تحميل رواية «ازمة ضمير» PDF

ازمة ضمير ... البارت الحادي عشر

«للكاتبه روزايه»

وهي المن صدك تعشك

مفضوحه ملامحها..

اذا بين السلف ضحكت

كلها دكول صاحبها...

...

ثريا..بدايه عام دراسي جديد طلعت ويه قيس واشتريت شكم قطعه ملابس انه البس جبه او عبايه اسلاميه نادرا ما البس التنوره والا فد شي عريض متعوده ع هذا اللبس ...

كملت كل تجهيزاتي ورجعت اجر بالعلاليك شكثرهه بسطت بيهه بوسط غرفتي وكعدت ارتب بيهم واقيسهم كملت من الملابس وطلعت للمطبخ خليت الطاوه ع النار وبديت اسوي عشه ..

ايد ع الطباخ وايد ويه اخوتي كلساع واحد صاح ثريا جيبي فلان شغله من كون اشتعلت ثريا ولكم موتوني..

ايوب.. ثرياا وين بنطروني الاسود؟

.. غاسلتو ع الحبل هسه اجيبو الك اذا مستعجل علي البس غيرو الاكل راح يحترك ..

.. راح البس دشداشه بس لاتخلي برا وياج سويلي لفه مستعجل اريد اطلع بالعجل يولي..

...وين غير تتعشه يله هسه يجي فاروق وهم مايلكاكم لا انت ولا ادهم..

... عندو علم كلتلو معزوم بحنه صديق ادهم ..

ثريا.. لفيتلو لفه واخذهه ياكل بيهه ويمشط بشعرو كدام المغسله ..

كملت العشا ورحت صليت وانتظر فاروق يجي حته نتعشه متحمسه للدوام واداوم مرحله ثانيه هالسنه مادري ليش مقرره اكون صداقه ويه البنات يمكن جنت فاقده الثقه بالنفس بسبب وضعنه بس هسه اختلف..

اسمع صوت فاروق اجه صبيت العشا وكعدنه بس اني ويا وقيس واوس فاروق مدنك ياكل واجت عيني ع شعرو بي خصلات شيب ..

وجعني كلبي علي ليش هيج كبران فاروق وراسو بده يصير ابيض وهو بعدو بعز شبابو ولحد الان يركض ورا الشغل ...

من تحسن حالنه اخوتي رجع الدم بوجهم الا فاروق جاي احسوا تعبان ويكابر ومرات ادحكلو مهموم بس مايعبر عن حزنو ...

اكثر من مره اكعد اصلي صلاة الليل وادحكو كاعد بالحديقه والجكاره ماتوكع من ايدو شنو الهم الشاغلو وليش احسو يفكر باشياء مانعرفهه..

قطعت الهدوء المسيطر وكتلهم دبرولي خط علمود الدوام

فاروق.. ان شاء الله دبرتلج خط رجال جبير وهو يجيج للباب لان بيتهم ورانه..

قيس.. ثريا خلي اخذج لبيت عمي دحكي ع البنات شلونهن خاف ابوهن هم تفرعن عليهن..

... اي والله اني هم مشتاگتلهن باجر العصر اخذني بس مااريد اشوف ابوي ومرتو اكيد الكاهم هناك..

فاروق.. لا قيس لاتاخذ ثريا اني حالف رجلنه ماتعتب هذاك البيت خابر عمك وكلو خلي يجيبهم مايكول شي ..

قيس.. موخاف يدور حجج ويرفض وساعتهه ما اتحملو..

.. لا مايرفض كلو معزوم شي بس لاتبين ع البنات ثريا ما تروح الي يريدهه هو يجيهه ..

...

فلاح.. يله استعجلن منتظرجن برا وراي شغل..

بيان.. فلاح اخذ البنات اني تعبانه مالي خلك هن يروحن يم ثريا اني اظل بالبيت..

.. اصيح بدريه يمج وانتن يله صعدن بالسياره والله ما رايد هاي الروحه بس ما اكدر اكلهم لا مايجن شيخلصنه ...

نيران.. صعدنه بالسياره وبس يتأفاف طول الطريق رجع مثل قبل نفس الغلط والفشار والكتل النه ولماما ...

المصيبه الاكبر بطل امنيه من المدرسه وخلاهه تعقدت بس تبجي ع مدرستهه واحنه مثل الدجاج الاعمى لاطبه ولاطلعه..

اخذت رقم خالو الجبير من دفتر بابا بدون مايدري وقررت انطي لفاروق يخابره يجي ياخذنه ..

وصلنه لبيتهم وطلع ادهم سلم ع بابا وراح كال المغرب ارجعلكم..

تلكتنه ثريا هاي البنيه الابتسامه ماتفارگ وجهه وكلامهه يرد الروح صدك اسم ع مسمى..

محد اكو بس ادهم امنيه بسرعه تتكيف ويه الوضع اتوسلت بي حته يطلعهه وهو يضحك يكلهه يولي شطولج جنج نخله وين اطلعج ...

امنيه.. حباب ادهم احنه والله محبوسين بالبيت طلعونه شويه مو كلتوا اي شي بس كولو..

ادهم.. يابه يول وين اطلعج واني رايح لجماعتي بس يله راح اجيبلج مطمطيات (حبشكلات) وياي ..

نيران..امنيه عيب لاتحرجيهم اكعدي واسكتي..

... اني اتمنى اعيش يمهم ولا ارجع للبيت بس ماما خطيه..

.. كافي امنيه بس يسمع كلامج بابا بعد مايخلينه نجي استري علينه..

ثريا... تعالن خلي نسوي غده شتحبون اسويلكم ..

.. بكيفج لا تكلفين نفسج ..

.. لا يابه انتو اليوم خطار بس اطلبو وانكول حاضر..

رؤى.. خلي انسوي برياني اني اعرف متعلمه من ماما احب الطبخ..

ثريا.. عجل خلي اضحكم تدرون اني منين تعلمت الطبخ؟ كلو من اخواني..

رؤى.. شنو يعرفون يطبخون ولامبين عليهم اصلا يخوفون ..

... لا منيلهم يولي گلبهم طيب حته مايكدرون يأذون بشر بس من جنه زغار اني حيل زغيره ويخافون عليه من الطباخ..

هم يطبخون قيس توب بالتمن يسوي بزل وفد طيب وادهم استاذ بالمقبلات يكعد يتفنن..

واوس يطبخ مرگه الباميا رهيبه ريحتهه توصل لشارع ..

بس عدنه ايوب وفاروق عليهم بس ياكلون مايشيلون الخاشوكه من الكاع وكلشي مايعرفون..

امنيه.. ثريا نيالج ع اخوتج اتمنى عندي مثلهم ..

... حبيبه لاتتمنين هم اخوتج هذولي وتلكيهم وكت الشده بظهرج..

رؤى... ثريا شعجب مايتزوج فاروق حته تصير وحده تساعدج؟؟

... مايرضون وكدامهم العمر طويل ماكتلجن قبولهم طلع قيس طيران وادهم كليه ضباط..

... ماشاء الله ماما سولفتنه ع عمي عماد شلون هيج انطا گلبه يسوي بس هو الي خسر وانتو ربحتو..

.. ماعلينه من هاي السوالف كومي شوفيني شطارتج ام البرياني..

نيران.. اني وامنيه انروح انرتب البيت وانتن عليجن الغده..

.. لا نيران اني ارتبو هسه طلعوا وخبصوا البيت اكعدي ارتاحي..

... لا كملي شغلكم اني وامنيه ماعدنه شي...بدينه نرتب شي قليل اصلا ثريا نظيفه حيل بس شي بسيط ...

اخذني الفضول ادخل الغرفه الي واكفه كدامهه غرفه الولد بابهه مسدود ع النص فتحته ودخلت وامنيه عفتهه بغرفه ثريا تلبس وتنزع بالكعب العالي..

غرفتهم بسيطه حيل جربايه وحده وصاير بيهه انفجار الشرشف مرفوع وشكو قميص وبنطرون ودشداشه باختصار الكنتور كله مشمور عليهه ...

دوشك مفروش بصف الحايط وبعدهه البطانيه مشموره مامرتبه يم المخده باكيت جكاير وهويه ..

دنكت شلتهه جانت هويه ايوب ناسيهه مبين يدخن خليتهم ع المخده وشلت البطانيه صفطتهه يم رجلي..

لفت انتباهي صور جبيره داكيهه ع الحايط تقربت عليهه جانت صوره لجدتي حليمه الله يرحمهه اول مره اشوفهه...

كاعده بالكاع وبيدهه مغزل قديم مال غزل صوف ولافه الفوطه وضاحكه بالصوره ...

تمعنت بيهه مبينه جانت خوش انسانه ودائما اسمع الناس تمدح بيهه بس شلون خلفت وربت هيج ولد مثل بابا وعمي...

اخذني فضولي فتحت اول باب من الكنتور بس فتحته جان ينفجر بوجهي كل الملابس وكعت بالكاع ما ادري صاحب الكنتور شلون هيج ساد الباب...

الملابس خبط الجديد ويه القديم الصيفي ويه الشتوي حته ورق وكتب كلهه سوه بديت ارجع بيهن واني الوم بنفسي شوف فضولي وين وداني..

انتبهت ع الباب من الداخل اكو قصاصه ورقه بيضه صغيره ملزوكه ع الباب بس بدون كتابه اكو اثر لشي مكتوب جواهه بس مامبين...

رفعتهه شويه لحد مابينت الكتابه جان مكتوب جواهه الضابط ادهم عماد السهو وراسم نجمه وحده...

بسرعه رجعتهه ولزكتهه شكد حلو كاتب حلمه الي حققه ومغطي فوكاهه هو ابو الهوسه جربايته وكنتوره...

اخذني الواهس اكتشف كل واحد بيهم صح موحلوه هاي العاده بس تعويد وحاله سيئه ..

فتحت الثاني جان مرتب بشكل موطبيعي اني بنيه مامرتبه مثله كلشي بانتظام كنتور منو هذا؟؟

اكو كتاب ع الرف سحبته اسمه ايجابيات الحياة ومكتوب فوك باول ورقه قيس السهو..

اگلب بصفحات الكتاب لفت انتباهي صوره صغيره لشابه جانت ابيض واسود وبدون حجاب وضاحكه يطلع عمرهه بالعشرين ...

المصيبه موهنا المصيبه مشخبط على وجهه بعلامه اكس كلبت الصوره مكتوب عليهه امي..

حيل استغربت هاي امه وهيج مشخبط عليهه شنو السر معقوله لان عافتهم لعد ليش محتفظ بصورتهه؟

بقيت فاتحه الباب وصافنه كلشي بي مرتب وهادئ العطر الي بداخل كنتوره مميز وشكد مرتب ونظامي...

سديته واني مبتسمه وحولت ع الثاني هذا اضرب من ادهم الي عجبني الجواريب اكثر من الملابس وكل وحده لون وفرشه الشعر مشموره بنصهن..

وتارس باب الكنتور من فوك ليجوه صوره من هو وصغير ويلعب طوبه وع طول الباب كاتب ايوب ايوب...

صدك ضحكت كل واحد بي ميزه داخلهم عكس خارجهم الي يشوفوهم يحكم عليهم عصبين شرانين بس بالحقيقه گلوبهم ماكو مثلهه..

الكنتور الرابع لاوس مرتب مثل التوأم مالته بس بي هواي ملازم وكتب مبين يحب الدراسه...

اما الاخير جان مقفول وهذا اكيد لفاروق بكلشي غامض وعنده اسرار خاصه حته هنا الوحيد مقفول كنتوره ...

رتب الغرفه وطلعت خلصناهه شقه وضحك ويه ثريا صدك تونسنه تمنيت ماما جايه بس بعد وفاه عمر تكابات وماتريد تشوف بشر...

كملت الغده هي ورؤى وكاعدين ننتظر اخوتهه بين ماصلينه سمعنه صوت الباب انفتح وضحك عالي...

جنت واكفه بالمطبخ واني اباوعلهم ادهم وايوب يضحكون واوس نزل بالحديقهه يغسل برجليه بالصونده..

فاروق ماجان موجود وياهم بس قيس جان لابس دشداشه لونهه نيلي غامق ولاف جراويه ع راسه صدك طالع حلو لكيت نفسي ابتسم لا ارادي..

بسرعه ركضت كعدت بالصاله الي يسموهه ديوانيه مدري شجاني مرتبكه حيل واحس الكل يسمع دكات كلبي...

دخل للصاله كال السلام عليكم كلنه ردينه السلام وراح لغرفتهم رفعت راسي اجت عيني بعين ثريا وعبالك تراقبني خجلت حيل ونصيت يمكن مفضوحه واحس الكل يدري بمشاعري اتجاه قيس...

كالت ثريا يله خلي انصب الغده بين مايغسلون حته نكعد انسولف كمنه وياهه للمطبخ الي تفرش السفره والي تشيل المواعين ...

حيل حلوه لمتهم كلهم كعدوا بس فاروق كالو عنده بضاعه يستلمهه مايجي ..

كعدت بصف ثريا وبصفي امنيه الي حاشكه نفسهه بصف ادهم ماادري هاي البنيه ليش لازكتله حيل تحبه دكول اتمنى اصير اخته وهي عبالهه بالكيف ...

اجه قيس كعد كدامي تربطت اديه حته استحي امد ايدي واكل بس ادهم عنده حس فكاهي يضحك ويتشاقه ...

ماعرفت شلون اكل حته اللگمه ماتنبلع وهو ولامهتم شفته اكل طبيعي بس انتبهت علي مايحب الكشمش يعزله ع جهه عكسي اني الي احبه...

رغم هم شبعوا بس ماكاموا هاي اصولهم مايكومون قبل الخطار بس احنه لان ناكل ونسولف تاخرنه ..

كمت من مكاني رحت غسلت وعدلت ضفيرتي اباوع بالمرايه واعدل بحواجبي شفته واكف وراي..

ابتعدت عن المغسله وتقدم هو يغسل واني لازمه الخاولي امسح بايدي يغسل بايده ويحجي وياي ...

كال شلونج نيران شلونهه امج؟

..زينه الحمدلله وماما صار عدهه ضغط بس هسه شويه احسن..

.. ابوج شلونه وياكم هم بعد اذاكم؟؟

.. هو من ورا وفاه عمر جان زين بس هسه صار شكم يوم رجع نفس الشي يضربنه و يغلط ويسب بينه..

.. خلي يسب الغلط يرجع علي..

.. هي ماما الواكعه بيهه من يصير عصبي ادخلنه للغرفه وهي تظل وحدهه واني انقهر عليهه لان ياذيهه..

... ابوج واحد مريض وياريت يانيران انتي واخواتج تجنبو كليا لايغرج مظهرو ترى اتوقعي اي تصرف منو...

سد المي والتفت عليه مد ايده يريد الخاولي واني صافنه بوجهه ابتسم كال انطيني الخاولي...

انطيته اله واني منصيه راسي علكه بالتعلاكه وكال تعالي احجي وياج ...

رحت ويا للمضيف محد اكو بس اني ويا كعدنه بالكاع وبده يسولف...

كال احنه حجينه وياا بس ماكنالو نيران كالت كنالو وحده من عماتي خبرتنه...

فاروق هددو يطلعوا من البيت ويرفع علي دعوه ومايتنازل عنو اذا سمع بي مأذيكم..

وكال من هاي وبس ما امد ايدي عليهم ولا ع امهم طلع حجتوا هو عصبي ووفاه ابنو خلتو يفقد اعصابو بس فاروق جان كلامو وياا حدي لذلك غير معاملتو واحتمال هسه يرادلو تذكير من جديد ..

.. قيس اني جبت رقم خالو حسن حته فاروق يخابره ويكله ع ماما حته يجي يخلصهه من بابا...

.. ليش ابوج يخاف من خالج؟؟

.. اي من جنه ببغداد كولش يخاف حته مرات من يسمع بي معاركهه يجي علي ويهدده لان خالو بالجيش ويخاف منه يكله اخذ بيان هي وبناتهه واشمرك بالسجن..

.. اذا امج هيج عدهه اخ ليش ما تحجي لاخوهه ع سوالف ابوج شلون تحملته كل هاي السنين...

... شلون تحجي لاخوهه هو كل المتزوجين هيج ودكول لازم اتحمل وهم ميكدرون يجون لا هم شيعه وهنا الوضع يخوف ..

.. لامو كل المتزوجين انتي غلطانه المهم ماعلينه سالفه خالج انسيهه اذا اجه واخذكم احنه مانقبل واحتمال ندخل بمشكله احنه بغنى عنهه...

... بس ماما راح تبقه تتاذى من عنده وهو ولاهامه شي تدري حته ماما دكول اخاف يزوجكم لمعارفه واني مابيدي اي شي اسوي لان مستعد حته يكتلهه ...

.. ماكو هيج حجي مايكدر يخطي خطوه انتن مرجعجن علينه مايتصرف بكيفو...

... اخذ الرقم حباب واتصلو ع خالو بس يجي بابا يخاف من عنده والله تنقذون ماما اني اعرفهه ماتكدر تتصرف تخاف علينه دكول كاسرات ظهري..

... انطيني الرقم ويصير خير اذا مالگينه حل عود نتصل بي.. هسه انتن بدون دراسه ..

... اي اني السنه الثانيه معهد وبطلني ورؤى وامنيه هم ومن ماما تحجي يتعارك ويغلط وتخاف منه وتسكت...

صدك انقبلت طيران مبروك ثريا كالت يعني راح تصير طيار...

... الله يبارك بيج بس موطيران مدني طيران حربي ع القوه الجويه..

.. يعني هذولي الي يقصفون عزااا قيس ليش رحت هيج شو ثريا ماكالت..

.. ثريا فاهمه الموضوع غلط عبالهه مدني بس احنه قدمنه ع الحربي اوس مانقبل واني انقبلت ولو يصير انطي مكاني لان هذا جان حلمو من احنه زغار..

.. مايصير تحول؟؟

..وين احول هن هنا 6 اشهر تدريب وبعدين يدزونه للخارج سنتين ...

... الطريق كدامك طويل ان شاء الله تتوفق..

... ان شاء الله قبل ما نثبت اقدامنه لازم نلكالكم حل لاتفكرين هسه روحي يم البنات ...

... ابتسمت وطلعت لثريا كتلهه طلع قيس يريد طيران حربي مو مدني لطمت ع صدرهه وكالت عزا العزاني يريد يقاتل اخوي شو ما ادري...

... لا يكول هي فاهمه غلط مو مدني حربي ويصيرون ضباط عائلتكم كلهه نجمات راح تصير ...

... اااوف شكد اتمنى جدتي عدله وادحكهم جان فرحت بيهم وهي ادحك ادهم المدلل مالتهه يصير ضابط...

امنيه.. ثريا احجيلنه عن قصص قبل وهم جنتي وكيحه ويعاقبج فاروق..

... لا والله جنت حبابه حيل بس خلي احجيلكم سالفه مو تفضحوني عود جنت صغيره وكل الجهال هيج..

جنت بلاول ابتدائي اول يوم اداوم بالمدرسه وبس ابجي ادهم بالثاني عود اكبر من عندي وتعرفون طلاب الاول بس يبجون جانت جدتي تكعد يمي بس تروح اكوم ابجي..

ليش ما لهتني وراحت واني ابجي وابجي وانحصرت اريد اروح للحمام واخاف من المعلمه وسويتهه ع نفسي وتبلل كالوني وصدريتي...

لزكت برحله مالتي ما اكدر اكوم وصرت وحشيه كل التجي يمي امرعدهه وابجي حته المعلمه كالت عوفنهه هسه تجي جدتهه تاخذهه...

صارت الحله واجه ادهم يشحط بيه واني لازكه بالرحله مثل العلج ويكلي كومي راح يسدون باب المدرسه واني اكلو روح ابات هنا..

كومني كوه وشافني مبلله ضربني ع راسي وكال خلي نوصل للبيت ياحيوانه واخلي جدتي حليمه تموتج ...

امشي ورا وهو يصيح جده جده ثريا بالت ع نفسهه والجهال كلهه تسمعه فضحني فضيحه بنص المنطقه ..

وصلنه للبيت واني كلبي مكطوع من البجي لكيت فاروق احتميت بي وادهم بعدو يصيح وصوتو عالي...

لزمو فاروق من جنطتو وضربوا راشدين وجر اذانوا كالو ياحمار المفروض تسترهه مو تفضحهه اموتك اذا سويتهه بعد ..

وخطيه ادهم حصل راشديات من اخوتي كل اليجي يرزلو وبعد من يومهه ادهم ما فضحلو سر صار متحفظ...

كاعدين نضحك وسوالف ثريا ولا ينمل منهه سمعنه الباب تكسر والدك مال واحد عنده هجوم..

طلعنه من غرفه ثريا صار كدامنه اوس يلبس بتشيرته وطلع يشوف منو ..

بس اجت عيني ع ظهر اوس بي اثر جبير مثل القرص الدائري حيل واضح احمر يم كتفه مدري وحمه مدري غير شي...

كلهم الولد طلعوا ع الصوت واحنه نسائل منو هذا وثريا وجهه شاحب بسرعه تغيرت ملامحهه ...

انفتح باب المطبخ واني اشوف ماما حبيبتي امرغله بالتراب والدم لازك ع وجهه وحالتهه حاله...

اتجمعنه عليهه واني لازمه راسهه وهي دكول سدو الباب لاتخلون عمكم ياخذنه احمونه من عنده ابوس اديكم لا ياخذ بناتي..

بس اوس وايوب بالبيت البقيه مادري وينهم نبجي ويه بجي ماما وثريا كوه كومتهه وكعدتهه ع القنفه وجابتلهه مي ..

كالهه اوس ع كيفج ام نيران محد يكدر ياذيكم بس اهدي وسولفينه..

بيان.. بروح حليمه الماشافتهه عيني خلصونه من عنده ياناس راح اموت تعبت بناتي لا ياخذهن مني اموت وراهن ...

اوس.. يابه محد ياخذهن بس ع كيفج .. التفت ع ايوب روح للمحل يول صيح الولد ع السريع ...

طلع ايوب يركض وماما غسلت وكعدت تاخذ النفس كوه وتسولف ويه اوس بس ماخلتنه نسمع شيحجون..

احنه الخوف سيطر علينه وانعاد يوم وفاه عمر كدامنه بس هالمره امنيه ماخايفه ودكل لماما لاتخافين والله فاروق يموته وتحجي بقوه ...

جانت تحتمي بابن عمهه الي ماصار ع معرفته غير سنتين تحتمي بي من بطش ابوهه...

شويه وواجو كلهم فاروق بملابس الشغل سلم وكعد وثريا ركضت جابتله مي ...

وقيس باوعلي بنظره وكانو يطمن عليه وهزلي راسه وغمض عينه بمعنى لاتخافين...

فاروق.. يابه ع كيفكم جبتوني ركض ام نيران اهدي وسولفينه شصاير وع كيفج البنات مفزوعات...

بيان... شحجي فاروق ياناس شحجي شنو الي اريد اكوله وبجت بصوت وادك ع رجليهه..

قيس.. استهدي بالرحمن ام نيران مايصير هيج الغلط من عندح انتي ساكته ما اجيتي وحجيتي نعرف بالي تمرين بي بسةمانكدر ندخل ..

بعده قيس يحجي وجان انشوف اعصار وداخل علينه وبيده سجينه مدري حربه وفاتحهه كدامنه والنار تلهب من عيونه

كلنه فزعنه وماما كمزت من مكانهه واحتمت بفاروق واخواتي لاذن ورا ظهر ثريا...

وهو عيونه تشع بالغضب والتفت عليه وجهه نظره صوبي وكال اليوم موتج ع ايدي ياسا.... نيران ادفنج بمكانج ومحد يخلصج من عندي ...

ما ادري شوصف حالتي الخوف سيطر عليه وكمت ارجف مثل هذيج الليله المشؤؤمه صوت اسناني وهن يطخن بالثاني يمكن الكل سمعه...

مفزوعه وما اكدر اتحرك خطوه حسيت على قيس سحبني من ايدي جنت واكفه بنص الصاله وخلاني ورا ظهره ...

تلقائيا لزمت التشيرت مالته احس محد اليوم يخلصني من ايده وما ادري شنو ذنبي..

مبين بابا ناوي ع شي مو انسان طبيعي عبالك مو بوعيه وليش جاي ابررله هو اصلا هيج واحد خسيس وظالم...

وجه الكلام لولد عمي الي بسببنه دخلو بمشكله هم مالهم ذنب بيهه...

فلاح.. فاروق وخر من كدامي ترى مستعد اكتلكم كلكم وانام بالسجن ماراح تخوفوني ولا بشعره..

فاروق.. نزل البيدك احسنلك واكعد مثل الزلم واحجي موجاي هاد ع نسوان ما استحيت بله مرتك وبناتك زارع الرعب بكلوبهن..

... كتلكم وخرو عن وجهي واتجفوا الشر نيران اليوم موتهه ع ايدي هي وامهه وخرووووو...

قيس.. جرب تمد ايدك واعلمك تربيه حليمه وحق الله اكطعك وصله وصلن بهاي الحربه البيدك..

فاروق.. ام نيران اخذي البنات وثريا وطبن جوه وانت تعال احجي وياك واذا مافاد الحجي عود هذيج الساعه الي غير تصرف وياك...

نيران.. بس تحركنه وجان يهجم عليه واني محتميه بقيس وموجه السجين على قيس ..

حسيت ايد قيس وهي تلزمني ودفعني ورا ظهره ووكف بوجه بابا...

ما ادري شصار فقدت بلحظتهه والخوف مسيطر عليه بس صحت بصوت لااااا واني اشوف الدم طافر بالكاع....

يتببببع.... متابعه ممتعه..

احداث قادمه...

الله عليك بابا لاتزوجني والله اظل خدامه بالبيت لمرتك بس لاتزوجني ابوس ايدك بابا ...

الحدث الثاني..

يولي ثريا كبرتي وكامت تجينه ناس يطلبون ايدج الولد سألت علي وطبيب وخوش ولد واهله ناس معروفين فكري ورجعيلي خبر ...

ازمة ضمير ... البارت الثاني عشر

«للكاتبه روزايه»

بيمن اذكرك من غبت

وخليتني بس التفت

مثل اليطيح بشدة

خليتني مثل ساعه رمل

كل الاوقات اتبده....

ثريا... ما انلحك نفرح كلما ادحك خيط السعاده اخلي ايدي ع گلبي لان وراهه حزن انعيشه بكل تفاصيله..

ما اعرف شنو اوصفلكم هاي اللحظات اخوتي معرضين للخطر وعمي مبين مو بوعيه ومستعد يكتلهم ...

وغيرتهم ماتسمحلهم يدحكو يهد وياذي بناتو ومرتو صاح بيه فاروق ندخل للغرفه هستوني جريت رؤى وامنيه وادحك عمي يهجم ع نيران الواكفه ورا ظهر قيس وترجف...

رافع السجين ويريد يكتلهه ولزمو قيس اتلاوه ويااا بس مو رجال عبالك حايط وبي كل الحيل ...

صراخنه وعياطنه رج البيت رج واني ادحك ع اخوتي خاف يصير بيهم شي...

ويه رفعه السجين بوجه قيس ويتلاوه ويا ادخل فاروق وضرب عمي دفره وكعتو بالكاع ...

من وكع السجين بعدهه بيدو ما انحس غير يلگحهه ع نيران بس ما اجت بيهه وكعت برجل قيس بالضبط جوه ركبته ...

ماادري شصار بيه اتخبلت عفت البنات وركضت ع قيس جان واكف عليهه بس يكابر لزم ايد نيران وكال فوتن جوه وقفلي الباب...

ما انطاني مجال دموعي تجري وگلبي احسو يريد يطلع من صدري من الخوف بس ماكدرت اعوفهم دخلت البنات هن وامهن وطلعت ادحكهم...

ادهم وايوب مثل الملاكمه كل ضربه يضربوهه لفلاح يرجعهه اقوه الهم بي حيل مال عشر ازلام...

صاح بيهم فاروق وعمي وكع بالكاع فاقد ويلهث اريد افتهم هذا انسان لو حيوان ماكو هيج بشر ...

قيس جر الخاولي وشد رجله بيهه تنزف الحمدلله جانت الضربه سطحيه ...

فاروق اخذ عمي يسحل بي للمضيف وقيس راح للمستشفى هو واوس يخيط رجله وادهم وايوب مثل البركان كلساع يردون يهدون بس فاروق مانعهم...

دخلت للغرفه حيل ماعندي ساعات عصيبه ولا تنسي بلحظه حسيت نفسي راح افقدهم جان عقلي الباطن يوسوسلي باشياء موزينه...

البنات متجمعات على امهن ويبجن ما اعرف الومهن لو اكوف بجانبهن هن هم ابتلن مثل نسخه عماد...

هديتهن وطمنتهن بس نيران للاسف حسيتهه شبه تخبلت ماتقبل نلزمهه كاعده بالزاويه وترجف حته امهه تريد تحضنهه تبعدهه وتعيط..

هاي البنيه مصدومه وبيهه مثل الحاله النفسيه او بمرور الايام اذا بقت ع هالعنف احتمال يصير بيهه شي..

احجي واريد واهدي بيهه بس لاول مره ادحك هيج انسان موطبيعي مثل الفاقده عقلهه منبته اضافيرهه برجليهه وتشهك...

عفت امهه تهدي بيهه وطلعت بالي يم اخوتي باب المضيف مفتوح شويه واسمع صوتهم ومكاونهن ويه عمي..

فلاح.. لاتدخلون مرتي وبناتي واني حر بيهن اصلخ اذبح محد يعارضني..

فاروق.. جرب تمد ايدك عليهن وابيتي ودحك شسوي بيك اكبر واحد مايوكف بوجهي عشيرتك واهلك كلهم مايشفعولك...

فلاح.. نيران اكتلهه اكتلهه اني فرخه تضحك عليه هي الباكت الوصيه من عمهه وانطتهه الكم ..

فاروق.. ماتستحي والله زحمه اهينك واعلي صوتي عليك متندم لان اخذت حگي منكم يولو كاعدين بخيري وابيتي هسه اشيلكم والگحكم بالشارع ومايرفلي جفن..

ونيران مالهه دخل بالوصيه ولا اندخلهه بهيج سالفه الوصيه اني اخذتهه بنفسي ادري ابوي ضامهه فوك وااندل كل شبر بالبيت واخذتهه..

... يعني انت عبرت ع بيت ابوك واخذتهه ..

.. اي اني ومو بيت ابوي بيتي هذا وبيت اخوتي نيران بنتك مو عدوتك حته هيج تسوي بيهه ..

ومدامك هيج طلعت وخليتني اعرف نواياك روح من هين ومالك لامره ولابنات واقرب حايط اضرب راسك بي..

.. موبكيفك اني عمك لاتحجي هيج وياي عائلتي ماتدخل بيهه والله اذبحكم..

... خلي النفس راضي وماطفح الكيل بيك ازين شاربي وما اتسمى فاروق اذا خليتك اطول اضفر واحد من البنات وامهن...

وروح حليمه تحلم ادحكهن وهن محتميات ابيتي اعلى مابخيلك اركبو ...

ولاعبالك راح انسالك ضربه قيس راح ارجعهه الك ضعفين واعتبر كلامي تهديد وتروح من هين حدك لباجر البيت يفرغ واي حرف ما اسمعوا منك...

ثريا... عمي تخبل كام من مكانو يريد يتكاون ويه فاروق بس ادهم وايوب سحلو مثل الطلي ولگحوا برا ...

فضحنه بصوتو والجيران طلعت ع عياطو وطلعوا فاروق غسلوا بشكم كلمه وراح...

جنت واكفه بباب المطبخ وعيوني مليانه دموع دحكني فاروق واجه اخذني بحضنو ويمسد ع راسي..

ثريا.. فاروق لاتتورط ويا انه خايفه..

... ثريا دحكتي بناتو ومرتو شكد ضعيفات اذا مانوكفلهن منو راح يحميهن ..

بكل وحده منهن اتخيلج ما اكدر ياثريا نيران حالهه من حالج ولازم اندافعلهه..

ثريا... قيس اتاذى بسببهه لو صاير شي علي ..

... لادكولين هيج قيس يعرف شيسوي وتلكي اصلا فرحان بفزعته الهه لاتتدخلين ولاتحسسيهن بشي عيب ومو من الاصول الي تعلمتيهه...

ثريا.. ما اعرف شكول باس راسي وطلع للمجمع وايوب وادهم بالمضيف كعدو رحت يمهن لكيت نيران ع نفس وضعهه وحته ماترمش بس صافنه ...

تخبلت هاي البنيه صحت ع ادهم بلكي يجي يحاجيهه يطمنهه شو هاي هي دحكتو وتخبلت عبالك يريد يفترسهه وهي تصيح لااا اطلع لاتسوولي شي..

ادهم.. دخيلك ربي عوزني جفله( فزه) هاي بنت عمج يمكن تخبلت الله يعينهه...

ثريا.. ادهم مارحت ورا قيس ليش تاخرو والله گلبي خلص..

ادهم.. يولي ماكو شي هي شطح الضربه جرح بسيط هسه يجي شلون راح تنحل هاي المشاكل...

ثريا... گلبي نار ع اخوتي والاكثر حال بنات عمي ياربي ليش الانسان ظالم موهاي كرايبنه ماكو هيج نماذج بس عماد وفلاح ..

اجه فاروق سوده عليه هومنا حيلو منهد واجه ركض ع المكاون كال ثريا صيحي ام نيران خلي افتهم منهه ...

رحت عليهه لكيتهه كاعده وامنيه بحضنهه بسرعه تخيلي امي هاي ام وهذيج تسمى ام ..

نفس الشي امي ابوي يكتلهه وهاي نفس الحاله بس متحمله علمود بناتهه ومادارت ظهرهه رغم هي بنت بغداد وتكدر من الصبح ترجع لحياتهه ...

كتلهه عمه فاروق يريد يحجي وياج خطيه سندت نفسهه وكامت تمشي ع كيف الله يلعنك يافلاح شمسوي بيهه كعدت كدام فاروق وغطت وجهه بحجابهه وبدت تحجي اني جنت ورا الباب بس اسمعهه ...

فاروق.. ام نيران انتي مرت عمي وواجبي وواجب اخوتي نوكفلج انتي والبنات ...

تعرفين عاداتنه احنه نكدر ندخل ببنات عمنه بس انتي عندج اهل وعمام الي اريدو منج ترسيني ع بر ..

اذا كلتي وراكم احسبي شغله عمي انتهت بس اذا الج نيه ترجعين وتسامحي بهاي تعذرينه مانكدر ندخل لان تعتبر زلمه وحرمتو...

بيان.. فاروق اسمعني زين اني موراعية طويله احس ايامي قربت وكل تحملي لخاطر بناتي اني من يوم العرس اكتشفت عمك واحد مريض نفسي ...

وهاي اسنين جبتهه متحمله لخاطرهن راح دكول ليش ماطلكتي وليش ساكته وليش وليش؟؟

ورا عرسي بشهر واحد طلعت حامل ماكدرت ابد ادير ظهري زعلت ورحت يم اهلي اشهر وهددني ياخذ الطفل واني ماعندي گلب اتخلى عن قطعه من عندي...

عمك جان يجبرني اخلف حته ارتبط بي وما اعوفه يرجع يعتذر بس شنو الفايده هو مريض وماراح يبطل ابد ...

كل هاي السنين حاميه بناتي وما اخليهن يطلعن ع اعمال ابوهن اتحمل العذاب وحدي بالغرفه واكعد من الصبح اسوي روحي طبيعيه رغم اسئلتهن والحاحهن بس شحجي وشكول...

من اجينه لهنا عمك تغير جذريا ماعندي ظهر استند علي استغل ضعفي وتضحيتي وجيتي ويااا يدري باهلي مايجون ولا اني اندل واطلع وحابسني بس للفراش والكتل...

فاروق اني ماريد شي من عدكم بس بناتي امانه بركبتكم لا تخلون ابوهن يذلهن وهن ضعيفات حال ...

عمك يريد يزوج نيران ورؤى واني گلبي مفرفح عليهن والله بعدهن جهال..

هاي نيران بس طول والله تسالني اسئله اخجل اجاوبهه وماتحس لان داخلهه بريء حرمهن من كلشي حسره عليهن اللبسه صار سنتين من اجينه لهنا ما اشترالهن قطعه وحده ...

جنت شايله راسي بزود اخوي بس هسه مادري بيهم بيا حال كالولي اتحملي روحتج ويا وراح اتعبين بس كلت لخاطر بناتي كلش يهون...

اترجاكم مثل ماحميتو ثريا من ابوكم وخليتوهه معززه مكرمه احمو بناتي ...

فاروق... ارتاحي هسه ومايصير خاطرج الا طيب لازم نخلي حل لهذا الوضع ...

ثريا... احسهه مشكله جبيره ومالهه حل من باب اخوتي يريدون يساعدوهن والباب الثاني هو ابوهن والو حق ياخذهن بالقوه من عدنه ما ادري شراح يحلهه ...

اجه قيس واوس ومخيط الجرح 3 خياطات بس اخوي واعرفه عيونو ادور وتحوم ع نيران طمنتو كتلو البنات زينات...

بس اول مره اجذب وما احجي الصدك نيران موطبيعيه رغم امهه يمهه بس البنيه احس بيهه حاله نفسيه...

نيران... لحظات بشعه اتشاهدت واني محتميه بظهر قيس بابا يريد يذبحني اكيد عرف بسالفه الوصيه ما ادري شصار بس شفت دم ينزل من رجل قيس...

اكو شي بداخلي يوسوسلي يكلي ابوج راح يذبحج مثل الافلام سويت فلم رعب براسي وتخيلته بكل تفاصيله...

ماما واخواتي وثريا يحجن ويايه بس جنت فاصله الم قوي يعصر گلبي ويضيق النفس عليه اريد اضرب راسي بالحايط حته اتخلص من الي احس بي...

صوت صرخات ماما واخواتي وتوسلاتي وهذيج الليله الي شفت بيهه ماما ووحشيه بابا خلتني افقد اعصابي ما اقبل اي واحد يتقرب لو يحاجيني ...

ماما تعبت من عندي وصاحت بيه كالت نيران ماكو شي ابوج راح وهاي انتن بامان بس ماتدري اني الشفته كلش كافي يخليني انسانه ضعيفه خوافه ...

كاعده بالزاويه وما اريد اتحرك من مكاني رغم كلهه رجعت طبيعيه الا اني احس اطرافي متجمده وما تساعدني اوكف عليهن...

وحدي بالغرفه وكل لحظه يتخيلي بابا وبيده السجينه ماما دكول علي مريض نفسي يعني يكتلنه بدم بارد ومايهتم ...

انفتح الباب واشوف قيس كدامي دخل وسد الباب ورا يتقرب عليه واني اضرب بظهري بالحايط اريد الحايط ينفتح ويبلعني ياربي تعبت من احساس الخوف وعدم الثقه بالنفس كلهم هيج هسه قيس يعاقبني لان تاذى بسببي...

ضميت راسي بين رجليه ما اريد اشوفه ولا اشوف انسان عصبي كدامي حسيت علي قريب كلش بس حاجاني بهدوء ...

قيس... نيران لاتخافين ارفعي راسج محد يأذيج..

نيران... رفعت راسي واشوفه كاعد ركبه ونص وحيل قريب من عندي ...

يباوع بوجهي ويتفحص بوجهي بلع ريگه وكال يول ياب عليمن خايفه مايكدر يسويلج شي واحنه موجودين...

كومي غسلي وارتاحي حته اخواتج طبيعيات ليش هيج خوافه واني اكول سباعيه..

نيران... قيس بابا مجرم لا يكتلكم بسببنه هو نفسه يعذب بماما سهله عنده يسوي بينه مثلهه ماما كالت يريد يزوجنه ما اريد اتزوج ويسوون بينه مثل ماما ...

قيس... خله اصبعه على شفايفي وكال اشششش لا تذكرين هذا الموضوع ابد محد يزوجج ومحد يكدر يتقربلج ...

نيران... عيونه سلبت كل الكلام الي اريد احجي واعبر عنه لكيت نفسي هادئه وكل الاعصار والبراكين الي بداخلي تلاشت مجرد ما باوعت بعيونه ...

لحظات وهو مخلي اصبعه ع شفايفي ومركز بعيني انتبه ع وضعه وخر اصبعه وكام كال كومي يله انطيتج وعد محد يمد ايده عليج لو مو ابوج يله كومي نيران ...

كمت بسرعه ابتسم بوجهي احس كل تعبي زال وكلشي يتغير حالته من اشوف قيس وحنيته سالته على جرحه لان يمشي طبيعي...

قيس.. مابيه شي يومين ويطيب..

... بسببي تأذيت ..

... كلشي لعيونج يهون بس رجعي نيران القويه ما احب ادحكج ضعيفه وماعندج ثقه بنفسج..

يله طلعي يم البنات واذا اجيت ولكيتج نفس حالتج من صدك ازعل عليج..

اندار عليه بابتسامه وطلع رحت غسلت وكعدت يم ماما الهدوء سيد الموقف وما الي واهس اسال شصار وشراح يصير ظليت ساكته وانتظر المصير المجهول...

ثريا ورؤى سون عشه اني ساعدتهن بشي قليل فرشنه السفره وكلهه كاعده اللمه حلوه بس تبقه الغصه بالگلب ماتنبلع...

ماما كعدت بدون نفس بس لان فشله واني كذلك احس نفسي شبعانه من القهر والشفته اليوم ....

ولد عمي كلهم كاعدين اكلو شي قليل وكامو فاروق كال اني طالع بشغله ...

ادهم وايوب كالو راح نروح نلعب طوبه قريبين واوس كال يم صديقي وقيس ظل يمنه لان وحدنه ..

كاعدين ع التلفزيون وقيس بغرفتهم ماما رادت علاجهه رحت اريد اجيبه لان جنطتهه بغرفتهم نسيت ادك الباب نسيته هو هنا..

فتحت الباب ودخلت بسرعه فزيت ودرت وجهي ما اعرف شسوي اطلع لو اطب ضربت الكنتور...

جان لابس بس شورت وواكف يريد يلبس لان ملابسه بايده ارتبكت حيل ردت اطلع صاح اوكفي يولي...

وكفت واني احس الحراره تسري بكل جسمي فززني مره ثانيه وهو يكول يول نيران التفتي شبيج حسستيني بعبع..

انداريت واني مدنكه راسي والخجل مسيطر عليه احس الاجواء الداير مدايري كلهه توحي بالخجل ما اعرف شنو اسوي ...

صوته يخترق مسامعي وكانو اسمع نغم موسيقي اقترب عليه وهو يعدل بتشيرته كال ليش من ادحكيني ينخطف لونج؟؟

كلام حشر بحلكي ولا اكدر انطق كلمه كتله لا بس اجيت اخذ علاج ماما اسفه مادكيت الباب...

.. اريد احجي وياج شكم كلمه؟؟ نيران مالي حق اتدخل بحياتج بس اعتبريهه نصيحه ...

انتي موصغيره جبيره وحاليا عايشه بوسط 5 شباب يحلون عليج ومايصير هذا عمرج وانتي بدون حجاب...

... بس اني مامحجبه وبابا هم مايحاسبنه لان مانطلع بس الكم..

... اني ماجاي احاسبج انتي حره بحياتج بس هيج شغلات حرام لازم تنتبهين عليهه امج والا ابوج محد يحمل ذنبج غيرج انتي...

مايصير يابنت عمي انتي مو وحدج 5 شباب بالبيت وحرام وشغله ثانيه هذا الحجي المفروض حته اخواتج يسمعو ...

... اني مامتعوده لاتضغط علينه من نحس نفسنه نكدر عود نتحجب ..

.. مسح وجهه بكف ايده وتنهد كال استغفر الله.. يول ياب اكلج حرام دكليلي من تكدرين نيران ما اقبل تفترين بطولج وضفيرتج كدام اخوتي....

... انت شعليك اني حره بنفسي ..

... تقرب مني حيل وعيونه تغيرت ولا هذا قيس الهادئ رفع اصبعه كدام وجهي كال اياج دكولين شعليك ولا اطولين السانج بعد ...

... ماكدرت احجي اخذت العلاج وطلعت شيحجي هذا صح كلامه بس احنه متعودين موبكيفهم يجبرونه وهو بالبيت حته ماطالعين بشارع...

كاعده يم ماما وعيني ع باب الغرفه شوكت يطلع بس عرف يغثني بهيج كلام وفوكاهه يهددني ...

صاحتنه ماما اني وخواتي وكالت لازم نلبس حجاب كدام الولد وظلت تحجي نفس كلام قيس الي عرفته ثريا منبهتهه ماكدرت اناقش واعاند لان ماما مريضه وتنفعل كلنالهه حاضر. ...

فرشتنه ثريا بغرفتهه وما طلعنه بعد ماما كلش شديده ويانه ودكول مانريد نقيدهم وهم شباب...

ثاني يوم كعدنه اعظامي مكسره واحس نفسي عبالك واكعه من السطح وحرارتي مرتفعه كالعاده ماما انطتني علاج وكمت من فراشي...

محد بالبيت ثريا رايحه للدوام وماما بالمطبخ ورؤى وامنيه يمهه عزلنه البيت وغرفه الولد هي من الاساس معزله يمكن ثريا مرتبتهه وهم طالعين للشغل...

بعدهم ماداوموا لان المراحل الاولى تتاخر هذا الحجي جان سنه 2006 اني هستوني داخله بعمر 18 سنه ولحد الان مابلغت مثل البنات...

ماما جانت شكد تريد تراجع بيه بس بابا مايقبل نطلع رؤى اصغر من عندي واجتهه صار شكم سنه بس اني مادري ليش هيج حالتي..

مع العلم كل شهر انام بالفراش من الالم وما اخلي علاج ما اخذه بس ما اعرف الاسباب الرئيسيه ...

ماما هوايه حاولت وحته قلقت دكول انتي كبرتي شلون هيج واخواتج اصغر منج وصارن كبار وانتي كلشي ماكو ...

هذا الحجي يستمر عندي الالم يومين ويروح وانسه السالفه ولشهر الثاني ينعاد نفس المنوال وماكو نتيجه...

بابا انقطع نهائيا اسمع فاروق يكول لماما اطمئني مايكدر يوصل هين السجن اقربلو من بيتنه الظاهر مخوفي وهو هسه كاعد يم بيت عمي عماد...

مرت على جيتنه 3 ايام وفعلا تحجبنه منا كلام ماما ومنا قيس بس طول هاي الايام ماكعدنه وياهم لومعزومين لو بالشغل بس ثريا ويانه...

بليل كاعدين بس ايوب بالبيت البقيه طالعين تخربطت حيل اتقيأ والوج من بطني الم فضيع حاولت ويايه ماما وانطتني علاح مافاد...

السياره جانت عند قيس ركض ايوب للمحل صاحه واجه جنت ابجي واتوسل بماما تنطيني علاج بس يروح الالم واسمعهه بس تستغفر ودكول ياربي شلون مصيبه هاي. .

اجه قيس يسال شبيهه نيران كالوله متخربطه بطنهه ونفسهه تلعب..

... خلي ناخذهه للمستشفى حته وجهه اصفر...

ع السريع بدلت وامشي اجر بنفسي ماما ويايه صعدنه بالسياره واحس الطريق صار طويل بس اريد اوصل وينطوني مهدء...

بس وصلنه ماما حجت للدكتوره واخذوني سونار ومدري شنو وضربوني ابره مهدئه للالم جان قيس واكف وماما كاعده ع الكرسي واجتي الدكتوره كالت..

...ماما بنتج حسب كلامج لحد الان مابلغت وهيج عمر متاخر يخوف شلون ساكتهه عنهه يأثر ع صحتهه موصغيره هي شلون هيج هامله الموضوع...

... والله دكتوره ابوهه مايقبل اطلعهه وهي تاخرت بالبلوغ وماعرف شسوي..

... ع كلا هاي ورقه تاخذوهه لعياده خاصه لدكتوره ناديه تشرف ع حالتهه طبعا جاي تنزل عندهه كل شهر بس احتمال تجمع بكيس ومانتامل يطلع صح كلامي لان تحتاج الى تدخل جراحي وهي بعدهه بنت مامتزوجه راح ياثر عليهه ...

... فدوه دكتوره لاتخوفيني بعدهه بنيه شحجي شكول ..

... يا امي هذا نتيجه الاهمال ان شاء الله تتعالج بس استعجلو...

نيران ... كلام الدكتوره خلاني فتت بهدومي احس الحراره تطلع من اذاني وكدام قيس يافشله الفشله بس مافهمت قصدهه من دكول بعدهه بنيه قابل ولد اني...

امشي واسمع ماما تحجي ويه قيس وهو يكلهه سهله باجر ناخذهه لدكتوره لاتخافين ...

ولا رفعت راسي ابد ولا اريد اشوف وجهه من الخجل ماما حرجتني اكثر وهي تسولف ويا ونست اني كبرت...

سولفنه لثريا كلامهه طمنه وكالت سهله ومدري ايش بس ماما كلساع وكالت شلون موبعدهه بنيه هاي شبيهه ماما منو كالهه اني رجال وعندي شوارب...

ثاني يوم اخذتني للطبيبه وقيس هو اخذنه بين تحاليل وسونار جان كلام الدكتوره عباره عن صدمه...

كالت البنيه بالغه من زمان وكل شهر تنزل عليهه وتجمع بكيس دموي لذلك صاير عدهه كيس حجمه كذا وجبير وضاغط ع المثانه واذا انفجر بطنهه يكتلهه لازم احنه نحاول نسحبه حته لاياثر ع رحمهه...

... دكتوره فدوه لعمرج يعني عمليه جراحيه لوشلون؟

.. لا امي عن طريق ناظور داخلي لاتخافين ماراح يتأثر الغشاء...

... جنت مثل الاطرش بالزفه كلشي مافهمت ياغشاء كل ضني غشاء مال معده لو مال البطن اااخ ياجيل الطيبين...

طلعت ماما واشترينه العلاج وتبجي وخبصت الجو وتسولف لقيس وهو ازيد من ماما شكله انكلب وملامحه تغيرت...

راحت ماما تشوف العلاج لدكتوره واني النادره عود ننتظرهه بالسياره كتله قيس شتقصد الدكتوره ؟؟

نسيت حالتي شنو شفته ارتبك كال ما ادري وسكت...

... قيس دكول الغشا مايتأثر يعني اهم شي ماكو خياطات ويصير بيه شي اني جنت اقصد ع بطني عود تخرب ...

بس هو ارتبك حيل وهم كال ما ادري ...

همزين اجتي ماما ونقذتني هستوني اريد اسأله الغشا وين صاير؟؟

بس سالته لماما وكالت ماعليج شغله بسيطه لحدالان من اتذكر الثول الي عندي اضحك ...

رجعت للبيت وحجيت لثريا شو هاي الثانيه هم تغير لونهه وكالت عزاا ولج موانتي بنيه ...

صحت بيهه كتلهه قابل رجال طبعا بنيه شبيك خايفين اصلا اني ماخايفه كالت الدكتوره مجرد شي بسيط مايتاثر الغشاء وهو اهم شي الغشاء...

جنت احجي وفاروق هستوه دخل وثريا تخزر بيه بس شكله لا يبتسم ولا ينطي رد فعل سلم ودخل ...

اني هم قررت اسكت لان ماحصلت الاجابه الكافيه وكلت بعدين اسال ماما بس المهم يروح الالم....

ثاني يوم كاعده اشوف تلفزيون واسمع ماما تصيح نيران طبو جوه كمت من مكاني واشوف بابا واكف بنص المطبخ وماما تدفع بي من صدره...

يتببببع..... احبكم

في البارت القادم..

فاروق .. يول ارحمني كافي حسو بيه تعبت النار البصدري ماكاعد تخمد باليوم احترك واموت الف موته ارحمني قيس وسد حلكك يول...

ثريا... اسمع كلام فاروق وحرگه كلبو وودموعي تجري حسيت الهوه شح عليه فاروق ياسندنه شحملت وشراح تحمل بعد....

ازمة ضمير ... البارت الثالث عشر

«للكاتبه روزايه»

مابيه خلك الشوك مابيه

أحب واتلهف واشتاك مابيه

ولا بيه اصافح من جديد جفوف باعت وشترت بيه

ولا بيه ارد ردود اخاوي وجوه مابلل كصصها المستحه شويه

....

نيران... بس شفت بابا فزيت بسرعه طبينه للغرفه اني وااخواتي بعدما ماما اشرت انروح مانسمع شي هدوء ولا عدنه القدره الي نفتح الباب ونشوف شيحجي...

بالي يم ماما ورؤى كلساع وكالت خاف ياخذهه غصب وجنت خايفه كلش مرت ربع ساعه وسمعنه صوت الباب معناتهه طلع بسرعه ركضنه ع ماما ..

جانت واكفه بالمطبخ نطمن عليهه ونباوعلهه مستغريين خاف ضربهه لو اذاهه كالت مابيه شي ماما روحن كملن شغلجن...

رؤى.. ماما شيريد بابا ..

... يريد نرجع للبيت بس ماننخدع بكلامه مره ثانيه هيج مرتاحين علما نشوف حل يله لاتهتمن ...

نيران... اخذت نفس وزفرته الحمدلله شكد حلو الواحد عنده سند ومعتمد علي حته ماما مطمئنه من هاي الناحيه لان تدري بي يخاف من ولد عمي...

صار الغده ومحد اجه بس ادهم وايوب البقيه بالشغل وثريا بالدوام اني عليه المواعين غسلتهم ونمت حسيت ع ثريا وهي تفتح الكنتور وتعلك ملابسهه..

كعدت كتلهه اصبلج غده؟؟ لا حبيبه اكلت بالجامعه شلونكم شلون گضيتو اليوم ...

... اجه بابا وكال لماما ارجعوا بس ماطلعنه وماما طردته وراح والولد بالشغل بس ايوب وادهم اجو...

... اااخ رجليه مورمه من الكعب العالي ماالبسه يطلع لبسي مبهذل البسه ابدي امشي حافيه احتاريت...

... لازم تتأنقين انتي صيدلانيه بعد ويجوز تنخطبين وتتزوجين ...

.. اسكتي نيران اكو واحد وياي بالجامعه مرحله خامسه صيدله وين ما اروح الگا كدامي حته كمت ما اطلع من القاعه ...

تريدين الصدك اخاف من اخوتي والله فاروق مايسامحني اذا زليت بشعره واعوذ بالله من هاي الكلمه بس الناس تريد حجايه تلزك بيهه ويكولون صاحبهه ...

... اذا خطبج هو والا غيره توافقين؟؟

...مستحيل اقبل واخوتي بنص الطريق شلون گلبي ينطيني اعوفهم واكون عائله وهم انكسر ظهرهم من العماله بسبيل توصل ثريا للجامعه...

تدرين مرات اكول ما اتزوج اذا ما ازفهم واحد واحد بيدي وافرح بيهم اصلا ماجاي اتخيل اعوفهم واعيش بعيده عنهم ...

بعدهم ببدايه مشوارهم والشهر الجاي يداومون مراحل اولى وفرحانه اكثر من قبولي بالكلية ...

... بس قابل تظلين بدون زواج لازم يجي يوم وتتزوجين..

... عوفج من هالحجي كومي نطلع بالحديقه انشم هوه ما اختنكتي من الغرفه...

...طلعنه للحديقه زاهيه بوردهه واشجارهه معتنين بيهه حيل والحديقه نصيب اوس هو الي مهتم بيهه ويزرع حسب المواسم...

جانت الساعه ب٤ ونص والجو نهايه شهر 10 كاعدين اني وياهه وتحجيلي عن الكليه شفت الباب انفتح اني ماجنت لابسه حجاب...

قيس وحده وشايل علاليك مسواك اني بسرعه كمزت للبيت البس حجاب  وهو عفته ويه ثريا يحجي لبست حجابي وطلعت لكيته بالمطبخ يشرب مي...

سلمت علي كال شلونج نيران؟؟ زينه اني اليوم اجه بابا للبيت..

.. اي ادري من طلع من يمكم اجانه للمجمع ويعتذر ويريد يرجعكم بس فاروق ما انطا مجال وراح ..

... اني اخاف من ماما خاف تلين وترجع وهم ياخذ شكم يوم ويرجع نفس طبعه...

... لا ماترجع وحته اذا رجعت ماعدهه بيت تكعد بي فاروق اخذ البيت واصلا اجرو لناس من المنطقه وابوج كاعد وي عماد ...

روحي كلي لثريا اني راح انام لاتكعدوني حته للعشا بس اذا اجه فاروق ع العشا خلي تكعدني...

راح ينام واني رجعت يم ثريا لكيت امنيه ورؤى يمهه ويضحكن  جان الجو مغيم وبي بروده طبينه جوه نسوي عشا رادت ماما تسوي بس ثريا ماقبلت كالتلهه علينه احنه والبنات. ..

كملنه وننتظرهم يجون كالعاده كلهم اجو وفاروق ماكو مادري ليش جياته للبيت قليله حيل ...

تعشينه وطلعوا الولد لحد ال9 اجه فاروق ماتعشه كال اتعشيت برا بس ثريا دكول اعرفو بي شي صار مده ...

بيومهه نمنه من وقت وعفت ثريا تقره ماكو شي نتلهى بي وماما نامت وتلفزيون فارغ ...

ثريا... كاعده اقره جانت الساعه ب12 اخوتي بغرفتهم طلعت من الغرفه اريد اغسل حجابي باجر دوام دحكت باب المطبخ مفتوح...

رجلين اخذتني اريد اسدو خاف ناسي وكفني صوت فاروق وهو عصبي وصوتو يرن بالحديقه دنيا لليل وهدوء الصوت مسموع ...

فاروق .. يول ارحمني كافي حسو بيه تعبت النار البصدري ماكاعد تخمد باليوم احترك واموت الف موته ارحمني قيس وسد حلكك يول...

... ما اسكت كافي فاروق انت اكبر مني واعتبرك ابوي انت طول عمرك ساندنه وذابين حملنه عليك ماراح اسكت هالمره...

... قيس وحق الله وروح حليمه اذا نطقت حرف واحد لادكول عندي اخ اسمو فاروق عوفني حامل هذا السر بگلبي اياك ياقيس تفضحو لاخوانك وخاصه ثريا...

... ما افضحو بس لازم ناخذ حگنه يول اسمعني مرجعهه علينه يول احنه نتسمى باسمهه ...

... يول انت براسك شي حجاره شحجي انه مثل بلاع الموس شكول امي زانيه ااااسكت لاتخليني اجرم بيهه وادخل سجن من وراهه. 

... عجل نسكت عنهه مثل ماسكتنه بصغرنه بس هسه اختلفت جنه جهال هالحزه سمعتنه تنداس وعدنه ثريا فكر بيهه فاروق لازم انروح لخوالي ونحجي وي واحد منهم...

... شتروح يول تروح بمضيفهم هذوله الباعونه واحنه جهال تروح دكلهم اختكم الي هي امنه زانيه من صغرنه لاتضغط عليه اكثر كل يوم اكبر ميه سنه واني اتذكر هذيج الساعه واللحظه الي ما اعرف شوكت انتقم بيهه...

قيس عوفني وحدي لاتخليني اتذكر وارجع ابني حقد من جديد بسببهه انه اكره النوم واكره جنس حواء على ذمه رجلهه وخانت واحنه زلم بطولهه...

انت مستوعب كلامي كاعد احجي على مره يكولون امي صار 21 سنه امك مامدحك وجهه بس سمعتهه كامت يلوحنه طشار منهه اني خايف لابيوم اطلع من طوري واكتلهه ويروح كلشي بنيته...

... الحل شنو والله لازم نعلم واحد من خوالنه مالهم علم بالي تسوي طلعت حجتهه بابوي يضربهه وهذا هسه مات ليش ادور ورا وهي موصغيره..

فاروق... لا اله الا الله كامت ترجع عندي مشاهد هذيج الليله واني بعمر 8 سنوات ...

اني بطبعي نومي خفيف مجرد ما واحد يمشي يم راسي اجفل بسرعه جنت نايم وحسيت ع واحد فات من يم راسي كعدت ادحك اخوتي كلهم نايمين ...

كمت من مكاني امشي لمحت خيال طلع من باب المطبخ اتبعته واني عبالي جنت بحلم مو بوعي الكامل افتريت ورا البيت واسمع صوت ضحكات امي..

تحجي ويه واحد كل ضني هذا ابوي ردت اصيح عليهم بس من حجه الزلمه عرفتو مو ابوي جان يكلهه اطلكي واني اتزوجج وعوفي جهالج علي...

... شلون اطلك مايقبل يطلكني وعندي ٥ ولد وين اوديهم وفاروق جبير ..

.. لگحيهم ع حليمه ونتزوج كافي اخذج من عندي طول هاي السنين انه اطلك مرتي ونعيش اني وياج هم زلم يعيشون ...

جنت اسد اذاني حته لا اسمع دلعهه وصوت ضحكتهه وهي دكلو انتظر اسوي مشكله وهالمره ما ارجع واذب جهالو على كلبو...

دحكت عليهم اتمنيت ميت ولا راح اظل اتخيل هذيج اللقطه امي باحظان زلمه غير ابوي ...

ولا انسه ولاراح انسه هاي الكلمات بلعتهن طول هاي السنوات ماعرفت بلحظتهه شتصرف اكل لابوي لو اكلهه عرفت بسالفتج...

رحت حجيت لجدتي حليمه وكالت اني احجي ويه ابوك بس خلال اسبوع سوت مكاونه واطلكت ومثل مالخسيس كالهه هم طلك مرتو وتزوجهه...

عائلتين صرنه ضحيه احنه 6 وهذيج العائله 3 بنات و2 ولد عاشو محرومين من الاب كل هذا وماتابت وتزوجت وكلت لازم انسه وما اعلم اخوتي ..

بس طلعت من كاعد احجي ويه جدتي حليمه قيس صغير وسامعنه وظلت ابالو راحت وماتندمت بالعكس جنت فرحان بداخلي ابوي خلص منهه ....

مرت كل هاي السنين وما مدحك وجهه قبل مده سمعت حجايه من غريب مايعرفهه هاي امي كال رجلهه مات وهسه ملتفه ع جارهه تريدو يتزوجهه والرجال خرب عائلتو وراح يطلك مرتو...

جان يحجي بموضوع عام وذكرهه حسيت الهوه شح عليه جان قيس كاعد احمد الله بس اني ويا والبقيه ماموجودين سمعتهه التعبانه راح تظل علامه تلاحگنه حاير شسوي ...

احس گلبي حامل اكثر من طاقتو شنو الحل مرجعهه علينه ماريد تتاثر سمعتنه ولا اريد اخوتي يسمعون بامهم هيج ...

مجرد مااقارن بينهه وبين مرت عمي فلاح اكرهه اكثر واكثر ماعدنه ام عدنه حيوانه تركض ورا شهوتهه ...

كل هذا الضيم ياقيس وتريدني اروح لاخوتهه العارات وانزل راسي واكلهم امي تلطخ بسمعتنه...

قيس... ما اعرف شكلك بس انت هدي حالك وخلي الموضوع يبقه مضموم حته مايسمعون اخوتنه...

ثريا... فاروق كعد بالكاع وقيس بصفه واني دموعي ترسن خدودي دخيلك يا ربي اني امي زانيه وخانت ابوي وعافتنه...

گلبي انعصر من الالم كلام فاروق مثل الواكف ع جبل وبلحظه انهار هذا الجبل الشامخ طول هاي السنين محافظ علينه وماحسسنه بالفقدان بس هو يعاني وحدو ...

بجيت وتمنيت اكضب امي واملخهه باسنوني شلون هيج سوت شلون خانت ابوي وطلعت حجتهه يشك بيهه يعني هو جان ع حق بشكه يدري بيهه موراحه...

اسمع كلام فاروق وحرگه كلبو وودموعي تجري حسيت الهوه شح عليه فاروق ياسندنه شحملت وشراح تحمل بعد....

طول عمرك متعوب وراح تظل يا اخوي تعاني اني اختك الله انطاني هاي القدره واكدر اميزكم واحد واحد من عيونكم ...

انت الوحيد يافاروق ماراح ادحك طعم الراحه وراح اتعيش ايام اتعس بالف مره من هاي الايام...

فاروق يا ابوي اتمنى اكدر انطيك كل الراحه وكل يوم حلو عسته تحت جناحك وظلك...

فاروق يافخري وعزي ودلالي طول عمري راسي مرفوع بيك وانت الي خليت الناس تهابنه وتحترمنه واخوتك يمشون بفخر لان انت بظهرهم...

مسحت دموعي ورحت غسلت حجابي ورجعت لفراشي ماغمضت عيني ولا لحظه لحد ما اذن الفجر كمت اتوضيت لكيت فاروق يصلي ...

واكفه ادحكلوا وهو يسلم كام يلم بالسجاده وحاجاني هاثريتي شوكاعده من الفجر ...

شبعت نوم وكعدت هم يله اسويلك ريوك حته تطلع واني هم اروح لدوامي بس ما ادري بقيس يروح وياك...

... اي كعدي قيس واوس اليوم عدنه مسواك ولازم نجيبو محتاجه شي بويه..

... الله يخليك النه ويحفظك مادام انت موجود مانحتاج شي ..

... اذا احتاجيتي شي كليلي لو لاخوتج لاتسكتين وهم اسالي بنات عمج خاف محتاجات شي ..

... فاروق بس نيران تحتاج عمليه حجزولهه عند طبيب زين..

... اليوم قيس حجزلهه وياخذهه...

... سويت ريوك بين ماكعد قيس اتريكت وياهم وطلعوا واني بدلت وانتظر الخط بس شنو الشعور الي بداخلي دمار...

مجرد ما اتذكر كلامهم يشح الهوه عليه وارجع استغفر ربي وادعي الله يحفظلي اخوتي بدونهم اضيع....

رحت لدوام وهذا الولد ولا عافني منين ما اندار الكا يدحك بوجهي عندي بنيه صديقتي تعرفت عليهه بنهايه المرحله الاولى حبابه حيل اسمهه رجاء...

كالت ثريا هذا فارس وين ماتروحين عيونه عليج وسمعت من بنيه عدهه علاقه بصديقه يكول اريد اتقدملهه وشتريد اني حاضر...

... انه حته ما اريد اطلع من القاعه من ورا مايصير هيج حته عيب الطلاب شدكول زودهه جثير...

...ثريا هو من بغداد وع اساس ينقل بس يكول بطلت لان قبولن طالع هين اذا خطبج لاترفضي يولي...

... اسكتي رجاء ما اتزوج هسه وبعدين مستحيل اتزوج بعيد عن اخوتي ولا هم راح يوافقون فدوه سدي الموضوع...

الولد ماناقصه شي بس مجرد ما افكر بسالفه الزواج تصيبني رعبه علمود اخوتي متعلقه بيهم وما اكدر افاركهم ساعه وحده ...

بعدني باول الطريق ومامستعجله بس فارس شاب بمعنى الكلمه مثقف ورزن وشخصيته حلو طويل وجسمه متروس ملامحو حلوه بس ابد ما رف كلبي ولا اهتميت الو...

وصلت الحاله لحدما اطلع للبيت وهو واكف بباب الكليه الا يدحكني اصعد بالخط يله يروح فكرت احجي لفاروق بس كلت ما اكبر السالفه ماتسوه...

ثاني يوم اجيت مستعجله لكيتو واكف بباب مقرر القسم جنت محتاجه توقيع وكفني اني ارتبكت وماعرفت شتصرف...

كال بس دقيقه من وقتج اول مره اوكف كدام شاب غير اخوتي ما انطيتو مجال ابد ولا جاوبتو عفتو ورحت للقاعه...

صار الدوام دهر بس اريدو يخلص وارجع اول مارجعت لكيت فاروق يريد يطلع معزوم بعدني بملابس الكليه وافرك بايدي واكفه كدامو ماعرف شحجي...

كال شبيج ثريا شو مو ع بعضج؟؟

فاروق اريد احجيلك شي بس اني والله مامسويه شي غلط..

... تعالي احجيلي اعرفج ماتسوين غلط احجي ...

فاروق اكو طالب ويايه مرحله خامسه وين ما اروح يلحكني واليوم وكفني يريد يحجي وياي واني انهزمت منو وماانطيتو مجال ...

... شيريد من عندج؟؟

ما اعرف بس نظراتو مومريحه وحته رجاء صديقتي انتبهت علي وكالتلي ...

...خليج ع طبيعتج ولاتنطي مجال اذا حاول يحجي وياج مره ثانيه صدي بطريقه حضاريه لا تتهمجمين وتنفعلين اذا راد يحاجيج كليلو خلي يكون كلامك ويه اخواني...

يله روحي ارتاحي وجهج اصفر عليمن انتي كبرتي وطبيعي منا وهيج يجون يخطبوج لاتخافين بس خليج مثل ما انتي..

من كال يخطبوج ولا تحملت كلمتو طلع هو واني رحت بدلت ونيران وامهه يريدن يروحن لطبيبه وقيس وياهن...

نيران... اخذنه قيس للمراجعه وانشوف شدكول هالمره بس للاسف ماكو تحسن وكالت الا عمليه كعدت تشرح لماما ...

كالتلهه اكو انواع من الغشاء يكون مغلق تماما ولازم نفتحلو فتحه صغيره حته تنزل عندهه لان بهيج حاله تعاني بالزواج وايضا تسبب عدهه امراض...

بعدني مصره ع سالفه الغشا ماما طلعتني برا وظلت هي ويه الطبيبه رحت يم قيس كتله قيس لازم عمليه يفتحون الغشاء...

مسح ع وجهه كال خلي انشوف امج شكالتلهه بس هو مرتبك مدري شبي؟؟

كتله كالتلهه لازم نسوي ثقب للغشاء لان يسبب امراض هاي يسموهه حاله مرضيه ..

التفت عليه وسحبني من ايدي بمكان معزول وترك ايدي كال نيران شكد عمرج انتي مستوعبه كلامج الي تحجي وياي؟؟

عمري 18 شبي كلامي غير هي الدكتوره هيج كالت ماسامع واحد يسوي عمليه...

... نيران يولي راح تخبليني انتي تعرفين شنو تقصد الطبيبه...

... اعرف كالت حته تصير عدهه مضاعفات وامراض المثانه لان هاي حاله مرضيه طبيعيه وبعدين كلهه الغشاء مالتهه مثقوب بس اني...

قيس... سدي حلگج يول لاتكومين تغردين اسكتي كافي رحمه لدينج راح تصيبيني بخبال...

... صاح بيه سكتت طلعت ماما واخذت موعد للعمليه ورجعنه بس وصلت حجيت لثريا ع كلشي لطمت صدرهه كالت عزا العزاج خبلتي اخوي...

تعاي يامسودنه افهمج موهيج الحجي كعدت تشرحلي بصوره علميه واني اريد ادفن راسي مثل النعامه من الخجل...

من كل عقلي كمت ابجي مومن خوف العمليه بس من فشلتي كدام قيس واني اكله بس اني مامثقوب. .

ماطلعت من الغرفه حته ماتعشيت كلساع اغم نفسي ع الثول شكول عليج ماما خليتيني مثل الثوله ع الاقل سدي حلكي....

صار موعد العمليه ورا يومين واخذتني ماما جنت ضامه نفسي من قيس ولا شفت وجهه من الفشله وفوكاهه هسه يدري شراح يسوون بيه...

جانت عمليه شبه بسيطه بنج عام وماحسيت بشي بس الي عرفته تسوي ثقب بالغشاء حته تنزل طبيعي وصدك وراهه باسبوع نزلت ...

اكيد ولد عمي كلهم يدرون شسويت عمليه جنت خجلانه منهم بس ثريا كالت محد يعرف بس قيس حته فاروق عبالهم تفتيت حصوه ...

الحمدلله ستر عليه وظل هذا السر بس ماما وقيس وثريا حته اخواتي مايعرفنه ...

....

فاروق...يولي ثريا كبرتي وكامت تجينه ناس يطلبون ايدج الولد سألت علي وطبيب وخوش ولد واهله ناس معروفين فكري ورجعيلي خبر ...

... فاروق ما اريد اتزوج اني حتلو طبيب ...

... الصيدلاني من بغداد وارتاحيتله ومبين مثقف بس اني ما انطيج بعيد بس هذا عن طريق اختو وياج طبيب متخرج وتقدملج مابيهه شي اول وتالي تزوجين...

... بجيت كتلو فاروق اني ماريد اتزوج هسه الله عليك ما اريد...

... لاتبجين بنيتي ماتريدين خلاص محد جابرج انتي اعرف بمصلحتج سدي الموضوع واني ارجعلهم خبر ...

بعدنه كاعدين ويحجي ويايه فاروق جانت الساعه ب8 بليل كاعدين بالحديقه ونسمع صوت نيران واخواتهه...

صوت عالي يصرخن ماما ولج ماما ركضنه ليجوه وادحك البنات يبجن ويكعدن بامهن الي مثل النايمه ونيران حشكت نفسهه بالزاويه...

تقرب منهه فاروق حاول وياهه لا نفس ولاروح جانت ميته وامنيه ورؤى متخبلات ونيران بعيده عنهن...

غطيتهه وطلعتهن بس حيل ماعندي كعدت وياهن وابجي وهن مفزوعات ما اعرف شلون ماتت فاروق اخذهه وحده هو وصديقو للمستشفى  ..

الي كالته رؤى دكول جانت تعبانه كالت راح امدد شويه وعبالنه نامت جايه امنيه تريد تكعدهه تاخذ علاجهه لاكيتهه خشبه صايره الظاهر مجلوطه والتقرير اكد جلطه قلبيه...

لنص الليل وحدنه بس الجيران يمنه جابوهه من المستشفى وانكلب البيت بالبواجي

انداريت ع نيران اخذتهه بحضني بعدهه بحاله صدمه حته دموع ماتوكع من عدهن بس صوت النحيب عالي...

اجو اخوتي يركضون وامنيه تصرخ وتصيح ماما هي الي اول وحده عرفتهه ماتت ما اعرف اواسي منو واكول شنو...

دخل عمي فلاح ويصرخ مثل المره بياااان ليش رحتي بيااان راحت لربهه الرحيم تخلص من شرك وتعذيبك...

امنيه منهاره اكثر وحده صوتهه عالي ولاگحه نفسهه ع امهه وتصيح ماما اخذيني وياج...

اجه ادهم سحب امنيه ماتقبل تضرب برجلهه بالكاع ما اعرف ادهم شيصرف جرهه لحضنه وضمهه جوه جنحه وطلعهه برا وهي تبجي...

نيران ماتقربت ابد نفس كعدتهه واخذهه قيس برا ورؤى انغمى عليهه وطلعتهه بين ماتجمعت الناس وعماتي وكرايبنه...

للصبح اخذوهه للمقبره والبنات حالتهن حاله كلساع وحده تتخربط عليه وعماتي قامن بالواجب وهن شالن الفاتحه ....

اهلهه مايدرون ومحد خبرهم بس عمتي ام جاسم كالت لرجلهه كل لشيخ ناصر يوصلهم خبر عيب من عدهم ...

طول ايام الفاتحه رؤى ماتحجي ولاتاكل ونيران اصلا دمعه ماوكعت منهه وبس ترجف ...

بس امنيه تصرخ ماما وبس ادهم يهديهه وكلساع يجي عليهه ...

خلصت الفاتحه وراح كلمن لبيته عمي راد ياخذ البنات وفاروق ماقبل كالو ماعندك بيت بعدين نحجي خليهن هسه وهو هم جان تعبان...

امنيه صغيره عمرهه 13 ضبط وادهم هو حاير بيهه لان تكعد تصرخ وتضرب بنفسهه ...

رؤى عاقله بس تبجي بس نيران حاولنه شكد وياهه وخاصه قيس بس جانت بس ترمش بعيونهه ودكول لاتخلون بابا ياخذنه....

مرت ع وفاتهه عشر ايام واجه عمي وشيخ ناصر يريدون البنات يرجعن يم ابوهن وهنا اخوتي ماعرفو شيتصرفون...

شيخ ناصر كالهم انتم شباب وابوهن موجود مايصير يكعدن يمكم ولازم يرجعن لابوهن وانتم ماقصرتو...

واحد يدحك بوجه الثاني ماعرفو شيكولون بس فاروق نقذهم وهو حجه عبالك قره كلوب اخوتو....

يتببببع...... احبكم...

يتببببع.... احبكم ...

ازمة ضمير ... البارت الرابع عشر

«للكاتبه روزايه»

آنة المحد وكفلة بساعة العازة،،

آنة الگلبة اعلة حب الناس يتوازة،،

آنة العقلة وگف من كثر ما مصدوم،،

غربة الشالتة والذبتة اعزازة،،

فاروق.. شيخ ناصر مدامك موجود هين خلي يكون كلشي بعلمك حته باجر من يصير شي اجي اعاتبك انت لانك شيخ وجنت كاعد بساعتهه...

محد بيكم سأل ليش ام عمر ماتت ابيتكم وين بيت رجلهه وليش ماصارت فاتحتهه ابيت عماد؟؟

ياشيخ المره اجت منهزمه من عمي وهاي صار شهر  كاعده هي والبنات يمنه عمي الكاعد يحجي بالاصول ويعرف الحلال من الحرام اجه ابدارنه وشال السجينه بوجه بناتو واخوتي وقيس انضرب بحزتهه وماحجينه ...

كاعد ويحجي بالتقاليد ويعرف الحلال والحرام وبناتو بس يدحكنو ينهزمن منو غير وغير الكتل والتعنيف هذا كلو وجاي يطالب بيهن...

اني وياك غلط وحرام وجودهن ابيت بي شباب وام ماعدهن وابوهن موجود بس شنو الي يضمن من ياخذهن مايكتلهن وهن ضعيفات حال...

شيخ ناصر تتحمل انت مسوؤليتهن واذا اجت وحده منهن متعوره بكد الشعر انت اول واكد اگاومك واخذ حگهن منك ...

شيخ ناصر... يابويه اني هالحزه سمعت منك الحجي والتفت ع فلاح يول فلاح صدك هالحجي من كون امهن ماتت من قهرهه ...

فلاح.. شيخنه اني اب وواجبي اربي يعني من اكتل واصيح غايتي اربيهن مالهم حك يدخلون بيه بناتي هن وما اسمح لاي بشر يدخل..

... مو هيج الحجي اذا بناتك شاردات من ظلمك انت ماتستحق تكون اب وان جانك خايف من الحلال والحرام انه اخذهن ابيتي وما اسمحلك اطول اضفرهن...

فاروق.. شيخ ناصر اذا عمي غايته الحلال والحرام وكلام الناس انه كدامك اطلب ايد بناتو لاخوتي وهذيج الساعه محد يكدر يحجي ..

فلاح... مستحيل بناتي صغار ما ازوجهن دحكت شيخنه حاطين عينهم ع جهال وتريد ابقيهن يمهم ...

فاروق.. احترم شيباتك وكبرتك والزم السانك قبل ماتكعد تشمر بحجيك وماتعرف تسولف شنو حاطين عينهم عليهن هن بعدهن زغار وما افرقهن عن ثريا بكد الشعره..

بس ظلمك وعنفك الي مارستو عليهن خلاني احجي هيج ماكاعد ابرر لحضرتك بس ما اسمح لاصغير ولاجبير يمس سمعتنه بسوء...

اوس.. هذا الحجي مردود عليك ياعمي وبحضورك ياشيخ ناصر مواحنه الي ندحك ع عرضنه ونخلي الوادم تحجي بينه لاتربينه ولاتعلمنه على هيج ياريت قبل ماتحجي توزن كلامك...

اني هسه كدامك اكلك مستعد اوكف بوجهك وما اسمحلك تاذيهن كلشي الو حل بس رجعتهن وياك ماراح تصير الا يتكفلهه شيخ ناصر ...

قيس... عمي انت حته بيت ماعندك وساكن ويه ابوي واحنه نعرف مرت ابونه شنو؟؟ احنه ولدو وبنتو ودار ظهرو صار اسنين وتريد تسلم بناتك الو ...

شيخ ناصر... اسمعوني ياولد حليمه البنات راح يبقن بامانتكم هاي الايام واعرفكم كدهه...

وانت يافلاح لااداعي ابناتك ابد الا توفرلهن بيت ودار ويصير عندك بيت هذيج الساعه تعال داعي بيهن وخلي يكون بعلمك يافلاح البيت يكون قريب ع بيت فاروق لان حليبكم اسود ...

مانسيت عملتكم انت وعماد والمفروض دكوم تحب فاروق واخوتو على مواقفهم وياك انطوك بيتهم وقدروك وماتهموك وطلعوك من السجن وهسه بعين صلفه كاعد ابدارهم وتشمر سهامك عليهم...

فلاح.. بس ياشيخ شلون يظلن وحدهن وثريا بالدوام ترضاهه انت...

... انه راح اجيب اختي الجبيره ام امل تعرفهه ارمله وبتهه امل متزوجه وهي بعد اخت حليمه الله يرحمهه ماتقصر اذا اكلهه تجي يم احفادهه ...

بويه فاروق عندك مانع اذا اجت يمكم الحجيه نعيمه هي دومهه تريد تزوركم بس بقت يمكم حته تظل يم البنات من تروح ثريا لدوامهه...

فاروق.. لا شيخ اهلا وسهلا بيهه واحسن حل حته عمي مايظل بشك مدام انت تكفلت الامر اني ما امنعو من الزياره يجي ويكعد بالوقت اليعجبه بس اذا ما يطمن كلبي من ناحيتو ما ارجعهن...

ثريا... طلع الشيخ وعمي وعاف البنات يمنه الحمدلله اهم شي سكت لو ما شيخ ناصر جان فاروق واخوتي تكاونو ويا وجيب الي يفكهم...

ايامنه ممله بين الدوام وبين الحاله النفسيه الي يمرن بيهه بنات عمي ثاني يوم اجتنه الحجيه نعيمه بس دحكتهه دمعت عيني الاخت الصغيره لجدتي حليمه نسخه منهه ...

مره جببره حاجه بيت الله عدهه بنيه وحده اسمهه امل متزوجه بالفلوجه ارمله رجلهه ميت ورا زواجهه بسنه طالع للشغل وينتظر ع سكه القطار وغافي وجاي القطار وساحكه ناس كالت نومه ثكيل بس بالتقرير الطبي طلع مضروب جلطه ومغمي علي...

هاي السوالف اذكرهه من جدتي حليمه اتذكرهه من جنه صغار اجتنه وحجتلنه قصتهه رحبو بيهه اخوتي وخاصه ادهم فرحان بيهه يكول تشبه جدتي ...

انه بالدوام فارس لازك وراي اكثر من مره يدزلي بنات وارفض ومثل ماكال فاروق تعاملت والولد بعد ما دحكتو الي سمعت بي نازل لاهلو ...

اليوم اخوتي يحظرون بغراضهم ادهم وقيس يسافرون لبغداد باجر اول يوم للدوام واحد بكليه الطيران وواحد بكليه الضباط....

اوس بعد اسبوع يله يروح بس ايوب الوحيد الي راح يدرس بلانبار احس البيت صار خنگه رغم بعدهم ماراحوا شلون بيه شلون افارك ادهم الي ويا مناگر منو يكعدني يسحبني من ضفيرتي منو الي يوكف ع راسي من اكوي ويغني...

رغم حزني ع فراكهم بس لساني يلهج بالدعاء الهم بكل خطوه يخطوهه ربي يكتبلهم التوفيق ومايصيبهم مكروه...

نيران... وفاة ماما سلبت من عندي كل شي حلو دخلت بازمه نفسيه بس الله يدري بيهه فقدناهه واحنه صغار احنه بحاجتهه شلون نكمل حياتنه من دونهه...

ما حجينه ولا عبرنه عن اي شي ولد عمي تكفلو بينه وماسمحو لبابا حته يشوفنه واجت يمنه الحجيه نعيمه حسيت بحنيتهه وعبالك بناتهه...

احس عليهه بالليل تغطي بينه وتصلي للفجر مرات اسمع صوتهه وهي تدعي من كل گلبهه تدعي لبنتهه اسمهه امل الله يهدي رجلهه عليهه تدعي لاخوهه شيخ ناصر الله يطول بعمره...

احلى دعوه جنت اسمعهه من عدهه وهي دكول ياربي احفظ العراق بسنته وشيعته احفظ شبابنه واطفالنه وفرح كل والده بابنهه وشافي كل مريض لايعلم بالمه الا انت...

انسانه عظيمه قليل الوصف بيهه يكولون حليمه بعد اكثر من عدهه بالحنيه كلهه هاي العائله شيوخ وعدهم مخافه الله بس عماد وفلاح ما ادري من يا صنف...

باجر قيس يروح لبغداد من وفاة ماما ماكعدت يمهم ولا شفته وحجينه طلعت من الغرفه شفته واكف يحجي ويه ثريا بس شافني لمعت عينه ...

نزلت عيني ورحت للمطبخ شربت مي وطلعت للحديقه اشم هوه سمعت باب المطبخ وهو ينسد التفتت علي اجه يمشي باتجاهي قابلته بابتسامه يتخللهه الحزن...

اشرلي نكعد بنص الثيله كاعده ومنزله راسي احس الخجل بده يستحوذ عليه ..

قيس.. واخيرا دحكتج وطلعتي يابه نيران كلنه ع هالطريق اليوم امج باجر اني وانتي...

... اسم الله عليك اني جنت خايفه بابا ياخذنه ..

.. موكتلج لاتخافين كلشي الو حل لاتفكرين ابد ...

... باجر راح تروح؟؟وشوكت ترجع..

.. اي باجر اروح وما ادري شكد راح اروح بس بالي يظل يمج...

... لا ماكو شي بابا مايجي بعد بس انت لا طول بس تحصل مجال تعال..

... ليش راح تشتاگيلي؟؟

... ماعرف شجاوبه ارتبكت بس دنكت وظليت افرك بايدي صوته ونظراته تخليني افقد السيطره بمشاعري...

جان يحجي بهمس ما ادري اني يتخيلي هيج كال نيران ارفعي راسج هل ادحك عيونج...

مارفعته خليت ايدي ع الكاع واريد اكوم ماحسيت غير ايده يخليهه ع ايدي بس بسرعه وخرهه بس كال اكعدي شويه...

رفعت راسي وباوعتله نظراته وعيونه الهادئه الشامه الي يم حاجبه حفظت كل تفاصيله وكانو اريدهن ذخيره لايام العازه...

لحظات وهو صافن عليه حسيت علي وكانو يريد يشبع شوف من عندي كال ديري بالج ع نفسج واي شي تحتاجي كولي لثريا ....

وضعي تخربط عيونه دمار خاصه بيهن جاذبيه موطبيعيه بسرعه هزيتله راسي وكمت وكلبي يدك سريع طبيت جوه وبوجهي للغرفه لا احد يشوفني احس نفسي مفضوحه...

بليل ثريا كعدت تبجي ونبجي وياهه والحجيه تسكت بيهه وهي تناشغ مثل الطفله كلساع تصفن وعبالك تذكر وترجع تبجي من جديد واحنه ماصدكنه نصبناهه مناحه وياهه...

ماردت اطلع واشوف قيس مدري شبيه كلساع رجليه تاخذني للباب اكول خلي اشبع منه شوف بس ارجع احس الكل يعرف احبه ...

ثاني يوم من الفجر طالعين واحنه نايمين جنت ناويه اكعد واسلم عليهم بس ثريا مامكعدتني صدك بلحظتهه ضجت حبيت اشوفه من يطلع ...

كعدت الم بالفراش مالتي انتبهت بصف الفراش علاكه صغيره مال دعايه بيهه كتاب شمرت الفراش وكعدت فتحتهه جان كتاب اسمه لاني احبك...

بس قريت العنوان خفق كلبي من قيس هذا اكيد ع السريع لميت الفراش وطلعته لايجي احد يشوفه خاصه اخواتي ...

كعدت ورا الجربايه من الجهه الثانيه حته محد يشوفني واكلب بي جانت اكو حديده صغيره مثل الدرهم محفور بيهه اسمي ومبين حفر يدوي ومخليهه بوسط الكتاب..

الصفحه الموجوده بيهه كلمات لحد الان حافظتهم وبين كل مده انفض الغبار واستعيد هاي الذكرى الجميله...

لاني احبك ارى كل شي جميل بمجرد النظر اليك عندما اتأمل ملامحكِ وعيناكِ يافاتنتي كأني احيى من جديد...

اليكِ حبي قلبي كياني روحي وكل ما املك احبكِ...

هاي جانت عباره عن اسطر بس هو مضللهه بقلم ومختارهه طول ما اني فاتحه الكتاب واقره ما اعرف شصار بيه لاول مره احس بهيج شعور قليله بحقه كلمه حلو ...

يعني قيس هم يحبني ويبادلني نفس المشاعر سديت الكتاب وضميته لصدري والفرحه غامرتني رحت ضميته بملابسي  عن لحد يشوفه...

ثريا... كعدت الصبح سويت ريوك واخوتي كلهم كعدوا حته يسلمون ع ادهم وقيس رحت اريد اكعد نيران كالت كعديني مقدره مشاعرهه بس فتحت الباب دحكت قيس كاعد يم راسهه وخله علاكه وهي غافيه ...

جان الجو بارد خاصه الفجر وهي نومهه عبث والغطا لاگحتو بعيد سحب الغطا وغطاهه وكانو بنته الصغيره الله ع حنيتك ياقيس ...

من كام دحكني وابتسم سد الباب وطلع كال لاتكعديهه عوفيهه وديري بالج عليهه ما اوصيج بعد...

شكد حلوه اللمعه بعينو وهو يوصيني عليهه اول واحد من اخوتي وكع بشباك الحب وصادته نيران ...

اخذو جنطهم وطلعو واني دموعي تجري حبوني من راسي وراحوا رجعت لفراشي واني ادعي الهم يوصلون بسلامه ...

جان يوم سبت ماعندي دوام كعدت لكيت الحجيه مطلعه التمن العنبر صبحت عليهه واخذته من ايدهه ماقبلت كالت يايمه اني ماعرف اكعد هناك بالفلوجه اطلع للبستان...

... ارتاحي جده وجودج يمنه كافي الله ينطيج طولة العمر...

... ثريا يابنيتي انه ربتني حليمه واتذكر من عرست جلبت بذيالهه وابجي وراهه ومن صار عدهه عماد كمت احبه واشيله وافتر بي مايوكع من ايدي...

انه من صغري جنت اتخيل الواحد بس ادحكو سولفت لامي الله يرحمهه كالت خاف تصيرين تقرين البخت بس احنه بنات شيوخ مايصير نطلع ولا ولا مفروض علينه...

امنه مره واعيه وتفهمنه ظلت وراي وراي لحدما تاكدت مني اني اعرف اقره البخت مثل مانسمي وصارت بيه وجربت اقره الواحد من وجهو ...

امي كامت تصدك بيه شكلهه يصير يتهيئلي يصير هيج وهيج بهالانسان بس جور الدنيا نساني...

... جده الله عليج اقريلي ماتذكرين شي منا منا...

... تعاي حدري يمي خلي اركز بوجهج...تقربت يمهه لزمتني من فكي وتفر بوجهي وهي صافنه عليه شويه يله حجت...

كالت انتي طريقج وعر راح تحصلين شي عالي وراح تخسرين شي غالي...

انتي اسمج ثريا بس نص من جانبج مظلم ومعتم اخوتج راح يظلون شايلين مصباح بيدهم ويضون جانبج المظلم الي ينطفي وبعد ما يتوهج من جديد...

... جده خوفتيني بعد اشوف ايام سوده لادكوليهه..

... كومي يولي لاتخافين كلهه خرافات مرات تطبك عندي ...

بس ما ارتاحيت لكلامهه لان ملامحهه تغيرت وهي تحجي وكانو تعبر عن كميه الحزن الي ادحكه بيه ...

رحت جبت صور اخوتي واجيت اريد تقراهم هي كالت ع الوجه والصوره لكيت البنات كاعدات وامنيه نايمه ع رجلهه...

انطيتهه الصور كتلهه جده اقريهن الي ضحكت وكالت يااا ولج صدكتي خايبه كبرت حته كمت ما ادحك زين. .

حبابه جده اقري اخوتي انه احب هاي الشغلات انطيتهه الصور اول وحده صوره اوس ...

ركزت وضحكت كالت هذا يتوفق بحياتو وادحكو لابس ابيض وحياتو هادئه وحلوه مثل وجهو...

انطتني الصوره واخذت صوره ايوب ركزت بيهه مشوار وكالت هذا عندو عدو جبير والعدو قريب علي ومامن بي ومايعرفه يولي ثريا نبهي هذا واحد يكيدله كيده ويوكعو بيهه ....

... منو هذا ياستار هاج جده اقري صوره قيس...

قيس راح يفارگ شخص عزيز علي ويفارگو للابد جانت تصفن وتحجي كلمات متقطعه ...

گلبو محروك ... مهموم ... تنطفي شمعتو من وكت لجمه گلبو ونيرانو ماتخمد...

ورفعت راسهه ع نيران وغمضت عينهه تعجبت بيهه مدري حركه لا اراديه مدري اني من كالت نيرانو تخيلي هيج..

اخذتهه وانطيتهه صوره ادهم ماتقبل اناقشهه دكول كلمات قليله ومحيره...

هذا بدربو عاصفه قويه جايتو من الجنوب من هذيج الرده راح تگلب حياتو..

ياجنوب قصدج من المحافظات ؟؟ اااي ..

هم ماقبلت اناقشهه وكانو اخربط افكارهه اخذ صوره لفاروق صفنت عليهه وعدلت كعدتهه...

فاروق ادحك سجن بحياتو وطول ايامو بيهه كلمه سجن سجن ... محكمه ... تنفيذ ... عدل ... اعدام... 

هاي كلماتهه جانت تردد بيهن وانطتني الصوره اريد اسالهه ماتقبل كالت خايبه شو كومي اني عقلي مشوش بس لا ملامحهه ماتوحي بهالشي مرتبكه وحزينه...

نيران واخواتهه نامن بعينهه تعالي اقرينه همات امنيه ورؤى كالتلهن حياتجن حلوه بس نيران كلامهه الغاز وياهه...

كالتلهه انتي حجر عاثر ولعنه ودمار لاخر يوم بحياة شخص قريب عليج ...

خلت نيران تفور تسالهه وتزكح بيهه بس خلت الفضول يشتغل عدنه اكثر شي فاروق وقيس اثرو بيه كلامهه خوفني...

ساعه اكول خزعبلات ومره جبيره وساعه اكول لا ليش كالت هيج وليش وصفت ادهم بعاصفه شنو قصدهه وشجابو ع الجنوب...

طول ما اني اشتغل بالي مشغول وافكر هي راحت تصلي ونيران اكلت راسي واني نفسي ماعندي جواب الهه...

كاعدين ورا الغده واسمع فاروق وايوب يحجون ايوب يكلو يول فاروق قدم ع الكليه والله احسن بس فاروق يهزلو براسو يكلو بعد ماشاب ودو للكتاب بيا حال منو يظل بالمعمل...

عفتهم يسولفون ورحت مددت اني بطبعي ما انام الظهر بس مدري شلون غفيت وادحك نفسي بوسط جزيره مالهن لا اول ولاتالي هايمه افتر وحدي...

امشي واتعثر اريد منفذ اطلع من عندو ماكو فجأه وتظلم الدنيا وصار كلشي اسود كدامي لمحت خيال فارس الوياي تعداني وراح...

صرخت ورا فارس افتحلي ضوه بس ماجاوبني ظلمه واختنكت واني بوسط الجزيره بس اسمع صوت ادهم يصيح ثريا لاتخافيني كلنه يمج...

ابجي واصيح ادهم لاتعوفني انه ثريا انه ثريا اردد باسمي وصوت اخوتي يتناوب ع مسامعي مره ادهم مره ايوب...

كتلهم كلو لفاروق ثريا صارت يمهه ظلمه خلي يجي ياخذني دحكت الضوه اجاني من بعيد اخوتي كلهم فاروق حضني واخذني...

يمسد ع راسي ويكول لاتخافين الراح راح انتي تبقين ثريا...

فزيت من نومي واني اعيط فاروق فاروق...

يتبببع.... احبكم...

احداث قادمه...

فاروق... مدام اجر البيت الي بصفنه هاهي خلي يرجعن البنات وتكفلهن شيخ ناصر ...

فارس...ثريا والله اني احبج من اول يوم شفتج وشتريدين اني حاظر بس انطيني موافقتج وانتظرج لحدما تتخرجين واجيب اهلي واجيج....

ازمة ضمير ... البارت الخامس عشر

«للكاتبه روزايه»

لسان حال احد الابطال..

صعبه...صعبه .. بين اهلنه انعيش غربه

صعبه...صعبه .. مثل اعمى وصخر دربه

صعبه...صعبه .. الما يودنه انريد گربه

والگلب صاير گزيزه.. ونظرة الوادم شماته

وباقيه جروحي نزيزه..

ويا حسافه للجفو رخصت روحي العزيزه

واااه من هذا الوكت...من الزغر وياي حربه

بس علي يمطر مصايب.. وضيمه فوگ الراس صبه

دافنلي سم بخبزتي.. وحنظل بماي الاشربه

وصعبه...صعبه ..ايدور گليبي اعله صحبه

ذهب مابيهه دغش .. صافي ابيض مثل گلبه

...

ثريا... فزيت مرعوبه اصرخ باسم فاروق لازمه گلبي والهث احس نفسي ضاق اجاني فاروق يصيح شبيج ثريا؟؟ اخذني بحضني مثل من جنت صغيره واجفل من نومي مرعوبه..

لازمه تشيرته ومغمضه عيوني يتراوالي الكابوس وهذاك المكان المظلم باسني من راسي وكال شبيج بنيتي حلمانه؟؟

اي فاروق حلمت حلم موحلو وجنت مختنكه واصرخ محد يسمعني ...

لا تخافين كومي تعوذي من الشيطان وغسلي هذا نوم الظهر مزعج ليش نايمه اول تالي كومي يم البنات ...

اي راح اكوم لايظل بالك مابيه شي ..

يله انه راح اروح للمجمع محتاجه شي؟؟ لا مامحتاجه شي بس مسواك جيب وياك...

طلع فاروق واني اتعوذ من الشيطان كمت غسلت وكعدت يم البنات قنعت نفسي هذا عقلي الباطن ظل يفكر بكلام الحجيه وحلمت هيج ...

رغم مدري شبيه مامرتاحه بس بالي يم اخوتي دعيت ربي يقدر عليه ولا يمر يوم بدونهم ماعندي غيرهم ولا اتحمل افاركهم لحظه روحه ادهم وقيس احسهه هاده حيلي ومالي واهس بكلشي...

حته من اوكف اسوي عشه تدمع عيوني وانه اتذكر ادهم من ياكل من احظر بالعشا واكوم احجي علي ويكول الو طعم خاص  الاكل الي ع الطباخ..

طمني فاروق عليهم كال وصلو وماجرين شقه وكاعدين بيهه علما يكملون الاوراق مال التقديم ويباشرون ...

كاعده ادحك برنامج مال مسابقات ويه امنيه وصاحت الحجيه يولن حدرن هين عجنت كليجه ساعدني اديه ماتعيني...

حطينه الصواني والقوالب والتمينه داير مدايرهه تسولفنه ع ايام قبل وشلون اتزوجت وهي بعمر 14 سنه سوالفهه حلوه بحيث ماحسينه شلون كملنه الصواني وبدينه نشوي..

الحجيه... خايبه نوريه مادكومين اطلعين الصينيه لاتحترك..

نيران.. لا بيبي طلعتهه وحطيت الثانيه بقت بس هاي البيدج اخر وحده..

امنيه... بيبي هم تشتاقين لاهلج لو تعودتي هنا؟؟

...والله يا بنيتي انه هناك كاعده ابيت الشيخ ناصر وعندو جناين واحفاد جثيره عزلت بغرفتي بس بلاكل وياهم ما اريد اقيدهم ...

شيخ ناصر يزعل عليه من يدحكني كاعده بغرفتي بس انه مره جبيره وهن بعدهن حديثات يريدن يسولفن ياخذن راحتهن ما اخليهن متقيدات ...

اشتاكيت لاخوي ناصر وبنات اخوي بس انتن مايهون عليه اعوفجن وخاصه انتي الفصعونه الصغيره ام اللسان ...

امنيه.. بيبي اني حبيتج حيل تشبهين بيبي ام بغداد بس هذيج اكبر من عندج بهوايه بس هم مثلج تسولفنه قصص وحكم انتي هم عندج اخوان واخوات؟؟

اي يمه عندي شيخ ناصر الجبير وبعد واحد اسمه شاكر مات بالحرب بس عندو ولدو كبار وهسه صارو شياب وعندي 4 اخوات كلهن ميتات بس انه الصغيره هن كبار حيل ...

الله يرحمهن لاتروحين ابد حته اذا انتقلنه لغير بيت تجين ويانه ثريا عدهه اخوان احنه ماعدنه...

لا يابنيتي هم اخوتج وسندج دحكيهم شلون واكفيلج من جانت حليمه عايشه الله يرحمهه دومهه تفكر بيهم ودكول ولد عماد كسرو ظهري واخاف عليهم من الدنيا الخوانه...

ثريا... لا جده دائما اقره قران لجدتي حليمه وادعيلهه بالرحمه واحلم بيهه احلام حلوه تعبت علينه وربتنه وزرعت الحب بيناتنه هي الي خلتهم گلب ع گلب ودومهم يتذكرون وصيتهه...

الحجيه.. الله يحميهم من كيد الناس ويستر عليهم ويستر عليج من ولد الحرام وتبقون مرفوعين الراس ...

نيران... تقربت كعدت بصف ثريا وشاورتهه ثريا ماخابروا الولد وصلو لولا؟؟

ابتسمت بوجهي.. اي وصلوا وباجر يباشرون احتمال ..

اي الحمدلله جنت قلقه عليهم من الطريق وانفجارات بغداد..

لاتقلقين واعدج يجي يعني راح يكون عند وعدو...

حجت هيج وكامت فهمت قصدهه معناتهه تعرف بقيس ظليت ساكته هو منو المايدري اني فاضحه نفسي ...

ثريا... بليل اكعد اقره واظل لوقت متاخر والبنات ينامن دائما ادحك فاروق ماينام ويطلع برا بالحديقه اروح ورا الكا يدخن وكاعد والف حسبه ابالو ادعيلو الله يريحو وارجع انام...

من اكعد الفجر الكا كاعد قبلي مرات اكول اخوي مثل الذيب ماينام وعبالك عنده واجب شوكت ينام اذا من الفجر لليل هو بالشغل وبليل تشهدلو الحديقه وحسبه تاخذو وحسبه ترجعو...

نزلت من الخط شايله كتبي وصدريتي وامشي سريع لان تاخر السايق اليوم صعدت درجات البنايه واني مدنكه بس ادحك رجلين قطعت الطريق عليه...

رفعت راسي وادحك فارس كدام وجهي واكف ومتعمد هيج يقطع طريقي

فارس...ثريا والله اني احبج من اول يوم شفتج وشتريدين اني حاظر بس انطيني موافقتج وانتظرج لحدما تتخرجين واجيب اهلي واجيج....

انه منا متاخره وتصرفه نرفزني يدحكلي ومبتسم كل الي كدرت علي كتلو مامتعلم اداب الطريق ماعرفت شحاوبو على هيج كلام...

حجيتهه ومشيت ما اعرف اتعامل بهيج مواقف دخلت المحاظره وبالي مشوش ومشتت بتصرفاتو شيريد من عندي رفضتو غير ينسحب ليش هلكد لزكه...

عندي موهبه قراءه العيون ومن اول ما ادحك الشخص اعرفو الا هذا عبالك انسان مصنع مرات احسو حباب وصاحب اخلاق ومرات احسو واحد موخوش قررت بس ارجع احجي لفاروق ...

اتجنبو وابد ما انطي مجال بس رجلو طالت وصار يدخل للقاعه بحجه واحد من الولد صديقو ضجت من هاي الحاله حته رجاء انتبهت وكالت تصرفاتو غريبه ...

بس رجعت للبيت جان فاروق هستوه راجع حته بعدو بهدوم الشغل كعدت احجيلو بالتفصيل وشلون يحاول يحجي وياي...

فاروق.. والله ياثريتي ما اعرف اذا من صدك رايدج المفروض يخاف عليج من اي حجايه تمسج بس اني راح اوكفوا عند حدو ...

ارتاحيت من كلام فاروق مدام عندو علم هو راح يحلهه ثاني يوم جان عدنه ريست وكاعدين برا دحكت فاروق جاي صوبي ويمشي بكل ثقه...

انه اخته وانعجبت بشخصيتو ورزانتو كل البنات اليمي كالو دحكو هذاك الجاي شلون شخصيه يحجن واني مبتسمه وكلي فخر باخوي شمعه دربي...

جان لابس بنطرون وقميص سمائي طولو واكتافو المفتوله وسمارو خلت العيون تتجه صوبو ...

ما امدح بي بس فاروق تنطبق علي كلمه الرجال الحقيقي الي مايقاس بجمالو بشخصيتو ورزانتو من صار قريب عليه بسرعه كمت واني فرحانه بجيتو ومفتخره بي...

فاروق شعجب اجيت ما ادري بيك؟؟ ايوب بالمجمع واجيتج وينو هذا اليزعج حمامتي..

فاروق البنات عينهن عليك تعال انروح للمكتبه وهو دائما هناك واليوم هو داز خبر بيد رجاء يكلهه اريد احجي وياهه...

فاروق.. يابه وينو والله ايام كبرت ثريا وفاروق يدور ويتكاون ويه الشباب شلون ابطلج واكعدج بالبيت ..

... انت تعرفني كلش زين بس هو واحد لزگه جنت امشي واحجي ويه فاروق دحكت فارس واكف وصديقو بصفو مدري شكالو وانتبه علينه بسرعه كلت لفاروق هذا هو...

اشو هذا اجانه مثل الاعصار يمشي سريع لان دحكني ويه فاروق وقطع الطريق علينه وصار كدامنه وكال ثريا عندج محاظره ؟؟

فاروق.. العفو منو حضرتك حته توجهلهه الاوامر وحاسب نفسك شي...

فارس... انت منو وتحجي وياي هيج..

فاروق.. جاي احجي وياك بصفتك زلمه تقبل واحد يعترض طريق اختك ويسببلهه احراج وين ماتروح يمشي وراهه...

سكت ولا حجه كلمه وحده بس يريد يفترس فاروق...

فاروق.. جاي احجي وياك جاوبني تقبلهه ع عرضك؟ الماتقبله ع نفسك لاتقبله ع غيرك ...

هالمره حجيت وياك باسلوب حلو المره الثانيه اذا شكتلي اختي راح ادحك شي مايعجبك خليك زلمه وصاحب كرامه وخلي اعراض الناس كدامك ...

اياك تقطع طريقهه وتمشي وراهه لان هذيج الساعه اذا حجتلي ما ارحمك لذلك خليك زلمه وغض بصرك عن عرض غيرك...

ثريا.. ماكدر يحجي ولاكلمه بس كال اني اعتذر ما عرفت انت اخوهه اعتذر جدا ...

فاروق ما حاجه كملنه طريقنه وكال يله روحي لمحاضرتج وانه راح ارجع للشغل بعد مايضوجج بعدنه واكفين اجتي رجاء سلمت علينه وكالت بدت المحاظره بس عينهه ولانزلت من فاروق..

ادحكلهه مبتسمه وادحكلو بشغف بس فاروق ولا رفع راسو ولا حته تعرف عليهه عافنه وراح وهي لزمتني دك اسئله ومبينه الاخت وكعت بس لا تحاول اخوي جبل ماتهزه ريح...

بيومهه رجعت مرتاحه خلصت من عندو وبعد مايضايقني لان وراهه مادحكتو ابد ...

نزلني الخط بالباب فتحتو ودخلت سيارتنه ماكو يعني بعدهم بالشغل طبيت بالمطبخ انزع بحذائي واجتني امنيه تركض كالت ثريا امج هنا!!!

اريد استوعب كلامهه هاي الكلمه ماسامعتهه بعمري كلو اجيت للدنيا وماسامعه صوتهه ولا مدحكه شكلهه...

كتبي بايدي وواكفه رجليه تريد ادخلني ليجوه بس گلبي وعقلي يرفض اتذكر كلام فاروق وهو يكول امي زانيه خليت كتبي ع الميز ورجعت ليورا بخطوات ثقيله اريد اطلع ما اريد ادحكهه اتمنيت اخوتي موجودين ...

امنيه تعيد براسي ثريا امج هنا وتنتظرج من زمان اسمع صوتهه وهي تحجي ويه الحجيه بس بلحظتهه ما اعرف شتصرف ...

رجعت اركض لشارع اعرف الخط مالتي ينزل بنات ورانه ويمر من بابنه كلت بلكي يرجع ما اعرف شكاعد اسوي بس ما اريد ادحكهه ...

شعدهه اجت خاينه زانيه باعتنه هاي الكلمات ادور براسي اجه الخط وكفتو كتلو عمي ابو محمد اخذني لفاروق للمجمع...

... صعدي بنتي خير خوماكوشي؟لا ماكوشي بس اريدو يمنه خطار ..

شكلك يا عمي شارده من امي من عمري يوم وهي دارت ظهرهه وعافتنه شكلك حته شكلهه مامدحكتو بيوم ولا اعرف شي عنهه وكعت دمعتي ومسحتهه ...

المجمع قريب من هين بسرعه وصلنه ونزل ابو محمد يصيحهم لان جثير سيارات واكفه تاخذ حموله اجه الرجال ويا اوس بس شافني جفل والخوف سيطر علي...

اوس..  ثريا شكو ليش جايه يولي شصاير بيج شي؟؟

.. فاروق وينو امي جايه بالبيت كاعده وانه اجيتكم اركض حته ما طبيت للبيت تعالو وياي ..

... امي!!!! شذكرهه بينه ووين تندلنه اسمعي فاروق راح للبيت ارجعي هسه ويه ابو محمد وانه اعزل المجمع ويه ايوب ونجي ...

..ما اروح وحدي تعالو ويايه ماطب للبيت ما اريدهه ...صاح ع ايوب كالو يول عزل وتعال بسرعه للبيت انه رحت قبلك ...

بس وصلت للباب ادعي كون فاروق جاي مانكدر اندحكهه حته اوس من كتلو مادري شصار بي ما اريدهم يحنون عليهه لان مايدرون بعملتهه...

دخلت ليجوه واسمع صوتهه اخذت نفس ودخلت ويه اوس بس دحكتنه كامت جنت مشتته نظري ما اريد ادحكهه ابد ...

نبهنه صوتهه وهي دكول من زمان انتظركم يايمه؟؟

دحكت عليهه ونفسي كاشه منهه مره متوسطه بالعمر بس معتنيه بنفسهه جثير مخليه كومه مكياج ع وجهه تريدنه نستقبلهه ونرحب بيهه...

اوس..  شعندج جايه ماكفاج السويتي مو درتي ظهرج وتزوجتي شمضيعه بعد...

... انطيني مجال اشرحلكم شلون انجبرت لاتلوموني ياولد بطن انه امكم وراح اظل مناطره ابابكم حته تسمعوني...

ثريا.. احنه ماعدنه ام روحي منا قبل لايجي فاروق وتغثي بشوفتج وتكدرين خاطرو روحي ما اريدج...

... اكعدي ارتاحي حقج بالي دكولي بس اسمعوني واحكموا انه انظلمت ياولدي لاتصيرون انتم والزمن عليه...

بعدنه واكفين بس احس الدنيا تفتر بيه سندتني نيران وكعدتني طب ايوب يركض عبالو صاير شي بس دحكهه كال السلام عليكم...

ماعرفهه لان بسرعه راد يطلع عبالو خطار او وحده غريبه هذا الموقف ولا راح انسى بعمري ماعرف امو ولا گلبه رف عليهه...

دار ظهرو بس وكفو صوت اوس وهو يكلو يول ايوب هاي  المره الكاعده يكولون امك...

بسرعه التفت عليهه وعيونه شعت غضب كالهه منو انتي شمضيعه يمنه كومي اطلعي برا وديربالج تعتبين بيتنه لان من اشوفج اشمئز...

... لاتحجي هيج ياوليدي وكامت تبجي انه امكم تذكرني ايوب ماتنام الا بحضني ولكم جار بيه الزمن لا تاذوني فاركتكم سنين وانتظر اللحظه الي ادحك بيهه وجوهكم ...

... بارعه بالتمثيل انتي مو ام انتي انسانه وضيعه الحيوان من ياخذون ابنو يهاجم بشراسه بس انتي سلمتينه وبعتينه وهسه جاي تحجين بلامومه...

دريتي شكلنه اشربنه شلون ربينه اختنه وحدنه دريتي بثريا مرت بمراهقه وتريد ام تعلمهه جنتي لاهيه ويه رجلج واحنه عشنه بالظيم لابارك الله بيج ولا بامومتج...

ثريا... ايوب يريد يهجم عليهه بس اوس مانعو وهي تتوسل والحجيه تهدي بيهم سمعت صوت الباب واني گلبي زادت دكاتو فاروق شراح تسوي وانت ادحكهه بنص بيتك ..

دخل فاروق كال السلام عليكم ووكف مثل الاسد ايوب واوس وكفو بصفو وهو صوب نظراتو اتجاهه وعيونو تحجي كلام وكلام محد يعرف يفسرو...

دموع التماسيح والتوسل وتناشغ وهي تصيح ارحموني امكم انه مظلومه ...

فاروق واكف وصافن عليهه كلهه تفاجات بردة فعلو ايوب من اول ما سمع بيهه انفجر الا هو عبالك يتذكر الماضي وجاي يستعيد بي بهاللحظه...

... فاروق سامحني انت واخوتك انه انظلمت واهلي هددوني يكتلوني ولازم اعوفكم ...

فاروق.. كلمه والثانيه اذا نطقتيهه اجيب السلاح وامشطج بي الدرب الجابج يردج ...

انتي مظلومه واحنه ظلمناج وكسرنه ظهرج اتزوجتي وخلفتي وعشتي الحياة الي تريديهه وشبعتي وزياده

اسمعيني زين قسما بذات الله اذا عتبت رجلج الباب ولو مرتي من الشارع ما اتردد بكتلج ماعندي شي اخسرو بس اخذ حيفي منج ...

ولد وبنت ماعندج ولا اتشرف بيوم اكعد احجيلهم عنج ولا تحاولين ويه اي واحد من عدهم لان راح تلكيني بوجهج ...

... فاروق انه .....

... اطلعي برا قبل ما افقد اعصابج واتحمل ذنبج بسرعه اطلعي...

ثريا... جان فاروق يحجي بنبره غضب بسرعه طلعت وهي تبجي رادت الحجيه تحجي ويا بس ما انطاهه مجال كال الصار تنسو اعتبرو هاي الساعه جانت حلم وكعدتوا...

حجيتلو رحت للمجمع واستلمني دك رزايل جبانه شلون تكملين حياتج وانتي هربتي من اول موقف واجهيهه وحطي اصبعج بعينهه ...

ياثريا ما اريد تكونين ضعيفه ابد صيري قويه وواجهي ودافعي واخذي حگج بيدج محد يدوم وهاي دنيا حته ماتبقين تعانين...

اكلت المقسوم من عندو وطلعت بدلت احس نفسي ميته تعب اليوم كلهه مغامرات بالنسبه الي قيس وادهم باجر يجون ونيران لازكه يم المرايه ...

نيران...

لبست نفنوف طويل بي حبل من الخصر وطويل زيتوني وبي ورد ناعم ابيض ولبست الحجاب وكاعده انتظر جيه قيس اشتاقيتله حيل ...

انفتح الباب وتلكتهم ثريا تبوس بيهم ويتشاقون وياهه وامنيه ركضت ع ادهم الي داك شعره صفر ومخفف اللحيه والشوارب بدت علامات الظباط تظهر علي...

قيس مسمر اكثر بس نفس شكلو لان بعدو ما مباشر شافني واكفه بعيد يسلم وعينه عليه واني اباوعله وادنك ومبتسمه...

من وصل قريب عليه كتله الحمدلله ع السلامه ... الله يسلم گلبج وراح للغرفه ثريا والبنات يسون عشا واني افتر اريد اشوفه طب يسبح...

من طلع لابس تراك نيلي والخاولي ع راسه يفرك بشعره اشرلي بيده اجي يمه امشي بخطوات خجل وكفت قريبه علي واني مدنكه وميله ركبتي ...

قيس.. شلونج ياحلوه؟؟ زينه انت شلونك؟؟

زين اني مدام دحكتج صرت زين

كلامه يخليني ما اعرف شجاوبه ظليت ساكته كال شو محلوه وكبرانه هن عشر ايام هيج تغيرتي وكبرتي...

... هو اني حلوه من الاساس

...منو يكول

... انت كلت هسه شلونج ياحلوه..

ضحك وظل يباوعلي اي يابه والله حلوه وانعل ابيه الي يكول موحلوه...

صحتج شلونهه خوما تخربطتي؟؟ لا مابيه شي زينه الحمدلله...

احجي ويا وكلبي يدك سريع عبالك عنده سباق صاح ايوب علي وراح احس نفسي طايره مثل الفراشه شعور الحب حلو وخاصه من تحسي صادق ونابع من القلب...

كاعدين كلنه نتعشه وادهم يسولفنه ع كليتهم يكول من اخذونه للحلاق اجيت ارجع شعري ابو الصابون الركي راح ...

الحلاق يكص بي ويكلي شنو تخليله حلو وثخين مايدري حسن قدح هو السر كتلو شامبو ماموجود جابو من الخارج...

امنيه.. ليش تجذب راح تصير ظابط هم تجذب على الجنود...

... يابه دخيل هاللسان حالف الا ازوجج لسعودي الاجلح يوميه يكلي دبرلي مره...

... ياااا موهي بكيفك والله فاروق يسوي بيك مثل بابا ويطردك من البيت مو فاروق؟؟

فاروق... طبعا يكدر يحاجيج اطيح حظو حتلو ظابط نجماتو ماتشفعلو ...

... سمعت ديربالك والله اشكيك لفاروق وانت تعرف بعد ...

... اي سمعت بعد فاروق كال نكدر نكول لا بس اني اعلمج الزركه جنت ناوي اطلعج باجر بس مدامج هيج ظلي بالبيت اطلع رؤى ونيران...

حركت حواجبهه وارتجت ع رجله كالته ماتكدر لان اكل لفاروق علي مو فاروق يطلعني ويااا؟؟

فاروق..اي يطلعج طبعا ..

سمعت يا حظره الظابط اني امنيه وانت ادهم ماتكدرلي...

طكهه ادهم بضحكه عاليه وكال سوده بوجهك فلاح ع هاي الدكه....

اضحك وياهم وقيس صافن عليه لمينه المواعين وواكفه اغسل بيهم حسيت حركه وراي بس التفتت صرت بوجهه شويه واطخ بي ...

مد ايده اخذ كلاص وعينه عليه جاي متغير قيس وكلشي فاضح صار سويت نفسي اغسل ومامهتمه اله بس جذب كلبي واديه ورجليه كلهه تتراقص...

قيس.. لكيتي الكتاب؟؟ اااي شكرا؟؟ قريتي؟؟ قريت من عنده بس مو كله ...

نيران اريد احجي وياج كلمتين؟؟ اي كول..

ابوج اجر البيت الي بصفنه ويطالب بيجن واحنه كنالو اذا  يمنه اخذهن وهسه شيخ ناصر مكتفل بحمايتجن وراح نفتح باب ع بيتنه بس يظل بالي يمج.

... قيس اني ماريد اروح ولا اخواتي والله بابا ياذيني هم يسوي بينه مثل ماما من جانت الله يرحمهه سمعتهه كالت يريد يزوج رؤى وخاف الي يزوجهه هم يسوي بيهه هيج...

.. نيران موكلهه مثل ابوج انتي فاهمه الزواج غلط داخلج بريء ومامستوعبه كلامج بس صدكي الزواج موهيج...

احنه نظل وياكم منا لمن نلكه حل لان هو مصر ياخذجن ومانكدر نمنعو لان كل الي انطلبو ينفذو...

قيس واذا زوجني بابا شلون اني اخاف من عنده...

بسرعه كام من مكانه واجه عليه لزمني من اكتافي وخله ظهري ع الثلاجه هو طويل واني اباوعله حركته فاجاتني...

ممنوع تعيدين هالكلام انتي ملكي الي لا ابوج ولا عشيرته يمنعوني عنج انتي بعدج صغيره وما اريد اربطج بزواج ومسوؤليه بهالعمر...

نيران انتي الي ماتعيدين هالكلام كدامي ابد سمعتي...

هزيتله راسي بس احس النار تطلع من خدودي المصيبه موهنا المصيبه صار الكلام ويه دخول فاروق...

فاروق... قيس صديقك ينتظرك بالباب ونيران سوي جاي وانطي لادهم يودي...

خله قيس مايعرف وين يروح طلع بدون اي كلام واني اتمنيت الكاع تبلعني شكد بارد ولاكانو شاف شي ...

ثريا... طلعت من الصبح للدوام سمعت الهورن عبالي الخط وصلت للباب سمعت صوت فاروق يحجي ويه واحد وانه كل ضني راح...

فاروق.. يول خلصني منهه انه مالي خلك هاي السوالف حب وعشك البيه مكفيني وصلهه كلامي كلهه خلي تكطع رجلهه عن المجمع لاتنتظر شي من عندي..

... يول البنيه حابتك حيل وجميله والكل تمدح باخلاقهه وصاحبه شهاده اخت زوجتي واعرفهه والله راسك بارد منهه انطي لنفسك مجال الحب موحرام يجوز تحبهه...

... لا ما احبهه ولا راح احب سد هالموضوع ولاتفتحه بعد ...

ثريا... ضحكت من سمعت كلام فاروق حته ماناوي يحب ولا يريد ينحب اجاني الخط ورحت ونسيت باب البيت مفتوح لا اكدر ارجع كلت هسه اخوتي يكعدون ويسدو ..

نيران... واكفه اغسل بالمغسله واسمع الباب مال المطبخ انفتح صحت منو كالت اني ام فاروق...

طبت للصاله ووياهه بنيه جميله بشكل تطلع بكد ثريا او اصغر حيل حلوه واكفه صافنه عليهن كلهه نايمه والحجيه تصلي ....

كالت روحي كعدي الحجيه شبيج صفنتي هاي بنتي انسام ....

يتببببع.... متابعه شيقه

طبعا الجفاف بهذني الصور الي قسم من تعليقاتكم كارثه شكد ارتاح واضحك من كل گلبي من اقراهن...

ازمة ضمير ... البارت السادس عشر

«للكاتبه روزايه»

اسعد الله مسائكم بكل خير ..

الرحمه والغفران لشهداء العراق والشفاء العاجل للجرحى ونصرُ قريب...

نيران.. خلت جنطهه بالكاع وكعدت هي وبنتهه ويباوعن لارجاء البيت ثريا بالدوام والولد بالشغل بس ادهم نايم رحت صحت الحجيه جانت تصلي ...

الحجيه.. هاي شتريد المره الا تخليهم يصيرون موخوش اوادم سترك ياربي لمت سجادتهه وكامت تعدل بالفوطه مالتهه وطلعت ...

ام فاروق.. صباح الخير حجيه شلونج؟ هلا هلا ع الله ..

... حجيه انه اريدن وكفتج وياي ولدي مايريدوني وانه ماعندي غيرهم رجلي مات وماعندي غير هالبنيه حصلتهه من عندو ...

دولبني الوكت وابوي وامي ماتو والبيت تقاسمنه ومن جان رجلي عدل اخذت حصتي واشترى بيهه سياره وراحت وكاعده ابيت ايجار والمؤجر طلعني لاعندي فلوس ادفع ولا عندي دار اكعد بي...

الحجيه.. يولي يا سناء من اطلكتي عفتي 5 ولد وراحتلج الحجيه حليمه وتوسلتلج وطرديهه زامطتي باهلج واخذتي الغايب والحاظر وعفتي كوم لحم وراج روحي لاهلج شعدج جايه عليهم...

... حجيه منيلي اهل اخوتي كل واحد دارو ومايقبل يلفيني نسوانهم مايقبلن واخواتي بعيدات وعدهن رجوله بس انه طلعت خايبه ..

... انه هنا مره خطار ما ادخل بيهم ولا اكعد احجيلهم باطل وامدحج كدامهم دحكتيهم باول ما اجيتي خايبه روحي لاخوتج ولا تبلين الولد بشرج ...

... لاتحرضيهم عليه موكاعده ابيت ابني وتغير بنفوسهم مالج علاقه طلعي منهه وعود اذا ماعاجبج الحجي ردي يم اخوج الشيخ تكتري ع جهه ...

نيران.. من سمعتهه حجت هيج ويه الحجيه بس اتعوذت من الشيطان شكد كرهتهه كلساع اريد احجي واكول اسكتي نيران مالج دخل شغله مويمج...

زادت بالحجي وكلساع ودكل للحجيه لاتتدخلين وسوت نفسهه مظلومه وبنتهه ابد ما ارتاحيتلهه اطك بالعلج وكاعده رجل ع رجل ومخليه كومه مكياج عبالك عروس ...

صاحت ع امنيه الكاعده ع الدرج كومي جيبيلنه مي ماتعرفن تقدمن لو بس حاطيجن يعلفون بيجن ...

امنيه.. ماعدنه مي وفاروق كال مايستخدم الا للعمل الصالح ...

... من كون عابت لهالحلك تربيه سزز كومي لا اشعل صفحتج شلون السان زفر...

.. بيبي ليش ماتنتظرين فاروق والولد وهم يحجون وياج احنه مالنه دخل ومي واكل ماعدنه احنه مافاتحين فندق ونخدمكم...

اسكت بامنيه ولاتخاف انهدت بيهه وهذيج السانهه زفر والحجيه تخزر بامنيه ودكلهه اسكتي بس ولايمهه كل حجايه تذبهه تخلي سناء تفور...

امنيه.. عفتهه تحجي ورحت للغرفه اكعد بادهم مخلي المخده ع راسه ونايم ع بطنه كعدته ادهم ادهم امك هناا ماكو جواب...

جريت المخده من عنده يله فز مايستوعب شحجي كتله امك هنا هي وبنتهه ...

... يول ام عكشه طلعي منا انه منيلي ام...

.. كوم والله اجت وطردهه فاروق ذاك اليوم وهسه هم اجت وتصيح وتتامر علينه وع الحجيه..

... اطلعي هسه اجي ...

طلعت كعدت ع الدرج وهي ماخذه راحتهه لو يقبلون الا اروح لفاروق بس خاف يسحلوني مايتفاهمون ..

همست يم اذن نيران كتلهه اريد اروح اصيح الولد هاي راح تلزك..

... انجبي واكعدي مايقبلون وحده تطلع هم يجون ويطردوهه لا تتدخلين...

ياربي شلون بامنيه كل حجايه تشمرهه ع سناء اكبر من عدهه طلع ادهم من الغرفه وهي كامت وفتحت اديهه تريد تحضنه واكف اباب الغرفه وهي تبجي وتمسح بدموعهه ..

ادهم وليدي اروح فدوه لهالطول الله لا ينطي الحرمني منكم طول هاي السنين..

ادهم.. ماشاء الله جنت راسمج بغير صوره ابالي لان ما اتذكر شكلج ابد بس للاسف لوظال ع الصوره البالي احسن بجثير...

شعندج اجيتي محتاجه افلوس جان رحتي للمجمع واطلبي مناك ترى ربتنه حليمه ما انرجع اي واحد يريد مساعده ...

مره كالت خاف تجي امكم وتطلب مساعده من عدكم ساعدوهه لوجه الله ومبين عليج ادورين فلوس والا ما اجيتي تقدمين استعراض وبطولاتج ابيتنه...

سناء... ادهم انه....

... اكدر اردج هسه واجرج من ايدج والگحج ابيت رجلج بس تعلمنه لازم ناخذ شور فاروق ورايو وانه اعرف بي يضوج من يسمع اسمج انه راح اساعدج واروح للمجمع اصيحلج فاروق وقيس واحجي وياهم...

طلع ادهم وهي صافنه بردة فعلو الحجيه واحنه ساكتين وهي تبسبس ويه بتهه امنيه راحت سدت المي ومنين ماتفتح البوري ماتلكه والثلاجه والمجمده اتذكرهن بيهن قفل رايحه قافلتهن حته احنه عطشانين وماترضه تنطي المفتاح ...

مرت ربع ساعه وانفتح الباب بسرعه طلعت لكيته قيس وادهم وايوب تعداني وفات اسمع صوت عالي هي تحجي وقيس اول مره اشوفه هيج عصبي تخبل عليهه ...

واكفه وصافنه شلون يهينون بيهه وهي ولا مهتمه مانحس غير ايوب يطفر عليهه ويخنكهه من ركبتهه بنتهه خبصت الدنيا بالصياح وايوب لازم ركبتهه صار وجهه ازرك...

جره قيس من عدهه وهي تكح وتبجي ودكلهم حقكم يابزر بطني تمدون ايدكم عليه ولكم انه امكم الله يحاسبكم ياويلكم من غضب الله ...

ايوب.. سكتوهه لاتسمعني صوتهه الج عين وتعرفين الله وتحجين ما اتشرف بيج ولا اريد ادحك وجهج وديربالج تعتبين الباب هذيج الساعه اكتلج وادخل سجن...

قيس... اطلعي من هين قبل لايجي فاروق مامستعدين نخسرو بسببج تعرفي اذا هدد ينفذ ومن كالج اخر مره ممنوع تعتبين بيتنه ع كلمتو خلي لنفسج كرامه واخذي بنت رجلج وروحي..

انسي بيوم عندج ولد لان ربينه وتعلمنه وكبرنه واحنه ماعدنه ام من يوم الطلعتي من البيت دفناج وانتهى كلشي...

... راح اروح يا بزر بطني بس راح تتندمون ع هاي الساعه واذكركم زين واطلبو السماح بحزتهه ودحكو امكم شراح تسوي..

ادهم.. شراح تسوين مثلا تزوجين الثالث لو الرابع وهم تلگحين ولدو الوحده مثلج هم تعرف تحجي الدرب الصد لا رد ...

نيران.. طلعت بغضب وهي ادردم وتسحل بنتهه ايوب حيل عصبي يمكن اكثر واحد بيهم دمه حار ادهم دار وجهه وطلع وقيس كعد ع القنفه لازم راسه..

تقربت يمه من شافني رفع راسه كال جيبيلي كلاص مي رحت جبتله واجيت كعدت بصفه والحجيه والبنات كامن...

... هاك اشرب لاتنقهر ذاك اليوم هم هيج سوت بفاروق..

... اني ما انقهر بس ع فاروق لايغرج وكفته وصلابته موضوع امي بالنسبه اله دمار ولا يقبل نتقاسمه وياا..

... مدري شبيهه الناس كمت اشوف العجب تدري امنيه كوه سكتت وحته سدت المي مانطتهه تشرب..

... ابتسم اي سباعيه همزين احنه بالمحل والا فاروق مايتفاهم جان طلعهه ودمهه بطولهه هو ايوب وكوه منعنا....

صدك نيران ابوج اليوم يجيب غراضكم وراح يفتح باب علينه بس اكو موضوع اريدج تسمعيني زين وتصيرين عاقله ...

ابوج يريد يتزوج وعمتي ام سالم هاي الحيه مدبرتلو وحده من جيرانهه وابوج قابل وع الاكثر يتزوج ويجيبهه وياكم تكعد..

... شنووو قيس بابا يتزوج وتصير عدنه مرت اب مثلكم وتزوجنه غصب ...

.. هم كالت زواج يولي انتي ليش دماغج يابس وين رحنه احنه ويزوجكم غصب مايكدر يخطي خطوه وحده ..

... كل مرت اب تكون ظالمه وراح تعذبنه اكثر من بابا هي ماما وجانت ماتكدر تحمينه من عنده..

.. ما اعرف شكلج يجوز تطلع خوش انسانه بس لاتعتقدين نتخلى عنكم مدام كدام عيونه مايكدر يسوي شي هسه خلي يجي وعود نجربو يوم يومين..

... انت راح تروح بس هالاسبوع وكلكم اداومون يعني نبقه وحدنه..

.. بهاي حقج حته فاروق احتمال يرجع يكمل دراسه واحتمال اخوتي ينشغلون عنكم وانه اصلا بس ٦ اشهر وياخذونه للخارج تدريب ع الطائرات يعني كدامنه طريق طويل يانيران..

... وشكد تظل هناك واني اظل اصارع ويه بابا ؟؟

ما ادري شكد نظل بس قبل ما اروح اخطبج من ابوج يله حته بالي يرتاح ماظل افكر ...

بعدنه نسولف واجه فاروق بس دخل كام يصيح لاول مره اشوف هيج احترام وكانو ابوهم واكثر.

يول قيس العتب عليه اعتمدت عليك شلون تعوفون المجمع فارغ كتلكم ربع ساعه منو ينزل الحمل حته من انتم هنا مامرتاح.

قيس.. ع كيفك فاروق صارت شغله وطلعنه وقفلنه المجمع وهسه راح اوس وايوب..

... يا اوس وينهم اخوتك السيارات واكفه بالباب تريد تنزل وحضراتكم كل واحد بجهه شنو الخلاكم تعوفونه وتهجون كلكم لا انت ولا اخوتك يرتاح بالي منكم .

... هسه راح اروح وادحكهم شجاك عصبي كتلك صارت شغله ورجعنه امك اجت والبنات وحدهن واجه ايهم كالنه وتلاغينه وياهه وايوب عصب وطلع...

... سكت بهدوء من يسمع بطاري امه ما ادري ليش هيج يهدء كال شوكت اجت وشعدهه..

... تريد تكعد هنا وجايبه بتهه وياهه وطردناهه لاتهتم ياب راحت وبعد ماتجي..

.. ليوين تريد توصل الا ادخل بخطيتهه يله ترتاح يول انتم حجارات بعقولكم من طلعتوا غير تقفلون الباب بنات وحدهن شلون تعوفو مفتوح...

... ايوب طلع اخر واحد وادهم بالبيت يعني ماراح نحسب احساب تجي مره ثانيه...

فاروق.. نيران وصي اخواتج واني اوصي الحجيه ممنوع ينطق اللسان حرف كدام ثريا كانما مادحكتو شي..

... هزيتله راسي بمعنى اااي ورحت للغرفه وصيت اخواتي والحجيه ما اعرف غايته شنو وليش مايريد ثريا تدري...

بيومهه لليل يله رجعوا الحجيه فارضه حصار علينه ماتقبل نكعد وناكل وياهم عازلتنه وحدنه وهم وحد دكول شباب حرمتنه من كلشي بس اسمع الاصوات ...

ثريا... جده خلي البنات يطلعن خطيه حابستهن من العصر لسه ترى اخوتي خوش زلم عليهم العتب ...

الحجيه.. خايبه كومي منا شمعرفج انتي انه اعرف واقره الگلوب اخوتج شباب ومن يدحكون عليهن شحلاتهن جنهن العيد يظلن ابالهم ..

... لا موهيج جده والله مثلي حاسبيهن وبعدين اذا واحد راد بنت عمه مابيهه شي ..

... كومي منا يول لا اكسر اسنونج اكلج هيج تكليلي هيج خايبه بنت حليمه واحد من اخوتج عينو على هاي ام شعفه نيران...

وانه ما مرتاحتلهه احسهه مثل اسمهه نار وتحرك القريب عليهه ابعديهه عن اخوج لاتصيرين غمه...

... قصدج قيس موو ترى هو رايدهه وع ساعه يخطبهه ..

... اااا ومن نكون خفه هالحلك مكيفه اكلهه البنت ادمر اخوج دكلي يخطبهه والله هذا قيس مظلوم وجنه راح يظلم نفسو بايدو من ورا هاي الصفيره...

... ياا جده نيران حبابه لاتحجين عليهه وفقيره وهي الطلعتنه الوصيه ..

... عود يجي الوكت ودحكي هذيج الساعه حبابه لولا كومي سويلنه جاي حامض هاي امج اليوم ورتني ور ...

... امي!! ليش شجابهه شو محد كال شوكت اجت..

... ااااخ منك يلساني وعظت اصبعهه حيل .. عود كلت ما احجي دكومي خلي نكعد يم اخوتج وطلعيهن هذني لايكولن الحجيه حابستنه...

... امي شجابهه طلعنه كعدنه بالديوانيه اخوتي كلهم موجودين يتابعون لعبه ليفربول ومانشستر ستي ومندمجين وانه اجيت كتلهم فاروق شو ماكلتو امي اجت...

فاروق.. لادكوليز امي شكم مره اعيد واكول ماعندج ام وبعدين منو كالج.

الحجيه.. انه ياجده فلت لساني وكتلهه بس طمني بنيتي راحت وماتجي بعد كله من هاي الزركه الجلحه ..

امنيه.. جده لاتعيبين عليه اصلا اني اشبهج لان انتي اخت بيبي حليمه واني اشبه بيبي وبعدين شعليه اني بس رادت مي وما انطيتهه..

... يولو هذني السعالو ال3 راح يخبلني جده فاروق ماكو من رفجانك( اصدقاءك) واحد يريدله مره زوجهن وخلصنه ..

... ليش نايمين ع گلبج وبعدين بعدج باسم الله حجيه وبديتي اطيرين بينه عود جنت ناويه اكل لفاروق ناخذج يمنه مدام طلعت نيتج هيج ما اريد..

... دحك السانهه ماكل غواربهه ولاجنج فعصه هلكبرج ...

فاروق.. لا حجيه هاي امنيه العزيزه وسباعيه وما نزوجهن لياهو الجان بس الي يستاهلن..

... عجل من كون هيج زوج هاي العيطه نيران لا شغل ولامشغله بس تكرك سوالف ...

نيران .. بيبي منو شاكيلج عليه اليوم باديه بينه بالسره اني ما اتزوج هسه وراح اظل ع گلبج. .

فاروق.. نيران باجر تنتقلون للبيت ابوج اكل راسي وكلشي تمام وفتح باب علينه حضروا غراضكم حته تنتقلون ...

نيران.. ماشي محضريهن ... ماجنت حابه اعوف بيتهم بس هاي حقيقه ولازم انطبقهه بابا ماراح يعوفنه يمهم طول العمر ثاني يوم اخذنه غراضنه وانتقلنه بيت مشتمل ومفتوح باب ع بيت عمي بحيث كلساع رايحين عليهم ..

ماحاسبنه ولاحجه ويانه بس كال اني راح اتزوج وانتن عليجن السكته لاتسمعني صوتجن وكل شي تريدنه تروحن تاخذنه من فاروق ...

وصدك كلشي صار براس فاروق وهو مامقصر ابد وبيوم منهن اجه بابا وجايب ست الحسن مرته فريده وما ادراكم مافريده ماتحجي ويانه ولا احنه بس كله من جوه ليجوه بس تزعل وتخلي يصيح ويغلط بس مايضربنه ...

رحت اريد احجي لبيت عمي لكيت ثريا تبجي كالت قيس وادهم راحو بساعتهه شبعت قهر كال اسبوع واروح واني نسيت روحته ولا هو اجه سلم عليه ...

اخذت ع خاطري منه كعدت يمهه وهي تحجي الظاهر انتبهت عليه وعرفت حالتي كالت نيران لاتضوجين قيس طلعت سفرته فجأه ويومين ويرجع وماكدر يدك الباب عليكم زحمه ...

ما اعرف تبرر لاخوهه لو صدك ماكدر التهيت وياهه ورجعت لبيتنه فريده ماتشيل الورده من الكاع من طبيت سمعت صوت نسوان ...

لكيتهن عماتي 3 يسولفن ويضحكن سلمت عليهن وكعدت ما اعرف بيمن يحجن بس جان موضوع خطبه عمتي ام جاسم دكلهه اخليهه بعيوني بنت اخوي هي ...

ظليت مركزه وياهن افتهمت جايات خطابه بس عليمن ما ادري كالتلهن فريده يجي فلاح واشاوره وراحن ..

ماعدنه جراه نسالهه لان شديده حيل بكلامهه لذلك سكتنه ووحده تسال الثانيه المن تخطب عمتي وشتريد...

لليل اجه بابا وصاحنه كلنه بده يحجي حكم ومواعظ كال انتن كبرتن ومصير كل ابنيه الزواج وانه اشوف احسن شي تزوجن حته ما اطلعني ظالم وتخلن ولد عمجن يستقوون عليه...

اليوم عمتكم ام جاسم اجت خطبت وحده من عندجن لابنهه رابح بس ماحددت منو كالت اني اريد اي وحده كلهن حلوات وماقاصرات...

وانه قررت انطي نيران لان جبيره ورؤى وامنيه بعدين حضري روحج بويه وانه ارد الخبر لعمتج...

الولد خوش ولد وشاغول وموغربه ولد عمومتي حته امجن يطمئن بالهه وترتاح ...

نيران.. بابا اني ما اريد اتزوج وما اريدج عمتي ام جاسم ولا ابنهه بس جنت احجي واغلي من الداخل ..

... اسسس ولاكلمه عبالج نسيت عملتج لاتخليني اذبحج وادفنج رجعت كلمه وانطيتهه مره رجلج اكسرهه واكسر ظهرج بس اسمع حرف من عندج..

ما جاوبته لان النقاش ويا ميت بس دمعتي ع خدي صاح بيه اكوم كمت للغرفه واني ابجي اريد اركض لبيت عمي بس ما اكدر...

صار الليل دهر عليه لثاني يوم يله كدرت اروح من طلع بس طبيت لكيت قيس واكف يشرب مي من شافني التفت ونزل الكلاص اني درت وجهي عنه ...

قيس.. نيران شلونج؟؟ زينه وين فاروق ؟ بالمجمع ليش تسالين كولي شبيج؟ مايخصج اريد احجي وياا..

.. يولي الزمي السانج شنو مايخصك شبيج وجهج مكلوب وشرايده من فاروق؟؟

... كتلك ما يخصك اريد فاروق شكو تسال انت مهتم تعرف وما ادري بيك شوكت تروح وشوكت ترجع..

... صوتج يول شبيج رعنه عندي دوام لازم استاذن من عندج لو اجي ادك الباب على ابوج اكلو صيح نيران احجي شبيج؟

... بابا انطاني لرابح ابن عمتي ام جاسم اجت خطبتنه وكال انتي جبيره قيس الله عليك خلصني من عنده حتلو ماتزوجني بس لاتخلي اني ما اريد اتزوج..

كعدت بالكاع ابجي لزمني من زندي وكومني دنك راسه عليه وهو لازمني الغضب يشع من عيونه بس حاول يحتويني ومايبين علي..

نيراني يولي محد ياخذج من عندي لاتخافين ظلي ساكته ولا تحجين اي كلمه وارجعي لبيتكم هسه ويصير خير...

... تقشمر عليه انت بابا رجع خبر لعمتي وكال اذبحج بس تحجين...

... راح اكص السانج يولي امشي لبيتكم قبل ما انفجر بيج شنو اقشمر عليج زعطوط كدامج روحي نيران وسدي حلكج لاتحجين حرف واحد...

طلعت ابجي منا رزاله قيس ومنا الخطبه رؤى تلح عليه شبيج رجعتي تبجين بس ما اكدر احجي ظليت بالغرفه لحدما اجه بابا صاحني طلعت اركض كال حضري روحج راح يجي ابن عمتج ...

تخبلت كمت ابجي واتوسله الله عليك بابا لاتزوجني والله اظل خدامه بالبيت لمرتك بس لاتزوجني ابوس ايدك بابا اني ما اريد اتزوج ...

... سدي حلكج لا اكوم ادفنج توكفين بوجهي وتعارضيني والله لو مو هذوله الكلاب ولد عمج جان هسه موتج بديه ...

ما كدرت اوكف كدامه حته لا انكتل طبيت للغرفه ودموعي ع خدي قرر مصيري وحده وكلام قيس جذب بابا انطاني وانتهه وهو يكلي يصير خير ياخير يحجي عنه ...

كاعده بالغرفه ونسمع الباب اندك كمت ختلت ورا الكنتور ما اريد اطلع ولا اشوف ابن عمتي بين ما اني بوسط دموعي اسمع صوت امنيه وهي دكول نيران ولد عمي اجو وبابا عقج وجهه ..

..روحي سمعي ما اكدر اطلع اني امشي ولج كاعده والوب شراح يحجون وشيسوي بابا وخاف يزوجني وخاف تصير مشكله وخاف وخاف...

تقريبا نص ساعه وراحو الصوت ماسمعته لان كاعدين بالمضيف شويه واجتي امنيه واني اجر بيهه اريدهه تحجي بالتفصيل...

امنيه .. دحكي يولي ع كولت اهل الانبار من اجو بابا كام يضرب اخماس باسداس اشمتت بي شكد جبان ويخاف ..

كعدوا كلهم وعرف جيتهم علينه قيس يريد يفترس بابا بس كلساع وفاروق يخلي ايده ع رجل قيس حته يسكت...

فاروق.. عمي انت ابن شيوخ وتربيت على عاداتهم يعني ما اعتقد نسيت لو تعمدت تتناسى اصولنه...

كل ابنيه تجيهه ناس تشور ولد عمهه واحنه 5 موبعينك حته تصرف وتنطي بنتك بدون ماتاخذ راي واحد بينه عيب وزحمه نسمع من غيرك وانت مرجع كلمه...

انه هسه ماجاي اعيد عليك واعلمك بس الخطبه هاي تلغي لان انه رايدهه لواحد من اخوتي ومن تكبر اجيك واطلبهه من ايدك مو بالخفيه. ..

رجع خبر لام جاسم كلهه فاروق مايقبل وكلهه قيس رايدهه وكلشي انتهى خلي تروح ادور لابنهه من معارفهه...

فلاح.. فاروق مو هيج الحجي انه انطيت كلمه شحجي هسه ..

... احجي بكيفك نيران ما ننطيهه ولا رؤى ولا امنيه من يجي المناسب عود نقبل تريد ننهي عليهن بالقوه بعد بكيفك..

انطيتني وعد ماتاذيهن بس للاسف ما التزمت وتدري بيه اكدر اخذهن من عندك لذلك خلي الامور تمشي وارفض الخطبه ...

نيران.. وقيس شكال ولج ..

... ماكال شي موكتلج كلما يريد يحجي فاروق يخلي ايده ع رجله يدري باخو يمكن يكتل بابا من العصبيه وهاي يانيران تفركشت الخطبه...

... الف الحمدلله ارتاحيت وبابا حرف ماحجه لا كال ليش ولاشلون ثاني يوم من الصبح رحت لبيتهم تلكاني قيس بالحديقه دار وجهه عني ولا عبرني فوكاهه زعلان..

اني هم ما حجيت ويا رحت يم ثريا انسولف ونضحك والحجيه مونستنه المهم خلصت من الخطبه عود قيس يرضى..

ثريا.. نيران تعرفين شكد فرحانه فاروق قدم قانون ويه ايوب وانقبل وهسه داومو يولي فرحانه حيل...

...اااي واخيرا يعني راح يصيرون محامين ..

... اي الحمدلله الله عوضهم فاروق يداوم مسائي والصبح بالمجمع وايوب سوه استضافه ع الصباحي حته يبقه ابمكان فاروق واوس راح لبغداد وادهم مانزل بعد يكولون تدريب وقيس احتمال بعد يومين ويداوم...

جانن تحجي واللهفه بعيونهه والفرحه اندكت الباب وهي جانت تسوي كبه رحت اني افتحه صحت منووو

محد جاوب فتحت الباب جانن نسوان 3 كبار ووحده شابه بعمر ثريا وياهن كالن هذا بيت فاروق ...

يتبببع... احبكم

ازمة ضمير ... البارت السابع عشر

«للكاتبه روزايه»

واشتاگلك وارجع طفل

مايقتنع هو بعذر ..

ما يعرف فراگ،وهجر

كل اليشوفه يريده !!

حاجاته كلهن بس اله ..

وممنوع واحد يقترب

حاضنهن بچف ايده !

....

نيران.. جاوبتهن اي تفضلن هذا بيت فاروق..

... اجيناكم بدون موعد اعذرونه ..

.. لا هلا بيكم تفضلو.. مشيت كدامهن فتحت باب الاستقبال دخلتهن ورحت ع ثريا كتلهه اكو نسوان طبن بلاستقبال ...

ثريا.. غسلت اديه واحجي ويه نيران منين غير تعرفيهن شلون ادخلين ناس غربه روحي صيحي للحجيه يولي خلي تكعد يمهن بين ما ابدل دشداشتي وكع عليهه تمن...

نيران.. رحت صحت الحجيه راحتلهن واني طلعت مي واخذته كاعدات وعينهن ع الباب منو يدخل ماعرفت شيريدن يسولفن ويه الحجيه عن الوضع وسالفه الامريكان جانت منتشره. .

طبت ثريا سلمت وماتعرفهن هن عينهن عليهه ولانزلت ابد كاعده بصف ثريا وكلساع اكلهه منو هذني دكول علمي علمج...

حجت وحده بيهن كالت حجيه احنه جايين نطلب القرب من عدكم لابنه والله يحبنه اذا قبلت ثريا ...

الحجيه.. يا اهلا وسهلا يمه مصير كل ابنيه الزواج بس هاي وراهه حزمة زلم الشور يرجع الهم يجون اخوتهه ونسالهم واذا الكم قسمه تصير ...

... ان شاء الله تصير ابني رايدهه وحابهه واني تعنيت من بغداد واجيتكم صار مده يلح ومدح بيهه هوايه ما ننكر سألنه عليكم والكل مدح بيهه وباخوتهه ...

ابني وياهه بالكليه اسمه فارس ومعجب باخلاقهه الصراحه ماناوي يتزوج بس يكول خاف تروح وتنخطب واحنه شتريدون بس كولو والله نشيلهه بالصلوات...

... ونعم منكم الله القاسمه يصير منين اصلكم فصلكم..

... حجيه احنه بغداديين اب عن جد وهاي اول مره اخلي رجلي بلانبار واجي ماعدنه احد نعرفه غير ابن عم زوجي ساكن هنا...

اني معلمه وقريب اطلع تقاعد وابونه موظف بالصحه وعندي فارس واثنين بنات اصغر من عنده

فارس طلع قبوله هنا وع اساس ينقل بس جماعته وحب الانبار حيل وكال اكمل بيهه بس من صارت سالفه الطائفه والطريق يخوف قرر ينقل بس حمامتكم حالت دونه يكول علمودهه باقي واخاف اخسرهه..

حجه ويانه وماننكر رفضنه طلبه لان بعيده ومانعرفكم بس اصراره خلا ابو وعمامه يجون بنفسهم ويسالون عليكم وماشاء الله كاله ابو ونعم ما اختاريت ...

كل الي اساله يكول روح وانت مغمض تربيه 5 زلم ينحلف بكرمهم واخلاقهم وهذا الشي خلانه نتمسك بيكم اكثر..

ثريا...كاعده واسمع الحجي بس الخجل محاوطني استأذنت من عدهن وكمت احس نفسي راح اخرب من الخجل كلام امو حيل حلو ومدحهه ومبينه مثقفه ..

اجت نيران وراي بس مامستعده اسمع كلمه اشرتلهه تسكت وماتحجي وياي حرف ...

طلعن النسوان والحجيه استلمتني تقنع وترجع ليورا شيسكتهه اليوم..

ثريا.. جده الله عليج سدي الموضوع انه ما اتزوج واعوف اخوتي بعدهم باول الطريق..

... واخوتج صغار لو تنطيهم الممه؟؟ مصيرج الزواج اذا خوش ولد لا تظلين تتعقيلين..

...جده موقصه صغار بس اني الولد ما رايدته وبعدني مرحله ثانيه عليمن مستعجله اني افظل ترجعيلهم خبر ما موافقه..

.. كومي من هين لا اطشر اسنونج يجي اخوج ونكلو متعافيه الولد شاريج يولي يمه اني اكلج اقبلي بي هذا يحبج وترتاحين ويا اني دحكت بخيالي الولد يحبج ...

... خلي اكوم اكمل شغل وعود من يجون اخوتي الله كريم كمت من يمهه لكيت نيران رايحه لاهلهه..

كلام جدتي وموقفه الي ثبت بي نيته صافيه ودز اهلو من بغداد خلاني احترمه اكثر بس للاسف ما احمل اي مشاعر الو ولا افكر بيوم ابادلو مشاعر ...

وفعلا جنت مصممه ع قراري واجو اخوتي وكعدت وياهم الحجيه وحجت بس كالو القرار راجعلهه مدام ماتقبل خلاص ينسد الموضوع...

من خلال المريت بي بحياتي مؤمنه بقول تعالى وعسى ان تكرهو شيئُ وهو خير لكم ...

مرات الانسان عواطفه واحاسيسه تخونه ويظلم المقابل وبعد سنوات يكتشف نفسو كان شكو خاطئ وياريت ماتبع احساسو بهذاك الوقت...

من يومهه فارس اختفى ماصرت ادحكو بالدوام بعد مارجعنه الجواب سالت رجاء كالت سمعت من قاعتو انقل ورجع لبغداد وبهاي السنه انطوت صفحه فارس وانمحى عن بالي نهائيآ ...

نيران... رجلي طويله ع بيت عمي كلساع رايحه وما اشوف قيس ليش ماصدفه اريد ارجع لبيتنه شفته فتح الباب ودخل وكفتله بنص الطرمه وخليت ايدي ع خصري اريد اشوف عليمن زعلان...

طول ماهو يمشي اني واكفه ومتخصره واجمع الكلمات براسي بس وصل يمي ولا عبرني تعداني وكانو كدامه حايط واجتازه ...

التفتت علي صحت قيس اوكف ومشيت سريع علي جان واكف اباب المطبخ كتله انت شبيك وياي شمسويتلك فوكاهه انت زعلان؟؟

قيس.. منو كالج زعلان؟؟

.. لعد ليش ماتحجي ويايه وحته ماتباوعلي..

.. من تتعلمين الادب والسانج تكصري تعاي احجي وياي .

.. اني اسفه لان جنت منفعله وماعرفت شحجي بس مو معناتهه تزعل عليه..

... نيران انه ما احب البنيه الرعنه ولا احب طولة اللسان منثثث اسألج جاوبي لاتلفين وادورين بالحجي عدت عليج السؤال اكثر من مره وانتي تنترين بالحجي...

... اني اسفه لاتضوج من عندي..

... ما اضوج من عندج بس اكو شي اسمو احترام وكتلج ما احب طولة اللسان..

... ان شاء الله ماتنعاد شوكت تروح انت.

.. باجر اروح وما ارجع ورا شهر ديربالج ع نفسج ..

... خاف بابا هم يسوي بيه شي ويروح يزوجني .

... لا فاروق موجود اقل خطر تحسين بي انتي او اخواتج تعالي لفاروق احجيله..

... روحي لبيتكم هسه ابوج دحكتو راجع بالطريق..

... ماشي مع السلامه.. طلعت من يمه بس ضايجه احسه بارد اتجاهي مو مثل قبل اخذت نفس ودخلت للبيت لثاني يوم يله رحت كالت ثريا راحو اوس وقيس البيت بس ايوب وفاروق ...

بعد مرور خمسة اشهر..

ثريا... كاعده اعزل بغرفة اخوتي فجأه حسيت خنجر وانغرس بگلبي خليت ايدي ع صدري وكمت استغفرت ربي وطلعت..

ياربي احفظ اخوتي احس واحد بيهم بخطر گلبي مامرتاح دمعتي جرت ع خدي وصرت مثل ام الولد طلعت برا بالحديقه بس اريد المح واحد من عدهم...

جانت الساعه ب4 وربع الم قلق احساس غريب كلهه التمت عليه لاتليفون واخابر لا مرسال بس القلق مسيطر عليه...

اذن الاذان واني ويه غروب الشمس احس روحي راحت دموعي ليش تجري مثل الشلال گلبي ليش ينبض بقوه منو من اسودي بي شي ...

اظلمت الدنيا وصلت لاخر نقطه تحمل ركضت للحجيه تصلي كتلهه جده اخوتي تاخرو مارجعوا من الدوام جده كلبي يوجعني ...

.. كملت والتفتت عليه اذكري الله ماكو شي هسه يرجعون..

... لا جده مايتاخرون لهيج ساعه بس يأذن يرجعون واصلا كالو اليوم دوامنه قليل بس محاظره...

... كومي يمه صلي ع محمد اخوتج زلم قابل جهال وخايفه عليهم ..

... كلامهه مايطمني نار وتسعر بكلبي اخوتي بيا مكان وليش هيج تاخروا اختلط عندي الاحساس مدري افكر بالي سكنو بغداد مدري بهذولي...

الساعه تمشي وكل اثر ما الهم اخذتني رجلي لبيت عمي لكيته يتابع اخبار كتلو عمي اخوتي مارجعو وبالي يمهم ...

... العصر مريت ع المجمع معزل اليوم ايوب يكعد بي وكالو ماكو مافتح...

... عمي كلبي مامرتاح ولا اكو تليفون اخابرهم ولاهم عدهم تليفون الله عليك روح دحكهم خاف صاير بيهم شي..

... لاتخافين بنتي روحي لبيتكم ارتاحي هسه اروح ادحكهم خاف بالمجمع لو ازدحام الطريق...

ثريا.. طلعت اجر بنفسي مستحيل يتاخرون كلبي حاس اكو شي وحته عقلي يوافقه الراي ليش هيج كلبي مختنك اريد اخذ النفس مااكدر اجت مرت عمي والبنات وكلنه كاعدين ...

صارت ب9 واسمع عمي يصيح ثريا كمزت من مكاني تلكيته صاح حضري ملابس نضيفه لايوب..

... ليش عمي شبي ايوب ووينهم اخوتي ؟؟

.. ايوب متعارك وصديقو ضاربو سجاجين بس الحمدلله زين ومنتبه ...

... لطمت ع صدري وصحت ماعرفت شسوي يسكتون بيه وانه اكمز بالبيت مثل المذبوح اخوتي لا ياربي اخذني قبلهم ولاتفجعني بيهم...

اتوسل بعمي ويحلف مابيهم شي بس ايوب وزين احس صوتي تلاشى لازمه دشداشتو ونيران ومرت ابوهه يجرن بيه ...

احضر بملابسو ودموعي تجري غوشت عيوني من كدما بجيت منو الضاربه وليش ؟؟ اخذهن عمي وراح وانه للصبح المر على الناس ماغمضت عيني ...

باتن يمي البنات ونيران كاعده وياي ماعافتني بس احس كلبي نار اريد ادحكو واطيب جروحو يله يهدء گلبي ...

ثاني يوم صارت ب10 انفتح الباب ركضت حافيه جان سادو فاروق ورجلو وايدو ملفوفه وايدو الثانيه مخليهه ع بطنو ..

حضنتو صاح ااخ اشم بي وابوس وهو يكلي يولي مابيه شي لاتبجين ..

اخذني من ايدي فاروق ومسح ع راسي كال بويه ثريا عليمن هالبواجي موهذا كدامج مابي شي ...

طبو ليجوه واني احمد واشكر ربي ع رجعتو بسلامه مددت ع جربايه ادهم وخليت المخاد ورا ظهرو كتلو ايوب من سوه بيك هيج؟؟

ماقبل يحجي كال دايخ اريد انام بعدين مالحيت سديت الباب وطلعت لكيت فاروق يغسل وكفت يمو وبديت اسأل ...

... فاروق منو سوه بي هيج عمي يكول صديقو..

... اي صديقو ضياء الي يوميه كاعدين ساعات بالمجمع وعود هذا صديقو من زغرو ..

... ليش ع شنو وضياء اهلو خوش ناس وع كولتك صديقو من الزغر شلون يأذي؟؟

... حسب مافتهمت من اصدقاءهم تدرين باخوج مايحجي يكولون اكو بنيه جيران ضياء وضياء يحبهه وهي مانطيتو مجال ايوب مو يروح يمهم والبنيه حسب كلامهم حابه ايوب واكثر من مره ايوب صادهه بحكم حبيبة صاحبو بس شيجي من وراهن غير الاذيه مسويه علاقه ويه ضياء وكايلتلو ايوب يتحرش بيه وهذاك باع صاحبو علمود وحده هي تضحك علي...

من سالت ايوب حلف بروح حليمه ما منطيهه مجال بس هي سوت اعناد لان رفضهه اكثر من مره ووكعت بين الاصدقاء وهذا اخوج مايقبل يشتكي على ضياء يكول لو بمكانو اسوي اكثر وانه تعبت ياثريا انصح واعلم وما ينفع..

... بس هذا موصديق الصديق الحقيقي ماياذي جان اجه وعاتبو وافتهم من عندو؟؟

.. المشكله مو هنا حته من ضاربو ذاك راجع لبيتو وايوب ربعو جابو للمستشفى يعني مااهتملو وضاربو بدون علمه مامتوقعهه من عندو ...

انه كتلو هيج صديق تحذر من عندو الف مره مايتسمى صديق هذا عدو بس دماغو قافل ومايقبل حته احجي وسد الدعوه صد مجهول...

... فاروق لاتعوفو ظل ورا ترى ايوب كلبو طيب ومايعرف عدو من صديقو..

... ثريا انه تعبت لا من هم زغار يسمعون الحجي ولا من هم كبار ذاك ابو راس اليابس اوس مايقبل يسكن بلاقسام الداخليه مال الكليه وطالع بشقه وحدو وادهم متكاون ويه واحد وياا بالعسكريه كل واحد عمرو راح يتعده العشرين وشالعين كلبي...

.. تحملهم هم من زغرهم هيج فاروق لاتسوون بيه هيج بعد غير متت همزين ماثار بيه سكر لاتليفون واخابركم لاشي..

.. اي حقج لراس الشهر اشتري تليفون الج والي انه هم بالي ظل يمج ادري بيج تقلقين بس ازمة وعدت..

... الله كريم اصبلك شي تاكلو ؟؟

.. لا راح اروح للمجمع وعينج ع ايوب ب12 ذكري ياخذ علاجو ..

ثريا.. يوم صعب مر عليه كلما اتذكر قلقي اتعوذ من الشيطان اني جانت عندي بدايه امتحانات رجعت اقره وكلساع اروح اطمن ع ايوب  خلفله ع نيران نظفت البيت وسوت غده وراحت لان جانت رجليه ماتساعدني...

اتذكر جان عندي اخر امتحان عدنه ممثل الشعبه مرات بيني وبين نفسي اكول شخصيتو حلوه رزن وانيق مرات الكه نفسي ادحكلو بنظرات خاطفه...

كملت امتحان وطلعت ولان اخر يوم نتاخر نسوي برائه ذمه وهاي السوالف جان ازدحام ع باب رئيس القسم واكفه انتظر ما حسيتو غير يحجي بنبرات هادئه يم اذني كال ثريا انطيني البراءه وروحي انتظري برا اني اكملهه..

لاول مره يحجي ويايه كلشي بيه صار بحاله حركه سريعه كلبي يخفق بشده واديه استسلمت لكلامو وانطيتو الورقه ورجليه مشت سريع وطلعت من وسط الازدحام...

حاجي بنفسي ثريا انتبهي شجاج بس لاول مره يدك كلبي بهيج سريع وهيج احساس كعدت برا ويه البنات ومر وقت بحدود نص ساعه دحكتو اجه من بعيد واشرلي ...

اني بلحظتهه جنت شكد غبيه ليش كمت من مكاني هي ورقه جان اجه وانطاهه الي كدام البنات بس الواحد من شدة الارتباك مايعرف شيسوي..

كمت اخذتهه من عنو نظراتو ربكتني اسمو سلام اريد انطق اسمو واكلو ماقصرت الساني انعكد وظليت بس امتمت...

رجعت للبيت وانه احس بفرحه خفيه مسيطره عليه حته جنت مستعده اداوم بالمستشفى بالعطله حته التقي بي وادحكو يوميه...

رجعت لكيت ايوب كاعد بالحديقه صحتو تحسنت وامتحاناتو اجلهه ع الدور الثاني بس فاروق يمتحن...

اليوم اوس ينزل بس قيس وادهم مايكدرون لان كليات عسكريه الاجازه عدهم قليله ...

الوضع هادئ حيل وحياتنه روتينه استلمت النتيجه ناجحه وفاروق هم نجح بنات عمي زينات ابوهن مالو دخل بيهن خلصت سنه من عمرنه وانتقلنه لمرحله جديده ومانعرف المضموم شنو ...

.....

في الناصريه جنوب العراق تحديدآ بيت ابو عباس...

ام عباس.. اسماء يمه روحي لبيت اخيتج رجلهه عازم جماعته ودكول وحدي وجهالهه خابصين الدنيا...

اسماء.. ما اروح ولا اتحرك خطوه بس هاي تعرفوهه اسماء كنسي صخام امسحي وتريدين اخدم جابر رجل بنتج حته يتفرعن اكثر علينه ..

... دهر فرج السانج شطوله خلي يسمعج عباس الا يطيح حظج ولج انتي ليش ممذوره من دون اخواتج..

.. والله الي يصير براسه خير عدكم تسوو ممذور اسمعي يمه كل صلاه اتحسب عليكم منا لمن ياخذ حقي من عدكم ...

.. ولج يامصخمه تدعين علينه كومي نرجس ناوشيني النعال اريد اكطعه عليهه هاي الماعرفت اربيهه كومي من وجهي لا اشعل اهلج نفر نفر..

... اشعليهم واشعلي اخوتج هذوله الحشريه بناتهم يدرسن عادي بس احنه لا ممنوع لان شافوج ضعيفه واستقوو علينه المن احجي عباس الي مسدود حلكه لان اخذ بتهم لو انتي الي مسويه اخوتج ملائكه منزله الف رحمه عليك يابويه رحت وعفت الجلاب تنهش بينه...

... اليوم افرك حلكج اخوتي جلاب استلمني دك ع ظهري وتجر بشعري بس والله ما اسكت لو شما يصير فلتت نفسي من عدهه وكتلهه ..

تخليني اكمل كليتي اسكت والله اذا ما سكتو اخوتج اروح عليكم الشيخ العشيره واخلي يشوف حل الكم درست وتعبت وطلعت معدل واذا قبولي بغداد شنو عيني اول وحده اخر وحده اداوم هناك ..

بيت عمي هناك وادرس يمهم تخليني ادرس اسكت ماتخليني لوتصلبوني ع النخله افضحكم افضحكم كافي طكت روحي من عدكم بنات اخوج مدللات واحنه اليتامى مشلوعه كلوبنه...

كامت امي هدت عليه وين اليوجعج اكلت كتله ع هذا كلامي لسه اتذكرهه المشكله مو هنا تفزع مرت عباس اخوي وتكتل وياهه شايفين هيج ام تستقوي بجنتهه...

كل وحده بينه تهد عليهه مرت عباس جلبه مسعوره حشاكم تكتل وتعظ واذا مدينه ايدنه عليهه يجي اخوي السبع اخو مرته يكطعنه وصل وامي دكله حيل ...

كعدت بالغرفه جسمي يون من كتل امي ورابعه مرت عباس اخواتي الصغار  بالمتوسطه كاعدات يمي يحجن عليه ليش السانج امي بس انه تعبت ...

طلع قبولي كليه التربيه جامعه بغداد وماخلوني خوالي ادرس هناك وبناتهم كلهن يدرسن بس احنه يبطلونه ويزوجنه ابوي ميت من احنه زغار وعندي عمام اثنين واحد مات ورا ابوي وواحد عايش ابغداد...

احنه 5 بنات اثنين متزوجات واحنه 3 وعدنه بس عباس اخذ بنت خالي وشايخه علينه لان امي منطيتهه مجال مرات احسهه مرت ابوي مو امي...

جنت مصممه لازم اكمل دراسه والله ما اخليهم يخسروني مستقبلي كل اخواتي شاطرات بس ظلموهن بالزواج من الصغر اكلت الكتله وكعدت علما يجي عباس واحجي واحصل الكتله الثانيه...

ثريا... عدنه تدريب ودوام بلاسبوع مرتين وهناك الكا سلام ماتنزل عينو من عندي ابد بديت احمل مشاعر اتجاهو بس مابينت الو جنت خايفه ومتردده ...

بيوم من عدهن جنت كاعده وحدي اجت ابنيه اعرفهه تصير بنت عم وحده ويانه ممرضه كاعده تسولف كالت ثريا اخوج فاروق شلونو؟؟

استغربت من سؤالهه كتلهه زين بس وين تعرفي وليش تسالين علي؟؟

... شلون ما اعرفو مو بيتو جيرانه ويوميه ادحكو من ارجع من الدوام

... هوب هوب شجابو ع بيتكم يولي غير بيتو هو نفسو بيتنه خاف متوهمه تقصدين غير واحد...

... شبيج ثريا مو فاروق عماد جدتكم حليمه مرت الحجي شنو ماتدرين اخوج مومتزوج صار سنتين تقريبا ...

... حجت هاي الكلمه وكملت كلامهه بس ما اتذكر شكالت بس وكفت يم كلمه متزوج صار سنتين عدلت كعدتي وسالتهه باستغراب...

يولي اخوي مامتزوج متوهمه انتي هاي مشتبهه بغير واحد..

.. لا عيوني اخوج متزوج وبيتو بنفس فرعنه ومرتو صغيره وحلوه وماتطلع الباب بس هو يجيهه ومرات اندحك اهلهه يجون وحته عندو جهال اثنيه يخبلون...

البارحه رجعت الظهر وجانو كاعدين بالباب وهو اجه بسيارتو ومن دحكو كامو يصيحون ماما اجه بابا واني عبالي متزوج وساكن وحده...

... وحده وحده استبرق اخوي مامتزوج ولا بيوم فتح موضوع الزواج فهميني الله عليج متاكده اخوي...

.. اي والله اخوج حته ماما مره راحتلهم واجت متعجبه كالت مرت فاروق تخبل ولاعبالك مخلفه اثنين وحته جابت طاريج ماما كالت عندو اخت ثريا اداوم ويه بنت عمج كتلهه اعرفهه...

اذا ماتصدكين تعالي لبيتنه ويه الخط ودحكي بعينج شنو متزوك بسر ومخلف وماتدرون؟؟

...لا يمعوده انتي شو وين شمرتي هو فاروق يلحك يحك راسو حته يتزوج وبعدين ليش يتزوج بدون علمنه الف فاروق بالمنطقه...

... يولي قابل جاي اتبلى ع اخوج اكلج جيرانه وعندو عائله ومرتو ملتقيه بيهه وكل كلامهه فاروق وفاروق ومايقبل اطلع ويخاف عليه والجهال من يدحكو يصيحون بابا قابل صديق العائله ...

ثريا... ما اعرف شفسر كلامهه ادري باخوي غامض ومانعرف عنو اي شي بس مال يطلع متزوج بدون علمنه شنو الجابرو بالعكس فرحتنه الجبيره هو ...

افسر كلامهه براسي احس نفسي دخت وصار عندي دوار ماجاي استوعب كلامهه التفتت عليهه كتلهه تكدرين تاخذيني وياج بالخط وادليني بالبيت...

.. ميخالف ابو الخط هو بيتو بمنطقتكم تعاي وياي ودحكي بعينج ويوصلج لبيتكم...

... كمت وياهه وما اعرف شسوي وشلون قررت اروح وادحك اخوي وزوجته بعيني...

يتبببع... متابعه شيقه

ازمة ضمير ... البارت الثامن عشر

«للكاتبه روزايه»

كل شعر انشره بالمقدمه يحجي حال بطل من الابطال سواء باحداث حاليه او قادمه....

مــآ مَــره ذكروني وبچّوا ،؟

يذكروني ،؟ لــوو أصلاً نسّوا !

ولمَن يمُر إسمي بـ صدَف ،

محد تنخگه الحسرَه !

مرات ترجع ليورا ، مليون خطوه مــن الوجع

والسبب مُمكن نظره !

....

ثريا.. صعدت وياهه بالخط والقلق مسيطر عليه عبالك رايحه للجبهه ابرر بداخلي لا فاروق مايسويهه احنه نعتبرو قدوه ومثال النه مايطلع من عندو هيج شي...

ساعه الوم نفسي شلون اجيت بالخط ويه البنيه واني مجرد سلام بيناتنه وتصرفي غلط وساعه اكول لازم اعرف الحقيقه ...

لو درو اخوتي بتصرفي ماراح يقبلون كلساع اريد اكول نزلوني هين المفروض احجي لفاروق واستمع من عندو..

احجي ويه نفسي وين رايحه وشلون ادك الباب بصفتي شنو وشريد اكول التفتت على البنيه كتلهه شلون ادك الباب بحجه شنو؟؟

... انه ادك الباب بحكم جيرانه بحجه امي دزتني على شغله انتي بس دحكي وتاكدي...

وصلنه لشارعهم ونزلنه ابو الخط بالباب مالتهم وظل ينتظرني هي دكت الباب واني اترقب شراح احجي وخاف يطلع فاروق...

صاحت منوو؟؟ اني هيام بنت ام عمر...

ما اكدر افتح الباب تفضلي رايده شي؟؟

التفتت عليه انه جاي ادحكهه لازم تفتح الباب رجعت هيام حاجتهه عيني ام عبدالله امي دزتني ع قنينه غاز ماعدكم؟؟

اسمع خطواتهه اقتربت ع الباب وفتحته شويه وصارت ورا كالتلهه تفضلي اعذريني فاروق مو بالبيت وما اكدر افتح لاي واحد...

دخلنه بالطرمه وكعت عيني عليهه بنيه صغيره بعمري او اكبر مني بقليل عبالك كيمر عرب بياضهه موطبيعي ملامحهه زينه حلوه والشعر اميش صدك حلوه...

تحجي ويه هيام واني ادحك عليهه واحفظ معالمهه كالت لهيام اعذريني والله ماعندي بس وحده ع الطباخ نص ساعه وتعالو عليهه بين ما اكمل الاكل...

هيام... لا شكرا كملي ع راحتج حته كوه دزتني امي كتلهه فشله خاف فاروق بالبيت...

... شويه ويجي علما يروح لبيتهم ويجي ...

.. ماعرفتج ع البنيه صديقتي نزلت ويايه ثريا اسمهه..

.. اهلا وسهلا تفضلو ليش واكفات بالباب..

... لا ما انريد انشغلج غير مره اجي يمج...

... لا عيوني تفضلو انه ليل نهار وحدي واضوج وما اعرف احد من الجيران بس انتو...

ثريا.. اصرت الا نفوت وانه كلبي يفور كلساع واريد اكلهه انه اخت فاروق اصير حماتج بس ماتطلع من عندي ..

دخلنه بالديوانيه كعدنه بالكاع لفت انتباهي صوره مخليهه ع الحايط اعرف صاحب الصوره يصير صديق فاروق المقرب من الطفوله اسمو عمار...

جابتلنه مي وعصير وهيام تسولف وياهه وانه عيوني تفتر عليهه وعلى بيتهه نظيف ومرتب كالت الجهال نايمين اركض وراهم اموتيني...

هيام.. اريد اسالج سؤال بس خاف بي احراج؟؟

... لا تفضلي ..

.. فاروق ماعندو اهل شو ما اندحك عيالج يجون عليج شنو ماعندو اهل...

... لا عندو اخوه واخت بس ضروف تحكم وما يكدرون يجون ... حاولت تغير الموضوع والتهت بالسوالف ع الجهال الوقت تاخر استاذنه منهه وطلعنه...

اول مره اخطي خطوه بدون علم اخوتي واول مره اكتشف اخوتي عدهم استقلال ويكدرون واحد يضم عن الثاني ...

وصلت للبيت متملكني الياس ليش هيج سوه فاروق عندو مره وجهال وضامهم مومن شيمهم هذا التصرف...

احس نفسي بدوامه التفكير لكيت ايوب طالع هذا الثاني راح يخبلني عود مريض واوس جاي وطالع وبس الحجيه كعدت يمهه واتذكر كلامهه من حجت ع حياة اخوتي ....

ورا العشا كاعدين وعيني ع فاروق كلساع اريد احجي واسكت كامو كلهم اخوتي رادو يطلعون قويت نفسي وحجيت كتلو...

فاروق اليوم اكتشفت شي خاص بيك ... اندار عليه وكالو شنو؟؟

... انت متزوج وعندك اطفال اثنين والتقيت بمرتك وحجيت وياهه...

ادحك ع اوس وايوب صوبو نظراتهم ع فاروق ركز بوجهي وكال وين التقيتي بيهه؟؟

..يعني صدك انت متزوج واحنه ماندري؟؟

فاروق...سألتج جاوبي وين التقيتي بيهه؟

... عندي صديقه اعرفهه وكعدت احجيله التفاصيل كلهه وشلون رحت وكعدت يمهه وحجينه...

بعدني اسولف وما احس غير الراشدي اجاني من فاروق فر وجهي فر لاول مره يمد ايدو عليه وبوسط اخوتي...

المشكله اخوتي ما حجو حرف ولا ادخلو لزمت خدي وادحك بوجهو وعيوني مليانه دموع يضربني فاروق لان اكتشفت زواجو...

فاروق.. مع الاسف جبرتيني امد ايدي عليج هيج ربيتج وعلمتج تصعدين ويه وحده غريبه واطبين ابيوت ناس ماتعرفيهه كدامج انه وتعاي احجيلي واعرفي الحقيقه...

... انه بس ردت اتاكد من كلامهه..

.. جان سالتيني ماتصرفين ع هواج هاي المره صارت المره الثانيه اذا انعادت وصعدتي بخطوط غريبه تصير موخوش سمعتي لو اعيد...

الحجيه.. خايب مو هديت ع البت اكعد احجيلنه كلامهه صح وانتم شو ساكتين وما جنكم مستغربين بسلا تدرون وسكتو...

فاروق.. ما مستعد اكعد اشرح بعد عملة ثريا روحي لغرفتج وهذا الموضوع تنسي ...

ثريا.. طبيت للغرفه وبجيت بالم شلون ضربني فاروق ولاول مره يسويهه ظليت ساعه كامله كاعده وحدي وابجي انفتح الباب واجتني الحجيه..

... يابنتي عليمن تبجين تصرفج غلط وتصرفو هم غلط بس تعرفين اخوتج يخافون عليج من الهوه الطاير ...

.. جده اخوي الجبير طلع متزوج وما ندري وفوكاهه ضاج لان رحت ودحكت مرتو...

... خايبه السانج جنه السان اغراب ما يطلع صوتو بس من اكو شؤم اكعدي خلي افهمج هسه حجالي...

هاي مرت صديقو اسمو عمار يكول اقرب واحد الي من زمان بالسقوط انكتل ببغداد وراح شبابو وعافهه حامل بتوم...

وهي البنيه تصير اخت صديقهم الثالث يعني رجلهه واخوهه اصدقاء فاروق ورا ماميت رجلهه وجايبه التوم عيالهه رايدين ياخذون الجهال لو يزوجوهه لحماهه معوق ودماغه موصاحي ...

واخوهه واكع ع فاروق وكايلو لخاطر عمار احمي جهالو وعائلتو واعقد عليهه لان ابو عمار يعز فاروق جثير وموافق يعقد عليهه ...

وهاي سنتين هو مسؤؤل عنهم ويكول مايوم بتت يمهم والبنيه حاسبهه مثل ثريا واخوهه مسافر يشتغل بلاردن السنه يجي وبس يجي يطلكهه وتكعد بجال اخوهه لان عمتهه وعمهه ابو عمار ماتو وبعد محد يطالب بالجهال...

ثريا.. جده البنيه تخبل وصابغه الشعر معقوله اخوي ماتدني نفسه عليهه .

الحجيه.. من كون خفه هالحلك يكول مايوم طخيت ايدهه معتبرهه مرت صديق عمرو راد يحفظهم وانتي عقلج مشيطن ...

... عجل ليش ضاج ومد ايدو عليه؟

... تصرفج غلط يمه احنه بوضع الناس تخاف من ابن عمهه شمدريج البنت كلامهه صح لو تريدلج مكيده وتوكعين بيهه ...

هذا الموضوع سدي وماتحجين بي بعد فاروق مامتصرف غلط من مزوجهه اخوتو شهود دحكتيهم شلون سكتو كلهم طلعو يدرون حته ادهم بس ستر للبنيه وانتي صغيره جنتي ماحجو الج ..

.. هاهي راح اسكت جده انه راح انام لان تعبانه فرشت فراشي ونمت ودمعتي ع خدي مكسور خاطري من فاروق ...

بين الغافيه وبين الكاعده حسيت على بوسه انطبعت ع خدي فتحت عيني دحكتو فاروق ثاني ركبتو يم راسي مد ايدو جوه راسي ورفعني لصدرو ...

ردتهه حجه حته ابجي مسح ع راسي وكال عسى الايد انمدت عليج مكسوره بس تصرفج غلط وتدرين بيه كلشس والا انتي ما اقبل يصيبج مكروه ...

ماحجيت شي باسني من راسي وطلع وانه غطيت بنوم عميق ...

ثاني يوم كعدت من الصبح سويتلو ريوك كعد صبح عليه مافتحت موضوع اتريك وطلع كعد ورا ايوب خليتلو الريوك وكعدت كدامو مدنك ياكل واني احجي ...

.. ايوب من شوكت تدرون بزواج فاروق؟؟

.. شبيج لحيتي يولي هو شكم شهر ويطلك بس ضمن جهالهه لخاطر اصدقائو احنه ندري بيومهه اخذنه ويا وطلب من عدنه مانحجي لان مابيهه داعي ...

... يعني انت مقتنع يطلكهه احتمال يوثق زواجو بيهه..

.. صار سنتين جان وثق ماننكر هي حابتو ومحاوله اتجيبو لطريق بس ماحاجه اعلمج ع اخوج مايهزو ريح...

... زين انت ليش ماتشتكي ع صاحبك هذا عدو..

... ثريا اليوم شبيج كاعده من الصبح توليتينه واحد واحد ما اشتكي علي لان مالو ذنب الصوج بتربيه الحبهه ...

... بس هاي تكدر توكع بعد وتحجي غير اشياء ويصدك ..

... اي متوقع هذا الشي لان صار سنه تحاول واصد بيهه وضياء يحبهه من طرف واحد ماكدرت احجيلو كلت يضوج وياخذ موقف ماتوقعت راح تلتف علي وهيج توكع بيناتنه...

... الله يستر بس اخذ الحذر من عندو ..

... راح اروح ورا فاروق عود كعدي اوس يجي ورانه مويظل نايم اليوم عدنه مسواك...

... طلع ايوب واني رحت بدلت وانتظر الخط يجي دوامي ب٨ ونص تدريب بالمستشفى وصيت الحجيه تكعد اوس حته يروح وراهم ...

دحكت لساعه ب٧ ونص كلت خلي امر ع بيت عمي البنات مادحكتهن شلونهن دكيت باب المطبخ اجتني امنيه ....

طبيت اضحك وياهه تفاجات بالموجوده مرت ابوي وبناتهه الي هن اخواتي صايرات نسوان ويحجن بالزواج وهن كلهن اعمارهن ١٤ و١٥ ماحجيت وياهه...

اسولف ويه نيران وهن ينبزن من يمهن حسيتهن قليلات تربيه من حركاتهن حته لابسات دشاديش عبالك فساتين مخصرات من الصدر ومدري منيلهن هالصدر واصل لخشومهن ...

كلساع ادحك عليهن وارجع ادحك ع نفسي ممسوحه من الجهتين ارجع ادحك ع نيران هاي مضروبه اوتي لا علوه ولا طسه بس هذني مدري شيعلف بيهن ابوي...

سمعت صوت الهورن مال الخط سلمت عليهم وطلعت وصلت للمستشفى اول واحد يجي بوجهي سلام نظرات ابتسامه وغرام بعيونو ما اريد الوقت يخلص وارجع للبيت. .

باخر لحظه انتبهت ع نفسي من رجاء كالت يولي ثريا احسج معجبه بسلام ونظراتج محاوطته بهاي اللحظه صدك ضجت من نفسي وكانما فزيت من سبات...

كرهت تصرفي وذميت نفسي شلون اسوي هيج نسيت اخوتي شلون تعبو عليه وشكد وصوني اصون نفسي واحافظ عليهه ...

قيس كالي خليج نجمه عاليه محد يطولج بس الي حابج من صدك ويجي يطلبج بدون سوالف الحب والخرابيط...

لو فاروق الي كل تعبو بسبيل اعيش ملكه بجالهم وعزهم وانه هيج اجازيهم صدك مع الاسف عليج ثريا 5 اسود ربوج احسن تربيه ومايوم عينهم افترت ع اعراض العالم يكولون عدنه اخت ...

لاتسمحين لنفسج توكعين وماتعرفي شنو من نوعيه واحتمال ياذيج واحتمال تاذين اخوتج جنت احجي ويه نفسي ومن هذا اليوم صحيت ع نفسي وماانطيتو مجال ابد حته كمت ما اسلم علي واي مكان بي هو اروح لغير مكان اذا صدك رايدني يجي يدك بابي...

جانت فترة التدريب عباره عن شهر وخلص  ورجعت كعدت بالبيت...

الناصريه...

ام اسماء.. جمعي غراضج واكعدي يم بيت عمج والله اذا اجتني سالفه من وراج اذبحج ..

اسماء.. اطمئني احفظ نفسي لنفسي موعلمودكم ولا خايفه من اخوتج ظلي انتي هنا مطيعه الهم وياكلون بخير ابوي ويذمو ...

... كون الكليه تعلمج الادب عبن ماعرفت اربيج وتطاولين عليه..

... اعتقد يا امي ماحجيت غلط ليش تحاولين ادافعيلهم مو ياكلون براتب ابوي وبمحلاته تكدرين تحجين؟؟ لااا ماتكدرين لان هذوله اخوتج ...

اني راح اروح واحصل شهاده واخوتج بطكاك ما اشتريهم ظلي خدمي بمرت عباس ياريت محترم هو لا محترم ام ولا اخت ...

... والله لو عليه يا اسماء لو تموتين ما اخليج اطلعين الباب بس وصلت لشيخ بعد عبنج صلفه وكويه كتلت بيج ومافاد مدمغه...

... اكتليني ونزعي جلدي بس اهم شي احقق الي اريده شهادتي ما اتنازل عنهه لو تذبحوني

اني من رحت لشيخ وحجيتله لان ايست من عندج شكد توسلت بيج يمه احجي كولي انطقي لا انتي واكفه ضدي ومن احجي دكلين لعباس لاتخليهه تدرس ...

... ادري بيج رعنه وتجيبيلي مصيبه ..

... تربيتج انه تشكين بيهه احنه بناتج طول عمرنه ماطالعين غير بس بالعيد وتاخذينه تكفخ ...

تربية بنات اخوج كلهن خطبن وحبن هاي التربيه عال العال بنت اخوج زوجتوهه وسترتوهه من لكيتو يمهه بس احنه بناتج الي لراس الشارع انتيه تربيتنه موخوش...

هذا السبب الي يخليني اتحمل بسبيل اخلص من عندج ومن ضعفج ومن جبروت اخوتج ...

.. روحي النفس ماراضي عنج ولاتجين اطلبين مني السماح ااااخ وعضت اصبعهه لوتيني من ايدي ودخلتي عمج جان عباس كسر رجليج...

.. مفتخره بطولات ابنج الجبان الي خزره من مرته يموت بمكانه روحي كليله اسماء دكول عليك هيج ما احترمه لان اخوي وصلة مسح ...

هم مكيفه عندج ابن ٥ بنات احنه يحطنه يخلي دمنه يجري والله شنو ماغاسلين مواعين ابمكان مرته هذا تسمي اخ ورجال ويعتمد علي..

... كومي منا لا اطشر اسنونج صلفه ع عماتج امهات الوكاحه منين اطلبيهه عمتج سهام من وكاحتهه ظلت عانس بدار اخوهه ..

... عماتي التحجين عليهن ماشايفتهن بس ع الاقل واصلات ومثقفات وشوفي بناتهن وولدهن لو تقارنيهن باخواتج الحايرات بالسحوره وليل نهار يحركن وخابطات الزلم خبط...

... امشي بنت ال.... وشمرتني بالنعال وكامت عليه سحبتني من شعري تعت بي متعوده عليهه بس خلي اروك باجر وشوفي منو يرجع بعد...

عود ردت اتندم ع تصرفي من دخلت للشيخ ابيت خالي جانو عازمي وحجيتله كتله شيخنه ماخلوني ادرس ويكتلون بيه خابر عمي وصدك الشيخ خابر ع عمي واجه علينه وغصب ماعليهم قرر ياخذني لان عمي ماعنده جهال مايخلف ماعدهم حجه بعد...

اخواتي اصغر مني راضيات بالعبوديه وينتظرن تجي قسمتهن الا اني مستعده اشيل اسلاح ولا اخليهم ينهون وجودي وكياني...

طلعت ويه عمي من الناصريه متوجهه لبغداد سامعه بيهه بس ماشايفتهه غير بالصور الطريق طويل انام واكعد وبعدهه السياره ادك ماوصلنه لحدما حسيت مقعدي نمل...

راسي يفتر وعيوني غوشت من كدما قريت لوحات واعلانات شكد حلوه بغداد وشكد جبيره نزلنه للبيت وتلكتني عمتي سهام معلمه مامتزوجه وزوجه عمي ربة بيت اللسان والترحيب نسوني اهلي...

انطوني غرفه وحدي وكعدت ارتب بغراضي واتذكر ايامي السود هناك والحزام يلعب ع ظهرنه من اخوي وخوالي خلونه خدم حته لنسوانهم وامي مطيعه الهم...

خوالي شكاكين جشعين طماعين يكرهون ابوي ومن مات ذلونه ذله ماصايره اخواتي الكبار زوجوهن غصب عنهن وهسه الدور النه بس نفذت بجلدي...

اخذني عمي للكليه وسجلت وبديت اداوم وسجلني بخط بس شنو من لبس شنو من بنات يخبلن واني اسحل بتنورتي الي كلساع توكع من الضعف ادور بروحي لحمه ماكو....

منين ما الزم عظم يعور عبالك قلم ابو المساحه تعرفت ع بنات وبسرعه اندمجت من احاول احجي مثلهن ينعوج حلكي عبنهن يكولن كوله ...وصدوك.. وهياته..

حته مره استحيت  جنه نسولف ووحده بغداديه كالت صدوووك اني اخذني الواهس مثل حجيهه من احجي كلت صدووك جذوووب  وكامن يضحكن عليه...

عمتي سهام دره شكد علمتني ورتبتني حته اختيار الملابس والتنسيق عليهه حسيت روحي بديت اتكيف ويه الوضع...

بيوم من عدهن كال عمي خلي اخذكم للكراده هم بيتهم بالزعفرانيه اخذنه بسيارته وافترينه كومه شلون ناس عايشه بدون حجاب وشعر وبنطرونات كلساع احس عيوني راح يوكعن من كدما باوعت...

امشي واباوع ع المحلات رافعه راسي ما ادري من الازدحام تيهتم ادور عليهم ماكو...

اتجمعت الدمعه بعيني وتخيلت راح ياخذوني يبيعوني ويتجارون بيه ما ادري وين اروح يمنه لو يسرى...

كمت امشي سريع واضرب كل واحد يتلكاني وصلت لنهايه شارع اله اول ماله تالي مدري وين ياخذني اخذت الفرع الثاني وامشي واتلفت ودنيا المغرب  حسيت راح ينغمي عليه...

وصلت لشارع عام وبس السيارات وناس واكفه ياربي ساعدني وين اروح حته بيت عمي ماعرف شيسموهم بس  اعرف عمي اسمه حسين...

مرت مجموعه شباب يباوعون عليه ويضحكون ومرت سياره خففت ويصوفرون ويضحكون ادنيت ووكفت يم سياج مال مدرسه مدري دائره كلشي ابغداد جبير...

انتبهت على شاب واكف شويه عني مخليه جنطه ع كتفه صفح عسكريه والجكاره بحلكه اتذكرت الشرطه في خدمه الشعب ردت اروح احجي ويا يساعدني وبطلت...

بعدني واكفه وبده الاذان ياذن واظلمت الدنيا وهذا الولد كعد ع الرصيف مبين ينتظر احد ظليت لازكه بمكاني كلت اوكف ع شارع عام احسن حته بلكي يشوفوني من يمرون...

حسيت اقدام وشحط نعل جاي باتجاهي التفتت وشفت اثنين شباب شكلهم يخلي الواحد يتقيء مال اسبوع عوزهم بس حمره...

وكف كدامي وتلفظوا بالفاظ قبيحه وياشرولي اصعد وياهم كلت لوكاتل لومكتول ضربت واحد بيهم بالجنطه ع وجهه بس الثاني جرني من ايدي...

صحت بصوت عالي واضرب بيهم ماحسيت غير الولد انشمر ع الرصيف والثاني ضرب بحايط المدرسه...

نفضوا نفسهم وانهزمو واني ابجي فززني صوت هذا الولد الشاب كال محتاجه شي اختي ليش واكفه هين؟؟

باوعت علي ودموعي تجري كتله اني تيهت عمي وما اندل احد ولا اندل البيت...

... وين تيهتيهم ماحفظتي نقطه داله اسم الكراج الي وكفتو بي...

... اي اسمه كراج النسور بس ما اندله وين ..

... تعالي وياي اخذج للكراج وياريت تنتبهين وماتيهين مبين عليج مو من بغداد ..

.. شكرا بس وصلني ولاتظل تتفلسف!!

... شنوو؟ الصوج موبيج مال اعوفج هنا بس ما اكدر موناقص غيره امشي لخاطر امه محمد فوكاهه ماعاجبهه...

... امشي ويا صار كدامي يسال ع الكراج انتبهت علي طويل واكتاف عريضه عبالك مدرب وشعره خفيف واكف صفح واباوع علي رموشه من يرمش عبالك ريش يصعد وينزل شطولهن هذني...

وصلني للكراج شفت سياره عمي وبيهه عمتي سهام كتله اي هذوله التفتت علي اريد اتشكره لكيته ماكو مدري وين اختفه ...

اكلت رزاله غسل ولبس من عمي ومرته ومن هذا اليوم صرت من امشي الزم بايد عمتي الي يتيه ابغداد يقره ع نفسه السلامه اذا غريب...

نيران...

انفاسي صارت ثكيله ولمسات قيس صارت اكثر جرئه احس شفايفي خدرت وثكل جسمه وهمساته سلب من عندي كل قوه...

بادلته نفس الشعور وايدي ع ظهره وهو يهمس يم اذني نيران احبج ويشم بركبتي واني اجر براسه ما اريد يوخر....

اباوع بعيونه ومركزه ع شفايفه ماحسيت نفسي الا اخذ شفايفه واتفنن بيهن وانزع بالتشيرت مالته وما اخلي يتحرك ...

فززتني امنيه وهي تصيح ولج نيران اكعدي شبيج جنج وحده ميته هو هيج الي ينام الظهر...

فزيت بسرعه اغطي برجليه واسحب بدشداشتي عبالي مثل الحلم هذا كله حلم لا عبالك حقيقه حته اتلمس بشفايفي احسهن صدك خدرانات...

امنيه... كومي ولج تنبل مال نوم خلي انروح لبيت عمي ولج جايه امل بنت الحجيه وجايبه بتهه وياهه...

يابويه تخبل ولج تشك شك وعيني اوس يريد يسلم مايعرف شيكول بس يهز براسه ...

نيران... كومي عابتلج ماخليتيني نايمه هسه اجي وراج .. احس الرعشه بعدهه بجسمي كمت غسلت ورحت لبيت عمي...

امل بنت الحجيه عدهه ابنيه اسمهه ياقوت صدك تخبل بكدي بالضبط جايه تشوف امهه وجايبه بتهه وياهه ....

ولد عمي غريبين من يشوفون وحده حلوه ينهزمون كلهم طلعوا والحجيه فرحانه بجيه بتهه وكالت اليوم باتن هنا انه اكل لفلاح ...

تعرفنه عليهه مخلصه ثالث متوسط ومبطليهه وابن عمهه يريدهه وامهه ماتقبل ولا البنيه دكول جبير حيل ...

كلساع وسالت ع ابو النظارات شسمه وشيدرس وشكد عمره  الظاهر دخل بالهه...

رؤى ما قبلت تبات كالت ما ارتاح بس يتغير مكاني وظلت بالبيت يم مرت ابوي ...

سهرنه سوالف وضحك وفرشنه ونمنه فزينه برعب على صوت طلقات خرط وحده ورا وحده كمزنه كلنه وطلعنه من الغرفه...

فاروق يلبس بتشيرته والمسدس بيده ولحكه واوس وايوب شايل رشاشه وركضوا صاحت وراهم ثريا شكو ؟؟

اجتني نغزه قويه بكلبي وصوبت عيني على بيتنه وصحت اختي رؤى وركضت اريد اطلع بس سحبتني امل وماخلتني...

سمعنه طلقات متفرقه وصار هدوء ماهي الادقائق واسمع صريخ عالي ولطم وصوت زلم وهوسه....

لسه اتذكر هاي اللوعه وحرگة الكلب طلعت اركض حافيه وصوت بواجي امنيه يرن باذاني ...

ياريت بهاي الليله طلعت روحي وراحت لرب السماء ياريتني ماكملت ولا لحظه ولاساعه بهاي الدنيا اصرخ واصرخ واضرب براسي بالحايط ويختفي صوتي وارجع من جديد....

يتببببع...  متابعه شيقه

ازمة ضمير ... البارت التاسع عشر

«للكاتبه روزايه»

نبجي ماندري عليمن..

نضحك وماندري ليش؟؟

ومادرينه انباعينه يمته..

وماندري نباعينه بيش؟؟

....

نيران... اركض مفزوعه واشوف رؤى اختي عزيزتي سابحه بدمهه بنص المطبخ وبس عيونهه مفتوحه وايدهه ع صدرهه....

ماصرخت ولا لطمت ولا وكعت من عندي دمعه وحده واكفه وصافنه ع منظر اختي واشوف الدم يجري من راسهه ومتمدد ويه طولهه...

اصوات الداير مادايري مثل ضجيج باطن الارض اسمع بس وشه ما استوعبت ولا راح استوعب الصار...

صوت بابا وهو يلطم ع راسه مثل المره المفجوعه وحاضنهه ودمهه يجري بغزاره وملابسه متروسه دم اسمع صوت ماما المرحومه وهي تصيح بنتي رؤى...

انسحبت من ايدي وطلعت برا ما اعرف منو سحبني وين اني وشصاير وين اخواتي وين ماما اني جاي احلم اكيد اني جاي اشوف كابوس هذا موحقيقيه كعدوني ضربوني خلوني اكعد من هذا الحلم الاسود ....

دقايق واشوف رؤى يطلعوهه من البيت ملفوفه ببطانيه وبابا شايلهه وناس تصيح لا اله الا الله ...

هنا كعدت من نومي وانتبهت ع حالي صرخت بعلو صوتي اختي لاتاخذوهه هاي اختي رؤى لاتروحين اخذوني وياكم...

ركضت وراهم واني اصرخ اختي اريد اختي بس ايد اوس وكفتني وحالت دوني بعدما صعدوهه بسياره واخذوهه للبعيد وصوت الناس وهي دكول خطيه صغيره خطيه منو كتلهه...

انسد علينه الباب وبس النسوان الجيران الي هبت بنص الليل ع صوت الصياح والطلقات الزلم راحو واني ع كعدتي بنص الطرمه بين المستوعبه وبين اكول لا هسه تجي امنيه تكعدني من الحلم...

امل جرتني من ايدي تريد تكومني بس رجليه انشلن مايتحركن صاحت ثريا تعالي وياي البت راح تموت ماجنت حاسه بشي ...

ثريا.. كومناهه من الكاع ورجليهه تسحل بيهن مايمشن مدري التفت عليهه مدري ع امنيه الي صراخهه وعياطهه يمزق الطبله مو بوعيهن مايعرفن شيسون...

محد يلومنهم وحقهن اختهن مثل الشمعه غركانه بدمهه وراحت بلحظه ومحد يعرف الاسباب كاعده كدامهن وابجي وهن يصرخن كلما احاول اهدي وحدي الثانيه تنهار اكثر...

تخبلت اكثر من عدهن ابجي بصوت احس البحه والحرگه الي ابلعومي تخنكني دخيلك يارب شنو من مصيبه وفاجعه حلت ع روسنه..

لوجه الصبح وهن ع فد صريخ وبواجي امل سدت المطبخ علمود البصمات وسوالف الشرطه والجيران مدري منين كامت تتوافد وكلهه تسال ليش انكتلت ....

مرت ابوهن متهستره لحظات صعبه مرت علينه ماعدنه اسباب نحجيهه للناس ولا الزلم رجعوا امنيه تعبت حيل خلت راسهه ع رجلي ونيران ماتقبل حته وحده دكلهه البقيه بحياتج...

النسوان مسويات دائره ع مرت ابوهن فريده ويسالن بيهه والشهاده لله المره املخه نفسهه منهاره حالهه حال البنات من صدمتهه حته من تحجي بكلمات متقطعه...

سالتهه وحده من الجيران كالتلهه مادري احنه نايمين وفزينه ع صوت الطلقه مانعرف شلون وليش انكتلت...

كامت تعيط وتصيح ياناس بريئه دمهه مايروح غدر بتنه انكتلت ومانعرفهه جتالهه يارب اخذ حوبتهه وطلع برائتهه...

اخذت نفس وخلت راسهه ع الحايط كالت لكيناهه سابحه بدمهه وباب المطبخ مفتوح وبيهه نفس اخير مالحكنه ناخذهه للمستشفى لان التهو يضربون وراهم طلقات ومحد دحكهم وين؟؟

قبل ماتغمض عينهه كالت لابن عمهه فاروق الكتلوني حراميه دحكوني وكتلوني باكو فلوس ابوي وشردو...

وبجت فريده وهي تصيح بايكين كل الفلوس ياريت ماخذين البيت وحلالنه وعايفيهه النه اااخ يمه يانار كلبي ...

تعبنه واحنه نعيد السالفه لكل وحده تسال صارت ب6 الصبح واجن عماتي بجن الصخر من يحجن ويذكرن شبابهه دحكت ع نيران بدت توكع وعينهه تفتح وتغمض ركضت عليهه شلتهه...

وياي ياقوت خليتهه بالغرفه وهي بدون حركه اريدهه تعبر عن حزنه وتصرخ وتبجي اريدهه تطلع من هاي الحاله البيهه بس البنيه تكوم من وحده توكع بلاكبر منهه...

محد اجه من الزلم غير الشرطه واوس وياهم طبوا اخذو بصمات وهاي الكلاوات وراحو غسلنه دمهه الي مغرك المطبخ وانتهى اثرهه ورحلت عن الدنيا وهي طفله بريئه...

مرت ابوي وبناتهه وعماتي واهل جديتي حليمه كلهه اجت واحتار اكابل منو وابجي ويه منو؟؟

رجعوا الزلم بعد ما سلموهه لربنه الكريم هو ياخذ حقهه ويطلع دمهه وحوبتهه من دحكتهم عمتي ام جاسم كامت تصيح اخذو ثارهه يولد عمهه لاتخلون دمهه يروح هدر الكتل من عدنه مره نكتل منه عشر ازلام وماتبرد كلوبنه...

انه تعبت ونيران هدت حيلي كل شوي وتوكع ونغركهه بالمي وتصحه امنيه تعبر عن حزنهه وتصرخ وتصيح الا هاي كلت ع ساعه يصير بيهه شي...

صار دنيا الليل والناس التهت تاكل وتشبع بطونهه وشبابهه اندفن بالتراب البارحه هيج وكت جانت يمنه وماقبلت تبات كالت بس يتغير مكاني اظل كاعده ...

كسرة رؤى وموتتهه المفاجئه كسرت اخواتهه والكل استحسف شبابهه وبرائتهه طفله يتيمه راحت لدار حقهه مظلومه بالدنيا....

بليل رحت لبيتنه اريد ابدل ملابسي لكيت فاروق بالبيت هو واوس جانو هستوهم جايين سالوني ع البنات شلونهن كتلهم مالهن لون بعد الصار...

فاروق.. الله يساعدهن ويرحمهه..

... فاروق راح تعوفون دمهه يروح هدر واكيد ماتعرفون منو السوه هيج...

... والله بعزته وجلاله ع حركه كلوبنه اليوم ودمعتهه الوكعت وهي باخر نفس لو يكولون اخر يوم بعمرك الا اخذ ثارهه ومربع والله لعلمهم الزلم شلون تصير بس المح واحد منهم ...

... شكالت اخر شي..

... كالت حراميه دحكوني وعرفت اشكالهم واعرفهم منو وكتلوني وباكو افلوس ابوي واشرت بايدهه كالت 4 بس مالحكت تحجي لان طلقتين مضروبه ...

عمي مستلم سلفه مال معلمين ومخليهه بالبيت والظاهر يعرفون بي وسطوا على بيتو واكيد من ربعو ومعارفو ...

اوس.. فاروق ولو ماتحتاج استشير عليك بس حاول لاتحجي بتهديد ولا بثار خاف يطلع منه وبينه...

... ماجابتو امو الي يخنس مثل الحرمه كلت لعمي ماكو فاتحه منا لمن ناخذ ثارهه وانطيت خبر لشيخ ناصر كتلو لمو الجادر من نلكهه جتالهه هذيج الساعه ننصب فاتحه...

... وشلون تعرفو وهي ما كالت اسمو ..

... دم مسلمه مايروح هدر لابد ينكشفون واعلكهم بيدي واخليهم يتمنون الموت ...

... فاروق قيس خابر وكتلو وكال نازلين بالطريق انه وادهم وتدري بأدهم هذا مستعد يكتل شكو زلمه كدامو عليك انت هديهم هم بالنقال وتخبلوا...

... الله كريم ثريا ظلي يم البنات تعبانات وعماتج خلي يسدن حلوكهن ماريد يحجن ويمسلتن وكل شوي اسمع حجايه ماصخه...

ثريا.. صدك ثاني يوم ماسوو فاتحه وكل اليجي مايلكه فاتحه يتلكا شيخ ناصر يكلو ناخذ ثارنه يله ننصب جادرنه ...

مخبوصه بالنسوان وكلساع ادحك البنات لا يوكعن اجتي بنيه صغيره مدري منين كالت ثريا اخوج يناديج طلعت ادحكو منو منهم بس دحكتو بجيت ..

قيس حضنتو وبجيت صرت اتنقل باحضانهم من ادهم الو حسيتهم عاجزين عن الكلام بس عيونهم اترجم غضب ...

قيس.. ثريا البنات شلونهن؟؟ مالهن لون يا قيس نيران من ليلة الحادث وهي ماطلعت دمعه وحده من عدهه ولا اكل ولاشرب وكلساع توكع ...

وامنيه تصرخ وتبجي تعبر عن حزنه بس هاي احسهه مثل الفاقده عقلهه وبعدهه مامستوعبه الصدمه...

قيس.. اريد ادحكهه وين جيبيهه لبيتنه انتظرج هناك...

... رحت لكيتهه ع كعدتهه البصف الحايط وادحك بالفراغ كومتهه ومشيتهه صاحت عمتي وين ماخذتهه كتلهه اخوتي دزو عليهه ماحجت سكت...

اكود بيهه وهي تمشي بيأس عدلت حجابهه وضفيرتهه النازله من ورا الحجاب واخذتهه لبيتنه لكيت قيس كاعد بالديوانيه ينتظر...

بس دحكهه كام ع حيلو انه رحت للغرفه وبلاحرى وكفت ادحك من بعيد ورا ظهرو ادحك عليهم ودموعي مغرگه ايدي...

لزمهه من زندهه وباسهه من راسهه وكالهه البقاء لله ... بس جانت عباره عن دميه ماتستجيب لاي ايعاز ما ادري شحجه وياهه بس صافنه ...

مستمر يحجي وياهه ولازم ايدهه دحكت ادموعهه وكعن وتمسح بيهن وصوتهه وهي تناشغ جرهه كعدهه ع القنفه وانطت اشاره لدموعهه بلانطلاق ..

تبجي بصوت مبحوح وقيس منطيهه مطلق الحريه وهي تعبر عن حزنه كدامو حسيتهه تعبت من البجي رحت عليهه كعدت بالكاع ولزمت ايدهه كل الكلمات ما اطمنهه ولا تهدي من روعهه بهيج ضرف قاسي...

مخليه ايدهه ع وجهه وتشهك كلنه منظر رؤى مايفارگ خيالنه اللسان عاجز عن المواساة بس نردد ليش كتلوهه ومنو هم حته اذا عرفتهم شلون يكدرون يسوون هيج...

اخذتهه من ايدهه ورجعنه للبيت عماتي كلامهن سم حاطات مرت ابوهه ويعدن عليهه ومحملاتهه المسوؤليه تالي اخر شي تكاونن وعمي فلاح منهار طردهن وسد بابه...

خليتهن بالغرفه ونامن ع رجلي اثنينهن اجتي امل حجت وياهن بس مايفيد تقريبا جانت الساعه ب٨ بليل كعدو الزلم بالمضيف ونسمع صوتهم وصياحهم ...

شيخ ناصر كال مو احنه التنكتل من عدنه حرمه ويروح دمهه وهي بعدهه طفله والله لخلي دمهه لرجاب ماتغمضنه عين گبل ماناخذ ثارهه..

عمرنه ماصار عدنه ثار دومنه ناس فقره وكافين شرنه تالي ينداس بيتنه وتنكتل بت بريعان شبابهه لا والله وسفه ع شوارب الزلم

حجي راضي... شيخ ناصر احنه مانعرفهم منين حراميه وباكو الفلوس ويعرفون مستلمهن يعني هذوله عرف ويندلون البيت ولو غربه ماجان كتلوهه لان كشفتهم...

شيخ ناصر... حتلو گريب وابن عمومتنه الطلقتين انرجعهن 4 احنه الوادم تحلف براسنه تالي ماننصب فاتحه ويروح دمهه لا والله لو اعرف انه الاخذ ثارهه وبهاي شيباتي...

بنيات غريبات طول عمرهن عاشن ابغداد امهن ماتت وعافتهن امانه عدنه تالي ماصنه الامانه ...

فلاح.. انه اخذ ثار بنتي وخلي انحكم سجن بس ما يبرد گلبي ولا انام ليلي وبنتي راحت غدر...

فاروق.. عمي كلشي بالعجله ندامه احنه من ناخذ حگنه كون ننذكر بالزين مو تذمنه الوادم الي اريدو منك ماتستعجل ابد وتخلينه نتصرف بحكمه ونتساعد وهذيج الساعه اذا ماعجبك روح اكتلهم بس خلي نعرفهم منو...

ثريا.. هاي النار شلون راح تخمد والنار الي بالگلب اكبر واعظم الكل شايط وگلبو محروك ويتمنى بهالحزه ياخذ ثارو..

خلصت الفاتحه والبنات حالهن للاسوء لا ياكلن ولايرضن يسكتن من البجي شكد حاولنه وياهن ومايفيد ورا الفاتحه باسبوع كامل جنت يمهن كاعده وساكته والهدوء مسيطر الساعه ب10 الصبح اندك الباب...

رحت فتحتو مره جبيره وجهه نوراني وبيدهه عصا واثنين ازلام وراهه ركضت ع الحجيه طلعتلهم اسمعهه تصيح تفضلو دخلو للمضيف ورحت صحت ادهم من بيتنه لان عمي موبالبيت...

والمره الجبيره الحجيه دخلتهه للغرفه ويه طبتي سمعت صوت البواجي وصوت امنيه ونحيبهه طبيت للغرفه وادحكهه كاعده بنص الغرفه وهن لاكحات نفسهن بحضنهه...

امنيه تصيح  بيبي ماما ورؤى راحن ليش عفتونه وحدنه وماسالتو علينه...

عرفتهه هاي ام بيان الله يرحمهه واصلهه الخبر هسه بس عتبت الحجيه عليهه ليش ما اجت لفاتحه بتهه...

.. اااخ لاتهيجون كلبي سنه مرت واني يوميه انام ع بواجي واكعد ع نحيب لاتلوموني بنتي بيان بغلاة روحي بس الضروف حالت دونه ..

من اجانه خبر وفاتهه ردنه نجي وكالو الطريق موزين مر 3 ايام وجابو ابني الجبير شهيد بانفجار وخله ورا 4 اطفال ومرته حامل كسرو ظهري بيان وهو ورا 4 اشهر مات ابونه اثر جلطه واتجمعت عليه وهاي حالنه للاسوء صار سنه...

البارحه خابرونه وكالو بنت بيان انطتكم عمرهه شيحمل گلبي ياريت انطي عمر نذر الهم ولا راحت هاي الشباب بالتراب...

ثريا... حجيهه كثر المواجع وصار البجي بفلس ماقبلو يبقون شويه وراحو كالو ماعدنه احد بالبيت رادت تاخذ البنات بس عمي ماقبل وراحو...

من طلعوا اجه ادهم كال وينهه امنيه صيحهه خلي احجي وياهه رحت صحتهه كامت وعدلت حجابهه كبرانه امنيه بهاي الاشهر الفاتت وصارت تستحي من ادهم الي مخلصتهه امناگر وياا...

بس دحكتو بجت جان كاعد بالديوانيه كعدت بصفو وهي دكلو ادهم رؤى راحت وماما راحت بس اني ونيران بقينه ومانعرف شراح انشوف بعد...

ادهم.. حقكم والكلام الي نكولو مجرد مواساة بس حد يومهه هذا ادعي الله يرحمهه ويطلع كتالهه صيري سباعيه وقويه وراح انكون وياجن بكل خطوه...

...

الحياة بائسه واخوتي ليل نهار يركضون بس يريدون طرف خيط يوصلهم للحراميه ليش مابيوم جنت بالبيت اخلص شغلي واروح لان امل وبتهه رجعن ويه شيخ ناصر...

اجه ايوب يركض طب للغرفه اخذ السلاح وطلع ركضت ورا صحت شكو ايوب كال عرفناهم يولي والله لا اكتلهم بيدي ...

لزمتو من دشداشتو ووكفتو بالطرمه حجيت بتوسل ايوب لاتتهور روح احجي لفاروق دخيلك لخاطري انه ثريا ...

... لاتخافين روحي يم البنات بس خلي نلزمهم راح فاروق يدحكهم بنفسو حجه هيج وطلع وكلبي مثل النار

ايوب عصبي حيل ومايخاف ولايهاب احد خاف يكتلهم ويتورط

رحت لبيت عمي ماحجيت حته للحجيه شحجي بس عيني ع الباب شوكت يجون...

للظهر سمعت الباب انفتح رحت ركض لبيتنه فاروق وايوب اجو قيس وادهم راحو لبغداد لان عسكريه ...

تلكيتهم اسأل شكو وشلون وشسويتو وشلون عرفتوهم..

فاروق.. وحده وحده خلي انطب انغسل موهيج ياثريا ..

... تعالو بس احجولي كلبي مثل النار ..

فاروق.. دم المسلم مايروح جنت كاعد بالمجمع واكو واحد يوميه يمر عليه اعرفو هو من معارف عمي وجان صديق ابوي اكو حجي بحلكو ويسال ع الحادثه...

اليوم الصبح اجاني وكال اريد احجي وياك كتلو تفضل كال انه من يوم صار الصار وماغمضت عيني احس نفسي مشارك بالجريمه انه بيومهه جنت يم اهلي جيرانكم بنفس الشارع نازلين جدد ومن صارت الطلقات انه كاعد وفتحت الباب ودحكت اربع ازلام تركض صوب الشارع ومسلحين ...

الله بهذيج الساعه راد يخليني شاهد شغلت سيارتي وافتريت من الفرع صرت كدامهم اشرولي عود اجره وصعدو وياي اعرفهم حق المعرفه سلمت عليهم وكتلهم وين جنتو كالو جنه سهرانين يم فلان وماكو سياره نرجع بيهه...

بس متوترين وخايفين وواحد منهم بيدو دم ويمسح بيهه بوصله انه سويت نفسي ما منتبه نزلتهم ابمكانهم ورجعت ومتاكد هم لان من نزلو سمعت واحد كال ماتت موو ...

ثريا..  انت عرفتهم منو علمكم باسمائهم..

... اي 2 منهم اصدقاء عمي فلاح يكعدون ويا ويروح يمهم بالكهوه واعرف شيخهم وعشيرتهم واثنين منهم عدهم سوابق سجون وحراميه ...

والزلمه كال قبل يومين كاعدين بالكهوه وعمك حجه بموضوع استلام السلفه وكال راح ابني بيهه الظاهر عرفو بي ورؤى دحكتهم وعرفتهم لان اصدقاء عمي المقربين وكتلوهه...

ثريا... وشراح تسون تكتلوهم وتروحون للسجون فاروق فكر بينه لاتتهورون ...

... راح ادفعهم الثمن غالي واكسر ركابهم واحد واحد بس الله يسهل وتنكشف الحقيقه الرجال كال مستعد اروح اشهد لان انه دحكت وشهدت والله يحاسبني...

ثريا.. الوضع هادئ واخوتي يشتغلون بصمت وكل خطوه يخطوهه يحسبولهه الف احساب مع العلم بده عام دراسي جديد واتبهذلت بالدوام اروح وارجع وبالي يم البنات رغم الحجيه يمهن ومأمنه عليهن بس خايفه الياس والحزن يسون شي بنفسهن

مرت ع وفاتهه عشرين يوم جنت يم بيت عمي واجه عمي فلاح يركض واخذ سلاحو ركضت ورا مرته دكلو شكو شصاير؟؟

كالهه ايوب هجم ع الكتالين بالسلاح وصايره مكاون راح يروح بيهه ابن اخوي ويدك ع راسو...

يتبببع..  متابعه شيقه..

ازمة ضمير ... البارت العشرون

«للكاتبه روزايه»

خريف سنيني ورگه تسابگ بـ ورگه

ادور بروحي غير هموم ما الگه

ماكلني الوجع وبروحي لمة آه

بس اضحك چذب والوادم مصدگه...

ثريا... دكيت ع خدودي وصدري ربي دخيلك اخوتي ركضت مثل المجنونه ورا عمي ومالحكت بي سد الباب وراح كعدت بالطرمه يم الباب وابجي وكلبي محروك عليهم...

طلعت فريده اخذتني وهي تهدي بيه امنيه ونيران واكفات بالباب مال المطبخ ويدحكن عليه وعيونهن مدمعه حسيتهن خايفات وكانو حملن نفسهن المسوؤليه...

طبيت جوه واني اردد بالدعاء الله يخلي اخوتي ويحفظهم الي ومايمر عليهم مكروه حسيت هاي سنه ٢٠٠٦ سنه ضيم وقهر من بدايتهه لهذا اليوم نكوم من مشكله نوكع باكبر منهه...

صار المغرب ومحد مر وماكو كل خبر اتخبلت بالزايد احس كل هبطه تهد حيلي وتوكعني للكاع وارجع اوكف واوكع من جديد عبالك القهر انكتب بس النه وتسجلت علينه مواقف الحزن...

ورا الاذان سمعت باب بيتنه انفتح ركضت للبيت دحكتهم ايوب وفاروق وايوب لازم بطنو ومنحني ادور بي خاف مجروح وهو يصيح ثريا مو وكتج..

ثريا.. ليش مو وكتي يوميه مهبطيني وتخلوني الطم فكرو بيه موكلبي انشلع..

ايوب.. فاروق رحمه لاهلك سكتهه ماعايزني قهر ..

فاروق.. ماحجت غير الصحيح الاستعجال العندك وين راح يوديك يوميه محصلك سجينه وداخل مركز وطالع من مستشفى اعقل يول وفكر الف مره قبل لاتخطي اي خطوه غلط..

ايوب.. يا اخي انه ماعندي هاي الاعصاب الي عندك جان يحجي ولازم الصونده يغسل برجلي انت تفكر وتتأنى انه عجول واذا تعبتك لا تطلع وراي ولا تفزعلي بعد..

بعدو ماكمل كلامو وضربوا فاروق ع علباتو بس بخفه وكالو سد حلكك واسكت لو تحجي سم لو تسكت بلامنفعه ...

اشرت لفاروق يسكت ايوب عدنه من النوع العصبي الى ابعد حد نار ومتسرع ومرات اخاف علي يوكع نفسو بورطه مايطلع من عدهه...

طبيت ليجوه بديت اسوي عشه صار البيت مالتنه قليل اجي بس علمود اخوتي دائما يم البنات والحجيه يمهن بس يظل بالي عليهن...

تعشينه وكمت غسلت مواعين وكتلو فاروق راح اروح لبيت عمي اروح يمهن احاول اضحكهن بس هن ولا يمهن فاصلات عن الخارج ...

اخوتي ماقبلو يحجولي عن الصار بس سالت عمي كال واحد من عدهم مار من يم المحل وايوب هاد علي وذاك بيدو سجينه ماعدنه دليل عليهم والرجال الي ع اساس يشهد شارد..

...

مرت الايام وسوينه اربعينهه ولحدالان مالكوا الحراميه والرجال الشاهد هم مختفي رجعت للدوام وهالمره اصعب المرحله ما الحك بين البيت والقرايه الحجيه رجعت يمي وكامت هي تشتغل بس ما اقبل خطيه مره جبيره...

صدك ما الحك احك راسي بين الدوام والشغل وطلبات اخوتي اتعب بحيث اكعد نص الليل مثل المضروبه ع راسي علمود اقره شوكت تخلص هاي السنه الكئيبه تعبتني حيل...

بيوم من عدهن اجه ايوب كال شيخ ناصر راح يجي وحجي راضي جان يلبس بقميصو ويسولف...

ثريا.. ليش خوماكو شي؟؟

.. شيخ ناصر راح لعشيره الحراميه وكايلهم ازلامكم كتلو حرمه من عدنه وهذولاك متخبلين ومتكاونين وي الشيخ بس الرجال الي اجه لفاروق شاهد وهسه طلبو الكعده حته يتفاهمون...

... هاي شوكت الحجي ومو ع اساس الرجال شرد ..

.. سوالف اخوج فاروق ما سولف حته لعمي وبس الشيخ يدري دحكتي شلون عزلني ..

.. مو عزلك بس يدري بيك عصبي ترى فاروق مستعد يخسر نفسو وماتنمس شعره من عدكم..

.. مو احنه ولد ماما المدللين ما حاجيتو خاف يزعل وياخذ ع خاطرو بس انتي كليلو ايوب زعلان ..

..  اووف منك هسه راح ارتب المضيف واحضر الجاي والله يحلهه...

صارت ب4 واجت الزلم مو جثير بس شيوخ كبار وعمام الحراميه كعدو بالمضيف واسمع صوتهم بس ما افهم شيحجون ...

ساعه كامله وهم بس متكاونين وراحو وطلع فاروق ويه حجي راضي والشيخ رحت للمضيف اعزل بي بس كطوف الجكاير والكلاصات مال المي الم بيهم واحجي ويه ايوب ...

ثريا.. شصار شكالو ؟؟

...  طلعوا الحجه ماعدنه دليل وهذا الرجال يكرهم موشاهد وماوصلوا لحل وتهمونه احنه نتبله عليهم...

بس فاروق كالهم منا ويخلص كلامنه وياكم باجر نشتكي والقانون ياخذ مجرا واذا طلعوا ولدكم الكم حك يمنه واحنه نمشي عليكم ...

ثريا... شوكت تخلص هاي السالفه؟؟

.. من الله ياخذ روح عمج وابوج اااااخ لو الزمهم اشويهم ع الفحم واطفيهم وارجع اشويهم عارات تفووو ع هيج زلم...

.. ياااا شبيك ايوب..

... ولج عمج ال.... يكول خلي يفصلوني واسكت يعني يسكت عن دم بنتو علمود شكم فلس وابوج الحضينه يدفع بي ويكلو مالك علاقه بفاروق ...

ثريا.. لا تهتمون الله يجازيهم خايفه ع البنات ولو ما هن طبهم مرض شيصير بيهم خلي يصير...

طلع ايوب وانه كملت تنظيف ورحت كعدت يم الحجيه انسولف وتحجيلي عن حكمه الشيخ ناصر وهسه يجيبهم للدرب...

وصدك ثاني يوم فاروق قدم بلاغ وهوسه ومحامين اخذت هاي السالفه فوك الشهرين والشهود وثبتت عليهم الجريمه وهم شاردين محد لزمهم ...

اهلهم شردوهم وكامو يدورون واسطات ورشاوي بس دم مسلمه ماراح والرجال الله ينطي هي شهادته الي ثبتت بالمحكمه

تخبلو اهلهم وخاصه هم 3 عشاير مختلفات وصارت السيارات رايحه جايه علينه وبزعنه من الخطار والشيوخ بس سالفه الجاي خلت عندي كرون ...

فاروق ماقبل يتنازل وعمي يريد يقبل بالفلوس حته يفصلون وتطمطم السالفه بس فاروق واكف سجينه خاصره لابوي وعمي وكالهم اكتلكم وما اتنازل...

شيخ ناصر وكفهم عند حدهم وكالهم حرف ماتحجون لان غمان ومابيكم كل خير وتخلونه علج بحلوك العشاير بسبيل الفلوس...

رادو مشيه وكعده حته ينطون فصل وشيخ ناصر قبل وصارت ابيتنه جانت مشيه جبيره حيل بيهم فوك 100 زلمه واكثرهم شيوخ وانه اركض منا وارجع منا وياي البنات وماالحك...

اوس جان نازل بس ادهم وقيس تدريب وما نزلو من يوم الفاتحه هذا الشهر الرابع الهم...

اصوات زلم عاليه وواحد يرفع واحد يكبس تالي طلعوا برضا والكل يسلم وقابلين .. 

اجه اوس سالتو شصار كال خلصت اخذنه من عدهم فصل وراحو ع كل واحد دحكت ع نيران وكعت دمعتهه وكانو دكول محد اخذ ثار اختي وابوي اتنازل علمود الفلوس...

استغربت من موافقه فاروق وهو نفسو جان يصيح اكتلهم لو يطيرون ليش اخوي قبل بالفلوس حته لوعايفهم للقانون...

ثريا.. ليش فاروق قبل بالفصل ؟؟

.. ما ادري عمي فلاح مادخل لان شيخ ناصر ما انطا فرصه وفاروق هو الحجه وكال من كل واحد من الكتاله ناخذ فصل ...

قبلوا ودفعوهن وبعد ما استلمهن فاروق كالهم روحي ماتكدرون تشترون عرضي بفلوسكم ولو اتحطون كدامي افلوس الرمادي كلهه ماراح اتنازل عن دم بنت عمي ..

هاي الفلوس مالتكم واخلي فوكاهن للمحامين والمحاكم واسحل ولدكم واحد واحد لا اريد فصل ولا اريد الوث ايدي بدمهم والقانون هو راح يحدد مصيرهم...

انتفضوا الزلم وصياح وكالو موهيج الحجي بس فاروق انطاهم موقفو وسكتهم كالهم هذا العندي دم عرضي مايروح هدر وثقو بالله ماراح اخذ دينار من هذني كلهن راح اخليهن للدعوه ...

جان المبلغ حيل جبير بهذاك الوكت الفلوس الهه قيمتهه بحيث شهكت من كال اوس دفعوهن نقد وطلعوا والفلوس بحوزة فاروق وماقبل ينطي عمي ربع واحد...

يحجي اوس ومستغربه اكثر منو معقوله فاروق يهتم للفلوس وليش مايقبل ينطيهم وين راح يوديهن والمصيبه شيخ ناصر مايدو ومانع عمي وابوي من يحجون حرف وعافهه ورا فاروق...

ماكدرت احجي ويه فاروق وعمي هوس وسكت وماحصل والفلوس محد يعرف وين حته اخوتي ماسمح الهم يعرفون شي...

ورا ايام كمت اسمع من اوس فاروق وكل محامين بفلوس وكام ينطي فلوس لناس تعرفهم حته يدلون مكانهم وصدك بالفلوس كلشي يجي وخلال شهر واحد لكاهم وطلعت الشرطه واخذتهم...

المحامين شطار والمدعي العام استاذ ويه فاروق وساعدو كسب القضيه وخلال 4 اشهر قبل لا تجي سنه رؤى انحكمو بلاعدام اربعتهم ..

اهلهم وعشيرتهم ثارت علينه بس شيخ ناصر كالهم الي يضرب عرضنه بورده انضربو بنار ماسوينه غير الحق ونالو جزائهم وطلعت عليهم جرائم سلب ونهب عدهم سوابق..

هنا انتهت وانطوت صفحه رؤى الله يرحمهه جان ينذكر اسمهه من خلال القضيه بس بعد ما اخذو ثارهه نصبو جادر الفاتحه من جديد وانقرت الفاتحه ع روحهه الطاهره وراحت لربهه مظلومه...

عمي اتخبل لان ماحصل فلوس وفصل بس جانت ضربه فاروق قاضيه الو ولابوي وماخلاهم ياخذون ربع واحد دائما يكول فاروق المهم اخذت ثارهه شيحجون هل يحجون...

...

2007 شهر الثاني بارده ثلج كاعده متلفله يم الصوبه وارجف وبيدي كتابي المرحله الثالثه شكد حلكت صعبه حيل ...

افكر بايوب الي بطل ومايقبل يكمل كليه ويشتغل نجار ويه صاحبو شكد حاولنه ويا ماقبل يكول ما اريد جان اكثر واحد حاب يدرس ليش هيج كرهه...

فاروق مرحله ثالثه وابد ما ادحكو يقره شلون ينجح ما ادري كل مره اريد افتح موضوع مرت صديقو واتردد اسال الحجيه دكول ما ادري هو اخوج ماينحزر...

جانت الساعه ب9 سمعت باب المطبخ يندك كمت اني وبطانيتي فتحتو امنيه ونيران لابسات قمصله عسكريه ودخلن كعدن يمي واكو حجي بعيونهن سالتهن شبيجن ياحمامات؟؟

نيران.. ثريا بابا راح يشيل للفلوجه بكاع جدتي حليمه يكول ماعندي اشتري وابني واذا اروح لشيخ ناصر ماراح يرجعني وينطيني حصه...

ثريا.. خلي يروح هي مرتو هم من الفلوجه خلي تكعد يم اهلهه احنه هم نخلص من طلايبو ...

نيران... واحنه شنو ذنبنه هم انروح ونعيش ويا وبعيدين عنكم ويسوي بينه بكيفه ...

... لا منو كال تروحن ويا فاروق مايقبل اذا يريد يروح وحده انتن مكانجن يم ولد عمجن مالجن دخل يجي فاروق واحجيله...

بعدنه كاعدين واجه فاروق وتلكتو نيران حجتلو ع نيه ابوهه كالهه ادري وكتلو روح وانتن تظلن هنا شوكت مايرجع عود ياخذجن لاتهتمن ولا تحجن ويااا ...

نيران.. حجه هالكلام ودخل لغرفته جنت حايره ومحتاره بامر بابا اني وامنيه حته مارفضنه ولا ردنه نحجي تعبنه والحزن مسيطر علينه...

قيس ماشفته من يوم الفاتحه نازل يومين وماشفته لان بابا بيومهه تعارك ويه مرته وحابسنه حيل مشتاقتله واسال علي بس احسه تغير وراح يشوف حياته بعيد عني...

اخذت امنيه ورجعت لبيتنه وبالي مشغول منا قيس ومنا بابا خليت راسي ع المخده واتمنيت قيس يكول اريد اخطبهه ليش عايفني هيج اصارع ويه بابا اذا يحبني صدك...

ثاني يوم اجتني امنيه كالت نيران قيس اجه هو وادهم تروحين جنت احجي ويه نفسي وكلت ما اروح يريدني هو يجي بس طلعت بس حجي ما احس غير رجليه اخذتني اله ...

خليت الحجاب ع راسي ورحت لكيت ادهم يغسل سلمنه علي وكعدت بالصاله وكلبي يدك سريع انتظره يطلع كالت ثريا بالحمام...

عيني ع الباب شوكت يطلع صار اشهر طويله ماشايفته بس طلع عدلت كعدتي وحسيت بروده سرت بانحاء جسمي كمت وكفت وصار كدامي مخلي الخاولي ع راسه بس شافني ابتسم...

اجه يمشي بخطوات سريعه باتجاهي كال شلونج نيراني...

.. زينه انت شلونك الحمدلله ع سلامه..

... الله يسلمج يولي كبرانه لا بهاي النزله بعد مابيهه مجال لازم اخطف هالحمامه...

... خجلت من كلامه ودنكت راسي وافرك بايدي...

قيس... نيران مقصر وياج جثير التدريب مهلك وماينطونه غير يومين ماالحك انزل بيهن والطريق مو تمام...

... لا اعرف بوضعك عاذرتك بس بابا يريد ياخذنه للفلوجه يم اهل مرته ...

... خلي يروح انتي هنا تبقين اليوم بليل نجي نحاجي واطلبج من عندو جنت ماجلهه لان اكول زغيره بس هسه لاكبرانه وهي بعد ماترهم بعد الصار ع الاقل بالي يطمن عليج واني بالدوام...

نيران.. اني راح اروح للبيت لايجي بابا ويعرف.. طلعت من يمهم وكلبي لاول مره يدب بي الفرح من بعد وفاة ماما احس الحياة فاهيه بلا طعم وكملتهه رؤى ...

لليل واجو ولد عمي وطلبو ايدي من بابا لقيس ما اعترض ولا كال شي بس كال اسالهه ودزلي مرته كتلهه بكيفكم وهاهي رجعلهم خبر وكالهم انه هم اخلص من المسوؤليه...

بس فاروق دائما يفاجئ الكل بكلامه وماينطي مجال لاحد حته يفكر بالخطوات الي يخطوهه...

فاروق.. عمي هسه نيران وقيس خلصنه بعد امنيه اريدهه لادهم خلي اكون صريح وياك انه ما امن عليهن يمك لذلك اريدهن كدام عيني وبامان...

فلاح... امنيه بعدهه صغيره واصغر اخواتهه واخذهه وياي ومن تكبر هي الكم..

... ماراح يتزوج ادهم بهالاسبوع المهم كدام عيونه بس خطبه ومن تكبر عود هذيج الساعه زواج وهو بعدو مامتخرج بس للامان...

.

نيران... هم ماحجه بابا سكت وكال هاهي اقرو الفاتحه المصيبه مو هنا المصيبه امنيه تخبلت تصيح بالغرفه ما اريد اتزوج وطلعت تركض لثريا واركض وراهه...

امنيه.. ولج ثريا تحاجين اخوج دكليله ما اريده شنو هي غصب وقررو مصيري وحدهم...

ثريا.. شبيج يولي غير من خوفهم عليج ترى ادهم ماعندو شي وياج ومقترح فاروق بس علمود ماتروحن للظيم...

امنيه.. وادهم موظيم تقبلين تتزوجين واحد ماتحبي ادهم مثل اخويه ما اريده روحي كليله واني ما احب الجيش...

الحجيه.. ولج المصعلكه ليش ماتسكتين لكتلهه رجل وكالت اعور هو منو مكلبج شعرج جنه سيم ...

... لاتقلدين حجيه الي يسمعج انتي كازنوفا زمانج حواجبج من الدك صايرات خضر  ...

... لزميهه الي الا املش هالشعفه هاي انه الحجيه يولي اوكفي اذا ما اخلي ادهم يشوي ع ط.... البصل...

امنيه... اوي حجيه جويتيني لو ع كولتج وريتيني ور ليش تجيبين ط.... بالموضوع لو غيرانه مني...

... من كون خفه هالحلك ماتستحين لازم اخلي يعلمج امشي منا ...

... راح امشي بس بعد لا تذكرين ط... بالموضوع لان خط احمر هذا...

ثريا... جانت منطلقه تحجي واحنه خربانين ضحك ما انحس غير صوت ادهم وهو يصيح ثريا وواكف بالباب ....

ادحك ع امنيه انخبصت وتروح من وترجع منا انه من يمي احس روحي صرت نار من الخجل كال روحي سويلي جاي ...

وانتي الفعصه امنيه لمي السانج لا اطيح حظج وتعالي وراي خلي افهم عقلج التنكه...

ثريا.. انخلست امنيه وراحت تمشي وتتلفت ع الحجيه وتعض باصبعهه دكلهه كلو من وراج...

...

امنيه... شكد فشله وموقفي اتعس من الفشله بالف مره اكيد سمعني واني اغرد كعدت يمه وهو مرتجي ع الحايط وبيده جكارته ...

ادهم.. امنيه اسمعيني زين انه ماعندي شي وياج غير انتي بنت عمي واختي وواجبي احميج وما نكدر نحميجن بس بهاي الطريقه...

صدكي وثقي ماراح اكون حجر عاثر بطريقج انتي يمنه وشوكت مااطلبين الحريه انطيهه الج وبامان ...

تعرفيني شكد اعزج وانه وراي طريق طويل وافكاري واحلامي بعيده كل البعد عنج لذلك لاتخلين ابالج ادهم بس كاخ لا اكثر...

... ديله ع اساس ميته عليك شو محسسني راكضه وراك...

.. انعل ابليس هاللسان يولي برنو لو شنو زعطوطه ماتعقلين كومي عبالي بيج حظ واكعد احجيلج جيبيلي جاي وياج ..

... كمت من يمه بعد ما مديت الساني وسويت حركه باديه ع راسي شمرنه بالمندر الي بحضنه وطردني ...

ادهم ما حاسبته غير اخ اعتمد علي بس ياريت ظليت ع هالتفكير وما شفت ايام سوده ...

مرات الانسان ياخذه الوهم وتاخذه الامال للبعيد ويظل حبيس اماله ومايتخلص منهه للممات يحاول يقنع نفسه ويجاهل الحقيقه وصوت عقله الي يكله اصحه بس هو نايم بسبات بس حته لايشوف الحقيقه ...

...

نيران... شكد فرحت بهذا اليوم وبابا ماحجه اي شي ويايه ع الرغم رحت لبيت عمي وهناك باركتلي الحجيه وثريا بس قيس طلع يم جماعته ....

اسمع مشاحنات امنيه وادهم وخربانين ضحك دكله لوتموت ما اتزوجك وهو يكلهه لو يحطون فوكاج كونيه ذهب ما اريدج بس مجبور طركاعه ووكعتي ع راسي...

انوبه انطلقت سامعه عن الحقوق الزوجيه ورادت اطبقهه ع ادهم وماتعرف معناهه عبالهه بس اكل وطلعه ...

امنيه.. اسمع ادهم عندي حقوق زوجيه يمك ولازم تنطيهه بالحق ...

ادهم...امشي يولي روحي يم ابوج مالي خلكج ادورين حقوق...

... اي اهم شي الحقوق واني هم ما اقصر هم انطيك حقوقك ونعيش سالمين غانمين...

... امنيه لو ما ادري بيج زعطوطه وعندج عقل بكد بيضه الحمام جانت سحلتج من هاي الكفشه الي مايمر عليهه مشط...

... ها همزين كتلي يعني ماعجبك كلامي طبعا لان ماتنطيني حقي وتخليني بس ادك شغل...

... تعرفين شنو هي حقوقج الزوجيه لو اكعد اشرحلج؟؟

... لا اعرفهه مايحتاج بعدني احجي وطب فاروق وايوب كتله فاروق ترضاهه ادهم يكول ما انطيج حقوقج الزوجيه؟؟

شو من حجيت هيج كلهه سكتت وايوب يشرب مي طلع المي من خشمه والحجيه تصيح من كون خفه هاللسان الي مابي حظ...

خزرني ادهم يريدني اسكت واني مصره لان ماجنت اعرف معناهه عبالي الحقوق هو الاكل والطلعه وينطيني فلوس يعني مو خدامه وحقوقه اغسل ملابسه واحضرله الاكل بس هذني اعرفهن...

ثريا ونيران يخزرني وادهم من جهه كتله فاروق شوفه شلون يخزرني والله يكول اي حق ما الج ...

فاروق.. لا مو بكيفه يسولف وحده هذا..

ايوب.. يول ادهم مابيهه دكمه تطفي سكتهه ..

امنيه... وليش اسكت حجيت غلط لو طلعت نيتكم ولد عمي تمنعوني من حقوقي وتخلوني ادك شغل...

ادهم.. من انعل ابو حقوقج يول سدي حلكج السانج مكروض امشي منا ...

فاروق... ادهم ع كيفك امنيه الحلوه ينطيج حقوقج وهو الممنون واذا عادهه عليج تعالي احجيلي ودحكي شسوي بيج...

الحجيه.. خايبه نيران اخذي اختج هاي اذا خليناهه دكوم تهجم ع الولد يمه منجن اليابسات...

اسحل بيهه من ايدهه وهي دكلي شبيكم جنكم سعالو هديتو عليه ...

وصلت لباب المطبخ واني اجر بيهه جان باب البيت مفتوح شفت وحده طبت ولابسه خمار وتكود باثنين جهال ...

عفت ايد امنيه ورحت عليهه منين هاي الجايه هيج وقت ب10 بليل كتلهن تفضلي ...

حجت بصوت مخنوك ومبينه باجيه كالت فاروق موجود؟؟؟

...اي موجود هسه اصيحو رحت اركض تلكتني ثريا كتلهه وحده ع فاروق جايه طلعنه لكينه امنيه واكفه تستجوب بيهه...

عبالك تعرفهه ثريا كالتلهه تفضلي بس رفعت الخمار صفنت بوجه ثريا بس ثريا كالتلهه اي انه نفسها تفضلي فاروق هنا...

كلشي مافهمت دخلت وراهه وكعدت بالصاله والحجيه صافنه عليهه والبنيه حيل حلوه وباجيه وجهالهه مصدومين ...

ثريا راحت للغرفه صاحت فاروق واجت وجابتلهه مي واحنه عبالك جايه من غير كوكب انباوع عليهه وع الججيه الي لبست النظارات وصفنت ...

طلع فاروق من الغرفه بس شافته كامت كالتله اعذرني انجبرت واجيت ..

فاروق.. اكعدي شلون طلعتي بهالليل ومنو جابج ؟؟ ومنين اندليتي ؟؟

... فاروق انه تعبت ....  قطع كلامهه بنتر كالهه جاوبيني منو جابج بهالليل وشلون طلعتي؟؟؟

... رحت لجيرانه وابوهم جابني يعرفك ويندل بيتكم والله انجبرت فاروق حته الجهال تخبلو عمي هد عليه ويريد ياخذهم من عندي وين اروح اهلي موهنا بعيدين...

ثريا... صافنه ع اخوي الي اعرفو من يعصب احتقن وجهو  وارجع ادحك عليهه الي العيون مورمه من البجي وجهالهه مفزوعين ...

ابتسم فاروق واخذهم بحضنو وهم متعلكين بركبتو كال امنيه اخذيهم شويه وانتي تعالي وياي للمضيف...

كامت ويااا تتخبط بخطواتهه وسد باب المضيف واحنه خلينه اذانه ع الباب ونتسمع الهم ما اسمع شي بس بواجيهه شكد قاسي اخوي...

شويه وجان يندك الباب حيل وعبالك مداهمه طلع ادهم واجه كال وين فاروق هذا ابو عمار الله يرحمه جاي يريد الجهال...

البنيه فزت وكامت تبجي لازمه ايد فاروق وتتوسل بي دكله اذبحني ولا تاخذهم مني...

المنظر قشعر بدني اتذكرت جدتي من تسولف ع امي من طردتهه وشلون دارت ظهرهه عنهه ...

عكس هاي الي بس سمعت فاروق كال دخلو هسه اجي وهي كعدت بالكاع يم رجلين فاروق ودكلو الله عليك بداعه ثريا لاتحرمني منهم سوو بيه كلشي ولا تاخذوهم....

كوه اخذتهه من ايدهه همزين جهالهه بالغرفه جان تخبلو ع امهم جبتلهه مي وهي تشهك والحجاب وكع وطلع الشعر اصفر  ..

والحجيه كلساع وكالت خايبات جنهه العيد بس شوفتهه ترد الروح شمالك يافاروق ما اهتزيت...

نص ساعه واجه فاروق وهي لبست حجابهه بس كالهه وين الجهال لو تخبلت انقهرنه عليهه مثل الحمامه المذبوحه وتتوجع شهكتهه والمهه يكسر الكلب...

تقرب عليهه فاروق وكالهه شجاج وين رايحين هم لبيت جدهم ...

... لافاروق خليني خدامه الك ولا اطلكني وياخذوني اني وجهالي انه اموت بدونهم والله احرك روحي ارحمني لخاطر عمار...

ثريا.. دحكت اخوي فرك وجهه واستغفر كالهه بصوت حاد نورس انطيني الجهال وباجر اني اجيبهم الج بيدي بس اليوم...

اخذهم بالقوه وهي تخبلت اخوتي مادخلو ابد ظلو برا والحجيه تسكت بيهه وهي تنحب وتبجي الي عرفنا فاروق ناوي يطلكهه وعيالهه من سمعوا قررو ياخذون الجهال لوتزوج حماهه وهي ماقابله...

اخذو الجهال واجه عليهه لزمهه من ايدهه واخذهه لغرفتي وسد الباب اول مره ادحك فاروق بهيج جراه الي كومهه وهو لازم ايدهه ...

تدفع بيه الحجيه اروح وراهم دكلي يولي اخوج حامي خاف يسوي شي بعز المشاكل تطلع الحجيه رونك سايد وتخليني اضحك...

شويه وطلع فاروق وكال عينج عليهه ترى مريضه وخاف تتخربط بين ما اروح اجيب علاجهه من البيت...

تسالت شبيهه مريضه وليش هيج اخوي خايف عليهه وقلقان مبينه من ملامحه معقوله دك العشك ابواب فاروق ؟؟

يتببببع..... متابعه ممتعه