تحميل رواية «كحل عرب» PDF
بقلم زينب ماجد
جارٍ تجهيز التحميل... برجاء الانتظار
سيظهر زر التحميل خلال 10 ثانية
جارٍ توليد الملف...
التحويل يتم بالكامل داخل متصفحك — لا يُرفع أي شيء للسيرفر.
اختر مجموعة الفصول للتحميل (كل ملف حتى 10 فصول)
عن الرواية
الفصل السادس والسبعون والاخير لو نگدر يروحي نطير فوگ الغيم فوگ الضيم فوگ دروبنه الضيگات حتى الخطوه تمتد والمسافه تطول وتكبر بالنهاية احلامنه الحلوات - عريان السيد خلف ( للملاحظة ارتأيت ان تكون كل حلقة بهذه الرواية تبتدي بابيات شعرية للشاعر الكبير عريان السيد خلف كونه هو اجمل من جسد الحسچة الجنوبية بقصائده ولإن الرواية جنوبية اقترنتها بقصائده الرائعة .. الرحمة و الغفران لروحه النقية) ........ خنجر : جاي امشي توني راد و ما احس الا واحد يصيح علي ( ولك خنجررررر خنجررررر الحك ) - شنهووووو - سالفة تفي...
رواية كحل عرب الفصل 0 - بقلم زينب ماجد
رواية كحل عرب الفصل السادس والسبعون والاخير
لو نگدر يروحي
نطير فوگ الغيم
فوگ الضيم
فوگ دروبنه الضيگات
حتى الخطوه تمتد
والمسافه تطول
وتكبر بالنهاية
احلامنه الحلوات
- عريان السيد خلف
( للملاحظة ارتأيت ان تكون كل حلقة بهذه الرواية تبتدي بابيات شعرية للشاعر الكبير عريان السيد خلف كونه هو اجمل من جسد الحسچة الجنوبية بقصائده ولإن الرواية جنوبية اقترنتها بقصائده الرائعة .. الرحمة و الغفران لروحه النقية)
........
خنجر : جاي امشي توني راد و ما احس الا واحد يصيح علي ( ولك خنجررررر خنجررررر الحك )
- شنهووووو
- سالفة تفيك خايب الحك
- يالله واخير ربعي راح تطلع منكم سالفة تفيدني ولو ما اظنن من كونكم ربعي واعرفنكم
- وعلي تفيدك
- شنهي احجي
-ال ثجيل
- شمالهم
- اعتبرهم مهججين
- شلون ؟.
- امس واحنا نداور بالجول شفنا ٣ من ال ثجيل
- شمالهم ؟
- عدهم تحركات ضد الحزب ، يعني تقرير واحد اطير ال ثجيل بخويطهم .
- صكد عود
- لي وعلي شمالك بس انطر كل جمعة ال ثجيل يلتمون عد سلطان نبلغ عليهم الجمعة خاطر يشيلونهم من السلف.
- اليوم شنهو ؟
- ثلاثاء .
- لاطيرهم ما اخلي واحد منهم .
عفت ربعي و مشيت السرحان للمضيف ، لكيت عده ازلام .. حضرت الجعدة ليما خلص ، كام اعلى حيله و كال : ها يخوي جن بين فچوچک حجوة وناطر تطلعها كول .
- اي والله جيت ابشرنك يخوي
- اللهم اجعله خير .. بشرني
- ال ثجيل اعتبرني مخلصك منهم
- تخلصني ؟ عليش شنهو الجاري
-كلت الك ما ارتاح لا ما افنيهم كلهم جزة بتراب حميد .
- جا غير اعرف الحاصل
- الحاصل ثلث ولد من ال ثجيل شافوهم الربع بالجول ويا ناس ضد الحزب .
- اييييي ؟
- شنهي الاييي نبلغ اعليهم وننعل والديهم
- تحجي صدك انت يو تتشاقى عليك العباس
- لا وعلي مو شقى ، انة ما اجوزن منهم لا ما اجليهم وانعل والديهم .
- هد علي بمچانه وتبرى من السانك .. جا تحلف بيه يرضى بفعايلك هاي ، شنهو فركك عن ابو تقرير الموهدن الوادم ؟ ... طلابتنا ويا ازلام ال ثجيل عوايلهم شلهم غرض وشذنبهم يتوهدون بهالسالفة .
- يو ما بلغنا اعليهم احنا ، تصل اعلومهم و يتبلع .
- جا انت كايلها ، يعني اول و تالي هم للموهدنين ارواحهم ... خل الله يجازيهم انت عليش تبتلش بذنبهم ؟ اليهجر مرة و يجتل جاهل يتاني من الله توفيج يخنجر ؟ ... لم روحك و حط عكلك براسك و هد حميد
- وتهد ثاره
- ثاره عد ال منعم .. وال منعم خذو فصلية ما خذوا جتال جا انا شنهي واخذ بجتاله .
- ابوك هو
- فوك اعكالي لجنه موش من عشيرتي واله اهل و يو دورت جتال و جتلت ، هم يدورون جتال و يجتلون واحد من اهلنا ونرد للمربع الاول واحنا اطينا تعهد و عكدنا راية العباس ما نتعرض لاحد منهم و نخلي الناس تامن .
سلطان ما كصرت بيه ، جتلت جبيرة و ابنه الزغير ذب جرش وياي ، و شهيرته اعلى كل السان و عكالي محفوظ .. ما اريدن الوث ايدي وارد بجلمتي للشيوخ هدنا منهم
- ويو هديتهم ما راح يهدونا
- يو تعدى احنا موش كليلين شر .. نحركه باهله
- جا ويو جتلك شنهي بكبرك ادور ثار .. شمالك يسرحان
- ان جانت روحي بيد سلطان حلال عليه ياخذها، هالركبة هاي بيد خالق واحد لا تهاب احد و انت موتك و حياتك بيده ... امن سلفنا و ابعد عن الفشك والله يتولاهم .
- ونهدهم
- انت موش رايد منهم بت ؟
- اخذنها غصبا عنهم
- مامش شي بالغصب ، يو تعديت الموت حصتك .. لا تحاول ، اكعد وانطر ليما الله يسهلها عليك و تخلص البت مدرسة واروحن انا اخطبها الك بيدي .
حجيت وياه واظننه رد دامه سكت .. لجن ظل الموضوع ابالي .. هديت سيارتي و طلعت افتر بالسلف .. ابالي جثير امور طرت .. وحسباتي زادن ، واجدامي خطن بلا وعي بالسلف .. ما اهيس بروحي الا وانا بهجد ايام الخوالي ..
بطت اجدامي ساعت المريت بشارعهم .. عاينت من ابعيد فروخهم تلعب بالباب .. مريت بيهم .. هاذ اليلعب شحيتان و هاذ الداير وجهه للحايط يلعب غميضان .. و البنيات كاضات هاللعابت و جاعدات ، يو راسمات الهن توكي و يطفرن ويصيحن (كبي .. نو )
وكفت اعاين الهم .. جهال و ما حاسين بهموم الكبار ولا يدرون بالحروب و الناس الجاي تموت ولا يعرفون شي عن اليدور احذاهم .. ريتني اردن لعمرهم واهد المضيف و طلايبة و ازيح هم الليالي عن امتوني .
وكت ضحى والوادم تزهبت للغدا وبس الروايح تطلع من بيوت السلف هاذ التشم من بيته ريحة سمج و ذاك ريحة بيتنجان و الاخر تشم من بيته ريحة تمن عنبر .. يهيم افادك بعبير ريحته ويخليك اتجوع حت يو انت شبعان.
اعاين للجهال و اعلى هالحال .. واجا حس من ابعيد يصيح : نوووووووسة بسج تجتلين بالجهال شليتي حاااالي .
طلعت وهي تزف ابتها و ترزلها و انا غاد عنها اتنوع ... كامت تصافي بين البنايات خاطر يلاعبن بنات اخوها ، وظلت واكفة تعاين عليهن .. ما دارت و لا زلفت ..
ليما مدت راسها تعاين بالعجد منا .. داريت لييي هنا ولنها تشوفني جدامها .. تبسمت من ابعيد ...
مشيت وكربت : ها اصباح الخير
- يا صباح هاذ راح يوذن المومن .
- شلونج يهدوة
- جا ما طولك واكف اعلى حيلك و بخير انا بخير ، اليوم مار منا شنهي .
- بلا ما اهيس بروحي اجدامي خطت ليجاي .
- دام اجدامك خطت .. انطر
دشت داخل و طلعت وبيدها صحن زغير بيه ٥ وحدات حلاوة تمر و سمسم .. ناوشتني و كالت : جا احنا عرب ما يعدي اعلينا وحيد لا ما نكرمه حت يو جان جبير السلف .
تبسمت ليها : انت المسويتهن ؟
- اي توني خلصيت عبن اليوم يجي ، هالحضرت الغدا و سويت هالنمنمات يتطيب بيهن.
- هنيال ابوج اعلى هالدلال جا .. يرد بالسلامة .
تبسمت الي .. مشيت خاطر لا اطول بالوكفة وياها .. الماعون بيدي ، اعاينله واتبسم .. تناوشت وحدة واكلتها ، ماعت بحلكي عدالك زبد ..
ظليت كاض الصحن وامش خاطر اردن للبيت ، وانا جاي اطلع اعلى الشارع ، صادفت ابو ستار يمشي و علاكته بيده ، شافني و هو بادر بالسلام من ابعيد ... :اهلااااا ابو مامون شلونك بوية
- يا هلا و مرحبا ، هلا ابو ستار شلونك شلون صحتك .
- شنهي ما شنهي
- والله اعلى حطت ايدك
- و سلطان كون تعرض بعد
- لا من بعد التعهد الكل هده ابيته ومامش غير الفصل مالت ال منعم و خذوا فصلية
- المن راحت الفصلية ؟
- لأبن حميد الزغير ..
- هاهيه دام فضت
- الحمدلله ، ياله الاهل ناطرينك ، توصل الهم بالسلامة
- غالي ابو مامون هلا بيك .
رديت للبيت ، وانا اكل من الصحن ليما وصلت البيت مخلصة كله .. جزت روحي بعد من الغدا ، كلت الهم بس استكان جاي جيبولي .. شربته ورحت امدد شواي .
بالليل وانا بعالم الطيف .. جن انا واكف بمجان ما اعرفنه ، واسع و بيه طيور جثيرة .. طاحت عيني اعلى طيرة جوزية سمرة .. تنكر بالكاع و تلكط حب ..
اجالي وحيد حجه وياي : انت مو ردت هالحمامة ؟ عليش ما تاحذها .
- موش حمامتي خاطر اخذها ما يرضون .
- اخذها وما الك غرضت انت طلبتها و هي الك ، كرب واخذها .
اعلى حجاية هالزلمة هاذ انا مشيت للحمامة ودنجيت الها ، اول ما ردت اكضنها وكفت اعلى ايدي ، شلتها ووكفت اعاين الها .. رفرفت و طارت وردت حطت اعلى جتفي ... ظليت اعاين الها
درت وجهي وجن من اشوفن مناير الأمير جدامي .
اعلى هالحال و فزيت من الحلم .. فزيت اصبن عرك و حلكي يابس .. تناوشت الماي شربت .. وجن هالحلم معيود بذاكرتي .
طريت البطانية من فوكي .. وكمت من فراشي ، تعثرت بجهالي ، خذت بالي وبعدت عنهم .. دنجت حبيت روسهم و غطيتهم و طلعت من الحجرة .
الكل نايم و الطيف اعلى بالي و حلكي شما اشرب ماي يابس ، انداريت ليورا البيت ترست المبردة خاطر تظل باردة للعايلة و ظلست كاض الصوندة و صافن بهالطيف .
للصبح وانا دايخ بيه .. كعدت بالمضيف ، لجن ما جان هكو ناس جثيرة عبن صبحية وازود الناس طالعه تشوف شغلها ، ومامش طلابة نمش بيها يو جعدة عشاير .. كاعد انا و عمي واسولف اله بالطيف وهو يفسرلي و كالي : طالب حاجة انت شي رايدة ما دام شفت مناير الامير معناتها الطيف خير لا تخاف منه .
- والله ما ادري يعمي ، لجن اهيس هالحلم معيود مدري انا اتخايل بس الحلم هاذ تعبني.
- دام تتذكره وما يروح من بالك رؤيا هاي موش حلم ، يكولون الحلم من الشيطان و الرؤيا من الرحمن.
- ان شاءالله يا رب خير .
جاي نحجي فات للمضيف حاكم و صاح : هاااا السلام عليكم
- اهلااااا وعليكم السلام ، هلا ابو ستار تفضل .
كعد يسلم علينا و يسولف ، كلتله : شكو ماكو
- والله مامش بس انا اجيت ليجاي خاطر اكضي الجنسية مالت بت بتي تريد تسجلها بالمدرسة العام الجاي .. ومنها كلت هم امشي بمعاملة طلاكها ليمتها تظل هاذ حالها .
ساعة الحجاها كلبي خفك واذاني صفرت ما ادري مصدك يو انا بعدني بالحلم ذاك و ما صاحي .. ردفه عمي و كاله : نويت تفركها
- اي والله يبو فاضل البت بعدها زغيرة كل عمرها ٢٤ سنة .. وهي لا والي ولا ولد .. اخوهن ومات وانا ما ضامن عمري ، ما اريدن اخليها تكضي عمرها برباة البنية ليما تعجز و يفوت عمرها ، حت يو انا اربيها عدي بس خل تشوف حياتها .
سرحان : خير ما تعمل يبو ستار البنية ما شافت من عمرها شي جابتها ويا فليح ضيم بضيم .. طلكها هلبت يجي نصيبها .. بس خافنهم ليغاد و هم ينهون اعليها ويوكفون بطريجها
- شحدهم انعل والديهم غير .. انا يو ما سالفتهم ذيج و فضيحتهم يحلمون بذيال ثوبها بس بعد .. صارت.
- ويو عادو ؟
- اسوي السواه جسام .. اطلع منهم وشيريدون يسوون يسون .
- عاشت يمناك ، هاذ الصح ...لا تسكت خل البت تشوف حالها .
- لا والله توني ردين من غبشة طالع اخلص بالمعاملات .
- اي خير ان شاءالله .
حجيت لجن اهيس عمي اخذ جانب السكته عبنه يعرف هدوة يو تطلكت اجاهد اعليها يو اعرف اخسر كلشي عدي ...
بهاذ اليوم انا ما كدرت اكعد بالكاع دكيكه وحدة ، اعلى كثر ما الافكار ترادمت براسي و اكولن هم تصير .. واتخايل روحي ارد لذيج الايام و احظى بولفي و احطنها حدر اجناحي ..
روحي لابت لا كدرت اكعد ولا اوكف ، خطت السلف مشي ... وين ما اعرف ويو احد نشدني وين رايح .. يمكن اسبل بوجهه و ما اعرف شجاي يطنك ويحجي .. اعلى كثر الهوسة البمخي ..
زفة و عرس و هلهلوله صدعن براسي اعلى هالعلم هاذ .
كضيت ايامي اتطر يوم يوم .. وماكش فرد يوم مر لا ما نشدت .. عن اخبارهم و شصار بهالمعاملة ....
صادفيت ناصر بالدرب مار ، هم ما يسلمون علينا ، لجن انا بادرت و سلمت عليه ، رد من غير طيبة خاطر .
حاجيته خاطر اخلي هالجلمات اباله وامهد الدرب كبل لا يدرون بسالفة طلاكها و كلت اله : اسمع يبو فلاح ان ومن كون موش صلح ويا ال ثجيل لجن الله يشهد علي ما اتمنى الاذية لاحد و اخافن اعلى العرب مثل ما اخافن اعلى اهلي ، وانا رايد اوصيك .
- عليش توصيني
- النا ربع بالجول ، يودونه و يريدون خاطرنا و كبل ايام جابولي علم و نهيتهم عنه ولولاه جا انتم وال ثجيل بخويطكم تهجرتو
- شنهو هاذ الخبر
- ابنك عدنان .. تراه يجي للجول ويلتقي ويا وادم تشتغل ضد الحزب ، ويو وحيد ما يودك يو عرف بهالامر وبلغ ، باجر الحزب يذبونكم جوا و تصفى انت و عايلتك بالمجهول .. انا لوجه الله تعالى جاي ابلغنك ما اريدن اذيك .
هو تسودن من عرف و كض بديه : صكد الحجي هاذ يو تجذب علي .
- انشد ابنك وعرف انا جاي احذرنك ، يو معاديك يو انت معاديني جا ما اجيت حذرتك و خليت الربع يكتبون تقرير وما ادخل لجن نظل كلنا اولاد جلوب .. وما رضيتها يكتبون عنكم و نهرتهم.
ظل يتشكر مني و يبرر وواله ما ادري وذول الولد راح يسودنوني و من هالحجي .. لجن انا حطيت اباله هالسالفة ، خاطر بعد يومين يو نويت اخطب هدوة ما يكدر يعاديني ويظل هالموضوع اباله .. ومنها هم يحذر ابنه يكف عن هالدرب لا يهجم بيوتهم .
رديت للبيت ولاكي مرة مكبعة و ما طالعة منها شي ، تمشيت عرفت كاصدة البيت و جاي طالبة حاجه ، كربت ولنها تكلي : الله بالخير يشيخ .
حسها موش غريب ... حاجيتها : ياهي انت بوية
- انا سليمة يشيخ
- وشعدج يمي يسليمة و جاية علي عكب ذيج السنين
- وازتني الدنيا وانا اعرف قصر الشيخ ضاحي ما يرد ادخيل وانا دخيله عدك .
- حياج الله .. دشي
دخلت للبيت و كلت لاهلنا يستكبلونها ، و يكرمونها ليما ابدل واكل لكمتي و اطلع اشوفنها شتريد .
خلصت ومشيت للديوان .. امي و فخرية كاعدات وياها ، وكفت : هااا شنهي ؟
ردحة : يمه المرة وحيدة ومالها احد و جاية طالبتك و تكول عالو علي .. و عدها امور اتكول اسولفنها للشيخ
- اسمعنج
- موش وكفه .
- احجي يسليمة شعدج
- بالاول انا لساها ما خلصت عدة رجلي ، ادري انت جتاله لجن ما عدي غيرك اليحميني من ال ثجيل ، بحك الزاد و الملح البيناتنا .
- يا زاد وملح هاذ الفتن الجنتي تفتنيهن علي ، يو دسايسج ويا الشيخة ملوك يو شنهي ... لجن انا صابر واسمعنج للاخير ما طولج ادخيلة
-نعمة ماخذ كبلي ٣ نسوان وومخلف منهن كومة فروخ لجن انا ما صار عدي فرخ من كون عرست اعلى كبر ، ومن مات كامن يذبن علي تهايم ليما تهمني انا طالعة وحاجية ويا حمدان بالبستان .. وانا لا طالعة ولا ماشية علي العباس .. راحت مرت حمدان حجت للشيخ سلطان وتكله تريد تكوش اعلى حمدان خاطر تاخذه .. وسلطان يكلي انت طلابة ورث .
- وانا شنهي دوري بكل هاذ سوالف عايلة مالي غرض بيها .
- اعرف مالك غرض لجن هم يريدون ياكلون علي حكي وانا ما كصريت وياهم و اجيت اعترفلك بامر صار انت ما تعرف بيه.
- شنهو ؟ .
- المواريث مال الشيخ جلوب خذوهن مني
-خذوهن منج شلون
- شيخ انا دخيلتك ... اعرف غلطت ومديت ايدي لجن اعترف بغلطي واقرن بيه وانا جاي عدك رايدة حكي .
- يا حك هاذ وانت بايكة قصر الشيخ وماخذة المواريث اعلى نهدة .. شنهي من مرة انت.
- ادخيلتك انا شيخ
- لا دخيلتي ولا هم يحزنون .. مامش احد طاردج وادخلج عدي ، انت بايكتني و رايحة مطيتهم حكي ومن ما مطينج حكوكج جاية تكليلي دخيلتك ... اطلعي برا ياله .
- شيخ مروتك
- ويا امثالج مامش مروة ، اعف ماضيج ترديلي بمصيبة لخرى وشمتانية اتكاوم ويا ال ثجيل من حدر راسج ... تحلمين بوية ، شوفينا كفاج رحمة الوالديج
ظلت تبجي و تجر بعباتي و تريد تحبها .. جريت العباية منها وكلت : يمه انا طالع .. ارد للبيت ... ما اريدن هالمرة هاي عدي .
حجيتها و طلعت من البيت كله ...
مشيت اعلى الشيخ التكفل جعدت الصلح ذيج و سولفت اله الحالة ... تكفل بالمواريث كال اسعى بموضوعهن لجن لا تهد اعليه ولا تسووها جبيرة .. احنا نحلها بيناتنا...
خليتها عليه وبعد السالفة من الهوسة و الفشك و ما استقبلت سليمة ولا كربتها عبنها مرة شيالة مشاكل ما اوهدن مضيفي بطلايبها.
.......
هدية : من يوم التكاومو ال ثجيل وال ضاحي وطاحت مجاتيل وصار بيها جاتل و مجتول ، انا غسلت ايدي من حظي .. و عرفت احلامي و امنيات الاتمناهن الاكيهن بس بالطيف ما يصير واقع .
لجن يوم الاجى ابوي .. سمعته يحجي ويا امي و يكللها : هكو وحيد وياي غاد ابغداد زلمة مريته ميته و عده فريخات ويريدله مرة طلب من عدي بت وانا كلتله عدي اثنيوين الاوله تدرس وما ترضى امها تطيها و الثانية فاكدة رجلها صارلها ٦ اشهر ..
وامي جاوبته : شيشتغل شعده ..
- الزلمة يشتغل وياي بالمعمل و عده بيت وابغداد جا شنريد احسن يا كواغد ، ليمتها تظل هالبت هاي كاعدة هيج .
- وبتها
- بتها تعيش عدنا .. انا ما اخليكم هنا ترضين ما ترضين اخذكم غاد يمي .. جا اذا هديوة عرست غاد شعدج هنا ..
- وانا جويعدة لجل هديوة شنهي .. بس هالامر موش موضوعنا .. وانا بالعكس وياك هلبت الله يكعد حظها للبت ما شافت خير من نهد فليح وليجاي بس الضيم لفاها.
- وهل الانه فكرت بيها هي موصيتني اعلى جنسية بتها كلت اخلص الاثنين سوية .. واخذ قرار من الثاضي بطلاكها خاطر نزوجها .
- لا جا من الزينات .
ضجت حيل مدري هيسيت روحي ثكيلة اعلى اهلي ، انا ما ردت افليح اعلى موت سرحان .. ارضى بغير ، خلصيت ايامي معرسه واحلم بسرحان و هم ارد اعرس وافكر بيه .. ما اكدر ..
حاجيت امي كلت الها : يمه السالفة الحجيتوها امس لا تعيدونها
- يا سالفة ؟
- سالفة طلاكي
- و شمتانية يمه، انت بطرك هالبت باجر عكبة كبرتي و عرست و انا و ابوج مامش وين تولين ووين تطين وجهج
- ظلتي هاي ارحم علي من العرس يمة .
- شنهو البالج
- البالي ما يصير هالراضية بوضعي وما اريدن عرس ادخيلج ..
- ميخالف يمه جا هي الدنيا تعاويد ولا تحسبين كل الزلم مثل فليح .. ان جان فليح ما نساج سرحان كود فليح اغم وما حرف يحويج عليش صاكة باب قسمتج ييمه وراضيه بوضعج هاذ احنا ما دايميلج و الدنيا ثجيلة ما ينحمل ضيمها .
- ولونها خليني اعلى حالي ، اهل فليح يو دروا اعرس ياخذونها مني
- بتج عدي تظل حالها حال بنيات ستار
- وانا اهد بتي لجل زلمة يا يمه شمالج
- يمه مو لجل زلمه لجل ولد يصير عدج و يشيل كبرتج جا يو ظليتي العمر كله جويعدة اعليها شنهو تاليتج
- لا يمه ، عرس ما اريد ولا اطولون وياي بالحجي ... ما اريدن .
رفضت هدوة اي شي يخص العرس .. عبنه ابوها ناوي يزوجها لواحد ويا بالمعمل ورايدها تشيل لبغداد ..
تعتقد سرحان نساها و التها بعايلته و مضيفة ونسى هكو مرة عاشكته و ما بطل العشك بفادها يوم ..
بس بالحقيقة سرحان جان صاحي لهالعشك ويخطي خطوات بطيئة بلايا علم احد خاطر يوصل لمناه .. وكاتم هالعشك بنص افاده وما ساره لاحد ولا كال لاحد انا راح انوي اعلى خطبة هدوة ... ظل يمهد دربه بهداي يما يطيح الامر بيده .
ليما اطلكت هدوة ووصل الخبر لال ناصر وعرفوا حاكم راح يطلك هدوة خاطر يعرسلها ... تعارك ٩اكم و ناصر و كاله : يو عرست هدية بتنا ترد النا مثل ما ظناكم عدكم ضنانا يرد النا .
وحاكم يرده : ٦ اسنين اعلى فكد ابوها يو ذاكرها بهالسنين الفاتت بدينار واحد بس اكولن ضناكم و حگکم لجن انتم الذبيتو ضناكم و يو عرست بتي ، بتها تظل عدي والريدن حلك ينفك ويطالب بيها الا احطن رجلي بحلكه واشكنه .. ٦ اسنين بت كاعدة بلا رجل .. ما لفيتو ولا كلتو شتعتاز شتريد شلون عايشة .. من تريدالها والي تحتم بيه لفيتو اتوطوطونا اعلى روسنا جنكم غراب البين .
وتكاوموا وهو وياه ..
سرحان يراكقب الوضع من ابعيد ما حاول يدخل ولا يحط روحه بس الاخبار اول باول توصل عده .
ما مرت ٣ اشهر و ١٠ ايام بالضبط ...
اجا العمه و كال : الله بالخير عمي
- هلا بيك بوية .. كول
- اذا تضكر انا من زمان عاشك بت حاكم وهاويها ، عرست و ردت لاهلها وهساها تطلكت .. وانا عمي نويت اعلى خطبتها ، لجن انت عمي الجبير ما اخطي خطوة و احطنك ورى ظهري ، انت عكالي و هيبتي و جاي ابلغنك انا راح اخطب ..
- وال ثجيل بوية
- ال ثجيل حطهم بركبتي واتهدلك ماكش احد منهم راح يفج حلكه و يحج وياي .
- انت تعرف بثارهم ويانا ما راح يطونك البت .. هاي اذا ما ردو نهوا اعلى البت
- انا كلت الك الامر هاذ حطه حدر يمناي لا تفكر بيه ، ال ثجيل ما راح يفجون حلوكهم وياي ،لجن انا ما اروحن اخطب بلا رضاك من كون انت جبيري و عكال راسي .
- انت شيخ السلف بوية وما يعتاز تاخذ امرك من احد انوي ونفذ واحنا نكلك تم اعلى امرك .
- لا عمي انا كبل ما اصيرن شيخ ابن اصول والاصول تكول اخذ راي كبارنا و انت عمي و ابوي مرتي واريدك انت تبلغها بالامر وان جان انا مبلغها بهالسالفة من زمان و حاطها اعلى بالها لجن احطن هالامر عدك انت توافيه.
- انا احج ويا فخرية ولا ادير بال .
- يطيك العافية ، جا انا اترخص
- وين ؟
- انا طالع البغداد
- وشعدك غاد
- رايح افتح الموضوع ويا حاكم .
- جا انطره يجي ليجاي واحج وياه عليش توهدن روحك بالروحة البغداد وانت كبل يومين جاي مناك .
- خير البر عاجله .. اودعناك .
طلعت من السماوة البغداد وانا بالي ساهي بدروبنا الضيجات .. وارد و اتضكر ذيج الايام الاكضن اديها بيهن واعلينلها واتبسم و اهيس كل كتر بيه يفرح بشوفة رسومها .
طالع وانا متوكل اعلى الله و ابو الحسن و طالب هالامر طلبة .. من اسنين و بعد كل هالسنين انفتحلي باب فرج وانا راكض بيج ومجلب بذيال اماله.
وصلت غاد دشيت المعمل شفت الشغل .. استغربوا وجيتي من كون انا كبل ايام عدهم .. سلمت اعلى ابو ستار و كلت اله : رايدك بموضوع
- امر يبو مامون
- ما يامر عليك ظالم لجن اقترح يو نطلع نتمشى برا نكعد نشربلنا استكان جاي ونحجي .
- اي ياله .
طلع من المعمل ورحنا لكهوة جريبة ، صبولنا استكان الجاي وانا الشيخ الحلن طلايب الناس ساعة الوصلت لطلابتي كض كلبي الرجيف و كصتي تنز عرك ، امسح وارد ليورا و جسمي نار .. التمنيته من اسنين هساه اجا عدي والزوم احجي وانطك و اطالب بحكي.
اندار وكال : شنهي الراي يبو مأمون .
- كبل اشهور انت اجيت و حجيتلي سالفة
- ياهي
- اعلى طلاك بتك ام امنية
- اي واطلكت الحمد لله وفضت
- وعمام البت شكالو
- مالهم راي عدي
- خير ما تعمل ، انا اعرف الوكت موش وكته وما لازم الحجي هيج يتم وحداني .. لجن انا جاي اخذ رتي ومنها افتح السالفة .
- كول ابو مأمون انت متفضل.
- لا لا تحجي هيج الفضل لله موش العبد .. بس انا جاي و طالب ايد بتك هدية الي اعلى سنة الله ورسولة .
صفن بوجهي : اااا ابو مأمون انت مامش احد ما يتمنى يناسبك وهذا شرف اناسب ابن الشيخ مطر وانتم فضلكم علينا واجد .. بسس
- بس اننا ما رايد الجواب هسه ، رايدك تشاور الاهل و تحجيلهم و تشوف شنهو ردهم و تطيني جوابي ، وانا من زود المحبة و جيف اودنك و احترمك رايد اناسبك و ان شاءالله خير .
- ان شاءالله ..
طلع حاكم و هو صافن بزمانه .. جان ناوي يطي بته لزلمه بعمره جبير وبس رايد يستر عليها ، هساه شيخ السلف جاي و يطلب بته ورايدها ، وهاذ مشهودله اله ولاجداده .. اصل ونسب و جاه ...
رد و السالفة اباله ،حاجته ايمان : شبيك شو دايخ
- لا والله رايد اطلع باجر للسماوة
- خير ؟
-الشيخ سرحان ابن الشيخ مطر
- اي شبيه
-طالب ايد هدوة بتي ورايدها مرة اعلى سنة الله ورسولة
- دكول والله
- جا اجذب عليج .
- عليك الله سرحان خطبها
- ولج والله شمالج شكو
كامت تضحك بقوة و تكله : اروح وياك باجر اكوم احضر غراضي
- عليش شنهو الصاير
- معليك اريد اروح وياك شنو تمنعني
- لا موش امنعج لجن شنهو الحاصل شبيه سرحان
- الشيخ بكبرة طالب بتك يعني هيج مناسبة ما تريدني احضرها ؟
- والله انت مسودنه يا بوية وموش بعكلج
- هههههههههههههه
- عليش هالضحك
- ماكو شي ... ههههههههههههههه
- وجعة امي
ثاني يوم من الصبح حاكم طلع بعائلته لبغداد .. وسرحان رد لاهله ... عكه جان حاجي لمرته و كايل الها سرحان طلع البغداد يخطب .. بجت و صيحت وتعاركت ويا ابوها شلون خلاه يطلع لبغداد ورضالة يخطب .
كال الها : احنا نعرف سرحان بهالامر متاني من اسنين و مطيج علم و كلنا نعرفه جان ناوي اعلى خطبتها بس فكدرت رجل هدية هو العركل طلاكها و ما خلاه يخطبها .. و ابوج واجدادج كلهم مثنين بوية ، انا ماخذ ثلث نسوان واخوتج كل واحد اثنين .. وجاي اعلى الشيخ تريدينه امنعة من الخطبة ابن اصول من اطاني علم وما خطب الا براي اروحن اكاومنه اعلى اي اساس ؟
- ويجيبها بالقصر ليجاي غير اطكن واموتن .. انا جاعدة خدامة لجهالة ويروح يخطب علي ، يو على جثتي ما يصير هالعرس.
ظلت تبجي وملت البيت صياح و بجي .. ليما اجا سرحان خمد صوتها و ما طلع .. شافته بدل و راد يكعد كالتله : رايح تخطب ومرهدن وانا موش اعلى بالك .
سرحان : انت يو موش اعلى بالي ما اكلل لابوج يبلغج بهالامر .
- وليش ابوي ، شنهي ما عدك وجه و تجي تحاجيني و تكلي راح تجيبن ضرة اعلى راسج .
- هالامر هاذ جان لازم يصير من زمان وانا كبل عرسنا مبلغج بيه .. بس يو اجيتج و كلت الج بنفسي صعبة احسنها وخليت ابوج واهلج يبلغونج .. والعرس مو كل شي انت تظلين مرتي .
- مرتيش وانت جايب علي ضرة سرحان .. شلون ارضى اقاسمنك ويا وحيدة غيري .
- العرس هاذ لزوم يتم يفخرية وانا طالبج واترجاج ترضين ، ما اريد اضلمنج ولا اريد احطنج وراي وامري اتشرطي باليحلالج بس العرس هاذ ابريني الذمة بيه.
- ويو شرطت ترضى شرطي ؟
- كولي و اخذيه مني .
- ما تحطها بهاذ القصر و هالبيت هاذ يظل الي بس ما اتشاركني بيه ضرة .
سكت و دنج وهو يعكد ايده و يتنهد ... تكربت منه : انا ام بتك و ابنك ابطني والي اعليك حك و انت شيخ والزوم تكدرني وتحطلي كدر وتنفذ شروطي .
- تامرين يام وردة البيت بس الج .. ما احطنها بيه.
سكتت وكامت لحجرتها تبجي من رضى بشرطها .
......
هدية : اجا ابوي اعلى غير عادته و جان وياه عايلته ، استغربيت جيتهم و مستغربة ضحكة ايمان كل ما تعاينلي .. امي ما جانت هنا
وانا لاهيه ويا الجهال اصافي بيهم .. و احوكن بهالحصير الكضى اديه .. واعاين ايمان تبسبس ويا لاله ولاله تضحك ..
زمن جويعدة يمي وكاضة بلعابتها الصوف .. حجت : عمة انت راح تصيرين عروسة
- عروستيش عمة
- صاحبي كلالي
- يا صاحبج عمة راح تسودنيني .
دشت امي هي و جمارة من برا .. وكعدت امي اعلى المروحة ناطة من الحر وتنشتني: شعجب ابوج جاي بعايلته صاير شي
- لا هيج جايين
جاي احجي و صرخت جمارة : صدددددددك عليج الله
اندارينا انا وامي خاطر نعرف شكو .. صاحت امي : شمالج جمارة شكو
كربت من عدنا و متبسمة وهي تكللنا : لا لا هيج ماكو شي.
- جا شمالج صميتي و صرختي غير نعرف عليش صيحيتي .
- بعدين بعدين
مشت وهي تهوس وتصيح : هاي فرحتنا الجبيرة و فرحت كل العشيرة هله هله .
وامي تكول : تسودنت البت.
ظليت اكمل الحصيرة واحوكن بيها ليما دش ابوي لميت غريضاتي و فرشنا السفرة خاطر ناكل ... ايمان تنكل بالزاد ويا البنات .. نشدتها امي : شكثر عليج ؟
ايمان : بعدلي اسبوع و اطب بالثامن.
- الله يسهلج .
حطينا السفرة وكلنا التمنيا صارت سفرة اشطولها .. امي من شافت لمتنا وكلنا كاعدين عرض بعينها ستار ، و كالت : ما ناكاصنا اعلى هالسفرة غير ستير.
حاكم : الله يرحمه
من اتضكرته جزت روحها من الزاد كامت تجيب ايدها منا و اتعاين منا الى ان ردت الصحن عنها و كالت : الله يديمها علينا ان شاءالله.
شالن البنيات السفرة وانا رحت سويت جاي وحطيته ،حجه ابوي : هديوة بوية عدي وياج سالفة.
انا من كاللها .. انكمش كلبي عرفت سالفة تخص عرس .. مكعدت بلا هواة .. والتمن البنات كلهن كعدن حت الجهال صفوا وكعدوا يعاينون .. عاينت علينا امي و كال : اللهم صل على محمد وال محمد شنهي مدرسة
تبسم ابوي و كال: الله يحفظهم و يخليهم گلب اعلى گلب
-امين
حجه : بوية انت كبرتي و العمر يمضي وما تهيسين الا انت اعلى عكازتج و السنين فاتن ما دكن بابج ولا شعرتي بيهن .. وانا بوية شايل همج اليوم انا و امج موجودين باجر عكبة ياهو الالج .
- بوية الي الله اذا جا هالموضوع يخص عرس انا ما اريدن العرس والله ما ينسى وحيد .
- جا الله بوية هم خلى ناس تشيل ناس .. ما ذب حملة اعلى واحد لا ما حطاله وحيد يشيل عنه ..
- والنعم بالله .. لجن بوية انا العرس ما اهوه خليني جويعدة اعلى بتي .. اخيرلي .
كمت اشوفن البنيات يتنادسن وايمان غمتني .. وامي حجت : اطي مجال لابوج يكمل سالفت
- يمه تعرفيني وانا حاجيتلج من زمان و كلت الج هالموضوع ما اريده و لا اريد ينحجي وياي بيه ، عليش تحرجوني ..
ردت اكومن ، كضتني امي و كالت : يخبگه خلي ابوج يكمل .
كعدت بس استهضمت كلش حسيت رايدين يغصبوني اعلى العرس وانا كلش مالي نفس بيه ، اروح اخذ زلمة بكبر ابوي ابغداد وابعد من بتي خاطر اربي بنات غيري شجابرني.
كعدت مهضومه و عيوني غوركن بدموعي لجن ما هملن .. حجه ابوي : بوية وحك علي ابن ابي طالب يو تظلين العمر كله لا املج ولا امل حملج ، لجن والعباس شايل همج يابوية وما اريدن العمر يروح عليج وانت ما شفتي خير ويا فليح .
- ولا راح اشوفن الخير بوية .. المكتوبلة الهم ما ينكتبله يفرح وانا هاذ حظي .. ما شفت الخير من اولها ارتجي لتاليها .
- لا بوية لا تحسبين الكل مثل فليح راح مات بعده الله يتولاه لجن الشيخ سرحان بوية موش مثل فليح زلمة معدل وخير.
انداريت بتعجب ؛ الشيخ سرحان .
تضاحكن البنات وامي حطت شيلتها اعلى وجهه و دنجت
حجه ابوي : اي بوية الشيخ سرحان طالبج اعلى سنة الله ورسولة .
ظليت اعاين ليهن الجاي اسمعنه صكد يو يتخايلي ؟
اتنوع بوجوهم واحد واحد يضحكون وحت ابوي يعاينلهم و يكللهم شمالكم .. دموعي جرن لوحيدهن ..
ما كدرت اكتم كمت من حيلي بسرعة و ضميت روحي من ابوي .. والبنات كامن وراي .
حاكم : شمالها
كواغد :- ما بيها شي ، موافكة
- جا مو تكول ما موافكة
- عدالها غير الشيخ لجن يو جان الشيخ يا بت الترده ، بس الما عدها عكل .. رد الجلمة للشيخ و كله اموافكين .
هدية : شبكتني جمارة تبجي من الفرحة وياي وانا حاطة ايدي اعلى حلكي و دموعي يجرن ، ميلت جمارة عني و حاجيتهن : عليجن العباس صكد يو تجذبون علي
ايمان : والله العظيم وما ردت اكولج حتى لا تخرب عليج ردت ابوج يكولج واشوف موقفج هذا هههههههههههه
لالة : سرحاااااان عيوني سرحاااان .
وتركص بحواجبها .
كعدت اعلى حيلي وكمت ابجي ما مصدكه هاليوم صكد اجا وابوي يفاتحني ويكلي سرحان يريدج ، اريدن كلبي يهدا .. يخفك يخفك من الفرحة .. حت دموعي ارد اكضنهن ما كمت الاكي شي اعبر بيه عن فرحتي غير دموعي ..
ليما طلع ابوي والتمن يدكلي .. لالة تصيح : سرحان رايد رايته وعايف بنات ولايته ...
وبتي تركص وجمارة تهز و البنات يتراكصن وامي تعاين علينا وتضحك .. وانا كل هاذ واكولن هسه افز ويطلع حلم.
للعصر حاكم ودى جواب للشيخ سرحان و كاله : نتشرف بزيارتك انت والاهل ..
سرحان من سمع الخبر الكاع ما شالته من الفرحة ، كض سيارته و طلع للجول يخبر خنجر خاطر يفرح وياه ..
نزل غاد بالجول صاح : خنجررررررر ، ولك خنيييييجر
خنجر : لا هله ولا مرحبا ، جا انا اطلع للجول افتك منك ترد تلحك وراي ، شرايد
- انجب لا اكوملك بالنعال والله
- على راسي احطنك شيخ انت والنعال
- يالردي هدني من سوالفك الماصخة وافرح لخيك
- شنهي ؟
- خطبتي باجر .. اودي مشية
- اها صكد تحجي
- اي وعلي شبيك
- ياهي التخطبها
- هدوة
- عليييييييك العباس
- والحسين هههههههههههه
- كللللللللللللللللللللوش .
- هههههههههههههههه لا يردي جا هي النسوان تهلهل يو الزلم .
- خايب انا ناذر بس تاخذها اهلها وعلي ، ولك موش بس اهلخا اليوم احطن وصلة واهزلك .... روح بوووووووح .
التموا الربع شكو شكو ... كللهم سريحان حظى بوله كامو يدكوله يوهوسون و هو يهوس وياهم ويضحك من كل كلبه ..
لليل حاكم انطى خبر لاخوته و كال الهم الشيخ سرحان طالب بتي وانا موافك وانا جاي بس اطيكم علم .. رادينه : شلون تطي لسرحان و انت تعرف الشيخ سلطان كوام وياه .
- الشيخ سلطان ما عاين علي واطاني حك ابوي كل هالسنين ؟ .. ما كال شنهي حاكم يشتغل عد سرحان و بمعملة ابغداد يغتاض بس من اطي بتي ، انا مالي غرض لا بسرحان ولا بضاحي انا زلمة مسالم ويا ةلكل وانتم ال خضير اخوتي و اجيت اطيكم خبر خاف تكولون باجر عكبة ما اطانا علم.
من وصلت السالفة السرحان تسودن و كال الهم : كل عرس مامش ، حويكم يناسب جتال ابني .. اذبنه من العشيرة والله .
حاكم كاله : ذبني انا يا يوم طاح بيدي شي منكم خاطر اترجى خير .. الكوام البينك و بين سرحان انا مالي غرض بيها ، انا زلمة اراعي لكمتي عليش اكطع رزقتي لجل ثار ما يسكت .
تكاوم سلطان و حاكم و تعاركوا .. حاكم طلع من سلطان مغتاض و حلف ما يدش مضيفه ولا يكربه وكال ، يريد يذب بيه سند خله يذب فلا اديرله بالي كافي الجنيناه منهم.
ودى سلطان اعلى ناصر وكاله مرت ابنك و شلون ترضاها واسحب البنية منهم .. كاله : اعذرني يبو نعمة انا سرحان ما ادخل بيه .. اذا جان اعلى بتنا ، فالبت حاكم متكفلها انا مالي غرض بيها .. واذا اعلى الخطبة خلها تولي انا ما اوهدن ولدي و حالي وياهم.
تسودن سرحان شلون سكتوا ... راد يحشد الوادم خاطر يمنعون الخطبة بس العمام كالو ، حتى يو نهينا حاكم يطلع من عدنا .. قسمة وصايرة .. هي امه من ال ثجيل تظل اعلى مرته خلها تولي .
وسكتوا الكل من وصلت الخطبة ...
اهلنا كبل يكولون .. القسمة لو اجت تعمي عيون و تصم احلوك وتصير تصير محد يردها .. وحانت القسمة.
هدية : الليل ما عرفت شلون طعمة النوم .. لا كدرت اخلي راسي اعلى المخدة ولا كدرت اغمض .. كلساع اكرص بروحي واكولن يربي بس كون ما افزن ويطلع حلم .
كلبي يخفك و كل اعضاي ترعش و من اتضكر انا راح اصيرن اله .. اطير اطير من الفرحة.
فج الفجر وبعدها الدنيا ظلمة .. غطيت بتي و كمت من افراشي .. عاينت للكل نايم .. خطيت اجدامي بسكوت ، جريت عباتي اعلى كيف ، فكيت باب الحوش و طلعت .
امشي بالعجد والهوى عذيبي ، فجر و نسماته باردة .. اعاين للنخل منا و منا و اكولن ، العالم هاذ هم يهيس فرحتي وهيج مبتهج يو انا اهيس الدنيا هيج عبني فرحانة .
تمشيت للشط خاطر اذكر ذيج الايام شلون جنت اشوفنه غاد اعلى الشط .. ليما وصلت و لني اشوفن سرحان كاعد اعلى الشط .
بس خطت اجدامي للشط ، هيس اجدام وراه فز من مجان واندار و انا وراه .. من شافني ضحك .. تكربت منه : عليك الحسين كلي هاذ موش حلم و الجنه نتمناه راح يصير .
مد اديه ليه تكربت منه و حطيت اديه بديه و كال : الألك ما يصير لغيرك و انت الي من الاول ... ورديتج لفادي .
- يعني راح اكضي العمر وياك .. اكعد و انامن وانا اشوفنك .. اسمع صوتك يمتى ما يحلالي وانطك اسمك وما اخاف احد .. وانسى البجى و الحزن ذاك كله .. تصير يسرحان .
- يكلب سرحان و عيونه و هواه .. وعلي ما مصدك روحي وليلي ما نايمة من الفرحة يهدوة .
- مثل عيوني ما نامن .. وكلبك يحس بكلبي وساهر الليل بهواه ..
- ما ادري شمالني من اوكف جدامج تضيع جلماتي و شما اجلب بيهن اصد بعيونج واتيهنهن .
- كلي الجاي نعيشة موش بحلم .
- تظلين حلمي يو شما كربتي مني .. ويظل خيالج يرافك عيوني وين ما اصد ..
"انا وياج للشيب يهدوة"
ما كدرت اتحمل ، هملن دموعي ، ارد اسيطر اعليهن ما كدرت ، تكرب مني و حس ادموعي بديه و كال : انطريني اليوم جايج وجايب الشيوخ وياي لهلج خطاب.
- جا غير يو الحجي يطلع مني ، سرحان اهيس كلبي راح يوكف .
- كلبي ويا كلبج يعيش للتالي ما افاركنج ولا اخلي احد ياخذ هدوة افادي مني .. حظيت بيج وما اطيج لعزيز كلبي ... انت الي .
- انا اروحن.
ضحك ضحكة مسموعة وبعد اديه مني و كال : هالجلمات راح اشتاكلهن دام راح تصيرين عدي .. اسمحلج هالمرة تروحين لجن بغيرها لا تحلمين .
ضحكت و مشيت عنه ... لحكن للعجد و يمشي وراي .. درتله و انا اكله : جا يو السلف فز و شاف شيخ السلف يمش ولاحك مرة شيكولون عنه .
- يكولون عشكه وولفه وما يطي لاحد .. انا رايد الدنيا كلها تعرف انا عاشكج يهدوة .
كمت امشي و اطكطك باصابيعي و اتبسم بخجل وانا امشي احذاها .. غنى بحس ناصي و هو يعاين للشجر : نخل السماوة يكول طرتني سمرة .
- ههههههههههههه ، سرحان انا ما ادوملي ضكة لجن حلكي ما جاي يبطل ضحك .
-منا و جاي الضحك نصيبج وعوينة ابو الحزن يو كرب منج .. احشن جدامه كبل لا يصل ليج .
- هههههه وصلني جريب من بيتنه ووكف ، وانا خلصيت الدرب امش واعاين وراي و الوحله بيدي ، وصلت للباب ، لكيت امي واكفة ورا الباب وكاضو العودة .
طارت الضحكة من وجها : ها يمه
- بربوك ما تانيتي الزلم تجي وتخطبج فكيتي الباب و غبشتيييي .
- يممممه جا اليوم يخطبني
- واعلى حس الطبل خفن يرجلية غير تنطرين ليما يخطبج ...
وطكتني اعلى تناحتي .. يمه لا اطكين
- اليوم احرك ابيج يالنمرررررة .
- يمممممممه
وشردت منها ، لاكتني ايمان وهي تضحك ، دشيت للبيت وانا احكن ورا .. وامي عاينت علي وضحكت ...يمه تضحكين وانت لسوعتيني بالعودة .
- جا يو رحتي ييمه ياهو يطكج غير تدلين تشتاكين لطكاتي ، سرحان اعرفنه ما بيه خير يطكج
- يا جا تريدينه يطكني يمه .
- يمه انتن بنات حويكم برابيج ما تجن الا بالعين الحمرة .
ظلينا نضحك و سوينا الريوك و تريكنا كلنا و هالايام يا هفاتهن اعلى كلبي وساعاتهن تركض ركض من كون فرحانة ..
سبحت و امي ما رضتلي الاسود نزعته عني و لبست الوان و ايمان حطتلي ازواكات و كون شعري بالاوتي ، ولبست نفنوف احمر ..
سوينا الغدا واجوا الناس لينا امه و عماته و خواته وراديون تهلهل و تركص وتهوس وتصيح : اخونا خوس اخو يستاهل الهوسة
انترس البيت ازلام .. احنا النسوان انحبسنا بحجرة وحدة بس امي ولالة ظالات بالمطبخ يسون بهالجاي و يطن لولد خالي ..
وابوي و خوالي بخويطهم جايين استقبلوا ازلامهم .. صار البيت مامش محط رجل ...كلها شيوخ ، الزلم الما معكله ظلت واكفة برا .. الناس عدالها شوف شنهي فاتحة اعلى كثر ما وادمه ملتمة بخطبته .. بس كالولهم ( لا خطبة الشيخ سرحان ) .
شربوا الجاي و عمه خطبني من ابوي ، وابوي كاله اعلى راسنا نتشرف بيكم و بالشيخ سرحان و خالي صلاح كال الهم خير ما ناسبنا شيخ العشيرة .
وحجوا بالحاضر و الغايب ابوي رفض اي فلوس و كال الشيخ سرحان خيروة الزلم وانا مخلي بتي بين ادين امينه حاضرها كتاب الله و غايبها حجة لبيت الله الحرام يمتى ما تيسر بيده .
تشكروا منه وقروا الفاتحة و صاح : بوية نسوانا هلهلن تمت الخطبة اعلى خير .
طكنها هلهولها عماته و خواتخ و كامن يهوسن بعبيهن : وابوها خير ما يطول بالحجي ..
والرمي اشتعل برا و الزلم تهوس و تصفك و تدبج لخطبته ، و خنجر لعلب لعب برا بالهوسات ، عرس اخوه و ذب لحم .
طلعوا الزلم و سرحان طلع وياهم وكف برا ، نقلوني من الحجرة كعدوني بالهول و هن يصفكن و يهوسن ويدبجن ، انا مدنجة ..
عمته وكفت و كالتله : ابو مامون ، تعال دش جا بعد خطبناها الك .. فوت .
فات علينا و كال : يا الله .. الله يساعدكم .
رحبن بيه وفتحله مجال اجا كعد اعلى الكرويته احذاي .. كلبي طير ويرفرف بفادي اعلى هالفرحة ، ارعش من فوك ليجوا ما ادري شمالني كضني الرجيف ومعت بمستحاي ..
مادة ادية وافرك بيهن وحدة بوحدة ... ومدنجة
وهو كاعد احذاي بعكاله و هيبته و ريحته التفوح جنها ريحة ورد ...
ما شلت راسي ولا عاينت ليه ، و هن يهوسن جدامنا .. همس و هو اعلى جعدته : اعشكنج يهدوة .
تبسمت وانا مدنجة وافرك بدية بمستحاي ، مد ايده و سحب ايدي و خلاها بين اديه ..
اجت راديون واطته باون ذهب ، سحب ايدي و كوماني .. وكفت جدامه مدنجة ما عاينت لكل احد .. حجت امي : شنهي نيشان.
حجت عمتة : لا النيشان بغير يوم هاي هديته مالت الخطبة .
اخذ باون الذهب من ادين راديون و لبسه بركبتي و مد ايده ووخر شعري من السلسلة .. رفعت وجهي .. كل جلمة ما جاي تطلع من اعلى كثر ما فرحانه و اهيس كلبي صاير هاكبره وراح يطك اعلى هالفرحة التارسة كلبي ترس .
تكرب مني وحباني بكصتي وهمس ؛ انا وياج للشيب ... اعشكج يهدوة .
تنهدت وذبيت حسرة جدامه وما اكدر احج ابد ، بس عيوني دمعن .. طشوا الواهلية فوكانا .. ورد كض ايد وحطاها بين اديه و يشاورني ويكلي : ما اهدنها عمري كله .
يربي وحيد يفززني ويكلي هاذ حلم معكول كل هالفرحة الي ؟ و كل الضيم ذاك ولى ، وانا هساه بالجنة ؟
طلعوا من عدنا وانا كضيت وكتي اهوس و افرح ويا البنيات وبتي ردحت ردح ليما خوت و نامت اعلى وجهه جفي ..
ثاني يوم اجا تغدة عدنا بس شني ابوي ما فاركه ، كضى كل الوكت وياه كاعد وانا صرت جايجي اجيب واودي ... ليما راد يروح كال لامي : باجر اخذكم خاطر هدوة تشتري نيشانها .
كواغد : جا عمة يمتى العرس .
- ما تطول هالأسبوع افضنه .
- عليش هيج مستعجل يعمة
- عدويني جثيرين وما اريدن احد يعرض ويخرب علي ، خير البر عاجله .. ليش انتم عدكم مانع .
-لا والله عمه شعدنا بس اكولن الخطبة ما تتعوض عليش مستعجل .
- نعرس ونعوضها ونكعد يمتى ما يحلالنا ، خل نفضها والله كريم ، بس هكو شي عمة .
- كول
- انا ما اريدن هدوة تعيش بالسلف ، ورايد احطلها بيت ابغداد و ابعدنها .
- عليش
- اول شي اريد ابعدنها عن كل العيون هنا ، من كون الكل حاطة عيونها .. و عايلتي هنا و الصدك انا ما اريدن يطلع حجي شوفو شلون يعامل الجديدة و شلون يعامل الاولى .. هالمقارنات ما اريدنها. . و سلطان وراي اليوم سكت باجر ينبش وراي ، رايد احطلها بيت ابغداد و بتها عدها ما تربى عد غيرها وبعيدة عن ال ثجيل و هوستهم.
- بعد عمة هي مرتك و حلالك و انت ولي امرها شتريد اعلى مرامك .
- الله يسلمج
اندار علي ابسمه و هو يكلي : ها بوية معتازة شي .
- ما معتازة غير شوفتك و سلامتك .
كرصتني امي ، هو تبسم و كال : يالة اودعناكم .
طلع و هي تكلي : بعد شبكي و تحبحبي ويا جدامي يال ما تستحين .
ظليت اضحك و دشيت جوا وهي ترزل بيه ..
ثاني يوم .. حضرت روحي خاطر امش ويا سرحان للسوك نشتري النيشان .. لالة اقترحت اعلى امي تخلينا نروح لوحيدنا نشتري النيشان .
كالتلها : لا موش امان شافلة زوية و حصرها و طين روسنا شنكول و شنحجي
- ياااا عمة شمالج شنهي هيج مستعجل .. وبعدين هو شيخ وابن اصول .
- جا هي اطك ساعتها يضكر هو شيخ يضكر اصول .
- عمه اول وتالي هو ماخذها هالاسبوع هاذ
- صار شي وما خذاها .. لا سامح الله مات شلون .
هدية : يممممممه لا تفاولين علي ، روحي بس لا تطرين هيج امور و تخمشين كلبي .
- تلحكين تنامين وتتوسدين ايده لا تفلفلين ، امشي .
ضحكنا ومشيت وياها ، خذانا هو بسيارته و كال الها : ام ستار شنهو اليخطر ابال هدوة و تريدة خل تشتري لا تكليلها عيب ولا بسج .. هي اعلى راحتها شيطيبلها بالها تاخذ ..
انا و سوك و كالي اخذي .. سرفنت ارداني و حطيت جروخ برجليه وانطلق ...
خذيت ازواكات كلشي و كلاشي
خذيت ٥ كوستمات من الزينات
وخذيت دشاديش و اعطور و ابخور و شحاطات من الزينة ونعل وربطات و عبي ...
بس ثياب نوم لا انا ولا امي اشترينا ، استحينا ..
وهو ما حجه ولا ضكرهن .. ولا جابهن اعلى البال .
بس الذهب كال انا امش للنجف و اشتري .. رادني امش وياه ، امي ما رضت كالتله : عمه عرسوا وروحو مالي غرض بيكم .. هسه ما يصير لوحيدكم تمشون .
هو احترم قرارها وما خذاني وياه
ثاني يوم من الصبح مرت علي راديون مشتريتلي اروابه نوم حرير يخبلن .. كامن البنات يكلبن بيهن و يكولن الله و شكد حلوات .
بس امي ترزل بيهن و يردنها ..
جنها شرطي اعلى راسنا ، كلشي عيب و ما يصير ، و كلساع هاده علينا بالعودة ولا جنه نسوان معتبرة .. ما تحترمنا .
يوم الحنة سواه هو حنة و هو نيشان اعلى كثر ما مستعجل .. بس يريد ياخذني ..
عجنت الحنة امي و حطتهن بكاسات .. و عوادين بخور وياس و جكليت ومصغول ... وسون صينية الحنة
حنن اديه و هو حنه بس اصبعه الزغيرون ..
ليما اجا يوم العرس
هاذ ابيوم جذب يجي مثله يوم .. لا بحلاته ولا بفرحته
جنت ما مصدكة روحي هاذ يوم عرسي من سرحان .. كل هالايام مرت وانا ما مصدكتها اعلى كثر ما جنت اشوفنه حلم .
هو واعد مرته الاولى ما يحطني بالسلف وياها ، وانا يعزلي ابغداد خاطر تظل بتي عدي بعيدة عن عيون ال ثجيل وانا رضيت لجل بتي تضل عدي .
بس العرس استرخص منها و كال الها ، اتحملي بس يوم العرس يصير بالبيت مالتنا .. وبعدها تنتكل لبغداد .
خذاها ابوها ووداها عد خوالها ظلت .
زين البيت كله .. و اشترى ٢٠ كيلو جكليت ووصى النسوان و كال الهن : الهلاهل و الجكليت اريدنه يوصل لكل بيت بالسلف .. خل الكل يعرف الشيخ سرحان حظى بولفيته .
زين سيارته و خنجر السايق بيها .. زورقوها و حطو اشكال والوان عليها وحضر الفرقة الموسيقية و جاب مطربين لعرس..
جمارة و ايمان لبسن من الكوستمات مالت عرسي الجبتهن بنيشاني .. و جمارة خذت احلى واحد بيهن ولبسته .
بتي امي اجرت الها بدلة بصلية لونها ووصت بنات خالي يسولها شعرها بقراصات ويرتبنها .. وانا اجتي مرة بالمنطقة تعرف تحط ازواكات .. سوتلي شعري
لبست بدلة بيضة .. وكعدت اتاني جية الزفة
ابوي واكف بالباب هم وخوالي .. كلبي يدك دكات موش برهدنه ، كل اعضاي تتراجف ، وحلكي يابس شما اشرب ماي ، مدري خوف توتر فرحة ما ادري ، اعلومي ضاعت .
شواي و سمعنا حس الزفة .. من ابعيد و المزيقه اترن بالسلف طبل و ماصول .. ودبج و هورنات .
وكفت الزفة بالباب .. انا انكمش كلبي .. كمت اهيس كلبي غده فلين من التوتر .. جسمي احتر ، وانا اعاين الهن ، وايمان تكلي : شبيج مو هذا ابيوم تتمنينه عيونج بطول اهدي ..
- مدري ارجف ..
كاضة الورد و سمعنا حس الهوسة طبت البيت ، شلت راسي شفته دش .. اعكاله ابيض اعلى راسة و عبايته سودة اعلى متنه وريحته تجيب التايه ، توصل كبل لا هو يوصل .
اجا مني و كرب وكعد .. بس هو جان موش احسن حال مني ، العرك تارس كصته و يمسح و يرد ليوى .. كض ايدي و الناس شتهوس و شتدبج انا و هو ما ندري .. نسمع دكات كلوبنا ازود من هوستهم .
مد ايده و كض ايدي حيل عصرها بيدي و همس : اجا اليوم النحلم بيه اسنين يهدوة .
- كضي ايدي حيل ولا تهدها .
- اعلى موتي ما اهدها .
- خليني اصدك انت صرت الي .. رجلي وموش صاحبي ولا متهومة وياك .
زاد اعلى كضت ايده .. دار وجهه و عاين الي : اعشكنج يهدوة .
- تمنيت اذبن مستحاي و اخبر هالوادم كلها واصيحن بنصهم ولفي ليه واديه ابين اديه .. بودي اكللهم انا اعشكنه عشك ما عاشكته مرة لزلمة .
تنهد و هو كاض ايدي باثنين اديه وهن يهوسن و ما ندري عنهن ، نزعونا الحلقات .. وواحدنا لبس الأخر و حولناهن من اليمنى لليسرى .
طشوا الواهلية فوكانه .. بكل انواع الهلاهل و الهوسات .. دش عمه ووكف وهو يتشكر من ابوي ، كومانا اثنينا .. تكرب من ابوي وحبني براسي و كالي : الله يسعدج و يهنيج بوية ... شيخ هدوة امانة بركبتك .
- بعيوني اخليها .
اخذ ايدي و طلعنا وهم يصيحون ورانا ( هاي الرادها و هاي التمناها )
ويا ما طلعنا تلكونا بالهلال و الواهلية و يطشون فوك روسنا ...
صاح خنجر .... ها خوتي هااااا
صاحو وراه ... هااااه
(وجان صاحبها وخذاها )
واشتغلت الموسيقى و الطبول و الدبج و الهوسات ، جمارة غافلت امي و طلعت بالكوستم بلا عباة .. وركبت ويانا بالسيارة ..
ما زفونا كبل للبيت .. داوروا بالسيارة و ركص بالشارع نزلو دبج و هوسات و سرحان نزل وياهم .. شالو وكام يهوسون وياها و هو الضحكة تطلع من كل كلبه وياهم و احنا واكفين نعاين الهم من السيارة .
من رموا .. اجوا الامن بسياراتهم ، كلها تراكضت للسيارات و صعدوا ومشوا .
خنجر يخزر .. بجمارة عبن طالعة جدام الزلم بهالكوستم و مامش زلمة بالسلف ما حط عينه عليها ، عبن مامش بت تطلع بلا عباة بس جيف اخت العروس ، غافلت الكل و طلعت بكوستمها .
وصلنا لقصر الشيخ جلوب نزلنا عده .. جان العجد مليان ازلام الدنيا مكلوبة كلاب وكراسي تارسه الشارع .
نمشي و يطشون بهالواهلية فوك روسنا .
والجهال اتلم ..
دنج مأمون كض جكليته كضتها هند بت حاكم .. صاح : هاي ماتي
- لا انا حصلتها الاول
- والله انا كضيتها مالتي .
كربت ايمان و كالتله : هسه على الجكليت تعاركتو الكاع متروسة جكليته .. امشي حبيبي .
ضاج مأمون من خذت الجكليته منه ، بس خله ايمان تغفل عينها و هد على هند جر قراصتها و خله كوشتها هاكبرها و هي ضلت تصرخ بجي
ايمان : مأمون ليش هيج يا حبيبي ، مو امشطتلها شعرها.
هند : امداك يا حقيييير
مأمون : امداج انت يا الصخلة
-مامااااااااااا باعي يكلي صخلة
- مأمون فدوة حبيبي بس عوفها
- خذت الجكليته مالتي .
- هاك هاي ابدالها بس عوفها .
مشى و هو يعيب عليها صرخت : باعي باااااااعي يعيييييب .
- ولك مأمووووووون .
وسن تلم بالجكليت و تحط بعلاكتها ... لمت جكليت العرس كله ... كرب منها مروان : نلعب انا وياج بيت بيوت وناكل الجكليت ؟
- يله
مشوا يلعبون بالحديقة عود هم عروس وعروسه مثل سرحان و هدية .. اجت هند وكفت تلعب ويا وسن وعود هي مثل جمارة ويا العروسة و نوسة تكللهن انا العروس شوفو بدلتي ... فرحن بيها وكامو يلعبون بيت بيوت عروس و عروسه
اجا مأمون وكف اعلى صفحة و يكول : الصخلة شتصيح مييييييع
هند : ماماااااااااااااااااااا
اعلى حس الهلاهيل و الطبل فرحان الكل و يهوس ..
لل٩ بالليل و الناس بالعرس تركص من كون مطربين و حت المن غير عرب جاي يشارك و يركص اعلى الغنى و الطرب .
خنجر ودى طارش لجمارة تطلع للبستان خاطر يحجي وياها .. من وصلالها الطارش ، غافلت الكل وطلعت للبستان
ويا ما دشت للبستان جراها : شنهي اللبس هاذ ولج ، انت ما تستحين
- هو كوستم عليش تخوزر و متعصب العرس كله
- اي جا انا دثو اعاين الناس حاطه عيونها عليش والمفروض افرح وافتخر موووووش
- هههههه يمتى يصيرلنا عرس مثل هاذ ونفرح هيج .
- جا غير ابوج الكوا**** يوافك علي ويخلينا نفرح.
- لا تغلط اعلى ابوي شمالك
- والله من انعل ابوج لابو ثجيل ولج بت ها كداتج ما تهنيت بالعرس كل بالي عدج ها شافوها ها رادوها ، هسه انا وين اودي روحي ؟ .
- خنجر
- عوينة ابو خنجر شعلتي اهله شعل ولج.
جاي يحجي صاحو اعليه .. خاطر يزفون سرحان لعروسته.
- امشي وبلدي بسد النسوان و يو طلعتي جدام احد ، انيشنج و اطكج بجيلة
- هههههههههه
عافها وركض لسرحان .. ودكوا طبل وهوسوا (عريس وربعه يزفونه )
دخلوه بحجرة الشيخ مطر المحضرها سرحان الليلة عرسة ويا هدوة .. كعدت هدوة و كعد سرحان وعمه و عمته واكفين اعلى الباب .
ليما دش الشيخ عليهم و هي لبست العباية و تكبعت وكعدت من ذيج الصفحة .. عقد الهم الشيخ و ختم كلامه ( الحمدلله الذي بحمده تتم الصالحات )
طلعوا من الحجرة و صكوها ويهوسون برا ( عرس الشيخ هيل وطش بالولاية )
هدية : انسدت الباب علينا وكام اعلى حيلة وتكرب مني ، وكفت اعلى حيلي : ها يمرتي ، ها يحلالي ها ها يصفنتي و عشكي.
تبسمت وانا مدنجة ، تكرب مني كلش ووكف جدامي مد اديه لوجهي ورفعه ليه ( وخذيتج يهدوة )
:- سرحان
- عشكه وروحه
-صرت الي
-هدوة كلبي راح يوكف
- ههههههه انا راح يطلع من صدري .
- اعشكنج
- احبنك
-انا وياج للشيب
.......
رواية كحل عرب الفصل الأول 1 - بقلم زينب ماجد
رواية كحل عرب الفصل الاول
المقدمة
مسيت العافية اعليكم يهلنه
وياكم انه جدتكم هدية ، اي والله ييمه .. صرنا جدات و كبرنا وكضى عمرنا بساع بساع، من تنشدوني اعلى عمري ما ادري شكثر، يگول ابوي اتضكر صرتي بالسنة النجتل بيها الزعيم عبد الكريم قاسم الله يرحمه ، جاي غاد ما ادري والله ييمه ، هو انه صرت بذيج اليام.
وين انا هسه جويعدة و بيا مجان مالكم غرض
خلوني اسولفلكم سالفة من سويليفات اهلنه
بس لزوم نبدي سويلفتنه بذكر الصلاة اعلى محمد و ال محمد ، من كون الله من يسمع واحد يضكر حبيبه يبارك بيه وبسولفته.
اي ...كان ياما كان في قديم الزمان
جانت اكو عشيرة اعلى كاع السماوة، عايشين بأمان الله، ناس تحب ناس ، و ناس تفزع الناس ، و الگلوب طيبة و متصافية.
بس اخخخخ من ابليس لو فات بين الناس
يهدهم و يخلي طشارهم عكابهم
... المهم
شيخ هاي العشيرة اسمه (چلوب)
لو نشدوتني .. ليش اسمه جلوب ؟
انا اگلكم
جانو اهل كبل ، اهلنا .. بكلشي يصكدون
مت عيني عليكم يهلنه .. ما يمر اعليهم طارش و يكللهم اعلى شي الا ويصكدونه ، فجان الشيخ مزهر الله يرحمه كلما جاله ولد انسدح الولد و مات
و هو يحب شيخته ، من كون مريته وما يرضى يكسر خاطرها و يتزوج اعليها ، لهناك اجاهم طارش كاللهم ( سمو الولد بسم حيوان و هو يعيش )
اهلنه مت عيني عليهم ما كصرو، ويا ما اجا الولد طكوه بسم (چلوب )، و لنه صكد و عاش، صكد لو كالو على نياتكم ترزقون، الحمدلله و الشكر.
كبر چلوب و صار شيخ و الوادم تحبه و تريد خاطره ، و جلمته بالسلف ما تنثني، الشيخ چلوب بعد
زلمة بخيت و الوادم تحلف براسه
ما يطب مضيف و بيه عكدة الا ويحلها، و الكل تاخذ الجلمة من حلكة و ما تردها عبن يحترمونه.
المهم ....
الشيخ جلوب الله يرحمه، جان عده ثنين نسوان
الجبيرة الشيخة محاسن
و الزغيرة بدرية
خلف منهن ٣ وليدات
الجبير ( دوّاي ) " الشدة على الواو"
الوسطاني (ثجيل) بلهجة الحضر "ثكيل" بمعنى فصيح "ثقيل"
ولاخر (ضاحي )
دواي و ضاحي من الشيخة محاسن
اما ثجيل فهو من بدرية
و ٤ بنيات .. ٣ من الشيخة محاسن (نضيمة و هضيمة وحسنه )، ومن بدرية بس (رجوة )
بس قصتنا و سالوفتنا تبدي من ولد الشيخ جلوب ( دواي و ثجيل و ضاحي )
من مات الشيخ جلوب الله يرحمه ، خلفه بالسلف و المضيف ابنه الجبير دواي .. صار هو المحفوظ
بس السالفة ما وكفت هنا ييمة
الشيخ دواي جان ما يخلف ( عقيم) تزوج ٢ نسوان و ما خلف منهن ، من عرف بنفسه ما يخلف و ماله وريث يخلف بعده و يصير الشيخ .. عمد المشيخة و امارة العشيرة لاخوه من امه (ضاحي) من بعده
بس ثجيل جان اكبر من ضاحي و المفروض بعد دواي الحك لثجيل، بس الشيطان و لعب النسوان دار العكول، و الشيخة محاسن ..وصت ابنها يخلي امارة العشيرة من بعده الإبنها الثاني ( ضاحي) ...وقرروا ياكلون حك ثجيل.
... خايبين جا غير لهناك وطگ و موت يدواي
هسه مات موت الله، احد جتله ماحد يعرف السالفة يهالعالم مصيبة ،عافو الزلمة ممطول و تمالخو من الروس، كلمن يصيح "انا الشيخ"
ثجيل يكول ؛انا الاخو الجبير و انا المحفوظ
و ضاحي ؛ يكول انا الشيخ و ابن الشيخ جلوب و الشيخة محاسن و اخوي الشيخ دواي وصاها ليه.
ثجيل ابن الشيخ جلوب و زلمة جبير و محترم و السلف كله يوده و يحترمة، لجن الشيخة و الناس كلها صفت ويا ضاحي.
هنا انگسمت العشيرة صوبين
الشيخ ضاحي هو الأخذ مجان اخوه و صار المحفوظ بالعشيرة
اما ثجيل فراح و ذب جرش و يا اخواله ونصب روحه شيخ وشايل اسم ابوه الشيخ جلوب.
ثجيل جان اسمه ضعيف و جثير ناس ما تعتبره هو الشيخ ، فراد يثبت اسمه و عشيرة بأسمه
جانن عده ٢ نسوان، اتزوج عليهن اثنين .. و حكم على ولده كل واحد يصير عمره ١٥ يتزوج .. و على كل ولد من ولده يتزوج ٤ نسوان و يخلفون ..
وصدك هو اتزوج ٤ و الخير يزيد عليه وولده خير من الله، كام بكل فصل و بكل جعدة سلف يطوه هدية مره ، اله
يكولون صار عده ٢٠ مره خلف منهن ٦٢ ولد و ٢٠ بنية
.. سگم النسوان الما تحبل على الاربعين يردها لاهلها
وحكم بالعشيرة كل فرد من اولاده و احفاده لزوم يتزوج ٤ و الما يتزوج يعيرونه و يطردونا حتى من المضيف و يعتبرونه موش ازلمه.
عده بستان و هوايش و طليان و حواوين جثيرة يستفاد منها، وولد و بنات خير من الله،كل همه يرفع اسمه اعلى اسم ضاحي و يصير الشيخ جلوب ينضكر بولده مو بولد الشيخ ضاحي.
... اما الشيخ ضاحي حاط كوره ويا كور ثجيل .. دم سنونه ثجيل .. معاديه معادة، و ثجيل مثله .. و نزاع بين ال ضاحي و ال ثجيل ما فض.
يوم من الأيام .. ماتت هايشة بگاع آل ضاحي
خايبين يهالوادم ماتت لو ابتلت اعلى عمرها ..
يكلولون لادغتها حية .. بس واصل خبر للشيخ كايليله :- شفنا واحد من ال ثجيل بكاعنا، من كون هو حط الحية و دربها اعلى هايشتنا.
تكاوموا و شالو اسلاحهم و هدو على ال ثجيل بالتفگ، ثجيل و ضاحي ازغر منه و يهد اعليه ، يا يابه يابويه
لم ولدك و حط التفگ اعلى اظهورهم و هد على ال ضاحي ، و معارك من الجيهتين
لا ال ضاحي يهيدون
ولا ال ثجيل يردون
واحد من اولاد ثجيل طاك زلمة من ازلام ال ضاحي، و لايحه بچيلة .. انهد السلف بوكتها يكولون.
ادخلت العشاير بيناتهم و طبو طباب خير ، ثجيل انرد عنهم لجل عيون العشاير الدخلت، بس ضاحي احزام و الف سيف ما ينرد
و شرط يا يرد ثجيل تحت شور ضاحي و تحت طوعه بالسلف ، يا ياخذ منه فصلية ..
هو اخوه و الاخوة ما بيناتهم فصلية ولا فصول ، شلون يطي مره فصلية و يبرد الدم ؟
ضاحي لاف العشاير على ثجيل و حطه بين هالخيارين ، يا يرد تحت شوره، يا يطي وحدة من بناته فصلية.
كوم ثجيل و اطي بت ابنك (ردحه) عمرها ١٢ سنة .. فصلية لبيت الشيخ ضاحي، فصلية لأبنه مطر.
جانت بعدها البت ما لاحكة (لم تحيض بعد) وما يجوز اعلى الزلمة يكرب بنية احديثة ما لاحكة، بنولها صريفة ورا البيت بالبستان وكعدت بيه.
المسكينة عانت و شافت الضيم مت عيني عليها، عاشت غريبة ووحيدة و الكل ما متغبلها، عبنها بت من ال ثجيل.
مطر متزوج كبل فرحة لجن ما عنده منها ولد، بس ما گرب ردحة حتى من بعد ما لحكت، جان بوده يردها لهلها بس جانت الجلمة لبوه الشيخ ضاحي وسكت عنها.
راحت اسنين و اجت اسنين ومات الشيخ ضاحي، و ابنه مطر صار الشيخ
ومرته الاوله ماتت وبكت عنده بس ردحة، بس هو جان حاط عوينته اعلى بت رجال معروف من ذاك الصوب ورايدها، تكدملها و طلبها امن ابوها وابوها وافغ، بس جان شرط بته، يطلك الفصلية من عبن اهي ما ترضى تجي شريجة لفصلية و اهي بت اصل وفصل.
السالفة جانت جايدة لين الشيخ ما كارب الفصلية و السالفة مرت اعليها سنين، و عيب اعلى الزلمة اليرد حرمة وما ماخذها، فتكرب لردحة وعرس عليها وردها، و تزوج ملوك.
بعد شهرين تبين ردحة حامل ..
منين ؟ .. من الشيخ مطر
الشيخة ملوك مرت الشيخ، وعرفت بردحة حبلت من الشيخ گبلها، جيبيها و عزليها وما خلت احد يدري ولا جابت سيرتها على السان.
جان الشيخ يحب شيخته من عبن جانو مترايدين، و اهي استغلت حب الشيخ الها وخلت اخوها سركال عد الشيخ مطر.
مامش احد درة بردحة جابت يو لا ، شنهي اخبارها ؟
من عبن الشيخة ملوك حامل و ما تريد الناس تعرف ردحة جابت كبلها لو لا خوف لا يطلع البطنها ولد ويخلف ابوه ويصير ابن ردحة الشيخ.
فهي ضمت ردحة وما خلت احد يدري عنها و لو سأل الشيخ عن ردحة تكله ( بحجرتها مرتاحة من كون حامل و ما نريد انتورط ويا ال ثجيل، تخلف ونردها لهلها)
الى ان اجا اليوم الولدت بيه ردحة، صكد و تجيب ولد
و الشيخ مطر ما عنده غير ٤ بنات من مرته الاوله الله يرحمها، ويصير ابن ردحة اول ولد للشيخ مطر.
يا يابه يابوية من درت ملوك بردحة جابت ولد، حجت ويا شيخ و كالتله :- ردحة جابت، اجا الوكت التنفذ وعدك ليه و ترد ردحة لهلها، و انا اتكفل الفرخ و اعتبره مثل ولدي.
وردت ردحة لال ثجيل، وضل ابنها ابيت ال ضاحي.
الشيخ سماه (سرحان)
و الشيخة سمته (غريب)
بس المشكلة وين ؟ بعدت غريب من البيت بحجة مرضعة ترضعة ويضل عدها.
وصفت بالغصر لوحيدها اهي الامر الناهي.
ومن هنا يبعد اهلي تبدي قصتنا ويا ابطالنا
غريب من ال ضاحي
وحاكم من ال ثجيل
منهو حاكم ؟
تعرفون غصته ان شاءالله من نبديها
وانا هنا واروحن لهلي ، و اخلي زينب بت ماجد تكمللكم غصتنا و غصة اهلنا، اودعناكم.
الحلقة_1
(ولادة الغريب )
بسم الله الرحمن الرحيم
(واذا قيل لهم اتبعوا ما انزل الله قالوا بل نتبع ما وجدنا عليه ابائنا )
الأعراف و التقاليد هو ذاته ما يردده الجهلاء و يذكره القرأن في (هذا ما وجدنا عليه ابائنا و اجدادنا )
فالعرف العشائري هو العرف السائد و الدستور العام للقبيلة.
فلا مناص لأمراة ولا رجل من هذه الأعراف، وكل من يخالف، فالموت هو ما يستحق.
في قصيدة الشاعرة نور السامرائي لرواية كحل عرب تقول :
حزني لچنه ثار شيوخ مايبرد
فرحتي كوار فصليه بعجل تنشد
اوگف وانهطر وبضهري حفنه چفوف
نگدت كحلة عرب فصليه للمرود
شيفيد معاتب خيوط الشمع للنار
مثل گهوة فصل تنعاب من تبرد
كضه عمره الشجر حايوز للعصفور
الحجر لبّس جفوف الماي جم معضد
الوكت ساعه رمل كل لحظه يمشي براي
على غير الشيل ماسولف الچرغد
شيضر الليل لولم بشليله اوجوه
شمرت شوفهه لحظن الگمر وابعد
معروف النهر ترجيه بذن الغيم
ومن طبع البلم للماي يتودد
وره مكفه الحلم بديت طوس دموع
هلبت مرت الاخرى اعله الصدك يمتد
حايط عالصور لثكال مامنيت
وياهه وياهه اكول وصرت عين وخد
ولاشفت المجازه انوخذ ثوب بنار
لامنهم جزت لاروحي تتعود
كبر ميت انه اليجزيني مايندار
بعازتهم سند لوريدهم محد
اليرّخص وادمه بجيوبه حفنه اعذار
غطه التابوت مامرغوب من ينرد
غطه التابوت مامرغوب من ينرد
كحل عرب
المكان :- المملكة العراقية الهاشمية_السماوة
الزمان :- عام 1950 _ الثالثة ليلا
ليلة باردة والكمر ما هو مبين من كثر الغيوم، هندس و الهوى الهاب حسه عالي و اهو يهز سعف البستان و شجيراته، كل هبه تمر تحجيلي قصة اعلى روس النخل
انا ردحة ، انا حفيدة ال جلوب، انا البت الشيوخ، انا النهديت فصلية لبيت عمي الشيخ و اهو ماهو الشيخ،
انا اللي انبعت لجل يهدي الثار، و ثاراتهم براسي تهد
انا البت ١٢ .. خذوني بلا جرم و كل اجرامهم تشهد
انطك و ابجي و ادير العين وما مش من اهليتي احد.
حبلى و محبوسة بصريفة بكفا (بظهر ) القصر، ما مسموحلي اطلع ولا ادش (ادخل ) للقصر، كله اعلى كيف الشيخة ملوك.
لافة ارويحتي ابطانية من البرد، و حدري (جواي ) جودلية، و المچان حيل بارد، كمت اعلى حيلي، بعد ما بيه اصبر، الوجع جتلني.
انا كمت ، و اهيس الماي جرى من بين رجلية، لا جايبة كبل ولا اعرف من النساوين شلون الجيابة، الوجع دوهني ، ظليت اكض (الزم ) بالعمود مال الصريفة، يامن يكومني اعلى حيلي ويوصلني للغصر.
"يا حاضر الشدات احضرني ، غريبة و مالي احد "
اجر بخطواتي جر، رجلية تكرمن من الوجع، ظلت ادموعي اتجارى ، طلعت الصريفة، طكني الهوى وردني، الوجع خواني ، كضيت الباب حيل و كمت اصيحن (يهل الوادم وينكمممممممممم خايبين الحكوليييييييي )
مامش احد يسمع حسي، الهوى عالي، ما ينسمع منه شي، كوة اجر بروحي بس اريدلي وحيد ازتنه (ادزه ) اعلى القصر يندهم.
اتكرميت فد دور ، كعدت و كمت اصيحن (ولكم الحكولي )
الشيخ مطر نايم، و نومه خفيف، و حجرته اطل اعلى البستان، قريبة من صريفة ردحة، فك عينه، اتصنت، كال :- جني اسمع حس مرة تصيح ؟
كف الغطى من جسمه وكام، كامت الشيخة ملوك :- انا اروحن اشوفن شكو، تطمن يشيخ
الشيخ :- خافنها ردحة التصيح ، هاي ايامها يملوك
- ولونها ردحة شنهي، جا انت تجيبها، انا اروحن اشوفن واخبرك
فتحت الباب و طلعت، صاحت :- سليممممممة، يا سليممممممة
اجت خادمة ثانية غير سليمة، :- انا صبيحة، امري يشيخة
- اطلعي عايني شصاير برا، اكو حس مرة يصارخ
ركضت صبيحة واخذت وياها واحد من ازلام القصر، طلعت و شافت ردحة رايحة روحها و متجية راسها للحايط و تصيح بحس ناصي ( احضرني يا حاضر الشدات دخيلتك)
صرخت:- يععععع دية ، جاي اطلكين ؟
ردحة :- راح اموتن الحكولي يا بوووووية
صبيحة :- كومي من مجانج كومي الجو بارد و يعسر ولادتج، خايب رحيييم يااا رحيم ، روح خبر الشيخة ملوك، گلها ردحة تطلك ، خل يندهون اعلى الجدة (القابلة ) ام عليوي ، امش بسررررعة ياااااله
نكلت ردحة لصريفتها، و رحيم راح يخبر القصر بطلوك ردحة، ملوك من عرفت ،دزت سليمة و رحيم اعلى الجدة المعروفة بالسلف.
الشيخ :- جاي تطلك مو ؟
الشيخة ملوك :- تطمن انا راح اروحن بنفسي و اوكف وياها بطلوكها، راحتك يا شيخ.
الشيخ :- خبريني لو جابت
- تامر
راحت لصريفة ردحة، اللي صبيحة ردتها وكعدتها بمجانها، وهي تلوب من الوجع، الفرخ واصل راسه ، وولادتها گربت، كضت ايد صبيحة و كامت تعصر من الوجع
صبيحة :- خايبة كضي روحج الما تجي الجدة مت عيني عليج دية
-خايبة راح اموتن ، من كون الله اخذني ولا خلاني اشوفن هاليوم
تحجي و تنشغ ، ردتها صبيحة
:- لا تكولين هيج يبعد اهلي، رزق هاذ ، حمدي الله و اشكري
- محمود مشكور يصبيحة من حيث ان اعرف لو جبت هالفرخ ما راح يخلونه ليه، راح ياخذونه مني يصبيحة ويردوووووني لهلي ، ولك اااااخ بوووووووووووووويه
- كولي ياله ، جيبي هسه ولا تفكرين، الله يسهل ان شاءالله
أضف تعليقاً
- اسمعي يصبيحة ، اريدن منج خدمة
- كولي
- لو جبت لا تخليني اشوفن الفرخ ، ما اريد كلبي ايتعلك بيه وياخذونه مني و اتعلعل، طلعو من بطني و اخذوه لا تخلوني اشوفنه
- لا تحجين هيج شمالج انت
- اوعديني يصبيحة
ملوك :- هاااا يردحة من كون گربت ولادتج
وكفت صبيحة، احترام للشيخة ملوك، وحجت :- اي شيخة سودة عليه تطلك
عاينت عليها الشيخة، بنظرات حادة بدون كلام، صبيحة دنجت، حجت الشيخة ملوك :- زيدو النور بهالمجان ، ما اريدنه هيج مظلم.
- تامرين شيخة
ركضت صبيحة، و دنكت ملوك على ردحة:- خليها ترجية بأذنج ساعة التولدين تردين لهيلتج ، ولد لو بت ، هنا يضل ابيت ال ضاحي، بت ال ثجيل مالها مجان بالقصر افتهمتي يردحة ؟
- شيخة احبن ايدج لا تحرميني من الفرخ، خدامة بهالقصر والله ما اكولن، الله ينطيج العافية.
اجت الجدة ووراها سليمة، ورحيم برا واكف، اجت صبيحة و اهي شايلة فانوس ضواه عالي، ردحة تبجي و تصرخ من الوجع، والجدة كعدت كبالها تجيبها.
الشيخة ملوك جانت بالشهر السابع من الحمل، ما تحملت صوت الطلوك، طلعت وكفت برا، ردحة جانت تصارخ بكل حسها، صرخة الم و حسرة ام تعرف لو ولدت ما راح يخلون ولدها الها، من كونها فصلية من ال ثجيل.
حس عالي يملي المكان بصرخات ردحة، فجأة!!
اختفى صوت ردحة، و اعتلى المكان صوت اخر
صوت طفل يبجي بصوت ناعم و عالي!
انولد الطفل
انولد اول ولد بال مطر
انولد اللي راح يشيل اثام ال ثجيل و ال ضاحي
انولد ابن الفصلية
...دارت وجهه ملوك، و فاتت للصريفة بسرعة، حتى تعرف ، الفرخ الجابته ردحة شنهو ؟!
رجعت راسها للفراش ردحة، و دموعها تتجارى منا و منا ، سكنت بعد تعب طويل مع الولادة.
الجدة و صبيحة لفن الفرخ بساع بساع من كون الجو بارد، حجت الشيخة ملوك :- اشجابت ؟
الجدة :- كرت عين الشيوخ اجاهم ولد شيخة.
ملامح الشيخة وضحت عليها علامات الغضب، تضايكت، وردحة بحس مالوم تصيح:- ما اريدنه، لا تخلوني اشوفنه، ما اريدنه.
الشيخة انطت أشارة لسليمة تشيل الطفل و اتجيبه الها، تنوعتله، صكد ويلد ، حجت :- بالمبارك يردحة ولدج راح يضل يمي و انا الاداريه، خلص دورج بأل ضاحي
اسمعو و خبروا الكل، هذا الفرخ اسمه ( غريب )
شنهو اسمه ؟
سليمة و صبيحة :- غريب شيخة
الشيخة :- سليمة كولي لرحيم يندهلي السركال كاطع، و انت يا صبيحة روحي خبري الشيخ ردحة جابت.
طلعن، و اهي بقت اتنوع ع الفرخ
ردحة :- شيخة الله يحفظج احبن ايدج لا تحرميني من ابني.
- ما الج ابن يردحة، من اليوم و جاي انت حرة و مانج فصلية.
الجدة:- لزوم تردين لمجانج خليني انظفنج.
رجعت راسها ردحة و اهي تبجي، و الشيخة مركزة بملامح الفرخ الزغير التوه مولود.
سمعت حس كاطع برا :- يا ملوك وينج يملوووك
كفت البردة و طلعت، حجه كاطع :- اصباح الخير خوية
ملوك:- يا خير اليلفانة و بت ال ثجيل نايمة اعلى افادي
كاطع :- كالو ولدت، صكد ؟
ملوك:- مو بس ولدت يكاطع، وجابت المر اعلى گلبي
- ويلد ؟
- اي ويلد
- شراح ءنتصرف يشيخة ؟
- بالاول اريدك تلهي الشيخ هاليومين ما اريدنه يظل بالسلف
- اهو عنده دعوة لمجلس الشيوخ ابغداد
- وهاذ الأريدنه، ابعد الشيخ يكاطع
اجا الشيخ مطر و رحيم و سليمة يمشون وراه :- كالو ولدت
ملوك :- ولدت بالخير يشيخ، مبروك جالك ولد
الشيخ مطر :- الحمد و الشكر لله.
تعداها و هو يدخل لصريفة ردحة، عاينت ملوك بوجه كاطع، وكاطع عاينلها :- لزوم نتصرف يشيخة
- موش وكته، خلنا نبعد الشيخ بالاول، اوكف هنا خلني ادش
فات الشيخ، و صفت الجدة و صبيحة اعلى كتر ، وتكدم كال :- بالمبارك يردحة
ردحة ما ردت، مغمضة و الدموع تجري منها واهي منسدحة، و تعب الولادة هاد حيلها، صبيحة قدمت الفرخ للشيخ، شاله و تنوعله ، ابتسم
اذن بأذنه ( الله اكبر الله اكبر ، اشهد ان لا اله الا الله اشهد ان لا اله الا الله .......)، و نطق اسمه :- اسمك سرحان، اسمك سرحان .
صبيحة :- الولد الصالح شيخ يتربى بعزك
الجدة :- بالمبارك يشيخ
الشيخ مطر :- الله يبارك بيكم ، انكلوا ردحة للقصر ودفوها زين و جيبولها التعتازه (التحتاجه ).
الشيخة ملوك :- سمعتن ؟ ... نفذن ياله
فكت عيونها ردحه بعد ما حست اكو خيط امل من الرحمة يخليها تكضي عمرها ويا ابنها الولدته الساعة، حجت :- شيخ
وقبل لا تكمل كلامها، نطق الشيخ كبلها و كال الها :- استريحي يردحة ولا اتعبين حالج.
انطا الولد لصبيحة و طلع من الصريفة، ملوك ضلت تعاين لردحة بخزرة، الثانية دنجت راسها مكسورة خاطر.
كاطع :- مبارك يشيخ
- الله يبارك بيك، اذبح ١٠ طليان، و خلي الديرة تعرف الشيخ مطر صار عنده ويلد
كاطع :- شيخ اليوم لزوم نروح لبغداد
-الاعرفنه مجلس الشيوخ بعد ثلث تيام
- اجانا الخبر يشيخ باجر
- ماطول هيج يكاطع، جا حضر لمشيتنا لبغداد
انتقلت ردحة للقصر، و الشيخة ملوك نار و تلهب من العصبية، رغم الشيخ كال اذبحوا ، بس هي كالت الكاطع ( لا تذبح )
- شلون ما اذبح ، لو دره الشيخ يملص ركبتي
- يو سألك گله ردت اذبح و الشيخة تعصبت وما رضت اعلى الذبح ، و هد الباكي اعليه.
- امرج يبت امي و ابوي.
اجت سليمة :- شيخة
- شرايدة يسليمة
- الفرخ يصارخ من الجوع و ردحة موش راضية ترضع الويلد
- وليش ما ترضعه ؟
- من حيث ما تريد ءتعلك بيه
- درابين بت ال ثجيل موش اعليه، انا الشيخة ملوك المثل ردحة اسحكها حدر رجليه و ما اعاينلها ، امشي
.... ردحة كاعدة تبجي، فاتت الشيخة :- جيبي الفرخ يسليمة
- هاذ شيخة
- انطيه للفصلية ترضعة
ردحة :- شيخة احبن ايدج
- ترضعين الفرخ وما اهيس حسج ، و ان ما رضعتي ، تعرفين شنهو اليصير ؟ يموت الولد و الجتال انت يردحة ياب بت ال ثجيل ، دم عشر زلام من اهلج ما يكفون لجتلته.
حجتها و طلعت، :- الشيخ وينه يسليمة ؟
- طلع للمضيف شيخة
-حضريلي العباية اريدن اطلع للبستان ، وخبروا الشيخ اشوفنه غاد .
بين دموع ردحة، و صرخات طفلها من الجوع، و غضب الشيخة ملوك ، مشاعر متضاربة
مشاعر ام محرومة من ابنها و القهر هي الحارمة روحها خاطر لا يتعلك بيها و تعلك بيه
ومشاعر طفل اول يوم اله بهاي الدنيا ما لكا منها غير الجوع و الحرمان ، وناس تكيد وكارهة وجوده
ومشاعر شر و حقد يملئ الشيخة ملوك مع الغيرة و حب التملك و السلطة
"هذا جان اول يوم بحياة غريب"
الشيخة و اهي تمشي بالبستان، اجاها الشيخ :- هلا يشيختي ، اشوفنج اليوم موش اعلى طبعج !؟
-متضايكة و جاتلني القهر
- من ايش متضايكة ؟
-جان الود ودي وليدك الاول يكون مني
- و انا منتظر هاذ اليوم
-بس اجاك الولد يمطر
- ارادة الله بعد
- الي يمك وعد ، وصار اليوم التنفذه ليه يشيخ
- وشنهو هاذ الوعد ؟
- ترد ردحة لاهلها
-انا ما ناسي هالموضوع، بس ترتاح و توكف اعلى حيلها ، و اردنها
- ترتاح عد اهلها
- شيختي غيرانه ؟
- افادي موجر يمطر
- ما يصير خاطرج الا طيب، بس الاريدنه منج شغيلة يملوك
- شنهيه ؟
- سرحان ، الفرخ هاذ اريدنه تحسبينة بحسبة ابنج، و ما تفرقينا عن بزرج لو صار، ما اريدنه يعيش يتيم بلايا امه، صيري امه يملوك
- لو ما وسعته عيني، احطه بكلبي ، تطمن يشيخ لا توصيني اعلى ولدي ، الشاهد الله من ساعة الشفته جن شفت ولدي.
- بارك الله بيج، انا طالع البغداد ، وصيت كاطع يحل مچاني، وما اوصيج ع القصر، وبالاخص ردحة، نفسة وخدمتها بيها اجر و ثواب وان شاءالله بس ارد احل موضوعها.
- تامر يشيخ ، جلمتك فوك راسي .
- لا اتعبين حالج جثير ارتاحي
- ان شاءالله
ردحة :- اعاين للطفل و انوحن و اهو يبجي و انبح حسه من البجى ، اخذته بحضني، طلعت صدري و حطيته بحلكة، در .. اتنوعله يرضع و ادموعي ءتجارى
كمت انوحن والولي (دللول يلولد يبني دللول عدوك عليل و ساكن الچول، يمه يموت كلبي من اكولن يمه اااااه يلولد يبني يا يمة )
فات الشيخ مطر و هي تنوح، مسحت دموعها بشيلتها و غطت صدرها و، ضلت مدنكة مكسورة خاطر
:- شمالج يردحة ؟
- هزت راسها ما حجت جلمة من قهرها
- اسمعي يردحة، انا ما رايد اظلمج وياي، انت بكبر بناتي و من ساعة الجابوج لهنا و انا ما راضي، بس حكم ابوي الشيخ ضاحي كسر ظهري، ويو ما العيب ما اتكربلج واردج لهلج بت تشوفين رويحتج و ترتاحين من ظلم ال ضاحي ، بس هذا النصيب.
ردي يردحة و ارتاحي من فصل ال ثجيل و ال ضاحي ومصايبهم.
-راحة الام يم ولدها يشيخ.
سكت و ما نطق اي كلمة بعدها، اندار و مشى ، رجعت ردحة تنعي، و اهي تسمّع الشيخ.
:- يمة ما اريد من جيبك فلوسك، يمة ولا اريد من جدرك اغموس، يمة ردتك ولي و ناموووووس اخ يولد يا يمة
يمه يحكلي لاصير دلي
اطلك الدنيا واولي
اعلى ظليمتي من دون حلي
تنهد الشيخ و طلع، دنجت هي تبجي اعلى راس ابنها .
"واعلى صوت النوح نام سرحان"
يومها سافر الشيخ صبحية، هو تعده عتبتة الباب، وملوك شدة حيلها، فاتت على ردحة اخذت ابنها ووصت سليمة و صبيحة يوصلنها لبيت ال ثجيل .
صاحت و ناحت و حبت الادين ماحد رد عليها، ورجعت ردحة لال ثجيل، و اختفت من حياة ابنها، لا جن خلفت ولا جن طلكت.
ندهت الشيخة لوحدة بالسلف اسمها زهرة توها جايبة من شهرين ، حالتها فقيرة وما تملك الدرهم، خلت الولد عدها و كالت الها :- اسمه غريب غير هاذ الأسم ما اريدن اسمع ، تاخذينه و تخلينه عدج وما تجيبينه للقصر الا وكت الانه اطلب و اندهج ، وتطمني انا راح اوصي اخوي السركال يتساهل ويا زلمتج بالبستان و محصولكم واصل.
دنكت على ايد الشيخة و هي تحبها و فرحانة، جان وكتها اقطاع زراعي و الفلاح بأسوء حالات الفقر ، و يا بخته اليحصلة لكمة خبز ياكلها هو وعياله.
عائلة زهرة و زوجها حميد حيل فرحوا بسرحان، جن هالطفل رحمة و نزل عليهم من السما راح يعيشون بجاله و يخلصون من الفكر العايشين بيه.
مر أسبوع ، رجع الشيخ من بغداد ، اول شي راح للمضيف شاف شغل عشيرته و اطلع على الامور الصارت بغيابة، خلص ورجع للقصر.
بنات الشيخ تلكن ابوهن و سلمن اعليهن و حبهن، صبيحة وسليمة واكفات ، وحدة شايلة دلة الماي و الثانية شايلة الطشت :- هلا شيخنا توه نور القصر
الشيخ :- هلا بيجن بوية، شلونجن ؟شلون الاخبار ؟
- بخير يشيخ
- ردحة و الفرخ شلونهم ؟
يحجي و هو ينزع العكال و الخاجية ، و يكف باردان دشداشته، جاوبته صبيحه و اهي تگله :- ردت لهلها
انتفض :-- شنهوووو ؟ انا ما كلت اترد ، ياهو هاذ اليتصرف اعلى كيفه بدون ما ياخذ شوري !؟
- الشيخة ملوك شيخنا هي الامرت برجعتها
كام من مچانه بعصبية و اهو يكول :- الشيخة وين ؟
-بحجرتها مريضة
وكف :- شمالها مريضة ؟
سليمة:- صارلها يومين مت عيني عليها طريح اوساد
- ندهتولها الداية ؟
- اي يمعزوز ندهنالها، تكول من القهر ، موش زين اعليها القهر و اهي حامل ، تعتاز راحة ، ومنعت اعليها الحركة و الكدر خوفن تجيب امبچر وهالشي موش زين.
تحجي و تمشي ورا الشيخ، و هو يمشي بلهفه لحجرة الشيخة ، فات للحجرة و الشيخة منسدحة و نايمة مريضة، تگرب يمها :- ملوك شمالج بوية شنهو الياذيج
فكت عينها :- هلا بيك شيخ هلا يبعد روحي ، صرت كواكة (زينة ) بشوفتك
- شجالج يبوية شصاير وياج و هيج اتمرضتي، هديتج صاحية .
- القهر انا كلشي استحمل الا بوحيدة تشاركني بيك اطكن و اموتن، السموحة يشيخ امرت برجعتها عبن ما كدرت استحمل بعد .
-ارتاحي هسه ارتاحي و نحجي بعدين
اندار لصبيحة و هو يسأل :- الفرخ وين ؟
ملوك :- من مشت امه انطينا حليب هوش بس الولد ما ءتحمله و غص، ندهتله زهرة اهي جايبة ولد من شهرين و هديته عدها حتى يرضع
- زهرة منهو ؟ مرت حميد ؟
- اي يشيخ، من خوفي عليه هديته عدها فرخ جاهل و يحتاز الترضعه، حطيتله مرضعة و ام اداريه و ان شاءالله ما نكصر وياه حسبت وليدي
شكل الشيخ ما رضى بكل الكلام ، بس ما كدر يحجي لإن الشيخة مريضة و ما يريد يزيد القهر اعليها.
امر سليمة تبگى يم الشيخة، و اهو نزل، صاح على رحيم و كال :- اندهلي حميد ال خنجر و حرمته بساع.
ركض رحيم و طلب حميد و مرته زهرة، جابو الولد و اجو، تفقد الحال و شاف وضع الفرخ، زهرة جانت معتنية بيه و بكت تقنع الشيخ خاطر يرضى بغريب يضل عدها، من كون هي مستفادة بخير هالفرخ النزل عدها.
و اهو جاي ءاتحقق ويا زهرة و حميد، صارت ضجة بالقصر و كالو ( الشيخة ملوك تخربطت ) كلها ركضت للشيخة واولهم الشيخ مطر.
ظلت اعلى هاي الحالة اسبوع التهى الشيخ بيها عن كلشي، و ضل غريب عد زهرة و حميد.
وره شهرين من ولادة غريب، ولدت الشيخة ملوك، و الجابته ولد و سماه الشيخ ( زناد ) وكتها السركال كاطع ذبح ٢٠ طلي وخلى الديرة كلها تعرف و تحتفل بولادة ابن الشيخ بعد اربعة بنات
ناس تكول :- ليش ردحة موش ولدت ؟ اشجابت ولد لو بت ؟ شنهي معقوله لليوم ردحة ما جابت
موش ردت لال ثجيل معناها جابت، جا وين خلفتها
ناس تكول جابت ولد و ناس تكول لا يو جايبة جان عرفنا .. وبكت الناس بين الكال و بين الكلت.
جانت غاية ملوك تشوف اللي ابطنها ولد لو بنية ، من حيث لو جان ولد هو اليخلف ابوه ماهو ابن الفصلية، فمن صار عدها ولد اترهت و خلت الديرة كلها ءتعرف الشيخ صار عده ولد.
فيما بعد الناس عرفوا للشيخ ولد ثاني ، اسمه غريب بس عايش ابيت حميد موش بقصر الشيخ .
بس نقطة راس سطر اللي معروف بين الناس (زناد ولد الشيخ ) هذا الولد الاله الاحترام و التقدير بعد مقام الشيخ العام للعشيرة و جبير الديرة.
عاش غريب عد زهرة و حضى بكل مشاعر الحب وروح العائلة ابيت حميد ويا اخوته من امه زهرة (رباب الجبيرة و عبيس و حسين) ، تعاملو وياه جن هو واحد من البيت و ذوله صدك اخوته.
غريب تعلق بزهرة، مثل كل طفل يتعلق بأمه، بس الشيخ فارض على زهرة كل يوم تجيبه للقصر حتى يعرف ءاهله وناسه ما ءيتعود ع الغرب.
بس ما خلص من كيد الشيخة ملوك ، موصية سليمة كلما يجي غريب للبيت تخزره ووين ما يمشي تخوفه، حتى يكره دشت القصر .
وبالفعل هذا الصار ، كل يوم لما تريد زهرة تاخذه للقصر ، غريب يفحط من البجي ما يرضى يروح ، بالجبر و الغصب ياخذونه ، يخلصها بجي وكاعد بحضن زهرة ليما يرد.
وابتعد سرحان من القصر !
ومشى الحال على هالحال.
.......
السماوة_ عرب الشيخ جلوب_ سنة 1958
المكان " بيت شمخي "
كواغد :- نايمة و اتكلب بمچاني والحرمز جتلني، كل ساعة اهيسه يمشي اعلى جسمي، صيف و الحر جاتلنا ، هيسيت شي يمشي اعلى وجهي ، ولني اصفك روحي ذيج الصفكة العمت عيني
كعدت اعلى حيلي :- خايب شنهي والله بلوة يربي الواحد ما ينام من هالحر و الحرمز ، اكومن اذب اعلى لشتي ماي بارد من السطلة بلكت ابرد و ارد انام.
كمت من مچاني ورحت للسطلة، جريت البردة و ذبيت اعلى روحي چم طاسة ماي، افيش ارتاح گلبي
لبست اهديمات و لفيت شيلتي و طلعت ، تمشيت لفراشي ، نمت ، بس النومة طارت من عيني
جني صحيت من سبحت.
ضليت افتر بالبيت ، احنا بيوتنا بيوت طين ، و ابوي شمخي مخلف ٧ ولد و بس انا البت الوحيدة اله، ٤ من اخوتي متزوجين و كل واحد حجرته لوحيدها
ما طولني افتر ومحد جاعد من الاهل خلوني اسولف عنا ... انا كواغد البت الوحيدة لابوي شمخي ، سماني ابوي كواغد عبن جيت للدنيا بيضة بلون الكاغد فمن حلاتي سموني كواغد
هسه موش بيضة اكلت وجهي الشمس و صار املح ، بس عويناتي حلوات لونهن احمر ، موش حمر حمر بس امي تكلي لونهن احمر و ابوي ءيتغزل بعيوني عبن انا كاغد گلبه ويحبني اكثر من اخوتي ، عمري ٢٠ اصغر اخوتي ، من حيث امي باطلت خلفة الا تجيب بت عبن تريدلها بنية و اجيت انا.
عايشين كلنا بعرب الشيخ جلوب.
جدي يصير ابن عم الشيخ جلوب ، عشنا بديرته و بخيره، الله يرحمه جان شيخ چريم و ابن اصول و يحب الكل ، اهو البنا لولاد ديرته بيوت طين ، جانت بيوت اجدادي كلها صرايف .
جان شيخ ينضرب بيه المثل بالكرم و الشجاعة ، الوادم كلها توده ، بس يا حيفن ع النار التخلف رماد، ورماده جان ولده ضاحي و ثجيل، فرقوا الديرة و انكسمت العشيرة صوبين بسببهم.
انا اجدادي و ابوي ضلوا بكتر الشيخ ضاحي ما مالو لثجيل عبنه طلع من العشيرة و ذب جرش ويا خواله.
بس ضلت الديرة ءترحم اعلى روح الشيخ جلوب، و كلنا هنا حلفانة بالشيخ جلوب ، من نحلف ( و حات جلوب ) ، ما بينا اليحلف بروحه باطل و اليحلف بيه باطل هذا افيسد موش من اهلنا.
شيخ الديرة هسه اهو الشيخ مطر ، هم زلمة معدل لجن السركال كاطع المعمي عليه ، كاصب الفلح واموت العالم جوع و كلها تخاف تشكي للشيخ ، يخافون لا يعاغبهم و يثكل الحمل فوكهم.
هو يحبني و كلما اطلع للزرع افلح، اشوفن وجهه الاغم ءيتبسملي ، خشته هاكبرها و شواربه نايمة بحلكة و عيونة نكط ما ينشافن و طوله مترة من الكاع ويفتر بعگاله ، هسه لو بيه طول زيادة هم خوش ، فتر و نص و سابي الوادم سباية.
من يمر ءيتبسملي، وانا خوفن منه ما اغمنه، لا يحط كوره ويا گور ابوي و احنا مالنا غير الفلاحة بكاع الشيخ مطر.
اهو متزوج و عنده ثنين فروخ و ءيتبصبص اعلى نسوان الديرة الفيسد.
ءتنهدت و انا اعاين اخوتي ، واحدهم فاك حلكة طول ذراع ويشوخرون و صوت شخيرهم واصل ذاك الصوب.
شنهي ما تكلولي ما تحسون بحر ، الحرمز ما يكرصكم ، جا بس عليه لا والحظ و الوعد اي والله، اكوم اعجنلي عجينة ، علما يوذن المومن العجين صاير ، خاطر اخبزها و اكعد نسوان اخوتي نلم شغلنا.
طلعت الحنطات خليتهن بالرحة و طحنتهن و عجنتهن، و انا اعجن، سمعيت السيد وذن، خلصت العجينه و رديت الغطا اعليها و حطيتها اعلى كتر، كعدت امي و ابوي ، ومشيت اعلى خوتي اندهم
:- يلا ولك محيسن اكعد، حممممممزة عليوي دياله يخوتي شمالكم كعدووووو.
اعاين ذول ما يكعدون، كمت ارفس بيهم ، صاح اعليوي :- ايييي ايييي شمالج زرفتي صفاحنا
- اي دكعدو ، انهد حيلي وانا اكعد بيكم.
صحت :- يمممممممه شنهي جبير ما كعد اهو ومريته اندهيهم
نشمية :- يمه انده و ارد ليوره ما الهم حس
حجت خلود مرت اخوي صلاح :- ولج كويغد هاي ابهية ام الفتن ما تكعد معاند بينا عود شنهي انا نايمة بحضن رجلي ، جيف هي بعمرج و متزوجه و عدها ولد و انت ما متزوجة
- كلاب الدنيا اي والله ، جا انا شنهي كاتله روحي اعلى الزلمة ، مدلله ابيت ابوي موش مثلها ام حلك الاعطر ابوها يصكع اعلى راسها
كومي يخلود كضي الخبز بمچاني خلني اشوفنها شلون ما تكعد ، اخذت الجدر و المس و مشيت لحجرة جبار اخوي ، وكمت اطكطك بالجدر
( اكعدددددددد يجباااااااار خاااااااااااايب يجبير خوية اكعدددددددددد)
جبار :- خايب شنهي يكواغد شمالج دوهنتونا (خبصتينا)
- راح تطلع الشمس و انتم نايمين، كعدوووو ياله
مشيت اعلى حجرات اخواني المتزوجين فريتهم ، كلهم الا جبير و مرته ام حلك الأعطر (الأعوج ) بهية.
صلينا و گمنا لشغلنا ، انا وجرت تنور الطين ووكفت اخبز، و نسوان اخوتي حضرن الريوك، وامي رشت الكاع خاطر تبرد ، وفرشت حصيرة الخوص.
طلع اهو يغسل ، الا هاي الحرمصة نايمة ما كعدت، دشيت اعليها للحجرة :- دكعدين ولج يو لا ؟
بهية :- اييي حسج شني ما انام
- خايبة تكومين لا وحات جلوب انوم هالجدر براسج
- هسه اكومن روحي اطلعي غاد خليني ابدل
- غميتها و طلعت ، ابوي يصيح ( يلا بووووية وين المواجيل نريد نمش للكاع استعجلن )
ونسوان اخوتي يصيحن :- اي عمي اي اجينا
خلود :- شنهي كواغد ما كعدت بهية ؟
- خايبه هاي صار الها مدة ما جاتلتها جسمها يحكها ع الجتله
- والله يكويغد انت موش الاولية جنتي اليعصيج اتجتلينه هسه كل خير ما بيج بس تهاددين
- خايبة لا تخليني احطج و ابيس بيج
- جا انت كدرتج عليه ؟ روحي لذيج النايمة وما تحشم احد
- راح تخلني امشي و اهطر راسها وعلي
- خايبة خليها تخاف منج و تحسبلج الف حساب شمالج انت ، من كون اهي نايمة عناد وياج خاطر انت تخدميها و اهي تكعد ع الحاظر ءتريك
-يعععععع شنهي انا اخدمها غير اليوم افشخ راسها، شلت الجدرر و هجيت اعلى حجرتها ، صكد ولني الكاها نايمة ، واجيبها برفسه عدله اعلى صفحتها
ولنها تفز جنها سبرنگا :- يااااااع اطكيني
- واطك ابووووووج يالمعچعچة (الضعيفة جدا )
هدت اعلية تريد اطكني، و اربدها بالجدر اعلى راسها ، ولن عيونها حولن و السانها طلع ليبرا وطاحت من طولها ، ياااااااع فلك طرني كون
انا اغلام ابوي بس لا ماتت : اكعدي ولج لا وحات جلوب اجيبج بهطرة ثانية اكعدي
ولج ابهية اكعدددددي .... يااااع شوف الفلك يربي بس لا طكت المرة وماتت ، حطيت جديري حدر ابطي ، والشيلة كضيتها بسنوني و اطلعت اتخوتل لا تطيح المصيبة براسي
مشيت لنسوان اخوتي :- خاااااايبات الحكلي مصيبة وطاحت اعلى راسي
خلود :- شمالج ولج ؟
- ولج شو هاي طكيتها ولنها تنمطل بالكاع
- يااااع جا انت طكيتيها ؟
-جا انت موش كلتيلي افشخيها ؟
- يا كويغد برد شرج كون انا شلي غرض ، طلعيني منها
- ها يالخايبة ءتبريتي، انا الج لجن هسه موش وكتج ، ميلي عني غاااد ، ميلييييي
ودن الريوك لابوي و اخوتي و انا احوصن اخاف اروحن اشوفنها و اتورط، و اخافن اعوفنها و تموت.
شمخي :- بووووية كاغد جا شمالج ما تجين ءتريكين
- هني و مري بوية ما اشتهي كليتلي اخبيزة و انا اخبز و انسدت نفسي
امي حست بيه شي كامت اتنوعلي ، ونسوان اخوتي الحيايا كعدن ياكلن وعافني مدوهنة بطركاعتي الطاحت اعلى راسي.
طلع ابوي ، انا اتخوتل ورحت مرت الاخرى لحجرة اخوي جبار من جيرة بكصته كون بيوم التزوج بهية الخوثه، كمت اتنوع الها ، بعدهي منسدحة ومفرشة بالكاع
جني حسيت بيها كاعد تمثل موش صكد طايحة ، اااااخ لو طلع هاي درب من دروبها الا صكد افشخها
هيست ايد حطت اعلى متني
:- يمممممممه
نشمية :- يا فلك طرج شمالج ولج
-شجاج يا يمة فززتيني
- جا غير اعرف شمالج ؟
- يمة هاي مرت جبير الاغم هطرتها هيج هطرة زغيرونة ولنها تطيح وتنمطل
-دهر الدهرج يكويغد ، و ماتت ؟
- لا هي ما تموت انا متأكدة من عبن هي موش ادمية
- تكتري خليني افزع اخوتج
مشت و هي تصيح :- ولك جبير يمه ، ولك الحك الحك
جبار و اهو كاعد يچرفع (يشرب بقوة ) بحليب الهوش، فز من مچانه وكام :- هاي يمه
- خايب هاي مريتك طايحة بحجرتها تعاااااال ليه
فزوا الولد وركض جبير الاغم اعلى مريته ، دش الحجرة و شالها و حطها اعلى فراشها ، و انا اتنوع اعليهم كلهم اتدوهنو (انخبصوا ) بيها ، بس اضنن جذابه عبن من شالها ءاتحركت ايدها
جبير الاغم الا شوية يطكها بجية اعلى حرمته و يصحي بيها و هاي مسحونه روحها ، اخر شي طكت حوصلتي و كلت اله :- خوية خلني اعاونك شو دميل
انا طويله و ايدي جنها سعفة نخل و اهفها بجف ترس خدها ، لفت راسها لوف، فزت الغمة و اهي تصيح :- ياهو، منهو ، ياهو الطكني بوووووية
كواغد :- طكج عزراييل كون ، خايبة انا عرفتج عيارة ، اروحن اجيب الجدر و اطكج مرت الأخرى يم حلك الاعطر
اهي كامت تصرخ و جبير بحسه الجهوري يلالي ، و امي كاضتني حتى ما اهد عليها، و اني اصيح :- هدووووووني اعليهااااااااااا اليوم الا ابيس بيها اليوم
جروني صويلح ومحيسن لحجرة امي و ابوي و انا النار موجرة بيه، الخوثة من وراها ما اتريكيت
محيسن :- خايبة شمالج يكواغد استجني خل نفهم شصاير
- ولك خوية انا اكعد من غبشية الله اعجن و اخبز و هاي تعيرني جيف ما عدي رجل
اجا جبير الاغم :- كواغد منا و غاد مالج غرض بحرمتي، عسنا تكوم الضحى مالج غرض بيها افتهمتييييييي
كواغد :- ولج يمممممممة وينكم يخوتي ، انا جبير يهد عليه لجل حرمته يممممممممه
محيسن :- شمالك يا جبار شنهي تكدر خاطر اختك لجل حرمتك
جبار :- اختي الفاكعة راسي ما اريدنها خل تفك مني و من حرمتي ، يهل وادممممم راح اتسووووودن هدددددددددوني بحالي
كواغد :- يبوووووووو اخوي ما يريدني يممممممة ، وينك بوية تعال ليه و شوف بتك شعملو بيها، اااااااااخ يا شمخي يا بوية
نشمية :- بسج يمة بسج فطرتي گلبي والله يا يمة، روح جبير الله لا يرضى عنك ، غاضبة عليك من عبن كدرت خاطر اختك يالاغم
صلاح :- شنهي السالفة لا تدعين اعلى جبار من كونه معصب يا يمه لا تدعين ، و انت يا كواغد هيدي يواشج (على كيفج) شمالج يا خوية ، التفك حلكها وياج بس اشري اعليها و شوفي اخوتج شيعملون
كواغد تبجي :- اناااااا اريدن ابوي ءءءء يا شمخي يا بوية ءءءءء(صوت البجي )
عليوي :- ابوي طلع للكاع بسج خوية
صلاح :- خلووود وينج يخلود ، حضري الريوك الكواغد و جيبنه الها خلها ءتريك
كواغد :- ما اريدن شي من نسوانكم المدوحسات الحيايا ، منا و غاد محد اله غرض بيه ، لا اشتغل الهن و لا يشتغللي ، و انا الهن الا ابيس بيهن وروح جلوب
خذت عباتي و طلعت مكسورة خاطر ادور اعلى ابوي ، عبن ما يبرد گلبي الا ياخذلي حكي من جبير و حرمته الغمان.
امي لحكتني للبستان تمشي وراي ما ينطيها گلبها اطلع محزنه من عبن انا بتها وحيدتها.
من ابعيد عاينت ابوي، كعدت بمچاني ، اجت امي فوك راسي :- ولج يمة كواغد كطعتي گلبي يا يمة
- هديني بضيمي يمة هديني ، اخوي يزفني لجل مرته
شفت ابوي كرب لينا، طكيتها نعوه :- يمه يمااااه يمه ، يمه يمرت اخونا يالحنينة ، ويلفت غدانا بالحضينه ، ييمة و تگلنا نگس لا تاكلينا .. اااااااخ يا شمخي يا بوية
نشمية تبجي بصوت عالي اعلى نعاوي بتها ، و شمخي يركض يريد يعرف شمالها كواغد ، كملت كواغد نعاوي :- يمااااااه يمه ، يمه الاخو شماله شمااااااااله ، ولج يمه يعزل حلالي من حلاااااااله ،ييمه حاچته المرة و صاير اباااااااله ، ياااااااااا بووووية
شمخي :- كاغد گلبي بوية شمالج يبعد ابوج ؟
كواغد :- ظلموني يا بووووية
نشيمة :- اي والله يمة ظلموها
شمخي :- ياهو وياج ؟
- هضموني يا بوية
- ياهو الطكج ؟
- انا اضيعن خلافك يا بوية
شمخي :- ولج نشميه احجي ياهو الطك كواغد
- جبير الاغم جيف تحاجت وي حرمته
شمخي :- ياااااااااااا يابة يابووووووويه
كض دشداشته و طر الدرب ، گمنا انه و امي وراه، دش البيت ، بس صلاح اخوي موجود، صاح ابوي :- جبيييير ؟
صلاح :- سلامات بوية خير ؟
- ولك جبير يطك كواغد لاجل مرته هالردي اليوم امرده مرد
- اوجب (اوكف ) بويه اوجب ، كواغد اهي الطاكة مامش احد طگها (ضربها)
نشمية :- يردي ما كدر خاطر و خشنها كلبها بجلماته الاغم، جا هو الطك طك الكلب يو طك الراس ؟
كواغد :- اي والله بويه طك كلبي جبير اااااااااخ يا صوابي (جروحي ) الما تطيب منه
صلاح:- خوية سمو بسم الله شنهي القضية دكولو ياله
شمخي :- جبار وين يصويلح ؟
- طلع
- سمعوا انتو البالبيت وانت ينساوين، والله اليجيس (يمس ) كواغد بحجاية انوم الربد براسه وروح جلوب الما احلف بروحه باطل ، فهمتووووووووو
صلاح :- فهمنا بويه بس تعال وياي خلنا نسولف شويه و كلشي تريده يجرالك
صلاح :- اخذت ابوي و طلعت للكاع و كلت اله : يابه تراها كواغد صايرة ءتحسس و النساوين يبوي ما تكدر الهن يذبن هالجلمة و ينكرنها و الف زلمة ما يكدر الدسايس النسوان
- املص اركابهن والله
-جا ربحنا ، بويه فدوة اغديلك هن نسوان وكواغد موش فقيرة هم ما تنكدر الا بروح جلوب ترضاها اعليها هاطرة راس مرت جبير بجدر و مخليتها تطيح من طولها ؟
شمخي :- كواغد بتي معدله من كون مرت جبير داست اعليها و طكتها.
- بوية كواغد موش معصومة و انا جاي اكلك لزوم تتزوج ، كبرت و البكدها عدها فرخ و فرخين و ثلاث، ليمتها تضل مفاشخ بينها و بين نساوينه يا بويه
انا اختي و احبنها و اريد مصلحتها ، انت شني ما رايد تشوف ويلادها تفرح بيها .
- ولك يصويلح ما يطيني كلبي اطي كواغد انا لا ما اشوف طولها يطر البيت فلا يرتاح گلبي.
- بويه البت موش بت ابوها البت لبيت رجلها و كواغد الزوم ءتزوج
اجا جبار ، من عاينه ابوي تعارك وياه شلون مكدر خاطر كواغد ، جبار ما رد بس تضايك حيل
ضليت احجي براس ابوي خاطر نزوج كواغد ، جنه رضى بسالفة زواجها .
.....
المكان :- بستان الشيخ مطر
الزمان :- 8 الصبح
حاكم :- متمدد و صخيلاتي ياكلن جدامي بالحشيش، كاض العودة و حاط رجل على رجل ومتمدد ع الحشيش و اغني :
" لو رايد عشرتي وياك حجي الجذب لا تطريه ادور اعلى الصدك يا ناس ضاع و بعد وين الگاه"
غريب وهو يركض من ابعيد :- حااااااااااااكم حااااااااااااااكم
حاكم :- ارتجيت و كمت من مكان :- ياهو هاذ ، غريب ها ولك ها ، تعااااااال هنا انا
اجا ووكف فحطان ، سألته :- شرايد ولك ؟
غريب :- كاطع دزني اعليك كال اندهلي حاكم يجيني بساع
: خير شكو ؟
- عرب ال مطشر اليوم يحولون عدنا ياخذون عطوة و الكعدة بعد الظهر و ذابحين اعلى الغدا و هل يريدك
- جا انت شعندك من الغبشة بالمضيف
- من امس ابوي الشيخ وصاني اجي كال اريدك حاضر و كعدت من غبشه و اجيت انا و حميد.
- جا من كون ابوك الشيخ كالك اريدك حاضر ليش تخلي كاطع يدزك اعليه و يبعدك من الديوان ؟
- اهو كالي روح دور حاكم و صيحه ليه
- مالك غرض بيه مرت الاخرى من يدزك كويطع لا تروح اركد يم ابوك و اكعد لا تكوم
- ما يرضى
- جا انت بكيفة خايب شمالك مخلي روحك خادم عد كويطع و انت ابن الشيخ
- اخافن منه يجتل ابوي حميد ويمنع اعليه رزقه
- والله يا غريب انت سالفتك سالفة الله يعينك اعلى كويطع بس ، روح بويه و انا جاي وراك.
مشى و انا كمت من مچاني :- عمر غريب ٨ سنوات بس هال٨ سنوات ما عاشهن بكتر ابوه الشيخ ، عاش مبعد ، ااااااه يذكرني بروحي
انا اصيرن ابن خضير ابن ثجيل ال جلوب
وكت التعاركو اجدادي ثجيل و ضاحي ، الخوات تكترن لا مالن لثجيل ولا مالن لضاحي و ضلن يدشن اعلى ال ثجيل و اعلى ال ضاحي
ثجيل جدي عده ولد خير من الله واحد منهم ابوي خضير ، متزوج ثلث نسوان ، و قرر ياخذ من عمته نضيمة اخت ثجيل مرة يتزوجها .. واخذ بتها جسومة اللي هي امي .
اتزوجها و صرت انا ، بس بعد ولادتي ٧ شهور توفى ابوي ، تمرض ومات ، ضلت امي حالها حال هالنسواين بكاع ال ثجيل اداري لكمتها و اداريني.
غلط ثجيل من كثر ولده خاطر يصيرله ال و نسبه يكبر بس معروفة الخوة مو بالعدد .. كل واحد من ولد ثجيل يعتبر اخوه اللي من امه هو اخوه ، و البقية اللي من غير ام مثل الگرابه .
معاينة بينهم و مشاكل الها اول ما الها تالي
شلون اوصفهم ... هم بمبدأ ( انا و ابن امي اعلى ابن ابوي و انا و ابن ابوي اعلى الغريب ) هذا قانونهم.
من مات ابوي تعاينو ويا امي معاينة ويحاولون بكل وسيلة يبعدوها حتى ما يضل الها حك بكاع خضير ابوي.
ليما صارت الطكة وماتت الهايشة بال ضاحي و تهموا ال ثجيل، جدتي ام امي مالت لضاحي و ايدته، هم من شافو جدتي مالت لال ضاحي اخذوها حجة كوموا و اطردوا امي من ال ثجيل و انا وياها و حرمونا من ورث ابوي.
عاشت امي عزبة (ارملة ) ابيت ابوها ، شافت انواع العذاب و الحرمان حتى ضرب جانت تنضرب من اخوتها ، الى ان قررت تلتجئ للشيخ ضاحي و تنزل عنده و تشكي حالها.
و بالفعل الشيخ ضاحي استقبلها و امر يبنولها بيت من طين بكاعه، واهو تكفلها و عشنا بكتر ال ضاحي.
من مات الشيخ ضاحي، و اجا الشيخ مطر ، تغيرت امورنا ، السركال كاطع ما يطي لاحد الا يشتغل بالكاع ،كامت امي تشتغل بالكاع بس التحصله يادوب يكفي يومنا ، من غير قسوة كاطع ع الفلح و اذا يوم ما اشتغلت تنحرم شهر كامل ما الك حصة
غير الجتل و الجلد، يصلب الفلاح ع النخلة و يجلدة ليما يريد يموت ، ياله يهده ، كل هالفلح تشكي قسوة السركال كاطع.
هو اقطاعي ومعروفين الأقطاعيين.
نولدت الاقطاعية بالعراق من زمن العثمانيين ، الشيوخ سيطرت ع الاراضي بدون ملك و خلت الناس فلح عدها والمحصول الهم وما للفلاح الا حصة تراب ، هذا الحجي كلش قديم كبل ١٨٠٠ ، وجرت الناس اعلى هاي العادة كلها فلح عد الشيخ و الشيخ هو اللي يدير الديرة ، و يتقاسم ثروة الكاع ويا السلطة الحاكمة.
كل ما مر الزمن الاقطاعيين يزيدون بظلمهم ع الفلاحين ، الشيوخ عايشين بقصور و الفلاح بصريفة و دشداشته كل ٢٠ سنة ياله تتبدل من الفكر و الجوع الجاتله.
رغم كل هذا الناس تعبد الشيوخ وشحدك تجيب طاري الشيخ ، عدهم الشيخ بعد الله ، لا والله لون تتجاوز اعلى الله ( عز وجل ) ماحد اله غرض بيك انت وربك ، بس من تغلط اعلى الشيخ لا جتلك واجب.
هذا زمن الأقطاعيين
الحكومة عميلة للأنكليز
و الشيوخ عميلة للحكومة
وما طايح بيها الا الفقير
من كبرت انا كمت اعاون امي و اشيل عنها ، وكمت افلح بالكاع و اشتغل ساگي (ساقي) بمضيف الشيخ مطر
عمري هسه ١٩ سنة ، امنيتي افك روحي من هاي الكاع و اطلع من حكم الشيوخ و اخلص من ظلم كاطع .
نشيت اعلى اصخلاتي ورديتهن للبيت و شديتهن ، دشيت للبيت امي ما مش (ما موجودة ) ، هديت البيت و طلعت لمضيف الشيخ مطر.
وصلت غاد ولكيت الوادم كلها تشتغل ، اجاني صوت من وراي
كاطع :- وين جنت يحاكم ؟
- هلا عمي، جنت اسرح بالحلال
- و حلالك اهم من المضيف ؟
- ما جنت ادري عمي السموحة
- لو انعادت ءتعلك من رجليك و محد يفكك مني
ما رديت عليه و كمت اشتغل حدر ايد الطباخ انا و جبار ابن شمخي ، اثنينه نشتغل سواگي بمضيف الشيخ مطر، و نعاون بالمطبخ.
حضرنا الكهوة و صراحيات الماي، وجبار يزمخ موش اعلى عوايده، حجيت :- جبار شمالك اليوم شو تزمخ
جبار :- حاكم اسكت عني رحمة لابوك
-سلامات خوية تعتاز شي ؟، اذا تعبان هد من ايدك و انا اشيل الشغل عنك.
- يطيك العافية خوية متضايك شوي
- اكو شي ؟
- لا مفاشخ حريم و انا طايح بنصهن يمعود
- سهلة ان شاءالله لا تهم
-روح كدم الدلة خاطر انا وراك
: ياله
اخذت الدلة و دشيت المضيف :- الله بالخير
ردوا :- الله بالخير و الرحمة
فريت المضيف و انا اوزع اوزع الكهوة ، انا على سايد اليمنه و جبار اعلى سايد اليسرة ، صاح الشيخ مطر
:- استعجلوا بغداكم يحاكم
- تامر شيخنا.
طلعت من المضيف و انا اخبر الطباخ يستعجل اعلى وصايا الشيخ ، استعجلو ومدينا السفر و نكلنا صواني الأجل و جبار مغنتب يشنتر اعلينا تشنتر.
من عوايدنا لما ينحط الأجل ، اثنين من عدنا يكضون الماي ويوكفون ورا العضامة ، واحد من ذاك السايد و اللاخ منا
انا كضيت صراحية الماي وواكف اعلى روسهم ياهو اليصيح (ماي ) اركض و انطيه ، ليش ما واحد شحط بالأجل و اعين للصراحية فرغت وهاذ تنك (اختنك ) ، ركضت.
جبار واكف مغنتب و الزلمة يشحط و الماي خلص، صاح واحد :- خايب يجبار موش الماي بيدك صبله
:- مالي غرض هاذ موش بسراي
- ولك الزلمة راح يمو انطه ماااااي
- وحات جلوب لو يرافس جدامي ما انطيه ماي موش بسراي
...الزلمة شحط شحطة موت صار ءاحمر و جبار مدلغم
الشيخ بذات نفسه كام يصيح :-شمالك يجبار اسكي الزلمة ماي
- اعذرني يشيخ انا حلفت براس جلوب ما انطي ماي
ضج المضيف بين اليضحك اعلى سوادين جبار و بين اليصيح اعلى حاكم و بين اليصيح اعلى جبار
ختمها واحد من سره جبار طلب ماي انطاه جبار ، لما رادو يوصلون الماي للزلمة دش حاكم و حطله الماي
ضج المضيف بالضحك كلها كضت ابطونها و تضحك ، حتى الشيخ كام يضحك .
حاكم :- لمينا و طلعنا من المضيف و احنه بعدنا نضحك اعلى جبار هو دلغم بالزايد ، تكربت منه :- خايب شمالك يخوي اليوم
- انا منين ءتلكاها ما تكلولي من كواغد الهاطرة راس حرمتي لو من ابوي الزفني لجل اختي لو من المضيف اليتمسخر اعلية ، انعل ابوكم لابو الجابكم
طر الوصلة من جتفه و طلع معصب، ركضت وراه :- كول ياله خوية شمالك انت تتضايك اعلى شي ما يسوى
- حاكم طكت روحي و العباس اريدن اهجن لمجان ما بيه احد و خاصة من اختي كواغد ، ولك دولبتني و دولبت حرمتي ، راح اطك
- ميخالف اختك اختك كول يالله ، انت المعدل الزين ، كوم يخوي .
كمت اهدي بيه خاطر يبرد و يرد نكمل شغل.
شمخي :- فشلنا جبير الله لا يطيه
صلاح :- لا تلومه بوية موش انت و كواغد الدستو بمصرانه كافي هدوه
- جا هيج يفشلنا كبل الشيخ
- بوية انت بس كلي اقتنعت بزواجة كواغد
- خايب انا لاكي اليستاهلها و ما ناطيها ، لجن محد يستاهل كاغد گلبي .
- واذا اكلك لكيت اليستاهلها
- ياهو هاذ
- حاكم
- و شعرف عنه ؟
- انا اعرفنه خوش زلمة و اخلاقه هيل و زلمة كادود و ما عده احد بطرك امه ، و عده بيت و عده حلال و يشتغل بمضيف الشيخ مطر ، جا شتريد بعد ننطر شيخ يجي ءيخطب اختنا يا بويه
- والله ما ادري
- انت خلها علي و اتنوع.
حاكم :- شلت دلة الكهوة و هايم اريد ادش المضيف ، و الكا غريب كاعد ويا ابوه حميد يغسل بالصحون برا ، صحت :- غررررررررريب غرررررررررريب
فز و عاين وراه، شافني شطف اديه و اجا :- ها ها
:- خايب انت شمالك ؟
- شنهو ؟
- اغم لا تصير عدل هندامك و دش اكعد يم ابوك بساع
كاطع :- شمالكم واكفين ما ءتحركون
حاكم :- لا عمي جاي اوصي غريب يجيب الوصلة نسيتها ، يلا غريب جيبها و تعال وراي
خزرته و اشرتله ، هو فهم ركض ورا المضيف ، انا دشيت المضيف ووكفت ما فريت ، انتظرته ، من كون كاطع ما يخليه يدش المضيف
بس عوايد الشيخ لو شاف ابنه يخدم ما يرضى بساع يصيح اعل
يه و يكعده يمه، انا اريدن بس اطببه للديوان حتى يشوفه الشيخ
شفت اجا يركض ، كاطع يصيح (اوجب ولك ) و انا صيح :- بس ناوشني الوصلة
وتعمدت ارفع حسي خاطر الشيخ ينتبه
وبالفعل انتبه ،بس شاف ابنه يصخرونه ، صاح :- سرحاااااان
غريب :- ها بوية
- گرب بعد ابوك
غريب :- عاينت اخوي زناد كاعد يم ابوي ، تكربت ليه ، حجه ابوي :- عدل روحك بوية واكعد حذاي (يمي )
- امرك بويه
الشيخ :- كااااااطع
- امر يشيخ
- حضر سرحان بساع كبل لا تجي الوادم ، اريدنه .
- تامر يشيخ
حاكم :- اصب بالكهوة و اعاينلهم، دار وجهه عليه كاطع و خزرني ، عرف بنوايي ، دنجت جني ما الي غرض .
صاح اعليه صلاح اخو جبار الجبير :- حاكم
- اي عمي
مشيت ليه كدمت اله الكهوة ، حجه :- الله يبارك بيك ، حاكم خوش حاكم موش هيج يا شيخ
الشيخ مطر :- حاكم من الزلم الحيد وانا احبنه من كون خوش زلمة
صلاح :- ندست ابوي احجي
شمخي :- من بعد اذن الشيخ
الشيخ :- كول يبو صلاح
شمخي :- مرية حاكم يمي
صاحوا اللي بالديوان :- كفو منك ، حياك الله حياااك
الشيخ :- و النعم منك يبو صلاح ، مشكور ، يلا يحاكم و هاي جتك مرة شد حيل خاطر نزوجك.
حاكم من الصدمة سبلت (صفنت ) بوجه الشيخ ، عفت المضيف و طلعت :- خااااااااايب جبااااااار
جبار :- وجعة جبار كون نامت اعلى افادك
:- خايب كلي جم حرمة عدكم بالبيت ما متزوجة غير كواغد ؟
- ما عدنا غير كواغد
- خايب يلاغم ابوك اطاها اليه و نومها براسي
-دكول و علي ؟
- خايب اذا صدك و اطاني كواغد الا اهجم الديرة اعلى راسك يجبير .
- هلا بيك ينسيييييييب ههههههههههههههههههه
زمخت - ميل عني ناسبك عزراييل كون ميل
جبار :- ههههههههههههههههههههههههه مبروك مبروك
حاكم :- يالچلب كبل شوية جنت مغنتب ووجهك مدوحس هسه ضحكت ، عوينة ابو اصلك
اخ يا يابة يابوية اجلتها ....
رواية كحل عرب الفصل الثاني 2 - بقلم زينب ماجد
الحلقة_2
(انتقام السركال)
اوحنت .. و عادات المحبين
لو حن المحب يطلب حبيبه
يالتريدين الولف .. ولف الجفاچ امنين اجيبه
كافي غيبه .. كافي .. جلمات العتب
عالناس .. ياروحي الغريبة
يالمثل دلّه استوت بوجاغ ما يخمد لهيبه ..
يالتظنين .. ابعظم بلواج .. ما صارت مصيبه
هذا سهمج .. والسهم لوعات
والخانه الوكت يرضه بنصيبه
او هذا طبع الناس .. بيهم بلاوفه
اوبيهم وفي .. اتجيبه الحليبه
وانتي لا جف الينشف العين ..
لا دار الولف .. يمج جريبه
يالحسرتج . حسرة المجبود .. وادموعج
تبدّت
يالعلى اجروحج .. اعز الناس ..
من شافت ، تشمت
يالتظنين الشمل يلتم
شمل عزّج .. تشتت.
(عريان السيد خلف )
جبار :- شمالك يا خوية جا غير انت اخوي و افرح من اخاويك و اناسبك
- تخاويني يالجلب، ااااااخ يا بويه، بس الا اخذها و علي الا اخذها.
- اي بالمبارك ان شاءالله ههههههههههه
- لا لا مو هسه تكلي مبارك ، انطر ليما اعرس عليها واحط بياضها بيدك.
- افا يالنذل شهالحجي احترم نفسك
- ليش بويه جا انا ماخذ اختك اعاين لطولها يو اعرس عليها ؟
- حويكم اعرف شتحجي لا و جلوب اكسر فچك
ضحكت بصوت عالي و اشهد عمي رسن الطباخ مال المضيف:- عمي عليك العباس احجي انا غلطان بحگه ؟
ضحك بصوت عالي :- لا والله يعمي هم النطوك المرة، لچن ما يصير تگله اعرس اعلى اختك زحمة.
جبار :- بسكم سدو الموضوع
حاكم :- لا وعلي ما اسده شنهي بوية تطيح الطلابة فوك راسي و تكلي بسك ، خاااااايب شوف وروح جلوب لا ما يومية الغبشة ادك الباب اعليك و اكلك حضرلي سطلة الماي اريدن اتعلى من اختك. فلا اطلع ابن ابوي
-جا غير اغسلنك و اجفننك و اردك لامك يالردي الما تستحي
حاكم :- عاينته دلغم زدت اعليه و انا اضحك :- وروح جلوب الا اسويها ولا ما سويتها عهد اعلية لالبس شيلة امي و اطر بيها السلف يجبير بس صبرك عليّ.
- دبسك بسك، شوف شغلك.
- لا يخوي اشتغل بمچاني انت ، من كون انا ازلمة مجبل ( مقبل ) اعلى الزواج ولزوم ارتاح خاطر تصير عدي طاقة اعرس بيها اعلى اختك.
- والله لنعل والديك اليوم يحوووووووويكم
هد اعليه و كلنا اللي بالمطبخ نضحك وحسنا عالي ، وانا ويا تكاضصنا و اكله :- بسك هذا هو بعد ما اكلك اعرس اعلى اختك بس لا ءتضايك ، عودن انا اعرس اعليها من وراك .
- خايب اتوب مني يووو لا ؟
- شلون مصيبة يهالوادم ، الكتلك اعرس اعليها واجيك ما رضيت الكلت الك من وراك ما رضيت، جا المن انطيتوني مرة و صارلك ساعة فرحان و تضحك ؟
كاطع :- حاااااااكم
حاكم : انداريت وراي "نعم عمي"
-تعال جاي
- جايك عمي
ذبيت الوصلة مني ورحت ورا السركال، حجه :- شگصدك يحويكم من عملتك هاي.
- يا عملة
- لون ضنيتني غشيم و ما ادري عن افعالك تكون غلطان، انا اعرف تعمديت فعلتك وي غريب ، اسمعني عدل يبن جسومة لو تكربيت مرت الاخرى لغريب لو اتدخلت بيه لاعلكك من كراعك و اصلبك افتهمت.
- السموحة عمي بس انا ابن ابوي و من آل جلوب و الزود ليه لا تنكر اصلي، موش نغل انا و تسميني بسم امي.
- شلووووون ولك
حجاها و هو يرفعني من اهدومي :- توكف جدامي و تراددني يحويكم، تاني تخلص الكعدة و اشوف شغلي وياك يبن جسومة، اخذووووووووووه.
چتفوني اثنين من زلامه و گيدوني و اخذوني.
(بيت شمخي )
نشمية :- يلا يمة كولي يا الله وكفي الشر ابوج هم ما كصر بيه كضاه كضيان من الرزايل ، اخيج هو موش غريب.
- انا اخيي مالي غرض بيه بس ذن الحيايا انا ما اجوزن منهن لا ما ابرد گلبي بيهن ، ابهية هطريت راسها ، ضلت هاي الوزتني (الدفعتني) اعلى بهية الا ابيس بيها وروح جلوب.
-ياهي هاي ؟
- خلود لا ما اخذ حكي منها فلا ارتاح عبن وزتني و من طحت بيها تبرت مني و تكترت الحية ، انا الها.
كمت اعلى حيلي رجعت للبيت، لكيت مرت جبير (تصغير جبار ) بالبيت تحضرلنا الغِده ، تمشيت و كلت الها :- اي ولج بهية تنامين للظهاري بعد ؟
-كواغد ميلي عني مالي خلك احد.
تحجي و تحس بخشمها و عيونها كل عين هاكبرها من البجي ، كلت الها :- شمالج ولج ، عليش تبجين ؟
- كلت الج عوفيني بهمي
- خايبة جا انا من طكيتج هيج مالي كصد بيها والعباس، من كون انت دستي بمصاريني وهطرتج ، ماتسوة ديه ما تسوة انت امشي عدل و انا ما اطكج بعد.
- موش منج يكواغد ، انا جلمات خلود اذني.
- شمالها وياج الحية ؟
- تكلي حگهم يستحگرونج من عبن ابوج الجان يطگج ويردج لينا.
- خايبه هاي ام الفتن ما ترتاح لا ما ابيس بيها، بس خوش انا الج يخلود و شوفي كويغد شتسوي بيج.
بس انت سويلي استكانة جاي و شوية خبيزة وروبة خلني اكلي الگيمة (تصغير لگمة ) حتى يصير بيه حيل من وره مصايبج انا ما ضلي حيل.
بهية :- يا جا غير ابطن عيني وروح امي اطيب اجل اسويلج ، بس انه يكويغد اريدن منج تاخذيلي حكي كون هيج خليدة ما تفج (تفك ) حلكها وياي.
- سهلة سهلة ، دسويلي الأچل و الله كريم.
رحت لحجرة امي و ابوي ، كعدت ، طكيتلي صفنة اعلى زماني " چا انا ليمتها اضلن بكتر امي لا الي بيت لا الي حجرة انجطل بيها لوحيدي ، لا الي زلمة يشيل عني ، البحلي (بعمري) معرسات وفروخهن حدرهن و انا ضالة يا كالت ابهية الغمة و يا حجت خلود الحية"
من جنت صغيرة هيج بعمر ال١٣ .. ١٤ .. جانت الوادم تتسابگ اعلى خطبتي، و انا كاغد ابوي و مدللته ياهو اليجيني ما ارضى بيه ليما الناس كفت رجلها ومحد بعد دك بابي و خطبني، غير كويطع المجلفط و انا هذا لو اوغف اعلى گلب ابوي هم ما اخذنه.
بهية :- كواااغد ، يا كواغد .
- وعمه ، شمالج ؟
- جا صارلي ساعة انده بيج و انت سارحة شجالج ؟
- هيج جت حسبة ابالي .
عاينت اعلى صينية الخوص حاطتلي بيها روبة و مريجة ( تصغير مرگة) و خبيزة وتمرات.
اييييه خايبة افادي انگطع من الجوع.
- هني و مري بس كون يغزر.
- مو اكوم انوم الصينية براسج ؟
ضحكت و هي تطلع و تحجي ( اتغشمر وياج شمالج )
ضحكت و دنجت اكل، ورديت لحسباتي.
لهناك فاتت امي :- ها يمه شو عفتيني و جيتي ؟
- يمه ما بياش حيل من الجوع كلت اكلي الگيمة و اردن اشتغل وياج.
- لا يمه هني ومري ما يعتاز انا خلصيت الشغل عنج.
- جا ابوي وين راح ؟
- من الكاع و طلع لمضيف الشيخ مطر عدهم جعدة من كون ينطون عطوة لبيت مطشر.
- يمه و يفصلونهم ؟
- جا يمه هذا حك دم زلمة مجتول (مقتول)
- يمه انا گلبي ينغزني لو سمعيت بفصلية اكولن هم تروح وحدة تنهضم وتدفع اثام اهلها.
- كولي ان شاءالله تخلص اعلى خير.
- ان شاءالله.
خلصيت و شلت الصينية نظفيتها، و اعاين نسوان اخوتي دشن للبيت جانن بالكاع غاد، تخوصرتلهن :- هااا ولجن رديتن
خلود :- جا كولي الله يساعدجن شنهي ثكيلة .
- الله لا ساعدج كون يم الفتن .
من سمعتني حجيت هچي اخذت درب و غابت من عيني، رحت وراها لحجرتها، دشيت :- ولج خليدة، ياهي التبرت مني اليوووم
- ياااع يمتى تبريت انا بس ما الي خلك مشاكل
- جا من ما الج خلك مشاكل عليش توزيني اعلى بهية و تروحين تعايريها بجتلة ابوها ؟
- اااا كويغد شوفي انا تعيبانة وما بياش حيل لسوالفج هديني وليرحم اجدادج.
- خايبه لو يطلع چلوب من کبره و يكلي هديها هم ما اهدج اليوم .
وهديت اعليها و هي كامت تصارخ ، و الكطلي عضة من اذنها و اشيل طاسة الماي العلى كتري واطكها بيها
خلود :- عمممممممممة الحكيني عمممممممة مروتج وينكمممممممممم
:- سمعييييي ولج نوبة الاخرى لو سمعيتج ادشين بين البصلة و كشرتها و توزين احد لو تعايرينه ، وروح جلوب لاحطج و اثرمج.
تصارخ و انا كاضتها من شعفتها، واصيح اعليها، اجت امي و ابهية ونسوان اخوتي البقية يفكنها مني.
جرنها مني و انا النار موجرة بفادي :- هدنها خلني اربيهاااا خلنيييي
خلود :- فروخي عدكم وانا ما اضلن بعد هنا ، يمااااااا كتلوني يمه، وينك يصلاح تعااااال ليه، ما اظلن بعد ما اظلن
ام كواغد :- كصري حسج شمالج شهرتينا
بهية :- جا موش جتلتني انا و سكتت ، من كون العايل كويغد اتجتله و انت العايله.
خلود :- البيت البيه كويغد انا ما اظلن بيه.
كواغد :- يااااع من كون تريديني اطلع ولج خليدة ؟
هامت ولبدت بسد امي:- عممممممة مروتج عمة راح تجتلني.
ام كواغد :- بسج يمه والله اتعيبانة و ما بياش حيل فدوة اغديلج .
كواغد :- يمه هاي خليدة تريد تفرگ اهلنا الحية ام الفتن بس هديني عليهااااااا.
جرتني امي عنها و انا اصيحن :- ولج اخليدة لا ما اكرط اذنج الاخرى ما اطلع كويغد يخليدددددة.
...........
(بيت سلطان ال ثجيل)
سلطان :- :- هساع يحول عرب مطشر عد مضيف ال مطر، شتضنون النتايج ؟
اخوه :- اضنن مطر راح يطي عطوة
سلطان :- يفصلهم يو يطالب بدم الجتال ؟
اخوه :- على ما اضنن ال مطشر شردو ابنهم برا الديرة و راضين بالفصل.
سلطان :- لزوم نجثر (نكثر) علاغاتنا بأل مطشر ونصف وياهم.
- السموحة يخوي بس ال ثجيل ما بعد بيه يتحمل مصايب ال ضاحي وطلايبهم.
سلطان :- وروح ابوي ثجيل لا ما اهد ال ضاحي و اخليلهم اثر فلا اتسمى بسمي سلطان ابن ثجيل، لخلي النار تسعر حدرهم واشبج بينهم و اخلي فضايحهم اعلى كل السان.
سكتوا اخوة سلطان و هم يسمعون و يشوفون حقد الشيخ سلطان اعلى ال ثجيل و اللي يعرفون هذا الحقد راح يخسرهم هواي، وما راح يخلي بيهم احد مرتاح.
اندار الشيخ سلطان اعلى اخوه وكاله :- حضر ردحة انا غررت انطيها هدية لبيت مطشر ، بسها تنحب صارلها ٨ سنين كللها الشيخ سلطان يكول حضري روحج.
.............
(مضيف الشيخ ال مطر )
بعد ما انقتل فلاح بسيط بكاع الشيخ مطر من قبل عرب ال مطشر، جانوا الكل يضن ان الشيخ راح ينطي عطوة و يفضها بفصل و تنتهي السالفة.
بس قرار الشيخ صدم الكل، لإنه رفض الفصل، و طالبهم بسند للجتال ، (السند هو وثيقة عشائرية يوقع عليها ابناء العشيرة للتخلي عن رجل منهم ساد فساده و تتم التبرأته منه حسب العرف العشائري الجنوبي السائد، بمصطلح اخر بالحسجة الجنوبية " يذبونه من العشيرة" ...) ما راد غير دم الجتال و كال كلمته المشهورة ( ما يغسل الدم الا الدم ) .
هذا القرار رضى البعض بس اغضب الاغلب ، لإن بهالحالة الديرة راح تضل بحالة حرب، بس بنفس الوكت ، الدم ما ينوخذ الا من الجتال لا تروح بيها فصول ولا هم يحزنون.
من هذا القرار حكموا على الشيخ مطر انه شيخ يختلف عن ابوه ضاحي تماما، الشيخ مطر شيخ حقاني.
صلاح :- شرايك بويه بغرار الشيخ ؟
شمخي:- والله يا بوية فعل ينخاف منه من كون عرب مطشر ما يتنازلون عن ابنهم، لو حالها فصل و فاض النزاع هواي ابركلنا
- انا اكول الحك ويا الشيخ مطر من كونه زلمة حكاني و ما رضى بظلم احد غير طلابته بدم الجتال.
- الله كريم بويه.
فتنا البيت و تلكتنا مرت صلاح :- يمااااااااا اخذوني لهلي ما اضلن بعد هنا
صلاح :- شمالج ولج
- تنوع اختك شعملت بيه ، كرطت اذاني شنهي انا فصليتكم و تكجتلني كويغد هساع تاخذوني لهلي.
شمخي :- كصري حسج يا مرة موش احنا البيت الينسمع حس حريمة، اكعدي و بالعكل فهمينا شجرالكم ؟
- عمي والعباس ما سويت شي رديت من الكاع فوك تعبي جتلتني بلا ذنب.
صلاح :- تمون تمون هاي كويغد اختنا و الزوم نتحملها.
خلود :- يااااااع و ما تاخذلي حكي
- انطمي جوا و ما اسمع حسج روحي غاد، مالك غرض بوية مشاعف حريم روح ارتاح و ناملك سويعة (ساعة)
خلود مشت للحجرة مو برضاتها، كعدت تبجي و تلم ابقجتها و تريد اهلها، دش صلاح
:- شجاي تسوين ؟
- انا ما اضلن هنا بعد خل اختك تنفعك يصلاح
- اكول استجني و اكعدي كلها ايام و تعرس و تروح لبيت رجلها .
عافت البقجة من ايدها خلود و جفلت :- ياااع ياهي هاي التعرس.
- كواغد
- و منهو هاذ الياخذها.
-حاكم ال ثجيل
- يععع و تطوها لال ثجيل .
- حاكم بري من ال ثجيل لچنه عايش بكاع ال ضاحي زلمة معدل و عندة بيت و شاغول و بطرك امه.
- يلوك والله كويغد ويكعد بختها و تاخذ وحيد عنده بيت وبطرك امه لا عيال ولا هرج.
- كويغد اختي خوش كويغد و تستاهل لا تظلين حاطة عوينتج عليها باركيلها شمالج السم متربع بفادج ؟
- شنهي غصدك انا مسمومة ؟
- بطلي الوزة ترانا خلكي ما يوسع مشاكلجن.
- جا ترضاها تكرط اذني ؟
- هسه صكد كرطتها ؟ استجني خايبة وفكينا.
للعصر كعدوا العائلة و لمهم شمخي بكعدة عصرونية خاطر يكللهم اعلى خطبة كواغد ، سوو الجاي و البثيث و اتجمعوا.
شمخي :- جعدوا بويه انا رايد اخبركم بشي
نشمية ام كواغد :- خير ان شاءالله
- كل خير ان شاءالله ، بويه كاغد شلونج ؟
- كواكة بويه رايدة سلامتك.
- اسمعي بويه و اسمعوا انتو، وخلني احجيلكم .. الزواج سنة نبينا (ص) ولزوم الواحد يعرس خاطر يستقر .
عليوي :- يا الله هلبت بويه لاكيلي مرة و اعرس هله هله
- انطم انت موش وكتك
-شنهي بويه انا زلمة و عمري طك بثلاثين هم من حكي اعرس .
- جا غير يخليني اخلص سالفتي عليوي المهرفل .
صلاح :- كمل بويه كمل .
- انتم تعرفون حاكم ابن ال ثجيل ؟
جبار :- اي بويه انا اعرف خطبت كواغد لرفيجي حاكم بيها الخير بيها الخير
- جبار بويه ... من جيرة و خفت كون ، جا يا الاغم موش انا ابوك و جاي احجي رطنتها يالمهرفل.
كواغد :- شنهييييييي يعععععع بويه انت تطيني يمااااااااا
شمخي :- كاغد كلبي بويه اسمعيني
- ما راااااااااااايدني بووووويه
- لا وروح جلوب يا بويه بس اسمعيني يبنيتي
- اااااخ يا بويه ااااااخ
كمت من مچاني ركضت اعلى الحجرة :- يااع راح اعرس يماااااي هيج و يصير عدي زلمة نذر عليه الا احبنه من علباته
وكمت اطك اصبع و اهز بفجرتي (المؤخرة) واهوس
راح اعرس احوو احوو ..
وراح اعرس احووو
موتن يالجناين راح اعرس احو احو
غيضن و طكن گهر وراح اعرس احو احوووو
هيسيت دبجة وواحد جايني، كعدت بمجاني بساع و حطيت الشيلة اعلى وجهي و ثغبت :- يممممه يردون يخلصون مني يمممه
نشمية :- ها يمة كويغد شمالج يبعد امي و ابوي ، جا غير تخلين ابوج يكمل سالفته يا يمة
- جا ما سمعتيهم يمه يطوني هدية، انا وحيدة ابوي و كاغد كلبه يطيني هدية و يظلمني ، اناااااا مظلومة ييمة ااااااااااااااا (صوت البجي )
خلود :- عمه مكرودة جنها ما رايدة العرس هدوها مسجينة
كواغد : شلت راسي بسع و عاينت عليها و كلت الها :- اسمعي اتي يالمسمومة تفكين مني لا وروح جلوب ادبچ بمصرانج .
- يعععع جنج رايدة العرس و تستحين تكولين ؟
كواغد :- يمه هاي من عبن ما كرطت اذنها الاخرى هالكامت تهذري ، هدووووني عليها
خلود :- يماااااااااي
وهجت برا الحجرة من الخوف ، و ظلت كواغد تنحب
اجا شمخي للحجرة دنج اعلى راس بته و باسها و كاللها :- كاغد بويه يمن يندارلج كل السلف فدوة يبعد گلبي يا بويه انا ما رايد اظلمج انا بس رايد اشوفنج مستغرة ابيت واشوف فريخات و احن عليهم يا بويه و العمر ما ضال بيه شي.
كواغد :- وتطيني هدية بوووية
- لا يبوي زواج اعلى سنة الله ورسوله و حاكم خوش زلمة و شاغول و بطرك امه و امه فغيرة و انه رايد راحتج، كومي وياي كومي
جرها واخذها يم اخوتها خاطر يكمل سالفته، حجه عليوي :- بويه اخيتي جنها ما ما راضية بالعرس عوفها و زوجني انا
كواغد :- انت ما الك غرض بيه جاتل روحك اعلى العرس.
عليوي :- خويه جنج رايدة العرس
كواغد :- لاااا انا موش مثلك، انا كاغد گلب ابوي ما افارك ابوي و اعوفنه و اعرس، ما يطيني گلبي.
نشمية :- هاي الحياة ييمه كلنا هدينا اهلنا ، وابوج ما دايملج ييمة.
صلاح :- خويه كاغد جا انت ليمتها اتظلين هيج ، يخوية التكثر خواطيبها تبور و ما تعرس و حاكم خوش حاكم و انا اخيج رايد مصلحتج.
كواغد :- من كون رايديني اعرس، انا اغبل بس بشرط .
خلود :- ياااع خايبة جا اتي ابدال ما تستحين من اخوتج و من طاري العرس تتشرطين.
كواغد :- خويه صويلح من رخصتك بس ادبج بيها.
صلاح زمخ بمرته و بعدها من الكعدة، بس خلود ما تابت وكفت ليغاد تتسمع اعليهم و تذب بهالحجي اعليهم ويا ساعة يكضوهم ويكضوها كضاين.
شمخي :- مالكم غرض انا بتي كاغد تتشرط و تتأمر جا شعدي غيرها و ما تتشرط ، كولي بويه.
- لو ردتوني اعرس ، تلمون على الروس و تشترولي هايشة من كون انا بنفسي تصير عدي هايشة و ارعى بيها و اعيشن اعليها.
شمخي :- هاا ، جا بويه انا ابوج هم ما عدي و حالتي اعلى كدي.
كواغد :- جا شني بويه تريدون تطوني بعباتي ما الي حك ، شنهي فصلية انا.
صلاح :- حكج حكج انت بس اغبلي بالزواج و هايشتج بركبتي.
كواغد :- صويلح خوية ..جنك تريد بس تفتك مني ؟
صالح :- لا وعلي يا خوية انا رايد مصلحتج.
عليوي :- جا و انا محد يدور مصلحتييييي شنهي موش زلمة و حكييي اعرس .
صلاح :- احسب من باجر حرمتك يمك يعلوي
عليوي :- العبااااااااس عليك ؟
شمخي :- اي والله بويه انتم خوانه التمو و ابنوله حجره و خل نعرسله نخلص منه لهالمهرفل
خلود من بعيد صاحت :- يااااع كعدة و عرستو بيها ثنين جا كولو المعرسين كامو يترادمو.
كضي الطاسة يكواغد ونيشنيها بنص راس خلود و خلتها تركص وتحك براسها من الفشخة.
كواغد :- كمت اعلى شغلي و انه الضحكة شاجة حلكي "راح اعرس" فضينا شغلنا كبل الغروب وطشينا.
لهناك حسيت بأهيلتي هودوا ، كضيت اعبيتي (تصغير عبايتي) و تخوتليت خاطر اطلع من البيت،و كضتني امي
:- ياااع خايبة وين وجهج ؟
- يمة اعليج العباس بس اروحن اسمع السيد شلون ينعى اعلى الحسين اغديلج فدوة خلني اروح
- ولج كويغد لو حسو اخوتج لو ابيج انت طالعة من البيت غير يكصبونج
- لا تخافين علي ما اتخر وروح جلوب هيج ساعة زمان و اردن ، انت بسدسديلي (غطيلي) والينشدج عليّ كليلة نايمة ، تغوسل ، تطر .. المهم سدي مجاني
- خايبة كويغد يمه اخوتج ما ينحطون بالعب اكعدي و ستري علينا يمه.
- اودعناج يمه ، ما اوصيج ما اوصيح
- يااااا خايبه تعاي جاااي ، ولج كويغد، شوف الفلك يربي انا هاي البت شلون اكضها.
كواغد :- طلعت من البيت و شيلتي اعلى وجهي خاطر لحد يعرفني، وصلت گبة السيد وكعيدت وراها اتصنت، هو ينعى اعلى الحسين و انا مركزة وياه ، من حيث انا لو ردت اصيرن ناعية اعلى الحسين سلام الله عليه لزوم اعرف غصته و غصة اهل بيته و عياله مت عيني عليه، بس انا ما تحمليت من ركزت و سمعت المقتل جن دموعي هلن و كمت اثغب.
عليش ما سمعوا حسي و انا اثغب ورا الكبة، وكامو يدورون "منهي هاي التثغب" (تثغب تعني البكاء بصوت عالي بالحسجة الجنوبية )
كضيت اعبيتي و طكيتها ركضة و ابعدت عنهم، بس ضلت نعاوي السيد ابالي، رديت لهيلتي و عيوني اتهل اعلى ابا عبد الله مت عيني عليه.
دشيت البيت اعلى اطراف اجدامي، توني اريد ادش الحجرة امي و اندكت الباب جفلت و من الفزة طفرت عبيتي مدري وين ، جمدت اجدامي من الخوف
" من كون ذوله اجو وراي للبيت خاطر يكولون لبوي بتك جانت تطر بالسلف ؟ يمممه دخيلك ربي غير اخوتي يگصبوني والله" ردت ادش بس لا كلت خلني اصير سباعية و اداري امري و الفلفها و اسد اعلى رويحتي.
عدلت هندامي و صحت :- يااااهو يااااهو
ووكفت بسد الباب
"- خويه انا انا اندهيلي جباااااار بسسسسع
- اندهله شكله ، شراااايد
- كليلة حويكم خذوه زلم السركال و هسه صالبينه اعلى الشجرة و امرعدينه ، خل ءنتلاحكله بساااع .
- يعععع
رحت اركض لحجرة اخوي و صلاح طلع يصيح :- شكو ياهو هاذ ؟
كواغد :- جبييييييييير خوية الحك خوووووية
جبار :- هاااااااااا خير خير
- رفيج يكول حويكم ماخذه السركال و صالبه الحك خوووية
- شلووووون ؟
كض دشداشتك و هم اعلى الطلعة، كضاه صلاح :- اوجب (اوكف ) خوية احنا مالنا غرض لا تورطنا ويا السركال ما بينا حيل طلايب
- جا شنهي تريد رفيجي ينصلب و انا جاعد مثل النسوان ، شو دميل عني خوووية
- اكلك اوجب يجبار لا تدوهنا ويا كاطع ترانا موش حمله.
- اكلك هدني شو هدني .
بعد صلاح عنه وركض جبار و رفيجة يتلاحكون حاكم :- خايب كلي شنسوي لو رحنا الكاطع يصلبنا وياه
- نمش اعلى حميد ناخذ غريب و نروح اعلى الشيخ محد يكدر للسركال ويوكفه غير الشيخ مطر .
- جا امشنا يلاااا
ركضوا على بيت حميد ، اخذوا حميد و غريب و راحوا اعلى القصر، هم وكفو بعيد و غريب راح يركض اعلى القصر هايم .
دش وكفت بوجهه سليمة :- شعندك بهاليل جاي ، اوجف جاي احجي ويااااك
غريب مسرع و يصيح ( بوووويه بوييييييه ) فلت من ايدها و راح لحجرة للشيخ دش بلايا اذن و فات اعلى الشيخ
الشيخة ملوك :- اوكف عندك
-بوووويه
الشيخ :- ها سرحان بويه شمالك
ملوك :- ما مقبول دشته بلايا اذن شيخ لزوم تعاغبه.
غريب :- بويه تعال بويه الحك
الشيخ :- اخذ نفس بعد ابوك شجالك عليش الحك
- حاكم حاكم تعاااال
يحجي بسرعة و هو يجر بيد الشيخ و ملوك تحاول تطلع من الحجرة الشيخ رضخ لطلب غريب و كاللها " بهداي ملوك خلني اروح و افهم ياهو ويا غريب "
لبس و طلع ويا غريب ، و غريب يجر بيه و كوة ياخذ النفس :- خايب بويه سرحان شجاك كلي
- بويه حاكم بويه
طلع الشيخ وازلامه وراه، تكابل بجبار و رفيجة و حميد واكفين برا القصر، بساع نزلو اعلى ايد الشيخ.
جبار - نحب ايدك شيخ السركال اخذ حاكم و صالبه اعلى الشجرة
تلاه رفيجة و هم يحجون بسرعة :- ما ندري شنهي جرمه شيخ و امه مسيجينه (مسكينة) تنحب و تنوح اعلى ولدها الحكنا.
الشيخ :- بهداي لويه بهداي خلني افهم
حميد :- شيخ ... حاكم ابن خضير ال ثجيل معاغبه السركال و امه تنوح تعرفه هاذ امانة الشيخ ضاحي و رايدين فزعتك و مالنا غيرك شيخ.
- امشوا ...
........
كواغد :- يمه هذا حويكم نفسه الخاطبني ؟
خلود :- غصدج الخاطبينه الج
- جنها الطاسة النومتها براسج العصرية ما غزرت بيج يخليدة و تريدين الأخرى ؟
- انا شلي غرض اخذ فروخي و اروح ارش الكاع خاطر انامن وراي كعدة من الغبشة موش مثل ناس ما تكعد الا تنهطر .
بهية :- شغصدج يخلود ؟
ام كواغد :- جا وكتجن تتشاعفن ؟ ولجن احنا بيا حال ، خايبات بالعباس ما تنلام بيجن كويغد من تهطر روسجن عبنجن موش ادميات ، ولن غاد ولن.
طشن لحجراتهن، حجت كواغد :- يمه خلنا نروح لمه نوچب (نوكف) وياها
- ياااع شنهي ولج تسودنتي ؟
- يمه جا غير راح نصير اهل لزوم نوكفلها وهي تكولون ما الها احد ،دمشينا
- جا غير لو عرف ابوج يكصبنا و علي، هيدي ولج خليني حايرة بجبير الراح و حط روحه بين سنون السركال شيخلصنا بعد.
- يمه اتي بس وافگي وافگي (وافقي)
- ولج اندثري يكواغد ما النا خلك طلايب
- وينها عبيتج (عباتج)
- ياااااااا
- هاي هاي البسي
- ولج لا اتودهينا (تورطينا)
- يلا امشينا ياااااااله
اخذت امي غصب بس انا ما اندل بيت حاكم امي اخذ الواهس بالمشي ومشت، لكينا المرة مكطعة روحها اباب البيت و ملتمات الحبايب يمها
صااااحت امي " يمااااااي ولج ديه (خية) ام حويكمممممم ديه "
ام حاكم :- جابليني خية جابني وليدي راح من اديه يممممممممممممه .
نعت
يماااااااه يمه ..
ولك يمممه ردتك تشيل النعش ممشة
وييمة و فراش اللحد بيدك تفرشة
ءهلا حويكم يا يمة.
.....يممممماه يمه وجعة عياله الوجع كلبي بيك يا يمه
-بسج دية بسج كطعتي كلوبنا ، راحو الولد يتاحكونه هساع يردون لا توجعين گلبچ فدوة اغديلج.
- يا نار البكلبي عيب تطفى حووووويكم يممممممه.
...............
الشيخ مشى لللبستان ووياه الزلام، وصل للسركال لكاه شاد حاكم اعلى الشجرة و زلمته يجلد بيه، صاح الشيخ :- عنننننننننندك
بساع وكف زلمة كاطع من الجلد و تكتر بس كاطع و كاطع ابتعد من حاكم، وحجه :- هلا شيخنا
عاين الشيخ على حاكم ، جان منتهي من كثر التعذيب، اشر لزلامه يفكوه، كلها تراكضت على حاكم تفكه، دار وجهه لكاطع و كاله :- الجلد للفاسد يكاطع ، شنهي جرمه و جلدت حويكم و انت تدري حاكم و امه امانة ابوي ضاحي.
- امانتك محفوظة يشيج لجن اجت مرة و شكت حاكم معتدي اعليها يم الشط و هي تسكي
- الحجي هاذ جبير و يحتاجله شهود يكاطع
- شيخنا يو ما الفضيجة جان كلت الك شنهو اسم المرة و اجيبنها الك، لجن هي عيب ترضى (ما ترضى) الفضيحة السموحة يشيخ امرني اجيبنها الك غبشة و انت تحكم بيهم.
- ومن كون تعرف انا الأحكم عليش جلدته بدون شوري يا كاطع.
- السموحة يشيخ انا هم زلمة و شبت النار بيه من سمعيت الحرمة تشكي و حويكم داك الناقصة وياها، لجن ادري هاذ موش عذر انا حاظر لكل التامر بيه.
دار وجهه الشيخ و صاح :- رحيم شيلو حاكم نكلوه وصكو اعليه الباب ليما اميز السالفة و اعرف الحك وين، وخبروا امه بهالطلابة.
وانت يا كاطع الي حساب يمك.
حجاها و هو يندار، ضل يمشي و السركال وراه يصيح :- شيخنا، اسمع مني شيخنا
ما انداله بعد و راح للمضيف ومنع احد يحجي بالسالفة عبن هالسالفة فضيحة من كون ما ينجلد الا الزاني و الفاسد ، ومن ينجلد وينفضح يصير منبوذ بالديرة و كلها تعيبه.
اضافة الى ان حاكم تابع لال ثجيل، و آل ثجيل ناس شرانيين يشترون الطلايب شراوة، ولو سمعو ال ضاحي جالدين ابنهم، تكبر السالفة و تتضخم ، حتى لو جانوا هم متبرين من امه، بس يضل حاكم راجع لاصله و عمامه.
على كولتهم ( ربني وانا وليد اهلي).
راح واحد من ازلام الشيخ مطر لبيت ام حاكم ، لكه لمة نساوين فارشات بالباب و ينعن و صوت نعاويهن واصل لذاك الصوب.
وكف و صاح :- ام حااااااكم
فزت جسومة ام حاكم و ركضت :- حويكم وليدي وينه، وين اخذتووو كلي .
دنج و هو يهمس الها :- حويكم عد الشيخ مطر عامل مصيبة جبيرة ولو ردتي تعرفين السالفة اتعني القصر الشيخ وغاد تعرفين عملته.
عاينت عليه و الدموع تهل :- وليدي و انا اعرفنه ما تطلع من الردية شعامل وليدي كلي .
- وما على الرسول الا البلاغ ، اودعناكم.
لفن النساوين و هن يسألنها :- شنهي خية ، شكو ، شماله حاكم، شصاير، هكو شي ؟
نشمية :- يمه كويغد كومي لزوم نرد للبيت لا تكبر السالفة
كواغد :- جا غير نعرف السالفة شنهي خاطر ندري عليش تكبر .
- مالنا غرض خلينا نرد لهلنا امشي .
- ونعوفها ، مسيجينه يما ما تشوينها تكسر باب الگلب.
- امشي اكلج
- اصبري ناخذ من خاطرها يا يمة نسلم اعليها و نمش موش نطفر طفرة الحرامية.
- ديلا امشينا
اخذنا من خاطرها وردينا.
.....
كاطع تعنى للقصر بساع و خبر اخته الشيخة ملوك بالموضوع كله ، كامت تلوم عليه :- جا توازيت اعلى جلدته يكويطع ؟
- يخيتي حويكم موش خوش حويكم
- وشعمل حاكم كلي
- العملة دشش غريب للمضيف وخلاه يكعد بكتر الشيخ بالكعدة.
- يو كايلي انا احلها بعكل موش بالجلد
- مو بس هاي يبت امي وابوي
- شنهو بعد؟
- هو يزاغل بالشغل و يتأخر ، غير هاي هو راح يعرس ...
- يعرس اعلى منهو ؟
- انت تعرفيني انا رايد بت شمخي و عجزت وياهم خاطر يطوها اليه ، الكطعت المحصول عنهم و الزدت بيه شمخي ما اطاها ليه و كام و اطاها لحويكم ، شنهي صار حويكم اخير مني ؟
- جا و انت تاذي حويكم يو شمخي ؟
- ما ناسيها الشمخي لجن حويكم اليوم وكف بعيني و تحداني و انا سركال الشيخ مطر ان ما ضلتلي هيبة محد يهابني بعد.
- و تجلده و تتهمة بفضيخة شرف يكاطع ؟
- هيج شمخي ما راح يطي كاغد اله و ينحسب افيسد ما ينطي مرة، ومنها نخلص منه و تهو مناصر لغريب و شاد حزامه اله.
- باجر غبشة مطلوب منك المرة الداسها حويكم شتگل للشيخ يكاطع ؟
- هاي انا ادبرها
- وشلون ؟
- حجل وحد كاوليه وهي ادبرني بوحدة تشهد جدام الشيخ
- و الشيخ يصدك بوحدة كاوليه ، خايب انت شمالك.
- انا مضبط اموري لا تخافين عليّ, الاريدنه منج تهدين الشيخ اعليه من كون اهو مغضب عبن جلدت ابن جسومة من دون شوره.
- هاي سهلة خلها عليه بس ضبط امرك زين و خليني اعلى بالك تراه اليضرك يضرني يبن امي و ابوي.
على حس ام حاكم اباب القصر ( حاااااااااكم يمممممه ، حويكم وليدييييييي وينه )
ملوك :- سليممممة
:- امرج شيخة
- تروحين بساع اتفوتين ام حاكم للقصر بلا حس ما نريد احد يعرف بالسالفة ، ركضي ياله .
كاطع :- انا اروحن اشوف حجل و اتفق وياها
- روح و دير بالك لا الشيخ يزت احد يراقبك ، تراه موش هين و يحسب الها الف حساب، حسب اله انت كبله.
-امرج شيخة.
راح كاطع، و مشت ملوك للديوان مال البيت، دشت ام حاكم :- احبن ايدج شيخة والله وليدي ما تطلع منه الردية
:- لجنها طلعت يجسومة ، ربينا و كبرنا وحيل افادة من كاع ال ضاحي لجن يا وسفة ان ما غزرت الكاع و دك الناقصة ويا اهلها.
- دخيلتج انا شيخة بس كليلي شسوا ولدي
- معتدي اعلى حرمة تسكي من الشط و مدنج روسنا عبن اهو محسوب اعلينا زلمة
- يمااااااااااااااااااااي موش طبايع ولدي هاي، و العباس موش فعلة حاكم هاي
طلعت من القصر تصرخ توجهت لمضيف الشيخ مطر ، وكفت اباب المضيف و توزرت بعبايتها و فتحت شيلتها و بان صدرها،دكت اعلى صدرها ورفعت اديها فوك وصاحت ( ءهلا يآل جلوووووب ءهلا )
فزت زلم المضيف اعلى حس المرة الصرخت اباب المضيف ، طلع الشيخ مطر ، و لكا ام خاكم فاكه سترها كبال مضيف الشيخ و تصيح بس ال جلوب و تتنخاهم.
فز اخو الشيخ مطر شال عبايته وغطاها ، بعدها وردت رفعت اديها وصاحت ( وينهم النشامة وينهممممممم)
صاح الشيخ مطر :- ابشري يم حاكم
وحط عبايته (عباية الشيوخ) اعليها و كال الها :- اليتغطى بعباة الشيخ حاجته مكضية و انا ما ارضاها الج يم حاكم ، ردي لدارج و حكج و حك ولدج لو جان اعلى حك بركبتي و انا السداد.
..........
(عرب ال ثجيل )
ام ردحة :- اكعدي يمه اريدن احجي وياج سالفة
ردحة :- كولي يمه
- ابوج و عمج سلطان غرر ينطون لبيت مطشر
- شلووووون ؟ يمه انا ما اريدن العرس فدوة اغديلج يمه احجي ويا ابوي كليله ما اريد اعرس.
- كلت اله والله ييمة بس ما سمع مني يكلي خبريها و الامر ما بيه مفاوض.
- احرك روحي والله وما اعرس ، بسكم انحرمت من ولدي ولجمة كلبي سرحان ، بسكم اطيتوني فصلية و انا بت ١٢ و ظلمتوني و تريدون تنطوني هدية بسكم عني بسكممممم
- شبيدي عليج يمه عمج سلطان ظالم و ابوج ما يكدر يكله لاله (لا)
- وانا شنهي يمه سلعتكم يمتى ما احتاجيتو بعتوني بسكم مني والله كتلتوني كااااافي.
-هيدي يمه جا انت ليمتها تظلين حابسة رويحتج صارلج ٨ سنوات بس تبجين اعلى وليدج ، وليدج عايش و عيشة خير و ابن شيوخ ، شوفي حالج يبعد حيلي يا يمة
- و اخلف وياخذونه مني ما اريدن يمه ما اكدر دخليتج انا فدوة اغديلج.
- والله ييمة ما اكدر احجي، من احجي انجتل من حيث ابوج ما يرضى احد يكسر جلمة الشيخ سلطان من كونه هو جبير ال ثجيل .
ردحة :- بس انا ما اظلن هيج و ما ارضى انظلم مرت الاخرى
- وين يمه ؟
- هديني
- ولج يمه وين تروحين اكعدي.
جرت عباتها و ركضت لدار سلطان، دشت الدار و فات اعلى ديوان و صاحت ( عمممممممممي دخيلتك انا عمي ) ودنجت اعلى اجدامه
انتفض هو من مجانه و كاللها :- شمالج يبوي ، شجرالج
- عمي احب ايدك ما اريد اعرس عوفني اموت لوحيدي ولا تظلمني عمي احب اجدامك عمي.
-البالج ما يصير يردحة ال ضاحي هم وابنهم شيلهم من خاطرج انسيهم، و انا قررت تعرسين جريب و الغراري ما يتناقش.
- احب اجدامك عمي دخيلتك و الله احرك روحي.
وهي تصرخ و تبجي فات ناصر ابن خضير :- عمي سلطان عميييي
- شمالك انت الاخر
عاين ناصر اعلى ردحة و رجع عاين للشيخ سلطان و كاله :- طارش من ال ضاحي
- شيكول هاذ الطارش يناصر
حجاها و اهو يبعد ردحة من من اجدامه ، و يأشر لابوها ياخذها من ديوانه ، و ردحة تصارخ بكل علو حسها من القهر و تتوسل بأبوها.
ما كدر سلطان يسمع الما جرو ردحة وبعدوها و هدى الديوان، التفت :- ما تحجي شنهو الصاير
ناصر :- طارش يكول صاير هوسة بكاع الشيخ ضاحي
- شنهو السبب ؟
- ما اعرف ، بس العرفته حرمة ذبت سترها اباب ديوانه
كام من مجانه سلطان :- من كون حرمة ذبت سترها اباب مضيفة هاي يعني السالفة جايدة
- و هي هجي عمي الشيخ
- اسمع ناصر ، تروح اتجسس و حط اذنك عدل اعلى مضيف الشيخ مطر و تعال ليه بساع و كلي شصاير، الزوم اعرف المشكلة.
- صار عمي
طلع ناصر ، و دش ابن سلطان :- اسمع بويه تروح طارش لعرب ال مطشر و تخبر الشيخ كله ابوي سلطان ضيفك باجر يشرب جايه يمك، ورد بساع و امش اعلى عرب ال مطر و اعرف شنهي المشكلة الصايرة
- تامر بويه
.........
( بيت شمخي )
دش جبار مسرع و اهو يصيح ببهية تحضرله دشداشته، و صلاح كاضه و يصيح :- روح غاد ماكو كافي ردينا وبسنا لهنا و نكف ما بينا طلايب يجبار
- واترك رفيجي بنص هالواويه ؟
- سالفة حاكم جايدة يجبار ، حااااكم فاسد
- موش فاسد و انا اعرفنه زلمة و اخو اخيته و ما تطلع منه العايبة
- انا اخوك الجبير و امرنك ترد و تترك السالفة مالنا حيل طلايب
- و انا ما اعوفن رفيجي ، انا وياه اعلى الحلوة و المرة و لو عفته وكت الضيج اطلع ناكص اصل يبن امي.
شمخي :- بويه جبير و انا ابوك ما بيه حيل طلايب استر علينا وليدي
- سهمك العافية بويه و عايروكم بيه تبرو مني بس انا رفيجي ما اتبرى منه
حجاها و طلع يركض ، و صلاح يضرب ايد ابأيد و امه تبجي و كواغد حاطة الشيلة اعلى وجهه و مستغربة
حجه شمخي :- جنه استعجلنا و اطيناه مرة
صلاح :- والله ما ادري يا بويه شو هي تاهت بعد ما ينعرف صكدها من جذبها
عليوي :- حاكم اعرفنه و خوش زلمة ما تطلع منه العايبة و كلنا نعرف السركال كاطع شنهو هو.
شمخي :- اسكت بويه لا يسمعونك ما النا حيل كاطع
خلود :- اكلكم مو جنها كواغد رجلها خضرة اعلى هالولد عبن اول ما حجوها الها انجلد الولد
- بويه من رخصتك
حجتها و فزي اعلى خلود و الكطيها بعضة من اذنها الثانية و هاي صرخت بعلو حسها وفزو الكل يفارغ بينهم و كواغد كاضه براس خلود و تنعل بيها.
ونشمية تصيح :- حيل بيها حيل و ابو زايد عبن ما تحترمين روحج.
............
الشيخ مطر :- ها يرحيم
- شيخنا ام حاكم اخذتها ابيتي و خليت حرمتي و بناتي وياها و ان شاءالله محلولة.
- شتظن يرحيم
- شيخ انا عبد مامور ما الي حك احجي و لو حجيت ما اسلم
- ما تسلم من منهو يرحيم
- موش شكاي ولا رايد احجي بشي شيخ بس لو ردت راي، فانا حسب اعرفنه حاكم زلمة شهم و خادوم ما يوم اطاول اعلى احد ولا مد عينة اعلى حرمة.
بس
- بس شنهي
تكرب رحيم من الشيخ و همسله :- كبل الجعدة مال الديوان ويا عرب مطشر ، كاطع زف حاكم برزالة و بعد الغدة سمعنا صوت حاكم و السركال غاد عنه، منها وزلام السركال اخذو حاكم.
- عليش تصايحو
- ما اظلم بخت احد.و احجي بشي ما اعرفنه، الادري بيه والله يا شيخ كتلك بيه.
دش السركال كاطع للمضيف، بعد رحيم من الشيخ و كاله :- شيخ السموحة انا اوجف برا.
عاين عليه السركال و اهو يخزره، حجه الشيخ :- اسمعنك يكاطع
- شيخ انا ......
وهو يكمل كلامه راد يكعد حتى يحجي ويا الشيخ ، قاطعه الشيخ و هو يأشرله ، يوكف كباله ، ما رضاله الكعدة، تعجب السركال من ردة فعل الشيخ
وكف و جتف اديه حدر.
دار وجهه الشيخ و هو يسمع ، كمل السركال :- شيخنا انا اجتني وحدة اسمها نسرة و شكت حاكم و بجت و ثغبت جثير و السموحة يشيخ انا من وجرت النار بيه ما حسيت الا و انا اجلد بحاكم.
- وينها ؟
-موجودة يشيخ باجر غبشة هي يمك
- شنهو المانع من جيتها هالساعة ؟
سكت السركال، دش زلمة للمضيف و هو يكول للشيخ :- شيخنا الشيخة ام زناد ظال بالها و تريد تعرف شنهي السالفة و دزتني خاطر اخبرك.
كام من مجانه و كال :- موش وكت سوالف نسوان، يااااارحيم خلنا نمش لحاكم نشوفه.
- امرك شيخ
مشى الشيخ وخلا السركال وراه، بمجرد ما طلع الشيخ، توجه كاطع للقصر حتى يخبر اخته بشكوك الشيخ.
فات الشيخ اعلى حاكم، بس حاكم جان بأسوء وضع السوط الضارب صدرة حاز لحمة و ظال الدم ينز.
من شاف الشيخ دش اعليه، حاول يكوم من مكانه لجن الشيخ صاح :- ما حاج ما حاج ، وكابله اعلى جذع نخلة كعد اعليها الشيخ و هو يستفسر من حاكم اعلى الصار
:- منهي نسرة ؟
- ماعرفها والله يشيخ
- يكولون انت معتدي اعليها
- حاشا والله ماهي طبايع ولد جلوب ولا نرضى الردية
- و النعم ، لجن المرة شاكية منك و تاهمتك يسرحان
- شيخ وروح جلوب ما اعرفها ولا اعرف كل مرة تعاركنا انا و السركال و صاحني بسم امي و ما رضيتها اله و كلت اله انا موش نغل و تصيحني بسم امي ، كضوني اهو و زلامه وجتلوني و جلدوني.
وفوكها يا شيخ يطعن بيه و يفسدني ، رايد حكي منك يا شيخ
- تجي المرة باجر و نحكم بالسالفة و لو الك حك ما يضيع.
- والنعم منك يا شيخ املنا بالله و بيك شيخنا والله انا مالي غرض بهالسالفة وحاشى اتعدى اعلى حرمة والله شيخ.
كام الشيخ من مجانه و طلع و امرهم يداوون حاكم، و اتوجه للقصر ، اول ما دش لكا السركال كاطع و ملوك بالديوان واكفين اثنينهم.
كاطع من شاف الشيخ طلع من القصر بساع، فات الشيخ للدار و تبعته الشيخة ملوك :- خير يبعد امي و ابوي ظل بالي اعليك شنهي الصاير
- من كون اخوج ما خبرج بالصاير يشيختي
- خبرني لجن انا بالي يمك ، تعبت اليوم جثير ، سليممممة حضري طشت الماي الدافي و الملح للشيخ يريح رجليه.
- ما اريد
راد يدش للحجرة و صاح :- رايد ارتاح و ما اريد احد يدش وراي، و خبرو رحيم يدزلي اعلى سرحان رايده بحضني يبات الليلة
:تطردني من حجرتي يشيخ
- حاشى انت ام زناد العزيزة لجن يرويحتي تعبان ولزوم تتفهمين امري
هزت راسها وهي مصدومة بتصرف الشيخ، صك الباب، والشيخة واكفة برا.
سليمة :- شيخة شتصرف ؟
- موش انا الارضى انطرد من الحجرة و يجي ابن الفصلية بمچاني.
- امنع غريب ؟
- لا مشوا كلشي هسه حسب ما يريد الشيخ الواجب هساع احفظ اخوي من مصيبته، بس كون كاطع يهيد و يترك طلابته ويا شمخي، شنهي كحط نسوان و حاط كورو ويا بت شمخي.
شوية و فاتت زهرة وكاضة بيدها غريب، اخذته سليمة من ايده ودربته لحجرة الشيخ
دش ...
مستغرب و يعاين اعلى الشيخ و اعلى الحجرة ، انتبه الشيخ و صاح :- كرب سرحان بوية
تقرب من الشيخ، اخذه و كعده يمك :- شلونك ؟
- زين
- حميد و زهرة شلونهم وياك؟
- امي و ابوي يحبوني
- انا ابوك يبعد ابوك
سكت ، ابتسم الشيخ و هو يكول :- ياهو التحبه اكثر انه لو حميد
- حميد
- اها جا و انا ؟
- هم احبك
- هههههههه ، عليش اجيتني ملهوف اعلى حاكم ، عليش تحبه
- انا احبه
- ادري بس عليش ؟
- ضل صافن ما يحجي، بعدين كال احبه
- انت خايف ؟
-سكت
- لا تخاف احجي انا ابوك
- امي صحيح ميته ؟
- عليش تسأل هالسؤال ؟
- انا امي زهرة بس الناس يصيحولي ابن الفصلية
- ياهو هاذ اليصيحلك هيج ؟
- سكت
-امك ردحة ،و صح موش ميته لجن بمجان بعيد حيل بعيد عنك
- انا موش ابنها
- عليش تكول هيج ؟
- امي زهرة بس ذيج ماتت ما اريد
- موش كلت الك موش ميته
- ما احبها
تنهد الشيخ ، كرب نام باعلى ايدي و خلني اسولف الك، هسه نام دش زناد للحجرة
- بويه انا اريدن انامن يمك
- تعال بوية
كرب و نام بحضن ابوه، و بدا الشيخ يحجيلهم شلون ابوه الشيخ ضاحي شارك بثورة العشرين و شلون الانكليز جتل نص زلام ال ضاحي .
وسولف الهم شلون ثجيل وولده ما شاركوا بالثورة عبن جان يريد يلم شمل اهله موش يجتلهم بالثورة.
وظل الشيخ يحجي الولده اعلى امجاد جدهم ضاحي بثورة العشرين.
اللي ظل بگلب غريب هو فعل الشيخ من جان يحجي، اكثر الحجي يحجيه و هو يعاين لابنه زناد و كلما يحجي الشيخ زناد يسأله و الشيخ الجاوب، غريب حس بروحة غريب بهالكعدة رغم ما جان الشيخ ماخذه بحضنه.
هذه الذكرى جانت دائما ابال غريب و يتذكرها و يتذكر تفضيل الشيخ لاخوه زناد.
وناموا اهل الديرة و هودت الاصوات و بس صوت الجلاب و الواوية بهالليل ، كلمن حط جرحة حدر كتره و نام .. لجن حدر كل واحد بهاي الديرة قصة يحجي حسيسها صوت الليل و صفيرة ..
مو جنه صوت ليل جن صوت الون من كلوب الوادم تطلع.
ونامت العيون الا عين ام حاكم ما هودت اعلى ابنها، ظلت تنحب لوحيدها بصوت مخنوس.
وصار الصبح ، و طلع فجر جديد اعلى ديرة ال جلوب.
وويا صياح الديج و زقزقة الزرازير بالبستان، صح الشيخ و رجع غريب لامه زهرة، وكعدت كواغد و اهلها و طلايبهم اعلى الكعدة ، و فز كلب ام خاكم ادور علوم ابنها
ويا طكة البريج وكفت جسوة غاد عن المضيف و جعدت تنطر ، اجا رحيم :- ام حاكم خوية شجاج ما تكليلي جا انا موش كلت الج تطمني و ابنج بخير
- ما يطيني گلبي يرحيم، انا كلب والدة و كليبي ما يهود الا بشوفة وليدي .
- انا راح اخذج اله بس عليج العباس ما اريد حسج يعلى و يكعدون ، شوفي بهالفجرية وردي من كون فجر وبعدهم ما طالعين
- و العباس ما اصيحن بس شوفني وليدي
- امشي وياي.
مشت ورا رحيم و هو يتلفت خاف لا احد يشوفه ، وصلها للمچان المحبوس بيه حاكم، فك الباب و كال الها :- دشي خويه و انا هنا مناطر من اكلج ياله لا تتأخرين .
- امرك خوية من عسنة الله يوفجك و يفتح طريجك و يطيك الصحة و العافية بجاه علي ابن ابي طالب.
- مشكورة خوية دشي ياله.
فاتت تشوف حاكم، ضوا الفجر جان بدون شمس بس ضوا و المكان موش هندس بس كوة ينشاف بيه، ابنها امدد بالكاع و نايم بلا وعي و يون من الالم، حطت ايدها اعلى حلكها خافن تطلع الونه و الدموع تهل.
دنجن اعلى جسم ابنها و حبت صوابه (جروحه ) ومدت ايدها اعلى راسها و همستله :- حويكم يمه
فز حاكم من نومه، ويا ما فز مستغرب لم امه بحضنة :- يمه شجابج هنا يمة
- جيت اشوفنك يوليدي
- يمه انا بري و العباس بري لا تظنين ببنج يدك الردية
- وليدي و ما يعتاز تحجي بدون ما اسمع بريتك والله يا يمة تربات ادية و ربيتك بدموع عيني و ما خليتك تندى لاحد ولا علميتك اعلى الشينة
شلونك يوليدي
- بخير يمه
- يا خير يمه و جسمك مملي جروح ، من كون جروحك بفاد عدوك يولد يبني
- روحي انت يمه و لا تنشدين علي انا ابنج و ما ينخاف عليّ
رحيم بصوت همس :- ام حاكم ياله خوية الشمس كربت تطلع و اخافن لا السركال يشوفني .
- اي خوية اي.
حبت راس ابنها و هو يحب بيها و يوصي بيها لا تقهر بروحها ، كامت منه و طلعت.
وكف رحيم وكال اله :- امشي خوية و ابعدي منا لاحد يشوفج ... مشت جسومة ، صاح كاطع من وراه
:- رحييييم
جفل و اندار بسرعة و ادودهه من شاف كاطع، صاح :- نعم عمي .
- منهي هاي ؟
- اااا ااا
- احجي شمااااالك
- ام حاكم عمي ام حاكم.
- و تفوت ام حاكم اعلى ابنها من دون شوري ولك
- الشيخ هو الكالي سركال، جانت بايته بداري و الليل كله تون اعلى ابنها.
- اسعل الشيخ و نشوف و لو طلعت تزاغل يرحيّم لا اكصبنك مثل ما كصبت الكبلك ،فاهم يووو لا .
هز راسه و هو واكف.
- ميل من جدامي ميل ، راد يدش الحاكم، شاف رحيم واكف :- ابعد منا ياله ما اريدن اشوفك
- عمي الشيخ كالي ضل هنا
- تخالف جلمتي يرحيم
- حشى سركال بس جلمة الشيخ فوك الكل
- مايخالف امش منا انا الراح اظلن هنا و لو سألك الشيخ كله كاطع كالي، امش من جدامي ياااله.
اندار مشى رحيم، ودش السركال اعلى حاكم
:- شلونك يحاكم
ما رد عليه، ضحك ضحكة مكر ، حجه :- امك امسيجينة راح تنظلم جثير منا و جاي
- تهددني بأمي ؟
- انت شتكول ؟
- انت تحديتني و عيب اعلى الزلمة اليحط الحرمة و يهادد بيها
دنج اعليه و كاله :- اسمع هالجلكتين مني يحويكم و حطها ترجية بذنك ، بالحب و الحرب كلشي مباح
بعد وجهه عاينله ابتسم و كاله :- وانا اعلنت الحرب ضدك ...والباكي يمك
حجاها و طلع
...........
ناصر :- عمي سلطااااااااااااااااان ، عميييييييييي
سلطان :- ياهو هاذ
- جنه حس ناصر
ناصر :- عمي سلطان عمي سلطان
- احجي ينويصر
- عرفت السالفة عمي و السالفة جايدة و متعدين اعلى حكوك ال ثجيل و من هيج يطمطمونها و ما يخلون احد يدري.
-ياهو المتعدي اعلى ال ثجيل ولك
- ال ضاحي عمي و جالدين اخوي حاكم و حابسينه ، و عمتي جسومة مؤت ابوي الله يرحمة هي الذبت سترها كبال مضيف الشيخ
كام اعلى حيله سلطان :- شلووون شلوووون
- انا اغلام ابوي
سلطان :- ال ضاحي يجلدون زلمة من ال ثجييييل ، حيهم يزلم حييييهم ، ان مالت الجيلة صدورنا اتسعها و لو طك الفشك تفكنا التحجي بالطك .
ها خووووتي هاااااا (ثلثين الطك لابن ام راية، ثلثين الطك لابن امراية ) هيييييييييي و دبجت الزلم و شالو التفك و هدوا اعلى ال ضاحي
وصلو لمضيف ال مطر ، وكف سلطان ورمى شاجور كامل بالجو ، فزعت الديرة كلها ، و الكل طلع يتراكض
برز سلطان ليجدام ورفع سلاحه و صاح :-حاااااااااكم عمامك جوك يحاكمممممم .
احنا ال ثجيييييل ثاية و علم ، واليطكنا بدم ما نرشه الا بدم .
هاااا حاااااكم هاااااا ( ويل تنشد عمامك وين جوك ذياب اليسماوة هييييييييييييي و يالتنشد عمامك وين جوك ذياب اليسماوة )
ودبچت الزلم وارتفع صوت التفك ، و اعتلت الجيلات سما الديرة وطش طشت واهلية اعلى بيوت الوادم .
ا
رواية كحل عرب الفصل الثالث 3 - بقلم زينب ماجد
الحلقة_3
(ولا يحيق المكر السيء الا بأهله )
ادك روحي .. نذر للجايب ابشاره
واورجه اعله الجروح ، المالهن چاره
جرح ينزف .. جرح باني اعله بسماره
يالمبشر .. مته المكَصوص جنحه
ايطولن اكَصاه ؟
ومتى الوكت التراده ، ايبدل
اطواره
ومتى العايش غريب ، ايأمن
ابداره ... ؟
(عريان السيد خلف )
زهرة :- اصباح الخير شيخنا
الشيخ :- اصباح النور
- جيت اعلى غريب اعرفنه ما ينام بغير مچانه.
- و انت الصادكة ما نام الليل ، اخذي يرتاح ، بس عايني ، لزوم كل يوم يجي هنا ابيت ابوه يظل و علميه هاذ بيته موش بيتكم و خليه يركد هنا و يتعرف اعلى اهله
- ان شاءالله شيخنا.
بعدها تريد تطلع و اندك الرمي، فز الشيخ و صاح بسرحان و امه زهرة يدشون داخل و طلعت ازلام القصر كلها هدت، و الشيخ شال التفكة و طلع .
صوت الرمي كلش عالي بالديرة و الناس كلها طلعت ، الزلم شالت تفكها و هدت، و النسوان واكفات بالباب يريدن يعرفن "شنهو الصار"
نشمية :- ءهلا ءهلا لحكوني يمه ، وليدي جبار ما هو ولك صويلح عليووووووي وينكم يولدي لحگو اخوکم يمه
صلاح :- دشي دااااااخل يمه
كواغد :- شلون ادش و اخوي مااااااااهو ولك يااااااااا جبير يا خوووية
بهية :- يماااااااااااي راح زلمتي يمه، راح شيال حملي يماااااااااااااا
صلاح :- خايب عليوي كض النسوان خلني اشوف اخوي وين و ابوي طر بنص هالجيلات خلني الحكهم.
عليوي و الولد وابوهم ما ردو من انسمع صوت الرمي و جبار ما بايت بالبيت كل ظنهم جبار بنص الطك ، فزعو كلهم صبحية خوفن اعلى ابنهم
طلعت الناس فزعانه .. التمت يم المضيف و سلطان و ازلامه يهوسون ( يالتنشد عمامك وين جوك ذياب اليسماوة ) وتفكهم بديهم
برز الهم الشيخ مطر :- شنهي الراااااااااي يسلطاااااان
-النا وليد عدكم وسمعنا الولد مجلود ، و الطك ولدنا طكنا وياه ، و جاينكم طلابة حگ و خليها اعلى بالك موش ابن ال ثجيل الينطك يمطر
ناصر :- اسمعووووو اسمعووو
الجلد جلدك يحاكم طك جلدنا وياااااك ...ايييييه
عزيز انت واجيتك يالاخو اتعناك ... ايييييييه
نفزعلك ركض لو اشرت يمناك ... اييييييه
... اتبشر خويه تبشر
ها تبشر خويه تبشر
للحك رداده ... تبشر خويه تبشر
للحك رداده ..... هيييييييي "ودبجو اعلى الهوسات "
الشيخ مطر :- ماهو ضايع حك ولدكم و انا ردادة و حويكم ولدنا و ربيب بكاعنا ، موش احنا الناكل حك الوادم يسلطان
- لونك نسيت افعال ابوك يبن ضاحي يل ما تاكلون حكوك العااااالم
- ان جنت طلاب حك حكك و حك وليدكم اعلى عكالي ، و ان كون بجيتك هاي جاي تفك دفاتر عتگ اخذت من حيلنا و دمنا هواي ، الديرة مل هواها الفشك (ملت الحروب) و گلوب الوادم موش حمل طك يبن العم .
حاكم و هو بالسجن و يسمع بالصوت برا، ويسمع بأسمه، كام يدك بالباب حيل و يصيح :- طلعووووووووووني خايبين ءهلا ءهلااااااااااااا وينكم ، يا رحييييييييييييم و لك جباااااااااار عمي رسنننننن.
لهناك اجا رحيم يركض بعد ما شاف ال ثجيل ناوين ع الشر و يذكرون بحك ابوهم ثجيل، فتح الباب اعلى حاكم و كاله :- حويكم ال ثجيل هدوا اعلى ال ضاحي
- هدني عميييييي
- اسمعني يوليدي تراه الشيخ مطر شيخ معدل لا تنسى افضالة و تزيد الطك
- موش انا الينكر الزاد يعمي، لجن هدني الحك
سحب نفسه من رحيم و طلع من السجن يركض بطرك البجامة و الصدر عاري واثار الجلد واضحه اعلى جسمه
فات بين الناس و اتقرب الهم ... لكا شيخ مطر مواجه ويا سلطان ال ثجيل.
وكف بنصهم و كاللهم :- حيااااااااكم
سلطان :- جينا ردادة حك يبن اخوي و حكك ما يضيع و انت ابن ثجيل.
حاكم :- جاي اطالب بحگوگي (بحقوقي) و انتم اول الظالم حكي من ابوي يعمي.
سلطان :- جنك موش راضي بجيتنا الك يبن خضير و احنا اعمامك
- اعمامي و اعلى راسي و عكالي ، لجن انا اخذت جلمة من الشيخ مطر و اهو واعدني يردلي حكي و انا ابن هاي الكاع و الحك ما يضع النا و احنا ولد جلوب.
صاحوا ازلام ضاحي و هم يرفعون اله سلاحهم : و النعم و النعم
اعلى هذا الحجي اجو زلم طبابة خير من الديرة الثانية من سمعوا حس التفك اجو يهدون و يطبون طبابة خير ، وكف حجي رفع ايده وصاح :- سلام اعليكم يهلنا
كلها ردت :- و عليكم السلام
:-الله بقرعانه يكول (انما المؤمنون اخوة فأصلحوا بين اخويكم
الشيخ مطر :- صدق الله العلي العظيم
انا عمكم من ديرة ال منعم وسمعنا حس الفشك و جينا طبابة خير ، ان رضيتولنا ادخلنا و ان ما رضيتو تكترنا (ابتعدنا)
سلطان :- اعلى راسي حياك
الشيخ مطر :- حيااااكم الف هلا تفضلوا للديوان
الحجي تقرب حط ايده بأيد سلطان سلم عليه سلام ايد و اخذ بأيده و دخله لمضيف الشيخ مطر .
وكعد يحجي بالحك بيناتهم و يهدي النفوس ، و برا الزلم الشباب واحد يهدد الأخر.
صفوا على راي بعد ما اخذوا الكلمة من حاكم اللي رضى يحكم بحكة الشيخ مطر و لو ما رداله حكه ذيج الساعة ، الحك لال ثجيل ياخذون حك ابنهم.
ردوا ال ثجيل لكاعهم و هم يفورون حقد اعلى حاكم جيف ردهم و عيّرهم بحكه من ابوه.
شمخي و هو ينشد البصفة بعد ما فضت الهوسة :- جا بويه هم عليش دكو الديرة بتفك ، حاكم شمسوي و هيج صار الفشك بين العمام ؟
جاوبه البصفه :- ابو صلاح يكولووون ، حاكم معتدي اعلى حرمة و ماخذها ماخذهاااا
- اهاااا انا غلام ابوي صكد هالحجي
- اي وعلي هاذ السمعناه.
مشى شمخي و الفكر يترادم براسه، و جان يضن السركال جالد حاكم اعلى شغيلة بسيطة موش فاسد و متعدي اعلى حرمة .
كض صلاح كاله :- اسحب اخوتك و امشنا للبيت بسع ياله مالنا حيل طلايب و جبير جره جر لو ما رد وياك.
راح عليوي و صلاح و باقي اخوتهم اعلى جبار خاطر ياخذونه للبيت و يتجفون الشر، لكوا جبار واكف ويا حاكم بمطبخ المضيف هو و الطباخ مال المضيف رسن و كاعدين يحجون
صاح صلاح :- جبار يلا خويا امشنا مناك الفرخات و النسوان ضال بالهن اعليك.
جبار :- طمنهم خوية انا سويعة و اردن.
اشر صلاح لجبار، حاكم فهمها، كاله :- امش خوية امش اهيلتك و حكهم يضل بالهم، انا بخير العصر امرلك لو صار عدي مجال.
جبار :- لا تحجيها ابد انا وياك لين ما تجي هالبر*** الرايدة تشهد اعليك زور و نشوف وين توصل ويا السركال
عليوي :- جبار ترانا موش كد محاميل السركال امشنا يخويه و احنا نرد لحاكم العصر ندور اخباره .
حاكم :- كفوا منك خوية و النعم و الثلث تنعام نعم الاخ و نعم الصديج لجن ما اريدنك تتأذى
جبار:- لا..... قاطعه حاكم و هو يكله :- لخاطري لو الي يمك خاطر كلت الك و الله انا امرلك .
- هز راسه جبار و تشابگ و يا حاكم و سلم عليه و طلع مغضب و صوت المرادد مالته و يا اخوته عله.
رحيم :- حاكم
- ها عمي
- امك بويه ناطرتك غاد روح طمن گلبها يوليدي.
طلع حاكم بسرعة، لكا امه واكفة شوية غاد عن المضيف، راح ليها و حضنها و هي كامت تنوح و تنحب و هي ماخذته بأديها.
وهم اعلى هاذ الوضع، اجاهم صوت الشيخ من وراهم :- نعم ما ربيتي يم حاكم
التفوا اله، ووكف عدل احتراما اله، تقدم الشيخ و حب راس ام حاكم و عاين لحاكم و كاله :- و كفتك ليه جدام عمامك ما انساها يبن خضير
- ما كلت الا الحك شيخنا و انا متطمن حكي يمك ما يضيع .
- و انت الصادك ، يا رحيم شوف ام حاكم شتعتاز ولبيلها التريده، وشوفلي كاطع وين مختفي.
حاكم :- بس شغلة اريدن اكلك بيها يشيخنا
- كول
- السركال جاني الصبح و رحيم يشهد و هددني بأمي
- هددك ؟ !
- ما هدد بالوجه لچنه الواضح بجلماته من كال امك مظلومة و راح تنظلم هواي انا فسرتها تهديد بمي خاطر ما احجي الحك و اعترف بالتهمني بيه هو، يمكن انا غلطان بتفسيري لجن كلتها الك خاطر لو صار شي بامي انت تدري منو الياذيها.
رحيم :- انا اشهد شيخ السركال طلب مني ابعد من المكان و حتى جذبت اعليه و كلت اله الشيخ كالي ظل ناطر بس هو ما رضى وبعدني و دش اله بس حتى اظلم بخت الحك لله انا ما سمعيت ولا ادري باللي دار بينهم .
هز راسه الشيخ و رد :- روح هسه و ولو شفته گله الشيخ يريدك.
- تامر شيخ .
(بيت شمخي )
جبار فك الباب و دش و هو يصيح :- شنهي جاهل انا عدكم و تكودوني من ايدي و تردوني بسكم تراها وصلت للهامة منكم
شمخي بدون تفاهم كوم و اضرب جبار وصيح :- كصر حسك ووووووولك بينا حيل طلايب احنا و صايرلنا شعلان
صلاح وكف بين ابوه و اخوه و البقية كاموا يجرون بالحجي ، جبار ما رد بس شال شماغة و طره بالكاع وراح للغرفة مغضب.
توتر جو البيت و الكل واكف و عيونه تناظر و الحجي يصرخ بنص البيت و كال الهم :- يا جلمة ردي لمجانج حتى مرة بعد ما اله حويكم يمنا ، وكلها من ورا راسك يصويلح من ركبت براسي و خليتني اطي اختك لهالفيسد الردي .
صلاح :- بويه لا تظلم بختك .......قاطعة
- هشششششش ما اريدن اسمع حس من احد ، مالنا غرض بحويكم يموت ينعدل منا و غاد الأشوفه يصف ويا حاكم الا اكضي بيه التوبه والله..
ظل يصيح و هم كلهم مدنجين روسهم، لحد ما مل مصايح، طلع من البيت، بهية اخذت فروخها و دشت يم رجلها، و الولد كلمن طش اعلى مرامه، ظلت كواغد و امها كاعدات بره ..
كواغد :- شنهي يمة يعني انا بعد ما اعرس
- جا وكتج يا كويغد العالم وين و انت وين
- جا انا شلي بالعالم ، شني لعبة انا عدكم اطيتوني و رديتوني، انا احسن هالزلمة هاذ اعلى حك.
- خايبة كصري حسج و ستري يا كويغد من كون واحد سمعج و انت تحجين بالزلم الا يكصب راسج اسكتي ولج.
- شنهيييي جا انا موش بشر كلساع مطيني و مرجعيني .
- خايبة اكومن منج اخيرلي.
كواغد :- ااااخ يكويطع اخ خايب هسه من اكضنك و اكلك بسنون هم احد يكلي ليش، الا غدي منهو الباكل لحمك الا الخنزير ، لجن والله ما اسكت لا ما نومت الجدر بنص هامتك يالمجلفط.
.......
ملوك :- سليمة يا سليييمة
- امريني شيخة .
- شصار بالمضيف محد جابلج علم
- ال ثجيل ردو..... قاطعتها
- هاي ادري بيها كليلي كاطع ما جاب المرة
- لا والله شيخة كاطع مختفي.
- غضب الله اعلى راسك يكاطع هسه انا شگل للشيخ اخوي شرد ،دخيلك ربي عديها اعلى خير و احفظنا.
فات الشيخ للقصر :- ها السلام عليكم
ملوك :- وعليكم السلام هلا بيك يبو زناد، بشر
- اخوج لهساع ما بين يملوك
- تلاكيه صادفته شغيله و هالعطلته، هسه يرد ، موش اخوي اليشرد ويهد طلابته.
-و انا هاذ الأريدنه، لجن السموحة يشيخة لو جان الحك اعلى كاطع راح اخذ حك ابن ال ثجيل من عيونه.
- جا هو شذنبه يشيخ هم زلمه هو و شكتله المرة و تصرف ما راد يدوخ راسك بالسالفة
- هالسالفة ما تنظم يملوك خصوصا و اهو يعرف حاكم ابن ال ثجيل وتعرفين ال ثجيل شلون حادين سنونهم اعلى ال ضاحي بفعلته هاي حط راسي بالطين كويطع
- محشوم و راسك مرفوع يشيخ هو غلط انا ما اعفي من الغلط لجن سبحان الما يغلط و هو طول عمره اخيك و عضيدك و ايدك اليمنى.
سليمة :- السموحة يشيخ السركال بالديوان و طالبك
ملوك :- اهااااا شفت يشيخ من عبنه حجيي صدك هالأجه انا اعرفنه اخوي ما يشرد ، وداعة الله عليك يشيخ لخاطري لا تغضب اعليه.
الشيخ كام من مكانه مشى و ما عاين لأحد، دش للديوان مال القصر و دشت وراه الشيخة ملوك.
السركال :- حكك علي يشيخ و انا خليتك بوضع شين لجن انا جبت المرة و هي مستعدة تشهد كبالك لجن تريد منك الأمان و الستر و كون ما تفضحها.
الشيخ :- ان شاءالله يطلع كلامك صيحيح يكاطع و الا ....... قاطعة
- طول عمري صادك وياك ما يوم دورت دغش و انا عد حجايتي.
هز راسه الشيخ و حجه :- ام زناد دشي داخل ، كللها ادش .
كاطع :- اروحن اجيبها الك يشيخ
- لا خليك بصفي، رحييييييييم وينك يا رحيييييم
فات رحيم للبيت :- امرك شيخنا
اشرله يتقرب يمه، ادنه حجه الشيخ بصوت ناصي :- اسمع المرة الواكفة برا تكشف وجهه و صيح حاكم و خله يمر من المرة و حاول تخليه يعاين وجهه بدون ما يحس و راغب (راقب) تصرفاته، و جيبه ليه .
- امرك شيخ
شال راسه و عاين اعى كاطع اللي واكف و اديه وره ظهرة مجتفهن ووجهه جن واحد حاكمينه اعدام.
راح رحيم و صاح حاكم و جابه للقصر مشاه من يم المرة، حاكم ما دا ارلها وجه كل فكره جان بالشيخ و اللي راح يصير.
فات للشيخ :- السلام عليكم
- و عليكم السلام ، هلا حاكم
- هلا بيك شيخ
- انشدنك ، المرة الواكفة بره اعرفتها ؟
- يا مرة ؟
- واكفة بالباب
- اعذرني شيخ والله ما ركزت بوجه احد من كون الفكر مشغول.
هز راسه الشيخ و اشرله يوكف اعلى يسرته، عاين حاكم لكاطع اليخزر بعيونه، وكفوا اثنينهم .. حاكم اعلى يسرة الشيخ و كاطع اعلى يمنته.
واشر لرحيم يدخل المرة، صاح الها رحيم من باب الديوان الشيخ لاحظ ان المرة وحدها لا وياها محرم ولا واحد من اهلها ، صاح :- عندك يااااا رحيم
وكف رحيم و طلب من الكرة ما ادش الديوان و كاله :- امر شيخنا
اندار الشيخ اعلى كاطع :- المرة بلا محرم يكاطع ؟
- شيخنا عدها عمام لجن تخاف الفضيحة و ما تكدر تكللهم و يجتلوها توسلت بيه ما اوصلها العمامها
تنهد الشيخ بأستنفار و صاح :- يا رحيم انده اعلى القصر و جيب ٤ نسوان خاطر يدشن وياها للديوان ما تدش وحيدها.
-امرك شيخنا
راح رحيم، والشيخ مال راسه لحاكم و همس :- عاين بيها عدل تعرفها المرة يو لا
- وعلي شيخنا ما شايفها بعمري.
الشيخ :- جا خوش .
اجن ٤ نسوان من القصر بعبيهن محشمات بس العيون طالعة من النقاب ، جانن خوات الشيخ ووحدة منهن الشيخة ملوك ، سلمن ووكفن اعلى كتر ، اشر الشيخ اعلى رحيم يجيب المرة .
دشت المرة عيونها حمر تبجي، اول ما اجت ذبت روحها يم اجدام الشيخ ، الشيخ اشر لحاكم ما يفك حلكة ولا بكلمة .
دنك الشيخ و شالها و كاللها :- امري بعد ابوج ولو الج حك انا الرداد
المرة تشهك و تكله :- اريدن ستري و حكي منك يشيك انا كاضه عبايتك ، انا بشارتك يشيخ جايه اشكيلك من الاعتدى اعليه و انا مالي ذنب
الشيخ :- جفي دموعج و احجي وياي عدل يبنيتي ياهو الداس اعليج
-حاكم شيخ حاكم هو الاعتدى اعليه
الشيخ انتبه و هي تحجي ما عاينت لحاكم ولا دارتله، ردها الشيخ :- تعرفينه انت
- اي اي اعرفنه شيخ هو اللي اعتدى اعلية دخيلتك انا يشيخ اذا سمعوا عمامي يذبحوني.
- اهدي بويه بس خل اتفاهم وياج، انا اردنلج حكج لجن حاكم شرد من الحجز اليوم الصبح
تصرخ و تصيح :- شيخ انا دخيلتك اريدنك تاخذلي حكي منه.
حاكم ما اتحمل بعد، فتكها و كال :- خايبه انت مسودنه لو احد وازج اعليه شنهي حاكم شنهي حك من يمتى انا معتدي اعليج ومني انت من الأساس.
ذيج من كد ما تبجي و تصيح و تلطم ما انتبهت لكلام حاكم، رد و صاح بيها :- خب هناااااا شمالج انت
وكفت و كاللها :- عايني اعليه وكفي هالتمثيلية جا غير انا حاكم احجي وياي منين تعرفيني بويه
جفلت المرة بوجه حاكم و الشيخ، و عاينت لكاطع و ردت عاينت للشيخ و تكله :- هو شيخ هو نفس الصوت ، هذا حسه انا اعرفنه .
- انا اخووووك طلع حسي المعتدي اعليها، شيخنا و العباس هالمرة تجذب ما اعرفها وروح جدي جلو ما شايفها.
ذيج كامت تصيح و ما ينفهم من حسها شي و تبجي بصوت عالي، و الشيخ يصيح و يكللها :- بهدااااااي خل نفهم حسج يا مرة
ما سكتت ولا خلتهم يفهمون و تصيح :- هو هذا نفسه
رفعت الشيخ ملوك نقابها و حجت :- شيخ هاي المرة حيالة وورطت اخوي
رحيم دنج راسه و حاكم دار وجهه من رفعت الشيخه غطاها، صاح الشيخ و خزرها، تكترت و ردت البوشية اعلى وجهه.
اشر لخواته يكض المرة و يسكتنها، التمن عليها خواته و لزمنها ، كرصنها و سدن حلكها و يكللها :- سكتي لا تنجوين بالعطاب اعلى جدادمج والله ، ما عدنا حرمة ترفع حسها بين الزلم.
جبرنها تسكت بس اليشوفها يبجي اعلى حالها اعلى كثر الدموع الهملتهن ، تقرب الشيخ و كاللها و هو يحذرها :- اسمعي يا مرة وروح جلوب لو ما حجيتي الحك لخلي هالنسوان تشوف شغلها وياج
اوكفي عدل و حسج ما اهيسنه و من اسأل تجاوبين اعلى كد سؤالي ... صرخ (مفهوووم )
دنكت هي تشهك و تخفي بجيتها، نزع عباته على كثر ما توتر احتر، انطاها لملوك و حجه و كاللها :- هذا حاكم تعرفينه يو لا ؟
هزت راسها :- اي شيخ
- شلون تعرفينه و انت ما ميزتي شكله من فات جدامج للقصر و ساعة و اهو واكف ما ميزتي ، شتفسرينها هاااااي
- شيخ اهو جان ملثم
- من كونه ملثم شلون اعرفتي حاكم يمكنه واحد ثاني .
- من حجه مييزيت حسه شيخ
- ولج شنهي من مرة انت شايفتنه جهال لو مهابيل جدامج
كامت تصرخ و تحلف و شيخ يا شيخ و هرجت الدنيا بصياحها ، ساعتها كاطع راد يتلاحك روحه ، جر عكالك و هد عليها و البكها بعكال و صرخ :- ولج كح.... ورطتينا و رادت تروح دم اركاب زلمنا تالتيتج تتبلين اعلى الولد و تخيلني اجلدددددددده
كضه رحيم :- خايب شمالك يكويطع تخبلت تطك مرة
الشيخ :- ما جن انا موجد يكاطع
- السموحة يشيخ لجن هاي الحرمة ورطتني و خلتني اجلد حويكم واتفاشل وياك.
تقرب من حاكم و حب راسه و كاله :- حكك اعليه يحاكم انا غلطيت بحكك
صاح الشيخ بصوت، سكتهم، امر النسوان ياخذن المرة و يفوتنها جوة ، واخذ بأيد حاكم و كاله:- يبن ال جلوب رايتك بيضة.
- على راسي شيخ
جر ايده من حاكم و حجه :- من اليوم و غاد انت يا رحيم تتولى امور الزراعة و المضيف ، اما انت يكاطع فجعدتي و يا عمامك و انا فصالهم اعلى جلدت ابن ال جلوب.
طلعت ملوك من الديوان بهمة وهي تعبر عن غضبها بقرار الشيخ ، و السركال ضل يتوسل بالشيخ و يبررله، الشيخ هدهم و طلع للمضيف ، طلع وياه حاكم و رحيم.
رحيم :- ويمكر و يمكرون والله خير الماكرين ، اعلى كثر ما زادوا بمكرهم اعليك يحاكم الله مكرلك و ردلك حكك
- من كون الله يعلم انا مظلوم و هو ويا المظلوم هالطلعلي حكي.
- و النعم بالله، امش يوليدي بشر امك وطمن گلبها اعليك .
- ان شاءالله عمي ، اشكرنك هواي من كونك انت و عايلتك ما كصريتو ويا امي و جنتو اهل
- و احنه اهل يوليدي، توكل بالله.
سلم وراح، الشيخ دش للمضيف تلكوه خوانه الظلو بمجانه بالمضيف، و سولفلهم السالفة بما انزلت و كام اعلى كاطع حجي ولوم ، بس الشيخ ما رضى الا يحضر عمامه .
حجه ويا الزلمة الطب طباب خير بالسالفة و سولف اله الصار، و الحجي راح لال ثجيل و حجالهم كل الجرى و ان السالفة كيد نسوان ووكع بيها حاكم و الشيخ مطر يخيركم و يكلكم :- تريدون انا اتكفل سالفته و اكاوم اهل كاطع لو تريدون انتم تاخذون حك ابنكم و هذا حككم ، من كون السركال موش من العشيرة و اهله غربة و انا عزلته من الشغل.
اجا الخبر من ال ثجيل ( احنا الفصالة و على ال ضاحي يتكترون و يجفونا الشر )
كف ايده الشيخ مطر و كال :- هاي هي ما دامها انحلت اعلى خير ما ظللن غير بس سالفة بيت مطشر.
بعده جاي يحجي ويا اخوته، دش شمخي للمضيف :- السلام عليكم
- وعليكم السلاااام اهلا ابو صلاح تفضل
- والله يا شيخ انا جايك بسالفة واريد اتعذرلك منها
- تفضل يبو صلاح امر
- انا امس حجيتلي جلمة لجن رايد اتراجع بيها
- و شنهي هاي الجلمة ؟
- انا انطيت بتي كاغد لحاكم لجن بعد الصار...... قاطعة الشيخ و كاله
- و كاغد بتك يبو صلاح ما تصير الا لحاكم
- الشور شورلك يشيخ لجن انا بتي هم عزيزة عليه و ما اهون بيها و انطياها.....
- حاكم موش فاسد يبو صلاح و السالفة كيد نسوان و عداوة ويا السركال .
- ما فهمت ، شنهي القضية شيخنا.
- السركال كاطع متعارك هو و حاكم و مدخلة مرة بنصهم و تاهمه حاكم بيها ، من صفيت حاكم و جبتها يا ابو صلاح حتى ما ميزت شكل حاكم ولا تعرف
-اي وروح جلوب ، طلع مظلوم وما يستاهل تظلمه، حاكم خوش حاكم .
- لا اذا خوش وما بيه عيب نتشرف بيه و هو ابن ال جلوب
- و ابشر مهرها تاخذه
- والله يا شيخ هي كويغد بتي هم ما رضت وظلت تتشرط لجن شرطها بالمهر غالي .
- لا تحجي هيج يبو صلاح بنيتك مثل بنيتي و شروطها مكضية، شنهو شرطها.
- تريدلها هايشة تحلبها و اتعيش اعليها
- ابشر مهرها واصل ، هايشة و خمس طليان بعد .
- يجثر خيرك شيخ و الله يبارك يبك و يحفظ وليداتك ان شاءالله.
- مشكور يبو صلاح و انت عمنا و الك حك اعلينا .
- و النعم منك ما تكصر.
(بيت شمخي )
كواغد :- اكلج يمه
- ها يا كاغد
- جا يعني هيج خلصت كلش كلش
- شنهيه ؟
- سالفتي
- يا سالفة منهن ؟
- شمالج يا يمة سالفة عرسي ، يعني خلصت كلش بعد ما اعرس ؟
- يا فلك .. خايبة صكد تحجين انت؟
- يمه تشوفين وجهي مال جذب غير جاي اسألنج.
- ولج العالم اتفشخت يكويغد و انت حايرة بعرسج
- جا هو العالم تفشخ يوم الحجو بعرسي شني هالحظ هذا، صارلهم سنين و دهو ال ثجيل و ضاحي ما متفاشخين يوم الحجو بسولفتي تضكرو (تذكروا ) و هدوا اعلى الديرة و تفاشخو، لا و الحظ و الوعد اي والله
فاتت خلود :- ها عمه شمالها كواغد
كواغد :-بيه حريشي ، بيه طحيل ، مالج انت ؟
- يا شمالج بس ردنا ننشد اعليج عبن شفتج مكدرة ، لجن حكج حكج راح المعرس وظليتي، مت عيني اعليج بعد ما تعرسين
- خايبة خليدة تفاركين عني لا وروح جلوب ادبچ بمصرانج دبچ عمارة ، ميلي غاااد.
- جا هو هم صوجي عبن انا ظلي بالي اعليج و اجيت انشد.
بهية :- اكلج عمه جبار غادي تراب عكب رزالة عمي، كوميله طيبي خاطره ، مكرود حيل متكدر
- عمت عيني اعليك يمه اكومن اشوفه كبل لا يصير الغروب
كامت اعلى حيلها جاي تهم لأبنها ، دش الحجي.
:- ها الله يساعدكم
نشمية :- هلا بيك حجي
- ها سلامات ؟
- جبير مكدر و كلت اطيب خاطرة
- اي انا هم ما كصريت بيه و هنته جدام مرته و فروخه
صاح ... جبير بويه خايب تعال جاي ابشرنك ، حاكم بري بري
نشمية :- صكد يبو صلاح ؟
- اي و العباس هساعه انا جنت يم الشيخ مطر و كال مهر كواغد انا سداده و اطاها هايشة و خمس طليان
كواغد تعاين و عيونها انفتحن حيل من الفرحة لجن ما تكدر تهوس فشلة من ابوها.
نشمية :- اهيييييييييي خايبه كويغد يمه صارت عدج هاااايشة ايدج بالدهن
صلاح :- صكد عود اطاها هايشة و خمس طليان بويه ؟
- اي والله شمالكم
خلود :- شو انا من عرسيت كلشي ما حصليت حتى واهلية عرسي ما حصليت منها و اخذوني ركض لا هلوله ولا صفكة
كواغد :- عبن انا طيبة و اعلى نياتي موش مسمومة
جبار :- و شحال حاكم هسه
شمخي :- كرب احبنك و انا اكلك شصار برفجيك
- ما تهم بويه انت ابوي و حكك شما تعمل
قرب شمخي و حب ابنه جبار براسه ، وكعدو ، فرشوا حصيرة الخوص و التموا يسولفون و الجناين راحن يحظرن العشا كبل لا ينزل الليل
والحجي يشرحلهم شصار و شجرى.
صلاح :- من كون هالطلايب كلها من تحت راس كاطع
كواغد :- انا اعرفنه عليش عمل هيج بالزلمة
شمخي :- عليش ؟
- بويه هذا افيسد انا ما اريد اكللك بسوالفه لجن انا روحي جزعت منه واحد هتلي مدري شلون الشيخ حاطه بديوانه ،
صلاح : شنهي غصدج يكاغد ؟ كاعط عمل عملته هاي خاطر ينهي هالعرس ؟
شمخي :- جايز صحيح كاطع ملوع افادي كلما يخطبها و ارفضنه يضيك اعلينا و يكطع المحصول.
كواغد :- بس انا اله و علي لا ما اهيننه فلا اطلع بت ابوي.
صلاح :- شني هالحجي هاذ ، لو كربتي ليه و العباس اكص جدامج استحي
دارت وجهه و هي مغنتبه و حاطه ابالها كاطع.
(المضيف )
حاكم :- السلام عليكم
الشيخ:- و عليكم السلام هلا يحاكم
حاكم :- كالولي الشيخ رايدك
- و الكالك صادج ، تفضل اكعد
- كول عمي
- بشريت امك
- اي و تدعيلك بطولت العمر شيخ
- الله يحفظكم ، اسمعني يوليدي ، شمخي ازلمة ابن اجاويد و بته يكولون عنها معدلة ، و انا تكفليت مهرك و عرسكم عليه و هاي اعتبرها مردود حك عكب جلدتك بكاعنا يوليدي
- دايم عزك شيخ لجن انا مغرر اعتمد اعلى رويحتي و اكون نفسي و رايد اتعنى لبغداد .
- وين تعرف ابغداد انت ؟
- الينشد ما يتيه و اليسعى ما يخيب الله سعيه و انا رايد اشتغلي شغل بعيد عن الفلاحة و المضايف.
- و امك شرايها بحجيك هاذ ؟
- انت اول الناس الحجيتله، ناطر اكومن اعلى حيلي و يطيب صوابي و اخبرها، لجن انا اعرف جوابها امي طيرة حرة ما ترضى بقفص بغداد لا ما زرع و بساتين ما يطيب خاطرها.
- بعد انت التشوفه النفسك انا ما رايد اجبرك، لجن خلي اعلى بالك بيت شمخي ان جنت عايف امك و مسافر خلنا نزوجك خاطر حرمتك تظل ويا امك
- بت الناس هم الها حك يعمي، لزوم اكون نفسي و ارتب وضعي خاطر اخذها، الأريده منك شيخ تحجي وياهم يطوني مهله الكه شغل و اخذ بتهم.
- سهلة، بس كلي اعلى عمامك شسويت وياهم
- لا رحت الهم ولا وصليت يمهم، والله يا شيخ انت بمثابة والدي و لحم ذراعي من خيرك لجن جية عمامي واخوتي اذتني ازود ما فرحتني
- حكك
- ١٧ سنة ما كالو ابنه ولا احد سأل عني ولا وكفو وياي ، بس وكت الطلابة جوني فزاعة .
- خليها ابالك لو طلابتك ويا غيرنا ما فزعولك ، لچن مهما يكون يا وليدي الظفر ما يطله من اللحم و عمامك حتى لو جانو موش زينين تمسك بيهم ذكر الزلمه عمامه وتظل طول عمرك محسوب عليهم.
لزوم العمام تتنومس بيهم من كون الما اله عمام يعيش عمره ضعيف و ماله ظهر، تاكله الواوية.
- الله كريم انا اترخص منك شيخنا
- مرخوص يوليدي.
حاكم :- طلعت من ديوان الشيخ و انا بالي مشغول، رديت لأمي ، تلكتني :- ها حويكم يمه
- ها يمه
- الصخلات ضلن اليوم محد سرح بيهن ماتن جوع
- يمه تعبان حيل و اريدن انامن.
- اي يمه حضريتلك الجودلية نام يبعد امك
انمطلت تعبان حيل و افكر بالصار، و اعاين اعلى امي اعلى ضوة البطل مشغلة البريمز و جاعدة مدري شتعمل بيه
- شنهو البيدج يمه ؟
- دوة مالت عرب ييمه اريدنه لجروحك
- دوة وتسهينه اعلى النار ، ما بيه شي يمه ارتاحي.
بردته و جابته ليه، ظلت تدهن بصدر، و انا سنحيت اعلى ريحتها، لهناك و تذكريت ، فكيت عيني :- صكد يمه نسيت اكللج
- شنهو ؟
- ابشري ابنج جته مره
- يععععع ياهي هاي
- شمالج يمه راح تزوعين عليّ جا كتلج ابشري موش هيج اطكينها
- جا غير اعرف ياهي هاي الراح تعرس اعليها.
- اخت رفيجي جبار
- والله ييمه جبير هاذ ما يتجازه هو و ذاك صديجك الاخر من كون هدوني، طول الليل و هم بكتري يروحون و يردون عليّ.
- جبير ماكو منه يمه، لجن هم الطوها اليه ، ابوها الحجه بالسالفة بنص الديوان.
- الله ينطيهم يوليدي يوم عيد الاعرسلك بيه و اشوف فريخاتك
- الشيخ مطر تربعلي بالمهر لجن انا رفضته
- يا يمه عليش هجي سويت جا منيلنا نجيب مهر للبت .
- يم الناس خوش ناس موش طلابة مهر و انا ما اريدن اعيشن بمنة احد بعد ، اشوفنلي شغيلة و اشتغل، ومنا لذاك الوكت عودن اخذها.
الا صدك يمه تعرفينها انت كواغد ؟
-كاغد بت حجي شمخي ؟
- اي
- اي جا شلون ما اعرفنها .
-حلوة يمه لو تشبه جبير الاغم
- هااا والله يمه ما ادري
- جا مو تكولين اعرفنها ؟
- اي بس ناسيتها ، لجن امها جوش مرة نشمية
- يمه انا راح احضن اخوها يو احضن امها ؟ جا غير اريدلي مرة حلوة اشوفن رويحتي بيها.
- ياااااع فلك طرك.
- يممممممه كلساع و صايحه يااااع بوجهي ميلي خليني انام ميلي.
.......
(قصر الشيخ )
غريب و زناد يلعبون، بس زناد من كثر ما تحجي براسه الشيخة امه، يا يود غريب و طول الوكت يتعاركون .
دش الشيخ و زناد و غريب تعاركوا ويا طبة الشيخ، جذب نظر الشيخ حس زناد و هو يصيح :- اطلع من بيتنا يلا روووح
صاح الشيخ :- زنااااااد
- بويه طيحني
- دش داخل بسع
ركض زناد، و الشيخ مشا، وكفت الشيخة ملوك :- ابني ينصاح بيه لجل الفصلية و اخوي ينطرد بلايا احترام لجل حاكم ... جنك نسيتني ولا انا ابالك يمطر.
- انا ويا الحك يملوك
- يا حك هاذ التحجي عنه و انت تعزل اخوي من شغلة و تهينه و تحط الخادم الجان عندنا رحيم بمجانا و تكلي حك ؟
- عاينتي افعالي لجن ما عاينتي اغلاط اخوج
- ما اشوف بخوي غير زلمة نشمي لعبت اعليه مرة محيلة وطيحته، الله يعلم بالنفوس يمكنهم ناس معادين اخوي وطيحوه ، ما تدري بالنفوس يمطر
- انا ما ادري عن النفوس لجن ادري جلدته لابن ال جلوب و بكاع ال جلوب ما الها عذر، الا اذا انا ما جنت بعينج انت و اخوج و مستسهلين الصار يملوك
- حتى جلمتك وياي متغيرة يمطر ، انا واخوي ما كصرينه ، انا الراعيت بيتك و ابنك و كل اهلك و اخوي الراعه امور زراعتك ويناطر ليل نهار اعلى شغله لجل نرضيك ، بس يا حيف اعلى البشر الينسى الزينات كلهن بشينة وحدة
اسمع يبعد امي و ابوي مالي ظلة اهنا و انا مهيونه ما ارضاها ، غراضي تحضرت وباجر غبشة انا ابيت ابوي ، و خلي قصرك و خدامك الك يمطر
- ملوك
- السموحة يشيخ هذا حدي و ما اكدر اتحمل بعد
- اسمعي اجل ، الباب لو طلعتي يا شيختي و صفيتي ويا اخيج ضدي ، توكلي بالله ولا اديرين وجهج.
حجاها ، رادت ترد ، عافها و طلع من المكان .
صبح ثاني يوم الصبح .. بس الشيخة ما راحت جانت تخاف لا تروح ويفرغ مجانها و الشيخ يركب راسه و يحطلع مرة بمجانها و تخسر هي و اخوها.
كعدوا الصبح هي مثكلة وجه ع الشيخ عدها من الشيخ ٣ .. ثنين ولد
زناد و اللي هو اصغر من غريب بشهرين مواليدهم ١٩٥٠
و كريم الأصغر منهم ب٤ سنوات مواليد ١٩٥٤
وبنية وحدة اسمها "رويده" سمتها وحدة مسيحية لما صعبت ولادة الشيخة و اخذوها اعلى المستشفى و جابت ، جانت السستر اللي ساعدة بجيبوبة الشيخة مسيحية سمتها (رويدا)
بس من ردت الشيخة للديرة و سمعوا الاهل اسم البنية رويدا ما رضوا كالو اسمها موش حلو كوموا وسموها (راديون ) حتى اسم قريب على اسم رويدا بس كون حلو . عمرها اشهر هي مواليد ١٩٥٨
مثل كل يوم الصبح يصحون كلهم اعلى الريوك، بس الشيخة ما كعدت، كعد زناد و كريم بحضنه ضاحكهم .. لعب وياهم لجل الشيخة تلين و تضحك و تخلص السالفة .. بس الشيخة جانت مصرة اعلى موقفها الى ان مل الشيخ و طلع من البيت وهو غضبان.
لهناك و دش كاطع للقصر يطلب اخته، راحتله الشيخة.
:- ها خوية بشري شنهي علوم الشيخ ؟
- من ورا طلايبك يكاطع حتى انا راح اخسر زلمتي .
- شنهي صاير بيناتكم شي.
- لا انا الما احجي وياه، عوفك مني هسه ، عمامي شكالو بيت ال ثجيل شسووا
- تعرفينهم عمامنا ما بيهم خير ، رحت الهم واحدهم يلوف بكتاره
-جا انت من تدريهم موش خوش عليش دودهت روحك بهالطلابة ، يو ما انا رافعه البوشية و صايحة اعلى المرة حيالة و كلبت السبة بيها ولفيت انظارهم جان رحت بيها و طاحت براسك
- ادري ومنها و انا اخذت الحجة ، الكاتلني هذا رحيم الما يسوى نص امن نعالي يصير بمجالي راح اطكن من القهر.
- جا انا شتكول عليه ابن الفصلية الصاير ليله و نهاره مجابلني ، اخخخخخخ ادفع عمري بس كوني افتك منه، وين ما اديرن الكه الشيخ يعاين الغريب و يتغشمر وياه ، امس انطحنت من صاح بوليد لجل هاذ الردي .
- عدي الحل
- وشنهو هو ؟
- خليها يمي يبت امي و ابوي ومالج غرض
-لا ادودهنا (تورطنا) مرت الاخرى يكاطع ، استر اعلينا .
- خليها اعلى اخوج وريحي بالج يختي، لرد حكوكنا مثلث، و نفتك من الطاحنين افادنا
- غصدك رحيم و غريب ؟
- هز راسه و طلع من اخته وباله الف فكرة شيطانية
..... مر اسبوع
و اوضاع الديرة بين الهدوء و التفاوض
عمام كاطع كعدوا ويا ال ثجيل و الواضح ال ضجيل رايديلهم فصل ، لجن حاكم اللابس الوضع و ما يحضر كعدات العشاير و الحجة مريض
رحيم استلم امور الزراعة ..
و كواغد ابالها تبرد كلبها بكاطع و تدور بيا طريقة تجتلة بدون ما احد يعرف.
... اندكت الباب اعلى بيت حميد بالليل و الدنيا هندس، اجاهم زلمة كال الهم (رحيم دزني اعلى غريب يكول اريدنه )
استغربوا !
رحيم شعده بهالليل ويا غريب ؟ وشيريد منه ؟
بس ما عارضوا من كون هو موش ابنهم ربيبهم مالهم حك يدخلون، حميد كال لابنه الجبير
(بويه اخذ اخوك وزته للمضيف ورد بسع )
اخذ غريب ووصله للمضيف ورجع ...
لهنااااااك و بنص الليل ، وبليلة ما بيها كمر ..
فزت الناس اعلى حس واحد يصيح .
( حرررررررررررررريجة حرررررررريجة يهل الواااااااااااااااادم الحكووووووووووو المضيف احتراااااك )
رواية كحل عرب الفصل الرابع 4 - بقلم زينب ماجد
الحلقة_4
(احتراق المضيف )
فرق بين اليبيع اسمه وسجاياه
وما بين الوفي
الما دنك الراس
ومن بين الحزن والاه والياويل
ومن ركبة طفل..
ما كاوت الميل
ومن بين العطش
والجوع.. والنار
ومن بين الثواجل والمجاتيل
ومن بين الصبر والطيف والحيف
ومن بين الجفوف المالهن حيل
لون ليل الغدر يكبر علامات
نشع نجمة صبح ونشتت الليل..
(عريان السيد خلف )
كواغد :- خليت اهيلتي يهودون و تخفت اصواتهم، كضيت عبيتي و طلعيت اتخوتل ، انا متربعة بروحي اصير ناعية اعلى الحسين سلام الله عليه ، و هالضالة كل ليلة اتخوتل خاطر اسمع محاضرات السيد.
بس هالمرة كضيت ارويحتي ما ثغبت بحس عالي خاطر محد يحس عليّ، خلص السيد محاضرته و نعاوية ، لفيت الشيه اعلى وجهي ودرت وجهي خطار اردن لعلي كبل لا يحسون.
جاي امشي و سمعيت حس واحد ينده وراي :- كاغد كاغد .
درت وجهي و الكاه كاطع المجلفط ، وكف وكال :- يو مو تضمين وجهج بشيلة حتى يو تضمين روحج بشبشية انا اعرفنج و اميزنج.
- نچر يخيعون امك
- نجر ونص جا شنهي انا مو بعينج ؟
- خاب كويطع تهدني لا وروح جلوب اكض هالجلمودة البكاع و انيمها براسك، فارج يااااله امش.
- ماني ماشي ولا انا المحترك، انا اريدنج يكاغد ما احمل سالفة حاكم ياخذج و انا افلس .
- خايب والعباس ابو فاضل انا من ساعة السمعيت بالسالفة عرفت طلابتك ويا حاكم بسبة هالموضوع ، لجن وروح جلوب لو ما فارجت يكويطع ما يكضني عنك الا وانا شاجة راسك.
ضل يتماطل و حلكه يلزك الأغم، عفته و مشيت كض ايدي و انا انتفضت ، دنجتي اعلى حجر جلمود بالكاع ، كضيتها و التفيت اعلى كويطع وهو زغير طوله ما بيه فتر و انا جني نخلة عرب هطالولني ، و انوم الجلمودة براسه ، صرخ و انا دفعيته ليغاد، طاح اعلى ظهره .
جا غير فار الدم براسي و اكومن اكضلي عصه من الكاع و انهد بيه جتل حيل حيل ليما برد گلبي .
واكض عبيتي و اطكنها ركضة لبويتنا (بيتنا) .. من كون لو راد يشكي و يكول كواغد طكتني تجذبنه و اهلي شهود لا طالعة ولا ماشية جويعدة ابيت ابيت ابوي و يتبلى عليه .
واخلي اليعاين بوجهه يتفل بيه بس اطني صبر يا كويطع، انا تجتل كويغد زلمتي ، حتى لون اهو مو زلمتي لجن ينحسب زلمتي دام حجو بسالفتنا ولزوم المرة ازينه توكف لزلمتها و اطك الطكاه.
دشيت البيت لفيت من صوب الحوض حطيت عبيتي اعلى البردة، اجاني صوت
خلود :- هاااا يكويغد وين جنتي
- شنهي وين جنت بالحجرة مجطوله و جتلني الحر و كلت اتغوسل شرايدة مني ؟
- جا انا دشيت للحجرة ومن عبن ما لكيتج هل سئليت
- شلوووون ولج ؟
- شنهي شمالج جاي اكللج ما شفتج
كواغد :- دنكيت و اخذت الربد (كرك) من الكاع و كلتلها : شلون ولج ما شفتينييييي ؟
- يااااااع شلون ما شفتج ديه شفتج و شفتج حتى غطيتج بديه
- من غطاج البين و شالج الحسين ، فارجي عني لا وروح جلوب انوم هالربد براسج ، فاااااااااارجي
ركضت جدامي جنها زرافة بر وتركض...
تغوسلت و برديت رويحتي ومشيت للحجرة .
........
رحيم كاعد و دش غريب للمضيف :- ها غريب بويه شعدك جاي بهالليل
- اخوي عبيس جابني وراح
- عليش ؟
- ما تدري
- شنهي صاير شي ، حميد متعارك ويا زهرة امك ؟
- لاع جنت نايم و كعدوني و جابوني
- نام هنا يوليدي، اخذ ذيج الوسادة و تمدد .
غريب هم ما كال شي ، مشا جر الوسادة و تمدد اعليها ، ضل جاعد مفتح عيونه ما غمضن
و رحيم ضل كاعد بالمضيف.
.....
(بيت حاكم )
اندكت الباب .. صاحت ام حاكم :- ياهو هاذ
ناصر :- انا يم حاكم
- ياهو انت ؟
- انا ناصر ال ثجيل اخو حاكم ، جاي احجي جلمتين ويا اخوي و امشي لهلي .
فتحت الباب ، حجه :- السلام عليكم
- و عليكم السلام
-حاكم وينه ؟
- نايم داخل دش يوليدي.
- الله يعزج،
جاي يدخل ، طلع حاكم :- ياهو هاذ يمه ؟
- اخوك ناصر يمه
استقبله بالهلا و المرحبا رغم الگلوب شياله .
حاکم :- كول يناصر شنهو الراي ؟
ناصر :- الراي يبن ابوي انت لزوم ترد لهيلتك و لديرتك و تهد ال ضاحي
- خير ان شاءالله من كونها صحت ضمايركم و جيتو تردوني بعد ١٨ سنة
- الظفر ما يطلع من اللحم و انت كبرت و صرت ازلمة و تنعد اعلى ال ثجيل و زحمة نرضى زلمتنا يضل عد الگاومونا و حرموا جدنا ثجيل من حكه .
- جا هساع ياله كلتو زحمة، من جانت امي عزبه و انا وحيدة زغير و تفر بال ضاحي و تحرث بكاعه و الجاي و رايح يلطها بجلمة ما هزتكم يبن ال ثجيل
- الراح راح وما يسوى نحجي بيه و نحن ولد اليوم
- لا والله يبن ابوي الراح ما راح و جروحه لليوم تنز بگلوبنه
- شنهي كصدك ما تريدنا يخوي ؟
- لا حشى انتم عمامي و اخوتي و اعلى الراس ومثل ما تفضلت الظفر ما يطلع من اللحم ، لجن انا ادريك اعليمن جاي يخوي ، انتم رايديني احضر جعدت عمام كاطع خاطر تفصلونهم و انا موش حمل فصول .
- و تخلي حكك رايح و يستصغرك الجبير و الزغير.
- الحك يم صاحب الحك سبحانه و تعالى ما يضيع يمه حك، لجن الفصول انا ما اودنها، باجر بحيل اجيب امي و نجي عدكم ءنتغده لجن اعفيني من الفصول يبن ابوي.
-هلا بيكم لجن يخوي السالفة ما عادت تخصك وحدك، السالفة هساع اهي هيبة ال ثجيل و كرامتهم شلون ترضى نسكت و ما ناخذ بحكنا .
- حككم و انا وياكم لجن اخذو تعهد لو انعادت مرت الاخرى و تعدوا اعليه ذاك الوكت نفصلهم ونهد ركابهم.
تنهد و كام ناصر :- والله يا ابن ابوي بعد ما اعرف ، لزوم تجي باجر و تدخل اعلى عمنا سلطان و اهو اليحكم بالراي، نظل احنا تحت رايه و هو جبيرنا.
- ان شاءالله بحيل الله باجر انا عدكم
- هلا بيك، يلا انا اترخص ، اودعناكم
- كل الهلا خوية.
.........
(بيت الشيخ)
اجا كاطع مدمى الراس ينز دم .. و يصارخ :- يهالوادم الحكووووووني راح امووووووت خايبين ءهلا ءهلا وينكمممممممم.
طلعو ازلام الفصر و دخلو للديوان وانطو خبر للشيخ ، من سمعت الشيخة ملوك فرفحت ، حطت الشيل اعلى راسها و ركضت جدام الشيخ
الشيخ امر الزلم تطلع برا، و دشوا القصر ، لكو كاطع كاض راسه بشماغة و كله دم .
صاح الشيخ :- شمالك ولك شني هاذ الدم
كاطع :- خمس زلام شيخ خمس زلام تلاكفوني غفل و جتلوني وما كدريت اوجدهم ( شوفهم ) طكوني و شردو وجنهم من ال ثجيل انا متأكد.
اخ يا يابه يابويه راااااااسي.
ملوك :- طك كلبه الطكاااك خوية ، مت عيني اعليك يبن امييي وينجننننن جيبن الماي لخوي الحكننننننن
الشيخ :- بهداي بهداي شمالج ، خل نفهم ، وين طكوك منين اجواك
- شيخ من كون انا متعود احرس كاع ال ضاحي و اتمشى بيها و ما احسّن الا ٥ زلام هدوا علي و تولوني
- جا من كون انت بالكاع ما شفتهم من اجوك من ابعيد
ملوك :- دخيل بختك شيخ ما تشوف اخوي شلون مصوب و انت كاضه اتحغغ (تحقق) وياه .. الماااااااااي شمااااالجن وين صرتن
جابو الماي و الشيخ طلع للزلم برا و كال الهم :- تروحو للحارس. مال البستان و تشوفون شنهو ذوله الخمس زلام الداشين اعلى ال ضاحي و دايسن بكاعنا، وتردولي الخبر ياله بسع.
و اندار لواحد لاخ و كاله :- تروح اعلى بيت حاكم و تشوفه وينه و تسأل امه كبل ساعة وين جان حاكم.
- امرك شيخ
- و اطلبه ليه كله الشيخ رايدك .
- تامر شيخنا.
اخذ الشيخ اثنين ازلام و راح للمضيف ، لكا رحيم كاعد و غريب منسدح :- ها بويه الله يساعدكم
رحيم :-هلا شيخنا
وكام اعلى حيل
- شعده غريب بالمضيف بهالليل
- اجا وراد ينام هنا كلت اله اخذ وساده وتمدد .
- ها زين، حط عينك اعليه ولا تفارجه .
- ابطن عيني شيخنا.
اجا الحرس :- امر شيخنا ؟
- شفت احد من ال ثجيل دش لكاعنا ؟
- اي شيخ ناصر ابن خضير
- ناصر ! شعده بكاعنا بهالليل ؟
- علمي علمك يا شيخ ، انا بس شفته .
رحيم :- شنهي الصاير يشيخ
- خمس زلام هادين اعلى كاطع مفشخينا بكاعنا، يكول ما عاينتهم بس جيتهم من صوب ال ثجيل .
- و هساع شلونه كاطع ؟
-بديوان القصر عد الشيخة ايتداوه
- شيخ انا و اعوذ بالله من جلمة انا بس لجن اريد اكلك بسالفة و انت بكيفك بعد .
- كول ؟
- خافنها هاي لعبة جديدة من كاطع خاطر يتجافى فصل ال ثجيل ؟
- شنهي اكو احد يطك روحه هيج طكه ؟ جتلته مو مال هو طاك روحه راسه ينز دم.
- اتعذر منك شيخ انا مو غصدي اتهم السركال لجن كلت احتمال
اجا حاكم، وكف عند الشيخ وكاله :- امر عمي كالولي الشيخ طالبك
- وين جنت يحاكم ؟
- بداري
- يمتى رديت لدارك ؟
- رديت ويا الغروب ، عليش تنشد شيخ صاير شيخ ؟
- الحارس شاف ناصر واهو يطر البستان .
- صادك يشيخ ، ناصر نزل عدنا عكب الغروب ما طول نص ساعة و مشا.
عاين الشيخ لزلامه .. ورد عاين لحاكم و هز راسه :- رد لدارك ...." عاين للحارس وكاله" ... وانت يا ضمد فتح عينك زين اعلى البستا و اي واحد يدش انا اول واحد تخبرني صار معلوم ؟
- امرك شيخنا.
........
ملوك :- شجرالك خوية ، شلون هدوا اعليك
- تريدين الصدك يخيتي موش ازلام الهدوا اعليه لجن كلت هيج جدام الشيخ خاطر اطكن عصفورين بحجر
- جا ياهو الطكك
- كواغد
- يااااع مرة اطكك يخوي شمالك تسودنت
- جا هي كواغد مرة يخوية يو جنه تفكة معيدي ما تنكض ، ما هيسيت الا و حاطة الجلمودة بهامتي ومغوشة اعيوني .
- جا شلون كلت للشيخ ٥ زلازم
- خاطر اروح لعمامي و اكللهم يكاومون ال ثجيل وتصير سد بسد ويطيحون الفصل.
بس تدرين يم زناد كل الصار من صالحي انا، من عبن الله يحبني جاب الامور اعلى مرامي .
- و شلون هيج و انت راسك مفشخ
- انا جنت رايح لعمامي خاطر لو طك الطك الكل يشهد انا موش بالديرة
- يا طك يكويطع ؟
- غريب و رحيم بالمضيف ، جانت ابالي فكرة بس راح اغيرها
- شنهي هي ؟
- اشبج لحية بلحية ؟
- وشلون ؟
- ابعد رحيم و نحرك المضيف و ابن الفصلية بنصه ، و التهمة جاهزة مجهزة ، ال ثجيل هم الوجرو النار
- خايب يكويطع لا ادور اطيح بروسنا يخويه و احنا تونه طايحين بنگرة .
- ان ضبطتيها وياي خوية نربح، و الا خليها ابالج الشيخ مطر جاي يحن اعلى غريب و من كل ولا بد هو اليخلف مچانه لو غمضت عينه، وكتها لو صار ابن الفصلية الشيخ اول شي يسويه يجيب امه و يخليها شيخة اعلى هاذ الغصر
وانا وياج ووليدج زناد نفلس من كل شي.
صدت اعليه و هي تفكر ، حجت :- و نكدر نتخلص من ابن الفصلية ؟
- لو حطيتي ايدج بيدي نكدر
بس اكو شغيلة
- و هي ؟
- كواغد
- وشمالها هاي
- لو نطغت (نطقت ) وشكت لهلها مني و كالت تعدى اعليه وكض ايدي و طكيته و تنفضح السالفة ، نروح بيها.
- سالفة النسوان خلها اعلى النسوان ، و كاغد امرها يمي، انت بس خلصني من ابن الفصلية.
- الليلة ينحل كل شي.
........
لنص الليل كاعد رحيم و غريب نايم .
اجا زلمه يصيح :- رحيم خايب رحيييييم
- ها ولك
- خايب الحك طاكين الحارس ضمد و يكولون ازلام ال ثجيل هادين اعلى ال ضاحي الحك و خبر الشيخ كبل لا ننوخذ .
كاض دشداشته رحيم و طاكهه ركضه ، ويا ما راكض رحيم ، انطك الزلمة اعلى راسه ووكع، وانرش المضيف بنفط ووج.
فز غريب اعلى لهيب النار ، كام من مجانه و كام يصيح بصوت عالي :- بوووووووووووووويه تعاااااااااال لييييييه بوووووووووووويه
فاز الزلمة اعلى صوت غريب ، كايم نازع دشداشته و يطفي بالباب مال المضيف و يصيح :- حررررررررررررررريجة يهالوااااااادم حرييييييجه المضيف احترك.
ويا ما فزع العالم ، غريب صاح :- عمممممممي اخااااااااافن عمي النار راح تاكلني.
الزلمة من حلات روحه و ابن الشيخ بنص النار فوت اعلى المضيف و هو واج ، لف غريب بدشداشته بعد ما خذت النار من ايده و ظهره.
اجت الناس فزاعه من كل صوب كلها تصيح :- المضيف احتررررررررررررك
و الزلمه و غريب بنص النار ، منين ما يريد يطلع النار تلهب و الدخان الأسود عمى عيونهم و خنكهم .
الناس تصيح بيه تطلع ، ولك اطلع و اطفي بالباب و اباب مشتعل ، اجا رحيم و الشيخ اجا بلا عكال بطرك الدشداشه يصيح
الزلمه من كثر ما اختنك اعبر الباب و وهو واج و اطلع ويا ما طالع تلهب الناس رجليه و وتشب ببجامته ، ذب غريب من حضنه و كامت الناس اطفي بيه الما طفى و بعدها النار شابه بنص المضيف
الشيخ اجا بطرك الدشداشه ، شاف ابنه فاقد و هو كام يدك و يصيح .. كلها الديرة طلعت بزلمها ونسوانها و فروخها ..
طفوا النار و الشيخ يصيح :- غريب راح يمووووت
ناس تلاكفت غريب ، وناس شالت الزلمة ، تراكضوا بيهم للمضمد ، شافه كال :- الفرخ اكدر اداويه لجن الزلمه حالته صعبه يلزمه دختور و مستشفى .
ناقلين الزلمه للولاية و غريب ضال عد المضمد يداوي بيه، التفت الشيخ لرحيم و كاله :- شنهي الصااااار يرحيم انت وين عنك عايف المضيف و طالع .
- شيخ ما عفته و العباس جيت اخبرنك طاكين الحارس و يكولون ال ثجيل هادين اعلينا ، و طلعت حضرت الزلم خاطر اخبرك و اسمعت الصار
حجه جاسم اخو الشيخ :- احجي غيرها يرحييييييم الحارس جان وسانا يطفي بالحريجة
- عمي و علي كالولي طكوه و اجيت احضر ازلامنا لا ننوخذ
الشيخ :- موش عذر هاذ يرحيييييييم انا الكلت الك عينك اعليه هاي امانتي هجي يصير بيهااااااا
ودو اعلى الحارس اجا بسع وكف جدام الشيخ، نشده تعلى طكته ، كاله :- ماكو هيج حجي انا جنت واكف و سمعيت الناس تصيح و اجيت فزاع اطفي بالحريجة
و رحيم يصيح و يكول :- الزلمه الحترك هو الكالي طكوك ، شيخ و علي هاذ السمعته.
الشيخ من حركة گلبة و عصبيته، كوم و طك رحيم و تولاه بالعكال، و هم يفارغون بيه، جره اخوه قاسم و كاله :- ازلام ال ثجيل ما راح يخلونه بحالنه خوية ذوله ازلام شر و حركة مضيفنا ما ينسكت اعليها خوية
ماخذ اخوته الشيخ و ازلامه و هاد اعلى ال ثجيل .
.....
سلطان ابيته نايم، ودو اعليه ندهوه ، كالوله :- شيخ امر ضروري
سلطان :- شنهو شصاير ؟
- يريدونك بالديوان
لابس و طالع ، واكف ابنه كاله :- بويه هادين اعلى اعلى ال ضاحي و حاركين مضيفة و يكولون ابنه المن ردحه مات بالحريجه .
- انا اخوك ، من يمتى هالحجي ؟
- كبل شوية و هساعة ال ضاحي غادين نار
كاعد يحجون و اشتعل الرمي برا ،وكف الشيخ مطر شال سلاحه و حرك الجو حرك ، و اخوه و زلامه اعلى حس التفك يهوسون ( اها اليوم التفكة تسولف و الحك ما ينعاف ..اليوم التفكة تسولف .....)
طلع سلطان وولده ، و اعمامه كلهم مسلحين :- موش احنا النندك و نسكت يمطر
الشيخ مطر :- واحرك تاااااااليها يسلطان
سلطان :- شنهي الجرى و تهدد يبن العم وان جان ظنك النا ايد بحركة مضيفك نشد راية العباس و انحلف اعلى الحك يبن ضاحي.
- خلها بعلومك يبن ثجييييل لو جان الواحد منكم ايد بحركة مضيفي وروح جلوب ذاك المات و عاف ولاده لاحرك ال ثجيييييل من اولهم اعلى تاليهممممممم
- مووووووش ال ثجيل اليتهدوون بنص كاعهم يل يبن ضاحي ان جانك رايد الطك احنا ازلامهااااااااااا
- ازلامك عاينوهم بص كاعي كبل الوجه يسلطااااااان
- ياهو هاذ المن ازلامنا
- ناصر ابن خضير ال ثجيل ، شافوه حرس البستان و هو داش اعلى كاعنا.
- هاي المالي علم بيها ، لجن بيناتنا راية العباس نقسم و العثرة اعلى الغلطان .
- و انا ناطر الراية عن اهلك و كل ال ثجيل .
طلب سلطان مهلة يومين يشوف اخوانه و ال ثجيل ويحقق وياهم اعلى حركة مضيف الشيخ مطر من كون هاذ قسم و لزوم اليقسم بيه عنه و عن اهله صادك والا تلاويه العثرة.
رجع الشيخ مطر لكاع لجن نار و تمشي اعلى الكاع، مشى اعلى بيت المضمد لكاه لاف غريب لف و يداوي بيه
:- ها شنهي اخبار وليدي ؟
المضمد :- انا اكولن يشيخ لو تخله هنا عبن صوابه جايد و يعتازله مداراه
- لا تقصر وياه يحمدان و اليخطر اعلى بالك طلبه، الاريدنه وليدي سالم يكوم اعلى حيله.
رد للقصر تلكاه كاطع و اهو شاد راسه و يثغب :- شيخ مصيبه هاي و ما ينسكت عنها يشيخنا
- ما نسكت يكاطع لجن الأريدنه منك تنصبلي المضيف و كون باجر العصر انا جاعد بمضيفي، و لحد يكلي ما يلحك من عسى تحط الف زلمه اعلى تنصيبه ، المضيف يتنصب باجر افتهمت يو لا ؟
- جلمتك اعلى عكالي يشيخ تامرنا و احنا ازلامك
عافه و مشى الشيخ و هو يحقق ويا الحراس مال البستان و عاقبهم كلهم بالفصل اعلى باله ما ادو واجبهم ما يدري الحارك مضيفه لابس ثوبه .
جانت ليلة حرك البستان من اصعب الليالي اعلى ديرة ال جلوب ، ازلام ال ضاحي حققوا ويا الجبيى ويا الزغير خافن واحد منهم شاف شي وما كاله .
اجا واحدهم اعلى ال شمخي ، و حلف شمخي عنه و عن ولده ما شافو شي ولا جانو طالعين ووهو ولده يخلصون العشا وينامون .
من خلصو وياه . دش للبيت و النسوان تتناطره خاطر تعرف شنهو الصاير .
تلكته نشميه :- ها يبو صلاح شنهي
- جايين يحققون ويانا اعلى حركة المضيف
- جا غير ال ثجيل هم الحراكه .
- ال ثجيل متبرين من هالحريجة و مستعدين يشدون راية العباس ويحلفون اعلى العثرة .
خلود :- حكهم شنهي ما صارت يعمي كلشي الحصل وانذب براس ال ثجيل ما يصير هجي .
كواغد :- من كون اخيتج ماخذه من ال صجيل تسدسديلهم و ادافعين يخليدة
- انا احجي الحك مالي غرض بالرايح و الراد
جبار :- بسجن انتن صرعتن روسنا ، السالفة وما بيها كاطع من كطعه البين كون بجاه الحسين هادين اعليه ٥ زلام ويكول من ال ثجيل عبن شافهم جايين من صوبهم
كواغد :- شنهي ؟ ٥ زلام هههههههههههههههههههههههههه
شمخي :- شمالج بويه كاغد
- يبويه خافنهم ثلثمية تفاك موش خمس زلام ؟
جبار :- شنهي بويه سامعة بشي انت ؟
كواغد :- لا يبويه ههههههههه خلها بويه خلها، خلها الكلوب مجودرة
صلاح - ان جانج تعرفين بشي يكاغد احجي ابوي حلف عنا
- لا يا خويه شعرف انا لجن هاذ السركال مالنا اغم و الله يطيح حظه كون من عبنه ما بيه خير .
اندكت الباب، كام صلاح للباب :- ياهو
سليمة :- انا خوية انا
- ها سليمة
- الشيخة طالبة كواغد تحضر عدها بالغصر
- الشيخة ؟ و شنهو التريده الشيخة من اختي كواغد
- سويلفة نسوان يخوية
- دامها سالفة نسوان جا خوش
كواااااغد .. كواااااغد .
- ها خوية ها
- الشيخة طالبتج بالغصر
- ياااااع شعدها وياي ؟
شمخي :- شعدهم الشيوخ ويا بتي
صلاح :- سالفة نسوان ، كومي يمه وصليها للقصر و شوفي شرايده الشيخة من اختنا
- ان شاءالله يمه، يلا يمه كومي .
كواغد طكيتها ركضه اعلى حجرة امي، اخذت الديرم حكيت سنوني ، و جريت كحل العرب و خطيت بيه عويناتي و كرصيت خدودي حيل حيل خاطر يوردن.
وخليت مسج و عنبر خاطر تطلع ريحتي طيبة من ادش للقصر موش يكولون هاي مزينه.
وطلعيت ، شو هاذ اخوي عليوي الله لا يطي شافني و تسودن :- شنهي طالعه مزوكه و حاطه الزواكات بوجهج هساع تتغوسلين
- يا شحاطه هي جرت كحل
شمخي :- لا بويه لا ما يصير كاغد كلبي بويه اخيج جلمته جلمة حك المرة عيب تحط الزواكات مسحيهن يبويه
عليوي :- هسه تتغوسلين جدامي لا و الحسن احط و اجهج و اجلفنه بجلافة جنفاص.
- ايييي الغسل كون ، شحطين هن كحلات من غضب الله كون.
رحت جريت سطلة الماي وغسلت وجهي بس صميت عويناتي حيل خاطر لا يطلع منهن الكحل، نشفت و جهي و ندهت امي تجيبلي العبية (العباية ) تلفلفيت بيها و مشيت حيل هاطر لحد ينده وراي و يكلي "تغوسلي بعد".
طرينا الدرب و مشينا للقصر، وصلنا هناك الوادم صايرة مكالب ، السلف كله مكلوب اعلى القصر ، حجت امي :- غطي وجهج خلنا نفوت زحمة منا الوادم
غطينا وجوهنا و درناها عن الزلم و انطيانهم كفانا و مشينا ، دشينا داخل ، استقبلتنا سليمه
:- هلا و مرحبا ، الشيخة داخل .. دشن
دخلنا و الشيخة كاعدة يشحلات كعدته، ووجها جنه الكمر حكه الشيخ لو تسودن بيها ، العيون وساع و الحاجب هلال و الوجه مرايا و الماي يلالي بركبتها من البياض.
حتى تدوهنت من شفتها هيسيت روحي افشل بصفها
الشيخة ملوك :- اهلا اهلا وسهلا بأم صلاح ، شلونكم يخالة
- ننشد اعلى خباركم ام زناد الله يطيج العافية كون ديه ، وعلي امس غدت كلوبنا نار اعلى حركة المضيف ، خو وليدي جبار صبح مصخن من القهر.
- قدر الله يم صلاح و نكول الحمد لله اعلى كل حال
- اي والله يخالة نحمده و نشكره.
- انا ودين اعلى كاغد من عبن حمدولي بطبخها جثير وكالولي الطبخ من اديها ما ينشبع منه .
كواغد :- عاينت اعلى امي و امي تنوعتلي (باوعتلي)
نشميه :- الله يسلمج يشيخة لچن كاغد مو هالكثر بالطبخ من عبن نسوان اخوتها الشايلات التركيب هي تخبز الهن من الصبح صفطة خبز و تطلع للكاع وياي.
-الشيخة جا من هاي حمدولي بخبزها، والله انا يم صلاح اعتازلي مرة نادرة لهيب و نار تكض الشغل بالغصر من كون سليمة و صبيحة كبرن و انا اريدنلي مرة اعتمد اعليها بس كونها خفيفة الشمايل اشغلها بالقصر وتاخذ حكها و زايد ان شاءالله.
كواغد :- عد عيناج شيخة شرف ليه انا اشتغل بالغصر و يا محلاها ندمكم يشيوخنا لجن انا و من رخصة امي، هم عدي ابو و اخوه ما اعوفنهم وراي، اخذ رايهم و اشوف احجايتهم و اردنلج الخبر .
- ان شاءالله ، بس هااا
- كولي شيخة
- اليشتغل بهاذ الغصر ، يكونه صم بكم عمي ، و اسراره ما توصل الباب، و يطلعها ناوي اعلى منيته، اهم شي عدنا الأمانه بشغل،
نشمية :- اي يديه حككم البيوت اسرار و اهم شي ببنادم يكون امين ، ان شاءالله مثل ما كالت بنيتي، نشوف الوليان (ولي الامر ) و نردلج الخبر.
- و انا بالأنتظار .
- نترخص منج يشيخة
طلعنا من الشيخة و انا هيج جني وركة نبك طايرة من الفرح، انا اشتغل بالغصر و الله و انفتحتلج ابواب السما يكويغد.
نشمية :- ان شاءالله ييمه بجاه ابو فاضل كون الدرب الوسيع و الحمل الخفيف و يوفكج يا يمه بكل درب تمشينه و يخلي التراب ذهب بيدج بجاه ضلع الزهرة ييمه.
- مشكورة يمه مشكورة.
ردينا للدار و كلنا لابوي و اخوتي هاذ الصار، ما مانعو لجنهم غدمولي عريضة مال توصيات يا شيلتج يا ثوبج يعبيتج يا سترج يا ضحكتج و يا حسج و رفعي راسنا و ديري بالج .. و ليله كامله هم بس يوصون
وزودها ابوي ، متمدده برا اعلى الهوى الهاب، و هو طلع بليل يشرب ماي من الحِب ، شافني ووصاح :- كاغد بويه ديربي بالج اعلى سمعتنا كون اليشوفج يصيح الف رحمة والدين شمخي اعلى هاي التربية
- شنهي بويه انت متحلم بيه .
- لا بويه اوصيج من عبنج بنيتي و كاغد گلبي و اخافن عليج.
- تطمن بويه انا بنيتك و تربات ايدك ما تطلع مني الشينة
- بعد ابوج و گلبهارد للحجرة و هو يكول " عفية عفية ببنيتي"
ذيج الليلة ما نمت من التفكير ، شلون راح اشتغل ويصير عدي فلوس و اعرس و يصير عدي رجل و اشتري لبيتي والعب لعب بالفلوس و يصير عدي حلال و اشرب منهن احليبه و اكل منهن هالروبه الطيبة و دهن الحر و اشتري الهاشمي الازرك و البسنه و اصير اسودن من الجمال جني الشيخة ملوك ، والعباس الا اصيرن شيخة و اكطع كلوب الجناين.
وهذه كانت اهم امنيات كواغد اللي ما تعرف القدر شضاملها و سبقت القدر بالتفكير و التخطيط .
ذاك الوكت جانت الناس مدوهنه بالحريجة الصارت و يمكنه موش بس ال ثجيل الوكفو انذار بسبب الحريجة، الدير الداير مداير الديرة كلها شدت احزامها من كونها حركة المضيف موش هين ، تعتبر اهانه حيل جبيرة للعشيرة .
سلطان مر اعلى ال ثجيل كلهم و حلفهم خاطر يحلف عنهم اعلى الراية ، و كلهم حلفوا عنهم و عن نسوانهم و فروخهم .
و اجا يوم القسم و نصبوا جادر كلش جبير وذبحوا الذبايح و اجوا كبار السلف معكلين و كلها حضرت هالجعدة، و ناطرين سلطان و اهله يجون اعلى القسم .
و اعلى الوعد اجا سلطان و زلامه وياه، شاف حاكم واكف اباب الجادر :- ها يحاكم شنهي الراي ؟
- عد عيناك عمي
- اوجب بظهري يبن اخوي
- تامر عمي.
وكف ورا سلطان و دش الجادر و صاح :- الله بالخير
ردوا :- الله بالخير و العافية .
كعدوا و هم يتناقشون، و الوجوه مكلبه و الكلوب شياله و اجلمة التطلع ما تطلع من طيب خاطر .
دش السيد علي والراية وياه ، زلمة يطلع بعمر ال٦٠ سنه عمامته سودة و الناس توده و تحترمه، بدخلته الكل وكفت حتى الشيوخ ، و الناس الطيبة نزلت اعلى ايده تحبها و تكله :- رايتك بيضة يل جدك محمد .
بس هو ما يرضى احد يحب ايده ، يخلي ايده اعلى صدره و يدنج راسه الهم و يكلهم :- كواكم الله بويه هلا بيكم.
وكفله الشيخ مطر و كاله :- تفضل سيد هلا بيك
كعد بمكانه ، وكال :- افلح من صلى على محمد وال محمد
ضج المضيف بالصلاة على الرسول محمد ، قدموله الكهوة ، شربها و هز الفنجان ، و كال الهم :- عساها دايمة
- يديمك سيد
- الشيطان يأمر بالفحشاء والله يأمر بالعدل و الأحسان ، و خير الأحسان الاحسان لذوي القربى (الأقربون اولى بالمعروف ) شيطان اعليمن يجي يبويه ؟
يجي اعلى المخربط ؟
اعلى الردي ؟ ... ذوله كافية اعليهم انفسهم الامارة بسوء الشيطان ما يكربهم يروح اعلى الناس الطيبة، الناس الخيرة امثالكم ، يفرق الخوان و يزرع العدوان و حصاد العدوان بس الشر يهلنا ..
يوادمنا الحقد مو خوش و يقسي الكلوب و ويل للقاسية قلوبهم.
ولقى محاضرته السيد الى ان كام و شال الراية ..رايه لونها احمر و مكتوب عليه "ابو الفضل العباس" و كال الهم ( هاي راية ابو الفضل الكطع جتافه و ما هدها اسد ضرغام طاح و ما دنك رايته من كونها راية حق )
صاح واحد منهم :- ها خوتي هااا
(كام و علك راياته ابن البدويه ) وهتفوا للرايه .
تقدم السيد و كال الهم :- اللي اعليهم القسم خلهم يتكدمون .
تقدم سلطان و الشيخ مطر ، كضوا الراية، صاح السيد :- لرفع الحقد و العدوان من الكلوب ببركة الصلاة افلح من صلى على محمد و ال محمد .... ضجوا بالصلاة، ردفها بالثانية على حب الحسن و الحسن ... صلوا .. ردفها بالثالثة على حب فاطمة الزهراء بأعلى الاصوات .. رفعوا اصواتهم بالصلاة على الرسول و اهل بيته .. و ابتدأ القسم
الشيخ مطر كاض الراية من طر، و الطرف الأخر سلطان ، و عكد الراية و قسم :- انا سلطان ابن ثجيل ال جلوب اقسم بهاي الراية راية الحك راية ابو الفضل عن و عني اهلي و كل ال ثجيل احنا ابرياء من حرچة مضيف مطر ال ضاحي براءة الذيب من دم يوسف و علينا العثرة لون جذبنا .
صاحو اللي بالمضيف :- و انت الصادك يبن ال جلوب عفاك الله من الجذب عفاك.
صاح الشيخ مطر :- و انا مطر بن ضاحي ال جلوب اتقدم بالعذر لولاد العم اعلى دوسة كاعهم .
سلطان :- طايحة تحت راية ابو الفضل .
شالو الراية و سلموا سلام ايد اثنينهم ، و جروا اديهم و خلوها اعلى صدورهم و كعدوا، و نادوا للابو الدله يفر الديوان.
و خلص القسم و طلعوا منها ال ثجيل و هدت الوادم و تعمر المضيف .
كل هاذ الحجي و ردحة محد كايللها بالصاير ، ولا احد موصل الها خبر اعلى ابنها محترك ، بينما هم وصلهم الخبر ميت.
بالصدفة و بيوم القسم دشت من برا جانت تشتغل بالكاع، دنجت تغسل اعلى السطلة الماي، امها و اختها ما يدرن بجيتها.
- خايبة شنكللها عوفيها بقهرها ، من يوم الفارجته و هي تون عيونها زوغلن من كثر البجي اعليه عودن الله يطي صبيحه تخليها تشوفه من بعيد، جا لو درت شيصير بيها
- ياهو الصاير بيه شي ؟
فزن اثنينهن :- يا جا انت اشجابج
- سرحان وليدي بي شي
- ما بيه شي شمالج انت لكفتي الحجاية و طرتي بيها محد جايب طاري ابنج
- يمه عليج العباس احجي وليدي صايبه شي ؟
- يمه لا تحلفيني يبعد رويحتي يا يمه شكلج
- احجي يمه
- اوووي خايبه كليلها انت انا رجف كلبي
- يمه شكلها متكليلي
- احجو شمااااااالكم ابني شجراله يمه حلفتج بالعباس يممممه
- يكولون مات بحريجة المضيف
كالولها هيج و كلبها فز ، جرت عباتها و طلعت بلا وعي تصيح و تبجي بالشارع .
هاذا جان اول يوم لكواغد تشتغل بيه بالغصر ، تمشي و تعاين :- خايبين شنهي ، وين عايشين بجنة الله
جا احنه عدنا بيوت و هاي بيوت ، لجن هاذ حظ الوادم ناس و ناس و احنا حظنا طيان .
ملوك :- كااااغد
- امرج شيخة
- كربي يكاغد .
- امريني
- انا سمعيت بسالفة طكتج لخوي
- السموحة يشيخة لجن انا...... قاطعتها
- ادري عنج ، و انا ما شايله اعليج ، لاله لا بالعكس انا تعجبني المرة القوية و الما تخلي احد يدنالها و يطخها حتى يو جان اخوي ... انا مرة حكاني و اوكف ويا الحك
- و النعم منج شيخة، انا طكيته من عبنه اعترض طريجي وكض ايدي
- عاشت ايدج ، لجن خلي هالموضوع سر بيناتنا من كون الزلمه ما يعيبة شي و لو حجيتي الحجاية تلوحج و انا اعرفنج خوش مرة لا تخلين هالحجي يطلع.
- على امرج شيخة.
- انا ادريج راح تعرسي اعلى حاكم ال ثجيل
- اي شيخة لجن هو اجلها يريد يروح لبغداد
- يرد يرد لا تخافين
- يسمع منج
- الاريدنه منج تصيرين عيوني الأثنين بالديرة ، موش بس بديرتنا لاله ، تتكربين اعلى ال ثجيل و ادشين اعليهم و هم تصيرين عيوني هناك
- جا تريديني افتن شيخ
- لا مو هيج ، لجن ما اريد احد بعد يكيد بال ضاحي واجبنا حفظ الديرة و امنها يكواغد موش بس واجب الزلم .
ان شاءالله شيخة
صاحت ردحة اعلى باب القصر :- وليدييييييي يمه ، سرحااااااااااان يمه
ملوك :- حس منهي هاي ؟
كواغد - ما ادري شيخه
- اطلعي و شوفي ياهي هاي
جاي تطلع، و دشت سليمة :- الحكينا شيخة الحكينا
- خير يسليمه ؟
- ردحة يشيخة تريد ابنها
- من كون هاذ حسها
- اي يشيخة
كامت من مكانها و طلعت و ردحة تشيل التراب و تهله اعلى راسها و تصيح :- سرحااااااااااااان يمه عمت عيني اعليك يممممممه
طلعت الها ملوك :- شنهي الخبر يردحة
- ولدي يمه اريدن ولدي ، اريدن رفة افاااااااااادي يمه اطوني ابنييييييييي يهالوادم اريد ابني
- ابنج موش بالقصر يردحة وممنوع اعليج تدوسين اعتاب ال ضاحي و نت بت ال ثجيل حراكين المضيف
- خايبين اننل ابو ضاحي لابو ال ثجيل لابو عوينة اصلهم كلهم يهالوادم اريد ابنيييييييي
الشيخ و هو راجع للقصر ووياه اخوانه قاسم و جاسم .. و كاطع مرافكهم .
الشيخ :- ال ثجيل و طلعوا منها ، ياهو الحرك مضيفنا ؟
جاسم :- من البداية كلت الك شيخ انا شاك بعرب لل مطشر ، جتلو زلمة من ازلامنا و موش راضين يطونا سند بالجتال و الزوم هم الحركوا المضيف.
كاطع :- انا اكولن كلام جاسم صحيح يشيخ ذوله ال مطشر ناس معذربين و صافين وسا ال ثجيل من كونهم هم الحركو مضيفنا
و هم يحجون الشيخ شاف مرة تنحب و تصرخ اعلى باب القصر، و هاي بعاداتهم جبيرة المرة تنحب اعلى باب شيخ ، واجب اكرامها و سترها.
تراكضوا للقصر و صاح الشيخ :- ياهي هاي ؟
- اندارت ردحة اعلى ندهة الشيخ و ركضت وطاحت اعلى جدامه و تصيح :- دخيلتك انا شيخ
كضة بعباته و صرخت :- بعباتك انا اريد وليدي منك
دنك اعليها و كال الها:- حاجتج مكضية يبويه لجن منهي انت وياهو ابنج
قاسم :- هاي ردحة يشيخ
- اها ، انا اخو ... كومي يمي يم سرحان كومي
- اريد ابني كالو ميت طمني كلبي اعلى ولدي شيخ
- ولدج بخير و عافية
ملوك من ورا الباب :- ما يصير توكفوان اعلى الباب يشيخ
صاحت ردحة :- اذا ابني موش بالقصر ما اريد دشته، انا اريد وليدي بس
- ابنج عد حمدان المضمد الشكر لله بخير و رحمة
اندار اعلى اخوه قاسم و كال اله :- اخذ الحرمة تشوف ولدها.
اخذها قاسم و مشى لبيت المضمد، بعده ما واصل ، اعترضوه اخوة ردحة كضوها من راسها و تولوها رفسات ، جيف طالعة بلا علمهم، و ردوها و ما خلوها تشوف ولدها.
دش الشيخ للقصر و الشيخ ملوك تستفسر اعلى الصار و هو يحجيلها، اجت كواغد قدمتله الماي ، رفع راسه و كال :- ياهو هاي ؟
ملوك :- بت شمخي يشيخ
- اهلا و كل الهلا ببت شمخي، انت كواغد موش يو لاله ؟
- اي شيخ انا كواغد
ضحك و كال :- من كون انت الشارطه اعلى زواجتج هايشة
دنجت خجلانه، ضحك الشيخ و كال لملوك:- تراه شمخي خوش زلمه ، هله هله ببنيته
- نحطها ابطن عينه شيخ ، حمدولي بشغلها و كلت اجيبنها تعاون البنيات
- زين ما سويتي ، راديون وينها
- بالحجرة توني رضعتها و نامت
- اكومن اشوفنها كلبي اشتاك الها
ضحكت الشيخة ،و كام الشيخ طلع ، دشت سليمة اعلى الشيخة :- السركال برا يشيخة و طالبج
- اي
كواغد :- مريت بوجهي اعلى الشغل، سمعيت الشيخ و هو يضاحك بنيته الصغيرة ، وكفت اعاين اعليهم :- شحلاتهم اللهم صل اعلى محمد و ال محمد ، هيج ربي و اعرس و تصير عدي بنيه و زلمتي يضاحكها .
اعاين اعلى الشيخ شلون يطك اصبع للفرخه و ذيج تضحك من كل كلبها، دار وجهه ، بسه شلعت من المكان.
مريت اعاون النساوين اعلى الاكل، كالت صبيحة :- لاله لا ، روحي اعلى الديوان شوفي شنهو البيه كشي الكاع و رتبي.
عفتهن و توجهت للديوان ، ردت ادخل ، سمعيت حس المجلفط كاعد ، لشتي كلها كشت من حسه الفيسد.
ردت اعاين اعليه شلون شاد راسه ابو خمس زلام هادين اعليه.
سمعيتهم و هم يكولون :- ما دام رجع الشيخ يوثق بيه تمام
و الشيخة تكله :- لجنه ما برد گلبي و ابن الفصلية بسبع ارواح ، من النار و طلع جا بعد وين احطك و ابعدك.
كواغد :- دخيلك ربي
دشيت اعليهم ....
رواية كحل عرب الفصل الخامس 5 - بقلم زينب ماجد
الحلقة _5
عنوان الحلقة (الثورة)
لا عاد الصبر يلچم مصب العين
ولا مثل الخلك بدموعنه أنمثل
طالت والعمر
كلما تلف بيه يطول
غم ذاك العمر من ينگضي أتعلعل.
(عريان السيد خلف )
كواغد : دشيت اعليهم چفت وانا حاطة الشيه اعلى وجهي ، جفلوا و انلصموا اعلى حلوكهم ... حجيت :- من رخصتكم اريدن اكش الكاع.
ملوك :- موش وكتج يكاغد
كاطع :- لاله لا انا اااا اكومن ، اودعناكم
طلع هو وملوك وراه ، و يوشوش ليها :- كون سمعتنا
ملوك :- ما ادري عنها
كاطع :- هي جابها عدكم تشتغل
- انا جبتها خاطر اغطي اعلى طلابتك.
- هاي موش مرة يملوك هاي فلك اسود.
- ما تكدر للمرة الا المرة يكاطع.
كواغد :- اي والله ما تكدر للمرة الا المرة
كشيت الكاع و انا عكلي مشغول بيهم، من كونهم صدك هم الحركوا المضيف و الشيخ مت عيني خلص كلبها وهو يكاوم هاذ و ذاك طلع حراكه ابيته و الماي ماشي من جواه.
خلصيت و و جاي اطلع ، كضتني ملوك :- تتذكرين يا كواغد شكتلج اول ما جيتي ؟
- كولي شيخة ؟
- صم بكم عمي .. هاذي صفات اليشتغل بالقصر و لو نسى وحدة منهن مثلا ، نسى و حجه سالفه و ما صم السانه ، ويا حسافة ينكص و يضل بلايا لسان يربي.
- امرج شيخة .
عافتني و مشت .. دشيت للقصر ، شكثر جنت فرحانة بشغلي بالقصر هساع بزعيت و جن صار قفص و مقفل اعليه و السر اليبات بصدر حرمة ياذيها ، خصه لو جانت مصيبة.
عاينيت اعلى حال القصر ... خوات الشيخ و بناته مثل الخطار ، مالهن غرض بشي يخص القصر الدور كله للشيخة ملوكة، و خادمة الشيخة ملوك ، سليمة هاي مثل چلبها الوفي .. اكثر الوكت يخلصنه كاعدات و يتوشون و يسولفن بحس ناصي .
المسؤله مال الخدم البالقصر وحدة اسمها صبيحة ، مبينه خوش مرة لجن انا من حبيت الشيخة ملوك و طلعت شيطان جزت بعد ما حبيت احد ، ظليت اشتغل و مصموم حلكي.
خلصيت شغلي، طلعت لكيت امي جويعدة غاد من للغصر تنطر ليما اخلص ، خاطر تردني .
مشيت اعليه كامت ، وردينا، طول الطريق و انا ساكته، استغربت وضعي من كون انا هاذ اول يوم الي بالقصر وانا متعودة بكلشي اهذري و اصرع راسها بسوالفي ليما دوخ و تنام.
نشمية :- يمه كاغد شمالج ؟
- مابياش شي يمه.
- مو عوايدج ييمه السكته ، شنهي تعيبانه ؟
- اي يمه اي .
- مت عيني ييمه لو خليت بنيتي تتعب، كعد و بعد لا تروحين المثلج عدها سبع خوان ييمه ما تشتغل .
- جم دوب خواني يشيلوني، لا ما اعين رويحتي محد يعيني ييمه و هاي الدنيا ينرادلها حيل و طريجي طويل .
- و ان جان يمه ما يطيني كلبي اتعبين.
- تعبي ييمه موش تعب لشة من كونه تعب مخ و وعكلي مشتت
- عليش تفكرين يمه ؟
- سولفت الها الصار و الجرى كله، ثغبت بنص الطريج ، وكامت تلطم و كالت : هاي منها و بعد لا تروحين يولون عوينة ابيهم .
- انا ما هامتني الروحة لجن شلون اسكت اعلى الحك و انا ادريهم هم الحركو المضيف و علعلو الفرخ الزغير .
- ياااااع و انت تريدين تحجين ؟
- جا اسكت ؟
- غير يوجرونه (يحركونه) بمچان المضيف والله .، اس لس اس ، منا و غاد ما الج روحه للغصر ، يو حجيتي ما يهدونج سالمة و لو اعملو بيج شي اخوتج ما ينحطون بالعب ، يهجمون الدنيا ييمه چفينا شر الطلايبن موش حيلها احنا.
رديت و انا امي بس توصي بيه، وصلنا البيت حتى ما خلتني احجي لبوي ولا لخواني ، اخ يذيج الليل الما شفت الراحة بيها ، حس بصدري فتني فت من عبن ساكته اعلى جريمتهم.
ثاني يوم ما رضت امي اروحن، لجن انا دكيت رجل الا اروحن من كون الفليسات الأحصلهن اعلى الشغل واردهن خوش وارد.
.........
حاكم:- اصباح الخير شيخنا
- يا اصباح النو هلا حاكم
- عامر مضيفك شيخ ، و ان شالله دومه يظل مضيف الحك ولهل الحك .
- يوفجك ان شاءالله .
- ان اجيت اخبرنك باجر غبشة انا طالع البغداد.
- بيها الخير ان شاءالله، ان جانت عندك حاجة كول
- بس امي شيخ
- شمالها
- رايد اوصيك اعليها بغيابي
-امانة ابوي ما يتوصى اعليها ، و اسمع راح اكتب الك عنوان ، تروح اعليه من تنزل ابغداد ، توصل هناك تسأل عن واحد اسمه " ناظم افندي" رفيجي هاذ و اعرفنه خوش زلمه ، كله انا من طرف الشيخ مطر ال ضاحي و هو راح يلكالك شغل .
دنجيت اعلى ايده احبها خاطر اشكرنه ، ما قبل، حط ايده بأيدي و سلم و كال :- حسبة ولدي انت و انا احبنك من غبنك شهم و ابن ابوك .
- الله يديم عزك شيخ.
- هلا بيك وليدي.
حاكم :- هم و زاحه الشيخ من افادي من دلاني اعلى واحد غاد ابغداد يعاوني اعلى لگوة شغل، جنت شايل هم شلون انزل غاد و شلون اندل ووين الكا شغل .
لميت هدمتي و زادي وحطتهن امي ليه بعلاكة زغيرة و كم فلس بجيبي و مشيت، صعديت الريل ، كصيت تكت و كعدت بمچاني.
كلها ساعة وارتفه حس الصفير بالقطار و مشينا متوجهين لبغداد، انا بعمري ما داش بغداد و لا اعرف بيها ، و جنت خايف من هاي التجربة لينها منطقة جبيرة ، صح السماوة اكبر لجن بغداد مناطقها و شوارعها و بناياتها اكبر.
نزلت و انا اعاين ، رغم الأزدحام .. بس عيني شاهت اعليها ، اخذت الكاغد المكتوب بيه العنوان و ظلست ياهو الأشوفه اواريه المكتوب و يدلي بيه .
ليما وصلت لكهوة واحد اسمه " حجي فخري " دشيت ،هو بسع عاين علي، كبل لا احجي ، كال :- من يا ريف انت
- ما رديت اعلى سؤال، و ردفته ب(السلام عليكم )
- و عليكم السلام
- جاي انشد اعلى حجي اسمه ناظم افندي
- وصلت ... شايف ذاك الكاعد بنص الكهوة اللي لابس قاط و رباط
عاينت ، شفته :- اي
- هو ذاك ناظم افندي.
- اتشكر منك .
عفته و مشيت للزلمه و كلت اله :- الله بالخير
رفع راسه و كال :- الله بالخير و الرحمة اهلا ابني ، تفضل.
- انا حاكم من عرب ال جلوب من السماوة وداني اعليك الشيخ مطر
- و النعم من الشيخ مطر.
- طلعت المكتوب من جيبي الانطاه اليه الشيخ، هو قراه و كالي
:- تقرب من الشيخ مطر
-عمي
- اخو ابوك ؟
- بن عم ابوي
ضحك و كال :- من ضاحي لو من ثجيل
مما رديت عليه، كام و كال :- مطر صديقي و انا وياه عشرة عمر ، امشي وياي.
مشيت وياه ، وداني لحجي فخري :- يا حجي فخري اجاك عامل جديد ديشتغل بالكهوة منا ورايح .
-عاين علي الحجي ، وكصني بنضرة من فوك لتحت، هز راسه و كال:- اني عندي اليشتغل لازم منضبط ، بمواعيدة و بشغله ،بتصرفه و كلماته و الا اني مستعد ابطلع بنفس اليوم اليشتغل بيه لو مو ناظم افندي توسطله.
- بالخدمة عمي .
- كام من مكانه و صاح :- يا رحومي
وصاح اعلى الصانع مالته ، اخذني وطاني هدمات خاصة بشغلي بالكهوة.
.........
كواغد :- مر اسبوع اعلى شغلي بالغصر ، شفت بيه عجايب الله بخلكه، من دشيت و انا اتحسر اعلى القصر من كون بيوتنا طين، لجن هسة لا والله احمد الله و اشكره المخلينا ببيوت طين و مخلين عكولنا مشغوله يا بلفلاحة يا بالاكل و الشرب و ان تعاركنه وره سويعه كلنا نلتم و نضحك.
لجن القصر شفت بيه الما ينشاف بالعين ناس تضحك الناس و ناس تحفر لناس، لجن حبيت صبيحة من كونها خوش مرة .
وبعد ما تأكدت صبيحة ما تود الشيخة ملوك و تتحسب اعليها بسرها، حطيت ايدي بيد صبيحة و سولفت البفادي كله الها .
كامت ادك و تلطم من درت الحارك المضيف كاطع و الشيخة خاطر يتخلصون من غريب.
كلت الها :- انا مربطة كلشي ما اكدر اعمل زعم اخافن اعلى هيلتي لا يصيبهم شي من حقد هالشياطين ذول.
صبيحة :- يكاغد غريب امانة بركبتنه و الفرخ لو ظل بهالحالة تجتله دام خلته اعلى بالها .
- اهو عليش عايش ابيت حميد و عايف قصر ابوه ؟
- السالفة طويله يكاغد لجن الشيخة ملوك ما تتطيب لجعدته بالقصر ، حتى من يجي ويلاعب اخوته زناد و كريم سليمة البين ما ترضاله اظل يا تخزر يا تكرصة و بظهرها الشيخة ملوك محد يكدر يحجي وياها
- شنهي محد يكدر يشكيها للشيخ ويكصبها خياته بنياته شنهي كلها تخاف
- الشيخ ينام اعلى شليل ملوك ، ماخذة عكله و ما يصدك غيرها، هالتشوفينه هيبة و و الكل تهابه و ترجف منه و بس الها يدنج الها ، غصة حبهم ماكو منها لجن هي ظالمة و هو معمي عيونه بيها.
- تدرين يصبيحة انا فكريت
- شنهي ؟
- لو ما بظلت غريب بالقصر مضرة للشيخة جا ما بعدته، لجن هي زعم المسؤله هنا اعلى كلشي و يو تأذى غريب بالقصر تطيح براسه الأذيه هالباعدته ، جا لو بالقصر هكو احد يكدر يطلع غريب من القصر ويحركه.
- جلمتج جلمة حك ، لجن شبيدنا و هي الباعدته.
- انا وياج لزوم نتعاون و بدل ما نفر من الغصر نجعد بيه و نتدهده للشيخ ملوك و نصير جريبين منها هاطر تأمن بينا ، خصه انا من عبني جديدة اعلى الشغل
- جلمتج حك
- جا هو انا من كعدين وياج ليجاي شحصليت منج غير جلمتج جلمة حك
ضحكت و كال :- لا والله يكاغد حركتي افادي من كتيلي الشيخة هي الحاركة غريب .
- مالج غرض، انا اعرف شسوي.
لليل من رديت ، مشيت اعلى حجرة اخوي جبار و كعديت انشدة اعلى علوم بيت حميد و شنهي هم ، و شحالهم و شنهي معاملتهم ويا هالفرخ ، و شنهي حال امه.
من عرفت غصته غديت تراب ، هلكثر نحت و بجيت ، خو من كال اخوة امه جاتليها من عبنها رادت تشوف ولدها ، احسن افادي وجر.
كلت لزوم ءتصرف .
.......
حاكم :- بجيتي لبغداد و شغلي بالكهوة و اسمع من الناس كل حجيهم بالسياسة و يا المعاهدة و يا نوري سعيد و يا كال الملك و يا حجت الوحدة الوطنية و يا كالت فلسطين .
دشيت بالسياسة و فار دمي بيها و من كل حيلي اسبن بعبد الاله و نوري السعيد .
جانت الحكومة عميلة للانكليز والوصي عبد الأله انعرف بعمالته لبريطانيا، خاصة و ان العراق كان يعاني اشد حالات الفقر وتردي الخدمات ناهيك عن الأقطاع الزراعي اللي اثقل كاهل الفلاح .
خاصة بعد عقد حلف بغداد اللي يساند العدوان الصهيوني بأحتلاله لفلسطين.
وبيوم 14 تموز من سنة 1958
و انا جاعد بالكهوة ، انكلبت الدنيا اعلى ساعة و الناس كلها طلعت من الكهوة الشرد و الساند و طلع يهتف ، كالو عبد السلام عارف سيطر اعلى القصر الملكي و عبد الكريم قاسم احتل وزارة الدفاع و راح يسوونها انقلاب اعلى الحكومة.
طلعت انا اهتف ويا الناس بأسم الثورة ، المؤيدين للحكم يصيحون ( نوري سعيد شدة ورد و صالح جبر ريحانه )
و بالثورة انصيح ( نوري سعيد القندرة و صالح جبر قيطانه )
وانكلبت الدنيا بهذا اليوم، ليما صارت هوسة كلت خل اردن للكهوة لا حجي فخري يشوفني عايفها و يعاغبني .
و انا امشي كضتني مرة دايما تمر منا و تنشد، اعرفها يسموها حسنية خاتون ، هي موش خاتون لجن هيج امشين اعليها من عبن اهلها زناكيل و فلوسهم متلتله وبيوتهم يكولون تارسة بغداد.
كضت ايدي و كال :- عيوني حكومي شنو اللي ديصير يكولون قتلوه للملك فيصل صحيح هالخبر ؟
- هلا بيج عيوني، و الله انا طلعيت وياهم و هالرديت ، ساعة يكولون جتلوه و ساعة يكولون بس سيطرو اعلى القصر و ضاع الحك بين هاذ و ذاك.
- و هسه شنو راح يصير
- الله وحدة اليعلم شنهو الراح يصير.
- يكولون راح يدخلون للبيوت و يكتلون البنات و يأذوهم صحيح هالكلام
- لا خاتون ماكو هيج حجي ، انت ردي لدارج و استغري بمچينج و لا تخافين سهلة ان شاءالله.
- لك عيني وحدي اني بالبيت بس اخوية و مسافر للأردن طالع بشغل .
- صكي الباب عدل واقري قرعان و ماكو شي ان شاءالله .
- الله يسمع من حلكك عيوني.
......
كواغد :- انكلبت الديرة بهاذ اليوم كلها مساندة الصورة من ضيم كلوبها هلبت يخلصون من فكرهم و ينصلح احوالهم .
و هاذ اليهوس و ذاك الينشد و ضاعت العلوم اعلينا، و كلها الزلم تروح و ترد اعلى كهوة نجيم خاطر يعرفون علوم الثورة من الراديون العدة .
انا مالي غرض من كل هاي الهوسة ، استغليت هوسة الغصر وخوفه اعلى مصالحهم و مزارعهم و املاكهم و انسليت منهم و طلعت انشد اعلى بيت زهرة واتخوتل خافن يشوفني واحد من اخوتي ، الا يكضي بيه التوبه من عبن ما يرضون بت احديثه تطلع لوحيدها
لو محرم ، لو مرة جبيرة بالعمر تطلع وياها خوفن تجيها الجلمة التايهة .
دكيت الباب اعلى بيت زهرة طلعت الي و سلميت اعليها و جعدنا نسولف و اشوفن غريب مت عيني اعليه عويناتي غدن دم من تنوعت ايدة و الحرك العليها.
- اكلج ديه جا عليش ما يروح غادي بقصر ابوه ، شله بجعدته هنا بهالبيت الطين .
زهرة :- والله ديه انا حاوليت يظل غادي لجن الشيخة ما ترضى و هو يكره دشت القصر زعم كلما راح ليغادي تعارك ويا زناد و تجاتلو، و ذاك يطرد بيه و هاذ يغتاض منها و كره دشت القصر .
- ما يصير ديه ما يصير انا راح اكللج شغيلة و اسرنج بيها من كونه الشاهد الله حبيتج و انشرح ليج صدري ، حركة غريب هاي وراها الشيخة ملوك و اهي ناويه اعلى جتلته ، وظلته هنا بمصلحتها من عبن ما تكدر تضرة يو جان بالغصر و بمسعوليتها.
وانتم يديه يو طلعتو من هالطلابة و طيحت الاخرى اعلى روسكم و جتلته للولد شتكولون و شتحجون ، الا وعلي ال ضاحي ما يهدونكم الا و يهجمون هالطين فوك روسكم
- اسكتي دية جا غير بلانا بلوة بحرجته (بحركته) من كون احنا الحرجنه موش هم الودو اعليه و شعلو الديوان .
- حكهم جا غير خاله و مأمنه عدكم و الأمانة يدية موش هينه.
- اعرف يدية موش هينه لجن عينج تشوف الحال ما يسر عدو ولا صديج عايشين اعلى هالولد و اعلى هالفليسات اليدزهن الشيخ مصرف ليه .
- ولو بلتكم الشيخة تفيدكم فليسات ، جا ديه من كون مات و جتلو وحيد من وليداتج تفيدج فليسات يبعد عيني .
- يااااع اسم الله اعلى وليداتي جا غير اموتن
- جا ما غادي قنعي الولد يرد للقصر و يركد بيه و انا لو اجا عيني اعليه من كونه مظلوم و الله يعاين للمظلوم يديه و ينصر اليكوم وياه و خيعونه الينصرله مظلوم.
جاي نحجي و كبت الهوسة ، طلعنا من البيت ركض :- ياااا شمالكم
- خايبين يكولون جتلو السركال كاطع
- شنهاي
- الفلح كلها هاجة و يكولون عبد الكريم قاسم ضد الاقطاع هالطلعت الفلح انتفضت و كضولك السركال كاطع بيسوا بيه و كضوا بيه التوبة ، ناس تكول مات و ناس تكول عدل .
- ياااااااااع صكد .. خاب كللللللللللللللللللللللللللللوش .
وشلت عبيتي و كمت اهوس بيها انا و زهرة بنص الشارع ، و انا فزاعة و اهوس و اعاين اخوي جبار غاد بالعجد (الفرع ) يتمشى
ياااااااع .. كضيت عبيتي ، ضميت وجيهي و طلعت بس اعوينتي، وطكيتها ركضة اعلى القصر، و گضيت الطريج كله اقرا قرعان عبن انا حافظة بس الفاتحة و الاخلاص من خلصن و كلساع اعيد بيهن كمت انعى اعلى الحسين هلبت الله يستر اعليه و ما يشوفني جبير اخوي.
وصليت القصر و التفاكة داير ما داير القصر ، كربيت ليهم شو هاذ شال التفكة و حطه بوجهي :- ياهي انت
- خاب دميل التفكة لا يشوفني اخوي دمييييل
دفعيته هو و تفكته و دشيت اعلى القصر
لكيت الشيخ بالديوان و اخوته و زلامه كلها مسلحة
- يااااع شماله الشيخ ؟
دشيت داخل ، لكيت الشيخة ملوك تلطم و تكطع بشعرها اعلى اخوها و لهسه ما يعرفون خبر عن كاطع ، الديره كلها واجه اعلى الثورة
يكولون انتهى زمن الاقطاع و لزوم ننتفض و نرد حكنا ، لهذا الشيخ سلح ازلامه خوفن من غيض الفلح لا يلوحه
حايزو البستان و التفو اعليه كلها مسلحة خاف يحركونه يو يخربونه، و حرسوا القصر البيه اهل الشيخ و حريمه، و مضيفه غاد كبار العشيرة كلها بيه، خلص الشيخ اوامرة بالقصر و توجه للمضيف و زلامه وياه تحرسه.
اليوم يوم انتقام الفلح من الملاجين .
ويهتفون ( عاش عاش عاش الزعيم عاش عاش عبد الكريم )
مشيت لصبيحة :- ديه شمالها الناس تسودنت
- الوادم جتلها الفكر يكاغد و ما ظلت الهم حيل غير الثورة خاطر يخلصون من الأقطاع و جوره اعليهم.
- و المجلفط شعلومه ؟
- ياهو هاذ ؟
- خايبة شمالج ديه هاذ الأغم اخو هاي
- مال علومج ديه ؟
- خاب الا اكلج راح من بالي اسمه الاغم
- جا يا مكثر الغمان ديه ياهو الاتذكره منهم وحيد ثنين
- ايييه تذكؤته، كويطع
- ياااع خايبه يكولون جتلوه سبحان ربج ما فات اعليه حوبة هالمظلومين ذول و اجت ساعته.
- حييييل بعد ايدي
- خايبة اسكتي لا يسمعنج و يبيسن بيج
و اعاين اعليهم القصر انهد فوك تحت من ورا هالثورة هاي، كلها خايفة و يكولون هاذ الزعيم طالع بالراديون ويحجي ويا الوادم .
((تم اسقاط الملكية و اعلان العراق جمهورية عربية ))
لهناك و سمعوا اهل القصر الخبر السركال ما ميت ، لجن جاتلينه جتلة عدلة منعنعين ضلوعه، كاسرين اثنين من ضلوعه و كاسرين ايده و رجله ومخربطين وجهه .
و انكلبت احوال الوادم فوك تحت بعد هاي الثورة، اطلقوا على الزعيم (ابو الفقراء ) من كونه ناصر الفقراء ووزع الهم اراضي . و سحب املاك الشيوخ و الملاجين وفعل قانون ( من اين لك هذا ؟ ) و طبقه اعلى الكل من المواطن الى اكبر راس بالدولة ، و اخذ منهم كل الاملاك المتعدين عليها و د الهم التابع الهم بس .
الشيخ مطر من قديم الزمان كبل جلوب و عن اجداده هم شيوخ من زمن العثمانيين و جانت الاراضي وسيعة سيطروا اعلى الاراضي و خلو الناس تشتغل عدهم ، من اجا الزعيم سحب منهم كل هاي الاراضي و انطاهم املاكهم الحقيقية التابعه الهم بس ، ووزع الاراضي على الفلح .
ام حاكم حصلت كاع
و شمخي و اولاده حصلو كاع .
و حميد و زهرة حصلو كاع.
ورد غريب لهله بعد ما زهرة خافت من صكد اعلى ولادها من جور الشيخة ملوك و ردت الولد لهله و تعذرت من الشيخة ، بس ضل غريب متعلق بيها و هي متعلقة بيه ، بس الخوف الخلاها ترده .
اما حاكم فطابتله عيشة الحضر يكره الفلاحة و يكره سوالف العشاير و كل ما يكل لامه خل اجيبج لبغداد ما ترضى .
فمن حصلت امه كاع من الحكومة بدل ما يزرعها قرر يبنيها بيت بدل ما يزرعها ، و صكد اداين و لم منا اليعرفهم و جاب ، و كام يبني شوية شوية.
اما شمخي ، فقرر يبني الكاع الاخذها من الحكومة لولده ، كبار وبلا زواج ، فقرر شويه شويه يبنيلهم واحد واحد ليما يزوجهم كلهم على هل عنده
.... بعد مرور سنة .
شمخي راح شكاي للشيخ مطر ودش اعلى ديوانه
- السلام اعليكم شيخنا
- اهلا و عليكم السلام ، هلا ابو صلاح
-والله يا شيخ انا جاي عندك و رايد اشكيك.
- تفضل ، مكضية ان شاءالله .
- انا انطيت بتي كاغد لحاكم لجن يا شيخ مرت سنة و البت محد مر اعليها ، يردونها خل ياخذون مريتهم ، ما يردونها لا يوكفون بغسمتها ، البت هم تكبر ولون كبرت يشيخ بارت و انت ما ترضاها اعلى بنياتك
و انا من سمعيت ابن خضير جاي من بغداد كلت اجيك و اشكي يمك هلبت تحاجيه و تردلنا الخبر
- لا حكك حكك ما حجيت الا الحك، ما يصير يوكف بغسمتها و انا الصدك اودنها لكواغد عبنها مرة مدبرة و نادرة و خدومة من يوم الشتغلت بالقصر و لليوم ما سمعيت حسها .
- الله يطيك العافية ، انا اكومن و انطر الخبر منك .
- بالليل الخبر يمك ، تامر يبو صلاح
- لا حشى شيخنا امت التامر و نحن ازلامك و اعوانك
- عمي و عكال راسي هلا بيك.
راح شمخي، وكف الشيخ و صاح :- حميييييد
- امر شيخ
- اندهلي حاكم يحضر عندي الساعة
- تامر شيخ .
ودو على حاكم يحضر عد الشيخ ، بسع اجا
حاكم :- الله بالخير
الشيخ :- الله بالخير و الرحمة
- كالولي الشيخ طالبك و اجيتك اعلى كفى وجهي ، امر شيخ
- تفضل يوليدي
- تامر
كعد .. حجه الشيخ :- كبل سنة بيت شمخي هدوك مرة ، و كالولك ما نريد لا مهر ولا فلوس مشترين ازلمه كبع و اخذ ، لجن طالت الامر يبني
- و انا عد كلمتي يشيخ لجن انا كلت اخلص بنيان بيتي و و اجمعلي جم فلس للزواج و اخذها
- الناس ملت يحاكم و شمخي شكاك يمي و يريد مني خبر ، تريدها لو نردها
- بس البيت بعده ما كامل شيخ
- اخذها و اعلى كيفك جمله جا شنهي طالبه منك غصر هي ، كاغد بنية حبابة و نادرة و تعاونك اعلى بيتك و لو خذتها هم يصير بيتك .
- البيت بس عمدان شيخ بلا سكف
- سكفك اعلية ، انا احطلك نايلون و جينكو ليما يصير عدك و تبني بعد ؟
- وصاية الله و صايتك شيخ ، هاهي اعتبر البت من باجر ابيتي
- نتوكل اعلى الله و نروح خطابه الليلة ؟
- نتوكل .
- جعدتك هنا شكثر ؟
- عشرة ايام ، جيت البارحة و ما ظالي بس ٨ ايام
- انا من الساعة امر حميد ياخذ زلام و يعاونونك بالبيت ، و ان شاءالله على بركة الله واهل البيت يتم.
- اتشكر منك انا ما اعرف شلون اجازي افضالك علي، غركتني و كلما زدت تخجلني .
- خايب شو جنك صاير تحجي مثل الحضيريه شنهي نسيت اهلك لو طابتلك بغداد ؟
- ههههه بغداد حلوة شيخ ماكو احد يشوفها لا ما يعشكها.
- ههههههه وليدي انت هم نفسك ياله و خلنا نزوجك بهالجم يوم.
- ممنون شيخ .
مشى حاكم من الشيخ و راح بلغ امه ، و امه فرحت حيل بالخبر ، و لبس و تعطر و حضر رويحته خاطر يروح يخطب ، و اخذ امه و اثنين من حبايبها و راح تعلى الشيخ لكا الشيخ محضر اخوه و زلمه جبير بالعشيرة ، و مرو اعلى اخت الشيخ الجبيرة و اخذها وياه ..
وراحوا لبيت شمخي ..
... كواغد :- يمه احطن كحل يو لا ؟
- لا يمه عيب شيكولون اعلينا بتهم مزوكة و عدها سوالف
بهية :- شنهي عمه غير جاينها خطابها يدشون اعليها و عيونها بيض ، حطي حطي
كواغد :- خايبة انا صاير احبنج كن كون صايرة حكانية
خلود :- جا انت بس اليحجي بحكج تحبينه اليحجي الحك ما تحبينه
- و انت الصاجه ، ما احبنج
- ياااااع
- وجعة امي كون
نشمة :- ياااا كويغد
- يمه موش وكتج هسه ، الزلم راح تجي خلني احضر هدماتي .
تغوسلت و سويت شعري ضفيرتين و حطيت مسج و عنبر ، و حطيت لعويناتي كحل هالخفاته ، خافن اخوتي يشوفوني عيب يكولون متزوكه للزلمه ، زحمة
حكيت سنوني بديرم و كرصيت خدودي ، و رديت ضفايري اعلى صدري خاطر يبينن و كعديت انطر الخواطيب.
و اصفك :- راح اعرس احو احو راح اعرس ..
اندكت الباب
احسن كلبي خفك و ضاعت علومي، هيست روحي طلعت من الرجيف .
الشيخ :- السلام عليكم
شمخي و ولده ٧ .. اهلا اهلا و العليكم السلام ، تفضلو تفضلوا
الزلم كعدت بره اعلى الحصير الفارشينه وموزعين اعليه الوسادات ، و النسوان دشت داخل ، يشوفن كواغد
هلهلت ام حاكم :- كلللللووووووووش
كواغد دنجت خجلانه و خدودها حمر ، و ما رفعت راسها، و ام حاكم تكلب بيها ، حتى ظفايرها شالتهن و شافت علباها خاطر اشوف المرة الماخذتها لأبنها زينة يو موش زينة
الجناين قدمن جاي وماي . للنسوان و انطن الصواني للزلم يقدمون .
لهناك و صاح الشيخ ( نقرا الفاتحة) .. رفعوا اديهم و قروها ، و هلهلت ام حاكم و هوست ( نتشكر من عمها و بوها نتشكر من كال اخذوها )
و حجه الشيخ :- و انا عد وعدي اعلى شرط كاغد و من باجر الهايشة و الخمس طليان يجنها.
من سمعت ام حاكم بالهايشة و خمس طليان رادت تنجلط من الفرحة اعلى كثر ما هوست و دبجت .
كام الشيخ و كال :- حضروا المرة بعد باجر ناخذها ان شاءالله .
كواغد كلبها يرجف رجيف من الفرحة ، طلعو الخطابة و امها ادكلها و الجناين يصفكن جذب ، من كون اجتها هايشة .
لجن ابوها عزل .. ما راوه وجهه الواحد عبن ضاج اعلى طلعت كاغد كلبه .
اجن الحبايب يعدلن بكواغد ، دكت بحنجها و بديها و برجليها ، و الشعر لمطغته بطين خاوة و غسلته غده مثل الماي يلمع و ناعم و طلعت يا مزيونه يا حلاتها مجوجبه اتجوجب .
للعصر وصلن الهايشة و الخمس طليان من الشيخ .
شافتهن كواغد لو وكف كلبها ، حطت الهايشة اعلى صدرها و حضنتها و تحبحب بيها ، غوسلتها ونظفتها و حتى بمسج دهنتها خاطر ريحتها تطلع طيبة
وكال :- من وغاد هايشتي اسمها فرحة من عبن انا ما فرحيت بحيات بكثر ما فرحتي بهالهايشة المزيونه.
و تدهن مسج بالبقرة و تصيح :- موتن و طكن كهر ، يمه يفريحة كلبي يمه ، هايشتي حبيبتي اعلى عناد ذوليج الناس يمه .
و الجناين لو بودهن يحطنها و يجتلنها ، لجن شيخلصن لو كربن اعليها .
اجا يوم العرس .
و غسلت و تحضرت و الدكة البحنچها يا حلاتها ، و لبست الچرغد البيه الشراشيب ، و ابوها و اخوتها لاميلها اعلى الروس و مشتريلها چنگال ذهب و هم حطته ،و حجول امها الفضة مال العرس ، هم خلتهن برجليها ومعاضد بديها .
ومشت المزيونه و هي تجر بهايشتها و طليانها وراها، و الحبايب شايلا بقجها و يصفكن الها .
لجن طلعت مكسورة خاطر من عبن ابوها ما سلم اعليها، ما تحمل يشوف بته تطلع من البيت ، مسح دموعه و طلع من البيت كبل طلعتهة .
مشت و تجر بالهايشه و تحس بدموعها التهل اعلى ابوها.
نشمية :- بسج يمه بسج ، كلنا اعلى هالطريج و فاركنا اهلنا.
و حاكم عدل هندامه و تحضر و فرحان بعرسه ، و فرش الحصيرة و الجودليه بالغرفة
ما جان عده غير هالحصيرة و بريمز و جدرين طبخ .
هاذ كل اثاث بيته.
وجابو كواغد بالهلاهيل و الصفكات مشي لبيت رجلها ، و ، امه طابخة هالعدها للمعازيم ، هم موش جثيرين ، ٢ زلم صحبان حاكم ، و ٤ نسوان حبيايب كواغد .
كعدوها اعلى الحصيرة الخوص و هي مدنجه عبنها عروس ، و النسوان يدكلها :- فصوص روبه يا كفاها وين دورها ولكاها.
لحد ما زفوهم لحجرتهم .
دشت كواغد و هي مدنجة ، و خايفة من عبنها عروس و زلمة غريب لا شايفته و لا تعرفه راح يدش اعليها و دكات كلبها يا علاواتهن .
دش حاكم و هي ضاعت علومها
كال الها :- ها الله يساعدج
ما ردت عليه، مشى شوية بالغرفة و هو يفتح دكمة دشداشته من كونه هو هم اول مرة يصف وياها.
ادوده و ضاعت علومه، كعد يمها ،
ما عرف شيسوي ، غير شال الدشداشة و طر
كواغد :- ياااااع فلك
- خايب شمااااالج
- ميل عني يلما تستحي
- خايبة تعاي جاي شنهي غير زلمتج انا
- ميل عني ، ولك بوييييييييييييه
- عوينة ابو اصلج ، ولج ردي
ما ردت اعليه دفعته و طلعت لنص البيت و تصرخ بعلو حسها :- ولك ءهلا ءهلا يلخلك بووووووية
اجنها النسوان يركضن :- ولج هااااااا ، احتركتوا ، حية طبت تعليكم
كواغد :- يمااااااااااي تعالن لية يمه
ولطمت حيل و هن بلا وعي لطمن
و ويا اللطم دكتلهن فزاعية
عافني و مشن والباب سدنه
احوحو
دش عليه الزلمة وعيب اعرفنه
احوحو
جر جدمه و تيگرب و اسمع الونه
احوحو
ومن شال هدومه
ها ومن شال هدومه
حيلي اهتز وتوهدن ... من شال هدومه
وحيلي اهتز وتوهدن
احو احو احو
حاكم :- خايب عوينة ابو اصلج شهرتينا تعاااااااااي
رواية كحل عرب الفصل السادس 6 - بقلم زينب ماجد
الحلقة_6
(عمل جديد)
موش احنا ياهو الچان يفهم حچينا
احنا الضحك مرات رمز البچينا
( عريان السيد خلف)
كواغد :- احو احو احووووووو
حاكم :- خايبة تعاي جااااااااااي شهرتينا
ام حاكم :- خايبات كفن اعن اللطم خل نعرف شمالها البت .
كويغد :- ميلوه عني ميلوه ، مايستي و حات الحسين ما يستحي.
حاكم :- يمه رديها اشتهرنااااااا
خلود :- ياااااااع خايبة كويغد عايفة ازلمتج ليلة عرسج شنهي تسودنتي
كواغد :- والعباس ما اردن ، هسه تردوني لهيلتي ، انا ما لي كعدة ويا الفيسد .
ام حاكم :- ياااااع تكولين اعلى ولسدي افيسددددد ، يممممممممممه .
رادت تهد اعليه و كضنها الحبايب و كواغد تصيح :- لاله لا انا اردن لهلي
و بهية :- شتردين ولج اركدي ، ليلة عرسج يخايبة لا تنفضحين
- ولكممممممم الا اگلكم يشيل بثوبييييييي و العباس لو درو بيه اخوتي الا يكصبونه لهالفيسد .
حاكم :- عسنها ساعة الكشرة ولج فضحتيني الوادم كلها درت ردي ولج
خلود :- يا خوية جا انت عليش لابس دشداشتك مكلوبي .
- خاب هو انا عاينت روحي ، ابتليت اعلى رويحتي طريت الدشداشة ، ولنها تهج اريد اربي الدشداشة وين طريتها ما عاينيت دربي الله لا ينطيج يبت شمخي.
ام حاكم :- يمه دكول يا الله و دش لحجرتك و احنا هساع نحط عكلها براسها و نردها ليك.
- يمه الوادم كلها سمعت حسنا انشهرنا وعلي.
- هاذ الصار يوليدي لا تحرك بأعصابك درد ييمه و هسه نجيبها الك.
رد حاكم للحجرة و كواغد كاضة الباب تريد تهج، و نسوان اخوتها يجرن بيها ، وهي تصيح :- ولجن اخوتي ما يرضووووون يذبحون لو درو زلمة كض ثوبي.
خلود :- خايبة غير زلمتج اعليش يذبحونج ، جا هم ما عدهم نسوان ، هاي الفروخ منين صارت من فطر الحايط، هههههههههه فلشج كون ، دهر الدهرج شهرتي الزلمة ولج ردي.
- ياااع و ارضى يشيل ذيالي
- ولج ذيالج شنهي ، جا غير مرته حلاله و ابوج صار وكيلج و عقدلكم السيد غاد.
- يا و العباس ابوي ما يرضى
ام حاكم :- خايبة من عوينة ابيج ، ردي .
- يااااااااع تشتمين ابوي عزيز گلبي ، هدوني اعليها.
و كضنها النسوان و هي تريد تهد اعلى عمتها عبنها شتمت ابوها، تعال يحاكم ، كضها من زندنها و جرها و هي تصيح :- ءهلااااااااااااااا يهالوادم تعاااااااااااالو ليه
جرها و خلها بالحجرة و صك الباب .. و اتفاهموا بيناتهم ، عاد جتلته جتلها مرة و رجال بيناتهم يتفاهمون.
كعدت كواغد الفجرية، فكت عينها، لاهو مچانها و لا هو بيت ابوها، وزلمة نايم بصفها، ضحكت :- ياااا جا طلع العرس حلو، شماله ابوي ما زوجني من زمان وين جان ضامني .
جا انا ناذرة لو عرسيت احبن زلمتي من علباته، دنجت اعليه و هو نايم و حبيته بعلباته، فز و صاح :- يااااهو هاذ
جفلت و رديت لمچيني (لمكاني) :- انا انا كاغد شمالك ، لكيت خيط طالع من دشداشتك و كطعته بسنوني .
ضحك هو وكعد و كاللها :- صبحية المباركة ان شاءالله.
جتلتني المستحه و دنجيت ، وما رديت اعليه .
كام من مكانه، و انا لميت فراشنا ، حجه :- عليش لميتي ؟
- جا غير كعدنا
- ضحك و طلع، شماله هاذ تسودن شو بس ءيتبسم و وءيتمضحك .
طلعت ، كال :- مامش ماي
- سهلة اشدي عبيتي واروحن اجيبن سطلتين من الشط و ارد.
- لا خلج انا اليوم الأجيب، بعدج عروس لا اطلعين ليما يغبط السابع
- عليش عود .
-يكولون تصيبج چبسة، وبعد ما يصر عدج فروخ .
- ياااع صكد ؟
- اي اي
اخذ سطولة الماي ، انا ما عونيت يمشي خاطر اروح اشوفن فرحة گلبي .
مشيت للحلال :- كطعة گلبج كون يجسومة وين موديه الحلال هنا ، اووووي مت عيني ، فريحة كلبي ، عزيزتي ، تروحلج فدوة جسومة تغار منج و حاطتج هنا من كونها ما عدها هايشة مزيونة مثلج .
وكمت اهوس للهايشة (يجسمة اطلعي من البيت و البيت اجو فروحته )
تفكديت الحلال، جويعانات مت عيني، جا هسه منين اجيبلجن علف ، اروحن لخوي جبير ، لاله لا عودينه انا انا اوصي خلود و بهية اخلي اخوتي اليجيبولي .
كمت اراعي بيهن ، بس ما يحملن الجوع خفت اعليهن يموتن، كلت خل اطكنها ركضة لكفا القصر هناك العلف ظال مال حلال الشيخ ، اخذ منه و اجي.
خذت عبيتي و الشمس بعدها ما طالعة ، ركضت جبت العلفات و اجيت ، لكيت حويكم مخوصر وواكف بالباب، و العلف اعلى راسي :- وين جنتي ؟
- رحت اجيبن العلف مت عيني الحلال ميت جوع
- جا انا موش كتلج ما اطلعين منا للسابع
- يا وعلي نسيت ، ااتعذر منك انه ما اعيدنها بعد و العباس.
- خوش خوش ددشي هسه كبل لا تكعد الوادم.
رحت حطيت العلف للحلال ورديت ، لكيته مغوسل، كال :- جبتلج سطلت ماي اسبحي
- عليش اسبح امس تغوسلت غسلة موت ، وعلي ليفيت الحد ما طلع جلد اخر.
- ما يصير يكاغد لزوم تسبحين ، و تكرب ليها و ووشوش الها ، :- ياااع صكد
- اي ، روحي ياله
- جا انا ما كلت باطل اخذت هدماتي و رحت تغوسلت، لكست النسوان كاعدة، صحت بيهت :- شمالجن الشمس طلعت و انتن نايمات ، ياله اكعدن نفض شغلنا.
جسومة :- جا انت شمكعدج الغبشة ، عروس اركدي بفراشج .
- لويت حلكي ما عجبتني، مدري ليش هالمرة ما دشت گلبي.
جابونا الريوك و تريكنا ، و طلع حاكم و انا ظالة بهالحجرة محبوسة ، عودينه لو ردت اتفسح، اروحن يم الحلال.
حاكم ، امشي و اغني ( انا و خلي تسامرنا و حجينا بنزهة و الكمر شاهد علينا )
وصلت لبيت جبار دكيت الباب بدكة طبل و اصيح :- والعذيبي تنسممم عبير الورد مشتم....... جفلت من طلعلي شمخي
- ها بويه
- ها عمي
- كاغد بيها شي ، شجرالها تحجي، انا اعرفنها ما تحمل فركة اهلها.
- لا عمي تطمن ما بيها شي ، لجن انا رايد جبار .
- شنهي يا بويه خرعتنا لدالي كاغد بتي صارلها شي.
جبااااااار جبااااااااار .. تعال حويكم رجل اختك يريدك
جبار :- شنهي متحلم بيه بصباح عرسة شرايد
حاكم :- تعال خوية اخو مريتي تعال
- هلا
- و ستين بلا .
- شرايد
- رايدلي سطلة بس اتعلى و امشي لهيلتي .
-حاكممممممممممم شنهي تسودنت
- جا انا زعم حلفت لا ما سويتها البس شيلة امي و اطر السلف ترضاها اخيك يسويها
- لا اخيي ولا اعرفنك امشي منا فارج .
- و علي اخوي و حزام ظهري ، بس لو تحضرلي سطلة الماي، شمالك.
- حاكم تروح منا لا وحات چلوب اثكل امك بيك
- اناااا اخوك، عليش ولك ، جا انا موش نسيبك و فرحت بيه و خلصيتك من البلوة اختك.
- لا حاكم عليك العباس ، خلينا خوان لا تخربها بيناتنا.
- ههههههه جا شربنا استكان جاي
- امشي للكهوة نطلع
- خايب حتى ما تلكاه متفح
- نكعده و نفتحه على ايدنا
- وعلي انت مو كودك نمش للكهوة، اعرف تفكيرك، جيف انا البارحة عرسي اعلى اختك .
- والله عوينة ابيه اليطلع وياك، و انعلبوك لابو الخلفك و لو خطت جدمك عتبت بابنا و العباس لكص جدمك .
- هههههههههههههههههههه
نصبت اعليه و ضحكت شوية، رديت للبيت، لكيت النساوين تطلع :- ها وين
- نرد لهلنا
- لا لا مامش طلعة ، ظلو اعلى الغدا .
- دايمة ان شاءالله و يسعدكم.
- هلا بيكم.
دشيت للبيت :- ها الله يساعدهم
جسومة :- هلا بيك يمه يبعد كلبي يا يمة تعيبان اسويلك اجل.
- لا يمه عساج سالمة
مشيت للحجرة و صحت اعلى كواغد ، بعدها جاي تطلع ، اندكت الباب و صاح شمخي :- هاااا وينهم
- جا شنهي اهيلتج ما راح يكفون ؤ الجناين تطلع و ابوج يرد
- ياااااع جا تريد تطرد اهلي
- هلا بيك عمي هلا تفضل
كواغد :- انا شفت ابوي ، و انا صرت بنص اهدومي ، ركضت اعلى الحجرة ما طلعيت ، اجت امي اعلى الحجر. تسلم اعليه و تنحب جيف عفت البيت و عرست ، و انا هم نحت وياها.
- جا يمه ما تكومين تسلمين اعلى ابوج
- ياااا يمه والعباس لو هسه تذبحيني هم تطلع
- عليش ولج ؟
- معرسه و اطلع لبوي ويباركلي اعلى عرسي يمااااااي ، شيفكر و شيكول اعليه ، لاله لا يمه ما اكدر والله
- عليش يمه غير عرس اعلى سنة الله و رسوله ، جا ناهبج هو و تستحين .
- لا يمه عليج العباس ما اريدن اطلع فشلة من شيبات ابوي. عودينه سلميلي اعلية .
-وااله تسودنتي يكواغد .
شوية و ابوي صاح :- يلا بويه
نشمية :- اي اي ابو اصلاح اجينا
- يلا يمه انا اروحن بالمبارك ان شاءالله صيري سباعية عفية بنيتي .
- سلميلي اعلى خوتي يمه و حبيلي فريخاتهم.
حجيتها و بجيت ، حضنتني هي و بجت و تكلي : شمالج يمه موش بعيدين يمتى ما ملتي ميلي اعلينا .
- ان شالله يمة .
راحو و انا امسح بدميعاتي ، وظليت مكدرة اعلى هيلتي عبني متعودة اعليهم و اعلى جوكتهم و هوستهم ، هنا البيت يصوصي ، طلعت عمتي و حاكم نام ، ظليت اصفن ومكابله الحلال .
- ها يكاغد ؟
- ها يبعد السلف كلهم
ضحك و كعد يمي :- شو صافنه بزمانج شمالج
- لا هيج حسبات ما بيهن نفع
- انا ما ظالي غير ٤ ايام و اردن لبغداد ، تروحين وياي ؟
- جا و امك ياهو اليظل يمها
- ما غصدت نعيش غاد، لجن كلت عروس و اطلعج اشوفج بغداد.
- لاله لا و الحلال ياهو اله ، روح انت انا اظلن هنا و ارعى بيتك .
- بكيفج، عوفي شغلج ابقصر الشيخ ما يحتاج انا اوديلكم مصرف.
- جا شيصير هالمصيرف هاذ، النا يو للبيت يو للديانه
-هاي بعد ليما الله يدبرها .
- كوم التعاونت ما ذلت ، انا وياك نشتغل ليما نبني البيت ونوفي الدين عود ذاك الوكت اعوفن الشغل.
الا صدك اريدن اكللك شغلة
- شنهي ؟
- تضكر حرجة المضيف كبل سنة
- اي ؟
- هاي الشيخة ملوك حرجته هي و كاطع
- عليج العباس، انا جان ابالي كلت بس اعرس اكللك ، بس انت طوليت بالعرس .
- و ذبوها براس عرب مطشر و ثكلوا اعليهم بالفصل ، شنهي ذول من شياطين.
- ما تريد غريب ، تريد تخلص منه، عمت عيني اعليه شايف المر منها و الشيخ ما يدري بشي هالدور الفرخ ما يشكي و انا اتحرمص اعليه.
ضل صافن و كال :- هاي ملوك ما حد يكسر خشمها
-جا غير تكل للكمر غيب و انا بمكانك الحسن العليها ما على مرة جنها مسيحية حمرة صفرة.
- عوينة ابو النسوان كل الطلايب من جواهن
- ياااااع جا انا شلي غرض
- موش اغصد اعليج انا اغصد
..... مرت ال٤ ايام و خلصت اجازة حاكم ورجع لبغداد.
و انا ظليت و يهالعمة الفلك ، موش عمة غضب الله ، هالكثر ادردم.
هالدور عروس و ما اكدر اعلى الطلعة و ظالة اعزل بهالبيت المغبر، و يو اكبال هالحلال و اكعد و يفرحة اتسامر اخيرلي من جعدة جسومة المعذربة (الوكحة )
بطلاع الروح خلص السبوع و يامن يطلعني و يشوفني البستان و اشمن ريحته، اول ما رحت اعلى هيلتي ، اشتميتهم افيش يديار اهلنا .
التموا اعلية فروخ اخوتي كلهم صاروا داير ما دايري ، انا هم ضامتلهم المصغول مال عرسي ، طلعته و انطيتهم الهم لجن ما كفن.
كلتلهم اليمص شويه يطي لخوه يمص المصغوله وياه.
الا واحد بيه محمد اسمه زغير هو لزك اعلى فادي من عبن مشتاكلي و الجناين فرحانات بيه هلي التحطلي جاي و هاي التسعلني ماكلة يو لا، و هاي التنشد اعلى علومي ويا عمتي .
وفرحانين بجيتي، و طلعيت كبل لا يجي ابوي من عبن استحي منه ما اكابلة ، من يوم العرست لليوم ما الي وجه اشوفنه .
مشيت للغصر، دشيت لكيت كاطع الموش سركال عبن خلص زمن الأقطاعية و انتهى دور السركال ، الفلح صارت عدها كيعان.
الا اليشتغلون بكاع الشيخ ، ذوله يختلفون .
دشيت اعليهم ، كلهن سلمن اعلية وظلن يحبحبن بيه و يباركلي الحبايب.
ورجعت لشغلي ابقصر الشيخ و مشت احوالنا اعلى هالرنة.
يوم من الأيام .. جانت ايام العشرة الوله من محرم .
و عدنا السيد كلما يصير محرم لو وفاة الني او واحد من اهل بيته سلام الله عليهم يكللنا و يبلغ الديرة.
انا احبن انعى و ادكن اعلى الحسين من عبن احبنه ابن بنت الرسول هاذ ، كلبي يرف لو سمع بسمه ، جنت جويعدة بالقصر و النساوين يمي و الشيخة كاعدة
و انا دكيتلهن :-
على الوليان ..خل ننصب تعازينا
و على الشهيد ... خل ننصب تعازينا
يا دينيا ليش خنتينا باهالينا على الوليان.
وهن يدكن وراي .. و نعيت الهن و هن كامن يثغبن وينوحن.
ليش ما حجت اخت الشيخ :- خايبة كواغد عليش ما نسويلنا مجلس لابا عبد الله يوم الطبك (عاشوراء ) و نودي اعلى نسوان السلف و تقرين لينا .
- يا جا شفايتلي الواه ، اكيف انا .
صدك و يتفغن اعلى يوم الطبك اقرالهن .. شو من صارت صكد كضني الرجيف ، جا انا وين ادبرها اقرا جدام الوادم ، غلطيت شلون ، تلكلكيت شلون بية .
رحت لامي كلتلها :- يالحبيبة يمه الحكيني انا وهدنت (ورطت) روحي و كلت الهن اقرالجن ولمن نسوان السلف كلهن و كضني الرجيف.
نشمية :- انت حافظة القراية
- انا حافظة موش ما حافظة لجن يمه توهدنيت اخافن لا اغلط و يضحكن اعليه.
- توكلي اعلى الله يمه و صفي نيتج للحسين سلام الله عليع ، و كون من تغرين تتخايلي الأمام كبالج و تقرين من حركة كلبج موش للناس .
صار الطبك و التمن النساوين ، و انا الرجيف ما هدني ، نخيت ، ها يالزهرة وينج .
عاينت للنسوان بديوان الشيخ مطر ، الديوان شطوله و شعرضة اكتض بالنسوان و الفروخ ، اليشتغلن بالغصر يمدن بهالجاي و النومي .
عاينيت منا ، جبتها منا ، .. جا بعد ما منها مهرب .
بديتها بالصلاة اعلى الرسول ..
شو من صلن و ارتفع حسهن ، گلبي خفك ، عمتي و نسوان اخوتي و امي كاعدات، و امي توميلي من بعيد و تشجع بيه ، كلت خل اسوي مثل ما علمتني امي .
غمضيت اعيوني وتخايلت الأمام مت عيني عليه جدامي ، و انعى ذاك النعي اليشك الگلب ، و نحت من كل كلبي ، بس كمت ما اسمع صوت عاويي اعلى كثر ما اسمع نوح النسوان ، و ما احسن اعلى روحي الا وساعتين و انا انعى و ابجي.
ليما ختمت و كلت :- ويييييه والف وييييه عليك يا ابا عبدالله.
النسوان حسن دموعهن . و كامن من مجانهن ، ويذبن اعليه فلوس بثواب الأمام ، انا استغربيت ، ظليت ساكتة، ليما كفن و احسب الفلوس و يطلعن اكثر من الأحصله بالشهر من بيت الشيخ بمرتين .
يااااااع ، جا سويعتين جاني هالكثر .
شلتهن خليتهن بعبي بس ما ادري حلال حرام ، جا انا قاريه للحسين مو خاطر اخذ فلوس ، كلت اضمهن وبعدين اسأل السيد اعليهن .
بعدني جويعدة ، و دنجت اعلية مرة :- خالة ما تجين تقرين اعلى الحسين عدنا ، عدي وليد عليل و اريدن بجاه الحسين عد الله يشافي وليدي.
عاينت لامي كالت يالة
رحت قريت نص ساعة عدها ، هم شالت فلوس و انطتني ، ما رضيت اخذهن ، كلت الها:- خالة انا قارية للحسن موش اعلى الفلوس
كالت :- اخذيهن مني بثواب الحسين.
وخلتهن بجيبي ، كلت يامن يجيب الصبح و اغبش اعلى السيد انشدنه.
رديت لبيتنا ، و من الغبشة بعدها الشمس توها طالعة ، رحت للسيد ، وصلت الباب ، دكيته طلع لفيت عبيتي اعلى وجهي و صديت عنه :- شلونك سيد
- هلا بويه ، تفضلي
- انا جاية انشدنك
- اي امري
- سولفت اله السالفة و كلت اله : سيد انا ما ارضى الفلوس اعلى قرايتي لجن ما عرفت شسوي، اردهن يو اخذهن .
كال :- ان نعيتي و طلبتي فلوس اعلى قرايتج، انت باطله و نعاويج ما مقبوله من كون قضية الأمام موش للمتاجرة ، بس لو قريتي و هن اطنج بلايا ما اطلبين منهن ، لا هاذ رزقج اخذي و اعزليلج منهن جم فلس طلعي لوجه الله تعالى بثواب الأمام و انطيهن للفقرة.
- هااا ، يعني اخذهن .
- اي بس شرط ما اطلبين انت
- اي
- انت رايدة تستمرين بالقراية
- اي والله سيد من عبن انا احبن الحسين
- جا مو ياهو الجاي يقرأ العلى الحسين بويه، قضية الامام الها موازينها و النعاوي التنهيهن اعلى الموته ما يصير تنعينهن اعلى الامام و لا كل جلمة تطلع من السانج تكولين، كون توازنيها ، تلوك للامام هاي الجلمة يو لا .. يلا تكوليها اعليه .
- هااا
- تعاي يومية سويعه اعلمج بويه شتكولين بالمجلس ، شلون تنصحين النساوين بالصلاة و الصوم خاطر تعلميهن .
- اي ، مشكور سيد الله يطيك العافية.
والله واستمريت بهالشغيلة ، العدها مجلس تودي علي، و العدها مريض ابيتها ، و العدهم عزا ...وصارت الناس تندل دربي .
ليما فد يوم هاي سليمة الله يشيلها و يخلصني منها، جاي اسولف لصبيحة اعلى شغلتي ، جان ادش اعلى سالفتنا و تعيرني و تكلي :- انت يو ما بيت الشيخ انت ياهو اليعرفج ، والله و صارلج صيت يبت شمخي ، جيتي للغصر يا حالج .
- جا شنهي هو غصر ابوج
- لاله موش غصر ابوي لجن انا خلصيت عمري ابيت اشيخ حسبة بتهم.
- الخادم يضل خادم يسليمة
- الشكر لله ما مدينا ادينا و طلبنا هوش ووطليان من الشيخ ، خاطر احد يعيرني .
- انا طلبيت من ابوي من طلبت من احد
- و ابوج اجا يتمناهن من الشيخ و ءيتحرمص اعليهن ، و حتى دارج بلا سكف يو ما الشيخ يحط هالجينكوات خاطر يجيبونج و يسكت خلك ابوج الهرج العالم اخذوا بتي و اخذو بتي.
- يصير خير .
كمت من مچاني ، رحت لميت الفليسات اللميت من القراية كلهن و رديت القصر الشيخ، لكيت الشيخ بالقصر.
تكربيت منه وكلت اله :- شلونك عمي
- هلا بيج بويه ، شلونج
-انا كواكة ، بس اريدن انطيك شغيلة يشيخ
- شنهو ؟
- خليت الفلوس جدامه و كلت اله ، شيخ هاي فلوس الجينكو الخليته اعلى السكف مالنا، و بعون الله اذا خلانا طيبين كل شهر انطينك جم فلس ليما اتمم فلوس الهايشة و الطليان، و اذا تريدهن اخذهن .
- شمالج يبت شمخي ، شبلاج بويه ؟
- مابياش شي لجن يشيخ الروح عزيزة و ما تحمل المنة
- ياهو المان اعليج
- الشكوة لله يعمي، موش لبنادم ، وداعة الله لا تردهن شيخ
- غير اعرف شنهو الصاير ، خاطر احكم
- انا اهلي موش ذبوني اعلى رجلية من عبن زلمه و اشتروا زلمة و حاكم زلمتي يعدل ١٠ زلم .
- ضحك الشيخ :- كاغد بويه هكو احد غاثج .
- ما حجيت بس عيوني ورمن و ما ردت اهمل الدمع كبال احد، كلت اله (من رخصتك) و طلعت .
رديت للبيت وانا رويحتي صايرة بهامتي ، و اسمع حس الهايشة كلساع تجعر ، مشيت اعليها والكا جدمها مشدوده بحبل حيل ليما ضاب اعليها ، كوة حليت الحبل من رجلها .
و كمت الوب ياهو العامل بفرحتي هالعملة ، ماكو غيرها جسيمة المعذربة ، هي دشت البيت و انا انهديت بيها
- انت الشادة جدم فرحتي بحبل ؟
- اي انا ، شنهي تحاسبيني
- وعليش شادتها
- شنهي تجي اعلى العلف مال صخلاتي و تاكلهن ، جا انا ما عدي شغل و عمل اجيبن علف لصخيلاتي و هايشتج تاكلهن.
- وعلي لو كربتي بعد اعلى فرحتي الا ابيس ييج
- ياااااع انا تبيسين بيه ؟
كومي و هدي اعليه ، و انا الجدر بكتري و اشيل الجدر و انومه براسها ، و هاي كامت تصيح و تثغب ، و تدفع بيه و تطردني من البيت
اخذت الحلال مالي و رحت لهيلتي، اجر بالهايشة و اهش اعلى الطليان ، دشيت اعليهم و انا انوحن ، و اخوتي تسودنوا :- ياهو الطاك اختن ، خايبة احجي ياهو وياج ، حاكم طكج ، نكسر ضلعه والله ، هسه نروح نكص جدمه
و اخوبوي يفزع بيهم و اتسودن ازود منهم ويريدون بس يفهمون مني لجن انا جمعت اعلية سوالف سليمة و جسومة و ظليت انوحن.
ليما شفت اخوي صويلح ، اخذ التفكة ويريد يهد ... يااااع صحت :- اوجب توجب انا طلابتي موش ويا زلمتي مت عيني عليه ما شايفته
- جا ياهو الطكج
- عمتي
نشمية :- يااااااع طكتج ، طكها العباس كون
- لاله موش طكتني، انا الطكيتها بالجدرية ، و طردتني يممممممممممممه ، اخ يخوتي يممممممه .
شو اخوتي واحد ضل يعاين بوجه الاخر ، و ابوي اجا كعد :- جا انت طاكة المرة بويه
- جا اهدها ليما اطكني ؟
- بويه مرة جبيرة هي ما يصير يا بوية
- اكله طردتني بوووووويه
- جا غير طاكتها كاغد بويه
- عبنها تستاهل ، شادة فرحة شدة موت خاطر لا تاكل من العلف ما صخولها .
صلاح :- خوية هي يس هاي المشكلة لو هكو غيرها ؟
- انا رديت طالعة رويحتي و قهرتني بهايشتي و ما هيسيت روحي الا و منومه الجدر اعلى راسها
شمخي :- نشمية البسي عباتج وروحي تفكدي المرة وحيدة لا صايبها شي ، طكت كواغد ياهو اليسلم منها
بهية : اي والله عمي انشدني اعليها ،سبع تيام راسي يتمركص من عكبها.
كامت نشمية و اخذت خلود و راحن اعلى ام حاكم :- يا ديه ام حاكم شلونج دية
- جا ما كالتلكم بتكم شلوني و شعملت بيه.
- يا وعلي ما رضينالها اخوتها ووابوها كضوها شعملو بحالها، ضلت تثغب تصيح انا احبن راسها انا احبن راسها بس هدوني، يا ديه جا احنه نرضة بالشينة يم حاكم
- عبنكم طيبين و ناس اجاويد يم صلاح، انا ما عدي شي وياها لجن هايشتها ما خلت اعل حالنا حال كل العلف بحلك هايشتها و صخلاتي ميتات جوع.
- انا بعد يومية امر اعلى الحلال و ارعى بيه ، بس لا تكدرين خاطرج يحبيبة و هي حسبة بتج ، كولي يالله
- كواغد وكحة يم صلاح
- موش وكحة وعلي لجن هي تغتاض بسرعة و ما تهيسيها ال اديها طالت ، بس يا دية كلبها كلب سمجة ما تحقد اعلى واحد.
- من كون خوش ، خليها ترد للبيت .
بقت نشمية تسولف ويا ام حاكم و اطيب الكلوب وردت لكواغد، كواغد ما رضت ترد الليل تريد تظل يم اهلها .
ظلت ثاني يوم الصبح ، صادف جية حاكم من بغداد ، هي جانت بالقصر ، من داز اعليها رايحة تركض.
خطية مشتاك الها و هي مشتاكتله، الما حاظنها ، كايللها :- خايبة كويغد شنهي هاي بطنج
- اعلية العباس ما ماجله شي و بطني تنفخ و الغازات لاعبة لعب .
- خايبة خافنها موش غازات ولج خافنج حبلة
- يااااع ، صكد ؟
- اي وعلي عايني بطنج هاگداتها، اكلج هي هاي التجي للنسوان كل شهر تجيج .
- وين من عرسيت لليوم انكطعت عني .
- جا يالخوثة عبنج حامل .
- صكد
- جا هي يعتازلها صكد ، غير انت المرة و تعرفين
- شكالولك علي مخلفة كبل ، انا اهيس بطني تكبر و شي يلعب بيها و اكولن غازات.
- خل البس اعبيتي واروحن للجدة ، اشوفن صدك حامل .
- روحي و انا راح اطلع اشوفن امي ، وامر احلى رفجاني.
- اي
كضيت اعبيتي و طريت الدرب، فحصتني لنها تكلي :- خايبة شنهي ما تدرين بروحج راح تجيبين
- يااااع صكد
- اي وعلي اعليج الثامن ، لجن من كونها اول بطن صير زغيرة ، بس ما تهيسين الفرخ
- اعليه العباس لدالي فراكيع مال غازات
- خايبة الغازات وين الفرخ
- والله يدية لاهية بهالدنيا يجي الليل ما اعول احطن راسي و انام ما ادري عن روحي.
- كومي خية و خيطي هدمات الفرخ ، شهر و تولدين .
يااااع ، فلك طرني كون ... راح اجيبن و نا ادري بروحي ، و انا كل اليشوف بطني يكلي شنهي شو مكورشه ، لدالهم سمنت اعلى الزواج ، طلع فرخ هاكداته ببطني و ما ادري .
........
حاكم :- مريت اعلى امي سلمت اعليها حضنتني و بجت ، كعدت وياها شوية و طلعت للمضيف اعلى جبار.
سلمت اعليهم و عيريته بنسابتي وياه و كلت اله جنت يم اختك و رفسني كم رفسة الا ارتاحيت .
وكعدت اسولف الهم اعلى بغداد و اعلى اخباري غاد و اليصير وياي، كام غريب و كال :- كل لابوي خل اروحن وياك.
- والله يا غريب ، الزعيم بنى مدرسة شوية غاد اعن الكهوة الأشتغل بيها يو تدرس بيها تطلع لوز
- عليك العباس كل لابوي خل اروحن وياك.
- خايب وين تروح صدكت انت، بغداد بعيده حيل
- ما اريد اظلن بالقصر اعليك العباس حاكم الله عليك.
- شوف هاذ يربي
- خايب كل لابو هلبت يرضى صكد و اخذه وياك ، و لو خذيته الشيخ يشتريلكم بيت هناك و اخلص من نومة الكهوة و الكاع الباردة
- ما يرضى
غريب :- گله و انا احجي وياه همين
-عوفها حبيبي عوفها
الولد ضاج و مشى مني، لهناك و اعين اعليه يبجي :- خايب شمالك انت
- انا ما اريد اظلن هنا
- عليش ؟
- امي زهرة ما تريدني و اخوي زناد بس يكتل و يطرد بيه .
- جا غير بيتك عليش يطردك خايب .
- اريد اروحن وياك
- خايب والله احطك بعين لجن ادري ابوك ما يرضى
دنج و ما حجه بس بيه حسرة موش حسرة فرخ، اليشوفه يكول اعلى كلبه هموم اكبر من همومه .
كسر كلبي .
رحت اعلى الشيخ حجيت وياه، ما رضى انتفض ورفض رفض تام ، ما يرضى ابنه يروح لبغداد و هو ابن ١١ سنة تقريبا .
هو يدرس هنا لجن يدرس وياه اخوه زناد و ذاك امه توزة و ظالين مكاوم بيناتهم ، و الما اله ام يتيم من عبن لليتم للام موش للابو .
غريب من سمعني حجيت ويا ابوه، دك رجل لبوك الا اروحن .
انا عفتهم و رديت .
لكيت كاغد بعدها ما رادة، اندكت الباب :- ها عمي
- عمي عدنا فاتحة و امي دزتني اعلى الملاية
- موش احنا بويه ، روح
- لا عمي انا متأكد ، هاذ بيته الملاية كواغد
صفنت :- اي عمي هاذ بيت كواغد لجن هي موش ملاية
- لا عمي ملاية و علي
- خايب انت ياهو الزاتك اعلينا، امش بويه امش ، هاذ موش بيت الملاية
راح الفرخ و انا اهزن ايدي .
لهناك اجت كواغد :- حاكم حاكم
- حاكم
- تكول الجدة الشهر الجاي يصير عدج فرخ
- صدك تحجين ؟
- و علي شمالك
- شنهي ولج يمتى حبلني ويكتى ولدتي
- تكول اعليج الثامن
هزيت ايدي و كلت الها :- بالمبارك، الا اكلج اجا فرخ جاهل دك الباب
- اي شيريد ؟
- يكول نريد الملاية
- عدهم فاتحة يو مريض
- شنهي شنهو شنهو مريض، احجيلي شنهو الصاير بغيابي
- شمالك ، غير اقرا اعلى الحسين
- وين تقرين
... سولفت اله السالفة شو هاذ انتفض و كام يشتم بهيلتي
- جا عليش تشتمني
- و تشتغلين بلايا علمي شنهي انا مو بعينج
- و انا شمشتغلة ركاصة ، غير ناعية خاطر اعيننك
- و ياهو الكايلج عينيني ياهو الطالب منج
- شنهي يا الطالب مني عاين شكفنا يخر و بالصيف يجتلنا الحر ، و ما حدرنا غير حصير الخوص و الجودلية
- والله انا ما كلت الكم شيك و اكعدنج بغصر هاي حالتي اليرضى اهلا وسهلا المايرضى الله وياه
- جا انا معايرتك و تكلي الله وياج انا جاي اكلك اريد اعاوننك باجر يصرون عدنا فروخ بيا حجرة نحطها ، بهاي التخر فوك روسنا
- عسى ما تغركين انت و سبع فروخ منج ما عدي مرة تفرفر بالبيوت.
- جلمة منه و جلمة مني ، بربد الدينا فوك راسي اجا امه ، زادتها اعليه ، و انا كلت الها و هي ما ترد و هي ما تسمع جلمتي وذاك اليوم طكتني
هو سمع و تسودن ، انت تضربين امي ، گلب البيت اعلى راسي ويهدد يطلكني يو ياخذ عليّ شريجة .. ردت اطلع ، بس خفت من اخوتي لو درو متعدي اعليه يتكاومون وياه و تكبر.
جعدت بحجرتي و عيوني همالة.
و انا اعلى كعدتي، ابوي سامع من امي انا حامل و اعليه الثامن و اجا طاير گلبه ينشد اعليه
وصل للباب و سمع حس حاكم و هو يشتمني و يهدد يطلك و يجتل ، رفس ابوي الباب و هد اعلينة
رواية كحل عرب الفصل السابع 7 - بقلم زينب ماجد
الحلقة_7
(الى بغداد )
اداري العين .. وانته العين
.. والدم .. اورفيف الدم
اداري الآه ..و انته الآه ..
وانخه الروح .. لا تهتم
اداري الحيف .. كل الحيف ..
ظل بيك الحلم .. يحلم
اداري اوكَضت روحي انذور ..
لاوِد لا شمل يلتم
يهاوي الروح غم الروح كون
ابشان ما تحلم
لَوَن .. شحت دموع الغيض ..
خل دمع العتب .. يلتم.
(عريان السيد خلف )
......بيت الشيخ مطر .....
رجع الشيخ من المضيف، و غريب وياه لجن غريب گضى الدرب بس بچي، و الشيخ هاده ما يحجي وياه من كونه يعرف غاية ابنه يريد بغداد وهو زغير.
دشوا القصر ، والخدم ماد السفرة للشيخ و عياله، كعد الشيخ و الشيخة و البنات والكل، بس غريب وكف اعلى الباب ينحب .
حجه الشيخ :- خايب شمالك بويه تسودنت ؟
ملوك :- شماله هاذ شيريد ؟
- سمع حاكم يسولف اعلى بغداد و تنحر الا اروحن لبغداد.
ملوك :- و شعدك ابغداد يبن ردحة ؟ يدور بغداد ابن ....احححح
الشيخ :- ابن ياهو يملوك ؟
- ابن الشيخ
- جا من كونه ابني عليش تندهينه بأسم امه ، شنهو نغل هو و تناديه اعلى اسم امه
- السموحة يشيخ موش غصدي لجن انا هيج اتغشمر وياه.
- هچي غشمره انا ما احبنها، تعااااال يا سرحان اكعد اكل ياله.
- انا ما اريدن اظلن هنا ياله اريد اروحن ويا حاكم
- خايب اليوم اجا حاكم ، الله لا يطيك حويكم اعلى الساعة السولفة بيها لسرحان و چلب النا بهالسالفة الگشرة.
ملوك :- تراك منطيه عبن زايد من يوم الرد من زهرة و لليوم وسرحان موش اعلى طبايعة كلما لنت وياه كبر صماخه .
ما رد عليها الشيخ تبيان ان هاذ الحجي ما حجبه فما يحب يسمعه، دنك ياكل وما جن سمعها حجت.
وغريب بعده ينوح .
...... بيت حاكم ......
رفس شمخي الباب ، ودش اعلى بيت حاكم و صاح :- هاذ ياهو اليشتم بتي ولك .
حاكم و امه ضلو صافنين اعلى دشة شمخي، هد اعليه و كضه من هدومه :- خايب انت تهدد بتي بالطلاك، ولك حوييييييييييكم.
كواغد :- سمعيت صياح ابوي و انا فزيت من مچاني، حسيت (مسحت) دموعي و رحت اركض :- ها بووووويه هاااا
حاكم :- ميل عني عمي
شمخي:- وعلي اليوم ماهدك ولك، انا تهدد بتي تاخذ اعليهاااااااااا حويكم
- بويه هده اعليك العباس هده بويه، ساعة عصبية
كوة اجرن بأبوي و حاكم طلع بالباب و هو يصيح و يسب اليوم الاخذني بيه، و ابوي وكف يصيح :- لمي غريضاتج ياله اليوم ما تظلين هنا.
- بويه استهدي برحمن اشربلك اميه
- شنهي انت راضية بمذلته .
- ما بيها مذلة هاذ الزلمة وكت عصبيته يكوم يهذري ويخربط .
حاكم :- ولج هااااذ ياهو اليهذري ويخربطططططط
كواغد :- يااااع موش اعليك انا دكعد.
ام حاكم :- يمه حويكم عليك العباس عمك هاذ يمه ابو رفيجك ، كض اعصابك يوليدي
- جا ما تسمعينهااااااا
شمخي :- ولج هاذ اغم ما تظلين عده بعد لمي غريضاتج ياله.
حاكم :- لا تغلط عمي تراني محترمك و محترم وكفتك ابيتي ، شنهي اغم شمالني ، حرمتي و ما ارضى تطلع ولو خطت جدمها الباب و راحت تنعى بالبيوت وعلي لكص جدمها و اكعدها بالبيت.
- وشنهي ولك هي دلالة يو ركاصة ، ما عاملة الشينة بتي و تكص جدمها يحويكم والله احط ظهرك و اطكه وعلي لو كربتها .
كواغد :- بويه بس يواشك و خلني افهمنك.
- خايبة شتفهميني هاذ يدمغ اعلى راسج ويهدد و انا واكف ، امشي ياله
جريت ابوي و كلت اله :- بويه انا الغلطانه من عبن اشتغلت بلاية علمه و زلمه و عصبي و بين الزلمة والمرة كلشي يحصل يتطابخ يتحبحبون، جا لو اعلى كل جلمة انهد البيت ما ظلت بيوت عامرة، روح بويه و لا تعصب روحك وانت مريض ، عزيز كلبي بويه كلشي ما بيه و علي بتك انا ياهو اليطكني الا اثرمه.
حاكم :- ولكم هاي تثرم منهو ما تهدوني اعليها .
ام حاكم جرت ابنها وشمهي يصيح ، و كواغد ركضت تجيب مي من الحب لبوها، انطته الميه بيده و حبت راسه :- من اغديلك فدوة بويه عزيز گلبي .
- سمعي بويه انت موش طالعة من فطر الحايط خاطر يجي هاذ الاغم يجتلج ، ساعة التنداسين تميلين اعلى هلج، خووووش .
- يطول بعمرك بويه عسى الله لا يحرمني منك بجاه الامير علي.
هدا شوية وكام :- ياله انا اروحن ، ديري بالج اعلى رويحتج بوية حبلى انت محد يفيدج.
- ان شاءالله بوية.
طلع الحجي ، و انا صكيت الباب وراه، و حاكم بالحجرة جاعد ، و ام حاكم طلعت :- شنهي ابوج يهدد
- عمة سايم الله و محمد و علي عليج ميلي عني،
بعدتها من طريجي، و دشيت للحجرة و هو جاعد ، تمددت و ادثرت بفراشي و اطيته ظهري، و هو داير عني.
ويدخن بهالتتن ، رادني احجي ، افك حلكي .. ما حجيت .. كام يدخن وذب الدخان بقوة و يتحسر خاطر اسعلنه (شمالك ؟) بس ما حجيت
اخذ نعيلة (نعالة) و طلع مغتاض.
وانا كمت للحلال، اخذت هويشتي ورحت اطر بيها السلف من عبن حسيتها ضايجة مت عيني ، و اغنيلها
( وفرحتي ويا حلالها السلف كله فداها ، اشرب حليب و لبنه و اتريع انا منها وفريّحة يا حلالها السلف كله فداها جسمه تغاري منها جيف هي احلى منها وفريّحة يا حلاها وهويشتي يا حلاها .. هله هله هله )
صادفت امي بالدرب :- ياااا، جا انت تسرحين بالهايشة و انا ادور اعليج
- ها خيرج يمه ؟
- ابوج كالي روحي لبتج موهدنين حالها.
- لاله ييمة هيج عركة صغيرة
- عليش
- جا نوجب بنص الدرب ونحجي، خلينا نمشي و احجيلج.
- ياله
مشيتا و سولفنا انا و امي، لنها دكلي :- ابوج باطل و رجلج اعلى حك يمه.
- عليش ؟
- جا حكه ما يرضى مرته تطلع
- جا نعيه اعلى الامام يو ركاصة خاطر ما يخليني اطلع.
- لو شما جان ، ما يرضاها يكلوله رجل الملاية.
- وشمالها الملاية يا يمه.
- جا يمة هو زلمتج وبكيفه و المرة الزينة اطيع زلمتها ييمة
- و انا ما حجيت، هالسكتت لجن نامت بفادي جسيمة
- و شمالها امه
- توزه اعليه خلته يصير ثور و يناطح .
- تحمليها يمه هي مرة جبيرة
- لا يمه عبنها هاي يرادلها جدرية ثانية ياله تمشي عدل
- ياااع خايبة انت تسودنتي شنهي اطكين عمتج.
- زعم هي حرمة و ما محترمة شيباتها و توز برجلي عليّ شبيدي عليها غير من سوالفها الغمة
- ميخالف يمه ميخالف ، تحمليها.
ظلينا نمشي و نحجي ليما هدتني وردت ، و انا اخذيت فرحة و كلت اردن للبيت كبل الوذان، صادفتنا مرة بالطريج ، وكفتني :- انت كواغد
- اي انا كولي دية
- اريد انشدنج اعلى سرحان
- غصدج غريب ابن الشيخ
- اي
- انت ياهي
- انا بس اريد انشدنج اعلية
- اعذريني دية ، انا ما اكدر احجي اسرار الغصر للغريب.
- انا امه.
- ياااع انت امه، انا شايفتج كبل سنتين بس وعلي ما عرفيتج شصاير بحالج دية
ردحة :- بس الله يعلم بحالي دية
- شبلاج ؟
- اهيلتي غصبوني اعلى زلمة عمرة ٧٠ سنة من ديرة ال مطشر و شايفة الضيم يدية .
-ياااا ، خاب ذوله ال ثجيل والله معذربين ما الله ياخذهم ويخلصنا من شرهم ، شنهي ديه شبلاج ؟
- اريدن بس اشوفن وليدي من ابعيد والله احجي ويته، بس اشوفنه، و اعرفنج انت تشتغلين بالغصر هالاجيتج
- والله يا دية ما ادري شكلج، الشيخة فلوك مو فلك واحد لو درت تلعب بحالي لعب.
- اعليج العباس، احلفنج براس الحسين
- يا دية شهالحلفان اليكسر الظهر لا تحلفيني، انا يو كدرت اكللج، بس وين الكاج ؟
- بعرب بيت مطشر بس انشدي اعلى بيت عبد الواحد يصير رجلي.
- صار دية ابطن عيني .
راحت و انا هملت دموعي اعلى حالها ، عاينيت للبطني: ها يبن بطني يمه ، هم تطلع و تصير عزيز وتنام ويا الكلب وياخذونك من حضني ؟ والله اكطعه بسنوني الياخذك مني.
رديت للبيت ، وحاكم كاعد طالعة رويحته مغنتب ، سهيتله تمر بدهن حر و لبن و خليتها جدامه.، ما كال لا ، عاين ، كال :- عدج دهن حر ؟
- الخير جايد الحمد لله
-حطيلي دهنات و لبنه و شوية تمرات من اروحن لبغداد اخذهن وياي.
-المن ؟
- اهل بغداد يفرحون بهالمتاع ، اريدن اخذها وياي لمرة غاد ما مغصرة وياي كل مرة توديلي صينية اچل
- وياهي هاي ؟
- حسنية خاتون
- ياااع ادور اعلينا الخاتونات ؟
- شمالج انت خلي الدهن الحر ولا تحجين تراه راسي دايخ منج .
- جا غير اعرف ياهي هاي
- مرة غادي كتلج
- خاب حويكم مرة يو مرمرة ؟
- شتغصدين
- تفهم غصدي.
- ما عدي وياها شي، ولو عدي شي شنهي استحي منج يو اخافن.
- جا انا ما كلت هيج بس ردت استفسر.
- حطي ولا تحجين
- نحط ليش ما نحط يستاهلون اهل بغداد
احجي وياه و اكل بالتمر و اتنوعله باطراف عيوني
- اكومن منج اخيرلي
- لونك ما عدك شي ما كمت يحويكم .
عافني وما حجه .
حاكم طلعت وكت الغروب، شفت الشيخ و هو راد للغصر ، نشدني :
- جا كاغد وينها اليوم ما هي ؟
- اخذت رخصة من عبن انا اجيت شيخ .
- ها حكها حكها، تعال وياي للغصر عدي وياك شغيلة .
- امر شيخ
العكال اعلى راسه والعباية الجوزية اعلى جتفه و السبحة بيدة ويمشي برهدنه.
وصلنا للقصر ، دش داخل و انا دخلت للديوان، شوية طلع و بيدة فلوس :- ها شيخ
- اخذ ذني يحاكم
- ماليش عمي ؟
- فليسات كواغد ، بس لا تكللها الشيخ انطانياهن
- فليسات مال شني ذني
-مالك غرض مني لكواغد جا هي هم مثل بتي.
- و النعم منك شيخ
-اخذهن و ابني بيهن سكف بيتك بوية ولا تخلي عيالك بالبرد.
- ان شاءالله شيخ تامر.
جاي اطلع و غرير عرضلي و عيونه مدمعه :- ها ولك شو تبجي
حاكم :- هاذ من ساعة الكلتله اعلى بغداد وليجاي ما سكت، يتبجبج جنه مرة .
- لا السموحة يشيخ ، غريب زلمة من ظهر زلمة و ما يبجي.
غريب :- انا ما اريد اظلن هنا ، اريد اروحن وياك لبغداد.
الشيخ :- دش داخل بوية
- شيخ خله يروح
- لاله لا وليدي هنا احنا اهله و ناسه ما يصير
صرخ غريب و هو ييجي بصوت عالي و عج القصر بصياحه.
- شيخ هو هنا يحس بغربة و حكة جيف عاش ابيت حميد و عافوه و اجه هنا كل وكته عرك وياه اخوه، خله يدرس و دراسة بغداد احسن من هنا ، هم مستقبل اله و افهم اوله و تاليه يظل خلالفك ، ولزوم يعرف الحضر و الريف شلون عيشتهم و يكون ملم بالثقافات.
- انا اريدنه يتعود اعلى اخوه، هو و زناد ساعة وكتهم عدوان واحد ما يطيك الاخر ، جا لو عفتهم شيصيرون خلافي ، يتذابحون يو ينعاد ثجيل و ضاحي.
- عمرك طويل شيخ ، تضل اعلى روسهم و تعلمهم الاصول، بس خله اعلى مره و انا اجر غاد غرفة و نعيش انا وياه.
- الله كريم روح هسه.
راح حاكم و غريب ما بطل بجي، حط براسه يروح لبغداد يعني يروح لبغداد .
ثاني يوم وكواغد راحت للقصر اخذت الها رخصة من الشيخة ملوك على كد يومين عبن رجلها راد من بغداد.
و الشيخة انطتها، طلعت كواغد فرحانه و مشترية ذيج السمجة البنية التبلط ، خاطر تشويها الرجلها، و تفكر :- شنهي اردن و جسيمة ام العلوم تجابلني اعلى هالسمجة و تزوهرني بيها و توز ببنها عليّ، لا والله ما اخليها تكابلني.
ردت للبيت ، عمتها مامش (ماكو )
بس رجلها نايم من عبنه الليل سهران ويا رفجانه. خلته اعلى راحته ، وجرت التنور و حطت السمجة اعليها و شوتها و ردت الغلك خاطر تشوي بهداي.
حضرت جرجف نظيف و خبز و لبن و خلتهن بالسلة و غطتهن، دشت عمتها هي وصخولها :- ها شو اليوم رادة مبچر ؟
- اي انا رديت خاطر اكللج ، الشيخة ملوك رايدتج
- شرايدة مني
- ما ادري غير تروحيلها غاد و تعرفين منها.
- ريحة سمج ياهو هاذ المسوي سمج
- بالعافية اعلى الوادم شتاكل ما تاكل، جا انت حاطة خشمج وياهم، روحي الشيخة تريدج روحي.
مشت و هي تتنوعلي بطرف عينها.
خليتها تطلع و انا همت اعلى حويكم :- خاب حاكم حاكم، دكعد شمالك ما شبعت نوم
- شنهي شرايدة ؟
- خايب شاويتلك ذيج السمجة التطيب الكلبج.
- عليج العباس ، هاي ريحتها مو .
- اي ، دكوم خلنا نمش للزرعات دامه الجو طيب ، نكعدلنا ساعة زمان انا وياك نتصافى.
- مشتاكتلي يكاغد
- جا وانت خليتني احجي و اكلك مشتاكتلك ، توتليتني من جيت ليجلي.
- دكومي ياله ، خل نمش.
كام و انا حاطة سطل الماي اعلى البريمز خاطر يحمى، كاسرتله الماي، سبح و طلعنا للبستان مال الشيخ مطر ، هو شايل صينية السمج و انا سلة الخبز و البصل الاخضر و سراحية لبن حامض .
فرشنا وكعدينا ذيج الكعدة الحلوة ناكل و نتغزل و نسولف ، هو يسولفلي اعلى بغداد و انا اسولف اله اعلى القصر .
لهناك شافني عازلة من السمجة، كال :- جا ذيج المن ضامتها.
- لامك
- صدك نسيت اكلج ، هي امي وين ؟
- الشيخة ودت عليها وراحت
- ها ، و جعد يسولف وياي.
جسومة راحت للقصر، و دخلت اعلى الشيخة ، و تكللها لا ما طالبتج، و ام حاكم استحت و صارت بنص هدومها ، حست مرت ابنها نصبت عليها.
ردت و الدخانة تطلع من هامتها من العصبية.
دشت للبيت ، لا كاغد و لا ابنها و هي صاحت " يا يابة يابوية خاب كويغد اكضنج اليوم يو لا ، الا ابيس بيج)
رادت تطلع ، وردت خاطر تتأكد ريحة السمج الشمتها كبل شوية من الجيران يو من كاغد مسويتها، مشت وهي تشمشم بالمواعين العلى التنور ، شمت ريحة السمج ، و شيلي عبيتي وركضي .
ما خلت مكان ما دورت اعليهم، اخر شي راحت للبستان ادور و تلكه المسعدة كواغد فارشة ذاك الجرجف و مفلسة المجة و تجرفع باللبن و تضحك ويا ابنها.
وهي صاحت :- ولكم ءهلا حويكم يمممممممه
نز حويكم من مچانه :- شمالج يمه ، احجي يمه
- كضني راح اموتن يمة
- شمالج
- طحت بنص الدرب و توهدن حيل يمممه
وسوت روحها تخربطت ، وذاك يصيح :- يمه احجي وياي شجاج يمه
و كواغد تصيح : هدها هدها وهي تكوم
وصحت عمتها اعلى حيلها و تهد اعليها وتكللها :-حايبة اليوم اهد عظامج اليوم
و هدي اعلى كواغد و طكتها
وكواغد حطت الشيلة و صاحت :- اخخخخخ بوية ، حويكم شفت امك شلون طكتني ، هاي عودينه جدامك يخايب ما عاينت لو رحت شتعمل يمه .
- يمه ليش طكيتيها ، المرة حبلة
- يااااع ادافع لمريتك يحاكم و انا امك
حاكم :- عوينة ابيه اليدش بيناتجن ، انا رايح وانت تصافن
- ولج كويغد تنصبين اعليه ولج ؟
- جا اريدن اكل الكيمة انا ورجلي براحة.
- وانا كاعدة اعلى كلبج ولج
وتهد عليه تريد اطكني
- خايبة لا تشوفيني جدام حاكم ثغبت و سكتت اعلى طكتج ، و العباس اكومنلج اهد اعضام ، كعددددي .
- يمممممممممماي تهددني يحااااااكم
- دكعدي كعدي اتغدي هاج
وخليت الها السمجة كبالها :- يا ذاكرتني، جا حسبالي ما ذاكرتني
- لا ذاكرتج اكعدي ، الا اكللج عمه
- كولي
- عرب ال مطشر وين صايرن انا ما اندلهم
- غاد من ذيج الصفحة ، عليش شعدج وياهم .
سولفت الها السالفة شو هاي هدت السمج و كعدت تنعى و تبجي ، انا هم ما كلت باطل، عدالي ما تشتهي، جريت السمجة و ردت اكلها، حست دموعها بساع و طكت ايدي و جرت السمجة و كملت اجل
وظلينه نسولف انا وساها ليما خلصنا و ككنا ردينا للبيت.
ثاني يوم حويكم طلع هو ورفجانه يبنون السكف مال البيت، من نشدته :- منيلك فليسات ؟
يكول :- انا ضامهن
وظل يبني ، انا رحت للشيخ ، من عبن استحي اوصل للمضيف ، محط ازلام ما توصلة مرة ، لجن ما اكدر احجي ويا الشيخ بالقصر تسمعنه الشيخة فلك
وانا ما اكدر اتحمل اعلى مسؤليتي و اخذ غريب و اروحن ، دنيا كلشي بيها انطكينا ، طاح و صار ييه شكولن وين جنت ماخذته، فاحجي للشيخ و اقنعه و اخذه الفرخ برضات ابوه .
وصلت غاد، و ووديت واحد من الفروخ اعلى حميد ، شوي و اجاني :- ها خوية كولي
- اريدن الشيخ بسويلفة
- الشيخ عنده ناس ، انطري لينا يروحون و يحجي وياج .
رديت للقصر كملت شعلي، جاي امشي ، لكيت الشيخ بالطريج، لفيت عباتي عدل و كلتله :- شلونك شيخنا
- هلا يكاغد
- اريدن احجي وياك بموضوع
- مطول يو شغيلة صغيرة
- والله شيخ ما ادري
اشر اعلى البستان ، هو مشى كبالي و انا رحت وراها، شلون طول شلون هيبة الله يحفظة ، مدنج و يكلي :- اي يكاغد ، شنهي الراي ؟
- سولفتله اعلى ردحة و طلبها .
انغهر بس كال صعب اودي غريب لعرب ال مطشر و احنه عدنا وياهم كوامة.
- انا احطنه حدر عباتي و ما اخلي احد يشوفه، وما اروحن لوحيدي اخذ عمتي وياي .
- بس لا اطولين
- لا جا شعدي مطولة ساعة زمان ونرد.
مشى هو للقصر و دز عليه غريب ، اخذت غريب من اديته ، كاوديته و مشينا اعلى عمتي اخذناها ويانا ورحنا اعلى عرب ال مطشر .
نشدنا اعلى بيت عبد الواحد ، دلونا
اخذت الولد و رحنا ، البيت طين ضعيف الحال، بلا باب ، داكين بردة بمجان الباب، صحنا :- يهل البيت
طلعت النا ردحة ، هي شافت ابنها و تخبلت خلتها اعلى صدرها و ثغبت و بجت ذيج البواجي التشك الگلب، بس غريب تضايق كام يبعد بيها
اجا لاذ بكتاري :- كواغد خلنا نرد لبيتنا
- تعرفها هاي المرة ياهي ؟
- لا
- هاي امك
- دار وجهه و ما عاين اعليها، ردت اقنعه ، فلت من ايدي و ركض برا، درت لردحة :- جا دية انت عيشتيش عايشتها هنا ؟
ظلت تبجي و تشكي الحال ، رجلها زلمة جبير بالعمر و مريض فرد مرة و رادو اله وحدة ادارية كايمين مزوجين ردحة اله خاطر اداريه ، لا كاربها ولا واصللها من كونه مريض ، مثل الخدامة اله مو مرة.
ظلت ردحة تشكي الحال ، و غريب جاعد غااااااد من البيت ، يعاين يمتى كاغد تطلع ، خلصن منها ، سلمن و طلعن
غريب كام يمشي كبالهن ، و من يردن يحجن وياه ، يسبقهن بالمشي خاطر لا يسمع شي ، ما يريد يعرف شي عنها.
ردته كواغد للقصر ورجعت .
خلص حاكم سكف البيت و خلصه .
اما في بيت الشيخ
صبيحة :- شيخ سرحان كاطع الاكل صارله يومين و الولد بس نايم .
- شنهي هاذ تسودن ، شماله
- يريد بغداد بعد عاند ..
- شنهي بكيفه احنا نمشي، تاليتنه فرخ يمشينا.
غريب سمع الشيخ و هو يصيح بهاي الكلمة غطه راسه و ما عاين احد، دش الشيخ :- سرحان ، سرحاااااااان
ما رد ، تقرب الشيخ بعصبية، كف الغطا منا و جراه من زندة ، و شعل الجداحة :- انا اصيحن و ما ترد ولك
- ما رد عليه
- كوم من مجانك يالة
- انت مو ابوي، و انا اريدن اردن لبيت حميد ياله.
- سرحاااااان لا اطلع اعصابي و تخليني اجتلك جتلة موت هسه والله.
ملوك :- هاي و هو زغير وموش كادر اعليه شلون لو كبر يشيخ
- اكص راسه والله
- انا تكص راسي بس هاذ لو زناد جا حبيته .
حجه هالكلمة ، و طلع ، صاح الشيخ و راه بعصبية :- تعال جاي
ما راد غريب ، راكض من البيت بلا نعال بس الدموع تجري، كال اتبعوه، و ذاك يركض بلايا نعال، ٢ زلم يريدون يلحكون بيه ، ما لحكو، شيل و ذب روحك بنص الشط و الجو بارد.
كاموا يصيحون الحراس ، واحد نزع هدومه و ذب روحه ، و الثاني رد للقصر و بلغهم بسالفة غريب
، الحارس مطلع غريب من الشط
و الشيخ اجا يركض لهفان، لكا غريب ناط من البيج، كوم فوك غركته ، و تولاها بالعكال و الناس تفارغ بيه .
و هو يصرخ :- كلللللب بعدك بكد فردة النعال و تريد تمشي جلمتك اعلينا ولك ، كل روحة الك مامش .
تذب روحك من الشط شيكولونا اعلينا الوادم اموتك من الجوع ، جاتلك فد يوم مقصر وياااااااك .
وغريب يشيل بروحه و يركع بيها ، لا رضى ولا سكن، الوادم توسطت عد الشيخ و اخذت غريب ، و ناس كبار دخلوا على الشيخ خاطر يخلون غريب يروح غاد البغداد هم احسن اله.
الشيخ عاند اول مرة ، بس بعدين من ادخلو بيها زلم كبار ، انجبر يرضى ، بس مو برضاته .
بس كال ما يمشي ويا حاكم ، انا افرغ و اخذه.
واجا وكت اليمشي بيه حاكم لبغداد ، ودع امه و مريته و كال الها :- كاغد هاذ رقم الكهوة الاشتغل بيها، ساعة التولدين انطيها لواحد من اهلج يخبرون علي خاطر اجيج
ومن هسه اكللج ، ان جان البيج ولد سمي ستار و ان جانت بنية انت مخيرة بأسمها، شتسميها سميها.
كالتله :- خوش
اودعناكم ... اودعناكم ..
ومشت الأيام و الشيخ عايف ابنه يلوج، لا يحجي وياه خاطر ينشدة يمتى يروحون ولا هو كايله نروح لو لا ، مخليه يتكلى بمكانه ، خاطر يتربى و ما يعاند بعد و يتعلم الاحترام.
لهناك وره اسبوعين ، الشيخ كال الصبيحة :- حضري هدمات سرحان خاطر نطلع لبغداد.
ركضت صبيحة تحضر، دشت الشيخة ملوك :- شنهي شجاي تسوين ؟
- احضر هدوم سرحان شيخة
- سرحان يو غريب ؟
سكتت صبيحة، و تنهدت الشيخة :- ابن الفصلية هاذ صاير ينخاف منه من عبنه عنودي و لو حط اباله شي ياخذه ، لزوم اتصرف وياه.
- شتأمرين شيخة ؟
- انت اشتغلي و اسكتي ، ياااااله
- امرج.
ظلت تحضر بهدوم غريب، و الشيخة تفكر، تقربت منها كواغد :- شيخة رايدتج بطلب.
- شنهي ياغد ، شعدج انت بعد ؟
- انا جيابتي گربت و الشغل ثكل اعلية ، رايدة منج جم يوم احضر بيهن غريضات الفرخ اخيطله هدمات ليما اجيبن و اردن
- اسبوعين ، بس لو زاد اعليهن يوم يتكصر من راتبح.
- امرج شيخة.
راحت كواغد نزلت للولاية اشترت قمايش بيض و انطتهن لمها خاطر تخيطهن.
والشيخ اخذ ابنه غريب و طلع لبغداد، الدرب كله ما حجه ويا ابنه ولا بحرف ، و حتى غريب ما حجه.
الشيخ راد يبين لغريب زعله منه، بس تفكير غريب كله جان شلون راح يعيش ببغداد.
من وصل هناك شاهت عينة اعلى بغداد ، من عبن ديرته ديرة ريف و اكثر شي عدهم هو قصر ابوه الشيخ ، ماكو بنيات ولا اكو هيج سيارات.
وصل الكهوة ، شافوا حاكم ، رفع صوته الشيخ :- السلام عليكم
كلها صاحت و عليكم السلام ، ضحك حاكم و اجا :- هلا بيك شيخ، توها نورت بغداد..
- عامرة بهلها ، شلونك يحاكم.
- الحمدلله تحت رحمته، انا انشد اعلى اخباركم شلونكم ، اهلي شلونهم
- اهلك بخير.
- و كاغد
- كاغد اخذت رخصة من الشغل و كربت ولادتها و هاي ايامها
- ان شاءالله خير يارب ، تفضل شيخ
غريب :- وين راح نعيش
الشيخ :- انت وين كاعد يحاكم.
- انا هنا انامن عمي بالكهوة .
- لزوم الكالكم بيت تجعدون بيه، و اكمل شغلة مدرسة سرحان ، بس كونها جريبة المدرسة ؟
- اي هاي شيخ ، ذيج نهاية الفرع
- زين ، مامش بيت ايجار هنا ، اوتيل .
- اي اكو اوتيل بعد شارعين منا .
- كل الزين، جا كوم يسرحان.
- جايك عمي
- واصلة يوليدي
راد يطلع الشيخ التقى بناظم افندي، رحبوا ابعض بصوت عالي و تحاضنو و هم يضحكون .
حاكم اخذ رخصة من حجي فخري ، و طلع ويا الشيخؤ و غريب ما كف عن السؤال :- حاكم وين راح نكعد، انا راح ادرس هنا، يمتى اداوم.
عاف الشيخ حاكم و اخذ غريب و طلع و هو يحجي وياه، مرت حسنية خاتون :- هلو عيوني
- هلا بيج حسنية خاتون
- منو هذا الحلو ؟
- ابن الشيخ مالنا غاد بالديرة
- يااا ذاك الرجال ابو عكال شيخ
- اي
- لك عيني اني ما احب الشيوخ ، ما اعرف اخاف منهم
- لا زلمة جريم و ابن اجاويد.
- مفهمت
- يعني خوش زلمة
- هااا يعني خوش رجال
- اي اي
- و هذا الحلو ابنه ، يا عيني ، ليش هيج ملبسي دشداشة و هو صغير ميصير .
- لبسنا هاذ غاد ، زحمة نلبس البنطرون غاد
- لويش عود ؟
- سالفة طويلة
- هااا ، و هسه شنو وين دا تريدون تروحون
- ضحك حاكم هو يعرف هذه شكد فضولية ، بس انسانة فقيرة و على نيتها ، كال الها :- نريد نأجر عبن
- هم كال عبن ، لك عيني انت تكتلني بكلمة عبن فدوة هي شنو عبن
- يعني لإن بلهجتنا غاد.
- اهااا ، و تريد تأجر لهالوليد الحلو
- اي ، لإن راح يدرس هنا.
- فدوة للشاطر، اوي ظالمي بهالملابس شنو هاي.
- مو كلت الج هاي ملابسنا يا حسنية خاتون
الشيخ مطر :- ها نمشي
- يلا ، من رخصتج خاتون
- مرخوص عيوني الرحمن يحفظكم.
مشوا ، و الشيخ سأل :- ياهي هاي ؟
- حسنية خاتون ، مرة عايشة هنا ، خوس مرة و على نياتها لجن جثير تسأل و تنشد الرايح و الجاي وتدخل بكلشي.
ضحك الشيخ :- عمرها يطلع ب٤٠ ليش ام ام فلان ، عليش ينصاح الها بأسمها.
- ما معرسة شيخ، هي صح جبيرة لجنها بت بيوت ما معرس.
- عليش
- والله هاي شيخ ما سألتها ، استحي انشد.
- هاا ، خلنا نشوف الاوتيل .
مشوا و حجزوا غرفة فندقية لغريب و خاكم يكعد وياه، و خلال ٣ ايام الشيخ خلص كل امور غريب ، ووصى حاكم عليه و رد البغداد.
داوم غريب ، اول يوم .. ثاني يوم شافته حسنية خاتون ، كادته من ايده و تولته اسئلة :- وين ابوك وليش وحدك ، ووين جنت و شنو حالك و سؤال يجر سؤال خلت الولد يحجي سيرة حياته كلها .
انقهرت عليه ، كالتله :-امشي وياي
- راحت للكهوة و ودزت احد على حاكم، طلع الها :- ها حسنية خاتون ؟
- اني راح اخذ هذا الولد وياية ساعة زمان و نرجع ماشي عيوني ؟
- خاتون هاذ ابوه موصيني اعليه و الامانة موش هينة يخاتون.
- لا عيوني لتشغل بالك وداعته لابويه منتأخر ساعة زمان و نرجع .
- بس امانة الله خاتون
- ليظل بالك عيوني .
اخذت غريب ودته للحلاق، واشترتله ملابس على عمرة بنطرون و قميص، و رجعي لبيتج و خلي بس بالشورت و سبحته و طلعته ولد ثاني.
وهذا غريب هم كيف عليها ، وسوتله مركة فاصولية و تمن و كعدته ياكل و بعدها تسأل بيه ما خلصت اسئلتها.
اندكت الباب، اجا حاكم ، فتحتله حسنية خاتون :- ها وينه غريب
- لويش تسموه غريب هالأسم كلش ظالمه للطفل خطية
- تعودنا خاتون
طلع غريب :- هااا
حاكم :- ياهو هاذ ولك انت شصاير بيك ، هاي شمسوية بيه خاتون
- بالنبي عليك هيجي مو احلى ؟
حاكم يضحك من كل كلبة و يكللها :- اخ خاتون لو يجون اهل الديرة و يشوفونج شمسوية بأبن الشيخ مالهم ، الله يكاومونج و يبيسون بيج
- يا لك دادة مفهمت، يعني شنو يبيسون بيه ؟
- يعني يحبونج خاتون يحبونج هههههههههههههه
-ها يحبوني، اني هم كلت هيج لإن طلع شكله حلو ، مو سرحان ؟
غريب بس يضحك على ضحكة حاكم:- يا لك عيني دادة شبيكم اشو تضحكون ؟
- سلامتج خاتون ، ياله غريب افندي امش جدامي
- لويش تاخذه خلي يمي
- خاتون ما يصير
- لا عيوني يصير بدل معايفة بالأوتيل خلي يمي اني عايشة وحدي من يوم التزوج اخوية و طلع و اني محد وياية بس هيانة الحارس و رجال جبير .
- ابوه ما يرضى
غريب :- بس انا اريدن اظلن يمها
-خايب لو سمع ابوك عايش ويا حرمة الا يكص اجدامنا، دمش ياله .
حسنية :- بداعتي عيوني حاكم بقي يمي و اذا هو مراد او مرتاح يرجع
- مو مأجرين خاتون
- عادي و شنو يعني ؟
غريب عاند و هي عاندت، عافهم حاكم و مشى للاوتيل وحدة نام.
غريب طابتله الكعدة عد هاي الخاتون مرة بالاربعين و ما متزوجة ولا عدها طفل ووحدها، ذبت كل اهتمامها بسرحان وهو حبها .
رجوعا للسماوة و لديرة الشيخ جلوب ...
جانت الأمور ماشية طبيعي .
بيت الشيخ على حالة
بيت شمخي خلص حجرتين و نوى يزوج ولدة الأثنين بنفس اليوم ، و غرر ياخذلهم خوات من ناس معارفهم.
اما كواغد فكربت ولادتها .
جانت سهرانه الليل كله ما تكدر تنام تلوب، دشت العاشر و هي ما جايبة ، و عمتها تكللها امشي و هي ما خلت ليل نهار تمشي حتى ينزل الفرخ ، و عاصي ابطنها .
دشت عليها عمتها :- ها عمة كويغد شنهي ؟
- عصى هالولد يعمه من دهر صابه كطع روحي.
- امشينا نروح للجدة خافنج عدج ولادة
- الدنيا ليل يعمة يا جدة جاعدة هساعة و نروحلها
- مالج غرض هاذ شغلهن.
اخذتها عمتها وراحت للجدة كالت الها ظلي اليوم اجيبنج ، عافتها عمتها واحت لامها و جابت اغريضات الولد ، بين ما رجعن ، كواغد جابت.
نشمية :- ها يمة كويغد ، مت عيني عليج يمة جبتي
شو خل اعاينة يا صلوات على النبي ، ولد شحليله
- جا غير كطع روحي ييمه ، ابو صماخ عصى و ما طلع لو ما هاي تجره.
- خايبة يمه حسج ، توج جايبة ، لفي ارويحتج لفيها.
- شو كربي الولد خل اشوفنه
- هاج دعايني شلونه ، الحمد الله على سلامتج يمه
جسومة :- اكلج دية شو هاذ راسه مطعج
- يااا شمالج دية غير توه جاي
- ما يشبه حويكم من عبنه وليدي حويكم مامش احد بحلاته
كواغد :- يوسف زمانه ، الكطعة الفريدة الخلقها الله ، خايبة ما تميليها عندي روحي مكطوعه و مال حيل اهدن عليها.
جسومة :- يااا تهدي علي ولج
نشمية : جا وكتج ؟
اخذت كواغد ابنها وردت للبيت ، سمته (ستار) واجا وابوها اخوتها و نسوانهم كلهم بخويطهم و تحمدولها بالسلامة.
خلود :- اكلج عمه هاذ مو يشبه جبار
بهية :- جا وشماله جبار
:- انت ياهو العاتب اعليجن و كايللجن تعالن ، حاطات روسجن بحضن الفرخ و تميزن بيه، دميلن .
نشمية :- يمه صكد هالفرخ يشبه اخيج جبار
جبار :- من كون ابوه حاط كورة وياي هالطلع ابنه يشبهني .
كواغد.:- كلاب الدنيا شنهي ما راضي
- جا ما تشوفين راسه مطعج
- جا راسك شلونه يخوي
وظلو واحد ما راضي بشكل الأخر و هم يعاينون اعلى وجه الفرخ ... خبروا حاكم مرتك جابت تعال.
هاذ ما مجذب خبر ، رايد يجي لهنا، لجن قيدة غريب و مدرسته ما كدر ، خبر اعلى الرقم البديرة و كال الهم وصلو خبر لبيت الشيخ اريد اجي بس شلون بسرحان ؟
، اجا الشيخ و خابره كاله ( ظل ابمجانك انا باجر جايك اظلن يم الولد و انت رد لهلك.)
و انتظر حاكم جية الشيخ ، لثاني يوم الظهر يلا اجا الشيخ :- ها شلون يحاكم ، بالخير اعلى الولد
- تسلم عمي ، والله اريدن اطلع هسه للسماوة
- اي اي اطلع تراهم ناطرينك، جا سرحان بيش الساعة يحل ؟
- للظهر الساعة ١٢ لجن ما يرد للوتيل
- جا وين يروح
- والله شيخ انا ما اعرف شكللك ، بس سرحان عنيد و ما رضى يسمع مني، هكو مرة خاتون هنا تاخذ سرحان و تخلي عدها و تعتني بيه و سرحان طابتلة الجعدة عدها
- وياهي هاي ؟
- حسنية خاتون
- وشلون تخلي عدها غير تكلي ؟
- ما صحتلي فرصة اكللك لجن انا عيني عليه كل يوم اروحنله
- دروح اتوكل عايلتك ناطرتك، و انا اشوف شسالفة عنادة هالسرحان هاذ ، الشاد راسه اعلينة من زغرة
- اودعناكم
- الله وياك
الشيخ اخذ عنوان الخاتون و راح الها، دك الباب ، طلعت اله، دنج راسه و صاح :- ها السلام عليكم بوية
- و عليكم السلام عيوني
- انا ابو سرحان
- يااا انت الشيخ مطر
- اي بويه انا ، سرحان اجا يو بعده
- هسه على جية ، اني طالعة اجيبه
- جا عليش تجيبينه انت هو ما يندل
- بلي يندل ، بس اني مينطيني كلبي يشيل الجنطة على جتفة خطية ، اروح و اشيلها عنه و اجيبة ويايه و انا ما عندي شي غيره.
-هاا
دشت جوا ، شوية و طلعت ، لابسه نفنوف ازرك جوة الركبة و شعرها يتراكص و الجنطة اعلى جتفها و الكعب اسود و تسال :- انت الشيخ مالهم هناكه مووو ؟
- اي انا، بس بويه حطي عباة اعلى راسج ، زحمة امشي ويا حرمة و هي مفرحة
- هاي شبيك حجي ، دمشي يا عيني
مشت و خلته وراها ، هو هز ايده ومشى مدنج ، تمشي هي و تسأل عن احوالهم ، و هو تقدم عنها هاطر لا يظل يعاين لطولها و هي تمشي جدامه، ويجاوبها
وصلوا المدرسة بعدها ما حالة ، وكفت هي دك اسئلة ، الى ان هو سألها :- جا اهلج وين بوية عليش ظالة وحدج
- حجي احنا اولاد تاجر جبير ابغداد ، جنت عايشة بجال ابوية الله يرحمة ، من مات هو وامي
- الله يرحمهم
- ويرحم امواتك ، بقيت عايشة على ويا اخوتي بس كل اليتزوج يطلع وحدة الى اخر واحد بيهم ، طلع و عافني.
- جا عليش ما عرستي
- كل اليجي يطمع بحالي ما لكيت الرجال الاكدر استند و اعتمد عليه من صدوك ، ما اكولك اختياري صح لإنو اني خسرت اهم فرصة بحياتي و هي انو اكون ام
- جا من هاي مهتمة بسرحان
- ما اعرف ليش هالطفل حيل احبه و احب اهتم بيه .
- الله يحفظج بوية
- ويحفظك حجي
- عليش تكليلي حجي ، ترانا بعدنا شباب
- هههههههههه نزول يا شباب عيوني ، ظل بينا شباب
- لاله لا بعدج بنية حديثة والله يستر عليج
- شنو يعني حديثة ؟
- يعني صغيرة
- هااا لا يعيوني فات قطار العمر و تعدانا
طلع غريب من المدرسة :- هلا بوييييه
- هلا يبعد ابوك
دنج و هو يحب بأبنه ، حسنية خاتون جرت الجنطة من غريب و هاذ ينشد اعلى راديون و كريم ، و شلونها اختي راديون و شلونه اخوي كريم.
و هاذ يحجيله و ينشده عن احواله ، سلموا على حسنية خاتون و راحو للأوتيل.
وغريب ما كف حجي لابوه عن الاسمها حسنية ، ساعة و اندكت الباب على غريب و ابوه ، فتحه و لنها حسنية خاتون مسويتلهم يخني باكلة و تمن جايبته الهم
:- عليش كلفتي روحج يا بوية
- تعبكم راحة عيوني .
- مشكورة بويه و الله يعلي علومج
- تسلم حجي
- جا هم كتيلي حجي
- لعد شكولك
- كليلي ابو سرحان
- هههههه ادلل ابو سرحان
ضحك الها الشيخ ، و هي راحت
وظلت يومية تطبخ و تجيب الهم الريوك و الغدا و العشا، حتى لو ما جان غريب موجود ، لإن الشيخ ضيف ابغداد ، فهي اكرمته.
يوم من الأيام ما جابتلهم عشى ، اخذتها النومة و التهت ، الشيخ روح و دك الباب عليهم ، طلع الحارس :- ها السلام عليكم
- اهلا حجي
- جا الخاتون وينها ؟
- والله ما طلعت يمكن نايمة
- ها اذا نايمة خليها ، انا اجيت انشد اعليها من عبن افتكدتها .
طلعت هي من باب المجاز تصيح :- ابو نوري منو على الباب ؟
- خاتون هاذ ابو سرحان
- لبست الروب الثخين فوك هدومها و طلعت :- هلا عيني ابو سرحان
- هلا بيج بويه انا تعذر يو زعجناكم
- لتكول هيج عيوني انت تنورنا صدك جذب، تفضل ابو نوري موجود
- لا بويه لا ، انا اردن ، بس ردت اتطمن اعليكم
يومين و الشيخ يفكر بيها ، جن نسى ملوك و نسى الديرة كله و هو يعاين على روحة و جية حسنية خاتون .
الى ان مر و هم يجيبون غريب حجه وياها وكال الها :- الله بالخير بويه
- هلا
- انا اريدن افاتحج بموضوع ، لجن ما ادري شلون احجي وياج و اخافنج تاخذينه بغير نظرة لجن الشاهد الله نيتي ما بيه كل غصد .
- شنو هالحجي ابو سرحان ، كول
- انا ابني موش صغير ولد فاهم ويميز الحلال و الحرام و تريدين الصدك الولد مرتاح بجعدته هنا يمج.
- الله يحفظه و اني هم احبه وروح ابوية هالولد كلبي متعلك بيه.
- بس هو جبير و ما يصير يكعد وياج و انت حرمة
- لا لدكول هيج ، بعده صغير
- عدنا ما تمشي
- لويش اني والله احبه.
-اسمعي بوية انا رايد اكللج ، طالبج زوجة الي اعلى سنة الله ورسوله منها امن اعلى وليدي و منا احضالي بخاتون و بت اوادم مثلج اتشرف بيها
شرايج بويه ؟.....
ا
رواية كحل عرب الفصل الثامن 8 - بقلم زينب ماجد
الحلقة_8
(أشرقت هدية )
...... عرب ال چلوب ......
اجا حاكم من بغداد و هو ملهوف يشوف أبنه الأول دخل للبيت و كال :- ها الله يساعدهم
تلكته ام حاكم :- هلا بيك يمة هلا ، عمت عيني تعيبان، ارتاح ارتاح.
- لاله لا ، اريد اشوفن ابني وينه
- ذاك هو بالحجرة دش دش
دخل حاكم للحجرة ، بس كواغد ما جانت موجودة ، شال الفرخ بين اديه ، حبه براسه و هو يعاين ابنه بفرحة، ورفع راسة يتسائل :- جا كواغد وينها، ما هي ؟
جاوبته امه :- جا كواغد تركد بالبيت ييمه مكضيتها فرارة النهار كلة ، خايبة اركدي ولج ابنج ، حاطة هالعباية اعلى راسها هاهاهاها فر بهالسلف .
- هاااه و عايفة ابنها.
- جا بعد شسوي ، انا امك جويعدة يمه كلبي اعليه خافنه يبجي .
حب ابنه ورجعه للمهد و علامات الغضب وضحت على وجهه، طلع من الحجرة ووكف بالباب ينتظر كواغد خاطر يحاسبها.
شوية و اجت كواغد العلف فوك راسها و تمشي كوة، من شافت رجلها من بعيد فرحت ، صارت تمشي بهمة خاطر توصلة بسرعة ، وصلت و كالتله :- يااا جيت هلا بيك .....قاطعها
- شعدج طالعة
- رحت اجيبن علف ، شلونك ، ارتاح ، جوعان يو اسويلك الگيمة
- مرة نفسة انت شعدج طالعة بهالجو هاذ تفرين بالسلف ما شبعتي خوارة، ابنج هادته بالبيت ما تكولين يبجي يجوع يفطس، شنهي من مرة انت.
- يا شمالك، اعلية العباس رضعته ونومته و رحت اجيبن ، من عبن گلت لامك تروح تجيب العلف للحلال ماتن جوع، ما رضت هالعفته يمها ومشيت .
عاين حاكم لأمه اللي سبقته و ردت كواغد :- يااااع انا ما رضيت يو كتلج رجلية ما يعينني اعلى المشي خلي اخوج يجيبهن.
- جا شنهي ما عدة شعل و عمل رايح راد اعلى العلف
- جا غير اخوج....قاطعهن حاكم
- بسسسسسسسسچن ، انا ارد تعبان ارتاح يو اسمع مراددجن ، بسجن فكني.
سكتن اثنينهن ، وراح هو دش اعلى الحجرة، دشت وراه كواغد :- ترانا طلعت روحي من امك
- كلت بس .
سكتت ، ردت حجت : شنهي جا حتى جلمة الحمد الله ع السلامة ثكيلة اعليك يو من ورة امك كلشي ما احصل منك حتى الجلمة الحلوة
- انا شگلت ؟
- صميت حلكي ارتاح
بجى الفرخ، تناوشته و حطته بحظنها وكعدت ترضع بيه ، شال علاكة وحطها يم رجليها، عاينة اعليه :- شني هاي
- افتحيها الج
فتحتها، بكارتونة صغيرة حلاوة راشي ، و وياها فوطة بيضة ، ضحكة و عاينت عليه :- هاي الي
ابتسم الها وهز راسه و كال الها :- الحمد الله اعلى سلامتج.
ضحكت و فزت من مكانها و هي تكله :- جا تعال احبن راسك
كامت حبته براسه و ، هو هم حبها و كعدوا يضحكون ويسولفون ، هي تسولف اله اعلى جيابتها، و هو على اوضاعة وشغله ابغداد.
....... في بغداد .......
الشيخ و هو ينتظر جواب حسنية خاتون على خطبته، و يكللها :- شرايج بوية ؟
صفنت هي و ما عرفت شتجاوبة :- والله يا ابو سرحان فاجئتني بطلبك ، ما اعرف شأكولك ، بس هيج قرار مو بسهولة ينوخذ خاصة بعد هاذ العمر.
- هو العمر ما ظال بيه شي يا خاتون ، و انا هالتشوفيني زلمة والحمد لله الله متفضل عليه بخيراته و مو بحاجة اموال احد و لا عوزني الجاه ، كلهن حاوين ورايد احويج وياهن.
ضحكت و هي تكوله :- شنو الخلاك تطلب هي طلب ؟ بس حتى ابقى اعتني بأبنك و ميبقى محرم عليه لو .... قاطعها .
- تريدين الصدك انا وكت الفكريت اخطبنج ما طره اعلى بالي شي اخر غيرج ، انا مشتري خاتون.
- بس انا الي اخوة
- و انا شيخ و ابن اجاويد و اعرف الأصول لجن ردت اعرف الجواب منج ياله اباشر بالأصول و اروحن اعلى اخوتج.
-اني اشوف الأفضل تاخذ الجواب منهم.
حجتها ومشت، بس هو شاف بعيونها الرضا و الخجل من الجواب، ضحك و هو يعاين عليها، دنج راسه للكاع وهو يفكر بيها.
من خطى هاي الخطوة ما حط اعلى باله ملوك ولا حبه الها ولا وكف بعينه كل شيء، بمجرد ما امرأة ثارت اعجابة استعلى بغرور الشيوخ و باشر بخطبتها.
اخذ ناظم افندي و فخري بيك و اثنين من باشوات بغداد يعرفهم هو و ناظم افندي و راح لخطبتها
لما وصل و خطبها، اخوتها جانو عدهم تردد بالموافقة ، من كون هو شيخ قروي ريفي ، واكو عنصرية بهذا الموضوع كون هم من البغداديين الأصليين بالمنطقة وافندية و نسائهم خاتونات.
بعد كلام و اخذ و عطى من الباشوات ، كال اخوها:- عدنا شرط
الشيخ عزت بروحة يتشرطون عليه و هو جبير اهله و شيوخهم و جاي يذل روحه هنا، فكال :- اسمع بويه احنا ناس معروفين من اصل و فصل ، و ان جان جدك يو ابوك صار عدهم جم فلس و صاروا باشوات و افندية ترانا من مئات السنين اهلنا شيوخ وكيعانة تملي عيون و النا قصور و خدم و حشم و احنا النتشرط موش يتشرط اعلينا، ويو ردنا النسوان يا مكثرها ، لجن انا طامع ابختكم ورايد اناسبكم..
حجه اخوها :- شيخ لو جنت شايفنا اقل منك ماكو داعي لهذه الزواجة
- حاشى التكبر و اصغار الناس موش اطباعنا ، لجن انا الشفت بجلماتك التزغير و ما ارضاها اعلى عكالي.
ناظم افندي :- نكول طلب و على بركة الله نسمع طلبك يا ابو منير.
حجه بأمتعاض :- اني ما اقبل الخاتون اختي تعيش بالقرية ، لإن القرية مو مستوى الخاتون و لا نرضاها على بناتنا.
تنهد الشيخ و هو يحاول يهدي نفسه كدام الاخ المتعجرف، حجه بهدوء :- و ان جنت انا مغرر تظل هنا و مالي نية اجيبنها غاد للسماوة، لجن انا اخلي هالموضوع للخاتون اهي حرة بأختيارها، ان جانت تريد ابغداد .. ابغداد ، و ان جانت تريد تعيش غاد بديرتي اشيلها اعلى عكالي.
جيبها منا ردها منا ، خطبة و كوة مشت بسبب شموخ الشيخ مطر و غطرست جواد افندي اخو حسنية خاتون.
يومين .. هي خطبة هي حفلة صغيرة للزواج و العقد ، و تزوجوا .. كالت اله :- اهلك هناك ما راح تنطيهم علم بزواجنا.
جاوبها :- انت مخيرة تريدني اخذج غاد و اعرفج اعلى هلي و ديرتي ما عندي مانع ، تكولين لا براحتج.
- اني اللي تشوفه
- اللي اشوفه يا خاتون ، انا كافي اعلية دوخة طلايب السلف موش حمل غيرة الشيخة ملوك ، خليهة ووكت ما تدري ذاك الوكت تدري ما عدي اشكال.
- يعني مراح تكولها ؟
- ما مضطر ، لجن انا عدي شغيلة صغيرة
- اللي هي ؟
- انا ما ارضاها عليّ اعيش ابيت حرمة و اجي خطارها، يو تخليني اشوفن بيت ثاني غير هاذ ، يا تبيعينة الي و انا الشراي.
- لا بيع شنو اني وياك مبيناتنا بيع و شرا ، اني مستعدة اتنازل بيه الك.
- لاله له ، ما ارضاها اعلى عكالي اخذ بيت من مرة ، احنا الننطي موش ناخذ .
- اني ما اكدر اطلع من هذا البيت، هذا البيت من ريحة امي و ابوية و مستعزة بيه هواية ، كل ذكريات اهلي بيه ولا اكدر ابيعه لأحد .
- انا اطيج فلوسه و خليه بأسمج لجن نكتب وثيقة بهالشي للزمن ، ما ندري بعد يومين الدنيا شيصير بيها .
- موافقة ،بس اكدر اطلب منك طلب
- وشنهو ؟
- سرحان يتسجل بأسمي و امشي بالاوراق القانونية و اخليه بأسمي
- لا بويه لا لا لا .. التبني حرام و الولد اله ام و هاي الأم تتمنى شوفته و هالسالفة موش هينة بعد ابوج .
- مراح يتغير من الموضوع شي ، انا بس اريدة ابني.
- لا بويه لا ما ارضاها، هو عدج وانت مخيرة بيه لجن ما ارضى بهالامور اعذريني.
سكتت بس بقى الموضوع بنفسها، لإن تتمنى يكون عدها ولد و تكون هي امه ، و بهالاجراء تظن ان يصير بأسمها وممكن تصير امه لكن الشيخ بادر بالرفض، ورفض المناقشة بهالموضوع قطعا... فنسد.
من بعد ايام .. رجع حاكم لبغداد
مر على الشيخ بالاوتيل ما لكاه، مسجل خروج من الفندق من فترة .
راجع لكهوته يشتغل، ثاني يوم مر الشيخ للكهوة ، شاف حاكم، حجه :- ها الله يساعدك ابو ستار
- هلا بيك عمي
وسلموا سلام ايد و خد :- شلونك اهلنا شلونهم
- بخير عمي ناطرين جيتك
- ان شاءالله ان شاءالله انا باجر غبشة طالع للسماوة بحيل الله.
- ان شاءالله توصل بالسلامة .
- الله يسلمك ، لجن انا اريدن اوصيك يحاكم
- كول عمي
- بالاول انا اريد اكللك ، تزوجت
- ها !! .. بالخير ان شاءالله منين الاخذتها
- والله تعرفها انت
.- اعرفها !؟ ياهي هاي ؟
- حسنية خاتون
حاكم بلع ريگه متفاجئ :- حسنية خاتون هاي اللي ........
الشيخ :- اي اي هي .. صارت القسمة و الحمد لله كلشي تم اعلى خير ، بهالوكت ما اريد يوصل شي للديرة و ما اريدهم يدرون بشي، لجن انا راجع باچر و راح يظل بالي هنا، فاريدنك تاخذ مچان الحارس ابو نوري، انا ما ارتاح لغريب يحفظ الدار ، و اريدنك انت هم كرايبي و هم رابي بكاعي و اعرفنك.
- على راسي شيخ لجن انت تعرف انا شغلي منا.
- شكثر تحصل هنا ، انا اطيك الضعف ، لجن اريدنك تحرس الدار و عينك عليهم .
- بخدمتك شيخ .
سلم عليّ و راح ، و انا ظليت صافن ، صكد عود تزوج حسنية خاتون، و وافقت ؟ جا هي ياهي اليتغدملها ما ترضى بيه ، بس زعم هاذ شيخ خو ما مثلنا ناس اعلى كدنا.
اييه زيادة الخير خيرين ، احجي ويا حجي فخري و اكله بعد منا و جاي اشتغل شفت واحد موش شفتين، و من الحعصل احلن و اكعد احرس الدار هم اريحلي و وراد ازيد.
الحمدلله و الشكر ربي على نعمتك.
رد الشيخ لداره ، و انا كضيت شغل الكهوة و حراسة دار الشيخ ، و متكفل غريب بالرايحة و الرادة ، لجن انا ما اطبن داخل بالبيت، مكاني الغرفة مال الحارس اكل و اشرب بيها و اوكف بالباب.
من وكفة الباب، و طلعت العصرية كونت الي صداقات ويا ناس سياسيين و اتعمقت بالسياسة و من المؤيدين العصاميين للزعيم عبد الكريم قاسم .
مرت سنة و السنتين و انا اعلى شغلي ووارد خير من الله اودي لعايلتي منه، و عايش بخير لجن جم مرة رحت لديرتنا و كواغد تظل تلح براسي تخاف لا ماخذ اعليها مرة ، و انا احلف الها و علي ما عدي غيرها بس ما تصدك من كون حالي تغير، جنت كبل اروح مبهذل التعب هاد حيلي، هسه تغيرت بنطروني و قميصي و ارتب روحي و هي جاتله روحها خوفن ماخذ اعليها.
كضيتها و كلت الها :-يا مرة و العباس ما عدي غيرج لجن انا كمت اشتغل ابيت الشيخ و اخذ ضعف راتبي بالشغل، ومنا....... قاطعنتني
- يا بيت الشيخ، شنهي الشيخ مشتريلك بيت غاد.
- لا بويه عرف ولف يشتريلي بيت، بيت لعايلته
- عايلته ياهي ؟
- ولج كويغد اكللج سالفة لجن ما اريدنج تكولين بيها
- شنهي هاي ؟
- الشيخ مطر متزوج غاد ابغداد
- ياااااااع صكد ؟
- اي وعلي متزوج خاتون
- خااااااااااااتون ، يععععع خايب انت تحجي صكد يو لاله
- جا انا مجذب عليج كبل شمالج .
- كللللللللللللللللللللللللللوش
- ها بوية شمالج
- يمه هسه ارتاح كلبي من كسر خشم هالفلوك هاي، و اخذ اعليها مرة .
- عليش ولج
- من عبن مشعوطتنا و هي رافعة هالخشم و تشوف الناس بالعين الزغير، جن هي فوك كل الوادم جواها، هله هله بالخاتون .
ودكت ( و انا بشيبي لدك حناها ، انا بشيبي لدك حناها )
- خايبة اركدي شنهي هالخفة هاي و تهزين جدامي.
- جا غير فرحانة دهدني
- ما دامج ترضين بالشريجة و تفرحين بيها جا ما تخطبيلي
- يععععع جا غير .... خليني ساكتة
- لا لا بالله احجيها
- عودن من تتزوج اكلك شعمل بحالك ، هسه خلني ساكته و ساترة اعلى رويحتي
- جا استري روحج و كفي هز، بس ها كواغد ، الكتلج عليي يظل سر ما اريدن احد يعرف الشيخ متزوج من عبن هو مأمني .
- صارله شكثر من عرس
- اكلها سر تكلي صارله شكثر ، خايبة سر سر
- اي اي فهمنا، لجن انا اريدن اعرف صارله شكثر من تزوج .
- عكب ما صار ستار .
- ياااع سنتين
- اي
- خاييبين انتم الزلم ما تنكدرون و علي، من كون لون حطيتو ابالكم شي ادستروها و لا احد يدري، جا مثل حظي حبليت مرت الاخرى و عودينه كلت ما اگل لاحد خافن تلوحني العين، بس كلت لامك و امي و نسوان اخوتي و بنات الغصر ، اصبح الصبح فتحية ام الروبة تكلي "بالمبارك سمعيت بيج حامل"
- انا اخووووووك ، جا كولي سر الشيخ انشهر.
ضحكت :- شمالك وياي انا احفظ السر و علي .
- نشوووف .
و هاذ الاختبار جان لكواغد ، لجن هي مرة حالها حال النساوين و السر عدها امرين يا سر جايد ما ينسكت علي يا سر عايب ما يستاهل ينظم.
و هي ما غصرت، راحت بشرت امها الشيخ متزوج اعلى ملوك، امها كضي جناينج و كليلهن ، جناينهن كل وحدة عدعا عزيزة و تعاي اكلج و لا تكولين .
لحد ما وصل لصبيحة ودرت بالسالفة ، و صبيحة راحت سعلت سليمة :- خايبة اكلج صكد الشيخ متزوج
- ياااا شني هالحجي جذب ما يعرس ، هو ما ياخذ اعلى الشيخة
- والله انا هاذ السمعته يكولون متزوج ابغداد.
- ياااه ، منين سمعتي
- من مرت حميد اليوم و انا امشي.
- لاله لا جذب مامشي هيج خبر، الشيخ ما ياخذ اعلى الشيخة من عبن يحبها .
- ايييه جا احنا شنريد الله يحفظهم ان شاءالله.
راحت صبيحة و سليمة ظلت تفكر و تحوس، روحي للشيخ و اكعدي يمها و هي مثل دجاجة تريد تبيض، بس تريد تطلع الجلمة من حلكها
الشيخة كاعدة تدهن بشعر بتها راديون و تهتم بيه ، و تغني لبتها وتضحك وياه، انتبهت لسليمة تحوس كالت الها :- شمالج يسليمة
:- اكلج شيختي
- اسمعنج
تحجي و تمشط براس بتها
- انا سمعيت اليوم جلمة ما ادري اكللج يو لا
- جا شنهي هي حزورة اكلج يو لا، احجي شنهي الچلمة
- يكولون ..........
- يگولون وسكتي ، شيكولون
- النسوان بالسلف ، انا سمعيت منهن ما ادري صح يو غلط
- جا غير تحجي !
- يكولن الشيخ متزوج ابغداد
رخت ايدها من شعر بتها، و دارت وجهه :- شني هالحجي ؟
- و علي انا سمعيت هيج ، بس لزوم هالخبر جذب ، تعرفين الشيخ ما يسويها من عبن يحبج و ما يشوف غيرج.
لفت شعر بتها الشيخة و بالها مو صافي، دكة خفيف على ظهر البنية و كالت الها :- كومي يمه ، روحي العبي .
وكامت اعلى حيلها :- منين سمعن هالحجي ؟
- ما ادري ، النسوان بياتهن يحجن، بس تلكيهن غيرة منج يشيخة ، لا تهتمين
- لا يسليمة لون غيرة جان طلعت للجلمة من كبل ، لجن مامش رماد بلايا نار .
- يعني شنهي ، تصكدين الحجي شيخة
- يا سليمة بس الاغم اليسمع الجلمة و يصدكها بلايا بحث، لزوم اعرف الحقيقة ، خصوصا و انا اشوف الشيخ كل شهر يروح ١٠ ايام لبغداد بحجة وليده غاد و انا حايرة شلون اخلص من وليدة ، يا خوفي صدك مسويها.
- سألي شيخة ما اظنن يجذب اعليج.
- لو رايد يكلي ما ضم ، خليها هسه و انا اعرف الحقيقة بطريقتي.
وظلت الشيخة ليل و نهار تفكر بهالأمر ...
فكرت تسأل حاكم، بس تعرف حاكم ما راح يكول، فضمتها للى ان يحين وكتها.
لم غراضة حاكم خاطر يرد لبغداد ، ووصى كواغد زين على ابنها و على البطنها و على امه، وودعهم ورجع لبغداد .. رجعة ما يعرف الزمن شضاملة بعدها .
صادف وكتها شباط .. الشهر الثاني و الدنيا رمضان .
الشيخة جانت ناوية بعد رمضان ، تتحقق من الموضوع ، بس الصار بهذا الشهر..
هو انقلاب لعبد السلام عارف على الزعيم عبد الكريم قاسم.
بعد تولي الزعيم رئاسة الدولة ، سعى برفع مستوى العراق الى صفوفوالدول المتقدمة في العالم لما يملك البلد من خيرات عظيمة ، ابتعد عن الحروب و الثورات و انشغل بالاعمار و انشاء المشاريع العملاقة .
لكن هذا الشي اللي خلة عبد السلام عارف و هو صديقة ينتقده اكثر من مرة بسياسته ، الى ان ندرجت هذه الصداقة الى عداوة، فدبر عبد السلام عارف محاولة اغتيال للزعيم .
ما مات لكن بعدها تم القاء القبض على عبد السلام عارف و الحكم عليه بالاعدام، لكن لكونه هو الصديق المقرب كان للزعيم .. الزعيم اعفاه من الاعدام خفف الحكم لمؤبد .
وهذه كانت غلطة الشاطر اللي كلفت الزعيم حياته
دبر عبد السلام عارف خطة للخروج و الانقلاب و فعلا يوم ٨ شباط من عام 1963 شهر رمضان حدث انقلاب على حكم الزعيم فسلم نفسه الزعيم و نزل ببدلته العسكرية .
حكموا عليه بالاعدام بدوم محكمة جنائية تثبت جرمه ليعدم، كان اخر طلب اله هو ان يناولوه كلاص ماي يشرب قبل الاعدام لإن كان صايم ، لكن رفضوا ان ينطوه الماي ، و انطوه الرصاصة بنص راسه و تم قتلة ... رمياً بالرصاص
من بعد قتلة امرت القادة ان يرمون جثة الزعيم بمكان بعيد خوف من ان الناس تشوفه او تزوره، لإن الزعيم كان صاحب شعبية عظيمة ملقب بابو الفقراء لما عرف عنه بحبه و مساندته للفقراء.
دفنوه بمنطقة نائية و هالو عليه التراب ، بس ناس شافو العسكر و هم يرمون جثة ، لما راحو العسكر و اقتربو من القبر ، شافو انو القبر مو منظم و التراب عليه ما مصفوف و بهالطريقة ممكن للكلاب ان تعفر و تاكل الجثة .
فحاولون يطلعون الجثة حتى يدفونها عدل ك(اكرام الميت دفنه ) لما طلعوه ، شافو وجه الزعيم ، و صادف الناس اللي طلعوه هم ناس فقراء قرويين الزعيم منطيهم قطعة ارض .
شيلو جثة الزعيم و غسلوه و كفنوه بما يليق بيه و ادفنوه بمكان بعيد .
لما وصل الخبر للرؤساء ، بعثوا قوة عسكرية داهمت المكان اخذوا اللي دفنوه للسجن، و طلعوا جثة الزعيم عبد الكريم قاسم و شمروها من جسر ديالى حتى يتخلصون من جثته ، كونه هو رجل صاحب شعبية و الناس تدورة بكل مكان ، رموه حتى تاكله السمج ويخلصون منه الى الأبد .
رثاه الشاعر عريان السيد خلف بأبيات شعرية قال فيها :-
منك.. كلهه منك.. طب حراميها
ولعب بيها وخبطها.. وشرب صافيها
كَلنالك تحذّر ناوراك الذيب
تاعيت الضواري.. وأمنّت بيها
يمصدك الاوهام.. ان البخت حفاظ
يا حظ.. يا بخت.. لوجرخ سركَيها
ثورة اتفرصغت.. من وسط حلكَـ الموت
وبدمك خذتها.. اشلون تنطيها!؟
شفت اشلون عثرت.. وانجفت عالكَاع
وتعله ابسرجها.. اتراب رجليها
صَدِك موملامه.. وتعداك اللوم
بس جمرة عتابة اتمشكلت بيها
يا سيد العفة ويانزيه الروح
ويارمز الشجاعة.. الحّد تواليها
يملاكَي الرصاص اعيونك امورثات
زلم الغدرتك.. ما ظن زلم بيها
الزلم تولي وتعف.. ونته الطلكَت اركَاب
جان الموت حكَـ.. امفصّل عليها
يا شاطر غلطتك كلفتنه ارواح
والغلطة الجبيرة اشلون نمحيها؟
يا غرة بياض ابكَصة التاريخ
جسدت الرجولة ابكل معانيها
لاكيت المنايا ابهيبة الفرسان
مادورت حفره.. وعفنّت بيها
يا لكَبرك صرح بكَلوب كل الناس
شلك بالكَبور الرِجل تاطيها
شلك بالگبور الرِجل تاطيها.
بعد موت الزعيم بحثوا عن ارثه ..ما لكو غير بس ١٦ دينار بجيبة ، ويسكن الأيجار ما عنده قطعة ارض بسبب ان كان عندة 4 قطع اراضي قبل لا يتسلم الحكم، لكن بعد ما تسلم الحكم متبرع بيها للدوله و بانيهن مدرسة و مستشفى للفقراء .
تم هدمهم من قبل السلطة الحاكمة لمحو اثره .
.....حاكم جان من المؤيد للزعيم، المعارض لأنقلاب ٨ شباط ، فطلع بحركة معارضة ضد مقتل الزعيم .
كضوهم و اشمروهم بالسجن . و حاكم من ضمنهم .
وانسجن و كواغد حامل عليها ٧ اشهر .
لما وصل الخبر لعرب ال جلوب و الشيخ درى ، انتفض ، و كال :- وصلوا خبر لعايلته ، و حضروا لطلعتنا باجر نروح لبغداد غبشة.
اجا حميد دك الباب ، صاحت ام حاكم :- ياهو ياهو
- انا انا ام حاكم ، انا حميد
- ها يمة كول شرايد
- بس ردت اخبرنكم
- شنهي يمه كول ، حويكم بيه شي
- والله يا ام حاكم ما ادري شگلچ
كواغد :- شنهي عمة شمالج
وتقربت حتى تعرف شكو
- خايب يمة كول مطيت كلبي وليدي بيه شي ؟.
حميد :- حاكم طالع بمعارضة سياسية ابغداد و انسجن غاد .
صرخن اثنينهن، ام حاكم تلطم و كاغد تضرب اعلى خدودها و تزلغ بيهن :- خوية عليك العباس بس كلي ، شنهي بعد ما يرد ، جتلوه شسوله احجي
- خوية مسجون سياسي و ما ندري بعد شنهي حلها ، لا تخافن ان شاءالله خير.
حاول يهديهن ، بس ما كامن يسمعنه يصرخن و يلطمن، ام حاكم ما تحملت الموقف ، اتخربطت بسرعة وطاحت من طول٧ا، و كواغد بطنها لخشمها و هي سمينه احتار حميد شلون يشيلها
كام يصيح بنص السلف :- خايبين ءهلا ءهلا الحكونا المرة طاحت يهالواااااادم
اجت الناس فزاعه، شالوعا وياه و نقلوها للمضمد، المضمد كال الهم اخذوها طبيب المرة ما جاي توعى، شالوها للمستوصف، المستوصف نقلها للولاية.
وكواغد وراها تهف ابطنها و ابنها مكعدته اعلى متونها و الدموع همالة ما كفن اعلى حالها و حال عمتها ورجلها.
وكفت بنص المستشفى و بس حميد و زلمه لاخ من السلف، كعدت بالكاع ، تبجي و هي تنطر خبر اعلى حالة عمتها ، شوية و طلع دكتور و خبرهم ان ام حاكم صابتها جلطة .
كواغد كامت ادك و تلطم بنص المستشفى اعلى حالة عمتها و تصرخ :- حااااااااااكم وينك حااااااااااكم ، وين رحت و عفتنييييي ، عليش هيج اعملت بيه حااااكم
و الزلم تهدي بيها، بهالاثناء دخل ابوها و اخوتها صلاح و جبار .
شمخي :- ها بوية كاغد كلبي عمت عيني عليج بويه بهداي يواشج ، اها بهداي.
- ولك بويييييييييه انسبيت بوية ، راح رجلييييييي بوية
صلاح :- لا تكولين هجي يا خوية سمي بسم الله ، ان شالله ما بي شي بري بري ان شاءالله .
حميد :- ام حاكم انصابت بجلطة
صرخوا :- لااااااااااه صكد والله
- اي ولله
صلاح يصفك بيدة ، و جبار يتنهد بقهر ، و شخهي دنج اعلى راس بته ، حبها و كال الها:- ما يصلح هالبجي بويه وعلي ما يصلح كولي يالله كاغد گلبي بوية.
كواغد :- ابتليت يا بوية انهدم بيتي اعلى راسي بوووويه
وحطت راسها بحضن ابوها و بجت ، ابنها يصرخ حضنها ابوها و دار وجهه اعلى ولده و صاح بيهم :- شالكم شيلو ابن اختكم ما تسمعون حسه يبجي ، شيلو عنها
مكاريد هم منقهرين اعلى اختهم و مركزين بيها من صاح بيهم ابوهم ، ترادمو و اثنينهم هم اعلى حضنها خاطر يشيلونه، شالة صلاح و كام يصح :- ها خالي ها شمالك ، تعال خالي تعال .
اخذه و طلع بيه يسكته، اما جبار دنج اعلى اخته يواسي بيها :- شمالج خوية كولي يالله جا احنه هنا شني، اعليمن تشيلين هم و احنا اخوتج احزام زلم ، وعلي ما نخليش بعازة نشيل من عوايلنا و ننطيج كولي يالله ولا تهتمين .
وهي تنوح و تبجي و حميد يكلها :- خوية احنا بالسلف كلنا اخوتج اشري و احنا عد عيناج
وظلو يواسون بيها ، بس يا جلمة الطيب كلبها من صوابها ، الحمل الثكيل ما يثكل غير اعلى صاحبة لو شما جان اله عوان .
ظلت ام حاكم بالستشفى ، وكاغد وياها ، و اهلها و اخوتها واحد رايح وواحد جاي عليها، و ابنها عد اهلها نسوان اخوتها شايلاته و متكفلاته ، و هي ظالة ويه عمتها و امها وياها تبات.
ام حاكم نايمة و كاغد يم راسها و حاطة ايدها اعلى خدها و تعاين لبطنها، و امها كاعدة، حجت :- يمة اظنن هاذ الفرخ البطني فگر .
نشمية :- يا يمة اسم الله ليش تحجين
- يمه شو من يوم الحبلت بيه ولليوم و انا المصايبة وحدة فوك الاخره تترادم اعلية.
- هاذ قدر ربج حرام تكولين هجي ، شله غرض الفرخ .
- من عبن يمه كل ابنادم اله كصة ، و يا كصة خير يا كصة فكر ، وكت الجبت ستار حوسكم اعتلى رويتبه و صارت امورة زينه و تعدلت امورنا من عبن كصته خير اعلينا ، لجن هاذ الفرخ كلبي ما مطمن اعليه ، اهيس كصته فكر اعلينة
- يا يمة لا تكولين هجي شمالج، هو اجا للدنيا و شفنا گصته خاطر تكولين هيييج ؟ هاي عود انت التعرفين الله جا شنكول اعلى الكافر.
-دخيل اسمه يمة جا انا ما كلت شي بس هيج ظنيت ، يجي ان شاءالله و الله يحفظه.
- الله كريم .
- وشلون راح ادبرها يمة ؟
- ذبي حمولج على الله يمه ما ينسى عبد حاشاه .
- و النعم من الله لجن يمة انا وحيدة و عمتي مريضة و عدي فرخ و حبلى وين اروحن بيهم و ين اطي وجهي ششتغل شجيب ، انا و حاكم جنه و كوة دابرين العيشة وحدي شلون راح ادبرنها؟!.
- جا احنا وين رحنا يمه ما نعوفج انا و ابوج و اخوتج
- يمه انتم منا حالكم شلون تحيرون بضيمي
- جا هاي بعد ليما الله يدبرها
- ما ترهم لزوم الكا شغيلة اخرة ويا شغل الغصر ، خاطر اعينن ارويحتي و عايلتي .
- الله كريم دجيبي هسه والله كريم ربج يدبرها .
وظلت كواغد حايرة بعيشتها وشلون ادبرها بهالازمة.
اما ملوك فجانت مراقب جيد للأوضاع ، تشوف الشيخ يروح و يرد البغداد ، سوا الدرب چن شبختين ولا عبالك مسافة طويلة تبعد السماوة عن بغداد ،و هي تراقب بهدوء.
اجا مرة و هو تعبان و ينزع بالسترة مالته و العركچينة، و كال الها :- اريدن انامن دايخ حيل
- سلامتك يبو زناد ، لجن انا گلبي اعليك عليش ما تجيب سرحان هنا ، شالع گلبك بهالروحة و الردة
- جاي يدرس ما يكدر يجي تروح اعلية السنة
- دخيل بختك شيخ شنهي دكتور و خايف اعلى دراسته و كاطع كلبك بهالروحة و الردة
- لا لجن انا ما اريدن تروح اعليه دراسته حرامات و هو مصر يكمل السنة .
- ما بيها شي ، يكملها هنا ، جا مو هاذ زناد هاليدرس يو الا بغداد ابن ردحة ؟
- هم رديتي تسمي بسم امه يملوك.
- السموحة يشيخ لجن انا الجاتلني تعبك هاذ ما يطيني گلبي اشوفنك هيج.
- ميخالف
- حاكم مسجون سياسي و ما نعرف مصيره شني، شلون ظال غاد بوحدة؟
- انا مأمنة يم عايلة
- الله اكبر ،كل هاي خاطر يدرس ابغداد ؟
ما رد عليها، تمدد ع القريولة و حط ايده اعلى راسه ، وتجاهل الأجابة ، تنهدت و هي تعاينلة ، كامت و كالتله :- ارتاح يروحتي عسى الروحك الراحة.
عافته و صكت الباب، و مشت للديوان .
من ورا الباب حجت ويا الحارس :- اندهلي كاطع بسع .
- على امرج شيخة .
دشت للديوان و هي تفر ، تروح و ترد ، شوية و دس كاطع :- ها خوية
- محتاجتك يبن امي
- و انا عد عيناج
- تعرف مچان شغل حاكم
-لا والله يخوية ، كل الاعرفنه هو يشتغل بمچان اسمه الأعظمية وبس هاذ كل الاعرفنه.
- لزوم تعرف مچان شغلة و المدرسة اليداوم بيها غريب، و البيت العايش بيه و كلشي ، ك ل ش ي ... بالتفصيل ..... مفهوم ؟
- تم ولا يهمج، لجن ارين اعرف عليش تريدين هالمعلومات ؟
- انا شاكة يكاطع
- بشنهي ؟
- بالشيخ متزوج اعلية .
- جا خوية هاي چلمة سمعناها و تعديناها نعرف الشيخ شكثر يحترمج و يودج .
- اليمشي اعلى رجلية ما ينحلف عليه يكاطع ، و الشيخ زلمة و الزلمة ما يتأمن ساعة اليهوى يعوف كلشي اعلى كتر ويتبع هواه.
- تظنين متزوج صكد .
- وظني جاي يكبر يوم بعد يوم ، و الا اؤضي عكلي و اطيني سبب واحد يخليني اقنع الشيخ عايف ابنه عد ناس غربه غاد وحدة و مصر لهاي الساعة ما يتنازل ويجيبة لهنا.
- والله ما ادري شكلج خوية بس تريدين للصدك سالفته ما جاي ادش بعكلي .
- ما اريدنها ادش يكاطع اريدنك تحفر الكاع و اطلعلي الحك خاطر اعرف العلي و الموش علي.
- اعلى امرج .
و ظلت الشيخة تبحث حتى تعرف حقيقة للشيخ مطر ووضعه الغريب .
اما كواغد فطلعت عمتها من المستشفى، لجن الحمل العلى جتافها ما تشيلة جبال، حطت عمتها بالحجرة و كابلتها و بچت .
اجا ابوها و اخوتها و نسوانهم و فروخهم كلهم مروا اعليها ، خاطر يخففون اعليها، امها حضرت هدمات الفرخ و اكماطاته و حضاينه و اللگافات مالاته، خاطر يو جتها الطلكة غريضات الفرخ جاهزة.
فرغ البيت بالليل ، و ظلت وحيدها ، هي و ابنها و عمتها و المريضة بحجرة وحدة اعلى ضوة البطل ، منومة الستوري اعلى رجلها و تهز بيه وايدها اعلى خدها و ام حاكم نايمة .. و تعاين
... اي يكواغد شراح تسوين بهالفرخ الجاهل و المرة المريضة و بطنج نايمة بحضنج ، دكيتي حيل بعرسج وصحتي اهو احو ويردح حيل الما شايفها
كلتي اييي اجا اليسندني ويوكف وياي اجا اليمحي وحشة الليل و راح اعيشن حالي حال نسوان اخوتي شما ضاكت الدنيا يجي الزلمة ينشدج و لو ضجتي يضاحكج و لو ونيتي شال عنج و لو استحاشتي ملا ظلمتج
، تالي انحرمتي من زلمتج بالسنة ما تشوفينة مريرتين يو ثلاث و اخيرها انكطع عنج و زاد حملج فوك حمولج.
اي يعيشة هلي ، لو ظالة اعلى نسوان اخوتي و طلايبهن و لا هالحمل الكسر ظهري .
لا منة الغريب تنراد ولا منة الاخوة
مو خوف من الاخو يمن لا .. خوفك من الغربه العدهن لا يوم يعايرني بعونة اخوي ليه و انا ام روح العزيزة الما تحمل المنة .
احجي و الدموع تجارى، غفيت و انة متچية راسي للحايط و ابني بصفي.
للصبح كعدت اعلى حس ابوي ، هيسيته يفتح الباب و ينده :- ها بوية كاغد
فزيت من مچاني :- ها بوية
اعاين الشمس بعدها ما طالعة، فتحت الباب و كلت اله :- هلا بوية
- شلونكم
- الحمد لله ، خير صاير شي ، سمعيت شي عن حاكم.
- لا والله يبوية ، هاي كعدتي من النوم و اجيتج ، كلت خاف تحتاج شي لو ما عدها ريوك. .
- لا بوية خير من الله الحمد لله
- يا خير بوية امس جبنا المرة و صارلج وياها شكثر ، منين بعد عدج
- تدبر بوية جا ما يظل حمل مطروح
- اي لا تفرج ان شاءالله انت بنيتي كاغد و انا اعرفنج سباعية لجن انا كلت لامج تجيب الريوك و نتريك انا وياها يمج.
- هلا بيكم بوية ، دشيت كبله ، غطيت ام حاكم و صحت تفضل بوية ، دش
دخلت امي :- خايبة مرت صويلح حالبة هايشتج ومسوية منها ذاك الكيمر الزين و ذيج الروبة الروبة الما ضايكها حلكج ، كعدي ياله خل نتريك
- تناوشيت الصينية من ايدها حطيتها بالكاع وتكربت ليها ، حبيت راسها :- هاا بيج يالحبيبة يمة
وكعدوا وياي ، ابوي حاط ستوري بحضنة و امي مجابلة ام حاكم تشربها احليبة بهداي.
اعلى صواب كلبي، لجن ضحكت من شفتهم ما عايفيني وحيدتي ، بس هم عزوتي و ما اخاف المنة بعطيتهم ووكفتهم.
ولو اخوتي الشاهد الله محد قصر بيهم ولا نسوانهم ، لجن انا احسب لبعيد عبن عظم ابن ادم ثكيل يوم يومين و ينمل.
لهناك اندكت الباب، الشيخ موديلنا اچل وچم فلس ، هم الله ينطي الزلمة ما ناسينا .
:- اكلج يمه
- ها يبنيتي
- ظلي يم ام حاكم خليني اروحن لال ثجيل
- يا شتسوين بديرة ال ثجيل
- يمة هاي دنيا و كلشي يصير بيها و يظل حاكم ابنهم ، بعد يومين ما يحكونا ويكلولنا ليش ما كلتونا ليش ما اطيتونا خبر، خلني اروحلهم هلبت واحد.منهم تشيلة الغيرة و يروح يدور اخبارة غاد ابغداد.
جا خوته ١٢ ما يطلع بيهم وحيد براسه خير
- روحي و لجن ييمة تنگبي و حطي شيلتج اعلى خشمج، مرة وحيدة هسه لا تخلين جلمة العايب تلوحج.
- جا يمة يوم امس انا وحيدة و حاكم ما هو و اشتغل اليوم انا صرت وحيدة
- ولون يمة هاي الوادم باطلة و تريدلها بس جلمة تعلج بيها ، لا تخلين روحج علج بحلوگهم .
تنهديت و كلت الها :- ان شاءالله يمة ان شاءالله.
لبست عبيتي وحطيت ستار اعلى متني ، و كلت ها يم البنين دخيلتج انا، و مشيت طريت الدرب اعلى ال ثجيل ، وصلت غاد ، هم بيوتهم جثيرة ، وحاكم له ١٢ اخو من ابوه ، و ٣ اخوة من ام ، وكل واحد بيهم عازل اعن الثاني، انا المن اروحن ؟
خلني امشي اعلى جبيرهم سلطان و ادش عندة واشوف شنهو راية و ان تبرى ، يزتني اعلى بيت اخو حاكم الجبير.
رحت اعلى بيته ، و دكيت الباب، طلعلي واحد :- تفضلي
- انا مرت حاكم ال خضير جيت ليكم و طالبتكم
- هلا بيج ، تفضلي ، هساع انده الاهل.
- يكثر خيرك ان شالله .
دشيت ، كبال الباب ديوان، دشيت اعليه ، الفرخ البطني من المشي احسنه صار بين رجلية ، كلش تضايقيت ، لا اكدر اكعد ، ينز .. و لا اكدر اظلن واكفة حيلي نهد.
طلعت مرة ، كالت :- هلا بيج يمة شنهي حبلة انت
- اي والله خالة حيلي انهد
- يا ، ولج يمه فضيل ماي من الحب بساع ، فحطانة خطية
دش سلطان :- ها الله بالخير
- هلا بيك عمي
- شلونج بوية
- الحمد لله ، اجيتك شجاية يعمي .
- امري
- حاكم انسجن ابغداد و ضاعت اعلومة
- لااااااااه ، عليش انسجن
- مكير حظي بهالسياسة يعمي ، مات الزعيم يو ابتلينا اعلى ارواحنا ، هو راح يعارض الحكومة ما ادري شنهي ، والله يا عمي ما افتهم بهالسوالف انا ، لجن هيج اسمعت ، راح الشيخ مطر ، كالولة لا اسألون اعلية هسه ، ليما يخلص محاكمة و يشوفون منو وراهم منو يدعمهم .
- شنهي هو صاير سياسي
اجت بت شايلة سراحية الماي، انطتني :- يطيج العافية حبيبة
شربت و جريت نفس و كملت الحجي
- والله ما ادري يعمي جاتلني بهالسياسة شكال الزعيم و شكال جمال عبد الناصر و شحجة عبد السلام عارف ، منهو ذول منين انا ما اعرفهم ، بس مصيبة وطاحت اعلى راسي من وراهم و انا شوفة عينك عدي فرخ ، وحبلى و هاي ايامي و حيرتي ما منها حيرة يعمي و ما لكيت غير بابك اشكيله.
- لا لا ان شالله لا تهتمين .
- اي والله يعمي و ذوله هم بزركم اولهم و تاليهم لال ثجيل و شايلين رايتكم و انا وحيدة حتى لو جانو الي خوان المرة عكب عين رجلها تظل بلا والي.
- ابشري ، هساع اودي اعلى ناصر جبير ال خضير ونشوف شلون انحلها لا تهتمين .
- الله يطيك العافية عمي
- ام حاكم شعلومها ؟
- والله يعمي حالها يبجي الصخر مت عيني اعليها ضربتها جلطة و هاي امس يالة رديناها للبيت و مصيبتنا مصيبة
- لااااااااا شني هاي العلوم التكطع الروح ، الله يساعدكم
- و النعم بالله .
شوية و اجا ناصر وسولف اله سلطان اعلى القضية ، و ذاك گضاها عليّ لاااه ولاااه ..
كال :- لا تشيلين هم انا اودي واحد يدور اخبارة غاد ابغداد خاطر نعرق شنهي علومة ، و شيصير وياج و شتاحتاجين كليلنا و ان شاءالله احنا ما نقصر .
- يطيك العافية خوية .
كمت من مجاني و ابني شايلته، لجن اعلى هدة و هيسيت رجلية تكرمن و راس الطفل بين رجلي، كضتني المرة ، طك عدي الماي ، صرخ :-اااااااه عمة الحكيني جني راح اجيب
- يااااع ، خاااايبت تعالن لية الفرخة راح تجيب
تراكضن النسوان و الزلم طلعوا، عاونني و دخلني جوا ، ووحدة منهن ركضت اعلى الجدة صاحتها و اجت ، و اني حاطة عباتي بحلكة اصك اعليها حيل من الوجع
دخلني بحجرة ما طولت ٥ دقايق و طلع راس الفرخ ، جريت نفس من التعب ورديت راسي ليورا و انا ابجي :- وينك يحاكم وينك ، عليش عفتني علييييش
الجدة :- بسج خية شمالج و هالاجتج بت ما شاءالله الرحمن .
لفنها و انا حسيت ادموعي خاطر اشوفنها، جابنها لية و لن اعاينها زرگة ... يااااع فوك ضيمي يربي و تطنيني بنية زركة ، شنهي فوووك الحمل تعلاوة .
نظفني و كملت ، و كمت اعلى حيلي كوة امش ، دش سلطان و ناصر ، صاح :- هاااا ع الخير كالو جابت
حجت وياه المرة :- اي والله جابت بت خطية
- يالله يالله بت ولد شيجي من الله نعم الله
- اي هاهيه جا هي هم عدها ولد.
اخذ البنية و كبر بأذنها و سماها (هدية )
ناصر ، عاينها ، حجه :- اكلكم هاي شو زركة
حجت مرة سلطان :- جا غير بت انفاس ، خلها تكبر وشوفها شتطلع ، المعاني يخبلن
- اي صح خشمها زغير حلو موش مثل خشومتنا .
حجه سلطان بضحك :- جا احجزها لولدك
- اي احجزها ، و خلي ابالج هالبت منهي اعليها لواحد من ولدي ، ما تصير لغيرنا .
ضحكت :- ياااع منهي اعليها ، جا من الكماط
سلطان :- هاي نهوة كماط مثل نهوة الموت ، تنوخذ تنوخذ .. ما تنعاف
كواغد :- ياااا
ضحكت كلت بكلبي هم زين ربي سهل قسمتها من هسه ، جا انا من شفتها زركة كلت بارت اعلى كلبي فوك حملي.
حطو تحت راسها فلوس ، وطلعت منهم
ااااخ ااااخ .. اغم ذاك اليوم الدشيت بيه اعلى ال ثجيل و ضحكت اعلى نهوتج يمه ، والله لون ادري بالغيب جان حطيتج بقوطية و ضميتج بنص افادي بس شكولن اعلى الدنيا و مصايبها.
.........
"بيت الشيخ"
- ها يكاطع بشر ؟
- شبشر يبت امي و ابوي
- احجي لا تكطع گلبي
- ظنج بمچانة يخيتي
- معرس
- وموش بس معرس
- جا شنهي
- الماخذها خاتون و بت اشراف من اشراف بغداد
تحسرت بقوة و كعدت ما حملتها رجليها من سمعت الخبر، اجتها راديون تركض :- يمة يمة
- امشي غاد راديون هديني بروحي
- يمه يمج يمج
امشيييييييي غااااد ، دفعت راديون للكاع ، اجت سليمة تركص ، تعاين اعلى الشيخة و تشيل براديون
صرخت الشيخة :- اطلعو منييييييييي بسسسسسع
شردت سليمة براديون و كاطع كاض اخته :- هدني يكاطع
- ما اهدج يبت ابوي انا وياج للوحة، شنهي الراي
- هدني يكاطع
- ما اهدج خوية
دنجت تبجي و كاطع يهدي بيها ، كاللها :- تمشين وياي
رفعت راسها بخزرة و هي تگله :- موش انا الامشي و اهد رجلي و قصري و مكانتي للخاتونات ، التكرب زلمتي خل تتحمل اليجرالها .
- شراح نتصرف ؟
- انا اكللك شتصرف ، امش
... نطرت روحة الشيخ البغداد .. ثاني يوم هي طلعت من الصبح لبغداد.
وصلو غاد ، حجه وياها كاطع :- شراح نسوي خوية
ضحكت بأبتسامة عريضة و كالتله ، نبارك للعرسان .
مشت و هو وراها ، دلاها اعلى بيت الشيخ ، وصلت ، دكت الباب ، ثلاث دكات .. فتح الباب غريب
شاف مرة مكبعه و عليها البوشية :- منو انت ؟
شالت البوشية و عاينتله من فوك لتحت ، ضحكت :- شلونك يبن الفصلية
ظل جامد بمكانه من شافها و مفتح عيونه ، ما رد عليه عافها، هي كضت ايدة ، جرته وراها و دشت ...
رواية كحل عرب الفصل التاسع 9 - بقلم زينب ماجد
الحلقة_9
(اللقاء)
بالكيف هو الگلب لمن يحب بالكيف؟
بالكيف ريح السفن لمن تهب بالكيف
الدنيه مره بشته ومره بسموم وصيف
هو شيشوف الجفن غير الدمع والطيف
يا هي يبو المستحه يلعينك ولايه
بيهه الفرح والحزن يتلاگن حچايه
يصير ضاع العرف والجرف مل مايه
وعينك ولا كل عين مشتني بين البين
لانفع بيهه الهوه ولا نصح بيهه الحيف
هو شيشوف الجفن غير الدمع و الطيف
( عريان السيد خلف )
سحبت ايد غريب ، ودشت جوا، جان الشيخ كاعد على الكرويتة، و الخاتون كبالة وتحوك بببلوز صوف جاي تغزله لغريب، دشت وكالت:- الله بالخير يبو زناد.
اندار وجهه بحركة سريعة خاطر يشوف مصدر للصوت اللي فاجئه، عاين عليها و عقد حواجبه مستغرب دخلتها :- هلا ام زناد تفضلي .
- خافني ما مرغوب بجيتي.
تحجي و تعاين على شكلة اللي تفاجئت بيه ولا كأنو هو هذا شيخ العام للعشيرة كاعد هنا لابس دشداشة بغدادية يلبسوعا اعل بغداد بالبيت كملبس فضفاض، كام هو من مكانه، دخل يبدل ملابسه.
حسنية خاتون :- ماما سرحان منو المرة ؟ وليش دا تدخل هالشكل بلا استأذان ؟
الشيخة ملوك :- يمكنج طرشة من عبنج ما سمعتي الشيخ و هو يكلي ام ازناد.
غريب :- امي ياريت تفوتين جوا وخلي الوالد يحل المشكلة .
الشيخة :- صاير حضيري يبن الفصلية .
تقرب منها سرحان و حجه :- غريب اللي طلع من دارج مو نفسه اللي كبالج ، اهلا وسهلا بيح يا مرت ابوي.
طلع الشيخ، و حسنية خاتون ما تحركت من مكانها، و مستغربة الدخول على البيت و كأنه اقتحام، لزمت بأيد غريب و هي تكوله:- شنو اللي راح يصير؟
سرحان :- ولا شي.
الشيخ :- تفضلي يم زناد
- ان جان ما مرغوب بجيتي ارد.
- ملووووووك
صاح بيها ، و دار وجهه لأبنه سرحان و كاله :- بوية اطلع وخلي كاطع يدش بحجرة الحارس ، لا تخلي يوكف اعلى الباب، و گله انطر حساب الشيخ.
ملوك :- انا اللي ردت اجي اخوي ماله غرض ومن شافني عازمة اعلى الجية ما نطاه كلبه يعوف اختها وحيدها دش بغداد.
دار وجهه على حسنية خاتون :- خاتون استكان جاي مهيل من ايدج
- اي بعيني .
مشت و هو كام ، وكال الها :- هاذ الأسلوب ما يمش وياي يم ازناد موش انا اليندخل داره ابلا أذن
- و انا موش اي وحدة يبو زناد انا ملوك
- وان جنتي، انا مقدرج و حاطج اعلى راسي و شيخة بغصري.
- يا مقدار هاذ و انت ماخذ علي.
- ماله خص ، التقدير شيء و الزواج شي اخر ، انا من اخذتها الي اسبابي
- وشنهي الأسباب الخلتك تاخذ علي، شناقصني
- بعدج بعيني شيخة و لا تظنين يقل قدرج عدي، لجن ابني عاش بدارج غريب، نطرت تحسبينه ابنج ما حسبتي، وصيتج اعلية ساعة ولادته وكلتلج خليه حسبة ولدج ، سميتي غريب اعلى الأسم السميته انا ، و خليتي الناس كلها تصيح اله بالأسم التردينة موش الأنا سميته، ان جنتي تظنين انا غافل تكونين وهمانة ، انا بس نطرتج تصحين اعلى زمانج و تكفين العداوة الزرعتيها بن ولدي سرحان و زناد لجن ما صحيتي ، بعدها ما عليه حرج لو تصرفت .
- تريد تغنعني انت اخذتها بس خاطر تخليها ام لابنك، ولو جان هيج عليش ما رديت ردحة.
- جانج نسيتي ياهو الرد ردحة لأهلها .
- هاذ جان عهدي وياك
- عهدي كبل لا تحبل ، لجن صارت ام و هي بنفسها طلبت مني ما ترد و تريد ظلتها يم ابنها واجلت موضوع رجعتها لبين نا ارد ، و من رديت شلكيتج ؟
- جا انا يو ضالة اعلى ردحة اخيرلي من الخاتون .
- ام ازناد الزواج سنة نبوية والزلمة من حگة اربع ، و اوليدي الذب روحة بشط خاطر يموت اليوم بفضل هالخاتون بيگ زغير.
تنهدت و هي تكله :- انا هنا ما جاي احاسبنك يشيخ ، تظل شيخي و من حكك موش اربع عشر ، و ان جانك مرتاح بعرسك هاذ اهم شي عدي راحتك حتى لو جان الأمر ياذيني ، بس انا الجنت اتمناه منك ما تغافلني
- انا ما غافلت يو ناشدتني جان كلت الج، انا بس ما ردت اضايكج بالموضوع، بس !
نزلت دموعها و هي تكله :- وين ذاك الحب يمطر ووين ذيج المعزة
- بعدها و تكبر ما تقل، لچن گلت الج اسباب.
مسحت دموعها و هي تكله :- اسبابك و جلمتك اعلى راسي وان جانك مرتاح هاذ يكفيني المهم عدي راحتك.
- اصيلة يم زناد .
صاح اعلى الخاتون ، و الخاتون جانت حاطة اذنها خاطر تسمع اللي يدور، من صاح ، دشت عليهم بسرعة، ابتسم ابتسامة خفيفة لنا عرفها هي واكفة بالباب تتصندت ، وردف ابتسامته و هو يكلها :- اهل السماوة ضيوفج يخاتون .
حسنية خاتون :- على عيني
- تسلم عينج
كام منهن و طلع من الهول للكراج، فات اعلى الحجرة مال حارس، لكه كاطع كاض سرحان ويستفسر منه، دش ، كام احترام اله :- هله بيك يشيخ
بعده ما مكمل ترحيبه، جاب الشيخ بجف :- موش انا اليدشون اعليه غفل يكاطع
- و علي ما رضيت شيخ لجن .....قاطعه
- هششششش انت الزلمة موش هي، جان المفروض تسيطر اعليها ليما اردن و تكلي الشيخة عرفت بزواجك و انا افهمها بالموضوع موش ادشون دشت حرامية ،
- انا اتعذر منك يشيخ لجن والله ....
ما سمع منه عافه يحجي و هو يصيح :- سرحاااان
- ها بوية
مشت الشيخة ملوك و هي تعاين للخاتون من فوك لجوا:- يو بس اعرف شعجبه بيج وهواج.
اندارت الها الخاتون :- اني اكول عندج حق الشيخ ميعرف يختار والا جان عرف يختار من الأول .
- يمكنج ما سامعه بيه يخاتون
- سامعة هواية
- من كونج سامعة حضري رويحتج وراج ضيم هواي ، و التكرب زلمة غيرها خلها تتحمل اليجرالها .
ضحكة الخاتون بقوة و هي تستهزء بالشيخة، ردتها :- ضحكة البطر ما تفوت لبنادم لاون تتليها المصيبة .
حجتها و طلعت للهول، دش الشيخ ، حجت الشيخة ملوك :- الوضع ابغداد ما يطمن يبو زناد انا اكولن يو تجيب وليدك و مريتك و تخليهم بالغصر لبين ما تهيد الوضعية ابغداد
ردفها غريب بالجواب، كبل لا يحجي ابوه:- لا يابه اني عندي امتحانات ما اكدر اروح هناك.
الشيخ ما رد عليه ومشى للخاتون خاطر يشوفها شمحتاجة اعلى الاكل.
عاينت الشيخة لغريب :- چنت اخافن يو كبرت تكاور ابني لچن من شفتك اتبغددت و صرت حضيري تطمن كلبي، ديرتنا ما تحمل يگودنها وحيّد رچيچ.
عافها و دار وجهه ، سحب كتابة و كعد يقرأ .
كعدت الشيخة تراقب وتشوف شنهو حال الشيخ ويا الخاتون ، رغم ما هو تحذر التصرف اعلى عادته ، الا ان الشيخة لاحظت بتصرفاته حب و مودة يملكها للخاتون ، مو مجرد امرأة تعتني بأبنة .
رادت ترد بيومها ، لجن الشيخ رفض و كال الها ، غبشة نطلع انا وياج ، رضت هي بطلعته.
لليل و هم نايمين .. كامت وراحت لحجرة الحراسة برا، لكت كاطع كاعد :- ها يبت ابوي
- الحال ما يسر يكاطع ، الشيخ جنه عاشكها.
- الكلب ما يعشك اثنين ، و الشيخ عشكة بين لياهي.
- الكلب يعشك شما تشوف العين و تعجب ، و الشيخ عاجبته الخاتون .
- وشنهو الحل خاطر ننهي هاذ كله.
عاينت اله :- ما مضطرين ننهي كله
- عليش
- لزوم نحترم عشك الشيخ و نشوفه ليوين يصل هالعشك وشكثر راح يدوم
- غصدج نسكت .
- اسكت اعن الشيخ من عبن گلبي يحبة لجن العيون الحطت شوفها اعلى رجلي اريدن شوفها
- عاين عليها ... ضحك بمكر :- فهمتج يبت ابوي .
- تصبح اعلى خير .
رجعت نامت الشيخة بعد ما دلت اخوها اعلى الدرب و بيا طريقة يتصرف، الصبح غبشة طلع الشيخ و اخذ عليته ورد .
..........
كواغد :- يممممه ، يالحييبة يمة
- هاااا ولج، ياااااع جبتي .
- اخذيها من ايدي و اطيني فريش انامن انهد حيلي
فرشت نشمية فراش لبتها و نومتها و دثرتها ، واخذت البت شفتها و كلبتها ونظفتها
سولفت كواغد لأمها اعلى كل الصار، امها كامت تلطم اعلى وجهه :- شلون ولج خليتيهم سنهون اعلى البت من الكماط
- يمه شهالها هي و امنع انا، دعاينيها زركة ، نعمة من الله من نهو اعليها و ساخذونها جا لو ظلت عدي ياهو الياخذها.
- البت الها ٧ شوفات يكواغد عليش ظلمتي بخت بتج و رضيتي.
- اعمامها هم واول و تالي البزر لهله.
- والله يا يمه انا اشوفن عميتي اعلى بنيتج عليش هيج يمه ، جا كبرت و ما رادت ولد عمها شلون.
- يمه لذاك الوكت الله كريم
- لا تتساهلين بالنهوة ييمة هالامور ما يتساهل بيها و تهد اركاب .
ما ردت كواغد اعلى امها من ما رضت النهوة ، ادثرت و نامت ، و ظلت نشمية التعتني بالبت ..
مرت ايام اعلى ولادة هدية ، لا واحد من ال ثجيل مر ولا احد كال شمحتاجين ، و لا حتى من السلف، ظلو بس ابوها و امها يا رايحين يا رادين اعليها.
كامت كواغد لبسي عبيتج و اخذي بتج وروحي للشيخ ، خوفن لا يبطلونها من الغصر من كونها صارلها شكثر ما داشة الغصر من وكت وكعت عمتها.
دشت للغصر ، وراحت اعلى الشيخ مطر و هو كاعد ويا عايلته :- ها صباح الخير
انداروا الها و شافوها، ردوا اعليها، و حجت الشيخة :- شنهي يكواغد نسيتي لهالغصر اصول يو مفكرة الشغل اعلى الكيف.
- تعرفوني يو جنت فاضية و علي ما اغيبن سوم لجن الله يعلم بحالي و انا نفسة و هاي الفرخة اعلى ايدي
الشيخ :- بالمبارك ان شاءالله تتربى بعزكم
- يا عز شيخ الشكوة لله لجن ضاكت الدنيا بيه و اجيتك شچاية (شكاية)
- ابشري يم ستار
- انا معتازة الشغل مو شلون ما جان، و طالبتكم تخلوني اشتغل الصبحية بمجان عمتي بالكاع ، و من بعد الضحى اجي اعلى الغصر .
،،، رادت تحجي الشيخة سبقها الشيخ :- جا انا وين رحت يم ستار لا تحسبين ، محصولكم واصل.
- يديم عزك شيخ لجن ليا وكت يضل الواحد عالة اعلى ظهر غيره ، انا ما اطلب منك غير تخليني اشتغل الشغلتين .
الشيخ :- يجرالج
محد عارض اوامر الشيخ ، و اشتغلت كواغد الشغلتين من الفجر تاخذ الحلال و تطلع للكاع تشتغل تخلص شغلها ترد كبل الضحى لبيتها تشوف عمتها و ابنها و اداري بيتها ، ساعة و ترد لغصر الشيخ من الضحى لينا بعد العشا . ترد لدارها .
وابنها ستار عد اهلها ، ساعة ووكت اعلى ايد جدة شمخي و البت اعلى ايدها. و امها ونسوان اخوتها تناوبن يومية وحدة تروح لبيت كواغد تجابل عمتها و تعتني بيها و تطيها العلاج.
وياها ردت تشتغل بالمجالس، العدها مريض وفاة تروح تقرالهم نص ساعة ..ساعة ، بعد ما تاخذ اذن من الشيخة ملوك وصبيحة تتكفل شغلها و تنوب عنها.
الحمد لله مشت امورها شوية شوية و عمتها بمرور الأيام كامت تتعافه ، بس ما بيها كومة ابد . بس كعدة
اما حاكم فمحد راح سأل عنه من اخوته ولا من السلف، غير بس جبار مرة وحدة و كالوله (امش ولا تسأل عنه تروح تتورط انت هم ) و كطع رجله ما راح بعد خوفن على عايلته.
وبليلة جان غريب كاعد بغرفته، و الختون نامت مثل عادتها ، تخلص العشا و تروح لغرفتها تقرالها كتاب قبل النوم لحد ما تغفى.
صارت اكو طكطة بالبيت، رفع سرحان راسه، نزل العوينات و بقى صافن يتصنت، " هو سمع صوت لو يتخيل"
كام على حيله خاطر يتأكد، جر البردة شوية و عاين اعلى الكراج، الجو طبيعي و ماكو شي، رجع البردة ، و مشى اخذ كتابه ، راد يكعد هيس مثل دبچة رجلين .
التفت بسرعة، هد الكتاب من ايدة و مشى ، ويا ما مشى تلاكفة واحد و هد عليه ، كام يتلاوى وياه و يصيح ، فات الاخر اعلى البيت ، فزت الخاتون و هي تصيح ( الحكووووووونا حراااااااامي )
كضها واحد و حط ايده اعلى حلكها و جرها للغرفة ، و غريب يتلاوة ويا الملثم الكاضة ، جر الثامة وكشف وجهه ذاك بساع هجم اعليه و حط السجين بخاصرته و لف اللثام.
و الخاتون تصيح ، كومو ورشو مادة سامة على عيونها ، انحركت عيونها حرك كامت تصرخ بكل علو صوتها .
طلعوا من البيت بسرعة ، و الخاتون تصرخ ، لحد ما فازعين اللي بالمنطقة مسعفينهم ، و اجت الشرطة تالي طوقت البيت و فتشته.
وصل خبر ثاني يوم للشيخ، و اجا حميد يركض :- شيخ شيخ الحك
- ها ولك
- اجاك اتصال من بغداد و يكولون حرامية داشين اعلى بيتك ابغداد و هساع سرحان و الخاتون بالمستشفى و طالبينك.
الشيخ تسودن ، كض الدرب و طر البغداد ، وصل غاد لكا اخوة الخاتون كلهم واكفين :- شنهي الغضية شصاير
- الصاير كله من جوا راسكم انت اللي منعت احد غريب يحرس البيت تالي سطوا عليها الحرامية.
- انا اغلام ابوي ، منين ذول
- محد يعرفهم و السبب انت يا شيخ ، لو صار شي بأختنا ، ما تسلم من عدنا تراك.
- خايبين كلولي شصاير بيهم ياهو المتاذي بيهم.
- سرحان متعرض لطعن سجين و الخاتون معمي عيونها .
ركض للردهه للبيها ابنه :- ها بوية سرحان، ياهو السطى اعليكم كلي
- شفت واحد بيهم بس ما اعرفنه
حجه واحد :- الحرامي ما بايك شي من البيت رغم اكو ذهب و اموال ، بس متقصد يتعدى اعلى اهل البيت
الشيخ :- ياهو هاذ المتغصد يتعدى اعلى حرمة بيتي، ... حميييييد اريدنك تعرف المعتدييييين و اطلعهم من حدر الكاااااااع .
صار مشاد كلامي بين اخو الخاتون جواد افندي و الشيخ مطر وصلت بيهم لحد الصياح، و الناس تفزع بيهم .
الأخ جان يذب اللوم على الشيخ لإن تركهم بلا حراسة ، و الشيخ اعصابة نار .
انتهت بالخاتون و هي تلوم على اخوها لما يعارك زوجها و هو ما اله ذنب ، تفاجئ من موقفها و زعل و تركها بالمستشفى و طلع.
اجا الشيخ و هو يحب اعلى راس الخاتون :- الحمد لله على سلامتج.
- الله يسلمك
- انا كلت الج خل احطن حارس من القصر ما رضيتي
- عيوني راحت يا ابو سرحان ، فقدت نظري
- يرد ان شاءالله يرد ، انا اخذج و اروح للأردن و نعالجها و يو علاجج صار بأخر الدنيا هم اخذج ، ما تظلين هيج.
- سرحان شلونه ؟
- ما ينخاف عليه ، الحمد لله بخير
- يا مطر الصار ما جنت متوقعته حتى بخيالي، دخلنا حالة رعب راد يوكف كلبي مشفتهم شلون التفوا غلى سرحان
- ان شاءالله نعرف السواها و نقتص منه.
-السواها مو بعيد عنك
- شتغصدين ؟
- الشيخة ملوك هددتني من قبل
انتفض :- اتهام الباطل انا ما ارضى بيه
- تعتقدني اتهم باطل
- موش لشخصج لجن ام زناد مرتي و ما ارضى اعليها الجلمة و ان صار بيناتجن كلام هاذ ما يعني هي ، اهي شيخة و صيت عالي و هالامور موش طبايعها
اتضايقت من دفعه لشيخته رغم جانت الخاتون شبه متاكدة ان الشيخة ورا الموضوع، كالتله :- اعابرني ما حجيت شي .
- انت تعبانة انا اعوفنج ترتاحين
ما جاوبته ، هو طلع يتاكد من ابنه اذا شاف احد منهم ، بقى غريب يشرحله ان شاف واحد منهم يس ما يعرفه ابد ، ولا شايفة كبل، و شكله موش ريفي ، ذبة الوجه جانت بغدادية.
هالجلمة الخلت الشيخ يبعد ملوك وما يرضى احد يجيب طاريها ، لكن رغم هذا خلى حميد يتحقق عن تحركات كاطع ، فكالوله :- كاطع كل وكته ويانا بالمضيف و ما طالع من السماوة ابد .
بعد الموضوع من باله ، ورغم بحث الشرطة و ازلام الشيخ ما عرفوا المعتدي منو .
قرر الشيخ يجيب لخاتون لقصر، لكن هي رفضت تجي للسماوة و كالتله :- بغداد و بيت ابوي ما اطلع منهم.
واصرت على موقفها ، فالشيخ ما جان كدامه خير يحط حرس ع الدار و يكثرهم، فطلب من صبيحة وولدها الثنين ينتقلون لبغداد و تبقى صبيحة بخدمة الخاتون وولدها حراسة للبيت.
وما لكوا اي اثر للجريمة ... وانسد .
اخذها للاردن و عرض حالتها على هواي اطباء ، وجانت النتيجة سلبية ، العين متعرضة لضرر كلش قوي و احتمالية رجوع النظر قليل جدا.
وبعد ما ايسوا من الاطباء استسلموا للواقع و بقت الخاتون فاقدة النظر .
بعدها مشت الأمور عكسية
....الشيخ قلت جيته لبغداد بعد ما جان يجي كل شهر ١٠ ايام صارت ٣ ايام يومين و يرد .
...ام حاكم تحسنت و صارت تكدر تكوم اعلى حيلها و تمشي بس ما تطلع للشغل ، و كواغد شايلة الشغل ، بس كامت تعتني بالجهال و بالحال على التكدر عليه.
غريب استمر بدراسته و صار يتقدم اكثر و اكثر ودخل جامعة قسم تاريخ اخذ ذبت الحضر بسبب عيشة ابغداد .. و كانت العيشة ابغداد تقريبا صعبة على الريفي كون البغداديين يميزون لهجة الريفي و بعضهم يستهزئ بيها ، فيضطر يحجي البغدادية ، مع هذا ابوه لو سمعه يحجي بغدادي ميقبل كون البغدادي عند اهل الريف يوصفونه بأنه رجيج و مو شديد ولا يفهم عادات و تقاليد عيشتهم و ايضا بعضهم يستهزئ بيه و يسمونه حضيري .. و هالأسم يجي من باب الاستهزاء
وبقى غريب ما بين الحضر و الريف
و هالامر سببله مشكلة لفترة ، لدرجة ظل يبحث بنفسه ، هو المن ينتمي هل هو بغدادي حضيري ، ام ريفي و ابن عشاير ؟
هذا الأمر اللي خلى غريب يعتز بأسمه (غريب) كونه يشوف نفسه فعلا غريب ، اله ام اسمها ردحة بس ما شايفها مرة بحياتة ، و اله ام رضعته ، لكن تركته لما شافت الخطر راح يصيبها و يصيب جهالها ، و اله ام اسمها حسنية بس هو مو ابنها .
ابوه الشيخ بينما هو ربى بحضن حميد و اعتبره ابوه
كل مكان يحط نفسه بيه يحس نفسه غريب ، الى ان تأقلم مع اسمه و عيشته و تعود ان يكون غريب على كل مكان.
في سنة 1969
تم الأفراج عن حاكم ...
طلع من السجن ، توجه للاعظمية راح على بيت الخاتون ، دك الباب طلع اله ابن صبيحة ادريس :- يا هلااااااااا شلونك شلونك زين
- زين زين
- تفضل تفضل
- شنهي كمت تشتغل هنا
- اي والله صارلنا ٥ سنين هنا ، جلينا لبغداد انا و امي و اخوي خاطر نخدم الخاتون
- جا سرحان وين ؟
- اكعد اكعد هسه انهده الك
راح خبر سرحان ، اجا سرحان يركض :- هلا ابو ستار
- هلا يابة شصاير
سلمو على بعض عن قرب :- ولك شنهاي ما عرفتك
- اني اللي ما عرفتك شصاير بحالك يمعود
- سالفتي طويلة ، همزين الله لكيتكم ، جا ظليت بالشارع
- ادخل ادخل
- لا تسلم ، رايد اطلع للسماوة
- اي دعدل روحك و اطلع
- لا والله مستعجل بس رايد منك جم فلس فلوس كروة و ان شاءالله دين
- لا تكولها شنو السالفة ، دفوت يا ابو ستار فوت
فات وراح سرحان جابله فلوس ، و ادريس و يسولفله مقتطفات عن الاحوال ، اجت صبيحة سلمت عليه ، و بجت كدامه على حال مرته و امه بغيابة ، و بشرته صار عده بنية و كواغد هيج تشتغل و هيج مكسور ظهرها اعلى بيتك و اولادك .
هو ما تحمل ، اخذ الفلوس و اطلع للسماوة ، وصل هناك لديرته ، مشى لبيته ، لكى الوضعية متغيرة عبن كواغد بانية بالبيت و مغيرة الباب ، ما عرفه هاذ الهم لو شايلين.
دك الباب ، طلع اله جاهل عمره ب٩ سنوات ، ضحك ليه :- انت ستار
- اي انا منهو انت ؟
- دنك عليه بسرعة و بجى بقوة، اجت بنية سمرة تركض ورا اخوها تعاين و تجر باخوها ، عاين عليها :- ياهي هاي .
طلعت امه :- ولكم حبوبه ياهو اعلى الباب
بعدها تحجي و شافت ابنها ، و هي نشغت بصوت عالي و حضنته :- وليديييييي يمه
حضنها حيل و كام يبجي، و الجهال كاضين بذيال حبوبتهم، دش للبيت و هو يحس بدموعه و ينشد اعليهم و امه تنشده عن احواله ، كال الها :- بس كليلي كواغد وين
- بالغصر جاي تشتغل
-ودي اعليها رايد اشوفنها ، مشتاك الها جثير
- هسه اودي اعليه ،طلعت تشوف احد ، و هو يعاين للبنية :- يمة ياهي هاي البت
- بتك يمة
- كواغد جابت بت ؟
- اي
ضحك ليها و كال الها :- كربي بعد ابوج خليني احبنج
كربت البنية لجن مستغربة الرجال، و هو اخذاها باحضانه يحبحب بيها و يعاين اعليها ، عيونها عيون امها ، هم بيهن حَمار.
-جا غير بتهة
-كواغد وينها
- مو كتلك بالغصر هساع و ديت اعليها واحد من الفروخ يروح يكللها حاكم طلع.
- مشتاك الكم يمه حيل مشتاك الكم و بالي كله يمكم ، شلونكم شحوالكم
- شحالنا ييمة ، حملنا من بعدك طاح اعلى راس هالمرة خلف الله عليها بت اصول لا هدتني ولا هدت فريخاتك وظلت مگفگفه اعلينا و ما خلتنا بعازة احد.
- بت شمخي اصيله يمة
- و النعم والله ييمة
كواغد و سمعت برجلها رد ، طار كلهبها و اجت ركض من بيت الشيخ لبيتها، دشت ولكت حاكم كبالها ، و هي ذبت روحها اعليه ، ناحت بصوت عالي ، و هو حضنها و دموعه بعينة ، كعد يهديها لجن هي تربعت يم رجليه و حطت شيلتها اعلى وجها و شكتله الحال و الحمل من بعده
حب راسها و كال الها :- يو انطيج ماي العيون ما اوافيج لجن اكولن الف رحمة اعلى البطن النگلتچ
- يروحلك فدوة يعزيزي ، طاب گلبي بشوفتك وعلي .
ضحك ليها و هو يعاين معانيها البان التعب بيهن و عتگن ، منگبة و الفوطة سودة و لافتها ، فلها عنها و كال الها :- ارتاحي انا اشيلن عنج منا و غاد، لا تهمين.
- لا تهم بيه ترانا حديد ما ازنجر بس انكسر بسهولة .
- اهلج اخوتج شلونهم
- الحمد لله كلهم عرسوا و صاؤت عدهم فروخ و امي و ابوي وياي وياي
- الله ينطيهم ، اكومن اروحن للحلاق مناك و اطلع ليهم اسلم اعليهم .
يا فرحة كواغد ذاك اليوم ، حطي واحد من خرفانج و كالتلهم ذبحوه جريان دم و ثواب لام البنين من عبن انا نذرت لو طلع رجلي بخير و سلامه اذبح لام البنين .
وصدك ذبحت و حاكم عزم الناس ابيته وسوو وليمة و ناس تبارك و ناس فرحت ، و سولفتله ياهو الوكف وياها بضيج وياها الجاب بس لسان و يصفط انا و انا .
من بعد جية حاكم و ردته لدارة
منعها من الشغل بكاع الشيخ و بقصرة، رضت تبطل من الكاع من عبنها تعبانه منها، لجن ما رضت تبطل من الغصر ، حبايبها كلهن غاد صارن و كالتله :- تعوديت ما اكدر بلايا القصر.
تركها بعد ما شاف هي اللي راغبة الشغل و رايده تعاونه ، حاول يلكاله شغل بالديرة ما لكه غير الفلاحة و هو ما يحبها، عافها و قرر يطلع لبغداد ، كواغد كضته و كالتله :- ادخيلك و ادخيل بغداد جفينا والله كلوبنا بعد ما تحمل الونة
- لا ما الي بالسياسة ، بس اروح غاد هلبت الاعرفهم يلكولي شغلؤ جا انا هنا شستغل يو ارعى بالحلال ، و يو افلح بالكاع و اثنينهم انا ما ازدهن
كالتله :- اخذ حليب و كيمر و دهن و بيع بالولاية و اشتغل
كال الها :- لا شنهي انا اشتغل بياع كيمر و حليب ، اطلع لبغداد و اشتغل
واصر يطلع لبغداد .
وبالفعل راح غاد ، و شاف اليعرفهم ، و اشتغل جوا ايد اخو الخاتون ، مو جواد اللاخ اسمه :- فيصل
وشغله جان زين و اتفق كل شهر يرجع لاهله اسبوع يشوفهم ويرد ، مو مثل شغلة كبل من وين لوين يالة يشوفهم .
ومشى شغلة بمعمل مال نسيج و صارت احواله احسن من كبل ..
من بعدها حبلت كواغد .. وجابت بتها الثالثة و سماها (جمارة )
الجمار هو لب النخل اللي بالجذع، يصير لونه ابيض و طعمه حيل حلو ، من حلاة البنية سماها حاكم ( جمارة )
جمارة جانت طفلة حيل حليوة
لجن هدية جانت سميرة .. ياهو اليجي ويقارن بين هدية وبين اخوتها و يكللها :- شمالها هاي البت زركة شو اخوانها شحلاتهم و هاي ضعيفة و زركة .
جانت كلش تتضايق من المقارنة بينها و بين اختها ، الى ان وصلت لحالة تكره اختها الصغيرة على كثر ما يقارنون و يمدحون بجمارة و يعيبون عليها
حتى محد يكللها السمرة ، امشين اعليها يا الزركة و يا الزركة و هي من كثر ما تتضايق ، يومية جالفة روحها هلبت يطلع الها جلد اخر و تصير بيضة مثل اختها الصغيرة
بس هذا لوني من خذوني ما تتغير .
بس هي كلما تكبر تبرز معاني وجهه ، ضفيرتها يا حلاتها ، تعتني بروحيحتها خاطر لحد يعيب اعليها.
عمرها ١٣ سنة ومن ضيم الوادم وحجيهم ، كامت ادور ازواكات (مكياج ) بوكي كحل العرب من حجرة امج و كحلي عويناتج.
شافتها امها و صرخت :- يااااااع ولج يالزريكة هاي شحاطة بعيونج
- يمه و علي ما حاطة بس كحل شوية
- اليوم منهو اليهدج من ايدي ، تعاي اكحلنج تعااااي
وتركض وراها بالعصا ، و ذيج تشرد منها ، لبسي انعالج و شردي لبيت جدج .
وعافتها كواغد ؟ لبست عباتها و لحكتها لبيت جدها وكضي ولوبجيها بالنعال .
و امها و نسوان اخوتها يفازعن و يرغن بيها
نشمية :- شمالج ويا البت ما تكليلي هديتي حيلها شجاج
- ولج يمه هاي عيييييييييي
وعضت ايدها :- هاي انا نا ارتاحلها كلبي يلعب من هالزريكة ، اليوم حطت الكحل باجر تحط ايدها بأيد زلمة و ما اكدر اعليها
- استحي اعلى روحج شمالج تحجين هيج ويا البت ، من ضيمكم حطت كحيله شجاج، جا انتم ياهو الكام و كاللها الزركة البت طكت وتريد تحلي برويحتها
- جا هو الازرك و يحط كحل شيصير بجامة مخططه ، هي زركة وينها وين الكحل
- حرام عليج و علي ما يصير هيج تحجين ويا البت ما يصير ، و العباس حلوة ، شمالها عايني الحلك هاكدة و الخشم شحلاته و اذا سميرة انهجم بيتكم يالبيضان ، يو ما جاتلتكم الشمس و صايرين ملحان و لاحكين هالبت الزركة و الزركة
- حبوبه اعليج العباس مو حلوة
- وعلي تخبلين يا حبوبه جنج الكمر
كواغد :- تردين وتحسي كحيلتج يو احطج و ابيس بيج يهديوة
- جا شني بس اني مو هاي راديون بت الشيخ تحط كحل محد يكللها و اني تجتليني بالنعال ، شنية شنية
وكامت تبجي .
نشمية تموت اعلى فروخ كواغد ، خو شمخي يحب بزر كواغد بعد ازود من كواغد ، و هدية بجت ، كلبو الدنيا اعلى راس كواغد و امها تصيح اعليها :- شنهي تتشيمين عدج بت و تعيبين اعليها ، والله ما اطيجياها بعد ، ولي منا يااااله
كواغد :- يااااع يمه اطرديني
- والله و اجتلج مثل ما تجتلينها ، انكلعي ياله ، طايحه لهالبنية تعيبين اعليها ، شنهي انت بحلاتها يالجلحة والله يو كربتيها بعد والعباس الا احطنج و اجتلج
كومي نشمية و طردي كواغد ، و ذيج ما تدري تضحك يو تنقهر اعلى حال امها .
طلعت :- حبوبه انا راح اروحن للقصر
- شعدج غاد يا حبوبة دكعدي يمي
- حبوبه اتونس ويا راديون ، وين اروحن غاد تشعل التفزيون مالهم حبوبه يخبل
- ياااع شنهي التفزفوز
- تفزيون تفزيون يطلع بيه شكثر وادم حتى جانو باللندن
- ياااع حتى لندن تطلع بيها
- اييي و يطلع هاذ مدري شسمه
- ياهو هذا
- اسمه حسين نعمة يغني
- يا حبوبه عيب زحمة تعايني اعلى الزلم
- جا ما يشوفونه حبوبه
- شلون ما يشوفوج ، اكعدي اكعدي حبوبه يو سمع ابوج اتعاينين اعلى الزلم يكرط روسنا
- لا وعلي حبوبه ما يشوفونه بس احنه نعاينهم
- يااااع عود صكد
- اي و العباس و يغني ع السماوة
- حتى السماوة يعرفونها
- اي يكول نخل السماوة يكول طرتني السمرة و انا احبن اعاين هاي الاغنين من عبني سمرة
- خايبة حبوبة شلج بهالسالفة تعاينين ولد و يغنولج
- ايييي يا حبوبه شني اظل اشرحلج انا
كامت لبست انعالها و مشت ، عدلت ظفيرتها و خلتها اعلى كتر و عدلت الشيلة و رتبت كذلتها و تمشت بالطرف و راحت لغصر الشيخ .
وصلت غاد دشت لراديون :- ها اصباح الخير
- صباح النور ، شلونج يهدوة
- كواكة ، جا انت وين تريدين تروحين
-اريدن اروحن ويا امي للسوك
- هااا ، جا انا اجيت عليج ما ادري راح اطلعين
- لا امي ما ترضى
- امج اليوم جمعة و عطلة ما تجي ، تعاي روحي وياي
- لا لا خافنها تدري و تكتلني
- معليج عودن انا اكللها انا جبرتها
- هااه
-اي والله
راديون هي صاحبة الحظ الجبير بهاذ السلف، محد عايشة عيشتهل، من عبنها بت الشيخ و الشيخ و الكعدة ، مدلله دلال محد شايفة
لا بملابسها ولا بذهبها ولا الهنا العايشة بيه .
وارثة جمال امها بحذافيرة ، الحسن العليها يوصفونها ما على مرة . العيون سود و الشعر شوية فوك ركبة رجلها ، و بيضة وبياضها صافي و الماي يلالي ابلعومها
تلبس العباية الفرنسية .. يطلع وزن هاي العبانة من ١٢ الى ١٥ كيلو .. ثكيلة و مطرزة بذهب ووياها بوشية ، بس راديون ما تحب البوشية تلبس ، تحط بوشية سودة بس خفيف تبين ملامحها ، و بس مكان العيون ظاهر .
لبست ثوب احمر ضيك اعلى جسمها و لبست باون ذهب اعلى صدرها ، و المعاضد بيدها و الحجل برجلها ، حطت كحل عرب بعينها و تعطرت ، و لبست حذائها يصير كعب .. ملابسها امها تستنكيهن الها من تاجر يجيبلها خصيصا من الخليج وتشتري البتها.
عادة العرب البت بعمر ١٢ .. او ١٣ يزوجون البنية
التكبر يسموها ( البايرة ) و يقل حظها بالزواج بسبب ان الناس ما يرغبون البنية الجبيرة كل اللي يريد يتزوج ياخذله بنية صغيرة و يربيها على اطباعه .. هذا فكرهم
التوصل العشرين بنظرهم بايرة و قلة اليخطبها.
الا راديون .. رغم جان عمرها ١٨ سنة ، و الناس تتسابق لخطبتها و الشيخ يرفض ، ما ينطيها لإن الشيخة حالفة ما تنطيها الا الواحد يبنيلها قصر مثل قصر ابوها ، و تعيش مثل عيشة ابوها ما ترضى لبتها اقل من هذا المستوى .
لبست و كملت و هدية تعاين عليها ، و تتمنى لو هي بجمال راديون و تتمعن بكل تفاصيلها .
حجت ، هدية :- هم راح تشوفينه ؟
راديون :- ما ادري ، گلبي يگلي اي راح اشوفنه غاد بالسوك،
دارت وجهه بضحكة و هي تكلها :- ادعيلي كلبي حيل مشتاك اعلى شوفته .
ضحكت هدية و هي تكللها :- ان شاءالله تشوفينة .
صاحت ملوك :- يله يا يمة ما طلعت تبديله هاي بس لبسج ساعة
- كملت يمة كملت ، يلا هدية تروحين ؟
- لا امي ما ترضى لو سمعت تشوي اعلى اذاني بصل
ضحكت و هي تجاوبها :- بكيفج
مشت و هدية تعاين وراها ، تنهدت و هي تكول :- جا يو الله خالقني حلوة ، ما جان حبيت و عشكت مثل راديون .
مشيت و انا افكر :- هو العشك حلو ؟ انا دوم اشوفن راديون ساعة التحجي بالزلمة التشوفه بالسوك عيونها تضحك و تحجي من كل كلبها و لهفتها تبين .
تضكرت امي ، يو اجت لبيت جدي وما لكتني هسه تكسر اعضامي ، مشيت للبيت مالتنا رجعت .
المكان :- بغداد
الزمان :- ١٩٧٦
:- ابوي فرض اعلية الرجعة للسماوة ، يكلي (جامعة و خلصت صارلك شكثرررر جا شنهي ظلتك بعد ابغداد ، انا تعبت من الروحة و الردة ) انا اعرف جاي يضغط اعليه خاطر امي حسنية تخضع و ترضى تروح وياي غاد.
و الصدك اني ما احب الرجعه لكن كلمة ابوي ما اكدر اكسرها ، فبلغت امي و كلت الها ( اني ما اكدر اكسر كلمة الوالد و رايدني وياه بالمضيف ولازم ارجع)
من عرفت اني عزمت الرجعه بسبب ضغوط ابوي ، وهي عمية ما تكدر تظل هنا وبس صبيحة وياها تعتبرني ابنها و متعوده علييّ ،رضت تروح وياي غاد . و نظمنا لرجعتنا و شلنا كل غراضنا و جلينا للسماوة .
وصل غاد و عاينت حالهم .. بيوت هواي بعدها طين ، لا و صرايف هم ما جن الزمن يمر اعلى الديرة حالها ما يسر .
ادريس : نطلع للقصر لو للمضيف
- اني انزل هنا و انتم اخذوا الوالدة للقصر
وصيت صبيحة اعلى الوالدة و نزلت ، صاح ادري :- سرحاااان
- ها
ذب علي الشماغ :- حط الشماغ اعلى جتفك لا اطب للمضيف افندي
رفعت ايدي احيي، و مشى و الوالدة تصيح :- دير بالك على نفسك يوم
- ان شالله امي ، لا يضل بالج
مشيت و انا اعيد بذاكرتي الأماكن من جنت امشي بيها و انا زغير.
بعدني جاي اتمشى ، ووحاد حط سجينته اعلى ركبتي و صاح :- بس تتحرك احز بلعومك
- ياهو انت
- عزرايين
كضيت ايدة وزنده ، و دنكت و كلبته حيل جدامي ، صاح :-ااااااااخ نعلعله ابيك
دنجت اعلية- وك انت شايفك بس ما اتذكرك
- من عوينة ابو اصلك لابو اليعرفك، بعرضي طلعت مو مال ضحج ، ااااخ يا يابة انكسرت ايدي .
ضحكت و هويت حتى اساعدة ، دفعني عنه و صاح :- ميل غاد عوينة ابو الجاب مثلك
- ولك تذكرتك ، انت خنجر اخو ابو حميد مو
- خايب كلت صاير حضيري ورجيج و بطكه يطيح ، ما دريتك ابن ابوك
- نعلعله ابو الخلفك شنو اني نغل و تكلي ما دريتك ابن ابوك
- تروح فدوة للنغل
كام و عو يحك ايده و ، عاين علي ، و كال :- كرب خايب خل احبنك
- عوف التحيحب ، وصلني للمضيف
- شنهي خايب انا مرة و تستحي احبنك
- ههههه شلونك
.. گربت عليه اسلم :- بخير ناغصتنا البچم مالك
- جيتك وراح اكابلك
- عليك العباس ؟ رديت بلا رجعه لبغداد
.- اي والله الوالد اصر اجي لهنا
- خير ما سوه تراه زناد شايف روحه اعلى الناس و حاسب نفسه هو الشيخ من بعد ابوه
- مو ابالي انافس احد
- ان ظليت بهاذ طبعك الوادم تكوم ما تهابك ، طبع بغداد ابغداد و طبع الريف بالريف
- شسوي يعني
- حط علج و الك بالمضيف و اعجن بحجيك خاطر يودونك
- وهيج اصير شيخ
- شيخ غصبا اعم اليرضى و المايرضى
ضحكت و ضربت اعلى جتفه :- شجاي تشتغل ؟
- نطكطك تالي الليل
- يعني ؟
- نشوفلنا غشم و نبوكه
- تشتغل شقاوة
- هكو احلى منها ، انا خنجر ابن خنجر شحد اليحجي وياي الا احزن زردومة بهالسجين .
- ايااابه ، ومخلصها شقاوات
- اي ، مثل هاي المحفظة متروسة فلوس ، تكفينا كم يوم ندربلنه فد.كاولية تركص النا و نعدل مزاجنا بكم كاس ، نكعد وزن
- عاينت اعلى المحفظة البيدة كمت اتلمس بجيوبي :- لا يالنغل ، محفظتيييييي
- جاااااانت
- لا عليك العباس
- نشوفك بخير يالبغدادي
- لك بس انطيني المستمسكات بربك خنجررررر
- روووووح خلي بغداد تفيدك
دار وجهه و اني هديت عليه ، سحب الفلوس من المحفظة ، وكضيته من ركبته :- هسة تردهن
انطاني ضربة بعكسة اجت بخشمي ، و شمر المحفظة علي وكال :- خوش بيهن وليمة اليوم .
- اروح للمضيف وارد و علي لا ما اكضك اطلعهن من خشمك بس اصبرلي .
- لا ما اصبر جاي وياك
- فلوسي
- عازمك بيهن اليوم اعلى كعدة من العمر
- كعداتك ما احبهن ، اطيني فلوووسي
- خايب شكد كرميدة انت شنهي قحط ، كلت الك اعزمك بيهن اليوم بس صم حلكك
هزيت ايدي، اشر :- خاب شوف زناد ابو عكال اليكول جنه واوي الليل
- ضحكت بصوت عالي
عاين علينا زناد ، و ضل مركز بينا ، تقربت يمه :- الله بالخير
- هلا وجثير الهلا بخوي
وسلم علي، طلع الوالد و كال :- هلا بسرحان ، هلا ابني
تكربت بست عكاله و كلت اله :- شلونك يابه
ما رد علي ضل يعاين لخنجر ، ذاك دار وجهه و مشى و صاح :- عاااازمك الليلة عود لا تنسى
الشيخ :-- شعندك ويا خنجر
- لاكيته بالدرب
- لا تمشي وياه بعد ، واحد شقاوجي و شلايتي
- شلونك انت يابه
عاين علي و عرفني قطعت سالفته :- شنهي مجبور اعلى الجية بوية
- انت الردتها و انا ما ردت اكسر كلمتك
- امك وين
- راحت بوجهه للقصر و صبيحة و وولدها وياها.
- هلا بيك بديرتك
حجاها ، تنهدت وكلت :- هلا بيك بوية .
- حميييييد
- امرني شيخ
- جهزت الكلت الك اعليه السرحان
عاينت اعلية :- شنو المجهزه؟
- انا اعرفنك مولع بالخيول و الاحصنه
- اي
- وصيتلك اعلى حصان عربي
عاينتله بأبتسامة ، ضرب اعلى جتفي و مشى جدامي :- مشيت وراه بلهفة ، اني كل جمعة بمزرعة امي لخاطر اتسابك اعلى الخيل ، ان جان صدك جايبلي فرس يا فرحتي بهالديرة و فرسها .
مشيت، وبالفعل لكيته محضرلي حصان تقربت امسح عليي .. عاينت لأبوي :- مشكور يابة
- بالعافية وليدي ، لجن اسمع ، ملابس الحضر بوية ما اريدنها البس دشداشة و امش ، لا تلبس بنطرون الناس هنا ما تخلص من حجيهم .
- ان شالله بوية تامر
طلع ابوي، و ظل زناد يتنوع ، درت عنه و انا اعاين الفرس و كلش فرحان بيه .
سمعت حس خنجر يصيح برا ، عفت الفرس و طلعت :- هااااا
:- امش
- شكو ؟
كض ايدي زناد :- ابوي حذراك من المشي ويا زناد
- و انا مو جاهل خاطر احد يحذرني
جريت ايدي منه، ومشيت لاكاني كاطع :- والله وجيت يالحضيري
تعديته و ما رديت و بتجاهل صحت اعلى خنجر :- شنهي العزيمة
استغرب كاطع و هو يعاين لغريب ، مشى و صف ويا خنجر :- هسه تطلع عزيمتك اثنين زرازير مالص اركابهن
- وعلي مشتهي الزرازير بروح جلوب خلنا نطلع بر
-هسه واصل ابن الاوادم
- جا شنهي ؟
- خليها غير مرة ناخذ هالحصان و التفكة و نطلع نصيد بر
- يا يااااااابه، دمشي لعد خل اخذك للشط
- وشعدك بالشط
- خايب وينها ام عين الكحيل تمر غاد ، امش
- لا غيب زحمة نروح نعاين اعلى النسوان ، شنو متكلي
- خايب تمشي يو ادجك والله
- بنات السلف
- ولك مو بس نسوان الكل يسكي مناك زلم و نسوان ، امش امش
مشينا و رحنا للشط ، وكعدنا هناك نذب حصو و نسولف ، حتى ما عاينا اعلى مرة ولا درنا ظهورنا الهن.
صار المغرب ، كال :- انا اروحن عدي شغلة ويا واحد صاحبي
- الله وياك
- راح تظل ؟
- شكل الماي و الغروب عاجبني، ينزل الغروب و ارد للقصر
- جا اشوفنك بالليل
- ان شاءالله
تنهدت و انا اشي بالحصوة و اذب بالماي، عاينت للسما :- ما اعرف شلون راح اكضي باقي حياتي هنا، عاينت اعلى اليترسون بجراتهم ، الحياة هنا تختلف عن بغداد جذريا .
ظليت مركز اعلى اليترسون ماي، مالت عيني اعلى بنية صغيرة ، احتارت بالجرة و الكصيبة ، كلما ادنك تترس ماي كصيبتها تطيح بالماي و تتبلل، ترجعه و تعصرىبيها و تخليها اعلى كتر و تسحب الجرة و هم تتبلل .
ضحكت و كلت بكلبي :- دوخري الكصيبة ليورا شموازيج كلساع و اطيح .
شالت عينها شافتني مركز بيها، دنكت للكاع بسرعة ، اخذت حجارة و درت وجهي .
ردت هي تترس ماي، مدري ليش ظل بالي مركز وياها و الفضول اخذ عيوني و خلاني ارجع اعاين الها ، شفت الكصيبة هم طايحة بنص الماي
ضحكت و تكربت ليها ، و دنجت وكلت الها :- تريدين اساعدج ....
ا