تحميل رواية «المنجمة» PDF

﷽

#المنجمة

الكاتبة _كفايه

لاتنسون متابعة الحساب

التصويت والتعليق بين الفقرات لطفاً💙

ياعلي مدد ♛

_____________________________

_يلا بدلي نروح

_شهب: اااالمن رايحين خلبقى هنا بالبيت

_نيزك: عيب نروح وياهم عمهم هذا شبيج

بقت تتذمر رحت قبلها بدلت واموري عد سهلة تلعب وياة مبدلتة من الصبح ضرغام طالع ماشفتة لان كعدت متاخرة البارحة شغل العزيمة نصة علية هلكت واني تعبانة من الحفلة  .

لبست عباتي وكعدت يم ذهب منتظرين شهب تكمل حتى نطلع البارحة الولد كالو ابو ضيغم جواد مريض واليوم اتصلت بية ذهب بعد على وضعة كالت نروحلة واني ما كلت لا، اجت شهب مترددة ماتريد تروح طلعنا وهي تهمسلي  .

_شهب: خلبقى يم خالي فدوه

_شهب امشي كدامي شوية ونرجع

_ماريد اروح

_ليش

كلتها وباوعت بعيونها مدمعة اخذت نفس وسحبتها من ايدها احجي وياها بصوت ناصي  .

_مو حلوة ما نروح وياهم شوية ونرجع ما نطول

سكتت وطول الطريق ساكتة وصلنا لبيتهم بعد السلام كعدنا اخوتة موجودين فرقد واسامة يسولفون وياة ويحاولون يضحكونة هو ضايج كلش من الالم ماعرف من سبب ثاني   .

_اسامة: طاقة سلبية انترست يمة كايم اني هذا اخوي جنة بومة عكر مزاجي

_جواد: بعدني ماطحت ولك اسامة طاقة سلبييية اني صرت

_اسامة: تعرفني ماحب الهم والغم وشوفتك تجيبهن ثنينهن

_جواد: شفتي يمة ولدج شفتيهم ساقطين سقووط

_ذهب: مو جديدة اطلعنا بالجديد يبن بطني

_جواد: يمة اريد البيت يتسجل باسمي شلووووون ماعررررف

بقة واحد يباوع بوجهة الثاني وذهب تعصبت رفعت عكازتها تاشر بيها علية بعصبية  .

_ذهب: لا تضل تهذي سددد حلگك سدددة

_جواد: الى متى غير نفهم البيوت والحلال والمال كلة مو باسم واحد بينة تعب عمرنا هسة يروح لحلوك الفايخين

_ذهب: سالفة الورث سدوها مابينة حيل دوخة رااااس اكعدو واهجعوووو

_اسامة: يمة شنو السالفة ترة صدك لشوكت نبقة هيج كل شي نشتغل بية ودايرينة باسم ابونة مانفضها

_ذهب: ماتجيبون غير طيحان الحظ الييييي ولد الخايبة خليهم بعيدين عني فهمتوووو بيوت وكاعدين بيها شركات ومشاريع عدكم شتردون اشتغلو واسكتو

_فرقد: هي هاي نشتغل ولدنا تتعب تالي نتقاسم كلشي بالنص

كامت من مكانها متعصبة دكت عوجيتها بالكاع

_ذهب: مايضيع تعبكم كل واحد ياخذ حصتة ان جان اليوم لو بعد الففففففف سنة

طلعت من المكان متعصبة وجواد يحجي بحركة

_هي هاي امكم اذا ما تبهذلنا كولو ما كلت خل نفضها ماكو احنة مغلسين وهما مغلسين ماتحجووووون شي

_اسامة: اني رايح سالفتكم تعبانة انتو

_جواد: رووح ديح من دولة لدولة لاتخلي شي بنفسك شهمك انت

ما جاوبة طلع من المكان بقة بس فرقد كاعد يباوعلي من انتبهتلة كال  .

_فرقد: كومي عمو شوفي ذهب لايرتفع ضغطها

هزيت راسي وكمت صاح بي جواد

_انت هم كوووم مابيكم خيرر كلكم ساكتين مغلسين ولا نكول جاي ننبح واصواتنا رايحة كووووم

_فرقد: شبيك انجلبت خو ما انجلبت اهمداااك

ضحكت واني امشي شبيهم ذولة الصراحة استغربت من علاقتهم جواد يسب صار ويفشر ولا احد رد علية رغم هما الكبار، ذهب كاعدة بالحديقة تباوع للبيت تحجي وي سهلة  .

_شوفي هذا مو بيت قصر هذا قصر وكلها تعيش بالقصر السلطان والخادم وجيبي خلگ للهوسة والمسرحيات التصير بية انا ما اتحمل السم

_سهلة: شلون يبقون هيج

_ذهب: دخل اموت اول تالي افتحو السالفة ماطولني بية حيل خلوها مدثورة

_سهلة: الله يطول بعمرج يمة

التفتت علية سهلة مبتسمة تكلي

_شلون جهزتلج جهاز يجنن بعدة ما واصل بس يوصل اريد اشوف ذوقج بية

_نيزك: مايحتاج اتعبين روحج

_سهلة: ياا صدك تحجين تعبيش غير طايرة من الفرح ما مصدكة هذا الاسبوع عرسكم بس تعرسون الف نذر ناذرتلي

_ذهب: جا شني ماتروح تشتري غراضها هي

_سهلة: لا والله يمة ضرغام ما يقبل يكول وصيت جهاز كامل انتن اخذن راحتجن مايريدنة نتعب سودة علية

_ذهب: كولي مايريد واحد يشوفها وتفتر على اهل المحلات

كالتها وابتسامة انرسمت على ثغرها دنكت راسي افكر بكلامها معقولة هيج يفكر شو حتى ما ادري موصي على جهاز الي  .

_فرقد: شلونهم الجماعة

خزرتة ذهب تباوع لسهلة دارت وجهة عنة ولا ردت هو مبين يسلم عليها لان ماجانت جوة احنا جنا يمة كاعدين  .

_فرقد: يمة شبيها الناس حتى السلام ماتردة مو لله هو

_سهلة: يمة اني رايحة رايدة شي

_ذهب: لا بس شوفي هالسويقط شيريد ماتكول شرايد

_فرقد: يا كلمة رجعييي لمكانج

راحت تمشي سريع دخلت جوة وهو اندار يباوعلها بكامل طولة منا لمن دخلت يلا التفتت يذب حسرات طلع باكيت الجكاير يدخن وذهب تشمر علية بالكلام  .

_اليضيع الاصيل ما يحصل مثلة

_فرقد: يمة انتي خبيثة ماكو هيج شايلة خباثة

_ماتبجب يالاغم شعلية انا

_انتي لو تحجين عليها تقتنع وتلين بس انتي مطابكتها وتزيدين الحطب على النار

_بعمري ما اوكف وي الغلط البت بعز شبابها تزوجت عليها كسرت فرحتها واهسها تريدني اوكف وياك امداني اي والله

_فرقد: يكول ما تعرفون ليش اتزوجت كلكم تعرفون السبب بس ضلو احجو علية ضلوو انعل هالعيشة الزفرررة رايح ااااااني ررررررايح

_ذهب: لاتنجلط ووولك الضغط السكر الصخااام لايرتفع عندك لا تسوووق يااا ولج اركضي وراة كليلة لايسوق

هزيت راسي وطلعت وراة مشغل السيارة وبيدة يضرب على الاستيرن بقوة ويحجي وي نفسة ويصيح بحركة صفنت علية سبحان الله ضرغام هم هيج شكلة من يتعصب مايخلي كلمة مايكولها وبس يضرب اليلوحة  .

بقيت بمكاني اباوعلة ما اتجرا اروحلة هم استحي منة وهم اخاف من عصبيتة انتبهلي بعد وقت سكت يتنفس بسرعة وجهة احمررر فتح الشباك يتنفس طلع ايدة من الجامة بعصبية يحجي

_فرقد: روحي كليلها احترررك السافل وانطفى ارتاحي اهم شي ترتاحين عساها حرگتي ما تتعدااااااج

خلة راسة على الاستيرن وطفة السيارة تقربت علية خفت لا هبط سكرة همست:: عمو انت زين؟

_روحي بابا

_اجيبلك شي

_لا بس بلغيها كلامي روحي قبل لاتنسين

دخلت جوة وماعرف ليش كبل كتلها الكلام يمكن لان اعتبرتة رسالة لازم اوصلها بقيت اترقب ردها بقت برودها وكالت  .

_الله يعرف كلشي ومنو صاحب الحوبة خل يحجي

سكتت وبقيت اساعد ياسمين بناتها ماكو حتى شهب خاتلة وياهن جوة التفتت على سهلة تكلي بيدها كلاص مي جبير وشريط حبوب خلتهن بيدي

_سهلة: روحي خلية يشرب

فهمت عليها مشيت وصاحت علية

_مو تكليلة اني دزيتج امانة

هميت بالموافقة لكيته على وضعة:: عمو عمو وياي

رفع راسة يفرك بية قدمتلة الكلاص والعلاج

_اشرب ذني

اخذهن من ايدي شرب العلاج وانطاني الكلاص ابتسامة انرسمت على ملامحة التعبانة

_كليلها لا كل ماريد اموت تحييني وتموتني بيدها

رجعت وبلغتها الكلام سكتت تشتغل بحركة وياسمين تكلها:: اني ما ادخل بهاي السوالف بس صدك هي انتي لو مطلكة حتى تحرمين علية لو لا تبقين هيج بذمتة وهاجرتة سنين حرام عليج الله يحاسبج

_سهلة: مايحاسبني لان اني رايدة الطلاك وهو مايطلكني شسوي سنين هاي بس اريدة يطلك مايطلك حرمت علية بعد ماطول سواها وياي عناد عبالة ارجعلة لو ما طلك

ضحكت ياسمين بصوت تكول

_مهوووس بيج بالقرآن مو بس يحبج

هزت ايدها سهلة باستهزاء ماردت عليها شوية ورحت اشوف امير لكيتة يلعب وي رضا ناسيني أصلاً ولا يكول امة عفتة ورحت للذهب وجهة انصبغ تصيح كامت  .

_احفااادي الدايحين وينهم عني راح اموت واخلصهم اريد اشوفهم وينهم لا ولد بيها خير ولا احفاد

قاست ياسمين ضغطها كالت طبيعي لو هي تخبلت عليها:: راح امووووت وتكلي طبيعي موتيني يالفاهية حتى يتسجل البيت باسمج موو ادري بيج

_ياسمين: يا عمة والله ما صاعد شوفي خالة نيزك

راوتني اني ماعرف بية بس سهلة عضتلها شفة تكلها:: امشي خابري الولد راح تموووت لاتبقى حسرة بكلبها شوفتهم

_ذهب: ايي ولج اي هنا الحجي الصدك راح اموت ابو ود وينة عني جدة عليش حبيب روحي وينك يابعدي الاصفر الازرك وينهم

_سهلة: هسة راح اخابرهم يجون تعالي ادخلي جوة

اخذتها غسلت وجهة يمكن من الشمس صار هيج كعدت على القنفة والبنات اجنها كعدن يمها صاحت بجوري  :: كومي عني كلبي مورم منج يلا كومي

طفرت من مكانها بدون ماترد عليها بكلمة

ماكو شوية واجو الولد دخلو عليها الثلاثي ضيغم وفقار وقبس دنكو على راسها باسوها وكعدو حوليها

ه

ي تشكيلهم  .

_ذهب: ردت اموت لو ما اجيتم اشوفنكم

_قبس: متاكدة

_ذهب: ابهاتكم المخبلين جلطوني الا شوية

_قبس: غير انتي تجلطين وين يجلطون هما

_ذهب: حبوبا فقار اروحلك فدوه خاف عطلتكم عن شغلكم

_فقار: يروحلج فدوة الشغل

_ذهب: يابعد الروح يا حبوبا بس انت الزين

_قبس: احنا سرسرية جايين لجوء لهاي العائلة الكريمة

_ذهب: بس يهذي يهذي يهذي يريدني اكوم اكتلة

_قبس: اي هذا الاريدة اكتلج يلة تعالي

اجة يلوي بديها وهي تضرب بيه تصيح لفقار ياخذ دفعة فقار عنها وقبس يضحك.

_فقار: كااافي شبيك

_قبس: خليني اكتلها السانها شطولة ماكلتنا اكل بيه

_ضيغم: خو انت عندك فوبيا من اللسان الطويل شبيك ماتكلي

_قبس: الصوت العالي يزعجني ما احبة

_ذهب: امداني جبلتك خوينسة تنطيك على مايك لو جايبتلك ام لسان تجلطك جلططط

رفع عيونة باوع لشهب خاتلة بصف وردة وردة تخزر بية كال وهو يباوعلها  :: حتى اكص لسانها واخلص انمونة

_ذهب: يمة ابو ود هذا عمدة يرفع بضغطي كومة منا يدري بية كلشي ولا يحجي على النسوان

_قبس: ماتفتحين جمعية نسائية للارامل والمطلقات والعوانز تكسبين اجر وهم تفرحين

_ذهب: ولك ولك ولك تعال احبك على هذا الحجي خوش فكرة جا شني اسويها انمونة

_قبس: يلا اني امولج فلوس بعد طالبتني طلابة

_ذهب: لا حبوبا ما اطلبك انت اكثر واحد اعزة من احفادي تعال احبك تعال

ضحك وهي تبوس بية ماعرف ليش احسهم يغيرون جو من يجون يمها حتى شخصياتهم تختلف مثلا قبس ما يحجي هواي بس وياها لسانة شطولة ويضحك ويحشش  .

ضيغم كلش هادئ اشوفة مايحجي تمدد على القنفة وخلة المخدة فوك راسة ذهب تحاجية بخوف..

_ذهب: ها حبوبا بيك شي يبعدي

_ضيغم: لا بس تعبان انام شوية واكعدوني

_ذهب: سودة علية حبوبا

_ياسمين: كوم لغرفتك يمة كوم

_ضيغم: خليني هنا بس اصعد بعد ما انزل

شوية واجة ضرغام يدور بالوجوة لان البنات بالمطبخ واني كاعدة اشوفة امة كلتلة

_سهلة: مو هنا جوة روح

كلهم سمعو الصوت ردت الكاع تنشگ وتبلعني وجهي صار ناااار دنكت راسي  بعد مابية اكوم سلم هو وكعد يكلي:: كومي هنا يمي ليش كاعدة وحدج

رفعت راسي اباوع للموجودين كل واحد يباوع بموبايلة قبس عاض شفتة يريد يضحك حجيت بتوتر:: لا راح اكوم هسة

_ضرغام: تعالي يمي شوية

خزرتة بقوة وهو دفر ضيغم طفرة خطية يصيح بية:: شبييييك وسم ومرررض

_ضرغام: شعندك نايم دكوووم

كاملة ضربة بوكس بكتفة وضرغام دفرة وراح ضيغم يخزر بية بغضب يكول اني ضربتة كمت من مكاني حتى احتريت من المستحة كلة من ورة ضرغام  ..

_ذهب:انجلب هذا الازرك

_ضيغم:زوجووووة خلصوووونة

،رحت للمطبخ اركض شبيهم ذولة اني شعلييية البنات يضحكن ورد من شافتني طكت اصبع ترفع بحواجبها تكلي...

_ورد: هلا هلا صبغ وجهج يلا ارتاح لكك حمااس للعرس حماس اريد اركص ركص حتى الكاولية ماتركص مثلي

طفرت من الوجع بنفس اللحظة امها كرصتها بقوة تمشي وتطفر تمسح بيدها  .

_ورد: ااااااا شبيج نبع الحنان شبيك اكو واحد هيج يكرص

_ياسمين: السانج يلغضب شكم مرة اكلج ركزي من تحجين

_ورد: الا اركص مثل الكاوليات وشوووفي

كالتها وطفرت امها تركض وراها ما لزمتها رجعت تحجي عليها:: خبلة هاي لا تشوفنها بس طول ماتعرف معنى الكلام التحجية

_سهلة: خليها فرحانة شبيج وياها هسة احنا بس بنات

كعدت اثرم زلاطة وشهب تسوي مقبلات هي وجوري اجة رضا وكف كدامي يكلي  .

_خالة عمو ضرغام يكول خل تجيني

كلهن ركزن وياي وسمعن الكلام انوب يضحكن هذا ضرغام ناوي يجلطني لو شنوووو، كتلة بعصبية

_عندي شغل روح كلة

راح وسهلة تحجي:: دمشي يا شغل هذا شوفية خطية تعبان

_ورد: منين تعبان مشتغل عمالة شو مكتبة اكبر من غرفتي

عضتلها امة اصبعها تصيح بيها

_ياسمين: ولي منا انتي شحچاج الا تشاركين

_ورد: المشاركة حلوة

طفرت من مكاني على صوتة العالي يصيح باسمي رجلية ما عانني هاي اني الما اخاف من اكبر واحد شبية رحت اركض لكيتة مدد على القنفة ومخلي ايدة على عيونة اول ما فتحت الباب وخر ايدة يصيح  ..

_ما تجين يعني الا اسحبج كدامهم

_شتريد شبيك خبصت الجو ترة ميصير هيج

عدل كعدتة واني بقيت واكفة بالنص اشر على الباب يكلي:: ارجعي اقفلية وتعالي

رفعت حاجبي وهو ضرب على رجلة بعصبية

_تشعل الگلب شششعل

_بس لا تصيح فضحتنا كلها درت انت صحتلي شبيك متكلي

رحت سديت الباب وهو ياكدلي:: بالمفتاح اقفلية

درتلة رافعتلة حاجب

_ضرغام: بس لا تعوفين المخازر ورفعت الحاجب اصير بنص الخير

_راح اطلع

_والقرآن اكوم وراج وكدامهم اشيلج واجيبج هنا تعالي يلة بدون دراما

هزيت ايدي وهمست مخبل

_ضرغام: كلها تدري بية مخبل

_تمام لعد ما اتزوج واحد مخبل خلينا نفصخ العقد مادام بعدنا على البر

_مو تدللين بس تعالي هسة اطلكج

رحت صرت كدامة شهكت من وكعني يمة

_نيزك: بالقرآن انت بيك شي مو صاحي

_بت جبار تخلين واحد صاحي بهاي عيونج نعلعلة

_علييمن هاي

_لا تصيحين مو عليج

وخرت اصبعة من شفتي وعدلت كعدتي مرر ايدة ورة ضهري وسحبني لحضنة وهاي اول مرة هيج يصير بية من اكون وياة جسمي قشعر من باسني بخدي همست واني ادفعة.

_ضرغام

_روحة

_لا. تسوي هيج كول شرايد

_انتي

ذبلت عيونة وهو يباوع بوجهي قبل لا احجي نزع شالي واني اريد الطم كوة احجي بصوت ناصي من العصبية  :: ضرغام بيت الناس شبيك

_احتركو كلهم بالبيت كلشي ما محصل عاد بيت الناس نحصل

_ترة عرسنا هذا الاسبوع

_لا يروح بالج بعيد على البر نلعب

ضربتة بوكس بصدرة احجي بعصبية

_لاتصير فاااسد

_فاسد وي مرتي.

_ترة ابطل اذا تبقة هيج

ضحك بصوت عالي ضحكة طويلة ابتسمت على الواهس  .

_ضرغام: انتي ناوية تجلطيني بهاي سوالفج مامنها والله مجلوط مجلوط

_هسة اني شسويت شبيك وياي

_حصرة المسج وصحتي ضرررغام

درت وجهي عنة دارة علية

_باوعيلي من احجي وياج

_اممم

كطعت النفس من قبلني اريد اتنفس وهو مطوقني كل اوضاعي تخربطت حتى لساني شكل اريد احجي بعد ماعرفت  هو بس يضحك على شنو ماعرف هسة بس اريد اكووووم ما يخليني  .

_اكعدي بس تحوسين شبيج ما تكليلي

_اريد امشي

_بعدة الغدة ينصب يلا ترحين

_لا والله

_هم عصبية وهم عنودية وهم تشگ شگ هواي علية

_شفت بلة

_اموت على الثقة جعل ماكو غيرج حلو ويتباهة

ضحكت ابعد راسي وهو يباوع لضحكتي يضحك

_نيزك: حرام عليك لاتكول جعل ماكو غيرج حلو

_تنگرررط الجعل بحلگج هو اني من شفتج كمت ما اباوع لان كمت اشوف النسوان كلها تلعب النفس

مديت ايدي على ركبتة اخنك بية وبهدوء احجي

_وين جنت تشوف النسوان

_عوفي سيرة النسوان نركز بشيختهن

ضحكت على الوصف وهو يشدد علية عبالك راح اطير من ايدة جعصني جعص وباصبعة يلعب بشعري  .

_شعرج حرير هسة بس يعدي الاسبوع اخذج لبيتي هناك نعيش واريد تلبسين ذاك التراك وتسوين شعرج ضفيرة

رفعت عيونة الة

_ها

_اسابيع واسابيع وذاك المنظر ما يطلع من راسي حتى من وراج تركت النوم لا افكر بيج بالحرام وانتي طاهرة

بلعت ريگي جسمي برد من كلامة بقيت اسمعلة وهو يكمل  .

_ضرغام: زلمة شكدني شكبرني سحلتني بكد الفصمة بتراكها وضفيرتها  .

يرسم دوائر على خدي واني مركزة بملامحة مثل الثولة شبية انثولت مو قبل كم يوم اكلة ماعندي مشاعر طاح حظي  .

_اول ماشفتج  دنكت حتى اشوفج من فوك وانتي جوة ناعمة ورقيقة برقة الفراشة عيونج رافعتهن يضون تحجين وياي شحلاتج وشحلات ذاك اليوم

ابتعد مني ونزع تشيرتة اشر على صدرة داك تاريخ

اول لقاء النة اني ما اتذكرة بالضبط ولا بالي بس هو جان بالشتا صح  .

_ضرغام: ما انسة تاريخ اليوم من درت ضهري وشفتج وشمتة حتى لا انساة وراح اوشم تاريخ زواجنا وعيد ميلادج هنا على گلبي

رفعت عيني من صدرة لبس تشيرتة ورجع مثل كعدتة سحبني لحضنة ساكتة  بهدوء وسكينة

_خل نرجع لذاك اليوم وكل واحد يحجي شلون شاف الثاني نبدي بيج يلة احجي

تحمحمت وصفنت اتذكر ذاك اليوم باوعت بوجهة منتظرني احجي كتلة  .

_خفت من شفتك لان ضخم وشكلك عصبي حاجبك مطبور وشعرك هم ناصي تشبة المصارعين شوية

ضحك يعصر بخدودي ويبوسهن

_شبية حاجبك مطبور

_ضربوني بطل كزاز وانشگ حاجبي

_خوش

_خوش لان ضربوني

_لا لا بس اكول خوش لان صرت حلو ازيد

سكتت وهو بقة ساكت ماحجة شي بس صافن بوجهي يوووترني ويموتني من التوتر بصوت هامس يكلي:: اني حلو

هزيت راسي اي وهو ابتسم

_عاجبج اني

_تعجب الكل عادي

_انتي انتي عاجبج

_اي

ضحك ويرجع يحجي وياي يدنك

_هاي الرقة والجمال لو اهلج عايشين ما ينطونج الي ولو ما اختج الدايحة ما اشوفج ولو ما عمج الارعن ماصرتي حلالي

_بس لا تحجي على اختي

_والله هسة ابوسها على دياحتها الخلتج تجيني

_هي تشتغل ما دايحة مجبورة تطلع

_ما احجي عليها وداعتج هي بنية بمية زلمة مو عشرة تحود حود

_بس هي ما تحبك

_حتى اني جنت ما احبها بس مثل ما اني حبيتها تحبني

_تحبها انت ما تكرهة؟

_نسيبتي شلون اكرهة بس هي ماتحبني لو دهر ما طول تزوجتج تبقة حاقدة علية

_تحبني تموت علية عبالك بنتها اني

_ادري بيها

ابتسمت بحزن من جاب طاريها وينها هي شجاي تسوي تشتغل كاعدة يم دراهم خليت راسي على كتفة افكر بيها صارت عدنا بيوت وهي على وضعها  والله لو اموت ما اخليها هيج  .

_ضرغام

_روح ضرغام

اني اعيش براحة من كواكب ترتاح تعرف

_اي

_هي صح راسها يابس وماتسمع لاحد بس خلينا نساعدها هي تكره المساعدة نجيها بغير طريق نوفرلها شغل بيت تكعد بية قريب مني

_الشغل ما تشتغل غير شغلها السوك ما تعوفة اختج ضيغم شغلها باحسن المراكز وراتب وتعرفين خوش شغل بس غير تبقة ولا تبقة وهسة لو تريد هم اشوفلها شغل وبيتي الها اشتريلها بيت بس كولي

_كون تقتنع ما تقتنع شسوي ماتعوف هاي الحياة

_تعوفها وداعتج يجي يوم وتتعب وتريد تعيش مثل البشر

_ان شاءالله امنيتي هاي والله

غمضت عيوني انفاسة بركبتي ضرب على خدي بصوت مطبك يكعدني:: كومي يمعودة

طفرت افرك بعيوني اباوع بعدني بمكاني كاعده وهو شكلة جان نايم شلت شالي لبستة شعري مخربط عدلتة اول كام هو يطگطگ بجسمة  .

_اويليييي شلون نومة اول مرة انام مرتاح هيج

طفرت من مكاني فاتحة عيوني بصدمة

_جنا نايمين احنا؟؟؟

ضحك يسحبني واني افلت روحي منة

_ضرغام: تخبل مو نومة

_حتى اني جنت نايمة

_نمتي على الدفو شبيج ما حاسة بروحج

هزيت راسي لا واني الفشلة راح تاكلني حتى عيوني دمعني والقرآن عيب هسة شيكولون توسلتة بعيوني اكلة  .

_ضرغام هسة شلون اشوفهم

_يمعودة هو منو متذكرج طشو هما امشي اطلعي نتغدا

_بس

_هسة زا*نـي بيج

سحبني من ايدي فعلاً ماكو احد المطبخ فارغ كال

_كلها تطشرت للغرف شبيج

_ماكعدتني حتى المواعين غاسلينها

_الا تعبين روحج يعني خليهن يغسلن خايفة عليهن اكعدي واسكتي لاتشمرين روحج على الشغل

_مو عيب

_ما طولج مرتي انسي العيب اهم شي راحتج ياشغل يا بطيخ اشوفج تشتغلين وتركضين

_شلون يعني نبطل

_اشتغلي بس مو كل الشغل خفايف سوي

رحت احمي الاكل وهو كعد يباوعلي كل ما ادير واجهي الكاه هيج الا ان صبيت الاكل وكعدت اول مرة اكل كدامة فد استحيت ، طفرت كدامة اغسل واخدر جاي رحت جوة لكيت امير نايم يم سهلة

وهي نايمة وياة ابتسمت وطلعت تذكرت افنان وصبيحة شلون جانن يكرهنا رجعت اصب جاي كعدت اشرب وهو لازم يدخن  .

_ضرغام: اشتريتلج جهاز تدرين

_دريت بس ليش ما كتلي وين تعرف قياسي

_اعرف شراردلها اذا مو كلهن على كدج عاتبيني

رفعت حاجبي بتعجب اشرب بالجاي

_نيزك: شو ماكو الولد وين راحو

_بالحديقة هسة تلكينهم

_شيسوون

_يحشون بية اروح اشوفهم  .

_ضرغام:: ها سرسرية مجتمعين

_ضيغم: ناقصتك الكعدة

_ضرغام: بس انت تكولها تضووج مني الناس

خزر فقار ضحك باستهزاء يكلة

_فقار: شبيك ابني منو وياك

_ضرغام: فقوري الورد احبك

_فقار: تسلم

_ضرغام: احبك

_فقار: الله يحبك

_ضرغام: مايعرف قيمة مشاعري الثمينة

_ضيغم: اني اعرفها

_ضرغام: هو انت وين اكو منك يرحلولك فدووة

_قبس: اجر زيج لو مايحتاج

_ضرغام: بتيتة حبيبي شبيك ضايج

_قبس: زروكي حبيبي ماضايج

_ضرغام: احبك يلة

_قبس: صار عندة فائض من العاطفة خوش مشحون

_ضرغام: راح اكوملك يلا انجب

_قبس: هي حظوظ الازرك يكول طايح من السما يوسف مو مثلك

_ضرغام: اذا جبت هذا الاسم بحلگك اشگة راح يصير عندي جالي واني شبعان

_قبس: يوسرسيف ادخل علينة يوووووسف يوسف

ضرب ايدة بالكاع راد يكوملة ا جاة يكلة

_قبس: ما اعيدها يلا افتهمت غيرو الموضوع

_فقار: ضيغم كملت الملفات الدزيتهن

_ضيغم: امممم

_ضرغام: شباب اريد اشتغل وياكم بالشركة واعوف المعرض للعمال

_فقار: مامحتاجين موظفين

_ضرغام: هسة ليش تخلوني ازرعد بالحجي

_قبس: شنو تشتغل ضوضو كول بس لاتريد تصير المدير

_ضرغام: اي والله خوش شغل

_فقار: تعزل الشركة

_ضرغام: ليش تعزل اتعلم وحد عنكم كلكم قوط ولبس رسمي اني هم اريد

_ضيغم: الرياضي احلى عليك يبرز عضلاتك

_ضرغام: لا الرسمي يبرزهن اكثر

_فقار: هسة شجلبت اشتغل بالشركة ما اشتغل

مو معرض طول بعرض مو بعينك

_ضرغام: شباب شدكولون شنو يطلعلي لو تقاسمنا الورث

_قبس: نعال لو تحصل لو ما تحصل

_ضرغام: يمكن الشركة تطلعلي اذا تلاحظون احنا قليلين واني بس عندي اخ واحد يعني حصتي جبيرة

_فقار: نام ساعتين كام يبني قصور بالغيم

_ضرغام: خليتو عينكم على نومتي بعد ما انام الليل

_ضيغم: اني منتظر اليوم التبقة ماتغمض عينك بية

كلهم باوعولة وهو خازرة بغضب رفع ايدة مبرر

_ضيغم: اني مدخلني هاي وحدة منجمة كالتلة هيج

_ضرغام: اشتعلت روحك وروحها شلون ثنين غثة

_قبس: سولفولنا منين هاي المنجمة

_ضيغم: وحدة تكشفك بس تباوع بعيونك

_قبس: والله حلو ما تاخذوني الها

_فقار: سخافات هاي شبيكم شباب شكدكم شكبركم تصدكون بهيج سوالف شخليتو لغيركم

_ضيغم: ترة صدك التكولة يصير، حقيقة

_فقار: مجاي اصدك هاي انت هيج ادور سوالف هسة ضرغام اصدك يدور بس انت لا

_ضرغام: اي مو ضرغام مو من المستوى مثقفين عود ولكم تاج راسكم هذا تعبكم كلة ما عدكم نص العندي

_قبس: ضرغام عادي اني اخوك اريد ابدل سيارتي

_ضرغام: جسر للطيبين ابدلها وبدل فقار

_فقار: يكول صاير على راسك شعندك وياي ابني

_ضرغام: غير احبك

_فقار: الله يحبك حبيبي

كام ضيغم ياشر لضرغام

_ماتروح للمعرض

_ضرغام: هسة لا شعندك

_اتونس

_ضرغام: مدكلي يا ونسة هاي

_ضيغم: الاجواء الشعبية تونس

_ضرغام: ذكرتني بغضنفر

_قبس: هسة هو شكال حتى ذكرك بية

_ضرغام: هيج بعد اجة بالي

_فقار: الاجة بحفل التخرج

_ضيغم: اي

_فقار: تعرفة انت ضيغم مو؟

_ضيغم: ملتقي بية هيج

_قبس: حبيتة يشبهة سمار هتلي سوالفة حلوة

_ضرغام: هو خوش ولد بس يشتغل وي تجار اسلحة وممنوعات

_الشباب كلهم بصوت واحد:: صددددك  !!!!

_ضرغام: اي معروف بالمنطقة اله اسمة

_فقار: مبين خوش ولد

_ضرغام: هو خوش لو ماهي السالفة

_ضيغم: متاكد من كلامك

_ضرغام: افااا اخباري توب التوب الولد يحجون عنة

_فقار: حرامات يدمر مستقبلة بعدة شاب شنو ماعندة اهل يحجون علية ويمنعونة

_ضرغام: اهلة موجودين بس شامرينة من الصغر ابوة منفصل عن امة وامة متزوجة عندها جهال  متربي بالشارع جان عد عمتة ورجل عمتة من عمر المراهقة طردة لان عندة بنات يخاف عليهن فهو عاف محافظتة واجة

_ضيغم: محد رجع سال علية لا ابوة ولا امة

_ضرغام: لا كل واحد بيهم عندة حياتة هو غلطة يعتبرونة واكو ناس دكول ابن حرام بس اهل ابوة موجودين وناس تكول محد يعرف شي عنة بلا اصل

_قبس: هسة دوختونا مافهمنا عندة اهل لا

_ضرغام: كل واحد يكول شكل مو اكيد

_فقار: بكل الاحوال يبقة خطية والمر بية مو شوية اتمنى يعيش بشكل صحيح

_ضرغام: ماينعدل

_قبس: زين هو شلون صديق كواكب اذا هيج

_ضرغام: صديق

_قبس: اي شلون هي ماتدري بية وتمشي وياة

_ضيغم: ما تمشي وياة هي كاعدة بيت دراهم وهو يجي على دراهم مرات تشوفة ماعدها شي وياة

_قبس: ترة اني ماكلت عدها شي وياة هي البنية مبينة ما عدها هيج سوالف

_ضيغم: يلة كافي كومو اطشرو هي بس تطول تعلك مع السلامه

_ضرغام: وياي طفرتو مو جنتو تسولفون

_قبس: وينها السوالف جنا ندك جكاير

_ضرغام: مشتهي نركيلة

_قبس: حتى اني امشينا نروح نأركل تجون ويانا شباب

_ضرغام: بربك ذولة يجون ياركلون ذولة

_قبس: ضيغم يدخن ترة

_فقار: روحو مايجي

_ضرغام: عوفهم جنهم ارامل

_ضيغم: هسة هذا شبية

_ضرغام: اروح اشوف تاج راسكم خاف محتاجة شي

_نيزك: الحجية ذهب كاعدة بالنص واحنا داير ومدايرها كدامنة كرزات وعصاير وحلويات كلنا ناكل ونسولف وياها  اجة صوت ضرغام يتحمحم صاحت بية  ..

_ذهب: تعال حبوبا تعال فوت

_ضرغام: ها يابة شلونهم

_ذهب: ها ولك مهيلك ليش حابس البت يمك

_ضرغام: تقصدين ام امير

_ذهب: ليش اكو غيرها

_ضرغام: الاول والتالي وين اكو غيرها

اعضلة بشفتي اريدة بس يسكت ماكو هسة زين من يحجي كدامهم ويخليني ماعرف وين انطي وجهي  .

_ذهب: كم يوم العرس ولك منعول تركض وراها من اليوم بعد ما تشوفها ارجع اكعد بيتك للعرس يلة

_ضرغام: حتى بهاي تدخلتي شعليك بيه ما اطلع لاتسولفينها شنو شمسوي مرتي

_ذهب: لو ما البنات جان حجيت شوف لو تروح تكعد بيتك لو اخليها هنا كاعدة للعرس

_ضرغام: لا بروح اهلج خليها بالبيت اني اطلع اعرفج تسوين البراسج

_ذهب: عفية صير ادمي

باوعلي وكال

_راح اطلع خوما محتاجة شي

ابتسمت واني اباوعلهن كلهن يريدن يضحكن بس مايكدرن كتلة:: لا سلامتك

_ذهب: مو كلت النسوان المعدلة يلة تخليكم تجرون عدل روح هسة يلا اطمنت على مستقبلك

هز راسة وطلع والبنات طاحن من الضحك بقيت اباوعلهن متفاجاة حتى سهلة تضحك شهب تباوعلي واني مافاهمة شي عليمن يضحكن ذني  !

_ذهب: والله وكت ضرغام يكل لواحد اني طالع

_ياسمين: اعترفي شنو مسويتلة ترة ماصدكت هذا نفسة ضرغام النعرفة

_نيزك: ترة مكتلة يجي يكلي هو من وحدة

_ياسمين: لا بربج من هسة سيطرتي والله تعرفيلها

_ذهب: عين الحارة باردة لا تخلن عيونجن

_جوري: جان يبات برة البيت مايكول لغيد

_نيزك: منو غيد

_جوري: زوجتة السابقة

_شهب: كطعت كلمتها جوري كالتها بدون ماتحس من شافنها يخزرن بيها كامت تشيل الاكل اباوع لنيزك وجهة صار احمر معقولة لان ذكرت اسم زوجتة السابقة هي تعرف بية جان متزوج شكو بعد

كامن البنات واني وياهن نيزك راحت لامير اليوم شكد لعب خطية تعب طلعنا نلعب بالحديقة ورد فد حركية ولا يكول جبيرة بس اطفر تناسب نجمة اني اكثر شي اميل لجوري لان هادئة مثلي  .

بقينا نمشي سوى تسولفلي عن الجامعة واجوائها  طلعنا من الموضوع ودخلنا بموضوع ثاني اكثر موضوع يوترني ويخلني ماعرف احجي  .

_جوري: حضرتي لعرسج

_شهب: خالة سهلة كالت راح يجهزونة وتجيبة اشوفة

_احسن ما ترحين تعبين نفسج

سكتت ادير بوجهي لان احسة اشتعل نار من ناحية اني اريد قبس يعجبني اشوفة كشخص بس اخاف يصير شي لو هو ما يريدني وينكسر گلبي  .

جفلت بمكاني من كالت:: تحبينة لقبس؟

بصوت يرجف كتلها لا ضحكت انداريت عليها ايدي ترجف هاي بس جابت طارية هيج  .

_جوري: لا تجذبين واضح تحبينة

_هه شلون عرفتي

_اعرف اليحب من عيونة ونظراتة

_تحبين انتي

احمر وجهة تبتسم رفعت عيونها تلمع بفضول كتلها

_عليج الله منو

_واحد

_اي منو يعني شنو يقربلكم شلون شكلة؟

_خيولي اجذب عليج

_جذابة والله

_هسة نرجع الج قبس علاقتج بيه تطورت شلون صارت صارلكم فترة مخطوبين

ميلت راسي وذبلت ملامحي بصدق شرحتلها البداخلي والاحس بية  .

_ما شايفتة حتى ماعندي تواصل وياة هيج بس مرة اجة طلعنا وبعد ما طلعنة شفتي اليوم حتى ما حجة وياي ولايكول خطيبتة

_هسة لان بعدكم مخطوبين اكيد ورة الزواج تتطور علاقتكم ماتبقة هيج وتصيرين تعرفينة اكثر

_انقهر من اشوفة ما مهتم مثل ضرغام بحيث مبين يحب اختي بنظراتة باهتمامة بكلامة يشمر عليها هو مامهتم الي

_لا تقارنين المقارنة تكتل ديري بالج منها كل واحد بطبيعتة هو يمكن مايحب يعبر ضرغام غير عنة ولا تنسين ضرغام ونيزك بنفس البيت انتو كل واحد بمكان

ابتسمت بحزن ورفعت اكتافي ماعرف بعد اتمنى يطلع كلامها صحيح احس اعيش اسعد بنية لو بادلني المشاعر وعشنا حياة طبيعية  .

كطعنا كلامنا من اجت ورد وكفت كدامنة فحطانة من الركض وكفت كدامنة لازمة خاصرتها  .

_ها ولجن شجنتن تحجن

_جوري: سوالف عادية

_ورد: بس من اجيت سكتن ولا احبجن بعد

_شهب: لاتزعلين شبيج

_ورد: بعد زعلت مااا

عافتنا وكامت كعدت بالمرجوحة زعلانة

_جوري: عوفيها ختولي

_لا خطية اروح احجي وياها

رحت عفتها تلعب بتليفونها كعدت يمها مطنكرة نفس نجمة بالضبط وشوية زايدة خبال بعد عدة محاولات يلة فكتها تكلي  .

_ورد: سامحتج بس بشرط تجيبيلي عصيري

_وين عصيرج هذا

_لو بالثلاجة لو تلكينة على المعرض بالغرفة

هزيت راسي وكمت عفتها تصفك فرحانة وتصيح

_هااي النسوان الحلوة لج احبببببج

ضحكت ورحت ادور على عصيرها ام بطن بس تاكل ومامبين بيها الحلويات بكل مكان مشمرتهن ورة المسواك والسلات كيكة لو جبس بس عصير ماكو بس ببسي سديت الثلاجة ورحت للغرفة اشوفة وكفت بمكاني فجاة من جذبني حديث سهلة وذهب يسولفن  .

_سهلة: يمة خاف الولد ما يريدها ويعوفها بيوم العرس

_ذهب: شمالة زعطوط يعوفها مو زلمة

_سهلة: ما اقصد هيج اقصد لان ما هاويها

_ذهب: يهواها وداعتج البت شحلاتها شكرة وتتلامع جنها نسمة هوى

_سهلة: والله شكلج من البداية وخليتي علي يعقد عليها جبتي قبس لا علبال ولا على الخاطر

_ذهب: انا اعرف شي وانتي تعرفين شي علي ما يحجي شلون بلة مارادتة ينكسر كلبة وهو مو بالة الزواج بعدة علي

_والله البنية ماتكول لا وين تلكة مثل علي كتلج خل يعقد عليها هسة اني خايفة من قبس خاف مايريد البنية

_اسكتي انتي يريدها بس خل يتزوجون شني وين لاكي مثلها زلمة حفيدي يدللها وينسيها عمها الخيسة  .

رجفة سرت بجسمي ودموعي لا ارادي نزلت رجعت واحس گلبي يدك بقوووة مو بس اني حاسة ما يريدني هو صدك ما يردني ومثل ما اني خايفة من هذا الشي هنا خايفات گلبي صار يوجعني اريد اختل بمكان فارغ وابجي صار كدامي الحمام دخلت وسديته وراي، خليت ايدي على حلگي اكتم بصوتي ابجي بحركة وكان حب عمري  .

تعبت من البجي كمت ارزل بنفسي ولان ماعندي احد ولا سند مجبورة اكمل الرادني والما رادني احمي روحي بية احسن ما سراج ياخذني ويخبلني وياة جحيم وي شخص احبة ولا وي شخص اكرهة

غسلت وجهي بمي بارد واسمع ورد تصيح باسمي وتحجي علية  :: الفاهية هو عصير سنة يلا ترجعين جايبتة لو كايمة من البداية ولا مشلوع كلبي هيج  .

اختفى صوتها فتحت الباب وطلعت امشي بالبيت شكد جبير وشكد بيه غرف صعدت فوك بية طابق كلش جبير وغرفة هواي، هما قليلين نص الغرف يستخدمونها او ربعهن البنات كل وحدة غرفة ضيغم وامهم وابوهم ولرضا هم غرفة خاصة الباقيات ماعرف المن نزلت بوجهي نيزك تصيحني

لكيتهم يردون يطلعون لازمة امير بيدها شافتني تكلي:: وين جنتي مو صار شكد ندور عليج

_جنت اغسل

_يلا نرجع

هزيت راسي تجهزت بسرعة وطلعت جواد طلع مبدل ومرتة تكلة:: مو تعبان ماتبقة كاعد

_جواد: شبعت نوم يوم كامل نايم خل اطلع اتنفس لا اموت بمكاني

طلع كدامنا واحنا بقينا منتظرين ضرغام

_شهب: مو خبصتيني وينة ماكو

_كال تجهزن جاي

شوية صدك والهورن بالباب طلعنا ورضا يريد امير يبقة وياة كوة امة دخلتة جوة من شفتة واكف احس كلبي طلع من مكانة بية مابية ما اصدلة اريد اعاند روحي وما اباوعلة بس ماعندي سيطرة على نفسي علكت عيوني علية يرفع بشعرة ويضحك ياشر لضرغام ماحسيت شوكت مشت السيارة وصار ورانة  !

سحبت نفس قوي ونيزك تسال بية

_شبيج

_مابية شي

_عيونج حمر باجية شي؟

_لا بس دخل رمش بعيني وفركتها

_طلعتية لو بعدة

_طلع

_خوما توجعج

_لا زينة

درت وجهي صافنة على الطريق وكلبي الرجيج يدك يدك يدك ليش ادك هيج بس اسكت وارجع مثل قبل ماكو  .

ركزت وي ضرغام يحجي وي امير يكلة

_اميري الحلو شلونة اليوم

_امير: ذين

_تونست يبعد الذين

_اي تونثت اليد رطا اهبة اني

_يا بعد الرررروج ولك اسكت لا اكلكككك

كمم فمة بيدة الصغيرة يضحك وضرغام متسودن علية اباوعلهم شكد حلوين ضرغام بسرعة احتواهم امير بلة اول ما شافة بس نيزك شكد جانت نافرتة ماخلاها على نفورها لو انتظرها يستغل ابسط الفرص حتى يتقربلها ويجبرها على قربة الا ان وصل لنتيجة معقولة ومرضية فرحانة الها كلش كون يعوضها على ذولة الخيسة العاشرتهم ماعدهم رجولة  .

طول الطريق هو يسولف مايخليها تسكت شوية عبالك متعطش يسمع صوتها وصلنا نزلت اروح لنجمة اشوفها دخلت للبيت يلا هما دخلو جوا واني اسولف وي مرة خالي بعدني ما داخلة اندك الباب باوعتلي مرة خالي واباستغراب كالت  .

_منووو

مارد وصار يندفر بقوة صرخنا ثنينة مرعوبات احس نفسي انكطع من سمعت صوت سراج مثل المخبل يعيط ويدفر بالباب ركضت جوة ونجمة طلعت مرعوبة طحت بالكاع من الخوف رجلية ما عانني دنكت نجمة علية وصرخت  .

_نجمة: سرراج هذا يمة شجابة المخبل

عفت شهب وجهة صوفر طلعت ماكدرت ابقة اسمع صياح برا وهو يصيح مثل السكران  .

_اريدها اني احبهاااا رجعوووووها الي لا احررررك بيوتكم ولكم كو** سفلة **** ولد *****

ماكمل كلامة صرخ بسبب ضربة اجتة مرت خالي فتحت الباب تباوع واني مديت راسي اشوف وياها خليت ايدي على حلكي من شفت ضرغام طايحلة بوكسات على حلكة كسر اسنونة والدمع يسيل

طيحة صفح بالدفرات صرخنا كلنة بصوت من شال شي حاد من الكاع ودج ضرغام بيدة غمض عيونة بالم وصرخ الدم اخذ ايدة طلع علي بالملابس الداخلية وشعره ينكط مي مبين جان يسبح هجم على سراج بشراسة يضرب بكل قوة وعنف حتى مايكدر يصد الضربات عنة صاح بية ضرغام ولا يسمع سحبة من ضهرة سحب يصيح بية  .

_ضرغام: عوووفة كافي عووووفة

كاز على سنونة بحركة ياشر بيدة" عوفني اموتة اذاك "

_ضرغام: مابية شي اني عووفة لا يموت هو كليتة خايسة لا توكف

سحبة وضرغام طلع موبايلة يخابر بسالم بس فتح خط صاح بية بصوت عالي  .

_ضرغام: تجي تاخذ جلبككك لا اترسة فشگ وادزة الككككك

نيزك انتهت بالباب تلطم تريد توصل لضرغام وامة طلعت علي ما خلاها دفعهن جوة وطبك الباب بقوة لازمة خاف يفتحنة ضرغام ولا مهتم لايدة يحجي يهدد بسالم  .

_نسوووانا بااااي حق يجي يتهدد يريدها اليوم اررربيكم اليوم اذا ما اسحله بالسجون

بلمح البصر اختفى سراج جان مشمور بالكاع مثل الجلب شكومة احنة كلنة انتهى الا يجي واحد يكومة شلون هيج  !

سد التليفون ضرغام يسب ويفشر بيهم شغل سيارتة وطلع بقة بس علي بالبيت قفلنة الباب لايرجع سراج حتى باب الصالة قفلناة علينة وشهب انتهت مرة خالي تغسل بوجهة لامن ايدها تحرك ولا رجلها بس ترجف ولسانها نعكد  .

دخلناها جوة كوة وشربت عصير، عن لايهبط ضغطها ماكو شوية والباب اندك طلعنا اني ومرت خالي ومن سمعت صوت قبس يلة تنفست رحت افتحلة الباب شكلة عصبي وجهة صاير احمر دخل يكلي.

_وين اختج سوالها شي هال**

_لا هو ما دخل أصلاً

_امشي صيحيها خل تكوم تجي وياي هذا يفتر المخبل ال*** ابن *****

_وين تاخذها

_للبيت وين للمهههههلى

_اي لا تصييييح غير افهم يابيت

_لصخامنا امشي جمعي غراضها

خزرتة بحقد ورحت جوة هسة شكو يصيح علية الارعن اني شعلية  امداك الحقير  .

_امشي ترحين لبيت قبس يلا كومي خبصنا هذا

_لاتعوفيني نجمة حبابة اخاف راح اموت

تبجي وترجف كمت حاضنتها امسح بوجهة

_شبيج بس تسمعين بطارية تمووووتين شكو هسة يمج سوالج شي جبااانة موتي مووتي

طلعنا وهي لازكة بيه ضرب على رجلة قبس من شافة يصيح بعصبية ياشر بيدة..

_شبيهاااا اختج شمسووووويلها

_نجمة: كتلكككك ما دخلللل لاتصيييييح

عض ايدة بقوة ياشر اطلع

_قبس: اطلعي هاي اموتها يلا ترتاح صوتها لم المنطقة جنها صوت معزايات

_نجمة: مو وكت مشاكل اسكت يلا

طلع مشيت شهب السيارة بالباب صعدتها ومن عفتها زادت بالبجي والمخبل يصيح  .

_قبس: لييييش تبجي ما تحجننننن

_نجمة: يبووووو ولكمممم يبووووو احنة نخلص من مخبل يجي مسودن ررررربي

_قبس: اااخ لو الزمج اااااااخ

رحت اركض جوة لا يلزمني صاح بية اجي

_قبس: راح تموووت تعالي شوفيها شتريد

_وخر شوية

اندار على جهة واني ركض رحتلها امسح بوجهة وابوس بيها  :: والقرآن ماكو شي شبيج ماكو نعال ما يوصلج حتى بالحلم

_روحي وياي فدوه لا تعوفيني

_يلا بس اجيب ملابسنا

رحت كتلة:: ضرغام شلون صار فدوة

_مابية شي نعال امشي جيبي جرودج

_الاجرب مو مثلك اني عندي جررود

رحت اركض وهو صاح وراي

_بسررررررعة لج

من الاستعجال ماعرف شخبطت بعلاكة طفرت اركض فحطانة شمرت العلاكة ورحت لبيت ضرغام صاح بية بس يصيح النعال خبصنة بصوتة العالي

_قبس: ووووين مولية

_بس اجيب ملابسها شتلبس ملابسك

مسح وجهة بعصبية واني رحت افلش بالباب يكول عندي وياة عركة فتحلي علي الباب دخلت بسرعة ادور على نيزك كاعدة بالمطبخ والوجهة مصبوغ والعيون ددددم صايرة شافتني شهكت وكامت فاتحة اديها ركضت احضنها وهي تبجي هدت حيلي هد..

_خليج قوية نيزك ماكو شي

_ضرغام تأذة بسببنة

_مابية شي شخط شخط

_ولج يا شخط ايدة اخذها الدم لو جاية بغير مكان وين انطي وجهي اختي لو مو بالبيت دخلت شنسوي

_ماصار شي شبيج وحدة اضرب من الثانية وين كواكب عنجن شهل جبن راح تموتن ماشايفات عرك بمسلسل اووي

غير هبطت كلوبنا بس شنسوي لازم واحد يقوي روحة ويتعود على الوضع رحت اخذت ملابسها كلت لنيزك راح نروح طلعت ورانا توصلني وتوصيني  .

_فدوه نجمة عينج عليها تاخذلها فترة يلا ترجع طبيعية سمعت صوتة بعد رعب عدها

_لا تهتمين هسة اخليها تزاكط من الضحك على هذا نعالها المنعل

_ولج لا تحجين علية عيب

_استلمني رزايل شمسويتلة اااني

_نجمة هسة احنا بيا حال

_يلة هسة اني شحاجية انخرس راح

طلعت مشغل السيارة صعدت بسرعة وشغلها شخطها شخط هسة بس ينافخ تفوووو علية

حضنت شهب امسح بوجهة خلت راسها على جتفي وغمضت عيونها الرجفة بجسمها تهمس باذني  .

_بينة وبينة خطوات لو لازمني ينحرني والله هو كالها قبل لو الي لو ماتصيرين لغيري اكتلج بيدي كال

_اس خيولي جلب ينبح اسكتي لا تفكرين بية

سكتت وقبس يخابر

_قبس: ها ضرغام وين انت

ضمد ايدك لا تلتهب

خابر جبيرهم لو نروحلة ندوس على راسة وراس اليطلع وراهم لو يكضون جلبهم لو يسلمونا ورقة فصلنة من العشيرة حتى مو باجر يطلعون ورانا

.. لا هاهية خوش تسوي قانون وعشيرة انعل خيرهم لابو *** مسوين رواحتهم  *** عبالهم ماكو واحد يدوس على راسهم

راسي انسطر من صوتة فشاير وغلط كلشي ما افتهمت ويكرة الصوت العالي الملطلط وصلنا لبيتهم نزلنة  وهو واكف يباوع لشهب حاجاني يكلي..

_قبس: بس فهميني ليش هيج حالتها

_نجمة: شبيك بابا انت ماتفهم تخاف منه من سيرتة تخاف

_شلون قبل مو جنتو عايشين بنفس البيت

_اي بس هي ماتطلع للحمام وحدها من الخوف

تحرك فكة السفلي بغضب وشغل السيارة طلع من البيت تلكتنة امة ترحب بينة اخذت شهب من ايدي للغرفة كالتها نامي ما كالت لا تمددت ونامت انطتني ايدها تريد ايدي تلزمها كعدت يم راسها لزمت ايدي ومنا لمن غفت يلا كمت سحبت ايدي بهدوء  .

طلعت اشوف هاجر كاعدة ايدها على خدها من شافتني فزت سالتني  :: شبيها الحلوة

_انهيار صار عدها

_خطية بنيتي نامت هسة

_اي نامت سودة علية ترجف

عصرت راسي بوجع اشكيلها

_خالة ابنج هذا مخبل مو صاحي بالقرآن صطرني صطر هذا راسي انثول من صوتة ولو صاح واحد يتخبل متعود على الهدوء الارعن

ضحكت مخليتني على راحتي احجي

_ولا يكول استاذ فقار الهادئ الحباب اخو ذاك وين وهذا وين اختلاف من السما للكاع منين جبتية

ضحكت بصوت اعلى انتبهت لجفصتي بررت اشرح خاف تفتهمني غلط:: لا اقصد ما يشبهة اختلاف بالشخصيات

_صح ما يتشابهون فقار لان الجبير عاقل هو شوية عصبي

_اريد بندول راسي موتني

كامت طلعتلي وحدة وانطتني مي اخذتها من ايدها شربتها اكلها:: رحمة على اهلج اخ راسي موتني خايسن ولد الخايسين ماتخلون الجو هادئ

شفتها راحت تكلب بالمنيو رحت يمها اباوع وياها

_خالة شنو هذا

_قائمة اكلات يحبونها الولد

_واو راح تسوين مثلها

_اي

_والله زين هاي اكلات مال ناس مثقفة احنة تمن ومرك وهاي السوالف هاي لا

ضحكت تكلي

_الولد ذوقهم صعب بالاكل خاصة اسامة مايحب النوع هذا من الاكل

_والله عمي خوش اساعدج

_براحتج

_اساعدج لعد

بقيت وياها انطيها التحتاجة واسالها كل شوية شجاي تسوي وبين فترة وفترة اشوف شهب نايمة اتصلت بميس واني واكفة وهاي المكالمة الـ 20 وهي ماكو ماترد أصلاً تليفونها خارج التغطية خايفة عليها واقنع بنفسي احتمال احترك تليفونها هسة بس تنحل هاي السالفة اروحلها اذا بقت هيج مختفية  .

_يبس ريگي خالة اريد اشرب مي

_كدامج حبيبتي الثلاثة اشربي اليعجبج

فتحتها اشكال العصاير والحلويات طلعت ككو وعصير خليتهن على الكاونتر مرتجية بضهري واحجي وياها..

_خالة البيت فارغ يخوف شلون عايشة وحدج

_تعودت على الوضع

_حتى لو ما يصير تبقين وحدج لازم يبقون وياج

_مرات بناتي يجن علية ويروحن باللليل الولد موجودين وهكذا

_ها خوش كون بناتج يجن

رفعت العصير اشرب وشرگحت بية شمرتة من حلكي ليكدام احس عيوني طلعت من شفت استاذ فقار دخل امة ادك على ضهري انشحطت اكح بقوووة شربت مي واسمع صوتة يكلي  .

_اتنفسي بابا اخذي نفس

اخذت نفس قوووي وغسلت وجهي رجعت امسح بية بشالي وهما كدامي قلقانين..

_فقار: شبيج متكليلي شرگتي على كيفج

_هو على كيفي اشرب بس لان شفتك دخلت شرگت

_جني اني

_لا انت استاذي

ابتسم واني عيوني نزلت على الطفلة الخاتلة بين رجلية ضحكت اكلة:: استاذ هاي منين الصغيرونة

_ود بنتي هاي

_ااااالله تخبل استاذ تنكرررط وعلي

_اي هيج

_استاذ بس انت ما كلتلي عندك بنية جان خليتني اشوفها ليش هيج ضامها عني

_ماصارت الصدفة بعد

دنكت اسويلها بيدي تعالي وهي مبرطمة تباوعلي ومجلبة برجلينة سحبها بيده خلاها كدامة  يكلها  .

_ود حبيبتي هاي نجوم

رفعت عيونها اله ورفعت كتفها

_خل ابوسها استاذ عادي

_عادي

اريد اسحبها ابوسها كزكزت عليها وهي ماتقبل تختل ورة ابوها دكيت رجلي بالكاع  .

_استاذ خل ابوسها كلها حباب

_ماتقبل نجوم

_نمونة هي بوسة

_هسة تقبلين انتي واحد يبوسج؟

_اكيد لااااا حتى اكفخة على عينها وارفس بطنة الحقير الزمال شنو تايهتلة

_هي هم هيج تسوي اذا واحد راد يبوسها

_بس اني عادي بنية

دنك عليها يحجي وياها

_بابا خلي نجوم تبوسج شوفي هي هم حلوة نفسج وتلعب وياج ها  ؟

وباقية خازرتني واني راح اموت الا ابوووسها

بعدة يقنع بيها ماعرف ليش هيج تعاند من هسة هاي لو كبرت شلون..

_فقار: يلة حبيبتي ود حتى تصيرن صديقات نجوم عدها هواي العاب

_اي والقرآن شكدددد عندي منا للصبح ماتخلص

دفعاها اجتني بتردد سحبتها وشفطتها شفط مو بنية عسل اني اموووووت على الجهال مثل ماحب الشكولاتة احبهم  ، رجعت لابوها تمسح بخدها  .

_فقار: نكدر نكول اول صديقة للاميرة ود

_والله تشرفت بصداقتها

ضحكت وهي تسحب بابوها تريد تروح اخذها يسترخص منا  .

_فقار: بس اخذها ترتاح

_براحتكم يابة

راحو واني اضحك فاتحة حلكي شبية امداني بس والله حلوين انتبهت على ملابسي نازعة الصاية ولا ادري بروحي رحت اركض اشوفلي شي عريض ومستور البسة عيب من الاستاذ خو ما ابقى بالصاية افتر جني باتمان  .

نثرت ملابسي وغميت كصتي على الملابس الجايبتهن مشكل جاية تك وتك بجايم وتشيرتات مرت خالي جايبتهن بالجديد رجعت لملابس شهب لكيت دشداشة زرگة جويتية حلوة بيها نقشة جديدة مرتبة يعني ترهم اطلع بيها  .

بدلت وطلعت بقيت اسوي مقبلات من المنيو مكتوبة بية وهاجر تشرحلي شلون اسويهن هزيت راسي اشتغل التفتت من حسيت علية دخل استحيت ماعرف شعور غريب من شفتة بملابس البيت متعودة اشوفة بالرسمي شايفين من تشوفون استاذكم بالسوك لو بغير مكان شتحسون اني هيج  .

درت وجهي اشتغل صخام الصخام اقتحمت بيت الرجال بس لا اضرب ميانة زفرة هسة الزمي روحج نجوم مو ميس هاي  .

_فقار: اي نجوم شكو ماكو

_صدك استاذ ماتعرف بالصار؟

_شصار؟

ذبيت البيدي وبديت احجيلة المقتل بالحرف الواحد بذمة وضمير شرحتلة الصار وعيشتة الاجواء  .

_استاذ فحطت شنو هاي

_اشربي مي غير انتي جريتيها دفعة وحدة

_مو استاذ اخاف انسة اذا ما احجيها هيج

صبيت كلاص مي اشرب وهو يكلي

_على كيفج لا تشركين

شربتة دفعة وحدة وخليتة على السنك

_لا استاذ هي مرة شفتك وشرگت مو كلساع

_هم صح

_استاذ هسة شسوو ماخابرتهم

_شغلة عشاير وهوسة مالي بيها هما يحلونها

_صدك هوسة والله ضرغام زين مو

_شبية مابية شي

_خطية ايدة

_سهلة يعيش وينسى

_هم صح

ابتسم واني رجعت اكمل شغلي اموت على السوالف اني انسة روحي بس يسولفون وياي امداني  .

بقة يتصفح بتليفونة واحنا نجهز العشا صبت امة صينية كالتلي اخذها جوة اخذتها ورجعت اخذ مي خلت كدامة الاكل ردت ارجع كلي  .

_بس اني اكل وحدي شنو ماتجين تاكلين وياي

_هاجر: ناكل جوة سوية كلنا

_مو خوش يعني ما تاكلين وياي نجوم

_لا والله اكل وياهن استحي منك استاذ

_راح اعوف الشركة نجمة

شهكت فاتحة عيوني

_يااا ليش استاذ وين تروح

_اشتغل بمعرض سيارات ضرغام

_ياا صدك تحجي والشركة

_ما اريدها من كثر ما تصيحين استاذ كرهتها

_ياا همزين عبالي اكو شي على هاي

_اسمي فقار

_استاذ فقار

_روحي نجوم جوة لا يرتفع ضغطي

_ياا حتى انت عندك ضغط شنو السالفة

_من وراج راح يصير روحي

دخلت جوة اضحك كعدت وياهن ناكل شهب كوة تاكل ويانة منا تنعس اكلت شوية ونامت احجي عليها مايفيد  .

_شهب: عوفيني انام حبابة

_ديلا نامي امري لله

هاجر مرة هادئة كلش واحسها هم تعبانة او مريضة هيج شي ساكتة واني ما احب الهدوء سالتها:: خالة وين مرة فقار

_منفصل

_يا وبنتة

_وياة شبيها

_يعني ما تريد امها تروحلها خطية صغيرة بعدها

_امها تنازلت عنها مالها حق تشوفها

_ياااا هم مو خوش

_اي كلش خطية

_والعباس اي خالة وهسة هي منو الها يعني وين جانت من اجت وياة

_بالحضانة

سكتت واني لو بيدي الف سؤال اسأل وما ارتاح فضوووول فضول شلت المواعين ولكيت مواعين فقار غاسلهن لان ماكو كفيت ردني وغسلت الباقيات واني بية مرض الا ادندن من اشتغل بس بصوت ناصي الحمدلله مو عالي لو مسموع التفتت من شميت ريحة جكاير شفت فقار واكف يدخن طلع من شافني بعد ما رجع خلصت المطبخ على السريع وتذكرت صلاتي رحت اركض توضيت وصليت كملت وطلعت تليفوني اشوف نيزك  .

اتصلت بخالة سهلة ما تشيلة عفتة وبقيت يم شهب كاعدة اكنك اخذت نت من امهم وكلبت المحتوى ضحك وتحشيش اموت على، هيج فيديوهات تالي مليت وشبعت طلعت اتصل مرة لخ بخالة سهلة دكتين وجاوبتني صوتها قلق  .

_هلو خالة شلونكم

_زينين بس اختج مدري شبيها

_شبيهااا

راحت شوية واسمع صوت نيزك تصرخ

_هدددددني لا تلزمني عووووووفني عوووووفني امووووت روحي بس تلزمني  .

يتبع  ...

_______________________

خفيفة على اللسان ثقيلة في الميزان صلو على محمد وآل محمد 💙

توقعاتكم 🥹💔

البارت كلش طويل تفاعلو بين الفقرات

#المنجمة

الكاتبة _كفايه

لاتنسون متابعة الحساب

تصويت وتعليق بين الفقرات لطفاً 💙

يا علي مدد  ♛

_______________________

نيزك...

ورمت عيوني من البجي كلبي احسة نار ضرغام منظرة ما يروح من راسي ايدة راحت ايدة الدم اخذها ولحد هسة ما رجع وين راح خايفة لايصير بية شي بسببنة فوك الي صار اله  .

سهلة كل ماتشوفني ابجي تسكتني ماتقبل خطية رغم خوفها علية مو اقل مني خايفة ذهب جانت تباوعلنة ساكتة صاحت بية بجزع   .

_ذهب: بسج كااافي نعلعلة علية شبية ما تگليلي  هسة يرجع

_نيزك: خاف يتعارك وي عمي ولدة شوفوة وين راح

_ذهب: دخل يروح يشگ حلوگهم شك خايفة علية

ضربت على رجلي اعض بشفتي كلبها بارد واذا صار بيه شي ذولة غدارة يغدرون جبناء وين انطي وجهي لو سوولة شي  !

رحت يمها ملهوفة من راحت تخابر علية امة ملت مايجاوبها بلكت يرد عليها طلعتة مو طبيعية، رن هواي يلا رد دگ كلبي بقووة واني اسمع صوتة  .

_ذهب: ها ولك وين انت

_موجود

_ما تنعدل شني موجود كول وين شسويت

_الاااااا احررررگ بيوووتهم على روووسهم احفااادج وووينهم ما يطلعوووون فقار القندررة حررك روحة حرررك هو وذاك الجبان گليلهم اخذ اخوي نهد عليهم بيوتهم احرررركها حتى يبرررد كلبي بيها  .

_هسة شكالو لا كبل تجيت ويصير الحك علينا

_اذا ما انطوني ورقة فصلة من العشيرة احرررركهم وانعل عشيرتهم  مو كلنا البنات يخصنا كلنا لو تشوفونهن وين ما كان مالكم غرض بيهن كلنااااااا كلنااااا

_ذهب: مال الغسسسل كون انا شعلية اذني انطرشت

_شوفي ذهب سالم زوعتة العافية وهسة هذا النعال مطلوب للشرطة ولو يطيح بيدي انعل سلفة سلفاة يطگني واسكتلة لا والله

_هو انت شخليت بية ما تنضب ايدك سويها وياك

_ضرغام: والله الا ادمية وووين يطير

_كمل شغلتك وي نعالهم على كولتك وتعال اذا ما يتبرون منه حتى سالم اخذ التفگ اخرطهم خرررط انت وعليش

ضحكت وسدت الاتصال كمت منها خاف جنت خايفة شوية زدت ذولة يريدون يسوونها بالتفک بلة انكتل واحد بيهم مو طبيعين ذولة برود عدهم

مر الوقت وضرغام ماكو واني ضالة اكل بروحي اكل وين راح وشسوة يارب رجعة سالم ماريد يصير بيهم شي من عرضتنة  .

الوضع عدهم طبيعي تعشو واني ولا اكلت شي روحي لعبانة غسلت المواعين والهواجيس ماكلتني مدري افكر بكواكب الماعرف علومها مدري بضرغام والراح يصير ويانة  .

كملت وذهب دخلت تخابر تشرب باستكان الجاي تضحك وتكلة..

_عفية بالسبع فصلة شيخهم، بس شبسرعة هيج كبل فصلة... هم صدك ما ينحملون بس المشاكل... يلا جا هاهية شتسوي غير هو شارد هسة وانت وقيس حذرتهم تكسرون ضهرة وتشمرونة بابهم ثاني مرة... ارجع حبوبا هاي زيبگ راح تموت عيونها ورمن من البجي  .

وخرت الموبايل من اذنها اشرتلي اخذه تصيح

_ذهب: صيح علية مبجيتها اني يكول

حيلي بايد وحلكي يابس من الخوف والقهر اخذتة منها ايدي ترجف خليتة على اذني اجة صوتة يصيح بنتر  .

_ضرغام: عليمن تبجين شكووووو ميت اني ميت بس كوولي؟

سكتت مارديت علية رجع يصيح

_ما تحجيين شبيج مو احجي ويااج

_مابية حيل لاتصيح

_حيلي على حيلج

كالها وذب حسرة غمضت عيوني صوت انفاسة العالية باذني رجع كال بصوت هادئ.

_اكلتي؟

_لا

_راح اجيب اكل ناكل سوى واذا تاخرت شوية اكلي ونامي

_امم

_يلة جاي الوصها لوص واجيج

سديت الخط وذهب مخلية ايدها جوة حنگها

_ذهب: يلة ارتاحيتي من سمعتي صوتة

تحمحمت احس بلعومي انشحط من نظراتها خليت الموبايل كدامها وركضت لغرفتي رحت اشوف حبيبي اموري نايم بغرفتة سهلة على فراشها ومن اجينة تعلقت بيه وتعود عليها ردت اشيلة ما قبلت

_سهلة: خلية يمي لايفز هستوة نام

دنكت ابوس بوجهة شميتة وغطيتة طلعت لغرفتي شمرت شالي وطفيت الضوة ميت من التعب تمددت على ضهري ايدي على راسي عيوني بالسگف معلكة احسب بالايام واتذكر هسة احنة بيا شهر وشكد بالهجري والميلادي غمضت عيوني بخوف احس نفسي انكطع صرت اريد اتنفس نفس ماكدر اليوم ونفس اليوم متت اني وشيعت روحي اني اليوم ومثل اليوم فقدت روحي  .

كورت روحي اضم براسي وكلني ارجف اضرب على راسي بقووووة ما اريد ارجع اتذكر بس تذكرت ذاك اليوم بحذافيرة  .

_نام يلا تنام اهديلك طير الحمام نامي حبيبتي نامي روحي ماما دنيا نامي يبعد عيون امج

تضحك وتناغي تريد العبها واني الشغل لفوك راسي ضحكت على ضحكتها اكرص بخدودها واكل بيهن اكل جنهن تفاح مشيت افتر بيها بالغرفة وكل شوية ابوسها وارسم بملامحها تسنح بيدي من اسوي هاي الحركة  .

تحسرت بقهر من نامت بيدي واني اباوعلها شكد حلوة بس مريضة كلبها تعبان راجعت بيها كال الدكتور ماعليها شي هسة للمستقبل نشوف التاثيرات عليها، بستها ونومتها بفراشها طلعت واجت برجلي دولكة ستيل طفرت من الوجع ومرة خالي تصيح علية  .

_اشررردي من الشغل اشرردي عايفتة كلة على الجناين وبناتي اميرررة انتي اميرة

عفتها ومشيت اهز بيدي واردها

_يا اميرة هو منو الجان يشتغل هذا الشغل كلة كملتة اني يا جناين يا بنات

دخلت للمطبخ وهي بعلو صوتها تصيح

_خلصينيي منج يجي سلووان واطلعي للمشتمل ارجعي لا ترجعين

اكلت شفتي اكل واني اشتغل ارجف هو اني شجابني يمج غير من ورة ابنج وخبالة يشرب ويفقد يكتلني منو يخلصني منه اخر مرة موتني على شغلات تافهة وهل اجيت كعدت يمهم اتحملها ولا اتحملة هي تحجي وتسوي مشاكل بس هو شغلتة طگ  .

سكتت عنها وهي بس اجة ابنها الثاني تشكيلة مني

_ولك يمة ترضاها مرة سلوان تحرك بگلبي وتراددني حتى غلط تغلط علية واني بكد امها

من يمي صحت

_خافي الله هذا الله خافية باجر وراج حساب وكتاب شوكت غلطت شوكت راددت

_تجذبيني مووو

_هو انتي جذابة

كلت هاي الكلمة لو كلبت البيت بالصياح هي منا تموت على المشاكل والصوت العالي ونستها بيهن يكول هي أصلاً هيج ما ترتاح اذا ما تسوي مشكلة لو وياي لو وي مرة حماي بس مو مثلي ذيج تخاف من اهلها اني منين تخاف سالم يأيدها علية  .

اجة حماي من شاف امة يرزل بية

_انتي فلا تستحين يجي سلوان يكسر ضهرج اليوم

_هو انتو هاي الشاطرين بيها سلوان تهددوني بيه ما كلتو وين الرجولة واني مرة تحيلونة يضربني هاي بدال ما تحجون علية

_فوكاها احنة صرنا مو زلم بسيطة بت جبار

راح يخابر ومرة خالي شمرت غراضي اطلع هي وبتها وما استغرب من اسلوبها وياي لان تكرة امي تموووت منها وهسة تطلع حقدها بيه ماكلت لا اخذت غراضي وبتني بحضني طلعت للمشتمل

فتحت الباب اتحسب عليهم روحي انقبضت

خليت بنتي بكاروكها وغسلتة ماكلة التراب فحطت رحت سبحت وطلعت بسكت اكل بية ماعدنا مسواك دنيا صرخت سويتلها ممة رضعتها العب وياها اكلها تكول ماما تحاول تكول مما عمرها فوك الـ ست اشهر  حبيبة روحي كتنلني الجوع وسلوان ماكو  .

نص الليل اندفر الباب بنتي بيدي واني واكفة رحت فتحتلة الباب وماحس الضرب منين اجاني عيوني ما اشوف بيهن كل ضربة والثانية بنتي بحضني على گلبي حاضنتها اصرخ اريده يعوفني لا بية حيل وبس اشيل ايدي الضربات تجي بتني بدون رحمة يضرب ويغلط بانواع الغلط والمسببات بدون حتى ماحاجي شي وياي مبين سكران وذولة معبين براسة  .

دفعنب على وجهي بكل قوووتي بنتي صارت جواي

صرخنة ثنينة گصتي انركعت بالكاع انشگت والدم تناثر ماكدرت ارفع راسي يدفر بية بضهري احسة نخسف من مل يلة طلع ماكدرت حتى اكوم بعد غمضت عيوني بالم احس راح يغمى علية عيوني صدت لدنيا جواي بكل قوتي حاضنتها بية مابية عدلت كعدتي بحضني امسح بوجهة مغمضة عيونها خليت ايدي على كلبها ولا نفس احس گلبي وكف ضربت على وجهة اريدها تصحى ماكو يبست كمت من مكاني مثل المخبلة ادك بالباب واصيح بعلو صوتي وهي بحضني..

_بنتييي مااااتتت افتحو الباااب بنتي

ايدية راحت وقوتي خرت وكعت وهي بحضني اكلب بيها ودموعي تجري ماماتت بنتي نامت هسة تكعد دنكت بستها اشم بيها واحجي وياها  .

_نامي حبيبتي نامي باجر الصبح العبج هسة اني تعبت

تمددت وهي بحضني لاحس ولا نفس ميتة بس اشوفها نايمة هسة تكعد انغمى علية ولثاني يوم يلا كعدت شلت راسي بنتي خشبة بيدي شفتي يابسة امسح على خدها واحاجيها

:: اكعدي حبيبتي صبح الصبح اكعدي ارضعي حليب ما جعتي حتى بالليل مافزيتي وشربتي

كمت سويتلها حليب وخليتها بحضني خليت الممة بحلكها ماترضع شمرت الممة لبعيد وعصرتها بحضني اهز راسي لا بنتي ما ميتة نايمة ومر الوكت وهي بحضني ميتة كمت خليتها بالكاع واشلع بشعري اصرررخ صريخ واركع راسي بالحايط غير يسمعون ويجون بنتي ماتتت بيدي ليلة كاملة هي بحضني ميتة  اخ ياوجع رروحي

طحت بالكاع زحفت زحوف جريتها حضتها بقوة ونمنا سوية الفرق هي دفنوها واني ضليت اتهموني كتلت بنتي بعنادهم لان ضربوني الصدمة صدمتين

واني بالمستشفى كعدت كواكب لازمة راسي افر بعيوني ادور على بنتي ماكو. مالكيتها صوتي رايح ماينسمع كمت احجي كوة..

_كواكب بنتي دنيا وين اريد ارضعها والعبها

حضنتي تصرخ واني ماحس بروحي مر شريط الذكريات اتذكر شلون خشبت بيدي كمت اصرخ واضرب بروحي وانغمى علية وهيج شهر ضبط عايشة تحت تاثير المهدئات بس يروح مفعولها

اتخبل ويرجعون يضربوني رجعت لنفس البيت واني الغلطانة عقلي مو وياي ولا حيلي  .

كاعدة بالغرفة واشكال الحجي النعال ابن النعالة ماشفتة مثل المخبلة كاعدة وحدي لا اكل ولا شرب اندفر الباب ماعرف بيش الساعه  اضحك ساعة واتخيل بنتي بحضني العبها ابجي واصرخ من استوعب هي ماتت بحضني كتلها الباب مقفول بس اطلع اذبحهم كلهم اكوم ادك بالباب اهددهم اغلط واسب محد يفتحلي أصلاً  محد يسمعني مرات يشمرولي اكل ومرات لا البيت فارغ كلشي مابية لا جداحة ولا سجينة  .

افتر واتخيل بنتي بحضني اسكتها اباوع لادية فارغها اصرخ وراسي بالحايط اركعها دمي يسيل على روحي ويغمى علية بيوم مابية لون وضوة مخبلة احاجي الحيطان لا ام التجيني ولا ابو اخواتي سالم ما يخليهن يطلعن وماعرف شي عنهن ولا بالي نسيت كلشي، انفتح الباب بالليل كمت اشوف  كواكب سدت حلكي تبوس بية وتحضن واني ولا وياها بس اباوعلها سحبتني تلبسني العباية وطلعتني تكلي  .

_حق بنتج وحقج ما يروح ولا اخلية

راحت جايبة جليكان نفط دخلت رشت المشتمل انطتني الجداحة اشرتلي اشعلها ما اخذتها عقلي مايستوعب بسبب الفترة العشتها وحدي شمرتها بالمشتمل اشتعل نار وبيدها بطالة كزاز تارستهن نفط شعلتهن وشمرتهن بالاستقبال مفتوح تلاثة بدن ياكلن الفراش والبرادي بالمطبخ مالهم شمرت واحد كبت بية النار وفوك واحد شمرت  .

البيت اشتعل نار المشتمل نار تضحك وتدير بوجهي تراويني:: حركتهم مثل ماحركو كلبج عبالهم وحدج والله احركهم والله

ثنينا نباوع للنار وصريخهم اشتغل لزمت ايدي بقوة سحبتني تكول بحركة:: خليهم يحتركون ويضوكون نار الحررگ

مابدرت اي ردت فعل طلعتني بعد ما بدت الناس تتجمع اني وياها ماعرف شي عن الدنيا فصلت  .

_كواكب: حركت محلاتهم حركتهن وحركت كلبهم عليهن مو عبالج اسكت مايخلوني اشوفج حركت كبلهم كلهم  .

ومن هذا اليوم ماعرفت شيصير مايصير لا اعرف الليل ولا النهار ولا حتى المشاكل الصارت بعد هذا اليوم طلاكي كلة ماعرف شلون صار ولا شلون وافقو يطلك اني فقدت بنتي وفقدت عقلي وكلشي حلو وياها وبين هذا الحال اني حامل بطفل ينمو داخلي ماحس بية ولا اريدة  .

نجمة...

بحلقت عيوني بخوف واني اسمع صريخها من يحاول يتقرب منها ضرغام صاحو بية يطلعونة منها وهو يصيح يريد يروحلها  .

_ضرغام: تشلع بشعرررررها عوفوني بس عوفوني الزمها

وهي تصرخ بحركها

_احررررك روحي احرررركها بس تلزمني

نزلت دموعي بقهر وكع الموبايل من ايدي بعد ما تستوعب هذا ضرغام ولا تريد قرب احد منها بين فترة وفترة بس ترجع تذكر لو تحلم حلم تكعد متخبلة هيج ولو ما نوعيها تأذي نفسها  .

درت وجهي فقار بوجهي هستوة دخل يباوعلي بخوف سالني..

_شبيج نجوم

_استاذ الله يخليك ساعدني

_الله لا يخليني اذا ما اساعدج

_اخذني لاختي فدوة راح تتخبل عليهم اخذني

ما كال لا طلعت وياه بملابس البيت نسيت روحي  وصيت خالة هاجر على شهب نايمة ورحت وي فقار حرك السيارة حرك طول الطريق ابجي خايفة عليها وهو يحجي علية  الى ان وصلنا روحي راحت نزلت اركض  .

ضرغام يدك بالباب يرررجف وذهب تصيح بيه

_ذهب: بس عوفها شمالك تسودنت

_ضرغام: مو بوعيها لاتسوي شي بروحهاااا بس افتحي الباب فدوة نازك

دار وجهة علية ما اسولف على تعابير شكلة الماليها الخوف والقلق رفع ايدة ترجف والله ترجف ايدة الثانية لازم ضهرة يكلي  .

_ضرغام: تعالي فدوة تعالي هاي اختج متخبلة علية شوفيها لايصير بيها شي  .

مسحت دموعي مشيت اكلة

_روحو منا فدوة روحو هسة تصير زينة

_ذهب: يلا امشو هي اختها تعرف حالتها عوفوها

كلها طلعت الا هو بقة واكف اني اعرفها ماتحب تشوف واحد لان عاشت فترة مو سهلة جانت وحدها محبوسة  .

دكيت الباب احجي وياها

_نيزك افتحي الباب اني نجمة

صوتها مختفي ماردت علية باوعت لضرغام بخوف هز راسة بخوف گلي:: راح اكسر الباب اغمى عليها

_لا لا مابيها شي هسة تفتحة

رجعت احجي وياها واني متاكدة تسمعني

_نيزك فدوة افتحي الباب شهبة مو زينة افتحي

بصوت مخنوك جاوبتني

_طلعوني منا طلعوني

_افتحي الباب اطلعج

_اخاف اخاف

_كلهم طلعو محد بقة

_نامو؟

_اي نامت كلها

_بس ما نحرك بيتهم بس نطلع

_هو بس نطلع

شوية وفتحت الباب وجهة دم عيونها كوة فاتحتهن وجهة مخرمشتة شهكت وحضنتها متجمدة بمكانها فاتحة عيونها بصدمة مركزتهن على ضرغام اجة تقرب يريد يسحبها مني ضمت وجهة بيدها تبجي وتصيح  .

_خلية يطلع طلعية طلعية

توسلتة بعيوني كوة طلع عيونة ضلت عليها كسر گلبي بنظرتة هاي سديت الباب ورحتلها منتهية كعدت كدامها بس عيونها تصب دمع حضنت وجههة بيدي..

_حاجيني شبيج

_بنتي بنتي ماتت اليوم

_مو اليوم صار بالاربع سنوات من ماتت

_لا هسة هسة ماتت بحضني ماتت

لطمت على عيونها تبجي بحركها كوة الزم بيدها

_نيزك: تضحكلي تضحكلي هي كتلها بحضني ماتت لج دنيا دنيا بنتي

_الله يرحمها شذكرج بيها شذكرج هسة

_اجتني بالحلم تريدني تضحكلي وتبجي اني كتلتها اني وكعت عليها

بلا وعي ملخت روحها ركضت فتحت الباب ضرغام كسرة دفعني ركضلها يسحب بديها ماخلاها تاذي نفسها وهي منتهية عيونها مغمضتهن ودموعها تنزل لسانها بلا وعي يحجي  .

_نيزك: طلعت روحها بحضني راحت بنتي جانت دكلي ماما تريد تكلي يوم يوم احسبلها تنطقها اني كتلتها بحضني طلعت روحها  .

يحضن بيها ويمسح بوجهة ثگل لسانها ونامت على صدره حاضنها عصرها عصر يبوس براسها دار علية اشري على الفراش عدلتة شالها خلاها وغطاها بقة كاعد يم راسها رجلية يرجفن من الخوف اباوعلهم ودموعي تنزل بصوت يرجف كال  وهو يعدل بشعرها..

_ضرغام: اذا اخذها لقبرها ترتاح

_لا لا ديربالك تتسودن والله

_عبالي ترتاح

ذب حسرة ساكت سالتها

_تعرف جانت عدها بنية

_كلشي اعرف عنها

_هي كالتلك

_ماتسولف حزنها اني سالت عنة

_رحت سالت عنها؟

_مو هسة من كعدتن بالبيت

_ليش سالت عنها واحنا ماعدنا علاقة بيكم

_عجبتني ردت ازوجها

سكت يتاملها ويتالم من يتلمس خدودها المطعونة من الضرب بهدوء كمل يسولفلي  .

_تمنيت ازوجهة اول ماشفتها حبيتها والله حبيتها ضلت بالي اعوضها نجمة العباس علية شاهد بس تبقة وياي لاتعوفني اني اعرف صغيرتها قبل جبيرتها مايهمني غير اشوفها تضحك ومرتاحة

دار وجهة علية يكلي

_ماصدكتهم والله اني ما اعرفها ولا معاشرها بس من كالو كتلت بتها بالعناد ولان ضاربينها ماصدكت وكلشي كالو اني كلت عكسة

" المها بروحي بس لاتكلي ماريدك "

مسحت دموعي الشهكة مجلبة بية بقة كاعد يمها شكد كبر بعيني وحبيتة اضعاف حبي اله صدك رجال ضرغام، طلعت لكيتهم كاعدين بخوف واهتمام سالوني عنها  .

_الحمدلله صارت احسن

بعد ما سالو عن حالتها شكد كبرو بعيني اتذكر صبيحة وافنان يعيرنها يكللها مخبلة محد ياخذج بعد لو مرات يتحيونن ويكللها كتلتي بنتج وهسة جاية هي تفقد عليهن تملخهن كواكب شكد قوية ما تكدر تطلعها منهن ومن بعد ما اكلنها صارن يتجنبنها حفاضاً على سلامتهن بس من تجي الخطابة يطفرنهن بهذا كلامهن اشكال الحجي اليحجنة ياما ناس اجتها بعد طلاكها  .

استحيت ارجع يمها ضرغام كعدت بالمطبخ فارغ خليت راسي بين ادية امير نايم فاز على الصريخ وسهلة مطلعتة للاستقبال حتى لايسمع خطية رجعتة لمكانة والله عجزت احمد ربي على هيج ناس يتخلون مرهم على الجرح  .

_فقار: الحمدلله على السلامة

رفعت راسي لكيتة كدامي سحب كرسي وكعد

صرت اعدل بشالي ما اباوع بوجهة  .

_فقار: نجوم

_شكراً استاذ والله انت حباب وماكو منك

ابتسم عيونة تلمع

_فقار: تدلل نجوم كم نجوم عدنا هي وحدة وطافرة من السما

ضحكني بهذا حالي

_فقار: اي هيج اضحكي تهون وداعتج

خابرت علية امة طمنها وبنته تحجي وياه كلها

_حبيبتي بابا جايج هسة انا

كالي ارجع وياة رفضت راح ونيزك نايمة مانمت بعد احوم عليها وضرغام ولا تحرك من مكانه

كعدت اتصل بميس كلبي نار الثانية عليها خفت عرفت بالموضوع والله تتخبل وبقيت بناري خفت سوت بروحهة شي كلشي اتوقع الافكار اكلتني  .

لنص الليل طلع ضرغام يصيحني صوتة مطبگ رحت وياة نيزك كعدت حضنتها وبستها ساكتة همست بتعب:: اريد اسبح

اخذتلها ملابس ودخلت وياها للحمام سبحتها ايدهة ماتحركها طلعت اجاني يكلي  .

_صارت زينة شلونها

_نفس الشي مو شفتها

طلعت من الحمام عبرتنة راحت لمكانها رحت انشف شعرها اجيت امشطة اخذة من ايدي يمشطلها على كيف كملة لفة بالقراصة طلع شوية بيدها صينية اكل خلاها كدامنة يحجي وياها يريدها تحاجية  .

_مو كتلج ناكل سوية هاي جبتلج اكل يلا اكلي وياي اني ما ماكل شي منتظرج

باوعتلة بعيونها الذبلانة ساكتة صار يسويها لفات وبيدة يوكلها رجعت ابجي من اشوفة هيج يعاملها بعد ابونا محد حن علينة ولا عاملونا بلطف  .

اكلت ورجعت نامت وهو ولا اكل شي اخذت منة الصينية غسلت المواعين سويتلة جاي رجعت لكيتة مخليها بحضنة طلعت بسرعة لثاني يوم على وضعها نايمة ماطلع من البيت يمها كاعد يتحارش بيها يلعب وي امير يمها تنجبر تكوم لخاطر ابنها

تطمنت عليها صح ما تطلع ولا تحجي بس احسن هسة ترجت، اخذت من ملابسها بدلت ورحت احجي وياها  .

_نجمة: نيزك حبيبتي الراح راح ابدي بداية جديدة وي ضرغام والله يشتريج بروحة البارحة ماشفتي شلون خايف عليج

_نيزك: مو بيدي والله مو تدرن بية

_ادري والله ادري بس سيطري على نفسج

_ما اسوي شي والله حتى ما ابجي كدامهم

بستها امسح على ايدها

_نجمة: عفية نيزك انتي قوية لاتضعفين لا الماضي يخليج تنهارين ولا الحاضر يخوفج انتي بت جبار خليج قوية

_اريد كواكب فدوة جيبيها الي

_صار تجيج بس صيري زينة اني رايحة اشوف ميس وارجع لكواكب اجيبها  .

طلعت اموري يشمرلي بوسات هو وضرغام يسوون اكل ماعرف حلويات كالبين المطبخ كلاب طلعت وهو حتى مامنتبة الي يحجي وي روحة بصوت مسموع  .

_ضرغام: هسة شنو اخلي شنسيت شنسبت لااااا

ضحكت على شكلة يركض بالمطبخ اول مرة اشوفة بالمطبخ يشتغل ما ياكل حرت هسة اني ويامن اروح حتى فلوس ماشايلة لا والله ويطلع ابو الغيرة ابو الحمية ابو الفزعة العراقية  .

_عليييي

رفع راسة الي ميلت راسي احجي وياة

_حباب علاوي اخذني

هز راسة وين واني كملت

_لبيت ميس صديقتي خطية مريضة البارحة اندعمت يمكن هسة ماتت يماااا عاد الطم بفاتحتها وابرد گلبي

اشرلي افتهمت علية كال بس ابدل واجي

_ولو ملابسك مابيهن شي بس يلا مو تتاخر ابو الفزعة الكفوو بسرعة

راح واني بقيت انتظرة مديت راسي اشوف امير يضحك بصوت عالي خليت ايدي على حلكي اضحك ضرغام حارك الطاوة شمرها بالسلك يحجي

_ما اخليك تاكل مادام تضحك علية فوك ماتشجعني الفصمة ابن الفصمة

اجت خالة سهلة دك رزايل تلطم ضلت وهو يكلها

_ضرغام: ولا تشجعون الواحد يطلع مواهبة

_سهلة: وينك وين الطبخ انت تحجي صدك هسة هاي الهوسة شيلمها يلاااا

سكت عنها يشتغل ويباوع بالموبايل تالي سدة يصيح:: اجيب جاهز شهلعبان الررروح صررت نادر اني

_سهلة: گل لروحك تكلي

_ضرغام: كلة من ورة امير الفصمة

شالة وطفر يبوس بيه وسهلة تحجي لان عاف الهوسة عليها طلع علي عطرة سابقة والاناقة بس سؤال ضرب براسي علي شمكمل دراسة والمشكلة اذا اسالة مايحجي يلة غير مرة اشوف واحد واسالة طلعت وياه دليتة المكان السيارة هدوء واني ماترهم اذا ما احجي وبقيت اشكيلة من ميس واحجي عليها بحركة كلب يسمعلي خطية منا لمن وصلنا يلا سكتت  .

امها طلعتلي واني حامية عليها ذبلت ملامحي من كالت بحزن  .

_ميس سافرت

نشغت وضربت على صدري بقوووة

_وين سافرررت

_لتركيا بيت خالتها هناك حجزولها شقة

حيلي راح والله عيوني غوشن كمت ما اشوف كعدت مخلية ادية على وجهي ابجي بصوت عالي طفلة وامها عافتها گلبي ورم قهر عرفت بالخبر وطلعت بدون حتى ماتستفسر حتى ماخابرتني وعاتبتني ليش ماكتلها راحت هيج بدون وداع  .

امها تسكت بيه واني انتهيت جيب اليسكتني اشهك واحجي اعاتبها الخنكة موتتني..

_نجمة: ترضينها خالة ترضينها اني صديقتها الوحيدة تعوفني بدون لا تودعني اتصل بيها ماتجاوبني

رجعت ابجي حضنتني تبجي وياي تكلي

_والله يا خالة مو بس انتي مقهورة منها حتى اني هيج عافتني بدون سبب علعلت گلبي بلكت فترة وترجع

لزمت گلبي بيدي بخوف كتلها

_هي شكد اطول

_تريد تستقر هناك بس ابوها مايقبل

طلعت من بيتهم الدنيا سودة بعيوني تسويها ميس وتعوفني حقدت علية ماتريدني بعد لان اختي راح تزوج قبس، شلون ينطيها گلبها تعوفني واحنا عشرة عمرررر  .

عيوني من البجي موتني جابلي علي مي غسلت وجهي اشكيلة انقهر وياي خطية وما كدرت ارجع اذا ما اشوف كواكب رحنة لبيت دراهم نزلت ادك بالباب محد طلعلي دفع الباب علي دخل قبلي مشيت وراة بخوف البيت فارغ ودراجتها موجوده وين راحت هي  !

كواكب...

رجعت بيدي عشاي اتلفت وراي اخاف من ولد سالم يغدروني دراهم تعبانة بالي وياها وصلت ميتة جوع بس اريد اكعد واكل دخلت وياريت ما دخلت ريتني باقية يم البنات على هذا المنظر سلاح مخلينة براس دراهم وغضنفر لازم ولد مخلي سلاح براسة واحد يهدد بالثاني هما يهددونة يقلون دراهم وهو يهددهم يقتل الولد وكع الاكل من ايدي انتبهو الي اصفريت بمكاني توجهة السلاح علية

وضحكو بصوت صاحو بغضنفر  .

_عرفنا صيدتنا

صاح بيهم يهدد ويفشر ركضت اطلع وماحس الا شايليني صرخت اضرب بيهم ماعرف منين طلعو بس هوسة ورة ضلت خانكيني خنگ مديت ايدي اطلع سجينتي فتحتها ادجج بيهم وهما شايليني

شمروني بالسيارة وسطرة على عيني طفتها دخت واختل توازني اريد انهض خنگوني بكلنس صرت ارافس بيهم هوووسة هوسة صارت براسي وفقدت الوعي  .

الالم يذبح بية ذبح راسي يموتني وجسمي متكسر نايمة على الكاع الصلدة كمت اباوع بالمكان بيت  فارغ خرابة صغير نعلعة على رواحتهم هاي الاماكن الهم كمت الباب مسدود ادفر بية واصيح عليهم ماكو رد مليت وكعدت لا شباك واطلع منه ولا الباب ينفتح ماعرف تاليتي وين من ورة الكلب ابن الكلب  .

الجوع موتني بس اريد اكل هسة خل يحبسوني راضية بس ينطوني اكل لازمة بطني افكر بدراهم بس لا كتلوها جانو مخلين السلاح براسها سودة اذا صار بيها شي  .

كلبت انام على بطني عاصرتها من الجوع اسب بغضنفر واهلة الا يورطنا وياة مايعوفنا بحالنا ابن القندرة مر وكت ماتحركت من مكاني ابجي واضحك من الجوع اكول..

_ربي فدوة بس اكل اررريد اكل راح اموت اي شي اكلة فدوة نعااااااااال اني اعلمك اذا ما ادججك فلا اتسمى باسمى  .

انفتح الباب اجة الفرج طفرت مثل المخبلة اركض على والولد اصيح  .

_ابن النعااااال اريد اااكل راح تموتووووني كفار انتو كفار

هز بيدة يكلي

_ولج انتي بيا حال هي مال اكل

_كواكب: اهم شي الاكل عندي الحكلي فدوووة

باوعلي وهز راسة ولد مثل غضنفر، حتى نفس شخصيتة الخايسة طلع قفل الباب وراة بقيت افتر بين ما يرجع طوول كلش طول واني احس روحي صارت بالاكل انفتح الباب طفرت علية جايبلي علاكة اخذتها وكعدت بالكاع مابية حيل بعد انتهيت اكل ملهوفة ماشايفة اكل يكول..

كملت واحس روحي رجعت لكيتة كدامي واكف نحلت بقيت على كعدتي اشرب مي  .

_الف رحمة على روح الخلفووك والخلف الخلفوك ياشريف ابن الشريف ولو انت مو شريف بس بعيني صرت اشوفك شريف

_ترة خاطفج

_جبتلي اكل مو زين نعمة

ضحك واني ضحكت وياة كمت امسح بحلكي

_كواكب: ليش جبتوني

_عدنا شغل وي غضنفر مايكملة صرتي كدامنا هددناة بيج مثل الشاطر راح يشتغلة

_خوش هم كلت انتو وجوة هتلية مو مال خطف وهاي السوالف

_دنجبي

_انجب انت

_البارحة بيش تدجيتي حمزة

_يا حمزة

_شالج البارحة ايدة انشخطت تصب دم راد يجي يدوس بطنج بس كوة لزمناة

_مو اكلك شريف عفية عليك هسة شوكت اطلع ما كلتلي

_من يخلص الشغل بعدة هسة

_اي شكد حدد

_يطول

_لا بربك ابقة هنا محبوسة

_اي

_ماكو حل ثاني

_لا

_زين اكل جيبولي حتى اسكت ترة اني صح فكر بس اكل حلويات وداطلي ماقصرة، على روحي جيبلي وياك

طلع يهز بيدة شبية هذا ترة احجي صدك شسوي مثلاً طلعة اذا مو بارادتهم ما اطلع وهما ماطول يشبهونة ما يخوفون هسة قابل اني اشبهة البنات اكعد واسكت بين ما القندرة يكمل الشغل اشوف شلون تصفة وياهم  .

انبطحت على ضهري ايدي جوة راسي ولو تسالوني خايفة بكل صدق اكلكم لا ماعندي مشاعر خوف گلبي مات وعرفت كل انواع البشر من الشكل اعرف الزين والشين ذولة مطگطگين، اكرة الكعدة وي روحي لان تاخذني بمطبات اني مو كدها التفكير يكتلني كمت كارهة روحي ما اريد افكر بحياتي.

ومر اليوم بالشفاعات بس خلولي اكل وراحو حجيت سبيت غلطت ماكو رد يس تعب لثاني يوم نفس الشي لكيت اكل زودوها حيل لا موجود احد واحجي وياه يفهمني ضلتي شنو فايدتها  .

انجنيت راح يصيرلي ثالث يوم وحدي هنا كعدت ورة الباب بيدي سجينتي لا ساعة ولا ساعتين اخاف اكوم اخاف يجي احد طولت خلكي بين ماسمعت خطوات تحضرت بس انفتح الباب مد راسة يشوفني ما لكاني دخل جسمة يدورني نبتت السجينة برگبتة صاح بالم والدم كام يطفر  .

دفعتة وطلعت الباب سديتة وراي خفت يلحگني ماخليت بالي يصير بية شي دجة بسيطة كلت

رحت اركض اريد اخلص روحي لان بديت اخاف منهم طلعت ماكو احد هما مأمنين لان جوة اني

صرخت الولد باذني خفت يموت استوعبت اني شسويت رجعت اركض علية لكيت الدم ماخذة

انرعبت واحس گلبي وكف يباوعلي بذبول لازم رگبتة ماعرفت شسوي خفت ريت ايدي الكسر

نزعت تشيرتة شكيتة وشديت رگبتة بية كام وياي دايخ اشرلي على السيارة كعدتة بيها واني ماعرف اسوق ولا احد موجود ياخذنا سحبت موبايلة ساكت مايحجي نحل خفت يموت هاي لحظاتة الاخيرة كمت ارجف هسة يلا حسيت بالخوف

ماكو رصيد شمرتة وصعدت بالسيارة اعرف اسوق دراجة سهلة يعني اكدر اسوقها اقنع بروحي اعرف اعرف شغلتها عليك يا الله دايستلها بكل سرعتي قبل لا نوصل للمستشفى يلة حجة بصعوبة  .

_اوكفي انزل هنا وارجعي بالسيارة بيها ممنوعات رجعيها لمكانها

نزل كدامي يمشي طلعت وراة لازم رگبتة مشة مشة وصل يم المستشفى وكع والناس التمت علية نقلتة دخلتة جوة رجعت خايفة ارجع بيها شلون ارجع بعد  .

گلبي يدك بلعومي سقتها وسياقتي مكسرة الشارع فارغ اروح منا ومنا تفكيري وياة خاف مات شلون اعيش لو مات هو ما اذاني بس  حابسني ليش غدرتة وطعنتة من نفس الطريق رجعت قربت اوصل للبيت  السيارة احسها طارت بيه من الخوف والرهبة نسيت شلون توكف ماحس الا انركعت بالحايط والدنيا دارت بية دارت والوجع ذبحني ذبح  .

الدم ينزل من راسي حار على كصتي ايدي احس شي نبت بزندي بس اتحرك تنشگ بالزايد والسيارة صارت نارررر بية حركت ايدي الثانية بصعوبة وايدي ذيج تموتني من الالم على كيفي اسحب بيها واحسها تتشرح كبت السيارة نار سحبتها بقوة والباب ماينفتح عتيت حيل ماعندي وايدي تصب دم فتحت الجامة طلعت راسي وانكلبت على راسي بالكاع الحرارة لاحتني زحفت زحوف كبت نار جسمي نار يرجف والالم موتني ابتعدت عنها خفت تلوحني الكاع تفتر بية ضحكت احجي  .

_مثل ماسويتي بالولد الله رجعها الج شفتي

بجيت بوجع ارد على نفسي

_هو خطفني اني ماسويت شي اله ما اعرفهم اني

مشيت ماكدر بعد رجلية احسهن تكسرن ارتجيت بصف الحايط خليت راسي وغمضت عيوني روحي انذبحت ذبح الالم ما اتحملة اني امسح بالدم من وجهي ويرجع ينزل المكان مهجور محد يجي هنا نهايتي قربت بس شلون اموت واني بنص الطريق خل اموت لان ماكو نهاية المن امشي  .

راحت روحي ورحت ماعندي طاقة اساعدها حسيت على روائح غريبة وهوسة يم راسي الم ياكلني فتحت عيوني بتعب ايدي ملفوفة وراسي

غضنفر واكف يباوعلي خدة مطبور وجهة تراب عيونة دممم حجيت بلسان ثگيل  .

_ادجك حلفت ادجك كتلك لا تورطنا لاتجي علينا جلبت جلبت دراهم كتلوها اني كتلت الولد السيارة كتلتني واني راح اكتلك

_ غضنفر: سبع ارواح ولا تموتين شبيج

_انعل ابوك ابن الكلب ايدييييييي

_انكصت؟

_توجعني اااخ يمةةةةة

_خياط خيطوها الج بس عوفيها

سحب ايدي الصاحية اعصر بيها سحبتها منه ضربتة راجدي اغلط علية  .

_ابن النعال ابن النعال

_ابن الكلب احلة ارجعي عليها النعال مايخوف مثل الكلب

_چلب انت

_كلب

_چلب ابن الجلب

_وفي وابوي وفي شتريدين شكوني شك من وراج نوم ما نايم حتى اطلعج منهم

_كلة من وراك غير من وراك كتلو دراهم

صرخت ابجي اصيح باسمها

_راحت بعد منو يصبرني منو يسولف علية

_اني موجود

_كشفتلي رحتلها وكشفتلي كالتلي اذا طردوج تعاليلي بيتي الج اكعدي بية راحت

_اني الج

_اسكت انت جلب اريد دراهم

_امشي امشي بت النعال راسي راح ينفجر لا تصيحين

_اريدها ما امشي

_اخذج الهااا امشي

كمت رحت وياة دايخة حايرة براسي ساعة بيدي وصلنا لبيتها نزلت ادور عليها شفتها حضنتها ابجي بلسان ثگيل احجي  .

_عبالي متي روحي راحت عليج راحت

_دراهم: ما اموت كبل لا اشوف تاليتج وين

اخذتني من ايدي كعدتني واسمعها تحجي وي غضنفر بصوت عالي محتركة  .

_دراهم: شمسوي بيهااا

_كولي هي شمسوية همزين ما كتلت الولد

_جهنم تلفهم غير خطفها تضحكلة

_بس هو حلف ما يأذيها ولا يخلي واحد ياذيها بين ما اكمل شغلهم

_ولك رايحة البيت هسة شحجي وي نسابتها كلساع يحققون وياي

_كتلج لا ترجعين عوفي البيت هي تبقة يمي منا لمن تصير زينة

_ما تبقى يمك لو تموت ما اخليها اطلع منا ولا ترجع بعد انساااانة

_ارجعلجن

_بيتي يتعذرك لا ترجع ما ناقصين مصايب

_خل اخذها وياي اني المن جبتها

_اطلع برااااااا

_وذولة لو رجعو عليها شدكليلهم

_ما يرجعون اليوم جانو يمي كتلهم تشتغل بالليل تحل طمنتهم عليها

_هي باجر تصحى تحمليها بس اليوم

تمددت ونمت حسيت بدفو الفراش ثاني يوم كعدت دايخة تعبانة دارهم سالتني هزيت راسي غسلت وهي حطت الاكل كدامي ايدي توجعني كوة اكلت رحت على المراية متكسرة معلكة بالحايط وجهي اصفر وراسي ملفوف فتحت الشاش رحت اغير ملابسي كلهن ريحة ديتول  .

_دراهم شلون عافوج ماموتوج

_عاف غضنفر الولد وعافوني وحدة بوحدة

_عبالي متِ

_ما اموت هسة بعد

بقيت اكلب بيدي وهي تحوم علية تسال بية

_جسمي متشخط بية طكع احمر وبنفسجي يوجعني بس زين ما مجروح

_اخواتج ما ترحيلهن

بهتتت ملامحي وبخفوت كتلها

_ها

_روحيلهن امشي مابينة حيل مشاكل

_مشاكل شنو

_ذولة نسابتج ناس بالدولة لانروح بيها من ورة هذا المخبل

_اطردية

_طردتة بس غير يحس ما يحس

بدلت ماعرف اليوم شكد الي ماشايفتهن هسة نيزك متخبلة لبست شفقة راسي يوجعني وايدي ماتبين لبست فوكاها رحت لبيتهم عفت دراجتي ماكدر اسوق ماعرفت شحجي من شفت خوف نيزك علية

بعد العتاب والرزايل كعدت اشرب جاي  وهي فوك راسي تكلي:: باجر العرس

شرگت بالجاي دكت على ضهري كوة جريت نفس

_صدك تحجين

_اي اليوم الحنة

_يا حنة

_حقج انتي وين واحنا وين حنتنة راح يسوون هسة شوية نروح للصالون واني ميتة عليج لو ماجاية فلا اتحرك

_خوش اجيت

طلعت نيزك وبقت بس نجمة سحبتها استفسر على الوضع نكتت الاول والتالي الي ضليت اكل بروحي اكل عليهن كل هذا صار واني مو يمهن اول مرة يصير بيهن شي واني بعيدة  .

كمت انعل بسراج اني ادري هما ماعايفينهن وحتى من ردت اطلعهن حسبت حساب لهذا الشي بس بطلت لان كلهم يحومون عليهن وكلشي خططتلة تبخر  .

طلعنا كلنا للمركز كعدت على صفحة خليت الشفقة على وجهي وغفيت تعبانة هنا بقن يتمكيجن وماعرف حاجزات بدلات كعدتني نجمة بقيت افرك بعيوني  .

_انتي نجمة مو؟

_نجمة: نجمة والعباس شلوني

_تشكين شك شك شك

ضحكت بحزن وراحت بفستانها الاحمر مخصر على جسمها تخصر شعرها مسرحتة نازل على طول ضهرها ومكياج نازك راسمة تموووت طلعت رحت اشوفهن انبهرت من شكل شهب بدلة احمر غامق وهي بيضة مكياجها بسيط لان مايلوكلها وي التسريحة والذهب ماينوصف جمالها  ،

نيزك لابسة فستان هم نفس الون وتسريحة ومكياج يخلن الواحد صافن ذهب تصلي على محمد وكل شوية ذبتلها كولة تصفك وتهلهل سهلة هاي سهلة طلعت تموت شكل ثاني بقيت بس اني وذهب تحجي علية..

_ماتكومين يملسوعة هسة انا ميت رجلي جا هم لبست وتحمرت انتي شمالج

_كواكب: مالي خلك انوب البس احمر لو امووووت

توسلتني نيزك بعيونها جايبتلي فستان وغراض وياه ذبيت حسرة اني بيا حال بس ما كسرت بخاطرهن رغم ماحب هاي السوالف بس ادري من يشوفني هيج يفرحن واني ما ابخل عليهن  .

بعد ما خلصنة توجهنا للقاعة كلها بنات ونسوان امير ماكو كالت وي ضرغام الاجواء والترتيبات تاسر النفوس جايبين ملة تقرا جابن شال مزخرف على راس كل وحدة  غطنهن واربع بنات كل وحدة لازمة طرفة واني من ضمنهن نحرك بية والملا تقرا بصوت هادئ جميل..

_امنية في امانيها

مليحة في معانيها

كملت واني صافنة ما مصدكة فرحة اخواتي نسيت هموم الدنيا كلها خلصت واخذنا صور وراها بدا الركص البنات فرحانات يركصن هاجر تعدل بشهب تصفك فرحانة بناتها يركصن ذهب فرحتها فرحة هاي هي وسهلة  .

نجمة..

خلصنة الحفلة كوة ابتسم من يوم العرفت ميس سافرت مالي واهس لكلشي حتى اتصال ما تفتح علية طلعتني من حياتها كل ما اذكرها اريد ابجي

فرحة لاختي بعد كلها قسمة ميس مو من قسمتها قبس شهب فرحانة كلش طالعة جنها اميرة  .

بدلت ونيزك رجعت بفستانها لان مستور البنات رجعن ويانا وردة اطك اصبع طول الطريق وتهز ركبة امها مو وياها ماخذه راحتها  .

_ورد: اريد اركص ركص واكسررر الكاشية واصيح اني اهل الولد مو اهل البنية لك هلااااا باليلعب حوووبي هلا برجال الجووبي انووووب

_بس لو تسكتين شخبصتيناااااا

_انجبي انتي

_انجبي انتي خوش

_يلة راح اسكت لان اخت العروس انتي

البيت بس نسوان وبنات كالت ذهب اخذن راحتجن محد يجي رحت ادخل للغرفة لكيت نيزك واكفة وصوت ضرغام منين يجي هذا اثاري فاتحة وياة اتصال   .

_ضرغام: راح اجيج هسة

_نيزك: فدوه لا تجي عيب كلها نسوان

_انعل ابوهن اني شعلية بيهن

_شبيك ضرغام ترة باجر العرس

_اعرف بس هسة اريد اشوف شكلج بالحقيقة ما يهمني حمرة نيزك حمرة يموت ضرغام احسن

عفتها تضحك وانسحبت بهدوء ضرغام العاشق الولهان الا قبس لا حس منة ولا خبر بقيت بفستاني افتر ولا اريد ابدل كد ماعاجبني كل شوية اشوف شكلي بالمراية  .

ورد تريد تشتري صبغ اضافر بلون فستانها تريد تلبسة شاورتني تكلي  ..

_راح اشتري من الاسواق اوكفيلي بس ادك الباب افتحية

_يا ولج وين رايحة باجر يجيبولج

_ما يجيبون هما وين يتذكروني الف شغلة عدهم اذا ما اجيبة بيدي كلشي ما احصل

_هسة الا صبغ بلونهن عيارة

_اني اتعاير يلة شتريدين

_امداج اي والله جنج بريص طالع من المجاري

غمتني وطلعت بقيت واكفتلها الخايسة العيارة محد يدري بيها طالعة اندك الباب شبسرعة رجعت جبانة والقران خافت ورجعت فتحتة  .

_نجمة: امدا..

كطعت كلمتي من شفت استاذ فقار هو وبنتة فتحت عيوني على وسعهن من التوتر ركعت الباب بوجهة شعري مفتوح شلون هسة ادخل النااااار على هاي سوايتي طاح حظي دخلت ارجف جوري صارت بوجهي  .

_امشي هذا ابن عمج بالباب روحي شوفية

_منو

_الاستاذ المدير امشيي

راحت فتحتة رجعت بيدها ود معبسة ملامحهة خزرتني بضوجة شبيها هاي انوب يمكن لان ركعت الباب بوجهة بدلت ملابسي ولبست شي مستور لكيت ورد امها تكفخ بيها بالختلة اضحك عليها شافتني اجت تغم بيه، شوية دخل ضرغام بيدة امير عافة يمنة دخل لغرفتة دقايق ولحكتة ذهب ادك بالباب من شبعتة رزايل يلا رد عليها   .

_شلووون بيج فااافوونة خلي العالم براحتها

_ايا ساقط وراك عرس مايصير، تشوفها اطلع ولك

طلع عابس وجهة وهي ترزل بية نيزك قفلت عليها الغرفة ماشفناها بعد بالليل صارت حنة الولد بالقاعة فاتحين بث مباشر والاجواء تموووووت يكول عبالك ديسكو الاضوية والموسيقى ما اسولف على الركص ضرغام ذب لحم رجلية طاحن من الهوسات والولد كلهم ركصو  ..

_كواكب: هذا ضيم شوف شوف طلع يعرف يركص واني اكول مو سوالفةة

_نجمة: عوفج منه شوفي الاستاذ المدير الجبير شلون يركص

_ورد: وين الرررركص وين ماتشوفنة بس يصفك

_نجمة: يا بس يصفك دطيري انتي عمية

بقينا نحجي بيهم نيزك بس تضحك تباوعلة سمار يكول العريس كد ما ركص اكول راح ينام اسبوع

سوينا حفلة باليل توديع العزوبية متت تعب نمت جفي على وجهي  والثاني يوم العرس خبصة انخبصنا نركض منا ومنا  .

الشارع انملى سيارات الزفة صارت من الصالون للقاعة الشارع ازدحام انسد سد كلة سيارات عالية وفرقة جايبين خلو الناس الماتعرفهم تركص على الواهس انبهرررت على الجمال اول مرة اشوف هيج بالحقيقة شكد ناس جاية  !

وصلنا للقاعة نيزك مصورات ثنين كل وحدة وحد نيزك بجهة وشهب بجهة ثانية شهب ترجف لازمها قبس شطالعة بالبدلة البيضة ملااااك ملااااك

البركع يسحل وراها والورد ينطش فوكاهم الاجواء تمووووت  .

استلمتهم المصورة قبس فد ثگيييييييل يخليها تحجي بكيفها هو يسوي حركات ويعلم بشهب

_قبس: بس ابقي ثابتة شلعتي كلبي خل ناخذ لقطة

عيوني بعد ما اشوف بيهن انملن دموع اختي الحلوة عروسة اليوم عبرت على الصفحة الثانية اباوع بالوجوة مبهوتة كلها تجمعت يم البوابة يتبسبسن بينهن كانهن مامصدكات لزمت كلبي بيدي اريد افهم شكو رحت لورد بعدني اريد اسالها والقاعة اختفت الاصوات بيها لو تشمرين صوت الابرة ينسمع  ..

يتبع...

____________________________

اللهم صلِّ على محمد وآل محمد 💙

توقعاتكم 👀

لاتنسون  متابعة لحسابي

تعالو نتناقش بالتلي

#المنجمة

الكاتبة _كفايه

لاتنسون متابعة الحساب

التصويت والتعليق بين الفقرات لطفاً 💙

يا علي مدد ♛

_________________________________

ورد...

قاعة ملكية اطلالة فخمة للعرسان ترتيبات دقيقة

صفكات وهلاهل تعتلي بين تارة واخرى الفرح مترسخ بگلوب الحاضرين وشلون ما نفرح اللهم.

واكفة بصف المصورة على وجهي ابتسامة داخلي اصلي على النبي العروسات وحدة احلى من الثانية نيزك كلش جميلة ونازكة باطلالة محجبات شعرة ما طالعة منها وهذا التوقعتة الصراحة احس نيزك ملتزمة  اكثر من اخواتها ولان قاعة فاختارت فستان بهذا التصميم  .

ضرغام احسة راح يطير من الفرح بزواجة الاول مافرح هيج بس هسة غير ابتسامتة ونظراتة تعبر يريد ياكل البنية بعيونة ااكل المصورة تنطي تعيلمات لنيزك وضرغام حتى ياخذون لقطات ونيزك طنكرت رافعة حاجبها ماعجبتها اللقطات  .

_المصورة: هسة شنو ياعيني ولا لقطة اخذنا

_نيزك: ما اخذ هيج لقطات تمااام

_المصورة: غير عروسة تبقة ذكرى هسة خجلانة منه باجر تتندمين يا خجل هذا عيوووني زوجج

_نيزك: حبيبتي انتي اخذي لقطات واحنا بكيفنا شلون نوكف مو ضرغام

خزرتة رافعة حاجبة عض شفتة السفلية مركز بيها

_ضرغام: اشتعل ضرغام

_نيزك: احنا نوكف بكيفنا وناخذ لقطات مو

_ضرغام: رب المو

_نيزك: يلا نبلش

خزرت المصورة على وجهها ابتسامة نصر كلبت وجهة المصورة تطك بعلجها، عدلت وكفتها نيزك ضرغام ياخذ بيدها يخليها على كتفة والايد الثانية يخليها على صدرة والمصورة تاخذ لقطات..

_نيزك: لو باقين على المصورة مو احسن

_ضرغام: لا المصورة شريفة ما تعجبني الشريفات

المصورة تسمع وتهز براسها وهو بس تخلص لقطة يبدل غيرها نيزك  تخزر بية ماتقبل لو تدفعة من صدرة بس يتمادى بالحركات.

_المصورة: الله يساعدك عليها تخلصها تقنيع

_نيزك: لا تخلين خشمج ويانة

_المصورة: صدك الله يعينج

_ضرغام: صوري واسكتي

ابتسمت نيزك واني وياها هي كلش انتحست ابتعدت على صفحة اريد اشوف قبس وشهبة الحلوة جلبت يمهم بس والله يخبلون امير بنصهم يصور ضرغام شالة يبوس بية يكلة..

_ضرغام: شتريد بعد حضرت عرس امك شفتها بالبدلة مثل حضي اركص اركص فرصة تفوتك ماتتعوض هاي

يضحك امير ويسحب امة من البركع لزمتة تبوس بيةشكد حلوين فدوة  تنفست براحة وطگطگت اصابعي شوكت يشغلون اغاني اريد اركص غير يخلصون تصوير، انتبهت للبوابة بعد ماشفت دخولية ضخمة اسرت تركيز كل الموجودين وخطفت الوانهم مامصدكين من جيتهم ولا اني بهذا الوقت تحديداً وبعد سنين طويلة شرجعهم وشنو جايبين وياهم  .

دخلت مرة جبيرة بالعمر قوية بحيلها بعدها ومن جانبها ثنين زلم اي عرفتهم سامعة عنهم ومرات اشوفلهم بالانترنت صور ذولة عمامي سلمان وعدنان  وبيبي حفصة اكيد صح ما شايفتها بالواقع بس مبينة هي السطرني سطر  شجابهم واحنا ماعدنا علاقة بيهم   !

توسطو القاعة يباوعون بوجوة الكل شبح ابتسامة مغطية ثغرهم دكت عوجيتها حفصة بالارض وسلمت بصوت عالي محد رد السلام من الصدمة  .

_عدنان: شبيكم حتى السلام ما تردونة  !

محد رد علية تلكتهم بيبي ذهب بصوت اعلى ترد عليهم:: هلا ومية هلة بيكم

_حفصة: شلونج شريجتي

_ذهب: انتي شلونج انا زينة

تشخصت عيون البنات نجوم ونيزك من سمعن كلامهن اي جدي ليث متزوج ثنين وقصة طويلة هاي  .

_حفصة: تستقبلونها نضل واكفين

_ذهب: كل الهلا بيكم تفضلو

_حفصة: احسها مو من كل كلبج

_ذهب: افاا وانا ربات الدواوين زحمة ما استقبل خطار

_حفصة: احنا من اهل الدار لا تنسين

_ذهب: ما ناسية بس كلشي بوكتة يحفصة

_حفصة: وهذا وكتة يذهب كافي كبل لا نموت نفض البينة

هزت راسها ذهب سكتت اجت هي تبارك لنيزك وضرغام نزل سلم على عمامي سلم عليهم بعد ماجان الكل فرحان هسة صار الكل قلق  .

اجو عمامي والبقية ماكو اي كيمية بينهم واحد يباوع بالثاني ساكتين وقت الكلام بعدة رجعت اجواء العرس القاعة منفصلة الشباب وحد فاخذو العرسان راحتهم شغلو موسيقى هادئة والاضواء طفت صار المكان معتم مزين باضوية خفيفة  .

توسطو الصالة نيزك وضرغام يركصون سلو نيزك احسها راح تموت من التوتر ضرغام متملكها هو يحركها بيدة، نسمة هواء باردة منظر يبعث الطمئنينة والهدوء شهبة وقبس خليت ايدي على خدي ذايبة بجمالهم احلى عرسان اشوفهم بحياتي شهب تمووووت ما شاءلله كلش جميلة  .

_ورد: ها عجايز شو واكفات لاصوت ولاحركة

_نجمة: شتريدين ولج ترة اخواتي العرايس

_ورد: انتي ولي مامنج فايدة امشي جوري ليش خاتلة هنا

_جوري: ما روحي انتي ابقة هنا احسن

_ورد: بالختلة بعد بعد خاف واحد يشوفج

كواكب كاعدة وساكتة تباوع بس بعيونها حتى ماتحجي نجوم العوبة مطنكرة وجوري هاي بالارضية لازگة المعازيم تجي تبارك وتكعد ملل يمنة بس بقاعة الولد علكت الاغاني وضرغام وقبس طلعو ركضت سحبت نجوم اسحول بيها تسحول  .

_نجمة: ما مااا اريد ابقى يم اخواتي اخذ صور

_جهازج انملى صوررر دمشي خل نشوف الشباب

_الفاسدة ام الولد

كرصتها من زندها ترفس بية ذيبت نفس براحة همزين امي ما شافتني رحنة نتختل صايرة ضلمة والاضوية تروح وترجع بس خفت يلكفوني اريد اشوف مكان ختلة كون ما يشوفونة بية بس احنة نشوفهم  .

_نجمة: يمة وين جلتيني فلك فلك ولج عيب ذولة ولد

_ورد: نباوع من بعيد شوفي الجو يخبل عاااااع شوفي شلون يركصون جوووبي

_نجمة: يا يمة انفضحنا ربي استرنا صوتج صوتج

_اي يلا يلا نصيتة

سحبتها للختلة واحنا ناعمين مانبين

_نجمة شوفي صافي وسمار شلون يركصون

_صافي ثگيل بس هذا يسحول بية اسكتي خل نسمع شيحجون  .

سكتنا ثنينا نخلي اذاناتنا يمهم لزگ صوت الاغاني نصوة نكدر نسمعهم، سمار يعت بقبس يبوس بية وذاك يريد يطلع روحة منه

_سمار: ضلعيييييي بالمباارك دخولك القفص الذهبي

_قبس: طيرررر اني طيررر حتى ادخل قفص

_سمار: واحلى طيوررر شيل يابة شيييل

_قبس: ابن النعال اذنيييي

_سمار: موووو اغانييي ضغووومي حبيبي

فتح ادية وراح لضيغم  ذب نفسة على كتفة يمسح على ضهرة  .

_سمار: يوم الازفك بيديييي واركص بعرسك

_ضيغم: تسلم حبيبي

_سمار: والله انت محترم فوول احترامات

_ضيغم: تسلم مرة ثانية

_سمار: ما اتحممممل هيج واحد محترررم يا عااالم

_ضيغم: انجب ولي مني

_صافي: ارتاحيت لزگة جونسن

_سمار: مو صوجهم صوج گلبي اليروحلهم

_قبس: لا تروحلهم مو من جوك

_سمار: بس انت المثقف جوي واجوااائي

راح على الاغاني بدل الاغنية وعلاها الشباب تخبلتتت لا سترة بقت ولا رباط شمروهن ودبج دبج بقينا فاكين حلوكنا احنا النسوان شبينة مو هيج نركص وحتى لو هاي تركص وحدة وعشرة لا ذولة كلهم تريدين واحد ماكو، على الواهس صرت اهز بالختلة ونجوم تكرص بية  .

_عوووفيني يبووو اريد اركص بعد محد يتزوج

_نجمة: اكلج اني جعت

_روحي البوفية مشترك بينا وبينهم جيبيلي اكل وياج وارجعي علية  .

_نجمة: طلعت اتختل خايفة يشوفوني ولو هما هسة مايباوعون لشي ذبيت نفس مرتاحة وكفيت ردن فستاني اخذت ماعون اخلي بية اكل هسة البنات جوة شجاي يسون اكمل اكل واروحلهن الا اخلي هاي العوبة وحدها  .

_هاي نجمة

التفتت گلبي يدك بقوة ابتسمت براحة من شفتة

_هلو استاذ شلونك

_حسن: الحمدلله ماكو اختفيتي بس كم يوم اجيتي

_نجمة: مو استاذ طبقت يمكم فترة وخلصت

_حسن: نعرض عليج شغل وارجعي جددي دوامج

_الصراحة انعرض علية شغل

_حلووو ماتجين

_ماعرف بعدني اشوف على الاكيد الفترة التجي

_حسن: يسعدنا وجودج ويانا

ابتسمت بامتنان استاذ حسن كلش لطيف راح  واني كعدت اكل بسرعة اريد بس اخلص  .

_

نجمتنااااااا

غصيت بالاكل اختنكتت جابلي كلاص مي اخذتة اشرب  .

_سمار: اسم الله اشربي مي

_نجمة: كمزتني ليش هيج

_شمعرفني راح تغصين بس احجي

_ترة انت صحت ما حجيت

اخذ ماعون ترسة اكل واجة كعد يمي يصيح

_متتتت جووع متتت

_حقك من الرگص شبقة بيج

فتح عيونة بصدمة واشر على نفسة بتعجب

_سمار: اااني اركص اااني صدك تحجين انتي؟

ضرب على رجلة يدير براسة منا ومنا

_سمار: كلها تركص الا اني بس اباوع عليهم

_صح شفتك

_شفتي لو عيني؟

هزيت راسي اضحك اكمل اكلي اباوعلة يلف لف خلص ماعونة كام ترسة ورجع كعد  .

_سمار: حيييييل جعت مو تكولين شكد ياكل

_شعلية واذا اكلت هواي

_صح قابل من جدرج ماكل

سكتت عنة بس هو عبالك بت عمة اول ماشفتة ضرب ميانة بس يسولف  .

_سمار: اكلج ميس ماكو شعجب مو هي صديقة قبس

تركت الاكل وجاوبتة بحزن

_سافرت ميس بعد ماترجع

رفع راسة فاتح عيونة بصدمة

_ووين سافرت ها سافرت بس ترجع مو؟

_امها دكول ماترجع بس ابوها مايقبل تستقر هناك

_هاي ليش تريد تعوفنا وتروح شبيها

_ماعرف

_حرامات

_صدك حرامات راح ابجي سمار

_اهووو انتي كلشوية وكلتي راح ابجي

_ترة صدك راح ابجي غير صديقتي عافتني اتخيل هسة قبس يعوفك وبعد ما تشوفة

_اشگ هدومي وراة ولا اكل ولا اشرب حتى اموت وابلية

_لهاي الدرجة تحبة  !

_اجذب عليج نعاليش هو اكلج هسة صار نسيبج يعني مااكدر احجي علية كدامج

_لا عادي احجي علية حتى اني اريد احجي علية

_اهووو هاي انتي بعدج حاقدة علية

_اي والله مامصدكة راح ياخذ اختي انوب بس كالب خلقتة علية عود  نسيبتة

_حرامات انطيتية اختج

_اي والله حرامات

_فقار: مجتمعين هنا

_سمار: حسب ماشفت اي

_فقار: ججج

بيدة سبحة فركها بيدية ورجعهن ورة ضهرة يباوعلنا سمار ياكل واني توترت شبية هذا شربت مي وكمت استرخص  .

_اني اكوم عن اذنكم

_فقار: اروح اني اخذو راحتكم

_نجمة: لا لا أصلاً اني رايحة اشوف اخواتي

رحت مستعجلة للحمامات يمااا شبية هذا يريد يكتلني غسلت ومن ردت اخلي حمرة ولكيت جنطتي مااكو دورت بعيوني عليها مالكيتها رجعت امشي سريع ثول الثولني نسيتها وراي وكفت اتنفس سريع لكيت استاذ فقار على وگفتة باقي بس سمار ماموجود  اخذتها اگلة  .

_نسيتها وراي

_انتبهي ثاني مرة

_ان شاء الله استاذ

_على طاري الاستاذ ماناوية تشتغلين

_اشتغل عادي

_وياي تشتغلين

_بس اني ماعرف تعلمني

_اعلمج

_استاذ هو السكرتيرة شتسوي

_تشخبط على الورق

ضحكت اكمم فمي:: لا استاذ صدك شتسوي اني جنت عبالي تشخبط على الورق بس هيج

_سهلة هسة اشتغلي بالاول وعود شخبطي اذا عجبج

_شكراً

_على الشغل لو لان اخليج تشخبطين

_عليهن ثنينهن

ابتسم ومد ايدة بجيبة بقيت مركزة وياة رفع راسة ابتسم وقدملي جكليتة ماكدرت اضم ابتسامتي الواسعة ملت راسي كال  .

_شفتها وتذكرتج

اخذتها من ايدة خليتها بين ادية:: شكراً استاذ والله انت حباب

دنك راسة يضحك رفعة كلي

_فقار: يخلص العرس وتبدين شغل؟

_اكيد استاذ

_واجيبلج شوكلاتة

_مو اگلك انت حباب

ضحك بصوت عالي عفتة ورحت اركض جوة هذا يضحك علية مبين هسة فوك ما اگلة بس انت حباب  !

_كواكب: غصة بلعومي مجلبة كل ما اباوع لاخواتي گلبي يوجعني يعني هاي هي شهب خلصت من سراج نيزك خلصت من يوسف خلصن من سالم  ؟

اتمنى فعلاً يخلصن حتى ارجع العب على سالم واخذ حقنا من بين عيونة لحد الان هنا لازماتني اخاف يتاذن بسببي بس امن عليهن اشد حيلي شد اني گلبي موجر نارة ماتطفى  .

طلعت من مكاني ما اتحمل دموعي راح ينزل اخواتي يدورن بوجوة النسوان يريدن امي هيلة سودة علية يايمة يالحنينة بحنانج ماشفت وين عن بناتج محتاجاتج هسة هنا جبار بوية نيزك للمرة الثانية عروس بس هالمرة مو غصب، شهبتك عروسة تأسر العيون من جمالها وحدهن ماعدهن احد  '

امسح بدموعي ويرجعن ينزلن بجيت بجيت گلبي نار وين اهلنا بس بنات وحدنة للمرة الثانية اخسر اهلي" بس اني الاخسرت اهلها مرتين "

كاعدة بعيد عن الهوسة عن المعازيم سندت راسي على الحايط دموعي تنزل بهدوء نحلانة من يوم الحادث وليجاي جسمي وراسي يوجعني خو ايدي كلش تاذيني بس ساكتة 

نزيت من سمعت حركة وراي مسحت دموعي والتفتت شفتة ضرغام ابتسم بلطف ولو شيصير ما اشوفة لطيف  .

_ضرغام: كاعدة تبجين؟

_لا جاي اكتل بعيجية

كعد نصة كعدة كدامي يحاجيني بصوت ناصي

_ضرغام: بعد صرنا نسابة غيري اسلوبج وياي

_منو كال راح اتعامل وياك أصلاً  ؟

عدلت كعدتي ورفعت ردن السترة احجي بتحذير

ه

_شوف ضرغام سوالفك القديمة تعوفهن من اليوم تبدي بداية جديدة اختي مو خط احمر لا موت احمر اسويها لليأذيها عندي استعداد اكتل علمودهن مو شفتو ماعدهن احد تاخذون راحتكم بتصرفاتكم شنو الاهل اصيرلهن وطن.

_اني والله هاويها لنيزك

أذي روحي وما أذيها

_بس تأذيها لو اشوف بعيونها الحزن ما اخليك تشوفها وهاي حذرتك

ابتسم وكام كمت اوكف كدامة اكمل كلامي عندي حجي يابو حجي بس مو وكتة كلة ينحجي  .

_كواكب: تنعدل ضرغام ولو ذيل الجلب يبقى اعوج

_ضرغام: راح اسوي روحي ما سمعت

_المهم سمعت واني والله لو ما ناهي كلشي بالدليل ولا اخليك تزوجها

_ضرغام: يلا اني امشي غير العريس وراي مرة احبج ام دجة

راح يضحك رجع اندار يكلي

_صدك سجينتج عندج

_موجوده اذا تريد اشرحك بيها

_تربات شوارع شطلعين هيفاء وهبي

_ساقطة مثلك يالساقططط

حرگ دمي الساقط ااااخ ويصير نسيبي انووب تففف عليك يالازرك جنك بعيجي بقيت اغلط علية محترك گلبي من اسلوبة وطريقة كلامة انتو تحسون ماكال شي بس اني هاي اذا ضحك يستفزني  عدلت سترتي رجعت صار بوجهي ضيغم خزرتة مكملة طريقي وكفت من كال  .

_ضيغم: مريضة انتي  ؟

_لا

_اوكفي اكلج

_وكفت ما تشوف

اجة يتقدم صار كدامي باوع لرگبتي وكال

_راح ادك مثل وشمج عجبني

ضحكت بصوت عالي وهو باقي على جمودة رفعت راسي اباوعلة

_كواكب: انت وينك وين هاي السوالف عوفهن ضيم عوفهن

_ليش اليدك وشم بية شي هسة انتي مو بنية داكة ماحجيت شي

_اشوف الوشم للشخصيات العنيفة

_يعني هسة انتي عنيفة؟

_لا وين ابد

_اتفق وياج

_خوش بس لا ادك اذا تباوعلة هواي تبقى تكرها تريد بس تمسحها تحس نفسك مليت منة نصيحة لا ادگ

_داك اني ما باقي عليج

_صدك بلة اشوف

_لازم اتصلخلج يلة تكدرين تشوفينة

گلبت عيوني هسة كون ادفرك  سبع دفرات هزيت ايدي هسة هذا شحجي وياة ضحك

قلص عيونة بففضول يكلي  .

_بس كون اعرف معناة

_واضح معناة بس انت غبي

_اويلي على الاحترام

_اويلي على صلافتك

دخلت جوة نيزك دورني بعيونها لزمتني ايدها ترجف:: وين رحتي؟

_كواكب: يمج

حضنتني تبوس بية لزمت وجهي بين اديها عيونها مدمعة تكلي:: لاتعوفيني ابقي يمي ماتبقين هيج بعيدة ما اعرف اخبارج

_كواكب: اممممم

_نيزك: راسج اليابس لينية ما نريدج عايفينج هيج

_الله كريم هسة اجت الزفة

عفتها ورحت لشهبة صارت ترجف لزمت اديها اعصر بيها واطمنها عيونها مدمعة تهمسلي "خايفة"

_كواكب: لا تخافين هسة احاجية الج

لزمتها نجمة ادور بعيونها خايفة جلبت بيه تحجي بصوت ناصي:: كواكب فدوة هاي ورد دخلت القاعة الولد ولحد هسة ماكو

فتحت عيوني انتر بيها

_صدك تحجين شلون تدخل قاعة الولد  !

_نجمة: بعد دخلت حبابة روحي شوفيها هسة اكو ولد بالقاعة  .

_من كل عقلها تروح هي

_دروحي حبيبتي تلكينها بالختلة اسحبيها دفرات جيبيها

هسة كون الطم على راسي امها تدور عليها وهاي هستوها يلة تحجي رحت للقاعة بيها شباب ماهتميت مديت راسي ودخلت ادور عليها بشكو ختلة فتحت عيوني بصدمة من شفتها جنها فارة لامة نفسها ماتبين بين الغراض دنكت اهمس  .

_ورد الو وياييي

_ورد: يمااا فدوة طلعيني راح اموت

_طبج مرض عندج عقل شكو جاية

_لا تحجين فدوة شوفيلي الوضع خل اطلع لا اخوي ولد عمي يلگفوني

هزيت ايدي هسة شوكت تفرغ الولد تباوعلي مامصدكة دخولي يمهم رفعت ايدي اصيح بيهم

وافتح بسترتي  .

_لا تباوعون جني ولد مثلكم مگطوعة كطع يللااا وجوهكم منييي

سوو روحهم مايشوفوني سحبت ورد وهي لازكة

_ورد: خاف يلاكوني

_امشي هسة امج راح تخبرهم انتي ماكو

كامت تريد تبجي والله هسة ارزلها كون على دكتها بس كلت خطية كسرت خاطري بعد، مجلبة بضهري طلعت صار بوجهي ضيغم بس مايشوفني ملتهي يخابر رجعت بسرعة خطية لايشوفها  .

_ورد: يمااا هسة شيكول هذا اخوي

_اشك مو اخوج لج هو وين وانتي وين

التفتت صار بوجهي صافي بهتت ملامحة يباوع بوجهي قلص عيونة يتذكر  ويكلي  .

_صافي: اني شايفج بس وين

_لا تتذكر احسن

_لا لا شايفج لااا صدك انتي نفسج!!

دنكت راسي اضحك واهز بية رفعتة اشوف ملامح الصدمة يباوعلي بعدم تصديق  كتلة:: اي الولد الباعلك چاي

ورد تكرص بضهري سحبتها كفختها على راسها

_ضهري ما رايدتة بت النعال

سكتت خطية ماردت علية متفشلة صافي بقة صافن كتلة بعصبية:: دمشي اخذ ضيم من دربي وفقار وجماعتة

_ليش

_هو شنو اليش غير هاي اختة العوبة تريد اطلعها

باوعلها بعدم تصديق صاحت بية

_ورد: شكددد فاهي ولك امشيي راح يدخل جنة سكران كواكب

_صافي: احترمي نفسج شنو سكران شو انتي ماتستحين شفتيني اطوطح؟

_ورد: طلع السانة الخوينس

_صافي: هم داخلة لقاعة الولد وهم تجاوز

هز ايدة وطلع سديت حلك وردة بيدي لان انهدت على الولد فرد هدة سحبتها لكيت الممر فارغ دفعتها بقوة لقاعة النسوان تنفست براحة تمسح بكصتها  .

_ورد: الله ينقذج ان شاءلله نقذتيني

_بعد لا تسوين هيج دكات ناقصة

راحت تركض جوة واني ادور قبس بعيوني شفتة داخل جوة رحت يمة والگة نجوم كالبة خلقتها عكدت حاجبي بتسائل قربت اذنها يمي تكلي

_نجمة: اجن الموضفات شوفيهن شلون يخزرن بينة خو شهب اكلنها

_دعوفيهن غير تخبل ومنغارات هسة بجمالها هنا

بوزت شفتها مطنكرة مكتفة اديها شيفكها بعد تقربت على قبس اشرلة براسي:: بس نحجي شوية

اجة وياي صرنة على صفحة باوعت بعيونة دارهن صفح ابتسمت اعض بشفتي غير اشوف عيونة ماكو  .

_كواكب: قبس انت رجال جبير واعي اتمنى منك ماتضغط على شهبة تراها خوافة عوفها براحتها

_قبس: تدلل بعد عندج غير شي

_لا بس دير بالك عليها لاتضوجها باي شكل من الاشكال

_صار

بس هيج كال وبقة ساكت عيونة على المعازيم انسحبت بهدوء بقو يباركولة خالي لازم ضرغام يوصي بية على نيزك ومرتة تعدل بيها ابتسمت اصير على جهة وضرغام يكل لخالي همام  .

_ضرغام: بروح الروح اخليها

نجمة تلعب بامير الهوسات مستمرة واكو مرة جبيرة بس تخزر باخواتي وبية هسة تكول هذا منين اجة خصوصا لان لابسة رسمي  .

جاي يتحظرون نريد نطلع نزف ودخلت مجموعة يباوعن منا ومنا جنهن معزايات سرفنت ردني  ونجمة انبهتت ملامحها  .

_نجمة: لج ذني صبيحة وافنان ومرة خالي

_مرة نعالج المگطع

اجة بنص القاعة خلن الامة تتفرج عليهن بنات الكلب  .

_صبيحة: بالمبباااارك عليجن بنات جبااار

نيزك تخزر بيهن عيونها يريدن يطلعن وشهب رجفت بمكانها وذيج تصيح  .

_صبيحة: ساقطات لكيتن المثلجن يلفيجن عاد صدك يوم يومين حرامات هاي المصاريف ولو انتو فلوسكم تشمرونها على الكاوليات المثلهن

_ذهب: تنضبن وترحن منا لا اسويها سودة عليجن

_افنان: ليش تسوينها سودة لان نكل للعالم تاريخ الملفيتهن عندج ومسويتهن نسوان وهنا فلس مايسون واحد يخسر عليهن

_صبيحة: هاي الصفرة ردت اخذها لابني فوك مرتة تخدم بيهم لان هذا مكانها للخدمة كلنهن هيج

اريد اهد اكطعهن بس كوة لازمة روحي لان عيب من الناس اخرب العرس وهو راح يخلص  .

_افنان: ولكم هاي المطلكة الخبلة هيج تخسرون عليها بثوبها اخذتها لابني ااااخ

نزع ضرغام سترتة وطگطگ ركبة صار كدامهن يكش بيدة مثل مايكش  الذبان.

_ضرغام: تسواج وتسوة راسج والخلفج والعشيرة كلها تروح فدوه لعيونها كلكم كلكم جوة انعالها اخليكم تسحگ عليكم سحگ

فتحت عيونها بصدمة ولطمت على خدها تگلة

_هجامت البيوت العقلها نص ونص تروحلي فدووة شوف شوف الزمن وين صار ودار.

_ضرغام: لو مو نسوان هسة الزمجن اطلعجن جنازة اذا هي نص عقل اني بدون عقل يلااااااااااااااا مناااااا گحـ... اب

وجوهن صارت تتلاطم صار كدامهن يهش بيهن هش وهنا بذاك الغلط طفرت منهن مرت خالي ام سلوان النعال تسحب بامير خلعتة خلع تصيح

_ابناااا العبن بكيفجن بس ما انطييية جيبية

فلتتت نيزك بدلتها تسحب بيه امير نط من البجي بيدها حتى ماتحركت خطوة من مكاني جمدت 

_نيزك: جيبيييية لا اموووتج هناااا بيدي

_ام سلوان: هو انتييي خبلة ماتريدينة من البداية اخوواتج مربياتة هسة تزوجتي منو اله تشمرينة بالزبالة هاي اذا ما كتلتية اخواتج ومو يمج بعد

صرخت بيها نيزك وسحبتها من عباتها وكعتها لطمتها راجدي وضرغام لزم ايدها لواها لوووي صرخت من الوجع   .

_اييييدي ولك ساااقط تمد ايدك على مرررة

_ضرغام: واكسرررج هناااا امشييي منا لا اطلعج جناااازة

_ام سلوان: جيب ابناا واخذ گحـ...

رجع ضرغام يفشر عليها وسحب امير انطاة لامة رادت تضرب نيزك ونيزك شالت كلاص عبتة براسها خلت دمها يتطافر وضرغام ولا اهتم اخذها دفع هي وياهن صبيحة تحاجي بشهب  .

_صبيحة: سراج ما يعوفج لا تفرحين ناوي على موتج يا ** بيدة يذبحج يكووول خاف تكولين ما كلت

دفعهن ضرغام يصيح عليهن هنا يفشرن وهو يفشر

التفتت اشوف اخواتي فحطت نيزك تبوس بامير وشهب ترجف المعازيم انصدمو كلها تبسبس بينهم طلعت وراهن امشي سريع اني شو فهيت شبية 

صراحة مامتوقعة جيتهن هاي  .

شفتهن برا وجوهن حمرر يلغن صحت بصوت عالي

_بنات ** عود جايات تخربن العرس وتفشلن اخواتي هههههههه ماتدرن راح افلشجن

ام سلوان لازمة راسها ايدها كلها دم هجمت على صبيحة نزلت راسها بالكاع ركعتها نمت فوكها اعض بيها واخنگ ماحس الا ضربة براسي اجت بس مو قوية وشعري يتشلع اريد اطفر واشوف ورد لازمة كعبها بيدها تضرب بافنان صرخت بصوت عااالي الكعب اذاها  .

_ورد: وووولج استوليتي عليهااا تريدين تموتينها شفتيها رقيقة صغيرة وحدها كبررر طمنيييي اذا ما افزعلها

رجعت تضرب بيها رادت تملخها شمرت الكعب وشردت لزمت وجهة صار بعينها صرخت صريخ من الوجع وصبيحة جواي نايمة على نفسها رجعت اعض بيها وانبت سنوني بحرررركة وكل ما تصرخ ازيد متاكدة هاي فكرتها هي الجابت ام نعال واجت

انرفعت منها بقوة صرت بالسما مرفوعة رفست برجلية اصرخ رجعني للقاعة ايد ضخمة قوووية ضابة بطني فتحتها ماتنفتح صرخت  .

_ااااابن النعااال هذا يا جلب لازمنيييي ولك نعااال عوفني مصاريني انمردتتتتت

نزلني بالكاع على كيف عدلت وكفتي امسح بطني التفتت بحركة اريد اضربة شفتة ضيغم صيح بوجهي بعصبية  .

_كااافي لج تموووت احسن بيدج

شلت خاشوكة من الطاولة ضربتها بية لزم مكان الضربة متوجع  .

_كواكب: واذا ماااتت شعليك انت

_ضيغم: مو لمصلحتج احجي غير ترحين سجن

_ما اريدك تطلعني هالمرة اني اكتلهن اكلهن هال**

جحظ عيونة عفتة وطلعت اريد ارجعلهن ما لكيت الهن اثر خليت ادية على صفاحي اتنفس سريع فحطني بنات القندرة طلعت ورد تمشي لابسة تك حذاء تصيح  .

_ورد: بنات الزمااالة بس لا اخذن حذااتي الملطلطات

ابتسمت على منظرها تمشي اعرج وجهة احمررر ادور على حذاتها اجيت ادور وياها والزفة طلعت صرنا على صفحة بقيت اباوع بعيوني اخذوهن وارحو ايدي احسها جانت بيها شي وفرغت فجاة باوعت بيدي مابيها شي من الاساس ليش هيج حسيت  .

مشت السيارات واني گلبي انعصر عصر وراهن بهتت روحي بقيت صافنة ما ادري عن الهوسة الكدامي هزتني وردة تحجي باستعجال  .

_ورد: ولج راح يعوفوني حذاتي وين حذاتي

_ماكو ولج امشي هيج هو انتو راح ترجعون للبيت

_ماا فدوه مااا اريد حذاتي

رجعنا ندور وهي تسال شكو واحد يطلع كدامها مر صافي وسمار حاجتهم  .

_يولد ماشفتو حذاتج

_سمار: اووو سندرلا هاي ليش تك وتك لابسة

_ورد: كتلت بيها الامير وهسة اجيت ادورها

_سمار: عنيفة NUMBER  Two

_ورد: مو فزعت لكواكب شلون مانفزززع

_سمار: جعل محد غيرج يفزع اذا هيج راح اتعارك بلكت تفزعيني ماطول عندج تك حذاء وحدة

خزرتة ومشت سمار يضحك وصافي يسحب بية يكلة  :: اخوها ولك عيب

_سمار: هسة شنو سويت اني امشي خل ندور حذاتها خطية

نزعت حذاتها بيدها اجت امها ادور عليها تعض باصبعها همزين ما انتبهت لرجليها راحت تركض كدامها صعدت بالسيارات رحت وراها اشوف نجوم لكيتها وياهن مبلوع وجهة ودموعها بعينها شهكت ونزلت من شافتني سحبتني من ادية تمشي بية

بخوف احجي وياها  .

_باوعيلي نجمة شبيج شو

_امشي بعد بعد

وكفت بية بمكان فارغ بهتت ملامحي من  شمرت روحها بحضني تبجي وتناشغ بصوت حضنتها امسح على ضهرها مجلبة بية بقوة اريد احجي ماعرف  ، من انكطع نفسها بعدتها عني امسح بوجهة انطعن دم  .

_شبيج حبيبتي نجمة لاتعلين گلبي

_نجمة: اريد امي بقيت وحدي اريدها

كالتها وبجت بلعت ريگ سحبتها لحضني ابوس بيها

_مو وحدج انتي مانعوفج وياج

_نجمة: وحدي اني بقيت شهب كواكب نيزك راح تكعد بيت وحدها ماروحلها انتي مو هنا بقيت وحدي

_ما اعوفج وداعتج ماعوفج

_اخذيني وياج بقينا بس وحدنا اخاف سالم يرجع ياخذني ما شفتيهم شلون بعدهم يفترون علينة

_ما ياخذونج احركهم والله بس لو يفكرون بيج

_هو حتى اموري المحد سائل عنة اجو علية اني هم يجون علية والله سالم مايسكت هسة ورة العرس ياخذني صبيحة وافنان يشبعن كتل بية

_اشش محد يتقرب عليج اني احوم عليج نجمة

لزمت ايدي بخوف تتوسلني نظرتها مردت روحي مررد  .

_نجمة: اني وانتي نعيش سوية ليش كل وحدة بمكان ننجمع بمكان واحد اني اقبل بكلشي وهم اشتغل وانطيج فلوس نجمعهن

_ما افيدج اني حياتي مخربطة خطرة

_االخطورة الوياج امان عندي

ذبيت حسرة اسكت بيها واحجي عليها يا روحي خايفة ومقهورة الله لا يوفقهن كون من وراهن هذا رجيفها شهب شلون بيها هسة.  ؟

طلعنا حاضنتها مجلبة بيه ماتريد اعوفها وين اخذها لبيت دراهم هو هم بيت هم حياة عايشين هناك ماتعيش غضنفر وجماعتة تارسين المنطقة حياتنا هناك بخطر على ساعة نموت  .

لكينا السيارات كلها متحركة باقية بس سيارتين بقتيت ادور بعيوني وين راحو وعافونا اني ارجع وحدي بس نجمة خالي شلون يعوفها  .

_فقار: انتن هنا

ذب نفس قوووي يمسح بوجهة يحجي

_فقار: اختفيتن خو ما اختفيتن

_كواكب: موجودين هنا بس ليش كلها راحت

_فقار: خالج دور عليجن جهالة وحدهم كنالة روح احنا نجيبهم و..

كطع كلمتة من باوع بوجهة نجوم عكد حواجبة بخوف يسالني  .

_فقار: شبيها اختج كواكب نجوم بابا شبيج باوعيلي

دفنت راسها بحضني مجلبة بية وهو بس يردها ترفع راسها  .

_فقار: حاجوها كواكب كولي شبيها شنو سوولها

_كواكب: لا محد بس هي على البنات تبجي

_فقار: تزوجن مابيهن شي على شنو تبجين

_كواكب: عوفها استاذ راح تطيحني من التدفع

_فقار: حتى انتي كواكب

_شنو؟

_دگليلي استاذ

_غير مدير شركة شلون ما اگلك استاذ

_صح اني المدير بس الشركة مو باسمي بس مستلمها

_المهم مدير

ابتسمت بوجهة وهو عيونة على نجمة التفتنا ثنينا على مصدر الصوت  .

_ضيغم: ولا تكولون ضييم وين راح ادور جوة ماتكول لكيتهن بحلگك عظممم

_فقار: لا تصيح هستوهن اجن

_ضيغم: كملو سوالفكم بعد

_فقار: روح هسة مجلب بيك تبقى غير انت ذبحت روحك ادور عليهن

_كواكب: مايحتاج اندل اني

_ضيغم: لا هو انتي وين اكو مثلج مرة ولو اكو نعزل بعد

_كواكب: لحظة لحظة شتقصد انت؟

_فقار: مايقصد شي

_انت اسكت هو خل يحجي لسانة شطولة الخوينس

_ضيغم: لا تكولين خوينس

_كواكب: خوينس وخوينس ولو بية حيل كلتها الف مرة

_ضيغم: حقج اذا من السحل بيج حيل يبقى هلكداتج جنج طير مهلس لازمة نسوان طول بعرض خانگتهن

بقيت فاتحة حلكي هذا طلع لسانة مو جان ساكت

رفع شعرة وگلب عيونة    .

_ضيغم: تاخرنا فقار مانروح للزفة هسة ضرغام بس يسمع ماكو مانخلص من السانة

_فقار: خو اني اغار منة

ضحكو وكل واحد راح لسيارتة فقار يكلنا

_يلة اصعدن نروح

_ضيغم: خو يرحن وياي

_فقار: نفس الشي

_لا مو نفس الشي ابو ود حبيبي

خزرة وذاك يضحك صعدنا وي فقار وضيغم يصيح

_فووك ما ادوور وافازع وي فقار

شغل فقار السيارة بقيت اباوعلة من الجامة ينافخ ويحجي وي روحة  .

_كواكب: هذا شبية مو جان ساكت مايحجي

_فقار: شبية مايحجي قابل اخرس

_خوينس طلع عبالي مايحجي فقير

_لا تخافين احفاد الليث مابيهم الفقير

_لا واضح

سكتت اباوع على الشارع ونجمة احسها نامت نغزتها اهمس باذنها:: نمتي نجمة

_لا

_طلعي راسج ما اختنگتي

_استحي

_منين تستحين ترة بس فقار

_استكي استحي وجهي صار كحل

سكتت عفتها براحتها خانسة بحضني الزفة صارت للفندق ولان بالاخير احنة ما اشوف سيارة العرسان بقت عيني عليهم بلكت اشوفهن بعد الخرعة شصار بيهن  .

_نجوم زينة

_فقار: انتي نجوم؟

_اختي هي

_اعرف بس احجي وياها

_ماتحجي هي واسمها نجمة

_نفس الشي

طلعت راسها من حضني عاكدة حواجبها كالت

_لا مو نفس الشي يلة خووش الجمع شي والمفرد هم شي

ضحك بصوت عالي رجعت حضنتني ضمت وجهها واني رافعة حاجبي شبية هذا يضحك وصلو الزفة للفندق نزلو بس الولد وسمار وبعد ولد يهوسون بالباب يم قبس  .

_سمار: زفيناااة وخلصنة منة بعد ضغومي الاكبر منة واني الاصغر منة

سوى مجال بيدة وصاح

_سمار: ها خوتي هاااا

ردو بصوت عالي واحد:: هااا

_سمار: زفوووني ماريد العشاا زفوني

اخذ الطبل يدك بية والولد يهوسون الاجواء تموت

وسمار ضايفيلها جو مميز حضن قبس يمسح علية يكلة:: من بختك اعرس ان شاءلله تعالو يا ولد اخذو من عرك كصتة اسبوع وتعرسون اني اخذت من امتونة يعني اشهر واتزوج

_قبس: ولي وانجب

_سمار: اروح وياك لاتعوفني وحدي ولك قبس حبيباااي

_قبس: عينااي روح كافي وفيت وكفيت

_سمار: احس بعدني مقصررر المهم المهم اني احبك مو تنساني

_قبس: واني هم احبك حبيبي

_سمار: يروحولك فدوه كلهم وخاصة صافي

_ضيغم: بس لو تعوف صافي كل  سالفة حاشرة بيها

_سمار: عود صاحبة مايرضة علية الا اخذة منك واخلية ماينجرع اعلمة على كل السوالف

هز ايدة ضيغم صار على صفحة وهو يكل لضرغام وقبس:: زوجوة راح يموت من القهر ضرغام تزوج مرتين وهو ولا مرة

_ضرغام: عين الحاسووود تنعمييي خليتم عينك امداكم اي والله ماتزوجون لاحكيني

عافهم وراح رحت وراة هوسة ماتنعبر الولد سادين الطريق   .

_اااخ لو بيدي ما اخليك تشوفها

التفتت علية ضحك كلبت عيوني

_كواكب: البعيجي ولك تاخذ كل هذا الجمال امدة الزمن الاغبررر

_ضرغام: اهووو كلها حاطة عينها علية اليوم الا اليستر طالبتني بطلابة انتي

_كواكب: ماعرف شلون درت واخذت اختي ولك اني مي لو بيدي ما انطيك

رفع حواجبة بشماتة يكلي:: اليوم يومي

غميتة بثنين ادية عبرتة وراي يصيح

_طكة ونص ما اعتب، عليج النسيبة الذيبة

لكيت نيزك حاضنة اموري تبوس بية وسهلة يمها تحجي وياها..

_سهلة: جيبية اخذه واروح

_نيزك: ما انطية ياخذونة يمي يبقة

_سهلة: وين يبقة اليوم عرسكم

_نيزك: ابني ياخذونة كواكب تعالي فدوه

باوعت لسهلة ماقابلة عليها هزيتلها براسي تسكت فتحت ايدي اموري يريد يجيني وهو ماتخلية خايفة لا يخاذونة منها عمت عينهم  .

_نيزك: ياخذونة لان تزوجت يحرموني منه والله يحرموني بعد ما اشوفة يخفونة عني

_احرمهم من النوم وعيونج لا تخافين ما يوصلون اله

_نيزك: شوفي كواكب اني اكول لخالة سهلة يبقى يمي حتى امن مابيها شي سويت هذا ماتقبلض.

_كواكب: لا جيبية يمي يبقة الليلة منا لمن ترجعون لبيتكم

_نيزك: اخاف علية

_كواكب: اني موجوده لا تخافين ما اعوفة لحظة

نيزك: اخذتة مني واني گلبي نار علية حيلي راح مو زفة طلعت علية اني اعرف مايدوملي شي خربنها وطلعنها من خشمي خايفة على ابني ياخذونة هما اهلة الهم حق بية بحجة تزوجت لو ماكواكب ولا اعوفة بس امنت عدها سوالي بدية باي ينطيني بوسات يضحك  .

_نيزك: يا روحي

شمرتة بوسة وكواكب تبوس بية ضرغام طلع من جيبة شدة فلوس خلاها بجيب كواكب وهي لان شايلة اموري ماتكدر تطلعهن صيحت علية بعصبية

_شو تنطيني فلووس تعال طلعهن مجدية منكككك

_ضرغام: النسيبة الذيبة صاحبة وكفة اروحلج فدوه اني وفلوسي اشتري اصرفي بهاي المناسبة السعيدة

_كواكب: امك سعيدة

_ضرغام: هاي امي هم سعيدة يمج شوفيها

اخذني من ايدي بقت كواكب كالبة خلقتها هو يضحم بصوت فرحان فلتت روحي منه اكلة

"بس احجي وياها شبيك  "

رحت لكواكب اوصيها واحجي وياها

_كواكب اموري تبقين يم ذهب ماتعوفينها بس هالليلة خاف يجون ما يطيحنها هاي الكتلة

_كواكب: ها هي

_فدوه لكلبج بس هاليلة امير يمج ادري بيج ماتحبين تبقين يمهم

_كواكب: لخاطرج سهلة

بستها وبست امير طلعت ذهب جانت يم شهب تحجي عليها لان خايفة وصيت ذهب على ابني وضرغام ولا يخليني اتنفس قفل الباب رحت كعدت على الجرباية ايدي على صدري اتنفس سريع

نزع سترتة وفتح اول زرارات قميصة اجة كعد نص كعدة كدامي سحب ايدي باسها سحبتها  همس  .

_ليش

_جاي تبزز بية ترة

ضحك وكال رافع حاجبة

_شلون اليوم لا اطلعين حج شنو هاي التبزز جديده

_يووو هسة اني شكلت ما اقصد شي

_يلة حبيبتي ام عيون لاتعصبين ولا يهمج شواربي يبززن مايكعدن راحة

ابتسمت بتعب كمت لازمة لازمة:: اسبح اني تعبت

_اخذي راحتج نازوكتي الجميلة

_انت منين تجيب هاي السوالف

_حلوة سوالفي مثلج

ضحكت ادير براسي:: اتفق وياك بس اني احلى

_يا حلاتج يا مرتي

سحبني من ايدي وكفت فاتحة عيوني

_ترة تعبانة هسة

_ضرغام: بس افتح حجابج

غمضت عيوني نفسة بوجهي فتحة بهدوء عافة على صفحة وفتح شعري ينثر بية سحب خصلة يشم بيها بلهفة يگلي  .

_تمنيت اشمة والله ماقصر

باوع بعيوني عيونة حمرة ابتعدت شوية رجعني

_ضرغام: اول بشر رافقني بخيالي وبالحقيقة اذا ماشفتج اتخيلج

رسم ملامحي بايدة يكمل بهيام

_اشهر من عرفتج امتلكتيني واستحليتي گلبي

عافني ابتعد يكلي

_روحي اسبحي

همست:: مو ادخن

_لا ما ادخن جكاير لكيت البديل ولاول مرة اكو بديل احلى من الجكاير

توترت مشيت همزين ماعثرت بدلتي ردت ادخل للحمام وتذكرت ملابس ما اخذت رجعت ادور بالملابس ايدي ترجف هذا بس يحجي وكلامة بية تاثير عجيب حسيتة ورة ضهري صار بلعت ريكي بتوتر سحب البيدي يسوي بحلكة لا  .

سحبتة منة بس هذا مستور

_ضرغام: عوفية الاحمر اخذية

_ما البس احمر

_الاحمر احلى

_تؤ

_الاحمر

_تؤ

_الاحمر اريد اشوفج بية

_تؤ

_ياااابا ياااابا شكد عنودية هسة البسي الاحمر

_بعدين مو هسة اريد هذا

خزرني اخذتة ورحت يحجي وراي

_ضرغام: مشت كلمتها علية بكد الفصمة ماخلتلي راي

_لا تبقة تكول بكد الفصمة مو طفلة اني

_لا يابة انوب اتهدد حقج غير انتي نيزك اكدرلج اني ماجذبت المصورة من كالت

التفتت علية رافعة حاجبي اشرت باصبعي اكلة

_الا المصورة لاتحجي بيها

رفع ادية باستسلام يضحك دخلت اسبح وفد متوترة على خايفة، سبحت بسرعة طلعت افلف بروحي رحت على المراية انشف بشعري دخل هو يسبح بين ما مشطت طلع هو اباوع بالمكياج اريد اخلي ماعرف كلنة مانعرف نخلي مكياج  .

اني ادور باقلام الحمر وكف يمي سحب احمر

_ضرغام: هاي لان شفتج محتارة اختاريتلج احمر

_نيزك: هو الاحمر رادلة مكياج قوي مايصير، هيج يتخلى

_خلي مكياج واجلطيني اني قابل بالجلطة

_مو ماعرف اخلي

_اكو بنية ماتعرف تخلي مكياج

_اي احنا بنات جبار مانعرف نخلي مكياج

_بس تعرفن تفلشن روس

ضحكت بصوت عالي

_كلة تفليش روس شاطرين بهاي السوالف احنا

_اي بس على كيفج وياي اني العاشق الولهان ما أذي

لزمت خدة اضرب بية راجديات خفيفة عيونة تريد تاكلني ماحسيت الا شالني شمرني على الجرباية ردت اكوم ما خلاني  .

_ضرغام بس..

_اشتعل ضرغام اسكتي

عدلت كعدتي امشط بشعري يحجي وياي

_عوفية لباجر تعالي يمي

شلت المخدة شمرتها علية ضحك

_روح مني ضرغام

_ما اسوي شي للصبح تعالي انام اريد

_ما تنام منو لازمك

_اريدج بحضني

_ما اجي عرفت سوالفك

_اااه

_اليسمعك متعود علية خطية

_ولج ولا ينكدرلج صدك لو كالو ام لسان غلابت النسوان

_منين غلبتني بجذبك بس عقد على ورق اطلگج كدام الزلم بس تكولين انطيتج كلمة

_هذا منو الكالج على ورق شبيج حبيبتي

_انكر وگول مو اني انكررر

_مو اني تتخيلين من كل عقلج بنية بجمالج اكلها على ورق بس اباوعلها واتحسر

_غشاش غشيتني والله ولا اقبل لو ما كايلي على ورق

_المهم هسة انتي مرتي تعالي ابوس

كلبت عيوني وهو يضحك كام من مكانة ردت اطفر شالني ورجعني لحضنة خانگني  .

_هسة اريد اتنفس شوية

_تنفسي منو لازمج

_ترة اختنكت ايدك ثگيلة

_قبل كم ساعة ما گلتي ثگيل هسة ايدي صارت ثگيلة

غمتت راسي هذا شلون بية وبلسانة ولا يكول خليها تتعود شوية، غفيت على بوساتة ولمساتة وكلمة احبج باذني كل شوية يكررها شعور غريب

ماعرف اني حبيتة لحد هذا الوقت ماعرف صدك اني احبة اي لحد يستغرب صح تزوجنا بس ماعرف مشاعري وياة  !

كعدت صياح افنان باذني هي وكواكب وافتح بعيوني واحجي:: عوفيها كواكب كافي عررك من الصبح تعالي اتريكي لا ترحين هيج بدون ريوك

عدلت كعدتي اني متعودة اني بدشداشة عريضة شوية لان مو امان البيت لميت شعري زنودي طالعة شكو اباوع منا ومنا  .

_شنو السالفة وين دشداشتي

_ضرغام: افنان اخذتها

_بت الجلب لحكتني على دشداشتي الزينة هاي والله لانعل ابوها ماترتاح اذا ما اكتلها

كمت من الجرباية اريد اطلع سحبني مايكدر يحجي شي من الضحك وكع خربان بهتت. ملامحي اباوع بالغرفة يا افنان هاي صخام الصخمني البارحة عرسي وهذا ضرغام رجلي  .

من الفشلة رحت ختلت بالحمام وبحجة اسبح نمت وعشت اجة دك الباب بقيت ساكتة اسمعلة  .

_اطلعلي محد شاف ولا احد راح يعرف بالموضوع بس اني

_هسة شتريد انت

_انطيج ملابسج يلة نطلع هم نروح لبيتنة ناخذ راحتنة

فتحت الباب مديت ايدي دفع الباب واني دفعتة قفلتة بسرعة دكيت علية اصيح بكتمان  .

_صدك لو كالت ذهب عليك ساقط عود صاير لوتي انت ترة اني الوت منك

_ابقي بالحمام خل تفيدج الواتة اني اعلمج الساقط منو

اختفة صوتة حسيتة ابتعد عضيت شفتي بخوف بس لازعل هذا لو فكر بغير قصد دكيت الباب اكلة

_ضرغام ما اقصد شي شبيك اتشاقة

من بعيد صاح ملابسج علكتهن لاترجعين على القديمات

اختفى صوتة بعد فتحتة ورة فترة خفت مسوي بية مقلب حتى افتح الباب ما لكيتة اخذت ملابسي بدلت جهزت نفسي ما رجع بعد الريوك باقي بصينيتة يمة علبة اخذتها فتحتها توسعت عيوني بفرح مشتريلي تليفون طلعتة اكلب بية حتى كفر مخليلة ضحكت من شفت مكتوب على الكفر بخط مزخرف "ام عيون السحلني "

احس فراشاات بگلبي من الفرحة ولاول مرة احس بهذا الشعور ما فرحانة بالتليفون لا والله فرحانة بية وبطريقة تفكيرة واسلوبة وتعاملة وياي  .

فتحتة مخلي رقمة ورقم امة اتصلت بية ما يرد

جربت مرة لخ هم مايرد رغم بية رصيد ويدك عندة

عفتة ما لحيت هسة يرجع وين يروح جهزت نفسي خاف نطلع ما تريكت اتصلت بية عيب نتريك سوى شنو وحدي  .

زفرت نفس بملل وين يلة جاوبني بصوت متعصب قلقني وترني خفت لا صاير شي اني اعرف نبرة صوتة مايغيرها من يحجي وياي بس تختلف  .

_ضرغام وين انت

_موجود

_اي وين ليش طلعت

_عندي شغلة

_الله عليك ضرغام خو ما صاير شي والله گلبي كام يوجعني

_وغلات عيونج الماكو اغلى منهن ماصاير شي لا تخافين شوية واجي

_نتريك انتظرك

_لا اتريكي انتي اني ما اشتهي وهم خاف اتاخر عليج اكلي والعبي بالتليفون بية نت يلة حبيبي بيباي  .

شهب...

كلمة وحدة تتردد براسي "سراج يذبحني ما ناسيني" اني متاكدة متاكدة سراج يذبحني يجي يوم ويموتني مايخليني عايشة لان تزوجت وعفتة وهو جان طاير من الفرح راح ينتقم وياخذ روحي

بقيت وحدي بالغرفة الرجفة ماتعوفني استوحشت وشعور الوحدة زارني اختلطت علية المشاعر وماكدرت اعرف هل اني سعيدة بهذا اليوم لو لا  .

عيني على الباب مو لازم العروسة تنتظر العريس يجي بس تاخر هذا ليش كمت افتر بدلتي رحت للمراية ضحكت فرحانة بشكلي بدلة مرصعة بالكرستال البركع زايدني جمال طلة جميلة كلشي متناسق من مكياج الى اخرة.

رحت اطلع بالعطور ارشرش اختنگت التفتت على الباب ماكو بلعت ريگي والعبرة لزمتني ليش ما اجة معقولة ما يريدني؟ اي لج غبية ما يريدج سمعتيهن بترس اذنج كالن ما يريدها وسكتي تتنتظرينة شكو هسة  .

نزلن دموعي بقهر ركضت على الحمام ابجي بحركة شبعت بجي على حظي شبية وما يريدني بس عذرتة الحب مو بالشكل ما نكدر ناخذ كلوب الناس بشكلنة يمكن الولد عاشگ غيري واني انفرضت علية انجبر يعقد علية ولو اني مافارضة نفسي ولا ادري بية يعقدون علي  .

حسيت الوقت بطيء تعاندت وي نفسي ما انتظرة اكثر، من هيج المفروض هو مايتاخر علية نزعت البدلة والتسريحة والمكياج كلة خربتة دموعي وي المي ينزلن ماحس بيهن لفيت روحي بالمنشفة

طلعت ماموجود اخذت ملابس بدلت وطلعت مشطت بسرعة وشمرت روحي بالفراش لفيتها لف هسة اني شكو ابجي من تاكدت مايريدني راح يطير نصي مثلاً  شهكت احجي  .

"كسر گلبي بيوم عرسي عافني وما اجة خرب هيبة البرگع النازل على متوني"

ميس تجي بالي هسة شلون حالة اكيد منهارة لان سمعت تزوج الله يساعدها ويكون بعونها حسيت بشعورها اني ما اوصل ربع محبتها اله وهيج صار بية الضاهر ثنينة مالنة نصيب بية اول يكون العكس بس اني مالي نصيب بية  .

غفيت راسي موتني من البجي خايفة وحدي حسيت على لمسات على وجهي وعيوني فتحت اباوع بهدوء بصفي نايم مرتجي على ايدة يباوع بوجهي عدلت كعدتي ارجع كذلتي ورة اذني  .

همست

_اجيت

_اجيت

_بيش الساعة هسة

_نص الليل

باوعتلة لابس ملابس بيت غطيت رجلية لابسة شلحة قصيرة شوية رجعت باوعتلة يباوعلي

_شبيج

_مابية شي

_مصخنة انتي

خلة ايدة بارد ثلج على كصتي نشغت

_باردة

_انتي مصخنة

سكتت ما حاجيتة دايرة عيوني عنة

_جوعانة

_لا

_حلو

_تاخرت عليج

_لا

_جان عندي شغل

_عادي أصلاً واذا

دار وجهي بيدة مركز بعيوني

_بجيتي لان تاخرت؟

_لا

_باجية؟

_على امي بجيت

ذبلت ملامحة بقهر سحبني لحضنة لو حسيت گلبي يريد يطلع من صدري مسح على شعري بحنية يكلي

_قبس: الله يرحمها اني موجود صح مو مثل امج بس تعاليلي عندج سالفة اي شي محتاجة حتى لو شوية اخذ دورها

بقيت ساكتة عيوني مدمعة عصر خدودي يكلي

_اضحكي ماتضحكين

_مجاي اشوف مسلسل يضحك

_الا مسلسل يلة تضحكين

_ماكو شي يضحك

_هنا المشكلة بس هم لازم تضحكين هاي شنو خدودج مطاطيات

جر خدي بية وجعني

_لا تسوي هيج بعد

_ينمطن حلوات،

_تقبل اسويلك هيج؟

_ماعندي خدود مثلج لو عندي الج حق تشلعينهن

رجعت عيوني عنة ماريد اباوع بشكلة اني هيج ومدري شبية  .

_كلبج مو زين علية هيج

_شنو

_يدك بسرعة

زحفت روحي عنة:: اني اريد انام

_لا بعد وكت خل نشوف فلم يضحك

_مو تكول نص الليل هسة

_اي عادي واذا شعدنا

_بكيفك

_بس هالمرة راح اقبل بكيفي

كام بقيت كاعدة اباوعلة التفتلي

_قبس: كومي ماتكومين

_شنو اسوي

_دكووومي

كمت بقيت واكفة سترتة على الميز وساعتة تلمع دنكت عيوني عليها امرر اصبعي ماحسيت الا صاير كدامي لزمني من خصري شهكت وحتى النفس كطعتة خلة راسة بركبتي همس  .

"اول ليلة يكمل كلشي بيها"

ما حجيت شي أصلاً احس روحي بغير عالم حسيت علية الصبح يكعدني الملم بروحي من التوتر والخجل دموعي نزلت هو مبدل وكاشخ واني على نومتي   .

_انتظرج نتريك

كمت والجرجف لامتة لم علية حتى راسي مغطيتة طلعت ملابس ماعرف شعجب تذكرتهن سبحت وطلعت ما اباوعلة استحي مشطت كعدت اكل عيوني ما رفعتهن  اللگمة كوة تدخل بلعومي  .

_بيج شي

هزيت راسي لا

_احنا على الاشارات نخلصها مو

رجعت هزيت راسي اي بدون ما ارفع راسي واباوعلة  .

_قبس: مو اكول الخرسان لطيفين ابقي هيج

كمت من الاكل متوترة ماعرف اصير هيج قريبة منة جهزت نفسي شوية وطلعنا كلي  .

_مسوين عزيمة بيت عمي جواد

_هسة راح نروح

_اي مو كلت

_روح انت حباب اني ما اروح

رفع حاجبة يسالني

_ليش ماترحين

_مو استحي حباب ما نروح

_لا عيب مايصير هو هناك هم محد يسألج على شي لو احد يحجي وياج على البارحة تمشي الامور عادية لاتتوترين

_مو...

_عوفي المو واريدج تصيرين معدلة ام بيت يعتمد عليج امي مريضة تعبانة تهتمين بيها اخواتي هم يجن خلي علاقتج بيهن طيبة اي شي يصير وياج اول واحد تجين علية تخبرني وعلاقتنة ماتطلع لاحد اعرف بيج انتي خوش بنية بس خاف يجرجرنج بالكلام كلشي يبقة سر بينة تمام  .

_تمام

_شعجب ماهزيتي راسج؟

ابتسمت بخجل وطلعنا للبيت كواكب هي وامير لاكتنة سلمت علية واموري جلب بية رفعتة ابوس بية يكلب بوجهي يكلي  .

_البارهة ماتو اتي بس تواتب ليس ماتو

_شهب: مو شسمة مريضة

_مابيس شي

_لا لا شوف امك وين

_يم امو زعام

ضحكت كواكب تكلة:: البعيجي مو زعام

_شهب: كواكب عيب الطفل يلكف بسرعة

_اني اريدة يلكف حتى نخبلة

ضحكت تعلم بامير هو بس يصفن على حلكها سالتها على نجمة كالتلي  .

_البارحة شبعت بجي عليجن وشكد حاولنا اني وفقار نضحكها ماكو طنكرت

_ماتجي هسة

_لا ماتجي ماقبلت تعبانة من العرس

_كواكب: احاول اتغاضى عن توتر شهب وخجلها مبين من شكلها كلشي دخلت جوة باركولها كلها انطتها واجب  وردة يمي عاضة شفتها تهمس

_ورد: على هذا الواجب راح اتزوج

_كواكب: اتزوجي منو لازمج

_ورد: اي بس اخذ الواجب اطلك واعيش بية

_دولي بهاي سوالفج يطلعونة من عيونج

_حمررر كلة حمررر

_بس لاتخلين عينج راح اخليها تنطيج منهن

_اي عفية

خبلة هاي البت تشمر كلامها شمر اباوع لشهب تسولف وي اسامة وهو شلون شخصية رزنة هادئة ودود كلش واحسة مثقف  .

اجت نيزك هي وضرغام الوجوة مكلوبة وخاصة ضرغام نيزك التهت بامير سالتها صاير شي كالتلي لا

بعد سكتت بس الاكيد صاير شي طلعت احجي وي ضرغام لو عرفت نيزك ماتبقة بهذا البرود طلع مالحكت علية اجتمعو الولد واني اريد اروح بعد

سلمت عليهم وتشكرت من ذهب وسهلة  .

_ذهب: حبوبا ولو انا ما ارضة ترحين بس شسوي سلميلي على هاي صاحبتج

_يوصل

طلعت اضحك ودعت اخواتي وضيغم طلع وراي اجو قبل نص ساعة هو وفقار لحكني يكلي  .

_اوصلج اوكفي

_تكسي انت؟

_مو مشكلة نصير

_شكد شريف انت

_الشرفاء قليلين حافظي علية

_لا هو انت خليتك بقائمتي

_خوش تسوين واني خليتج بقائمتي الحمراء

صعدت يمة بالصدر شغل واني احجي وياة

_اكلك ضرغام وين راح

_والله ماعرف

_شعجب ماتعرف يعني هسة راح للشغل برأيك هي مال شغل غير عريس ويكعد وينجب

_امور خاصة اني ما ادخل ولا اسئل

_مو اكول شريف

لنص الطريق كلي

_تشتغلين اذا دورتلج شغل

_لا

_ليش لا

_اشتغل داخل السوك اني ما اطلع منة

_شمعنة

_الادور علية الكاه هناك

_على شنو ادورين بالضبط؟ مضيعة شي

_سلامتك

_بير اسرار ولا تنحزرين

ابتسمت وهو حتى درب دراهم حفضة نزلني بابهم نزلت تشكرتة كال:: فكري بالعرض

_العرض الصح للشخص الغلط باي

دخلت جوة سلمت على دراهم لكيتها تلبس بجواريبها سالتها كالت اروح اجيب غراض

طلعت وراها اوصيها

_اريد مصيادة اذا لكيتي جيبيلي وياج

_عوفي سوالف الجهال كبرتي بعد

سكتت ماريد اكلها شسوي بيها لان بس اكلها ماتجيبلي قبل لاتطلع كلتلي:: ماتعرفين شي عن غضنفر

_لا ليش تسالين

_ماكو اختفى

_عادي هو هيج ماتعودتي

_هذا من يطول يرجع جايبلة بلية

_اي والله صدك

دخلت جوة اشوف ايدي شصار عليها كمت ادور على معقم غضنفر جايبة كلة بيومها والعلاج بقة يمها عقمتها وكمت كعدت بالفي مال الشجرة اندفر الباب ودخل غضنفر يضحك فرحان صاح  .

"افرحي يا كواكب لكيت اهلج لكيتهمممممم  "

يتبع....

__________'_____________________

اللهم صلِّ على محمد وآل محمد 💙

توقعاتكم 🎀

رأيكم بالبارت؟

طبعاً هالبارت يجننن شي مايشبهة شي مشاعر متنوعة كون تفاعل يسووى 😍

بية كومة مشاهد للتصميم 

اني ابلش بية تصميم

ومن اخلص اكتب 👎🏻

نتناقش بالتلي تعالو اجاوبكم...

﷽

المنجمة

الكاتبة_كفايه

لاتنسون متابعة الحساب

التصويت وتعليق بين الفقرات لطفاً 💙

يا علي مدد ♕

___________________________________

لو كنا نعلم يا كواكب'

لما تجرئنا على التقدم  .

"افرحي يا كووواكب لكيت اهلج لكيتهممممم"

فزيت من مكاني مو گلبي لا هاي روحي احسها طفرت من جسمي ارتفع صدري اجر النفس جر

اطرافي ترجف دخل هو فرحان ويضحك ما اصدك اني بية ادري بية مقلب لو يتشاقة بس شبية تخربطت احوالي هاي بس جاب سيرتهم هيج شحال لو شفتهم بالحقيقة  .

اشرت بيدي على الباب صوتي يرجف صحت بية

_اطلع مناااا

ما اهتم صار مقابيلي يضحك

_غضنفر: اهلج اهلج لكيتهم مو تدورين عليهم

_انجب واطلع ما اريد اشوفك بعد وهذا وجهك اسوية خارطة بس تعيد سوالفك التعبانة

خلة ايدة على خصرة ودار راسة مسح وجهة

_غضنفر: اهلج ما تريدينهم؟ هاي شبيها امشي وياي امشي عبالها اجذب العوبة

بقيت جامدة بمكاني اباوع بملامحة اشوفة يجذب لو يحجي الصدك بس جان يحجي الصدك رجلية ماحملني بعد كعدت بالكاع ارجف ودموعي تنزل رفعت راسي احجي كوة  وارجف..

_عليك الله اهلي هما اهلي مو تجذب فدوه

كعد نص كعدة مقابيلي مد ايدة يمسح دموعي وخرت ايدة  :: كول لاتجذب كووول

_لكيت ناس ادور على بنية شابة من زمان وبالمنطقة اجيتي بالي كلت اهلج مو انتي اهلج من زمان مضيعينج؟

هزيت راسي ودموعي تصب باد حيلي جلبت بية اكوم احس روحي خلصت طاقتي وگلبي نار  .

_امشي نشوفهم امشي

_يلا بس لا تموتين

مشيت كدامة احس بروحي حلم هاي السنين كلها الكة واحد من دمي ولحمي الكة اهلي الجابوني وذبوني بهاي الدنيا الجبيرة ما سألو بعد عني  .

صعدت بالسيارة خليت راسي على الكشن صعد هو يدخن اسمعة يحجي اني بالي مو وياة همس قريب مني   .

_كواكب

رفعت راسي وجهي نار

_ها

_ترة الاهل مو كلشي بالدنيا شبيج هيج عايفة حياتج علمودهم

_انت ماتفهمني اني والله بس اريد اطفي النار البگلبي مشتعلة سنين سنين من جنت طلفة ولحد هسة اتعاير باصلي ماريد منهم شي بس اريد اشوفهم شلونهم شلون عايشين زينين مو زينين يستاهلون ما يستاهلون قهري عليهم

_محد يستاهل صدكي

شغل السيارة مشت صرت ارجف بالزايد قربت نهايتي احسها الشي المنتظرة من سنين وتدور علية راح تلكاة شعور صعب اوصفة، وكفت السيارة باوعت بوجهة تعبان والحيرة ملت روحي

_غضنفر: هنا انزلي شوفي ذولة الناس

_بلة ما طلعو هما شسوي

_ترجعين اوصلج لبيت دراهم وترجعين تعيشن شتسوين يعني تكتلين روحج

بجيت بقهر لزمني من ضهري دفعت ايدة

_عوفني انت مو مثلي اني خسرت شبابي وخسرت شكلي فرحتي بالدنيا خسرتها ماعشت مثل البنات ولا سويت مثلهن مايوم فرحت من كل كلبي دوم افكر دوووم من وراهم هما ماحافظو علية

_كافي بسج بلكت هما

_بس اسامحهم اذا هسة لان گلبي بعدة لين

هز راسة عيونة مدمعة مسحت وجهي ونفشت شعري شوية طولان نزلت اعدل بملابسي نزل وياي مشة واني وراة وكفنا كدام بيت اهلة من الطبقة المتوسطة واضح دك الباب غضنفر واني گلبي يوجعني والله يتكطع وكوة واكفة على طولي واتضاهر القوة  .

حسيت بغضنفر يعصر بيدي نترتها بقوة رفعت اصبعي احذر بية بعصبية  .

_الففف مرة كتلك لاتلمسني تريد تموووت كلي اذا تريد تموت

_شبيج هسة مو شفتج خايفة يمتها لزمتج اني

خزرتة رجعت اباوع على الباب محد طلع دكيت الباب بيدي  بحركة  .

_على كيفج

_معليك

_ديلا فوك زينتي

انفتح الباب بهتت ملامحي اباوع بخفوت طلعت مرة شابة بالتلاثينات حلوة باوعتلنة باستغراب لازمة الباب مطلعة بس راسها كالت  .

_تفضلو عيني شنو رايدين؟

باوعلي غضنفر هزيت راسي ماكدرت احجي تفهم وجاوبها  .

_سمعت بيكم مضيعين بنية شنو السالفة

عكدت حواجبها كلتلة

_اي وانت شنو

_غضنفر: اريد اعرف السالفة حتى اساعدكم بلة اعرفها او شاك بيها هي نفسها بنتكم

_يا خالة صدك اووف وكون نلكاها

_غضنفر: شكد عمرها وشكثر المدة الاختفت بيها

_والله يا خالة سنتين راح تصير مضيعينها احنا دوم نسأل بلكت احد شافها لو رجعت و..

عفتها تسولف وياة ومشيت دموعي تنزل بالكاع مشيت ومشيت ومشيت كعدت على الرصيف الشارع فارغ جهال تلعب بالبايسكلات امسح بدموعي وينزلن بحركة وخذلان   .

_كواكب:ربي تسمع مو بعد ما اريدهم والله بعد ما اريدهم تلوع گلبي هواي من وراهم لو عايشة وياهم شلون انت مبين تكلي عوفيهم بس اني غبية حاركة روحي عليهم حررررك

خليت راسي بحضني ابجي بحركة غضنفر يصيح علية من بعيد اجة يركض كعد بصفي يكلي..

_همزين طلعو مو اهلج ماحبيتهم مايناسبونج انوب ملتزمين وانتي متعلمة على الدياحة تموتين مايخلونج تطلعين ودراجتج تنسينها بعد لا وفوكاها فكرر هسة لو اغنياء جان هلهلت وركصت واني الثگيل  .

_روح منا

_ابجي هسة منو لازمج امداج عود تستحين

مسحت عيوني بعنف الغصة بصوتي واضحة اكلة

_بعد راح اصير مثلك ماريد اهلي ولا يهمني

صفك ايد بيد فرحان

_اي ايييي ولج يا اهل يا بطيخ

_اني تعبت من وراهم هواي تعبت هما سنين ما دوروني واني سنيييين ادورهم  وحتى لو لكيتهم على هاي كسرت كلبي ماريدهم كرهتهم بدون لا اشوفهم مابيهم خير لو بيهم خير ماعافو بنية من دمهم ولحمهم عد الناس الغرب ماكلفو نفسهم ودورو لو سالو عليها  .

اختنكت كطعت كلامي جريت نفس ردت روحي ورجعت احجي  .

_عسى حوبتي ماتتعداهم اذا فرحانين ومرتاحين كون تخرب فرحتهم مثل ماخربو حياتي مايفرحون ولا يتهنون

_كافي عوفي السالفة انسيها

_مايستاهلون والله مايستاهلون شكد افكر بيهم واتخيلهم واحد واحد حتى شكولهم اتخيلها بس هما مو بحالي عايشين بغير دنيا

_هسة اعتبريني اهلج لاتهتمين

_اني هم ما اريدك بعد ما اريد احد

_شبيج ركبج جني ماتريدين واحد

_ماتعرفون احساسي وكسرت كلبي شلون توجع

_دكولي يا الله يا كوكو

_انجب غوغو

ضحك واني ضحكت بوسط دموعي

_غضنفر:اي درجعي ام دجة المتوحشة

_ماكلة امك وابوك متوحشة

_لا يابة ولا ضاربتني دفرة ولا مهددتني بالسجينة

مديت ايدي طلعت السجينة فتحتها تلمستها بيدي

مبتسمة بشر  .

_غضنفر:: شبيج يا ستار ليش احسج راح تموتيني

_بنص الشارع شبيك

_ها تريدين تسدرجيني لبيت دراهم هناك تتعاونن علية تخفن جثتي

_انجب خل احجي

_بنت النعال انتي انجبي يلا احجي احجي اتشاقة وياج

_شوف سالم ولدة يفترون على اخواتي

_مو مساع تبجين على اهلج منين طلعن اخوواتج

_ترة ادجكككك

ابتعد مني واني رافعة السجينة علية رفع ادية باستسلام:: احجي يلا بعد ما اعيدها

ضميتها بجيبي احجيلة

_اريد اتوب سالم ولدة من عدنا  وخاصة سراج يفتر على شهب اني والله ماردتهن يتزوجن بس من وراهم انجبرت

_هنا مو اتزوجن وانتي بالسجن اتذكر

_اي بس من طلعت اكدر اطلكهن واخذهن بعيد بس ذولة مايعوفونة سراج ميتتت ميتتت يريدها شايف اذا لزمها يموتها موت جم مرة شفتة يم البيت يراقبها

_وما كلتي

_كلت لضرغام هو مايخليهن يطلعن امان بالبيت مو فارغ بية علي لو هو وعلي زلمة سبع يكسر ضهرة كسر  .

_ والله خوش زلم عجبوني بس كليلي شلون تلزمين سالم تردين تشرحينة

_لا لا اريد احرك كلبة واخليهم ينسونا هسة سالم راح يرجع على نجوم وهنا النسوان مايخلنها كاعدة مرتاحة يردنها للخدمة

_شمدريج

_حقيقة مو اكثر اريد خطة شي يساعدني

_اني وياج شتردين اسوي

_هو اني ماعرف شريد اسوي بيهم

_لا تسوين شي بدون تخطيط لاترحين بيها سجن انوب شيطلعج

_حتى ضيم مايطلعني هالمرة اعفن

_اني اجيبلج ملابس واكل بين فترة وفترة

_لا ربحنا

كمت من مكاني انكت بملابسي كام وراي يضحك

_اني اريد ناس تطلعني من السجن الشرطة حفظت  حتى مواليدي

التفتت علية وملامح الحزن على وجهي بهدوء حاجيتة:: ماتبدل شغلك وتشتغل شي بية خير وتبدي بداية صحيحة

_بعد اني صرت هيج هذا شغلي وهاي حياتي

_حرام

_عندي شغل حلال اشتغلة

_اي بس هذا حرام متلطخ انت بالحرام

_دمشي امشي لو باقية تبجين على اهلج احسلي

هزيت ايدي هذا زمال مايفيد الحجي وياة مثل الرسم على المي صعدت وياة يرجعني عيني على الطريق بهتت روحي جانت نار وطفت احجي وي روحي واقنعها "بعد ماريد اهل دراهم عندي بيت عندي اشتغل واعيش  "

وتبقى غصة بگلبي من احجي هذا الكلام جذب كلة جذب احجي شي واريد شي طلعني من حديثي وصراعي وي نفسي صوت غضنفر  .

_اني ادري بيج زعلتي وضجتي لان ماطلعو هما كالو ناس كل فترة يجون يدورون على بتهم ضايعة من زمان كلت كواكب ضايعة من زمان بلكت هما والله فرحت لان ادري بيج تفرحين كلش  .

_حصل خير

_اتقبلي الواقع اكو ناس تخلف وتشمر ماتريد بزر المن جبتوهم تادية فرض  !

_اهلك شمروك؟

_مايردوني

_ادري بيك جذاب عندك اهل

_مو جذاب صدك ماعندي اهل ماتربيت بيت وام واب شمروني واحد على واحد وضيعوني لاهي تريدني ولا هو ولا الناس تريدني كل هذا وتريدين اكول عندي اهل  !  لا وافتخر بيهم هما حتى جناسي ما طلعولي  .

التفتت علية فاتحة عيونة على وسعهن

_كواكب: جنسية عندك  ؟ شلون تمشي صدك تحجي  .

_طلعت من تالي دفعت فلوس يابو فلوس يلة حصلت جنسية اسكتي اسكتي اني ماعندي ولا راح اكول عندي اهل العاشو والماتو سوية يطبهم الف مرض هالعارات الـ*** الـ***

نزل عليهم غلط وفشار وجهة صار دم يريد ينفجر ولاول مرة اشوف غضنفر هيج عصبي خليت راسي على ايدي دايرة وجهي عنة وساكتة خلية براحتة شعندي وياة  .

الاهل ثنينة كسرونا اهلنا وعافونا اني هم ما اختلف عنة هم شمروني هو عاد يعرفهم اني ما خلوني اعرفهم  .

وصلنا نزلت لكيت دراهم جاية من السوك ولا تكعد دراهم قوية بعدها مو عبالكم جبيرة وماتكدر باوعت بوجهي ودنكت تشتغل بالبيدها  .

_دراهم: لاتماشين غضنفر

_ما امشي وياة جانت عدنا شغلة

كعدت كدامها اسحب بالعلاليك اشوف شجابت وياها مدت ايدها بصفها خلت بحضني مصيادة

_دراهم: ما ردت اجيبلج بس لكيتها جدامي

اخذتها اضحك:: اي هاي الاريدها صنع ايد مسوينها بجوب والله عاشت اديهم

_دراهم: فروخ صغار يسوونها

_اي هذا جوبلس ومصارين ماموجودة بس مدري منين يجيبونها

رفعت عيونها خازرتني اختفت ابسامتي وسويت روحي عاقلة  .

_دراهم: سجينة وفوكاها مصيادة

_مو السجينة انتي تدرين يطلعلي سكران ملطلط نتعارك مرات ادافع بيها على روحي ما امن الا هي بخصري

_والمصيادة

_العب بيها من ماعندي شي

سحبتها ابوس براسها

_حبيبتي دراهم علم انتي علم

برود سالتني:: وين جنتي

_وي هذا زمال

_لا تتزوملين وترحين وياة

هزيت راسي اي وكمت طلعت برا ادور حصو اجربها لكيت غضنفر يدخن واكف التفت من شافني اخذت حصوة خليتها بيها ونيشنتها على الشجرة شمرتها طارن البعيجية والطيور صوتهن دوة  .

_كواكب: حل طارن

_غضنفر: شكد خبيثة

_اكرة البعيجية احسهن حاقدات علية حتى بالحلم يطلعلي

_يحبنج غير

_يعني هسة اني اطلعلك بالحلم؟

صفن بوجهي والجكارة بحلكة يسحب منها دفرتة برجلي ابتعد يزفر الدخان  .

_غضنفر: ولي ام خيسة اتحلم بيها عوزني

_مو انت تحبني؟

_جنت احبج

_وهسة

_ما احبج

هزيت ايدي اضحك ملامحة جدية مايجذب اعرفة دورت على حصو اجمع بية واحجي وياة  .

_شعجب بطلت تحبني

_يلة تتزوجيني

_اهوووو

_يعني تردين احبج وما اتزوجج ولا الزمج ولا اباوع بوجهج طلعت غير شغلة

درت وجهي علية مقابيلة صرت احجي

_كواكب: هسة شعجبك تزوجني بس لو افتهم

_شبيج عيونج يكتلن، طولج جنة شطب

_ضحكتني يعني اني حلوة

_تدرين بية ماجذب احجي الصدك

_اي احجي

_بس تكعدين وتلبسين مثل البنات وشعرج يطول تصيرين تفلشين

ضحكت بالزايد وهو يحجي

_احجي الصدك شبيج ليش اني اريد اتزوجج اريد اشوف النتائج والتغييرات

_امداك اي والله

_تدرين اني ليش اريدج لان  حنينة وفية تضحين بروحج على الناس التحبينهم اني اريد هيج

_اضحي بنفسي للناس الاحبهم مو اليحبوني

_حتى اليحبونج يهمونج اعرفج

ضربت بالمصيادة بكتفة لزم ايدة متوجع

_هسة شبيج ومرض

_تخيل وياي اجيبلك وحدة حلوة حبابة تحبك تزوجها؟

عض شفتة مقلص عيونة

_غضنفر: الله وايدج وينها

_والله اجيبها بس تعوف شغلك

غماني بثنين ادية وطلع طحتلة بالمصيادة سبني وشال طابوكة شمرها كمزت ودخلت اركض فحطانة دراهم تصيح:: شكووو شبيكم

_هذا ابن النعال سواها علية فلسطين بالطابوك طاحلي

_دراهم: انتي البديتي بمصيادتج هاي

حكيت راسي شمرت المصيادة وطگگت رگبتي اخذت ملابس من البوفية بدلت ورجعت لدراهم اكلها  .

_اني طالعة

_وين ان شاءلله

_اشوفلي شغل منين نصرف بعد

_ماتكعدين انتي

_اي اكعد وغضنفر الجلب يكد علينا عمي اروح اشتغل هم نعيش وهم نجمع فلوس للزمن كلشي يصير،

هزت راسها ماقابلة بس شتريد تسوي مايفيد الحجي طلعت دراجتي ماكلها التراب جبت مكناسة كنست التراب عنها طلعتها من البيت مشي ايدي زينة شوية شوية مو هواي بس اكدر اسوق قابل مكطومة، سديت الباب وراي ونزلت الشفقة على وجهي والنكاب رفعتة  .

طلعت للسوك ادور شغل ما لكيت محمود ماكو شكد دورت علية مالكيتة طك گلبي علية، جعت وتعبت رجعت لبيت دراهم طالعة روحي اعرف ينشلع كلبي يلة الكة شغل يعجبني واني راجعة استوقفتني سيارة متاكدة مو لسالم لان مو جوة هيج نوعيات ركزت بيها   .

بصف السايق كاعد واحد اكرع شكلة مال ذولة السلابة خزرتة وبصوت عالي كتلة:: شتريد

ايدة مطلعها من الجامة ابتسامة مشيطنة على وجهة كال:: شغل تشتغلين

ذبلت ملامحي وبلعت ريكي يحاجيني بصيغة انثى هذا صلبت ملامحي بس عيوني وعكدة حواجبي تبين مديت ايدة اصيح:: بيك شي انت وخر امشي

التفت وراة التفتت اشوف.شكو وراة جانت  سيارة وراي بيها ثنين ضخام الى درجة كل واحد راسة شكبرة التفتت علية مبهوتة اسمع كلامة يحجي ، رفع اصبعة وبتهديد كال  .

_كواكب من الاخير عدنا الج خيارين يا تشتغلين ويانا يا تشتغلين ويانا  .

نيزك  ...

كلنا مجتمعين بالاستقبال الهدوء مالي المكان كلنا مترقبين ذهب تجي وتحجي ليش جمعتنا هنا وشنو رايدة منا اباوع لولدها واحد يباوع بوجهة الثاني ويحجون بالاشارات والنظرات كلهم مفتهمين الموضوع على ما اعتقد الا احنة خطفت انظاري جيت ذهب كعدت بصف فقار تاخذ نفس بيدها ورقة..

_ذهب: يا الله يا محمد يا علي

الزم حبوبا الزم

اخذ الورقة منها باوع بيها رفع عيونة ماعاجبة

_ذهب: اقراها حبوبة اقراها

بصوت جهوري واضح قرأ

_فقار::بسم الله الرحمن الرحيم

وصية ارث

الاسم ليث حازم ال***

انا الوريث الوحيد صاحب كل من الاملاك ادناة

لكل من الاولاد (اسامة، فرقد، جواد، عدنان، سلمان، سندس)

ولزوجاتي ذهب وحفصة

ارجو بعد موتي ان تتقاربو وتصبحو اسرة واحدة تجمعكم الدنيا ولو فترة من الزمن

في حياتي عجزت ان اجمعكم

لكن بعد موتي انتم مجبورين ان تجتمعو في بيت واحد من اجل توزيع الارث

في بيت  وهو البالغ مساحتة اكثر من 500متر

في منطقة ××××

لمدة عام واحد

وبعدها سيقسم الارث فيما بينكم بالعدل

والله ولي التوفيق جعل المحبة دائمة بينكم

هذة الوصية بعد موتي تنفذ  .

كمل القراءة نزل الورقة فرك وجهة بتعب اخذتها ذهب من ايدة طبگتها وذبت حسرة تشرحلنا  .

_ذهب: حبوبا انتن البنيات ماتعرفن احجيلجن

ليث الله يرحمه جان متزوج انا الزوجة الثانية

تزوجت ما ادري بية متزوج حبني واخذني هو لا منه ولا من ثوبي بس اهلي شافوة خوش زلمة وانطوني اله بعدها دريت متزوج ماعندة خلف

ورة مادريت مرتة حبلت واني هم  .

كل وحدة جانت بديرة محد بينة تشوف الثانية ولا خلفتنا يعرفون اخوانهم مرت الايام والسنين ليث يميل الي وكل وكتة يمنا بس جان حاز بخاطرة ويريد ولدة تجتمع ويصيرون واحد بس ماصار وكسرنا من راح بوصيته هاي  .

ضلت سنين محد منفذها وكل واحد عايش حياتة وكاعد بيتة المخلية اله وكلهن باسمة لا انا ولا حفصة تريد الثانية مانكدر نعيش سوى بس هسة اجت الوكت حتى نوزع الورث  .

_اسامة: هذا البيت ابوي بناة النة وعلى عددنا وعدد ولدنا جان يريد نعيش سوة بية بس هسة نعيش سنة كلنا بية مجبورين كبار وصغار علمود الورث الماينفذ الوصية يسقط حقة من الورث وانتو بعد بكيفكم  .

_ضرغام: يعني انتووو من كل عقلكم نعيش سوى اني ما تحملكممم ولا اتحمل الهوسة هاي بعدني عريس اريد اطلع وحدي

_فرقد: انت تسمع لو اطرش مو نكول ماكو ورث للما ينفذ الوصية

_ضرغام: الوصية وياييي صارت

_ذهب: بعد اسبوع واحد يصادف بداية شهر الك اسبوع اخذ مرتك وروح وين مايعجبك وانت الثاني هم  .

فرك وجهة بقوة محتقن عصبي صاير نار هو من الصبح هيج امدة الحظ عود عريس بس حظي واعرفة اني منيلي حظ تخبل الزلمة بس يخازر بية غلست عنة شسويلة  .

_فرقد: مابيها بعد تأجيل سنين ناجل بيها سنة وحدة بعدها نطش محد يشوف الثاني ناخذ الورث وفضت وانتهت

_قبس: جدي عقلة ثلاثي الابعاد شلون يفكر انوب متزوج ثنين

_ذهب: انطم لا تحجي علية زلمة معدل جدك دار حلال اهلة وحدة وطور وزاد علية

_قبس: لو هيج الاهل لو بلاها ورث يغطي عين الشمس منيلهم كل هذا

_اسامة: ورث على تعب ماكو شي يجي بالهين

_قبس: تعبهم صار الجدي كلة

_اسامة: ليش هو جدك شاف الراحة واحنا وياة من الصغر اشتغلنا وعلمنا على التجارة الكم صفت

_قبس: هسة احنا كاعدين لو مشگوكين شك

_ذهب: كلها هيج مو بس انت

_ضرغام: راح ننشك اضعاف بجيتهم

_ذهب: انت من هسة كلبت وجهك امشي امشي لا تطلعها سم علينة عبالة بس هو مايدري انا شلون اتحمل هالعيشة وياكم كلكم تغثون

_فرقد: اكول لازم نطش لان رجعت علينة ذهب

_جواد: وراح تسحل بكرامتنا الكاع يلا عيني نكوم

_ذهب: صعد الجالي عندي من هسة شايلة هم هاي الكعدة الماتنطاق

طلعت اشوف امير يلعب وي رضا ميت علية من اشوفة شلون فرحان گلبي ينترس فرح  خطية جان مايطلع من الغرفة مخلصها تلفزيون هو شهب  .

رحت احجي وي شهب خاتلة تريد تموت ماتخلي عينها بعين احد سحبتها وحدنا برا عيونها ماتخليها بعيني  .

_شبيج راح تموتين شكوو

_شهب: ها

_شبيج ترجفين

_ماكو شي

_قبس شلونة وياج

_زين

_كملتو شغلتكم

_اي

رفعت حاجبي متعجبة هاي الجبانة شعجب ماكلبتها مناحة ضحكت على شكلها وتوترها  .

_نيزك: عبالي تبقين شهر بهاي فهاوتج

_اني معلية هو

_لا ربحنا ايدج بالدهن مسلمتها وهو مسيطر

_يعني مو زين

_خليلج كلمة لا كلشي بكيفة احجي سولفي لاتبقين خرسة

دنكت رأسها تلعب برجليها تحجي بخجل

_شهب: هو اني اريد احجي وياة بس ماعرف احجي بشنو

_امداني اي والله

_لا صدك ابقة ساكتة يكلي خرسة انتي

ضحكت من كل كلبي صدك خرسة خوينسة هاي ماتحجي مو نفسنة كل وحدة لسانها شطولة ماننجرع طلع هو يخابر صارت وراي ختلت هزيت ايدي احاجيها  .

_نيزك: هسة شبيج ضميتي روحج

_استحي من اشوفة

_لا تخبليني رجلج البارحة شلون خلصتيها مغمى عليج

_ماعرف

_يااا انوب دكول ماعرف امداني اي والله هسة شحجي وياج

خلص اتصال واجة باتجاهنا عاكد حواجبة كوة واكفة خفت لا اطيح هاي واكفة بضهري تدفع بية العوبة رجلي هو لو رجلها  .

_قبس:شكو

_نيزك: شكو

عيونة وراي اشر براسة

_شبيها اختج

_مابيها

_صدك شبيها خاتلة هيج مني مسويلها شي

_لا لا بس جاي تتشمس حتى بشرتها تصير حنطية

رفع حاجبة سحبتها خليتها بصفي خليت ايدي ورة ضهرها وجهة انصبغ دم راح اموت اني مو هي هاي شلون صارت مرتة يررربي  .

_قبس: شبيج شهب

_شهب: مابية شي

_قبس: يعني اكو واحد يوكف بالشمس حتى يتغير لونة انصلختي صلخ

سحبها من ايدها بالفي بسدة يهز براسة وهي ساكتة  .

_نيزك: اني اروح

شفت ضرغام طلع دخلت جوة ولا كاني اشوفة مطنكر بوجهي من الصبح اني اعلمك ضرغام

صاح باسمي دخلت سويت روحي ماسمعتة بالمطبخ بقيت مايقبلن اسوي شي لان عروس  .

_ضرغام: تعالي وراي

راح دخل ردت امشي وراي وانخمش كلبي من اسمع هوسة جاية من برا طلعت اركض شهب مجلبة بامير ترجف وقبس يصيح  .

_قبس: لككك زمال احجي عددددل يا ابن التريدة هذا

حسيت رجلية صارن خيوط وگلبي ذبحني ذبح اعرف هالصوت والله اعرفة همام هذا اخو سلوان

_همام: ابنا نررريدة حجيت كردي هندييييي انطيني الطفلللل

_قبس: شوف والقرآن الزمك اطلع روحك صياااااح لا تصييييح بوجهي

_همام: دجيببب ابن اخوي خليني امشي ماميت على شوفتك

سحبت امير مثل المخبلة يريدونة راح ياخذونة والله للموت ماعوفة طلع ضرغام يكفكف بارداناتة يمشي ويصيح  .

_ضرغام: تجي كووووة تجي الطلايب مو روحي طاكة منو هذا اليريد اجعصة بيدي

التفتلي شافني ابجي اجة يمسح بدموعي لزمت ايدة بتوسل اكلة:: فدوه ضرغام لاتنطيهم ابني

_ضرغام: اسويها بحررررر دموم وما يشوفون هالفصعون

باسني بخدي جمدت بمكاني كلها طلعت هسة اني بيا حال وهذا يبوس طلع وهمام يريد يجفت يسحب امير صارت هوسة وياة زلم ماجاي وحدة

اكلت شفتي اكل وكلت لشهب تاخذة جوة  .

جفتت امة واختة للبيت ماتوقعت جايات وياة اختة تصيح هدادة  .

_جيبي ابن اخوي ساقطة تفشخين امي صايرة مرة حووووك

_نيزك: وحق العباس الزمجن ثنينجن اتخبل عليجن شتريدن اطلعن منا هسة عرفتن ابن اخوجن سنين محد سائل علية لابعيد ولابسعيد ربع محد خاسر علية صار ابن اخوج هسسسسسة

تريد تهد علية وردة وامها وسهلة صارن كبالها يحجن وياها واني حامية گلبي نار لو الزمهن امخلهن  .

_ياسمين: خالة شلجن بهاي السالفة الولد وي امة وماكو شي

_ام سلوان: احنا وين نعرفكم شتسوون ماتسوون ناس غربة نعوف ابنا يمكم شنو ماعدنا بيت

_سهلة: مجرمين احنا شبينا

_ام سلون: جانت مامتزوجة وعد عمها بيها باب وجواب هسة تزوجت تجيب جهال منو بحالة يموت يعيش اريد حفيدي جيبوة

_نيزك: وحق هذاااااا الله تردين تموتين على ايدي بت الكلب صار حفيددددج هسة بقاط ماذاكرتة يايوم اجيتي شفتية لو خليتي بيدة وحق الحق هنا اطلعج جنازة

_ام سلوان: الخبلة ام نص عقل تردين تصيرين ام مو خلفلة على اخواتج مربياتة بحالة انتي

بنتها وهي خبصنا خبص والله لو يهدني عليهن جان ملختهن وبردت كلبي بيهن مو يكولن خبلة اعلمهن الخبلة شتسوي بيهم، ذهب طلعت تحاجيهن وهنا غافلات بس يصيح صاحت بصوت عالي..

_ذهب: خايبات ماتهدنها عليهههههن خل تكضي بيها التوبة وانتن وياها

_ياسمين: يا عمة صدك تحجين تردينها تصير مالخ

_ءهب: ذني اذا ما ينسحلن ما يرتاحن

اجة ضرغام يصيح بيهن بعصبية

_تطلعن من البيتتتتت يلااااا لاتحررركن بكلبها

_ام سلوان: انطينة ابنة ونروح

دنك على رجلة نزع النعال رفعة بيدة بعصبية يكلها

_ضرغام: هذا مو نعاااال نعال وما انطية الج مو انطيج طفل امشي لج تحجين عليها وانتي ابنج مجرم خايس بالسجون تطالبين بابنها

شمر النعال بالكاع بقوووة  كلهن كمزن عبالهن يضربهن بية بخبال صاح بيهن  .

_ضرغام: خمسسسسس دقايق طالعين من المنطقة

لا اتخبل عليكم ولا بالقانون ولا بالعشاير الكم شي يمي الاب بالسجن الطفل من حق الام ولو مو يطلع من السجن ما تشوفونة يلااااااااا مناااااا

اجة علية يرجف عصبية واني مو اقل منه سحبني يدخلني جوة عافهن وراه اخذني على السنك فتح المي غسل وجهي بيدة بمي بارد يسب بيهن ويفشر

_ضرغام: لايصعد ضغطج بنات الـ** يفيدنج

_نيزك: ابني ما انطية ضرغام

_ضرغام: محد يوصلة على جثتي ياخذونة الهم نعل مو ابن يمي امشي امشي

اخذني كعدني على القنفة فحطانة اتنفس سريع صدك ضغطي صعد اجت شهب وامير يركض بحضني كعد حضنتة لصدري ابوس بية وارفع بشعرة نازل  .

_يا روحي خفت خوفنك

_امير: نانا لاتصيهين

_لا ما اصيح شعندي مصيحة وانت عندي

_نانا اني من اتبر ماهليهم يسوفونج بعد

غمضت عيوني ابوس بية والله لو اموت ماياخذونة مني هالخيسة، نزل ضرغام بالغراض شمر علية عبايتي  .

_ضرغام: يلة عيني كومي

_وين نروح

_حجزت للسليمانية نخلص اسبوع هناك مو عرس طلعو علية

باوعت بوجهة شهب مبهوتة وعيونها مدمعة بلعت ريك اكلة::اخواتي ماكدر اعوفهن ضرغام

_ضرغام:بس اسبوع اختج هاي راح تروح لبيت عمي وكواكب مو هنا نجمة يم خالج شكو بعد

_خاف يصير شي واني ماموجودة اخاف والله

_شهب: صدك تحجين روحي  نيزك ماعلينة شي

بحيرة باوعتلها كلبي ماينطيني اعوفهن هزيت راسي طلع هو قبلي لبست عباتي وسحبت شهب لحضني ابوس بيها واوصيها  .

_اي شي يصير اتصلي بية ونجمة شلون اريد اشوفها اروحلها

_ورد: ها ولجن يمة فحطت اني منتظرة تتعاركين حتى اهد وياج

_نيزك: هما خلوني اتعارك

_ورد: وين اكو عروس بيوم عرسها فشخت وحدة وثاني يوم تهادد تريد تكتل المرة

_نيزك: شو كلبتي علية ولج ماتشوفينهن يتهددن يردن ابني ياخذنة

_ورد: اويي شبيج اتشاقة وياج المهم عيني سمعت بيها سليمانية راح ياخذج ضوضو

_نيزك: اي يريد بس اسبوع نبقة بس اني اريد اشوف نجمة وكواكب قبل لا اروح

_ورد: نجمة العوبة البارحة شفتيها وكواكب جانت يمج مو لو مو مو

_نيزك: مو بس اني اتشاقلهن

_ورد: دروحي استري علينا هذا ضرغام صاير عصبي وانتي ماتعرفين لو صار عصبي شيسوي

عبالها يبوسها

_شهب: اي والله باسها وهو يرجف من العصبية خو شفتية

_ورد: شفتة بس مامصدكة عيوني هو من يتعصب يرفس يدفر مو يبوس

_نيزك: صح يدفر بالحايط ويكسر الغرفة بس ما يحاجيني

سكتت من سمعتة يصيح باسمي ودعتهن وطلعت وياة ابني شايلتة اخذة مني يبوس بية ويشمة

_ضرغام:هذا ابنج دباعي نسختج ولد القنادر منيلهم ولد حبيبي الحلو اكلك كول؟

_امير:لا

_ضرغام:اكل امك بدالك

خزرتة يسكت ضحك بصوت عالي وطلعنا عفنة  الجو مشتعل بعدهم بتأثير العركة حتى استحيت منهم هسة شيكولون من شافوني بس المشاكل  .

شهب...

بقيت وحدي بداخلي فراغ جبير هسة يلة حسيت بالغربة جانن هنا وياي عندي عادي لزكت بجوري عيوني مدمعة اريد ابجي عليهن بس كوة لازمة روحي، جوري كعدت كدامي بابتسامة تگلي  .

_امكيجج شدكولين

رفعت كتفي ماعرف

_شهب: مو عيب يشوفوني كلهم

_جوري: لا مو عيب انتي عروس وين العيب

_بكيفج اني ما اعرف

طفرت تركض جابت المكياج انواع واشكال اني ما اعرفها طشرتهن وكعدت ترسم بوجهي ورد صوتها يلعلع بالبيت اجت فحطانة كعدت يمنا  .

_ورد: شفتن والحظ الفكر بيتنا راح يصير بيت المختار الثقفي من انجمعت بية الامة العربية

_جوري: اني شايلة هم شلون نتعايش كلنة عمامي عدنان وسلمان احنة ماعدنا علاقة بيهم واكيد عدهم ولد وبنات بس تخيلي

_ورد: راح اشك هدووومي ولج مبينات خبيثات ونصير دكة داك

_شهب: بنات حتى احنا هم نعيش

_ورد: اي ولج كلنا اني نهايتي راح تصير اشبعن مني شوف عليجن الحسين راح اموت لو على ايد ضرغام لو على ايد قبس

_شهب: شعلية قبس

_ورد: يحبني يموت علية يموتني من الحب

ابتسمت على سوالفها خطية تلطم مقهورة من صدك وحقهة راح كلها تنجمع بمكان واحد وين جانن ماخذات راحتهن، صفنت وضحكت بصوت فاتحة عيونهة بفررحة  .

_ورد: تخيلي جوري يطلعون عندي ولد عم صاكين صكووك يجون يعيشون وتبدي قصة حبنا

_جوري: هسة امي اذا لكفتج هيج تحجين تحبسج بالحمام

_ورد: تسويها نبع الحنان تخليني حالي حال الصرصر

كملت مكياجي جوري باوعت لنفسي وبهدوء كلتلها

_شهب: حبابة خففية

_جوري: حلو يخبل عوفية

_شهب: لا خففية هواي هذا

_ورد: صدك خففية لا اني انكتل بدالج لج طلعت تفلش مو هيج كالوها

كوة عن جوري خففتة الي احس عيب اطلع كدامهم هيج خلتة الي خفيف كلش مايبين سحبت راس ورد تكلي:: خل اعلمج تتمكيجين هناك منو يخليلج

_ورد: اني شعلية

_جوري: اعلمها بيج حبي

_ورد: هو اني مكتولة مكتولة صخمي بوجهي

ضحكت بسكوت ورد مطنكرة وجوري تمكيجها وتعلمني الخطوات شلون ابدي واخلي ايلاينر الى ان خلصت  .

_جوري: ها عرفتي

_شهب: اي بس يحتاج اتعلم بعدين

_ورد: نعلعلة عليجن ترستن وجهي صخام بس والله حلوة اني اويليييييي اشك شك

_جوري: هذا منو الضاحك عليج

_ورد: دولي على طاري الضاحك علية حذاتي مالكيتها وعساها بحضج ياصبيحة وافنان وام نعال حرامات غالية اشتريتها بقت بس تك

_شهب: وين راحت

_ورد: تعاركت بيها فشختلج صبوحة تفشخ ماااتتت ماتت واني اركعها بالكعب ربج ما لزمتني جان خنگتني

ضحكت من كل كلبي على سوالفة تشبه سوالف نجوم بس هاي تعارك ذيج جبانة طلعت وي البنات

هنا يشتغلن واني وياهن على السوالف  .

طلعن هنا بقيت وي سهلة تحجي وي علي

_سهلة: ها يمة علي صدك تريد تشتغل وي اخوانك

هز راسة اي بابتسامة هادئة مغطية ثغرة

_سهلة: والله اني من زمان اريدك تشتغل وياهم فرحتلك هواي بالمبارك عليك حبيبي

سحبتة تبوس بية الفرحة واضحة على شكلها طلع سالتها من باب الفضول  :: خالة شنو يشتغل علي

_سهلة: يشتغل وي اخوتة بالشركة هو علي خريج العام عرض علية ابو ود شغل ما قبل العام هالسنة الله هداة يشتغل وياهم

باوعت من الباب ماكو هو كلتلها بصوت ناصي

_خالة هو مو مايحجي شلون درس

_سهلة: كلة بفلوس واسطات اكو مدارس ماتستقبل هيج حالة بس قبلو وهما المننونين  علي شاطر وذكي كلش بس هو تأذة من الطلاب والتمنر

ذبلت ملامحها بحزن وذبت حسرة عيونها تتلامع بالدموع  .

_سهلة: مايستاهل تعذب وتلوع من صغرة كلة من ورة امة وابوة ثنينهم السبب

سكتت تكمل البيدها طلعت مقهورة علية واتخيل شلون عاش والطلاب يتنمرون علية شهكت بصوت من طلع قبس بوجهي  .

_قبس: شبيج

_مابية

_لا تشهكين بعد

_كمزتني

دنكت عيوني ومشيت اعبرة مبين يريد يطلع سحبني من ايدي خلاني كدامة يباوع بوجهي بعصبية  .

_شكو مخلية مكياج

برطمت:: مو اني البنات هنا مكيجني

_وانتي بكيف البنات

رفعت كتفي ودنكت راسي مهضومة من طريقة كلامة رفع راسي باصبعة يكلي  .

_من احجي وياج لا تنزلين عيونج جاوبيني

هزيت راسي ونزلن دموعي سحبت روحي منة ماخلاني امشي  .

_قبس: هسة ااااني شكلت شكلتتت ليش تبجين بس فهميني

_شهب: صيحت علية واني مامسوية شي

_يمتهاااا صيحت عليج

زدت بالبجي سحبني يصعدني فوك لان سهلة مدت راسها تصيح شبيكم خلاني كدامة امشي يصيح

_ماكوووو شي

دخلني لوحدة من الغرف للحمام اخذني صرت ارجف بيدي وهو متخبل ماعرف شبية  .

_قبس: بس لا تبجين يالكااااائناااااات

غمضت عيوني وفلتت اركض سحبني بقوة خلع متني اخذني للمغسلة دنك راسي يغسل وجهي بالمي دموعي ينزلن لازمني مسيطر علية رفع راسي باوع بوجهي ورفع حاجبة  .

_قبس: بالصابون احسن

غسل وجهي بالصابون غمضت عيوني اختنكت فلتت منة امسح بوجهي عيوني تحرگني باوعت بالمراية وجهي احمررر وقطرة مكياج ماكو بنظرة عتب باوعتلة  .

_شهب: ليش هيج سويت؟

_قيس: بدون مكياج احلى غير اني علمودج اريد الناس تشوفج حلوة قبل شوية جنج مهرج هيج تخبلين لا الوان ولا احمر واخضر  .

اجة يمي يمسح بوجهي يرفع برمشي مبلاات واني اشهك:: شوفي شلون حلوة هيج بعد لاتخلين مكياج بس اذا كتلج اني

_شهب: مو تكول اصير مو حلوة

_ايجوز يعجبني اشوفج مو حلوة بكيفي

يعدل بشالي ويضم شعري بيدة مركز بية يكلي

_شعرج لاتخلينة يطلع انتبهي كل شوية شوفي روحج عندي الج كورس ملاحظات قبل لا نكعد هنا اعلمج واشرحلج كلشي

هزيت راسي مايدة كلامة كرص خدي دفعت ايدة

_يوجعني لاتكرص

كطعت نفسي من دنك عضني بخدي جمدت بمكاني

ابتعد يمسح بخدي باوعتلة بزعل  .

_ياااابووووية شيخلصها وياج من اول يوم وشلعتي گلبي

_شسويت

_بس تبجين بعد بعد عليمن طالعة هيج ولج اختج خطفناها ولا بجت تصيح الله لايوووفقكم تخطفون بالبنات الحلوااات

رفع راسة يضحك ضحكت اكلة

_اي ليش تخطفونها

_عوفي هاي ركزي بالحلوات

_اي هي حلوة

_ام لسان وينها حلوة بس تضحك وتعالو شوفو غمازاتي

_عدها بس غمازة وحدة مو ثنين

_المهم شعلينة بيها

_كواكب كلتلي تبجي خطية خل اروح اشوفها

_قبس: ماترحين تجيج هي

_ماتجي اني اروحلها

_ماترحين عروس انتي مايصير

_صدك

_لا جذب شبيج بابا

سحبت نفس طويل سحبني ينزلني لكيناهم كلهم متجمعين دنكت راسي صرت بسدة يباوعولنة صاحتلي بيبي ذهب ترفع براسي  .

_ذهب؛ انتي مو جنتي مخلية حمرة وعروس

_ورد: اي والله مكيجناها خوش مكياج تعبنا بية تعبببب وين رراح

ضربها قبس على راسها لزمت راسها خازرتة

_قبس: شعليج انتي شعليج

_ورد: هو شنو شعلية غيررر تعبي

_قبس: لا تخللها مرة ثانية عوفنها هيج

_ذهب: غير عروس مال الغسل ماتخليها تخلي نفس البنات

_قبس: هسة انتن شعليجن اني عاجبتني هيج الا تدخلن

_ذهب: والغسل هاي انت هيج شحال الازرگ شيسوي يلبسها بوشية

_سهلة: والله هو من زمان كلي كون تتبوش لان شكلها يجيب التاية

_ياسمين: يااا هذا يحجي صدك

_سهلة: يكول حتى عيونها ماتطلع فتنة عيونها رايح مستشرع كلة اذا بارادتها لاتجبرها

ضحكت ذهب تهز بيدها ماعاجبها هذا ضرغام صدك يحجي يريد يبوشها هي نيزك تقبل والله ولا تقبل

بقينا شوية يمهم وطلعنا للبيت اخواتة موجودات لليل راحن هو طالع ما كلي وين ولا اني الثولة سألتة  .

_هاجر: ها ماما محتاجة شي

_شهب: لا

_هاجر: روحي حبيبتي اصعدي لغرفتج ارتاحي

دخل فقار وي بنتة سلم علينة ود تباوعلي تسحب برجلة دنك عليها يكللها..

_هاي شهب زوجتة عمو قبس

_ود: راح تعيش ويانة

_فقار: اي هي حبابة شوفيها اخت نجوم

ضحك ورفع نفسة باوع لامة تشتغل حك راسة وكال:: اختج ماكو اليوم

_تكول كواكب بس تبجي وتعبانة

عفس ملامحة

_فقار: شبيها

_زعلانة علينا

_اذا تريد خل تجي هنا يمج تاخذلها فترة او تعيش

عكدت حواجبي اريد احجي كمل

_فقار: محد يحاجيها عادي نعتبرها اختنا مثلج

_هاجر: ماما بس انت تعتبر شهب مثل اختك لان زوجة اخوك نجمة قبس بس راح يعتبرها اختة

_فقار: نفس الشي يوم

ضحكت وهو اخذ بنتة وصعد التفت عليها من كالت

_فقار منفصل وجاي يحاولون يرجعون زوجتة

_شهب: ان شاءلله ترجع

_هاجر: روحي ماما لغرفتج قبس مايرجع هسة

هزيت راسي وصعدت الغرفة مثل ماهي دورت  بعطورة كلش طيبات اخذت تراك نوم سبحت وكعدت امشط على المراية خفت على توحشت البيت هادئ الغرفة هادئة متعلمة على الهوسة شلون اتعود على هذا الهدوء بسهولة  .

كملت شعري سويتة ضفيرة  ينفش اذا اعوفة هيج

رجعت لعطورتة اخذت العجبني رشيت منه شوية ورجعتة لمكانة افتر بالغرفة اخاف انام  .

رحت لكيس  الملاكمة مالتة انتبهت اكو صور الة بملابس الملاكمة والكفوف لابسهن مسوي الحركة الشهيرة للملاكمين مقدم ايد وماخر ايد يضحك بوسط الحلبة هم عندو الصراحة انبهرت اول مرة اشوفهن وجملة دكت براسي...

  "يعني قبس ملاكم"

حلو هالشي بس مامبين علية ضربت الكيس بيدي توجعت عفتة ضايحة تمددت بسريري اباوع بالسكف والتفتت للباب كل شوية غمضت عيوني والماضي الاسود مايعوفني نمت بتعب  .

حسيت على شي كدامي خيال طفرت مرعوبة

_اسم الله شبيج

باوعتلة اتنفس سريع:: هاي انت

_منو غيري يدخل هنا؟

_عبالي مو انت

_اني

رجع كذلتي ورة اذني صفنت بية بملابس داخلية وجهي صار نار رجعت لفراشي تغطيت ودرت وجهي عنة تلمس خدي يهمس "شبيج"

غمضت عيوني ما رديت علية ولا التفتت فترة مرت بعد مانمت ماكو اختفت حركتة رفعت راسي مالكيتة بالغرفة وين راح؟ بعدني اريد اكوم طلع من الحمام ينشف بشعرة لاف المنشفة على خصرة

اريد الزم الجرجف احسة طار مني من الفشلة نمت على وجهي راسي بالمخدة دافنتة اسمع بس صوت ضحكتة سويت روحي نايمة عليمن يضحك هسة  .

كلش قريب مني ايدة باردة تتلمس وجهي جسمي يكش همس قريب مني:: اكعدي لج

مارديت ولا تحركت متت مو نمت كرص خدي راد وجعني ولا تحركت ادري بية مالبس ملابس نزيت من خلة راسة برگبتي كمت اجر النفس بصعوبة  .

_قبس: هاي ليش مخلية من عطرري

فتحت عيوني كتلة

_ها

_عطري ليش مخلية منه

_ماعرف

_اروح اسئل عطري يعرف؟

_هو عطر انمونة اني عندي هواي عطور انطيك بدالهن

_شسوي بيهن اني اريد اشتمهن عليج

رمشت بعيوني مستوعبة كلامة ردت ادير وجهي ثبتة بيدة جاعصة..

_قبس: لا تديرين وجهج واني موجود بس باوعيلي

_البس شي اول

_غرفتي هاي اريد ما البس بكيفي

_بس اني موجوده استحي غير لازم تلبس

_مرتي انتي

_استحي منك

دمعت عيوني ردت ابجي دنكت باسني بقوة و...

كعدت الصبح على رشة العطر رفعت راسي اباوعلة لابس رسمي نيلي وابيض يلبس بساعتة التفتت علية شافني كاعدة اجة يمي كلش  .

_قبس: رايح للدوام محتاجة شي بس لاتهزين براسج احجي

_لا ممحتاجة

_متاكدة

_امم

_زين

_اكلك اريد اخابر اختي

_ها صح اخذي تليفوني علما اجيبلج واحد

_وانت

_زايد عندي اني لو اعرف جبتلج بس هسة يلا عرفت

راح يدور بغراضة كمت ارتب بشعري جابلي تليفون شمره على الجرباية اشر علية يحجي  .

_بية رقم نجمة ورقمي بعدين رتبية انتي

_شكراً

_ماكو داعي

كرص خدي كاز على سنونة

_قبس: عجين مطاط

_ماكو عجين مطاط

_اكو ود تلعب بية ملون هيج ينمط

_هذا طين اصطناعي

_اي مثل خدودج ينمطن

لزم وجهي بثنين ادية جعص خددودي وعضني يلا راح  اخذت ربع ساعة يلا كمت ماعرف شصار، بية

رتبت الفراش وبدلت ملابسي باوعت لوجهي خدي احمر خليت فونديشن يلا اختفى لبست شالي ونزلت محد موجود بس خالة هاجر صبحت عليها ابتسمت بوجهي  .

_هاجر: صباح العافية حبيبتي اتريكي خلي دمدم تجهزلج الريوك