تحميل رواية «كحل عرب» PDF

رواية كحل عرب الفصل الخمسون

( القاء قبض )

و'چنت اظن

الوكت الــ'تِهـِد بيه روحي .. اهدك

لني كلما فززن صبري الليالي

و'فات وكتي اتوسلك

هدوة وكت خليني عندك

(عريان السيد خلف)

كواغد : كمت من حيلي ساعة الشفت بعير العشيرة دش اعلية ، و يتصايح و يعلي بحسه اعليه جدام الوادم و فوك ظليمة بتي هو ابو الراهي .

ولني انهد بيه : بيا عييييين جاي ليجاي و تحاسب ، دشيت ديوانك اتنخاك البت خذوها وامعا فاكدة ...و خلصيتها اعليه "سهله سهله" تالي ليما جابولنا البت ميتة جاي تفر بفچك علي، جا هو عكالك ما يكدر بس اعلى النسوااااان .

سلطان : حسج عينج اسمع جلمة منج ، دولبتينا ووهدنتي حالنا ثاريج تلعبين اعلينا يبت شمخيييي .

- حسي اعلي و ما اخافن احد دامني اعلى حك و انت و ابن اخيك الماخذين حكي، خليتو زلمتي يطلع للواجب و توليتونا ، وعلي اليمد ليده اعلى البت وياخذها و العباس ابو فاظل اشهركم شهر و انا موش مرة يو ما سويتها.

سلطان : علي حسج و اشوفنج الزلم اعلى اصولها يبت شمخي ، وعلي لا ابهذل حالج ، طلعي البت و امشي ويانا يالة

- البت ما تطلع ، و اخو خيته اليمد ايدة و ياخذ البت من عدنا ، موتوها و جايين تخلصون اعليها ، يل ما عدكم لا حظ لا بخت .

نعمة : ابوي الما عدة بخت يكوووووووووويغد .

اجت الدكتورة : ترا والله ميصير هيج ، ردهة و مرضى نايمين ، لو سمحتو تفضلوا برا .

سلطان : احنا ماشين لجن الفرخة هاي بتنا و لزوم نطلعها ويانا .

الدكتورة : البنت مريضة و عندها التهاب بالأمعاء و ما لازم تطلع من المستشفى الى ان تتحسن .

سلطان : احنا النقرر تطلع يو لاله ، نعمة اخذ البت

الدكتورة : دكتور انت و تقرر ، يا حجي البنت تعبانة وما لازم تطلع .

كواغد : موتوها وردوا يجتلونها مرت الأخرى ، عساها بحظكم و ابختكم يل مالكم بخت.

سلطان : اخذ البت ينعمة .

الدكتورة : عفوا هنا مستشفى حجي مو جول ، تريد اطلع البنت على مسؤليتك ، يجي ولي امرها الاب او الأم يوقعون على مسؤليتهم تطلع .

- انت ياهو و تعلمينا شغلنا ، ميلي غاد بوية ولا تخلين طشارنا يلوحج .

الدكتورة : طشار شنو و شغل شنو البنت مريضة و هنا اني دكتورة و مسؤلية كل مريض بركبتي ، يجي الاب او الأم يوقعون على خروجها بمسؤليتهم وتطلع .

هدية: انا امها وعلي ذول يريدون يموتون بتي .

الدكتورة : مو فالتو ويجون يموتون ، خبروا الأمن بسرعة

سلطان : مكوية عودج يدكتورة و تندهيلنا الامن ، انت من يا عمام ؟.

الدكتورة : ليش ناوي تفصل اهلي لو تبتلش وياهم ، الأمن وينه .

- البت كلت تطلع يعني تطلع .

كواغد : الله اكبر عليكم ، اااااااااااااااااالله الاحد ، وينكم يهل واااااااااادم ، تعالو ليه وشوفو حاااااالي ، مرة وحيددددددددة و تولوني ، وين اهل ابختتتتتتت ، وين اهل الحمية ءهلااااااااااااا يمة .

دخلو الحرس ، و اللي بالردهات البقية كلها التمت عليهم و كواغد تصيح : زلمتي بجيش يحارب و تولوني الما بكلبهم رحم ، جتلو البت و طلعيتها من حلك الموت و لحكونا للمستشفى ، وين شيوخ السماااااااوة ، خل يجون يعاينون شييييييخ اهلنا يمن كون نختل بفية انون مننننننننه .

ارتفع صياح الزلم و سلطان وولده يتصايحون ، انتهت بدخلت الأمن للردهة ، من صار بيها الأمن طلعوا من المستشفى و هم يتوعدون لكواغد .

هدية : شلون بيه هسه يمة .

- خليني امش و انت ظلي هنا ،اروحن اوصي لويلة و اخيتج ما يفجن الباب و يطلعن ، ذولة ما يتأمنون.

- و يو اجو وخذو بتي .

- شحده الياخذها ، ظلي هنا و لا اطلعين.

طلعت كواغد من المستشفى ، تلكاها خنجر : ها ام ستار انا ردت ادخل و انهد بيهم لجن خفت اثر اعليجن و ازيدنها .

- لا يمه زين سويت ، خليني اروحن لبيتي خافن ياذون البنيات .

طلعت كواغد من المستشفى ، مشت للبيت حذرت لالة تصك الباب ، وودت على ايمان خاطر تكعد وياهم و كالتلهن : لا تفجن الباب لحد ليما تسمعني حسي .

لالة : روحي عمة ولا تفكرين انا هنا وعلي شحد اليكرب ، احطن رجلي بمصرانة و اشهرنه شهر.

- عفية بتي، ياله امشي.

.....

دش سلطان للبيت و هو نار كبرة و يصرخ : ولكم انا سلطان ، كويغد ال**** تصايحني جدام الوادم و تلم الناس اعليه و تشهرني .. جا تطني صبر هي يو لا

نعمة : مالها رداد هاي بوية ، و حاكم اخري ما يعرف شلون يكضها و يكص السانها من كون هاي موش اول مرة اتطاول اعليك .

ناصر : جا يو شايف بتها شتسوي ، حباية و مفشوكة من امها ، لا تستحي ولا عدها نكطة حيا ، و يو طكاها فليح فزعت الوادم و الصايحة تصيح اعليه.

جاسم : جا هسه شنسوي ؟ نكعد و نسكت اعلى فعايلها و شهيرتها لينا جدام الوادم ؟

سلطان : هدوها ليما تطلع من المستشفى هي و بتها ، و بعدها الا اذلنهن ، دخل يصبرن علي فلا اطلع سلطان ابن ال ثجيل يو ما علميتهن و ربيتلهن كلب .

....

راديون : اتصنت اعليهم و اسمعنهم ، حتى الجاهله ما سلمت منهم و رايدين يذلون هدوة و امها خاطر يردونها ، شنهي ذول من بشر ما اعرف ، لا و الحظ جا هو الموت لفى اعلى ابوي و تخطى هالوادم ذول ، عفية دنيا ما يركد بيها الا الردي .

مشيت ليجوا ، مرت حمدان طاكه روحها و تجتل و تلبس بابنها و تصيح ، درت ليها : جا شمالج بهداي موتي الولد .

- عساه يموت و اخلص منه ، طكت روحي و علي .

- شمالج كولي يا الله

- جا هكو مرة ما تشوف اهلها سنتين وعلي طكت روحي، امي مريضة وراح تموت و ما يخليني اروحن اشوفنها.

- بهداي و سايسي وكليلة سويعة ما اطول اشوفنها و اردن .

- ابوه ما يرضى .

- يطلابة سلطان الما تخلص .

ظليت جويعدة ونجمة ترزل بيها : شنهي عليش مكشره هالجهرة ، كله اعلى روحة اهلج ، عفية نسوان بس تردن تخورن موش كود امج .

- عمة سنتين انا حاجية كايلة ما فد يوم شكيت ، لجن امي مريضة ، عليج العباس احجي ويا عمي سلطان .

- عمج موش فاضي لهالسوالف هاي ، كافي اعليه مصايب السلف الملتهي بيها ، ويو رحتي شنهي طابت امج يو هي عيارة ؟

دارت عنها و ظلت تبجي و ما ترد اعليها و نجمة مستمرة ترزل بيها .

دش جسام صاحني ، كمت ليه:

- جهزيلي غريضاتي ، خاطر باجر غبشة اطلع

- وين ؟

- لكربلة عدي بضاعة اوصلنها .

- تبات يو تظل ؟

- ما اعرف ، لجن جهزيلي مالت بياته .

- جا خوش ، اكلك انشدنك عن اخبار هدوة وبتها بالي يمهن .

- ما اعرف ابوي رايح ليهن للمستشفى و مخزياته جدام الوادم .

- جا ابوك موش اعلى حك و الحك حكهن ، انا اكول يو تروح ليهن و تتفكدهن.

- ما اريدن اتوهدن ويا ابوي ، خليني بعيد عنه .

- جا نسوان مالهن احد ، و بالمستشفى و محد منكم يروح ، يو تروحون تكاومونهن و هن نسوان ، يو تشيلون اديكم، جا ما طلعت هاي .

- انت عليش تعديني وياهم انا شلي غرض بيهم

- جا موش كرايبك ، دروح ليهن شمالك .

- اي اي بس خلصي شغلج عودن اروحلهن .

جهزيتله غريضاته ووحطيتهن و هو طلع ليهن ، وانا بهالبيت صامة احليكي بس اعاين مراددهم و كوامهم ، واحد يصايح الاخر و بيت ما يهيدله ساعة ، وكرت حمدان دكة رجل اعلى روحتها لهلها .

.... دش جسام للمستشفى و راح للاستعلامات خاطر ينشد اعلى الردهة النايمة بيها الجاهلة ، توه وكف ، وكف بسده خنجر : شعدك هنا

اندار جسام : ميل من وجهي ، ما رتيد اشوفن وجهك

- جا ادير وجهك وتطلع من المستشفى كلها

- عليش خافنها مستشفى الخلفوك و انا ما عرف ؟

احتك بيه و كض اهدومه : من تجيب الخلفوني اعلى السانك النجس ، ادفننك افتهم ، ياله اطلع .

- ميل عن دربي لا انا الادفننك ، ميل

دفعته و ردت ادش ، كضني و كال : اذا انت اخو خيتك اطلع واجهني غاد .

- دتعال ، خل اشوفنك الخو اخيته شلونه تعال

تكاضضنا و طلعنا ليبرا خارج المستشفى وتكاومنا ، واحد كام يدوس بالاخر ، ليما التمت الناس اعلينا ، فركونا و انا اصيحن بيه : هدوووووووني اجتلنه ، هدووووني .

خنجر : تجتلني مووو ، شو بس هدوني خل اشوفن ياهو اليجتله .

كامت الناس تجرجر بينا ، ليما دفعونا عن بعض ، مشيت السيارتي و انا اتوعدله ، النجس بعده اباله راديون ، لا ما اسحك بالك فلا اتسمى بسمي.

ظليت متربصله بالسيارة و تاطرة مناطر ، للمغرب شفته طلع ومر من جدامي ، شغليت السيارة و دست بيها ، ويا ما عاين ليه ، و دهسته ، انطر ليغاد .

تنوعتله ، طاح اعلى صدره و كام يكوم و يطيح و الدم جره اعلى وجه ، درت سيارتي و طلعت للبيت .

دشيت للبيت ، هوسة كابة ، فتت بوجهي للحجرة، لحكتني راديون : شمالك ، متجاتل ويا احد

- عليش هالصياح البهالبيت ؟

- مرت حمدان تعاركت هي ورجلها ، و رجلها كبن براسه و جتلها ، كلي انت شمالك ؟

- مشيت للمستشفى و لاكيت خنجر .

سكتت ، عاين علي ساعة النطك بسمه ، رد حجه : و تكاومنا

- دهر يمممممه .

- اشوفنج خايفة اعليه ، توهدن حالج ساعة العرفتي تكاومتي وياه

- ردينا

- انا يو انننننننننت

- سد السالفة لا تحج بيها

- و انا هم سديت سالفته للابد

- شنهو يعني ؟

-دهسته بالسيارة و طريته .

نشغت من كل كلبي و حطيت اديه اعلى حلكي ، اندار ليه : تضايكتي .

- شنهو الخلاك تسوي بحاااااله هيج

- تبجين عليش رويدا ؟

- الزلمة انا هديته ورضيت بيه ، تتعرضله لييييش ..

- حسي دموعج لا وعلي ابن ابي طالب هساعة هاي اطلكنج ، كفي يااااله .

كمت من عده خاطر اطلع ، صاح : اكعدي جدامي ، و دمعة يو شفت منج اعليه ، اذبن عليج نفط و احركنج افتهمتييييي

- فكينا هالسالفة و كلت الك الزلمة ما عدي شي وياه ، تصرف هاذ شنهووووو .

- موش انت التحاسبيني اعليه رووووووويدا .

فكت الباب نجمة : جا انتم هم تكاومتو ، لسم الله الستار ، شو من ساعة الدشتنا ملوك و لهساعة البيت ما هدة ولا ركدت مصايحة .

ظليت اعاين اعليها بخزرة ، هديت المجان كله و طلعت ، نسوان احمويني توهن مخلصات العشا ، حطيت المواعين ع الحوض و اجلف و ادموعي يهلن .

جا فوك هدتي ليه و يجتله ، انا استسلميت النصيبي ورضيت بيه و بعدت عنه ورديت لجسام ، يروح يدهسه عليش ؟ ، يختبرني يو شنهوو غايته ؟ ، جا هسه اخبرمن اعلى دهسة خنجر ، هيج اسكت ولا جن صاير شي ؟

اجا جسام ، حسيت دموعي و ظليت جويعدة اعلى اطراف الحوض و مدنجة اشطف بالصحون ، سويت روحي ملتهية .

جسام : شجاي تسوين

- شتشوف ؟

- من انشدنج احجي وياي عدل رويداااا

- جاي اجلف .

حجيتها و اختنكت بعبرتي ، هدني هو وراح دش للحجرة ، خلصيت الصحون شلتها بالصينية و نكلتها للمطبخ اعزل بيهن ، اندكت الباب ، طلع نعمة فكاه ، جابو علم ام مرت حمدان .. ماتت

البت سمعت بامها ماتت يو انهد حيلها ، شكد زيجها و ملخت شعرها و كامت تنحب و تصيح ، وحمدان يكللها : عليش تبجين جا شنهي مرة عجوز وماتت تردينها .

وكفت و هي تكله : بس اخذني اوادعن جنازتها ، ولكم اريدن اشوفن امييييي .

سلطان : دشي حجرتج و اترحميلها، ياااااله فضينا صدعتي روسنا بهالصريخ .

كامت تصرخ و تبجي و تنحب و حمدان يصيح اعليها ، انا عيد و جابه العباس ليه ، اعلى صريخها ذبيت طوس دموع .. هلبت يرتاح كلبي و اهود .

جسام كاعد اعلى كتر يعاين علي، و حمدان جر مرته و دخلاها للحجرة ، وهي تصرخ بكل حسه و تكله : بس احضر جنازتها ما اباتن .

وهو يردها : بسج دوخيتينا انعلة الله اعلى روحها ، انعل ابوج يابو اهلج بسس .

تسودنت شلون شتم امها و توها ميته ، تكاوموا ، و سلطان صاح : نجمممممة دشي صمي حلكها لا تخلني اكومن اذبن كل غيضي بيها ، كومي ليها .

اندرت لمرت جاسم : جا هم عليش ما يخلونها تروح تمش لهيلتها ؟ شني هالكوة ؟

- سلطان و ابوها متكاومين واحد ما يحج ويا الاخر ، ومن يوم ما تكاوموا ليجاي هي ما رايحه لهلها .

- هالبيت هاذ موش بيت ، زنزانة مساجين .

- دستري اعلى رويحتج و اسكتي لا يسمعونج ويندارون عليج .

جاي تحجي ، على حس مرت حمدان و عي تكله : هاذ يو ابوك الميت ترضى ما توكف اعلى جناااااازته ، ولكم هااااااي امي.

حجت هيج يو ابتلت اعلى روحها ، حمدان تولاها من عده و سلطان كام من مجانه ، و ضرب اعلى الباب بعوجيته و صاح : حمداااااان ، طلعها لجليلة حيا ، طلعهااااااا .

جراها من راسها و دفرها بنص البيت ، كامو ليها جسام و جاسم و شالوها و حطوها وراهم و يدفعون بحمدان منعا و هاذ يصيح و يفشر و يشتم بيها ، و جهالها ٦ متسطرين ورا و يتباجون و هم يعاينون امهن انولت .

ظليت موجفه بمجاني بس الدموع تلالي ، وسلطان يصيح : طلكها و اطردها لهلها و خلها ترد لمها يااااااااله .

رمى اعليها يمين الطلاك و عي تسودنت ، نزلت اعلى اجدامه تحبحب و تكله : ادخيلك انا عمي مروتك ، جهالي .

- مامش جهال الج عدنا، اطردها يحمدان ووديها لهلها يااااله .

ركضت و كضت بجهالها و تصرخ و تتوسل بيهم نا ياخذونهم منها ، انا ما ظلت دموعي بعيوني و انا اشوفنها بهالحال ، اهيس كلبي وجر اعليها .

وجهالها دكدك اكبر واحد بيهم عمره ٧ سنوات ، جروها من راسها و طلعوها برا ، وودوها لاهلها ، جهالها نطوا من البجي اعلى بجي امهم و ساعة جروها و طلعوها فرفحت كلوبهم عليها ، نريد نجر واحد منهم ، كلهم يتصرخون .

كوة شلت اثنين منهظ ووديتهم للحجرة ظليت اهدي بيهم و اقنع ، ليما تعب افادهم من البجي و نامو و الشهكة بنص صدورهم .

دؤت للبيت اعاين و احجي بكلبي : الله هم يرحمك يسلطان اعلى كل هالمظاليم الحاطهم حدرك ، ما كلت فروخها ما حسبيت ، يمن كون حبة بكلبك بجاه العباس ابو فاضل .

غطيتهم بجرجف و كمت منهم و دشيت للحجرة ، حجيت : كلكم واكفين مامش وحيد منكم يوكف بوجه ابوكم و يوكفه ، شنهي ذنب هالفرووخ هاي فرفحت كلوبهم اعلى امهم .

ما رد علي ولا التفتلي ، مشيت عنه ، جريت الجودلية من النضيدة و طريتها اعلى الكاع ، وجريت جرجف ، فرشت ، عاين هو : شنهو معناتها

- لا معنى ولا هم يحونون ، ساعة السودة الدشيت بيه هالبيت ورضيت اردله ، انا يو ضاله عد اهيلتي اخيرلي من هالبيت هاذ الكله مظاليم .

- شيلي فراشج وردي لمچانچ بساااااع

- لا يكون رايد تسوي وياي مثل السواه اخوك ويا مريته

- رويداااااااااا

- لا رويدا ولا هم يحزنون ، هدني بحالني موش طايكة اشوفن وحيد منكم .

كام من مجانه و دفر الوسادة برجله و كضني من ايدي : اسمعي ليهساع و انا مطول خلك وياج ، جري عدل لا و الحسين اندار اعليج .

دفعني اعلى القريوله و طلع من الحجرة ، كعدت اعليها و كمت اناشغ من البجي ، مدري ابجي اعلى هالحال ، مدري اعلى حال خنجر الما اعرف عنه شي .

ظليت ابجي بهداي ، لينا دش سويت روحي نايمة خاطر لا يحجي وياي، هو بدل ملابسه وطفى الضوا ، و انجطل احذاي .

تصنمت بمجاني ما تحركت ، و هو مزوهر بمجانه يدير منا ويرد منا ، ليما كرب شال راسي و حط ايده و سحبتي ليه و هود و غمض .

للصبح كعد ويا الصلاة ، ساعة الطلع ايده من حدر راسي ، حسيت و فكيت عيني ، مشى توضى و مد سجادة و صلى ، سحبت ظهري و انتجيت وكعدت ، عاين علي هو و المسبحة بيدة يسبح .

ظليت اعاين بيه و صافنه مالي حيل اكومن ، خلص تسبيح ، فرك السبحة و حب التربة و لم السجادة و حجه : اصباح الخير

- صباح النور

كرب ليه و حب اعلى راسي و كعد احذاي : انا رايح و ما اريدن يظل بيني و بينج زعل و معاتب ، الصار امس راح ويا امس ، وطر فجر جديد و انا رايح بدرب بعيد ، و الدرب ما يتأمن ، ما اريد اروحن و انا امزعلج.

- موش زعلانة منك

- جا عليش هالوجه مكشر و البسمة ما تطره

- توني كاعدة و دايخة ، و الصار امس موش سهل .

تنهد و انا اهيسنه يريد ينشد شكصد بالصار ، ويا مرت حمدان يو خنجر ، لجن ما حجيت ، و طبطب اعلى ايدي و هوويكلي: ياله كومي جهزيلي الريوك اعلى ما ابدل خاطر امشي، هم ياله اطلع .

هزيت راسي و كمت اعلى حيلي .

سويتله الريوك و خلصيته و اخذته ليه ، لكيته مبدل ولابس و جاي يحسب بالفلوس و يحط بجيبه ، خليت الأكل جدامه وتكترت .

حجه : جا ما تاكلين ؟

- ما مشتهية

- رويدا

- وعلي ما مشتهية

- كربي بس اشربي جاي .

حط الاستكان جدامي و كمت اجاملنة و اشرب كوة، ليما كمل ، غسل و كال : شمعتازة اجيبلج مناك من كربله ؟

- ما معتازة غير تردلنا سالم .

- الله يسلمج .

حبني براسي ، و طلع انداريت مرت حماي تعاين ، دشيت داخل ، تكلي : عشتو يحبج بنص كصتج شنهي بعد ما تتشاوفون .

- لا اسم الله عليش تكولين هيج .

- جا موش زايعينها كلش ، مسوين روحكم متجاتلين اعلى العشك و لا يكول كبل اسبوع هو مطلكج و بالكوة يالة رضى يردج .

عفتها تحجي و دشيت داخل.

....

اندكت الباب غبشة ، و لاله تلف بشيلتها و تصيح : اي اي جا طايرين ، ربدتونا .

كربت من الباب و هي تصيح : ياااااهو

حاكم: شنهي القضية يا بوية دفجي الباب ، ساعة ادكن اعلى ايمان ما تكعد

لاله : ياااااع عمي

فكت الباب بساع و حضنته، ضحك هو و حباها براسها: هلا بوية شلونكم

- بالضيم خلافك عميييي

وبجت ..

حاكم : هااااه شصاير .

- هديوة يعمي ولوها الما يخافون من الله .

- هاااااه ياهو الوي هديوووة

- يعمي هجولونا هجولنا ، ومن درت عنه هجولوناااااااا .

- خايبة بسج نحيب و كليلي هديوة ياهو وياها ، وينها ؟

- بالمستشفى يعمي حال الضيم حالها ، من رحت عنا و ليجاي مامش مصيبة و ما ذبوها اعلى روسنا اهل يسرى الغمة عمييييي .

- خايبة بسج انحيب دفهميني مرمريتي افادي .

ايمان : هلووو حاكم ، اجيييت

- فهمني كواغد وين ، هدوة وينها .

ايمان : اخوك ناصر اخذ بنتها و تمرضت الطفلة و هسه هدية نايمة بيها بالمستشفى، حالتها كلش مو زينة .

هد علاكته و كض الباب و طر الدرب للمستشفى ، وصلي ليغادي ، دش اعلى الردهة ، شافته كواغد فزت اعلى حيلها ، وفزت وراها هدوة

تلكاهن : شنهي فهمني شصاير .

ذبت روحها هدية بحضن ابوها و نحبت : بوووووية وين مشيت عني بوووووية .

- يمج بوية وعلي عوينة ابيه اليكرب صوبج .

كواغد :- الحمد لله اعلى سلامتك يبو ستار خلصت كلوبنا ليما رديت .

- فهميني شصار وعليش خذوها .

- مامش هيج مر اعلى مشيتك ٤ تيام ولنهم ينزلون عدنا ، يو ترد هدوة يو ناخذ البت ، هدوة كالت الهم ما اردن ، خذو البت و حرمو امها منها و رديناها بلا ما يدرون.

- ما يدرون شنهي

- سالفة طويلة لجن البت ساعة الرديناها اخت الميته عبن مطينها حبوب ما ادري شنهي ، هسه نعمة ردت رويحتها الا يو تعاين حالتها ساعة الردينها البت ميته يحاكم .

- وشلونهم تخلينهم ياخذونها و انا موش بالبيت ؟

- سمعو مني هو ومرته تلاكفونا و خذوها .

- يا يابة ياااااااااااابوية ، اليوم اسميها دماية وعلي .

اخذ التفكة وطر الدرب لبيت ناصر ، وكف ابابه ، سحب اقسام و رمى ثلث جيلات بالباب و صاح : ولك نوووووووووووويصر ، ياهو اليخلصك مني نوووووويصر .

دفر الباب اعليهم و صاح : اطلع ولك اطلللللللع ، ادوس بيتي وانا ما موووووووووووجود .

اعلى حس الفشك ، فزعت الناس ، وناصر طلع و يصيح : انا اخوووووك تهد علي يحوييييكم

- موش اهد اعليك اليووووووم، اليوم انوم الجيلة بفادك ينااااااصر .

وسدد التفكة صوبه ، و الناس كضته : اعصابك اعصابك يبو ستار ، صلي اعلى محمد صلي اعلى محمد .

- ميلووووووووووو عني .

ثار جيلة اجت بالحب مالت الماي ، تفلش الحب و انچب الماي .. و النسوان كامن يتصايحن وولد ناصر يصيحون : عمي نتفاهم بهداي عمي

- انعل ابوكم لابو عمكم لابو البزركم لابو اليوم الشفتكم بيه كواويييييييييييييي* تخلوني امش و تهدون اعلى بتي تهجولونهااااااااا ، الكم عين بعد عملت ابنكم بجيابتها ادوووووسون بيتي ، اليوم محد يخلصكم من اديه وعلي .

ثار الطلقة الثانية و اجت شرجي ..

وهم كامو يتراجفون من كونه معصب وما يتفاهم و التفكة بيدة ويا ساعة يصيبله واحد بيهم .

جروه الناس ، والتموا اعليه ، وناس كبار تكفلوه وكالوله : حكك تاخذه اعلى هالشارب ، لخاطرنا و لخاطر شيباتنا ، هيد و احنا نحلها بينكم .

.....

فزع سلطان اعلى حس الچيلات : شنهو هاذ الفشك ، مالمن

نعمة : جريب جنه بسلفنا ، كوم يجاسم شوف شنهي الغضية .

جاي يكوم ، اندكت الباب، مشى جاسم فك الباب ، سيارة امن واكفة بالباب و ٤ لابسين زي شرطة ، حجه : المعدو جسام سلطان ثجيل متهم باجراء حادث للمدعو خنجر الخنجر حسين ، و هو مطلوب للعدالة .

سلطان : حادث شنهي بوية ، ياهو خنجر هاذ

- حجي ابنك داهس واحد اسمه خنجر ، و الرجل الان بالمستشفى و حالته صعب ، و عدنا امر بالقاء القبض على المتهم جسام.

- يمتى هاي بوية

- امس بحدود الساعة ٦ و نص .

نعمة : جان موجود بهالوكت ، اي اي موجود ، اخافنكم متوهمين بوية .

- اخي العزيز عدنا اوامر بالقاء القبض ، ولازم ناخذه ، فتحوا مجال للعدالة تاخذ مجراها و سلمولنا المتهم ، و الا تضطرونا لدخول البيت بالقوة .

سلطان : اسمع بويه انا شيخ و الوادم تعرفني و تعرف ولدي موش طبايعهم ولا هي تربيتهم يتعدون اعلى الوادم و ان جان صكد جسام متعدي ، انا اسلمنه بيدي الكم من كون اهم شي عدنا الامن و الغانون ، لجن جسام هساع موش بالبيت ، طلع الصبح اعلى شغله بالنجف .

- على راسي شيخنا ، بس انا كتلك عدي اوامر بالقاء القبض ، انطينا مجال نفتش البيت .

- بيت شيخ و ادوسونا تره ما صايرة

- هاذ القانون حجي يطبق اعلى الجبير و الزغير بلا زغرن بيك لجن بالقانون الكل سواسية ، تخلينا ندخل لو ندخل بطريقتنا .

سلطان : لا بوية انت و قانونك احطنكم اعلى راسي ، نعمة بوية صيح اعلى النساوين يسون مجال للشرطة خاطر تخلص واجبها .

صاح نعمة : بويه نسوانه ، البسن عبيجن خاطر الشرطة ادش ، يااااااله بوية

تراكضن النسوان و تلفلف بالعبي ، و الجهال طلعو جنهم سرب ، ووولد سلطان جثيرين .. غطوا العين ، دخلو الشرطة فتشو البيت ، حجه واحد منهم : غرفة المتهم وينهم ؟

سلطان: هاي ؟

راديون : ساعة الكالو امن ، هبيت اعلى الكتب مال جسام ، كلبي طار شلتهن و خليتهن بهدومي ، ولبست عباتي و ظليت كاضة عليهن و كلبي يخفك .

دخلو ، فتشوها وفردشوا غريضاتنا ، اندار ليه وانا اتشاهديت ، اهيس روحي راح يغمن عليه ، حجه : يمتى يرد

سلطان : شنهي مامش زلام و تنشد مرة ، تراها ما مرضية ، و ان جانك تحكني بقانونك انا احكن عمامك باصولنا .

- تهددني شيخ

- انا رضيت ادش بيتي من كون انا ما اوجب بوجه القانون ، لجن بقانونك هاذ ما تتعدى اعلى حريمنا ، زحمة بووووية وانا اعرف عمامك ما يرضونها .

انسحبو و هم يكلوله : البيت راح يظل تحت المراقبة و لو عرفنا انتم جاي تتحايلون على العدالة ، راح تكون انت المحاسب كدامنا يا شيخ .

- اعلى راسي .

ركبو سياراتهم وطلعوا، دش ناصر : عمي حويكم هد علي بتفكته عمي .

- عوينة ابيك لابو اصلك ، انا الياهو اصيرن منكم ، لطلابتك يو لطلابة جسام ، نعممممة انهد اعلى مرت جسام تجي ليجاي.

نعمة : وينج يبت ضويحيييي ، كربي ليجاي ، تعاي .

سلطان : شنهي سالفة جسام ؟

- امس كالي بالحادث لجن ما ظنيت يوصل الامر للامن.

- ياهو هاذ الداهسه و عليش سكت ، عليش ما كالي دهسته .

جاسم : خنجر هاااذ نفسه الجان خاطبج من ابوج و موافك اعليه يو غيره .

سكتت ، صاح سلطان : شنهيييي بلع السانج الواوي ، احجي .

- ما اعرفنه ، امس كالي دهسته و سكت . والتهينا بمرت حمدان .

- وانا حايط هنا ، ابني متعرض لواحد و جاتله و انا نايم اعىى كفاي ، ما حجيتي امس ، موش تزقنبتي كبل شواي ، عليش ما فجيتي حلكج وحجيتي .

- جا ولون هو ما حجه انا احجي

جاسم : شنهو المسويه صاحبج و جتله جسام .

راديون : استحي اعلى شاربك موش انا الينحجي بوجهي هيييج .

هم اعليها جاسم و طكاها راشدي و كضوه اخوته و هو يصيح : ياهو هاااااذ اليستحي ولج ، تعرفون المستحى انت و اهلج ، يبت ضويحيييييي .

سلطان : السانج يطول اعلى ولدي ولج .

راديون : يطول اعلى الحك، ترضاها اعلى بتك ينكال هيج اعليها.

سلطان : ولللللللج بت ضوووووووووويحي ، حسج ما اهيسنه .

دفعها بالعوجية و كال الهم ، شوفولي هاذ خنجر شنهي سالفته ويا جسام ، ياااااله ، و انت حمدان تاخذ سيارتك و تطلع الكربلة تدورها اعليه شارع شارع ليما تلاكيه و تاخذه لال مطشر ، ياااااله امش .

.......

بشرى : اهيس الوجع ينزل اعلى اركبي ، اظنن ولادي كربت

عاينت لسرحان صافن بالريوك و ما يمد ايده و ما مركز وياها ، ردت حجت : اذا الله سهل ولادتي هالايام ، ما اعرف ولد يو بت ، انت شنهو تريدها

سرحان ؟ ... سرحاااان

فز : ها ها ، شمالج ، شتريدين

- صالي ساعة احجي وياك و انت بالك موش وياي .

-بالي مشغول ، خنجر كالي اوديلك خبر و مامش من امس ، اكومن اوصي سالم يروح ليهم.

بشرى : يروح المن ؟

- انت شنهو الرايدته ؟

- انا اكللك راح اجيبن و الوجع جاتلني و انت مامش ابالك ، غير هدوة و بتها ، و انا و ابني و البطني ، يطبنا هرش ، اهم شي هدية ، موش يو لاله .

- ردينا لهالسالفة

- ردينا ردينا ، هو انت ناسي خاطر تكلي ردينا ، انت كاعد احذاي ووبالك و فكرك يمها ، سيارتك غاد و خنجر غاد و مخاطر بسمك وموهدن روحك ويا ال ثجيل ، بس لخاطر هدوة و تكلي ردينها ، هو انت يمتى نسيت خاطر ترد .

تنهد سرحان : دايمة ان شالله ، شبعت.

- انت ما شبعت انت كايم تروح ليها خاطر تشبع شوف بيها موش بالأجل .

- يمه معتازين شي كبل لا اروح

- يواشك يمه ميخالف ، المرة تحبك و التحب تغار .

- الله كريم ، ياله انا اروحن .

طلع من البيت و بشرى فزت لحجرتها صكتها اعليها و كامت تبجي ، طلع هو و كال للحارس : سالم وينه ؟

- والله ما اعرف بوية

مشى للمضيف ، اجا سالم يركض : ابو مأمون ، ابووووو مأمون

- خير يسالم ؟

- خنجر داهسينه و هساه بالمستشفى ؟

- هاااااااه ، ياهو الداهسه ؟

- مدري ، حميد الفجر ياله اجاه الخبر

- امشنا ياله .

مشى لبيت كريم ، اخذ سويج سيارة كريم و طلع بيها ، وصل ليغادي ونزل ، دش للمستشفى ، نشد عنه دلوه ، راح ليه ، لكا حميد عد راسه و ومغمض .

- ها حميد شنهي السالفة شصاير ، ياهو الداهسه .

- ابن سلطان

- ابن سلطان ياهو ؟

- نسيبك جسام .

- انا اخوك يكريم ... شلون دهسه و عليش .

- هو بلغ عنه ، واطه اسنه و توهم اطوه مسكن و رد نام و اظنن الشرطة راح تنزل اعلى بيت سلطان .

- شنهو الصار بينهم .. جا غير افتهم

- انا روحي ما مفتهم ، بس ربك نجاه من حلك الموت جا راح بيها .

- لا حول ولا قوة الا بالله ، عفية هالسلف هاذ ما تفض طلايبة .

....

رد حاكم للمستشفى ، خطار يتطمن اعلى هدية وبتها ، كعد يمها و حباها براسها : لا تخافين بوية ، عوينة ابيهم ، وعلي يو كربج احد منهم يو كرب بنيتج ، الا عدمنهم هالمطايا ذول .

- بوية رادت تموت بين اديه ، روحي فرفحت اعلى بنيتي بوية .

- عدت سلامات لا تخافين ، كواغد كليلي شلون اخذتو البت من بيت ناصر ، الزلم خبرتني البت مبيوكه من عدهم و ثلث تيام يدورون اعليها و ما يعرفون ، و انت هاده اعليهم و تدورين اعليها شنهي القضية ؟

- القضية رادو يردون هدوة بلا عزال وترد لذاك الفكر ولذاك الجوع وذله عكب سوايتهم السودة ، ما رضيت اردنها ، اتفقت ويا ابنهم الزغير يو جابها الي انطيه جم فلس بلا ما يكل لاحد ، و الولد ما قصر من الصبح حطها حدر كترها و جابها ليه ، نكرت هي عدي كلت ليما ترد من الجبهة و تتفاهم وياهم ، لجن البت ساعة الخذيناها منهم ميته ، كوة تلاحكينالهم

- شسمه ابنهم الجابها الج

- حتى نسيت اسمه ، ما اتضكره جا هم هواي ..وين احفظ اسمه .

- انا اتفاهم وياهم ، و سهله هالكواويي* حاط بتهم ابيت لوحيدها و معززة ومكرمه مسواكها ومصرفها واصل و هم دايسين بيتي وماخذين البت وويردون يردونها بلا عزال، دخل يصطبرولي ، الا اشعلهم شعل وحك هو محمد .

......

ليلة : عمه عمه

ملوك : ها يليله شنهي ؟

- سلطان و ابنه اعلى الباب ورايدين يدشون .

- زناد نايم يو كاعد

- الليل كله يون ما غفتله عين ليما اخذ مسكن و منوم و نام الصبح .

- اطيني عباتي و البوشية بساع .

لبست و طلعت ، وفجت الباب لسلطان ووكفت اعلى الباب : هلا يبو نعمة ، اعذرني من دشت البيت من كون البيت بلا محرم .

سلطان : ما جاي ادشن ولا السالفة ينكعد ليها يم زناد .

- شنهي القضية ؟

- امس جسام داهس الجان خاطب بتج راديون و الزلمة هساعه بالمستشفى ومبلغ اعلى جسام و الامن جاي يدورون عنه ، الحمد لله جسام طالع غبشة بشغل خارج السماوة ، جا هساه وليدي بالسجن.

ملوك : جا الله ما يطك بحجار ، انا متأكده خنجر ورى دهسة زناد و الله اطاه اله بأيده .

سلطان : انا هااااذ الحجي ما يهمني يم زناد وموش شغلي ادور اعلى الجنايين اعلى زناد ، انا ما رايد ابني يتورط بسبب وحيد جان خاطب بتج ورايدها ، السةلفة شنهي ؟

كلولنا خاطر نفهم

- انت جاي تتهم بتي يو شنهي

- الزلمة مبلغ اعلى جسام ، و جسام ابني و اعرفنه زلمة عاكل و مرهدن و ما يدنى هالفعايل يو ما توازه اعليها و من كون الوزاه خطيب بتج الكديم ، وخلوها بعلمكم ، جسام يو انمست شعره من راسه يو دش السجن ، بتكم ما تسلم منها .

- بتي شلها غرض و هي عدكم، كول الوراها سرحان من كون خنجر رفيجة وبتي مالها غرض بهالامور ، عدك حجاية تروح تحجيها ويا سرحان و جلمة تهددني ابتي ما ارضاه ، و انا اعرفنك زلمة معدل ما يهدد مرة .

- انا ما اهدد مرة ، انا جاي ابلغنكم بس .

...

حاكم التهى بيومه ويا هدوة بالمستشفى ، و سرحان ويا خنجر ، ما رد للبيت ، و الشرطة ادور اعلى جسام .

لثاني يوم .. و الكل يدور جسام و اخوه ما خله مجان بكربله ما دوراه عليه و ما لكاه .

من الصبح و جسام بلا دراية ، صف سيارته اباب بيت ابوه و نزل من السيارة ، ونزل لبيت ابوه .

دك الباب ، طلع نعمة : شعدك جاي ليجاي

جسام : شنعي شكو

-خايب الشرطة ادور اعليك ، اشرد ولك

- شرطة

سلطان : جسام ، شعدك ولك

- بوية شرطتيش جا غير افتهم

- نعمة اخذ اخيك و امش بيه لال مطشر ، بساع تحرك كبل لا الشرطة تجي .

ويا ما جاي يطلع نعمه و جسام وياه ، صفت سيارة الشرطة و نزل منها العسكر و التفو اعلى جسام و كيدوا ادية .

جسام : شنهو شكو ، جا غير اعرف عليش تكيدوني .

- بالمركز تعرف ... امشييييي ...

-

رواية كحل عرب الفصل الواحد والخمسون

( اقتحام امني)

كتبولك شعر من چان

فيـّك حيل وباعوك

ابرخص من گصت بيّك النار

(عريان السيد خلف)

راديون : ليلي ما نمته من التفكير ، و الكتب فتكت الدوشك مالت القريولة و دحستهن بين النسيج، خاطر لحد يشوفهن ، يو ردو مرت الاخرى .

صبحيت الصبح عيوني وارمة من السهر و البجي ، ما اعرف اخافن اعلى جسام ، يو ادكن اعلى خنجر الدهسه ، ما اعرف دربي ما جاي اوچدنه من ضيمي ، و حايرة بأمري .

كعدنا نتريك ونعله الباب ، فزيت امن امچيني ، و الولد طلعو يفكون الباب، طلع نعمة ، و نعله جسام ، و ينهد بيه نعمة و يكله .. امش روح .

كام يدفع بيه و جسام ما يعرف السالفة شنهو ، دصفي يشرطة و كيدو جسام و انا فرفحيت ، لبست عبيتي و ظليت اربي من ابعيد ، جتفوه و دنجو راسه و خلوه بالسيارة ، طلع سلطان وولده كلهم فزوا وراه و تبعوه بسياراتهم .

كمت ابجي و اصرخ ، ملخيت شعري زلغيت اخدودي اعليه و اعلى الصار ويانا ، جا هسه يو اهله نشدوه عليش دهسه شيكللهم ؟ دخيلج يالزهرة احضريني .

النسوان التهن عني و انا اشتغل و دمعتي سچابة ، اسمع عمتي و هي تنعل بيه و تغلط ، لجن صاكة اذاني عنها و لاهيه بهمي .

لهناك و اندكت الباب ، فكوا للباب و نعلها امي اعلى الباب ، دشت للبيت و هي تسلم اعلى عمتي لجن عمتي موش طايقته .

انا عيد و جابه العباس ليه ، ركضت ليها و ذبست روحي بحضنها و كمت ابجي ، كضتني و عاينتلي : شنهو الصار فهميني عليش دهسه

نجمة : ما تعرفين عليش ؟ خطيبها النكري هاذ ، و انا اظنن الصار كله من حدر روسكم .

ملوك : من تحجين احجي بأعدال ، ولا تظلين تتهمين باطل ، خوش .

نجمة : الباطل لفانا ساعة اللفتنا بت ضويحي ، انا يو ما جسام وعلي هم اخليها تخطي اعتاب البيت ، لجن هالاغبر طاح بيها ورادها .

ملوك : الفكر و الكلب مشغول موش خلك ارددنج، ياله يمه دام رجلج موش موجود لمي غريضاتج وتعاي وياي لبيت اخيج .

نجمة : تطلع بلايا امر شنهي فالتو ، البيت اله اصوله يجي سلطان و تكله و يو رضى تروح وياج ، غير هالحجي كعدي ويا بتج شواي و امشي.

- شنهي انت و شنهي سلطان و انطر رايكم ، شو انت طوخيتيها ديه ما تميلين عني من كون البال موش حملج ... استجلي يروديون ..

لملميت اغراضي و طلعتني امي وياها و خذتني لبيت زناد.، نزعت عباتي ، حجت امي : دشي سلمي اعلى اخيج .

- ما اريدن

- اخوج هو موش عدوج .

- وانا مالي حيل اشوفنه ، هديني بحالي يرحم والديج

ليلة : جا ادشين ابيته و تكعدين وما تسلمين اعليه ، شنهي من كلب شايله ، غدي .

ملوك : و انت شجابج و حطج بالنص هي و اخيها انت سهمج الراحة ، صمي حلكج و لا تدخلين ، ياااله .

راديون : انا يو اروحن لبيت سرحان اريحلي .

- سرحان سرحان سرحان ، شبايتنا بلوة ، اكعدي و اركدي .

- جا هسه شلون

- كلها من حدر راس سرحان ، يعرف بخنجر ردي و ملفي بنصنا .

........

سرحان : خنجر لزوم تتنازل عن الدعوة

-يو على كص زردومي ما اتنازل وعلي .

- خنجر الزلمة نسيبي لا توهدني وياهم .

خنجر : سرحان انت صويحبي و ما اريدن اخسرنك لجن انا اتنطرها اعلى هالردي هاذ نطرة ، ما اتنازل عنه ولاحد يتدخل بامره .

- يا الطلابة الما تفض .. ولك خنجر سمي بس الله و كول يالله ... تسودنت

حميد : عليش رايده يتنازل و هو الداهسه ؟

- بوية جا غير نسيبي و اخيتي التتضرر .

تنهد خنجر و كاله : اخيتك الاختارت نصيبها بيدها خل تصبر اعلى اليجرالها عليش جاي تطلب مني اتنازل بحكي لجلها ؟ شنهو السوته هي و شنهو التنازلت بيه خاطر انا اطخن و اتنازل .

- احترم نفسك و احجي عدل الجاي تحجي عنها اختي خنجرررررررر .

- ابو مأمون ياريت تتكتر عنها و تخليني انا ويا ال ثجيل .

سرحان : طلعت منه و انا اعصابي موجرة ، جا هي سالفة و صارت يم خنجر جيب اليكنعه و يركد عكله و يخليه يتنازل .

......

هدية : صارلنا ايام و احنا بالمستشفى ، تبهذلينا و انسكمنا بهالكعدة ، لجن جنت خايفة يو كتبولنه طلعه ، اطلع و ياخذونها مني، لجن ساعة الرد ابوي انا امنيت و صرت اتنطر الطلعة خاطر ارتاح.

اجت الدكتورة الصبح تفكدة البت و سوتلها تحاليل و عاينت حالتها و كالت : حاليا صحتها تمام ، راح اكتبلكم خروج و قائمة ادوية تاخذينها من الصيدلية مالت المستشفى ، و احصري عىى رضاعتها تكون طبيعية ، حليب الحيوان احنا البشر ما نتحملة على الدسومة الشايلها مو تنطينا لطفلة معدتها ارق من الورقة ، خليها على الرضاعة الطبيعية ولا تزيدين عليها .

اخذت الجلمات من حلكة الدكتورة و كضيتهن ، و طلعنا انا و امي ، خذينا البت و مشينا : الف الحمد و الشكر من صحت بتي وردتلي ، كلت ماتت راحت من اديه .

- الحمد لله ، ياله يمه خل نعبر

- اكلج يمه جا نروح لوحيدنا ؟

- جا شعلينا ، ابوج تلاكينه نويم مكرود من اجا من دوامه و ليجاي ما ارتاح.

- جا خلينا يمه اليوم انسوي سفرة لام البنين انا نذرت يو طلعت بتي بسلامه انصب سفرة، و دام ابوي موجود هم ياكله لكيمة تكض افاده .

- خوش خوش .

ركبنا سيارة و ردينا للبيت ، دشينا ، لكينا ابوي واكف و جلي يحجي ويا لاله و يوصي بيها خاطر يطلع و يجينا، من شافنا كال : اهاااااه ، اجيتو ، جا انا لابس وعودن جايكم .

كواغد : يطيك العافية لجن الدكتورة كتبت ليها طلعه ما عولينا كضيتهن و طريت الدرب بيهن .

حجت امي و هي تذب عبايتها اعلى كتر ، و جرت الوسادة تمدد و صاحت : ااااااااااخ يا شمخي يا بويه و علي حيل ما ظل بيه .

كربت لاله و كالتلها : عمه افرجلج رجلية

- اي والله يعمه يطيج العافية

مددت رجليها و تربعت لاله تفرج برجلين امي ، و ابوي جدامها يسولف وياها و ينشدها ، دشيت للحجرة مالت حبوبتي .

فزت جلجول و اخذت البت من ايدي و حضنتها و كامت تبجي : عليش تبجين ما بيها شي عدت

- انا خفت يصير بيها شي ، و علي ظليت بس ابجي عليها.

- دخذيها و نوميها بمجانها ، و خليني اسبح ، خيست صالي ايام بالمستشفى لا سبح ولا تغوسل .

احجي و احكن براسي ، فزت حبوبتي : هااا جدة الحمد الله اعلى سلامة ابنيتج.

- الله يسلمج حبوبة

- ها جدة شو تحكين براسج ؟

- والله يا جدة مدري شماله من فكيت الشيلة كام يحكني .

- خافنج مكملة يجده .

- اندري

- كربي اشوفن شعرج

-شتشوفين يجده شعر طوله نص فتر وسلابيح .

- جا ولونه ، هم يصير كربي .

كربيت لجدتي و حطت رجلها و كعدت ركبة و نص و هي تفلي براسي ، عاينيت لجمارة ، بعدها تون و مجابلة امونه : خايبة دبسج كتلج ما بيها شي .

- جا انا موش بس ابجي اعليها

- جا ياهو بعد

-خنجر مدهوس

- يااااا صكد ولج ضكريتيني .. شلون حالة مكرود هالزلمة شلون وكف ويانا وكفه ، تالي سمعنا اندهس .. و الله انغهرنا اعليه .

ظلت مدنجة و مدمعه : خايبة هييي جا انت عم وليد خلل بنية و جاتله رويحتج

- جا شني انا موش احبنه

- من فلك الفلكج كووون ، وينج ووين الحب ، خايبة لا يسمعج ابوي وعلي ينوم الجيلة براسج ، دسكتي .

الجدة : عيب حبوبة ما يصير تحجين هالحجي ، هالسوالف ما يصير تحجي بيهن البنية عيب.

كامت من عدنا و هي تنكث بديها و ما راضيه بحجينا ، هزيت ايدي : جا ما ظل علينا غير جلجول ام الجلاجل تحب و تتمعشك و هي بكد فص التمرة.

رفعت راسي : ها جده بيه .

- اي والله يحبوية ، لكطيت جم وحيدة ، انا اكولن يو تروحين تمشطين راسج بنفط و بعدين تسبحين خاطر كلش يحترك و ما يظل .

- جا خوش .

طلعت من الحجرة ابوي جاي يطلع و امي غفت ، و لاله دنجت خذت عباة امي و شيلتها و اندارت علي : عدج ثياب اغسلنها دام راح احطن الطشت و اجلف الهديمات.

- اي والله يطيج العافية تعيبانه و ما بياش حيل اغسل هديماتي و هديمات بتي .

دشيت للحجرة لميت الهدوم و طلعيتهن اطيتهن الاله ، و خذت طاسة موش زينه و صبيت بيها نفط من الجلكان و طلعت برا ، حطيت بلوكة و كعدت حدر ضوا الشمس ، ابلل المشط بالنفط و امشط راسي بيه و لاله جدامي حاطة التخته حدرها و الطشت بين رجليها و كاعدة تفرك .

حجيت : شصار ما صار عكبنا ؟

- صاكين الباب و كاعدين حتى جلجول ما مشت للمدرسة ، خوفن لا يتعرضونا بيت ثجيل ، سرحان مر لينا مرتين نشدنا خافن معتازين شي ، و جابلنا المسواك .

- جا انا هم اجازي سرحان

- لا وعلي يو تطينا ماي عينج ما تجازينه

- اي والعباس

تنهد .. مت عين الدنيا الذبتني اعلى فليح و حرمتني منه .

- بعدج تحنين ليه

- موش حنيني الاولي لجن يو مر طرواه اعلى الباب مثل كاع مشحشحه و جاتلها الجفاف و يمر اعليها الماي، هيج يم اعليه .. و يو شفته عيوني ادمع اعلى كثر ما تفرح بشوفته .

- جا كل هاذ وموش حنينج الاولي، جا يو الاولي شتسوين .

- جنت يو مر طاري كلبي يكوم يخفك يخفك و اهيس الناس يو تنوعتلي راح تعرف شمالني اعلى كثر ما يكضني الرجيف بطرواه .

- ويمتى تنسينه .

- جا غير يو انسى ، من كون هالحجي حرام لجن موش بالكيف ، انا اتسلى بذكرياته. يو ردت انشنش و ارتاح اردن لذيج الايام الجنت اروحن بيهن للشط فجرية و اشوفنه واصبح بوجه ، من اتضكر حيل ارتاح لجن ساعة الاعرف هالسوالف صارت ذكريات ، ارد اتكدر و يكض كلبي الضيم .

- الله عوضج ببنيتج ، حطي عينج اعليها و انسي الضكريات ما تجيب غير الهم .

حطيت المشط و كمت و كتلها: امش ادشن اتغوسل عبن ريحتي صارت كلها نفط ، يو كدرتي جيبلي هديمات من الكومدي.

كمت للحمام غسلت و اسمع ايمان اجت عدنا ، ناوشتني لاله الهدوم لبست و طلعت و كعدت وياها نسولف و امي نايمة ، نشدها : شكثر عليج ؟

ايمان : يمكن بالشهر السادس.

- تظنين ولد يو بنية ؟

- ما اعرف بس ما تشبه حبالتي بميمو ، و بالحلم تحلمت كأنو واحد دينطيني كلادة حمرة و لبستها .

- يااا جا بنية

- اني احب البنية ، اتمنى تصير عندي .

- كومي بسلامه و كلشي يهون .

لاله : جا انا يمتى ؟

ضحكت : رزق ربج ما تعرفين يمتى يطي و يمتى يمنع .

لاله : تظنن يسرى مسويتلي عمل

ايمان : اني يسرى كلشي اتوقع منها

هدية : والله ما اعرف ، لجن هو الله يو راد يوكفه سحر يسرى يخيتي ، خلي عينج بعين الله و الله كريم .

- الله كريم .

......

سرحان : هاااا ابو ستار شلونك

- هلا ابو مامون ، شلونك شلون علومك .. شنهي ما شنهي اخبار خنجر

- والله يابو ستار راكب راسه و ما جاي يرضى يتنازل.

- حييييييل وان كون انا ما اودن خنيجر لجن دوا ويا ال ثجيل .

- يابو ستار الزلمة نسيبنا ، و الحك ينكال جسام موش مثل اهله ، زلمه زين و معدل .

- شنهي رديتها ليهم ؟

- رضت ترد رديتها جا شسوي

- لا والله يبو مامون كصريت ، ذول ما يتناسبون وما ينطون مرة ، ياهي الشافت خير عدهم امي يو بتي خاطر جاي تترجى باخيتك تلاكي الخير عدهم .

- رضاتها جا شسوي. الا كلي شنهي حال بنيتك ، لهيت و ما رحت بعد ليغادي .

- طلعت اليوم هي و بتها .

- ااااه يا الله ، و شلون صحتها ؟

- كواكة

- و شنهي مفكر تردها يو شنهي .

- اردنها شنهي ، يولون بوية عوينة ابيهم ، يو كلش رادو يردونها ما اطيها الا بيت لوحيدها .

- حتى وحدها لا تطي .

- الله كريم ، ياله انا اروحن لال ثجيل تعتاز شي

- شوفلي شنهو الاخبار عدهم و خبرني .

- تامر

- معدل ابو ستار .

عفته و مشيت للبيت ، توني دشي و الاكي جدامي كريم : يا هلااااااا و جثير الهلا ، شلونك يبو وسن ، شلون صحتك

- هلا ابو مأمون ، هلا بيك ، وسن ياهي ؟

- جا ما تعرف بتك سميتها وسن

- خلفت ؟

- جا ما مريت بيهم

- لا وعلي توني اجيت

- استراح استراح ، بنيتك و مريتك بخير و سلامه ، الا كلي اخبار الحرب شنهي.

- انا موش عالستار ، شغلي جوا ، لجن الأخبار كلش زينة ، اجتاحينا اراضي ايرانية وتقدم الجيش العراقي ممتاز .

- جيش بمليون و ٨٠٠ جندي .. اقوى جيش بالشرق الاوسط الجيش العراقي شلون ما نتقدم .. بس كلي ليمتها ؟

- والله يابو مامون ما نعرف ، جاي نطي شهداء وحرب حمرة و مستعرة .

- الله الحافظ ، ياله استراح و اخذ راحتك .

- خلني اروحن اشوفن المرة

- هههه روح

دشيت كعدت امي : جا راح تسكت يمه

- شسوي يمه خنجر موش راضي يتنازل

- و اخيتك

- جسام غلطان و انا ما اكدر اجبر خنجر اعلى التنازل ، و اخيتي ما متضررة ، معززة و مكرمه ما معتازة لاحد .

- لا يمه شلون حجي هاذ .

- والله يا يمة هاذ العدي ، انا هم طكت روحي ، يتنازل خير اعلى خير ما يتنازل حكه هاذ بعد ، و خلي سلطان يبتلش بأبنه .

جاي نحجي اجت بشرى : سرحان خل نمش للجدة تفحصني اهيس الفرررخ نازل .

- لبسي عباتج خل اخذنج .

لبست و خلينا مأمون عد امي و طلعت بيها للجدة ، دشت فحصت ووطلعت : هااااه بشري

- تكلي امشي خاطر تتسهل .

- جا خل اصفن السيارة عد البيت و نطلع نتمشى لبيت زناد هم نشوفهم و هم نستفكد الحال .

- خوش

صفيت السيارة و طلعت بيها لبيت زناد نتمشى ، وصلنا غاد لكيت راديون ، كعدت وياهم و بلغيتهم خنجر ما يريد يتنازل ،ظلت ملوك تلوم و تحجي معلك و تفر بفجها بحجيها .

كمت منهم و مشيت ببشرى بالسلف خاطر تسهل ولادتها ، درت ليها : تمرين ببيت ابو ستار تتحمدين لهدية بالسلامة ؟

- انا يو انت الرايد تشوفها و حاطني حجه

- يابة وعلي ما عدي شي لجن ام ستار مرة متفضلة اعلينا و اليوم طالعين من المستشفى خلنا نمر

- انا كواغد احبنها لجن بتها

ضحكت : المرة معرسة و عدها بنية ، جا انا من جانت بت ما خذيتها احظى بيها من تالي ، انت ما ادري شلونج.

- من كون اعرفك جاي تحن.

- ما تريدين بويه ما بلازم ، خلنا نمش

- لا ياله خلنه نروح ليهم .

دكينا الباب اعلى بيت حاكم طلع النا هو ، رحب بينا ودشينا داخل ، كعدنا وانا انشد اعلى حال البت .

كواغد : خايبات تعالن ليه و جابلني

هدية : شمالج يمه

- جا انا غير خبريت ابوج وكتله انا اتفقت ويا الولد و طلعيت سرحان منها ، جا هسه يو دهرباها جدام حاكم ، شعمل بحالي .

هدية : جا ولون كال ، خله يعرف هو العاونه .

- يا و ابوج يعرف احنا دازين خنيجر اعلى بيت ناصر و مسوين كل هالخطط وهو ما يعرف ، جا غير يكلبها علينا ، ويتفاشل سرحان .. ما مجبورين نحجي و نكول بس شلون يو فتكها جدامه .

جمارة : انا اشاورنه

- تكدرين

- اي

- دروحي كليله تكول امي انا كلت لحاكم اتفقت ويا واحد من احفاد ناصر جاب البت و طلعيتك من الطاري ، لا تجيب سيرة .

- خوش

مشت جمارة و كواغد ندهت البشر ادش بالحجرة تكعد ، و راحت جمارة كعدت جريب من سرحان و هو يسولف .

دشت كواغد خاطر تقدم الجاي ، و تكدمت جمارة من سرحان : عمي امي تكول لا تجيب سيرة لابوي اعلى سالفة اخذ بت هديوة ، هي كالتله انا الجبتها ، لا تحجي خوش .

اندار ليها ابتسم ، و اخذ الاستكان و هو يحجي ويا ابو ستار ، ردت حجت جمارة : اكلك عمي جا هو خنجر يمتى يطلع .

-بعدنا ما نعرف ، عليش ؟

صاح بيها حاكم و كوماها ، و هي غندبت .

رادوا يكومون ، كواغد ما رضت كالتله : مسوين ثواب لام البنين ومامش طلعه الا و تتعشو ويانا .

ظلوا اعلى العشا و فرشو سفرة تمر و لبن و سمجة و مركة يابسة و فواكه .. حاكم و سرحان لوحيدهم و النسوان داخل فرشن سفرة يا طولها و كعدن ، سوالف و ضحك .

تالي سرحان يصيح : ياله يابه هل نروح

وبشرى تصيح : بس شوية بس شوية .

ليما مشوا بالليل ، و هي تمشي اجاها الوجع وكامت تتلوى : ها ؟

- اظنن كربت ولادتي

- جا هسه نمش للبيت يو للجدة .

- لا اخذني للبيت ..

مشاها بهداي للبيت ، ليما وصلت و هي تتلوى من الوجع ، و سرحان كاض بأمون و ردحة واكفة عدها

بشرى : راح اموتن من الوجع ، تعال ليه سرحاااان .

سرحان : اخذنها يو شنهي .

- يمه هي موش بچر و لزوم تعرف ساعة الولادة شلونها ، دشي اسبحي و خضي رويحتج بميه دافية ، خاطر ترخى اعضاج ، ان جانت ولادة تسهل بالسبح و ان جانها تشاليع ، تهيد و تستراحين .

دخلت سبحت .. زاد عليها الوجع كالتله ردحه : جا خلنا ناخذها يمه .

خذها بالسيارة ووداها عد الجدة و مشى لامها خبرها خاطر تجيها ، وراح خله مامون عد راديون .

لاكاه رحيم : ها ابو مأمون ، مشيت للقصر و انت مامش

- المرة جاي تطلك و مبتلش بيها

- اهاااه ، عالخير ان شاءالله

- الله يبارك بيك ، شنهي ؟

- سلطان مر للمضيف و عصبي و تحاجه ويا عمك ابو فاضل .

- وعليش جاي

- اعلى سالفة خنجر ، شلون ما يتنازل ، و ابنه اليوم حابسينة

- واحنا ياهو مالتنا يهد اعلينا ، غير ابنه الداهسه ؟ والله حلوة هاي ، فوك شين ابنه هو ابو الراهي و يجي يهادد ، خله يولي .

- والله يا عمي ما اعرف ، لجن سلطان ما يتأمن.

- و عساه لا يتامن ، دخله يولي ، اسلم عليك

- الله وياك .

رد للجدة خاطر يعرف شنهي اخبار بشرى، ساعة الوصل كالله : بالمبارك يبو مامون بالمبارك .

- بشري يمه

- اجا اخ لمأمون

- ولد ... يا رحمة الله ، الحمد لله رب العالمين ، بشرى شلونها ؟

- كواكة تستراح من تعب الولادة و ناخذها .

شواي لفلفوها و حطوا ابنها بحضنها ورد بيها للبيت بنص الليل ، اخذ الولد بأيده و ابتسم بحزن : الله يرحمك يا بوية ساعة الأجا مأمون هو الخذاه بيده و باركلي .. حيل استفكدك يا بوية ، الله يرحمك .

ردحة : راح لدار حقه ، الله يرحمه ، شتسمي الولد ؟

- اسمي مروان .. مروان و مأمون

حلو يو لاله

- لا كلش حلو

- ان شاءالله يصير سند لاخيه وما يخلون الحقد و الغيرة تفرك بينهم .

كبر ووذن بأذانه ... و اجا مروان للدنيا .

وصار ثاني ابن لسرحان ، ثاني سند .. ثاني ولد .

مرت الأيام اعلى هالحال ، بين توتر و بين صفوة .. لجن سلطان شاب نار شلون خنجر ما راضي يتنازل بقضيته ، اجا على سرحان و كاله خل يتنازل و انا فصاله اعلى دهسته .

وخنجر موش راضي يخليها عشائريا .. لازمها لزمه اعلى جسام و بردان افاده بسجنته .

احتار سلطان شلون يطلع ابنه ..

ما خله حميد ما هدداه .. ما هله سرحان ما تكاوم وياه و خنجر راكب راسه ما يتنازل .

تكاوم ويا سرحان خاطر راديون ترد للبيت من كونها طلعت بلايا شورهم .. بس سرحان و زناد رفضوا يردون راديون ليما يرد رجلها للبيت .

طلع خنجر المستشفى .. و ركضتله جلجول للبيت

- عمي عمي عمي

- خايبة و عمى العماج ، توني غفيت و جفتي اعليه، شمالج

- عمي وعلي انا من سمعيت انت اندهست انا نطيت من البجي

- عليييش ؟

- جا غير عليك

- شنهي ميت انا و تبجين اعليه

- خايب عمي انت والله ما تستحي جا انا غير عدالي متت و ظليت ابجي .

- جزاج الله الف خير ، امشي هليني انامن.

- عمي انا جايبتلك اخبار

- اخباريش ؟

- راديون عد بيت زناد

- مالي غرض بيها ، يطبها هرش الراحت و الردت

- اي صكد يطبها هرش .

- خلصيتي تذربن ؟

- عمي شمالك وياي ، جا انا غير اجيت اشوفنك.

- تشوفج العافية بوية ، ياله احجيلي بت هدوة شلونها

- جا غير ابوي هد اعليهم بالتفكة وطك عمي ناصر بجيله براسه

- بدينا تهمبل ، احجي الصكد

-جا انا ما اجذب

- من عوينة ابيج وين هكو واحد ينطك براسه و يظل عايش ، حتى يو عار و ابن سبعين عار هم يعض السانة ويفطس ، اسمعي بوية انا ما اكللج لا تجذبين لجن اعلمنج من تجذبين ، جذبي جذبة تتصكد .

- جا عمي انا ما اجذب هو ابوي هد اعليهم

- اي وشنهو الصار بعدين

- بعد ما كربو و هدوا هدوة وبتها عدنا

- ذوله جلاب بس يروح ابوج يردون يلهثون اعلى اعتابكم ، كلي لابوج لا يضل مطي و خله يتصرف.

- جا اروحن اكلل لابوي لا تصير مطي ؟ .. شمالك عمي

- جلجول

- ادكوميت تذلفين مني يو اكوملج انعنع اعضامج

- خايب عمي انت والله ما تستاهل و انا ابجي عليك .

ضحك و شال الها فلوس وكال الها : هاج هاي روحي اشتريلج مصغوله و جيبيلي وياج جكارتين من الحجية ام صبري.

- خوش

ركضت اشترتله و اشترت مصغول و ردت ليه اطته الجكاير و اخذ منها مصغولة وحدة ، و هي ردت طايرة من الفرح من كون اشترالها مصغول.

شالت المصغولات و ضمتهن بالنضدة .

وهدية تعاي عليها : شجاي تضمين ؟

- المصغول مالي

- منيلج

- اكللج سر ؟

- اي

- خنجر اشترالي مصغول

- و انت شوداج لخنجر ؟

- جا غير رحت اشوفنه

- اكلج انت ينراد اكلل لامي عليج تجويج بالعطاب خاطر تتوبين ، استجني و اتادبي و اركدي بالبيت عيب تمشين ليه

- ايووو ، جا موش انا الخذيت امي ليه و خليته يردلج بتج .

- تعايريني ولج ، امشي ويو رحتي مرت الاخرة اله الا اكصن اجدامج افتهمتي يو لا

دارت عنها و ما رضت بحجي اختها ، حجيها براسها ما تسمع من احد ، خنجر ابالها ، يعني ابالها ما تتنازل عنه.

جرت الأيام ..

وهدوة عد اهلها

و سرحان متولي امور المضيف ، ليما كام زناد اعلى حيله و رد المضيفه.

و جسام بالسجن و تحولت قضيته للقضاء .

راديون ظلت عد اهلها متانية الحكم لجن بعد اصرار خنجر اعلى القضية ، جانوا متاكدين ينحكم و ناطرين الحكم .

مرت ٣ اشهر ياله صدر الحكم اعليه ٣ سنوات سجن.

سلطان و ابنه انسجن ثلث سنوات .. تسودن ، كام يكوم و يكعد يتوعد لال ضاحي ، لجن سرحان و زناد منطينه الاذن الطرشة .

الا ما بيوم ...

كان يوم .. عيد الفطر

السيد مالت الجامع .. بعد التكبير و صلاة العيد .. قرأ دعاء الندبة .. دعاء منسوب للأمام الثاني عشر من ائمة اهل البيت ( ع) .. يستحب قرائته في الاعياد .. فقرا السيد الدعاء بالسماعة .. و صوت الدعاء صدع بأرجاء السلف.

كان اول يوم بعيد الفطر

بس جان يوم اسووود .. بسواد قلوب الظلام .

صفت سيارة امن ، و دخلوا الجامع بأحذيتهم .. و طلبوا من السيد ان يتوقف من هذا الدعاء .

توقف و نزل يتفاهم وياهم ان هو دعاء ما بيه شي محرض ، ولا حزب جاي بيه.. ولا دولة .. دعاء تحمد الله

كاله هاذ دعاء ايراني وممنوع ينقري بالجامع .. السيد منفعل و كاله : بوية الدعاء مالت الامام المهدي جا قابل الامام ايراني ؟

ظال الحزبي يغلط و يكذب ويكله بدع ايرانية .. ماكو هيج بالدين .. و ظل يغلط و يشتم .

انفعل الشيخ و اغتاض من حجي الحزبي و كاله : بويه هاي عقايدنا وهاذ دينه .. ان جان حربك ويا ايران ، ذيج ايران و حاربها احنا ياهو مالتنا ، و انا جان حربك ضد مذهب .. فيا بويه هاذ موش اسلام . الله سبحانه و تعالى يكول ( لا اكراه في الدين) تجبرني اترك عقايدي و تجذبها .. و جاي تهددني ، اعلى يا دين ويا ملة تتبع انتم.

لا انا التابع لايران

و لا انا ايراني

ولا انا متعدي اعلى قانون .. سيد وجنسيتي عراقية و جاي اقرا دعائي بجامع شنهو جرمنا وجايين تتهدونا و دايسين حرمة الجامع بقنادركم .. بسكم جزعيتونا ، طلعيتوها من زياكها ..

حجا هالحجايات السيد و تلاكفوه الأمن ..

جرجروه بسيارتهم .. وصلخوه بنص السلف و مثلو بجثته و هدوا اعلى بيته .. هدو البيت اعلى عايلته .. ماتن نسوانه الأثنين و ٤ من اولادة ونسوانهم و كل احفاده .

حادثه اهتز السلف الها

و العيد تحول يوم اكشر ..

هم ناس ريف و عدهم احترام للسادة كون هم من نسل النبي محمد و بعاداتهم .. السيد يتسمى مولاي .. لا ينوكل كدامه ، ولا ينكعد كبله ولا ينشرب جدامه ولا ينحجي اعلى حجايته .. السيد عدهم مقدس بيناتهم ..

حتى لو تمرضو يتجهون للسيد كبل المستشفى .. (سيد اقرا على راسنا ) وعلى نياتكم ترزقون .. و بالفعل يشوفون الشفاء اعلى اديهم .. فمعظمين شانهم .. سالفة ينجتل السيد و يتمثل بجثته و تنجتل عايلته و ينهدم بيته و بلا ذنب .. كبرت بصدورهم ..

وطلعو للديوان ينشدون الشيوخ : شنهي نعاين يجورون اعلينا و اعلى سادتنا و نسكت .. انجتل السيد باقر الصدر و اخته و جاروا اعلينا و سكتنا .. و هساه انجتل سيد الجامع و نسكت .

زناد : وعلي حك .. جا ليمتها نسكت ؟

سرحان : و شنهو البدينا

- جا انت راضي بهالفعايل .. ما شفت شعملو بالسيد .. زلمة جليل و يخاف الله يصلخونه و يجتلونه جدام الوادم هيج .. وهو جامعنا .

سرحان : مرجعنا و سكت و السكوت بهالوضع اوجب .. و يو حجينا شنهو مصيرنا و شنهو مصير عوايلنا وياهو اليوكف ويانا ؟ الخليج و العرب و امريكا كلها ويا صدام .. نتأمل بمنهو ونشد ظهورنا .. بالخميني الجاي يحاربنا .. مالنا غير نحافظ اعلى اهلنا و عوايلنا والله اعلى الظالم ، و حسبنا الله و نعم الوكيل .

- جا ما كاموا اجدادنا بثورة العشرين لا طلبو عونه من احد ولا من دولة ، بينا و بولدنا نهد .

- ثورة العشرين موش مثل حالنا .. ثورة اجدادنا ضد الانكليز ، موش ضد حاكم عراقي مسلم مثل صدام .

زناد : انا فار دمي وعلي ، و صدري اختنك .. ما اكدر اسكت

- حدك يزناد .. ابوي وصاني ووصيته لا نوكف ويا صدام ولا نصير ضده ..

- جا شنهي ننطر دورنا ليما ننجتل يو نعاين و هم يجرون بهالناس و يذبحونهم .. ليمتها فاضت اصدورنا طكينا .

- انت شيخ عشيرة موش دين واجبك تحفظ اهل عشيرتك موش تهد بيهم وتوهدنهم .

ظل سرحان يحجي ويحاول يهدي زناد .. لجن زناد كبرت بصدره السالفة ، و السلف نار .. كل واحد بيهم مستعد يهد ويثور ضد طغيان الحزب .

حزب الدعوة .. هو الحزب المعادي لحزب البعث والناس من ضيمها والجور اعليها .. صار تأيد هاذ الحزب من كون صارت كل عقايدهم ممنوعة و هاذ الحزب يطالب بحقوقهم .

مجالس العزاء على الحسين ممنوعة

كتب الادعية ممنوعة

الكتب الفقهية ممنوعة

الدينية ممنوعة

عقايدهم اللي ماشين عليها من الف سنة ، ممنوعة .. واليعترض "تبعي" وينتهي حاله بالمقابر الجماعية .

من بعد حادثة السيد ٤ ايام ..

نزلو عد المضية لمة زلام .. بعد ما كعدوا .. تبين هم من حزب الدعوة ، يطالبون الشيخ زناد بمساندتهم و الانظمام لحزبهم للدفاع عن العقيدة .

زناد ما اطاهم جواب .. لا اي و لا لا .. بس رحب بيهم و ضيفهم بمضيفه .. وكرمهم .

وهنا جانت فرصة سلطان ..

ساعة العرف ناس من حزب الدعوة بمضيف زناد و جاي يتفق وياهم .. بلغ عليه .. مضيف ال ضاحي مقر لحزب الدعوة .

وصل خبر للي يشتغلون بالحزب ، ان وصل تقرير بالشيخ زناد .. بساع طلع واحد منهم بنص الليل وبلغاه يطلع الأمن راح يجون .

زناد كض امك و نسوانك و جهالك .. واطلع لبيت سرحان ... دك الباب بحدود الساعة ٢ بالليل .

طلع الحارس .. دش زناد للبيت و دك اعلى حجرة سرحان بقوة : سرحاااان سرحاااان

فز سرحان من مجانه : هاااااااه شكو

فتح الباب و صاح : شماااالك

- ما عدي وكت ، عايلتي امانة بركبتك تخليهم يمك ، ليما اطلع و امنهم ..

- شنهو الصاير

- امي تخبرك بالسالفة ، سرحان عايلتي انا طااااالع .

طلع من البيت ، سرحان رد يدل و طلع و ملوك تلطم اعلى وجهه و راديون تبجي و نسوان زناد ناصباتها مناحة .

سرحان : شنهو الصاير فهموني ؟

ملوك : نازلين خطار عده و تبين ذول الخطار من حزب الدعوة بس هو لا صف وياهم ولا اطاهم جلمة بس كرمهم .. كبل شواي دك الباب اعلينا واحد ويكول كتبوا تقرير اعليه خله يطلع .

- خرب بغيرتك زناد .. خرب غيرررررتك .. كتبك لا توهدن حالك بيهم يا بشر تكتتتتتتتتر ، هساه شنسوي .. وشراح يعمل بحاله .. زناد كتب اعلى روووووووووحه الموت .

ملوك : هسه شنهو النعمله

- جا هو ابنج خله شي نعمله

- زناد ما صف وياهم .. ضيفاهم جا يطردهم .

- يا ربي ... دخيلك يا علي ابن ابي طالب ..

بشرى واكفة و الجاهل يبجي و مامون فاز اعلى اصواتهم و يبجي .. و سرحان متوتر و اعصابه لفوك راسه .. صاح بيها : سكتيييييييييييهم

شردت لحجرتها و صكت الباب ، اندار لراديون و كال الها ندهي مرت كريم و كليلها تجي هنا

- تظن يهدون اعلينا

- كلشي جايز ... امشي اندهيها و جيبيها.

راحت صاحتها .. و كعدوا كلهم بحجرة وحدة ... و كلهن نسوان بس سرحان زلمتهن ... يعاين ليهن كلهن بركبته و زناد طفر .. يرد ينعل الف نعله اعلى زناد و يغلط اعلى الوهدنه الحطاه بيها.

بحدود الساعة ٤ ونص ..

على صوت سيارات الأمن .. وصفن بالباب ..

اندار ليهن سرحان و كاللهن : عبيجن و بوشياتجن بسرعة ما اريدن مرة مفرعة يو طالع وجهه .

تراكضن كلهن ولبسن عبيهن . اندفر الباب و انتشر الامن بكل ارجاء القصر .. و اسلاحهم بيدهم .

سرحان : ها بويه خيركم

- زناد مطر ضاحي وينه

- ابيته

- اخذوووووه

- اوكفو بويه .. غير افتهم شنهو دشتكم اعلينا بهالليل .

جتفو سرحان من اديه و ضربو اعلى النسوان و يصيحون : اخذوووووووهم .

السلف اعلى حس سيارات الأمن فزو .. شالو تفكهم و فزعو .. طلعو سرحان من القصر مكيدينه .

صاح رحيم : شنهي الرااااااااي يسرحان ....

رواية كحل عرب الفصل الثاني والخمسون

(غرابيب الموت )

الحيطان منخل والدروب احفور

والبيبان صرخه بلا صدى ولاصوت

صفنت كَمبره بوحشة مِسيّت اكَبور

ووجوه الزغار الحاضنه الشباج

باكَة ورد ذابل بلّ الحزن محصور

والنظره متاهه وخوف يرضع خوف

من يهتز قفل حسبالهم شاجور

من يهتز قفل حتى الطيور اطير

مرعوبة جنح وبلا وعي ادور

(عريان السيد خلف )

رحيم : شنهيييي الراي يسرحااااان

صاح الحزبي : ابعدهم من المكان فوررررررررا .

سرحان : بس احجي وياه

- اخذوووووه

- افهمنه بس بويه ، وعلي ما عدنا شي

- اسكتتتتتت يييييييييييييله

صحت :عمييييي رحيم لا تدخل ولا ترفع سلاح بوجه احد ... احمي اولاد الديرة و استر اعليهم عميييي.

راديون : ويا ما حجه سرحان و طكو بالرشاشة اعلى راسه و طيحوه للكاع و ربطوه .

كمنا نصرخ ... سرحااااااااان سرحااااااان

بشرى تصرخ و شايله مروان بيدها و مأمون كاض بذياله ، دفعوها ، انجب اعلى وجهه و نط من البجي ، كمت اجر بروحي اريدن اردله اشيلنه وامه دارت ليه تجر بيه دفرها برجله ، طاحت للكاع هي وجهالها وتصرخ .

٢ من اهل الديرة رمو برشاشاتهم .. دنجينا نكفكف اعلى بعضنا .. و الامن شعل النار ورمى اعلى اهل الديرة ، صار طشارهم بفلس ، شغلوا سياراتهم وتبعوهم و سرحان جروه للسيارة .

واحنا جرونا لسيارة بي كم مسكفة كعدونا بيها .

انا و امي

ونسوان ازناد اثنين و جهالهن ٥

وبشرى و جهالها اثنين

ومرت كريم و بتها

و عمتي ردحة .

بس صوت الونين يطلع من عدنا ، نشدت امي : يمه وين راح ياخذونا ، شراح يسوون بينا ، يمه اعضاي تتراجف يمه .

ملوك : الله وحده اليعلم مصيرنا شنهو يراديون ... اخ يزناد يمه .

مأمون نط من البجي .. جرته عمه ردحه من امه و خلته بحضنها وكامت تهود اعليه و تلولي و هي تبجي و تكله ( دليلول يالولد يبني دلول عدوك عليل وساكن الجول )

انا متجية راسي اعلى متن امي و ادموعي يجرن بهداي .

بشرى : راح نموت راح نمووووووت

كامت تنحب بصوت عالي و تبجي و تصيح راح نموت ، كمنا نبجي اعلى بواجيها .

وكفت بينا السيارة بمجان ما نعرفه شنهو .. نسمع حس الأمن ينزلون من السيارة ، اجو اعلينا و كامو يصيحون : نزلو ياااااله، بسررررررعة

نزلت امي اول وحده و طكها اعلى راسها و دفعها وكام يجرجرون بينا و ينزلون .. الدنيا ظلمة و شتا و الجو ضباب .. جان بداية الشهر الثاني سنة ١٩٨١ ... عاينيت المجان خطف ، فد هاي السيارة مامش غيرها ، السيارة الصعدوا بيها سرحان مامش .

دخلونا بمجان و بعدين نزلو بينا حدر الكاع بدرج ، و دخلونا بفرد مجان و صكو اعلينا الباب ، و نا نسمع منهم بس الصياح و الغلط و السب و الشتم .

كعدنا ملتفين وحدة بللخ . و نتراجف ومامش نبي ولا امام ما نخينا اعلى شدتنا هاي ، ودموعنا اتجاره ، الجهال ناموا بحظن امهاتهم .. و الاصوات هدت .

اعلى حسب ما اعرف المفروض هساع طلعت الشمس، بس كل ضوا مامش المجان هندس ، حرحارة اليد ما تنشاف بيه اعلى ظلمته .

ظلينا جويعدات و انا متجية راسي للحايط وابجي بهداي و اجرن بخشمي، ريحة المجان جانت حيل مو طيبة .. الريحة جن ريحة لحم فاطس ، و انا روحي كامت تكلب من الريحة ، جريت عباتي و خليتها اعلى خشمي خاطر لا اظلن اشتمنها .

حجت بشرى : وين اخذو سرحان

- ما نعرف .

بشرى : جا هسه شنهو الراح يصير بينا ، راح نرد لاهلنا يو لاله ... راح يجتلون و يجتلون زلمنا و فريخاتنا موش يو لالة .

تحجي لوحيدها و تبجي .. و احنا ساكاتنا مامش وحدة من عدنا ردت اعليها.

......

رحيم : هاااا ابو فاضل شنهي ؟

- مشيت للمركز ويكلولي عمي رد ولا تنشد ، لا ياخذونك و ياخذون عويلك

خنجر : و شلووووون نسكت ، سرحان خذوها و زناد شارد كلولنا .. نكعد مثل النساوين نتباجى و اخينا غاااااد هو وحريمه ..

حميد : انا اكولن يو روح واحد من عدنا لمجلس شيوخ الفرات الاوسط ، خلهم يتلاحكولنا و نكللهم الامن دشو اعلى بيت شيخ ال ضاحي و خذو عياله .. هلبت نكدر نخلص من اديهم بس النسوان

ابو فاضل : وهو هاذ الحل مامش غيرها ، لزوم نروح نطلع للنجف، و نفزع الشيوخ الكبار .

رحيم : الامن سبى الديرة سبايا ، يدورون اعلى الزلام الرمت اعليهم بدوسة قصر ال ضاحي.

ابو فاضل : رحيم انت ضل هنا بالمضيف .. و انا راح اروحن اطلع للنجف .

خنجر : ترا انا يو ظليت هنا وعلي اكضلي حزبي انام بخوانيكه و ابتلش بيه وابلش الديرة ، خلني اطلع وياك

- ياله امشنا .

كضينا السيارة و طرينا الدرب للنجف .

كواغد : الليل ما نمنا اعلى حس سيارات الامن التلوف بكتار الديرة ، الليل مر علينا بالف ضنكة وويل .. شطول هاليلة الما تخلص ، وحاكم ما رضى نفتح الباب كال : ذول ما يعولون يكضولهم واحد و يحطون براسة تهمة تبعي ، واحنا هيج هيج ما نكدر نسوي شي ، خلنا نستر اعلى ارواحنا و اعلى عوايلنا و نصك الباب و نكعد .

وصكد سركينا الباب و كعدنا و ما نعرف الامن اعليش يدور و اعليش فازع ... لجن عيني ما خذت نوم ... الليل كله متزوهره بفريشي ، كمت توضيت و حطيت سجادتي صليتلي ركعتين و كضيت السبحة و كمت اصلي اعلى محمد و ال محمد و اداور السبحة بالصلاة اعليه .

ليما سمعت طكطكه برا لجن جنها ابيتنا .. كمت اعلى حيلي و انا اتنخى : دخيلك يا علي دخيلك يبو الحسنين ها يزهرة ..

كاضة اسبيحتي وفكيت الباب و مديت رويسي اعاين ليبرا شنهو الصار ، الجو هندس حتى الكهرباء مطفية و ظالين اعلى ضوه الفانوس .

ردت اردن و اصك الباب لجن جني لمحست وحيد بالظلمة طفر اعلى السياج .

احنا بعد ما حاكم صار بالعسكرية فتح باب من بيت ايمان اعلى بيتنا وصرنا بيت واحد من كونها زغيرة و يخاف اعليها تبات لوحيدها يو تبات يمها جلجول ، طك خايط وخله باب و فتح بيت ايمان اعلى بيتنا و هساه هو نايم و يو سمع حس يكض تفكته و يطلع و نتوهدن .

دشيت داخل هديت السبحة بالمجان الصليت بيه و جربت اعبيت المعلكة بكفا الباب ، لفيت الشيله و خليتها اعلى خشمي و حطيت العباية اعلى راسي ، و كضيت التوثية مالت حاكم و طلعت بهداي و رديت الباب اعلى كيفي خاطر لا يطلع صوت و يفز وحيد من اهلنا .

توني مشيت للزاوية الورى البيت و اهيس شي يتضمضم، ولنه كلبي يكضه الرجيف: دخيلك ربي جا يطلع حرامي و يجتلني .. كويت روحي و صحت (يااااهو غاد )

كمت اهيسه وهو يتضمضم لجن هندس وما اوجد شي جدامي ، كربيت و انا اسمي بسم الله ، اجاني صوت : انا انا ، دخيلج بويه الامن ملاحكيني و يو كضوني يعدموني .

- دخيلك يا علي ، ياهو انت

- انا عدنان ابن ارويشد

- ياااع خايب انت ابن نصرة .. مت عين امك ، عليش ملاحكينك الأمن ولك شعامل يمفلوك .

- بس ضميني بس يروحون خاطر اشرد .

- وين اضمك و انا عدي زلمة ووليدات جا يو دشو اعلينا ولكوك مضموم هنا ، ما نتوهدن وينكص راس زلمتي وينسبن بنياتي.

- يو طلعت يعدموني ، فدوة حجيه .

-ها يا حاضر الشدات احضرنا .. دكوم يمه كوم دش غادي بذيج الكطعة و وتغطى حدر كواني العلف ، كوم .

كام و انا انكسر باب كلبي اعليه من كون اعرفنه هاذ شوية انهض من ستار وليدي .. شاب بعده توه تعدى العشرين .

مشى جدامي و يتلفت ، و انا ادير وجهي اعلى البيت خاف يطلع حويكم هالدور يبتليني انا شا شيكول علي تضمضم زلم .

دش بالكطعة مالت الحلال توى تغطى حدر كواني العلف و نعله الديج يصح ( ععيعوووووووووووو) ولنه يفز ذيج الفزة الطيرت كلبه عداله اجوه .

خاب كتله : يواشك يمه شمالك

-والله عدالي اجو

- دنام يمه نام ، جا من كونك تخاف من خيالك ييمه شورطاك و طلعيت ضد هالما يخافون من الله .

- دشوا اعل. قصر ال ضاحي و خذوا ازلامه و حريمة و طلعت انا و ابوي و اخوتي .

- يا يمه .. دشو اعلى بيت سرحان

- اي وخذوه

- ياااااع دخيلك يا علي ابن ابي طالب ، جا هاذ شعده و ياخذونه لاله غرض بحزب ولا دين ، زلمة مسالم .

ضليت اغطي اعلى الولد و انا راسي توهدن .. و الديج من كونه صار الفجر .. تولانا بصياحه ، عفته وطلعت من الكطعة و دشيت للبيت .

هدية : ها يمه اصباح الخير

- يا خير اليلفانا وذولة الظلام اعلى روسنا

- خير شنهي شصاير ، انا سمعت سيارات الامن تفتر شنهي سالفتهم ؟

- خايبة يكولون خذو سرحان و حريمة.

نشغت من كل حيلي و صحت : يااااااااااا صكد تحجين

- اي وعلي هاذ السمعيته

- دخيلك ربي ، و هسه شني ؟

- جا انا اعرف شنهي و ابوج صاك الباب و ما يرضى احد يطلع ، خل اكعدنا و اكلله الأمن خذو سرحان .

مشيت لحجرة حاكم دكيت الباب و هو يصيح : ياااااهو

- دكعد الدنيا مكلوبه فوك حدر و انت حاضن هالمتيريسه ما شبعت دكعد .

فك الباب و كال : شمااااالج صكعتي الباب بدكج هاذ

- دكعد الامن اخذ سرحان و نسوان و يكولون السلف مكلوب كلاب .

- انا اغلام ابوي ، ماخذين سرحان .

- اي دروح اطلع شوف شكو شنهي الاخبار .. جا موش ضامين روسنا جنه نعامة .

دش يلبس بهدومه و باله تضعضع اعلى الخبر ، طلعت لكيت هدية كاضة بنيتها ترضع بيها و الفانوس جدامها و دموعها هماله .. هديتها ووكفت اصلي الفجر .

مر حاكم و انا اصلي و هو ينشد : شلون عرفتي سرحان خذوها ياهو الكالج.

- الله اكبر .. سمع الله لمن حمده

هدني ومشى طلع من البيت ، رحمة الله من نشدني و انا اصلي جا يو ناشدني شكلله .. وشجاوبنه .

خلصيت صلاتي وكعدت اسبح تسبيح الزهرة ، اندرت اعاين لهديوة بعدها تبجي : دبسج شني انهديتي استحي اعلى روحج

- يمه سرحان فضايله جثيرة اعلينا

- جا شنسوي بيدنا و نا وكفنا وياه ، خايبة ادور اليوم عدي قراية بفاتحة بيت مچيسر شلون بالله اروحن يو لا .

- يمه الوكت يخوف و الوضع موش مالت واحد يقرا ، تعاينين الامن جاي يفتر .. واليقراله دعا يكضونه و يذبونه جوا ، مو ادور نلطهم هسه عدالهم مجلس للحسين .

- جا شني نبطل نلطم بفواتحنا ، ولكم مصيبة هاي وعلي.

كعدت ايمان : ها صباح الخير

- هله صباح النور

- شنو شكو شصاير ، اني خفت من اصوات السيارات مال الشرطة .

- وين حويكم يجي يحضنج خاطر لا تخاف الخاتونه بت الخواتين ، خايبة دكعدي الدنيا كايمة كاعدة و هي تعوج بفجها و تصيح "اصوات سيارات الشرطة"

لميت السجادة وهي كعدت كوة من بطنها واصلة الخشمها : ياله يمه اهديوة ذبي بتج و سوينا الريوك خاطر نلم شغلنا و نطلع للكاع .

هدية : كعديت بتي بالكاع و كمت وانا احسن دموعي ، ظلت تزحف وراي و تبجي ، صاحتها امي : تعاي حبوبه تعاي

لجن ظلت تبجي وراي ، شلتها كعديتها اعلى خصري و حطيتلي طحينات شواي بالمعجنه و كعديت بتي حذاي و اطيتها الجمجة تلعب بيها و انا اعجن و دموعي تجري .. يا خوفي يجتلونه .. جا انا يو جتلوه شيصير بحالي ، وعلي اموتن .. يكفيني يظل بعيد و بخير .. بس كونه يشتم الهوى ... جا شلون يو جتلوه شحاجي الروح و شكللها .

خلصيت العجن و انا ابجي، خلصت لفلفيت العجين ابطانية و حطيته اعلى كتر خذيت بتي ورحت للحجرة دفرت جلجول و صحت بيها : بسج نوم ياله صار الضوة كومي اخبزي وياي ، يااااله .

كعدت و هي تتصفن و انا حطيت امنية اهود اعليها و انوم بيها ليما دشت بنومتها حطيتها بمهدها ولفلفيتها من البرد و كمت و جلجول بعدها صافنة

صحت بيها : دكووووومي ياله

خذيت صينية طشيت بيها طحين طاسة ماي و جلجول شالت المعجنة ورحنا لورا البيت خاطر نخبز بتنور الطين .

كعدت جلجول تدولج العجين و انا اوجر النار بالتنور ، ولاله كعدت تسوي الريوك .. وصياح امي اعلى ايمان وهي تكللها : كومي تحركي كشي الكاع نظفي البيت خاطر تسهل ولادتج جا مربعه وكاعدة وتصيحين ما عدي ولادة كومي .

كامت ايمان تنظف بالبيت و امي شالت اميدي اعلى امتونها من كونه مسخن وروحه بخشمه ومتنحس و اجت جرت كطعت كماش و حطتها بين البيت و الكطعة مالت الحلال .

درت ليها : عليش حطيتي هالكماشة ؟

- احسن خاطر ريحة الحلال ما تصل للبيت .

درت عنها و انا اخذ شنكة من الصينية طركتها و طكيتها بالتنور و ظليت اخبز .. وامي كاضة اميدي و جويعدة جدامنا و ادك اعلى رجلها و تلاشيه ( شبان و تريد الهوى و الموت ما خلاها )

طلعينا اول خبزة حارة ، دشت للبيت خذت من الريوك الجاي تسوي لاله و خلت اعليه كرصت خبز حارة و دشت للكطعة ، حجت جلجول : امي عليش خذت الأجل ، المن ؟

- يمه المن هاذ الزاد ؟

كواغد : للديج مالجن غرض خبزن و اسكتن.

درنا نكمل خبز بس جلجول ظلت مركزة ويا امي و تتنوع الها ، وحطت اذانها غاد .. حجت : اهيس امي جاي تحجي ويا واحد

- ياهو

هدت التدولج من ايدها و كامت اعلى حيلها و اديها مدمره .. حطت اذانها اعلى الكطعة طلعت امي و طكتها : شمالج حاطه اذانج اعليه ، خلصن شغلجن ياااااله .

مشت تخض بالحليب .. لجن جلجول حطت اذنها بالكطعة و تكول : اهيس احد بالكطعة سالفة امي موش خالية .

- شيلي الخبز و مالج غرض بيها

شالت الصينية و دشت داخل، و امي طلعت بالباب تعاين وكفت : يمه روحي تفدي بيت سرحان شنهي علومهم خافنها السالفة دغشش و موش صكد .

- دخل نتريك والله كريم ، ياله دشي .

تونا دشينا ، اجا ابوي ، فزيت ليه : ها بويه بشر

- شبشر ، ماخذين سرحان واهل بيته بخويطهم و يكولون زناد طفر ، و كاضين تسع اولاد من السلف و بعد ٨ جايين يدورون عليهم

- شنهي سالفتهم عليش يدورون عليهم ؟

- ساعة الهادين اعلى بيت سرحان ١٧ زلمة من السلف شايلين تفكهم وهادين اعلى بيت سرحان يخلصونه و اثنين منهم رامين جيلاتهم صوب الامن و هالجاي يلاحكونهم .. و السلف مكلوب فوك حدر .

كواغد : طركاعة و طاحت اعلى روسنا ، جا هسه البنيات شلون خذوهن . و شلون نكعد هيج بلا عونه .

حاكم : شنهو البدينا نسوي وما سوينا نفك حلوكنا نبتلي و نروح بيها ، نسكت يجتلنا .

كواغد : دكعد اكعد اكلك لكيمه خاطر تمش

كعد و بس اخذ استكان الجاي و كام يدخن و محروك كلبه ، و امي موش اعلى طبايعها تلوب و تعاين للباب ، اندكت الباب فزت اعلى حيلها، حجه ابوي : كعدن انا اطلع .

طلع للباب و امي كضت باب الهول و تعاين ، حجت جلجول : امي موش طبيعية

- وانا هم هيسيتها هيج

طلعت مرة اعلى الباب تريد امي، طلعت امي للباب و دش ابوي كعد، راحت المرة ، نشد ابوي : هاه شتريد ؟

- اعلى الفاتحة تريدني اقرالهم

- شفينا شر القراية رحمة الوالدين ، الحزبيه خادين نيابهم اعلى السلف لا تشلشينا وياهم .

- جا هي فاتحة موش قراية للامام .

- لا قراية ولا فاتحة ، سايم الله و محمد و علي عليج كعدي وجفينا شرهم .

- جا المرة......... قاطعها و هو يطر الاستكان بالكاع و فلشاه و هو يصيح : اكعديييييييييي كوااااااااغد اكعدددددددي اكعدييييييييي ، اصيحن بعد يوووووووووو سمعتي .. اكعدي .

سكتت عنه و كعدت و صدت ليغاد مغتاضه ، كام و هو يحجي : غضب الله عليكم ما ترتاحون لا ما تجيبون طركاعة و تذبونها اعلى روسنا .

......

راديون : مرت ساعات و احنا بمجان هندس و نا نعرف كاعنا وين ، لا سمعنا عن سرحان ولا واحد دش اعلينا .

ليما مر وكت .. انفك الباب و انجرخ السركي ، كمنا اعلى حيلنا ، و فز ابن بشرى و هو بالكماط و كام يبجي بصوت ناعم .

فكو الضوا .. عاينا ليهم لابسين بدلة زيتونية خاصة بالأمن و بديهم عصي ، اول ما طكو بشرى الواكفة جريب من الباب و كاضة بابنها.

صرخت و صاح هو : تحجن و تكولن الحقيقة نهدجن ، ما تحجن .. نهينجن وحدة وحدة وما نخلي منجن نفر .

ردحة : ما نعرف شي ، يمه والله مالنا خبر بشي ، انا مثل امك و ناخيتك بعرضك .

طكها بالعصى وصاح : لا تجيبين عرضي اعلى السانج

ابن بشرى نط من البجي و هي تبجي و هاذ يطك بعمتي ردحة و انا ملتفه بأمي ، اندار و صرخ ببشرى : سكتيييييييييه

كامت تبجي و زادت بالنوح ، طكاها و هو يصيح بيها : ويا جم واحد متمتعة و جايبة هاذ ابن المتعة ، احجييييي .. ويا جم واحددددددد

وكام يطك بيها ، ذبينا ارواحنا اعليها وكمنا نتصارخ و هم يطكون بينا .

صاحت عمتي ردحة : دخيلك ياااااااااا علييييييي .

شلون تندب علي وتكفر هدو اعلينا بالعصي ورفسات وواحذيتهم نبتت بافادنا و يصيحون : مجوس روافض عبدة القبور .. اولاد المتعة ..

ويفشرون اعلينا فشار ما سامعينة كبل .

انفرد كل واحد بيهم يطك باثنين ، طاح ابن بشرى من ايدها و فرفح هو ومأمون ، دمونا دمايا و احنا نتصارخ ... كضو امي و كالولها يو ما حجيتي هسه نتعدى اعليجن وحدة وحدة

ملوك : والله ما نعرف غير ازلام دشو المضيف ورحب بيهم و تبين هم ينتمون الحزب لا صف وياهم ولا اله غرض بيهم كلو زادهم و مشوا

- وشرد ويااااااهم موووو

- ما نعرف وينه ، والله ما نعرف وينه

- شني اساميهم الدشو للمضيف

- ما نعرفهم

- ما تعرفينهم موش .

ردو اعلينا يكتلونا بينا ، بشرى كلش تأذت من الجتل مالهم .. انسحت روحها و طاحت واحنا وحدتنا بادت بالكاع وكعدت و هم يصرخون اعلينا و يحققون ويانا .

ليما تعبو من عدنا طلعو وطفو الضوا ، كامت عمتي ردحة تتهيس الكاع و تصيح : مأمون حبوبه وينك

وتزحف لاولاد سرحان، وامي و نسوان اخوي جرن اولاد زناد ، هيسيت الكاع بديه و كضيت بالجاهل و هو فرفح من البجي .

كربت مرت كريم و هي تنده ببشرى .. و بشرى فاكدة ، من سمعنا تكعد بيها و ما تكعد فزينا ليها ننده بيها و نصرخ و ندك بالباب و نصيح : ماتت المرة مااااااااتت فكو الباااااااااااب ، ولكم ماااااااااااااتت .

.......

وصل عم سرحان و خنجر لمجلس شيوخ الفرات الأوسط و بلغوهم ان شيخ عشيرة عام من شيوخ عشاير السماوة خذوه هو و عياله .. تلاحكونا .

بنفس اليوم طلعت ٥ سيارات لشيوخ ووجهاء من المجلس و طلعو صوب السماوة .

اما كواغد محتارة شلون اطلع هاذ الزلمة من البيت ابتلشت بيه ، لا تكدر اطرده و يروح ينعدم .. ولا تكدر تخلي و تبتلي هي ورجلها و عيال بيتها.

ظلت تحوم بالبيت و تفتر ، ندكت الباب و نعلها سيارة امن واكفة بالباب ، حجت : اعوينة ابو اصلي دخيلك يا علي .

هدية : شني يمه شكو

- خايبة سيارة صفت بالباب ، بس لا امن ، خايبة رحنا بيها وعلي

- عليش

كمت للباب ورجليه عيب تشيلني ، درت وجهي صوب كربله و صحت : ها يبو فاضل عليك يبو راس الحار .

كويت رويحتي و تلفلفت بعباتي وطلعيت، ونعلهم ثلياثه لابسين هدوم الأمن ، كتلهم : هلا بيكم يمه امروا

- شفتي احد قريب من هاي المطقة ، لاحظتي احد يتخفى .

- لا ييمه صاكة الباب اعلى بنياتي و ما طلعينا .

حجه الاخر : هم موجودين بهالمنطقة ما طالعين .

حجيت : تريدون ادشون اتفتشون البيت يمه نشيلكم اعلى راسنا هلا بيكم ، جا انتم وليداتنا و نايمين بسلامة بجالكم و بجال الريس حفظه الله ورعاه .

- لا حجية سدي الباب و لو احد مر او شفتي واحد منهم تبلغينا .. و لو عرفنا انتم متعاونين وياهم تحاسبون ازود من احسابهم .

- يااااع انا اعاون اليضدون الريس من عمت عيني كون يو سويتها هاذ الريس هاذ ، عزتنا و هيبتنا .

ودكت وهوست الهم

( فدوة انروح كل احنه لابو عداي ، يشيال الحمل يا سدرة حماي و فدوة نرووووح )

- الله يحفظج الله يحفظج بارك الله بيج .

ركبو سياراتهم و طلعو و انا كلبي ها ها ها ها .. مدري منين جتني الكوة و ما تلكلكيت جدامهم .

صكيت الباب و انا حايرة بهاذ الزلمة طركاعة و طاحت اعلى راسي، يامن يخلصني و بس يطلع يكضونه و كلبي ما يطني من كون امه وحدة من حبايبي و اشوفنه بستير يو طاح بنفس الطيحة .. يظل كلبي يكفك اعلى وليدي .

حطيت العربانه و كلت اله: كوم يمه اطلع

- يو طلعت وعلي يكضوني

- اكعد بهاي العربانه واحطن العلف اعليك وراح اذبنك بالشط ، انت اسبح وروح لذيج الديرة و اشرد و لونه الماي بارد لجن اخير ما توهدني وياك و تالي انا ميته و انت ميت .

جلجول : يمه هاذ ياااهو

- اششش اعوينة ابيج ، هشششش

- شكو يمه شني

- خايبة هس الزلمة شارد و يو كضو يجتلونا كلنا بخويطنا.

- يمه اسم الله ، جا وين راح تودينه يمه

- حطيلج شي على راسج و تعاي وياي .

حطيت الزلمة بالعربانه و كلتله : اريدنك تكطع النفس ما اهيس حس منك من كون يو كضونا مردونا .

- انا اشكرنج يمه

- دخل نطلع و اشكرني عود .

حطيت الزلمة و اجت جلجول ، درت ليها : اسمعي انت امشي جدامي كلش بعيد و راكبي هكو احد بس اشريلي خاطر اتلاحك روحي و يو مامش امش .

-وين نروح

- للشط

- خوش

كضيت شيلتي و عكدتها و كلت : عكدت شيلتي برايتك يبو فاضل ، نذر علي يو طلعيتني من هالمحنه ذبيحه اذبحها لوجه الله تعالى اعلى اعتابك .

كضيت ادين العربانه و الزلمة الله يسلمه ثكيل كمت كوه ادفع بالعربانه و انعثل بيها و جلجول جدامي تشوفلي الدرب و بوصاية الله وصلت للشط بسلامه ، ذبيته هو و العلف و جلجول تعاين و تتفكد

ادهرب للشط و طاح و كام يسبح و حجه : يوفكج الله بحق محمد وال محمد

- روح يمه محفوظ بوصاية الله ونبيه و اهل بيته اليغطي عيونهم عنك و تسلم منهم .

اندرت اردن للبيت و جلجول كامت تدفع بالعربانة و جبت الدرب كله انوحن و انحب اعلى هالشبان الجاي تضيع بلايا ذنب .

جا غير اوصل للبيت ونعله حسي مبحوح : يااااع وانه عدي فاتحه

دشيت للبيت وانا اكللهن : خايبات تعاااالن ليه يمه

هدية : ها يمه

- خايبة حسي انمحه .

- جا يمه اعلى هالهوسات الهوسيتيهن لابو عداي بالباب و الدنيا تكص كص شلون ما ينخفت حسج .

- اعوينة ابو اصل الجاب مثلي ، خايبات انا هوسيت الصدام خاطر ادفع بله وما اخليهم يدشون البيت ، يمه الزهرة خفت حسي من كون انا قرايتي و نحيبي اعلى وليدها و هوسيت لصدام ...

- يمه منين تجيبين هالحجي ، حسج انخفت من البرد موش اعلى صدام .

- لا وعلي .. يماااااي يمه مت عيني كون .

- لا تحجين بعد بسج لا يزين و ينخفت ازود

لاله : اسويلج كنداغ عمه

- اي والله عمه .

هدية : ظليت جويعدة ويا امي وهي مبتليه بحسها انبح .. كلت الها : يمه ما رحتي لبيت سرحان

- وين اروحن وياهو اليكرب غير الامن يكصبونا

- جا ابوي وينه

- بالديوان .

كامت ادك اعلى رجلها و تحاول تنعي حسها مبحوح ما يطلع .. بس من تحجي يوضح ، و هي تصيح( الزهرة بحت حسي) .

شواي و دش ابوي شاف امي مبحوح حسها صاح : يا رحمتك ربي من انبح حسج خاطر تركدين و تبطلين من الفواتح و القرايات اعلى ساعة و ذابتنا كلنا جوة من حدر قراياتج هاي .

- ياااع جا شلون نهد الحسين و نخاف اعلى رويحاتنا ..

- انا كايلج هدي الحسين سلام الله عليه لجن الوكت موش وكت نعاوي وقرايات .

- جا ونهد ابن الزهرة ما نبجي اعلى مصابه خافن يجتلونه ، انت شجاي تحجي ابو ستار .

- ابجي و انعي ابيتج بالبيوت لا تقرين كواغد فكينا.

- جا هي اليوم فاتحة موش قراية .. بس هو حسي انبح وعلي فشل جا هسه شكلل للوادم حسي انبح و هم معتمدين اعليه .

- احمدك و اشكرك ربي حمد ما ينعد و شكر ما ينحسب ساعة البحيت حسها .

- من كون اكولن يعابيك العباس بس انت زلمتي و بحكي اكولنها.

ظل يضحك هي وياها ، كعدت ايمان و هي حايرة ابطنها كال الها : تحركي تكري خاطر الجاهل ينزل .

- شنو صارلي ساعة امشي مشفتني من ردت اكعد تصيح تحركي والله رجليه كامو يوجعوني .

ضحك و هو يكللها : يابه استراحي انا غير لخاطر خاطر تسهل و ترتاحين ، جا انا الشايله يو انت.

جاي نحجي و اندكت الباب و نعلهم بيت عمامي .. موش نويصر غيرهم جايين خاطر يحجون ويا ابوي بسالفة ردتي لفليح لجن ابوي موش راضي.

انا كضيت بنيتي و كعديت داخل و اتصنت اعلى حجيهم .. و يكلوله : كلما نريد نلتم و نجيك انت بالدوام ، ناصر غلط و اخذ البت لجن كوده جان يردها موش ياذيها .

حاكم : البت عدي و مالها رده

- جا ليمتها تظل عدك .. المرة مالها غير بيت رجلها و الزلمه بالعسكرية وكل مرة يرد و ما يشوف بنيته يصير ؟

- محد مانعه يشوف بنيته لجن يجي من الباب يشوفها ويولي .

- هاذ موش حجي يبو ستار و احنا اخوتنك و جاايين خاطر نحل الأمور .. عدك شروط كولها لجن لا تظلم بخت البت وتكعدها عدك ..

- شرطي ينعزللها بيت ابحدها ، مثل ما انا مخلي بيت لبتهم يسرى ومعززها ومكرمها و ما مخليها بكصرة هم هيج ويا بنيتي غيرها ما الها ردة.

- اكلك ابو ستار انت الله وفكك وكدرت تشتري بيت و بستان و ما تعتاز لاحد لجن ناصر وولده فقرة وما يملكون الفلس .

- والله هاذ العدي بتي ما الها رده وياهم لا ما تعزل لوحيدها

- جا زين خله يبنيله حجرة بكاعك بالبستان و هم بنيتك بكترك و هو بحسبة ابنك و انت عمة .

- ما عدي مانع لجن فلس واحد ما ادفع اعلى البنيان و خله يكون بعلمه لخاطر بتي موش لخاطر احد و يو طكاها اطكه ازود و اطردنه .

- عمي اخذها من هالشارب ما تنطك .. و اذا اعلى البنيان احنا جثيرين نلمله فلس اعلى فلس و نتعاون و نبنيله .. بس خلنا ندر ، جا هي هم بتنا و ما نرضالها الكعدة و الناس تحجي .

- ابنو والله كريم ما عدي مانع .

طلعو عمامي و دش ابوي : ها بويه هدوة سمعتي الحجي يو لاله ؟

- اي بويه سمعته

كواغد : اذا تعزل و ابستانه جا شتعتاز بعد و اسمه رجال فوك راسها ولا هالكعده هاي .

حاكم : انت راضية بويه يو ما راضية ؟ انا ما رايد اظلم بختج و اردنج .. فكري و اطي جواب .. و يو قرريتي رديلي خبر

جسومه : عليش تردلك خبر ، هاي هي و شوف شنهي طلباتها احجي حبوبه يو جان بفادج جلمة .

- ما عدي جلمه و بكيفكم الراي الكم

خاكم : الراي رايج ان جنتي موش راضية هسه اوديهم خبر و اكللهم مامش الكم بت عدي .

- لا بويه اذا جان حجرة و ابستانك ما عدي مانع ، انا هم عدي بت و لزوم اتعرف اعلى ابوها موش حكي امنعنها منه و هو رايدها .

- جا هاهيه ، يلمون و يبنون وتكعدين بيه .

- خوش .

...........

وصلو الشيوخ مقر الأمن و نزلو بعكلهم يطلع بيهم ٧ شيوخ معدلين ، كل واحد بيهم هيبة و مشياه برهدنه .

نزلو اعلى الامن و كالولهم : الله بالخير بويه

- هلا .. خير

- بويه احنا طبابين خير و احنا ويا الريس موش ضده ، ولهساع ما طلعت منا الشينة من كون الكاع كاعنا و اليخون الأرض مثل اليخون العرض ما نرضاه .. لجن دوسة عتبة شيخ جبيرة وما ينسكت اعليها .

- الشيخ منتمي لحزب الدعوة

- الأخبار الوصلتنا تكول نزلو مضيفه و ضيفاهم والأصول تكول الضيف ضيف ولونه عدو تكرمه، جا يو اعلى النزله بويه اشكال اتمر اعلينا ونضيف وما صفينا ويا اوحيد .

- الأمر صعد للقيادة

- الأمر انتم اعلم بيه و احنا ما نعترض اعلى رايكم و احنا كلنالكم احنا ويا الريس موش ضده لجن تاخذون حريمه هاي الما نرضاها .

- نحقق منهم ونردهم

- لا بويه المرة ما ينحجي وياها ولا يتحقق وياها ، الزلمه عدكم و حققو وياه و اعرفو الحك منه حكم لجن النساوين ترد ويانا

- مالهن رده ، ويو خلصينا شغلنا..... قاطعة

- اسمع بويه جارة الدنيا اعلينا و سكتنا ، اطينا ولدنا للحرب وكلنا ارضنا و فدوة لعراقنا .. لجن توصل عرضنا لاااااا وال لا ما نرضاها ، اليوم انداس بيت شيخ بالسماوة باجر تنداس بيوتنا ويو سكتنا يطول الجور اعلينا ...

النساوين مالهن غرض بهالأمور تردولنا ياهن خير اعلى خير ما تردونهن ....

- تهدد الحزب

- حاشى اهدد الحزب ، لجن موش فعايل الحزب هاي من كون نعرف المراجل ما تتكاوى اعلى النسوان و عهدنا ببو عداي زلمه معدل ما يرضاها اعلى عرض احد .

ظلو يحجون و يتنحارون ويا الأمن .. و انطوهم عطوة بلهجتهم منا الباجر النسوان ترد ... و راح نبات الليلة بمضيف ضاحي و ننطر الجلمة .

خنجر : وسرحان ؟

- سرحان سالفته صعبه النكدر اعليه نطلع النسوان و الجهال و الزلمة يتحمل .. جا هاي بعد الدنيا و جورها اعلينا .

.......

راديون .. مر وكت طويل وحنا الدم يبس بوجوهنا ، والجوع و العطش كعدنا ، بشرى صحت و سندناها خاطر ترضع ابنها .. بس ما تكوى اعلى كضتها

مأمون نام بحضن ردحه الخلصت وكتها تنعى اعلى راسه .

ردوا مرت الأخرى جاروا اعلينا و يحققون ويانا خاطر يعرفون زناد وين لجن ما نعرف وجواب مامش .. طكونا و سبونا و شتمونا ... صكو الباب اعلينا .

بشرى حالتها تسوء كلش و ابنها يلوع من الجوع و صدرها نشف من الرضاع و حال دينار مرت كريم موش اقل من من حال بشرى .

ليما لثاني يوم فكوا الباب و احنا مهودات .. كامو يصيحون بينا : كومو يلااااااااااا ، كوووومو

وطلعونا و صعدونا بسيارة و ذبونا اعلى الدرب ومشوا .. كمنا نبجي ساعة العرفنا هدونا ، وحدة كامت تحضن الأخرى ، لجن بشرى خرت و طاحت من طولها ، فزعنا ليها و كامت ردحة وصلت للشارع هلبت سيارة تمر و نشيلها .

نضرب اعلى وجهه .. نصحي بيها فاكدة و شايلين ابنها: ولج بشرى كعدي ، بشررررى .

حظت ردحه بسيارة حمل داور سيارته ووصلاها لينا ، صعدنا كلنا و الزلمة عاونا ووصلنا لي باب القصر .

ويا ما وصلنا وركض لينا عمي ابو فاضل و يصيح : يا رحمتك ربي ، يا رحمتك يا الهي .

وكضنا وينشد بينا ، صاحت امي بيه : المرة راح تمووووت عاونوها

التمو ولد عمنا و عمامنا و كرابتنا كلهم اعلينا .

دشن النسوان داخل و انا و امي و عمتي ردحه طلعنا ويا بشرى للمستشفى ، ساعة الوصلو بيها عمامي و دخلوها المستشفى تلاكفونا و شالوها بسديا .

دخلنا داوو جراحنا .. و انا حالي موش اقل منها .. عدي ضربه جوه حنجي مشكوك لحك فجي ، خيطولي الجرة و سوولي فحوصات .

بالدم تبين انا حامل .. تعجبت حامل !!

وكل هالرفس هاذ و ما طاح و بعدني حامل !

سوولي فحوصات وما ادري شنهي .. و طلعت حامل و الفررخ نبضه ضعيف و اعلى ساعة يطيح ، اطتني حبوب و حطتلي مغذي .. وكالتلي الدكتورة : عليج ٣ اشهر و ٣ اسابيع .

داووني وكضتني امي ورحنا لعمتي ردحة : ها شكالو عنها .

- يكولون طحيل ما ادري شنهي منمرد عدها .

- والله يا يمه ما افتهمت منها شي ، بس يكولون .. لزوم نسويلها عمليه .

اجا عمي و كال : الطحال متضرر عدها الضربات التلكتهن بفادها .. طايحات بيها .. وراح يدخلونها عمليه .

كعد عمي يستفسر من عدنا ، و شنهو السوو و شحجو ، حجت عمتي ردحة : جا وسرحان ؟

- سرحان ما نعرف مصيره شنهو من كون اول نكر دشت زناد اعليه .. لجن تبين زناد مخلي عياله عده يعني متعاون .. وما نعرف بعد شنهو مصيره .

ظلينا جويعدين نحجي ، و السلف غاد مخبوص بسالفتنا .. طلع واحد من برا و حجه

المريضة بشرى قاسم حمدان .. منو الويا المريضة بشرى قاسم حمدان ..

كام عمي واحنا كمنا ليه و كاله : احنا وياها بويه كول

- المريضة انطتكم عمرها البقية بحياتكم ....

-

رواية كحل عرب الفصل الثالث والخمسون

(مساومة شرف )

منايانه غفل و الدنيا غدارة

وفواتحنا اكثرت و الدمع يتجارة

وشارتنا الكبل تحرك بسابع صوب

هسه احنا النخاف تلوحنا الشارة

(عريان السيد خلف )

- المريضة انطتكم عمرها البقية بحياتكم.

راديون نشغت و لطمت خدي: يممممممه طركاعة و طاحت اعلى روسنه دييييييه يممممممه .

كامت عمتي ردحة تزلغ بوجها و تصرخ و تتصيح : عفتي فرووخج المن ولج بشررررررى ، شردن ليهم .. شكل لامأمون يو بجه ورادج يمممممه .

عمي جر غترته و خلاها اعلى وجهه و كام يبجي .. و امي بجت و انا و عمتي كمنا نتصارخ ... طلعوها من صالة العمليات مغطاية ، كضينا بالسديا و كمنا نتصارخ ، جروها من عدنا و الناس المت اعلينا .

نسوان كابلنا وبجن و كمنا ننعي و نلطم اعلى ميتنا و اعلى حالنا ومصيبتنا ، كمل الاجرائات عمي و خذاها بسيارة الجنازة و سيارتنا وراها و الدموع اعليها حماله.

وينك يسرحان تعال و شوف شحال عايلتك ، مريتك نطتك عمرها و جهالك يتامه .. وصلنا غاد للسلف طش الخبر مرت سرحان ال مطر ماتت .

اجوا اهلها .. امها و خواتها يتباجن ويتلاطمن.

...

كواغد : يا ستار يا ربي شنهي شصاير ، شنهي هالبجي و النياح بالسلف ، درت لوحدة تمشي مهرفه جايه .. خب كتلها دييييه شصاير شني هالصياح و النياح البالسلف ياهو المات .

- دية يكولون مرت سرحان ال مطر ماتت

- يااااااع مت عيني يمه ، بشيرة ماتت يمممممه ، جا وفروخها دية .

- ما عرف توني سمعين و هالجاي اروحن ليهم .. اليوم فكو اعليهم جانو ماخذينهم الامن.

- مت عيني يمه ولونا وعلي .. الله لا يطيهم بجاه الزهرة .

دشيت داخل و انا ابجي و اجرن بعباتي الزينة خاطر امش ليغادي و اعزيهم.

هدية : ها يمه شنهي ؟

- ولج مريت سرحان ماتت

- يااااااااا صكد

- اي وعلي

- وفروخها ؟ ما صالها ثلث تشهر من جابت .. يمه مت عيني يممممه .

لبست عباتي و حطيت بنيتي يم حبوبتي وطلعت ورا امي اركض و جلجول وراي ، وصلنا غادي الباب مفكوك و النسوان شادات اوزارهن و يلطمن ، امي حسها مبحوح وما بيها صرخه ، و اليدش الفاتحة و ما يصرخ عيب و يستنقدونه ..

من الباب و صرخ : ولج ديييييييييييه يممممممممممممه

ندستني امي و هي تكول ( ندبي كل يوم الدنيا تبز عيني ) وانا صرخت كل يوم الدنيا تبز عيني كل يوم الدييييييييييييا تبز عيني

احو احو احو .

ولاجنه النسوان ويانا اعلى لطمتنا و هن يكللها : ام ستار ذبيلج كوله

كواغد : عيب يطلع حسي من كون هوسيت لواحد و انبح حسي .

كامن يطلعن كولات و نلطم .. ليما شالو جنازتها ، اعاين ليغادي ابن سرحان زغير يطلع عمره ثلث سنوات واكف ويعاين للوادم و صياحها ..

كربيت منه وجيهه مجرح ، دنجيت ليه و كلت اله : انت مأمون .

ظل يعاين علي .. جريت ليه و نحبت : يحوينت ابوك بيك .. الله يساعد كلبه شيحمل و شحاله هالسااااع .

وكامت اجتافاتي تهتز و انا حاضنته و ابجي .

ربطو الجنازة اعلى السيارة و صعدت امي بالسيارة و عمة ردحة و خوات المرحومة و امها .. و راديون ظلت تجر بيها امها ما رضت تروح و تكللها

- موش زين اعليج اركدي و لا تتحركين

- عوينة ابو الجاهل كلبي موجر خليني اروحن للنجف و اعاتب ابوي اعلى هدته لينا و هاذ حالنا ، هديني .

ما سمعت من امها و ركبت و صعدت وياهم .

ذبو عباية اعلى التابوت .. و تحركت السيارة و مشت و عيونا هماله ، شلت اديت ووادعيتها و كلت ليها : باريني الذمة .. محاللة وماهوبة و مبرية الذمة و الله يرحمج دية .

مشت السيارة و كعدن النسوان يحجن و يسألن بنسوان زناد و كريم اعلى صوابهن و شلون الامن خذاهن .. و كعدن ينوحن و يبجن .

مرت كريم كاضة ببتها و بأبن بشرى، كربيت ليها : هاذ ابن سرحان .

هزت راسها مالومه كلش : عنج ديه ، انا راح اخذنهم عدي غاد بالبيت و يو وحيد نشد عنهم كولي ابيت حاكم خوش ؟

هزت راسها .. خذيت الجاهل و جلجول كضت ايد مأمون ورديت بيهم للبيت ، لبسيت الجاهل من هديمات امونه .. و كعدت مامون و هو يلوب و يصح : يمه يمه.

عود يريد امه ، اطيت فلوس لجلجول راحت خذته اشترتله و رد .. وظلت تلعب وياه و تسكت بيه ، و الجاهل ينغص .. جويعان .

شلت صدري ورضعيته .. ليما شبع و نام .

وذاك لعب شواي و هم نام .. كابليتهم و اشوف وجه سرحان الما ادري عنه بيهم .. الله لا يطيكم ال ثجيل بجاه العباس يوم الفركيتوني عنه و علعليتو كلبي و كلبه ، جا ولون ذوله جهالي منه و ما متفاركين .. الله ينتقم منكم بجاه الحسين .

ايمان : امج راحت وياهم

- اي

- تروحين بعد لو كافي ؟

- جا غير يردون

- ما عرفتي شمسويلهم ، شلون ماتت .

- يكولون معذبينهن ليما طايحات ..

- و سرحان ؟

- محد يعرف عنه شي ، الله يعلم بحاله شنهو هسه .

ظليت جويعدة و مكابلتهم .. اندكت الباب و دشت يسرى و بناتها .. الاولى حولة وثانية عرجة .

- ها شني ذوله ياهمه ؟

لاله : وانت ياهو مالتج، و شعدج جاية ، ياله داوري وراوينه عرض اجتافج .

- لازم داشة بيت الخلفوج خاطر اطردين بيه منه ، جا نسيتي هاذ بيت عمي و انت الغريبة .

ايمان : وهذا بيت عمتها .. و بيتي و بيت رجلي و ما نتشرف بيج .

- شلون بوم و اديرلجن بال ..

حطت بناتها و كعدت و هي تنشدني اعلى بيت الشيخ شصار بيه ما جاوبيتها و كلت الها ما اعرف .

- جا من كون ما تعرفين شعدج جايبة جهاله ذول و حاطتهم عدج

- يتامه و البيت هوسه و مكتض بناسه اعلى الفاتحة و افراجهن .. و جبتهم عدي ليما تفض .

- اي جا خوش .. اشوفن الكلب كام يحن

- يسرى ان جانت جيتج تذبذبين بسامير و تنغزين بينا ، خذي بنياتج و روحي لبيتج .

- اكلكم شو بس اطردون شنهي سالفتكم ، و تعاي جاي ، عمامي اليوم غررو يبنولج حجرة بكاع عمي و راح تردين لفليح .

- اي وشنهي الرايدته ؟

لاله : الريدته تذب سمها بنصنا و تمش ، اكلج عايني اطلعين بالعيني و اغاتي يو اطلعنج بمكوار عمي ؟

- شو انت ماخذة طول بعرض يظهر عمي و عمتي مطينج وجه زايد عليج ، ولو حكهم من كونج عاجر ما تخلفين .. و ستار ما يرغبج ولا يكربج من كونج مسمومة ، الله يحفظه الي كاعدة ابيتي وحدي و يحبني و من يرد بس يشمشم بيه اناااااا و بناتي.

ايمان : الله يرحم من جان يطرج و يشمرج على اهلج ، لو ديرين اذكرج بليلة عرسي شلون سويتي مصيبة و طيحتيها براسه حتى يتزوجج ؟

و التمن لاله و ايمان وحدة تكبس و الاخرى ترفع ، وهي تردهن و تغلط عليهن .. هدية و جلجول كاعدات عاينن ليهن .

اندكت الباب .. و كامت جلجول تفكه .. و دشت تكل لهدية : هديوة هاي وحدة تكول اريدن جهال سرحان

- ياهي ؟

- من بيت عمهم

كمت من حيلي اعاين ياهي ، طلعت بت عم سرحان .. تصير بت ابو فاضل : هلا ديه تفضلي

فخرية : هلا بيج ديه ، لا يطيج العافية انا اريدن اروحن ، لجن جاية اخذ الفريخات.

- جا دية عدمن يضلون انا انكسر كلبي اعليهم و جبتهم

- يزلون عدي جا هم ولدنا قابل نذب لحمنا، طلعيم ياله ديه مستعجله اريد اروحن .

طلعيتهم و كلت الها : هاج ديه ، بس ديري بالج اعليهم ، هاذ الزغير الحيمة ترفة و الدنيا باردة

- ياااع جا توصينا اعلى وليداتنا شمالج ديه .

- لا ما اوصيج لجن بس احطن ابالج .

خذتهم و دارت عنه و مشت ، انداريت ايمان ولالة واكفات ، صكيت الباب و كلت الهن : كلبي ما تطمن الها هالمرة .

لاله : ولا انا شو تولتنا لحمنا و لحمنا جا هو شعمه اعلينا غير من الحمنا و دمنا

ايمان : يسرى وينها

- موش جانت جويعدة هنا ؟

ايمان : لاله كومي دوريها هاي ام السحورة مو امان والله .

مشت لاله لكتها ورى البيت : ها شعدج

- ما عدي شي اجيت اخسل هاي الوصلة

- جا اليغسل هنا يو غاد ؟

دارت عنها و مشت لاله ما تطمنت ، كامت تبحوش بالمجان الجانت بيه ، لجن ما لاحظت شي اليجذب نظرها و دشت داخل ، لبست عبايتها و خذتها بناتها و مشت .

....

طلعت الجنازة للنجف .. و دفنوها بمكبرتهم .. و هم يدفنون بيها و امها و خواتها ينوحن اعليها ، نزلت راديون بهداي و مشت لكبر ابوها فكت الباب اعلى الحجرة البيها كبور الشيوخ و دشت و كامت تصرخ.

حطت راسها اعلى كبر ابوها و كامت تنوح و تعاتبه اعلى ظليمتهم و ضياعهم خلاف عينه .

كابلنها النسوان و كعدن يبجن ..

دكت و لطمت وناحت ليما فكدت و طاحت و ابتلشو الزلم بيها .. هيمة ومكبرة و شياخذها لمستشفى ، ويا مستشفى جريبة اعلى هالهيمة .. مكبرة وادي السلام يا كبرها و ياعرضها .

شالوها للسيارة طكن اعلى وجهه و رشن الماي اعليها . نشغت وكعدت .. دفنهم وخلنها بالسيارة تنوح ليما خلصو دفن ردوا لاهلهم بالسماوة .

وصلت راديون للبيت كضاها نزيف و امها تلوم اعليها من كون كالت الها موش زين اعليج درب النجف

طيحت الفرخ من عدها ، وودن اعلى الجدة اجت عاينتها و اطتها حبوب و نامت .. لا تشيل ايد ولا رجل.

دشت كواغد البيتها بالليل كلش ،لا تشيل ايد ولا رجل ، مشى حاكم : يابه الله يساعدج .. يكولون رديتي .

كواغد : جا غير انهد حيلي وعلي .

- اي وانا طرطور هنا اتركبين و اطلعين ما تكولين عدي رجال اشوفنه يرضى ما يرضى.

تمددت و هي تكله : ساعة الكالولي اصعدي كلت خل اركب هلبت اروحن لكبر ابوي مت عيني اعليه و ابجي و انحب اعلى كبره .

- وانا شنهي

- جا انا شسويت

- سوووووويت شني ، مال راااااي اطلعين اعلى كيفج و ما اديرين ظهرج ولا تفكرين باحد .

كام يحجي و يدفر بالببيان و يضرب بديه على االيطلع جدامه .

كواغد : شمالك ما تكلي كل هاي اعلى روحتي للنجف

هدية : كام ابوي يغلط و يشتم و يصيح ، و عادة ابوي شكثر ما يصيح و يتعصب لجن ما يستعمل ايده بس يهدد اطمن و اجتل، بس هالساع كاب نار طالت ايده اعلى امي وطكاها .

تسودنت امي و كامت تصيح و تكله : شتم شتميتني و شتمت اهلي و صمبت حلكي ، وصلت بيك اطكني و احفادي تارسين البييييت .

و ابوي يصرخ هيج منج لا من اهلج لا من احفادج .. و كام يصارخ و فاشك ونار كبره تهيسه .

امي جرت عباتها و كالتله : خلي بيتك الك وانا طالعة منه .

كضيت بأمي و كمت انا ولاله و جلجول نجر بيها و نهديها خاطر تهيد و تكعد .. وهي تصيح و تبجي .

كوه هدينا و دخليناها جوا خاطر تسكت ، شو كب ابوي اعلى ايمان و ما نسمع بس صياحه و مرافسه اعلى البيبان و يغلط عليها و يصيح .

ركضنا لحجرت ابوي دكينا الباب و فكيتها لكيت ايمان جويعدة اعلى صفحة و تبجي ، جريتها و هي تكلي : لا ما اطلع ، عوفيني هدوة ما اريد

- دكومي يا دية كومي

لاله شالت اميدي ، و انا كوميتها و طلعيتها .. وابوي كعد و يسكت شواي ويرد يصيح .. درت لايمان : عليش صيح .

- قبل شوية بدلت الجرجف مال الجرباية ، ويا دخلته مؤيد خاف وسواها على روحه شاف الجرف مبلل كام يصيح و يغلط علي.

جسومه : شجاه ما تكللي ، هجج للبيت و حركاه حرك عليش .

كواغد : انا ادري عن ابنج .. ايام الله كلها ما مدورني ولا ينشد عني ولا يكرب ، بس ساعة الاهجن للنجف ابجي اعلى كبور اهلي و اشكي ليهم .. اطلع انا المالومه .

كام ابوي و هو يصرخ : حسج يطلع فوك عمااااايلج

كمنا صكينا الباب و كام يضرب اعلى الباب و هو يغلط علينا ، واحزا كلنا ملتمين بجرة وحدة .

ليما تعبنا و احنا واحدنا مجابل الاخر و نبسبس ، فرشنا و نمنا بحجرة حبوبتي كلنا.

للفجر ندهتني ايمان و هي تكلي : يمكن عندي ولادة

- وجع قوي ؟

- كل شويه يروح و يرجعلي حتى رجليه مكمت اكدر اوكف عليهن .

ندهت امي فزت بساع ، لبست عباتها هي ولاله و مشن وياها .. كعد ابوي كال: امج وين .

بعدني توني نطكت : راحت هي.....و هو صرخ

- راحت طلعت ، هدددد .. موش بيت مفتح انا مكو***** طرطووووووور انا هنااااا .

- بويه بس يواشك ايمان تطلك و اخذتها ..

- و عليش ما كعدتوني

- جا اذا انت متعارك وياهن اثنينهن شيكعدنك ، هالندهتك انا ، ما يصير هيج بويه من امس و انت شواي اعلى اذاناتنا بصل .

لبس و طلع بلايا ريوك .. انا عجنت و لملميت البيت و كعدت جلجول خاطر تخبز الخبز بدالي و انا اروحن اسوي الريوك .. تونا خلصينا و اندكت الباب .

صحت : يااااااااهو ؟

فلاح : انا اناااااا

- شرايد فلاح شعدج جاي .

- جاي اثوفنج انت و بتي .

- شتشوف من عدنا روووح محد بالبيت .

- بث اثوفنكم وعلي ما احجي وياج .

فكيت الباب ليه ، واكف ابدلته العسكرية كال : ثلونج

- كواكه ، شرايد

- هاي جيتي من العثكرية ، و مثتاك ليجن .

-دش اكعد و هسه اجيب البت تشوفها

دش نزع بسطاله بالباب و دخل للهول كعد، شلت الفرخة ووديتها ليها ، حطيتها بحضنه ، حباها و انا مشيت حضريتله صينية ريوك و شلت كرصتين حارات من الخبزتهن جلجول و حطيتهن جدامه

- اييي رحم الله والديج

-ووالديك .

شلت البت وكعدت اعلى كتر و هو داس بالصينية دوس ياكل ، حجيت : جيتك هاي شني ؟

- انا من جنت غاد تحلميت بيج و بالبت و اثتاكيتلجن و كلت اول ما امث للديرة امرن بيجن .

-عمامي اجو كبل امس وكالو يبنون حجرة لينا بكاع ابوي و اعزل عن اهلك .

- و تردين

- يو انبت اردن .

- جا انا راح بهاي اجازتي ابنيها خوث ؟

- الامر عدك انا مالي غرض .

كمل اكل و كام لبس بسطاله و انطاني جم فلس و كال : هاي الج

- مشكور .

ضحك و طلع ، رديت الباب وراه و سركيته ، حجت جلجول : اليوم فليح ابو اللثك يطي مصرف شني يريد يموت ؟

- مدري عنه .. الله يعلم شنهي ورا هالتغيير هاذ

جسومه : لا تحجين هيج حبوبه جا ابن ادم من طين ، يوم يصح و يوم يبطش و فليح ابنادم ، هلبت الله هداه ليج و يستعدل وتردون حدر سكف واحد و تكفكفون اعلى بنيتكم ، جا شنهي كعدتج حبوبه

- جا انا استعدل وما رديت يا جدة لجن كلما اردن يخليني اعض اصابيعي اعلى الساعة الرديت بيها.

- الله كريم حبوبة الله كريم نا يظل حمل مطروح ، يعينه ربج .

- و النعم بالله .

كواغد : عد الجدة و ايمان تطلك و انا و لويله جويعدين عد راسها ، و لاله كاضة بيدها و تصيح : من بختج بجاه علي كون احبل ويصير عدي جاهل .

- ان شاءالله يا عمه اليحبلج و تشيلين فرخ ابطنج .

اندمت الباب ورجل الجدة صاح من ابعيد : ام علي ابو ستار اعلى الباب.

دارت لينا و كالت : وحدة منجن تطلع اله

كواغد : كومي لاله شوفي

- لا عمه اطلعيني انت عمي عصبي و انا اخافن .

كامت اعلى حيلها و هي ما تحجي وياه فكت الباب و كالتلها : هااا

- هااا شنهي جابت يو بعدها

- بعدها

- و يمتى تجيب

- العلم عد ربك جا انا شدراني

- وانت عليش تحجين وياي من اطراف خشمج

- جا شني نسيت عملتك امس

- انا جريب منا من تولد كليلي

- عووود خوش .

.....

راديون فكيت عيني امي جاعدة جريب مني و حطاه ايدها اعلى راسها

- ها يمه

- الحمد لله اعلى سلامتج يمه

- مامش خبر عن سرحان ؟

- كلشي ماكو .. لا هو ولا زناد .

-جا زناد.شيكل لربه ساعة الهدنه و شرد و هو شيخنا

- جا يو ظال شنهي يهدونه ؟ .. ربج طلعونه يو كاضينه و هو جويعد ويا حزب الدعوة جا عدمونا كلنا .

- الله اعلى الظالم .

- عمج جاب اهله و غراضهم و اجا كعد هنا

- يعني شنهي

- فك حجرة الشيخ مطر و كال لمرته نركد هنا منا و غاد . و جاب بناته و جناينه .. و نصب روحه شيخ .

- جا عكب سرحان و زناد ما النا جبير غيره

- جا و كريم

- كريم بعيد عن سوالف العشاير و ابوي ذاب بيه سند و متبري منه .

- هالحجي كديم وراح وكته ، حجرة الشيخ لزوم تنصك و جعدته بهاذ القصر اعلى كد الفاتحة و يمش .

- ناوي يسكن هنا ؟

- يكول قصر ابوي.

- جا هو العزاز وراحو يا يمه و نحسب للقصر خذاها يو ما خذاه

- ونخلي يكوش اعلى حكنا

- ما كوش زناد اعلى حك سرحان .. مدري شعاجبنهم بهالكبارية الكل يتهاوش اعليها .

- الله كريم

- جهال سرحان وينهم .

- كاضتهم بت عمج و صايرة حنينة اعليهم .

- يطيها العافية ان جانها حانه اعلى هالفريخات.

- انت ليمتها تظلين خبكة ؟ يمه ذول بعز مصابنا طمعوا بينا .

جاي يحجون و دش كريم للقصر و هو ينشد شكو ، شنهو ، شصاير .. حجوله الصاير كام يدك اعلى راسه و يصيح : يا سرحان يا خوية يا بلواك يا خويييييية .

....

هدية : جويعدة واندكت الباب ، كلت شنهي هم رد فليح ، كمت افكنه و نعله ستار اخوي : حبيته و حضنته

- شلونك ، شلون علومك

- زين الحمد لله انتم شلونكم امي ابوي وينهم .. لاله ما هي .

- راحو ويا ايمان جاي تطلك

- جا خوش انا اروح لبيت اشوفن بناتي و ارتاح و اردن ليكم خوش

- جا دش سلم اعلى حبوبتي

- حيل تعبان و ما بيه انزع البسطان و ادشن ، سلميلي اعليها جثير و اتعذريلي منها

- ان شالله خوية

- انت شنهي اخبارج .. عيالج ما شافو حل

- قررو نبني حجرة بكاع ابوي ونعزل عن اهله .

- الله كريم .. احسن الج خوية جا ليمتها تظلين جويعدة عد ابوي للمرة ما الها غير رجلها، ياله اودعناكم

حجاها و طلع .

كواغد : ياااااله ولج خنكتي .. خايبة ادفعي

ايمان تصرخ و تطلك ولاله كاضة بيدها و الجدة تجيب بيها و كواغد تصيح و تحفز بيها .. ومامش ولادة

و الجدة تكلها : ما يصير هيج شمالج من الصبح و هاذ الضحى و انت تتمزلكين .. فضي روحج بسرعه و جيبي

ايمان : شسوي والله تعبت .. حاكممممم

كواغد : خايبة حاكم شنهي .. ندبي يا علي ياااااله فضيها موتيتي الفرخ ياااااله

كامت تصيح عليها و هي تدفع .. بطلعان الروح ياله جابت ، طاحت و فكدت بعد من التعب .

- بت يو ولد ؟

- بنية

- نعمة نعمة

شالتها و كالت : صلاوات اعلى محمد وال محمد ، تشبه المتيريسة .. هم متيريسه مثلها.

لاله : اشو عمه اشوفنها .

ظلن يتنوعلها و الجدة و نظفت ايمان و ضربتها ابرة و اطتها حبوب و كالتلها اطلعي .. طلعت و حاكم تلكاهن، لجن الجو بارد ركض جابلهن سيارة صعداهن و راح للبيت .

دش و هدية فارشة لايمان بحجرة حبوبتها : يا صلاة اعلى محمد وال محمد ... بالله يمه

نومن ايمان و ظلن يعاينن بالبت، تكرب حاكم خذاها و يعاين الها و ايمان مغفية من التعب .

جلجول : يمه شراح تسمونها ؟

كواغد : نسميها هند

حاكم : اعلى كيفج نسمي .. هند شني ما اريدنها موش حلو

كواغد.: لا تسميها ما اريدن .

حاكم : اي لا تريدين .. انسميها ازهار .

كواغد : اكلك انت عند صويحبة اسمها ازهار من كون دكيت اعلى بت هديوة ردت تسميها ازهار و ما صارت و هسه تتكاوم وياي خاطر تسميها ازهار

فكت عينها ايمان : لا ما اسميها ازهار

- جا بكيفجن انا ، اسمها ازهار يعني ازهار .

- جا انت باجر و تمش للعسكرية و انا اطلع اسجلنها و اكتب هند .. شلوني ؟

حاكم : انا سميتها ازهار و اريدن اشوفن ياهو اليسميها هند

هدية : بويه وعلي هند احلى من ازهار .

جسومه : جا هسه انتم تعاركتو و المرة نايمة .. دكولو شنسميها اخذوا رايها جا جابت و خلتتها بديكم .

هدية : شتسمينها ؟

ايمان : هند

كواغد : عفية هيج اريدنج معدله

حاكم : دخل اشوف اليسميها هند .

كلنا ضحكنا ، درت ليها و كلت الها: و انت بالكماط تعاركو اعليج يهنيدة جا من تكبرين شتسوين .. تكومين السلف و تعطبينه .

حباها ابوي وكال : ياله سموها التريدونه .. اهم شي اتمام خلقتها .

- صكد بوي ستار اجا

لاله : علييييج الله وينه .. بالحجرة

- لا راح لبيته يكةل تعبان

- جا ما نام بحجرتي

- ما اعرف حتى ما دش داخل من الباب و مشى.

حاكم : رايح امرن اعليهم

ايمان : اخذ ميمو وياك شوفه ديغار من الطفلة .

لبسته هدية و دفته و خذاه و طلع لبيت ستار .

اجت هند للدنيا ..

و ما تعرف الله شضاملها بدنياها ..

مرت الأيام اعلى هالحال ..

سرحان ماله خبر ويخافون ينشدون عنه .. من كون الامن اخذ ١٥ واحد من الديرة و محد يعرف عنهم خبر .. كلها صامه احلوكها من الخوف .

ملوك حشدت كريم خاطر ياخذ مضيف ابوه ويكعد بيه لجن كريم كال الها ( انا اكره سوالف العشاير و الطلايب و زلمه ما الي بهالسوالف مشاكلي مالي هلك احلنها اروحن احيرن بطلابة هاذ و مصيبة ذاك .. خله عمي يتولاها و هو اعرف من عدنا بهالامور .

و اجا عمهم قاسم و جاب بناته و ولده و عايلته و سكن القصر ، و بته فخرية عمرها ٣٢ سنه .. ارمله و رجلها ميت من ١٠ سنوات .. وخذت جهال سرحان و خلتهم عدها ، وما رضت مرت كريم ترضع مروان الزغير و كالت الها

- لا انت مخلفة بت و حليب البت ما يرهم للولد ما يصير .. و كامت تشربه حليب قواطي يجيبواها للفرخ.

و خلت الجهال عدها .. ما اطتهم لاحد حتى لخالاته و جدته ما اطتهم ، و ابوها كض الديوان و القصر .

من بعد ما خلصت الفاتحة و سالفة سرحان مضت عليها ايام و بردت .. كلمن رد لاهله .. و ردت مرت كريم لبيتها .. لجن ملوك ما طلعت من القصر ، و صممت اعلى طلعتهم حجرة الشيخ ..

وكدرت تخلي كريم يحجي ويا عمه و يكله : عمي انت جبيرنا و على راسي لجن حجرة الشيخ مطر ما يندش ليها ، و البيت حجراته جثيرة اخذ التعجبك و اكعد بيها .

كدر كريم باسلوبه يخلي عمه يترك حجرة الشيخ و يترد تنصك و تظل اثار الشيخ مطر بيها.

اجت ايام وراحت ايام

و انبت حجرة و مطبخ مسكف بجينكو و حمام .. بيت لهدية بنص كاع ابوها .. وانتقلت بيه واستقرت .. و حياتها صارت احسن من كبل .. فليح يجي ١٠ ايام .. ٥ يكضيهن يم هدوة و ٥ عد اهله ويرد يلتحق ١٠ ايام .

ومشت امورها اعلى هالحال .

وره جم شهر .. غابت عنها الشهرية

خذت امها وراحت فحصت .. طلعت حامل ..

وحبلت مرت الأخرى من فليح .

اما راديون فسلطان يحوم و يدور يريدها ترد و ما ترضى اترد الهم و رجلها مسجون ، كدرت مرة تحصل الها زيارة و تروحله للسجن .

شافته و بجت اعليه و حجتله اعلى حالها و شصار وياها .. تسودن ساعة العرف .. احتار بكاعه و هو بالسجن .

سلطان متضايك من ابن ضاحي اخو الشيخ مطر رد سيطر اعلى المضيف و القصر .. و رد يتربصله مثل ما جان يتربص للشيخ مطر .

خصوصا و ان ملوك ما راضية بكعدة ابو فاضل بالقصر و استحواذه اعلى الديوان ، وتعرف بسلطان يكره قاسم كونه ابن ضاحي .

فيمر بحجة يشوف مرت ابنه و يتفكد الاخبار من ملوك .. هي تحجيله وتوصله اخباره .

سرحان من جان موجود و كريم يروح للجيش يتولى امور بيته بكلشي .. شيجيب لبيته يجيب لبيت كريم و امه تنشد مرته ان جان تريد شي .

لجن بعد ما راح سرحان ... ما يوصلها المسواك و هي عازله بيتها عن القصر ودوخته و نسوانه و هوسته .. فصارت كلما تحتاج شي تطلع بنفسها تتبوش تجيب اللي تحتاجه و ترد .

دينار : بيش هاذ الحجل حجي

- بدينارين .

دينار: جريت الحجل و انا اعاين بيه حيل عجبني ، حجه واحد

- اذا عاجبج اخذي و اعتبري الحساب واصل

التفتت عليه و احد لابس رصاصي مبين اعلى شكله رفيق .. درت عنه و انا ادور بالحجول و اعاين .

حجه : الادين بيض و ناعمات .. هيج ادين ما تنوجد بالريف .. هنا النسوان يغبش للشغل يخبزن و ينظفن و يطبخن و يطلعن للزرع يعاونن الزلمة بشغله و اظن هالدين ما مار اعليهن شغل .

رديت الحجل لمجانه و انداريت خاطر امشي ، وكف وكال : بكيفي تمشين و بكيفي توكفين

- استحي اعلى روحك و امش منا .. ياله

- وكوية عين و تتصالفين ، بيمن شادة ظهرج و هيج متكاويه

تعديته و مشيت و هو مشى وراي ، نزلت للبستان دشيت هو لحكني للبستان .. وصلت للبيت و دشيت البيتي ردت اصكن الباب شفته يعاينلي متبسم .

صكيت الباب و سركيته .. وعديت الموقف من بالي ما حسبت ليه احساب ، للعصر خليت العباية اعلى راسي و طلعت اتمشى بالبستان.

الجو ربيع و البستان يا حلاته بهالجو . اخذ بنيته بيدي و امشي بالبستان ، لابسه نفنوف احمر جوا الركبة و العباية بلا حجاب و الكذله طالعه منها و اتمشى .

كعديت حدر شجرة زيتون و انا اناغي لبتي : يمه البنات عشرة واكول گليلات يمه البنات .

و ما اهيس الا هاذ الزلمة جدامي كمت اعلى حيلي : انت شلون ادش البستان هيج بلايا اذن من اهله .

- وين ما يعجبنا ندخل مو احنا الناخذ امر احد .

- الحارس ما شافاك .. ما وكفاك

- لو بيه زود جا حجه ، بس خل اكللج الصدك .. انا شفت اديج و تبعتج اعلى عمى عيوني ، بس هالوجه الجنه كيمر .. ممو بس اتبعنج .. و احرك الدنيا اعلى اهلها لاجلج .

- انا مرة متزوجة و عيب تحط عينك اعلى مرة ، شنهي ما عدك مستحى .

- بكيفنا .

كمت اخذت بتي و جاي امشي صاح : ما كتيلي اسم رجلج ياهو ؟

- وانت ياهو مالتك

- لو ما حجيتي تتندمين

- اي عودين ندمني ، ياله فارج .

عفته و رحت للبيت و دشيت و صفكت الباب وراي .. حتى البيت بعد ما طلعت منه ابد .. و كمت يو احتاجيت شي اودي اعلى القصر ..

المغرب و اندكت الباب ..

صحت : يااااهو .. ياهو اعلى الباب .

مامش احد جا ياهو الدك الباب ، فكيته ، و نعله زلمه واكف جدامي .

اعضاي تراجف و اعاين بوجه مبتسم و انا الخوف خذاني ، و انا مفرعة وضامه روحي ورا الباب ، بساع رديته و ردت اصكنه .. حط ايده و كال

- اسمعييي

- شرايد مني والله عيب عليك امشي لاحد يشوفك بالبستان و انفضح .

- الأسم دينار

العمل السابق كاولية و راقصة ارتست .. لو رقصت ركصت كلوم الزلم بحجل رجليها .. ركصت بيوم من الايام و اجتهدت بركصها كدام واحد ابن شيوخ وشردت وياه و ابن الشيوخ الغبي صدكاها و تبرى من اهلها و خذاها .. بس هاااااي الكاولية جاي تستشرف هواي و حاليلها دور الاستشراف و انا اموتن اعلى التستشرف .. كلش احبنها .

- امش منا يله

- تبعية و كبل جم شهر شالوها الامن ويا عيالها .. و لو ما الشيوخ تفزع و تدخل جا هي هسه ميته بنكرة من نكر السماوة .

- انت شرايد مني والله عيب عليك انا لا كربيت منك ولا ادنيت ليك ابعد عني و هدني بحالي .

-تسايريني و تمشيني بشوري اعيشج فوك روسهم ملكه .. بس لو رفضتي .. وكتها تجبريني اعلى افعال ما اهواها .. اروحن اخبر عنكم و اذبن كل ذوله المساجين جوا و اخذنج غصب عليش ، خلنا نخلص الموضوع بيناتنا و نفضها

- نفض شنهو الله يستر اعلى عرضك انا مرة متزوجه

- كاولية مثلج ما تجيب عرضي اعلى السانها ولو عدتيها ما اظمن ليج اليجرالج عكبها .

- شرايد مني ؟

- كعدة كاولية مثل كعداتج كبل و تهزيلي ليما اتيخن بيج و اطيح .

- انا مو كاوليه و الباب هاذ لا تدكه بعد

- يعني ترديني

- الله يخليك والله تبت من ذاك الدرب ، امشي لا احد يشوفك ، احبن ايدك خويه فدوة امش .

- تردين لو ادخل البيت بالقوة

- بالقوة شنو عفيه والله ما يصير شنو ابتليت طلعت كدامي جاي اكلك اني ذاك الدرب تبت منه .

- خلك كاوليه لا تستشرفين براسي ، الليلة انا و جماعتي ناطرينج و لو ما اجيتي .

- ما اجي و ما اسويها والله يخليك امشي منا

- تتحديني و تختبرين صبري يعني ؟

- ما اتعدى احد انا مرة عدي ضنا و رجال و بيت و ما اكدر اخونن البيت الصاني وستر علي ، امش الله يخليك

حجيتها و صكيت الباب بوجهه قوي ....

رواية كحل عرب الفصل الرابع والخمسون

( فك قيد )

ابگـه اگل للروح لو جرحي انلچم ياروحي اسكتي

( عريان السيد خلف )

بعد مرور ٦ اشهر

دخل كريم للبيت ، البيت صنطة !

جاي من العسكرية و مصوب بيدة و نازل كبل اوانه .. دخل لحجرته ، لا بته ولا دينار مرته ماكو !

- وينها هاي ؟

ذب جنطته العسكرية على القريولة و كعد .. ظل كاعد

ليغادي .. دشت دينار للبيت هو كاعد و ناطرها .

دخلت للحجرة تفاجئت هو جدامها .. فزت : انت اجيت ؟

- ما جاي تشوفين روحج هاي ثاني مرة اردن من العسكرية و انت مو بالبيت ؟

وين جنتي ؟

مشت والرجفة و الخوفة مبينه اعلى ملامحها، نومت الفرخة و حجه هو :

- ويييييييييين جنتي ؟

- ما جنت عد.احد ، البت ارتفعت حرارتها و خذيتها للمضمد يشوفها

- بهالوكت ووجهج مليان ازواكات و ملون ، انت جاي تلعبين علي يو شنهو

- انا ما جاي العب عليك .. كتلك البت جانت مريضة

كربت ليه حطت راسها على راسه و حبته و كامت تبجي

رفع الها راسها و حجه : شمالج ؟

- ماكو شي ظل بالي عليك و اشتاكيتلك جثير.

- انا هم مشتاكلج بس طلعت الفجر بطليها انا ما احبنها.

- شبيها ايدك

- موش تعرفين كبل لا الأمن يداهم البيت انا جنت بالادار بعيد عن الساتر و حروبه ، لجن بعد الصار نقلوني للساتر احارب اعليه .. و تصاوبيت بيدي صالي ثلث تيام و اطاني الامر اجازة خاطر اردن ليجاي .

- الحمد لله على سلامتك .

مشت من عنده و دموعها بعينها ، حجه : عليش جاي تبجين

- كلت الك مشتاكتلك ومامش شي غيرك .

- بس انا اهيسج موش اعلى طبايعج .. هكو احد مضايكج بغيابي ؟ هكو احد غاثج ؟ كليلي عليش تضمين بكلبج عني .

- محد .. بس انا اهيس مليت هنا .. واحس بروحي ما اناسبنك

- شني هاذ الحجي جديد

- موش جديد بس انا اكولن يو تعوفني و تشوف دربك اخيرك و اخيرلي .

- اشوف دربي وين انت شجلي تحجين ، ترا تعبان و ايدي مصوبة و ماذيتني لا تأذيني بكلام ماله كل داعي ، خوش لو لا .

دنكت و سكتت .. رد حجه : لا تسكتين تعاي عاونيني وكربي نزعيلي البسطال ايدي ما اكدر اعين نفسي منها .

كربت ليه و دنجت عد رجليه فتحت قياطين حذائه و خلتهن اعلى كتر وراحت جابت ماي بكيتلي و طشت و غسلتله رجليه .

مد ايده الاخرى و كض حنجها : شمالها عزيزتي متضايكه غير افهم .

- انا ما اناسبنك .. انت ابن اشيوخ و ابن اوادم و انا اظلن الكاولية

- شني هالحجي هاذ .. هالسالفة تعديناها و ماضيج دفناه و هساج انت مرتي و عزيزتي و ام بتي عليش تحجين هيج .

- اخافن لا تلوحك مني الاذية.

- مامش اذية .. شيلي هالطشت هاذ و نشفي رجليه و تعاي كربي عدي حيل مشتاكلج .

شالت و سوت مثل ما يريد بس ما كربت من عنده طفت ضوا الحجرة و طلعت و كالتله ارتاح.

نام ساعتين و طلع لبيت اهله .. دش

سلم على امه و اخته و مرت ابوه .. تسودنن ساعة الشافنه مصوب .. ملوك كامت تلطم و تكله : اطلع لا تظل .

- وين اطلع ؟

- اشرد من العراق ولا تظل هنا و تموت بالحرب .

- كضوني اعلى الدرب شنهي الاستفادة غير انا و عايلتي نروح بيها .. خليني بمجاني ليما يفرجها الله ، بس كلولي شعلوم سرحان ما بين له خبر ما سمعتوا عنه

ردحة : مت عيني عليه .. من يوم الخذوه و لليوم و انا عسني ما تاخذ النوم .. عمت عيوني اعليه و هو غايب ، و ناذرة نذر للعباس اذبحله سبع ذبايح يو رد .

وظلت تنوح ، كعد يواسيها هو و يكللها : الله كريم يمه الله كريم ان جان مكتوبله يرد .. يرد ، لا يظل بالج اعليه.

اندار لامه : هكو احد مضايك دينار

- لا ،عليش ؟

-ما ادري اهيسنها متضايكة وبس تبجي و ما ادري شمابها و الليل تكول البنية جانت موش طويبة شني مامش احد مر منكم ليها و عاين حالهن .

- امس العصر انا نشدتها معتازة شي كالت لا ، وهي لا تجي لهنا ولا تكرب ، صاكه اعلى روحها الباب و عازلة نفسها من الكل ، لا تجامل وحيد ولا تكرب لاحد خاطر تكول مضايكينها .

- جا شمالها

- عيارة نسوان و يو ظليت تعاين ليها يا معتازة يا متضايكة .. تركبك وما تخليك تشوف دربك .

ساعة الحجت امه هيج ما رضه كام من مجانه و راح للديوان ..وكف ويا عمه .. لجن عمه ما يوده ها كثر .. من كون الشيخ مطر تبرى منه .. و هو مكعد كاولية بنص قصر الشيوخ.

اما بيت حاكم ..

فالموضوع اتازم بين لاله و ستار

اذا جان يكضي نص اجازته يمها .. كام كل الاجازة ما يلفي عدها .. ويجي زيارات لاهله .. يكضيها صياح عليها و يعيرها شلون ما تحبل و عاجر .

اجا ستار للبيت .. و حاكم بالعسكرية.

دش للبيت كواغد بالكاع و حبوبته نايمة و جلجول بالمدرسة و هدوة ابيتها ..

دخل كال الها : شني وحدج بالبيت

- جا كلمن راح اعلى شغيلته و حبوبتي نايمة .

- امس وكت الاجيت وين جنتي ؟

- ويا عمتي بالكاع اعاوننها.

- و انا شنهي هنا و ما تكليلي راح اطلع

- جا انا وين طالعة للشارع ، غير للكاع و امك وياي .

- هادج اعلى مايج و خلك مالي و اكعدلج ، الا ساعة الاصفالج .. دم ازوعنج .

- عليش شنهي السويته

- لا تداهريني غيضي فايض منج

- جا غير اعرف شنهي كصرتي اعليك و هيج تحج وياي اذا غيضك فاض انا صبري طفح و الروح ما عادت تحمل ، شنهي جيتك بس ترزل و تشتم باهلي و تروح لبيتك ولا جني مرة عدك و جويعدة ابيت اهلك .

- انت مرة انت شنهي نفعج المرة الما تخلف وما تجيب ، النعال ابرك منها ، على الاقل تستفاد منه انت شنهو نفعج ؟

- خلف الله عليك جا دامني نعال ، خلي يسرى ام السحورة اعلى كلبك و انا امش لهيلتي عليش ضالة هنا شني للمذلة يو للشتايم .

- دخل اشوفن جدمج يخطي باب البيت الا وعلي اكصنها

- تكصها عليش ، لا انت راحمني ولا خال رحمة الله تنزل اعليه و موليه ، بسك و العباس طكت رووووحي ، اااااااااااالله الاحد

جسومة : حبووووووووبة ستير خايب جدة تعال جاي احجي وياك

ستار : تدعين عليييي

- انا ما داعية انا اريدن اروحن لاهلي .

- روحة لاهلج مامش و يو تعديتي الباب انت مطلكة بالثلاث.

- اي بالمبارك اعليك يسرى ، انا اروحن و شتريد تعمل تعمل .

حطت عبايتها اعلى راسها و فكت الباب، كام يجر بيها هو و يتعارك وياها و جدتهم من جوا تصيح عليهم .. بعدته ايده عنها و طلعت من البيت تبجي .

ساعة الأجت كواغد للبيت و سولفت الها عمتها اعلى سالفة ستار ويا مريته ، لطمت حدادي و هي تصيح : دهر الدهره كون ، فاشلني ويا اخوي ، شكلل لصلاح جتل بتك و هجت من بيتي ، شواجهنه .. عمت عينك يستار .

كواغد : طلعت من البيت و انا مفرفحة ، اول ما رحت على بيت ستار دشيت ليهم لكيته متمدد و جاي يسولف و يا مرته و انة انهديت بيه : انعل ابوك يابو الجابك يابو اهلك يابو رسك النجس ، رس ثجيل الحطيته عدي لا بارك الله بيك ، عليش ولك تعمل بحالها هيج . جا ما حسبيت احساب خالك .. ما كرمك و كرم ابوك و اطاك مرة بلا مهر .. ما كلك كبع و اخذ تالي هججيتها مكسورة خاطر .. نعلة الله اعليك .

راد يوكفني .. حب راسي و كالي اكعدي يمه نتفاهم ، و انا نفضيته عني و صحت : ابعد لا بارك الله بيك ابعد ، فشليتني ويا اخوتي الله لا يطيك.

طلعت من بيتي و انا متفاشلة جا يو رحت شكلل لخوي فشله لا منها صوج ولا عدها ذنب .. يسود وجهي جدامه و يو ما رحت .. زحمة وما يصير .

كضيت الدرب و طريته لبيت اخوي صلاح ، ساعة الدشيت و خلود تعاركت وياي شلون ستار عامل لبتها هيج .. سكتت جا شحجي انا ساعة الطكو اهديوة شهرت عيالها و خزيتهم و الومن امها يو حجت .

صكيت احليكي و سكتت .. ليما رد اخوي و لاله حجت و شكتله لاله و كامت تبجي .

حجيت انا : والله يا خوية شتحجي البت حك و انا جايتك ليجاي لجن و العباس وجهي بلون عباتي اعلى فشلتي وياك بس شسوي هاذ استير من دهر الدهره كون .. فاشلاني وياك .

- وجهج ابيض ام ستار خوية ، جا هالامور تصير بين المرة و الرجال ، ايام الله موش كلها بيض لاون ايام تعسر و ايام تفرج

لجن انا انشد بنيتي طاكج بويه ؟

- لا

- جوعاج ؟

- لا

- عمتج مأذيتج ؟

- لا

- جا بوية تردين ويا عمتج .. المرة الاصيلة ما تهد بيتها و عمتج تحبج و عمج يبحبج .. و كلهم زينين وياج و ستار يو طاكج انا اخذ حكج منه لجن الزلمة بناته معوقات ويريدله فريخ و هاجت اعصابه و طاحت اعليج جا يو كل مرة هدت بيتها و هجت ما ظلت بيوت عامرة بوية.

لخاطر عمتج تلبسين عبيتج بويه و تردين .

خلود : يااااع و تخليها ترد و هي مهيونه .

- ستار مثل ابني و انا اكضنه و ارزلنه و اعلمنه الصح شنهو .. لا تساندين بتج اعلى خراب بيتها ، خلها ترد ويا عمتها بسلامة .

- لا والله ما ترد .

كواغد : ساعة الشفت الحجي احتد بين اخوي و مرته .. خفت لا ادور مصيبة ثاني اتصير فوك مصيبة ستير كلت اله : لاله خوية لا .. الله يعلي علومك و يخليك خيمة اعلى روسنا بجاه العباس ، لجن انا جاية خاطر ابري روحي من فعايل ستير و الشاهد الله لويله اعزنها بكثر بناتي .. و بناتي ما عايناتني بكثرها .. وانا اريدنها تستراح ابيتك هنا .. تشوف اهلها اخياتها يجن تغير هواها و انا يو اجا عمها اخليها يكض ستير ويرد عكله براسها ويجي عليها يردها معززة مكرمة البيته.

صلاح : براحتج بعد خوية جا هي بنيتكم .

- اي والله بنيتي .

كمت منهم و انا اتعذر وهو ما يرضى اتعذر على سوالف ستير ، خجلاني بخيوريته فوك فشلتي الاجيت بيها .

رديت و انا حلفت يا ستار ما ادش بيت ابيك ولا تخط اعتابه ليما ترد لويله للبيت ، و يو التحقت وما رايح ليها و مطيب خاطرها .. لا ارضى عنك دنيا ولا اخرة.

البيت مامش احد بيه بس ام حاكم ، و جلجول امتحانات و كاسرة ركبتها اعلى دراستها ، و هديوة رجلها بالواجب موش بالبيت ، مشيت عليها خاطر اجيبنها للبيت .

رحت ليها و دكيت اعليها الباب ، صاحت : يااااهو

- انا امج يهدوة .

- هلا يمه ، هلا بطرواج .. تفضلي

- لا ييمه ما جاي اكعد ، انا عدي شغل و البيت غاد فارك و مامش غير حبوبتج مريضة .. و لويلة مشت لاهلها .

- يااااه عليش

- سوالف اخيج الردي جا ما تعرفينه

- يمه وعلي الزلمة موش خالي .. اخافنه مشرب

- اغم ما بيه خير لا تكليلي مشرب ولا مدهرب .

- جا هسه انا شسوي ؟

- اريدنج تروحين غاد انت و ابنيتج ليما يرد ابوج ويرد لويله .

- ما عدي شي .

لميت غريضات بتي وغريضاتي و طلعت ويا امي .. بالدرب و كتلها : يمه هاي ام شخيتر مرة مومنه و الناس تمدح بيها و النسوان اعليها جوكه جوكه هلنا ندش وناخذ عدها خيرة .

- خيرتيش يا يمه دمشي

- يمه ما خسرانين شي و هي تفتح بكتاب الله و مرة مومنه خلنا نمر .

- و شتسويلنه

- يمه انت يو معاشرة يسرى و امها ما كلتي هيج ذني كلهن اسحورة و الكل يعرفهن ... جدات جداتهن جانن هيج ، الياكل يحطله بالكل هاذ اليمر و يسلم يلزكنه بسحر .. مسوية البيت طليان بيدها .. ما خسرانين شي ندش هلبت تطينا حرز شي نعلكه بالبيت .

- دياله امشينا.

خذيت امي و دشيت بيها لبيت ام شخيتر ، النسوان جوكة جويعدات عدها كضينا سرة ياله وصلنا ليها ، حجت : كالت الها ... عدج واحد بالعسكرية ؟

- جا هم واحد اثنين .. الريس الله يطي العافية خذاهم كلهم للحرب وما خله زلم ببيوتها ، اخوتي وولد اخوتي و رجلي و ابني ورجل بتي كلهم بالحرب .

-واحد منهم وركته ذبلت وراح اطيح .

- اسم الله الستار يمه .. يا وانا دعيت اعلى ستير وليدي .. سور سو و النبايا حضور وبيرغ علي المنشور . جا غير اموتن يو صار بوليدي شي .

هدية : دية احنا اجينا ليج اعلى البيت كبل جان مسكون و شلنا منا لجن اخوي ظل بيه و مرته موش امان ... و الاخرى عاجر و جاير اعليها و هالجيناج هلبت حرز يو تفتحيلنا اعلى البيت .

حجت ويا امي و كالت الها : حطي ايدج اعلى القران

حطت امي .. وهي ظلت تقرا .. فتحته و كالت هكو مشاكل عدكم بالبيت و المشاكل اعلى ساعة تكب

كواغد : جا ما تمر سويعه بلا مشكلة تمر وعلي و احنا جويعدين بساع بساع اعلى حجوة بسيطة تكب و نوجر و يشتعل البيت صياح .

- بيتج موش نظيف

- يا دخيل بختج دية جا شني وصخين احنا

- موش وصاخة .. هكو عمل محطوط الكم بالبيت ، اطيج حرز تعلكينه بالبيت و بخور تشغلينه المغربية و القرأن لا تفاركينه .. و ابنج راح اقرالج اعلى ماي و لزوم هاذ الماي يشربه و يو كلش كلش ما شربه .. طري منه بوجهه .

- وجنتي ؟

- شمالها

- مامش جاهل من يوم العرست وليجاي .

- تجيبنها الي خاطر اعرفها .

جا خوش ..

كمنا انا وامي طلعنا منها و علكينه الحرز بالبيت و شعلنا البخور و شعلنا كاسي مالت قران .. نشدت حبوبتي شنهي شكو ما كللنالها رحنا ولا حجينه كبالها .. كنالها ( هيج بخور و قران خاطر تخف المشاكل بالبيت )

ستار عاند ما يمر اللاله .. ولا يردها

يس ساعة الزعلت امي اعليه ، اجا راضاها و كال الها : انا اروحن و اعتذر من خالي بس لا تزعلين علي.

ومشى لبيت خالي و خالي كاضة بالرزايل و الغلط .. غسل ولبس . وامي كالت يستاهل ..

لجن التحك ستار كبل لا ينزل ابوي من العسكرية.

ثلث تيام و اجا ابوي لينا

اول يوم استراح و ما كلناله اي شي ، لجن ثاني يوم خبرته امي و تسودن شلون ستار هيج مسوي و غبش البيت خالي .

طلع حاكم خاطر يمش لبيت صلاح .. بس بالدرب و شاف هوسة .

- هاااا شكو شنهي ؟

- خايب يكولون سرحان رد

- صكد

- اي وعلي

وتراكضنا للديوان ، لكينا واكف و الزلم اتسلم اعليه ، رفعت ايدي و صحت : ها يبو مأمووووون هاااا ..

صاحت الزلم هاااااا

اليوم الحر يستعرض

اها اليوم الحر يستعرض بصدور النيبه

اليوم الحر يستعرض .....) هي هي

صاح رحيم (جنك راس خيط شما كصوك تفطر ) هي هي هي .

سرحان : يطيكم العافية عمامي ما كصريتو الله يبارك بيكم .

رحيم : كللنا شنهي الصار وياك كلوبنا وكفت من يوم الغبت وليجاي .

- موش وكته الحجي عمي خلني امش للبيت استراح ونحج بعدين

- اخذ راحتك اخذ راحتك

مشاه خنجر و حميد و رحيم و سالم وصلوه للبيت ، لكه بيته مفتوح طلاقتين ، اول ما دش انطش الجكليت اعلى راسه و اشتغلت الهلاهيل .. دش للديوان و مأمون كبران .. متكتر اعلى صفحة ، تبسمله و كاله : كرب بعد ابوك .. خلني احبك

سحبه و دفعوه لابوه خلاه بحضنه و يحبحب بيه .. رفع راسه و هم كلهم يحجون و يتحمدوله بالسلامه ، حجه : جا بشرى وينها .

ابو فاضل : استراح و اخلك الكيمه و طمنا اعليك و انكلك بالصار و الدار .

بساع تغيرت ملامحه و حجه : شنهو الصاير عليش هادة جهالها هنا .. وينها ؟

حجت عمه : اطتك عمرها .

- لاااااه .. صكد يو تتشاقون ؟

شافهم كلهم سكتو دنك راسه و حجه : انا لله وانا اليه راجعون ..

كضيت بأبني حطيت راسه اعلى راسه و انا احاول اكظم غيضي .. لابت روحي ساعة العرفت اولادي يتامه .

درت ليهم و العيون حيرانه و مدمعه : شلون ماتت ؟

- بالتعذيب اتاذت و الطحال مادري شني مالوم عدها و ما تحملت و سلمت امانتها و راحت لدار حقها .. ادعيلها و ابريها الذمة .

كمت من مچاني وكلت الهن : بس مأمون و مروان جيبيهم عدي و خلوني لوحدي .

كمت من مجاني مشيت لحجرة الشيخ ابوي ، كعدت دشت بتعمي و هي كايدة مأمون و مروان شايلته اعلى اعلى خصرها .. كربت مأمون ووكفت مروان يمي و حجت

- الله يعزي مصابك خوية ، و بهداي اعلى ارويحتك جا يو الحزن يرد الراح نحزن طول عمرنا .

ما رديت عليها ، هدت الجهال وومشت جريتهم و كعدتهم واحد اعلى يمنتي و الاخر اعلى يسرتي و دنجيت ابجي بوسطهم .

ظلوا الجهال مصفصفين بحضني و مروان كام يتضايق و يحاول يكوم ، هديته كام يزحف و مامون تبعه و راحو كضو بالمبخرة و يلعبون بيها و انا اعاينلهم مكسور .. اليتم و الغربة العانيتها بزغري اندارت ليكم بوية .. المكتوب علي انكتب اعلى ولدي .

احترت الدموع بعيني .. فكرتهن و انا اكولن ( لا اعتراض اعلى امرك و حكمتك ربي بس امتحانك صعب وانهد حيلي )

اندكت الباب و دشت راديون : ها خوية ابو مأمون .

- هلا خوية

- ادشن يو اهدك بروحك

- لا دخلي ، تعاي

كربت و كعدت حبت راسي وكالت : عز الله مصابك خوية .

- شصار وياكم ساعة الخذوكم

- عذبونا جثير لجن ما طولينا يوم واحد و طلعنا من كون عمي طالع لشيوخ الفرات الاوسط ومفزعهم لينا و الاجاويد ما كصروا .. لجن بشرى ما تحملت عذاب يوم .. و سبحان الله هي الوحيدة الدرب كله جابته و هي تصيح ( راح نموت راح نموت) جن كلبها علم كرب موتها .

دنكت و انا افرك بوجهي من القهر .. اهيس اذاني اشتعلت نار ... الله يرحمها مبرية الذمة دنيا و اخرة .. وين دفنتوها

- بكبور اهلنا

- انت شحالج .. هم رديتي بعد لال ثجيل

- لا .. لجن سكط جنيني بعد موتت بشرى .

- الله اليعوض .

- انت شنهي علومك

- صارلهم ثمن اشهور الله وحده يعلم بحالنا .. ما اعرف شلون الله خلصاني من اديهم و فكوني .

- الف الحمد و الشكر لله اعلى طلعتك سالم .. ردتك لينا كافية ، ففدوة كلشي دامك سالم

- الله يسلمج .. الجهال شنهو حالهم

- والله عد فخرية شايلتهم اعلى كلبها من ساعة الماتت امهم ليجاي هي حاويتهم .. و عمي اجا كعد هنا و سالكين ويانا .

- ما تكصر اعليهم بشي

- لا يشهد الله كلنا عينه اعليهم ما فاركيناهم .

- هدوة شلون حالها .

- ردت الرجالها و عزلت ابيت وحدها و حبلى هساها ..

هز راسه و ما حجه .

..

حاكم : الف الحمد و الشكر ساعة الرد وعلي يو اخوي ما افرحله هالكثر

جبار : سرحان خوش سرحان و يستاهل لجن شحاله راد

- جا غير مسجون المهم رد .

- اي الحمد لله .

- اكلك ما تروح وياي لبيت صلاح اعلى مود بته ستير الطايح حظه مفشلني وياه و انا اخجل منه من كونه خيّر

- صدك جذب يابو ستار عليش متفاشل وياه جا هي عركة مرة و رجال تصير .. و صلاح اخوك موش غريب .

- والله يا جبار ابني ردي عبنه لاحك ذيج البكد امه . و عايف هالوردة هاي .

- جا بعد هاذ رايه شتسوي ، ياله امشنا خلنا نمر بيه و ناخذ البت

طلعنا من المضيف ورحنا لبيت صلاح و خجل بكرمه و كلامه .. و كال لبته تلبس عباتها خاطر تمشي ويانا .. كلت الها : ها بوية تروحين يو موش هاوية

لالة : لا عمي جا انا اشتاكيت لعمتي و البنيات .

- و هن هم مشتاكاتلج يا بعد عمج ، ياله امشينا.

خذيتها ورديت بيها للبيت ، تلكنها البنات ايمان و هدية و جلجول و كواغد و امي وظلت جويعدة وياهن .

ردت اطلع حجت هديوة : بويه وصلني بدربك .

- ياله بويه امشي .

خذاني ابوي ورديت لبيتي ، لكيت فلاح جاي و ابطالة العرك عد راسه : ايهيييي جا ردينا لريحة العرك و ابطالته .

سرحان : خذيت ٥ ايام انا بالبيت و الناس تجبل تواصلنا و تبارك لينا اعلى طلعتي .

من بعد الخمس تيام ..

مرو اعليه اعضاء بالحزب وكعدوا وياي و حطو شروطهم اعليه بالمضيف .. گيدوني بگيدهم .. يو ابيعن ضميري و اشتغل عدهم .. يو ما اخلص من جورهم .. سايريتهم اعلى الاكدر اعليه و كلت الهم : خادم للريس .

طلعت للمضيف مالت ابوي ، التمو عمامي و كبار العشيرة و كال عمي : بويه سرحان هاذ عكال ابوك و هاي خاجيته .. انا سديت مجانك ساعة غيابك لجن يوم الرديت الحك ليك و انت شيخنا.

-عمي مامش فرك بيني و بينك و انت ابن ضاحي وانا اريدنك احذاي .

- جا احنا عمامك ما نهدك .. وياك وياك ولزوم نشد حيلنا وواحدنا يسند الاخر خاطر الناس تعرف ال ضاحي ياهم ، و انا و جدام هاي الزلم اطيك مرة تكبعها و تاخذها بلا مهر ..

صاحو الزلم : و النعم منك يبو فاضل و النعم و النعم .

ظليت اتشكر بعمي لجن بداخلي ما اريدنها بس عيب افشلنه جدام الزلم .. كلت تمر السالفة و اردنها من كون انا ما اتوالم ويا مرة ، الجانت عدي و اعلى مرامي .. شبعتها ضيم و قهر جا اجيبن الاخرى عليش ؟

جنت اتمنى اهدن السلف و اطلع البغداد و اسكنها .. لجن وصايا ابوي الخانكاتني ، خصوصا هالساع بس انا .. و زناد مامش .. تمنيت اطي المشيخة لعمي و اتكتر من كون اعرف الحزب راد يضغطون علي خاطر اخدم مضيفي بخدمتهم .. واعلى مرامهم .. لجن يو سويتها اسم ابوي بين الشيوخ يندثر و يصير وريث المشيخة من ال ضاحي .. عمي موش مطر واولاده .

مرت الأيام و انا وحيد .. و بيت عمي ما طلعو من القصر .. وانا ما حجيت جلمه جدامه ، ملوك طلبت مني اكلله يفرغ البيت لجن الحك عمي و ان جان بموت ابوي صف ضدي لجن هساه هو حذاي و ساندني اروحن اكبح وياه اعلى كعدته بالبيت ؟

ظلت هالعوايل نايمه اعلى افادي

نسوان زناد ٢ و امه .. و بيت عمي و انا بطرك امي و جهالي اثنيوين ، ظلت تلح امي علي .. اخذ بت عمك يمه ولا ترده و المرة شالت لحمك ساعة فكدتك و عمك ما قصر .. و ما يصير ترد بته و ترجعها .. اخذها و انت وحيد و ما يصير تظل هيج ، و المرة راحت لدار حكها و لخاطر ولدك .

شفت مصلحة ولدي بهالزواجة .. كلت الها : الله كريم

- يعني راضي

- ان شاءالله

- جا خلنا نملج الكم الجمعة .

- موش وكته .. موتت بشرى ما صالها سنة خل تعدي السنة مالتها و انا اخذنها

- جا و عدت شنهي التغدم و شنهي الاتخر

- لا اقدم ولا اخر لجن يظل احترام الها .. هم عدها اهل و ام و خوات .. ما يضوجن و يكولن ساعة الرد نسى اخيتنا و اخذله مره و حطها ابدالها .

- جا هاي الدنيا يمة

- ميخالف .. الاحترام واجب .

- جا اكلل لعمك حجيك هاذ .

- كليله

حجيت و طلعت للمضيف عدنا كعده .. اجاني خنجر : ابو مامون

- ايدي ورجلي يخنجر ما اريدك تفاركني .

- لا تهم و جماعة الجول كلهم عد عيناك .. لجن انا جايك بجلمه وداني بيها سالم و مستحي يكلك

- شني هي

- والله انا هم استحي اكللك ، اكولن يو اصيحنه يخبرنك افضل .

- شنهي القضية المستحين منها

- السالفة بيها سمعة و عرض و احنا سلف ومن كونك اخونا و عرضك عرضنا هالنريد نكلك .

- جا غير افهم

-اصيحله و اجي .

- اوكف ، اذا السالفة تشغل بالي خلها لورا الكعدة من كون عدنا طلابة و لزوم نحلها .

-ولله يابو مأمون موش بس تشغل البال ، و تشيب الراس .

- جا انت ما كلتها و شغلت بالي يو كلتها شيصير احجيها

-لا خلها بالليل

- جا دهربتها و فلتت دكول

- بعد الكعدة نخبرك

- خوش

دخلت المضيف و التموا الزلم و حجيت وياهم ووعيتهم اعلى امور السلف و ان الريس ريسنا و لزوم نكف وياه موش لاجل احد لجل كاعنا و كاع اجدانا وان جان الريس يمثل اعراقنا .. الي يريد ايران ذيج ايران .. و اليريد ربه يندل سماه ، و الرايد يبجي اعلى الحسين بينه و بين عايلته ورحمة الله اعلى اليدفع البلا عن اهله و عايلته .. .. احنا نوكف ويا عراقنا و اليخون ارضه مثل الخاين عرضه ..

وطلت بالخطة ليما ردينا اعلى الطلابة النحلها ، لجن اهل السلف ما رضوا بحجيي .. و شلون نوكف ويا حرب هي من الاساس ضدنا كبل لا تصير ضد ايران .. و طالو بشكواهم عني .. ساعة الطلعت هاطر امش لخنجر كضاني عمي

- شني الحجي الحجيته بالمضيف يسرحان

- انا ملزم بدفع البلا عن اهلي و عشيرتي و ناسي

- انت انتميت للحزب ؟

ما رديت عليه و درت عنه و كلت : عدي امر ضروري و لزوم امش .

طلعت منه ورحت لخنجر و سالم واكفين ليغاد ، كربيت ليهم و كلت الهم : تعالو جاي كلولي شنهي السالفة التشيب الروس .. كوة كضيت روحي بالمضيف داوريتو راسي .. احجو

سالم : مستحي منك يبو مامون و هالجلمة ما تنكال بوجهك يشيخ لجن

- احج العدك يسالم لا تكطع افادي .

- انت حطيتي اعلى حراسة كاعك و انا حارسها لجن هكو امر لزوم تعرف بيه

- جا غير يفضها

- مرت اخوك كريم .. يومية بالليل جاي تطلع من البستان للشارع وبتها بيدها .. وراغبتها موش مرة ولا مريرتين .. جثير بس الأيام الكريم يجي بيهن ، هي ما تطلع من بيتها .

- شنهي الحجي هااااااذ ساااالم .

- اجتافي لبو فاضل من كون يكطع اديه يو جذبيت اعليك ، انت زلمه كرمتني و انا مسؤل بكاعك و لزوم اصارحنك ... وهكو شي ثاني

- استغفرك الله واتوب اليه ، دخيلك يا علي .

- هكو واحد اعرفنه يشتغل بالامن .. اكثر من مرة شفته نزل للبستان و دك الباب اعليها .

- وما عرفته شيريد منها

- هي عرضكم يشيخ و انا ما اكدر اتبعنها .

- شنهي الراي يخنجر ترانا انهد حيلي ، معكول البت الكاوليه الامناها اخوي جاي تدوس باعراضنا.

خنجر : والله يخوي الله لا يحط احد مجانك السالفة موش هينة و لزوم نتكتم اعليها بيناتنا، و هو جاي يكلك حزبي دك الباب ، يعني السالفة داجة و يو شويه تلاعبينا اطير روسنا و تتبهذل عوايلنا ... بس لزوم نتأكد من للسالفة و يو عرفنا نخلي كريم يطلكها و السلام ..

- هكو زلمه يطلك مرة دايسة بيته بلا ما يحط الجيلة براسها ؟

- شعفتنا صفرة يبو مامون موش بصالحنا هساه الطك و الفشك .. لزوم نداير الامور .

- اسمعو جنس مخلوق ما اريدنه يعرف بالسالفة ، ليما اعرفها و اداورها ولهذاك الوكت اتراقبون بيتها ويو طلعت او احد كرب بيتها بساااااع تطوني علم مفهوم ؟

- مفهوم

درت منهم و انا حيلي مهدود ، اريدن امش اجدامي ما كامت تعيني .. طريت الدرب اعلى حيلي و دكيت باب بيتها .. فتحته : هلا و مرحبا ابو مأمون .

هي متعودة علي ما ادشن البيت اذا ماكو احد .. وكريم مو بالبيت .. لجن هساع ، دفعت الباب و دشيت و كعدت بالهول ، هي استغربت دشتي .

ظليت كاعد بلا حجي و هي واكفة و اطك طك بأصابيعها : ما عرفت شنهي جيتك يبو مأمون

تنهدت و انا امسح اعلى شواربي و داير عنها ، توترت و راحت جابت ماي و حطت كبالي ، حجت برجفه : هكو شي ؟

- كبل سنتين هيج .. هكو مرة من السلف متزوجة و بذمة رجال و بيتها لوحيدها .. لجن تعرفين احنا سلف وواحدنا يعرف الاخر ومحد يغيب عن عين الاخر ولا هكو سر ينظم بهالسلف .

سكتت وتوترها زاد و كامت تمسح بكصتها و بوجها العرك .. كملت : لجن شافوها ادخل غريب لبيتها .. تعرفين شنهو العملو بحالها ؟

درت ليها : حطو جيلة براسها و ذبوها للجلاب كلتها ورجلها و اهلها وعيالهم بخويطهم شالو من السلف .. من كون العار ما يخلص بجتلة المرة لجن يظل يلاحك اهلها و رجلها ... ذولاك البتهم جانت هيج و جتلوها .. ذاك المرته جانت هيج تجيب لبيته و جتلوها ... و هاذ العار .

- فهمتك .

- انا الوحيد الساندت كريم بزواجته و كلتله سترت اعلى بت مفضوحه و صنتها و عدلتها ، لجن هاي البت يووووو

حجت : انا دخيلتك يبو مأمون ، صايرة مثل بلاعة الموس لا اكدر احجي ولا اكدر اسكت .. الحجيت الموت ما يصلني وحدي .. راح ينكتب اعليكم كلكم و انتم ناس تفضلتو علي .. و السكتت

حجتها و صرخت ودنجت تبجي ، بتها فزت و كامت تصرخ .. حجيت : احجي جلمة وحدة خنتي كريم يو لاله ؟

- مو برضاي والله ، يو ما...........

- يووووووو ماااااا شنوووووووو ، زلمة صانج تدوسييييييييين عرضه لييييييش ...

-

رواية كحل عرب الفصل الخامس والخمسون

(طلابة فليح )

يقول الشاعر عريان السيد خلف :

يلتمن علي مشتتات البال

وانفضهن نفض و انهض ولا جني

فيرد الشاعر مظفر النواب قائلا :

انا مو عريان وانفضهن نفض و انهض ولا جني

انا التمن علي امشتتات البال خذن ثلثين حيلي و كبرن سني .

.....

دينار : مجبورة و موش برضاي .. انا خفت منهم هدداني بيكم .. يجتلكم و انا خوفا طاوعيت .

سرحان : ولج شنهي انت من مرة ، ما تعرفين الموت اهون اعلى اركابنا من العاااااااار ، ارخص ما عدج الشرررررف ..

- اناا ....

- انت خلك كاااااوليه لعبتي اعلى اخوي وخذيتي عكله وهدنتي حاله .. لجن مووووش ثوبه من كونج يو بت شيوخ تجتلين روووووحج و ما تواطيها لوااااااحد رددددددي .

... انداريت وانا اصفك بديه و افرك بيهن بحركه

الف رحمة اعلى روحك بويه .. ساعة التبرى من اكريم كلت ابوي ظالم و اكريم ما عمل غير الصح و ستر اعلى بت مفضوحه و صانها .. و شنهو الجزاااااه .. الجازاه خياااانة عرض .. دستي بيته و دستي عرضة .. اثاريه ابوي يعرف الطبع البا البدن ما يغيره الا الجفن، و انت ذبت كاوليه .. يو وازاج وكتج ارخص ما عدج عرضج .

- انا كلت اله يطلكني لجن هو الما رضى يطلكني .

- من كونه اغم و ضاحكة اعلى عكله بجم سالفة غمه مثلج و مثله ، المفروض احطنج حدر و انوم الجيلة براسج ، بس وعلي ما تسوين اشيلن ذنبج و انشهر بسواتج .. تهدين البت و اطلعين من السلف وما اريدن اشوفج وجهج.

- اطلع بس بتي ما اهدنها ما عدي غيرها ، واريدنك تعزلي بيت خاطر ابعد بيه عن كريم .

- المثلج هساه و حماها جدامها و داري بعارها اطم راسها و ما تفج حلكها و انت واكفة جدامي تتشرطين و بصلافة عين تنهين و تامرين ، ولج من احطنج براسي اعدمج العافية بالعباس ، اتجفي شري و انسي عدج بت

- بتي هاي انا الخلفتها .. و انا جان اذنبت هي مالها ذنب تبعدوها عني .

- هاي موش بتج يالكاولية ، هاي بت ال ضاحي و تحلمين بعمرج اخلي بت الشيوخ عدج تربينها . شانطر اطلعينها اعلى ذويلج يو تلفيلها وصله خصرها وكت ما وازاها زمانها تهز و اداري حاااااالها .. هاذ التردينه يو شنهو

- دخيلتك انا ابو مأمون والله ما اكدر اترك بتي.

- لا دخيلتي و استقبل مرة داس بعرض اخوي الاكدر اعليه اعفيج من غسل العار و اطمن عارج و ابعدنج .

.- ما عدي مجان اروحن ليه

- جا حسبيتي ساعة الدستي عتبة بابج و رجلج اعلى الساتر بوجه الموت يحارب و انت غاويه ويا....... استغفرك ربي و اتوب اليك .

دنجيت للبت خاطر اشيلنها ، تكربت علي و خذت بتها : اطيني البت

- ما اطيك بتي

- تخليني يفور دمي و ارتكب بيج جريمة .. ابعدي عن بت اخوي و اطيها ليه .

- بتي ما اطيها .. و طلعه من هاذ السلف ما اطلع ، اذا ما تأمنلي بيت اعيشن بيه .

- انا اكول اتأملي و شوفي اليجرالج شنهو .

جريت المفاتيح مالت الباب من البسمار .. طلعت و صكيت الباب و سركيته وقفلته و خليت المفاتيح بجيبي ، خنجر واكف ليغاد .. صحت : خنجررررر

- امر يبو مامون .

- اتحط اثنين زلام اعلى البيت ما اريدن تتخطى عتبة الدار .. و البستان اداوره بزلامنا .. و لزوم تلكالي بيت برا الديرة خاطر نبعدها .

- رضت تبعد

- موش اعلى كيفها

- ابو مأمون يو درى كريم بسالفتها يتوهدن ويا الحزبينه و يضيع بيها .

- وهاذ الما اريدنه ، و اليوم لزوم نتخلص منها و نبعدها .. تفهم علي يخنجر يو لاله ؟

- فاهمك يخوي .

- ياله نفذ .

طلعت من البستان انداريت للقصر ، دشيت و لاكيت بت عمي كبالي طلعت : ها گواك الله

- الله يكويج بويه ، الجهال وينهم ؟

- جويعدين ثنيوينهم بحجرتي يتلاعبون .

- الله يطيج العافية ام زناد وينها ؟

- اظنن توها طلعت للحديقة .

- اندهيها ليه و كليلها سرحان رايدج بموضوع جايد

- يا ستار يا ربي شنهي السالفة خوية ، هكو شي

- لا الله يسلمج خوية ، مامش شي لجن طلايب سلف و رايد اشورنها .

- جا خوش

حجيت وانا دمي فاير ، مريت اعلى الحجرة شفت جهالي جاي يلعبون .. دنجيت حبيتهم اعلى روسهم ، وكف اعلى الباب ياسر و ظل يعاين هو واخته .

- تعال ياسر بويه كرب .

كربو و انا الهم متلتل اعلى افادي .. كعديتهم اعلى اجدامي .. حبيت نجاة اعلى راسها : ينعل ابيكم الوهدن حاله و يتماكم .

ياسر : عمي يعني ابوي بعد ما يرد .

شلت فلوس من جيبي و اطيته و كلت له : اخذ اخيتك و اشتري انت وياها .

نجاة:- عمي انا اريدن اظلن يمك .

- روحو اشترو وردولي ياله عمو .

مامون من سمع بيها مشترى فز وركض وراهم ، دشت ملوك انا حجيت : ياسر عمي كض ادية اخيك و اخذ اشتريله وياك .

ملوك : شنهي السالفة فخرية جفلتني وتكلي سالفة جايدة شنهو الصاير ؟

- كوة كاض باعصابي وجاي اصبر بروحي خاطر اكضم غيضي و ما اتهور .. صكي الباب و كعدي احجيلج المصيبة

- ادخيلك ربي

سدت الباب و تكربت : شنهي السالفة

- وكت الجنت شيخة هاذ البيت جانت الدودة ما تمر الا بعلمج .. شنهو الصار وعامية عيونج اعلى نسوان ولدج .. نايمة ورجليج بالشمس و الماي تجري حدرج و انت مالج خبر بيها ليما تطينت روسنا ، بسبتج و بسبة ولدج الغمان .

- شمالك احجي وياي عدل خاطر افهم شنهو الصاير .

- اغيبن سنه وارد ومحد بحالي الكل مستوطن بيتي و عايشين بخيري ولا واحد بيكم هامه غيبتي و ساعة الاردن بس بلواكم اعلى راسي .

- جا راح تظل شچاي و ما افهم منك .. انطك وكلي شنعي السالفة تراك وهدنت حالي .

- جنتج تهرم يملووك ، جنتج ليلية تك*** وانت نايمة و الماي حدرج ... جنتج مطينه روسنا و انت لاهية بعمي طلع يو ما طلع ، جنتج مبتلشه بوحيد حزبي و انت مووووش داريه .

لطمت اعلى خدها : يمه دهر الدهرنا .. ياهي هاي .

- جم كاولية ذبوها ولدج اعلى افادنا .. انا بمصايبكم شعمل .. اجتلها و افضح اخوي و واهدن حاله .. يو شنهي الاسوي .. بوكاحة عين تكلي بتي ما اطيها و تطيني بيت و ساندة ظهرها بحزبي .. انا شسوي بهالحااااال كليلي.

- دينار ! ما تلفي ولا تجي ليجاي .. جم مرة ندهت اعليها ما تجي عازله روحها خافن نسمعها جلمة يو نغثها بجلمة كاولية .. وانا ما زايغه عيني عنها .. يومية اتفكدها .

- يومية ومهرمه براس ابنج.

- ادخيلك ربي .. منين عرفت شنهي السالفة احجيلي خاطر افهم .. راسي اندار

حجت وربعت بالكاع و ادك اعلى رجلها ، سولفت الها كامت تلوب و تكلي : اجتلها وذبها بالجول بليلة ظلمة

- ان جان الجتل اسهل ما عدج انا ابن اصول .. و الجتل موش ثوب الاجواد .. امشي ليها و تصرفي وياها و خليها تحضر روحها الليلة تطلع من السلف .

حجيتها و كمت مجاني خاطر تطلع ،فكيت الباب .. مرت من جدامي فخرية : ها خوية الجهال وينهم

تعديتها و ما حجيت وياها .. طلعت من البيت ورحت للمضيف ، كعدت ويا عمي و كلت له هيج و هيج السالفة شير علي

- اجتلها و ذبها ابعيد عنا

- عمي اسوالف الثار و غسل العار و الجتل ما احبنها .. انا زلمه دارس شرايع الدين وقاري القرأن من الجلد للجلد بيا شرع اجتلنها ؟ المرة مهددها ومفكر هي جاي تحمينا بفعلتها الردية .. و انا بس رايد ابعدنها ما اريد الطخ ادي بدمها .

- المرة التشد راسها و تتشرط اعليك لزوم هاي شادة ظهرها و يو ما لويتها تلاويك.

- و الراي ؟

- تجتلها .

- و غير الجتل ؟

- مامش .

تنهدت و كمت اعلى حيلي و طلعت من المضيف .. اخ يا بويه اخ .. حملك كسر ظهري .. ربيت ابغداد و اربيت بين الحضر وتعودت اعلى اطباعهم وشلتني و ذبيتني بهالسلف و يو تجتل يو ينغلب اعلى امرك و ينكسر ظهرك ..

خنجر : ها الله يكويك

- يكوي بختك .. شسويت ؟

- وصيت الربع يحضرون بيت خارج السلف تكعد بيه ليما ادبر امرها.

- ممتاز . عينك ما تفارج البستان و البيت .. خوش

- تامر .

مشيت عنه و خطيت جدامي للشط خاطر اجرن النفس بهداي و ابعيد عن طلايب هالوادم الخانكه اعلى افادي ، كعدت و انا اجيبنها منا و اردنها منا ابالي .

انا ما اكدر اجتل نفس ابنادم .. ولا اكدر الوث ايدي بدم احد .. و يو ما جتلتها اخافن تتحايل اعلينا خاطر ترد بتها ومن سابع المستحيلات اخلي بتنا تربى عد هيج مرة ، و يو عفتها و درى كريم يتوهدن ويا الحزبيه .. دخيلك ربي لا تحير عبدك .

هدية : من يوم العزليت لوحيدي ابيت .. كمت اجيبن الماي من الشط من كون الشطر اكرب ليه للشارع من بيت ابوي و الزرع و الحفر البالبستان، اغسل اعلى الشط و اترس و اردن .. مشيت هالساع خاطر اجيبن ماي كبل لا يچلچل الليل ..

و نعلي ( وجان ) اشوفن سرحان من ابعيد .. جويعد اعلى الشط .. ما صدكيت عيوني كمت اوجد ازود خاطر اعاين عدل .. والله هو .

دمعت عيوني ساعة الشفته سالم جدامي

ردت اتكرب لجن اعرف روحي يو حجيت ابجي ، انداريت امش بلا ما يهيسني ..

بس فلاح بالبيت و يو رديت ومامش ماي ، هسه يكلي جا المن رحتي و المن اجيتي و ادش بسين و جيم ما تخلص وهو شكوكي .

مشيت ليغادي و دنجيت للماي اترس ، صد هو وشافاني .. حجه : الله يساعدج بويه ، شنهي جلمة الحمد لله اعلى السلامة ثكلت يهدوة .

- ياهو سرحان .. جا انا ما شفتك ، الحمد لله اعلى سلامتك خوية ، وعلي فرحت ساعة العرفت انت رديت وما اجيت اباركلك من كون تعرف وضعي .

كام اعلى حيله و هو يتحسر و مر من عدي و حجه : الكل عايش .. الكل ..... ولا واحد من الاودنهم ناكصه غيابي .. لجن يا حيف يوم الاحضر بس جلمة الحك يسرحان ويو غبت الكل يعيش ويشوف دربه، و انا الغريب المالي احد يلحك ليه .

هدية : مكسور الجناح ما ينعتب اعليه يو راف بحضن اعداه من كون يو شما راد يطير و يعلى عن اليضدونه .. ينلوي جناحه و يغصبه زمانه اعلى النصيب و يدنج راسه ليهم .. وانا مكسورة جنح يبو مأمون .

- بعدهن جلماتج يو صفيتيهن يطيبن الفاد .. جنهن دوا .

- شنهي فايدة البلبل يو غرد و هو مسجون بكفص وماله احد اليفهم رطنه .. احنا ما عايشين حياتنا مثل الخلك .. انام و نكعد هلبت يكضي يوم بعد يوم ونفتك من هالدنيا ونمش لمنايانا .

ما اريدن اطول الوكفة وياك يبو مأمون عبن تعرف وضعي .

- مرخوصة بامان الله .

تعدتني و مشت عن و هي تشيل جدر الماي اعلى متنها .. تنهدت .. ما حجت الا الحك .. انام و نكعد خاطر نخلص هالدنيا ونفتك منها .

هدية : رديت و انا اتضعضت احوالي و كلبي يخفك والحرارة لابت بلشتي ووجرت .. دشيت البيت شايطة حطيت الماي و دخلت الحجرة

فليح حاط راسه ابطن الكومدي .. حجيت : ها شعدك تبحوش؟

جفل و اندار علي : الثهب هاث مالمن ؟

- تراجي ذهب جابتهن امي الي و لبتي وذنيج دلاعات وصلن بيهن صويحبات امي ، شعدك اداور اعليهن ؟

- هيج بث نثدت ما عدي ثي .

- جا خوش كض البت خاطر ازهب العشا وافضنه .

شالها وكعد بيها بالباب و انا كعدت عد الجولة اسوي العشا ، دش علي : ياله فثيها بتج تبجي ، ثني هاذ الدخان راح تخنكينا .

- جا تشوفني العب .. كضها واكف غاد

لوعاني بالحجي و الملحة ليما فضيت العشا و حطيته جدامه ، و طلعت الجولة برا الحجرة و كعد ياكل ، توا كعد طفت الكهرباء.

شلت بتي اعلى متني ورحت شعلت الفانوص و جبته ليه خاطر يتعشى : جا ثني ما تاكلين ؟

- ما اشتهي الزاد اريدن ارضع البت و انومنها خاطر اكومن لشغلي .

اكل هو و خلص و كال : انا اروحن لبيت اهلي ما اجي الليلة.

- خوش

- ثركي الباب

- دياله روح

طلع سركيت الباب و كوه امش بطني تعبني حملها .. رديت غطيت بتي بجرجف خافن لا توصلها حرمس يو دود يكرصها .. وخذيت الصحون ليغادين خضيتهن و خليتهن اعلى كتر و فرشتلي فريش اباب حجرتي و حطيت الفانوص احذاي و جبت السعفات الذم بيهن و اسويهن مهفات مالت سعف ..

اشتغل و بالي جارخ بغير مجان ووشما اضكر الله و اتعوذ الشيطان خاطر لا افكر بزماني الفات ، اردن و الاكي روحي اتسلى بذكر ذيج الايام .

خلصيت مهفايتين .. حطيتهن اعلى كتر و كمت ودشيت داخل ذبيت الوسادة لصف بتي خاطر اتمدد ، صدت عيني بالكومدي مفتوح .

خذيت اافانوص و تكربيت خاطر اتفكد ذهباتي .. فكيت الكومدي ادور ادور .. ونعلي ما الكاهن : يمه ءهلاه مامش غير فليح النذل الاخذ ذهباتي ، خل اتلاحكله كبل لا يبيعهن.

جريت عباتي من ورا الباب ونصيت الفانوص وحطيته اعلى كتر و شلت بتي اعلى افادي و طلعت لبيت اهله و نعله مامش !!

لابت روحي ووجرت .. الردي لحكني اعلى ذهبات امي .. و علي ما اسكت انا شمحصله منه المسواك من اهلي ناكصتي وزايدتي اعلى اهلي و هو خلك چرچوبة احذاي .

ردت اروحن لاهلي و ابوي موجود و اخليه يكضه ويبيس بيه .. لجن تعوذيت ابليس ورديت البيت مالي خلك طلايب .

...

سرحان : دشيت اعلى بيت كريم .. ملوك ماخذة البت من عدها و المرة تنحب و تتوسل .. وراديون واكفة .. كعدت مدنج و ناطر الساعة تصير ال٢ خاطر تطلع .

تكربت احذاي و كالتلي : بتي لا تحرمني منها .. احبن اجدامك لا تحرمني ، اجتلوني ولا تحرموني من بتي .

صديت عنها ، جرتها ملوك و هي تفشر عليها: ساعة الوسديتي ويا زلمه غير زلمتج ما فكريتي بحال بتج و رجلج .. كامت تجر بيه و اطكها وراديون وياها .

دخلنها للحجرة .. وانا كاعد .. صارت الساعة ٢ الا ربع .. كمت ليها و حجيت : رايدة تموتين جتلي حالج انا ما اكضنج ولا الي غرض بيج .. رايدة تعيشين وتريدين بتج تعيش وياج كطنه و اشلعيها من اذنج ، انجوم السما اكربلج .. راح اكعدنج ابيت برا السلف .. يو كربيتي و رديتي ساعتها وعلي الموت احكنه اعليج و ما يرفلي جفن .. ادورين اهلج تشتغلين شلون ما تعيشين تعيشين انا مالي غرض بيج كل الاكدر عليه اسكنج ابيت ٦ اشهر بعدها البيت يرد الصاحبه و انت دوريلج اليلفيج بعيد عنه ... خوش .

- بتي

- البت الخنتي ابوها ما الج حك بيها لا تجيبينها اعلى السانج .

- ترضع ما تكدر بلياي والله .. عوفها فدوة اغديلك احب اجدامك .

درت عنها وانا اتنهد .. وملوك وراديون يغلطن عليها و يتعاركن وياها .. تنهدت .. ورديت درت الها : حد البت وياج ليما تنفطم .. بعدها ترد .. و كريم مامش غير جلمة ( دينار شردت من البيت ) تنكاله .. و يو رديتي مرت الأخرى ما تلومين الا روحج .

من سمعت هيج طاحت اعلى اجدامي تحبهن .. بعدت عنها و صحت : رايدون خلها تلبس عباتها و تطلع ، خنجر ناطرها بالسيارة .

مشيت وكربت ملوك ليه و كالت : تطيها البت و تخليها تمش .

- البت ترضع

- حليبها النكس ما نهواه احنا نرضع البت .. ولا تطيها.

- من كونها نكسه و حليبها نكس جا فتحيتي عيونج اعلى بيت ابنج و الافضل يو كاعده عدها بدل ما مجابله فاضل خوفن ياخذ الكصر و تظلين .. ميلي عني .

طلعت و هي لبست عباتها و طلعت من البيت ، صعدت ويا خنجر .. وطلعت الساعة ٢ وشوية .

ومشيت لبيتي رديت ، دشيت حجرتي لاكيت بت عمي : ها بويه شعدج هنا

- اجيت اغطي الجهال خافنهم يستبردون .

- الجو موش بارد و الجهال نايمين بامان الله ، استراحي بويه ولا تشيلين همهم .

- تامر

اندارت خاطر تطلع .. و انا نزعت العكال من راسي و كمت افتح بدكم دشداشتي .. ندارت علي : عدك وكت يو ردت احجي وياك

- يا حجي هاذ بهالوكت خوية .

- انا ابوي كالي اطاني الك .. و انا ما عدي مانع و جهالك جهالي .. بس.

- الحجي موش وكته ، من رخصتج باجر نحج .. دايخ ونعسان كلش .

- بالنهار ما اكدر الاكيك لوحيدك و احاجيك.

تنهدت : كربي

كعدت اعلى القريوله و هي كعدت اعلى السكملي جدامي : اسمعي بويه انا وحيد ما ينحمل وجاف وما احوي مرة ولا اعرف الاشيها .. و الماتت ما ماتت من صدام كثر ما موتتها بقهري .. جانت عايشة وناطرة الجلمة التطلع من الساني ، لا بيوم غازليتها ولا بيوم لان كلبي الها و طاوعيتها .. هذا انا وهاي اطباعي ما انخبط ويا مرة .. ويو ردت اعرس مرت الاخرى .. فبس لخاطر اولادي اجيبلهم التداريهم .. تكدرين تنذرين روحج الهم و لمداراتهم .. احطنج اعلى راسي .. ما تكدرين انت مخيرة مامش احد يجبرج و ان جان عمي اطاج بالديوان .

- لا انا ما عدي كل مانع احطنهم اعلى راسي و اداريهم بعيوني .

- الله يطيج العافية .

حجيتها و كمت اعدل بولادي و افكن بالجرجف خاطر انامن احذاهم ، درت و الاكيها جويعده بمچانها : هكو بلسانج حچوة مستحية تكولينها .. احجي ؟

- ها لاله لا .. ما عدي شي .

كامت طلعت بساع ، توسديت فراشي ونمت .

چلچل الليل و كلمن توسد همه ونام .

الصبح فزوا حاكم و كواغد اعلى حس جمارة و هي تنده باهلها .. جدتها كامت تشخر و تطلع الزباد من حلكها وتنده بيها وما تكعد .

تراكضو حاكم و كواغد شالوها و طلعو بيها للمستشفى .. و جمارة لبست هدومها و طلعت للمدرسة .

جاي تمشي مر خنجر بسيارة سرحان : ها ولج جلجول

- هلا عمي .

- شني هااااي حجاب و صايرة مرة

- هو انا بكيفي جا غير ما يرضى الا البس الحجاب و اروحن للمدرسة والا يبطلني .

- لا جا حكه .. الحجاب ستر للبت و يطلعها حليوة مثل ما هسه انت طالعة احليوة .

- صكد عمي يعني انا حلوة

- اي وعلي طالعة حلوة

شو هاي ركضي و صعدي بالسيارة : ها بويه شني هالميانة الزفرة

- وصلني للمدرسة

- اناااا اخوك .. سايك الخلفوج و اوصلنج

- شمالك عمي هي هاي وينها ، دمشي

- اي امشي بويه امشي جا هي سيارة الخلفونا .. ولو سريحان يو درى موصلج و بيج ريحة ذولاك الناس ، يطني حبة فوك التوصيلة.

- جا ما فهمت

- اي لا تفهمين هو الاحسن ..

لاف السيارة و رد يوصلها للسيارة .

- عمي يعني هسه انا صرت مرة ؟

- نص ونص بعدج ما مستوية

- شني جدر باجه انا عمي

- لا يعني بعد ينرادلج شواي و تصيرين مرة

- اي خوش .. انا اكلل لابوي يصبغ حجرتك .. منا لمن اصيرن مرة .

- ونعرررررررررس العب.

حجاها وانا فجيت حلكي اضحك مستحيه ، اندار : شو خفت حسج ، خايبين والله جنها البت صكد ابالها .

ظليت اعاينله اضحك .. نشدني : يا صف انت ؟

-خامس

- حيييل جا ما اخذج

- عليش

- انا اريدن وحدة دكتورة .. موش صف خامس

- جا غير ادرس و اصيرن دكتورة .

- هاا يعني ادرسين زين و تصيرين دكتورة

- اي وعلي انا ادرس

- اذا ما درستي و صرتي دكتورة تره ما اخذج .. خوش ؟

ظليت صافنه ... جا انا بعدني صف خامس ليمتها اظلن ياله نعرس .. درت لي : شني عمي هديوة موش اكبر مني بثلث اسنين و عرست ، يعني بعد ثلث سنوات و نعرس .

- جا انا شلي غرض بهديوة انا اريدن وحدة دكتورة .. هديوة دكتورة ؟

- لا

- انت دكتورة

- جا بعدني خامس

- اي ليما تدرسين و تصيرين دكتورة ياله اعرس و اذا ما صرتي اخذ غيرج .

- لا وعلي ادرس .

- هههههههههههههههههههههه جا خوش يله ، سايك الخلفوج بالخدمة يا بت المطي ، انزلي ياله .

- عمي والله انت مسودن

حجتها و نزلت وصفكت الباب ردفها :

- بت المسودن اعوينة ابيج لابو ثجيل وياج واحد واحد .

عافته ومشت و هو ضل يضحك .. داور السيارة و مشى.

هديوة : صحيت الصبح طلعت للكاع خاطر اكلل لامي تروح لبيت فليح هلبت تكدر تجيبلي ذهباتي .. بس طلعت و مامي مامش !

موش عوايدها تهد الكاع هالوكت من كون طالعة الشمس، تمشيت للبيت .. و نعلها لاله تكلي : جدتج تخربطت و شالوها للمستشفى .

- سلامات ؟

- تخربطت بالليل وخذوها

- جا انا اطلع للحلال بمجان امي ومناك اروحن للكاع ، تخلين بنيتي عدج

- يساعة المباركة جيبيها احطنها بكلبي

-هاج حطيها وين ما تحطينها .. خلني امش .

ذبيت بتي وطلعت بمجان امي .. الضحى و نعلي اشوفن فليح يتسرسح اعلى البيت ..

ركضت ليه ويا ما دش انا لفيت اعلى راسه : ذهباتي وينهن فلييييح

- جا انا ثمدريني بيهن

-عدك لا تنكر ..

-ميلي عني

- لا ما اميل تطني ذهباتي لا وعلي اروحن اكلل لابوي واهو ياخذهن منك

- ثني انت تهاددين ؟

- اطني ذهباتي ياله

- ما عدي

- شني ما عدك انا ضامتهن بالكومدي ومامش غيرك نشدتني عنهن امس و فكدتهن بساعتها .. يو طالعة اكولن حرامي بس انا ما طلعت وبساع تفكدتتهن مامش غيرك .

دفعني عنه و هو يكلي : دوخيتيني ميلي عنيييي

وكام طلع من البيت طلع وراه و انا موزرة بعباتي لحكته اصيحن ما يرد علي وصلت للشارع و هو عبر لذاك الصوب .. تفلت وراه : تف الله لا يطيج بجاه الحسين ، من عبن عادم حياتي ..

توني جاي اردن و نعلي اسمع حس امي و هي تصرخ .. و اركض ليهم و عرفت حبوبتي ماتت ، لاكيت امي و انا اصرخ و ادكن اعلى راسي ..

التم السلف و الناس كلها التمت بالبيت عدنا ...

خوالي و عمامي و ال ثجيل كلهم بخويطهم .. وال ضاحي و صارت هوسة .

حيلي اذاناني ابوي ساعة الشفته حاضن تابوتها و ينحب ويصيح : يا يمه .

شالوها و شدو التبابوت بالسيارة

راحوا بالدفنة امي ومرت عمي وكرايب حبوبتي .. و انا ظليت بالفاتحة الاجي النسوان الدش انا و نسوان خوالي.

لليل ردت امي غادية تراب .. هي صكد حبوبتي بس امي جانت تودها و متعودة عليها ومامش بت الها غير امي .. صارت هي جنتها و هي بتها ساعة يتعاركن و ساعة لاخ يتصاحبن و يا محلاهن .

كرايبنا جثيرين من السلف وسدوا ابيتنا ونامو .. والبيت انترس و الفاتحة منصوبه غادي .

كلت هسه انا شموازيني اعلى هالحصرة خلني امش لبيتي اناملي شواي و اردن الفجر لامي واكض الفاتحة ، خذيت بتي و طلعت لبيتي .

افكن بالباب ما ينرد ..

انا ما مسركيته جا ياهو المسركي من الداخل .. خافن فليح جاي نايم هنا .. جا موش اليوم حطة مرته الاخرى يبات عدها شو جاي عدي ..

كمت ادكن بالباب، ادك ادك مامش احد ... يا جا الباب عليش مصكوك ؟

كمت ادكن حيلي وحس الدك عالي ، صاح فليح : ياااااهو

- يا رايت الله بيضة من كعدت شني ميت دفك الباب ادي راحن من الدك .. افتح

- انت موث كلتي اباتن عد اهلي .

- خاب دفك الباب هو انا ايدي بايدة من اللطم و بتك هاسمنها اعلى افادي دفك ... يااااااع دفك الباب .

- ردي للفاتحة الباب ما ينفك روحي اريدن انامن

- هو شني ما ينفك اعلى كيفك جا غير بيتي تطردني منه ، دفك الباااب .

- ما افكن روحي .

نزلت بتي للكاع وكفتها و جريت عودة و حطيت رجلي اعلى نص الباب بيه حديدة واتشلبه خاطر اچرخ السركي بالعودة .

وانا اعلى الباب .. چرخ السركي بيدهو انفك الباب .. نزلت و انا ادردم : شني شمالك ..صالي ساعة اكلك فك .

هو فك الباب ودش جوا ، بطرك الفانيلة البيضه و اللباس الابيض الواصل لحد اركبه .. و ادشن و الكه بت لابسه هدومها مكلوب .. و ملابسها الداخلية مطشرات بالكاع ووالحجرة عينك وما تشوف من الهوسة .

عاينتله : هاي ياهي

- هاي وحدة هجي

- تجيب كحا** فليح .. انا اهلي معزايين و حبوبتي ميته و انت تجيب كحا***** للبيت

جرت العباية و حطتها اعلى راسها .. وكربيت منها : تعاي جاي دايسة بيتي وتريدين اطلعي بأمان الله.

واذبن روحي عليها و اطيحن فوكها .. لا خليت الها شعر ولا عض ما عضيتها .. لعبت بحالها لعب و فليح يجر بيه منها و انا افشر .

كامت مني ونعلها ترجيتي الجابتها امي تلمع بذنها و انا تسودنيت : تطي ذهبااااااااتي للكحااااااااااااااا** ... ولج يمممممممه ، ءهلا يالوادم ءهلاااااااااااا ، خايبين تعاااااااااالو ليه ... دايس بيت و جايب كح*** و يلبسهن بذهباتي ... وينج احبيبة يمه .

جرني و انا اصيح ذيج شردت و هو كام يطكني .. جابني بطكه اعلى عين اهيس عيمي طفت و ما اعرف الطك منين يجي .. تولاني وليه .

ليما خويت و طحت .

ما فكيت عيني الا بعد ساعة اعلى حس بتي ناطة من البجي ، تجيت روحي كوة و انا جريتها الي ضميتها لحضني .. و كمت ابجي و انحب اعلى روحي واعلى الساعة الرديت بيها لفليح الردي .

البت تعاين بوجهي وظن تشوفني ابجي تكوم تصرخ .. حطيت صدري بحلكها و انا خاوية و ابجي بهداي : وينك بوية تعال ليه ... يمن عساني متت ولا رديت لفليح .

وانا كاعدة كمت اهيس مايات تنزل علي .. ظليت جويعدة بمجاني ليما نامت بتي ، حطيتها ولفيتها بعباتي ونامت ، كضيت الحايط و كمت امشي كوة لشتي كلها تون .

رحت غسلت و اهيس هكو وجع كضني .. و الغرخ كلساع يتحرك ابطني لجن هالساع خفت لا حس ولا نفس ..

من الصبح ليجاي ساعة ما حطيت ولا كعدت ..

ويا فجت عيني طلعت لهلي حلبت الهوش و رحت للكاع اشتغل بيها و من اجا علم حبوبتي لاجيت امي و دچيت وياها .. و لاجيت النسوان و شلت الفاتحة اعلى راسي وما اكولن انا حبلة اشيل و انعثل وختمتها ويا فليح ... وهاذ حالي .. دخيلك يا علي بس لا الفرررخ مالي مات.

ظليت اصبر بروحي و تغوسلت وشربت ماي تمددت يم بتي هلبت استراح و ظهري يعدل و يخف الألم و الفرخ ما بي شي .. لجن الوجع يزيد ما ينكص .

للفجر ما نمت كمت خذيت بنيتي و مشيت لبيت ابوي ، اول ما دشيت .. لاكتني : ها يمه اهديوة شماله وجهج .. ياهو الطاكج .

- طحت بحضنها ابجي ... التمن علي نسوان خوالي بايتات عدنا .. و يسرى و ايمان ولاله .. و انا حاضنه امي وابجي و هي تكلي : فليح طاكج احجي .

يسرى: يا فليح عد اهلي بايت

هدية : لا يمه موش فليح طحت وتبربدت .. و هساه المايات تنزل علي و الوجع كاضني .

كواغد : يااااع خايبة بعدج السابع ما داخلته شنهي ولج مايات .

- يمه راح اموتن

- خايبة وحيدة منجن تطلع تنده لبو ستار كلله هديوة مالومه

ركضت جمارة لابوي : بويه بويه .. هو توه جاي يترس ماي للفاتحة

- نصي حسج جميرة بويه جا انت كبرتي .

- بويه هديوة راح تموت

طاحت الدولكة من ايده : شمااااالها ؟

- ما تدري تكول طحت تعاااال

ركض و اجاني : ها بويه هديوة

اعلى حس ابوي العالي النسوان انتبهن وكلهن كربن يريدين يعرفن شمالني .. ما حجيت ولا كلت فليح طكاني .. حتى يو هو نذل زحمة اورج الوادم اعلى بلواي وفضايح رجلي .. شكللهم لكيت جايب وحدة لبيتي و ملبسها ذهباتي .. ظليت بس ابجي و اشجي لبوي .. و ابوي طلع فازع خاطر ياجر سيارة ويجيني .

و يسرى تكللهن : طاحت وتبربدت .. جا هي كل وكتها ها ها ها ما تكعد .. نكللها كعدي هيدي ولج انت حبله ما تستجن ليما هالفرخ ما ندري طاح بعد ما نعرف .

يو بيه حيل جا كمت نمت بخوانيكها لجن مالومة ، امي لفت شيلتها ولبست عباتها و اطت بتي الاله . و مشتني طلعتني ليما وصلوني هي و ابوي يسيارة حمل للجدة ..

ونعلها الجدة تكلي الفرخ نازل وعدج ولادة

كواغد : ولادتيش دية السابع ما داخلته هي ، تحجين صكد يو تشاقين .

- ديه البت تطلك شني تشاقين، يو ظلت تدفع و ما تجيب يطك عدها الرحم و تموت غير

- يمه دخيلك يحماي الحما .. ها يبو خيمة الزرگة .

طلعت امي لابوي و هي تكله : عدها ولادة

- ولادة شنهي شكثر عليها

- يا بعدها السادس

- انا عدي فاتحه ولزوم اردن هسه شني تجيب يو شنهي

- جا انا الفارغة يبو ستار عفت بيتي مهدود و الفاتحة كايمة .. لجن البت سالفتها موش خالية ، عود طاحت و تبربدت كلش ما خشت عكلي .. بتي هديوة و اعرفنها مطكوكه .

- فليح طاكها

- مامش غيره هالنذل لجن الحجي موش وكته تفض الفاتح ونعرف شنهي السالفة ، رد انت و دز ناصر ومرته ليه .. الا اخسرنهم فلوس الجدة و علي فلس ما ادفع .

دشيت داخل لبتي و هديوة تصرخ و الجدة تحاول وياها .. و الفرخ لين .. موش مالت ولادة .. وصعبت و انا ها يبو الحسن ها .. دخيلك .. ها يم البنين .. وما خليت وحيد من الأيمه ما حطيته و نذرته من كون تطلع بنيتي سالمة .

اجت مرت نويصر و انا اذبن الحجي من اطراف خشمي اعليها من كون موش متاكدة ابنها ورة طيحة اهديوة يو مو هو .. بس المرته طاحت وما اجا لزوم هو ورة السالفة ..

و صعبت حالتها و كام الدم يفيض من البت و الجدة تطي بهالابر و ترد ليوره ، خايب كتله : دية دخيل بختج جا كلبتيها منخل .. المرة راح تموت .

- وانا ياهو ماتي .. العلي جاي اسويه

- العليج شنهي .. كليلنا البت تكدريلها يو اخذنها

- اخذيها جا ياهو الكاضج ، يو ماتت انا ما اتحمل مسوليتها .

- عليش اخذنها و اموتنها .. جيبيها و خلنا نمش

- النزف ما جاي يوكف ... اخذيها وروحي للمستشفى تلاحكيلها و يو حاجوج لا تكليلهم جانت عد الجدة ولا تجيبين سيرتي .. مالي حيل يطبون علي الامن وياخذوني انا ورجلي من وراج ومن وره بتج .

- ياااااع مت عينج كون .. لجن وعلي يو صار ابتي شي موش بس ابلغ الامن والعباس اشيلكم منا رفسات واشوفكم شلون تلعبون بالوادم يالماتخافون من الله .

عنت بنيتي و شلتها و زمخت بمرت نويصر خاطر توكفلنا سيارة ، وكفت سيارة صعدنا للمستشفى ، وصلنا .. جريت بتي و نزلت .. و ظلت تصيح وراي : يااا ام ستار جا انا ما شايله وياي .

عفتها تهذري و دشيت للمستشفى .. ساعة الشافوها تنزف .. جرولها سديه حطوها و طارو بيها .. و انا اهفة بعباتي وراهم.

ليما دشت اعلى الدكتورة كالت : رايحة جدة

- اي والله مدري شتمعمرت بالبت و خلت هاذ حالها

-شنو من ام انت المرة راح تموت و انت ماخذتها جدة شنو احنا هنا نبيع مخضر لو مستشفى.. المن مفتحين و تركضن للجدة و تذبن بهالفلوس و ساعة الوصلتن هالحالت تذكرتن اكو مستشفى

- يمه يو شايفة البت و دايرة حالتها جا هسه طابت اعلى حجيج هاذ انا اشمن ايدي ، طاحت علي و الجدة احذاي درت ليها ووديتها وانا معزاية امس توفت عمتي مت عيني عليها.

- فوك ما مسوية بحالتها هيج و تحجين بالراهي اخذيها و اطلعي .

- ياهي هاي التاخذها و تطلع ، شني يمه مدخلتها ابيتج يو موكلتها من زادج .. شو المستشفى مالت الحكومه وراتبج تاخذينه من الحكومة مانه اعلينا و تحجين من كفا خشمج عليييش .

- ما اعاينها و لو تموت .. احنا ما مسؤلين بيها

- جا يو ماتت و محد معاينها غير المستشفى اهدنها فوك روسكم و العباس ، غصبا ما عنج تعاينينها .. من تكولين مفتحين مستشفى ياله شوفي شغلج و عايني دامج موش بياعة خضرة .

ونعلها تصيح الامن و تكلهم طردوها ، خاب كتلهم البي خير يكرب و يطخني الا اسويله عرس هنا و اكلب ال ثجيل بخويطهم وعلي تداوولي بتي يو تخلوني اهدن هالمستشفى فوك روسكم .

حجه الشرطي : حجية الحجي هاذ ما يجوز .. اتفضلي برا لو سمحتي

- لا اسمح ولا تسمح خايب بتي راح تموت و انت كلي اسمحي .. داوووها .

التمو الدكاترة و الامن و الناس و هم يريدون يطلعوني و هي تكللهم : طلعوها هي ومريضتها برا .. وانا توليتهم ( خايبين ءهلاه ءهلاه وين الريييييييس عنا يممممممه مرة تموت ومحد بحالها .. وين اهل الرحم وينهم)

انخبصت المستشفى خبص حتى رئيس المستشفى نزل و امرهم يحولون هديوة للطواري .. ودكتورتين يشرفون اعلى حالتها .. و اجا تعذر مني و يكلي : حجية انت بس اعصابج ما يصير تحجين هيج ويا الدكتورة .

- انا الحاجية يو هي التحاجيني من كفاها .. شني موش بمغامها يو ما اناسبها .. من كونها حضيريه و ما تناسب الريف عليش اشتغلت دكتورة بوسطنا وتلم فلوس ويو كبلها وحيد منا نترته و طردته من كونه ما يناسب مغامها .. شنهي يمه وليه هي .

حجيتها ومشيت عنهم دشيت للطواري خاطر اشوفن اهديوة .. و امشي بزودي وعلي ما يخلون وحيد يدش لصالة الولادة و انا من كون واحد كربني وكضاني اعاين الوادم تتحاشاني و انا موش امشي .. من احطن رجلي الا الكاع تجدح من العصبية و النار الموجرة بفادي اعلى بتي و من هالدكتورة الغمة هاي .

دشيت جوا و تلاكيت ويا الدكتور .. خاب كتلها : يمه بنيتي هديوة وينها

- بتج منو ؟

- جا موش اكللج هديوة جا بعد شكولن

- اسمها الكامل حجية .. شنو حالتها .. شكد عليها ..

- اسمها (هدية حاكم خضير) حبلى بالسادس وعدها ولادة .

- هااا .. بتج راح يحولونها عملية

- يا ستير يا يمة .. عملتيش هاي

- فتح بطن

- تفتحون بطن بتيييي ياااع جا غير اطك و تموت .. شني رايدن تموتون بتي

- لا حجية نموتها شنو .. البنية عدها نزف و الرحم ما يتحمل لازم نجري العملية بسرعة و نطلع الطفل منها حتى تعيش .

- جا وهسه

- هسه تطلعين تجيبيلها دم

- منين اجيبن

- اسألي ابو الاستعلامات و هم يكلولج .

طلعت ووحيدي اهفي مرت نويصر اظنن ماتت من عرفت فلوس التكسي طاحت اعليها ، وكفت يم واحد حاطله حاجووز وكاعد

دنجيت ليه : الله يكويك يمه

- هلا حجية

- يمه اريدن دم منين اجيبن

- دم شني غير تجيبين ورقة .. بيها الفصيلة و الحالة ..

- والله يمه انا ما اعرف علي العباس اجدامي توذرني من امس ليجاي جنت دفانه بالنجف و اجيت ما نمتلي سويعة .

- استراحي حجية هنا و انا راح اكلل للولد هاذ يروح يشوف شنهي و هو يكضيها

- يبعد امك يطيك العافية كون بجاه الحسين .

اطيته اسمه هديوة وكعدت و الولد راح جابلي كاغد مدري شمشخبطين بيه و دلاني وين اروحن .. رحت ليغادي .. واطيتهم الكاغد .

ونعله يكلي دمها O+ .. جيبيلنا متبرع .

- شني يمه مفتحة جامع و اجيبلك متبرع ..

ما رد علي شمالهم ذول لا والحظ من حظي اي والله ، مشيت و مجان وسيع بي ازلام جثير .. صحت : يمه اريدن دم ياهو العده دم .. بتي راح تموت وتريد دم .

ونعلهم كلها تصيح : عد عيناج حجيه

و هاذ يكلي شنهي الزمرة .. و الاخر يصيح شنهي دمها ولنهم يلتمون علي .. كتلهم: ما ادري هاي الوريقة .

صاحو : اووو موجب ياهو دمه اووو

كامو زلمه جثيرة خذت منهم وحيد ورحت ليغادي لجن مت عيني عليه كاضي غادي عود .. منين راح يطي الدم وهو وجه كركم ؟

- خايب يمه من فدوة اغديلك يبعد حيلي اخافن ما بيك دم ييمه و اطيح و اتوهدن وانا امك موش عايزة مصيبة لخرى اطيح اعلى راسي .

ضحك والثاني يكلي : روحي استراحي حجية الدم احنا راح نحوله .

- جا خوش

مشيت رديت اتاني هلبت يجي وحيد من اهلنا يو يكلولي هديوة شحالها .. لهناااك و اجا ناصر .. كال : شنهي شو طولتو

- يطيك العافية عجبتنا المستشفى و توسديناها ، جا غير البت ميته و فاكين بطنها و جاي يتمعمرون بيها .

ناصر : هي ولادة شلكم بهالسوالف هاي

- خاب انا روحيني نايمة بخشمي من كوني اتعيبانه و جاية اعلى عمه عيوني لجن وعلي يو دريت فليح ورى طيحتها هاي لنلعب بحاله لعب و العباس

- خو مامش مصيبة ما تذبنها براس فليح ساعة السودة الناسباكم و ابتلش ابتكم .

- يا كلاب الدنيا اي والله .. ساعة سودة اعلينا من فضحتها انت ومرتك و طيحتو هالردي ابنك ابراسها و ابتلت بيه و ببطلات العرك مالته .

- جا راح تظلين تفتحين دفاتر عتيجة

- من كونها عتيجه لا تفكها و تلجم صوابنا و تذكرنا بذاك اليوم الاكشر .

سكت و مشى ليغادي و انا يو ما اخافن الله جا غميته لجن ما يسوى ذنب يتسجل اعليه بسبته .

لهناك و طلعو هديوة مت عيني اعليها و انا فزيت ليها .. حطوها بحجرة و هي تون و تنوح و تصيح : ولج يممممه باك ذهباتي يمه .

- ياااع ياهو الباك ذهباتج

- فليح ابو اللثك يمه .. لكيته مطبب كح*** ابيتي و حاط ذهباتي الجابتهن امي ليه بذانها و طكااااني .

- ياااع ... نويصر ... نويصر .. تعال اسمع

- شنهي ؟

- ابنك بايك الذهبات و مطبب كح** لبيتها و طاكها و جاتلها

- البت نايمه و جاي تهذري .. شني انت تصكديها و هي بهالحال

- بتي ما تجذب .. وين حويكم وين اليوم يكض فليح و يرد للنجف يدفنه يم امه ... وين يحويييييكم تعاااال ليه .

جا غير بهالحال و يطب سرحان اعلينا للمستشفى هو و امه و يكول : ها الله يساعدهم ....

رواية كحل عرب الفصل السادس والخمسون

(وسوسة دينار )

في بيت شعري للشاعر عريان السيد خلف يقول :

ومن وصلنا البابهم ..

كالو شجابك ؟

لا تجينه .

فيرد الشاعر كاظم اسماعيل كاطع قائلا :

تالي طبكو بابهم ..

وبنار فشلتنا انچوينا .

....

سرحان : ها الله يساعدهم

كواغد : هلا ابو مأمون ، هلا بيك .. هلا دية شلونج

وكربت على ام سرحان تسلم اعليها .

ناصار تضايك و دار ليه و كاله : ها خير .

سرحان :جنه جايين للمستشفى على امي اجدامها يوجعنها اسم الله عليكم .. و شفت ام ستار .. خلصنا وكلنا نجي نشوف عليش جاية .. شنهي شمالها ام امنية ؟

كواغد : يطيكم العافية هلا بيكم .. والله طاحت و تبربدت و هي حبلى و نعلها تصيح يممممه الحكوني و جبتها ليجاي .. حتى بيتي مكتض بالوادم و انا حايرة وياها توهم طلعوها من العمليات.

سرحان : لا حول ولا قوة الا بالله العلي العظيم .. شنهي من طيحة هاي العامله بوجيها هيج ومضعضعتها .. خافنها غير شي .

ناصر : زيارتك وصلت يبن ضاحي و على الله اعلومك ، لجن زيارة المريض خفيفة.

سرحان : ام ستار اذا تعتازين شي تراها الرگبة سدادة ، عليج العباس لا تستحين .

كواغد : يعلي علومك ييمه و يطيك العافية و يفتحها بوجهك ناخية الحسين الشهيد .. ما تكصر يبو مامون .

سرحان : الله يسلمج .. يمه انت بعدج تحاليلج ما طالعة .. ظلي هنا يم ام ستار ليما اخلص واردنلج .

ردحة : روح يمه.

دار ظهره و طلع لحكه ناصر وحجه : نسيت ايام كبل و جاي تنشد اعليها شعدك وياها.

- حاكم اخوي و هي بت اخوي .. وانا وياهم عشرة عمر لا تنسى .. وكت الذبيتو اخوكم جدي اخذهم و حطاهم بكاعه وربو ويانا وصاروا منا وبينا

-دمش منا ويو مريت مرت الاخرى لا ابتلش بال ضاحي واحد واحد .. ياله

- من تحج ويا الشيوخ احجي برهدنه يبو الولد .. وكت اليطرى اعلى بالي راح اجي .. و يو بيك زود امنعني .

حجاها و دار ظهره و مشى و ناصر ظل يغلط وراها و يستصغره .. رد دش يم كواغد يدردم و يغلط اعلى ال ضاحي و يسب بيهم وردحة كاعدة .. و هدوة تون و تصيح : ولج يمه اهيس الوجع راح يموتني تعالي ليه يالحبيبة يمه .

كواغد.: جا ابدال ما ظال واكف وتشتم بذاك و هاذ امش و انده اعلى وحيد من الدكاترة يجي يعاينها البت راح تموت من الوجع .. امش .

ناصر : لا بارك الله بالساعة الخذينا منكم مرة ، وعلي يو اعرف عدها هيج ام .. يو تبور ابيت اهلها ما اخذنها .

دارت ليه كواغد و هو مشى .. كضتها ردحة ؛ دية موش وكته الحجي بتج مريضة تكوم بسلامه و حاسبيهم.

كواغد : وعلي اطك بفادي اكضنهم و اوذنرهم .. و خل اعرف هم وره حالتها هاي الا اشهرهم و اخزيهم ، بس غير يو تفك حلكها هاي الغمه و تحجي .. ظاله ادسترلهم و اتضمضملهم .

راح ناصر جاب سستر و اجا .. حطتلها المغذي وانطتها الدوة ... و غيرتلها هدومه ..

فكت عينها هدوة بعد ما سكن الألم .. حجت بصوت تعبان: مات الفرخ يمه .

- مات ييمه وخلصتي منه .. جا يو اموتج انا شيطيح بيدي .

ظلت تبجي وتنوح .. صاحت كواغد : يا عليش تبجين ما تكليلي جا هو انت شحصليتي من ابوه خاطر تبجين و تريدين تحصلينه .. دشوفي ارويحتج يا يمه غادية كومة اعظام .

ردحة : بهداي يمه اعلى ارويحتج جا ارادة ربج و حكمته و البجى و النوح ما يجوز .. احمدي الله و اشكري طلعاج سالمة جا امج تكول الجدة معمرت بيج و ردت تموتين .

كواغد : اي وعلي كلبتها منخل يدية .. ازرگه ما ازرگه بهالابر، و كل ابره مكرم السامع تكول مالن مطي موش مالت اوادم .

ناصر : ورانا فاتحة شنهي نظل موسدين هنا كوموها و خلنا نمش .

كواغد : جا انا مستراحه الفاتحة ابيتي غير البت مطلعينها عمليه.

ناصر : اي وشنهي نكضي وكتنا اعلى مرة والده

- ياهو الكالك تعال و ياهو الكالك كرب ، امش خوية الله يطيك العافية ، تعبناك ويانه

حطت و هي تصد راسها عنه و تلوي بحلكها ما عاجبها ، هو هم خذه الحجاية راس مال .. و كال الها : جا خوش دام ما معتازيني انا امش .

ودار ظهره وطلع .. هدية بين التكعد و بين التغفى ، كعدن كواغد و ردحة بالكاع يسولفن اعلى الدفنه و ينعن ، رد اجا سرحان .

- ها شلون صارت

كامت كواغد اعلى حيلها : والله يا يمه اعلى حالها ساعة تون ساعة تغفى.

سرحان : صوجكم والله يا ام ستار ، الواحد يكول ما يدخل و يسكت لجن تفلة تفلتها لا تردها .. ببنيتها ذيج طلعت من حلك الموت رديتو مرت الاخرى رديتوها ليه .. اعلى اي اساس .

- جا يا عمه هو بالكيف بس تكول طاحت موش هو احد جاتلها .

- تصدكين اذنج يو عينج يا ام ستار دعايني وجهه هي مال طيحة هاي .. المرة مكتوله تحجين صدك تشاقين .

هدية: اسمع حس سرحان و هو يلوم بامي ويحجي بحركه .. فكيت عيني هو جدامي .. معكل و يا طوله .. صحت .... ااااااااااخ

كلهم اندارو ليه .. كربت امي : اكلج يمه احجي الصكد مامش احد غريب طايحة يو وحيد طاكج ؟

- فليح طكاني يمه .

- ياااااع شلون طكاج .

- باك ذهباتي اول امس وما لفى و التهيت بالفاتحة .. و ساعة الرديت للبيت بالليل ثاريه جايب وحدة للبيت نايم وياها ومن عرفت و ثغبت طكاني ..

سرحان :دهاج استلمي .. بايكها و جايب وحدة عليها و ابيتها و فوك اثمه طاكها .. ادري عكولكم وين ساعة الرديتوها .. الله يبحبها من طيحة الفرخ وما توهدنت وحيد لاخ منه .. بت هي وما سائل عنها .. شنهو هو هاذ بشر و تبتلش بيه رحمة لوالديكم .

ظلت امي تتفركع من القهر .. شلون طاكني . و سرحان يلوب و امه تصبر بيهم وامي تحجي بحركه و تتحلف بيه : جا يكضونه يو لا .. و علي الا يدبجون دبج عمترة بمصرانه هالوصخ هاذ .

سرحان : من ساعة السمعت هديوة طايحة و متزوركه و متأذيه هيج ما صدكت و عرفت الورة السالفة فليح الاغم .. و كتلها يمه امشينا .. البت مامش احد وياها و ابوها بالفاتحة .

هدية: يمه بتي وينها

- عد لويله يا يمه و علي حركتي افادي جا غاد و كولي فليح شجاج و سكتي امداج يالغمة كل خير ما بيح بالعباس .

- اروحن جدام الوادم اشكي و اكولن جاب وحدة ابيتي .

- اي كولي و اشهري جا شني تضمضميله و تخافين تحجين .. يو صاحية جا كتلتج وعلي اعلى سوايتج هاي .. وخليتي اخته تصيحج بالفاتحة ما تكعد و ما تكعد .

امي تصيح و انا الوجع فايض بجسمي اونن من كل كتر و سرحان طلع .. ظلت امه و امي يحجن و يسولفن و انا الوبن ..

حجت امه ان سرحان خطب بت عمه و ناطر تعدي السنة مالت بشرى الله يرحمها خاطر يعرس عليها .. مدري شمالني ساعة السمعيت هالكلام كام الوجع يون علي من كل صوب .. وكمت ابجي ..

ادري انا مالي حك بيه .. و ادري انا اعلى ذمة زلمه غيره ... وادري دربنا موش واحد لجن هالجلمات يوجن حيل يوجعني .

كامت امي ليه و انا اونن من الالم وما اكدر اكح اهيس بطني تنشك يو ردت اكحن .. دش سرحان بيدة علاكة .

ساعة الشافني ابجي راح نده للدكتورة .. خاطر تجيني .. اجت وشافت حالتي و ظلت مدري شتتمعمر بهاذ الواحد فوكي ..

مشت عني و انا اونن والوب .. حجه سرحان : ام ستار انا جبتلكم نفرين معلاك .. وهاذ خبز حار معتازين شي بعد ؟

انداريت ليه و كلت اله : انت ياهو الطابك و ياهو العاتب عليك تجبل .. المن جاي و شعدك ادور وراي .

انحرج حيل من جلماتي و امي تصم بحلكي و انا ابعد براسي و اونن و اكللها : ما اريدن احد خل يمش هدوني هدوني .

سرحان : عدها العافية ام ستار ، ياله يمه خلنا نمش لهلنا .

طلعوا من الردهة و امي تلوم وتغلط علي شلون هيج جازيته .. كمت ابجي و اسبن بروحي و باليوم الاجيت بيه من عبن كضيت عمري معلعله ما مر يوم ما انلجم واظل اونن اعلى حظي و قسمتي .

ليغاد اجا ابوي متسودن شلون انا مسوية عملية .. ومن درى فليح الطاكني .. تسودن ازود ورد لسلف خاطر يكض فليح .

لثاني يوم طلعتني امي من المستشفى ورديت للبيت .. شالن فراش حبوبتي الله يرحمه و مدنه اليه بمجانها و كاللي : نامي

صرخت : يااااع شنهي اكليل فراشات و موسدات الها فريش المرحومه شمفاولاتها ما تكللي ..

ايمان : لو تاخذيها تنام على جربايتي احسن الها من الدوخة هنانه .. خليها ترتاح هناكه و نسد الباب عليها.

كواغد: اي والله بعد احسن

مشني و خذني لحجرة ابوي و نوموني غاد .. اجت بتي تزحف و تحاول تصعد اعلى القريوله صعدتها امي .. مت عيني عليها تجيب برويسها و تحطه اعلى راسي عود مشتاكتلي ، حبيتها وكمت اونن عليها .

.......

راديون : جا عليش مكدر

سرحان : ها هلا خوية .. تعاي

- اشوفنك صافن بزمانك وجويعد بهالحديقة .

- الهموم جثيرة .. ومنين ما تصد الطلايب جدامك .

- هدوة بيهن يووو

- كولي اولهن

- جا هنا الحجي .. شمالك ؟

- اهيس بروحي مربط و انا اعاين وضعها .. جم توصل الموت اعلى ايد هاذ الوصخ .. و ترد تكعد عد اهلها جم شهر و يردونها .

- جا شتريد يا خوية .. تطلك عيب من الوادم شيكولون عليها .. جا المرة يو صار عدها فرخ تتحمل و هي متحملة لجل بتها .

سرحان : هالطاك الصفنة و ما بيدي شي بس احترك و اوجر اعليها .

- وليمتها راح تظل هيج تحرك بفادك عليها .. سرحان خوية السما اكربك من هدوة وموتت مرتك لا تكدم ولا تأخر .

- ياهو الكالج العشك بس عرس .. يو عشكتي انسان كافي تتمنيله الراحة و تضل ابالج تشوفينه مرتاح .. ما يعتاز يكرب ليج و انا ما رايد غير بس اشوفنها مرتاحه .. قهرها و حالها هاذ ينز بكلبي لا يخليني انامن ليل ولا اتهنى بنهار .

- الله كريم .. مرت اكريم شصار منها

- خنجر خلاها ابيت بعيد عن السلف .

- جا ويو خذت بتنا ووشردت بيها .

- يو عدها مجان تشرد هي كومة طلعت منا من كونها مالها احد تاوي عدها مو امنلها بيت و تشرد منه لا تخافين .

- ينعل سلفاها الاغم يو دره كريم بيها شحاله

- نكله شردت وغير هالحجي ما ينحجي .

- النسوان بالقصر ينشدن عنها .. يو درو هي مامش شنكللهم .

-هاي السالفة انا ما احيرن بيها انت و امج دبرنها .

راديون : جا اكلل لامي خاطر اعرف شكللهن و شلون ندبرها.

كمت من عده و مشيت خاطر اروحن لامي تلكتني فخرية : ها دية وين .

- كولي معتازة شي

- لا والله بس على هالفرررخ مريوان ما اعرف شماله يو تجين تشوفينه

- اي

رحت وياها خاطر اعرف شماله .. كربتله و هي تطلي يلوع و بطنه كلش

- اخافن مستمرد من كون الجو بعده بارد لا يغرج النهار .

- ما اعرف بس انا ملبسته

داوريت الفرخ فحصته : كلشي ما بيه

- ان شالله ، اكلج رايدة انشدنج ..

- كولي ؟

- هدية بت حاكم هي نفسها اليحبها سرحان كبل ؟

- هالسوالف كديمه شضكراج بيهن ؟

- لا سمعت من مرت زناد حجتلي عنها و ردت انشدج من كونج اخيته و تعرفينه .

- لا ديه الحجي ما يسوى البت عرست والسالفة عيب ينحجي بيها

- لا جا انا ما حجيت بس كل انشدنج عبن مرت زناد كالتلي هو ما يود النسوان اعلى ضكرها.

- اي صح جان يحبها وابوي الله يرحمه غصبه اعلى بشرى و ظل عاشكها ليما عرست و مشت .

-بس بالفاتحة امس انا سمعت كواغد تكول اطلكنها وعود على اساس رجلها جايب ابيتها وحدة وجاتلها لين شايفته مدري شلون و تريد تطلك .

- حتى يو اطلكت ما تصيرله .. جا هي من اول ما صارتله تصير من تالي .. كومينا ديه هلسوالف عيب تنفع.

....

هدية : خلصت الفاتحة مالت حبوبتي .. لجن كبل ما تفض الفاتحة فليح ملتحق و رايح للبصرة .. ابوي راح لاخوته كال الهم .. اطلكون واليفج حلكه بالنعال اشكنه ..

ناصر عمي متبري و ناكر كل سوالف فليح و كاله يرد و يو صكد جايب عليخا وحدة للبيت ذاك الوكت تحكه .. و اذا الزلمه رضى بالطلاك يطلك .

عكب جم يوم و الوادم ما فاركت بيتنا .. ناس طالعة و ناس جاية ..ابوي التحق للجيش .

انا ظليت جم يوم عد اهلي ليما فكيت خياط عمليتي و مشيت البيتي عبن تعودت اعلى بيتي ما ارتاح لا ما اسندح و انامن براحتي .. لجن جلجول التكلي الماي ولاله تركب و اتوديلي .. وجمارة ما مفاركتني كاضة بنوسة وتلاعب بيها و شايله البت اعلى كلبها .

سرحان : ملتهي بالسلف و طلايبة و بين المعمل الرجعيت الشغل بيه وواكف اعلى اجدامي ليل نهار خاطر اخليه يرد شغله الاولي ..

راديون و امها سولهن فلم و كالن للبيت ان مرت طريم شاردة بالبت و عمي مساندهن . و انا اطلع غبشة اردن وكت النوم ما اجابل احد .

لهناك و اجا كريم رد البيته مقفول .. دش لبيتي .. حجه ويا امه كايلتله .. دينار كعدنا ما لكيناها كلبنا السلف عليها مامش .

راكض و جاي للمضيف و انا كاعد .. دش و حجه : ابو مأمون .. سرحاااان تعال ليه

- ها يبو وسن

- دينار وينها .. شنهي يعني شردت ؟

- كعدنا ما لكيناها بالبيت .. دورينا عليها مامش

- وين راحت

- ما نعرف

- وبتي سرحان

- اهدى و استراح و كلشي ينحل

- يا استراح وبيتي مهجوم .. عليش شردت شنهو الوازاها .

- يخوية المرة كاولية و ابوي حذراك منها و انت البعتوابوي و تبريت منه لاجلها .. جا هو الياخذله هيج مرة شيضن منها تصون .

- شنهي يعني تصون .. دينار شعامله و عليش شاردة .. كلولي لا تخلوني موجر

- اذكر الله وصلي اعلى محمد و خل نرد للبيت و نحج بهداي .

كضيته و رديت بيه للبيت .. كعدة ما يكعد متسودن وواكف اعلى حيله بملابسه العسكرية و يصيح : ما قصريت وياها تهدني و تروووووووح ليش .. شنهو الجنيته .. شردت لييييييييش

ملوك : و انت شناطر يالاغم مثل ما حوتك و حطتك بجيبها وانت ابن شيوخ .. لكت الها صيدة غيرك و كوشت عليه و شردت عليش متضايك .. المثلها ما ينحزن اعليه .

كعد و الابواب مسدوده بعينه .. تايه بروحه ..رد لا عايلة ولا جهال هو و الكاع .. خسر ابوه و خسر حصته وورثه الجان لازم هسه عايش بخيره .. و اخيرها خسر عايلته .

كام من مجانه وراح للبيت يصرخ و يبجي لحاله .. رادت تمشيله راديون وكفاها سرحان : هدي خله يفرغ همه اعلى كيفه .. لحد يكربه .

ظل ثلث تيام صاك الباب اعلى روحه وما يحاجي احد ..

طلعت ملوك خاطر تشوفه لجن ما فك ليها الباب .. كرب واحد حزبي و كال الها : شكو بهاذ البيت

- ابني .. و انت شلون ادش البستان بلايا امر من اهله .

- انا امرن ساعة اليحلالي محد اله جلمة علي .. فهمتي يو لاله .. هكو مرة هنا جانت عايشة وينها

- ما نعرف عنها شي ماخذها بتها و طالعة من البيت، عليش تنشد

- مو شغلج هاذ

اندار و ظل يراوح بمجانه و يراقب البيت .. ما مشت ملوك خوفن من هاذ اليراوح .. ظلت تفتر اكبال البيت بالبستان ، ليما شافته مشى .. صعدت خاطر تفر للقصر.

دشت للبيت .. حجت راديون : ها شلون حاله ؟

- اخيج اعلى حاله وضعه هاذ موش بمحله

- عليش

- هكو وحيد حزبي يفر اعلى البيت بعصاته و ما مطمنتله .

- لا تخافين ما علي شي يوم يومين يتعود ويرد لحاله ، اكلج يمه عليش ما تروحين وياي للسوك دامه الجو طيب و انا معتازه غريضات الي ..

- تشترين الوان يو هم اسود

- يا يمه ويني وين الالوان زلمتي مسجون و ابوي ميت المن لابسته .

- يمه ابوج صاله سنه و نص من مات .. و رجلج ما يرده الاسود مضيعة شبابج عليش .

- ولونه يمه .. حرام يو حطيت الالوان اعلى جسمي ولبستها . هو وضعنه مالت الوان واحدنا ضيمه اعلى افاده مجلجل .

- دياله لبسي خاطر نمش و نرد من وكت .

لبسن ودزت خبر ملوك للمضيف يريدن يطلعت خاطر سرحان يوديلهن سيارة يروحن بيها .. كض السيارة خنجر عداله شوف ياهو اليزته من اهل سرحان ما يدري براديون .

تلبس الشيلة و العباية و يطلعن .. ويا ما جاي يصعدن .. هو عرفها راديون ظل مدنج راسه ، ساعة الشافته هي توهدن حاله.

- يمه نمش بالسيارة يو لوحيدنا

- وحيدنا شلون دصعدي

- لا يمه جا ما اروحن

شافته ملوك و عرفت راديون ليش ما رادت تصعد .. هو اندار عاف السيارة و طلع للمضيف كال السرحان : ابو مأمون اعذرني السيارة خليتها شوف غيري يوصل الاهل

- هكو شي

- لا بس ما اكدر انا اعذرني .

حجاها ومشى ... راح كعد وحدة .. جلجول من ابعيد و هي كاضة ابت هديوة لكطته .. طكتها ركضه و اجته : ها عمي شو كاعد هنا

- روحي بويه ليغادي هديني .

- شني شمالك ؟

- ما بيه شي هديني .

- انا عد بيت هديوة .. كلت لمي بعد اباتن يم اهديوة . هم اكضن بتها و هم اخلص من اميدي .

- بويه كلت الج روحي غادي وعلي ما بيه اسمع هالتهذري .

- جا انا ما اهذري

- اعوذ بالله منك يلساني ولج بويه امشي عني .

كامت من عده وراحت للبيت .. حطت البت وكعدت .. حجت هدية : ها ؟

- خنيجر مدري شماله

- خايبة شجاج اعلى الزلمة دهدي

- انا احبنه

- شتحبين منه ولج ..

- هو بس يطرد بيه

- من كونه زلمه ادمي موش مثلج اخفيفة وما تستحين اعلى روحج وتتلزكين بيه .

- جا انا احبنه

- ولج عيب هاذ الحجي شني هالطفگه العدج .. زغيرة بعدج اعلى العشك حطي راسج بكتبج ولا تفكرين بهالسوالف .

هدية : شو هاي الفرخة كامت مني و دارت راسها و كامت تبجي : ياااع فلك صابج كووون خايبة وين ووين البجى ... هدور ظلت بمجانها ليما نامت.

...

راديون : ساعة الدار وجهه كلت الها .. يمه تروحين يو اردن

نزلت من السيارة صكتها وتمشينا للشارع العام اخذنا سيارة ومشينا ... لجن توهدن حالي .. ظليت اطك صفات .

ملوك : وين بالج

- لا هيج صديت

- الفات ولى لا تحطينه اعلى بالج ، لا تنسينه هاذ نفسه الخلا رجلج بالسجن و ما تنازل عنه و يو جان يودج والج كدر عدها جا ما سجنه لجن خلك وحيد سرسري ما يسواش صفنة .

ما حجيت ولا رديت عليها .. ظلينا نفتر بالسوك .. ليما كبل الغروب ردينا .. جاي ناخذ سيارة من على الشارع و نعله سلطان ... چرررروب و يصف سيارته جدامنا .

سلطان : اشوفن البوشية مامش وطالعة بوجهج يراديون

ملوك : جا ياهو اله اعليها حكم يبو نعمة .. انتم الموش دارين عنها ولا وحيد منكم ناشد اعن احوالها يو ياهو .

سكت و ردف غير الموضوع و هو يكللها: جا صعدو نوصلكم

ملوك : مشكور ناخذ سيارة ونرد

- يا سيارة هاي .. اصعدن ياله منا الناس تعاين .

صعدنا و ابنه حمدان اليسوك .. ظل يحجي و ينشد امي اعلى اخبار زناد و اعلى احوالهم ورجعة سرحان .. لجن شفت الحجي ما يعجب و نوايا سلطان ما ريحتني .

وصلنا للسلف و نزل و حجه و كال الها : رايدج بسالفة يم زناد

- نزلت البوشية اعلى وجهه و كالتله : خير

سلطان : ننزل للبستان و نحج سويلفتنا بيواش .

مشت وياه و انا ظليت واكفة ما دشيت .

ملوك : شنهي الراي يبو نعمة

- انا و اعوذ بالله من جلمة انا و الصكد .. اكدرنج والله يشهد الج معزة بكلبي ليج

- الله يسلمك .. لجن شنهي مناسبة هالحجي ؟

- انا يو رضيتي رايدج اعلى سنة الله و رسوله.

- جان استحيت اعلى روحك تخطبني و انا مرت الشيخ مطر

- مطر اعلى زمانه طلكاج

- و ان طلكاني كلام لسان و انا ام الشيخ زناد و مرت الشيخ مطر ما اجيبن الجلمة اليه .. هالمرة حجيتها يو عدتها مرت الاخرة الحجي وكتها ما يعجب .

- انت يواشج وياي بهداي افهمنج .. انا ما رايد اضرنج . لجن سرحان ما يتامن .....

- سرحان انا ويا لا ادخل روحك بيناتنا يبو نعمة و عود و كت الاعزاك ما تقصر .. صار المغرب و لزوم امرن اعلى كريم اشوفنه .. من رخصتك .

حجتها و مشت عنه .

راديون : شرايد منج

- جا كضيلي وحيد من ال ثجيل شريف خاطر اكللج شراد مني

- جلماته وياج ما ارتحت ليهن .

- الزلمه جاي يطلبني بلا خجل

- وشكلتيلي ؟

- و شكله غير ارزلنه و افارج

- خير ما سويتي يدور عرس .. هم ولده حاط كوره وياهم و مسويلهم جدول كل اسبوع ياله يسبحون .

ردن للبيت و هن يحجن .. مرن على كريم ما فك الباب .

مر اسبوع و كلشي اعلى حالة

هدوة ابيتها و جرحها بده يطيب .

و سرحان اعلى راس شغله .

وراديون بحالها .. ناطرة الفرج

جلجول حاطه روحها بالدراسة خاطر تصير دكتورة و تصير تحسن من الكل و خنجر يكوم يحبها .. و تقرا و تصيح : انا راح اصيرن دكتورة على اعنادكم .

مرت كريم .. ما الها احد عكب كريم ..

وهي ما تشوف روحها غلطت .. تشوف نفسها مجبورة على السوته و جزت بفعلها اركاب من الموت لو رافضه جا التقارير كامت تلعب اعلى كريم و اهله .. بس سرحان الما سمع منها و طردها من بيتها .

خذت بتها وردت للديرة بسكوت و راحت لكريم .. ساعة الفك ليها الباب و دشت عليه .. تسودن و كضاها من راسها و دخلها للبيت .

- كريم بس اسمعني كريم فدوة اغديلك

- اسمعج و انت شارررررردة من البيت شعدددددج .. عفتي بيتج و شمتي بيه اهلي و خليتيني علج بحلك اليسوى و الما يسوى لييييش .

- مالي ذنب بالسويته وعلي .. ما سويت شي

- شنهو الما سويتيييييي .

- انا ما شردت سرحان لبعدني من الديرة .

- سرحااان !

- اي هو و امك .. توسلت بيهم وحبيت اديهم ما خلوني اظلن و بعدوني و كالولي راح نكل لكريم شردت .

- وعليش سوا هيج .

- انا ما رايدة اذيك بس والله ما غلطت باحد .. هكو واحد حزبي هدداني لو اطي روحي لو يكتلكم .. كام سرحان و بعدني منا و يكلي مالنا حيل طلايب انت خلك وحدة كاوليه .. وما اريدن اخوي يبتلش ويا الحزبية بسببج .. و هدوني ابيت يصوصي .. انا مالي غيرك كريم .. دخيلتك انا .

راد يكوم .. كضته : لا تبتلش وياه .. انا ما اريدن مصيبة تصير بينك و بين اخوك بسببي .. انا بس رايدتك انت اخذنك و ناخذ بنيتنا و نمش منا بهداي .

- انا مامنج عدهم شلون تريديني اسكتتتت ، يذبونج انت و بتي بالجول وتكليلي اسكت

- يخافون عليك حكهم .. لا تتوهدن وياهم خلينا ناخذ بنيتنا و نروح لمچان بعيد منا .

- وين روح و انا بطرك الراتب الما يكفي فلوس بدلة عسكرية اشتري بيه .. وين نطي وجهنا

- اطلب منه

- ياهو ؟

- سرحان

- و شعدي يمه و اطلب

- خيراتكم كلها اصبحت حدر ايده زناد شرد و خله بيته و بستانه و كلشي عد سرحان وابوك فلوسه ودعهن عده و حتى حكك .. انا ما اكللك تاخذ بساتين و املتك بس انت اخوه و خله يطيك فلوس بيت ولا تكله علي ولا تكله شفتني من كونه يو شافنا .. راح يكلك ابعد عنها و الحزبيه يراكضون وراها و حكه .. اخذ منه فلوس و خل نشرد من هالسلف و الحزبيه لغير مجان .

- انا ما عرفت يا حزبي هاذ المهددج ووين شافج

- رحت اشتري مسواك و مبوشه و شاف ادية و يكلي نسوان السلف اديهن كاضيها التعب انت عليش اديج هيج بيض يلمعن و لحكني و هدداني .

- شسمه

- جا تريد اسمه خاطر تهد اعليه و ننعدم انا وياك و هالبنية كريم خلنا نشرد بارواحنا فدوة اغديلك .

- ظلي هنا ولا اطلعين ولا تخلين واحد يسمع حسج انا رايح للبيت مالت اهلي.. سركي الباب وراي .

- خوش

طلع كريم و هو مصدك كل كلمه حجتها دينار .. من كونه يعشكها عشك ما يصدك احد غيرها .

دخل للبيت سرحان توه راد من المضيف الدنيا ليل .. ظل يعاين لسرحان بحقد .. و حجه : ابو مامون رايدك بسالفة

- هلا خوية .. ظل بالنا عليك شنهي قضيتك سركيت الباب وكفلت اعلى روحك

- انا صحيت لزماني و قرريت اترك السلف و امش

عقد حاجبه سرحان :تترك السلف ؟ ... ليش خوية

- هاذ الرايدة انا وياريت محد يعارضني

ملوك : وين تولي ووين تطي وجهك .. اكعد و خلك احذانا الواحد باا اهله يضيع و يتوهدن .

كريم : يمه هديني رحمة الوالديج خليني بروحي

- روحك شنهي ولك .. ما كلت امي اخيتي نسوان اخوتي عكب ضيعة اخوك .. وين يروحن .. شنهي انت تفكر بس بروحك .

- سرحان و عمي موجودين و انا مالي غرض باحد

- تهد امك يكريم و تكلي مالي غرض بيك .. هاذ جزات رباي يبن بطني تهدني وتمش ولك ؟

سرحان : خلني افهم رايه و بعدين اعلى كيفكم تعاتبو ... الرايدة مني شنهي خوية

- رايد حكي

- يا حك هاذ ؟

- حكي من ورث ابوي .

- انت تعرف ....

- اعرف ابوي حرمني من الورث بس انت ما تاكل حك .. و حكي عدك ما يضيع ان شالله .

- حكيش ابوي وكت الوزع الورث قسم الحصص بنفسه .. انا شطيك .. و شعدك يمي .

- عدك كلشي ورث امي الانحرمت منه صار الك وورثي الانحرمت منه صار الك و زناد الشرد و ترك خيره و هم صار الك و كلشي حد رايدك ما يضرك يو اطيتني حكي .

- ياهو المحشدك ضدي يكريم ؟.

- مامش احد .. تطيني حكي يووو

- يووووووو شنهي زناااااد جنك نسيت انا اخوك الجبير و من تحج تحترم و حجايتك تعدلهاااااا

- احجي باليطرى اعلى بالي محد اله علي حك .. و انا رايد حكي منك و بهالساعة .

- دام الحجي هيج ومحد اله حك اعليك .. اعذرني خوية انت هم ما الك حك يمي .

- خوش .

طلع من البيت وراح لبيته .. تضارب ويا سالم اعلى الباب .. حجه سالم : رايد الشيخ سرحان عدي حجاية وياه .

ودوا خبر لسرحان .. بس سرحان كال الهم : كلوله موش وكته خل يروح

وظل يحجي ويصيح بالبيت و يغلط اعلى خوة زناد و كريم و يكللهم : يو شاربين حليب خنزير هم ما اطلعو بالردايا .. ولكم شنهي من ملة و شني من خوان .. الله ما اطاني خواني اعلى كلبي ساعة حكوكهم كلبو علي و حشو بلحمييييي ..

وظل يصيح و يصارخ بالبيت و يغلط و يهين بملوك .. بس هي عزت بروحها حيل خذت نسوان ابنها و جهالهم و طلعت من البيت كله ... وراحت فتحت بيت زناد و كعدت بيه .

وعم سرحان ظل بالبيت يكض بهاذ ويهدي بذاك و البيت اشتعل نار .

لنص الليل و سرحان ما نايم .. عينه ما عفت ولا خذت نوم .. كام اعلى حيله خاطر يمر بكريم و يتفاهم وياه .. خاف لا يطلع الصبح و هاج من الديرة اعلى زعل .

ويا ما طلع سالم واكف اعلى البستان .. كرب سرحان لبيت كريم .. صاح سالم : ابو مأمون .. ابو مأمون .

- ها يسالم شرايد

- انا بس رايد ابلغنك .. مرة مكبعه مبوشة دشت للبستان خفيه .. انا شفتها لجن ما ميزته بس ساعة الدمت الباب اعلى بيت كريم و بيدها جاهل اظنن المرة هي نفسها .

- عرفت .. شوف شغلك يسويلم .

دك الباب .. ما فتحه كريم

حجه سرحان : لا تضم علي يخوي انا اعرف العدك ياهي افتح الباب و لا تخسر اخيك لجل وحدة ما تسوى اظفرك .

فك الباب كريم و كض بايخات سرحان و صر خ : من تطعن بمرتي احش راسك افتهممممممت

دفعه سرحان ودهلاه جوا و صرخ : التكول عنها مرتي داست بيتك .. هانتك .. خانتك يااااا كريم

- انت الخونتها و هي ما خانت .. ساعة الرديت و الشر بعيونك وجاي تخلص اعلينا واحد واحد .. زناد هج و هججت مرتي وبتي الدور الجاي علييييمن . علييييمن .

- خايب يالاغم تبيع اخوك اعلى فرد وحدة كاولية

حجاها و انهد اعليه كريم يكض بياخاته .. طكاها سرحان و تكاوم وياه ..

- تتجاوز علي لجل وحدة كح***** .. ولك الزلام تعاينها كل ليلة تطلع و ترد لبيتك ليلية و انت صاف وياها مكررررن

- مامش غيرك .. ردي وخوان .. تبعد مرت اخوك خوفن من شوية حزبية كضوك و طكوك .. و ظال ترجف منهم و باعد مرتي و بتي بالجوووول .

ظل واحد يغلط تعلى الاخر ... دش سالم و اثنين ازلام للبيت فركوهم .. وكف سرحان و كاله

- دام الحجي هيج .. وانا الردي و انا الباعد عايلتك و خايف من الحزبيه ومصدك الكاوليه .. هساه تطلع من بيتي انت و عايلتك .. دقيقة ما تظلووووووون يااااله ....

رواية كحل عرب الفصل السابع والخمسون

( تأسير )

الله كريم نكول .. بس هذا روتين

صح نمشي فوك الكاع .. بس احنه ميتين

( عريان السيد خلف )

........

لم كريم غراضه و غراض مرته و طلعوا بالليل من السلف .. و سرحان موجر نار عبن خوانه موش خوان ، الاول باعه خاطر يكوش اعلى المضيف و الاخر صكد كاوليه و جذباه و هو الضم عليه خاطر لا يروح يتعارك ويا الحزبي و يتوهدن وياه .

سرحان : سالم .. اكفل اعلى البيت هاذ و اطي مفاتيحه للحارس .. ليلة ما تخلص ساعة الكشرة الجابتني امي بهالسلف هاذ.

- تامر يشيخ .

درت عنه و مشيت للبيت دشيت ورحت لحجرتي ، مددت و انا احاول انامن .. موش اهل الغريب ابرك منهم .. اكله مرتك هيج يجذبني الردي .

كمت اجيب بروحي منا و اتكلب بفراشي منا .. متزوهر ولا ضكت الراحة .. ليما هاه .. غفيت

بعالم الطيف و نعلي اشوفن ابوي اعلى عهده ذاك لابس الدشداشة البيضه والعباية اعلى جتفه والعكال المعدل لجن مغضب .. وجني اكلله : ها بويه

ويرد علي : موش هيج يسرحان

وجني بالحلم اكلله : شنو هو الموش هيج ؟

دار عني ومشى وما عاين ليه وچنه زعلان علي .. فزيت الفجر اعلى الديج يصيح .. اتنفس حيل و العرك يصب من جسمي .

كمت من حيلي تعوذيت ابليس وگمت من مچاني : شنهو طيف ابوي وشيكصد ؟ و عليش مغضب ؟

مشيت توضيت خاطر اسكن روحي .. مديت السجادة وصليت .. خلصيت صلاة الفجر وجريت السبحة و اسبح و انا صافن بزماني .. چن جسمي نحلان وكل حيل ما بيه .. واعيس بروحي مخنوك من ضيم الحبس و التعذيب اجيت ليجاي و لاكيت هالطلايب بوجهي .

خلصت تسبيح .. فركت السبحة بيدي حبيتها وخليتها اعلى كصتي وحطيتها و انا اتنهد .. البيت هدوووء ... لا ملوك ولا نسوان زناد و جهاله ولا راديون .. كريم هج ..

كمت اعلى حيلي لميت السجادة و طلعت مشيت بالممر مالت البيت .. امشي جني غريب ببيتي .. اهلي كلهم هجو من البيت وما ظلي احد .

يمكني عرفت كصد ابوي ساعة الكالي (مو هيج) .. انا هججت كل اهله من قصري و هو الوصاني بيهم .. وصاني اعلى اخوتي اعلى اخواتي اعلى اهله كلهم ..

اشوفن روحي هججتهم كلهم .

كضيت الدرب و طلعت للشط كعدت و كلش متضايك مدري منيش .. لجن اهيس بروحي مكبوسة بصدري و جني مسجون .

فكيت دكمة الدشداشه و انا اتنهد .. دخيلك ربي لا تحير عبدك .. طكت روحي بالعباس طكت روحي .. وين اهجن و اخلص ما اعرف ..

وانا جويعد اجن نسوان للشط يغسلن هديماتهن .. كمت من مجاني و ظليت اتمشى بالسلف .. خطيت جدمي لكاع حاكم .. غاد عن الشط .

وكفت ليغادي و ظليت اعاين بكاعه ... طلعت هدية من بيتها ومكعده بتها على متونها .. مشت لشجرة الزيتون ، كعدت بتها و ظلت تحوش .

تبسمت .. جا هسه انا بالله اليشوفني شيكول علي ؟ شيخ و هالله هاللة ومكابل بستان حاكم وكاعد .. والله عيب اعلى عكالي .

انداريت اروحن لجن ظل ابالي انشدها عن صحتها .. خطيت جدمي و رحت ليها و هي ملتهية تغني:

- من علتي البحشاي ما ظلي عدي راي ..

ما ظلي عدي راي ...

جرحي صعب ودواي ما يفهمه انسان ..ما يفهمه انسان .. يا نبعة الريحان حني على الولهان حنييييي

قاطعتها و انا اكلها : ها اصباح الخير

فزت : سرحان خير سلامات شو صبّاحي ؟

- هيج مريت وشفتج كلت اسلم و امش .. اخر مرة جنتي موش زينة و كلت انشد عنج .

- يا اصباح النور .. انا زينه بس مستحية منك وموش شوية .. جثير

- عليش ؟

- بالمستشفى انا من الوجع ما عرف شلون نهديت بيك و زفيتك لجن وعلي موش كصدي .

- يجعلها اعلى همومنا يهدوة .. من كون يو على هاي تهون .. لا تشيلين ابالج .. انا حتى ما طرت اعلى بالي، صحتج شلونها ؟

- زينه

- موش مريضة عليش اطلعين و تشتغلين .. استراحي شواي

- يا وعلي حرام ما بياش شي .. امش وشحلاتني .. جا اهدن امي وحيدها بالكاع ما يصير .

- الله يكويج بويه .. ياله انا امش تعتازين شي ؟

- لا لجن ردت انشدك و ان جان الوكت موش وكته و اخافن احد يشوفك واكف جدامي و يطكني بجلمه بس ابالي انشدنك .. صكد راح تعرس ؟

- اي .. جهالي يتامه و يعتازون ام .

- هاا جا خوش .. الله يبارك .

تبسم .. و شال الفرخة و كال : اشوفنج رديتي لبيتج جنج ما هاوية الطلاك

- الله لا يكولها عليش اطلك

- و شنهي الناطرته وتردين .. ناويه اعلى موتج

- موتي اهون علي من ظلتي .. ما عاد يفرك عدي شي .. و المتعود اعلى الهموم ما تضره كثرتها و المبلل ما يخاف من المطر .

- جحي السان هااااذ يهدوة حطي عكلج براسج و اعكلي .. وردي لبيت اهلج و اسكتي .

- اشوفنك كمت تصايح و تعلي بحسك يسرحان

- انا اصيح لجلج .. ردتج ما منها فايدة

- و يو اطلكت شنهي فايدتي اظلن منسية عد اهلي بلا والي .. و الناس تحش بلحمي و تحجي علي و غيري عايش ويبتزخ بروحه .

- شلج بغيرج و انت متأذيه بعيشتج .. انا اكولن ما ادخل بس طكت مرارتي بسج .. كل مرة تردين وتاليتج بالمستشفى و بحلك الموت .. يزي بسج .

- و انا مرت الاخرى اطكن بوجهك و اغتاض و انت ما تفهم رطني .

عكد حواجبه و تبسمر : انا !! .. انا شنهي .

- اجت امي انا اكولن يو تروح من كون يو شافنا احد .. نصير علج بحلك الوادم .

كواغد : ها اصباح الخير شلونك يمه

- هلا ام ستار هلا بيج .

- جبت الريوك اصبلك .. متريك ؟

- لا زاد فضلج انا بس شفت هدوة ومريت انشد اعلى صحتها .. ياله اودعناكم .

- هلا بيك

مشى سرحان و كواغد حطت الريوك ووكفت خلت ايدها اعلى عينها و هي تعاين سرحان يطلع من الكاع ، اندارت الهدية : ايييييي ولج شنهي معناتها هاي

- شني يمه

- لا يمه مكصرة جا ما خذيتي للبيت مالج و تكعدون تتسامرون اعلى كيفكم

- يمه شمالج الزلمة مر بس ينشد

- خايبة هديوة هاذ الحجي مشي اعلى وحيدة غيري .. مش اعلى امج .. خوش .. مرت الاخرى يو شفتج وكافه حذاه اكصن راسج

- يمه علي العباس ما عدي شي .. الزلمه مر نشدني و ظلت السوالف تاخذن

- ايييييي ويو واحد شافكم شنكللهم خذتهم السوالف ، خايبة انت ليش ما تخافين ربج .. بالله هو شاف ركعة وجهج و نسى هو شيخ .. شني نسيتي انت بعد اعلى ذمة رجال و ما يصير تحجين وياه

- يمه لا حجيت ولا كلت .. كل السالفة السلام عليكم و عليكم السلام .

-خايبة هديوة هالحجي تمشينة اعلى امج .. شفتي ابيج حجه بالطلاك كلبج كام يلعب ويرد لذيج الايام .. لا تنسين ارويحتج ييمه

- علييش ؟

- جا يو جنتي وحدة .. هساج موش بطرك روحج و عدج بت وذول ال ثجيل ما ينحطون بالعب .

- يمه سرحان شيخ .. و عيشتي وياه عيشة سلاطين و هو ارمل بلايا مرة .. جا انا هادة الكمر و مچلبه بالحجار عليييش ؟

- وبتج يو لوو ذراعج بيه .. ان اكولن بطلي هالحجي و اكعدي اتريكي خاطر نكوم لشغلنا.

.....

سرحان : رديت للبيت وحجايات هدوة ظلن ابالي .. تكلي مترتين اغتاضيت بوجهك .. كعدت و جهالي يلعبون و عمي كاعد و انا ضارب صفنه بيها .

امي كاعدة احذاي التفتت ندستهت و حجيت بهداي: يمه يوم الخذيتج ورحنا الهدوة بالمستشفى هم جبتيلها طاري اعلى خطبتي وعرس و هيج امور

- والله ييمه ما اتضكر لجن ... بس انا وكواغد حجينا ويمكني كلت ليها .. عليش ؟

- لا هيج

درت من امي متبسم .. عرفت سبب غيض هدوة اثاريها جانت توحيلي وانا الما فاهم اعلى رطنها .

مرت الاولى من نهرتني اظنن سمعت بسالفة العرس.

ومن ندشتني وكلت الها اي .. هو هاذ غيضها .. بس شني دكلي اردن لفليح .. معكول جانت مغتاضة و نزتني بهالحجايات خاطر تغيضني ؟

مدري بروحي و انا اتبسم لوحيدي و نعلي اشوفن الاهل مبحلكين بوجهي : هااا ؟

حجه : شو تتبسم شمالك ؟

- لا هيج سالفة ابالي

- يا سالفة هاي عمي و كريم ما ندري عنه و ام زناد و النساوين طلعن امس مغتاضات .

- رديت لواقعي و تغيرت ملامحي .. تنهد : انا اتصرف بهالامور .. نحمد الله و نشكره على نعمة يجعلها دايمه.

كمت من السفرة و طلعت .. كبل ساعة اهيس بروحي مسجون و روحي محبوسة و مكبوته اعلى انفاسي و جلمتين من هدوة .. هدت افادي وخلت حتى الناس توچد سني من رسمة بسمتي اعلى شفاي .

تنهدت ..... اااااااه ..الهي بجاه علي عدك.

طلعت للمضيف لكيت خنجر كبالي : ها خويي اصباح الخير

خنجر : هلا بيك خوية اصباح النور ...

عكد احواجبه ساعة الشافني

- شمالك

- شو متبسم

- هيج مرتاح

- اعلى يا هم مرتاح .. خايب شو هي داجة .. ولك سريحااان ما مرتاحلك .

- خايب سريحان شني احترم نفسك جا هاذ العكال الاعلى راسي شنهي تاير الخلفوك .. احج عدل

- خايب تخليني اعفطلك عفطة يكرم طار علي الا اطير مضيفك بيها .

- انجب هي عفطي ..

طكني بزيج ... و انا طكيتها بضحكه و هو ضحك اعلى ضحكي .. جا نريد نسكت .. تفل الشيطان بحلوكنا

وهو يصيح : العفطية من يكضون مضيف

- هههههههههههههههههههههههههههه لا يا عفطي انجب اغم انا زلمة محترم ، لجن موش صوجك صوجي انا جا هو الشيخ اليرافك مثلك شناطر غير الردي يطگله بزيج .

خنجر : هههههههههههههههههههههههه

سرحان : انشكت بطني بالعباس .. الله يجعلها ضحكة خير .

- لا صكد عليك العباس ، هكو شي

- لا وعلي كلشي ماكو

- جا عليش تتبسم

- خايب شوف الحظ الناس كامت تتعجب تشوفنا نتبسم .

- غيري موش انا من كون اعرف بسمتك الجذابيه من الصدكية .. احج لا اجيبك بثانية بعلي

- هههههه شفت هدوة

- جا هنااااااااا الدك و الرطن .. اييييه ؟

- شنهو اي .. بس شفتها و حجينا شواي و مشيت عنها .

- الحجايات شنهي

- ترا عيب عليك بعلي عيب .. شلك غرض

- خايب مو اطكك

- اسكت وبعدين نحجي .. بالاول لزوم امش لبيت زناد اردن ملوك و جناينها .

- عليش جايب الهم اعلى كلبك خلهن يولن .

- ابوي اجاني بالطيف مغضب يخنجر .

- جا هو ابوك كضى عمره مغضب و لاوي خشمه .

- لا اجاني يعاتبني اعلى هجتي لاهله .. من كونهم ما بيهم خير لجن روحه عدهم .

- و تردهم

- و انا ياهو الظال عدي غير عمي هو و بناته و نسوانه بالبيت .. اجيبنهم و اخليهم بالبيت الجان بيه كريم هم ملوك معزوله عني و هم حذاي اديرن بالي عليهم .

-وكريم

- الباعني لجل وحدة كاولية وما صدكاني شكلله هاذ ؟ و هم اسمي اخو .

- الباع ابوه يبيعك .. لجن موش اعلى كصد .. كريم معمي عينه بهاي و تاليته يعرف الحك و يرد ليك

- و انا هم كلت هيج .. اريدنك اتدوره و تطي فلوس و تامنله بيت يكعد بيه .. بس لا تكله انا .. هو هم رفيجك و خله يحسبها جنها منك .

- خوش .

- دصعد وياي خل نمش ليهم .

- ياله

طلعنا كن المضيف لبيت زناد .. خنجر تاناني بالسيارة و انا نزلت ليهم .. دكيت الباب طلعتلي ملوك : خير مجبل من الصبح

- اجيت اشوفنكم

- بخير ما نموت

- اعرف ما تموتون لجن جاي اخذنكم .. انا صكد ما اودنج لجن تظلين وصية زناد كبل لا يهج .. انت و نسوانه و جهاله .. جاي خاطر انطيج البيت الجان كاعد بيه كريم .. و افتح عليه ثنين من حجرات القصر خاطر يكفيكم .. و تظلون لا الكم غرض بيه ولا انا الي غرض بيكم .. و عيني عليكم .

- شعور بالذنب هاذ يو شنهي ؟

- ما اذنب بحك احد مثل ما ذنبتو بحكي .. لجن انا مكيد بوصايا ابوي .. و اخوي ما تهون علي وصيته.

- جا خوش .. هيج احسن .

- خبريهن يحضرن غراضهن خاطر يجون ينكلونهن ليغادي .

حجيتها و كمت من عدهم طلعت ويا خنجر .. و هاذ لزك الا يعرف شحجيت انا وهدوة : ترا عيب عليك بعلي .

- خايب ما ارتاح لا ما اعرف شنهي الخلاك تتبسم

- ولك رحت خاطر انشد عنها ولنها هي تنشدني و تكلي انت راح تعرس .. انا اعلى لاهيتي كتلها اي و نعلها البت يخنجر تغتاض بوجهي .. و تكلي انا اريد اردن لرجلي ..

- دردي خله يدفنها .

- ولك مو هيج .. انا اغتاضيت و كلت الها جا شني رايدة موتج و اداهر وياها .. و لنها تكلي انت ما تفهم رطني .

- خايب بس لا تريد تتطلك خاطر تردلك

- جا غير اهوسلها بجفية .. يسويها حظي و تردي

- اذا اعلى حظك انا غاسل ايدي .. لجن دامها متأمله و رايدتك ... ليش لا .. انت مشلوع كلب و هي كشلوعة كلبي ليمتها تظلون اعلى هالحال ؟

- الامر موش بهالسهولة يخنجر هدوة عدها بت

- ولونّها ؟

- الله كريم .. خلها تطلك و افتك و يحلها ربك .

- يعني نحضر لعرسك منا لسنة

- اعوينة ابو اصلك عرس شنهي انطر لا تچسحها.

- ههههههه

....

هدية : يهالصباح هاذ المرني و كلب يومي ابيض ويا خفاته اعلى كلبي .. اهيس روحي نامت بماي بارد و هودت ساعة المر علي و نشد عني .

ابوي رضى بطلاكي و حتى امي رضت بطلاكي .. هلبت الله اطلك و ارتاح و اردن ليه .. و يسويه البخت و يكعد حظي وياه .

كمت اشتغل و ما اهيس بروحي من كوني منشنشة هاذ الصباح و محد بخفاتي .. يو كل صباح هجي انا بخير .

للظهر رديت للبيت ، و اجت جلجول شالت بتي و انا كعدت احوكن مهفات .. و اسوي .. و اعاين جميرة موش اعلى مرامها .

شلت راسي ليها : شمالج ؟

- ماكو شي

- خايبة احجي شنهي سالفتج تصفنين ومدمعة

خذت نوسة شالتها اعلى متنها .. و طلعت كعدت بالباب ، انا كملت مهفايتي و لبست عباتي و طلعت خذيتهن ورحت للبيت اهلي ..

لجن شفت الوجوه مكلبه : ها شمالكم

كواغد: خايبة ستير ما عاجبني ما نزله مرة لا ما تولى هالمسيچينه هاي غلط و شتايم و يعيرها جيف ما تحبل .

- يمه خل ناخذ لويله ونمش خافنها مسوالها عمل يو شوف شنهي

- وين اخذنها

- لام اشخيتر .

- ييمه انا هاذ الدرب ما احبنه ..

- يمه قابل احنا جاي نسوي سحورة و ما تحبينه هي مرة تاخذ خير و تكطع للوادم ما خسرانين شي .

والله كوة قنعيت امي و خذينا لويله ومشينا للحجية .. فتحت الها ااقران و مدري شتقرا .. و لنها تكلها : عدج تابعة اعلى الحبالة .. ما تحبلين ، تشوفين شي .. هيسيتي عدج شي غريب يصير وياج

لاله : لا بس مرة سودة .. مرات من اصد اعايننها يو من نايمة و افز اشوفنها .. مامش غيرها .

- جا هي هاي التابعة رابطة اعليج و ما تخليج تحبلين .

كواغد : اكلج ديه جا هي رابطة شني .. موچبه حراسه .. من يكبلها رجلها منعت حبالتها .. شنهي يخالة هاذ حجي .

الحجية : جا شني انا اجذب اعليج .. ما تصكدين لا تكبلين ولا تجين

- لا والعباس عيب اصكد .

ندست امي : يمه جا وكتج

- خايبة هديوة ليوين جايبتنه انت .

- يمه هسه الفادتها خير تعلى خيى ما فادتها ما ضارتنا بشي .. سكتي شواي .

كواغد : اااااااااح .. سكتنا .

ظليت احجي ويا المرة خاطر تكطعلها و اطتها حجاب تعلكه بجنكال بثيابها .. و ماي ورد و بخور و ياس .. و من هالامور ..

ردين ولويله عدها امل يو سوت هالامور تحبل ..

لجن هو الاغم اغم و الما يعرف لهالسوالف .. ما يعرف يدسترها .. لاله ما خلت واحد ما كالتله رحنا للحجية و كطعتلي و راح احبل .

خايبة كلت الها : يالغمة دصمي احليكج من وره شهيرتج هاي يطكونج بعين و ينومونج بكاعج .. دسكتي .

لاله : خايبة هديوة فرحيلي عليج العباس هلبت احبل .

- ان شالله بجاه محمد و ال بيت محمد .

والله مشت الأيام .. وراح اسبوع و اجا اسبوع و احنا اعلى حالنا .. لجن الحرب حامية .. و البالحرب راحو و مر الشهرين و هم ما رادين لاهلهم .

صكد و تمر الشهرين و نعلها لويله تكول : عمه اشو صالي شهرين ما غاسله .. و جانها طولت علي .

كواغد : ياااع .. خايبة هيج و اطلعين حامل .. و علي اخذنج و اروحن للكاظم اطشن واهليه غاد واهلهل يو اطاني مرادي من كوني ناخيتلج باب الحوايج .

لاله : يا عمه جا انا ناذرة طلي وعلي .

- و الطلي هاذ منين تجيبينه .. من طلياني موش يو لاله

- عمه دخل نروح بالاول و عود يو حبلت نتعاون اعليه.

- جا تنذرين و اتذبين براسي

- يوووو يعمه شمالج دخلنا نمش .

- دياله لبسي خل اخذنج للمستشفى .

لبست لاله و مشت هي و عمتها للمستشفى .. خذوا منها دم و كعدن ينطرن النتيجة .. لهناك و اطوهن النتيجة

- جا يمه اقرالي انا امك عيب اعرف اقرا الكاغد هاذ

- حجيه هاذ تحليل دم و بالتحليل اكو حمل .

- هكو حمل يعني شنيى

- هو التحليل الج ؟

- لا يمه اسم الله شمالك دعايني عدل ويني ووين الحباله .. الچنتي

- حامل حامل حجية

- عليك العباس ابو فاضل

- اي وعلي حامل حجيه والله

لاله : ياااااااع انااااااااا حبله .. عمه تسمعين يكلي انا حامل

كواغد : كلللللللللللللللللللللللللللللللللوش ... توه الله التفت واطاني ... ميته و الجليل احياني ... احا احا احا

وكامت تهوس بعبايتها و الناس تضحك .. وناس كامت تهوس وياها ..

ردت للبيت و هن طايرات من الفرحة ..

سوت جدر جبير مالت شربت .. ووزعت دولكات شربت اعلى البيوت .. و من الصبح غبشت و طلعت لبغداد خذت لاله ومشت للامام الكاظم .. طشت واهليه و هوست و ذبت فلوس بشباجه .

ردن للبيت و نعلها يسرى موجودة و الوجه امدلغم .. وكاعدة بالبيت ..

ايمان همست الاله : من الصبح اجت علينا اني قفلت باب غرفتج حتى متدخل .. و ظليت كاعدة كبالها ما فاركتها منعرف هاية شيطلع منها .

لاله : زين ما سويتي .

يسرى : بالمبارك سمعت بيج حبلى

لاله : موش اكيد بعدني ما متوكده .

يسرى : شني اطردين عيون

- و انت ياهو ماتج ، شوفينا عرض اجتافج و التهي بطناطلج ديه .

يسرى ما عجبها الوضع و ضلت كل يوم تجي لبيت عيالها .. و بس لاله و ايمان مكابلاتها .. ما يخلنها تلتفت ..

وره ايام .. اندكت الباب

كواغد توها كاعدة الفجر فتحت الباب فتحته و نعله حاكم : يا هله بيك .. وعلي كلوبنا راحت .. تفضل دش دش

- شلونكم شلون صحتكم

- احنا تحت رحمته لجن ننشد عنك

- الحمد لله عدت

- يكولون انتصرتوا

- نصريش طاح حظنا

- عليش ؟

- الجيش العراقي هجم هجمة قويه و اجتاحينا الاراضي الايرانية و هوسنا و دكينا اطبول و كلنا اجتاحيناهم

- اي جا انا اوجن هالراديوان هاذ الصبح و اسمع الاخبار الاذاعات تصدح و تركص و هلهوله للشعب الصامد .

- اي صدام ما جاي يعرض للعراقيين بس اللي يريد يعرضه ... احنا اجتاحيناهم لجن القوات الأيرانية عززت قواتها و هجمت علينا بليلة ظلمة و طردتنا من اراضيها و اسرو هواي كلش هواي من عدنا .. الاذاعات ما جاي تطي الاعداد الحقيقية الاسرتها ايران بس العدد بالالاف .

- ياااع راحو ولدنا وعلي .

- اي والله .. حرب جانت كلش حامية

- جا هي المحمرة بعد

- الله و ابو الحسن علي ويانا .. وتفض هالحرب طكت ارواحنا بالعباس .

- اكلك ستير ما شفته .. شو انا كلبي رف

- لا كبل يومين شفت ستار ما بيه شي .. اصلا ستار موش اعلى الساتر .. ما عليه شي .. و يمكنه ينزل هاي الايام .

- اي يسمع من حلكك اشتاكيتله كلبي طاك عليه .

- يجيج و تشبعين منه شوف ، هديوة شنهي اخبارها

- داكه رجل تريد طلاك

- جا هاذ حك .. شني يكواغد هم بعد بيج تردينها

- انا ما اريد ردتها .. لجن يابو ستار ما نخلص المرة عدها بت .. خله مطرود و عد اهله .. بس لا جلمة المطلكه .

- انعل والديهم خلها تخلص منهم وتكعد هي وبته شحصلت منهم .

- جا غير ما كلت الك

- شنهي

- لويله حبلى

- يا صلاة اعلى محمد وال محمد .. صدك ؟

- اي وعلي ، كضيتها ورحت ليها لبغداد

- ها بويه بغداد شنهي .

- جا موش انا ناذرة يو حبلت اطشن واهليه عد باب الحوايج

- وانا يا غافلين الكم الله

- جا غير ناذرة

- ونذرج ما ينطر اردن و تكليلي ... ما ابريج الذمة ولا مقبوله الزيارة

- يااااع علي العباس مالي كصد اعاندنك لجن من فرحتي طرت وخذيتها .. لا عليك ابو فاضل ابريني الذمه شمالك

- لا بريه الذمة .. خاطر مرة الاخرى تستجنين و تنطريني ليما اردن واكللج روحي ياله تروحين

-ياااع فلك طرني كون .. وعلي ما اهدنك .. اليوم تبريني الذمة

- امشي عنك

- من كون اهدك

ظل يضحك و كاللها : مبرية ام ستار صدك جذب اتغشمر وياج بس مرت الاخرى حطيني اعلى بالج

- جا والعباس انت بكلبي موش اعلى بالي .

ضحك و راح دش لحجرتها .. كعدت لاله تسوي الريوك .. شوي و طلعت كواغد : ها اصباح الخير عمه

- اصباح النور ، جا بعدج ما مزهبه الريوك

- لا خلصت و ايمان جاي تخبز .. بس اكلج عمه .. جني سمعت حس عمي حاكم اجا

- اي من غبشة اجا

- جا وينه ؟

- نايم بحجرتي

- جا خوش

- ياله عمه انا اروحن اخضن ارويحتي و انتن استعجلن ورانا شغل

- ها عمه شو تخضين رويحتج اليوووووم

- يااااع ههههه خايبة استحي اعلى روحج لا تحاجيني هيج

- جا اتغشمر وياج .

- اروحن سوالفج ما بيهن خير

- بس سوالف عمي بيهن خير ، موش يو لاله .

- اكومن اهطر هالجدرية براسج اشتغلي .

- ههههههه

راحت عمتي تغسل و انا ظليت اخلص الريوك .. دشت ايمان و هي تحط صفطت الخبز : يايمه متت حر ، منو الجاي يسبح

- عمتي

- اريد اسبح متت من الحر .. اكلج شنو ستار جاي

- لا عليش

- لعد هذا البسطال مالمن ؟

- شني جا غير مال عمي

- حاكم اجا ؟

- اي

- وينه لعد شو مكعدني ؟

- بحجرة عمتي نايم .

- هاااا

- شمالج ؟

- لا هيج مبيه شي

- دية و ان جانه يحبج لجن عمتي هم مرته و يكبلها عليش تتضايكين .

- اروح اشوف بتي اخاف كعدت .

مشت لحجرتها ما طلعت .. غسلت عمتي و طلعت وتدهن بالمسج بجسمها و تغني : هلهوله للشعب الصامد هلوله .

- يكولون يو طابت النفوس غنت .

- خايبة شو اليوم حاطة كورج وياي

- يا عمه وعلي من اشوفنج فرحانه انا من يمي اتختخ و افرح .

- اغديلج فدوة بنيتي .

خلصت الريوك و حطيته : عمه .. عمي حاكم يكعد يو لاله ؟

- لا يعمه خلي نايم خطية

حطينا الريوك وكعدت جلجول تاكل ويانا ، حجت : جا المتيريسه وينها ؟

- مدري صحتها و ما اجت

- شمالها

- من سمعت عمي جاي و ما مكعدها ضاجت

- وضوجتهم جا شني داكه اعليه طابع و مسجلته بسمها .

حاكم : عليش ما كعدتوني اتريك

كواغد : هلا كلنا تعبان

- لا والله شبعان نوم بالقطار .. بس جوعان حيل .

- هاي خيرات الله كرب .

تريك و هيس بايمان ضايجة من مانعه ابنها و تصيح اعلى بتها .. اكله لكمه و كام اعلى حيله راح لحجرتها

- ها الله يساعدج

عاينتله : هلا

وردت تلبس بمؤيد

- شو هلا .. ولا جني غايب شهور

- كول لنفسك .. ولا كأنو غايب شهور

- عليش

- هيج ماكو شي

- متضايكة عبن نمت عد كواغد كبلج

- انت مخير وين متنام اني ما الي حكم عليك

- دام الحجي هيج جا سدي الموضوع وخلنا نكلب صفحة .

حجه و دنك على مؤيد خذاه يلاشيه و يحبحب بهند ..

كامت هي تريد تطلع ، حجه : ايمان شمالج

- مبيه شي

- من كعدت و لهسه انت دايرة عني ما سمعت منج غير بس جلمة الهلا و انا راد من الموت .

- محترة دا اريد اسبح .

- روحي .

بدل و طلع للكاع شاف هدوة و سلم عليها و حباها و طلع للمضيف شاف الامور شلونها .

للظهر اجا ستار .. هلهلت كواغد بجيته عبن هو و ابوه اجو اثنينهم سوية و هي جان ظال بالها عليه بهالحرب المحمرة .

بشرته لاله حامل .. طار بيها من الفرح

ومن فرحته بيها اول ٥ ايام كضاها يمها .. خاتل بحجرتها لو يطلع هو وياها للبستان يتسامرون .

من بعد هالخمس ايام .. مشى لعايلته من يسرى

بس ٣ ايام و دك الباب بقوة اعلى بيت ابوه .. فك الباب و هو يصيح : ولك بويه تعال ليه مصاريني جاي تتكطع .

حاكم : خايب شماااااالك .. ولك ستااااار ؟

- ولك بوية راااااح اموتن

كض الحايط و كام يزوع .. بس الطلع من دود

صرخت كواغد : يااااااااه وليدي يمه .. شنهي الدود هاااااذ

حاكم : هاذ مشرب ... ولك ستاااار بويه

يكضونه و هاذ يذب من راسه و يطلع الدود من حلكه .. تسودنو كواغد و حاكم كضوه و ركضو بيه بيه للمستشفى .

الدكاترة يريدون يطيحون اعلى علته ما يعرفون شنهو الشاربه و بطنه مدوده .. و يكولهم لو متأخرين شوية جا مات .

وحاكم تسود .. هد اعلى يسرى وكتلها و يكللها : ولج انا خلصت اهديوة من فليح اطلعيلي انت و سحورتج و اسحورة اهلج و تريدين تموتين ابني .

كاضها وموديها لاهلها و هي تبجي و تتمسكن و تكللهم : مالي ذنب .

بس ستار ما طلع من المستشفى ظل راكد بالمستشفى يومين .. يسرى عد اهلها ولاله تبجي و تنوح بالبيت و حاكم و كواغد دايخين ببنهم و بين المستشفى وبين البيت .

مر سرحان الصبح خاطر ينشد اعلى ستار ، راد يدك الباب .. بس تعداه و راح عاين بالبستان . هدية موجودة

مشالها : ها بويه الله يساعدج

- هلا يبو مامون

- سمعت بخيج مريض وكلت امرله .. شنهي وضعه

- والله بعده مت عيني علي بالمستشفى حاله يقهر .. زاع دود

- لا حول ولا قوة الا بالله .. مامش غير مشرب

- ابوي هم كال هيج .. الحجي بيناتنا ام فليح مشهورة بسحورتها . و اظنن ما كصرت باخيي

- و تريدين ترديله يهدوة

تبسمت : جا وين اولي

- ان جان هاذ تغنج .. انا الغنج اعلى كلبي ماي بارد

- امش منا يسرحان وكتنا فات و هالحجي باطل .

- باطل اليكول عنه باطل .. زواجتج من غيري غصب هو الباطل موش انا .

- يااا جا ويو شافك احد واكف وياي .

- هدوة

تبسمت ودارت وجهه : امش يسرحان

- يمتى تطلكين ؟

- انا اكولن يو تروح لبيتك و تجابل بت عمك ليما تعرس وتاخذها ابرك من وكفتك هاي وياي .

- جا و العباس عرفت غيضج مني بهالسالفة

- انا ما مغتاضه و انت حكك بكلشي تسوي انا ياهي و احكنك .

- انت لوحيدج الالج حك بيه و كل هالناس باطله

يحجي و انا مدنجة و مستحة .. من كال هالجلمة رفعت عيني ليه وكلبي كام يخفك : امش يسرحان لا تشوفني الوادم وتقرا عيوني و انفضح

- مامش احد يقرا عيونج غيري .. مامش غيري اليفهم رطنهن .

- انا اروحن

ضحك : ههههههههههه

تبسمت و درت عنه و مشيت ..

مشيت عنه و انا الومن بروحي .. و اهيس الجاي اسوي حرام .. بس كلبي ما يفهم هالحجي بشوفه جن طير و حرروه من الكفص رفرف اعليه بجنح ملهوف .

شما اصدن اشوفن موش حكي .. و الجاي اسويه باطل .. بس مامش باطل ما عملوه بيه .. يو ما حكمهم علي .. جا هسه عدي منه ثلث فروخ ... شهروني و فضحوني و نهو علي و عرسو علي غصب .. ومامش سواية غمه ما سووها بيه .. لجن كل هاذ و شما اصدن .. اشوف الجاي اهيسنه موش حكي

بعد ما غابو شهور بالحرب وردوا ..

اهل فلاح يكولون ما رد .. بس ابوي جان يجذبهم و يكللهم جاي تغطون اعلى ابنكم وتريدون تسيسونها ليما تروح حرورتها و تردون تحجون بردتها .. بتي ما الها رده الكم .

بس هم جانو يكولون فليح مامش .. و كل اللي بالحرب .. نزلو لاهلهم و كضوا اجايزهم .

بس فليح ما رد .

ليما طلعت الاسماء

و اجا الخبر لاهله

فلاح تأسر عد ايران .. و طلع اسمه .. اسير حرب ...

رواية كحل عرب الفصل الثامن والخمسون

( ملاحقة )

يالِعب الطفوله ويا فرح صبيان

ياماي أنچفه وللجدَح شيردّك.. ؟

( عريان السيد خلف)

هدية : من سمعت الخبر و ليجاي و انا متوهه روحي .. ما اعرف احزن علي وان كونه عشرته مرة لجن العشرة ما تهون اعلى ابن الحلال وانا عدي منه فرخة و هالفرخة اصبحت مالها اب .. يو افرح خلصت منه ومن ضيم ، يو اموتن بقهري اعلى علكتي هاي الظليت عكبه لا انا مطلكة و اشوفن دربي ولا انا معرسه .

يوم جانا الخبر ابوي و امي نايمين بالمستشفى بستار ليهساه ما طاب مت عيني عليه ، و يسرى الغمة منفية عد اهلها ولويله جويعدة و تنحب اعلى رجلها .

ايمان : اني ما افتهم بهالأمور يعني شنو بعد متطلكين من فلاح

لاله : يا دية شمالج تطلك شني شو انت مدري شلونج ، زلمة اسير ما نعرف داره من سماه شبيدها غيى تظل تنطره ليما يرد و يو ما ردت هاي كعدتها .. جا الوادم تاكل وجوهنا يو هوت ... شيكولون فلفلت اعلى زلمه .

ايمان : و سرحان ؟

هدية تنهدت و كلت الهن .. هدن الحجي مالي خلك اسمعنه ...ظليت اعاين لبنيتي و انا ميته قهر .. جا حظي يربي لا والقسمة الوعد اي والله .. كضيت عمري معلعلة و ساعة الكلت جاني الفرج و راح اطلك و اردن لليهواه كلبي .. غاب و عافني معلكة .

للعصر يالة بالكوات طلعو ستار اخوي .. و جابوه لينا .. تناكزنا وحدة تحطله الفراش و اللخ تسويله المواجيل الخفيفية اعلى بطينته .. و التزهب البيت خافن يجينا خطار .

ساعة الطب تلاكيناه .. نحبحب بيه و ننحب .

ابوي كاضه و امي واكفه احذاه و شايلة علاكة الدوا .. كلت اله : بويه دريت ؟

- شنهي ؟

- فليح اسروه

- انا اغلام ابوي ، ياهو الكالج ؟

كواغد : يا يمه .. صكد ؟

- اي وعلي ، جنت بالكاع اشتغل ومرت وحدة تواسيني لدالها ادري عن الخبر .. لطمت اعلى خدي و نحت اعلى قسمتي .

حاكم : لا والله مو خوش خبر .

كواغد : جا هو الظال و المأسر احنا شخاش بجيبونا ، الله يرده سالم لهله خلنا نحير بوليدنا هاذ الرايحة روحة من سحورة اخته .

لاله : شكالو لكم عليه ؟

حاكم : يكلولنا مسمم .. بس يا سم هاذ اليدود البطن .. بطنه غادية مذرعه .

نومينا بمجانه و ظلينا جويعدين حذاه .. حجه ابوي : هاهيه بوي هديوة لا تغهرين بروحج الرد خير اعلى خير و الما رد انت ببويتنا هنا و حالج من حالنا .

كواغد : لا هاهيه جا شعدها هي من الاول عدنا وبنيتها بنيتنا ... تظل ابيتها والله كريم .

حاكم : لا تظل ابيتها شني ، هنا بهالحجرة هاي مالت امي الله يرحمها تكعد هي و اخيتها اجميرة و حالها من حالنا .

- يا جا و بيتها

- مرة عزبة شنهي كعدتها ابيتها

هدية : لا بويه انا بيتي ما اهدنه و هو حذاكم موش بعيد .

- لا بويه لا .. الناس شتكول عنه .. و شلون انأمن . ساعة الساعة وطفر اعليج واحد شنكول و شنحجي ، كبل جان بالعسكرية و نكول معرسة و جويعدة حذانا .. هساه شني غير نشنهر و نتخزه

كواغد: ابو ستار شنهي سالفتك جا غير بويتها و الوحدة ما ترتاح لا ما ابيتها ، عليش تكول هالحجي

- ما يصير ما يصير

- جا انا موش بحلها ساعة الغبت عني و انسجنت ٦ سنين و كفكفيت اعلى وليداتي و تحمليت الجار و المضى هلبت احد طفر علي يو كربالي .

المرة الشريفة يو تنحط بوسط كوم ازلام فنه المد ايده و كربها .. من كون الشريفة يهابونها .. لجن الخفيفة و طاكه سنها و فاچة الضحچة للرايح و الراد مامش احد ما يسعالها، و هديوة بتي و تربات ايدي .

- ولونها .. حطي بتج حدرج و اتچفي شر الوادم يكاغد .

تمنيت امي تداهره و تلح اعليه خاطر يرضى اظلن ابيتي و ما اجي ليجاي .. انا حلتلي العيشة بوحيدي و ما اهوا اجاعد احد .. بس امي سكتت و انا خفت اداهر ابوي و هو توه جاي من المستشفى و اتعيبان .

تمدد ابوي عد راس ستير و نام .. و امي نامت ليغادي .. عليت البنكه و صكيت الباب و خليتهم ينامون ، لورا المغرب اجوا خوالي .. و ظلوا الخطار يروحون و يوجون

وياهو اليجي يواسيني اعلى تأسير فليح .. ليما فكت الوادم لليل سركينا الباب و ستير عاونته لويله وخذته لحجرتها ينام و ظلينا انا و امي و جميرة بالحجيرة.

كواغد.: هديوة يمه شو صافنة يبتي

- والله ييمه صافنة بزماني

- لا تهمين بزمانج ييمه هو اليهم بيج من كون المكتوب اعلى الجبين لاون تشوفه العين .. ان صفنتي بيها و الما صفنتي يجرى اعليج الكاتبة ربج .

- يمه و اظلن هاذ حالي .. جا انا بس جاني الخبر ابوي داس بخوانيكي و حبسني بهالحجرة و عيب عزبة .. جا العمر شلون اكضيه .

-كربي ييمه اوصيج

كربت من عدها و جمارة مادة رجليها تنوم بنوسه .. واذنها يمنا .. حجت امي : اوصيج يبنيتي حملج ما يشيله غيرج .. انا امج لا تخليني اشيل عنج ، مت عيني عليج لجن القسم لمي قسملي .. و شجارت الدنيا علي .. جارت عليج ييمه و غاب و خلاج معلكه .

اسمعي يمه .. شنهي الفرق بيني و بين ايمان .. انا بحلها اخوطن السلف خوط وعباتي تهفي وراي ، ايمان يرضى ابوج تمد راسها من الباب و تعاين ؟

- لا

- عليش

- ما اعرف

- التعويد ييمه

انا من خذت ابوج ما رضى اشتغل ابيت الشيخ و تعارك وياي ويكلي كعدي و انا علي يابو علي اسايسنه و كلت اله بس اوفي دينه و اكعد .. تعود انا كل صبحية اطلع و مو بس ظليت اعلى قصر الشيخ .. نعيت و كمت اطلع قرايات و امش مجالس .. و ليما رد و تعارك وهم منعني .. بس بعديش ؟ بعد ما الناس عرفتني و تعودت علي ويدكون الباب و ملحة .. تعود

يو شما اطلع ما يكلي وين ..

ما غاب يمه ..

جتافي لابو ابو فاضل يايمة ما دكيت باب احد و كتله معتازه ، ابوي ذاك العزيز ما فرد يوم كتله بويه اعتازيت .. و انت بالكماط و حبوبتج مريضة و اخيج توه هاعلواته .. شديت حزامي وشلت حملكم كلكم اعلى جتافي .. اشتغل بالكاع وبالقصر و انعى و اطلع مجالس وفواتح ، و الخير ازود علي من نهد ابوج ...

بس شني ؟

بشرف .. ما خليت احد يشوف وجهي .. من امش الشيلة اجرنها فوك خشمي ..مامش فرد يوكف وكف ويا زلمه ولاشيته و خذتني السوالف وياه ، ما فرد يوم طلعت و انا فاجه حلكي و اتضاحك ... عليش ؟

احسب احساب الروحي خافن انعاب وانا بلا والي

احساب لشيبات ابوي و انا وحيدته

احساب لهيبة اخوتي و انا عرضهم

و احساب لابوج يو رد ما تلوحه الجلمة عني .

ولنه عرفني عفيفة وموش خفيفة يوثق بيه .. ما خليته يركب اعلى امتوني .. ولا هالمتيريسه هاي يكلها موتي تموت يكلها عدلي تعدل .. اسم الله هو بعسكرية .. احسبي جار اعليه شي .. شيصير بحالها ؟ ياكلها العدو والصديج موش يو لاله ؟ .. تعاي ليه .. اعتاز ؟ .. لا موش بعازة احد .. ادوس اعلى كاعي و شحده اليكربني

عليش ؟

ما عودته يكلي كعدي واكعد .. ولا ذبيت حملي اعلى احد.

احنا العراقيات ييمه ما نطيحلنا بوحيد اعلى الفاد .. يو عايب و ما يشيل حملج .. يو شيال حملج و الدنيا جايرة اعلى راسه و ما بجيبه فلس يو خيرة الزلمه نجيبه و نطي للحرب تكرط راسه .. وحدتنا يو ما تكوت و شالت حملها يمه ما تعيش .

ولا انت هسه يمه .

ابوج موش والي عليج و ان جان ابوج لجن انت هساه بلا والي .. حطي حملج اعلى اجتافج و شما زادت الدنيا بثكلها احملي .. ما يظل حمل مطروح و يفرجها ربج و تصير سالفة تسولفينها لجهالج يو كبروا .

كالج ما تعيشين بالبيت اسكتي لا اطاوعينه و تكليله اي ولا تداهرين وياه وتخلين باله وياج .. و يو راح ردي لبيتج ومن يعرف راح يتضايك و يتعارك ومرة و مرنين و ثلاث ليما يتعود انت بيتج وحيدج ما يكربج .

و الشغل لا تكعدين يمه .. ابوي عايش اعيشن بخيره .

الدنيا موش لاحد باجر انا و ابوج كطينا ومتنا بفرد يوم وين تروحين ؟ تظلين حدر نسوان اخوتج ؟ اعتمدي اعلى روحج و اشتغلي ... مامش شغلة تطلع بوجهج ما تشتغلينها .. لا تكولين ما اعرف .. كلشي جدامج جربي و اشتغلي . و اتبوشي و اطلعي و شوفي الوادم شلون ينحجي وياها شلون جاوينها و اجاريها وصيري كوية .. تراه اليذب حملة اعلى غيره يطيح ييمه و اليشيل حمله يعاونه ربج و يشيله عنج و يكويج .

- يعني ما اكعد عدكم

- لا تكعدين .. كعدتج ابيتي تكسرج و تحبسج ، ابوج واجبج تبرينه .. موش اطاوعينه .

وظلت امي تحج بروسنا و انا ووجميرة نستمع ليها و هي توصي بينا ، ليما نعسينا و نمنا .

طلعت الصبح جمارة للمدرسة .. وما شايلة جنطة .. امتحانات اخير السنة ، جاي تمشي .. صف بالسيارة خنجر

: شو بلا جنطة شنهي وين متخمة بثياب المدرسة

- عمي عليش تحج علي هيج ؟ امتحانات وامتحاني بكتاب واحد عليش اشيلن بعد

- ها خوش ، جا عليش صالج مده ما تمرين بيه ما تكولين عمي طاكه الضيم اشوفنه شبي ما بي

- موش انت الصحت بيه و نهرتني وكلتلي امشي عني .

- ومن ذاك الوكت لهاذ الوكت و انت زعلانه .. شنهي ولج يو بعير هم ما حقد هالكثر و زعل .

مشت وما حجت ضحك هو : خايب شوووف هم جميرة المصلبخة و صايرة تضوج .. خايبة كربي احجي وياج .

- شني عمي

- عمي والله اتكشمر وياج .. لا تضوجين تعاي اصعدي خل اوصلنج

- امي ما ترضى اصعد ويا زلمة غريب .

- هاااه .. هسه صارت هيج و انا زلمة غريب

- عمي شرايد مني

- اخيتج شلونها

- ازرك

- انا اخوك ههههههههههه جميرة المصلبخة تصنف .

ضاجت من عده حيل ووكفت : شني عمي

- خايبة رايدة انشدنج معتازة شي .. شلون حالها من درت رجلها غاب تضايكت بجت شنهي غير انشدنج عنها

- روح انشدها انا شني .

- شمالج انت ؟

- انا موش مصلبخة و اسمي جمارة موش جميرة .. وموش قرقوز خاطر تضحك علي .. خووووش .

هدته ومشت حيل .. ظل يعاين ليها : شمالها هاي ؟

اندار ومشى لسرحان ..

سرحان : ها

- مدري اختها لا خذت منها حك ولا باطل .

- والله يا خنجر حظي الردي ما ادري يمتى ينصف وياي ، ظن وصلت للحلك تيسر هالفليح هاذ .

- جا انا موش كتلك حظك غاسل ايدي منه من العچس .

- كلت تطلك و اخذنها و اخليها ام لولادي .. و هساه انا ضعت و هي ضاعت .. ولا احنا السما ولا احنا الكاع

- مالت تعرس بعد صعبة ما تصير بعد، جن النصيب يكلك ايس يسرحان و الهواها كلبك موش الك وارضى بنصيبك

- لا تعل كلبي بهالجلمات

- جا مامش غيرها .

- امشنا ليهم .. نواصل ابوها و انشوف اخوها ، والله كريم .

طلعنا من المعمل مشينا لبيت حاكم ، كعدتا شفنا ابنه و تحمدناله اعلى السلامة و طلعنا .

مرت الأيام اعلى هالحال

هدية ابيتها و تشتغل بكاع ابوها

و سرحان لاهي بشغله ومضيفه

وجمارة خلصت الخامس ابتدائي و نجحت للسادس ابتدائي .. وعرك كواغد ويا حاكم خاطر يخليها تكمل دراسه ..

هو يكللها: عيب البت كبرت و ما يصير بعد تطلع و تمشي .. عرفت قراية و كتابه هاهيه تكعد بالبيت تتعلم شغل البيت ليما يجي نصيبها و تروح لحالها .

بس كواغد داكة رجل و تكله : ما تبطل بت شاطرة نار حتى المعلم من اروحله يوصيني عليها و يكلي ديري بالج اتبطلينها البت نبيهة و شاطرها هلها تكمل ... ما تبطل .

و ظاله هي وياه مناكر و كل ما شافها طلعت للمدرسة .. يتضايك و يظل يحجي و يردم البيت ردم بهوسته و صياحه .. بس كواغد اطلع الحجي منا و تذبه منا .. تريدها تخلص دراسه خاطر تتباها بيها جدام حبايبها و تكلهن بتي مثقفة و دارسه .

واعلى هالرنة ماشين .

فرد يوم من الأيام ..

الدنيا ليل و سرحان توه صف سيارته جدام بيته خاطر ينزل .. انفك باب السيارة و صعدت وياه مره

سرحان : ها بويه ياهي انت ؟

رفعت بوشيتها و لنها دينار ، عكد حاجبه و بانت ملامح التعجب اعلى ملامحه : دينار شعدج يمي

- انا جاية و ناخيتك

- شنهو الجايه اعليه عكب ما فركيتي بيني و بين اخوي ووسوسيتي براسه علي .

- انا ما فركته عنك ولا وسوسيت انا كل الردته زلمة اعلى راسي يلمني و اعيشن بكتره .. لجن جنها الدنيا ما كاتبتلي هيج .. وانا جاية ناخيتك

- حركيت السيارة و لفتها ورى القصر خاطر ما يشوفنا احد ساعة الشفتها تلتفت و تحجي و مبوشة وبتها حدر عبايتها ، درت ليها و كلت الها : احجي ؟

- كريم فر من الجيش و صاله جم شهر يشتغل عد واحد خاطر يعيلنا .. و الحزبي الجان يهددني كبل عرف مكاني مرت الاخرى ورد يهددني .

- و زلمتج الحوك وينه عنج .. انا شنهو و جاييني عكب ما جذبيتوني و طلعيتوني انا التاهمج و طاعن بمرت اخوي .

- البت هاي امانة عدك يسرحان

- البت هاي شني ، تأمنيها عدي عليش و انتم وينكم

- انا يو ظليت عد كريم ما راح يسلم ، و اعرف الحزبي هاذ ما راح يمررها سلامات و هو فراري ، امس طلع من البيت و هاذ هدداني يكتب عنه تبعي و ننجتل انا وكريم و هالبت .. ما لكيت روحي الا لابسه العباية و جايتك

- كريم وينه هسه ؟

- ما ادري عنه .. الحزبيه يدورون عنه من كونه فراري لجن يو كتب عنه هاذ .. نروح بيها كلنا حتى هاي البت . بتي هاي عدك من كون مالي مجان اخذنها وراح ابعد من كريم خاطر لا اضرنه.

عكلي اندار وانا لا فاهم حك ولا باطل .. وهي تحجي و ترجف .. اكللها بهداي المرة ترجف .. ضمت بتها حظنتها حبتها بكصتها ، خلتها بيدي و هي تبجي .

- امانة الله عدك .. يو رد ابوها تسلمها اله ، و يو لكيت مجان زين اردن ليها .

حجتها ورادت تمش كلت الها : اوكفي بويه ، وين طالعة انت هسه ؟ ووين رايحة

- ما اعرف كل الاعرفنه انا خطر اعلى بتي و اعلى كريم .. و الحزبي ما يفك عني يو اظلن انفذ اليطلبه مني يو اموتن انا وياها و كريم .

- خليني اطلعنج من الديرة سلامات اوكفي ولا تروحين وحدج

- انا اذيتك هواي و الشاهد الله ما جنت ناوية اذيتك .. وما رايدة اوهدنك بيه .. خلني امش والطالبته منك بس بتي .

- وين تروحين ؟

- كاع الله وسيعة

حجتها و مشت بسرعة عني و الفرخة بيدي تبجي ، خذيتها ومشيت بيها للبيت .. انطيتها الملوك و كلت الها : هيج و هيج السالفة خلي البت عدج و خليني اطلع اشوفن كريم وينه .. حتى ابعدنه من الحزبية ما يكضونه .

ملوك : وينه هيه هو

- انا ادري عنه ؟ .. راح اروح اخلي ازلامي تدورة بسكوت البت عدج و الحارس بالباب شتعتاز وصي خاطر يجيبه الها .

طلعت من البيت و انا استغفر و اردد : لا حول ولا قوة الا بالله ، بخيرهم ما خيروني وبشرهم عمو علي ، اخ يخوتي اااااخ .

مشيت للمضيف ، خنجر مامش ، رحتله للبيت ما موجود ، خذيت سيارتي و طلعت للجول ، ربع خنجر موجرين النار و لافين داير ما دايرها .

صحت : حيييييهم الربع

انداروا : هلا ابو مامون .. هلا بالشيخ .. تفضل

- زاد فضلكم ، دايمه ان شالله ، جيت انشدكم شفتوا خنجر ؟

- مشى بشيغلة، عليش شرايد منه

-الحجي بيناتنا كريم اخوي فراري و الامن يدور عليه و هكو حزبي متسبكله خاطر يطيح ورايد ابعدنه .

- اعلى عينك نور ، كريم جانا امس و نام عدنا العصر درى خنجر خذاها و طلع بيه برا الديرة و اهم متخفين خاطر يأمنه عد واحد عرف

- صكد ؟ .. يعني اجاكم ليجاي

- اي اجا ، اكعد ، حيدرة صب جاي لسريحان .

كعدت و صبولي جاي فحم و هم يفهموني بسالفته : وليمتها راح يظل افراري ؟ و يو رد الحزبي هاذ ما راح يهده .

- هو الحزبي هاذ شيريد منه

- ما اعرف .. تعرفهم ذول جلاوزة و جايرين اعلى الوادم و عدالهم الدنيا دايمتلهم .

كمت من الكعدة و كلت الهم : دايمة يالربع ، يو رد خنجر كلوله يجيني للبيت ، خوش

- تامر يبو مأمون .

- اودعناكم

درت سيارتي و هديت الجول ورديت للسلف ، دشيت البيت و انا النوم ما ضاك عيني الف حسبة ابالي تروح و ترد و اخافن لا يكضون كريم .

ثاني يوم الصبح .. اجاني خنجر : ها ولك بشر وينه كريم ؟

- ابيت صاحبي بالولاية بس المجان موش دايم ولزوم ندورله مجان امن .

- وديني ليه هساه خل اشوفنه و اشرحله الحال ، لا بعدين اطلع انا الطارد مرته و مهجول عايلته .

- دمشنا ياله .

طلعت من السلف رحنا للولاية .. دشينا سلمنا اعلى ابو البيت .. هيسيت الزلمة متضايك من كعدت كريم .

دشيت للدوانية كريم متمدد : السلام عليكم

كام اعلى حيله : وعليكم السلام

وبعده داير عني .

- شعملت بحالك يكريم ؟ عليش وهدنت روحك هالوهدنه هاي ؟

- مامش وهدنه ولا هم يحزنون انا راح اسلم نفسي للامن يجنوني جم يوم و اردن لعسكريتي والله لا يعوزني الك .

- خايب يالاغم انا اخوك موش عدوك .. ويوم الكتلك مرتك هاذ حالها ما جذبت عليك .. اجتني امس تتنخاني و هدت بتك عدي و شردت

دار راسه : شردت شنهي ؟ عليش شردت ؟

- الأمن اليدورون عنك .. دازهم الحزبي اعلى بيتك و يو ما نفذت وراحت ليه مثل كبل مهددها يكتب عنك .. و هدتك انت و البت و شردت .

- المهددها ياهو

-انت من الاول صدكتها وما كتلي ياهو .. بعد ما طمسنا ليجاي .. جاي تكلي ياهو ؟ خوية ليمتها تظل اغم خلني اعاوننك و اطلعك من هالبلوة هاي .

- وين شردت

- انا ادري عنها وين شردت

- يعني شنهي

- يعني المرة لعبت اعلى عكلك ساعة الكالتلك برية ، هي طمست روحها بينهم بس ما رادت تخسرك و جذبت .

- الحجي هاذ موش صحيح دينار ما تهدني

- اصحى من احلامها يكريم .. الماخذها كاوليه كاااااااااولية موش ثوبك ولا هي التناسبك ، وهدنت حالك و ضيعتك .

كام من حيله و كض بسرحان : الحجي هاذ جذب و انت جاي تخرب بسمعة مرتي ، جذبببب

- نزل ايدك وووووولك .

حجه ابو البيت : بويه على كيفكم .. انا لخاطر خنجر رضيت اكعدنه عدي بس انا زلمه عدي بنات و اخاف عليهن .. و صياحكم هاذ يضرني .

سرحان : مشكور بوية ، زاحمناك .. و حكك علينا ، امش كدامي .

خذنا كريم و طلعنا من بيت الزلم تعذر من عدنا و سلم علينا .. وطلعنا ، تونا خطينا الباب كريم اندار عكس السيارة و راد يمشي

كضيته : وين رايح

- هدني امش لبيتي

- ولك يا بيت هااااذ اكلك المرة شردت

- ما شردت و دينار بعدها بالبيت و انت الجاي تجذب علي

- كريم اصحى كررررررريم

جبته بجف ولحكته بالثاني : بسك اصحى اعلى روحك ، خذتها و سكتنا .. تبريت من ابوي لجلها و سكتناااااا ، ركبتلك اكرون لجلها و سكتناااااا ، بس لهنا و بسسسس اصحى عليتني ، ساعة السودة الريدت بيها الهالسماوة و طحتو اعلى كلبببببببي ، لو ظال غاد انا ملك زماااااني ممممممممملك ... ولكم شيبتوني و لكم مامش ضيم ما ذبيتو اعلى راسي بسكممممممم

المن اصير لامك لو لنسوان اخوتك لو لجهاااااااله لو الك و البتك المننننن .. حنلكم زاد علي بسكم واحد منكم يكول هالكو*****، تعب تعبببببب .

خنجر : شمالك خوي اهدى

- ولك اكله مرتك هيج ..يكلي انت ... ولك يجذبنييييييي

خنجر : ميخالف ميخالف هدي تعصابك

دفع خنجر ومشى عنه للسيارة

حجه خنجر: كريم يو خطيت جدمك و علي اكصبك اصعد بالسيارة

- ان جانه ضيم اعلى كلبه خله يتبرى من عدنا و يهدنا ، ما متوازي بحملنا.

خنجر : انجب ولا تظل تاكل ***** .. اصعد وبلا حجي .

كريم : ما اريدن

- تصعد يو تخليني اسحلنك

-خنجر رحمة لوالديك خليني امشي .

- دنجبببببي اصعد مرمرتنا دصعدددددد ابن الاوادم

دفعاه دفع للسايرة فك الباب .. وجبره يصعد وهو صعد ويا سرحان بالصدر .. وكل واحد بيهم نار كبرى .

سرحان : مشينا و مامش احد بينا فج حلكه .. السيارة صنطه .. لهناك حجه خنجر

- هسه انت وين راح تودي سرحان؟

- اخذه للجول يظل لليل و اردنه لبيت زناد .. فارغ ومكفول مامش احد بيه ، يكعد، و احنا نحوله الاكل و الشرب ليما ندبرها و نكدر نطلعه .

كريم : اطلع وين ؟ اسلم نفسي للامن واردن للجيش

سرحان : هاك استلم

تنهدت بغيض منه ، حجه خنجر

- اكلك انت ؟ مطي يو جحش .. مو جا ينكلك يدورون حنك و الحزبي حاكم براسه بعد هالشرف هاذ منين اجاك ، دستجن واكعد وخلينا نشوف شلون نحير بطلابتك .

سرحان : دخيلك يا علي .. امن

خنجر : ايييه جا هسه دومنت ، داور ورد

- منين اداور ما تكلي ، من نعلعله الساعة اشفتكم بيها .

خنجر : خب هي يو بالهدف يو بنجف ، دمش وكرب

سرحان : نكلهم ضيف ويانا من البصرة و هويتك لا اطلعها .

- خوش

كربنا ، و خنجر يلف و ينزل بالجام ، وكف بصفهم و صاح خنجر : هاااا حيهم رجال الريس

- الله محييك

- وين

سرحان : جايين من الولاية و رادين لعربنه بويه وويانا خطار من البصرة

خنجر : اي والله اخ الكح**** هاذ جاي لينا و تولانا هبيط .. اليكول مامش اجل بالبصرة بس بعد اهل البصرة اعلى روسنا نشوي كلوبنا و نحطها جدامهم .

كريم : لا يالردي ولك ياهو اخ الكح*** سرسري

ضحكنا بصوت عالي جذب جدام الامن و الشرطي ضحك و كال : توصلون بالسلامة و ضرب على السيارة من فوك .

تعدينا الامن و انا طكيته بترس جفي .. و كريم كضاه من راسه : ولك عليمن تفشر انت

- بوية تولوني وعلي ، خايب وين ارجال الريس ءهلا ءهلا ..

ضلينا نضحك بصوت عالي و هو يكللنا : شمالكم جا غير اعدي بضحكه خاطر يخلونا نمش وما يحققون ويانا ، جا يو كاضينا احسن ؟

سرحان : والله يو كاضينه ولا مسوي خواتنا **** يالاغم .

خنجر : ههههههههه جا انا نسيت هو اخوك و اختك اخته .. بس ياله شيخنا امسحها بوجهي .

يحجيها و غاص بالضحك .. رديته : وعلي على يوم انزع هالخمسة و خمسين الحاطة اعلى راسي و الوبجك بيه خاطر ما تنسى انا شيخك .

خنجر : طكه زيج

ارتفعت اصواتنا بالضحك و خخفيت السرعة على كثر ما دمعيت من الضحك ، درتله : تكف يو لاله .. خلنا نمش بامان الله .

- جا انا كاضك ما تمش ..

ضحكنا و مشينا للجول ، بس كريم ردت ملامحة اغتاضت .. وصيت عليه الربع و جاي امش ، كضاني: سرحان بروح ابوي عليك بروح الخاتون بروح كل عزيز عدك .. احجي وياي الصدك

- والله يا خوية انا ما جذبت عليك غير الجذبة الاولى ساعة الكلت الك شردت .. بس باكي الكلام كله صح .

- لا تسودني .

- انا ردت اوكف وياك و ابعدنك عنها بس هي الما رضت تبعد عنك ليما ورطتك و شافت الموت كرب منك .. هدتك بس بعديش ؟ ..

- هدني من الكلام هاذ و كلي صدك خانت

- انا ما اتهم عرض احد .. حراس البستان حجولي عنها تطلع و ترد بالليل و كالو هطو حزبي يراود لبيتها ، ساعة الواجهتها ما نكرت .

- بس نكرت كبالي .

- و انت صدكتها و جذبت اخوك .

- يعني انا الغشيم الحويت وحدة كح*** و مصدكها .

- غشيم و اغم لدرجة ابوك مات و ما راضي عنك بسببها .

- وينها هسه

- ما ادري عنها ، هدت بتك و شردت و هساه البنية عد امك .

- امي التركتها لاجلها ..

حجاها و هو يفرك براسه و يطوي بروحه

- دامك تشم الهوى كلشي يهون خلنا نامن اعلى حياتك والله كريم ، راح اتفق ويا الربع يطلعونك خارج العراق و حصتك من ورث ابوك وياك .

ما رد ولا عاين ليه ظل يعاين بالجول ، يفرك بديه ووبراسه و يدفر برجله بالتراب .

هديته و رديت للسلف ، ساعة الوصلت للمضيف تلكاني رحيم : ها عمي

- هكو واحد حزبي اجا ليجاي

- شيريد ؟

- يكول كريم متورط ويا حزب الدعوة و اذا جنتو جاي تسترون عليه .. ما راح تسلمون لا انتم ولا هم.

- ووينه هسه

- مشى

كضيت سيارتي و طلع لمقر الأمن .. دشيت عليهم و كلت الهم : بوية السلام عليكم

- و عليكم السلام

- جايين للمضيف ادورون اعلى كريم مطر ضاحي ، هو اخوي من ابوي لجنه احنا متبرين منه نهد ابوي ، و هو جان ساكن احذانا و كبل اشهر هججينا من عدنا ، زلمه صاحب طلايب و احنا مالنا غرض بيه ، تكضونه شتسون بيه احنا مالنا غرض بيه .

- و عايلته وينها

- ما ادري عنه ، كلت الك الزلمه طردته من بيتي كبل شهور و ما ادري عنه لا يجي واحد و يكلي عنه .

.. تبريت منه جدام الامن و رديت للبيت بلغيتهم بالحصل ، حجه عمي : الحزبي مساوم اعلى شرف ، عليش ما نشتكي عليه ؟ و هاذ شرفنا .

- عمي يو جانت المرة الخانت وحدة من عدنا جا كلنا شرفنا. بس البت خطية كريم ، وحدة كاولية ، انا كاعد بالعرس ساعة الهزت جدامنا وركصت خاطر تعجبه ، هيج وحدة شلون اكولن عنها شرفي ؟

الذنب ذنب كريم و ان شاءالله نبعده عنها و عن العراق كله و يعيش برا ، كاطع خاله عايش بالكويت يروح يعيش غاد حذاه و يخلص ، لا اريدن اتوهدن ويا حزبيه ولا ابتلش بهمه ... من كون يو ردنا نشتكي مامش قانون ينصفنا .. قانونه مفصل اعلى صدام و حزبه ، من تمس الحزب يو شما جنت متأذي انت تبعي و موش عراقي .. هاذ الموجود .. اروحن اوهدن عايلتي و هالنساوين هاي يعمي مثل سالفة زناد ، خلنا نستر اعلى ارواحنا والله اعلى الظالم .

- الله كريم . لا حول ولا قوة الا بالله .

- هاي الصولة يعمي موش بس اعلينه ، صدام جار اعلى اكثر شيوخ الوسط و الجنوب و ضيك اعليهم خوف لا يطاوعون ثورة ايران ويثيرون البلبلة ضده .. والعاكل البينه اليكفكف اعلى اهله و يحافظ اعليهم و ننطر ليما الله يفرجها عنه.

كمت من مجاني ومشيت لحجرتي ، اندكت الباب :تفضل

راديون : هلا خوية

- هلا بيج تفضلي ، كربي

صكت الباب و اجت عدي : ها ؟

- انا موصايه خاطر انشدنك

- عليش ؟

- بت عمي موش انحجت بيه و عمي اطاها الك و هاي السنة مالت بشرى طلعت .. تعرس خوية يو لا ؟

- الوكت موش وكته ، لجن باكرب وكت انا احجي ويعمي و انهي هالموضوع

- تنهي بخير يو شنهي

- خوية انا غير هدوة كلبي ما يهوى .. وهدوة ما ينعرف كاعها من سماها .. وانا معلك بيها ، ما اريدن اوهدن بت عمي وياي و اظلمها مثل ما ظلمت بشرى.

- وفروخك ؟ انا اليوم موجودة ، لجن باجر يو طلع جسام من الحبس ياهو الهم ؟ و عمتي ردحة موش حمل فروخ .

- الله كريم ، هسه انا دايخ بسالفة كريم ،احلنها و اندار لجهالي .

- براحتك .

مشت راديون و هي تبلغ بت عمها .. تن سرحان موهدن بهدوة و ما يكدر يظلم مرة وياه .. و انت ما رايد يظلمج و باقرب وقت يحجي ويا ابوج و يحل هالموضوع، بس فخرية ما رضت .. وكالتلها : شيخ ويا كداتها و شكبر اسمه معلك روحة بوحدة زركة ما تسوى اظفره عليش ؟

راديون : لا ديه لا تحجين هيج عليش ما تسوى انت يو تشوفينها شتحملت من ضيم هالعشك ما حجيتي هيج .

- عشكيش يديه ما تكليلي هم ال ثجيل يتعاشرون .. لحمهم مر ، مطيح كلبه بوحيدة منهم و معلك روحه بيها.

- هاي بعد الكلب مو اعلى كيفه منين يهوى .

هدتها و كامت ...

ثاني يوم .. وكف سرحان اعلى الشط .. اعلى عادته الفجر .. ما ينطر احد لجن ظال يجي يجابل ذكرياته اعلى الشط ليما طرت الشمس ، خطى اجدامه وراح يعاين كاع حاكم من بعين خاطر يشوف هدوة و هي تشتغل بالكاع .

وصل بس هدوة بعدها ما جاية ، ظل كاعد ناطر يشوفها خاطر يرد لاهله ... اجت هدية و بتها اعلى متنها ، خلت البنية بالكاع و ظلت تحوش .. البنية تبجي تلوع تريدها .. تشيلها .

ابتسم هو وكرب من الكاع و صاح : ها الله يساعدهم

فزت و هي تشيل ابتها : هلا بيك ، شجابك بهالصباح .

- هيج جنت مار و كلت اسلم ، شلونج ؟

- تحت رحمته

تحجي و تسكت ابتها و تهز بيها ، حجه : شمالها البت عليش تبجي ، شفتها من ابعيد ما سكتت

- مدري شمالها من امس و ليجاي ما سكتت حتى الليل ما نمته من بجيها.

- مريضة ، تريدين ازتلج وحيد ياخذها للمستشفى

- لا ما يعتاز ، النيبان طالعات عدها ومأذياتها اظنن ، سرحان

- امري ..

- ما يامر عليك ظالم لجن ما اريدنك تكرب مني .

- انا اعرف وكفتي هاي موش بمحلها بس ساعة الشفتك موهدنه ابتج .. جدامي خطن ليج لوحيدهن .

- شما درنا و ردنا ناوسي دربنا .. الدنيا ما صحت ويانا و جنه الله ما كاتبلنه قسمة .

- ما يظل شي اعلى حاله .. و احنا النكتب كدرنا يهدوة .

- تضكر من كتلي لا تهدين ايدي يهدوة .

- اذكر و اذكر انا ما جنت عد كلمتي و خليتج للما عرف كدرج .

- لا يسرحان .. مامش واحد بينا هد ايد الأخر ، لجن موش ادينا هاي ، من كتلي حطي ايدج بأيدي .. جانت الجلمات اعلى الدليل خضرله ادين و حطهن بدين كلبك و من ذاك اليوم و لهاذ اليوم و ادينه ما هدت .. بس الدنيا معاكسة .

- الحجي بكلبي هواي وانا شيخ ويو حجيت جدام الوادم اسكتنهم و احجي برهدنه ، بس مدري ليش من اوكف كبالج الجلمات يضيعن و اظل اجلب بذيالهن و ما اعرف احطلي جلمه اعلى جلمه و اعبر بيها و اكللج الضامه بكلبي .

- ما يعتاز تحجي .. انا يو عاينت بعينك يوصلني كل هالحجي التكول ما يرف اعلى السانك .

تنهد : ما اريدن اطول و اضرنج بوكفتي بس انا راضي يو بالشهر مرة اشوفنج و احجي وياج .

- ونرد للشوك و نتأمل ؟

- دام الله موجود انا ما كاطع امل .. و ظال اعلى امالي هلبت توصلني ليج .

- امش كبل لا يشوفك احد واكف احذاي

- اودعنج .

- مودع بالله .

درت عنها و مشيت و خليتها وراي و هي تداري ابتها و تحبحب ابكصتها .. مدري هالبت هاي يمتى الله يكتب و تصير ابيتي مرة و اترس بيتي بجهالي منها .

رحت للمعمل كضيت شغلي ورديت للمضيف .. اجاني الحزبي مرت الأخرى و حجه و كال : يو دليتني اعلى مجان الكاولية ، اهدن اخوك و اجزي عنه و اجذب التهمة .

- جاي اتساومني انت يو شنهي ، انا كلت الكم بري من اخوي و بري من هالمرة و مضيفي ما ينجاب بيه هالطاري بعد ابوك ، انتم زلمنا و ارجال الريس و اعلى راسنا لجن هالموضوع لا تعيده بمضيفنا اخوي بري منا انا .

زفيته و طلع من المضيف ..

خنجر رايح و مبلغ كريم ... كايله الحزبي هيج جاي يساوم و سرحان طارده .. خنجر من عرف ياهو الحزبي الحاط عينه اعلى مرته .. هد مجانك و هد اعلى بيته .

ويا ما هاد .. داج الزلمة بخاصرته ٣ دجات بخاصرته ، مرت الحزبي كايمة تصرخ و تعيط بالبيت ، خله و شارد كريم من سامع عياطها .

ويا ما طالع و الأمن ملاحكينه بسياراتهم .. تلايموا اعليه ... و كضوه و طاح بين اديهم ....

رواية كحل عرب الفصل التاسع والخمسون

( اتفاق حیدره )

شكتر ليلك جوانی و روحی عطابه

اعلى جرحك

عريان السيد خلف)

سرحان : نایم و باب حجرتی اندکت بكوة ، فزيت اعلى حيلي و صحت : ياااااهو

وانا اتناوش الدشداشة والبسنها

صاح عمي : اصحى يسرحان بسااااع

- شنهي عصبيبي

فكيت الباب .... شما يييييير ؟

الامن كضو كريم

حجيتها و تعديته بلا وعي و انا هايم للباب ، لكيت خنجر و سالم بالباب : شنهو الصار

طلع وراح اعلى الحزبي وويكولون داجة ثلث سجاجين و كاضينه الأمن.

دخيلك بين ابي طالب .... و هساه وين خذوه ؟

خنجر : ما تعرف ... هالحاير انا وعلى دخت دوخة ما دايخها بزماني اعلى هالولد هان

سرحان و شعده طلع من البيت انا موش كتله اركد ليما أدبر طلعتك من العرااااق عليش طلع

الذنب ذنبي بيو مأمون ... انا الكلتله اعلى النذل الأجا يساومك.

سرحان : امشينا لمقر الامن ننشد عنه ، لوف السيارة

ابو فاضل : وين وجهك يسرحان بوية، انت متيري من عده جدامهم و يو رحت ليهم و نشدت

عنه تتورط بمصيبته

جا اهدن اخوووووي بين أدبهم يعمي .

يو ردت تحافظ أعلى مضيقك و ناسك تصبر يسرحان .

درت عنه و انا عيوني مجمرة و اهيس بركان بقادي وجر .. گفت اصبحن ااااااااخ ولكم يخوتي

طلعت ملوك من بيتها الثاني و اجت ليجاي صاحت : ابني وينه يسرحااااان ، كلي ابني ابخير سرحان ، وليدي يمممممه.

ولحكنها راديون والتساوين وصياحهن على بنصاص الليالي و اذا كاض يكلبي و افرك بيه ... درت لعمي و انا اكلله : النسوان فوتهم داخل عمي .

حجيتها وطلعت للمضيف ... اجا الأمن و بلغاني كريم صار بدينه ... ما اطيته جواب ولا كدرت انطك جلمة و غيضي فاض بفادي و اميس بروحي راح الفجر ...

ملوك ما صبرت اعلى هالحال ... و راحت و ذیت روحها اعلى اعتاب المقر و تصيح : وليدي ادخيلكم و ادخيل الله ابني .

تابعينها ولد عمي و عمي و كافين بيها ، و الحزبي كايل الهم : بويه انا موش ضدكم .. لجن يو تروحون وما تردون مرت الأخرى عنه يكون افضل ... من كون ورطة الولد جبيرة و ما تنحل و يو

دشيتو بيها تتوهدنون و اطيحيون وياه ... خلكم بعيدين عنه .

اعلى هالحجي عمي جار بملوك ورادها بالبيت .. وانا الكعدة ما اكثر ليها .. من اكعد اهيس نار حدري تجويني و اكومن ... محتامة ارويحتي ولايبة و ما ادري شنهو البيدي و اعملته و اجرن

اخيي من ها الطلابة .

للظهر اندكت الباب .. و اجا واحد رفيق .

طلعت انا .. السلام عليكم

وعليكم السلام

كريم مطر ضاحي اخوك موووو ؟

اي بويه اخوي ، شنهو الراي .

طلع من جيبه جيلة وكال : كلب مسعور ما يسوى فلوس الطلقة .... حك الطلقة

ومد الجيله ليه و اطالياها ... تنهدت برجفة مالت قهر

فرت الدنيا بيه و اهيس الدم بعد ما يصعد لراسي و عيوني غوشن ... ضاجت الوسيعة بيه بذيج الساعة .

حجه : حك الطلقة ياااا شيخ ... هههههههه

مديت ايدي اعلى جيبي طلعيت فلوس و اطيته حكها ، و كلت اله : ان جان ميت وجتلتوه انا ما رايد غير جنته ادفنتها واكرام الميت دفنه .

لازم رايد تندفن وياه ... الجلب ماله كبر و اخوك اتعدى اعلى الحزب و الجلب أكرم منه .

حجاها و اندار صعد بسيارته، صكيت ايدي اعلى الجيلة و همان دموعي .. و عمي واكف حذاي ارتفع ایجاه .

دشيت و اهلنا كلهم مناطرين ورا الباب و يكولون : شنهي خبرونه ... شكالولكم ميت يو عدل

دشیت و فکیت ایدی ليهم وراويتهم الجيلة وكلت الهم : كريم بذمة الله .

صرخت ملوك و صاحن النسوان و اتلاطمن ...

و انا دنكت و كمت الحب بعلو حسي ... وزلم العشيرة التمت اعلى الباب .

سندوني ولد عمي و دشينا للديوان والنسوان عمى دخلاهن جوا .. و انا كعدت ... اعاين للدنيا لا

ظلي بيها اخ ولا اب واهل ..

تكرب عمي : الناس تجيل يسرحان شنهي الراي ، و الحزب منع نسوي اعليه فاتحه .

خلنا نكوم المضيف ... ونستقبلهم غاد و كلل نسوان لطمهن جوا ولا يطلع حسهن .

ان شاء الله .

تونی جای اکومن ... دشت کواغد و هدية و البنات وياها ، رفعت اديها كواغد و صاحت : ولج ام زنااااااااااد دييييييه .. من عينى عليج يمه .

صدينا عنهن خاطر يمرن براحتهم .

و دشت کواعد و تلكتها ملوكا : راحو مني ولدي ... يمه تصخم راسي بممممه يمه ولديييييبي

رفعت اديها كواغد و لطمت والنسوان الاجتها :

اهل کلبی و علیه بهونون ... اهل كلبي عليه ما يهونون

ردناهم تجيه و الوكت عون .. اهل كلبي ........

صرخت ملوك و کابلتها و ادك اعلى راسها و تصرخ .. وكواعد تكمل : وينك بالشيييييخ مطر وينك .. ولدك ضاعو اخلاف عيييييينك ... يا مطر يا بووووووويه

کامت تصرخ راديون و تصيح : اي والله ضعنا خلااااااااك بووووووووويه .

كواعد : هدونا و نامووووو بالهمية.. هدونا نامووو بالهيمة.

و النسوان تلطم اعلى دكاتها ليما خلصت كعدت جدامهن وحطت شيلتها أعلى وجها ونعت :

اااااااااخ يمااااد يمه

يمه ما لايك اعليك .. الموت بيمه ما لايك اعليك

وكل احاجيك وكل احجيك تريض بيمه وخ احاجيك

ااااااه اااااه لحم كلبه .. اللحم كلبي بيك يا يمه .

وظلن ينعن و يبجن والزلم صاكه الباب عليهن خوفا يطلع حسهن ليبرا و يبتلون بالامن ...

طلع سرحان للمضيف وظل جاعد بيه و الناس تجبل و هو يتعذر منهم ... وكال الهم : مامش عزا

اليودنا يصليله الوحشة و هاي هيه .

وهو اعلى باب مضيفه اجا سالم

:- ابو مامووووون

ها يسالم

ام زناد طاحت و تخربطت الحك

تراكضنا للبيت ، حطيناها بالسيارة وصعدت وياها کواغد و راديون و الدرب كله ينوحن و يبجن

و ملوك فاكده .

وصلنا للمستشفى دخليناها ... تلاكفوها من ادينا .. و حطولها مغذی و داروها و رادیون تنعی و آنا

و عمي وخنجر و حميد .

صفنت .... حجیت

اذا جانو عدي اثنين يتامة و جهال زناد بركيتي، انضافت ليهم بت كريم و طاحت یتیمه اعلی

افادي ... بالله كلولي انا وين اطي وجهي بكل هاليتامة والتساوين ..

ابو فاضل : الله كريم ... هاذ الله كاتبه علينا .

کواغد : اكلك يمه جا شني مامش فاتحة هيج يظل

لا فاتحة ولا كبر ولا كلشي ماكو يم ستار .

مت عينهم كون اعلى ظلايمهم ... جا وين يروحون من الله ، ناخية علي بن ابي طالب البشل

حالهم و يوهدتهم أعلى ظليمتهم هاي ..

ابو فاضل : اعلى هونج يم ستار الحيطان الها اذان لا يروح احد يسمعج و مالنا حبل بعد وعلي .

الله كريم يبو فاضل .. تهون ما تظل متلايمه ويفرجها ربك ...

سرحان : ام ستار خافن نتعبج ويانا ، اخلي خنجر يوصلح

لا ييمه جا ساعة الصبح اهدتكم شمالتي ، ابوكم فضله على ليجاي ما اجازي يو و گفت و ياكم ها الساعة .

الله يطيح العافية .

اندار للمضمد و کاله : شنهي حالها ؟

انهيار عصبي ... ما عليها في ان شاء الله تخلص المغذي و ترتاح و تاخذونها.

- مشکور

اطيته فلوس و مشى عنه و ملوك نايمه اعلی سديه و مغطيتها بعبايتها ، و رادیون تلوح بهدای و

كاعدة احداها، وعمى رد للمضيف غادي و انا وخنجر واكفين .

کضیت خنجر و طلعت بيه ليغادي : العمل بحالنا هيج يسلم يخنجر

لا وعلى ما يسلم .

الحط عينه اعلى عائلة اخينا ووهدن حاله پتوهدن حاله و تاره يطلع يخنجر .

امر و الركبة سدادة

الجيلة الطوها الية ... تنحط بكصة الجان السبب .

ظل يعاين علي، اندار منا ومنا ... حجيت : تكدر

اكدر

طلعت الجيلة من جيبي ... وخليتها بجيبه و كلت الله : لا تكصر بناره .

اعتبره تم اعلى امرك .

- دايم يخوي .

طلع من عدي و انا رديت للردهة ... اعاين الملوك فاكة حلكها وفائدة ... الشكل بان أعلى ملامحها .

ظليت موجد بوجهه و رد بالي يفرزن ذيج الأيام

دارت ليه كواغد

ها ببو مامون اشوفتك سيلت

اعلى بلواي يم ستار

تشمی و کدها و تشيلها عن اهلك .

يم ستار انت عايشتينا وتورجتي اعلى يلونا و تعرفين شكتر كلبي حمل من هالمرة هاي .....

سعت بديها ورجليها خاطر تخليني غريب و جردتني حتى من اسمي و سعتني غريب و بعدتني

عن ابوي و عن اخوتي و غربتني عنهم ... وخلت اخوتي ما يشوفوني غير وحيد يتصيد لهم ....

جنت اتمناهم يظلون حذاي و اشدن ظهري بيهم ، فركتهم على ليما خلتني هاذ خالي .

لا تكول هیچ بیمه ، اشكر الله

و النعم بالله لجن شكثر ما اكولن اسامحنها ... شيئاتها بكلبي مورمات منها .. غربتني و بعدتني

و تالي التغربوا ولدها وما ظلها أحد غير الغربته .

کواغد : جا ما يطي الا الكريم

و يو ردت من الله يطيك .. أطي العبده

ولا تكول هاذ ما يستحك .. كلنا جدام الله ما تستحك .. يطى و يمد لينا بافضاله و احنا يو صار

وكت الصلاة يا تكلنا وشيخلصها لينا ... نطكطها و نمش نهوى اعلى دليتانا هاطر نترس بطونا ...

ارحم ... يشملك برحمته

اطي .... يطيك و يزيد اعليك

اطي وكول لوجه الله ، كلشي با بنادم ضايع بس يم ربك ما يضعلك حك وتلكاه بدل المرة عشر .

لا تتحسف بيمه ... افتخر بروحك لا دنيت الخطية ولا لوتيت كلبك بغمام الردايا ، هل الله واكف

حذاك من كونك ماشي عدل و يا خلكه .

جلماتج يا ام ستار يطيبن الفاد ... يضكرني بناس ... الله يطيح اعلى وكفتح هاي ويانا المثلج يخاف ويصك بابه ها فن تلوحه الاذية من الجار اعلينه ، لجنج اصيله .

- لا تكول هيچ ... انا يو اطيكم ماي عيوني ما اجازيكم عين افضال ابولا جانت مغور کتنی بیمه .

جا انسى شكثر وكف وياي وكفات ما وكفهن الى اخوي المن امي و ابوي .

الله يرحمه .

كملسنا من المستشفى جم ساعة، خذينه ملوك وردينا بيها للبيت ... دخلناها جوا ... كابلتها

و كعدن داخل و انا برا اكعدت اعلى السكملي .. دنجيت راسي و اسمع التعاويهن ...

هنيال المرة تكدر تصرخ و تغير واطلع البفادها و تنعى ، انا جلمة اخ يو طلعت مني تشك افادي

اعلى قهري وكسرتي يأخوتي .

مدلج و حاط ايدي اعلى وجهي واستمع ليهن ....

سمعت بچي جريب مني، رفعت راسي ولنها هدوة تعاين ليه و تبجي .

ها بهدوة

- الله يشيل عنك

ادموعج باذلي بويه حسيهن.

شلون احسنهن و انا اشوفن النار موجرة بيك .

هزيت راسي و تنهدت : الله كريم ... شلونج انت بتج شلونها ..

على الله .

مديت ايدي خاطر تطيني البنية .

كربت اطتني ياها ... وبعدت ... حبيتها وكلت الها : تسمها ضكريني ؟

امنية

تبسمت بقهر و انه احبتها .. وكفت جمارة بصف هدوة و هي تكول : بس لا احنا تندهلها نوسة

شلت راسي : عليش ؟

هدية : فلش راسج .. جا دشي انت

جمارة : لا ادفعين

هدية : من كون اسمها شواي يوكف بالحلك اعلى السهولة كمنا تندهلها نوسة .

حلو .

کرب مامون ووكف يصف ابوه ... و هو يعاين البنية جراه اله وكعداه اعلى رجله و حیاه، حجیت : لا تكدر كليك يسرحان ... انا دوم اشوفتك كوي بصبرك، و ان جانها كسرة اخوتك جايدة شد حيلك الخاطر هاليتامه .

- تواسيني بهدوة

جا ما يبدي غير اوسيك .

ظل يعاين علي .. و كال : يا بختي .

ظلیت اتلفت منا و منا لا ادور يروح احد يسمعه وتصير المصيبة مصيبتين .. ما شفت غير بت

عمه ليغاد عنه واكفه لجن اهيستهن موجده ويانة .

دکیت اعلى ظهر جمارة و كلت الها : ياله كلي لامي نعسينا هل نمش للبيت .

اوصلتكم

لا جا انت بيا حال .

اعلى أي حال ما عدى غير اكعد و اسكت ... خل أوصلتكم خاطر مناك و اطلع الخنجر

جمارة : خنجر وينه ؟

کرصتها حيل فزت ... هو انتبه وظل يعاين ... دفعتها ليغاد و مشيت وهو طلع، رديت كرصتها :

بربوك جا وكنج تنشدين عن خنجر الدنيا بيا حال و انت همچ خنجر

- جا انت عليش واكفة تواسين بسرحان بو كدرتج بس علي تكرمين بيه .

- صمي بوزج لا الطج اعلى حلكج .. يلا ولي .

دفعتها وكفت و پای بت عم سرحان : انت هدية موش بو لاله

شنهي دية ما تعرفيني ؟ ترا زماني جنت اشتغل هنا و اعرفنح و جنتي تجين و تكعدين وياي عبيش تنشدين .

ما جنت اعرف البالي، عدالي خدامة ابيت عمي و بس ، بس طلعتي موش هيئه ، بخدمتج نیج كوشتي اعلى ابن الشيوخ وورطيتي بيج .

لمي روحج و احجي وياي عدل ، شعدي وياه

کل و کفتح های وياه و تنشدين ، انا النشدنج .. شعدج وياه

- سرحان زلمة متفضل علي مامش مصيبة طاحت اعلى راسي الا و شال عني و الكاه حذاي بكل مصيبة اطيحن بيها .

جا معروفة عليش ، بس المرة الاعلى ذمة زلمة وهي تتونس بوكفة أهواها الكديم حداها

شينكال عنها.

الحجي هاذ ما ارضي .. واحجي عدل يو ردتي تفجين حلكج وياي .. وياريت تبعدين ولا

عيالج يدرون واكفه حذاه و نواسینه ؟

ادخلين روحج بسوالف ما تخصج .

بدرون الحومين على و ما جن زلمتج مفكود متونسه بغبابة و انت تتصيدين لشيخ ال ضاحي.

عيالي مالهم غرض بيه و انا ما غلطانه و یا وحید و سرحان ما عدي شي وياه .

جا خوش خل نشوف يو دروا شيعملون .

دية شمالح و شنهو التريدينه مني

و گفت امي : هااا شمالجن

ضحكت هي و تكللها : لا هیچ جنت الغشمر وياها ...

اندارت تمشي وردت تنوعتلي و كالت : يو صارتلي فرصة امرن بيج باجر

حجت امي : هلا بيج يمه ، ياله بناتي امشينا..

درت و انا الخوف كاضني من جلماتها ... طلعنا للشارع سرحان موجف برا بکتر سيارته، صعدت امي يمه و احنا ورا .

كاد السيارة لي بيتنا و نزلنا و امي تتشكر منا ... وراح ...

سرحان : ها خنجر بشر

- الزلمة بالمستشفى .. يطلع ويتنفذ الأمر

حيدرة هو الراح ينفذ .. خاطر انت بعيد عن السالفة و حتى يو حلفت عنك و عن ازلامك .. صادك يحلفك و ما تتورط بدم هالردي .

- حياك الله خوبي .

الله محبيك بويه .

داوريت السيارة و رديت البيت ....

الليل ما نمته من القهر و حسن النسوان يتعن، ما بطل ونهن ... ما شفت النوم ولا ضكنه وانا

اتكلب بفراشی و اهیس بروحي متزوهرة ..

زناد ما ادري عنه و كريم هاذ حاله ....

كلبي اعلى اخوني يوجعني و ما جاي ارتاح بفكدهم .

الثاني يوم .... العصر

اچا خنجر و انا ناطر منه الجلمة ، واكف و مدنج راسي وكف احذاي و کال : ابو مامون اشوفن

ظهرك محني

الاخو حزام ظهر يخنجر و اخوتي كسروا ظهري .

افا عيب عليك وعلى تكولها وانا احذاك ... يمن كون التراب اطمن و الجلاب اطلعتي و تاكلني

يو هديتك يوم يسرحان

دك اعلى جتفه : وياك للمنية ووكت ما تامر الروح الك يرخص الماي .

كفو منك يخوي ، اشدن ظهري بيك يختيجر .

و ما اهدتك يخوي .

دکیت اعلی جتفه و مد ایده و حطها اعلى ايدي : شصار عن الكتلك عليه

- اعتبرها الليلة تم

احذر الامن موش سهل ذول واوية وما يخفى عنهم شي .

ان جانو واوية احنا ذياب حول ... لا تهم بالامر و اخيك موجود .

خنجر رايد تار اخوي اعلى ايدي

انا اخافن عليك لا يشكون بيك ويتلايمون اعليك .

الله كريم .

ما اكدر اوكف هيچ بلا كوة و اخوي انهدر دمه و انجتل ..

ورى يومين ......

اجا خنجر و بیده جبس ما اعرفه شنهو

ها يخنجر

اعذرني خوبي انا جان الود ودي اخليك تاخذ يشارك من الردي الداس اخوك .. لجن ما رايد اوهدتنك بيه و هو فرد جربوع اجرب .

و شنهو الصار ؟

مد ایده و اطاني الجيس .... شنهو هال

الزلمة التعدى اعلى اخوك و عايلته ... انجتل

لجن الربع ما ردو فارغين ... العيون النحطت اعلى عرضكم ... شلعوهن .. و هاي من بالجيس ..

تنهدت و مديت ايدي كضيت الجيس، عايت ليه : اطلب التتمناه يخوي .

يطل عرك والله يسلم راسك يخوي

تبسمت ليه وخذت الجيس و كلت اله : جنته و بنه ؟ دفتتوها ؟ خافن لا يهيسكم احد و

تتوهدنون .

انا ندفنه ها لجلب هاذ .. ذبينا الجلاب الجول ...

عليش ها لفعل ... احنا موش مثلهم ... يكفي خذنا بتارنا .

انا رايد اصيرن مثلهم ..

- خلك بالمضيف و انا رايح للبيت .

مشيت للبيت دشیت و ملوك مكسورة .. ومدنجه ومحنية ظهر اعلى ولدها، دشيت و كلت الهم :

اطلعو غادي

شالت راسها تعاين ، كلهم طلعوا من الحجرة، نصيت حسي و كلت الها : الحط عينه اعلى عائلة كريم و بلاه بهالبلية .... انجتل و های عیونه .

فتحت الجيس مليان دم و المحمال العيون بوسطهن : هاذ تار این ال ضاحي

ساعة الحجيت هيچ دموعها همان و حطت ايدها و هلهلت : كالوش .

دنجت و سلت الجيس منها دشوا وهم ينشدون .. انا عفتهم و طلعت عنها .. لين حتى عمي ما

يدري بهالامر .

خليت العيون بالسيارة وطلعت بيها للنجف .....

توضيت و دشيت زرت الامام علي و من ضريحة طلعت بوجهي للمكبرة .. حطيت العيون جدام كير ابوي

دلجيت و كعدت عد كبر ابوي و حطيت راسي اعلى كبره .. قريت الفاتحة .. تنهدت و انا اكلكه : ما كدرت احمي ولدك بويه ... ما كدرت احوى ولدك ، شما حاولت اخويهم ما طاوعوني .. حملك الحطيته اعلى جنافي هد امتوني .

يا شيخ بركبتي كومة نسوان و ايتام ... هديتني هد بوية .. هديتني بوكت كلش اعتاز مكلك و حكمتك بيها ..... حجيت و اختنكت سكنت

ردیت شلت راسي و عاينت اسمه اعلى الكبر : اتوخذ تار ابنك بين ضاحي ، لجن ما كدرت

اجبینه و ادانته احذاك بويه .

ظليت اعلى كبر اشكي واحجي وياه ....

ليما هيسيت الغروب نزل و القبو اظلم ، كمت من مجاني و طلعت ... ما رديت لاهلی و ظلیت

بابت بالامام علي

جنت حيل معتاز اشتم عبير كبر الأمام خاطر تسكن روحي و تمام جروحي عده و ارتاح من تكل

الهموم الاعلى اجتافي.

هدية : من بعد شهر من موتت كريم ابن الشيخ مطر .... لا شفت سرحان ولا شافني .. اخر شوفه

الي ساعة الوصلاتي .. وانا اتحاذر اوصله ما اريدن اتوهدن و انا عزبة .

بس يظهر بت عم سرحان خالتني ابالها ... اجت للكاع الضحى ... سلمت اعلى امي و كانتلي :

عدي جلمة وياج

تمشينا انا وياها و كلت الها : شرايدة مني ؟

انا الرايدة انشدنج ... شرايدة من سرحان ... شنهي معامله يا خذج ؟

انا لا كاربه سرحان ولا واصلته ، و الجلمه هاي لا تعيدينها بعد.

- خايبة درويج هاي موش علي انا فخرية ، الدود يو مر احداي اعرف رطنه .

اكلج ديه الاسمح فخرية ... زلمه ما هاويج لاز که باکتاره علیش

ورايدة اهدن ابن عمي الشيخ الج يبت حاكم

انا مرة فاكدة رجلها ... لالي بعرس ولا الى غرض باحد ، بس سرحان ما يهواج ولا يهوى وحيدة

عليش معلعله ارويحتج وياه و اهو موش داري عن هواج .

نظنين راح اسمع جلمتج انا

ما كايتلح اسمعي بس يو خديتي ، لا تكليله عليش ما تهواني و عليش ما اداريتي من كون ....

سو كدرتي فما بيدج غير تاخذين جسم ... لا عكل ولا دليل .

تصدح عكله و دليله وياج .

انا نصحتج ... و انت اعلى كيفج ، وموت الأخرى يديه لا تكريين مني ولا تجيني

- اسمعي بيت حاكم يو كربيتي صوب سرحان اروحن لال تجیل و اشهرنج و اخریج جدامهم ....

و تاليتها حتى بنيتج يحرمونج منها ، حطي مع كلج برامج بيت تجيل و ابعدي عن شيخ ال ضاحي .

انا مبعده ولا مكربه بس يو بيج زود ابعديني من كلبه ... ساعتها اخذي و اتهني و الرسي حضنه جهال .. خوش ديه ... اسلم عليج .

هديتها و مشیت و امي حاطه ايدها اعلى عينها و تربي، كربيت منها ، حجت : شمالها هاي عربيد البساتين .

تكلي لا تكريين صوب سرحان و اریدن اخذته و يو كربيتي اشهرنج عدال تجيل و اكللهم واخليهم يحرمونج من بتج.

يااااع و تهددج

انا يتج ييمه لا كاربه سرحان ولا واصله ليه ....

- خايبة بالغمة اجت لكاعج هددتج و سكني ؟

جا تسويلها يمه اشاعفتهن

عمني البيت يو سكنت الها

هدت البيدها وراحت للبيت غسلت وليست شيلتها مالت الطلعة وراحت للمضيف .

کاعد سرحان و ابو فاضل و رحيم ... و الزلم ملتمة و عدهم طلابة عشايرية .

وكفت بعيد عن المضيف وصاحت : وين ابو فااااااصل

فز الزلمة وكام ليها ، و سرحان سمع حس ام ستار و کام ... و طلعو : ها بم ستار

انا مرة وزلمتي بالعسكرية و ما ادريه يرد سالم يو يستشهد غاد .. وعمري كضيته بخدمتكم .

شنهي الجرى و تجي بتكم تهدد بنيتي

سرحان : بنيتج یاهی و باهو بننا ؟ .. فهمينا يم ستار .

كواغد : بت الحجي قاسم ... نجي تهدد هديوة وتكللها بعدي عن سرحان .. عليش يمه شنهي کاربینکم واصلينكم وجاية تظلم بخت بتی و تشهر بيها جا بو صاحت عليها الصايحة وهي عزبة انا شحطن بيدي ...

سرحان : شنهي الحجي ، فخرية جلية ليكم ؟

قاسم : اکسن راسها يو كاربتكم ، حكج اعلى راسي يم ستار

سالم روسكم بالشيوخ لجن انا ما ارضى بت تجي وتهدد بنيتي فول ظليمتها وتكلها يو ما جزئي اروحن لال تجيل اشهرنج و اخليهم يحرمونج من بتج .. هالحجي يرضيكم يممممه .

بحظك وابختك يسرحان بني ماشيه حذاك .. كاربتك عليش اطعنون بيها .

سرحان : ام ستار هاذ الحجي انا ما ارضى اليطعن بهدوة احسن راسه حش ... و تمشين ويانا هسته و حكج اعلى يمتاج .

مشوا للبيت و انا امشي وراهم، ليما وصلوا البيت فتحولي الطريح وكالو : تفضلي يم ستار .

دشيت للديوان و هم برا ... تلكنني ردحة و ام فاضل والتساوين ... و قاسم صاح لبته و جابها و ذیح عيونها صارن بالطول من الخوف جدامهم .

حجه قاسم الكلته وكال الها : صكد هالحجي بويه رايحة ليهم

فخرية : لا بويه علي العباس لا حاجيه وياهم ولا متكريه لهديوة ... انا ما لي غرض وهال ..........

قاطعیتها و كلت الها : خلف الله عليج يعني انا جذابه ؟

رادوا يحجون كلت الهم : انا ما جاية اكلتكم الحجي صكد يو جذب ... المرة اجت و هددت بتي و ها الجلمة يو وصلت ال نجيل يو انجاب سيرة بني و انعطن بسمعتها، حكي منكم اريدنه و ساعتها اجعدتكم مجاعد زلم و اطلع حك بنيتي ..

حجیت و طلعت من للبيت و البت تيجي وتجذبني ... لحكني سرحان : ام ستار ام ستااار

و گفت و انا اكتله : سايم الله و محمد و على عليك يمه .. يو شفت هدوة بصوب امش بصوب لاخ ولا تكرب ليها من كون تعرفها اعلى زمانها ذاك وهي متهومة بيك وموش عاد عزية و الناس تتريض ليها ...

وحك علي ابن ابي طالب ما مكرب منها ولا واصل صوبها اخر شوف ليه الها .. يوم جتلة كريم .

تريد نصيحتي يمه ... عرس و لم جهال ولا تتامل و اظل معلك بهدوة ... هدية دامك انت مفرد .... ظنونها ما يهدئها و تعامل لدنياها ارد ليك ... وردتها مامش منها من كون عدها بت يو فكرت تطلك من فليح بغيابه يعتبرونها فلفلت اعلى رجل و ياخذون بنيتها، خلها عايشة و شوف حياتك يمه .

ام ستار انا موش جاهل و اوزن الامور ... مرات تصدف امرن و انشدنها و انا ماشي لجن لا كارب.

منها ولا واصل ليها و اعرف الطريج موش واحد ....

فريحاتك معنا زین ام ویت قاسم ها ويتك ومداريه عيالك خذها ولم لحمك ..

حجتها ومشت .

تنهد سرحان ورد للبيت لكه عمه يصيح ويزف ابته ويغلط عليها ... خلص من بنه رد على سرحان

بویه شنهي رايك البت الحجت حجايتها و غطيت عليها و هي ظاله بامالك .

عمي انا ما رايد اظلم البت وياي ... لا تشوفني وياكم اضحك .. ويا المرة مر و ما اتعاشر و اما انخبط و يا وحيدة وعي بت عمي ما اريدن اتفاشل وياك

و جهالك عمي ، شنهي نظل يتي طول عمرها اداري بيهم و انتهادها بعد ما حجيت عليها و تأملت بيك ...

الحجي موش وكنه يعمي ... كريم توه جرحه اخضر بكلوبنا .... خل تعدي السنة مالته و يصير خير.

هدية : اعلى نار و انا اناطر امي ترد ...

لیما ردت و هي مشعوطة : ها

خيصتهم و وردمت واحد بالآخر ورديت منهم

- یمه جا شهرتینی

لا ما شهرتج ... هاي يو ظلت تهددج و تخافين منها تسويها و تالي ال تجيل يحشون بلحمج ... رحت ليهم وحطيت الحجي اعلى اديهم خاطر يو طلعت الجلمة باجر عكبة بتهم التعاب ... و يعرفون شلون يصدونها ويردون حكج .

- سرحان شکالج

ما جانلج غير سرحان، و ما مطيح حظوظنا غير سرخان و ما مطین روستا غير السانج و هو يلهج بسم سرحان، حطي طويبيجات بجيوبج و اركدي ، بسج استحي اعلى روحج من ساعة

النويتي اعلى الطلاك استخفيتي ، شيسمونها های .

سكتت ... و هي تكلي : كلت السرحان يعرس و ياخذ بت عمه و هو كالي انا خاطبها وراح اعرس و هدية انا لا واصل صوبها و لا مفكر بيها.

كعدت متضايكة ... من حجت هالحجاية درت ليها : الحجي هاذ منج بو صكد

- لا صكد .... الزلمة عده ايتام شنهي تريدينه يكعد عزابي بلا مرة والله شني عود جان يحبها .

اصحي يمه يا زلمه يحمل يظل بلا مرة ... و تاليته يعرس ولا تظلين تعلين بظنونج ليما تطمسين

عودن ليش موش حكي ؟ .. انا مفرده و اهو مفرد .. و دنیانا شما لفت بينا كلبي ما هوى غيره ولا هوى غيري ، عليش هيج وياي ، تستكثرون علي اعيش مرتاحه بجاله .

- رايدة سرحان بمه .

سكتت ....

لا احجي رايدة سرحان من عين باجر اشدن عباتي و امشي افرن بطلاكج ليما اطلكج من فليح.... بس مستعدة يمة تطين ظناج لال تجيل ؟

ما رديت .... عليش سكني احجي مستعدة تطين ظناج

اطلع من الديرة و اشرد ابتي

خابية ام حلك الأعطر عليش ما تستجنين ، الشردین شاهی ... جا احنا شنهي نهفي وراج يو شنكل للوادم ....

لا تظلين تتاملين يهديووووووة ال تجيل ما يهدون ... ما يهدووووونج ... اصيحن بعد يو بسي ؟

ظلت دموعي تجري و انا دايرة عنه .. وهي تحجي و ترزل بيه اعلى ظنوني .

ظليت اخلص ايامي

شما ابعدته من بالي الاكي روحي افكر بيه و اتخايل نفسي بذاك اليون النصف سويه ويصير واحدنا للآخر .. وارد اهزن ايدي اعلى الظنوني الما تبطل منه .

جمارة : صرت صف سادس ... وانا شما يمر بيه الوكت اعدن ايامي خاطر اکبر و اصيرن دكتورة و يرضى خنجر و نعرس ... بس مرات اهيسته يضحك علي .

انا احبنه .. و من الزغر احبنه

اشوفته زلمه ما يهاب شيء و يطك بالوادم و محد يكدر يحاجيه ، و انا احبن الزلمة الكوي الكلها اتخاف منه .

مرات اسمع امي تحجي ويا هديوة و تكللها ... هاي المرة خطبت جميرة لابنها و هاذ رادها مني ... بس لا تكليل لابوج خاطر لا يبطلها.

وانا افرح و انشنش و اهيس بروحي كبرت و راح اعرس ، پس خنجر يريد الا دكتورة .

اذا حتى جزت امشي ليه ولا احج وياي خافن يكول على هاي خفيفة و ما يحبني و حاطة راسي بالكتاب و اقرأ .

هكو صديج لخنجر اسمه حيدره

مرات اشوفته يكعد و یا خنجر .. ويسولف وياه ، و انا كلما امرن اظل اعاين عليهم ليما اتعداهم .... شو هاذ مرة مرتين كمت اشوفته من اطلع من أهلي اروحن للمدرسة ... يلحك وراي و يمشي و

يكول : بت يو كيمر ... جا الله السواج جم يوم ظل يعجن بيج .

انت شمالك ما تستحي ، لا تكفر جا الله شني يعجن .. امداك وامده وجهك

عليش تغلطين على

جا ما تستحي تلحكني للمدرسة ؟

جا حلوة والحكنج ما يصير

انت موش صديح خنجر

ای

خنجر يرضى تلحك بيه.

جا وهو شله غرض ؟

انا و خنجر راح نعرس

- صكد ؟

اي

- يجذب عليج

عليش ؟

- خنجر ما يفكر يعرس ... وهو واحد مالت شرب و نسوان .

يعني شني

يعني يحب بنات هواي

صكد

اي والله

و گفت ... عليش تحجي عليه هجي هو موش رفيجك

انا ما حاجي عليه، انا جاي اكلج هو هيچ خاطر لا تتاملين بيه و هو ما يحبج .

و منو كال هو صكد هیچ ؟

ه - تعال

اذا تبتتلج شتطيني

اتي بت عليش تغلطين

جا مني تكلي تنطيني ... رايد تأخذ مني فلوس

موش فلوس

جا شني .

تحبيني و تجين وياي

انت جذاب

هسه البتلج يو لاله ؟

- خوش اثبت خنجر بدور بنات و انا شتريد راح اسوي

- متفكين .....