تحميل رواية «كان صديقي» PDF

الاسبوع الجاي تنزل القصة، وإن شاء الله تستمتعون بيها. بس من هسه ما أريد غلط على الأبطال، كضوا لساناتكم. وكذلك القصة بيها شرح لمواقف، ضروري أشرح وأوضح، مو يجيلي متصوف لو تجيلي قديسة ويكولون أووه عيب وحركات خضرة الشريفة ما أحبها. فديت اللي يعلقون وما ينتقدون. انتظروني قريبًا.

اية ولج اية روحي شوفي منو بالباب.

اي اجت البنكلادش، اية صار صار.

ولي ام لسان بسرعة.

ماما ولد بالباب يكول نريد الطرشي مالت ام مهند.

اي هاي المرة أول مرة تشتري مني جديدة.

همزين طلبها كامل.

تعاي نتكابل اني وياج حتى نطلع السطل ثكيل شوي.

مابيه يمه ثكيييل معليه.

رح أصيح لمروة.

مروووة.. مرووووة.... لحكي ولج.

ها ها خير اية شكو!

ههه ماكو شي ردتج تجين بسرعة.

اجيت لكيت امي بالمطبخ تلمع بسطل الطرشي.

ايه عافتنا وراحت.

تعالي أمي الله يرضى عليج.

ولد عدهم طلب طرشي اجه عليه ومابيه اشيله.

واخوانج طالعين محد هنا.

يلا لعد عيب نتأخر خل نطلعه.

بس ألبس عباتي وحجابي.

وصلنا اني وامي للباب.

فتحت الباب والصدمة!

اشوفه واكف يم سيارته ويلعب بالفون ممنتبه.

معقوله؟ هذا شجابه.

...................

اني مروة عبد الهادي. أبوي توفى ورا السقوط برصاصة طائشة.

ضربته براسه وتوفى بسرعة.

وامي ربي يحفظها ربتنا وعشنا بتقاعد أبوي ولأن ميكفي.

ضلت تسوي طرشي وهي مشهورة بي من قبل، الناس يمدحون بي.

ضلت تبيع وانعرفت وضلو ياخذون منها ويوصون ع كميات جبيرة.

اكو نسوان هواي حالتهم توب يوصوها تسويلهم فد كمية جبيره.

لأن طيب ونظيف ويثقون بيها.

طبعًا احنا ٣ أولاد و٣ بنات.

الجبيرة اختي ليلى مخلصة معهد وممتعينه.

واني بعدني طالبة مرحلة ثالثة علم نفس.

والصغيرة اية مرحلة أولى صيدلة.

أما الأولاد هم:

أمين الجبير وتارك المدرسة واشتغل أعمال حرة كل يوم شغلة.

إلى أن اشترى تكسي واشتغل بيها.

تعرفله ع وحدة حالتها زينه لأن التزمها خط يوديها للدوام.

حبو بعض وتزوجها.

وأبوها شغله ويا لأن هي رفاه مرته جبيرة، أهلها واخوانها صغار.

لزم أمين شغل عمه وعاش وياهم ببيته.

ومايذكرنا بس من تصير مشكلة.

هشام تخرج من معهد الطبي وتوظف بالمستشفى.

بس بخيل ومصلحجي وفلوسه إله.

واكرم هم ترك الدراسه وضل يوميه شغل شكل.

حاولت وياهم أمي يكملون دراستهم.

بس مايطيعوها ومايسمعون كلام.

رغم تعبت عليهم وكسرت عمرها وشبابها بس ماغزر بيهم.

طبعًا مواصفاتي شرقية بيضة عيون كبار سود ورمش ملفوف.

ومعاني مرتبة.

وطويلة وجسم متناسق كلش.

لبسي بسيط وأغلبه من البالات لأن شوي أرخص ومايستهلك بسرعة.

داومت بالكلية والحمدلله مستواي كلش زين.

صديقات عندي ٣ مقربات وكله سوا.

اختلاطي بالطلاب قليل مجرد سلام ومااحب أتجمع وي الناس.

هواي يصارحوني ولد من الجامعة مو بس من كليتي.

بس مااتجرأ أرتبط وأحب لأن أخاف.

لحد مرحلة ثانية بالامتحانات.

ورا الامتحان رحنا ناكل بالكافتريا لكيناها معزلة.

كالو البنات بعد وكت منا لساعة ١٢ يلا نطلع.

امشو نروح لنادي الهندسة.

النادي مالتهم حلو واسع كلش وكلشي بي.

مو مثلنا كافتيريا ومسكفة وكراسي وميوزة واللفات باردة.

رحنا وكعدنا وبدا الحش والقشب بالناس.

طبعًا جانو كلش مرتبين يعني ينضرب بيهم المثل.

بس بعد البنات من ينجمعن لازم يكصن بالرايح والجاي.

كمنا اني وامل صديقتي نجيب الأكل.

هي طلعت تجيب عصير فريش.

واني انطيت الورقه للولد جابلي الطلب ومسبل عيونه.

يا شبي هذا حينام وهو واكف؟

جانو مخلين صلصة وطرشي وسلطة ويسألون إذا تريدين نخلي باللفة لو لا.

طبعًا بس اني اخذت لفة لأن مصروفي محدود ماكدر أصرف زيادة.

سألني الدايخ.

تريدين احطلج صلصة حارة لو سلطة.

لا سلطة مااريد بس أريد صلصة حارة هواي.

باوع بوجهي وعيونه فاترة يمكن شارب هذا.

أف بس هاي حارة كلش فلفل أحمر هذا.

اي احبه خلي منه هواي.

مو يحركج أخاف متتحملي.

أففف شبي هذا هسه أنت شعليك قابل حاط من طاسة الخلفك.

اييي مو مشكلة يااخي انطيني خلي اروح إذا تسمح.

علت شوية نبرة صوتي.

اشو هذا انطاني اللفة وفوكها رقم! وكال:

مدام تحبين الحار خابريني.

وغمزلي.

ثواني مااشوف إلا واحد من وراي لزمة من تشيرته وجره.

لك احترم نفسك ناااقص.

اني انصدمت حتى مباوعت ع الوراي.

بس اشوف كبت عيطة.

وبسرعة صارت هوسه والتمو الولد.

رجعت بسرعة لمكاني.

والبنات صافنات لج شكوو شصاار؟

حجيتلهم الصار والكاله الولد.

كالو:

لج هذا التعارك وياه عينه منج من كمتي.

وراح وكف وراج بس أنتِ عوبة ماانتبهتي.

اجت امل جابت العصير وادردم مالحكت تعرف سبب الهوسه الصارت.

هالحجي الناس تفرقت واباوع للولد ظهره الي ويحجون ويا المسؤول مالت النادي والشباب.

خلصنا أكلنا بسرعة البنات ناصبات عليه يكولن أم المشاكل.

كعدنا نحل بأسئلة الامتحان واسمع واحد سلم.

بس صوته خشن رجولي إلى درجة بحيث مميز.

السلام عليكم بنات من رخصتكم إذا ممكن.

رفعت راسي باوعت.

واحد لابس قميص بيجي ردانه مرفوعة للعكس.

ساعة جلد جوزي.

جينز ثلجي وبوت جوزي طوخ.

شعره أشقر عالي بشرته بيضة.

عيونه مااعرف خضر مااعرف صفر بس متلونات.

وشوارب شقرا مو كثيفة وسط.

طوله متوسط ورفيع بحيث الملابس عليه قالب.

وكف كدامنا البنات كلوله تفضل. كال لا مااطول.

بس عندي حجاية وي حضرتج.

وباوعلي.

تفضل!؟

زاد فضلك بس ردت أعتذر ع الموقف الصار.

بس من سمعته قلل أدب ماكدرت أسكت.

واطمئني مااجت سيرتج بالمشكلة الصارت والولد راد يعتذرلج بس ماخليته.

اهاا.. لا شكرًا أخي ماقصرت واني أسفة صارتلك مشكلة بسببي وممنونة منك ع موقفك.

بالخدمة اني.

من رخصتك.

سلم وراح.

اباوع للبنات عبالك يتفرجون فلم فاتحين حلكهم وصافنين.

وي كعدتي طارت الورقة لأن السبلت ع جهتنا.

اباوع يبوو يم الميز الي هو كاعد عليه.

استلمني البنات يداهرني وروحي جيبيها من يم أبو الغيرة.

وما خلن كلمة ماحجنها.

انتبهت للميز كاعد هو وولد ثاني.

بس اليمه أكلني أكل بعيونه ونظرات جريئة بلا خجل أو حشمة.

شفته باوع للأسئلة جوا وشالها.

واليمه صافن عليه.

عزاا نسيت اني كاتبه بيها اسمي لأن الأساتذة ميقبلون إلا نكتب اسمنا.

حتى لنبدل بينا ويصير غش.

وراسمه عليها وكاتبه شعر.

لأن خلصت من وكت وماقبلو اطلع قبل العشرة كعدت أشخبط.

رحت ركض أخذها قبل ليقرا.

لو سمحت هاي ورقتي.

باوعلي بنفس النظرة العميقة كال:

أريدها.

الجزء الثاني

أريدها ممكن؟

محتاج ورقة وما عندي لأني مو طالب..!

بس قلم إذا تسمحين..

آها عادي ما أحتاجها أنا وهسه أجيبلك قلم من الجنطة..

لا ما يصير أتعبج أنا أجي وياج آخذه..

قبل لا أرفض إجه وراي..

فتحت المحفظة أريد أنطي قلم جاف، كال لا أريد رصاص..

أنا ما أستخدم بس ميكانيكي وهالقلم كلش عزيز علي..

صارلي عندي من أول ما دخلت الكلية..

جنت جاي أجهز للكلية ولأن فلوسنا محدودة..

يعني نشتري قليل..

من ردت أشتري قرطاسية شفته وكلش عجبني، سألت عنه كال الولد بعشرة..

أنا كمزت.. بقلبي شنو قابل يكتب لوحده لو ما يغلط..

بس عجبني كلش لأن جان ماروني وبي خطوط رصاصي..

وشكله كلش نازك وسلايته رفيعة وخطه حلو..

أمي كالت أخذي مدام عجبج وصرتي كلية حلو تستخدميه أحسن من الرصاص..

هذا لطش كال انطيني رصاص..

كتله ما عندي..

لعد هذا شنو؟ وأشر ع القلم..

ها أي ميكانيكي..

أي بعد أحسن أحب خطه..

أوكي تفضل..

مشكورة شوية وأرجعه..

أخذه ورجع للكرسي وبإيده الأسئلة يكتب بظهرها..

وهذا اليمه نظراته تريد تاكلني شكد شكله ماصخ وفاهي..

رغم شكله أجمل ما يكون..

جان أبيض بياض أجنبي عبالك مو عربي بسرته ترفة جنه طفل..

لون عيونه أزرق صافي..

شعره خفيف أشقر.. وملامحه ناعمة..

طوله مرتب جسمه تارس شوية يعني حلو لا ضعيف ولا سمين..

جان لابس جينز أزرق وقميص سمائي وجوزي نصين..

انتقدت لبسه بوقتها شكله ما عنده ذوق..

التفتت ع صوت البنات وهم يحشون بيهم..

لج مروة أنا انضغطت منهم أحلى مني!

كالت أمل، سكتي سالي حسيت روحي رجال من شفتهم..

جاوبتها ولاء أصلاً ما أتجرأ وأباوعلهم..

دشوفي جنهم آيس كريم..

مو أنا جني شلغم..

بين الكلام والشقة إجه الخط ردنا نكوم أباوع!

لا يااا هذا ماكو والقلم...

أف هسه شبيك فكر حتى قلم ما عندك..

رجعت للبيت تغديت ونمت للمغرب كعدت..

سويت العشا أنا وآية..

ليلى جاي تتعلم خياطة فاتحين دورة مجانية..

وتروح تتعلم تكول أفيد أمي..

كملنا وصبينا الأكل أكرم بالمنطقة وي جماعته خابرناه كال ما أريد..

صحت ع هشام نزل..

جوعان شمسوين؟

بتيته وطماطة وجاي..

أووووو هم بتيته مو روحنا طكت شنو قحط لازكين بس بيها..

جاوبته أمي..

يمه كول الحمد لله أنا منين أجيب أبوك..

إذا أخوك حتى ما يذكرنا بفلس لو يكول أمي محتاجة شي..

هسه فلس ما رايدة خل يسأل عني لو يكول ميتة عدلة..

وأنت تنطيني ٢٥ بالشهر وراتبك حتى ما تقبل تكول شكد..

وأكرم مسكين ما عنده شغلة يومية بمكان..

هسه هل يشتغل بهالمحل مال الجبب بالسوك صانع..

وشياخذ قابل ملايين هي تفاليس..

يلا يطلع منهن مصرف جيب.. لبس حاله حال شباب البعمره..

أي فهمنا يمه فهمنا.. هسه الـ ٢٥ الأنطي وين تودي؟

ههه يمه إذا ما آن علينا بي أخذه..

وين أودي؟ أخلي عليه ٥ وأنطي لأبو المولد..

إذا تريد لا تنطي مو مشكلة إلا نفتح لاله من تطفى الكهرباء عود.. مو إلا نسحب..

يلا يلا هذا هو أطلع أكل شي برة أحسن..

صدك بدل وطلع..

كعدنا أكلنا الحمد لله نعمة غيرنا يتحسر عليها..

يوم ثاني عطلة لأن امتحان الفاينل بين يوم ويوم..

وراها داومت وامتحنا هالمرة زين اكو لفات كاعدين..

كعدنا أكلنا ورحنا يم القسم مالتنا نسولف حد ما يجي الخط..

ولازم طبعًا الجاي والرايح ينكص محد سلم منهن..

إلى أن صدفة رفعت نظري وشفته جاي يمشي..

وجان مركز نظره علي..

وهم وياه هذا الأصفر..

طبعًا نظراته أحسها تتغلغل بي مو نظرات عادية..

أحس تخترق روحي وجسمي نفس الوقت..

درت وجهي ع البنات وسويت نفسي أسولف..

كالت أمل

لج هذا أبو الغيرة هنا شكو وويا هذا أويييلي..

لج سالي باعي حظي شلون عيون تكول المحيط الهادي كد ما هادئات..

جاوبتها أنا لج كااافي فضحتينا..

بين سوالفنا سمعت هذا الصوت المميز يسلم..

باوعلي وأحس مركز بي كأنه جاي يرسمني من شدة الدقة ورافع حاجبه..

القلم مالتج ضاع وهذا بداله..

طلع قلم رصاصي وبي حفر علامة إنفنتي..

لا عادي مو مشكلة عندي غيره..

أعرف عندج بس أنا ضيعته ولازم أعوضج..

شرعًا وقانونًا هذا حقج..

خلاه بيدي وترخص وراح بس نظراته أحسها عصبية..

بس جان يتصنع البرود..

من راح البنات كالو لج هذا شكد حلو بس مينبلع أفف..

وين ذاك صح فاهي بس مو هيج نظراته مال واحد مداين الناس ومناطي فلوسه..

هو شكله فعلاً هيج ههه...

المهم ورا كم يوم جنت توه طالعة من الامتحان..

صار بوجهي..

غلست مشيت خطوتين أسمع..

مروة عندي حجاية وياج؟

التفتت بسرعة مستغربة شلون عرف اسمي؟

شفته باوعلي شلون منتظر أسأله...

بس ما حجيت..

بدأ الحديث هو..

عادي نحكي هنا؟ لو تردين نكعد..

لا خل نصير ع جهة لأن منا الطلاب تروح وتجي..

صرنا ع جهة وكف وخله إيده بجيبه..

مروة أنا مو شاطر بالمصارحة..

بس الأكدر أكوله أنا..

أريدج..

للحكاية بقية

بقلم شقراء (قمر كانون)

شتريد مني يعني؟

أريدج مثل ما كل رجال يريد مرة.

عفوًا!

باوعلي رافع حاجبه: ليش هالفزّة كلها؟ شنو متعرفين كل رجال يريد بنت وتعجبه؟

يخطبها!

آها، أي ما عرف.

تلعثمت بالكلام وياه لأن أول مرة أحچي وي ولد وبهيج موضوع. صح أحچي وي الطلاب بس عادي. مو مثل هذا ونظراته وترتني أكثر.

هسه شنو رأيج إذا أخطبچ توافقين؟

ما أعرف، القرار مو يمي، يم أهلي. أكيد هم أعرف بمصلحتي.

قبل قرار أهلچ أنتِ شنو رأيچ؟

ليش أحسك جاي تحقق وياي؟

لا غلطانة، أني مو هذا أسلوبي.

چان الحديث بينا متوتر لأن ثنينا نريد نثبت نفسنا. ماكو طرف خاضع بالموضوع أو طرف لين يمتص الشحنات اللي بينا.

هسه إذا أدز الوالدة ماكو مشكلة؟

مبدئيًا ماكو.

وآني أترخص، ما أگدر أطول.

أخذي راحتچ.

نزلت بسرعة ومتوترة، ما أعرف أفكر. رجعت أتذكر كلامي وياه.

شبيه أنا مخبّلة شلون أگله تعال؟ زين هو منين يعرف بيتنا حتى يجي؟

أفففف شگد أكره نفسي من أستغبي.

أجو البنات بس ما حچيت گدامهم. رجعت للبيت حتى ما تغديت. لگيت أمي جاي تسوي طلبية طرشي وليلى تساعدها. آية بالغرفة تقرا والولد مموجودين. رحت للفراش واني أفكر.

كل عقلي وگفت وياه وحاچيته! صدگ هو شسمه؟

***

اسمي جراح رفعت جراح. والدي سماني عاسم جدي لأن ولدت من مات. بالفاتحة مالت جدي ثاني يوم، صادف ٧-١٢-١٩٨٩. يوم ثاني بالفاتحة ولدت. لهذا سموني على اسمه. لأن والدي چان أقرب أولاده إله وجدي چان مهيوب ومعروف. دائمًا يگولولي أنت نسخة منه.

والدي متزوج ثنين. أمي الأولى وعندي إخوان ثنين أكبر مني. رفعت متزوج وعنده ٣ أولاد وبنية. وبهجت متزوج وعنده بنية وولد. آني الوسطاني وأصغر مني تجي عذراء أختي متزوجة ابن خالي وعدها ولد وبنات ثنين. وبيداء متزوجة غريب وصارلها سنة بعدها وما عندها أطفال. والدتي طيبة من أهل قبل على نياتها. حتى من تزوج عليها والدي ما عاركت ولا حچت. بس هجرته، گلتله تبقى أبو جهالي وبس. وهو جيّاته يمنا قليلة، أكثر شي يم الجديدة.

زوجته الثانية أرملة وما تخلف. بس بعدها شابة ثلاثينية. ما شفنا منها شي مو زين، خلوقة وحبابة. وكلش تحترمنا. بس ما نحتك بيها زيادة لخاطر الوالدة.

حالتنا المادية مرتاحة. لأن الوالد ملاج شغلنا بمواد إنشائية وبناء. الحمد لله الخير زايد بس طبعنا بسيطين ومقدّرين النعمة.

آني چنت أحب بنت جيرانه من چنت بالسادس علمي. ومستواي الدراسي عالي. حتى چنت أدرسها. وچانت حالتهم وسط وأهلها ميقبلون يخلولها مدرسين. آني تكفلت أدرسها كلشي. قصّرت على نفسي وتمّمتلها المواد. امتحنا وطلعت المعدلات. وجابت معدل عالي. ودخلنا ثنينا هندسة. آني لخاطرها رحت هندسة.

داومنا سوا أول شهر، طاير فرح بيها. بس شوي شوي بدت تتغير. ما تقبل تمشي وياي. تگعد بغير ستيج بعيد عني. آني گلت لخاطر سمعتها يمكن تخاف. عذرتها وتفهمت الأمور. بس لاحظت تتغير أكثر وأكثر. گلت لازم أتأكد.

چانت طالعة من الكلية هي وبنية وياها. تبعتهم بلا ما تدري. شفتها ورا الكلية. واگفة وي ولد والبنيه بعيد عنهم شوي. أباوع وجها بوجهه. التفت الولد منا ومنا. جر إيدها وباسها.

هنا شگد حسيت نفسي مغفل. أعصابي سبقتني. رحت ركض جريتها بلا ما أنطق. انهد بيه الوياها وهي انصدمت من شافتني.

تمالخنا آني والولد، ما خليته يحچي، مطلته بالأرض وشبعته بوكسات. وهي بكل صلافة تجر بيه!

دفعته وهو يمسح بخشمه صب دم. دفعتها يمه. گتله بالعافية عليك فضالتي. ترى أندل جسمها شبر شبر.

هو گام جرني من قميصي، باوعت بوجهه مبتسم. تريد تضرب عادي. رفعت إيده الثانية يلا رد الضربة. نزل إيده، عفته ومشيت.

هههههه شگد أثول آني. صعدت على چتافي وعلت. ودفعتني. صدگ علمته على الرماية وصوبني. بس مو آني التكسرني مرة. أعتبرها حشرة وعبرت عليها وتعديت.

ورا هاليوم ما داومت بعد. تخابر عليه ما أجاوب، أنطيتها حظر من كلشي. حولت كلية شرطة. لأن چانت الهندسة مو رغبتي. هناك بلشت عالم ثاني. قسيت أكثر ما آني قاسي. صارت بكلشي صارم ومتزمت. عفت الحب وخرابيطه. ظليت يوميه وي وحدة، هيچ أقضي رغبتي وبس.

مرت الأيام وتخرجت وصرت ضابط. وچنت رايح للكلية أزور صديقي لأن تخرج وكمل دراسات. وتعرفت على قيس يصير صديقه. وضابط بحري هو، وتعارفنا وصارت صداقة.

ظلينا نمر للكلية بين فترات. إلى أن مرة گاعدين بنادي الهندسة. ودخلوا بنات گعدوا على ميز قريب علينا. بس مبينات ثگيلات لأن ما رفعن عيونهن على ولد. من ضمنهم وحدة أول ما شفتها حسيت قلبي اختض. ظليت أباوع وهي قافلة. انتبهلي قيس گال: ها شنو حصلت صيدة؟

يمعود متشوفها ممّعبرتني.

منيه منهن؟

هاي البيضة أم طول الحلو چنها عارضة أزياء.

ثالث وحدة مو؟

أي هي.

روح فوت عليها لعد.

انجب يول، ششايفني مثلًا قيس؟

لعد ظل أطحن حنطة وشعير بمكانك.

ظليت أباوع، اليمها انتبهت عليه. هي گامت تجيب أكل، گلت شوي وأگوم وراها. گمت وگفت على جهة، ردتها تباوع ماكو. إلى أن رحت وگفت وراها وسمعت حچيها.

خرّب شگد فاهية. ما تحملت ضربت الولد.

للحكاية بقية.

شكد حسيتها فاهية وبريئة لأن الكلام الي كاله الولد عيب وقصده مخجل.

بس هي بكل برود تحجي.

هالشي عجبني بيها أكثر.

ممعقولة بنية بهذا العمر وهيج فقيرة.

ورا ما حاجيتها واعتذرت الها، قررت أسأل عنها وآخذ معلومات أكثر.

بس ما أعرف اسمها، وسألت أهل الكافتيريا كالو مو من الهندسة غريبة.

بس الي سهّل عليه المهمة شفت اسمها وقسمها بالأسئلة، كلت انحلت.

ترخصت من قيس كتله خابروني الأهل وراح ارجع.

رحت لكليتها وسألت عنها.

جانت الإجوبة كلها وحدة وتبشر بخير.

كلش خوش بنية وهادئة ما عندها زايدة ناقصة.

ارتاحيت وكلت بداية حلوة.

بس جنت أحجي وي ولد بغير قسم، واجه صديقه يمنا.

من سمعنا نحجي بيها كال:

"جانت عندي علاقة بيها، وماريد أغشك لأن أنت جاي تسأل تكول تريد تخطبها، ولازم أبرئ ذمتي."

هذا الوحيد الي طعن بيها.

وتقريبًا ما صدقته، مبين مو راحة.

كلت اسأل عنه وأشوفه شنو.

سألت ولد اثنين كالو:

"سيد محمود اوف ماكو منه."

مدحو ونزهو كلش.

طخت ابالي أسأل عنه بنية، إذا ذمته معناها هذا مرتكب ع مروة ويجوز ما ناطيته وجه وضايج منها.

ردت وحدة ثكيلة حتى اسألها.

مشيت واكفات ثنين لابسات عبي راس.

تقربت منهم وسلمت.

"العفو أختي إذا ماكو إزعاج عندي فد استفسار."

"تفضل أخي إن شاء الله أكدر أساعدك."

مدنكة وتحاجيني واليمها كالت:

"تفضل."

"اني جاي أسأل عن ولد اسمه محمود هو سيد، خاطب من عدنا ونريد نسأل عنه، واني شفتج رزنة ومحتشمة كلت أكيد تحجين ضميرج."

"شوف أخي اني بنت وباجر أتعرض لموقف وواحد يسأل عني، وأكيد إذا بريت ذمتي هسه ربي رح يوكفلي. اني ما أكدر أطعن بسمعة أحد لأن ديننا يأمرنا بالستر، بس اكو أمور ضرورية وتتوقف عليها مصاير ناس. باختصار، سيد محمود حثالة المجتمع الجامعي! هذا كل الأكدر أجاوبك عليه وما أكدر أحجي شي زايد بعد."

"الله يرحم والديج ما قصرتي، مشكورة والله يستر عليج."

"أهلًا وسهلًا بيك الشكر لله."

ترخصت ومشيت كلت هذا يرادله جرة إذن.

بس مو هسه خل أفرغ.

مرت كم يوم ورحت لكليتها واشتريتلها قلم.

ردت أخلي شي مني يمها.

وقلمها بقيته عندي.

حسيتها انعقجت من عرفت ضاع.

متدري بي يمي ويجي يوم وأنطي إلها.

شغلت تفكيري كلش وأحس صدك رايدها.

لأن اني عارف هواي بنات ويوميه وي وحدة.

بس بلا لهفة بلا شوق.

جنت شاك نفسي ما عندي إحساس.

بس وياها رجعتلي أحاسيس حلوة.

ويمكن هذا الحب من أول نظرة هيج يصير.

قررت أخطبها لأن ماريد ألوثها بعلاقة.

المهم حاجيتها بس ما حسيتها معترضة.

تمنيتها فعلًا تصير الي.

عيونها بريئة مثل عيون الطفل.

بياضها مثير وطولها كلشي بيها لفت نظري.

قررت أخطبها وحجيت لقيس.

بس قيس خربط أفكاري من كال:

"شلون تخطبها هيج ليش ما تتأكد من أخلاقها؟"

"يكفي سألت عنها بالكلية وبالمنطقة الكل تحلف بيهم بعد شنو."

"لازم تتأكد يا جراح شخسران هسه أنت. خليني أختبرها الك شتكول؟"

"دروح تختبرها شنو انجب بلة."

"اني أخوك وأقرب واحد الك يعني أطمئن مراح أزعجها لو أضوجها."

"ما أعرف هسه عوف الموضوع."

مروة:

يوم ثاني ماكو امتحان.

نظفنا البيت وساعدنا أمي بالطرشي.

أكرم يمنا يسولف.

وخليل البخيل (هشام) اجه يمنا.

"يمه فرغي روحج هاليومين أريد تخطبيلي."

"يا يمه أبرك الساعة."

"مبين معينلك وحدة أشوف تتبسم."

"اي يمه أحبها وخوش بنية."

"الله يوفقك ويسعدكم."

"حاجيت أمين بالموضوع لو لا؟"

"اي حاجيته وكال روح بفالك."

"بيها الخير بس كلي شوكت تريد حتى نروح."

"شمسوين غدا اليوم؟"

"مگشت وروب."

"كومي آية صبيلي جوعان."

صبتله آية وأكل لكمتين.

"عيع شنو صدك جذب شوكت تعرفون تطبخون بلة. الأكل يلعب النفس."

عاف الغدا وكام.

اجه أكرم كعد ياكل.

"يولي هذا الفكر معليج يمه الأكل يخبل. كلشي من إيدج طيب."

سكتت أمي ما حجت شي.

تغدينا وكعدت أقرا، ليلى راحت لدورة الخياطة.

وآية يمي تقرا وأمي نامت.

ورا شوية سمعنا الباب يندك راح أكرم فتحه.

اجه كال:

"نسوان ٣ بالباب بسرعة ولج مروة كومي دخليهم أمي نايمة."

كمت هم واكفين بالطرمة وسلمت.

دخلو وسألو عن أمي كتلهم نايمة هسه أكعدها.

سألوني:

"أنت مروة؟"

الجزء الخامس

أي خالة، أنا مروة.

الله يحفظج ويستر عليج... الله يخليج خالة مشكورة.

عن إذنكم، أقعد الوالدة.

رحت لقيت أمي جاي تبدل وتلف بالفوطة مالتها.

مكعدتها آية.

طلعت يمهم وأنا سويت جاي وحضرته.

شوية واجت أمي كالت جيبي الجاي وتعاي.

أخذته وقدمته الهم.

كالت أمي:

"أم رفعت جاية تخطبج لابنها."

"شايفج بالكلية ودازهم اليوم عليج."

عاد عرفت هو دز أهله صدك.

سألتني أمه شنو رايج، كتلتها الكلام يم أمي.

ترخصت وكمت.

رحت للغرفة، آية جانت تخابر بس شافتني سدته.

ما حسستها أني انتبهت.

بس كتلتها جايين يخطبوني وكعدت تحقق.

كتلتها هيج سالفته وكعدت تذاهر بيه.

لو أدري ما حجيت.

أمي كالت ينتظرون من عدنا خبر.

لازم أسأل أخوانج وأرد جواب.

كتلتها كيفج، سوي التشوفي.

يوم ثاني داومت، صادف امتحان الأخير.

شفت جراح واجه حاجاني.

كتلتله بعد الوالدة ترجعلكم خبر.

كال أريد رقمج وهذا رقمي خلي يمج.

لأن حتجي عطلة ويمكن أحتاج رايج أو كذا.

انطيته رقمي باعتبار الموضوع وصل لأهلي، ماكو داعي أخاف بعد.

شوية ترخص وراح ويا صديقه.

وكالعادة نظراته تأكل بيه.

ما مخلي حشيمة إله وهو يدري بي خطبني وهي يباوع.

كلت إذا صدك ارتبطنا أول واحد أمنعه منه هذا.

رجعت وخابرني جراح وسولفنا شوي.

تعرفنا على بعض وتناقشنا.

بس ما تجاوز لو قلل أدب، يحجي بكب رزانة.

أمي طبعًا حاجت أخواني، كلولها نريد عنوان نسأل.

وخابرت أمه وانطتها العنوان.

كالو نسأل ونرد جواب.

ورا يومين جانت الدنيا عصر، كاعدين أنا والبنات على الـ T.V نباوع فلم أجنبي.

واجت رسالة من رقم غريب.

أول مرة تصير وياي.

جانت شعر غزل.

غلست عنها.

اجت ثانية.

حفظت الرقم بالفون وكتبت مجهول.

حتى لينمسح يجوز أعرفه.

ورا شوي حاجاني جراح.

ملتحق بالدوام.

طبعًا جراح جان شغله خارج المحافظة.

ومكان كلش خطر.

حاجيته وكتله دير بالك على نفسك.

بس حجينا بحدود ورسميات.

خلصت منه، رحت صليت وسوينا عشا وتعشينا.

تالي فتحت الفون وبالصدفة فتحت ويجات.

أصلاً قليل استخدمه جنت.

مرات نحجي أنا والبنات مسوين بي كروب.

شفت إشعار فتحته.

طالع من جهات الاتصال الرقم مال مساع.

فتحت حسابه!

لكيته صديقه!

ملابس عسكرية وكاعد بمكتب.

والاسم قيس البحار.

كلت أنطي الرقم لجراح على أساس ما أعرفه.

وأشوف رد فعله.

أنا مو غبية ولا بسرعة تعبر عليا.

حاجيت جراح وكتله حدزلك الرقم.

دزيته كال ما طلع بالكاشف.

كتله:

"حنطي حضر."

"كيفج انتِ شلون تتصرفين كيفج."

"زين ليش ما ترزله أنت وتعرفه منو؟"

"لا الأحسن أنتِ تصرفي، أنا أثق بيج."

"وما أريد ألغي وجودج وأتصرف عنج."

"أوكي حرزله أنا لو رجع دز."

ختمته وياه بس كلش ضجت.

معناها هذا متفق ويا صاحبه علي.

ما دام سكت ويكلي حاجي أنتِ.

بسيطة لعد أنا الك.

يوم ثاني دز قيس نكتة.

وكاتب وراها شلونج شخبارج.

كتله نعم؟

حضرتك منو؟

"أنا اسمي حازم ومعجب بيج."

"آها والمطلوب؟"

"أريدج ياريت تقبلين بيه، أعيشج ملكة."

"آهااا..."

صدك تضايقت من كلامه.

كلت أدزه لجراح وأشوف ردة فعله، ما أريد أظلمه.

حاجيته ودزيتله الكلام، حسيته ضاج كلللش.

كال ختميها وياه يجوز يعرفج.

كتله يجوز؟؟؟

يعني تنكر صديقك هو؟

بس مع الأسف ثقتي بيك انهزت من أول، لعد تالي شلون؟

اعتبر كلشي انتهى، مع السلامة.

ظل يتعذر ويدز رسايل.

"هو كال أختبرها الك."

"أنا ما قبلت بس من ثقتي بيج خليته."

"ردت أفتخر بيج وبثقتي بيج."

عفته ما رديت عليه.

رجعت دزيت لقيس.

كتله هسه شكول أستاذ قيس لو أستاذ حازم؟

مو أنا رح أصير عرض صديقك ما تستحي؟

أنا أصلاً ما أطيقك ونظراتك فاهمتها عدل.

وهسه أجيت كملتها.

ظل يبرر على أساس يتشاقى وياي.

ساعة يكول لتزعلين ترى جراح يدري، ساعة يكول ما يدري.

رزلته كتله بعد لا تراسلني رجاءً.

كال تدللين وظل يتعذر.

جراح ما جاوبته.

يوم ثاني ما راسلني.

واليوم صار أسبوع.

وأهلي رادوا يدزون خبر موافقين.

خابروا أمه فونها مغلق.

سدوا الموضوع واعتبروا شي عادي ما ركزوا بي.

يعني عادي ناس أجوا حجوا وراحوا.

ورا أسبوع راسلني قيس.

فتحت الرسالة شفت بيها بطات متحاضنات وكاتبين ممكن تقبل صداقتي؟

كان صديقي

الجزء السادس

اففف هذا شلون بي شكد غثيث خررب...

حذفت المسج وعفته مجاوبت..

وراها لليل راسلني جراح كال..

اسف انقطعت عنج هالفترة..

بس الوالدة تعرضت لحادث هي واخوي..

والحمدلله عدت سلامات ..

اه الحمدلله ع سلامتهم ..

وهسه شنو وضعهم؟

لا هي مابيها شي قوي بس رجليها متاذيات فترة متمشي..

بس اخوي راسة متاذي وايده لان حاظنها حتى لتتاذى..

يلا الحمدلله عدت ع خير ومابيهم شي...

انشالله بس تطيب تجيكم..

هلا بيها بكل وقت..

اهلج ماردو جواب شنو كالو؟؟

ماعرف ماحجو كدامي شي..

يمكن بعدهم ماسائلين..

ماردت اكله اتصلنا ومغلق ماريده يكول ردو بسرعة الجواب..

انوب رجع يعتذر عن موضوع قيس..

اني اسف لان خليتج بهيج موقف..

مو فكرتي اختبرج ابد..

بس هو صديقي واخوي..

ومن عرض عليه الفكرة لان جنت واثق بيج قبلت..

هسه راح الراح واعتبريها غلطة وراحت..

واني اعتذر واتاسف..

ثكلت عليه واحجي من ورا خشمي..

مرت فترة يلا لنت وحيل حبيته..

شفت بي الشخصية الاحلم بيها..

وقيس مراسلني ابد بعد..

بيوم طالعة اني وامي واخواتي للسوك حتى نشتري ملابس خطوبة هشام بعد يومين..

اتفقت وياه وكال اجي اشوفج من بعيد..

بس من اجه هم وياه قيس شكد انغثيت منه..

حتى مباوعتله ابد..

من رجعت راسلته كتله..

هذا ليش تجيبه وياك ولا ارتاحله..

حبيبتي صديقي هذا واقرب واحد الي ليش تكرهي..

مو اكرهه بس جيته مالها داعي..

ههه مو اخذه وياي اكشخ بي..

ليش شبيك انت وتكشخ بي قابل عايز جمال..

وين اوصله يمعوده غير صاك هو بس عيونه كافي..

اوي اصلا مامنتبهه لعيونه..

اصفر وماصخ احسه مابي طعم..

ها ولج طعم شنو..

شمدريني هيج باهت فاهي..

اوف ماكو فاهية غيرج يا مروة..

دائما تجفصين ومتدرين..

اوو فرها عليه..

هههههه. اموت عليج..

صارت خطوبة هشام ورحنا..

مرته حالتهم وسط بس احسن من عدنا..

بس امبينه حادة سنونها النا..

والاعظم امبينة ابخل من هشام اضعاف..

لان من قطعو الكيك واكلو..

الي بقى بالماعون كالت لاختها ضمي لتذبو بعدين اكله ..

لا امبين ذوله مستقبلهم زاهر..

استمريت بعلاقتي ويا جراح والحب زاد اضعاف..

ومتعودين نتراسل ونتخابر ..

طبعا خواتي يعرفون بالموضوع..

الى ان بيوم خابرني جراح..

هلا حياتي مشتاقتلك...

جاوب بكل برود..

مروة اني مكان شغلي خطر وماريد اورطج اتمنى نفترق..

وتذكريني بالخير...

للحكاية بقية

بقلم شقراء(قمر كانون)

عذروني البارت قصير لان عندي ظرف بس ماردت اخليكم تنتظرون

نفترق؟

ليش شنو صار وشنو تغير؟

ترى وضعك نفسه من أول ما عرفتك، نفسه وشغلك قابلة بيه.

الظاهر اكو سبب ثاني جراح.

على العموم سوي اللي تشوفه مناسب.

لا راح أتوسل ولا أبوس ايدك حتى ترجع وما تتركني.

الرجال اللي يحب مستعد يفدي حبه بأي شكل ويسوي المستحيل حتى يحافظ عليه.

شوف حياتك والله يوفقك.

ويوفقج هم، أتمنى تذكريني بخير.

صدقيني محد راح ياخذ مكانج حتى لو ارتبطت ما راح أحبها مثلج!

الله يوفقك جراح، مع السلامة.

ما تحملت أكابر أكثر وما ردت أضعف قدامه.

سديت الفون وانفجرت بالبچي.

لييييييييش؟

ليش علقتني بيك وخليتني أحبك ليييش ليييش الله ياخذني ويخلصني.

ظليت أبچي وسادة حلگي بيدي.

ما ردت أحد يشوفني.

تغطيت وغطيت وجهي وبقيت أبچي.

أريد أرتاح، أريد أبچي بصوت عالي بلكي قلبي يبرد.

كتمت ألمي بداخلي.

وسديت موضوع جراح وأعرف وراه لغز.

لأن جراح يحبني وجانت نيته وياي زواج.

ليش فجأة تغير كلشي؟

بقيت محتارة وكاتمة حزني وقهري.

كرت فترة ورجع قيس يرسل سلام لو رمزيات.

بس أصلاً ما أحاچي لو أرد.

بيوم قاعدة بالغرفة وصاحتني آية.

قالت: تعالي ساعدي أمي بالطرشي لأن ولد إجه عليه.

لبست عبايتي وحجابي وطلعت.

من فتحت الباب شفت قيس!

چان واقف يم سيارته.

شعنده هنا؟ ومعقولة يعرف بي بيتنا؟

رفع راسه ابتسم ابتسامة عريضة.

تقدم عليه.

السلام عليكم، شلونج مروة، شخبارج؟

يحچي بحماس وعيونه تلمع.

طلعت أمي، أني فتت ما جاوبته، زين ما سمعت أمي.

شويه وفاتت للبيت قالت:

الله يحفظه شلون ولد معدل.

شلون أسلوب وتربية صدك خلقة وأخلاق.

الله يخليه لأهله ماما.

وأني بقلبي أقول الله ياخذه شگد أكرهه.

بقيت أفكر هذا شعنده إجه ومعقولة صدفة؟

بس إذا متعمد شلون قابل يقول لأمه اخذي منهم طرشي؟

ظليت دايخة بالسالفة.

هه هسه بقت على هاي.

أشو كلشي يدوخ.

مر اليوم كالعادة.

وراء العشا چنا قاعدين نسولف وإجاني مسج من قيس.

مروة ما أعرف ليش تكرهيني وأنتِ ما تعرفيني.

ترى أني أحترمج وأقدرج وأتمنى نكون أصدقاء.

ترى مو أني سبب فراقكم أنتِ وجراح.

صدقيني جراح متأكد منج ومن أخلاقج.

وأني بنفسي إجيت ويا سأل عنج بالمنطقة.

ويعرف أهلج وكلشي عنج!

قررت أجاوبه وأشوف شنو هالدوخة من باب يعرف عني كلشي.

ومن باب دز قيس اختبرني؟

شنو هالدوامة؟

كتبت لقيس:

أنت ليش لازگ هالكد؟

إجاني الرد بسرعة:

هههه مقبولة منج بس صدقيني أحترمج.

وحيل أتمنى نكون أصدقاء.

يعني اكو بين الرجال والمرة صداقة؟

من تقوم المرة مثلج صاينة نفسها أكيد اكو.

المهم قيس قالي شنو اللي صار وي جراح؟

ما أعرف مروة هو قال ما أريد أورطها وياي ومكاني ساخن.

كلش مكاني خطر وياساعة ميت.

صدقيني چان كلش يائس.

آها وهسه شلون، شنو وضعه؟

لا زين أحاچي وأتطمن عليه دائماً.

الله يوفقه ويحفظه لشبابه.

بس عندي سؤال شنو جيتك لبيتنا صدفة لو متعمد؟

لا بصراحة متعمد لأن الوالدة طرشيها مو حلو ههه.

وگلت نجيب منكم وذقته صدك تحفة.

قالت بس يخلص أوصي بعد.

آها بالعافية لعد.

ترخصت منه ورحت.

ظل قيس يراسل على طول بس مو دوم أجاوبه.

جانت نيتي بس أتطمن على جراح.

لأن أخاف عليه أحبه وما أريد أذل نفسي.

بس گلت أني ليش أكره قيس هالكد؟

خلي أنطي مجال يجوز يطلع العكس.

بس ما خليته يتجاوز حدوده مجرد سلام وأسأله عن جراح وهو يطمني.

صار عرس هشام وما قبلوا يسوون عرس.

بس زفة.

وسوتلهم أمي عزيمة.

ومرته بايعة ثقل علينا وتباوع بنص عين.

ليلى تعلمت خياطة بس تريد مكينة خطية.

أمي گلتلها أدخل سلفة وأشتريلج.

بلش الدوام وصرت مرحلة ثالثة.

بس بلا واهس أبد.

أشتاق لجراح هواي.

رغم أني ما أبين للناس بس بداخلي لا.

داخلي هش ومفتت.

قلبي صاير مثل بيت العنكبوت.

أقل عاصفة توگعه وتنهيه.

قيس مستمر بمراسلته وياي.

مرة دز مسج وسلم سألته:

شخبار جراح تحاچي؟

زين جراح هالايام نحچي قليل.

ضايج يقول من أرسله ما يجاوب بسرعة.

آها.

مروة نياله لجراح هالكد تسألين عنه.

وأني گدامچ حتى ما تگولين شلونك.

لا ليش مو أسولف وياك أسأل عنك؟

أي بس مو مثل سؤالج عن جراح.

شي ما يشبه قيس مالها داعي هالمقارنة.

إييي يا مروة شوكت تحسين بيه.

لچ من أول ما وگعت عيني عليج حبيتچ.

لهسه أتذكر من طارت الورقة وإجيتي يمنا أوووف.

ما أحچيلچ شسويتي بيه.

قيس؟ شنو هالكلام أنت واعي شتحچي؟

إييي واعي خلاص طفح الكيل.

أني أحبج وأتمنى خيالج حسي عاد حسي ما تحسين أنتِ.

لهسه أتذكر تفاصيلج من إجيتي تمشين قبلي بيه عاد خل نتزوج.

قريت كلامه انصدمت؟

ما متوقعة لهالدرجة توصل الأمور. كتبتله:

مع الأسف احترمتك وحاچيتك أتمنى يكون هذا أخير اتصال بينا. مع السلامة.

سديت الفون وأني راسي مصدع من الشي اللي سمعته.

يعني حبيبي اللي حبيته تركني وما فكر بيه.

وصديقه اللي أكرهه خطبني وميت عليه!

ما جاوبت قيس بعد.

وراء يومين إجه أمين قال خطبوا مروة مني وأني انطيتها.

للحكاية بقية.

بقلم شقراء (قمر كانون)

الجزء الثامن

سألته أمي:

منو هذا الخاطبها؟

من معارف عمي، حجية خوش ولد وحالته زينة وبيته لوحده.

أي أخلاقه شلونها، شكد عمره وشنو مخلص؟

مو بس حالته وبيته، إحنا شنسوي ببيته لو إذاها تالي؟

عمره ٣٧ سنة وأخلاقه ذهب، كلش مدح بي عمي.

شنو ولك بكد أبوها يمه، أكبر منها بـ ١٦ سنة؟

مو هواي فرق يمه ترى، والرجال مشتريها.

خل يتزوجن مو أحسن، ما مبتلية بيهن.

ما متعاجزة من لكمتهن أنا ومطالبات من أحد.

هسه أنتو شوفوا وتالي احكموا، أني كتلتلهم تعالوا باجر حتى يشوفها وتشوفه.

يصير خير لعد.

يمكن بلحظات فكرت أتزوج وأخلص من هالدوامة الي أنا بيها.

بس ما أكدر أظلم أحد وياي، جراح بعده بداخلي.

الي سماه جراح ماجذب لأن ما ترك ذكرى بداخلي.

ترك جراحات هواي، وتساؤلات مالها أجوبة.

ما رفضت أشوفه للولد حتى لا يعصب أمين وتصير غصب.

قلت أنا أحاجيه وأكله ما أريد أتزوج يمكن يتفهم.

لبست سترة سودة وجواها بدي زيتوني.

وتنورة سودة وشال مشجر زيتوني.

مكياج ما أخلي أصلاً.

تعطرت ودخلت.

كان كاعد ولد ونسوان ثنتين وأمي وأمين.

ما باوعت ع الولد شفت بس رجليه.

سلمت وكعدت، ظلوا يسولفون وياي أمه والبنية الكاعدة خالته بس مو كبيرة شابة.

أنا دايرة وأحجي، ما باوعت لحظة للولد.

قالوا خل نتركهم يتفاهمون لأن يستحون كدامنا.

قاموا وسدوا الباب.

أنا قاعدة وعيني مو يمه.

قام وكعد قريب عليّ.

باوعت عليه شكله مرتب كلش.

لابس سترة أسود وجواها بدي سبعة أسود.

وجينز ثلجي.

شكله كلش أنيق.

وجهه خمري، ملامحه مرتبة.

كان مسوي سكسوكة ثخينة ومحددة.

عيونه سود كبار ونظراته متمكنة، شعره يلمع مسرحه بالجل.

كعد يمي وبكل ثقة قال:

ليش دايرة وجهك؟ باوعيلي خل نسولف.

درت عليه صارت عيوني بعيونه، شفته ابتسم ووجهه استبشر.

أي من البداية وخليني أشوف هالحسن.

ليش ساكتة أحسج مو وياي كلش؟

لا وياك وأريد تسمعني للنهاية.

ماشي تدللين تفضلي؟

باختصار وبلا ما أطول بالكلام أنا ما أريد زواج وشايلته من راسي.

آها يعني مموافقة عليه لو ع زواج بصورة عامة؟

لا الزواج بصورة عامة، أريد أخلص دراستي وأتوظف يلا.

أي ما عندي مانع نتزوج وكملي وتوظفي.

صراحة أنا من سمعت عنج كلش عجبتيني.

ومن شفتج زاد إعجابي أكثر.

شكرًا من لطفك بس.

ما أريد أتزوج وما أكدر أرفض لأن أهلي ما يتفاهمون.

يعني أفهم منج أنت رافضة بس تخافين تقولين؟

أي صح، وردت أقولك بنفسي لأن ما أريد أغشك.

هاي عشرة عمر وما أريد أبنيها ع أساس كذب.

بالعكس عين العقل من حجيتي.

صراحة من شفتج هواي تمنيت تصير القسمة بس بعد ماكو نصيب.

تشرفت بيج هواي وأتمنالك الأفضل.

ها وليظل بالك رح يكون الرفض من جهتي اطمئني.

صراحة خجلتني.

بالعكس كلش احترمتج لأن وثقتي بيه وصارحتيني.

وهم ما قبلتي بيه ع مضض وعذبتيني تالي.

شفته خابر شوية ودخلوا أمي وأمه وأخته.

سألوا شخباركم تفاهمتوا؟

جاوبهم إن شاء الله خير.

إحنا حاليًا نترخص وتشرفنا بيكم.

يا عزا شو يقول خير هذا شنو نيته؟

لا مو معقولة بعد هو أنطى كلمة.

أجه أمين وترخصوا وطلعوا.

أجوا البنات وأمي يحققون وياي.

طبعًا حجيت لأخواتي الصار وي جراح وكلهم قالوا يولي جذاب هذا سحب نفسه.

ونصحوني أقبل بهذا لأن فل أوبشن.

وفعلًا كلش فل أوبشن رغم فرق السن بس اله وزنه وهيبته.

داومت يوم ثاني وبرجعتي شفت أمين عندنا.

سلمت وفتت للغرفة بدلت طلعت ما موجود.

البنات بالمطبخ وأمي يمهم.

جوعانة خل نصب.

أي جاهز الأكل يلا صيحي لأكرم ولبيت هشام.

صحت لأكرم قال جاي.

رحت أصيح لهشام ومرته، وصلت للباب وأسمعهم يتكافشون.

أريد شي ألبسه ماكو، غسلي ملابس ترى ما يصير هيج، الكنتور فرغ.

أهووووو شسويلك أنا إذا كل ساعة تنزع وتلبس.

بعدين ذبهن ع أخواتك يغسلنها.

كاعدات ع قلبي لا وحدة ولا ثنتين.

هسه فضيها ولا تتحججين خوش.

دقيت الباب قلتلهم غدا قبل لا يجاوبون مشيت.

لا يا دبابة يا دبة إحنا كاعدات ع قلبج أم لقمة.

ظليت أدردم ورحت يم البنات قلتلهم.

أمين كان هنا شبسرعة راح؟

قالت آية:

أجه ع مود موضوعج الولد رافض.

اممم شعجب؟

يقول من شايفج شكلك صغير ما تناسبيني يعني هو شكله كبير وأنت يمه نشاز ويقول شفت هالشي ما يناسبني.

أفف بقلبي ارتاحيت، صح ضجت عليه لأن خوش ولد ومحترم.

بس أنا مو بمود زواج كلش.

طبعًا هاليومين قيس ماكو ماله أثر أبد.

داومت عادي.

نهاية الأسبوع صادف خميس.

أنا والبنات كاعدين بالحديقة نسولف.

سالي و ولاء راحوا للحمام يرتبون مكياجهم.

بقينا أنا وأمل نسولف.

أنا صح ما أظهر للناس بس مكسورة هواي.

وما أريد أبين مكسورة لا أجرح ولا أنجرح.

بقينا نسولف أنا وأمل دق فوني.

شفته قيس يتصل!

فصلته خمس مرات متواصلة يدق.

للحظة حسيت جراح بي شي هو جاي يخابر حتى يكلي.

أحس قلبي وجعني حتى لو افترقنا بس هو حبي الأول.

رجع دق قيس جاوبت بس حابسة أنفاسي.

ألو...

هلا مراوي شلونج؟

الحمد لله تفضل؟

لا سلامتك بس اكو وظيفة عندنا بالشركة ومحتاجين موظفة إذا تقبلين حتى تجين باجر.

لأن رادوا يسوون إعلان قلتلهم ننتظر.

ارتاحيت مو شي يخص جراح.

قلتله:

آها بس أنا دوام الصبح ما أكدر.

لا هي تبلش بـ ٢ للـ ٦ لأن شفت ثاني.

ما أعرف أنطي أهلي خبر وأشوف، بس شنو حتكون وظيفتي؟

مكتب وتستنسخين عقود وأمور حساسة بالشركة يعني مو استنساخ أوراق عادية.

وتسويهن باضبارة وترتبيهم.

آها بسيطة لعد أشوف الأهل وأنطيك خبر.

أي بس باجر أريد الجواب لأن مستعجلين الشغل متوقف وباجر عندك فرصة لأن عطلة.

حتى السبت تبلشين.

أوكي شكرًا.

ختمته وياه وأمل شلعت إيدي من القرص.

حجيتلها قالت:

اشتغلي يفيدك مصرف وونسه أحسن من كعدة البيت.

صدق رجعت وقلت لأمي وبس حجت وي الولد قبلوا بلا ما يسألون منين وعن طريق من، المهم أشيل مصروفي.

دزيت مسج لقيس قال أوكي تجين السبت حتى تبلشين بس تعالي بالـ ٩.

ماشي.

أنا أترخص مع السلامة.

مشى اليوم عادي.

يوم ثاني جمعة الكل بالبيت.

أمي قالت عاجبني أزور صار هواي ما رايحة.

وأم كوثر مسوية حملة.

هي مرة بمنطقتنا تسوي حملات دوم.

جاوبها أكرم:

أي أمي روحي أنت تعبانة بالبيت وبالشغل.

وقام خطية جابلها مية وأجه باسها برأسها وخلاهم بصدر الدشداشة.

هاج خليهم هنا مثل المصريات هههه.

الله يرضى عليك يمه أنت شعندك وتنطيني.

خليهن يفيدنك.

ماكو فايدة أكثر من زيارة أمي، روحي وادعيلنا وعذريني مقصر عليج لو عندي أكثر أنطيج.

هالحجي هشام ومرته كاعدين مسوين روحهم يباوعون للـ T.V.

بعد ما كدروا شافوا نفسهم انجبروا.

هشام قال لمرته:

روحي جيبيلي محفظتي.

أباوعلها قامت كوة جابتها.

فتحها أنطى أمي ٣٠ ألف كلها.

عذريني بس مو وقت راتب.

أمي خلتهم بيده وسدتها قلتله:

خليهم يفيدنك أنت عندك عائلة.

الخير موجود.

صدق أخذهم ورجعهم بالمحفظة.

بعد يومين أمي تروح تزور وتروح ليلى وياها.

صار يوم ثاني وأخذني أكرم ورحنا للشركة.

دورنا عليها وسألنا ع اسم بسرعة لقيناها لأن معروفة.

فتنا بس قلنا لهم من طرف قيس ظلوا محتارين شيسوون.

يرحبون بينا ويقدمون ماي.

طبعًا أكرم سألني منو حصلها الج؟

قلتله صديق أخو أمل وأنا أنطيت خبر لقيس قلتله هيج حقول.

المهم فتنا لغرفة بيها ولد شاب ثلاثيني.

رحب بينا قال تفضلوا لأن المدير مشغول عنده ضيف.

ونائب المدير هو يستقبلكم بس أنطيه خبر.

صدق خابر وقال تفضلي.

قال أكرم ما يحتاج أفوت وياج حنتظر هنا عيب هسه يقولون أخوها فات وياها للمقابلة.

أريدهم يشوفون شخصيتج قوية حتى محد يأذيج.

ابتسمتله ماشي عمري ادعيلي.

فتحلي الولد الباب وفتت.

غرفة المكتب واسعة هواي.

بيها مكتب صاج أسود وطقم قنفات بيج.

وميز كبير جهة وكراسي.

والي متوسط المكتب وواقف بابتسامة عريضة!

قيس.

الجزء التاسع

اجه من ورا المكتب مبتسم:

"يا هلا بالطول الحلو، نورت الشركة. شخبارك عساج بخير؟"

"شكرًا، الحمد لله بخير."

"استريحي، شنو تشربين؟"

"لا ما أحتاج، شكرًا."

"لا شلون؟"

خابر واحد، كله ثنين قهوة، وابتسملي.

"أعرفج تحبيها، وأني هم أحبها، ذوقنا متشابه."

ابتسمت وسكتت، شمدري هذا أحب القهوة بعد؟

رجع يحجي:

"حيكون شغلج وياي، ويا أخويه الأكبر مني هو المدير."

"النائب مالته، لأن شغلي أسبوع بأسبوع، مرات أكثر، يعني ما أتواجد دوم."

"تعرفين بيه ضابط بحري، ونظام الشغل معقد شوي."

"لهذا صرت النائب، وأخوي الأصغر مني يساعدني، لأن هي شركة الوالد."

"آها، يعني هسه شغلي وين يكون؟"

"رح تاخذين الغرفة اللي بداخل المكتب مالت السكرتير."

"هو يصير ابن خالي اسمه وائل."

"ماشي، يعني غرفتي بداخل غرفته؟"

"أي، هاي الغرفة اللي دخلتي منها."

"أوكي."

"وراتبج شكد تردين؟"

"هه، شلون يصير الموظف يتشرط ع المدير بلة؟"

"بشركتنا كلشي يصير ههه."

"مدام كلشي يصير، الراتب انتو حددوه، حالي حال البقية."

"اممم، ٨٠٠ دولار كافي؟"

أني غصيت من كال هيج، ولك شدعوا قابل راح أطبع رسالة إلى الوالي شنو؟

"مثل ما يعجبك، أني جايه أكسب خبرة وما أشرط."

"اتفقنا لعد."

"هسه شنو أبلش من اليوم لو شلون؟"

"أي طبعًا، راح آخذج لغرفتج وأشوفج نماذج حتى من باجر نعتمد عليج."

"لعد خل أنطي أخوي خبر حتى يروح لأن هو جابني."

"حلو لعد، أتعرف عليه هسه وأشوفج غرفتج."

طلعنا وأكرم كاعد برا.

سلم عليه بحرارة وعرّف بنفسه.

كله خليها تبلش اليوم، وسيارة الشغل هي توصلها حتى يندلون البيت وياخذوها باجر.

ترخص أكرم وراح.

دخلنا للمكتب، صغير ومرتب كلش.

ومبين حتى ترتيبه جديد!

يعني بي لمسة مميزة، حتى حيطانه مو مثل مكتب السكرتير.

ميز رصاصي عليه لابتوب يمه طابعة.

ويمه مجموعة أوراق.

وكوب بي أقلام.

مزهرية كزاز ع جهة بيها ورد جوري أبيض وأحمر.

وميز صغير جانبي عليه مكينة قهوة!

كال:

"تفضلي، هذا مكتبج إن شاء الله يعجبج."

"اممم، نازك كلش."

"هسه استريحي ع الكرسي حتى تسوين بروفة، لأن هواي عدنا عقود وأوراق مهمة."

كعدت وفتحت اللابتوب، وي فتحته انتبهت للأقلام اللي يمي، من ضمنهم قلمي؟

أخذته وباوعت لقيس رافعة حاجب.

طلع أيديه من جيوبه ورفعهم بحركة استسلام.

"لا تباعين هيج، هو انطاه الي."

حاجيته باستغراب:

"هو انطاه الك؟"

"مو كال ضاع وجابلي بداله واحد؟"

"أي بس هو ما ضاع، جان عنده ومن افترقتوا ذبه وأخذته أني."

شكد انقهرت من كال هيج، يعني لهالدرجة رخيصة عنده وما مهتم لي.

جاوبته:

"أي شكرًا لأن أخذته، لأن غالي علي كلش."

ابتسم صفح.

"أقدر أعرف ليش غالي؟"

"لأن أمي جابته الي من داومت جامعة."

"ربي يخليها الج."

"يلا خل نبلش لعد."

جابله كرسي وخلاه بصفي.

حسيت تقرب مني كلش، هالشي خلاني أرتبك، رغم أني قوية بس ضليت أرجف، وعطره قوي ترس أنفاسي بس خنكني، رغم كلش حلو.

بس أني ما أحبه ولا أحب كلشي منه.

حس بارتباكي ورجفتي، باوعلي بنظرات منتصرة.

"يلا هسه انتبهيلي شنو أسوي حتى تسوين مثلي."

هزيت راسي، بس كلشي ما أعرف، بالي مشوش وأحس احتريت كلش.

رغم أرجف بس نار تطلع مني.

حاجاني:

"هسه فهمتي شنو تسوين مو؟"

بقلبي أصلاً كلشي ما أدري ولا شفتك شنو سويت.

كتله:

"اممم أي، أي فهمت."

طكها ضحكة حيل.

"لاااا مبين كلش فهمتي من رجفة صوتج ووجهج صار فراولة من الخجل."

"ها لا، الجو حار ترى."

"وين حار يمعودة، كسر والشتا ع الأبواب، بس أنا خجلانة."

"هسه أتركج ترتاحين، ومن تحتاجين أي شي حاجيني."

"وإذا ما موجود أني، وائل برة موصي عليج أني، بس كليله."

"أوكي شكرًا الك."

طلع وسد وراه الباب، أففففف ما صدكت.

حضنت نفسي حيل أريد أوخر الرجفة.

هدأت شوي وكعدت أجرب أطبع، والحمد لله ضبطت.

خلص اليوم وأني بالمكتب، ورجعتني سيارة الشركة.

هواي موظفين وموظفات، ثنين وحدة بت خالته ووحدة جيرانهم، البقية كلهم شباب.

رجعت للبيت صليت وأكلت ونمت، لأن تعبت هواي.

يوم ثاني داومت والخط ذبني للشغل.

لكيت قيس صاعد للدوام مموجود.

سلم علي وائل وكال:

"أني موجود أي شي تحتاجيه."

كعدت شويه ودك المدير رايدني.

رحت دخلت وسلمت، طبعًا أخو نسخة منه.

بس أضخم وأكبر.

استقبلني وأسلوبه كلش حلو.

بس حسيت من تعامله يعرف قيس رايدني.

انطاني أوراق طبعتهم ووديتهم اله.

وخلصت رجعت حتى أهلي قليل أشوفهم.

أمي راحت هي وليلى للزيارة.

آية بالدوام، بقت مرت هشام هي تطبخ.

من اجيت صليت، رحت يم آية تسوي العشا.

"ها لج، شسوين ترى جوعانة."

"كباب عروق، أعرفج تحبيه."

"أي عاشت أيدج، ميتة جوع، أستحي هناك أشتري."

دخل أكرم كال:

"ها آية، عفية استعجلي، ميت جوع ما تغديت ونفسي لعبت، خررب."

"ليش ما متغدي شعجب؟"

"يا مروش شحجيلج ع الغدا اليوم."

"هههه شكو؟"

"لج الدب القطبي طبخ اليوم، بس الأكل حتى البزازين ما تاكله."

"ياا ليش؟"

"ولج اجيت ميت جوع وصبيتلي أكل وكعدت أكل."

"وأفتحلج السمجة وألكى بطنها بيها ما متنظفة."

"يبووووووو كذذذذذب."

"ههههههه خرب يومج، جبتلج علم ميت شنو بس."

"أوف غير عفت الأكل وضليت ألوب."

"معدتي انعفست عفس."

"عابتلك بعد ما أشتهي أكل."

دارت علينا آية:

"انجبوا تاكلون وتخلصوا، لمن واكفة أكلي لجدي."

صدك تعشينا وخلصنا وكفينا البيت أني وآية، وما طولت بسرعة نمت.

مشى الأسبوع والدوام حلو مريح وهدوء، مالي علاقة بأحد.

إلى أن نزل قيس وداوم.

اجالي للمكتب سلم علي وانطاني عقد استنسخته وكال:

"اليوم مسوين وجبة ثواب، بوفيه مفتوح، من أخلص أجي عليج ونروح، لأن بعد نص ساعة نتجمع."

"أوكي."

ورا شويه اجه ورحنا، الكل متجمعين وشي تسولف شي تاكل.

وكفت أخذتلي ماعون أريد أكل وشفت جراح اجه.