ولا من درة

جمانة _ ل لا ر راح يعرفون أ ا أنه وياك لـ لان انته راح ت تختفي وياي ر رجعني م ما اريد اتزوجك ب بهذا الشكل ب بطلت

عباس _حد البارحة انتي راضية شغيرج فهميني

جمانة _ ن ندمت اريد ا ارجع م ما اريد ا اكسر اخوي وابوي و ا ا انزل روسهم ب بنص عمامي

عباس _من خ** بأهلج وبعمامج من جبيرهم لزغيرهم احترگت صفحتهم من فاضل لأزغر واحد

حطيت ايديني على أذاني و عطت حيل _ ل لا تغلط ع ا اهلي ع عباس

ما اقبل ت ترة

عباس _عساچ لا قبلتي

جمانة _ ص صدمتني ما توقعتك ه هيج ر رجعني يله ل لا ابليك بلوة و و اكلهم خ خاطفني واسجنك

عباس _غير كل شي يثبت علاقتنة موجود يمي بالجهاز صورنه سوية موجودة ورقمج يمي وحتى رسائلج حافظهن غير افضحج اذا سويتيها

سكتت من الخوف ما گدرت انطق شي تنهد وگال _ما قصدي اضوجج بس انه متوتر لان احنة جاي نسوي شي غلط بس مجبورين

خالتي ماتريد تنطيج وخالي مايقبل ما ضل غير حل

جمانة _ و والله ندمت ما ما اريد ا انهب ر رجعني ، حجيت وانه ابجي بخوف

عباس _بعد ما اكدر صارلنه تقريبا ساعة هسة لاحظو غيابج وحتى صاحو بسماعة المفقودين بأسمج

جمانة _ ش شمدريك

عباس _علي اخوي هناك دزلي رساله بلغني

جمانة _ ب بس يش يشوفون علي ي يعرفوني و وياك

رحنا ب بيها عباس راح ي يلگفونة ويذبحوني ب بسببك رجعني

عباس _كتلج فات الاوان يلا اهدي اخذي نفس وخل نتوكل على الله اليوم نكعد بمكان محد يوصله نخليهم يأيسون ونطلع باجر بشركة سفر

اوكفي سكتي علي جاي يخابر ، جاوب وضل يحجي ويكول اي اي خوش اي متفقين

سد الخط وباوعلي _اكو شركة بعد ساعتين يطلعون لأربيل علاوي گال طلعو وياهم وخابر صاحبه يضبطلنه الوضع

هزيت رأسي بدون جواب ضليت ارجف الندم من اول ساعة ضل ياكل بية اكل حسيت روحي بدأت تطلع من الخوف

اباوع كل اصابعي ترجف تنزل دمعتي وارفع ايدي امسحها واباوع لعباس

اختنگت بعبرتي غصيت وانفجرت بجي غطيت وجهي بايديني اشهگ

سودة عليه فالح راح ينزل رأسه بسببي امداني امداني انه رعنه امداااني خربت كل شي هسة ابوي يصير عگاله بالطين وما يكدر يرفع رأسه بالديوان مرة ثانيه وامي تتفشل بنص النسوان ويسموني العالم جمانه الناهبة لو الشالحة

لطمت على وجهي بقوة وضليت اتوسل بعباس يرجعني بس هوا ما اهتم لا حياة لمن تنادي

اخذني لمكان او منطقة شبه مهجورة وگف السيارة

نزل ضل واگف يمها تقريبا ساعة ورجع صعد طول هاي المدة انه ابجي واشهگ والطم

ردته يرجعني منين ماخذاني اخابر اهلي واشوفلي جذبة انطيها الهم اكللهم ضعت اكللهم تخربطت وامشيها

بس ما طول انه ويا ما اكدر اخابرهم شگللهم انه شردت تعالو لحگوني لان ستندمت

شغل السيارة ومشة كتله بصوت مبحوح _ ل ليش وگفت

عباس _حسيت اكو واحد لاحگنه وكفت حتى اتاكد احنه بامان وهسة رايحين نطلع بسيارات الشركة لا من شاف ولا من درة انتي بس سكتي ومسحي دموعج حتى وجهج يستقر هيج بهذا شكلج تجيبين علينه الانظار ويحسون اكو شي

جمانة _م ما اريد ر رجعني والله ندمت ا اريد تاخذني ب بالحلال ك كدام اهلي

عباس _راح اخذج بالحلال شنو شعبالج اجذب عليج؟ والله بلوة انتي جبتي كل مستمسكاتتتج؟

هزيت رأسي بدون جواب

عباس _جمونتي شبيج فهميني شبيييج مو امس جنتي راضية

جمانة _خ خايفه عباس

عباس _غلقي مبايلچ ومحد يوصل النه غلقي بسرعة

جمانه _ هوا م مب مبايلي مغلق بدون ماتگول

باوعتله متوترة گال _نزلي هسة هنا نعقد ونطلع گبل لأربيل انسي اهلچ بعد هذا اليوم

باوعت وگف السيارة گبال عمارة ايديني ترجف ما ادري انزل لو اضل كاعدة ارتعش خوف

اجت ببالي فكرة وهي انزل واركض واذا لحكني اكول للناس خاطفني واخليهم يرجعوني الاهلي وهوا يبتلي لان كتله رجعني ماقبل معناها صدگ مثل الخاطفني

لزم ايدي بسرعة وشخط السيارة وطلع نترت ايدي بخوف شفته خايف يباوع بالمراية ويتلفت ويسوق سريع ما حجيت اي شي صوتي ضل ما يطلع

كتمت انفاسي حتى نسيت شلون الواحد يتنفس بالربع ساعة يسوق سريع وبعدها ضل يسوق عادي خفف السرعة وجر نفس عميق وزفره

سحب كلينس مسح جبينه من العرك وكال _كلب ابن الكلب والله لو عارض كبالك اطيرك انته وسيارتك

جمانة _ش شكو؟

عباس _واحد لاحگنه بس مو من جماعتكم ماشايف عدكم هيج سيارة الظاهر هذا حاس اكو شي ما ادري انه يتراوالي لان شاردين احس هيج كل الناس مستهدفتنة

نصيت بدون رد ضليت افرك بايديني ايد بأيد وصلنه لمكان كله سيارات كبار وناس شايله جنط

خابر علي ورا دقايق اجة ولد طلبو جنسيتي طلعتها بأيدين ترجف خوف وندم وانطيتها اله

بهاي اللحظة انثولت جنت اكدر اشرد من عباس بس ما ادري شنو صابني خوف؟ ما ادري رغبة بالهروب ويا عباس

لو مات عقلي من هول الموقف

مشة الولد شوية ورجع جاب جنسيتي ضميتها وضل يحجي ويا عباس ، واخذنة لوحدة من السيارات

صعدنة كبل عباس خله الستارة وكعدنه رجلي تهتز عيني بالوجوه

صرت اشوف كل الناس ابوي وفالح ، حطيت رأسي على الكشن ابجي بدون صوت

انه دمرت روحي دمرت روحي بسبب حبي لعباس

ابن خالتي واحبه ويحبني صار ثلث سنوات بس اهلي رافضينه لان يشرب واهله شوية ماعدهم رباط يعني دايحين بين قوسين

بس انه فاهية وعفت كل الزلم الزينة وكعت بهذا وانعميت على عيوني جنت امشي ورا مثل المخدرة

كل ماتصير فرصة واروح لبيت جدي يجي ويكعد يمي ويصور وياي ويسولف ويضحك بس ما اخلي يتمادة جنت حافظه نفسي بس هسة لا غرگت نفسي ببير عمري ما اطلع منه

امداني ما سمعت كلمة امي من گالت اذا تضلين تحبين عباس تروحين بالرجلين امداني ما سمعتها

ضلت اكتافي تهتز حطيت شالي بحلگي حتى ماتطلع شهگاتي

عباس قرب رأسه مني وهمس يم اذني _راح تفضحينه صبري روحچ دقايق ونطلع والكابوس ينتهي نصير احررار

لج باعي انه وياج راح نطلع منا ونروح للحريه تعرفين شنو يعني حرية

ماكو لا قيود ولا اعراف ولا عادات وتقاليد خايسة شبيج موتي روحج ياما ناس انهزمت وعاشت احسن عيشة

سكتت ما رديت مسحت وجهي وضليت كاعدة افرك بأيديني بخوف بدون صوت ولا نفس صابتني لعنه خطفت صوتي بذيج اللحظه

___________________

خوف ترقب، ناس تروح وناس تجي وناس تخابر

گاعدين بغرفة عمي فاضل بالفندق

كلنا خايفين جمانة اختفت فص ملح وذاب

مرت ساعتين وفوگ وما الهة اي خبر ولا اثر

الكل عبالهم صارلها شي لو انخطفت ، محد جان يدري بالشي السوته جمانة حتى انه ما جنت اعرف

سداد _رهف تعاي وياي

باوعت لعمه نجوى هزتلي راسها بالموافقة انسحبت من يمهم وطلعت ويا ..

وگف يم المصعد طلع جكارة ورثها وگال _ما سامعة شي من جمانة شايفة شي احجي رهف

رهف _ليش تسألني انه شمعرفني ما تگلي البنية ماتحجيلي اي سر

سداد _معقولة؟ شايفجن اخر فترة حبايب

رهف _غير بت عمي؟ طبيعي نكون حبايب بس ما نحجي اسرارنا مو كل واحد ضحك بوجوهنا وحسينه نفسنه ارتاحينه ويا نروح نكتله الاول والتالي لازم الواحد يكتم ويحفظ اسراره

سداد _صح لازم واحد مايخلي المقابل يعرف سره لو نقطة ضعفه لان يستغلها ضده ويأذي

رهف _عفية عليك ابن عمي عندك شي ثاني؟

عقد حواجبه مختنگ وگح بقوة ضرب على صدره ومشه خطوات للدرج تبعته بخوف

_سداد اجيبلك ماي؟

اشرلي بأيده لا ومستمر يكح بقوة وجهة صار اصفر مديت ايدي سحبت الجكارة من ايده بغضب وسحگتها برجلي

_هذا السم هلكك وراح يموتك دعوووف الجكارة عوووفها

_بس هية تفتهمني وتحرگ روحها علمودي

_مو وكت هذا حچيك سداد احنه عدنا مصيبه

_انه بمصيبة من شهور ومحد حاس بيه ولا احد ملتفتلي

رفعت طرف حاجبي ما عاجبني كلامه ورديت ..

_انتة وگعت روحك لا تسحگ على الجني وتصيح اسم الله

_رهف انه راح اموت من وراج راح اموت شني الذنب المرتكبه والله عاقبني بيچ؟

لا تارك فرض ولا متدني للحرام بس سبحانه انطاني اختبار جبير

_رايحة للغرفه

رجع يكح ما جاوب حسيته يكح بقوة مبين علي متأذي طبعا اذا ريحة الجكاير صارت توصل لغرفتنا هل كد يدخن مو طبيعي مأذي نفسه

رفع رأسه وحچة بصوت متقطع ..

سداد _الأنسان مكون من مشاعر هوا عبارة عن كتله مشاعر ، الا انتي الله خالقچ من صخر وحتى مشاعر ماعندچ گلبچ قاسي وضالمة دمرتيني دمرتي حياتي

رهف _انته ليش تلعب دور الضحية؟ هذا الشي مقرف

انه المظلومة بكل هاااي القصة وكاعدة وساكته مو مثلك ظالم ومسوي نفسك مظلوم

سداد _ادري بيج مظلومة وانه اعتذر عن كل شي صار وياج ومستعد ابوي ايديج واعتذر منج مليون مرة بس كافي تسوين بيه هيج جاي تموتيني

وما تحسين بروحج

رهف _شمسوية؟

سداد _صارلج فترة محسستني انه والماكو سوية مرات احس بروحي غير مرئي يعني تعبرين من يمي احسج ما تشوفيني

احاجيج احس ما تسمعيني وحتى اذا استجبتي الي هم احسج ماكو مو يمي ذهنچ شارد

رهف _متوهم جاي اتصرف وياك طبيعي كلش مثل ما اتصرف ويا غيث وحمودي شو همة ما متحسسين انته شبيك شايل روحك وهادگها (ضاربها) بالگاع

سداد _دستيني هواي ومع هذا ماراح الومج انتي انظلمتي بس رجاءً رجعي طبيعية ترة جاي اموت الف موته على الاقل حسسيني انه موجود وانشاف

حجيت بأستهزاء _ شلون احسسك بشيء ما موجود

هز رأسه متأذي ورد _ براحتچ روحي فوتي جوة اذا سألوچ گليلهم سداد نزل شوية ويصعد

رهف _تمام بالمناسبة انه ما خلصت العندي ضامتلك مفاجئة راح تخليك تطيررر من الفرحة ويمكن من القهر

عقد حواجبه باوعلي مستغرب استرسلت بالكلام

_انه اريدك تفرح لان من واجب الاخ يفرح الاخته سداد

لا تتوقع اكو ذرة حب بگلبي اتجاهك انتَ غلط واحنة تعلمنة من احنة صغار اكو مساحة تمحي الاغلاط وتنظف المكان ونرجع نكتب فوگها الصحيح

انتَ غلط وانمسحت وراح اخط مستقبل صحيح فوگ المسحته ، اتمنالك حياة سعيدة ويا الهام واتمنى تكونلي اخ وسند ولو اشك بيك تكدر تسند احد انتَ روحك ماتعرف تسندها

حطيت ايدي على حلگي _وجعك الحجي اسفه بس شسوي تذكرت من شفتني ويا ليث ماكدرت تسند روحك وتكوم تدور الحقيقه وتنقذني وتنقذ نفسك

فگلت الانسان المايكدر يسند روحه اترجى منه يسند بشر ثاني؟

جان يسمع ويتوجع وكل الالام واضحة على وجهة تعمدت اجرحه لسببين الاول حتى ينساني ويأيس مني والثاني ، استرجع كرامتي الي داسها قبل وداسني وعافني شايله جروحي وحدي ومحمله حطامي على ظهري وادور على واحد يعيني يشيل عني ويصلح المتحطم وياي

وما لگيت احد غير اختي درة شالت وياي وسندتني ورتبت وياي وبنت المهدوم ولمعت المخدوش وخلتني ارجع احسن من قبل

اذكر جانت كل يوم تكعد يمي وتحجيلي كل شي تعلمته من خالي حر

حتى بعد وفاته تجي يمي تضم دموعها وتنسى روحها وتررممني وترجع تبني الامل بداخلي

ما حسيت بالقوة الا من مدتلي ايد العون وشالتني وانه لو ما درة اختي جا هسة غركانة بمستنقع ليث القذر ..

بس بفضل ربي ودرة انه اليوم راسي مرفوع وقوية ومسترجعة كرامتي وذاتي ..

دخلت كعدت بهدوء يم عمة نجوى ..

نجوى _شني راد منچ سداد؟

رهف _سألني عن جمانة اذا اعرف شي عنها گتله كل شي ما اعرف ما حاچيتلي شي يخصها

طب فالح فاير يرجف غضب كال وهوا ينزل النقال من ذانه

فالح _كلهم اختفو واحد ورة الثاني طلعو وما الهم حس ، نجم ماخذ سيارتي وخلاني اشبج الله ينتقم منه

سعدية _خافنها طايحة صايرلها شي نشدو بالمستشفيات

باوعت لام فالح وگلتلها هي البت مو وياج وين ولت شلون تغفلين عنها

ام فالح مسحت وجهة من الدموع وحجت _گلتلي رايحة ويا البنات وبيت عمي فاضل ازور احب رفگة البنات وانه ضليت يم ام لمياء والبنات

فاضل _يعني من طلعنه طلعت ورانه

جمانة _ما ادري انه بالغرفة كلتلي يمه راح ينزلون واريدن وياهم گتلها خوش يمه روحي وانه مطمنه طلعت وبعد مادريت لحد ماخابرني فالح كال جيبي جمانة وتعاي ناكل لكينه خوش مطعم

كتله جمانه مانزلت وياي نزلت ويا بيت عمك فاضل خليها براحتها تريد ويا البنات

كال انه توة شفتهم خطفو من بعيد وجمانة ما لمحتها وياهم سده مني ومخابرلها ماترد راجع مخابر سداد ولنه سداد يكله مو ويانه

رجع خابرني متسودن وضلينه ندك ندك ماكو سداد يدك ماكو وصار مغلق

سعدية _اااخ منجن اخ بت شابة اجيبها واحطها بيد حرمة عمها وارد للحجرة حتى تتاكدين صارت بايد امينه

نجوى _والله ما اجتنة لو جايتنة جا حطيتها بعيوني بعد هاي ابو ليث والولد شهود

فاضل _لا اله الا الله يبا جلال الولد طلع الكامرات شفتوهن

جلال _عمي بصراحة .. تلعثم وباوع لفالح

_جمانة طلعت نازلة وحدها محد وياها لا من عدنا ولا من عدهم

فالح _شتقصدددد جلال

جلال _والله ما اقصد شي يمكن عبالها طالعين لو رادت تفتر وحدها وضاعت

ما ادري بس اكيد ما اشكك باخلاق بنيه عمي

ارفد _همام غيث وبارق وين ولو؟

فالح ضرب الباب رفسه وكال _خابرتهم واحد ورا الثاني طلعو حتى نجم خذة سيارتي وطلع يدورون كلساع واحد يخابرني يكلي رحت للمستشفى الفلانية ورحت سألت بفلان مكان ماكو ما الهة اثر

سعدية _عدها صاحبه هنانة؟

صادق _عدها بيت خالها وبيت خالتها خابرنالهم ونشدناهم كبل دقايق كالو ماكو ماشفناها دخيلك ياعلي دخيلك راحت فلذة افادي

ام فالح وهي تبجي _بس لا صار عليها قدر حضريها يالزهرة هاي وحيدتي

فاضل _وين تروح تطير؟ حتى لو طارت هم ينزلونها الولد ويجيبونها

اخ بوية تعال عمو جلال تعال گومني راح اموتن اخذني اقيس ضغطي گبل لا تطكني جلطة

اجاله جلال ابن عمي ارفد سندة وساعدة عمي ارفد اخذو عمي فاضل ، الجو مشحون الوجوه محتقنة فالح تخربط وكل شوية تديه روحه ويطيح على اركبه وما يشوف شي

راد يموت

بس لا جمانة شاردة والله حرام تكسر فالح وامها ابوها وهمة هسة ميتين من الخوف عليها

عاد بالاخير فالح طاح حط ايده بذانه توجعه ركضله سداد سنده وركضله عمي صادق ساعده

صاح سداد _راح يروح فاالح من ايدينا تعالووو سندو وياي

عمي فالح واسد ساعدو عدلو ، غطيت حلكي بأيدي ابجي درة واكفة بباب غرفتنة تمسح بدموعها ويمها ترف

ما حسيت غير ترف صرخت وتنزع النعال مال الحمام من رجلها وتشمرها على واحد وگبل ركضت

سداد عاف عمامي يم فاضل وركض وراها كمت بسرعة ركضت ومنا درة ركضت

وثنين من ولد عمامي جاسم وكاظم جانو واكفين على الدرج يدخنون ركضو بسرعة

ما نحس غير ولد يتدهرب من الدرج وترف نازعة فردة نعالها الثانية وتضرب بالولد

امي خرطت خدودها وحمودي وسداد جروها منه وهي تعيط علي

ترف _انته اذا ماتطلع عصابجي وخاطف جمانة اكص ايدي

كام ينفض روحة وكال متلعثم _شسالفة ماعرفتوني؟ انه سمعت بجمانة ماكو واجيت اطمن

سداد _انته ابن خالها؟ جني شايفك

علي _لا ابن خالتها الجماعة خابرو ييسألون ضلينه بقلق واجيت اشوفكم خاف محتاجين مساعدة محتاجين عرف بالمراكز اعرف هواي ناس

ترف _وليش من خزرتك خفت ولك انتَ انتَ ماغيرك وراك مصيبة

سداد _ترف عوفي الولد اقارب مو غريب

درة _سداد، هذا شفته يراقبنه من اول ما وصلنه وحتى قبل لا نرتاح ونطلع نزور

حجت بهمس

سداد عقد حاجبة وگال للولد _شمدريك احنه بيا فندق واجيت

علي _امي سالت ابو فالح وعرفته منها

سداد لزمة ضرب على كتفه وكله _تعال وياي يصير خير

جاسم _لا عوفه يروح احنة نعرف شلون نتصرف

علي _اي شي تحتاجونة خابروني

ترف _ولك انت جسوم وجهك اجلح شمالك ماتعرف تتصرف اكلك هذا ورا مصيبة

محمود _روحي ترف درة اخذيها يمكن فاهمة غلط

درة _تعاي عيني همة يعرفون يتصرفون

جرتها درة خزرتها و وشوشت الها كم كلمه

جاسم _رايح ورا تعال كاظم احنة نعرف شلون نطلع الحق والحقيقة

سداد ضل يمهم

سداد _اجي وياكم خاف تحتاجوني ، لو يصير عليكم شي منا منا

جاسم _احنة اولاد آل نعمان واحدنة بالف زلمة راييحين نطلع الحقيقة ونجيب بت عمنه سالمة ونرجع لا تخاف

كاظم _امشي جاسم لا يتبعد هذا الولد

راحو ينزلون همزين محد شاف كل شي صار بس احنة التفت سداد شافني وگال

_هذا اخو خاطب جمانة جم مرة بمرة

_افتهم منك انتم هسة حطيتو علي علامة X واعتبرتوه اول متهم

_اي بس انه ماحبيت احسسه والولد هم لگفوها ما تشوفينهم تصرفو طبيعي وبس مشة لحگو

رهف _من هيج جنتو واحد يباوع للثاني وتنطون بعض اشارات بعيونكم

سداد _اي بالضبط احنة واحد يفهم الثاني من نظره هاي مثل اللغة عدنا وبس احنة نفتهمها

رهف _بس ماتوقعت جاسم وكاظم وباقي اولاد عمامي مثلكم لان هم هادئين ولا مالهم حس حتى مرات انسى عندي اولا عمام غيركم انتم البارزين بكل المواقف

وهم مايدخلون عليكم بكثرة غير فالح وهمام ومرات نجم وجلال وبارق البقية ما اتذكر شايفتهم غير بالدوانية لو بالاستقبال اذا انفتح الباب صدفة

سداد _تدرين بيهم متكترين وبيوتهم مسافة عنه صعدة سيارة ف مايجون بكثرة

بس احنة متعودين بالمناسبات بالطلايب ايد وحدة

كلنا نتكاتف

رهف _الله يحفظكم ويخليكم ويمدكم بالقوة وينطي شوية من غيرتكم الشايلينها لاخوك ليث الماعندة غيرة

سكت ما رد تخطاني ومشة تعبت كلش مشيت لغرفتنا لكيت ترف تبجي مكتولة بنفس النعال الي شمرته ع الولد

نزعت وبدلت بدشداشة خفيفه وتمددت كل حيل ما ضل بيه ، امي تسولف ويا درة يلومن بترف وهي بالركن كاعدة تصيح

ترف _شني غير اكتله مبين عصابجي وخاطف بت عمي شمالجن انتن

درة _اي بس مو هيج بله طلع بريئ ويجي يكول لعمي فاضل بتكم كتلتني بالنعال ودفرتني من فوك الدرج

رهف _ما اظن بريئ

وعد _شدراج

سولفتلهن حجي سداد وكامن يمدحن بترف وحتى امي راحت باستها وگلتلها عفية بنيتي ام لسان طلعتي ذكية مو لسان على الخالي

____________________

جمانة ..

چنت اشوف الناس استقرو وگالو شوية ونطلع

باوعت لعباس خايفة ارجف بهاي الاثناء سمعت عياط ، شلت الستارة وشفت واحد انذب من باب السيارة عيني علي اريد اعرف شبي ما ادري شلون رفعت راسي اباوع ليكدام بالسيارة

واشوف بارق ابن عمي أرفد متنگب وكاض بأيده جناية ، واجة عدل وگبل على عباس جرة من يمي وسحبه وصاح بكل غضب _نززززززززلي لچ

سحب عباس بقوة شمره برة السيارة ركضت ورا رغم الخطا واعرف اكو عقاب منتظرني بس فرحت وحسيت اجة الخلاص

اباوع لبارق طاح لعباس ضرب كتله شبعه دگ اجو الناس يفاككوهم ، طلع همام ما ادري منين يبعد بالناس يگللهم مشاكل عائلي خليهم يحلون مشاكلهم

وتقرب مني باوعلي بخزره وبعيونه نظرة غضب

گال _لا يطلع حسج ولا تحجين حرف لسانج اكطعة من العرج خوش لو مو خوش

هزيت رأسي بدون كلام سحبني همام للسيارة ضليت اتلفت اشوف بارق خله عباس ينكط دم

حط رجلة على صدر عباس ، عباس صاح بغضب _انننه اعلمكم

رد بارق بكل غرور ..

_احنة احفاد نعمان الذيـابة ما تخوفنا الزعاطيط

شال لثامه وتفل بوجه عباس ودار وجهة واجة للسيارة عافه مذبوب بالگاع يون بوجع

ويتلوه ، عباس صاح بصوت عالي

_جاي ياخذ بت عمة الساقطة وهية ناهبة وياي

بارق وگف عيونه انخصمن مثل الذيب دار وجهة وركض لعباس لزمه من راسهة وضل يفرك بوجهة بالكاع بكل غضب ويحجي ويا بس ما واضح شنو يحجي

الغضب مسيطر علي وكل ذرة بي تنفض غضب

الناس شالو من عباس اجة بسرعة باتجاهنا وصعد بالسيارة التفت شاف همام كاعد يمي لازمني من زندي بقوة يخاف انهزم لو اسوي شي

شغل السيارة وطلع ورفع مبايله خابر وما حجة شي غير كلمات معدودة

_جمانة وياي جايبها وجاي

سد التلفون شمرة على الكشن وكال بغضب يهدد

بارق _ما تكولين انه طالعة ويا كولي خطفني خطف وغير هاي الحجايتين لا تحجين

شلون خطفج كليلهم ما ادري طلعت للسوك وضعت وما حسيت شنو صار وراها

لا تنطين اي تفصيلة ولو صغيرة

لا تكسرين فالح وابوج ما يستاهلون جذبي علمودهم وعلمود روحچ ترة اذا ماجذبتي ترحين بالرجلين

همام _تشبعين كتل تشبعين مسبة لا تعترفين لو حتى جرو لسانج وگـلولچ نكطعه اذا ماحجيتي

كليلهم جاي احجي الصدك عباس خطفني واذا ماكلتي هيج وحجيتي مصيبتج ونزلتي راس فالح بايدي اكتلج وادفنج وادفن هذا الخايس عباس وراچ

جمانة _ خ خوش و والله ندمت و وكتله ر رجعني ما قبل و والله و وداعة امي

بارق _سدي حلكچ ما اريد اسمع حسچ سدددي ولج لو ما شايفينج وخطفتو من كدامنا بالسيارة جا حطيتي روسنه بالكاع وخليتينه علج بحلك اليسوة والمايسوة

همام _خو ما صار شي منا منا لو عقدتو

جمانة _ ل لا ك كلشي ماصار والله والله

بارق هز راسه يخزر بيه نزلت راسي مالي عين ارفعه انه غلطت واستحق كل هذا الحجي ، بداخلي فرحانة طلعت من حلگ مصيبة شكبرها الحمدلله والشكر

مستعدة اسمع غلط وشتم ويدگوني بالقندرة مي يخالف المهم ما تمت ولا رحت ويا عباس

ضلو يخابرون وهمام يجاوب مايحجي شي بس يكلهم جبناها واجينه

وصلنة للفندق وصعدنه بس طبيت الكل باوعلي ركضلي فالح وبسرعة حضني يبوس براسي

_ولج انكطع كلبي عليج جمارة گلبي احس بهاي الساعات روحي انسلبت مني وين رحتي وشصارلج

بارق وين لكيتها

حضنت فالح بقوة خايفة واسمع بارق بدأ يجذب ويكللهم

_انخطفت خطف الخاطف مانعرفه ، جنة انه وهمام طالعين بالسيارة وشفنا حاطينها ورا ومبينه مو بوعيها

وصارلنه ساعات وراهم نضيعهم ونرجع نلگاهم

اخير شي شمروها من السيارة شمر واحنة نزلنالها ركض ربك ستر ما شمروها والسيارة تمشي

ابوي اخذني من فالح يتفقدني ويحضن بيه وگال _سوولج شي بوية احجي سوولج عوروج ضربوج؟! شربوج شي

هزيت رأسي ب لا

وركضت الامي كل الناس ساكته الا عمي خالد الشراني كال

خالد _مو بالكامرات شافوج طالعة بوحدج ومجذبة على امج كايلتلها انه رايحة ويا البنات

انتي مو مخطوفة طلعتي منا شاردة لا تباوعولي هيج ولا تجذبون على نفسكم غير بالكامرات طلعت خايفه وتتلفت بعد واحد يحجي الصدك

هل مرة كضوها ويردون يسترونها المرة الجاية محد يكضها وتسويلنه طركاعة

عمي صادق هد علي وفالح رفس الحايط وعض ايده حيل وصاح _ولللك لا تتهم اختي بشي ما مسوووويته

عمي ارفد عرض بينهم وبيبي سعدية وكفت عاطت بيهم _سكتووووو كافي

يمة برق مو احجي وياك برق ، هاي شسمهم كامرات طلعو جمانة نازلة تمشي وحيدها لهيج عمك عباله شاردة

فالح _شنو رقم السيارة انطينياه اطلعهم واخليهم يوكفون كبال خااالد ويكولون اي خاطفينها وماشاردة

بارق رد _مابيها ارقام

فالح عاط وضرب راسه كلش اذه نفسه كضو الولد بالكوة

فاضل _جمااانة سمعينه حسج احجيلنه ليش نزلتي وحدج المن جنتي رايحة وليش خايفه تتلفتين الزوم نعرف كل شي حتى نحل هاي القضية وما تتشوه سمعتچ

بارق جر نفس عميق وگال وراها _چذب ما مخطوفة جمانة

جمد الدم بعروگي لو يكطعوني ماينزل مني دم كل الانظار توجهت اله

بلع ريگ وگللهم بكل جد

بارق _انه وياها واحد عاشگ الثاني ومن دريت نجم محاجي عمي خاطبها وعمي ناطيها اله قررت اخذها غصب واعقد عليها واخليكم امام الامر الواقع ...........

_ضلو يسربتون شافونه سود حسبالهم هنود

فاضل _خالد لا تخليني اهينك اكرمنا بسكوتك

سعدية بغضب _والله انك يخالد تهوى الشر وما تگدر تضمه بگلبك وانتَ بزر بطني عود لو جايبة صخل ولا جايبتك

فالح مسح وجهة حيل وتقدم بهدوء على بارق بسرعة طفرو همام وسداد لزموه عرفو نيته يضربه

فاضل _بارق نريد الصدك ترة دوختنا من صفحة تگول مخطوفة وهسة عاشگتك وعاشگها

وتريد تعقد عليها خلينا نفتهم احجي بشكل اوضح شمالك عمي

ارفد _صلو على محمد وآلِ محمد وگعدو سداد كعد فالح خلينه نسمع ونفهم

صلو على محمد وگعدو على الچرابي فالح حاط ايده على خاصرته يباوع لبارق بتحدي وكأن يگله جيب سيرة اختي بشين وشوف شلون اكلك بسنوني واذبك عظام

بارق _ بس لا تقاطعوني وافتهمو كل شي بالأول

هزو رؤسهم عمي فاضل گله _احچي نسمعك سولف

بارق _اول شي جمانة ما الهة اي ذنب الذنب ذنبي انه الغلطان بكل شي صار

فالح _انتَ وحدك الغلطان وغصبا ما على خشمك

بارق _ مو غصب بس هذا الصدگ اسمعو انه اريد جمانة احبها ، بس شاهد الله وحق هذا الماي يا جمانة ماعندي شي وياها حتى عيني ما احطها على طولها استحي من عمي وفالح

لا اخابرها ولا ادزلها رساله ورقمها صار بمبايلي من يوم خلص رصيدك وردت تخابر اختك يا فالح

من وراها ضل الرقم حتى رساله بالجذب ما دزيت

والله شاهد ومستعد هسة انزل احلفلك بالكاظم وخاف ما تصدگ من احلفلك بالكاظم هاي روحتنا لكربلاء احلفلك بسبع الگنطرة وبعد ماله داعي اشرحلك تعرف سبع الگنطرة واليحلف بي

ردو _والنعم من ابو فاضل دخيل اسمه

بارق _گبل فترة شفت جمانة عند بيت عمي فاضل وتدرون احنه عادي نحجي وياهن نسولف وياهن

والله وكفت كبالها جمعت قوتي وجرئتي وگتلها يا جمانة انه رايد اطلب القرب منچ تقبلين ما تقبلين

گلتلي شمعنى انه ، من گلتلي هيج احترام الك عمي والك فالح ما گدرت اكللها بصريح العبارة انه عاشگج لو احبچ

گلتلها الگلب اختارج والعقل بنيه عمي واعرف اخلاقچ وادبج واعرف امج شنو وابوج شنو واخوج شنو

هي ابتسمت وخجلت وما ردت غير بكم كلمه

كالتلي _ما ينطوني الك والدتك صاحبه مشاكل ولسان ويخافون ما يقبلون

انه گتلها اذا انتي موافقة نشوف حل المهم رضاتج

هي ما ردت عدها خجل وحياء ما سمحولها ترد غير بأبتسامة

انه هنا عرفت بت عمي هم هاويتني وضليت هيج من اشوفنها بس ابتسم وتعرضون گبالي ادير وجهي واطلع

هسة حد هنا انه غلطان؟ گولو يا جماعة بية صوج بيه غلط

منو بيكم عندة قدرة ويكدر على گلبه

محد الگلب هوى من ذاته ومحد بينه عنده على گلبه سلطة

فالح _هسة لهنا ميخالف ما غلطان نمشيها الك ابن عمها وردتها اريد اعرف شصاااارر اليوم

فاضل _ليش ما خطبتها دامك رايدها وهية راضية

بارق _تجيك السالفة ابوي عمي صادق احنة مو گبل شهر حجينه عمي جاوبهم مو خطبنه جمانة منك انه وابوي وانته رديتنا

كل الانظار توجهت الابوي حجي بارق جان جذب هوا ممحاجيني هذا تاليف منه بس سالفة الخطبه طلعت صدك لان ابوي جاوب

صادق _صح رفضتك

سعدية _وليش ترفض ابن اخوك هيج احسلك راد ينهب بتك

صادق _غير الي اسبابي

فاضل _وشني اسبابك بله شنهي السبب اليخليك ترفض ابن اخوك

فالح زفر بقلة صبر وضل يمسح بوجهة بغضب

صادق _ انه اگلكم ليش رفضت تدرون انتم بجمانتي عزيزة وانه ما انطيها لياهو الجان

ارفد _جا ابني ياهو الجان صادق ؟ ابني ياهو الجان خوية؟

صادق _لا والله وليدك وليدي الله شاهد وكفيل بس انه احجي الصدك وما راح اجذب

ام بارق وبناتك شرانيات بله هسة البنات ماخذات معرسات ومتكترات نشيلهن بس نجي على ام بارق هناء

مريتك هناء تدور مرة كامله مكمله وتريدها بت حسب ونسب ... قاطعة عمي

ارفد _جا ناقصك حسب نسب غير احنه نفس العشيرة وكلنه نفس العايله

صادق _الحسب والنسب موجود خلني اكمل

وتدور شكل كامل وشهادة عالية ولسان سليم او بالاحرى لسان سليم ولوگي

وانتم مثل ما تدرون جمانه ترتل والرتله عدها واضحة وبنيتي بيها شام هواي

سعدية _جا شني اليرتل والبي شام ناقص

صادق _اي غير ام بارق بعرس هاني وخطوبة سداد خلتها ترجع للبيت تبجي بس والله لا ام فالح ردت ولا انه حجيت

گايله للبت روحي جيبي بودر وغطي وجهج وجسمج ترسي روحج شكلج بالشام يكشش جنج مشوهة

وتسميها ام نص لسان جا ترتل عمي خليني ساكت شلون انطيها بتي على طبق من ذهب واكلها هج ذمريها

انه بتي ما تعجب هناء وراح تهججها بعد غير هذا الصدك

ارفد _جا ام نجم مو لمياء اخت هناء شمعنى النسوان خوات والاباء اخوان شنهي الفرق لا لا هذا مو خوش حجي منك

صادق _لا لمياء رايده وشاريه غير مرة عزمونه بهذا رمضان هسة ماصار ثلث اشهر وجنة كاعدين وهية فتحت الموضوع كالت نجم بس يكمل المشتمل نعرسه واحنه مانريد نركض ورا الغريبة نريد ناخذ من دمنا ولحمنه وان شاءالله نجيكم بالموضوع

وجانت فرحانه وتحجي من طيب خاطر وخالد يضحك

خالد _ورا هاي السالفة احنة مبطلين ما نرضا ناخذها

فالح _وعساك لا رضيت ظفر من جمانه ماتستاهلون

خالد _ماعندك احترامات

فالح _ما اتعلم الاحترامات منك

فاضل _شلون اليوم ماتفض؟ بااارق كمل عمك رفض وراها شصار

بارق _كبل لا اكمل اريد اسأل عمي صادق عمي جا انه شنو بية مو بعينك هية ماخذتني لو ماخذة امي

شمعنى تنطيها لنجم ما تنطينياها

صادق _عمي بارق امك تهججها ماتخليها والله العظيم

بارق _لا مالها شغل دام انه رايدها

صادق _ لا الها شغل تتذكرون من ابوي مارضا جعفر ياخذ وعد شصار وراها

طرد جعفر

ارفد _ماكو ربط بين السالفتين

صادق _اكو ونص طرد جعفر وخلاه بعيد عنه وهاي جدامك البنات ماشفناهن الا من كبرن وشبن و وحدتهن صارت مرة

بسبب رفض ابوي للحرمة لرادها اخوي جعفر المقصد من كلامي الاهل ياثرررون واذا رفضو ومارادو الجنة يتشتتون

فاضل _هسة هاي افتهمناها بس بارق وارفد عدهم خير اشرط البنت بيت مشتمل شقه فوگ وتعزل بيها

صادق _لو يحطلها بيت بعرعر تعزل بي ما يفتكون من هناء غير واحد يحجي الصدك

بارق _مي خالف انه وياك وكلامك صحيح وان شاءالله محلولة

فالح _استاذ بارق ممكن تتفضل علينه وتكمل النه الصار

خالد _هوا غير مايعرف شلون يرگعها

بارق _اكملك مالك شغل بعمي خالد انه غلطت اعترف غلطت واستاهل منكم كل شي حجي غلط واذا تريد تطكني يافالح كوم طكني

طلعت روحي وكلت يهاي البت ماخذها ماخذها انه اجيتها كتلها بهيج ساعة نزليلي احجي وياج برة كم حجاية

مالت الله هية مارضت بس انه لحيت كتلها الرايدة منج شي مهم وعندي حل ومن هذا الحجي هي رفضت اخير شي قنعتها

هذا الحجي من وصلنه وراحو الولد يأجرون

نزلتلي جمانه تحجي وياي ونتفاهم انه شسويت كتلها تعاي وراي نمشي للسيارة مارضت

رفضت جريتها من ايدها العالم ضلت تباوع

كتلها اذا ما تجين اجرج اقوة والعالم تذب علينه سالفة ضلت تبجي وامتثلت الاوامري واجت وياي

صعدتها بالسيارة بعد كتلها انه اريد اعقد عليج غير هيج ما يرضون ولا يهتمون ساعة شيطان وقررت هيج قرار تعبان

ضلت تبجي وتضرب بروحها وهاي كدامك وجهة شصاير بي من الدك خطيه انقهرت وفزيت مثل الواحد الذابين علي ماي بارد

كلت هاي انته شسويت بارق شصخمت كمت خابرت همام كتله بعد انه تعبت نزل ضغطي وما اكدر اسوق تعالي لفلان مكان وصفتله على ما اجالي اكله ساعة تقريبا

ومن شافها وياي ما كدر يحجي سكت لحد ماخذاني للمستشفى وجيك ضغطي ورجعلي حيلي لان مايدري شيگللكم ضل ساكت

لحد ما صرت زين وكمت بنفسي كتلكم جمانة وياي وهاي هية وذيج هية

هاي جمانة مثل ماخذيتها رجعتها طرف ثوبها ما كضيته ولا عقدت عليها ولا شي

واستاهل منكم العقوبة ومستعد الهة

خالد _وليش جذبت وكلت مخطوفة

بارق _ما ردت اطيح من عين عمي وفالح كلت اجذب في سبيل ما اخسرهم ما جنت محسب حساب الكامرات ما منتبه اكو كامرات يصورنها من تنزل

بعد ورا ماشفتو الكامرات انه مجبور اعترف حتى ما تتورط جمانة بسببي بالاخير هية عرضي وما من المعقول انه اخلي عرضي علج لو يمسها شي من وراي

كامله فالح هاجم علي ويكله بغضب _ورا هاااي عملتك شعرة من شعرها ما تحصل **** س*** حيووووووان

ولك انه اخوووك بارق تغدرني ولك تغدرررر اخوووك سااافل

جرو الولد كعدو غصب عمي فاضل صاح غسلوله وجهة اجة سداد يذب ماي على وجهة كله فالح بنتر

_شني شايفني عمري سنتين ولابس حفاظه جاي تغسلي

اخذ منه البطل وضل يذب ماي على وجهة ويمسح بشعره

عمي فاضل وبيبي سعدية واحد باوع للثاني الجذبة مشت على الكل الا عليهم هذولي الاثنين مستحيل تعبر عليهم

فاضل _ اليوم نفضها

فالح _لا ما تفض وبارق من هاي الساعة ماهو ابن عمي ولا من دمي ولحمي انه بريئ منه

فاضل _فاالح؟!! من يمته صوتك يعلى على صوتي؟!

فالح _السموحة عمي بس هذا عرضي وبارق تجاور على عرضي اي واحد مكاني يسوي هيج ويحجي هيج زين ومني ماكمت فتحت رأسه بالنص

فاضل _يا جماعة خلينه نسمع من جمانه جمانة عمي انتي جنتي راضية بابن عمج بارق

باوعت لبارق خزرني حتى ما اطلعه جذاب رجعت باوعت لفالح

فاضل _احجي بوية لا تخافين انتي بكل الاحوال طلعتي نظيفه وبريئة

رضاتج بي ماراح تدينچ

جمانة _ ص صح انه ق قابلة ب بي بس ما ش شردت و ويا م مثل ما گ كا كال جبرني امشي و ويا

فاضل _يعني انتي رايده بارق ابن عمچ

جمانة _ چ چنت بعد ا الصار ط طاح من عيني م ما اريده

بارق _حچي لسان والله بگلبها هية تهواني وانه اريدها وراح اخذها برضاتكم لو غصب عنكم

فالح _ولك شو انته ماتعرف تسولف ،، رجع گامله غطيت وجهي خايفة

اسمع بس صياحهم ردت اموت من الخوف كله بسببي بارق ورط نفسه وفالح وابوي راح يموتون يرجفون

فاضل بغضب _كاافي انه والحجية وصادق وارفد نحلها ونقرر يله كدامي تطلعون كلكم وتتوزعون على الغرف مانريد فضايح انت فالح لخاطير اختك اسكت

الناس كلها ضلت تتفرج علينه والله يعلم شكاعد يحجون

ارفد _واحنة ماگاعدين بالبيت بمكان بي غرب كافي ازعجناهم بما فيه الكافيه رجاءً التزمو الهدوء لخاطر الله

كامو الولد طشو همام يبوس جتف فالح ويحجي ويا بصوت ناصي وسداد كاضه

والباقين طلعو بارق امي وعمتي نجوى طلعني واخذني يم عمة وعد والبنات جانن كلهن واكفات يم الباب بحيث بس دكينه الباب فتحو النه

جنت ابجي خايفه وعمة نجوى تقص عليهن الصار طبعا هوا ماصاير هاي جذبة بارق نقذ راسي بيها بو ماهوا جا طار راسي

ولو اشك بفالح وابوي يسوونها على كد ما يحبوني راشدي ما يضربوني وانه الغبية رحت ويا عباس وما حسبت حسابهم امداني امداني ثولة رعنة وماعندي اخلاق بسببي راح يتكاتلون

وعد _عمة كافي موتي روحج بجي هاي هية رجعتي سالمه وراح تنحل ما تضل

ام فالح _مو اكلها ماتسمع وميته بجي راح تفر روحها وتروح

يمة جمانه كافي هذا ابن عمج اعترف بغلطه وندمان هاي هية تنحل وبوس عمك بوس ابن عمك وتفض

جمانة _ب بله ما ف فضت ويصير ش شي بسببي ا الله ياااخذني ا انه السبب بكل شي

ام فالح _شنزززلج يمصكوعة شنزلج اااخ منچ اخ والله لو كايلتلي بسالفة بارق وانه ساعدتج وحليتها بس اااخ منج اخ والف اخ

نجوى _سوايتچ غلط شلون تنزلين بدون علم امچ

رهف _خطية لا تلومونها وتزيدون همها خلوها ترتاح

سداد يم الباب يصيح رررهف رهفف عمة نجوى باوعتلي احنه فاهمين شنو جاي يسوي ونعرف بي جاي يتحجج بس حتى يحجي وياي

حطيت شالي وعبايتي على رأسي وطلعلته

_ها خوية شصار خو ما واحد بي شي منا منا

_بله ماتجين تكعدين يمنه حتى خالد يسكت

صفنت بوجهة شوية وضحكت _تحجي كل عقلك

_اي والله احجي كل عقلي شو هوا مساع من انتي واكفة انصگر ومن رحتي ضل يغرد الظاهر يخاف من لسانچ بس تعاي كعدي يمنه شوية وانه طلعت حجة كتلهم رايح اجيب جهاز ضغط ومن جبته محد يعرفله كتلهم رهف تعرف راح اصيحلها

رهف _وانه وين اعرفله

سداد _انه اهمسلچ يلا تعاي قيسي ضغط فالح

رهف _بس انطيهن علم دقيقة

فتحت الباب گتلهن _راح اشوف ضغط فالح خاف صاعد واجيجن

سديت الباب ومشيت ويا دخلت لوحدة من الغرف عمي اسد وخالد كاعدين صفه وهمام وفالح بصفحة فالح وجهة احمر دم وما يباوع لهمام رغم همام جان يهمسله هواي

وعمة اطياف كاعدة وساكته

خالد جان يحجي وبس دخلت سكت وضل يباوع

اجيت لفالح كتله _بس اشوف ضغطك فلوحي يلا عيني

فالح مو احجي وياك لا تزعلني منك

نتر بوجهي _وزعلتهم وخري عني كهف لا امدج هنا واطلع ضيمي كله بيچ

حزت بخاطري من نتر بية بس لزمت نفسي كوة وجريت نفس حتى ما تغورگ عيوني وادمع

من شافني هيج دار وجهة ومد ايده بديت اطبق حجي سداد وطلع ضغطه لفالح صاعد

سداد _ضلي هنا كعدي يم عمة اطياف خاف يصير شي عاد الجهاز وانتي موجودين

هزيت رأسي بدون ما اباوعله گال بهدوء _مو احچي وياچ

رهف _سمعتك

اخذت الجهاز وكعدت يم عمة اطياف گلتلي بهدوء _درة شلونها شبيها مساع صفرة

_من الهبطة غير داهت روحها

_خاف نزل ضغطها روحي چيكي الها كل شي يصير

_لا صارت زينه شربناها عصير ورجع الدم لوجهة

هزت رأسها ودنگت تفرك ايد بايد وانتي شنو وراج بله يا عمة اطياف وشنو قصة حلقومة وليش نهلة جانت على خلاف وياچ رغم ناطيتچ بتها

معقولة بعد ما عمة اطياف خلفت نهلة رادت ترجع بتها وتخالفن

يمكن لان عمي اسد الله عنده جاسم وكاظم حسب علمي صايرين سوية توم ورا ما نهلة انطت ورود لاختها اطياف

بس ورا فترة صارو يعني من بدت تكبر ورود وتحلى بعين اطياف

جاسم وكاظم من حل حمودي

مرت ساعة تقريبا حتى العصر صار يمكن ضيعنة الوقت والله ودز عمي فاضل على جمانة وامها وفالح وبارق وهناء

جمانة _كعدنة كل احنة وسدو باب الغرفة عمي فاضل بدأ يحجي گال انه قررت والقرار الاخذته راح يتنفذ لا فالح ولا بارق ولا حتى جمانة مسموح الهم يكولون لا

هزينة روسنة الوضع متأزم واحنة متوترين شفت جاسم وكاظم يباوعولي من طلعت وسداد واكف يمهم يباوعلي بنظره غضب

الظاهر عرفو لان درة حجتلي عن علي يعني هذول لثلاثة عرفو انه مهزومة ومناك همام وبارق صارت فضيحة راح انشهر ماكو شي يضل مضموم

فاضل _احنة بحيل الله هسة نرتاح نريح روسنه ونطلع الكربلاء هناك نعقد لبارق وجمانة

فالح _شلووووون؟! ماياخذ اظفر جمانة والله ك** حاله حال المطاية ماعندة غيره على عرضه

ماانطيها

فاضل _باوع وراك عمي فالح دير وجهك باوع شني وراك

فالح التفت مستغرب ورجع باوع لعمي

فاضل _حايط طگ راسك بي انه اريد الزينيه الكم واعرف شنو جاي اتصرف

وما قررت وحدي هاي بيبيتك سعدية وعمك وابوك

صادق _وانه موافق

فالح _تحجييي صدك

صادق _اي والله هم واحد هاوي الثاني هذا هوا خلي نعرسهم مابيها شي

فالح راد يحجي عمي رفع ايده سكته وگله _فالح تثق بعمك فاضل لو لا؟

فالح _اثق بيك طبعا

فاضل _هذا هوا دامك واثق بيه امشي وراي المصلحتكم انه احجي

فالح _عمي لا تشمر

فاضل _انه ما مشمر كلامي طبيعي غير الشيطان سواها مرة يرجع يسويها مرة ثانية

ويا خوفي يجي يوم وجمانة تسايسه ويشردون برضاتهم وما نلگالهم اثر

فالح _ماتسويهاااا جمانة

فاضل _ليش منهو گال بارق يسويها؟ شتعرف بارق ينهب عرضه؟ لا والله

بس الشيطان من يسيطر على عقل ابن ادم يخلسه خلس ويخلي يسوي المحد متوقعه ويا ما عگل طاحت من ورة الشيطان

هسة ما اريد اسمع اي كلمة غير موافقتهم الاخيرة

بارق نتوكل ونعقد الكم

هز رأسه وكال _اي انه هاوي بس اريد فالح يكول راضي انطيك

فاضل _وفالح خوش زلمة وما راح يكسر كلمة عمة

فالح كال بغضب _هذا هو دام ابوي قبل وانتم طبختوها سوة بعد شكول انه

عافنا وطلع شايط لحكة سداد رجع عمي باوعلي وكال وانتي عمو نسمعها منج

باوعت لبارق خزرني متحلف خفت ارفض ويفضحني كدامهم

هزيت راسي وكلت _اذا اهلي ق قابلين م ماعندي مشكلة

صادق _وانه قابل وانطيتچ الابن عمج لأنه هاويچ وما يريد مرة غيرچ

سعدية _الحمدلله ماصار شي بنيتنه لوليدنا الله يقدم البي خير

فاضل _حضرو نفسكم نطلع لكربلاء بعد نص ساعة

غيث خابر اخوك ليث وشوفه وين وصل

غيث _كبل ساعتين گلي هوا بكربله

فاضل _رد خابرله گله شوفلنه سوالف العقد وهاي الامور خلي ينشد حتى ما تصعب علينه

غيث _تامر بوية

ضلمت بعيني كلش وما ادري شلون لگيت روحي بالسيارة وابوي وفالح يتصايحون

فالح ماراضي بس ما يكدر يرد كلمتهم هم الاكبارية قررو ماكو شي بأيده

غطيت اذاني بايديني ونصيت رأسي حيل

صادق _كااافي فالح جمانة خاافت كااافي كااافي راح تموتني اكلك انه وعمامك تشاورنه وعمك فاضل كال ماطول واحد هاوي الثاني لازم نعرسهم خاف يوزهم الشيطان ويسوون سالفة تنزل روسنه

فالح _وانته ماتعرف تكله بتي ماتسويهاااا ما تطاوع واحد حيوان وتنهب

صادق _ گتله طبعا بس هوا كال جمانة فقيرة ماتطلع منها بس الشيطان مامات وليش نطولها وهي گصيرة نعقدلهم ويعرسون وهاي هية فضت راحت

فالح _خلي يكون بعلمك حجي انه ماراضي عن هاي الخطبة وشايل بخاطري كلش وماراح احضر واصلا شني اذبكم بكربله وارد للبصرة

انتم رجعو ويا الربع

صادق _ضل يزكط

سكتو ثنينهم السيارة تمشي بينه ومن دخلنة كربلاء ابوي ضل يسولف ويا فالح گوة قنعه يضل ويانه

كله خليك لازم تكون موجود فالح كوة علي قبل

نزلنة كبل للبيت ليث شايف النه بيت ودافعلهم ومنتظرنا دخلنة للبيت الدنيا جانت ليل كبل دخلت للحمام فتحت الماي وكعدت ابجي موتت روحي بواجي

لحد ما دكو الباب يله طلعت بعد بشنو يفيد الندم الواحد ليش يذب روحه للنار وبعدين يصيح طفوني

طلعت بدلت ولبست شالي نزلنه الساعة بالتسعة اخذونه لمكتب امي وهناء الي سكتت ما حجت حرف وسكوتها مخوفني

وابوي واخوي وبيبي وعمي فاضل والبقية راحو يزورون وينتظرونه بين الحرمين

اكو شيخ معمم كعدونة انه وبارق والشيخ بدأ يعقد النه

انطيت موافقتي وبارق كذلك

گام بارق سلم على عمامي وابوي وباس رأس ابوي وجهة شوية ثگيل رجع باس ايده وگله

_السموحة منك عمي البشر خطاء سبحانه المايغلط وانه غلطت واريدك تسامحني ما اريد اخسرك

صادق _الله كريم الايام تبرد لكلوب وتطيب الخاطر

فاضل _يله بوس ابن عمك طيح علي بارق

فالح _لا يوصلني انه حاضر علمود اختي

بارق _فالح انته اخوي ماريد نصير اعداء

فالح حچة مختاض

_العدو ما يسوي السويته انته يبارق يالجنت بيوم ابن عم واخو وسند وعزوة

بارق _ساعة شيطان وهذا راسك ابوسة ، باس راس فالح دفعه وطلع مختاض كلش و وجهة ما يگصه السيف

امي كضت ايدي وطلعنة للجماعة بين الحرمين لكيناهم منتظرينه واخذونة لمطعم لان ميتين جوع

البنات يكولن مشينة نفسنه بالحلويات والفطاير الزايدات والولد واحدهم ما دخلت لكمة لحلگه من اختفيت لهاي الساعة

جنت مالي نفس بس من شفت شوية الناس هدأو وامي همستلي _انه ادري شردتج ويا عباس وبعدين نحجي بالموضوع

حمدي ربچ ابن عمج سترج وطلعج من السالف

جمانة _يعني هسة ماراح يصيرلي شي

ام فالح _بعد مايصير بارق شال الذنب وحمل روحه وكره نفسه

شوية ارتاحيت لان ماراح اتعاقب بس من اذكر بارق ماراح يعديها انغمص

وضليت هيج دقيقة ارتاح ودقيقة انمغص لحد ما خلصت هاي الليلة وغفيت بعد عناء طويل ..

ترف _يمة رايحة للسطح اشرهن

فلك _ولج صبري امداج عجولية

وعد _تاني بت عمچ ولا تبطن راح انام انه ماريد افتح عيني على مصيبة جديدة

نجوى _والله انه گلبي يريد يوگف هسة لو ما الولد وفاضل سوية جا رحت حجيت ويا وشفته شماله

وعد _محتقن الزلمة والحجية هم يردون يطگون ما ادري شمالهم

ترف _يلللله

فلك _خل اشطف العباية ثواني

نجوى _سالفة بارق ماتتسولف

وعد _چا هوا بارق اذا عاشگ جمانة شلون راد ياخذ درة

نجوى _يمكن عشگها ورا سالفة درة

درة _همزين ماخذيته فد واحد مغثه ومكرووووه لا هلا بي

نجوى _هوا صدك ينرفز بس خوش ولد حتى همام وجلال طالعين على ابوهم ما طالعين على هناء مثل البنات

درة _هية هناء شلونها عاد مكروها ماتنبلع توكف بالزردوم

امي وعمة ضحكن على حجي درة طلعت فلك شايله سطل الملابس وصعدنة البيت ثلث طوابق واحنة بالارضي رجلينه تكسرن وايدينا تكرمعن علما وصلنه

طلعنه للسطح شفنه جمرة جكاوة بالضلمة

فلك _كل ظني هذا سداد لان هوا موت روحه بالتدخين بس من حجة عرفته هذا فالح

فلك _راح احجي ويا كم كلمة شريهن ترف

ترف _خدامة عد الخلفج ترف

فلك _انطيچ جيس حامص حلو

ترف _ههههه متفقين

عفتها ومشيت لفالح گبل لا اوصله حجة _شعندج جايتلي

فلك _اشوفك بالي يمك

فالح _روحي نزلي لا توكفين كبالي عقلي مو الي خاف احجي شي ياذيچ

نصيت شوية وحجيت بهدوء _لا فلوحي انته وردة ما تطلع منك تضر بنية ضعيفه لا حول ولا قوة

ولا جاية تنشد عليك

فالح _انعم الله عليج

فلك _باع فالح الصار مكتوب وما منه مهروب

يمكن هوا نصيبهم هيج ، بارق ما يتعيب وراح يسعدها

فالح _لو جااي وخاطبها مني والله انطيها

فلك _اي غير ساعة شيطان وهسة انطيني لا تصير كلش مثل سداد

مديت ايدي اخذت الجكارة من بين شفايفه وگتله بهدوء

_انتَ النچر ما تلويك المصيبة ، لا يفالح انتَ تلوي ذرعان المصايب لو نمدتلك

ضل جامد وعينه مثبتها عليه الضوة خفيف طفيت الجكارة بالحايط ورجعت كتله

_ولا تخلي شوية تتن تستقوي عليك وتضر روحك

والله من شفتك لازمها للجكارة انمردت مرد لا تعيدها علمود صحتك

نهيت كلامي وابتسمت وعفته ومشيت لترف جاي ننزل سمعت بسبسه اباوع اشوف جاسم وسداد يصعدون شافونه سكتو جاي ننزل جان ترف گالت بغضب

ترف _اوگف جسومي اوگف انته شلون مساع تمد ايدك وتلف كصيبتي على ايدك وتجرني منها ما تستحي

جاسم صفن وسداد ابتسم على حجيها

جاسم _غير شفتج لابسة شال وطالعة ظفيرتچ منه وتكتلين بالولد طايحتله دك بالنعال

ردت اسحبج ماكو غير حل مديت ايدي على الظفيرة وجريتچ منها حيل

ومنا سداد وحمودي هيج يله سيطرني عليج

سداد _الله عليك مو نچرة

جاسم _والله سامع عنها واليوم شفت صدگ نچرة

ترف _وشسامع عيني

لكزتها هوا ضحك وكال _يكلك داخلة للديوان تعاركين وهم كصيبتج طالعة من الحجاب

مدت لسانها عيبت علي بغضب ونزلت قبلي ضلو يضحكون عليها وصعدو

خلصنة زيارة بكربلاء ورحنة للنجف زرنة الامام علي والمقابر البنات موتن نفسهن على قبر حر ، باستثناء درة جانت حتى ما تبچي بس تباوع بهدوء

انتهت زيارتنا ورجعنة للبصرة تعبانين ، اول يوم خلصنا نوم

وثاني يوم يله داومنا وبالكوة رحنا مجبورات يعني

جنت جاي امشي وبيدي عصير اشرب ولمحت استاذ فاقد واگف يم رهف يحجي وياها مبتسم ويهز برأسه وهية منصية ما تباوعله

شوية ترفع راسها تباوعله تبتسم وترجع تنصي

وهوا بس يضحك ويفرك بگصته ويعدل شعره

شوية وراح درت وجهي ومشيت ما حبيت اسألها كلت يمكن شي خاص

درة …

يعني معقولة الجنانوة لحكوني راح اتخبل

ولج رهف دفتر حر اختفة نبشت كنتوري نبش وحتى كنتور امي دورته وسألتها اذا شايفه دفتر كالت لا

رهف _يمة اتخيل الجن لحگونا هنا والله اموت خوف

درة _راح اتسودن وين راح الدفتر والله ما ضل عقل براسي مناك دفتري وبطايق حر اختفن وهسة هذا الدفتر اكو احد ماخذه

بس لا هاني مفتش الغرفة ولاگي الدفتر وماخذه والله بلوة هاي

رهف _مسحي دموعج ولا تخافين وفكري بيها زين دفترج من اختفة احنه جنة عايشين وحدنا ماكو غير امي يجوز ماخذته شامرته وهسة هذا نفس الشي ماتريدج تضلين متعلقة

درة _مو ما قريته وما شفت كل شي بي كل ما الزمة ارجف من الحزن وارجع اضمه

رهف _وعرفتي كل شي شنو تستفادين؟ بعد خالي راح انسي وابدي حياة جديدة

تنهدت بضيق بله هاي شلون افهمها ان خالها بعدة عايش ورجعلي ودزلي بطاقة همزين جنت ضامتها بملزمة وموجودة محد ماخذها صرت اخاف

جبت صندوك من امي خشب بي قفل وقفلت على اشيائي العزيزة

الظاهر امي كاشفتني وهية جاي تاخذ الدفاتر وتضمهن عني

استغليت نزولها ودخلت لغرفتها ادور بين ملابسها وجوة الفراش مالكيت شي

مو بعيدة تكون ذابته هاي اخوها حر يعني داهية

رهف طبت وراي للغرفة تحجي _عوفي الدوارة وسمعي ليث اعترف بجذبته كدام صهيب

بيوم العزيمة عمي جابرة كايله اغير وصيتي واحرمك من الورث

درة _شدراج؟ احجي وادور

رهف _توة عمي صاحلي وسولفلي شلون ماخذ منه قطعة ارض بمكان تجاري جان ناطيها اله وشلون مهددة بصراحة فرحت كلش الحمدلله اخذ حقي

درة _اكلج شي هوا شعجب بطل منج

رهف _سمعت من عمي يكول انه مهددة ما يوصلج وسداد مهددة من يوم راد يخطبني واجت مها هادة

وهم مهددي من ضل يجي يفتر ويشغل اغاني يم بابنه عمي گايله اذا تتقربلها اشمرك من العشيرة كلها واخليك للمصكعة

درة _ما يجي الا بالعين الحمرة الاخوث ، وين موديته امي

رهف _تطلع شامرته شبيج

درة عوفي هاي السالفة ماتفيدج وتعاي احجيلج شسويت امس

سديت الكنتور والتفتت الهة متخصرة _شسويتي عيني؟ ممكن اعرف شنو سوت رهف الذكية

رهف _حاجيت استاذ فاقد گتله انه موافقة تجي تتقدملي وين الگى بأخلاقك وا

درة _هوا خوش حجي واستاذ فاقد محترم بس مو احسها شوية واگفه تاخذين صاحبه

رهف _شنو الواگف بالموضوع؟ الدنيا قسمة ونصيب ويمكن استاذ فاقد نصيبي

مو احسن ما اخذ ابن عمه

درة _هاي جديدة النوب

رهف _لا ماكو شي بس الولد خير من الله هيچ وتقدملي واحد منهم وتعاي يارهف اخذي ابن عمج شلون بله غير سداد يضل ياكل بروحه ، واكون قريبة علي طول العمر ويعرف كل اخباري حبلت جابت طلعت ويا سافرو مشو

درة _والله ماادري انتي ادرى بمصلحتچ

صعدت ترف تكول امي تكول نزلن العشا كمل وانتن فوگ

نزلنه گاعدين نتعشى ودگ نقال عمي فاضل جاوب واحنة التزمنا السكوت وهوا يحجي عقد حاجبة

ويهز رأسه ويگول خير ان شاءالله خير

سده وشمرة بغضب وگال _شني سداد شو سمعت جاي تلعب من وراي وتقرر بدون ماتاخذ رأيي

سداد _شني سمعت بوية

فاضل _والله سمعت وليدي مقرر يفسخ وانه اخر من يعلم منيلك هاي وشني الاسباب

سداد _مو قراري وحدي هذا القرار احنه اتخذناه سوية انه وياها

سعدية _مو اگلكم الخطوبة من تطول تخرب

سداد _بوية ثنيناتنه مانريد نكمل ما متفاهمين هية عصبية زايد وتتحسس من ابسط الاموار

واخر حجي كالت اريد بيت انتم من خطبتوني وحدكم شو هسة كاعدات وياكم بنات عمكم وبيبيتكم وانه هذا ما يصرفلي

حجيها هذا ما عجبني ، واذا ع بيت ماعندي امكانيه احطلها بيت بعدني الم بروحي وذبيت نص فلوسي ع مهر والسيارة الجديدة

والباقي للعرس ولشهر العسل غير هية تريد شهر عسل بتركيا خو ما اخذها ونروح ايد ورا وايد كدام

فاضل _انه انطيك فلوس البيت سهله

وعد _خوية جا انه زينه ومابيه شي نرجع نكعد هذا بيتنه يمكم مو بعيدة حتى البيت يخف وما الها حجة بعد

نجوى _يااااا هوا انتي ما تتامنين هيج وطحتي والبنات بالدوام وصار عليج قدر شنگول احنه!! شنحجي

عرب شكثرنا ما نكدر نداري مرة وحيدة

سعدية _مانها وحيدة بس هية تتعاير الحضرية زلمة ويعشگج هسة يحطلج بيت ويحطج بي انتي وبنياتج ويداريجن

وعد _رجعو الموضوع سداد حجية احسن

فاضل _لا البيت عليه هذا هوا بوية بعد على شني فسخ خطبه

سداد نصة زم شفايفه جر نفس ورجع گال

_اكو غير اسباب احنة شفنه نفسنا ما متفاهمين لا هي فاهمتني ولا انه فاهمها لهذا السبب قررنا نفسخ وكل واحد يروح بطريق

حتى گتلها ماريد منج ربع دينار كلشي عندج يضل الج

عمي هز رأسه وعمة نجوى سكتت ماكملت بيبي سعدية گالت

_جنك يَ سديد هاويلك غير وحده

فاضل _اي هاويله وحده بس ما جان كدها وخسرها ضاعت من ايده وللابد

رفع راسه سداد باوع لعمي مستغرب عمي جلى صوته وحاچة امي

_ام رهف اليوم خابروني ناس راح يجون على بنيتچ رهف رادو مني الاوكي كبل لا يجون

وعد _يعني ناس تعرفهم؟ شنو اصلهم فصلهم اخلاقهم

فاضل _الولد نعرفه من سنين طويله خلوق اهله خوش ناس فقرة ما يحجون ومالهم شغل لا بالرايح ولا بالجاي

والله لو طالب ايد فلك اگله كبع واخذ

سداد فرك وجهة حيل وكال

_منو هذا النبي

_الزم لسانك سداد بدون استهزاء

رجع باوع الامي وكمل

_هوا يصير من المنطقة فاقد ابن حجي سلام والله خوووش انسان واظن رهف تعرفه مدرسها بالسادس

رهف _اي صح

فاضل _شگلتي ام رهف انه كتلهم تعالو والله ما نحصل مثله نسيب

وعد _خل يجون هلا بيهم اذا انته تعرفه وهيه تعرفه وتعرف اخلاقه وشايفته وين المشكلة

سداد گام بدون اي كلام ، باوعت لرهف خدودها حمر خجلت من موضوع الخطوبة ولا همها سداد

فاضل _شگلتي رهف

رهف _استاذ فاقد انسان خلوق وما شفت علي شي موزين لهذا السبب ماعندي مشكلة مبدئيًا

بس اكيد لازم نحجي ونتفق ونشوف ورا مايجون

عمي فاضل هز راسه برضى ونصة ياكل

الوجوه نصها احتقنت گامت بيبي سعدية تتمشة راحت ورا سداد

رهف _ورة ما خلصنة غسل مواعين ركضت وراي درة

درة _شوفي سداد راح يفسخ ومبين مبيت النيه براسه وماراح يطولها

رديت مستغربة _واذا فسخ؟! شسويله حياته وهو حر

درة _خاف تندمين بعدين يعني احسه يستاهل فرصة ثانية

رهف _لا ابد والله ما يستاهل ولا نص فرصة

سمعي درة سداد صفحة وطويتها وماراح افتحها ابد

شسوي بواحد ماعرف يطلع حقي لو يسعى حتى يطلع برائتي؟

درة _مو ضعيف بس چان الحبيب والعدو ثنينهم من اهله

رهف _على العموم انه كرامتي ما تسمحلي العافني مرة مكسورة ما اريده لو ينصب ذهب خله يشوف شنو خسر عمره ما يلگى وحده تسد مكاني راح يضل متعلعل

هاي حوبتي ماراح يرتاح

درة _الله يسعدكم شريد منكم انه

تمددت بفراشي اجاني طلب منه على الفيس قبلته راسن دز

مساء الخير عادي احجي وياج شوية

رديت مساء النور احجي عادي

كال عادي اخابر

كتبتله لا البنات يمي وامي كاعدة

ضل يكتب ويدز بشكل عشوائي

سمعي رهف والله والله واجهت ليث وبعد ما تاكدت هوا سوا المكيدة تعاركت ويا وحتى تضاربنا قبل اسبوعين وابوي تدخل بيناتنه وحلها

وهددته اذا يوصلچ سواء چنتي وياي لو ويا غيري

يشوف مني شي ما يعجبه

وحجيت كدام ابوي كل شي واعترفت بغلطي جنت تحت تأثير الصدمة وما عرفت اتصرف

الواحد مو سهله يشوف حبيبته وبت عمه بحضن اخو

لا تأذيني اكثر اخذتي حقچ مني وعذبتيني ودمرتي اعصابي

خلي نبدي صفحة جديدة

كتبتله _الله يوفقك بحياتك

ومال افتح صفحة جديدة وياك هذا حلم بعيد المنال نصيحة لا تفكر بي زياده

شافها ورا خمس دقايق رد _اتوسلچ رهف لا تسوين بيه هيچ

رديت _جنت شاكة بيك راح تفسخ لان عندك امل ارجعلك وهسة تاكدت

سداد لا تدمر روحك وتخسر خطيبتك انه مو الك نقطة راس سطر

شافها وبعد ما رد ثاني يوم استغربت من لكيت عمي كاعد بالحديقة وطلب يحجي وياي قبل لا اروح للجامعة

كعدت يمة كال _اليوم بالليل الناس يجون

رهف _هلا بيهم

فاضل _والبارحة حاچاني سداد يتوسل وما اضم عليج حتى عيونه يدمعن وهوا يحجي يگلي اريدها وبدونها اموت

گتله انه _انت خسرتها من سكتت وما واجهت اخوك وطلعت الحق لهذا السبب هسة ما راح اساندك واوكف بطريق بت عمك

بس مع هذا وحتى انطي فرصة اخيرة راح احجي وياها واشوف ردها اذا رفضت فاقد وقبلت بيك هذا هو

واذا لا والله قبلت بفاقد راح انطيها اله رضيت وله مارضيت

باوعلي بتساؤول _عمي انه راضية بفاقد وسداد شطبته من حياتي وانته بعد تعرف كل شي

فاضل _اويلي منج الكشمة

رهف _الانسان الا كرامته وانه مستعدة اموت ولا انزل نفسي واتراجع عن موقفي

قررت من زمان اعتبر سداد ماموجود بالبداية جانت صعبة بس هسة لا تغلبت على نفسي حتى

وصرت ما اشوفه ،، تريدني بعد كل هذا الطريق السلكته ادير وجهي وارجع لنقطة الصفر؟ مستحيل

فاضل _قافله

رهف _اي عمو واذا مو فاقد راح اخذ غيره بس اكيد مو سداد

فاضل _الله يسعدج والله انه جا تدخلت ومنعتچ بس مالي حق اول شي هاي حياتج وثاني شي انتي تأذيتي بسبب ولدي وانه لحد البارحة احس روحي مذنب والوم بروحي شلون ما حسيت شلون ما ادري بت اخوي بنص بيتي تتاذى وانه ما ادري!

والله ليلي كوة انامه وهذا هوا ماراح اقبل تنظلمين اكثر

التردي يصير راضيه بفاقد ما اكلج غير الله يوفقج ويسعدج

لزم رأسي باسه بست ايده وكمت وكفت يم البنات ضلن يحوسن يردن يعرفن شنو حجينة بس ما حجيت الهن سكتت

رحنة ع ياسمين بت عمي خالد طلعت صعدت ابتسمت وصبحت ع بنات بس ماباوعتلي اذكر ورا ماصار الموقف وجبت سيرتها بنص عمامي كم يوم ماشفتها ومن داومت اجتي حجت وياي

كلتلي حرام عليج جان رحت بالرجلين ليش تفضحين بيه عندج مشاكل ويا ابوي حليها ويا مالي ذنب انه

وجهة جان ثكيل ورجعت كالت همزين عمي فاضل خابر ابوي وكله رهف اعترفت وكالت جذب ماشايفتها جان هسة مبطليني

والبنية من يومها سكتت ما شفت شي منها تبين لطيفة ومسالمة داخلها الله يعلم بي

درة .. عيني تباوع اول ما وصلنه عندي امل المحه

ما ضل وجه ما تخايلته وجهة وابتسمت

نزلت للجامعة اخذت محاضرات و بوقت استراحتي اجت انغام كمت بلهفة شافتني سلمت عليه وكعدت بصفي من بعد ذاك اليوم ما شفتها

انغام _ اجة العزيز الغايب مالتج وانطاني ضرف وگال كم كلمة اوصلهن الج بس اوگفي انه كتبتهن لان انسه

دمعت عيوني قبل حتى لا تمدلي الظرف مسحت دموعي واخذته فتحت دفتر ملاحظاتها وقرت المكتوب

_گال "خليها تداري نفسها ولا ترضخ لأي بشر يمكن غيبتي تطول بس انه راجع لا محاال"

ابتسمت ومسحت دمعتي _انطيتي حسابي شي گلتيله عني

_بسرعة راح والله گتله تريد تحجي وياك يكول حتى مبايل ماعندي شلون احجي وياها وراح بس انه شسويت وصلتله حجيج وكتله اسمها بالفيس درة البصراوية يعني خاف اله نيه يراسلج وهيج

درة _مشكورة ما تقصرين ياعمري ان شاءالله يجي يوم ويرجع النه حال كل مشاكله

انغام _اكلج عيني خاف تصيرلي مشكلة يعني الولد هوا امان

ضحكت وكتلها _ماكو منه ثنين لو تفرين كل العالم ماتلگين منه

انغام _الله يحل ازمته انه اترخص حبيبه

عافتني وراحت فتحت الظرف وبس قريت اول كلمات عيوني دمعت

كاتبلي "اتذكر من جنتي بالرابع ورهف تغيب اخذج للمدرسة والزم ايدچ طول الطريق وادندن بأغاني

جانت من ضمنها اغنيه عمي يابياع الورد تحديدا هذا المقطع

الورد الزرعته خوش ورد

وبيدي زرعته زرعته

والمر يا درة ترة والمرة يا درة ترة

لاجلج جرعته جرعته

اليوم كنت اغنيها وانا بطريقي للبنت الي تسلمج الظرف وعيني دمعت من تذكرته وكفت وكتبتلج هذا الكلام وراح توصله الج انغام

اتمنى تكونين بخير عطري"

مسحت دموعي وضميته بقوة لصدري احس الروح رجعت دبت بجسمي من جديد

الله يرجعك سالم وتقر عيني بشوفتك

رهف _شايله صينية العصير ودخلت عليهم قدمته لامه وخواته

وكعدت يم امي بهدوء

صار الحجي عن موضوع الخطبه انتهى بالله كريم وان شاءالله خير

ما طولت ثاني يوم الموافقة تمت بين الطرفين جان محرم قريب لهذا السبب صرنه مجبورين نستعجل حتى نسوي الخطوبة وما تتاجل

منا سداد اخذله صفحة بمشاكله ويا الهام وسالفة فسخ الخطبة ومنا مهري

كعدتني يوم الجمعة امي تصيح عليه

_يله كعدي ولج ورانه درب طويل للسوك

كمت ركض صليت وبدلت ورتبت وجهي بشوية مكياج ونزلت

جانت

مشاعري عادية فرح ع حزن على خوف

ما ادري شلون بالضبط بس جانت مختلطة

لكيت امي وعمة نجوى وفلك ينتظرني اربعتنه راح نروح للسوگ

نجوى _وينه سداد تأخرر والله السوك بعيد لازم هسة طالعين

سداد _هاي اجيت صبرچ

باوعتله مرتب وحتى لحيته وشعره محلق وطالع وين شحلاته عبالك هوا العريس

سبقنة للسيارة رحنة ورا صعدنا وطول الطريق ساكت ما حجة بس كل ما ارفع راسي اباوعله اشوف عيونه حمر مغورگة دمع

ادري متوازي تزمط النه تاخذنا للسوگ مو ردنا غيث المن حطيت روحك اذا ما تتحمل

نصيت ع مبايل مارفعت راسي لحد ما وصلنه اول شي جنت رايده فستان حلو مرتب ويطلعني جميله

ضلينه نفتر على فستان الحبايب بسرعة تعبن وخلنه انه وفلك وحدنة نختار

وگفت كبال مراية طويلة بواحد من المحلات البنية لازمة بيدها فساتين ثنين

انطتني واحد باوعتله وحطيته على روحي سداد واكف بعد مترين عني ، حجيت ويا البنية بصوت مسموع اله

_اريد فستان من البسه اطير عقل خطيبي

_هههه يعني شلون بالضبط مغري

_لا اريد اطلع بي جميله لابعد حد بحيث ورا مايشوفني عينه تضل ماتشوف غيري

واريد لونه سمائي حلو عليه هذا اللون

ذكرت اللون لان سداد يحب السمائي

راحت لبنية دقايق ورجعت جايبتلي فساتين بأيدها ضليت اگلب بيهن اريد فلك تجي تنطيني رايها ملتهية ويتهن يختارن فساتين للبنات

اخذت من ايد البنية واحد حلو يصير حورية ضيگ من فوگ وبي فتحة من يم الركبة ليجوة لونه سمائي وبي من فوگ تور مزين بخرز ابيض

حطيته على روحي وحاچيته

_شنو رأيك سداد بهذا الفستان؟ تحس اذا البسه بيوم العقد اگدر اسلب عقل فاقد بجمالي ........

ذكرت اللون لان سداد يحب السمائي

راحت لبنية دقايق ورجعت جايبتلي فساتين بأيدها ضليت اگلب بيهن اريد فلك تجي تنطيني رايها ملتهية وياهن يختارن فساتين للبنات

اخذت من ايد البنية واحد حلو يصير حورية ضيگ من فوگ وبي فتحة من يم الركبة ليجوة لونه سمائي وبي من فوگ تور مزين بخرز ابيض

حطيته على روحي وحاچيته

_شنو رأيك سداد بهذا الفستان؟ تحس اذا البسه بيوم العقد اگدر اسلب عقل فاقد بجمالي ..

البنية ضحكت متفاجئة وگالت

_توقعته خطيبچ

رهف _هذا اخوي ، باوعت لسداد عيونه محتقنه طبگ شفايفه وضغطهم حيل

چنت احرگه واحرگ بروحي تقرب مني اكثر واشر للبنيه

انطتنه الفساتين گلبهن ورجع باوعلي وگال ..

سداد _هذا الحاطته عليچ انسب واحد ، اذا تردين تعرفين رأيي فـ انه متأكد بهذا الفستان راح تطلعين اجمل من القمر

ومتأكد كذلك راح تسلبين عقل فاقد بجمالچ وتسلبين الباقي من عافيتي

بلعت الغصة ودرت وجهي حتى ما يحس كلامه جان مثل التحذير وكأن يگلي اذا لبستي تموتيني وتنهيني خلاص

جرحي جان لسه ماناشف گبل گلت للبنيه هذا هو الفستان هذا اريده

بعد ماباوعتله تنهد وابتعد عني دخلت لغرفة التبديل گبل دمعت عيني مسحت دمعتي جريت نفس عميق جربت الفستان جان كلش حلو ولاگلي ، بي مثل الشيالات تول يصيرن نازلات ومن فوگ الجسم يضل عاري

ولونه لاگلي كلش ، شكد جنت متمنيه البسه الك مو اله بس شسوي انته غبي وجبان وجبرتني اسوي هيج

نزعته وطلعت ، كملنه فرة بالسوگ ودخلنة تغدينة جنت مالي نفس ضايجة اكلت شوية رفعت رأسي باوعتله منصي يحرك بمفتاح السيارة على الميز بملل

طلعنه للسيارة محملين ، صعدنه صارت گعدتي ورا بشكل مباشر

طلع وضل يگلب بالاغاني بالنهاية ثبت على اغنيه حرگني بيها حرك اغنية لقاسم سلطان اسمها احط ايدي على خدي

وبدأ يغني وياه بصوت خافت يكاد لا يسمع

احط ايدي على خدي واعاود ذكرى ايامي

وادور احلى مابيها واشوفچ انتي گدامي

يمر اسمج على بالي واهيم بحبچ الغالي

وانام الليل والگاني احبچ حتى بأحلامي

احاول انسى صدگيني شوكي ما يخليني

يعذبني سهر ليلي دمع عيني يچويني

يا اول شوگ خلاني اعيش بهمي واحزاني

واخلص الليل بهمومي دفهميني دفهميني

يمر اسمج على بالي واتحسر على حالي

واكلچ شوگي تعبني ومكانج بالكلب خالي

يا اول شوگ خلاني اعيش بهمي واحزاني

واخلص الليل بهمومي شوكت نتلاگى يا عيني



مسحت دمعتي قبل ما يشوفها ودرت وجهي بسرعة العب بأطراف ثوبي الهي نفسي

وصلت للبيت مخنوگة گبل دخلت للحمام بچيت ذبيت كل همي وحزني وطلعت

ثاني يوم گعدت الصبح رحت للصالون مكيجوني وبرمولي شعري برم خلتلي تاج ناعم ، لبست الفستان و وگفت گبال المرايه اتأمل شكلي

يابة شكد شعور صعب وانه لابسه فستان من اختيار الانسان اليحبني واحبه

بس مالابسته اله لابسته لصديقة

تنهدت بضيق وطلعنا للبيت رجعنا غيث وصلت للبيت متنگة كلش گعدت بالصالة اباوع على البنات يفترن ، درة تمشي وتهز ضحكت عليها ونصيت راسي

تقربت بيبي سعدية كعدت بصفي وگلتلي بصوت ناصي

_شمالچ تعذبين برويحتچ وتعذبين بالولد كرامتچ رديها وحگچ اخذي بس مو على حساب روحچ وگليبچ

فرت كف ايدها واسترسلت _بعد شيفيد الولد گاعد يموت وانتي ازيد منه بس عنادچ بعد امج وعد الحضيرية 13 سنه ريلها ما مخليته يعرس عليها عليمن تطلعين ، هذا العويد من ذيچ الشجيرة

رهف _بيبي شمدريچ انتي محد يعلم يگلب الثاني

سعدية _چا العوينات المن الله حطها؟

غير هن مرايه للگلب يرهف لبگلبچ ذاك هوا مرسوم على عيونچ بس انتي عنيدة والعناد ماهو زين

سودة علي يده سداد الله يساعد گلبك وينطيك الصبر راحت خليلتك

انمرد گلبي كلش نصيت رأسي كلش ما رفعته بعد اجت فلك تركض شاورتني

_ضحكي امچ تگول شني مغندبة جنها مغصوبة

ابتسمت على كلامها ورفعت راسي ضليت اوزع ابتسامات ، قريت الفاتحة وكم ايه من القرآن وارتاحيت وانشرح صدري

فلك ... رجعت ركضت للمطبخ محد بي حطيت الشال على روحي بس كلاوات الطالع اكثر من المضموم استغفرالله احنة بالمناسبات ننسى الحلال والحرام

اندك الباب حيل التفتت شفته فالح يحجي بس عينه مو عليَ موجهة لغير مكان ويحجي

فالح _بسرعة فلك تلاحگينا بصينية چاي

فلك_ چاي؟ غير عصير شتسوون بالچاي شنو گاعدين بفاتحة

ابتسم وباوعلي ورجع نصى ..

فالح _والله هيَ چنها راح تصير فاتحة صدگ ، يله استعجلي گبل لا يوصلون اهل فاقد

تأفأفت وركضت للقوري شبيت جوا وطلعت لأستكاين وانه ادردم فالح رجع وانه دايرة ما منتبهة اله ، فززني بصوته

فالح _يُبا فلك راح يطلع عليهم سم كافي لِچ

فلك _مو حاله هاي انه وفستاني وضيمي واسوي چاي تهي بهي راح اطنگر وانزع والله

فالح _چا انتي ما تنزعين الا گدامي!! ام شامة ستري علينا احنة ناس صيام لا تعرضين گبالنه المفطرات وتگليلنا التزمو بصيامكم

فلك _شمدريني بيك صايم؟ اگلك كم استكان اصب

فالح ضحك ورد _ مو هواي بس للكبارية كاعدين بالدوانية بيهم خمسطعش

نجوى _فلك وين برنص .... ها عمة فالح شلونك بعد عمتك شلون صحتك والله بالي يمك سمعت بيك متخربط

فالح _الحمدلله صرت اهون

نجوى _ليش هيج ويا روحك عمة هذا قدر ومكتوب وابن عمك ندم واعترف بغلطه لا تضل تاكل بروحك اكل

هز رأسه وكال ..

فالح _والله الستر علي كونه بارق مو غيرة چا قريب من الروح واعرفه سكتت وگلت الايام تداوي الجرح السببه

لو غير بارق چا قضيت بي التوبة وطيبت جرحي بدمه

نجوى _اي عمة تبرد نارك وتردون احباب ان شاءالله

رجعت باوعتلي _وين برنص رهف

فلك _بالخانة الاخيرة بالعلاگه ويا علبه الطخم

عافتني وراحت تركض ، طفيت جوة القوري عدلت الشال ورجعت اصب باوعت بطرف عيني لفالح شفته واگف زام شفايفه وماله خلگ

اول دگمة من قميصه مفتوحة و جاي غصبًا ما علي گوة راحو جابو الولد ضغطو علي بالحجي شلون ماتوگف بعقد بت عمك وانتَ ابن عمها ولازم الناس تشوف عزوتها وسندها

شلت الصينية والتفتت وگعت عيني بعينه رفع طرف حاجبة وبلع ريگه بشكل واضح

وترتني نظرته ، ماعرفت امشي تعثرت بطرف فستاني وطحت على اركبي وانگلب الچاي

فالح _اسم الله اسم الله

من ثولي سحبت فستاني بسرعة حتى ما ينترس چاي وطلعن رجليني حسيت صوت لطمة رفعت راسي شفته ايده على گصته لاطمها ويباوعلي

ردت ابچي من الفشلة گلي بصوت ناصي ..

فالح _ما يطلعن زرورچ الا يم فالح من امده حظ فالح امداه امداه ، وامده نفسه العزيزة التشوف النهر وترد عطشانه

حجاها بقهر وغضب ودار وجهة ابتعد ..

شبي هذا والله يالله لان طاح الچاي شكو عليك هسة الم هذا واصبلك غيره شمالك ما تتحمل لو يم الناس تتمضحك ويم فلك ما يعجبك العجب ولا الصيام برجب

هي مو صوجك صوجي

طبت درة شافتني صفنت حجيتلها مختصر ، ركضت طلعت غير استكاين وانه لميت الگاع اجه غيث گال وين الچاااي وديت فالح وبعد ما رجع

درة _هذا هذا صبيت

غيث _هلو هلو شنو هاي النسوان اليوم ربي اگلبني مرة بس اليوم دخلني بنصهن

گال بنبرة بكاء _ولچ درة خية شطالعة

درة _ههههههه شگد سخيف الزم راح اگلب الصينية والله

فالح _ولچ هاااي ليش هيج الباب البرة مفتووووح اهلسس شاربي هسة راح العرض داح

فلك _هم رجعت لميس

فالح _غيث اطلع ولي طبي سدي الباب ، جاي يخطفون زلم لا يشوفونچ وانه احترگ ويحترگون اهلي واسلافي بگبورهم وما اگدر افك حلگي

طبي يله

درة صفنت بوجها شلون يحجي معصب ، باوعتلي من طلع وگالت

_هذا يحجي وياي؟

_كلساع يرزل واحد شافط مو بعقله والله احلف علي مجنون ويمكن فقد عقله بحرب ايران

_ماكو مجنونة غيرچ لا تحجين على فلوحي رجاءً هذا العزيز

_امداچ وامدا العزيز وياچ

طلعت من يم درة غسلت ايدي شلت الشال ورتبت نفسي فستاني حلو ساتر بس شوية بي دلعه يااا صخام من طحت طاح شالي بس لا فالح شاف صدري شگد عيب

ياا ياا اكول شبي دار وجهة وما ضل يباوع

بس يلا ماقاصده مو حرام موقف ما متعمد

سمعت هلاهل تحمست رتبت شعري بسرعة وطلعت شفت اهل فاقد ترسو البيت هلاهل ضليت اضحك بس اجذب اذا اگول فرحتي كاملة لان ادري بگلب سداد هسة غادي نار

هوَ حتى مانزل للخطبه ، گلاله ابوي عيب

سداد گله _گللهم مسافر ميت مدفون اي شي وصعد متعصب

نص ساعة من الهوسات والرگص وكالو راح يجي فاقد لبسنه شالات واخذو رهف يم الباب

وبدأ العقد بس نطقت الموافقة النسوان هلهلن انه ما اجذب ضليت اهلهل وياهن واصفگ فرحت الهة ودعيت الله يسعدها ويعوضها خير ..

رجعت گعدت بمكانها لاحظتها متوترة دخل فاقد هي شافته وابتسمت گعد بصفها

باوعلها مبتسم وضل ساكت ما حچة اخت فاقد شسوت تقربت وشالت ايديهم وخلت ايد بأيد

رهف باوعت لفاقد مبتسمة وهوَ لثاني رفع كف ايدها باسه وضل كاضه ويحرك أبهامة على راحة ايدها بهدوء

انه ودرة راحت روحنة الا شوية صرخنة وحضنه بعض وضلينه نگمز بس زين كدرنا نسيطر

سوينالهم مكان وتوزعو المعازيم كعدو ونص وگفو على صفحة شغلنه الهم اغنية أليسا رومانسية گام فاقد لازمها من ايدها لنص لأستقبال ولف ايدينه حول خصرها وهي حطت ايديها على اكتافه وضلو يتمايلون ويا الموسيقى والكلمات

درة _راح يغمة عليه من الرومانسية

فلك _انه راح ازاگط مابيها مجال بعد

رفعت الكامرة زين اصورهم ، فاقد شسوة قربها منه اكثر وهيَ شبكت اصابعها وحوطت عنقه مايفصلهم غير جرة النفس

وصلت للمقطع بلمسة حنونة بغمرة مجنونة وما اغمض عيوني الا انا وياك

عبالي حبيبيي ، وفاقد حضن رهف بكل حيله وحط رأسه برگبتها

ورجع رفعها شالها وفرها

ترف _الا اعرس الا اعرس الا اعرس دورولي رجل يشيلني

جمانة _ ف فدوة ي يخبلون الله ي يسعدهم

فلك _ان شاءالله بالعرس والحنة نسويلج هيچ حتى تعوضين

هزت راسها بدون اجابة ونصت بسرعة ضايجة ادري شبيها تضوج غير هي هم تريده

بس لا كرهتة لان سوا بيها هيج واخذها غصب وخلاها عرضة للاتهامات والشكوك

انتهت الحفلة اخيرًا ، اجة ابن ليث بأيده ورقه گال وين عمي ثداد

فلك _فوك عمتي حبيبي

رهف _ما اتحمل بعد صاعدة اختنگت خنگة

فلك _بس صورة الله عليج

وكفتني فلك اخذت كم صورة شردت منها شرادة صعدت فوگ البيت جان فارغ مابي بشر ، ما جنت متوقعه سداد ضال فوگ ما نازل للعقد

ويا ما خلصت الدرج الهث شفت ابن ليث واكف يم سداد ومادله ورقه حطيت ايدي على صدري استره

وردت انزل ، بسرعة دخل للغرفة وسد الباب مادري شافني ما شافني

مشيت بسرعة للغرفة دخلت قفلت الباب على روحي وضليت انزع بالتاج بس امشع شعري تمشع من الغضب

ما اعرف ليش من اشوفه اتذكر كل شي ويتغير مزاجي مع العلم بلحظات احس روحي نسيته واكمل طبيعي وتجي لحظات ترجعني لمنتصف الطريق

سبحت وطلعت مشطت شعري ، تمددت عيني على السگف

اعوذ بالله من الذكريات اعوذ بالله من حبك

رفعت مبايلي بعد ما اجتي رسالة ، چانت من عنده مثل ما توقعت

كاتبلي "مثل ما توقعت طالعة اجمل من الجمال نفسه ، الله يكتبلچ الراحة ويا فاقد ويرجعلي روحي الراحت مني ، واذا على عقل فاقد متأكد سلبتي لان هسة وصلني وعرفت فاقد طالع من يمج يريد يشغل سيارة غير سيارته كد ماجان دايخ بيچ

يحاچونة يبتسم مايعرف يرد

واذا على عافيتي انسلبت وما ضل الي غير الحسرة والجگارة"

كعدت على حيلي ضربت الكاع بقبضة ايدي ليث النذل ماكو غيره موصل لسداد هذا الحچي

جان يكتب رجع دز "ابشرچ حقچ وخذيتي كافي بعد ما ضل عندي شي وتاخذي مني

لا ضحكة ولا اعصاب ولا حتى گلب وروح مبروك عليچ انتصرتي اليوم وحطمتيني من گلتي للشيخ نعم ، كسرتيني رهف وانه الچان عندي گلب يتباهى بعشگچ"

ما كتبت شي جنت اعيد رسائله والدنيا ضلمة بعيني ، دقايق ودزلي اغنية فتحتها اشتغلت

تمددت ، حطيت المبايل يم رأسي اسمع الاغنية وعيوني تجري استسلمت حتى گدام نفسي

واعترفت اخيرًا انه مو بس حرگت سداد حرگت حتى روحي

يا نبعة الريحان حني على الولهان

يا نبعة الريحان حني على الولهان

جسمي نحل والروح ذابت وعظمي بان

جسمي نحل والروح ذابت وعظمي بان

من علتي إلبحشاي ماظلي عندي راي ماظلي عندي راي

جرحي صعب ودواي ما يفهمة انسان ما يفهمه انسان

يا نبعة الريحان حني على الولهان

جسمي نحل والروح ذابت وعظمي بان

يوم الذي حبيت يا منيتي جنيت

يا منيتي جنيت

حاير انا ظليت ماادري ذنبي شچان

ماادري ذنبي شچان

يا نبعة الريحان حني على الولهان

جسمي نحل والروح ذابت وعظمي بان

ماعندي كل ذنوب الا هوى المحبوب

الا هوى المحبوب

لا هو ذنب واتوب ومتصبر الرحمن

متصبر الرحمن

فلك ... كعدت بغرفة بيبي ادرس لان عندي امتحان والجماعة مسوين البيت هوسة

وماكو مكان اكدر اخذ راحتي بي غير غرفة بيبي سعدية لانها صاكرتهم يخافون منها محد يوصل للغرفة

الساعة چانت 11 بالليل اقرا وبيبي كاعدة كعادتها فوك السرير گصايبها البرتقاليات من الحنة محطوطات منا ومنا

لابسه نظارتها ومنصيه تسبح وشيلتها على اكتافها

اندگ الباب صاحت بيبي ...نعم طب طب

انفتح الباب رفعت رأسي شفته سداد دخل للغرفة وسد الباب وگف يم الباب يباوع لبيبي بحزن وعيونه رايحه

هيَ شافته هيچ گلتله

سعدية _تعال يدة تعال ليه

تقرب نام وحط رأسه بحجرها وبچى بصوت مسموع ، گال بغصه

سداد _جدة راحت رهبتي وصارت حلال صاحبي

راحت لحضن صاحبي انطتني مگفاها بدون ما تفكر ولا تحسب بيه ، يگلك ذايبة بحضنه وكل ما مر الهوى بنصهم گربها اله

السواد البرمشي نزل على جفوني وهيَ ما تخربط كحلها

عض اصابعه حيل وگال _كون الروح تنعض مو بس اصابيعي

سعديه _استهدي بالرحمن يده المكتوب على الجبين تشوفه العين ، هاي قسمتكم شتسوي بعد

تموت روحك؟ وخلني اكلك شغيله تراها معلعلة بگدك اذا موش اكثر لچنها تكبت حدرها ماتطلع

حالك ارحم من حالها چا انته طلعت غهرك (قهرك) وهي لاله

سداد _ لبست ثوب من اختياري جدة گلتلي شوف هذا اذا البسه اسلب عقل فاقد

خلتني البسها على ذوقي لواحد ثاني

سعدية _من كونها تريد تمرد افادك

سداد _مردته مرد جدة راحت كشمتي راحت

بيبي ضلت تمسح على راسه شالت شيلتها غطته بيها وتمسد علي وتحاچي بهدوء

سعدية _اصبر لحكم ربك يجوز الله كاتبها الك بس مو هسة

سداد _بعد راحت وماترجع

سعدية _الله يعوضك بالاحسن منها

سداد _بس هيَ وگلبها يلوگلولي

سعدية _الك الصبر ويعينك الله بعد يدتك واسمها

في مكان آخر ..

_هاا؟

_مثل ما گتلچ القضية انفتحت من جديد وبرائة حر راح تطلع ، المجرم الحقيقي راح يبين وينحكم

_هيچ ربي ويطلع بريئ والناسسس كلها تعرف حـر الدين ماله بالدم وايده نظيفه

_بس لازم ناخذ الثار

_ما ينظف الدم غير الدم

_الله كريم

....

جمانة _ ش شجابك بارق

باوعتله ابتسم ابتسامة جانبية بينت جزء من اسنانه

عدل ياخه قميصه الرسمي

ومسح طرف انفه بغرور

متعجرف متسلط ، مغرور كل الصفات السيئة شايلها ويتباهى بيها بعد

بارق _ جابني الشوق

جمانة _من ي يمتى ه هاي تشتاقلي

بارق _من يوم صرتي على ذمتي اشتاقلچ او .... سكت

تقرب مد ايده من وراي اخذ برتقاله وسجين

باوعلي بمكر عيونه خاصمهن كالذيب

غرز السچين وسط البرتقالة وگال بمكر ..

بارق _ او مشتاق لدموعچ

جمانة _چ چنك ناوي ت تبچيني ه هواي

بارق _ذكية

جمانة _لا ت تحلم حتى أ انه ابچيك و وما أ ابچي

بارق _وألچ عين بعد؟ ما شاءالله صلافتچ هاي وراثة لو اجتهاد شخصي؟!

جمانة _و وهسة شتريد؟ حجيت بجزع

رد بنفس نبرته الهادئة المستفزة ..

بارق _اريد نتفق على العرس محرم جاي يعني عرس ماكو شهرين وتجي فرحة الزهرة

تصير فرحة الزهرة منا نتزوچ منا طيارة ما عندي صبر اريدچ تجين يمي يا عيني

جمانة _ ش شنو ناوي ت تسوي؟

أذا ا انت ضايج م مني وكارهني ا افسخ أ أحسن ما ن نتورط بهذا الزواج الموحلو

بارق _شنو ناوي؟ يعني رجال ومرة عروسة للوووش شنو يريد منها وعلى شنو ناوي؟!

جمانة _ ا اطلع من غ غرفتي لا يجي فالح

عض طرف شفته بهدوء نزل البرتقاله والسجين بالصحن حصرني على الميز

رفع اصابعه تحسس رگبتي وگال بهدوء يستفز ثورة اعصابي

_أم شامات! اكو اسطورة تگول حبة الخال هيَ قبلة ملاك على جسد الانسان

هاي الملائكة شكد مبوسة بيچ؟ اذا اريد احسبهن اضيع الدخلة

غمضت عيني بقلة صبر قربه مني وعطره خلوني اتنرفز

بدون ما احس حوط رگبتي بأيده فتحت عيني غرز اصابعه بركبتي وگال وهو مبتسم

_ما خفتي من فالح يوم الشردتي؟! بس هسة تخافين وتطردين ابن عمج ورجلچ

هسة نگدر نگول البربوقة جمانة صارت شريفة روما

جمانة _و والله غ غلطت وندمت

بارق _سمعي لچ وحق ذيچ المشت مسبية ورافعه الهام لو ما فالح چا خليتهم يكطعونچ وصل ويذبونچ للچلاب السايبة اقلها تطلع منج فايده

بس فالح وگف بعيني كلت هذا اخوي وكسرته من كسرتي خليني استر عليها واحافظ على سمعه فالح

جمانة _ ر رحم الله و والديك م ماقصرت ب بس لا تعذبني ا اذا انت ش شايل بكلبك عليه ه هواي ب بسبب عملتي ا افسخ ش شنو الفايدة تحب ف فالح وتعذب اخته الوحيدة؟

ا انه روح ف فالح و واذا ت تمس شعره م مني بسوء معناها ض ضربت فالح ب بخنجر

بارق _تعرفين محنته عليچ؟ هزيت رأسي

كال متأسف _مع هذا ردتي تكسرينه؟

بچيت ودفعت ايده من رگبتي _ و والله ن ندمت ساعة ط طيش ه هسة انت نبي م ماتغلط والله حلوة ه هاي بس تلزمون ل لزمة ع واحد م ما تفكونه ع ع اساس انتم م ملائكة لو انبياء

بارق _هذا هوا

جمانة _ت تفسخ؟

بارق _ لااا لاا لااا شلون يا جمارتي شلون يا رجفة أعضاي؟! غير بالاول اخذ حقي كرهت روحي وجبت الروحي الملامة تاليتي اعوف الغزالة هيچ؟

الصياد المن يتعب ؟ غير حتى يروي ضمئه ، يرتوي بدم فريسته

تنهدت مسحت گصتي لميت شعري وگتله ..

جمانة _ ش شنو تريد ت تسوي سوي م موتني ا اذبحني بك بكيفك اطلع يلا

م ما اريد ا اشوفك يمي و واذا ع ع عرس مثل م ماتريد و بالوكت التريده

دار وجهة تمشة وگف يم ميز التواليت فتح قلم حمرة باوعله ورجع باوعلي

بارق _أحمر!! تخوووووف

شمرة على الميز وطلع صفگت ايديني وغميت ورا

نذل مستفز ماكو رحمة يعني غلط طلع مني وندمت وبچيت كافي عاد فكوني

امي بصفحة ما تحاجيني وفاالح وجهة ثگيل لان مارفضت بارق بس ابوي هو هو وياي

احس روحي اختنگت واريد اموت بس مابيَ اسوي شي مجبورة اضل ساكته ومتحمله بالاخير انه غلطت وأستاهل

سويت شي جبير وربي سترني ودزلي بارق ، ربي هسة الا بارق؟! موديلي غير واحد

هذا ما ينجرع

انجبي جمانة حمدي ربج لان ودالچ بارق وما خلاچ ترحين ويا عباس وتنفضحين ..

يا ربي شنو مخططلي هل بارق ؟ وشنو ضاملي

چنة الصياد ناوي يذبني عظام

اخذت صحن الفواكه للمطبخ لكيت امي وبارق يسولفون سمعت اخر كلمات من بارق

_لا عمة هي عرضي

من شافوني سكتو امي دارت وجهة ضايجة مني وبارق طلع من المطبخ بسرعة عيني تبعته فتح الباب الخارجي وطلع

فززني صوت امي

_غلطتي غلط شكبرة والله كتبلج زلمة يسوة راسچ وحگ هو علي اذا ما تكسبينة وتدارينا احطج وافصم گفاچ

_الله اكبر ، ع عمي لو ا ادري گ كايله الصدك و مخليتهم ير يرجموني بالنعل اشرفلي

ه هيج يحطوني و وكل واحد ي يجيب ن نعل و يكفخني حد م ما اموت

مرت الايام صار محرم ، بارق ما اشوفة مرة هي اجو عمي ومرته جابو المهر وراحو

واجت ايام المشاية احنة بوكت المشاية عدنا موكب نستقبل زوار هم بس مو عدنا لا ببيت عمي فاضل لأن هم بيت الجبير وكلشي عدهم

نلتم احنة النسوان يم بيت عمي فاضل نحضر ونطبخ ونخدم المشاية

هاي عادة عدنا من فتحت عيوني على الدنيا

اول موكب اجة ، هو موكب جبير نسوان وزلم يتقسمون على الحسينيه والديوانية والاستقبال

فتحو صندوك الحسين وجابو ذبايح

ذبحو الطباخ برة يطبخ الوجبة الاساسية

واحنة بالبيت تقسمنة نص لغسل الملابس ونص للثرم ونص للتنظيف والكبار يسون الباقي مثلا دولمة حلويات مقبلات وهكذا

طبعا يسوون عشا الجو زين بارد المشاية يمشون بالنهار يتغدون بالمواكب والعصر ينزلون لبيت المعزب يتعشون وينامون ويطلعون الصبح

انه ورهف واكفات يم الغسالات بالمنور الخلفي نسوالف ونحط الملابس ونطلع الناشف

جان رهف گالت كلمات اجت ملح ع جرحي

_عاد حمدي ربچ بالاخير صار نصيبچ الشخص التحبي

ابتسمت بوجع وكتلها الحمدلله ، ب بس ا انتي هم أ استعجلتي ك كلها تدري بسداد ي يحبچ ليش رحتي ك كبل انخطبتي

رهف _ لان ما اشوف زواجي من سداد معناها نهاية سعيدة وحياة وردية ، الحب مو اساس السعادة جمانة

جمانة _ ص صح الحب م مرات يجيب المرض والهم و الغم ا اوف ش شنسوي بعد احنه ه هم ماعندنا گلوب

رهف _لو تدرين جمانة قبل يومين شنو صار والله كرهت روحي من ورا الموقف الي نحطيت بي

جمانة _ س سولفي ت تحمست

رهف _ اجاني فاقد كعد يم غيث شوية وجان غيث يدز عليه روحي يم خطيبج انه طبعا متحضرة مرتبه شعري ولابسه لبس حلو

دخلت يم فاقد سلمت علي وذبيت الشال من رأسي وكعدت بصفه ضل يسولف وياي ويضحكني خلاني شوية اكسر الخجل واتجاوب ويا اضحك وادردش هيج سوالف عادية عن الدوام والمواقف بس احنة جنة مندمجين كلش عبالك جاي نسولف حب وغرام

لف ايده حولي وقربني منه كلش حضني صار نص ظهري بصدرة نصه رأسه وباس كتفي وهمس بأذني _ريحتچ تردلي روحي انتي شنو من مرة بيج شي عجيب تملكتيني واخذتي كلبي روحي

انه من يوم الخطوبة روحي مو الي وبس اصفن وافكر بيچ اموج عجيب بيج سر

ضحكت ومديت ايدي ابعد بي بهدوء وهو يشاقيني ويحضني ، اخير شي استسلمت وضليت كاعدة بحضنه يلعب بخصلات شعري ويشم بي

ويرجع يشم خدي ويبوسني بوسة مثل العطشان اليريد يروي عطشه

فاقد _ تعاي يمي باسرع وكت والله ادللج دلال رهف وكلشي تطلبي البي ، نذر عليه وانفذه العمر كله ما اخليج تنامين ليله وحدة بعيدة عن حضني

رهف _عاد انه هيچ راح اطمع

حجيتها وانه ابعد خصله من شعري لزم ايدي وباس اصابعي بهدوء ورد بصوت خدران

فاقد _طمعي وتدللي على حبيبچ شعندي غيرچ انه

ضليت اضحك ما اخفي عليچ انجذبت اله وبديت انعجب بشخصيته هدوئه رزانته واسلوبه المحترم

رفع رأسي وبسته بخده ، لزم رأسي غمضت عيوني وضل وجهي على وجهة حاضني ويشتم انفاسي

دك مبايله واضطر يروح عنده درس خصوصي ، حطيت شالي على رأسي خاف يدخل واحد من الولد

وبديت الم المواعين مال الحلويات والعصاير وشلت بايدي بوكس هدية جابها الي فاقد

بطلعتي من الباب لمحت خيال خليت الصينيه على الميز وطلعت من الباب الثاني باوعت شفت سداد واگف قريب من الشباك الاحنة جنة كاعدين كباله ولسوء الحظ الكهرباء طافيه واحنة فاتحين الشبابيك علمود الضوء والهوى

سداد منصي ويمسح بوجهة والكاع عبارة عن كطوف جكاير

انسحبت بسرعة ، ورا كم ساعة دزت عليه بيبي سعدية كلتلي نوبة الثانية من تكعدين يم رجلج سددي الشبابيج والباب ولا تخلين احد يشوفكم وثگلي

سويت روحي ماشايفه سداد وگتلها _ليش شنو شفتي شي بيبي لو احد شاكيلج

كلتلي

_ لا طريت من ورا والشباج مفتوح ولچحتكم عيب من تعرسون عدكم غرفة وتحاضنو وتباسو بيها ينام فوكج تنامين فوكة محد الا شغل بيكم

بيبي جانت تحجي بحركة كلب انه عرفت هنا سداد شايف وسامع وما تحمل راح ذب حزنه يم بيبي مثل يوم خطوبتي

هم فلك شايفته يم بيبي شاكيلها حزنه وهمه

جمانة _ الله ي يصبره م مسكين

انفتح الباب وطلعت ياسمين بت عمي خالد وجهة احمر من الغضب شايلة سلة ملابس تدردم گتلها

_ خ خير ش شمالج هادة جنج ط طنطل

ياسمين گالت بتساؤول وغضب

_انه لو اعرف بيبيتي هاي بيبيتي ام امي شني راضعة خالتي هناء انه بخير

مخليتلها بيكاربونات الخباثة ويا الحليب؟

رشة كطع ، جطعة حموضة واخير شي نقانق سم

مو طبيعية شكد انسانه سمانية محد يسلم من شرها يعني انه بت اختها وهيج تتعامل وياي

الله يساعدج جمانة والله لو انه منچ احط راسي بالسيفونه اختنك واموت احسن الي من العيشة ويا هناء بنت الشرفاء

جمانة _ ا استلم ن ناقصني خوف انه م من هناء

فالح _ وووي هناا الحبايب طبن طبن الطباخ راح يجي

رهف _ مو نحتاج الغسالات اخذ الطباخ لغير مكان وهم نشر هدوم هنا

فر ايده ماعاجبه وراح لاحظت همام وبارق يشيلون جدور كبار يحولوهن صرنه كدامهم بارق لمحني ابتسم بمكر ابتسامته ترعبني كلش تخليني ارجف

درت وجهي اباوع لدرة راحت يم برميل النفط شايله صوبة

ياسمين _شوفي هاي وحدة من سوالف خالتي هناء بس شافت درة صاحتلها السووويدة تعاي ترسي الصوبة الزايرة بردانه

وهيج كاعدة تنفخ روحها تقلد وحاطة ايديها ع بطنها وتخزر بينه تقلد هناء

ياسمين _درة ما ردت ضلت تصيح السويدة السويدة ودرة مسوية روحها ما تسمع لحد ما صاحتلها درة يله كلتلها ها يعني مبينه درة لابستها وفشلتها الزايرات ضلن يضحكن والله لو ما حرام جا كمت ركصت وطكيتلي كاس على شرف درة

رهف _ كفو من اختي حبيبيتي

باوعتلي ياسمين وسكتت شوية تتحسس مني بسبب الموقف الي صار

التفتت شلت السلة لگيت بارق يخزر بجمانة وهمام رايح بغير عالم باله كله يم درة ومبتسم ولا عبالك يمة الولد نصهم فصل كلش

جاسم لكزه بكوعة وفالح صاح بغضب _تتتعاااال مصخم شيل وياي شمالك انسطرت ، اوو انه ليش اگلكم لا تحبون الحلقوم من هاي السالفة واحدكم يصير ابو صابر

ضحكت وبديت اشر ملابس ، طاح الثوب من ايدي ورجف كل جسمي ، لمن صرخت درة وشفتها تركض شابة بيها النار مفرفحة مثل الحمامة .....

صرخت بخوف وركضتلها بسرعة سبقني فالح بخطواته جان نبه اكثر مني ورا همام

حضن درة بسرعة وفالح تلاحگهم بأيده طفه رجلين درة وهي تصرخ مفرفحة وهمام يحضنها حيل حتى ما تشب اكثر بسبب الاوكسجين

ما حسينه غير بارق ذب عليهم فروة لفهم بيها لف وصاح _لاااا تخليهاااا تتحرك همام لا تخليها تشب بالزايد

لحضات مرعبة انفاسنة نكطعت نرجف ونبجي ونباوع بخوف وترقب ، باوعت لوجه درة انگلب كله عيونها تگلبن وطاحت داهت روحها

فالح بغضب جر همام وشال درة شيل مثل الطفل

رهف _ يمة ماتت اختي ماتت

ياسمين _هااك العباااية رجليها طالعات شلون تاخذها هيچ

ذبت العباية عليها محد من جوة البيت سمع صوتنا بسبب الهوسة وكثرت الناس

فالح ركض بدرة وراه بارق لازم همام قميصه محترگ وايده على صدرة متأذي من النار

جمانة فرفحت بجي وانه اكثر منها

نركض ورا فالح ، هوا دخل للبيت وعمتي نورية شافته ضلت تركض ورا تصيح

_شمااالها ولكم مردتوني مرررد يمة فالح

رهف _احترگت درة احترگت

طلعت امي ركض مصدومة ما عبالها درة وهي شافتها وسمعت كلماتي خرت وطاحت

ويا ام حسين جنتي بوحدة صرتي بثنين ، انخبصنا والبيت انگلب رأس على عقب

فالح يركض بيها كل المسافة الي بين البيت والباب الخارجي شكد طويله وهوا شايلها ويركض وكلهم يركضون علي يردون يعرفون شبيها ..

هاني يركض يجيب سويچة ونسوان عمامي يكعدن بأمي ومناك فالح حط درة بالسيارة ويا عمة نورية طلعت تركض صعدت ورا

البيت انگلب بيبي سعدية تصيح _ولكم كلولي ميته عدلة شحترگ منها بس لا ماتت البت يااعلي يااعلي بس لا ماتت الفرخة يالرضا

شالو امي للسيارة خذاها هاني ونسوان عمامي وبهيج طلعو من بيتنة ثلاثة للمستشفى

همام ودرة وامي ..

جثيت على اركبي بالمطبخ اعيط واضرب على صدري ملخت روحي تملخ ، دخل عمي فاضل يركض ورا سداد وليث

فاضل _شحرگهااااااااا

ابچي واحچي _ تترس الصوبة وما حسينه غير شبت بيهااا النار وروحها فارة تركض تركض تريد تطفي روحها

ضرب عكازته وصاح بصوت رج اركان البيت رج ..

فاضل _انه مووووو گايل ماتوصل ولا بت للنفط مايعرررفن وخاف يحترگن شوووووصلها للنفط درة ياااهوووو وداها تترس الصوبة

الحلوگ تلصمت وانه من هبطتي نسيت حجي ياسمين ..

ترف گلتله وهي تبچي _هاي عمة هناء قهرتها كلش ودزتها تترس الصوبة ، خلتها دمعتها بعينها وما تشوف گدامها كون الله لا ينطيها ولا يرضى عليها السمانيه هاي

ياسمين _اي والله گدامي قهرتها ودزتها تترس الصوبة

فاضل _ شگلتلها

ترف _ كدام النسوان ضلت تصيح لدرة السويدة السويدة واختي درة كلش تنقهر من واحد يعيب عليها حتى تتمرض

ترف جانت تحجي وتبچي

عمي فاضل طلع من البيت مدرعم سداد عاط _غطنهاا هاي تخبلت لو طبنها جوة

ترف _ جان يقصد ترف لان شالها طاح وصدرها طالع وكطعت روحها جرينها للبيت منهارة تصيح _ماتت درة ماتت ، راحت اختي ررراحت الله لا يوفقچ هنااااء هيه درة شمعرفها شلون تشتغل الصوبة

ترف _الحية متعمدة تفشلها وتقهرها وتخليها ماتشوف گدامها

ام فالح _صلن على النبي ياامي الله يسترها ويرجعهن سالمات ياربي دخيلك لا تشوفنا بيهن مكروه

تحجي وتباوع لجمانة بخوف وحقها هاي السمانية كلشي يطلع منها الجربوع

عفت رهف تلطم وتندب الحظ وطلعت من الغرفة اشوف عمي فاضل طب ويا عمي ارفد وصاح بنص البيت

هناااااااء

طلعت من الاستقبال من يم الزايرات جان مبين عليها الخوف والظاهر خاتله هناك ..

فاضل _هناء ام بارق انه احملچ مسؤولية الصار بدرة والراح يصير ، مااريد اسويها بس جبرتيني اعاقبچ

هناء _وانت منو وتعاقبني ابو جهالي وانه ما ادري لو الوكيل بلگمتي عندي رجل ويحاسبني لو غلطت

ارفد _ماعندي كلمة تعلى على كلمة ابو ليث والحجية صبرررت هواي وللصبر حد موتتتيني يمتة تعقلين وتكفين شرج عن الوادم

هناء _ليش انه شسويت گتلها روحي ترسي الصوبة

سعدية _ خايييبة سنين من عهد گبل على روح نعمان ماعدنا بت توصل للنفط ولا تعرف تترس صوبة ، هاي الفرخة راحت ترست الصوبة ويمكنها شابه واحتركت البت واحترگ ابنج وياها

صرخت حيل وگاال _صخااااام يااا ابن احترگ وياها شجابة عليها شودا عليهاااا

فاضل _من حفر حفرة لأخيه وقع فيها شرچ رد بنحرچ ماتدرين ابنچ همام احترگ وياها من طفاها

هيَ هنا ملخت روحها مادري تتصنع استغفرالله ما اثق بهاي المرة ..

سعدية _ولججج هنننيييوة ما طووولج حارگة گلب جعيفررر وماردتها ومعيبة عليها و وديتيها للنفط ومن وراچ احتركچ ما اخليج تنامين ليلچ مرتاحه

هاي المملوحة الشايله ملوحة البصرة والجمال السومري بس عيونها تسواچ وتسوة عشيرتچ كلها

هناء _ فوووگ ناررري على وليدي كلكم عليَ ارررفد شمالك احجي شي ابنك محتررررررگ وانتَ ولا چنك

فاضل حچة بصرامة

_ حسيتي بنار اليحترگ ضناه؟ أرفد عندك خيارين مو اكثر

هاي المرة الگاعدة گبالي الخلتني اخسر صبري بهواي اوقات واسكت لخاطيرك والخاطير الولد اليوم وصلت حدها وياها ، وطلعت من ماعونها كلش

يا تشمر عليها يمين الطلاگ يا تطلع منا وتنسى عندك اخو اسمه فاضل

سعدية _وينسى سعدية لونها ماطلگ هاي الشرانية

هناء ملخت وجها وتصيح وتبچي

_ماا تخااافون الله تردون تهجمووووون بيتي مو كافي دريت بي ماخذ وعد وسكتت الله لا يوفقكم

فاضل _والله يا هناء هاي المرة مصختيها وجبرتينا على شي ما نريده

سعدية _احنة لو ندريچ على نيتچ سكتنا بس نعرفچ متعمدة وتدرين الصوبة شابه وراح تحرگ البيت

من كونچ ردتيها تتشوه لو تموت وما تاخذ ابنچ همام

أرفد _تعبتيني تفشليني واكول اعبرلها تدوسين بگلبي واكول مخلفتلك خمسة لخاطر العشرة ، احترم شيباتها

سعدية _منيلها شيبات صابغتهن صفر عود تسوي روحها عوروبيا (اوربيا) مثل هذني ليطلعن بالـ بلبزيون (التلفزيون) وهيَ ريلها تتلولح بالگبر طگة بعوجيتي تطيح چفي على ويهة (وجهة)

عمي ارفد تنهد باوعله عمي فاضل بنظره خلاه گبل يگول

_انتِ طااااالق طااالق طااالق ، حچاها ودار وجهة طلع من البيت

وهيَ انهدت ماخلت شي ماطلعته تلطم وتعيط وتصيح

هيج هيج منكم اولاد الكذا وبنات الكذا يعني خربتها كلش حتى ما فكرت خاف ترجع شلون تگابلهم بيا وجه

بيبي سعدية كعدت تباوعلها ولا هزت شعرة منها هادئة وحتى ملامحها ارتخت ..

گامت جابت عبايتها ولبستها طلعت من الباب الخلفي ركضت وراها اريد اتعارك انه شلون اطفي ناري اذا ما تعاركت وانه ترف بت جعفر واسكت؟! لا والله ابد

التفتت هيَ وصاحت _شمالچ لاحگتني جنچ ذيلي ولاطشة وراي

ترف _خوش تعرفين روحچ من صنف العدهم ذيولة

هناء _راح ابسطچ وانسيج حليب امچ لرضعتي

ترف _والله چانچ بيچ زود نسيني حليب امي لرضعته انه ما متعودة انسه شي عاد خليني اجرب الشعور

دارت جاي تطلع كلش من اخر باب ورجعت باوعتلي وگالت وهي تسويلي حركة توعد

_هين يا بت جعفر انه وياچ والزمن طويل

ترف _اعلى ما بخيلچ اركبي عشرة مثلچ ما يوصللي هاي بداية وردت اكلج نشوف المستوى الثاني بس تذكرت انتي هسة مطلگة وامي راح تاخذ مكانچ

هي صارت حمرة نصت شالت نعالها شمرته تفاديته وگتلها بكل برود

_مبروك طلاكچ ومبروك على امي اتمام زواجها من عمي حبيبي ارفد

كل البنيتي من سنين صار لوعد تكدرين تطلعين هسة وترحين طليقة عمي

جانت تباوعلي بحقد شمرت نعالها يم رجلها لبسته وطلعت تارسة روحها ذهب وجاية بنعال

ماادري اخذته گبل مو الها

مشيت وراها اسد الباب ما تعاركت بس گدرت اشعلها بكلمات بسيطة ، التفتت اخر مرة وعاطت ..

_عسا درة بالموت واذا مو الموت كون تتشوه وتضل عمرها كله ماتوگف كبال المرايه وان شافت روحها تخترع وتفز ، بت السماچ نافخة روحها

زميت شفايفي بغيض نصيت شلت صلبوخ وردت اركض ابط راسها هية شافتني هيج وراحت تمشي بسرعة وعبايتها تطير

بعدني ما راكضتلي كم متر حسيت روحي انجريت من رأسي

التفتت شفت جاسم لاف ظفيرتي على ايده وجرني منها

جاسم _مجرمة الترفه .

ترف _ولك جسوووم عوووفني اخلي دمها بطولها

جرني من ظفيرتي دخلني للبيت اعيط _جسوووووم شمااالك ويااا ظفيرتي راح تشلعها

هسة شمالك اووووي شنو رايده انه بس افشخها

جاسم _عيب مرة جبيرة ورجلها ادبها فوتي يله ، وهاي ظفيرتچ ضميها جوة هدومج جوة الشال المن مخليتها هيج

ترف _وخرر هي تطلع شسويلها

جاسم _مرة ثانية ان شفتها طالعة وهيج تفترين الا اگصها الچ واخليچ تنحبين نحيب

ترف _هاي ثاني مرة تسوي هاي الحركة مرة ثالثة اكسر ايدك واعلگها خوش لو موخوش

جاسم _طبي لا اصلخچ راشدي اخليچ تشوفين الفوگ حدر ام ظفيرة الطالعة

مديت لساني عيبت علي بغضب ودخلت للبيت

مرت ساعات ، امي مابيها شي بس درة ماندري صدك جذب يكولون مابيها شي

اخير شي قبل لا ننام جابو امي ركضنه عليها حضناها كل وحدة من جهة هي كعدت على جرباية بيبي سعدية وحضنتنه ثنيناتنة تبچي وتمسح دمعها بشيلتها

وعد _وروح الماشبع راحة ونام جوة التربان مظلوم مابيها شي يمة گطعتن گلبي

رهف _الله عليج

ترف _يعني ما تتشوه لو تموت

وعد _اسم الله عليها وبالنسبة للحروق اكثر شي برجليها وشوية صايرات بصفحتها بس يكولون مو خطرات ويتعالجن ويطيبن بسرعة

رهف _حطيت راسي بصدر امي ابجي بحرگة منظرها مايفارگ رأسي كل ما اغمض تجي صورتها گبالي محترگة وتركض مفرفحة تريد تطفي نفسها

درة … ريگي ناشف وغصة بصدري والالم نخر روحي

عيني تدمع وكل ثنايا روحي متألمه

اباوع عمة نورية على صفحة وفالح گاعد بالگاع عينه بالمبايل

شگد حسيت بالحزن خطيه هاي الناس محترگة گلوبها وياي ومتأذية انه طول عمري مصدر قلق لأحبابي من حر وانه صاعدة

اخ يروحي شنو تشوفين بعد شو دومچ معلعلة ومتلوعة وما يدوملج فرح ولا تستمر البسمة على شفايفج

تعرضت لمحاولة اغتصاب لليوم اتحلم وخايفه

حر الانسان الجان اعز من روحي عافني وراح وما ادري بيا كاع هوا هسة وشنو اخباره واذا يرجع لو لا

عشت يتيمة الابوين وهسة ختمتها محتركة

صح كلولي مو ذيج الحروك بس متأكدة يصبروني ويجذبون وبعدين يضل اثر واصير مشوهة

طلع صوت فالح يخابر _هاا نايمة .. لا لا .. ضغطك يمعود ضل مرتاح هاني شمالك .... اوو جا هية بس اختك هم اختي ...لالا لا تجي انه ما اعول ارجعك للبيت تريد تجيلي وبهذا الليل تندعم شي .....لا تعصبني!! ترة روحي طالعة الف مرة خابرتوني كاافي روح گول لعمك فاضل فالح يگول لفو روسكم ونامو ليلكم رغد البت مابيها شي وانه وعمتي نورية يمها

سكت ورجع كال ...شگددد تلح ليش تطلع صوتي وتخليني اگعدها؟ عمي انته رجيج وضغطك نزل زين ما متت علينه ... هاا ... يلا ... خوش الصبح نبدل

...مانخليها هواي نطلعها باجر عكبه مابيها شي

سكت فترة وضحك بصوت مخنوگ … انه عبالي يسوون فاتحتك من شفتك سلهمت خلفة جعفر كلها رچيچة

نهى الاتصال ورجع يگلب بالمبايل حجيت بصوت ناصي

_فالح؟

فالح _عيون فاالح .. حجاها وگام اجة بأتجاهي

بيج شي محتاجة شي ادز على الدكتورة ولج عاد شلون دكتورة حلوة هم اكحل عيوني وهم تخدمج

ابتسمت على كلامه وغمضت عيني لحضات متألمة

_الله عليك اتشوه لا؟

فالح _عمي گالو ماتتشوه واذا لا سامح الله وضلن اثار حرگ يتعالجن هاي مراكز التجميل ضاله اخذيلج سنه يطيبن الجروح ترحيلهم يرجعونچ بالباكيت ومسويلج نفخ هم مكبرين براطمچ

درة _ولك مابيه اضحك ، همام خو ما تأذى

فالح _خل يولي هلسافل المنحط انتهز الفرصة بحجة محترگة شبگچ لزگ بيچ ما صدگ

درة _ هههههه تعور مو

فالح _اي تعور صدرة لان كبل ذب روحه على بطنج ، ضحك حيل ومسح وجها

_تدرين شني گلي؟ راح ادعي كون ما اشوفها تشب بيها النار وبحجة اطفيها اخذلي شبگة

درة _هههههههههه فاله اخير من فاله هوا هيج راح اموت انه

فالح _خلي اصيح للدكتورة الحلوة

درة _متأكد تريد تصيحلها علمودي؟

فالح _وانتي يهو بحالچ انه اريد اصچم الدكتورة الحلوة

درة _امي شلونها شعجب راحت

فالح _تعبت طردتها عمة نورية طرد ، هزيت رأسي سكتت وهوا كذلك

غمضت عيني ما اعرف ليش بسرعة غفيت ، وكعدت ورا الساعات هنا بدأت معاناتي ويا الحرك جان يوجعني ولازم يومية ياخذوني للمضمدة هناك تروح روحي احسها توصل لحنجرتي شهگة موت واردها

شلون مشت هاي الايام ما اعرف بس مرورتهن ضلت بحلگي والألم لا يمكن ان انساه

ركضت الايام ركض اجت فرحة الزهرة وانخبصو خبص بالتحضير لعرس بارق ، شلون اخبارهم شنو صار

هناء وين راحت محد يدري مايحجون كل الي وصل النه جاي يجهزون للعرس

انه مالي وهس محترگة والدنيا طالعة من عيني ، وبعد ما وصلني شي من حر هذا هم اثر عليه وانعكس على نفسيتي چنت بس انام واقرا ومالي خلگ شي ثاني

حياتي صارت سودة اطلع صورته ابجي وابوسها واضمها الصدري يلا انام

امرر اصابعي على وجهة وابچي واعاتبه _يمتة ترجع توگف كبالي واشوف طولك ويرتاح گلبي المتلوع من ورة فراگك يمته ابوسك واحضنك واشم عطرك واختل بين ذرعانك تحميني من هذا العالم

دخلت رهف جاية من السوك من جهة متسوگة لعرسها ومن جهة لعرس بارق ، والله احنة مانريد نروح بس بيبي سعدية من سمعت بينا عاطت وضلت تحجي علينا

كعدت رهف تطلع بالاغراض تراويني ، ومن بينهم روب نوم بصلي يجنن رفعته تضحك

رهف _ذوق فاقد يگلي راح استعجل بالعرس علمود اشوفچ لابسته هذا الفاسد

ههههه بس صدك حلو ، شوفي جبت هذا سمائي هو حب السمائي من يوم الخطوبة

باوعت مستغربة بادلتني النظرة _ليش صفنتي بوجهي

درة _مو تصرفاتچ غريبة يعني گلبج حسب علمي يم سداد وتصرفاتچ ويا فاقد ماادري مال وحدة تحب

ابتسمت وكامت كعدت بصفي _شوفي انه صدك كلبي يم سداد ومتلوعة بحب سداد بس كلت ما اظلم روحي خليني اجذب يوم يومين خليها سنة وانسى كل شي

اما عن فاقد هذا اسمة تقبل واعجاب وميول مو حب

بس الحب راح يجي ، فاقد انسان يستاهل وانه رهف بعد تعرفين شنو يعني رهف راح احافظ علي وما اخسرة بسبب حب عقيم ما ورا اي فايدة

درة _عفية الله يكملچ بعقلچ هيچ اريدچ دائما قوية وتعرفين تتصرفين

دك نقالها ابتسمت وجاوبت وحطت المبايل على اذنها

ضلت تاخذ وتنطي انه نزلت راسي اكمل قراية الرواية كامت كعدت على صفحة تسولف وتضحك

الجماعة ضارب عدهم خيط مو توة جان وياهم بالسوگ مسرع اشتاقو

الله يسعدهم .....

بالنهاية الخوف ماراح يفيدني ، ولا راح يقدملي شي

الانسان اذا ضل خايف وحاط ايده على خده يندب حظه ماراح يستفاد شي

بس الأذية تجي من ورة الخوف

لهذا السبب انه هسة ذبيت الخوف وقررت اشتغل على المستقبل ما من المعقول غضب بارق مني يضل العمر كله هوا فترة ويبرد ويصير سمسم

صح انه اكرها واتمنى يطلگني بس لخاطر امي وعلمود رضاتها راح اصير عاقلة واسوي مثل ما وصتني

حاچتني ام الصالون فتحت عيني باوعتلها ورجعت باوعت للمراية

_ ش شنو هذا اللون؟ أ اريد احمر

_حبيبتي يا احمر هذا مديل وكل العرايس هسة يحطن هيج حمرة لون هادئ ومحدد

_ ش شعليه ب بالعرايس انه ه هذا عرسي ا ا اريد حمرة لون احمر غيرها م ما اريد ا امسحها واطلع بدون ح حمرة

باوعتلي بنص عين ما عاجبها تتمعلچ غيرتلي اللون يله ارتاحيت عشقي لون الاحمر خصوصا من يزين الشفايف احسه خطيررررر

اجة بارق والزفة طلعنة للاستوديو ، نزلت ما اشوف شي مغطيني بالبرنص بس من دخلت للاستوديو نزعت البرنص اخذته مني هيفاء اخته بس جرته من ايدي بنتر ، ما صدگت هناء نكلعت طلعتلي هيفاء دخيلك ربي النوب الشرانيات هيج كلهن هيفاء هناء واختها زهراء

تگول شرط الشر لازم نهايته الف وهمزة

عدلت بدلتي من يم الصدر التفتت

شفته واگف بقاط رسمي اسود ورباط احمر ، ايده بجيبه ومعاجبة العجب

المتعجرف

اجتي المصورة تاخذ النه لقطات ، اول شي سوته جابت كرسي وگلتلي

_صعدي علي

تعالي عيني ساعديها تصعد فوگ

بارق ابتسم ابتسامة استهزاء وانه شسوي من لا چارة صعدت باوعتله وصاحت

_العريس تعال اوگف هنا وانتي مدي ايدج

بارق _شنو معنى هاي الحركة

_يعني عود هيَ طايحة وانت تنقذها

بارق _لا والله؟ غمض عينه وفتح بقلة صبر وجرني بقوة نزلني اختل توازني سندني ضليت اباوعله بحقد

بارق _نريد صور واقعيات بدون دراما

_شنو تعلمني بشغلي انه اصور على المديل هسة كله هيج لقطات

بارق _انه الزبون والي حق اختار الصور الأريدهن واللقطات

اريد اشياء واقعيه وفخمة وراقية لا طايرة ولا طايحة

هي هم ماعجبها شكلنا اليوم انه ويا متعمدين نغث اي واحد يطلع بدربنا

كملنا تصوير وطلعنه البيتهم شفت امه حاضرة وتخزر بيَ ، البنات شي يرگصن شي كاعدات

عمة وعد وبناتها كاعدات يم بيبي سعدية ما كامن ابد

لابسات فساتين راقية ومسويات شعرهن بشكل حلو وبسيط، طالعات جميلات وما تحركن ولا حتى صفگن وبيبي سعدية كل شوية تحاجي عمة وعد شي وتضوج

بعدين رهف كامت واجن يمي هي وفلك كومني بدون مايحجن شي حتى ارگص

بله انه وين والرگص وين باوعتلي رهف وهزت خصرها وفلك حطت جتفها على جتفي وصاحت _يلله بوية يله هلا هلا

التمن بنات عمامي يركصن وانه بنصهن استحي اركص بس احرك بروحي يمين ويسار عود هذا رگص اضحك عليهن بي

كامت بيبي سعدية وكضت عكازتها بالعرض وضلت تدبج وتهلهل سوت واهس لنسوان عمامي وكلهن ضلن يدبچن وياها ويركصن والله انه من شفتهن هيج نسيت انه العروس ونسيت البدلة وذبيت لحم ليشوفني ماخذته على حب وما مصدگة روحي

لحد ما فلك جرتني وكالت _فلك طرج ردناج شوية تركصين مو تخزينة شمالج ماريد العشا زفوني فشلتينا

جمانة _ غ غير انتن سـ سويتلي واهس

فلك _ لو ندري بيچ راح تجيبيلنا العار ما گومناچ ولا تقربنا الچ

جمانة _ل لا تضلين ت تهذين مالي خ خلگ

فلك _ما الچ خلگ همزين لو الج خلگ ذبيتي البدلة وضليتي مصلخة ترگصين

هيفاء _ وين مگعدتها عيوني خل نصعدها لشقتها ترتاح وتحضر نفسها قبل لا يجي بارق

جانت تحجي بنتر وتباوع بنص عين مشمئزة بعد اخوها بارق عليمن تطلع ..

ابتسمت بخبث و گعدت كلت موجهة الحجي الها ولفلك

_انه ا اريد ن ننزف سوية ي يعني أيد بأيد و و نصعد

هيفاء _هاي السوالف مو عدنا احنة متعلمين البنية تنزف وراها العريس يصعد شنو تردين تكسرين القاعدة لو انتي من الشواذ

جمانة _ ع عرسچ؟ لو عرسي ا انه العروس و و لازم اعيش لحضات ع عرسي مثل ما ا احب و اريد

ف فلك ج جيبي نقالي

مشت فلك لجنطتها تطلع نقالي منه باوعتلي هيفاء مستائة

هيفاء _لا عيني گومي نزفچ لا تطوليها يله مافارغيلج نريد نحط عشا للعالم وياكلون ويرحون لبيوتهم ويخلص هذا العرس الاگشر

جمانة _ش شبيچ راح تاكليني؟ م ما طگيتكم على ايدك و و گ كتلكم اخذوني

فريت ايدي ما عاجبني اجت فلك وهيفاء على وگفتها

صرفتها بسرعة _دقايق واصعد

عافتني وراحت دكيت على بارق وهاي ثاني مكالمة وطبعا الاولى كانت بخصوص روحة السوگ مو اكثر

جاوبني فتحت سبيكر حتى اسمع يمي هوسة واغاني

ولازم يحجي بكل هدوء وبرود مستفز

بارق _ لازم مستعجلة الافندية

جمانة _ب بارق ش شوف انه ما اصعد ا الا ايدي ب بايدك و ننزف س سوية اذا م مو هيج اضل گاعدة ج جوة خ خوش؟

بارق _ما فهمت

جمانة _ خ خابر اختك گللها م ماتصعد جمانة الا ا انه وياها و ننزف س سوية

بارق _واوووو تخووووووف منيلك هاي الافكار

جمانة _ م من راسي

بارق _لازم ميته عليَ وبس تردين اصعد وياچ

جمانة _ا اي ميته ع عليك لو تشوف ص صارلي ساعة اهوس ما ا اريد العشا ز زفوني ولبارق ح حبيبي ودوني هوَ ع عمري وحياتي و وضوة عيوني

ضل يضحك ورد _هذا هو لان ضحكتيني راح انفذلچ لتردي بس لا ياخذچ الواهس اكثر من هيچ ما اكدر انفذلچ

جمانة _ ع عادي

نهيت الاتصال انطيت المبايل لـ فلك مبتسمة غمزتلي وگالت

_خوش مسيطرة الأخت

رفعتلها طرف حاجبي وابتسمت

لهناك واختفت هيفاء واجت ام بارق تربع والله ما تمنيت اشوفها بعد بس الظاهر الولد جايبيها

نصت بحجة تباوسني وفرحانة وهمست بأذني

_ لا تصدكين روحج وتبدين تخبثين من هسة ترة الولد ابني ومحبس بايدي افره مثل ما اريد

جمانة _ خ خوش

هناء _ مو انتي التمنيتچ اله ابد البكعه ام نص لسان بختچ شكبرة لصم ابني لصم وعما عمي

ابتسمت بدون جواب ، عافتني وراحت العالم تعشت انه ما ردت عشا البنات سوولي عصير طبيعي وحطولي بي قصبة شربته حسيت روحي شبعت

ساعة تقريبًا ودزو عليَ حتى اتحضر ، اجن البنات يركضن رهف ترستني عطر ودرة تعدل الاكليل

والثانية تعدل البدلة ، توترهن وترني بس لزمت روحي

فتحو الباب مال الصالة شفت بارق ورا عمامي و والولد يم باب الصالة يهوسون ويدبچون صوت اقدامهم هز الگاع حسيتها بگلبي هيچ صوت يفرح ويرهب بنفس الوقت ..

يهوسون "زفيناه بصاااية حيدر ، زفيناه بصاااية حيدر"

ترف _صعدت فوگ الكرسي لازمة المبايل اصورهم اشوف عمامي يخبلون طالعين هيبة بالعبي والعگل

والشباب كلهم منسقين لابسين ستر ، ومرتبين طالعين يجننون

سوو ميدان وضلو يهوسون وبارق واكف بالباب يباوعلهم مبتسم عزة ماعبالي بارق عنده هيج ضحكة حقيقية

_ اي احنة اولاد العم طيييح وكوم احنة اولاد العم طيييح وكوم

طبت بنصهم عمة نورية تهوس بعبايتها _اااي امشن نتبارك لابن الطيبات اعلومة امشن نتبارك

لابن الطيبات اعلومة

عمي ارفد حط ايده علي راسه بتحيه احترام

طفر همام بالنص يهوس بسترته النازعها _وكللهاا عرست بس انه ضليت جيبولي مرة لا احرك البيت

الولد شدوها من وصلت للعرس وضلو يزكطون مو بس يدبجون

فجأة زامل ابن عمتي واخوته اكتسحو الميدان

وكف زامل بالنص ضرب رجلة بالگاع وهوس

_احنة اولاد اختك .. احنة اولاد اختك وانتَ الخااال

وكل اولاد عماتي ضلو يدبجون

عمي ارفد يتشكر منهم ويحط ايده ع صدره وراسه

نورية _والله والكضت كضاها والله والكضت كضاها يحله ابو بارق عشاها والله والكضت كضاها

وبيت ابو بارق عشاها والله والكضت كضاها

چنة نضحك وفجأة عيني تركزت على فالح الي ماجان حاضر شلون دخل فجأة بنصهم كلهم سكتو ينتظرو يهوس هوسته

دبچ رجلة وهوس _ما طشينة يالشامت ون .. ما طشينا يالشامت ون

ضلو يدبجون بارق راحله وتحاضنو بنصهم والهلاهل علت

منظرهم وهم متحاضنين خلاني ادمع

درت الكامرة مشيتها وكفت على عمي ارفد واكف يم امي بالباب ومنصي رأسه مادري شنو همس الها

هي ضلت متضايقة رادت تمشي لزمها من ايدها رجعها مبتسم

ضجت كلش بس والله الحق يقال عمي ارفد يخبل وهيبة هنيال امي عاشگها هيچ واحد

حطو ع راس جمانة برنص ودخل بارق لزمها من ايدها يصعدون والكل نسوان وزلم وراهم يزفوهم ويهوسون زفيناه بصاااية حيدر زفينا ، واصوات الهلاهل والدبج عبالك رعد

وبهيج يكون العرس خلص وبالحقيقة جان احلى عرس احضرة بحياتي وشعور الفخر طلع من خشمي

جاي احفظ بالمقطع اجة حمودي يركض يعض باصبعه باوعتله بخوف وضليت اتلفت

حمودي بغضب _ولج ضمي رجلييينج انتن شمالجن بالعراس تنسن الله

لفيت العباية زين وضحكت _اعصابك بطبوط

ضرب گصته _بوية فاااضل الحك ابنك بطبوط

ضليت اضحك علي ، اجن البنات لابسات يردن يرحن بس عماتي ماقبلن كالن وين هسة تجي ملا ويجيبن هذني دفوف ونضل لنص الليل والزلم هم عدهم برة هوسات ومهاويل

رهف _جنت كلش تعبانة وما اكدر اضل وياهم وانه عبالي خلص العرس من زفيناهم

خابرت فاقد ، جاوبني بسرعة

رهف _فاقد بعدك بالعرس لو رحت

فاقد _موجود عيني بعدني

رهف _ماتاخذنه بطريقك انه وترف للبيت متنة تعب وسالفتهم طويله الجماعة

فاقد _هاا عشر دقايق اسلم واطلع اخابرلچ

رهف _تمام

فاقد _حبيبتي

رهف _هلا .. نهيت الاتصال

ورا ربع ساعة خابر انطينه امي خبر ورجعنة اصلا فدك رجعت للبيت من زمان هي وهاني لانها حامل وماتتحمل تعب يعني البيت مو فارغ كلنا نرجع نرتاح

جاي نطلع جلبت بينه درة اجت ويانه ، يم الباب صادفنة فالح وهمام وسداد واكفين النوب شلون ثلاثة

سلمنة ، كال فالح وين

رهف _وين للبيت راح يوصلنه فاقد بطريقة تعبانين كلش

فالح _جان خابرتيني

رهف _والله ماعندي رقمك وهم انته غير ضال يم الولد وجايبين مهاويل عاد فاقد اول وتالي رايح

باوعت لهمام ماشال عينه من درة يباوعلها ويتبسم

لگزتها كتلها يلا

فالح _لا اوووكفن جلاااال روح شوف فاقد وين خل يجيب سيارته ويجي منا هناك زلم ويروح يتطشر عرضنه ونهلس شواربنه

ضحكنة على كلامه صدك هنا محد بس هم واكفين الزلم صايرين بغير صفحة ، رفعت عيني طاحت على سداد منصي يباوع بالمبايل باله مو يمنة الحمدلله بدا ينسى او يتأقلم

رفعت عيني لهمام ودرة مرتبكين ، درة خجلانة وهمام اكلها بنظراته فالح يباوع بمكر ويضحك

همام _ياا فالح الحگ اخوووك

فالح _شبييي اخووووي

همام _صارر بي سكر من كثررر الحلقوووووم

سداد رفع راسه مبتسم ابتسمت على حجيهم ودرة خزرته

همام قرب راسه من راس فالح وكله _خوووية فاالح الحك اخوك

فالح _شبييي اخووووي

همام _يكلك طاح على وجهة چفي

فالح _احوووي احووي

همام _خوووية سداد

سداد _ها خووووية

همام _يگلك ريحة الحلقوم لحد هسة باخوك من ورا الشبگة

طبگ فاقد بسيارته درة باوعت بغضب لهمام وگلتله

_بيك زگطة اردك بحضن امك هناء ابن هناء

عافتنة وراحت للسيارة نزل فاقد انه ما انتظرت رحت صعدت بالصدر والبنات ورا اسمعه يباركلهم

وبالاخير يحجي ويا سداد علمود عرسه يگله اريدك حاضر انته اخوي

سداد رد _والله عااد تعذرني انه يمكن اشرد ما اكدر احضر

فاقد _اي سويها مثل الخطوبة واشرد وعلي اقاطعك

سداد _لا والله ما اشرد بس ما احضر ، اخذه وعد مني بأيدي اسلمك بنيه عمي عروس بس مال احضر لا

نهو كلامهم اجة فاقد رجعنة للبيت ميتين تعب نمنة ما كعدنا حد ساعة 12 الظهر ، ومتكسرات هم

جمانة _دخلنة لشقتنة عاف ايدي عيبت علي بگلبي شبي هذا ثول عبالك جبرته ياخذني

مشيت للغرفة بنفسي وهو اختفة بديت افتح تسريحتي ذبيت الاكليل وتقريبًا خلصت فتح التسريحة شمرت الشعر الحاطي الي بقرف

والله لعبان نفس انه شعري قصير لحد كتفي كتلها سوي شي بسيط ماقبلت الا تحط شعر حضرة جنابها

دخل عليه بطرگ الشورت وينشف برأسه فكيت حلكي مصدومة عمري وحياتي ماشايفة رجال بهيج منظر حتى اخوي فالح ماطالع كدامي هيج

بلعت ريكي متوترة ودرت وجهي عنه ، فتحت البدلة استغليت انشغاله ونزعتها بسرعة لبست برنص ستن اخذت ملابسي وفتت سبحت وكعت كل المكياج والسبري من شعري ومشطت بالحمام يله طلعت

لكيت صينية العشا محطوطة بنص الصالة ، اكو جلسة عربية وبيها مساند كاعد ثاني رجله وايده ع مسند الكعدة

گبل بدون حجي تربعت گبال الصينية جنت لابسة بجامة ستن بيضة نص ردن بحركة لا اراديه رفعت الردن متحضرة للاكل

بارق _انه اعرف العرايس يخجلن يستحن شو انتي گبل هجمتي حتى ما صحتيلي

جمانة _ چ چا شنو اموت م من الجووووع ب بعدين اكو واحد ي يشوف نعمة الله ويكول ل لا؟

باوعلي بنظرة ثاقبة ومسح على شواربه ورد بمكر

_لا والله ماكو ..

ثنى رجله وكعد كبالي ياكل شو هذا نازوكي مو مثلي مرعبلة حتى من ياكل على كيفه ويعامل الخاشوگة معاملة رقيقة تكول صاحبته

شعليَ؟!! شبعت بطني وكمت غسلت وفرشت اسناني رجعت للغرفة رشيت عطر وتوجهت للفراش عفته وراي ياكل ، لفيت راسي بالغطا ونمت بسرعة

ما حسيت غير انفاسه يم أذني وانه غافيه فتحت عيني بنعس همس بأذني

_الصياد صاد الغزالة ، على روح الغزالة السلام

غمضت عيني بخوف ما رديت الغرفة جانت ظلمة ضحك ضحكة شر وابتعد عني ورا دقايق انتظمت انفاسه ونام ..

رهف _مرت الايام بين دوام وتحضير للعرس خلصنه امتحانات الفصل الاول وكعدنه كم يوم عطلة

عرسي راح يكون ورا مانداوم بفترة قصيرة ، جنت خايفة كلش ومرتبكة من هاي الحياة الجديدة

بس اتذكر حجي امي دائما تگوله الي "شجعي روحج بالبداية وسيطري بعدين كل شي يصير سهل"

لازم اسيطر واتحكم بكل شيء واسيطر على فاقد والبيت حتى ما اخسر لو اخلي شي يفوتني

شلون مرت كل الايام هاي ما اعرف ، وعرسي ماضله غير عشر ايام احسه شي يخنگ

ومنا بدأ الدوام الضيم صار ضيمين وتعب

كعدنا الصبح ونزلنه لكينه الجماعة ملتمين وامي تتوسطهم

بيبي سعديه كالت بأمر _ررراح تنفذييين وعد احنة ادرى بمصلحة البت اكثرررر منچ

وعد _لا والله!! هاي بتي وجزء من روحي حتى لو ما كانت بزر بطني احس بيها واعرف شنو يريحها وشنو يضرها ، ماراح ترتاح ويا همام

سعدية _ولج وعد انتي تعرفين شي وانه اعرف شي ثاني تعوذي من بليس وقنعي البت

فاضل _حجية ، الحجية سكتت باوع الامي كللها

_انه قررت وعمري ما قررت شي اذا ما متاكد منه

وعد _وهاي اول مرة تقرر شي مو زين ويضر ما ينفع

سعدية _هيهو الحضيرية شعرفچ انتي؟! احنة ادرى منچ مالج شغل انتي البت بتنا واحنة نريدلها الزينية

وعد _وهناء؟! ما ترجع؟

وتموت البنيه لو تسويلها شي

سعدية _هناء ترجع بس من تتأدب مو هسة واذا ع بت حالها من حال بت عمها صادق يحطله ريلها باب وتصير بشقه وحدها وكت اللكمة تنزل تاكلها وتصعد

وعد _والله ماعندي بت للزواج اخذها واهج والله والله انه الربيت وتعبت وكبرت والي كامل الحق بتحديد مصير بنتي

عمي فاضل غمض عينه بقلة صبر مبين اكو شي بداخله وسبب قوي مخلي يسوي هيچ

فاضل _خوية لخاااطر محمد وبروح اخيچ حر لا توكفين بطريقنا انه والحجية تشاورنا وعدنا غاية

وعد _شنو درة كبش فداء لغاياتكم؟ مالي شغل والله البت ماتريد همام وانه اعرف هذا شي وحتى انه ما قابلة ما انطي بنتي لواحد من ولد هناء صدك همة زينين ماطالعين على امهم

بس هية هناء يرادلها عشرة شرانيات يله يكدرلها

وجنكم نسيتو من ودتها متعمدة للنفط وخلتها تحترگ؟ من تصير يمها شتسوي بس الله يعلم

عمي فاضل هز راسه وكال بجزع _نحجي بعدين

عاف الصالة وطلع تعبان

بيبي سعدية زمت شفايفها بغيض وكالت لامي _ماتفتهمين والله تستندمين بعدين

ما ادري شصاير وشنو السالفة امي ضاجت وراحت للمطبخ همزين درة مو هنا وما سمعت بعدها فوگ

ضليت الوب اريد احاجي امي بس هي ملتهية ويا عمة نجوى بالطبخ طكت روحي مليت رحت كعدت بالصالة يمهم مجتمعين ، ملزمتي بايدي لازمة القلم واكتب هناك وضليت صافنة بله هسة انه شسوي هنا وشنو هذا البحث شلون اكمله ابد مو وكته

حطيت القلم على جبيني وصفنت شفت سداد يباوعلي رفعلي حاجبة بمعنى شكو

رهف _هذا الدكتور طلب من عدنا كل واحد يكتب بحث ، صرنة كل ثنين سوية زميلتي كتبت هواي اشياء وانه هم كتبت

بس الدكتور كال يريد بعد ، كتبت عن كلمات العواطل وحطيت المثل خطبة الامام علي بدون نقاط

ورجع يكول ناقص ويريد بعد عود هذا بحث عادي مو مال تخرج لو شي

اشرلي بايده نزلت كعدت قريب منه اخذ من ايدي وبدأ يحجي ويكتب هواي امور ويقرأ بالمكتوب ويصحح الأغلاط

مديت ايدي اشرتله على سطر معين عينه وكعت على حلقتي جر نفس عميييق وزفره فتح عينه وكمل ..

اخذت الاوراق منه ارتبهن بالتسلسل ضلت ملزمتي بأيده انتهت اله ضل يكتب بظهرها ، مدلي القلم وانطاني الملزمة

اخذتهن من ايده ابتسمت اله بأمتنان وگتله _ممنونة

هز رأسه ونصه فتح مبايله يتصفح بالفيس

كعدت علي القنفة قريب منه درت الملزمة اشوف شنو كاتب بدون ما انتبه

"ابلغ عزيزًا في ثنايا القلب منزله

اني وان كنت لا القاه ، القاه

وان طرفي موصول برؤيته

وان تباعد عن سكناي سكناهُ

ياليته يعلم اني لست اذكره

وكيف اذكره اذ لست انساه

من توهم اني لست اذكره

والله يعلم اني لست انساه

طبگت شفايفي ضغطتهن روحي اختنگت كلش ، ضليت اشغل نفسي بالمراجعة

رفعت راسي على صوت ضحك ترف كاعدة بصف عمي ورافعه المبايل تصور ويا وتحجيله نكات

عمي يضحك حتى اكتافه تهتز وبيبي سعدية تگللها شني يعني مافهمت

ترجع ترف تفسر الكنته وعمي فاضل يضحك

راحت ترف تمشي وكل شوية تحط المبايل بوجه احد وتكله اضحك اضحك وتصورة ڤيديو

اختفت ترف ورجعت ورا ربع ساعة تبچي كلنا اخترعنة مسحت وجهة وكبل لاجت لعمي فاضل فتحلها ذراعة كعدت بصفة حضنها خلاها جوة ذراعه

فاضل _شبيها شيخة آل نعمان تبجي ياهو مبجيهااا والله اخلي يتوسل يطلب رضاتچ

ترف _عمووو اذا واحد سوالك سحر تموت؟

عمي فاضل صفن ضل يباوع الهة مستغرب هز رأسه ب لا

_الاعمار بيد الله شنهي سحر وشني قدرته كبال قدرة الله وتخطيطه

رجعت تبجي وكالت بقهر _بس السحر هوا يخوف شياطين والشياطين تأذي عمو لا تمووووت فدوة انه احبك

ضليت ارمش صافنة احسها هاي مقصودة منها والظاهر سامعتلها شي عن سحر وجاية تنقلة بهيج طريقة

سعدية _خايبة تريفه بطيتي گلوبنه هسة لا تگولين شمالچ تبجين والنوب كلبتي على السحورة طلعي الزبدة خلنا نفهم ونعرف الصاير

ترف _ما اكدر احجي ما اكدر الحجي صعب وانه اخاف احجي ماعندي جرأة

فاضل _لا بوية احجيلي الشي الصايرلج وكبل كل شي خل ببالج السحر لا شيء كبال قدرة رب العالمين واحنة كلنا هنا من زغيرنه لچبيرنا حدر رحمته وهوا يدفع كل شر عني وعنج

سعدية _هي غيرر تحجي

وعد _ تررف!! حجتها تخزر بترف وتعض اصبعها

ترف _عمو اسمع كل شي من البدايه الله عليك

انه امس جنت اضحك ويا حمودي ورحت وين للمطبخ تمام

فاضل _تمام

لكيت سفانة بالمطبخ بس شافتني ذبتلي حجي گلتلي بت السماچ الفگر ما صدكت شافت خير ضلت تتلزگ

اجيت انه وكفت كبالها تخصرت وگتلها بغضب

_عيدي

سفانة _اي لا تباوعيلي هيچ طبيتي هنا شفتي العز والخير وضليتي تتلزكين هسة سنتين تلاثة وتاخذين الولد والخير يغطيج

ترف _لا حبيبتي انه من اصلي بت خير وعايشة بخير خالي حر المرحوم احتار شلون يدللنه وما خلانه ننقص شي

وابوي ابن خير ونفسه عزيزة عاش ومات عزيز

سفانة _هو غير ابوج سماچ وانتي لو ما خير العالم هذا الثوب العليج ماتلبسي

ضحكت وگتلها _لا عيني اذا ناسية اذكرج

عمامي صح كل واحد بيهم عنده خير خاص بس ورث جدي مامتوزع والحلال واحد وحصه جعفر حالهة حال حصة فاضل واسد وصادق لأصغر واحد

يعني انه وخواتي واخوي بأعتبارنه بنات جعفر النه حصه من هذا الخيرر لهووواي

بس انتي شنو الج!! وشنو عندج؟ واهلج شنو عدهم

هذا مو طبعي انه مااحب اقلل من قيمة احد واستهزئ برزقه بس انتي جبرتيني

فرت ايدها ماعاجبها وطلعت ، وكل ما تشوفني تضحك بشكل غريب خلتني اشك بيها مسوية شي خطير

لحد قبل ساعة وهي على نفس الوضع ، انتبهت الهة كامت تتسحب من جنت انه يمكم اصور شسويت كمت اتسحب وراها ومبايلي بايدي وكامرتي مشتغلة

شفتها راحت للمنور الخلفي وكبل للباب انه ركضت ختلت ورا برميل النفط يم الجادر الحاطينه يفصل المنور من فتحه صغيرة راقبتها دخلت للبيت ولد مراهق

وهي تتلفت وتحجي ويا الجهاز يصور واذني تسمع

گلتله بخوف _هاا جبته

_اي جبته بس مو حرام هذا السحر خاف يهجم البيت

_لا مو حرام هذول مستحقين وكل شي يصير بيهم يستاهلونه

عمي فاضل نايملة على ربطات فلوس ما نكدر نحصلهن الا يموت ونفتك منه

_شيموته لا تكتلينا وتبلينه مالنه شغل

_انجب مطي هذا السحر راح يمرضه ويهلكه ، يتوزع ورثه ويصير براسنه خير ونضل ننام على فلوس ونكعد على فلوس ......

لامو حرام هذول مستحقين وكل شي يصير بيهم يستاهلونه

عمي فاضل نايملة على ربطات فلوس ما نكدر نحصلهن الا يموت ونفتك منه

_شيموته لا تكتلينا وتبلينه مالنه شغل

_انجب مطي هذا السحر راح يمرضه ويهلكه ، يتوزع ورثه ويصير براسنه خير ونضل ننام على فلوس ونكعد على فلوس .

_ما اعرف شكلچ خاف الله يعابيج

_ولي الله يعابيني على شنو؟ انه ورجلي كاعدين بسويت هل كبرة چنة گن وهو تارس القاصة والبنگ فلوس بالجذب مايشيله مبلغ وارض ويحطهن بأيد غيث ويگله روح ابنيلك بيت اگعد بي انته ومرتك

فاضل ابو المثاليات

فوگها ملفيلي حياية بالبيت والله يالله اكعد انتظر يومين يزوج وحدة منهن لرجلي

_ چا رجلج مايطالب ابو بمال وارض مادري شلونج انتي تسوين شي يضرج وتلجئين لهذا الطريق الاعوج

_خوية!! شمالك انته والله هذا مايعتبر سحر يعتبر تسهيل امر ماتريد اختك ترتاح

انته الك الصافي مالك شغل

رفع اكتافه وقوس شفايفه ب لا مبالاة

سفانة _الاريدة منك بعد تجيبلي الباقيات بدون تأخير حتى يشتغل وما يضيعن فلوسي الذبيتهن

_تدللين وين اكراميتي

طلعت من صدرها فلوس حمر وحطتهن بايده وراح

ضمت الاغراض بجسمها وما طبت للبيت راحت للحديقة مادري تسويلها شي لو رادت تدور من باب المطبخ حتى محد يحس بحركتها الغريبة واختفائها المفاجئ

غيث ركض للحديقة عمة نجوى خرطت خدها وگالت بحسرة

_يبووووي چنتنا ماكلة ويانة شاربة ويانه وخيرنا مغطيها ماباخلين عليها بشي هيج تحجي علينه وتتحسد النه وعينها على خيرنا ،، العدو والحاقد شيطلع منه؟

عمي فاضل حط ايدينه ثنينهن على عكازته سندهن وغمض عينه بقلة صبر مـتألم

سعدية _ولج ترفة خاف سامعه غلط شي شياتين يمكن تتوهمين بله فكري عدل

ترف _وهذا التصوير موجود والله انه ماقصدي اسوي مشكلة لو اصورهم بس من شفت حركاتها لغريبة وطبت الولد للبيت كلت خاف حرامي خاف واحد عصابجي خلي اصور علمود مايضيع الحق ويختلط ويا الباطل من يصير شي

سعدية _راوينياه ولچ

فاضل _ لا انطيني النقال يبا

مدتله مبايلها ضمه بجيبة ضلت كاعدة تباوع لعمي بنظرة خوف حقيقية لان ترف صدگ تعلقت بعمي فاضل مو جذب

بس هيَ كلاوچية اجتله وفتحت الموضوع بتمثيل وأستغباء

دخل غيث ساحل سفانة سحل من راسها يضرب بيها عمة وامي دخلن بيناتهم فكن سفانة من غيث بالگوة

غيث محتقن عيونه ناطة وكل عروكة تنبض وجهة صار احمرررر

سداد سحبه من صدره بس غيث تحول وحش ضل يدفع بسداد ويهد عليها يريد يضربها

وتعرض امه بطريقة

وحمودي وسداد يسحبونه منها

سداد _لااا تموووتها كااافي لك كاافي تنحل بغير طريقة

غيث _چلبببة ما يجي بعييينچ شنااااقصچ ولچ شناااقص ما باخل عليج بششششي وابوي ماشايل وناطينه؟!! ولچ ابوي ناطيني ارض لو تبيعين اهلج ماتجيبين ربع منها بت الفگر ماشفتي الراحة والخير الا من طبيتي لهذاااا البيت

ولچ خيررر اهلي مغطي حتى اهلللج خاف انچ ناااسية

انه خذييتچ من بيت حيطانه طايحة وجبتج كعدتج بقصر ، السوووگ ما واصلتله من كد الفگر

لبس ماتعرفين تلبسين واللگمة الزينة حسرة عليج وعلى اهلج

انه سووويتچ مرة انه الدللتج انه اللبستج ذهب بخير ابوي

ولبستج احسن لبس وطلعتج وسفرتج ومشيتچ ، وهذاااااا اخوووج جان كاتله الجرب من كثر لم القواطي بنص الزبل والخيس

واننننه انه غيث بنفسي حاجيت ابوي شغله ولبسه وعالجة وسوياه ادمي ، كله بخيررر ابووووي فاضل ابو المثاليات الما عاجبچ وتردين تموتينه

ناكرررين المعروف والجميييل ما تستاهلوووون شي

سفانه صاحت وهيَ تبچي _لا تحچي على اهللللي تروحلهم فدوة

غيث ضرب الميز رفسه وصيح بغضب _ولج انه ما اروحلهم فدوة لا انه اروحلهم ساحل بتهم سحل وحاط ورقة طلاگها بايدهاااا

نجوى _كااافي سكتووو تنحل

فاااضل ابووو ليث احجيلك شي

عمي فاضل على وضعيته ساكت ايدي ع ايد عكازته ويباوع بهدوء

وبيبي سعديه نفس الحركة سبحان الله عبالك امه مو زوجة ابو متشابهين بالنظرات والاطباع وطريقة تعاملهم ويا الغلط ذاتها

سفانة _غلطت والله غلطت ماتنعاااد بس لا تحرمني من رضاااك عمي والله ابوووس رجلك

غيث _يا رحمة يا رحمة انتيييي ما راااح تشوووفين شي اسمه رحمة

طلع نقاله من جيبه ونتر روحه من سداد طلع يخابر وما نسمع بس يغلط ويصيح تتعااال اخذ اختك السحااارة وراها صوت تكسير المبايل

غير كلنا جفلنة غيث طلع گبل سفانة طاحت على رجل عمتي تبوسها وتبجي

_والله غلطت والله والله والله ما تنعاد وروح ابوي ماتنعاااد بس سامحوني

عمتي سحبت روحها واجت يم عمي تتفقدة هدوئه صار مرعب اجت سفانه تركض طاحت يم رجلي تتوسل

وتبوس بيهن وهو سحبهن بسرعة

_هااااي رجلينك ابووووسهن عمي بس سامحني والله ماتنعاااد غلطت وانتَ گلبك جبير مايرد احد وتسامح

فاضل _انه ابو المثاليات المتصنع؟ يمتة صار الانسان اليدور راحة ناسة ويدور الحق ابو مثاليات؟! هسة صار الينطي ويساعد ويحب الخير للناس مو زين

سفانة _بدووون وعي طلعت والله الطمع عماااني لان انطيت سداد ارض عبالي ماناطي ليث ومغلس علينه

فاضل _گومي من يمي صعدي لمي هدومچ غيث خابررر اخوج يجيچ

ضلت تبجي كامت تركض صعدت عمي فاضل على گعدته ونفس النبرة كال

_تصير فقير تضل بعازة اللگمة وحال الضيم حالك تصير صاحب خير اقرب الناس الك تطمع بيك وتريد تموتك حتى تستفاد بخيرك

ضحك وگال _شر البلية ما يضحك ..

ام ليث جيبيلي حباية ضغط وروحن كملن شغلجن ماصار شي

سعدية _سداد يدة اكلفك تروح لسادة معروفين بالناصرية اعرفهم واثق بيهم ، تفك النه العمل وترد

بس شوف اخيك يتاكد مرتة دافنته ضامته حارگته

سداد _صار

فلك _الله لا يقبل الها عمل صالح ان چانها بهذا عملها تضر ابوي

رهف _شگد حيه!! عجيب شنو هاي النفسية

گمت صعدت لان لعبت نفسي من الشفته مانزلت الا للغدة تغديت وصعدت رتبت جزء من اغراضي بوحدة من الجنط

كلت يومية شوية وبعد عندي اغراض ممشتريتهن هم بعدين اجيبهن وارتبهن بجنطة كبيرة لو اوزعهن على الجنط هذول

طلعت جنطة صغيرة متكتكة رتبت بيها المكياج الجديد وضل بيها مكان علبه كلت احط علبه الذهب لان ماراح البسه بعرسي اريد البس طخم فضي وكرستال انزك

فتحت الكنتور طلعت العلبة فتحتها اتفقد الذهبات وما اشوف بيها شي غير وصولات الذهب

استغربت نبشت كنتوري نبش ماكو

صحت لدرة اجت دورت وياي مالگينه الذهب

سألنه امي كالت ما ماخذته دورنه زين؟

ضلينة ندور ندور عمتي نجوى درت بالذهب ضايع ضلت تدور ويانه وتسال اذا ضامي عد احد ماكو

كعدت على الدرج ابچي احاول اتذكر اذا شايلته لو مطلعته من علبته ماكو متاكدة من روحي

ماشايله الذهب

سعدية _والله وجنها مررت غيث مو بس تسحر تبوك صخام خاف انها باكت الذهب نيتها تسحرة وتردة لمچانة

نجوى _هاي العايزة بعد!!؟ والله بلوة والله بلوة

وعد _هسة اذا بايگته ضايع هيج يولي فدوة انه عندي فلوس اجيبلها ذهب بمكان الراح

بس ياخوفي يطلع توقع الحجية صحيح وتروح تسحر الرهف بالذهب مالها

سعدية _يدة الذهب لابسته؟

رهف _لبسته بس اول ما اشتريته هيج جربت

سعدية _هسة لو مالابسته نكول ما يأثر مصيبة ربي مصيبة طلعنا منها ورد للبت حلالها

وعد _حجية احنة مو على الذهب خل يولي لا يرد ، انه على توقعج اذا طلع صدك البت تنضر ويصيرلها شي شنحط الها وتطيب

سعدية _سداد من يطلع للسادة نوصي يكشف الهة على سالفة الذهب واذا طلع مثل ما ظنيت السادة يحلونها

رهف _امدا حظي شعندي وياها حتى ما متلاغيه وياها والله

ولا مادة ايدي على شي الها بس هو هذا الماعنده حظ

درة _صدك والله هذا الماعنده حظ هسة شلون؟

سعدية _كتلجن سداد رايح ويحلها وان جان الذهب ضايع لو مبيوگ نعوضه ونشتريلها بمچانه

طب هاني بهدوم الشغل تعبان باوع علينا مستغرب كال _شكو؟

وعد _ذهب اختك ضاع وهم سالفة طويلة صارت اليوم

هاني _هوا اكو يوم رجعت ومالكيت سالفة؟ يومية نفس الشي الف سالفة تصير

وانتي شلون ضاع ذهبج

رهف _ما ادري لو ادري ما سألت علي ودورت

مسح وجهة بتعب وكاال بنبرة واحد منهك

_سهلة اجيبلج ذهب بمكانه باجر العصرية ماعندي شي واخذج للصايغ اختاري التردينه

وعد _لا هاني شعندك انته ؟ انه اجيبلها هسة ياريت يطلع ضايع صدك

هاني _يطلع ضايع صدگ؟

نجوى _غير انته بالشغل واحنة كشفنه سفانة طلعت ساحرة النه وتدفن بالحديقة ، وصارت مشكلة اجة اخوها الجبير ياخذها ومن عرف بالسالفة طاحلها كسرها تكسر بالطارمة وسحلها للتكسي

هاني صوووفر حيل وكال _ العب ، شعدها وياكم وتسحر

نجوى _غير طمع

هاني _بس مافهمت ذهب رهف شدخله

سعدية _يدة احنة خايفين تكون ماخذته حتى تسحر الاختك وتخرب عرسها

هاني _سفانة شعدها وياچ؟

رهف _والله ماعدها هذا حظي من دون كل العالم مكروهة والف سالفة براسي وانه مامسوية شي

هاني _اذا الذهب نلگى ما ينلبس ، وانه اخوج اعوضچ واجيبلج احسن واثگل منه

سعدية _بارك الله بيك اصعد يم مريتك ارتاح

تخطاني صعد لغرفته ، بيبي سعدية باوعت لدرة

سعدية _درية يدة تعاي كوديني للحجرة

درة .. ركضت لزمت بيبي من ايدها مشيتها لغرفتها كعدتها على السرير

سعدية _جيبيلي دواي اليوم انه اموت من ورا المصايب

درة _عمرچ طووويل بيبي

انطيتها العلاج اشرتلي اكعد ، تاخذ الحباية على كيفها وتبلعها براحة

نزعت شيلتها عدلت گصايبها وباوعتلي

_صلاوات صايرة شحلاتچ تجيبين العين

_مشكورة بيبي

_على شني تشكريني هذا حجي الصدگ

ومنها الناس ضلت تعشكچ

عقدت حاجبي مستغربة _منو عاشگني ؟

سعدية _وليد عمج ارفد همام ياهو غيرة حسب ظني انتي تدرين بي وهاي العرب كلها تدري بهمام عاشگ درة

درة _همام عاشگ حلقومة مو درة

سعدية _ لا يبت جعفر الولد عاشگچ انتي درة بنفسج بشخصيتج بروحج التختلف عن ورود المرحومة

درة _بيبي همام يشوف حلقومة بيَ تدرين انه اول ما اجيت للگرنة وشافني جان بعدة مامتعالج وشوية يحجي حجي مو بوعية

ضل يصيحلي حلقومة ويركض وراي عباله انه ورود

سعدية _وهسة طاب وعرف انتي مو ورود وحباچ

شمالجن عنيدات يمة تربية وعد الحضيرية مووتتني مربيتچن على العناد والله يراد اطيحلها بالعوچية ودگ دگ اكرمعها تكرمع

درة _مالها شغل وعد هذا الشافته عيني وحسه كلبي مااريد اربط روحي بواحد ما يحبني لذاتي

نصيت رأسي بحزن وكملت _وامه تكرهني وتستصغرني

وحطي فوكهن صرت مشوهة جسمي بي اثار حرگ الله يعلم اذا يرحن لو يضلن وشگد يرادلهن حتى يرحن

سعدية _هوا رايدج انتي واثارچ ومو ياهو الجان يحبچ بطبيعتچ مثله وبعيوبچ

درة _بيبي انه ويا ما نتشابه ابد

هوَ حلو وانه حلاتي على گدي وبيَ اثار

هوَ اهله اغنياء وانه بت جعفر الفقير الجان يشتغل سماچ ويتيمة مو اقلل من ابوي

بس هاي امه تقلل وراح تضل تدگ براسي بت السماچ بت السماچ

هناء تريد لولدها نسوان كاملات مكملات امهات لسنه ويجاملن والوجه تريدة كيمر والجسم مصبوب صبابة والاب شيخ وصدر ديوان وصاحب مال وجاه

والاماية مدندشة ذهب

وانه ماعندي هاي الصفات هي جمانة احلى مني واحسن مني و وضع ابوها ممتاز بعد عمي صادق معروف صاحب خير واله مكانته بالدواوين وماراضية والله بيها شام هواي وترتل

سعدية _هواي تگركين يده انتي غير ماخذة الابن شلج غرض بالاماية

درة _تهججني وبعدين انه ماهاوية وماالي نفس بالولد

سعدية _واذا كتلج انه وعمج تشاورنه وقررنه لمصلحتچ احنة نعرف شي انتي ماتعرفينه

درة _وانه هم بداخلي شي انتم ما تعرفونه

سعدية _لا والرضا اعرفة عمچ حجاالي عن اخو وعد الله يرحمة مات صارله شهور بعد انتي خو ماتضلين!!؟ شو نسوان يموتن رجولتهن وراهن خمسة سته مايطولن سنة ويعرسن ويعشكن الريل الجديد

جا تموتين روحج ورا واحد ما ماهرچ حتى؟

درة _اكو غير اشياء لا تضغطون عليَ وهمام ما اخذه لو اموت مااخذ ابن هناء

سعدية _بعد ضلت يم عمچ اذا قرر تنفذين هوا مسؤول عنج وانتي حدر جناحة

احتقنت كلش وبداخلي هواي حجي ما جنت قابلة على كلامها ، زميت شفايفي امنع نفسي من الكلام

اذا حجيت اخرب واقلل ادب ويا بيبي

وهاي مو اخلاقي كمت ترخصت بهدوء وطلعت دمعتي بطرف عيني

لگيت فالح وهمام يدخلون للبيت جمدت بمكاني

فالح صاح _بووونية عمي درررية الحورية كيف الحاال

هزيت رأسي وجاوبت بخنكة _الحمدلله فالح الحمدلله

فالح _نشرب چاي من ايدين درية ؟

درة _چنك على چاي تتدلل ، رحت للمطبخ غسلت وجهي بماي بارد

فلك كاعدة يم رهف متكابلات

وحدة تثرم كباب طاوة والثانية تندب حظها

حطيت القوري اهز برجلي متوترة

فلك شالت ايدها من الثرم وكلتلي _حطيلهم كعك ويا الچاي وتلگين نص كيكة بالفرن كصيلهم منها

درة _خوش

حطيت الهم وصبيت اربعه وياهم هاني كاعد لان اليوم مخلص من وكت وراجع وسداد

فالح _عفية عفية درية جزاج الله خير والله جنت جوعان

درة _الف عافيه

رجعت للمطبخ دقيقة وطلع هاني يخابر شغل السيارة وراح

مالحگ طلع صاحلي فالح رحتله وجهي متنگ على اي لحظة ابجي

من شافني ما حجة كال _تعاي كعدي بله احجي وياج شوية

همام _فالح!!

فالح _اسكت انته

كعدت منصية متالمة فالح گلي بهدوء

_لج درية يبا انتي العاقلة التعرف مصلحتها يطلع منج هيج؟

درة _ليش شطلع مني

اشر على همام عافس وجهة _ترفضين هذا

درة _وليش هذا منو؟ ابن هناء لتكرهني وتستحقرني وتهيني كل ما تشوووفني وتعيب عليه

فالح _لا لا درة ما توقعتها منج والله همام ماله شغل بعمتي هناء ترة خوش ولد متربي

علي وعلى جلال حتى بارق الناقص هم زين لو ما سوايته الاخيرة

درة _بالنسبة الك مو الي بارق كذلك حاطة علي خط احمر يكرهني ويستفزني وين مايشوفني يشمرلي بسمار لو يذب حجي يوجعني

همام _اذا الله سهل وقبلتي وعرسنا لا امي ولا اخوي محد اله غرض بينه لا يتدخلون بحياتنه

نعيش سوية احرار ومانخلي مجاال لواحد يخرب

درة _لا والف لا ومليون لا ، انه رافضه وماراح اقبل لو يخيروني ..... سكتت ما كملت من شفت همام تأذى وبين علي الحزن

سداد ضحك تك خد وگال _استلم معجونات بماي العناد الله مسلطهن علينه بنات جعفر يكسرن بينه لا ذمة ولا ضمير

خزرته بغضب وجهتله كم كلمة _على اساس انته شلونك مو خليت الي ابالي تتكطع ورادت تموت وتشوف بعينها تطورات حياتك ، و وناستك ورومانسياتك ولا اهتميييت خليتها تتكطع

من شفتها نستك وكملت حياتها وصارت نصيب غيرك انرعصت رعص

سداد رمش مصدوم وكاال بقهر

_انتي اخر وحدة توقعت يطلع منها هيج كلام وبهاي اللهجة

درة _غير انته تدوس بالگلب وتريد الناس تضل بدون كرامة

تسحگ بيهم وتمشي وتتحكم بمشاعرهم شوكت ما عجبك تتوقف وتروح تركض لغير بنية

ومن يعجبك ترجع وتستأنف علاقتك ويا العفتها مكسورة وخاسرة كرامتها مجروحة الكلب والكبرياء

سداد _حطي روحج مكااااني

درة _حطيتها الف مرة حطيتها وشفت روحي ابرر وادور على حقيقة ضاعت بظلمة الليل مو مثلك ضعيف ، رحت تدور زواج وارتباط حتى تقهرها وما دورت على الحقيقة وطلعتها بريئة

وبالنتيجة كسرت الهام وضيعت شهور من عمرها خليتها تنطي حب لانسان مايستاهلها ماخذها حتى ينسى وحدة ثانية

وخسرت البنية الحبتك من كل كلبها وضيعت روحك واتحداااك اتحدااااك تكدر ترجع الروحك

جنة متخازرين ونحجي بأعصاب

همام حط راسه يم راس فالح وكله _عليمن يحجون منو هاي البت

فالح _انجب معليك سوالف كبار ، راقب حلقومة حتى تحفظ اطباعها

سداد _درة سكتي لا تخليني اجفص

درة _جفص وشوف انه شلون اجفص هم

باوعت الفالح بايده كعكة وصافن علينا

درة _انت الاخ شبيك

فالح _مقهوووور ... گالها بحسرة وصفن على كوب الچاي والكعكة كاال بحسرة

_شيفيد الكعك من يبرد الچاي؟

همام _ياويلي ياويلي

درة _من رخصتكم فرفحتو گلبي على خالي

فالح _ترة ماحجينة شي وماكملت كلامي وانتم تگابلتو وضليتو تتراشگون بالرزايل المغلفه بالأدب

لا لا ما مرجية منكم

سداد _عوفها ولا تحاول هذني بنات عمي جعفر نفس الطينة عنيدات وروسهن يابسه مايطخن راس لاكبر واحد

ويتلذذن بعذاب الانسان العاشگهن ، يدوسن گلبه ويمشن ويعوفنه وراهن لا حول ولا قوة بدون ما يرفلهن جفن

جان يحجي بغيض واعصاب

عفتهم ومشيت للمطبخ ، فلك ورهف عينهن على الباب بس طبيت للمطبخ بچيت ، ضليت امسح بدموعي واندب حظي

وبداخلي اتوسل حر يرجع وياخذني قبل لا يجبروني على واحد غيره ويذبحوني بحلقة

فلك _حتى حجي مانكدر نحجي احفاد نعمان متحلفين بينه وراح يموتونه وحدة ورا الثانية على ايديهم

لليل عمي دز علينا انه وامي كعدنة يمه بالاستقبال بدأ يحجي ويا امي نفس الحجي مال همام رايدها وهو يعرف شي هي ماتعرفه ولمصلحتي

امي ردت منتفضه _ابو ليث لا تخليني اخرب التوة صلحناه

غمض عينه بقلة صبر وگللها بجزع _والله لو تذبينها عليَ وتمشين وراي

وعد _انه مستعدة امشي وراك ب اي شي الا بمستقبل بناتي حرام عليك ابو ليث يتيمة وما هاوية الولد ليش تكسرها؟

من حقها تختار الانسان لتشوفه مناسب وتحس روحها تنسعد ويا

فاضل _ترة همام خوش همام

وعد _ودرة ما رايدته ، وانه ماعندي بنيه انطيها لهناء الشرانية

فاضل _هذا هو اخذيها مني بيت درة يندگ هنا بصف بيتنة وگبل العرس

وعد _لا كلش زين ولا چن گبل سنين انه يمكم وهي ببيتها وشرها لاحني شنو جنك نسيت ابو ليث؟

هناء ما تكضها المسافة ولا يكضها شي ثاني شرها راح يطول درة اذا خذت همام لو اضمها هي ويا جوة الگاع

فاضل _درة بوية وافقي والله انه اعرف مصلحتچ وجاي اسويلج الزين

خنكتني العبرة نصيت دموعي جانت هي الجواب ضعفت كلش من بعدك حر ضعفت صرت حجي ما اكدر احجي وانه الوكفت بنص ديوان ورفضت بارق كدام الشيوخ والعالم هسة مااكدر انطق كلمة كدام بشر واحد

وينك تعال وقويني ورجعني درة القديمة والله بدونك ضعت وينك حبيبي وامي وابوي وحزامي

عمي ضل يتنهد ويتحسر وامي تگله _مو كتلك بنتي ماتريد همام

فاضل _بوية درة كومي صعدي عندي جم حجاية ويا امج

باوعتلهم ثنينهم ادري كلش زين كلمة من عمي وكلمة من الحجية راح يقنعوها ويتحكمون بمصيري حسب الي هم يشوفو مايدرون بالتشوفه عيني والي يريده گلبي

كتلهم بغصه _تعبتوني

وطلعت من يمهم ركض ما وكفت ولا حجيت ويا بشر عفتهم وراي الله يعلم شنو راح يحجون وشراح يصير

ورا نص ساعة صعدت امي وجهة اصفر باوعت النه ثلاثتنا وكالت

_باچر نسير على خوالچن نتغدة ونتعشى ونرد بالليل

رهف _المناسبة؟

وعد _شرط مناسبة؟ اسامة وقصي يعاتبوني لان ما امرلهم نطلع منا لبيت اسامة نتغدة والعصر نروح لبيت قصي نتعشا ونرجع بالليل واذا كلش كلش نبات عدهم ونرد الصبح

رهف _لا يمة وين ترة الاحد عدنا دوامات نرجع بالليل احسن

هزت رأسها بدون اجابة انگلبت صفرة ، ما اعرف شنو الي تغير وشنو حجو

تمددت بفراشي طلعت صورته واكف مبتسم لابس قميص ابيض ولازم بايده ترف تريد تشرد يضحك

وماخذيله الصورة عفوية

ضليت امرر ايدي على وجهة واعاتبه بداخلي بدون صوت ، دموعي مثل الجمر تطلع من گلب محترگ تحرگ عيوني

قربت الصورة من شفايفي قبلتها وحطيتها على گلبي

غمضت عيني طلعت مني شهگات مكتومة

رفعت الغطة حطيته على راسي ما اريد احد يحس بالضعف الانه بي

من عرفته عايش صرت سعيدة بس هسة لا

لان ما ادري شنو ورا وهوا وين

وشوكت يرجع وهاي اذا رجع اصلاً ، يمكن مسوي شي ومنهزم وماراح يرجعلي

من جنت ادري بي ميت جنت مأيسة ، وبعد اكول هذا هو مات واندفن بس من عرفت بي عايش لا

صرت بحيرة من امري

غفت بحضني صورته وعلى خدي دمعتي ..

گعدت الصبح راسي ثگيل سبحت وبدلت بدون نفس ، انه جنت لابسة اسود بعدني بحجة حزينه ويا امي

بس رهف وترف نزعن الاسود من انخطبت ترف

وانه مارضيت انزعه لان نذرت نذر ما انزع الاسود الا يرجع العزيز الغايب

وشنو حلاة الالوان والكشخة وهوا ما يشوفني بيهن؟

طلعنة الصبح ماجان اكو احد من الولد موجود لهذا السبب هاني خابر النه على تكسي

اخذنة ابو التكسي البيت خالي اسامة

فتحت الباب كاتي متحمسة _هلا هلا هلا بوئد هلا

بوستنة فوتتنه للبيت ..

_انه فرررهان كلش كلش فرررهان وصشيشة يهبكم منتظركم

اخذته رهف تبوس بي امي نزعت شالها وكالت

_وين اسامة

كاتي _راه يجيب لهم دشاش انه يعرف يطبه (يطبخ) مرات يهرب اكل مال انه

وعد _يو انه اطبخ هسة الامن مكلف روحه

كاتي _ما يكلف لا تهاف وعد مايكلف انت تستاهل لهم دشاش

اندمجن بالحديث تسحبت من يمهم دخلت لغرفته مثل ماهية فراشه مفروش وكل اغراضه بمكانهن

تمددت بفراشه ابجي بحركة واتوسله يرجع فراشه جان دافي بس مو ادفى من حضنه

كمت للكنتور فتحته اخذت قميصه شميته وحضنته الصدري بقوة

_ارجع اريد اشمك من صدگ ارجعلي فدوة

رجعت القميص وضليت كاعدة منصية راسي ادري بالحجي لو طال اتعب بدون نتيجة

ورا دقايق سمعت صوتي خالي قصي استغربت وجوده

طلعت مالكيته ولا لكيت امي

ما اهتميت لان ما توقعت اكو شي جاي يتدبر من ورا ظهري

جمانة ..

اكعد اك اكعد استغفر الله ب بارق ا اكعد

ما يكعد ماعرف يتصنع النوم ما تحملت اكثر ضربته على علباته بقوة طفر مفزوع شمر المخدة الجوة راسه عليَ

ولزم الثانية گاملي بيها بغضب

رفعت ايدي بحركة امنعه وگتله _ع عمي ب بالباااب يريدددك

خزرني شمر المخدة عليَ مسح طرف خشمة وگال من بين اسنانة

_راجعلچ

عيبت علي من دار وجهة ما اهتميت رتبت الغرفة وشلت المنشفة من شعري شسورت وحطيت كحلة وحمرة حَمرا ، اخذت علچ حطيته بحلگي

هسة كل شي مضبوط

رجع بارق للغرفة خازرني اوي شسويتله يعني هية ضربة على علباته شكد حساس هذا

بارق _شلون تطكيني ولج

جمانة _ ش شلون تلبسني و ولك

بارق _ لا تگليلي ولك

جمانة _ ل لا تگلي و ولچ مفهوم

بارق _لا مو مفهوم وهذا حلگج ملغمطته مسحي كدامي

مطيت شفايفي وسويتله حركة كورتهن وكتله بدلال _ما ا امسحه ه هيج اشوف ر روحي ا اميررررة

بارق _ولك تخووووووف! مع هذا مسحي يلا جنج مطي غاط راسه بجدر مرگة

علجت وملت بوكفتي تخصرت _ ه هيج المطاية ح حلوة؟

بارق _نسخة طبق الاصل سبحان الله حضريلي الحمام اريد اسبح

هزيت راسي رحت طلعت ملابس داخليه علگتهن وشلت غراضي من الحمام ضميت المرطبات والغسولات لان بارق خبث وياي مرة من دخل للحمام اجيت ورا لكيت الغسولات والمرطبات كلهن مخلصات من سئلته اذا مستخدمهن

انطاني نظرة الزوج البريء وكال انه ما وصلت الهن

صحتله كتله _ ب باااارق ت تعاال جهززز الحمممااام

بارق _لا تصرخين خليج هادئة ونازكة على كيفج صيحي هيج بارق حبيبي تاج راسي قرة عيني تعال للحمام

باوعتله بطرف عيني سويت نفاخة بعلچي جبيرة وتخطيته وطلعت

عفته وراي يباوعلي ما عاجبه

والله يالله حبيبي قرة عيني وانه اصلا يومية بالليل اشمرله بطانية وينام بصالة البيت على الكعدة العربية

لان احنة ما متراهمين هو يكرهني وانه اكرها

وما تممنة دخلتنا لان واحد ماجارع الثاني بعد ليش اخلي ينام يمي بالغرفة؟ زايدة مني اذا قبلت غير ليلة العرس ما حط راسه يمي مرة ثانية

حطيت ملازمي على الجرباية وتمددت ع بطني اقرا هيج يلا افهم ، شعري القصير رافعته بقراصه صغيرة

ونصه نازل على رقبتي ما ملموم لانه قصير

مخليه قلم فوك اذني وساندة عكوسي على الجرباية واقرا

دفر الباب حيل بكل قوته بحيث الباب ضرب بالحايط رفعت عيني باوعتله بنص عين وطگيت بعلچي طگة

دخل يمشي نافخ روحه وراح حط معطرات ومشط وشمر الخاولي عليه كله ماي ، شسويت شلته بطرف اصابعي مثل القرفانه وشمرته بالكاع

ورجعت اقرا ، اجة شمر روحه على الجرباية يمي وفتح مبايله طلع اغنيه وضل يغني ويا الاغنية بس بصوت هادئ هذا مايعرف يصيح نازك

كملت قرايه ولا حسسته انه متضايقة او اثر بيَ ، مل مني وما كدر يستفزني حتى اتعارك ويا كام وطلع من الغرفة ..

.....

وعد _الك التريده مني من سنين طويله

ارفد _وضحي

وعد _وعد تصير الك وروح ذاك النايم بالتربان ما اتراجع

ارفد _بس انتي هيج جاي تطلبين مني اكسر گلب وليدي؟ تعاي وصيري يمي وبحضني وبتج يمج وكبال عينج

وعد _درة ماتصير لـ همام انه اخاطر بروحي واتنازل واصير يمك اذا طاوعتني وسويت الاريده

مسح وجهة بتعب ضل يتنهد فرك سبحته ورجع باوعلي

ارفد _بس طلبچ صعب بي كسرة لوليدي

وبعدين انتي ماجاي ترضيني بهذا حجيج معناها تجين يمي مجبورة وما الج رغبة بيَ

وعد _المرة لو دخل عليها رجلها وعاشت يمة عزته وحبته انته الك الصافي بس طاوعني وكون انته المسؤول عن دره ومهرها

ارفد _وعد انتي جاي تسوين غلط ان طاوعتج خربت ويا اخوي

وعد _تعلمني بيكم غير انه حافظتكم حفظ ماتخربون خلي يزعل منك يومية اسبوعين بالهواي سنة وترجعون احسن من الاول ولا جن صاير شي

ضل محتار يزفر بتعب احتار ما بين يقبل ويربح عشگه بس يكسر ابنه

لو يرفض ويخسر عشگه علمود همام

ارفد _ليش ما تاجليها احاجي همام وفاضل

وعد _اذا مو همام راح ينطيها لغير واحد بعد الحجي العرفته فاضل مايخلي درة اسبوع اذا ما عاقدلها على واحد من ولدكم

اسمعني ارفد والله انه يا هلبنت ما انطيها لهناء جنة هناء الشوهت سمعتي واتهمتني بعلاقة ويا فاضل وانه نفسه وتراب رجلي ماناشف علمود تبعدك عني

تسوي الازيد بدرة

ما اضحي بهاي البت لو على گص ركبتي

ارفد _عقلج لزوم يرجع لراسج وتفهمين احنة ما نأذي بتنه

وعد _بس هناء مو انتم

ارفد هذا اخر حجي عندي والله لو درت وجهك وطلعت من هذا الباب ماراضي وجهي بعد ما تشوفة واظفري ماتنوله

رهف تعرس وهاي درة انطيها الكم وترف اذبها على بيت فاضل

مو انتم لازميني من ايدي التوجعني ومهدديني بالبنات اذبهن كلهن عليكم وبهيج مالكم شي يمي اتطلك واكمل حياتي وانام بحضن زلمة غيرك وبعد طولي طولي ماتلمحه

بعدني صغيرة توني اربعين اعرس واخلف واكون عائلة وابتعد عنكم حتى البنات ما اطلب اشوفهن ولو من بعيد لان طگت روحي راااح اموت

جانت تحجي بجزع واعصاب مخنوگة ، ضل ارفد حاير ما يعرف شنو يتصرف

اختنگ حطته وعد بين نارين

تقربت مررت ايدها على وجهة ولحيته غمض عينه وارتخت ملامحه

وعد _ما تريد وعد؟ هيج سهلة عندك تخسر عشگ سنين وتطلع بالخسارة وانه الظنيت انته راح تشيل همي وتسندني وتسند بناتي

ارفد انه گلبي بدا يرفلك وعيني صارت تحب تشوفك لكن ان خذلتني اكطع نبض كلبي واشلع عيني لو ردت تباوعلك

حوطها بأيدي واخذها لحضنه بقوة وهاي ثاني مرة يحضنها بحياته المرة الاولى بعد وفاة حر حضنها وتاذت لدرجة تمرضت بسبب رفضها لهاي العلاقة

بس هاي المرة كل شي غير اكو مصلحة عدها ، تريد تنقذ درة من نار هناء

جانت مجبرة تتحمل وتذب روحها للنار وتجبر نفسها على شي ماتريده علمود راحة درة

ارفد _الچ التردي وعد ، بس اريدج بهاي الساعة واحنة هنا مافوكنه غير السما الزرگة تعاهديني ياوعد تصيرين الي بمجرد ما انطيج موافقتي

حتى لو صار شي وما انتهت مثل ما احنة نريد

وعد _وروح حـر الدين انه الك اذا رضيت وساندتني مهما كانت النهاية المهم توصل وياي للي نكدر علي

ارفد _سهلة عندج ينكسر كلب وليدي ي وعد والله تراه فقير وعاشكها

وعد _ما هاويته يا ارفد ما هاويته

شم راسها وكال بحسرة _يا وعدي وعشگ السنين اخ اخ

........

درة _حرررام عليج حررااام حرررررام

ضربتها راشدي بقوة وصرخت بوجها _والله ثم والله ثم والله اشمررررج هسة شوفي هناك عمج ارفد وبعد ما تشوووفني

درة _شمررريني وما اقبل شمررريني ولا تجبريني اخذ واخذ بشر مارايدته كااافي تتحكمون بيَ وبحياااتي كااافي كااافي ضلمتوووني عذبتوووني

امي لطمت على روحها وجرت درة وترف بغضب شمرتهن بالدوانية ورجعت جرتني ذبتني كبالهن وكالت بغضب وهي تبجي

وعد _هاي هية رووووحن وعيشن بعيد عني انه بعد ما اريد اشووووفجن اخذهن ارفد اخذهن

ذبهن على بيت فاااضل وما اريد اشوفهن ولا اسمع حتى صووووت وحدة منهن

ضلينه نتباجى ونركض عليها نحضن بيها فقدت ضلت تدفع بينه وتطردنا

درة _ما اريد اتزززوج يعني ليش مستعجللييين عليَ ليششسش ليشششش شنو شايفيني مصاحبة مسويتلي طركاعة وتردون تسترررروني

وعد _ما مسوية بس راح تصيرررررر والله وهذا اخر كلام يا تكومين وتحضرين روحج وتنمهرين اليوم

يا ثلاثتچن تولن وبعد ما اريد اشوف وحدة منجن

حنيت ظهري علمودجن هيج تجااازني وترفضلي الاريدة

رهف _يمة عوفيها غير ماتريد الولد مو جبر

ارفد _وعدي اهدي تعاي بابا درة كومي

جر درة اخذها على صفحة ضل يقنع بيها وامي تدفع بينه ترف تبجي ومجلبة بيها وانه كذلك تخبلنه

درة سكتت عمي ارفد مال _يلا هاي قنعت قنعت ماتريد تخسرج

امي هدات كبل درة راحت لغرفة خالي حر لحكتها حصنتها بس تبجي

امي جابت الهة الفستان الوصت علي خالي اسامه جانت محضرة كلشي بدون علمنه ومخططة لكل شي ويا خوالي بظرف كم ساعة

اجت بغضب نزعتها الاسود ولبستها الفستان كوة

باوعتلي وكالت _عدلي وجهة وطلعت

درة ملخت روحها تملخ كوة سكتتها غسلت وجهة وكتلها كافي كافي اكيد صاير شي اكو سر يخليهم كلهم مستعجلين على زواجج

_ وللج راح اخذ ابن اخو راح اخذ ابن اخوو

رهف _مااات مات مايرجع

_راح اموت انه راح اموت شلون اخذ ابن اخو شلون شلون

تحجي وتبجي بشهكة

دموعي تجري وياها ما اعرف شلون اتصرف

قنعتها وسكتتها وكتلها يلا هوا هسة بس عقد ورا العقد الله كريم يمكن تكدرين تتطلكين

من سمعت هيج هدات وضلت تصفن يمكن تخطط تخرب كلشي من ورا العقد

رتبت وجهة بشوية مكياج لبست شال لان الفستان جان مستور ومالها خلگ هية

ورا ساعتين اجو خوالي التمو

شلون صار هيج ماندري درة وصهيب! بعد ساعة اذا مو اقل يصيرون متزوجين واحنة نجهل كل شي

ومانعرف الاسباب حتى

الوقت مر بسرعة كعدت درة برة يمهم الوجوه محتقنه مرت خالي قصي ماراضية مجبورة وحقها احنة نفسنا ماندري شنو صار وليش

درة منصية راسها ، ماقابلة تفرك باصابعها وترجع ترفع راسها وتنصي

وكل شوية تمسح دموعها ..

فجأة انگلب الجو ركضت لباب المطبخ اباوع باب البيت السلايت مفتوح على وسعه

خوالي وعمي ارفد بالطارمة و همام وفالح وسداد وبارق وعلى رأس القائمة عمي خالد مسلحين برة البيت

همام رفع السلاح ليفوگ وضل يرمي بالجو وعمي خالد تقدم ورا الولد

همام صاح بغضب _اااجيت اخذ بت عمي ، انه جاي نهاي عليهااا ...........