تحميل رواية «لعنة الماضي ل شيمو الشيماء محمد ShiMoOo» PDF

الحلقه 11

فارس: اوصلك الاول؟؟

ايمان: شكرا

فارس: انتي متأخره النهارده

ايمان: هاخد تاكسي ما تشغلش بالك

يدوب بتفتح باب الشقه اتفاجئت بحد قدامها.. بصت لفارس وهو كمان بصلها...

: ## مفاجأة مش كده؟؟

فارس: يا اهلا بيكي يا ست الكل نورتي بيتك اخيرا حنيتي علينا وجيتي؟

منيره: انا قلت عرسان اسيبكم براحتكم شويه قبل ما اطبق علي انفاسكم

ايمان: يا خبر يا ست الكل انتي بتقولي ايه ده احنا من غيرك ولا نسوا انتي الخير والبركه وبعدين البيت من غير حد كبير تحسيه فاضي كده ومالوش معني.. لازم حنيه الكبار في البيت

منيره: اديني جيت اهوه يالا شكلكم كنتو نازلين علي اشغالكم انزلوا يالا ما تتأخروش

فارس: مش لازم تروحي النهارده يا ايمان وخليكي وانا ممكن اروح استأذنلك؟

ايمان: مفيش مشكله

منيره: قسما بالله ما يحصل.. يالا كل واحد علي شغله يالا اتوكلوا علي اللي خلقكم يالا

فارس: بس النهارده خليها معاكي؟

منيره: انا حلفت يا فارس يالا روحوا يالا كفايه تأخير

ايمان: انا اصلا متأخره النهارده فمفيش مشكله لو ما رحتش

منيره: متأخره شويه ارحم من انك ما تروحيش يالا بقي يا فارس وصل مراتك وكفايا تأخير

فارس: خلاص براحتك يالا يا ايمان

نزلوا الاتنين وفارس راح ناحيه عربيته واتفاجئ ان ايمان مش وراه

فارس: انتي رايحه فين سيادتك؟

ايمان: رايحه شغلي

فارس: طيب اركبي هوصلك

ايمان: متشكره هطلع علي الشارع واخد تاكسي

فارس: يا فتاح يا عليم يا رزاق يا كريم اركبي يا بنتي ولمي الدور

ايمان: مش عايزاك توصلني ايه مشكلتك؟؟

فارس: مشكلتي انتي.. اتفضلي اركبي بدال ما اللي رايح واللي جاي بيتفرج علينا

ايمان: ما تروح علي شغلك انت وتسيبني في حالي؟

فارس: قسما بالله ان ما ركبتي ماهخليكي تروحي الشغل اصلا اتفضلي

ايمان: هتحبسني يعني ولا ايه؟

فارس: تحبي تجربي علشان تصدقي؟؟

ايمان: اه عايزه اجرب هتحبسني ازاي؟

فارس يدوب هيرد بس سمع صوت مامته من فوق

منيره: انتو ناسيين حاجه ولا ايه؟ في حاجه يا فارس؟؟ ناسي حاجه اجيبهالك؟؟

فارس: لا يا ست الكل تسلمي انتي عايزه حاجه؟

منيره: لا تسلم انا بس قلت اتشمس شويه وافتح الشقه تتشمس..

فارس: اه ماشي يالا سلام.... اركبي

ايمان بصتله بس ركبت وهيا هتولع وهو ركب وراح يوصلها ودي كانت اول مره تركب معاه عربيته او تشوفوا لابس نظارته الشمس واعترفت لنفسها انه وسيم جدا .. فضلوا ساكتين لحد ما قربوا يوصلوا

فارس: خسيتي بقي لما ركبتي؟

ايمان: اسكت لو سمحت لاني ولا طيقاك ولا طايقه نفسي وقسما بالله لولا عملت حساب لمامتك ما كنت ركبت ولو عملت ايه؟

فارس ابتسم: عارف انك ركبتي علشانها ومتشكر لانك عملتلها حساب لها

ايمان بصتله باستغراب لانها ما تخيلتش ان ده رده...

فارس: انزلك فين عند انهي باب؟؟

ايمان: الباب اللي جاي ده

فارس: هو انتي مدرسه ايه؟ ولا اداريه ولا ايه بالظبط؟

ايمان بصتله باستغراب: مش شايف ان سؤال ده متأخر شويتين؟؟

فارس: علي رأي امي متأخر احسن من مافيش

ايمان: مدرسه ماث

فارس: ماث؟؟بتدي سنه كام؟؟

ايمان: اعدادي وثانوي

فارس باعجاب: انتي بتدي لثانوي؟؟

ايمان: ايه ما اشبهش؟؟

فارس: لا مش القصد بس في دماغي ان ديما مدرسين ثانوي بيبقوا كبار في السن ما اعرفش انهم ممكن يبقوا عيال

ايمان: علي فكره انت بس اللي شايفني عيله

نزلت ورزعت الباب وراها ومشيت بسرعه بس بعد كام خطوه اتفاجئت بحد بيمسكها من دراعها ويوقفها وبصت لقته فارس

فارس: لحظه... انا مش شايفك عيله.. انا ممكن التعبير خاني انا اقصد انك صغيره عن المدرسين اللي كانوا علي ايامنا كان المدرسين بيبقي شعرهم ابيض فهماني؟؟

ايمان: فهمتك ممكن ادخل؟

فارس: ادخلي بس في كلمه عايز اقولهالك قبل ما تدخلي..

ايمان: اتفضل قول

فارس: ما تدقيقش علي كل كلمه اقولها... سبق وقولتلك اول يوم جوازنا اني محتاج لوقت فارجوكي اديني الوقت ده واصبري... اصبري عليا

ايمان حست بحاجه غريبه جواها معرفتش تحددها

ايمان: طيب... ممكن ادخل بقي لان كل اللي داخل بيبصلنا واحنا في نص الطريق كده.. البنات هياكلونا بعنيهم

فارس: دول معجبين بالمز اللي واقف معاكي بس

ايمان: واخد في نفس قلم... قال مز قال

فارس: الله يرحم ايام ما كنتي بتقفي قدام ورشه علشان تلمحيني بس؟؟

ايمان: انا... امشي وروح شوف شغلك يالا

مشي وسابها وهيا مشيت بصت وراها لقته ساند علي عربيته باصص عليها فاتكسفت وجريت علي جوه وهو ابتسم ومشي علي شغله مبسوط بخناقه معاها

ايمان اول ما دخلت الفصل بتاعها بنت سالتها

البنت: يا مس هو مين المز اللي كان واقف معاكي علي البوابه الصبح؟؟

البنات كلهم هاصوا عايزين يعرفوا

ايمان: بس... بس انتي وهيا... ده جوزي اسكتوا بقي

بنت: اسمه ايه يا مس؟؟

ايمان: ده شيئ ما يخصكمش

البنات: والنبي والنبي يا مس قولي

ايمان: بس بقي.. اسمه فارس.. باشمهندس فارس بدال ما تسألوا تاني بيشتغل ايه؟ ودلوقتي نبدأ الدرس ومش عايزه كلمه تاني بره الدرس

الظهر ايمان روحت مبسوطه ودخلت وسلمت علي حماتها

ايمان: يدوب اغير واجهز الغدا قبل ما فارس يجي

منيره: انا جهزته حبيبتي ادخلي غيري وارتاحيلك شويه

ايمان: ليه بس بتقفي انتي وتتعبي نفسك.. يا ماما انا عايزاكي ترتاحي واللي انتي عيزاه شاوري بس عليه.. مالكيش دعوه انتي بشغل البيت ولو نفسك في حاجه قوليلي عليها وانا اعملهالك

منيره: تسلمي يا قلبي بس انا كنت زهقانه وفاضيه قلت اتسلي عقبال ما ترجعي انتي

ايمان: اتسلي اخرجي اتمشي شويه. افتحي التليفزيون اي حاجه لكن ما تقفيش تشتغلي؟؟

منيره: بقولك ايه انتي ما تشتغليليش زي فارس انا الحمد لله بصحتي

ايمان: يارب ديما بس انتي غاليه علينا بس ومش عايزين نتعبك

منيره: يالا ادخلي غيري هدومك

فارس اتأخر ومنيره اصرت تستناه علي الغدا فايمان اتصلت بيه

ايمان: الو ايوه.. اتأخرت يعني؟؟ قلت هتيجي بدري؟

فارس: غريبه مش عوايدك تكلميني وتسأليني اتأخرت ليه؟

ايمان: وما يهمنيش تتأخر او لأ بس مامتك مصره تستناك علي الغدا ورافضه تتغدي من غيرك فقلت اشوفك ناوي علي ايه علشان اقولها

فارس: اممم بقي كده؟ يعني مش قلقتي عليا فحبيتي تطمني؟ اخص عليكي

ايمان: واقلق عليك بتاع ايه؟

فارس: يا شيخه اعتبريني زي جوزك واسألي عليا

ايمان: ما انا سبق واعتبرتك واديتني فوق دماغي وانا استوعبت الدرس كويس

فارس: واهون عليكي يعني؟

ايمان: انجز جاي ولا اقول لمامتك تتغدي؟؟

فارس: طيب لو هتأخر هتستنيني انتي علي الغدا؟؟

ايمان: لا مش هستناك انا اصلا جعانه من دلوقتي واهو في المطبخ وباكل لحد ما يبانلك صاحب انت ومامتك اللي مش عايزه تاكل!!

فارس: بقي كده؟ بتاكلي انتي في المطبخ؟؟

ايمان: ايوه باكل في المطبخ عندك مانع؟

فارس ابتسم: انتي كدابه كدب الابل

ايمان: انا

مكملتش كلمتها لانها لقت فارس واقف علي باب الاوضه بيضحك

فارس: بتاكلي فعلا؟؟

ايمان: كنت رايحه اهو

فارس: طيب قومي روحي حطي الاكل وانا هغير في ثواني

ايمان: مش هستناك لو اتأخرت

فارس: ماشي

وهيا معديه جنبه عاكسها وطلعت تجري منه: يا كدابه

ايمان: والله انت رخم

سابته وخرجت وهو وقف مكانه فهي رجعت تاني

فارس: خير؟

ايمان: انا شيلت الحاجه بتاعتك اللي في اوضه فرح علشان مامتك لاني معرفش انت ناوي علي ايه؟ ارجعها ولا ايه؟

فارس: اللي يريحك اعمليه؟ انتي عيزاني هنا جنبك؟

كانت عايزه تقوله انها بتتمناه جنبها

ايمان: بلاش باللي انا عيزاه.. بس اعتقد انك مش عايز مامتك تعرف اننا متخانقين ولا عادي تعرف؟

فارس: لا يستحسن انها ما تعرفش وكويس انك عملتي كده

سابته وراحت تجهز الغدا ومامته كانت واقفه مرقباهم لانها شافت من الصبح حاجات فارس بره الاوضه وعرفت انهم متخانقين وكل واحد بينام في اوضه!! وحمدت ربنا انها رجعت لانهم هيفضلوا مع بعض علي الاقل قدامها لحد ما القرب هيصالحهم...

الغدا اتحط واتلموا كلهم حوالين السفره وبدؤا ياكلوا فارس اخد معلقتين بالظبط وحط المعلقه من ايده

منيره: مالك حبيبي؟؟

فارس: مين عمل الاكل ده؟ طبعا حضرتك عملتيه يا امي صح؟

منيره: اه فيها ايه؟

فارس قام وقف وزعق: فيها ان احنا مش هنعيده من تاني يا امي... مش هتفضلي تخدمي كل واحده هنا.. وانتي يا هانم خلتيها تعمل هيا الاكل ليه؟ طب حتي سيبها تريح يوم ولا خفتي تتعود؟؟

فارس معطاش فرصه لحد يتكلم ولا منيره ولا ايمان

فارس: امي ما تدخلش المطبخ فاهمه يا هانم ولا مش فاهمه؟

منيره: فارس.. انا اللي دخلت وعملته اهدي..

فارس:.. مش ههدي يا امي ومش هدوق الاكل ده.. الاكل اللي هتحطي ايدك فيه مش هدوقه.. انا اتجوزت تاني علشانك انتي يا امي لكن مش علشان اجيب واحده تخدميها انتي تاني وهيا تنام وانتي توقفي في المطبخ

ايمان: انا مكنتش نايمه انا رجعت من الشغل لقيتها خلصت كل حاجه

فارس: خلاص ملحوقه ما فيش شغل تاني...

ايمان سابتله الاكل ومشيت علي اوضتها لانها مش عايزه ترد عليه قدام مامته

منيره: مراتك ملهاش ذنب ابدا انا اللي دخلت المطبخ وخلصت قبل ما هيا تيجي

فارس: يبقي الذنب ذنبك وانتي اتحملي اللي هيجرلها طالما انتي هتستغلي وجودها في الشغل يبقي تقعد هيا في البيت

منيره: فارس.. انت مش هتمشي كلامك عليا

فارس: فعلا مش همشيه عليكي لكن همشيه عليها تقعد هيا من الشغل ولو دخلتي المطبخ تاني هوديها علي بيت ابوها ما تلزمنيش انا مش هعيده من تاني ومش هتستغفليني من تاني واللي عندي قلته والكوره في ملعبك يا امي.. انتي بقي قرري ايمان هتكمل في البيت ده ولا هتمشي؟؟

منيره: طيب مش هدخل بس ادخل هات مراتك واقعد كل انت من الصبح بره

فارس: مش هدوقه يا أما... الاكل اللي هيتعمل بتعبك ووقفتك مش هدوقه... بعد اذنك انا نازل الشغل

منيره: فارس اصبر

فارس: لا مش هصبر.. كنتي هتموتي من التعب ولا نسيتي حجزتك في المستشفي.. نسيتي يا امي؟ لو انتي نسيتي انا ما نسيتش... ما نسيتش ان مراتي وحبيبتي استغفلتني واكلمها اقولها امي فين تقولي نايمه وهيا قافله عليكي بالمفتاح وسيادتك ما قولتليش انا مش هنسالك الموقف ده ابدا يا امي ابدا لان انا ما سامحتش نفسي لحد النهارده علي موت ابويا وانا بعيد عنه فانتي لو جرالك حاجه بسببي او بسبب مراتي مش عارف هعمل ايه؟ فارجوكي ما تدمرينيش بايدك ارجوكي يا امي..

دخل اوضته كانت ايمان قاعده علي جنب واول ما دخل وقفت قدامه

ايمان: انا ما طلبتش من والدتك تقف في المطبخ وانا قلتلها نفس كلامك قبل ما انت تيجي ده اولا.. ثانيا بقي ايوه انت قلتلي قبل ما نتجوز انك عايزني اخلي بالي من والدتك وانا وافقت تكرما مني وحبا في والدتك كشخصيه لاني فعلا بحبها من زمان فاوعي تفتكر ان ده يديك الحق انك تتحكم فيا او تعاملني كأني خدامه فعلا في بيتك وتقولي اروح وما اروحش

فارس: خلصتي كلامك؟؟ ولا لسه ؟؟؟ممكن بقي تسمعيني ؟؟؟ انا عارف انك مش خدامه هنا وعارف انك وافقتي تكرما منك،. اللي حصل بره ده كان تهديد لامي مش ليكي انتي لانها مش هتوافق انك تسيبي الشغل بسببها وبالتالي مش هتتعب نفسها تاني... الكلام اللي قولته بره كله كان موجهه لامي مش ليكي انتي وكنت فاكر انك ذكيه وفاهمه ده بعد اذنك

سابهم وراح علي الشغل ومنيره حاولت مع ايمان تخليها تاخد اكل وتروح لفارس الشغل بس ايمان رفضت تماما واعتذرت منها

فارس رجع متأخر من الشغل ودخل علي اوضته يرتاح بعد ما سلم علي امه واعتذرلها عن صوته العالي بس ما اتراجعش عن حرف نطقه

دخل اوضته كانت ايمان بتقلب في كتاب علي السرير دخل ومسي ودخل غير هدومه وخرج قعد علي السرير

ايمان: احطلك عشا؟؟

فارس: لا اكلت مع العمال جبنا عشا واتعشينا.. انتي وامي اتعشيتو؟؟

ايمان: ايوه اتعشينا من بدري انت ناسي ان محدش اتغدي؟

فارس: لا مش ناسي.. سهرانه ولا هتنامي؟

ايمان: هنام انا كنت مستنياك بس علشان لو عايز تتعشي

فارس: متشكر تصبحي علي خير

طفي النور وناموا بس النوم طار من عنيهم وهما بالقرب ده من بعض..

فارس قرب منها وحط ايده علي كتفها وهمس في ودانها

فارس: نمتي؟؟

ايمان: هنام

فارس حاول يقرب منها اكتر وحط شفايفه في رقبتها بس هيا افتكرت جملته اللي قالهالها فسحبت نفسها بعيد عنه

ايمان: انا اسفه عايزه انام...

فارس بعد عنها تماما وكل واحد نام في جنب وناموا نوم مقطع لحد ما النهار طلع كل واحد قام يجهز علشان شغله وبيتجاهلوا بعض.. نزلوا مع بعض وفارس اصر يوصلها وركبت معاه

فارس: هتفضلي متجهلاني لامتي؟

ايمان: انا مش متجاهلاك

فارس: بلاش متجاهلاني... زعلانه لامتي؟

ايمان: مش زعلانه يا فارس

فارس: امال اللي حصل امبارح بالليل ده تسميه ايه؟

ايمان: اسميه ان انا بعفيك بوظيفه انت مش عايزها او انك تشيل هم اني اتعلق في رقبتك

فارس: ايمان قلتلك ما تقفيش علي كل حرف انطقه

ايمان: اقف عند البوابه دي هنزل هنا

فارس: ايمان

ايمان: لو سمحت افتح الباب علشان انا انزل انا متأخره

فارس بزعيق: ايمان

ايمان: نعم... لما احس اني كفؤ ليك ولخبرتك هبقي ساعتها اقولك شبيك لبيك لكن دلوقتي انا متأخره وعايزه انزل

فتحت الباب ونزلت وهو طلع بالعربيه بسرعه بعدها وكان في قمه غضبه وغيظه منها

وهيا في الشغل خطرت علي بالها فكره وقررت تنفذها روحت بيتها وجهزت الغدا وفضلت مستنيه فارس يرجع علشان تنفذ خطتها فضلت طول الوقت فاتحه اللاب وبتدور علي حاجه وبتجرب كذا حاجه .. اتصل بيها قبل ما يطلع البيت وسألها لو محتاجه حاجه

طلع ودخل علي اوضته يغير وهنا ايمان كانت مجهزه كل حاجه واول ما دخل شغلت الفيلم اللي علي اللاب اللي هيا مجهزاه وكانت موجهه الشاشه ناحيه الباب بحيث لما يدخل يشوفه.. فارس دخل كالعاده ورمي السلام ويدوب هيدخل علي الحمام لمح الشاشه فوقف وراها وتنح للشاشه

فارس: انتي بتعملي ايه سيادتك؟

راح عليها وقفل الشاشه ووقفها قصاده

فارس: ايه ده اللي بتتفرجي عليه؟ هاه؟ انتي اتهبلتي ولا اتجننتي ولا ايه بالظبط؟؟ ما تنطقي

ايمان: انت بأي حق بتتكلم؟؟ هاه؟؟

فارس: انتي مجنونه ولا ايه؟ هو حد كان قالك تتفرجي علي حاجه زي دي

ايمان: لا بجد ؟؟امال مين اللي بيشتكي من قله خبرتي هاه؟؟ مين اللي قال اني متخلفه ومش عارفه ارضيك؟ مين اللي قال اني كل اللي بعمله بتعلق في رقبتك!! هاه!! اديني اهو بتعلم زعلان ليه بقي؟؟

فارس: قسما بالله يا ايمان

ايمان: ايوه قول بتحلف عليا بايه؟

فارس: لمي الدور ما تخلنيش امد ايدي عليكي

ايمان: يا سبحان الله هو مش انت اللي اشتكيت؟

فارس: بطلي هبل بقي... الحاجات دي ما تشتغلش في بيتي فاهمه ولا لأ؟ ؟ الحاجات دي بتقطع الرزق من البيت ده اولا ثانيا انا مش عايزك تشوفي حاجه زي دي

ايمان: ولو شوفت.. انا ممكن اشوف من وراك

فارس: ساعتها تبقي طالق بالتلاته وتحرمي عليا...

ايمان: انت بتحلف عليا بالطلاق؟؟

فارس: لما تخوني ثقتي فيكي يبقي اه احلف عليكي... انتي الحكم وربك شاهد عليكي... انا مش هتكلم في الموضوع ده تاني نهائي.، الحاجات دي ما تتفتحش تاني ابدا.،. وبعدين ايه اللي انا قلته لده كله يعني؟

ايمان: ايه اللي انت قولته؟؟ تخيل كده لو الوضع معكوس وانا مطلقه وجيت قولتلك واتخانقت معاك انك مش راجل كفايا وان جوزي الاولاني كان احسن منك مليون مره وان انت مش ربع رجولته هتعمل ايه؟ هاه حط نفسك مكاني؟؟

فارس: لا طبعا ما احطش نفسي مكانك الراجل غير الست

ايمان: الراجل بيحس والست معدومه الاحساس صح؟

فارس: بلا احساس بلا زفت الراجل ربنا حلله يجمع بين اربعه والست تتقبل ده لكن الراجل ما يتقبلش غير ان الست بتاعته تكون ليه هو وبس وما ينفعش اصلا تقارنه بحد

ايمان: لكن هو يقارنها عادي!!!

فارس: بقولك ايه انا مش ناقصك كلامي يتسمع وده اللي عندي

سابها ودخل وهو هيتجنن من التفكير واللوم وعلامه الاستفهام بتكبر جدا جواه والشك قرب يبقي يقين... هيام مكنتش بريئه ....

اتغدوا مع بعض وهو رفض يفضل ونزل علي ورشته تاني ورجع بالليل كالعاده... كانت ايمان قاعده مع امه في اوضتها وبص عليهم سامع ضحكهم وشاف ايمان بتدلك رجلين مامته والاتنين منسجمين تماما وساعتها شاف في ايمان حاجه هو مفهمهاش.. وما عرفش يفسر اللي شافه واللي حاسه ده يسميه ايه؟ دخل عندهم وقعد معاهم شويه لحد ما امه طردتهم الاتنين من عندها فمشيوا ودخلوا اوضتهم وهو دخل غير وطلع لمراته اللي كانت واخده جنب واول ما شافته رقدت وغطت نفسها وعملت نفسها هتنام... فارس شد الغطا من عليها ووقفها قدامه ومسك وشها بايديه

فارس: اسمعيني كويس قوي... اوعي اوعي يا ايمان تعملي حاجه غلط علشان حد واوعي تتقبلي حاجه غلط علشان حد محدش يستاهل تغلطي في حق نفسك او حق من حقوق ربنا.. وبعدين انا اسف لو كنت اتنرفزت عليكي حقك عليا.. انا عارف انك بتحبي امي بس انا... انا مش عارف اقولك ايه يا ايمان... هيام كانت بتعتبر امي خدامه عندها وكل يوم تعزم اصحابها وتخلي امي تخدمهم وفي يوم امي كانت تعبانه مقدرتش وطلبت من هيام تكلمني او تجيبلها دكتور عارفه هيام عملت ايه؟ حبستها في اوضتها وقفلت عليها بالمفتاح علشان عزومتها ما تبوظش ولولا فرح جت ولحقتها كان زمانها.،... امي لو جرالها حاجه انا مش هسامح نفسي انا اتساهلت كتير مع هيام وللاسف انتي اللي بتدفعي تمن غلطي ده... انا اسف يا ايمان بس ارجوكي ارجوكي اوعي تنتقمي مني في مره بانك تزعليها او تتعبيها.. اوعديني انك هتعتبريها ديما زي امك اوعديني

سند راسه علي راسها وهيا ساعتها حست بحب كبير جواه وجرح اكبر وندم وحاجات كتيره

ايمان: اوعدك يا فارس

فارس: لو انا زعلتك اتخانقي معايا براحتك واعملي ما بدالك المهم خلي كل حاجه بينا بعيده عن امي اتفقنا؟

ايمان: اتفقنا بس انت يا فارس بتجرحني قوي

فارس: حقك عليا... يمكن لان انا مجروح قوي فبجرح اللي حواليا

ايمان: المفروض العكس اللي اتجرح بيخاف علي اللي حواليه

فارس: انا عامل زي الغريق اللي كل ما حد يجي يطلعه بيشده معاه... مع انه عارف انه بيحاول يطلعه بس اهو بيغرقه معاه... ممكن ما تزعليش مني؟

ايمان: انا ما بلحقش ما ازعلش... يالا المهم تعال ارتاح الوقت اتأخر

طفوا النور وفارس قرب منها تاني ما اتحركتش وبعدت بس كشت في نفسها

فارس: هتفضلي لامتي بعيد؟ مش واحشك؟

ايمان: مش قادره.. كل ما افتكر اللي انت قولته مليون حاجز بيترفع بيني وبينك

فارس: بوصيلي يا ايمان

ايمان لفتله

فارس: الكلام اللي انا قلته ساعتها كان مجرد كلام وخلاص.. كان اي حاجه علشان اسكتك

ايمان: تقصد ايه؟

فارس: اقصد ان عدم خبره البنت وانها تبقي ابيض ده شيئ كويس مش وحش... انا غلطان لو فهمتي مني غير كده... الصح انك تبقي ابيض وجوزك هو اللي يعلمك اللي هو عايز يعلمهولك...

ايمان: بس انت قولت

قاطعها: سيبك من اللي قولته ساعتها ده كان كلام في لحظه غضب... الصح ان البنت تبقي ابيض والا مصدر تعليمها هيكون ايه؟ تقدري تقوليلي؟؟

ايمان: انت قولت ان مراتك كانت عارفه هيا بتعمل ايه من اول يوم؟؟

فارس: صح فعلا ... انا لما نمت معاكي يا ايمان كان باين قوي ان انا اول حد يلمسك واول حد يقرب حتي مجرد قرب منك.. اول حد يبوسك.. اول حد حتي يمسك ايدك.. وده خلاني افوق لنقطه مهمه قوي

ايمان: ايه هيا

فارس: هيام جابت خبرتها منين؟؟ جابت ثقتها في نفسها منين؟؟ ازاي كانت بتقدر هيا توجهني زي ما هيا عايزه؟؟ علامه استفهام كبيره قوي اترسمت قدامي!!!

ايمان: ما يمكن تكون مثلا اتفرجت علي افلام؟؟

فارس: الفرجه اه ممكن تخليكي عارفه ايه اللي هيحصل او متوقع منك ايه بس مش هتديكي ثقه مش هتشيل الخوف والرهبه بتوع اول ليله.. مش هتشيل الكسوف ورهبه اول مره... مش هتشيل التوتر.. اذا كان الراجل نفسه بيبقي متوتر لكن هيا مكنش في عندها النقطه دي وعيشتني ليله ولا الف ليله وليله وساعتها ايوه كنت مبسوط بس لما اتجوزتك استوعبت ده وكنت بقارنها هيا بيكي مش انتي لكن ساعتها من غيظي قولتلك كده فاعذريني بقي...

ايمان: مش عارفه اقولك ايه بس برضه ما تظلمهاش بالشكل ده ما توصلش للخيانه يا فارس انا مازلت مصره انها اكيد اتفرجت كتير علي الافلام دي؟؟

فارس: انتي بتعرفي تعومي يا ايمان؟

ايمان: ايه؟ اعوم؟؟ لأ مش بعرف

فارس: طيب لو انا جبتلك 20 فيلم عن تعليم العوم وحفظتك كل حاجه نظري وبعدها اخدتك البحر ورميتك فيه هتعملي ايه؟ هتعومي؟؟

ايمان: لا طبعا هغرق.. لازم حد يعلمني الاول قبل ما ترميني في الميه بس ده ايه علاقته؟؟

فارس: انتي جاوبتي نفسك.. ان النظري مش كفايا لازم حد يعلمك الاول...

ايمان: يعني ايه؟

فارس: مفيهاش يعني.... زي ما انتي قولتي لازم حد يعلمها الاول...المهم كفايا كلام عنها هيام صفحتها اتقفلت يا ايمان وارجوكي ما تفكريش فيها ولا تحاولي تفكريني بيها... وخلي بالك من نقطه مهمه اي مقارنه هتكون لصالحك حتي لو انا قلتلك غير كده.. زي ما قلتلك وهقولك مليون مره ما تركزيش علي كلامي قوي.. اتفقنا؟

ايمان: اتفقنا بس انت برضه ما تجرحنيش قوي

فارس: حقك عليا.. ممكن بقي تقبلي اسفي ولا هتفضلي برضه بعيد؟؟

ايمان: مش هتقولي متشعبطه في رقبتي ليه؟

فارس: مش هقولك غير اني كلي ملكك انتي وبس....

فضلوا لحد الفجر مع بعض وايمان ما صدقت انها بقت في حضن فارس حبيب عمرها...

فارس صحي علي خبط علي الباب فتح عنيه بالعافيه

فارس: ايوه

منيره فتحت ودخلت: حبيبي انتو ماوراكوش شغل النهارده ولا ايه؟ وايمان مش هتروح المدرسه الوقت اتاخر؟؟

فارس: هيا الساعه كام؟؟

منيره: الساعه 7:30 وانتو بتمشوا في الوقت ده

فارس: فعلا اتأخرت.. ايمان

منيره: هيا جنبك؟؟ تصدق انا فاكرها في الحمام وعلشان كده دخلت بقلب جامد بصحيك

فارس كشف راس ايمان لامه

منيره: حبيبي الجو برد عليكم ما تناموش كده

فارس: حاضر يا امي حاضر

طلعت امه وهو صحي ايمان بالعافيه

ايمان: عايزه انام يا فارس سيبني

فارس: وشغلك؟

ايمان: مش قادره

فارس: انتي حره

ايمان اتعدلت وقامت غصب عنها لبست وجهزت وراحت صحت فارس

فارس: ايه؟؟

ايمان: متأخره

فارس: طيب خدي تاكسي معاكي فلوس صح؟

فارس بيكلمها وهو نايم ومش عايز يفتح عنيه فايمان شدت الغطا من عليه وشدته

ايمان: انت سهرتني يبقي انت تقوم توصلني وتصحي زي ما انا صحيت

فارس: انا اللي سهرتك برضه؟؟ مش انتي اللي متشعبطه في رقبتي؟

ايمان بصتله وهو ضحك

فارس: سيبيني انام بقي وبعدين محدش قالك خاصمني بالاسبوع تستاهلي

ايمان: شوف انت هتقوم توصلني يعني هتقوم توصلني اتفضل

فارس قام غصب عنه لبس ونزل معاها يوصلها وبعد ما وصلها قبل ما تنزل

فارس: انا من النهارده هنام في اوضه فرح وانام براحتي واصحي براحتي

ايمان: نام انت حر... بس ما تبقاش تيجي في نص الليل تقولي... (بتتريق عليه) ايمان تعالي في حضني اصل الدنيا برد

فارس فتح بوقه: انا... انا... صح صح اصل انا فعلا اللي كل ما كنتي بس بتتلفتي ألزق فيكي واقولك الدنيا برد واكمش زي الفار... يا بت ده انتي الليل كله مستخبيه فيا

ايمان: خلاص هبقي اروح الليل انام في حضن مامتك اهي تدفيني

فارس: انزلي يا بت وبطلي رغي كتير.. قال تنام في حضن امي قال... اتفضلي

نزلت وهو راح علي شغله مبسوط بغير عادته... والظاهر ان ايمان قدرت تزرع الحب في قلب فارس او هيا فاكره كده.....

الايام كانت جميله وهاديه وكلها سعاده

عيد ميلاد فارس قرب وايمان عرفت بيه من فرح واتفقوا الاتنين يعملوا حفله كبيره لفارس وبدؤا يتقابلوا ويجهزولها وفضلت ايمان كتير محتاره تشتري ايه لفارس وفي الاخر استقرت انها تجيبله موبيل جديد لان موبيله شاشته اتكسرت وهو مش فاضي يصلحها

عملت الحفله وعزمت فيها الحبايب والكل مستني فارس يرجع اللي مع مجدي بيعطله لحد ما كل حاجه تجهز لانه هو كمان مشترك معاهم في تجهيزات الحفله

اخيرا فارس طلع وفتح الباب الجو ظلمه جدا واستغرب

مجدي: ايه الظلمه دي؟

فارس: غريبه.. مش عارف لحظه انور النور

نور فارس النور وهنا الكل صقف وزمر وقالوله

........ مفاجأة........

وفعلا كانت مفاجأة لفارس بس للاسف رد فعله كان غير متوقع نهائي... والكل اتصدم باللي هو عمله... وعلاقته بايمان رجعت تاني لنقطه الصفر او هيا اصلا مكنتش اتحركت وايمان كانت عايشه في وهم السعاده

ونكمل بكره

توقعاتكم

ShiMoOo

الحلقه 12

نور فارس النور وهنا الكل صقف وزمر وقالوله

........ مفاجأة........

وفعلا كانت مفاجأة لفارس بس للاسف رد فعله كان غير متوقع نهائي... والكل اتصدم باللي هو عمله... وعلاقته بايمان رجعت تاني لنقطه الصفر او هيا اصلا مكنتش اتحركت وايمان كانت عايشه في وهم السعاده

فارس: ايه ده؟ ايه اللي بيحصل هنا ده؟ في ايه؟

ايمان: عيد ميلادك حبيبي كل سنه وانت طيب

فارس: عيد ميلادي؟؟؟ ومين قالك اني بحتفل باعياد ميلاد هاه؟ وازاي اصلا تعملي كل ده من غير ما تقوليلي؟؟ انا ما بعملش حفلات ولا بحتفل باعياد ميلاد واتفضلي شيلي كل اللي انتي عملاه ده انا مش عايز كل ده في ثواني ما الاقيش حاجه فاهمه ولا لأ؟

منيره: براحه يا فارس في ايه؟

فارس: لا مش براحه يا امي... انا مش عايز حفلات

فرح: طيب ممكن تهدي يا فارس؟

فارس: علي اساس انك شيفاني مجنون؟؟

فرح: ايوه اللي بتعمله ده جنون

فارس: تحبي اوريكي الجنون... ده الجنون

وبدأ يقطع اي فرع زينه يطوله ويشد الحاجات اللي معلقينها ويرميها في الارض وكل اللي علي السفره قلبه في الارض وسط ذهول الكل وحاله صدمه لايمان لانها متوقعتش كل ده منه

مجدي شده بالعافيه واخده وخرج بره البيت والكل مشي بعد اللي فارس عمله وايمان قعدت مكانها مصدومه من رد فعل فارس...

منيره: ما تزعليش يا حبيبتي.. هو تلاقيه افتكر اخر حفله عيد ميلاد اللي ابوه اتوفي فيها وعلشان كده اتجنن كده.. فارس والله عمره ما كان كده.. اعذريه وبعدين مراته كانت كل فلوسه مخلصاها علي الحفلات ووصلته لمرحله كان بيستلف علشان يعرف يسد تمن الحاجات اللي بتشتريها

ايمان: لحد امتي هفضل اعذره!!! انا اسفه بعد اذنك انا هقوم انضف الدنيا

حاولت منيره توقف ايمان او تكلمها بس هيا كانت زي الاله اللي بتشتغل وبس... نظفت كل حاجه وشالت كل اثر لعيد الميلاد ودخلت اوضتها قلعت فستانها ولبست هدوم عاديه وجهزت شنطه وحطت هديتها علي التسريحه وكتبت ورقه وسابتهالو

طلعت بره ومنيره اول ما شافتها بالشنطه

منيره: ايمان لأ اوعي

ايمان: انا اسفه سامحيني بس مش قادره اجي علي نفسي اكتر من كده.. انا عايشه مع حطام راجل.. بيقارني في كل لحظه بحبيبته وللاسف هو عايش علي ذكراها وبيحاول يتقبلني بس مش بيقدر.. ارجوكي يا ماما انا مبحبش اقولك لأ فارجوكي سيبيني ما تضغطيش عليا بعد اذنك

نزلت وراحت بيت ابوها وفارس رجع اخر الليل واول ما دخل لقي امه قاعده في الصاله ودموعها علي خدها فقعد في الارض تحت رجليها

فارس: سامحيني اني اتنرفزت كده حقك عليا..

منيره: انت ما اتنرفزتش عليا انا علشان تعتذرلي انا انت اتنرفزت علي مراتك وريني بقي هتصالحها ازاي؟

فارس: ايمان قلبها ابيض وما بتزعلش

منيره: ان كان حبييك عسل!!!! ايمان نظفت البيت زي ما انت شايف وشالت كل اثر زي ما قولت وبعدها سابتلك البيت ومشيت

فارس: انتي بتقولي ايه؟ مين دي اللي سابت البيت..

قام وقف ينادي عليها ودخل اوضه النوم بس لقاها مترتبه وفاضيه وشاف الرساله والهديه علي التسريحه

قري الرساله بتاعتها

" انا عملت الحفله دي ليك انت اهو قلت حاجه تفرحك وتخرجك من الجو اللي انت فيه ولعلمك انا مصرفتش مليم واحد علي الحفله من فلوسك.. كلها كانت من راتبي الخاص.. فلوسك اهي دي كل الفلوس اللي اتبقت معايا من مصروف البيت وربنا يعلم اني ما اخدتش قرش واحد ليا او جيبت حاجه تخصني بفلوسك.. انا كان قصدي افرحك وبس.. انا روحت بيت ابويا فارجوك ما تجيش لاني عارفه ان والدتك هتضغط عليك تيجي وانا مش هتحمل ده منك.. ما تجيش يا فارس..

هديتي دي برضه بفلوسي الخاصه.. كنت حابه اني اهاديك زي ما انت هادتني بالمكياج اللي جبتهولي ولقيت ان دي فرصه كويسه.. لو معجبتكش الهديه او مش عايزها بسكت الزباله جنبك ارميها فيه.. اسفه حاولت علي قد ما اقدر بس خلاص مش قادره اكتر من كده ... ايمان "

دمعه نزلت غصب عنه لان ايمان ما تستاهلش منه كده ابدا.. بس يعمل ايه في قلبه الغبي.. ياريت قلبه بيفكر زي عقله كان ارتاح كتير... مكنش عارف يعمل ايه او يفكر ازاي بس حس بدموعها وهيا بتكتب الرساله دي .. شاف الظرف اللي هيا سيباه ولقي تقريبا الفلوس زي ما هيا اللي اتصرف كان قليل جدا.. مسك الهديه وفتحها وشاف الموبيل كان نفس الموبيل اللي بيفكر يشتريه بدال موبيله اللي اتكسر.. قعد مكانه وحس ان في حاجه كبيره ضاعت منه.. ايمان لو ضاعت منه مش هيقدر يعوضها وفعلا هيكون خسر بجد..

فضل قاعد مكانه كتير يفتكر اللحظات الحلوه اللي هيا بتخلقها وبتبتكرها علشانه.. افتكر لحظات ضحك مامته معاها.. افتكر لعبها مع عيال اخته اللي بيجوا كل يوم والتاني يا اما علشان يلعبوا او هيا تذاكرلهم ماث.. افتكر كل ابتسامه رسمتها علي شفايفه...

افتكر نظرات الحب اللي بيشوفها في عنيها..

حاجات كتيره هيا بتقدمها من غير مقابل وهو بيقابلها بانكار وكأنها مفروض عليها انها تعمل كده.!

قارنها بهيام وحب هيام التملكي.. هيام كانت بس بتحاول ديما تتملك فارس وبس لكن ايمان حبت فارس بجنون وده شيئ هو واثق منه... وللاسف هيضيعها من ايديه بغباؤه...

قام وخرج وامه شافته وهو خارج

منيره: رايح فين دلوقتي؟؟

فارس: هجيب ايمان

منيره: انت عارف الساعه كام؟؟ الساعه 3 الفجر يا فارس اصبر النهار يطلع

فارس: هيا مش هتبقي نايمه

منيره: هيا اه لكن اهل البيت هيبقوا نايمين

فارس: مين قالك؟؟ مين قالك ان اهل البيت بيناموا وابنهم او بنتهم بيبقوا مجروحين؟؟

منيره: فارس الوقت متأخر.. اكيد الكل نايم دلوقتي

فارس: انا مش نايم وانتي اهو مش نايمه وايمان مش نايمه واكيد ابوها وامها مش نايمين

سابها وخرج وراح لبيت ايمان خبط علي الباب

ام هدي: خير يا رب مين هيجي دلوقتي؟

عم سيد: هقوم اشوف مين؟

ايمان: بابا ده اكيد فارس قوله اني نايمه لاني مش هقابله دلوقتي

عم سيد فتح الباب وفعلا كان فارس اللي علي الباب

عم سيد: خير يا فارس في حاجه؟

فارس: عايز ايمان

عم سيد: ايمان اللي انت طردتها من بيتك هيا وضيوفها؟؟

فارس: انا مطردتش حد..

عم سيد: امال لما تكسر البيت وتقلب كل حاجه وتقطع كل حاجه ده معناه ايه بالنسبالك؟؟ انك بتقول للناس اهلا وسهلا.. انا واحد من الناس مش هدخل بيتك تاني بعد اللي انت عملته

فارس: عمي.. عمي عمي ارجوك.. انا عايز اتكلم مع ايمان.. انا مش قصدي مش قصدي

عم سيد: قصدك ولا مش قصدك انت مسؤل عن اللي حصل.. انت هنت بنتي قدام اهلها واصحابها واهلك انت ما عملتش احترام لاي حد.. ما احترمتش حد.. انت مش بس غلطت فيها انت غلطت فينا كلنا انت غلطت في حق كل واحد كان في بيتك النهارده..

فارس: مبحبش الحفلات وخصوصا حفلات اعياد الميلاد.. انا ابويا مات في حفله عيد ميلاد عايزني اعمل ايه؟ هاه؟ مجرد ما دخلت الحفله!!!! عمي ارجوك

عم سيد: كان ممكن تعتذر بهدوء وتمشي ساعتها كنا هنقدر الحاله اللي انت فيها ويمكن نعذرك لكن اللي انت عملته كان عدم احترام... ايمان قالتلي قبل ما تتجوزها انك ما بتحبهاش وانك عايز خدامه لامك وبس عارف انا قلتلها ايه؟ قلتلها اللي بيحب والدته ويحترمها هيشيلك فوق دماغه واقنعتها انها تتجوزك وقلتلها ازرعي انتي الحب في قلبه ولاني انا مربي بنتي كويس ولاني عارفها كويس فعارف انها مقصرتش معاك فمعني كده ان انا كنت غلطان.. كنت واخد مقلب كبير قوي فيك.. تخيلت انك محتاج لصدر حنين وبنتي هتكون الصدر الحنين ما تخيلتش ابدا انك فعلا عايز خدامه مش زوجه.. كنت فاكر انك مجروح وبتتكلم لكن مش كده.. انا غلطت لما اقنعت بنتي تتجوزك... انا قلتلها واقنعتها انك حتي لو محبتهاش هتحترمها وهتحطها فوق راسك وجوه عنيك لكن انت ولا حبتها ولا بتحترمها يبقي كده اسف يا فارس مالكش حاجه في البيت ده واتفضل الوقت متأخر..

فارس: انا عايز ايمان.. {بينادي } ايمان... ايمان... خليها تطلع تكلمني هنا

عم سيد: قلتلك اتفضل يا فارس من هنا

فارس: مش همشي غير لما اشوفها... ايمان

طلعت ايمان: بابا سيبه.. عايز ايه يا فارس؟ افندم؟

فارس: يالا بيتك

ايمان: انا في بيتي..

فارس بص لابوها: ايمان خلينا نتكلم انا وانتي

ايمان: مفيش حاجه نتكلم فيها.. وبعدين حاضر نتكلم.. اتفضل ادخل.. بابا ادخل حضرتك ارتاح

باباها دخل وسابها هيا وفارس لوحدهم يتكلموا براحتهم

ايمان: قول عايز ايه؟

فارس: ارجعي معايا البيت يالا

ايمان: مصر يعني؟؟ والدتك قالتلك ما ترجعش من غيرها ولا ايه؟ اكيد

فارس: امي ملهاش دعوه وما اتكلمتش معايا.. انا عايزك ترجعي

ايمان: ليه؟ ايه فايده وجودي!؟ علي فكره انت ممكن تعين ممرضه لوالدتك وهيا هتاخد بالها من ادويتها وهتاخد علي الاقل اقل من ربع المصروف اللي انت عاملو للبيت

فارس: ايمان.. انتي مش خدامه ولا ممرضه في بيتي انا اكتشفت ان انا محتاجك اكتر من اي حد.. انتي بتخليني عايش

ايمان: وانت بتخليني ميته!!! اسفه معدش عندي حاجه اقدمهالك!! اعذرني

فارس: ايمان انا اسف اني بوظتلك حفلتك.. بس صدقيني اول ما دخلت مفيش غير حاجتين فكرت فيهم... هيام وحفلاتها الكتير وامي بتخدمهم وابويا لما مات وانا في حفله عيد ميلاد برقص.. انا ما سامحتش نفسي علي موته يمكن لو كنت موجود كنت عملت حاجه بس ساعتها انا كنت في حفله وعلشان كده انا بكره حفلات عيد الميلاد لدرجه ما تتخيليهاش فسامحيني

ايمان: كان ممكن تمشي او تعتذر وتمشي.. كان ممكن تاخدني علي جنب وتقولي انك مش عايز حفلات وتسيبني اتصرف بس ده تصرف راجل بيحب مراته وبيخاف علي زعلها لكن انا مش كده.. زعلي مش بيفرق معاك وبعدين ايوه كنت بستحمل جرحك ليا واهاناتك ليا بس يمكن علشان كان بيبقي بيني وبينك... لكن دلوقتي انت اهانتك كانت قدام الكل وده مش هقدر اتجاهلو اسفه يا فارس... انا مش هقدر ارجعلك

ايمان مهما فارس يقول رفضت ترجع معاه ومشته ومهما يروحلها بترفضه ديما.....

فارس حس انه المره دي خسر بجد... حاول معاها كتير بس هيا رافضه

كانت بتروح شغلها واصحابها بيسألوها عملت ايه فقالتلهم انها مكنتش تعرف بموت ابوه في حفله عيد ميلاد وانه متعقد وعلشان كده انهار ساعة الحفله بس هيا من جواها مش مقتنعه بالمبرر ده!!!

كل يوم كان بيقف يستناها علشان يشوفها وهيا مروحه ويحاول يكلمها.. كانت بتسمعه بس بتمشي تاني من غير ما تتكلم...

فارس قال كل حاجه ممكن تتقال الا اهم حاجه يمكن لو قالها كانت سامحته... ماقلهاش انه بيحبها... اه هو محتاجها وبيحب وجودها في حياته بس ما اعترفش بالحب يمكن لان الحب اصلا مش موجود... زي الادمان كده محدش بيحبه بس ما يستغناش عنه.. او مسكن مؤقت للجروح.. وايمان عارفه كويس قوي انها مجرد مسكن لجروحه لكن مش علاج...

راحت زارت نجاه اللي هيا ومجدي بيحاولو يصلحوا بينهم وفضلوا يرغوا كتير قوي

ايمان: هو مجدي وفارس اصحاب من امتي؟ انا من ساعت ما وعيت علي الدنيا وانا بشوفهم مع بعض؟

نجاه: هما فعلا اصحاب من وهما عيال صغيرين

ايمان: حلو قوي ان الواحد يكون له صاحب بجد

نجاه: طبعا... والاحلي انه يكون ليكي زوج متمسك بيكي

ايمان: نجاه ارجوكي بلاش انا جايه اقعد معاكي شويه

نجاه: حاضر بلاش... ( غيرت الموضوع) تعالي افرجك علي شويه صور ليهم تحفه من وهما عيال وشكلهم عار

طلعت البوم كبير وبدئت تفرجها عليهم وهما صغيرين وفضلوا يضحكوا كتير لحد ما جت صورهم في الجامعه ولاحظت ايمان ان في واحده مع فارس قريبه منه.. نجاه حاولت تقفل الالبوم وارتبكت

ايمان: هيام كانت زميلته في الجامعه؟؟ هيا دي صح؟؟

نجاه: ايوه هيا ممكن بقي نسيب الالبوم؟

ايمان: لا بعد اذنك انا محتاجه اشوفها واعرف انا بواجه مين وبتحدي مين وبتقارن بمين في كل نفس بتنفسه.. انا محتاجه اعرف غريمتي وكويس اني شفتها انا حاولت مع فرح توريهالي ورفضت وقالت ان ملهاش صور ارجوكي يا نجاه انا محتاجه لده

فضلت تتفرج علي الصور وكل فتره القرب بيبان في الصور والحب بيوضح لحد ما شافت صور الفرح

حاولت نجاه تقفل الالبوم بس ايمان منعتها.. شافت عريس في قمه سعادته وهو مع عروسته... شافت فرحه وحب في عنين فارس ما شافتهمش قبل كده..

شافت حب كبير في صورهم... حب استحاله ان هيا تتغلب عليه... دلوقتي بس عرفت فارس ليه مش عارف يحبها!!! دلوقتي عرفت ان غريمتها مش سهله ولا بسيطه.. صورتها بتقول ان شخصيتها قويه متملكه فعلا.. وللاسف جميله واجمل منها بمراحل.....

قفلت ايمان الالبوم وشويه ومشيت وفي بيتها عيطت كتير جدا لانها اتيقنت ان عمر ما فارس هيبصلها بالطريقه دي ابدا... وعرفت ليه فارس مش قادر يقلع دبلتها من ايده لان هيا معششه ومتملكه قلبه.... وابسط دليل دبلتها اللي كانت نار وجمر كل ما ايد فارس بتلمس ايمان.......

في مره معديه بالليل متأخر كانت راجعه من فرح وتاكسي نزلها وهو لمحها ومشي وراها يطمن انها هتوصل للبيت بسلامه.. كانت جميله فوق العاده وفستانها طويل ورائع ورفعاه وهيا ماشيه وهو حس انه اول مره يشوفها.. مشي وراها من بعيد لبعيد..

اتصل بيه مجدي كان عايز يسأله عن حاجه في الشغل فوقف يكلمه علشان ايمان ما تسمعش صوته وتعرف انه وراها...

ايمان وهيا ماشيه وقف كام شاب وبدؤا يضايقوها ويعاكسوا فيها وقبل ما تجري او تصرخ شدوها لشارع جانبي وواحد حط ايده علي بوقها علشان ما تصرخش

وبدؤا يفكروا هياخدوها ازاي من غير ما حد يشوفهم وهيا بتحاول تهرب بس مش عارفه.. بتبص حواليها بيأس وبتعيط والشباب واحد فيهم مشي يجيب عربيه علشان ياخدوها فيها...

ايمان حست ان حياتها ممكن تنتهي الليله دي وما فكرتش غير في شخص واحد وبس وهو فارس

الشباب بيشدوها وهيا بتحاول تهرب من ايديهم بس مش قادره.. عضت ايد الولد اللي علي بوقها فشال ايده للحظه بس كانت كفيله انها تصرخ بصوتها كله وتقول كلمه واحده

#### فاااارس####

فارس سمعها وطلع يجري علي صوتها وهناك شاف الشباب بيشدوها علشان يدخلوها العربيه جري عليهم وبدأ يتخانق معاهم..

مجدي كان لسه علي التليفون لان فارس مقفلش وسمع صوت صريخ ايمان وصوت الشباب وهما بيتخانقوا..

قال لمراته تطلب البوليس وهو نزل يجري علي صاحبه بسرعه....

فارس كان بيضرب في الشباب وبيتضرب بس نوعا ما خوفه علي مراته مديه قوه غريبه.. كان لازم يقف علي رجليه مهما يضرب لان مفيش راجل هيقبل ان مراته تتاخد منه الا علي جثته الاول... واحد طلع مطواه وايمان صرخت تنبه فارس.. انتبه فارس ليها وحاول يصدها بس الشاب ضربه جامد في جنبه ووقع في الارض ويدوب هيكمل عليه كان مجدي جه بعصايه كبيره في ايده وضرب الشباب وكذا واحد من الحاره اتلم علي صريخ ايمان ومسكوا الشباب وكتفوهم لحد ما البوليس وصل واخدهم وفارس مجدي اخده المستشفي وايمان راحت معاه... كانت حاطه ايدها علي جرح فارس علشان ما ينذفش كتير وبتعيط..

فارس جرحه مكنش كبير قوي بس منظر الدم الكتير والموقف مخلي ايمان مش مبطله عياط...

فارس: علي فكره انا كويس... الجرح سطحي ما تخافيش

ايمان: انت كان ممكن تموت...

فارس: ممكن بس ما متش... وانا كويس قدامك فبلاش عياط بقي...

فستانها اتبهدل بدمه وهو حاول يبتسم بس الالم بدأ يشد عليه... وصلوا المستشفي اخيرا

فارس دخل لدكتور جراحه يخيطله الجرح واصر ان ايمان تفضل جنبه واول ما شافت جرحه كبير قد ايه كان هيغمي عليها فمجدي خرجها بره

ابوها اتصل بيها يشوفها فين وهيا من العياط معرفتش ترد عليه فمجدي اخد التليفون منها وهو كلم ابوها وحكاله اللي حصل

عم سيد: طيب انتو في اي مستشفي علشان اجيلكم

مجدي بعد شويه عن ايمان: لو سمحت يا عمي سيد ما تجيش

عم سيد: انت عايزيني اسيب بنتي لوحدها؟؟

مجدي: اهدي يا عمي بنت حضرتك كويسه جدا هيا بس بتعيط علشان فارس اتعور ويمكن يكون ده مصلحه

عم سيد: مصلحه ايه ان بنتي شباب يخطفوها ولا جوزها يضرب ويتعور؟؟؟

مجدي: لو حضرتك جيت دلوقتي اول ما نخرج هتروح ايمان معاك

عم سيد: امال انت عايزها تروح فين؟

مجدي: عايزها تروح بيت جوزها... انا هروحهم وهيا هتفضل مع فارس لانه تعبان ومش هيهون عليها تسيبه لوحده اما لو حضرتك جيت فتهخليها تفكر بعقلها وهتمشي معاك فارجوك سيبهم

عم سيد: انت متخيل ان انا مانعها تروح بيتها؟؟ ده قرارها هيا

مجدي: خلاص يبقي تسيبها تاخد قرارها الليله وهيا لو قالت تروح انا اوعدك اني هوصلها لحد باب البيت واسلمهالك في ايدك... بس ارجوك فارس محتاجها ايوه عارف انه غلط بس هو ندمان سيبهم يا عمي ارجوك

عم سيد: ياريت صاحبك عاقل زيك كده يا مجدي

مجدي: والله يا عمي علي طول هو اللي كان عاقل فينا بس معلش هيا الدنيا ملطشه معاه شويه وملخبطاه فشويه وقت بس وهو هيظبط كل حاجه.. بس نصبر عليه هو انت يعني يا عمي مش عارف فارس!!!

عم سيد: كنت عارفو وانا اللي شجعت بنتي تتجوزه بس هو اللي بيغير صورته قدامي

مجدي: معلش اعذره يا عمي

عم سيد: خلاص هسيبهم بس تكلمني وتقولي ايه اللي بيحصل ولو روحت معاه طمني

مجدي :من عنيا يا عمي...

الدكتور طلع من عند فارس وايمان جريت عليه

ايمان: هو عامل ايه يا دكتور؟؟

الدكتور: الحمد لله احسن... الجرح كبير والحمد لله انه ما اصابش حاجه حيويه... اخد حوالي عشرين غرزه فيه... لازم يرتاح وكنت افضل يبات معانا الليله بس هو رافض... فيروح بس لازم يتغذي كويس ويشرب سوائل كتير علشان يعوض النزيف وادويته ياخدها في مواعيدها علشان الجرح يقفل بسرعه وطبعا حركته تبقي قليله... خليه يرتاح ساعه كده بس المحلول يخلص وبعدها ممكن يروح... الف سلامه عليه

ايمان دخلت هيا ومجدي وهو كان مغمض عنيه بس اول ما حس بيهم فتحهم بالعافيه...

ايمان: ليه مش عايز تبات هنا؟؟ ما تخلينا الليله هنا؟؟

فارس: امي لوحدها في البيت وهتقلق وبعدين انا كويس فمالوش لازمه قعدة المستشفي..

ايمان: فين الكويس ده؟ انت عارف واخد كام غرزه؟؟

فارس: فداكي روحي كلها مش كام غرزه

ايمان مسكت ايده ودموعها نزلت ومجدي اتنحنح علشان يعرفهم انه موجود

مجدي: ايمان ادخلي الحمام اغسلي ايديكي ووشك من الدم ده...

ايمان دخلت وسابتهم

فارس: مشيتها ليه يا بارد؟

مجدي: الله يسامحك.. المهم قبل ما تطلع... ما تعمليش فيها عنتر وتقول انك كويس لانك لو كويس هيا هتروح فهمت؟ لكن لو انت تعبان هتفضل جنبك وبعدين يا فصيح كنت فضلت الليله هنا بس ماعلينا انا اقنعت عم سيد انه يسيبها ولو هيا طلبت تروح هروحها غير كده هتفضل معاك... شطارتك بقي تخليها تفضل معاك... فهمت؟

فارس: فهمت... انت عايزني امثل ان انا تعبان صح؟

مجدي: ايوه صح؟

فارس: علي اساس انك شايفني مش تعبان مثلا ولا شايفني بمثل اني متعور؟؟

مجدي: انت بتقول ايه؟ ؟

فارس: بقول اني اصلا تعبان يا بأف مش محتاج امثل

مجدي: تصدق انا غلطان لاهلك.. ده انت واطي صح؟

فارس: حظك اني مش قادر اقوم ارد عليك

مجدي: والله ان ما سكت لاسيبك وامشي وابعتلك عم سيد ينزلك قدام بيتكم وياخد بنته ويمشي

فارس: امشي وريني هتعملها ازاي؟؟

مجدي: اعملها واعمل ابوها..

ايمان طلعت ومجدي طلع بحجه هيكلم مراته يطمنها وسابهم لوحدهم

ايمان: حاسس بإيه؟ تعبان؟

فارس: مش عارف... جسمي كله بيوجعني

رفع ايده حطها علي عينه بحاجبه واتأوه فمسكت ايده

ايمان: انت مخبوط جامد هنا.. ما تحطش ايدك اصلا وشك كله بقي خريطه...

فارس: يعني مبقتش مز ولا ايه؟

ايمان ضحكت وهو حاول يضحك بس اتأوه جامد

ايمان: اسفه اسفه... هششش.. فارس خلينا هنا الليله.. علشان خاطري

فارس: خاطرك غالي قوي بس لو اتصلتي بامي وقولتلها اني في المستشفي هتروح فيها

ايمان: لو اتصلت بيها وقولتلها ان انا وانت مع بعض وهنقضي الليله بره هتفرح؟؟ علشان خاطري خلينا بس للصبح.. علشان ابقي مطمنه ارجوك

فارس: طيب بس لو امي شكت في اي حاجه هنروح وريني هتقنعيها ازاي وخلي بالك انها لو سمعت صوتي هتعرف اني تعبان

ايمان: انا اللي هكلمها.. فين تليفونك؟

فارس: كان في جيبي مش عارف..

حاول يحرك ايده بس ماقدرش

ايمان هيا حطت ايدها في جيوبه واحد وري التاني تدور عليه وهو مع اي حركه بيغمض عنيه وهيا مش قادره تشوفه بيتوجع

ايمان: مفيش في جيوبك دي؟؟

فارس: يبقي في جيبي اللي وري

ايمان قربت منه جامد وحاولت توصل لجيبه من غير ما تحركه بس هيا بقت قريبه منه.. وشها قريب من وشه وهنا فارس عرف قد ايه هيا وحشاه.. رفع ايده السليمه وقربها منه علشان يلمس شفايفها وهيا استجابت ليه ويدوب بيبوسها فوقف مره واحده

ايمان بهمس: مالك؟

فارس: هو انا متعور في شفايفي؟؟

ايمان ابتسمت: اه... مش بقولك وشك بقي خريطه

فارس: ربنا بينتقملك مني اهوه

ايمان: بعد الشر عليك... تليفونك اهوه

طلعت التليفون واكتشفت انه التليفون اللي هيا جابتوله هديه فابتسمت بس ما علقتش..

فتحته كان عليه باس ورد

ايمان: عليه باس ورد

فارس:

20 11 16

ايمان: ايه الارقام الغريبه دي؟

فارس: 20/11/2016 تاريخ جوازنا

ايمان بصتله ومعرفتش تتكلم فبصت للتليفون واتفاجئت بصورتها خلفيه لتليفونه كان قلبها هيخرج من مكانه... معقوله يكون حبها؟؟ ولا كل دي حركات علشانها!؟ بس هو يعرف منين ان كل ده هيحصل؟؟؟

ايمان: اسكت علشان هكلم مامتك

فارس: هو انا اتكلمت؟

ايمان اخدت نفس طويل واتصلت برقم منيره اللي ردت بسرعه وفارس طلب منها تفتح الاسبيكر

منيره: فارس حبيبي اتأخرت ليه؟ ده انا هموت من القلق عليك

ايمان: اعذريه بقي يا ست الكل..

منيره: ايمان!!! امال فارس فين!! اوعي يكون جراله حاجه قولي والنبي

ايمان ضحكت: لا ما تقلقيش.. انا كنت في فرح صاحبتي وهو شافني وجه ورايا وفضل يعاكسني و... وبس..

منيره ضحكت: وانتو فين؟

ايمان: قرر يعوضني بليله رومانسيه فاخدني فندق هنقضي الليله فيه... ما تتخيليش جمال الفندق اللي احنا فيه!! اتعشينا علي شموع علي بيسين... الليله وهم يا امي.. انا مش عارفه اقولك ايه؟

منيره: طمنتي قلبي ربنا يسعدكم يا حبيبتي انتي تستاهلي كل خير... وربنا يبعد عنكم الزعل.. امال هو فين؟

ايمان اترددت: في الحمام... لو عايزانا نيجي علي البيت هقوله ونيجي؟؟

منيره: لا يا حبيبتي اتبسطوا انتو وانا مبسوطه انكم مع بعض

فارس جمع كل قوته ونادي علي ايمان بصوت عالي فبصتله باستغراب

منيره: روحيله يا حبيبه قلبي.. ما تخليهوش يستناكي كتير... وتسلمي يا حبيبتي انك طمنتيني... روحي لجوزك يالا تصبحوا علي الف الف خير

ايمان قفلت التليفون وبصتله: انت بتنادي ليه ؟

فارس: علشان لو مكنتش سمعت صوتي كانت هتقلق وهتفكر كتير ليه انتي بس اتكلمتي؟ وانا فين؟ وهتفضل الليله كلها تفكر لكن كده هيا

ايمان كملت بغيظ: انك في الحمام وعايزني معاك؟

بعد ما قالت جملتها استوعبت معني كلامها وهو ابتسم

فارس: برافو عليكي وده كان المقصود..

ايمان بغيظ: انت رخم

فارس: انا تعبان.. لو سمحتي يا ايمان نادي علي مجدي من بره

ايمان نادتله ودخلهم

فارس: روح انت يا مجدي والصبح ابقي تعال

مجدي: كويس انك عرفتي تقنعيه يبات.. المهم انا هبات معاكم لو احتجتم حاجه ولا كده؟

فارس: لا يا سيدي روح لمراتك وبيتك ده كلها كام ساعه والنهار يطلع... اتفضل

مجدي: لا يا سيدي انا كلمت نوجا وطمنتها وهبات معاكم

فارس: تبات معانا فين؟؟ اتكل علي اللي خلقك والصبح تعال بدري.. قال يبات معانا

مجدي: تصدق انا غلطان.. عايزه حاجه يا ايمان؟

ايمان: متشكره يا مجدي..

مجدي: رقمكي معاكي ومعاه لو في اي حاجه كلميني في اي وقت ما يهمكيش هبلغ الدكتور انكم هتباتوا يالا سلام

مشي مجدي وسابهم وهيا راحت قعدت جنبه ومسكت ايده.. كان مجروح في جنبه الشمال فهي قعدت علي يمينه

فارس: هتفضلي قاعده كده كتير؟

ايمان: عايزني اعمل حاجه؟

فارس: اه

ايمان وقفت: قول عايز ايه؟

فارس: تيجي في حضني

ابتسمت وطلعت جنبه بس مجرد ماحطت دماغها علي صدره أن واتألم فبعدت..

ايمان: انت تعبان

فارس: ما تبعديش خليكي

سندت علي دراعها واخدته هيا في حضنها وايدها علي جرحه

ايمان: هو انت ليه عملت كده؟

فارس: ليه عملت ايه؟

ايمان: ليه اتخانقت مع الشباب؟ ليه مثلا ما ناديتش علي اي حد او قولت لحد يجي او حاولت تتفاهم معاهم بالعقل اي حاجه؟

فارس: انتي هبله؟؟ شباب بيخطفوا مراتي هروح انادي لحد اقوله والنبي تعال الحق مراتي؟ ولا هقولهم والنبي سيبوهالي؟؟ انتي هبله يا بت؟؟ اصلا انا مجرد ما شفتهم اتجننت

ايمان ابتسمت: و لو مجدي مجاش كان ايه اللي هيحصل؟؟

فارس: يا اما بقدره قادر انا همنعهم وهيهربوا يا اما مش هياخدوكي غير وانا ميت

ايمان: بعد الشر عليك ما تقولش كده

فارس: بقولك اللي هيحصل

ايمان غيرت الموضوع لانها مش عايزه تفكر لو ده حصل؟؟؟

ايمان : مجدي صاحبك جدع قوي

فارس: فوق ما تتخيلي... ولاقصي درجه

ايمان: اممم هو جرحك هنا؟

فارس: تقريبا... اصلا جنبي كله بيوجع فمش عارف فين الجرح بالظبط

ايمان: الف سلامه عليك... شكلك غريب ووشك بدأ يورم ويزرق وعينك

فارس: خسارتك يا فارس كنت مجنن بنات الحاره كلهم

خبطته براحه بس هو اتوجع

فارس: براحه عليا...

ايمان: طيب لم نفسك

فارس: انا ملموم غصب عني... شكلي بقي وحش قوي؟

ايمان بصتله وكان نفسها تقوله انها بتعشقه هو مش شكله ولا منظره بس هو

فارس: للدرجه دي شكلي بشع؟؟

حطت ايدها علي شفايفه وبدأت تبوس في كل جرح في وشه برقه... لحد ماهو وقفها

ايمان: مالك؟ انا تعباك؟؟

فارس: فوق ما تتخيلي... ارحمي انا متكسر كلي...

ايمان ضحكت: طيب غمض عنيك

فارس: لو غمضت هنام وانا عايز افضل صاحي معاكي

فارس كان بيتكلم بالعافيه...

ايمان قفلت عنيه... هشششش... اول ما تصحي هكون جنبك وفي حضنك... نام

كانت بتهمس وهو فعلا نام مع صوتها... فضلت كتير جنبه تبصله وتتخيل لو مجدي مجاش؟؟؟ دموعها نزلت وفضلت تعيط كتير وتحمد ربنا انه نجي جوزها

الصبح طلع ومجدي جه بدري والبوليس جه علشان ياخد اقوالهم واخيرا كل حاجه خلصت وفارس اصر يروح حتي مع الحاح ايمان يفضلوا...

مجدي ساعد فارس ينزل وركبه العربيه وايمان جنبه وتعب جدا لحد ما استقر في العربيه...

وكل حركه للعربيه بيتوجع وايمان هتتجنن جنبه وكأنها هيا اللي بتتوجع...

فرح مع جوزها الصبح قبل ما ينزلوا اشغالهم

محمود: اطمنتي علي اخوكي اخباره ايه؟

فرح تنحت: اخويا؟؟ اخويا ماله

محمود جمد وعرف ان مراته ما تعرفش حاجه

محمود: مالوش بقولك بس اخباره ايه؟ اتصالح مع مراته ما اتصالحش كده يعني؟

فرح فضلت شويه ساكته: محمود؟؟ اخويا ماله في ايه؟ انطق قول في ايه؟

محمود: يوووه انتي الواحد ما يعرفش يفلفط منك!!! اتخانق بالليل مع كام واحد اتهجموا علي ايمان واتعور ومجدي اخده المستشفي بس اللي اعرفه انه كويس بانه راح بنفسه يعني

فرح: وما قولتليش من بالليل؟؟

محمود: كنتي نايمه ومحبتش اصحيكي وبعدين هو كويس انا كلمت مجدي واتطمنت عليه وقال ان ايمان معاه وانها فرصه يتصالحوا

فرح: انا هتصل بماما

محمود: اه اتصلي قوليلها ان فارس في المستشفي وبعدها اطلبيلها انتي بقي الاسعاف وروحي الحقيها.. انتي هبله ولا ايه؟ امك ما تعرفش حاجه

فرح: المفروض اعمل ايه؟

محمود: استني هكلم مجدي

كلمه وقالهم انه واخد فارس علي البيت

محمود: اخوكي رايح علي البيت شويه ونروح بحيث ما تخضيش مامتك لو شافتك جايه كده

فارس وصلوا البيت كان في قمه الالم نزل من العربيه وايمان سندته وبتدخله البيت ومجدي بيركن... ابوها كان مستنيهم واول ما شافهم راح ناحيتهم

فارس دخل وبص للسلم: هو انا ليه مش ساكن في الارضي؟؟

ايمان: معلش دول يدوب دورين

فارس: متتخيليش انا شايفهم قد ايه؟

مجدي جاي بسرعه وفي دخلته خبط فارس في جنبه اللي حس ان روحه طلعت...

صرخ وخبي وشه في حضن ايمان اللي سانداه وبيأن جامد وهيا ضماه قوي ودموعها نزلت من وجع جوزها بين ايديها ومجدي بيتأسف..

عمي سيد دخل شاف فارس في حضن ايمان وبس

عم سيد: يعني ايه ده؟؟ مكنتش اعرف انك طري كده ما تنشف وتطلع لفوق بدال الحركات دي

فارس رفع وشه بالعافيه وبص لعم سيد اللي اول ما شاف وشه شهق لانه متخيلش شكله كده ابدا

فارس: للدرجه دي شكلي يخض؟؟ اهلا يا عمي

عم سيد: انت كويس؟ طيب لما انت تعبان كده طلعتوا ليه؟

فارس: انا كويس بس الغبي ده خبطني

مجدي: سوري سوري سوري

فارس: اعمل بيها ايه سوري دي؟ اطلعوا انتو وانا هطلع وراكم

هما سبقوه وهو ماشي درجه درجه مع ايمان اللي حست قد ايه هو تعبان وبيتألم وبيداري

اخيرا قربوا يوصلوا هنا عم سيد خبط علي الباب ومنيره فتحت

منيره: يا اهلا يا عم سيد... اكيد بتطمن علي ايمان..هيا مع فارس ما تقلقش عليها

عم سيد: انا عارف انها مع فارس

منيره قلقت وبصت شافت مجدي وده زود خوفها

منيره: مجدي؟؟؟ في ايه؟ وفارس فين؟

مجدي: مفيش فارس اهو علي السلم

طلعت منيره واول ما شافت فارس صوتت وجريت عليه

فارس: انا كويس ما تخافيش ما تخافيش

دخلوا البيت وهو طلب يدخل علي السرير علي طول وفعلا كانت مأساه لحد ما ارتاح في السرير... فرح جت هيا وجوزها ونفس اللي امها عملته هيا عملت اكتر منه... مجدي حكالهم اللي حصل وايمان جنبه ماسكه ايده او هو اللي ماسكها ومش عايز يسيبها

عم سيد كان هيمشي وبعد ما خرج نادي علي ايمان فحاولت تقوم بس فارس مسكها لانه خاف.....

فارس: اوعي تمشي وتسيبيني؟؟

ايمان شافت خوف وقلق ودموع وتعب وحاجات كتيره في عنين فارس... شافت تعلق عيل بامه اللي خايف انها تسيبه لوحده فابتسمتله

ايمان: هشوفه وارجع لحظه

خرجت لابوها وهو فرح قعدت جنبه هيا وامها يتكلموا معاه وهو كان بيرد بالعافيه ومجدي بيدردش معاهم

بره عم سيد: انتي هتفضلي هنا امشي انا؟؟

ايمان: مش هقدر اسيبه وهو كده؟

عم سيد: ده قرارك؟؟ هتتجاهلي اللي حصل وهتفضلي؟

ايمان: انت عايزني اسيبه؟

عم سيد: لا يا بنتي لأ.. بس انا عايزك تبقي واثقه من قرارك ما تجيش بعد يومين تعيطي تاني وتقولي مراته الاولانيه تاني... هتقعدي يبقي تتقبليه بحلوه وبمرو تتقبلي ماضيه بمراته فاهمه؟

ايمان: فاهمه... بابا انا بحب فارس جدا ومجرد فكره انه كان ممكن يموت!!!!! انا كان ممكن اموت لو هو جراله حاجه؟

عم سيد: يعني كان لازم يحصل كده علشان ترجعيله؟

ايمان: كانت محتاجه اشوف حاجه منه وشوفتها في عنيه؟؟ شفت تمسكه بيا في عنيه... انا هحبه نيابه عني وعنه... حبي هيكفينا احنا الاتنين بس الاول لازم اعمل حاجه مهمه وبعدها هنكمل مع بعض مهما يحصل

عم سيد: حاجه ايه؟

ايمان: لازم يقطع كل صلته بالماضي بعد اذنك يا بابا

ايمان دخلت وحاجه في دماغها فابوها وقف يشوف هتعمل ايه؟

دخلت لفارس وقعدت قصاده وهو حس انها هتقول حاجه

فارس: مالك؟؟ اوعي تقولي انك هتمشي؟؟

ايمان: مش همشي بس انا في حاجه واقفه بيني وبينك عايزاك تشيلها

فارس: حاجه ايه؟ انا اتأسفتلك ومستعد اتأسفلك قدام الكل علي تهوري ساعة الحفله

ايمان: لا مش ده اللي قصدي عليه... انا عايزه منك حاجه تانيه

فارس: ايمان انا تعبان ومش قادر قولي عايزه ايه علي طول

ايمان: لو فعلا عايزني انا افضل معاك يبقي تختارني انا

فارس: وانا بعمل ايه؟ ما انا اهو بقولك خليكي جنبي

ايمان: يبقي تقلع الدبله اللي في ايدك اللي عليها اسم واحده تانيه غيري وتحط دبلتي انا في ايدك؟؟؟؟

فارس اتصدم بكلامها وتنح لانه متخيلش ابدا ده...

ايمان: سكت ليه؟ هاه؟ قولت ايه يا فارس؟

فارس: مش هقولك غير حاجه واحده ما تلويش دراعي يا ايمان

ايمان بصدمه: الوي دراعك؟؟ انا بطلب حق بسيط من حقوقي وانت بتسميه بلوي دراعك؟؟

فارس: طيب مش وقته دلوقتي

ايمان حست بصدمه لانها ما تخيلتش انه هيتمسك بدبلته للدرجه دي حتي لو علي حسابها

ايمان: لا وقته يا فارس عايزني افضل معاك يبقي الاول تقلع دبلتها وتختارني انا؟؟؟

فارس اتنرفز: انا بختارك انتي اهو وبقولك خليكي جنبي ده تسميه ايه؟

ايمان: احتياج... وانا للاسف معدش مكفيني... اقلع الدبله يا فارس

فارس: وان ما قلعتهاش هتمشي؟؟

ايمان بصوت مخنوق: اختارني ولو مره واحده؟ اختارني انا... انا بطلب حاجه بسيطه جدا

فارس: انتي بتلوي دراعي.. انتي عارفه اني تعبان ومحتاجك وبتضغطي عليا واسف مش هقبل ده

ايمان: للدرجه دي انا ماليش تمن عندك؟؟

فارس: ما تشرطيش عليا يا ايمان

ايمان: وانت ليه بتشرط عليا.... من قبل حتي ما نتجوز وانت بتشرط عليا!!! اسفه يا فارس... اختار يا أنا يا دبلتك؟؟؟

فارس سكت وبص بعيد

ايمان دموعها المخنوقه نزلت والكل بيراقب حوارهم اللي بيدور بهمس بس فاهمين الحوار ماشي ازاي

ايمان وقفت: خلاص براحتك بس ما تجيش تاني البيت عندي تطلب مني ارجع لاني مش هاجي علي نفسي تاني واول ما تقوم بالسلامه

قاطعها: ايه اعمل ايه هاه؟ امشي يا ايمان مش هجيلك تاني... انا ما بختارش دبلتي انا بس برفض اسلوبك ده.. انك تطلبي مني الطلب ده في الوقت ده اللي انتي عارفه فيه ومتأكده اني محتاجك جنبي ده اللي انا برفضه بس براحتك افهميها زي ما تفهميها... مش هعطلك باباكي واقف علي الباب

ايمان سابتله الاوضه وخرجت وقالت لابوها يمشوا

فرح ومنيره طلعوا وراها يحاولو يوقفوها

مجدي فضل مع فارس

مجدي: ما تقلع ام الزفته دي!!! ورحمه ابوك ده سبب تتخانقوا علشانه؟؟ متمسك بيها ليه يا فارس؟؟؟ انت بتبيعها بالرخيص قوي

فارس اتنرفز جامد واتعدل : ما تتشرطش عليا... هيا عارفه اني محتاجها وبتستغل ضعفي واحتياجي ليها وده اللي انا رافضه

مجدي مره واحده تنح لفارس: انت بتنزف

فارس رمي نفسه علي السرير لانه عارف وحاسس بجرحه اتفتح

مجدي حط ايده علي الجرح يحاول يوقف النزيف بس فارس ما استحملش ضغطه ايده

مجدي: عاجبك العصبيه دي؟؟ اهو جرحك اتفتح... انا هجري اجيبلك دكتور وانت اهدي بقي

طلع مجدي يجري كانت ايمان ماشيه واول ما طلع كلهم بصوله وايديه غرقانه دم

مجدي: فارس بينزف جامد... ايمان خليكي معاه لحد ما اجيب الدكتور بسرعه

طلع مجدي يجري وكلهم دخلوا لفارس اللي هدومه غرقانه دم وهو راقد مغمض عنيه

ايمان حطت ايدها علي الجرح بتحاول توقف النزيف بس فارس زق ايديها بعيد

فارس: رجعتي ليه امشي يالا

ايمان:....

نكمل بكره

توقعاتكم

ShiMoO

الحلقه 13

طلع مجدي يجري وكلهم دخلوا لفارس اللي هدومه غرقانه دم وهو راقد مغمض عنيه

ايمان حطت ايدها علي الجرح بتحاول توقف النزيف بس فارس زق ايديها بعيد

فارس: رجعتي ليه امشي يالا

ايمان: ممكن تهدي؟ انت كل ما بتتكلم النزيف بيزيد

فارس: ما يزيد انتي يهمك ايه؟ عامله نفسك خايفه عليا ليه؟ انتي كل اللي يهمك وهم الحب اللي مسيطر عليكي.. عايشه في خيال مالوش علاقه بالواقع

زقها بعيد وهيا دموعها نازله

ايمان: انت بتظلمني... ارجوك يا فارس انت بتنزف اهدي دلوقتي

فارس: لو انتي عايزاني اهدي بجد مكنتيش وقفتي قصادي تتشرطي عليا دلوقتي... ( زقها بعيد وقام وقف) اوعي تفتكري ان تعبي ده ضعف واني هبوس ايدك واترجاكي تفضلي جنبي...

ايمان: انا عارفه مكانتي هنا ايه بالظبط ما تخافش مش هعتبرك ضعيف

فارس: انتي مهوسه بكلمه حب.. مهوسه.. تقدري تقوليلي ايه هو الحب!! ايه فايدته اصلا؟؟ ما انا حبيت وعشقت كمان اخدت منه ايه الحب ده؟؟ اقولك اخدت ايه؟؟ اخدت تعب ما بينتهيش.. اخدت تضحيات كتير ملهاش اي لازمه.. قدمت تنازلات كتيره جدا.. جيت علي نفسي كتير جدا... جيت علي اهلي كتير جدا.. امي كانت هتموت بسبب حبي ده... هو ده اللي انتي بتطلبيه؟؟؟ انا مش فاهم انتي ناقصك ايه؟ اهتمام وبهتم بيكي... بشتاقلك وانتي بعيد... ما بستحملش زعلك... بقدرك وبحترمك ... زعلتك اه بس مستعد اعتذرلك علي غلطي قدام الكل... ايه اللي ناقصك تاني هاه؟؟

فارس بينزف جامد وايمان بتعيط وهو بيتكلم وهيا بترجع لوري وحست ان الضعف قصاده مش هيجيب نتيجه ابدا فوقفت في وشه

ايمان: ناقصني قلبك

فارس: بطلي طمع معاكي عقلي واعتقد ان العقل اهم مليون مره عن القلب

ايمان زعقت: لا طبعا قلبك اهم

فارس: العقل هو اللي بيسيطر علي القلب

ايمان: لا طبعا لو ده صح مكنتش اتجوزت هيام.. مكنتش استحملت كل اللي انت قولت عليه... مكنتش انا اتجوزتك... عمر ما كان العقل المسيطر.. بدليل اهو انك بتقول ان عقلك معايا بس انت مش عارف تكسبني

فارس: لانك طماعه... هل لو قلعت الدبله ده معناه مثلا اني بحبك؟؟ هو ده الدليل اللي انتي عيزاه؟؟

ايمان: بغير عليك

فارس: من ايه؟ من دبله لابسها من خمس سنين ملهاش قيمه او معني

ايمان: ولما مالهاش قيمه متمسك بيها ليه؟؟؟ انت غيران علي مراتك علشان افتكرت انها من خمس سنين في دخلتكم كانت واثقه زياده في نفسها وهتتجنن لما شكيت مجرد شك انك مش اول واحد في حياتها... غيران عليها علي الرغم انك مطلقها من تلات سنين ومستغرب اني مراتك حاليا وغيرانه انك لابس دبله طليقتك ومش لابس دبلتي انا.. انا مراتك... باي منطق انت بتتكلم؟؟

فارس: مش هقلعها وامشي لو عايزه... اتفضلي

ايمان: مش همشي واتفضل ارتاح خليني اعرف احاول اوقف نزيفك ده

فارس: مش هرتاح

ايمان: انت فعلا ساعات بتكون غبي والذوق مش هينفع معاك

زقته ورجعته لوري وشدته علي السرير ورقدته وهو من كتر تعبه مقدرش ولا يقاومها ولا يقوم من تاني

منيره وفرح وعم سيد واقفين في حاله ذهول من اللي بيحصل قدامهم...

ايمان مسكت فوطه صغيره وضغطت بيها علي جرح فارس اللي بيقاوم الظلمه اللي بتهجم عليه...

صمت بيقطعه دموع الكل سواء ايمان او فرح او منيره

اخيرا فارس غمض عنيه وايمان افتكرته غمضهم من الالم... ولما طول من غير ما يفتحهم

ايمان: فارس... فارس

حركت وشه بايدها بس هو ما فتحش عنيه.. فرح قربت وبدئت تحاول تصحيه بس ما استجابش

هنا مجدي دخل بالدكتور اللي جاي يجري معاه

الدكتور: اغمي عليه من امتي؟

ايمان: دقايق

الدكتور كلم الممرضه اللي معاه وبدأ يديله حقن ويفوقه.. قص الشاش اللي علي الجرح واول ما ايمان وفرح شافوا الجرح عيطوا.. كان جرح كبير مفتوح

الدكتور: ايه اللي فتح الجرح بالشكل ده؟؟ هو عمل ايه؟ لو سمحت باشمهندس مجدي هحتاج منك شويه حاجات من الصيدليه بسرعه ممكن؟

مجدي: طبعا

مجدي نزل يجيب الحاجات اللي الدكتور طلبها والدكتور بدأ يخيط من تاني جرح فارس والممرضه بتساعدوا

الدكتور: ياريت ما يفوقش لحد ما اخلص لانه مش هيستحمل الالم..

وهو بيخيط فارس بيفوق واول ما فتح عنيه ايديه بتلقائيه رايحه للجرح..

الدكتور بص لايمان: امسكيله ايديه وحاولي تخليه هادي بسرعه

فارس عايز يقوم بس ايمان قعدت جنبه وحطت وشها في وشه ومسكت ايديه

ايمان: اهدي اهدي ما تتحركش

فارس مش قادر يستحمل الالم وشكله غني عن اي كلام

ايمان: معلش استحمل الدكتور بيخيطه وعلشان كده انت تعبان... قرب يخلص اهو معلش استحمل

كانت دموعها نازله علي وشه وهو شد ايده من ايدها واتفاجئت ايمان انه بيمسح دموعها

فارس: ما تعيطيش

شويه بسيطه وغمض عنيه تاني

ايمان: فارس

الدكتور: سيبيه.. كده احسن

خلص الدكتور ولفله الجرح من تاني وعطاه حقن ومسكنات وطلب من الممرضه تفضل معاه باقي اليوم ولو في اي جديد تخبر الدكتور..

الدكتور مشي ومجدي كمان استأذن يروح ويرجع تاني بس يطمن علي بيته

وابو ايمان استأذن هيمشي بس منيره وقفت وشدت ايمان بره وقفلت الباب علي ابنها

ايمان: في ايه يا ماما؟؟

منيره: امشي مع ابوكي

ايمان وفرح وعم سيد الكل مستغرب

فرح: بتقولي ايه يا ماما؟؟

منيره: اللي سمعتوه.. امشي مع ابوكي

ايمان: انتي بتقولي كده ليه؟

منيره لاول مره تزعق كده : مش انتي كنتي بتهدديه انك هتمشي انا اهو مكانه بقولك امشي... ما تقعديش يا ستي غصب عنك... انا اخدم ابني بعنيا... ومش عايزه خدمتك اللي انتي بتمني عليه بيها.. مش انتي ماسكاه من ايده اللي بتوجعه وبتستغلي حبه ليا انا اهو بقولك امشي.. انا عارفه انه اتجوزك علشاني... عارفه لما فرح قالتله عليكي كان هيتجنن عارفه ليه لانه استخسرك في نفسه.. هو استخسرك في نفسه وشافك كتيره قوي عليه بس انا دلوقتي شايفه انك انتي ما تستاهليش ضفره

فرح: ماما انتي بتقولي ايه بس اهدي.. وصلي علي النبي كده

الكل قال عليه الصلاه وافضل السلام

ايمان: انا بحبه وحضرتك عارفه ده كويس

منيره: لا انا مش عارفه انا ليا اللي شايفاه بعيني وانا شايفاه هو لسه برضه بيجي علي نفسه كتير

عم سيد: هو اللي بيجي علي نفسه برضه يا ام فارس؟ دلوقتي انتي بتغلطي بنتي؟؟ دلوقتي هيا اللي وحشه؟؟ يالا ايمان.. يالا يا بنتي نمشي

منيره: حط نفسك مكاني يا ابو ايمان... تخيل بنتك تعبانه ولاقدر الله بتموت وبتنزف وابني جاي بدال ما ياخدها في حضنه ويطمنها عمال يتخانق معاها علي تفاهات وشايفها بتنزف قدامه ولا هامه ومكمل خناقه هتعمل ايه وخليك حقاني؟؟؟ هاه؟ مهما يكون غلط في حقها عملها ايه هو... اتنرفز علي حفله عملتها؟؟ هو ده يستاهل اللي عملته فيه؟؟ وبعدين اعتذرلها بدل المره الف وقال مستعد يعتذرلها قدام الكل عايزه ايه تاني؟؟؟ ده انتي غلبتي هيام بكل عيوبها

ايمان رفعت دماغها وبصت لحماتها باستنكار

منيره: ايوه مستغربه ليه؟ هيام علي طول بكل العبر اللي فيها كنت ديما بشوف فارس مبسوط وسعيد معاها ايوه كانت وحشه معانا بس ده يمكن لانها كانت عيزاه هو وبس مش عايزه عيلته وامه معاه.. ولو الظروف كانت غير الظروف كان ممكن عمرهم ما تطلقوا... كانت ديما بتتفنن ازاي تسعده وتخليه ديما يحبها وانتي بتتفنني ازاي تنكدي عليه وازاي تخليه ديما زعلان وازاي جو الكأبه ما يفارقش البيت وفي الاخر تقولي انك بتحبيه اي حب ده؟

ايمان: انا وحشه قوي كده؟ انا وحشه للدرجه دي؟؟ انا فعلا معدتش قادره اقف قصاد شبح هيام اللي مسيطر علي البيت كله... كنت متخيله ان فارس بس اللي بيقارني بيها طلع البيت كله... طالما كلكم عايزني امشي فهمشي

يدوب هتتحرك بس فرح وقفتها

فرح: ايمان استني.. ماما من خوفها علي فارس قالت الكلام ده.. انتي عارفه هيا بتحبك قد ايه؟ وبعدين لو مشيتي فارس مش هينسهالك ابدا انتي لازم تفضلي جنبه في تعبه اوعي تسمحي لحد يدخل بينكم او يفرقكم عن بعض.. فارس محتاجلك وقالهالك خليكي جنبي... لو اتخليتي عنه في الوقت ده هتخسريه

ايمان: علي اساس اني كسباه؟ انا اصلا خسراه

فرح: لا طبعا مكنش كل يوم والتاني يجيلك ويقولك ارجعي بيتك هو محتاجك واعترفلك بده.. خليكي يا ايمان

ايمان: ماما عايزاني امشي.. مش هقعد في بيتها غصب عنها

منيره بنرفزه: بقولك ايه ما تعملنيش حجتك انتي اللي عماله تتخانقي مع جوزك وتقوليله همشي عايزه تقعدي انتي حره ده بيت جوزك

ايمان دخلت اوضتها وغيرت هدومها وقعدت جنبه تعيط وتدعي انه يقوم بالسلامه

فارس كل شويه يفوق وينام تاني... فضل يومين بينام اكتر ما بيصحي وشويه شويه بيتحسن وما بيحاولش يتكلم في اي شيئ خاص

ايمان فضلت طول الوقت جنبه بتعمله اي حاجه يطلبها او ما يطلبهاش... حتي الاكل بتأكله

بعد كذا يوم

فارس: انا بقيت كويس يا ايمان

ايمان: طيب الحمد لله

فارس: لو انتي قاعده معايا علشان تعبان فانا بقيت كويس

ايمان: يعني انت عايزني امشي؟؟

فارس: انا كنت كل يوم بروحلك البيت علشان ارجعك

ايمان: طيب امال عايزني امشي ليه دلوقتي؟؟

فارس: انا مش عايزك تمشي انا بقولك ما تفضليش غصب عنك

ايمان: انا فاضله لاني بحبك يا فارس بغض النظر عن انت احساسك ايه ناحيتي

فارس: احساسي اني محتاجلك وعايزك علي طول جنبي ومش عايزك تبعدي عني.... ايمان سيبيني براحتي وانتي هتلاقيني قلعتها بنفسي بس سيبيني انا اقلعها لاني عايز اقلعها مش لانك طلبتي مني اقلعها

ايمان: براحتك.. اللي انت مرتاحلو اعملو

سندت علي صدره

فارس: ما تريحيش قوي لاني لسه تعبان

ايمان: لامتي بقي كفايه

فارس: حاضر كفايه.. استني ادوس علي زرار stop ايه ده مش شغال تصدقي

ايمان: انت غتيت قوي علي فكره

فارس: انا برضه.. ولا انتي... تعالي تعالي في حضني

قربت منه ونامت في حضنه

ايمان: هو انت مش قادر خالص كده؟

فارس ابتسم: مش قادر لايه بالظبط.؟ عايزه ايه انتي؟

ايمان: يعني انت مسموحلك تسأل السؤال ده عادي لكن انا اسأله تقولي هيا دي حاجه تتقال؟؟

فارس ضحك: برضه عايزه ايه؟

ايمان: تعبان قوي؟

فارس: مش عارف يا ايمان... انا مش عارف...

فارس اتحسن تماما ونزل شغله واحده واحده والحياه استتبت نوعا ما... كان في شغله مره وايمان راحتله

مجدي: ايمو ازيك

ايمان: الحمد لله امال فارس فين؟

مجدي: هناك تحت العربيه

ايمان: طيب رايحالو بعد اذنك هو ينفع تنادي للي جنبه ده

مجدي: ما انصحكيش

ايمان: ليه؟

مجدي: هيام عملتها قبلك وما تقبلش دخولها تحت العربيه معاه

ايمان: انا غير هيام

مجدي:براحتك... حسن ولا يا حسن تعال ياد ثواني

حسن خرج من جنب فارس وايمان راحت ونامت علي الحاجه اللي بيرقدوا عليها بعجل وزقت نفسها جنبه

فارس يدوب بيتلفت شافها

فارس: بتعملي ايه هنا؟ اتجننتي ولا ايه؟ اطلعي يالا

ايمان: لا مش طالعه

فارس: ايمان مش بهزر علي فكره اتفضلي

ايمان: ولا انا بهزر... المهم ركز بقي.. عايزه اعرف انت بتعمل ايه؟ يعني ايه اللي بيعجبك في النومه تحت العربيات كده كتير.. فهمني بتعمل ايه؟

فارس: ليه؟

ايمان: عايزه افهم في مجالك المفضل.. علمني ولا ما تعرفش؟؟

فارس: هتفهمي يعني؟

ايمان: جربني!!!

بدأ فارس يشرحلها كل حاجه يعلمها وايمان كانت بتستوعب معاه وبدئت معاه هوايه جديده وبقت كل يوم بتنزل معاه بعد ما تخلص شغل وتفضل معاه لحد ما يروحوا مع بعض... طلبت منه يعلمها السواقه

فارس كان حابب فكره انه يعلم ايمان وقرر انه يعملها حفله يعتذرلها فيها قدام الكل... طلب من فرح تعزمله كل اللي كانوا موجودين في عيد الميلاد وجهز معاها كل حاجه واحتار يهاديها ايه واخيرا استقر علي الهديه

اليوم ده اخدها وخرج وساب مجدي ونجاه وفرح يجهزوله الحفله بكل شيئ طلبه

فارس اخد ايمان وخرج اشترالها فستان جميل وخلاها تلبسه واخدها كوافير واستناها لحد ماخرجت ملكه جمال لدرجه انه مكنش مصدق نفسه....

اخدها وروح وهناك اول ما فتح الباب كانت الدنيا ظلمه

ايمان: هو الفيوز ضاربه ولا ايه؟ الشارع كله منور

فارس: انا عارف... نوري النور كده

ايمان نورت النور وساعتها الكل

##### مفاجأة #####

وفعلا كانت مفاجأة لايمان اللي ما صدقتش نفسها وبصت لفارس ودموعها في عنيها

فارس: اوعي تعيطي انا صارف قد كده علي الميكب ده اوعي تبوظيه

ايمان ضحكت وهو ضمها لحضنه

ايمان: انت عامل حفله ليا؟؟ ليه؟ انت بتكره الحفلات

فترس: اعياد الميلاد بس وبعدين حبيت اعتذرلك قدام الكل علي جنوني وغبائي المره اللي فاتت ( بص للناس) واعتذر لكل الموجودين علي تهوري بالشكل ده معلش بقي اعذروني

ايمان حضنت فارس جامد وكانت حفله احلي من الخيال...

فارس اخدها علي جنب

فارس: عندي ليكي هديه

ايمان: انت احلي هديه مش عايزه حاجه تاني

فارس: يعني ارجعها؟؟

ايمان: لا طبعا انا بجاملك...

فارس ضحك وطلع علبه صغيره علبه خاتم وعطاهالها

ايمان ابتسمت واخدتها وفتحتها واول ما شافت اللي جواها بصتله مش مصدقه

ايمان: بجد؟؟

فارس: بجد اعملي فيها ما بدالك

ايمان: اخيرا قلعتها

فارس: متأخر احسن من ما فيش مش هتلبسيني بقي دبلتك؟

ايمان بدموع فرحه : طبعا لحظه

دخلت وجابت دبلتها وهو دخل وراها لبستهالو وباسها بحب.... فضلوا مع بعضهم جوه وسايبين الناس بره وهيا عايزه تفضل معاه مش عايزه اي حد ولا اي شيئ يبعدهم تاني...

فرح دخلت وحمحمت فبصولها الاتنين

فرح: ممكن تأجلوا الرومانسيه دي لبعد ما الناس تمشي؟ الكل بيسأل عليكم بره

فارس: اوكي خارجين

طلعت وسابتهم وهو بص لمراته: نخرج ولا اطلع اطفشلك الناس اللي بره؟

ايمان ضحكت: لا نخرج مش كل مره

اخدها وخرج وايدها في ايده وماسبش ايدها نهائي طول الحفله كلها لحد ما كل الناس مشيت واخيرا بقوا لوحدهم في اوضتهم...........

ايمان صحيت قبل فارس وحضرت فطار واخدته للسرير لفارس وصحته

فارس: صباح الخير يا قمر ايه ده؟ فطار في السرير؟ لا انا مش واخد علي الدلع ده

ايمان: اتدلع براحتك عليا

فارس اخدها في حضنه وفطروا مع بعض

فارس: امي صاحيه؟؟

ايمان: لا بصيت عليها كانت نايمه حضرتلها الفطار وحطيته جنبها منين ما تصحي تفطر

فارس: ربنا يخليكي ليا بقولك ايه صح؟

ايمان: قول حبيبي

فارس: تعرفي تاخدي من شغلك اجازه اسبوعين كده؟

ايمان: اجازه؟؟ اشمعني؟؟

فارس: تعرفي ولا لأ؟

ايمان: اه اعرف عندي شهر اجازه ما اخدتش منه غير اسبوع بتاع جوازنا ممكن اخد لحد 3 اسابيع

فارس: طيب خديهم وبلغيني هيبدؤا امتي؟

ايمان: انت عايزهم يبدؤا امتي؟؟

فارس: هو انتي بتسألي كتير ليه؟ بلغيني اجازتك هتبدأ امتي بس كده؟

ايمان: حاضر هشوف النهارده وابلغك

نزلوا اشغالهم والكل كان بيبص لايمان بحسد علي جوزها اللي عملها الحفله بالشكل ده...

فارس في شغله مع مجدي

فارس: بقولك يا مجدي انا هاخد اسبوعين كده مش هاجي فيهم الشغل

مجدي: اشمعني خير؟

فارس: زي ما تقول كده نويت اعمل شهر عسل متأخر

مجدي: ياه اخيرا افتكرت؟؟ ان كان كده ماشي... ايمان تستاهل كل خير

فضلوا ساكتين شويه واتكلموا في امور الشغل وفجأه مجدي سأل

مجدي: هو انت بتحب ايمان يا فارس؟؟ ولا مجرد سلمت بالامر الواقع؟؟ ولا تعود ولا احتياج؟؟

فارس فضل ساكت شويه: هتصدقني لو قلتلك معرفش!! معرفش اذا كنت بحبها ولا اتعودت علي وجودها!!! هيا بقت شيئ اساسي وضروري مبعرفش استغني عنها.. مبعرفش تبعد عني... بحب فيها حاجات كتيره... لكن حب حب مش عارف؟

مجدي: يعني لو هيام جتلك مثلا وقدمتلك فروض الولاء والطاعه هترجعلها ولا هتفضل مع ايمان؟

فارس: رجوع لهيام ما اعتقدش ابدا... ايوه كنت بحبها بس ارجعلها تاني ما اظنش

سؤال فعلا مهم هل فارس ممكن يرجع لهيام لو ظهرت من تاني ولا هيا فعلا صفحه واتقفلت نهائي

ايمان اخدت اجازه زي ما فارس طلب وهو فاجئها بانه هيعملها شهر عسل متأخر وكانت فرحتها ما تتوصفش ابدا.. اخدها وسافروا واخدوا تلات اسابيع فسح قربوهم كتير من بعض.. فارس علم فيهم ايمان السواقه وبقت محترفه زييه..

موضوع واحد حاليا شاغل ايمان وبيطير النوم من عينها وهو تأخير الحمل... فكرت كذا مره تروح لدكاتره من وري فارس بس بتتراجع...

فضلت مستمره تروح مع فارس الورشه وتتعلم كل حاجه تخص العربيات وعجبها مجال العربيات جدا وبقت بتعرف تتكلم مع فارس في المجال اللي بيعشقه ويرسموا خطوط المستقبل مع بعض

في يوم كانت مع فارس في الورشه وكان شكلها تعبان وكل شويه فارس يطلب منها تروح وهيا رافضه لحد ما اصر انها تمشي وفعلا مشيت بس دقيقه وواحد من رجاله فارس في الورشه جه يجري ينادي عليه

فارس: في ايه يالا بتنادي كده ليه؟

حسن: مدام ايمان وقعت في الشارع والناس اتلموا عليها

فارس طلع يجري وفعلا الناس كانت ملمومه ومجدي معاه

مجدي بعد الناس وفارس شال مراته واخدها علي المستشفي ومجدي معاه... وفضل يلوم نفسه انه كان شايفها تعبانه وما اخدهاش هو بنفسه هنا من الاول....

مجدي بيطمن فيه انه ممكن بس تعب وارهاق مش اكتر واخيرا الدكتور طلع والاتنين راحوله

الدكتور: مين فيكم جوزها؟؟

فارس: انا يا دكتور خير؟ مراتي مالها؟

الدكتور:....

ونكمل بكره

توقعاتكم

ShiMoOo

الحلقه 14

الدكتور: مين فيكم جوزها؟؟

فارس: انا يا دكتور خير؟ مراتي مالها؟

الدكتور:مراتك عملنالها تحاليل كتير ونسبه السكر عاليه جدا في جسمها ... هيا بتاخد علاج ايه للسكر ؟؟

فارس : سكر ؟؟ مراتي معندهاش سكر اصلا !!!

الدكتور : ازاي ؟؟. السكر التراكمي بتاعها عالي جدا معني كده ان بقالها اكتر من اربع شهور السكر عالي اكيد تعبت ؟ اكيد اشتكت ؟ اكيد لاحظتو ان في حاجه مش مظبوطه ؟

فارس : مراتي كويسه النهارده اول يوم تتعب

الدكتور : النهارده جسمها انهار مش تعبت .. جسمها معدش مستحمل فانهارت .. بعدين ازاي كويسه ؟؟ وازاي ملاحظتوش ؟؟ انتو متجوزين بقالكم قد ايه ؟؟

فارس : يعني حوالي عشر شهور

الدكتور : يعني مش جديد .. في حمل حصل ؟؟

فارس : لأ

الدكتور : مسألتوش نفسكم ليه الحمل اتأخر ؟ مكشفتوش ؟؟ ما روحتوش لدكاتره ؟؟

فارس اتنرفز : اوكي خلاص عرفت ان مراتي تعبانه خلاص ؟ دلوقتي بقي حالتها ايه ؟ ولا هتفضل اليوم كله تقوله معملتوش وما سويتوش ؟؟

مجدي : اهدي يا فارس مش بيستفسر منك !! سوري يا دكتور معلش اعذره

الدكتور : حاليا دكتوره النسا هتدخلها وتبقي تطمنكم عليها بعد اذنكم

فارس : لحظه !! دكتوره نسا ليه ؟

الدكتور : لان مراتك حاليا عندها نزيف فمحتاجه دكتوره نسا تقولنا سببه ايه ؟

مجدي : ممكن كان حمل وسقط ؟؟

الدكتور : لا مش حمل ... الدكتوره اكيد هيبقي عندها معلومات اكتر بعد اذنكم

سابهم في حاله غير الحاله ومجدي مش عارف يقول ايه لفارس

فارس : ممكن تكون كانت تعبانه ومقالتش ؟؟ ولا ايه؟ ايوه كذا مره قالت مصدعه بس عادي ولا انا اللي شفتها عادي ؟؟

مجدي : فارس ... اهدي .. كلنا بنقول مصدعين كتير محدش من صداع بيروح لدكاتره فما تأنبش في نفسك ودلوقتي شوف هتكلم اهلها ولا هتعمل ايه ؟

فارس : هكلم هدي اكيد عارفه اذا كانت تعبانه ولا لأ .. ايمان لو هتشتكي لحد هيكون هدي

اتصل بهدي وبلغها اللي حصل وخلال نص ساعه كانت عنده واكدت ان ايمان عمرها ما اشتكت من حاجه ابدا ومعندهاش سكر ومعندهاش امراض

الدكتوره خرجت من عندها وراحتلهم

فارس : ايه الاخبار مالها مراتي يا دكتوره ؟

الدكتوره :النزيف عباره عن دوره عاديه متأخره هيا صادفت بس مع تعبها حاليا وطبعا لارتفاع السكر فهيا اشبه بالنزيف فاحنا اول حاجه لازم السكر ينزل لمعدله الطبيعي

هدي : هيا معندهاش سكر اصلا يا دكتوره ؟

الدكتوره : التحاليل بتقول غير كده ... السكر عالي جدا والتراكمي عالي جدا وده سببلها مشاكل كتير جدا هيا ان شاء الله هتبقي كويسه بس محتاجه متابعه معانا شويه

فارس : طيب هيا حالتها ايه دلوقتي بالظبط؟

الدكتوره :طبعا لان السكر بقاله فتره عالي في الدم واتساب من غير علاج ، ده سببلها تراكم الحمض الكيتوني السام في الدم والبول، وعمل حاجه اسمها الحماض الكيتوني السكري (بالانجليزية: ketoacidosis).

وعلشان كده ممكن نلاقي اعراض كتير تظهر زي ::: تصبح رائحة الفم مثل رائحة الفواكه. الشعور بالغثيان والتقيؤ. قصور في التنفس. جفاف الفم. الضعف والإعياء. الاضطرابات النفسية. الغيبوبة. ألم في البطن.كل الحاجات دي هيا معرضه ليها دلوقتي فخلينا ما نسبقش الاحداث ونظبط السكر الاول

فارس : هتظبطوه بايه ؟؟انسولين ؟؟

هدي : لا ما اعتقدش هيبدؤا بانسولين علي طول صح يا دكتوره ؟

الدكتوره : اعتقد هيبدؤا بالانسلوين اتكلموا مع دكتور زهير اللي هيتابعها انا من ناحيتي هكتبلها علي حاجه تقلل النزيف اللي عندها بس مبدئيا مش هينتهي من غير ما السكر يتعدل بعد اذنكم

سابتهم الدكتوره ومشيت وفارس سابهم ودخل لايمان اللي كانت نايمه او مغمي عليها .. مسك ايدها وباسها وماتخيلش ابدا انها ممكن يجرالها حاجه او تروح منه ابدا ... واكتشف انها غاليه قوي عليه ومش ممكن يستغني عنها ابدا ...

اخيرا اخر النهار فاقت كان الكل عندها وشكلها اتغير تماما و وشها بقي اصفر والتعب والارهاق اتملكوا منها وكأنها عيانه من شهور مش يوم واحد بس والكل مستغرب ايه اللي حصلها ....

فارس ماسبهاش لحظه واحده طول اليوم وهيتجنن عليها وهيموت من القلق وهيا حاسه بده ... الليل اصر ان الكل يمشي وهو هيفضل معاها

ايمان : انت طول النهار جنبي روح ارتاح وتعال الصبح وهدي هتفضل معايا

فارس : انتي بتقولي ايه ؟؟ انتي متخيله اني هسيبك ؟؟ لا طبعا هدي تروح لبيتها ولجوزها وعيالها وانا هفضل معاكي هنا

ايمان : اهي ليله زي ما تكون

فارس قرب منها : انتي مش عيزاني معاكي ليه ؟؟ في ايه ؟؟

ايمان : لا مش كده

فارس : امال ايه ؟ عايزاني امشي ليه ؟

ايمان : مش حكايه عيزاك تمشي بس عايزه هدي معايا مش اكتر

فارس : ايوه عايزاها في ايه ؟ ايه اللي ممكن هدي تعمله وانا مش هعرف اعملهولك ؟

ايمان اتحرجت من فارس ومش عارفه تقوله ايه ؟

ايمان : حاجات كتير يا فارس ... معلش

فارس : لا ما فيش معلش اختك هتروح واللي انتي محتاجاه انا هعملهواك ... انا همشي الكل

ايمان : استني بس فارس ... فارس

سابها وخرج ومشي فعلا الكل ورجع لمراته

فارس : خدي جنب بقي خليني اقعد جنبك ما تاخديش السرير كله

ايمان : ليه ما مشيتش انت ؟؟

فارس : عايزه الصراحه ؟؟

ايمان : قول

فارس : الممرضه بتاعت الليل مزه طحن

ضربته وهو ضحك جامد عليها وعلي شكلها

ايمان : قوم امشي من جنبي

فارس بيضحك : لا لا خلاص ... بهرج معاكي والله

ايمان زعلت وكشرت

فارس : طيب والله بهرج انا ما شفتش ممرضات اصلا لسه ... انا فضلت علشان عايز اقعد جنبك مش اكتر ومش عايزك تحتاجي لحد غيري مهما يكون اللي انتي محتاجاه انا هعمله مش عايزك تعملي حدود بينا او تتكسفي مني خلاص ؟

ايمان : اقولك ايه بس ؟

فارس : ما تقوليش بس اول ما تحتاجي حاجه قوليلي مش اكتر من كده

ايمان : احنا مش بينا العلاقه دي يا فارس

فارس : امال احنا بينا ايه ؟؟

ايمان : يعني انت هتدخلني الحمام مثلا وتغيرلي هدومي مثلا ؟

فارس : يا بنتي انا جوزك انا اقربلك من اختك ... فاهمه ؟ انتي بتبقي في حضني جوايا بنكون كيان واحد انا وانتي كيان واحد انتي مراتي

ايمان : انت بالنسبالي كده لكن ما تخيلتش ان انا كده بالنسبالك

فارس : انتي اكتر من كده ... انتي اغلي ما عندي يا ايمان وسيبك من الهبل اللي قولتهولك قبل الجواز انتي اساس حياتي ومحورها

ايمان نامت في حضنه وغمضت عنيها هيا مش عايزه اكتر من كده ... هو ممكن ماقلش بحبك بس كل تصرفاته واعماله بتقولها وده مكفيها

شويه الباب خبط وهيا اتعدلت بس فارس شدها في حضنه ورجعها مكانها

دخلت ممرضه واول ما فارس شافها ضحك جامد وده لان الممرضه كانت حلوه ومدلعه نفسها وميكب وبرفان وحاجه اخر دلع وايمان ضربته وضحكت ايمان : قوم من جنبي

فارس : طب والله ما كنت اعرف ولا شوفتها

ايمان : كداب

فارس : والله ابدا وحياتك انتي

الممرضه : في ايه ؟ انا مش فاهمه حاجه ؟؟

فارس : لا مفيش خير ؟

الممرضه : هديها الانسولين والعلاج بتاعها

فارس دور وشه بعيد لان مش عايز مراته تاخد انسولين او هو عارف ان اللي بياخد انسولين بيستمر حياته كلها عليه وهو مراته صغيره لسه

الممرضه خرجت وسابتهم وايمان حست بفارس وضيقه

ايمان : بقي ماشفتش الممرضه

فارس: والله كمان مره كنت بهزر ما تخيلتش ابدا انها هتبقي مزه بجد

ايمان : يعني هيا مزه بجد ؟؟

فارس : هيا مزه الحق يتقال لونه ودلوعه مدلعه نفسها يعني من الاخر

ايمان : احلي مني يعني ؟؟

فارس : مفيش حد في الدنيا دي كلها احلي منك في عيني

ايمان اتجرأت ونطقت : ولا حتي هيام ؟؟؟

فارس اتردد كتير : مش هكدب عليكي واقولك ان هيام مش حلوه لا هيا كانت حلوه وحلوه جدا كمان بس حلاوه خارجيه لكن من جواها مفيش حاجه حلوه

ايمان : وانا ؟؟

فارس : انتي حلوه من بره ومن جواه

ضحكوا: لا بجد يا ايمان انتي جواكي حلو وده مخليكي حلوه بجد ومخلي كل اللي حواليكي بيحبوكي وبيقدروكي لكن هيام محدش ابدا حبها غيري انا علشان كنت متخلف .. مفيش اي شيء في هيام يقلقك او يخليكي تديها اهميه يا ايمان ... مفيش غيرك انتي وبس ....

اخدها تاني يوم وخرج من المستشفي من اصرارها انها هتكمل العلاج في البيت وهو مرضيش يضغط عليها لان هو نفسه بيكره المستشفيات جدا

اصرت انها تروح بيت ابوها وهو بيحاول يقنعها

فارس : وبعدين معاكي ؟؟

ايمان : مين ابسط حاجه هيعمل اكل ؟؟ انت ولا والدتك ؟؟ والدتك تعبانه يا فارس

فارس : هجيب اكل من بره ؟هتصرف ؟لكن انتي ما تخرجيش بره البيت

ايمان : ما تسيبني براحتي

فارس : ومن امتي راحتك بعيدعني ؟؟

ايمان : راحتي مش بعيد عنك بس انا مش عايزه اتعب حد معايا

فارس : امال احنا بس نتعبك ؟ مش هتخرجي من البيت وده اخر كلام عندي

فعلا رفض نهائي انها تروح بيت ابوها وطلب من اخته انها تيجي تعمل غدا وتمشي واخته ما اتأخرتش وهو بيقوم باي حاجه تانيه ... كانت بتتعب كتير والعلاج مش جايب نتيجه فكان اخر ما بيزهق بياخدها في حضنه وهيا تعيط

كذا يوم عدي علي الحال ده

فارس : تعالي نروح لدكتور غير زهير ده ونشوف غيره ...في مستشفي ام هيام اخدتني فيها مره وفيها دكاتره كويسين تعالي نروحها

ايمان : اكيد هتبقي غاليه

فارس : نعم يا اختي ؟؟ مافي داهيه الفلوس المهم انتي بكره الصبح هاخدك وهروح اتفقنا ؟

فعلا اخدها وراح وهناك عملولها كل التحاليل من تاني وللاسف نفس الكلام وطلبوا منها تستمر علي الانسولين ... هناك فارس شاف الدكتوره اللي حماته اخدته عندها وهيا شافته وعرفته

الدكتوره داليا : انت جوز هيام صح ؟؟

فارس : صح بس احنا اتطلقنا من زمان !!

الدكتوره بصت لايمان

فارس : دي مراتي

الدكتوره : شكلها دبلان قوي خير مالها ؟

فارس : اذ فجأه تعبت وقالو ان عندها سكر

الدكتوره : في حمل ؟؟

ايمان : لا مفيش

الدكتوره : ساعات الجسم بيتلخبط ويعمل حاجه شبيه بالسكر وبتكون عرضيه وتروح فما تقلقوش لو هيا مش عندها سكر اصلا ممكن يبقي شيء عرضي ويروح زي سكر الحمل كده ... بيستمر فتره الحمل ويروح

ايمان : طيب هو ممكن يكون سبب تأخير الحمل ؟؟

الدكتوره : السكر في حد ذاته ما يأخرش الحمل بس اللي سببلك اللخبطه دي ورفعلك السكر هو ممكن اللي سببلك تأخير الحمل ... لو حابه اكشف عليكي تعالي

ايمان بصت لفارس : براحتك

ايمان : لو ينفع يا ريت !!!

فارس : هيا عندها نزيف مش بيقف من ساعت ما تعبت بقالها اكتر من اسبوع اهو

الدكتوره : علشان السكر عالي لازم ينزل الاول

فارس : كل واحد يقولي السكر عالي وما بتنزلهوش

الدكتوره: حاجه متراكمه من شهور طبيعي هتاخد وقت لحد ما ترجع لطبيعتها ولا ايه ؟ المهم اتفضلي اشوفك

كشفت عليها وخرجت لفارس

فارس : ايه ؟؟ في جديد ؟

الدكتوره : الرحم بتاعها كويس والمبايض كويسه مش شايفه اي اسباب ظاهريه لتأخير الحمل .. انت عملت تحاليل ؟؟

فارس : انا ؟؟ لأ معملتش

الدكتوره : طيب عندك مانع تعملها ؟؟

فارس : لا طبعا

الدكتوره : طيب فرصه تعملها دلوقتي ولو تحاليلك كويسه يبقي بعد ما المدام تبقي كويسه وكل الامور ترجع لطبيعتها نشوف الوضع ايه ؟

فارس : تمام

فارس التحاليل بتاعته طلعت سليمه وايمان فضلت اكتر من اسبوعين كمان تعبانه من غير اي تحسن لدرجه ان فارس هيتجنن ومش عارف يعمل ايه ؟؟

والدكاتره بيقولو نصبر لان معندهمش كلام تاني يقولوه

فارس كان في صلاه الجمعه وبيسمع الخطبه وساعتها الخطيب كان بيتكلم عن الصدقه واهميتها

وساعتها جمله واحده رنت في دماغ فارس

""داوا مرضاكم بالصدقه "

الخطيب فضل يتكلم وفارس انتبه قوي

""قال النبي صلى الله عليه وسلم "داووا مرضاكم بالصدقة " حسنه الألباني في صحيح الجامع

فكم من مريض كانت الصدقة سببًا بأمر الله في شفائه , وكم من مبتلى عافاه الله والحقائق على ذلك واضحة والأدلة قاطعة , ووالله إن بيننا من كانت الصدقة سببا في شفائه """"

فارس خرج من الصلاه وعرف ازاي هيعالج مراته

قرر انه هيشوف كام واحد محتاجين علاج وهيعالجهم هو وفعلا طلع علي مستشفي ابو الريش وهناك بدأ يدور ويشوف حد مسكين وللاسف لقي كتير جدا محتاج لعلاج واتصدم بكميه الناس اللي مش لاقيه تعالج عيالها

ساعتها اخد قرار انه يتبرع بمبلغ شهريا من دخله للناس دي فقابل مدير المستشفي وبلغه بقراره واتفق معاه انه كل شهر هيبعت اللي يقدر عليه ويتكفل بعلاج كام حاله علي قد ما يقدر

وهو ماشي اللي بيقابله بيديله اللي يقدر عليه لحد ما روح بيته مفيش مليم واحد في جيبه

اول ما دخل البيت سمع صوت حاجه اكتشف انه مفتقدها جدا .. ضحكه ايمان ومامته ..

دخل عندهم وايمان قابلته بابتسامه هو اشتاقلها

فارس : عامله ايه ؟؟

ايمان : كويسه جدا .. مفيش صداع .. مفيش دوخه .. مفيش مغص .. مفيش حاجه

فارس ابتسم واخدها في حضنه واستغرب هو ليه كان ناسي النقطه دي ..

دخل اوضته يصلي ركعتين شكر ويشكر ربنا انه بعتله الخطيب برسالته دي

ايمان : مالك ؟؟ في ايه ؟؟

فارس : مفيش

ايمان : امال بتصلي ايه ؟ انت لسه جاي من الجامع؟؟

فارس : بشكر ربنا انك بقيتي كويسه ولا ايه ؟؟

ايمان : انت بجد بتخاف عليا ؟؟

فارس : انتي لسه عندك شك في ده ؟؟انتي دنيتي

ايمان : اتاخرت ليه روحت فين بعد الصلاه ؟؟

فارس : كنت بعمل حاجات مقصر فيها وغايبه عن بالي والحمد لله ربنا فكرني بيها فعملتها وجيت وما تسألنيش ايه هيا ؟؟

ايمان : مش هسألك

فارس : المهم انك بقيتي كويسه

ايمان : الحمد لله طيب العلاج اخده ولا ايه ؟؟

فارس : لا ما تاخديش حاجه .. العلاج الرباني اضمن سيبك من علاج الدكاتره

ايمان : العلاج الرباني ؟؟ ايه هو ؟؟

فارس : ما تشغليش بالك انتي المهم انك قومتيلي بالسلامه وبس .. خلاص ؟

فارس كلم مجدي وقاله علي قراره بحيث هما الاتنين يخصصوا جزء من دخل الورشه للموضوع ده

مجدي : انت عايز تخلي ربع دخل الورشه تتبرع بيه ؟ اشمعني ايه اللي اوحالك بالفكره دي ؟

فارس : موافق ولا اطلع انا من نصيبي بس ؟؟

مجدي : طبعا موافق انت عايز ثواب لوحدك ولا ايه ؟

فارس : لا مش عايز لوحدي وعلشان كده قولتلك احنا علي الحلوه والمره مع بعض والثواب والعقاب مع بعض برضه

مجدي : بس اشمعني برضه ؟؟

فارس : الامام النهارده في الجامع كانت بيتكلم علي الصدقه

مجدي : ما شاء الله ايمانك مقطع بعضه

فارس : مش الفكره بس هو اتكلم ان اللي عنده مريض يداويه بالصدقه وانا جربت دكاتره كتير مع ايمان ماعدا الطريق ده وساعتها قررت اعالج اي حد واتمنيت ان ربنا يشفي هو ايمان من عنده وتخيل رجعت البيت لقيت ايمان كويسه .. وكأنها ما كانتش عيانه اصلا

مجدي : طيب الحمد لله خلاص نتوكل

فارس :انت ما تتخيلش كميه الناس اللي عندها حد عيان ومش عارفه تعالجه انا ذهلت

مجدي : ربنا يقدرنا علي فعل الخير ويباركلنا في رزقنا

فارس : يا رب

نجاه راحت تزور ايمان تطمن عليها وتسلم عليها لان مجدي قالها انها اتحسنت وتروح تشوفها ... نجاه راحت وقعدت مع ايمان وهزروا وضحكوا

نجاه : بس جميل قوي العلاج اللي فارس جابهولك صراحه جاب من الاخر . ياه كتير بحس ان فارس رومانسي وكيوت كده

ايمان : فارس ؟؟ رومانسي وكيوت ؟؟ الظاهر انك بتتكلمي عن حد معرفوش

نجاه : حرام عليكي انتي ظلماه

ايمان : انا ظلماه ؟ ما علينا مش هرد عليكي وبعدين علاج ايه اللي فارس جابهولي وجاب من الاخر ؟؟

نجاه : العلاج الرباني زي ما هو بيسميه ...

ايمان افتكرت لما قالها الكلمه دي بس معلقتش

ايمان : ايه هو بقي العلاج الرباني ده ؟؟فعلا فارس قالي بس مقاليش ايه هو ؟؟

نجاه حكاتلها الموضوع كله زي ما مجدي حكاه وايمان مكنتش مصدقه ان فارس يعمل كل ده علشانها ؟؟ بقي ممكن يكون فعلا بيحبها ؟؟ هو وقف جنبها وما اتخلاش عنها ابدا .. فارس ده اكبر لغز في حياتها مش قادره تحله او تفهمه .....

كانت فرحتها ما تتوصفش ابدا .. كانت طايره ونفسها لو تشوفه دلوقتي وتقوله انها بتعشقه مش بس بتحبه ... حركات زي دي بتخليه يملك قلبها ..

كانت هتتجنن وتشوفه ومستنياه علي نار لدرجه حماتها كل شويه تقولها زمانه جاي اهدي ....

اخيرا الباب بيتفتح وفارس داخل من الباب وايمان انطلقت وعملت حاجه محدش توقعها ولا فارس ولا منيره .. الكل كان عنده حاله ذهول منها ...

ايمان جريت واتشعبطت في رقبه فارس وحضنته قوي وكأنها بتقوله انا بحبك قوووي ...

منيره ابتسمت وفارس مستغرب

فارس : في ايه ؟؟ انا مش راجع من السفر

ايمان : انا بحبك قوي قوي

جه يتكلم بس هيا باسته وهو اتحرج لان مامته موجوده

منيره سابتهم ودخلت اوضتها وهو مش فاهم حاجه

شدته علي اوضتهم

فارس : طيب اديني فرصه اغير هدوم الشغل واغسل حتي ايديا هتتبهدلي زي كل مره وموضوع الاريال مش نافع

ايمان : انت بتتكلم كتير ليه ؟؟

فارس : انا غلطان مش هتكلم ....

بعد فتره طويله وهيا معاه

فارس : مش هتقوليلي بقي اللي حصل ده ؟؟ مش بعترض انا لاسمح الله بس عايز افهم ايه ده ؟؟ انتي حتي معملتيش حساب ان امي واقفه ؟؟

ايمان اتحرجت وبصت بعيد : بحبك اعمل ايه ؟

فارس : ماشي ما اعترضناش بس برضه ايه ؟؟

ايمان : اصل انا عرفت علاجك ايه هو ؟

فارس : ايه علاجي ده ؟؟

ايمان : اللي انت عملته علشاني ومشوارك بتاع الجمعه وانك تخصص جزء من دخلك لله .. انت ما تتخيلش انت عليت في نظري قد ايه وحبي ليك اتضاعف قد ايه ؟؟

فارس : انتي عرفتي منين ؟؟

ايمان : نجاه قالتلي

فارس : الواطي مجدي ، ما بيتبلش في بوقه فوله

ايمان : انت مكنتش عايزني اعرف ؟؟

فارس : انا مكنتش عايز حد يعرف بس قولتله علشان دخل الورشه ..الحاجات دي مطلوب فيهاالسر والا بتبقي رياء مش خالصه لوجهه الله فالمفروض محدش يعرفها.. ده لدرجه ان بيقول ايدك الشمال ما تعرفش اللي دفعته اليمين ...

ايمان : ما علينا المهم ان انا بحبك وما تقلقش مش هقول لحد

فارس : تسلمي

خرج فارس بعد شويه وراح لامه واول ما شافته ضحكوا الاتنين

فارس : سوري بقي يا ست الكل

منيره : علي ايه حبيبي .. ربنا يسعدكم كمان وكمان ويفرحكم اكتر

فارس : امم اشمعني هيام مكنتيش بتطيقي لو مسكت ايدي قدامك وبتطلعي فيها القطط الفطسانه؟؟

منيره : علشان ايمان بتحبك ببراءه وبجد مش بتغيظ او بتمثل تصرفتها طبيعيه

فارس اتصل بمجدي وشتمه وقاله ان الموضوع يبقي سر مش علني والا ثوابه هيروح

..الايام كانت حلوه وجميله ومستقره وهاديه بينهم

منيره : يا ايمان ؟؟ ايمان ؟؟

ايمان : ايوه يا ماما ؟؟ خير ؟؟

منيره : يا حبيبتي والنبي تدوريلي علي موبيلي مش لقياه وتقريبا فصل شحن

ايمان : هو في اوضتك ؟؟

منيره : والله ما اعرف في اوضتي ولا اوضه فرح امبارح بيت فيها مع البت ملك نادتلي بالليل ورحت الاوضه نمت معاها مش عارفه بقي كان معايا ولا سيبتو في اوضتي .. دماغي لفت يا بنتي !!!

ايمان : سلامتك يا قمر طيب بتدوري انتي ليه ؟؟ انا هشفهولك حاضر ارتاحي انتي

دخلت ايمان اوضه حماتها دورت في كل شبر ما لقتوش ابدا ... خرجت وراحت اوضه فرح وبدئت تقلبها فوق تحت ... السرير كان من النوعيه اللي متقفله من تحت مش مفتوح وفاضي ... رفعت المرتبه تشوفه ممكن وقع تحته من عند المخده .. ولما رفعت لمحته في الارض معرفتش تجيبه نهائي لانه محشور ... زقت السرير وجابته وهيا هترجعه لمحت صندوق صغير لفت انتباهها وفضولها اتمكن منها ... طلعت الموبيل وعطته لحماتها

منيره : تسلمي حبيبتي الهي يريح قلبك

ايمان : تسلميلي يا ست الكل

منيره : رايحه فين ؟؟

ايمان : هرتب الاوضه انا قلبتها علشان الاقيه

منيره : معلش حبيبتي تعبتك

ايمان : تعبك راحه يا ام الغالي

دخلت ايمان وهيا متحفزه تشوف اسرار فرح او حاجه من الماضي بتاعها فضول مش اكتر...

طلعت الصندوق وفتحته وكانت صدمتها فوق ما تتخيل لان السمع حاجه وانها تشوف بعينها حاجه تانيه ... كل اللي بنته مع فارس انهار في اللحظه دي وحست انها رجعت لنقطه الصفر وانها ما اتحركتش خطوه قدام وانها كانت عايشه في وهم كبير جدا .. وهم حب فارس ليها او حتي مجرد احتياجه ليها ... واكتشفت انها اكبر كدبه في حياه

فارس وانها لاشيء ...هيا عايشه في لعنه الماضي

ونكمل بكره

توقعاتكم

ياتري الصندوق فيه ايه ؟؟؟

ShiMoOo

الحلقه 15

طلعت الصندوق وفتحته وكانت صدمتها فوق ما تتخيل لان السمع حاجه وانها تشوف بعينها حاجه تانيه ... كل اللي بنته مع فارس انهار في اللحظه دي وحست انها رجعت لنقطه الصفر وانها ما اتحركتش خطوه قدام وانها كانت عايشه في وهم كبير جدا .. وهم حب فارس ليها او حتي مجرد احتياجه ليها ... واكتشفت انها اكبر كدبه في حياه

فارس وانها لاشيء ...هيا عايشه في لعنه الماضي

الصندوق كان فيه حاجات خاصه جدا بفارس

قميص نوم .. برفان حريمي .. وصور كتير .. صور منتهي الحب والرومانسيه فيهم .. صور عمرها ما هتعرف ابدا توصل للحب اللي شيفاه في الصور دي .. صور ورته انها اوردي خسرانه مهما تعمل .. في شوق ولهفه وحب في الصور دي .. صور استغربت اصلا ازاي فارس بشخصيته دي قبل يتصور في اوضاع زي كده وعريان بالشكل ده .. ازاي قبل ان حد يصور مراته في اوضاع زي دي .. ازاي قبل حد يصوره تحت الدش او في البانيو مع مراته .. محدش بيتصور في اوضاع زي دي .. اوضاع عمرها هيا حتي ما جربتها ... قفلت الصندوق ومش عارفه تعمل ايه !! تواجه فارس ؟؟ تتجاهل الصندوق وكأنها ما شافتوش اصلا ؟ تسيبه وتستسلم بقي ؟؟ تعمل ايه ؟؟ ايوه هيا عارفه انه بيحب هيام بس مش بالطريقه دي ...

صوره واحده بالذات ضايقتها قوي وهيا عنيهم متعلقه بعض وقريب منها قوي وكميه حب في عنيه ما شافتهاش قبل كده ومكتوب عليها اهداء كلماته قطعت قلبها زي السكين

كلمات حب بيهاديها بيها .. كلمات عمرها ما هتسمعها ابدا .. كلمات عشق وهيام لهيام قلبه ...

فضلت كتير مكانها مش عارفه تفكر او تتصرف ..

منيره خرجت وراحت لفرح وهيا فضلت وحدها تستني فارس يرجع ولما رجع جهزت الغدا وقعدت قصاده تبصله بهدوء

فارس : بتبصيلي كده ليه ؟؟ عايزه تقولي ايه ؟؟

ايمان : انت لسه بتفكر في هيام ؟؟

فارس بصلها كتير : بتسألي ليه ؟؟

ايمان : بسأل جوزي بيفكر في واحده تانيه غيري ولا لأ ايه المشكله ؟؟

فارس : لا مش بفكر .. ارتحتي كده ؟

ايمان : انت بتقول كده لمجرد انك تريحني صح ؟

فارس : عايزه ايه يا ايمان ؟انتي عايزه تتخانقي ؟؟

ايمان : انا مش عايزه اتخانق لأ

فارس : طيب خلاص اقفلي بقي .. سيبني اتغدي ممكن ؟؟ جعان ؟؟

ايمان : كل بالهنا

شويه سكتت وبعدها اتكلمت تاني

ايمان : موبيل مامتك كان تايه منها النهارده وطلبت مني ادور عليه في اوضتها واوضه فرح

فارس : ولقيتيه ولا لأ؟؟

ايمان : مالقيتوش في اوضتها لقيته في اوضه فرح

فارس : طيب كويس انك لقيتيه

ايمان : بعد ما قلبت الاوضه كلها فوقاني تحتاني

فارس : معلش بقي اكيد تعبتي بس المهم انه اتلقي

ايمان مستغربه ان فارس بيتكلم عادي ومش مهتم انه مخبي حاجه وجه في بالها تفكير تاني ان ممكن الحاجه تبقي فرح اللي شيلاها او منيره مش فارس ...مين قالها ان فارس هو اللي شايل الحاجه دي ؟؟ ممكن يكون مامته شالتهم كذكري او صور ابنها مش عايزه تقطعهم ؟؟؟ بعد ما كانت هتتكلم سكتت تفكر بدل ما تتهور ....

قامت راحت اوضتها رايحه جايه بتفكر تعمل ايه في الصندوق وتحطه فين ؟؟ ترجعه مكانه ؟؟ تحرقه ؟؟ تديه لفارس وتواجه ؟؟ مش عارفه تتصرف ازاي ؟؟

فارس فتح التليفزيون وقعد قدامه ومستغرب من ايمان وطريقه كلامها وليه بتقوله بالطريقه دي !! وكأنها عايزه تلمحله بحاجه وهو مش فاهم ....

فضل قدام التليفزيون وفجأه افتكر الصندوق فقام بسرعه علي اوضه فرح يشوفه ومالقاهوش وهنا فهم مراته مالها وبتسأل ليه وعايزه ايه ؟؟؟

دخل لمراته الاوضه وبصلها كتير

فارس : فين الصندوق يا ايمان ؟؟

ايمان دورت وشها بعيد وغمضت عنيها ..كان عندها امل انه مش هو اللي مخبيه !!!

فارس : سمعتيني ؟؟ فين الصندوق ؟؟

ايمان : صندوق ايه ؟ معرفش انت بتتكلم عن ايه ؟؟

فارس : فين .. الصندوق .. يا .. ايمان ؟؟

كان بيتكلم بمنتهي الهدوء

ايمان : معرفش صندوق ايه ؟؟؟

فارس : الصندوق اللي لقيتيه في اوضه فرح فين ؟؟

ايمان : اه الصندوق اللي فيه صور حبيبتك ؟؟ رميته في الزباله

فارس : فين الصندوق يا ايمان ؟

ايمان : قولتلك رميته !!

فارس بدأ يتعصب : فين الصندوق يا ايمان ؟؟

ايمان : حرقته ولعت فيه .. واحمد ربنا اني ما ولعتش في الشقه كلها

فارس بيزعق : مش هسأل تاني فين الصندوق يا ايمان ؟؟

سابته وخرجت بره وهو خرج وراها ومسكها جامد من دراعها لدرجه صرخت

فارس : هو فين انطقي ؟؟

ايمان : معرفش .. عايزو ليه هاه ؟؟ مش قلت انها ذكري ؟ مش قلت انك تخطيتها ؟؟ شايله ليه ؟؟ محتفظ بيه ليه ؟؟ ليه يا فارس ؟؟

فارس : ده شيء ما يخصكيش

ايمان بصدمه : ما يخصنيش ؟؟ انا مراتك !! ما يخصنيش ازاي ؟؟

فارس : ما يخصكيش .. حياتي قبلك ما تخصكيش .. انتي ليكي من يوم ما دخلتي البيت ده قبلها بساعه ما يخصكيش.. ذكرياتي .. حياتي ... حبي .. كل ده ما يخصكيش ...

ايمان : لا طبعا اي شيء مرتبط بيك يخصني .. انت كلك علي بعضك تخصني

فارس : هتفضلي كده لامتي ؟؟ لامتي هتفضلي تبصي لنص الكوبايه الفاضي ؟؟ لامتي عدم الرضا ده ؟؟ هاه ؟؟ لامتي هتفضلي تدوري علي اي حاجه تنكدي عليها ؟؟ لامتي هتفضلي تدروي علي اي شيء المهم تحسي انك ضحيه ؟؟ ما ترضي مره بحالك !! ارضي باللي بين ايديكي

ايمان : وانا مش راضيه ؟؟ وبعدين ايه هو اللي بين ايديا ؟؟ وهم ؟؟

فارس : الوهم ده جو دماغك بس ،. انتي عندك زوج بيقدرك وبيحترمك وبيتمنالك الرضا وبيعمل كل اللي يقدر عليه علشان سعادتك لكن كل ده مش مكفيكي بتدوري ديما علي اكتر .. وللاسف حتي اللي بتملكيه هتخسريه باللي بتعمليه ده

ايمان : انا ما كسبتكش علشان اخسرك

فارس : هتعرفي الفرق بس للاسف هيكون بعد فوات الاوان .. ودلوقتي فين الصندوق ؟؟

ايمان : مش هديهولك ... لو السما انطبقت علي الارض مش هتاخده

فارس بيسيطر علي اعصابه بالعافيه

فارس : هاتي الصندوق بالذوق يا ايمان

ايمان : ولو ما عطتهولكش هتعمل ايه ؟؟

فارس : هاتيه وبطلي تستفزيني بالمنظر ده ؟؟

ايمان : لا مش هديهولك

فارس : ايمان !! لاخر مره هقولك هاتي الصندوق

ايمان : ماشي يا فارس ... بس يا انا يا

الصندوق ؟

فارس : تاني ؟؟ تاني بتقللي من نفسك وتحطي نفسك في مقابل حاجه تانيه !! قبل كده خيرتيني بينك وبين الدبله وقولتلك انا ما باجيش كده ..ما تعمليش كده يا ايمان

ايمان : لا هعمل .. يا انا يا الصندوق اختار ؟؟

فارس : هاتي الصندوق

ايمان بصتله مش مصدقه انه هيختار الصندوق علي حسابها

فارس : طالما انتي مستعده ديما تصغري نفسك للدرجه دي فأنا مش هكبرك

ايمان : بتبعني علشان حبه صور ؟؟

فارس : ذكرياتي وانا حر فيها ، اما حكايه ابيعك دي فانتي اللي بتبيعي نفسك مش انا ... مش انا اللي كل شويه احاول الوي دراعك واخيرك بيني وبين اي حاجه ما تعجبنيش .. ده اختيارك انتي مش انا

ايمان : انت فعلا مستعد تسيبني في مقابل الصندوق ده ؟؟

فارس : هاتي الصندوق وخليكي معايا ليه بتحطي نفسك في حاجه زي دي ؟؟ ليه اختار اصلا ؟؟

ايمان : لان انا وهيا ما ينفعش نعيش مع بعض

فارس ضحك : وانتي عايشه معاها ؟؟ انتي فعلا ما تعرفيش تعيشي من غير احساس المظلومه صح ؟؟ براحتك . هاتي الصندوق بقي

ايمان باستسلام : الصندوق جوه في الدولاب .. ما شيلتوش اصلا ومش مخبياه

فارس سابها ودخل اخد الصندوق بعد ما اطمن ان كل حاجه فيه واخده وخرج من غير ولا كلمه ...

وهو بره منيره كلمته وطلبت منه يعدي عليها ياخدها في طريقه وفعلا راحلها وقعد معاهم شويه واخد امه وروح علي البيت وكان البيت هادي

دخل اوضته كانت فاضيه وعرف ان ايمان سابت البيت

منيره : فارس ؟

فارس : ايه يا ست الكل ؟؟

منيره : فين ايمان ؟؟

فارس : في بيت ابوها يا امي .. خير محتاجه حاجه ؟؟

منيره : لا يا حبيبي بطمن .. في حاجه حصلت ؟؟

فارس : لا يا ست الكل مفيش .. روحي ارتاحي انتي

النهار طلع وفارس بيفطر هو وامه في صمت

منيره : ايمان راحت بيت ابوها ليه يا فارس وما تقولش مفيش حاجه ؟؟؟

فارس :هيا عايزه تروح فراحت

منيره : دي مش اجابه

فارس : معنديش غيرها ... اسأليها هيا لو تحبي .. انا نازل الشغل لو عايزه حاجه ابقي كلميني

قام وخارج

منيره : انا هروحلها

فارس : براحتك .. بعد اذنك

راحتلها وقابلتها وهناك معرفتش منها اي حاجه

منيره : طيب طالما مفيش حاجه ارجعي معايا البيت

ايمان : معلش يا امي انا عايزه افضل هنا يومين .. ارجوكي سيبيني براحتي

ام هدي : ما تتعبيش نفسك انا من امبارح معرفتش منها ولا حق ولا باطل

محدش عرف منها زعلانه ليه ولا عرف هيا سابت البيت ليه ؟؟

ايمان مستنيه فارس يجيلها بس انتظارها طال

فارس كان بيقلب في صندوقه ومسك الصور بيقلب فيها واحده وري واحده ويفتكر كل لقطه وذكراها واتصوروها امتي ؟؟؟ ومره واحده اكتشف ان في صوره ناقصه ... اهم صوره في الصندوق ده كله ..الصندوق كله ما يسواش جنب الصوره دي وعرف ان ايمان اخدتها ...

قام وقرر يروح يجيب الصوره فطلع علي بيت ايمان خبط وابوها فتح وابتسم جواه انه اخيرا جاي لمراته

فارس : ازيك يا عم سيد لو ينفع اقابل ايمان ؟؟

عم سيد : اخيرا افتكرت انك متجوز يا فارس ؟؟ لا عيب عليك كده ؟؟

فارس : عيب عليا لو كنت زعلتها او مشيتها او غلطت فيها ... بنتك مشيت بنفسها مش انا اللي مشتها

عم سيد : ولنفترض انه مش انت اللي مشتها .. مراتك زعلت من حاجه ومشيت ايه ترميها ؟؟ ملهاش اي قيمه عندك ؟؟

فارس : بنتك بتحب جو الزعل ده .. بتعشقه .. وبتزعل لو عدي علينا اسبوعين او تلاته من غير زعل فتدور علي اي حاجه تعمل فيلم عليها وتتخانق عليها .. وانا صراحه تعبت من المصالحه ...

عم سيد : يعني ايه ؟؟ امال انت جاي ليه ؟؟

فارس : جاي اكلمها اذا سمحت

ايمان خرجت : اتكلم سمعاك قول

فارس : لوحدنا

ايمان : ليه خايف تطلع غلطان قدامهم ؟؟

فارس : لا مش خايف بس حياتي الخاصه خاصه بيا انا بس ..

عم سيد : ادخل يا فارس اتكلم مع مراتك براحتك ربنا يهديكم يا رب وتعقلوا كده

فارس دخل لايمان اوضتها

ايمان : خير ... جاي ليه يا فارس .. مش معقوله وحشتك وعايز ترجعني ؟؟

فارس : عايزه ترجعي ارجعي ده بيتك .. انتي اللي سبتيه بمزاجك ..

ايمان : انت ما اخترتنيش

فارس : ومش هختارك ابدا ... مش كل ما تقابلك حاجه مش عجباكي تقوليلي يا انا يا هيا ؟؟ سبق ونفذتلك رغبتك مره لكن لو هو ده الاسلوب اللي هتستخدميه معايا فاسف مش هينفع ..

ايمان : طيب جاي ليه ؟

فارس : في صوره ناقصه هاتيها

ايمان بصتله باستغراب وبصدمه وبوجع : نعم ؟؟

فارس بكل هدوء : الصوره اللي اخدتيها من الصندوق هاتيها

ايمان :هو انت مفيش اي حدود لقسوتك يا فارس ؟؟

فارس : قسوتي !؟ مش هرد عليكي .. هاتي الصوره لو سمحتي

ايمان : ليه ؟؟ ايه اللي يفرق الصوره دي عن باقيها ؟

فارس : ده شيء يخصني .. الصوره دي مهمه وعليها اهداء في ظهرها عايزها .. هاتيها

ايمان : اهداء .. بتقولها فيه قد ايه بتعشقها وبتحبها وانك بتقدم عمرك كله اللي راح واللي جاي ليها هيا وبس .. وعدتها انك ليها هيا وبس وللاسف صدقت في وعدك

فارس : انتي شايفه كده ؟؟ ما علينا هاتيها

ايمان : فارس ارجوك ..

قاطعها : ارجوكي انتي .. هاتيها ...

ايمان عيطت : اتمسك بيا

فارس : انا متمسك بيكي .. بس ده ماضيا انا .. عايزو بحلوه وبمره .. ذكرياتي انا .. انتي مالكيش علاقه بيها .. انتي الحاضر بتاعي ليه ده مش مكفيكي ؟؟ ليه عايزه الماضي ؟؟ سيبيه !! سيبيه يا ايمان

ايمان : انت اللي متمسك بيه !!

فارس : قصرت معاكي في ايه !! ماضيا فارق معاكي ليه ؟؟ عايشه فيه ليه ؟؟ اطلعي منه وعيشي معايا في الحاضر اتمتعي باللي في ايدك بدال ما تخسريه هو كمان ... انا ليكي بس ماضيا مش ليكي ...افهمي

ايمان : مش عايزه افهم ( فتحت دولابها وطلعت الصوره ) اتفضل خد صورتك بس قبل ما تمشي طلقني .،

اخد الصوره وحطها في جيبه وسابها وخارج ولما سمع الكلمه وقف للحظه وبعدها خرج وهيا خرجت وراه وكلمه واحده بتقولها

ايمان : طلقني يا فارس ... طلقني

ابوها وامها جريوا عليها وحاولوا يمسكوها بس سابتهم ومسكت في فارس ومش عايزه تسيبه

ايمان : طلقني قبل ما تمشي ... طلقني

فارس بص لابوها : امسك بنتك

وبيحاول يخلص نفسه منها بس ماسكه هدومه وبتتخانق معاه .. ابوها شدها جامد وفارس شد نفسه وخرج بره البيت ونزل جري علي السلالم

ايمان : سيبني يا بابا سيبني

زقت ابوها بعيد وخرجت وراه وبتنادي علي فارس اللي رفض يقف

ابوها بيشدها علشان يدخلها وهيا بتشد نفسها علي السلم لحد ما اختل توازنها ووقعت علي السلم وصرخت وابوها صرخ وفارس سمع الوقعه وجمد مكانه وطلع يجري عليها ..لقاها علي اخر السلم وبتنزف من دماغها وبص لابوها فوق

عم سيد : هيا شدت نفسها ووقعت ... الحقني يا فارس

امها طلعت تصوت وفارس طلب الاسعاف لانه خاف يحركها فحالتها تسوء ...

اخدوها علي المستشفي والكل اتجمع والكل عرف باللي حصل لما شافوا الاسعاف ...

دخلت العمليات وفضلت كتير جواها ... وفارس بره جامد مش بيتكلم وعم سيد بيعيط وبيلوم نفسه انها فلتت من ايده ...

اخيرا الدكتور خرج : فين جوزها ؟؟

فارس بصله : انا .. خير ؟؟

الدكتور : الحمد لله هيا كويسه ..مفيش كسور والاشعه علي المخ سليمه بس ارتجاج بسيط والباقي رضوض هتاخد وقتها

فارس : انا مستني لكن ، ايه اللي حصل ؟؟هات من الاخر

الدكتور : البيبي نزل انا اسف .. الوقعه كانت جامده عليه

هنا فارس اللي اتصدم .. : هيا كانت حامل ؟؟

الدكتور : انت ما تعرفش ؟؟ الحمل كان قرب يكمل شهرين يعني اكيد المدام عارفه ؟؟

فارس : فعلا اكيد كانت عارفه .. متشكر يا دكتور ممكن ادخلها ؟

الدكتور : هيا لسه ما فاقتش من العمليه .. احنا عملنالها اجهاض .. بس ممكن اه تدخلها اول ما تستقر في اوضتها الممرضه هتبلغك

فارس كان متعصب لدرجه فوق التخيل ... متعصب من كل حاجه وكل حد وكل شيء حواليه

منيره : معلش حبيبي بكره يتعوض .. قدر الله وما شاء فعل

فارس : لو سمحتي يا امي انا مش عايز اتكلم

وقف بعيد واستني الممرضه تطلع تبلغه انها فاقت واول ما طلعت دخل لمراته .. كانت يدوب بتفوق

فارس : حمد الله علي السلامه

ايمان بصتله بتعب وبتبص حواليها وعنيها تايه وبتحط ايدها علي بطنها ففارس قرب منها

فارس بهدوء :بتحطي ايدك علي بطنك ليه ؟؟ احب اطمنك

ايمان غمضت عنيها بارتياح

فارس كمل : اللي في بطنك نزل ..

ايمان بصتله باستغراب

فارس : اه نزل ( عيطت بوجع ) نزل لانه خساره فيكي انتي ما تستاهليش يكون عندك نعمه زي دي .. عيطي بقي من قلبك ... ديما بتختلقي سبب تعيطي عليه .. مره ما بيحبنيش .. مره دبله .. مره صوره .. كلها تفاهات لو كنتي تجاهلتيها كان زمانا مع بعض مبسوطين بالبيبي وفرحانين بس لأ ازاي ؟؟ لازم ابقي ضحيه اهو ربنا قالك خدي .. واخد منك اللي في ايدك علشان في مره تحمديه علي اللي في ايدك .. واديكي ما حمدتيش فاخد منك علشان تعرفي الفرق وتبقي تحمدي ربنا وترضي ... مبروك علي نزول البيبي

سابها ومشي وهيا فضلت تعيط وتصرخ لدرجه انهم عطوها مهديء ...

ونكمل بكره

توقعاتكم

ShiMoOo

الحلقه ال 16

فارس اخر حاجه قالها : مبروك علي نزول البيبي

سابها ومشي وهيا فضلت تعيط وتصرخ لدرجه انهم عطوها مهديء ...

فضلت كذا يوم تعيط وهيا في المستشفي وبيدوها مهدئات وفارس مش بيروحلها وسايبها

عم سيد راح لفارس البيت

عم سيد : مكنش العشم يا فارس انك تتخلي عنها في الظروف دي ؟؟

فارس : هيا اللي اختارت ... هيا اللي عملت فينا كده .. هيا اللي نزلت البيبي بتهورها وغبائها

عم سيد : مش يمكن لو انت اخدتها في حضنك وطبطبت عليها مكنش كل ده حصل ؟

فارس : وانا مخدتش في حضني وطبطبت مليون مره قبل كده ؟؟ هيا مقتنعه بحاجه في دماغها ومهما اعمل خلاص دماغها اتقفلت ...

عم سيد : يعني ايه ؟؟خلاص هتطلقها علشان البيبي نزل ؟؟

فارس اتنرفز : علشان البيبي نزل ؟؟ هو انت شايفني ندل كده ؟؟ لو هطلقها هيبقي علشان هيا عايزه ده مش علشان البيبي زي ما سيادتك بتقول

عم سيد : هيا حاليا مشوشره .. منهاره .. مجروحه .. مكلوبه علي ابنها اللي نزل وواجبك تقف جنبها مش ضدها وتقولها احسن

فارس : علي اساس انه كان ابنها وحدها ؟؟

عم سيد : احساس الام بيبقي غير الاب .. الام من اول لحظه بتعرف فيها انها حامل بتتعلق بابنها لكن الاب بيحتاج وقت ويحتاج يتعامل معاه الاول .. ايوه من حقك تزعل بس مش هتبقي زيها

فارس : انت عايز ايه مني يا عم سيد ؟؟

عم سيد : عايزك تقف جنب مراتك

فارس : باذن الله .. حاجه تانيه ؟؟

عم سيد : اتمني انك ترجع فارس اللي دماغه توزن بلد مش اللي حاطط دماغه بدماغ عيله مش عارف يكسبها

فارس : عيله ؟فعلا في دي عندك حق هيا عيله ومن هنا ورايح هعاملها علي الاساس ده

وهو ماشي وقف عم سيد : علي فكره هيا هتخرج بكره من المستشفي علي الساعه ١٠ الصبح كده

ان شاء الله

بعد ما مشي

منيره : بكره تروح تجيب مراتك علي البيت .. سمعت ؟

فارس بص لامه وما ردش وداخل اوضته

منيره : فارس ... لما اكلمك ترد عليا

فارس : اسف يا امي حاضر ان شاء الله الصبح هروح تصبحي علي خير

الصبح راح علي المستشفي ودخل عند مراته اللي بصتله كتير بس ما اتكلمتش ..

خلص اوراق الخروج ودفع الفواتير واخدها هيا وامها وابوها ..وراح علي بيته وقف قدامه

فارس : حمدالله علي السلامه

ايمان بصت حواليها ولقت نفسها قدام بيت فارس

ايمان بتعب : انت وقفت هنا ليه ؟؟

فارس : وصلنا البيت يالا

ايمان : لو سمحت وصلني لبيت بابا لاني مش قادره امشي

فارس : احنا وصلنا بيتنا يالا وبعد ما اطلعك وتستريحي هوصل والدتك ووالدك لحد البيت

ايمان : انا مش قادره اتكلم ارجوك

فارس : محدش طلب منك تتكلمي يالا انزلي

ايمان: مش عايزه ارجع دلوقتي

فارس : يالا انزلي وكفايه بقي هبل ولعب عيال

ايمان :مشاعري بالنسبالك لعب عيال صح؟

فارس نزل وفتح باب العربيه قدام ايمان : انزلي

ايمان : مش هطلع

فارس : فارس بنفاذ صبر : قسما بالله العظيم ان ما نزلتي دلوقتي ما هتعتبيه تاني وتبقي طالق بالتلاته اتفضلي انزلي

عم سيد : لا حول ولا قوه الا بالله يا ابني مش كده

ام هدي : يا بنتي انزلي بقي واقصري الشر جوزك حلف عليكي

ايمان : يحلف علي نفسه مش عليا وبعدين هو ده اللي عايزه .. يخلص مني لانه عارف اني مش هطلع معاه فبيحلف

فارس : اوكي بما انك مصره تتصرفي زي العيال يبقي اعاملك معامله الاطفال

فارس شدها من العربيه وشالها غصب عنها ومهما تقاومه شايلها زي العيله في ايده وامها نوعا ما حست باطمئنان مش عارفه مصدره بس حست ان فارس باقي علي ايمان ومش هيسيبها تروح منه ابدا وانهم مع بعض علي طول

منيره فتحت الباب لانها سمعت صوت صريخ ايمان

منيره : في ايه مالها ؟؟ براحه يا فارس عليها

فارس :براحه ؟؟ وانا عاملها ايه ؟؟ الهانم مش عايزه تطلع

دخلها الاوضه وحطها علي السرير

فارس : من هناورايح مش هاخد رأيك في اي شيء وهعاملك زي العيل الصغير اللي مش عارف مصلحته .. وهتنفذي اللي اقوله بمزاجك ؟ غصب عنك ؟ المهم يتنفذ ودلوقتي هطلع اشوف والدك ووالدتك واوصلهم بعد اذنك واه حمدالله علي السلامه

فارس اخد اجازه من شغله يومين وقعد مع مراته بيعملها كل حاجه بس من غير كلام نهائي ولا هو بيتكلم ولا هيا بتتكلم .. وبالليل بيديها ضهره وينام

عدي شهر والوضع زي ما هو ايمان بتعمل كل حاجه بس بتوهان وسرحان ومش بتتكلم ابدا ولو حد كلمها بتهز دماغها او تقول اه او لأ ..

منيره مش عاجبها اللي بيحصل ده ابداوابنها مش بيتكلم معاها ولا راضي يسمعها

وفي مره وهو نازل الصبح

فارس : عايزه حاجه يا امي ؟

منيره ما ردتش عليه وفضلت ساكته

فارس : ماما .. امي .. ام فارس

منيره بصتله ودورت وشها بعيد من غير ما ترد عليه

فارس : اه .. كده انتي زعلانه ... مالك يا ست الكل ؟

منيره : ويفرق معاك زعلي اصلا ؟؟

فارس : نعم ؟؟ ده انتي الخير والبركه .. ايه اللي مزعلك ؟؟

منيره : انت يا فارس

فارس : ليه بس يا امي ؟؟ في ايه ؟؟

منيره : مراتك

فارس : مالها مراتي ؟؟

منيره : مش بتكلمها ليه ؟؟ سايبها كده ليه ؟؟ ده حتي حرام .. وعاشروهن بالمعروف

فارس : وانا مش معاشرها بالمعروف يا امي ؟قصرت معاها في ايه ؟؟ ناقصها ايه ؟؟

منيره : لا من جهه ناقصها فناقصها كتير قوي ..انت سبتها لوحدها

فارس : فين ده ؟ انا علي طول معاها

منيره : انت بتلف وتدور ليه ؟ انت عارف انا قصدي ايه ؟

فارس : وبعدين ؟؟ ايه اللي ناقصها ؟ او المفروض اعمل ايه وما عملتوش ؟؟

منيره : تاخدها في حضنك ..تطمنها .. تقولها ما تخافش .. تقولها انك هتفضل جنبها .. تقولها متزعلش وقضي اخف من قضي .. تقولها قومي بالسلامه ونعوضه.. في كتير قوي يتقال .. بس انت لومتها واكتفيت بكده وكأنك انت ملاك ..

فارس : وانا غلطت في ايه ؟؟ انا اللي قلتلها تسيب البيت ؟ انا اللي قلتلها تتنجنن وتتخانق معايا .؟ ذنبي ايه انا ؟؟ وبعدين سيادتها كانت عايزه تطلق من غير حتي ما تقولي انها حامل ..

منيره : انا مش فاهمه انت بتلومها علي ايه ؟ انها بتحبك وبتغير عليك ؟؟ انت قدرك انك كنت متجوز قبل كده وده شيء مش هيتغير

فارس : قوليلها هيا بقي النقطه دي

منيره : لا انا اقولك انت .. جوازك حط حمل عليك زياده .. هيا مش بتغير من الهوا او اللي رايحه واللي جايه هيا بتغير من حقيقه انت مصر كل شويه تأكدها ومش عايز تلغيها

فارس : حقيقه ايه ؟؟

منيره : انك بتحب مراتك الاولي

فارس : وده شيء صح

منيره : ماشي اللي في القلب في القلب مش لازم كل شويه نقوله ... المفروض كنت تنهي النقطه دي .. تلغيها تماما من تفكيرها .. تبعد اي شيء ممكن يثير النقطه دي .. تطمنها كل شويه ان هيا وبس اللي حبيبتك .. لكن انت للاسف بتعمل العكس تماما ... كل شويه تحسسها ان ملهاش قيمه في حياتك وانك عمرك لا حبيت ولا هتحب غير هيام وده غلط

فارس : ممكن في الاول لكن دلوقتي هيا مهمه ومهمه قوي كمان وهيا عارفه ده وبحاول اعمل ديما اللي اقدر عليه علشان اسعدها

منيره : ما انكرتش ده بس برضه مشيلتش الخوف من جواها .. انت ابسط حاجه عمرك ما قلتلها انك بتحبها وبعدين انت ناسي نقطه مهمه ان ايمان عيله .. بالنسبالك عيله .. انت اول حب ليها واول راجل في حياتها وخبرتها في الحياه معدومه وده يفرض عليك انك تعلمها وتفهمها وتحميها مش كل ما تغلط تقف قصادها بالعصايه .. فين حنيتك .. فين حبك .. ليه ما تقولهاش كل شويه بحبك ؟؟

فارس : انا مش عارف الكلمه دي عملالكم ايه ؟؟

منيره : الكلمه دي سحر يا فارس ... وبعدين حتي لو مش حاسسها قوي فيها ايه لو قلتها .. ومره وري مره هتبقي حقيقه وهتبقي سهله

فارس : المفروض اكدب عليها يعني ؟؟

منيره : الرسول عليه الصلاه والسلاه كان بيحب السيده عائشه جدا وكل زوجاته كانوا عارفين بس غاروا وطلبوا منه يعلن قدام الكل مين احب زوجاته ..وطبعا هو لو قال عائشه هيزعلوا وكده هيبقي فرق بينهم فعمل ايه ؟ راح لكل واحده بالليل وعطاها تمره .. وقالها ما تقولش لاي واحده علشان ما حدش يغير او يزعل انه عطاها هيا تمره وتاني يوم جمعهم كلهم وقالهم احب زوجاتي هيا من اعطيتها تمره .. كلهم اتبسطوا وكل واحده فاكره ان هيا الاحب الي قلبه .. ليه مقالش زيك انا بحب عائشه والباقي يخبط دماغه في الحيط ؟؟ وكان ديما يدعي ربنا ويقوله اللهم لا تؤاخذني فيما لا املك وكان قصده علي حبه لعائشه ....ان الزوج يقول لمراته انه بيحبها او انها اجمل واحده او اي شيء ده ما بيعتبرش كدب حتي لو مش حقيقه ده بيثاب عليه ..وبيعمل محبه وموده بين الزوجين

فارس : ماشي كلامك صح .. بس انا مش شايف اهميه للكلمه دي ؟ وبعدين انا من يوم ما وعيت علي الدنيا للنهارده عمري ما سمعت ابويا قالك بحبك !! جرالك ايه ؟؟ كنتي بتموتي فيه وهو كان بيحبك .. يعني مش بالكلام

منيره ضحكت : هو فعلا مش بالكلام بس انت مين قالك ان ابوك عمره ما قالي بحبك ؟؟

فارس : انا ماسمعتهاش منه

منيره: هو مش شرط يكون قالها بحبك

فارس : بالظبط اهو ده اللي انا عايز اقوله

منيره : اهدي واسكت مش ده قصدي .،، اقصد ان حماتي كانت من الحموات الصعبه .. وكانت بتعتبر ان الراجل لو حب مراته يبقي ضعيف وابوك كان بيحبني وكان ديما يقولي بحبك ولو حماتي سمعته يبقي يوم مش معدي سواء عليا او عليه فاتفق معايا كهزار انه هيقولها سيم بينا .. وقالي اول ما اقولك نوارتي يبقي كأني بقولك بحبك .. وفعلا كان كل شويه يقولي يا نوارتي وامه بتعديها وانا ببتسم واسكت لاني عارفه هو بيقول ايه واتوعدنا علي كده ... هاه ؟؟ كام مره سمعت ابوك بيقولي يا نوارتي ؟؟

فارس افتكر ابوه وهو كل شويه يقول لمراته يا نوارتي ... وهو داخل وهو خارج .. وهو عايز حاجه .. حتي وهو تعبان ..

منيره : الكلمه مهمه يا فارس .. وانت جاي علي مراتك قوي .. خدها يا ابني في حضنك وطبطب عليها وقولها انك بتحبها .. حرام عليك .. دي عيله ومحتاجه لحضن جوزها وحنيته .. مش محتاجه ابدا انه كل شويه يقارنها بالماضي .. فكر في كلامي ... واللي يريحك اعمله ولو مش قادر تحبها سيبها تروح بيت ابوها .. ماهو ما ينفعش ولا ترحم ولا تسيب رحمه ربنا تنزل .. حرام بنات الناس

فارس قام ودخل اوضته يجيب حاجته قبل ما ينزل شغله وهو خارج لمح ايمان في المطبخ واقفه بتقلب حاجه علي النار بس تايهه وسرحانه ومش باصه للي علي النار اصلا بتقلب وخلاص وهيا في عالم تاني .. بصلها قوي واكتشف قد ايه هيا صغيره وتايهه ودبلانه .. اكتشف انها فعلا مكتئبه وساكته بطريقه غريبه وحس فعلا ان امه عندها حق .. هو مقصر معاها جدا .. دخل عندها وطفي النار وشد المعلقه من ايدها

ايمان فاقت : لسه ما استواش

فارس : سيبيه عايزك تعالي

اخدها اوضتهم وقعدها علي السرير قصاده

فارس : وبعدين هتفضلي كده لامتي ؟؟ ايمان بصيلي .. كفايه بقي

ايمان بصت بعيد : انا كويسه

فارس : لا مش كويسه .. مراتي وحشتني رجعيهالي ارجوكي ..

ايمان : مراتك .. ارجوك يا فارس .. بعد اذنك

خارجه فوقف ووقفها

فارس : وحشتيني ... كفايه زعل بقي .. اللي راح غالي اه بس احنا لسه موجودين .. ونقدر نعوضه

ايمان دموعها نزلت: انت قلت بنفسك في حاجات ما تتعوضش

فارس : طالما انا وانتي مع بعض يبقي اي حاجه تانيه تتعوض ... عايزه تعيطي عيطي بس في حضني

ايمان بصتله كتيره وكأنها مستغربه اللي بتسمعه بس مره واحده رمت نفسها في حضنها وفضلت تعيط كتير قوي وهو بيهدهد فيها زي الطفله ..

فارس : عيطي .. بس دي اخر مره هتعيطي .. كفايه بقي .. خلينا نرجع لحياتنا

ايمان : حياتنا ... انت علي طول بتختارها

فارس : انا ما بختارهاش بس ما بحبش لوي الدراع .. ايمان انا بحبك انتي

ايمان مصدقتش هو قال ايه وفارس نفسه مش مصدق انها طلعت بالسهوله دي ؟ كان متخيل انها مش هتطلع او هتطلع بصعوبه

ايمان عنيها وسعت وبصتله : انت قلت ايه ؟

فارس : مقولتش .. بقولك اني ما بحبش حد يلوي دراعي مهما يكون الحد ده وده شيء في دمي

ايمان : مش قصدي علي ده قولت ايه بعدها ؟

فارس : اه قصدك علي بحبك ؟ انا مش عارف انتي ليه مش مصدقه اني تخطيت الماضي من زمان وقلبي حاليها مفيهوش غيرك انتي وبس ..

ايمان : انت بتحبني ؟؟

فضل كتير يبصلها وساكت :

ايمان : بتحبني ؟؟

فارس : بعشقك مش بحبك بس ...

وهنا اخدها في حضنه وعيشها في لحظات حب مسروقه من الزمن .. كان واحشها وكانت وحشاه جدا .. ومن جواه بيسأل نفسه يا تري فعلا هو بيحبها بجد ولا ده علشان الامور تمشي وعلشان امه قالت كده ؟؟

فارس : مش عايزك دبلانه كده .. عايزك تفوقي كده وترجعي تملي البيت ضحك وحب فاهمه ؟

ايمان : طول ما انت معايا انا مستعده اعمل اي شيء .. طيب وهيام لسه

فارس قاطعها : ما بتحرميش .. يا بنتي انسيها وبطلي تفكريني بيها .. هقولك معلومه صغيره ..هيام ما بتجيش في بالي غير لما انتي تفكريني بيها ايه رأيك ؟؟

ايمان : طيب قولي تاني انك بتحبني ؟

فارس : هقولهالك تاني وتالت ورابع لحد ما تزهقي منها .. بحبك بحبك بحبك بحبك

ايمان ضحكت وهو ضحك

الباب خبط وهو هيقوم بس ايمان مسكته

ايمان : ارجوك ما تسيبنيش النهارده .. خليك معايا

كانت متشعبطه في رقبته زي الغريق اللي بيتعلق بقشايه فرجع جنبها تاني

فارس : مش هسيبك .. امي هتفتح واكيد هتتصرف

ايمان : يعني وعد ؟

فارس : وعد مش هسيبك

شويه والباب خبط عندهم

منيره : فارس حبيبي مجدي بره ومصر انك تطلعله معرفتش امشيه

فارس من جوه : حاضر يا امي ( بص لمراته ) كنا متواعدين النهارده هنشوف حاجه مهمه في الشغل يالا تتعوض بكره ان شاء الله هامشيه وارجعلك

ايمان : لو ضروريه قوي روح

فارس : ضروريه بس مش اهم منك انتي .. كل حاجه تانيه تتعوض ما تقلقيش

فارس لبس وطلع لمجدي بره علي الباب

مجدي : سيادتك بعت رساله انك مش جاي انت بتستعبط ولا ايه ؟؟ انت ناسي احنا ورانا ايه ؟؟ المشروع الجديد اللي هنبدؤه النهارده لازم نقابل صاحب الارض اللي هنعمل فيها مشروعنا ولازم نقابل اللي هيتعاملوا معانا .. فارس هو انا اللي هقولك احنا ورانا ايه ؟؟ انت بتخطط للموضوع ده من امتي ؟؟

فارس : عارف ان احنا ورانا حاجات مهمه بس النهارده مش هينفع اخرج ... ايمان محتاجاني وانا هفضل معاها النهارده

مجدي متضايق : نعم ؟؟ ايمان؟؟ انت هتمثل عليا انا ولا ايه عيب عليك ؟؟ ايمان مين دي اللي هتقعد علشانها احنا هنستعبط ولا ايه ؟؟ ولا كدبت كدبه وصدقتها ؟ ده انت مستحملها بالعافيه علشان امك ؟ده انا قعدت قد ايه اقنعك تتجوزها هنستعبط بقي ؟؟ايه ؟؟ ده احنا دافنينو سوا ولا انت نسيت كل ما تبقي عايز تخلص منها تكلمني وتقولي مجدي الحقني اتصل بيا وقول اي مصيبه تخرجني بيها ؟؟ شوفلك حجه غير دي يا فارس .. قال ايمان قال .. احنا هنكدب علي بعض ولا ايه ؟؟ انت فاكراها هيام ولا ايه اه هيام كنت بتعشقها لكن ايمان ؟؟ ايمان دي مجرد واجب وفرض عليك انت مضطر تستحمله

فارس : خلصت كلامك .. شوفلك سكه .. قولتلك هقعد جنب مراتي محتاجاني .. انت لما نجاه بتحتاجك مش بتكلم

مجدي : ايوه علشان دي نجاه حبيبتي لكن احنا بنتكلم عن ايمان .. انت تمثل الحب ده عليها هيا قدامها لكن معايا عيب عليك .. انجز ويالا

فارس يدوب هيرد بس لقي مجدي تنح وبص وراه لقي ايمان واقفه ومن ملامحها شكلها واقف من بدري

فارس : ايمان ؟؟ انتي واقفه هنا من امتي ؟؟

ايمان ابتسمت بدموع : من ساعت ما قالك انتو دفنينو سوا .. علي العموم انا كنت جايه اقولك روح مشاوريك المهمه انا كويسه وانت مش متضطر تقعد جنبي وبدال ما تتصل بيه وتخليه يتصل بيك روح من دلوقتي

سابتهم ودخلت وفارس نادالها بس هيا جريت من قدامهم

مجدي: فارس انا مش اقصد

فارس زق مجدي : ممكن تغور بقي من هنا اتفضل

قفل الباب ودخل جري وري مراته اللي بتعيط والمره دي عندها حق تعيط وهو مش عارف يقولها ايه ؟؟

قعد وراها وبيحاول يضمها وهيا بتبعد عنه

ايمان : ارجوك انت مش مضطر للتمثيل ده ارجوك

فارس : تمثيل ايه بس .. مجدي ده متخلف .. بقي تصدقي مجدي وتكدبيني انا ؟؟ انا فعلا بحبك يا ايمان .. صدقيني

ايمان بتشاور بدماغها لأ

ايمان : ارجوك سيبني لوحدي ارجوك يا فارس .. ارجوك بدال ما نتخانق تاني انا مش حمل خناق سيبني لوحدي ارجوك

بتعيط جامد وهو اضطر يسيبها ويمشي ونزل علي الورشه وهناك شاف مجدي

مجدي : اسف يا فارس مش اقصد بس انت استفزتني الصراحه

فاسر : نعم استفزيتك؟؟ مراتي خارجه من محنه وانت جاي بيتي تهدو علي دماغي وتقولي استفزيتني ؟؟ انت ياما غلطت وانا بدافع عنك قدام نجاه وانت جاي تعمل ده ؟؟

مجدي : بقولك ايه ما تعملش فيلم

فارس : ما اعملش فيلم ؟؟ تصدق فعلا مش هعمل فيلم سوري

ومره واحده ضربه وقعه في الارض

مجدي مسح الدم من بوقه وبص لفارس

مجدي : انت بتضربني علشان دي ؟؟

فارس : اللي بتتكلم عنها دي تبقي مراتي

مجدي : ودلوقتي افتكرت انها مراتك ؟؟ ماهي مراتك من اكتر من سنه

فارس : مالكش فيه

مجدي : دلوقتي ماليش فيه ؟؟ انت طول عمرك بتعتمد عليا في كل كبيره وصغيره دلوقتي جاي تقولي مالكش فيه ؟

فارس : انا بعتمد عليك !! في ايه ؟؟ انا واخدك معايا كده في الورشه بحق الصحوبيه مش اكتر

مجدي : انا اللي وقفت الورشه دي انا وبس انت جيت علي الجاهز وانت بتشتغل خدام عند مراتك الهانم ولا نسيت ؟؟

فارس : انا مخدمتش عند حد احترم نفسك

مجدي : امال كنت بتعمل ايه في بيتها ؟؟ هاه ؟؟ وحتي اما رجعت هنا كان مشغلاك زي الفاعل

فارس : لحد كده واخرس خالص

مجدي ؛ ولو ما خرستش ؟؟

فارس : هعمل كده

وبدؤا يضربوا في بعض الاتنين ويتخانقوا جامد واي حد بيحاول يدخل بينهم بيضرب

واحد من العمال طلع يجري

حسن : يا ام فارس ... يا ام فارس

منيره طلعت البلكونه تشوف ايه

منيره : في ايه يا واد يا حسن

حسن : سي فارس وسي مجدي بيتخانقوا وهيموتوابعض ومحدش عارف يفصلهم

منيره صوتت ونادت علي ايمان اللي طلعت بسرعه

ايمان : في ايه يا ماما ؟؟ بتصوتي ليه ؟؟

منيره : فارس ومجدي بيتخانقوا وهيموتوا بعض الحقيهم والنبي يا ايمان ... اجري انا مفييش صحه اجري والنبي يا ايمان اجري

ايمان نزلت جري علي الورشه وهناك شافت الناس متجمعه والاتنين بيضربوا في بعض وفي نفس الوقت وصلت نجاه وكل واحده وقفت في وش جوزها توقفه وتشده ... وفعلا كل واحده اخدت جوزها وطلعت بيه علي بيتها ...

منيره جريت علي فارس : ليه كده في ايه ؟؟ من امتي بتتخانقوا كده ؟

فارس : متخلف واطي

ايمان :معلش يا امي سيبيه دلوقتي .. انا هنضفه

ايمان اخدته اوضتها وجابت عده الاسعافات وبدئت تمسح وشه

فارس : الواطي نسي ان انا اللي عملته بني ادم

مجدي عند مراته : دلوقتي جاي يقولي ماليش دعوه وماليش فيه ... ده لولا انا كان زمانه .. انا اللي اشتريت الورشه وانا اللي وقفتها وهو جه علي الجاهز

فارس مع ايمان : ناسي انه لولا فلوسي مكنش عرف اصلا يشتري الورشه ولولا خبرتي مكنش استمر نسي ...

مجدي : نسي كل مره وقفت معاه فيها ..، انا اللي اقنعت ايمان تتجوزه وانا اللي اقنعته هو يتجوزها دلوقتي يقولي مالكش فيه ...

فارس : جاي بيتي يهده ويقولي نرفزتي ... كان المفروض قتلته ...

ايمان : خلصت ؟؟ ما قتلتوش ليه ؟؟اهو كنت قتلت صاحبك ودخلت السجن ... ولا ايه ؟؟

نجاه لمجدي : ايه اللي حصل لده كله ... من امتي انت وفارس بتتخانقوا كده ؟؟

مجدي : علشان هو واطي

ايمان :نسيت يا فارس انه صاحبك ؟زعلان منه ليه علشان قال كلمه حق ؟؟

فارس مسك ايدها وزقها: والله ما نقصاكي كلمه حق ايه ابو حق ؟؟ لما يجي يقول موقف حصل من اكتر من سنه وقدامك ده يبقي ايه ؟؟ وبعدين انتي مش فاهمه حاجه فاسكتي

ايمان : مش فاهمه ايه ؟؟ حبك الغريب ولا تمثيلك عليا من شويه ؟؟

فارس : انا ما بمثلش والمفروض تكوني واثقه فيا مش كلمه توديكي وكلمه تجيبك

ايمان : انت فعلا كنت بتخليه يكلمك ويقولك تعال علشان تخلص مني ؟؟ انت فعلا حبتني ؟؟ ولا كله كان كلام وخلاص ؟؟ ارجوك علي الاقل خليك صريح معايا انت مديونلي بده

فارس : صدقيني .. مش هكدب عليكي وقولك اني حبيتك من زمان والكلام ده لأ .. وفي الاول ايوه كنت ساعات بتصل بيه واقوله يتصل بيا بس ده كان قبل ما نتجوز .. والله قبل ما نتجوز .. لكن بعد ما اتجوزنا عمري ما عملتها صدقيني

ايمان : مصدقاك في دي بس انا فعلا مش هيام ولا عمري هكون .. انت اه ممكن تكون اتعودت عليا وعلي وجودي بس مش حب .. ده انت مقدرتش تقلع دبلتها ومحتفظ بصوركم وجيت اتخانقت معايا وكنت مستعد تطلقني ولما صوره واحده اختفت قلبت الدنيا .. انت جيتلي تكمل خناقك علشان صوره ناقصه .. ده تسميه ايه ان مكنش عشق مجنون .. انا راضيه بنصيبي معاك وانا كويسه ( مسحت دموعها وبصتله ) انا هرضي باللي تقدمهولي خلاص ؟ قوم روح شغلك وهترجع تلاقيني بشكل تاني خالص ومش هتخانق معاك وده وعد مني

فارس مسك وشها بايده : انتي فاهمه كل حاجه غلط يا ايمان .. تمسكي بذكرياتي مش حبا في هيام ابدا .. احتفاظي بذكرياتي علشان اتعظ منها وانا اسف اني ما وضحتلكيش النقطه دي وده عرفت دلوقتي انه غلط شنيع مني .. يمكن لو كنت وضحتها كنا تلافينا حاجات كتير .. لحظه

قام وفتح دولابه وجاب الصندوق وفتحه قدام ايمان

ايمان دورت وشها بعيد

فارس : لا بصيلي هنا .. افهمي .. كل حاجه في الصندوق ده مرتبطه بذكري انا عايز افضل فاكرها ..شوفي الصوره دي ( صوره في حضنه ونايمه علي كتفه ) دي اتصورناها في حفله كانوا عملينها وكنت تعبان في الحفله دي جدا فوق ما تتخيلي لدرجه اني مش قادر اصلا اقف ولو دققتي في ملامحي هتشوفي ده وهيام ما اهتمش المهم عندها المنظر واصحابها وحفلتها لدرجه ان ابوها اللي طلب منها تسيبني امشي واغمي عليا في العربيه والخدامين شالوني وطلبولي دكتور وكان اول مره اتعب كده وهيام رجعت اتخانقت معايا علشان تعبت وعلشان ما فضلتش معاها في حفلتها ...

( طلع صورتين كانوا عريانين فيهم في الدش والبانيو) الصورتين دول كنا في شهر العسل واكتشفت صدفه وانا بقلب في موبيلها الصورتين دول انها صورتهملي علشان توريهم لاصحابها وتتمنظر بيهم واتخانقنا كتير جدا عليهم .. ومسحتهم من عندها بس اشترطت نحتفظ بنسخه فعملت دي بنفسي

( طلع صوره كانت حضناه قوي ) دي ساعت ما اشتغلت مع ابوها غصب عني علشان اليق بمركزهم ومستواهم وربنا العالم انا كنت بروح الشغل ده ازاي ؟؟ كنت بكره كل لحظه فيه

( صوره فيها هيا قاعده علي حجره وباسته) دي اتخانقنا لان امي وفرح وابويا جم عندنا وهيا رفضت تقابلهم وزعلوا ساعتها ومشيوا وهيا قال كانت بتصالحني ومامتها صورتنا الصوره دي

( صوره كانت علي كتفه شايلها ولابسه مايوه ) دي كنت شايلها ومدخلها جوه لاننا كنا بنتخانق علي المايوه اللي لابساه ولو حد صور وشي كنت بطلع نار ان مراتي لابسه ده قدام اصحابها وحد منهم صورنا

كل صوره من دول لها جانب تاني انا عايز افضل فاكره .. ايوه اللي يشوفهم يقول حب لكن انا شايفهم عبء وانانيه وتضحيه ملهاش اي معني ومنتهي الغباء مني

ايمان مستغربه من كلامه : والصوره اللي جيت اتخانقت معايا عليها ؟؟ كان الحب في عنيك

فارس ابتسم بوجع : دي قمتهم بقي .. اه فيها حب في عنيا فعلا واتصورناها بحب

ايمان : علشان كده هيا مهمه ؟ انها الوحيده اللي اتصورتوها بحب ؟؟

فارس : لا دي مهمه لانها اكتر صوره وجعتني قوي .. الصوره دي اتصورناها في عيد ميلاد هيام .. العيد ميلاد اللي ابويا مات فيه وانا كنت ساعتها معاها ومش معاه في المستشفي وده لو فضلت مليون سنه عمري ما هنسي الليله دي .. انا فضلت معاها ارقص واغني وابويا بيموت وبيطلع في الروح .. واحده غيرها كانت لغت الحفله وقالتلي خليك جنب والدك لكن هيام لأ رفضت وقالت انها عزمت الناس وانها هتزعل وابويا اصر ساعتها اني اروحلها وانا مقولتش لأ ورحت وهفضل عمري كله نادم علي اللحظه دي

ايمان ضمته وحست بوجعه وانها ظلماه

ايمان : وقميص النوم ؟؟

فارس : ده كانت لابسه اخر يوم كانت هنا .. اليوم اللي ضربت فيه عيال فرح وطردت فرح نفسها من البيت وانا دخلت وهيا بتزفها ووقعت تحت رجليا وساعتها كانت صدمه عمري .. والبرفان قبل ما تسألي كانت طلبته مني وانا اشتريتهولها في اليوم اللي امي تعبت فيه وهيا حبستها ولما كلمتها قالتلي انها مخليه بالها منها وانها بتريح ونايمه وانا صدقتها ورحت جيبتلها البرفان اللي هيا طلباه

.. كل حاجه هنا وراها ذكري مؤلمه يا ايمان وانا عايز الذكريات دي لكن لو ده معناه اني هخسرك يبقي مش عايزهم وخديهم اعملي فيهم ما بدالك .. انتي الحاضر بتاعي ومش عايز غيرك انتي وبس

انتي لازم تتعلمي تثقي فيا وفي حبي ليكى ..

انا بحبك بجد يا أيمان ومش مجدي بس اللي مستعد اضربه واخسره علشانك لأ ... الدنيا كلها في كفه وانتي في كفه ...

ايمان : انا مش عايزه اصدق انك بتحبني

فارس : ليه ؟؟

ايمان : لاني اتعودت علي جرحك لكن لو اقتنعت انك بتحبني مش هستحمل جرحك تاني ... الجرح من الحبيب غير ... ارجوك يا فارس

فارس : ايمان .... ارجوكي انتي صدقي حبي بقي انا محتاجه اكتر منك .. محتاجك انتي ...

مد ايده ليها ومستنيها تدخله جنتها وتسمحله يحبها ...

ونكمل بكره

توقعاتكم

ShiMoOo

الحلقه ال 17

فارس : ارجوكي انتي يا ايمان .. صدقي حبي بقي ..انا محتاجك اكتر ما انتي محتاجاني

مد ايده ليها مستنيها تثق فيه وتقرب منه وهيا اترددت بس استسلمت لحضنه ...

بعد فتره طويله مع بعض

فارس : بقولك

ايمان : قول

فارس : ايه رأيك نخرج انا وانتي نتمشي سويه ؟

ايمان : يالا ..

خرجوا الاتنين واتمشوا كتير واكتشفوا حاجات كتيره في بعض

فارس :ايه رأيك لو اشتريلك لبس علي ذوقي ؟

ايمان : لبسي مش عاجبك ؟؟

فارس : لا طبعا مش كده بس انا حابب اشتريلك حاجه علي ذوقي انا ؟؟

ايمان : اوكي يالا

دخلوا محل فخم جدا وايمان كانت بتبص يمين وشمال مبهوره بالمحل

ايمان : اولا المحل ده هتبقي الاسعار فيه خياليه

فارس : وثانيا ؟؟

ايمان : وثانيا مفيهوش حاجه مناسبه .. ده لبس ما ينفعش يتخرج بيه ابدا .. ده مش لبس محجبات

فارس ابتسم : ومين قالك اني هجيبلك لبس خروج ؟؟

جت موظفه عليهم : في حاجه معينه بتدورا عليها ؟؟ ازاي اساعدكم ؟؟

ايمان فاتحه بوقها وفارس مبتسم من شكلها

فارس : اوكي شوفي يا ستي ... اناعايز بناطيل جينز اللي الله اعلم بتلبسوها ازاي .. قصيره وضيقه وعليها بلوزات ملهاش اي لازمه في الحياه .. من الاخر شوفتي البنات الموديل اللي بيطلعوا في الاغاني ؟؟ انا عايز الاستيل ده

ايمان : انت بتقول ايه ؟؟

فارس : معترضه علي ايه ؟؟

ايمان : انت طبيعي ؟؟

فارس : جدا ... ممكن لو سمحتي ؟

الموظفه : طبعا اتفضلوا معايا

وبدأت تتطلع بناطيل شكلها ضيق جدا

ايمان : ده مش مقاسي ابدا

الموظفه : لا اعتقد انه مقاسك ممكن تقيسي واحد حضرتك بحيث نبقي عارفين المقاس بالظبط ونختار علي اساسه ؟؟

ايمان بصت لفارس اللي ابتسم واخد البنطلون وعطاه لايمان

دخلت البروفه تقيس البنطلون قدام اصرار فارس وهو وقف علي الباب مبتسم وسامع دربكه كتير

فارس : انتي كويسه جوه ؟؟

ايمان : انا مش عارفه اصلا بيلبسوا ام البناطيل دي ازاي ؟؟ مش راضي يدخل اصلا مش مقاسي ..، انا عايزه عشر مقاسات اكبر

الموظفه : يا افندم ده مقاس حضرتك لو حابه اساعدك ادخلك ؟

ايمان : لا متشكره .. لبسته بس ضيق ومش مقاسي وهاتي مقاس اكبر

فارس : طيب اطلعي اشوف شكله فيكي الاول

فتح الباب وهو بصلها

فارس : ماهو حلو اهو ؟؟ ومظبوط

ايمان : ضيق جدا

الموظفه : طيب ممكن تتحركي لحد الكرسي ده ؟؟( ايمان اتحركت ) ممكن تقعدي (قعدت ) حطي رجل علي رجل

الموظفه : البنطلون مقاسك بالظبط ، حضرتك بس علشان اول مره تلبسي حاجه ضيقه كده متهيألك .. لكن طالما بتقدري تتحركي وتقعدي فيه يبقي مقاسك .. وبعدين هو هيريح في اللبس لو اوسع مش هيبقي حلو

فارس : اوكي دلعينا بقي يالا

الموظفه ضحكت وبدئت تنقي هيا وفارس اشكال الوان

الموظفه : مش عايز حاجه مقطعه ... طالع موضه قوي ؟؟

فارس بص لايمان : طبعا عايز مقطع

ايمان :انت مش طبيعي النهارده ... ده قديم ودايب ومقطع وشايف سعره كام ؟

فارس : احنا متجوزين بقالنا قد ايه ؟؟ اكتر من سنه ودي اول مره نخرج مع بعض ما تبقيش غلسه واستمتعي وبس ممكن ؟؟

الموظفه : مش عايز هوت شورت

فارس : والله لو شكله زي اسمه فاكيد عايزه طبعا

ورتهوله وهو ضحك اول ما شافه واخده طبعا

وهو بيحاسب

الموظفه : ممكن اسأل سؤال ؟؟

فارس : اتفضلي

الموظفه : اعذرني لتطفلي بس حضرتك اشتريت حاجات كتير وغاليه ومرات حضرتك محجبه فهتلبسهم فين ؟؟

فارس : في البيت ليا فين المشكله ؟؟

الموظفه : كل ده علشان البيت ؟؟

ايمان : قوليله والنبي ؟؟

فارس اخدها وطلع وهما ماشين ايمان مره واحده نطت قدامه

ايمان : جنون بجنون تعال معايا

فارس : فين ؟؟

ايمان : زي ما انت لبستني علي مزاجك انا كمان هلبسك علي مزاجي وشدته لمحل ملابس شبابيه

فارس : انا مش هلبس البدي الملزق ده

ايمان ضحكت : هتلبسه .. وبعدين بالعضلات دي مش عايز تلبسه ليه ؟؟ده انت هتبقي مز علي الاخر

البابع : فعلا جسمك ده شباب كتير بيتمنوه .. والحاجات دي هتبقي حلوه فيك

وفعلا اشترت ليه علي ذوقها هيا وهو مشي بحاجه من الللي اشتريتهم .. اتغدوا مع بعض والمفروض يروحوا

فارس : ايه رأيك لو نكمل وصله الجنان ؟؟

ايمان : انا معاك

فارس طلع تليفونه وهيا بصاله واتصل بحد

فارس : ايوه يا نواره .. بقولك يا قلبي انا هاخد ايمان وهطلع علي اي مكان نغير جو يومين ايه رأيك ؟؟

منيره : ودي محتاجه رأي دي .. اتوكل وخلي بالك منها

فارس : اوك يا ست الكل

ايمان : انا كنت متخيله سهره في اي مكان مش يومين بحالهم

فارس : مش كتير عليكي وبعدين احنا فعلا محتاجين نبدأ من الاول انا وانتي صفحه جديده وحياه جديده

اخدها وطلعوا علي اقرب بحر قابلهم واخد شاليه قريب من البحر

فارس : بما انك نمتي طول الطريق فاكيد دلوقتي مصهلله؟

ايمان ضحكت : اهممم وبعدين ؟ في دماغك ايه ؟

فارس : وبما ان الجو ساقعه بالليل مش هينفع ننزل البحر فقدامنا حاجه واحده

ايمان : اللي هيا ؟؟

فارس : اطلعي حالا وتعمليلي عرض ازياء لكل حاجه اشتريناها النهارده

ايمان : انا مش بحب اقلع والبس كتير

فارس : طيب خلاص هروح اسهر في اي ديسكو واكيد في كتير هنا وانتي اطلعي نامي

ايمان : لحظه ونازله يا غلس

فارس : بسرعه واه خلي الهوت شورت للاخر

شغلها مزيكا عاليه وعاشوا جو من الجنون .. جو عمره ما تخيل انه ممكن يعيشه مع ايمان .. ولاول مره تعدي ليله كامله فارس ما يفتكرش حتي هيام

عاشوا يومين من الجنون والحب ...

وهما مع بعض قبل ما يناموا

ايمان : مش هتصالح مجدي ؟؟

فارس : مش عارف .. هو اتهبل .. مش عارف انا كان ماله ؟؟

ايمان : صالحه .. علشان خاطري

فارس : المفروض انتي اكتر واحده تقوليلي ما اصالحوش

ايمان : ليه ؟؟ مجدي صاحبك من زمان قوي .. انا من ساعت ما وعيت علي الدنيا وانتو اصحاب فمينفعش الصحوبيه دي تنتهي كده ...

فارس : فعلا انا نسيت انك انتي عيله بنت امبارح

ضربته علي صدره واخدها في حضنه

فارس : لا بجد انتي ليه مهتمه بمصالحتنا كده ؟؟

ايمان : لان مجدي له معزه خاصه عندي

فارس : نعم يا روح امك

ايمان : اهدي بس ...انا مديوناله باني في حضنك دلوقتي لولا هو مكنتش اتجوزتك

فارس : اشمعني بقي وهو دخله ايه ؟؟

ايمان : فاكر لما اشترينا الشبكه وتاني يوم الصبح شوفتيني بيها وسألتني رايحه فين بيها ؟؟

فارس : اه فاكر

ايمان : لو تفتكر انا ساعتها شوفت مجدي قبلك وسألني جايه ليه وقلتله جايه ارجع شبكتك وساعتها هو فضل يقنع فيا لأ وانك محتاجني في حياتك واني اتمسك بيك وما استسلمش واديك بس فرصه وانا كنت متردده وبعدها انت كنت جاي فقالي اقوله ان نجاه عايزه تشوف الشبكه وساعتها انت سألتني رايحه فين فلقيت نفسي بقولك نفس كلامه وانت ساعتها ضحكت وقولتلي انك افتكرتني هرجعها ليك

فارس : يعني تفكيري كان صح وكنتي عايزه تسيبيني ؟؟

ايمان : انت بتصعبها قوي يا فارس علي اللي بيحاول يقرب

فارس فتح ايديه

فارس : انا فاتحلك درعاتي اهو وبناديكي ....

وهيا لبت الندا ....

عند مجدي

نجاه : وبعدين هتفضل قاعد في البيت كتير ؟؟ ومخاصم صاحبك ؟؟

مجدي :وهو يعني ما يجيش يصالحني ليه ؟؟

نجاه : لانك انت اللي غلطان !!! واحد قالك مراته تعبانه وانت اكتر واحد شايف الظروف بينهم وبدال ما تساعده بكلمه رايح تهدها فوق راسه وتقوله انت ما بتحبش مراتك وقدامها عايزو يعمل ايه ؟؟ يطبطب عليك ؟

مجدي : مكنش قدامها هيا اللي طلعت

نجاه : يا سلام !! ماهو بيتها وده معرض انه يحصل انت ليه قلت كده ؟؟ ليه يا مجدي ؟؟ وكأنك ...

مجدي : وكأني ايه ؟ سكتي ليه ؟

نجاه : وكأنك غيران منه ؟؟

مجدي تنح : انا اغير من فارس ؟؟ عنده ايه زياده عني ؟؟

نجاه : ماهو ده اللي انا مستغرباله .. عنده ايه زياده عنك ؟؟ انت عندك عيلين ضفرهم بالدنيا .. وهو ابنه سقط من قبل حتي ما يشوف النور .. انا وانت مع بعض وهو حب عمره افترق عنه وحاليا بيصارع في علاقه الله اعلم هتكمل ولا لأ ؟؟ فليه عايز تهد حياته اكتر من كده ؟؟

مجدي : بطلي هبل بقي ... واسكتي

نجاه : هبطل وهسكت بس هتصالحه امتي ؟

مجدي : هو اخد مراته وسافر لما يرجع ربك يسهلها

فارس رجع هو ومراته اخر الليل ودخل فارس لامه طمنها انهم وصلوا وارتاحوا والصبح ايمان كلمت عيلتها وبلغتهم برجوعها

لبست بنطلون جينز برمودا استرتش وعليه بدي عريان مع ميكب خفيف كان كفيل يخليها نجمه من نجمات الفيديو كليب

فارس كان قاعد مع مامته وفرح وهيا طلعت ففرح صفرتلها وايمان اتحرجت

فرح : ده انتي مزه واحنا مش واخدين بالنا

ايمان : اخوكي هو اللي عمل كده

فرح : يا نمس عملت ايه في البنت ؟؟

فارس بتريقه وبلهجه افلام الكرتون : اطلقت الحريه للطاقه الكامنه

كلهم ضحكوا وايمان قعدت جنب فارس بس بعيد فشدها عليه

فارس : مفيش حد غريب علشان تعملي مسافه بينا

شويه والباب خبط فقامت دخلت وفارس راح يفتح وكان حماه وحماته

فارس : تعالي ايمان محدش غريب .. باباكي ومامتك

الاتنين كانوا متوقعين واحده دبلانه تايهه مريضه زي ما كانت قبل ما تسافر مع جوزها بس اول ما شافوها بلبسها وبالحب اللي في عنيها مكنوش مصدقين ان دي ايمان بنتهم

اخر النهار الباب خبط وكان المره دي مجدي

مجدي : ادخل ولا ايه ؟

فارس سكت ومنيره جت من وراه : ادخل يا واد وانت من امتي بتستأذن ؟

فارس : من ساعت ما بقي بيهبل

مجدي دخل وقعد هو وفارس لوحده

مجدي : انا اسف يا فارس علي اللي حصل بس انت المفروض تبقي عارف انه مكنش قصدي

فارس : انت جاي بيتي تقولي ما بتحبش مراتك وبتمثل عليها وتقولي مش قصدي ؟

مجدي : انا غلطت بس كنت ساعتها مهتم اكتر بالشغل فاعذرني .. انا غلطت

فارس : انا كمان غلطت لما مديت ايدي عليك هناك

مجدي : انت كان عندك حق انا كنت غبي ومتخلف كمان

فارس :مش انت لوحدك يا صاحبي مش انت لوحدك

مجدي : يعني اصحاب ؟؟

فارس : انت عندك شك في كده ؟؟

منيره طلعت : انتو اخوات مش اصحاب والاخوات بيتخانقوا ويتصالحوا بس ما بيبعدوش عن بعض

مجدي : طيب ممكن اعتذر لايمان ؟؟

فارس نادي عليها وخرجت

مجدي : هيا احلوت اليومين دول ولا انا متهيألي ؟؟

فارس : انت مال اهلك ؟ انت جاي تبص لمراتي يالا ؟

مجدي : والله ما اقصد ابدا

اعتذر وفضل معاهم شويه ونزلوا الاتنين مع بعض يتكلموا في امور الشغل اللي اتعطل وبعد ما خلصوا فضلوا شويه ساكتين

فارس : ايمان قالتلي

مجدي: علي ايه ؟

فارس : انها كانت عايزه ترجع الشبكه وانت منعتها

مجدي : انت محتاجها في حياتك وكنت عارف انك مع الوقت هتحبها لان هيا انسانه كويسه

فارس : متشكر علي وقوفك جنبي

مجدي : اي خدمه ... فارس

فارس : ايه ؟

مجدي: نجاه وهيا بتكلمني قالتلي حاجه غريبه ؟ قالتلي انها حست ان انا عملت كده علشان بغير منك

فارس ضحك : انت تغير مني ؟ ليه ؟ لو حد هيغير المفروض ابقي انا ؟؟ انت عندك كل حاجه مش عندي .. وربنا يباركلك فيها لاحسن تقول اني بقر ولا حاجه

مجدي ضحك : بس للاسف يا فارس انا فعلا غيرت منك ؟؟

فارس : ليه ؟؟ علي جوازي الفاشل ؟؟ وعلي المشاكل اللي ما بتنتهيش ؟؟ علي جوازي التاني اللي عملته غصب عني ؟؟ علي خناقي مع مراتي كل يوم والتاني ؟؟ علي العيل اللي سقط ؟؟ علي ايه بالظبط ؟؟

مجدي : معرفش علي كل ده اه .. ديما بحس انك مهم .. هيام مثلا لما حبتك ؟؟ شغلك مع ابوها ؟؟ لما اشتريت الورشه ؟؟ لما رجعت تشتغل معايا ؟؟ ذكائك وشطارتك في الشغل ؟؟ ايمان نفسها وحبها ليك ؟؟ ودلوقتي اهو كمان بدأت تحبها ... ساعتها قولت بكل المشاكل دي وناجح في شغله فما بالك لو اموره اتصلحت وحب مراته وبقي سعيد هيعمل ايه في الشغل ؟؟ هيبدع ؟؟هتوصل لاعلي نقطه وفي وقت قياسي ..غيرت منك .. فسامحني

فارس : بص يا مجدي احنا الاتنين غلطنا واتصالحنا وانتهي الموضوع علي كده... اقفل بقي الحوار ده كله .. تعال نركز في شغلنا لان زي ما انت بتقول انها هبدع وعندي فكره جهنميه هتنقلنا فووووق

فارس فعلا هو ومجدي ركزوا في الشغل وبدؤا يطلعوا لفوق وايمان عايشه قصه حب مع جوزها وبتتفنن في اسعاده ...

في يوم كان في شغله واتصلوا بيه من شغل مراته وبلغوه انها تعبانه واغمي عليها فطلع يجري عليها ولما وصل كانت فايقه وكويسه واخدها علي البيت وهناك اصر يروحوا يطمنوا عليها لانه خاف انها تكون تعبت تاني او السكر عالي تاني

راحوا للدكتوره داليا زي ما ايمان طلبت وهناك حكالها اللي حصل وعملتلها تحاليل واستنوا النتيجه لحد ما طلعت .. فارس طلع المعمل يجيب النتيجه ومراته في الاستراحه مستنياه

اخد النتيجه وبيقلب فيها بيشوف ايه اللي يعرف يخمنه .. بيبص للنتيجه والنسبه بتاعتها المفترضه وشايف ان اغلب التحاليل كويسه علي قد ما فهم لحد ما قري كلمه خلته اتصدم

Pregnancy test: positive

الدنيا لفت بيه وقراها كذا مره وبيحاول يفهم وبيترجم في عقله يعني ايه positive ويعني ايه negative وايه الفرق بينهم لحد ما وصل عند مراته اللي اول ما شافت وشه وقفت قدامه

ايمان : في ايه التحاليل فيها ايه ؟

فارس : مفيهاش

ايمان : امال انت كده ليه ؟

فارس بصلها بتوهان : تحليل الحمل positive

ايمان : يعني ايه ؟؟

فارس :positive.. يعني ايجابي يعني فيه يعني موجود .. يعني بالعربي كده انتي حامل

ايمان شويه مش مصدقه وبعدها نطت في حضن فارس اللي شالها وحس انه ممكن يعمل اي حاجه في اللحظه دي .. دخلوا للدكتوره اللي اول ما شافتهم

داليا : تخميني طلع صح مراتك حامل صح ؟

الكل كان فرحان لفارس وايمان وفارس كان ناقص يشيل مراته من علي الارض .. كان فرحان جدا

وفضلوا متابعين مع داليا وفي مره عندها

داليا : باشمهندس فارس ممكن اطلب من حضرتك طلب ؟؟ او هو رجاء ؟ او خدمه ؟؟

فارس : طبعا اتفضلي قولي علي طول

داليا : ابني امجد لسه متخرج من ميكانيكا سيارات وعايز يتدرب عندك

فارس : يتدرب عندي؟؟ انا عندي ورشه وبعدل عربيات او بصلحها مش مصنع او شركه .. اعتقد ان حضرتك ممكن بسهوله تشوفيله مكان راق يتدرب فيه او يشتغل فيه ؟

داليا : عارفه كل الكلام ده بس اللي انا فهمته منه انك لك شهره في عالم السيارات وهو حابب نفس مجالك ده وعايزك انت بالاسم ..فلو ممكن ؟؟ لو مش عايز براحتك ؟؟

فارس : لا لا طبعا خليه ينورني في اي وقت .. خليه يجرب براحته

داليا قالت لابنها وفرح جدا بانه هيتعلم علي ايد عبقري السيارات فارس

جوز داليا : انتي وابنك مجانين بقي يرفض اكبر شركات علشان يتدرب في ورشه ؟

داليا : علي حسب ما فهمت وسمعت ان ورشه فارس مش مجرد ورشه

جوز داليا : هو مش فارس ده جوز بنت صاحبتك ..

داليا : انت لسه فاكر ؟دول اطلقوا من زمان قوي

جوز داليا : اممم .. ايهههه روحتي فين ؟ سرحتي في ايه كده ؟

داليا : بقولك يا محمود ؟؟ هو لو انا كدبت في حاجه وعدت من زمان لازم اعترف بيها ولا خلاص؟

محمود : ايه الالغاز دي ؟؟ حاجه ايه اللي غلطتي فيها ؟؟

داليا : لما فارس كان متجوز هيام ( حكتله اللي حصل )

محمود : طيب هما اطلقوا بسبب الموضوع ده ؟

داليا : لا لا خالص

محمود : هو مبسوط مع مراته ؟؟

داليا : جدا هيا حامل وهو طاير بالحمل ده واعتقد ايوه بيحبها

محمود : يبقي مالوش لازمه تفتحي جروح الماضي .. وبعدين هيام مسافره بره مصر هيا وامها يبقي لازمتها ايه ؟

فارس استقبل امجد ابن داليا وبدأ يعلمه والولد فرحان جدا

في يوم راجع بيته مشغول الدماغ وسرحان

ايمان : السرحان ممنوع مالك ؟؟

فارس : مشاكل شغل

ايمان : طيب احكيلي

فارس : في مصنع معروض للبيع وبصراحه سعره لقطه لان اللي هيبيعه مزنوق جدا في فلوس فعارضه بتلت سعره تقريبا بشرط الفلوس كاش علي التربيزه واحنا لو خدناه هقدر اعمل النقله اللي انا عايز اعملها .. انا عايز انا اصنع العربيه مش اعدلها بس .. عايز انا اخد توكيل اي موديل وانا استورد وانا اعدل وانا انزلها في السوق فالمصنع ده هيبقي نقله كبيره

ايمان : طيب كويس جدا فين المشكله ؟ ايه اللي موقفك ؟

فارس : الفلوس طبعا ... الراجل طالب ٢،٥ مليون علي التربيزه .. وطبعا احنا معناش مبلغ زي ده جاهز .. والمشكله ان الراجل عطانا فرصه اربع ايام والا هيبيعه

ايمان : معاكو كام من ٢ مليون دول ؟؟

فارس : انا ممكن اجمع حوالي مليون و٢٠٠ الف بالعافيه ومجدي قال اخره مليون كده فاضلنا ٥٠٠ الف ... نص مليون بحالهم .. فبالتالي كل الاحلام بشششس بتتدمر المشكله ان المصنع ده لو راح مش هنعرف نجيب زيه تاني ... اولا جاهز معداته جاهزه سعره لقطه .. فرصه العمر حلم بعيد صح ؟ وبعدين حتي لو اخدنا المصنع هنبقي علي الحديده ومصنع زي ده محتاج لفلوس علشان تمشيه !! من الاخر هيا متقفله من كل الجوانب اصلا ..

ايمان : حبيبي قدامك اربع ايام.. هتتسهل وهتقول ايمان قالت

فارس حضنها : باذن الله دعواتك حبيبي

فارس نزل شغله وايمان خرجت وراحت لاختها

هدي : خير في ايه كلمتيني وقلقتيني

ايمان : خير ... البيت اللي اخدناه انا وانتي من كام سنه فكراه ؟؟

هدي : طبعا فكراه ماله ؟؟

ايمان : عايزه ابيعه محتاجه لفلوس ضروري يا هدي فيا اما تشتري نصيبي يا اما توافقي نبيعه بسرعه

هدي : طب انا ممكن اسلفك قولي عايزه ايه ؟

ايمان : عايزه نص مليون معاكي ؟

هدي : نعم يا اختي .. نص ايه ؟ وبعدين البيت اشتريناه في ايام الرخص ب ٢٥٠ الف وقسطناهم وابوكي دفعلنا نصهم متخيله يجيبلك كام ؟ ده اخره ٣٠٠ الف لو اتنطط

ايمان : هبيع دهبي والدهب غالي هيجيب يجي ٧٠ الف ومعايا ٥٠ الف محوشاهم من فارس من المصروف اللي بيدهوالي وانا معايا يجي ٣٠ الف يعني معايا في حدود ١٥٠ ومحتاجه الباقي

هدي : كل ده ليه ؟؟ عايزه الفلوس دي ليه ؟

ايمان : هقولك بس الموضوع بينا وما تعترضيش

حكتلها علي كلام فارس كله

هدي : وانتي حابه تقفي جنبه يحقق حلمه ؟؟

ايمان : اه .. نفسي اعمل اي حاجه اساعده بيها وبعدين انتي مش متخيله فارس بيحلم بالمشروع ده ازاي ؟؟

هدي : وانتي واثقه في فارس انك تسلميله كل حاجه كده ؟؟ انتو كان بينكم مشاكل كتير

ايمان : كان ... وبعدين انا وهو بنحب بعض جدا ده غير ابنه اللي في بطني .. علاقتي بفارس اخدت شكل تاني .. هتساعديني ولا ايه ؟

هدي : يالا ننزل لعمك صبحي السمسار

نزلوا واول ما شافهم

عم صبحي : اولاد حلال مصفي

هدي : اشمعني ؟

عم صبحي :كنت لسه جايلكم

ايمان : خير يا عم صبحي ؟

عم صبحي : خير يا بنتي !! الراجل جاركم هد بيته وعايز يطلع بعماره جديده كبيره وهيموت علي البيت بتاعكم وكلمني كذا مره عايزه بالمبلغ اللي تحدودوه .. البيت سعره الاصلي في حدود ٤٠٠ الف تقريبا هو مستعد يدفع ٦٠٠ الف بس ما تبيعهوش لحد غيره وكل يوم يكلمني

ايمان وهدي مش مصدقين اللي سمعوه

ايمان : موافقين يا عم صبحي بس بشرط .. الفلوس كاش بكره علي التربيزه وده شرطنا الوحيد يا اما هنبيعه لاي حد مستعد يدفع كاش ولو سمحت حط يافطه علي البيت مكتوب عليها للبيع

مشيوا من عند عم صبحي اللي فعلا حط اليافطه والراجل جارهم اول ما شافها شالها وجري علي عم صبحي يتخانق معاه

الجار : انا قلتلك لازمني جاي تعرضه للبيع ؟؟

عم صبحي : انا زي ما قالولي نفذت

الجار : عايزين فيه كام ؟؟

عم صبحي : طالبين فيه مبلغ كبير وشارطين علي التربيزه وكاش

الجار : عايزين كام يا عم صبحي ؟؟

عم صبحي : ٧٠٠ الف

الجار : نعم ؟ البيت تمنه لما يتنطط ٥٠٠

عم صبحي : بين البايع والشاري يفتح الله بس ما تزعلش لو اتباع لغيرك .. البيت موقعه كويس

الجار : مقدرش اجمع ٧٠٠ كاش

عم صبحي : يا ابني ده شرطهم

الجار : طيب كلمهم خليهم يقابلوني

عم صبحي اتصل بهدي وكانت ايمان لسه معاها بيتمشوا وطلب منهم يقابلوه وفعلا اتقابلوا

الجار اول ما شافهم : ٧٠٠ الف كاش كتير اصبروا عليا

هدي وايمان بصوا لبعض

عم صبحي : ما انا قلتلك شرطهم كاش

ايمان : اه فعلا في شاري تاني عايزو

الجار : سيدهم الفرارجي صح ؟؟ هيموت وياخده مني .. طيب بصوا انا ممكن اجمع ٦٠٠ وكاش وعلي التربيزه !! هاه ؟ اكتر من كده للاسف مش هقدر .. يا اما تدوني فرصه كام شهر ؟

ايمان :لا يا عمي الاقربون اولي بالمعروف انت برضه جارنا واحنا ما يخلصناش نبيع للغريب وانت موجود بس بكره نكتب العقد ونستلم الفلوس

الجار : خلاص هاتو محامي ونكتب العقد ونطلع علي البنك اسلمكم وتمضوا تمام ؟

وفعلا ده اللي تم وايمان متحمسه جدا تقول لجوزها وتشوف رد فعله ايه ؟

باعوا واستلموا الفلوس وهدي قالت لاختها انها مش محتاجه حاليا الفلوس وتخليها معاها تفك زنقه جوزها وبعدها ترجعها ... ايمان بقي معاها ٧٣٠ الف في حسابها وراحت باعت دهبها ب ٧٠ واصبح معاها ٨٠٠ الف جنيه في ليلتين ومش مصدقه نفسها انها معاها مبلغ زي ده راحت علي البيت جري مستنيه فارس يرجع ...

رجع مخنوق زي عادته اخر كام يوم وايمان مستنياه باكبر ابتسامه واحلي ابتسامه لدرجه خلته يستغرب هيا مبتسمه ليه ؟؟

فارس : في ايه ؟؟ مالك ؟؟

ايمان : عندي هديه ليك

فارس : هديه ليا انا ؟؟ بمناسبه ايه ؟؟ ايه المناسبه ؟

ايمان : هو الواحده محتاجه مناسبه علشان تهادي جوزها ؟؟

فارس : لا يا ستي ... ايه هيا هديتك ؟؟

ايمان طلعت شنطه صغيره وعطتها لفارس اللي اخدها وفتحها ولقي فيها فلوس

فارس : ايه ده ؟؟

ايمان : فلوس

فارس : انا عارف انها فلوس .. فلوس ايه دي ؟

ايمان : ٧٠ الف خدهم

فارس ضحك بحب : حبيبه قلبي تسلمي خليهم معاكي لو احتجتهم هقولك اتفقنا ؟

ايمان : انت محتاجهم

فارس : حبيبي انا محتاج ٥٠٠ الف نص مليون ...

ايمان : ماشي فاهمه طيب شوف ايه تاني مع الفلوس ما تشوف هديتك كويس

فارس بص وطلع الفلوس وورقه وقعت جابها وفتحها لقاها شيك باسمه ب ٧٣٠ الف يعني المجموع ٨٠٠ الف جنيه

فارس تنح وبص لايمان : ايه ده ؟؟

ونكمل بكره توقعاتكم

ShiMoOo

الحلقه ١٨

فارس بص وطلع الفلوس وورقه وقعت جابها وفتحها لقاها شيك باسمه ب ٧٣٠ الف يعني المجموع ٨٠٠ الف جنيه

فارس تنح وبص لايمان : ايه ده ؟؟جبتي منين المبلغ ده ؟؟

ايمان : انت مالك جبته منين المهم روح هات مصنعك يالا

فارس : انتي اتجننتي ولا ايه ؟؟ جبتي منين الفلوس دي ؟؟

ايمان : بعت دهبي وكنت محوشه مبلغ كده وحوشت برضه مصروف البيت اللي بتديهولي

فارس : دهبك ايه ومحوشه ايه ؟؟ انتي بتستعبطي يا ايمان ولا شيفاني اهبل قدامك ؟؟ دول ٨٠٠ الف؟؟

ايمان : ممكن تهدي علشان نعرف نتكلم ؟

فارس : اهدي لما اعرف جبتي الفلوس منين ؟؟ وبعدين مين قالك اني هقبل اصلا فلوس منك ؟؟

ايمان : من كام سنه اشتريت انا وهدي بيت كان بسعر لقطه ونسيناه وامبارح بعته ودي فلوسه

حكت لفارس كل اللي حصل بالتفصيل

فارس : خلصتي كلامك ؟؟ انتي ازاي تعملي كل ده من غير ما تقوليلي ؟؟وبعديت انتي متخيله ان انا هاخد فلوسك كلها كده ؟؟ انتي متخيله ان انا هقبل مراتي تصرف عليا ؟؟انا مقبلتش اني اشتغل مع حمايا قبل كده لمجرد اني حسيت انه بيصرف عليا او بيزودلي الراتب ..

ايمان : اولا انا غير حماك قبل كده .. ثانيا الدهب انت اللي جبته والفلوس محوشاها منك اما البيت فهو مكنلوش فايده اصلا وبعدين انت هتعتبرهم سلف يا سيدي وابقي لما مشروعك يقف علي رجله ردهملي .. انا مراتك يا فارس ومن حق الزوجه انها تقف جنب جوزها

فارس : تقف جنبه تشجعه توفرله كل ده ماشي لكن مش تصرف عليه !! روحي رجعي بيتك وادي لاختك نصيبها او حطيهم في البنك اللي يعجبك اعمليه

ايمان: انت بجد مستعد ان المصنع يروح من ايدك وحلمك يتدمر لمجرد ان كبرياءك واجعك ؟؟

فارس : كبرياء ايه ؟

ايمان : امال اللي انت بتعمله ده اسمه ايه ؟

فارس : مش عايز مساعدتك

ايمان : طيب بلاش علشاني علشان خاطر اللي في بطني .. ما تضيعش الفرصه من ايدك علشانه .. مش انت عايز تضمن مستقبله ؟؟ يبقي ما تضيعش فرص من ايدك وبقولك اهو اعتبرهم سلف يا سيدي طالما مش قابلني اساعدك .. فارس فكر بعقلك ..

فارس سكت وسابها ومشي وراح لشغله وكان سرحان تماما

مجدي : يا ابني ... ايه بكلمك من بدري..

فارس : معلش مشغول شويه

مجدي : الراجل اتصل وبيقول لو بكره مجبناش الفلوس هيبيعه لغيرنا .. خلاص كده ؟؟

فارس سكت وما ردش عليه

مجدي : فارس بتفكر في ايه ؟؟

فارس : بفكر ادخل شريك تالت معانا ايه رأيك ؟

مجدي : مين هو ؟؟

فارس : ايمان

مجدي : نعم!! مع احترامي الشديد ليها بس ليه ؟؟

فارس : لان معاها ٨٠٠ الف وعايزه تديهملي وانا مش عايز اخدهم كده

مجدي قام وقف : مراتك معاها ٨٠٠ الف وانت قاعد هنا بتفكر ؟؟ انا نفضت نجاه .. بيعتها كل حاجه حتي نصيبها في ورثها في بيت ابوها! وسيادتك بتفكر !!

فارس : معرفش مش متقبل الفكره ولو هاخد الفلوس منها هدخلها معانا شريك بالتساوي

مجدي : ازاي بقي ؟

فارس : هديها ٢٠٠ اللي معايا وهتبقي مليون وكلنا بالتساوي احنا التلاته.. كل واحد داخل بمليون .. هنشتري المصنع وال٥٠٠ الفاضلين هنشتغل بيهم.. عندك مانع ؟؟

مجدي : طبعا لأ هروح اكلم الراجل واتفق معاه هنروحله الصبح

مجدي كلم الراجل ورجع لفارس

مجدي : بس مراتك معاها المبلغ ده منين ؟؟

فارس : كان عندها بيت هيا واختها وباعوه بجانب تحويشه عمرها ودهبها وجمعتهم

مجدي: بجد يا فارس البت دي خساره فيك

فارس : ماشي ياعم متشكر

فارس روح لمراته وقعد معاها

فارس : الصبح هنروح نشتري المصنع وهاخد منك الفلوس ..

ايمان حضنته جامد

ايمان : طيب يا رب يباركلك فيه

فارس : الصبح عايزك تيجي معايا ممكن ؟؟

ايمان : طبعا ممكن

الصبح قاموا واخدها ونزلوا واول ما قابلوا مجدي كان هيتكلم بس فارس سكته لانه عايز يعملها مفاجأه ليها زي مفاجأتهاواتفاجئت ايمان بابوها جاي معاهم ومفهمتش ليه بس فارس قالها انه هيكون شاهد علي العقد

راحوا وقابلوا الراجل وقعدوا مع المحامي اللي مجهز العقود وجه وقت الكل يمضي ..

المحامي : اتفضلي مدام ايمان امضي هنا

ايمان : انا ؟؟ امضي ليه ؟؟

المحامي : لان سيادتك شريكه معاهم بالتساوي

ايمان بصت لجوزها وقامت طلعت بره وهو قام وراها

فارس : لحظه يا جماعه

طلع وراها

فارس : طلعتي ليه ؟؟

ايمان : انت ليه بتعمل كده يا فارس ؟؟

فارس : انتي دافعه زينا وده حقك

ايمان : اديني فرصه اقف جنب جوزي

فارس : وانتي كده موقفتيش جنبي ؟؟ لولا فلوسك مكناش قعدنا القعده دي ولا كتبنا عقود ..

ايمان : طيب مش عايزه ابقي شريكه

فارس: ده شرطي علشان اقبل فلوسك يا ايمان وبعدين مش بتقولي ان انا وانتي واحد ؟ فيها ايه بقي اني اكتب جزء باسمي وجزء باسمك ؟ احنا واحد ولا ايه ؟

ايمان : طيب ماشي بس انا مش هشتغل معاكم ولا افهم حاجه في شغلكم ازاي ابقي شريكه ؟؟

فارس : هنا بقي ده دوري انا جوزك .. جوزك هو اللي هيتابع نصيبك .. يالا بقي ما ينفعش نتأخر كده والناس جوه

فارس اخد ايمان من ايدها وخلاها مضت علي العقد شريكه تالته معاهم وابوها كان شاهد علي العقد وهنا بدأ فارس اول خطوه ناحيه مستقبله اللي هو بيحلم بيه .. كان بيشتغل ليل مع نهار هو ومجدي علشان يقدروا يعملوا حاجه

كان راجع البيت بعد يومين بره مطبقهم ومهدود علي اخره

ايمان : حبيبي احطلك عشي ؟؟

فارس : جعان نوم وبس هموت وانام

ايمان : طيب ادخل وريح

وشويه وايمان صحته

فارس : ايمان ابوس ايدك سيبيني انام

ايمان : فارس انا تعبانه قوي اااااهههههه

فارس قام اتعدل بسرعه : في ايه ؟؟

ايمان : شكلي بولد يا فارس

فارس قام بسرعه جاب امه اللي برضه قالت انها بتولدواتصلوا بالدكتوره وراحولها وقضوا ليله طويله كلها تعب ووجع لحد ما اخيرا دخلوها كشك الولاده وايمان اصرت ان فارس يدخل معاها اللي كان رافض تماما مجرد حتي الفكره

الدكتوره داليا : لعلمك وقوفك جنبها بيقويها وبيقربكم اكتر من بعض .. ايه مشكلتك ؟؟ مش مكفيك وجعها ده كلها كمان مستكتر عليها انها تستمد حبه قوه منك .. من وجود حبيبها جنبها. ؟؟

فارس : مش هقدر

داليا : متهيألك .. وجودك هيفرق كتير وبراحتك

فارس دخل مع مراته وشاركها وجعها والمها اللي مهما اتخيله عمره ابدا ما تخيل انه هيكون قمه الوجع والالم بالشكل ده.. لحد ما اخيرا ابنه نزل وملي الدنيا بعياطه

وعطوه لابوه اللي مكنش قادر يفسر مشاعره دي ايه او هو حاسس بايه .. وراه لامه اللي تعبانه جدا فابتسمتله وجوزها حضنها بحب ... واخيرا بقم عيله صغننه ...

فارس فضل جنبها النهار كله وكانت فرحته ما تتوصفش ابدا ..

منيره : عرفت بقي كنت بدعيلك ليه ديما ربنا يرزقك بالذريه ؟؟ لان فرحه ضمه ابنك او بنتك لحضنك ما تتوصفش ولسه لما يضحك ولا يحبي ولا يتكلم ولا يقولك بابا .. كل يوم فرحه في حد ذاته ...

فارس : تسلمي يا ست الكل ربنا يخليكي ليا

وفعلا كل يوم كان فرحه جديده مع ابنه حمزه

ايمان : حمزه متعلق بيك قوي

فارس : اللي يشوف كده يقول ابوه ؟؟

ضحكوا الاتنين

ايمان : ماشي يا عم المهم اخبار شغلك ايه ؟

فارس : كويس

ايمان : ومالك بتقولها كده ؟

فارس : لان الواقع غير الاحلام .. كنت متخيل اني هعرف اتواصل مع اي شركه بره بحيث اخد انا توكيل تصنيعها واعدل فيها انا بمزاجي بس الموضوع كبيييير قوي ومحتاج حد تقيل .. ومحتاج راس مال عالي جدا ..

ايمان : وبعدين ناوي علي ايه ؟؟

فارس : محتاجين شريك تقيييل

ايمان : ان شاء الله هيجيلك لحد عندك وهتشوف

فارس : انا بثق في كلامك ودعواتك .. ادعيلي حبيبي

ايمان : باذن الله وربنا هيفتحها من اوسع ابوابه

فارس : باذن الله حبيبي

وفي يوم مروح اخر النهار ولقي عربيه عطلانه وحد فاتحها وواقف مش عارف يعمل ايه فوقف يساعده

فارس : عايز مساعده ؟؟

الراجل : ياريت

فارس بص للعربيه وعرف مالها

فارس : للاسف مش هتتصلح بسهوله محتاجه تتقطر لو تحب اوصلك اي مكان معنديش مانع ؟

الراجل : انت تفهم في العربيات ؟؟

فارس : فوق ما تتخيل ..هاه تحب اوصلك ؟؟

الراجل : يا ريت انا عندي اجتماع مهم جدا

ركب وبدؤا يتعرفوا علي بعض

الراجل : اسف علي تطفلي .. انا كريم عبد الفتاح الدخيلي

فارس : اهلا بحضرتك .. الدخيلي ده له علاقه بشركات الدخيلي للعربيات ولا مجرد تشابه اسماء ؟؟

كريم : تسمع عنها الشركات دي ؟؟

فارس : افندم ؟ اسمع عنها ؟؟ دي تعتبر اكبر شركه لاستيراد العربيات هنا

كريم : ههه فعلا .. الشركات بتاعت والدي وانا حاليا اللي ماسكها .. كنت متخيلها شغلانه سهله واهو رجل اعمال بس الواقع غير

فارس : انت هتقولي !! فعلا الواقع بيكون غير

كريم : وحضرتك مين ؟؟

فارس : اه سوري .. انا فارس محمد عبد السلام مهندس ميكانيكا سيارات

كريم : فارس !!! ليك علاقه بفارس اللي مشهور في حلبات السباق بتعديل سرعه العربيات ولا مجرد تشابه اسماء ؟؟

فارس ابتسم : هو بعينه

كريم : ايه الصدفه دي ؟؟ كويس ان عربيتي عطلت وقابلتك

فارس : الشرف ليا انا .. احنا وصلنا اهو للفندق اللي حضرتك قولت عليه

كريم وهو نازل رجع مكانه : بقولك .. ايه رأيك لو اخد من وقتك ساعه تيجي تحضر معايا الاجتماع ده !! الكلام كله هيكون علي العربيات واستيرادها وتعديلها .. عايزين نشوف شركه بحيث ان احنا نستورد وهيا تصنع هنا بمواصفتنا وبصراحه انا لسه جديد في المجال ده وابويا معتمد عليا فايه رأيك لو تيجي معايا وتقولي ايه رأيك في كل عربيه هتتعرض عليا لان كل شركه هتطلب موديل معين

فارس فكر وحس ان دي ممكن تكون فرصته لعالم الكبار .. يدخل ويعرف نفسه ويسمعهم...

وافق ودخل معاهم وقعد في الاجتماع سامع ساكت تماما يسمع عرض كل واحد فيهم وحس انهم كلهم بيقولو اي كلام وخلاص ... وان كريم هيضحك عليه في القعده دي مع اي حد يختاره ...

بعد فتره من الصمت قام وقف فالكل بصله

فارس : اسف جدا ليكم بس انا مضطر امشي بعد اذنك

كريم : باشمهندس في ايه ؟؟ ايه اللي مش عاجبك ؟

فارس : ده شيء ما يخصنيش يا افندم ... بعد اذنك اعذرني

كريم : لا انا مصر سمعني رأيك معترض علي ايه ؟

فارس : اعذرني لان كلامي مش هيعجب حد من الموجودين بعد اذنك

فارس خرج وكريم جري وراه واعتذر هو كمان

كريم : لحظه يا فارس

فارس : انت سبت الاجتماع ليه ؟؟

كريم : قولي ايه ؟؟ ايه اعتراضك ؟؟

فارس : اعتراضي !! الناس دي محدش فاهم هو بيتكلم عن ايه !! كل واحد مهتم بالموديل اللي هو اوردي بيشتغل فيه بغض النظر عن اي حاجه تانيه

كريم : مش فاهم تقصد ايه؟

فارس : اوكي بلغه بسيطه بتاع مرسيدس .. في كام واحد بيركب مرسيدس ؟؟ فئه بسيطه جدا جدا فوق ما تتخيل وزيها الهامر او بي ام العربيات دي تقيله جدا واسعارها غاليه جدا وحتي قطع غيارها غاليه جدا .. فانت كده حصرت مبيعاتك لفئه معينه في المجتمع وللاسف الفئه دي قليله جدا .. سعر العربيات دي بيعدي ال ٤٠٠ الف .. عامه الشعب ودول الاغلبيه اخرهم عربيه ١٠٠ الف واذا وحط مليون خط تحت اذا دي .. اذا حب يجيب عربيه غاليه فاخره تويتا كرولا او متسوبيشي ودي جديده في حدود ٢٥٠ وقطع غيارها في المقبول فانت لو هتستورد وتعدل يبقي حاجه للاغلبيه العظمي مش للفئه القليله قوي دي ..

كريم : انت عندك حق فعلا ... بقولك انا عايز اقابلك واتكلم معاك .. ينفع تليفونك ؟؟

فارس عطاله التليفون ومشي وحس ان دي بدايه جديده مزدهره ..

روح حكي لمراته كل اللي حصل وهيا تفاءلت جدا

وفعلا فارس قابله تاني وبدؤا يتكلموا بالتفصيل وفي الاخر كريم اخد قراره بعد ما قرب من فارس اكتر واكتر وشاف مصنعه وشغله ..

كريم : بقولك يا فارس ايه رأيك لو انا استورد وانت اللي تصنع وانا شايف اهو انك اوردي بتشتغل في الموضوع ده.. بس هنوسعه ونكبره.. وبدال ما تعدل بس عربيات السباق انت تصنعها؟؟؟

فارس : دي مسؤليه كبيره جدا انت عارف انت بتقول ايه ؟؟

كريم : ابويا سابلي الشركه وهو عنده ثقه اني هعمل حاجه جديده.. حط ايدك في ايدي ونطلع مع بعض .. انت تكبر اسمك وانا اثبت لابويا اني قد المسؤليه الضخمه دي .. قولت ايه؟؟ تحط ايدك في ايدي ؟؟؟

فارس مد ايده وحطها في ايد كريم وبدأ شغله بجد.

وبدؤا هو ومجدي وكريم يعلوا مع بعض واسمهم يعلي واحده واحده ...

وايمان كانت سند لجوزها وواقفه معاه في كل خطوه وسدت لاختها فلوسها كلها .. وشويه ونقلوا لشقه كبيره شويه في مكان راقي وسابو الحاره واقنع فارس منيره تيجي معاه بالعافيه ..

في مطار القاهره

عاصم ومراته واقفين في انتظار بنتهم اللي اخيرا راجعه من بره واخدوها وروحوا

عاصم : اخيرا يا هيام .. وحشتينا

هيام : اخيرا يا بابي

عاصم : واخبارك ايه ؟؟ مفيش حد في حياتك ؟؟

هيام : فارس وبس .. مفيش غيره دخل قلبي .. ما تعرفش اخباره ايه يا بابي ؟؟

عاصم :لا فارس ده شيليه من دماغك خالص

هيام : ليه هو جراله حاجه ؟؟ بابا قولي

عاصم : لا مجرالوش .. كبر في السوق وخصوصا بعد ما شارك كريم الدخيلي واشتغلوا مع بعض وبقي له اسم في السوق

هيام ابتسمت : طيب كويس بقي غني يعني .. وكده اللي فرق بينا معدلوش وجود .. بقي نفس المستوي

عاصم : لا طبعا .. فارس اتجوز وخلف كمان ... فوقي بقي ... خلاص معدش متاح

هيام اتصدمت : ايه اتجوز ؟؟ اتجوز عليا انا ؟؟ تطلع مين هيا!!

عاصم : هيام اقفلي بقي الموضوع ده

هيام قاطعته : تطلع مين هيا يا بابا ؟؟

عاصم : واحده عاديه من حارتهم مدرسه هيا .. بنت من مستواه

هيام : انا يتجوز عليا مدرسه ... ماشي يا فارس !

عاصم : هيام .. فكري في مستقبلك وسيبي الماضي في حاله بقي

هيام : حاضر يا بابا هفكر في مستقبلي وبس اوعدك بعد اذنك !!!

مشيت هيام ومفيش غير حاجه واحده في دماغها فارس وبس ....

ايمان مع فارس قاعده وبتلف وتدور وتتكلم كتير

فارس : ايمان ... وبعدين ساعه بترغي .. ما تجيبي من الاخر

ايمان : مفيش اخر انا بس برغي معاك

فارس : هو انا مش عارفك ولا ايه ؟؟ انا بعرف امتي بترغي وامتي بتبقي عايزه توصلي لحاجه فارجوكي هاتي من الاخر

ايمان : حاضر .. بص يا فارس انا عارفه انك بتكره اعياد الميلاد جدا ومقدره ده

فارس : من غير مقدمات بقي يا ايمان

ايمان : حمزه هيتم سنه وعايزه اعمله عيد ميلاد.. ممكن ؟ ارجوك ده اول عيد ميلاد ليه ؟؟

فارس ضحك: انتي متخيله اني ممكن ارفض اعمله عيد ميلاد !! ايمان زمان كانت ظروف تانيه خالص وكان في جروح كتيره مفتحه دلوقتي انتي عالجتي كل حاجه .. اعملي العيد ميلاد اللي انتي عيزاه واعزمي كل حبايبنا فيها

ايمان فرحت جدا وفعلا عملت عيد ميلاد لابنها والكل مهيص وفرحان ومبسوط

جرس الباب ضرب وفتحت فرح الباب واتفاجئت باللي علي الباب

فرح : انتي ؟؟

جت تقفل الباب في وشها بس زقتها ودخلت

هيام : لسه برضه لازقه بعيالك في بيته ؟؟ في حاجات ما بتتغيرش ابدا

فرح : وفي بني ادمين برضه ما بيتغيروش ..وجودك مش مرغوب فيه اتفضلي

هيام :مش انتي اللي هسمع كلامك

دخلت هيام والكل شافها وسكت وهيا فضلت تبص للوشوش كتير وكله ساكت

هيام : مين بقي مرات فارس ؟؟؟توريني شكلها

ايمان كانت شايله كريم وبصالها مصدومه

هيام بصتلها : انتي صح ؟؟ الخوف مالي عنيكي !! وعندك حق تخافي لاني راجعه وناويه ارجع جوزي لحضني ...

فجأه صوت من وراها

فارس :هيام !!

ونكمل بكره

توقعاتكم

ShiMoOo

الحلقه ١٩

ايمان كانت شايله كريم وبصالها مصدومه

هيام بصتلها : انتي ؟صح ؟؟ الخوف مالي عنيكي !! وعندك حق تخافي لاني راجعه وناويه ارجع جوزي لحضني ...

فجأه صوت من وراها

فارس :هيام !!

هيام بصتله : فارس حبيبي وحشتيني

فارس : حبيبك ؟؟ ووحشتك ؟؟ ما علينا افندم !!جايه ليه بعد السنين دي كلها!! وزي ما فرح قالتلك وجودك مش مرحب بيه

هيام : بيبي انت لسه زعلان مني ولا ايه ؟؟ انا هيام حبيبتك !!!

فارس : انتي قاطعتي عيد ميلاد ابني فلو سمحتي اتفضلي بقي

هيام : اوكي كل سنه وهو طيب هشوفك بعدين باي

هيام مشيت بس عملت قلق للكل

وبعد ما البيت فضي وكله روح ايمان شايله ابنها بتنومه وجوزها قاعد قصادها بس حست انه ابعد ما يكون عنها.. في عالم تاني

فارس سرحان وبيفكر يا تري ايه اللي رجع هيام بعد السنين دي كلها؟؟وراجعه ليه وعايزه ايه ؟؟

اسئله كتير بتدور في دماغه مش لاقيلهااجابه !!!!

فاق علي صوت مراته بتكلمه

فارس : قولتي ايه ؟؟ سوري ما سمعتش

ايمان : بسألك مالك وبتفكر في ايه ؟؟ اوعي تكون بتفكر فيها ؟؟

فارس قام واخد مراته في حضنه

فارس : ايمو حبيبي هيام خلاص صفحه واتقفلت ما تقلقيش مش هتتفتح تاني

ايمان : اكيد يا فارس .. انت مش هتهد بيتك اللي تعبت فيه ولا هتسيب ابنك علشان خاطرواحده خلتك خسرت كل حاجه ..

فارس بصلها كتير واخيرا نطق : اكيد

تاني يوم في شغله باب مكتبه خبط ودخلت هيام بصلها وكأنه كان متوقع مجيها ليه ..

هيام : توقعت اني جايه صح ؟؟

فارس : اكيد خير ؟؟ عايزه ايه يا هيام ؟

هيام : عايزه جوزي وبس

فارس : جوزك ؟؟ جوزك انتي خرجتيه من حياتك فخلاص بخ مفيش

هيام : فارس انا لسه بحبك وعايزه نرجع لبعض

فارس : مفيش بعض دي .. اللي بينا انتهي يا هيام وانتهي بشناعه فسوري .. معنديش استعداد اجرب تاني معاكي ودلوقتي لو سمحتي عندي شغل

هيام : انامش هقبل رفضك يا فارس انت بس محتاج وقت تستوعب فيه وجودي في حياتك من تاني وانا هديك الوقت ده

فارس وقف :شكلك انتي اللي محتاجه وقت تستوعبي فيه انك خلاص بقيتي ماضي وبس وماضي مش حلو كمان بعد اذنك

سابلها المكتب وخرج ونزل للمصنع يشوف الشغل ماشي ازاي !!!

هيام وهيا خارجه قابلت كريم اللي كان داخل يدور علي فارس

هيام : فارس لسه ماشي حالا

كريم : وحضرتك تبقي .؟؟؟

هيام : مراته ...

سابته ومشيت وهو مستغرب جدا .. مراته ازاي ؟؟

نزل جري لفارس يشوفه فين وعلامه الذهول علي ملامحه

فارس : مالك عامل كده ليه ؟

كريم : انا لسه حالا مقابل واحده بتقول انها مراتك ولولا اني عارفك كويس كنت قلت انك بتلعب بديلك؟

فارس : دي طليقتي مش مراتي بس بتحلم شويتين

كريم : ودي حد يطلقها ؟؟

فارس : هيا للاسف منظر بس .. اه جميله جدا بس من جوه حاجه تانيه خالص وانا فضلت فتره اسيرها بس الحمد لله اتحررت منها

كريم : يعني فعلا طليقتك ؟

فارس : اهه فعلا طليقتي .. خلينا في الشغل كنت عايز حاجه ؟

وكملوا كلامهم في الشغل ... يوم وري يوم هيام بتيجي لفارس ويطردها .. بس دماغه بتفكر كتير واسئله كتير ملهاش اجابه .. وقلق وخوف مسيطرين علي ايمان . خايفه علي حبها الوليد ينتهي بظهور هيام . خايفه جوزها يحن للماضي وجوزها حاسس بخوفها ده بس مش عارف يعمل ايه فبيسكت ...

في يوم هيام معاه

فارس : وبعدين بقي يا هيام لامتي ؟؟ قولتلك انا مش هسيب لا مراتي ولا ابني فريحي نفسك بقي ؟مراتي هيا اللي وصلتني للي انا فيه دلوقتي !! هيا اللي وقفت جنبي لحد ما وقفت علي رجليا بعكسك انتي تماما اللي كنت كل ما بقف بتغرقيني تاني ؟؟

هيام : مين قالك اني عيزاك تسيب مراتك او ابنك ؟؟

مراتك وقفت جنبك واستحملت حاجات انا ما استحملتهاش والاهم من كل ده انها ام ابنك ... كل ده انا عارفاه كويس وفهماه

فارس : ولما انتي فهماه عايزه ايه مني بقي ؟؟

هيام : عيزاك انتي يا فارس

فارس باستغراب : سوري مش فاهم .. انتي عايزه ايه بالظبط ؟؟؟

هيام : عايزه حبيبي .. احنا بنحب بعض ( جه يقاطعها بس معطتلوش فرصه ) وده مش هننكره لا انا ولا انت .. احنا بنحب بعض .. ودي مكانتش مشكلتنا .. مشكلتنا كانت فرق الطبقات بينا انا اتربيت بطريقه معرفتش اتخلص منها او اغيرها وانت اتربيت بطريقه مختلفه .. وعلشان كده فشلنا نتلاقي انا وانت في نقطه لكن ايمان بما انها جارتك ومن نفس منطقتك فهيا عرفت تعمل اللي انا معرفتش اعمله وبالتالي نجحتم في علاقاتكم بس اوعي تقولي انك بتحس معاها زي ما كنت معايا ... اللي بيني وبينك حاجه اكبر اننا نوصفها بكلام ... انت في حضني يا فارس مهما كانت خلافاتنا الا انك كنت بتنسي الدنيا بكل مافيها ... وده اتمني انك ما تنكروش ..

فارس : مش هنكره .. لا عمري نكرته ولا هنكره .. بس تخطيته .. ولحد دلوقتي انا برضه مش فاهم انتي عايزه ايه مني ؟؟

هيام : نرجع انا وانت لبعض

فارس ضحك : بجد !! وايه اللي ممكن في العالم ده كله يخليني ارجعلك ؟؟؟

هيام : علشان انت بتحبني

فارس : ايوه انا كنت بحبك ... بس خلي بالك من كلمه كنت دي ... فعل ماضي .. لكن الحاضر والمستقبل لايمان وبس انتي مالكيش مكان فيه

سابها ومشي وهيا اتغاظت لانها مش عارفه تدخله وقررت انها تلعب بطريقه مختلفه .. لازم توري فارس هو ناقصه ايه مع ايمان !!!!

فارس كلام هيام اثر فيه وبدأ يفتكر ذكريات حلوه بينهم ويتجاهل شويه شويه الوحش اللي فيها ...

هيام عينت مراقبه علي فارس وتحركاته كلها وبيبلغوها بكل حركاته اول باول

@ يا هانم فارس بيه اخد مراته وخرجوا يسهروا بره في ....

هيام : اوكي خليك وراه

راحت هيام للمكان اللي فارس فيه مع مراته وفضلت تراقبهم من بعيد ... اتعشوا ورقصوا مع بعض رقصه بسيطه لان ايمان كان شكلها محرج من الناس والمكان .. وابتسمت هيام لانها عرفت هتلعب ازاي !!!!

انتهزت فرصه فارس بعد عن ايمان وراح ناحيه الحمام وهناك خبطت نفسها فيه ويدوب هيعتذر اتفاجئ انها هيا

فارس : هيام !!

هيام : فارس انت هنا !! صدفه جميله ..

فارس : بدأت اشك انها صدفه ... بعد اذنك

هيام : جميل المكان ده .. صح !! فاكر سهراتنا انا وانت مع بعض .. فاكر كنا بنرقص قد ايه ؟ كنت ببقي طايره في حضنك والكون كله ما بيهمنيش .. ما بفكرش غير اني في حضنك وبس .. فاكر يا فارس ....

ايمان قلقت لوحدها فقامت تروح هيا كمان الحمام تعدل الميكب بتاعها وتسترد ثقتها في نفسها

هيام : انت فاكر صح ؟؟ فاكر بعد ما بنروح كنا بنعمل ايه !! فاكر سهراتنا لحد الصبح. وتقعد تتخانق معايا وتقولي عندي شغل الصبح وانا اقولك نام هو انا مسكاك بس اول ما اديلك ظهري كنت بتتجنن وتشدني اكتر واكتر وتاخدني في حضنك ..

ملامحك بتقول انك فاكر كل كلمه .. صح يا فارس ؟؟

فارس كان بيفتكر كل كلامها ده وبدأ يحن لذكرياته وهيا استغلت الفرصه وقربت منه قوي وباسته ..

هنا ايمان اتجننت وفكرت تدخل تجيبها من شعرها ويدوب هتتحرك وقفت مكانها وحبت تشوف جوزها هيعمل ايه الاول هيستجيب ولا هيقاوم ...

فارس فاق وزق هيام بعيد

فارس :انا فعلا فاكر كل كلامك ده بس فاكر برضه خناقاتك اللي مكنتش بتنهي وطلباتك اللي كانت مخلياني علي الحديده وامي اللي كنتي بتعامليها زي الخدامه وحبستيها وكانت هتموت فيها وفرح اختي اللي خليتيها ما تدخلش بيتي وفاكر منظرها وانتي بترميها علي الارض تحت رجليا .. وللاسف ده غطي علي اي حاجه حلوه عملتيها بعد اذنك

زقها بعيد لزقت في الحيطه وراح دخل الحمام وايمان ابتسمت ورجعت تربيزتها ..

فارس دخل وغسل وشه واخد نفس طويل واكتشف انه كان محتاج قوه علشان يبعد هيام عنه واكتشف للاسف ان لمساتها وحشاه جدا !!!!

هيام اتنرفزت وخرجت وشافت ايمان واتقابلت عنيهم بتحدي واضح وراحتلها

ايمان : ايه مالك ؟؟ وشك احمر ليه ؟؟

هيام : ماهو حاجه من الاتنين يا حب يا خناق بس يا تري انهي فيهم الصح ؟؟

ايمان : اعتقد انه خناق لان الواحده لما وشها بيبقي احمر من الحب بتبقي في حاله ... هيام يا هيام

وضحكت وده ضايق هيام اكتر

هيام : اوعدك يا ايمان ان فارس هيرجعلي وانا مش هرتاح الا لما اخده منك

سابتها ومشيت وفارس خارج شافها ماشيه

فارس : قالتلك ايه ؟؟

ايمان : كلام فاضي ما تشغلش بالك .. المهم انت

فارس : انا مالي ؟؟

ايمان : قالتلك حاجه ضايقتك ؟؟

فارس : لا طبعا ما تشغليش بالك انتي كمان .. يالا بينا ولا تحبي تسهري اكتر ؟

ايمان : لا يالا علشان حمزه مع مامتك لاحسن يصحي ويجننها

مشيوا وحاله صمت سيطرت عليهم والاتنين احترموا صمت بعض محدش فيهم قطع الصمت ده ..

الكلام قل بينهم تماما والمسافات كبرت بينهم وايمان حست ان جوزها بيروح منها ومش عارفه تعمل ايه وفي نفس الوقت عايزاه هو اللي يقفل صفحتها بقي لانها مش هتعيش عمرها كله مهدده ...

فارس حاول يغرق نفسه بالشغل اكتر واكتر فكبر مجال تعديل عربيات السباق اللي بتجيله وده شغل بيعمله بايده .. وامجد ابن داليا اكتر واحد بيساعده ويقف معاه ويتجننوا مع بعض ....

كريم : فارس ..انت ليه بتشتغل كتير في تعديل العربيات ده ؟؟ حاول تعلم كام مهندس وهما يشتغلوا وانت اشرف عليهم

فارس : اوك هعلم كام واحد بس انا بشتغل لاني حابب اشتغل مش اكتر

كريم : انت حابب تلبس عفريته وتنزل تحت عربيه وتبقي كلك زيت وشحم ؟؟

فارس ابتسم : دي مجرد اضرار جانبيه .. ههههه ما تشغلش بالك انت

كريم : ممكن اسألك سؤال شخصي ؟؟

فارس :اسأل

كريم : هو انت بتفكر ترجع طليقتك ؟؟

هنا دخل مجدي وهو اللي جاوب : يبقي عنده تخلف عقلي ومحتاج نوديه مستشفي للامراض العقليه ؟؟

كريم : اشمعني ؟؟ دي بنت جميله ورائعه وبنت واحد تقيل جدا في السوق ومهندسه يعني من الاخر بيرفكت .. انا مستغرب اصلا انت ازاي عرفت تطلقها وليه ؟؟

فارس ماردش عليه بس مجدي اللي رد

مجدي : هيا شكل بس لكن جوه فاضي .. وبعدين الجميله دي خلته كان بيشحت

كريم : طيب ده كان زمان اعتقد دلوقتي هو يقدر يواكب مصاريفها ..

مجدي : كريم اسكت خالص لو سمحت انت ما تعرفش هيام عملت فيه ايه وما صدقنا انه تخطاها فارجوك ما تلعبش في دماغه

كريم رفع ايديه باستسلام : سوري شيء ما يخصنيش ..

سابهم وخرج وفارس برضه ساكت

مجدي : فارس ... فوق لنفسك وافتكر هيام عملت معاك ايه وايمان عملت معاك ايه. ؟ وفكر في حمزه ابنك ؟؟

فارس : انت بتقولي ده ليه ؟؟ انا ما بفكرش في هيام بعد اذنك

هرب فارس من قدام مجدي لانه اكتر واحد فاهمه جدا ...

في يوم بالليل هيام اتصلت بفارس وهيا بتعيط

فارس : في ايه يا هيام اهدي واتكلمي علشان افهم انتي بتقولي ايه ؟؟

وهيام بتعيط وبس وهو مش فاهم مالها واخيرا بعد محاولات كتيره نطقت واتكلمت

هيام : في قزاز اتكسر مني واتعورت جامد ومش عارفه اكلم مين ؟

فارس : ابوكي وامك فين و الخدم والحشم بتوعك

هيام : انا في شقتي مش مع بابي ومامي وبعدين هما مسافرين مش في القاهره حاليا ارجوك يا فارس ارجوك

فارس : اطلبي الاسعاف يا هيام

هيام بتعيط وتتوجع : معرفش ارقام ليهم ارجوك يا فارس .. طيب لو خايف مني هات ايمان معاك اعتبرها خدمه لانسان كان بينكم وبين بعض عيش وملح ارجوك يا فارس

فارس : حاضر يا هيام جايلك .. قولي عنوانك ايه ؟

كتب عنوانها ودخل غير هدومه ونازل

ايمان : انت رايحلها ؟؟

فارس وقف لانه متخيلش انها سمعته بيتكلم

فارس : بتقول انها اتعورت ومعهاش حد مش هتأخر

ايمان : وانت صدقتها ؟؟ اتعورت تجري عليها ؟؟

فارس : مالك يا ايمان في ايه ؟؟ انا من امتي بتأخر عن اي حد ؟ وبعدين واحده لوحدها وفي ازمه وطلبت مساعدتي اكيد مش هتأخر !!

ايمان : بس دي مش اي واحده دي مراتك وعيزاك ترجعلها باي تمن

فارس : مراتي هاه !! بطلي تقولي الكلمه دي كتير بدال ما تبقي بجد .. بعد اذنك يا ايمان مش هتأخر

سابها ومشي وهيا عيطت مكانها وخوف ملاها ..

فارس نزل وراح لهيام اللي فضل معاها علي التليفون الطريق كله لحد ما اخيرا وصل ووقف علي الباب

فارس : هيام افتحيلي انا علي الباب

هيام : مش قادره اقوم يا فارس ... في مفتاح علي الباب من فوق خالص حاول تجيبه .. بابا كان حاطط نسخه لنفسه

فارس حاول وفعلا لقاها وفتح الباب ودخل واتفاجيء فعلا بقزاز كتير في الارض وهيام متكومه في ركن ودم كتير حواليها فجري عليها لانه مكنش مصدق ابدا كلامها وكان عايز يثبت لنفسه انها بتكدب وبس ...

فارس بخوف : انتي متعوره فين ؟؟ هاه

هيام ابتسمتله بحب واغمي عليها بين ايديه !!!

شالها فارس وهو مش عارف يعمل ايه ؟؟ بس الاول لازم يلبسها اي حاجه لانها تقريبا شبه عريانه

دخل اوضه نومها وطلع اقرب فستان جه في ايده ولبسهولها وشالها ونزل علي اقرب مستشفي وهناك فوقوها وخيطولها رجلها المتعوره وركبولها محلول يعوض الدم اللي نذفته وكل ده فارس جنبها

ايمان اتصلت بيه اخر ما صبرها نفد وخافت يبات معاها فداست علي كرامتها واتصلت

ايمان : انت فين ؟ اتأخرت ليه ؟

فارس : انا في المستشفي .. هيام متعوره جامد واخدتها علي المستشفي ... ايمان ما تخافيش عليا وما تفهميش وقفتي جنبها غلط اصبري عليا اوكي

ايمان : ماشي يا فارس براحتك تصبح علي خير

فارس فضل معاها لحد ما فاقت واخدها روحها البيت وطلعها في اوضه نومها وحطها في السرير ويدوب هيبعد مسكت في رقبته وباسته وهو للاسف استسلم لبوستها واندمج معاها جدا .. يمكن تعبها او خوفه عليه او ريحتها اللي كانت وحشاه او ضعفها او احتياجها ليه او كل الامور دي مع بعض خلته يستسلم ... بس صوره ايمان طاردته ووقفت قدام عنيه فبعد عن هيام تماما

هيام : فارس ارجوك

فارس : هطلع اشيل القزاز اللي بره بدال ما يعور حد تاني

فارس سابها وطلع شال القزاز اللي في الارض ونضفه تماما وهو سرحان متلخبط بيحارب نفسه

وفجأه سؤال ألح عليه : وفيها ايه لو رجعتلها ؟؟ انت تقدر حاليا تفتح بيتين ؟؟ فيها ايه ؟؟

الوقت اتأخر جدا وهو دخل لهيام وقعد جنبها فحست بيه وبصتله

فارس : انا لازم امشي دلوقتي

مسكت قميصه بخوف : ما تسبنيش لوحدي

فارس : مش هينفع افضل هنا .. نامي وارتاحي والصبح هجيلك

هيام : ارجوك ما تسيبنيش وحدي

فارس : هيام .. مش هينفع بعد اذنك لو في حاجه كلميني سلام

سابها ومشي غصب عنه وهيا سابته لانها حاسه انها انجزت كتير الليله دي وخطتها ماشيه زي ما هيا عيزاها .. ايه يعني كسرت حبه قزاز ولا عورت نفسها !؟المهم النتيجه والنتيجه مرضيه جدا ....

فارس روح ودخل اوضه نومه وايمان بصتله وكان قميصه متوسخ دم

ايمان : في دم علي قميصك ؟

فارس : ده لما شيلت هيام

ايمان بصتله : شلتها ؟؟

فارس : كان مغمي عليها كان المفروض اعمل ايه ؟ هاه ؟ اسيبها ولا اجرجرها في الارض ؟؟

ايمان : اممم وهيا عامله ايه دلوقتي ؟؟

فارس : تعبانه جدا ومش بتتحرك ومكنتش عايزاني اسيبها

ايمان بتريقه : وسيبتها ليه ؟ ما نمتش في حضنها ليه ؟

فارس اتنرفز : تصدقي عندك حق انا غلطان .. كان المفروض نمت في حضنها ..

سابها ودخل يغير هدومه وذكري شفايف هيام مش مفرقاه نهائي .. الصبح بدري بيلبس ونازل

ايمان : نازل بدري قوي النهارده ليه ؟؟ في حاجه ؟؟

فارس : لا بس مش هينفع اتأخر علي هيام اكتر من كده وهيا لوحدها طول الليل

ايمان : نعم ؟؟ لوحدها ؟؟ وانت مالك انت ؟ كتر خيرك اللي رحتلها وفضلت جنبها كمان رايحلها دلوقتي ؟؟ وبعدين فين ابوها وامها ؟؟

فارس : بغض النظر عن اسلوب التريقه اللي سيادتك بتتكلمي بيه بس هقولك ابوها وامها مسافرين وهيا لوحدها ومش هسيبها لوحدها فوفري كلامك

ايمان : فارس

قاطعها فارس : اوعي ترجعي لجنونك وتخيريني بينك وبينها تاني اوعي يا ايمان !! بعد اذنك

سابها ومشي وهيا قعدت مكانها تعيط لحد ما منيره جاتلها وقعدت جنبها

منيره : بطلي عياط لان ده مش وقت العياط

ايمان : وانا بأيدي ايه غير العياط دلوقتي ؟جوزي مع حبيبته الاولي وشكلها الاخيره المفروض اعمل ايه ؟؟

منيره : هيام اعلنتها صريحه انها في حاله حرب وللاسف انتي استسلمتي من اولها وما حاربتيش

ايمان : احارب ازاي وهيا مسيطره علي قلبه ؟؟ احارب بايه ؟؟ واحارب مين ؟؟

منيره : نعم ؟؟ مسيطره علي قلبه ؟؟ خليها تشبع بيه قال قلبه قال ؟؟ انتي غبيه ولا محتاجه قلمين تفوقي بيهم !!

ايمان : فارس بيحبها يا امي

منيره : فارس فاكر نفسه بيحبها لكن هو بيحبك انتي وانا شفت معاملته ليكم انتو الاتنين وبعدين انتي ليه عامله في نفسك كده ؟؟ ده مش وقت الانكسار ده وقت تقفي علي رجليكي وتتفنني ازاي تغلبيها .. بتقولي معاها قلبه وانتي معاكي ايه ؟؟ هاه ؟؟ معاكي عقله ..ابنه ..امه.. اخته ..انتي بجمالك وحلاوتك ووقفتك جنبه طول الفتره اللي فاتت ...انتي وقفتيه علي رجليه... انتي بعتي كل حاجه علشان تخليه يحقق حلمه .. انتي معاكي كل حاجه لكن هيا معاها سراب محتاج بس شعاع شمس يطلع هيبدده تماما .. فحاليا فوقي ووري فارس انتي ايه؟؟ مش قاعدالي تعيطي وتندبي في حظك وشكلك زي ما يكون ميتلك حد ... انزلي اشتري كام طقم جديد من اللي فارس بيحبهم وارجعي نجمه والمعي في ليله .. اخر مره فارس لمسك امتي هاه ؟؟ ساعت عيد الميلاد صح ومن ساعتها بعدتي عنه وبتقدميهولها علي طبق من فضه وبتقوليلها خدي جوزي اهو

ايمان : يعني اعمل ايه اقوله والنبي تعال نام معايا ؟؟ والنبي قرب ؟؟

منيره : وانتي محتاجه تقوليها كده .. الست اللي ما تعرفش تغري جوزها يبقي ملهاش لازمه في بيته

ايمان : وهيام اللي هو عندها دلوقتي وعملالي فيها متعوره وبتموت وهو جنبها

منيره : وهيفضل جنبها ومش هيسيبها

ايمان : اعمل ايه انا بقي ؟؟

منيره : خليه يجيبها هنا يا ايمان .. مش هو جنبها بحجه انها لوحدها ومفيش حد معاها ؟ قوليله يجيبها هنا واحنا كلنا معاها

ايمان اتنرفزت : انتي عيزاني اقوله يجيب طليقته هنا وانا اخدمهالو لا كده كتير قوي

منيره شدتها وقعدتها : مش احسن ما هو هناك معاها لوحدهم بيخدمها .. انتي من امتي غبيه كده؟؟ زمانها بتدلع عليه .. اه تعبانه .. اه شيلتي يا فارس وديني الحمام .. اه شيلني يا فارس طلعني البلكونه اشم هوا .. اه خدني يا فارس في حضنك لاحسن تعبانه قوي .. اه تعال حميني يا فارس واعتقد الباقي واضح صح ده اللي انتي عيزاه ؟ ولو لمسها ثقي تماما انه ساعتها هيردها

ايمان : انا هسيبله البيت وامشي وخليه يشبع بيها

منيره : انتي حره دي حياتك وانتي حره بس خلي بالك ان في حمزه بينكم فكري فيه هو كمان ...هيام خسرانه بس انتي اللي بتخليها تكسب علي حسابك .. عقلك فيكي انتي مش صغيره ..دي حرب وانتي بتستسلمي ...

ايمان فضلت محتاره شويه تقوم تفتح الدولاب وشويه تقعد .. شويه تفكر تمشي وشويه ترجع في كلامها واخيرا تليفونها رن

فارس : ايمان معلش حبيبي هو انتي بتعملي فراخ ازاي ؟ عايز اعملها اي اكل ومش عارف ؟؟ اعمل ايه ؟

ايمان كانت عايزه تنفجر فيه ويدوب هتنطق سمعت صوت هيام بدلع

هيام : فارس ارجوك ممكن تساعدني ارفع رجلي علي التربيزه وجعاني قوي .. اه

فارس شكله فعلا راح يساعدها لانها سامعه صوتهم مع بعض

فارس : كده كويس ؟

هيام بدلع : اه بس حطلي مخده كمان ممكن ؟ اه براحه

فارس : سوري براحه اهو عايزه حاجه تاني ؟

هيام : ما اتحرمش منك ابدا بيبي

ايمان افتكرت كلام منيره كله وتخيلت هيام بتقول لفارس يحميها وتخيلتهم مع بعض وهنا اتجننت واعلنت الحرب هيا كمان

فارس : سوري ايمان سيبتك علي التليفون هاه اعمل ايه ؟

ايمان : ما تعملش يا روح قلبي .. هاتها هنا وانا مجهزه الغدا وانا هاخد بالي منها لكن انت ما تعملش حبيبي انت بس تشاور ..

فارس اتصدم : افندم ؟؟ اجيب مين فين ؟

ايمان : هات هيام هنا وانا هخلي بالي منها وانت انزل شغلك حبيبي .. وما تخافش مش هسيبها لوحدها

فارس : انتي بتهزري ولا بتتكلمي جد ؟؟

ايمان : هزار ايه بس ؟ واحده عيانه ومحتاجه مساعده وانا اهو بقولك هساعدها فين المشكله ؟

فارس : المشكله انها طليقتي انتي متأكده ؟

ايمان : طبعا حبيبي واحده محتاجه مساعده بغض النظر هيا مين الا اني مستعده اساعدها وكله يهون علشان خاطر حبيبي ابو ابني .. يالا مستنياكم هجهز الاكل عقبال ما تيجي باي ..

قفلت وسابته متنح مش عارف يعمل ايه ؟؟

فارس : هيام .. يالا بينا

هيام : علي فين بيبي ؟؟

فارس : هاخدك البيت عندي يالا

هيام : نعم ؟؟ انهي بيت ؟؟

فارس : بيتي وهناك امي وايمان هيخلوا بالهم منك

هيام كده خطتها مش هتنفع لانها مش هتعرف تغري فارس في بيته وفي وجود مراته

هيام : لا طبعا انا مش هروح بيتك

فارس : وانا مش هقدر افضل هنا فاختاري تفضلي لوحدك ولا تيجي معايا البيت ؟ انا عندي شغل ومش فاضي ولو هنا دلوقتي بعد شويه مش هبقي فخدي قرارك ؟؟

هيام شافت اصرار في عنين فارس وللاسف مش هتقدر تقعد لوحدها وفعلا ابوها وامها مسافرين فاضطرت توافق ..

فارس اخدها البيت واتفاجؤا بايمان بتستقبلهم بابتسامه واسعه وجمال وشياكه وغارت هيام منها لانها اول مره تشوفها بلبس البيت وشعرها ومكياجها ..

ايمان : حبيبي حطها هنا علي الكنبه لحد ما تاكل وبعدها نبقي ندخلها ترتاح

فارس حطها وايمان ساعدته وبعدين بصلها وهيا قربت منه فحضنها وباسها بسرعه

ايمان : لحظه والغدا يبقي جاهز

سابتهم وهو لقي نفسه رايح وراها

فارس : بس ايه الحلاوه دي ؟؟ كنتي فين من زمان وحشاني !!!

ايمان : انا علي طول قدام عنيك بس انت اللي ما بتاخدش بالك

فارس : انا القمر ده قدامي ومش واخد بالي ؟ طيب ازاي ؟ اعمي انا ولا اهبل ؟

ايمان بدلع : الاتنين

فارس : عندك حق ... نتغدي بس واصلح غلطي ده بسرعه .. ولا ايه رأيك الاول

قاطعته : نتغدي الاول ونغدي المسكينه دي وبعدين انا مش عايزه كروته

فارس ضحك : انا بكروت ؟؟؟ ماشي ؟؟ حقك يا قمر ..

منيره دخلت وابتسمت لابنها وساعدت ايمان يحطوا الاكل

منيره : برافو .. خلي عنيه ديما مليانه .. واديكي اهوه بحبه ميكب خلتيه مش شايف غيرك .. مش تعيطي وتقولي راحلها ... اهي قدامه ومعبرهاش لانه مش شايف غيرك ...

اتغدوا وايمان مهتميه بفارس جدا وحماتها بتهتم بهيام اللي هتولع من اللي بيحصل قدامها وبعد ما خلصوا اكل

هيام : انا عايزه ارتاح ممكن ؟؟

ايمان : فارس حبيبي وديها اوضتها اللي جهزتهالها ... يالا هاتها وتعال

فارس شالها وايمان اتنرفزت بس سيطرت علي اعصابها ومشيت قدام جوزها بدلع وفتحتله الباب وهو دخلها وحطها

ايمان : ابعد انت حبيبي انا هغطيها ..

ايمان غطتها وقربت منها قوي : اوعي تتخيلي اني هسمحلك تاخدي اكتر من اللي انا اقدمهولك.. الف سلامه عليكي

شدت جوزها علي بره : يالا نسيبها ترتاح ويالا علشان تنفذ وعدك بتاع قبل الغدا

فارس ضحك واخدها واول ما قفلوا الباب سمعت ضحكه عاليه منه وصرخه منها وجري ورزعه لباب وده جننها اكتر واكتر وعرفت ان ايمان مش خصم سهل ابدا ...

ونكمل بكره

توقعاتكم

ShiMoOo

الحلقه ٢٠

هيام قعدت في بيت فارس وايمان بتخدمها هيا وامه وهو مستغرب جدا من رد فعل ايمان لانه ما تخيلوش ابدا ... هيام مهما تحاول تدلع بتلاقي ايمان فوق دماغها ديما وبتبعد فارس عنها نهائي

مجدي عدي علي فارس ايمان فتحتله الباب ودخل اتفاجئ بهيام في الصاله قاعده معاها فشار ورافعه رجليها علي التربيزه وتنح وبص لايمان

مجدي : ايه ده؟؟

ايمان بتريقه : شوفت الهنا اللي انا فيه ؟؟

مجدي : لا بجد ايه ده ؟؟

هيام : بتتوشوشو علي ايه كده ؟؟ هاه ؟؟ لسه زي ما انت يا مجدي ما اتغيرتش

مجدي : الحمد لله علي كل حال

هيام : ايمان .. عايزه قهوه

ايمان بصتلها ويدوب هترد فارس خرج

فارس : مجدي ازيك كنت لسه هكلمك اشوفك اتأخرت ليه ؟ جيت امتي ؟

مجدي : يدوب ولسه ما فوقتش من اللي انا شايفو

فارس ضحك : ادخل تعال .. ايمو حبيبي اعمليلنا قهوه بعد اذنك

ايمان : عنيا حبيبي

هيام : جيت في وقتك يا فارس بقالي ساعه بتحايل عليها تعملي وهيا مش راضيه ..

ايمان : المنبهات غلط عليهاحبيبي وبعدين غلط جدا مسكنات مع منبهات .. ممكن انتي مش عايزه تخفي بسرعه بس انا عيزاكي تخفي .. هعملك لبن

هيام بنرفزه : انتي شيفاني عيله قدامك هتشربيني اللبن ؟؟

ايمان : طالما مش عارفه مصلحتك تبقي عيله ولا ايه يا فارس ؟؟

فارس : اه اعمليلها لبن خليه يقويها شويه

هيام : مش عايزه منك حاجه

ايمان : براحتك يا قلبي

سابتهم ودخلت وهيام كمان دخلت اوضتها ومجدي فاتح بوقه مذبهل

مجدي : لا قادر ... انت قادر ...

فارس ضحك : اقفل بوقك بس

مجدي : الاتنين في بيت واحد ؟؟؟ طيب ازاي افهم اوعي تكون ردتها ؟؟

فارس : انت اهبل يالا ؟؟ ارد مين ؟؟

مجدي : قادر وتعملها

فارس : اسكت والنبي مش نقصاك

مجدي : ليه ؟؟ لو مكانك اعملها والاتنين يتنافسوا ازاي يرضوني وانا اعيش ملك متوج

فارس : وايوه ولو اتفقوا عليك يخلو نهارك اسود من ليلك ويخلوك تلف حوالين نفسك

مجدي : تقوم رازعهم بوحده تالته تظبطهم الاتنين

ايمان جت وراهم : يا تري ايه الاتنين اللي عايزين تظبطوهم بواحده تالته ؟؟

مجدي : انتي بتيجي في اوقات يا ايمان ؟؟

فارس : هيا اللي بتيجي في اوقات ولا انت اللي لسانك متبري منك ؟؟

ايمان : اتفضلوا القهوه ... وبعدين يا مجدي مش كل حاجه بتيجي بالعند في حاجات محتاجه تتصرف بعقل مش ترزع واحده تالته ؟؟ وبعدين معرفتش تسلك اتنين مع بعض بالعقل كده هتقدر علي تلاته ازاي ؟؟فارس ما تسمعش كلام الواد ده هيغرقك

فارس : انتي عارفاني حبيبي انا ما بسمعش لحد

سابتهم ودخلت

مجدي : لا بجد بقي هيا بتعمل ايه هنا ؟؟

فارس حكاله كل اللي حصل

مجدي : مراتك اخدت مبدأ بيدي لا بيد مش عارف مين ؟؟ هههه ناصحه بدال ما انت تروحلها كل شويه والتاني والامور تتطور قالتلك ايه اجيبها هنا واخليها قدام عيني !!!

فارس : فعلا ده تفكيرها المهم سيبك بقي من الحوارات دي ونتكلم في الشغل ... كريم هيبقي ريسبونسر علي سباق كبير وهيدخل عربياته في السباق وطلب مني اننا نعدلهم بحيث كل العربيات هتبقي نسخه واحده وسرعه واحده بحيث هنا تبان المهاره وعايزين نبدأ .. هما عشر عربيات اوك ؟

مجدي : الواحد بطل الشغل بايده !!

فارس : بطل كسل بقي

مجدي : خلاص خلاص ما تزوقش هساعدك ونخلصهم بسرعه ...

بالليل فارس سهران قدام التليفزيون لوحده وايمان دخلت تنوم ابنها ونامت معاه من التعب وطبعا هيام استغلت الفرصه ان فارس لوحده فطلعت وقعدت معاه بفستان اشبه لقميص النوم ...

هيام : امال مراتك سيباك لوحدك ليه ؟؟

فارس : بتنوم حمزه ونامت معاه

هيام : وانت في الوقت ده بتعمل ايه ؟؟بتفضل لوحدك ؟؟

فارس : عاده بنام انا كمان لان عندي شغل نادرا ما بسهر كتير .. وبعدين هيا كتر خيرها .. شغل طول النهار مع حمزه ومسؤليته .. الله يعينها ما بتقصرش في حق حد ابدا

هيام : برافو ست بيت ممتازه ... بس يا تري كعشيقه وصاحبه ايه ؟؟

فارس : ما تتعبيش نفسك يا هيام

هيام : ما اتعبش نفسي في ايه بالظبط ؟ خايف مني ليه يا فارس ؟

فارس : انا خايف منك ؟

اتعدل وبصلها

فارس : خايف منك ازاي ؟؟

هيام : خايف اني اقرب لاحسن تضعف لانك ماسك نفسك مني بالعافيه واي قرب منك هتنهار مقاومتك

فارس ضحك : بجد ؟؟ انتي شايفه كده ؟؟ يعني لو المعتقد ده بيريحك نفسيا اتمسكي بيه !!

هيام : يعني انا لو قربت منك كده مش هتخاف ؟

قربت قوي منه لدرجه انها كلها في حضنه

هيام : فاكر ليالينا كنا بنقضيها ازاي ؟؟ عمرنا ما زهقنا ولا ملينا ومهما نتخانق كان لازم بالليل نتصالح لاننا ما بنقدرش نبقي جنب بعض ونفضل زعلانين فاكر ؟ عمر ما ليله واحده قضيناها جنب بعض زعلانين ولو كنت عايز تزعل كنت بتسيب البيت كله لانك ما بتقدرش تقاومني تنكر ده ؟

فارس : لا ما انكرش بس ده يا هيام مش معناه اني بحبك للدرجه اللي انتي متخيلاها

هيام بتهمس في رقبته : امال معناه ايه ؟؟

فارس قرب من رقبتها قوي وافتكرت انه هيلمسها بس قالها

فارس : معناه انك محترفه في السرير مش اكتر

قام وقف : تصبحي علي خير وما تحلميش كتير قوي ..

سابها ودخل لمراته اللي كانت صاحيه بترضع ابنها وبصتله جامد اول ما دخل وفضل يسأل نفسه ياتري هيا كانت صاحيه من بدري وخرجت وشافتهم ولا هيا هنا وما خرجتش ؟؟ طيب بتبصله كده ليه ؟ ومعني نظراتها دي ايه ؟

فارس : صاحيه من بدري ؟

ايمان : لا يدوب

رقد جنبها وباسها في رقبتها

فارس : تحبي تكملي نوم واسهر انا بيه ؟؟

ايمان بصتله كتير باستغراب لان مش من عوايده يطلب انه يسهر بيه ؟ ولا عايز حجه يسهر بيها مع هيام ؟؟ ويا تري هيفضل يقاومها لامتي ؟؟ هيا شافتهم وشافت محاولاتها لاغرائه واه جوزها رفض بس يا تري لامتي ؟؟؟

ايمان : لا ريح انت .. انا هفضل معاه انت عندك شغل

فارس : فعلا عندي شغل طحن .. موضوع تعديل عربيات السباق ده واكل وقتي كله

ايمان : فعلا وبعدين كنت بطلت ترجع مشحم

فارس : وده مضايقك ؟؟ الشحم ؟؟

ايمان : لا طبعا بالعكس ده واحشني .. انك ترجع وتبهدلني انا معاك شحم وبعدها تفضل تنظفه من علي جسمي

فارس ضحك : انتي بتبقي مجنونه انا اعملك ايه؟وكل مره بتقنعي نفسك انك هتعرفي تنظفيه

ايمان بدلع : مش يمكن انا بضحك عليك علشان انت تنظفهولي ؟؟ مش يمكن ده شيء بيعجبني وبيعجبني انك انت تعمله بايدك ؟؟

فارس : مش بقولك مجنونه!!!

ايمان : وهيا الواحده لو ما اتجننتش مع جوزها هتتجنن فين ؟؟

فارس : ابنك نام ولا لسه ؟

ايمان ضحكت : نام بس انت عايز تنام

فارس : وهو في راجل عاقل ينام وجنبه قمر !!

..............................

هيام هتتجنن من ايمان ومراقبتها ليها وعايزه تمشي بس لو مشيت مش هتعرف تجيب فارس عندها تاني ليها ...

تاني يوم الصبح طلبت من فارس شويه حاجات يجيبها وهو استغرب بس بعتلها اللي هيا عيزاه علي البيت

ايمان فتحت الباب لقت العامل بتاع السوبر ماركت جايب حاجات كتير

ايمان : سوري بس انا ما طلبتش حاجه

العامل : باشمهندس فارس هو اللي طلبها وطلب مننا نوصلها لحد البيت

هيام طلعت : اه اتفضل انا عايزه الحاجات دي ..

ايمان : انتي ؟؟

العامل دخل : احط الحاجات فين ؟؟

هيام : دخلها المطبخ

العامل : فين المطبخ ؟؟

ايمان : حطها قدامك واتفضل انت .. حسابك ايه ؟؟

العامل : فارس بيه حاسبني وعطاني بقشيشي كمان اي حاجه حضرتك تحتاجيها تليفون هتكون عندك

ايمان : متشكره جدا لذوقك

العامل مشي وهيام وايمان واقفين قصاد بعض

هيام : ليه مخليتهوش يدخلها المطبخ غاويه تعب انتي

ايمان : لان ما ينفعش راجل غريب يدخل لحد المطبخ ومفيش راجل في البيت

هيام : ده العامل بتاع الديلفيري

ايمان : مش راجل يعني ولا ايه ؟

هيام : ما علينا انا مش حمل جدال معاكي ..ممكن بقي تساعديني ندخل الحاجات دي المطبخ ؟؟

ايمان : انتي طلبتيها انتي دخليها وبعدين ايه الحاجات دي اصلا ؟؟

هيام : قررت اعمل لفارس اكل اتمني انك ما تعارضيش او تخافي انه اكلي يعجبه عن اكلك

ايمان ضحكت بصوتها كله : انتي تعملي اكل ؟؟ وانا اخاف ان اكلك يعجبه ؟؟ لا انتي دماغك لسعت . عارفه مع اني مكنتش ناويه اساعدك في مجرد انك تدخلي الحاجه لا ده انا كمان هتفرج عليكي ( ضحكت تاني ) قال اخاف منها قال (ضحكت تاني )

منيره خرجت علي ضحكها

منيره : في ايه يا ايمان حبيبتي ربنا يفرحك كمان وكمان

ايمان : لا ابدا يا ماما بس هيام ناويه تعمل اكل بنفسها وبتقولي اوعي اغير منها لاحسن اكلها يعجب فارس عن اكلي

منيره ضحكت جامد هيا كمان وده نرفز هيام جدا

هيام : بتضحكوا .. ماشي هتشوفوا هعمل ايه ؟؟

الاتنين كملوا ضحك وايمان اخدت الحاجه تدخلها المطبخ ومنيره دخلت تتفرج

ايمان : الشيف هيام ناويه تعملي ايه سيادتك ؟

هيام : هعمل لازانيا اصلا تلاقيكي حتي ما تعرفيهاش

ايمان : مش هرد عليكي وريني سيادتك هتعملي ايه اتفضلي

هيام : لعلمك اه انا ما بعرفش اعمل اكل الا حاجتين اتنين بحبهم وبتقنهم جدا وهما فطيره التفاح واللازانيا وهتشوفي بنفسك

وفعلا هيام بدأت تعمل وايمان ومنيره بيتفرجوا عليها واستغربوا انها فعلا عارفه بتعمل ايه !!!!

فارس في الشغل مع مجدي

مجدي : اتأخرت ليه ؟؟ الطريق حتي مكنش واقف ولا فضلت في البيت بعد ما كلمتني ؟

فارس : لا ما فضلتش بس عديت علي السوير ماركت اشتريت شويه حاجات للبيت

مجدي : اشمعني ماهي ايمان بتطلب اللي هيا عيزاه وبيوصلها لحد البيت ؟

فارس: هيام اللي كانت طالبه الحاجه مش ايمان .. تخيل انها ناويه تعمل اكل بنفسها ؟

مجدي ضحك : نعم ؟ هيام هتعمل اكل ؟؟ هههههه ابوس ايدك اعزمني النهارده عندك هههههه

فضل يضحك كتير وفارس مستغرب هو بيضحك ليه

فارس : افهم بس الاول سيادتك بتضحك ليه ؟؟

مجدي بيضحك جامد وكريم كان جاي شايف مجدي بيضحك وفارس واقف حاطط ايديه في وسطه

كريم : في ايه ماله ؟

فارس : حاله هبل بعيد عنك

مجدي اخيرا وقف يتنفس : طليقته في بيته مع مراته وناويه تطبخله بنفسها وتأكله لا وطليقته دي ايه عمرها اصلا ما دخلت المطبخ ابوس ايدك اعزمني

كريم ضحك : انا كمان يا فارس عايز اتعزم

فارس : انتو في ايه ؟ ايه المشكله ؟

كريم : بجد انت مش شايف مشكله في ان طليقتك اصلا في بيتك لا وكمان هتدخل لمركز التحكم اللي هو المطبخ وتعمل اكل بايدها لسيادتك !! بجد انت مش شايف اي مشكله ؟

فارس : لا مش شايف واحده عند ناس وبتعرض مساعدتها فيها ايه ؟

مجدي : اولا دي مش واحده دي طليقتك .. دي حبيبتك القديمه اللي ياما عذبت ايمان علشانها .. ثانيا دي واحده عمرها ما دخلت المطبخ ناويه تدخل علشانك معني كده انها بتحاول تغريك باي شيء مهما يكون لدرجه انها هتتنازل وتدخل المطبخ .. ثالثا بقي والاهم اي ست في الدنيا ما بتحبش حد يدخل مطبخها لان ده مملكتها فما بالك الست دي حبيبتك السابقه وما بالك انها بتحاول ترضيك

انت متخيل النار هتبقي عامله ازاي في بيتك ؟؟

كريم : اصلا يا فارس قعدتها في بيتك غلط مع مراتك .. مراتك مستحمله الوضع ده ازاي ؟

فارس : هيا اللي طلبته مش انا

مجدي : مراته بتحبه ومستعده تعمل اي شيء علشانه

كريم : المفروض يا فارس تقدر الحب ده ؟

فارس : انتو محسسني اني قايم اتجوز عليها دي مجرد اكله

كريم : طيب طالما مجرد اكله اعزمنا بقي عليها وخليك جدع

فارس : بس كده حاضر هعزمكم

مجدي : تخيل يا كريم فارس قاعد وايمان علي يمينه وهيام علي شماله ودي تديله معلقه ودي معلقه

الاتنين بيضحكوا

كريم : الا بقي لو شبع هيختم بمعلقه مين ؟؟

الاتنين بيضحكوا جامد عليه

فارس : والنعمه انتو عيال هبله هروح اكلم ايمان اقولها انكم جايين ده انتو غلسين صح ؟

فارس اتصل بايمان

فارس : ايوه يا ايمان بقولك حبيبي .. كريم ومراته جايين علي الغدا ومجدي ومراته كلمي انتي بقي مراتاتهم واعزميهم

ايمان : هتعزمهم علي اكل ست هيام ولا ايه ؟؟

فارس : هيام مين يا ماما.. هيام اخرها تسلق بيضه وهتسألك تسلقها ازاي ؟؟ معلش انتي اتعبي واعمليلنا اي حاجه كده من ايديكي قال هيام قال ولا اجيب من بره لو مش فاضيه او مش عايزه ؟؟

ايمان : لا يا حبيبي طبعا اهلا بضيوفك بس هاتلي رقم مرات كريم انا معرفوش وما اتقابلتش معاها غير مره واحده انا اصلا مش فاكره اسمها

فارس : اسمها هدير هبعتلك رقمها واتس

ايمان : وانت اشمعني فاكر اسمها يعني ؟ ومعاك رقمها منين ؟

فارس : اولا مش معايا رقمها هجيبه من كريم ثانيا فاكر اسمها لان كريم كتير بيتكلم قدامنا وبيقول اسمها زي ما انا مثلا بكلمك واقول اسمك قدامه

ايمان : ماشي يا عم ماشي

فارس بعتلها الرقم من كريم

ايمان كلمتهم ودخلت المطبخ وبدئت تجهز غدا معتبر لضيوف جوزها ومنيره بتساعدها ونوعا ما هيام غارت من علاقتهم ببعض وحبهم الظاهر حست ان منيره ام لايمان مش حمي

فارس اتصل وقال انه جاي هو وضيوفه ..

هيام : انا رايحه اجهز نفسي لاستقبال الضيوف بعد اذنكم ..

منيره : روحي انتي كمان يا ايمان جهزي نفسك مش عيزاها احلي منك في اي حاجه

ايمان : هيبان قوي اني بعمل كده علشانها

منيره : لا طبعا ضيوف جايين عندك انتي في بيتك انتي .. انتي تستقبليهم وبعدين مش كريم ده هو يعتبر رئيسهم في الشغل يعني حد تقيل هتقابليهم اول مره في بيتك بريحه الطبيخ والاكل دي .. روحي وانا جنب الاكل وبعدين للاسف الكل هيقارنكم ببعض فخليكي رافعه راسك لفوق انتي احلي واقوي واجمل وانتي اصلا احلي مليون مره بقلبك وبحبك وبابتسامتك .. يالا وابنك كمان انا هغيرله واخليه قمر زي ابوه .. اتحركي مفيش وقت

فعلا ايمان سمعت كلام حماتها ودخلت اخدت شاور بسرعه ولبست فستان شيك جدا ولبست حجابها وحطت ميكب خفيف ابرز جمالها وكانت جميله فعلا بحجابها وقلبها الجميل

فارس دخل هو وضيوفه وايمان طلعت تستقبلهم

فارس : ايه الجمال ده .. انتي بتحلوي كل شويه ليه ؟؟

ايمان : بحلو بحبك انت

كريم : نروح احنا بقي

ايمان : لا طبعا اهلا بحضراتكم اتفضلو

سلمت علي الكل ودخلوا كلهم وقعدوا وابنه طلع يجري فابوه شالو

فارس : موزو حبيبي ..

كريم : ما شاء الله شبهك قوي

هدير : فعلا بيقولو اللي بتحب جوزها قوي بتجيب عيال تشبهو

فارس : بجد ده ؟؟ انا عرفت عيال مجدي مش شبه ليه

مجدي : قصدك ايه بقي؟؟ بت يا نجاه انتي ما بتحبنيش ولا ايه ؟

نجاه بصت لفارس : ايه يا فارس ده انت العاقل

فارس : مره من نفسي بقي

الكل بيضحك وهيام خرجت فالكل سكت .. كانت جميله بس عامله زي الملكه الشريره في فيلم سنووايت .. الكل سكت وبصلها

فارس بصلها قوي وحس فعلا بالفارق بينها وبين ايمان .. ايمان جميله بطريقه مختلفه تماما عن هيام .. هيام جمالها جريء وغجري .. ولبسها فاضح للاسف غير ايمان اللي زي الجوهره المصونه.ودي كانت نقطه ضد هيام مش لصالحها

القعده بقت مليانه توتر وقلق بعد دخول هيام ومنيره كمان دخلت وقعدت

ايمان وقفت تجهز السفره ووقفت كمان منيره فنجاه وقفت

نجاه : انا هساعدها ارتاحي انتي يا ست الكل

هدير كمان : ممكن تسمحولي اساعدكم ؟

هيام : اتفضلي انتي ارتاحي هما اصحاب من حاره واحده وعارفين بعض مش هترتاحي معاهم

هدير سكتت بس ايمان اتدخلت

ايمان : طبعا لو تحبي اهلا بيكي اتفضلي

بصوا الاتنين لبعض بتحدي ومجدي عايز لب يتسلي

دخلو البنات التلاته يساعدوا بعض

هدير : هو لو ينفع اسأل مين دي اللي بره ؟

نجاه وايمان بصوا لبعض

ايمان : طليقه جوزي

هدير فتحت بوقها : نعم وبتعمل ايه هنا ؟؟ ردها ؟

ايمان : لا طبعا بس هيا عامله فيلم ومتعوره في رجلها وكانت عيزاه يروحلها كل شويه شقتها فانا بدال ما هو يروحلها خليته جابها هنا

هدير : شاطره بس انا لو مكانك كنت ... كنت سميتها ولا خنقتها .. انتي شايفه بتلبس ازاي ؟

ايمان : امال لو شوفتيها بالليل ؟

نجاه : اوعي تكون بتلبس قمصان نوم يا ايمان؟

ايمان : بتلبس يا اختي حاجات انا اتكسف البسها قدام فارس

هدير : وجوزك بيبقي فين سيادته ؟ بيشوفها ؟

ايمان : طبعا ولو ما شفهاش تعمل نفسها تعبانه وتناديله لاوضتها

هدير : وانتي ايه ؟ بتعملي ايه ؟انا كنت قتلته ؟ هو وهيا ؟! قال تناديلو اوضتها وهيا بقميص نوم

ايمان : والله ما عارفه اعمل ايه ؟

هدير : ارفضي الوضع ده !! خيريه

نجاه : لا طبعا فارس ما بيجيش بلوي الدراع ابدا

ايمان : هيام سر مشاكلنا في اول كام سنه جواز وبعد ما استقرينا وشيلناها من دماغنا تماما رجعت تاني وبعدين سبق وخيرته وكان ديمابيبعد بحجه انه ما بيحبش الاسلوب ده وبيعند عليا

هدير : وطبعا لو خيرتيه ممكن يعند تاني البت دي عايزه خطه نخلص منها

ايمان : ان شاء الله نخلص منها علي خير بس عارفه انا متخيلتش انك حبوبه كده

هدير : كريم علي طول ما بيتكلمش غير عن فارس وكان نفسي اتعرف عليكي

نجاه : انتو معندكوش اولاد ؟؟

هدير بصت للارض : لسه ربنا ما ارادش

ايمان : فعلا كله باراده ربنا .. لما اتجوزت فارس كنت هموت علي الخلفه ولما حملت بغبائي سقطت نفسي وبعدها لما ربنا اراد عطانا حمزه .. خلي املك في ربنا كبير

هدير : ونعم بالله يالا بقي نخرج الاكل لاحسن الرجاله يفضحونا

بره هيام بتتدخل في كلام الرجاله يمكن لانها مهندسه زيهم او يمكن لانها متحدثه لبقه

منيره اتضايقت : حبيبتي انتي طفيتي علي الاكل اللي في الفرن اللي انتي عملاه

هيام : هو حضرتك ما طفتيش عليه ؟

منيره : انتي ما قولتيش

هيام : انتي عايزه تفهميني انها لسه في الفرن لحد دلوقتي ؟؟

منيره : انا معرفش قومي شوفي

هيام قامت بسرعه ومجدي كتم ضحكته بالعافيه

منيره : بس يا واد ...

مجدي : اه من شغل الحموات

منيره : انا مش حماتها .. انا حماه ايمان وبس

فارس : انتي ما بتعامليش ايمان كحمي

منيره : علشان هيا ما بتعتبرنيش حمي .. هيا اعتبرتني امها وانا اعتبرتها بنتي .. العلاقه متبادله يا فارس .. اللي بيحبك بصدق لازم تحبه بصدق

كريم : قصف جبهه اسكت يا فارس

منيره : هقوم اشوف البنات دي بتعمل ايه جوه

هيام دخلت كانوا بيضحوا : هو الصينيه في الفرن فعلا

ايمان : مفيش حاجه في الفرن

هيام : امال قالت كده ليه ؟ عايزه تقومني وخلاص

ايمان : مش يمكن لانه ذوقيا المفروض طالما الستات قامت تقومي معاهم !

هيام : الكلام ده انتي تعمليه يا جاهله لكن انا لأ

ايمان : خدي صنيتك وشوفي هتعملي فيها ايه اتفضلي وبعدين خلينا العلم ليكي

طلعوا الاكل والكل قعد وفعلا هيام قعدت جنب فارس وايمان منيره قعدتها جنبه من الناحيه التانيه وهنا مجدي مقدرش يسكت وضحك بهستيريه خلت الرجاله كلها تضحك ومحدش من الستات فاهم في ايه ؟؟

فارس ضحك لانه تخيل نفسه شهريار وواحده علي يمينه وواحده علي شماله والاتنين بيأكلوه

اخيرا هديت موجه الضحك وبدؤا ياكلو بس الرجاله كل شويه يضحكوا كل ما ايمان او هيام يتحركوا

هيام : عجبتك اللازانيا يا فارس ؟

الكل بص لفارس اللي مش واخد باله

فارس : اول مره اعرف انك بتعرفي تعملي اي اكل

هيام بصت لايمان : يعني عجبتك ؟؟؟

فارس هيجاوب بس اخد باله ان ايمان بصاله مستنيه اجابته ومش ايمان بس ده الكل مستني والكل بيبصله ومجدي متحفز للضحك

كريم : جميله تسلم ايدك مدام هيام .. وحضرتك مدام ايمان تسلم ايديكم صراحه الاكل كله تحفه وبما اننا اتجمعنا وبصراحه القعده لذيذه يبقي ايه رأيك هدير الاسبوع الجاي يبقي عندنا

هدير : اه يا ريت بس تنبيه انا مش بشطاره ايمان طبعا فهتضطروا تاكلوا بدون تعليق

ايمان : يا حبيبتي كفايه ذوقك انتي كلك عسل

كريم انقذ الموقف وانقذ فارس من حبل المشنقه

واخيرا الرجاله لوحدهم

فارس : متشكر يا كريم لحقتيني

مجدي : كنت سيبتنا نتفرج عليه شويه كان نفسي اعرف هتقول ايه ؟؟

فارس : من يومك واطي يا مان ..

كريم : وضعك كده مش حلو يا فارس وفعلا الوضح محرج ومراتك ليها حق عليك فحاول تخلص منه

فارس : عندك حق

واخيرا خلصت العزومه علي خير والكل ارتاح

ايمان في حضن جوزها : علي فكره كريم انقذك النهارده

فارس : انقذني من ايه ؟

ايمان : من سؤال هيام بس دلوقتي مفيش حد ينقذك مني .. عجبك اكلها ؟؟

فارس : انتي بتقولي ايه ؟؟ يعني واحده اول مره تدخل مطبخ وتعمل اكل .. هل انتي مثلا متخيله ان لو اكلها عجبني هرجعلها مثلا ؟؟ علشان اكله واحده ؟

ايمان : لأ مش حكايه ترجعلها

فارس : ايمو انا بحبك وبحب اي اكل انتي تعمليه ولو كنت قلتلها اه عجبني كان هيبقي من باب الذوق والمجامله مش اكتر

ايمان : واكلي انا عجبك ؟؟

فارس : بجد بتسألي نامي يا ايمان نامي ....

ايمان امها تعبت وطلبت منها تروحلها وفعلا ايمان راحت وللاسف اضطرت تبات هناك ودي كانت فرصه لهيام تستغلها كويس

فارس كان مع ايمان بالليل ومش عيزاه يروح

ايمان : ما تبات معايا هنا ؟؟

فارس : انا من امتي ببات في بيت ابوكي يا ايمان !!

ايمان : طيب بات في شقتنا القديمه؟

فارس : يعني مش فاهم انظفها الاول ولا ابات في ترابها كده ؟ في ايه يا ايمان مالك ؟

ايمان : مش عيزاك تبعد عني

فارس : مش عيزاني ابعد عنك ولا خايفه عليا من هيام ؟؟

ايمان : الاتنين عندك مانع ؟

فارس : لا معنديش وبعدين امي في البيت

ايمان : امك بتنام بدري

فارس : انتي بتشكي فيا ؟؟ اني هخونك طالما انتي مش موجوده ؟؟

فارس رجع خطوتين لورا

فارس : انا لو عايزها هرجعلها ولو عايز انام معاها من غير ما انتي تعرفي هنام مش محتاج اني استغل ليله هتقضيها بره ؟؟

ايمان : مش قصدي كده يا فارس

فارس : انتي قصدك بالظبط كده !! عارفه الموضوع بقي يخنق ... بعد اذنك

مشي خطوتين ورجع تاني

فارس : معلومه صغيره انا لو فكرت ارجعلهاهقولك ما تخافيش مش هعملها من وراكي فبلاش موضوع المراقبه ده كل شويه .. لاني ببقي شايفك كويس وانتي واقفه مستنيه تشوفي رد فعلي ايه ومش بعيد اعمل حاجه مش عايز اعملها لمجرد اني اضايقك .. تصبحي علي خير

مشي متغاظ منها وروح علي البيت ودخل من غير ما يرن الجرس رنته المعتاده وراح عند امه اللي كانت بتتكلم في التليفون

منيره : ما تخافيش يا ايمان انا موجوده !! مش هنام حاضر واسيبهم .. يا بنتي فارس مالوش في العك ده ولو هيعمل حاجه هيعملها في النور

يالا اول ما يوصل هبلغك ..... حاضر هكلمك كل شويه .... يا بت كلتي دماغي بقي ... حاضر مش هسيبهم يسهروا مع بعض

فارس واقف وفي قمه غيظه ومتضايق جدا من ايمان ومن عدم ثقتها فيه ...

هيام وراه بهمس : مراتك ما بتثقش فيك صح ؟؟ عينت مامتك حارس عليك ... صح يا بيضه كلهم خايفين مني .. يا تري هما شايفينك ضعيف قوي كده ولا شايفيني انا جميله قوي كده ؟؟

سابته ودخلت وهو علي اخره خبط ودخل لامه اللي قفلت تليفونها بسرعه

فارس : قفلتي ليه ؟؟ ما تكملي خليها تكمل تعليماتها

منيره : تعليمات ايه يا حبيبي ؟؟

فارس : انا عارف بقي تعليمات ايه ؟؟

منيره : يا حبيبي دي بس بتطمن عليا وعلي صحتي واتعشيت ولا لأ وبتشوف انت وصلت بالسلامه ولا لأ؟

فارس : لا فيها الخير وبعدين ماهي ممكن تكلمني انا تشوفني وصلت ولا لسه ؟

منيره: بقولك ايه

قاطعها: ما تقوليش .. وموضوع المراقبه ده سخيف جدا وقسما بالله لولا ان عامل حساب لعشرتنا ووقفتها معايا لكنت اخدت هيام دلوقتي علي اقرب مأذون عندا فيها بس

منيره : استهدي بالله يا فارس وادخل نام ايمان بتحبك

فارس : عارف انها بتحبني وعلشان كده مستحمل بس قسما بالله يا امي ان طلعتي الليله تراقبيني زي ما هيا قالتلك مش هيحصل خير فانتي استهدي بالله بقي ونامي وما تخربيهاش عليها تصبحي علي خير لو محتاجه حاجه ناديلي

سابها وخرج وايمان رنت تاني عليها

وهو سمع امه بترد عليها بس سابهم ودخل اوضته

كان متغاظ بس مش قادر يفهم ايه اللي مضايقه بالظبط ؟؟ غيره ايمان ؟ طيب ما هو ده حقها !! ولا دفاعاته اللي قربت تنهار قدام هيام ؟؟ ولا غيظه من هيام انها ما استحملتش زي ايمان وساعدته يقف علي رجليه ؟؟ ولا الجزء البسيط اللي جواه اللي لسه بيحن لهيام ؟؟ ولا احساسه بالذنب ناحيه ايمان لانها عملت كتير قوي واستحملت اكتر واكتر؟ ايه اللي مضايقه بالظبط ؟

اكيد مش مكالمه ايمان لامه لان ده شيء طبيعي جدا ولو هو مكانها استحاله يقبل ان مراته تبات في مكان مع راجل سبق وكان لها علاقه بيه ؟؟ مابالك انهم يباتوا لوحدهم !!!

فارس : فوق لنفسك .. بتفكر كتير في ايه وليه ؟؟ هيام لازم تمشي بقي من هنا !!!

دخل ياخد شاور يروق دماغه اللي هتنفجر دي يمكن الميه البارده تريح اعصابه وتهديه ...

وهو جوه اتفاجئ بالباب اتفتح ودخلت هيام اللي كانت فرصتها اللي لو ضيعتها خلاص مش هترجع تاني

فارس بصلها وهيا قلعت روبها

فارس : سيادتك بتعملي ايه ؟؟

هيام : بستغل الظروف

دخلت هيام معاه وهوغيظه من ايمان خلاه يفكر يستجاب لهيام او هو اقنع نفسه بكده

بس فجأه عرف ان في خطوط حمرا مافيش بعدها رجعه وفي حاجات ما ينفعش نتمادي فيها زق هيام بعيد عنه وطلع هو بره وسابها ،،هيام لفت نفسها وطلعت وراه

هيام :في ايه ؟ واوعي تقولي انك بتحب مراتك ؟؟

فارس : ماشي مش هقولك اني بحب مراتي هقولك اني مش هرتكب غلط زي ده

هيام : محدش هيعرف اوعدك اني مش هعرف حد

فارس : ديما بتبصي للناس وبس

هيام : امال في ايه تاني هنبصله ؟؟

فارس : تبصي للي خلقك وتعملي حساب للحرام والحلال ولا ده شيء ما بيخطرش علي بالك ؟؟ اللي انتي عيزاه يحصل بينا ده من اكبر الكبائر وللاسف مالوش تكفير او ربك ما بيسامحش فيه .. ده اللي انا عامل حسابه

هيام : انا مراتك يا فارس

فارس : لا طبعا انتي طليقتي وانا طلقتك عند مأذون ...

هيام : ردني

فارس : حتي لو وخلي بالك من لو دي .. لو حبيت اردك لازم اتجوزك من تاني علي يد مأذون ...

هيام : تعال نشوف مأذون

فارس : هيام انا مش عايز ارجعلك افهمي بقي وابعدي عني .. انا جربت وفشلت معاكي ومقدرتش ولا اسعدك ولا حتي اكفي طلباتك اللي مكنتش بتنتهي.. انتي وصلتينا للطريق ده ودمرتي كل السكك بينا ..

هيام : فارس انا بحبك ومقدرتش ابدا انساك ولا قدرت اعرف غيرك .. حاولت كتير وسافرت بره مصر خالص علشان اقدر انساك اواعرف غيرك بس مفيش راجل ابدا قدر يملي ولو جزء من الفراغ اللي انت سيبته جوايا.. واوعي تقول ان ايمان ملت الفراغ ده

فارس : ايمان مش بس ملته لا ده دي عملت اكتر من كده بالكتير يا هيام .. وبعدين حتي لو ما مليتوش اللي عملته معايا مهما اعمل مش هقدر اعوضه او اسدد ديونها وافضالها عليا ..

هيام : اوك عارفه ده كويس وما طلبتش منك اي شيء بخصوصها.. انا عايزه ابقي معاك وهرضي باي حاجه انت تقول عليها

فارس : قصدك ايه ؟

هيام : اقصد اني هرضي ولو بساعه واحده كل يوم تيجي تقضيها في حضني واوعدك مش هطلب منك اكتر من ساعه واوعدك اني عمري ما هحاول اضايق ايمان او اتدخل في حياتها ومش هرهقك بطلباتي ابدا انا عايزه حضنك وبس يا فارس .. ده طلب كبير ؟؟ اتجوزني ومش عايزه غير ساعه وبس منك كل يوم ولو يوم ما فضيتش او ايمان احتاجتلك مش هتكلم ولا هطلبك ولو مش عايز حد يعرف باتفاقنا ده برضه موافقه المهم ان يبقي ليا حق اشوفك وبس

فارس سكت ومعرفش يرد عليها وخصوصا لما دموعها نزلت وحس بحبها ونسي كل اللي فات

فارس : هيام اطلعي بره ارجوكي ولو سمحتي لو انتي فعلا بتحبيني الصبح امشي من هنا ولو بتحبيني ما تهديش بيتي ده .. وما تنسيش ان في حمزه دلوقتي مش ايمان بس ..

هيام : حاضر هطلع ومش هضايقك تاني بس ارجوك فكر في كلامي

خرجت بره وبره شافتها منيره اللي بتبصلها وهيا عايزه تقتلها سابتها ودخلت اوضتها وقفلت علي نفسها بس منيره راحت وراها ودخلت وقفلت الباب وكلمتها بصوت واطي بس حازم

منيره : عملتي فيلم وقبلناه !! بتحاولي ديما تغريه وسكتنا!! دمرتيه قبل كده وبرضه سكتنا ؟ راجعه تاني ليه ؟؟ عايزه ايه منه؟؟

هيام: بحبه

منيره : كدابه انتي متعرفيش يعني ايه حب انتي بس عيزاه ملكك مش اكتر

هيام : حتي التملك نوع من انواع الحب اوعي تنكري ان فارس كان مبسوط معايا

منيره : كانت السكينه سرقاه دلوقتي هو مبسوط مع مراته وانتي جايه تهدي بيته تاني وتدمريه من تاني . انتي مالكيش مكان في البيت ده والصبح

قاطعتها هيام : ماشيه الصبح ريحي نفسك بس انتي برضه مش عادله انتي عمرك ما عاملتيني بالطريقه اللي بتعاملي ايمان بيها ولا عمرك حبتيني زيها

منيره : لان انتي من ساعت ما دخلتي بيتنا بصيتلنا من فوق وكأننا مش من مستواكي .. انتي اعتبرتينا غرماء ليكي وحاربتينا لكن ايمان من اول ما دخلت اعتبرتني ام ليها وعاملتني علي الاساس ده وانا اعتبرتها بنتي هيا عطت وانا قبلت وعطيت ..ايمان بتقعد تحت رجليا وتدلكهملي وانا تعبانه .. بتقعد جنبي وتعملي اي حاجه من غير حتي ما اطلبها منها مش انتي اللي لما مره واحده تعبت حبستيني نسيتي يا هيام عملتي ايه؟؟ اطلعي من حياه ابني

سابتها وخرجت ووقفت قدام المرايه تفكر خطوتها الجايه ايه ؟؟

منيره حضرت الفطار وفارس طلع وقعدوا مع بعض يفطروا بصمت

منيره : انا شفت هيام خارجه من اوضتك بالليل مبلوله

فارس بصلها : مفيش حاجه حصلت بينا اطمني

منيره : طبعا عارفه ان مفيش حاجه حصلت لان ابني انا وابوه ربيناه كويس وعلمناه الصح والغلط وربيناه علي قيم ومباديء اتمني انه ما ينسهاش

فارس : ولما انتي عارفه انك مربياني صح بتتكلمي في الموضوع ده ليه ؟ انا طلبت منها تمشي ريحي نفسك

منيره : انا عايزه اعرف انت بتسمحلها تدخل حياتك من تاني ليه ؟؟ ليه فاتحلها طريق يا فارس .. ايمان ما تستاهلش منك ده

فارس : عارف عارف عارف ... عارف يا امي

منيره : واما انت عارف ليه ؟؟ ليه يا فارس

فارس : عايزه تعرفي ليه ؟؟ لاني اكتشفت انها لسه جوه ... ما خرجتش ابدا .. في جوايا شويه شك لازم انهيهم تماما .. اعمل ايه هاه؟؟؟ عارف ان ايمان ما تستاهلش مني غير الحب والاحترام وانا اقسم بالله بحاول بس ظهورها في حياتي تاني ملخبطني مش عارف اخد قرار مش عارف اخد حكم قاطع مش قادر اقفل الباب تماما .. عرفتي بقي ؟؟

منيره : طيب مش هقولك ايمان وهيام .. مش هقولك غير حاجه واحده بس .. فكر في حمزه وبس .. وانت هتعرف هتختار ايه ؟؟؟ مش هنتكلم تاني وايمان مش هقولها علي حاجه

فارس : مفيش حاجه حصلت علشان تتقال

منيره : مجرد دخولها اوضتك ده حاجه وحاجه كبيره كمان ... وبعدين لو مفيش حاجه ازاي دخلت ناشفه وخرجت مبلوله ؟؟؟؟

فارس بص لامه وسكت وما اتكلمش لان فعلا في كتير حصل مش ما حصلش ....

هيام قامت لمت حاجتها وخرجت كان فارس وامه بيفطروا وهيا خرجت ومثلت الانكسار وهيا ماشيه

فارس : اصبري هوصلك

هيام : لا معلش خليك افطر براحتك

فارس : قولت اصبري هوصلك

وهما خارجين كانت ايمان داخله فبصتلهم

ايمان : علي فين كده ؟

هيام : متشكره علي استضافتك ليا في بيتك يا ايمان انا مش عارفه اشكرك ازاي ؟ محدش يعمل اللي انتي عملتيه معايا واسفه لو ضايقتك باي شكل

ايمان مش مصدقه : لا ده واجب .. انت رايح فين؟

فارس : هوصلها واروح علي الشغل .. والدتك اخبارها ايه ؟

ايمان : كويسه .. روح علشان ما تتاخرش علي شغلك يالا

فارس اخد هيام ووصلها شقتها وطلعها فوق وهو نازل مسكته من دراعه

هيام : ارجوك فكر في كلامي ساعه وبس مش عايزه اكتر من ده ...مش هكلمك تاني ولا هضغط عليك بس ارجوك فكر

فارس اليوم كله مش عارف يركز .. هيام طلبها مش كتير ومش صعب وهو عايز ده اكتر من اي شيء .. وبعدين هو مش هيجي علي ايمان ابدا .. ممكن اصلا ما يعرفهاش .. بس ما يضمنش هيام لانها ممكن تروح تقولها وساعتها هيخسر ايمان وهو مش مستعد لده ابدا ..

فضل يومين تايه ومش عارف يعمل ايه ؟؟

ايمان : طول عمرك بتتكلم معايا في اي شيء مهما يكون ليه المره دي ساكت ومش عايز تتكلم؟؟

فارس : يمكن لان الكلام هيوجع

ايمان : وانا علي طول بتحمل قول وهسمعك

فارس بصلها كتير

ايمان : عندك شك انك هتلاقي حل لمشكلتك عندي ؟؟

فارس : لأ بس خايف انك فعلا تحليها بس علي حساب حاجه تانيه انا مش مستعدلها

ايمان : طيب فكر بصوت عالي ايه رأيك ؟؟

فارس : موافق بس بشرط

ايمان : موافقه علي شرطك قول

فارس : اسمعيه الاول

ايمان : قول سامعاك

فارس : تسمعيني كصديقه او عشيقه مش زوجه ابدا

ايمان عرفت هو هيتكلم عن ايه وعارفه هيقول ايه وقاومت دموعها تنزل ووافقت

ايمان : هسمعك حاضر وعد هسمعك كصديقه قول

فارس : اوكي انا بحب مراتي وبحب بيتي فوق ما تتخيلي وبحب ابني جدا ومتمسك بكل حاجه فيه

ايمان : لكن الماضي ظهر ومش عارف تعمل فيه ايه ؟

فارس : هيام عرضت عليا عرض حسسني ان كل حاجه سهله وكل حاجه ممكنه

ايمان : ايه هو العرض ده ؟؟

فارس : انها مش عايزه اكتر من ساعه واحده كل يوم مع وعد انها ما تطلبش اكتر منها وما تضايقكيش ابدا وما تدخلش في حياتنا نهائي بس عايزه تفضل معايا ساعه وبس

ايمان الدنيا لفت بيها لانها ما تخيلتش ابدا ان فارس هيقولها كده بالصراحه دي .. ايوه كانت عارفه انه هيتكلم عن هيام بس مش انه بيفكر يرجعلها ومعرفتش تعمل ايه ؟؟؟

ونكمل بكره

توقعاتكم

ShiMoOo