تحميل رواية «خذ بيدي» PDF

من كتابات

زهراء العراقية

او تراتيل حواء

سابقا و اقسمت على من كتبها أنها حقيقة ما عشت انا مجردة من الخيال اساسا لو كنت املك ذلك التعبير القوي لكنت كتبتها بنفسي، و كتبت ووصفت اين كنت أنا في عالم الوعي واللاوعي على ارض هذا الدنيا او خارجها

اهي حقيقة أم زيف خدعني فيه عقلي المشؤوم  اهو ضعف مني او ما يسمى بالقدر، تراني صامتة وسط نظراتي الجانبية يحسبها البعض نظرات مرعبة لهم لكن في الواقع كانت استنجاد ونداء صامت وعويل خائب مترجي أن يحبوا الى الخارج من غير القماط الذي كسر اضلعي  كنت كالبركان المحمل بالحمم النارية ليتها تخرج ويرتاح ذاك العقل المرهق ، كل ما حاولت ان اصرخ تكتم صرخاتي تلك العجوز الشمطاء او يضربني ذاك القزم ذا الانياب الحادة على فمي فأعجز عن حركة فكي وترتعش اضلعي  واصمت !!!... بعد أن يأس حالي وسلمت اشرعي لتلك الشياطين تسلل نوره الى اوعية قلبي كأنه ياخذ بيدي ويشد علية لأقاوم من جديد كم هو غفور رحيم إأستحق  أنا الرحمة ؟!  على كل حال شكرا لك يا الله  وشكرا لمن بعثته لي عندما رأيته قلت

  -خذ بيدي   

● من كتابات زهراء العراقية ●

مفهوم الوحدة هو أنك تعيش و بداخلك فراغ كبير، محد قريب على قلبك رغم أنك تجلس مع مجموعه من الناس ؟ لكن هذا مو معناه أنك وياهم. تقارب الاجساد ما يعني بينكم تخاطر و انسجام ،،كل واحد بينا عده قصة كاتمها ببالة وعايش بيها بعيد كل البعد عن المحيط هذي هي الوحدة ،، جالسة على عتبة صبة الحديقة الكبيرة الموجودة بالبناية واعيوني اتروح شمال ويمين كانت الدنيا مصحية اليوم ومابيها غيوم ،اكتظت علينا بالايام السابقة بالمطر وماكدرنا نطلع من غرفنا اليوم بعد ما طلعت الشمس طلعنا كلنا للحديقة ونفتر بالممرات المسموح النا نمشي بيها اني كنت ماخذتلي زاوية وگاعده كافية خيري شري حسيت بنسمة برد انتبهت لروحي القمصلة ما سادتها حاولت اسد السحاب وادفي روحي ايدي ترجف وجااافه حيل وصايره عليه طبقة جوزية اللون مغطية بياض كفي اني اسميه مشك او تسلحف من البرد ،سديته كان قوي كلش لان القمصلة حربية لونها زيتوني طوخ وبيها گبع حطيته على راسي رغم وجود الشمس لكن البرد كان قارص اهلنا اهل قبل يسمون هاي الايام غرور المعيدي ما اعرف قصته شنو بس همه هيج يسموها طبعا اني كنت من الهادئين حالتي خاصة وغريبة يمكن

شفت اثنين ممرضات لافات احرامات فوق عليهن ويفترن بين المرضى بذاك الوقت كانن يلبسن قميص ابيض من غير ازرار ؟ مع سروال ابيض بس لان بارده تلگيهن لابسات من فوقة الوان من قماصل وقبابيط او ترواكه حياكة كان بذاك الوقت الشغل اليدوي متروس بالسوق او همه نفسهم النساء يحيكون او يخيطون عام 2001 شتويته كانت بارده حيل علينا احنه يعني الصوبات مكانت متوفرة في شماعية او مستشفى الرشاد حتى الاغطية نعاني من نقص كل ما ازدادت اعداد الحالات حتى بالادوية كان نقص كبير بحيث يلجأون الى الصدمات الكهربائية من تتفاقم الحالة بسبب هجر الدوة عن الجسم ويمكن تبقى المريضه يومين ما تكدر تحجي مدري من مفعول الضربات على القلب لو من الخوف لو هو فعلا يهدأ ؟؟

المهم اني كنت اخاف منه كأنه صالة الكهرباء فلم رعب بالنسبة الي بحيث أحارب الي يوسوسون بدماغي حتى اجنب تجربتة مرة ثانية .

اثناء مراقبتي للمريضات الي وحده تركص والثانية تغني والثالثة تهز براسها كأنها تظن احد دا يلعب بشعرها واصيح وخروا من هينه

و اكو وحده لهسه معالم وجهه محفورة براسي اصيح *انا المسكينة انه انه المسكينة* قصتها هي فصلية هذا الي اعرفة من دردشة الممرضات انها انطوها اهلها فصلية والنتيجة فقدت عقلها واهنا هي ساعة تغني وساعه تبجي اتكول اريد اوليدي شنو قصة ابنها الله اعلم !!

اما اني ناسية مدري متناسية قصتي مع الهم الي فوك راسي يراقبني حتى ما انطق !

وساكته بس اوف من الممرضات الي يلگن ونستهن بالنبش بقصص المريضات ويوگفن يسولفن يظنن الي يسمعهن اطرش او رايح بغير عالم خاصة اني اباوع منا ومنا من ثلاث أشهر كمت ما اباوع بخلقة البشر حتى لا أتأذى وأذيهم وياي .. كانت وحده منهم سمينة حيل معروفه باللغوية تمضغ بعلكها واتباوع الي واتحچي مع الثانية الي مبينة جديدة علينا او كانت بغير عنبر ما اذكر لامحتها؛اني باوعت الها بنظرة جانبية خطافية من سألتني عن اسمي ودنگت راسي

الممرضة السمينة كالت الها

-يمعودة هاي ما تحجي صارلها اهنا اربع اشهر من جابتها مرة وشمرتها علينا

الثانية گالت وهي متأسفة على حالى

-يا خطية دشوفيها اشلون اتخبل جنها الاميرة اديانا اعيونها تفلج الكلب والله حرامات

جاوبتها السمينة وهی اتهز ايدها

- يعيني هاي چانت صاحية كلشي مابيها بس اااخ من الزلم

وعضت طرف شفتها السفليه بأسنانها

كانن يحچن وكل ظنهن اني ما اسمع ولا اصغي الهن

- اي بس ليش هيج صار بيها ما اتعرفين قصتها

گعدت السمينة جواري اطرافة المحشوة بالشحوم وجعوها من الوگفة

واشرت للثانية تگعد يمها وطلعت من جيبها سنارة و خيط حياگه ملفوف ببكرة صغيره

وگالت وهي اطلع صوت مزعج من علكتها

-يختي هاي جانت ربة بيت نادرة اتگول المرة الي جابتها لهنا تخبل ويتيمة ورة ما امها ماتت رجلها شبعها ظيم وناس اتكول هو كتل امها واخذ البيت مالها وبعد وفاتها هاي المسكينة اتخبلت وذبها بالشارع ناس گرايبة جابوها لهنا خطية محتارين بيها بس هي صارت كلش حالتها ومنو يتحمل منو يمعوده بهذا الزمن ؛؛

هزت ايدها وبرطمت شفتها وهي اتباوع للمرضة الثانية الي اضاهر قصتي أثرت بيها ودمعت عينها هسة تيقنت هاي جديدة اهنا لأن الي يشتغل اهنا لمدة سنة اعتقد اتموت انسانيته؟؟او يتخلى عنها حتى يگدر يشوف ويغلس !

كملت السمينة كلامها وهي لافة الخيط بالسنارة وتعمل بية دوائرة لحتى اتحوك شي ما ركزت عليه شنو وكالت

-چنا حاجزيها لان كلش خطرة اول ما أجت بس بعد الصدمات انعدلت وصارت احسن بس كون ما نگطع العلاج الي شح ولو عدها اهل يستلومها كان طلعوها منا بس شوفي هذا اليتيم

الممرضة الجديدة سكتت وبس تتأمل بوجهي اتقربت عليه واني گلبي صار يرجف اتمنى لا تمد ايدها لا اقطعاها الها ؟

السمينة گالت الها محذره

- يمعوده لا تتخبل علينا محد يگدر يلزمها اجن علينا

ابعدت ايدها الممرضة وگالت

- اي بس ليش هيج قاصين شعرها باتريه بتر خطية

- وصخه حيل يمعوده عوفيهن هيج وما خلصانين من عدوات الگمل والجرب ..

كامن اثنينهن وراحن من امامي واني بسبب كلامهن رجعت بيه ذاكرتي لأيام قبل والوجع بدة يهتز بصدري بتذكري ايام اصباي !!!!

عام 1999 شهر آب

كنت لازم مراية او في صحيح العبارة عن كسر مال مراية قديمة بيدي واباوع لوجهي من خلال فطورها كرصت خدودي حييل حتى يصيرن حمر و يوردن چنت اعيش داخل حلم جميل واني متخيلة نفسي اطلع من سجن امي الى عش الزوجية البس واتمكيج على راحتي وزوجي يطلعني ماكو لا ماكو ابد كلمة لا ،ماكو احتصار وجوع و احتياج ... بهاي الايام كثرت نظراتي لنفسي بالمراية أتأمل عيوني الزرق صحيح مو وساع لكن لونهم بيه جاذبية كبيرة انفي طويل بعض الشي لكن مو نشاز ومو مدبب تلمست الشامة الصغيره الي على أنفي

وكلت

-اوف لو ما انتي موجودة احسن شصير يعني لو انت على يم عيني لو يم شفتي عفتي الأماكن كلها وطفرتي على خشمي .. ضحكت لنفسي بالمراية وكلت

- ياترى من يشوفني اعجبه ؟لو لا .. بلكت اعجبه اني بيضة حمرة ومو سمينة وحتى شعري اشكر اووف لو بس سرح ليش سبرناگات اووف ما تكمل ابد

حقها امي من اتگول ماگو احد كامل ..

اهنا سمعت بابنا ندگ نزلت المراية ورحت خلف امي اشرت الي ارجع وما اطلع لبرة .. دخلت ركض لبدت خلف حايط الدرج واسمع امي تدخل بنسوان مديت راسي شفتهم اثنين وحده كأني شافيته من قبل اي اكيد شايفته بس طبيعي مو هلگد اذكرها هاي جيرانه بس لاني ما اطلع يمكن صارلي سنة ما عتبت باب الحوش ،منيتي چانت اشوف البراني شنو شكله ،شارعنا اشلون صار سمعت امي اصيح بأسمي

- هدى يا هدى تعاي

رحت اركض واني امسح بشعري وانزل بشعراتي الي واگفات مثل السبرنگ

دخلت عليهم حتى اخجل اباوع بوجوه النسوات تلكأت وگلت بصوت اعتقد وصلهم همس

- اسلام عليكم

ردن عليه وهنه يباوعن الي من فوك لجوة

امي گالت بليونة

- روحي سوي چاي للخطار

وحده منهن گالت

- لا يعيني لا اتعبون نفسكم

هي كلمة التنگال گالتها المرة بس امي خزرتني من كلت من وحدي

- حسوي الكم خالة صدك جذب

سكتت ابسرعة ما عرفت شسوي انحرجت ضليت واگفه بمكاني واطوي بضفيرتي الشگرة كانت واصلة لتحت خصري ثخييينة شعري كلش ثخين و بي ردة قوية ولان كنت اغسلة بصابون حسن قدح او تايت كان متقرطف كله لهذا اسوي دوم ضفيره واتعاجز من غسله ومن تمشيطة وما اكدر اكصة لان يوگف سبرنك الافضل اطولة

المرة جارتنا كأنها حست بموقفي فگالت الي

-اگعدي خالة ليش واگفة

گعدت ابصف امي على الجودلية

گالت الجارة وهي اتباوع للمرة الي وياها

-ام هدى حبوبة هاي ام معن خوش مرة حوك وابنها شاغول واخلاق ويدور على بت الحلال وانه جبتها الكم

باوعت امي على مرة وهي تمضغ بعلج البستج (علك المر) وردت

- هدى ملچتها جانت الاسبوع الطاف عيني

شالت المرة اعيونها عني وگالت ممستوعبة

- يا حرامات والله حبيتها

وباوعت المرة للجارة كانها تعاتبها اشلون اجيبها النا وهي ماتعرف التفاصيل ابسرعه الجارة سأالت امي اتريد اتبرر للمرة موقفها

-جا ليش احنه ماندري مو جيرة وعشرة عمر

اي عشرة عمر يا جارتنا امي لا تطلع للجيران ولا احد يعرف اخبارها سكوتية و غدية ومو عشرية حقج من ما اتعرفين بخطوبتي

امي ردت بحدية

- شنهو اطشن انه الخبر بالجامع يا خلايك ابنيتي أملچت ؟؟؟؟

كلام امي الحاد سكت الجارة ...وخجلها

المرة باوعت الي وگالت

-اشكد عمرج يعمة

اني باوعت لامي وسالتها !!!

-اجاوب

- شلج بعمرها بعد كلنا مخطوبة وعرسها الشهر الجاي

سكتت المرة هم امي خجلتها

الجارة كالت بعتاب وضحكة على وجها

-جا احنه بعد نترخص حتى اسوالف ما اتقبلين نسولف وياج شجاج قابل راح نخطف البنية منكم بس سألتها المرة عن عمرها

اشوية امي مثل الي حست على نفسها وگالت مبررة

- لا عيني شدعواج زعلتي ... عمرها راح يتم 20 وكلت ازوجها واخلص من همها تدرين بيها شكلها جايب الي العين يا ام جابر وانه مرة عودة گلت من اموت عاد ارتاح ما اشيل الها هم

اني كنت العب بضفيرتي واسمع كلامهم كنت متمتعة بسوالفهن صارلي اشكد ما مجالسة الناس حتى ما اعرف اشلون اصول الكلام ولا شنو المواضيع الي المفروض تطرح بهيج گعدات لهذا ما تكلمت لا امي اتخزني

سمعت ام معن اتكول لامي

-اشكد حلوة ابنيتج هادئة ومرباية اتمنيتها لأبني معن والله جمال وترباه

امي خزت المرة وگالت بصوت متعصب

- يخية لا اضل نفسج بيها واتنفسيها للبنية انه ما اطلعها وحابستها لا احد يحسدها اشمالج يخية بنات العوايل اجثير

المرة استنكرت كلام امي وابسرعة كامت وكالت

- يخية صدگتي بنات العوائل اهواي اني ليش احسدها الله يتمم عليها بالخير انه مو هذا قصدي يلا بينا ام جابر

-الله وياجن

ام جابر همست بأذن امي وهنه يطلعن

ما اعرف شنو گالت بس امي جاوبتها

- يا شكلنا احنه وتزعلن ديلا الله ومحمد وياچن وكانها دفعت بالمرة على كيف اتقدمها للامام المرة هم طلعت ابسرعه .سدت امي الباب وشافتني واگفة يم باب الحوش نسيت قوانين امي وكنت متونسة بشوفة ناس يطلعون من بيتنا خزتني حيل بنظرها،اني انتبهت على نفسي وركضت حيل وهي ورايه تمشي وعدها حدبة ..

دخلت للغرفة وهي وراية اصيح عليه

- طلعت عينج اهديوة انه الچ اشعدج طالعه برة ها ولچ

همزين بس صاحت وراحت

وهاي هي امي عبارة عن كتلة قساوة هي اصلها من الارياف تزوجت واحد قبل ابوي وچانت كل ما تحبل تطرح من الكراب الي عند بالعرب الچنات خدم او عبيد ماكو الهن راحه منا من مات رجلها يمكن عمرها فوق الثلاثين من ازوجت ابوية وطلعها من الارياف وجابها للنجف ابوية من اصول اعجمية لهذا طلعت عليه حمرة برصة واخذت اللكنة النجفية بكلامي لهذا كان مختلف عن كلام امي ولهجتها الي اصلها من الديوانية لكن مو كلش بعض الكلمات هم ماخذته من امي او بالاحرى طريقة الكلام ... حاول ابوية يغير من امي لكن ماگدر منا من اتوفى وكانت هذي اول نكساتي اذكر بأمتحانات اخر السنة كنت بالاول متوسط بقالي كم امتحان واخلص بيوم رجعت ولگيت هوسة يم بابنا ونعش عبالي وكل ظني صندوك بيه ملابس او احد من گرايب امي العرب جاي وجايب بيه هدايا !!!! لأن بعمري ما شايفة النعش ولا حتى القبر ، لكن من سمعت النعي والعويل عرفت الي بالنعش ابوية من يومها عرف الحزن الي طريق ونسيت طريق المدرسة وياه ! والشارع هم والمحلات وكلشي كل الدنيا كأني عايشه بره هاي الدنيا .. مرات كنت اتعمد اوگف بالخلفي حتى اسمع صوت الجيران الي خلفنه ومن تلگفني امي اشبع كتل .

من اتوفى ابوية امي واجهت اخوته واخذت البيت هو باسم ابوية بس لان عمامي هم يورثون امي باعت گاعها الي بخماس واهلها گاطعوها لأن وگفت الهم سچينة خاصر الا تاخذ حصتها وهم لأن طلبوا منها ترجع يمهم ورفضت تاخذني لاهناك ،، و انطت لعمامي حصصهم وبالرايحه والجاية اتغم بيه واتكول لو انت اصبي جان انه محد شاركني بيتي وما بعت گاعي وغضبوا علي اخوتي بس هاي قسمتي الگشره ... لهذا نمت بداخلي فكرة وهي اني شي ناقص وحقها امي من تقسى عليه وظنيت هي هاي الامومة من اجيب بنت لازم اقسى عليها كانها عادة طبيعية تمارس .. !!! اضافة الى ذلك الحديقة اذا اطلعها اشبع كتل مرة نست تقفل باب الكلدورة وطلعت انه وهي دخلت بدون مبالغة قطعت عليه نعالها او مداسها صار ضهري احمر ولا اتعاطفت وياي وضاجت كلش على نعالها انوب ضربتني راشدي لأن انكطع وضلت تتكرظم على المداس وراحت جابت سنارة وكعدت اتخيط بيه واني محشورة باحد الزواية ابجي !!!!!! ؛؛؛؛؛؛

ورة يومين جنت اشتغل لامي بالخوص اسوي زوالي وسلات جنت گاعده بالسطح على جودلية مخيطة يدويا من وصل زايدات من كانت اتروح للخياطة عسى ما بحروثة ازود من القماش تاخذها من الخياطه واتجمعهم واسوي جودليات بيهم المهم هي گاعده يمي لان ما اصعده الا وهي وياي !!! اندك الباب هي بالقوة گامت وصلت يم الباب ونترت بيه

- لج اهديوة كومي يلا انزلي

گمت ابسرعه خوفا منها نسيت هي ماتقبل اظل وحدي اهنا

نزلنا هي راحت للباب وانه دخلت للغرفة مالتنا چانت بسيطة الاثاث بيها بوفية وعليها نضيده ومغطاية بشرشف بيه ورد كبارة جوزي وهو ابيض صاير اصفر لأن قديم و ننام على الارض بالنهار نشيل الفرش بس بالليل نمدهن وعدنا قريولات حاطيهم فوك السطح ننام عليهن هسه بالصيف وهاي هي ماعدنا شي بالغرفه غير الحصيرة الي من الخوص

والهول بيه حصيرة من نايلون قديمة ومدات اثنين ومخدات عليهن تطريز ورد ما يطلعن بالهول الا من يجينا احد !؟؟؟

وعدنا مطبخ جبير ما بيه غير طباخ ابو اربع اعيون منضدي حاطينه على ميز قديم و ميز خشبي بوسطه المواعين وماعدنا سنك اصلا ما اعرف جنت شنو سنك اخذ المواعين للحوض بالحديقة وامي فوك راسي ولانها شكاكه على الاغلب هي تغسلهم بالصابونه والسفنج وبمكان السيم نحط ليف مال نخل !!!؟؟؟ المساحة مال البيت كبيرة لكن مو كلها بانيها،،

اجتني وكالت بنتر وضايجه حيل

- كومي ولچ هذا يريد يشوفج

كلت بهمس

- منو

- رجلج يعني منو

اتوترت حييل ما عرفت شسوي هاي اول مرة راح اشوفه من اتقدم الي لليوم ابد ما شفته ومن ملچنا مومن وكلت السيد من ورة الباب وهو چان گاعد ويه امي وامه من طلع السيد راح يزتته لان من معارفه وما رجع وما شفته !!!!

لبست الثوب الوحيد هو كان جاهز وهاي اول مرة بعد وفاة ابوي البس شي جاهز مو تحوير من ملابس امي . غصبا عليها اشترته حتى اطلع لأم الولد ... طلعت بعد ما غسلت وجهي وكرصت اخدودي ولبست شيلة !!؟؟؟

شفته جالس ماد رجل وثاني الثانية ويباوع لامي من شافني ابسرعه گام .. اني دنگت راسي واتعثرت بخطاي اجيت اوگع عليه من ثولي بساعتها الحماوة الي صرت احسها تطلع من اخدودي مو طبيعية ..

ردت اهمس واسلم ما گدرت

وسام

- يا اهلا وسهلا بست العرايس

كوة رفعت نظري على امي بمعنى يمه ارد !؟

هزت راسه الي ردي

- و و علي كم السلام

ضحك هو عليه يمكن لان اصلا هو ماگال السلام عليكم !

گعدت ابصف امي وبودي اختل وراهه من المستحة

امي ادفع بيه واطلعني لگدام

- وهاي هدى الي اتريد اشوفها مو گتلك تخجل

ضحك و رد

- دطلعي اني رجلج صرت خل نشوفج

ضل يحجي ويه امي وانه بس اسمع صوته ما شفت وجه

رغبة ملحة بشوفة ملامحه بس اووف من الخجل منعني اهنا اذن الاذان مال المغرب الولد كال من رختصج خاله اريد اتوضة امي عبالها يريد يروح طلع يريد يصلي دلته على الحوض برة بالحديقه وگالت الي وهي اتخزني

-هذا اشعنده بس لا يريد يكلفنه عشا

اني سكتت ما جاوبت

بده يصلي الرجال وانه رحت للغرفة وامي اصلي گدامي من سلمت امي بعد ماخلصت فرض المغرب باوعت الي وگالت

- ليش ما اگومين اصلين ولج مشرچة انتي هااا ردي

ما رديت عليه وغلست !!! وانه بس اريدها اتخلص حتى اكوم اشوف وسام بس اووف اخاف هم اخجل اجتني فكرة گلت من تسجد امي اروح واغفلها واشوفه وهو ملتهي يصلي ..

صدك كمت ابسرعه .... للهول شفته دا يركع وادية على رگبتة تجرأت وضليت اركز على ملامحة كان اسمراني شعرة قالبة ولابس بنطرون ابو الكسرات اسود ومدخل بوسطه القميص الي لونة ابيض ومشجر باللون الحني ولحيته يعني خفيفة اشوية واعيونه وساع و ملامحة حلوة عجبتني خجلت من اتذكرت كلها ايام واصير اني وياه بغرفة وحده !!!؟؟؟؟؟

من انتهى من وضع السجود شفته يباوع عليه انه ابسرعه هرولت ورجعت للغرفة ..

وامي من خلصت صلاة ضلت تدردم عليه راح يخسرنا عشا ما عده احساس ومن هذا الكلام

انه فرحانه حييل طلع حلو مو قبيح خوش اختيار امي هالمرة ....

من طلعنا شفناه مخلص وگاعد ينتظر

- عمة باجر احد نمر عليكم حتى نعقد محكمة خو ماعدكم مشكل

-لا يا عمة بيش الساعه نحضر نفسنا

- بالثمانية

.......................

ثاني يوم رحنا وامي بينا تمشي حرام الي يشوفها يكول هي مرته مو انه ولازمه بيدي وانه گوة امشي اريد انجبح الله اشكد حلو الشارع والسمة لونها يخبل من نطلع ونمشي بالخارج يختلف عن لونها بالسطح ! واسمع اصوات اهواي اتمنيت ما نوصل للمحكمة ونظل بالتكسي من وصلنا

اول ما نزلت وگف هو يمي وگال

- هاي المحكمة هداوي وراح اصيرين مرتي رسمي

انه خجلت ودنگت راسي حسيت احد يدفع بينا باوعنا شفنا امي واستحيت من الرجال

دفعتنا وسوت مجال الها وسطنا وهي تعلج بعلجها وتهز براسها بينا ،اني من دخلت ووگفنا بباب القاضي شفت المراجعين اشو بس اني العروس الي لابسة شيلة كلها احجبة صارلي اشگد ما حاطته على راسي من بطلت من المدرسة لليوم وسام لاف ووگف يمي من الجهة الثانية امي مدت راسه عليه وگالت -اه

وضلت بس تتأفأف علينا اني ضليت اباوع للناس للرايح وللجاي و احاول ابعد فكري عن قرب وسام الي . حسيت كفة بدة يتلامس مع ايدي .. بعدها لزمها اي لزمها وحواها بيده الكبيرة لا اراديا طلع مني صوت شهگة وابتعدت عنه

امي ضلت اتباوع يمنه ويسره الناس كلها انتبهت علينا يردون يعرفون اشبيه شهگت بصوت

وسام حك جبينه وباوعلي من اسفل نظراته اتلوم بيه امي جرتني وگالت

-حدج اهنا اوكفي بت حسين عديها على خير

دخلنا وخمس مرات عاد القاضي المهيوب الي وترني بزياده بصرامته الا كلت نعم اقبل

..........

من عقدنا بعد ما شفته لوسام

وبيوم من الايام اجنه اهله وجابن المهر وهاي فرحتي راح اشتري واتهنى مثل البنات بس الفرحة ما تمت الفلوس مدري وين راحت !!!!

وما قبلت امي اروح اشتري غراضي بنفسي

هي جابتهم الي

ضليت اقلب بيهم كم قطعه قماش وكم قطعه ملابس داخلية ... زين وين ملابس الطلعه

گالت ذني طلعتهم من الاكياس وطرت بيهم طير للغرفة لبستهم چانن فيت قياسي

عبارة عن تنورة كبس منفوخه وبيه وردات تطبيش وقميص بيه كتافيات وورده على الياخه لونه اصفر والتونرة حليبية والورد الي بيها ازرق وقراصه حلوة حديدية وبيها ورده اسفنجية مغلفة بقماش قديفه صفرة لفت نظري الكعب الابيض يخبل لا والعلبة مال المكياج تخبل جانت كارتونية ومغلفة بأحمر اويلي تخبل لگيت امي حاطه بوسطها مكحلة وما اعرف الباقي هي كالت ذني مكياج للعروسة

امي كالت اسبحي وقيسي ملابسج الداخلية

كتله خوش بس اتعاجزت اسبح دخلت بللت شعري حتى امي عبالها سابحه واتخليني البسهم واقيسهم طلعوا يخبلون عليه بالاخص ثوب النوم الابيض كان قماشه يتمطى ما اعرف اسمه اصلا ما اعرف اسماء الاقمشة بس هو يتمطى وبعد مده قليلة بدة يتمزك ؟؟؟؟؟

ما اعرف ليش جنت ما اطيق السبح وجنت اطير اطيور من ازورني العاده الشهرية

حتى لا اسبح لان امي اتكول ترضرض العظام اذا سبحتي بيها وانه اكيف

..

جنت گاعده والطخ بنفسي بحجة ادرب بس انه هاي ونستي صارت

امي بالهول تسمع بالمسجل ردة اهز مهدك يا عبد الله

جانت اتحبها حيل ودوم اتعيد بيها يمكن لان ابنها مات قبل لا يكبر .. هي من ازوجت ابويه كوة حبلت بيه وانه اجيت بالسلامة وبعدي هم حبلت بالگوة وجابت ولد ومات وبعد ما حبلت يمكن لان مسقطة اهواي ما ادري بعد ..

طفته وگامت امي الي

- اهديوة اذن ما اتكومين تتوضين واصلين !؟

انه جاوبته بتلكأ وگلت

- بعدلي يوم يمه

- ها چا مو البارحه گلتي الي بعدلي يوم

توترت بالزايد بس لا تكشف چذبتي وگلت

-لا لا يمتى اقصد باچر

-اها انشالله خير

وراحت تتوضة واني ابتسمت مرتاحه لان ما كشفتني صارلي تلاث ايام من انتهت العادة من عندي وأجل بالسبحة مالتي اتعاجز واكره الماي حيل وهم حتى عندي حجة من ما اصلي امي ما اظل اتلح ..

ظميت المكياج وگعدت بالزاوية اتقرفصت وشميت حظني .. كانت ريحتي مثل ريحة الي توها ولاده وبعدها ما سابحة استنشقتها بعمق كنت حيل احب هاي الريحة !!!!!!!!

وكان شي بداخلي يكولي شمي بعد اكثر هاي الريحه كلش طيبة !!

جرتني من ايدي وحده من المريضات وچانت تخوزر بية وگالت

-تعاي انروح للحمام سبحيني

ابعدت ايدها عني وركضت وشردت، وصلت للغرفة الي انام بيها گعدت الهث وكلي خوف من البنية تجيني مرة ثانية

اليوم كان مشؤم كلش علية رجعت اتذكر حياتي و هاي المريضه بس لا حاطتني في بالها . ما صدكت ارتاح اشوية اجانة الغدة طلعت ماعوني من جوة  مخدتي ورحت وگفت وية السرة   ، الطباخة تحط الجدورة بعربانة وتوكف بباب الغرف واحنه المرضى نوگف سرة

والعاملة تاخذ منا الصحن تسكب النا بيه و ناخذة منها جان تمن حصة و علية مرگة عدس صفرة يمكن حاطين بس خاشوگة وحده  معجون  بالجدر !؟

وبرتقالة وحده و صمونة  دائرية توصلنا يابسة

گعدت بمكاني واكل بايدي  التمن وبديت اگرط بالصمونة گرط

صاحت العاملة

- عيني الي تريد اجيب  ماعونها وتجي

باوعت يمنة ويسرة وگالت للطباخة يلا بينا

رغم هي شافت اكو وحده من المريضات هاي التغني انه المسكينة ما تقربت ولا گامت جانت دايرة وجها على الحايط وتنعى على ابنها

واكو وحده ثانية بس نايمة ومن تگعد هم تگلبها بس اصيح  .. عافتهن وما انطتهن حصتهن .... جنت دوم اراقب من حولي اساسا هذا ملتهاي الوحيد جنت اكعد يم الشباچ الي حاطين علية شبك حتى لا ننهزم منه  چنت اشوف الممرضات  او العاملات من يردن يطلعن يفوتن من الممر المطل عليه شباچ العنبر شايلات وياهن اكل !

اصلا دوم يوصلنا شي قليل يمكن الغدة مالتي جانت عبارة  عن ثلاث خواشيك والصمونة كمت اغطها بالماي حتى اگدر اكلها .. هاي التفاصيل جنت اذكرها ابد ما نسيتها ولا راح انساها اساسا اني مكنت بلا عقل والدليل اليوم

دخلن العاملات علينا العصر

سحلن الي تغني انه المسكينة للحمام لان الريحه لا تطاق بعد ما تكرمت على نفسها وراحن رجعنھا وجها كله اثار ضرب !

وشالن الشراشف وخلنها بلا غطى !!!؟

گعدت تبچي على سريرها الي بلا فراش

اني گمت شلت شرشفي وحطيته عليها ما اعرف  من شفتها بطرك ثوب المرضى السمائي بهلبرد  فز گلبي عليها .. احد العاملات التفت عليه وگالت لصاحبتها

- هاي هدى ترة صاحية حرامات محد الها ياخذها منا

- والله يا يعيني ملينا من اشكولاتهن حتى من يصحن ضالات على كلبنا !

راحن واني بداخلي فرحت اتمنيت لو عندي احد يستلمني ويخلصني من الي اشوفة اهنا

ولو اني شفت الاعظم والاعظم بين ما اني ادلك بايد احلام رجعت بيه ذاكرتي من جديد ...

عام

1999  أيلول

جنت گاعده وامي تكتل بيه واصيح

-لج اهديوة صارلج اشكد ما سابحة بت النعالة

جنت كاعدة بالطشت ومغطية صدري بأدية مستحية من امي وهي فوك راسي تجلف بضهري شايله اطراف ثوبها بحلكها وتجلف وتجلف طلعت جسمي ابيض يلمع انه اتعاجز احجر نزلت على رجلية ونظفتني بعدها تخبلت امي من شافتني ونظفتني بماده ما اعرفها شنيه لونها ابيض طحينية المهم هي نوع من انواع ازالت الشعر .. ظلت تغلط واتعلم بيه اشلون احافظ على نظافة جسمي واني منا وجاي راح يطلع عليه رجال عيب ما اسبح ومن هذا الكلام

اني استحيت وشلت هم اتمنيت لو ما ازوج احسن الي اشلون راح اتأقلم مع العلاقة الزوجية ...يلا المهم اخلص من حبس امي

طلعت من الحمام ورحنا لوحده مفتحه صالون ببيتها ميشت شعري وقصته خلته يوصل لضهري بدل ما كان لتحت خصري حتى ما يكلف اهواي ميش وصبغ صحيح جنت شگره بس مو مثل الميش والصبغ ام الصالون تخبلت عليه كالت اول مرة اشوف اجنبية بالعراق !

حفيت حواجبي كانن شقر وثخان لونهم قريب للبني الفاتح واصلا بشرتي دهنية ما بيها اهواي شعر  حفيت وضليت بس صافنه على نفسي بالمراية ......... شفت اهناك بنات ونسوان والبنات الي بعمري اشلون يحجن ويطلبن وحتى طريقة كلامهم مختلفه عني اني حدية وعلى كد السؤال هنة لا يشاقن ويه ام الصالون وماخذين راحتهم

وصلنا لبيتنا والعصر اجت أم  وسام

انه طلعت سلمت عليهم والمرة ضلت اصلي على النبي  من شافتني وانه شعوري لا يوصف حسيت اني حلوة ومرغوبة توني بديت احس انه انثى !  ؛ كنت لابسه من ثياب جهازي لان ماعندي ملابس بيها خير من اهلي

گعدت يم امي والمرة طلبت ماي ريكها ناشف واني نسيت اقدم الها  رحت ركض للمطبخ وسگيتها واشرت لامي بمعنى شسوي الها

- يمة سوي النا چاي

اني تحنطت لان ماعدنا شكر اصلا !!؟؟؟؟

- اهديوة روحي سوة الجاي اشبيج

اني تلكات وكلت بهمس وانه حاطه اصبعي او ابهامي على حلكي

- يمة ماعدنا شكر

امي گحت وگالت للمرة مغيرة الموضوع

- اگلج ام وسام هم نجيب ملة لو لا

مطت بحلگها ام وسام وباوعت لامي بستصغار وگالت

- اي عيني جيبوا حتى تتبرك العروس جا غير نجليها

- ها خوش

گامت امي وجرتني وياها دخلتني للمطبخ وگالت

-عمت عينج فشلتينا جدام المرة غبرة يا عوبة

راحت طلعت مفتاح خانتها بالبوفية ام ثلاث بيبان وحده الي واثنين لامي وحده ملابسها والثانية دوم تقفلها بيها گشتها و فوق اكو جام خانه بيها كلاصات واستكاين ابوية جايبهم يخبلن بس ابد ما مجربتهم ولا حتى غاسلتهم امي ماتقبل اجيسهم ! طلعت علاگه سوده وكالت تعاي ورايه رحت للمطبخ وچان اشوفها تگدر بالاستكاين الشكر وطلعت .. انه من رحت قدمته الهم سمعت المرة اتگول

- ليش عود ما اتقبلين بيه بعد شريناه احنه

امي بعصبية

- انه مو گلت الكم انطونا افلوس الذهب انه اشتري الها عود ليش اشتريتوه غير هاي الاصول

ام وسام ضيقت نظرها على امي وكالت

- جا شنو الفرق بينا غير احنه صرنا اهل و هدى مثل بتنا ورحت اني بنفسي وجبت الها الذهب

- لا والله ما مرجية منكم هاي انه اريد اشتري اله غير على مراقها

هزت ايدها ام وسام وگالت ساخرة منا

- والله شفنه ذوقها بالملابس احنه اشلونه گلنا احنه نجيب الها الذهب احسن ما نتفشل گدام الوادم جا هي مرجوعها  النا صار

ضاجت امي وگالت

- لعد خلو ذهبكم الكم

وشفتها رجعت علبة حمرة للمرة

- انه اتفقت وياكم على شي ما عجبكم ذوقنا ها هي بيكفكم

المرة تحاجت وية امي وراحت طلعت من بيتنا زعلانه وعافت الذهب بمكانه ....

امي شالت العلبة انه ركضت گعدت يمها من فتحتها شفت بيها زنجيل طويل وبيه كتاب الله

وتراجي امهات عنكود العنب صب و حلقة هم صب و محبس بيه شذره فستقيه حيل عجبني 

مبين متين اخذته من امي لكنها جرته مني وگالت لاحكه عيني جيبي خل اظمه بيوم العرس  عود اتلبسيه

اجيت اكلها بس اجربة خزتني

-حاظر يمة

...........

بالليل اجة وسام اضاهر امه مسولفة اله

گعد ويه امي وگال

- عمة ما يكون خاطرج الا طيب اذا تردين ورة الزواج نبيعه ونجيب الها على ذوقه

مانختلف احنه على هاي الامورة عمة وبعد كم يوم عرسنا

امي

- يعمة امك سوتنا ما نعرف نشتري شنو شايفتنا ما شايفين لو معدان احنه

اتعذر منها وبعدها اترخص منها وگام من گامت امي اتوصلة فاجأها وگال

- من رخصتج عمة عندي كلمتين وية هدواي

امي مثل الي بحلكها موس ماگدرت اتعارض بس ضلت تخزر بيه واتباوع الي واله

انه صرت ارجف رجف گلت راح تموتني امي

بس هي گالت بهدوء

- ها خوش هي بعد جم يوم وتروح يمك انت الله وياك هسة ، لاحگين على السوالف

ضل واگف ما راح وگال وهو مبتسم

- عمة ادري كلها كم يوم ويمي بس غير الكلمتين ماعندي وياها يا عمة قابل اني شرايد نفخت بحلكهاوراحت امي

وانه التفتت ردت اروح وراهه وگفني وسام

- هدى اوكفي شنو قضيتج مو گلنا عدنا كلمتين

التفتت عليه واستحيت ماعرفت شصرف اضل واگفه لو اگعد لو شنو ؟

اتقرب هو وگال الي تعاي اگعدي

گعدت على المدة وهو ابصفي گعد چان حاط عطر كلللش طيب

انه من مستحاي ما جنت منتبها لاديه لازم بيهم كيس طلع منه شيشة عطر وحطه امامي

- اتفضلي ست العرايس اكلج شي بس لا تستحين

اني دنجت راسي واباوع لحظني وادية شابكتهم ببعض حيل

- تدرين اني كل يوم اتخيل بيج

ما فهمت كلامه المفهوم الصحيح

-رحم الله والديك

ضحك هو بصوت

- والديج بالرحمة ........... شو باوعي الي

باوعت اله واشو هذا تقرب وباسني من جبيني بوسة خطافية وابسرعة گام و ودعني وانه داااايخة حيييل من اثر بوسته وشفاه على كصتي !!!!!!!هاي اول مرة اگعد وحدي مع احد بدون امي لا يم مرة ولا رجال گاعده وحدي سابقا !!!!!!!

رحت لغرفتي دايخه وامي ضلت تحجي وادردم وما شفت الذهب الا يوم العرس لبسته

طبعا سوينه هو حنه هو مولد عرس عزمنا كم وحده من الجيران ونسوان عمامي تعذرن ما يريدن يختلطن ويه امي يكرهنها حيل وهم هنه غير محافظه بكربلاء شالو ،والباقي من اهل وسام ضليت صافنه على لبس البنات ورگصهن ... امي وزعت بس حلقوم .  وشربت سوته  خفيف كلش

ام وسام جانت مسوية كيك گالت لامي وزعو منه امي ضمت نصه وطلعت الباقي قطعته كلش اصغار و وزعته ما اعرف ليش هيج اتسوي رغم هي عدها تقاعد ابوي وهم گاعها مو كلها انطت افلوسها يعني نگدر نعيش احسن من هذا الحال لكن شسوي ..........

گالو اجه العريس .. دخل علية وسام بقاط حبري ورباط ماروني جلس ابصفي كان يضحك و يشاقه وياي واني ساكته خجلانه

زفونا ورحنا گبل لبيت عيالي دخلنا لغرفته ضليت گاعده على الچرباية وخواته گاعدات يمي

افراح

- يا ترة هدى شعرج ما مشسور عدل

انه مسحت على شعري وسكتت جان محلول ولابسه تاج وبركع والبدلة بيها ردانات منفوخه

سراب

- لا اشبيها تخبل

ارتاحيت من گالت هيج

هنه كانن ثلاثه كلهن من جيلي يطلعن او اصغر بشوية

حلى

- اشبيج مبوزة تضحكي

اتضايقت من تعليقاتهن اشوكت يرحن من غرفتي

دخل وسام وگال

- يلا انصرفن .  

طلعهن كلهن وانه عيني على الباب اشلون قفله

وابسرعه من غير كلام خلع ملابسة انه حطيت ادية على اعيوني خجلانه منه

..

الصبح گعدت جسمي كله متكسر اضافة الى وجع داخلي موتني واحس الدم ما انقطع !!!

واستحي اشكي لوسام حتى نمت بدون ما احس على نفسي مثل المغمى عليه هو من خلص البارحه راح يدخن بعدها اجه بصفي وعادها واني حاطه ادية على حلگي اكتم صرخات آلمي . 

باوعت لنفسي بالمراية الصبح وجهي كله مزورگ ومتني هم ،وكوة امشي روحي تخروع

اسمع صوت هلاهل وامي اسولف وياهن بس انه ماگدرت اطلع گلبيتي البيضه حتى اسلم عليهم وگعت وبعد ما ادري شنهو الصار .....

غير واني بالمستشفى وبيدي كانونه واسمع صوت وحده تلعلع

- هذا مو زواج اغتصاب ترة والله اقدم شكوة بيكم

ركزت اشويه شفت الطبيبة من صحيت اتقربت مني و كالت

- اشلونج هسة ماما زينة ؟

اشرت براسي

شفت امي وامه واگفات من راحت الطبيبة امي

ضربتني على وجهي وگالت

- عمت عينج ما دبرتيها ولج فاهية عوجة وين ما احطج عوجة

امه وخرت امي عني وگالت

- كولي ياالله توها صحت

امي رزلتني وكالت

-هاي بعد بتكم انتم تعرفون تصرفون وياها 

وراحت لبيتها وعافتني شفت وسام دخل للردهة لا اراديا اطرافي صارت تهتز هز

هو اتقرب مني وگال

-حمدلله على سلامتج هداوي

چان مبين عليه ضايج

امه طلعت برة هو طلب منها

- اعذريني يا بت الناس والله اني شاب ومتهور وانتي شدعوة هيج حلوة فقدت واذيتج

سكتت ما گلت شي واخذني للبيت چان جارحني ولازم يضمد جرحي  شهر كامل مع علاجات كومة

مر اول اسبوع اشگد حلو هو بس يدلل بيه ويمدح بشكلي ويشاقة وياي وانه ما اعرف ارد عليه بس اضحك او ابتسم بخجل  صحيح اشتاق لأمي مرات بس من اطلع للحديقة ومحد يحاسبني ارتاح واكول همزين خلصت من سجني ،وسام صار ينتظر الشهر يخلص بفارغ الصبر واهله زينين بس خواته اثنين منهن  دوم يضوجن بيه .. هو هم ميت ابوه ، يشتغل بحي الصناعة مصلح سيارات ،ومسؤول عن عائلته ثلاث خوات وام واني وبيتهم اجار بس هو شاغول وشاطر

خلص الشهر ومرن شهرين وثلاثة واني يمهم

جنت بالمطبخ اثرم شبنت عمتي جايبة كومة واتريد اتيبسة

وگف وسام فوك راسي

بنتر

- يلا گومي الساعه راح ادك التسعة وانتي خاتلة اهنا

-صار

كمت غسلت ادية ورحت خلفه

عمتي شافتني بالممر

- ها هدى خلصتي ثرم ؟

- ها عمة وسام صاحني

- يا هنه شكم باكه ما دبرتيها گالت امج فاهية واني ما صدگتها يلا روحي كمليهن لاحگه على النوم

- صار عمة

ردت اروح وسام كال بعصبية

- يمة نازلة بيها كراب ترة اني مزوجها اريدها يمي بالليل

سحبني ودخلني للغرفة

- انتي شنو شيكولن الج صار ولج باليل مو كتلج ماكو شغل اريدج يمي متعدلة ومنتظرتني اني اجي جد جدي مسموط اريد الكلمة الحلوة و العطر اليفوح شنو هاي ريحتج جايفة

طلعن ادموعي وحطيت ادية على اعيوني

-اوووف يابة .........لا تبجين يمعودة ...... دسكتي

حظني وباسني من خدي وراضاني .. انه جسمي ابيض حيل وهو مأذيني كلة اثار  كنت اظن هو هذا الزواج هيج . مثل ما فهمت الامومة غلط العلاقة الزوجية هم فهمتها لازم بيها آلم ومعاناة يعني المرة بس تعاني وتتآلم اثناء العلاقة و المتعة  فقط للرجل هذا الي فهمتة اثناء هاي اول أشهر من زواجي

گمت من خلص ورحت للمطبخ شفت الشبنت على حطته كعدت اكمل ثرم  ضليت ساعه اصفن اهدي بآلم جسمي المزورگ وساعة اثرم

دخل عليه وسام وجان حيل معصب

- صارلي ساعة انتظر عبالي اسبحين تالي طلعتي اهنا ولج گومي

اروح اسبح واطلع الكاج نايمة يمي ..

راح دخل للحمام واني فضيت الهوسة وكمت للغرفة نمت وهو اجه ابصفي حظني ونام

ثاني يوم كان يسامر وياي بالغرفة بس فجأة  فز بعد ما چان يضحك صار عصبي واعيونه فوك راسه

- ولج شنهاي ريحتج

توترت وشميت نفسي

- اشبيها ر ريحتي ....... ها مو والله ما الحك اول ما كمل عشا نتعشا وانت اتريدني اجي يمك ما لحكت اسبح 

- ولج ريحتج مو طبخ ريحتج مال ...... استغفر الله كومي اسبحي هدى وتعاي

دخلت للحمام جان بيه مجانة وطاسة اغرف بيها الماي وصابونه ريحة وشامبوا هاي بس عدهم شفته واستخدمته مجان عدنا هيج شي

باوعت للماي بتقزز بس شسوي لازم اغسل 

حتى  ريحتي ما تقرف وسام صارله يومين يتقرب الي وانه ما اسبح !!

كلت هي مو بارده كلش خل اغسل بماي التأسيس الي يجري بالدوش فتحته والماي يجري واني گاعده ضايجه اشلون راح ادخل جواه اكو صوت بداخلي يوسوس الي ما ادخل اتعاجز بس اغسل المنطقة واطلع اله  افضلي .. بس كلت خاف هم يضل يصيح علية

دخلت جوة الدوش كان الجو بارد ذو الحجة وعدكم الحساب بال ب99 باردة يعني الماي بارد دخلت جواه وكلت اووويلي باااارد رعصت بلحظتها ردت اطلع طفت الكهرباء جانت قبل ساعتين بساعتين وتطفى علينا صارت هندس انه طلعت من الماي وهو يجري گدامي لازمه جسمي بأدية حاظنته من البرد وصارت ظلمة ومثل الطنين الي بأذني ............حسيت اكو لهاث شخص خلفي اهنا گلبي صار يدگ حيل نوبات خوف زارتني وحسيت اكو لمسات خفيفة على اضلعي من خلف  اريد التفت جمدت من الخوف   فجاءة حسيت مثل الادين لمستني لمسه قوية حسيت بيها ودفعتني على الماي اليجري دخلت جوة الدوش والمااااي جان يچوي چوي حسيت جلدي راح يتكشط من الحرارة انوب  من گدامي صارت تجيني نسمات هوى بارده حسيت بخار يطلع من جسمي من البروده والحرارة وادين تلمس بيه وباجزاء جسمي واني واكفه جامده بمكاني ما اكدر اتحرك  !!!!!!!!!!!!!!!!!!!!!!

اهنا ندگت باب الحمام وسمعت صوت افراح

-ادري  الي يدخل للحمام ساعة لو مو ساعة

اهنا اجت الكهرباء والماي رجع بااارد طلعت منه ابسرعة و ضليت صافنه على جسمي اباوع اريد اشوف شصار باوعت خلفي محد !

وانفكت عگدة لساني  ابسرعة اتحركت لبست ملابسي وطلعت صارت گبالي افراح

- ادري ساعة خوما ساعه كولي اكو بشر اهنا

- هاا مو طفت الكهرباء

- لجذبين ام الوصخ الكهرباء ما طفت انتي صارلج ساعة اجلفين بعد ما عاط بيج وسام اكومين اسبحين ام الوصخ

ما ركزت هي  اشمدريها هو عاط بيه ولا ركزت بالوقت الي بالغت بيه اني دقايق وطلعت !!لكن الكهرباء طفت  والضوة انطفى

رحت من اگبالها للغرفة شفت وسام غاط بالنوم باوعت للساعه صايره ب 10 !!!!! وانه دخلت للحمام ب 9 صدك صارلي ساعة !!!

طلعت برة الحمام فارغ افراح مو بيه بس تخبث عليه

رحت للهول شفت سراب تفرش اتريد تنام

كتلها سراب الكهرباء هم طفت قبل اشوية

باوعت الي وگالت 

- لا ما طفت مستمرة لان اليوم عرفة

رجعت تفرش وانه جمدت بمكاني !!!!!!!!!!!!!!!!!!!!!!!!

گعدت من نومي مفزوعة على صوت صراخ قوي تكومت على نفسي مرعوبة من شكل وحده من المريضات جانت مدماية فزيت على صوتها ... الحايط مصبوغ احمر .... شالنها الممرضات واخذنها  اضاهر هي راكعه راسها ... اني ضليت ارعش واباوع للدم ونفسي مشغوفة ... ما گدرت اقاوم گمت من مكاني  .. وقربت راسي على الحايط .. اخذت نفس طووويل وانه اشم بالحايط ريحة الدم ردت بيه الروح ! ،

حسيت احد جرني من ثوبي وسحلني التفتت شفت هاي المريضه العنيفة الي صاحتني بالحديقة وشردت منها

- تعاي سبحيني

- ؟؟؟؟

حاولت افلت نفسي من ايدها  بس هي اقوة مني جرتني رحنا للحمامات حطيت ايدي على انفي ما اريد اشتم الريحة اخاف روحي ترجع تحن للماضي ... الحيطان عبارة عن دماية ملطشة بيها و الارضية هم مثل الحال بس حتى براز وبول عدنا مريضات كأنهم  اطفال ما يميزن بين الحمام والتواليت !؟

نزعت ملابسها كدامي ابسرعه وگالت يلا تعاي فركي جسمي

اني حشرت نفسي على الحايط  وباوعت الها بشمئزاز باوعت آنی  خلفها عبالها اكو احد دخل هي هم التفتت . اني خليت وشردت وهي ورايه تركض   .  وصلت للغرفة وهي ورايه من دخلت مالابسه التمن عليها المريضات يمعشن بيها ويضحكن

اني اخذت  قمصلتي الحربية وطلعت برة للحديقة ..

بس شافتني العاملة صاحت

- يلا ولج تعاي اليوم عدكم تنظيف

و جموعنا كلنا ننظف بالممرات والحمامات والعنابر

طبعا بس معنفات محد يخليهم ينظفن والانطوائيات هم محد يطلب منهن ينظفن بس المريضات دوم يكتلن بيهن عنبرنا الوحيد الي كان نظيف اشوية والسبب احنه الي بيه اشوية نعي ونفتهم بس هم عدنا كم وحده مرات تفصم وتخربط

المستشفى مكان بيه علاج نفسي فيزيائي و أخصائي نفسي يتابع . لا بس علاج دوة عدنا

وهم مرات يقصرون بيه  و كهرباء هاي الوسائل فقط.... كنت انظف بالحديقة اشيل بالعلاليك لازھه بالعاگول

من انحنيت حسيت اكو شخص خلفي

رفعت راسي شفت الحارس واگف خلفي و مكانت نظراته خالية اصلا هو شدخله ؟؟؟؟

اه يا زمن اني جنت محجبة البس عباية وحتى بوشي لبست هسة شعري فارع للغريب . عفته وركضت دخلت للغرفة

العاملة - هدى ليش ما كملتي تنظيف

جانت شايلة مكرافة بيدها وتحجي وياي

اني گعدت على قريولتي وغلست عنها

وما احس غير المكرافة فوك راسي طشت محتواها عليه  طش ضليت اكح من التراب دخل لانفي 

عافتني وراحت اني سكتت بس ضليت انكث بالتراب عني  شفت سعدية راحت وراهه

((سعدية المريضة الي دوم تطلب مني اسبحها واني اتهرب منها ))

سمعت اصياح برة والمريضات كلهن طلعن يصفكن ويضحكن اريد اشوف شنو صار

وچان أشوف سعدية نايمة نيوم على العاملة ومنزعتها الحجاب ومطلعه كفشتها وتخرمش واضرب بيها اهنا شفت الممرضات والعاملات سحلن سعدية سحل عن العاملة وهاي ثايرة اصيح وتفشر عليهن  گومن العاملة منتهية ماتگدر تمشي الانسان المريض النفسي من يهيج تجي قوة هائلة مايكدر الطبيعي يقاومه خاصة اذا مكان عليل البدن ... اخذو سعدية مدري وين و العاملة للطبابة ....

ما فرحت بداخلي من تعاقبت العاملة لأن اعرف كلش زين الي اخذ حقة مراح ينجى من اديهن

اتذكرت اني اهنا معانتي ورجع علية شريط ذكرياتي ....

عام 1999 في عيد الاضحى

وسام - گومي هدى كافي نوم يلا يمعوده خل نعايد اهلچ ..

گمت واني متكاسلة گتله اي بس خل اسبح

صفن بوجهي وگال

- هدى حبابة ابسرعة اطلعي لا اضلين ساعات اريد اتريك

- اي مراح أتأخر

چان حمامنا داخلي وبيتنا بالشتا مظلم مو على الشمس فالحمام الصبح اظلم علگت اللالة ودخلتها و فتحت المشعل جنا مخصصين قنينة بالحمام اله وحميت الماي وگعدت من حمى

جلفت نفسي جلف صرت حمرة .... من خلصت دا ابعد بالبخار عن المراية حتى اشوف وجهي

فزعت نفسي واني اشوف خلفي بزون اسود بعيون ذهبية

شهگت ورجعت للخلف باوعت خلفي كلشي ماكو ضليت ارجف رجعت باوعت بالمراية كلشي ماكو ... اووف من هاي التخيلات

الباب ندكت حيل

عمتي - منو اهنا ؟؟؟

ردت بيه الروح من سمعت صوتها جنت مرعوبة

-انة عمة

- يلا ابسرعة اطلعي نريد نسبح احنه هم ورانه طلعة لهلنا

- اي اي

طلعت ابسرعة شفتها بالممر

- حضري نفسج هدى ترحين ويانا نعايد اهلي

بس اني چنت اريد اروح لبيت امي اعايدها هي اول شي ما حجيت شي وكتلها

- حاضر

دخلت للغرفة وانه بالي مشغول بشكل البزون ... البارحة حسيت اكو احد وياي . و اني قنعت نفسي هاي افراح طفت علية الضوة بس الواحد الي حسيته وياي منهو ؟ شنهو جاي يصير وياي لازم اسولف لسراب هي اشوية تفتهم وحبابة وياي  .. وگفت امشط شعري متعب گوة يتمشط   

التفتت على السرير اريد اخذ قراصتي ، حسيت اكو احد دا يتلمس جسمي شهگت

وابسرعة باوعت هالمرة ما جمدت بمكاني  شفته وسام

يحظن ويقبل ضل يشم براسي

- ريحة شعرج تاخذ العقل

تضايقت حاولت اجنبة لكن حاوطني بالبداية هادي  بعدين رجع يتعامل وياي بقساوة  اني كنت ما احرك ادية بس اصفن حتى ما اتكلم ولا يطلع حسي اكتم أوجاعي واتمنى الوقت يخلص وياه ..... خلص يلهث ..  ضربني كف خفيف خلاني انتبه عليه كان معصب

- اشبيج ولا يگلك رجال وياج ؟

وين بالج ولج

عافني وراح ركع الباب رگع واني گوة گمت ازنودي حمر من العض عادي اني متعوده على الآلم بس شسبحني هسة مرة ثانية  ؟؟؟

غلست ما دخلت سبحت ورحنا لبيت اهل عمتي

سلمنا عليهم وضلينه يمهم تغدينا ومناك رحنا لأجداد وسام اهل ابو ، امه ما راحت ظلت عند اهلها بس خواته واني رحنا وياه ..

سلمنا على بيبيته وعمامه ونسوان وصايره لمة

حسيت نفسي غريبه بينهم دخلت مرة اني شايفتها سابقا  يمكن اصير جنة عم وسام سلمت عليهم هي ورجلها طبت كلهم وگفوا الهم وذاك السلام اني عجبني كلامها واشلون تحجي واسلم  ، انه گوة اگول السلام وبصوت ناصي حتى محد سمعني وتشاقة وگعدت يم بيبية وسام اسلوف وتضحك وتسال عن حال المرة ..بعدين گالت لوسام

- اي عيني وسام بعد ما تجينا ..بس حقك اذا عندك هالگمر بالبيت وين تگدر تطلع

تنهد وسام و باوع الي بحسرة وگال

- لا والله بس كثرة المسوؤليات هليام ما افرغ

ابن عم وسام - اي بعد وبعد اذا يجيك طفل  ما اشوف دربك بعد هههههههههههههه

ضحكوا كلهم واني بس عيني على المرة

وعاجبتني .. هي من شافتني بس اباوع الها  گالت

- اي هدى شخبارچ ماكو منا منا

ما فهمت قصدها

-الحمدلله

- ماكو منا منا بالطريق شي جاي

- لا محد يجينيا

ما فهمت ؟

جان صوتي ناصي وهي هوسة لمة عوائل بعد

ما وصلها صوتي بس افراح ابصفي سمعتني

ضحكت وگالت - ما فهمتج اصلا هاي

ههههه لا معدها مو حامل تأخرت مدري ليش

- ها لاحكة لعد

تغيرت گعدتنا من الزلم گاموا اجت مرت ابن عم زوجي گعدت يمي وعود لان مزوجه مثلها اتريد اتسوي وياي علاقات جان عدها اربع ولد

وابنية بحظنها

ام محمد- اي بشري اشلونه الزواج وياج

سكتت بالبداية ما عرفت اشلون ارد

كتلها واني اباوع لبتها متفحه وسمينة

- زينة

- و عمتي ام وسام اشلونها  ما اجت اليوم حرامات ما شفتها

- اي مو ظلت يم امها

-هاااا يعني طلعت من البيت مو گالو مريضة ؟؟؟؟

- لا مو مريضة

اهنا ندستني افراح حيل وكالت

- لا مريضة خطية غير يوم تجي اسلم على بيبي

-اهااا

كأن البنية ما صدگت بأفراح واني دنگت راسي وافراح كرصتني حسيت اني عكيتها بعد شخلصني

المرة جانت اسولف وياي وعشرية بس اني ما اعرف على گد الكلام ارد عليه

عبالها ما احب اسولف عافتني وافراح ضلت تغلط عليه اشلون فضحت امها ...

رجعنا للبيت لكينا عمتي راجعه من بيت اهلها

انه دخلت لغرفتي وگلت لوسام

- يلا خل انروح لبيت امي ما سلمت عليها

اهنا ندگت الباب

وسام - ادخلوو

دخلت امه وكلش معصبة

- والله مسمومه انتي اشلون اتفضحيني يم بيت اعيالي هااا

صفن وسام عليه ما فاهم  شي

- ما ادري والله عمة مو قاصدة

عضت اصبعها بحلكها وكالت أاااااخ يوم اسود من اخذتج يالجايفة

صكت الباب حيل وراحت

وسام اخذ باكيت جگايرة وراد يطلع صحت وراه وين ما راح تاخذني

- بعدين بعدين

ما رحت لامي بيومها وحزت بنفسي حيل

بالليل اندفرت باب غرفتي ودخلت افراح

- يلا يالفاهية شمتانية گاعدة ما اگومين اساعدينا بالعشا

- بس انه سويت البارحه اليوم مو دوري

- اهااوالله خوش لعد انت مو الغدة ما سويتي اكلنا برة هااا يلا گومي

گمت سويت

......

جنت اغسل ملابس گاعده يم المشعل احمي عليه ماي بالحمام  ومادة رجلية اخذت طاسه ماي حار وفرغتها بالطشت وبديت افرك ملابس وسام المدهنه   والتايت يمي من جهتي الشمال حاطته بطاسة واخذمنه غرف بيدي من غير ما التفتت ... للخلف

اجت عمتي

باوعت الي من باب الحمام وراحت . وراها رجعت شمرت ملابس عليه وگالت

- اشطفي ذني وياج

اباوع بيهن كلهن ملابسها

ما ناقشت كلت اكمل ملابس وسام واغير الماي الا اجلفهن .. مديت ايدي للتايت من غير ما اباوع اخذت صم بيدي حسيت بگرگشة كانه احد يگرگش أيدي بطراف أصابيعه

ابسرعه شلت ايدي وباوعت لكيت ابو بريصي صاعد على ابسرعه نكثتها وگع ولعبت روحي رحت غسلت ايدي ورجعت كملت غسل ..

ردت ادخل لغرفتي عمتي شافتني گالت روحي اغسلي الحديقة طلعت غسلتها ورجعت دخلت

عمتي - ولج توج خلصتي صارلي ساعه من گتلج اشگد فاهيه ما تلام امج من گالت بصباحيتج

روحي ساعدي البنات بالمطبخ ..

- اي حاضر

كلمة حاضر تعلمتها من امي گالت شنو اتطلب منج عمتج كولي حاضر وتم

رحت ساعدتهم رغم هنه من يجي دوري محد اساعد

..

گاعده انضف بيه ما تقبل عمتي يضلن للصبح وحمواتي محد تقبل تاخذهم يروحن يباوعن تلفزيون ..الي فرفحت روحي عليه وحبيته جنه نباوع عالم ست وهيبة مسلسل كلش حلو يطلع ويه غسلة المواعين  وما الحگ عليه دوم ..

رحت اركض لوسام من صاحني

- ادري اني مو گتلج بالليل لا تشتغلين

- مو عمة ماتقبل يبقن للصبح

- واني شعلية بامي قابل هي ماخذتج هااا

حرت اشلون ارضي وسام وامه بنفس الوقت

تقرب مني وهو بس يتكرظم لان ما ابادلة ساعه يگول رحيتج محلوة

راح سبح ورجع نام بصفي ..

اني نفس وضعي ما گمت من الفراش گمت ابجي ما احب الزواج اريد ارجع لسجن امي احسن الي ما اااريد كل يوم احسه ياكل بجسمي أكل دمرني  ضرب راشديات و عض وحتى مرات يخنگني برگبتي من يفقد گوة يهدني ....هو حباب وياي وما يضربني ابد بالنهار وما يغلط عليه بس بالليل جان عبالي هذا يصير ويه كل النسوان واستحي أسال امي اشلون چانت تتحمل  .. لزمت رگبتي چان طالع دم من اثر العضة .. حرگتني

نمت وغفيت  وانه دمعتي بعيني ،،،نص الليل يمكن حسيت اكو ايد دا تتلمس رگبتي بخفة و وبعطف تمسح بيها وبجروحي البقية حبيت حنيتها

- وسام ضل امسح بجسمي

گتله هيج لان چنت مرتاحه بلمساته الحنونه هو ما يلامسني هيج دوم عنيف وياي

بدة يرفع بثوبي اني گتله

- لا حباب بس امسح على جلدي ما اريد تعبت

چان وسام يرد عليه

- نامي ولچ فززتيني منو يمچ

گالها بصوت ناعس گوة نطق

اهنا  فز گلبي اهنا حسيت اکو شي مو طبيعي صوت وسام غادي عني بنهاية السرير ينام هو مايحب ريحتي وينطيني ضهره من ينام اصلا استغربت من لامس جروحي جفلت روحي وحسيت بأيد احد انحطت على حلكي جانت الدنيا ظلللمة حييييل مايحب وسام الضوة من ينام واللمسات اختلفت من حنونه الى شي ثاني بديت احس بثوبي الململ ينرفع عني واحد يشم بيه و بريحتي بشغف وحلكي مسدود ما اكدر انطق اللمسات ابد مكانت مال وسام حسيت الدم طار من شراييني اريد اصيح ما اگدر كأني مشلولة كلش ما اگدر اتحرك

حسيته بدأ يقبل بأثار جروحي وهي تهدأ ما تحركني  بس گلبي ضل يدگ بخوف واحس نفسي اختنك وماكو هوى اشتمه !!!!

گعدت الصبح مفزوعه ... ااااه هذا حلم ... اكيد حلم مو حقيقة اصلا اني ما حسيت بعد شنو صار ايحلم وخلص ... مممم بس كلش حلو عمي ياريت كل يوم يجيني هيج حلم !؟ .

سبحت بيومها بس جنت بس انظف جسمي واطلع ما اعرف اغسل بنية الطهارة ..

طلعت من الحمام من دخلت لغرفتي شفت عمتي ادور بكنتوري

-عمة

من حجيت فزت وحطت ايدها على گلبها

- خرعتيني ولچ

اشبيچ هيچ خازرتني كنتور ابنيي وجاي اشوفج مرتبته لا

طلعت وعافتني بس ليش وجهه اصفر ما اهتمت ...

...

اصرت بالليل سراب نلعب جماد حيوان وعلمني عليها من خلصنا جابن حب بالطاوة وبدينا نسهي اهنا طفت الكهرباء علينا وجينا اللاله وكعدنا داير مداير الصوبة

وسام جان نايم تعبان و امه هم

بس احنه البنات گاعدات

سمعت انه صوت بالمطبخ

- يمه هاي منو بالمطبخ مو كلنا اهنا

ضحكت حلى وگالت

-جني

انه ارتعبت حيل من غير شي انه ميته من الخوف هليام واحاول دوم اقنع نفسي  الي يصير وياي  تخيلات لو احلام

افراح

-اشبيج ست   هدى ترة صدك هههههه

چان قبل ما نأجر هذا البيت يگولون ياهو الي يأجرة يفلت منه يگولون بيه جني مسكون

انه گالت هيج انوب كلش صوفرت

سراب

- كافي ولج خرعتي البنية  يشاقن معليج بيهن

حلى

- لا مو شقة صدك اني دوم اسمع صوت بالحمام بالليل لو البارحه سمعت باب غرفتكم انفتح ومحد طلع منه وانسد وسمعت صوت خطوات على الدرج !!

غصيت بالحباية ضليت اكح وسراب انطتني  ماي وكالت

- ولج صدگتي ذني مشتغلاتج ناصبات عليج لا اصيرين خوافه

ااااه كلامهن مدري صدگ مدري شقة انه ضل مطبوع ببالي وضليت اخاف من خيالي  ماعدهم تواليت داخلي اظطر اتوسل بحلى تروح وياي لو سراب بالليل مشت هاي الايام بين غيره عمتي على ابنها وبين غيره افراح مني

امي حسره عليه اشوفها وسام ما يوديني الها واذا رحت ابسرعه يجي ياخذني .. 

...

باحد الايام ردت ادخل للهول أسال عمتي شطبخ غدة وجان وسام ما رايح للشغل

سمعتها اتحيلة علية واتگوله مرتك فاهية بالشغل و ما تغسل ملابسك عدل ودومها ضاربه صفنات واحسها جاهلة حتى اتخاف اتروح للمرافق بالليل وحدها غرنا شكلها يمه و ما همنا داخلها شنو

اهنا فزيت من ندستني فرح على متني

وصاحت

- يمة هاي تصنت عليكم

نزيت اني ودفعتني دخلتني يمهم

وسام اعيونه صارت تجدح شرر

وعمتي تغلط واصيح واگله شوف عمايل مرتك ابد ما مرباية

حمى من كلامهن وجرني للغرفة وهاي اول مرة يظربني بقصد يأذيني وطلع وعافني ابجي ....

انه ما تحملت لميت ملابسي وطلعت لگيته بالهول گاعد يدخن ضايج وامه تحجي براسه

- يلا وديني لهلي

ما اتوقع مني اطلع من البيت

- روحي لغرفتج

- ما ما هسة اروح ...

رحت طلعت بالحديقة وضليت ابچي ..وهو ما طلع ورايه ..اجتني سراب حاولت اتهديني بس اني جنت ضايجه حيل ما سمعت كلامها ودخلت ...

اجتني ورة اشويه عمتي

وگالت بس اطلعين منا ازوج ابني والله

انه اخترعت لا صدك اسويها وره اشويه رجعت دخلت ورجعت ملابسي

ونمت بيومها زعلانه عليه وضل ثلاث ايام ما يحاچيني وانه غلست عنه كيفت ما يتقربلي بعد وعلى راحتي  لا اسبح واشتغل على راحتي ما اسرع انه من اشتغل تاخذني الصفنات وأتاخر بالشغل خلصت تنظيف المطبخ ، حسيت العاده اجتني رحت لغرفتي ارتاح ،و وسام بيومها ثگيل عليه كلش من ما اتلگاه من يجي عباله مو بحاله وانه صدك مرتاحه منه بحجه الزعل ... فرايح نايم بالاستقبال .. وانه علگت الاله اخاف انام وحدي بالظلمة ساعه اگول اروح اگله يجي ينام وساعه اگول بس اصيحه عباله رضيت ويتقرب الي يبووو انوب مو جاهزة يشلع گلبي  ماعاونت اخلص منه .. اتحملت ونمت وحدي

حسيت ببروده فضيييعة تسري بجسمي رغم اني متغطية عدل حسيت الغطى بده يرفع عني !!

ردت اگول وسام هاي انت ..

بس ما گدرت وما اشوف احد اصلا الضوة ينشاف منه بس اني ما اشوف بس احس احد دا يحاول يدخل من يم رجليه جوة اللحاف وياي

نفس الاحساس جمدت اطرافي يگلك عليه قالب ثلج ما اگدر احركها والساني هالمرة انعگد محد لازمني بس هو ثكل اريد احركه ما اگدر

حسيت على رجلي لمسات جفلت خرت روحي اجه يغمى علية من الخوف وصلت اللمسات لبطني جنت احس اكو شخص دا يصعد عليه واحس بثقل فضيع واحس انفاس حاروگه عليه وصل لرقبتي حرقني حرق بأنفاسه كان يشتم ريحتي

واني وگف جسمي اشلون الخشبة حتى گمت ما ارجف يمكن ربع ساعه انه على هذا  الوضع

حتى وجهي بديت احس احد يشتمتي شم منه اشويه وانفك جسمي وحسيت رجع الدم يمشي بيه من جديد ركضت بطرك ثوبي الخفيف تعودت البسه من انام وطلعت للاستقبال حتى ما فكرت اگعد وسام  نرجع للغرفة سوة خفت منها كلها ، اتمددت ابصفه ودخلت وياه بالغطة وحظنته يمكن هاي اول مرة احظنه اني من وحدي !!!، حظنته من ظهره  من الخوف حسيته حس اكو شخص اندار عليه يمكن عرفني ،لف وحظني حيل وظل يقبل بيه عباله اجيت اراضيه ما يدري اجيت من ظيمي لبدت وراه !!

چنت نايمة واطيوف الماضي دا ازورني بأحلامي ...حسيت بحركة غريبة بين النايمة والصاحية   گلت يمكن رجعت الي الحالة ....

لكن الحركة بدت احسها من بني ادمي لأن ما حاسة بخوف ولا جسمي جمد مدري كثرة الادوية جمدت گلبي  ،اجاني من جوة سگطتة برجلي سمعت صوت اااه بس طفيف     گعدت شفته الحارس ابسرعه اجه عليه وسد حلگي وجرجرني لبره  حاط ايده على حلگي وضهري على عليه ومشاني بالگوة للخارج اني احاول اوخر ايده الچبيره وما اگدر تالي من طلعنا من الممر ضليت احاول اموت رجليه ما امشي بس هو ما دار بال سحلني سحل جلغ رجليه . ماعدنا غفر او احد يراقب المريضات محد يعتني بعمله واعتقد حتى لو شافوه عااادي عدهم واذا يعني قابل انه صاحية عدهم المخبلة هي والعدم كلشي مباح ينوخذ منها  .  سحلني لغرفة الحارس دخلني شفت الي وياه گاعد ويسد بدكم قميصه و وحده من المريضات تبجي ومن غير ملابس !! لبسها گدامي وانه هذا لازمني ما يخليني اتحرك وبعده ساد حلگي  ..

هم سحلها وطلع وهو يباوع لصاحبة ويضحك  همه ذوله  الحرس مالتنا !!!!! شمرني على القريولة الي چانت گاعده عليها البنية تبجي وصار الي صار مراح انساه بيوم ....

صحيت على نفسي نايمة على احد القريولات والممرضات داير مدايري يباوعن الي واني اباوع للسكف بغواش .. سعدية چانت كوة واكفه لأن تعرضت للصعقات الكهربائية من نهد ما اتهجمت على العاملة ، وانه هم روحي خاوية ...

اجني الممرضات اثنين وحده منهم السمينة

من شافتني صاحية گالت

-مو گلنا صحيتي وعقلتي شجاچ  وانهديتي على الرجال اذا مات تدرين شصير بيچ

راحن الممرضات وانه بدت نفسي تلعب واذب الاكو والماكو  ..

رجعت انتكست حالتي وحتى نسيت اني منو عشت ضروف جدا صعبة سنة الفين و واحد،

من صحيت خلوني بغرفة اصغيره انفرادية وحدي وبس سطل اتكرم بيه هذا هو الحجز ...

كنت ادنك راسي وانحني واباوع من جوة الباب للضوة اي اشوفه من بره وحتى اسمع صوت الناس اتوحش وحدي ..... يرسلون الي أكل بيد المريضات عود حتى يحطنه من جوة الباب لكن مكان يوصل الي شي واحس معدتي تتعصر من الجوع وانه ما اگدر اصيح او احجي اخاف من القزم لا هم يحاول  يدخل بيه جنت اشوفه يطلع من الارض ويصعد للسگف لو فجأ من ارمش يصير گدام بصري يخرعني چان عدة گرنين وانياب اتخوفني دوم طالع منهم دم

لازمه اذاني و احك بيها واعيوني تنسد وتنفتح و اريد اصيح عليه دوخني يصعد وينزل بس ما اگدر احچيي چان يطلع مني بس أنين ضحكت من شفته يضحك علية وصرت اباوع اله بتجسر ما عاد يهمني من اجتني قوة غريبة بغرفة الحارس وهو يحاول يفتح بنطرونة شلت الراديون ورگعت بيه راسة هو راد يوگع الضربة قوية حيل ضل حاط ايده على راسه ويباوع عليه اني شلت بوري ما ادري وما اعرف شنو من قوة خلتني اشلعه من القريولة الحديدية جان مال سورها شلعته ودك عليه هو گام يصيح ويحاول يبعدني واجه صاحبة اتراجعت للخلف وبلعت ريقي چان شعري الاشگر صاعد لفوگ و صاير مثل الحلقات  لان مقصوص و وشكلي شاحب كاني ممصوص دمي صاير لونه قريب للشفاف ..  چنت اباوع وابتسم اله باوعت لتحت حزامه هو احتار يگوف نزف صاحبه اشلون لو يوگفني اني اشلون ..

واخيرا قرر اتقرب مني بالاول يريد ياخذ الحديده مني اني گبل شمرتها گدامه هو شمرها ورجع رفع صاحبة . انه طلعت من الغرفة عبالة انهزمت لكني رجعت اخذت الحديدة وعلى راسه اندار عليه چانت مو حيل قوية الضربة

ضربته مرة ثانية تحت حزامه اهنا هو صاااح وحط ايده وكام يأن . خليت وشردت ...

وهذا عقابي يگولون اني متهجمة عليهم مغافلتهم وهايجة عليهم !!! خوش حرس ونعم منهم لمجنونه وحده ما كدروة !!!!!!!!!

زين اشلون گدرت اخذ الحديدة شنو چانو صافنين علية ؟ ينتظروني اتهجم

لكن اخذت جزائي وهذا الحبس الثمن . تسألت الي يوگف بوجه البشر ما يگدر يوگف بوجه الشيطان .... هاي الفكرة توها طرت بفكري المرهق يعني ما اگدر اتخلص من ذولة الي يضهرون الي  ..انه ليش ما اتخلص منهم ليش خليتهم ياخذون مني كلشي امي ابني كلشي عقلي صحتي شبابي انتهى انفيت بمكان عراني من كلشي لا كرامة ولا حشمة .. زين انه بعدني افكر بهاي الشغلات انه مو مخبلة همه كلهم يچذبون انه مثلهم بعدني افكر .. ضليت احك برگبتي واگول لنفسي

- انه بعدني  مو مخبلة طلعوني طلعوني .

.

فترة مو هينة حاجزيني وانه اقاسي المر لأن  وحدي و جنوني تحويني واتحوم حولي من كل مكان كأني مكشوف عني الحجاب اشوف السفليين و كأني وياهم ووحده منهم بس ما يتقربون مني ما اعرف ليش احسهم يخافون من چبيرهم مدري الاقوة بيهم ..  تذكرت مرة من ودتني ام محمد .. اي ام  محمد  مرت ابن عم زوجي هي الوحيده الي حاولت اطلعني من الي اني بيه الوحيده الي ما تخلت عني ومدت ايدها ، ودتني لمرة وگالت الها هاي نجسة وعاشگها من الجن السفلي ويحرضها على اعمال

ام محمد

- البينة مجان بيها شي ليش هيج صار بيها .. اصلا ليش صارت نجسة

المرة جانت فاتحه وصلة بيضة گدامها وكأنها تقره محتواها ...مدري دجالة مدري صدك تحجي

كالت

- هاي من يوم الي بلغت حاول يتلبس  بيها ويعاشرها .

ضلت ام محمد تتعوذ بالله من الشيطان الرجيم واتباوع الي چنت خاوية وبس ادموعي تعبر عن آلمي .. تذكرت اول يوم اجتني بيه الدورة ..

وتذكرت وتذكرت  كرهت أمي بالزايد ...

چنت اخاف اگول الها لانها دوم اتگول الي لا تتقربين على هاي المنطقة جان ابوية لهسة عايش ....

هزيت راسي وانه گاعده گبال المرة الي تاخذ خيرة ما اريد اذكر ذيچ الايام ولا امي . 

كتلها

- ساعديني

وابچي

المرة گالت انه ما بيدي شي

وصفت لأم محمد اتروح لواحد كلش خبير بس المبلغ الي طلبه منها حتى يرقيني كلللش خيالي اصلا انه من شفته كأني  اشوف گدامي شيطان حاله حال الي يطلع الي ..  ام محمد بعد ما انطردت من بيت امي و نوخذ مني كلشي بعد ما طاح اوليدي وانه بشهر السابع ..  اخذتني هي لبيتها محد مدلي ايده غيرها بس هي عانتني محد وگف وياي ، 

بطلت اتذكر سالفة ام محمد و گلت لنفسي

اشلون اتخلص من هذا الي عاشگني ضلت هاي احچايتها ادك بالي ..دوم يكولون عني نجسة ...

ليش انه نجسة

من طلعت من المحتجز حاولت قدر الامكان ماندگ باحد لا مريض ولا صاحي حتى بس اخلص منهم ..  دخلت للحمامات بالگوة تنطاق ااااه اني رجعت اكره هاي الريحه من جديد ..

غسلت جسمي .... نظفته وطلعت .. شلت شراشف قريولتي كلها بول المريضات من رجعت لگيتهم ماخذين ملابسي الي ام محمد منطتهن الي .. حتى القمصلة الحربية ما لگيتها جنييت وكلش ضجت ضليت اهبد عليها هاي لأن من ريحته جنت دوم من البسها محد يكدر يتقرب الي من جنوني من بعيد لبعيد يراقبوني .

واحسها تحميني منهم .... اااه يا حسن لو قابل تاخذني يمك مكان هذا حالي ..

ضليت اهبد عليها وادفع بالمريضات ... 

ما لگيتها ..  لزمت گصتي وانه دايخة حيل من الي يجرة الي ... حسيت نفسي رجعت على وحده ودست رجلها .. شفتها سعدية

سعدية - شتردين ؟؟ تعاي ندخل نسبح سوة

دفعتها حيل وگعتها وطلعت برة وجان

اشوفها ... ريحة حسن وطهارته لابسته احلام بس .... لحظة ليش كلها ماي من جوة .. جانت هي جبيرة وأحلام ناعمه اتقربت عليها اشتميت ريحتها تقرف هاي بس تعملها تحتها كضيتها شبعتها دك واصيااااح اي صياح صوتي طلع من غير ما احس

- ليش لبستيها ولج لللللييييش

نزعتها وعفتها بالممر تبجي من فتت من يم المريضات كلهن اتراجعن للخلف مرعوبات مني حتى سعدية الي الكل يخاف منها  .. رحت للحديقة حطيت القمصله بذاك البرد جوة الحنفية وغسلتها لان الحمام نجس وما اريد ادخلها بيه هاي جانت بالنسبة الي الطهارة بحد ذاتها ..  شفت الحارس واگف يشرب شاي و واگفة  يمة عاملة ، الحارس الي ضربتة على .. مو الحارس الي حاول يعتدي عليه ضحكت ورحت مشيت من يمهم وگتله

-اشلون صرت

شفت كوبه صار يهتز بايده خليت وشردت اشلون الطفله ..  المهم احس بداخلي اخذت ثار البنية وهم فرحانه بنفسي گدرت احجي گلت من اليوم احچي ابد ما اسكت على شي ابد ابد ..

انه مو مخبلة انه صاحية .. كلساع اذكر نفسي ..

بس اغسل هاي هي مايگدر الجن يتقرب مني هذا الي فهمته ..  نظفت افرشتي و ضليت ميته من البرد لا اغطية ولا قبوط عندي قمصلة حسن ضلت اربعه ايام الا نشفت ... الكل لاحظ من الممرضات التغير .. والعجيب هم الجنون والتخيلات ماعدت اشوفهم قليل كلش ومحد يتقرب مني بعد ... وانه من يضهرون ما اباوع الهم واغني لو احجي حتى اثبت الهم انه ما اهتم الهم ....

انتهى الشتا وخلصنا من البرد واجانه الحر وماعدنا غير المراوح ..

دخلت العاملة وگالت  بسخرية

- ست هدى يردوچ بعيادة الدكتور

فرحت رحت اركض اله ركض ..

دخلت بعد ما دگيت الباب واذن الي كان الطبيب ثلاثيني حباب حيل لان جديد ...

دخلت وانه اعدل بحجابي ..

اول ما شافني ابتسم وگال

- شنو هاي التطورات هداوي ..  

ضل يمدح بيه وسالني عن اهلي ولاحظ كيف تغيرت ملامح  وجهي البشوشه الى انكسار .. 

گتله ماعندي اهل انه وحيده امي وابوي ماتوا ورجلي طلگني

كلي حرامات اضلين اهنا .. هدى اذا ماعندچ احد تعيشين يمه ليش ما تشتغلين  واطلعين منا مو افضل الج

كتله انه اشتغل !!

گلي لا مو اهنا راح تشتغلين بمشغل وتتغير حياتج عيشيها من جديد ...احنه راح ندز تبليغ للي رسلچ لهنا بهذا  الخبر

-يا خبر

- انتي والحمدلله شفيتي هدى اساسا الهلاوس ما اچتت ولا ازورچ وعلى العلاج انت تمام واكيد راح تضلين تحت المراقبه ..  لكن الافضل ترحين منا .. حتى تستقر حالتج ..

كلام الطبيب فرلي راسي .. طلعت وانه حاسه نفسي تايها انه خايفه حييل من العالم الخارجي

وما اعرف لا اشتغل بره ولا اعتمد على نفسي رجعت للعنبر جان يلمع

شفت احلام تاكل وگع منها اشويه تمن رأسا خزرتها ..دنگت شالته وهي ترجف مني .. 

هدووء كلش جان الكل يخاف مني وصار بيه هوس اقل شي يوكع اغسل الغرفة واشيل القريولات خليته كله نظيفه اخاف لا الجنون تجينا من نظل وسخات حتى الي منعزله على نفسها انه ادخلها للحمام و اغسل الها واطهر اله ثيابها اخاف لا من خلالها يجونا لو الحمام الي طحت بيه جلف واراقب شكو وحده اتروح اله اروح وراهه انظفه !!!!!!

لهذا  بدة الكادر راضي عني ، هذا  الطبيب يجي مرتين بالاسبوع يزور المرضى وبشرني بالخير

،

مر شهر والوضع على هو ماهو عليه

چنت گاعده اسوي سلات ،العاملات يجيبن   الي خوص واني اشتغل الهن لبيوتهن سلات للتمر وللخبز و صواني خوص للخبز هم وينطني كم فلس ... كنت احاول اشغل نفسي ودوم اگعد يم ناس واشغل نفسي بتنضيف المريضات واخذ علاجي بانتظام حتى اعصابي اضل دوم هادية هاي وصية الطبيب .... وتيقنت انه مو مخبلة وزادت ثقتي بنفسي بعد ما الطبيب شافني وهو گال الي بنفسة

الحديقة هوسه وحلوة انه احب هاي الهوسة گاعده جوة ضل شجرة على جودليه من الخوص مالتي صنعي ؛ واصنع سلات واسمع صوت عصافير اصيح دوختني جانن اصغار ينتظرن امهن وبس يصيحن ..

شفت من بعيد العاملة تأشر عليه و وحده لابسة عبايه راسه واگفه وياه ما گدرت اميزها الا تقربت متوجهة عليه .. عرفتها هاي ام محمد

فزت روحي الها گمت وانه اتقربت منها وشمرت نفسي عليه وابچي واشاهگ ..

- ليش شمرتيني اهنا .. اطياف اخذيني الله عليج

ام محمد اسمها اطياف 

- والله على عيني على عيني عفتچ يا ام الگلب الصافي ...

مسحت دمعتها بعد العتاب الي طول بينا وگعدنا اثنيناجوة الشجرة ..

گامت اصلي على النبي من شافتني گاعده  و نظيفه و محجبة ومرتبة مبينه من هندامي راجعه لوعيي

-مبين يهتمون بيكم اهنا

مدري اضحك مدري ابچي اي اهتمام هذا

گالت الي سولفي شصار وياج واشلون صحيتي لنفسج .. سولفت الها كلشي ...

ضلت تلطم على صدرها ..  گالت لا والله ولا اگدر اعوفج اهنا ذوله مو بشر ..

بالتالي راحت اطياف  وما اخذتني وياها گالت رجلي  ينتظرني برة مادخل ...  راح ارجع اتوسل بام شروق مرة ثانية رجلها  بعده ما ازوج عليها ....فرحت حييللل

بس گالت ضلي هيج يا هدى الله يخليج حتى اگدر اطلعج ........بيومها ما گدرت انام وانه اعد الايام حتى بس تردلي خبر اطياف .. بس كون حسن يوافق ياخذني اااااااااه لو بس بوقتها قبل مكان اني اجيت لهنا

وهاجت عليه المواجع ۔۔۔

نرجع لنهاية  عام 2000  الشؤم

جانت ام محمد حابستني بغرفة جهالها ومطلعتهم عني ..واسمع اصياح رجلها ..

- يا مرة خل نوديها للشماعية ونخلص من مسؤليتها اذا ماعدها احد .. احنه شنو ابتلينا بيها لو ما ابتلينا رجلها ناقص اني اگلج ابن عمي ناقص شمرها بالشارع بس اني هم مو فاتحه شماعية احط مخبلة ببيتي يمج ويم جهالي ..  والله اخاف اعوفكم وحدكم وياها

ا طياف - الله يخليك بس اترد الي خبر تهاني والله كريم

- اگلج اطياف انتي هم يمكن اتخبلتي ...صاير لعقلج شي ..انتي وهاي ام شروق تخبلتن بالله هاي لان رجلها يريد يصگرها بمرة انتي اشبيج اتخبلتي ... اختج مخبلة انتي اشبيج تردين اتورطين الرجال بوحده مخبلة ...  هااا من يگول يوافق .. 

جنت اسد باذاني ما اريد اسمع صوته يشبه صوت وسام ...

العصر دخلت عليه مرة .... وانه جنت اصنع النوم حتى اخلص من الجنون الي تحوم حولي

اسمعهن  يسولفن

ام محمد اطياف  اتكول للمرة

- صارت كلش من وديتها للشيخ وما سويت الها شي ماعندي امكانية

ام شروق تهاني

- اووف من ظيمي غير ... عاد مخبلة اهون من صاحية تحرك گلبي اخذها للرجال مشيش عليه يريد يزوج ويذلني يا اختي تعبت والله ليلي ما انامه انه هذا الرجال الي يموت عليه هيچ يسوي بيه

ام محمد

- مو وكت حسرات هسة ... هاي هدى اتفيدج .. رجلج يقبل ياخذها ترة والله من ظلمها هيج صارت  هي ورده بس اشويه يسعى بيها تصحى 

نترت باختها  -شيسعه انه ليش تاعبه نفسي بيها هو يريد ولد وانه كلشي ما اريد منها اخذه اربيه بس خل اجيبه اله وانفك عاد

عبالهن ما اسمع ولا اعي حديثهن الي خوفني بالزايد ... من جابت طاري الظنه

اهنا رجل ام محمد معارض يريد يخلص مني ومن دوختي .. خاصه بعد ما شافني تجيني  نوبات جنون رسمي ... 

بس المرة الي ما اعرفها ولا ارتاحيت الها اصرت تاخذني وياها ورحت وانه ما اعرف شنو مصيري مسلمه نفسي بيد الناس . ..

دخلتني لبيت .. واني ما اشوفه ولا عقلي وياي حتى يميزه ..

بس شفت كومه بنات صافنات عليه .. وهي ابسرعه گالت الي انزلي  .. نزلت ..غرفه جوة البيت اثاري هاي سرداب جانوا اغلب العرااقيين يحفرونها بالبيت وقت الهجوم لان البلاد دوم حروب يختلون بيه شفت بيه غراض قديمه .. دخلتني

وانه اصيح وراهه لا اتعوفني وحدي

راحت واني بس ضوة الاله اشويه يوخر من خوفي .. 

وصار االيل انوب .....بعد ما اكلت الي دزته الي

شفت گرون طلعن من الحايط گبالي .. اني اهناااا ضليت اصيح بعلووو صوتي . الحگووووني الحكووووووني الحگووووووووووووني وطلع الي اديه ادين صخلة ورجليه هم بس وجه لا هو بشري ولا هو حيوووان اعيونه بنفسجية تلمع .. من هول المنظر بلت على روحي   ....

وضليت احشر نفسي بالحايط وهو يتقرب مني .. رافع اديه لفوگ ويباوع الي بنظرات خلتني ارعش رعش

ما كان الساني معگود  وكنت اصيح وهو يضحك كأنه يگلي محد يخلصج مني وبالفعل اهنا انفتح الباب  ودخلت ام شروق  مرة اتريد اصير اربعينيه سمينه وعدها شامه على خدها وسمره حيل ...بس معانيها حلوة ...صاحت عليه

- ولج اشبيج انتي اسكتي راح يجي الرجال

ياربي اشلون بلوه هاي اذا شافهه الرجال وين يقبل ياخذها بعد ...

شگفت باديها وراحت وابو گرون واگف يمها يضحك عليها !!! انوب من راحت بده يتقرب الي واني امعش بروحي بلكت اموت واخلص من عذابه .....

صار نص الليل انه اهنا صوتي ذبل گعدت قرفصت وهو هم قرفص يمي جانن اعظامه بارزات من جسمة گعدت اگبالي هو يتقرب بس يعوفني ويضحك عليه .. 

غفيت ونمت بس احس بحرارة فوگ راسي فتحت وجان اشوفه فوگ راسي وجه على وجهي اخترعت من شفته فاك حلگه وسوائل لونها ابيض تطلع من حلگه رجع طلع صوتي الحاد هز ارجاء بيتهم يمكن هز ....... حاطه اديه على اذاني واصييييح فقدت حسيت بدة يتحكم بيه .. جمد راسي ما اگدر احركه و وصوتي اختفى .... و اهو صار فوقي محاول يدخل السوائل لحلگي واني لعبت نفسي بس ادموعي تطلع أيست ...اهنا ينفتح الباب ...واحس بخطى اقدام خلت ابو گرون يبتعد عني ابسرعه ويختفي مرة وحده .. ابو گرون اختفى بعد ما  كان دوم ملازمني ويضحك يخوف بيه ۔ حتى يم الشيخ يطلع يوگف فوك راسة ويضحك ويطلع الي أسنونه الحادة .ماكوووو راح گمت اباوع يمنة ويسره واشوفلگ واحد بيده فانوس و واگف گدامي صافن عليه ........ اني بس ضليت صافنه عليه اشلون ابو گرون خاف منه وشرد ... !!!!!!!!!!!!

گعدت من نومي اثاري انة نايمة واني افكر بحسن .

باوعت يمنى و يسرة ادور هم اكو احد طالع الي من الجنون . همزين محد موجود .. طلعت ملابسي ما ظال بيهن غير ثوبين رثات و القمصلة الشتوية .. طلعته وگعدت ابوس بيها ورجعتني للماضي .واشلون أول مرة يشوفني بيها حسن

نهاية عام 2000

اختفى ابو گرون الي كل ما يضهر يفزعني فزع قوي ودوم يضهر اشوكت ما يريد وما يختفي من يشوف يمي احد بس من دخل هذا الرجل علية بفانوسة ابسرعة اختفى !؟

- اللهم لا نسألك رد القضاء ...

لا حول ولا قوة الا بالله

تهاني يا تهاني تعاي شوفي هاي البنية الجبتيها اشبيها

انه اباوع اله وروحي اطمأنت حسيت بأمان فقدته من أسنين طويلة  وهو يباوع الي بشمئزاز وحگة چنت اكثر من مرة متبولة على روحي ويمكن صارلي شهر ما سابحه وما اخلي احد يتقرب الي ،  عجزت ام محمد اسبحني واساعدني  ما گدرت .. وهاي المرة هم اول ما جابتني حاولت ادخلني للحمام وما قبلت اجيت اكتلها خافت مني ودخلتني للسرداب وسرقته من برة عليه ..  چان وجهي ملطخ بأكل قديم وجديد. و لافة شيله علي راسي واباوع اله بريبه لهسه ما مصدگه ابو كرون اختفى 

الرجل ظل واكف وحاط ايده على انفة ينتظر مرته تجي

دخلت تهاني

- ها اجيت اجيت

اشبيها هاي اصيح اخاف شافت حشرة .. ترة هي زينه مو كلش

جاوبها بعصبية

- ليش حابستها هنا ...

شو تعاي نحجي برة اخذها وراد يطلع وانه لا اراديا ركضت وراهم

- انتظروني لا تخلوني اهنا الله عليكم

طلعوا وتهاني ردت الباب

.. شفتهم وگفوا يم الباب وحچوا

- گلتي ابنية مريضه نفسية واساعديها .. شو اشوفها كلش هاي مختلة عقليا

- لا لا اشبيك انت البنيه ما بيه شي بس انه اريد اكسب ثواب بيها ...

- انتي ادورين ثواب !

كالها هازئه منها كانه ما مصدگها

- اگلج اذا مختلة كلش اصرفي ورجعيها على اختج اني ما اتحمل اجي تعبان مو اصياح و مجانين .... كافي عليه انتي

- يا رجال اشبيك صبرك عليه گتلك البنية ما بيها شي ...

- ما اعرف ليش احس ورة جيبتچ الها مبتغى ثاني مو لأجل الثواب لكن اني راح اسكت والله كريم .. ادخلي غيري ملابسها وطهريها الريحه تكتل جوة ...

...

كرهت الزلم بوقتها كلهم . كلهم نفس الشي والنسوان ارحم منهم من وسام الى  هذا الي جاي يحچي ويه المرة كلهم ما عدهم رحمة

بليلتها نمت مرتاحه وما قبلت ادخل للحمام بعدها كتلني الظيم المرة تدخل اتريد اتنظفني واني بس اصيح وابجي وصارت تخاف مني بيوم جابت ام محمد ودخلتها عليه

- شوفي هاي حالتها لچ خية هاي اشلون اقنع الرجال ياخذها اذا اجه من الشمال اني عبالي اصير زينه واقنعه بيها

ام محمد

- عيني اني جبتها الچ مو بس حتى تاخذين منها ولد واذبيها اريدها ترتاح بمكان الذل الي شافته  عدچ امكانية وديها للطبيب .. الكلب ابن عم رجلي كفة و وفى بيها كتل وظرب حتى بالكرك يضربها چان وفاضيح بالشارع كتل الها ابنها الحقير سقطة على ايده بعد ما ضحك عليها هي فطيره كلش  واخذ بيتها وسربتها

تهاني

- شوفي اكلچ انه گلت ادرايها بس ما عبالي هيج تخوف اشلون اطلعها منا واني اخاف على بناتي

- ما اعرف خيتي اني عدت عليج قصتها حتى تخلين الله بين اعيونچ ولا اتعذبيها بالزايد

اتوسلت بيه ام محمد اروح وياها للحمام بس القزم هالمرة طالع الي گاعد على متني اريد اگوم ما اگدر انه نفسي كرهت روحي ..

فعاندت وياه وكمت حطيت ايده على الارض وگمت ازحف لانه صاعد على ضهري ما اگدر اگوم اخاف يخنكني  بأيده

تهاني

- يا يمة دخيلك ربي اشبيها هاي هيج تمشي

اطياف 

- الله يخليچ هدى اصحي

انوب من يذكرن اسم الله خطافي  ينبت اديه بعقني اضافره احسها دخلت بلعومي گمت عليهن اثنينهن وصحت بصووت متعذب ومخنوووگ

- لا اذكرن اسمه كدااااامي لا اذكرن خر.......

ضليت اكفر واشتم وكفران جدا قوي

خليتهن وحده تحظن الثانيه وينتكأن على الحايط  من الخوف خلن بعدها وشردن اثنينهن

وسدن الباب .. وانه انطرحت على الارض افرك ببلعومي بعد ما نزل القزم الي دوم اشوفه ....

وقضيت ايامي يمها ساعه اغني وساعه اصيح واغلط من يتقربون مني الجنون الناس عبالهم وحدي هيج اصيح وادفع بالهوى ما يدرون ابعد بالقطط السود الي أتضهر الي لو بالعجوز الي تگعد فجأ اشوفها جوة رجلية تكسر بأضفيري تريد تاكلهم ..

..

چنت مطوية على نفسي  والقزم گاعد يمي وبزونه گدامي تموي  دخلت تهاني و وياها  الرجال ابسرعه كلشي اختفى من الي ضاهر الي باوعت للباب شفته نفسة الرجل .. جان مبين اربعيني .. طولة وسط وجسمة مربوع على سمين وعنده كرش ضاهر من دشداشته البيضة وبيده فانوس

مجان مجرور للسرداب ضوة او كهرباء .  انه بديت اخزره اشگد اكرهم كلهم ولا احبهم وخاصه عرفته  ما يريدني وبس يتفرجون  عليه گمت ابسرعه وخرمشته مثل البزونه على رگبته جلغته خليتها تقطر دم لأن اضافيري اطوال حيل  ، ابسرعه رجع  للخلف مكان متوقع مني اتهجم عليه لهذا ما بدر منه حماية لنفسه . المرة بالگوة لازمتني واصيح عليه وهو ضل واگف ولازم رگبته واعيونه مفتوحه على وسعها

جنت اصك على اسناني واصيح راح اكتلكم كلكم انتم وربكم الي خلقكم

هذا الكلام والفعل هم ما چنت اذكره اصلا همه الي سولفوه الي اني ما اذكر اصلا المواقف كلها من فقدت كلش بذيج الفترة ..

الطلعوا وعافوني ..اظرب بروحي .  گعدت الصبح شفت نفسي مربطة .. حاولت افك قيدي ما گدرت دخلت المرة ورادت اتوكلني وانه اصييييح بعلووا صوتي عليه  لان ابو گرون چان ضاهر وگاعد هو يتفل على الاكل وهاي اتريد اتحطه بحلگي غصب .... اهنا دخل الرجال نفسة ،  من دخل هم ابسرعه  اختفى ابو گرون  .. واني بديت الهث تعبانه من الصياح

صاح هو بصوته العالي الحاد

- يا مرة انتي شمسويه .. فكيها

من گال هيج هديت وباوعت اله  چانت لون خراميشي صاير احمر متيبس على رقبته لابس قميص وبنطرون هالمرة و بيده اوراق

الح مرة ثانية وهي صافنه عليه ما اتريد اتفكني

- ابسرعه

فكتني وهي خايفه مني .. اني ابسرعه عدلت گعدتي .. صحيح چنت اشوف هيكل جسمه وعرفته مو ضعيف وميزته من صوته بس السرداب حتى بالنهار اظلم حتى باللاله مو كلش تتضح ملامحنا هو هم اعتقد ما شافني اصلا  من يدخل بس يضل حاط ايده على انفة ويباوع لمرته ويحچي عليها ...

طلعوا برة .. ورة اشويه اجتني المرة وطلعتني لبره بالحديقة چانن بيها اربع نخلات اصغار و هي كلش چبيره بيها سياج مشبچ وگن جبيرر للدجاج مالتهم چانت اعداده هائلة گعدت يم السياج على الصبه ونزلت رجليه على الترابيه المزروعه خضورات .  كرفس و نعناع معزول عن گن الدجاج ..  ضليت اراقب اشلون الفروخ ترگض خلف امهاتها .. لاحظت گن اشكبره واعداد الدجاج الكبيره الا انه ماكو بس ديچ واحد بينهم ؟؟؟؟؟ . شفت العجوز ضهرت الي بس الدجاجه ضرگت عليها وانه متت ضحك واكول

-حيل تستاهلين واضليت احچي ويه العجوز ..

والمرة صافنه عليه ..... من يومها عرفت تهاني ما مني فايده ..  بس انه من گامت اطلعني و ما تحبسني بس وقت النوم ادخلني للسرداب ماكمت اصيح عليهم  ولو هي كلش اتخاف مني ومن اطلعني ادخل بناتها لغرفهن خوفا مني عليهن

بيوم دخلت عليه هي وچانت   تبجي و خلفها ام محمد  .. 

- لچ ما يريدہا ضحك عليه

گعدت تلم بملابسي الي انطتنياهم ام محمد وتبچي وام محمد تشكف باديها فهمت منها گايله لرجلها عليه ورافض كلش ياخذني ..

- شفتي يگول اريد وحده واعية و مثقفه شوفي طلع يريد مرة مو بس ولد .. تشگف باديها وتبجي . 

وانه گمت ابجي عرفت راح اطلع منا والامان الي لگيتة اهنا راح . وراح ارجع للطلطه

ام محمد

- شسوي رجلج قافل . ما يريدها واني حلفت اله گدامچ. چانت صاحيه وربت بيت بس رجلها واحد ناكر معروف وخاين يگعدتها بكتله وينيمها بكتله .  ودافع امها گدامها من الدرج وكاتلها مخليها تتخبل كلش ..  بعد ما ضحك عليه واخذ البيت

- اگلج يلا هاج اخذيها على شنو متحملتها اني اخذيها يمج او وديها لمستشفى المخايبل بكيفچ بعد ..

راحت جابت الي كم هدمه قديمه وگالت هاج ام محمد حطيلها ذني شتويات جاينه البرد وهاي سترة حسن ادفي نفسها بيها ..

طلعت من بيتهم  وخلال يومين ..بعد ما ضليت يم بيت ام محمد ودوني لمكان غريب وجبير... تالي طلع مستشفى ... شفت اشكال والوان بيه... اول ما دخلته اصيح وبغج ما اريد ام محمد تخليني وحدي بهاي الغربة ... لكن من عافتني دخلوني لغرفة غريبه وظربوني ابرة نمت عليها ومن گعدت هم نفس الحالة اصيح وفاقده  واجيت اخنگ احد العاملات .. تاليها نيموني و جربت الصدمات الكهربائية  الي هدت حيلي .. بعدها گومني وانه تعبانه ما حاسه غير بنفسي تلعب ..

گعدوني على كرسي واشوفلك گصيبتي الطويلة بحظني مگصوصة

ما گدرت احچي بس ... حسيتهم گصوا جزء من جسمي مو شعر حسيت نفسي ناقصه شي .. راح مني .. بتروها بترة اريد الزمها ايدي خدرانه  كلش . نيموني على احد الاسرة وانه ادموعي مغركه وجناتي .  اجتني سعدية وضلت تلعب بجسمي سوتتي لعابة انوب من گمت ابجي بصوت طفيف  اجتني احلام سوتني ابنها والا اترضعني من صدرها والتمن عليه المريضات ..

ما اگدر اگول هاي ابشع ايام حياتي لأن شفت الابشع والابشع عاد على العلاج اعصابي الي تلفت بدت تهدأ ..  واليوم واخيرا الكل اقتنع اني طبيعية من حقي احيى بعيد عن اهنا واشوف العالم ...

صرت كلي نشاط وحيوية واتمنى رجوع  ام محمد الي وتبشرني .. لان چنت خايفه من كلام الطبيب وهو الي يصحى ينطوه عمل حتى لو كان بالمشفى كعامله واعيش بالسكن الخاص لكن فكرة اني وحيده مثل هسه ارعبتني انه اريد رجال او احد يحميني تعبت واريد اذب حملي على احد  وبوجود حسن الي كل جنوني تشرد منه راح امن على نفسي

و مرت الايام وأيست من جية ام محمد ... وافقت اشتغل بالمستشفى كعامله اساسا انه من چنت مريضه ادگ شغل الهم  .. عفت المستشفى من ناحية المبيت ورحت سكنت بالمجمع السكني الخاص بالدولة اغريفه اصغيره على الگد  بعدني ما تاقلمت بيها

ولا لحگت اتأقلم بعد ايام باحد الصبحيات چنت انظف بالحمامات صاحوني

شفت المؤهلة النفسية والطبيب وام محمد و زوجها  وام شروق .  چنت لابسه ملابس العاملة الي هي فوق ملابسي قميص طويل مفتوح لونه نيلي  و لابسه جبة قديمه طبعا ملابسي كلها من اهل الرحم او من الدكتورات يعني مشيه حالي  چانت لونها هم نيلي ساده كلشي ما بيها وقديمه حيل وحجاب اسود سلمت عليهم بصوتي الناصي و چنت حيل مستحية رجعت مثل قبل اخجل من مجالسة الرجال حتى الطبيب رجعت اخجل منه ،گعدت اگبالهم وانه گلبي يدك فرح حسيتهم راح يأخذوني چانو يسالوني وانه اهز راسي اوافق على كلشي ... بس الي ما فهمته ما قبلوا اطلع وياهم .. بعد ايام اضاهر همه بقوا ببغداد . اجه عمي  . الا گدر يوقع ويطلعني على كفالته اي هو وصي عليه .. عمي الي راد يقتلني ! .  حتى ام محمد گوة طايقته بس طلعنا من المستشفى اخذ مبلغ من ام شروق وراح اثاري بالقوة قانعيه يطلعني ..   اخذوني ورحت وياهم والطريق كله انه افكر اشلون راح اصير عيشتي

دخلنا لبيت ام شروق وگعدت ام محمد گالت

الي

- شوفي يا بت الناس بالسابق وشفتي عيالج شنو سوو بيج

انه غص گلبي ولاحظت اشلون انگلب وجهي خافت عليه وما كملت

- اوف يروحي بعد ما اذكرچ بيهم بس انتي شنو عيشي حياتچ هدى بعدچ بعز شبابچ  انتي تذكرين عمرج هسه اشكد

هزيت راسي نافيه

گالت

- أثنين وعشرين سنه بعدچ باحلى ايام شبابچ يروحي تهني بكل لحظة اتعيشيها ولا تخلين الهلاوس اسيطر عليج مرة ثانيه انتي قوية .. وعلاجچ انتظمي عليه

گتلها بلهجة ترجي

- انتي راح اتعوفيني اهنا .. وحدي

- يا عمري انه انشالله راح اصير اخت ضرتج

بس انتي شنو اريدچ اضلين هيچ عاقله واتخبلين خوش

چانت لازمة خدودي و تحچي وياي بلطف

هزيت راسي بمعنى تم فركت بأصابعي وگتله بعبارة طفولية ضحكتها

-زين ليش ما ازوجيني رجلچ واعيش وياچ انتي

ضحگت بصوت اطياف وحطت ايدها على حلگها اسكت بنفسها وگالت

- والله عندج اسوالف .. افهمي هدى اني عندي الحمدلله ولد خير من الله وبنت .. و رجلي يموت عليه . بس اختي ما عدها بس اثمن بنات والتاسعه من جابتها رحمها شالوه لان نزل من كثر ما تخلف فوگه فوگه ورجلها يريد ولد ويريد يزوج عليها بكل الاحوال وصارله فترة يخطب وهي اتروح عراكه اتفض الخطوبة تالي متالي مل الرجال وهدا وگال ما اريد ازوج بس اختي ما صدگت خافت لا يسويها من غير علمها فجابتچ  مرة ثانية  معلى الاقل انتي نعرفج بت حلال واني من اجاني تبليغ انتي رجعتي زينة ما هانت علية اعوفچ وحدچ

غصيت بلعابي من گالت بت حلال وگتلها

- والله بس اريد اعيش وسط ناس

باستني ام محمد وانطتني گلبيه گالت البسها اليوم ..

دخلت للحمام مالتهن چان بيه حوض فرفوري تاليه تهاني گالت هذا ادخلين بوسطه واسبحين اذا تردين انه صدگ ترسته ماي ودخلت جواه مرتاحه حييل

تأخرت بالحمام وخافت تهاني لا سويت شي بنفسي دگت الباب گتلها اي راح اطلع طلعت من الحمام بالگلبيه الي انطتها الي ام محمد .. 

ضلت صافنه عليه تهاني وگالت

- ياربي صبرني ... حتى الخبلة اغار منها اشلون بگلبي راح اسلم الرجال الها . 

انه دنگت راسي ومشيت من يمها دخلتني لغرفتها .. چان اثاثها لونه  جوزي متن .. ضليت صافنه على ترتيبها بذاك الوقت انه كلشي ما شايفه ... والبيت توني الا شفته من وعيت . وگفت گدام المراية .. وشعري البني على شقار ينگط ماي على الگلبيه الورديه قماشها مطاط صيفي ما اعرف اسمه ! وبيها طبعه على الصدر فضية تلمع چان شعري واصل لتحت رگبتي توه راجع يطول بعد ما چان ولادي .. مشطته وسويته كعكه لفيته بقراصه حديد ام الطبكه كل هذا وام شروق گاعده على السرير اتباوع الي وحاطه ايدها على خدها واجر حسرات انه من العلاج .. جسمي صاير بيه لحمة بس چنت اهواي ارهط بالمستشفى وحركتي خفيفه  صارت !!!فما سمنت حيل يسموني اهنا رشيقه على مربربه ...

گعدت ابصفها وگلت بفطاريه

- اشوكت ازوجيني رجلج  !!!!!!!!!!!!!

باوعتلي واعيونها مشتعلة نار حسيتها راح تضربني اشويه اسرسحت عنها مبتعده

هي حست على نفسها نزلت ايدها وگالت

بعصبية خل يجي هو  العصر وافاتحه بالموضوع بعدين انه گلت اله انتي طبتي وضاله حايره ببغداد فجبتچ حتى اكسب ثواب بيچ هو قافل على  موضوع زواجكم

حزنت ويأست طلع ما موافق بعده .. اااه هم راح ارجع للحيره بنفسي ..

گتلها والعبرة خنگتني

- لعد رجعيني لبغداد انه ما اگعد ويه رجال غريب رديني اهناك احسن

گامت وگالت بغضرسة

- لا تخافين انه من احط شي براسي اسويه ياخذچ ويخلصني من الهم عاد انتي مگدور عليچ

شفتها أبتسمت من شافتني كلش فطيره فرحت وگالت الي نامي اهنا هسه واني رايحه اطبخ لگمة للرجال راح يجي ..  سمعت صوت قفل اضاهر قفلته من برة عليه وراحت بس كلت عود ليش الا اهنا اتنيمني اخاف رجلها يجي .. انه هم تعبانه انطرحت على سريرها وافكر بيوم انه راح انام وارتاح بهذا البيت ويصير بيتي

وغفيت على النعيم الي نايمة بيه .. يمكن اول مرة من انام ما اشوف خفافيش اطير ولا احس بخنگه  نمت وکاني نايمه على ريش نعام غفيت وكل جسمي ارتخى وارتاح 

سمعت صوت بين انايمه والگاعده .. احد يگوول تهاني ...انتي نايمه ؟؟ لعد منو الي بالمطبخ ...انتي تهاني لو شروق .... شروووق

انه انفزعت من حسيت الشرشف انشال عن وجهي صفنت بعيونه وهو هم صفن عليه .... همست

-حسن ۔۔۔۔۔۔!

هو مثل الي اخترع شنو انه هيچ قبيحه خرعته الرجال اتراجع للخلف وعثر وسقط على ضهره وابسرعه گام وركض بره الغرفه  . وانه طلعت من الغطه ولبست حجابي وخجلت ياربي بعد ما راح ياخذني اشكد  فشله  ...

طلعت اسمع صوته بالمطبخ رجليه اخذتني لطريقة . حطيت راسي على الحايط وانه اتمنى اسمع حسة ..

تهاني

- اشبيك اصيح عليه يا رجال منو بغرفتك

جاوبها بعصبيه

- هاي  هي هدى

- اي ... يااااا

گالتها بفهاوة

- نسيت نيمتها عبالي ما ترجع  هسة

-   والله فلا صدگتچ هاي سوالفچ حافظها ...

كلت الچ شلت الموضوع عن راسي ولا اضلين اتلحين

صاحت وسمعت  صوت چفچير ينحط على السنگ حييل

-شفت ما اتريدها لأنك مسويها من ورايه موووو

-لا حول ولا قوة الا بالله ...

طلع حسن وانه صرت گباله ..

غطيت بحجابي حلگي وراح هو من گدامي  ...

وضجت حييل ...

دخلت للهول شفت ابنيات احديثات وبس دخلت كلها شردت  خافن مني .. اهنا انه حزت بنفسي حيل .... يعني ابوهن اخترع مني وهنه هم شنو انه اشبيه ... رحت للمراية يم المغسلة اشو انه زينه ما معيوبه ...  لفت نظري المغسلة اشلون حلوة والحنفية الي بيها بعد احلى لا وبعد المراية اشكبرها ... اذكرت مرايتي قبل لا ازوج وضحكت ضليت افتر بالبيت كان واسع بناء شرقي .. رحت للدجاجات وگعدت اتفرج عليهن على الاقل بس هنه مراح يشردن مني

شفت حسن لابس بنطرون وكاشخ .. باوعلي وابسرعه اندار وراح وانه اباوع خلفة .

چان هو  حنطي على ابيض .. شعرة مخففه وماعنده لحية ولا شوارب .. وجه لا هو الطويل ولا هو الدائري واعيونه سود مثل لون الليل طلع وانه حسيته اتأخر اتعشينا وهو ما جاي طبعا انه من گعدت بالگوة امهن گعدتهن ياكلن ويانا اشگد حلوة  کومه بنات اعمارهم  متقاربه اتحسين بيهم تؤام من تقاربهم ... وانه كنت اتحسر على اخت وحده ماكو ... اكلنا چان اكلها كلش طيب وين هو و وين اكل المستشفى هذا كله لحم ..  انه اگلت بشراهه چني صارلي قرن ما ماكلة ،امهن گالت لشروق انتي اغسلي المواعين

وظلت شروق تتعارك ويه خواتها مو عليها اليوم السرة  .... انه من شفتها  هيچ گلت انه اغسلهم .. بس تهاني ما قبلت .... فرشت الي بالاستقبال .

والبنات قفلن غرفهن عليهن !

اااه احس نفسي نايمة بصحراء وكومه اچلاب تنبح عليه وابو گرون والقزم وكل الجنون طالعه الي وانه گمت اصيييح اصييح ...

واحس بناس يصحون بيه ويرشون ماي ...صحيت طلع كابوس لگيت تهاني گاعده فوگ راسي .... سمعت صوت حسن خلف الباب

- اقري الها كم اية حتى  ما تكوبس ...

صدگ قرت الي ورجعت نمت

..........

ثاني يوم انه گمت من الصبح  لگيت مواعين العشا محد غاسلهم نضفتهم ...ورحت گعدت بالهول ...ركزت بالجامه وسخ ... رحت جبت اكلاص ماي و وصله من المطبخ ..... بس الوصله اتلوصه .. ضليت اقلب بنظري بلكت الگه شي امسح بيه جان اكو طقم خشبي بالهول .... شفت كومة اوراق على احد القنفات .. اخذت وحده منهن عبالي مال البنات .. و مسحت بيها الجامة ..... واني منهمكه بالشغل سمعت حس ورايه يقلب بالاوراق باوعت شفته حسن .. يقلب بعصبيه ...

وصاح

-تهانيييي

انه خفت من صوته چان عصبي

اجت بته شروق

- ها بابا

-صحي امج شوفي شنو سوت بشغلي الي جابتها   ...

راحت شروق .. وانه من لهجت كلامه گعدت على الارض وگمت ابچي بعد ما تحملت عرفته ما طايق وجودي وكلش كارهني ...

-يالله ... كافي الله يستر عليچ كافي تهاني يا تهاني تعاي .. شوفيها  اشبيها

انه گتله

- ليش تكرهني ....انه اليوم راح اروح رجعوني لبغداد ......

-منو گال أكرهچ هو اني وين اعرفچ يا بت الناس غير تقرين الاوراق واشوفين  شنو بيها

-نضفت الجامه وصخه

اجت تهاني اتفرك بعيونها گوة گعدت ..

-شكوووو .. اشبيك اصيح على كيفك ويه البنيه

گومتني واني اباوع عليه مهضومه وهو واخيرا رفع نظرة عن اوراقه وشافني ...انه مسحت دمعتي وطلعت غيرها ....

ما طلعت من الهول گعدت على القنفة وگلت

- رجعوني رجعوني لهناك

جنت ارعش مو لان صيح عليه لأن عرفت ما يريدني الرجال  هي مو غصب انه خابت امالي الي بنيتها اهنا ...

المرة اتربت على متني ...

حسن تنهد وگال و واضح كلش ضايج

- تهاني روحي جيبي الها ماي  ...

راحت وبقت شروق اسكت بيه

-روحي انتي هم بابا

راحت وانه بمكاني ابچي ...

- اسمچ هدى مو ...

گعد ابصفي  على القنفة المجاورة وگال

- اول شي ليش تبچين شنو گلنا ...ثاني شي اني هم ما يفيدني هذا الوضع ...اني اخاف الله وعندي بنات  .. وجودچ اهنا ينافي اعرافنا ..

عبالي مرة چبيره او ما اعرف شنو غير الي شفتها البارحه ..   ابنية اصغيره والله ناعم عليج بالخلق

دخلت مرته قطعت كلامه .. هو گام وهي خلفه وانه رحت وراهم اصنت سمعتها گالت اله

- ها يا رجال شكلت  عجبتك 

جاوبها بتأني بالكلام

- ما اعرف خليني افكر بالموضوع .. هاي اذا اخذها فصدگي للثواب ...  البنية بعدها عدها توابع مرض نفسي ..انطيني مهلة كم يوم  ادرها براسي

يتبع

بالليل .. ما اتعشيت وياهم گعدتني ام شروق بالاستقبال واتعشيت وحدي ، چنت اسمع اصواتهم واتحسر ودي اگعد يمهم ما أگدر اتحمل بعد الوحدة ..

چنت اسمع صوت حسن من يحچي وية بناته

وطگطگة خواشيگهم اتخليني اتحسر على الگعدة يمهم ..

حسن وتهاني عدهم شروق عمرها يطلع فوگ ال 19 ، و امال و عذراء و زهراء و فاطمة و زينب و سكينة؛ و رقية عمرها 3 سنوات   .

سمعت حسن گال

-  يا وردة  اسوي الي چاي

اسمع صوتهن يتعاركن كلهن يردن يسون  اله

انه گمت عن صينيتي و مديت راسي .. ما شفته

ردت ادخل اكثر .. بس صارت تهاني گبالي چانت گاعدة على القنفة وخزرتني ؛ رأسا دخلت ..

ومرت ثلاث أيام وانه تهاني عازلتني عنهم بالاستقبال بس بالنهار اهواي ناس تجي على حسن وكلساع تدخل تهاني اطلعني للصالة حتى يدخلون ومافهمت ذوله منو !؟

ما تخليني اشيل شي او اساعدهم و بديت ارتاح الها من شفتها دايره بالها علية ... بيوم كل بنات حسن راحن مع ابوهن  .. واجتنا ام محمد

صاحتني . طلعت سلمت عليها چنھا امي وفاقدتها ذبيت نفسي عليه احظن بيها ...

گتلها اخذيني وياج

گالت

-هذا راح  يصير بيتچ

- بس الرجال ما يريد يزوج اخذيني حبابة

سكتت ام محمد صبرتني بنظراتها الحنونه

تهاني

- اشبيچ هيچ لازگه للمرة ولا يگلك نطبخ ونخلي بحلگچ ومداريچ

اني  خنست ورة اطياف لزمتها من زندها وغطيت نفسي وراها چنت بعدني الصوت العالي يربكني ويخوفني  حيل ...

اطياف

- على كيفچ  وياھا ، البنيةاتحبني مو قصدها شي ..

بعدين وين البنيات ؟

جرت الاه بحسرة تهاني وگالت

- ياختي هذا الرجال صدگ كارهني . اخذ بناته وراح يجهزهن جهاز المدرسة ولا گال خطية هاي المرة اطلعها واخذ بخاطرها

- يمعوده لا اضلين تتحسسين هو رايح يشتري ملابس مدرسه انتي شلچ بالتعب بعدين وين لاگية رجال يطلع يجهز جهالة والله ابو شروق ماكو منه ورده

- اهه اطياف  اليدري يدري والمايدري بگشة عدس الا أگلج من يومها ما طاخني و نافرني اااه بس شگول وشدعي على اصفية اخته هاي مسويتنا عمل

طياف ابتسمت وگالت

- طلعي المرة من ذمتج فارغة الچ اسوي اسحورة  چان سوت لرجل بتها طلگها وذبها عليها

- ذكرتيني انوب هذا حسن فوگ ما هي ما تجي النا وتكرهني يروحلها ويسألها شنو محتاجه هم امداني اي والله واني اخوتي لو اموت محد يحظر جنازتي لخاطر نسوانهم

باوعت الي اطياف هي چانت گاعده يمي واني لازگه روحي بيها

- اي يا عروسة اشلونها امورچ اهنا

ربكتني من گالت عروسة وخجلت

تهاني

- يا عروسة . اعدل بيها دوم واريد حسن بس يطلع الها ماكو الرجال قافل بس لا مزوج من ورايه

ضحكت ام محمد بصوت وگالت

- ولا يبطل حسن سوالفه دوم يشتغل من وراچ غير البارحه اجه لابو محمد و سألة عن ضروف هدى

تهاني انعقچ وجها  وگالت

- شنو !؟؟؟؟ عن شنو سأل وليش ؟؟؟

- عيني يريد يعرف شنو صار وياها بالظبط وهي من يا عشيره واهل امها ويريد كل معلوماتها يعرف الصغيره والكبيره عنها .. حتى يزوجها و ياخذ بيها اجر لان يتيمه ومريضه

تهاني - ااااااااه

من سمعت تهاني بالخبر هو وناوي يسوياه صدگ و واصلة للسؤال عني .. حطت ايدها على گلبها وصاحت گلبي وصار وجها ازززززرك كلش

ركضت ام محمد عليها و تهفي بيدها بوجها ...واصلي على النبي و تسمي

اما انه گاعده بمكاني ما فزيت ... ما اعرف خفت حيل گلبي مو عادي يدگ صار يهتز بصدري هز و اكو مرارة بجوفي  گمت من يمهن ورحت اشرب ماي وانه اگول لنفسي  لا تخافين

هدى .... لا تخافين

صاحتلي اطياف . رجعت الهن بالهول

اطياف

- اشبيچ هدى ليش لونچ مخطوف هاااا

تعاي اگعدي اهنا

گعدت ابصفها وگالت

- لا تخافين حسن رجال يخاف الله وراح يراعيه بيچ

ما حچيت

تهاني بحسرة

- يعني هاي هي قبل بيها

گالتها بستنقاص وهي اتباوع الي وتأشر عليه

- اي عيني راح ياخذها

شوفي هداوي انتي راح اصيرن امريته ..  لازم هم اتعرفيه هو منو

انه چان بالي مو وياها وبس اصفن .. بالگوة الا گدرت تلفت انتباهي

- شوفي حسن  . من عشيرة ******* و عمرة 42 سنة سيد من نسل رسول الله

صفنت بداخلي اثاري لان سيد كل ما يشوفه احد جنوني يختفي بخوف منه

-وين صفنتي انتبهي ........ لازم اتعرفين عنه كلشي .... مزوج وعنده اثمان بنات  والتاسعه ماتت وهي عمرها شهر ..

شفت تهاني اتباوع للارض وتهز براسها وتاخذها الحسبات واتجر الحسرات  وتفرك بقلبها ...

رجعت باوعت لطياف واني مشبعه بالفضول اريد. اعرف اكثر عن حسن .

- تاجر بالسوگ واله اسمه ولان قديم بالمنطقة وسمعته سابقته سيد و صاحب واجب اختاروه مختار للمنطقة بعد ما اتوفى مختارها ما صارلة اهواي .. يعني انتي راح اصيرين مرت المختار ..

عرفت واخيرا شنو شغله وذوله الناس چانو يجون حتى ياخذون ختمه بالوثائق  .

- انه دزني ابو شروق البارحة گال الي تعاي اخذيها اشتري الها كم هدمه ...

گتلها

- هو ذكرني

صاحت تهاني

- اشبيچ لاگفة على الرجال من هسة

وخلتني ارجف انه صحيح رجعت انطق لكن صوتي ناصي ومهزوز وبالقوة ابلع بالحروف  من انطق بعد اكو خوف بداخلي .. گمت وگعدت على نفس قنفة اطياف حصرتها حصر ولبدت وراها ...

عضت شفتها ام اطياف لتهاني وگالت

- لچ ليش خفتي هيج ترة هي تهاني هيج صوتها عالي ...بس گلبها طيب ترة تهاني اختي الجبيره

احسبها مثل امي الثانية . ربتنا ويه امي احنه ثلاث بنات واثنين اخوة  .

انه گلت

- خوش

- هههههه وردة اريدچ سباعية ...... ولا تخافين

-خوش

- ونظفي دوم نفسج وگرضي اضافيرج  وصلي ...

- خوش

- عفية عليج

اخذتني ام محمد وام شروق قفلت البيت وراحت ويانا ....

چانت ام محمد تشتري الي ... كم قطعه قماش اني ماعندي ملابس ام  شروق ذبت كل ملابسي لعبانه نفسه منهم بس گلبيتين وحده الوردية من ام محمد والثانية انطونيها  من شروق ولا ملابس داخلية ولا حتى عباة عندي . لبست من شروق ورحت وياهن ... 

چنت اتعثر بذيالها ما اعرف لان اشوية بيها طول او لأني قليل جدا البسها لأني اذا  دخلت مكان بعد ما اطلع منه الا طلعات قليلة جدا  .. مثلا بيت امي من اتوفى ابوية ماشفت الشارع  . لو عد وسام الطلعه حسرة عليه ...يمكن افضل  مكان كنت اتنفه بيه هو المستشفى من اطلع للحديقة  !

وكلساع تسرسب من راسي العباة وراجع اعدلها وگفنا يم محل يبيع 

قماش عبي واكو عبي جاهزة ضلت ام محمد تتعامل وياه ..وانه واگفه خارج المحل الرجال يحجي وياها ويباوع الي كلساع .. انوب انه دنگت راسي  و راسي يهتز وحده .. ما اعرف هاي الحركه صاحبتني من يوم ما خفت من الي شفته ...

انوب هذا ما اعرف ليش كل اشويه وخازرني ..گلت ارجع للخلف احسن اخاف لأن واگفة يم محلة برة .. رجعت من غير ما التفت ماادري على شنو سحگت يزلگ وانچبحت على ضهري

اجتني ام محمد  وتهاني شفتها غمتني انه خجلت الوادم ضلت تتفرج عليه وگذلتي طلعت من الربطه ... وحال الضيم حالي .. وعباتي صارت بيضه من التراب .. گمت  وام محمد تنكث بيها اخذت كيس العباء الجديده اشترت الي جاهزة وام شروق الي تحاسب .. چانت بصراحه مهيوبة .. تلبس عباية سودة تلمع و شادتها ببلك سود على شكل ورده من ليلوة اسود و تلبس كتافيات اصير اعدها اكتاف

ملامحها حلوة بس وجها بادي تضهر بيه التجاعيد يم العين والحلك وهي سمرة حيل حتى من طلعنا وحارة عرگت وازدادت سمار وسمينه انوب ... وعدها بطن حيل جبيرة من كثر ما حبلانه . عكس اختها رشيقه وحلوة ...

دخلني لمحل ملابس داخليه اشترن الي كم غرض لازم وطلعنا لابو الاحجبة هم اخذت الي حجاب اصفر و وردي ..

الغراض الي اشترنها بس حتى اتسد حاجتي كبنت .. حتى شب مطحون اخذن الي وجنت ما اعرف المن يستخدم  واشترن الي شحاطة و مداس وقراصات ومن هذا القبيل ....

رجعنا للبيت ابو شروق لهسه ما راجع  ...

ام محمد گالت لازم اروح لبيتي عفت جهالي يم الرجال هسة الگه اعيونه مشعولة ... راحت واخذت القطع اتخيطهن يم خياطتها ..  وام شروق عافتني وراحت لغرفتها ...

احتاريت وين اگعد  و وين اضم عباتي الجديده هي وغراضي .  حطيتهم على الطقم بالاستقبال وشمرت فوكهن الملابس الداخلية وذبيت العلاليك ..   ورحت للمطبخ  طلعت فواكه وگعدت اكل على الارض . چان الكاشي بارد حلو  ونظيف ..  ضليت اباوع لكاونترهم اشكبره خشبي جوزي لونه و اول مرة اشوف كاونتر ثاني  معلك فوك !   وسلة حلوة يم السنك الغميج  جبيره بيه صحون واگلاصات وترمز اشكبره للماي البارد ابصف الثلاجه لو الفرفوري الي تارس الكاونتر الفوگ لا يعد ولا يحصى معقولة هذا البيت راح يصير الي بيه حگ وانظف بيه وارتب وياهن ويصير الي غرفة جديده انام بيها .. سمعت صوت الباب  وصوت هوسة بنات ..

- ماما تعاي شوفي شنو شرينه انه رحت وراهن  دخلت واتمشى بستحياء من شفت ابو شروق دخل وياهن للهول ذب العلاليگ مال جنط المدرسة على الطقم والبنات ضلن يفتحن ويراون لأمهن اشنو اشترة ابوهن وهي كعدت تتفرج وتمدح بذوقه وهو ولا يمها حاط بته ام ثلاث سنوات ويفتح الها بنجتطها على شكل ارنب وبته اصفك فرحانه .. وانه يم الباب حاطه طرف حجابي على حلگي ومدري ليش مبتسمه على فرحن ... شروق طلعت لامها ملابسها مچانت مال مدرس كوستم سمائي وكعب و غراض اول مرة اشوفها ضليت أتأمل بيهن و عيني زاغت على جمالهن

تهاني

- يوم هذا لونه كلش فاتح

شروق

- لا شنو كلش حلو ذوق بابا هو  اختاره

انه گلت بگلبي هاي شنو الزلم هم تشتري ملابس للنسوان ؟؟

شروق

- على العموم ماما اني ما اشتريت غير كوستم واحد والدوام يرادله كومه ملابس وما لحگنا ....

التفت على ابوها وگالت

- انت وعدتني تاخذني غير يوم وحدي مو بابا

- يصير خير

عذراء طلعت باكيت عطر وانطته لتهاني

- ماما هاچ هذا بابا جابه الچ

ضحكت الام حسيتها طارت من الفرحه واتباوع لرجلها الي منحني ويلبس ببته ام ست سنوات حذاء يجربة عليه ..

- صدگ ابو علي ذكرتني رحم الله والديك

ما جاوبها و احتار ببناته الصغار حتى ما لاحظ وجودي  .. ام شروق اخذت العطر وراحت لغرفتها ..بيومها سوت النا عشه وهي تغني عجيب امرها ..

طلع ابو شروق المغرب وما رجع غير بالليل

انه من همه بالهول اروح دوم اسمع عليهم

اخاف حسن يذكرني ... وهم احاديث الناس احس بعدني عايشة من اسمعهم

خلف باب  الاستقبال وگفت

تهاني

- تأخرت  اليوم

بعد سكووت طويل الا اتكلم حسن

- رحنا اني وابو محمد لعمام هدى

- هاااااااا

- ناس تعبانه وابد مو ولد خير ومبين البنية حيل انظلمت ويه اهلها عفت ابو محمد ورحت سألت على ابن عمه واحد طلع سكير وهم مزوج كل يوم الجيران يشكون من صوت مرته وخواته من العرك مالهم ... ناس تعبانه  ... حگها البنيه من صارت بيها حالة نفسية

- اي اهواي اكو نسوان تنظلم بزواجها

- اكلچ اني هاهي مدام طلعت بت حلال .. راح اخذها واكسب بيها ثواب وانت هم ديري بالج عليها

صاحت بصوت

- واني شنو شايفني حتى اتوصي هو اني الي جبتها الك وراح ازوجها الك على ايدي كل هذا ومو بعيونكم

سمعته كال ببرود

- اروح انام

وانه مالحگت اشرد  چنت مسطورة ...لمحني وانه اروح من گدامه .. ثاني يوم ...العصر .. راح هو وبته الچبير ما جنت اعرف ليش هيج يجهزها شنو راح يزوجها ...خطية راح اشوف شلعان الگلب ويه الزواج ؛ الزواج !!!!!!!!!!

لن واحد وهفني براشدي من اذكرت واجبات الزوج .. گعدت على الگاع وانه گلبي يرجف انوب هذا شكلة كبير راح يشبعني كتل وارجع اعاني وياه اقصد بالعلاقة الزوجية لأن هذا الي فهمته الزوج يكتل بزوجته اثناء العلاقة

انه ما محتملة كل الي ردته من يزوجني راح اضل ببيته محمية من البشر ومن الجنون هم ..هو اني خفت لا حادثه الحارس تتكرر مرة ثانية الي ببغداد واجيت اهنا احتمي تحت جدار بيت بس نسيت تماما سالفة الزواج هاي ..

يلا هذا  عنده مرة بلكت ليلة عدها وليلة عدي راح تكون اهون شسوي هاي سنة الحياة رجلي اعاني منه ولا غريب ....

راحت شروق ثاني يوم ويه ابوها هم تشتري

المغرب رجعوا وانه هم وگفت يم باب الهول بس حتى اشوف مشتريات بته چنت اتنوس بس لمجرد اشوف الغراض ...

دخلت وخواتها اتلگنها تفتحهن بس من شافتني خزرتني وگالت

- اشعندج اهنا يلا روحي ..

دخل ابوها  ما سمع كلامها وانه ردت اروح . لكنه لمحني

- ااااا ي هدى

كأنه ما متعود يصيحني وانه هم ما متعوده اسمع  اسمي بصوته

- هاچ بوية انطيها

انطه لعذراء اشياء بعلاگه وهي وصلتهم الي اخذتهم وانه ما مصدگه هو جايب الي اشياء ..

شفت عذراء راحت لغرفة امها تركض وانه دخلت للاستقبال اشوف شنو بيهم ....

-الله ثوب

چان ابيض حاضر وكله شذر اول مرة اشوفه وردنه عريض كانه بوق حسيته مال عرايس ؟؟

انوب ملابس طلعه ،كوستم و حذاء يشبهون مال  شروق الشفتهم البارحه بس على غير لون اكول ليش شروق خزرتني ...

چنت مدنگه عليهم و گاعده على الارض ..

واندفعت على الارض وگعت على الملابس كل ظني القزم رجع الي ويريد يصعد على ضهري باوعت شفتها ام شروق ويمها عذراء

- هاي شنو مشتري الچ خل انشوف بالله

گمت عن مكاني ووكفت گدام الملابس

رفعت بيدها من دون الملابس الثوب الابيض وضلت اتباوع اله وايدها ترجف

واعيونها اكلنه اكل من فوك لوجة طوته وشمرته وگالت

- شنو هاي المخازي ما اتلوگ الچ هو انتي بيضه باهته انوب اتلبسين ابيض

هزت بأيدها وداست على الثوب برجلها وبتها قلدت حركتها وراحن ..  شلته وحطيته على الطقم مع الملابس . مجان عندي مكان .. همه حطوني اهنا وحتى لغرف البنات ما يقبلن ادخل .. حتى ما يگعدن يمي انوب من انتشر خبر زواجي من ابوهن كلش حتى من اكعد يمهن يگومن .. 

مرة رحت للمطبخ حتى اكل

سمعت شروق اتگول لمها اتراجعي يمه ما نتحمل انشوف ابويه بغرفة وحده ثانية

وانه حيل خفت لا امها اطاوعها لكن ارتاحيت من گالت

- لا يمة ما اگدر اتراجع ابوچ يريد ولد .. هو الوحيد لهله وخواته وبيبيتچ يلحن عليه يزوج عليه عاد هاي فطيره وماتاخذ ابوچ منا لا يغرچ جمالها يومين ويمل منها ابوچ شخصيه قوية ويريد وحده حوك مثلي اتقارشه واتناقشه مو هاي اختج عذراء الوت منها

........

چنت گاعده  واباوع للثوب الابيض    ..

اجتني بت حسن الصغيره گالت بابا يريد يدخل ناس روحي منا هدى انه ركضت للمطبخ ...ورة اشويه من راحوا الناس

سمعت صوت حسن عصبي

رحت للهول شفته يحجي ويه زوجته

- انتي اشلون اتخلين ملابس بالاستقبال دخلت وسط اهدومي من قحطان شافهم لا وانوب ........

سكت استرجع اعصابة ، وگال

-استغفر الله

يامرة صغرتيني ياريت ملابس عاديات ..

گالت بهدوء

- واني شعليه غير هاي هدى حاطتهن

انه خجلت ردت ابچي

گال بستغراب

- ليش هي اتخلي ملابسها اهنا ..

شروق يا شروق

اجته بته

امرها تنطيني خانتين من كنتورها

وضلت تتكرظم ما قبلت زجرها وخزرتني من شافتني واگفه يم الباب ..

-بابا لا تكبريها انتي كلها ايام واسافرين اصلا هاي غرفتج راح اصير الها بالمستقبل

هو گال هيچ وكلهن گبن حتى الام .. گام من مكانه وكال بهدوء

- هذا الي رادته امكم وعيب هذا الكلام راح اصير منا وبينا

هم راح وهنه گبن على امهن لأنها هي صاحبه الفكرة خلنها تدگ على صدرها ...

بيومها هو گال اني رايح ابات بالامام .. استغربت هو الامام علي يباتون بيه اخر مرة زرته ويه ام محمد اووف وما اريد اذكر ذاك اليوم من گمت ازحلك نفسي على الارض لان حسيت بصوت يدوي بأذني يگلي اطلعي منااا هذا مو مكانج

هزيت راسي ما اريد اذكر ايام جنوني المهم چني راح افرح ابو شروق مبين حنين حبيت حنيته على بناته  واكيد هنه راح يحبني انه ما اذي احد.

سمعت صوت سلام نسوان

من اجانه هيج وقت

سمعت ام شروق ترحب بيهن هي مضياف

رحت اصنت

سمعت وحده اتگول

- اي وينها عروسة اخونه الجديده انريد انشوفها

جرت الحسره ام شروق وگالت

-بعدها مو مرته هليام الا يعقد عليها بعدها مصارت عروس

- اكلچ الضره مرة انتي اشلون قبلتيها على نفسچ

ام شروق اجاوبهن  برصانه

- اعرف حسن يحبني ويشم التراب الي امشي عليه . وهاي ابنيه يتيمه جبتها اله حتى نكسب بيها ثواب

- يمعوده خل نشوفها ...

-اي ليش لا

صاحتلي وانه ابسرعه دخلت وهي خزرتني عرفتني چنت لابده اسمع كلامهن

شفتهن اثنين نسوان اسمان وحده بيهن بيها شبه من حسن

ضلن فاتحات اعيونهن  و وحده منهن صلت على النبي وانه دخلت وراسي معوج على جهتي اليمنه هاي طريقه مشيتي اتعودت عليه لان چنت من امشي يصعد عليه خفاش ادمي اصغير على متني خلاني احني راسي واتعودت على هاي المشيه !!!!!

- لگ خية هاي الملاك وين لگيتيها اتخبل والله حسن صبر صبر ونال

حسيت اكو شعلات بنظرات تهاني الهن

كلامهن كله كان مثل السكين بخواصر تهاني

حسيتها راح اگوم تطردهن

ردت تهاني  بكبرياء

- اكيد اني عندي ذؤق

-ههههه وحتى يطلع ابنا اشكر ابيض مو خاله

گالت اخر عبارة الها وهي تباوع

الي اني دنگت وما جاوبت

الثانية سألتني

- شنو اسمچ يحلوة

اني باوعت لتهاني بمعنى اجاوبهن لو لا

تهاني

- اسمها هدى ليش نشرة الاخبارة ما وصلتكم كاملة

الي تشبه حسن گالت بخبث - اكلچ انتي اشگد عمرج چنج من عمر شروق بته

شروق جاوبتهن بغضرسة

- لا عمة شنو بگدي هاي مواليد 79 واني 82

-اها ناعمه وتخبل الله يحرسها

انه رحت للاستقبال من حسيت بوجع ببطني ...وبعدها هنه راحن .. عرفت العاده اليوم تجي من الوجع حضرت الوصل گلت بس تجي ادخل للحمام ونمت على القنفه اتلوة ..

سمعت صوت اصياح تهاني هي من غير اصياح صوتها عالي مو انوب اصيح

- يا حرگة كلبچ يا تهاني يا مصيبتج يا تهاني

فرحت الشمات بيج يا تهاني

قربت رجلية على بنطي واتكعورت وانه نايمه وحاول اسد بذاناتي صوتها ارعبني وحسيته قرب من الاستقبال

دخلت وجرتني من ايدي گومتني

- و و ين

-تعاي يا فرحة الشمات اني جبتچ بيدي لا وانوب تردين تاخذين غرفة بناتي

جرتني وانه اتلوة من بطني وشمرتني بالسرداب وانه اصيح واترجى لا تتركني وحدي  ضليت

يتبع .....

ظليت لازگة على الباب وانحب حتى بس اطلعني 

هي هم اسمع صوت بكائها وكأنها گعدت خلف باب السرداب تبكي واسمع صوت ضرب كأن تضرب نفسها وتبكي

- افتحي لا اتخليني اهنا ... حبابه طلعيني ... طلعيني

ما كنت اسمع غير صوت انين وبنات يسكتن بأمهم

تهاني

- ليش ياربي جاي اتعاقبني هذا اول شي راح تاخذه مني ...

اني جنت خاله راسي على الباب بس اريد اسمع صوتهن حتى لا احس نفسي وحدي اهنا .. اشويه وصارت هدوء عرفتهن راحن وخلني وحدي .. گعدت تعبت من الصياح والوگفه واني بطني تلويني حيل ..

ضليت ابچي .. حسيت اكو شي نزل عرفته دم رجعت  اصيح

- لا تخلوني بالظلمة طلعووووني

حتى لالة ما جان اكو كلشي ما اشوف هندس

صفنت على ضوة ازرك بدة يطلع من يم الحايط الگدامي حطيت اديه على ركبي واني ارجف ... الضوة انگلب احمر وطلعت الية گرون ملتوية ولسان من الحايط ... طلع كله يمشي برجليه رجلين صخلة واگفه وگوف وخلفة القزم شايل جاكوك ردت اصيح انبلع صوووتي وراح مرة ثاااني اهنا انهد حيلي انوب حتى علاج ما ماخذه بعدني ما اريد اشرح شنو صار بيه بذيچ الليلة بس الشياطين گامت تشم بثوبي الملطخ بالدم والليل كلة ابو كرون اكرونه نابته بمتوني يريد يشك اهدومي بس ما سوة ؟ ومن چان يحاول وما يگدر يون بأذني يخليها اطن طنين قووي كأنه ينتقم مني لان ما گدر يتقرب الي بالايام السابقة من بديت اجنبه  ودوم نظيفة واخذ علاج يهدي اعصابي وما اگعد ابد وحدي

رجعلي همي اضاهر هذا مكتوب عليه طول العمر .....

الصبح صبح علية فتحت اعيوني ... لگيت ايدي كلها دم حكيت راسي بألم لان نايمه على الارض ...حاولت اطلع صوتي وصحت

- طلعوووووني

سكتت من عرفت ما عگد لساني هالمرة عبالي هو يتحكم بيه ..

حسيت الباب ينفتح گمت ركضت وانه اتألم ودي اكتل تهاني دمرتني ورجعته الي ..  انفتح الباب وصار حسن بوجهي اول ما شفته

وگفت ما صحت صفن هو على حالي

شعري منفش ثوبي مطكع حتى راسي بيه دم

خزرته من شفته يباوع بستنكار وهم دنگ راسه

-شنو على شنو اتباوع رجعوني  رجعوني لبغداد ولا تخبلوني مرة ثاني

جانت طاقه ابو گرون بعدها بيه وراح ذاك صوتي الناعم الخجول وضهرت ذيج القوة نفسها الي ضهرت بيوم ضربي لعمتي ام وسام ضهرت وصارت بوجه حسن

- كتل كتل ضرب دك حبس ملللليت رجعوووني لو اكتلوني

چنت احچي وارجف وهو مدنگ اصلا ما منتبها اله معصب او لا چنت فاقده واحد ثاني ينطق بمكاني مو اني

انتكأت على الحايط وگلت

- شنو فرقكم عن امي هي هم حبستني وسام هم حبسني كلهم حبسوني وابو گرون يمص بدمي هذا دمي شوفه

رجعوني لو اكتلوني  

اتسرسبت وگعدت على الارض مدده رجلية

اتلاشت  ذيج القوة ورجعت مهدودة حيل باوعت شفته يباوع للحايط وضهره بس علية وحاط ايده عليه ،ويفرك بين عيونه بيده الثانية 

- گومي منا .....گومي اني اعرف اصرف

كنت خايفه ما گمت

راح هو وصاح على تهاني اجته تركض خايفه ..

بعدها اجتني  دخلتني للحمام ..

طلعت منه واخذت علاجي لحت عليه اتريك ما قبلت رحت انام  مو حبا بيه لكن خوفا من حسن

البارحه ما نمت بل اغمى عليه من التعب فهسة لفيت راسي ونمت  ... اتمنيت ما اصحى لا اني الخبلة صدگ وفاقده مثل احلام ولا اني الصاحية .....

ما گعدت غير العصر بالقوة اتگعد بيه تهاني ...

واعيونها حمر

-گومي ولج گومي راح يجي السيد !!!!!!!!

گومتني واجتنا ام محمد  عرفت اليوم ابو شروق راح يعقد علية ....... وصار العقد ....

وكلت ابو محمد وتم كلشي على خير

بيومها اجتنا اخته نفسها هاي الي تشبه حسن اخذتني وياها بهاي الاجواء ما شفت ابو شروق غير لمحه بسيطه بالعقد ...

اخذتني اثاري هاي اوامر حسن منا من نزوج اضل يم اخته .....

ما اعرف لأن اشبه شو چنت مرتاحه الها ..وما شفت منها غير كل خير چان عدها جناين وبت مطلگه حبابه ..  هي اخت حسن الچبيرة   ..

وعجبتها  حيل لان دوم هادئه وما عندي خبث مبطن هي گالت الي هيج بس ما اعرف شنو يعني خبث مبطن !؟

اخذني وجهزني  اخته وبتها گالن هذا مهرج من حسن   الاشياء كلها حلوة بس انحرجت اهواي لان يگولن اختاري واني ما اعرف اختار ابد

بس هاي بت اخته اشترت اهواي ثياب نوم كثرت منهن گالت بس ذني يفيدن وضحكت ..

انوب ذكرتني بالهم الي اني بيه ...

مرت ايام وايام  واجمل شي ابد ما زراتني احد جنوني ومرتاحه حيل ببيت اخت حسن... واخيرا فهمت سالفة شروق

اشواق بت اخت حسن گالت الي تدرس طبية ببغداد واتروح لبيت خالتها اهناك عايشه يمهم لأن قبولها اهناك طالع .. 

في سنة  2002 بالظبط

كنت گاعده واشواق مكيجتني بغرفتها ننتظر حسن يجي ياخذني .. لابسه نفنوف اصفر وملبستني حجاب وبوشية و عبايه گالت مكياجچ قوي ما اگدرين اطلعين بيه هيچ ...

ما چان عرس مجرد خواته وامه مرة چبيره سانده نفسها على عكازة وكانت حيل ضعيفه بس العجيب بناتها اسمان ...

سمعت هلاهل نسوان ولد اخت حسن ودخل حسن كان لابس بنطرون و قميص وجاكيت صيفي من غير رباط اسود ...

انه خجلت ابسرعه ذبيت البوشي على وجهي

وهو هم مستعجل ابسرعه گال يلا

اخذني للسيارة وفتحها الي وگعدت ورحنا

لبيته

دخلت وانه ارجف رجف منه ومن عائلته ....

ما شفت تهاني ولا بناتها گعدت بالهول

هو وگف يمي وگال

-مساج الله بالخير ارفعي البوشي !

رفعته وهو كان ملتهي باوراق امامه على الميز

همس

- هاي شنو المستمسكات

شالها وراح لغرفته مد راسه عليه وگال

- اخذي راحتج وروحي لغرفه شروق صارت الچ.  ترة محد بالبيت المرة اخذت البنات راحت لبيت اهلها  ...

انه اهناخفت اكثر .. رحت لغرفة شروق شفت بيها خشاب جديد حتى ريحه الصبغ ما رايحه منها  ..  گعدت لا فرحت بيها ولا انتبهت لشكلها كل همي شنو راح يصير بيه ...

ما بدلت بس ذبيت البوشي وگعدت بعباتي .. اتحركت يده الباب لو انه روحي شاغت وياها

انوب دخل عليه حين كان خالع الجاكيت ولازمه بيده شمره على كرسي الاستراحه .. وباوعلي بستغراب

- ادري ما اتنزعين ؟؟؟

عدلت حجابي وما اريد اذبه ...

بدة گلبي يخفگ من اجه وگعد يمي ...اجيت ابچي هو شاف خوفي بعيوني ابتسم وگال

- شنو هالخوف .... خوف وجمال لا هذا غير محتمل ..  گام وانه جريت النفس مرتاحه همزين گام اشو بده يفتح بأزرار قميصه ..خلعه ورماه على الكرسي

بگلبي گلت انه وسام اشضعفه وما اتحملته اشلون راح اتحمل هذا السمين !!!!!

لا انوب گبل خلع ضليت استر بنفسي بعباتي 

نزلع قميصه وباوع الي وضحك

-ادري هذا مو قميص طرگاعه حصرني حصر

طلع دشداشه وطلع برة ...شو  تركني !!!!

رجع بعدها وهو بيده بنطرونة

- ياالله هاي لهسة بالعباة ترة عادي اني مثل اخوج

صفنت عليه ما فهمت كلامه

ضحك ببشاشة وگال مقلد عليه

- ادري خاتله بالعباة اعتبريني اخوج ابوج وذبيها على الاقل بس هي

نزعتها بالقوة

- ايي وهسة اعتبريني امج وذبي الحجاب

ضحكت من اتخيلته امي

دنگت راسي واني خربانه ضحك

- لا تگضيها ضحك گومي سوينا عشة تراني جوعان

وطبطب على بطنه ضحكني بالزايد .. مدري ليش صوته يزيل شكو خوف بيه رحت للمطبخ ... اصلا هي اخته انطتنا اكل ... جاهز هي مسويته  دجاج شوي محشى ابصراحه انه راقبتها وهي اسويها واول مرة اعرف الدجاج يتحشى لو الدولمه ينحط الها شكر !

سكبت الاكل وما عرفت شحط وياه غير الخبز والماي واخذت الصينية ، من دخلت شفته يصلي .....حطيته على الميز وگعدت بمكاني اعدل بحجابي

خلص واخذ الصينية حطها على الارض

- ما تجين شيختنا

- ها انه

- لا خيالي ..  گومي خوية تعاي اكلي

وضحك ...

انه هم ابتسمت وگعدت اگباله .. بس شو ما اھدر اريد امد يدي مستحية

هو راح وعافني ...ما اعرف ليش ..

رجع وبيده طرشي .. وكاسة روبه حطهم وهم راح جاب گلاص للماي و خيار هو قطعه وجابة ..ليش ما طلب مني اجيب ما اعرف !!

شافني صافنه و حارنه هو صرفن ردنه ومد ايده قطع الفخذ وحطه كدامي وگال

- ادري غير اجيبين صحون فارغه

-اكوم اجيب

-لا على الخبز بعد يلا كولي بسم الله واكلي

اشوفه ياكل وعادي اصلا ما يباوع الي .. و وجه بشوش غير مخيف مبين طيب ..  اكلت اشوية بس الطعم رهيب .... اكلت اشوية لأن كنت خجلانه وبنفسي بعد اكل ! ..  گام هو وانه شلت الصينية حطيتها على الميز ودا اكترها .. 

سمعته خلفي

- تعاي ارتاحي عوفيها هاي هسة ...

-صار

ورجعت  ازوجت ورجعت للتم والصار .. گعدت بغرفتي  منتظرة ذبحي همه الزلم حبابين بس ليش ينگلبون وحوش قبل النوم !!!

دخل وبيده كيس وگلاص فتحه وحط محتواه وخاطه گام يفور شربه و فرك معدته وگال

-ااه معدتي .... تريع

- اي هسة الواحد ارتاح  ........اخ لو بس اذب الحجاب

سويت نفسي ما اسمع

گعد يمي ولاشاني بكلماتي دوختني

- يا اشگر وسيع العين  والله بالينا ترة احنه عباد الله ارحم بمأنينا 

انه گمت ولبست عباتي  وهو صوت ضحكاته رنت بالغرفه رن .. الرجال اختنك انوب هو ابيض احمر صار ؛حسيت دمه كله صعد براسه السيد

مسح وجهة وگال

- يارحمن يا رحيم

اي هدى اقصد الشيخه هدى احجيلنا شنو سويتي ببيت ام سعد يقصد اخته

همست

- كلشي ما سويت

-شنو ما سمعت

- كلشي ما سويت

- ما سمعت  علي صوتج

عليته اكثر

- كلشي ما سويت

- ما سمعت بعد عيدي كلشي ما سويت مرة

- كلشي.!!!!! انتبهت اله وضحكت

- اويلي شنو من ضحكة يگلك رنة خلخال

اني اهنا غطيت وجهي بأدية وحيل خجلت حسيته شمر عليه شي

باوعت شفت البوشي

هز ايده وگال

- بعد البسيها احسن الچ

ليش مطلعه وجهج

انه حطيته دا افتحها حتى البسها ..

- لا والله صدگتي ...

- ها سيد مو انت گلت الي

- شنو سيد هاي ؟؟؟

-خالة ام سعد گالت گوليها

- طالعه من حلكچ مثل العسل ؛ بس ذبي البوشية والحجاب ترة بديت اضوج منه

-ها لا لا مرتاحه هيچ

- مرتاااحه ...لعد من تتختلين ورة البيبان بشعرچ الاشگر هذا ما گلتي هذا خطية ... دفتحي لا افتحه اني .

ارتعشت خجل عزة طلع شايفني ...؟؟

گمت بخوف من شفته گال هيج عبالي ضاج

ذبيت البوشي والعباة    .. غمضت عيني وفتحت الحجاب اجيت ابچي ...وعورت روحي بالدنبوس

-اااااه

ابسرعه تقرب مني

- الف لا بأس عليچ ... شصار

-رگبتي ااه

- شو هااي ورامه

-صددگ ؟؟

-اي خل افحصہا .. اتقرب وحط ايده عليها ...كأن الدچة بردت ومحسيت بوجع .. .حسيت ببروده ورعشة وبحركه خفيفه نزعني الحجاب ...

- اللهم صل على محمد وال محمد 

هو گال هيچ واني خجلت اردت اوگع عليه

چانت اشواق مسويه الي تسريحه وهي شعري محلول على متني وماخذه خصلتين من الجوانب ورافعتهم بماشات سود ومخليه الباقي محلول للخلف و كاصه الي گذله مقوستها على گصتي  ...

قبلني من جبيني ...

-معقولة الله جازاني بيچ ... لعد اشگد راضي عليه ...

انه بعد گلبي انتهى  احس دگاته اسرع من العداد اريد اتنفس ما اگدر كان مقرب راسه على اذني ويهمس بيها يگرگشني  خلاني اعرش ما ادري ليش ....

حگيت اذني وادنيت عنه ..

- حسيته ايده اتغللت بين خصلات شعري ...كنت مدنگه ما اشوف شنو يسوي ردت اغمض مثل ما چنت اسوي بالسابق وشصير خل يصير همس هو باذني

- فتحي يبنية

.. كان بس يلعب بخصلات شعري

ويباوع الي وانه ذبت بنظراته من فتحت .. الافضل ارجع  اغمض ...حسيت ابهامه صار يتلمس جفوني وانه ومغمضه

- فتحي .......

ما فتحت

نزل بهامه على شفتي ...

ضل يتلمس بيها ..

-فتحي

هم ما فتحت ... حسيته گام من يمي وسمعت صوت نقطه انطفت ... فتحت شفته فتح ضوة احمر  وراح رش عطر ورجع ... الي بس راد يحظني انه اتذكرت اشلون راح يصير حالي وياه بعد اشويه وراح كل هذا الحنان  يروح صحت بلا وعي

- عوفني عوفني

چنت ارجف ومحاوطه جسمي بذراعتي

هاي دوم جنت اگولها لوسام وهو يرتاح من يشوف خوفي ويضربني اكثر حتى اترجاه ...

بس هسة ما هجم عليه احد حسيت الضوة رجع انفتح  . 

وراح حسن .. رجع وبيده گلاص ماي ..

- اشربي هدى

اخذته منه ونص وگعته عليه ونص صكيته ريگي ناشف .. 

طلع الي ثوب بيتي وشمرة يمي

- بدلي وصيحيلي من اكملين بدلت وانه خايفه لا يرجع الي وما صحت اله هو دك  الباب  من شافني تأخرت

دخل وانه ما خليت غطى ما اتغطيت بيه ..

انشال عني الغطى وودخل هو وياي

- عمي اني زوجچ شنو اتنامين وتخليني

كان مبتسم ..

ريحني يعني مو معصب مني

- لا تخافين هداوي انتي صرتي امريتي وهذا الشي بكيفچ شوكت ما اتكولين تعال اجي ..

اتقرب مني وگال

-بس لنزيد التقارب بينا عاد بس تعاي بحظني نامي

ما انطيت  رده فعل وهو جرني ليمه وحطني على ايده ضليت كاتمه نفسي ما اريد اشتم ريحته خايفه حيل منه .. 

قبلني على شعري وضل يلعب بشعري وگال

- راح اسولف الج سالفة حسن الشاطر ...

عبالي قصته هو ما چنت ادري هي قصه شهيره ..

ضل يسولف وانه اندمجت وياه منا من سكت الرجال باوعت اله اشو هذا مغمض وراسه مرتخي على راسي .. ابتسمت وگلت شو ما هجم عليه . ضليت العب بدكمه دشداشته وتوني انتبهت عزة هو من جان يسولف انه العب بيه لا وبعد حاطه راسي على صدره واشم بريحته الطيبه !!!!!!!

يتبع ..

نمت بيومها وحاسة واخيرا من حقي انام اهنا وصار الي مكان مو عائل انه علية ومن حقي احتمي تحت ظلة  .....صحيت على صوت حسن   بالقوة فتحت اعيوني شفته گدام المراية يلمع لمع كأنه توه طالع من الحمام  كان يلحن بصفير  بصوت هادئ ويمشط بشعره من شافني گعدت غمز الي وهو يباوع الي بالمراية

ااه حسيت توني نمت ... معقولة خلص الليل ابسرعه بس كنت مرتاحه وجسمي مرتخي .  مطيت ادية وگمت

اريد أسأل اسوي اله ريوگ بس استحي فضليت واگفه خلفه واصبعي على حلگي متردده

التفتت هو علية حط اديه على امتوني وگال

- صباح الخيرات يا عروسة .. اول مرة اشوف بشر يصحى من النوم ريان هيج

داعب خدي بلطف

ابعدت اديه من غير قصد ورجعت للخلف ما اعرف شرد ...

گرصني من خدي

- روح يا مستحي سوي الي ريوگ ترة ميت جوع    

- صار

۔۔۔۔۔۔۔۔

كأنه يريد يطلع كان مغير اوف بس لا اضل وحدي اني اخاف

- وين صافنه

فزيت مخترعة چنت فاتحه الثلاجة وصافنه عليها

واجاني صوته

- ما احب البيض والاجبان على الريوك

گلي كبة اذا اكو واقراص بتيته ..

- خوش

چانت الثلاجه حيل نظيفة اصلا هي تهاني كلش نظيفة ومرتبة بحيث مرتبة السلال و حاطة صحن طويل لافته بكيس وبيه كبة تمن وجوة صحن ثاني وبية كبة برغل

وبورگ 

اثاري لان حسن يحبه ع الريوك هي اسوي واضم طلعتهن و علكت النار على الطاوة ....

وگليت ...... رتبت الاكل اله ..

وديته للهول هو چان گاعد تحت التخم وصافن من دخلت باوعلي وربع بعد ما كان ماد رجل وثاني الاخرى

ضليت واگفه من حطيتها

- اگعدي اكلي وياي ..

سمعت كلامه وگعدت

ابعد الخبز وضل صافن على الاكل

- ليش البتيتة صفرة ؟؟؟ غير اتلكيها قبل الكبة

- هااا نسيت

- زين وين الطماطة اشلون اكلها يابسة

گمت ابسرعة .  ثرمت طماطه وجبتها اله وكنت حيل مرتبكه وهو صافن على تصرفاتي حطيتها گدامه

- هاي الطماطه نيه

كأنه ضاج ....

- هسة اگليها

- لا اااا

ابعد الصينية  عنه وگال

- ما اريد

هو گالها بهدوء بس كان ضايج . انه اسرسحت دمعة على خدي وصافنه على الاكل

تنهد

وگال

- گومي ياب انتي راح اشلعين گلبي اليوم تعاي اعلمج اشلون اگلين

گلت بصوتي الباكي

- انه اعرف اطبخ ترة

- ادري ياب ادري بس تعاي ام دميعة

گمت خلفه ..

طلعت طاوة ثانية .. انه اطلع اله الغراض وهو يشتغل ... خلاها تحمه زين وحط البتيته خلاها تنفش صارت مشهية ..وبعدها قلينا الكبه انه گلبتها وطلعتها

چنت كلساع اباوع اله وهو حاط ايده على خاصرته ويضحك من يشتغل بصراحه شكل الرجل وهو يقلب طماطه يخرب ضحك ولو هو كان عادي عنده  ... رحنا ناكل  ...

وشافني اشلون متوترة بالگوة ،اكل ابسرعه خلص هو على  سريع حتى اخذ راحتي  ريوگه چان غريب انه ما اكل هيچ.. چنت لو اكل صمونه يابسة وحليب يوصل النا بارد وبيضه سلگ مچحلة ما تنوكل وهم اتحسر عليها لان مو دوم المريضات مرات ياخذن اكلي من حظني وانه ما لي خلگ للعرك ...

طبعا اخذلتي صفنه وانه اذكر ايامي وما حطيت لگمه بحگلي  وما منتبها لحسن الي .. اضاهر كان يباوع الي وراجع من المغسلة من وقت طويل  .. بحيث اجه گعد يمي وانه مو يمه الا

اشر بيده گبال وجهي الا لاحظته

- غريبه صفناتج هدواي ..  وين اتروحين بيها

ما عرفت شرد

- ها  هسة اشيلها

- لا قابل گلت شيليها . 

هدى ليش دوم خايفة .. من شنو خايفة . !!!؟

دنگت راسي ما گدرت اكله من كلشي وحتى منك

- هدى اريد اعرف شنو صار وياج بالتفصيل

صفنت بوجهه ما اعرف ليش ضليت اباوع اله بستنكار

- شتريد تعرف ..  انت قبلت تزوجني وانه هيج حالتي ..  انه تعبانه ...كافي ..كافي

ظل الرجل يباوع الي بغرابه وانه گمت من گدامه ورحت اركض للحديقة مختنگه ما اريد اسولف شي .. اني تعبانه من كلشي صار ..

طلع خلفي . شافني گاعده على الارض ابچي

اجه ينحني عليه

لزمت راسي باديه

- لا تتقرب مني روح منا روووح لحد يلمسني روحوووا كلكم

رووحووو

-هدى ماخذه علاجچ ؟؟؟

-ن نسيته نسيته ببيت ام سعد

-  يعني من البارحه من ماماخذته

تعاي لا تخافين ...

- عوفني عوفني

- موو خايف عليچ دوم اشوف اهنا حياية وخاصه ام راسين هاي الچبيره

يحچي ويأشر بيده بجدية موتتني خوف هو بس هذا الناقص  تطلع الي حية .. گمت مفزوعه انكث بنفسي .. وارجع للخلف

لزمني بقوة ووگفني چنت ارعص حول نفسي

- ههههههه ماكو شي ..  لا تخافين اشاقة

- انه راسي يوجعني .. انه تعبانه

- كلشي ما بيچ جنچ الگمر لا تدللين

چنت گدامه واديه محاوطه امتوني بحنية

واعيونه تضحك جنها الليل ومفروش بيها السواد الخميج و بيها لمعه مثل النجم تتوسط سوادها اعيون عدها خبرة بهاي الدنيا وچانت هي تحچي حنيته...

طمنتني نظراته بس اخ منه  استغل ضعفي يم اعيونه حظني وهمس

- تعاي ندخل لجوة

اهنا انفتح الباب وبالصدارة ام البنات چانت چنها مضيعه طفل وجاية بحرگة گلب اشوفه .  

ابسرعه اديه ابتعدت عني وحك راسه ومرته لازمه الباب وصافنه علينا اعيونها جحظت    و البنات يردن يدخلن هي لازمتها فلتن ايدها ودخلت اول وحده رقية ركضت على ابوها وشالها يبوس بيها

واجته ام ست سنوات حظنته

يبوسن بيهن يگلك صارلهن قرن مو يمه

- اشلون اتعوفوني بابا البيت ظلمة

امهن دخلت من الممر للمطبخ ...وانه ظليت اباوع اله اشلون بناته استلمنا بفرني وصعدني يكلك جبل و يتمنن يصعدن بين ذراعاته

راح ذاك الاهتمام وحتى سالفة دواي نساها بين بناته ...واخذهن وراح يلاعبهن چان حيل ملهوف عليهن ....انه رحت للمطبخ شفت ام شروق بالمطبخ حتى ما خالعه حجابها واگفه على السنگ تغسل بالمواعين مال عشانا وريوگنا ..

استحيت منها  لان احنه وسخناهم

- خالة اني اغسلهن

ما جاوبتني

- اني اغسلهم احنه اكلنا رو....

-اشش كلمة زايده لا تحجين ما لچ شغل بمطبخي فاهمه الچ غرفتج وبس

چانت تحچي بصوت باكي ....و زجر واصياح كله مخبوط  سوة وانه مناك اعصابي تلفانه بلا علاج

عفتها ورحت ختلت بغرفتي .. وما ذكرني بعد حسن ..  والتهى عني ورجعت لوحدتي

ع الغدا محد دگ بابي سألني اشبيه ..

جوعانه لا ... ضليت الوچ اريد اكل واريد علاجي ..

الساعه ب3 الا انفتح بابي .. ودخل حسن . شافني گاعده يم زواية حاشرة نفسي واباوع للحايط

ابسرعه اتقرب مني ونهرني بصوته الدافي

- لا اگعدين هيج گعدات .. سحبني جبر من ايدي .. 

وگعدني على السرير .. راح جاب گلاص ماي ودخل عليه .. وانطاني حباية ...

- هذا علاجچ رحت جبته الچ

وبعد. لا تنسيه بأي مكان .. يلا گومي غيري .  نطلع نغير جوو

-شن شنو نطلع انه و وياك بس

- لا ناخذ ام شروق

ضحك وراح

انه خفت ااوووف شلون اخاف اتضوج انوب تكرهني بالزايد اذا رحت وياهم .. بدلت لبست الكوستم الي هو جابه الي والحذاء وما اعرف اشلون راح امشي بيها عاليه .. وعباتي ...

وطلعت شفته گاعد كأنه ينتظرني ..

مرته ماكو

-  خلصتي

-اي

- لعد خن نتوكل

طلعنا وانه مستغربة وين مرته لعد ؟؟

-هم ضربت صفنه وليش تمشين اعوج

همست

- م ما اعرف امشي بالكعب

وي وين خالة ام شروق

- شنووو !!!

- انت مو گلت اتروح ويانا

ابتسم وگال

- لا اصدگين كلشي حتى الشقة هدى خلي بداخلچ حاسة تميز كلام البشر .. 

-خوش

- ولا اصيحين لأم شروق خالة افضل

چان يمشي وباديه سبحه

ويباوع لگدام ويحچي وياي واني عاوجه راسي وامشي

احسه گلساع يباوع الي

همس بعد ما گدر يتحمل

- امشي ياب عدل ارفعي راسج 

احرجني بالگوة عدلته ورة اشوية رجعت ملت لان متعوده ...

دخلنا لصايغ .. 

چان يحچي وياه وهو يختار . وانه بس يقيس علية وعيني زاغت على الذهب وجماله صاغ الي ابتوت و محبس وحلقة و تراچي  ..

انه چنت شيك

گول اهز راسي واگول بكيفك

بس بداخلي فرحة طفلة ابوها دا يصوغ الها للعيد .. 

رحنا للمطعم بالختامية وگعدنا ...

من اجه الولد يسال شنو انريد سالني وهم گتله بكيفك

طلب هو نفرين كباب

التهى هو ياكل وعافني بحيرتي ما اعرف اكل على ميز وبالعباية هم ما اعرف ...

انوب ناس كومه گاعده تاكل .. انحينت حيل على الاكل وبديت اكل .. بس اخ وگعت مني طماطه على ثوبي .. حتى لا يشوفني حسن غطيتها من رفع راسه ...ابتسم الي ورجع ياكل ..

وهمس

- ارفعي راسچ واخذي راحتج ..

- اي

رفعت راسي .  وفتحت عباتي شفت الطماطه لايصتني .. شلتها وجان حسن يرفع راسي ويشوفني .. انحرجت ردت اخذ الماي دربيت اللبن ووگع كله على عباتي والمحيط صاروا يباوعون على حالتي . رجفت وگمت على حيلي وطلعت ما سمعت ندائات حسن الي .

ابچي يم باب المطعم والرايح والجاي يباوع الي .. حسن دفع الحساب وخطية ما كمل اكله لزمني من ايدي اتوقعت راح يصيح الا هو كال بهدوء

تعاي انشوف مغاسل

غسلت وطلعت ملوصه نفسي اكثر اللبن لزك لونه الابيض طگع العباء ...

اخذني وما گال شي ..رجعنا للبيت .  دخلت لغرفتي وهو راح لغرفته .. ملابسة كلها بيها ..  ما حاطه تهاني غير كم قطعه بيتية اله بغرفتي وهو هم متعود على ذيچ...

طلعت الذهب وعجبني البسه اليوم .. نمت بيه من الفرحة ... غفيت .. حسيت احد يتقلب يمي ..

فتحت اعيوني شفت حسن .. مطفي الضوة انه اعوفه مفتوح؛ وفااتح ضوة النوم استقر على ضهره وشابك اديه على بطنه وصافن ...

انه اخرخش ببتوتي .. من درت وجهي عنه عرفني گاعده ....

همس

- هدى ....

مجاوبت ...

- ليش ما اشوفچ اصلين ؟؟

سؤالة خلاني استغرب اشجابه على باله

-  هدى

شنو چنت اشوفين من دخلت عليج بالسرداب .. ويامن اصيحن ...؟؟

گعدت على حيلي وصفنت عليه ..اول مرة واحد يسألني شنو اشوف اقصد مو طبيب ؟؟؟؟؟؟

محد يهتم شنو اشوف ولا احد يسأل عبالهم هلاوس وانه يتخيل الي ....

رجعت انطرحت وانطيته ظهري ...وافكر هم راح يرجعون الي .....لو تركوني .. حسيت بحسن مد راسه عليه صار حنكه يم خدي

- احچلي چنت اشوفين جن

انه بس ذكر اسمه ارتعبت وانكمشت على نفسي صرت خشبه انوب الضوه احمر وبس اعيونه السود تللالي .. ادنيت عليه وكتله

- اش حباب ..

- ليش خايفه ....لا تخافين اذا جن يطلع الچ

ما يگدر يطلع هسة

اتقربت اكثر وانه اتخيل ابو گرون يمد ايده من جوة الجرباية

التصقت بجسمه المتين وهو يمسح على ضهري وكمل

- اني اصلي هو يخاف مني ...

رفعت بس راسي عليه ما فهمت شيقصد

- اي الجن ما يطلع للبني ادم المؤمن يخاف واني الحمدلله رجال مصلي صايم من عمري 10 سنوات .......

- يعني اليصلي يخاف منه الجني ؟؟

حط ايده على حنكة وگال

- يعني اشوفين انت جن ؟؟؟؟

غطيت راسي بصدرة وكتله

- اي اي

- لعد احظنيني اكثر حتى اتنامين بأمان ......

محد يگدر يوصلچ ...

حظنتها اديه رادت تنشلع من قوة لزمتي لملابسه وتشبثي بية..

وكأنه الامر عجبة .. حط رجلية بين رجليه واحتواني ونام .... وانه حييل مرتاحه كأني داخل محمية تحميني من الزنابير ...

بعد دقايق ....

ابتعدت عنه بالقوة لدرجة وگعت على الارض .. ابسرعة گام فتح الضوة ....

گومني

- اني اسف ... والله مقدر وضعچ اسف   ... بعد ما اتقرب منچ .....

گالها بأسف .. نمت على السرير وهو نام ابصفي بس منطيني ضهرة

اااخ لو بس يدير وجهة علية ويحظني كلشي ما اريد غير اختل يمه ...  اتقربت عليه ونمت ابصفه حيل  گام عني 

وراد يطلع من الغرفة

- لا تعوفني وحدي ... حباب

ابتسم ببشاشه وگال

- بس اترس المبردات ماي  وارجع  

انه گمت خلفه .. راح للخلفي جر الصونده ووگف يمها ينتظرها تنترس ..

- اشعدچ جايه روحي نامي

- مااا اخاف .. من تنام  انته  انام

انترست سدها وراح وانه وراه .. راح للحديقة

فتح الماي على مبرده البنات ...

وانه هم انتظرة واگفه خلفه مثل الطفلة واتلفتت خايفه من الظلمة .. .

راح . لمبردة غرفته الثانية .. هم ترسها ماي و گال

- يلا تعاي . ويه ما طبينا للبيت

انطفت الكهرباء!

ضحك  وگال

- هاي تالي التعب ... هسة الحر ياكلنا .. روحي اصعدي لفوگ .. اهنا طلعت ام شروق خزرتني

وصعدت وبيدها مهفة . .

والبنات هم طلعن .. بس الصغار نايمات شالهن ابوهن وانه امشي وراه وين ما يمشي . 

من صعدت شفت السطح مليان قريولات ..

گتله 

- هاي شنو چنا احنه ننام على الگاع  فوگ

-لا اخاف تجي حشرات للبنات .

حط رقية على قريولة صغيره بيها اعمده مسيجه  من الجوانب حتى لا توگع ورجع نزل وانه خلفه شال بته ام ست سنوات وهم نيمها

ما منتبها  انه ام شروق طالعه روحها مني  لأن لازگه بحسن لزگ وكلساع اتگول استغفر الله .. وين ما يروح جان لابس دشداشه

هو بالبيت يلبسها بس بالطلعه كله بنطاير حتى كابوي . معتني بنفسة حيل ...

غطاهم  وراح لقريولته ابصف مرته ..  البنات يصيرن خلفهم مسطرات وهمه على صفحه خلف البيتونه .. يعني بين البنات وبينهم البيتونه ما يشفونهم .. وگف محتار بيه ...

وين يحطني؛ مرته مطروحه واتهفي مسوية نفسها ما منتبه علينا ...

- وين اتنامين ....وين احطج

- عادي اجيب افراش وانام جوة

- لا اشلون اتنامين جوة

مرته

- لعد وين اتحطها انشالله اتريد تاخذ سريري  حطها ابصف البنات اهناك ...

راح يم البنات ...حطني  يمهن  طبك اسرة عذراء وزهراء حتى انام بينهن وانه شفت اوجوهن مگلبه ... ماگدرت اندحس وياهن

من رجع لمرته رحت خلفه بس ما اتقربت ضليت واگفه يم البيتونه اخاف من تهاني اتقرب مديت راسي شفته منطي ضهرة لتهاني ونايم ..

وگفت يم البيتونه واخذتني الصفنات ...گعدت تعبت من الوگفه .. وغفيت وانه گاعده .. صحيح ما مرتاحه بالنوم لكن بالي مرتاح لان حسن قريب عليه ...

حست احد يگوم بيه ورفعني ..فتحت شفت نفسي بين ذراعات حسن شالني .. من غير ما يحچي وحطني على قريولته .. الكل چان نايم ومرته تشخر شخيرها كلش قوي ..  احتار بنفسه وين يروح ..انه ادنيت سويت اله مجال عرفني گعدت ...ابتسم وهمس

- وين يكفينا

صح ما يكفي هو ضخم والسرير ابو نفر .. تاليها راح لجوة ورجعلي گال الكهرباء اجت تعاي ننام جوة ...

رحت خلفه وانه نعسانه .. بس حظني على ذراعه نمت ما حسيت بشي ...

الصبح گعدنا اثنينا على صوت طكطكه مواعين بالمطبخ ... احس جدورة مدري طاوات تتراگع حيل ....

فرك اعيونه

- اللهم صبحنا وصبح الملك لك لا شريك لك

التفت عليه بعدها وهمس بصوته الناعس

- صباح الورد للورد

-  ص اصباح النور

- الحر كتلنا اهنا ...اهواي طفت الكهرباء .  داخل اسبح .. روحي ساعدي ام شروق ..

گمت خلفه ورحت للمطبخ وهو للحمام وام شروق من سمعت صوت باب غرفتنا انفتح وگفت يم باب المطبخ

جان اشوي بينا مسافه الممر بيه اتطل غرفتين

والدرج

والمطبخ يم بابه يم الدرج

خزرتني ورجعت دخلت چانت ريحة الباگلة عاطة وريحة البطنج وياها .  شفتها تعصر نومي وبنفس الوقت حاطه طاوة یتقلى بيها البيض على دهن حر ريحته اخذت عقلي ضليت واگفه يم الطاوة واشمشم دفعتني وگالت

- وخري منا لا يوگع شعر علينا

چانت هي معصبة راسه بربطه ما اعرف ليش

گالت

- اشعدج ماخذه الرجال منيمته بالحر هاااا ما صبرتي ليلة

لا تخافين كل الليالي يمچ منا من يصير حمل الا  نشوف عود بعدين اشلون اصير.

گالتها بغل ..

سمعت باب الحمام انفتح عفتها ورحت ركض خلف حسن بس من دخل لغرفته مال تهاني وگفت يم الباب ما أجرأت ادخل

دفعتني وحده ودخلت

جانت رقيه وصاحت

- باباااا اريد اتلوووس

ضحك واخذها وسد الباب عليهم وانه ضليت اااه يم بناته ينساني ...

حطوا صواني الريوگ بعض البنات اكلن جبن و شاي بصينه ابصفنا بس حسن ورقية وزهراء گاعدين وتهاني هم گعدت وگالت الي من شافتني حايرة

- لا اضلين واگفه على روسهن اذا تاكلين جبن اگعدي يمهن اذا ثريده باگله تعاي يمنا

انه ريحه دهن الحر عجبتني گعدت ابصف رقيه

قبل لا امد ايدي زجرتني تهاني

- روحي غسلي ايدچ

انه من غير كلام رحت غسلت من رجعت سمعت حسن

- لا تعامليها مثل الطفل هي مو بتج .. على مهلج

- اااه منہا

رجعت انه گعدت ...واكلت وياهم بس خزرات ام شروق الي خلتني اگوم قبل لا اشبع اخذت دواي ونعست ونمت .. 

وقضيت ذيچ الايام ما بين الناس تجامل حسن واتوجبه ونسوان اشوفني اتبارك وما بين العيشة الترفه .. و معاملة حسن الي .. الي بدت احسها اصير مثل معالمته لعذراء وبقيه بناته .. شروق راحت لبغداد والبنات هم نص يومهن بالمدارس .. ابقى يم تهاني الصبح تگضي ساعتين بالسوگ وترجع تطبخ و تنظف چانت حيل سريعة ابد ما تخليني اجيس شي واساعدها احسها تلعب نفسها مني .. حتى ملابس حسن ما تقبل اغسلهم حتى ملابسي هي تغسلهم  هي ،چان عدهم غسالة بس ملابسي تعزلهم بالغسل ..

احسها مرات قاسية مع بناتها لكن ابد ما حارمتهن من شي ما تخليهن يجيسن الورد بالشغل لان يدرسن واجمل ملابس يلبسن واطلعهم دوم اتخليهن  يرحن العصريات لبيت صديقاتهم ..  حتى حسن ما چنت اشوفهم يحچون غير بخصوص البنات والبيت او مواضيع  عابره قصيره .. وما يروح لغرفتها بس من يغير ملابسه ومن ينام ينام يمي  واني لو مرات يحظني ومرات ينام تعبان يتركني احشر نفسي خلف ظهرة وما عاد يتغزل بيه مثل البداية ..  

چنت اشوفه ويه بناته شكل و ويه مرته شكل ثاني .  يعني يسولف ويشاقه ويلاعب حتى لو يجي تعبان .. ويه مرته دوم شكله جاد    ..

اما وياي كان هادي ودوم ينبه بيه اعدل من مشيتي ... انظف غرفتي ..  احاول احچي ويه البنات .. دوم يطلب مني احاول احچي ويه البنات بس انه اشوفهن يجنبني ما اتقرب منهم

مر شهر زمان وانه مرتاحه ببيت ابو شروق ..

الى أن بليلة انتظرت حسن يجي ينام ما اجه

طلعت بره شفته بالهول گاعد ويفكر

همست متردده

- اشوكت  تجي تنام

تنهد وبالگوة نطق بعد ما صفن عليه

- ما ارتاح بالنومه يمچ !؟؟؟

- ها ل ليش

ارتعبت من كلمته حيل اجيت ابجي شنو ما يحبني ..

عقد حاجبة

-ليش اترجفين .. هدى اگعدي خل احچي وياچ

- ص صار

- اااه

جر نفس

- شوفي يا بت الناس .. اني رجال وعندي متطلبات ردت ازوج بالسابق لأن ما اگدر اخذها من ام شروق ... بس هي وگفت بعيني ما گدرت اكسر بخاطرها ..  بس هي جابتج الي وگدام عيني .... يا ابنية اني كل يوم انام يمج واني اتخيلچ وياي اتعرفين شنو اتحلم بيچ !!. رجال بهذا عمري خليتيني اتحلم ..وانتي نايمة يمي

اخذ نفسه وگال استغفر

روحي نامي الله يرضى عليچ ما عليچ بيه

- اي بس تعال يمي بالغرفة .. حتى محد يجيني

صفن بوجهي اشوية

- اني ما احميج .... شسوين بيه واني يجي يوم واعوفج

شهگت وكتله

- الله عليك لا اتگول هيچ

حباب

- يا ابنية اني ما دايم ليش تتعلقين بالي ما يدوم وگبالچ الله حاطچ   بين عيونه ارتبطي بربج بعلاقة قوية محد يگدر يجيچ هسة اني

ودگ على صدره

- اتحدى هذا ابو گروون !!!! يجيني

تعال ولك واجهني

ضربت صدري وشهگت وارتعشت من جاب طاريه

وتوتت وسألتة

- اش اشمد اشمدريك بيه ...لا تت تتحداه

- ههههههههه

ضل يضحك وانه ميته خوف لا ابو گرن يخلي حسن براسه .. والله روحي اتعلقت بيه هذا الرجال .. 

نزلت تهاني من فوگ واتخوصرت من شافتنا

چان حسن بعده يضحك .

انه رجعت گعدت يمه واباوع الها بحترام

چنت اهابها بصراحه وهي مهيوبة حيل

تنهد حسن وگال

- روحي نامي هدى اشويه وجايچ

همست

- ا اظل ويا ك لعد

بجدية امرني اروح

رحت واني اتلفت عليه

- تعاي تهاني اگعدي

انه وگفت يم الدرج انتظره ..

- وين اگعد اشوفك تتمضحك وياها وماخذ راحتك ولا اتگول عندي مرة اراعي شعورها

- انتي الي وصلتينا لهاي المواصيل والا منو چان يحزر اني اتمنى غيرج !!!!!!!!

يتبع

حطيت راسي على الحايط وانه اسمع وكلي انصات الهم ...!!!

سمعت صوت أهات

مديت راسي اشوية بس حتى المحهم چان حسن گاعد من الجهة  المقابلة للباب بس يم الحايط يحتاج مني امد راسي خطافي حتى اشوفهم

هز گلبي منظر تهاني من گاعده على ركبها جنب حسن الي منزل راسه وحاط ايده على وجهه وهي لازمه رجلة وبدت تترجاه

- حسن الله يخليك ساحمني والله مستعده ابوس رجلك بس ارجعلي . 

جانت تبچي وتحچي وهو  مغطي وجهه

ضليت مادة راسي لأن تهاني بس ضهرها علية ...

- حسن والله  اشتاقيت الك

باست رگبة وضلت  اشمشم بيه وتبچي

انه اتراجعت ودخلت لغرفتي ....

منو يصدگ هاي المرة المهيوبة الي كلها قساوة هيچ تتوسل بزوجها و تبچي ..

شنو الي سوته حتى ما يقبل يباوع بوجها ..

ضليت ارجف وابجي  انهاريت ... يعني حسن مثل وسام يذل  

دخل حسن وچان مخترع عليه لان ابچي بصوت

گومني من الزاوية بحنية

- ياب ليش تبچين گعدني  واني ابعد بيه عني ..

لكنه غلبني بعطفة و حظني حاوطته من خاصرته وفرغت دموعي وچان المح تهاني واگفه يم الباب عايف هو  نصها مفتوح جايه خلفه ... من شافته اشلون حاضني ابتعدت وهي حاطه اديها على حلگها هو ما شافها

-بس كافي ... منو وياچ ....هم اجوچ ؟

رفع راسي وباوعلي بعيونه العطاشنة

چنت ارجف بين اديه انتبهت اله يباوع لشفتي ويبلع ريقة

بلحظة حسيت اني اريد اتقرب منه حتى وأن تأذيت كانت رغبة قوية بداخلي خلتني أغمض

شميت ريحته الي ما تشبع انفاسي منها ....لكن من اختلطت  انفاسنا مع بعض ...

- لا لا

صحت اهنا بعلو صوتي وگمت انتكأت على الكنتور وحاطه ادية على خدودي ؛مغمضة واصيح

- لا سمير لا سمير

- يا سمير اهدي اهدي بسم الله الرحمن الرحيم

- اقصد و و وسام  و سام لا اتسوي مثله

ع وفني حباب .. ما  اريد

كانت انفاسي تصعد وتنزل وادموعي غاسلة وجهي واني  اباوع اله بترجي ...

وهو بدأ يقرأ ايات

بديت اهدأ وارتاح عليه مثل المهدأ لتفكيري والهستريه الي بية

من غير ما احس اشلون وكيف وصلت للسرير ونمت عليه   ..لگيت نفسي نايمة ..  وحسن گاعد يمي  يهفي الي لأن الكهرباء طفت ومستمر يقرأ الي ..

ماغفيت وضجت من نفسي حيل .. لأن چنت احس بنفسي اتعبه وهو طيب وياي . اني ما اخاف منه هو ... اخاف من الزواج  وطريقته

ما اعرف حسيت بخوف فضيع وإني راح ارجع أتألم  واكره جسمة بعد ما حظنة هو يدفيني يصير فلم مرعب الي ويروح ذاك الدفو . من اگول يدفيني مو اقصد من البرد .. اقصد يجردني  من الخوف الي بداخلي من

غرگني بعطفة .. 

من توقف قرأة

سألته بهمس

- اشلون عرفت سالفة ابو گرون ..حسن ...حسن

-  حسن ... صار اهواي ما سامعها ...

- هااا اقصد سيد

- يا مرت حسن انتي اتنامين يمي كل يوم تتحلمين  بيه كل يوم  ....تدرين شي

-شنو

رفعت نظري الي لأن چان وجه اعلى من وجهي لأن نايمه على ذراعه وبعده مستمر يهفي النا

وشوش بذاني

- ياريت اني ابو گرون هذا ... وتتحلمين  بيه بمكانه !!!!!!!!!

اندهشت وضليت ارمش بعيني اباوع اله چان مبتسم نزلت راسي وضحكت

- انت گمر حسن ..احلى رجال شفته

ضحكلي ورجع وجه البشوش ينور بضحكته چان وجهه صاير شبه بالدائري لأن ممتلى يضحك وياه ...

اتلمست بعض الخطوط الي ضاهرة يم عينه وهو يضحك من غير قصد وكتله

- حنيتك ماكو منها رجعت راسي لمكانه وهو صدر حسن وشميته

-لا تعوفني حسن حباب

باسني من راسي

- ما اعوفچ هدى  ...بدت روحي تتعلق بيج چنج بتي التاسعة ومرتي الثانية .....اااخ بس اشوكت اصيرين مرتي ....

- ههههه انه مرتك اشبيك مو عقد النا السيد

- اااه يا گلبي على الورق بس وينه هو الزواج

هسة لو احدث عاقل ما يصدك حاطلي گمر وعايفة عفة شگد صبر يراد ...انوب اريد اعوفچ

لازگة بية ياب اتعبيني من اجي يمج

  جان يحجي بحركة ... انه سألته بهدوء

- يعني شنو ياب

-  اشمدريني ... كلمة استعباطية مدري امنين اجت على لساني ...بس هي اتصير اخت بوية

- هههههه

شديت على احتظاني  اله اكثر و ردت اغفى نعسيت .

..........

الصبح من گعدت ما لگيته .... گمت بلكت الحگ عليه بالصالة

ما شفته .. رحت للحديقة شفت بناته يلبسن بأحذيتهن ...

سألت

- فاطمة بابا طلع

- اي راح قبل اشوية

خزرتني عذراء وطلعت من البيت

دخلت للمطبخ شفت تهاني تغسل صحون ..عزة انه اتأخرت بالنوم ...

ما حچت وياي شي

الضهر رجع حسن وانه چنت اتنطرة ....

من سمعت صوته طلعت اركض شفته

يدخل بمسواگ اهواي للمطبخ استغربت  مو مرته تسوگ ليش اسوگ هو !؟

چانن بناته كلهن متعصبات بأحجبة وياخذن منه الغراض ، باوعلي وابتسم

- هلا بهداوي تعاي ساعديهم

- صار

تهاني بثقل

- ما اريد منها شي

حسن

- اهواي زلم راح تجي اليوم على العزيمه خليها تساعدچ ..

راح حسن و تهاني بس تتأفأف عليه ...

خلت بناتها يثرمن اللحم وهي تقطع بالدجاج وانه انطتني البصل ...چان اهواي ...

حطيت التخته الخشب واعيوني انمردن .. حگتني عيني . سمعت صوت حسن يم المبطخ

يحچي ويه بته يريد ماي للزلم . 

انه نسيت وحگيت عيني حيل واتمنى حسن يدخل  مشتاقه لشوفته لو اشوفه كل دقيقه ما مل منه ..  بس عيني انمردت من الحريگ الي صار بيها گلت

-يمة عيني راحت ...عيني

تهاني

- هاي اشبيها

دخل حسن واجاني  مسرع قرفص يمي واني لازمه اعيوني بديه ام البصل

- اااي يمة عيني ...

- وخري ايدچ.

شو گومي يمعوده ...

گومي ... گومني ومثل الطفله غسلي هو اعيوني بردت على الماي ضل يفرگ بيها

وسمع صوت رگع قبق جدر حيل ...وبناته  كلهن يخزرن بيه من خلص وفتحت

- غسلي اديج وروحي لغرفتج .. هاي الترافه مو مال شغل ..

طلع حسن .. انه حتى ما غسلت هم خجلت وهم فرحت بكلماته وهم خفت من نظرات تهاني حتى القبق وگع منها ...

طلعت ع العشا شفتهن صابات اكل گعدت اريد اكل

عذراء خزرتني

- ها يمه شو اجت تاكل هاي الترفه شنو احنه الها خدم !

الام جرت نفس بحسرة

- اضاهر هيچ

عذراء

- سم ببطنچ لا تاكلين من طبخنا

انه ابسرعه گمت لغرفتي وسديتها خفت من كلامها  . گعدت ابچي ..ليش يكرهوني

حسن تأخروا الناس يمه چان عازمهم ..هو صاحب واجب ومضياف ومختار يعني يوجب ويتوجب شي عادي ..

دخل حسن و رقية لازمه بيده

انه چنت نايمة ...

گعدني بصوته الحنون واشوفه بيده صينية اكل

- هسة اتگومين تاكلين   ..

گعدت واني ميته جوع على سريري والصينية على حجري

صاح لتهاني وبناتها وراها

باوع الهن وگال بصرامه

- رقية سولفت الي شنو صار اليوم هذا الشي ما اريده يكرر ... مفهوم

وخزر تهاني ...

وعذراء ودها اگطع رقيه ..

- هدى حالها حالكم ...محد يحاسبها تاكل من خيري محد اله فضل عليها غير ربكم ... يلا روحن ...

راحن وبقت بس رقية تلعب ويه ابوها وانه اكل ..

واليوم رقية رحمت ابوها من العذاب من نامت بوسطنا واسولف الي سالفه الدودة كلشي ما فهمت منها    ... بس چنت ابتسم الها واتخيل نفسي امها ... ياريت لو اصير ام ....

،

چنت گاعده وحدي وصاحلي حسن

گال لا اگعدين وحدچ چان لام بناته ويسولف الهن كلهن .. سوالفه ولا ينمل منهن ..  بس تهاني چانت بالاستقبال تقرة ادعية ...

من كمل سوالف گال لبنته

فاطمة تعاي خل نتوضة نعلمج الصلاة

عذراء نبزت

- بعدها توها ست سنوات

شال فاطمه على متنه وراح بيها ...رجع وباوعلي وگال جيبي الخاولي ورايه هدى ..

جبت اله الخاولي .. شفته واگف ما مغسل من شافني فتح الماي وبدأ يتضوة وبته اتباوع اله وانه هم ... اشو وضوئة مختلف عن ما علمتني امي ؟؟؟ بس اكيد السيد الصح .

خلصوا اخذه مني وابتسم ..

بس ما نشف ..چا المن وگفني ...

گعدت بالهول وهمه جابو سجادات ..  وفاطمه اضحك شعرها نصه طالع من الربطه

قبل لا يبدي گعدها وگال الها فوائد الصلاة

قرأ الها اية كريمة اول مرة اسمعها  !

- بسم الله  الرحمن الرحيم

وَمَا خَلَقْتُ الْجِنَّ وَالْإِنْسَ إِلَّا لِيَعْبُدُونِ * مَا أُرِيدُ مِنْهُمْ مِنْ رِزْقٍ وَمَا أُرِيدُ أَنْ يُطْعِمُونِ * إِنَّ اللَّهَ هُوَ الرَّزَّاقُ ذُو الْقُوَّةِ الْمَتِينُ )

يعني يا فطومه الحلوة الصلاة واجبة والله موجبها على العباد ... فهمتي

والها فوائد ومنها الدوام على الطهارة

فاطمه

-  يعني شنو طهارة !!!!

كمل هو وما قاطع حديثه

- ذكر الله المستمر يحصنه من شر النفس بابا

ولازم اتعرفين يا فطومه الحلوة ...  الله سبحانه خالق ابليس لعنة الله عليه  عصى الباري عز وجل    وصار عدو النا ودوم يريدنا نبتعد عن الله ...والصلاة هي صلة القرب بينا وبين الله

   فاحنه لازم نحاربه بالصلاة وحب ال البيت و اطاعتهم اذا اعتصمنا بهم يعني اعتصمنا بما امر الله

كان يحچي وياها بأسلوب مبسط حتى يدخل الكلام لعلقها وهي بس تضحك ...

بس انه حسيت هذا الكلام صحاني .... امي ما گالت الي هيچ .. ابويه گال ...صلي لا الله يذبچ بالنار ... وامي ما قصرت حاولت وياي حتى التزم ج

چانت تضربني اذا ما اصلي ومرة چوتني بأديه لان العب وما اروح اصلي من يأذن ، صح گالت الي  الله يذبني بالنار اذا ما اصلي بس ما ذكرت  الله ليش فرضها علينا ...

يمكن ولا مرة بحياتي صليتها وانه باالي وياها

وقررت اجرب  فحطيت كل حواسي مع حسن

بدة يكبر ويعلمها الشهادة ....

تذكرت بأسى اشلون چنت اكره صوت الاذان او الذكر ...... الحمدلله هسة استمع بأنصات

ماتن ضحك البنات على فاطمه من يوصل لأنعمت عليهم هي اتكول العنت عليهم

طلعت ام تهاني وگالت

- ياااا شتعلم بيها هي سورة الفاتحه بعدها ما ماخذتها ....هزت ايدها وراحت،

اكتشفت نفسي ناسية شكو سورة صغيره چنت حافظتها حتى الصلاة ناسيتها بس من كثر ما عاد و زواد مع بنته رجعت حفظتها

...

من صار وقت الصلاة اريد اتوضة استحي الكل يدري بيه ما اصلي اشمعنا  اليوم

اتخنست ليش ما فاطمه خلفي شافتني ضحكت وراحت

لخواتها

- هدى راح اصلي هههههه امي اتگول عليها نگسة ما اصلي .. راح اصلي غارت مني

انه شردت لغرفتي بعد الفضيحه ...

ماعندي سجاده او تربة ....احتارت.بس ما طولت حيرتي من شفت على الميز شي يلمع ..گمت شفتها سبحه سمائية ... وتربة وجواهم سجاده ... ابتسمت گلت يمكن حسن ناسيهم اهنا ...اخذتهم .... وصليت .. مدري ليش من اوصل ل اهدنا السراط

اختنك وادمع وابچي .. وارجع اعيد ...

ابعدت الحجاب عني .. وما كملت .  ما اگدر اکو شي بداخلي يمنعني ... اكمل ... من يگول الله يغفر الي ..  ضليت نايمه على السجاده ابچي . انفتح بابي ودخل علية حسن شافني ابچي .

- على كيفچ ...هدى ..لا تيأسين حقج اهواي ابتعدتي ..  عوفي الصلاة هسة ..

- ما اگدر حسن انه الله غاضب عليه ما اگدر اكمل

- الله غفور رحيم هدى ...... رحمته وسعت كل شي ...

ثاني يوم العصر اخذني ورحنا نزور ... وگال طلعي شكو شي بداخلچ وانت يم الشباك .. مكانوا عازلين الضريح  بذاك الوقت وگفت يم الشباك وگعدت اذكرت شنو صار وياي ..وابچي واطلب الرحمه بهذا المكان گدرت اطلع الي بداخلي و تأملت الله يغفر الي ..  

صليت اهنا .. اول صلاة الي بنية خالصه للله چنت اركز على كل كلمه طالعه من قلبي وقاصده بيها الرب كأنه واگف امامي ...

الراحه الي حسيتها ما بعدها راحه .. لأول مرة احس نفسي قوية ونظيفه ...

رحنا بعدها ونسني حسن ورجعنا  للبيت ...

اول ما دخلنا اتلگتنا ام شروق

- هلا والله .. تعال ابو شروق اريدك بشي ...

جاوبها هو

-وين البنات لعد

-وديتهم لهلي

- ليش .. وبدون اذني

- اريدك بموضوع  ما يجوز  گدام احد

و باوعتلي بطرف عينها ؛رحت لغرفتي وعفتهم .....

ورة ربع ساعه او اكثر سمعت اصواتهم علت ....

طلعت اول ماشافتني 

-ادخلي انتي مالچ علاقة ..

انه دخلت ...وماكو داعي استرق السمع صوتهم واصلي

- ليش تعاقبني ....انت ليش قاسي عليه ...

من ذكرت قساوته گامت تبچي 

- كافي .... ما تأثر بيه دموعچ ..بعد ... ابد !!!!!

لخاطر بناتج اني مستمر وياج ... 

اذني ما صدگت الي سمعته هذا رد حسن !!!!

ليش هيچ وياها  شنو سوت حتى هيج يتعامل وياها ؟؟؟؟؟؟؟

يتبع

علمني....يامن..احتويتني..

وباارادتك....قويتني..

وبصبرك....رتبتني

وبحبك.....خلقت..عالمي..

وبحنينك....عيشتني...

كنت..اسيرة..الخيالي..

عبداً...لااوهمامي...

اكلم...الجدراني....

رسمتك..في..خاطري..

ملاكاً...يحلق..بوجداني...

وطيراً....بجناحيه...

ضمني....ورفعني..للاعالي..

اميراً...انت..في.

.مملكه..حبي

لا..احد..قبلك..

ولا..بعدي..

لا..ترحل...فتكسر..قلبي..

تقدم..وهات..العهدي..

بيني..وبينك..لا..نسيان

ولا..غدري..

سوى...كلمه..

هيه..العشقي..

من كتابات صديقتنا همسات الذاكرين