تحميل رواية «لا سمعها شهريار ولا حَكت شهرزاد عنها» PDF

جهزت الطاوله سمر تنتظرهم وجلست على الكرسي واخذت نفس تناطر كل شي وابتسمت ورفعت عيونها من دق الباب ووقفت ومشت تفتح الباب وعقدت حجاجها وتقدمت هيله تدفعها:وش تبين ؟

لفت سمر على حنان والبندري ولفت لهيله:انتي اللي وش تبين جايه بهالوقت ؟ خير هيله شعندك ؟

هيله ناظرتها بجنون:سمر بنهي حياتك والله اقتلك هنا وادفنك

سمر تأففت وصدت:ما نخلص ياهيله ما نخلص حتى واحنا نسايب

حنان:لفيتي حوالين تركي وخليتيه يطلق الحين ناويه على عبدالمحسن

ابتسمت سمر تناظر حنان:أجر وعافيه ياحنان يقولون المَره تصغر مع الطلاق بس ما تغيرتي كبرتي عشر

هيله مسكتها من ذراعها:انطقي وش بينك وبين عبدالمحسن

ناظرتها سمر وهي ساكته ودخلت توليب وناظرتهم بصدمه:أمي

لفت هيله وناظرت عسّاف اللي دخل وصدت عنهم البندري بتوتر وتقدم عسّاف:وش السالفه ؟

هيله:العقربه تحوم حوالين ابوك تبي تتزوجه سراقة الرجال تبي تنتقم مني بهالشكل

لف عسّاف على حنان وناظرته بحده:لا تطالعني ما لفقت شي البندري شافتهم بالزواج

توليب همست:أمي

سمر تأففت وناظرت هيله:تعبتي نفسك اسألي زوجك اقرب هو يجاوبك

لانت ملامح توليب وتقدم عسّاف:خالتي

سمر ناظرتهم:وانا صادقه عندكم شي روحوا لعبدالمحسن انا ماعندي كلام

ناظرتها هيله بذهول ومشت سمر تدخل للصاله:ودي اعزمكم بس الكميه محدوده

ناظرها عسّاف ولف لامه:أمي مستحيل يصير

هيله:تكذبني ياولد بطني ؟ بتوقف معها وهي بتسرق ابوك ؟

سمر:اووه ازعجتيني انتي كبرتي واستخفيتي اطلعي برا بيتي

عسّاف:خالتي خلاص

سمر وقفت وتكتفت ولف عسّاف:امشي امي

دفعته هيله وناظرها عسّاف بذهول ومشت تخرج ولفت حنان على عسّاف:خسارة التسع شهور فيك

سكت عسّاف يناظرهم وخرجوا ومشت توليب خلفهم ونطق عسّاف:توليب

مشت ومسكت ذراع البندري ولفت البندري عليها وخرج عسّاف يوقف وناظرهم وحدهم بالحوش

توليب ناظرتها:تلفقين على أمي ؟

البندري:ما لفقت ، شي شفته وقلته

توليب:وش شفتي ؟

البندري لفت لعسّاف ورجعت ناظرتها:كانت تتكلم معه تقول بنبلغ عسّاف وتوليب بوقت ثاني

سكتت توليب وكملت البندري:وهذا اللي فهمته

مشت البندري تخرج وقفلت الباب ولفت توليب على عسّاف وتقدمت تدخل ودخل عسّاف:خالتي

سمر ابتسمت:سويت لكم مكرونه باشميل بخلطه رهيبه

توليب:أمي

تأففت سمر وناظرتهم ونطق عسّاف:وش السالفه

سمر ناظرتهم ولفت لتوليب:مصدقتهم ؟

توليب:لا

سمر ناظرت عسّاف:وانت مصدقهم ؟

هز راسه بالنفي عسّاف ينتظر تبرير للي حصل

سمر سكتت وتوترت توليب وتقدمت تجلس:أمي

سمر اخذت نفس ورجعت ظهرها لورا:اي تكلمت مع عبدالمحسن ومخبين عليكم واللي شافته وسمعته البندري صحيح

عقد حجاجه عسّاف وكملت سمر:بس اشاعات حنان ماهي صحيحه ، تطمن عسّاف ما بخطف ابوك من امك ماهو ستايلي

تأففت توليب من سخرية سمر وسحب الكرسي عسّاف يجلس:ليه ما قلتي هالكلام ؟

سمر:بغيت اغث هيله شوي واطير عقلها بغيت اجيب لها مشاكل من نوع ثاني بس هي جنت على نفسها

عسّاف:انا مابي حربكم ترجع ولا يرضيني اللي صاير ولا بيبقى هالوضع

توليب:وش الموضوع اللي بينك وبينه مخبينه ؟

ناظرتها سمر وناظرت عسّاف وصدت:هو يبلغك

عسّاف:وش صاير ؟

سمر سكتت ثواني وناظرت عسّاف:أمك كانت تعرف اخوي حمد من قبل

لانت ملامح توليب وهز راسه عسّاف:عندي علم

عقدت حجاجها سمر ولفت توليب:تعرف ؟

عسّاف:وليه توصلين هالكلام لابوي ؟ شي بالماضي

سمر:من قال ؟ تواصلت معه قريب

سكت عسّاف وكملت سمر:تبيه يخدمها بزواجي من تركي اللي كان بيحصل

عسّاف نزل عيونه للطاوله وكملت سمر:انا وحمد من زمان ما احنا قراب بس جاني يبلغني ان هيله تواصلت معه عشان ما ارجع لتركي ويوقف بوجهي

عسّاف:وليه تقولين لابوي ؟

سمر ناظرته:لانه لازم يحذر من زوجته اللي أذتني من زمان وتجاهل كل مشاكلها

توليب:وأنا ليه اتورط بهذي المشاكل ؟

سمر:لان هيله ما بترحمك اذا عرفت اني بلغت عبدالمحسن

عسّاف تنهد ووقف يصد عنهم وناظرته سمر:هذي حقيقة أمك ياعسّاف وش نسوي

عسّاف:وليه تكلمه عشان زواجك من تركي ؟ قبل كانت نيتها انتقام لحمد الحين ليه ؟

سمر رفعت كتفها:الله أعلم اسألها هي

سكت عسّاف ولفت توليب تناظره:عسّاف ما يخصنا هالموضوع

عسّاف:أمي وأبوي بمشكله كيف ما يخصني ؟

وقفت توليب:بيأثرون علينا

ناظرها عسّاف تخاف وتقدم لها ومسك كتوفها وتنهد:الوضع ماهو أصعب من قبل ما بيصير شي

لف على سمر ورجع ناظرها:تعشي

ناظرته توليب بتوتر ومشى عسّاف يخرج وتنهدت تراقب خروجه وابتسمت سمر:وش حلاوة العروس هذي ؟

لفت توليب عليها:أمي

سمر:لا تكلميني بهالاسلوب باللعنه في هيله وعبدالمحسن وش عليك منهم ومن مشاكلهم بيتحملهم عساف يتحملهم انتي مالك شغل

توليب:بترجع هالمشاكل علينا عسّاف بيتأثر بتفتحين دفاتر قديمه

سمر:هيله نوت تخرب زواجي من ابوك لو حصل بتنتظريني اسكت ؟ وزين اني سكت عشان يتم زواجك انتي وعسّاف واصريت على عبدالمحسن يسكت لين يتم هالزواج

سكتت توليب بقلق وبدت تاكل سمر أمامها

'

خرج عسّاف من البيت مستعجل ولف من ناداه:يالطيب

لف عسّاف وعقد حجاجه وتقدم له:كيف الحال

عسّاف:هلا

ناظر البيت ورجع ناظر عسّاف:لك أهل بهالبيت ؟

عسّاف:ليه ؟

تنحنح من الوضع يناظر عسّاف:اذا البيت لاختك تراها ماهي بأمان وحدها لا تتركونها ببيت لوحدها

لف عسّاف بغرابه يناظره وكمل:هجم عليها طليقها بالبيت وصرخت تستنجد وانا اللي طردته ، كانت وحدها

جمد وجه عسّاف وكمل:حلوا مشاكل طليقها لانه ماهو ناوي خير والله يستر عليكم ويكفيكم شرّه

عسّاف هز راسه يستوعب:ماعندي خبر

رفع حاجبه:يمكن اختك ماتبي تبلغك

عسّاف:ماهي اختي أم زوجتي وانا بحسبة ولدها بس الله يعافيك ماقصرت

اخذ نفس:أنا فارس كنت طالع امس من بيت

بنتي بس لقيت واحد تسلق هالسور ودخل البيت وشكيت فيه ومابغيت اظلمه قعدت انتظره وجات ام زوجتك وسألتها ان كان بالبيت رجّال وقالت لا ويوم دخلت انتظرت وسمعت صراخها ودخلت لهم

تنهد عسّاف وناظره يصافحه:رايتك بيضاء وفيك الخير ماقصرت

هز راسه فارس ومشى عسّاف لسيارته يركب:ناقصك انا ياتركي ناقصك

تأفف عسّاف وحرك سيارته ناوي وجهته لبيت أهله ووقف عند وصوله ونزل ودخل البيت يسمع اصواتهم وتقدم يشوف ابوه ورياض اللي بجانبه وهيله وحنان اللي واقفين والبنات شهود

عبدالمحسن:رحتي لها ؟

هيله:وش تبي تسوي فينا اكثر سمر ؟ وش تبي تسوي ؟ تاخذك عشان ترتاح وتنتقم ؟

عبدالمحسن عقد حجاجه وكملت هيله:تبي تتزوجها ياعبدالمحسن نهاية العشره وهالعيال ؟

رياض لف على ابوه وهز راسه عبدالمحسن:بتهدين فيني وفيها ؟

ناظرته هيله بصدمه وتقدم عسّاف:ابوي

عبدالمحسن:وش بتسوين ياهيله ؟ بتكلمين احد يمنعنا ؟

سكتت هيله وكمل عبدالمحسن:حمد مثلاً

جمد وجه هيله ولفت حنان بصدمه على هيله وبلع ريقه عسّاف وعقد حجاجه رياض:من حمد ؟

عبدالمحسن:ردي ياهيله ردي منهو حمد ؟ وليه تكلمينه على ذمتي تخططين من جديد لحروبك ؟

هيله ناظرته ترفع كفوفها بذهول:ما كلمته

عبدالمحسن ناظرها بحده:لا تكذبين حاشمك قدام عيالك مابي اغلط عليك

هيله:اقسم بالله ما كلمته

لف عسّاف عليها يناظرها ولفت هيله على عسّاف:عسّاف انت تعرف انا كلمتك والله ما كلمته

لف رياض:احد يشرح لي

عبدالمحسن:حمد هذا خطيب امك القديم وسبايب حرب سمر معها لانه اخو سمر والحين خططت معه من جديد وكلمته عشان تركي ما يرجع لسمر

عقدت حجاجها هيله تناظره بصدمه ونزل راسه عسّاف وناظرتهم هيله:تصدقها ياعبدالمحسن ؟

عبدالمحسن رفع صوته يرعب البنات:ورتني رسايلك معه ما كذبت عيني

سكتت هيله وغمض عيونه عسّاف بتعب وصد رياض بصدمه يناظر خواته

عبدالمحسن:ما تتغير اطباعك ؟ حتى بصبري عليك ؟

هيله ناظرته:ما كلمته

عبدالمحسن صرخ:لا تكذبين بتوصل للطلاق

لفت هيله على حنان اللي جالسه وسكتت ولف عسّاف يناظر حنان اللي تفرك يدينها وصاده بعيونها

ولفت البندري على امها بذهول وعقد حجاجه عسّاف:انتي ؟

رفعت راسها حنان عليهم وناظرت هيله وجمد وجه هيله وهمست:حنان

حنان وقفت ومسكت كفوفها:اقسم بالله نيتي ماكانت اضرك والله هيله ماودي اضرك بس عمتني عيوني تصرفت باللي خطر ببالي

عقد حجاجه عبدالمحسن وتقدم عسّاف بعصبيه:ليه تسوين بأمي كذا ؟

حنان تمسكت بهيله:هيله والله ماقصدي اضرك انتي وبيتك ولا ظنيت توصل لهالوضع

مشت تجلس هيله وهي ماسكه راسها ولفت حنان على عبدالمحسن وبلعت ريقها برعب وتقدم عسّاف:اطلعي برا

لفت حنان عليه:عسّاف والله ماهي نيتي

عسّاف رفع صوته:اطلعي

بلعت ريقها حنان ومشت البندري تطلع قبل امها وناظرتهم حنان وناظرت هيله اللي صاده ومشت تخرج

جلس رياض ومسك راسه ولف عسّاف على ابوه:صلّح اللي تقدر تصلحه

ناظر البنات عبدالمحسن ورعبهم ودموعهم وفجعتهم ورجع ناظر هيله وجلس محله ووقف رياض يتركهم ويغادر واخذ نفس عسّاف يناظر هيله:لا ترجع علاقتك فيها لانها ضرتنا كلنا وبتضرنا وما بتتغير ، اتركينا نعيش أمي

ناظرته هيله وناظرها بتعب عسّاف ومشى يتركهم ويخرج

'

جلست توليب بإنتظار اتصاله ولفت لسمر:وش الوضع عندهم ؟

سمر:ما ادري بس اتمنى الاسوأ لهيله

تنهدت توليب ولفت لها سمر تتكي بذراعها:شايله هم عسّاف ادري بس تراه رجّال ما بيتغير شي بعلاقتكم حتى لو امه سببت مشاكل

نزلت عيونها توليب وكملت سمر:لان كل رجّال مهموم ينزاح همه عند حب حياته خصوصاً لو بنت حلوه ورده مثلك

رفعت عيونها توليب وابتسمت سمر تعدل شعرها:يدوخ عندها واظن ان عسّاف دايخ دايم

ابتسمت بإحراج توليب من تلميح سمر لها وصدت عنها

ودق الباب ولفت سمر توقف ومشت تفتح الباب وناظرت عسّاف:الحمدلله على السلامه

عسّاف قفل الباب وناظرها ولف للبيت ورجع ناظرها:وش موضوع الجيران اللي فزعوا لك عن طليقك ؟

لانت ملامح سمر ولفت بحذر وناظرته:من قالك ؟

تنهد عسّاف بتعب لان الموضوع صحيح واستند على الباب بجبينه من المشاكل المتتابعه ولف عليها من جديد:وش يبي ؟

سمر؛تركي وجنونه

عسّاف:وليه ما تعلميني اساعدك ؟

سمر:واصل ياحبيبي ياعسّاف بس ما احتاج مساعدة احد اشيل نفسي بنفسي انت بس انشغل بتوليب

عسّاف:وعشان توليب وعشانك اتدخل ، ليه يسوي مشاكل توصل للجيران ؟

سمر:بغير اقفال البيت وتنحل

عسّاف ناظر الباب ورجع ناظرها:بجيب عامل وراجع

ناظرته سمر بذهول:عسّاف اتركه

فتح الباب ومشى يخرج وتنهدت سمر ورجعت تدخل وناظرتها توليب:مو عسّاف ؟

سمر:الا بس الباب شكله مصدي عجزت افتحه وانفتح بصعوبه وقال عسّاف بيجيب عامل يغير القفل

عقدت حجاجها توليب:الحين ؟

سمر:هو أصرّ

توليب:ما أكل شي

سمر تنهدت تجلس وناظرتها توليب بقلق واخذت جوالها ومشت تبتعد وتتصل عليه

رد عليها:آمريني

توليب همست:ماتعشيت عسّاف كان أجلت الباب لبعدين

عسّاف:ما ينفع لبعدين

توليب:اي مصدي بس عادي لبكره يظل

عسّاف هز راسه:ماني متأخر عليك حتى انا اشتاق لك

ابتسمت توليب ورفعت شعرها خلف اذنها:استناك

قفلت جوالها ومشت تجلس بجانب سمر:كلمتك غايه بعد العرس ؟

سمر:اي مرتني بقهوتين مشتاقه لك

ابتسمت توليب:بشوفها ان شاء الله

سمر:عندها موضوع جديد

عقدت حجاجها توليب وغمزت سمر:خطوبه

لانت ملامها:مين خطبها ؟

سمر:مو من بعيد اخو عسّاف

شهقت توليب بصدمه:امانه ؟

سمر ضحكت:والله تقول هيله قروا عليها وكلمت امها بالعرس وحددوا يوم بيروحون لهم

توليب اخذت جوالها:ما علمتني

سمر:اي اكيد ما بتعلمك وانتي عروس تشغلك

توليب:ياويلها مني

سمر:اتركي الجوال تأخر الوقت بكره كلميها

ضحكت توليب بذهول وقفلت جوالها وناظرت سمر:متى بتجين بيتي ؟

رفعت حاجبها سمر:اعزميني ياست البيت

ابتسمت توليب:بأي وقت استقبلك

سمر:ماودي اغث عسّاف كم يوم يستفرد فيك وبعدها اجيك

توليب ضحكت بحيا وإحراج ولفت سمر:ما بتسافرون ؟

رفعت كتفها توليب:ما تكلمنا

سمر:سافروا كلميه واطلبي المكان اللي تبينه وروحي انبسطي معه

ابتسمت توليب وتنهدت:ان شاء الله

لفت من سمعت صوت بالحوش ووقفت وفتحت الشباك وناظرت العامل وعسّاف وابتسمت:عسّاف

سمر ابتسمت لانه عند كلمته لها وصدت تاخذ نفس وناظرتهم توليب لين غيره العامل وانتهى من الابواب ودخل عسّاف وبيده المفاتيح وناظرهم وتقدم لسمر:هذا الباب الخارجي وهذا باب البيت

اخذتهم سمر وناظرته:ماقصرت

هز راسه عسّاف ولف لتوليب وابتسم لها:واقفه عند الشباك تنتظريني ؟

توليب ابتسمت وهزت راسها بالنفي:لا

سمر:نصابه ياعسّاف هذي وقفتها من يوم رحت ، تموت عليك

ضحكت توليب بذهول وابتسم عسّاف ومد كفه لتوليب والتفت لسمر:تبين شي ؟

مسكت كفه توليب توقف بجانبه وناظرتهم سمر:لا ولاشي تقدر تسرقها مني

ابتسم عسّاف ووقفت سمر:بس بعطيك عشاء مو انا حطيته توليب حطته لك عشانك

ضحك عسّاف لانه يعرف انها سمر من نظرات توليب ومدت الكيس سمر واخذه عسّاف ومشت توليب تلبس عبايتها ونطق عسّاف:متى ما بغيتي شي كلميني

هزت راسها سمر تطمنه وابتسمت توليب تحضن سمر وباست خدودها سمر بحنيّه كأنها طفلتها وابتسم عسّاف يناظرهم ومشت توليب مع عسّاف يخرجون وناظرتهم سمر عند الباب وابتسمت لهم

وخرج عسّاف وفتح باب توليب وركبت ومشى يركب وحط الكيس بالخلف ولف عليها:لبيتنا ؟

ابتسمت له تهز راسها ولف يحرك سيارته:ودك بشي ؟

توليب:لا اكلت مع امي

عسّاف:ماهو أكل شي تحبينه ويشبهك

سكتت توليب ولف عسّاف عليها تناظر ابتسامته وابتسمت:ما بتلاقي ورد الحين بهالليل

عسّاف:ليه هينه انتي ما اجيب لك بهالوقت ؟

ضحكت توليب بذهول:وش بتسوي بتصحي العم لطفي ؟

عسّاف:حرام نصحيه ونزعجه بس بنجيب لك ورد

عقدت حجاجها وهي مبتسمه ولفت من وقف عند المشتل وناظرته:عسّاف

نزل ونزلت توليب وهمست:عسّاف

اشر لها تنتظره وضحكت تغطي فمها من رفع ثوبه يتسلق الباب ونط بالمشتل وغمضت عيونها توليب بعدم تصديق وانتظرته لدقايق وابتسمت من فتح الباب يخرج وبيده ورد وضحكت ولف عليها وابتسم وتقدم لها ووقف قدامها:قلعته من جذوره العم لطفي بينهي حياتي

ضحكت فعلاً وابتسم من ضحكتها وتقدمت له تحضنه واتسع ثغره من بسمته وهو ماسك لها الورد باقه بيدينه وابتعدت عنه تاخذ الورد وناظرها عسّاف:اطلبيني اي شي واجيبه أبي البّي كل شي تطلبينه

ابتسمت توليب:خلك جنبي دايم

اشر على خشمه وهو مبتسم وناظرته توليب تتنهد من دوافع حبه ومشى عسّاف يفتح بابها وركبت ومشى يركب وحرك وابتسمت توليب تناظر الورد بحضنها لحد وصولهم لبيتهم ونزلوا

مد كفه لها تمسك كفه وفتح الباب ودخلت وبيدها الورد وتوترت ماودها تقاوم خجلها وتخسر أمام اندفاع عسّاف

دخلت وتقدم عسّاف للصاله وحط الاكل:ودي اذوق اكل امك من السياره

ابتسمت توليب تناظره يفتح الاكل وابتسم يغمض عيونه بقوه من ذاقه وفصخت عبايتها :بالعافيه

هز راسه ياكل ومشت توليب تاخذ الفازه واخذت تقطف جذوره وتحطه بالفازه وابتسم عسّاف يراقبها تنسغل بالورد وترتبه

ورفعت شعرها ترتب الورد واخذت الفازه تمشي للمطبخ ورجع ياكل عسّاف وهو مبتسم وخرجت من جديد تبتسم:حلوين بالمكان

حطتهم بالطاوله تناظرهم وابتسمت تلف عليه:صح ؟

عسّاف:لا

ابتسمت تفهم انها احلى بعيونه من كل فازه وفازه ومشت تجلس بجانيه من انتهى من اكله ولفت تناظر الورد ورفع اصابعه عسّاف لشعرها ولفت عليه توليب تستوعب حركاته ووقفت:غسل وانا بودي هذي المطبخ

اخذت الاكل ومشت للمطبخ وتنهد عسّاف ووقف يدخل للحمام يغسل وخرج وناظر توليب اللي تتلفت تدور بها اي منفذ وخلاص منه وتقدم لها:توليب وش تسوين ؟

توليب:احس التلفزيون مايل تعدله ؟

عسّاف هز راسه بالنفي وجلس يسحب كفها:لا

جلست وناظرته وبلعت ريقها:تعرف وش صار ؟

ابتسم لانها بتسولف عشان تتخلص منه كعادتها:وش صار ؟

توليب اخذت نفس:تخيل

هز راسه يحط كفه على خده يناظرها ونطقت توليب:رياض بيخطب غايه

سكت عسّاف وكملت توليب:امك كلمت امها بالزواج وحددوا يوم بيروحون

عقد حجاجه عسّاف:ماقال رياض

توليب رفعت كتفها:استغربت حتى انا امك شلون رضت

عسّاف سكت وناظرته توليب:بسأل غايه اي يوم عشان اروح لها

عسّاف:طيب انتي بتسولفين هالسواليف الحلوه عشان تلهيني ؟ ما تدرين ان سواليفك هذي تزيدني رغبه أبوسك

سكتت من كلامه وابتسم عسّاف ومسك وجهها يقبّل خدها اليمين:كذا

ابتسمت لانه كرر تقبيله لخدها اليسار وناظرها:ما بخليك تخجلين مني ابد

سكتت تناظره وتقدم عسّاف يقبّلها ومسكت كفوفه توليب تشعر فيه

'

دق الباب وقامت عن فطورها تخفض صوت المسلسل ومشت للباب وخرجت ووقفت عند الباب:مين ؟

تردد بالكلام بإحراج بعدها أردف:أنا فارس

عقدت حجاجها سمر:من فارس ؟

فارس تجاهل سؤالها:بك شي ؟ جيت اتطمن

استوعبت انه ذات الشخص وفتحت نصف الباب تناظره وتغطي شعرها ولف فارس يناظرها وصدت بعيونها:لا

فارس:تكلمت مع زوج بنتك وان شاء الله انه اخذ احتياطاتكم

سمر:غيرت قفل الباب ما بيقدر يدخل

فارس:الله يستر عليكم ويكفيكم شرّه

سكتت سمر وصد بعيونه فارس:بيت بنتي بهالبيت جنبكم وولدت بالسلامه بغيت تزورونها لانها بدون امها وحياكم الله عندها بتتلها فيكم

سمر:بنتك اللي سألت عن خطيبها وصلاته ؟

ابتسم فارس ولف عليها:قلتها كذبه عشان اتطمن لاني شفته تسلق بابك ودخل ولا مشيت لبيتي لين سألتك ان كان داخل البيت رجال

سكتت سمر تناظره ولف فارس:حياكم الله من جديد انتي وبنتك وزوجها

هزت راسها سمر ومشى فارس وقفلت الباب سمر وابتسمت تناظر الفراغ:فارس

رفعت كتفها ودخلت البيت تردد اسمه ببالها ومشت تجلس بالصاله وتكرر دق الباب ومشت وهي مبتسمه وفتحت الباب ونطقت:مين ؟

غايه:انا

ابتسمت سمر وفتحت لها:زين جيتي تعالي افطري معي

غايه تقدمت تدخل:محتاره محتاره ومستحيه اتصل على توليب

سمر مشت تجلس:بوشو

غايه فتحت جوالها تجلس:شرايك اي واحد البسه ؟

سمر ناظرت الفساتين:متى بيجون ؟

غايه:بكره

سمر ابتسمت:هذا يهبل عليك يطلع

ابتسمت غايه تناطر الفستان ونطقت سمر:اقول غايه

لفت غايه عليها:هلا

سمر:شرايك بإسم فارس ؟

عقدت حجاجها:شفيه

سمر:يعني شلون حلو ؟ لايق مع اسمي

ناظرتها بذهول غايه:لا تقولين ؟ الزوج الثالث

ضحكت سمر:نسولف وش جاب هالطاوي

غايه:هذي البدايه اعرفها وينه فارس هذا ووش صار ومن وين عرفتيه

صدت سمر:شوي شوي شفيك

غايه:علميني بسرعه بفهم

سمر ابتسمت ثواني ودق جوال غايه وناظرته وشهقت ترد:توته

ابتسمت توليب:كنتي بتنخطبين بدوني ؟

غايه:مستحيل انا بتزوج عشانك اصلاً

ضحكت توليب تناظر الحوش:منجد بكره ؟

غايه:رياض قال لعسّاف ؟

توليب:اي كلمه اليوم

غايه:تعالي توليب بدري لا تجين معهم كأنهم اهلك

توليب:انتي أهلي

ابتسمت غايه:انا مصبحه على امك

توليب:جد ؟ بخاطري اجي

غايه:نصابه ما بتخلين عسّاف عشاني

ضحكت سمر اللي تسمعها وابتسمت توليب:عسّاف برا

غايه:عشان كذا لقينا وقت فاضي نكلمك ؟ غريبه خلّاك

توليب:ما خلّاني بيجيب فطور

هزت راسها غايه ولفت توليب من انفتح الباب وناظرت عسّاف:اكلمك وقت ثاني غايه

قفلت وتقدم عسّاف:معي زوّار تستقبلين ياست البيت؟

عقدت حجاجها توليب وهزت راسها ومشت تدخل البيت دخلت الغرفه تاخذ عبايتها بإستغراب وخرجت وفتحت الستاره تناظر العم لطفي وصفيه وابتسمت

مشت تخرج وناظرتهم:اهلين

ابتسم عسّاف يناظرها وتقدمت تحضن صفيه

صفيه:الف مبروك ياعروسه ماشاء الله ماشاء الله البيت حلو اوي

ابتسمت توليب ولفت للعم لطفي:كيفك عمو لطفي

العم لطفي:الحمدلله كويس انتي ازيك ياورده ؟

صفيه لفت عليه:لا عيب تسأل وزارع الورد قنبها مش هتكون الا بخير

ابتسم عسّاف ورفع ذراعه على كتوف توليب

العم لطفي:قبت لك بزور للزراعه عسّاف ئلي انك حتزرعي البيت

توليب رفعت كتفها:ما اعرف تتوقع تزرع هنا ؟

لف العم لطفي:وماله ؟ حنقرب تعالي معايه

مشت توليب ولف عسّاف:حيّاك خاله صفيه

مشت تدخل وهي تسمي وتذكر الله وجلسوا ولف عسّاف يناظر توليب بالحوش مع العم لطفي

صفيه:ياحبيبتي فرحانه اوي بالزرع حتخلي البيت قنه

ابتسم عسّاف يهز راسه وعينه على توليب اللي تزرع مع العم لطفي وشعرها ينساب عليها من حركتها وتبتسم للعم لطفي

'

دلع جلست بتعب:خلاص تكفون من بعد زواج عسّاف مانمت من القلق

نجود:انتي تفكرين تنامين وزواجك الجمعه ؟

دلع تأففت من التوتر وحركات نجود ولفت هيله:خلصنا ما بقي شي

سكتت دلع تتأمل هدوء هيله ووضعها:امي منجد بتروحين بكره تخطبين ؟

هيله لفت عليهم:عطيناهم وعد ورياض بينشب

رنا:امي عادي احنا نروح بدونك انتي ارتاحي

دلع لفت:لا طبعاً ما تخلينا بتجي معنا وبنفرح برياض

هزت راسها هيله ودخل رياض:غتره والا شماغ

نجود:يعني عندك خيارات اصلاً ؟ مافي فرق

رياض:نجود

ناظرته وكمل رياض:انكتمي

ضحكت رنا وهزت راسها دلع:غتره رياض حلوه عليك

هز راسه رياض وجلس:اخذ ورد معي ؟ والا ماله داعي ؟

دلع:خذ معاك اذا تبي تشوفها

رياض ناظرهم بذهول:اكيد بشوفها اجل ليه رايحين ، امي قولي لهم بشوفها

هيله هزت راسها تسكت ولف رياض:بصلي العصر واشتري ورد من تجي معي ؟

رنا:انا انا

رياض:ماعندك ذوق دلع تعالي معي

نجود:يعني دلع عندها ذوق ؟

دلع:اي عندي

نجود:لو عندك ذوق ماتزوجتي واحد اسمه ضيدان

ضحك رياض وضربتها دلع ووقفت:دودي قصدك

نجود:والله لو تنادينه سوسو بعد اسمه ضيدان

كشرت دلع تخرج وضحك رياض ووقف ومشى لغرفته واخذ جواله واتصل عليه ينتظر رده

رد عسّاف وابتسم:اقول عريس ؟

رياض:العريس انت والله ما بنشوفك يعني ؟

رفع عيونه عسّاف لتوليب اللي تاكل ولف للمطعم:شتبي اجي معك خطبتك ؟ بجي ، غيره ؟

رياض:اهتمام يا اخوي ترا خطبه

عسّاف:ماعليك خلاف ان احتجت شي اطلب

رياض:بروح بعد صلاة العصر اشتري ورد

عسّاف ابتسم وناظر توليب:خذ توليب التوليب حلو

ناظرته توليب بإستغراب وكشر رياض:ياشينك بس توكل

ضحك عسّاف وقفل جواله وناظرته توليب:في شي ؟

عسّاف:رياض يبي ورد

ابتسمت توليب ورجعت تاكل:غايه تحب البيوني

ناظرها عسّاف ورفعت عيونها توليب وضحك عسّاف واخذ جواله يرسل لرياض

سكتت توليب تراقبه وقفل جواله عسّاف ورجع ياكل ونزلت عيونها توليب:عسّاف

ناظرها وهو ياكل ورفعت عيونها:ما بنروح مكان ؟

عسّاف ابتسم يفهمها:وين ودك ؟

رفعت كتفها تسكت وهز راسه عسّاف:بنروح بس الحين ما يمدي خطبة رياض وزواج دلع

توليب تقدمت تعض شفتها:وين ؟

ابتسم يهز راسه بالنفي وكشرت:عسّاف لازم تقولي

ضحك ما يرد عليها وياكل وتكتفت تناظره وانتهى عن طعامه:ما تبين تكونين مع غايه ؟

توليب:الا

عسّاف:بوديك لها الحين واخذك العشاء

توليب:ليه عندك شغل ؟

عسّاف:بمرّ اهلي

هزت راسها توليب ووقف عسّاف ووقفت توليب وتقدم يدفع الحساب ومشت توليب ترسل لغايه ولفت من رفع ذراعه على كتوفها يخرج معها

'

لابسه روبها تجلس قدام مرايتها تعدل شعرها وترسم وجهها باللي تحب تبرزه بكحل عيونها ورموشها وتتلون بألوان هاديه مبهجه وناظرت أظافرها ولفت من دق جوال عسّاف وقام من نومته واخذ جواله ورد:هلا

صدت توليب تسمعه وتفتح شعرها وتعدله

عسّاف:يمين بالله بثر رياض الحين ماشي انت ؟ خلاص اجل اصبر

ابتسمت توليب تسمعه نعسان وقفل جواله عسّاف وضحك يتأفف من رياض ولف وناظر توليب:متى صحيتي ؟

توليب:من وقت طويل ياكسول

ابتسم وهو منسدح يناظرها ووقفت توليب ولفت عليه:ما يمديك ترجع تنام قوم عسّاف بروح بدري لغايه

عسّاف تنهد وغمض عيونه:فيني نوم

توليب جلست على السرير:مين قالك تسهر امس ؟

لف عسّاف عليها:انتي تخلين الواحد ينام ؟

ابتسمت تناظره بنص عين:انا السبب

جلس عسّاف وتوترت توقف:اوكيه ما يمدي الا تقوم تتروش وتلبس

عسّاف ضحك يناظرها واخذت فستانها توليب ومشى عسّاف للحمام ولبست توليب تناظر فستانها اللي يبين انها عروس وفعلاً عروس

انحنت تلبس كعبها ورفعت راسها تسمع رنين جوالها واخذته ترد:هلا امي

سمر:طلعتي توليب ؟

توليب:لا عسّاف باقي ماجهز انا جاهزه

سمر:اسبقك يعني ؟

توليب:لا تروحين لوحدك انا وعسّاف نجيك

خرج عسّاف وناظرها وهزت راسها توليب:امي نجي ناخذك لا تسبقيني

سمر تنهدت:لا تطولون بنتظركم

توليب:اوكيه

قفلت جوالها وناظرت عسّاف اللي يقفل ازرار ثوبه:بناخذ امي معانا

هز راسه ووقف خلفها وعدل شعره وابتسمت توليب وناظرها عسّاف:متجاهلك لصالحك صدقيني

ضحكت تهز راسها:بجيب شماغك

فتحت الدولاب المشترك بينهم وابتسمت تطلع شماغه وتقدمت له يلبس طاقيته ومدت له الشماغ واخذه يلبسه ومشت توليب تاخذ عطورها تتعطر وتعطر شعرها ورفع شماغه عسّاف وتقدم لها وباس كتفها وميلت راسها توليب تبتسم

وناظرها من المرايه:اللي يصبرني انك بترجعين معي عندي

ابتسمت ماترد وابتعد ياخذ جواله من عند السرير ولبست عبايتها توليب:عسّاف

ناظر جواله ولفت عليه توليب:ببخرك

لف عليها وابتسم وابتسمت:لانك عريس

تقدم لها:نهبتي قلب عسّاف

شغلت الفحمه تولع عليها وحطت العود وتقدمت له تفتح شماغه وتبخره وهي مبتسمه وناظر مبسمها عسّاف ورفعت عيونها توليب:ريحتك إثبات وجودي

عسّاف:راعي دبل تي وحلالي دبل تي

ضحكت لانه يقصد براند دبل تي ويقصد ذاتها هي دبل تي:دبل تي تحبك

ابتسم عسّاف يتأملها وتقدمت توليب تبوس خده ولانت ملامح عسّاف من ابتعدت وتأمل ابتسامتها وحطت المبخره خلفهم واخذ نفس عسّاف ومشت توليب تاخذ شنطتها وتخرج وخرج معها

ركبت السياره تصور لغايه اثبات انها جايه ولا تقلق وناظرتها غايه وقفلت جوالها تعدل شكلها:يومك سنه توته

عدلت فستانها وخرجت من غرفتها وناظرت امها اللي تجهز وانشغلت معها ترتب ولفت من دق الباب:توته اكيد

مشت امها وفتحت الباب وابتسمت:ياهلا ياهلا

ابتسمت سمر تدخل:ماشاء الله تبارك الله

سلمت عليها وخرجت غايه وابتسمت من شافت توليب وسمر

وناظرتها توليب بحماس ولفت تسلم:كيفك ؟

ابتسمت ام غايه:حيّ الله العروس

ضحكت توليب وتقدمت بالورد اللي بيدها لغايه وكتمت صرختها تحضنها وابتسمت غايه:خفت تتأخرين

توليب بعدت عنها:تهبلين غايه شكلك يااي ماشاء الله

ضحكت سمر تتقدم لغايه وتحضنها:كثيره على اي احد

ضحكت غايه وابتعدت عنها:ماعندي فارس احلام معين

ناظرتها سمر تفهمها وصدت تفصخ عبايتها وتجلس

جلسوا وابتسمت توليب تتأمل الضيافه

سمر:ام العريس جايه ؟

ام غايه:اي ان شاء الله اكدت عليّ العصر

رفعت حاجبينها سمر ولفت لغايه وابتسمت لها

'

دخل رياض وابتسم يسلم على أبوها ويعلو صوتهم بالمجلس تركيب ببعضهم ومعه عبدالمحسن وعسّاف وناظر أعمامها الحاضرين وجلسوا وانتشرت ريحة البن والهيل والزعفران وطيب العود واندمجت بينهم السوالف والعلوم

ولف عسّاف على رياض المتوتر بوضوح حتى وهو يسولف ويتكلم واخذ جواله يطلعه وكتب لتوليب:أمي والبنات وصلوا كانوا ورانا

قرتها توليب ولفت لغايه اللي جالسه مع حريم أعمامها واشرت لها بعيونها

ووقفت غايه بربكه ومشت معها توليب ودخلوا غرفتها واخذت عطرها غايه:وصلوا صح ؟ سمعت اصوات الرجال

توليب عدلت شكلها:ام زوجي وزوجك ؟ اي وصلت

اخذت نفس غايه ومشت تخرج وخلفها توليب وناظرت هيله والبنات اللي دخلوا وابتسمت غايه تتقدم لهم

وناظرتهم توليب بإبتسامه ولفت هيله وناظرت غايه وتقدمت لها تسلم بهدوء بدون تسأل عن الحال حتى ولفت تناظر توليب ولفت سمر تراقبهم من مكانها وبيدها فنجان قهوتها وابتسمت من سلمت على توليب ولفت هيله وناظرت سمر ورفعت حاجبينها سمر:هيله ؟ حيّ الله هيله

وقفت سمر وتقدمت هيله لها وابتسمت سمر تمد كفها:شلون صحتك ؟ عسى ما تعبتي بالمشوار بيت أهل غايه بعيد

تجاهلتها هيله وتقدمت تسلم عليهم وابتسمت توليب للبنات وحضنت دلع:استعديتي مابقي شي ؟

دلع ناظرتها بتوتر:لا تذكريني احاول انسى

ضحكت توليب ولفت لنجود اللي ابتسمت:محلوه عسّاف يخليك حلوه كذا ؟

ابتسمت توليب تسلم عليها وتقدمت رنا:خليني أخمن جاينا حفيد ؟

ضحكت غايه تكتم صرختها وتوردت ملامح توليب لان كان صوت رنا عالي ولفت نجود على رنا:نسينا نقفل زر اللقافه في رنا الله يستر

ضحكت توليب وتقدموا يدخلوا ومشت توليب تجلس بجانب سمر وناظرتهم هيله بجانب بعضهم

ولفت وحده من الحضور:ماشاء الله يا أم توليب والله ما صدقت انك أم توليب لين قالت لي أم غايه ، كأنكم خوات

ضحكت سمر تنتصر من هالطاري اللي تدري انه يغيض هيله:اي والله الكل يقول صرت حتى ما اعدل لهم صواب خل يظنوني اختها

ابتسمت توليب تناظر سمر ولفت على غايه اللي جالسه بجانب أمها

ولفت سمر على هيله:ماشاء الله ياهيله زوجتي عيالك ما بقي لك الا هالبنتين عاد بتصيرين جده تتحقق امنيتك بأحفادك

هيله ناظرتها:شدراك انها امنيتي ؟

ابتسمت سمر:معروف هيله الله يسامحك الوحده ان كبرت ماتبي الا انها تشوف احفادها

هيله:اي وانتي ودك باحفادك بعد

صدت توليب بعيونها وابتسمت سمر:ان شاء الله ليش لا

نزلت عيونها غايه لقهوتها تناظرها ولفت من دق جوال امها واخذته ولفت لغايه:شوفي أبوك

ابتسمت توليب واخذت نفس غايه ووقفت ومشت وناظرت ابوها اللي واقف:تعالي وأنا أبوك تعالي

مشت تدخل وناظرت رياض اللي جالس وابتسم رياض ووقف والتفت ابوها:البيت بيتك وأنا عمك

هز راسه رياض:تسلم

مشى يخرج تاركهم ولف رياض على غايه وناظر فستانها وشعرها ونزلت عيونها للبيوني اللي على الطاوله ورجعت ناظرته

لف وناظر الورد ورجع ناظرها:هالمره مصدر موثوق ادري فيك تحبينه

ناظرت الورد وابتسمت واخذه رياض ومده لها واخذته ورفعت خصل شعرها خلف اذنها وناظرته

وابتسم رياض:اعتقيني من هالاختبار ووافقي

ماردت عليه وهي مبتسمه وسكت رياض يناظرها ونزلت عيونها للورد ورجعت ناظرته من نطق:بحدد كتب الكتاب

عقدت حجاجها:بستخير !

رياض:انتي يوم كنتي تصديني ماكنتي تستخيرين ؟ وش كنتي تسوين اجل خافي الله فيني

ضحكت لانه انفعل فعلاً ورفعت كتفها:ما ينفع تحدد

رياض:عسّاف بيسافر ماودي ننتظره لين يرجع

غايه صدت بعيونها تتذكر وجود توليب معها وضرورته ورجعت ناظرته ومسك ياقته رياض:ارحميني

ابتسمت وهزت راسها وابتسم رياض يشوف الودّ بعيونها ومشت تخرج من عنده وناظرت الورد وعضت شفتها من كل هذا الدلال والرغبه اللي تشعر بها ومشت تدخل وتمرّ من عندهم وتدخل غرفتها وابتسمت توليب ووقفت ومشت لها ودخلت:علميني

غايه حطت الورد:بيحدد كتب كتاب

توليب:المفروض على صبره الليله كتب الكتاب

ضحكت غايه:وقفي بصفي تنازلت ووافقت قبل تسافرين

عقدت حجاجها توليب:اسافر وين ؟

غايه:رياض يقول بتسافرون يبي قبل يروح عسّاف

ابتسمت توليب لان عسّاف خطط بوضوح وهزت راسها

'

مشت سمر وناظرت هيله اللي تلبس عبايتها وناظرت البنات بجانبها خارجين:اتركونا يابنات دقايق

لفت دلع وناظرت امها ومشوا يتركونهم ولفت هيله عليها وناظرتها:استقوى عودك ياسمر

ابتسمت سمر:عدالة ربي

هيله:شتبين ؟

سمر:عسّاف قالي ان حنان اللي حاولت تخرب بيتك وهي اللي كلمت حمد ، عاد حنان شهالصمله وش لاقيه بتركي ؟

هيله:لا تدخلين وفكينا منك

سمر تكتفت وتقدمت لها:حاسبتيني على ذنب ما سويته وعاقبتيني على شي ما تحملته رغم ان ماضيك اسوأ من محاولاتك وضررك لي

سكتت هيله تناظرها وكملت سمر:يوم رفضت حمد يكمل معك وتتزوجون كنت ادري ان ما يطلع منك الا الشرّ كنت تحاربين زوجة ابوك انتي وحنان ، جاتني تشتكي من ظلمكم وقهرها

هيله:ورفضتي حمد يتزوج بس رحتي اخذتي تركي من حنان ؟

سمر:كنت اظن حربكم على زوجة ابوكم بس حاربتوني حتى انا

هيله:وللحين تحاولين تلعبين

سمر:لانك صرتي ضعيفه ياهيله حنان اللي كانت تحرضك وتدخلك بمشاكلها مع تركي طلعت هي اساس شرّك ومصايبك وانتي بدون حنان هشّه

سكتت تناظرها هيله وكملت سمر:بنتي صارت زوجة ولدك وبتكون أم أحفادك ، ارعيها وخليها ذهبه ما تنرخص وخلي الجاي يمرّ بسلام بدون حربك وبدون حنان

ماردت عليها هيله ومشت سمر تتركها ودخلت وناظرت البنات وابتسمت:امكم تنتظركم

وقفت دلع وابتسمت:كنت مستحيه اقول قدام الموجودين بس ابيك تحضرين مع توليب زواجي يوم الجمعه

ابتسمت سمر لها:ان شاء الله اشوف وقتي والله يوفقك

ابتسمت دلع ومشت مع خواتها تخرج وجلست سمر مكانها تشوف المجلس مافيه الا ام غايه وغايه وتوليب:توته ما نمشي ؟

توليب اخذت جوالها:بكلم عسّاف

غايه:اجلسي توته نسولف

ام غايه:وراها بيت وزوج ياحياتي ماهي فاضيه نفس قبل

ضحكت سمر:عقبال غايه ان شاء الله

ابتسمت توليب تقرأ رسالته:ينتظرنا برا

وقفت سمر وابتسمت ام غايه:نورتي ياسمر ياشريكة افراحنا

سمر ابتسمت:عقبال الفرحه الكبيره ان شاء الله

مشت توليب تلبس عبايتها ووقفت غايه تناظرهم

توليب:اذا قال ابوك متى موعد كتب الكتاب بلغيني

غايه:بيوصلك خبر مع عسّاف

تقدمت توليب تسلم عليها ومشت تخرج ولفت سمر تسلم على غايه ولحقت توليب بالخروج

لف عسّاف اللي بسيارته وتقدمت توليب تفتح الباب تركب بجانبه وركبت سمر وحرك عسّاف

لفت عليه توليب:متى حددوا ؟

عسّاف:الاسبوع الجاي

سمر:الحين غايه بيجيها هبوط

ضحكت توليب وكمل عسّاف:قالوا بالبيت وعائليه

توليب:يمكن عشان يلحقون علينا قبل نسافر !

لف عسّاف وضحك يهز راسه:رياض ما يمسك لسانه

ابتسمت توليب تناظره وصدت وناظرتهم سمر:اقول عسّاف

رفع عيونه على مرايته ونطقت سمر:جيراني بنتهم ولدت ونادتني انا وتوليب بنروح نزورها

توليب عقدت حجاجها:اي جاره ؟

عسّاف:هي عزمتك ؟

تنحنت سمر:لا أبوها

لفت توليب عليها بإستغراب وهز راسه عسّاف:فارس ؟

سمر:اي جزاه الله خير عزمك وقال بنته وحدها ويبي نسليها

عسّاف اخذ نفس وناظرتهم توليب:مين فارس واي جيران ليش ماعندي خبر ؟

سمر سكتت وصدت وناظرها عسّاف يسكت وناظرتهم توليب

وقف عند البيت وابتسمت سمر:تصبحون على خير

فتحت الباب تنزل ولفت توليب تناظرها ولفت على عسّاف:امي صارت تعلمك بكل شي وانا لا ؟

عسّاف حرك سيارته:انا عرفت بنفسي

توليب:عن وشو ؟

عسّاف تنهد يسكت وتقدمت توليب:عسّاف

لف عليها:أبوك طب البيت بليلة زواجنا وتهاوش مع امك وسمعهم جاركم ودخل لهم

عقدت حجاجها توليب وكمل عسّاف:هذا اللي حصل

توليب:عشان كذا تغيرون الاقفال ؟ وما تعلموني ؟

عسّاف:ما بغيتك تكرهينه ما بغيت تعرفين وتخافين على امك وتقلقين

توليب:امي وابوي يتهاوشون من سنين الحين يوم تزوجت صار يتخبى عليّ ؟

عسّاف:ماتبي تقولك وتخوفك

توليب:تقولي اذا قالت لك لازم تقولي لاني انا بنتها

عسّاف سكت يناظر الطريق وصدت توليب ونزلت عيونها لجوالها وظلت ساهيه في رقم ابوها وقفلته تناظر الطريق

'

خرج يناظر الطريق المظلم ومشى لضوء المناره ودخل المسجد وناظر اللي متقدمين على الاذان بوقت قصير ودخل يجلس بجانبه والتفت عليه وعقد حجاجه وابتسم يوسف:صبحك الله بالخير يالجار

هز راسه يصد ويستغفر وتنحنح يوسف:شلون الصحه والعافيه ؟

لف عليه وضحك بوهقه يوسف:اقصد شلونك انت عساك بخير

أبو مها:وش تبي ؟

يوسف:ولاشي مبكر للصلاه ولقيتك قلت اخذ علومك

أبو مها:انشغل بالذكر عن وسوسة الشيطان

سكت يوسف وصد للمسجد ورجع ناظره:عمي ترا العود ماهو لي والله ما اعرف له ولا عندي معازف ابد

لف أبو مها وكمل يوسف:والحادث اللي صار لي خلل بالبريك ماهو تفحيط ، والله اني ولد صالح

أبو مها:وشدخلني أنا ؟ هذا لك ولربك

يوسف:هذا تمهيد طال عمرك عشان تعرفني زين

أبو مها:الله يصلح حالك

يوسف صد يسمع الاقامه ووقف يصف بجانب أبو مها ويكبر يصلي معه وانتهى يسبح ودق جواله وطلعه وعقد حجاجه يقرأ الرقم الغريب بهذا الوقت من الإبكار ووقف ومشى يخرج ورد:هلا

لبس نعاله وهو يهز راسه:اي يوسف تركي

وقف محله يسمع محتوى المكالمه وبلع ريقه وقفل ومشى يدخل البيت ولفت حنان اللي بجلال صلاتها كانت تدور عليه وناظرته:يوسف

تقدم يدخل غرفة البندري واخذ مفتاح سيارتها وخرج وعقدت حجاجها حنان:وين رايح ؟

يوسف:عندي شغل

حنان:يوسف لا تسوق لا يجيك شي

لف عليها يوسف ومسك كتوفها:ماني مسرع راجع

سكتت حنان بقلق ومشى يوسف يخرج وفتح سيارة البندري وركب يحرك وعقد حجاجه طول طريقه في دوامة قلق واسئله ووقف عند القسم ونزل ومشى يدخل وناظر العسكري:جاي اشوف ابوي تركي فواز

العسكري:ادخل هالمكتب

مشى يوسف ودخل وناظر أبوه جالس ولانت ملامحه ورفع عيونه تركي ولف للعسكري:سلام عليكم

العسكري:انت يوسف ؟

هز راسه وتقدم يجلس قدام أبوه ولف عليه ورجع ناظر العسكري من تكلم:الوالد كان يسوق مسرع بطريق فرعي ورغم ان الدوريه خلفه طلبته يوقف تمرد ورفض

لف يوسف على تركي ونزل راسه وكمل العسكري:بخليك معه

وقف يتركهم ورفع عيونه يوسف على تركي اللي صاد ونطق:تخرج معي وتجي بيتنا

ناظره تركي وهمس:ماهو بيتي

يوسف:بيتنا وانت ابونا كلنا

تركي:ماني أبوكم

يوسف اخذ نفس وتقدم وناظره:انت ما خسرتنا حتى بعد طلاقك من أمي وتبقى أبوي وأبو البندري وأريام وتوليب ماهو لازم تكون على ذمتك وحده منهم عشان تكون أب لنا

تركي مسك راسه بقوه بتعب وشعر فيه يوسف وتقدم يسلم على راسه ويجلس:تكفى ابوي

تركي:احسني تعبان احسني ماني طيب

يوسف:مافيك الا كل خير تعال معي

وقف تركي يخرج معه ومسك ذراعه يوسف وفتح السياره يركب تركي ومشى يوسف يركب وحرك وناظر تركي اللي يناظر الطريق يهوجس ورجع صد يوسف ووقف عند الفندق ولف عليه تركي:بترميني فيه ؟

يوسف؛ابوي انزل معي

ناظره تركي ومشى يوسف ينزل وفتح الباب ونزل تركي وقفل السياره يوسف:بقعد معك

مشى مع تركي يدخلون واخذ المفتاح يوسف يفتح الغرفه ودخل تركي يناظرها ودخل خلفه يوسف وقفل الباب ومشى يوسف وقعد على السرير:ما انت وحدك

لف تركي عليه يناظره بيأس شديد يأكل من روحه:ليه يصير كل هذا ؟ انا كل اللي بغيته اختار حياتي واعيشها

سكت يوسف ما يبي يلومه على سوء اختياره وتصرفاته لان حاله كان يكفي

كمل تركي يناظر يوسف:توليب معد تبيني وانا مالي بيت الحين ، ماعندي بيت

يوسف:بيتك بيتنا وبتجي معي

تركي:امك ماهي زوجتي

يوسف سكت وصد بعيونه وكمل تركي:بموت وحدي هذا اللي بيصير لي ، موتي وحدي

لف يوسف يناظره وناظره تركي يسكت وبلع ريقه يوسف ينزل راسه

'

دخلت سمر وخلفها توليب البيت وابتسمت سمر من شافت البنت بإستقبالهم:اهلين

تقدمت تسلم عليها سمر:كيف حالك ؟ الف مبروك ماجاك

هزت راسها:الله يبارك فيك أنا دلال

ابتسمت توليب تتقدم لها:أنا توليب وهذي أمي سمر

دلال:حياكم الله حياكم

دخلوا وناظروا الاستقبال واسم البيبي وابتسمت سمر:ماشاء الله الله يحفظها يارب

تقدموا يجلسون وابتسمت دلال تجلس:اول ما قالي ابوي ان الجيران بيزوروني فرحت قريب سكنت هنا

سمر:ياحبيبتي كان سيرتي عليّ انا وحدي بالبيت

دلال:بنتك متزوجه ؟

ابتسمت توليب تهز راسها وضحكت دلال:اجل عقبالك نزورك بعد الولاده

سمر لفت لتوليب وتوترت توليب تهز راسها

سمر ناظرتها ثواني:اهل زوجك مو حوالينك ؟

دلال:لا والله ساكنين بالرياض زوجي يشتغل هنا بينبع ، ابوي بس اللي موجود هنا

سمر:وأمك ؟

دلال ابتسمت:امي متوفيه من ١٥ سنه

سمر رفعت حاجبينها:الله يرحمها يارب يعني أبوك للحين مو متزوج ؟

كحت توليب ومدت يدها تشرب من كاس المويه اللي قدامها وناظرتها سمر وابتسمت تشرب من قهوتها

دلال:لا ابوي من زمان أرمل كان يحاول يتزوج ويجرب بس ما يلقى اللي تناسبه

سمر ناظرت توليب بتوتر ولفت:وش يناسبه ؟

توليب:وين البيبي ؟ ماشفناها

دلال:نايمه بس دقايق اجيبها

وقفت دلال ولفت توليب على سمر اللي صدت تلعب بخصل شعرها:أمي

سمر:شفيك خل نسأل ونسولف

توليب:بس بتحرجين نفسك

سمر ابتسمت:مالقي اللي تناسبه قصدها مالقي وحده نفس سمر

صدت توليب بعدم تصديق وابتسمت من دخلت دلال بالبيبي ومدتها لتوليب وارتبكت توليب تاخذها من يدينها:بسم الله ماشاء الله

ابتسمت توليب تناظرها بحضنها وجلست دلال مكانها وناظرتها سمر تبتسم:لو عسّاف شافك طار عقله

لفت توليب بربكه على امها وناظرت دلال:الله يخليها لكم ان شاء الله

دلال:امين وعقبالك يارب

ابتسمت توليب تناظر البيبي وصدت سمر تناظر دلال:ماعندك خوات اخوان ؟

دلال:لا وحيدة أبوي

سمر:الله يخليكم لبعض

دلال:ابوي بلغني باللي صار ببيتك

سمر ابتسمت بإحراج:يعني تعرفين الحياه

دلال ابتسمت:بغيت اطمنك اني قريبه منك متى ما احتجتي شي كلميني

سمر:ما تقصرين

دق جوال دلال وردت:هلا ابوي

ناظرتها سمر ورفعت عيونها توليب على سمر وابتسمت دلال:ليش تتعب نفسك ؟

نزلت عيونها سمر تعدل فستانها ووقفت دلال:طيب جايتك

قفلت وناظرتهم:عن اذنكم

مشت تخرج ولفت سمر:لا يكون بتدخل ابوها علينا شوفه شرعيه

كشرت توليب من حركات سمر وضحكت سمر:امزح لا تطالعيني كذا

دخلت دلال وبيدها صواني حلا وحطتها:هذي من ابوي يوم عرف انكم جايين أصرّ يجيب لكم

ابتسمت سمر ترفع حاجبينها وناظرتها توليب ونطقت سمر:راعي ذوق وواجب

ابتسمت دلال وناظرت سمر:ماشاء الله بس عندك توليب ؟

توليب رفعت عيونها لدلال اللي تسولف مع سمر بإهتمام ونطقت سمر:اي تطلقت بدري وانا صغيره

دلال:ما تزوجتي ؟

سمر ضحكت:الا بس بعد تطلقت

دلال ابتسمت:انا استغربت باقي صغيره وما تزوجتي !

سمر ابتسمت:تزوجت مرتين وما صار توافق

دلال:وعادي تتزوجين الحين ؟

لفت توليب بذهول من سؤال دلال اللي كان بوضوح تلميح وبلعت ريقها سمر تستوعب تتردد بالكلام

وابتسمت توليب:ليش لا بس اكيد شخص افضل من اي احد ماضي

دلال هزت راسها تشرب من قهوتها وتناظرهم

وتوترت سمر تلف على توليب اللي تناظرها وصدت بعيونها

ونطقت توليب:اجل نستأذن احنا مانبي نزعجك

دلال:لا افا عليك اي ازعاج تونسوني

تقدمت توليب بالبيبي وعطتها دلال ووقفت سمر:متى ما بغيتي تجيني تعالي حياك الله

دلال ابتسمت:ان شاء الله ، خلوني اعطيكم من الحلا اللي جابه ابوي حرام جابه عشانكم

لفت توليب على سمر اللي هزت راسها:ما قصر

مدت لهم الكيس واخذته توليب وابتسمت:نشوفك على خير

مشت سمر ولبست عبايتها وتقدمت توليب تلبس عبايتها وتخرج ومشوا يخرجون

ولفت توليب من ناظرت اللي خارج من المجلس ولفت سمر وناظرته وصدت وتقدم يخرج معهم:أم توليب

لفت توليب عليه من خرج معهم ولفت سمر وناظرته

وابتسم فارس:زارتنا البركه ما رديتيني

سمر ارتبكت ولفت لتوليب ورجعت ناظرته:احنا جيران

فارس:ماقصرتي ورايتك بيضاء وبنت حلال

صدت توليب تكتم ضحكتها وابتسمت سمر ومشت مع توليب لبيتهم ولفت تناظره لا زال واقف ودخلوا وضحكت توليب

وضربت كتفها سمر:اسكتي يسمع

تقدمت تدخل البيت توليب:وش حصل الحين خطبه هذي والا وشو ؟

سمر ناظرتها بذهول:ولا انا ادري البنت رسمي سألت عني

توليب ضحكت وجلست تحط الحلا:جايب حلا سوي لك قهوه تركيه تاكلينه معها

جلست سمر وابتسمت:راعي واجب والا ؟

توليب اخذت نفس تناظر سمر:مريح اكثر من عدنان

سمر كشرت:وينه ووين عدنان ؟ وش جاب الثرى للثريا

صرخت توليب بصدمه وضحكت سمر:بنت

توليب:رسمي الوضع ؟

سمر:يعني توته وش زينه صراحه جنتل وماهو شايب واسمه فارس ليه لا ؟

توليب:خلينا من فارس بتحضرين معي عرس دلع بكره ؟

سمر:لا مالي خلق هيله

توليب:لا تخليني وحدي غايه وامها بيحضرون

سمر:اشوف لين بكره واعلمك

توليب:اجل برجع انا الحين

سمر ابتسمت:زين

تقدمت توليب لها وباست خدها وضحكت:الله يوفقك ياعروس

ضحكت سمر من طنازة توليب وخرجت توليب وابتسمت تركب سيارتها وحركت راجعه لبيتها ، بيتها مع عسّاف وابتسمت من شافت سيارته عند البيت ووقفت خلفه ونزلت وفتحت شنطتها تطلع مفتاحها وتدخل

ومشت تدخل البيت وتقدمت تشوفه بالصاله ولف عليها:العشاء جاهز طال عمرك

ضحكت وتقدمت:تأخرت عليك ؟

عسّاف هز راسه بالنفي وابتسم وفصخت عبايتها توليب ومشت تجلس بجانبه وناظرته:كيف الوضع عند اهلك ؟

عسّاف:ما لقيتهم كانوا برا لقيت رياض بس

توليب:ارسلت لدلع اذا تحتاج مساعده بس قالت لا

عسّاف:سيّرتي أم الزين ؟ سويتي واجبك

ضحكت ولفت عليه بجسمها:رجعت بيتي

عسّاف ابتسم يناظرها ولفت توليب:تعشيت بدوني ؟

عسّاف:اخسى

توليب:تطلب لنا ؟

عسّاف هز راسه واخذ جواله ولفت توليب تناظره وابتسمت ورفعت كفها على رقبته وشعره:حجزت ؟

ضحك عسّاف وعينه على الجوال لانه يدري انها تراوغ عشان تعرف وجهتهم وهز راسه بالنفي

وعقدت حجاجها توليب تتقدم له:عسّاف قولي ما بقى شي يمكن بخاطري مكان

لف عليها عسّاف:تهقين لو بخاطرك مكان ما اعرفه ؟

ابتسمت وهي تناظر عيونه:وش باقي شي ما سويته عشاني ؟

عسّاف قفل جواله والتفت بجسمه عليها:بقي اللي بخاطري أنا من زمان بس مالقيت الوقت المناسب

سكتت توليب تناظره ورفع كفه عسّاف لكفها:يصير دبل تي ملك لك وحدك

لانت ملامحها بذهول وكمل عسّاف:مشروعك وإسمك وطموحك كمليه انتي وأرباحه كلها لك

توليب ناظرته بذهول:بس انا ماودي

عسّاف:ما بشيل يدي عنه بساعدك واوقف معك واصفق بكفوفي لنجاحك بس ابي ان نجح قالوا نجحت توليب واستقامت فيه

سكتت تتأمله وابتسم عسّاف:وتوسعي وافتحي بإسمك مشروع غيره ونافسيني بالتجاره

ابتسمت بخفوت ما يعجبها اختياره واخذت نفس:عسّاف شاركني فيه ما ابي اكمله وحدي ، مشوار بدونك ما ابي امشي فيه

شد على كفّها عسّاف:ما انتي وحدك والله ما تكونين وحدك وأنا حيّ وجودي باقي معك بس إسمك بهالمشروع بيتفرد بك لانك تستاهلينه

سكتت وتقدم عسّاف يبوس خدها وحضنته توليب لانه كان بيبتعد عنها وابتسم عسّاف يرفع ذراعينه على ظهرها وتنهدت توليب تحط براسها على كتفه وهي حاضنته:وأنا وش أعطيك ؟

عسّاف:أبوّه

ابتعدت عنه وناظرته من قريب وابتسم عسّاف:ابي عيال منك تملين هالبيت ابي نسخ صغيره منك ومني

ابتسمت بحنيّه من كلامه ولمعة عيونه وهز راسه عسّاف:كل اللي أبيه تصيرين أم عيالي

ابتسمت بدون رد ورجعت تحضنه ورفع كفوفه على ظهرها يقدمها لحضنه لين صارت تجلس على فخوذه وهي حاضنته ورفع كفوفه يمسك شعرها وابتعد عنها وناظرته وهي تتوسط حضنه تجلس بين جناحينه وانحنت بشعرها تلمس دقنه بأصابعها وتقبّله نفس ما ودها دايم تقبّله

'

في ليلة العمر بالنسبه لشخصين اختلفت اسماءهم وتشابهت أرواحهم وسط فوحان العود والباتشولي وطيب المباركه والحضور بغرفة العروس كانت جاهزه تلبس فستانها وطرحتها وتناظر خواتها اللي قدامها:القاعه مليانه بشر حشى عزموا كل أحد اهل ضيدان

دلع ناظرت جوالها:توترت ودودي ما يرد عشان نتصور أجلت التصوير داخل القاعه عشان انشغاله مع الرجال

نجود:المهم تصورتي معنا شتبين في دودي

دق الباب ولفت رنا تفتح وابتسمت:هلا حريم اخواني

ضحكت توليب وتقدمت تدخل وخلفها غايه وابتسمت توليب:احلى عروس

ابتسمت دلع ووقفت وحضنت توليب:اوف توتر قولي هيّن الموضوع

توليب ابتعدت عنها:لا تتوترين انبسطي

لفت لغايه وابتسمت غايه:طالعه قمر ماشاء الله

ابتسمت دلع:انتوا متفقين تلبسون نفس اللون ؟

ضحكت غايه تلف على توليب تحضنها من الجنب:لون الذهب ؟ صدفه

نجود:ما يلوق الا عليكم اصلاً

ابتسمت توليب:عقبالكم بنات

رنا:ماشاء الله وحده زارع لها مية ورده ووحده مسوي لها اغنيه طموحي صار مرتفع

ضحكت نجود:ووحده ذابح لها فار بالعياده عشان ما تنفصل

دلع:يالله بس نجود دودي يسواهم كلهم

لفت توليب وضحكت بذهول:امداك تجحدين اخوانك؟

دلع ضحكت ونطقت غايه:من يوم نادته دودي اعرفي الموضوع انتهى

ابتسمت توليب ولفت على سؤال دلع:ما جات امك ؟

توليب:لا والله تتعذر منك وارسلت بهديتها معي

دلع:معذوره وانتي غايه ؟

غايه:لا امي اول الحضور لين تضمن دبلتي

ضحكت دلع ولفت توليب:جينا نسلم وبنرجع لا تتوترين دلع

هزت راسها دلع وخرجوا كلهم تاركين دلع وحدها

ونزلت توليب من الدرج مع غايه ولفت نجود عليها:بشويش على البيبي

لفت توليب بذهول وضحكت غايه:توته صارت تسمع كلمة بيبي يومياً

رنا:مستعجلين توليب نبغى حفيد خلاص

توليب توترت من هالطاري وناظرتهم بنظرات تبين جنونهم بالكلام ومشت مع غايه لطاولتهم مع ام غايه وجلست توليب ولفت تناظر الحضور

ولفت غايه على توليب:المطربه عجيبه توته بخاطري ارقص قومي معي

ام غايه:قوموا ارقصوا لا تقعدون

توليب ابتسمت:مطقمين وطالعين نرقص بزواج الحموله ؟ بياكلونا بعيونهم

غايه ابتسمت:وياكلونا اموت على أكل العيون

ضحكت توليب ووقفت غايه ومشت معاها توليب وطلعوا يرقصون مع بعضهم وسط نظرات وسؤال الحضور بقرابتهم لبعضهم وكيف ماخذين أخوان

ابتسمت نجود ترقص مع رنا بفستانها وتعزز لتوليب وغايه تبيّن اندماجهم مع بعضهم ولفت هيله تناظرهم يرقصون ولفت على ام ضيدان اللي تكلمها وابتسمت بخفوت أمام الحضور ورجعت صدت تناظرهم

وقفت توليب بجانب نجود تناظر غايه اللي ترقص مع رنا ولفت توليب على نجود:ما عزمتوا خالتك ؟

نجود:ماعاد يتكلمون هي وأمي بس دلع عزمت البندري وأريام ما اعرف اذا بيحضرون او لا اتوقع ما بيخلون امهم

سكتت توليب تصد تناظر الحضور ولفت لغايه اللي تقدمت لها ونزلوا مع بعضهم ولفت توليب تناظر باب الحضور ثواني ومشت تجلس بجانب غايه

شربت من القهوه غايه ولفت عليها امها تتكلم وصدت توليب تناظر الباب وانقضاء الليل اللي ما بقي شي لزفة دلع وصدت بعيونها تسأل عن الحال اللي صار لهم ولفت من جديد ولانت ملامحها تشوف دخولهم ولفت على هيله اللي على الكوشه واققه تتكلم مع ام ضيدان ولفت على غايه:دقايق وجايه

وقفت توليب ومشت تتوجه لهم ودخولهم المشتت أمام الحضور ولفت أريام وناظرت توليب ودقت البندري ولفت البندري وناظرت اقتراب توليب منهم

وقفت قدامهم توليب:وحدكم ؟

البندري:بدون أبوي وأمي

سكتت توليب تشعر بنبرة صوتها وجوابها وانكسارها وكملت أريام:جينا عشان دلع ما يخصنا اللي يحصل بين أمي وخالتي

توليب ناظرتهم وهمست:وأبوي ؟

البندري بلعت ريقها ولفت من تقدمت نجود لهم تحضنهم وابتسمت البندري وناظرتهم توليب يحضنون بعضهم ، كان المفترض والمخطط له انهم يكونون من ضمن أهل الزواج الليله والبندري معهم أقرب من وجودها هي لكن تغير كل شي وصارت توليب هي المعزبه زوجة الأخ الاولى وهذولا حمولتها والبندري جايه ضيفه وسط صعوبة المشاكل

رنا:دلع تتصور تعالوا اجلسوا شوي وتنزف

مشت أريام معهم ولفت البندري على توليب وناظرتها توليب وسكتت

البندري:أبوي تعبان ومندمر نفسياً يوسف قاعد معاه بغرفه بفندق وأنا وأريام نزوره

توليب تكتفت تصد بعيونها وكملت البندري:وأمي مو مهتمه لأمره ورافضه جيته للبيت

توليب هزت راسها:ما تنلام

البندري:ما بتزورينه ؟ سأل عنك

سكتت توليب يوجعها هالطاري وبلعت ريقها ترفض الرد

البندري:مو مجبوره ابد وأتفهم رفضك بس بغيت ابلغك بحالته

هزت راسها توليب ومشت البندري تدخل وتجلس مع نجود ورنا واخذت نفس توليب ترجع محلها ولفت غايه عليها:وش قالت لك ؟

ماردت توليب وسكتت غايه تراقب ملامحها وصدت تناظر البندري من بعيد وجلوسها مع بنات خالتها

لفت من تخفضت الاضواء واشتغلت زفة دخول العريس وابتسمت غايه من دخلوا عائلة دلع ، عبدالمحسن ورياض وعسّاف ولفت لتوليب وابتسمت توليب تلمح عسّاف بجانب ضيدان

وابتسم ضيدان اللي يشوف فلاشات التصوير ولف عسّاف لرياض وضحك ينطق:عقبالك

ابتسم رياض له ولف عسّاف يناظر وقوف هيله بإستقبالهم وتقدم ضيدان يبوس راسها وابتسمت هيله:الله يوفقكم يارب

ضيدان:اعتبريني ثالث عيالك

ابتسمت له هيله:الله يرضى عليك

مشى ضيدان يعتلي الكوشه ولفت هيله على عبدالمحسن اللي تجاهلها يطلع للكوشه وتقدم رياض يبوس راس هيله وابتسمت تمسك ذراعه ولفت لعسّاف اللي باس راسها هو كذلك وابتسمت لهم ووقف عسّاف بجانب رياض ولف رياض لضيدان:المفروض نطلع تنزف لك وحدك بس قاعدين على قلبك

ضحك ضيدان يعض شفته وابتسم عسّاف يسمعهم ولف من اشتغلت زفة دلع وخرجت تحضن بيدينها مسكة ليلة عمرها وابتسمت بتوتر تعدل طرحتها وتوقف تناظر الحضور واهلها وضيدان

ومشت بخطوات هاديه تنزف لضيدان وسط التصوير وتقدم ضيدان يستقبلها وابتسمت تمسك كفه وتقدم يبوس جبينها وتوترت ترجف اطرافها وناظرها ضيدان:ما زدتي حياتي الا كل خير وما بعطيك من حياتي الا كل خير

ابتسمت دلع له وطلعت على الكوشه معه وتقدمت لعبدالمحسن اللي سلم عليها ولفت لرياض وعسّاف تسلم عليهم توقف بمنتصفهم وتتصور معهم وخرجوا رياض وعسّاف وابوهم يتركون القاعه

وناظرت جوالها توليب تقرأ رسالة عسّاف ولفت لغايه:بتمشين ؟ عسّاف ينتظرني

أم غايه:خلونا نقعد شوي نتفرج بهالناس

غايه:روحي انتي توته احنا قاعدين

هزت راسها توليب واخذت اغراضها تخرج من القاعه ورفعت طرحتها على شعرها تخرج وتشوف سيارة عسّاف ومشت بتركب ولفت من صفّر من خلفها وابتسمت تناظره وتقدم لها:بتركبين بنفسك ؟ ماتعودتي عليّ ؟

ضحكت توليب:كنت تدخن عسّاف وتحاول تصرفني

عسّاف ناظرها بذهول:ماحصل

توليب:اوكيه ريحتك دخان

عض شفته عسّاف وركبت توليب وقفل بابها عسّاف ومشى يركب ولف عليها:حيّ الله أم الزّين

لفت عليه توليب:تتغافلني وتدخن ؟

عسّاف:في غيابك ؟ مالي بديل يعدل مزاجي غير سيقاره

توليب:الفروض ما يتعكر مزاجك وأنا بحياتك

ضحك عسّاف لانها تبين زعلها واخذ كفها يبوسه:حقك عليّ

ابتسمت تتأمله ولف عسّاف يحرك سيارته

سكتت تناظر الطريق تعيد كلامها مع البندري وتحارب عقلها وعاطفتها في صوت في دماغها يقولها اتركيه يستحق ولا تحتاجينه وصوت نبضها يطالبها تشوفه وترجع بخطواتها له وتعاتبه لان العتاب أقوى دليل المحبه

بلعت ريقها ولفت تناظر عسّاف بتردد ولف عليها عسّاف يشعر بنظراتها:وش بتقولين ؟

توليب اخذت نفس:تقدر توديني لابوي ؟

سكت عسّاف وهو يناظرها وصد للطريق وده يرفض ويمنعها لانها بتتعب مع تركي لكنه حقها وطلبها وماوده يردها

'

ابتسمت سمر تفتح الباب:زين جيتي

ابتسمت دلال تدخل وبحضنها بنتها:شكلك طفشتي

سمر:لا تشوفين حالتي وحدي

تقدمت دلال تدخل البيت:ماشاء الله تبارك الله راعية ذوق

ابتسمت سمر تدخل معها للصاله:من طيب أصلك

حطت بنتها تفصخ عبايتها:توليب مو موجوده ؟

سمر:عندها عرس حضرت مع حمولتها

دلال جلست وناظرت سمر:واضح تملين وحدك

سمر:لو ما كلمتيني كان دورت لي اي بيت اسيّر عليه

دلال:يعني ما تحبين وضعك كذا وانتي وحدك ؟

سمر:كانت توليب ماليه حياتها كلها الحين انشغلت وابتعدت

دلال ابتسمت:تسمحين لي اناديك سمر ؟ مابي اظلمك واقولك خالتي

ضحكت سمر:اسمح لك اكيد

دلال ابتسمت ووقفت سمر تصب لها قهوه وجلست:كيف الامومه معك ؟

دلال:صعبه صعبه الله يهونها عليّ وتكبر شوي

سمر:بتشيلين همها لين تكبر وحتى بعد ما تتزوج بتكونين مشغوله فيها ، بتكونين أم دايم

ابتسمت دلال:احسك مشتاقه تصيرين أم

ضحكت سمر بذهول:لا مو لهالدرجه اي صغيره بس ما اظن يمدي

دلال:ليه لا ؟

سكتت سمر بحيره وابتسمت دلال:جيّتي جات بوقتها كنت ابي اتكلم معك بموضوع وما ابيك تاخذين موقف او تفهميني غلط

توترت سمر تحط فنجانها وناظرت دلال ونطقت دلال:بصراحه أشوفك تناسبين أبوي وأبوي يشيد فيك وتكلمت معه بهالخصوص وكان موافق من ناحيته رغم انه يرفض كثير هالطاري

بلعت ريقها سمر ترتبك وابتسمت دلال:ابوي وحيد وانتي وحيده بعد كملوا حياتكم مع بعضكم بالحلال

سكتت سمر من صعوبة الموقف وابتسمت دلال:فكري بالموضوع وشاوري بنتك وردي لي

ابتسمت سمر وهي ساكته ونزلت عيونها للقهوه ترجع تشرب منها

دلال:وانا بكون مبسوطه لو الاقي شخص يناسب ابوي ويعيش ابوي مع احد ما يقعد وحيد ، وانتي ما تقعدين وحدك

سمر اخذت نفس:الله يجيب كل خير

سكتت دلال تفهم انها تحتاج وقت وابتسمت تصد لبنتها تناظرها

'

لف يوسف يناظر تركي اللي جالس وضام رجلينه ويفكر بنقطه في الفراغ وعقد حجاجه يوسف:ابوي

لف عليه تركي ونطق:لو اموت بيضحكون بجنازتي ؟

تقدم يوسف بذهول من الفكره اللي راودته:من هم ؟

تركي:أمك وسمر وتوليب

يوسف:وش هالكلام ابوي ؟ ليه تفكر بهالسوداويه مافيك الا العافيه وانا موجود معك

تركي سكت يناظر يوسف ولف من دق الباب ونطق يوسف:البندري وأريام

وقف يوسف والتفت بعيونه تركي للفراغ يناظره وفتح الباب يوسف ولانت ملامحه يشوف عسّاف وتوليب ورفعت عيونها توليب تناظر تركي وجلوسه وعدم ادراكه لوجودهم وبلعت ريقها ولف يوسف على ابوه:أبوي

لف تركي بإنتباه وناظر عسّاف وتوليب ووقف يناظرهم ومشى يدخل عسّاف وتقدمت توليب وهي تناظر تركي ووقفت قدامه وجلس عسّاف بدون يتكلم يراقبهم

ووقفت توليب أمامه تناظر كثافة لحيته واستغرابها من شكله وتعبه الواضح وظلت ساكته تترقب منه اول حروفه

ورفع اصابعه تركي يحاول يلمسها وابتعدت توليب بتوتر وهمست:كنت بتضر أمي ؟

لف تركي بجنون على يوسف ورجع ناظرها:تخافين على امك ماتخافين عليّ ؟ تزعلين على امك ما تزعلين على اللي سوته فيني ؟

توليب:انا ضحية عراك بينك وبين امي مكسبي الوحيد هو أمي وتمسكها فيني انت خسرتك دايم كنت أخسرك

تركي:ليه دايم تلوموني ليه دايم انا الغلطان ليه محد يوقف معي جنبي يعينني ؟ انا بموت وحدي ؟

عقدت حجاجها توليب تشوف حالته وكلامه الغريب وابتعدت خطوه وتقدم منها تركي:انتي وقفتي مع امك رغم انها اوهمتني وخلتني اترك بيتي الاولي ، انتي بتجين تحاسبيني على غضبي منها ؟

توليب:وليش تحاسبني انا ليه مشاكلكم اتخير فيها بينكم ؟ ليه ولا مره كنتوا سوا ؟ حتى بحربكم كنت مجبوره اتخيّر

تركي رفع يدينه على دماغه يناظرها:أنا بغيتها هي تركتني وطردتني واخذتك مني

عقدت حجاجها توليب:انت ما بغيتني لو ما اخذتني امي ما كان لقيتك للحين ولهذي اللحظه انت ما سألت عن حالي لانه ما يهمك ما أهمك

مسك كتوفها تركي ووقف عسّاف يناظرهم وتوترت توليب لانه بدأ يرفع صوته:تطيعين امك في أذيتي ؟ انتي بتتركيني مع امك ؟ انا كنت حولك بس ما بغيتيني كنت تركضين ورا رضاه ورا هذا عسّاف

توليب حاولت تتخلص من قيده لكتوفها:لانه أحسن منك

تقدم عسّاف لهم وهمس يوسف:خلاص توليب

توليب هزت راسها:ولانك كنت موجود معي عشان هو طلبك تجي ، انت ماعمرك سويت شي من نفسك عشاني ولا مره كنت موجود عشاني ، هو كان موجود عشاني

دفعها بقوه تركي يصرخ يرد عليها ومسكه بقوه عسّاف بغضب:وخر عنها

تقدم يوسف يمسك ابوه ويناظر عصبيته ويسمع كلامه ولف عسّاف على توليب اللي تمسكت فيه برعب تناظر تركي وتقدم عسّاف وهو ماسك توليب:الله يلعن أبوّه نفس أبوّتك

يوسف:خلاص عسّاف خلاص

مشى عسّاف وهو ماسك كف توليب بعصبيه يخرجون وبلعت ريقها توليب تمشي مع عسّاف بصدمه وضغط المصعد عسّاف يوقف ولف عليها:لا عاد تطلبيني اجيبك له ، ماهو صاحي ماعاد فيه عقل لا تحاولينه تسمعين توليب لا تحاولينه

رفعت عيونها توليب عليه وبكت بدون صوت وتنهد وتقدم يحضنها وتمسكت بثوبه بقوه تبكي واخذ نفس عسّاف يناظر يوسف اللي خرج جاي لهم ونطق عسّاف:يوسف توكل بالله

لفت توليب عليه وتقدم يوسف:عسّاف ابوي مريض اقسم بالله مريض فيه شي ماهو طبيعي

عسّاف لف لتوليب ما يبي يعصب ويتكلم أمامها لانها تتأثر ولف ليوسف:بكلمك بعدين

سكت يوسف يناظر توليب ورجفتها الواضحه ودخل المصعد عسّاف وبجانبه توليب

لف عسّاف عليها:توليب ما يجيك شي وانتي معي ليه تخافين ؟

ماردت وهي صاده بعيونها وساكته وكمل عسّاف:لو هذا حاله ما تشوفينه ولا تحتاجينه

رفعت عيونها عليه تناظره وهي ساكته ولف عسّاف من انفتح المصعد ومسك كفها يخرج معها وبلعت ريقها تمشي معه وفتح باب سيارته تركب ومشى يركب بجانبها ومسح وجهه بتوتر وده يرجع لهم لكنه ما يقدر يتركها

التفت على توليب يناظرها تطالع اصابعها وساكته ورفع كفه على كفوفها:توليب

لفت عليه تناظره ورجعت تبكي من جديد وتقدم لها يفتح حزامه ويحضنها وتمسكت في ذراعينه تبكي

'

مشت معه وهو رافع طرف فستانها وتقدمت لغرفتهم بالفندق ووقف ضيدان ومد الكرت يفتح الباب لها ودخلت دلع واختنقت توتر من اختلت معه بالغرفه وابتسم ضيدان:مبروك ياعروس

لفت دلع عليه تناظره بتوتر وماردت وتقدمت تحط ورد مسكتها وتجلس وفصخ بشته ضيدان:تعشيتي ؟ ودك تاكلين ؟

هزت راسها بالنفي وابتسم ضيدان:طيب ناديني دودي ابي اسمعها منك

ارتبكت تسكت وتقدم لها ضيدان:مابيك تخافين مني ما يجيك شي ما تبينه وانا ابي هالليله بيني وبينك راحه ادري انك تعبتي وابيك ترتاحين

ناظرته دلع ونزلت عيونها من مسك كفوفها الثنتين:بس علميني ودك تاكلين ؟

دلع هزت راسها بالنفي:لا

ابتسم ضيدان:اتركيني اساعدك عشان تنامين

لفت تشوفه يمسك فستانها يفتحه وهمس:تبين تاخذين راحتك ؟

دلع ناظرت الغرفه اللي يختلون فيها ولفت عليه تناظره وسكت ضيدان يناظر نظراتها هاديه تتأمله ما يفهم منها شي غير هلاك ذاته وروحه ولا قاوم وتردد لانها توجت حلاله الليله

وتقدم يقبّلها بهدوء ما يبيها تتوتر اكثر تصد وترتبك وكانت نيته يتركها ترتاح فعلاً بدون قربه لكنها تغلب تحمله وصبره وهي كانت تعي نيته وقربه ومحاولته لكنها ما تقدر تصدّه الان فتركت كل توترها تخطي معه خطوة بداية حياتهم مع بعضهم

'

منسدحه وتناظر الفراغ قدامها بتعب ورفعت عيونها من دخل عسّاف الغرفه وناظرها

مشى لها يشوف نظراتها ورمش عينها الذبلان وجلس عندها:قلتي بتنامين

توليب:ماقدرت أنام

رفع كفه على شعرها يمسح عليه:وش تفكرين فيه ؟

توليب:وش باقي اعطيه عشان أكسبه ؟ كم مره بحاول عشان أصير بنته ؟

مارد عليها يناظرها ولفت عليه ورفعت عيونها عليه:دايم احس اني غير مرغوبه وانا جنبه ومهمشه وقليله مو كافيه

عسّاف همس:ما عطاك اللي تبينه وكان مقصر وادري محد يسد مكانه لا أمك ولا أنا

سكتت تتأمله وكمل عسّاف:بس انتي توردين حياتي وتلونينها وتحلين بوجودك حياة أمك وتكملين النقص اللي تشعر به لان لو امك انفصلت قبل تجيبك ماكان هذا صبرها وهذي قوتها بس انتي كنتي قوه وطاقه وحُب ورغبه وورده ، كنتي دايم ورده

لانت ملامحها تسمع صوته وحنية وصفه لها وابتسم بخفوت عسّاف:كنتي توليب دايم توليب بحياتي وأنا أشعر بوجودك وأمك تقدّر وجودك

رفعت كفها على كفه على شعرها وهي تناظره ولمس ملامحها وهو يناظرها:متى ما بغيتي تفتحين هالموضوع افتحيه بسمعه منك دايم بس ماودي يزعجك اكثر ويشتتك

لفت من جاتها رساله ولف عسّاف على جوالها ينتظر منها تلاحظه لكنها رفعت كفوفها لكتوفه تجلس أمامه ولف عليها يناظرها وحاوطت باصابعها عنقه وشعره تقبل ثغره ، تاخذ أنفاسه منه وتموته لانها تطغى بقربها له دائماً وما ترد لا بكثير الكلام ولا بقليله ، هذي القبلات دلائلها رغم خجلها الشديد لكنها كانت تتمكن وتغلب نية استسلامه

'

استائت من كلام يوسف اللي صارحهم فيه واخيراً يبين بغض الموقف وصعوبته:أبوي مريض

صدت بعيونها حنان ماتبي تقول شي

نزلت عيونها أريام لاصابعها تصد عن مواجهة عيونها مع اي شخص بينهم

وكمل يوسف:ابي نروح مع بعضنا معه ناخذ له موعذ عند دكتور نفسي ونقويه

تنهدت البندري تمسك راسها وناظرهم يوسف:وحدي ما بيتغير شي لازم تجون معي

لفت البندري عليه:ما كلمت توليب بعد اخر مره شافها ؟

يوسف:ماقدرت اكلمها ماكانت بخير

حنان:وهو ما بيشفيه الا توليب ؟

البندري:ابوي كان طيب كان معنا وحوالينا كيف وصل لهنا ؟

حنان؛الطمع والأنانيه وصلته لهنا ما كسب شي الا انهبل

يوسف لف عليها:أمي !

ناظرته حنان ولفت لأريام والبندري وسكتت تمتنع عن الكلام

يوسف:رياض عزمني بكره على كتب كتابه بس ابي اتعذر منه ونروح مع ابوي

حنان سكتت لان هيله ما نادتها ولا فتحت لها مجال من اخر مره بينهم ، هي تعودت انه ما يطول الزعل بينهم والعتاب بداية رضاهم بس هيله قفلت الباب الاخير بوجهها

لفت البندري:امي تجين معنا ؟

حنان:وين ؟

البندري:مع ابوي ؟

حنان:حتى انتي ما بتحضرين ملكة رياض ؟

هزت راسها بالنفي البندري وسكتت حنان ونطقت البندري:امي بتجين معنا ؟

حنان:لا

وقفت تتركهم وبكت أريام بدون صوت من التشتت اللي يشعرون به ولفت البندري تناظرها ونطق يوسف:انا موجود وبيتصلح كل شي وبكلم ناصر عشان موضوعك وبيتيسر وابوي بيكون موجود بس عطوني وقت ولا تخلوني وحدي

البندري هزت راسها تدعمه رغم تعبها ولف يوسف لأريام ووقف ومشى لها يحضنها وهي جالسه وصدت البندري عنهم

'

فتحت الباب وغطت فمها من انذهلت وناظرت ضحكهم أمامها وابتسمت بصدمه وتقدمت توليب بالطرحه تلبسها:احلى عروسه بينبع

ابتسمت غايه تمسك الطرحه على شعرها وضحكت نجود:جينا نحتفل فيك قبل ما يسرقك بكره رياض

غايه ضحكت بصدمه وناظرت سمر:وانتي خارجه منها ؟

سمر:ما احب المنافسه تزوجي انتي وحدك ما بخطف الاضواء منك

لفت نجود يإستغراب على سمر ولفت رنا:مين بيتزوج غيرك ؟

سكتت غايه ولفت على توليب اللي ناظرتهم وابتسمت سمر:أنا

لانت ملامح رنا ونجود بصدمه وابتسمت بربكه نجود:مبروك

سمر:بدري على التباريك الحين باركوا لاخوكم

توليب مسكت كف غايه:تعالي شوفي هديتي

تقدمت غايه تشوف الهدايا والكيكه وابتسمت:اوه توته

توليب مدت لها الهديه وورد البيوني ورفعت عيونها غايه:انا تزوجت اخو عسّاف عشان اكون قريبه منك وش بسوي زياده عشاني أحبك ؟

ضحكت توليب وتقدمت تحضنها ونطقت نجود:لا تحطمين رياض

غايه لفت عليها:ان شاء الله يكون قد المجازفه

رنا:رياض ما يشبه عسّاف اي ، بس اكثر حنيّه وقرب لنا دايم

ابتسمت نجود:والله ما نبالغ رياض مافي منه

غايه رفعت كتفها:وذوقه حلو بالاغاني صح

ضحكت توليب:صح نبي نشغلها لك

مشت توليب تشغل الاغنيه وابتسمت سمر تناظره وتمايلت غايه بالورد والطرحه ترقص وتقطع الكيكه وضحكت مع البنات وتصويرهم ولفت رنا ترفع صوتها:توليب لا ترقصين كثير مو زين على البيبي

ضحكت سمر من شكل توليب وكيف تغير وجهها ولفت غايه:على حماسكم هذا توته لا تحملين

توليب توترت من هالطاري ترفع شعرها:مستحيل الحين

سمر:لا تفتحون هالطاري تاكلون الجو على العروس

غايه ابتسمت تبوس سمر من بعيد ولفت على جوالها من جاها اتصال ومشت تاخذه وناظرت رقم رياض وناظرتهم:جايه

مشت مبتعده وابتسمت ترد:عسى خير ؟

رياض عقد حجاجه يسمع صوت الاغنيه عندها:وش تسمعين ؟

غايه:اغنيه مو معروفه يقولون اهداء

رياض ابتسم:اي وانا سمعت بعد من واحد انحك على وجهه عشان تتزوجه جاها بالهدايا الثمان وهبلت فيه

ابتسمت غايه:يمكن تستاهل غالية الاثمان

ابتسم رياض:عز الله

سكتت بتوتر تصد تناظرهم من بعيد ورجعت لفت من نطق:جاهزه لبكره ؟

غايه:لا باقي بستخير

لانت ملامح رياض بصدمه:وش باقي دلائل عشان تصدقين اني خيره ؟

ضحكت من ردة فعله ورفعت كتفها:اصلي عشان ربي يصرف الشرّ عني

رياض:يالله ياكريم حوالينا ولا علينا والله اني عبدك المظلوم وانت تشوف وتعرف

ضحكت تعض شفتها ورفع ذراعه يحط راسه عليها ويناظر غرفته:حتى خواتي راحوا يحتفلون فيك وخلوني

غايه:مو قلت غالي الأثمان ؟

رياض:‏جسور على الشده ، صبور على الأتعاب لكني عند بابك مالي صبر ولا أقاوم أكثر عساها تزين وتلبسين دبله

غايه ميلت شفايفها من حياها لكنها تكابر:عندك شي تعطيني بكره غير دبله ؟

رياض:عندي قلبي غالي الأثمان بين يدينك هديه

ابتسمت غايه وكمل رياض:تبينه بيتك حلالك وبقية حياتك ؟

غايه:اي طمعانه

ابتسم رياض وهز راسه:ياكريم

ابتسمت تلف من نادوها ورجعت تصد:تصبح على خير

رياض:مافيه شك

ابتسمت وقفلت جوالها ورجعت لهم ولفت نجود:بنرجع البيت امي دقت تسأل

غايه ابتسمت:شكراً انبسطت مره

نجود وقفت:اي وباقي بتنبسطين اكثر بكره

ضحكت غايه وسلمت عليها ولفت نجود تسلم على توليب وسمر ونطقت رنا:بتنامين هنا ؟

غايه:بعد عناء من موافقة امي وابوي اي واخيراً

ضحكت توليب:لو ما وافقوا جيتك انام عندك

مشوا يخرجون نجود ورنا وجلست غايه تاكل من الكيكه:اي خاله سمر شلون الناس ؟

ابتسمت سمر تشرب من قهوتها:طيبين

توليب:ردت على بنته بالموافقه

غايه:منتي هينه ثلاث مرات

سمر:وش ينقصني ؟

توليب:ان شاء الله هالمره تكون ثابته

سمر:اذا ماهو زين صدقيني ماني صابره عليه يتوكل مع اللي قبله

ضحكت غايه من أسلوبها وطريقتها بالكلام:كوين التخطي

سمر ضحكت ولفت توليب:بس هذا فارس متأمله فيه خير

سمر:وأحلى من اللي قبله

غايه:شكله العوض

سمر ابتسمت ولفت غايه على توليب:وش ردوا طيب ؟

توليب:قال يبي يتكلم مع رجّال ويخطب وامي عطتهم رقم عسّاف

غايه:اها الحين عسّاف صار ولي امرك وأمر أمك

سمر:اي عسّاف رجّال

توليب ابتسمت:يوم علمته ضحك قال انه كان متوقع

غايه ضحكت:غريبه وافق تنامين هنا وخلّاك تتنفسين شوي

ناظرتها توليب بذهول:طول الاسبوع معك افرفر محل محل

غايه:اي بس ما تنامين الا بحضنه

توليب مسكت طرف خصل شعرها وهمست:مكافأة يومي الطويل

لفت غايه تناظرها بنص عين وابتسمت توليب:تزوجي ونشوف

سمر:متى بتسافرون ؟

توليب لفت عليها ورفعت كتفها:حاجز كل شي بس ما يبي يبلغني وهو مرتب شنطتي وملابسي

ضحكت سمر وابتسمت توليب:متحمسه لبكره مو مصدقه غايه

ابتسمت غايه بتوتر:ولا أنا انحشت من أمي وأبوي لانهم كل شوي يفتحون الموضوع ويتأثرون ويبكون

سمر:ياليتك بقيتي معهم

غايه:البيت حوسه عشان الملكه وفيه عمال للحين

توليب:يعني بننام في غرفتي ؟ هذا اكثر شي وحشني

ابتسمت غايه ورجعت تاكل من الكيكه ولفت توليب لجوالها من جاتها رساله وابتسمت تقرأ اسمه ومحتواها:اليوم عليّ خلاف بدون أحضانك

رجعت ظهرها تبتسم ترد عليه:كل غفوه بدون حضنك غُربه ، صار حضنك بيتي

ابتسم عسّاف اللي منسدح:الله يجيب بكره على خير

ابتسمت توليب:تصبح على خير

رد يكتب لها وقفل جواله وغمض عيونه بتعب والتفت ينسدح على بطنه ينام

'

" كتب كتاب رياض بن عبدالمحسن على غايه بنت سلمان "

هذا كان عنوان الليله وعنوان لوحة استقبال الضيوف وسط فوحان البخور والورد والإستعداد بصوت الأغاني الترحيبيه اللي تنشر بهجة الليله السعيده

بخت الباتشولي فوق فستانها تبتسم بعدم تصديق ولفت لغايه اللي لا زالت تستعد مع الميك اب ارتست:بخرج غايه متى ما احتجتي كلميني

غايه:جيبي لي قهوه

ابتسمت توليب ومشت تخرج من الغرفه وتقدمت تشوف سمر اللي تواجدت:ماما

لفت سمر وابتسمت:وش هالحلاوه ؟ تعالي اشوفك وقفي قدامي

مشت توليب ووقفت قدام سمر بفستان ربيعي تفاحي ورفعت حاجبينها سمر:فخر انك بنتي على هالانتاج

ضحكت توليب ولفت على ام غايه اللي دخلت:في ضيوف بستقبلهم شوفي القهوجيات ياتوليب

هزت راسها توليب ودخلت تشوف التجهيزات واخذت المباخر تحط داخلها العود ولفت للمضيفات يقدمونها للضيوف اللي حضروا ومشت تخرج وناظرت هيله وبناتها وابتسمت وتقدمت لهم ولفت هيله تناظر فستانها وشكلها ومدت كفها توليب تسلم عليها وهزت راسها هيله لها تدخل وابتسمت توليب لدلع:ياعروس

ضحكت دلع تسلم عليها:لا اليوم العروس غايه

ضحكت توليب ولفت تسلم على نجود ورنا ودخلوا سوا يقعدون وابتسمت سمر تناظر هيله:شلونك ياهيله ؟

هيله ماردت تمثل عدم السماع وسط ضجة الاغاني وابتسمت سمر تصد عنها

وبدأ المكان بزيادة عدد الحضور وانقضت أول ساعتين من الليله ومشت توليب تشوف المصورات اللي يصورون لحظة كتب كتاب غايه وتقدمت تصورها بجوالها والايباد متثبت على لوح خشبي يحمل اسمائهم مع بعضهم وابتسمت غايه من وصلتها رسالة اثبات عقد القران ولفت لتوليب وضحكت:صارت توته

ضحكت توليب تشرح سعادتها وتقدمت تحضنها وابتسمت غايه واخذت مسكة يدينها والبيوني ووقفت:أمي تحاول تستعجلني انزف بس ماودي ماودي

توليب:تأخر الوقت وعسّاف قال ان من زمان قاعدين الرجال

غايه لفت من دخلت أمها:ابوك بيجي مع رياض

غايه:أمي انتظري

أم غايه:استعدي غايه بطلع قبلك

هزت راسها تستعجلها ولفت توليب:بطلع انا

غايه هزت راسها بربكه ومشت تخرج توليب وعدلت شكلها غايه واخذت نفس ووقفت بالممر اللي لونوه بورود ونفح عود وعدلت فستانها توقف بإنتظاره والمصورات خلفها ووقفت تنتظر زفتها واشتغلت ومشت بخطوات هاديه تدخل وسط غطاريف الحضور وأمها اللي استقبلتها وابتسمت غايه تمشي برويه وهدوء تتوسط كوشتها ولفت دلع على توليب:مكياجها خيالي ماشاء الله

ابتسمت توليب تتأمل غايه:كلها خيال

لفت هيله بعيونها تناظر غايه وفستانها وشكلها ولفت تشرب من قهوتها وجلست غايه تناظر الموجودين ووقفت توليب تمشي لها تكسر هدوء جلوسها وتوقفها:لازم ترقصين

ضحكت غايه:كنت برقص بس عطيني وقت شوي

ابتسمت توليب تمسك كفها وترقص معها ووقفت سمر ترقص معهم وناظرتها هيله ترفع حاجبها وقاموا البنات يرقصون معهم

ابتسمت توليب توقف بجانب غايه ولفت على من نطقت:لابسه فستان ضيق ماخفتي يبان بطنك ؟

توليب:رنا فكيني تكفين من هالطاري

ضحكت رنا وصدت توليب بتوتر ولفت على ام غايه اللي دخلت تبلغهم بدخول رياض

وتوجهت توليب تلبس عبايتها وتجلس ووقفت غايه تمسك ورد البيوني بيدينها الثنتين

واشتغلت الاغنيه الاهداء المخصوصه من رياض لها وابتسمت غايه لأنها أفضل اختيار لدخول رياض لحياتها بكل شاعرية كلماتها وألحانها ودخل رياض بجانب أبو غايه وابتسم رياض بإنتصار من شافها بالمكان اللي يسرّه بوسط قلبه الليله زوجته حليلته وتقدم أبو غايه يحضنها وابتسمت غايه تسلم عليه وابتعد عنها والتفت لرياض:حطها بين عيونك ذهبه لا ترخصها تراها أغلى ماعندي

ابتسم رياض يسمع توصيته:لا توصي حريص

لف لغايه ومد كفه لها وابتسمت تناظره من تقدم لها يبوس جبينها وخرج أبو غايه ووقفت هيله تقصخ عبايتها وتتقدم لرياض ولف لها يسلم عليها وابتسمت هيله:مبروك

رياض:مبروك دامك موجوده وحاضره

وقفت هيله بجانبه تناظر أم غايه اللي مدت لهم الشبكه والدبلتين

ولف رياض ياخذ دبلتها والتفت لها وابتسم يمسك أصابعها ومدت أصابعها له ولبسها دبلتها وظلت ماده يدها ورفعت عيونها عليه تتغير ملامحها والتفت يستوعب اصابعها واخذ كفها يبوسه وابتسمت ترجع لطبيعة ابتسامتها وناظرت دبلتها ولفت تاخذ دبلته ومسكت اصابعه تلبسه ولفت تبتسم للمصوره وللبنات اللي واقفين يصورون

واخذ طقم الشبكه وابتسمت بإعجاب لذوقه وغالي الأثمان اللي بيقدمه لها وبتلبسه وتقدم لها يحاوط عنقها واقتربت منه يلبسها العقد وتلونت ملامحها من باس خدها يبتعد وصدت هيله عنهم بملل

واخذ ذراعها يلبسها اسورتها ولف عليها وهو مبتسم:أردى ما تلبسينه تستاهلين أكثر

ابتسمت غايه:تعيش وتجيب الأكثر

ضحك منها ومن ردّها المغرور وابتسمت تصد للبنات من تقدموا يسلمون عليه ولفت على توليب اللي جالسه مبتعده عنهم وابتسمت لها توليب ترفع طرحتها على شعرها وتناظرهم

'

( لا تنسون النجمه ⭐️ )

جالس يمين أبوه ويسمع سواليف الحضور مع بعضهم وساهي

التفت عبدالمحسن عليه:سمعت عن تركي ؟

لف عسّاف وتغيرت ملامحه للغضب لانه كان ساهي في هذا الموضوع بعد مكالمته مع يوسف وهز راسه

عبدالمحسن:وش جاه ؟

عسّاف:أنهبل

عبدالمحسن عقد حجاجه:دقيت على يوسف ما فهمني شي غير انه ماهو بخير

عسّاف هز راسه وناظر ابوه:اي لدرجة كان بيمد يده على بنته من جنونه

عبدالمحسن:الله يصلح الحال وش جاه

عسّاف مارد عليه واخذ جواله اللي يدق وناظر اسم توليب ورد بدون صوت

ولفت توليب على رياض وغايه من بعيد جالسين والحضور يتعشون بمكان اخر تاركينهم وحدهم:أبو الزّين

ابتسم عسّاف وسع ابتسامته وتغير مزاجه مباشره ووقف ومشى يخرج:نهبتيه نهبتي قلبه وعقله

ابتسمت توليب:ماودك نرجع بيتنا ؟

عسّاف:ودي لان عليك دين ليله غبتي فيها عن حضني

ضحكت توليب:اوكيه بستناك برا

عسّاف ابتسم وقفل جواله ولف يدخل لابوه:انا ماشي تبي شي ؟

عبدالمحسن:لا سلامتك متى مسافر ؟

عسّاف:بعد بكره ان شاء الله

عبدالمحسن:الله يسهل لك

مشى عسّاف يخرج وركب سيارته وحرك ماشي لين باب البيت ووقف ونزل عيونه لجواله يرسل لها والتفت من انفتح باب السياره وعقد حجاجه من شاف أمه تركب وقفلت الباب وهمس:أمي ؟

لفت هيله عليه وخرجت توليب ومشت ولانت ملامحها بإستغراب تشوف هيله بجانبه ورفع عيونه عسّاف لتوليب وفتح بابه ينزل ومشى لها ولفت هيله عليهم

ناظرته توليب بإستغراب وهمس:ماعندي علم

سكتت توليب تناظره وفتح الباب الخلفي لها واخذت نفس تركب وقفل الباب ومشى يرجع يركب وحرك سيارته بهدوء

وتكتفت توليب تناظر الطريق ونطقت هيله بهدوء:لا توديني بيتنا ودني بيتك

عقدت حجاجها توليب ولف عسّاف عليها:ليه ؟

هيله:الله يبقيك ياعسّاف

سكت عسّاف يناظرها وعرف بنيتها ولف للطريق ياخذ نفس وصدت توليب

وقف عند البيت ونزلت توليب ولفت هيله على عسّاف:غريبه نزلت بدون ما تستناك تفتح لها

لف عسّاف عليها:حيّاك أمي حيّاك

فتحت الباب هيله تنزل ونزل عسّاف وناظر توليب اللي فتحت باب البيت تدخل ولف على امه اللي مشت معه

ودخلت توليب وفصخت عبايتها تحطها على الكنبه ووقفت ثواني ولفت من دخلوا وتقدمت هيله:ما رحبتي فيني ياراعية البيت وين ترحيبك وضيافتك والبقى

توليب ناظرتها وتكتفت:لو اني عزمتك او عندي خبر بجيتك كان رحبت فيك

صد عسّاف يفصخ شماغه وابتسمت هيله:وش انتظر منك ، بنت سمر

رفعت حاجبينها توليب:ونعم ، ماعاد ينقال عني الا بنت سمر ماني بنت تركي حتى وهذا شرف حياتي كلها اني بنت سمر

سكتت هيله تناظرها ومشت تتركهم وتدخل الغرفه ولف عسّاف على امه:ما قلتي لي انك بتجين

هيله:متهاوشه مع ابوك مابي ارجع معه

عسّاف:وعنده علم انك معي ؟

هيله:اي

سكت عسّاف واخذ شماغه بيده:جايك

مشى يدخل للغرفه وناظر توليب اللي تنزل اخراصها وتقدم لها وحط شماغه وفتح ياقة ثوبه واخذ جواله ولفت تناظره توليب:وش سبب الزياره ؟

مارد عسّاف وهو يكتب لابوه سؤاله اللي رد عليه بالنفي:لا ما تهاوشنا ليه راحت معك ما قالت لي ؟

غمض عيونه عسّاف بتعب والتفت لتوليب:ماعندي علم

توليب:زوجي عسّاف اي بس ماراح اتحمل حركاتها عشانها أمك

عسّاف:جات بدون عزيمه وخبر اي وبتنام هنا اي بس ما اقدر اقول شي

توليب:لا تقول عسّاف لا تقول ، انا اتكلم واقول اني مابي بيتي سردادي مردادي لها بأي وقت تحشمني وتتصل عليّ اذا بتجي بيتي

عسّاف:هو بيت ولدها بعد توليب

رفعت حاجبينها توليب:بيت ولدها ؟ هذا اذا كان بيتك وحدك ، اعرف نية امك واعرف وش تحاول تسوي ولا ابي اصفّي نيتي لها ولا ابي اتقبل منها احسانها وبياض نيتها مابي منها لا خيرها ولا شرّها

عسّاف تأفف ومشى يخرج من الغرفه وناظرت مكانه توليب تكتم غضبها وجلست قدام المرايه تناظر شكلها ومكياجها وفتحت الدرج تمسح مكياجها ونزلت فستانها تدخل الحمام وتفتح المويه واخذت شاور وطلعت تلبس روبها وتنشف شعرها

ومشت تخرج من الغرفه وناظرت عسّاف وهيله قاعدين بالصاله ولفت عليها هيله تناظرها ومشت توليب بتدخل المطبخ وتنهد عسّاف يصد وهو ساكت

ولفت عليه هيله:ما حشمتني

عسّاف وقف:امي بجيب لك لحاف وبفتح لك الغرفه تنامين وانا رايح انام

هيله رفعت حاجبها:يوم شفتها بروبها بتشرد لها وتخليني ؟

عقد حجاجه عسّاف بذهول من أمه وخرجت توليب وناظرتهم ومشت للغرفه ونطق عسّاف:مابي اسمع اللي قلتيه ارتاحي البيت بيتك

مشى يتركها ودخل الغرفه وناظر توليب اللي تمسح يدينها بالكريم وقدامها كاس مويه وجلس على السرير:توليب

ماردت عليه وهي صاده ولف عليها يناظرها:مابي يتوتر الوضع بيننا بسبب أمي

لفت عليه توليب:من يوم تزوجنا تجاهلت كل شي سوته وقلت ما ابي احتك فيها ولا ازورها ولا تزورني لانها ما تبيني اصلاً ، اذا تبيك انت تروح لها هي امك او اذا بتجي هالبيت تجيه تحترم وجودي داخله

عسّاف:هذي اول مره تسويها واعرف ما بتسويها من جديد ان كان بتجيني بتتصل علي واعرف بس هالمره هي وابوي متهاوشين ماتبي ترجع البيت معه

توليب وقفت ولانت ملامحها وناظرته:تكذب عليّ ؟

رفع راسه عليها يناظرها ورمشت بذهول توليب وهي تناظره ساكت ومشت تاخذ جواله اللي بجانب السرير ومدته له:ابوك مرسل لك جواب سؤالك

ناظر جواله اللي كان تاركه بالغرفه وبلع ريقه ووقف وهمس:توليب

توليب ناظرته:من هنا بدت نهاية أمي وأبوي ياعسّاف ، من أول كذبه

بلع ريقه عسّاف ومشت توليب تفتح اللحاف تنسدح وغمض عيونه ومسح وجهه ولف عليها يناظرها منسدحه ومشى يدخل الحمام

'

راكبه يمينه تسمع الأغنيه اللي يكررها طول الطريق وهي ساكته تبتسم بين وهله ووهله ووقف رياض بمكان خالي وعقدت حجاجها ولفت عليه:وين احنا ؟

رياض ابتسم وناظرها:انزلي بوريك شي

سكتت غايه وفتح الباب رياض ينزل وفتحت بابها تنزل وناظرته يوقف خلف السياره وتقدمت له وفتح السياره من الخلف وابتسمت من شافت الهديه ولفت عليه وهي مبتسمه وضحك رياض يناظرها:خمنتها ترضيك

تقدمت تشوف حجمها وكشفت عن تغليفها تشوف اسم البراند على الهديه ولفت عليه بذهول:كيف عرفت ؟

رياض:سويتي لايك على هالشنطه مرتين بتويتر

ابتسمت بذهول تناظره واخذ جواله من جيبه رياض:ابي اصورك تذكار

ابتسمت له تناظره يرفع جواله يصورها فيديو

ورفع عيونه رياض للسماء من ارتفع صوت الالعاب الناريّه ولفت غايه بصدمه وصرخت بعدم تصديق وضحكت تلف عليه وضحك رياض اللي يصورها ولفت تناظر الألعاب الناريه اللي تتلون في السماء السوداء ، بليله وحده عطاها أكثر شي تحبه مابين البسيط ومابين التكلف

لفت عليه ومسكت كفه بعدم تصديق تلف تناظر الألعاب الناريه في المكان الخالي اللي هم فيه وابتسم رياض يناظر كفها بكفه والتفتت عليه تسأله:هذي ما سويت لها لايك

رياض:وش لك بالمصدر دامي عطيتك مابخاطرك ؟

سكتت غايه تناظره وهي مبتسمه وكمل رياض:مداري والفلك كله انتي ومافي فضاي الا غايه وحده ، إنتي غايتي

سكنت ملامح غايه تناظره سرقها بليله وحده يغير كل مشاعرها يجيها بوفرة حب بحجم هائل ما تتخيله ورجفت يدينها من شافته يقترب منها ناوي تقبيلها وسط كل ألوان الألعاب الناريه يقبّلها يعترف بإن ربي يوم أخذ أعطى وعوّض وكان حلاله أحلى من حرامه

بلعت ريقها من ابتعدت عنه وناظرت عيونه تسمع الهدوء حوالينها وارتبكت تصد بعيونها عن نظراته لها ومسك كفها ومشى ومشت معه وفتح بابها ولف عليها وناظرته بهدوء وركبت وقفل بابها وابتسمت تغمض عيونها بعدم تصديق واخذت نفس من ركب بجانبها يحرك السياره

'

خرج يوسف مع الدكتور ولف عليه الدكتور:يحتاج جلسات علاجيه ومسكنات لانه يفكر كثير وفي دوامة اسئله وخوف

يوسف:ممكن يتحسن وضعه ؟

الدكتور:ان شاء الله بس نفسياً يحتاج وجودكم جنبه او انكم ترجعون على روتينه القديم

يوسف سكت ومشى الدكتور تاركه وتنهد يوسف لان اللي انقضى مستحيل يرجع من جديد وبسببه هو بسبب تركي ذاته

التفت يناظر البندري وأريام اللي خرجوا مع تركي وناظر تركي:ابوي باخذك معنا البيت تقعد معنا ونسهر مع بعضنا

تركي:لا ما ابي اشوف حنان بتتمشت فيني

البندري:ابوي انت بتكون معنا مو مع امي

تركي:بتطردني

يوسف:ابوي هذا بيتنا كلنا وبيتك قبل يكون بيتنا

سكت تركي يناظرهم ولف على أريام اللي ساكته ورجع ناظر يوسف ومشى يوسف يخرج معهم

وركب تركي السياره وحرك يوسف سيارته ولف لابوه وابتسم:ناصر كلمني

لفت البندري تناظر تركي اللي لف على يوسف:من ناصر ؟

لفت أريام برعب تناظرهم وتقدمت البندري تراقب ملامح تركي ونطق يوسف:خطيب البندري

صد تركي يناظر الطريق ولارد عليه وبلع ريقه يوسف ووقف عند البيت ولف:حيّاك ابوي تعال

نزلوا ومشت البندري تحضن ذراع تركي وتمشي معه للبيت وتقدم يوسف يفتح الباب ولف على ابوه اللي متردد بالدخول ونطقت البندري:ابوي

لف عليهم ودخل وتنهد يوسف يناظرهم والتفت من انفتح باب جيرانهم ولفت مها من خرجت وناظرت يوسف وناظرها يوسف ثواني ومشى يدخل البيت

عقدت حجاجها مها ما تفهم من ملامحه شي وتقدمت للسياره تركب

قفل الباب يوسف ودخل البيت وناظر حنان اللي وقفت تناظر تركي

وتقدم يوسف:ابوي بيكون موجود هنا ؟

حنان:غصباً عن شرع ربي ؟

البندري همست:امي

نزلت عيونها حنان لكيس الادويه اللي بيد أريام وناظرت تركي:ليه ما وديتوه عند طبه وعلاجه ؟ سمر

تركي:انتي اتفقتي مع سمر ؟ تحالفتم ضدي وعليّ ؟ انتم تبون تأذوني وتحرموني من عيالي صح ؟

ناظرته بذهول حنان:انت منت صاحي فعلاً

يوسف:امي !

سكتت حنان تناظر تركي ولف يوسف لابوه:تعال ابوي تعال

مشى تركي معه ولفت حنان على البندري وأريام:حتى بعد ما هبل فينا كلنا يبي ياخذ دور الضحيه ؟

البندري:امي لو سمحتي جبناه حوالينا لان وضعه ما يسمح نتركه وحده

حنان:ابوكم يكذب عليكم يبي هالمعمعه والاهتمام فيه ما يبي احد يعرف سواد وجهه

أريام ناظرتها ومشت تتركها تدخل وتقدمت البندري:نبي نعيش في سلام

رفعت حاجبينها حنان وجلست وناظرتها البندري وتنهدت تدخل

'

لفت تناظر عسّاف اللي نايم واخذت جوالها ومشت تخرج وهي لابسه روبها الحرير وعقدت حجاجها تسمع الاصوات بالمطبخ ومشت وناظرت هيله اللي تطبخ وتقدمت بذهول

ولفت هيله عليها:في راعية بيت تقوم هالوقت ؟

توليب ناظرت الفطور اللي مسويته هيله:محد يحاسبني ببيتي على وقت صحوتي ونومي

هيله رفعت عيونها عليها:عسّاف مريض سكر بأي لحظه يطيح واحياناً وسط نومه يدوخ ، اهتمي فيه مابي ولدي يصير عليه شي

توليب تقدمت لها وابتسمت بهدوء:أول مره شفت ولدك فيها كان طايح بالارض وانا انقذته من انخفاض السكر ، يعني لا تعلميني بشي تعلمته اول ما عرفته

سكتت هيله تناظر توليب ونزلت عيونها توليب للفطور واخذت قطعة الزيتون وابتسمت:ماقصرتي كنت احتاج احد ياخذ هالشغل عني

ضحكت توليب من ملامح هيله ومشت تخرج من المطبخ وناظرت جوالها وخرجت تمشي بالحوش وناظرت زرعها اللي زرعته واخذت ترعاه وتسقيه واتصلت تنتظر جوابها

وردت سمر:هلا توته

توليب ناظرت الزرع:صحيتك ؟

سمر شربت من قهوتها:لا من زمان صاحيه

توليب:امس هيله رجعت معي للبيت

سمر شهقت بصدمه:تستهبلين ؟ شتبي ذي من عزمها

توليب:ماهمتني اعرف اتعامل معها بس بسببها صارت مشكله بيني وبين عسّاف

سمر:وش حصل ؟

توليب:قاعده تطلع نسخه ما ابيها من عسّاف امس كذب عليّ ، كذب بس عشان يطلع امه من الموضوع

رفعت حاجبها سمر وكملت توليب:افكر اجيك

سمر:توته هذي اول مشكله بينكم وهيله ودها تسوي هالمشكله وتتركين بيتك ومكانك وعسّاف وتاكل الجو هي وتلعب براس عسّاف

سكتت توليب وكملت سمر:لا تسمحين لها اقهريها بوجودك ببيتك ومع عسّاف علميها انها ما بتسوي اللي سوته فيني

اخذت نفس توليب ولفت تناظر البيت وابتسمت سمر:تسلّي فيها

توليب:تمام اذا لقيت وقت بكلمك

سمر:الله يقويك توته

قفلت جوالها توليب ودخلت وناظرت عسّاف اللي جالس وهيله تصب له كاسة عصير ورفع عيونه عسّاف على توليب يناظرها وابتسمت توليب تتقدم:صباح الخير حياتي

لانت ملامح عسّاف بعدم فهم ولفت هيله تناظرها ورفعت شعرها توليب:انتظرني نفطر مع بعض بغير ملابسي وجايه

مشت تتركهم وناظرها عسّاف ولف لهيله اللي نطقت:تحسب الفطور لها ؟ انا مسويته عشانك نحفت من يوم تزوجت

مارد عسّاف وهو يفطر وساكت وخرجت توليب تعدل فستانها وجلست بجانب عسّاف ورفع عيونه عسّاف عليها من رفعت كفها على كتفه:نمت زين ؟

سكت يتأمل وضعها ولف على أمه اللي تراقبهم وهز راسه والتفت عليها:حمدلله

ابتسمت له ولفت للفطور:تسلم يدك ياليت يومياً نفطر زي هالفطور

هيله:ماني خدامه عندك

رفعت عيونها توليب وعضت شفتها:محشومه فهمتيها غلط الله يهديك

لف عسّاف يراقب تصرفات توليب واخذت قطعه بالخبز توليب ولفت على عسّاف وابتسمت:ذوق من يدي

ناظرتهم هيله وعقدت حجاجها وهمس عسّاف:وش تسوين ؟

توليب مسكت دقنه وفتح فمه تلقمه وابتسمت:بالعافيه حبيبي

اخذ نفس عسّاف ولف لامه:كلمت ابوي امس

رفعت عيونها توليب تناظر هيله وتكتفت هيله:شتبي فيه ؟ قلت لك اني عطيته خبر

عسّاف:قلتي لي اي بس ولا مره طلعتي من بيتك عشان مشاكل مع ابوي

هيله:لان ماكان عندي بيت ثاني

توليب:بس هذا مو بيت ثاني ، هذا بيت عسّاف اللي تزوج وسكن واستقر فيه

لفت هيله عليها:يعني بيتي

توليب ابتسمت:لا

عسّاف:توليب

لفت توليب عليه وابتسمت:شبعت حبيبي ؟ ابغاك توديني لامي بنجهز لملكتها

هيله همست:هي باقي فيها حيل تتزوج بعد

توليب لفت على هيله:صغيره وحلوه وبتكمل حياتها مع رجّال يستاهلها

هيله سكتت تناظر توليب ولفت توليب على عسّاف:توديني ؟

عسّاف مسك شاربه ثواني ولف عليها:قومي بتكلم معك

سكتت توليب تناظره وابتسمت ووقفت ومشت تدخل الغرفه ومشى خلفها عسّاف وقفل الباب وناظرها:وش تسوين ؟

توليب لفت عليه وتكتفت:وش اسوي ؟

عسّاف:ليه تسوين كذا ؟ ليه ما تتكلمين معي ؟

توليب:ما في شي نتكلم فيه كل شي واضح حتى تلميعك لامك فاشل

عسّاف سكت يناظرها وناظرته توليب وصدت تفتح دولابها:بروح لامي متى ما طلعت برجع بيتي

تقدم عسّاف ومسك ذراعها ولفت عليه ونطق عسّاف:لا نصير كذا

توليب:المفروض قلت لنفسك قبل تكذب عليّ وتحاول توهمني انها ما بتأذيني بحياتي

عسّاف:ماكان قصدي اكذب كنت ابي اهدّيك واعدّي الموضوع على خير

توليب:لا تعديه ولا تهديني ولا تكذب عليّ

عسّاف همس:توليب هذي امي

توليب هزت راسها:اعرف ولا حرمتك منها ولا تكلمت عنها عندك وخليتك تكرهها وبكل مره اقابلها ما اتكلم عن سوء تعاملها عشانك انت ، وابتعدت عنها معك لهنا عشان ما ابيها تدخل حياتي ، بس مستحيل انجبر اتحملها واستقبل شرّها وتأذيني فيك تبي انت ترضيها ارضها ماراح امنعك بس ابي قدري ببيتي منها هي

سكت عسّاف يناظرها وهزت راسها توليب:بروح لامي

سكتت توليب تناظره وصدت عنه تطلع عبايتها واخد نفس عسّاف:ما بترضين حتى لو زرعت قدام بيتك مية ورده ؟

لفت عليه توليب تتذكر مشاكلهم القديمه ومحاولته لرضاها ولاردت تلبس عبايتها وتاخذ شنطتها ومشت تخرج واخذ نفس عسّاف بتعب ومشى يخرج وناظر هيله:وش قاعده تسوين امي ؟

هيله:ازورك ببيتك

عسّاف:زوريني وعطيني خبر واستقبلك بعيوني بس مابي تصير هالمشاكل لو سمحتي ، انا خرجت من بيتنا وسكنت بهالبيت لان مابي مشاكل ابي أبرّ فيك ولا أضرّ زوجتي بنفس الوقت

هيله سكتت تناظره وكمل عسّاف:أنا عمري ما بنسحب عنك وعن أهلي ولا تخافين من هالفكره انتي بتلقيني عندك بالبيت طول عمرك ولا بقصر معك وأسبق اخواني لرضاك بس اتركي توليب بحالها

صدت هيله بدون رد وكمل عسّاف:ادري جيتي بدون تعطين خبر لابوي وبدون مشاكل مع ابوي ولو كنتي جايه لي وعشاني كنت حطيتك فوق راسي

ماردت عليه وكمل عسّاف:بكره رحلتنا بنسافر

هزت راسها تفهم من كلامه انها لازم تغادر وكمل عسّاف:تبيني اوديك البيت والا تنتظرين رياض ؟ لاني كلمته يجي وهو على وصول

هيله ماردت عليه ولف عسّاف على جواله من دق ومشى يخرج وفتح الباب ودخل رياض:صباح الخير ابو الزّين اخبار علوم ؟

مارد عسّاف يقفل الباب وتلفت رياض:ماشاء الله ماشاء الله بيتاً عامر يا أبو الزّين تملاه المسرات

عسّاف:ادخل لامي

لف رياض يناظر حالة عسّاف وعصبيته وتقدم يدخل البيت:افا يا ام رياض وش جابك عند العرسان ؟ لا يكون بتسوين فيني هالحركات

لف عسّاف بعصبيه على روقان رياض ونطقت هيله:اي اطردوني وودوني دار العجزه وشمّتوا فيني سمر

سكت رياض بصدمه من انفعال هيله والتفت عسّاف:ماتعرف تسولف انطم

رياض:شدراني الوضع مشتد لهالدرجه

هيله لفت لعسّاف:جيت بحسّن وضعي مع زوجتك عشانك انت بس هذا طبع بنت سمر

عسّاف:لا تصلحين شي الوضع بخير بدون ما يتصلح

هزت راسها هيله ومشت تدخل ولف رياض على عسّاف:وش الوضع

عسّاف:خذ امي البيت

هز راسه رياض وخرجت هيله ومشت تخرج من البيت وتنهد عسّاف ولف يناظر البيت وهو هادي

'

لفت من دخلت غايه وابتسمت توليب:وجهك منور

ضحكت غايه وتقدمت تجلس ودخلت سمر:اي والله وجه عروس

غايه:وشو بتاخذوني محتوى ؟

سمر:اكيد ليش ناديتك ؟

غايه ابتسمت واخذت نفس براحه ورفعت حاجبينها توليب:اوه تنهيده ! سحرك رياض اللي رفضتيه مليون مره ؟

غايه:طلع مناسبني

سمر:بدري

غايه:والله مناسبني ومناسبني مره انا ما استوعبت شلون مدارات الفلك هذيك فرطت فيه ؟

ضحكت توليب بصدمه:شوي شوي نستوعب

غايه ابتسمت:غريبه لقيتك هنا وش تسوين ؟

توليب:المفروض وين اكون ؟

غايه:بييتك تستعدين للسفر

عقدت حجاجها توليب وناظرتها غايه:اوكيه شكلي انا علمتك قبل يعلمك عسّاف

توليب:متى السفر ؟

غايه:بكره

سكتت توليب ولفت عليها سمر وابتسمت:اجل هيله عندها علم عشان كذا غثتك

لفت توليب تناظر سمر وصدت عنهم تفكر ولفت غايه من وصلتها رساله:صباح الخير ناقصني وجه حسن مع الفطور تفطرين معي ؟

ابتسمت غايه تكتب له:تأخرت

رياض:تتغدين ؟

عضت شفتها غايه وناظرت سمر وتوليب ورجعت تكتب له:اوكيه

لفت توليب من دق الباب ووقفت سمر:دعواتكم يكون فارس من زمان ما صبح عليّ

ضحكت غايه ومشت سمر وفتحت الباب وناظرت عسّاف وهمست:عسّاف

تقدم يدخل وبيده كيس:توليب عندك ؟

سمر:عندي بس ماهي وحدها غايه بعد موجوده

عسّاف لف لشباك غرفتها:عطيها خبر اني هنا

مشى لغرفتها وناظرته سمر يدخل مع الشباك ودخلت البيت وابتسمت تناظر توليب اللي ساهيه:حسافه ماهو فارس

غايه:مين ؟

سمر:مضيعين بيت الجيران يحسبونه بيتنا

لفت تناظر توليب:اقول توليب

لفت عليها توليب وابتسمت سمر:خبيت لك اغراض بغرفتك قلت تاخذينها لو سافرتي

توليب عقدت حجاجها:اغراض وشو ؟

سمر:روحي شوفيها اذا جازت لك سافري معها

سكتت توليب ولفت عليهم ووقفت ومشت بهدوء لغرفتها وفتحت الباب ووقفت تلين ملامحها من ناظرته جالس

اخذت نفس ودخلت وقفلت الباب وتقدمت له ورفع راسه عسّاف وهو يفتح الرمانه بيدينه وجلست قدامه توليب على الكنبه ولفت تناظر الشباك وفتح بذور الرمان ياكل منها وناظرها:انتي يوم بدّيتي ابوك عليّ اعتذرتي بعد ما استوعبتي

لفت عليه توليب وكمل عسّاف:وانا يكفيني الاعتذار دايم يكفيني الاعتذار بس انتي وش يكفيك ؟

توليب لفت عليه تناظره ياكل من الرمان:عسّاف أنا ما تمنيت يتوتر الوضع بيننا لهالدرجه ومابي ألومك على شي مالك ذنب فيه بس وجودها حوالينا ماهو مطمني أبد

سكت يناظرها وكملت توليب:كذبت عليك وكذبت على أبوك عشان تجي البيت بدون تكلمني وتستأذن مني رغم انها بالملكه بيني وبينها كنبتين بس هي ماتبي تشوفني زوجتك وقدري من قدرك وأنا مابي احاسبك على شي أمك تسويه مالك ذنب فيه بس اسمح لي ابتعد عنها بالمكان اللي المفروض يكون بيتي

هزت راسها تشرح له مخاوفها:أنا قبل نتزوج كان خوفي الوحيد تتكرر حياة أمي وأبوي ، كانت امي تعدّي الزلّات والغلطات عشان تكمّل حياتها وكان ابوي يكذب ويجامل ويضغط على نفسه عشان حياته لين خسروا بعض

سكت عسّاف يناظرها وكملت توليب:بس انا مابي تصير تركي ولا أنا أصير سمر ، من أول غلطه ما بسمح انها تمرّ لازم تعرف اني ماراح اتقبل اي محاوله منها تدخل حياتي ومابي اذكرك باللي كانت تسويه في امي وكم مره حاربتني قبل نتزوج ورفضتني

سكتت ثواني تناظر عسّاف:انت تبي أمك وواجبك ترضيها بس أنا مستحيل أتحملها ، ومابي تسوي شي الا انك ما تنكر تصرفاتها وتكذب عليّ ولا تجبرني أتحملها

عسّاف:وهذا اللي حصل لأني أعرف أمي بنيت لنا بيت مستقل ولأني أعرف أمي ما بنكر فعايلها وأعترف بخطاي ، هذاك بيتك ومكانك

ناظرته بهدوء توليب:انا اسفه لو ضغطت عليك او حمّلتك شي ماهو ذنبك

عسّاف:سبقتي اعتذاري

توليب:بس انا ما يكفيني الاعتذار

ابتسم بدون يبيّن اسنانه ورجع يفتح بذور الرمان ومد كفه وناظرته توليب وفتحت كفها ومدّ لها حبيبات الرمان وهز راسه:عشان كذا جيت اخذك معي

توليب اكلت من الرمان اللي بكفها:للمطار ؟

عسّاف عقد حجاجه:رياض ما يسكت ؟

ماردت توليب وهي تناظره واخذ نفس عسّاف ووقف:انتظرك بسيارتي

رفعت عيونها من وقف ومشى يخرج من الشباك وخرج وناظر سيارة رياض وعقد حجاجه ورفع عيونه رياض من خرج

تقدم عسّاف وفتح شباكه رياض:ياليل النشبه شتبي انت

عسّاف:اثقل اثقل امس كانت ملكتك

رياض ابتسم يتكي بذراعه على الشباك:اخر واحد يسولف عن الثقل ويعطي نصايح انت ، تراك جاي تراضي ام الزّين

عسّاف ناظره بذهول:انت ما تمسك شي بلسانك ؟ كل شي تفرطه لزوجتك ؟ وليت زوجتك تعقل وتسكت هي ما تقصر بعد

ضحك رياض والتفت من خرجت توليب مع غايه وابتعد عسّاف يمشي لسيارته وفتح باب توليب ومشت توليب تركب وقفل بابها يناظر رياض وغايه خلفه وركب يحرك

'

ركبت بجانبه ترتبك والتفت عليها:بخاطرك مطعم ؟

غايه ابتسمت ولفت الطريق:لا بشوف ذوقك

رياض ناظر طريقه:ودعتك توليب ؟

غايه:لا يمكن اروح المطار اودعها

رياض:اي انا بعد قلت لعسّاف بجي معك للمطار اشوف لا ينقص عليهم شي والا شي

ابتسمت غايه تناظره:والله ؟

هز راسه رياض وصدت غايه تعرف انه يكذب ويبي يجي معها

اخذت جوالها ترسل لتوليب:راضاك شهريار بمية ورده ؟

قرت الرساله توليب ولفت من وقف عند البيت عسّاف ولف عليها:حيّاك ام الزّين بيتك ومكانك

لفت عليه توليب ونزلت ومشى عسّاف يقفل سيارته ويدخل البيت وعقدت حجاجها توليب من شافت العم لطفي بالحوش ومعه عمال وابتسم العم لطفي:دبل تي ازيك

ابتسمت توليب وهزت راسها:الحمدلله

العم لطفي:ما عملناش حاقه قينا نطمن وماشين ، سلام عليكو

مشى يخرج والعماله معه ولف عسّاف يضحك من العم لطفي ولفت توليب بغرابه:عسّاف

مد كفه لها ومسكت كفه ومشى يدخل البيت وفتح الباب ولانت ملامح توليب تتأمل كل شبر بالبيت فايح منه ورد وكمية غصون الورد اللي متوزعه بكل زوايا البيت

وابتسم عسّاف يلمس من ملامحها رضاه عن قصوره والتفتت عليه توليب وابتسمت:أكثر من مية ورده

عسّاف:تستاهلينه

ماردت تتأمل نظراته لها وتقدمت تحضنه وتنهد عسّاف يحاوطها بذراعينه والتفتت توليب تبوس خده وابتعدت تناظره:باقي ما بتعلمني لوين ؟

عسّاف:بكره تعرفين

توليب:واليوم ؟

عسّاف نزل عيونه لملامحها يناظرها:اليوم كله اعتذري لي بحضني بين جناحيني ولا عاد تتركين بيتك

سكتت توليب تناظره تفهمه وتعرف انها بترضيه بقربها منه

لفت تناظر الورد بالبيت وابتسمت تمشي من بين أغصانه وتاخذ نفس تشمّ عبيره وشذاه بالبيت وتقدم عسّاف بهدوء وهو حاط يدينه بجيوبه والتفتت عليه ترفع ذراعينها حوالين رقبته وهمست:زعلني دايم إذا هذا رضاي

ابتسم عسّاف ورفع كفه لشعرها يمسك أطراف خصلها:وارضي عني دايم عشان أخذ رضاك

توليب نزلت عيونها لثوبه وهمست:اختار لون

عقد حجاجه وهو مبتسم ورفعت عيونها تناظره ورفع راسه يعض شفته يفكر ورجع ناظرها:أبيض

ابتسمت وهزت راسها:انتظرني

وقف محله ومشت رايحه للغرفه ولفت تناظره من بعيد وابتسمت تدخل الغرفه وانتظرها يلف يناظر الورد بالبيت وانحنى ياخذ غصن ورد ويقطف وردته والتفت يناظرها واقفه أمامه

خَفت مسمعه ولمعت عيونه يتأملها من أدنى دونها لين راسها ويتأمل نظراتها وابتسامتها الخافته له تظهر فتنتها جمالها بفستان أبيض وتقدمت له تمشي له برويه ووقفت أمامه تناظر عيونه ورفعت طرف أقدامها تقبل ثغره بخفه تاكل عقله وركادته وابتعدت عنه ورفع الورده اللي بكفوفه يغرسها فوق اذنها بين خصلات شعرها وهمس:مرخص لك كل غالي وكل هالورد ما نبت الا عشان تقطفينه

ابتسمت تناظره:الدنيا معك دايم ربيع

مارد يتأملها وتقدم لها يقبّلها يمسك بكفه عنقها وبيده الاخرى يحاوط خصرها يشعر بيدينها حوالين عنقه

'

رفعت عيونها عليه يلبس ثوبه أمامها:طيب توصلني بيت أهلي قبل تداوم ؟

ضيدان:اوديك وين تبين اوديك

دلع عدلت فستانها:بس اذا بتتأخر بدوامك اروح بسيارتي

لف ضيدان وابتسمت:معد تبين تبطين عند اهلك ؟ تشتاقين لبيتك ولزوجك ؟

دلع ابتسمت:لا لاني اعرف بتطول بدوامك ناسي عندك زوجه تنتظرك

ضيدان:والله لو مو شغلي متكدس كان مددت الاجازه بس لا يقوم قائم الا بضيدلن

ضحكت دلع:يدرون انك ضيدان بالشغل ودودي عندي ؟

تقدم يرفع ذراعه خلف ظهرها:الواحد يندم انه ماهو دودي من يومه صغير

ابتسمت دلع تشعر فيه يقبّل خدها وابتعد ياخذ شماغه ولبست عبايتها دلع وخرجت معه وركب ضيدان سيارته ولفت عليه دلع:متى راجع ؟

ضيدان:العصر يابعدي

دلع:تمام بنتظرك

هز راسه ضيدان يسوق ووقف عند البيت والتفت على دلع وابتسم:وين قبلات الزوجيه ؟

ضحكت من مفرداته وتقدمت تبوس خده وابتعدت:باي

نزلت من السياره وناظرها ضيدان لين دخلت البيت وحرك

دخلت دلع وناظرت رياض اللي خارج وابتسمت:اوه العريس

رياض:مستعجل عسّاف مسافر بروح له

دلع:اليوم بيسافرون ؟

هز راسه يتخطاها ويخرج وفتح سيارته يركب واخذ جواله اللي يدق ورد:اقسم بالله جايك

غايه:شفت لو تطير الطياره قبل اودع توته وش بيصير ؟

رياض:ان شاء الله ما اشوف

غايه:دامك بتأخرني ليش ما خليتني اروح بسيارتي ؟

رياض:غايه يمين بالله جاي اسكتي شوي خليني اسوق

تأففت تقفل جوالها وتتكتف وهي جالسه تنتظره ودقايق ارسل لها وخرجت تناظره بحده وركبت بجانبه وحرك رياض وهو ساكت يحس بنظراتها ونطقت:متأخر دايم متأخر ولا تقول معليش على التأخير حياتي واسف ولك مني اخذ قرض واجيب لك سيارتين هديه

لف رياض ورفع حاجبينه:ما اخذت لاهلي قرض اخذ عشان تأخرت عليك

غايه:اي اي استهين فيني ولا كأني نصف دينك

ابتسم رياض يلف للطريق:غايه

ماردت عليه تلتفت ولف عليها وضحك ياخذ كفها:اسف بدون قرض كذا ساده ترضين فيها ؟

ماردت عليه وابتسم:ومعها السلسال اللي مسويه له لايك

ابتسمت تكتم ضحكتها ودفعها بخفه يفهم حركاتها:صرتي تسوين لايكات عشان اجيبهم لك ؟

غايه ماردت وهي مبتسمه وضحك رياض ولف لطريقه:اجيبهم انتي سوي لايك ويجيك

لفت عليه وهي مبتسمه والتفتت للطريق تضحك

وقف عند المطار ونزلوا يدخلون ومسك كفها رياض يدخل المطار واخذ جواله بكفه الاخرى يدق على عسّاف

رد عسّاف يحط ذراعه خلف كتوف توليب:هلا

رياض:بنودعكم وينكم

عسّاف التفت يناظر حوالينه:ما دخلنا للحين قاعدين بمطعم نفطر

رياض:طيب

لف عسّاف على توليب اللي تبحث بجوالها ولفت عليه:ايسلند ؟

ضحك لانها من اول تحاول:توليب بتعرفين اول ما نوصل بوابتنا

توليب:عسّاف قول خلاص ما اتحمل

عسّاف لف من شاف رياض ورفع ذراعه ولفت توليب وابتسمت توقف من شافت غايه وتقدمت لها غايه تحضنها:بشتاق لك

ابتسمت توليب:وأنا

ابتعدت غايه وناظرتها:انبسطي ولا تنسين هديتي

هزت راسها توليب:زوري امي دايم تطفش لحالها

غايه:لا تشيلين هم

لفت توليب على عسّاف اللي واقف مع رياض وناظرتها غايه:ما قالك وين ؟

توليب لفت وكشرت:لا

ضحكت غايه:صوري لي كل شي

هزت راسها توليب وتقدم عسّاف:مشينا

رياض:طمنا بالوصول عسّاف

عسّاف:ان شاء الله

مشت توليب تسحب شنطتها ومشى معها عسّاف شايل جوازاتهم ويسحب شنطته ودوّر على البوابه ووقفت توليب تقرأ وجهة الرحله ولفت عليه:امستردام ؟

ابتسم عسّاف:هولندا تعرفين ليه ؟

ابتسمت بعدم تصديق تناظره وضحك عسّاف:بنزور أهلك

ضحكت تحضن ذراعه لانها تعرف بإن أكبر حقول التوليب تقع في هولندا بعدة مناطق وبملايين أغصان لورد التوليب بجميع ألوانه وكان حلمها تزوره

'

واقف وساند ذراعه فوق كتوفها يناظر معها بالمكان اللي تناظره ' شاشة الرحلات الدوليه '

غايه:نيويورك

رياض رفع راسه بالرفض:بعيده

غايه سكتت تتأمل:ايطاليا

رياض:راحوها ناس أعرفهم

غايه:لندن

رياض:ماتعجبني

غايه:وين تبي رياض ؟ كل ما قلت مكان طلعت فيه عذاريب

رياض:وش زينها ينبع شهر عسل نكسر القاعده مانروح

غايه ناظرته:انا محد قالي انك بخيل نقدر نكنسل العقد ؟

رياض ضحك ولف للشاشه:ياغايتي وكل المدارات لو تبين الفضاء أمشي معك له ، ما تزين الاماكن الا بك

غايه ناظرته بنص عينه من احتضنها تحت جناحه:الفضاء ؟ ليه مشتاق للنجوم ؟ اشوفك حنيت

لف عليها وضحك:لا حول ولا قوة الا بالله ، انا تخطيت ونسيت انتي ليه ما تنسين ؟

غايه رفعت حاجبينها بالرفض:احلم انسى

رياض مشى معها يخرج:طيب يالله نروح بيتنا

لفت عليه وابتسم رياض:بدون ما نسوي زواج يكفينا نروح نييورك

ابتسمت غايه:تسويها مجنون

رياض:والله لو تقولين تم لاروح اعطي ابوك خبر وتجين معي بيتي وبكره نسافر

سكتت تناظر جنونه وضحكت بعدم تصديق تصد ووقف رياض يناظرها ولفت عليه:رياض صاحي ؟

رياض:لازم تلبسين أبيض ؟

سكتت تناظره وابتسمت وتقدم رياض لها وهمس:والله أسويها وبعطي خبر لابوك أحشمه بس قولي خذني رياض

ماردت تناظره وهي مبتسمه ورفعت عيونها تفكر ورجعت ناظرته وضحكت:خذني رياض

ضحك بعلو صوته وتخبت تحت ذراعه من مشى معها للسياره

'

فتحت الباب وابتسمت من خمّنته ورفع عيونه يناظرها:مساك الله بالخير

هزت راسها سمر:مساك الله بالنور

فارس:مرّيت بعد ما قالت لي دلال ان عسّاف وبنتك مسافرين

سمر:الله يردهم بالسلامه

فارس:تعودتي تقعدين وحدك ؟

سمر:لا دايم يندق بابي

ابتسم لانها تقصده وصد عنها ثواني ورجع ناظرها:تكلمت مع عسّاف

سمر سكتت وكمل فارس:عطاني موعد بعد ما يرجع من السفر

صدت تناظر الحوش وناظرها فارس:عند كلمتي وان شاء الله الله يجيب الخير

سمر لفت عليه وهزت راسها ونطق فارس:طليقك

سكتت سمر وكمل فارس:رجع يسوي لك مشاكل ؟

سمر:لا ، يقولون أنهبل بعد ما رفضته

سكت فارس وابتسمت سمر:مو سهل تحب سمر

فارس:ولا سهل هي تحبك ؟

ابتسمت تسكت تناظره وابتسم لها فارس ونزل راسه ورجع خطوه:ان احتجتي شي لا يردك لسانك أنا حاضر

سمر هزت راسها ومشى فارس لسيارته وابتسمت سمر تناظره وقفلت الباب واتسعت ابتسامتها ودخلت البيت وتقدمت تجلس بالصاله ولفت من وصلتها رساله من توليب:وصلنا

ابتسمت تشوف صورتهم بالمطار وردت:انبسطوا

قرتها توليب ولفت لعسّاف اللي يتكلم مع صاحب السياره:عسّاف اشتغل جوالي

لف عليها:طيب اركبي نمشي على الفندق

توليب:فهم عليك ؟

عسّاف:اي يفهم

فتحت الباب تركب بالخلف وركب بجانبها عسّاف وابتسمت تناظر امستردام من نافذتها ولفت على عسّاف ورفعت كفها على دقنه:تحس سكرك منخفض ؟

رفع كفه يبوس كفها:لا لا وصلنا نرتاح واكل

ابتسمت له:تذكر سفرتنا الاولى ؟

عسّاف:اذكر جوالي اللي انسرق

ضحكت توليب وحضنت ذراعه:هذيك المره ما كنا نعرف بعض

عسّاف:اي هالمره بتنامين بحضني تعرفيني تحبيني

ابتسمت تناظره ولفت تناظر الطريق ووقف السواق عند الفندق ونزلوا وتلفتت تشوف المكان والفندق وتقدم عسّاف يرفع ذراعه على ظهرها ومشت تدخل وتقدم لهم يأكد حجزه ولفت توليب تناظر الكوفي الصغير اللي باللوبي ولفت لعسّاف:دقايق وجايه

تقدمت تشوف المكان وتقرأ المنيو المعروض ولف عسّاف يناظرها واقفه ومشى لها وبيده كرت الغرفه ووقف بجانبها:وش تبين ؟

توليب:لقيت عندهم قطع كيك بالجوكلت شريت لك واحد

عسّاف ابتسم:نريّح ونروح ناكل بعدين

توليب:بعد ما انقذك ؟

ضحكت واخذت الكيك ومشت معه وفتح الغرفه ودخلت وتلفتت تناظرها وتقدمت تناظر الفيو وابتسمت:تنام ؟

عسّاف:مو لوحدي

لفت عليه تناظره يحط شنطهم داخل ويقفل الباب ويدخل يفصخ جاكيته ومدت له الكيك واخذه يجلس ياكله وتقدمت تجلس على فخذه ورفع ذراعه عسّاف خلف ظهرها وهو ياكل بيده اليمين وابتسمت توليب:لين متى بنجلس ؟

عسّاف نطق وهو ياكل:شهر ، عشره ايام هنا وعشره نروح ألمانيا وعشره ايام فرنسا ، ما سمعتك تسولفين فرنسي قلت اوديك واسمعك

ضحكت تهز راسها ورفعت كفها على دقنه:اسولف فرنسي

ابتسم عسّاف وتقدمت توليب تاكل قطعه من الكيك وكمل باقي القطعه عسّاف ووقفت توليب عن حضنه واخذت جوالها ومشت تصور الفيو من بلكونتها

'

لف عليه وعقد حجاجه:انهبلت ؟

رياض:ابوي انا متزوج ومانبي نسوي زواج وش المشكله ؟

عبدالمحسن:انت كتب كتابك كان بالبيت ومحد حضر ولا سمعوا الخبر الا بعد الملكه بكم يوم بعد ماتبي تسوي زواج ؟

هيله:انا عيالي انهبلوا ؟ انت وش جايك ؟ وش طيّر عقلك ؟

ضحكت نجود:غايه

رياض:امي انا واياها راضين وش المشكله ؟

رنا:حياتكم سهله لهالدرجه ؟ تقررون قرار وعادي

رياض:لانها حياتنا

هيله:عشان بكره تجيك تقول بخلت عليّ ما سويت لي زواج وملكه نفس الخلق ؟

رياض:ما بتقول لاننا بنسافر

هيله:اها تبي تسفرها يعني ؟ هذي فكرتها شافت عسّاف مسافر قالت انا بعد

عبدالمحسن:قفل الموضوع ولا تفتحه وتحرجنا مع ابوها احشمه واحشم بنته

سكت رياض يناظرهم وقام يخرج من البيت وركب سيارته واخذ جواله يدق عليها وهو يسوق

ردت وتأففت:امي عصبت عليّ

رياض:ما اقتنعوا حتى اهلي راحت عليك نيويورك ياغايه مسكينه

غايه:تحسب بعديها لك ؟ بتوديني يعني بتوديني

رياض:طيب دام محد ماشي معنا تجين معي ؟

غايه:وين ؟

رياض:الكويت

غايه:والله رياض ؟

رياض:اي يومين ونرجع

غايه سكتت وابتسمت:بيوافقون ؟

رياض:زوجتي عاد لا يصعبونها

غايه:بجرب اقولهم واكلمك

رياض ابتسم وقفل جواله وناظر طريقه ولف من دق جواله وقرأ الاسم ولانت ملامحه واخذه يرد:هلا

يوسف:شلونك رياض ؟

رياض:هلا يوسف انت شلونك شلون عمي تركي ؟

يوسف اخذ نفس:والله نقول ان شاء الله بخير كلنا

رياض:ماعليك بتزين

يوسف:والله مستحي ادق عليك لان محد جاك ملكتك بس البندري تحدد كتب كتابها بيكون هالاسبوع ومابي نفقدكم

رياض:تبشر بي يايوسف اجيك ان شاء الله

يوسف:تعرف وضع امي وخالتي بس البندري بتكلم البنات وانا كلمتك وبكلم عسّاف

رياض:عسّاف مسافر والله ماهو موجود بس انا أسدّ واجيب خواتي معي

يوسف ابتسم:ما قصرت

قفل جواله رياض واخذ نفس بضيق وارسل لدلع يسألها وقرت رسالته دلع ترد عليه:كلمتني البندري واكيد بروح لها ما بخليها ، انت بتحضر ؟

رياض:ان شاء الله

ناظرت رسالته دلع ورفعت عيونها على ضيدان:بنت خالتي ملكتها هالاسبوع وبروح مع خواتي ورياض ان شاء الله

ضيدان ناظرها وهز راسه:اوديك

دلع ابتسمت له بهدوء وصدت تناظر جوالها وتقرأ رسالة البندري اللي تلمس منها الاحراج والخجل وجاوبت ترد:مستحيل اخليك بكون موجوده معك أنا وخواتي

قرت الرساله البندري ورفعت عيونها للفستان قدامها واخذت نفس ولفت حنان:حلو خذيه

أريام:بيطلع حلو عليك البندري خلينا مدور مقاسك وناخذه

البندري لفت عليهم:يوسف قاعد مع ابوي بالبيت ؟

حنان:اهوه وش تبين بطاري ابوك اقولك اشتري هالفستان خلينا نخلص اغراضنا

لفت أريام تناظر حنان اللي تركتهم تدور بين الفساتين وتنهدت البندري تاخذ الفستان تشتريه

'

ابتسمت توقف عند الباب:انبسطت وما حسيت بالوقت

ابتسمت دلال:وأنا بعد كرريها وتعالي لي

سمر هزت راسها:ان شاء الله

الفتت تخرج وناظرت فارس اللي وقف سيارته وابتسمت تعدل حجابها وتناظر الطريق ونزل فارس وتقدم لها:الله بالخير

لفت عليه سمر وهزت راسها:كنت عند دلال

فارس:عندي خبر عشان كذا جيت

ماردت وهي تناظره وصدت تناظر السياره اللي وقفت عند بيتها ولانت ملامحها والتفت فارس وعقد حجاجه

ومشت سمر بهدوء تناظر يوسف اللي نزل من سيارته ولفت تناظر تركي اللي راكب جنبه وظل محله بالسياره

تقدم فارس يناظرهم ووقف يوسف قدام سمر:سلام عليكم

سمر:عسى خير

يوسف:ابوي معي يبي يتكلم معك

سمر ناظرت تركي بالسياره ورجعت ناظرت يوسف:ما بيننا كلام

لفت تاخذ مفتاحها ونطق يوسف:تكفين

نزل تركي والتفتت سمر وتقدم فارس يناظر تركي وتقدم تركي وعينه على فارس ولفت سمر تناظره

واخذ نفس يوسف بقلق ومسك ذراع ابوه:أبوي

تركي:من انت ؟

لفت سمر على فارس ورجعت ناظرت تركي بحذر ونطق فارس:قالت ماتبي تتكلم معك ، توكل

يوسف:لو سمحت لا تدخل

فارس:لا بتدخل اذا كان صاحي وقتها ما بتدخل

تركي تقدم لفارس ونطقت سمر:تركي اذلف

لف تركي عليها:انا جاي حاشمك ابيك تعذريني وتحلليني هذا ليه موجود ؟

سمر:اعذرك واحللك ؟ بالله تركي مستانس بدور الضحيه وتبي الناس حوالينك يراضونك ؟

تركي:هذا منهو ؟

سمر سكتت ولفت على فارس وناظرها فارس والتفت عليه:زوجها

لانت ملامح يوسف يناظره وبلعت ريقها سمر تناظر تركي

تركي لف على سمر بذهول ورجع ناظر فارس:تعقب ما انت زوجها سمر بترجع لي

فارس تقدم له:انا رجّالها وظهرها وسندها ان ما ابتعدت عنها اعرف كيف اخليك تبتعد ، هذا البيت بيتها ما بتقربه ولا تجيه وزوجتي في ذراي وحمايتي اذلف عنها

تكتفت سمر بتوتر تناظرهم ولف تركي:كيف تزوجتي غيري ؟

سمر:تراه الثالث

يوسف:ابوي امش تكفى

فارس:خذ ابوك الظاهر ماهو بعقله

يوسف:حشّم عمرك

فارس:خله يعرف الحشيمه لأم بنته بدال ما يتسلق جدرانها يدخل عليها وحدها

لف يوسف على ابوه وعقد حجاجه وناظرهم تركي بعدم تصديق ولف على سمر اللي صدت عنه بعيونها ومسك ذراعه يوسف:امش ابوي تكفى

مشى مع يوسف وهو يناظرهم وركب السياره والتفت فارس على سمر:ما بيقدر يضرّك

سمر التفتت على فارس وسكتت وكمل فارس:انا عند دلال ان صار شي تلقيني قريب

سمر:ليه كذبت عليه ؟ بيمشي ورا الموضوع ويعرف انك تكذب

فارس:ما كذبت ان كان في خير بيصير هالشي

سمر:ماهو بعقله ونظراته ما تطمن ابد

فارس لف يناظر الشارع بقلق ورجع ناظرها:سمر انتي تبيني ؟

سكتت بذهول تناظره وسكت فارس ينتظر جوابها وبلعت ريقها وناظرها:مستعد وجاهز نتزوج

سمر همست:توليب وعسّاف !

قاطعها يهز راسه:بيفهمون الوضع بس طليقك ما بيخليك بحالك وانا مابي اخليك لحالك

بلعت ريقها تناظره وصدت بعيونها ونطق فارس:فكري الليله وبكره خير

لفت عليها تناظره واخذ مفتاحها من يدها يفتح بابها لها ودخلت ومد المفتاح تاخذه وناظرها:استودعتك الله

خرج يقفل الباب ويتركها وابتسمت سمر من تركها ومشت تدخل البيت وفكت حجابها وجلست على الكنبه هي تعرف ان تركي شرّ وسوء بس الخير اللي جلبه لها تركي لمره وحده بحياتها هي فارس

اخذت جوالها وابتسمت تكتب لتوليب:بتزوج

ارسلتها واخذت نفس وابتسمت تقفل جوالها

اخذت جوالها توليب من وصلتها رساله ولفت على عسّاف اللي تقدم لها:تعالي

قفلت جوالها بدون تقراها ومسكت كفه تمشي معه ويدخلون المكان اللي حلمت في زيارته شافته بالصور وحبته وتمنته والان هي تزوره مع عسّاف

اتسعت حدقة عينها من المكان وحقل التوليب الفسيح الكبير بكل ألوانه بأحلى مواسمه وابتسمت ما تصدق كمية الورد بالمكان

ابتسم عسّاف يترك كل ورد المكان ويتأملها هي وردته وحدها تناظر ببهجه بعدم تصديق وهذا يكفيه

عضت شفتها تمشي معه وتتلفت:عسّاف ما اصدق كميتها

لف يناظر المكان ويمشي بين الورد بممر صغير معها يشمّ ريحة المكان وعبق عبير عطره وشذاه ومشت توليب تسرع بخطواتها وتترك كفه تدور بالمكان وابتسم عسّاف يوقف محله يشوفها تمشي بين الورد وتركض حوالينه وصوت ضحكاتها تطرب مسامعه

اخذ جواله من جيبه وابتسم يصورها وابتسمت له ترفع ذراعينها بين الورد تحس بروحها في المكان نصيبها من أحلى الأسامي وناظرت عسّاف بعيون تمليها المسرّه ، هي تشوف أجمل حظوظها وأغلى محصولها من الدنيا ، حنيّه تساوي كل حقول الورد بالعالم يحتضنها عسّاف لها ولأجلها ، عطاها ما تمنت وأكثر ، سلوة خاطرها وإنشراح صدرها وراحتها معه بجانبه ، كل الأماكن معه دايم ربيع كل السنه كل الفصول كل المواسم والعصور

عسّاف الساقي الحنون عطاها إسمها تعيشه وشال حزنها ينثره مع نحل الزهور ، عبر فيها كل الأغاني على الصوت الشادي أنغام ، رسم لها كل دروب الفرح ألحان ، حاوط صورها ببرواز يصرخ سعيد بذكريات وأيام ، عرفت معه ان وفرة الشوك تعني ورد وافر ، وهذي هي تعيش الربيع بعد جفاف سبق جيّته ، تمشي معه في بستان الحُب ورده

تركت محلها تمشي له تحتضنه وابتسم عسّاف يشعر بسعادتها:تعالي معي

ابتعدت عنه تناظره وابتسمت تحضن ذراعه وتمشي معه وسط حقل التوليب

توليب:أحلى ألوان التوليب الأبيض بس كيف يزرعونه بهذي الوفره ؟

لفت عليه تناظره:عسّاف ابي بيتنا كذا

ضحك يهز راسه:العم لطفي ما بيقصر بيزرعه كله

ابتسمت تلف للورد:هذا أحلى نوع ورد

عسّاف التفت عليها:إنتي أحلى الورود

لفت عليه تبتسم وميّلت راسها على كتفه تمشي معه

'

وقفت قدام مرايتها تناظر شكلها والورد اللي تحتضنه بكفوفها ولفت على حنان من دخلت تغطرف بعلو صوتها مسروره ببنتها وابتسمت تحتضنها تسمع أحلى الدعوات منها واخذت نفس تمشي مع حنان وتخرج بهدوء تناظر يوسف اللي يستقبلها وابتسم لها ومشى معها لين استقرت وسط الحضور تناظر ناصر اللي ينتظرها وبجانبه تركي ووقفت لوهله تتأمل ابتسامة ناصر ونظراته لها ، لطالما حلمت تشوف هالنظرات بالحب الوافر لها تشرح جمالها واختلافها بعيون غير عيونها

لفت تناظر حنان المبتسمه تغطرف ماتبي تلومها على ماضي رسمته لها تبي تكون الحاضر مع شخص اختارها وهي تبي تختاره ايضاً

مشت مع يوسف وناظرت تركي الواقف هادي يبان عليه معسّرات حياته واختياراته واحضتنته البندري تخونها دموعها واخذ نفس تركي لانه الى الان يشعر بأبوته معها ومع يوسف وأريام وما أنحرم منه ولا يبي يخسره مع باقي خساراته

ابتعدت البندري وناظرت ابوها وابتسمت وسط دموعها ولف على ناصر من مسك كفها وتقدمت له وتقدم يسلم عليها وناظرها:مبروك الله يوفقني أسعدك تستاهلين المسرّه

ابتسمت له توقف بجانبه والتفتت تناظر حوالينها وحضور دلع ونجود ورنا وتواجدهم تبان عليهم الفرحه بدون مجامله

ابتسمت دلع تصور طاولتهم وأسماء البندري وناصر بين فازات الورد ونزلت عيونها تكتب على الصوره:الله يوفقك البندري

نزلتها بسنابها ترجع تبتسم تصفق بيدينها على صخب الاغاني

لفت توليب تناظر عسّاف اللي فاتح جواله ومنسدح يعطيها ظهره وناظرت الصوره وتقدمت:البندري ؟

التفت عليها عسّاف وقفل جواله وهز راسه

ابتسمت توليب تجلس قدام التسريحه تجفف شعرها ما تعلق وناظرها عسّاف:لو ما كنا مسافرين كنتي رحتي ؟

توليب:لا

سكت عسّاف ورفعت عيونها توليب تناظر انعكاسه:ماعاد ابي طريق يوصلني له

عسّاف اخذ نفس:وامك ؟

توليب لفت عليه:انت كلمت فارس كان صادق بكلامه ؟

عسّاف هز راسه:الظاهر أبوك ما بيترك أمك بحالها عرف وبيجن جنونه

توليب:ما نرجع ؟

عسّاف:وش بيتغير لا رجعنا ؟ أمك طايره من وناستها لانه استعجل

توليب اخذت نفس ولفت تاخذ جوالها ونطق عسّاف:بتكلمينها ؟

هزت راسها ومشت تخرج البلكونه واتصلت عليها وردت سمر:وردتي وعيوني

توليب سكتت تشعر بضيقتها ونطقت سمر تكمل:حطيت صورتك وصورة عسّاف بين الورد ببرواز بالبيت ياليتك تشوفينها ، الله يحفظكم

توليب:بتتزوجين وانا بعيده ؟

سكتت سمر من حست بصوت توليب وضحكت:شدعوه توته مو أول مره اتزوج وما بسوي زواج ، فارس يبي شي بسيط بيني وبينه

توليب تكلمت تخفي وضوح غصتها:بس أنا ولا مره ما كنت معاك

سمر:اوف اوف وش هالدلع توته بتبكين عشاني بشخط على ورقه ؟

توليب نزلت راسها ومسحت جوف عيونها وابتسمت سمر:حتى غايه ما بتكون موجوده شي بسيط توته عن مشاكل تركي بس

توليب:وين غايه ؟

سمر:بتروح الكويت مع رياض

توليب عقدت حجاجها:ما قالت لي

سمر:اكيد ما بتقولك انتي مسافره ومشغوله ومبسوطه بتشوفينها تصور وتعرفين

صدت توليب تناظر الفيو من البلكونه وابتسمت سمر:انبسطي انا بكون مبسوطه صدقيني

هزت راسها توليب:أحبك

ابتسمت سمر:وأنا أكثر يا وردة حياتي

قفلت جوالها توليب وخرج عسّاف وناظرها ونطق:وش قالت ؟

لفت عليه توليب وبكت بدون صوت وتقدم لها بذهول:توليب !

جلس بجانبها على الكرسي يحتضنها:وشفيك ؟

توليب:أمي بتتزوج بدوني وغايه بتسافر ما قالت لي

ناظرها بذهول ينتظرها تكمل وتشرح اللي يزعلّها لكنها سكتت ونطق:بس ؟ عشان كذا ؟

توليب تأففت:عسّاف احسني زعلانه

عسّاف ضحك:أول مره أشوفك دلوعه كذا ما كنتي تبكين على شي هيّن كذا

توليب مسحت دموعها ولفت عليه:يمكن تأثرت هرمونات

ابتسم عسّاف:اها يعني احذر هالاسبوع من هرموناتك ؟

صدت عنه تسمع ضحكته واخذت نفس ووقف عسّاف:مشينا نخرج قومي تجهزي

ناظرته توليب وهزت راسها ودخل ولفت تناظر حوالينها واخذت نفس ووقفت

'

خرجت غايه مع أبوها وابتسمت تناظر رياض ووقوقه عند السياره وتقدم يسلم على أبوها:شلونك عمي ؟

سلمان:وش هالخطط يارياض كل يومين بخطه جديده ؟

رياض:هذي غايه أنا قلت لها تطيعني ونسوي زواج وبعدها نسافر بس هي بخاطرها

ناظرته بذهول غايه ولف سلمان عليها:تنقصها اغراض للزواج تبي لها اغراض تشتريها من الكويت

رياض:وأنا بالخدمه زوجتي وحلالي وبعيوني

سلمان ابتسم:الله يوجه لكم

لفت غايه وسلمت على ابوها اللي نطق:كلميني طمنيني

هزت راسها غايه ومشت لسيارة رياض تركب ومشى رياض يركب وابتسم يحرك:على ديارنا الثانيه الكويت

لفت غايه:بالله رياض ؟ ليش تقول لابوي انها خططي ؟ صدقني ماراح تعدي

رياض:يالله انك تخارجنا انتي كل شوي بتزعلين ؟

غايه:اي لين تقعد عاقل

رياض:العقل ماهو زين الجنون أحلى خصوصاً لو كان أسود

ابتسمت تفهمه ولف عليها رياض وضحك:شنطه سوداء ؟

لفت عليه:بلاقيها بالبوتيك بالكويت وبتشتريها لي

رياض:ادري اني بشتريها من يوم شفت اللايك عرفت اني بشتريها

ابتسمت غايه ولفت للطريق:ما قلت لتوته اننا بنسافر اخاف تزعل

رياض:ماهي داريه عنك بيروحون ميونيخ اليوم

لفت غايه:امانه ؟ شدراك ؟

رياض:انا اسولف مع اخوي

غايه:رياض تستهبل ؟ امس اقولك بتصل عليها تقول عيب تكلمينهم رايحين شهر عسل ؟

تقدمت تضرب ذراعه وضحك رياض:انتي تبين تسمعين كلامي شسوي لك

غايه:والله نحيس

اخذت جوالها وناظرت سناب توليب وصورة مطار ألمانيا وابتسمت تكتب لها:وحشتيني

لفت توليب تطلع جوالها من جيبها تقرأ رسالة غايه ولفت على عسّاف اللي يدخل شنطهم الفندق مع العامل ولف عليها:وجهك أصفر توليب وشفيك ؟

توليب:مانمت بالرحله نعسانه

رفع كفوفه على وجهها وباس جبينها:الحين نرتاح

مشت معه وهي حاضنه ذراعه واخذ الكرت يمشي للمصعد ولف عليها:كلمتي أمك ؟

هزت راسها بالنفي توليب وناظرها عسّاف:وشفيك توليب ؟ من يوم ركبنا الطياره وانتي ساكته

توليب ناظرت عيونه وسكتت ولف للمصعد من انفتح ودخل ومسك كفها بقوه يناظرها ولف للعامل يعطيه بقشيش وخرجوا لغرفتهم ودخلت توليب وفصخت جاكيتها وتقدم عسّاف:توليب ياحبيبتي

لفت عليه:مافيني شي بس تعبانه مانمت

ابتسمت له تطمنه وناظرها عسّاف وتقدم يقبّل خدها والتفت يفصخ كابه ويدخل الحمام وجلست على السرير بتعب ونعاس واخذت جوالها تقرأ رسالة سمر:ننتظر فارس وخالك حمد موجود

لفت توليب على عسّاف:أمي معها خالي حمد ينتظرون فارس

هز راسه عسّاف:بتنامين ؟

هزت راسها ومشى يفتح الشنط عسّاف ووقفت توليب تاخذ ملابسها ودخلت الحمام تغير ملابسها وناظرت وجهها وغسلت تناظر ملامحها وخرجت تشوف عسّاف منسدح بينام وتقدمت تنسدح بجانبه ولف عليها عسّاف وحضنها بذراعينه

'

ابتسمت سمر تدخل المجلس والتفت فارس يناظرها وابتسم وتقدمت تناظر حمد:تعشّى معنا حمد

حمد وقف:حاسبين حسابي الأهل

وقفت سمر وابتسمت ووقف فارس يصافح حمد اللي نطق:مبروكين الله يوفقكم

فارس:الله يبارك فيك

لف حمد على سمر ومشت معه تخرج والتفت حمد:اصملي عليه هالمره الثالثه ثابته

سمر:والله ياحمد اذا ما ناسبنا ما صملت

حمد:هيله عندها خبر انك تزوجتي ؟

ضحكت سمر وهزت راسها بأسف:انت مشغول بهيله وهي مشغوله فيك ، تبي تغثها ؟

حمد:اعرف انها تكرهك وابيها تنقهر

سمر:اخذت نصيبها من القهر يكفي

حمد:استأذن أنا

ماردت سمر ومشى يخرج حمد وقفلت الباب ولفت تدخل البيت وابتسمت تشوف جلوس فارس وتقزمت له والتفت فارس يناظرها تمشي له وهز راسه:متأكد انك بكل مره طلبتي الطلاق انتي لأن مستحيل عاقل يفرّط فيك

ابتسمت سمر وجلست أمامه وصبت لها قهوه:تهقى يافارس ؟

ابتسم يناظرها ورفعت عيونها ووقف ومشى يجلس بجانبها والتفتت تحط رجل على الاخرى وبيدها فنجان القهوه

فارس:توقعتك تناديني أبو دلال تعطيني نصيب من عمري

سمر ضحكت بخفوت:أنا عرفتك فارس بالأول ومابي أناديك بغيره

فارس:ودك ننقل بيتي ؟

سمر سكتت ثواني وناظرت فنجانها:اي

فارس هز راسه:وأفضل عن المشاكل

ابتسمت سمر تشرب من قهوتها وترفع شعرها وابتسم فارس يناظرها:تعرفين اللي يقول ، شعرٍ حرير لانزل فوق الأمتان ، ‏أرجّعه بأصابعي فوق ويطيح ، ‏وكتف وردف وجسم وعود ريّان ، ‏ياجرح ياطب القلوب المجاريح

رفعت حاجبينها سمر بذهول وهي مبتسمه وكمل فارس:حرام مامثلك رأت عيني إنسان ‏ياقاهر الزينات سيد المماليح

ابتسمت:شاعر يعني ؟

فارس:لا والله ماني شاعر بس إنتي القصيد

سكتت تناظره وهي مبتسمه تعجب بدلاله لها وهمست:من إختيارك لإسم بنتك عرفت اني بذوقه ، دلال

فارس هز راسه وابتسم:ابشري بي

'

تمشي معه كفها بكفه تناظر الشوارع والمباني في مينويخ الساحره وبيد عسّاف كوب قهوه يشرب منه ولابس نظارته الشمسيه التفت عليها يناظرها هاديه:ما جازت لك ؟

لفت عليه وابتسمت:الا كثير مو شوي

عسّاف:طيب ليه ساكته ورفضتي نطلع بارشوت ؟

توليب:ما اعرف خفت من المرتفعات وما احسها أمان

عسّاف:توليب بك شي وأنا ادري ليه ما تعلميني

لفت تناظر من بعيد ولفت عليه:ادخل المطعم قبل يروح حجزنا انا بروح الصيدليه هنا واجيك

عقد حجاجه:اجي معك

توليب:لا حبيبي ادخل لا يروح حجزنا الصيدليه هنا شوف

سكت يناظرها بإستغراب واخذ نفس ومشت تتركه يناظرها من بعيد تدخل الصيدليه ودخل المطعم يجلس على طاولتهم واخذ المنيو ولف من شافها جلست:وش شريتي ؟

توليب:ولاشي كنت ابي كريم معين لليد ومالقيته

عسّاف:نمرّه واحنا راجعين اجيبه لك

ابتسمت له توليب:اي وش نطلب ؟

عسّاف ناظرها وسكت واخذت المنيو تناظره ونزل عيونه عسّاف يتجاهل غرابتها وبلعت ريقها توليب وحطت المنيو:عسّاف يصير بعد الغداء نرجع الاوتيل بغير ملابسي مو مرتاحه فيها

عسّاف هز راسه:يصير

ابتسمت له وطلب عسّاف لهم غداء وناظرها:غايه ورياض بالكويت

ابتسمت تهز راسها:اي شفت غايه مصوره

عسّاف:رياض من زمان وده يروح الكويت وطلبني اروح معه بس كنت مشغول وقتها بالزواج

ضحكت توليب:الحين بيندم انه طلبك لان غايه بالسفر غير

عسّاف ضحك وناظر الاكل من حطه العامل على الطاوله وبدأ ياكل ورفع عيونه لها تصور الأكل وتصوره وابتسم

حطت جوالها تبدأ تاكل وناظرت صحنها وانسدت شهيتها مباشره تكتم أنفاسها ماتبي تشمّه وابتسمت لعسّاف تناظره ياكل وبلعت ريقها من انقلبت معدتها واخذت نفس:تصدق مو مشتهيه

عسّاف ناظر صحنها وناظرها:انتي قلتي جيعانه

توليب:اي بس ما اعرف عادي نطلب بالاوتيل

سكت يناظرها وابتسمت له:اذا خلصت خل نرجع

مسح فمه بالمنديل والتفت يطلب الحساب ووقفت توليب تنتظره ودفع ومشى معها:توليب

توليب لفت تناظره:تنادي السواق يجينا ؟ تعبت من المشي

سكت يناظرها ولفت توليب تناظر الطريق واخذ نفس ياخذ جواله وارسل للسواق ودقايق وقف عندهم وركبت وركب عسّاف ولف عليها:اي متى بنتكلم ؟

توليب لفت عليه:عن وشو ؟

عسّاف:عن حالتك الغريبه ولا تقولين مافيك شي ، أعرفك

توليب ابتسمت ورفعت كفها على دقنه:حبيبي عسّاف مافيني شي عادي مبسوطه والمكان خيال

سكت يناظرها وتقدمت تبوس خده ولفت تناظر الطريق

وقف السواق عند الفندق ونزلوا ومشت تدخل توليب وناظرها عسّاف تمشي قبله ما انتظرته وضغطت المصعد بتوتر تناظر عدّاد النزول ووقف بجانبها عسّاف

ودخلت من انفتح تضغطه ويوقف بجانبها ويناظرها تناظر ارقام الصعود

وخرجت قبله من انفتح المصعد ودخلت الغرفه واخذت شنطتها تدخل الحمام وعقد حجاجه يقفل الباب خلفه ودخل الغرفه ومسح دقنه من حالها

التفت ومشى للحمام ودقه:توليب اطلعي نتكلم

لفت على الباب ترفع صوتها:دقايق بمسح الميك اب

لفت تناظر اللي بيدها وجلست على طرف البانيو وهي مغطيه فمها ولانت ملامحها تنتبه لنتيجته الايجابيه ورفعت عيونها بذهول تناظر انعكاسها بالمرايه

ورجفت كفوفها برعب ووقفت ماتبي تبكي من شعورها ورهبة الموضوع

قاحت المويه تمسح عنقها وناظرت تحليل الحمل ودخلته بالشنطه وخرجت وناظرت عسّاف اللي واقف وبلعت ريقها

ناظر وجهها الاصفر وجموده ومسك كفها:امشي نتكلم

مشت معه وجلس وجلست بجانبه وناظرها:علميني عشان أمك تزوجت ؟ والا ابوك تواصل معك ؟ والا عشان البندري ما عزمتك ؟ والا وشو توليب علميني

سكتت ماترد عليه وكمل عسّاف:ماهو عاجبك المكان نغيره ؟ وين تبين علميني ونروح

رفعت كفه تمسك كفه بقوه ونزل عيونه لكفها وناظرها ساكته وتجمعت دموعها بعيونها وعقد حجاجه يتأمل ملامحها وعضت شفتها وهمست:تذكر يوم قلت لك انك عطيتني كل شي ؟

زاد استغرابه وكملت توليب:وقلت لك وش تبيني أنا أعطيك وجاوبتني

مارد عليها وهو عاقد حجاجه وهمست توليب يرجف كفها وسط كفه:قلت تبي أبوّه

تقدم لها ونطق:عشان أبوك هالكلام ؟ كلمك وأثر عليك ؟

هزت راسها بالنفي بتوتر وتنهد بتعب عسّاف:احل وشفيك فهميني

اخذت نفس طويل تناظره وهمست:أنا حامل

لانت ملامحه بذهول وجمد وجهه يناظرها وعضت شفتها تترقب ردة فعله اللي تهدي روعتها وخوفها

وقف وناظرها بصدمه:اسألك بالله !

بلعت ريقها وقتحت شنطتها تمد له تحليل الحمل واخذه يناظره ما يفهمه ورجع ناظرها:توليب

غطت فمها بيدينها الثنتين تناظره وابتسم يتسع ثغره بعدم تصديق ورجع جلس يمسك كفوفها يناظر ملامحها:قولي والله بشريني الله يبشرك قولي والله

ناظره بربكه وابتسمت وسط رعبها ودموعها وخوفها وهزت راسها وضحك عسّاف يتقدم لها يحتضنها وغمض عيونه يقشعر جسده:ياربي لك الحمد ياربي لك الحمد

رفعت كفوفها على ظهره تشد عليه من شعورها اللي داخلها وابتسم عسّاف يبوس كتفها وهو مغمض عيونه

'

شايله الأكياس بيدينها تمشي معه بالافنيوز وتناظر حوالينها ولفت توقف محلها ومدت الأكياس:لحظه رياض

اخذ الاكياس وناظرها تمشي ونطق:غايه يرحم أهلك نبي نقعد نرتاح

غايه تقدمت تدخل وابتسمت تناظر الساعات ولفت على رياض وناظر ابتسامتها رياض:تبين قرض من ابتسامتك بس خافي الله قبل كم يوم دفعت مهر

غايه رفعت حاجبها:ملكتي كانت بالبيت ما صرفت مصاريف اصرف الحين ابي الساعه هذي

لف يناظر الساعه واخذ نفس وبلع ريقه:ما سويتي لها لايك

تقدمت غايه تصغط على زجاج الساعه:سويت يالله اشتريها

لف عليها وابتسمت غايه:يالله رياض حبيبي لا تخليها بخاطري ، إنت رجّال تقدر تجيب لي الغالي والرخيص

ابتسم من كلامها وهز راسه:يجيك الغالي

ضحكت من تقدم يطلب الساعه وطلعها لهم وقاستها غايه يطير عقلها فيها ولفت على رياض:شوف رياض خياليه ، أبيها

رياض رفع عيونه وهز راسه للموظف واخذت قياسها وابتسمت تجلس تنتظر يجهزونها لها ولف رياض:خلينا نرجع الفندق من جينا ما قعدنا وارتحنا

غايه:رياض

رياض:هلا

غايه:إنت شايب ؟

رياض تنهد يصد وكملت غايه:نبي نقعد نبي نقعد كأنك شايب عنده خشونه خلنا نمشي ليش مسافرين أجل ؟

لفت من مد لها الكيس وابتسمت تاخذه ولفت على رياض:تم عشانك ماخليت شي بخاطري نروح نرتاح

رياض:الحمدلله يارب

ابتسمت ومدت له الكيس واخذه ومشت تحضن ذراعه وتمشي تخرج معه وفتح السياره يحط الاغراض بالخلف وركبت بجانبه ومشى يركب والتفت لها:ما اشتريتي لي شي واحد على حسابك

غايه عقدت حجاجها:بس إنت الرجّال

رياض:واذا ؟

غايه:تعطي ما تاخذ

رفع حاجبه رياض وابتسمت غايه:بروتوكول الزواج حبيبي رياض

رياض ابتسم:شالطاري اليوم سمعت حبيبي بكثره ؟

غايه ابتسمت:راضيه عليك

رياض:الله يديمه

ابتسمت وحرك سيارته رياض ورفعت جوالها تصور الكويت بعدسة جوالها خلف صوت أغنيتها ووقف رياض عند الفندق ونزلت غايه ونزل رياض وتقدم العامل ياخذ الاكياس من الخلف ومشى رياض معها يدخلون وطلعوا وفتحت غرفتها غايه ودخل العامل ورياض وناظرته:شفيك داخل ؟

رياض تقدم ودخلت غايه:رياض شتبي ؟

ناظر مكياجها اللي على التسريحه ولف على سريرها وانسدح وناظرته بذهول:روح غرفتك رياض قوم

رياض فتح ذراعينه:ناسي الكرت داخلها

غايه:اي طيب روح اطلبهم جديد

رياض:تعبان

غايه:انا بروح

مشت بتروح ومسك ذراعها ولفت عليه وناظرها رياض:ظهري يوجعني سوي لي مساج

انسدح على بطنه وناظرته غايه:شايب يعني خشونه بالحبل الشوكي ؟

ضحك رياض وهو منسدح على بطنه وابتسمت غايه من ضحكته وتقدمت تجلس ورفعت كفوفها بتوتر تلمس ظهره وضغطت بيدينها تسوي له مساج وابتعدت من سحب تيشيرته يفصخه ووقفت:رياض

رياض:شفيك ؟ المساج بدون ملابس عشان تلمسين العضلات زين

اخذت نفس بربكه:توترني خلاص قوم اطلع برا واطلب مساج بالفندق

لف عليها وابتسم رياض وناظرت ابتسامته بتوتر وتكتفت وهمست:لن تحصل على ماتريد

ضحك وجلس يعتدل بجلوسه وناظرها:مين يمنعني ؟

سكتت تناظره بربكه من ابتسامته وتيشيرته اللي بجانبه وكمل رياض:زوجتي وبمكان وحدنا والشيطان معنا

غايه:اوكيه رياض مزحك ثقيل قوم روح غرفتك

وقف ولفت عليه تناظره تلين ملامحها وتقدم لها وبلعت ريقها من اقترب منها وصدت بعيونها واقترب يقبّل خدها ولفت تناظره وهمست:رياض

رياض ميل شفايفه يناظرها:أبيك

سكتت تناظره وكمل رياض:لا ترديني

رفع كفه على ملامحها ودقنها وخفتت ملامحها تشعر فيه يقبّلها

رغم تسرّع إندفاعه لها وإستغلال الخلوه بينهم لكن كان داخلها مرتاح ومطمئن بجانبه ومعه تعرفه وتودّه ، شافت منه أصدق كلامه وإنها الأولى حتى لو قبلها أُلوف تؤمن بإنها تظلم من يجي بعدها يجون وكنهم مقفين وتقهر من يجي قبلها لو إنّه شمس تخفيه ، ورياض صبر رغم عجالته بكل أموره ، صبر ونالها اليوم ولا يظن انه أخطأ بعجالته لان كل ما بداخله يبيها وراضي فيها وصارت له ومشى مع حبل الوصل لين أصحبت خَليلته

'

جالس بجانب أبوه ويناظر أبوها وأخوها وبلع ريقه يناظرهم

ونطق أبو مها:حياكم الله

هز راسه تركي ولف على يوسف:أنا ربي عطاني ولد واحد أغلى ماعندي

لف يوسف يناظره وكمل تركي:وأخذ مني ربي الكثير وما بقي لي شي أغلى من يوسف

ابتسم بخفوت يوسف وكمل تركي:وولدي وده بنسبكم

لف يوسف يناظرهم والتفت أبو مها على ولده ورجع ناظرهم:ونعم

تركي:ولدي ما نزهته بدينه وصلاته بس قربكم خير له ولنا بإذن الله وماهو مفرط ببنتكم بيرعاها وبيحفظها وبيكون نعم النسيب لكم

أبو مها:تعرف يا أبو يوسف تربية البنات صعبه والأب يشقى عشان بنته ويبي لها الاحسن ، يعاشرها طول عمره ولا وده ينقص عليها شعره يختار لها احسن المدارس ويكرمها ومعها بكل أيامها ما يفارقها ولا يتركها تحتاج لرجّال غيره

سكت تركي من تلونت بعيونه صورة توليب وكمل أبو مها:بنتي تربت بحضني بين السجّاده والقرآن وهي تصحيني لقيام الليل ومن بيت دَيّن وابي من ياخذها يستاهلها

بلع ريقه تركي ينزل عيونه ويسكت ولف يوسف يناظره من سكت وتغيرت ملامحه ورفع راسه:لك مني كل الخير لبنتك ياعمي ونفس ما رعيت أهلي وخواتي برعاها وأكون نعم الرجّال

اخذ نفس أبو مها:نستخير والله يكتب اللي فيه خير

اعتدل بجلوسه يوسف يناظر تركي اللي ساكت وسكتوا لدقايق لين وقف يوسف:نستأذن ما قصرتم

لف على تركي:مشينا أبوي

وقف تركي ومشى يخرج معه ومشوا لبيتهم والتفت يوسف:وش فيك ؟ ما عجبوك ؟

تركي:مارعيت توليب زين ولا شافت مني خير

سكت يوسف ووقف تركي والتفت عليه:خليتها تحب رجّال أكثر مني

يوسف تنهد:لا تفكر ابوي وتتعب نفسك

تركي:بس ماكان بيدي كانت تذكرني بسمر كل ما شفتها شفت سمر وحياتي معها ماقدرت اقترب منها مو أنا السبب ماكنت أنا السبب

يوسف سكت ولف تركي يناظر الطريق:ماهو أنا

يوسف:امش ندخل ابوي

مشى يدخل تركي وهو يردد بصوت مهموس:ماهو أنا السبب

'

لفت عليه تشوف نظرات عيونه وابتسمت:تشتري لي ورد ؟

التفت عسّاف يناظر المحل:اشتري المحل

ضحكت تحضن ذراعه وتقدمت تناظر الورد ورفع ذراعه خلف ظهرها يناظرها تختار ورد وتجمعه مع بعضه ورفعت عيونها للي تبيع وابتسمت لها تمده وطلع بوكه عسّاف يسأل عن السعر واخذت الورد توليب وابتسمت تشمه ودفع عسّاف والتفت عليها:ايه ام الزّين روقتي الحين ؟

توليب ضحكت:احتجت كم يوم أستوعب

عسّاف لف يناظرها وهو مبتسم ولفت عليه:إنت خليتني أصدق

عسّاف قربها تحت جناحه:صدقي صدقي ، انقضى عمري معك أنتظر هالأيام وهالجيّه

ابتسمت تحضنه بيدينها والورد بكفها ومشت معه للمطعم وسحب الكرسي بالجلسات الخارجيه وجلست توليب وجلس أمامها:قضينا من ميونيخ وبرلين بكره ان وصلنا فرنسا انتي تدلين

ضحكت توليب وهزت راسها:نوسمدغ توكوغ

رفع حاجبينه يراقب ثغرها وطريقة كلامها وتقدم لها همس:طالعي فيني أشوف

ابتسمت تناظره ونطق عسّاف:أنا عشوتي المفضله بفرنسا بيكون فمك هذا

ضحكت بعلو صوتها وابتسم عسّاف يعض شفته وابتسمت توليب:ما اعرف مره كان صعب عليّ بس بمشي حالنا

عسّاف:تعرفين تعرفين أنا واثق فيك

ابتسمت تناظر المطعم ولفت عليه من تذكرت:كلمت رياض ؟ ماشفت غايه صورت شي بعد هذيك المرّه

عسّاف هز راسه:اي رجعوا ما طولوا خذوا يومين بس

توليب:غريبه ما صورت غايه شي

عسّاف:كلمتي أمك ؟

توليب هزت راسها واخذت نفس:اخذت نص اغراضها بيت فارس بتستقر معاه

عسّاف:اي زين أحسن لها

توليب:أحب بيتنا ماودي نتركه أنا وأمي

عسّاف:انتي بأي وقت قولي ودني وأوديك

ابتسمت توليب تناظره ومدت كفها تمسك كفه:ولا مرّه خذلت حبي فيك تعطيني قدري وأكثر

عسّاف:ماهو أكثر انتي تستاهلين اللي يحبك

سكنت ملامحها تتأمله:أنت ومعي كل المواسم ربيع ما أبي أذوق خريفك

عسّاف تقدم يمسك كفوفها الثنتين:لا تغلبك الهرمونات أنا جنبك على طول وعلى طول الدنيا ربيع

ابتسمت له من قبّل كفوفها الثنتين ونطق:وش تطلبين ؟

رفعت كفها:اي شي على ذوقك

لفت لجوالها من جاتها رساله واخذته تقرأ الاسم ودخلت الرساله تشوف الدعوه لكتب كتاب

ناظرت تحت الدعوه ترجّيه الواضح:أبي كل خواتي موجودين معي

سكتت تقرأ اسم يوسف من جديد وبجانبه اسم مها وتاريخ كتب كتابهم بعد شهر من اليوم

ماردت على رسالته وقفلت جوالها بهدوء تسترجع ذاكرتها مع يوسف وكيف حاول ببداية علاقتهم وساءت الأقدار بينهم واختلفت

طلب عسّاف الأكل واخذ جواله وفتحه يناظر رسالة يوسف وابتسم ورفعت عيونها توليب تراقب ملامحه وفتح فويس بصوته يهنّي:والله سويتها يوسف الله يوفقك وأنا بكون أول الحضور معك ما بخليك

ابتسم عسّاف يرسل الفويس ورفع عيونه لها:يوسف

سكت يناظر ملامحها يستوعب ان عندها خبر وكمل ينطق:عزمك ؟

توليب بدلت جوالها بكفوفها الثنتين وهزت راسها وهي تناظر جوالها وتحركه بيدينها

وسكت عسّاف ياخذ نفس يراقبها وقفل جواله والتفت من حط الاكل وسطهم وبدت تاكل توليب بهدوء

'

تفقدت الأدراج ولفت من دخل:يبي لي أحيي لك مطبخك لانك لازم تذوق أكلي

ابتسم فارس يحط الاكياس:سمعت عنه صيته معروف يقولون اللي ياكله ما تشيله أرضه تشيله سماه ، يطير

ابتسمت سمر وتقدم لها فارس يناظر ابتسامتها:انتي أحيي حياتي مو بس مطبخي ، وبعدين ماهو مطبخي هذا صار مطبخنا

سمر لفت تناظر الاكياس ورجعت ناظرته:يعني تقول اجمعيني بكل شي ؟

فارس:أنا قلبي صار متبوعك

ابتسمت سمر تسمع منطوق عذب منه ما جربته من قبل ورفعت شعرها تاخذ الاكياس:بسوي لي قهوه تشرب معي ؟

فارس:أشرب

سمر:تركيه ؟ تشربها عادي ؟

فارس:اشركيني بأي شي معك

ابتسمت سمر وهزت راسها تاخذ البن من الكيس ومشى فارس يخرج يستريح بالصاله وخرجت بعد دقايق بالكوبين ومدت له ياخذه وجلست بجانبه تشرب من قهوتها:محد كان يشرب معي حتى توليب ما تحبها

فارس:اللي يحب يستطعم المرّ حالي معك ياسمر

سمر:شوي شوي فارس كل كلامك هذا ما أتحمله بهالفتره القصيره قسطه عليّ

ضحك فارس يشرب من القهوه ولفت سمر على جوالها:اشتقت لتوته ولا مره تركتني هالكثر

لف فارس يناظرها تناظر صور توليب مع عسّاف بباريس عند برج ايفل وابتسم:الله يهنيهم بيجيونك قريب

سمر ابتسمت تناظر توليب وعسّاف:ان شاء الله

ارسلت لتوليب:متى راجعين ؟

اخذت جوالها توليب تقرأ رسالة سمر ولفت عليه:متى رحلتنا ؟

عسّاف وقف خلفها يحضنها قدامه ويمشي للأمام:نمدد

ضحكت تحضن ذراعينه اللي تحاوطها وتناظر أمامها:اشتقت لأمي وعمو لطفي وبيتنا والورد

عسّاف ابتسم يبوس خدها:راجعين ياحبيبتي راجعين بإذن الله

ابتسمت توليب تمشي معه وتشعر بحضنه لها وتقبيله لشعرها وخدها:عسّاف

همهم وهو يناظر أمامه وابتسمت توليب:مستعد تسمع بابا ؟

التفت عليها عسّاف ينذهل من سؤالها اللطيف:انتي علميني تتوقعين جاهز يصير عندي وردتين ؟

توليب ضحكت:شدراك يمكن ما تكون بنت

عسّاف:ولو انه ولد فيه من ريحة الورد

ابتسمت توليب ورجع عسّاف يحضنها يمشي معها

'

وقفت هيله عند الشباك تناظر رياض اللي وقف سيارته ونزلت معه غايه

لفت غايه على رياض بتوتر:لو مو توته جايه ماجيت

رياض:انتي حابسه نفسك من رجعتنا ليه ؟

غايه اخذت نفس بربكه تناظر البيت وابتسم رياض:صار اللي صار ليه كل هذا الصدود ؟

غايه:رياض لا تربكني أكثر خلاص لا تعيد الموضوع

رياض ضحك ومسك كفها يفتح الباب:مفعولها باقي

صدت غايه عن ضحكته وتلميحاته ودخلت معه البيت ولفت هيله تناظرهم وابتسم رياض:سلام عليكم

ابتسمت غايه من شافت دلع ونجود ورنا ولفت على هيله اللي واقفه:سلام عليكم

هيله ناظرت كفوفهم ولا ردت تقدمت دلع لغايه:اشتقنا لك انتي اختفيتي مع توليب بعد

ابتسمت غايه تسلم عليها:ادور وقت ازورك في بيتك

دلع:الله يحييك بأي وقت

ابتسمت غايه وتقدمت لنجود ورنا تسلم عليهم وجلست:انا معكم مشتاقه لتوليب

رياض ناظر امه اللي واقفه وتقدم لها:من شوقك لعسّاف ما سلمتي على غايه ؟

لفت غايه تناظر هيله وناظرتها هيله:ايه هلا هلا

رفعت حاجبينها غايه تتجاهلها ومشى رياض يجلس بجانب غايه ولفت هيله تمشي للشباك توقف وتنتظر وناظرت عبدالمحسن اللي وقف عند البيت يدخل

ودخل وابتسم من شاف غايه:ماشاء الله ماشاء الله

ابتسمت غايه ووقفت تسلم عليه:كيف حالك ياعمي ؟

عبدالمحسن:الحمدلله بخير انتي كيف حالك ؟ كيف رياض معك ؟ ان قال لك كلمه قولي لي اردها كلمتين له وانا عمك

ضحكت غايه وابتسم رياض:من ولدك انا والا هي ؟

عبدالمحسن لف يناظر هيله اللي عند الشباك ورجع صد:جاي جاي تعالي اقعدي

ماردت عليه هيله وناظرت سيارة عسّاف واعتدلت بوقفتها

وقف عسّاف ولف على توليب:ما بنبطي بنرجع نرتاح في البيت بس جينا لهم من المطار على طول عشان امي ما تزعل

اخذت نفس توليب وابتسمت تهز راسها ومشت تنزل معه وقفل سيارته عسّاف وفتح الباب يدخل ودخلت توليب البيت وابتسمت تناظرهم وصرخت رنا بشوق وتقدمت تحضن عسّاف ووقفت غايه من ناظرتها توليب وتقدمت توليب تحضنها:وحشتيني

غايه:ردت روحي

ابتسمت توليب بشوق تعض شفتها ولفت على دلع ونجود اللي يحضنون عسّاف ولفت رنا على توليب وبلعت ريقها توليب بربكه:وحشتيني رنا

رنا:وانتي اكثر

سلمت عليها ماتبي تسألها ابد كعادتها وتقدم عسّاف لامه وباس راسها:كيف الحال ام رياض ؟ اشتقنا لك

هزت راسها:الحمدلله

عبدالمحسن:تعال تعال خلك من امك تتدلل

ابتسم عسّاف وسلم على راس عبدالمحسن ولف لرياض وضحك رياض:ارحب ابو الزّين

لفت توليب بتوتر من سمعته يناديه وابتسمت من نطقت دلع:تعالي ارتاحي

مشت معهم تجلس وجلس عسّاف بجانب رياض:اي اخبار علوم

رياض:الاخبار عندك

عسّاف ناظر التمر اللي أمامه واخذه:الحمدلله توفقنا بالرحله

جلست هيله وتكتفت تناظر عسّاف اللي ياكل تمر متتابع

دلع:انا طار عقلي من صوركم ببرلين ما توقعتها حلوه كذا

ابتسمت توليب وهز راسه عسّاف:اكثر مكان عجبنا بعد

رياض:عطنا الجدول نفسه نستعمله

غايه ناظرته بحده وضحك عسّاف ولف على هيله اللي ساكته:اي شخبارك أمي ؟

هيله:منخفض سكرك

لفت توليب تناظرها وهز راسه عسّاف:الامور طيبه

عبدالمحسن:هذا هو ياكل ماعليه خلاف

نجود:وين هدايا السفر ؟

ابتسمت توليب:ما فتحنا الشنط من المطار لهنا

غايه:ياحياتي اكيد تعبانه

رنا:توليب بسـ

قاطعتها مباشره توليب بتوتر:هديتك موجوده انتي بعد

ابتسمت رنا:والله ؟ تحمست

دلع ناظر اصابع توليب وابتسمت:خاتم جديد ؟

التفت عسّاف يناظرها وابتسمت توليب تناظر خاتمها وهزت راسها

لفت هيله تناظر الخاتم من مكانها وتقدمت غايه تمسك كف توليب:خيالي توته ماشاء الله عليك بالعافيه

نجود:واضح غالي من وين اشتريتيه ؟

لفت توليب على عسّاف وابتسمت:عسّاف اشتراه من باريس

هيله:اكيد عسّاف يشتريه مين بيشتريه

لفت توليب عليها واخذ نفس عسّاف:المره الجايه نروح كلنا ان شاء الله

رنا:اي تكفون

عبدالمحسن:ان شاء الله

توليب لفت على غايه وابتسمت:ورانا سواليف انا وانتي

لانت ملامح غايه ولفت على رياض ورجعت ناظرتها:اي سواليف ؟

ابتسمت توليب وناظرت عسّاف المبتسم ونطق عسّاف:نستأذن احنا

دلع:بسم الله عسّاف قبل شوي جيتم اجلسوا شوي وقفت توليب وابتسمت:باقي بمر أمي بيت فارس بعيد

عسّاف:توصون شي ؟

عبدالمحسن:سلامتك

عسّاف:مشينا

مشت توليب وناظرتها هيله من طلعت ونطقت رنا:فارس هذا الجديد ؟

دقتها نجود تسكت ولفت غايه تناظر رياض:انا بعد راجعه

رياض:اقعدي تقهوي

غايه:قوم رياض

رفعت حاجبها هيله:اقعدي قال لك

لفت غايه وعقدت حجاجها:ما سمعت صوتك تسألين عن حالي !

تنحنح رياض ووقف:لا امي بوديها وراجع

ناظرتها غايه واخذت نفس ووقفت ومشت تخرج ولفت على رياض بحده:انت قايل لعسّاف شي ؟

رياض عقد حجاجه:وش قايل ؟

غايه:ليه توليب تلمح تقول سواليف وسواليف ، رياض وش قايل انت ؟

رياض:صاحيه انتي ؟ وش بقول لعسّاف ؟ موضوع خاص ذا ما ينحكى فيه

غايه:شدراني انت كل شي تقوله

رياض ضحك بذهول:عشان كذا وجهك اسود طول القعده ؟

غايه تأففت وفتحت باب السياره تركب وركب بجانبها رياض:على ذا الحال اللي يشوفك يقول مسوين جريمه

غايه مسكت راسها:مو قبل الزواج

رياض:زوجتي محد له عندنا شي

لفت غايه عليه تستوعب بروده ولفت للطريق وضحك رياض يحرك سيارته

-

( اعذروني على التأخير كانت النيّه مع الختام لكن طولت عليكم ان شاء الله البارت الجاي النهايه ، لا تنسون النجمه ⭐️ )

وقف عسّاف عند البيت وناظرته توليب:ما يشبه بيتنا

ابتسم عسّاف:وحامك على بيتكم يعني ؟

لفت توليب عليه بحزن:أحبه كل ذكرياتي فيه

عسّاف:نزوره ونقعد فيه ولا يهمك وأنا أحبه معك

ابتسمت توليب ونزلت ونزل عسّاف ومشت تدق الجرس توليب ومسك كفها عسّاف تشد عليه

وفتحت الباب سمر بلهفه وناظرتهم:أمي ودنيتي

تقدمت توليب تحضنها بسرعه وابتسم عسّاف يناظرهم

لف من خرج فارس:ارحب يالله حيّه

ابتسم عسّاف يتقدم له ويسلم عليه:كيف الحال ؟ مبروك ما كنا موجودين

ضحك فارس وناظره:الله يبارك فيك

لف عسّاف على سمر اللي حاضنه توليب ونطقت سمر:لو ما حضنتيني هالقد كنت زعلت عليك

ماردت توليب ولفت سمر على عسّاف:تبكي ؟

تقدم عسّاف يناظر وجه توليب وابتسم يناظر دموعها وابتسم فارس

وابتعدت سمر وناظرت وجه توليب ودموعها:ياوردتي لهالدرجه اشتقتي لي

ابتسم عسّاف وهمس:صايره بكّايه

مسحت دموعها توليب ولفت على فارس وناظرته وتقدم لها فارس:كيف حالك توليب ؟

ابتسمت بخفوت وصافحته وتقدم يسلم عليها ولفت سمر لعسّاف:تعال تعال

ضحك عسّاف من تقدمت تحضنه وابتسمت سمر:لا عاد تروحون عني والله اشتاق لكم هالشهر عدّى سنه

ابتعدت توليب تمسح جفن عيونها وتناظرهم ولفت سمر:تعالوا تعالوا

تقدمت توليب تدخل وتجلس وجلس فارس:كيف سفرتكم ؟

عسّاف:الحمدلله توفقنا بالجو وبكل شي

سمر ناظرت توليب اللي جالسه جنبها ومسحت على شعرها:زرتي المكان اللي تحبينه ؟

ابتسمت توليب ولفت على عسّاف ورجعت ناظرت امها:أحلى مكان زرته

سمر اخذت جوالها:شوفي صورتك بين الورد حاطتها خلفيتي ، وردتي والله وردتي

ضحكت توليب ورجعت تحضن سمر وابتسمت سمر

فارس:حيّاك عسّاف ذوق سمر تقول تحب هالحلا

لفت توليب على عسّاف وابتسم:عشان السكر

سمر:اي والله سويته قلت الحين تجي سكرك منخفض خذ لك قطعه عسّاف

اخذ الصحن وابتسم يذوق ولفت سمر على توليب:متغيره توته صرتي حلوه أكثر وجهك مفتح

ابتسمت توليب وناظرهم عسّاف وهو مبتسم

فارس:جابت صورك بتعلقهم هنا بالصاله

ابتسمت توليب:حطي صور دلال بعد

فارس ضحك:صور دلال موجوده بغرفتي

عسّاف:اتركوا صور توليب في بيتي حطوا صوركم انتم

سمر ضحكت:عاد فارس يخطط لنا على مكان نروحه كم يوم

توليب لانت ملامحها:بتروحين ؟

سمر ناظرتها:انتي ليه متعلقه فيني هالمره ؟

عسّاف:مشتاقه لك اجلوها لين تشبع منك

لفت توليب على عسّاف اللي يناظرها واخذ نفس عسّاف:نستأذن بنمشي بيتنا

سمر:وين عسّاف اقعدوا نتعشى سوا

عسّاف:لا والله مره ثانيه ان شاء الله جينا للمطار ما ريحنا

فارس:بس اوعدني تعيدونها ونقعد نتعشى

ابتسم عسّاف ووقف:ابشر ماقصرت

وقفت توليب ولفت عليها سمر وتقدمت تبوسها:تعالي لي بكره

ابتسمت توليب وهزت راسها ومشت مع عسّاف يخرجون وفتح الباب عسّاف وهمس:كنتي بتبكين ؟

توليب تأففت:مافي شي يبكي بس احسني مخنوقه

ابتسم يحضنها بذراعه ويفتح لها باب السياره وركبت ومشى يركب:متى بتقولين لها ؟

توليب:لازم اروح العياده اشوف الوضع أول

عسّاف:تطمنا هناك

توليب:مافهمت عليهم ولا فهموا عليّ

عسّاف:نروح ياحبيبتي نروح

اخذ كفها يبوسه وهو يسوق لبيتهم ووقف عند البيت:اخيراً

نزلت توليب ومشى عسّاف يفتح الباب ودخلت وابتسمت:عسّاف

دخل يناظر الحوش والزرع اللي بدأ يكبر والورد الواضح وابتسم:عم لطفي ياخي

توليب:وصيته يسقيهم ؟

عسّاف هز راسه:عنده مفتاح الحوش

توليب:ياي عسّاف شوف الحوش كيف صار

تقدمت تناظر الورد وهي مبتسمه وتقدم عسّاف يفتح باب البيت وهو يناظرها ودخل واخذ نفس وحط مفتاحه وجواله وطلع للغرفه

دخل الحمام ياخذ شاور ودخلت الغرفه توليب وناظرت غرفتهم وابتسمت براحه تشوف روحها وروح عسّاف بالمكان ولفت عليه من خرج وابتسم:راحتي هنا

ابتسمت له وتقدمت تحضنه وتحاوط ظهره وابتسم عسّاف يشيل المنشفه عن رقبته ونزل راسه يبوس كتفها

'

غايه خرجت وناظرت سيارة رياض وركبت بجانبه:شسالفتهم ؟

رياض:مدري عنهم عسّاف يقول تعالوا المشتل ضروري

غايه:لا يكون العم لطفي مات

رياض:اعوذ بالله وش فيك على الرجّال ؟

غايه:ليش نروح المشتل طيب ؟ كان رحنا بيتهم

رياض:الحين نوصل ونشوف وش عندهم

غايه:توته وحركاتها اكيد في نوع ورد مزروع جديد وهي طايره فيه تحسبه شي مهم لنا

ضحك رياض ووقف عند المشتل ونطق:هذا رجّال أمها ؟

غايه ابتسمت:فارس

لف رياض عليها من نزلت غايه وابتسمت:خاله سمر

لفت سمر اللي نزلت من السياره وابتسمت:مين ناداكم ؟

ضحكت غايه تسلم عليها:توته

لف فارس على رياض وصافحه وابتسم رياض:انا أخو عسّاف

ابتسم فارس:ونعم أنا فارس زوج أم توليب

هز راسه رياض ولفت غايه على فارس:كيفك عمي ؟

سمر:وشو عمي تكبرينه بعد

ضحك فارس:هي تناديك خالتي ما تبينها تناديني عمي

رياض:تناديك تناديك عمي

ناظرته غايه واشر لها ومشت بجانبه ودخلت سمر مع فارس وابتسمت سمر:ماشاء الله أول مره اجيه

تقدمت تناظر الورد والزرع حوالينهم وناظرت العم لطفي اللي تقدم لهم:اهلاً وسهلاً ارحبوا

ضحك رياض وابتسم فارس:كيف الحال ؟

العم لطفي صافحه:الحمدلله ازيك انت ؟ ازي حضرتك ام توليب ؟

سمر:الحمدلله بس وين توليب وعسّاف ؟

العم لطفي:لسى ما وصلوش هيقوا دي الوئت ، تفضلوا تفضلوا

مشوا يدخلون ولف العم لطفي على غايه:وانتي قايه وقاييه قوزك ؟

رياض:لا انا مو زوجها انا جاي اخو عسّاف لا تطردني

غايه:الله يسامحك عمو لطفي هذا وانا مشتاقه لك وللمشتل

العم لطفي:خشي خشي هنعمل ايه

دخلت غايه تجلس وابتسمت سمر تلف لفارس:هذا مشتل عسّاف تعرفوا على بعض هو وتوته هنا

فارس ابتسم:بين الورد يعني ؟

ضحكت سمر تناظر المشتل وناظرتهم داخلين:هاه وصلوا

لف العم لطفي وابتسم وتقدم عسّاف مع توليب اللي شايله بيدها كرتون وابتسم عسّاف يدخل:سلام عليكم

ابتسمت توليب تناظرهم ولف العم لطفي:وعليكم السلام هاه ايه المناسبه دي اللي عزمتوا فيها دي البت ؟

ناظرته غايه بذهول وضحك رياض:والله جدول عليك

توليب:ارتاح عمو لطفي بس بنسولف

سمر:نسولف ؟ توته !

توليب:مو دايم تسألين عن المشتل وعمو لطفي ؟ خلاص جينا كلنا نسولف

عسّاف:جبنا كيكه ناكلها

العم لطفي:بمناسبة ايه ؟

لف عسّاف وابتسم يناظر توليب وحطت الكرتون قدامهم وفتحته وشهقت غايه ورفعت عيونها بذهول سمر ورفع راسه فارس وضحك:ماشاء الله ماشاء الله

حضنت كفوفها الثنتين توليب تناظر ردة فعلهم ووقف رياض يحضن عسّاف:احلف

ضحك عسّاف:والله

غايه وقفت وناظرت توليب بصدمه:توته

عضت شفتها توليب ما تبي تبكي وتقدمت لغايه:يوتر لا توتريني اكثر

حضنت غايه اللي مصدومه ووقفت سمر وجمعت كفوفها عند فمها ما تصدق ولفت توليب على سمر تناظرها ونزلت دموع سمر وهي مبتسمه وحضنتها توليب تبكي

ولفت غايه على عم لطفي:انت مستوعب ؟

العم لطفي:دي المره الاولى اللي بكون معاكي مش مستوعب خالص

عسّاف لف للعم لطفي:بيجيني بيبي ياعم لطفي استوعب وبشّر صفصف

ابتسم العم لطفي:تعال احضنك تعال

ضحك عسّاف يحضن العم لطفي وابتعدت توليب عن سمر وناظرتها سمر بعدم تصديق:متى كبرتي ؟

بكت توليب وهي تناظرها ووقف فارس:لا تبكين البنت

تقدم يحضن توليب وجلست سمر وهي تمسح دموعها وابتسم عسّاف يناظرهم ورفعت عيونها توليب لفارس اللي يحضنها وضحك:امك تبكي عشان بتصير جده بهالعمر

ضحكت توليب تمسح دموعها ولفت غايه:مو مصدقه توليب بتصيرين أم

رياض:اقسم بالله مبسوط

عسّاف ناظره:اخذت منك المنصب الاول بكل شي

ضحك رياض:بتكبر قبلي حتى لو اني الكبير

ضحك عسّاف ولف العم لطفي:ما تئطعوا الكيك ناكلها

ابتسم عسّاف وناظر توليب ومشت توليب توقف بجانبه ورجع مكانه رياض

ورفع ذراعه على ظهر توليب وابتسمت سمر تناظر توليب وتتأملها

مد لهم السكين العم لطفي وابتسم:الكيكه القايه كيكة سلامة البيبي ودبل تي ان شاء الله

عسّاف همس:ان شاء الله

تقدمت توليب تمسك كف عسّاف وتقطع الكيكه واخذت جوالها غايه تصور ونطق فارس:عطوني اكبر حصّه شكلها مشهي

ضحك عسّاف يقطع الكيك ولفت توليب تجلس ومد لها صحن عسّاف تاخذه وقطع لهم بالصحون وجلس بجانب توليب وابتسم العم لطفي:والله ده اسعد يوم في حياتي مانشغل مزيكا

عسّاف ضحك وهو ياكل:شغل شغل

العم لطفي ابتسم ووقف يشغل لهم اغنيه ولف رياض من صخب الاغنيه وضحك:العب يا لطفي

تقدم لهم يرقص العم لطفي وضحك فارس يناظرهم وصفق عسّاف بيدينه للعم لطفي وضحكت توليب تناظره

ابتسمت سمر تناظر توليب وابتسامتها ولفت من مسك كفها فارس يشعر بها وابتسمت له

'

وقف السياره واخذ كيس الادويه من يمينه ونزل ولف من شاف السياره اللي وقفت وابتسم يوقف محله

فتحت الباب تنزل ونزل السواق ياخذ فستانها من الخلف ورفعت عيونها مها وتقدم لها يوسف:توقعت اخطب خمس مرات بس وافقتي من أول مره

مها:عشان ترد لي العود

ضحك يوسف:تقدرين تشترين غيره ما اقبل هالعذر

مها:احمد ربك ابوي وافق عليك اصلاً

يوسف:ليه ما يوافق ؟ مو أنا اللي ادق عود بنته

ناظرته مها وابتسم يوسف من سكتت:مبروك مقدماً ياغزاله بإنتظار كتب كتابنا

ماردت عليه ومشت تدخل البيت وابتسم يوسف ودخل وناظر حنان وتقدمت له:يوسف

وقف وتكتفت:ماهي حاله ذي خلاص مليت من وجوده بالبيت مو ماخذه راحتي ببيتي دوروا له بيت ثاني ما ابيه يقعد

يوسف:امي ابوي تعبان وش تقولين انتي وين نوديه وحده

حنان:ماني حليلته يقعد عندي نهار وليل ، ماهي حاله يوسف

تنهد يوسف وصد بتعب وكملت حنان:اذا ما بيطلع من هالبيت خله يدور لي بيت انا اطلع فيه

يوسف:يعني نفتح باب المشاكل بهذا الوقت ؟

حنان:انت بتملّك وتنشغل مع حياتك والبندري بتتزوج وابوك وين يقعد ؟ عندي ؟

يوسف:خلاص خلي الملكه تمر على خير واشوف الوضع

مشت حنان تتركه وتنهد يوسف واخذ جواله وتقدم يجلس بالصاله وناظر الرقم بتردد ودق بإنتظار الاجابه

دق جوالها ولفت تسمعه وناظرت عسّاف اللي نايم بجانبها واخذت جوالها وناظرت اسمه وسكنت ملامحها ، مشت تخرج من الغرفه وردت عليه بدون صوت

وحك حاجبه يوسف:توليب

مشت تجلس على الكنبه:هلا

يوسف:كيف الحال ؟

توليب:الحمدلله

يوسف سكت ثواني:بغيت ادق اتطمن عليك واسأل اذا بتحضرين كتب كتابي

سكتت توليب تشعر بإختناقها ورفعت كفها على عنقها وكمل يوسف:أبوي يسأل عنك

توليب:مابي اقابله

يوسف:توليب أبوي مريض ياخذ ادويه نفسيه وباله ماهو معه ، حاله ماهو زين

توليب رمشت بهدوء تسمعه وكمل يوسف:يعزّ عليّ اقول هالكلام بس اعتبريه ماهو بعقله

ماردت عليه واخذ نفس يوسف:براحتك بس لو بتحضرين مع عسّاف هالجمعه بكون مبسوط

توليب:الله يوفقك

سكت وقفلت جوالها توليب وناظرت الفراغ وتكت بيدها تناظر البيت بهدوء ونزلت عيونها تلعب بدبلتها بتوتر وبلعت ريقها ترفع يدها على عنقها تلمس سلسال تركي لها الوحيد اللي اخذته منه ، ما قدرت ترميه او تهمله كل ما ضعفت لبسته من جديد وكل ما انقهرت حطته على الرفّ بس تخسر انها تتركه

خرج عسّاف وناظرها وتقدم يشوفها ساهيه وهمس:توليب

لفت عليه بإنتباه وعدلت جلستها وناظرته بدون تيشيرته لابس شورته ونطقت:ليش قمت ؟

تقدم لها وجلس:انتي ليه قمتي ؟

توليب اخذت نفس:ما اعرف تضايقت شوي وخرجت هنا

عسّاف ابتسم:تبين تبكين لوحدك يعني ؟

تأففت توليب من ضيقتها وتقدم لها عسّاف يسحبها لجهته:أنا بغلب الزيّن خل نشوف من اقوى هرموناتك والا أنا

ابتسمت توليب وهي بحضنه تناظر الصاله وتقدم عسّاف يقبّل عنقها وكتفها:من دق عليك

لانت ملامحها ولفت عليه تناظره من قريب وسكت عسّاف يتأملها وهمست:يوسف

مارد عليها يناظرها وصدت بعيونها توليب:يقول أبوي مريض

تنهد عسّاف وابتعد عنها ورفعت كتفها توليب:ماودي اروح وودي اروح

عسّاف:ان رحتي او مارحتي أنا ما بجبرك

توليب لفت تناظره:تظن بيفيد شي الحين؟

عسّاف:لا

توليب سكتت وكمل عسّاف يقترب منها يمسك كفها:بس يفيدك مع أخواتك ويوسف

سكتت تناظره ونطق بهدوء:عندكم فرصه تصلحون الوضع

صدت توليب بهدوء ورفع كفه عسّاف لشعرها يبعده عن عنقها:لا تفكرين بعيد طالعيني انا

لفت عليه واخذت نفس:أبيك جنبي دايم عسّاف

ابتسم لها من تأثرت فيه تحضنه ورفع كفوفه على شعرها وغمضت عيونها توليب تستند على كتفه براحه ونزل ذراعينه عسّاف تحت اقدامها وتعلقت فيه من شالها وابتسمت ترمي راسها على الخلف وابتسم عسّاف وهو شايلها يمشي ويبوس عنقها ورفعت راسها تضحك تستند على صدره

'

دخلت دلع خلفهم بعد ما وصلها ضيدان ونزلت تشوف هيله وخواتها من وقفوا ينزعون عباياتهم وناظرت امها:ماقلتي بتحضرين !

ماردت عليها هيله تناظر اللي واقفه بالاستقبال وحدها ولفت حنان ولانت ملامحها من شافت هيله ومشت هيله لها ووقفت أمامها ونطقت حنان بذهول:هيله

لفت هيله توقف بجانبها:يوسف طلبني أحضر

حنان:كان عندي أمل تحضرين قلت ماراح تخليني

هيله لفت عليها:عشان يوسف ماهو عشانك

حنان:بنظل على هالحال ؟

هيله صدت تناظر الحضور والضيوف:راحت أيامنا مع بعضنا الحين بربي عيالي وربي عيالك

سكتت حنان تناظرها ودخلوا البنات يجلسون على طاوله

خرجت البندري مع أريام من الغرفه وابتسمت أريام من ناظرت البنات من بعيد ولفت على البندري:البنات وصلوا

هزت راسها البندري ترد على جوالها:روحي دقيقه وجايه

مشت تخرج وابتسمت:بستقبلهم ناصر أنا عند الباب

قفلت جوالها وابتسمت من شافت أم ناصر وخواته وسلمت عليهم

أم ناصر:عروستنا كيف حالك

ابتسمت تهز راسها ولفت تلين ملامحها على اللي دخلت بعدهم وناظرتها توليب وبلعت ريقها ولفت تفصخ عبايتها

وتقدمت البندري لها ووققت عندها وحطت عبايتها توليب ولفت عليها:ما يحتاج تستقبليني استقبلي حمولتك

البندري:حضرتي عشان ابوي ؟

توليب اخذت نفس وناظرتها:ليه تظنون اني انا ما ابيه ؟ ليه ما تشوفونه ما يبيني ؟

البندري:لان أبوي تعبان توليب

سكتت توليب وكملت البندري:ابوي ما ينام الا بأدويه ماهو الاولي ويحتاجنا كلنا

توليب:كلكم انتم عياله انا ولا مره كنت بالحسبه

البندري:لين متى ما انتي بالحسبه ؟ حتى الحين ؟

سكتت توليب وبلعت ريقها البندري:توليب

توليب:طيب بشوفه

هزت راسها البندري ومشت معها توليب تدخل لفت حنان تناظر توليب وناظرتها هيله وتعدتهم تدخل وجلست مع البنات على الطاوله ولفت دلع:غايه مو جايه ؟

هزت راسها توليب بالنفي وصدت عنهم ولفت على أريام اللي تقدمت لها وقامت توليب تسلم عليها وناظرتها أريام:ابوي فوق مع يوسف ، تجين ؟

سكتت ثواني وهزت راسها ولفت للبنات تناظرهم ومشت مع أريام وطلعت وناظرتهم هيله من بعيد ولفت على حنان اللي تناظرهم

دخلت توليب تمشي مع أريام ودقت الباب أريام وفتحت البندري وناظرت توليب ورفع عيونه يوسف على توليب والتفت تركي يناظرها

طاحت عيونها بعيون تركي تناظره وتتأمل ملامحه ولفت البندري تناظر تركي وتقزمت توليب تدخل الغرفه وتناظر تركي اللي لابس بشت وناظرت ملامحه ولفت على يوسف وابتسم يوسف:هلا توليب

تقدمت له تسلم عليه:مبروك الله يوفقك

يوسف:اللهم امين

لفت توليب على تركي:يقولون مريض وتعالي زوريه

تركي سكت وكملت توليب:باقي ما زوجت أريام يحتاجونك حيّ موجود معهم

همست البندري:توليب

توليب ناظرته:وش تبي اعطيك الحين ؟ ومن وين اعطيك ؟

مارد عليها وتقدمت له توليب:ما اخذت منك شي الا قطعة ذهب ، هذي هي

قطعتها من عنقها وغطت فمها أريام تراقبهم وناظر السلسال تركي وكملت توليب:ماكنت معي ولا بلحظه بحياتي الذهب ما يسدّ مكانك

تركي رفع عيونه عليها وتجمعت دموعها بعيونها:جيت عشان أخواني ماهو عشانك

لف يوسف على البندري وكملت توليب:لا تحاول تصلح شي معي ارجع غيب نفس ماغبت سنيني كلها

تركي:توليب

اخذت نفس تستجمع نفسها وصدت عنه تناظر البندري ويوسف وأريام:عقبال أريام

ناظرتهم ثواني وخرجت من الغرفه ولف يوسف على تركي اللي جلس وهو ساكت:ابوي

البندري لفت على يوسف تعدل بشته:مها تنتظرك تتصورون روح لها

لف يوسف عليها وهزت راسها له ومشى يوسف يخرج يتركهم وتوجه لجناح العروس وخرجت أم مها وناظر حجابها يوسف وابتسم:أنا ولدك ياخاله

أم مها هزت راسها:مبروك يوسف الله يوفقكم

سكت يوسف وتقدم يدخل وناظر مها اللي واقفه أمامه ولانت ملامحه يتأملها بذهول لانه ما يعرفها ولا سبق شافها وتمنّاها بدون ما يعرف شكلها وجاته أفضل من خياله وأحلى أمنياته

توترت مها من سكوته ونظراته ولف بسرعه من الفلاش اللي بوجهه وناظر المصوره ورجع ناظر مها وتقدم لها وهمست بتوتر:العود بيرجع معي البيت

يوسف:انتي والعود بترجعون معي البيت

ناظرته بذهول وابتسم يوسف يناظرها وبلعت ريقها من نظراته والتفت يوسف على أم مها اللي واقفه بعيد والمصوره:أحد محظوظ أكثر مني ؟

ابتسمت المصوره ولف يوسف من جديد على مها:ماشاء الله تبارك الله تطربين العين ماهو بس السمع

ماقدرت ما تبتسم من كلامه وصدت بعيونها لامها اللي واقفه

أم مها:تنزفون ؟

هزت راسها مها ومد كفه يوسف لها ومسكت بتوتر تخرج من الغرفه تستعد للزفه

التفتت توليب من خرجوا ينزفون ولفت عليها البندري:جيتي عشان يوسف صدق ؟

ناظرتها توليب وناظرت يوسف وهزت راسها وكملت البندري:بتجين زواجي لو أطلبك تجين ؟

سكتت توليب تناظرها وكملت البندري:عشاني مو عشان ابوي

هزت راسها توليب:اجي

ابتسمت بخفوت البندري ولفت تناظر يوسف ومها ولفت توليب تناظر هيله اللي على نفس الطاوله تناظرهم وصدت عنها توليب

رنا:توليب بنرجع مع عسّاف ان شاء الله محد فاضي يرجعنا

هيله:عسّاف عنده خبر

نجود:اي بس نعطي خبر لتوليب بعد

توليب ابتسمت للبنات:اكيد عادي نوصلكم البيت

ابتسمت لها نجود وصدت توليب تناظر يوسف ومها

'

وقف عسّاف ينتظر بالسياره والتفت يشوف امه والبنات وتوليب وتقدمت هيله تركب بالأمام والتفت عسّاف عليهم من ركبوا كلهم وابتسم:حيّ الله أمي وخواتي

نجود:عسل عسّاف صرنا نشتاق لك

حرك عسّاف وضحك:ما طولت عنكم قبل يومين عندكم

هيله:اي بس مو نفس قبل ٢٤ ساعه معنا

عسّاف لف على هيله وابتسم:يمكن عشاني تزوجت ؟

رنا:من زمان تنشغل وتسافر اصلاً من قبل تتزوج

سكت عسّاف ورفع عيونه لمرايته يشوف توليب اللي صاده عنهم للشباك ولف على امه:أمي قريب بتفرحين

ناظرته هيله ولفت توليب عليهم وابتسم عسّاف:الله بشرني بيجيني عيال

شهقت رنا ولفت على توليب بذهول:والله شكيت اليوم كنت بسألك

نجود ضحكت:ياحياتي انبسطت مره مبروك عسّاف ، مبروك توليب

ابتسمت لهم توليب ولفت هيله على توليب ورجعت ناظرت عسّاف اللي نطق:ما فرحتي ؟

هيله لفت للامام بدون تتكلم واخذ نفس عسّاف:أنا فرحان ومبسوط ومن زمان ودي أصير أب واعيش عمري كله عشان عيالي وعائلتي

هيله:عائلتك ؟

عسّاف:اي عمري اللي مضى كله وانا لكم ومعكم والحين وقت عايلتي الصغيره

هيله سكتت وكمل عسّاف:بتصيرين جده وخواتي عمات بتزيد حياتنا خير ان شاء الله بدون مشاكل بدون حروب وعوار راس

لفت توليب تناظر هيله وكمل عسّاف:ابيك تحبينهم نفس ما حبيتيني

نجود:اكيد عسّاف هذا اول بيبي بنفرح فيه

رنا:انا قلت هدية سفرتكم ما عجبتني كنت ابي بيبي

ضحكت توليب وابتسمت لها رنا وصد عسّاف للامام ووقف عند البيت ولفت عليه هيله وهزت راسها:عساه يجي على خير

ابتسم عسّاف لها ونزلت هيله وابتسمت توليب للبنات من نزلوا ونزلت تمشي وتركب قدام ولفت على عسّاف وناظرها عسّاف والتفت يحرك سيارته بدون ما يتكلم او يسأل ووقف عند البيت ونزلوا ومشى يفتح الباب ودخلت قبله وانحنت تفصخ كعبها وناظرها عسّاف من مشت حافيه وبيدها الكعب ودخلت البيت وهو خلفها

دخلت الصاله ترمي كعبها وفصخت عبايتها وجلست على الكنبه وتقدم عسّاف وناظر فستانها وشكلها ورفعت عيونها:البندري نادتني زواجها

سكت يراقبها وابتسمت توليب من تجمعت عيونها:رحت عشان يوسف وبروح عشان البندري

اخذ نفس وفصخ شماغه وعقاله وجلس بجانبها ورجعت راسها تناظر أمامها:تكلمت مع ابوي بدون ما احس بخوف او ابكي ما شعرت بشي كأني اعتدت غيابه ولا احتاجه انا عطيته فرص كثيره ودايم يخيب ظني ولا عندي جهد اعطيه فرص اكثر

لفت على عسّاف وكملت:تعرف ليش حسيت بولاشي ؟

هز راسه ينتظر جوابها وتأملته بهدوء:عشانك سديت مكانه

سكت عسّاف والتفتت عليه توليب بكامل شعورها وجسدها تناظره:انت تكفيني وتغنيني تعطيني بدون منّه وشُح ، تعطيني بدون تسأل وتشعر بي بدون أقولك

ناظر عيونها وهي تتكلم وكملت توليب:اللي كنت ادوره لقيته هنا

مدت كفها على صدره تلمسه وهي تناظر عيونه:إنت تكفيني

رفع كفه على كفها وابتسمت توليب:محظوظ اللي بتكون أبوه

ابتسم بخفوت وتقدم يحضنها وحضنته تبكي على كتفه بدون صوت ورفع كفوفه على ظهرها ونزل راسه لكتفها يقبّله وهمس:أنا أبوك وأهلك الله خلق صدري وطنك وضحكتك بيتي

ماردت وهي سانده راسها على كتفه تسعر بتقبيله لكتفها

'

وقف السياره والتفت عليها وناظرته تستغرب وقوفه:ليه وقفنا ؟

يوسف ابتسم ومد ذراعه للخلف واخذ العود وناظرته وابتسم:انزلي

فتح الباب ينزل ومعه العود ونزلت مها تناظر البحر والشاطي الهادي وتقدمت له تشوفه يجلس على كبوت السياره وتقدمت له:كيف ابوي ما شافه بسيارتك ؟

يوسف:ماعاد تفرق معي والمفروض ما تفرق معك ، اكشفي

سكتت من طلبه وابتسم يوسف يمد لها العود وتقدمت له تبتسم وجلست بجانبه على كبوت السياره وفصخت نقابها وطرحتها تاخذ العود وبدت تدق عليه وابتسم يوسف يناظر دبلتها بيسارها ورجع ظهره للخلف يسند ذراعينه خلف راسه ويناظر البحر وابتسمت مها اللي تعزف العود بشوق وشغف ولف عليها:تعزفين شي لطلال مداح ؟

لفت عليه:وش تبي ؟

يوسف:عشقت الليل

ابتسمت مها تناظر العود تعزف وابتسم يوسف يجلس يعتدل بجلوسه يغني:عشقت الليل من شانه ونسمة نجد ودلاله ومن ذاق الهنا في قربه جميع الكون يحلاله

ابتسمت مها تعزف بإحترافيه وسكت يوسف يتابع نظراته ليدها وخفتها وناظرته:عشقت الليل ونجومه

ابتسم يغني:بتشهد والقمر شاهد وانا وانت في ستر الليل أعاهد وانت بتعاهد

ناظرت العود تدق وهي تميّل راسها وناظرها يوسف:يا نسمة داعبي شعره وردي لي شـذى منه وقولي له عن أخباري وجيبي لي الخبر عنه

لفت عليه وهي تعزف:صوتك خايس احد قالك ؟

هز راسه يكمل يغني:عشقت الليل أنا عشقته

وقفت عزفها ولفت عليه وناظرها يوسف:بتعزفين متى ودك

مها:تعرف ما كان ودي أمسك عود واهلي مو راضين

يوسف سكت وكملت مها:اعرف انهم بيزعلون بس أحبه وأبيه وأنبسط اذا عزفت فيه

يوسف:هذا هو بسيارتي باخذه لبيتنا وباخذك لبيتي تلاقينه عندك

ابتسمت مها:واذا شافوه اهلي ؟

يوسف:حطيها براسي قولي داشر وبردّه لهدايته

ضحكت وابتسم يوسف يناظرها وصدت تناظر المكان

'

دخلت توليب البيت وابتسمت من شافت فارس خارج

ابتسم فارس:هاه توليب متى الولاده ؟

ضحكت توليب:بدري

فارس:الله يتمم لك على خير انا رايح اجيب لامك اغراض حيّاك

ابتسمت توليب ومشت تدخل البيت ولفت سمر وابتسمت:توته !

تقدمت توليب ووقفت سمر تحضنها:وه بنتي الحلوه

ابتسمت توليب ولفت سمر تبوس خدينها:ريحتك ورد ورد

توليب:جيت عشانك وحشتيني

سمر:تعالي اجلسي غايه كلمتني بتجي

توليب هزت راسها:اي قلت لها تقابلني عندك

سمر رفعت كفها تلمس ملامحها:وجهك تعبان توته

توليب هزت راسها:مو مشتهيه اكل شي عسّاف افطر لوحده

سمر:بسوي لك عصير تشربينه انتي تحبيني اعصر بيديني

ابتسمت توليب ووقفت سمر ومشت للمطبخ ولفت توليب على الباب من دق الجرس ووقفت ومشت تقتح وابتسمت من شافت غايه

وتقدمت تحضنها غايه:ماما توته

ضحكت توليب وناظرتها غايه:ياحياتي تعبانه توته ؟

توليب:لا عادي تعالي

مشت غايه:فارس مو موجود ؟

توليب:لا

فصخت عبايتها غايه تجلس وناظرتها توليب:ماصرت اسمع لك حس وينك مختفيه

ابتسمت غايه:ولاشي تماشي مع رياض

رفعت حاجبينها توليب:تماشي ؟

غايه اخذت نفس بتوتر:اي اكيد يعني تماشي

توليب:طيب ما علمتيني وش شريتي من الكويت ؟

سكتت غايه تناظرها بجمود وعقدت حجاجها توليب:شفيه وجهك سوّد ؟

غايه:ولاشي

توليب:ما شريتي شي ؟

غايه:الا شريت

توليب سكتت تراقب ملامحها وهمست:بنت

غايه بلعت ريقها وهمست:توته لا تطالعيني كذا

شهقت توليب بصدمه تناظرها وتأففت غايه تصد بتوتر وإحراج وضحكت توليب:احلفي غايه ؟ قبل زواجكم ؟

غايه لفت بسرعه:انكتمي

توليب ضحكت بعدم تصديق:الحين كنت تقولين لي انتبهي من نومة عسّاف عندك وتحذريني وبالنهايه انتي ورياض ؟

صدت غايه وكملت تضحك توليب:ما سويناها انا وعسّاف واحنا نحب بعض من زمان

لفت غايه:خلاص توته لا تحرجيني صار اللي صار وزواجنا قريب

غطت فمها توليب تصحك بعدم تصديق ولفت غايه:توته خلاص

توليب:اوكيه خلاص سكت الله يهنيكم

ناظرتها غايه تسمع ضحكتها ولفت من دخلت سمر بالعصير:دايمه هالضحكه ضحكوني معكم

لفت توليب على غايه ونطقت غايه:ولاشي توته طلعت هرمونات الحمل

ابتسمت سمر تصب العصير:ماني مصدقه للحين بتشيلين بيبي يعني بحضنك ؟

اخذت العصير توليب ورفعت كتفها:ولا انا مستوعبه

غايه:اذا كبر بطنك مترين تستوعبين

توليب اخذت نفس تشرب من العصير ورفعت عيونها سمر على غايه:تعالي انتي ما سولفتي لي عن سفرة الكويت

غايه ناظرتها بذهول:شفيكم على هالطاري ؟

ضحكت توليب بعلو صوتها وناظرتهم سمر ماتفهم شي ووقفت من دق الباب:فارس بشوفه

مشت تتركهم ولفت غايه على توليب اللي تضحك

'

حك شاربه يناظر العياده والمراجعين ولف على توليب ومسك كفها وابتسمت توليب ولفت من نادوها ووقفت ومشى عسّاف يدخل معها ولفت عليهم الدكتوره:اهلين توليب كيف الحال

ابتسمت توليب:الحمدلله

عسّاف:هاه دكتوره بنعرف جنس البيبي هالشهر ؟

ضحكت الدكتوره:البيبي يقرر ، تفضلي توليب

مشت توليب تنسدح ولف عسّاف يتكتف يناظر شاشة السونار ولفت توليب تراقب معه وابتسمت الدكتوره:ماشاء الله كل شي تمام بإذن الله

ابتسم عسّاف يناظر البيبي من تشكّل ولف على توليب يناظرها وابتسمت له توليب وناظرتهم الدكتوره:باين تبغون تعرفون ؟

لف عسّاف عليها يناظرها ولف على توليب وعضت شفتها توليب وهزت راسها وابتسمت الدكتوره:وش ودك ياماما ؟

توليب ابتسمت:ما اعرف

الدكتوره:وانت يابابا ؟

ابتسم عسّاف:بنت

ابتسمت الدكتوره تناظر السونار:كل الحنان في البنات

لفت توليب عليها ولفت عليهم الدكتوره:بنت

ضحك عسّاف بعدم تصديق وناظرته توليب وعضت شفتها بربكه وابتسم عسّاف:طيب كل شي تمام ؟

الدكتوره:ايوا حمدلله وانتي توليب حافظي على سكرك والضغط بعد هالشهر الخامس لازم تكونين حريصه

هزت راسها توليب وابتسمت تجلس ولف عسّاف عليها ومسك كفها ومشت تخرج معه وضحكت:ما خمنت

عسّاف:يالله لك الحمد والشكر على اللي تمنيته وجاني

ابتسمت توليب وركبت السياره بجانبه:بشوف امي بروح لها اعلمها

هز راسه عسّاف يناظر طريقه ودق جواله واخذه يرد:هلا رياض

رياض:خلصت من موعدكم ؟

عسّاف ابتسم:اي

رياض:عندي وحده ناشبه لي تبي تعرف

ناظرته غايه بحده وقربت اذنها تسمع ولف عسّاف على توليب:اعلمهم ؟

ضحكت توليب وهزت راسها وابتسم عسّاف:الدنيا ورديه ياعم رياض

ضحك رياض وشهقت غايه بعدم تصديق بفرحه وابتسم رياض:الله يجيبها بالسلامه

عسّاف:اللهم امين

قفل عسّاف وهو مبتسم وناظرته توليب:تنزل معي عند امي ؟

عسّاف:اي بس ما بطول بمرّ امي

ابتسمت توليب بربكه ونزلت عيونها لبطنها اللي بدأ بالوضوح ووقف عسّاف عند البيت وقفل سيارته:جايك

نزل ومشى لها يفتح الباب ونزلت معه وابتسم يشد على كفها ودق الباب ينتظر وفتحت سمر وابتسمت:خلصتي موعدك ؟

توليب:ما بندخل ؟

سمر ابتعدع عن الباب وناظرت ابتسامة عسّاف:طيب علموني

تقدمت توليب تدخل البيت ولف فارس وابتسم:وش نقول أم وشو ؟

ابتسم عسّاف يدخل واخذت نفس توليب ولفت تناظر سمر اللي تنتظر اجابتها وضحكت:بنت

صرخت سمر بفرحه تحضنها وابتسم فارس:ماشاء الله ماشاء الله

توليب ابتسمت وابتعدت سمر:تمنيت بنت تمنيت ما يكفيني ووده وحده ابي وردتين

فارس:يعني الحين نقول أم الورد ؟

عسّاف:أم الزّين

ابتسمت توليب وناظرتها سمر بفرحه تمسك خدينها:بتكون عليك حنونه نفس ما انتي عليّ تحنين

توليب:لا تخليني ابكي

لفت سمر على عسّاف وابتسمت:ياحظها بهالأب ياعسّاف

ابتسم عسّاف ومشت سمر تحضنه ولفت توليب على جوالها:دلال كلمتني اطمنها برسل لها

جلست توليب ولف فارس:حيّاك عسّاف

عسّاف:لا بروح لامي اشوفها

ابتسمت سمر تجلس بجانب توليب ومشى يخرج عسّاف وركب سيارته يحرك وهو مبتسم وتوجه لبيت أهله يوقف ونزل يدخل البيت وتقدم يشوف امه لوحدها وابتسم:أمي

رفعت عيونه عن جوالها تناظره وفتح ذراعينه بفرحه:بيجيني بنت

هيله:وش انتظر منها اكيد ما بتجيب ولد

لانت ملامحه يسكت وكملت هيله:اول طفل يجيك بنت ؟

عسّاف:وشفيهم البنات ؟ هذا انتي جبتي ثلاث

هيله:جبتهم بعدك انت ورياض

عسّاف:امي ترا خير من ربي ماهو اختيار وانا مبسوط ابي بنت

هيله:اي زين الله يخليها لك

سكت يناظرها يقارن بينها وبين سمر اللي كان عندها قبل دقايق وهمس عسّاف:لو ادري ما بشرتك

رفعت عيونها هيله وكمل عسّاف:كان كفتني فرحة خالتي سمر

سكتت هيله تناظره بجمود ولف عسّاف من نزلوا رنا ونجود وابتسمت رنا:عرفت جنس البيبي ؟

ابتسم عسّاف يهز راسه ونطقت نجود:علمني

عسّاف:بنت

غطت يدينها نجود بفرحه وضحكت رنا تحضنه:الله كان ودي

ابتسم عسّاف تحت نظرات هيله لهم وابتعدت رنا:توليب بالبيت ؟ بنروح معاك

عسّاف:لا عند امها

نجود:اي اجل نروح لها وقت ثاني

عسّاف هز راسه:ان شاء الله

لف على امه اللي تناظرهم ورجع ناظرهم:انا طالع

مشى يخرج ولفت نجود:شفيه امي ؟ قلتي له شي ؟

هيله ماردت وتكتفت نجود:اكيد نكدتي عليه ، شكلك بتخسرينه بسبب كرهك لتوليب

هيله:مابي نصايحك نجود

نجود:خليه يصير يحبها اكثر منك

سكتت هيله ومشت نجود تتركهم

'

ضحكت تشرب من عصيرها:علمته ما يعرف

البندري:يوسف عرفت كل شي مو زين بالدنيا الا العود ؟

يوسف:قطع اصابعي وبعدين ماله لذه الا اذا دقته الغزاله

ابتسمت مها تاكل ولفت أريام:البندري بتروحين لابوي ؟

البندري:لا بروح عند توليب

يوسف:بيتها ؟

هزت راسها البندري:كلمتها قبل فتره اشوفها قالت ما تحب تطلع من البيت قلت بجيك

يوسف هز راسه ولفت مها عليهم:علاقتكم مو قويه فيها مع انها وحيده كان بإمكانكم تعرفونها اكثر

يوسف:ما كانت الدنيا معنا

أريام:انا بشوف ابوي اجل قبل ارجع البيت

البندري:لا تعلمين امي اني بروح لتوليب قولي رجعت بيتها

هزت راسها أريام وقامت وابتسمت مها:خذي كملي غداك اريام

اريام:لا شبعت بالعافيه

وقف يوسف يمسح فمه ووقف مع اريام ومشت تخرج وتقدم يوسف:شوفي ابوي وش يحتاج وعلميني

اريام:كان استاجرت له هنا جنبك يوسف احسه بعيد ولوحده

يوسف:هو رفض وبعدين انا كل يوم ازوره وانتي تنامين عنده كذا يوم ماعليه خلاف

سكتت اريام ومشت تركب السياره ورجع يدخل يوسف وناظر البندري اللي وقفت تلبس عبايتها:انا رايحه

هز راسه يوسف ومشت تخرج البندري وناظرت سيارة ناصر تركب يمينه والتفت عليها:تغديتي مع يوسف وبتتعشين مع اختك وانا وش نصيبي ؟

ابتسمت البندري تلتفت عليه:نومتي جنبك

ابتسم ناصر وناظر طريقه لين اقترب:وين بيتهم ؟

البندري ناظرت سيارة عسّاف:بس هنا

وقف ناصر ولفت عليه:شكراً لانك شريت الاغراض

ناصر:انبسطي لا خلصتي كلميني

ابتسمت تهز راسها ولفت تاخذ الاغراض من الخلف وتنزل ومشت للبيت واخذت نفس تدق الجرس

فتحت لها خدامه وتقدمت البندري:توليب وين ؟

طلعت توليب تتكلم مع الخدامه انقليزي ولفت للبندري:اليوم اول يوم تشتغل ما تفهم عليك

تقدمت البندري لها وابتسمت تسلم عليها وناظرتها توليب:كيف حالك ؟

البندري مدت للخدامه الحلا والمالح:حمدلله

توليب:حيّاك

مشت البندري تناظر الزرع بالحوش والورد وتقدمت تدخل البيت ولفت عليها توليب:عسّاف نايم وعنده خبر انك موجوده خذي راحتك يعني

فصخت عبايتها البندري وتقدمت توليب تجلس امامها وجلست البندري وابتسمت تناظر بطنها الواضح:ماشاء الله قالوا لي البنات انك حامل

ابتسمت توليب لها وكملت البندري:تقومين بالسلامه

توليب:امين وعقبالك

سكتوا ثواني ورفعت عيونها توليب:كيف ابوي ؟

البندري:ماشي حاله نتفقده يومياً بعد ما رفضت امي يقعد بالبيت صار الموضوع صعب وهو بعيد وحده

سكتت توليب وكملت البندري:أريام تنام عنده احياناً

توليب:ماتحسن حاله ؟

البندري هزت راسها بالنفي:الدكتور يقول انه صعب يتحسن بس سهل ما ينتكس سوء

توليب تقدمت تصب قهوه:لا تتركونه يحب وجودكم وماراح ينتكس

البندري اخذت الفنجان من يدها:ما تفكرين تزورينه ؟

جلست توليب واخذت نفس:انا اذكره بأمي وهو علته أمي الاحسن ابتعد

البندري:انتي ماودك ؟

توليب:لا ماودي البندري انا ماني نفسك ، انا مالقيت ذكرى وحده اتذكرها له عشان اشفق عليه كل ذكرياتي معه سيئه او مالي ذكريات ، ما اقدر انسى انه يوم ابتعد ابتعد عشان امي ويوم اقترب اقترب عشانها بعد

سكتت البندري ونطقت توليب بحرقه:ما عطاني فرصه أبرّه

نزلت عيونها البندري ولفت توليب من دخلت الخدامه تبلغها ان عسّاف يبيها وفهمت البندري تصد ووقفت توليب ومشت تخرج وناظرت عسّاف اللي واقف والتفت عليها:جات ؟

توليب هزت راسها:داخل

عسّاف:بروح عند رياض اذا بغيتم عشاء كلميني

توليب رفعت كفها على صدره:لا حياتي انا اطلب عادي لا تتعب نفسك

ابتسم عسّاف وتقدم يبوس خدها ومشى يخرج من البيت ورجعت تجلس توليب عند البندري:كنت بكلم البنات يجون وغايه بس قلت يمكن ماتبين

البندري:بالعكس عادي وبخاطري اتعرف على غايه بعد

ابتسمت توليب:غايه ما اشوفها كثير من بعد زواجها سافرت ورجعت وصارت ما تفارق رياض

ابتسمت البندري وكملت توليب:كانت تبي تتزوجه عشان تكون قريبه مني اكثر بس تغير كل شي

ضحكت توليب وابتسمت البندري تلاحظ توتر توليب ونزلت عيونها لفنجانها وهي مبتسمه

ونطقت توليب:كيف يوسف وزوجته ؟

اخذت نفس البندري وناظرت توليب:مابي احس كأني ضيفه

سكتت توليب وكملت البندري:مابي تسأليني عن يوسف وابوي ابيك تعرفين عنهم كل شي

توليب صدت بعيونها وكملت البندري:توليب مابي نقترب من بعض عشان نكون كأننا صديقات او جيران ، انتي اختي

لفت توليب تناظرها وهمست:اول مره تقولينها بصوت عالي

البندري:افهم الماضي بيننا وافهم دخول حياتك لنا واللي حصل بس انا تعبت توليب ، طلاق امي وابوي بعد هالسنين وتعب ابوي وكل اللي صار أثر عليّ

توليب:وانا قاعده احاول البندري احاول معك بس لا امي ولا امك يساعدونا

البندري:مانحتاج مساعدتهم

سكتت توليب تناظرها وكملت البندري:انتي تزوجتي وانا تزوجت حياتنا استقلت

ماردت توليب وهي تناظرها وتنهدت البندري:توليب انتي بعمري رديفة ميلادي تحتاجيني اكثر من احتياجي لك

توليب:هذا أنا فاتحه ابوابي لك وليوسف واريام ما قلت لا ولا ابتعدت رغم كل اللي حصل عطيت فرصه لنا بدون تفرقة ابوي وحرب امي وامك

سكتت البندري واخذت نفس توليب وتقدمت تناظر البندري:ابيكم بحياتي بقد ما انتم تبوني

نزلت عيونها البندري ورجعت ظهرها توليب تستجمع نفسها:تاكلين بيتزا ؟

رفعت عيونها البندري وابتسمت تهز راسها وابتسمت توليب تاخذ جوالها

'

فتح الباب رياض وابتسم:ارحب ابو الزّين

ابتسم عسّاف وتقدم يسلم عليه ودخل المجلس:وش الوضع ؟

رياض:الوضع تمام انت وش الطاري الجيّه

عسّاف جلس:ضيوف بالبيت انطردت

ضحك رياض يصب له قهوه وتكّى عسّاف على المركى:البندري

رفع حاجبه رياض:البندري اختها ؟ بنت خالتي ماغيرها ؟

هز راسه عسّاف يشرب من القهوه ونطق رياض:الله الهادي سبحانه

عسّاف سحب صحن التمر ياكل وناظره رياض:بدخل اجيب الاكل وجاي

هز راسه عسّاف ومشى رياض يدخل وناطر غايه اللي واقفه ولفت عليه:ارسل لك ليش ماترد ؟

عقد حجاجه رياض:صامت ، عطيني الاغراض عسّاف داخل

غايه:مو وقت عسّاف

رياض:وشفيك ؟

غايه ناظرته بتوتر ومدت له تحليل الحمل وناظره:هذا عاشر مره تجربين خلاص مافي حمل ليه مصرّه ؟

غايه:لان ياحمار هالمره خطين طالع

اخذه يناظره وناظرها:صادقه ؟

غايه:قلت لك احسني حامل ما صدقتني

ابتسم رياض يناظر التحليل واخذت نفس بتوتر:رياض

رياض:هذا عسّاف ابو الخير من يوم دخل البيت

غايه عقدت حجاجها بربكه:رياض

ضحك لانها تخاف وتتوتر وتقدم يحضنها وحضنته تهدي روعتها وهمست:لا تقول لاحد

رياض ابتعد وناظرها وابتسم:لا ما بقول لاحد لين نتطمن

غايه ابتسمت تعص شفتها وضحك رياض يمسك وجهها يبوس جبينها وابتعد:عسّاف عندي اذا راح جيتك

هزت راسها ومشى رياض ياخذ الحلا وابتسم يناظرها ودخل المجلس وحط الحلا وناظر الحلا عسّاف:رياض يرتفع سكري ماله داعي

رياض ناظره بذهول:من اللي حامل ؟

عقد حجاجه عسّاف وبلع ريقه رياض:هاه ! وشو الحلا

ابتسم عسّاف يعدل جلسته:رياض

رياض تأفف وضحك عسّاف منه:ولد

رياض:خلاص اسكت ارتبكت وخرجت مني اسألك بالله لا تعلم احد قلت لغايه ما بقول

عسّاف ماظره بذهول وهو يضحك:الحين صادق حامل ؟

رياض هز راسه بوجه جامد وتقدم له عسّاف يحضنه ويضحك:مبروك اخوي الكبير مبروك

ابتسم رياض وابتعد عسّاف وهو يضحك:بس وش هالغباء فيك يادلخ اكلمك عن الحلا تعلمني انها حامل ؟

رياض:شسوي تقروشت قبل شوي عرفت

عسّاف ابتسم يرجع يتكي:على البركه يجي سالم معافى ان شاء الله

رياض:للحين ما استوعبت لا استوعبت رديت عليك

ضحك عسّاف يشرب من قهوته وجلس لوقت طويل عند رياض وهو يلعب بلوت ولف ياخذ جواله اللي دق ورد:أم الزّين

توليب:راحت البندري

عسّاف:طيب شوي واجي

توليب:تعشيت ؟

عسّاف:لا للحين

توليب:تعال عندي لا تاكل عند رياض

ابتسم عسّاف:ازهليني

ابتسمت توليب وقفل عسّاف يحط الورق:جانا الفرج

رياض:اقعد نتعشى

عسّاف وقف:لا والله بروح بيتنا وانت رح شوف امورك

هز راسه رياض وابتسم عسّاف:اذا تبي دكتورة توليب قولي اعطيك العنوان

ابتسم رياض وضحك عسّاف يخرج من البيت وركب سيارته وتثاوب بنعاس يحرك لبيته ووقف عند وصوله ينزل ودخل يفتح الباب وتقدم يناظر توليب اللي جالسه وابتسمت:اشتقت لي ؟

عسّاف ضحك بخفوت يرمي مفتاحه:كل ما اطلع من البيت تسأليني واجاوبك نفس الجواب

توليب هزت راسها وهي مبتسمه:جاوبني

لف عليها وابتسم وتقدم لها يمسك وجهها وهي جالسه يقبّلها وابتعد يناظرها:هذا دايم جوابي

ابتسمت له وجلس بجانبه وناظر بطنها:والزّين ما اشتاقت لي ؟

تقدم يمسك بطنها وابتسمت توليب:تتحرك كثير عشاني اكلت حالي

ابتسم عسّاف يقبّل بطنها ورفع عيونه لها:وش الوضع ؟

توليب رفعت كتفها:أحسن من اللي تخيلته

سكت عسّاف وكملت توليب:مريحه الزياره

هز راسه عسّاف:الحمدلله

توليب:رفعت لنا من العشاء اقول للخدامه تسخنه ؟

عسّاف هز راسه ووقفت توليب ومشت وجلس عسّاف يرفع ذراعينه على الكنب بنعاس ودخلت توليب مع الخدامه تحط البيتزا:نمت العصر ليش نعسان ؟

توليب ناظرته تجلس ونطق عسّاف:انا نمت عشان اسهر معك بس راسي ما شبع نوم

توليب:بتنام الحين ؟

عسّاف ابتسم ورفع ذراعه على شعرها يلمس اطرافه:لا سهريني واسهر معك

ابتسمت له ولفت تاخذ قطعه من البيتزا تاكل وابتسم عسّاف من تذكر:غايه حامل

شرقت توليب ولف عسّاف وضحك:اسم الله عليك

ناظرته بذهول:كيف عرفت ؟

عسّاف:تكلمت عن الحلا عند رياض قالي من حامل

ضحكت توليب بصدمه وابتسم عسّاف:ماكان بيعلمني

توليب عضت شفتها:ارسلت لغايه ماردت اصلاً

عسّاف اكل وابتسمت توليب:ياحياتي غايه

عسّاف:يالله توليب نبي الزّين

ابتسمت توليب تمسك بطنها:اصبر عليها

عسّاف ناظرها وهو مبتسم ياكل وضحكت توليب

'

مشت تناظر المحل وفارس يمينها ونطق:بدري سمر

سمر:لا مو بدري بجهز استقبال توته وبساعدها باغراض البيبي كل هذا ما يمدين اسويه وهي بالتاسع

فارس:يمكن ما تبي استقبالها في بيتنا

سمر:هي قالت تبي تقعد ببيتها بس انا رفضت مو على كيفها تحسب الولاده والبيبي سهالات

فارس:هي جابت خدامه عشان تقعد ببيتها ما تبي تجيك

سمر لفت عليه:لو تاخذ نفاسها عندي المهم تكون تحت عيني هي والبيبي

ابتسمت تشوف الاغراض:وه ياتوليب الله يبشرني بسلامتك يا أمي انتي

طلعت جوالها تصور وارسلت لتوليب تشاورها

ناظرت جوالها توليب تشوف الصور وابتسمت:امي بتشتري السوق كله من الحماس

ابتسم عسّاف وهو يسوق ولفت الجوال عليه:شوف عربية البيبي هذي

لف يناظرها وابتسم من نظرات توليب ورجعت توليب تناظر الاغراض وسكت عسّاف يناظر طريقه يذكر برود امه اتجاه فرحته وتهميشها

اخذ نفس يوقف عند البيت ولف عليها:لا خلصتي كلميني

هزت راسها توليب وتقدم عسّاف لها يقبّل خدها وابتسمت توليب تغمض عيونها وابتعد وابتسمت له:ما بتدخل تسلم على خواتك ؟

عسّاف:بنزل معك الاغراض واشوفهم

هزت راسها وفتحت الباب تنزل ونزل عسّاف ياخذ الحلا والمالح من الخلف ومشت توليب تدق الباب وفتحت غايه وابتسمت توليب:عسّاف معاي نادي البنات

هزت راسها غايه تدخل ولفت توليب على عسّاف:هات عسّاف

عسّاف:لا انا اشيلهم ادخلي

ابتسمت له ولفت من خرجت دلع تسلم عليه ودخلت البيت وناظرتها غايه:وين البطن الكتكوت اشوف

ابتسمت تفصخ عبايتها ومسكت بطنها غايه:واي على النونو يالله توته متشوقين

ناظرتها توليب ورفعت حاجبها:والله ؟

هزت راسها غايه:خواتك وصلوا انتي تأخرتي

دخلت توليب وناظرت البندري وأريام وابتسمت تسلم عليهم ودخلت رنا:وين النونو

ضحكت توليب من توجهت رنا لبطنها:تتحرك ؟ بحس

توليب:اجلسي جنبي

جلست توليب ودخلوا دلع ونجود يجلسون

غايه:نبغى نكررها كل مره ببيت وحده

دلع:انا ماعندي مانع اي وقت تعالوا

البندري:وانا كلموني وتعالوا بعد

نجود:طيب غريبه غايه هالعزيمه لها مناسبه ؟

غايه سكتت تبتسم وناظرتها توليب وابتسمت غايه:لا جمعه عاديه

توليب ضحكت تهز راسها:توقعت في مناسبه

غايه لانت ملامحها تناظر توليب ولفت على دلع اللي نطقت:بس في خبر حلو بقوله لكم

نجود:اذا مكتبك الجديد بدوامك محد مهتم

ضحكت دلع:لا

رنا:تكفين دلع تكفين قولي اللي ببالي

تقدمت البندري بذهول:دلع

ضحكت تناظر ملامحهم وهزت راسها:اي

صرخت رنا وضحكت توليب تناظر غايه اللي توترت وتجمعوا على دلع وابتسمت:ماقلت لامي باقي لا تسربون بقولها قريب

نجود:توقعت غايه تحمل قبلك

غايه:ليش ؟

أريام:يارب بنوته زياده

ابتسمت دلع ولفت على غايه اللي ساكته واخذت نفس توليب:غايه

توترت تناظرهم:خلاص لا تضغطوني متوتره بس اي

رنا ناظرتها:اي وشو ؟

توليب ضحكت:حامل

ضحكوا بعدم تصديق ولفت البندري تضحك بعلو صوتها:مع بعض ؟ تكفون

توليب:الموضوع بدأ من عندي وماراح يوقف انا بالسادس وانتوا ما قصرتوا

أريام:البندري تكفين لا ننصدم الحين انك بعد حامل

البندري ضحكت:لا تطمني مافي

رنا:ما اصدق طلبت بيبي وربي رزقني بثلاثه ؟

نجود:ترا مو عيالك هدي شوي

غايه:بنات من يوم عرفت وانا دايخه مو مستوعبه كيف كذا دلع مبسوطه ماشاء الله

دلع:متزوجه طبيعي احمل وشو الغريب

غايه لفت على توليب:توته مين قالك ؟

توليب:مين تتوقعين ؟

غايه:رياض ما يمسك لسانه مستحيل نقال العلوم هذا

نجود:وانا اقول جانا يتبوسم بس ما تكلم

غايه ابتسمت:يتبوسم كل الوقت حتى عندي

توليب:اوكيه اللي بتجيب بنت ياحظها من الحين بعطيها كل الاغراض اللي شرتها امي لانها اخذت لخمس بنات مو بس للزّين

لفت أريام وابتسمت:بتسمينها الزّين ؟

لفت توليب تهز راسها ونطقت أريام:زي ما ينادون عسّاف يوسف ورياض

غايه ناظرتها بتشوق:ياناسو واناديها زوزي وه ابي نسخة توته نسسخه

نجود:وتصير المسوقه لدبل تي

ضحكت توليب تكمل دلع:انجح تسويق

رنا:للحين تطلع لي اعلانات لدبل تي

توليب:اي حمدلله ماشي الشغل

دلع:صار لك صح ؟

توليب هزت راسها وابتسمت وابتسمت دلع:هو من زمان لك بس عسّاف ساعدك

توليب صجكت:عسّاف رجع المشروع من جديد

غايه:ماقصر ما انسى سفرتكم الدوحه تخيلوا انسرقوا هناك وسافر لهم رياض يعدل وضعهم

نجود بذهول:ما اعرف السالفه

توليب ابتسمت:قبل اعرف انه اخوكم

سكتت البندري تناظرهم ومدت لها الصحن أريام تاخذ قطعه

رنا:حمدلله عرفتي عسّاف طلعت اسلّم عليه الحين وجهه منور محلو

ابتسمت توليب وكملت دلع تضحك:على التعب اللي شقاه عشان ياخذ توليب اكيد وجهه منور

غايه:قل اعوذ برب الفلق بتحسدونهم ماعندكم الا هالسالفه

البندري:انتي قولي غايه كيف ردة فعل رياض

غايه:ماخليت فيها ردة فعل كل يوم كنت اسوي تحليل ويتحمس ويطلع خط واحد

ضحكت دلع:نشف وهو ينتظر

ضحكت غايه تهز راسها ومدت كفها تاخذ من الصحن وتمده لنجود بجانبها

نجود:ناقصنا مها زوجة يوسف صراحه

البندري:كلمتها بس قالت تستحي وما تعرفكم

غايه:المره الجايه ناديها نتعرف عليها

البندري:ان شاء الله ببيتي اكيد تجي

'

دخلت الصاله تناظرها فارغه تستاحش قعدتها لوحدها وجلست تناظر حوالينها وفتحت جوالها تشوف سناب بناتها وجمعتهم وعقدت حجاجها تشوف البندري واريام اللي بجانب توليب والمشهد بينهم كان ودود

استغربت كيف تحسن حالهم مع بعضهم ، خرجت تقرا رسالة حنان بها من ساعات تطلبها تجيها لانها وحيده وماردت عليها ابد تمتنع

فتحت سناب رياض تشوفه مصور القهوتين وعسّاف امامه ظلت تتأمل حال عيالها اللي اكتفوا يبتعدون مع بعضهم لكوفي افضل من انهم يجونها

بلعت ريقها ماتبي تفكر بخسارتها وتعترف بهزيمتها وينهدم كبريائها بس هذا اللي حاصل

تفكر حتى بحنان اللي تعيش نفس شعورها ووحشتها حالياً وكيف بيتها صارت تستاحشه ، أريام تنام عند تركي اكثر من وجودها بالبيت وتركي اللي حاربت عشانه بالنهايه ماكان لها ولا لاحد غيرها ويوسف انشغل بحياته الاخرى والبندري تزوجت وابتعدت

اصبحت هي وحدها بالبيت واكبر عقاب يشعر به الانسان هو الوحده وانه يشتاق يسمع صوت بني آدم في البيت

اخذت جوالها حنان دور رقم أريام واتصلت عليها

لفت أريام تسمع ضحكهم وردت:هلا

حنان:وينك ؟ تأخر الوقت ارجعي

أريام:أمي بروح لأبوي وعدته برجع عنده

سكتت حنان تسمع ضحك البنات وكملت أريام:شوي بطلع من بيت رياض واروح له واطمنك

سكتت تنتظر ردة فعل امها لكن قفلت الخط وناظرت جوالها أريام وتنهدت ولانت ملامحها تشوف خلفيتها اللي نورت الشاشه وصورتها مع تركي بمشهد حميمي يوصف حبها له واحتياجها

قفلت جوالها تاخذ نفس ولفت تناظر توليب اللي تناظرها بجانبها وابتسمت أريام:الصوره قديمه

هزت راسها توليب:باين

رجعت تشغل جوالها تقدمه لتوليب واخذته توليب تناظر تركي وتنهدت من عمق داخلها وناظرت أريام تبتسم بخفوت وصدت تناظر البنات اللي يسولفون

غايه:توته نامي عندي

توليب:تعبانه غايه والله ما برتاح الا بالبيت صرت ما ودي اطول برا

دلع:بدري ما صرتي بطة التاسع

ابتسمت توليب:عسّاف جاي كلمته مره ثانيه

تنهدت غايه ولفت لنجود ورنا:انتوا بنات ناموا عندي

نجود:فشله عند رياض نحشركم

غايه عقدت حجاجها:عادي والله

رنا:لا اصلاً امي ارسلت لي ما نطول

البندري:غريبه خالتي شفيها لو جلستم ؟ بيت اخوكم

دلع:زين وافقت يجون

لفت توليب على جوالها من دق واخذته ترد:هلا

عسّاف:سهرتيني ووحشتيني وش ذنبك ؟

ابتسمت توليب:اذا بتعاتب أجله لين اجيك

عسّاف:أنا برا

توليب:تمام

قفلت جوالها ووقفت يبان حجم بطنها من فستانها وابتسمت رنا تلمس بطنها

لبست عبايتها توليب ولفت من وقفت البندري:انبسطنا مره غايه كانت جمعه حلوه

غايه:انتي بعد رايحه ؟

هزت راسها البندري ولفت:أريام قومي معي روحي بسيارتك قدامنا اخاف عليك بهالليل

أريام:بيت ابوي قريب

البندري:لا قومي ناصر قال نمشي وراك لين توصلين

وقفت أريام ومشت توليب تبوس غايه وابتسمت:اذا تطمنتي على البيبي كلميني

ابتسمت غايه تهز راسها:حرق ردة فعلك رياض راح يتحاسب ينام بالصاله

ضحكت توليب ومشت تخرج ولفت بتردد وناظرت البندري واريام:طمنيني اذا شفتيه

هزت راسها أريام وابتسمت توليب ومشت تخرج وناظرت سيارة عسّاف ولفت تشوف عسّاف اللي واقف مع ناصر وتقدمت تركب

ابتسم عسّاف:الله يرحم والديك ما تقصر بإذن الله

ناصر:وعدتني تجيني البيت لا تنسى

عسّاف:ان شاء الله تبشر

ركبت البندري ومشى عسّاف لسيارته وركب ولف لتوليب:ام الزّين الساعه صارت ١٢

توليب:عسّاف

ابتسم من نبرة صوتها لاسمه تبي تطلب وهو يفهم هالنبره منها وحرك سيارته:نهبتي قلب عسّاف

ابتسمت توليب:ابي عصير رمان

لف عليها عسّاف:اعصر لك لا وصلنا البيت

توليب:مخلص

عسّاف حك شاربه يفكر ولف عليها:ازهليني

توليب:تلاقي لي الحين ؟

عسّاف:ازرع واحصد واقطف واعصر الحين

ابتسمت تحتضن ذراعه وناظر طريقه عسّاف يمشي بدري سفر وينتصفه يوقف عند محطه فيها مطاعم مفتوحه ٢٤ ساعه ووقف وناظرها:دقيقه اشوف واجيك

نزل وابتسمت توليب تناظره ودخل المحل ودقايق خرج ومعه كوبين وضحكت تناظر ابتسامته وهو جاي

ركب ولف عليها:رمان والا مو رمان

ابتسمت تناظره يحطه بينهم وياخذ واحد ويغرس المصاص فيه ويمده لها واخذته

وحرك سيارته عسّاف راجع لينبع وناظر ساعة السياره يستوعب الوقت اللي مشى فيهم وهو نعسان ويتثاوب من فرط نعاسه لكنه مستمتع يسمع اغاني أنغام اللي تختارها توليب

'

دخل رياض يناظر الصاله والاكل وتقدم ياخذ قطعه ياكل ولف من دخلت غايه لابسه بجامه:لا تخلص ورق العنب ما اكلت

تقدمت تاخذه وجلس رياض وهو ياكل:طولوا

غايه ابتسمت:انبسطت والله ولا حسيت بالوقت

رياض:قلتي لهم ؟

غايه ناظرته بحده:ياشيخ يعني ما سبقتني وقلت لعسّاف

رياض وقف لقمته يناظرها بصدمه ورفعت حاجبها:هاه رياض مين يقول ما بقول لاحد وبنسوي مفاجأه ودنيا

رياض:والله ياحبيبتي زلّة لسان والا ما نويت اعلمه وبعدين هو شدخله يعلم توليب ما يسكت

غايه:زوجته اكيد يعلمها يعني انتي ما تعلمني لو عرفت شي؟

سكت يناظرها وتقدمت له:رياض !

رياض:اعلمك بعلمك بس مانبي نتهاوش قبل النوم

غايه:لا عادي لانك بتنام بالصاله

رياض لف بصدمه:غايه

غايه:مو طايقتك وحامي عليك

رياض:كل ذا عشان قلت لعسّاف خلاص السموحه واسف

غايه:اسف ؟

تنهد رياض:طيب اجيب لك الشنطه اللي تبينها

ابتسمت غايه ورفعت كفها تمسح على دقنه:حبيبي ياناس افتح فمك اعطيك حبه

فتح فمه تمد له قطعة ورق عنب وابتسم رياض ياكل

'

فتحت عيونها بتعب تناظر عسّاف اللي واقف عند الدولاب وعقدت حجاجها:عسّاف

التفت عليها بإنتباه وتقدم لها:توليب ياحبيبتي حطيت لك فستانين على الدولاب نقي منهم واحد والله ماعرفت وش يناسبك ويريحك

ابتسمت وتقدم لها:اذا تعبانه لا تروحين ماله داعي

توليب:مو تعبانه بروح عشان غايه

عسّاف:انا اعلمك اذا بنت والا ولد بس ارتاحي

توليب جلست وضحكت:عسّاف ما بولد لا تخاف

سكت عسّاف يناظر بطنها اللي تضخم دلالة نهاية شهرها وتقدم يلمس بطنها:الله يسهل يارب

رفعت كفها على ظهره تناظر قلقه وتقدم لها يبوس راسها:بخلص شغلي وارجع اخذك نروح لهم

هزت راسها ومشى يخرج ولفت تاخذ جوالها تقرأ رسالة سمر:وين مختفيه لا يكون ولدتي

ضحكت ترد عليها وقفلت جوالها ووقفت بتعب وثقل تمشي وتناظر بطنها بالمرايه وهمست:خلاص يامامي تكفين

دخلت الحمام تاخذ شاور ولبست روبها تناظر بطنها وابتسمت ، هي صبرت تسع شهور بكل شوق ولهفه عشان تحتضن طفل من عسّاف وردة ربيع حياتهم وحبهم وما بقي شي ويتحقق حلمها

مسحت جسمها بكريم دبل تي وخرجت للغرفه تناظر الفساتين اللي معلقها عسّاف لانها امس كانت تبكي على كتفه من صعوبة حياتها بحجم بطنها وكيف كل قياساتها اختلفت وكان بكائها من الهرمونات لكن تأثر عسّاف مباشره

اخذت فستان تاخذه وتحطه على السرير ولفت ترطب وجهها وترفع شعرها وتبدأ تحط ميك اب وتتجهز

ناظرت رسالة غايه لها تقراها:لا تتأخرين

وقفت تسوي شعرها وتلبس فستانها ورفعت شعرها تتبخر ولفت من دخل عسّاف وابتسمت من ابتسم يناظر فستانها:من قال ما يلوق عليك شي ؟

توليب حطت البخور تتعطر وتقدم لها عسّاف:وردتي انتي كل شي تحلينه

اخذت نفس براحه توليب تلفت عليه وابتسمت:بس ذوقك حلو

ضحك عسّاف يناظرها والتفتت تاخذ عبايتها:نمشي ؟

هز راسه عسّاف ومشت توليب معه ومسك كفها يطلع معها من البيت وفتح لها الباب وركبت وقفل بابها ومشى يركب بجانبها وحرك سيارته والتفت عليها ياخذ كفها يبوسه:اذا حسيتي انك تعبانه كلميني اجيك

توليب:لا تشيل هم عسّاف تكفى انا بكون مبسوطه مع البنات

عسّاف:لو حسيتي بألم كلميني على طول لا تصبرين عليه

ابتسمت تشوف جديّته وكمل عسّاف:الدكتوره قالت هالاسبوع وش باقي ؟ يمكن تولدين اليوم

توليب:لا ما ظنتي تطمن بس

وقف عسّاف عند بيت رياض ونزل وفتح لها الباب ونزلت تمشي معاه ووقف عند الباب:تبين شي ؟

هزت راسها بالنفي تبتسم وتقدم يبوس جبينها:فمان الله

ناظرته رايح ومشت تدخل البيت وابتسمت تناظر المكان اللي جهزوه بالحوش والجلسه والبوالين وتقدمت تناظر سمر بذهول:جيتي ؟

ابتسمت سمر ومشت لها تحضنها:غايه غصبتني

توليب ابتعدت:ليش بالعكس كان ودي تجين بس ما اقتنعتي

سمر:ما بغيت اشوف هيله

توليب:موجوده ؟

سمر:لا

مشت توليب تدخل البيت وابتسمت لغايه:كروشه

لفت غايه وضحكت:مين يتكلم ؟

لفوا البنات وفصخت عبايتها توليب ومشت تسلم عليها ولفت لدلع اللي جالسه:اتوقع كلكم نفس الشي

رنا:لا شوفي بطونهم مختلفه صدقيني وحده بنت وحده ولد

نجود:مو على كيفكم نبي بنات بس بنات

لفت توليب على البندري وأريام تسلم عليهم ولفت غايه:تعالوا نجلس برا خالتي وحدها

البندري ناظرت توليب:ما حددوا لك موعد الولاده ؟

توليب تنهدت بتوتر:قالوا هذا الاسبوع

البندري ابتسمت:ان شاء الله خير لا تتوترين

توليب:مو متوتره قد ما اني مستعجله تعبت مره

البندري:هانت

مشت معها تخرج وناظرتهم سمر:اخلصوا علينا افقعوا هالبالونات خلونا نرجع البيت

غايه:مو لازم تقولين بصوت عالي انك مشتاقه لفارس

سمر:فارس معهم ياذكيه

أريام:الحين هم متجمعين ببيت دلع ؟

دلع:اي دودي ناداهم

نجود:مها زوجة يوسف وين طيب ؟ ما بتجي ؟

البندري:الا بتجي ننتظرها

غايه جلست ولفت توليب:أمي انتي خبره علمينا مين حامل ببنت

سمر ناظرت بطن دلع اللي بجانبها:لا مو بنت

دلع:تكفين بخاطري بنت قولي يارب وردي

سمر:مين اللي مسوي البالونات خل يغششنا

غايه:أمي سوتها لي ولدلع

ضحكت سمر:وينها طيب تأخرت هي بعد

غايه:بتجي ان شاء الله

وقفت غايه من دق الباب ومشت تفتح وابتسمت تناظر مها:اخيراً طولتي

تقدمت مها تسلم عليها:يوسف عطلني مالي شغل من اول جاهزه اسألي البندري

غايه قفلت الباب ومشت مها تسلم عليهم وجلست

لفت سمر على توليب تهمس لها:من عزم هيله ؟

توليب رفعت كفها:اكيد رياض

سمر اخذت نفس ولفت تناظر ام غايه ووقفت تحضنها وتسلم عليها وابتسمت ام غايه:هاه وش توقعاتك ؟

سمر لفت على غايه:والله ماعطيت للحين توقع

ان غايه ضحكت ومشت تجلس وناظرت ساعتها دلع ولفت للبنات:امي تأخرت ليش ماجات معكم ؟

نجود:احنا جينا مع رياض هي رفضت تقول بجي مع ابوكم

تنهدت دلع تنتظرها وانقضى وقت طويل ينتظرونها وسط سواليفهم مع بعضهم واكلهم وقهوتهم ولفت غايه من دق الباب:اخيراً

مشت وفتحت الباب وناظرت هيله وتقدمت هيله ولفوا عليها يناظرونها واخذت نفس ولفت لغايه وناظرت بطنها:هلا

رفعت حاجبينها غايه ومشت هيله تدخل وناظرت سمر ولفت على توليب وناظرت بطنها وفصخت عبايتها ووقفت رنا تاخذ عبايتها:تأخرتي امي

مشت هيله وجلست:كان بديتوا قبل

ام غايه:افا يا أم رياض ما تحلو الا بوجودك

ابتسمت سمر تسمع ام غايه وصدت تناظر امامها ووقفت غايه بحماس:يالله دلع تعالي

وقفت دلع ورفعت جوالها البندري تصور وهي مبتسمه

واخذت بالونه غايه ودلع اخذت بالونه وشغلت الاغاني أريام وصرخت رنا بحماس:بسرعه

توليب رفعت صوتها تعد عد تنازلي وعدوا معها البنات وضحكت مها تشد على يد نجود اللي بجانبها وتنتظر

ولفت غايه لبالونتها تفقعها تتابعاً مع دلع وصرخوا بصدمه البنات يوقفون وغطت فمها دلع من تناثر لون واحد فقط من بالوناتها وبالونة غايه وضحكت غايه بصدمه تلف عليهم وابتسمت هيله تهز راسها برضى من اللون الازرق اللي تناثر

ما كفّ صراخهم من صدمتهم وضحكهم وتعليقاتهم ببعضهم وضحكت توليب بصدمه تغطي وجهها من نطقت مها تصرخ:عرسان

ابتسمت سمر تناظرهم وضحكت غايه:حامل معي وتقلديني ؟

ضحكت دلع تحضنها ولفت عليهم وهي تضحك واخذت نفس بتعب توليب من ضحكهم المستمر ونطقت:اهخ

لفت سمر عليها ولفت هيله وسكتوا وناظرتهم من سكتوا وضحكت:ما بولد شفيكم

سمر:خرعتيني

توليب:لا بس رجلها طالعه عليّ

رنا:يعني الحين عندنا بنت وحده بندلعها ؟

غايه:انا وحامي قاسي على بشرتي ولوني قلت مستحيل بنت

ضحكت نجود:حمل البنات يخليك ورده زي توليب

هيله لفت على توليب تناظرها وناظرت بطنها:وجهك وجه ولاده

سكتت توليب تناظرها وهزت راسها واخذت نفس سمر بقلق:الله يبشرنا بكل خير

'

رمى الورق يقوم:والله تستهبلون

ضحك رياض:ياخي يابزر يايوسف امش كمل العب

يوسف:جيبوا ناصر يكمل رابع انا ماني لاعب

لف ضيدان على ناصر:تعال

ناصر:ما اعرف للبلوت والله

رياض:تعال انا اعلمك تعال

عسّاف:والا نادوا الشايب هذا يكملنا

رفع عينه عن جواله فارس:من الشايب ؟

ضحكوا وصد عسّاف:أنا بس اقلط كمل رابع

وقف فارس:والله اعرف بس لا تسوون نفس هالبزر

يوسف:عشانك بعمر ابوي بس

سكت رياض ثواني من الطاري ولف على يوسف:ليه ما جبته معك ؟

يوسف تنهد:ما يبي يطلع

ناصر:طيب غير الدكتور ما تحسن وضعه من شهور ياخي

يوسف:غيرت والله بس هو ما يبي يساعد نفسه

سكت عسّاف يناظر الورق ولف فارس:العب

ابتسم عسّاف يعدل جلوسه يلعب ولف يوسف على ناصر اللي يلعب فيفا ومد له يد ثانيه يلعب معه

ورفع صوته يوسف:عمي عبدالمحسن ليه ما جاء ؟

رياض:يقول ما يبي يسهر بينام بدري والا نشبت فيه والله

فارس:وباقي تقولون عني شايب ؟

ضحك عسّاف:تراك جَدّ

فارس:وإنت أب ، العب احسن لك

ضحك رياض:جدّ مرتين بنتك وبنت زوجتك

ضحك ضيدان:دبل جدو

ضحك عسّاف من تعليق ضيدان ولف عليه:هذا شي يخصني لا سمح الله ؟

ضيدان:لا والله دبل محشوم

ضحك ناصر اللي يلعب مع يوسف ودق جوال عسّاف وفزّ:اللهم اجعله خير

ضيدان:هذا اللي ينتظر مولود

ابتسم رياض وناظر الاسم عسّاف وعقد حجاجه يرد وناظره فارس

عسّاف:هلا

سمر لفت تناظرهم جالسين بعيد:عسّاف أشك ان توليب بتولد

عسّاف جلس بإعتدال:ليه ؟ وشفيها

سمر:ماتبي تبين واسألها تقول مافيني شي بس احسها تتألم جرب كلمها اسألها

عسّاف اخذ مفتاحه من الارض:لا بجيها

سمر:يمكني ابالغ ومابي اخرب قعدتها مبسوطه معهم بس قلت دق اسألها يمكن تعلمك

حك شاربه عسّاف يفكر:طيب

قفل جواله وناظره فارس:شفيك ؟

وقف:دقايق وجاي

مشى يخرج ودق على توليب ينتظر ردها وردت عليه:هلا عسّاف

عسّاف:تعبانه توليب؟

لفت توليب على سمر اللي جالسه وتناظرها واخذت نفس توليب بتعب:امي كلمتك صح ؟

عسّاف:توليب علميني بجيك لو تحسين بشي

توليب:لا عسّاف مافيني شي بس امي قلقانه

عسّاف:اكيد ؟

توليب:والله

عسّاف اخذ نفس:طيب اذا تبين ترجعين بجيك

توليب:لا مبسوطه وبنتظر العشاء وباكل معاهم

عسّاف هز راسه:طيب

قفلت جوالها توليب تجلس معهم ولفت سمر:روحي البيت ارتاحي مو مطمنه

توليب:امي لو ادري ما شكيت لك بس خوفتي عسّاف

سمر:تحسين بمغص يمكن بداية طلق روحي البيت ارتاحي نامي

توليب:لا ما بولد اليوم قدامي الاسبوع كله

تنهدت سمر تصد عنها ولفت توليب عليهم تسمع سوالفهم

'

وقف عند البيت ينتظرها ورفع عيونه من خرجت توليب ومعها سمر ونزل من السياره ولفت توليب:أمي تكفين والله مافيني شي

سمر:عسّاف ياحبيبي اذا ما ولدت اليوم انا ما أفهم

عسّاف ناظر توليب:يوجعك شي ؟

توليب:لا مافيني شي ليش محد مصدقني

سمر:اركبي السياره واذا رحتي البيت تأكدي ان شنطة البيبي جاهزه

ضحكت توليب من سمر ومشت تركب ولفت سمر وهمست:ماتبي تخوفني بس انا حاسه

عسّاف اخذ نفس بقلق:طيب انا عندها

سمر:طمني

هز راسه عسّاف ومشى عسّاف يركب ودخلت سمر من جديد والتفت عسّاف على توليب:كيف السهره ؟

توليب ابتسمت:انبسطنا مره حمدلله

عسّاف ابتسم وحرك سيارته ولف عليها:اذا تبين نمر المستشفى

توليب:عسّاف لا تصير نفس أمي توترني ، برجع انام مافيني شي

عسّاف هز راسه يناظر طريقه ووقف عند البيت تنزل مع عسّاف ومشى يفتح الباب ودخلت وابتسمت تناظر الورد بالحوش:بسقيهم واجيك

هز راسه لها وابتسم ومشى يدخل وتقدم للشباك يناظرها تمشي بإتجاه الورد

ابتسمت تنحني شبه تجلس بتعب تناظر الزرع والورد وعقدت حجاجها من حست بالألم من جديد ووقفت بصعوبه تمسك بطنها واخذت نفس ومشت تدخل ولف عسّاف عليها وابتسمت من ناظرته:بدخل اغير ملابسي واجيك

مشت بدون يرد عليها وتنهد يشعر بإنها تخبي وجعها وجلس على الكنب واخذ جواله وناظر الوقت المتأخر وارسل لسمر:تتألم بس تخبي علينا

سمر:باين كنت اعرف انتظر كم ساعه وخذها المستشفى واذا قالوا ولاده اتصل علي بجيكم

قرأ رسالتها ولف يسمع الهدوء ومشى يقول ودخل الغرفه يسمع المويه بالحمام وتقدم يحط اذنه ودق الباب:توليب

عقدت حجاجها بألم تجلس على طرف البانيو ورفعت عيونها بخوف تناظر السقف ولبست الروب تخرج من الحمام وناظر وجهها عسّاف وتقدم يمسك ملامحها:ليه تكذبين عليّ ؟

ناظرته تلين ملامحها بخوف وهمست:خايفه

رفع حاجبينه بذهول:تخافين من الزّين اللي شبر ونص ؟

ابتسمت من كلامه وابتسم عسّاف يناظرها بحنيّه:تيسير من ربي وان جات الزّين بتنسين كل وجع ، تجين معي ؟

اخذت نفس بخوف وهزت راسها وتقدم عسّاف يبوس جبينها:باخذ شنطتك وشنطة الزّين واجيك

مشى ياخذ الشنط وجلست على السرير تاخذ ملابسها وتلبس وهي تتألم واخذت جوالها تناظر الوقت المتأخر ولفت من دخل عسّاف واخذ عبايتها:مشينا

لبست عبايتها ولفت عليه:عسّاف خلك معي

عسّاف:ماني مخليك ياحبيبتي والله ما اخليك

مسك كفها ومشت معه وخرج معها من البيت يركب من جديد سيارته ويشغلها ويحرك للمستشفى

وشدت على كفوفها توليب بتوتر تشعر بكل الألم لكن ماتبي تصدقه من رعبها وخوفها من التجربه الأولى ووقف السياره عسّاف ونزل وناظرت المستشفى توليب تشتعل عيونها من دموعها المحبوسه وتقدم يفتح لها الباب وناظرها وهمس:توليب

بكت بخوف ومن الألم اللي حبسته داخلها وتقدم لها:اسم الله عليك شفيك ياعيون عسّاف ، توليب والله اني معك ليه الخوف

توليب:تعبانه

عسّاف تقدم يحضنها وشدت عليه بخوف وعقدت حجاجها من الألم وابتعد:تمشين ؟

هزت راسها تنزل ومسك كفها بقوه وابتسم:بنخرج من هنا ثلاثه بإذن الله هذا ما يونسك ؟

شدت على ذراعه تمشي ومشى معها يدخل الطوارئ وتقدم يسجل بياناتها ومشت تدخل الغرفه ودخل معها يوقف ويناظر الممرضه اللي كشفت عليها واخذ جواله يناظر رسالة سمر وسؤالها ورفع راسه من نطقت الممرضه:في طلق بس باقي تنتظر شوي وترتاح ونحط لها جهاز التخطيط

هزت راسها توليب وتقدم عسّاف يجلس على الكرسي عندها ومسك كفها بقوه وجلست تفصخ عبايتها بمساعدته ورجعت تنسدح وجلس بتعب يناظرها

'

اخذت جوالها تشوف اللارد من عسّاف وتوليب وفهمت انها بتولد حتى لو خفوا الموضوع لفت تناظر فارس:فارس قوم

فتح عيونه يناظرها:أذن ؟

سمر وقفت:توليب بتولد

جلس بذهول يناظرها ومشت تاخذ شنطتها وتحط جوالها واخذ نفس ووقف يدخل الحمام

اخذت عبايتها سمر تنتظره وخرج فارس يلبس ثوبه ويخرجون وركبت السياره تسمع أذان الفجر وكبّر فارس يردد مع المؤذن وحرك سيارته:من قالك بتولد ؟ عسّاف ؟

سمر:قلت له يطمني بس مارد عليّ عرفت انها بتولد

فارس التفت للطريق ووقف عند المستشفى ونزل ونزلت مع سمر يدخلون واخذت جوالها سمر تتصل على عسّاف

فزّ من صوت الجوال وناظر توليب اللي غفت بتعب ووقف يرد وخرج:هلا

سمر:وينك توليب ولدت ؟

عسّاف:لا بالطوارئ للحين

سمر:انا وفارس بالمستشفى

عسّاف:طيب جاي

مشى يخرج وناظرهم وتقدمت له سمر:ليه طولت ؟

عسّاف:مدري قالوا باقي وهي داخل تغفى شوي وتقوم

سمر:مسموح ادخل لها ؟

هز راسه عسّاف ومشت سمر تدخل وناظرت توليب اللي مفتحه عيونها تتألم وتقدمت لها:نور عيوني

لفت توليب بألم ومدت كفها وناظرتها سمر:ليه محد عندك ؟

توليب:تعبت كل شوي يزيد الألم ويقولون باقي ، أمي تكفين برتاح خلاص

سمر:الحين اشوف الممرضه

لفت سمر تخرج ولف فارس عليها ومشت لهم:عسّاف شوف لي ممرضه ونادها

عسّاف هز راسه ورجعت تدخل سمر ودخلت الممرضه مع عسّاف وتقدمت لتوليب:طيب بنطلعك فوق لغرفة الولاده بس دقيقه انادي الدكتوره

سمر لفت لعسّاف:ادخل معها عسّاف وانا بنتظركم

هز راسه عسّاف ودخلوا الممرضه والدكتوره وجلست توليب على الكرسي المتحرك ومشى معها عسّاف

خرجت سمر وجلست بجانب فارس:الله يهونها عليها يارب

فارس:سهالات بإذن الله

سمر:ماهي نايمه من أمس وعسّاف بعد مو نايم

فارس:ان قامت بالسلامه يهون كل شي

سمر هزت راسها تنتظر بجانب فارس

'

قضى وقته معها وشهد كل لحظة المخاض معها وما فارقها وعشان رهبة الموقف ورعبه عليها وخوفه لين تبشّر بالطفله اللي بكت يشدو صوتها بالغرفه وابتسم من احتضنت الطفله توليب وهي تبكي بألم وتقدم لها عسّاف يبتسم يناظرها والتفت مع الممرضه اللي خرجت بالطفله ومشى يخرج واخذ جواله من جيبه ومسك شعره بفرحه يتصل وينتظر الرد

ناظرت جوالها هيله وهي تفطر مع البنات وعبدالمحسن وردت:هلا عسّاف

عسّاف ضحك:أمي توليب ولدت

لانت ملامح هيله وناظرتها رنا بصدمه:توليب ولدت ؟

لف عبدالمحسن وهزت راسها هيله:الحمدلله على سلامتها

عسّاف:الله يسلمك دقيت أبشرك

هيله:زين تسوي لا استقرت بغرفتها جيناكم

رنا لفت على نجود وصرخت:البنوته وصلت

عبدالمحسن:اسكتي نفهم اصبري

نجود:ابوي قاعده تبارك له اكيد ولدت

قفلت هيله وناظرته:ولدت حمدلله

ابتسم عبدالمحسن:يالله الحمدلله

ضحكت رنا:بنروح نشوفها تكفون

نجود:كلمي دلع

رنا:برسل بالقروب كلهم يقرون

ابتسمت تاخذ جوالها تكتب بالقروب وناظرت غايه اللي قرتها

كانت تفرش اسنانها وتمشي بالغرفه تدور خاتمها واخذت جوالها من صوت الرساله وجمد وجهها ولفت على رياض:رياض

لف عليها:غسلي فمك لا تحوسينا

مشت له ومدت الجوال ووقف بصدمه:اسألك بالله

اخذ جواله ومشت غايه تغسل وخرجت تصرخ:رياض توليب ولدت

رياض مارد عليها يحاول يتصل على عسّاف وضحكت بصدمه غايه تغطي فمها:تكفى خل نروح نتأكد

رياض:ما يرد

غايه:دقايق اجهز

رياض:بشويش لا تولدين انتي بعد

ضحكت غايه من فرحتها ومشت تدخل وابتسم رياض يرسل لعسّاف

خرج عسّاف يقرأ رسالة رياض ولف من تقدمت سمر:ارجع نام وارتاح عسّاف والعصر تعال انا بقعد عن توليب

ابتسم بفرحه:مستحيل ما تستوعبين فرحتي اللي طيرت نومي ؟

ابتسمت سمر تشد على ذراعه:والله وأنا فرحانه بعد ماني مصدقه أبد

عسّاف:بقعد عند توليب واتطمن عليها واشوف الزّين بالأول

سمر غطت فمها بعدم تصديق:زوزي وردتي الجديده

ضحك عسّاف والتفت من خرجت الممرضه ومشى يدخل لجناح توليب وابتسم يناظرها منسدحه على سريرها وتقدم لها:أم الزّين

ناظرته بتعب وابتسمت وتقدم لها يبوس كفها ويبوس راسها:حمدلله على السلامه

ناظرت سمر خلفه وهمست:تعبانه

سمر:الحين بتاكلين وترتاحين بس ما ودك نشوف الورده ؟

رجعت راسها بتعب توليب ومسح على شعرها عسّاف يشعر بتعها وارهاقها وتقدمت سمر:روح عسّاف خلص اوراق البنوته

هز راسه وناظر توليب ومشى يخرج وتقدمت سمر لتوليب:ريحتك ورد ياتوته

توليب:اخذت شاور ساعدوني الممرضات واخذوا شنطة الزّين شوفيها بالله أمي

سمر:انا بشوف كل شي لا تشيلين هم بس ارتاحي

التفتت من دخلوا بالأكل وتقدمت سمر تاخذه وتقدمه لتوليب اللي بدت تاكل بتعب

ورفعت عيونها توليب من انتهت من الاكل وناظرت عسّاف اللي دخل وشايل بيده الزّين وابتسمت سمر تناظره وناظرتهم توليب تبكي من مشاعرها

وضحك عسّاف يناظر وجه الزّين اللي بحضنه ورفع عيونه لتوليب اللي تبكي بدون صوت وتقدم لها يجلس بجانبها على طرف السرير

وتقدمت سمر تناظرهم ومسحت دموعها توليب تناظرها نايمه بحضن عسّاف ورفع عيونها على عسّاف اللي مبتسم يناظر الزّين وميلت راسها على صدره تناظر الزّين

واخذت جوالها سمر تصورهم وابتسمت ومسحت دموعها توليب ترفع اصابعها تلمس خد الزّين تلمس نعومتها وبشرتها وهمس عسّاف:ياوردة فصل الربيع ، ياوردة حياتي

ابتسمت توليب تناظر الزّين والتفت عسّاف يبوس راس توليب اللي سانده عليه

'

البندري دخلت تناظر تركي اللي جالس مع أريام ولفت عليها أريام بحزن وتقدمت البندري تجلس بجانبه:أبوي

لف عليها تركي يناظرها ورفعت كفها على ظهره:بنروح نشوف بنت توليب تجي معنا ؟

تركي سكت ولف على أريام ورجع ناظر البندري:بنتها ؟

البندري:اي ولدت قبل أسبوع وبنروح نشوفها

تركي سكت يناظرهم وتقدمت أريام:هي ببيتها مو ببيت أمها

تركي:سمر تزوجت ؟

تنهدت البندري بتعب:أبوي حبيبي تبي تجي تشوف حفيدتك ؟ بنت توليب ؟

تركي هز راسه وابتسمت أريام ووقفت ومشى تركي معهم

خرجت البندري واخذت جوالها ترسل لتوليب:أبوي بيجي معنا

قرت الرساله توليب ورفعت عيونها على سمر اللي عندها:تعالي عندي توليب لا تعانديني

توليب:أمي تكفين خليني هنا أريح لي انتي نامي عندي عادي

تأففت سمر تعدل اغراض توليب وسكتت توليب تناظر الزّين اللي نايمه بجانبها على السرير:أبوي بيجي

لفت سمر بصدمه تناظرها ولفت عليها توليب وتقدمت سمر:أبوك ؟

هزت راسها توليب ورفعت حاجبينها سمر بذهول:ماشاء الله

توليب:طلعي لي فستاني اغير ملابسي أمي

سمر:بيجون معه خواتك ؟

هزت راسها توليب:ويوسف ومها

سمر اخذت ملابس توليب تطلعها:انا ما بقعد برجع البيت

توليب ناظرتها ومدت لها الفستان سمر:أجيك بعد صلاة العشاء بسوي لك شوربه واجيبها اتطمن وارجع

هزت راسها توليب واخذت شنطتها سمر وتقدمت للزّين:وه يا أمي انتي ووردتي

ابتسمت توليب تناظرها وباستها سمر بخفه ومشت تخرج من الغرفه

وقفت توليب بتعب تدخل الحمام وغيرت ملابسها تلبس الفستان وخرجت وتقدمت للتسريحه تعدل شعرها ولفت من بكت الزّين وحطت الفير توليب:تكفين خليني اخلص شعري

وقفت ومشت للزّين تشيلها ورفعت راسها من دخل عسّاف مذهول وابتسم من صوتها بالغرفه:أبو عسّاف وأهله

تقدم يسمعها تبكي:اسم الله على وردتي

توليب:عسّاف خلها معاك بخلص شعري

عسّاف جلس وحط مفتاحه بجانبه وشال الزّين وابتسم يحضنها بهدوء:بسم الله عليك

مشت توليب تخلص شعرها وتناظر عسّاف اللي يهزها بخفه وابتسمت ونزل عيونه عسّاف يناظر الزّين اللي سكنت ونامت بحضنه وتقدم يبوس جبينها

ووقفت توليب:عسّاف أبوي جاي

لف عسّاف عليها وسكت وكملت توليب:مع يوسف والبنات

صد يفكر وهز راسه بدون يتكلم وتقدمت:ساعدني اغير لها

حطها على السرير عسّاف يفتح ملابسها ويناظر أقدامها الصغيره وابتسم يقبّلها وابتسمت توليب تغيّر لها وجلس على الارض عسّاف يبوس أقدامها الصغيره

ودق جوال توليب تلبس الزّين فستان صغير على حجمها الصغير وتغطي شعرها ومشت ترد:هلا

يوسف:وصلنا توليب

توليب لفت على عسّاف:عسّاف

هز راسه يقوم وقفلت جوالها توليب ومشى يخرج عسّاف وتقدمت تشيل الزّين وابتسمت تناظرها بحضنها ومشت تخرج ووقفت عند الباب تسمع صوت عسّاف وترحيبه ولانت ملامحها من دخل تركي وماسك بيده ذراع البندري ورفعت عيونها البندري تناظر توليب والبيبي بحضنها وابتسمت لها وبلع ريقه عسّاف وده يدخل لكن خواتها وزوجة يوسف دخلوا وما تركوا له مجال الا انه يوقف عند الباب

مشى يوسف يدخل وابتسم:ماشاء الله

بلعت ريقها توليب تناظر تركي ولف يوسف على ابوه وابتسم:أبوي

لفوا عليه البنات وناظرتهم مها وتقدم لتوليب وناظرها:بنت ؟

هزت راسها توليب تناظره وتقدم يناظر الزّين واخذت نفس البندري تناظر تركي وشتتاته ولف تركي على توليب وناظرها:شلونك ؟

سكتت لانها ما سمعت هالسؤال منه ابد ولا حسته وهالمره سألها وهو يناظر بعينها بكل ضعف ووهن وكبر ، نزلت عيونها ما تبي تبكي وهزت راسها وهي تناظر الزّين وتقدمت أريام:عطيني اشوفها

مدت لها الزّين ومشت لها البندري وابتسمت تحضنها واخذت نفس توليب من حضنتها البندري وهمست توليب:تغير

البندري ابتعدت عنها بأسف تناظرها ولفت تناظر تركي اللي جلس وابتسمت توليب تسلم على مها:ادخلي ارتاحي ما بيدخل عسّاف

مشت مها تجلس ولفت توليب على يوسف اللي مد لها الهديه والورد وهمس:ما بنطول أبوي يتعب لا خرج

هزت راسها توليب تاخذ الورد والهديه وناظرت تركي وتقدمت تجلس وابتسم يوسف يناظر الزّين بحضن أريام:نسختك توليب ما خذت شي من عسّاف

ابتسمت توليب من أكدت كلامها مها:صح ؟ نسخه

البندري:ياحياتي صغيره مره مو نفس التصوير نتفه

أريام:شوفي اليد والخاتم ماشاء الله

لفت توليب تناظر تركي اللي ساكت:أبوي شلونك ؟

لف تركي عليها ولفوا عليها واخذت نفس توليب:ان شاء الله انك طيب ؟

هز راسه بدون يتكلم ونزل عيونه للارض:أمك تركتني للشمّاتين

لفت توليب عليهم واشر لها يوسف بعيونه يهديها وسكتت توليب من كمل:يشهد الله اني بغيتها وحبيتها ليه تركتني ؟

كان ودها ترد عليه وتبرّي أمها من كلامه لكنها تشعر بتعبه وأفكاره ونفسيته فتجاهلت كل كلامه تسكت

'

خرج عسّاف من المجلس على اتصال أبوه وناظر امه اللي داخله وتقدم لهم:ياهلا

دخل عبدالمحسن وابتسم:أبو الزّين

ابتسم عسّاف وتقدم يسلم عليهم وناظرته هيله:وين بنتك ؟ لا يكون راحت بيت سمر

عسّاف:لا داخل بالبيت عمي تركي داخل

هيله:تركي ؟ فيه حيل ؟

عبدالمحسن:ناده

هز راسه عسّاف ومشت هيله تدخل وناظرتهم ومدت الاغراض على الطاوله:سلام عليكم

لف تركي عليها وناظرته هيله تتفقد وضعه:ما تشوف شر ياتركي وش جاك بعد طلاق حنان ؟

تنهدت البندري تصد ووقف يوسف:مشينا ابوي عند عسّاف

وقف تركي وناظرته هيله من مشى يسند على ذراع يوسف ويخرجون ولفت تناظر الزّين بحضن أريام:هاتيها

ناظرتهم توليب واخذتها هيله وجلست وابتسمت:تشبهين عسّاف اسم الله عليه وعليك

رفعت حاجبها مها بذهول وابتسمت توليب تسمع تعبير هيله واخذت نفس هيله تمسح على شعرها:لا تطلعينها بالمكيف ماهو زين دخليها

ماردت توليب ولفت هيله:تعالي خذيها

البندري:هاتيها خالتي

لفت هيله تناظر البندري واخذتها من حضنها وابتسمت البندري تلاعبها:عيوني ياخالتي انتي

هيله:ماشاء الله تعدل الوضع بينكم

رفعت عيونها البندري على توليب وصدت عنهم توليب واخذت نفس هيله:انا قلت بعد سالفة عسّاف ما بتسـ

البندري:خالتي لو سمحتي

لفت أريام بحرج من مها ووجودها وبلعت ريقها توليب ووقفت:البندري جيبيها بدخلها تنام

البندري:جايه

مشت معها ودخلت الغرفه وهمست البندري:أول مره تزورك خالتي ؟

توليب حطت الزّين بالسرير:لا زارتني بالمستشفى

البندري:ولين متى بتنكد عليك كذا ؟

توليب:هي تبي أحفاد عيال انتظري تولد دلع او غايه وما بتشوفينها عندي

تنهدت البندري ولفت تعدل شعرها بالمرايه:توليب اذا احتجتي اساعدك في زوزي اخذها عادي وترتاحين

توليب ابتسمت:أمي مو مخليتني واذا تعبت عسّاف موجود ماتقصرين

البندري اخذت نفس:اجل انا بروح ناصر وراه دوام استعجلته يجيبني

هزت راسها توليب ووقفت تسلم عليها ومشت تخرج البندري وناظرت مها اللي تلبس عبايتها:بتمشين ؟

أريام لفت عليها:اي ابوي ما يبي يقعد

هيله:عشان عبدالمحسن يعني ؟

البندري:ابوي تعبان خالتي مو عشان أحد

صدت هيله بدون ترد ومشوا يخرجون وتقدمت توليب تقفل الباب ولفت من دخل عبدالمحسن مع عسّاف وابتسمت من تقدم لها عبدالمحسن:وين الصغيره نشوفها ؟

توليب:نايمه داخل

هيله:قلت لها تخليها هنا بس هي ما طاعتني

لفت توليب على هيله:ماقلتي المكيف يضرها ؟

سكتت هيله وتقدم عسّاف:بكره تكبر تصير تجيك ان شاء الله

ضحك عبدالمحسن:يا من يعيش ياعسّاف لين تكبر وتمشي مالها أسبوع البنت

جلس عسّاف وابتسم:الأيام تركض

هيله:الله يبلغنا بعيال دلع ورياض على خير ان شاء الله

لف عليها عسّاف يسكت ومشت توليب تجلس بجانبه

عبدالمحسن:هذي غير بنت عسّاف اول أحفادي عز الله غلاها مختلف

ابتسمت توليب ولف عليها عسّاف وهمس:صوتها ؟

سكتت تحاول تسمع ووقفت من تأكدت انها تبكي ومشت تدخل الغرفه وتقدمت لسرير الزّين ترفع شعرها وتشيلها بحضنها وجلست على السرير تاخذ رضاعتها وابتسمت تتأملها

ورجعت ظهرها للخلف ورفعت عيونها من دخل عسّاف وعقدت حجاجها:اجلس عندهم

عسّاف:راحوا

توليب:غريبه ليه ؟

تقدم عسّاف وجلس وناظر الزّين وابتسم ورفع اصابعه يلمس شعرها وهمس:أخاف عليها ودي تعيش مبسوطه ما يخدشها شي

ابتسمت توليب تناظره ورفع عيونه عسّاف:ابيها تعيش بربيع الورد بدون شوك ، بس ورد وزهر

توليب:اذا انت أبوها بتعيش

ابتسم عسّاف ونزل عيونها يناظرها ويتأملها ومدتها له واخذها يشيله بحضنه وجلست توليب تناظرهم وتتأمل سكون ملامح الزّين

'

ابتسمت ترتبك من حست فيه يدخل الغرفه وناظر العود بحضنها ورفع حاجبينه:طربانه اليوم ؟

ضحكت مها:تعال اجلس

تقدم يوسف وجلس بجانبها:وش ودك تغنين ؟

مها ابتسمت:تغني معي ؟

يوسف:أغني سمعيني من بعد مزح ولعب

لفت مها تناظر العود وتبدأ تعزف ولفت على يوسف تغني معه:من بعد مزح ولعب اهو صار حبك صحيح ، وأصبحت مغرم عيون وأمسيت وقلبي طريح

ابتسمت مها تسكت تتركه يكمل يغني وضحك يوسف يميّل راسه مع نغم العود ولفت عليه تناطر عيونه ونطق يوسف:وأنا الذي كنت أهرج والكل حولي سكوت صرت اتـ

قاطعته تهمس وهي تعزف:أنا حامل

سكت يناظرها ووقفت عزفها من استوعب وجلس يناظرها بذهول وابتسمت مها تبعد العود من حضنها:عرفت اليوم يوم رحنا نزور دلع والبيبي بالمستشفى

يوسف عض شفته بصدمه وتقدم لها:حامل ؟

هزت راسها مها وابتسم يوسف بعدم تصديق:يعني بيجيني ولد ؟

ماردت مها تناظر ردة فعله وضحك يتقدم يحضنها وابتسمت مها واخذت نفس:ماقلت لأهلي للحين

يوسف ابتعد وناظرها:طيب وحامك على العود والا اجيب لك بيانو ؟ وش تبين ؟

ضحكت مها تناظره ورفعت كفها على خده وهي مبتسمه وتقدم يوسف يقبّل خدها ويرجع يحضنها

'

دلع ابتسمت من خوف غايه اللي بعيونها تسألها:كم جلستي ساعه لين ولدتي ؟

توليب لفت وضحكت:غايه خلاص يكفي توتر

غايه:ليه ولدتي قبلي ؟ الحين انا بقعد على أعصابي

نجود:لا تخافين دلع ولدت بدري انتي طبيعيه

غايه:وين بدري صرت نص التاسع

توليب:بس شوفي علاوي الصغير يستاهل كل التعب ماشاء الله

ابتسمت دلع تناظر علي ولدها بالسرير بجانبها ولفت بتعب:متى اخرج تعبت من الاستقبال امي ما بقت احد ما دخلته عليّ يسلم

رنا:توليب ليش ما جبتي زوزي معك ؟

توليب:أريح خليتها عند أمي جيت خفيفه

لفت غايه:وحشتني مريني بكره

ضحكت توليب وهزت راسها ولفت على دلع:أنا برجع خليت عسّاف ينتظرني

دلع ابتسمت تهز راسها ووقفت توليب تخرج ومشت لمكان سيارة عسّاف وفتحت الباب تركب ولف عليها:ما طولتي

توليب:تعبانه دلع ما بغيت اطول عندها

عسّاف حرك سيارته:زين ما بكت ؟ ما كلمتك خالتي ؟

توليب:صورتها لي تلعب

ابتسم عسّاف يناظر طريقه ووقف عند بيت فارس ونزلت توليب معه وتقدم يدق الباب وفتح فارس:وش تبون ؟ ماعندكم شي ارجعوا بيتكم

ضحك عسّاف:استانست عليها ؟

فارس ابتسم:الله يحفظها تغني بالبيت وتصرخ

ابتسمت توليب ومشت تدخل مع عسّاف تسمع الزّين اللي تغرد وبيدها لعبه صغيره تهزّها بقوه

تقدمت توليب تحط شنطتها:مامي

لفت سمر عليها وتقدمت توليب لزين وناظرتها زين تسكت وتقدم عسّاف بجانب توليب يناظرها منسدحه على الارض وصرخت من شافت عسّاف ولفت بصدمه سمر على فارس:هذا صراخ الحماس عشان عسّاف !

ضحك عسّاف وابتسمت توليب:عشان دايم يشيلها

فتح يدينه يأشر لها:هيّا هيّا

رفرفرت بيدينها تحرك رجلينها بسرعه وضحكت توليب وتقدم عسّاف يشيلها بحضنه وباس خدها بقوه ولفت توليب على سمر:ما نامت ؟

سمر:لا ، كيف دلع ؟

توليب ابتسمت:حمدلله بخير وولدها بخير

فارس:والله لو يزيدون الأطفال بالدنيا ملايين مافي من زنزونه

ضحكت توليب من تقدم يناديها:زوزي

ابتسم عسّاف يناظرها بحضنه تتأمل فارس ورفع حاجبينه فارس يحرك وجهه وملامحه لها وضحكت الزّين وغطت فمها سمر:يا أمي ودنيتي

ابتسمت توليب تفتح جوالها تصورها بحضن عسّاف وفارس يلاعبها وتضحك من جديد ، ابتسم عسّاف يقبّل راسها

ولفت توليب على سمر:متشوقه متى تحبي

ابتسمت سمر:هانت شهرين ثلاثه وتحبي ان شاء الله وتصير شقيه

توليب ناظرت الزّين:تصيرين مشاغبه ؟

لفت الزّين تناظرها وابتسمت توليب تشيلها بحضنها والتفت عسّاف ياخذ شنطتها:توصون شي ؟

سمر:لا تقطعون نفقد حسّها

فارس:اي والله ان بغيتم تطلعون وحدكم جيبوها

عسّاف ابتسم:ما تقصرون

مشت توليب ترفع كف الزّين تسوي لهم باي وابتسمت سمر تناظرهم ومشت تخرج توليب مع عسّاف

'

التفت رياض اللي ياكل وناظر غايه اللي تمشي وضحك:يالبطه تعالي اجلسي

غايه:لازم اولد تعبت

رياض:متى ما نضج طلع

غايه لفت عليه:حامل ببرتقاله انا متى ما نضج يطلع ؟ رياض سولف زين لا تغثني

ضحك يناظرها ورجعت تمشي غايه ولفت بتعب تاخذ نفس:تعبت رياض

رياض:تعالي ياعيوني تعالي اقعدي

مشت وجلست بتعب وبثقل وناظرته بخوف:دلع ولدت قبلي

رياض:مامن خلاف

غايه:متى دوري ؟

رياض:الله ييسرها لا تفكرين

غايه:اتصل على عسّاف يجيب زوزي تكفى

رياض:عسّاف زين يخرج يشتغل بينهبل عليها تبينه يجيبها عندنا ؟

غايه:ترا توليب وعسّاف مو صاحين يحسبونها بنتهم لوحدهم هذي بنتي انا بعد ، اتصل قول غايه تبيها متوحمه

رياض:اي وحام الله يعافيك بطنك مترين

غايه:كلمه رياض تكفى

تنهد رياض يلف ياخذ جواله ودور رقم عسّاف يتصل عليه ورد عسّاف:هلا

رياض:وينك ؟

عسّاف:بالبيت ليه ؟

رياض:تعال وجيب الزّين معك عندنا مطالبات من السلطات العليا

عسّاف ابتسم:نايمه والله شوي تصحى

رياض:اي لا قامت تعال واجيب غداء ناكل مع بعض

عسّاف اخذ نفس وناظر توليب اللي تقدمت تجلس بالصاله:طيب اشوف واعطيك خبر

لفت توليب عليه وقفل عسّاف:رياض يبي زين

توليب ابتسمت:نروح ؟ ودي اشوف غايه

عسّاف:عادي نروح بس لا تصحينها متى ما صحت رحنا

توليب:هي غفوه بس ما بتطول بتجهز اجل انا

وقفت ومشت تدخل الغرفه ووقف عسّاف يتبعها ودخل وناظر الزّين نايمه بسريرها وابتسم يناظرها ولف على توليب اللي تنقي بين ملابسها:غايه نفسيتها تعبانه ماولدت للحين

عسّاف:دلع ولدت بدري

توليب لفت عليه:اي بس عادي يحصل تتأخر شوي

عسّاف جلس ومشت توليب تغير ملابسها وخرجت ترفع شعرها وناظرها عسّاف وانسدح يرفع ذراعينه خلف راسه يناظرها تتجهز وتحط ميك اب وقضى وقتها في الاستعداد وهو يتأملها ويناظرها وابتسمت توليب:ما طفشت ؟

ابتسم من انتهت ولفت عليه وهز راسه بالنفي

توليب:بوشو تفكر كل هذا الوقت ؟

عسّاف:احسب لك كم ساعه بيمديك ترجعين تجهزين من جديد

تقدمت له تناظره وابتسمت ومسك ذراعها وهو منسدح يناظرها واقفه:لأني بدمر كل شي سويتيه

جلست على طرف السرير تناظره وابتسم يرفع اصابعه لشعرها يلمس أطرافه وجلس يتقدم لها وهو جالسه وتقدم يقبّل عنقها وميلت راسها تبتسم وابتعد يناظرها وابتسم من ضحكت له وتقدم يقبّل ثغرها وملأ فراغ اصابعه بشعرها ينحني عليها وابتعد من سمع صوت الزّين تتنغص بنومها والتفت يناظرها بسريرها

وابتسمت توليب تناظره:صارت تقطع حبل أفكارك فيني ؟

لف عسّاف وضحك لانه فعلاً تغير حاله من سمع لها صوت خفيف وهز راسه:هذي ربح حبل أفكاري اللي أشاركه فيك

ابتسمت توليب وانحنى يقبل خدها يهمس:حبل أفكاري الجديد يجيب لنا ورده جديده ؟

رفعت جسدها عنه بذهول:عسّاف الزّين صغيره باقي اي ورده واي ورود

عسّاف ناظرها:وش المشكله يكبرون مع بعض عندي بستان كامل لهم

ابتسمت تضحك من جنونه ولفت من قامت الزّين تفتح عيونها:قامت

لف عسّاف وابتسم يتقدم لها:وردة ابوها

وقفت توليب تاخذ ملابس الزّين وناظرت عسّاف اللي شالها من سريرها واخذتها منه تحطها على السرير تغير ملابسها وتناظرها وهي مبتسمه تتأمل عسّاف اللي يلعبها ويبوس كفها ونطقت:عسّاف خلاص قوم نجهز ونروح

عسّاف تنهد ينسدح بجانب الزّين ومشت توليب تاخذ شنطة الزّين وتلبس عبايتها وقام عسّاف يغير ملابسه ومشت توليب تاخذ شنطتها وخرج عسّاف ياخذ مفتاحه وتقدم يشيل الزيّن بحضنه وياخذ شنطتها وخرج قبل توليب

'

فتح الباب وابتسم:هلا أبوي هلا بالزّين

ابتسم عسّاف من تقدم رياض يشيل الزّين من حضن عسّاف وتقدمت تدخل توليب البيت وناظرت الصاله فارغه وجلست تسمع بكاء الزّين اللي وصلها دليل خوفها من رياض

اخذها عسّاف وناظره رياض:أما شخص سيئ للأطفال

عسّاف:اي هم يحسون بالأشرار

رياض:حشّم عمرك جايني ورع ان شاء الله

عسّاف لف يناظر الزّين اللي سكتت تناظر رياض بخوف وضحك وتقدم يدخل المجلس

وخرجت غايه وشهقت من شافت توليب وابتسمت توليب:خوش استقبال

غايه:ماقالي رياض انكم وصلتوا

ابتسمت توليب توقف وتقدمت تسلم عليها وعقدت حجاجها توليب:متى البيبي بيحن عليك ؟

غايه:اسكتي اذا صار عمره ٢٠ سنه باخذ حقي منه

ضحكت توليب تجلس:ان شاء الله الله يجيبه سالم

لفت غايه من سمعت الزّين تبكي وتنهدت توليب:خايفه من رياض

غايه:ياويلي لا يكون بيخرع الولد انا ابغاه يساعدني فيه مو يخرعه

ضحكت توليب ولفت من نطق عسّاف:توليب

وقفت:جايه

مشت وتقدمت وناظرته واقف وشايل الزّين اللي تبكي وابتسمت تاخذها وايتسم عسّاف:صارت تستنكر

توليب ناظرت الزّين اللي سكتت:تعودت علينا

مشت تدخل ولفت غايه:ياويلي توته نسخه صغيره منك ياوردتي انتي وهالطوق الحلو

تقدمت توليب تحطها بحضنها وتجلس بجانب غايه وتقدمت غايه لها:انتوا صرتوا تلبسون حلق وطوق ورد وتسوون مناكير ؟ ياورده انتي

ابتسمت توليب تناظر الزّين بحضنها ولفت الزّين تناظر توليب وهمست توليب:مامي هذي خاله غايه

غايه:أم العريس

ضحكت توليب:ماراح اجبرها هي تكبر وتختار

غايه:ما بنجبرها بتحبه غصب ولدي بينحب

توليب ابتسمت تناظر الزّين ولفت على غايه:كيف دلع والبيبي كلمتيها ؟

غايه:لا والله بس رياض اخذ امه وراحوا لها

توليب:مها زوجة يوسف حامل

رفعت حاجبينها بذهول غايه:والله ؟

هزت راسها توليب:البندري قالت لي

ابتسمت غايه:ياحياتي احسها صغيره مدري ليه

توليب:على اساس انتي الحين بالاربعين

غايه:انا من يوم حملت صرت ناضجه امس من الملل غسلت المواعين هذي مو حركاتي

ضحكت توليب ولفت على الزّين اللي بحضنها ولفت على جوالها اللي يدق واخذته ترد:هلا

سمر:بسوي لنا الغداء تعالي انتي وعسّاف

توليب:سبقوكم ناس بالعزيمه

سمر:من ؟

توليب:أنا عند غايه

سمر:حسافه بغينا ننبسط شوي مع زوزي وش تسوي ؟ بموت شوق عليها

ضحكت توليب تناظر الزّين:خايفه من رياض

سمر:ياويلي لا يسقط قلبها جيبيها عندنا تموت على فارس ما تضحك الا معه

ابتسمت توليب:ان شاء الله يوم ثاني

سمر تنهدت:على هواكم

'

قفل الباب خلفهم ورجع يدخل وناظر غايه اللي تلبس عبايتها:وين ؟

غايه:بمشي هنا بالممشى القريب

رياض:غايه والله مافيني حيل

غايه:لا تجي من قالك تجي معي ، اقعد

رياض:اخاف اخليك وحدك

غايه:لا تخاف بمشي شوي

سكت رياض ومشت تخرج غايه وطلعت من البيت تمشي بهدوء وتكبّر خطواتها تبي تولد ، ابتعدت تمشي لخطوات بعيده وتعبت تستريح وتجلس على كراسي الممشى واخذت نفس ونزلت عيونها من سمعت صوت المويه اللي انهمرت عليها وبلعت ريقها برعب لانها موية الولاده وتلفتت تناظر المكان فاضي ورجفت يدينها تطلع جوالها ، دقت على رياض وهي ماسكه الكرسي برعب ولارد عليها ورجعت تكرر الاتصال مارد عليها

وقفت بخوف تمسك بطنها تدور اي احد يساعدها لكنها كانت وحدها والبيت ابتعد عنها كانت على وشك تبكي لكن اتصل رياض عليها وردت برعب:بولد رياض تكفى تعال

جمد وجهه يبعد المنشفه عن شعره:وينك ؟

غايه:تعال تكفى رياض

قفل جواله يخرج بسرعه من البيت ووقف يناظر الممشى من بعيد وركب سيارته وحرك يناظر غايه اللي واقفه بعيد ووقف عندها ومشت تركب ولف عليها:شفيك ؟

مسكت ذراعه بخوف:انفجر

جمد وجهها:منهو ؟

ضربت كتفه:كيس الولاده

رياض:خرعتيني تكلمي زين

غايه:ودني المستشفى خايفه رياض تكفى

رياض حرك:لا تخافين سهالات ان شاء الله ، بشغل لك اغنيتنا تروقين عليها

لفت عليه تناظره بجنون يشغل الاغنيه فعلاً ولف ابتسم عليها وهو يسوق وصرخت عليه:رياض بفتح باب السياره انتحر

خفض الصوت يستغربها وكملت:وش هالبرود اقولك بولد ما يكفي عرفتك بالشارع بعد بولد بالشارع

رياض:شسوي لك هذاني بوديك ومشغل لك تروقين

غايه:كله منك لو ما تزوجت ما عشت هاليوم

تنهد رياض يناظر الطريق يسمعها تكمل:ليه وافقت عليك ؟ كان انا الحين بسيارتي افرفر بينبع مرتاح بالي

مارد عليها ومسكت بطنها بخوف:ما احس بألم خايفه

رياض ناظر جواله اللي يدق يقرأ اسم عسّاف وابتسم ياخذه يرد:هلا ابو الزّين

عسّاف:رياض رضاعة الزّين نسيناها عندكم اظن دور لها بالله

رياض ابتسم:رايحين للولاده مافي وقت لرضاعتكم

لانت ملامح عسّاف بصدمه:اسألك بالله

لفت توليب عليه وهمست:انكسرت ؟

ابتسم عسّاف يناظرها وهز راسه:طيب بشرني

رياض:ان شاء الله

قفل جواله عسّاف ولف لتوليب:رايحين المستشفى

توليب ناظرته بصدمه:بتولد ؟

عسّاف:يقول

توليب:قبل شوي كنا عندهم ماكان فيها شي

عسّاف:الله العالم

غطت فمها توليب بصدمه وابتسمت ولف عسّاف على الزّين اللي تعض يدينها وانحنى يبوسها

'

ناظرت الطريق ولفت على فارس:صايرين نروح نوجّب مواليد

ضحك فارس:الله يزيد ويبارك الذريه زينه لو مافات عمري كان جبنا لنا

ابتسمت سمر:تكلم عن عمرك انا للحين صغيره

فارس:صرتي جده ياسمر

سمر:الزّين كبرتني والا انا صغيره

فارس:ليتنا نلقاها مشتاق لها كلمي توليب اسألي عنها

اخذت جوالها سمر تدور رقم توليب واتصلت تنتظر ردها

ردت توليب اللي داخله المشتل وعسّاف شايل الزيّن قدامها:هلا أمي

سمر:وينكم توته بنقابلكم عند غايه ؟

توليب:اي اي بس بناخذ ورد ورايحين

سمر:زنزونه معكم ؟

توليب ابتسمت تشوف العم لطفي اللي خرج يركض بلهفه:اي

سمر:طيب على خير

قفلت توليب وضحكت تشوف العم لطفي يشيل الزّين:دي لابسه فستان ورد مش عارفه انها ورده ؟

عسّاف:رايحين نوجب رياض

العم لطفي ناظرهم:هيه خلفت ؟

توليب:اي حمدلله جابت ولد

العم لطفي:مش مهتم خالص

لف على الزّين يبوسها:دي نور المشتل ووردة المشتل

عسّاف:نبي ورد ياعم لطفي

العم لطفي:دي تكفي

ضحك عسّاف ياخذ الزّين من حضنه ومشى العم لطفي يدخل ودخلت توليب تناظر الورد:عمو لطفي اذا في بيوني أحلى

العم لطفي:وماله

عسّاف ناظر الزّين اللي تناظر الورد وابتسم:هذا ساس ذكرياتك اذا ما تعرفين

لفت توليب وابتسمت:بيتها

ضحك عسّاف يناظر توليب ولفت توليب تاخذ الورد من يدين العم لطفي

العم لطفي:ما تغيبوش تعالوا مع الورده زوروني

توليب:ان شاء الله

مشت تخرج وعسّاف خلفها شايل الزّين وركبت توليب تحط الورد بالخلف بجانب الكارسيت

حطها عسّاف يثبتها ومشى يركب ولفت توليب تناظرها تمسك الورد بيدها وابتسمت

اخذت جوالها تفتح الكاميرا وتناظر شكلها تقرب من عسّاف وتبيّن الزّين اللي بالخلف تلعب بالورد وابتسم عسّاف يناظر الصوره وابتسامة توليب والتفت عليها يناظرها تتأمل الصوره

حرك سيارته وشغلت الاغنيه توليب:شوف زوزي اذا شغلت الاغنيه

ناظر المرايه عسّاف وهو مبتسم وشغلت الأغنيه توليب ولفت الزّين تضحك وتهز رجلينها بقوه وضحك عسّاف:انتي فانز أنغام ؟

توليب لفت عليه تلمع عيونها:تعشقها تخيل ماتوقعت

ابتسم عسّاف لتوليب ولفت توليب تناظر الزّين وهي مبتسمه:لازم تحضر معانا حفله ، عسّاف

لف عليها يناظرها:نهبتي قلب عسّاف

ابتسمت تمد كفها لكفه:ناخذ زوزي حفله معنا ؟

عسّاف:اذا كبرت بإذن الله ، نروح

ناظرته توليب:متشوقه تكبر اسمع سوالفها واشوف شخصيتها مين تشبه انا والا انت

عسّاف:انتي مني وفيني ، هي وش بتكون ؟

ابتسمت توليب ولفت تناظر الزّين تتأمل سنها وعمرها والوقت اللي تمنّته ينقضي وانقضى فعلاً والعمر ركض فيهم والسنين رافقتهم بالأيام الربيعيه تبشرهم بشارتين بورده وسقّاي ، بنت وولد آخرين

..

حطت الصحن على الطاوله تناظرها ولفت:عمّار ننتظرك على الفطور

عسّاف:ليه ماقام ، سهران أمس ؟

توليب جلست وناظر الزّين من نطقت:رجع وحده الليل

عسّاف سكت ولفت ورد عليها:ما تسكتين ؟

عسّاف:اعرف حتى لو ما علمتني

ورد:عادي ويكند ليش ما يسهر

توليب لفت تناظر عسّاف اللي ساكت ولفت من جديد على عمّار اللي دخل وناظرهم:سلام

سحب الكرسي يجلس بجانب توليب وابتسمت توليب:ورد ماما ، البيض اللي عندك مع تشيز زي ماتحبينه ، عسّاف سويت عصير رمان تشربه والا حالي عليك ؟

عسّاف:لا هاتي اشربه اللي تعصرينه من يدينك ما ينعاف

ابتسمت له تصب له ومدت الكاس له واخذه وناظر عمّار:ليه سهران أمس ؟

عمّار:ماحسيت بالوقت

عسّاف:لازم تحسّ لان وراك أمك ما نامت لين تطمنت عليك ووراك أب محرّص عليك ترجع بدري

عمّار:أبوي والله من بعد الاختبارات اني طفشت وماصدقت اخرج

الزّين:صح نزل لي قريد اخر ماده

لفت توليب:بشري

الزّين ابتسمت:A+ لاني الزّين مو اي احد

عسّاف ابتسم يناظرها وناظر ورد:وانتي ورد

لفت عليه:باقي مانزلت درجاتي

لفت توليب على عمّار اللي يفطر:لا تحاول تلهينا جاوب

عمّار:أمي والله أول سنه جامعه صعبه والتخصص صعب زين نجحت

عسّاف:عمّار تبي تزين عمرك وتمشي والا شلون ؟

عمّار:ابوي سألت خالي يوسف عن التخصص يقول صعب وما ينقدر عليه

عسّاف:انت داخله بنفسك محد جبرك قلت تبي أمن سبراني وش جاك الحين ؟

عمّار:حسيته صعب

توليب:ما يصعب عليك شي تقدر ترفع درجاتك عندك فرصه

ورد ابتسمت:أمي سمسمه كلمتني تبغانا انا وزين نروح معها سينما وجدي فارس معنا

توليب عقدت حجاجها:سينما وشو الله يهديها أمي

لف عسّاف:خليهم يروحون معها هي تنبسط معهم

توليب لفت على عمّار:وانت وش جدولك اليوم ؟

عمّار:بطلع مع عيال عمتي دلع ، وراشد ولد عمي رياض

توليب رفعت حاجبها وابتسم عسّاف يناظرهم وسكتت توليب ترجع تفطر وقاموا بعد انتهاء الفطور ولفت توليب على عسّاف اللي لا زال جالس ومبتسم يناظر الفطور:كلهم مخططين يخرجون متى نجلس ويك اند مع بعض ؟

عسّاف ناظرها:ماعرفتي ليه خالتي سمر نادت البنات وعمّار رايح مع العيال ؟

عقدت حجاجها توليب وتقدم عسّاف وابتسم:منجدك ماعرفتي ؟

توليب:لا والله وش صاير

عسّاف:اثنين ودبلتين

رفعت حاجبها بذهول تبتسم:اليوم ؟

هز راسه عسّاف وضحكت توليب:فهمت الحين مشاكسين ، الزّين جايتني قبل شوي تقول اذا بتلبسين فستان قريب البسي الابيض حلو عليك

ضحك عسّاف وابتسمت توليب ولفت من خرجت الزّين لابسه عبايتها ومعها ورد ووقفت توليب:تاخذين معك الشتله تودينها المشتل ؟

الزّين:بس يغير التربه ؟

توليب مشت معه:اي ما تنفع هذي ابد

خرجت ورد خلفهم ووقفت توليب بالحوش اللي صار جَنّه من الخَضار والربيع والورد والزهر واخذت الشتله:محمد ولد العم لطفي هناك هو بيعرف

الزّين اخذتها:حاضر

ابتسمت توليب:ما غششتني خليتي ابوك يعلمني ويكتشف اني ناسيه

ضحكت ورد:عرفت ان ابوي مستحيل ينسى كل سنه ما ينسى

ابتسمت توليب لهم وتقدمت ورد تبوس خد توليب ومشت وتقدمت الزّين تبوسها وناظرتهم توليب:بشويش بالطريق

هزت راسها الزّين وخرجت مع ورد وركبت ورد بجانب الزّين اللي شغلت السياره تحط الشتله ورا

ورد:نروح نشوف هدايا لامي وابوي ؟

الزّين:كل سنه يصعب الاختيار هالمره وش ناخذ لهم ؟

ورد رفعت كتفها بحيره:كلمي عمّار يقابلنا هناك نختار مع بعض

الزّين:بمرّ المشتل وبعدها محل دبل تي كلموني امس

ورد:استشيري ابوي بديكور المحل الجديد هو يفهم

الزّين:امي عطتني المشروع بالكامل لاني قده ما ابي اطلب من ابوي شي ابي يعرفون اني قد المشروع

ابتسمت ورد:امس شفت بنات خالتي البندري وعمه نجود مصورين بالمحل

ضحكت الزّين:اي انا عطيتهم خصم

وقفت عند المشتل ولفت على ورد:انتظريني

الزّين نزلت واخذت الشتله من الخلف ودخلت المشتل وتقدمت تدور محمد ولد العم لطفي ولفت برعب من خرجت من قدامها قطوه تركض وطاحت على الخلف الزّين بخوف وطاحت الشتله حوالينها ورفعت راسها برعب من خرجت القطوه من المشتل وناظرت اللي قدامها بعصى كبيره رافعها وبلعت ريقها وجمد وجهه يناظرها بصدمه ولفت الزّين على محمد اللي ركض لهم:حصل ايه ؟ خرقت ؟

ناظر الزّين ولف يناظره واقف ونزل العصى يستوعب ولف عليها:السموحه

رفعت عيونها تستوعب أكثر من ثوبه وكلمته جنسيته وتفهم انه سعودي وقفت تنفض عبايتها وناظرت الشتله ولفت لمحمد:كنت بغيرها

محمد:ايوه العم عسّاف اتصل يشرح لي هقيب لك قديده

مشى محمد يدخل وناظرت يدينها والتراب اللي خدش باطن كفها وجروح اصابعها ورفعت عيونها من نطق:كنت اساعد العامل القطوه دمرت الورد

ماردت عليه تناظر يدها وهي عاقده حاجبينها ولفت عليه تناظره وصدت لمحمد اللي مد لها الشتله ومدت يدينها بتاخذها واخذها من محمد:غسلي يدينك انا اخذها عنك

محمد:تعالي تعالي حيزعلنا العم عسّاف على اللي حصل

مشت الزّين ومدت كفوفها تحت المويه عند الورد تغسل كفوفها ولف محمد وابتسم:ده سند ، زبون دايم بيزورنا

رفعت عيونها الزّين على سند ولف محمد:دي بت العم عسّاف صاحب المشتل واللي كان بيشتغل باباي عنده

الزّين:كيف عمو لطفي ؟

سكت سند يناظرها ولف محمد:الحمدلله كويس بياخد كم ساعه بيمشي ويتحرك بس كبر اوي مابقاش عنده قوه

الزّين:ان شاء الله نزوره قريب

محمد ابتسم يهز راسه وتقدمت بتاخذ الشتله ومشى سند قبلها يخرج من المشتل ولفت ورد وعقدت حجاجها ولف سند:سيارتك ؟

هزت راسها وتقدمت يفتح الباب بالخلف يحط الشتله والتفت عليها وناظرته وهزت راسها بتوتر تفتح بابها وتركب ونطقت ورد:مين هذا ؟

حركت السياره الزّين وناظرت اصابعها ونطقت ورد:وش صار على يدك ؟

الزّين:طحت بالمشتل من قطوه

ورد:ياحياتي انتظري اعطيك كريم ترطبين يدك

فتحت شنطتها تاخذ دبل تي ومدت للزّين واخذته زين وهي تسوق تمسح يدينها وناظرت الطريق

'

بمكان بعيد وقف سيارته بجانب السيارات يوقف قدام المخيّم ولف على توليب:عمّار كان ورانا وينه ؟

توليب اخذت جوالها تتنهد ونزلت ومشى عسّاف يناظر خلفه ووقف عمّار سيارته خلف سيارة أبوه ونزلوا البنات وناظرهم عسّاف:ليه تأخرتم ؟

الزّين رفعت القهوه اللي بيدها:عزمنا عمّار وما صدقنا يدفع شي

ابتسمت توليب وتقدمت ورد:ما نسيتك جبت لك باشن فروت

باستها توليب ومشت تدخل معهم وابتسمت الزّين من شافت البنات وتقدمت خلف توليب تسلم على دلع ونجود وأريام وبناتهم وناظرت وجود غايه ومها

وضحكت من سلمت على البندري:جابوا لك البنات من المنتج الجديد

البندري:رهيب يازين رهيب اتوقع بيكون سولد اوت قريب

ضحكت الزّين ومشت تسلم على بنات البندري وجلست وتقدمت توليب تجلس بجانب غايه ولفت عليها غايه:ما قابلتم العيال برا ؟

توليب:لا بسلامتهم داخل مع ابوهم

غايه:ارسلت لهم يجيبون لي اصياخ ابي اسوي كباب بس محد رد مو منهم من رياض علمهم البرود

توليب:كلمي راشد

غايه:كلمت راشد وريّان ومشعل محد يرد ولا كأني امهم

توليب:بشوف لك عمّار يكلمهم

اخذت جوالها توليب تدق على عمّار ولف عمّار على العيال:جنبي كلهم

لف راشد عليهم وهز راسه عمّار:ابشري

قفل جواله والتفت:امك تتصل عليكم محد يرد

راشد اخذ جواله من جيبه:اح صامت والله

ريّان:رديت عليها تبي اصياخ كباب

راشد:انا بجيب واعطيها

مشعل ضحك:بيلحق يشوف المعزبه

راشد رفع حاجبه:خطيبتي

ابتسم عمّار ومشى راشد يخرج والتفت ريّان يسمع سوالف أبوه رياض مع ناصر ولف على عمّار يضحك:ابوي ماخذها صحبه مع عمي ناصر عشان راشد خطب بنته

عمّار ضحك يناظر رياض والتفت على ابوه عسّاف يشوفه يتكلم مع الجميع:والله خالتي حنان تعبانه بالمستشفى لها مدّه يقولون بيسوون لها عملية قلب مفتوح ومتنومه ويوسف عندها

ضيدان:لا ياشيخ !

عسّاف:ان شاء الله انها طيبه

ناصر:زرتها انا وعديلي بندر كل واحد اخذ مرته ورحنا نزورها ، تعبانه ما تحس بأحد

بندر:الله يقومها بالسلامه

لف ريّان يدق ذراع مشعل يشوف سيارة راشد اللي وقفت وضحك من توجه راشد يعدل شماغه ودخل قسم النساء

دق الباب وهو ماسك جماله يتصل على غايه وردت وهي تضحك:هلا

راشد:أمي انا برا

غايه لفت تناظر بنت البندري اللي بجانبها:اي طيب

ابتسمت تقفل جوالها وناظرتها:شهد وأنا خالتك خذي من راشد الاغراض

لفت الزّين تضحك ولفت شهد على البندري اللي هزت راسها لها ومشت تعدل شكلها تخرج

وابتسمت البندري تلف عليهم:طاير عقلها أمس كانت معه برا

غايه:طاير عقلها ؟ شتقولين عن الخروف اللي عندي

ضحكت توليب:غايه تكفين بشويش على العيال والله انهم محترمين

غايه:عطينا ورد لواحد منهم أجل

تلون وجه ورد بالحيّا وضحكت الزّين تلف تكتم صرختها وابتسمت توليب:مو مستعجله على بناتي ماشبعت منهم

مها:اي والله البنات نعمه مو حاسه فيها غايه

غايه:امدحي بناتك بدون تسقطين عليّ

ضحكت مها ووقفت غايه تتبع شهد وناظرت راشد اللي متكي على الباب مبتسم وتقدمت:ماشاء الله قعده رومانسيه

اعتدل بوقفته راشد وضحكت شهد بإحراج وناظرته غايه ترفع حلجبها وتنحنح راشد ومشت شهد تتركهم وتقدمت له تمسكه مع اذنه:ادق عليك ماترد ليه

عقد حجاجه راشد:يمه تكفين لا تلف وتشوفني كذا

غايه:محشوم ما بقولها اني للحين اربي فيك

راشد:أمي والله ما انتبهت لجوالي

غايه:روح ناد لي اخوانك بنتظرك بسرعه

مشى راشد يدخل ولف عليه مشعل واشر لهم يجون ولف مشغل يدق ريّان ووقفوا يمشون ودخل مشعل:وش هالحلاوه أم راشد ؟

تقدمت تضربه على راسه وضحك راشد ومسكت اذنه:امكم تدق عليكم ليه مافي واحد يرد ؟

ريّان:امي انا طافي شحن معذور

لفت عليه:تعال انت قرب مني

تقدم ريّان ومسكته من اذنه وضحك مشعل وناظرتهم غايه:طالعين على ابوكم بهالإهمال

راشد:السموحه أمي ما تكرر وعد

ابتعدت تناظرهم بحده وهزت راسها:اذلفوا الحين

تقدم يبوس راسها ريّان يتبعه مشعل وابتسمت لهم وقفلت الباب خلفهم تدخل من جديد

تسمع السالفه اللي دخلت عليها ولفت دلع عليهم:أم البنات الوحيده بيننا البندري الباقي مشكلين

البندري:مرتاحه حمدلله بناتي غير غير

أريام:غير لدرجة كل العيال حاطين عيونهم عليهم بس مدري من بيسبق ، رياض اخذ وحده والباقين من نصيب من

نجود:احرجنا البنات طالعوا وجيههم

ضحكت توليب تناظر البنات ولفت على الزّين تهمس لها:محمد ولد العم لطفي كلّم أبوك قبل يومين وقاله سالفة القطوه وما القطوه ، ما علمتيني

بلعت ريقها الزّين ترفع كتفها:ما حسيت لازم اقول

توليب ابتسمت:محمد نسخة عم لطفي يقول كل التفاصيل ، سند ساعدك ؟

توترت ترفع شعرها:ما اعرفه

سكتت توليب تناظر ملامحها وصدت تبتسم بدون تتكلم

البندري:توليب منجد بتروحون مصر ؟

توليب:اي ان شاء الله بنزور عم لطفي ونتفقده

غايه:مامات ؟

توليب:اعوذ بالله لا تفاولين عليه

غايه:مافاولت بس كبر

توليب ناظرت البندري:انتي علميني كيف أمك ؟

أريام:رحنا لها نزورها تعبانه وتشتكي ونفسيتها زادتها هي لو تتحسن نفسيتها بتطيب

البندري:تعيد وتزيد في الماضي تسأل عن خالتي هيله الله يرحمها وعن أبوي الله يرحمه وشكلها خايفه

نجود تنهدت:الله يرحمهم

مها:محد تخطى ابد حتى يوسف للحين على طاري أبوه

بلعت ريقها توليب تسكت ونطقت أريام:الحمدلله على كل حال

غايه:بس لهم سنين الواحد يدعي لهم ، اذكر أبو توليب مات وتوليب حامل في عمّار وأمكم بعده بكم سنه العمر مشى فينا

توليب:لا تذكرينا بالتفاصيل الله يرحمهم كلهم

غايه:امين يارب

'

جلست على طرف الكنبه وناظرت عسّاف اللي جالس:أبوي عطيتهم خبر بنجي ؟

عسّاف:قلت لمحمد ان شاء الله انه عطاهم خبر

توليب:كلمت زينه عندهم خبر

عسّاف ناظر ساعته:وينه طيب محمد الحين ؟ تأخر

لف عمّار يناظر حوالينه وناظر محمد اللي معه شنطته وبجانبه شخص اخر:ابوي هذا هو

لف عسّاف ولفت الزّين ولانت ملامحها تناظر اللي مع محمد ولفت ورد عليها وابتسمت ، ناظرتهم توليب بهدوء ووقف عسّاف:وينك يامحمد

محمد:معلش اصلي معرفش اوي في المطار ، سند قا معايا يساعدني

لف عسّاف يناظر سند ومد كفه سند:كيف حالك ياعمي ؟

صدت الزّين بعيونها تناظر المطار وهز راسه عسّاف:هلا والله ماقصرت جبت محمد والا كان طارت الطياره

سند ابتسم ولف لمحمد:نعين ونعاون

لف سند وناظر عمّار اللي وقف وسلم عليه ولف سند على عسّاف:أنا أشتغل مهندس أمن معلومات في ينبع الصناعيه هنا أي خدمه أنا تحت أمرك ياعمي

ابتسم عسّاف ونطق عمّار:أمن سبراني انت ؟

هز راسه سند:الله الله

عسّاف:يالله زين لقيت لك احد يعاونك في التخصص ، عمّار ولدي اول سنه بالتخصص

سند لف لعمّار يطلع جواله:ابد في خدمتك كلمني اي وقت ، عطني اسجل رقمي

مد جواله عمّار ولفت ورد تناظر سند وتناظر الزّين اللي ساكته ووقفت توليب وهمست:عسّاف !

عسّاف:اي اي مشينا لا نتأخر ،ماقصرت ياسند

سند:بالخدمه ياعمي

مشت الزّين مع عسّاف وناظرت سند اللي واقف ومشوا كلهم لبوابة الرحله وطلعت الزّين لمقعدها تجلس ولفت على ورد اللي تقدمت لها من مقعدها:اقولك

الزّين:اعرف وش بتقولين خلي تفكيرك في نفسك

ورد ضحكت تغطي فمها ولفت لعمّار اللي وقف عندها:سماعتي عطيني ابيها

ورد:قلت ما تحتاجها خليتني اشيلها معي عشان تاخذها؟

عمّار:اي لانه بكيفي وحقتي

ورد لفت للزّين:ولا كأني اخته الكبيره

عمّار:سنه وحده مسويه كبيره هاتي بس

تقدمت توليب من مكانها:شفيكم ؟

اعطته ورد السماعه ومشى يجلس على مقعده ولفت توليب على عسّاف تناظره تعبان:ما فطرت قبل نخرج

عسّاف:ماكان في وقت الحين نفطر

توليب اخذت شنطتها تفتحها ومدت له توست بالمربى مغلّف وضحك عسّاف يهز راسه ما يستغربها وابتسمت توليب:على بالي دايم حتى مع الثلاث هذولا

ناظرها عسّاف وهو مبتسم وتقدّم يناظر الزّين وورد اللي كل وحده فيهم ماسكه جوالها والتفت على عمّار اللي لابس سماعته فوق كابه ومعه جواله

رجع ظهره يفتح التوست وياكل منه ونطقت توليب:أمي كلمتني نودعها بس ما امداني الحين تزعل

عسّاف:نراضيها ويرضيها فارس ما تقعد زعلانه

ابتسمت توليب:البنات يراضونها انا ما بتدخل ، تحبهم اكثر مني

عسّاف:لا رجعنا افكر انادي ابوي ورياض وخواتي نتجمع كلنا

توليب:اللي تشوفه

لفت توليب ترتاح لوقت طويل والتفتت على عمّار اللي نايم ولفت على عسّاف:عمّار من يشبه بنومه هذا ؟ لانك كنت دجاجه

ضحك عسّاف يرفع راسه يناظره نايم ولف يشوف محمد خلفهم نايم ورجع ناظرها:ماهو وحده نايم

لفت توليب من نادتها الزّين وتقدمت توليب لها وابتسمت الزّين:اخذت معي بوكسات دبل تي تتوقعين يحبونها لو اعطيهم ؟ يعني عم لطفي وصفصف وزينه وبناتها

هزت راسها توليب تبتسم:اي اكيد وزين تسوين

ابتسمت ترجع محلها ولفت توليب من هبطت الطياره بمطار القاهره ونزلوا مع بعض ولف عسّاف على محمد اللي مبتسم:ريحة أهلك

ضحك محمد يستعجل بمشيته:مش مصدء

تقدم عمّار ياخذ من الشيبس اللي بيد ورد ويحطها تحت جناحه ياكل معها وهم يمشون بالمطار

عسّاف:قلت لمن يجي ياخذنا ؟

محمد:ابني

عسّاف التفت يناظر الزّين اللي خلفه:زين خلصي امور الشرايح والارقام

هزت راسها الزّين ولفت توليب:عمّار روح معها

عمّار:امي والله ما افهم خلاص هي تحلها وتجي

تنهدت توليب تنتظر وضحك محمد من شاف ولده وتقدم له يحضنه وابتسم عسّاف وتقدم له الولد يسلّم على راسه ورفض عسّاف:لا والله انت زي ولدي

محمود:متشكر ياعم عسّاف خيرك علينا وعلى قدو

عسّاف:ما سويت شي ولو يبي محمد افتح له صيدليه في السعوديه فتحت له بس هو يبي مشتل ابوه

محمد:دي وصية أبويه

لف عسّاف للزّين ياخذ منها ورفع ذراعه على كتوفها:عشت

ابتسمت له تحضنه ومشت معه يخرجون وركبت بالسياره بالخلف مع ورد وركب عسّاف مع توليب وعمّار بالأمام وبالقياده محمود بجانبه محمد

لفت توليب على الزّين وهمست:ليه اي شخص يقابلك تعجبينه ؟

رفعت عيونها الزّين على مراية محمود اللي يسوق ولفت على توليب وضحكت:لاني أشبهك

ابتسمت توليب تحضن ذراعها ولفت تناظر القاهره من شباك السياره لين وصلوا للحيّ تسمع ضجيج البيوت والناس وصوت صخب الأغاني المتنوعه وابتسمت ورد:كذا اعرف اننا بمصر

ابتسم عسّاف بفتح شباكه ويناظر الحيّ ونطق:نفس كل شي يامحمود ما تغير شي بالمكان

محمود ابتسم يوقف عند البيت:ماغبتوش اوي

فتح الباب عسّاف ينزل:يارب

رفع عيونه على بلكونة البيت وابتسم والتفت لهم من نزلوا ومدّ كفه لتوليب تمسكه ودخل معها ودخلوا البنات مع عمّار معه وطلع يدق الجرس وفتحت زينه وابتسمت:اهلاً وسهلاً اهلاً وسهلاً نورتوا الحته كلها

تقدمت توليب تسلم عليها:حبيبتي النور نوركم

دخل عسّاف البيت ولفت زينه عليهم:ياماما ، ياصفصف تعالي بصي

خرجت صفيه تمشي بهدوء وتعب وابتسمت:ابني

ابتسم عسّاف وتقدم لها يقبّل يدها وناظرها:كيف حالك ياصفصف ؟

صفيه هزت راسها تناظر البنات وعمّار:دول مين ؟

زينه:ياماما دول ولاده

ابتسمت توليب لان صفيه نسيتهم رغم انهم زاروهم بكثره

تقدمت الزّين تسلم عليها:ازيك ياخاله ؟

صفيه لفت على زينه:دي بتتكلم زينا

ضحكت الزّين ودخل محمد يرفع صوته:سلام عليكم

مشت صفيه:ياحبيبي

تقدم يحضنها وابتسم عسّاف ولف على زينه:بابا قاعد هنا

مشى عسّاف ودخل معه عمّار وابتسم عسّاف يشوف العم لطفي اللي بالبلكونه جالس ويناظر البيوت والبلكونه فيها شتلات ورد متنوعه وتقدم عسّاف له:سلام عليكم

التفت العم لطفي يناظر عسّاف وسكت يتأمله وابتسم عسّاف:عسّاف

ابتسم العم لطفي:حبيبي

تقدم له عسّاف ينحني ويسلم عليه وناظره:كيف صحتك ؟

العم لطفي:انت كنت فين ؟

عسّاف:كنت في ينبع

العم لطفي:مش شامم فيك ريحة سقاير

عسّاف:لا بطلنا ابشرك من سنين

العم لطفي:الله ! انت تقوزت دبل تي ؟ امك لسى مش راضيه ؟

ضحك عسّاف يلتفت لعمّار اللي واقف:هذا ولدي ياعم لطفي انت نسيته ؟ كنت تلعب معه طاوله هنا

العم لطفي عقد حجاجه:ابنك ؟ انت تقوزت بت خالتك ؟

دخلت توليب وابتسمت:عمو لطفي

لف وابتسم:دبل تي

تقدمت له وابتسمت:كيفك ؟

العم لطفي:انتي تقوزتي ؟

هزت راسها توليب ولفت على البنات:هذولا بناتي وهذا عمّار

لف يتأملهم العم لطفي وضحك عمّار:ياجدو ياجدو انت نسيتني والا مسوي نفسك ناسي عشان خسارتك ؟

ضحك العم لطفي من تذكره:اه منك انت

تقدم عمّار يسلم عليه وجلس بجانبه على الكرسي وسحب الكرسي الاخر عسّاف يجلس ودخلت زينه:حتعّودوا هنا ؟

توليب:بجي اساعدك زينه

زينه:لا ياحبيبتي مافيش حاقه كل شي قاهز ارتاحي

توليب:زين ورد ساعدوها

زينه:الوردات دول عادي

مشت الزّين مع ورد يدخلون ولف عسّاف يسحب الكرسي الاخر لتوليب يأشر لها تجلس بجانبه وجلست تبتسم واخذت جوالها تطلعه ودقت على سمر وردت سمر تفتح الكاميرا توليب:وصلنا

سمر فتحت الكاميرا:اعرف توقعت

توليب:أمي والله تأخرنا على الرحله

سمر:وريني ورداتي اشوف

عمّار تقدم براسه:أنا سمسمه ماتبيني ؟

سمر ابتسمت:انت عيوني الثنتين

ابتسم عمّار ورفع راسه من دخلوا البنات:هذولا الوردات

ورد:مين ؟ أم سمسمه ؟

سمر:تعالي اشوفك ياوردتي

تقدمت ورد وابتسمت:وحشتيني وين جدو فارس ؟

سمر:خرج يصلي ياخذ ساعتين لين يوصل من رجوله ما يمدي يوصل الا وأذن

ضحكت توليب:ياحياتي طيب يروح بالسياره مع السواق

سمر:ما يبي ، كبر وصار يطلب كثير

الزّين:ياحياتي ياجدو

سمر:وين حبيبي عسّاف ؟

لفت الكاميرا توليب وابتسمت وتقدم عسّاف:تمناك معنا

سمر:لا خلني محلي لا خرجت اوجعتني ركبي

عسّاف:ماتشوفين شرّ

توليب:أمي ما بطول عليك دقيت اطمنك

سمر:طيب استودعناكم الله

قفلت توليب وجلس عمّار بجانب عسّاف على الطاوله وخرجت زينه بالمحاشي تحطها على الطاوله:دي إشراف ماما صفصف

الزّين استنشقت الريحه:اهخ خيال أشتاق لهذا الطبخ

توليب:يعني البيض حقي مو حلو ؟

ضحك عسّاف ورفع كفه على كتوفها:انتي الخير كله لا تسمعين لها

ابتسمت توليب وضحكت الزّين وجلست زينه بجانب صفيه ومدت ورق العنب والمحشي ودخل محمد يسلم على لطفي ويجلس معهم ودخلوا عيال محمد وزينه يجلسون تحت صوت أم كلثوم يشدو

' سنين ومرّت زي الثواني في حُبك إنتَ

وإن كنت أقدر أحب تاني ، أحبك إنتَ '

سهى عسّاف يسمع كلمات الاغنيه والتفت يناظر توليب اللي تحط له بالصحن وتمد له عشان ياكل وناظرت نظراته وابتسمت له تفهمه وتعرف إنه يسمع الكلمات وصوت ضحكهم وتعليقاتهم وتستشعر هي أيضاً وين أول نقطه بينهم ووين أنتهى السطر الأخير

عرفت إن وفرة شوك الورد تعني وفرة الورد دائم ، وإن الزمان ممكن يكون بستان لو كان الحُب برفقه مثل رفقة عسّاف لها

التفتت تنتبه لنظرات عسّاف لعياله وعقدت حجاجها وغطت فمها بذهول من خرج عمّار شايل بوكيه ورد والزّين معها كيكه وورد حضنت توليب وابتسمت زينه تغني وهي تصفق مع عيالها وناظرت الكيكه توليب تستوعب عيد ميلادها وضحكت بإحراج تتلون ملامحها ولفت لعسّاف تبتسم وتعض شفتها وتقدم عمّار يبوس توليب ورفعت كفها توليب عليه من حضنها من الخلف ورفعت جوالها الزّين تغني معهم وتصور توليب ووقف عسّاف يبوس راس توليب وابتسمت توليب ورفعت عيونها على العم لطفي وصفيه والبقيه ولفت زينه:انا حصوركم اوئفي مع باباكي

فتح ذراعه عسّاف من مشت الزّين تحضنه ووقف عسّاف عند توليب وبحضنه الزّين وورد خلف توليب تحضنها وعمّار واقف معهم وتوليب شايله الكيكه وابتسمت زينه تصورهم

وتوقفت الحكايه بعد هذي الصوره تنسج عنها اخر سطر من كتاب ألف ليله وليله تختمها بروايه لا سمعها شهريار ولا حَكت شهرزاد عنها ، فصل الربيع الأروع اللي صنع حكايه من الودّ والورد ، استراحت نجوم القسوه والجفاف وأشرقت شمس الطمأنينه تنهمر بشروقها سيل على كل بستان تسقيه ترويه وتزرعه حنان وحنيّه ، حكايه لو تنروي للنخيل فاض من تحت النخيل أنهار وفي النهايه والمختصر والسطر الموجز الأخير .. عسَى أن تجد ما تحبه كما تمنيته ، أن تأتيك المسرّات من حيث لا تحتسب ، أتمنى بإن الروايه كانت بمثابة الحلم الذي لم تنله والرساله التي لم تصل والعذر الذي لم يكتمل والصوره التي لم تلتقط والربيع الذي لم يحلّ بعد .

-

لا يهمّ إن سبقني أحد في شيء ، أنا هُنا لي طريقي ، خطواتي ، أحلامي ، أسير وقتما أريد وأرفض وأقبل ما أريد ، اتأخر ، أتوقف ، أغيّر وجهتي كيفما أريد ، عينايّ لا تلمح الا خُطاي وعقلي لا يسع أكثر من شأني .

تم بحمدلله ختام روايتي الثالثه ، رواية الربيع

« لا سمعها شهريار ولا حَكت شهرزاد عنها »

نُسجت على خيوط الخيال إن وجدتم تشابه مع الواقع فهو مقصود .

١١ - يناير - ٢٠٢٤ م

شروق