تحميل رواية «ابناء الحسوم "شمسون"» PDF

#ابناء_الحسوم "شمسون"

بقلمي: زهراء السلامي ❤︎

لطفاً لتنسون التصويت + التعليق بين الفقرات + متابعة لحسابي 😍.

شتان ما بيننا..

انتَ بردٌ صاقعٌ

وانا

مهما

بردت

حريق... 🔥

━━━━━━  ━━━━━━

"مسرة"

بست روحي بالمراية بوسات متتالية سويت على المراية برواز بوسات فرحانة وسعيدة والحماس متوزع بكل جزء من جسمي، دخل ابوية للغرفة واستند بجسمه على الباب رافعلي حاجبه مستنكر..

-فادي: يعني سويتها مسرة

-اي

-اكيد تعرفين شيصير بي لو حاولتي ترجعين العلاقة؟

-فنكم

-فادي: تتحديني؟؟

-اكره اقلل من احترامك بابا بس اي أتحداك! بيمن تهددني؟ ميس؟ ميوسة ورجعت لحضني واكرم وانلصم على حلگه ووگفوا عنده حده و...

-بواسطة سردار! شوكت حاچية ويه سردار انتِ؟؟ ليش تشتغلين من وره ظهري مو كتلج اني ارجعلج ميس؟!

-بعدك تعاتبني على هالشي بابا؟ ترجعها شوكت من تصير مراهقة؟؟ لو من تتزوج بنتي ان شاء الله؟

-اويليي يا عنادج!

-اويلي يا اعنادي ويا اصراري ويا حبي! وانتَ تعرفني زيين محد يگدر ياخذ من ايدي شي الا اذا اني انطيته بنفسي!

-بسيطة الظاهر سجن شُهيب ما كفاچ انتِ تردين تكتلي گليلي بابا اني اريدك تكتله وتخلصني منه

-ابوه رجع وما راح يسمح بهالشي! واذا ابوه ما گدر يوگفك فـ اني الراح اوگفك قسماً بالله وروحها لامي اتحالف ويه عدوك ضدك واحط لتصرفاتك حد!!

-شنو هالصلافة مسررررة ابوچ اني!!

-انتَ تريد تكتل رابط الاب وبنته بيناتنا انتَ دمرت علاقتنا من زمااان بابا واني باقية عندك علمود ميس بس هسة رجعتلي كلها ايام واطلع من هالبيت وتخلص مني

اخذت جنطة السفر اسحلها ولزمني من ايدي، حضنني لصدره يمسح على راسي يرجف ويتوسل صار زمان ما شايفة ابوية بهذا الوضع ويعز عليَّ اخلي يتوسل گلبي ميتحمل لو شما سوه بيه ابقى احبه..

-فادي: يا بابا يا بنيتي يا روحه لابوج شمسون وولده راح يدمروج سرور راح ياخذوج مني مثلما اخذو امج

-ماطول شُهيب بظهري محد يگدر يلمس شعرة مني

-شُهيب الكتل امچ؟؟

-شُهيب ما كتلها مااا كتلها!! شوكت راضي تستوعب هالشي!

-المهم واحد منهم كتلها!

-وراح اعرفه منو أنطيني مجال

-صار سنين منطيچ مجال وما عرفتي منو!

-لان صعب! چنت طفلة بهاي الحادثة وشفت گفاه ما شفت وجهه شلون راح اعرفه!

-بابا اني خايف لا يكسر گلبج ابن شمسون الكلب

-اني الكسرت گلبه بابا مو هو لو اقدم روحي لـ شُهيب هم ما اعوضه الفقده بهاي الثلاث سنوات

قبل لا يجاوبني مشيت اعبره وطلعت من البيت، ركبت ويه السايق ولبست مناظري الشمسية اخفي عيوني الصايرة تخوني وتنزل دموعها بشكل مبالغ بي، حط السايق جنطة السفر بالسيارة وانطلق للمطار..

بس وصلت للمطار طلعت مرايتي اعدل نفسي، رفعت شعري نص ذيل حصان والباقي على اكتافي ونزلت.. اليوم لابسة سوت كاجول قابل للطلعات ليش وشعجب مادري بس طخ على بالي ولبسته وتنازلت عن الكعب بدلته بحذاء رياضي وابشركم ميس ربطتلي القيطان..

دخلت المطار ادور عليه بعيوني، شفته من بعيد گاعد بصالة الانتظار صافن وحده، مغصتني بطني واحس بفراشات صارت بيها، سيطرت على ملامحي المتحمسة وخفيت ابتسامتي وحاولت ابطئ خطواتي قدر المستطاع وتمشيت متوجهة اله..

-هاي

انتبه على صوتي وجاوبني بهزة راس، باوعت للساعة البيدي وسألته..

-شگد بقى للطيارة؟

-ماعرف يمچ التذاكر

-ها اي صح

طلعتهن شفت صار وقت نروح للصالة الثانية ما سلمنا جنطنا لان مو كبار، سحل جنطتي وجنطته وتمشى ويايه نروح ننتظر هناك والگعدة عبارة عن صمت! طلعت روحي من الهدوء صرت الوب بمكاني متنرفزة احتاجيت اللهي روحي بأي شي لا انهار هنا..

-مسرة: جايب سماعات؟؟

-لا

-واني ما جايبة وناسية مالتي اريد اسمع اغاني

-هسة بالطيارة ينطونا

-اريد هسسة!!!

قابل ردة فعلي العصبية اللا ارادية بهدوء، هز راسه واني ضغطت على ايدي ثنينهن اركز ويه هوسة المطار وانتبه ويه الاصوات ما اخلي الهدوء يسيطر عليَّ نزلت راسي اركز ويه الرجال والمرة الگاعدين ورانه يسولفون وبالي ويه صراخ الطفل والبچي.. بدون لا احس صرت احد بسنوني راسي راح ينفجر ماتحملت راح اخذ الحباية مال مهدأ واطيح حظي هنا اطرافي كلها صارت ترجف اريد وماريد..

-مسرة؟

-ها...

-سكرچ ارتفع؟ شكلچ مو بخير

-لا لا

-تمام رايح اجيبلچ ماي

هزيت راسي بـ اي كم مرة واول ما وگف يروح اني شردت للحمامات، طبيت لوحدة من الحمامات وقفلت الباب عليَّ اخذ شهيق وزفير گلبي ينبض بقوة وريگي نشف.. طلعت الحباية من جنطتي وفلتت من ايدي بسبب الرجفة و وگعت بنص التواليت صرخت من القهر وشمرت جنطتي بالگاع طلعت وحدة ثانية وصفنت عليها..

مردتها مرد بيدي وغمضت عيوني احارب نفسي، ادماني على المهدئات غلط! الدكتور حذرني اكثر من مرة وگال لازم اسيطر على نفسي لااازم اترك الحبوب...

گنبصت اخذ شهيق وزفير لوقت طويل اعصر ايدي ورجلي وسندت ظهري على الحايط، ماعرف شگد بقيت على هذا الوضع وما رجعت لوعيي وللواقع الا على صوت رجال قلق يصيح بأسمي..

-مسرة؟ مسرة انتِ بعدچ هنا؟؟

فزيت اوگف بمكاني ويه صوته المتوتر، بلعت ريگي اعدل نفسي وامسح جوه عيوني الكحل لا يكون سايح، رجعت الحبة بالجنطة ولبست جنطتي على كتفي وطلعت..

-شُهيب: وييينج؟؟

-مسرة: هنا

-شبيچ شصار وياچ؟؟

ابتسمت على خوفه ولهفته وحركات ايده، من شافني مبتسمة وگف عدل يحط ايده بجيوبه، حكيت طرف انفي ووخرت گذلتي عن عيوني وجاوبت بثقتي المعتادة..

-سكري ارتفع شوية واخذت علاجي هنا ماردت گدام الناس

-تمام وهسة انتِ زينة؟

-اي..

-صاحو طيارتنا تره

-ها اوكي يله نطلع

طلعت وياه اخذ جنطتنا وتوجهنا لسيارات النقل، وصلونه للطيارة صعدنا بس راسي احسه ثگييل ويوجعني سندته على الكرسي وغمضت عيوني بسرعة ورحت لغير عالم بعد ما حسيت الا على لمسة شُهيب يضرب خدي خفيف بأصبعه..

-مسرة! مسرة!!

فتحت عيوني ثگيلة صار وجهي بوجهه عيونه جاحظهن على وسعهن ووجهه مخطوف لونه، عدلت نفسي وحسيت بخدي حار ويمكن حتى صاير بي طبع..

-مسرة: شبيك؟

-ما گعدتي!!

ضحكت على نبرته متعجب وطلع لسانه اخيراً، مطيت ايدي فوگ وراهة لميتهن بحضني وگلت بأبتسامة واسعة..

-نعسانة شبيك ويااي

-عبالي غبتي عن الوعي

-لا يابة اگلك جوعانة اريد عمعم

-وصلنا ام عمعم

-يااا صدگ عود

-اي

-لعد ليش ما گعدتني من جابو الاكل صاير مهمل برو ماكس شُهيب

-چابو پورك (لحم خنزير) بس اخذتلج ذني

انطاني نساتل وصمون وعود زبدة ومربى، فتحلي الصمونة بسرعة بسرعة وحشه بيها الزبدة ومربى وانطاهة الي اكره الزبد وما اطيقه بس اخذته منه واكلتها فرحانة بأهتمامه..

-مسرة: لا خلص رجعت خوش وليد

-هاي نساتل هم، يلا مدوزيل لازم ننزل تأخرنا

-مو دا اكل شلون اشيل جنطتي؟

بدون لا يجاوب گام يطلع جنطنا من فوگانه وشال جنطتي اليدوية بيده وسحل بالجنط الباقية واشرلي نطلع.. مشيت وراه وقلبي يتراقص فرحاً مفتقده حنيته واهتمامه، عمري كله قضيته بدون احد ورايه بس من تعرفت على شُهيب صرت مثل الطرنة وياه كلشي ما افتهم وكلشي ما ادبر اريده هو يسوي كلشي..

دخلنا بناية المطار وكملنا الاجراءات وشفت مرة ويه زوجها يمشون باوعت لوضع شُهيب يسحل بجنطتين وجنطتي اليدوية مشكلها بالجنطة مالته، غمزتلي المرة وسوتلي حركة اوكي بأصبعها وهمستلي "I love this" ضحكت وهزيتلها براسي اوافقها الرأي..

بأثناء ما احنه واگفين اني اسوي روحي اتصل بأبوية حتى يأمنلنه سيارة، لقطتهم عيني من بعيد ابتسمت وگلت امثل التفاجئ..

-عزه هاي شجابهم

اللتفت شُهيب مكان الدا اباوعله وچانت ثانية او اقل الثانية حتى اشرقت الشمس من مشرقها وشفت ابتسامة واسعة تنرسم على وجهه الحلو حسيت بگلبي يزهر ورد ويه فرحته من صاح وهو يلوح بيده..

-شُهيب: اطلللس، عمررر، علييي، حمزززة، مسلمممم هناااا

اجو الولد بأتجاهنا وما اسولف على السلام الحار الصار بيناتهم، تحشيش على مداهر على مسبات على رزايل على غمزات على لمزات ماكو شي ما سووا وما خلوا بنفسهم، ضحك شُهيب من كل گلبه ويه عمر من گال..

-عمر: حسيت بالمغرب غيمت تدرون؟ گلت بس لا شمسون جاي اثاري طلع خلفة شمسون جاينه

-شُهيب: هههههه هذا شوكت يبطل من طيحان حظه ما تگلولي

-عمر: بالعباس مشتاقيلك گلبي مفرفح على شوفتك

-شُهيب: شفتك گطعت طريق السجن روحه رده تجي تزورني

-عمر: وعلي من وره عليوي هو السبب والزهررة مرتين اجينا اوربا نوصلك وما يرضى نفوت

-علي: خاب ماتحمل گلبي رقيق مو بيدي اخاف اطير الهيبة وتطيح دمعتي گدام امة لا اله الا الله

-مسلم: عمت عيني عليك امشي امشي لا تضحك العالم علينا

لم الاطلس شُهيب بحضنه ووگفو على جهة يبسبسون وحمزة مضيگ عيونه ويباوعلهم ضحكوا ثتينهم واشروله يجيهم ما قبل متت ضحك رجال شكبره شگده طنگر عليهم وراح وبقوا يتوسلون بي..

-عمر: عذروا شباب عذروا هاي هرمونات الحمل گابة عنده

-حمزة: هسة احمـ.....

خزرهم شُهيب وفوراً حمزة سكت جافل وكلهم انبلعت لساناتهم، بصعوبة كتمت الضحكة نسوا اني موجودة ورادو يدوسون بالحچي.. تعجبت على شخصيتهم بين بعض خصوصاً مسيو حمزة كلش كلاس توقعته اصلاً ميتشاقه وبالمرتين صدمني هم هنا وهم بالحفلة..

-شُهيب: شلون عرفتو اني بالمغرب ما بلغت احد ردت افاجأكم تالي انتو فاجأتوني

-علي: عرفنا من ستوري انسة قيثارة كاتبة لوكيشن "TO MOROCCO" وعرفنا راح تجي وياهة انتَ

اندار يباوعلي شُهيب بـ شَك رفعت اكتافي بلا مبالاة وسويت روحي فقيرة، بالحقيقة اني بلغت الاطلس بنفسي احنه جايين واذا عنده وقت يطلع ويه شُهيب يغيرله جو ماتوقعت راح يجيب كل اصدقائهم ويستقبلو بالمطار بس چنهم همه الي منتظرين جيته على نار وسعادتهم تفسر هالشي..

-حمزة: والله متمني ابقى بعد بس عندي اجتماع مهم طار نصه

-الاطلس: اي ولك انتَ مو اجتماعك بالتسعة بالليل؟

-حمزة: فدوة يروح لـ شُهيب اهم شي شفناه بخير..

ودعوا وراح وبقوا الباقين ويانه، سلموا عليَّ بأحترام محد بيهم صاحلي بأسمي كله لو "مدموزيل" لو "ليدي".. طلعنا سوه ركبنا اني وشُهيب بسيارة الاطلس والباقين گالو عدهم شغل..

-الاطلس: اليوم تباتون يمنا

-شُهيب: لا اطلس احنه اجينا بشغل

-الاطلس: ميخالف والنومة بشنو راح تأثر على شغلكم؟.. غانم اسفط على جهة

حچه ويه السايق مالته وسوه مثلما يريد، توقعت راح ينزل يجيب شي بس بقى ويانه بالسيارة گاعد ثواني واندگت جهة جامة الاطلس ومدو روسهم ثلاث زلم..

-شُهيب: تضحك عليَّ انتَ!!!

حچاهة بفرحة غمرت قلبه، ضحك الاطلس ونزل ويه شُهيب من السيارة تسالمو ويه الزلم سلام حار، ما عرفتهم منو لانهم مو من ضمن الخطة بس ميهم المهم شُهيب سعيد..

صعدوا لسيارتهم واجو ورانه بطريق بيت الاطلس قبل لا اسأل منو ذولة شُهيب گال..

-شُهيب: ولك صار سبعة سنين ما شايفهم شجابهم ما تگلي

-الاطلس: اصدقاء المدرسة ما ينسون شُهيب وصدفة جايين للمغرب زيارة صارلهم يومين وصارت جيتك وياهم

-شُهيب: شهر واحد داومت مدرسة هنا ولهذا يومك احنه على تواصل تدري زياد حتى بالسجن خابرني

-الاطلس: دكتور زياد رجاءاً!

-شُهيب: خرب عقلك زياد "دكتور" صارت دمج ويه اسمه المخبل

ضحكات وسوالف وذكريات ولطافة گضوا الطريق، ابتسمت بسعادة آخيراً شفته فرحان ومتحمس لشي اخيراً ردت روحه وصار ياخذ وينطي وكأنه نسى شنو عاش وحتى نوعاً ما نسى اني گاعدة بجانبه واني ما تعبت نفسي انبهه بوجودي ردته يستمتع قدر المستطاع ويه اصدقائه..

وصلنا لبيت الاطلس وكلنا گعدنا بصالة بيته حتى الزلم اجو ويانه، راسي بده يفتر دايخة بشكل مو طبيعي وحسيت بـ شُهيب ما مرتاح بسبب وجودي وياهم خمس زلم وبنية وحدة شوية السالفة داچة، لو شغل عادي بس لان گعدة اصدقاء فـ ما اللومه خصوصاً وواحد من الاصدقاء عرفت يصير صديق زياد شُهيب مو كلش علاقته بي اسمه "شادي" عينه صلفة وما شالها مني..

شربت من العصير وانتبهت لشادي يتقرب مني ويفتح ويايه حديث..

-شادي: انتِ رئيسة شُهيب مو؟

-مسرة: چنه شركاء بس شُهيب باع اسهمه الي

-شادي: صدگ عود؟ ليش؟

-مسرة: راد يستقل بعمل وحده

-شادي: تالي انسجن مو هههههههه

-شنو اليضحك؟

-لا ما اقصد استهزأ بس اگول خطية

-امم

-انتِ مهندسة صح؟

-امم

-تدرين عندي موظفة تشبهچ كلش عبالك انتِ من كثر الشبه حتى نفس الستايل

-خوش

-هم تشگ مثلچ

رفعتله حاجبي مستنكرة كلمته الحقيرة ومادري بـ شُهيب حاط اذنه ويانه ومنتبه لكل المحادثة حتى وهو يحچي ويه جماعته اذنه چانت ويايه..

-مسرة: عفواً؟!

-القصد من كلامي انتِ جميلة بشكل يلفت النظر

نزيت على رجل شُهيب تضرب الطاولة الگدامه ويسفطها ويه القنفة بشكل عصبي، الكل انتبه لحركته الغريبة بس ما اهتم ولا برر لاحد..

-شُهيب: من رخصتكم احنه عدنا شغل ولازم نطلع

-الاطلس: شنو السالفة شُهيب مو گلنه تباتون هنا والشباب كلهم راح يباتون هنا لخاطرك

-شُهيب: غير وقت

-شادي: لا حرامات

خزره بحدة ضحك شادي وطبطب على كتف شُهيب وگال..

-شادي: انتَ روح عادي بس خلي مسرة تبقى وين تروح بهالليل

وهاي چانت اسوء جملة يحچيها بهيج وضع وبهيچ وقت بالتحديد، دفر شُهيب ايده شادي عن كتفه وصاحو الكل من لزمه من خوانيگه يحط وجهه بوجه شادي الشاذي..

-شُهيب: شنو قصدك ولك؟!!

-مسرة: شُهيب اهدأ

-الاطلس: يمعودين

-شادي: شعليك بقصدي شُهيب وليش مزعوج انتَ؟

-شُهيب: زياد صديقك حباب خلي يطفر من وجهي لا اطلع حرگة گلبي بي

-شادي: اشايف روحك انتَ؟؟؟ كلك خلگ خريج سجووون

هجم عليه شُهيب يريد يتكاتل بنص الصالة وطبوا بنصهم الاطلس وزياد وصديقهم الثالث يفاككون، شادي يذب حچي وشُهيب يشوط ويصير نار تخبل ودفع زياد عنه بس الاطلس عاق طريقه.. الهوسة اعتلت وايدي بدت ترجف اعصابي تلفت..

-زياد: خلص شادي خلينا نرووح

-شادي: ما اطلع هوو ما عاجبته الگعدة خلي يوليي

گبت عركة جديدة بس بالكلام هالمرة محد تضارب، توترت من الصار وهالشي ميصيرلي بالعادة بس هاي اثر المهدئات محتاجة حباية، طلع زياد وصديقهم الثالث دخت وتاهت عليَّ تحرك شادي ديطلع وياهم وبالغلط لزمت ايده اطلع وياه عبالي شُهيب لانهم لابسين نفس لون الجاكيت..

لزمت ايده لو صخمت على روحي ولطمتها، سحبني شُهيب من ايدي بقوة لدرجة احسها انخلعت، صرخت متوجعة وانداريتله شفته شُهيب من قوة الصدمة ولحظة الادراك الاجتني عطت اتدارك الموقف بس اني لصتها بالزايد..

-شُهيب اذيتني شبييك!!

-ما قصدت صدگيني

لزمت ايدي الوب من الالم حسيت بالعضلة تنفصل من الكتف، بنفس اللحظة طلعتلي مرة سمرة من غرفة الاطلس صاحلها "نانا" اجت تطمن عليَّ ولزمتني من ايدي واخذتني وياهة لغرفتها..

-نانا: سلامتج يَّـ بنتي انتِ بخير؟

-مسرة: لا مو بخير راسي يوجعني كلش

-ارتاحي حبيبة نامي هنا اذا تردين

-لا اريد اطلع شكراً الج خالة

عفتها وطلعت من الغرفة بدون لا اسمحلها تحجي شي، البيت يفتر بيه للحظات توقعت راح اوگع بالممر لولا صوت بنية شابة تصيح بأسمي..

-مسرة.. انتِ مسرة؟

اللتفتت الها اشوفها لابسة شال ولازمته بأيدها ضابته، تحركت من مكانها واجتلي وگفت مقابيلي مباشرة، مدتلي ايدها تصافحني وگالت بأبتسامة بشوشة..

-اني مريم

-مسرة: زوجة الاطلس

-صحيح بس شلون عرفتي وهو گلكم اني مو بالبيت؟

-ميحتاج يگول شي انتِ نفس المواصفات الي رسمتها بعقلي

-عذريني ما طلعتلچ بس ابني كلش متنحس اليوم لا يفشلني وچنت اجهز نفسي اريد اروح لبيت اهلي زيارة

-عادي مرمر

ابتسمت ووردت خدودها بطريقة لطيفة مبينة خجلت من صحتلها "مرمر" الاطلس سمعته يصيحلها هيج اكثر من مرة، عرفت عنها شغلات كلش بسيطة بس تعلق زوجها بيها وضحلي انها امرأة عظيمة..

اشرتلي نروح لغرفتها قبلت فوراً محتاجة بس امدد حتى لو بالگاع، دخلت لغرفتها وشفت طفل صغير يتمركض منا ومنا مثل الدودة، ضحكت من اجه يهرول لـ مريم وكمش برجليها من جوه وصاحلها "مما"..

-مريم: ادومي هم دعفست مو؟؟ اعرف بسوالفك اجيتني تركض وتتلوگ لانك وكحت

باوعلها بعيونه البريئة وهي عافسة وجهها عليه، نزلت نفسها اله وشالته من الگاع گزگزت من فتح حلگه ياكل خدها عرفته عود ديبوسها بس بعده ميعرف..

-مريم: اي اي تبوس بعد

ضحكت وباسته وعرفتني عليه، تلمست ايده الصغيرة وجرها مني ميقبل اللزمه يضم وجهه عني، ابتسمت مريم وهمست همس شفايف..

-يستغرب هو

-مسرة: حبيبي الله يحفظه

گعدنا سوه سولفت شوية وياهة البنية بشوشة ووجهها يضوي ما شاء الله شفافة صايرة من البياض واسلوبها وكلامها حلو مينمل منها.. غيرت جو ووضعي تحسن نوعاً ما من سوتلي عصير برتقال خطية عرفت بيه دايخة ركضت تجيبلي عصير..

-مريم: مسرة تنامين حبيبتي؟

-لا مريم اريد اروح شُهيب وينه؟

-لا وين ترحين شُهيب ويه الاطلس بالاستقبال راحو تره رجلي ميعوفه بعد لا عبالج

-اروح وحدي ميخالف

-شبيچ حبيبتي بعدج دايخة؟

تنهدت تعبانة فركت بين عيوني وطلبت الحمام، رحت غسلت واخذت علاجي ورجعت شفتها تحضرلي الفراش فرشتلنا ثنينا بالگاع اني وياهة، گعدت على الفراش واجت جايبة اشكال فاكهة وحلويات وعصاير الاجواء حلوة واخذتنا السوالف..

-مسرة: اني ملتقية بزوجچ كم مرة واسمچ ميوگع من لسانه تدرين كم مرة صاحلي مرمر لو متدرين؟

ضحكتتتت بصوت عالي ضحكة سعادة، هزت راسها وگالت بعدما اكلت شيف تفاح..

-هو يگول اغلط بأسماء البنات ولج عيني عبالي يضحك عليَّ

-لا يمعودة دا اگلچ كم مرة صارت والله

-هههههه فضحنا الرجال

-شلون تعرفتو على بعض؟

-اذا اسولفلچ متصدگين

-اصدگ طبعاً

تربعت ونيمت ابنها على رجليها وبدت تسولفلي متحمسة، حچتلي قصتهم واني فاكة حلگي عبالك دتحچيلي مسلسل من الصدف الصارت والتلاعب بعلاقتهم شي يحمس ويونس بنفس الوقت..

-مسرة: مريم معقولة ما عرفچ زوجته؟؟

-لاا هنا اليكتلج ماعرفني اني مريم زوجته

-واسمج؟ لقبج؟ عنوانج؟ رقمج؟؟

-كله لعب بي عمو محمد حتى لقبي تغير بس ما اسولفلج الموضوع چان صعب ويحرگ الگلب خصوصاً وهو عنده صديقة مقربة نورسين وتحبه و...

-نعالسين؟؟؟؟؟؟

-شنو؟

-نورسين صديقة الاطلس وتحبه؟؟

-اي انتِ تعرفيها؟

-نورسين خطيبة شُهيب السابقة!

-چذاااابة

-والقران بس لحظة لحظة

-شنو؟

-اتذكر شُهيب گلي حبت صديقه! بس ما گال منو

-واني الاطلس گلي نورسين انخطبت لواحد من اصدقائي بس ما گال منو

-شوف شوف شوف وطلع عدنا شي مشترك وهو وجود نعالسين

-ههههههه استغفر الله ياربييي ماريد اشيل غيبتها

-دختوليي هالعاره

ضمت حلگها بيدها مستحية، نسيت روحي وردت انسرد گدامها وتذكرت عيب هاي بنية غريبة وميصير..

-مريم: عوفچ منها انتِ شلون تزوجتي شُهيب؟

-خاف انتو مسلسل تركي قصتكم احنه فلم هندي قصتنا

-سولفيلي احب الهنود

ضحكت وبديت اسولفلها ما ترددت لثانية وحچيتلها كلشي وكأني اعرف هالبنية صار سنين، اولاً لان مريم جداً مريحة واحد يحجي وياهة وثانياً اني محتاجة أفضفض محتاجة احچي مشاعري لاحد بدون لا يحاسبني وينتقدني ومريم الشخص المثالي..

-مريم: وانتظرتي ثلاث سنوات مسرة؟ يعني عندچ امل ترجع علاقتكم نفس قبل وانتِ تگولين ابوچ سجنه؟

-مسرة: ادعي من كل گلبي ترجع علاقتنا بس ماعرف مريم وضعي مو زين والحبوب دتأثر عليَّ بشكل سلبي

-تركيهم حبابة تره ذني يدمرنچ

-دا احاول اتركهن قبل چنت ما اگعد على حيلي بس بديت اتعود اعوفهن واخذهن بس بوقت الحاجة

-الله يساعدج مسرة وضعچ صعب بس اني متأكدة رب العالمين راح يعوضچ على كلشي عشتي واهم شي ميس بنتج رجعتلج وارتاحيتي

هزيت راسي اأيدها وسألتني بعد اسئلة عن حياتي واني كذلك، بفترة قصيرة تعرفت عليها وصرنا صديقات هيچ بهالسرعة تبادلنا حسابات بعض وفرحتني من گالت..

-من تحسين روحچ تردين تسولفين اني موجودة واسمعچ حبيبتي

-شكراً ام ادومي وانتِ نفس الشي هنيال الاسباني عليج

-اي والله نياله

ضحكنا بصوت عالي وتمددنا على الفراش نكمل سوالفنا، ما حسيت بالوقت الا من دگ منبه مريم سدته وگامت تترخص للحمام.. شوية ورجعت ايدها ووجهها مبللات نشفتهن ونزلت رداناتها وفرشت سجادتها تصلي..

طخت ببالي صار وقت صلاة الفجر، بقيت بفراشي اباوعلها شلون تصلي وحركاتها بطيئة، كملت ورفعت مسبحة تسبح وراهة جابت كتاب نفس مال العلوية مكتوب عليه مفاتيح الجنان وقرت شي بي.. ابتسمت واني اباوعلها شكلها راحة نفسية ومتأكدة هذا النور الضاوي بوجهها بسبب اعمالها معكوسة على شكلها..

نزلت الكتاب من ايدها واللتفتتلي وسألتني سؤال كأنها چانت تفكر بي لفترة..

-مسرة گلتيلي انتِ وشُهيب گرايب مو؟

-اي

-شنو صلة قرابتكم؟

-امي تصير بنت عم ابوه

-روحي للعلوية واحچيلها صلة القرابة واشرحيلها كلشي يجوز هي توگف وياچ؟

-توگف ويايه ضد ابنها؟ ماتوقع صراحة

-حاولي انتِ مو تردين شُهيب؟ وشُهيب يريد يروح للعراق يعيش هناك حاولي بكل الطرق تمنعي ورجعي العلاقة لان اني اشوف حقه ماخذ موقف ومتألم على الصار وياه ما اللومه

-ولا اني اللومه

نمنا وثاني يوم طلعنا اني وشُهيب كملنا شغل ما حچينا هواي ولا ذكرنا الصار البارحة نهائياً حسيته واحد ثاني ولمست تغيره بمشاعره ناحيتي.. تأذيت اضعاف وبالليل طلعنا ويه مريم والاطلس بس ما تونست ابد عقلي فاصل وچنت بس اريد ارجع للفندق وارتاح..

حست مريم وعذرتني راحو واحنه رحنا للفندق كلمن بغرفة، فتت سبحت بدلت وعفت شعري ما مشط، اخذت حبة ودخلت بالفراش اريح نفسي هستوها دتغفى عيني وسمعت صوت طرقات خفيفة على باب الغرفة.. غلست عليها ورجعت تندگ ولحو بالطرق كل هذا وما گمت توقعتها خدمة الغرف.. بس تندمت بگد شعر راسي لان ما فاتحتها.. ثاني يوم عرفت هذا چان شُهيب وراد يحچي ويايه..

متت قهر ومن زعلي ثاني يوم فوراً حجزت ورجعنا، سفرة المغرب چانت مثمرة شُهيب نفسيته تحسنت بشكل ملحوظ وحصلت صديقة لطيفة مثل مريم بس خسرت علاقتي بـ حبيبي وابتعدنا اكثر صرنا حتى بالشغل منلتقي الا نادر..

وبيوم اني مطفية الكامرات لان اريد اشتغل وشوفة شُهيب بالكامرات دتخليني اللتهي، انفتحت باب مكتبي بهمجية ودخلتلي صبا للمكتب تركض وتگول..

-مسرة مسررررة لحگي مسررررة

-شنو شصاير؟

-لچ صققر ريماس اجه وتكامش ويه شُهههيب

-شنوووو

-ولج علمودج ديتعاركون علموووودج

-چذااابة چذاااابة

-والله العظيم صقر استفز شُهيب بيچ وهذاك گبت غيرته وماتحمل تعال اللزم صقر حطه وكتله

-عزززززه مستحييييل يممممة حممممماس

-ولج امشيي فاككيهم محد ديگدرلهم حتى الامن تدخلو وما فاد چنهم ثيران هائججة

-خليهم بعد شوية خليهم اريد صقر ينكتلل

-ولللج

-اششش معليج

طرت على الشاشات فتحت الكامرات واشوف الدنيا محترگة بمكتب شُهيب هو وصقر صايرين واحد فوگ الثاني، ضميت حلگي بيدي اطفر بمكاني من الحماس والاثارة والشرار الدا يطلع منهم وصبا اجت تتفرج ويايه..

-صبا: ولك حييييل اكتله افگس عيونه اييي.. ايييي بعد ايدي اييي

-مسرة: حييل بيك يالنافخ روحك ههههههه عباله راح يگدر على شهوباتي يشوفه هادئ يگول ميگدرلي ميدري هو منيم الوحش الي بداخله

اتابع من الشاشة وگلبي يرگع من المشهد الاكشن الدا اشاهده، صارت دماية والعياط مال موظفات وصل للمكتب مالتي، شُهيب من طلع من السجن زاد العنف مالته دا اللاحظ هالشي رغم هالة الهدوء الي محاوطته والصمت الدائم بس ردات فعله وعصبيته اقوى..

-صبا: سرور شو ذولة راح يموتون بعض

-لو بيدي اعوفهم لحدما شُهيب يكتل صقر ويخلصني منه

-ويرجع للسجن؟؟

فزيت واگع گلبي ويه جملتها، رجعلي عقلي واستوعبت لو تطور الموضوع محد ينضر غير شُهيب، لبست حذائي بسرعة وطلعت اهرول من المكتب اتلاحگله.. وصلت لبوابة المكتب مالتهم مفتوح والدنيا مگلوبة هنا.. عدلت ظهري واكتافي ودخلت وراسي مرفوع مثل العادة وسألت ولا كأنما شفت شي او اعرف شي..

-مسرة: شنو ديصير هنا؟

اللتفتو عليَّ الموظفين كلها تتلاطم لاحظت لا نشوان ولا مروان ولا فاضل هنا حتى يفاككون اخوهم باقيلي الفاهين ذولة..

-جولي: مسررة انتهيناا راحو من ايدناا

-مسرة: شباب كافي

حچيت بصوت ناصي محد بيهم سمعني ولا شافوني واگفة، ضربت بخاتمي الچبير على جامة المكتبة اجذب انتباههم ونترت امثل العصبية..

-شبااب!! گلت كااافي!

عكست عين صقر عليَّ ودفع شُهيب عنه يعدل نفسه وقميصه، وگف شُهيب على حيله يعدل سترته وغافله صقر ببوكس طاير بدون لا يحس هشم وجه شُهيب.. شهگت ممتوقعة البوكس ولا شُهيب متوقعه راد يهجم مرة ثانية وصرت بيناتهم ادفع شُهيب من صدره امنعه واحلفه ميتعارك..

-شُهيب دخيللك كاافي

-وخررري مسرررة

-صقر: هددي لهذا المتوحش هدددي خو شفتي بعينچ شلون همجي ووحشيي ومتبركع بالهدووء

-شُهيب: ابن ال......

-مسرة: بداعتيي عوفه بدااعتي شُههيب الموظفات خاافو كاافي فدووة لطولك ارووح

-شُهيب: انطيني مجاال لا تتعورييين

-مسرة: احلفك بداعة امك وخرر حبااب شُهيب اهددأ

لزمت وجهه اقيده بيدي ويلفح نار بوجهي النذل صقر صار ورايه يستفز بي ماعرف شديسويله حركات مثل الزعطوط وهذا راح يموت بيدي من الرجفة..

-صقر: مو زين مشغلتك يمها وانتَ خريج سجون! اني مسؤوول وغصباً عنك تشتغل عندي وتكمل تصميم مشروعي وفنك لو فتحت حلگك

وخرني شُهيب عنه وعيونه يتطاير منها شرار، ما حچه شي ولا رد صقر مجرد تحرك للمكتب مالته جر ورقة بيضة وكتب بيها شي وشمرها على الميز وگال..

-شُهيب: اني استقيل

ذبلت ملامحي من جديته من كل عقله كتب استقالته وشمرها على الميز ويريد يطلع، تخبلت من القهر والحرگة صحت وراه..

-مسرة: بس بيناتناا عقد شُهيب ميصير تستقيل

-شُهيب: اعتبريني غاااااايب

عاطها بعلو صوته وطلع من المكتب ماخذ رجفته وعصبيته وياه، دگيت رجلي بالگاع منهارة اول تالي شُهيب ينهان هنا وبمكان هو چان بي مدير وفنه اليفتح حلگه وياه! اول تالي اسمح لواحد يقلل من احترامه بس لانه فقد منصبه؟! والله اشگ حلگه اليتجاوز عليه وادوس على راس صقر والخلف صقر الكلب..

-مسرة: انتَ منو حاسب نفسك صقر ريماااس؟؟؟

-صقر: مشروعي يمكم مسرة ليش ضايجة؟

-مسرة: اعتبره مرفوض!

-مسرة من كل عقلچ؟؟

-اخذ مشروعك واطلع منا صققر ولا تفكر ترجعلنا!

-هيج صارت قيثارة؟؟ تفضلين ابن العار شمسون عليَّ؟؟

-ماعندي وقت اضيعه، صباا جوليي رجعو للمسيو فلوسه وكرستينا انطيه التصميم مجاناً خلي يعتبره هدية من شركتنا!

عطتها بنبرة قوية وطلعت منا، داخلي يغلي غليي اعرف صقر راح يشد ويايه بس طُززز انعل ابو لابو الجابه اليتجاوز على زوجي والله امسحه بالگاع واذله واطرده منا وخلي يجيني ويفتح حلگه..

من بعد هاليوم شُهيب انعزل بالزايد، خاف چان يحچي شوية قبل ونفسيته تحسنت بعد سفرة المغرب هسة رجع نفس قبل واسوء بعد.. نشوان ومروان بدوا يقلقون على اخوهم وسمعتهم يتناقشون ياخذو لمعالج نفسي عسى ولعل يساعده يطلع من هالاكتئاب بس المشكلة شُهيب رافض رفض قطعي..

بقيت اراقبه من الشاشات ما غفلت عنه ولا ساعة اشوف تطوره وتصاميمه تبهرني شي يجنن ومتعوب عليه بس ميقبل يحضر بالاجتماعات ديخلي نشوان يعرض اعماله نيابة عنه وما اللومه صعبة من تكون مدير وكل الزبائن يجوك وتكون انتَ سيد الموقف والقرار وفجأة ترجع لنقطة الصفر حالك حال الموظفين والناس تباوعلك بنظرة المجرم..

اغلب شغله ووقته صار ويه فاضل وجولي، اموت احترگ واشتعل من الداخل من اراقبهم بالكامرات يسولفون ويشتغلون سوه، اكثر من مرة ردت انقل جولي او اطردها منا بس صبا تذكرني ان افشل مدير هو الي يدخل علاقاته الشخصية بالعمل وبقيت هيچ بالعة موس وساكتة..

اجتني صبا تسولفلي عن تطور علاقتها ويه مروان وشلون تصالحو ووضعهم ممتاز والعرس رجعوا حددوا، صديقتي المقربة سعيدة وطايرة من الفرح ودا اجهز وياهة بس كله بعقل شارد..

-صبا: شديسولفون ذولة صارلهم شگد؟

-مسرة: منو

اشرت بعيونها على الشاشات لاحظت عيونها على الشاشة الچبيرة المعروضين بيها جولي وشُهيب.. بلعت ريگي وطگطگت اصابعي متوترة حركت اكتافي امثل اللامبالاة وگلت..

-يشتغلون سوه

-اي ادري بس شبيها جولي منفعلة وكل شوية تنزل راسها؟

-مادري مادري صبا ماادري

-فتحي المايك بله

-لا ما اسويها

-دفتحي ولج هذا زوجچ الچ حق يله فتحي

وكأن چنت اريد دفعة من شخص حتى اتشجع وافتح المايك، ركزت بكل حواسي ويه حديثهم مو كلش واضح بس ينفهم نوعاً ما.. افتهمت بجولي دتحچيله عن امها ومشاكل ويه ابوها وشُهيب يشتغل ويهز براسه وياهة بدون لا يجاوب..

-جولي: عشت بعائلة مشتتة ابوية حاير بالنسوان وامي تموت من القهر.. وانتَ؟

-شُهيب: شنو اني؟

-هم عشت بين ام واب مشتتين؟

-لا

-ها.. المهم الي اريد اگوله اني معجبة بأسلوبك وتعاملك ويه اخوانك وخصوصاً تصرفاتك ويه كيان تجنن كلها حنية ولطافة هي محظوظة بيك

ابتسم وبقى مركز بالحاسبة، حطيت ايدي على گلبي راح يوگف وصبا مدت راسها ويايه تشوفهم عضيت على شفتي وغمضت عيوني اركز بس ويه صوتها المتمنية اخفي من الوجود وهي تگول..

-جولي: شنو رأيك نطلع سوه؟

-شُهيب: وين

-بكيفك، مثلاً نتعشا؟

-صبا: لااااا عاااد

-مسرة: اششششش خليني اسمع

-شُهيب: نرتبلنا طلعة شي يوم نروح كلنا نطلع من الدوام سوه

-جولي: لا لا.. اريد بس اني وياك

صفن بوجهها وهي ابتسمت، ما حسيت بأظافري تحفر بيدي الا من مدت ايدها تلمس ايده وتگول بنبرتها الغنوجة..

-معقولة تردني ومتعزمني على عشا شُهيب؟

-لا مو هيچ بس...

-لا تكول بس امانة راح انتظرك اليوم تمام؟

قربت كرسيها عليه اكثر صارت لزگ بي، ماتحملت ابقى اتفرج وگاعدة گمت من مكاني وطلعت من ميز المكتب اريد اروحلهم وافرقهم من بعض بأي طريقة حتى لو اسوي مشكلة بنص الشركة وافضح روحي..

-صبا: مسرررة وين رايحة وووين

-هددديني صبااااااا

-مسرة حبابة سيطري على نفسج وينن ترحين وتفضحين روحج بيناتهمم لا تنزلين نفسج اله ماطوله ميهتملج عوفيي

-ولج هدددددينييييي

-ما اهدددچ والله مااا اهد يا غبييية ما خليتينا حتى نسمع رده عليها بسبب تهورچ!!

اللتفتنا ثنينا على الشاشات شفنا شُهيب كاعد وحده بالمكتب وجولي اختفت، دورتها بكل كامرات الشركة مالها اثر بمعنى دخلت للحمام ثرت ثرت متتت بدمي دفعت صبا عني وطلعت من المكتب اهف اركض لمكتبهم..

-صبا: سااام سيطر عليها اللزمهاا سام هاي مو بعقلها العلاجات خبلنها

بدون لا يعرف شكو سام لزمني يقيدني ويجرني قبل لا يشوفني واحد من الموظفين ظليت اتعارك وياه ما گدرتله جرني وحبسوني بالمكتب واستلمتني صبا رزايل.. تعاركت عركة لا صايرة ولا دايرة هنا..

-صبا: كااافي گعددي

-مسرة: اگعد حتى جولي تاااخذه؟؟

-صبا: سرور حبابة ركزي ويايه تصرف جولي اجه من صالحچ يا حبيبتي اعرفي هو شنو نيته وياچ اعرفي هو يريدج؟؟ يريد يكمل العلاقة؟ لو تخلى وبعد متهمي بشي!

-لاااااا ما اقبل لااااااا

-مسرررة

-ولج جولي عرضت عليه تطلع وياه جووولي تعرفين جولي منو وشنو موو؟؟

-اعرف

-جولي ماااكو رجال طلعت وياه اذا ما باسته واخذته لبيتها ماااكوو من اول موعد الهم محد يقاومهاا ويقاوم دلعهاا وجمالها صبااا ماكدر اگعد واسكت فتحي الباب راح اتتتخبل

ما قبلت تفتح الباب شگد حقدت عليها وكرهتها بهاللحظة، انهاريت صرت اكفش بشعري بدون لا احس بروحي وگلبي يتگطع.. سام واگف على جهة يباوعلي وملامحه ممتعضة بألم خبلوني ذولة الثنين ومحد راضي يحس بيه..

-صبا: مسرة.. سرور حبيبتي اهدي وانتبهي ويايه

-اكررررهج لا تلزميني وخررري عني وخرري

-راح تبقين عمرج كله تنتظرين منه مبادرة؟ بله طلع ناسيچ ومو بباله؟ بله طلع ميريدج بعد شلون؟؟ تذلين نفسج اله وتتوسلين بي ميطلع ويه بنات ويبقى بس الج؟؟ مسرة ماريدج تتفشلين وياهم ماا اقبل عليج يفشلوچ شُهيب او جولي ويكسرون كبريائچ!

صفنت بوجهها انتبه لكلماتها واستوعبت كلامها صح.. كلامها صح لان اذا رحت على الاغلب راح يفشلني وميهتم لوجودي، راح يطلع وياهة عناد بيه يحرگ بگلبي وجولي راح تنچلب بالزايد.. يجوز ما قبل يطلع وياهة؟ يمكن رفضها وميريدها بس تهوري واستعجالي عم عليَّ وماعرفت جوابه شنو..

فضلت اهدأ واگعد افكر بعقلي بوستني صبا وحضنتني تعتذر مني لان حبستني هنا بادلتها حضن وتشكرت منها لانها دائماً واگفة ويايه وتريد مصلحتي، بقت ويايه گاعدة بالمكتب تلهيني ومتخليني افكر بشي بس وين اگدر ما افكر عقلي كله صار وياهم خصوصاً من خلص وقت الدوام..

رجعت ويايه صبا واجت لبيتي ميس راوتني واجباتها وشنو تلبس باجر وتسولفلي عن دوامها نوعاً ما تناسيت شنو ممكن ديصير هسة ويه شُهيب وجولي وركزت ويه بنتي هي اهم..

طلعت صبا لبيتهم واخذت ميس ونيمتها بفراشها وبقيت وياهة الى ان غفت، حاضنتها واللعب بشعرها وافكر افكر افكر افكر عقلي راح يوگف.. بعد فترة من الزمن شفت الساعة بالـ 11 بالليل ما طقت انتظر زايد اخذت جنطتي وطلعت لسيارتي..

سقت بكل سرعتي لبيته، نزلت من السيارة اباوع لشقته منا وافكر شلون راح ادگ الباب وشنو اگله اذا فتحلي؟ حسمت قراري وقررت اصعد من الدرج البراني وادخل شقته من الشباك دائماً يعوفه مفتوح..

لبست جنطتي بشكل جانبي وصعدت اني وكعبي الدرج الصغير، ادوس على اطراف اصابعي ما اسوي صوت حتى محد ينتبه من الجيران، وصلت لشقته ومثلما توقعت الشباك مفتوح واضوية الصالة مفتوحة بس مو كلها، طفرت ادخل منا وتسللت للصالة ادور عليه..

ما لگيته رحت لغرفته هم ماكو، رحت للحمام ماكو والمطبخ والبلكون كله ماكو.. صرت احك بيدي وشعري متوترة، گعدت بزاوية الصالة على كرسي انتظره يجوز راح لامه.. اكيد راح لماريا اكيد هو يومية يزورها..

بقيت گاعدة هنا فوگ الساعة ونص وشُهيب ما رجع! كل شوية بقيت انطي عذر شكل يمكن راح لامه او يمكن لبيت اخوانه او يمكن طلع ويه اصدقائه او يمكن راح يغير جو؟

ساعة تجر ساعة وشُهيب ماكو!! طفيت اضوية الصالة وگعدت بالظلام اخذ شهيق وزفير قدر المستطاع اجاهد اسيطر على اعصابي وما اكسر كلشي هنا واگلب بيته گلاااااب واحرگه بالنار المشعولة بصدري!!

فركت صدري اليوجعني وتمتمت ادعي ربي يبرد گلبي ويرجع قبل بوقت وارتاح بس ما صار هالشي.. اكيد دعائي ما راح يستجاب لاني مو خوش بنية! لاني انسانة حقيرة! وحدة عاصية وما استحق رحمة رب العالمين! استحق كلللشي ديصير ويايه كللللشي اصلاً ما استحق اكون زوجته! وما استحق ميس ما استحق اكون ام لهيچ بنية ما استحق!!

انتظرت وانتظرت وانتظرت، طلعت تلفوني تنازلت واتصلت بس طلعلي تلفونه مغلق!! دگيت على جولي وطلعلي الجهاز هم مغلق تخبلتتت، طلعت حباية من جنطتي شربتها اريد الرجفة والدوخة تروح..

غمضت عيوني اعصرها واعصر راسي دقايق معدودة وسمعت قفل باب الشقة ينفتح، فزيت بمكاني اباوع لساعة موبايلي بالـ 2:40 بعد منتصف الليل!

دخل شُهيب الصالة ما ضوه المكان وما اهتم يمشي بالظلام، ما انتبه لوجودي گاعدة بزاوية بعيدة واباوع لخياله اليمشي، راح لغرفته ثواني وطلع لازم بيده منشفة وراح للحمام.. روحي لابت گلبي تملخ من القهر ليش راح يسبح؟؟ ليييش اول ما رجع رايح يسبح ليييش؟؟؟؟

فتح باب الحمام ضوه جزء من الصالة، گمت من مكاني ممهتمة لطگة كعبي البينت بالأرضية، اللتفت عليَّ مستغرب وبدون تردد وبدون لا افكر ضربته ضربات متتالية على صدره وانفجرت بالصراخ..

-ويييين رايح وييييين چنتتتتت وييييييين

-مسرة؟

-وييييييين چنت شُههههيب وووووين احچيييييي لييييش رايح تسبح لييييييش

-مسرة شبيچ شصاير؟؟

-احچييي گلبي راح يووووگف راح امووووت

-مسرة اهددي ما جاي افتهم عليج!!

جريته من ياخة قميصه فاقدة اعصابي، جريته لدرجة وجهه لزگته بوجهي ونترت بحقد، بعصبية، بغيرة عمياء لو بيدي ابلعه وما اخلي وحدة تاخذه وتشوفه..

-انتَ الي شُهيب شمسون!! الي!! افهم اليي انتَ مالتي وحدي بس اليي انتَ مُلك مسرة وبس!!!

-تمام اهدي

-گوللهن انتَ مالتي احتررگت من الغيرة گووول

حضنته من رگبته ارجف جسمي فقد ماگدر اسيطر عليه بعد، بادلني حضن قوي يمسح على ظهري وشعري ويهدأ بيه بس كلشيي ما افتهم منه عقلي راح لغير عالم..

-اسم الله عليج حبيبتي شصاير وياچ.. مسرة ليش ترجفينن لا تخوفيني علييچ

رخت ايدي الحاضنته حسيت راح اوگع مفعول الحباية بده يبين، ذبيت روحي على صدره ومكمشة بقميصه ما اخلي يروح.. جرني يطلعني من الحمام ياخذني لغرفته گعدني على الچرباية مالته ومستمر يحچي ويايه..

-عيونج حمر ليش؟! مسرة شنو شاربة لا تخبلينييي

-من وراك

-شسويتي بروحج شمسووية

-وين چنت؟

-طالع چنت طالع

-رحت وياهة مو.. چنت ببيتها

-منو؟؟

-جولي

-ليش اروح لبيت جولي شنو المناسبة؟؟

-عزمتك على عشا

-وانتِ شمعرفج بهالشي؟

وخرني عنه يباوع بعيوني المطفية، تعبت ماكدرت اركز بعيونه ورجعت انام على صدره..

-احجي

-ما قبلت العزيمة مسرة ما رحت وياهة

-ليش

-لان ماريد اكسر گلبها وأاملها بشي مستحيل يصير

نهضت نفسي ارفع ايدي واتلمس وجهه، سألته بخفوت..

-ليش مستحيل؟

-لان..

-لان شنو

-لان گلبي ما جاي يدگ يم غيرچ

غمضت عيوني ويه جملته ونزلت دمعتي، سندت جبيني على خده استمع لباقي كلامه ونبرة الخذلان الي بصوته والجملة الخسفت گلبي ورنت بأذني وكل جزء من روحي..

-ردتچ سرور لأيامي شجاچ وصرتيلي حزن؟

-شُهيب

-اذيتيني بگدما چنت خايف عليچ ورايدچ مسرة

-ادري والله ادري

-مرة گلتيلي اليلعب بناري يتحمل حرگها.. شبيه احترگت منچ وما جاي اتوب؟

رفعت نفسي اله اواجه عيوني المطفية بعيونه الحزينة، تلمست خده بأناملي بهدوء وهمست بيني وبينه اكمل جلسة العتاب الما معروف تاليها..

-غصباً عني شُهيب كله صار غصب عني

-منو جابلي الاوراق بيوم عيد ميلادي مسرة؟

-اخ شُهيب

-ومنو دخلت وياي شريكة

-اني

-ومنو الچان عنده اتفاقيات سرية ويه روس كبار مثل سردار وصقر ريماس وغيره؟

-اووووف شُهيب

-ومنو قدمتلي عرض مغري تشتري اسهمي بالشركة قبل محاكمتي بأيام؟

-صدفة والله صدفة

-منو الرادت تطلگ؟ منو الي خربت حياتنا بحجة ماريد حياتك تدمر بسببي؟ منو الرفعت دعوة تشهير بسمعتها؟ منو الدزت ابوها حتى اطلگها؟

بقيت ساكتة ماعرف شنو اجاوب هزيت راسها يائسة وشُهيب باقي على گعدته يمثل هو بخير بس الكسرة الي بعيونه ميحتاج يسولف بيها..

-كرهتك

الكلمة الوحيدة الطلعت من حلگي، تغيرت نظرة عيونه للتفاجأ، بلعت ريگي وثبتت عيوني بعيونه وكملت بصوت خادر اثر الحبة..

-كرهتك، ونيتي ادمرك واوقعك على ديون وقروض واخليك تغرگ بيهن وتنسجن بسببهن، كل كلام مالك وتحذيراته الك حقيقية، اخوك چان يشوفني من زاوية اخرى زاوية ذكية بعيدة عن العاطفة، چان يگلك راح تدمرك وترجعك لنقطة الصفر وهذا الصار.. گلك نهياتك على ايد نفس البنية التحبها وچذبته وصدگتني بس هذا الصار!

ذبيت نفس متعب وفركت عيني البدت تغوش، اردفت بتعب شديد..

-كرهتكم كلكم انتَ واخوانك وابوك، وصل كرهي الك وحقدي ردت اكتلك بيدي الثنين ردت اسممك واخلص منك بس ما گدرت بكل مرة توصل بيها اريد ااذيك واتراجع بآخر لحظة.. بالبداية مچنت افهم سبب تأجيل انتقامي بس بعدين بديت استوعب ان اني.. احبك..

قويت نفسي وركزت بعيونه ما بعدتهن ولا ثانية وكملت بكل صدق..

-ماگدر ااذيك لاني احبك لدرجة لو گلت راسك يوجعك راسي يوجعني وياك.. ولو صارت نغزة ابرة بگلبك احس بكل أبر الدنيا تنغز بگلبي

اخذت ايده وحطيتها على صدري بمكان گلبي اخلي يحس بوجعي والحرورة التطلع منه، نزل عيونه يباوع لايدينا وكملت بنفس النبرة الدافية الصادقة..

-اني اسفة شُهيب، اسفة لاني اذيتك بگد حبي الك اسفة لان دمرت مستقبلك اسفة لان ما گدرت اوگف ابوية عند حده وامنعه يكمل الانتقام.. اسفة لاني اوجع گلبك بحبي بس شسوي عيوني انعمت عن كل زلم الدنيا ومتشوف غيرك اسفة لاني انسانة سيئة واحرگ كلشي حلو تلمسه ايدي..

رفع عيونه لوجهي يقراني، رفع ايده الثانية يمسح خدي من الدموع ما حسيت بروحي دا ابچي وكرهت نفسي لان بچيت گدامه.. درت وجهي عنه بسرعة امسح وجهي وعيوني ما قبل وجرني من ايدي يرجعني وياه..

-لا تديرين وجهچ عني

-اريد.. اريد ارجع للبيت اسفة اسفة

-على شنو تعتذرين؟ مسرة باعيلي خليني افتهم شبيچ

اطرافي كلها رخت ما احس بيهن وگعت بالگاع مهدود حيلي، لگفني بيده بسرعة وشالني يگعدني على الفراش وركض يجيبلي مي وجاب جنطتي يدور جهاز قياس السكر، الخلل مو من سكري من مفعول الحباية بس ما عارضت حتى ما احسسه..

چيك سكري شافه ممتاز ظل يذب حسرات حاير، جر جفني يفتح عيوني يشوفهن وهز راسه مأيس، فر بيده وظل يدردم عليَّ بالروسي حتى لغة ما افهمها..

-لا تظل تدردم احچي عدل

-غير افتهم شمصخمة بروحج شبيچ ما تگليلي شبييچ

-ليش تعيط عليَّ

-اي غير شگيتيني نصيين بنصاص الليالي

-احس زعلت

-زعلي! اني اريدج تزعلين

-اوكي

برطمت شفايفي استعد ابچي فتح عيونه مصدوم ما متوقع تصرفي وحقه ينصدم مو شخصيتي هاي ومادري شبيه گمت امسلت..

-لا عمي بطلنا منريدج تزعلين

-وانتَ؟

-شبيه اني

-ما زعلان

ذب حسرة جديدة وهمس "ااخ"، برطمت شفتي السفلية ابتسم على حركتي ومد ايده يمسح خدي بأبهامه، قربت خدي اكثر اتحسس لمسته كبرت ابتسامته ويه تصرفي وهمس بنبرة ماكرة..

-تدفعين اجار شقتي كل الفترة الفاتت ولج مسرة

-ها..؟

-وفلوس المحامي

-اءءء

-وانتِ السبب بأعادة محاكمتي وتقليص مدة سجني من عشرين سنة لثلاث سنوات

-هاي شمعرفك!

-الاطلس حچالي كلشي مسرات

-عزه بعيني هالاسباني ولا يگدر يلزم لسانه

-لا مو هيچ بس شاف علاقتنا والبرود المحتلها، حچالي اول يوم من بتنا ببيتهم وثاني يوم اجيتچ للفندق ردت اتفاهم وياچ وما انطيتيني مجال

-وليش ما حچيت بغير وقت؟ ليش انتظرت كل هالمدة؟

-توقعتج انتِ تجين تبرريلي، تدافعين عن نفسج، تنفخين روحج يمي وتبرزين عضلاتج بس ما اجيتي ولا گلتي انتِ السبب بكلشي

-ماعرفت شلون أفاتحك بالموضوع

-عرفت كل الصار تلفيق عليچ واستخدموا اسمچ ضدچ بالمحكمة

-والقران اييي

-بس فهمت هسة اكو بعد اسرار خافيتها عني

توترت من نظراته دفعته عني وگمت امشي للباب برجلين ترعش وحيل ماكو، انطيته ظهري ونطقت بصوت يرجف..

-اني راح.. اروح

-وين وين وين وين..

قبل لا اندار اواجهه حسيت بجسمي ينرفع من الگاع شُهيب شايلني، ايد جوه رجلي وذراع جوه ظهري، لف شعري بيده وجره من وره.. ضرب جبيني بجبينه وتنفس عطري غمضت عيوني عاجزة عن الكلام..

-حرگتي گلبي حرگ من شفت شعرچ ماكو

-گصيته من شفت شعرك ماكو

-هو شعر الرجال نفس شعر البنية؟ ازين ويطول بأسبوعين بس انتِ شلووون

-فدوة الك

-اااخ يابة

بلعت ريگ قوتي ماكو خفت افقد حيلي وماكدر اقاوم بعد وانام هنا، حسيت بي يبوس بوجهي وشعري وراسي.. تجرأت لمساته ماقبلت ولزمت ايده اهمس..

-مسرة: شُهيب ماحس بشي

-وهو المطلوب...

شهگت ويه حركته الجديدة وبعد ما حسيت بشي، فقدت عقلي وگلبي وجسمي كله سلمته اله.. عشت ليلة ما اتذكر منها غير گعدت الصبح حالي بالضيم، راسي يموتني من الوجع واللم بكل جزء من جسمي..

دورت على شُهيب ماهو بس اني متمددة بالفراش، گمت بسرعة بدلت وطلعت ادور عليه بالشقة سمعت صوت طگطگة جاي من المطبخ مديت راسي شفته واگف مفتح قميصه وشعره يقطر منه المي وديقطع طماطة.. خطف انفاسي منظره والله يرهم يكون وجه اعلاني يطلع شگاگي.. ما كدرت افوت هاللقطة وركضت لتلفوني جبته واخذتله الف صورة وفيديو وهو ميدري منطيني ظهره..

-شُهيب: خلصتي؟

-هههههههه لا تقتتل المتعة يا مسلم

-رجعنا لسالفة التصوير مسرات؟ شلون وياچ انتِ

-هوايتي هاي شهوبي تحملها

وگفت قريب منه اشوف شنو ديسويلنا ابتسمت من شفتها بيض وطماطة، جايب صمون عراقي حار ومسوي چاي الاجواء تخبل ناقصها بس ميوسة..

-شُهيب: لو ميوسة مو بالمدرسة اجيبها تاكل ويانه

-هاي شمعرفك دا افكر بيها

-صرت اعرف نظراتج شلون تتغير من تفكرين بيها تصير كلها حنية

-احبها

-واني احبها ام اليسكويم

ابتسمت مگزگزة وكعدت على ميز الطعام اكل فراولة، فصلت عنه افكر شنو خطوتنا التالية وقاطع افكاري صوته يگول بمشاكسة..

-ما اقبل وحدة حاقدة عليَّ تاكل من فراولاتي

ضحكت بصوت عالي ونزلت راسي، داعب انفي بأنفه ووكلني فراولة جديدة، باسني واردف..

-انتِ مو عندج ثار ويانه ليش گاعدة يمي ونايمة بفراشي مو عيب عليج

فتحت عيوني متفاجئة من جملته ضحك على ردة فعلي وباسني مرة ثانية يكمل..

-اجت تاخذ ثار امها من واحد طاح حظه بروسيا بتاريخ وفاتها

صفنت صفنة تسوه عمري، ضحك ضحكة عالية وعض خدي كم عضة فصلت عنه مصدومة هذا شمعرفه؟ البارحة ماتذكر ذكرت هالموضوع.. صدمني اكثر من كمل كلامه يسولفلي خطتي شنو ردت اسوي من اول ما دخلت عنده للشركة لهذا يومي..

يسولف واني فاكة عيوني وحلگي حتى صلة القرابة بيناتنا سولفها، يحچي تفاصيل مستحيل ويستحيل يگدر يكتشفها ومن سألته شلون عرفت صارحني ان اني سولفتله البارحة.. الحظ الاغبر طلعت خارطتله الاول والتالي واني ما حاسة على روحي..

صخمت ولطمت البارحة اعترفتله اعترافات تسحل كرامتي سحل، اعترفتله ان اني اعشقه وماگدر اعيش بدونه ولو يخيروني بين فلوسي وحياتي والدنيا كلها وبين شُهيب راح اختار شُهيب.. ضربت خدي من المفاجعة السويتها، غازلته غزل مو بس موجب 18 لا موجب 64 تخيلوو گتله كلمة "احبك" بكذا لغة وعدتها عليه فوگ الـ 73 مرة!! وزدتها بالخزي من گتلهّ لو بيدي ابوسك كلما تريد تحچي!!! ااااااخ يا گلبيي ااااخ..

شردت للغرفة من الفشلة لا يا مسرة راحت هيبتچ وراحت سمعتج بالحضيض، طلعت شريط حبوب المهدأة من جنطتي وكله كبيته بالتواليت وطاح حظني اذا اخذت بعد..

سبحت ورتبت نفسي وطلعت اتسحب من بيته مالي عين اواجهه، ركبت سيارتي وطلعت ودگ تلفوني برقمه، جاوبته بثقة مزيفة..

-ها شُهيب؟

-وين رحتي؟

-عندي شغل مهم

-شغل مهم لو شردتي

-لا لا شغل مهم يله باي احجي وياك بعد شوية

سديته قبل لا يجاوب، عضعضت اظافري واكلت ايدي اكل من الخجل شجااني وحچيت كلشي!! حتى اسباب عدم اعلان زواحنا گتله ابوية ميحبكم وميريدكم وجبرني اأذيك وووو كلشي كلشي ما خليت شي بنفسي وهسة شُهيب عرف كلشي وفضحت روحي فضيحة تسوه عمري..

من بعد هاليوم والصار بيناتنا ماگدر اگول رجعت علاقتنا طبيعية لان ما شفت شي من شُهيب، ثاني يوم اجه اخذ اجازة وگال عنده سفرة مهمة فتشت وراه وعرفت سفرته ويه ابوه وللاسف هذا چان المقابل الي قدمه شُهيب حتى يطلع من السجن قبل موعد افراجه بشهرين..

تدمرت من القهر شلون عيشة چان عايشها هناك لحتى ماتحمل ينتظر بعد شهرين وتنازل لابوه! طول بسفرته هاي وبديت اقلق عليه، عرفت سافروا لروسيا من خلال موزس وگلي شُهيب بخير بس نفسيته تعبانة لان راحوا لمكان.. وين هالمكان وشنو بي مادري، مجنت اعرف بوكتها راح لبيت تدريبه القديم وهاجت عنده الذكريات..

طلعت من الدوام وقررت اروح ازور ماريا واتطمن عليها، اشتريتلها حلويات وهدايا ورحت لبيتها، دگيت الباب وانفتحت بيدي ما مسدودة ولا مقفولة.. دخلت البيت وابتسمت من سمعت صوت الطرب يجي من غرفتها الفوگ جووي ماريا كللش جوي..

صعدتلها توقعت الگاهة تهز ويه الاغنية بس مچانت ترگص چانت صافنة بالفراغ ودموعها تجري.. خفت عليها ودخلت بسرعة اسأل بلهفة..

-مارياا

فزت ويه صوتي وعاطت تغطي وجهها وراسها تنزله لحضنها وتصيح..

-مو انييي مو انيييييي ما ردتت همه اخذووني والله اخذوونيي ماررريد انييي

-حبيبتي ماريا شبيچ شنو صاير وياچ

-موووو انييييييي

تصرخ بعلو صوتها وتبچي مثل الاطفال، فقدت بين ايدي منهارة اني اعرف تصير عدها انهيارات عصبية وشُهيب حاچيلي من قبل بس هاي اول مرة اشوفها.. دفعتني عنها وصاحت بخوف..

-همه خطفوني مسرة اخذوني من المدرسة لابسة صدرية جنت لابسة صدرية واخذووني هنااك

-ويين حبيبتي ووين

وگعت بالگاع ترفس بالحايط وتتگله مثل السمچة، فقدت اعصابي عليها طلعت تلفوني بسرعة اتصل بالاسعاف هي شافتني اريد اخابر انجنت شالت موبايلي وشمرته بالحايط كسرته..

-لا لا اصير حبابة فدوة والله اصير حبابة لا تخابريهم هاي گعدت عاقلة هنا عاقلة

گعدت على چربايتها تكتف ايدها مثل العاقلة بس دموعها عشرة عشرة كسرت گلبي نصين، رحت للمسجل طفيته ورحت اگعد يمها امسح بدموعها واوخر شعرها التهووس من وجهها..

-خالة ماريا شبيچ حبيبتي منو وياچ؟

مجاوبتني ولا اهتمت، لزمت ايدها واردفت..

-جبتلج حلويات وهدايا

-ماريد

-ليش؟

-اريد شهوبي

-شهوبي مسافر حبيبتي عنده شغل

-مسرة

-ها عيوني

-اخذوني وياهم مسرة

-منو حبيبتي؟

-زلم لابسين اسود خدروني واخذوني وياهم

انفزعت ويه كلامها وتحچي بجدية بعيدة عن لغة الأطفال المعتادة، وضعها وشكلها وكلامها هسة مال وحدة چبيرة بنفس عمرها..

-مسرة: شوكت هاي؟

-چان عمري 11 سنة

-وين اخذوچ؟

-اخذوني من المدرسة چان عندي امتحان احياء

-وين اخذوج حبيبتي؟

-مادري.. بالبداية مادري وين رحت طببوني بشاحنة چبيرة كلنا بنات صغار واخذونا لبيت

-اي؟

-اجه واحد عنده شوارب واختارني، بچيت هواي وتوسلت بي يعوفني ويرجعني لبيت عمي بس ما قبل

-ليش اختارج؟

-گلي انتِ حلوة وتفيدين، اخذني وياه لمكان كله رگص وريحته مطيبة ايع شفت زلم ونسوان ومكان يخوف اضويته خفيفة واكو بنات يركصون وفرحانات

گلبي گام يوجعني، هزيتلها راسي حتى تكمل ثبتت عيونها بعيوني وكالت وعيونها تصب دموع..

-سألني شنو اسمي گتله ماريا صاح لوحدة اسمها "روز" وشمرني عليها وگللها علميها.. اخذتني روز لغرفة وشگت الصدرية من جسمي صحت اضم بجسمي وابچي كتلتني وهلست شعري وضربت راسي بالحايط كم مرة حسيت راسي راد ينفجر وغبت عن الوعي

-وتالي؟؟

-گعدت من النوم شفت روحي بغرفة باردة واربع بنات ويايه، ماتذكر شنو صار بس اتذكر رجعتلي روز وشمرت عليَّ فستان احمر مخصر وگلتلي لبسي.. لبسته وظلت تباوع لجسمي سألتني..

-روز: انتِ متأكدة عمرج بس 11 سنة؟

-ماريا: اي

-روز: اشتعلو اهلج على هالجسم مال عشرينيات

ضربتني من وره وگالت لحگيني، رحت وراهة شافت شعر بيدي لزمتني هلستني بالشيرة ونظفتني بالكامل متت من البچي اتوسل بيها تعوفني ما قبلت وتكتلني كلما اصرخ..

سحلت بيه لنص قاعة الرقص يسموا ملهى ليلي، نزلت نفسها ونترت بأذني تهدد..

-راح تباوعيلهن وتتعلمين منهن اكتلچ وانتِ نايمة اذا ما تعلمتي بسرعة وشلعتي گلبي

-ماريا: رجعووني مااريد اخااف

-يله للج

شمرتني بين البنات الي يرگصن ومنفعلات والزلم يشمرون عليهن فلوس وهنه يزيدن، شفت نفسه ابو الشوارب اشرلي بيده رگصي وخزرني.. سويت مثل ما يردون وداخلي ميتة من الخوف والقهر.. بسرعة تعلمت من الخوف وصارو كل يوم يطلعوني ارگص اشكال حچي سمعت واشكال لمسات لمسوا جسمي واشكال دفعو لابو الشوارب رادو يشتروني وهو قافل..

حاولت اهرب كم مرة وبكل مرة انلزم واكل المقسوم يطيحون حظي بالكتل ويخلوني ارگص للصبح ما اكعد ولا استراح، بقيت على هذا الحال الى ان دخل واحد شاب للملهى.. انيق ومرتب بس شكله حزين گعد على طاولة وحده وشرب لحدما فقد وعيه على الطاولة..

ظل يكرر زياراته فترة البنات عجبهم لانه حلو ومرتب وجيبه ثگيل بس هو ما عبر وحدة منهن وما اهتم، وبيوم اني هستوني صاعدة المنصة بديت ارگص شفته گاعد وعيونه طافية راح يحچي ويه ابو الشوارب واشر بيده عليَّ..

دقيقة دقيقتين وصاحولي سحلوني لغرفة واجت صديقتي سوسن گالت..

-سوسن: الله يساعدج حبيبتي حتى الطفلة ما خلصت منهم

-ماريا: يعني شنو؟

-سوسن: اجه دورج تقدمين نفسچ الهم ماريا

ما فهمت قصدها، اني اعرف رؤوس اقلام بس محد يقبل يشرحلي بشكل دقيق روز چانت متقبل ولا ابو الشوارب چنت دائماً اسمعهم يگولون نضمها لصيدة چبيرة هو يبدي وبعدين ننطيها لغيره..

واجه هالصيدة الچبيرة وچان شمسون! ما انسى الصار بيه بهاي الليلة ولا انسى حنيته ولطافته ويايه.. حتى وهو طافي چان بس ما اذاني ولا كتلني.. انصدمت من العشته واني بعمر صغير بس نسيت كلشي من شمسون حط راسه بحضني وصار يبچي..

بچه بچي سنييين يبچي ويسولفلي على حب حياته الماتت وعافته، حچالي عن مرة اسمها اولغا ومن حديثه عنها عرفته حزين عليها.. حچالي حاول ينتحر اكثر من مرة بعد موتها بس مينجح بكل مرة يرجع للحياة وحار شنو يسوي حتى يرتاح من هالعذاب..

طلع مني شمسون يجر اذيال الخيبة وياه ما لحگت اتنفس واتقبل الصار ودخلو عليَّ واحد ثاني.. كتلني كتل شل جسمي وهيچ استمرت الليلة اشوف من الوجع والقهر.. من شافني ابو الشوارب غبت عن الوعي اكثر من مرة منع عني احد يدخلي وافتهمت شمسون دافعلي واشتراني منه ليش وشمعنى ماعرف بس هو الساعدني وتركوني بس على الرقص..

يوم بعد يوم حسيت بنفسي تلعب تعبت وصرت حتى ماكدر ارگص ادوخ واوگع واخاف احچي لاحد لا يكتلوني، بقيت على هذا الوضع الى ان بطني بده ينفخ ويكبر خفت وانرعبت صرت اللبس حزام اضبها لا يكتشفون بس ماكو شي ينخفي عنهم روز لگفتني وعرفت اني حامل..

فوراً اتصلوا بشمسون ما جاوب بقوا اشهر يحاولون يوصلوله اكيد راح يطالب بأبنه ويستفادون همه بس ما اهتم لبشر الى ان اجه يوم رجال اسمه سمير.. سمير اجه يقضي الليلة هنا واختارني من دون كل البنات قدموني اله ما اهتموا اني حامل ولا هو انتبه سكران وطافي..

بچيت وتوسلت بيهم يعفوني دگيت على راسي وخدودي منهارة بس محد اهتم، اخذوني لغرفته وبعد الصار صرت انزف بشكل مخيف وفقدت الوعي بين ايده، حاول يصحيني سمير بس ماكو فائدة ركض بيه للمستشفى بدون لا يحس عليه احد وعرضني على طبيبة..

گلتله اني حامل والطفل مهدد بالاسقاط تخبل وحار بيه، صحيت بس ما صحيت.. صحيت غير وحدة صحيت واحس نفسي بحلم وكأني بغير عالم باوعت لسمير وفصلت بوجهه...

-مسرة: وشصار بعدين؟؟؟

رجعت لوعيها تباوعلي ومبحلقة عيونها عليَّ، ضحكت وكممت فمها وهزت راسها بـ لا هزيتها من متونها صفنت وگالت بنبرة سريعة..

-شهوبي ميقبل اگلچ اني جبته بملهى ولا يقبل اگلچ هو ابن غير شرعي..

ويه جملتها هاي دخل اخر شخص تمنيته يدخل، دخل الغرفة شُهيب! دخل فاتح عيونه وراح لامه لزمها من ايدها وگال بنبرة متوترة..

-يمة يمة حبيبتي يممة رجعي وياي

-ماريا: ما ححيت شهوبي ما گلتلها اني گلتلها شُهيب ميقبل

-شُهيب: يممة

-انتَ زعلان؟ لا تزعل اني اسفة ماكول بعد ماكول مسرة انسي حبابة يله شوف نست والله

وجه شُهيب بعد ميتفسر گام ينطي اللوان وگصته انترست مي من الارتباك، يبلعم ووجهه انطعن ميعرف بعد شيسوي.. حضن امه يمسح على ظهرها وعيونه ما حطهن بعيوني ولا مرة..

اخذها وياه يطلعها مادري وين وبعد ما رجعلي، عرفته خجلان وميگدر يواجهني قررت اني اروحله، دورت على ماريا شفتها متمددة على القنفة وتباوع تلفزيون سألتها على شُهيب گالت كاعد بالحديقة..

باوعتله من الشباك شفته گاعد على المرجوحة بدون لا يهزها وبيده جگارة، طلعت اتمشى على كيفي بدون لا اخلي يحس عليَّ وگعدت بصفه بالمرجوحة.. اللتفت يباوع لجانبه الايسر ودار عيونه فوراً..

-هزهزنا شُهيب

بده يحرك بالمرجوحة على كيفه وللان ميحط عيونه عليَّ حتى بعد سفر دام لفترة طويلة، جريت زنده بين ايدي وحطيت راسي على كتفه اتنهد براحة، حسيت بي ينزل عيونه يباوعلي وبقى يتأملني واني هيج..

-لا تخجل من ماضي امك هموسي

-ما اخجل

-لعد شبيك

-اني اتألم

-سمير هو خالك الي رباك؟

-عرفتي منها سمير مو خالي

-بس انتَ تشوفه خالك

-بس حتى الناس متحس امي عايشة ويه رجال غريب گال عنها اخته واني ابن اخته

-ليش هيج سوه؟

-يگول هو السبب بحالة امي

-وصدگ هو السبب؟

-محد يگدر يعرف هالشي

-يجوز تراكم صدمات شُهيب

-اغلب الاطباء اتفقوا على هالسبب

-شلون سمير طلع امك من ذاك المكان؟

-اشتراها

-وانطوها بسهولة؟

-دفعلهم مبلغ محترم ليش ما ينطوها

-شلون ابوك اعترف بيك شُهيب؟ اسفة على سؤالي بس مستغربة

تحركت تفاحة ادم عنده دليل بلع ريگه، لمست ايده اخفف عنه نزل عيونه وصار يلعب بجكارته..

-سمير قنعه

-شلون؟

-طلب منه يسوي تحاليل ويتأكد

-وابوك سواهة؟

-اي بعد ست او سبع اشهر ياله اعترف بيه

-وشصار وراهة؟

-ولا شي مجرد صار عنده ابن حَسوم ثاني

-شنو معناة هالكلمة؟ هواي اسمعهم يكرروها عليكم

-ايام الحَسوم هي ايام النحس من السنة، ايام باردة كئيبة هواها يقلع الزرع من جذوره محد يحب هاي الايام والكل يتشائم منهن، الي يشتغل بيهن نهاية شغله خسارة، والي يتزوج بيهن نهايته طلاق والي تجيب بيهن يكون ابنها نحس وحظه تعيس، والصدفة لعبت دورها واني واخواني ثلاثتنا اجينا بنفس الشهر ونفس الايام

-وبدوا يصيحولكم أبناء الحَسَوم!

-بالضبط

-طاح حظهم شنو هالخرافات

-بعض الدول العربية يعترفون بيهن واصدقاء ابوية الكبار همه الي فطنوا ابوية وگلوله عندك ابناء حَسَوم

-وسمير؟

-شبي؟

-مات لو شنو؟

-مات اي

-چان زين؟

-كلش

-حبك مو؟

-واني حبيته

-واني احبك

شفت ابتسامة تنرسم على وجهه، بست خده خفيف وهمست بأذنه بنبرة مشاكسة..

-ميهمني اصلك شنو ولا ابوك منو انتَ شُهيبي وبس وطُز بالباقي

كبرت ابتسامته ونزل يبوس راسي، رفعت عيوني اله وهو نزلهن الي..

-اريد اطلب منك شي

-عيوني الچ

-اول شي فلوس اسهم الشركة مالتك بعدهن عندك؟

-اي ما صرفتهن

-اريد تكون شريكي بالشريكة

-شنو؟

-ابيعلك نسبة 60% من الشركة

-بس هاي اكبر من نسبتچ!

-وهو المطلوب

-ليش مسرة تبيعيلي اسهم شركتچ؟

-تعبت واحس مسؤولية دتاخد هواي من وقتي ومحتاجة هموس يعاوني

-مسرة!

-شبيك هو هذا السبب محتاجة تمدلي يد العون زوجي العزيز

-انتِ متأكدة؟

-مية بالمية

-مسرة اذا جاي تسوين هيچ بس حتى ا...

-لا! مو حتى ارجعلك الفقدته بس اني تعبانة اذا متشتريها انتَ راح ابيعها لواحد ثاني ويضيع تعبنا بيد الغريب

-لا تبيعيها لا

-تشتريها؟

-اي

-اييييي همزين من قبلت چنت حاطة ايدي على گلبي.. حياتييي فرحت هواي

حضنت زنده اعصره سعيدة، چذب لا تعبت ولا ناوية ابيعها لبشر بس هذا اقل شي اقدمه اله ارجعله نسبته بالشركة ومنصبه يعز عليَّ اشوفه حاير واحبه يكون متميز بشغله انطيته النسبة الاكبر لغاية وهو حتى الموظفين يشوفوا المسؤول الاول ويعاملوه على هذا الاساس، ثانياً لا تخلوني احمى زايد أساساً هو راح يشتري الاسهم بفلوسه يعني مو صدقة مني واروح اصدگ روحيي..

**

-جنات قميصي الرصاصي وين؟

-جنات: مادري

-مالك: اني متأكد كويته البارحة وين راح جنات عندي اجتماع ما يصير اتأخر

گمت اتأفأف ادور وياه بالحقيقة اني ضميته عناد بي ردت اضوجه بأي طريقة كانت وما اجه ببالي غير اضم قميصه الكواه البارحة.. عنده الف قميص غير هذا بس مالك من يرتب ستايل براسه لو يموت ميغير بعد هذا طبع مزعج عنده..

-مالك: راح اتأخر على ابووووية خررررب

-شبيك شبيك هسة واذا تأخرت على نعلون

-بس ي*** حظي

-اييييع شنو هالفشاير شبيك صاير بيئي مو عيب الطفل هنا!

-اسف بابا اسف حبيبي

باس رامي وهذا يضحك ميدري شكو، گام لابوه يچلب برجله ويجرجر ببنطرونه حتى يباوعله، نزل مالك عيونه عليه ورامي اشرله على الصالة..

-مالك: من ارجع حبيبي

اشر رامي على الصالة بعد يلح، ضحكت اتفرج عليه بعد رامي وراد شغلة فنك لو ما سويتها اله وهسة ديطلب من ابوه يرحون للصالة ويلعبون ختيلان مثل كل يوم..

-مالك: بعدين نلعب حبيبي وعد

-رامي: بابا

-مالك: والله وعد اول ما ارجع اللعب وياك للصبح

جر بنطرونه بعد بمعنى انطيني حلويات حتى ارضى، طلع من جيبه مصاصة وانطاهة اله كيف وراح يركض يفتح بيها ياكلها.. ابتسمت بحب اتأملهم هاي المصاصة متوگع من جيب مالك من تعرف على رامي لهذا اليوم، هو واناقته وكشخته وشخصيته ولو تفتح جيبه راح تلگه مصاصة بجيبه حتى ينطيها لابنه اول ميرجع للبيت..

رحت للغرفة الفوگ طلعت قميصه ونزلت انطي اله، ما سألني وينه لان يعرفني اني المخبيته اخذه مني ولبسه بسرعة، بقيت مبوزة عليه ضحك وخربط شعري..

-شبيچ شبيچ

-اكرهك

-جنات

-اربعة ايام مختفي! مالك اربعة ايام انتَ غايب شبييك متگلي وين تروح؟؟

-جنة

-وتريد تعدل علاقتنا ونرجع ويه بعض مو؟؟ تحلللم مالك تحلم اصيرلك زوجة وانتَ هذا وضعك يومية غايب واليذبح ميبلغني قبل بوقت فجأة يختفي!

-تصير سفرة مفاجأة مو بيدي

-خوش ميهمني! اليوم راجعة لبيت ماريا اني خلي يكون بعلمك

-عادي ابات وياكم

-لو تمووت ماكو منريدك!

-هااا هسة حتى حضني ما تردي حطيتي رامي بدالي!

-اي احط رامي احنه منريدك انتَ بس زايد عدد حاطي وجودك وعدمه وااحد! اكرررهك ماااالك

اخذت رامي وصعدت فوگ ميتة من القهر، وين جان بهاي الاربعة ايام راح اتخبل اسئله يگول مسافر ومن اگله وين ميجاوب دا اشك بي مل مني وراح تزوج عليَّ ويخاف يواجهني يجوز تزوج دارلان!!

ساعة اللوم بروحي واگول اني السبب اذا راح لغيري، اني لهذا اليوم ما رجعت علاقتنا طبيعية ماكدر مدا انسى العشته بدونه.. حملت وجبت وتعذبت وسمعت اشكاال حچي من ابوية وبنات عمي الحياية قسم منهن گالن الطفل مو ابن مالك وميريده وقسم گالن اني خنته وهو هجرني وقسم گالن شافله شوفة عشت المُر بغيابه ويرجعلي وره ما ابنه كبر ويحاول يزحف وحده؟ والله يستاهل اشلع گلبه مثلما شلع گلبي واذاني!

العصر اخذت رامي ورحت لبيت فاهد ماكو هالبشر مختفي لا يجينا ولا بعد سأل على رامي ومن اخابر كيان تگول وضعه مو تمام ونفسيته تعبانة بسبب كلام مالك فـ قررت احسن من وضعه واخذله رامي يشوفه..

دگيت الباب طلعتلي ام خالد دخلتني وگالت فاهد بغرفته اگدر اصعدله، عارضت اني اروحله وگلتلها انتظره هنا بالصالة، دقايق ونزل الابتسامة تارسة وجهه اخذ رامي من ايدي وصار يشمره بالهوا ويضحك على ضحكاته..

-فاهد: ولك ابن الگملة وينك عني انتَ وييين

-جنات: انتَ متزورنا عمو ليش گاطع بينا

-فاهد: وضعي مليوص گملة شسوي

-ليش شبيك؟

-ابوية رجع ومطيح حظ حظنا

-فاهد احلفك بروح امك مالك بعده يشتغل ويه ابوك ويسوي الي يريده؟

-تحلفيني بروح امي شنو هسة فد نعال هي وتحلفيني بيها

-جاوب ثؤالي بدون چذب لعد

-اي يشتغل وصاير يشتغل اضعاف قبل

-اااااخ يالقهر لللليش

-علمود ابنه مالك يخاف لا يقصر بشي وشمسون يطلع حرگته بـ رامي

-يمة ابنيي

-اي ومالك واگع بيها

-زين انتَ شبيك ويه مالك متحاچي ومخلي ميت من القهر؟

-خلينا هيچ جنات

-ليييش

-تشربين شي؟

-لا راح اروح اني

-ولج ما شبعت منه!

-تريده؟ تندل بيته تعال زورنا هناك

-يا نذلة تخليني امام الامر الواقع!

-اي لانك تثتااهل

-سم ومررض بت الزمال

-ديلا ولي ولي باااي

-نعععل مگطعة على ابنچ السلبوووح

طلعته وعفته يفشر ويغلط على روحه وعلى گلبه، ضحكت وطلعت للسايق گتله ينزلي عربانة رامي واتمشى بي قريب الحديقة العامة شوية وارجعه..

افتريت شوية واشتريت موطة الي ومصاصة اله و گعدت على المسطبة الحديقة فارغة تقريباً بس احنه وكم نفر متوزعين، رامي يسولف ويلهلج واني اللاعبه واسولف وياه وكأنه چبير ويفتهم عليَّ صديقي صار هالنتفة..

طلعت تلفوني وفتحت البرنامج مال قصص وبديت اكمل قصتي الصار اسبوع بيها كله من وره روري ميخليني اقره يظل الليل كله يبچي..

وبأثناء ما اني منسجمة بالاحداث ما حسيت على شي وفصلت عن العالم اقره واللتهم الحروف ماگدر اوگف، خف الحدث وهدأت نوعاً ما ذبيت نفس ورفعت عيوني اباوع لـ رامي بس ما لگيته! ما لگيت ابني!! طفرت من مكاني ادوره بعدني ما صحت اسمه وحسيت بواحد ورايه يحط وصلة على خشمي وبعد ما حسيت غير الظلام يحاوطني....

**

"كيان"

مزروعة يم الشباك هذا حالي لا البيه اتنازل واروح لبيته اتطمن عليه ولا البيه اهدأ واستقر بمكاني وانچب، فاهد هد حيلي ماعرف شسوي وياه گلبي نار عليه وبسببه معصبة ومشتاقة زعلانة وقلقانة مشاعر مخربطة عيشني هالبشر..

باوعت للساعة متأملة يجي اليوم وقاطع تأملاتي للساعة صوت طرق باب البيت، نزلت الدرج اريد افتحها وشفت شُهيب يگوم للباب وعيونه بالتلفون ديراسل احد والابتسامة من الاذن للاذن، ضحكت وياه على الواهس والفضول ياكل بيه اعرف منو الي يراسله وهيچ فرحان..

راح للباب يفتحها واني وگفت بنهاية الدرج مادة راسي اشوف منو، جمد جسمي وكلشي بيه من سمعت صوت مميز يگول..

-سلام

مديت راسي اتأكد من الدا اشوفه بس ما احتاجيت ظهر شُهيب الي تشنج بعد جملته التالية چانت كافية..

-فاهد: جبتلك كيلو برتقال

-شُهيب: فاهد

-فاهد: ها

-شُهيب: اجيت حتى تجيبلي برتقال؟

-فاهد: اي.. يعني اني اشتهيته وگلت يمكن انتَ هم مشتهي مثلي

-شُهيب: مشتهي

-فاهد: ههههههههههههههههههه لعد همزين اجيت

صعدت بسرعة قبل لا يفوت ويشوفني، مديت راسي من محجر الدرج اشوف شُهيب مصدوم بس مبتسم وفاهد دخل وبيده چيس برتقال، حطه على الطاولة وگعد على القنفة يريح ظهره..

-فاهد: بيت اخوانك خايس

-شُهيب: گاعد ببيتهم وتعيب عليه؟

-اي

ماعندي شك شُهيب هسة گلب عيونه وگعد على القنفة ما شفت وجهه بس حافظة حركاته..

-فاهد: احم

-شُهيب: احم

-فاهد: الله بالخير

-شُهيب: الله بالخير والعافية

-فاهد: شلونكم

-زينين

-بعد شلونكم

-بخير

-شلونهم اخوانك الخايسين؟

-استغفر الله فاهد

-اكرههم

-ما يهمني

-اموت منهم

-اي ليييش

-لانهم اخذوك من عدنا

لانت نبرة صوته وتغيرت بشكل ملحوظ، رخت اكتاف شُهيب يباوعله وفاهد ثبت عيونه على اخوه وبقوا صامتين لفترة قبل لا فاهد يگول..

-فاهد: راح اسويلك برتقالة

-تمام

-نص الك ونص الي زين؟

-خو سويلك وحدة ثانية

-لا اريد الك نص والي نص

-نفس قبل

-ههههههههههههه اي من نتشارك برتقالة مالك اني اخذ نص وانتَ نص

اخذ نص البرتقالة وانطه النص الثاني وگعدو ياكلوها، فاهد فرحان لدرجة احسه شوية ويطير بمكانه ظل كل شوية يسأل شُهيب..

-طيبة مو؟ طيبة؟؟

-شُهيب: عسل

-اي طبعاً من ايدي هاي

كملوا البرتقالة واصر يسويلهم وحدة جديدة وعلى هاي گعدتهم اكلو خمس برتقالات لا فاهد يتوقف ولا شُهيب يمنعه..

-فاهد

-ها

-شلونك؟

صفن فاهد بوجه شُهيب ثواني واللحقها بدقائق، صفن صفنة طويلة غابت بيها ابتسامته.. هز راسه بـ "لا" وجاوب بصوت مبحوح..

-مو بخير

-منو وياك فاهد؟

-الدنيا

-شسوت بيك

-لعبت بحالي

نزل عيونه وذب السچينة من ايده، ضم كفوف ايده ويه بعض وذب حسرة قوية يردف..

-خلتني احقد على اعز ثنين على گلبي، حاربتك وردت اكتلك اكثر من مرة

-بس ما سويتها ولا مرة

-عقلي يريد وگلبي يرفض

-ادري

-بكل مرة رفعت سلاح على وجهك ما خفت ولا انهزيت ما وخرت عن طريقي حتى واني شارب او متعاطي ما چنت تهتم

-لان اعرفك ما تسويها

سكت فاهد يباوع لعيون اخوه وشُهيب اردف بهدوء شديد..

-الچان يتختل من عيون الحراس حتى يجي ينام يمي بالبرد بره من اتعاقب ما اخاف واني انطي ظهري

-چنت اهددك واضرب طلق عليك شُهيب

-بس ولا وحدة لاحتني

-متعرف بيه بس بوخة

-ههههههههه اعرفك اعرفك

ضحك فاهد يفرك عيونه وشُهيب نزل راسه يباوع لتلفونه بعدما اجته رسالة جديدة، وفجأة ومن العدم گام فاهد من مكانه وباس راس شُهيب وحضنه بقوة..

تصلب جسم شُهيب ما متوقع هالحركة بس ما رده وبادله حضن اخوي حنون، وگفو على حيلهم وبقوا حاضنين بعض فوگ الخمس دقايق، فاهد مغمض عيونه يستشعر دفو اخوه وحنيته عليه وشُهيب نفس الحالة..

-فاهد: مشتاقلك

-شُهيب: مو بگدي خوية مو بگدي

-وراس مالك اموت عليك

-مالك شد راسه هسة من الچذب

ضحك فاهد وضحكت بالكتمة عزه بعينك فهيد طلعت هاي حچاية شُهيب وانتَ بايگهة منه، وخر فاهد من حضن اخو بس بقت ايده على متون شُهيب ابتسم وگال وعيونه تلمع..

-فاهد: يرحولك فدوة اخوانك الجرب

-اهووووووو فاهد

-الا اشگهم بس انطيني مجال

-فنك لو طخيتهم فهود اگعد راحة

-حاضر

-وهسة ولي عن وجهي شبعت منك

-بس اني ما شبعتتتتت

هجم على شُهيب يحضنه وما اكتفى شمر روحه شمر وچنگل رجليه يحاوط خصر شُهيب يخلي يشيله موتني من الضحك وشُهيب يرزل ويعيط عليه حتى ينزل..

-وللللك شثگللك اشتعلت اممك الغبرررة

-جرحت مشاعري العضروطية

-انززل فاهد خرب روح ابووك العار

-خ** على اخوانك عدى كيان كلكم ترحولها فدوة

-هو سوه بيها حالة نفسية وبعده يگول كيان

وخر عنه يوگف مقابيله وگال بجدية..

-مالي عين احاچيها تدري؟

-خلي حمرتك تفيدك

-ولك يا حمرتي وراس مالك لا رايحلها ولا شايفها

-وين چنت كل هالوقت؟

-مسجون

شهگت ضامة حلگي بيدي وفاتحة عيوني على وسعها، ممصدگة كلامه ولا متوقعة اسمع هيجي شي، اردف بنبرة ناصية كلش..

-انشگيت نصين شُهيب طيحو حظي اكو احد موصل الفلاش للشرطة ووگعت براسي الجريمة عفت كيان بدون لا انطيها خبر خفت اكون متورط صدگ وانزل من عينها واحلم اشوف اظفرها بعد بقيت بالع موس وساكت لحدما لزموا ناصر

-ناااصر السبب؟؟

-اي ناصر هذا الي توصلتله الشرطة، طلعوني ولهذا يومك خايف لا اتورط من جديد ماكدر اجازف بعلاقتنا اكثر وماكدر اشرحلها الوضع راح تشوفني مجرم حقيقي وتكرهني بالزايد.. بس احبها شُهيب وداعة سنين فراگنا ميت بيها ورايدها وماريد غيرها

-انتَ وكيان علاقتكم مـ....

-لا تكمل! احلفك بعزيزة گلبك لا تكمل وتكسر خاطري وگلبي اني بنية غير كيان مااريد ولو ابقى انتظرها العمر كله ولو اكبر واحد يتدخل ويصير بيناتنا ما اتنازل عنها حس بيه شُهيب حسس!!

-والحل؟

-الحل اشرحلها كلشي بس محتاج اتأكد من اخر بلية ورطها براسي شمسون اذا طلعت منها برائة فـ ما اعوف اختك لو تصلبوني مصلخخ

-مادري فاهد والله مادري

-ثق بيه والله ما يحتاج اگلك احطها بعيوني لان هي عيوني

-تمام تأكد من سالفتك ويه شمسون ورجعلي خبر

-لااا بشرررفك

-گتلك تأكد ما انطيتك شي اكيد

-خايبين كللللللللووووووش شااايف خير ومستاهلهااا شايف خييير ومستاااهلهاااا وللللج كووووورييييي

صرخت وياه مفزوعة اشوفه يركض يصعد الدرج يريد يجيني وشُهيب راح وراه يجره ينزله..

-ووولك مسوودن وييين

-مسووودن بيها اني ولك ارررريدهاا

-انزل انززل

-احب اختتك احبهاا يا ناااس يالكعبببة احبهااا ولج كوررري اموت عليج وشررف امي البرب***

-فاهد سيطر على اعصابك بس انتبه وياااي

-ها ها انتبهت

-شنو راح تسوي ويه ابوك؟ تبقى بهذا وضعك؟

-ها اي نسيت

-شنو نسيت؟

-نسيت اگلك شنو اريد

-اي شنو؟

-اريدك تساعدني ننهي شمسون.......

يتبع....

━━━━━━  ━━━━━━

وجت وجتتتت 🙊💋🔥🔥🔥🔥

#ابناء_الحسوم "شمسون"

بقلمي: زهراء السلامي ❤︎

لطفاً لتنسون التصويت + التعليق بين الفقرات + متابعة لحسابي 😍.

مُرّة كالقهوة..

لا يتحملني الا عاشقها 🤎

━━━━━━  ━━━━━━

-يلة شبااب اشتغلو بعد يومين عرسي

-نشوان: جاي نشتغل لعنة الله على ابليسك

-مروان: فااضل شبيك هو هيييچ يشيلون الطاوولة

-فاضل: جيب صخاام بعينك جيب خبيرين اعراس أي شي يشتغلون بمكاننا يا فگررر

-مروان: جايب

-نشوان، فاضل: نعمممم؟؟

-مروان: جبت بس خطية خوما كله يشتغلو عيب منهم

-نشوان: عيب منهم شنوو انتَ دافعلهم فلوس لو نوه؟؟

-صبا: مروان ذولة ليش محاربين الانسانية انتو ليش ماعدكم ضمير؟

-نشوان: فاكهة حياتي مو انشگينا نصين لو الانسانية يمنا وتخلص

-صبا: هاي شبيكم شباب اصلاً تحصلون اجر مو سيد؟ اجر لان راح تفرحونا

-فاضل: اجر واني اعرف راح ينگلب العرس ملهى؟ العياذ بالله من الخبث والخبائث استجير بالله من المشاركة في المعاصي

ضحكت وگعدت على الكرسي اشوف شغلهم خطية من الصبح شُهيب انطانه اجازة كلنا واجينا نرتب حديقة القاعة، حلم حياتي يكون عرسي بحديقة چبيرة واخييراً راح يتحقق هالحلم واتزوج من حب حياتي..

طلعت تلفوني اراسل الـ wedding planner اشوف شنو ناقص بعد، دقايق وحسيت بشخص يغطي عيوني من وره.. تلمست الايد وابتسمت ميزت ايديها الناعمة..

-ملااك

-ملاك: ههههههه هلو صبا

-صبا: گلتي متجين

-ملاك: معقولة تطلبيني وما اجي

-صبا: امممم راح اصدگ اي اي خوش

-ملاك: هسة گولي بشنو ترديني اساعد؟

-تعالي

اخذتها للكوشة اخذ رأيها، ملاك تعرفت عليها عن طريق فيروز الي للاسف رجعت للعراق صار فترة بس بقينا على تواصل، بأثناء ما اني وملاك نسولف ونقرر فزينا على صوت صياح جاي من جهة الولد..

-صبا: عزا بعيني مرواان

ركضت لجهتهم ما شافو ملاك من دخلت، نسيت وجودها وركضت اتطمن على مروان والقلق يدب بگلبي.. لگيته واگف كلشي مابي ونشوان وياه لازمين فاضل ثنينهم..

-صبا: شصااار

-مروان: وگعت طاولة الگزاز على رجلين فاضل وانكسرت

كممت فمي مقهورة اشوف الزجاج كل مكان وفاضل متأذي، جروا يگعدو على جهة ونزع شحاطته يشوف الگزاز ماكل رجليه وطاب بيها..

-نشوان: خرب حضك من شوكت تلبس شحااطة يا شحااطة

-فاضل: ااخخ مادري ولك داويني شوفلي چارة طلعلي الگزاز خرب

-نشوان: شصخملك يعني قابل اطلع الگزاز بسنوني

-فاضل: بخس الصديق نشوان بخسس

-نشوان: اگلك لا تظل تخسخس عليَّ ما افتهم هالمصطلحات گوم گوم اخذك للمستشفى احنه شكول اعراس احنه

-ملاك: بس انتَ هم تحتاج مستشفى

نطقت بصوت ناعم هادئ، اللتفتوا الولد ثلاثتهم عليها ونشوان فك عيونه هسة ياله استوعب وجودها وانتبه عليها هنا..

-نشوان: هااا

-ملاك: ايدك مجروحة

-نشوان: شني

-ملاك: ايدك.. شوف يطلع منها دم

تمط بالحچاية وناااازكة اني بنية وانسحل عليها ما اللوم فهاوة نشوان من يشوفها يظل يمتمت والحچاية متطلع من حلگه..

-مروان: اي نشوان صح كلامها ايدك مجروحة وجاي تذب دم

-نشوان: لا لا

-مروان: هو شنو لا لا ولك شوفها

-ملاك: اي انتبه عليها

-نشوان: فدوة الچ

صفنت ملاك وصفن فاضل وصفنت اني وصفنوا اهل القاعة والاهم صفن نشوان على حچايته وفتح عيونه..

-نشوان: اقصد فدوة الكم كلكم شبيكم لا تشخصنوها

مسح ايده بجاكيته ممهتم للدم واخذ فاضل وراد ياخذه وياه للمستشفى ورحنا كلنا وياهم ماعرف شعجب اجت ملاك ويانه بس لاحظت شي على هالبنية ابد ماعدها صديقات نهاائياً وفيروز صديقتها الوحيدة وصرت هسة اني صديقتها ماعرف شعجب..

رحنا للمستشفى يقطبون جروحهم ثنينهم ولا عبالك متأذين گضوها يضحكون وموتونا ضحك وياهم، راحت ملاك تجيب مي وظل نشوان يراقبها من بعيد..

-نشوان: يارب كل يوم توگع طاولة گزاز على رجلين فاضل بجاهك يا موسى بن جعفر

-فاضل: لييش ولكك

-نشوان: خايبين ما شفتوها شلون خايفة عليَّ؟ ولك راحت تجيبلي مااي

-فاضل: هنا من البراد راحت تجيب ما راحت تجيب من ايران

-نشوان: نفس الشي خوية المهم مهتمة، اگلك والعياذ بالله بس لا حرام اشرب الماي منها؟

-فاضل: نعم بي اشكال شرعي

-نشوان: لااااا سيد صدگ تحچي

-فاضل: للاسف

-نشوان: لييش قابل شنو راح يصير اذا شربت الماي؟؟

-فاضل: عزيزم راح تتولد عندك مشاعر محرمة وهذا حكم شرعي لو حتى بالامور الشرعية تريد تدخل وتغيرها؟

-نشوان: بالعباس الا اشرربه

-فاضل: اعوووذ بالله نشوان لا تنسى دينك ومبادئك مقابل شربة ماء من الحبيبة

-نشوان: هو مااي اشتعل عقلك

ضحك مروان يفر بيده واني ميتة ضحك وياه هذا فاضل ناصب على نشوان والفطير مصدگه، بقى حاير لحدما رجعت ملاك وبيدها كاسة مي قدمتها لنشوان بأبتسامة اخذها منها ايده ترجف وعيونه على فاضل..

-فاضل: بكيفك بعد هل تريد الجنة ام النار جونم؟

صفن نشوان على الكاسة فوگ الدقيقة وملاك تباوعلي وترجع تباوعله مستغربة..

-ملاك: تره ما حطيت بيها شي

-نشوان: هههه لا لا ههههههه هسة اشرب

-فاضل: استغفرالله لا قوة الا بالله اللهم احفظنا بحفظك واجرنا نار جهنم

وره جملته التخلي اكبر واحد يتردد تعال يا نشوان واشرب المي كله وباوع لفاضل بعين صلفة، ضحك فاضل بصوت عالي وكلنا ضحكنا وياه بينما نشوان ظل صافن فترة وراهة گال بأنزعاج..

-نشوان: ولكمم ناصبين عليَّ

-مروان: انتَ قشمر

-نشوان: چنت متأكد اكو شي غلط ومو مقنع بهذا الحكم

-مروان: ديلا يلا اني رايح ادفع فلوس المستشفى انتو تحضروا حتى نطلع

راح وبقينا ويه الولد، ملاك هادئة مثل اسمها بالضبط ونشوان گاعد ويحرگ بروحه يريد يحجي وياهة وماعنده الجرأة بس... بس صدمنا كلناا من گال بثقة وبشكل مختصر..

-نشوان: آنسة ملاك تسمحيلنا نزوركم اليوم بالبيت؟

-ملاك: اهلاً وسهلاً بس شنو المناسبة؟

-نشوان: اريد اخطبج

غص فاضل بالمي وملاك رفعت حواحبها ثنينهن مصدومة من سرعة الرد، ضميت حلگي متفاجأة بي انوب هو هم سكت وبعد ما حچى بقى يبحلق بعيونه عليها ووجهه صاير احمر..

-نشوان: اي هو يعني باعي امي.. اقصد مو امي مرت ابوية ماريا تعرفيها مو؟ اي هي شافتج وعجبتيها وهاي بعد هاي رادت تصير واني كلت خليني.. خليني استعجل ليش اماطل

-ملاك: هلا بيكم

-نشوان: يعني نجي؟؟

ابتسمت وتوردت خدوها نزلت عيونها ورجعت رفعتهن وهزت راسها بـ اي..

-نشوان: مستحيل! لا اكو شي غلط

-ملاك: ما فهمت؟

-نشوان: ليش ما صارت مشاكل؟ ليش ما عانينا؟ ليش ما رفضتيني وعفتيني اعيش الوجع والقهر؟ ليش ما انتظرنا سنين ياله صرنا لبعض؟

-ملاك: تريد هيچ يصير انتَ؟

-نشوان: لاا لااا اكيد لاا ولك فااضل وافقتت ولك وااافقت بسرعة واني صارلي سنينن اتلاطم وحدي لو حاچي من الاول چان هسة ابني بطوولي

-فاضل: ولك خزيتتا الله لا يخزيك

-نشوان: ملاك انتَ موافقة؟ موافقة؟؟ لو من اجي اخطبج ترفضيني حتى نكمل تخيلاتي؟؟

-ملاك: بكيفك تريدني ارفضك عادي

-نشوان: لاا شنو ترفضيني وين تلگين احسن مني تره انتِ الخسرانة هااا من هسة اگلچ والله ماكو احن من گلبي

-ملاك: طلعت نرجسي

-نشوان: نرجسي شنو؟ لا اني عراقي

ضحكت تغطي حلگها ودارت وجهها عنه، بدون لا تنتبه عليه صار يهز رگبته واكتافه ويطگ اصبعتين بالهوا فرحان..

-صبا: احم ملاك

توقف نشوان عن الرقص يسوي روحه ثگيل وهي اندارت تواجهني، اشرتلها نطلع سوه من غرفة الولد بس عبرنا باب غرفتهم ذبت نفس ملاك تهفي وجهها متوترة..

-ملاك: عزززه راح اموت صباا

-صبا: ههههه ليش ولج عززا فرحانة صرتي مرت حماية

-ملاك: توترت ماعرفت شنو أجاوبه طلعت من حلگي هلا بيكم والله لو ابوية يعرف يطيح حظي

-بس لا متردي وگلتيها لان استحيتي منه؟؟

-لا لا مو هيج.. شوفي اچذب اذا اگول احبه لان نادر نلتقي بس يعجبني وهو خوش رجال وابوية يمدح بي وبأخوانه من سألته عنهم

-الحمدلله لعد ليش خايفة من ابوج؟

-اخاف لا يعرف بينتله اني موافقة.. باعي قبل لا تجون تخطبون سووا روحكم متعرفوني ولا كأن اني وياچ صديقات تمام؟؟

-صبا: تمام فهمت هذا هو

ضحكت متحمسة وعيونها تلمع كل هالفرحة وتگول متحبه بس هاي فاهية متفرق بين الحب والإعجاب فرحتلهم وتمنيتلهم كل السعادة يتناسبون كلش هو فقير وخوش ولد وهي لطيفة وكلش خوش بنية واهم شي مايعة وساحلته سحلل..

**

"جنات"

فزيت على صوت رامي يبچي من بعيد، رفعت راسي من الگاع دايخة وثگيل بس جرت على روحي وگمت ادور اني وين؟؟ و ابني وينه وليش صوته بعيد عني؟؟

افتر بمكان يشبه الغرفة بس من ركزت بالحيطان انتبهت هذا كرڤان، اختلست خوف ركضت للباب افتح بيها متنفتح وصوت رامي يصرررخ فحط من البچي متت قهر وصرت اضرب بالباب واصيح يفتحولي..

-افتحوووو الباااااااب ابنيييي يبچي فتحوووهااااا

اضرب مثل المخبلة فجأة وخنس صوته انهاريت خوف شصار بي؟؟ شسووله لييش سكت رامي بهالطريقة؟؟ فقدت عقلي وقوتي دگيت الباب لحدما ايدي تزلغت وما فتحوها..

وگعت بالگاع انوح ماعرف شگد مر من الوقت واني ابچي وادعي وانخي منو يجي ببالي، دقايق اخرى مرت وفتحوا باب الكرفان عليَّ طفرت من مكاني اشوف منو دخلولي زلم ثنين ملثمين رگع گلبي بخوف بس تماسكت ومثلت القوة..

-جنات: منو انتو شتردون مني

حچى واحد بيهم بلغة البلد وقدملي ورقة وقلم جاف، تسائلت شنو هاي واشرلي حتى اقراها.. مكتوبة بالعربي مترجميها قريتها وانصدمت! هذا تنازل عام لكل املاكي لـ جعفر شمسون!

-جنات: لووو تموووتوننن

شمرت الورقة عليهم والقلم وثنينهم تقدموا عليَّ قيدو ايدي وكلمن شالني من جهة، صرت ادفر وارافس حتى يعوفوني بس ماكو فائدة، حنجرتي تشخطت من العياط ومحد بيهم اهتملي ولا نزلوني..

طلعوني من الكرفان وضرب جسمي هوا بارد، انتبهت لمكاننا احنه على الساحل الخوف اكلني وتأكدت نهايتي راح تكون هنا بهذا المكان المهجور المجهول..

دخلوني لكرفان ثاني وصوت رامي ماكو! ابني وين اخذو وشسووا بي!! اول ما فوتوني للكفران الجديد جمدت مصدومة من الشفته گبالي واحس بگلبي وگع بين رجليه، شهگت اصيح بأسمه وركضت عليه ودفعني الغبي بعيد عنه خازرني ويأشرلي اطلع بدون ما يطلع صوته..

-شمسون: شوفي راح اتكرم عليج واگلچ الچ حق تطلعين منا هسة بشرط توقعين الاوراق وتنطينا حلويات وياهة

-جنات: حلويات شنو

-شمسون بغمزة: فهمچ كفاية

عطت مفزوعة من وصاخته! وصلت بي المواصيل الي! اني بنت اخوو! من شاف اعتراضي واصراري ما اقبل بعرضه راح لابنه يحرگ بگلبي ويطلع غضبه وحقده بي..

دوى صوت الراشدي بالمكان مخلف صدى يلتهم الكرڤان الفارغ بينما هو بقى على وگفته مستسلم منتظر مَوته آمل يتخلص من هذا العذاب، سحبت ايده اتوسل وارجف بخوف بحياتي ما خفت مثل ما خايفة هسة احس گلبي راح يوگف بأي ثانية..

-امشي ويايه فدوة امشيي تريده يمووتك تره هذا مخبل امشي

-شمسون: تحبين تموتين وياه؟

بلعت ريگ اعصر عيوني ما طايقة اشوف وجهه، استجمعت قوتي وعطت بي..

-شنو من گلب علييك ولك حيوووان انتَ ماعندك مشاااعر ماعندك ضميرر؟؟

-شمسون: تطلعين لو تاكلين المقسوم وياه؟

جاوب ببرود حرگني وابتسامة مشاكسة مرسومة على ثغره، بنفس اللحظة دخلو زلم ثلاثة مقنعين واگفين ينتظرون اوامر منه، مسح شفايفه بأبهامه واشر بعيونه علينا..

بلا كلام اجو المقنعين دفعوني بخفة وجروا مالك مني لزموا من ايده يچتفوه ونزعوه قميصه، اطرافي نملت وراسي راح ينفجر حتى صوتي اختفى من شفتهم يعلگوا من ايده گدامي وبيدهم اسواط من الجلد..

-جنات: ولك حرررام عليك ونبي حرررام عوووفه يالكللللب يالخسيسس

-تطلعين؟ لو.. تاكلين.. المقسوم.. وياه..؟

حچاهه كلمة كلمة وهو ينزع حزامه، تخربط وضعي من صار يتقرب مني والحزام بيده، حاولت ما ابين خوفي بس رجليه خانتني انداريت عليه يعلگون بي ويعيط بيَّ بروح رايحة..

-مالك: طلللعي برررا لا تبقيييين هنااااا

-جنات: مارووح ماعوفك

-وللللج روووووحييييي

صوته يرج بالگرفان رررج اخذتني الرجفة وصرت اراوح بمكاني، منين ما ادير وجهي محاوطيني ناس مجرمين ماكو بگلوبهم رحمة، هزيت راسي بـ لا واخيراً سمحت لدموعي تتحرر..

-ماعوفك

تعب مني نزل راسه وايده معلگه فوگ ورجليه مثبتيهه بالگاع بأصفاد، شهگت بعياط من صارو يضربون بي گدام عيوني بچيت بچي مخابيل اتوسل بيهم يعوفو يضربون من دون رحمة ملخو جسمه وصدره وحتى وجهه ملامحه بعد متبين من الدماية والجروح..

-جنات: الا انتقمممم منكمممم يا كلاااااب ما اطلع بنت امييي اذا ما اخذت حقنا منكممم ولللك ارحم بحاله وشنو تريد انطيك

زدت بالبچي من سمعته يصيح بيه بصوت تعبان بس قوي خلى جسمي يقشعر...

-مالك: لااااااا ولجججج لاااااااااااا اموووتج وحق الله اموووتج انتِ مو تكرههينييي طلعيييي مناااا طلععععييي

-جنات: اذا انتَ حيوان ومتحس من يعذبوك اني احس ارحم بحالي

همستها بتعب بصعوبة طلعت الكلمات من فمي ووگعت بالگاع، رفعت انظاري على ابليس الگدامي بيده الحزام وينظرلي نظرات متوعدة، نزل ينگبص امامي قرب وجهه من وجهي وهمس بأبتسامة مشاكسة بيني وبينه بدون لا يخلي احد يسمع..

-انتِ تحبي؟

حركت راسي لا بحركات عشوائية، هز راسه اي وكبرت ابتسامته وهو يهمس..

-راح اموته تره

-موته

-گدام عيونچ؟

-بكيفك ميهمني

رفع نفسه عني واشرلهم يرجعون يضربوه بقوة اكبر واحد منهم شال سطل مي عرفت بي ملح بسبب شهگته من شمروه عليه ويرجعون يضربوه، انهاريت ركضت اللزم ايده واتوسل..

-انطيك التريده عموو بس عوفه ابوس ايددك عوفه كاافي راح يمووت هذا ابنننك

جاوبني بثقة وهو يطلع جگارة من جيبه وصوت مالك الديعذبوه يرج بالمكان..

-عندي ثنين غيره ما يهمني

-گتلك انطيك التريددده لا تصير مطييي

اللتفت عليه عيونه تجدح وابتسامة ماكرة مليئة بالمعاني الفاسدة نُحتت على وجهه، رفع ايده يأمرهم بشي فوراً واحد منهم شمر بيده علاگة، اخذها وطلع منها دشداشة بيضة شمرها عليه وگال بعجرفة..

-لبسي هاي وانتظريني بالكرفان الي بجانبنا فارغ ماكو احد

اخذتها من ايده والدموع ترست وجهي وعيوني ما اشوف شي كدامي بس اسمع صوت مالك حطم جدران الغرفة انشخط بلعومه راحت روحه ما گدرت ابقى زايد وطلعت ادخل بالكرفان الثاني وعيوني شخصت من المنظر الشفته..

-جنات: فاهد! شُهيب!!

-شُهيب بهمس: اششش

رجفت من شوفتهم هنا، شُهيب وفاهد كلمن لازم بأيده سلاحين ولابسين اسود من فوگ ليجوه وبوتات لونها اسود، خانتني قوتي وگعدت مگنبصة بالگاع..

-جنات: انتو هنا

-فاهد: جنات صوتح لا يطلع، رامي اخذناه وموجود بالسيارة ويه مسرة

بچيت اكثر مهضومة اغطي وجهي بأيدي الترجف، همست بضعف وروح رايحة..

-جنات: مالك.. مالك جوه راح يكتلو

-شُهيب: ما نسمحلهم

تقرب شُهيب يهدأني وعيونه تتطاير منا ومنا اصلاً ماعرف شلون دخلو ووين الحراس وشلون اجتازوا الكل وشلون شمسون ما حس عليهم بس مو مهم المهم اخوانه اجو يساعدوه! اخوانه اجو يسندوه وما عافوه وحده!

وگفت على جهة اسمعهم يتناقشون ويتفقون بس ما افهم لغتهم يحچون مغربي وروسي يخبطون وسرييع كلش، افتهمت من حركاتهم وحركة المسدس الي بيدهم راح يدخلون الكرڤان ويغافلوهم فجأة ويضربون على الحرس يوگعوهم..

-فاهد: تمام فهمت

-شُهيب: طللقة فاهد اريد سرعتك بسررعة الطلقة لا تنتظر تتنفس واضرب الثاني

-فاهد: انطي الخبز لخبازه

ضرب كتفه شُهيب يشجعه وامروني ابقى واگفة هنا ما اتحرك، توترت گمت اطگ سن بسن خوف ورهبة من منظرهم وتحضرهم للهجوم، اشر شُهيب لفاهد يمشي وراه بخطوات غير مسموعة..

چانت ثواني قبل لا شُهيب يضرب الباب برجله يدفرها ويدخل جوه وما سمعت بعد غير صوت صلي الرصاص واحد وره الثاني ولوهم ولية حتى صوت صرخة ما طلعت منهم محد بيهم لحگ يفتح حلگه او على الاقل يطلع السلاح من جيبه..

اختفت الاصوات انرعبت لا يكون صار بواحد من الولد شي ركضت امد عيوني من باب الكرفان وتصنمت جافلة من الگاع صايرة عبارة عن دم! دم مالك المتعذب ودم الحرس الخمسة الواگعين بالگاع فاقدين الوعي او ميتين ماعرف!

مالك بعده معلگ ومغمض عيونه وشمسون متبسمر بمكانه وفاتح عيونه على وسعها يقابل ولده الموجهين السلاح عليه..

-شمسون: ولدي؟

-فاهد: خ** على كلمة ولدي ابن الكلب!!

-شمسون: على كيفك بابا حبيبي لا تعصب

-شُهيب: تريد تكتل ابنك؟؟ وصلت بيك المواصيل تكتل ابنك من دمك ولحمك؟؟

-شمسون: يا هلا بـ نمري

-شُهيب: احنه ويين وانتَ وييين

-شمسون: هو صح كلامك، بس تردون الصراحة؟ اني مبهور بطريقة المداهمة والحركات الشگاگية الصارت عفية ولدي رفعتو راسي ما راحت فلوس تدريباتكم ب**ـة بالشط

-شُهيب: نزل الحزام من ايدك!

-شمسون: ليش؟ بس لا خايف اضربك بي مثل ايام قبل؟

سحب اقسام شُهيب من مسدسه وحطه براس شمسون، بقى صامد المجنون جعفر ولا انهز بالعكس استقبله بأبتسامة وهز راسه راضي..

-شمسون: احسنت

-فاهد: هذا ليش بعده يمسلتتت

-شمسون: چنت منتظر هذا اليوم

سكت يدور عيونه على ولده ثلاثتهم وباقي على ابتسامته، طلع صوت مزعج بحلگه وفر السبحة الجوزية البيده..

-شمسون: منتظر تعرفون الحقيقة وتتحالفون ضدي

-فاهد: حقيقة انتَ لعبت علينا؟؟ لعبت بمشاعرنا وخوتنا؟؟ وهمتنا وهددت مالك لحدما اخذت صحته وعافييته!

-شُهيب: انتَ سلبت حياتنا! سلبت حريتنا وشخصياتنا!! ولدك ماعدهم كلمة وشخصية وميگدرون يخطون خطوة مناا لهنا بسببك! لانك تهددهم بكلشي يحبوه! موقعهم على اتفاقياتت تدمر حاضرهم ومستقبلهمم مسويهم لعابات بيددك تتحكم بيهم!!

-شمسون: صحيح

نزل شُهيب السلاح من راس ابوه ورجعه لبنطرونه، توجه لـ مالك ممهتم لشي وفك القيود عن ايده ورجله وهنا اخيراً مالك فتح عيونه بس شكله ما واعي، حضنه شُهيب يسنده على جسمه وصاح بـ فاهد..

-فاهد جيب اغراضه وياك

تحرك فاهد فوراً ولم اغراض مالك المحطوطات على صفحة وفجأة ومن العدم رفع شمسون الحزام البيده وضرب وجه فاهد على جهة عينه، عطتت مخترعة ويه صوت فاهد العااالي ووگع على ركباته فوراً لازم مكان عينه فاقد توازنه..

-شمسون: هاي حتى كلما تشوف عينك تتذكر ابوك اليحبك فهدي

ثااار شُهيب متخبل، فشر وسب وغلط على ابوه وشمسون يضححك بصوت عالي منتعشة روحه، من القهر تمنيت اني اسحب المسدس واطشر راس هالسايكو واخلص العالم من شره بس ااااخ!

-شُهيب: فااهد!! فاااهد انتَ وياي؟؟ تسمعنني؟؟؟ شبيها عينك جاااوب ولك

-فاهد: مابيه.. مابيه شي

نهض من مكانه حاط ايده على عينه ميقبل يوخرها، اخذله صفنة توعد لابوه وعافه بدون لا يدافع عن نفسه وراح لمالك يسنده ويه شُهيب، مشوا وياهم كلمن لاف ايد مالك على كتفه ومشوه يطلعو من الكرفان تاركين شمسون وحده يضحك ويفر بسبحته..

-جنات: ماالك.. مالك تسمعنيي ماالك اصححى

اللزم بوجهه وامسح الدم عن عيونه وحلگه وراسه، ابعد شعره عن جبينه وبقيت اصيح بأسمه وابچي ميتة من الخوف روحي راحت ياله فتح عيونه وهمس..

-مالك: جنة

-ياا روووح جنتك ماالك

حضنته من رگبته ما اسيطر على نفسي نسيت العيب والفشلة ونسيت وجود اخوته ابچي واضحك فرحانة هو بخير ويسمعني، نزل ايده من اكتاف اخوته وبادلني حضن حاار ذاب ثقل جسمه عليَّ.. باسني على راسي ووجهي ويمسح على ظهري ويأن من الالم..

بقينا على هالحال ابچي اني وهو حاضنني، وخرني عنه يخلينا نتواجه طلعت كلينس من جيبي امسح الدم من وجهه وهو يمسح على خدودي يتطمن اني زينة لو لا بدون لا يحچي عرفت يريد يسأل عن رامي..

-جنات: رامي زين هو بره بأمان

حرك راسه وذب نفس مرتاح، دور عيونه يباوع لجوانبه وعگد حاجبه الميبين من الدم المغطي وجهه، تغيرت ملامحه من الحنية والحب الي للالم والحزن الهم..

-شُهيب: الحمدلله على السلامة

رقت ملامح مالك بطريقة تقهر، اندار لفاهد يشوفه ابتسم فاهد وضرب كتف مالك المشگگ من الجلد، ايد على عينه المتأذية وبالعين الثانية غمز وگال..

-عبالي ما نلحگ عليك ونلگاك مسلمها

-شُهيب: العار ما يموت

ضحكوا ثنينهم بينما مالك بقى ساكت ويدور عيونه بيناتهم، انفاسه تسارعت وعيونه لمع بيهن الدمع، بلع غصته وحچى بصعوبة..

-اخواني

-فاهد: نعم؟ خير؟

-مالك: جنات اخواني هنا لو اتخيل؟

-جنات بدموع: هنا همه والله هنا

ابتسم مالك ما مصدگ بقى هيج عين على شُهيب وعين على فاهد انخبص، ضحك بصوت متناسي اللمه وصاح منفعل..

-ولكم انتو هنااا

-فاهد: اگلك مالك لا تلح مالنا خلگك وعيني جاي تذب دم

ضحك مالك بهستيريا وطفر عليهم ثنينهم يحضنهم، ضحكوا وياه بسعادة وبادلو حضن اخوي دافي عيوني دمعت على فرحتهم وعلى حركاتهم كل شوية يوخر وجهه عنهم يباوع لوجوههم يتأكد ذولة همه لو يتخيل ويرجع يحضنهم..

-مالك: ما جاي اصدگ.. الحمدلله يا رب الحمدلله

-فاهد: اي بس بهالسوالف تتذكر ربك

-مالك: هههههههههه جنات شوفي اخواني ما عافوني شوفيهم اجونيي

هزيت راسي اوافقه ودموعي عشرة عشرة شگدما هو فرحان فرحانتله اضعااف، باس راسه شُهيب وفاهد وثنينهم بوسوه وباسوا ايده وكتفه حضنهم لصدره يمسح على شعرهم وما اسولف على فرحتهم والابتسامة المزينة وجههم كأنهم اطفال ورجعوا لحضن ابوهم..

سندوه من جديد ومشوا بأتجاه سيارة شُهيب، ركضت قبلهم اشوف رامي بيد مسرة وحاط اصبعها بحلگه يمص بي فتحت السيارة واخذته منها ابوس بي واحضنه وابچي محترگ گلبي شلون لهيت عنه وشلون خلال ثواني اخذو مني وما حسيت عليه..

-مسرة: جنات انتِ بخير؟ اذوچ؟؟ احد مد ايده عليج؟؟

-لا لا ما لحگو

انتبهنا لـ شُهيب وفاهد ساندين مالك ويتقربون من السيارة، طفرنا اني ومسرة بالكراسي الوره حتى ينيمون مالك بمكاننا، فتحوا السيارة ودخلوا وشُهيب اشرلي اني اجي اگعد يمه..

-مسرة: جيبي رامي وروحيله انتِ

هزيت راسي وانطيتها الطفل ورحعت لمكاني الاول بقت مسرة وره وفاهد گدام وشُهيب يسوق، حط مالك راسه بحضني عاصر عيونه متألم نزلت دموعي محروگة حرگ ومسحت وجهه بردن بلوزي، حس على حركتي ولزم معصم ايدي وابتسم يهمس..

-خايفة عليَّ

جاوبته بنفس الهمس حتى محد يسمعنا..

-ططوة غبي انتَ 

-لسانج لازم نرجع نشوفله حل

-فگر شلون تروحله برجليك شلوون

-هددني بـ رامي جنة رحتله واتفقت وياه وغدرني بآخر لحظة

-چان متت لو ما ملحگين عليك شُهيب وفاهد!

-بس ما متت واجوني اخواني

باس ايدي وابتسم بسعادة بادلته ابتسامة ودرت وجهي عنه اباوع للجامة و ابچي الرجفة بعدها بيه وروحي خارطة من الخوف..

-مالك: ولا ادري تخافين عليَّ هيج

-جنات: اششش كافي لا تلح

اللتفت شُهيب لـ مالك يتطمن عليه واني درت وجهي لرامي ومسرة اشوفهم ابني خانس يمها، لاعبت خده وابتسمت ويه همسة مسرة..

-مسرة: عليج الله مو يخبل؟

-جنات: اي يجنن حبيبي

-مسرة: ووولج

-جنات: ها شكو

-مسرة: حبيبج شنو شو متستحين صايرة رجلج بحضنج وعينج على رجلي

-جنات: عززا تقصدين شُهيب؟؟

-مسرة: ليش منو يخبل هنا غيره؟

-جنات: هههه عابتلج ضحكتيني ومالي نفث (نفس)

-مسرة: ضحكي حبيبي ضحكي الدنيا متسوه شبعنا من هالكلاوات المهم هموسي بخير وطُز بكلشي ثاني

-جنات: خرب روحج مثرة (مسرة)

ضحكت وباست رامي مگزگزة واعرف هالگزگزة لهموسها مو لرامي، بحياتي ما شفت وحدة معجبه ومكرشة وتحب زوجها مثل ما مسرة تحب شُهيب..

-شُهيب: فاهد شبيها عينك؟

-فاهد: زين من احد انتبه

-شُهيب: ولك منتبه بس مالك شتت افكاري شو وخر ايدك عن عينك اشوفها

-فاهد: ما ما

-شُهيب: ديلا يا فاهد

-فاهد: خلي مالك يفيدك ما

-مالك: شو اندارلي اشوفك

-فاهد: مـ...

-شُهيب: راح اللطمك على عينك الثانية واطفيهاا وخر ايدك اشووف

-فاهد: اووي صار عبصي

وخر ايده من عينه واندار النا شهكت رايحة روحي من المنظر!! فاهد عينه عبارة عن ددم عينه تنزف ددم وشخط شكبره بوجهه حافر خده حفرر!! من قوة الجرح والمنظر مالك طفر من مكانه مفزوع وجر وجه فاهد عليه وصاح..

-عيييينك فاااهد انتَ ما تحس بالوووجع؟؟؟

-فاهد: احس بس شسوي

-شُهيب: شلون هيج صار ما جاي افهم!!

-فاهد: ضربني خيسون بحزامه حسيت بالحديدة تطب بعيني وتشخط وجهي تحفره

-شُهيب: شنو هالحديدة؟ معقولة هاي كله من حزام!!

-فاهد: اذا هو يلبس حزام اعرض من الطووط لا تخلوني احچي واطشر العرض هناا

-مالك: اني سؤالي كله ليش ما كتلتو؟ توقعتكم راح تنهون عليه!

-شُهيب: اذا نكتله بسرعة نرحم بحاله ناوي اموته على البطيء نخلي يتمنى الموت

-فاهد: احححح لو تعرف شنو ناويله بس محتاجين وقت، مالك تعرف الگاع ما تريد عاريه وما راح يموت بسهولة لازم نطبخها على نار ناصية ونتأنى

وافقه الكل الرأي وتوجه شُهيب للمستشفى ما قبل مالك ينزل بس فاهد راح يشوف عينه احنه وصلونه للبيت، دخله شُهيب سانده يمشي واني ومسرة نمشي وراهم..

-جنات: شلون عرفتو الصار بينه واجيتو؟

-مسرة: سام

گالتها وضحكت صفنت ممفتهمة قصدها، گلبت شعرها كله على جهة وحدة وكملت..

-مسرة: واحد من الخطفچ يصير صديق سام وبلغه

-جنات: شوف الصدفة!!

-مسرة: مو صدفة لان جماعة سام كلهم حماية وحرس للمافيات الكبار وسام كفوء بشغله ويعرف المن يصادق حتى يعرف كلشي يحيطه ما مخلي واحد يعتب عليه وهذا السبب ابوية ميبدله بحرس الدنيا واني ما ابدل صديق وفي وذكي مثل سام..

-جنات: الحمدلله والشكر يارب وانتِ بلغتي شُهيب؟

-مسرة: اي بسرعة بلغته، حچى لفاهد وفوراً عرفوا الموضوع متعلق بمالك وصلنا للمكان وكأنهم يعرفون ومتأكدين وين راح تتواجدون

حضنتها ممتنة بادلتني الحضن ورامي راح يشرد يلعب بالصالة، گعدتها بالصالة علما اشوف مالك وشُهيب دخلوا لغرفتنا..

-شُهيب: انزلك على الفراش؟

-مالك: لا كلني دم

-ميخالف ما تگدر تمشي عدل

-لا جنات ما تحب ريحة الدم گعدني على الكرسي

ابتسمت بحب احط ايدي على گلبي، حط شُهيب كوشة وره الكرسي وگعده على كيف، وگف يتأكد من راحة اخوه وراح جاب طاولة وحطها گباله نزل ينزعه حذائه وجواريبه وشال رجليه يحطهن على الطاولة.. عيون مالك ما نزلت منه من بعيد دا اشوف لمعتهن وكمية الفرحة الي بوجهه تتسولف..

-شُهيب: مرتاح؟ تريدني اساعدك تسبح؟

-مالك: لا شكراً

-شُهيب: اني رايح للمستشفى اشوف فاهد وارجعلك أي شي تحتاجه بلغ جنات تتصل بيه واني اجيك

هز راسه مالك بدون لا يبتسم باقي بس صافن عليه، رفع شُهيب خصلات شعره النزلت على عيونه واللتفت يريد يطلع واستوقفه مالك، اندار لاخوه يشوف شنو يريد ونهض نفسه مالك من الكرسي ووگف على حيله يتمشى ناحية شُهيب..

بقوا واحد يباوع بوجه الثاني بدون لا يحچون بس نظرات عيون مالك تحچي وتفسر، تفسر اعتذار وندم، اللم وحرمان سنين، تعب وعذاب.. نزل راسه يمسح عيونه الدمعت بأصابعه المنتهية ولزم ايده شُهيب يمنعه، رجع مالك يرفع عيونه يسمح لدموعه تنزل وهز راسه بـ "لا".. ثواني وانتبهت لاكتاف شُهيب تنحني وتهتز، طلعت صوت شهگة قوية منه وشمر نفسه يحضن اخوه..

حضنه مالك بقوة يبچي محترگ گلبه وشُهيب يبچي ويضرب على ظهر مالك من وره ويحچي شي، يحچي كلام مفهوم وما مفهوم مكسور خاطره وگلبه، اوتاره الصوتية مليئة بالخذلان وكلامه يهد جبال من العتاب، نزلت دمعتي من قوة قبضة ايده يضرب على ظهر مالك ويگول بنبرة اخ محروم..

-شُهيب: شلون عفتني هناك وحددي شلوون

-مالك: غصباً عني والله جبروني يا خوية

-شُهيب: انكسر ظهري بغيابكم الغريب والقريب يتشمت بيه

وخره مالك من حضنه يلزم وجه شُهيب بثنين ايده، باس جبينه بوسة مطولة وباس خدوده ومسح على شعره من وره يثبت عيونه بعيون اخوه، حچى بحرگة وروح شايطة..

-مالك: وروحها لأمي يا شُهيب وروحها الغالية ما تركتك وحدك احلفلك براس ابني راقبتك وچنت امشي وراك على الدعسة خايف عليك من ابوك ومن الدنيا ما تركتك ولا لحظة حتى وانتَ نايم ببيتك چنت اتأكد انتَ مرتاح لو لا

-الجواسيس الالگفهم يمشون ورايه ويدخلون الشركة منك؟؟

-اي مني اي

-عبالي مال ابوك واني أشوفهم محد بيهم اذاني او حاول يعترض طريقي

-بكل عثرة چنت وياك وكل سفرة، كل كسرة وكل اللم چنت واگف وراك يا خوية وما تركتك حلم صار اروحلك واحضنك واطبطب على ظهرك بس هالحلم حوله ابوك لكابوس

حضنه شُهيب من جديد وطول عتابهم، طول كلامهم وحديثهم اللتفتت شفت مسرة واگفة وراية تتابع وحاطة ايدها على صدرها متأثرة..

-شُهيب: رغم الصار بيناتنا والعشته بفراگكم والذل العشته بس ما كرهتكم، اول مرة اعترف اني چذاب! چذبت بكل مرة گلت اكرهك وماريد اشوفك چذبت بكل مرة انطيتك ظهري واني گلبي يريد يطلع من صدري من الشوق واللهفة.. گمت اتمنى ننجمع بأي مهمة من ابوك حتى نلتقي واشوف وجهك واشم ريحتك يا مَلك

-مالك: يا حبيبي

رجعوا تحاضنو من جديد وكأنهم ديعوضون كل لحظة انحرموا بيها من بعض، تركتهم وحدهم يكملون كلامهم وركضنا اني ومسرة لـ رامي الصعد الدرج ويريد يذب روحه منه..

-مسرة: ولج هذا شگد وكح

-جنات: جده شمسون وامه جنات وعمه فاهد شنتوقعه يطلع

ضحكت تأيدني واخذته من ايدي ميقبل يتصارع وياهة ميريد احد يشيله مجرد خزرته شو هذا ابني سكت وابتسملها يبوس خدها يتلوگ وخايف..

-مسرة: لا فاهي طلعت بخزرة تتأثر

-جنات: ما متعود على النظرات العنيفة

بوسته وراضته ونيمته بحضنها ومن گدما انخلس غفى، سولفنا وسألتني كم مرة على وضعي وحلفتني تاخذ رامي وياهة حتى ابقى ويه مالك وميزعجه بس اعرفه يريد ابنه ويشتاقله احنه متمالخين ودگ معاير واحد للثاني وبس يجي رامي نسكت ونگعد نلعب وياه ثنينا..

-جنات: انتِ وشُهيب شلونكم عرفت من كيان رجعت علاقتكم

وردت خدودها خجلانة! مسرة خجلت! مو قصدي ابالغ بس حقيقةً هاي اول مرة اشوفها خجلانة ومستحية من شي، لعبت بطرف جاكيتها وگالت وعيونها تلمع سعادة..

-احنه كلش زينين

-على الخيير كلش فرحتلكم والله

-شهوبي يريد يخطبني من ابوية مرة ثانية صح بعدنا متزوجين بس هو يريد يسوي كلشي بالعلن وگدام الناس

-وابوچ راح يوافق؟

-لحد الان هو معارض بس نهايته يوافق حتى يحافظ على علاقتي بي راح يقبل ويقتنع

-وبنتچ؟

-ميوسة عندي اكيد وشُهيب من هسة بده يدور على بيت اكبر يناسبنا خطية متحمس اكثر مني ومنتظر يوم يوم على جمعتنا

-والكعبة متت فرح هاي الاخبار الحلووة

فرحت على فرحتي وطلعت هي وشُهيب واني فتت لغرفتنا شفت مالك ينزع بقميصه المتمزق، ركضت حطيت رامي بچربايته ورحت لمالك اساعده گال يريد يسبح گومته اسنده على ايدي امشي للحمام وگعدته على باية البانيو ركضت للصالة جبت كرسي ورجعت احطه بنص الحمام حتى يگعد وميتعب..

-مالك: هاي شنو

-جنات: اشش لا تحچي

-مالك: تردين تسبحيني ولچ جنة

-جنات: والزهرة ابطل وارجع لابنك

-مالك: لا لا سكتت تعالي ماكدر اسبح وحدي

-لانك ططوة

ضحك وعفس خشمي، ابتسمت وياه من همس "ططة" اعرفه يسويها بالعمدني تعود وعرف شلون اگولها صح وتعلمها بس يحب يستفزني ويگولها "ططة"..

درت مي عليه واشوف گاع الحمام صارت عبارة عن نهر احمر من الدم، ما حسيت على روحي واني ابچي گلبي متگطع من كمية الجروح الي بجسمه لحمه محفور حفر وكلما احط مي عليه تشوغ روحه..

تلمس وجهي يمسح الدموع من وجهي بلل خدي بأيده المبللة، نزلت وجهي ابچي من كل گلبي ميتة من جوه گلبي ينزف احس الوجع بروحي اتذكر شلون شمسون ساومني بشرفي واملاكي حتى ميكتل مالك ورامي وازيد بالبجي..

-لا تبچين جنتي

-امانة خلينا نروح للمثتشفي

-لا حبيبي متعود اداوي جروحي

مسحت وجهي وغسلته بلكت النار الي بگلبي تهدأ، كمل سبح وجبتله مناشف اغطي جسمه ونيمته على الفراش، المنشفة تنگعت بدمه شعوطني وميقبل يروح دكتور..

ركضت اجيب علبة الاسعافات الاولية ورجعت اقطب جروحه واداويهن، شفت بالعلبة حتى ابر بنج عنده انصدمت وما توقعت اشوف هيجي شي..

-هاي شنو مالك؟

-من احتاج اخيط اخذ نسبة بنج موضعي

-شلون تركز وانتَ متخدر؟

-يجي فاهد يخيطلي الجرح

ما جاوبت وكملت اللف بجروحه وهو هادئ واحس بعيونه عليَّ، ذبيت حسرة وجعتني ويه ما لمست الجرح الي بصدره محفور حفر حتى اللحم طالع.. لزم ايدي ثنينهن يمنعني اكمل وجرهم لشفايفه يبوسهن..

-اذا ما تگدرين عوفي اني اكمل

-لو مخلص عليك شلون بيه

-بس ما خلص! انتِ شلون ورحتي تردين تسلمين نفسج الهم؟

-منو الهم؟

زفر نفس متألم من سؤالي، هسة ياله استوعبت وطخت الفكرة براسي شمسون مو هو الراد يعتدي عليَّ راد يخلي حمايته يكملون الموضوع! قشعر جسمي واخذتني الرجفة جسمي صار يهتز واحس عيوني تطلع منها نار، لمني مالك بحضنه وحط راسي على صدره يمسح عليه..

-چنت اريده يعوفك سويتها بس حتى يعوفك وما يموتك مالك

-عيون وروح مالك حذرتچ ما تخطين أي خطوة لخاطر بشر تحطين رامي ونفسج قبل الكل! گتلج لو تشوفيهم ينحروني كدامج لا تتنازلين وتقدميلهم نفسج جناات!

يحچي ويرجف رجيف عصبية وغيرة، حضنته اكثر اهز براسي اي..

-وعد ما اعيدها والله ما راح اعيدها بعد اهده فدوة

-تعرفين شصار بيه من تنازلتي وردتي ترحين؟ تعرفين بشنو حسيت جنات؟؟ تمنيت اموت وما اگعد بعد اخذتي روحي وطلعتي من الكرفان وحققق الله

-اثفة والله اثفة

بست خده اعتذر منه واضم وجهي بصدره مقهورة وكارهة نفسي لان ما فكرت زين وردت اتنازل بس عقل ما ظل براسي من شفته بهالحال كل عقلي راح يعوفه ويحن عليَّ ويعوفني من اذكره اني بنت اخوه..

-خلص حبيبتي لا تبچين وتحرگين بگلبي

هدأت امسح دموعي وبقيت على هالحال حاطة راسي على صدره ومتناسية كلشي فات بيناتنة، كل تعب عشته والم فراق كل اذية نسيتها وراحت من بالي ماريد شي غير هو وابنه يكونون بخير ونعيش بسعادة ابدية..

-ليش حرمتيني منچ كل هالفترة جنة

طلعني من تفكيري وصفنتي صوته الهادئ، رفعت راسي اخلي وجهي يوازي وجهه، رفعت حاجبي وجاوبته بجدية..

-مثلما انتَ حرمتني وحرمت ابنك منك كل الفترة الفاتت

-ههههههههه

-شو تضحك؟

-صلفةة ماگدرلچ

-والله عشتو هو يعوفني ويروح يثرح ويمرح ويه دارلان المشگگة وعايفني اطلگ بأبنه وحدي

-لا تچذبين ما طلگتي

-المهم جبت!

-صحيح، وجبتيلنا احلى ملاك

دار وجهه على فراش رامي النايم بي وابتسم يتأمله، تنهدت بحب اباوع للعنون شلون نايم ومرتاح وما رجعني للواقع الا بوسة مالك السريعة..

-يا عاااار

-هم غلطتي؟؟ تعالي ووولچ

-لا لاا التوبة التوبة اثفة مااعيدهاا

-الا اشلع لسانج ياله تنعدلين

-امشي لللك فگوور اني اشلع لثاانك

هجم عليَّ يكتل بيه بالشقه ويتحارش ياخذ حقه عطت بكتمة لا يگعد رامي ويخترع ورغم وضع مالك المأساوي والضيم الهو بي صار مثل الحصان يمي ولا كأنه قبل شوية طلع من الموت...

عشنا احلى واهدأ يومين، مالك وضعه تحسن نوعاً ما واني اهتميت ببيتي وبي وبـ رامي، عجبني اغير اثاث البيت واسوي كله وردي ومالك صار يلطم بالهندي..

-مالك: وردي؟؟؟

-جنات: شبيك والله كيوت

-مالك: جنااات بس لا هاي تمهيدات لشيي غير متوقع

-قصدك اكون حامل ببنية؟

-خررررب حظي لا تگوليهاا لا تگوووليها

-لا شبيك شلحگ احمل بث يمكن اطلع حامل شمعرفك

-اششش والله اكلب الدنيااا شنوو بزوون وما يفيد وياچ شيي

-يوووه هثة شبيك قابل صدگ حامل وخبصت روحك

عفته ورحت للغرفة اللطم نسيت اخذ الحبة البارحة وحاطة ايدي على گلبي، دعيت ما احمل وبدلت بسرعة اتجهز لعرس صبا ومروان وطلعت للصالة اشوف مالك ورامي يلعبون ركيضان بالبيت متت من الضحك على اشكالهم مالك يركض على كيف ورامي لازم چفچير خشب مادري منين جابه ويلحگه بي يريد يكتله..

تعثرت رجلين مالك بالطاولة وراد يوگع ورامي قلد ابوه وسوه نفس الحركة ميت من الضحك والوناسة لدرجة گعد بالگاع يضحك والچفچير بيده..

-جنات: ها عيني يله كافي لعب خلونه نطلع

-مالك: اجينا حبي

شال رامي باس خده ورامي رجعله البوسة، رفع مالك ايده يسويله طگها ورامي يطگها فرحان، يمكن هالصغيرون يحب ابوه اكثر مني لانه من يكون وياه ميبطل ضحك وفرح ولعب متعلق بمالك تعلق فضييع ومالك نفس الشي، اباوعله واگول بگلبي هذا نفسه الرجال الچان خايف يصير اب ويجيله طفل لا يظلمه؟ سبحان الله..

طلعنا متوجهين لعرس صبا ومروان الاجواء خيالية!! انبهرت بجمال صبا بالبدلة البيضة المحتشمة اختارت بدلة بيها ردان ورقبة عالية اكيد بطلب من مروان حاسة ما ظل شي ويقنعها بالحجاب، طالعة تجنن بكل ما تعنيه الكلمة وكلشي چان مثل الافلام بجماله والحب الواضح بعيونها وعيون مروان ينحچي بي لسنييين عديدة..

مسرة وشُهيب اجو والحب ينفض منهم وكيان اجت وياهم، دورت على فاهد وسألت مالك عنه گال ما راح يجي بسبب عينه المتضررة بعده ما متقبل الجرح الي بوجهه وعينه الي انضربت ميتة قهر عليه ومالك متأذي على اخوه وعجز خلال هاليومين يقنعه شكله حلو وما مأثر عليه.. عن نفسي اشوفه احلى من قبل منطي الجرح شكل جذاب لا ارادي تبقى تباوعله، استغفر الله استغفر الله العياذ بالله من الخبث والخبائث..

ابتسمت من شفت لارا وهارون يتقدمون علينا، صار فترة ما شايفيها واستغربت من شفت بطنها كبرانة شوية.. تسالمنا وياهة ومثل عادتها لارا تضحك وفرحانة وسعيدة وبدون أي مقدمات حطت ايدها على بطنها وگالت بفرحة وصوت عالي..

-ولجن بناات بنااات اني حااامل

-كيان: الففف مبرووك تستاهلووون

-جنات: مبروووك شكد فررحت ياربيي

-لارا: ايي دخلت بشهر الخامس بس ما گلت الا نتشاوف وجه بوجه، تخيلن هارون طااار من الفرح من عرف ولجن اول مرة اشوفه هيجي فرحان حتى تعامله ويايه تغيرر

-كيان: سعيدة كلش بهالشي، ما عرفتي جنس الطفل؟

-لارا: عرفت عرفتت راح اصير ام ضيغم

فرحنالها اضعاف خصوصاً من عرفنا هارون من چان مراهق متمني يكون عنده ولده ويريد يسمي ضيغم وكلنا شفنا والفرحة والسعادة بعيونه من باركنالهم، عكست عينه على كيان البقت تحجي ويه لارا بحماس وتسألها عن حملها وشفت نظراته لصديقتي..

ابتسم يباوعلهن وما عرفت شنو نوع هالابتسامة هل هي سعادة ام حسرة؟ بدون مبالغة بس هذا الدا اشوفه هارون ما شال عيونه من كيان الحفلة كلها ولارا ما منتبهة او يمكن انتبهت وما اهتمت المهم هارون صار الها وهسة هي حامل وصراحة ما اتمنالها غير السعادة..

خلص العرس اللطيف على خير وقبل لا نطلع من حديقة القاعة اجه شُهيب وطلب من مالك يروح وياه لبيت ابو ملاك تسائلنا ليش وفاجأنا من گال يردون يرحون يخطبوها لـ نشوان..

-مالك: اليوم؟؟

-شُهيب: اي احنه ردنا مروان يكون ويانه بس تعرف ابوها مو فارغ وما يتواجد هواي وبس اليوم بالليل عنده وقت فراغ مروان طلب مني اروح وياه واخذ واحد شخصية وياي

-مالك: ههههههه صرت شخصية

-شُهيب: مالك لخاطر الله اذا انتَ مو شخصية منو شخصية فاضل

-فاضل: رحم الله والديك

-شُهيب: هههههه اتشاقه سيد عمي انتَ تاج وباج

-فاضل: لا لا هسة صار مالك بدالي عادي هي هاي غدرة الصحبان معروفة

-مالك: منو گدك وگد اهلك سيد معروفين انتو جيوبكم ثگيلة

غمزله وضحك وفاضل هم ضحك يدردم عليه بالفارسي، طلعوا كلهم بدلنا ببيوتنا بسرعة ورحنا لبيت ملاك مسرة ما گدرت تجي فـ رحنا اني وكيان ومالك وشُهيب ونشوان وفاضل.. استقبلنا ابوها والخدم العدهم ما شاء الله ناس كلش متمكنين وواضح الترف عليهم..

گعدنا شوية ودخلت ملاك تقدم الضيافة مبدلة ملابس العرس ولابسة سوت لونه بيجي وشال ما حاطة نقطة مكياج وتضوي ما شاء الله، گعدت ويانه البنات وكيان تبادلت وياهة اطراف الحديث عرفت هنه مو كلش قريبات على بعض بس كالعادة اني وكيان منو نشوفها نصادقها صرنا صديقات بسرعة وتبادلنا حسابات بعض..

-ابو ملاك: اهلاً وسهلاً بيكم شباب، مسيو مالك، مسيو شُهيب شرفتونا وأنرتو

لابو فاضل ونشوان بمكانهم وبما ان احنه كاعدات قريب عليهم سمعت فاضل يبسبس ويه نشوان..

-فاضل: اگلك مو چنه لبسنا؟

-نشوان: لبسة القندرة اي

-فاضل: يا عيبة العيبة

-نشوان: خلي خوية لو يعرفك ابن منو يدگلك تحية مو بس يرحب بيك بس گالوها الما يعرفك ما يثمنك

-فاضل: يمعود راضي انلبس المهم تصير قسمتكم واخلص منك ومن نگك

-نشوان: بالعباس ارگص شهر گدام لو رضا ابوها

اول من بده الحديث مالك وبنفس اسلوبه الراقي ورزانته المتعودين عليها، بالبداية حچى بنشوان ومدح بي وحول الكلام لـ شُهيب هو يكمل مدح اخوه.. حموا زايد وسووا نشوان ملاك منزه من السماء شوية ويگلولون يملك برج خليفة..

-مالك: الفلوس مو كلشي خوية شُهيب لا والله مو كلشي

-شُهيب: اي اكيد

-مالك: اهم شي اخلاقه ومخافته من الله وروحه الحلوة، تدري ابو ملاك اني قدمت عرض مغري لـ نشوان يشتغل عندي بالشركة ورفضه؟

-نشوان بهمس: هاي شوكت ولك

-شُهيب: اكيد راح يرفض ما استغني عنه اني

-مالك: محظوظ بي ماكول غيرها

-ابو ملاك: اي سمعت بمشاريع نشوان ما شاء الله ربي يزيده

-مالك: اذا صارت قسمة وتم كلشي على خير ادخلك واسطة انتَ تقنع نشوان يشتغل ويايه وويه شُهيب بنفس الوقت ما افوت هيج لقطة

فك حلگه نشوان ممصدگ ضحكت وكيان هم ضحكت وضمينا حلگنه المشكلة نشوان عباله مالك ديبالغ وبس گدام ابو ملاك هيج يحجي لكن بالحقيقة مالك كللش يحب نشوان ومعجب بشغله وديفكر فعلاً يقدمله عرض عمل وهيج راح يكون وارد نشوان اكبر وراتبه مضاعف هم يشتغل لـ شُهيب ومالك بنفس الوقت..

-ابو ملاك: نحتاج وقت نفكر واسأل بنتي وان شاء الله خير

تسالمو  وطلعنا من بيت ابو ملاك، غمز مالك لنشوان وگال بثقة..

-يومين ويرجعلك الموافقة لا تخاف

-نشوان: لا بشررفك؟؟ خاف ما يقبل ويگول اني مو من مستواهم المادي

-مالك: لا فيصل الخالدي مو انسان مادي عنده اهم شي الهمة يعجبه الرجل الهميم والذكي ما يحب الخمول

من الفرحة عزمنا نشوان على العشا ما گدرت اروح رامي تنحس علينا ونعس مالك وعدهم شي يوم نلتم وهو الي يعزمهم ببيتنا، رجعنا للبيت نيمت العنون وقضيت باقي الوقت ويه مَلكي..

**

"كيان"

طلعت من دوامي ويه زميلتي خابرت نشوان الطاااير من الفرح بعد موافقة ملاك عليه مثلما گال مالك يومين ضبط ورجعولنا الموافقة وعقدهم اسبوع الجاي، فرحت على فرحة اخوية يستاهل عفونة كل خير اهم شي يتزوج ويخلصنا من جفافه العاطفي..

اليوم علساس رايحين نخطب مسرة لـ شُهيب بس تفاجأنا من ابوها گال ماكو داعي احد يتزحم ويجي يگدر شُهيب يجيب الشيخ يعقدلهم من جديد وياخذها وياه.. شُهيب يگول ابوها چان حزين ومسرة كلش مقهورة بس وعدته ما راح تعوفه وكل يوم تزوره هي وميس..

وفعلاً بنفس اليوم شُهيب جاب الشيخ العصر وتم العقد رغم همه ما تم طلاق شرعي بيناتهم بس فادي راد يعيدون العقد بوجوده وبموافقته.. وهيچ رجعوا طيور الحب سوه وانجمعوا ببيت واحد وعاشت ميوسة بين ام واب يحبها اكثر من ابوها الحقيقي..

كلشي ديمر بـ سلاسة ما شاء الله عيني باردة بس شمسون ابد ما تدخل او حاول يخرب أي شي وعرفنا ليش، مالك گال اول مرة يشوف ابوه هيج خايف وشايل هم لدرجة حرس شمسون ديگولون مشدد حمايته وجايب اكثر من واحد خايف من ولده لا ينتقمون منه عايش برعب حقيقي وديتعذب عذاب نفسي..

والحلو ولده ديلعبوها على البارد وياه، يكملون شغلهم ويمشون بأوامره وهاي الخطة يكملون وياه بدون لا يحسسوا بتغيير وبعدين يضربوا ضربة قاضية بس شمسون ذكي ويعرف اكو شي دينحاك وره ظهره وباقي هيج لا هو اليكدر يضم نفسه ويهرب بسبب اتفاقيات الشغل العاقدها ولا يكدر يصالح ولده..

رجعت للبيت اسوي عشا الي ولنشوان، صبا ومروان بشهر العسل سافروا لـ ايطاليا وديعيشون اجمل ايام حياتهم حسب كلام صبا وفرحة مروان، كملت المعكرونة ونصيت النار ورحت للصالة..

-اگلك شوشو اليوم اتصلت بيه ملاك

-نشوان: شگالتتت ملاك رووحي شگاالت

-اثگل ولك لا تترعن

-دحچي لا اجي و..

-يبوووو راح احجي شبيك مخبل، كالت اشترت فستانها وتريد الخطوبة تكون معزولة زلم عن النسوان حتى تاخذ راحتها تحط مكياج وتلبس فستان مفتوح

-شررررريفة وبالشرف معرووفة وحاير شرد اوصفنهااا

-اي خوش خوش

-هااي النسوان العفيفة الشريفة المؤدبة المحتشمة اروحلها ستين فدووة

-صراحة مال مؤدبة فـ كلش اي ومال محتشمة فـ حشمتها تخبل ومال شريفة اتفق بطريقتي الخاصة عرفت بحياتها ما دخلت علاقة حب ولا عدها اصدقاء شباب

-احوووووي يا فرحتييييي على عناادك عليووي راح اتزوج شرررريفة

ضحكت على سوالفه وحماسه ورجع يگابل الحاسبة يشتغل ويهز رگبة، حطيت العشا ومن فرحته ما قبل ياكل ظل بس يسولف بيها وفكر وين راح يعيشون وشنو يسوي وشلون راح يدللها ويقدملها كلشي تحبه وماعندي شَك راح يقصر وياهة بشي لان هاي طبيعة نشوان يدلل ويحب من كل گلبه..

اندگت الباب راح يفتحها نشوان وفرحنا من شفناهم شُهيب ومسرة وميوسة وجايبين ماريا وياهم، تسالمنا ودخلناهم جوه تبادلنا اطراف الحديث شوية وشُهيب صاحني يريدني، صعدت وياه لغرفتي حسيت يريد يفاتحني بموضوع اشتغل عدهم بالشركة هاي ثالث مرة يگلي واني اتردد احب شغلي وماحب اعوفه بس وگف گلبي وعقلي وكلشي بيه من گال بجدية..

-كيان فاهد زارني البارحة ببيتي

لا ارادي حطيت ايدي على گلبي اداري دگاته اخاف لا تفضحني، تسارعت انفاسي انتظره يكمل بس انشلع گلبي من سكت يفرك بيده..

-كيان: فاهد بي شي؟؟

-شُهيب: لا

-لعد شنو شُهيب شو سكتت؟

-فاهد خطبچ مرة ثانية

فز گلبي وكل جروحي بقيت متصنمة وعيوني مثبتتها بعيونه وهو يكمل..

-هاي الصراحة مو اول مرة، قبل فترة خطبچ وگال يحتاج يتأكد من شغلة بينه وبين شمسون، ورجع خطب بيوم عرس مروان اتصل بيه وگتله انتظر وحلفته ما يحاچيچ هو ما اجالج للدوام مو صح؟

-لا ولا مرة

ضحك وگلب عيونه مستهزأ وگال..

-ماكو حاجة تچذبين كيان اعرفه اجالچ وكل يوم جاي تتشاوفون

-احنه؟؟ لا ابد والله

-كيان؟

-والله العظيم وروح امي وابوية ما شايفته ولا شايفني

-عجيب!

-شنو العجيب؟

-لا خلص انسي، المهم شنو رأيج بالموضوع انتِ مقتنعة بفكرة رجوعكم؟

-مادري

-كيان تتذكرين قبل طلاقكم من گتلج فاهد راح يشوف سارة بالمستشفى؟ هو شرحلي ليش راحلها وفهمني الموضوع مو مثلما متصورين هو نساها وانتهت قصته وياهة قبل لا تبدي والفترة الغاب بيها لانه چان مسجون كيان واني اعرف وهو يعرف وخايف يكون گلبچ بارد ناحيته وما تحبي بعد بس جاي يتوسل تنطي فرصة

سكتت ما رديت عرفت القصة كاملة وعرفت فاهد ما گلي هو بالسجن حتى مينزل من عيني، عرفته چان خايف يكون هو المتورط والمجرم واكرهه، عرفت ليش ما بررلي سبب غيابه، بس الما عرفته هو فاهد عباله اني ماحبه بعد؟ عباله نسيته وما اريده؟ هو ميدري اني لهذا اليوم اسهر للـ 2 بالليل انتظره يجيني جوه شباك غرفتي اتأمل اللگاه هناك ويعلگلي اغنية ويغنيلي وياهة، ولا يدري يفز گلبي من يذكرون اسمه ويهيج گلبي العاشق المجروح..

-شُهيب اريد وقت افكر

-تمام

گام وگال بجدية..

-راح انطيچ اسبوع تفكرين بيها وانتِ المسؤولة عن قرارج

حسيت شُهيب ناشف ويايه مو نفس قبل حنون وحچايته لطيفة، واستغربت اكثر من جملته "انتِ مسؤولة عن قرارج" گالها الي من قبل بس چان عداوة ويه فاهد زين شبي هسة؟

-شهوبي

-نعم

-شبيك شُهيب ليش احسك ضايج؟

-مابيه

-شُهيب بداعتي تحچي شبيك ماتحمل تكون قاسي وياي

-قاسي؟! اني قاسي كيان؟؟

-شبيك شُهيب

-من شوكت انتِ تخافين من عدنا؟؟ من شوكت انتِ تخبين علينا طراگيع كياان!!

-يا طراگيع والله كلشي ممسوية

-فاهد چان صريح وحچالي كلللشي! حچالي عن تهديدات ابوية الج والطيحان الحظ الصارلچ بسببه!؟

شخصت ابصاري وگلبي صار يرعد، ليش حچاله فاهد وشلون شنو استفاد من حچى لـ شُهيب؟؟

-كيان: چنت مجبورة والله

-ادرري مجبورة ادررري حچالي ودافعلج! كال جانت تسوي كلشي يگوله شمسون لانه يهددها بأخوتهاا!

-والله يا شُهيب خفت عليكم والله العظيم اكثرر من مرة وجه قناص على نشواان والله

-چان اجيتيلي!! تعالي احجيييلي

-احچيلك؟ نشوان يموت بنفس اللحظة! ما راح تلحگ عليه اصلاً شُهيب حس بيه واعذر خوفي على اخوووية

-ااااااااخ يالقههههر ولج اني شمسوون يتلاعب بأختي واسكتتله

-حباب فدوة نصي صوتك حبااب لا يسمعون نشوان ومروان

-لا تخافين ما راح يعرفون شي! بس وحق من انزل القراان على محمد يا كيااان اندمه واطلعع كل خوف ورعب عيشه الچ من عيوونه اخلي يتمنى المووت وما يحصله!!

شمرت روحي عليه احضنه وابچي مرعوبة اخاف نتزاعل وبعد شُهيب ميصدگني ويشوفني چذابة..

-شُهيب بيمن احلفلك وتصدگني مو ذنبي

-اصدگچ حبيبتي، لا تبچين والله الا اندمه هالعار

-بس انتبه لنفسك حباب

-خليها عليَّ

باس راسي ومسح دموعي، بعدني ارجف من الخوف لزم ايدي يسيطر على رعشتهن، باسهن وگال بأبتسامة..

-ننتظرچ تفكرين وترديلنا جواب

هزيت راسي بـ اي عافني وطلع من الغرفة عايفني وحدي وگلبي يرررگع هم خوف وهم سعادة بنفس الوقت، افكر شنو نهاية شمسون وفجأة يجي ببالي فاهد ويطغى على تفكيري، احتاجيت اطول بأجابتي حتى ميلزمها عليَّ فهيد ويگول رديتي الموافقة بسرعة اعرفه هالمسودن يكرهني بالساعة الگلت بيها موافقة..

اسبوع مر وشلعت گلبه بيومين بعد ياله رديت الموافقة علما رجعوا مروان وصبا وتم عقد نشوان وملاك، اني گلت اي منا برمشة عين فاهد جاب الامة العربية كلها واجونا للبيت، فكيت حلگي ما مصدگة حتى الشيخ جابه عود يعقدلنا گدام اخواني! عزه بعينه فشلني الرجال گدام العالم وصار يصيح من الدرج..

-حضررري روحج يا مرررة نص ساعة ويعقدلنا الشييخ

-كيان بهمس: گبررر فشلناا

-مسرة: هههههه خلي فرحان ماكو احد غريب شبيچ

ضحكت وبدلت ملابسي بسرعة علساس عگب باجر نعقد بس ماتحمل وجابه واجه، لبست فستان ماروني وحطتلي مكياج مسرة وجنات حطت الشال فوگ راسي علمود العقد.. گعدو الزلم بالاستقبال واني وجنات وماريا ومسرة وملاك وصبا وامها گعدنا بالصالة نسمع الشيخ ياخذ وكالتي..

نطقتها واعتلت الهلاهل من البنات ضحكت من كل گلبي اول مرة يهلهلن بس والله طلع منهن شي، راحت جنات تجيب الضيافة ورحت وياهة خطية متندل كلشي هنا اني محضرة كلشي من الصبح بقى بس واحد يوزعهن..

-نشوان: كيان تعالي

-كيان: اجيت لحظة

-نشوان: ولج تعاليي فضحنا هذا

-ليش شصاير

-يريد ياخذج اليوم

-وين ياخذني؟

-فاهد: اهووووو وينها ولج كووووري

-كيان: عزه بعينيي هاي كدام الزلم ديعيطلي هييج؟؟

-نشوان: لا راحو بقينا بس احنه اخوتج

-فاهد: وخرن ولجن.. بس والله خوش تهلهن سمعت صوت وحدة وچان حلو منو بيجن هاي اعترفن؟

-مسرة: دروح لكوريتك لا تضيع وقت

-فاهد: والعباس كللشي تحچي مسرة قيثارة صح وللللج كووري وينج يا مرررة

دخل للمطبخ چنت متحمسة وسعيدة بشوفته بس جفلت من المنظر، شخط چبير على خده وعينه متضررة، ركز فاهد انظاره عليَّ وگال بجدية عكس المرح الچان بصوته..

-مو وكتها تخترعين مني كيان

بقيت ساكتة وصافنة عليه، بلع ريگ مرتبك وحط ايده يغطي عينه ودار وجهه عني، انتبهت لروحي ولصفنتي الغبية وطلعت من المطبخ بسرعة وركضت اصعد فوك والصدمة بعدها محتلتني..

اجوني البنات يباركولي ويصفگن ويغنون الي ابتسمت مجاملة بس عقلي كله وياه، جنات ما جابتلي طاري فاهد تأذه سألتها كم مرة بس ما گلتلي عينه اليمنى انضربت وجزء من وجهه تشوه!

حضرت جنطتي بعقل سارح والبنات ويايه ما عافوني، ودعت اخواني وطلعت من بيتهم بعدما وصوا فاهد عليَّ بس چان هاادئ، هادئ بطريقة الكل حس بي شي ولاحظ الخمول الصابه..

دخلت وياه السيارة يسوق وباقي على هدوئه، اللتفتت اباوع لوجهه وداخلي يعتصر من الالم ما حسيت على روحي طولت بالصفنة لحدما هو گال..

-راح احاول اصلح الوضع

-كيان: شنو؟

-احاول اصلح وجهي

من كبر الصدمة ما جاوبت! الغباء استولى عليَّ وما رديت عليه اصلاً ماعرفت شنو اگول وشنو انطق.. بلعت ريگي ودرت وجهي عنه وبقينا على الصامت لحدما وصلنا البيت..

نزلت وهو نزل اغراضي وجنطتي دخلت البيت استقبلتني ام خالد بس تعجبت من اسلوبها وملگاها، سعيدة وفرحانة بوجودي أهلت وسهلت بحرارة وركضت تجيبلي عصير وضيافة وتهلهل وتبوس بـ فاهد..

-ام خالد: كلللللللووووش مباارك حبيبي وليدي فهودي مبارك رجعت كوريتك ونورت بيتك

بوسها فاهد وتشكر منها واخذ جنطي وصعدهن لغرفتنا فوگ، اول ما شفته صعد انداريت عليها وسألت مزعوجة ومقهورة..

-شصاير ام خالد؟؟ شبي وجه فاهد؟؟؟

-ام خالد: سودة عليَّ من راح يساعد مالك ابوه ضربه على وجهه وشوهه وشوه عينه الطبيب گال چان انطفت عينه للتالي لو طابة الحديدة للقرنية بس ربج ستر انشخطت شخط ورغم هذا ما يشوف بيها زين يكول مغوش ومايكدر يركز بيها هواي يدوخ

-كيان: وشلوون؟؟ يبقى وجهه هيججيي؟؟؟

صرخت منفعلة محترگ گلبي وحظي النحس ويه سؤالي نزل فاهد، جمد على الدرج يباوع عليَّ وعلى ام خالد عضيت شفتي السفلية وركضت اصعدله افهمه ما اقصد الاهانة وصراخي چان من القهر بس ما سمعني وطب للغرفة وسد الباب وراه..

ظليت بره اللوم بروحي شلون هيج قهرته وكسرت گلبه شجااني، لملمت روحي واستجمعت قوتي ودخلت الغرفة سمعت صوت الدوش بالحمام ينفتح، اخذت ملابس ورحت للحمام الي بالغرفة الثانية سبحت و بدلت ملابسي بسرعة وحضرت روحي تعطرت ومكيجت مكياج خفيف واخذت نفس عميق ورجعت للغرفة لگيته واگف يدور بكنتوره على شي يلبسه..

-كيان: هلو

-امم

انقهرت من رده ورحت اگعد على الچرباية، جر تراك وراح للحمام يلبسه انصدمت بالزايد! يا يوم فاهد بدل بمكان خاص؟ اصلاً فاهد ميلبس ملابس ويتهستر منهن انوب اخذله تراك كامل وراح يلبسه؟؟

گعدت افكر وارتب كلامي شلون راح افهمه اني ما مزعوجة من شكله اني بس مقهورة وميتة من الحرگة على الصار بي، راحت عيونه الصفر الچان يحبهن ويمكن مترجع نفس قبل..

طلع من الحمام منطيني ظهره ابد ابد ما اللتفت عليَّ وخلاني اشوف وجهه، وگف بصف الميز يمشط شعره وانتبهت لظهره من وره عضلاته كبرانة بمعنى چان يذب روحه وحرگته بالجم، گمت من مكاني اوگف وراه ناوية اسولف واشرحله بس كسر گلبي من سبقني وگال..

-حچيت ويه الطبيب گال وجهي راح يتعدل كله مسألة وقت

-وعينك؟

اندارلي يواجهني، يطير عيونه منا ومنا ميخليها عليَّ، تقدمت عليه ولزمت وجهه بثنين ايدي اثبت عيونه بعيوني، همست بخفوت..

-وعيونك فهودي؟

ذب حسرة وهز راسه مأيس، بلع ريگه وگال بحسرة..

-مالها علاج كوري.. طفت عيوني الصفر

-عادي

-شنو؟

-عيوني الكورية كلها الك

ابتسم وصغرت عينه بالزايد، دار وجهه فوراً من شافني اباوعلها هو لحد الان ما متقبل الحقيقة بس مستحيل اعوفه يعيش معاناته وحده واني اعرف شلون اطلعه من حالته..

-شفايتلك انطيك عيوني الكورية بوس ايدك وجه وگفه

-خوش خوش

-كيان: ابو عين العوصة

وهنا وگع قناع فاهد الحزين وصار يضحك بصوت عاااالي، ضحكة حقيقية مو تمثيل ضحكة طالعة من گلبه لدرجة عيونه دمعت، اعرف شلون اغير مزاج المخبل مالتي يتونس على هالسوالف وراح احقق الي يريده، صفگ ايده وگال بمرح..

-خرررب عقلج كوري متت ضحككك اشتعلو اخوانج الجررب

-تروحلهم فدووة

-خاب طييري يرحون فدوة لعيني العوصة ههههههههههههههه

-باوع تعرفني ما اجامل واحچيها بوجهك لان اعرف ماعندك مشاعر ومتحس بس قسماً بالله صاير شكلك هوت بيها

-اي اي هوت صح

-وروح اميي فد لايگتلك العين العوصة وهذا الجرح خاف چان شكلك شوية مال مجرمين هسة صرت مجرم عن حق وحقيق

-احححح افتخررر

-ادري بيك

-تدرين كوري اني هم گلت صاير اشگ دباعي الصكوك

-دوليي منيلك صكوك

-انتِ بس تغارين

-هو منو الچان يضم وجهه عني جدي؟؟

-تره ما جنت اباوع لوجهج حتى ما تلعب نفسي وانحرم من العشا اليوم

-ههههههه نذل

-اموت عليج كوووري مشتاقلج اشتعلتت امي الغبرة

-واني مشتاقتلك حبيبي

-تروح عيني العوصة فدوة لكلمة حبيبي

-ههههههه اموت عليها

وگفت على اطراف اصابعي وبست عينه ابتسم وجرني من خصري يحاوطه، بوس خدي وراسي وقبلني بهدوء..

-شكد مشتاق لريحة الفراولة والكرز

-واني مشتاقة لعيونك الصفر

-تروح تروح وترجع لقنادرري الصفرر

-وظيفتي احافظ على شخصيتك واجرح مشاعرك العضروطية فاهد

-عفية عليج حبيبي

-احبك

-ميت بيج كيان

-جذاب

-اهوووووو بدينا بالتمسلت، بعدين تعالي ليش شليتي گلبي ورجعتي الموافقة وره تسعة ايام؟؟

-لان بكيفي

-عود عبالج اعبرها؟؟؟

-هاااا؟

-اطلع القضى والمضى اطلع هالتسعة ايام من عينچ

-اهووو هو اني ردت ارفضك وجنات قنعتني اوافق

-لو رافضتني ماكووووو...

-اييي شتسوي؟؟؟

-اجي اشگچ واششگ اخواانچ الجرررب

-فنننننك شُهيب يطيح حظك

-عادي واني ارجع اطيح حظج

-عااار

-يعني مو بارد؟

-هههههههههه مسودن

-مسودن بيييييييچ

شالني واني اضحك واضرب بظهره متت من السعادة من صار يسولفلي عن حبه واشتياقه الي ما خلاني انام لحد الصبح احنه سوه ما خلى شي بنفسه حتى طبخ خلانه ننزل نطبخ سوه، المسودن خلانه نطبخ مندي لحم بالستة الصبح!!

-كيان: عزه بعينك فاهد

-فاهد: ولج جوعان خليني اشحن طاقة و...

-كيان بهمس: اششش اسكت ولك ام خالد شفتها تتجسس علينا

-يعني اتطشر العرض؟

-خرررب ولك اشش كافي حباب

-كوري اريد اخذلنا صور وفيديو حتى كلما اسافر واشتاقلج اشوفه

-شنوووو؟؟؟

-شبيچ صور وفيديوات النا واذا هسة يله گولي cheezzzzz

طلع تلفونه واخذلنا صورة ضليت صافنة وجلدت ذاتي من جوه على تفكيري الطايح حظه همزين ما انتبه لـ نيتي وما علق عليها..

خمسة ايام عشتها بالعسل وياه، الي يعيش ويه فاهد مستحيل يضوج او يمل يخترع اختراعات عجيبة حتى يونسني ويغير من مزاجي، باليوم السادس رحت وياه للطبيب وگال عينه مالها چارة ولازم يتأقلم بس حجمها راح يرجع نفس قبل لا يظل باله بس تاخذ وقت..

مرت فترة على زواجنا كلشي تمام ورجع فاهد لدراسته واني لدوامي وجنات هم رجعت للجامعة وحياتنا حلوة وهادئة، صح كل يوم احط ايدي على گلبي اخاف لا شمسون يظهر من جديد ويخرب حياتنا بس ما صار هالشي، وبيوم اني ارتب بالغرفة اجاني فاهد ذب كتابه على الميز وگال..

-اسبوع الجاي نسافر للعراق حبيبتي

-كيان: نسافر؟ يعني حتى اني؟

-اي كلكم البنات

-ليش اكو شي فاهد؟ لا تخوفني فدوة

-لا حب بس عدنا شغل ويه عمامي يله جهزي نفسج....

**

"مسرة"

گلبي لعب من شُهيب گال راح نروح للعراق، اني متأكدة هو شال فكرة السفر من راسه ليش هسة ديريدنا نروح؟ والزاد ضوجتي اكرم ما قبل يجي للمطار وينطي الموافقة لسفر ميس متت قهر وردت ابقى بس تذكرت موضوع امي اريد احچي كلشي للعلوية فـ اضطريت اعوفها ويه صبا ومروان..

صعدنا الطيارة ومالك وجنات وابنهم گاعدين ورانة وكيان وفاهد گدامنا والبنات كلنا نتسائل شنو الموضوع وشنو منتظرنا هناك؟ لحدما وصلنا بيت العلوية الف فكرة وفكرة اجت براسي خصوصاً من سمعت مالك يگول لاخوانه..

-كلشي يطلبه منكم شمسون توافقون عليه تمام؟

-شُهيب، فاهد: تمام

تسالمنا ويه العلوية وولد عمهم وبنات عمهم كلهن هنا، قسم منهم تزوج والقسم الثاني لا ومن ضمنهن فيروز، فرحت بشوفتها وعرفت بعدها ما متزوجة وللان ترفض كل من يتقدملها، توزعنا على التخم والعلوية حاطة رامي بحضنها وتغنيله..

-العلوية: هلا بيك هلاا وبأمك لا هلاا امك لحم هووش تهيج كل بلاا

ضحكت جنات تتذمر على كلام العلوية وبادلتها العلوية بضحكة سعادة بوستها وبوست رامي وگعدتهم بصفها.. هوسة ولمة حلوة واجواء ولا اروع قضينا هالليلة ببيتهم، انطونا كل ثنائي غرفة والعلوية تمشي وتسوي هوسات وگفلات بعوچيتها فرحانة لان الاخوان رجعت علاقتهم حلوة ببعض..

صعدت لغرفتنا، نزعت ملابسي وبدلتهن بشي مال نوم، گمت للميز اسوي روتيني واتعطر واباوع لـ شُهيب من المراية باله مو ويايه صافن بالسگف وباقي على الصامت تسائلت بداخلي ليش مو مثل كل يوم عادةً من اسوي روتيني الليلي نبقى نسولف سوه وكلمن يحچي عن يومه بس شبي اليوم؟

گمت من مكاني ونزعت الروب اعلگه وتمددت بصفه، ما طلع من هدوئه الا من حطيت راسي على صدره وتلمست لحيته..

-مسرة: بالك وين حبيبي

-بالشغل

مديت ايدي سويتها بحركة x وسندتها على صدر شهوبي وحطيت حنچي عليهن، ابتسمت وگلت..

-شغل شنو هذا الماخذك مني

ابتسم على وضعي وحركاتي ومسح على شعري بيده، قربت نفسي اكثر ورفعت حاجبي امثل الضوجة..

-ماقبل يشغلك أي شي عني اغار

-لو هيج الغيرة لو ماريدها

-ههههه اگلك هاي جناوي نست جنطتها اليدوية يمي وبيها ممية رامي خاف تحتاجها وتستحي تجي تاخذها رايحة احطها بباب غرفتهم وارجع انتظرني مو تنام تره ازعل

-ما انام منتظرج

طلعت من الغرفة ورجعني صوته، فز من الچرباية واجه يركض عليَّ فاتح عيونه صايرات بگصته..

-مسرررة لبسسسچ

-ياا نسيت ما منتبهة

جريت روب ثخين وطويل مو نفس الچنت لابسته، شده هو الي وباس راسي ويحچي بين سنونه..

-شددي لا تخبلينا بهالليل

-ههههههه راح اشده والله

-اني اخذ الجنطة انطيني

-يووه هموسي دقايق ما اطول

گوة هدني عبالك راح اروح لغير دولة ضحكت على تعلقه وبقى واگفلي بالباب يراقبني، مثلت دا افتح حبل الروب اللعب بأعصابه خزرني وسوالي اني اعلمج بيده، شديت الروب بسرعة ورگصت شوية بالباب واضحك..

-شُهيب بهمس: اووويلي لو اللزمچ

-مسرة: فننك

-اني اعلمج وديها ورجعي بس انطيني صبر

-تهددني ابن شمسون؟

-اهدد ونص قيثارة

-اوكي اقبل تهددني بس لان شعرك حلو

-ولج يللة لا يكعد احد جيبيها اني اخذها انطيني

-لا لا عيب جنات محجبة خاف تفتح الباب وما لابسة شال

-يله بسرعة

-شو تتأمر؟

-مسرراات

-ههههههه رايحة اووووي ابوسك

سمعت ضحكته الخفيفة وظلينا نتداهر لحدما غبت عن عينه، تمشيت بالبيت اظلم اكيد الكل نام، نويت ادگ بابهم واعلگ الجنطة باليدة واروح.. وصلت قريب غرفتهم وشفت ظل شخص بباب غرفة جنات ومالك فاتح شوية من الباب ويباوع للي بداخل الغرفة..

عگدت حاجبي متسائلة منو ممكن يكون؟ وشديسوي؟ هيئتها مال بنية بس معقولة ما حسوا مالك وجنات اكو شخص ديراقبهم؟ تقربت اكثر بدون لا اطلع صوت وشميت ريحة تلعب النفس گبت.. عبست ملامحي متقززة من الريحة بس ما فكرت بيها زايد بسبب تحرك الشخص الي واگف..

هربت اضم نفسي بالدرج واراقب من مكاني، شفت البنية الواگفة تفتح جبتها وتطلع چيس من جيبها ونثرت محتواه بالباب وتبسبس بكلمات، انخمش گلبي خوف ورهبة فوراً صار عندي هبوط وزارتني دوخة قووية بصعوبة سيطرت على توازني وثبتت نفسي..

ثواني ورفعت راسها تباوع من الباب، نزعت الشال والجبة گدرت اشوف لابسة دشداشة خفيفة وقصيرة، وخرت القراصة من شعرها وفتحته تنثره على اكتافها، دگت باب الغرفة ورجعت تنثر من الچيس وضمته بصدرها اول ما سمعت صوت احد يتقرب، دقيقة وفتحلها الباب مالك بالفانيلة الداخلية وبجامة......

يتبع.....

━━━━━━  ━━━━━━

بارت انلموا بي حبايب القلب كلهم 🙈♥️

عدى فيروز وفاضل 😩

+البارت انقسم لنصفين بسبب طوله!! 🥲

تعالو انستااا يا روحي 🙈🤎

#ابناء_الحسوم "شمسون"

بقلمي: زهراء السلامي ❤︎

لطفاً لتنسون التصويت + التعليق بين الفقرات + متابعة لحسابي 😍.

اتعنى المكان الي گعدته وياك

ما الگاك بس رايد اثر منك!

بلچن چلمة ما نگلها الريح

الگاها وتسولف بالنشد عنك

لو دور عطر منك بقه على الگاع

احط نفسي عليه وافييش اشمنك... 🥀

━━━━━━  ━━━━━━

تقربت كم خطوة اتأكد من وجوده، اختنگت واني اشوفه عيوني ما نزلت عن عيونه الصفر التجدح ويه اضوية القاعة، شهگت من غمزلي وشمرلي بوسة بالهوا وقريت بشفايفه نطق كلمة "احبچ"..

فتحت عيوني مصدومة ضحك بصوت عالي ضحكته المجنونة وتبعها بصفير عالي ورفع ايده وگدام كلل الناس صاح بصوت عالي بالعربي..

-هاي المهننندسة كوريتييي

كل الناس صارت تتلفت تباوعله واني واگفة جامدة! جامدة هم من الدوخة ماگدر اتحرك هواي لا اوگع وهم من الصدمة من وجود فاهد هنا!!

-فاهد: چان هزيتلچ رگبة بس عندي اصابة بيها عذرينا كوري

-كيان: فاهد!

-فاهد: عيونه الصفر

-نشوان: هذا فاهد؟؟؟

-فاهد: هلو شوشو

-مروان: انتَ شتسوي هنا؟؟

-فاهد: هلو نحوسي

-مروان: ولك شتسوي هنا جاي؟!!

-فاهد: شلون استقبال حار هذا بس يله ميخالف راح اسامحكم هالمرة لخاطر كوريتي

-كيان: مروان، نشوان خلوني احچي وياه على انفراد عفية

-مروان: مالچ كلام ويه هذا المسودن!

-فاهد: جرحت مشاعري العضروطية

-كيان: مروان فدوة

بصعوبة قنعتهم يرجعون لمكاناتهم واني رحت اتقدم على هذا الحقير، وگفت مقابيله مباشرةً وزارتني دوخة ولعبان نفس بس تماسكت..

-كيان: خير؟!!

-فاهد: بوجهچ

-كيان: شتسوي جاي هنا؟! شنو الغاية من حضورك؟؟

-فاهد: وعدتچ احضر واصفگ لنجاحچ بين الحضور

-كيان: تمام شكراً يله تقضل روح

-فاهد: وااااااه؟؟

-شكو وااه؟ خاف عبالك راح اگوم اطفر من اشوفك واخذك بالأحضان والدموع؟؟

-طبعاً!

قاطع حديثنا هارون ولارا، هارون سلم على فاهد وتباوسو وغمزله وهناا طخت بعقلي وراسي ذولة الثنين متفقين عليَّ؟؟

-كيان: انتو الزوووج نهايتكم على ايددي!!

-هارون: على كيفج عيني

-فاهد: انچب لككك ما اسمحلك تگول عيني لزوجتيي

-كيان: لا بله؟؟؟

-فاهد: كيان انچبي لازم انتِ ما تسمحيله مو والله راسي تعب من الگرون!

-كيان: وانتَ شكو تدخل بحياتي؟

-فاهد: كورية عيب تعاملين زوجچ بهاي الطريقة عيب

-هارون: صح اتفق نعم

-كيان: ولكم لا تخبلووني زوجي شنو؟؟ خاف مصدگ نفسك انتَ؟!!

-فاهد: هو صح اني غبت سنتين بس ميخالف ابقى رجلچ

-رجلي؟؟ ولك احنه متطلگين!!

-فاهد: شنووووو

-هارون: وهنا كان لازم نتدخل

-فاهد: وولك ولك ولك ولك ولك جااي تسمععع

-كيان: اي اي طلگتك اني!! وين نايم انتَ!!

-فاهد: طلگتينييي كياااان؟؟؟

-كيان: صوتك فضحتنا هذا شبي

-فاهد: لا لا لا شنو هالاهانة بحقيي ولج انيي تطلگينيي انيي ابو زعاطيطچ!!

-اي

-سممم ومرض شلون هلچ گلبچ تسويها بيه!!

-فاهد مالي خلگ اللاعيبك روح عني

-هارون: اي فاهد روح عنها لا تخرب فرحتها

-فاهد: **** انتَ شكو حاط خشمك بيناتنا امشي ولي اخذ البريعصي مالتك وروحو منااا

-لارا: اففف فاهد شبيك وياي

-فاهد: لارا احبج بس الارعن مالتج لزمي واخذي من وجهي

-هارون: خاب دطيير بحالك اني اجيت علمود كوري

-فاهد: ولك ولك ولك وللك هارونن لا تلعب بأعصابيي هسة احطك وادوسس بگلبك وآكله بأسنااني

-هارون: تدوس بگلبي واني ابن عمك وضلعك؟!

-فاهد: وآكله هم!!

-هارون: مو صوچك صوچي اني الحبيت مرتك!

فتحت عيوني ولارا جحظت عيونها وفاهد انگلب طنطل لزم هارون من خوانيگه گدام كللل البشر الي هنا ونتر بين سنونه..

-لا تشاقه ويااي شقه مااصخ لا اشرب من دممك وتعرفنيي اسويهااا

-هارون: تمام فهمت

-يله ولي من وجهييي

ضحك هارون مبتعد ولا كأن هسة فاهد هدده انوب شمرله بوسة بالهوا ولف ايده حول كتف لارا وباس راسها واخذها وياه، بقيت فاكة حلگي على المشهد الصار ودرت عيوني على اخواني راح ياكلون فاهد اكل بعيونهم..

-فاهد: عاار **** روح مناا

-هارون: احبببببك

-فاهد: ايووووووو

-هارون: لا تنسى تحضررر عرسييي

-فاهد: عرس حمووضة

-هارون: وارگصلك رگص معدااان

فشر عليه فاهد ياله راح يضحك مثل المخبل وفاهد هم ضحك يربي والله احسني اطرش بالزفة شنو ديصير؟؟ هارون من طلع المحبس الي هل صدگ راد يخطبني لو سواهة لعبة حتى يعرف مشاعري لفاهد شنو ويگول لابن عمه؟؟!

-فاعد: نرجع نتناقش بموضوعنا ماي لوڤ

-كيان: ماعندي نقاش ويه مسودنين

-فاهد: اوگفي يعني هسة اني اعتبر مطلگ؟؟ هاي شوكت وليش وشلوون كوري شلون تكسرين قلبي الصغير واني اجيتچ متأنق وكاشخ ولابس كتراتچ بيدي!

-افففف فاهد

-وجعة اميي الغبرة ولچ بااعي خربت هيبتي وكشختي بهذا الكتر!

مدلي معصم ايده ورجعت ذاكرتي لذاك اليوم من نزعني الكتر بالسيارة وشمره، وكرر هالحركة ويايه بالجامعة من تخربطت ودخلني للحمام نزعه من شعري ولبسه بيده، عيوني دمعت على الموقف ضم الكتر كل هالفترة وحافظ عليه؟ بس ما استسلمت وما بينت تأثري تخصرت گدامه ورفعتله حاجبي..

-صدگ طلگتيني لو تضحكين عليَّ؟؟؟

-اي طلگتك ايي!!

-يعني هسة اني بالعدة؟؟؟ همزين لابس اسود

-فاهد انتَ جاي هنا تضحك عليَّ لو شنو؟!

-ولج انتِ سويتيني مضحكة! انيي فاهد ابن شمسون الخ** يطلگوني؟؟ يا عيبة العيبة يا عيبببة اللحية والشواررب يا عيبة الترچية الالماس اللابسها بأذني!

-اتفق

-كيان احچي عدل وفهميتي هل انا مطلق؟ هل يجوز اطلع من البيت والبنات يشوفوني؟ لو اعتبر بالعدة ولازم ابقى ست اشهر ببيتي؟

گلبت عيوني متنرفزة من تصرفاته هاي مشكلة فاهد متعرفه شوكت يكون جَدي وشوكت يتمضحك، اخذته على گد عقله وجاوبت..

-خلصت العدة مالتك صارلها قرنين

-هاا الحمدلله طمنتيني خليني اروح اصاحب بنات لعد

-رووح الله وياك

ضحك يصفگ بيده متونس مادري على شنو، گرصني من زندي ما وخرت ايدي عنه بقيت مبوزة بوجهه، من شافني متنرفزة ومو طبيعية اخيراً عدل ملامحه المبتهجة ورجعهم للجدية..

-فاهد: اني اعرف غيابي اثر عليج بس هواي شغلات مصخمة صارتلي بالفترة الفاتت

-ما اثر عليَّ بشي غيابك

-تمام زين هالشي

-لان انتَ ولشي بالنسبة الي فاهد عبارة عن نكرة!

-كيان لا تدوسين بالحچي

-ادوس وادوس على راس ابوك العار هم!!

-تمام ابويه الچ الحق تدوسين على راسه بس هَدي وخلينا نتناقش

-على شنو نتناقش؟؟ بابا انتَ شنو بالنسبة الي؟! انتَ لاا شيء عبارة عن جماد متهمني بشي روح شوف حياتك وخليني اشوف حياتي!

-شتشوفين وحبنا؟؟

-يا حب يا بطيخ نعال على هالحب الفاشل روح فاهد مالي خلگ اتناقش خليني فرحانة بنجاحي!

تركته روحي طافرة وگفت بصف طاولة احرگ بروحي دورت على مي ما لگيت اخذت عصير اشربه يبوووو شنو هاي ليش كلهن يلعبن النفس دوخني بالزايد خرب! سألت الموظفة الي بصفي اهمسلها..

-اگلچ هذا عصير شنو؟

-عصير كرز

-طعمه مو حلو

-اي حتى اني لاحظت

ما لحگت اجاوبها بسبب فاهد لزمني من معصم ايدي بقوة يسحبني عليه گدام الكل يجرني بره القاعة، خفت اخواني يشوفون بس لگيتهم ملتهين بـ صبا ماعرف شنو واگع على فستانها ومروان دينظفه الها ونشوان شايل بيده مي..

-هدنني فاااهد وين مااخذني ولك دااايخة

وگفنه بنص الطريق لازمة راسي ومغمضة عيوني القاعة كلها تفتر بيه، سألني شبيچ كم مرة ما جاوبت بقيت ساكتة اخاف اتقيء استسلمت بين ايده يجرني بره القاعة وياخذني لگراج السيارات يدخلني غصب لسيارته تعاركت وياه بيدي بدون لا افتح حلگي بس وين اگدرله هالغوريلا صعدني غصباً عني وقفل الباب علينا..

-فاهد: شبيييچ غير افتهم ليش ما تحچين؟؟

-امممممم

-شكوو؟؟

-ممممممممم

-سمم ومرض ما تحچيين

اشرتله على حلگي راح اتقيء، طلع مي من صندوگ الوسط وشربني وغسل وجهي، دفعت ايده بعدما حسيت روحي احسن وعطت بي..

-غبيي مكيااجيي راااح

-فاهد: ليش انتِ تحتاجين مكياج

-خربت كللشي فاهد كلللشييي

-ههههههههههههه شكراً

-الله يااخذك

-وياخذج

-افتح الباب وضعي مو تمام فاهد تعبانة

-شبيچ

-دايخة ومعدتي تفور اريد اتقيء ماعرف شنو ديصير بيه

-اعراض حمل هاي

-اهووو دوخر

-هههههههههههههه

-انتَ شجابك؟ وشذكرك بيه؟؟ شرجعك لحياتي؟!!

-اجيت اشوف مرتي

-طليقتك!!

-كيان اني مو بمزاج تضحكين وياي بعد كافي

-اضحك شنو؟! هو منو الدزلي وكيل نيابة عنه حتى يطلگني؟؟

-شنو وكيل

-انسان انتَ توكله نيابة عنك حتى يرمي يمين الطلاق!

-شنو؟

-اي اي غشم نفسك وگول مو اني! ورسالتك مال "احياناً قد يكون التخلي هو الحلُ الوحيد"!!

-شنووو؟؟ شهالمستلة!!

-تره انتَ كتبتهااا!!!

-اني اكتب هالتمسلت؟؟ ليييش؟؟

-والله مادري اسأل روحك واسأل توقيعك جوه شكبررره مكتوب "فاهد شمسون"!!!

-ولج اني اتخلى؟؟ اني؟؟ وما لگو غيري انيي يشوهون سمعتي بموضوع التخلي؟؟ والعباااس انام على خوانيگچ وماعووفچ تگلي تخلي الفايخة!

-ولي وليي لا تضحك عليَّ!!

-راويني الرسالة خليني اشوفهاا

-ما اراوييك ورووح مااريدك...

الباب مقفول مينفتح جرني من ايدي ما قبلت جرني من راسي من وره عليه صحت بوجهه وما كملت العيطة وتقيأت بحضنه!! على رجله وعلى كرسي السايق وعلى صندوگ السيارة روحي طلعت ومعدتي تگطعني..

-فاهد: شنو الموضوع حبيبتي شبيچ.. على كيفج على كيف

يمسح على ظهري وجاب كلينس يغطي بي حلگي، ذبلت عيوني وبعد ما گدرت افتحها حط وجهي على صدره يمسح على شعري من وره ويسويلي مساج لراسي، ثواني وحسيت بي يرفع شعري فوگ ويربطه بكتر..

-فاهد

-صرتي احسن؟

-لا تلمسني وخر

-تمام

-وخرني عنك على كيف

-ارتاحي شوية

-ماريد وخرني عنك بس مو سريع... دايخة

لزمني من رگبتي وره يبعد وجهي عن صدره يرجعني لكرسيي، نظف مكانه وحضنه والسيارة شلون مچان واجه يشربني مي وغسل وجهي وحلگي بقيت مغمضة عيوني بس احس بأنفاسه الدافية تلفح وجهي لازگ وجهه بيه ماعندي قوة اوخره عني بس احرك راسي ترجعلي الدوخة..

-كوري ما طلگت اني وما مفتهم سالفة الرسالة

فتحت عيوني على كيف عيونه الصفر اللتحمت بعيوني، مسح بأبهامه على حنچي وخدي ونطق بهدوء يوازي هدوء السيارة..

-ما جاي افتهم شي

حسيت روحي بين النايمة والگاعدة كأني دخلت بحلم.. حسيت بفاهد يتقرب مني ويقبلني ايدي ثگيله وعيوني تزوغل تلمست خده اتأكد يمكن هذا وهم مو حقيقة وبنص الموقف وكأن منبه دگ براسي، دفعته عني فوراً وانطيته راشدي، لزم خده وفتح عيونه مصدوم..

-حقير

-كيان يله عاد

-تستغل ضعفي يا فاشل

-لو استغل ضعفج هسة امطلچ هنا بالسيارة

بلعت ريگي ودرت وجهي من الجهة الثانية امنعه يشوف تعبيرات وجهي المقهورة وعيوني الدمعت، عضيت على لساني قبل لا انطق اسمها واواجهه بنقطة ضعفي..

-سارة

-شنو؟

-سارة السبب بطلاقنا.. انتَ رحت.. رحت لسارة من جابت

خنس صوته وما اسمع غير صوت الهدوء، فاهد سكت! اي سكت وما برر لو ضحك لو تناقش سكت والسكتة دامت لدقايق قبل لا يگول وايده تلف ايدي بقوة..

-صحيح رحت

-امم

-ما بلغت احد بهذا الشي حتى الحماية هربت منهم

-عاشت ايدك

-چنت محتاج اروحلها، محتاج اشوف حلمي ينتهي چان لازم اواجه الحقيقة والواقع واشوف ابنها بعيوني واشوف خوف زوجها ولهفته عليها.. اچذب عليج اذا اگلچ ما تألمت لا والله يا كيان جمرة بگلبي ما طفت ولا اظنها راح تطفى بيوم بسبب الغش والوعود الكاذبة العشتها بسبب هاي البنية ضيعت سنين عمري علمود وَهَم.. بس سارة انتهت بگلبي وفرغ مكانها

صفنت بعيونه الحادة الجَدية و بلعت ريگ رخيت راسي على الكشنات الوره اعض على شفتي احارب دمعتي لا تنزل، بينما هو اردف بهدوء..

-اعرفچ زعلانة وما راضية على تصرفي بس اني...

-انتَ عفتني شهر ونص بدون تبرير لغيابك وبنفس اللحظة عرفت بيها جابت حجزت وسافرتلها؟ لهدرجة تشوفني بديلة فاهد؟

-لا اكيد! اكيد مو بديلة كيان انتِ لو تعرفين شگد احبچ ومتعلق بيج ما تگولين هالشي بس اني چنت تعبان! تعبت وانهد حيلي بعد ليلتنا واعترافچ بمشاعرچ تجاه اخويه...

نصه صوته من گال المقطع الاخير وذب حسرة عالية، كمل يحچي بنبرة مغلفة بالحقد والغيرة..

-هربت منچ ماگدرت ارجعلچ لا اأذيچ وانتقم كيان اني مشكلتي احقد وحقدي يكتل ماگدرت اجازف بيچ.. اول مرة بحياتي تمنيت ادمر مالك وحققت امنيتي وكسرت ظهره بمهمة راد يموت بيها بالمغرب! اكره نفسي لان سويت هيچ بس گلبي نار وما جاي يبرد ورغم هذا اخوية سامحني هو ما يعرف سبب حقدي عليه وليش ما طايقه بذيچ الفترة بس عذرني وگال اعرفك ما تضوج من شي ماصخ خصوصاً واني اخوك وابوك الربيتك...

-مشاعر قديمة هاي فاهد لازم تقتنع بهالشي

-وشيقنع گلبي؟ شيقنع النار المشعولة بيه؟ شيقنع غيرتي وعشگي وتعلقي بيچ؟؟

-بس هذا مو تبرير لتصرفك ولا تبرير تغيب سنتين!

هنا سكت مرة ثانية ما جاوب ولا برر سبب غيابه بهاي السنتين، تنرفزت ودفعته من صدره اوخره مني، جر ايدي غصب مني وگال بعصبية يرجف..

-احبچ كيان لا تحرميني منچ

-ماحبك

-اموت عليج

-مستعدة اموت ولا اشوفك

-تدمرت بهاي السنتين بدونچ لا عبالج چنت بمدينة الالعاب

-واني عشت احلى سنتين بحياتي بغيابك

-هههههههههههههههههه برب***

-ولـ.. ولي هناك.. وليـ..ـي

-هاي شبيها گوة تحچي؟ انتِ شاربة شي متعاطية شي؟؟

-شربت عصير

-شنو نوع هالعصير؟

-عصير كرز

-الي بالحفلة؟؟

-اي

-واني اگوووول شبيها الفرخة

-شبيه

-بابا هذا بي كحول معقولة ما ميزتي طعمه؟

-چذاااااااااب

صرخت اطفر من مكاني ناسية الدوخة وكلشي ضحك بصوت عالي وهز راسه اي..

-لا لا المدير ميشرب وگالو ميحطون كحول بالعصاير!

-بس حطوا اني شربت منه وطعمه واضح تره

-اييييععع شلون تشربوو هم حراام وهم طعمه يلعب النففس

-هيلگة

-ديلا وخر بعدني مزاعلتك

-كيان شسالفة

-وخرر لا تلمسني خليني ارجع لا ينتبهون اخواني على غيابي

-خليهم ينتبهون انتِ وياي

-دروح منو معترف بيك انتَ

-سممم ومررض مو بعينچ اني ولج!!

-لا مو بعيني! وخر احنه متطلگين روح ماريدك!

-بابا احنه ما متطلگييين

-تطلگناااا

-لااااا

-طلگتك اني طلگتتتك

-وانتِ منو وتطلگيني؟؟ خاف صدگتي نفسچ العصمة بيدج؟!!

-طبعاً بيدي لو حتى حكم رب العالمين تريد تغيره؟؟

-باباا هيووو اصحي احنه عاقدين قبل لا نعقد گدام اخوانج ويشرطون العصمة بيدج! يعني هاي سالفة انتِ تطلگيني خررط ومالها صحة بعقدنا!!

-شنوووو

-اي اي احنه ما متطلگين وهسة راح تجين لبيتي غصباً عليج

-ولييي ما اجي عافني سنتين وهسة يريدني الله يعلم شچنت تسوي بهالسنتين!!

-ما خليت شغلة ما سويتها وطاح حظ حظي

-مو اعرفك عاار بعد ابن شمسون الچلب!

-عوفج من ابوية اليوم ترجعين لبيتي مرتي واريدج!

-روح باباا ما ارجع وياك ماريدك اني عشت حياتي ومرتاحة بدونك

-بس اني ما مرتاح بدونج

-لا ترتاح ميهمني

-حتى وره ما زوعتي عليَّ ودمرتيني؟؟

-اي!

-اوگفي

-شنو؟؟

-دقيقة تعالي شوية

قرب نفسه مني يمسح على خدودي تسائلت تصرفه شديسوي هذا، مركز بكل حواسه ويه خدودي يتحسسهن ويفرك اصابعه ومن لا مكان وماعرف شلون وليش تقرب اكثر ولحس خدي..

-ايييييييييع لا تلحسنييي

-مابي طعم

-اااييع ايييعع مخبل انتَ!!

-كوري؟

-خير؟؟

-انتِ هيج بشرتج من الله؟

-شلون يعني؟

-يعني متحطين شي يخفي عيوب لو باودر بوجهج؟ هذا بياضج الحقيقي؟

-اي

-شلون هيج

-ليش؟

-البيضة لازم يصير عدها نمش!

-لا مو لازم

-بس...

-بس شنو؟

تحسس خدودي مرة ثانية وگال بجدية..

-تسمحيلي؟

-شتسوي؟

-اللحسه؟

-لااا ايعع وخر شبييك دا اگلك ما اخلي شي على وجهي!!

-بس حمرتي عدها نمش..

حچاهة بشرود ما منتبه شلون الي ديفكر بصوت عالي وبقى يتلمس خدودي، خزرته لدرجة عيوني طلعت من وجهي طلع يلحس خدودي حتى يتأكد حاطة مكياج لو لا؟؟ طول هالفترة يقارنني بحمرته ويتسائل ليش اني بيضة مثلها وليش ماعندي نمش مثلها؟؟ دفرت ايده بعنف ونترت..

-اني مو نسخة من حمرتك يا غبي!! وماعندي نمش وجهي صافي من الله! وهسة افتحلي الباب لا اتخببببل عليك فااهد

-كيان شبيچ هسة واذا....

-كمممل الجملة والقران اللم الدنيا عليييك افتحلي البااااااب راسي راح ينفجررر

-تمام اخذج للبيت ترتاحين

-افتح البااب!!

بسبب عياطي وخبصتي اله وچذبت عليه گتله راح اتقيء مرة ثانية فتح قفل الباب وخلاني انزل، ركضت ادخل للقاعة گلبي ينبض بجنون وعقلي راح ينفجر.. اذا الرسالة مو منه ومو هو دز الوكيل علمود الطلاق منو سوه كل هذا؟ والسؤال الاهم فاهد وين چان بهاي الفترة كلها وليش عافني؟؟

رجعت للقاعة اشوف عيون نشوان تاكلني اكل سألني بأنزعاج واضح..

-وين چنتي صار ساعة ادورچ!

-كيان: موجودة نشوان بس تعبت شوية وتقيأت

-ليش تقيأتي شبيچ؟؟

-مادري شبيه بس كلش تعبانة تكدر ترجعني للبيت

-اي يله

لزم ايدي واجت ويايه فيروز يمشوني وعيوني تدور فاهد الي اختفى، طلعت من القاعة ولقطته عيني من بعيد واگف بصف سيارته ويباوعلي بدون لا يتقرب.. صديت وجهي عنه وركبت السيارة وعقلي كله وياه ميتة قهر وحرگة ووجع فراقنا كله تكرر عليَّ هسة..

-فيروز: نشوان خفف شوية خاف كيان تدوخ من السرعة

-نشوان بهمس: احچي وياهة شوية

اسمع لهمساتهم سوه واشوف نشوان يتناقش ويه فيروز على مادري شنو، غمضت عيوني وسندت راسي على الجامة اريح راسي شوية..

-فيروز: راح اسافر اني كيان تدرين؟

-كيان: اي گلتيلي بس ما راح تطولين مو؟

-فيروز: ماعرف بعد، احس وجودي غلط هنا وابوية كلش معصب يريدني ارجع

-كيان: بس انتِ عايشة ويه ماريا ليش غلط؟

-بس لا ولد عمي موجودين ولا عمي المن باقية هنا؟ تدرين يومية ابوية يتعارك ويايه حتى ارجع واني معاندة لان اعرف بس ارجع يزوجني لواحد من ولد عمي

-وفاضل؟

همست اسمه بخفوت شديد، بلعت ريگها متوترة ولعبت بأصابعها بدون لا تجاوب، لحيت عليها كم مرة ياله گالت..

-احسه ميحبني بعد

-ليش تگولين هيچ؟

-من بعد الصار بحفلة شُهيب ومسرة فاضل اتصل بأبوية وطلبني منه بدون لا اعرف وبدون لا يگلي اصلاً بس دزلي رسالة هاي شوفيها..

طلعتلي الرسالة الي بتلقونها ابتسمت اهز راسي اعرف هالقصة وفيروز عادتها الي الف مرة وبكل مرة تتأثر وايدها تگوم ترجف.. مدتلي تلفونها تقرالي الرسالة بهمس حتى نشوان ميسمع..

"ماريد احرجچ اكثر واحچي وياچ، فضلت احچي ويه ابوچ واطلبچ منه فوراً بس للاسف رفضني.. خليت ابوي يحچي وياه ما انطانه مجال من عرفنا عجم "ايرانيين" هان ابوي بأسلوبه المتعالي وطبگ الاتصال بوجهه.. فيروز اني شاريچ واريدچ بس ماعرف شلون راح تصفى وننجمع.."

-فيروز: تدرين ابوية ما فاتحني بالموضوع اصلاً! ما گال اكو واحد خطبچ رغم فاضل وره هالخطبة تقدملي سبع مرات! والله العظيم سبع مرات وعُلا گلتلي راح اتخبل كيان شلون اخلي ابوية يقتنع بي!

-والله يا فيروز ماعرف شلون راح تنحل بس حاولي انتِ تحچين ويه ابوچ هو يسمع لكلامچ وميحب يزعلچ دليل من دون بنات عمج انتِ طالعة للخارج بلكت من يشوفج تردي يقبل؟

-لاا حبيبتي ابوية يقبل بكلشي اطلبه منه الا الزواج عنده خط احمر! لو اتزوج واحد من ولد عمي المعفنين لو اگعد واسكت واعنس

حرت وياهة خطية مبين محروگ گلبها وفاضل بعده يستقتل عليها رغم ما سوه وياهة علاقة ولا تعارف نهائياً ما تقرب منها ومو غريبة على فاضل لو تصير حلاله ويحچي وياهة ويحبها بما يرضي الله لو ينتظر لحدما تنحل الامور المهم ميسوي شي حرام ويعصي رب العالمين بعلاقة محرمة..

**

-اي؟

-اكرم: اي هاي نهايتج مسرة گاعدة ببجامتج وعقلچ فاصل بسبب الادوية هذا مكانج الصحيح

-خوش

-اكرم: ههههههههه لا عبالج اخذو ميس غصباً عني تره اني انطيتج الحضانة برضاتي

-مسرة: اي بس سردار شگك نصين قبلها

خزر بحدة وجنح خشمه بعصبية، ضحكت بروح رايحة وعقل شبه نايم على شكله ونستي بالحياة ازعج اكرم واضوجه هسة مو زين من عايفته عايش ويمشي على طوله طبيعي؟

-اكرم: انتِ شيطااانة قيثارة!!

-مسرة: وهسة ياله دريت؟

-اكرم: دمرتي شمسون وولده! شمسون هارب ما يگدر يظهر نفسه لا يتم اعتقاله ومالك خسرتي كللشي واسهم شركتهم بالنازل وحاير بديونه، سجنتي شُهيب بتهمة باطلة وما كفاچ رحتي سجنتي فاهد هم! بس حاب اگلچ خربت خطتچ بآخر لحظة وفاهد شمسون طلع من السجن برائة! مو هو القتل يوسف غيث! الي قتله ابن عمه ناصر!

-مسرة: اوكي

-اكرم: ما مهتمة لان طلع من السجن؟؟

-لا

-ليش؟!

-ماعندي وقت افكر بهالسخافات عندي امور اهم

-ههههه امورچ الاهم حبوبچ ومهدئاتج صح؟

-اكرررم اطلع بررره

-هههههههههههه هاي النهاية التستحقها كل حقيرة تشبهچ

شلت گلاص المي وشمرته عليه وخر بسرعة وتهشم الگلاص انضرب بالطاولة، فتح عيونه بصدمة وعاط..

-حقيرةة ***** چان كسرتي عليَّ!!!

-واكسر عضااامك وخشمك العاالي فوگاااه اطلع برررره

-اني اعلمچ مسرة وربج ما اخليج مرتاااحة انسانة مخببلة وخاااينة انسانة فاقدة الاهلية ميسس اخذها منج اخذهااا واخليج بحسرتهااا

-وللللك بررررروه لا اموووتك برررره

ركضت عليه وبيدي سچينة الفواكه لزم ايدي يحاربني اريد احطها بگلبه وراهة بگلبي اريد اخلص منه اريد اخلص من هالوجع الي جاي ينخر عقلي وگلبي وكلشي بيه.. اخذ السچينة من ايدي وشمرها ودفعني وگعني بالگاع صرخت فاقدة الحيل ماگدر اگوم، بدت مفعول الحباية تأثر بيه واحس ايدي ورجلي تربطت وكأن طلعت من عالم الحاضر ودخلت بعالم الذكريات.. لحياتي قبل..

رجعت ذاكرتي وخيالي لنفس ذيچ الگعدة بصالة بيتي القديم (بيت اكرم) ميس بحضني ارضعها ممة ودخل عليَّ اكرم يگول بأبتسامة..

-اكرم: مسرة اني طالع اليوم لا تنتظريني على العشا

-مسرة: اكرم هو يومية؟ ليش هيچ انتَ شبيك وياي صار حلمي ناكل سوه لو نگعد نسولف مثل أي ثنين متزوجين

-اكرم: اهووو مسرة رجعتي للحن والنگ كم مرة گتلج ما احب وحدة تنگ!

-تره حقي هذا! انتَ زوجي اذا وياك ما احچي واقضي وقت ويامن اروح؟

-حبيبتي يا گلبي يا روحي انتِ خليني افهمچ بطريقة ثانية

حط ايده فوگ كتفي يحاوطه وگعد بصفي على القنفة، سندت راسي على صدره وحطيت ايدي بين ايده، اني سويت هالحركة لو عبالك تكهرب طفر من يمي وركض لنهاية الصالة يضحك ويمسح على شعره وملابسه..

-يله حبيبتي اني طالع لا تنتظريني تمام؟

طلع بسرعة يتهرب بدون لا يبرر تصرفه او يفهمني ليش راح يطلع.. راح بدون لا يباوع لوجه ميس، عافني بالبيت وحدي وبقيت الليل كله انتظره يرجع..

تعبت من هالوضع وتعبت من اسلوب اكرم الناشف اوقات احسه ميحبني وميريدني صح ميأذيني ومخليني على راحتي بس الموضوع بده يصير مزعج ماعنده ذرة غيرة عليَّ لو يدخل للبيت ويشوف زلم گاعدين ويايه هم ميحچي ويگول براحتچ..

تطبع وصار مثل ابوية واني گلبي بارد تجاهه اعرف زواجي منه مصلحة لابوية بس معقولة راح اكمل حياتي ويه رجال مهمل بارد مثله؟

ومثل كل يوم رجع تالي الليل يتطوطح سكران وريحته لا تطاق من وره الشرب واگع على ملابسه وجسمه، شمر روحه على الفراش وراح بغير عالم.. باوعتله اتنهد ما طايقة روحي ماعرف المن اروح؟ احچي لابوية يگول كل الزلم هيجي، اگله اريد انفصل وارفع قضية طلاق اكرم يتخبل يبوس بيدي ورجلي حتى ابقى و يصير اللين من الزبد ويايه ياخذله شهر شهرين زين ويرجع اتعس..

حملت بـ ميس واحسني متندمة اخاف تتورط هالطفلة ويايه بأب مهمل نفسه بس شسويله هو اكل گلبي على موضوع الاطفال وابوية محاربني يگول هذا حقه وام اكرم دمرتني بسمها لحدما ماتت هي تنق بگلبي لحدما حملت..

مرت الايام اني حايرة بين الشغل وميس واكرم ماله علاقة بيها نهائياً ميتقرب منها ولا كأنها بنته حاير بشغله وطلعاته توالي الليل، اكثر من مرة راقبته واشوفه يروح للمكتب مالته ويبقى للفجر ياله يطلع ارتاحيت نوعاً ما من عرفته ميخوني..

-اكرم: مسرة شنو رأيج نطلع سوه اليوم؟

-اييي نطلع بس وين؟

-نروح لحفلة صديقي يله لبسي شي حلو انتظرج جوه

-مثل شنو اللبس؟

-فدشي جذاب ومغري

هزيت راسي وصعدت لغرفتي ما تفاجأت من طلبه لان هذا اكرم يموت على الملابس المغرية ودائماً يشتريلي اشياء فاضحة لدرجة اني استحي اللبسهن بره فـ اللبس فوگاهن سترة..

بدلت ملابسي ونزلت استقبلني صفيره ابتسمت ووگفت مقابيله مباشرةً متوقعته راح يتغزل بيه او يگول شي حلو بس ما سوه أي شي من هذا، بس اخذ ايدي وشال كارسيت ميس المتنقل وطلعنا، حطينا ميس عند صبا واحنه رحنا لحفلة صديقه..

الحفلة صايرة بملهى ليلي، كل مرة يجيبني اكرم لملاهي ليلية احس بشعور غريب اني مسرة الي اعشق الصخب والأجواء الهوسة بس الملاهي الليلية مو جوي يكش جسمي من الريحة والاجواء اشوف مناظر مقززة متعجبني..

دخلنا جوه هد ايدي وراح يسلم على جماعته واجه يعرفهم عليَّ، تعرفت على نسوانهم وگعدنا سوه حول طاولة وحدة وجابو مشروبات كحولية اشكال كلهم شربوا عدايه ما اتقبله ريحته متنجرع مو انوب اشربه..

شوية وگام اكرم ويه ثنين زلم اصدقائه ونسوانهم وراحت وياهم وحدة صديقتهم ما متزوجة، اندار عليَّ وگال وره ما باس خدي..

-ما نتأخر مسرة بس عدنا شغل ضروري هنا لازم نكمله

-مسرة: اففف كالعادة

-اكرم: ههههههه سرور شنسوي بعد الشغل ورانه ورانه وهاي القضية تأخرنا بيها ما يصير تتأجل

هزيت راسي متفهمة هاي بكل مرة نطلع سوه ونلتقي بذولة جماعته يجيبلي الشغل بالنص صرت حتى ما اهتم واللتهي اني هم اكمل شغلي بغيابه..

تأخر الوقت وتأخر اكرم ما رجع، باوعت للساعة مرت فوگ الثلاث ساعات والاجواء كلما جايهة تسوء هنا.. قررت اگوم ادوره وين سألت عنه كم شخص ياله جاوبوني وگالو دخلو بهاي الغرفة الي گدامي..

تشكرت منهم ورحت للغرفة مديت ايدي لمقبض الباب توقعتها مقفول لان اكرم لو يموت ميشتغل بمكان بابه مفتوح بس للعجب چانت مفتوحة.. فتحت الباب وچان اشوف اتعس منظر اشوفه بحياتي...

منظر شل اطرافي وتمنيتني عمية بلحظتها! منظر حتى بالافلام الاباحية اتوقع محد يشوفه!! شفت اكرم واصدقائه ونسوانهم كلهم سوه!! كلهم كلهم كلهم!!

من الصدمة بقيت بمكاني فاتحة عيوني ما مصدگة الدا اشوفه، لگفتني وحدة من البنات وصاحت بأكرم تنبهه بوجودي بعد ميعرف شلون يلبس ملابسه ويجيني..

ركضت بكل ماعندي من سرعة اطلع من هالملهى الحقير اجرت تكسي اريد اطييير لبيت ابوية اشتكيله واشكيله حالي بس ما لحگت اكرم لزمني من شعري تعاركت وياه بنص الشارع عركة طيحت حظه بالمسبات والضرب ما اخلي يلمسني قرفاانة لعبانة نفسيي من المنظر مدا يروح من عقلي..

قيد ايدي وشالني غصب ودخلني سيارته بأستعانة نفس اصدقائه الچان يسوي الحرام وياهم! كلهم تگابلو عليَّ تخبلت گمت اصيحح مثل المجنونة الطريق كله مچتفين ايدي ورجلي واكرم طار بيه للبيت.. شالوني مرة ثانية ودخلوني لغرفتي فوگ واخذ مني موبايلي وشكو وسيلة اگدر اتصل بيها على احد وحبسني هنا..

-مسرة: افتتتتح الباب يا نذذذل افتتتتح الباااب يا عاشق الزلم والنسواااان

-اكرم: صوووتچ ما اسممعه لا اجي اطيييح حظظظچ

-مسرة: اشتكي عليييك اخليك تخييس بالسجون يا عااار يا قذررر

دخل للغرفة وقفل الباب علينا وتكاتلنا! يضرب واني اضرب دميته ودماني صرنا واحد فوگ الثاني وهو مصدووم شلون دا اضرب وادافع عن نفسي وشلون دا اتحايل عليه واضربه بأماكن ما متوقعة..

-اكرم: شيطااانة

-مسرة: ادمررك اكرم طلعنيييي مناااااا

على اثر صياحه وعركاته دخلو ثنين علينا بالغرفة شالوني شيول وربطوني بالچرباية تخبلت اضرب براسي واشيل بجسمي وارگعه، اعيط انبح صوتي من صارو يفرغون الغرفة بالكامل! فضوا الغرفة ما خلوا بيها غير السرير النايمة عليه حتى الفرشة المارونية الي مغطية الچرباية شالوها وعافوني بسرير ابيض خالي!

حبسني بهاي الغرفة لشهرين ضبط! شهرين اني ما شايفة بنتي! شهرين اني ما اشوف غير الحيطان هنا! شهرين ماعرف شنو ديصير بالحياة الخارجية! شهرين ابوية عباله اني مسافرة وملتهية! شهرين اني بغير عالم!!

ما خلى ادوية ما انطاني ما خله ابر ما حقنني بيهن ما خله شي ما سواه بيه، اغتصاب، ترهيب، خوف، تهديد واخر مرة كانت القاضية من دخل عليَّ ثلاث زلم واني شبه عريانة وصورني وياهم..

اگدر اصنف هذا اليوم بأتعس يوم بحياتي على كمية الخوف العشتها! على كمية الاهانة وهمه يصورون بجسمي وكلشي بيه! على كمية الذل الي صار واني ابوس ايد اكرم حتى يوخرهم مني وميخليهم يسوولي شي ووعدته احفظ سره وما اشتكي عليه وحتى طلاق ما اتطلگ بس خليهم يعوفوني ويبتعدون..

قبل بتوسلاتي بس صورهم وهمه يمثلون دنسوي الغلط، ربي ستر عليَّ ونجاني منهم ومحد بيهم لمسني بطريقة تأذيني او تضرني بس صورهم! صورهم واخذ التصوير للمحكمة وهو بنفسه رفع قضية طلاق علساس اني الخاينته! واني الاخذ حبوب مهدئة واني الفاقدة الاهلية!

الكل صدگه وچذبوني حتى ابوية! حتى ابوية صدگه وما حچى كلمة وحدة ودافع بيها عني وگلي بالضبط جملة "كسرتي وجهي بين الناس"..

تدمرت تخبلت من طلگني اكرم الكل شهد عليَّ زور وجاب خواته العايشات بغير بلد هم شهدن ضدي وما كفاهم هالشي اثبت بالمحكمة اني فاقدة الاهلية واخذو مني ميس، اخذو ضوه حياتي وبنيتي وتعبي، اخذو حبيبتي مني وما الي حق اشوفها غير كل اسبوعين مرة!

عشت اتعس ايام حياتي تخبلت وفقدت عقلي، اكرم قدم بلاغ بالمحكمة اني احتاج مصحة عقلية وجاب دكاترة مدفوعين حتى يأكدون كلامه وگالو لازم اروح اتعالج كل هذا حتى ما افضحه وادمر مستقبله! دمر حياتي ومستقبلي في سبيل يحافظ على صورته بين الناس! اخذوني غصب عني للمصحة سنتين وشهرين عشت بيها تخبلت بالزايد اتعارك واعنف نفسي واشلع بشعري واصرخ ليل نهار..

-مسرة: طلعووووونيييي مناااااااا راح امووووووووووت

يركضون عليَّ يچتفون ايدي ويضربوني ابر مهدئة جسمي فقدته، طولي فقدته، قوتي فقدتها.. ايام وصلت بيهم يربطوني بالشراشف حتى يسيطرون على عصبيتي وجنوني، صرت ماشوف غير اللون الابيض بأي مكان وما اسمع غير الهدوء.. كرهت الهدوء كرهته لدرجة اريد املخ روحي من اگعد بمكان هادئ..

صارت متعتي وسولتي بالدم اعشق لونه احب اشوفه، اطول اظافري عمد وادچها برگبة الدكاترة وبصدورهم اشخطهم اطلع الدم واتونس عليه، اضحك من يتأذون وافرح من اشوف واحد متألم صرت اتعطش واريد اأذي بعد بس خربوا ونستي من صارو يقرضون اظافري ميخلوهن يطولن..

انام واگعد على كوابيس، اتحلم بـ ميس تبچي تريدني واني مربطة ماگدر اروحلها، احلم بأمي تعاتبني امي تريدني اخذ حقها وثارها من شمسون واگعد من النوم مفزوعة اگعد ابچي واضرب نفسي اريد اطلع منا احتااج اطلع منا واخذ حقهاا واروي گلبي بموته!

**

-مييييييس رجعوووولييي ميييييييسسس

-صبا: مسرررة اصحي انتِ نااايمة هااي ميوسة يمچ سرووور

-مسرة: مييس صبااا اخذوهااا مني اخذووووهااا حرمووني منهااا

-صبا: سودة عليَّ مسرة حبابة گعدي هاي بنتج ولج ميس خايفة متقبل تتقرب منج گوومي لا تخرعيها

فتحت عيونها جاحظتهن على وسعهن، اباوع لحالها واگعة بالگاع وشعرها متناثر على الارضية، ماعرف صارلها شگد على هالوضعية لان هسة ياله وصلت اني وشفت ميس تحاول تصحيها وتبچي على امها..

-مسرة: ميوسة

-صبا: ميس تعالي لامج

تقربت ميس بس بعدها خايفة باوعتلها مسرة وابتسمت ومسحت الدموع من عيونها، حضنت بنتها وبچت بالخنسة عليها.. انمرد گلبي على حالهن مسرة صارت انسانة ثانية هالعلاجات دتدمرها دتخلي عقلها يفصل وتروح لغير عالم..

-صبا: انتِ زينة سرور؟

-مسرة: اي زينة

-لا تاخذين هذا العلاج بعد لا تدمرين نفسج

هزت راسها وگامت من الگاع مشت على الزجاج المتكسر بدون لا تتألم او تحس بي، متت من القهر جريتها عنه بسرعة صفنت عليَّ مستغربة ليش سحبتها هيچ نزلت عيوني اخليها تشوف الدم الطالع من رجليها باوعتله وابتسمت..

-مسرة: احب الدم

-صبا: سرور انتِ مو بخير تعالي اوديج لفراشج

استسلمت تخليني امشيها، اخذتها فوگ وميس گلتلها تبقى جوه تلعب.. نيمتها على الچرباية وهزيت راسي معترضة على حالتها، جبت ملقط و شاش ومعقمات اعالج رجليها واطلع الگزاز الناعم الي طب بيهن وهي متمددة وصافنة بالسگف..

-مسرة: گلبي

-صبا: شبي؟

-مسرة: يوجعني

-سلامته حبيبتي، سرور لا تأذين نفسج طُز بأكرم وطُز بوجوده لا تسمحيله يضوجچ

-ماگدر بس اشوفه اتذكر الصار بيه بسببه

-الله ينتقم منه بس دائماً تذكري ابوچ وگفلچ وطلعچ من المصحة ورجعلچ حياتج حبيبتي

-ههههههههههههههههه

-سرور

-هههههههههه هو منو دمرني غير ابوية منو القدمني وليمة على طبق من ذهب لاعدائه غير ابوية؟

-حبيبتي مسرة

غمضت عيونها بقوة وهمست بروح محترگة..

-ابوية دمر حياتي! ومن طلعني من ذاك المكان بشرط امشيله شغله واتفق ويايه يرجعلي ميس بالمقابل.. سرقو احلى سنين عمري

-اهدي يروحي

-شمسون.. شمسون السبب بكلشي

-حتى بزواجچ من اكرم؟

-امم

-شلون؟

-هو العرف ابوية على اكرم وبسببه تزوجته

-بس چنتي موافقة على اكرم انتِ

-توقعت راح اخلص من التدريبات العنيفة وجماعة ابوية واتحرر بزواجي من اكرم، بس طلعت من سجن ودخلت لسجن ثاني

-خلص مسرة انسيهم واللتفتي لحياتج

نزلت دمعتها وغمضت عيونها تحرر باقي الدموع، هزت راسها بـ لا وگالت بغصة..

-شُهيب راح صبا

-هذا حظه بعد

-انسجن بسببي

-لا مو بسببچ لا

-اني دمرت حياته

-لا حبيبتي لا يروحي انتِ مالج ذنب

-شُهيب يكرهني اني اذيته واذيت اخوته بچيت امه عليه صبا ماريا شنو حالها هسة

-هي بخير بعدها متعرف هو بالسجن گلولها مسافر

-الله ياخذ شمسون الله ينتقم منه حرمني من امي ومن حبيبي ومن بنتي ومن كلشي حلو بحياتي

-شمسون بعده ميعرف انتو تعرفون هو السبب بموت امج؟

-لا، عباله ابوية ميدري عباله بابا بعده يشوفه صديقه المقرب الساعده يهرب ويه حبيبته ويستقر بره

-ما شافچ من كتل امچ؟

-لا

غطت وجهها وشهگت بدموعها، تبچي محروگة گلب والدموع مغرگة وجهها، كملت بقهر..

-بالبداية خلانه نسوي حادث بطريق مفتوح سريع حتى محد يشهد على الجريمة، چنت نايمة بالكشنات الوره وما احس الا سيارتنا تطب بسيارة ثانية غبت عن الوعي ثواني وفزيت على صوت طلقات تزرف بجسم امي وبطنها من الصدمة ما صرخت شخصت عيوني من مديتها من الجامة اشوف شمسون واگف يراقب واربع ولد وياه والي شايل المسدس ولد مراهق وصار يركض يبتعد من السيارة ما شفت وجهه بس گفاه.. شمسون گال بالضبط "عفية بـ ابني، عفية وليدي، عفية بابا" صاحها بعلو صوته منتصر وهو يشوف امي مزرف جسمها بالطلقات!

-يمة!

-وما كفاهم هالشي صبااا طبو للسيارة واخذو جثة امي وياهم! ولج اخذوها اخذو امي وعافوني ما شافوني! ختلت وره كرسيها مگطوع عني النفس من الهبطة گلبي ماات واني اشوفها تنزف من كل مكان!

-سودة عليَّ وشلون طلعتي من السيارة؟؟

-اجه واحد ساعدني ماعرفه منو بس هو الي سوه بلاغ الشرطة واخذني وياه ورجعني لابوية

-وبده ثاركم من هذا اليوم؟

-وبدت قصتنا وثارنا من هذا اليوم..

ذبت حسرة قوية وگامت من فراشها تمشي على رجليها اللفيتهم الها، راحت توگف گدام الحايط الي معلگة عليه رزنامة عملاقة واخذت قلم احمر ورادت تشخط يوم منها..

-صبا: بعده ما صار يوم جديد مسرة

سدت القلم بدون لا تكتب شي وذبته بالگاع، نزلت راسها تمسح من وجهها الدموع الرجعت تنزل.. هذا حالها من يوم دخل شُهيب للسجن هي لو تباوع لصورهم لو تنام لو توگف گدام هاي الرزنامة وتحسب يوم يوم لطلعته..

رجعتها لفراشها بلكت تنام وترتاح بسرعة غفت، نزلت اللعب ويه ميوسة واشوف واجباتها شنو عدها اساعدها بيهن، وكلتها وسبحتها وبدلتلها ملابسها ورجعت لمسرة فوگ خفت تگعد وهم تاخذ حبة مهدأ..

مدا اعوفها لحظة عشت هنا يمها اخاف تدمن على الحبوب وشلون بينا بهالورطة، اليوم رحت لحفلة تكريم كيان اخذت حبة وره ظهري وهذا حالها..

گعدت بصفها على السرير اباوعلها بغير عالم، مسحت على شعرها الناعم افكر بتاليتهم شلون؟ شوكت تستوعب وتتقبل فكرة سجن شُهيب مو هذا كله من عمرها!

بينما اني گاعدة هالگعدة ضوه تلفون مسرة الحاطته على الميز بصفها، رج بأتصال من رقم غريب شلته اشوف منو ماعرفت الرقم تركته ممهتمة ورجع اتصل من جديد، خلصت الدگة ودز رسالة على الواتساب كاتب..

"اني هنا"

تسائلت منو ممكن تكون هاي او هذا بس ما تدخلت بخصوصياتها وما فتحت التلفون، ابتسمت من انغلق التلفون وبينت خلفية تلفونها حاطة صورتها هي وشُهيب ومبينة الصورة من چانو بـ اسبانيا لان على البحر وكمية الحب الي بالصورة تجنن.. هو لاف ايده على خصرها ومثبت حنچه على كتفها وهي مسوية بوز وماخذه السلفي..

رجعت التلفون بمكانه وجبت ميس ويانه ونيمتها بنصنا وغفيت، جرنها للصبح بعد ما گعدن لا مسرة ولا بنتها.. حسيت الصبح على صوت طگطگة خفيفة كعدت على حيلي شفت مسرة مبدلة وواگفة تمشط بشعرها..

-صبا: صباح الخير، شنو ساعة بيش؟

-مسرة: صباح النور بالـ 9

-طالعة؟

-اي

-وين؟ اشوفچ متحمسة ومرتاحة ان شاء الله خير

-خير خير

گالتها بأبتسامة واخذت جنطتها، باست بنتها وطلعت من الغرفة لمادري وين بس مو مهم المهم مرتاحة وشكلها صاحية وبخير..

**

"مسرة"

نزلت جوه مستعجلة لاگيت ابوية بالصالة ما سلمت عليه عفته يصيح بأسمي وتركته اطلع من البيت، ركبت سيارتي وسقت بكل سرعتي للمكان القاصدته وگلبي ينبض بجنوون..

وصلت بركت سيارتي ونزلت اهرول، لحدما وصلت لبوابة السجن شفته واگف وايده بجيوب الكوت مالته، خففت خطواتي ورحتله اوگف مقابيله مباشرة سلم عليَّ بهزة راسه وطلع ايده من جيوبه..

-مسرة: شكراً لان تركت اشغالك واجيت

-الاطلس: اجيت اشوف صاحبي

-مسرة: راح يفرح بشوفتك

-ندخل؟

-مسرة: اي

مشينا اني وياه كتف بكتف ندخل السجن، حچينا ويه الحرس ودخلونا للضابط هز راسه اول ما شافنا واجرى كم اتصال يلبي طلبنا الي صار اشهر ننتظر يوافقون عليه، وگفت انتظر على نار دقايق وگال يله دخلوا..

مشيت على دگات گلبي معدتي خبطت من التوتر وكأني رايحة اشوف موتي، دخلوني لغرفة بيها شباك مظلل اني اشوف البره وهمه ميشوفوني ولا يسمعوني بينما الاسباني دخل بالغرفة الثانية وگعد گدام طاولة منتظر دخول شُهيب عليه..

صار اشهر اشتغل على هالموضوع ميسمحون نشوفه بهالطريقة ما خليت واسطة ما دخلتها لحدما وفرولي غرفة شباكها عازل اشوفه منه، ضغطت بكل قوتي على ايدي اسيطر على اعصابي لا انهار هنا، من يوم الحفل لهذا اليوم اني ما شفته! ما شفت شُهيب ولا رويت گلبي واشتياقي بطلته الاحبها..

دقيقة ووگف نبض گلبي واني اشوف ثنين شرطة يمشون وبيدهم شُهيب يدخلو للغرفة چان لابس كبوس مغطي شعره الحلو اكيد بسبب برودة السجن، عيوني ضحكت من شفت طوله يدخل ويسلم على الاطلس، غطيت حلگي بيدي اخفي ضحكاتي المجنونة، رجلي ما ثبتت من رعيشها صرت اطفر بمكاني بحماس وفرح ممزوج بالحرمان..

شكله متغييير كلش وجهه تعبان وعيونه جواهن هالات وعضلاته هفتانة، ابتسامته ما شفتها حتى من سلم على صديق عمره سلم بجمود وگعد على الكرسي ينزل عيونه وضام كفوف ايده لبعض..

-الاطلس: مشتاقين نمر

-شُهيب: تسلم

-الاطلس: شلونك حبيبي

-بخير

-شلون ماشية ايامك

-نفس بعض

-صحتك تحسنت عن اخر مرة؟

-اي

-بعدك بالسجن الانفرادي؟

شهگت تحت انفاسي! شُهيب بالسجن الانفرادي؟؟ يعني فوگ الضيم حاطي بالسجن الانفرادي ليييش؟؟؟

-شُهيب: بعدني

-ليش ما تطلب تطلع منه

-ماريد

-ليش شُهيب؟ ليش ما جاي تحاول تتأقلم خوية صارلك سنتين هنا اني خايف عليك لا يصير بيك شي!

-ما يصير بيه شي

-ما فرحت بقرار تخفيف الحكم؟

-الحمدلله

-لطيف

-شكراً لان اجيت

-انچب لا تسوي هالسوالف

-اعنيها اطلس

-شلون ما اجي شُهيب

-متبهذل بسببي

-راضي بهذا التبهذل كل الولد يوصلون سلامهم الحار الك ومنتظريك اول ما تطلع تزورنا بالمغرب

-الله كريم

-اجيت اراويك شي

بقى منزل عيونه ميرفعهن شوفته بهالحال دمرني واخذ من حيلي ليش ميرفع عيونه ليش ميخلينا نشوفهن شنو خافي بيهن شُهيب وخايف صديقك يكشفك!

-الاطلس: شوف

مدله صورة صغيرة طلعها من جيب سترته، اخيراً رفع عيونه حبيبي وشاف الصورة، تأملها شوية وگال..

-شُهيب: هذا انتَ بس...

-الاطلس: ابيض هههههه

-بالضبط

-هذا ابني آدم

وهنا شفت طيف.. طيف مو حقيقة طيف ابتسامة خفيفة جداً تنرسم على وجهه وگال وهو يتأمل الصورة..

-الله يحفظه اخيراً شفنه ادم

-وعدتك اجيبلك صورة اله بس ما قبلوا ادخل موبايلي طبعتله صورة حتى تشوفه

-جميل ما شاء الله

-يوم الالك ونشوف ابنك ونفرح بيك

ذبلت ابتسامته وما جاوبه، غير الموضوع بسرعة من دور عيونه بالغرفة الگاعدين بيها وتسائل..

-ليش اجينه هنا؟ بالعادة نتشاوف بذيچ الغرفة

-اني طلبت نجي هنا حتى ناخذ راحتنا بالكلام

-ها وقبلو بسرعة؟

-حركت جيبي

-اختصاص انتَ

-چا شلون

-اطلس منو طلب اعادة حكم لقضيتي؟

-ليش تسأل؟

-لان شاك بيك ماكو غيرك مخبل ويدفع هالگد فلوس على شي تافه

-اعادة حكمك وتخفيف السجن تافه بالنسبة الك شُهيب؟

-اي

-خاب دنچب تره كاره روحي وانتَ ماكو حياتي انگلبت بسببك صاير مثل المطي رجل هنا ورجل بالمغرب ما يهلي گلبي اعوفك

-عوفني اطلس، اگعد ببيتك واهتم بشركتك واسكت ابنك وزوجتك اولى بيك

-ولك انتَ اخوي شلون اعوفك! انتَ مو واحد عادي لو صديق عابر بالنسبة الي ما انسى وگفاتك وما انسى اليوم التعرفنا بي على بعض!

-ولا اني انساه

ابتسم الاطلس وگال بشرود..

-چنه ما نعرف احنه اعداء

-ولا نعرف ابوية يشوف دم سنونه ولا يسمع بطاري ابوك

-ولا الطامة الوگعت على راسك وراسي من أهالينا اكتشفوا احنه اصدقاء وبقينا نتشاوف بالسر اليسمعنا يگول مسوين مكسورة ونخاف لا ننلگف هههههه

كبرت ابتسامة شُهيب وعفس وجهه..

-الله ياخذك دائماً تفكيرك وصخ يالدايح

-ااخخ شُهيب شيصير لو ترجع ذيج الايام وارجع لعمر العشرين؟

-ياريت ترجع

-نلتقي بنفس الحديقة وتشوفني واني اتعارك وتجي تفزعلي بس لان سمعتني احچي عراقي

-ما چنت اعرفك منو طلعت من المحاضرة واشوفك متكامش ويه ثنين ووضعك مو زين وجهك عرگان وتعبان حسيت بيك مو طبيعي..

-چانت راح تزورني النوبة

-بالضبط، اول ما اجيت اتعارك وياهم وافزعلك انتَ وگعت وانلزمت حرت اساعدك لو افطس ذولة

-تالي فطستهم واجيتني ومن يومها انتَ الضلع الما ينشلع ابن الكلب شمسون

-وانتَ ابن محمد العار

-شلون مكس يشگ شگ

-ما اصدگ تكاتلت ويه ثنين بوكتها بس لان گالو عنك غني ومدلل؟

-منعل اني هههههههههه

اسمعلهم وابتسامتي من الاذن للاذن هالثنائي وگعدتهم وسوالفهم صنعوا يومي، نسيت همي لدقايق واني اشوف شُهيب نوعاً ما بده يحچي ويتجاوب ويه الاطلس وذاك ما خله فرصة تمر بدون لا يزعج شهوبي لو يداهره..

-الاطلس: انزع كبوسك طالع چنك راس لهانة

-باردة جوه

-انزع انزع بضلوعي ادفيك

-اووع ماريد

-طاح حظك ما تريد حضني؟ مو صوچك وعلي

نزعه الكبوس غصباً عنه وهنا كانت الصدمة! هنا صابني الانهيار! دموعي ماگدرت اسيطر عليهن ولا صوت شهگاتي واني اشوف شعره الاعشقه ماكو! شعره ماكووو!! شعره مزيني!! خصلاته العسلية الناعمة اختفت!!

ماتحملت كل هالالم شوفته بهالحال كسرتني فوگ كسرتي، كسرت شكو امل وسعادة انخلقت عندي بشوفته، تدمرت روحي اشتعلت بيها ناار ماگدرت اوگف على حيلي وگعدت بالگاع لامة رجليه لصدري وابچي بالسكتة..

اسمع لصوته يحچي ويه صديقه بس بالي مو وياهم بالي كله ويه كسرته وعيونه وشعره وحياته وكلشي فقده بسببي.. اني سلبت حياته سلبت احلامه.. سلبت فرحته بشوفة طفله! ابسط احلامه چان طفل، حلم صعب صار هالطفل ومو راضي يتحقق!

طلعت من الغرفة انتظر الاطلس يكمل زيارته وتمشيت اطلع من الممر الي بي الغرفة واروح للممر الثاني خاف يطلع شُهيب، اروح واجي والتفكير ماكل راسي، بينما اني امشي وعقلي فاصل انرگعت بجسد رجال ضخم دردم بلغة ما مفهومة وبعدها گال بالانكليزي..

-what the f***!!!

گلبت عيوني واعتذرتله ما اقتنع وگلب وجهه عليَّ يكمل بالانكليزي..

-قيثارة انتِ ليش ابد ما تنتبهين؟!

-مسرة: موزس بالي مو وياي شبيك شسالفة!

-موزس: يله ميخالف هالمرة سماح

-شعندك هنا؟

-جاي اشوف البرو

-تأخرت عنده زيارة وخلص وقت الزيارات

-وات ذا هييل!! تره اني ماخذ موعد من اخوانه صار شهر! گلتلهم الزيارة هاليوم الي!!

اول ما كمل جملته اجه الاطلس عطره يسبقه يمشي برهاوته المعهودة ايد بجيب بنطرونه والايد الثانية يعدل ربطة عنقه..

-موزس: وات ذا ****!!!!! هذا انتَ ماخذ زيارتي!!!

-الاطلس: عندك مانع؟

-موزس: طبعاً عندي مانع طبعاااً صار شهر انتظر هاليوم اجيت من روسيا لهنا عايف شغلي وحياتي حتى اشوف شُهيب تالي انتَ تجي على الحاضر محضر تدخل تشوفه قبلي!

-الاطلس: اي

-موزس: انتَ انسان استغلالي تنتهز الفرص لصالحك داائماً!

-الاطلس: شسالفة تره صديقك صديقي والي حق اشوفه مثلك بالضبط!

-موزس: شُهيب صديقي قبل لا يكون صديقك! هو اخوي!

-الاطلس: واخوي هم!!

-اخوي قبل لا يصير اخوك!

-بين ابوه وابوي عداوة يعني اني اقرب!

-تجمعني عداوة ويه اخوانه العارات من سنننين!

-اني...

-مسرة: شباب كافي!! شكلكم مثل الضراير اليتعاركن على رجلهن تره شُهيب صديقكم مو زوجكم!!

كشر موزس ما عاجبه والاطلس ضحك مستهزأ، قبل لا تگب بيناتهم مرة ثانية قاطعت النقاش وعبرتهم ياربي يتعاركون عليه ويغارون من بعض عبالك شُهيب سيارة لو قطعة ملابس!

رحت لحارس السجن الي ادفعله بكل مرة علمود يزودني بالمعلومات هنا ادز الفلوس بيد سام بدون لا اجي حتى ما انكشف، وگفت گدامه وعرفته عن نفسي وفوراً سألته بلغة البلد..

-شُهيب من شوكت بالسجن الانفرادي؟!

-صار سنة تقريباً

-ليش؟

-صارت مشكلة چبيرة بينه وبين واحد بالسجن حاط دوبه من دوب شُهيب تكامشوا وتعاركوا عركة حامية وثنينهم عزلوهم

-وبقى هناك؟؟

-لا طلعوا من الانفرادي بس هو طلب يرجعله

-ااااوف ياربي!!

-لا تخافين مدام هو عايش

-شنو الفائدة عايش جسد بلا روح!

-مدام هذا السجن شنو بيدنا

-تمام تمام.. مهتمين بي؟ اكله؟ شربه؟ ملابسه؟ دتجيبوله احتياجاته؟ عطور وملابس ومكاين حلاقة وغيرها مو؟

-نعم مدام بس اكو بعض الامور بصعوبة جاي ندخلها لانها ممنوعة وهو بده يشك بالموضوع فـ مشينا بكلامج وگلناله اخوانه واصدقائه جاي يدزوله

-اي ممتاز، واهتم بي زين واهتم لنظافة مكانه فرش اسنانه غيرهم كل ثلاث اشهر مو تنساهن تره شُهيب نظييف

-مدام هذا سجن للمجرمين مو فندق خمس نجوم

-مجرمين شنو؟! تره التحچي عنه رجل اعمال معروف! قضى تسع سنوات من حياته دراسة! وسنين نجاح بعمل نظيف مية بالمية! انتبه لكلامك ووازن حروفك!!

-تمام

هز راسه مأيس ماعرف ديسوي الي اطلبه منه صدگ لو يچذب عليَّ، سام گلي اكو ياخذون الفلوس وكلشي ميقدمون للمساجين بس يقطون بأهاليهم.. ويمكن اني هم دا ابالغ يعني هو بالسجن مو بفندق بس مو بيدي گلبي نار واريده يرتاح قدر المستطاع..

دفعتله شهريته بدون لا يشوفني احد لان لو انلگف دا ارشي يروح بستين داهية، طلعت من السجن وودعت الاطلس وموزس وقبل لا نفترق گلت..

-مسرة: الاطلس راح ارجعلك باقي الفلوس ما ناسيتهم

-الاطلس: تحچين صدگ انتِ؟! اكيد ما ارضى بهذا الشي!

-موزس: what the heck are you talking about

جاوبته بالانكليزي..

-دنحچي على فلوس المحامي والقاضي مال اعادة حكم شُهيب چان مبلغ كلش ضخم ماگدرت اسحب هالگد فلوس من البنك لا ابوية يحس فـ الاطلس دفع نص واني نص

-الاطلس: مسرة گتلچ اني ادفعهم كامل انتِ ليش تعاندين؟!

-مسرة: واني ماريدك تدفعهن! اني مو ماعندي امكانية حتى تدفع بدلاً عني بس گتلك ابوية يحس وماردت اخرب شغلنا

دردم عليَّ بالمغربي متنرفز وموزس يفر بيده ابتسمت على حركاتهم وقررت اتشكر منهم مرة ثانية..

-ماعرف شلون اتشكركم، بسبب فلوس الاطلس ومعارفك موزس گدرنا نعيد محاكمة شُهيب ونخفف حكمه

-الاطلس: ولولا اصرارچ والمحامي القوي الوكلتي چان ما تخفف الحكم مسرة ما جاي افهم ليش ما تردينا نحچي ونگول انتِ الساعدتي؟ ليش مُصرة تبينين لـ شُهيب وللكل اني وموزس التكفلنا بالموضوع كامل؟

-مسرة: ميخالف شباب لخاطري هالشي لا يطلع من بيناتنا

-موزس: ما راح يطلع بس بعدني ما ارتاحيت هسة لو تخليني اهربه من السجن تره اگدر اهربه ولا من شاف ولا من درى انتِ بس انطيني مجال اجيب جماعتي واجي اطيح حظ ولد الزنا الجوه واحرر صاحبي!

-مسرة: ويظل عايش حياته يهرب من دولة لدولة؟ لا موزس شُهيب ما راح يقتنع بهيچ حياة

-الاطلس: عوف سوالف المافيات الوضع مو مال هالحركات

-موزس: انتَ عندك مشكلة شخصية وياي؟

-الاطلس: لا

عفتهم واحد مطنگر على الثاني ويسمع الثاني حچي وصعدت سبارتي وسقت لمكاني المتعودة اروحله..

نزلت من السيارة اول ما وصلت ووگفت گدام عمارة شُهيب الچان ساكن بيها، دفعت اجار شقته ما سمحتلهم ياخذوها منه لو يفرغون منها أي شي وكل فترة والثانية اجيها انظفها بيدي بحياتي ما نظفت مكان وما متعودة بس ماگدر ادخل احد هنا اريد ريحته تبقى ببيته واني ارتبه واتذكره بكل قطعة اثاث موجودة..

مسحت البيت وكنسته وسقيت زريعاته، ابتسمت من شفت وردة متفتحة بوحدة من زرعاته وخلق بداخلي امل شُهيب يجي يشوفها ويفرح.. هاي الزريعات من ماريا جبرته يحطهن بالشقة ويهتم بيهن علمودها وكلما تطلع وردة يقطفها وياخذها لأمه..

كملت كلشي ودخلت غرفته تمددت بفراشه وحضنت مخدته اتنفسها واشم ريحتها مابيها عطره رايح بسرعة جبت شيشة العطر مالته وترستها ونمت عليها مرتاحة وجريتها نومة للعصر ياله گعدت..

لملمت نفسي ورتبت اخر اللمسات، شعلت شمعته الاحبها و سويت گهوة بالبيت بس ما شربتها لان ما احبها بس المهم ريحته تبقى موجودة بالبيت ومتتغير، ابتسمت من فاحت الريحة بالمكان، اخذت نفس عميييق يتغلغل بريتي ورحت اگعد على الطاولة المقابل القنفة مالته.. نفس الطاولة الگعدت عليها بيوم اجت نورسين واخذتله الف صورة وهو نايم..

طلعت تلفوني اگلب بالصور وشفتهن، نزلت دمعتي ومسحتها بسرعة وغيرت خلفية شاشة تلفوني احطها بدال الچنت حاطتها، ابتسمت برضا ودعيت من كل گلبي الملتهب يرجع شُهيب ويرجع لحياته يكمل نجاحه واسنده بكلشي املكه..

طلعت من البيت وقفلت الباب وطلعت للشركة ارتب كم شغلة، وضعي بين وبين يوم اكون تعبانة وخاملة وتعيسة لدرجة ماكدر ارفع ايدي ويوم اكون افضل..

انشغلت هنا وجبرت نفسي اوگف على رجليه واقوي روحي لخاطر ميس بس كلما يجي الليل ترجع تنتكس حالتي واگابل صورنا وابچي على غيابه..

مشت ايامي باردة كئيبة الخطابة طابة طالعة عليَّ ويومية ابوية يجيبلي واحد وارفض وتگب بيني وبينه وهيچ مستمر الحال لحد اخر شخص اجاني للشركة اليوم حتى يحچي ويايه شخصياً ويحاول يقنعني هو صقر ريماس!..

**

-شلون بي هذا العنون انتَ ليش متنام؟

-ايات: جناوي شبيچ تره بعده طفل ميفتهم!

-جنات: راح امووت اريد انام ولك ناام نااام الله ياخذ ابوك

-تسنيم: استغفر الله جنات حرام عليج لا تدعين على زوجچ

-جنات: ياربي ثامحني ما اقصد بث والله تعبانة من البارحة ما نمت ميثكت بث يبچي

-ايات: جيبي حبي خليني اسويله ممية وانتِ نامي شوية

-جنات: حبابة أي شي يصير بي تعاليلي بثرعة

-ايات: شيصير يعني يا عيني

-جنات: ميخالف أي شي واذا يظل يبچي جيبي الي والله يظل بالي

-ايات: تمام نامي حبيبتي

اخذته وطلعت واجتني عُلا ام حضن الفاهي شمرت روحها على فراشي حضنتني ونامت بصفي..

-عُلا: صرتي ام وبعدج متنامين الا بحضن احد

-جنات: اخاف

-عُلا: عوووع عود جاي اقارن بعقلي حضنچ بحضن جلولتي

-جنات: انتِ وجلال مو متتحاچون وجايه يمنا زعلانة؟؟

-عُلا: اي بس احبه ولج احبببببه

-جنات: طاح حظ هيچ زعل فاشل

-عُلا: دنامي نامي شلون ازعل وابنه ببطني يذكرني بي بكل لحظة

-جنات: رامي گدامي ونثخة "نسخة" من ابوه وما اتذكر مالك بي

-لااا ابد هاي اني اليومية ادردم على مالك واگول لـ رامي ليش تشبهله متشبهني؟؟

-جنات: يله كافي اريد انام

-عُلا: كالعادة تغيرين الموضوع

وصحيح كلامها كالعادة اغير الموضوع ما انطي لنفسي فرصة أفكر بي بصوت عالي، حاقدة عليه وكارهته من جبت لسه ما اجه ولا شاف ابنه ابوية اتصل بي من وره خشمه وبلغه اني جبت دگ عليَّ كم مرة ما جاوبته من لح بالاتصالات انطيته حظر متنرفزة..

ولادتي صارت سريعة ما متوقعة چنت گاعدة عصرونية ويه ايات والعلوية وطاهر يفشر على روسنا متعارك ويه زيد ومال حاضر صار عندي وجع واخذوني للمستشفى حتى ما لحگت اطلگ بي بباب المستشفى حسيت راح اجيب ونقلوني لغرفة الولادة وجبت هيچ بهالسهولة والغرابة..

بين ليلة ويوم نوّر حياتي رامي ملاكي واجمل ما املك، حبيب امه ماخذ عيوني بس باقي ملامحه نسخة ابوه صح بعده صغير وما ثابت شكله بس كل الي يشوفه يگول هذا مالك بصغره وطبعاً يقيسون على صورة عند العلوية لمالك من چان طفل..

غفيت وعُلا بصفي وحسيت المغرب على ايات شايلة وليدي روري وتگعد بيه..

-جناوي گومي جنات

-جنات: هاا روري صايرله شي؟؟

-لا ولج بس جايلچ خطار يباركولج على الولادة

گمت اتأفأف والله لعبت نفسي من الخطار كل شوية جاينه واحد، بدلت ملابسي وايات كالت اللبس حجاب لان رجال من كرايبنا جاي سألتها منو گالت ماعرف لبست بسرعة ونزلت اكل شي ما متغدية على لحم بطني من البارحة كملت واخذت رامي ودخلت للاستقبال وصار بوجهي...

-فااهد!!

-فاهد: يبووووووووي

-جنات: شجابك هنا؟؟

-فاهد: ولچ گممملة هذا ابننا؟؟ هذا ابن مالك موو؟؟؟

-جنات: لا هذا ابني اني وحدي!

-فاهد: دووليي انطيني اشوفه يابة يابة يابة يابة ولك اشتعللوو اهلك على هالجمال

-جنات: صلي على محمد لا تحثده

-فاهد: اذا امك جنات ومالك ابوك شنو اتوقع تطلع غير تشگ سبطعش شگةةة

-اممم عود خوش

-اسمه رامي مو؟ اسم خايس ومعفن تلگين مالك شاگ زيجه من القهر هسة

-تره يخبل اثمه انتَ بث تغار!

-هههههههههههههههه والله صح اغار بس يبقى اسمه خايس

-فااهد لا تتنمر عليه

-لا ما اتنمر وجهه الحلو يشفعله ولچ بدر هذا بدررر

-اگلك جاي وحدك؟

-عبالج مالك وياي موو مووو؟؟

-لا بث متفاجأة لانك هنا انتَ اخر فترة اختفيت وين رحت؟

-انشگيت اربع شگات بس يله فدوة لكوريتي المزاعلتني

-باع شيگول وهو مطلگها!

-ولج ما مططلگ وروح امي العااره ما مطططلگ

-لعد شنو؟؟؟

حچالي كلشي صار بينه وبين كيان بحفل تكريمها ظليت صافنة اذا فاهد ما مطلگها منو دز الوكيل والرسالة؟ منو لفق عليه كل هالشغلات؟؟

-فاهد: شلون سؤال غبي جنات منو غير شمسون؟ منو غير خـ..*يون؟؟ منو غير نعلون؟!!

-جنات: اهاااا يعني عمي النذل لاعب علينا وفرقك عن كانونة

-بالضبط وهسة كوري مزاعلتني وما تريدني بعد عبالها بعدني احب سارة

-حقها فاهد انتَ غبت عنها هواي، زين بررتلها ثبب غيابك مو؟

-لا

-وما ناوي تبرر ان شاء الله؟!

-اي

-لاا عاوز تريدك وتتقبلك شو انتو مادري شلونكم مثوين منية علينا لأن متزوجينا؟!

-ماريد اتعارك وياچ گملة خليني اشبع من وليدي

ظل يبوسه ويحضن بي ويشمشم ورامي مسنح وياه لا بچه ولا ناص ولا ضاج من جعيص فاهد اله، ابتسمت من صار يناغيله ويلاعبه..

-فاهد: ولك رامي الحلو شلون وليد عدنا احنه يروحلك فدوة شمسون وشكو عار موجود

-على طاري ابوك ما شفتو بعد؟

-فص ملح وذاب الله لا يرده

-رحت للعلوية لو بعدك؟

-رحت سلمت عليها واجيت اشوف ابني

-اجيبلك شي تاكله تشربه؟

-لا.. جنات

-ها

-اريد اطلب منج طلب

-شنو هو؟

نزل رامي حطه بحضنه گالبه على بطنه وخانگه من رگبته خفت عليه لا ينمتن بس هذا ابني مكيف على سوالف عمه بعد حفيد شمسون شتوقعه يطلع؟

-فاهد: اريدج تسمحين لـ مالك يحچي وياچ

-فاهد اني چنت ادري انتَ جاي علمود هالموضوع لا تحاول وياي عفية اني مرتاحة بدونه

-بس هو ما مرتاح، مالك متدمر على فراگچ معقولة يهلچ تشوفين ابو ابنچ متبهذل وحاله بالضيم؟

-هو متدمر على شُهيب اكثر

سكت فاهد فاجأة ونظراته رقت بطريقة ما شايفتها من قبل، نزل عيونه يلاعب رامي وهمس بخفوت..

-كلنا متدمرين على سجن شُهيب

-انتَ تكرهه

-بس ما يستحق ينسجن هذا ظلم

-الكل يگول ظلم

-شُهيب احسن واحد بيناتنا بعمره ما رضى على شغلنا ولا رضى يمد ايده ويه ابوية كل عملية قام بيها وكل مهمة چانت بس حتى شمسون يعوف اخوانه وامه

-من كلامك مبين تحبه ليش تبينله انتَ حاقد عليه؟

-ما احبه!

-تحبه انتَ فاهد

-ما احبه واكرهه!! شُهيب باعنا ما يحبنا!! هو.. هو راد يخلص من عدنا بأي طريقة!!

يحچي بحقد وعيونه تخزر بيه من العصبية، كل جسمه گام يرجف ويه كلماته من كمل..

-باعنا وفضل اخوته علينا!! هو رادنا نمووت!!

-اتمنى ترجعون تتصالحون

-عوفچ من عدنا رايح اصيح مالك!

-مالك هنا؟؟

-اي اجه وياي

-لا فاهد اوگف.. اوگف لا تصيحله

-ليش؟

-احث.. احث ماكدر اشوفه وره كل هالفترة اني حاقدة عليه وكارهته!

-تمام ابقي كارهته بس خلي يشوف ابنه جنات هذا حقه

عضيت على شفتي مترددة ماعرف شصار بيه گلبي گام يرجف وانفاسي اضطربت، اخذت رامي من ايده وتوترت من طلع فاهد من الاستقبال يروح للحديقة من الارتباك حضنت رامي لصدري وعيوني لزگت بالباب اراقب دخوله..

ثواني وسمعت صوته يحاچي فاهد، عصرت عيوني بقوة وفتحتهن ويه دخلته للاستقبال.. دخل بأناقته المتعودة عليها وبشخصيته وحضوره الطاغي، تقدم كم خطوة ورخت اكتافه القوية وگال بنبرة تحمل اشتياق..

-شلونچ جنة

-جنات: بخير

ابتسم بحب وبقينا واحد يباوع بعيون الثاني محد بينا عكس انظاره، عيوني تحمل عتاب ايام وسنين وعيونه تحمل حسرات وتعب، ما قطع سرحاننا ببعض الا صوت فاهد من گال ببهجة..

-مالك ما تريد تشوف ابنك؟

تغيرت نظرة مالك من الحنية والعطف لنظرات تايهة، سرح بوجه فاهد بدون لا يجاوبه، ضحك فاهد وگال بنفس الفرحة..

-اخيراً صار عدنا طفل بالعائلة مالك من هسة اگلك هذا الوليد ابني راح يكون وما ارضى الا يصيحلي بابا

-جنات: طبعاً ابنك هو فاهد

-فاهد: هههههههههههه الگملة جابت گملة جديدة للعائلة تعال شوفه شلون صغير مثل البرغي شوفه شگد حلو ويشبهك

جره مالك جر من ايده ومالك مثل المكوك، وگفو گدامي ثنينهم ونزل فاهد ياخذ الطفل من ايدي باس ايده وراسه وعيونه الخضر ومده لأخو، نزل عيونه مالك على ابنه وصفن عليه هيچ صفن بدون أي تعبيرات بدون أي تغير بملامحه.. استقبل ابنه بملامح جامدة باردة مابيها روح!

-فاهد: شيله خوية

-مالك: ماريد اخاف اوگعه

-فاهد: ما توگعه مَلك شيل ابنك

-مالك: عوفه بيدك شفته كافي

تنهد فاهد ودار عيونه الي همسلي كلمة "ميخالف" وقصده ميخالف على ردة فعل مالك الباردة وعلى تصرفه واصراره ميشيل ابنه، مد فاهد رامي اكثر وحطه غصب بحضن مالك وهو واگف..

-فاهد: شيله تره اهده!

-مالك: فاهد شسالفة ماريد!!

-فاهد: راح اهده ويموت تره!

-مالك: ولك مااريد رجعه لامه!

-فاهد: واحد.. ثنييين... ثلاثـ....

ما كمل الثلاثة وشهگت واگف گلبي ويه شمرة فاهد لـ رامي يوگعه من ايده، لزمه مالك بسرعة يحضنه لصدره وجاحظ عيونه ما مصدگ تصرف فاهد وجنونه..

-مالك: تخبلت انتَ!! تخببلت بله الطفل صارله شيي!!

-فاهد: وخلي يصيرله واذا؟

-مالك: فااهد لا تلعب وياي فاااهد!

من الخرعة والخوف ما تحملت ابقى واگفة جريت رامي من ايد مالك اخذه واطلع منا شمسويله هالطفل وهيج حاقد عليه!! شمسوي؟؟؟

-فاهد: جنات عوفي اريده

-جنات: اريد ابدله حفوضته

-فاهد: جيبي اغراضه هنا نبدله

بقى مُصر واخذه من ايدي تعلق بي فاهد كلش ويعامله عبالك ابنه كلمة "وليدي" ما وگعت من لسانه.. عفتهم وصعدت لغرفتي اجيب اغراضه وملابسه ومميته خاف جاع شلتهن كلهن بسلته الخاصة ونزلت ارجع للاستقبال واستوقفني فاهد واگف بالصالة..

-فاهد: جنات

-جنات: وين رامي؟

-لا اوگفي هنا دقيقة

-ليش؟ وينه ابني؟

خفت عليه خصوصاً وره تصرف فاهد قبل شوية هرولت للاستقبال واستوقفني منظر.. منظر حبس انفاسي و ماگدرت عيوني ما تدمع عليه، شفت مالك واگف ومنزل جسمه على رامي النايم على القنفة، يتلمس خدوده الترفة بأصبعه ومبتسم يسولف وياه بصوت ناصي ماعرف شنو ديگوله ورامي يهمش ويلعب وياه لحدما لزم اصبع ابوه بأيده الصغيرة، ضحك مالك وسمعته يگول بصوت ناصي..

-ها بابا ها حبيبي...

يتبع 🥹💙.....

━━━━━━  ━━━━━━

يا روح البابا 😭🙏🏻🙏🏻🙏🏻

قفلة خفيفة ظريفة كيوووت كُلش ✨🫶🏻

حُب فاهد لـ رامي يجنننن 😭🙏🏻💙

+ما بقى شي للنهاية ومن هسة يعززز عليَّ الودااع لأجمل ابطال

😭💙💙💙

بس ما خلصنا كلشييي اكو بعد مصايب اكوو 😰

توقعاتكم شنووو 💀🩷🩷🩷🩷

#ابناء_الحسوم "شمسون"

بقلمي: زهراء السلامي ❤︎

لطفاً لتنسون التصويت + التعليق بين الفقرات + متابعة لحسابي 😍.

انا الناي..

البچه على جفاك

والغنّه بمواويلك... 🥀

━━━━━━  ━━━━━━

"جنات"

هرولت للاستقبال واستوقفني منظر حبس انفاسي و ماگدرت عيوني ما تدمع عليه، شفت مالك واگف ومنزل جسمه على رامي النايم على القنفة، يتلمس خدوده الترفة بأصبعه ومبتسم يسولف وياه بصوت ناصي ماعرف شنو ديگوله ورامي يهمش ويلعب وياه لحدما لزم اصبع ابوه بأيده الصغيرة، ضحك مالك وسمعته يگول بصوت ناصي..

-ها بابا ها حبيبي

-اغوو

-مالك: ههههه تحچي ولك صاير انتَ

بقى يلاعبه وكلما رامي يناغيله يضحك مالك ما مصدگ، نزل نفسه باس خده خفيف وشمه.. بقى على وضعه منزل روحه على خد رامي يتحسس ترافته ماگدرت اقاوم اكثر وسويت صوت ويه دخلتي فز بسرعة يوگف على حيله ووجه مال حاضر انخطف لونه كأن لزمته بالجرم المشهود..

-جنات: شو بعدك هنا؟

-مالك: اي.. احم هذا.. هذا الصغير چان يبچي

-جنات: هذا الصغير عنده اثم.. واثمه رامي

عفس وجهه ما عاجبه، فرشت مفرش بالگاع حتى انزع رامي، رحت لابني شلته وحطيته فوگ الفراش وگعدت انزعه الحفوضة..

-مالك: ما لگيتي غير اسم رامي؟

-جنات: شيخصك بأبني؟

-مالك: اي حقچ

كملت تبديله وجبت زيت ودلكت جسمه بي شوية وظليت اللعب وياه واسولف..

-جنات: رووي انتَ صاير فد وكييح ولا تگعد عاقل..

عضيت خده خفيف ضحك وصار يهمش بيه ويجرجر بشعري ونسته بالحياة هاي شعري الطولان هلسه تهلس بدافع الحب..

-مالك: ليش يضحك هواي؟

-جنات: لانه مرتاح

اخذت رامي وطلعت من الاستقبال اعوف هالططوة وحده خلي يمثل على روحه وعليَّ هو ميريد ابنه وكارهه، دورت على فاهد ماهو طبيت للمطبخ شفته گاعد على المجمدة وبيده برتقالة ياكل..

-جنات: المجمدة انخثفت! (انخسفت)

-فاهد: فدوة الي

-جنات: والله ايات تلعب جولة بث تشوفك

-فاهد: انتو مو چان عدكم مساعدة؟ نسيت اسمها يمكن سميرة؟

-جنات: عزه بعينك شلون تتذكرها

-فاهد بغمزة: اني ما انسى

-جنات: ديلا اخذ اخوك واطلع منا

-فاهد: شو تطردين انتِ!

-جنات: فاهد مشكلتي مو وياك مشكلتي ويه ذاك الططة!

-اااااااه قلبي الصغير لا يتحمل حتى ما نست شلون يگول ططة

-فاهد مو وكتها!!

-باعي گملة تعالي يمي احاچيچ

-ها اجيت

-هذا السلبوح ودي لابوه وانتِ لحگيني

-لا تگول على ابني ثلبوح!

-اگلچ والله خبصتينا بكل كلمة والثانية صحتي ابني وابني شنوو ماكو غيرج صارت ام وعدها ابن!

-انتَ بث تغار

-اي والله

-شوف چان صار عندك كوري صغيرون بث انتَ ضيعته من ايدك

-وشلون اخلفه بزنزانة؟؟

-هاااا؟؟؟

-بس چان لازم اخذ كيان وياي ترد عني الوحشة

-فاهد انتَ چنت مثجون؟؟؟

-لا

-لعد ليش تگول زنزانة؟؟

-هيلگة

حچاهة بجمود وگام من المجمدة وباس خد رامي شفطه شفط وطلع من البيت يروح للعلوية، صحت بي قبل لا يغيب عن انظاري..

-واخووووك متاخذه؟؟؟

-اخوية رجلچ دللي لا يروح يشوف غيرج يا غبية

-خلي يشوف ميهمني

-عود من تلفلف درالان الحية ايديها ورجليها عليه وتاخذه لبيتها ذاك الوقت تعاليلي دگي ولطمي

-دارلان بعدها عايشة؟؟؟

-وصارلها اشهر تحوم حوالين الططة للمعلومة

-چذاب

-بكيفج.. يله چاو

طلع وعافني اتصفن هنا بعد ما رجعت للاستقبال يم مالك ابد صعدت لغرفتي فوگ ابدل وانظفها سمعت باب الحوش ينرگع عرفته هو طلع بعد احسن ماريد احچي وياه..

-ايات: جناوي اني طالعة ويه طاهر عازمني على العشا

-جنات: ههههه شعجب

-ايات: لح هواي وماردت اكسر خاطره

-جنات: ماشي حبي غيري جو ولا تبقين مطنگرة عليه

-ايات: يعدل لسانه وما اطنگر! هو يعرفني اكره الرجال السوقي الي يفشر ليش مدا يهتم لهذا الجانب ويحاول يعدله؟؟

-جنات: حقچ بث على كيفج وياه طاهر من يوم يومه هيج

-بس اني ما اسمح بهالشي تلعب نفسي

-وداعتج كل الزلم يفشرون ويغلطون

-مالك يفشر ويغلط؟؟؟

سألتني محترگ گلبها ابتسمت بدون لا اجاوب من اردفت بعصبية..

-بدون لا تحچين من السما للگااع اختلافهم ولوو احچي مناا لباجر هم متحسين بمعاناتي!!

-صحيح اختلافهم چبير واول اختلاف الاطفال، متأكدة لو صار عدكم جهال طاهر راح يشيلهم بعيونه ويحبهم ويكون اب مثالي الهم

-جناوي..

-ايات روحي حبي وغيري مزاجچ ويه خطيبچ الرجال يحبچ لا تلعبين بمشاعره طاهر خوش رجال

-اني احبه

-اعرف تحبي بس بطلي تقارني بباقي الزلم كل رجال يختلف عن الثاني والحچي نفسه للمرة.. كلمن شخصيته وعقليته وتربيته وبيئته اني وياچ خوات ووحدة متشبه الثانية

-صحيح كلامج اني اسفة لان قارنته بـ مالك بس صدگيني مو قصدي شي

-ادري حبيبتي

-تمام باي يروحي انتبهي على رامي

بوستني وحضنتني وباست رامي وطلعت، ايات انخطبت لـ طاهر خطوبة تقليدية متحبه بس هو ميت بيها ويسوي المستحيل حتى ايات تبادله بآخر فترة حسيت بدت تحبه وتتعلق بي بس مشكلة طاهر لسانه زفر وايات نازكة زيادة ومتتحمل هالشخصيات وكل مشاكلهم بسبب هالموضوع..

صارت الساعة 10 بدت مسلسلتي اخذت روري ونزلت اتابعها بالصالة، جبت نمنيات وسويت ممية للعنون وگعدت اتابع وهو ويايه يخنس عليها..

-جنات: روري هذا صاك احلى من ابوك اذا اجه وخطبني راح اوافق

باوعلي بعيونه الكبار بدون لا يناغي بالاجابة، كفخته بأصبعي وهمست بيني وبينه..

-اشش اشش لا تباوعلي هيچ عبالك مذنبة تره ابوك عار!

-اغه

-اي كلش ولك عافنا كل هالفترة وذيچ المصلخة دارلان تريده خلي يروحلها منريده احنه

ضحك وجر شعري ضحكت وياه وحضنته مثل اللعابة، جر اصبعي والا يحطه بحلگه هالسولة ولا يبطلها وكملنا نتابع.. وبينما اني وياه گاعدين بنص المسلسل وبنص حدث مهم اني ورامي ثنينا منسجمين انفتح باب الاستقبال وحده! هيچ وحده وحده انفتح وما اسولف على الخرعة والعيطة العطتها وصراخ رامي وبكائه الي رج الصالة..

-مالك: شبيكم شصاااير؟؟ شنوو صاار؟؟

-جنات: هذا انتَ ووولك ردنا نموووت

-مالك: ليش؟

-جنات: شيل الطفل فحط مالك شبييك

شال رامي يسكته واني شربت مي ارتاح، اباوعله حاير بي ميعرف شلون يشيله ولا يعرف شلون يسكت الطفل اخذته من ايده افتر بي وادگ على ظهره لحدما سكت..

-مالك: خرعتكم؟

-جنات: عبالي طلعت

-مالك: لا ما رحت لمكان

-كل هالوقت انتَ هنا؟

-اي

-‏ما رحت يعني؟؟

-لا

گعد على القنفة يتفرج علينا گلبت وجهي ما عاجبني وجوده بس ما ناقشت زايد اخذت ممية رامي وردت اصعد فوگ ولزمني مالك من ايدي..

-جنة اوگفي

-هدني مالك

-خلينا نحچي

-ماعندي حچي وياك

-جنات انطيني مجال

جرني من خصري وباقي على گعدته ما گام وخرت ايده مني وشدد عليَّ ايد على خصري وايد لزم بيها رجلين رامي من جوه..

-مالك: خليني احچي وياكم

-جنات: احنه منريد نثمعك

-جنات انتِ ليش عنودية؟؟ فهميني ليش عنودية وتحبين العلاقات الصعبة!؟

-مالك انتَ تركتني بأصعب اوقاتي! شوف ابنك راح يبدي يزحف وانتَ متعرفه ولا شايفه من قبل!!

-منو گلچ ما شايفه؟

-وشوكت شفته بالحلم؟؟؟

-اني اجيت بولادتچ جنة

-هههههههههههههههههه صح شفتك واگف ولازم ايدي وتهدي بيه

-جنات اني اجيت! والله اجيت بس ابوج عارض طريقي وسوالي مشكلة الها اول مالها تالي وفضحني بنص المستشفى!

-لا تچذب مااالك! چذب لااا تچذب!! منو الگال ما اعترف بالطفل وميهمني بشي جدي؟؟

-ما مچذب! وتعرفيني ما اچذب! اجيت وسجلت الطفل بأسمي! وروحي تأكدي من ملفه الطبي اذا ما تصدگين!

-ما شفت طولك!!

-اجيت وتوسلت بأبوج يخليني اشوفچ حتى لو من بعيد سوالي فضيحة شكبرها وجابلي جماعة ماعرف منين وصارتلج دگ مرادم وعرك حتى امن المستشفى تدخلو!

-كل هذا صار ومحد وصلي حچي شوف يا سبحان الله!

-محد چان موجود جنات غير ولد عمچ العارات! روحي لواحد واحد سأليهم وتأكدي منهم حتى الطفل تخبلوا عليَّ من عرفوني رحت اشوفه!

-تره ابنك چبييير شوفه شكبره صار لا وصلت ولا شفته بعد!

-جنات اني اعرف مقصر بس الله لا يضوگ بشر العشته بهاي الايام

-اني وابنك اهم من كلشي عشته مالك!

تنهد ساكت، فاجأني من حط راسه على بطني يرخي اكتافه دفعته عني بقسوة وصعدت اركض فوگ اعوفه وحده هنا مو هامني وجوده احس بغضب وحقد گلبي مشعوط منه ومن اهماله بقيت بالغرفة ما طلعت الا من نام رامي..

نيمته بصفي على الفراش ماحب احطه بالسرير مالته الا يمي ينام والحلو بـ ابني متعلق بيه كلش وهادئ وبشوش قليل كلش يبچي وينوص دائماً ساكت لو يلعب..

لعبت بشعره وحسيت بعيوني بدت تغفي فزيت بسرعة مخترعة ماگدر انام وحدي اخاف، خدرت تعبانة وبين النايمة والگاعدة سمعت صوت طرق خفيف على باب غرفتي بدون لا اسأل منو عرفته هو اجاني..

-منريدك

فتح الباب ممهتم لكلامي واجه يگعد على السرير بصفي، طنگرت بوجهه وانطيته ظهري انام بقى ساكت لفترة ياله سأل..

-جنات.. جنات؟.. نمتي جنات؟

اخذت وضع التغليس ثواني واشوف وجهه بخلقتي غمضت عيوني امثل النوم ضحك مستهزأ وهمس بخفوت..

-يمكن جنات نست تخاف تنام وحدها والا واحد يحضنها

-جنات: ما نثيت

عضيت لساني وره هالچفصة عزه بعيني ماگدرت امثل نايمة لخمس ثواني وخربتها، ضحك بصوت عالي وگلبني بحركة سريعة وخفيفة على ظهري..

-شنو شكو شتريد

-وخري هذا

-منو هذا؟؟؟

-ابنچ

-اي عفية عبالي راح تگول ابننا!

-اگلچ يعني صدگ هذا ابني؟

-لا

-ها مو اگول

-ديلا روح منا منحبك احنه

-عادي

-عادي منحبك؟؟

-تعودت ميحبوني الناس جنات

-عود شنو دتريد تكثر خاطري؟ تره مينكثر لا عبالك

-هو لان مينكسر حچيت گدامج ما احب احد يشفق عليَّ

-اممم عود خوش يلا وخر انطي البيبي مجال يرتاح بنومته

وخر يگعد بعيد عننا وانتبهت للسوار البيده يتحرك، غطيت رامي عدل وحطيت راسي على المخدة انطي ظهري لمالك ماريد نتواجه تعبانة بما يكفي من هالموضوع وماعندي طاقة اتناقش..

بقى بالي ويه السوار النسائي الي يلبسه دائماً بس ولا مرة جاوبني عليه الشيطان بده يلعب بعقلي ويگول هذا لواحد من حبيباته وميگدر ينساها وبقى لابسه، يبس ظهري ويه حركة ايده التسللت تمسح عليه من وره ويلعب بأطراف شعري..

-مالك: احبچ

-مو كافي هالشي

-اعرف بس....

تنهد يقاطع جملته، گلبي الغبي وجعني وانمردت روحي ماعرف شجاب هالسؤال على بالي بس صار عندي فضول اسأل..

-مالك شنو چان عاحبك تسمي ابنك المستقبلي؟

-مادري

-يعني ما مفكر من قبل؟

-لا

-لان متريد اطفال

-اي.. ما تخيلت بيوم يصير عندي طفل ولحد هاي اللحظة اني ما مصدگ هذا الطفل ابني

-انتَ متستحق تكون اب!

-صحيح

-انتَ انسان اناني تحب نفسك وبس! رامي ميستحق هيچ اب هو طفل لطيف وبشوش وكله ايجابية حرامات عليه!

-فعلاً

احترگ دمي وأعصابي بدت ترجف انقهرت على نفسي وعلى ابني محد بينا يستحق هالاهمال صح زواجي من مالك چان مصلحة بس هو حبني! اعترف ان يحبني واليحب راح يحب الي يجمعه ويه حبيبه مهما كان خصوصاً طفل!.. قاطع تفكيري صوته الهادئ يگول بجدية..

-مالك: يكون افضل لو طلعت من حياتكم جنات

فزيت من مكاني وكأن احد كهربني، گمت من الفراش بطريقة سريعة وركضت اوگف گباله مخصرة ايدي وحرفياً ارجف من العصبية..

-هذا حلك؟؟ هذا الحل مالتك مالك!! الحل هو الهروب وتبتعد؟؟ هذا حل رجال واعي عابر عمر الثلاثين؟؟!

-لا.. هذا حل رجال تايه وما عاش حياة طبيعية حاله حال ملايين الناس

انفاسي تسارعت ويه كلماته ونبرة صوته الي تغيرت عگدت حاجبي بفضول ويه كلماته الجاية..

-ماعرف شنو يعني اهل.. ماعرف شنو يعني اسرة وحب شنو يعني لمة وعائلة، جنات اني ماعرف شلون احب بطريقة طبيعية! ماعرف شلون الام تحب طفلها واني متفاجئ من اشوفچ مستقتلة على رامي!

-هذا الحب! حبي لرامي وخوفي وحرصي عليه هو الحب الطبيعي بين أي ام وابن!

-احسده لان عنده ام حنونة مثلچ

-امك حبتك مثلما احب رامي ويمكن اكثر

-يجوز

گام يصبله مي من الدولكة بقيت اتابع ظهره المنقبض وعضلات ايده الكبرانة، مالك مزيد وشومه وداگ اكثر من وشم جديد على زنده وايده، اكثر وشومه مغطيات جروح بليغة ما معروفة منين..

-شگد عمرك من ماتت امك؟

-اقل السنة

-ومنو رباك وراهة؟

-الميتم

ابتسم ودار وجهه يواجهني، حافظت على هدوئي وكملت اسئلتي الفضولية..

-وين چان هذا الميتم؟

-المغرب

-عشت اغلب حياتك بالمغرب؟

-اي

-شلون چانت عيشة الميتم؟ تتذكر؟

-ما انساهة

-حلوة؟

-بأستهزاء: اوووووه كلش

-احچيلي عنها

-مو حاب احچي عن ماضيي جنات

-اني احب

تقربت منه اكثر جريت ايده وگعدته بصفي على السرير، لزمت السوار بيدي وعيوني بعيونه وسألته بدون لف ودوران..

-هاي سوارة منو لابسها؟

تغيرت نظرته متفاجأ من سؤالي المليار عن هاي السوارة بس وجهي اليوم كلش مو مال يلعب عليَّ ويغلس على اجوبتي..

-مال امي

-مال امك؟

-الشي الوحيد البقالي منها لگيته ويه اغراض ابوية

-ولبسته حتى تتذكرها؟

-اي

-مالك هم تتمنى لو چانت عايشة؟

ابتسم وجاوب بمرارة..

-كلش

حسيت بوجعه هزيت راسي معترضة هالالم وگمت اخذت تلفوني وطلعت صورتها الاخذتها من ماريا طگيتلها صورة ونويت اراويها لمالك بوكتها..

-شوف

اخذ التلفون من ايدي وباوع للصورة مستغرب، راقبت نظرات عيونه التتفحص الصورة لثواني ونبض گلبي بقوة من شفته يضم شفايفه لداخل فمه وعيونه تدمع..

-هاي امك مالك

عصر عيونه يدير وجهه عني وگف على حيله منطيني ظهره وبيده التلفون يباوع للصورة، عيوني على ظهره واكتافه منتظرته يفرح واشوف ردة فعله بس ما فرح.. ما فرح بالعكس اكتافه وظهره بدوا يهتزون مال واحد يحارب ويحبس دموعه.. گمت بسرعة عليه اديره عليَّ ميقبل يراويني وجهه قسم گلبي نصين من هجم يحضنني ويضم وجهه بصدري ويبلله بدموعه..

بچيت وياه اطبطب على ظهره وراسه من وره اسمحله يفرغ كل طاقته السلبية الحزينة، انهد حيلي من حيله المكسور بصعوبة جريته اگعده على السرير واحنه باقين على هالحال.. استمر دقايق هو معترض يراويني شكله، شوية وسألني بصوت مبحوح..

-هاي امي..؟

-اي مالك امك هاي

حبس شهگته ولزم نفسه عن البكاء، شوفته بهالحال دمرتني مالك دائماً قوي ومينهار بسهولة معقولة شوفة صورة امه تخلي هالجبل ينهدم بهالسرعة..

-شوف صورتها واشبع منها.. شوفها شگد تشبهك

ابتسم يمسح عيونه بأصابعه ويتأمل الصورة، يكبرها ويبعدها ويراقبها بكل فضول يحفظ تفاصيلها.. دعيت من كل گلبي على ابوه النذل حارمه حتى من شوفة صورتها..

-اشبهها مو؟

-اي كلش

-حلوة امي

-كلش باوع نزاكتها ونعومتها

ابتسم بفرح يهز راسه وظل يباوعلي ويباوع للصورة ضحكت شكله مال واحد ديقارن بيناتنا بس ما حچى شي، الفضول اشتغل عندي وسألته بسرعة بدفاشة..

-امك شلون ماتت مالك؟

انقبضت عضلات فكه بعدما چان مبتسم وبلع ريگ ومسح جبينه من قطرات العرق البدت تتجمع عليه، سؤالي وتره لدرجة ضحك ميعرف شيجاوب، كررت سؤالي بجدية اكبر وهالشي خلاه ينزل التلفون من ايده وعيونه تطبع بالگاع يشرد بيها.. ثواني ونطق..

-امي انتحرت

-ليش؟

رجع سكت سرحان مسحت على ايده على كيف ارجعه ويايه، ابتسم بمرارة وجاوب بصوت بصعوبة سمعته..

-انتحرت بسبب الاغتصاب المتكرر

-من ابوك؟؟؟

-لا

-لعد من منو؟؟

-من واحد من هوامير المغرب

-مدا افهم

ما جاوبني وطلع تلفونه فتح الاستوديو مالته وطلع صور ملتقطهن من دفتر قديم متروس كتابات بلغة ما مفهومة.. گلب بتلفونه شوية وبده يقرا مقتطفات بسيطة منهن، يقرا وكأنها رواية بسرد كاتبة..

"الخميس 24/6 اليوم حللت بالمختبر وبشروني اني حامل.. منتظرة رجعة جعفر على نار حتى ابلغه بهذا الخبر الحلو متأكدة راح يطير من الفرح.. ما بقى شي ويقنع اهله على زواجنا اني متحمسة لهذا اليوم واتمنى يكون قبل لا يكبر بطني وانحرم من البدلة البيضة"..

گلب بالصورة الثانية وقره الوراهة..

"الثلاثاء 28/2 ما بقى شي وينور حياتي ملاكي اني لحد هذا اليوم ماعرف جنس الطفل ولد لو بنية بس ما يهم المهم يكون بصحة وعافية ماريد اكثر من هالشي.. شمسون متحمس اكثر مني لولادة هذا الطفل منتظره على نار لو اجتنا بنت يريد يسميها ملاك واذا ولد يريده مالك واني الاسمين عاجبيني وطايرة بيهم.. جعفر مينام الليل الا يحط راسه على بطني ويصلي بقلبه يكون هذا الطفل السبيل لجمعتنا سوه وماگدر اگول غير "امين.. ادعي من امنا العذراء تحفظ طفلي ويزيد حياتي بهجة"

رفعت حاجبي متفاجأة ام مالك مسيحية؟؟ محد ذكرلنا هالشي حتى العلوية متعرف ويجوز هذا السبب الاكبر ما قبلت جعفر يتزوجها.. گلب مالك بالصور وفتح صورة جديدة وهنا نبرة صوته تغيرت واعتلته غصة..

"اني ممتنة من ربي على اعطائي اجمل ملاك، نور الدنيا ابني الحبيب مالك قطعة من روحي واجمل ما املك جعفر يغار لان ميشوف ابنه هواي بسبب عمله وكثرة سفره يتحسر على شوفته ويتحمس يرجع حتى بس يشم ريحته.. للاسف ما تزوحنا ماعرف شلون راح ننجمع ويه بعض لكن اهله معارضين بشدة هذا الزواج خصوصاً ابوه حلف لو اكتشف بجعفر متزوجني حتى لو بس عقد راح يقتلني لهنا وصلت بي المواصيل وبديت انزعج وافقد الامل.."

"الجمعة 13/4 رجل غريب يتبعني صار اسبوعان قلقني الموضوع وشمسون ما موجود حتى اشاركه عسى ولعل هذهِ الكتابات تخفف عني"

"الاحد 15/4 اكتب الان وقلبي يرتجف.. اكتب الان وقلبي يرتجف! شفته من جديد! شفت الرجل الي يلحگني مرة ثانية وراح انجن من الخوف اليوم چان واگف بباب بيتي!"..

ذب التلفون تعبان نزل راسه بقهر وقره الرسالة بعدها وبأختصار شديد مكتوب بيها..

"الاربعاء 18/4 الم في كل جزء من جسدي جعفر مختفي.. دخل الرجل لبيتي دفع الباب عليَّ واستحوذ على جسدي بالكامل.."

الجمعة.. السبت.. الاحد.. الاثنين.. الثلاثاء الخخ.. استمر مالك بالقراءة والوجع يعصر بگلبي عصر! كاتبة ادق تفاصيل الصار وياهة والله يساعد حالها ما اتخيل شلون وضعها چان وهي تكتب كل ضرخة كل اللم كل رعب عاشته وحدها كل تهديد توجه الها من الرجل تهديد بحياتها وحياة ابنها اذا حچت لـ شمسون يقضي عليهم ثنينهم ومرة شك بيها لمحت لجعفر شال سچينة وراد يحطها بگالب مالك..

اولغا چانت تتعرض للاغتصاب بشكل وحشي بشكل وصفته بالضبط "تمنيت ما تشرق عليَّ شمس ولا تغرب" استمر الرجل يتردد الها كل يوم! كل ساعة! كل دقيقة! ياخذ مالك يحطه بغرفة ويسحل اولغا لغرفة ساد حلگها بيده ويقيدها عن الحركة ويتوحش عليها!

حاولت تهرب مرة وثنين وثلاثة ويرجع يصيدها وينتقم منها اشد انتقام، شمسون بده يشك بيها تخونه ويتعارك وياهة وينهار ويگلب البيت على راسها ويعوفها وحدها چانت تتوسل بي ميعوفها وحدها لان بس يروح يجيها ذاك الحيوان ويشبع رغباته بهاي المسكينة.. وصفت وضعها بالوردة الذبلانة بكل رسالة كانت تتمنى الموت وتدعي الرب ياخذها ويخلصها من وضعها..

اغتصاب بعد اغتصاب روحها طفت وكرهت الدنيا كلما تريد تبلغ شمسون بالصار يكتشف الحقير بطريقة من الطرق ويأذيها اكثر من المرة القبلها.. حياة اولغا انتهت وما شافت منها شي.. فضلت الموت فضلت تنتحر وتخلص من حياتها وتنهي عذابها..

-جنات: ليييش ما حچت؟؟؟

-چانت تخاف من ثنينهم هم ابوية لا يچذبها ومن ذاك لا ينتقم مني ومنها

-يا عمررري وتالي؟؟

-دخل ابوية لگاهة شانقة نفسها بصالة بيتنا انهار وكره حياته وراهة كرهني لاني چنت نايم من امي قررت تنتحر الجيران اكدوا لو اني باچي چان اجوني وشافوها

-مالك مو منطق هذا!! چنت طفل شمعرفك انتَ؟؟

-بعد ابوية راد حجة حتى يكرهني ويطفي النار المشتعلة بگلبه عليها نبذني بميتم ويا جنات حرام اگول عنه ميتم چان سجن واللهي سجن

-يمة

-تعذيب، ترهيب، خوف، جوع عيشونا چنت اتعنف بكلشي يصدر مني سويت زين او لا اني متعنف ومكتول كل يوم انام ودمعتي على خدي.. مثل الخدم اتخذونا لو شگد ماحچيلچ ما تصدگين كل هذا واعمارنا چانت متتجاوز الخمس سنوات

-سودة بوجهي

-گلبي مات جنة من سجلت مدرسة چنت اباوع للاطفال واشوفهم مبدلين ونظيفين وامهاتهم تودعهم واهاليهم ينتظروهم هذا الي يگول امي درستني وهذا اليگول ابوية اشترالي گمت اكره كل الاطفال ما احبهم اتخبل منهم نفرت من الكل واعتكفت على روحي احس اني غلط وكلشي بيه مو حلو وعيب والله عاقبني واخذ امي مني والميتم عقوبتي

-وشصار بعدين؟؟ شلون طلعت من الميتم وما عرفتو منو اغتصب امك لليوم؟؟

-اكيد عرفنا

-منو؟؟

-تعرفين عدونا الاطلس؟

-اي؟؟

-عمه اخو ابوه اسمه محمود چان مريض نفسي مهووس بطريقة مرعبة

-ووين راح؟؟؟

-ابوية كتله اول ما اكتشف هو الي اذى امي بمكانه كتله ودفنه ومحمد الادهم وابوه ما فكوا حلگهم

-وعادي عندهم لان كتلتو؟؟

-اكيد! هذا ثارنا من زمان همه الي اعتدوا على امي الادهم چان يعرف ابنه مهووس بوحدة اوكرانية ويعرفه يمارس عليها الاغتصاب ويتردد عليها وما منع منه من هالشي!

-حسبي الله ونعم الوكيل

-ثار وعداوة عدنا وياهم صار سنييين ابوية ما اكتفى بهالشي ولا شفى گلبه و الادهم زادها من راح لشمسون وگله امي خانته ويه محمود والموضوع مو إغتصاب بس مذكرات امي كلها لگيناها بالبيت مضمومة بالمخزن قرينا كلشي كاتبته وبعض الجيران اكدو ان الرجل چان يطفر السياج ويدخل البيت وكم مرة سمعوا صياحها وتوسلاتها

-وليش ما حچو لابوك؟؟؟

-يگولون هددنا اذا نحچي او نتدخل يكتل اطفالنا واني اشك مهددهم اتوقع دافعلهم فلوس حتى يسكتون

-وابوك شسوه وره ما الادهم گله هي عدها علاقة بي؟

-سوه النون وما يعلمون اخذ اخواني شُهيب وفاهد رادهم يغتصبون بنت محمد الادهم فاهد چان طافي وما مستوعب الوضع ويگول ما تمم المهمة وشُهيب عارض بشدة وراد يهرب البنية ما يقبل بهالشي وزاد اصراره من عرفها اخت الاطلس بس ابوي لزمه بآخر لحظة وزوعه حليب امه

-چذذذذذب والبنية شصار وياهة؟؟؟

-تدمرت البنية اني ما چنت موجود بالمغرب بوكتها وماعرف بهذا الموضوع ناصر حچالي حبسوا البنية عندهم واعتدوا عليها وكتلوا الولد الوياهة بس محد حچى منو تمم المهمة ولحد قبل فترة ياله الشرطة عرفت من خلال فلاش بي تسجيل صوتي لفاهد ابوية مسجل صوته علساس هو القاتل

-ليش هيچ سوه ابووك؟؟

-سواهة حتى يحمي نفسه واذا انكشف فاهد يروح بيها و لحد اخر لحظة بذاك اليوم فاهد طافي وما يعرف شيسوي زايد جرعة المخدر وعقله فاصل والشرطة اثبتت صوته ولسانه ثگيل بالتسجيل دليل چان متعاطي او مكثر بالشرب ومن خلال الادلة والبحث دام لاكثر من سنة ونص اكتشفوا ناصر الي قتل الولد والي اغتصبوا البنية لليوم ما معروفين منو

-وشلون گدرت ترجع لأهلها؟؟

-شُهيب الي هربها متصل على اخوها حتى ياخذون بنتهم ورجع ابوية انتقم من شُهيب لانه كسر كلامه لليوم ما انسى ابوية شسوه بي طلعله جلد ثاني من التعذيب راد يطلع روحه بيده لولا تدخلي بآخر لحظة

-مالك شنو هذا!!

-هذا لا شيء بالنسبة لباقي المواقف التجمعنا ويه الادهم وولده

-مصدومة والله.. زين انتَ شلون طلعوك من الميتم ما كملتلي؟

-بعمر السبع سنوات رجعلي ابوية وسفرني لـ روسيا وهناك تعرفت على اخواني وبدت حياتي تحلى نوعاً ما رغم التدريب القاسي والالم العشناه بس وجود اخواني خفف عني هواي

-يعني چنتو قريبين على بعض!

-روح وحدة بثلاث اجساد

سكتت ماعندي شي اضيفه ما سألت عن سبب فراقهم لان مثل العادة راح يتهرب وميجاوبني.. حسيت بي يتلمس رجل رامي من جوه على كيفه ابتسمت على منظرهم بس تذكرت السواه وبسرعة خبيت ابتسامتي..

-جنات: راح تبقى هنا؟!

-مالك: ترديني اروح؟

-جنات: اي

-وتنامين وحدج؟

-اي

-ومتخافين؟

-اي

-جنات لهدرجة انتِ ما ترديني؟

-اي

-جنات!!

-اي خلي يرجع ابوية وتطلگني شكو رابطني بيك

-ايي حتى تتزوجين واحد حلو!!!

-اي

-وجعييي وطاگلحييي

-اي شعليك انتَ عشتوو تره عمري عشرين مثل الوردة شناقصني قابل؟؟

-اييييي انتِ گوليهااا ببالچ واااحد مو اني اعرف هالدگاات النااقصة!!

-صوتك الطفل نايم

-منو ببالچ؟؟؟ منو خاااطبچ احچي!!!

-محد خاطبنيي لا تتخبل!!

صرخ رامي ويه نترتي القوية شلته اسكت بي بس فز مخروع بقى يبچي ويشمر بروحه مادري احير بـ رامي الفحط لو بمالك اليرجف وينفخ نار..

-جيبي جيبييي

جره من ايدي يتعارك وياي نيمه على كتفه ودگدگ على ظهره بس الطفل ما سكت، طلع بي مالك بره الغرفة ونزل واني اركض وراه اخذه للحديقة هدأ نوعاً ما بس بقى مستمر بالبكاء مشى بي بعد لحدما طلع بي للشارع وهو ما حاس على روحه.. مديت راسي من باب الحوش وصحت..

-وين ماااخذه؟

-امشي جوووه انتِ مو محجبببة!!

دخلت راسي وداخلي يفور طبيت جوه بسرعة لبست شال وعباية اسلامية ومديت راسي من الباب مرة ثانية بس اختفوا مالهم اثر بعد، الدنيا ليل وشارعنا هادئ بهيچ وقت بقيت واگفة وافرك بيدي فترة طويلة الى ان رجعت آيات وبيدها بوكيه ورد احمر چبير والضحكة تارسة وجهها وعيونها..

-ايات: هلوووو

-جنات: هلو اگلچ ما شفتي مالك ورامي؟

-ايات: لا، صدگ انتِ ليش واگفة هنا؟

-يبچي واخذه يفتر بي

-ها لعد شكو خايفة عليه ابوه تره هو

-مو تأخرو

-دتعالي تعالي نفوت اراويچ الحب شجابلي

دخلتني وياهة وانطتني قسم من الاكياس البيدها وگعدت تراويني شنو اشترت، مشت نص ساعة ايات تسولف ويايه على طاهر وراحت تنام ومالك ما رجع الف وسواس صار براسي خفت اخذه وميرجعه الي بعد..

گابلت شباك المطبخ وگعدت اكل بأظافري، هستوني دا افتح الحضر عنه واتصل بي وشفت باب الحوش ينفتح وضحكة رامي واصلة الي ومالك وياه..

-مالك: هههههه ولك مسطي

باس خده وشايله على چتفه حاط بيد رامي نستلة ومصاصة وهو شايل كيس شفاف متروس حلويات بدون لا احس ابتسامة زينت وجهي وحماس عجيب انخلق بداخلي..

وگف مالك بنص الحديقة يفتح لـ رامي المصاصة وظل يدردم وياه بالمغربي ومن كل عقله منتظر رامي يجاوبه، چان ديگله خاف تعور روحك بالعودة مال المصاصة ولا يظل يهمش خلي يثگل ويصبر وهو راح ينطي ما طايرة.. طبعاً هذا الفهمته..

-مالك: رامي عيب ابني عيب!

كفخه رامي على عينه شهگة مالك وصلتني متت ضحك على حركته وصدمته ولازم عينه وخازر رامي وهذا ابني ولا اهتم تعال وانطي كفخة طفي العين الثانية..

-جنات بهمس: حيييل

-مالك: ابن جنات شتطلع يعني

كفخه للمرة الثالثة وجر شعره طرت فرح طررت فديته وليدي ياخذ بحقي وميرضى على امه، ضحك مالك وباسه كم بوسة بكل مكان من وجهه وايده ودخل بي جوه للمطبخ.. ركضت للكاونتر اسوي روحي واگفة اسويله الشوربة مالته ودخلو همه..

-مالك: ولج جنات هذا ليش يضرب؟

-جنات: ميضرب الا من واحد يضوجه

-مالك: كفوووو لا خلص مستقبله مضمون

-جنات: طالع عنيف على ابوه

ضحك مالك ضحكة سعادة استغربتها وظليت صافنة عليه، غمزلي واجه يگرصني من خاصرتي طفرني بمكاني..

-جنات: وخرر لك

-مالك: نحسة.. اگلچ شنو اليوم ما تنيمينا؟

-اي متنام روح لبيت العلوية

-العلوية طاردتني ما تقبل ابقى يمها كالت روح لمرتك

-علينااااا

-اي شبيچ

-مو حتى الثلج گليناااا

-وبسامير بالهوا دگينا ادري لا تگوليها بس والله هسة چنت يمها

-هاي من تأخرت ويه رامي رايحين للعلوية؟

-اي

-مالك ليش ما گتلي گلبي وگف من القلق!

-ليش يوگف قابل راح اخطفه.. يله يله اريد انام امشي سويلي فراشي

-ياااا

-اي اني مو زوجچ؟!

-راح نتطلگ قريباً ماريدك!

-عود من نتطلگ الله كريم هسة اريد انام يم هذا (وباس خده)

-اسمه رامي!!

-اي هو هذا اريده (باس خده مرة ثانية) هههههه ولج شوفي يضحك الارعن

-راح افرشلك بالهول

-وتخلين هذا ينام يمي؟

-لاا هذا ينام يمي!!

-مو حق اريد هذا ينام يمي!

-هذا راح ينام يم امه الحملت بي وتعبت عليه!!

-جنة

-هااا

-من الاخير خلينا ننام سوه!

-نعم؟؟؟

-اي انتِ تردي واني اريده شلون قابل نقسمه نصين؟! خلينا ننام سوه ونفضها

-هههههههههههههههههه

-الله يستر من هالضحكة

-ملوك شايفني قشمر؟!

-غرفتج وين فوگ مو؟

طلع گبل ورامي بيده فكيت حلگي ممصدگة صلافته شفته يصعد الدرج وياكل ويه ابنه حلويات لحدما غابو عن انظاري تنرفزت كللش بس سكتت ونويت امرر هالليلة على خير حتى ميروح للعلوية يشكيلها مني وتطبب العوچية ببطني..

صعدت لغرفتي لگيته نايم على چربايتي ورامي حاطه على بطنه يلعب وياه لعبة غريبة تشبه الباح باح بس مو باح باح يمكن عدهم هاللعبة بالمغرب، قرقره بالنهاية وهذا مات من الضحك ويتلوه بيده مكيف على الوضعية..

-جنات: جيبه خليني انومه

-خلي بعد شوية

-لا تأخر وقت نومه

اخذته وكعدت على الچرباية بصفه ارضعه الممه ومالك ضاربله ركن وصافن علينا، باوعتله بطرف عيني نفس نظراته قبل من يصفن عليَّ ذب حسرة ومسح وجهه وعيونه وتقرب من روري البده يغفي يباوع لوجهه شوية ورفع انظاره الي يهمس بصوت خافت..

-كلش لايگلچ تصيرين ام

بقيت منزلة عيوني ما اخليها بعينه لا يقراني وانفضح، همست بصوت ناصي كلش..

-شكراً

-رامي محظوظ بيچ

-واني محظوظة لانه ابني

شلته ادگدگ ظهره ورجعته ينام بفراشه بسلام فاتح ايده ورجله ومسوي حلگه بوز مثل البطة، ابتسمت مرتاحة لانه مرتاح وتمددت بفراشي ومالك بصفي ماعندي جرأة اگوله نام بالگاع لان مستحيل راح اگدر انام وحدي وايات ما راح تقبل انام يمها ماطول مالك هنا يعني نهايتي بحضنه يعني بحضنه اليوم..

سرحت بالحايط البصفي دقايق عقلي مشغول وافكر شنو التالي؟ بس عقلي وكلشي افكر بي تبخر وانخطفت انفاسي من سحبني من خصري يحط راسي على صدره جمدت كل اطرافي من دفو جسده حاوطني بتملك، جر ايدي وغصب حطهن جواه حتى ما ابقى معچفتهن ورافعتهن، رفع راسي من حنچي يخلي عيني بعيونه وگال..

-ما تباوعين بعيوني ليش؟

-لانهن يلعبن النفث!

اهتز صدره بضحكة خافته وسب ابوية بالمغربي، طنگرت وسبيت ابوه ابتسم اكثر ونزل نفسه يبوس طرف انفي..

-جنات: تجرأ اكثر وانهي مثتقبلك وشرفيي!!

-من اگول نحسة هم انلام؟

-لا

-دنامي نامي تضوجنا بهالليالي

غمضت عيوني بسرعة اسوي روحي نايمة حتى هو هم يأيس وينام وهذا الصار.. بس ما گدرت تغفى عيني بقيت اتگلب بفراشي لحدما فلتت نفسي من ايده ما قيدني اكثر وحررني گعدت على حيلي اتصفن وحرورة بصدري ما جاي تبرد..

نزلت جوه طلعت حليب موز وصبيتلي كوب شربته كله وما ارتاحيت صبيتلي بعد عصير برتقال، شربته وصبيتلي عصير منگا، شربته ورجعت اشرب حليب موز صارت لخبطة بمعدتي لعبت نفسي..

رجعت لغرفتي مو ظلمة لان ما انام بالظلام، عيني على تلفون مالك والحرورة بگلبي تزيد وتزيد عقلي وفكري كله بتلفونه صار، ما تحملت وسحبته بين ايدي احاول افتحه حطيت رمزه القديم فتح ويايه بسرعة اخذتلي ركن بالغرفة اگلب بين الرسائل ادور على رسائل دارلان..

فتحت الواتس ما لگيتلها اثر هنا بس شفت جاياته رسائل كومة ما فاتحهن، طلعت للانستا واول حساب صار بوجهي حسابها بالخاص مالته!! دازه كومة رسائل وما مفتوحات كلهن واخر رسالة دزتها قبل شوية بالـ 10:30..

الف حوصة صارت بگلبي سويت طريقة افتح الرسالة بدون لا يبين قريتها وشفتهن كلهننن بلغة البلد كاتبتهن مو بالعربي اصلاً مالك نادر يستخدم لغته العربية بس ويايه اكثر شي..

اگلب بالمحادثة ماكو مالك ما مجاوبها ولا مرة صار اكثر من سنتين بس هي تدز او تجاوب على ستورياته، شفت كم صورة الها دازتهن بشكل دائمي وهي بالجم بنفس ملابسها الفاضحة وكاتبتله شي قريتها وفهمتها "مكانك خالي" متت من القهر خصوصاً من شفت اخر رسالة وصورة دزتها اليوم بملابس حفلة عبارة عن تنورة جينز قصيرة جداً وتوب ابيض طالع منه جسمها وكاتبة "we miss you"..

جبت تلفوني واخذت صور لكل كلامها گصيت صورة حسابها حتى متعرفها منو ودزيته بشكل فوري لكيان تترجمه الي لان معظمه ما فهمته مشكلة هاللغة صعبة ومو بسرعة واحد يتعلمها.. جاوبتني كيان فوراً برسالة كاتبة..

"هاي منو!!!!"

"جنات: شنو نوع الكلام الدازته؟؟"

"ولج منو هاي؟؟ جاوبي ليش جاي تحچي بيه!!!"

"شنو؟"

"جنات عليج الله گولي منو هاي بسررعة!"

"دارلان هاي"

"صخام بعيني عمت عينهاا هالغبية فضحتنا!!"

"شكاتبة!!؟"

دزتلي بصمة ركضت اهرول بره حتى اسمعها واسمع صوتها تهمس همس وتحچي..

"كيان: كاتبة مشتاقتلك ومدا اگدر ابطل افكر بيك ليش گطعت عني وعن كيان ثنينا متأثرات بغيابك وممتحملات البُعد ارجع مالك حياتنا فارغة بدونك!"

"جنات: وووجع حياتها فارغة بدونه ام الوصخخ!"

"دباعي هاي الرسال بااعي كاتبتله كيان مچانت تبطل تحچي عنك حتى من اللتقينا ذاك اليوم بالجم حچت بيك وشگد انتَ مهم بالنسبة الها اشوفها مكسورة لان سحبت نفسك منها واهتميت بـ زوجتك الصغيرة!"

"جنات: سمممم وزحححيرررر"

"قسماً بالله يا جنات ما حچيت ولا جبت طاري مالك بولا شي غير الكلام الي انتِ سمعتي"

"تعلميني بيچ كيان بس اني اعرفها هالعاره راسمة عليه حاامض على بوزها الطويل توصله انام على خوانيگه وعلي"

ذبيت موبايلي ورجعت لموبايل مالك رحت على اسمي يطلعلي حساب غير موجود طبعاً لاني حاضرته من كل مكان، فتت للمحادثة وانصدمت من الشفته! انصدمت بل انصعقت واني اشوف رساااائل هائلة جرايد كاتبلي وكله بالعربي! ما مستعمل ولا كلمة انگليزي لو بلغة البلد كله عربي ومتأكدة اخذ منه ساعااات بالكتابة لانه ضعيف بي ونص الكتابة ساحگ بيهن وغلط..

اقره بالرسائل وعيوني مدمعة حتى واني حاضرته كاتبلي عن مشاعره واحاسيسه والوحدة الي يحس بيها، نزلت دموعي من قريت الرسالة كاتبلي..

"حبيبتي جنات.. جنتي وكلشي حلو املكه مشتاقتلج، مشتاق لصوتج وريحتح وكلشي بيج.. اني بروسيا وضعي مو تمام جنة محتاجچ رجعت لنفس البيت الي عفت بي شُهيب واحس الدنيا ظلمت بعيوني مخنوگ ومحتاج شوفة عيونچ عسى ارتاح.. احبچ وما اظن شي يوم راح يتبدل حبچ بثانية اني تعبان جنات تعبت وانتِ بعيدة تعبت واخواني كلمن بمكان، تعبت لدرجة ماريد هاي العيشة بس اعرف نهايتي جهنم لأني اخذت جَنتي بالدنيا.. والي هي انتِ"

مسحت دموعي وقريت الرسالة الوراهة وصدمتني وكأنه جاوب الاسئلة البراسي عن ليش مالك ما گدر يساعد شُهيب..

"نار بگلبي تسعر ماعرف شلون اطفيها! هاي رجعتي من السجن شفت شُهيب تمنيتني ميت ولا شايف اخوية وحبيبي بهذا الوضع، سويت المستحيل حتى اخذ بحقه! مسرة الكسرته واخذت حقها من احسن واحد بينا.. كل العشاير والجماعات الچنت اتعامل وياهم بوحود ابوية انسحبوا وشالوا ايدهم من قطعنا عنهم الوارد والشغل اني وحدي جنات! وايد وحدة ما تصفگ خصوصاً هالبنية مسنودة من ناس كبار وما جاي يلوحها شي.."

الرسالة الوراهة چانت فرق كم ساعة دازها من الرسالة القديمة، كاتب.

"اتمنى تكونين بخير لاني مو بخير، عرفت منو وره افلاس ابوية وهروبه وعذابه.. فاهد! فاهد منتقم من ابوية و مسلم كلشي يخصه لاعدائه بالسكتة وبدون لا احد يدري چنت اعرفه ما راح يسكت وياخذ حقه من شمسون على سنين عمره الضاعت، حط ايده بأيد عبد الرحمن بدون لا يدري وسهل المهمة عليه وقضوا على ابوية.. بس المشكلة اكو شخص غيرهم متدخل بهاي المهمة وما جاي اعرفه منو.. شاك بـ مسرة قيثارة هالبنية لعبت بحالنا شلون گدرت تلوف شمسون وولده بأصبع واحد شللوون!!!"

كاتب الااف الرسائل ومو مبالغة العدد، يكتب كلشي بخاطره وگلبه واتوقع هالشي ورثه من امه، يكتبلي ومتطمن ما راح اقراهن بيوم بسبب الحضر المنطيته اله.. اخر رسالة قريتها چانت..

"امنيتي اشوفه، اشوف ابننا.. لاول مرة اعترف اني چذاب من گلت اكرهه گلبي يحبه على حبچ جنة وما متمني غير نستقر ويه بعض وننجمع ببيت واحد.. تركتكم بسبب خوفي عليكم تهددت اكثر من مرة بيچ وتضاعف خوفي من گلتيلي انتِ حامل خفت عليكم ثنينكم وتركتكم مجبور عفتچ وضيعتج من ايدي مجبور مثل كل مرة.. جنات ابوية لو رجع ما راح يعوف ابني بحاله راح يستخدمه ضدي بكل الطرق والوسائل ويبچينا عليه دم.."

طلعت من اسمي ما گدرت اكمل قراءة تعبت وگلبي وجعني، گلبت بباقي تلفونه بشرود مو قصدي اتجسس بعد وبالغلط ايدي راحت على الستوريات والحظ الفگر فتحت ستوري دارلان!!

طلعت منه بسرررعة قبل لا اشوف محتواه اطفر بمكاني واللطم على وجهي طااحظج يالططوة گبرر الگبررچ يا فگور ما فتحتي غير ستوري هالتافهة!! ماكوو دقايق وكتبتله رسالة جديدة عبالك چانت تراقب منو شاف ستورياتها كتبتله بالعربي هالمرة رسالة..

"مااااالك 😍😍😍😍😍"

دگيت ولطمت على الهمسة عمت عيننننچ ما صارت عينج الا على اسمه!! اااخ مال اشيل اصابيعي واچوويهن على هالطرگاعة الجبتها على راسي!!.. رصيت على اسناني بعصبية ويه رسالتها الثانية كاتبة بحروف كبيرة..

"I MISS U SO FREAKING MUCH MALIK PLZ ANSWER ME I KNOW UR STALKING ME!!"

"الترجمة: مشتاقتلك كلش هوايه مالك اترجاك تجاوبني اعرفك دتراقبني!!"

سديت التلفون بسرعة ورجعت اركض للغرفة حطيته يم راسه وطفرت بخفة على الچرباية وجريت ايده اخلي يحضنني وسويت روحي ولا كأن سويت مصيبة..

-مالك: كملتي تفتشين بتلفوني

جفلت يابسة بدمي، تداركت الموقف بسرعة وتثاوبت وفركت عيوني اسوي روحي نعسانة رفعت عيوني اله وهمست امثل النعاس..

-جنات: هاا

جاوبني بتمتمة واحد نعسان ومغمض عيونه..

-مالك: ما اخونچ لا تخافين

-منو بحالك انتَ متهمني تره چنت بالحمام!

-امم

-نام يله

-امم

غمضت عيوني وبقيت اللوم بروحي شلون خليته يحس عليَّ افتش بتلفونه هسة شيخلصني.. گعدت الفجر رامي يبچي اخذته وطلعت من الغرفة وبعد ما رجعت ماكو نوم بعيوني ملح بالستة گعد مالك يفرك بعيونه ومستغرب اجانه للصالة..

-مالك: شوكت گعدتي ما حسيت عليج؟

-الفجر

-ها.. جنات اريد افاتحچ بموضوع مهم

-شنو هو

-اريد اخذ رامي وياي

-وين؟

-لاوربا

-شنووووو

-على كيفج يا عيني شبيچ

-ليش تاخذه؟؟ تريد الحضانة؟؟ مثتحححيل انطيها الك!!

-ما راح اخذ الحضانة راح اخذكم ثنينكم وارجعكم وياي!

-ماا ارجع وياك اريد اتطللگ!!

-جنات والله العظييم ورووحهاا لامي العزززيزة مااا اطلگچ لو ماادري شتسوين لوو اكبرر سلطة واكبر راس يتددخل تحلمينن اطلگ فهمتي لو لا!! وسالفة الزواج من خ** ثانييي شيليهاا من راااسچ اليااابس!!

-انتَ معليك!!

-معليك شنوو؟؟ اني ما اقبل ابني يتربى ويه رجال ثاني!!!

-هااا هسة صار ابنك حبيبك وتخاف عليه وينننك كل هالشهوور؟؟

-لا نعيد ونزيد بنفس الموضوع راامي راح يرجع ويااي اسويله جنسية!

-شيسوي بجنسية؟؟؟

-تفيده! تفيده لمستقبله لحياته لعمله لشغلله تنطي فرص اكبر اذا تحبين ابنج وتخافين على مصلحته أنطي خليني اسويله جنسية!!

-شلون راح تسفره منا وهو حتى ماعنده جنسية عراقية؟؟؟

-نسويله، هسة نطلع اني وياچ نسويله وحدة واخذه واسافر

-ماالك متاخذ ابني وحدددك!!

-تعالي وياه!

-اي اجي!

-تمام

-والفيزا شلون؟؟

-اشوف فيزتج الدراسية القديمة اذا ما سقطت تطلعين بيها واذا سقطت اجددها

-شگد تطول؟

-ماعرف اني اردلج خبر

-انتَ مسافر مو؟

-نااااايم على گلبچ ما اطلععع من العررراق رجلي على رجلللچ!!!

عاط بعلو صوته ورجع للغرفة ظليت فاكة حلگي وصافنة طلعت ايات تهرول خايفة من العياط سألتني شصاير جاوبتها واني افر بيدي..

-متخبل عليَّ عباله اريد اتطلگ منه واروح اتزوج

-يا عوبة بس لا انتِ طلعتي هالسمعة عليج؟

-اي

-غبية ولج لييش

-اريد احرگ گلبه مثلما شتلني وحرگ گلبي كل هالمدة!

-ها لعد عفيييية

-اعجبچ...

**

"كيان"

ركض بركض كلشي مدا اشوف من حياتي مرت ايام واشهر واني على هذا الحال جنات رجعت اسبوع الفات بس هي ومالك مي ونار واحد يحرگ والثاني يطفي، متقبل تعيش ببيته بقت يم ماريا وهو يجيها بالليل غصب عنها.. موتتني ضحك من گالت موهمته تريد تطلگ حتى تتزوج واحد ثاني والرجال ديعيش كوابيس بسبب هالموضوع..

-كيان: هههههههه الله والله فكرة تجنن ميجي واحد يخطبني واگول للمسودن انخطبت واحرگ گلبه

-جنات: ولچ راح يموت اوقات اعطش بالليل واگوم اشرب مي ومالك يفز من نومه مثل المخبل يدورني وميرجع للفراش الا ياخذني بيده وينومني وينام على ايدي ويحط تلفوني جوه راثه (راسه)

-عزززه يشك بيج تخوني؟؟

-ولج لاا يخاف لا اتصل بأبوية واگله رجعني

-هههههههه خبلت الرجال هالگملة

-على طاري الگملة فاهد بعده ماخذ الوضع ضحك؟

-غبي!! اي اي بعده عباله اتدلل عليه وكل يوم يوگف جوه شباك غرفتي يغنيلي ويدزلي بوسات بالهوا... اها باع هاي هم اجه دقيقة اشوف

باوعت للساعة بالـ 12:30 بالليل بالضبط مثل كل يوم موقتها مستتتحيل يزيد دقيقة او ينقص دقيقة يعرف اخواني ينامون هيچ وقت.. يوگف جوه الشباك مالتي يعلگ اغاني ويقره ويه المطرب واوقات يعلگ طربگة ويرجف اصبعتين ويهز چتف..

فتحت البردة عيوني عليه بس شافني دزلي بوسة بالهوا وسوالي حركة سخيفة وصخة، خزرته وغميته رجعلي الغمة وبوسة وياهة وسوه حركة بعد اوصخ!!! فتحت الشباك وعطت بهمس..

-كيان: تره اخوااني بدو يحسوون!!

-فاهد: زيييج لا تچذبين ما يوصل الصوت لغرفة اخوانج حاسب حسابي

-گبرررر

-اليگبرچ

-ويگبرو امك الغبررة

-ويگبر اخوانج الجررب

-ويگبرر صلعتتك الخاايسة!

-ماعندي صلعة بس ميخالف ويگبرر ابووچ المگبور!

-لا تغلطط على ابوية لا انززززلك فااهد

-اييي خرب روحج دنزلي خليني اشفي گلبي بيييچ واطلع القضى والمضى اخليج تـ.....

-يا سافل يا فاسق يا ارعننن

-نزلي كوري بس احاچيچ

-وتبوسني وتحصرني مثل ذيج المرة موو؟؟ لو تمووووت

-جنات: احم

-كيان: عزة انتِ بعدج على الخط؟

-جنات: نعم واكتشفت ان ولد نعلون كلهم ثاقطين

-ابوهم نعلون السلطعون شتتوقعين يطلعون ملائكة؟

-فاهد: وللچ انتِ وهاي الگملة تگابلتن عليَّ والعباس اروحلها اجر راس ابنها الاصلعع

-جنات: وصليله رثالتي تحلممممم اطلعلك رامي وتشوفه وخلي كلامك يفييدك يا مثووودن

-كيان: تگول تحلمممم تطلعلك رامي وتشوفه وخلي كلامك يفيدك يا مسووودن

-فاهد: لا بروح امج اسحب كلامي والله اسحبه جايهم خليها تفتحلي الباب لا اخزيهم وافضحهم

-كيان: جايكم هذا جنات اخذو خلصوني منه

-فاهد: اروح اشوف ابني وراجعلچ لا عبالج تخلصين مني

سديت الشباك والبردة ورحت انام مغلسة عليه، ساعتين ورجعلي فاتح اغاني عراقية طربگة ويتمرگص وحده مثل المخابيل اني اعرفه مو صاحي واعرفه هسة شارب لدرجة ميشوف گدامه بعد واعرفه جاي يتعذب ومتبهذل وحاله بالضيم بس مدا يشفى گلبي منه..

نمت والصبح گعدت بدلت بسرعة وطلعت للدوام مستعجلة مشى الوقت سريع مثل كل يوم ورجعت للبيت المغربية هلكانة تعب سويت عشا الي ولاخواني شوية واندگت الباب..

فتحتها وابتسمت من شفتها جيراننا ام كريم دخلتها للبيت واجت توگف ويايه بالمطبخ تسألني شمسوية عشا وتسولف.. هاي جيراننا انتقلو هنا صارلهم سنة كلش حبابة واجتماعية وتموت علينا كلنا بنات المنطقة خطية تتفگد وحدة وحدة..

-ام كريم: اگلچ كيونة حبيبتي

-ها خالة كولي

-اذا اجتچ قسمة زينة توافقين؟

وگفت ايدي عن تقليب الزلاطة ما متوقعة سؤالها، باوعتلها مبلوع صوتي ما نطقت حرف من التفاجئ.. ضحكت وگالت..

-لا تستحين ولا تنصدمين هذا واحد شافچ كم مرة هنا بالمنطقة وانتِ راجعة من الدوام وحاچاني عليج

-شگلتيله؟

-گلتله البنية منفصلة صارلها هواي وعايشة ويه اخوانها الثنين

-منو هذا خالة؟

-ابني كريم

فكيت حلگي وعيوني بنفس الوقت ضحكتتت بصوت عالي على حركاتي وطبطبت على ظهري وگالت بلطف..

-يمة كيان ادري بيج مصدومة بس فكري زين قبل لا تنطيني جواب كريم رجال والنعم منه مكمل دراسة وناجح بشغله ويطلع بيت وحد اذا تردين ويوفرلج الحياة التستحقيها.. والله بيه بخت لو رضيتي وصرتي چنتي

الصفنة لحد هاي اللحظة قائمة البارحة اني وجنات حچينا بموضوع الخطوبة شبسرعة صارت!! طلعت وعافتني افكر بالموضوع تفاجأت اكثر من اندگت الباب من جديد بالتسعة بالليل فتحتها وصار بوجهي هارون..

-هارون!

-شلونچ كيان

-بخير.. محتاج شي؟

-شدعوة تحچين چنچ ما ترديني هنا

-اني وحدي بالبيت هارون

-احححح بعد احسنن

-هارون!!!

-ههههههههه اتشاقه شبيچ اجيت انطيچ هاي

-شنو هذا؟

مدلي ظرف لونه اول وايت فتحته وابتسمت من شفتها دعوة لحضور زواجه بعد اسبوعين..

-راح تتزوج؟

-للاسف

-ليش للاسف؟

-اتشاقه شبيچ

ابتسمت مغلسة شكله ابد مو شقه، تنهدت بأبتسامة واسعة وباركتله وتمنيتله السعادة بقى يهز براسه اي وگال بخفوت..

-شكراً

-انتَ محظوظ بـ لارا بنية تجنن

-صحيح..

تشكرت منه على العزيمة وودعته، سوالي باي بيده وگال بأبتسامة تحمل معنى..

-للاسف.. اوقات مو كلشي نريده نحصله كيان

-شنو؟

-مع السلامة

طلع وعافني واگفة بالباب اتصفن، مشى يعبر نص حديقتنا الامامية واللتفت عليَّ وگال بعياط..

-فاهد يحبببچ هلكني هلااك يمعودة رجعيله مو ز*** بيه!!!

ما جاوبته طبيت وطبگت الباب ورايه گلبي يدگ ويه ذكر اسمه، حطيت الدعوة على الميز وفتت اجهز العشا.. ربع ساعة واجو اخواني والحمرة اكلت وجهي من فاتوحني بموضوع الخطبة على العشا كريم محاچيهم وطالبني منهم!

-كيان: صدگ تحچون؟ هاي شوكت؟

-مروان: قبل ثلاث ايام حچى ويايه

-نشوان: واول بارحة من رحنا لـ شُهيب بلغناه بالموضوع وفرح كلش

-كيان: حتى شُهيب يدري!

-مروان: اي بلغناه بالموضوع

-نشوان: هسة انتِ شنو رأيج بالموضوع؟

-كيان: اني؟

-مروان: طبعاً غير نعرف انتِ مستعدة تخوضين تجربة الزواج مرة الثانية لا؟

-نشوان: كيان احنه وياچ بأي شي تختاري محد راح يضغط عليج نهائياً وهاي رسالة من شُهيب هم يگول انتِ حُرة بأختيار شريك حياتج واحنه عدنا ثقة بيج راح تحسنين الاختيار مرة الثانية

-كيان بخجل: ماعرف

-مروان: ننطيج كم يوم تفكرين افضل اني حاچيت الرجال وگتله ينطينا وقت

-نشوان: اني اگول لا تستعجلين شتسوين بالزواج ودوخة الراس يمعودة

-مروان: نشوان!!

-نشوان: هاا هاا شكو

-مروان: وعدتني ما راح تخرب واهسها خليها هي تقرر!

-نشوان: تمام تمام

عفتهم وصعدت لغرفتي ميتة من الخجل وجهي مشتعل نار لسببين، السبب الاول اني انخطبت وهاي اول مرة تصير بشكل رسمي وطبيعي ويحچون ويه اخواني والسبب الثاني فاهد! شلون انخطب واني بعدني زوجة فاهد الشرعية!

ذبيت روحي على الفراش والافكار تجيبني وتوديني بقيت افكر وافكر وافكر واماطل بالايام يومية اگلهم باجر وعگبة لحدما وصلت بيه المواصيل اگلهم انتظر طلعة شُهيب بس مروان وجنات ثنينهم رزلوني فـ فكرت اردلهم جواب اول ما ارجع من موعدي ويه فاهد واناقشه بموضوع الطلاق..

اتصلت بي ابلغه محتاجة اشوفه گلي هو بالبيت ما طالع مريض، ما قبلت اروحله هناك وللمرة الاولى بحياته ما لح عليَّ وگال براحتج حتى حسيته ما راد يشوفني! لا هذا صدگ مريض لعد!

اخذت تكسي ونزلت لبيته فتحتلي الباب ام خالد گالبة وجهها سلمت ببرود وسألت عنه گالت نايم ميگدر يگوم من فراشه من المرض گلبي الغبي قلق عليه وصعدت الدرج شفت باب غرفته شوية مفتوح ويطلع منها سمووم وجحييم حارة وبوخة فاتحين التدفأة بس الجو كلش مو مال تدفأة..

دخلت اتسحب للغرفة ضواها مخنفس شفت جسد عاري باقي بالبنطرون مكشف ومرمي بأهمال على الچرباية.. تقربت منه اشوف وضعه وشهگت مكتومة انفاسي من المنظر المخيف البشععع الشفته!!

فاهد مدمى تدمممي وجسمه عبارة عن خدوش ومطبر تطبرر لدرجة وشومه اغلبها ما مبينة من الجراح المرعبة المغطية جسده، منبوش لحمه نبش وكأن احد حافر اماكن خاصة بجسمه اخذتني الرجفة وتقربت منه ملهوفة ادور بعيوني على الاماكن التنزف اريد اعرف شنو نوع الالة المستخدميها لدرجة فراشه ناگع بالدم!

حرورة تطلع من جسمه تخووف عبالك واگفة بصف فرن وصوت وناته عالية زرفت گلبي.. مديت اصبع واحد ادوس على زنده بخفة حتى ما اأذي ومثل الحساس فتح عيونه الصفر جاحظهن وفز من مكانه ينگلب على ظهره..

-فاهد: كوري؟

-كيان: خرعتك؟

-انتِ هنا

-اي

-صدگ؟

-اي هنا

-وين

-هنا فاهد شوف

لمست ايده وقربت نفسي منه اباوع بعيونه مو حمر يعني ما متعاطي وصاحي بس شكله بعده نايم..

-شبيك فاهد

-ليش اجيتي؟

-مشتاقتلك

گلتها بأستهزاء وهنا اخيراً ضحك تعبان ومسح عيونه بأيده المدماية، شمر روحه على الفراش من جديد وغفى! رجع غفى بدون لا يحس على روحه..

بقيت گاعدة بجانبه لفترة من الوقت هو نايم واني صافنة على جروحه وگلبي معصور على صوت وناته يون ما حاس على روحه روحي وجعتني عليه ما تحملت ابقى اتفرج، اخذت كم صورة لجروحه خابرت صديقتي تسأل اخوها الدكتور شنو اگدر انطي واعالجهن گال هالجروح تحتاج مستشفى بس اعرف فاهد يتخبل من طاري المستشفى ومستحيل يقبل يجيب دكتور هنا..

علمني على كم شغلة وكتبله علاج بس على وصفي للجروح دزيت الحماية يجيبوله الادوية واني جبت طاسة مي ووصلة انظف الدم.. كللشي ميحس غسلت جسمه ونظفته وعقمته وسويت كلشي وما حس بأي شي او حاس بس ميريد يگوم بعد ماعرف..

اخر شي بقى اشربه المسكنات والعلاج گعدته گوة وحطيت ايدي جوه راسه على كيف، حضنته نص حضنه ارفع جسمه حتى يشرب الدوه.. حط راسه على كتفي مغمض عيونه مسحت على خده على كيفي وهمست..

-فهود گوم اشرب علاجك

هز راسه معترض وهمس بصوت گوة طلع منه..

-لا تسوين هيچ كيان

-شسوي؟

-تهتمين بيه

-فاهد

-لا تعلقيني بيچ اكثر وانتِ تردين تعوفيني

عضيت شفتي السفلية امنع نفسي من الرد، فتح عيونه على النص مبتسم بخفة، گلبت عيوني وجاوبته بأبتسامة مماثلة..

-اي اعوفك

-عاره

-يعني مو باردة؟

ضحك على كيفه بس گوة من التعب..

-اني ما احس بوجع لا تخافين

-فاهد شنو مو بشر ومتحس!

-اي اني حيوان عوفيني

-لا تحچي على روحك هيچ وتستفزني!

-بعدچ ما ترضين احچي على روحي

-هسة انتَ بيا حال وگاعد تسولف اشرب دواك ونام خلصني

-كوري

-ها

-وجع گولي عيونها الكورية

-ماكول احجي شتريد

-مشتاقلج كوري

-منو سوه هالشي بيك فاهد؟

رجع وجهه بشعري ميقبل يجاوبني، مسحت على شعره من وره وبقينا هيج لفترة گلبي ميهلي اعوفه وحده وميهلي اضوجه بحچاية قررت ابقى لينة وياه واداري علما يسترد وعيه..

-يله فاهد نشرب العلاج

گعدته وانطيته العلاج شربه ميدري شنو ما شنو ونزيت مخترعة من جر جسمي ينيمني على الفراش ويحط راسه على صدري ينام فوگاه..

-وخر فاهد

-بس شوية

-فهيد لا تسوي هالسوالف

ما جاوبني جسمه ثگيل ونفسه ثگل غفى مرة ثانية وخرته مني ما قبل لطش بعد شيشلعه تعبت منه واستسلمت بمكاني.. مشى الوقت وعبر فوگ الساعتين هو نايم واني ارسم بيدي على وشومه الي ما متضررات.. فزيت مخروعة من شفت وشم مكتوب بالعربي حرف "سـ" وتتبعه حروف ضربته بكل قووتي على زنده فز مخترع..

-هذااا شنو الوووشم؟؟؟؟؟

-شنو

-هذاااا شنوووو مكتوب هنااااا

اضرب حييل على زنده اول مرة انتبه عليه واشتعلت شععل، عوص عينه وفرك خشمه وراهة وگال..

-سامر

-شنووو؟؟

-سامر مكتوب

ركزت بيها زين وتهجيتها ما مبينة عدل لان وشم فوگ وشم صاير، بصعوبة قريتها وانتبهت مكتوب "سافر" مو سامر..

-هاي سافر فاهد

-شمدريني

-شنو معناها؟

-مادري

-شلون متدري

-مادري ولج چنت سكران من وشمته

-ولك منو ساامرر

-هااا تذكرت يمكن نفسه الي انطاني جگارة بيومها گتله راح ادگ اسمك على زندي حتى ما انساك

-صدگ تحچي انتَ؟؟

-اي وعنده وشم ليث هم

-اسم ليث؟؟ منو ليث!!

-مرة ساعدني وهم چنت طافي ووشمته

-عزه بعيني هذا وين صاير شو ما شايفته؟؟

-نزعيني بنطروني وشوفي

-يا وصصصخ

ضحكككك بصوت عالي كلش يصفگ بيده المضبرة ولا كأنه مطبر بالجروح لا احساس ولا ضمير..

-عجيب هالبشر انتَ عجيبببب

-هههههههههههههههههههههههههه عبالچ واشم اسم سارة

-دولييي حتى لو واشمها ميهمني!!

-اي اي صح عود ذكريني اوشم اسمچ

-هو وين اكو مجال بجسمك بعد حتى توشمه

-عود اللگالي مكان لا تخافين

-فاهد لحظة اريد احچي وياك بموضوع

-ابوية

-شنو؟

-موضوعچ مو تسألين عن جروحي؟

-ها؟ اي يعني عنهن و..

-ابوية رجع

-شنووووو

-رجع وداشنا دوش

-شنو يعني؟؟

تنفس بعمق وهمس بخفوت..

-طلع كل قهره بينا دمر مالك دمار من عرفه ما مطلگ جنات ومن دافعت لـ مالك امر زلامه يچتفوني ويذبون على جسمي ماي حار ويجلدوني

-يمممة عمت عينييي

-ماعرف شنو صار وراهة حقنوني ابرة مخدر ومالك ما عرفت شصار وياه انطيني موبايلي

انطيته تلفونه فتحه بسرعة واتصل على مالك فتح سبيكر دگ مرتين وجاوبه مالك بصوت منتهي..

-مالك: شلونك فاهد

-انتَ شلونك؟؟ شصار وياك؟!

-اني زين

-صوتك مو زين مالك!!

-عالجت وضعي فاهد اهتم بنفسك شافك طبيب مو؟

-اجتني كيان

-تمام انتبه لنفسك ولحد يوصل الموضوع لجنات اني گلتلها مسافر حتى ما تشوف الجروح البيه

-فاهد: لو تگللها مالك

-لا! راح تخاف عليَّ وتطلب مني اطلگها اياك توصل الموضوع الها فاهد وروح امي لو جنات عرفت بالوضع احملك كامل المسؤولية ولساني ما يطخ لسانك بعد!

-تمام تمام

سد الاتصال وزفر نفس يطحر طحر من الغضب، صفنت استوعب مالك گال لجنات مسافر، معقولة من چان يگوللها مسافر قبل يكون السبب نفسه؟ يكون متعذب وميرجعلها ويتحجج بالسفر؟؟

-كيان: فاهد ابوك شيريد منكم شيريددد هو مو مطلوب؟؟

-صفى حساباته كلهن ورجع شمسون الطاغوت!

-چذذذب

-وداعتچ اني هم مصدوم شلون وراسه انطلب من كم عشيرة والعالم جرت ايدها منه راح يخبلني هالبشر شلون رجع نفس قبل واقوى بعد!

-وشُهيب!

-شبي؟

-عرف ابوه طلع؟

-اكيد وصله الخبر

-ياربي شلون بينا منخلص احنه!

-عوفچ منه لا تخافين انتِ وابقي يمي خليني اتطمن عليچ وارتاح

-لا فاهد

-شنو لا؟ اذا على اخوانج اني اوضحلهم موضوعنا اگلهم اريدج واريد نرجع ويه بعض

-لا يعني ماريدك! ولا اريد ارجع وياك

-اهوووو كيان مو كافي من هالسالفة!! تره صار اشهههر انتِ معاندة وياي وعايش الضيم من وراج!!

-لا تعيشه وكمل حياتك بدوني ارمي عليَّ يمين الطلاق فاهد وحررني منك

-كيااان!!!

-طلگني محتاجة ارتاح

-ارتاحي يمي ما اطخچ ولا ازعجچ بشي كيان شبيچ

-ماريد ابقى يمك ماريد انسجن وياك مرة ثانية وتدمر حياتي بسببك

-كيان!!

-طلگني فاهد ماتحمل ابقى وياك

-بااابا ما اسويلج شيييي حتى لو تردين زواجنا يبقى على ورق اني قابل!!

-اني ماقبل ولا اقبل بهاي المسلتة بعد اريد اعيش واكون عائلة كافي! اني استحق اصير ام وتصير عندي عائلة

-انيي انطيچ اطفال!!

-ماريد منك هي گوووة!

-كيان شنو براسچ احچي!!!

-ماكو شي براسي طلگني يا بني ادم لو اروح لحاكم الشرع اگله ميقبل يطلگني ويلگالي حل وياك!!

-كياااان احچي بالخط العريض شنو تردين بالضبط؟؟؟

-گلت الاريده.. عندك العافية اني طالعة

جرني من ايدي وفلتت نفسي منه وركضت اطلع من غرفته لحگني يركض ورايه لحدما وصلت للحديقة صاح بالحماية يوگفوني وخزرتهم ما اخليهم يلمسوني عافوني اروح واسمع لفاهد يعيط عليهم وطيح حظهم بالرزايل..

اخذت تكسي ورجعت للبيت والهم والغم تارس گلبي شسوي ماعرف، مر أسبوع ونص جديد وصار لازم اتجهز لعرس "هارون" و "لارا"، طلعنا اني وجنات نشتري فستانين نويت احضر العرس خصوصاً اخر فترة لارا كلش تقربت مني ومن جنات وصارت صديقتنا هالبنية افقر منها ماكو وفد فطيرة بحچايتين ينضحك عليها..

اجه يوم العرس ورتبنا نفسنا واجت صبا من الصبح ويايه للصالون وفرحتني اكثر من گالت نوت هي ومروان يكون عرسهم شهر الجاي بسبب امها ما رضت تطول فترة الخطوبة اكثر..

لبست فستاني وجنات بدلت لـ رامي البده يتخطى يخبل هالولد يخخخبل الكل مخبوص بي ومدلل من قبل الجميع خو فاهد روحه بي يگول عبالك ابني وشايله..

عرس هارون ولارا چان يجنن الحب من لارا واااضح وضوح الشمس وكأنها كاتبة على گصتها اني عاشقة هذا الرجال وطبعاً الكل شاف وشم اسم هارون على كتفها الايمن.. فرت ايدها جنات وهمستلي..

-تخيلي توشمين اثم زوجچ على كتفچ

-كيان: ههههههه لو اموت

وگفنا نصفگ ونعيش الاجواء والفرحة وياهم بس الكل لاحظ هارون چان مو بسعادة لارا وكل المعازيم اتفقوا على ان العروسة تحب العريس اكثر.. اخوانه وفاهد وكم واحد من ولد عمهم هم هنا حرگو الجو، عرس ممتمع كللش وعبارة عن وناسة ما حسينا بالوقت وما حسيت الا على مالك يجي ياخذ ابنه من جنات ويگلها يطلعون استغربت وهي هم استغربت بس ما حچت شي وطلعت وياه..

شلت اطراف فستاني الطويل وتمشيت اجيب عصير الي ولصبا ولاگيت تميم اخو هارون، سلم عليَّ وگال بأبتسامة واسعة بشوشة..

-فرحتونا بحضوركم كيان

-كيان: ربي يسعد العرسان كلش تونست

ابتسم يهز راسه، اشر بأصبعه على فستاني الاسود العدل وبي ريش من يم الصدر وگال منبهر..

-بالمناسبة فستانج يشگ شگ

ضحكت متفاجئة من اطرائه ومن حركات حواجبه الشيطانية وراح من يمي، حرك راسي مأيسة منهم وكملت طريقي اجيب العصاير وشفت فاهد واگف بصف البوفيه وباله شارد..

-كيان: ممكن؟

انتبه ويايه اأشر حتى يسويلي مجال ابتسم وتقدم خطوة عليَّ يسد الميز عني كلياً..

-فاهد وخر اريد اروح

-ما حبيت فستانج

-ليش شبي؟

-مو حلو

-بالعكس الكل عجبه ومدحوني عليه!

-بس اني ما عجبني!

-وشيخصني بيك؟؟

-ما حبيت هذا اللعبان النفسسس على الصدر مو حلو مو حلووو

-اسمه ريش! واني اشوفه حلو!

-طالعة چنچ دجاجة شهالذوق كياان بعد تعالي بقبقيلنا!!

گلبت عيوني مغثوثة منه اگص ايدي اذا ما سمع تميم يمدح فستاني وهاي ردة فعله بسبب غيرته الغبية..

-فاهد: هاچ هاي

نزع سترة بدلته الرسمية يلبسني، دفرت ايده معترضة وخزرته..

-وخر ماريد!

-لبسيها الفستان مو حلو حبيبتي لا تفشلين نفسچ

-معليك اني اريد افشل نفسي

-ااااخ يا عناادچ!

-ديلا روح منا

-تعالي اريد احچي وياچ بموضوع

حچاهة بعصبية خفيفة مغصتني بطني خفت يكون افتهم بموضوع الخاطب رحت وياه اتمشى لحديقة القاعة الخلفية علمود الهدوء ماكو احد هنا، حط ايده بجيوب بنطرونه وسأل بجدية..

-ليش ما تجاوبين اتصالاتي؟

-لان ماريد

-كيان ليش تشلعين گلبي عذبتيني وطيحتي حظي مو كافي؟

-مو انتَ تقرر شوكت اكتفي ثانياً اني واضحة وياك بس انتَ معاند

-سالفة الطلاق شيليها من راسچ

-لا ليش اشيلها اصلاً حچيت لاخواني عن الموضوع والشيخ گال اگدر اتطلگ منك غيابي

-خيررر؟؟؟ هو بكيفه؟؟؟؟

-لا بكيفي

-على شنو ناوية انتِ؟؟ ليش مُصرة اطلگچ؟!!

-لان تقدملي واحد واخواني موافقين

-نعم؟؟؟؟

-انخطبت واني موافقة

-كياااان لا تخبلينييييي تعرفينييييي مخخخخبل وهسسسة احرررگ القاااعة على راااسچ ورررراسي احچييي عدددل

-دا احچي عدل

-مخطوبة شنو؟؟؟ انتِ جاي تستفزيني ادري بييج بطلي هالحركات قديمة صااارت!!

-اگلك فاهد ماعندي وقت استفز بيك تطلگني لو متطلگني ميهمني اول تالي اخواني يتفاهمون وياك

عفته دا اروح وانشنطت ايدي انشلت من جرته العصبية دفعني على السياج يرگع ظهري بقوة توجعت بس ما صحت بسبب عيونه الراح ياكلني..

-يمكن بعدج انتِ ما تعرفيين فااهد منوو حقچ تتملعبيين ومصدگة نفسج!!

-تهدد حضرتك؟

لزم فچي يعصره بدونه لا يأذيني يحط عيوني بعيونه يخزر ومتحلف..

-اهدد واكسرر روس ورگاااب اليلعب وياي ولچ اني ابوي لعب وياي طيحت حظ حظظه سنتين رگصته تك رجل تردين اخوانچ يگدرولي؟؟؟

-انتَ السبب بأختفاء ابوك

-اي اني السبب!! اني السلمت كل خيااساته لأعدائه ونعلت وااالديه!!

-واجه ينتقم منك ومن مالك!

-طززززز ما يهمني المهم اكل المقسوم وانذل وانسحگ وانداااس وانكسر خشمه العالي!! فـ يا كيان انصحچ ما تتحديني وداااعة عيونچ العاشگهنن اذبح خطيبچ الخ** الجديد بحضنننچ واسبحچ بدمه!!!

-مصدگ روحك انتَ؟!!

-روحي سألي فاهد منوو وشنو يگدر يسوووي من احط براسي واحد ما ارتاح الا اشگه نصييين!!

-بطل تهديداتك بطللللهن

-ابببطل شوكت ما تجرين عدددل وترجعين الي!!

-ماريدك فاهد افهم مااا احبك!!!

-واني احبببببچ وما اعوفچ على جثتييي كيااان والعباااس اطلگ منااا اخليهم يدفنوني بنفس اللحظة!!!

-كيان؟

درت عيوني على صوت وحدة من صديقات لارا واگفة مصدومة من عياط فاهد، رادت تحچي واندار فاهد خازرها سدت حلگها بسرعة وگالت بضحكة..

-لا اني.. اني رايحة باي حبيبتي

-كيان: جاية وياچ سولاف

دفعت فاهد من صدره وجرني من ايدي يرجعني للسياج، صفنت سولاف فاتحة عيونها ما ردت اعرض نفسي وحياتي گدامها وهمست بنتر بيني وبين فاهد..

-عوفني لا تفشلنا!!

-گليلها تروح مناا لا ادفنها بمكانها!!

-فاااهد!!

-تمام ما انطيتيني حل ثاني

عافني وراحلها يلفح نار تخبلت لزمته من ايده اجره وامنعه من الحركة وطلبت من سولاف تروح، ضربته على صدره كم مرة اعيط عليه وهو جبل ميهزك ريح..

-ماريددك ماااريدددك

-لو اني لو الگبر اختاري

-حقققير نذذل اكررهكك فاااهد روووح لحمرتك رووحلها وخليني اشوف حياااتي بعيد عنننك اريد اتزوج واكون اسرررة طبيعية!!

-حاضر....

جرني من ايدي يمشيني لماعرف وين بقيت اتمالخ وياه واتعارك كله بالسكتة لا ننفضح ما هدني طلعني من الباب الخلفي يسحسل بيه خبلته بالعياط سد حلگي بأيده ودخلني سيارته غصب عني بالكراسي الوره قفل الباب بسرعة شگد حاولت افتح الباب بس قفلها دفن ماگدر..

-افتح الباااااااااب

ما سمعلي ولا كأن الي وجود ساق سيارته المظللة يطلعني من شارع القاعة واني ما خليت مسبة وغلط ما غلطت عليه كفخت راسه تكفخ وفگست عيونه ثنينهن وهو ولااا يمه ولا كأن دا اأذي، اتصل بأحد واحنه بالطريق وفطسني من الخوف من گال بلغة البلد..

-جيبولي كريم

شهگت جوه انفاسي شلون عرف كريم الخاطبني؟؟ فاهد شنو راح يسووي هالمخبل المسودن المجنون الناقص العقل شنو راح يسوي بالرجال ووين ماخذني؟؟!!....

**

-صقر: يعني تمام مو؟

-مسرة: اي اوكي گتلك

-صقر: كللش زين همزين من اتفقنا شلعتي گلبي ههههه

ما جاوبته وسرحت اباوع من جامة السيارة للبنايات والطرق المزدحمة، اي اي اني بسيارة صقر ريماس بس مو يروح بالكم بعيد ما قبلت بعرضه للزواج..

صار اشهر صقر يقنعني استلم منه مشروع واني ارفض قبل اسبوعين تمرضت وما داومت والبديل الي حاطته مياخذ قرارات نيابة عني الا يبغلني بس الصدمة چانت من وقع عقد وياه بطلب من ابوية! تخيلوا ابوية گدر يأثر حتى على البديل وخلاه يوقع عقد ويه هذا المجرم بدون لا يستشيرني وهسة اني مجبورة اكمل الشغل والبديل اكل المقسوم اكيد..

-صقر: شنو حابة تسمعين جميلتي

-مسرة: مدموزيل مسرة!

-ماحب الرسميات راح اكتفي بـ مسرة مثل قبل

-وصلني لمدرسة ميس اخذها بطريقي

-بعينييي

گلبت عيوني متنرفزة مالي خلگ حتى ابتسم بوجهه، فتح اغنية رومانسية هااادئة لعبت نفسي وضوجتني بالزايد طفيتها وعلگت شي حماسي..

-صقر: ولا تغيرين طبعچ الاعشقه

-لوف يمين

-شنو

-لوف يمين للمدرسة انتَ رايح لطريق الروضة

-اي نسيت ميس بنتج كبرت وصارت مدرسة

ابتسمت لا ارادي واجتني لحظة ادراك ميوستي كبرت وصارت مدرسة ومن هسة معذبة قلوب الولد الي وياهة اول البارحة اجتني متوترة وتفرك بيدها وتهمس بأذني..

"‏ماما هذا واحد دالي "گالي" احبچ"

ضحكت صبا وبوكتها اني مثلت الدراما ودگيت على صدري وشهگت، فتحت عيونها الكبار تزرزر بيهن وتهز براسها تأيد صدمتي..

-ميس:اي اي ادوي ميستحي

-مسرة: مو بله؟ شگد عيب عليه وانتِ شنو جاوبتي ميوسة؟

-ميس: دتله ووح عيب امي متقبل

-صبا: زين ميس اوگفي هو شلون چان شكله؟ حلو؟؟؟

-مسرة: صباا!

-ميس: سبا عيب

-صبا: والله العظيم صح ميس عذريني اني صايرة ما استحي هالايام

-ميس: مو انتِ چبيوة لازم انتِ تعلميني مو بالعتس (بالعكس)

-صبا: صح صح ضميري يأنبني

-مسرة: ميوسات صباوي تشاقه وياچ ماما المهم الي سويتي صح عفية ببنيتي البطلة

-ميس: عود من اكبو اتزوج

-صبا: ههههههههههههههههه ولج من هسة تفكر بالزواج هاي

-ميس: اتزوج واحد مثل عمو سووهيب

جفلت متصنمة بينما صبا ضحكت اكثر تأيد ميس.. دا استغرب شلون ميس تتذكره ووتذكر كلشي بي يعني هي طفلة والطفل بسرعة ينسى شلون باقي بعقلها وتتذكر كل تفاصيله لدرجة مرة دخلنا لمحل يبيع عطور والمحل راشين بي عطر رجالي جرت تنورتي من جوه وهمستلي تگول "نفس ويحة عمو سووهيب" وفعلاً!! كلامها صحيح وچان العطر المرشوش كلش يشبه ريحة عطر شُهيب!

رجعت للواقع بسيارة صقر گلبي يوجعني بس اتذكره احس بسكري يهبط وروحي تنسحن، تعبني كلش تعبني فراگه وكأنهم اخذو روحي مني..

-صقر: وصلنا

هزيت راسي ونزلت من السيارة هو بقى ينتظر، اساساً اني راكبة وياه لان رحنا نشوف موقع العمل واصر هو يسوق مچان عندي طاقة اناقش وقبلت..

تمشيت لمدرسة ميوسة لمكان انتظار الاهل شفت سام واگف مثل كل يوم هو يوديها وهو يرجعها سلمت عليه وگتله يروح اني راح ارجعها ويايه..

انتظرت فترة والاولاد اغلبها طلعت بس ميس ماكو؟ وينها بنتي؟ سألت حارس المدرسة گال اكو بعد تلاميذ جوه وگفت انتظر بعد بس گلبي بده يلعب وتوترت اول مرة تتأخر لهدرجة ميوسة دائماً اول البنات تطلع..

قررت ادخل ادورها بنفسي الف وسواس لعب بيه خفت لا يكون متعورة او صايرلها شي خفت لا احد معترض طريقها او ممكن حتى تكون مسوية على روحها وقافلة روحها بالحمام متقبل تطلع..

صار بوجهي معلمين ومعلمات سألتهم وين ممكن تكون واغلبهم كالو اذا ما لگيتيها بالمدرسة يمكن بالحديقة البرة تلعب بالمراجيح هوايه اطفال يلعبون هناك وره الدوام.. استعجلت بخطواتي للحديقة المدرسة هدووء تام فرغت للتالي مينسمع غير طگة كعبي بالگاع..

وصلت للحديقة ادور بنيتي طلعت اتمشى بيها وامشط عيوني المكان، لقطت عيني من بعييد ميس واگفة وگاعد مقابيلها رجال مگنبص لابس شفقة.. توترت وخفت هرولت لأتجاههم قلقة وبأنفاس مقطوعة اطلع السچينة الصغيرة من مدالية مفاتيحي اتحضر.. بس كلشي تغير من وگف هذا الرجال...

وگف الرجال وبرز طوله الفارع، وگف الرجال وشفت اكتافه العريضة، وگف الرجال ووگف عقلي وياه، رجليه صارن خيوط حسيت قوتي خانتني واني اشوف ظهره ومستحيل انسى هالهيكلة الجسمية.. توقف الزمن وياه گلبي من اللتفت الرجال ولزم ميس بيده مبتسم.. اللتفت وصارت عينه بعيني، شهگت من عمق روحي ونبضات قلبي شكلت حروفه قبل لساني ونطقت بأشتياق مميت...

-شُهيب.......

يتبع.....

━━━━━━  ━━━━━━

شُههههيب 😭🙏🏻💙💙💙💙💙💙

سعيدة سعيييدة برجوعك هموسي 😩😂

رامي الططة العنون اللفه بصمونة وآكله على هالكياته 🥹😍

فاهد وكيان... 🤫 المسودن تسودننن 💃🏼

برأيكم شلون راح يكون لقاء العمالقة شُهيب ومسرة؟؟ 😁🤞🏻

#ابناء_الحسوم "شمسون"

بقلمي: زهراء السلامي ❤︎

لطفاً لتنسون التصويت + التعليق بين الفقرات + متابعة لحسابي 😍.

لقد سرق قلبي وجهٌ ابيض مُلتحي

بعينانٍ كالنجومِ والشُهبِ... ✨

━━━━━━  ━━━━━━

وگف الرجال وبرز طوله الفارع، وگف الرجال وشفت اكتافه العريضة، وگف الرجال ووگف عقلي وياه، رجليه صارن خيوط حسيت قوتي خانتني واني اشوف ظهره ومستحيل انسى هالهيكلة الجسمية.. توقف الزمن وياه گلبي من اللتفت الرجال ولزم ميس بيده مبتسم.. اللتفت وصارت عينه بعيني، شهگت من عمق روحي ونبضات قلبي شكلت حروفه قبل لساني ونطقت بأشتياق مميت...

-شُهيب

هد ايد ميس يقابلني بملامح جامدة وجه مستقيم ونظرات ميتة، بلعت ريگي النشف وتقدمت كم خطوة منه احس جاي ادوس على گلبي كل اطرافي ترجف لحدما وصلتله الف موتة متت، بصعوبة طلعت الكلمات من فمي انطق..

-الحمدلله على سلامتك

هز راسه بإيماءة بسيطة بدون لا يفتح حلگه بحرف، ضرب الهوا جسمي وطار شعري وشعر ميوسة، شفت عيونه تتابع خصلات شعري التطايرت وزاد تركيزه ويه ايدي اليسرة الرفعتها ابعد الخصلات عن وجهي، يباوع وكأنه يدور بيها شي فوراً طخ بعقلي ديدور على خاتم او حلقة شُهيب عباله اني تزوجت!

اخذت نفس عميق وتقربت خطوتين اضافية صرت مقابيله ضبط متفصلنا الا خطوة بسيطة، عيني بعينه ونبض گلبي العالي راح يخترق صدره..

-انتَ شلون...

-شُهيب: هنا؟

-اي

-افراج

-شنو؟

-افرجوا عني

سألت بحيرة مستغربة وهاي چانت اسوء كلمة احچيها بحياتي كلها..

-مسرة: شلون؟

-قصدج شلون افرجوا عن مجرم؟.. مادري

-لا لا...

-ميس: عمو سووهيب سامو ما اداني اليوم ادت ماما لازم اووح للبيت

-مسرة: ردتي ترحين وياه؟

-ميس: اي دال بس يستويلي ايسكويم

-شُهيب: بوجود سام اكيد ما اخذها وحدي

-مسرة: عادي براحتك

-ميس: واح تاهذني؟

-شُهيب: غير وقت حبيبتي لازم ارجع لامي قبل لا تكعد من النوم وترجع تبچي

-مسرة: ليش تبچي؟

وجه عيونه الي يباوعلي بنظرات خاوية، جاوبني بنبرة مغلفة بالاستهزاء..

-يمكن لان ابنها تركها قريب الثلاث سنوات؟

لطمني على حلگي ضاع لساني، نزل باس ايد ميس وهمسلها شي ومشى يعبرني.. هيچ عبرني بدون لا يحچي شي اضافي بدون لا يتكرم عليَّ بنظرة بدون لا يهتم لوجودي.. تخبلت احس روحي تفووور كلشيي بيه يصرخ الم لزمت ايد ميس وهرولت اعبر گدامه خفت لا اتخربط هنا واوگع ويگول سوت هالمسرحية حتى يساعدني..

طلعت من المدرسة واحس بخطواته ورايه يمشي، توجهت لسيارة صقر نويت بس اخذ علاجي وارجع احچي وياه.. طلع صقر من سيارته اول ما شافنا عگد حاجبه وعيونه انترست حقد..

-صقر: شنو صاير هنا؟؟؟

التفتت على شُهيب شفته يردله النظرة، وجه عيونه عليَّ ما قريت بيهن شي عافني وراح يمشي وايده بجيوبه، حطيت ايدي على راسي راح ينفجر انتبهلي صقر واجه يركض..

-مسرة شبيچ

-علاجي اريده

مشاني للسيارة وانطاني جنطتي طلعت ابرتي ضربتها بأيد ترجف ميس گامت تبچي خايفة وصقر انخبص ويايه اخذت بنتي ودخلت وياهة للسيارة مصدومة من الصار.. شلون شُهيب طلع وشوكت؟؟ معقولة اني تيهت تاريخ افراجه؟ اني متأكدة بعدله 84 يوم سجن شلون اليوم طلع..؟

-صقر: راح اخذج للمستشفى

-رجعني للبيت

-مسرة وضعج مو زين ايدج ترجف

-شفته صقر؟

عفس وجهه مزعوج ومشى بالسيارة، بقيت اباوعله انتظر منه يجاوب بس ما حچه خبلني بالزايد..

-متحچي شبيك؟!!

-شفته طبعاً شفته!!

-انتَ تعرف بي طلع من السجن؟

-اي

-صدگ تحچي؟؟؟

-مسرة شنو سالفتج انتِ؟ شبيچ ترجفين؟ معقولة ابن شمسون خوفچ؟؟

-شوكت طلع؟

-اليوم

-شلوووون

-انعادت محاكمته البارحة جانت سرية شمسون حط ايده بموضوعه وطلعه قبل شهرين من تاريخ الافراج

-واني ليش مادري بهالشي.. يربي اه راسي..

-مسرة شوو باعيلي سرور انتِ بخيرر؟؟

اشرتله بيدي اني زينة بس لا! لا اني مو بخير لساني يبس وعيوني تغوشت بعد كلشي ما اشوف حطيت راسي على الكرسي اسنده وميس بحضني حضنتها، بقيت هيچ لحدما رجعت للبيت وبوجهي لغرفتي..

ماخليت واحد ما اتصلت بي واكدولي شُهيب اليوم طلع من السجن، شمرت تلفوني على فراشي اجتني لحظة ادراك شُهيب طلع يعني هذا هو يعني خلص من السجن يعني انتهى كابوسي شُهيب رجع!! صرت اضحك واطفر مثل المخبلة ما مصدگة هالخبر اليجنن.. دخلت ميس لغرفتي تباوع لحالي عطت بحماس وشلتها افتر بيها واصيح..

-ميوووسة رجعع عمو سووهيب رررجع همووووسي رررررجععع

-ميس: عمو سووهيب دال استويلچ ايسكويم

-اي اييي يشتريلج يا روحيي ايي لازم اوگفي شوفي شنو راح نسوي.. بدلي بسرعة تعالي لازم نبدل بسرعة

-وين نووح؟

-نروح لهاي.. لشسمها.. لصبا نروح لصبا نروح نبشرها يله

بدلتلها بسرعة واني بقيت بملابسي طلبت من السايق يوصلني لان سكري مدا يثبت واخاف لا اسوي حادث، دگيت باب بيتها طلعتلي بعدها بملابس عرس هارون..

-صبااااااا

-وجع شكو شصاير

-ولح صبا رجع شُهيببب رجععع رجعليييي

-بدينا بالتمسلت

-والله رجع والله

-هم اخذتي الحباية مو؟ اني كم مرة گتلج ممنوع تاخذين هالنعععل مسرة!!

-ما ماخذه والله ما ماخذه شُهيب اجه شفته اني طلع من السجن

دفعتها ودخلت لبيتها اطير مثل الفراشة الضحكة تارسة وجهي وميس تطفر ويايه متدري شكو، فرت ايدها صبا وباست اصابعها وتكول..

-الحمدلله والشكر

-ههههههههههههه ميوسة احجي لـ صبا شُهيب شنو گلج

گعدت ميس تحچيلها شنو صار بالتفصيل شهگت صبا ما مصدگة وصارت تطفر بمكانها بحماس وتعيط ويايه..

-مسرة: رووحي صبا لبيتهم بسرررعة طيييري واحچيلي شنو يصيير

-صبا: يااا ولج متعاركين اني ومروان ماروح

-ولج حبابة صالحييييي

-ما اصالحه تخيلي اتفقنا على موعد زواجنا منا تعارك ويايه مناك وحتى عرس هارون ما اجه وما خلاني اروح نرفزني ورحت غصب عنه

-يا غبية ليش ترحين غصب عنه تضوجي منج!

-ديتحكم بكللشي وكلمة والثانية يگول انتِ متطبقين اوامري وهالشي يزعجني وكارهته!

-تره زوجچ هو شنو يتحكم عادي تشاركوا بالاراء سمعيله ويسمعلج وين المشكلة؟

-ميعجبه هالشي يريد يمسح شخصيتي

-شبي مروان شبييي

-تخبل عليَّ مادري

-تمام ابقي مزاعلته بس روحي شوفي هموسات ورجعيلي فدوة

-امي متقبل البارحة فضحتني وخزتني تكول ثگلي على الرجال

-حبابة بس اليوم اني اغطي مكانج

-تمام رايحة تمام..

**

"صبا"

بدلت وطلعت بسرعة متوجهة لبيت مروان محضرة نفسي للعركة الطاحنة الراح تصير، اول ما دگيت الجرس جفلت مصدومة من فتحلي الباب شُهيب! فكيت عيوني وصحت اغطي فمي وعلى اثر عياطي اجه مروان يهرول..

-مروان: صبا

-صبا: مروااااان اخوك رجعععع

ضحك مروان يهز راسه بـ اي ويباوع لـ شُهيب دخلوني جوه وعيوني لطشت على شُهيب ما درتهن ولا ثانية فرحانة ومتفاجأة بنفس الوقت شكله متغير شعره مختفي وهالات ماكلة عيونه من جوه..

-صبا: الحمدلله على السلامة شُهيب والقران هسة ياله نور البيت

-شُهيب: الله يسلمج صبا

دخلنا سوه للصالة ما خليت شي بنفسي ما سألته وجوابه واحد ما تغير..

-شُهيب: بخير

-صبا: احم اي مبين عليك بخير ربي يديمك

ترخص وگام يصعد فوگ افتهمت ماريا جاية يمهم اليوم مروان جايبها يرد عنها الوحشة، گعدت بصفه على القنفة وهو بصفي مطنگر وماد البوز شبرين..

-مروان: شو مو بالعرس؟

-طلعت من وكت ويه جنات ومالك

-اها

-ما گتلي شُهيب رجع

-لان ما صارلي مجال اني هم انصدمت من شفته بوجهي

-حمااااس راح اطييير من الفرح

-وشكو تطيرين؟!

-مروان اني اموووت على شُهيب فد أعززه واهتمله

-لا بلله؟؟؟

-اي والله هالرجال صح همسمس بس فد ينحب

-تسويها عناد بيه يعني؟!

-لا اني اعزه

-اييي روحيللله شكو جايتنييي روحي حبي وتخبلي عليه هنااك

-اوكي

گمت عناد بي امثل اريد اصعدله ولزمني من ايدي منگلب بركان راح ينفجر، قربني منه ولزگ وجهه بوجهي وعاط..

-صباااااا لا تطلعيييين عصبيتي وخبااااالي

-انتَ ما احترمت نفسك وطلبت مني اروح لاخوك واني دا اطبق اوامرك

-خ** على اواااامريي صيررري ادمية وگعدددي هنااا

-امشييي لك شنو صيري ادميية شايفني حيوااانة؟؟؟

-صباااااا انتِ تردددين تسوين مشكلة بيناااتنا مبييينة

-اييي اسوي واسووي واحطلك حد!! تره اني اسكتللك واعبرللك لان اعرفك عصبيي ومتتحمل واحترم مشاعرك بس لهنا وخلللص مروااان تعبت منك ومن تصرفااتك

-تصرفاتيي؟؟ شمسويللج اني؟؟؟

-تشك بخياالك ابتسمت صحت ليييش تبتسميين ضحككت گلت المن تضحكيين طلعت گلت ويامن طالعة وشعندج طاالعة وحتى لو گتلك ويه اهلي تگولي انتِ طالعة عيينچ!!

-اي طلعيهن بعد طلعيهنن كلهننن

-اطلعهن طبعااً شوف مروان اني چنت ملللكة بييت اهلي مدللة دلال ما صااير محد يگلي على عينچ حاجبب ومن انخطبت الك توقعت راح تحترم هالدلال وتزيدني بس طلعت غلطانة! انتَ خنگتني ودمرت نفسيتيي يوم بعد يوم دا اكرره هالعلاقة نفسيتي تعبت بسببك!!

-صرت اني الغلطان بكللشي لاني اغار عليج؟؟ صرت غلطاان لان ما اخليج تطلعين ويه شباب اصدقاء وتصيعون سووه توالي الليل؟؟ صرت غلطان هسة لان عندي غيييرة على عرضي؟؟؟

-ماعندي مشكلة بغيرتك بموضوع الشباب ولا بلبسي! ودتشوف بعيونك تغيرت من السما للگاع بسببك بس انتَ متحكمم مشكلتك تتحكم وتريدني عبدة الك شتطلب اگول تمم شنو تحچي اوافقك وما افتح حلگييي بس هالسوالف متمشي عندي مروان شوفلك جاارية غيرري تقبل بشخصيتك!!

-شنو افتهم من كلامج هذا؟؟

-اتوقع وصلت الفكرة ميحتاج اشرح اكثر اريد افسخ الخطوبة

-من كل عققققلچ؟؟؟ صارلنااا دهر مخطوبينن هسة من حددنا موعد الزواج هربتي؟؟؟

على اثر عياطه نزل شُهيب مستغرب، هدأت صوتي حتى مننفضح گدامه وجاوبت بهدوء..

-اني تعبانة وماعندي طاقة اناقش مروان كلامك ويه ابوية يصير

-ويييين موليييية

جرني من ايدي يقربني عليه اكثر خفت.. من المرات النادرة بحياتي اخاف من احد ومن عيون احد مروان انگلب غير واحد وضغطه على ايدي يفسر بأي ثانية راح يلزمني ويكتلني هنا..

-تلعبيين عليَّ كل هالفتررة؟؟ تتونسين وتعيشين علاقة ويه رجااال يمووت على الهوا التتنفسيي وتردين تعوفييي ياكل روحه بروحه بهالسهولة؟؟؟

تألمت ودمعت عيوني من كلامه الوجع من گلبي وايدي الضاغط عليها وعيوني المحاربة تنزل دمعتها، تدخل شُهيب من شاف الوضع حامي بيناتنا ومروان صار يگزز على اسنانه راح يهشمهن دفعه مني وگال بهدوء..

-شُهيب: مروان على كيفك

-مروان: هدنييي شُهههيب خلينيي افتهممم شتريييد بالضبططط

بنص العركة دخل نشوان للبيت يتحلطم شايل سترته الرسمية بيده ورگعها بالگاع وعاط بعصبية معمي على عيونه..

-لوووو بس افتهممم وين راحتتت هالبنية ارتاااح راح تخبلنيي كياان راح اتخخخبل بسـ....

قطع جملته من ركز بعيونه وانتبه لوجود شُهيب فتح حلگه وعيونه سوه وعاط..

-شُههههيب

وهنا شفنا ابتسامة شُهيب اخيراً، هز راسه نشوان ما مصدگ وصاح من جديد..

-شههههوووبيييي

ركض بأتجاه اخوه وشمر روحه بحضنه يضحك ويبچي ويحضنه وكأنه راح يطير من بين ايده، ضحك شُهيب فرحان بشوفته وبادله حضن اخوي حار.. دام سلامهم الحار والحنون خمس دقايق نشوان ما مصدگ شُهيب گدامه كل شوية يوخر راسه يتأكد هو هنا لو يتخيل ويرجع يحضنه..

-مروان: كافي افتهمنا شسالفة خنگت الرجال

-شُهيب: خلي مروان

طبطب شُهيب على ظهر نشوان اللطش ميقبل يوخر، رغم زعلي بس ضحكني من وخر وباس خد شُهيب شلعه شلع..

-نشوان: افيييييييييييييش ريحة الغواااالي

-شُهيب: عيوني

-نشوان: شوكت طلعت شُهيب؟؟ وليش احنه ما نعرف وشلون طلعت؟؟

-شُهيب: البارحة عادوا المحاكمة چانت سرية وافرجوا عني الظهر

-مروان: مجاي افتهم شلون احسه مو منطقي

-شُهيب: حتى اني

-نشوان: المههممم طلعت يا فرحتي والعبااس مانطيها لاحدد

-مروان: وين كيان؟

-نشوان: مادري خبلتنيي هالعفونة وين تروح ماادري

-صبا: يمكن طلعت ويه صديقاتها

-شُهيب: تطلع هيج بدون ما تبلغ احد؟

-نشوان: لا مستحيل هي تسألني قبل لا تروح لمكان

-صبا: لا اكيد طلعت ويه صديقاتها عوفوها متونسة اليوم لا نخرب فرحتها

عفتهم فرحانين ببعض وملتهين وتسحبت اطلع من البيت، بالباب ولزمني مروان ميخليني اطلع..

-مروان: ما كملناا

-صبا: مروان كافي اني تعبانة گتلك نقاشك ويه ابوية يصير

هديت ايدي منه وطلعت من البيت اركض لسيارتي اخذتها وشخطت منا قبل لا يلحگني.. هالعلاقة استنزفت طاقتي وصار لازم ينحطلها حد كم موقف بموقف مشيته لخاطر حبنا بس الوضع ديزيد مينقص ومن حددنا موعد الزواج صار خوفي اضعاف، خفت يبقى هيچ لنهاية العمر لو يلگه حل ويه ابوية ويعدل من نفسه لو نترك وينتهي كلشي..

**

-كيان: وخررر كاااافي شفايفي تملللخن انتَ متحسسس

-فاهد: واگطععهن همم انطيني صبر كياان والله الا اشگچ واشگ اخواننج العارات

-بيك خييير سويها

-اسويها واسووي ابوها هممم

-اي اي فاهد اييي ابقى على هاي سوالفك خنشوف يا كللبة ترجعللك

-فاهد: صمي حلگج لا اصممه بطريقتيي

-طاايح الحظظ سربوت فاااسق

-تعالي ولللج

تمالخنا للمرة الالف لليوم هو يكتل واني اكتل تماطلنا بالگاع نتعارك بس وين اگدرله هالغوريلا لزم ايدي ورجلي يثبتهم وضحك يحرك حواجبه بشيطنة..

-فاهد: صار وقت اللصمچ حبيبتي الكورية

-وليييي عن وجهههي فاااهد ماريدددك

طفر مني وجهه ينفض غضب تلمست شفايفي النذل زرفهن تزرف مثل المخبل يبوس، طلع تلفونه يتوعدلي واني واگفة مكتفة ايدي لصدري واهز راسي اتوعدله..

-فاهد: ويييينه كررريم اساس ليش تأخرتووو؟؟؟

بنفس اللحظة دخلوا كريم ثنين عمالقة مچتفي ومغطين وجهه شهگت مصدومة من منظره وصوت عياطه يتعارك وياهم يريدهم يفلتوا، ما هدوا الا من جابو كرسي بالوسط وگعدوه وربطوه بي..

وگفت على جهة حتى ميشوفني وتصيرلي مصيبة اما فاهد وخر القناع من وجه كريم وفلش وجهه ببوكس خلاه يوگع هو والكرسي..

-كريم: شنوووو حاي يصيييييير

-فاهد: وخرو الحبال من ايده

-الحماية: بس سيدي..

لزمه من خوانيگه ونتر بي وكل خلية بجسمه ترجف..

-گلتت حرروا ايددده

-حاضر كابيتان

نزلوا يشيلون الحبال عن ايده ورجله وگف كريم على حيله لازم خشمه الينزف دم وباوع لـ فاهد متحلف..

-كريم: انتَ منو؟؟؟

-فاهد: كابوسك..

لزمه من رگبته وانطاه كلة طگ راس براس صاح كريم متألم وبعده ما مفتح عيونه وانهاال فاهد عليه بالضرب المجنون، نام عليه ويضرب بكل عنف عنده راشديات وبوكسيات واحد وره الثاني ويصيح..

-ابن ال***** عينك عليهااا الا افگسهااا واخليك بحسرررة النظررة

طبب اصبعه بعيونه يريد يقلع البؤبؤ ماتحملت هالوحشية وركضت اجر ايده واتوسل..

-حباااب فااهد لاااا حرام عليك حراااام

-هددددينييي

-عليك الله احلفك برراس ماالك لا تأذي

-تدااافعيله بعددد؟؟ انعل ابوووو اليووووم

لزمه ودگ كتل ورم وجهه تورم من البوكسيات والرفسات ببطنه انگلب كريم على فاهد صار هو فوگاه يدافع عن نفسه، كريم هم ضخم وطويل كلش وجسمه رياضي انطه لفاهد كم بوكس على كم راشدي على كم حركة وفاهد يضحككك بصوت عالي مثل المخبل انهاريت من الخوف..

-كيان: كااافي دخيلكم كاااافي

-كريم: كيااان هذا منو؟؟؟

-فاهد: لا تگووول اسمهاااا

سكت عن الضحك ودفع كريم عنه ورجع يضرب ويضرب ويضرب وكريم جسمه ينهز ميستوعب الضربة الاولى وفاهد ينطي بوكس وبعده ما مستوعب البوكس ويطير وجهه براشدي..

-فاهد: تباوعلها مووو عينك عليهااا تريدهااا تروح تخطبهاا ولكك انهيييك والله انهههيك اطلعع مصاريننك واوكلك ياااهه

-كريم: لا.. منو...

ميگدر يحچي من قوة الهجمات، الوضع كلما جايله يسوء اكثر واكثر كريم وفاهد واحد دمى الثاني بس الاكثر كريم مات بين ايدين فاهد وكأنه ديطبق وعيده ويريد يكتله من صدگ..

-كيان: فاااهد قسماً بالله اذا ما عفت الرجال تحلممم تشوفني بعددد

اندار عليَّ يلفح نار غافله كريم ويه اللتفاته وضرب فاهد ببطنه وراهة ضربه بمكان حساس شهگت ويه صيحة فاهد متألم بس ما اخذ وقت يعيش الالم تعال اللزم راس كريم وارگعه بالحايط فلشه، بنفس اللحظة كريم وگع بالگاع لازم راسه، ابتعد يزحف كم خطوة من فاهد وعاط..

-كريم: عمييي بطلناااا ما نخطب بعددد ما نرررريد

-فاهد: عود عبالك راح اعوفك؟؟؟ وشرفييي ا....

لزمت وجهه بيدي اسد حلگه ميكمل حلفانه، عيونه الصفر تخزر وانفاسه اللاهثة تخوف، جريته ناحيتي ايد على حلگه وايد امسح على راسه من وره واحچي بيني وبينه..

-اهدأ فااهد لخاطري سيطر على اعصابك سيطرر

وخر ايده من حلگي وجر راسه مني حتى يرجعله ولزمته مرة ثانية من متونه ثنينهن حضنته منهن ادخل ايدي جوه واسحبه الي ما اخلي يشوف غير عيوني..

-تخسرني للابد فاهد فكر واختار غضبك وعصبيتك لو اني!

-كياااان كيااااااااان

غمضت عيوني من نبرة صراخه العالي بس تماسكت ورديت بهدوء..

-گول

-اكتتتتله اذبببحه اشرب من دممممه

-واني؟

-انتِ شكووو عليچ

انتبهت لحماية فاهد لزموا كريم من ايده يقيدوا ويرجعون يگعدو على الكرسي، هزيت راسي مفتهمة مستحيل راح يهتملي ويعوفه فاهد من يعصب ينجن وماكو قوة تأثر بي، هديت ايده وگلت ببرود..

-تمام فهمت

خطيت خطوة ارجع للخلف وبنفس اللحظة جرني يقربني خطوتين منه جسمي يطخ بجسمه، قيدني بأيد ولزم راسي من وره يدگ انفي بأنفه وگال برجفة عصبية..

-لا تعوفيني كياان ماگدر اعيش بدونج لا تعوفينيي

باسني وابتعد يعيد نفس الجملة مرتين وثلاثة واربعة وويه كل جملة يكررها يقبلني لدرجة انفاسي ضاعت..

-عوفه

-اعوفه والله اعوفه..

اندار على حمايته وعاط بيهم بدون لا يتركني من ايده..

-هدووو ولد الكلبب

عافهم ورجعلي يحضنني كسر عظامي يعتذرلي ويبوس براسي وشعري، عيني ويه كريم الصار جنازة طلعو الحماية وراحو وياه، انتظرت شوية علما سمعت صوت السيارة تتحرك ودفعت فاهد عني..

-وخر فاهد

-انتِ مو گلتي هده وارجعلك؟؟!!

-لا! گلت عوفه وبس ما علقت شي وراهة

-تضحكين عليَّ انتِ!!!

عفته ورحت اگعد على القنفة مهدود حيلي، اعصابي ترجف وروحي تاخت ضغطي هبط من العصبية والخوف حطيت ايدي على عيوني من التعب اجه يگعد بصفي ويفرك بيدي وراسي يسويلي مساج..

-تعبت منك

-اني تعبت مني كيان

-شنو حصلت هسة من هالعركة؟ تراويني سباعيتك لو شنو؟

-اوضح خطوطي الحمرة لا اكثر

-خطوطك الحمرة شنو؟

-انتِ خطوطي الحمرة والبيضة والسودة وكل اللوان الدنيا، اخلي هذا الجربوع عبرة لكل واحد ينوي يتقرب منچ وياخدج مني

-ليش متريد تتغير؟ لشوكت تبقى هيج؟

-غيريني انتِ

-لا بله؟

-كيان اني من ماشوفج كدامي اتسودن عقلي يروح بعد ماشوف بعيونيي اريد اذبح واصللخ اريد اخنگ واشگ حلوووگ

-اي اي عفية

-وادوس بالمصاريين واطيح حظووظ

-عاشت ايدك

-وانعل والدين و...

-افتهمت!

جريت ايدي منه ووخرت ايده عن راسي، نفخت هوا متنرفزة منه ونترت مزعوجة..

-محسسني امك اني ومادري بروحي!

-انتِ اكثر من امي

نبرته تغلفت بحنية تنافي غضبه وروحه الشايطة، تنهدت احرك راسي نافية فتحت حلگي اريد احچي وسده بأيده يمنعني من الكلام..

-لا تحچين شي ثاني.. اعرفچ تعبانة ومتبهذل حالچ من ورايه بس كيان اني ضايع بدونج تايه وما معروفلي درب صرت اتمنى الموت بغيابچ تعبت وانهد حيلي ليش ما تحسين بيه؟

وخرت ايده الرخت عن حلگي وجاوبت بهدوء..

-احس بيك شوكت ما تنوي تحس بيه وتحقق الاريده وتفصلني عنك

-الظاهر انتِ ما تمشي وياچ السياسة وهالكلان نعل!

-اي متمشي شنو راح تسوي مثلاً؟!!

-احتلچ وبعدين نتفاوض

عطت مخروعة من هجم عليَّ، ارافس بيدي ورجلي وادافع عن نفسي شمرته عني من القنفة اوگعه بالگاع صفن فاتح عيونه واني وگفت اشرد للطابق الثاني وقفلت باب الغرفة عليَّ، دقايق وطرق الباب عليَّ بس الغريب صوته هدأ وچان جَدي..

-فتحي الباب كوري

-‏ماا افتتتح

-فتحيها ما اسويلج شي فتحي اريد احاچيچ

-چذاب راح تدخل تعتدي علييَّ

-انتِ ليش عبالج اني حيوان؟

-لانك حيوان!

-هاا اي يجوز صدگ

-فاهد رووح خليني ارجع لاخواني راح يخافون عليَّ

-تمام

-فاااااهد

-گتلج تمام كيان طلعي براحتج

-جذاب

-والله حيرتيني انتِ شنو اكول وصحتي جذاب

-لانك جذاب!!

-اي والله صح

-احلفك براس مالك متلحگني

-مو مالك شد راسه هسة من الچذب

-اوعدني يله!

-وعد

-راح اطلع فاهد أي حركة تصدر منك اطشر راسك وربيي

شفت مزهرية هنا شلتها بيدي وفتحت الباب بس شافني رفع حاجبه معاجبه حطيت المزهرية بوجهه اهدده بيها ونزلت الدرج وجهي عليه وظهري على الدرج من وره.. وصلت لاخر ثلاث بايات وفلتت رجلي دست بالفضاء وردت اوگع لولا لزمة فاهد لايدي يسندني..

-كيان: يمممممة

-فاهد: سليمة شكد فاهية

-ردت اوگع فاهدد

-واني سندتچ

-ايييي

-شفتي شگد وجودي مهم بحياتج؟ رايحتلي لذاك كريم الاساس الفاهي

-ماريده!!

-اي اني الردت اوافق عليه وگتلچ طلگيني

نفخت بوجهه وعتيت ايدي منه بقسوة ورحت للباب افتح بيها ومتنفتح، حاولت اكثر من مرة افتح بس ماكوو لان...

-الباااب مقفوووول!!!

-بالضبط

-اياا چذاااب حلفتك براس مااالك

-حلفتيني براس مالك حتى ما اعترض طريقچ وهذا الصار ماي لوڤ

دا اجاوبه ودگ تلفونه فتح مكبرة صوت عرفته مالك لازم يسمعني محادثتهم وهو شلون يشلع گلبه..

-فاهد: مالك وكتك غلط چنت بوسط حرب حامية

-مالك: فاهد تعال اريدك

-فاهد: خليني اكمل الحرب واجيك

-مالك: حرب شنو؟

-لا عيب احچي يطشر العرض

-مالك: فهمت بس اذا وحدة غير كيان اشگك مو تجي بعدين تبچي عليها وتلطم والله اني اگلهم لا ترجعوها اله!

-فاهد: تعوف حزام اخوتك من يمرك ضيج.. لا تفيدك غرب بالضيج لا تفيدك العوزية

-مالك: شنووو؟؟

-فاهد: والله يا الله اخوان تالي وكت يتونس بجرح مشاعري العضروطية

-مالك: فاهد بس تعال بسرعة محتاجك بشي مهم

-گول هسة صار عندي فضول

-شُهيب طلع من السجن

شهگت شهگة شگت گلبي، فتحت عيوني على وسعها وفاهد عگد حاجبه بنفس الوقت ركضت اوگف بصفه اضرب على كتفه حتى يحچي وياخذ معلومات اكثر من مالك..

-فاهد: زين؟

-مالك: اريد نروحله

-فاهد: خو ماكو شي؟؟ شكو رايحيله؟؟

-مالك: شُهيب نفسيته كلش تعبانة لو تجي تشوفه ما تعرفه صاير غير واحد

-فاهد: واني ماخذني ارگصله لو شنو؟!

-مالك: يا بني ادم هذا اخونا!!

-فاهد: عدوناا قصدك مالك ما اجي وياك لا تتعب نفسك

-مالك: تجي غصباً عنك! عندي حچي وياكم ثنينكم ساعة واللگاك ببيت اخوانه!

-فاهد: لا ما ار.....

طبگ الاتصال بوجهنا فشر فاهد مزعوج وشمر موبايله، نزلت المزهرية من ايدي ونزلت اسد سير حذائي وركضت للباب انبهه..

-يلاا افتح يللا اخذني لبيتنا

-ليش؟

-اشوف اخوية شبيك يلاا فاهد حباب

انزعج بالزايد واتوقع السبب من كلمة "اخوية" كلما اگول على شُهيب اخوية يتسودن فاهد عبالك ينگرص.. فتحلي الباب بدون مرادد ورحت لسيارته ركبت وهو اجه يسوق وباله شارد..

-كيان: تنزلني ووره نص ساعة تفوت حتى محد يحس تمام؟

هز راسه موافق اول ما وصلنا البيت ركضت بكل سرعتي انلوت رجلي مرتين بسبب الكعب العالي بس ما اهتميت وكملت طريقي، طلعت مفاتيحي ودخلت البيت ادور بعيوني واصيح بفرحة..

-شُهيب ويين؟؟ شهوووبي انتَ هناا

على اثر صوتي طلع نظر عيني من الغرفة روحي رفرفرت ويه نظرة عيونه الحنونة، هرولت اله مثل الطفلة وشافت ابوها وحضنته بكل قوتي اسند روحي على سندي الحرموني منه..

ابچي وافرغ طاقتي السلبية، خوفي ووحشتي، اكتأبي وجزعي على چتفه.. اسمع لضحك نشوان ومروان واجت ماريا هم وارفض اتركه محتاجة حنيته عليَّ ومحتاجة طبطبة ايده على ظهري..

-شُهيب: بنوتي الحلوة

-كيان: يا روحهاا

-نشوان: يلا عاد ما شبعتي

-كيان: لاااا

-نشوان: شبيچ فاكهة حياتي لا تفشلينا ويه الزلمة

-ماريا: فشليهم فشليهم يستاهلون!

-نشوان: ليش كبد شبيچ انتِ الثانية

-ماريا: انتو كلكم عفووونة

-نشوان: اگلچ ماريا انتِ زعلانة على ابنچ اني شكو طبگتيني وياه

وخرني شُهيب عنه شوية بس بعده حاضنني واندار على امه، ابتسم بوجهها وگال بلطف..

-يمة حبيبتي گتلج چنت مسافر

-ماريا: تروح تتونس وتترك امك وحدها تبچي! شهوبي انتَ ابن عااق

تألم شُهيب من جملتها وهز راسه بهدوء، ما قبلت عليه ودافعتله بس ماريا انقهرت بالزايد وگامت تبچي، حضنها شُهيب يهدأها وهي تضرب على صدره تعاتبه شلون عافها كل هالمدة وخلاهة تشتاقله وتخاف عليه بقى يهدأ بيها ويقنعها هو بخير فوگ النص ساعة ما خلى شي ما غراهة بي وماقبلت ولا اقتنعت عافته وراحت لغرفتي فوگ زعلانة منه..

-مروان: احچيلها وين چنت حتى تعذرك

-شُهيب: لا راح تگوم تخاف مني

-كيان: ليش تخاف؟

-شُهيب: لان تعرف السجن بس للمجرمين

-كيان: بس انتَ مو مجرم!!

-شُهيب: مو مهم سجلي تسجل عليه مجرم وتعاقبت بسجن على تهمة جريمة قتل

برود ببرود نطقها طالعة الدنيا من عينه راح فوگ لامه عرفته ميخليها زعلانة وبقى وياهة فوگ ال 20 دقيقة.. كلام مالك صحيح شُهيب نفسيته كلش تعبانة وروحه طالعة ماله واهس لشي، تناقشت اني واخواني شلون راح نطلعه من حالته ومروان گال بجدية..

-مروان: شباب حالته طبيعية صارله قريب ٣ سنوات بالسجن شنو تتوقعون يطلع يغني ويرگص؟

قاطع حديثنا صوت جرس الباب توترت وبطني خبطت عرفت ذولة مالك وفاهد وصلوا، نشوان راح يفتح الباب ورجعلنا وياهم..

-نشوان: اجو يشوفون اخوهم

-مالك: مساء الخير

رد عليه مروان ودخل هو وفاهد المطنگر للصالة، گعدو واحد بصف الثاني ونشوان ومروان على جهة واني بصفهم..

-مالك: شُهيب هنا؟

-نشوان: اي هسة اشوفه

صعدله نشوان بس مبين ما گله اجو اخوانك لان نزل شُهيب طبيعي الى ان وصل للباية الاخيرة مال الدرج هنا انصدم، انصدم لدرجة جمدت رجله وايده على المحجر رافض يتحرك واول جملة طلعت منه هي..

-شُهيب: صاير شي؟

-مالك: لا، الحمدلله على سلامتك

وگفله دليل الاحترام بينما فاهد بقى گاعد بمكانه ممهتم، هز راسه شُهيب بمعنى الله يسلمك وتقدم كم خطوة..

-مالك: عندك وقت نحچي وياك؟

-شُهيب: لا

كمل طريقه يطلع من الصالة ضحك فاهد مستهزأ بينما مالك وگف يهرول ناحية شُهيب لزمه من ايده وگال بصوت متوسل..

-مالك: بلا امر عليك اطلب منك تفرغلنا وقت عندي موضوع مهم محتاج اشاركك بي

رفعله حاجب ممتقبل كرر مالك الطلب ياله هز راسه واجه يگعد ويانه..

-فاهد: زحمناك عيوني شُهيب

-شُهيب: صحيح

-فاهد: هههههههههههههههههه مصدگ روحه

-مالك: فاهد!!

-فاهد: تره هو يستفز بيه!

-مالك: انطيني مجال احچي فاهد.. شُهيب اكو مكان خاص نگدر نحچي بي؟

افتهمنا يردون خصوصية بيناتهم احنه ترخصنا وگمنا كلمن راح لغرفته اما اني ماگدرت اروح للغرفة بقيت واگفة على محجر الدرج وحاطة ايدي على گلبي لا يچفص فاهد بشي ويفضحنا..

-مالك: شلونك شُهيب؟

-شُهيب: بخير، ممكن ندخل بصلب الموضوع

تحمحم مالك متوتر، مديت عيوني اشوفهم گاعد على طرف القنفة بينما فاهد گاعد مريح نفسه وحاط رجل على رجل..

-مالك: اكو شي قديم بيناتنا صار لازم نصفي

-فاهد: ما جايب مصفى

-مالك: فاهد كافي عااد!

-فاهد: اي مو كلت تريد تصفي؟ شنو هو تمن وتصفي شبيك مالك

-شُهيب: اذا تبقون هيج اني رايح ماعندي وقت لتفاهة فاهد

-فاهد: تفاهة لو برتقالة ههههههههههههههههههههههه

-مالك: يا صبر الارض!!

-فاهد: اكيد برتقالة ونفسها البرتقالة الچان شُهيب ياخذها مني ويحرمني منها من چنه صغار!!

-شُهيب: اكلت گلبي عليها ماكو يوم اخذت برتقالتك!

-فاهد: صح صح چان صديقك العااار موزس ياخذها وبعدين شنوو؟ گمت تجيب برتقال لاخوانك الجدد وتشبع بطوونهم!

-شُهيب: اخواني شنو جابهم بالنص؟!

-فاهد: يمكن لانك بعتنااا علمودهم؟!

-مالك: شُهيب لا تجاوبه خلوني احچي!

سكتوا ثنينهم ينتظرون مالك يحچي، دام الصمت لثواني تخيلته ما راح يگول شي الى ان گال بهدوء شديد..

-مالك: من اجه رامي للدنيا حياتي تغيرت، صارت اصعب وجاي احاول اتأقلم ويه الوضع الجديد، صرت انظر لهواي امور من جوانب ثانية و اخاف عليه من الهوا لأني صرت اب.. وشعور الابوة غريزة طبيعية تصير قلق وتخاف على طفلك وتفكر بي بكل لحظة..

سكت ثواني يلقط انفاسه واردف بنفس الهدوء..

-بدال ما چنت اخاف على ثنين صاروا اربعة رامي وجنات صاروا اهم شي بحياتي ما تغمض عيني اذا حسيت بزوجتي تعبانة او ابني مغصته بطنه نبقى للصبح وياه و رغم انشغالي ويه ابني وزوجتي بس الموضوع الاريد احچي بي وياكم ما جاي يروح من بالي هَم على گلبي وروحي توجعني بسببه

-فاهد: شنو السالفة مالك خوفتنا لشنو كل هاي المقدمات؟

-مالك: مرت سنين على هذا الموضوع وكل سنة اگول هالسنة افاتحهم وانوي واتوكل ويجي ابوكم يخرب مخططاتي بآخر لحظة.. ماعرف شلون يكتشف عندي نية بهذا الشي بس كلنا نعرف شمسون شيطان ومو إنسان طبيعي يعذبني ويوقعني على بلاوي عقاب الي ولازمني من ايدي التوجعني بس خلص الى متى ايقى اأجل بما ان شمسون مو هنا و..

-فاهد: رجع

-مالك: المهم مو هنا مو بيناتنا.. شُهيب، فاهد صار لازم نرجع ونسولف على اخر موقف جمعنا كـ اخوان قبل اكثر من 16 سنة..

**

"FLASH BACK"

-مالك: نعم كابيتان؟

نزل الجگارة من ايده وريح ظهره على الكرسي، زفر الدخان بوجهي وگال بلغته الروسية..

-غوغري: ابوك زارنا اليوم مالك ويريدكم تطلعون منا

-مالك: عنده مهمة؟

-غوغري: للابد

-مالك: شنو؟

-ڤاي: راح تطلعون منا ابوكم يريدكم

توقفت نبضات قلبي من الصدمة، صفنت استوعب كلامهم الجدي واراقب ملامحهم الواثقة الثابتة، تداركت وضعي وسألت واحس رجلي بدت ترجف..

-شنو قصدكم؟ يعني راح نطلع منا وما نرجع بعد؟؟

-غوغري: بالضبط

-صدگ تحچي زعيم؟؟ صدگ رااح نطلع مناا؟؟ راح نرجع لبيوتنا؟؟؟

صحت بفرح لا نهائي لو بيدي اقفز بمكاني واصيح بعلو صوتي من السعادة، خزرني غوغري على ردة فعلي ورزلني المدرب ڤاي..

-ڤاي: هاي ردة فعل رجل تدرب عدنا سنين على ضبط النفس والثبات؟!! وينها تدريباتك مالك شمسون؟؟ لا تنسى نفسسك منو وشنو ولا تخلي هاي الامور التافهة تبين على وجهك!!

نزلت عيوني اسيطر على توازني اخفي ابتسامتي واوگف وظهري عدل وايدي مكتفة ليوره، هزيت راسي بـ اي ورفعت راسي فوگ نفس وگفتنا المعتادة.. اكتاف مشدودة وظهر مستقيم يحارب الانحناء..

-مالك: حاضر كابيتان!

-ڤاي: يلا روح جهز نفسك!!

اومأت بخفة وگلت بثقة..

-مالك: اني ممنون منكم سيدي اخواني راح ينسعدون بهذا الخبر

اديت التحية وتوجهت للباب اريد اطلع ووگفني صوت غوغري..

-غوغري: وين رايح؟

-مالك: ابلغ اخواني سيدي

-غوغري: منو اخوانك؟

-مالك: شُهيب وفاهد شمسون

-غوغري: بلغ فاهد وعوف الوحش

-مالك: ما فهمت؟

-ڤاي: تروح تبلغ فاهد يطلع وياك وتعوف شُهيب هنا!

-شُهيب ما يجي ويانه؟

-غوغري: لا ابوك طلبكم انتَ وفاهد بس

-مالك: ونعوف شُهيب؟؟؟

-غوغري: شُهيب يبقى يمنا

-مالك: ليش؟؟

-ڤاي: لان احنه اشتريناه

-مالك: شُهيب مو حاجة حتى تشتروها!!

-غوغري: وهسة صار حاجة واشتريناه

-مالك: مستحيل اقبل بهذا الشي! ما اعوف اخوية مستحيل!!

-غوغري: انتبه لنبرتك!!

-مالك: حاي تطلبون مني اعوف اخوي وحده هنا واروح؟ زعيم حط نفسك بمكاني شلون تقبل تتخلى عن اخوك وتعوفه يحارب الموت وحده؟

-ڤاي: اووووه اكتفينا من هالدراما العائلية المقززة وملينا صار لازم نفرقكم واجه الامر من ابوكم اخيراً

-مالك: اني احچي ويه ابوية خلو الموضوع عليَّ

-غوغري: منو مفكر نفسك انتَ؟

-مالك: اخوه الچبير وسنده!

-ڤاي: لعبت نفسي من هالمصطلحات روح مالك لا تقرفنا اكثر

-مالك: ما اروح زعيم اني ماريد اطلع منا ماكو حاجة نروح

-غوغري: ابني! ابوك يريدك هو بكيفك؟! خلص اشتراككم يمنا لا تناقش!

-مالك: اروح بشرط تسمحولي اشوف شُهيب، كل شهر اني اجي هنا يمه

-ڤاي: اهاا زعيم نسينا نبلغه بباقي الاوامر

-غوغري: تطلع منا تنسى عندك اخ اسمه شُهيب مالك هذا طلب ابوك!

الصدمة احتلتني من كل جانب وكأن احد انطاني راشدي قوي نساني الماضي والحاضر من اردف غوغري بنبرة مستفزة..

-غوغري: تطلع من هاي الابواب اريد اخوك يكرهكم! ينساكم! تمحي من راسه عنده اخوان وعائلة ماريده يلتهي يفكر بيكم! فهمت لو لا؟!

-مالك: لا لا!

-ڤاي: مالك شمسون اذا ما تممت اتفاقنا اليوم تلگه شُهيب ميت بفراشه!

روحي راحت ويه تهديدهم ماعندي شك ولا واحد بالمية بيهم يسووها اساساً القتل هنا اسهل من شربة الماي، هزيت راسي معترض وزادها غوغري بـ..

-غوغري: تكره فاهد بي هم ماعرف شنو تگله وشنو تألف اريدكم تنسوا والنمر ينساكم

-ڤاي: هذا طلب ابوك لا عبالك من جيبنا وگال بالضبط اذا مالك ما يتمم المهمة على اكمل وجه تكتلون اخوانه گدام عينه وتحرگون گلبه

-مالك بدموع: تريدني اكسر گلب اخوووي!!

-غوغري: جاي تبچي؟؟؟

-مالك: ماااعوفه ماگدرر اخذله مااااكدر

-ڤاي: كااافي مليييت من هالاسطوانه! كبروا بابا كبرووا صرتوا زلم! الى متى تبقون متعلقين ببعض مثل الاطفال المزعجة!!!

-مالك: احنه اخووان

زمجر غوغري بعصبية وجر تلفون المكتب مالته وامر بجدية وبرود..

-غوغري: تسحلولي فاهد وشُهيب شمسون لغرفة المجزرة!

-مالك: لااا زعيم لاااا ابوس ايدددك

-ڤاي: اذبحهم زعيم! خلينا نخلص من هالجو الأسري التعيس!

-مالك: لااا اسوي التردو بس عوفوهم احلفك بأعز ما تملك كابيتاان راح اسوي التگوله والله اسووي احلف بروح اميي

-غوغري: تكره شُهيب بيكم! تنبذه من حياتكم! فاهد اريده يكرره اخوه! يشوف دم سنونه ولا يشوف شُهيب مفهوم؟؟؟

-ڤاي: خلينا نكتلهم زعيم لا تنطي فرصة ثانية ما يستحقها!

-مالك: اسوي التردو اعتبروا تم بس انطوني مجال امهدله الطريق

-غوغري: تمهد الطريق شنو؟!! هاليومين اريد الوضع يتم بعد يومين تتحارب ويه اخوك تكسر ضلوعه وراسه وتگطع عنه النفسس! باچرر اريد اشوف شُهيب بالمستشفى نايم لا انيمه بگبره!!

-ڤاي: وتعرف الزعيم يسويها

هزيت راسي حابس دموعي لا تنزل، گلبي راح يطلع من صدري من قوة ضرباته كلشي بيه يصرخ عذاب واعتراض بس ماكو بيدي شي ماكو بيدي غير اطبق واحافظ على حياتهم..

طلعت من مكتب غوغري اطرافي ترتعش، اني مالك الما ابين ضعفي گدام احد ما جاي اگدر امشي على رجليه.. خانتني قوتي بنص الطريق ووگعت منهار اطلقت لنفسي العنان وبچيت من كل گلبي بچيت لحدما طلعت عيوني بچيت اتذكر الماضي والحاضر والمنتظرنه.. بچيت على فگدي اخواني بيدي راح افرقنا عن بعض بنفس الايد الچانت تلمهم واحط راسهم على صدري راح تفرقهم وتزرع الكراهية بيناتنا..

رجعت لاخواني بگلب محترگ بس امثل البرود، حاچاني شُهيب كم مرة بس ماگدرت اجاوبه، ثاني يوم قرروا شُهيب وفاهد يصعدون للسطح من الكل ينام ورحت وياهم، مالي عين اباوع بعيون اخواني ماگدر حتى من شفت قمر وبصفه نجمة ماگدرت ابوس كل واحد على خده، عفتهم ونزلت انام بس والله ما غفت عيني الليل كله افكر شلون اقنع فاهد يكره شُهيب وشلون راح اعوف شُهيب..

لازم يتم كلشي ماعندي وقت اذا ما فرقتنا عن بعض غوغري راح يكتل اخواني ويحرمني منهم للابد، من الصبح طلع شُهيب يتريگ ولزمت فاهد قبل لا يطلع..

-اوگف اريد احچي وياك

-فاهد: يلاا بسرعة قبل لا موزس يروح يگعد بصف شُهيب وياخذ مكاني

-بخصوص شُهيب اريد احچي فاهد

-شنو گول

-احنه مخدوعين بي

-شنو قصدك؟

اخذت نفس عميق قطع نياط گلبي وگلت واني اتنهد من الالم..

-شُهيب ما يحبنا جاي يضحك علينا

-فاهد: شنو يعني

-يريدني اموت البارحة سمعته هو وموزس يحچون ويتفقون علينا گله راح اكتل مالك اليوم وراه اكتل فاهد

-شنووو

-حتى ابقى وحيد ابوي ويطلعني منا وارجع لاخواني الجدد

-لا مالك لاا ما اصدگ

-هذا الصار فاهد بأذني سمعته ما شفته صارله يومين يتحضر لقتال اليوم اشوفه يتدرب بشكل مضاعف ويطلع ويه موزس هواي واليوم الصبح هم اجاله موزس هنا واتفقوا سمعته يگله راح تعوف غرفة اخوانك وتجي يمي قبل لا تطلع منا

عيونه انترست دموع والغصة اعتلت صوته، حاولت اسيطر على وضعي واكمل الكذبة وداخلي محترگ من القهر..

-فاهد: شُهيب يريد يكتلنا ما يحبنا؟

-يحب اخوانه فاهد دائماً راح يفضلهم علينا

-هو يحبني

نزلت دموعه سمعت صوت كسر گلبه وشهگته الدمرته من الداخل..

-فاهد: يمكن جذب؟ يمكن مقلب؟ مالك اكيد مقلب اكيد شُهيب يحبنا هو اخونا

-مالك: يا ريت لو چان مقلب فهود

-يريد يعوفنا ويطلع منا؟

-يكتلنا ويطلع منا

مسح دموعه بأيده مثل حركات الاطفال وصار يتنفس بصوت عالي يشهگ شهگ گعد على سريره وانفجر بالبكاء ويضرب على صدره مكان گلبه يسكته..

-فاهد: يچذب علينا

-كل هالسنين شُهيب يچذب علينا

-ليش لييييش

-مادري

-لاني مخبل؟ هو ما يحبني لان اني مخبل؟؟ دائماً يگول عني مسودن ويخجل مني

قاومت قدر المستطاع بس فشلت نزلت دمعتي گدامه ودرتله ظهري حتى ما يشوف ضعفي، صوت بكائه وكأنه طفل وحرموا من احلى شي عنده هلكني، صوته وهو يلوم بنفسه هشمني..

-فاهد: اني السبب كله من ورايه اني ما صرت حباب وياه اني اضوجه من اخذ برتقالته اني اخذ اكله اني كرهته بيه

-بعد شنسوي فاهد

-انطي كل برتقالاتي بس لا يروح لا يكتلنا اصير خوش ولد والله گله اصير خوش ولد بس لا يعوفنا

-ما يفيد فهود شُهيب كرهنا بعد عنده اخوان جدد واحنه ولا شي بالنسبة اله

-شنو نسوي؟ شلوون نرجعه ويانه؟؟

-ما يفيد! شُهيب ما راح يرجع شُهيب بااعنا بابا وليددي شُهيب ما يحبنا من البداية هو استغلنا ومثل هو يحبنا حتى ميبقى وحيد!

يهز براسه معترض ودموعه عشرة عشرة انهيار تام صابه سد اذاناته ميقبل يسمعني بس دست على نفسي وگلبي وكملت..

-اليوم اجته الفرصة حتى يكتلني يريد يخلص مني ووراهة جايك الدور! اني اتصلت بأبوية البارحة وطلبت منه ياخذنا منا لا نموت ويخسرنا للابد

-ابوية يدري

-اي حچيتله كلشي وگال اليوم بالليل راح ياخذنا ويعوف شُهيب هنا وحده عقوبة

-لا ماعوفه

-فاهد نعوفه! لازم نعوفه يتأدب! شُهيب لعب عليَّ وعليك انتَ ما جاي تحس من تزوجت امه وصار عنده اخوان ثانيين شلون تغير؟؟؟

-لا لااا

-اي فاهد! ايييي افهمني لاازم ننتقم منه اني وياك! اليوم راح نعوفه وما نهتمله حتى ما نودعه راح ناخذ اغراضنا ونطلع منا بدونه خلي يبقى يتعذب وحده وما ناخذه ويانه احنه نكره شُهيب نكرهه لانه خاننا وخذلنا حتى لو توسل بينا نرجع ما راح نهتمله راح نكسر گلبه مثلما كسر گلبنا!!

صوت بكائه اعتلى صار يضرب على وجهه وراسه وصدره ملخه تملخ، يبچي ويصيح ميقبل على كلامي على اثر صياحه دخل المدرب ڤاي وشاف وضعه صاح بي وراد يضربه بالحزام البيده وصرت بوجه فاهد اغطي..

-مالك: اني اسكته انييي

-ڤاي: شنو طفففل انتَ وگاعد تبچي؟؟ ما تستحي؟؟؟

-مالك: كابيتان اني اتصرف اترجاك

عافنا ڤاي بعدما ضربني مرتين بالحزام على ظهري عقوبة، طلع واللتهيت ويه فاهد المنتهية اعصابه بصعوبة قنعته حتى ميواجهه ويعاتبه وهمته بس يعرف شُهيب بخطتنا راح يكتلنا بطريقة ثانية، بصعوبة قسيت گلبه على حبيب گلبه شُهيب.. شُهيب وفاهد مو علاقة اخوان لا شُهيب يتصرف ويه فاهد كأنه ابوه واني ابوهم ثنينهم وخسرتهم ثنينهم اليوم..

اجه وقت القتال، تحاربت ويه شُهيب ودمرته دماار گلبي ينزف ويه كل كسرة عظم اكسرها منه، ما تركته الا كملت المهمة وخليته يفقد الوعي.. دست على شكو مشاعر فقد جاي احس بيها ورجعت للغرفة اللملم اغراضي ويه فاهد كلشي بيه يرجف اعصابي تلفت احسني جاي اعوف روحي هنا واطلع..

اجانه شُهيب وشاف وضعنا توسل وبچى مثل الاطفال وگع وانهار وداس المدرب ڤاي على اصابعه كسرهم گدام عيني وماگدرت ارجع لاخوية.. ماگدرت ادافعله واهشم فَك ڤاي المبتسم ماگدرت حتى انهار لو اصيح ماگدرت اودعه بنظرة.. ماگدرت..

طلعت من هالسجن وشفت ابوية واگف ينتظرنا، صعد فاهد السيارة وانهار من البكاء بعده ما مستوعب الصار بس اني ماگدرت ابچي واريح گلبي.. خزرني ابوية وعرفت مقصده من هالخزرة جاي يسألني تممت الموضوع لو لا، هزيت راسي اي ودرت وجهي للجامة..

وصلنا لبيتنا الجديد رحت لغرفتي ووگعت، والوگعة اخذت ثلثين حيلي كرهت الدنيا واعتكفت على روحي.. اكمل شغلي ودراستي جسد بلا روح عقلي وگلبي ويه شُهيب افكر شنو جاي يسوي هسة؟ جاي يعذبو؟ داخل للغرفة الجليدية؟ جاي ينجلد هسة؟ لو يگعد على الزجاج؟ او يركض على البسامير؟ لو يمكن جاي يتعاقب لانه بچه ورانه وراح يطلعوله جلد جديد ويزينون شعره صفر!!

التفكير اكل راسي وانخر گلبي من الوحدة، ماتحملت اگابل ابوية واگعد وياه ببيت واحد طلعت ببيت وحدي وانعزلت اتردد على فاهد واكمل شغلي من بعيد لبعيد بس بقى يدور براسي سؤال واحد شحصلوا من فرقونا؟ واجاني الجواب من ابوية بعجرفة وتعالي..

-شمسون: لانكم قريبين زيادة عن اللزوم وفشلتوني گدام الزلم!!

-مالك: بس احنه اخوان

-شمسون: اني واخواني هم اخوان!! شو ولا واحد بينا ضحى علمود الثاني ولا بمقدار ابرة!!

-واحنه شيخصنا بأخوانك؟ تريد تحولنا وحوش مثلكم؟؟

-شلون تصيرون زلم؟؟؟ شلون ترفعون راسي!! شلون وانتو واحد يبچي على الثاني وواحد يمرض على مرض الثاني!!

-لان هالشي طبيعي! لازم الاخوان يكونون هيچ!

-لا مو طبيعي! الطبيعي تهتم بنفسك وبس!!! تفكر بمصلحتك ومصلحة جيبك وانعل ابو الاخوان لابو العاائلة!!

حطيت عيني بعيونه معترض وقررت بس تصيرلي فرصة اروح هناك وافهم شُهيب كللشي ومثل الشيطان شمسون لگف وعرف بشنو افكر، لزمني من فچي بقوة عصره بين ايده ونتر بعيون راح تاكلني..

-يا مالك قسماً عظماً وداعتها لامي وروووحها لامك يا مالك لو افتهمت حاچي لو متواصل ويه شُهيب اليوم لو باچر لو بعد سنة لو عشرر سنيين مالك اكتتل اخوانك گدام عيونك واحرگ گلبك عليهههم وانتَ تعرفني اسوويها والله اسويهاا!!

شمرني شمر بالگاع ورفس ببطني مرتين وداس على وجهي كتحذير اخير وعافني بضيمي، فركت صدري من هالهم ودعيت من ربي ياخذ روحي وارتاح من هالجبل النايم على گلبي..

مشت الايام كئيبة حزينة تعيسة بدون صديقي المقرب، بدون بير اسراري وشريك معاناتي واحلامي، بقيت من مرض لمرض ما صحيت الى ان وصلني خبر شُهيب طلع! شلون وشوكت وليش مادري! بس المهم شُهيب طلع!!

بقيت وراه وراه ما عفته حتى واني امثل الكره والحقد انتبه عليه واراقبه من بعيد، عرفت موزس اله ايد بتحرير شُهيب مناك وزاد احترامي لهذا الانسان ووفائه، بس طلع شُهيب مناك وهو كارهني ما طايق شوفتي وصلت بي المواصيل يتمنالي الموت وما اللومه..

**

"الحــــاضر"

اسمع لمالك وعيوني صارت بگصتي من العاشوا، نبرة صوته چانت محملة بالانكسار، عيوني ما بعدتها عن شُهيب وفاهد الجافلين، فاهد فاتح عيونه على وسعها وشُهيب باقي ساكن بس الصدمة واضحة عليه..

كمل مالك كلامه ودور عيونه بين اخوانه يشوف ردة فعلهم بس عبث.. محد بيهم تحرك ولا احد نطق بشي بقوا على هذا الهدوء بالعشر دقايق واحد صافن بوجه الثاني ومالك گاعد على اعصابه..

-مالك: ما راح تعلقون عن الموضوع؟

-فاهد: شتريدنا نعلق؟ شنو نعلق وانتَ ضاحك علينا صارلك 16 سنة مالك!!

-مالك: حقك شنو تگول حقك

-فاهد: تگول ابوية يحاربك؟؟ ابوية يلزمك بكل مرة تريد تكشف السر چان گدرت تحچيلي الي وحدي بيني وبينك احنه مو اصدقاء لو لا؟؟؟

-مالك: ما حچيت لان اعرف گلبك راح يحن وترجع العلاقة بيناتكم وابوية راح يكتشف بهالشي وينفذ تهديده فاهد

-فاهد: ما جاي اصدگ هالخرررط شنو هالمسلتتتتة انتَ شلوون تسوي بيه هيچ شلوووون

دفر الطاولة متخبل وصار يعيط ويضرب بكلشي يصير گدامه، طلع من البيت ما سمع لمالك ولا اهتم لكلامه ومحاولاته يخلي يهدأ، فاهد مصدوم واعرف ردة فعله وعصبيته هاي ناتجة من صدمة هذا اسلوبه بالتعبير عن شي فاجأه..

زفر نفس مالك حاير وحرك راسه متألم من ردة فعل اخوه وانتظر أي شي يطلع من شُهيب أي كلمة او أي سؤال بس ولشي.. ولا شي طلع من حلگه وما نطق شي گام من مكانه بهدوئه المعتاد وراح للمطبخ يتهرب..

بقى مالك وحده يضرب اخماس بأسداس والهم والغم تارس وجهه، يمكن تخيل لو حچى وياهم راح ترجع علاقتهم نفس قبل ويرجعون الاخوان الثلاثي المرح الي الكل چان يغار منهم بس المشكلة مالك نسى.. نسى البُعد والجفاء والحقد يكبر سنة بعد سنة بالگلوب الى ان يتحول لكره شديد ونفور..

مشت الايام والجفاء نفسه، فاهد اختفى تماماً! بعد ما اجه ولا شافني ولا اتصل ظل بالي عليه وگلبي ماتحمل ابتعد عنه اكثر واحنه بنفس الدولة ونفس المدينة، اتصلت بأم خالد اسألها عنه وگووة طلعت من حلگها جملة..

-فاهد مو بخير! من يوم عرس هارون لهذا اليوم هو ما طالع من بيته لا يطلع ولا يسهر ولا يعبر حدود باب غرفته! انتِ السبب انتِ دمرتي!!!

سدت الاتصال بوجهي، تنهدت حايرة شلون بيهم؟ يبقون على هذا الحال؟ يبقون بهالصدمة ما ناوين يطلعون منها ويستوعبون الموضوع! يستوعبون همه مو اعداء وكل الي صار لعبة وانلعب بيهم همه الثلاثة!

بعد مرور ايام عديدة من هالموضوع الصعب گدرنا نرجع لحياتنا السابقة نوعاً ما، شُهيب رجع لشقته وعرفنا واحد من جماعته چان يدفع الاجار منو من اصدقائه ما عرفنا هو شَك بالاطلس وگال بس هو المخبل جيبه مزروف ويشمر فلوسه منا ومنا..

اليوم اجانه من الصبح يزورنا نفس قبل، نزلت من فوگ شفته گاعد وحاسبتي گدامه ديشتغل بيها هالفترة علما يشتريله وحدة جديدة..

-كيان: شنو دتسوي؟

-شُهيب: اصمم

-كيان بفرحة: اجاك شغل؟؟

-شُهيب: لا

-ها

انقهرت بس ما بينت وگعدت بصفه اباوع شلون يصمم وادرس كل تفصيلة يشتغلها واحفظها على غيبي، وبينما احنه گاعدين اجاله اتصال فز من مكانه يشوف تلفونه وبلع ريگه من شاف المتصل "شركة لانتو"، حمحم بصوته وجاوب بثقة بلغة البلد..

-شُهيب: مساء النور.. نعم اني شُهيب شمسون، نعم الـ CV مالتي هذا.. اها.. تمام شكراً..

سد الإتصال وشمر التلفون على القنفة ورجع لمكانه، سألت بحماسي المعتاد..

-هااا بشر؟؟

-رفضوني

-لاا شُهيب

-اشوف غيرهم مو مشكلة

هزيت راسي اجاهد ما ابين زعلي، هذا المكان الـ 16 شُهيب يقدم عليه على عمل ويرفضوا! شُهيب شمسون الي چانو يتعجبون على تصاميمه وشغله الدقيق وعبقريته وطاقة تحمله صار ينرفض؟؟ شُهيب الي چان رئيس شركته الخاصة ينرفض ومينراد بعد؟؟ ماگول غير يا كسرتك يا شُهيب..

-كيان: شنو سبب الرفض؟

-نفس العادة

-لان چنت مسجون؟

-اممم

-والله مظلوم گوللهم انتَ مظلوم وهاي تهمة باطلة!

عيوني دمعت من القهر ابتسم ودار عيونه الي، مسح على ايدي خفيف وگال بهدوء شديد..

-حبيبتي كيان رفضهم الي طبيعي جداً اني مسيرتي المهنية ونجاحي انتهى وراح.. كله تبخر وأنسى اول ما دخلت السجن تلطخ سجلي بجريمة قتل وماكو شركة راح تقبلني

-شُهيب همه الخسروك والله!

كبرت ابتسامته وهز راسه يسايرني، يعرف ان مو همه الخسروا هو الخسر كلشي، هو الخسر دراسته وتعبه ونجاحه وسنين عمره كلها بسبب تهمة باطلة! هو الخسر قريب الثلاث سنوات من عمره على شي ما سواه! هو التدمر وانتهى حلمه بسبب حقد بنية وابوها! بسبب بنية حبها وعشقها وقدملها كلشي تحبه اووووف يا مسرة لو تشوفين شصار بـ شُهيب چان بچيتي دم على حاله!

بقينا هيچ كل يوم ننتظر اتصالات الشركات وكلهم قابلوا بالرفض كلهمم!! محد بيهم واجهه بالحقيقة وگال بسبب موضوع السجن يگلوله عدنا اكتفاء بس احنه مو اغبياء..

فكر يفتح مشروع وحده بس يعرف راح يفشل ومحد يجيله، حتى اصدقائه الچان وياهم ويساعدهم وينطيهم افكار تخلوا عنه وما قبلوا يساعدو واليذبح شُهيب يعذرهم ويگول حقهم هالشي راح ينزل من مستوى شركتهم ويأثر على سمعتها، استمرينا على هالقهر الى ان اجه اليوم ورن جرس بابنا رحت افتحه وتفاجأت من شفت..

-مسرة قيثارة!

نزعت نظاراتها الشمسية تلبسهن على راسها وابتسمت بأسنان خالية من اللماستها التلمع شايلتها وما موجودة بعد..

-مسرة: شلونچ كيان

-كيان: بخير

-مسرة: تسمحيلي ادخل؟

-هاا؟

-ما راح اخذ من وقتچ هواي

-احم.. اي تفضلي

ترددت قبل لا افوتها لان شُهيب هنا بس ماگدرت ارفض استحي، دخلت جوه بملابسها الانيقة وعطرها الي يفوح، بس انتبهت لشي متغير بيها ولحدما مشت گدامي ياله لاحظت شعرها! مسرة متنازلة وگاصة شعرها الطويل التعشقه وموصلته لأكتافها!!

-شُهيب: كيان جيبيلي الگهوة بطريقچ حبيبتي

جمدت مسرة عن الحركة ويه صوت شُهيب، اللتفتت بكل جسمها عليَّ فاتحة عيونها الكبار وسألت بتردد..

-شُهيب هنا؟

-اي

-ما گلتيلي

-ما سألتيني

رصت على اسنانها وهزت راسها، عدلت ظهرها وبلعت ريگ وكملت طريقها تدخل للصالة واني وراهة..

-شُهيب: ها كيان جبتـ....

قطع كلامه ويه دخولها تصلب ظهره وبحلق عيونه على وجهها، دخلت مسرة متغاضية عن ردة فعله وگعدت على الكرسي تطبگ رجل على رجل..

-مسرة: مساء الخير

-كيان: مساء النور

نزعت النظارة من راسها تحطها على الطاولة ومفاتيح سيارتها والمداليات الهوايه المشكلة بيهن هم ويه المناظر، من دخلت هنا لحد هاللحظة ما وجهت نظرها لـ شُهيب الا هسة رفعت عيونها اله وسألت بهدووء شديد..

-شلونك شُهيب

-بخير

-شلون ماشي شغلك؟

-بخير

-شلونها امورك وترتيبات حياتك؟

-بخير

برود في برود اجوبته وهي نار موقدة، لاحظت حماسها وفضولها من تسأله وهو طفى هالحماس وشال عيونه عنها يكمل تصميمه الي ما راح يفيده بشي، عضت على شفتها السفلية وسرحت بعيونها بالگاع، ثواني ورفعت عيونا عليه وگالت بنبرة سريعة واختصار شديد..

-مسرة: اني اجيت هنا لغاية.. كيان ردت اقدملج عرض تجين تشتغلين بشركتي؟

-كيان: اني؟؟

-مسرة: اي، انتِ واخوانج كلكم

اكدت على كلمة كلكم وباوعت لـ شُهيب، ما رفع عيونه من الحاسبة ولا اهتم ولا كأنها موجودة..

-كيان: اني مرتاحة بمكان شغلي مسرة شكراً الچ، من رخصتچ اجيب الضيافة

تركتهم عسى ولعل يحچون ويه بعض وينزاح هالجدار الي انبنى بيناتهم، راقبتهم منا مادة عيوني هاي وظيفتي بالحياة صارت اراقب بالعالم واني باقية بنفس صخامي ولطامي ماكو تطور بحياتي..

-مسرة: بديت شغل؟

-تؤ (لا)

-بس سألتك على شغلك وگتلي ماشي بخير؟

-امم

-راح تگضيها عليَّ تؤ و امم؟

-امم

وگفت بمكانها متنرفزة نزعت الكوت مالتها وشمرته على القنفة وراحت توگف گباله بالضبط..

-ممكن تباوعلي؟!

رفع بؤبؤ عينه الجليدي الها منتظرها تحچي، گلبت شعرها كله على جهة متنرفزة ورجع تناثر على رگبتها واكتفاها لانه قصير..

-انتَ مزعوج مني لان عبالك اني سجنتك صح؟؟ بدون لا تجاوب اعرف صح! شُهيب مو اني سجنتك مو اني!!

ركزت وياهم وعيوني ما زحتها من شُهيب الماتغيرت نظراته، نزلت مسرة لمستواه صار وجهها قريب من وجهه واستندت على الطاولة الي گدامه وكررت..

-مو اني الرفعت عليك قضية! مو اني الي اشتكت عليك!!

-تمام

-شُهيب اني ماا سويت هالشي اعرف السالفة متتصدگ بس قسماً بالله مو اني اصلاً ماعرف شلون المحامي اخذ وكالة مني وحچى نيابة عني! اني مچنت موجودة ومادري بيك انتَ جاي تتحاكم!!

-تمام

ضربت على الطاولة بأيدها بقوة صدى صوتها بالصالة وكررت بعصبية مضاعفة..

-ماااا اشتكيت علييييك انلعب بينا كلنااا اشهههب!!

كذلك ما جاوبها وكمل تمثيلية البرود، صارت ترجف بمكانها من الغضب تقربت اكثر تلزم وجهه بثنين ايديها اني بمكاني وتسارعت نبضات گلبي هو شلون..

-انتَ گمت تكرهني؟

جاوبها بالصمت، دگت جبينها بجبينه وزفرت نفس شفت عيون شُهيب تنزل على انفها وباقي ملامحها ويضغط على ايده يسيطر على نفسه، همست بخفوت يوازي هدوء الصالة..

-تعرف احنه بعدنا متزوجين مو صح؟

رفع انظاره لعيونها يتسائل واني صفنت وياه همه مو تطلگو؟

-مسرة: بالمحكمة طلگتني شهوبي مو بالشرع انتَ ما نطقتها

طخت براسي وتذكرت فعلاً! شُهيب ما نطق كلمة الطلاق الها لانهم ما اللتقوا ابد.. مجرد ابوها طلگها منه بالمحكمة وهالطلاق عدنا المسلمين باطل ومينمشي بي..

قربهم وترني صرت افرك بيدي واباوع للشرارة التطاير بيناتهم والوضع الحميمي الهمه بي يربك، مسرة تطيح اكبر راس مستحيل راح يگدر يقاومها..

قربت نفسها عليه اكثر جمد لحظات و سوه نفس حركتها، ايدها تمسح خده وهو هادئ.. احلف عليه گلبه راح يوگف اخوية واعرفه تنهار قوته گدام هاي المرأة..

ثواني مرت واحد يباوع بعيون الثاني، همست مسرة بخفوت شديد وشُهيب مركز بكل حواسه ويه سؤالها..

-تكرهني شُهيب؟

انتظرت منه جواب صريح بس ما جاوبها بحروف، عكس عينه عنها وما سمحتله مسحت على خده ترجعه وياهة وفجأة... قبلها! هو الباسها! والله هو! هو جر وجهها وباسها و... لا لحظة ميصير اباوع عيب ميصيييير..

درت وجهي عنهم اطفر بمكاني من الحماس نشوة سعادة صارت عندي بس انقطعت هالسعادة من سمعت صوت يجي منهم، مديت عيوني شفته لازمها ويحچي بهدوء..

-شنو تردين مني؟

-ولشي

-ما اكتفيتي؟

-لا

-ولا اني..

ضغط على اسنانه بقوة وهدها يقاوم رغبته ودار نفسه منها بمعنى روحي، انقهرت مسرة من حركته وابتعدت عنه توخر شعرها عن وجهها ويرجع يغطي عيونها..

-حاقد عليَّ شُهيب؟ لهدرجة كارهني؟؟

-روحي مسرة

-اني مادري! مادري بكل الصار! اوكي صح ردت انتقم منك صح كرهتك بالبداية وتمنيتك تموت اكثر من مرة وصح لعبت لعب حتى اوگعك بس تغير كللشي من تزوجنا! سحبت كللشي چنت ناوية اسوي بيك وانتقم منك كللشي!!

شال الحاسبة من حضنه بهدوء وحطها على جنب، مد ايده على ظهر القنفة يريح ظهره واللتزم الصمت..

-ليش متحچي شي؟؟

-ماعندي شي اگوله

-انتَ مصدگ اني مشتكية عليك؟؟

-يجوز

-دا اگلك مووو اني! اني معليه بكل هاي المهزلة!!

قابلها بسكوت مميت، صرخت ضايجة وطلعت ورقة من جنطتها وحطتها على الطاولة المقابيل شُهيب وگالت بجدية..

-هذا عرض! عرض ابين حسن نيتي تجاهك! عرضي تجي تشتغل عندي بالشركة راتبك مكتوب ومنصبك موجود كل التفاصيل مذكورة لا تستعجل بالرفض وفكر زين شُهيب!

اخذت اغراضها وطلعت من البيت، رجعت اهرول اله منتظرته يفتح الورقة بس ما شالها ولا عبرها.. بقت هاي الورقة على الطاولة ايااام وليالي محد تجرأ يفتحها ويشوف محتواها الى ان اجه اليوم ودخل مروان منهار للبيت..

نزع سترته ورباطه ومناظره وجنطته شمرهن بالگاع وعاط متخبل، ركضت افتهم شبي ونشوان وشُهيب وماريا هم موجودة عدنا بوقتها كلنا تسائلنا شصاير وياه وانصدمنا من گال..

-قااافلة ماكوو قااافلة ما تريدناا نكمل!! صبااا تريدنا ننفصل ونفسخ الخطوبة!!

-نشوان: صدگ تحچي!؟

-مروان: ابووها الكلبب استغل زعلتنا وگال اطلگها وغصباااً عني هم!!

-كيان: وهي شگالت؟؟

-مروان: حاضرتني ما تجاوب اتصالاتي راح اتتتخبل

ثار وتخبل من العصبية بدال منحير بـ شُهيب المكسور صرنا نحير بثنين مروان انضم للمجموعة، لا اكل ولا شرب وگاضيها جگاير بعمره وحياته ما ضايگ الجگارة صارت هسة متوگع من حلگه وشُهيب وياه يدخنون وما ملحگين..

اجت ببالي فكرة صح حسيتها فكرة هندية بس عسى ولعل تكون السبيل لنجاتهم ثنينهم، رحت اوگف گدامهم وتخصرت اجذب انتباههم، حمحمت وسويت ايدي مثل السماعة وگلت بفرحة..

-عندي فكرة جهنمية!!!

-نشوان: شنو هي؟

-كيان: مروان انتَ مو تريد طريقة تتواصل بيها ويه صبا وتتفاهمون مووو؟؟

-مروان: اي

-كيان: شنو رأيك ترجع تشتغل وياهة! بنفس مكانك القديم بشركة مسرة قيثارة!

-نشوان: لااا عاد

-كيان: شنو لا عاد شكوو تره البنية قدمتلكم عرض يشگ شگ لا تصيرون عفونة وترفضون! ثانياً گالت بلسانها مو هي الي اشتكت على شُهيب واذا هي چانت صدگ تكرهه ومتريده وتريد تدمره متقدمله عرض يرجع وياهة للشركة ولا تقدملكم عروض مثل هاي! البنية تريد تصلح المشاكل الوگعت على روسنا انطوها مجاااال

-نشوان: مادري والله

-مروان: اني موافق!

-شُهيب: مروان!!!

-مروان: والله موافق والعباس موافق من باچر ابدي شغل هناك واني الها صبا عبالها تشرد مني!!!

-شُهيب: تغير مكان شغلك بس حتى تكون قريب منها وتحچي وياهة؟؟

-مروان: اي!

-نشوان: انلاست

-شُهيب: تمام براحتك ما يهمني

-كيان: وانتَ؟

-شُهيب: اني معليه ما ارجع لذيج الشركة

-نشوان: اييي ابقى گابلني وگاعد تشرب بهاي الجگاير وتگابل الزواجل وتقرالهن اشعاار حب حزينة

-شُهيب: غاثتك گعدتي يمك؟؟

-نشوان: بابا لاااا اني اريدك تشتغل اريدك ترتاح اريدك تغير من نفسيتك الخااايسة

-شُهيب: راح اشتغل وارتاح بس مو هناك

بقينا نقنع بي لا ساعة ولا ثنين وللمرة الاولى مروان يستقتل يقنع شُهيب بس هذا عنودي وقافل، راح نشوان على ورقة عرض مسرة فتحها وجحظ عيونه ويگول..

-راح تكون كللللب ابن كللللب لو رفضت هذا العرض الشگااگيي

-شُهيب: راضي اكون كلب

-كيان: يمممما يا عناده يممما

-مروان: شُهيب اذا قبلت تشتغل هناك راح تنقذ زواجي راح تجمعني ويه حب حياتي ويه البنية الي جاي اتعالج علمودها تره اترك العلاج والله اتركه واتخبل عليكم

-نشوان: لا دخيلللك شُهيب ما ناقصنا يرجعلنا ذا هولك ويعفس حياتناا

واخذنالنه ساعة اخرى بالتقنيع متنا متنااا ياله گال راح يداوم يوم واحد ويشوف الوضع اذا ما عاجبه محد يجبره يكمل.. طرنا فرح ومن الصبح الكل جهز نفسه حلفت اروح وياهم واطيح حظ صبا شبيها تتنعوص هاي لان حددوا يوم الزواج گامت تخاف بس يا خوفي يكون مروان مصخم وياهة..

وصلنا لبوابة الشركة توقعت شُهيب راح يتوتر او يرتبك بس ابد! ولا بين على وجهه شي دخل بطوله وثقته الشركة وعيون الموظفين كلها صارت عليه.. هذا الي اجه يسلم وهذا الي انخبص وهاي الي عاطت من الفرحة وهاي الي حمت زايد وشمرت روحها عليه تحضنه وحتى اكو موظفة باست خده موتتني من الضحك وهذا اخوية ظل صافن..

فرحت بحماسهم ولقائهم ولا كأن انسجن وغاب عنهم ثلاث سنوات اسمع لاصواتهم الحماسية يصيحون "رجع الرئيس" "رجع المدير" زادت سعادتي لحد هذا اليوم يعتبروا رئيسهم ونفس الاحترام والتقدير مطروا بي..

بأثناء ما شُهيب يسلم وياهم تصادفنا ويه جولي وما اسولف على صرختها وعيونها الدمعت، هرولت بكل سرعتها عليه وحضنته من رگبته وتطفر بمكانها..

-جولي: شُهييب رجعت شُهههيب

ابتسم شُهيب ولزم ذراعها بأيده الثنين بمعنى اكتفيت من حضنچ بس ما انشلعت منه وما اهتمت بقت محاوطة رقبته ووخرت وجهها من كتفه تخلي يوازي وجهه..

-جولي: فرحتي ما انطيها لاحد شُهيب والله ما انطي سعادتي لبشر

-شُهيب: سعيد بشوفتچ جولي

-جولي: رجعت هنا صحح؟؟

-اشوف الوضع

حرك ايده يمسح على ذراعها المتغطية بجاكيت فرو اسود حسيته شوية ويصيح يمعودددة وخري، ما اهتمت وحضنته زايد اني معليه وغرت على اخوية شسالفة ليش متقبل توخر؟

-جولي: شوف من هسة نتفق ترجع هنا تشتغل ويايه غير هالشي ما ارضى هاااا

ابتسم ومشى شوية عنها وهنا بعدت اصابعها المصبغة عن رگبته ومشت وياه وتسولف..

-جولي: كم مرة بمرة اجيت اريد ازورك بس ما سمحولي ماعرف ليش كلما اروح هناك يگولون خلص وقت الزيارات والله زعلت هواي

سكت ما جاوب وكمل طريقه يمشي، وصلنا قريب مكتب مسرة وشفناها تطلع من مكتبها ووياهة وفد اجانب دتحچي وياهم وسام يمشي وراهة.. جمدت عن الحركة وقطعت كلامها ويه الوفد مجرد ما شافت شُهيب..

-جولي: مسرة شوفي منو اجه...

**

"مسرة"

ضاعت الكلمات والحروف، اريد اكمل وداعي ويه الوفد ماكو نسيت شنو لازم اگول.. كمل نيابة عني سام والبديل واخذهم وياه للبوابة واني بقيت هنا اتأمل اجمل منظر اشوفه لليوم بعد شوفة وجه ميس..

-شُهيب: صباح الخير

يا صباح الحب يا صباح العشق يا صباح الهيام والاشتياق يا بعد كل الصباحات، يروحلك فدوة شكو واحد صبحت عليه اليوم ويروح فدوة لهيبتك وجمالك وشخصيتك التشگ اكرم، اكيد كل هذا تراود بداخلي لكن طلعت من حلگي كلمتين فقط وهي..

-مسرة: صباح النور

-جولي: سرور شُهيب رجعلنا اخيراااً

نزلت عيوني على ايدها المحاوطة زنده وابتسمت بوجهها وداخلي مشتعل لو بيدي اروح اكسسر ايدها واعلگها برگبتها أطيح حظها واتوبها تباوعله بعد مو بس تلمسه..

-مسرة: سعيدة برجعتك شُهيب

-شكراً

-مسرة: تفضل ويايه للمكتب..

هز راسه وعبرني مشيت وراه خليته هو يفتح الباب ويدخل قبلي، وگفت بالباب وما فات الا سمحتله جنتل مان من يوم يومك يا بعد اكرم..

-مسرة: فرحت لانك قبلت الشغل

-ما قبلته

-لعد؟

-اجيت اشوف الوضع شلونه اذا ما يناسبني ما اكمل

-حبيت، خوش شروط حاطلك.. على العموم هذا عقدك اقراه ووقعه من تكون جاهز

انطيته ورقة العقد لزمها بين ايده يقراها بعيونه، ثواني وعگد حاجبه مستغرب وگال بأستنكار..

-عقد خمس سنوات ممنوع ابطل منكم؟!

-اي

-وهاي كل موظفينچ موقعتهم على هيچ عقد؟

-اي

چذب.. ما موقعة بشر على هالعقد غيره والله الا ارجعك يا شُهيب برضاتك لو غصب عنك انتَ الي يعني الي!

-شُهيب: اسف ما يفيدني هذا

-ليش؟؟

-ماكدر اللتزم كل هالمدة ما مفكر ابقى هنا

نزل الورقة على مكتبي واندار متوجه للباب يطلع بكل هدوء، استعجلت بخطواتي وصرت گدامه اسد الباب بظهري ولا ارادي وبدون لا انتبه صارت ايدي على صدره، ابتعد خطوة للخلف حتى تنزل ايدي منه لاحظت الموقف ونزلتها..

-وين تريد تروح؟

-ارجع للعراق

-تريد ترجع للعراق؟؟ ليش؟؟

-اشتغل هناك

-وامك؟؟

-اخذها وياي

-واخوانك؟؟

-بكيفهم يبقون هنا او يسافرون

-شُهيب لا تضيع سنين نجاحك وتعبك وتبدي من الصفر!

-اول تالي جاي ابدي من الصفر سواء بقيت هنا او سافرت

-تمام تمام.. شوف شوكت ناوي تسافر انتَ؟

-على السنة الجديدة

-تمام خلي العقد من اليوم لحد السنة الجديدة مو خمس سنين

-وهالاستثناءات تسويها لكل موظفينچ؟

-اي

چذبت مرة ثانية، أي موظف ميريد يشتغل عندي الله ومحمد وعلي وياه ماتذكر شي مرة توسلت بموظف حتى يبقى ويايه بس هذا الهموس غييير والله غيرر..

-شُهيب: تمام، شوكت ابدي؟

-اليوم.. هسة!

-تمام

-راح تشتغل بنفس مكتبك القديم و..

-ماريد

-شنو؟

-اني مو مدير ليش اشتغل هناك؟

-لان يعجبني

-بس ما يعجبني

-اني مديرتك شُهيب واطلب منك بكل احترام تروح لنفس مكتبك وتشتغل هناك

-وحدي؟

-منو تريده يشتغل وياك؟

-نشوان

-تمام

-وفاضل

-نجيبه اكيد نحتاجه

-وجولي

-ليش جولي؟؟؟

-لانها ذكية واحب اشتغل ويه الاذكياء

-شغلك راح يكون وياي اغلب الاوقات للمعلومة!

-ميخالف

اعصابي بدت ترجف غيرة ضغطت على ايدي نبتت اظافري بيهن حفرتهن حفر حتى اسيطر على نفسي وما ابين گدامه، هزيت راسي بالموافقة راح اخلي نعولي تشتغل وياك يا شُهيب واني اعلمك!

-شُهيب: من رخصتچ آنسة مسرة

ابتعدت من الباب افسحله الطريق ومن هذا اليوم وهاي الدقيقة شنيت حرب ضده! حرب عشاق ومستحيل اطلع منها خسرانة! راح ارجع حبيبي الي واشلع عيونها التاخذه مني لو چانت امي!! الله يرحمچ ماما مادري شجابچ هسة بس المهم وصلت الفكرة..

بدينا نشتغل ومشت ايام عديدة هو هنا، حطيت روحي وياه اتابعه واراقبه على الدعسة، شغلت الشاشات بغرفتي من جديد من طلع شُهيب من الشركة نقلت الكامرات لغرفة خاصة بس هسة رجعتهن و صرت مثل المخبلة مگابلة الشاشات وگاعدة اشوف شلون يشتغل وشنو يسوي..

اباوعله گاعد مثل النملة ما تحرك نهائياً ويشتغل بهدووووء تام حتى حركته بسيطة ميتحرك هواي، مثبته حنچي على ايدي وكأن دا اتابع مسلسل مهم وميصير افوت لقطة، الجلاتين گدامي اكل منه ومركزة ويه شُهيب..

-ولج نعااال صار ساعة اصيحلچ!!!

انتبهت لصوت صبا واگفة گدامي ومتخوصرة، حطيت جلاتينة بحلگي وهزيت راسي بمعنى شكو..

-صبا: ليش رجعتي مروان يشتغل ويايه؟؟؟

-مسرة: لان شغلكم ممتاز سوه

-مسرة اني ماعندي مشكلة بشغله ويانه بالشركة بس ماااريده يشتغل ويايه اني اريد اتطلگ منه!

-انچبي ماعدنا بنات يتطلگن من ازواجهن

-لاحظ عزيزي الملاحظ لاااحظ نصيحة تطلع من وحدة متطلگة بالمحكمة مرتين!!

-مرة رجاءاً اكرم مينحسب

-مينحسب وعدها بنية منه

-دروحيي هي البنية وصارت بالقدرة الگبر اليگبره الاغبر

-مسرة فهميني اني ومروان ما جاي نتوالم!

-وهسة ياله دريتي؟ وره ثلاث سنوات خطوبة؟

-اي

-وجعيي ولي من وجهي يله خليني مستمتعة اكمل مراقبة هموساتي

-ولج مخبلللة

-اي اي مخبلة يله روحي

-تسودنت الفرخة

-ولچ احبه احببببببببه

-اوووف من هالبنية اووووف

-صبا شبيج انتِ ليش متفهميني؟ انتِ مو تحبين مروان؟

-لا

-حلفي براس ميس!

-انچبي ما احلف براسها انتِ شلون ام!!

-حلفتچ بيها لان اعرفج ما راح تحلفين براسها چذب

-مسرة احبه

-طاح حظنا اي والله

-والقران اييي

-ولي صالحي وتزوجو وعيشو الحب شبيچ انتِ

-اخاف ميتغير

-يتغير! مو تگولين جار عدل هالايام من بده يشتغل هنا لو لا؟

-يووووه اختلاف من السما للگاع صاير مثل الملاك والله مصدومة

-بمعنى ديحاول يصلح العلاقة حبيبتي صباوي مروان يحبچ وحبه واضح على عيونه ولهفته الج

-سرور شسوي ساعديني

-ليني راسج وياه وتناقشو گوليله شروطج شنو وخلي امج تحچي وياه وابوج هم حتى يعرف اهلج بظهرج وميستهين بالشروط

-ابوية يريده يطلگني

-گليله لو تكون طباب خير لو لا تدخل روحك احچي ويه ابوج صبصب هو يسمعلج

-سروريييي

شمرت روحها عليَّ تحضنني وتبوس بيه ضحكت على فرحتها ووخرتها مني احط جلاتين بحلگها مكافاءة واگول واني خازرتها..

-مو تترعنين وتسيحين على الرجال من هسة، بالبداية احچو وتناقشو

-اي اي.. يله باااي

طلعت من المكتب ورجعت اني لموقعي، طلعتلي عصير اناناس من الثلاجة وگعدت اتابع واشرب، بقيت على هالحال يمكن ساعات لان ما حسيت بعد الا على جولي تدخل مكتبي..

-جولي: سرور اريد احجي وياچ بموضوع

-بخصوص شنو؟

-يخص شُهيب

-شبي

-شُهيب مو بخير مسرة

تقلصت بطني من الخوف وگفت على حيلي فازة وطلعت من خلف مكتبي اوگف مقابيلها اسأل بلهفة..

-شبي؟؟

-شُهيب حالته النفسية متدمرة

-شلون يعني؟

-مسرة ميحچي، الرجال نهائياً ميحچي حتى من تسألي بخصوص شي يجاوب بكلمة او كلمتين وبس! من الصبح لليل هو بالمكتب ميطلع منه ولا ياخذ استراحة ولا حتى ياكل شي باقي بي وبس يشتغل

-لاحظت

-شلون يبقى على هالحال؟ والله راح اموت من قهري

نفخت هوا يااا بوية شكد متمنية افگس عيونها الزرگ هسة بس مو وكتها مسرة.. كلام جولي صح شُهيب نفسيته تحت الصفر لا يحچي ولا ياكل ولا يرتاح لازم اطلعه من هالحالة لازم!

طلعت جولي واني رجعت لمكاني افكر بطريقة اسعد بيها هالانسان، فدشي يخلي يتحسن ووضعه يكون افضل بس شنو؟ اخذت ساعات من يومي بس افكر بي وافكر شنو ممكن يفرح شُهيبي؟

بنص افكاري قفزت براسي فكرة! فكرة متأكدة راح تغير من نفسيته وتسعده وتحسن من وضعه، لبست حذائي ونزلت تنورتي الطفرت ورحت للمراية، باوعت لروحي وعدلت شعري القصير وجددت حمرتي.. اخذت العطر سبحت بي ورجعت ملامحي للجمود وطلعت من المكتب..

توجهت لمكتبه امشي وداخلي يتراقص فرحاً، دگيت الباب سمحلي بالدخول فوراً.. اول ما طبيت صارت بخشمي ريحة القهوة الممزوجة بعطره الهادئ.. اخذت نفس عميق استشعره واروي اشتياقي لهاي الريحة ودخلت..

-مسرة: انتَ وحدك هنا؟

-نعم

-نشوان وفاضل وين؟

-طلعوا استراحة

-وانتَ متطلع؟

-لا اني زين

-عندك چاي اخضر؟

-اي

گام بسرعة من الكرسي متوجه لمكينة القهوة مالته، الابتسامة شگت وجهي من الفرح حاط چاي اخضر عنده بالمكتب وهو ميطيقه بس حاسب حسابي.. متانيني شي يوم اجيله وازوره هنا ويسويلي يا روحييي..

جابلي كوب حطه گدامي على الميز، گعدت وتشكرت منه وحطيت رجل على رجل انقر بأظافري على الميز..

-مسرة: اني راح اسافر هالفترة ومحتاجة اخذ البديل فاروق ويايه

بقى يباوعلي ينتظرني اكمل، رشفت كمعة من الچاي واردفت..

-فاروق مهندس شاطر مو بس شاطر رهيب ويجمع الهندستين هم مدني وهم معماري نفسك بالضبط بس اكو مشكلة

كذلك سكت ما سألني يربيي ميحچي موتني، ما اهتميت وكملت جملتي..

-مشكلتي هو فاروق عرسه اسبوع الجاي وميگدر يجي وياي انتَ تعرف هو خاطب كرستينا التشتغل هنا مو؟

-اي

-اي فـ عرسهم اسبوع الجاي وحرت كلش ماعندي بديل عنه

-زين؟

-محتاجة مهندس معماري ومدني ينفس الوقت علمود المشروع واحفظ فلوس تذكرة اخذ شخص بدال شخصين

-عجيب

-ليش؟

-ماتذكر شي يوم اهتميتي بالمادة

-لا ما اهتم بس.. تعرف شغل وتعب ونقاشات اصعب من تصير ويه ثنين فـ محتاجة واحد بس

-تمام

-أريدك تسافر وياي

هيچ چطيتها بوجهه فتح عيونه متعجب وضحك، ماعرف سبب ضحكته شنو بس مو مهم راح اخذه وياي غصب..

-شُهيب: واذا گلت ماگدر؟

-اسفة بس مو بكيفك السفرة اجبار لان ماعندي غيرك

-متأكد جولي راح تكفي وتوفي

-جولي ما جامعة الهندستين ثانياً شبيك انتَ كل كلمة والثانية صحت جولي؟!!!

-مدموزيل ماكدر اسافر

-حاول

-ماكدر

-حاول

-صدگيني ما...

-حاول

-استغفر الله..

تنهد يمسح على وجهه وشعره البده يطول صاير يخبل بس مو وكتها خلوني مركزة، بلع ريگه وهز راسه مستسلم يسأل..

-وين السفرة؟

-بلد عايشين بي حبايب گلبك

-وين؟

-رايحين للمغرب شُهيب......

يتبع.....

━━━━━━  ━━━━━━

اخيررراً راح نروح لحبيبة گلبكم ونلتقي بـ... 🥹😂🦋

مسرة وشُهيب؟ اعجززز عن وصف الحبببب 😩🙈🔥

فاهد وكسرته شبعت بچي عليه 😩

الله يساعد گلب مالك المسكين 😞 شفت كم وحدة تگول ليش ميگدرون لابوهم مالك ذكر اكثر من مرة شمسون معيش ولده على المساومات كُـلشي يصدر منهم أي غلط حتى لو وره ظهره هم يكتشف ويلعب بيهم طوبة يوقعهم على مصايبه وبلاويه حسبي الله ونعم الوكيل 😡😡

ما بقى شي للنهاية.... كُلش كُلش ما بقى شي 🥹✨💙

#ابناء_الحسوم "شمسون"

بقلمي: زهراء السلامي ❤︎

لطفاً لتنسون التصويت + التعليق بين الفقرات + متابعة لحسابي 😍.

شتان ما بيننا..

انتَ بردٌ صاقعٌ

وانا

مهما

بردت

حريق... 🔥

━━━━━━  ━━━━━━

"مسرة"

بست روحي بالمراية بوسات متتالية سويت على المراية برواز بوسات فرحانة وسعيدة والحماس متوزع بكل جزء من جسمي، دخل ابوية للغرفة واستند بجسمه على الباب رافعلي حاجبه مستنكر..

-فادي: يعني سويتها مسرة

-اي

-اكيد تعرفين شيصير بي لو حاولتي ترجعين العلاقة؟

-فنكم

-فادي: تتحديني؟؟

-اكره اقلل من احترامك بابا بس اي أتحداك! بيمن تهددني؟ ميس؟ ميوسة ورجعت لحضني واكرم وانلصم على حلگه ووگفوا عنده حده و...

-بواسطة سردار! شوكت حاچية ويه سردار انتِ؟؟ ليش تشتغلين من وره ظهري مو كتلج اني ارجعلج ميس؟!

-بعدك تعاتبني على هالشي بابا؟ ترجعها شوكت من تصير مراهقة؟؟ لو من تتزوج بنتي ان شاء الله؟

-اويليي يا عنادج!

-اويلي يا اعنادي ويا اصراري ويا حبي! وانتَ تعرفني زيين محد يگدر ياخذ من ايدي شي الا اذا اني انطيته بنفسي!

-بسيطة الظاهر سجن شُهيب ما كفاچ انتِ تردين تكتلي گليلي بابا اني اريدك تكتله وتخلصني منه

-ابوه رجع وما راح يسمح بهالشي! واذا ابوه ما گدر يوگفك فـ اني الراح اوگفك قسماً بالله وروحها لامي اتحالف ويه عدوك ضدك واحط لتصرفاتك حد!!

-شنو هالصلافة مسررررة ابوچ اني!!

-انتَ تريد تكتل رابط الاب وبنته بيناتنا انتَ دمرت علاقتنا من زمااان بابا واني باقية عندك علمود ميس بس هسة رجعتلي كلها ايام واطلع من هالبيت وتخلص مني

اخذت جنطة السفر اسحلها ولزمني من ايدي، حضنني لصدره يمسح على راسي يرجف ويتوسل صار زمان ما شايفة ابوية بهذا الوضع ويعز عليَّ اخلي يتوسل گلبي ميتحمل لو شما سوه بيه ابقى احبه..

-فادي: يا بابا يا بنيتي يا روحه لابوج شمسون وولده راح يدمروج سرور راح ياخذوج مني مثلما اخذو امج

-ماطول شُهيب بظهري محد يگدر يلمس شعرة مني

-شُهيب الكتل امچ؟؟

-شُهيب ما كتلها مااا كتلها!! شوكت راضي تستوعب هالشي!

-المهم واحد منهم كتلها!

-وراح اعرفه منو أنطيني مجال

-صار سنين منطيچ مجال وما عرفتي منو!

-لان صعب! چنت طفلة بهاي الحادثة وشفت گفاه ما شفت وجهه شلون راح اعرفه!

-بابا اني خايف لا يكسر گلبج ابن شمسون الكلب

-اني الكسرت گلبه بابا مو هو لو اقدم روحي لـ شُهيب هم ما اعوضه الفقده بهاي الثلاث سنوات

قبل لا يجاوبني مشيت اعبره وطلعت من البيت، ركبت ويه السايق ولبست مناظري الشمسية اخفي عيوني الصايرة تخوني وتنزل دموعها بشكل مبالغ بي، حط السايق جنطة السفر بالسيارة وانطلق للمطار..

بس وصلت للمطار طلعت مرايتي اعدل نفسي، رفعت شعري نص ذيل حصان والباقي على اكتافي ونزلت.. اليوم لابسة سوت كاجول قابل للطلعات ليش وشعجب مادري بس طخ على بالي ولبسته وتنازلت عن الكعب بدلته بحذاء رياضي وابشركم ميس ربطتلي القيطان..

دخلت المطار ادور عليه بعيوني، شفته من بعيد گاعد بصالة الانتظار صافن وحده، مغصتني بطني واحس بفراشات صارت بيها، سيطرت على ملامحي المتحمسة وخفيت ابتسامتي وحاولت ابطئ خطواتي قدر المستطاع وتمشيت متوجهة اله..

-هاي

انتبه على صوتي وجاوبني بهزة راس، باوعت للساعة البيدي وسألته..

-شگد بقى للطيارة؟

-ماعرف يمچ التذاكر

-ها اي صح

طلعتهن شفت صار وقت نروح للصالة الثانية ما سلمنا جنطنا لان مو كبار، سحل جنطتي وجنطته وتمشى ويايه نروح ننتظر هناك والگعدة عبارة عن صمت! طلعت روحي من الهدوء صرت الوب بمكاني متنرفزة احتاجيت اللهي روحي بأي شي لا انهار هنا..

-مسرة: جايب سماعات؟؟

-لا

-واني ما جايبة وناسية مالتي اريد اسمع اغاني

-هسة بالطيارة ينطونا

-اريد هسسة!!!

قابل ردة فعلي العصبية اللا ارادية بهدوء، هز راسه واني ضغطت على ايدي ثنينهن اركز ويه هوسة المطار وانتبه ويه الاصوات ما اخلي الهدوء يسيطر عليَّ نزلت راسي اركز ويه الرجال والمرة الگاعدين ورانه يسولفون وبالي ويه صراخ الطفل والبچي.. بدون لا احس صرت احد بسنوني راسي راح ينفجر ماتحملت راح اخذ الحباية مال مهدأ واطيح حظي هنا اطرافي كلها صارت ترجف اريد وماريد..

-مسرة؟

-ها...

-سكرچ ارتفع؟ شكلچ مو بخير

-لا لا

-تمام رايح اجيبلچ ماي

هزيت راسي بـ اي كم مرة واول ما وگف يروح اني شردت للحمامات، طبيت لوحدة من الحمامات وقفلت الباب عليَّ اخذ شهيق وزفير گلبي ينبض بقوة وريگي نشف.. طلعت الحباية من جنطتي وفلتت من ايدي بسبب الرجفة و وگعت بنص التواليت صرخت من القهر وشمرت جنطتي بالگاع طلعت وحدة ثانية وصفنت عليها..

مردتها مرد بيدي وغمضت عيوني احارب نفسي، ادماني على المهدئات غلط! الدكتور حذرني اكثر من مرة وگال لازم اسيطر على نفسي لااازم اترك الحبوب...

گنبصت اخذ شهيق وزفير لوقت طويل اعصر ايدي ورجلي وسندت ظهري على الحايط، ماعرف شگد بقيت على هذا الوضع وما رجعت لوعيي وللواقع الا على صوت رجال قلق يصيح بأسمي..

-مسرة؟ مسرة انتِ بعدچ هنا؟؟

فزيت اوگف بمكاني ويه صوته المتوتر، بلعت ريگي اعدل نفسي وامسح جوه عيوني الكحل لا يكون سايح، رجعت الحبة بالجنطة ولبست جنطتي على كتفي وطلعت..

-شُهيب: وييينج؟؟

-مسرة: هنا

-شبيچ شصار وياچ؟؟

ابتسمت على خوفه ولهفته وحركات ايده، من شافني مبتسمة وگف عدل يحط ايده بجيوبه، حكيت طرف انفي ووخرت گذلتي عن عيوني وجاوبت بثقتي المعتادة..

-سكري ارتفع شوية واخذت علاجي هنا ماردت گدام الناس

-تمام وهسة انتِ زينة؟

-اي..

-صاحو طيارتنا تره

-ها اوكي يله نطلع

طلعت وياه اخذ جنطتنا وتوجهنا لسيارات النقل، وصلونه للطيارة صعدنا بس راسي احسه ثگييل ويوجعني سندته على الكرسي وغمضت عيوني بسرعة ورحت لغير عالم بعد ما حسيت الا على لمسة شُهيب يضرب خدي خفيف بأصبعه..

-مسرة! مسرة!!

فتحت عيوني ثگيلة صار وجهي بوجهه عيونه جاحظهن على وسعهن ووجهه مخطوف لونه، عدلت نفسي وحسيت بخدي حار ويمكن حتى صاير بي طبع..

-مسرة: شبيك؟

-ما گعدتي!!

ضحكت على نبرته متعجب وطلع لسانه اخيراً، مطيت ايدي فوگ وراهة لميتهن بحضني وگلت بأبتسامة واسعة..

-نعسانة شبيك ويااي

-عبالي غبتي عن الوعي

-لا يابة اگلك جوعانة اريد عمعم

-وصلنا ام عمعم

-يااا صدگ عود

-اي

-لعد ليش ما گعدتني من جابو الاكل صاير مهمل برو ماكس شُهيب

-چابو پورك (لحم خنزير) بس اخذتلج ذني

انطاني نساتل وصمون وعود زبدة ومربى، فتحلي الصمونة بسرعة بسرعة وحشه بيها الزبدة ومربى وانطاهة الي اكره الزبد وما اطيقه بس اخذته منه واكلتها فرحانة بأهتمامه..

-مسرة: لا خلص رجعت خوش وليد

-هاي نساتل هم، يلا مدوزيل لازم ننزل تأخرنا

-مو دا اكل شلون اشيل جنطتي؟

بدون لا يجاوب گام يطلع جنطنا من فوگانه وشال جنطتي اليدوية بيده وسحل بالجنط الباقية واشرلي نطلع.. مشيت وراه وقلبي يتراقص فرحاً مفتقده حنيته واهتمامه، عمري كله قضيته بدون احد ورايه بس من تعرفت على شُهيب صرت مثل الطرنة وياه كلشي ما افتهم وكلشي ما ادبر اريده هو يسوي كلشي..

دخلنا بناية المطار وكملنا الاجراءات وشفت مرة ويه زوجها يمشون باوعت لوضع شُهيب يسحل بجنطتين وجنطتي اليدوية مشكلها بالجنطة مالته، غمزتلي المرة وسوتلي حركة اوكي بأصبعها وهمستلي "I love this" ضحكت وهزيتلها براسي اوافقها الرأي..

بأثناء ما احنه واگفين اني اسوي روحي اتصل بأبوية حتى يأمنلنه سيارة، لقطتهم عيني من بعيد ابتسمت وگلت امثل التفاجئ..

-عزه هاي شجابهم

اللتفت شُهيب مكان الدا اباوعله وچانت ثانية او اقل الثانية حتى اشرقت الشمس من مشرقها وشفت ابتسامة واسعة تنرسم على وجهه الحلو حسيت بگلبي يزهر ورد ويه فرحته من صاح وهو يلوح بيده..

-شُهيب: اطلللس، عمررر، علييي، حمزززة، مسلمممم هناااا

اجو الولد بأتجاهنا وما اسولف على السلام الحار الصار بيناتهم، تحشيش على مداهر على مسبات على رزايل على غمزات على لمزات ماكو شي ما سووا وما خلوا بنفسهم، ضحك شُهيب من كل گلبه ويه عمر من گال..

-عمر: حسيت بالمغرب غيمت تدرون؟ گلت بس لا شمسون جاي اثاري طلع خلفة شمسون جاينه

-شُهيب: هههههه هذا شوكت يبطل من طيحان حظه ما تگلولي

-عمر: بالعباس مشتاقيلك گلبي مفرفح على شوفتك

-شُهيب: شفتك گطعت طريق السجن روحه رده تجي تزورني

-عمر: وعلي من وره عليوي هو السبب والزهررة مرتين اجينا اوربا نوصلك وما يرضى نفوت

-علي: خاب ماتحمل گلبي رقيق مو بيدي اخاف اطير الهيبة وتطيح دمعتي گدام امة لا اله الا الله

-مسلم: عمت عيني عليك امشي امشي لا تضحك العالم علينا

لم الاطلس شُهيب بحضنه ووگفو على جهة يبسبسون وحمزة مضيگ عيونه ويباوعلهم ضحكوا ثتينهم واشروله يجيهم ما قبل متت ضحك رجال شكبره شگده طنگر عليهم وراح وبقوا يتوسلون بي..

-عمر: عذروا شباب عذروا هاي هرمونات الحمل گابة عنده

-حمزة: هسة احمـ.....

خزرهم شُهيب وفوراً حمزة سكت جافل وكلهم انبلعت لساناتهم، بصعوبة كتمت الضحكة نسوا اني موجودة ورادو يدوسون بالحچي.. تعجبت على شخصيتهم بين بعض خصوصاً مسيو حمزة كلش كلاس توقعته اصلاً ميتشاقه وبالمرتين صدمني هم هنا وهم بالحفلة..

-شُهيب: شلون عرفتو اني بالمغرب ما بلغت احد ردت افاجأكم تالي انتو فاجأتوني

-علي: عرفنا من ستوري انسة قيثارة كاتبة لوكيشن "TO MOROCCO" وعرفنا راح تجي وياهة انتَ

اندار يباوعلي شُهيب بـ شَك رفعت اكتافي بلا مبالاة وسويت روحي فقيرة، بالحقيقة اني بلغت الاطلس بنفسي احنه جايين واذا عنده وقت يطلع ويه شُهيب يغيرله جو ماتوقعت راح يجيب كل اصدقائهم ويستقبلو بالمطار بس چنهم همه الي منتظرين جيته على نار وسعادتهم تفسر هالشي..

-حمزة: والله متمني ابقى بعد بس عندي اجتماع مهم طار نصه

-الاطلس: اي ولك انتَ مو اجتماعك بالتسعة بالليل؟

-حمزة: فدوة يروح لـ شُهيب اهم شي شفناه بخير..

ودعوا وراح وبقوا الباقين ويانه، سلموا عليَّ بأحترام محد بيهم صاحلي بأسمي كله لو "مدموزيل" لو "ليدي".. طلعنا سوه ركبنا اني وشُهيب بسيارة الاطلس والباقين گالو عدهم شغل..

-الاطلس: اليوم تباتون يمنا

-شُهيب: لا اطلس احنه اجينا بشغل

-الاطلس: ميخالف والنومة بشنو راح تأثر على شغلكم؟.. غانم اسفط على جهة

حچه ويه السايق مالته وسوه مثلما يريد، توقعت راح ينزل يجيب شي بس بقى ويانه بالسيارة گاعد ثواني واندگت جهة جامة الاطلس ومدو روسهم ثلاث زلم..

-شُهيب: تضحك عليَّ انتَ!!!

حچاهة بفرحة غمرت قلبه، ضحك الاطلس ونزل ويه شُهيب من السيارة تسالمو ويه الزلم سلام حار، ما عرفتهم منو لانهم مو من ضمن الخطة بس ميهم المهم شُهيب سعيد..

صعدوا لسيارتهم واجو ورانه بطريق بيت الاطلس قبل لا اسأل منو ذولة شُهيب گال..

-شُهيب: ولك صار سبعة سنين ما شايفهم شجابهم ما تگلي

-الاطلس: اصدقاء المدرسة ما ينسون شُهيب وصدفة جايين للمغرب زيارة صارلهم يومين وصارت جيتك وياهم

-شُهيب: شهر واحد داومت مدرسة هنا ولهذا يومك احنه على تواصل تدري زياد حتى بالسجن خابرني

-الاطلس: دكتور زياد رجاءاً!

-شُهيب: خرب عقلك زياد "دكتور" صارت دمج ويه اسمه المخبل

ضحكات وسوالف وذكريات ولطافة گضوا الطريق، ابتسمت بسعادة آخيراً شفته فرحان ومتحمس لشي اخيراً ردت روحه وصار ياخذ وينطي وكأنه نسى شنو عاش وحتى نوعاً ما نسى اني گاعدة بجانبه واني ما تعبت نفسي انبهه بوجودي ردته يستمتع قدر المستطاع ويه اصدقائه..

وصلنا لبيت الاطلس وكلنا گعدنا بصالة بيته حتى الزلم اجو ويانه، راسي بده يفتر دايخة بشكل مو طبيعي وحسيت بـ شُهيب ما مرتاح بسبب وجودي وياهم خمس زلم وبنية وحدة شوية السالفة داچة، لو شغل عادي بس لان گعدة اصدقاء فـ ما اللومه خصوصاً وواحد من الاصدقاء عرفت يصير صديق زياد شُهيب مو كلش علاقته بي اسمه "شادي" عينه صلفة وما شالها مني..

شربت من العصير وانتبهت لشادي يتقرب مني ويفتح ويايه حديث..

-شادي: انتِ رئيسة شُهيب مو؟

-مسرة: چنه شركاء بس شُهيب باع اسهمه الي

-شادي: صدگ عود؟ ليش؟

-مسرة: راد يستقل بعمل وحده

-شادي: تالي انسجن مو هههههههه

-شنو اليضحك؟

-لا ما اقصد استهزأ بس اگول خطية

-امم

-انتِ مهندسة صح؟

-امم

-تدرين عندي موظفة تشبهچ كلش عبالك انتِ من كثر الشبه حتى نفس الستايل

-خوش

-هم تشگ مثلچ

رفعتله حاجبي مستنكرة كلمته الحقيرة ومادري بـ شُهيب حاط اذنه ويانه ومنتبه لكل المحادثة حتى وهو يحچي ويه جماعته اذنه چانت ويايه..

-مسرة: عفواً؟!

-القصد من كلامي انتِ جميلة بشكل يلفت النظر

نزيت على رجل شُهيب تضرب الطاولة الگدامه ويسفطها ويه القنفة بشكل عصبي، الكل انتبه لحركته الغريبة بس ما اهتم ولا برر لاحد..

-شُهيب: من رخصتكم احنه عدنا شغل ولازم نطلع

-الاطلس: شنو السالفة شُهيب مو گلنه تباتون هنا والشباب كلهم راح يباتون هنا لخاطرك

-شُهيب: غير وقت

-شادي: لا حرامات

خزره بحدة ضحك شادي وطبطب على كتف شُهيب وگال..

-شادي: انتَ روح عادي بس خلي مسرة تبقى وين تروح بهالليل

وهاي چانت اسوء جملة يحچيها بهيج وضع وبهيچ وقت بالتحديد، دفر شُهيب ايده شادي عن كتفه وصاحو الكل من لزمه من خوانيگه يحط وجهه بوجه شادي الشاذي..

-شُهيب: شنو قصدك ولك؟!!

-مسرة: شُهيب اهدأ

-الاطلس: يمعودين

-شادي: شعليك بقصدي شُهيب وليش مزعوج انتَ؟

-شُهيب: زياد صديقك حباب خلي يطفر من وجهي لا اطلع حرگة گلبي بي

-شادي: اشايف روحك انتَ؟؟؟ كلك خلگ خريج سجووون

هجم عليه شُهيب يريد يتكاتل بنص الصالة وطبوا بنصهم الاطلس وزياد وصديقهم الثالث يفاككون، شادي يذب حچي وشُهيب يشوط ويصير نار تخبل ودفع زياد عنه بس الاطلس عاق طريقه.. الهوسة اعتلت وايدي بدت ترجف اعصابي تلفت..

-زياد: خلص شادي خلينا نرووح

-شادي: ما اطلع هوو ما عاجبته الگعدة خلي يوليي

گبت عركة جديدة بس بالكلام هالمرة محد تضارب، توترت من الصار وهالشي ميصيرلي بالعادة بس هاي اثر المهدئات محتاجة حباية، طلع زياد وصديقهم الثالث دخت وتاهت عليَّ تحرك شادي ديطلع وياهم وبالغلط لزمت ايده اطلع وياه عبالي شُهيب لانهم لابسين نفس لون الجاكيت..

لزمت ايده لو صخمت على روحي ولطمتها، سحبني شُهيب من ايدي بقوة لدرجة احسها انخلعت، صرخت متوجعة وانداريتله شفته شُهيب من قوة الصدمة ولحظة الادراك الاجتني عطت اتدارك الموقف بس اني لصتها بالزايد..

-شُهيب اذيتني شبييك!!

-ما قصدت صدگيني

لزمت ايدي الوب من الالم حسيت بالعضلة تنفصل من الكتف، بنفس اللحظة طلعتلي مرة سمرة من غرفة الاطلس صاحلها "نانا" اجت تطمن عليَّ ولزمتني من ايدي واخذتني وياهة لغرفتها..

-نانا: سلامتج يَّـ بنتي انتِ بخير؟

-مسرة: لا مو بخير راسي يوجعني كلش

-ارتاحي حبيبة نامي هنا اذا تردين

-لا اريد اطلع شكراً الج خالة

عفتها وطلعت من الغرفة بدون لا اسمحلها تحجي شي، البيت يفتر بيه للحظات توقعت راح اوگع بالممر لولا صوت بنية شابة تصيح بأسمي..

-مسرة.. انتِ مسرة؟

اللتفتت الها اشوفها لابسة شال ولازمته بأيدها ضابته، تحركت من مكانها واجتلي وگفت مقابيلي مباشرة، مدتلي ايدها تصافحني وگالت بأبتسامة بشوشة..

-اني مريم

-مسرة: زوجة الاطلس

-صحيح بس شلون عرفتي وهو گلكم اني مو بالبيت؟

-ميحتاج يگول شي انتِ نفس المواصفات الي رسمتها بعقلي

-عذريني ما طلعتلچ بس ابني كلش متنحس اليوم لا يفشلني وچنت اجهز نفسي اريد اروح لبيت اهلي زيارة

-عادي مرمر

ابتسمت ووردت خدودها بطريقة لطيفة مبينة خجلت من صحتلها "مرمر" الاطلس سمعته يصيحلها هيج اكثر من مرة، عرفت عنها شغلات كلش بسيطة بس تعلق زوجها بيها وضحلي انها امرأة عظيمة..

اشرتلي نروح لغرفتها قبلت فوراً محتاجة بس امدد حتى لو بالگاع، دخلت لغرفتها وشفت طفل صغير يتمركض منا ومنا مثل الدودة، ضحكت من اجه يهرول لـ مريم وكمش برجليها من جوه وصاحلها "مما"..

-مريم: ادومي هم دعفست مو؟؟ اعرف بسوالفك اجيتني تركض وتتلوگ لانك وكحت

باوعلها بعيونه البريئة وهي عافسة وجهها عليه، نزلت نفسها اله وشالته من الگاع گزگزت من فتح حلگه ياكل خدها عرفته عود ديبوسها بس بعده ميعرف..

-مريم: اي اي تبوس بعد

ضحكت وباسته وعرفتني عليه، تلمست ايده الصغيرة وجرها مني ميقبل اللزمه يضم وجهه عني، ابتسمت مريم وهمست همس شفايف..

-يستغرب هو

-مسرة: حبيبي الله يحفظه

گعدنا سوه سولفت شوية وياهة البنية بشوشة ووجهها يضوي ما شاء الله شفافة صايرة من البياض واسلوبها وكلامها حلو مينمل منها.. غيرت جو ووضعي تحسن نوعاً ما من سوتلي عصير برتقال خطية عرفت بيه دايخة ركضت تجيبلي عصير..

-مريم: مسرة تنامين حبيبتي؟

-لا مريم اريد اروح شُهيب وينه؟

-لا وين ترحين شُهيب ويه الاطلس بالاستقبال راحو تره رجلي ميعوفه بعد لا عبالج

-اروح وحدي ميخالف

-شبيچ حبيبتي بعدج دايخة؟

تنهدت تعبانة فركت بين عيوني وطلبت الحمام، رحت غسلت واخذت علاجي ورجعت شفتها تحضرلي الفراش فرشتلنا ثنينا بالگاع اني وياهة، گعدت على الفراش واجت جايبة اشكال فاكهة وحلويات وعصاير الاجواء حلوة واخذتنا السوالف..

-مسرة: اني ملتقية بزوجچ كم مرة واسمچ ميوگع من لسانه تدرين كم مرة صاحلي مرمر لو متدرين؟

ضحكتتتت بصوت عالي ضحكة سعادة، هزت راسها وگالت بعدما اكلت شيف تفاح..

-هو يگول اغلط بأسماء البنات ولج عيني عبالي يضحك عليَّ

-لا يمعودة دا اگلچ كم مرة صارت والله

-هههههه فضحنا الرجال

-شلون تعرفتو على بعض؟

-اذا اسولفلچ متصدگين

-اصدگ طبعاً

تربعت ونيمت ابنها على رجليها وبدت تسولفلي متحمسة، حچتلي قصتهم واني فاكة حلگي عبالك دتحچيلي مسلسل من الصدف الصارت والتلاعب بعلاقتهم شي يحمس ويونس بنفس الوقت..

-مسرة: مريم معقولة ما عرفچ زوجته؟؟

-لاا هنا اليكتلج ماعرفني اني مريم زوجته

-واسمج؟ لقبج؟ عنوانج؟ رقمج؟؟

-كله لعب بي عمو محمد حتى لقبي تغير بس ما اسولفلج الموضوع چان صعب ويحرگ الگلب خصوصاً وهو عنده صديقة مقربة نورسين وتحبه و...

-نعالسين؟؟؟؟؟؟

-شنو؟

-نورسين صديقة الاطلس وتحبه؟؟

-اي انتِ تعرفيها؟

-نورسين خطيبة شُهيب السابقة!

-چذاااابة

-والقران بس لحظة لحظة

-شنو؟

-اتذكر شُهيب گلي حبت صديقه! بس ما گال منو

-واني الاطلس گلي نورسين انخطبت لواحد من اصدقائي بس ما گال منو

-شوف شوف شوف وطلع عدنا شي مشترك وهو وجود نعالسين

-ههههههه استغفر الله ياربييي ماريد اشيل غيبتها

-دختوليي هالعاره

ضمت حلگها بيدها مستحية، نسيت روحي وردت انسرد گدامها وتذكرت عيب هاي بنية غريبة وميصير..

-مريم: عوفچ منها انتِ شلون تزوجتي شُهيب؟

-خاف انتو مسلسل تركي قصتكم احنه فلم هندي قصتنا

-سولفيلي احب الهنود

ضحكت وبديت اسولفلها ما ترددت لثانية وحچيتلها كلشي وكأني اعرف هالبنية صار سنين، اولاً لان مريم جداً مريحة واحد يحجي وياهة وثانياً اني محتاجة أفضفض محتاجة احچي مشاعري لاحد بدون لا يحاسبني وينتقدني ومريم الشخص المثالي..

-مريم: وانتظرتي ثلاث سنوات مسرة؟ يعني عندچ امل ترجع علاقتكم نفس قبل وانتِ تگولين ابوچ سجنه؟

-مسرة: ادعي من كل گلبي ترجع علاقتنا بس ماعرف مريم وضعي مو زين والحبوب دتأثر عليَّ بشكل سلبي

-تركيهم حبابة تره ذني يدمرنچ

-دا احاول اتركهن قبل چنت ما اگعد على حيلي بس بديت اتعود اعوفهن واخذهن بس بوقت الحاجة

-الله يساعدج مسرة وضعچ صعب بس اني متأكدة رب العالمين راح يعوضچ على كلشي عشتي واهم شي ميس بنتج رجعتلج وارتاحيتي

هزيت راسي اأيدها وسألتني بعد اسئلة عن حياتي واني كذلك، بفترة قصيرة تعرفت عليها وصرنا صديقات هيچ بهالسرعة تبادلنا حسابات بعض وفرحتني من گالت..

-من تحسين روحچ تردين تسولفين اني موجودة واسمعچ حبيبتي

-شكراً ام ادومي وانتِ نفس الشي هنيال الاسباني عليج

-اي والله نياله

ضحكنا بصوت عالي وتمددنا على الفراش نكمل سوالفنا، ما حسيت بالوقت الا من دگ منبه مريم سدته وگامت تترخص للحمام.. شوية ورجعت ايدها ووجهها مبللات نشفتهن ونزلت رداناتها وفرشت سجادتها تصلي..

طخت ببالي صار وقت صلاة الفجر، بقيت بفراشي اباوعلها شلون تصلي وحركاتها بطيئة، كملت ورفعت مسبحة تسبح وراهة جابت كتاب نفس مال العلوية مكتوب عليه مفاتيح الجنان وقرت شي بي.. ابتسمت واني اباوعلها شكلها راحة نفسية ومتأكدة هذا النور الضاوي بوجهها بسبب اعمالها معكوسة على شكلها..

نزلت الكتاب من ايدها واللتفتتلي وسألتني سؤال كأنها چانت تفكر بي لفترة..

-مسرة گلتيلي انتِ وشُهيب گرايب مو؟

-اي

-شنو صلة قرابتكم؟

-امي تصير بنت عم ابوه

-روحي للعلوية واحچيلها صلة القرابة واشرحيلها كلشي يجوز هي توگف وياچ؟

-توگف ويايه ضد ابنها؟ ماتوقع صراحة

-حاولي انتِ مو تردين شُهيب؟ وشُهيب يريد يروح للعراق يعيش هناك حاولي بكل الطرق تمنعي ورجعي العلاقة لان اني اشوف حقه ماخذ موقف ومتألم على الصار وياه ما اللومه

-ولا اني اللومه

نمنا وثاني يوم طلعنا اني وشُهيب كملنا شغل ما حچينا هواي ولا ذكرنا الصار البارحة نهائياً حسيته واحد ثاني ولمست تغيره بمشاعره ناحيتي.. تأذيت اضعاف وبالليل طلعنا ويه مريم والاطلس بس ما تونست ابد عقلي فاصل وچنت بس اريد ارجع للفندق وارتاح..

حست مريم وعذرتني راحو واحنه رحنا للفندق كلمن بغرفة، فتت سبحت بدلت وعفت شعري ما مشط، اخذت حبة ودخلت بالفراش اريح نفسي هستوها دتغفى عيني وسمعت صوت طرقات خفيفة على باب الغرفة.. غلست عليها ورجعت تندگ ولحو بالطرق كل هذا وما گمت توقعتها خدمة الغرف.. بس تندمت بگد شعر راسي لان ما فاتحتها.. ثاني يوم عرفت هذا چان شُهيب وراد يحچي ويايه..

متت قهر ومن زعلي ثاني يوم فوراً حجزت ورجعنا، سفرة المغرب چانت مثمرة شُهيب نفسيته تحسنت بشكل ملحوظ وحصلت صديقة لطيفة مثل مريم بس خسرت علاقتي بـ حبيبي وابتعدنا اكثر صرنا حتى بالشغل منلتقي الا نادر..

وبيوم اني مطفية الكامرات لان اريد اشتغل وشوفة شُهيب بالكامرات دتخليني اللتهي، انفتحت باب مكتبي بهمجية ودخلتلي صبا للمكتب تركض وتگول..

-مسرة مسررررة لحگي مسررررة

-شنو شصاير؟

-لچ صققر ريماس اجه وتكامش ويه شُهههيب

-شنوووو

-ولج علمودج ديتعاركون علموووودج

-چذااابة چذاااابة

-والله العظيم صقر استفز شُهيب بيچ وهذاك گبت غيرته وماتحمل تعال اللزم صقر حطه وكتله

-عزززززه مستحييييل يممممة حممممماس

-ولج امشيي فاككيهم محد ديگدرلهم حتى الامن تدخلو وما فاد چنهم ثيران هائججة

-خليهم بعد شوية خليهم اريد صقر ينكتلل

-ولللج

-اششش معليج

طرت على الشاشات فتحت الكامرات واشوف الدنيا محترگة بمكتب شُهيب هو وصقر صايرين واحد فوگ الثاني، ضميت حلگي بيدي اطفر بمكاني من الحماس والاثارة والشرار الدا يطلع منهم وصبا اجت تتفرج ويايه..

-صبا: ولك حييييل اكتله افگس عيونه اييي.. ايييي بعد ايدي اييي

-مسرة: حييل بيك يالنافخ روحك ههههههه عباله راح يگدر على شهوباتي يشوفه هادئ يگول ميگدرلي ميدري هو منيم الوحش الي بداخله

اتابع من الشاشة وگلبي يرگع من المشهد الاكشن الدا اشاهده، صارت دماية والعياط مال موظفات وصل للمكتب مالتي، شُهيب من طلع من السجن زاد العنف مالته دا اللاحظ هالشي رغم هالة الهدوء الي محاوطته والصمت الدائم بس ردات فعله وعصبيته اقوى..

-صبا: سرور شو ذولة راح يموتون بعض

-لو بيدي اعوفهم لحدما شُهيب يكتل صقر ويخلصني منه

-ويرجع للسجن؟؟

فزيت واگع گلبي ويه جملتها، رجعلي عقلي واستوعبت لو تطور الموضوع محد ينضر غير شُهيب، لبست حذائي بسرعة وطلعت اهرول من المكتب اتلاحگله.. وصلت لبوابة المكتب مالتهم مفتوح والدنيا مگلوبة هنا.. عدلت ظهري واكتافي ودخلت وراسي مرفوع مثل العادة وسألت ولا كأنما شفت شي او اعرف شي..

-مسرة: شنو ديصير هنا؟

اللتفتو عليَّ الموظفين كلها تتلاطم لاحظت لا نشوان ولا مروان ولا فاضل هنا حتى يفاككون اخوهم باقيلي الفاهين ذولة..

-جولي: مسررة انتهيناا راحو من ايدناا

-مسرة: شباب كافي

حچيت بصوت ناصي محد بيهم سمعني ولا شافوني واگفة، ضربت بخاتمي الچبير على جامة المكتبة اجذب انتباههم ونترت امثل العصبية..

-شبااب!! گلت كااافي!

عكست عين صقر عليَّ ودفع شُهيب عنه يعدل نفسه وقميصه، وگف شُهيب على حيله يعدل سترته وغافله صقر ببوكس طاير بدون لا يحس هشم وجه شُهيب.. شهگت ممتوقعة البوكس ولا شُهيب متوقعه راد يهجم مرة ثانية وصرت بيناتهم ادفع شُهيب من صدره امنعه واحلفه ميتعارك..

-شُهيب دخيللك كاافي

-وخررري مسرررة

-صقر: هددي لهذا المتوحش هدددي خو شفتي بعينچ شلون همجي ووحشيي ومتبركع بالهدووء

-شُهيب: ابن ال......

-مسرة: بداعتيي عوفه بدااعتي شُههيب الموظفات خاافو كاافي فدووة لطولك ارووح

-شُهيب: انطيني مجاال لا تتعورييين

-مسرة: احلفك بداعة امك وخرر حبااب شُهيب اهددأ

لزمت وجهه اقيده بيدي ويلفح نار بوجهي النذل صقر صار ورايه يستفز بي ماعرف شديسويله حركات مثل الزعطوط وهذا راح يموت بيدي من الرجفة..

-صقر: مو زين مشغلتك يمها وانتَ خريج سجون! اني مسؤوول وغصباً عنك تشتغل عندي وتكمل تصميم مشروعي وفنك لو فتحت حلگك

وخرني شُهيب عنه وعيونه يتطاير منها شرار، ما حچه شي ولا رد صقر مجرد تحرك للمكتب مالته جر ورقة بيضة وكتب بيها شي وشمرها على الميز وگال..

-شُهيب: اني استقيل

ذبلت ملامحي من جديته من كل عقله كتب استقالته وشمرها على الميز ويريد يطلع، تخبلت من القهر والحرگة صحت وراه..

-مسرة: بس بيناتناا عقد شُهيب ميصير تستقيل

-شُهيب: اعتبريني غاااااايب

عاطها بعلو صوته وطلع من المكتب ماخذ رجفته وعصبيته وياه، دگيت رجلي بالگاع منهارة اول تالي شُهيب ينهان هنا وبمكان هو چان بي مدير وفنه اليفتح حلگه وياه! اول تالي اسمح لواحد يقلل من احترامه بس لانه فقد منصبه؟! والله اشگ حلگه اليتجاوز عليه وادوس على راس صقر والخلف صقر الكلب..

-مسرة: انتَ منو حاسب نفسك صقر ريماااس؟؟؟

-صقر: مشروعي يمكم مسرة ليش ضايجة؟

-مسرة: اعتبره مرفوض!

-مسرة من كل عقلچ؟؟

-اخذ مشروعك واطلع منا صققر ولا تفكر ترجعلنا!

-هيج صارت قيثارة؟؟ تفضلين ابن العار شمسون عليَّ؟؟

-ماعندي وقت اضيعه، صباا جوليي رجعو للمسيو فلوسه وكرستينا انطيه التصميم مجاناً خلي يعتبره هدية من شركتنا!

عطتها بنبرة قوية وطلعت منا، داخلي يغلي غليي اعرف صقر راح يشد ويايه بس طُززز انعل ابو لابو الجابه اليتجاوز على زوجي والله امسحه بالگاع واذله واطرده منا وخلي يجيني ويفتح حلگه..

من بعد هاليوم شُهيب انعزل بالزايد، خاف چان يحچي شوية قبل ونفسيته تحسنت بعد سفرة المغرب هسة رجع نفس قبل واسوء بعد.. نشوان ومروان بدوا يقلقون على اخوهم وسمعتهم يتناقشون ياخذو لمعالج نفسي عسى ولعل يساعده يطلع من هالاكتئاب بس المشكلة شُهيب رافض رفض قطعي..

بقيت اراقبه من الشاشات ما غفلت عنه ولا ساعة اشوف تطوره وتصاميمه تبهرني شي يجنن ومتعوب عليه بس ميقبل يحضر بالاجتماعات ديخلي نشوان يعرض اعماله نيابة عنه وما اللومه صعبة من تكون مدير وكل الزبائن يجوك وتكون انتَ سيد الموقف والقرار وفجأة ترجع لنقطة الصفر حالك حال الموظفين والناس تباوعلك بنظرة المجرم..

اغلب شغله ووقته صار ويه فاضل وجولي، اموت احترگ واشتعل من الداخل من اراقبهم بالكامرات يسولفون ويشتغلون سوه، اكثر من مرة ردت انقل جولي او اطردها منا بس صبا تذكرني ان افشل مدير هو الي يدخل علاقاته الشخصية بالعمل وبقيت هيچ بالعة موس وساكتة..

اجتني صبا تسولفلي عن تطور علاقتها ويه مروان وشلون تصالحو ووضعهم ممتاز والعرس رجعوا حددوا، صديقتي المقربة سعيدة وطايرة من الفرح ودا اجهز وياهة بس كله بعقل شارد..

-صبا: شديسولفون ذولة صارلهم شگد؟

-مسرة: منو

اشرت بعيونها على الشاشات لاحظت عيونها على الشاشة الچبيرة المعروضين بيها جولي وشُهيب.. بلعت ريگي وطگطگت اصابعي متوترة حركت اكتافي امثل اللامبالاة وگلت..

-يشتغلون سوه

-اي ادري بس شبيها جولي منفعلة وكل شوية تنزل راسها؟

-مادري مادري صبا ماادري

-فتحي المايك بله

-لا ما اسويها

-دفتحي ولج هذا زوجچ الچ حق يله فتحي

وكأن چنت اريد دفعة من شخص حتى اتشجع وافتح المايك، ركزت بكل حواسي ويه حديثهم مو كلش واضح بس ينفهم نوعاً ما.. افتهمت بجولي دتحچيله عن امها ومشاكل ويه ابوها وشُهيب يشتغل ويهز براسه وياهة بدون لا يجاوب..

-جولي: عشت بعائلة مشتتة ابوية حاير بالنسوان وامي تموت من القهر.. وانتَ؟

-شُهيب: شنو اني؟

-هم عشت بين ام واب مشتتين؟

-لا

-ها.. المهم الي اريد اگوله اني معجبة بأسلوبك وتعاملك ويه اخوانك وخصوصاً تصرفاتك ويه كيان تجنن كلها حنية ولطافة هي محظوظة بيك

ابتسم وبقى مركز بالحاسبة، حطيت ايدي على گلبي راح يوگف وصبا مدت راسها ويايه تشوفهم عضيت على شفتي وغمضت عيوني اركز بس ويه صوتها المتمنية اخفي من الوجود وهي تگول..

-جولي: شنو رأيك نطلع سوه؟

-شُهيب: وين

-بكيفك، مثلاً نتعشا؟

-صبا: لااااا عاااد

-مسرة: اششششش خليني اسمع

-شُهيب: نرتبلنا طلعة شي يوم نروح كلنا نطلع من الدوام سوه

-جولي: لا لا.. اريد بس اني وياك

صفن بوجهها وهي ابتسمت، ما حسيت بأظافري تحفر بيدي الا من مدت ايدها تلمس ايده وتگول بنبرتها الغنوجة..

-معقولة تردني ومتعزمني على عشا شُهيب؟

-لا مو هيچ بس...

-لا تكول بس امانة راح انتظرك اليوم تمام؟

قربت كرسيها عليه اكثر صارت لزگ بي، ماتحملت ابقى اتفرج وگاعدة گمت من مكاني وطلعت من ميز المكتب اريد اروحلهم وافرقهم من بعض بأي طريقة حتى لو اسوي مشكلة بنص الشركة وافضح روحي..

-صبا: مسرررة وين رايحة وووين

-هددديني صبااااااا

-مسرة حبابة سيطري على نفسج وينن ترحين وتفضحين روحج بيناتهمم لا تنزلين نفسج اله ماطوله ميهتملج عوفيي

-ولج هدددددينييييي

-ما اهدددچ والله مااا اهد يا غبييية ما خليتينا حتى نسمع رده عليها بسبب تهورچ!!

اللتفتنا ثنينا على الشاشات شفنا شُهيب كاعد وحده بالمكتب وجولي اختفت، دورتها بكل كامرات الشركة مالها اثر بمعنى دخلت للحمام ثرت ثرت متتت بدمي دفعت صبا عني وطلعت من المكتب اهف اركض لمكتبهم..

-صبا: سااام سيطر عليها اللزمهاا سام هاي مو بعقلها العلاجات خبلنها

بدون لا يعرف شكو سام لزمني يقيدني ويجرني قبل لا يشوفني واحد من الموظفين ظليت اتعارك وياه ما گدرتله جرني وحبسوني بالمكتب واستلمتني صبا رزايل.. تعاركت عركة لا صايرة ولا دايرة هنا..

-صبا: كااافي گعددي

-مسرة: اگعد حتى جولي تاااخذه؟؟

-صبا: سرور حبابة ركزي ويايه تصرف جولي اجه من صالحچ يا حبيبتي اعرفي هو شنو نيته وياچ اعرفي هو يريدج؟؟ يريد يكمل العلاقة؟ لو تخلى وبعد متهمي بشي!

-لاااااا ما اقبل لااااااا

-مسرررة

-ولج جولي عرضت عليه تطلع وياه جووولي تعرفين جولي منو وشنو موو؟؟

-اعرف

-جولي ماااكو رجال طلعت وياه اذا ما باسته واخذته لبيتها ماااكوو من اول موعد الهم محد يقاومهاا ويقاوم دلعهاا وجمالها صبااا ماكدر اگعد واسكت فتحي الباب راح اتتتخبل

ما قبلت تفتح الباب شگد حقدت عليها وكرهتها بهاللحظة، انهاريت صرت اكفش بشعري بدون لا احس بروحي وگلبي يتگطع.. سام واگف على جهة يباوعلي وملامحه ممتعضة بألم خبلوني ذولة الثنين ومحد راضي يحس بيه..

-صبا: مسرة.. سرور حبيبتي اهدي وانتبهي ويايه

-اكررررهج لا تلزميني وخررري عني وخرري

-راح تبقين عمرج كله تنتظرين منه مبادرة؟ بله طلع ناسيچ ومو بباله؟ بله طلع ميريدج بعد شلون؟؟ تذلين نفسج اله وتتوسلين بي ميطلع ويه بنات ويبقى بس الج؟؟ مسرة ماريدج تتفشلين وياهم ماا اقبل عليج يفشلوچ شُهيب او جولي ويكسرون كبريائچ!

صفنت بوجهها انتبه لكلماتها واستوعبت كلامها صح.. كلامها صح لان اذا رحت على الاغلب راح يفشلني وميهتم لوجودي، راح يطلع وياهة عناد بيه يحرگ بگلبي وجولي راح تنچلب بالزايد.. يجوز ما قبل يطلع وياهة؟ يمكن رفضها وميريدها بس تهوري واستعجالي عم عليَّ وماعرفت جوابه شنو..

فضلت اهدأ واگعد افكر بعقلي بوستني صبا وحضنتني تعتذر مني لان حبستني هنا بادلتها حضن وتشكرت منها لانها دائماً واگفة ويايه وتريد مصلحتي، بقت ويايه گاعدة بالمكتب تلهيني ومتخليني افكر بشي بس وين اگدر ما افكر عقلي كله صار وياهم خصوصاً من خلص وقت الدوام..

رجعت ويايه صبا واجت لبيتي ميس راوتني واجباتها وشنو تلبس باجر وتسولفلي عن دوامها نوعاً ما تناسيت شنو ممكن ديصير هسة ويه شُهيب وجولي وركزت ويه بنتي هي اهم..

طلعت صبا لبيتهم واخذت ميس ونيمتها بفراشها وبقيت وياهة الى ان غفت، حاضنتها واللعب بشعرها وافكر افكر افكر افكر عقلي راح يوگف.. بعد فترة من الزمن شفت الساعة بالـ 11 بالليل ما طقت انتظر زايد اخذت جنطتي وطلعت لسيارتي..

سقت بكل سرعتي لبيته، نزلت من السيارة اباوع لشقته منا وافكر شلون راح ادگ الباب وشنو اگله اذا فتحلي؟ حسمت قراري وقررت اصعد من الدرج البراني وادخل شقته من الشباك دائماً يعوفه مفتوح..

لبست جنطتي بشكل جانبي وصعدت اني وكعبي الدرج الصغير، ادوس على اطراف اصابعي ما اسوي صوت حتى محد ينتبه من الجيران، وصلت لشقته ومثلما توقعت الشباك مفتوح واضوية الصالة مفتوحة بس مو كلها، طفرت ادخل منا وتسللت للصالة ادور عليه..

ما لگيته رحت لغرفته هم ماكو، رحت للحمام ماكو والمطبخ والبلكون كله ماكو.. صرت احك بيدي وشعري متوترة، گعدت بزاوية الصالة على كرسي انتظره يجوز راح لامه.. اكيد راح لماريا اكيد هو يومية يزورها..

بقيت گاعدة هنا فوگ الساعة ونص وشُهيب ما رجع! كل شوية بقيت انطي عذر شكل يمكن راح لامه او يمكن لبيت اخوانه او يمكن طلع ويه اصدقائه او يمكن راح يغير جو؟

ساعة تجر ساعة وشُهيب ماكو!! طفيت اضوية الصالة وگعدت بالظلام اخذ شهيق وزفير قدر المستطاع اجاهد اسيطر على اعصابي وما اكسر كلشي هنا واگلب بيته گلاااااب واحرگه بالنار المشعولة بصدري!!

فركت صدري اليوجعني وتمتمت ادعي ربي يبرد گلبي ويرجع قبل بوقت وارتاح بس ما صار هالشي.. اكيد دعائي ما راح يستجاب لاني مو خوش بنية! لاني انسانة حقيرة! وحدة عاصية وما استحق رحمة رب العالمين! استحق كلللشي ديصير ويايه كللللشي اصلاً ما استحق اكون زوجته! وما استحق ميس ما استحق اكون ام لهيچ بنية ما استحق!!

انتظرت وانتظرت وانتظرت، طلعت تلفوني تنازلت واتصلت بس طلعلي تلفونه مغلق!! دگيت على جولي وطلعلي الجهاز هم مغلق تخبلتتت، طلعت حباية من جنطتي شربتها اريد الرجفة والدوخة تروح..

غمضت عيوني اعصرها واعصر راسي دقايق معدودة وسمعت قفل باب الشقة ينفتح، فزيت بمكاني اباوع لساعة موبايلي بالـ 2:40 بعد منتصف الليل!

دخل شُهيب الصالة ما ضوه المكان وما اهتم يمشي بالظلام، ما انتبه لوجودي گاعدة بزاوية بعيدة واباوع لخياله اليمشي، راح لغرفته ثواني وطلع لازم بيده منشفة وراح للحمام.. روحي لابت گلبي تملخ من القهر ليش راح يسبح؟؟ ليييش اول ما رجع رايح يسبح ليييش؟؟؟؟

فتح باب الحمام ضوه جزء من الصالة، گمت من مكاني ممهتمة لطگة كعبي البينت بالأرضية، اللتفت عليَّ مستغرب وبدون تردد وبدون لا افكر ضربته ضربات متتالية على صدره وانفجرت بالصراخ..

-ويييين رايح وييييين چنتتتتت وييييييين

-مسرة؟

-وييييييين چنت شُههههيب وووووين احچيييييي لييييش رايح تسبح لييييييش

-مسرة شبيچ شصاير؟؟

-احچييي گلبي راح يووووگف راح امووووت

-مسرة اهددي ما جاي افتهم عليج!!

جريته من ياخة قميصه فاقدة اعصابي، جريته لدرجة وجهه لزگته بوجهي ونترت بحقد، بعصبية، بغيرة عمياء لو بيدي ابلعه وما اخلي وحدة تاخذه وتشوفه..

-انتَ الي شُهيب شمسون!! الي!! افهم اليي انتَ مالتي وحدي بس اليي انتَ مُلك مسرة وبس!!!

-تمام اهدي

-گوللهن انتَ مالتي احتررگت من الغيرة گووول

حضنته من رگبته ارجف جسمي فقد ماگدر اسيطر عليه بعد، بادلني حضن قوي يمسح على ظهري وشعري ويهدأ بيه بس كلشيي ما افتهم منه عقلي راح لغير عالم..

-اسم الله عليج حبيبتي شصاير وياچ.. مسرة ليش ترجفينن لا تخوفيني علييچ

رخت ايدي الحاضنته حسيت راح اوگع مفعول الحباية بده يبين، ذبيت روحي على صدره ومكمشة بقميصه ما اخلي يروح.. جرني يطلعني من الحمام ياخذني لغرفته گعدني على الچرباية مالته ومستمر يحچي ويايه..

-عيونج حمر ليش؟! مسرة شنو شاربة لا تخبلينييي

-من وراك

-شسويتي بروحج شمسووية

-وين چنت؟

-طالع چنت طالع

-رحت وياهة مو.. چنت ببيتها

-منو؟؟

-جولي

-ليش اروح لبيت جولي شنو المناسبة؟؟

-عزمتك على عشا

-وانتِ شمعرفج بهالشي؟

وخرني عنه يباوع بعيوني المطفية، تعبت ماكدرت اركز بعيونه ورجعت انام على صدره..

-احجي

-ما قبلت العزيمة مسرة ما رحت وياهة

-ليش

-لان ماريد اكسر گلبها وأاملها بشي مستحيل يصير

نهضت نفسي ارفع ايدي واتلمس وجهه، سألته بخفوت..

-ليش مستحيل؟

-لان..

-لان شنو

-لان گلبي ما جاي يدگ يم غيرچ

غمضت عيوني ويه جملته ونزلت دمعتي، سندت جبيني على خده استمع لباقي كلامه ونبرة الخذلان الي بصوته والجملة الخسفت گلبي ورنت بأذني وكل جزء من روحي..

-ردتچ سرور لأيامي شجاچ وصرتيلي حزن؟

-شُهيب

-اذيتيني بگدما چنت خايف عليچ ورايدچ مسرة

-ادري والله ادري

-مرة گلتيلي اليلعب بناري يتحمل حرگها.. شبيه احترگت منچ وما جاي اتوب؟

رفعت نفسي اله اواجه عيوني المطفية بعيونه الحزينة، تلمست خده بأناملي بهدوء وهمست بيني وبينه اكمل جلسة العتاب الما معروف تاليها..

-غصباً عني شُهيب كله صار غصب عني

-منو جابلي الاوراق بيوم عيد ميلادي مسرة؟

-اخ شُهيب

-ومنو دخلت وياي شريكة

-اني

-ومنو الچان عنده اتفاقيات سرية ويه روس كبار مثل سردار وصقر ريماس وغيره؟

-اووووف شُهيب

-ومنو قدمتلي عرض مغري تشتري اسهمي بالشركة قبل محاكمتي بأيام؟

-صدفة والله صدفة

-منو الرادت تطلگ؟ منو الي خربت حياتنا بحجة ماريد حياتك تدمر بسببي؟ منو الرفعت دعوة تشهير بسمعتها؟ منو الدزت ابوها حتى اطلگها؟

بقيت ساكتة ماعرف شنو اجاوب هزيت راسها يائسة وشُهيب باقي على گعدته يمثل هو بخير بس الكسرة الي بعيونه ميحتاج يسولف بيها..

-كرهتك

الكلمة الوحيدة الطلعت من حلگي، تغيرت نظرة عيونه للتفاجأ، بلعت ريگي وثبتت عيوني بعيونه وكملت بصوت خادر اثر الحبة..

-كرهتك، ونيتي ادمرك واوقعك على ديون وقروض واخليك تغرگ بيهن وتنسجن بسببهن، كل كلام مالك وتحذيراته الك حقيقية، اخوك چان يشوفني من زاوية اخرى زاوية ذكية بعيدة عن العاطفة، چان يگلك راح تدمرك وترجعك لنقطة الصفر وهذا الصار.. گلك نهياتك على ايد نفس البنية التحبها وچذبته وصدگتني بس هذا الصار!

ذبيت نفس متعب وفركت عيني البدت تغوش، اردفت بتعب شديد..

-كرهتكم كلكم انتَ واخوانك وابوك، وصل كرهي الك وحقدي ردت اكتلك بيدي الثنين ردت اسممك واخلص منك بس ما گدرت بكل مرة توصل بيها اريد ااذيك واتراجع بآخر لحظة.. بالبداية مچنت افهم سبب تأجيل انتقامي بس بعدين بديت استوعب ان اني.. احبك..

قويت نفسي وركزت بعيونه ما بعدتهن ولا ثانية وكملت بكل صدق..

-ماگدر ااذيك لاني احبك لدرجة لو گلت راسك يوجعك راسي يوجعني وياك.. ولو صارت نغزة ابرة بگلبك احس بكل أبر الدنيا تنغز بگلبي

اخذت ايده وحطيتها على صدري بمكان گلبي اخلي يحس بوجعي والحرورة التطلع منه، نزل عيونه يباوع لايدينا وكملت بنفس النبرة الدافية الصادقة..

-اني اسفة شُهيب، اسفة لاني اذيتك بگد حبي الك اسفة لان دمرت مستقبلك اسفة لان ما گدرت اوگف ابوية عند حده وامنعه يكمل الانتقام.. اسفة لاني اوجع گلبك بحبي بس شسوي عيوني انعمت عن كل زلم الدنيا ومتشوف غيرك اسفة لاني انسانة سيئة واحرگ كلشي حلو تلمسه ايدي..

رفع عيونه لوجهي يقراني، رفع ايده الثانية يمسح خدي من الدموع ما حسيت بروحي دا ابچي وكرهت نفسي لان بچيت گدامه.. درت وجهي عنه بسرعة امسح وجهي وعيوني ما قبل وجرني من ايدي يرجعني وياه..

-لا تديرين وجهچ عني

-اريد.. اريد ارجع للبيت اسفة اسفة

-على شنو تعتذرين؟ مسرة باعيلي خليني افتهم شبيچ

اطرافي كلها رخت ما احس بيهن وگعت بالگاع مهدود حيلي، لگفني بيده بسرعة وشالني يگعدني على الفراش وركض يجيبلي مي وجاب جنطتي يدور جهاز قياس السكر، الخلل مو من سكري من مفعول الحباية بس ما عارضت حتى ما احسسه..

چيك سكري شافه ممتاز ظل يذب حسرات حاير، جر جفني يفتح عيوني يشوفهن وهز راسه مأيس، فر بيده وظل يدردم عليَّ بالروسي حتى لغة ما افهمها..

-لا تظل تدردم احچي عدل

-غير افتهم شمصخمة بروحج شبيچ ما تگليلي شبييچ

-ليش تعيط عليَّ

-اي غير شگيتيني نصيين بنصاص الليالي

-احس زعلت

-زعلي! اني اريدج تزعلين

-اوكي

برطمت شفايفي استعد ابچي فتح عيونه مصدوم ما متوقع تصرفي وحقه ينصدم مو شخصيتي هاي ومادري شبيه گمت امسلت..

-لا عمي بطلنا منريدج تزعلين

-وانتَ؟

-شبيه اني

-ما زعلان

ذب حسرة جديدة وهمس "ااخ"، برطمت شفتي السفلية ابتسم على حركتي ومد ايده يمسح خدي بأبهامه، قربت خدي اكثر اتحسس لمسته كبرت ابتسامته ويه تصرفي وهمس بنبرة ماكرة..

-تدفعين اجار شقتي كل الفترة الفاتت ولج مسرة

-ها..؟

-وفلوس المحامي

-اءءء

-وانتِ السبب بأعادة محاكمتي وتقليص مدة سجني من عشرين سنة لثلاث سنوات

-هاي شمعرفك!

-الاطلس حچالي كلشي مسرات

-عزه بعيني هالاسباني ولا يگدر يلزم لسانه

-لا مو هيچ بس شاف علاقتنا والبرود المحتلها، حچالي اول يوم من بتنا ببيتهم وثاني يوم اجيتچ للفندق ردت اتفاهم وياچ وما انطيتيني مجال

-وليش ما حچيت بغير وقت؟ ليش انتظرت كل هالمدة؟

-توقعتج انتِ تجين تبرريلي، تدافعين عن نفسج، تنفخين روحج يمي وتبرزين عضلاتج بس ما اجيتي ولا گلتي انتِ السبب بكلشي

-ماعرفت شلون أفاتحك بالموضوع

-عرفت كل الصار تلفيق عليچ واستخدموا اسمچ ضدچ بالمحكمة

-والقران اييي

-بس فهمت هسة اكو بعد اسرار خافيتها عني

توترت من نظراته دفعته عني وگمت امشي للباب برجلين ترعش وحيل ماكو، انطيته ظهري ونطقت بصوت يرجف..

-اني راح.. اروح

-وين وين وين وين..

قبل لا اندار اواجهه حسيت بجسمي ينرفع من الگاع شُهيب شايلني، ايد جوه رجلي وذراع جوه ظهري، لف شعري بيده وجره من وره.. ضرب جبيني بجبينه وتنفس عطري غمضت عيوني عاجزة عن الكلام..

-حرگتي گلبي حرگ من شفت شعرچ ماكو

-گصيته من شفت شعرك ماكو

-هو شعر الرجال نفس شعر البنية؟ ازين ويطول بأسبوعين بس انتِ شلووون

-فدوة الك

-اااخ يابة

بلعت ريگ قوتي ماكو خفت افقد حيلي وماكدر اقاوم بعد وانام هنا، حسيت بي يبوس بوجهي وشعري وراسي.. تجرأت لمساته ماقبلت ولزمت ايده اهمس..

-مسرة: شُهيب ماحس بشي

-وهو المطلوب...

شهگت ويه حركته الجديدة وبعد ما حسيت بشي، فقدت عقلي وگلبي وجسمي كله سلمته اله.. عشت ليلة ما اتذكر منها غير گعدت الصبح حالي بالضيم، راسي يموتني من الوجع واللم بكل جزء من جسمي..

دورت على شُهيب ماهو بس اني متمددة بالفراش، گمت بسرعة بدلت وطلعت ادور عليه بالشقة سمعت صوت طگطگة جاي من المطبخ مديت راسي شفته واگف مفتح قميصه وشعره يقطر منه المي وديقطع طماطة.. خطف انفاسي منظره والله يرهم يكون وجه اعلاني يطلع شگاگي.. ما كدرت افوت هاللقطة وركضت لتلفوني جبته واخذتله الف صورة وفيديو وهو ميدري منطيني ظهره..

-شُهيب: خلصتي؟

-هههههههه لا تقتتل المتعة يا مسلم

-رجعنا لسالفة التصوير مسرات؟ شلون وياچ انتِ

-هوايتي هاي شهوبي تحملها

وگفت قريب منه اشوف شنو ديسويلنا ابتسمت من شفتها بيض وطماطة، جايب صمون عراقي حار ومسوي چاي الاجواء تخبل ناقصها بس ميوسة..

-شُهيب: لو ميوسة مو بالمدرسة اجيبها تاكل ويانه

-هاي شمعرفك دا افكر بيها

-صرت اعرف نظراتج شلون تتغير من تفكرين بيها تصير كلها حنية

-احبها

-واني احبها ام اليسكويم

ابتسمت مگزگزة وكعدت على ميز الطعام اكل فراولة، فصلت عنه افكر شنو خطوتنا التالية وقاطع افكاري صوته يگول بمشاكسة..

-ما اقبل وحدة حاقدة عليَّ تاكل من فراولاتي

ضحكت بصوت عالي ونزلت راسي، داعب انفي بأنفه ووكلني فراولة جديدة، باسني واردف..

-انتِ مو عندج ثار ويانه ليش گاعدة يمي ونايمة بفراشي مو عيب عليج

فتحت عيوني متفاجئة من جملته ضحك على ردة فعلي وباسني مرة ثانية يكمل..

-اجت تاخذ ثار امها من واحد طاح حظه بروسيا بتاريخ وفاتها

صفنت صفنة تسوه عمري، ضحك ضحكة عالية وعض خدي كم عضة فصلت عنه مصدومة هذا شمعرفه؟ البارحة ماتذكر ذكرت هالموضوع.. صدمني اكثر من كمل كلامه يسولفلي خطتي شنو ردت اسوي من اول ما دخلت عنده للشركة لهذا يومي..

يسولف واني فاكة عيوني وحلگي حتى صلة القرابة بيناتنا سولفها، يحچي تفاصيل مستحيل ويستحيل يگدر يكتشفها ومن سألته شلون عرفت صارحني ان اني سولفتله البارحة.. الحظ الاغبر طلعت خارطتله الاول والتالي واني ما حاسة على روحي..

صخمت ولطمت البارحة اعترفتله اعترافات تسحل كرامتي سحل، اعترفتله ان اني اعشقه وماگدر اعيش بدونه ولو يخيروني بين فلوسي وحياتي والدنيا كلها وبين شُهيب راح اختار شُهيب.. ضربت خدي من المفاجعة السويتها، غازلته غزل مو بس موجب 18 لا موجب 64 تخيلوو گتله كلمة "احبك" بكذا لغة وعدتها عليه فوگ الـ 73 مرة!! وزدتها بالخزي من گتلهّ لو بيدي ابوسك كلما تريد تحچي!!! ااااااخ يا گلبيي ااااخ..

شردت للغرفة من الفشلة لا يا مسرة راحت هيبتچ وراحت سمعتج بالحضيض، طلعت شريط حبوب المهدأة من جنطتي وكله كبيته بالتواليت وطاح حظني اذا اخذت بعد..

سبحت ورتبت نفسي وطلعت اتسحب من بيته مالي عين اواجهه، ركبت سيارتي وطلعت ودگ تلفوني برقمه، جاوبته بثقة مزيفة..

-ها شُهيب؟

-وين رحتي؟

-عندي شغل مهم

-شغل مهم لو شردتي

-لا لا شغل مهم يله باي احجي وياك بعد شوية

سديته قبل لا يجاوب، عضعضت اظافري واكلت ايدي اكل من الخجل شجااني وحچيت كلشي!! حتى اسباب عدم اعلان زواحنا گتله ابوية ميحبكم وميريدكم وجبرني اأذيك وووو كلشي كلشي ما خليت شي بنفسي وهسة شُهيب عرف كلشي وفضحت روحي فضيحة تسوه عمري..

من بعد هاليوم والصار بيناتنا ماگدر اگول رجعت علاقتنا طبيعية لان ما شفت شي من شُهيب، ثاني يوم اجه اخذ اجازة وگال عنده سفرة مهمة فتشت وراه وعرفت سفرته ويه ابوه وللاسف هذا چان المقابل الي قدمه شُهيب حتى يطلع من السجن قبل موعد افراجه بشهرين..

تدمرت من القهر شلون عيشة چان عايشها هناك لحتى ماتحمل ينتظر بعد شهرين وتنازل لابوه! طول بسفرته هاي وبديت اقلق عليه، عرفت سافروا لروسيا من خلال موزس وگلي شُهيب بخير بس نفسيته تعبانة لان راحوا لمكان.. وين هالمكان وشنو بي مادري، مجنت اعرف بوكتها راح لبيت تدريبه القديم وهاجت عنده الذكريات..

طلعت من الدوام وقررت اروح ازور ماريا واتطمن عليها، اشتريتلها حلويات وهدايا ورحت لبيتها، دگيت الباب وانفتحت بيدي ما مسدودة ولا مقفولة.. دخلت البيت وابتسمت من سمعت صوت الطرب يجي من غرفتها الفوگ جووي ماريا كللش جوي..

صعدتلها توقعت الگاهة تهز ويه الاغنية بس مچانت ترگص چانت صافنة بالفراغ ودموعها تجري.. خفت عليها ودخلت بسرعة اسأل بلهفة..

-مارياا

فزت ويه صوتي وعاطت تغطي وجهها وراسها تنزله لحضنها وتصيح..

-مو انييي مو انيييييي ما ردتت همه اخذووني والله اخذوونيي ماررريد انييي

-حبيبتي ماريا شبيچ شنو صاير وياچ

-موووو انييييييي

تصرخ بعلو صوتها وتبچي مثل الاطفال، فقدت بين ايدي منهارة اني اعرف تصير عدها انهيارات عصبية وشُهيب حاچيلي من قبل بس هاي اول مرة اشوفها.. دفعتني عنها وصاحت بخوف..

-همه خطفوني مسرة اخذوني من المدرسة لابسة صدرية جنت لابسة صدرية واخذووني هنااك

-ويين حبيبتي ووين

وگعت بالگاع ترفس بالحايط وتتگله مثل السمچة، فقدت اعصابي عليها طلعت تلفوني بسرعة اتصل بالاسعاف هي شافتني اريد اخابر انجنت شالت موبايلي وشمرته بالحايط كسرته..

-لا لا اصير حبابة فدوة والله اصير حبابة لا تخابريهم هاي گعدت عاقلة هنا عاقلة

گعدت على چربايتها تكتف ايدها مثل العاقلة بس دموعها عشرة عشرة كسرت گلبي نصين، رحت للمسجل طفيته ورحت اگعد يمها امسح بدموعها واوخر شعرها التهووس من وجهها..

-خالة ماريا شبيچ حبيبتي منو وياچ؟

مجاوبتني ولا اهتمت، لزمت ايدها واردفت..

-جبتلج حلويات وهدايا

-ماريد

-ليش؟

-اريد شهوبي

-شهوبي مسافر حبيبتي عنده شغل

-مسرة

-ها عيوني

-اخذوني وياهم مسرة

-منو حبيبتي؟

-زلم لابسين اسود خدروني واخذوني وياهم

انفزعت ويه كلامها وتحچي بجدية بعيدة عن لغة الأطفال المعتادة، وضعها وشكلها وكلامها هسة مال وحدة چبيرة بنفس عمرها..

-مسرة: شوكت هاي؟

-چان عمري 11 سنة

-وين اخذوچ؟

-اخذوني من المدرسة چان عندي امتحان احياء

-وين اخذوج حبيبتي؟

-مادري.. بالبداية مادري وين رحت طببوني بشاحنة چبيرة كلنا بنات صغار واخذونا لبيت

-اي؟

-اجه واحد عنده شوارب واختارني، بچيت هواي وتوسلت بي يعوفني ويرجعني لبيت عمي بس ما قبل

-ليش اختارج؟

-گلي انتِ حلوة وتفيدين، اخذني وياه لمكان كله رگص وريحته مطيبة ايع شفت زلم ونسوان ومكان يخوف اضويته خفيفة واكو بنات يركصون وفرحانات

گلبي گام يوجعني، هزيتلها راسي حتى تكمل ثبتت عيونها بعيوني وكالت وعيونها تصب دموع..

-سألني شنو اسمي گتله ماريا صاح لوحدة اسمها "روز" وشمرني عليها وگللها علميها.. اخذتني روز لغرفة وشگت الصدرية من جسمي صحت اضم بجسمي وابچي كتلتني وهلست شعري وضربت راسي بالحايط كم مرة حسيت راسي راد ينفجر وغبت عن الوعي

-وتالي؟؟

-گعدت من النوم شفت روحي بغرفة باردة واربع بنات ويايه، ماتذكر شنو صار بس اتذكر رجعتلي روز وشمرت عليَّ فستان احمر مخصر وگلتلي لبسي.. لبسته وظلت تباوع لجسمي سألتني..

-روز: انتِ متأكدة عمرج بس 11 سنة؟

-ماريا: اي

-روز: اشتعلو اهلج على هالجسم مال عشرينيات

ضربتني من وره وگالت لحگيني، رحت وراهة شافت شعر بيدي لزمتني هلستني بالشيرة ونظفتني بالكامل متت من البچي اتوسل بيها تعوفني ما قبلت وتكتلني كلما اصرخ..

سحلت بيه لنص قاعة الرقص يسموا ملهى ليلي، نزلت نفسها ونترت بأذني تهدد..

-راح تباوعيلهن وتتعلمين منهن اكتلچ وانتِ نايمة اذا ما تعلمتي بسرعة وشلعتي گلبي

-ماريا: رجعووني مااريد اخااف

-يله للج

شمرتني بين البنات الي يرگصن ومنفعلات والزلم يشمرون عليهن فلوس وهنه يزيدن، شفت نفسه ابو الشوارب اشرلي بيده رگصي وخزرني.. سويت مثل ما يردون وداخلي ميتة من الخوف والقهر.. بسرعة تعلمت من الخوف وصارو كل يوم يطلعوني ارگص اشكال حچي سمعت واشكال لمسات لمسوا جسمي واشكال دفعو لابو الشوارب رادو يشتروني وهو قافل..

حاولت اهرب كم مرة وبكل مرة انلزم واكل المقسوم يطيحون حظي بالكتل ويخلوني ارگص للصبح ما اكعد ولا استراح، بقيت على هذا الحال الى ان دخل واحد شاب للملهى.. انيق ومرتب بس شكله حزين گعد على طاولة وحده وشرب لحدما فقد وعيه على الطاولة..

ظل يكرر زياراته فترة البنات عجبهم لانه حلو ومرتب وجيبه ثگيل بس هو ما عبر وحدة منهن وما اهتم، وبيوم اني هستوني صاعدة المنصة بديت ارگص شفته گاعد وعيونه طافية راح يحچي ويه ابو الشوارب واشر بيده عليَّ..

دقيقة دقيقتين وصاحولي سحلوني لغرفة واجت صديقتي سوسن گالت..

-سوسن: الله يساعدج حبيبتي حتى الطفلة ما خلصت منهم

-ماريا: يعني شنو؟

-سوسن: اجه دورج تقدمين نفسچ الهم ماريا

ما فهمت قصدها، اني اعرف رؤوس اقلام بس محد يقبل يشرحلي بشكل دقيق روز چانت متقبل ولا ابو الشوارب چنت دائماً اسمعهم يگولون نضمها لصيدة چبيرة هو يبدي وبعدين ننطيها لغيره..

واجه هالصيدة الچبيرة وچان شمسون! ما انسى الصار بيه بهاي الليلة ولا انسى حنيته ولطافته ويايه.. حتى وهو طافي چان بس ما اذاني ولا كتلني.. انصدمت من العشته واني بعمر صغير بس نسيت كلشي من شمسون حط راسه بحضني وصار يبچي..

بچه بچي سنييين يبچي ويسولفلي على حب حياته الماتت وعافته، حچالي عن مرة اسمها اولغا ومن حديثه عنها عرفته حزين عليها.. حچالي حاول ينتحر اكثر من مرة بعد موتها بس مينجح بكل مرة يرجع للحياة وحار شنو يسوي حتى يرتاح من هالعذاب..

طلع مني شمسون يجر اذيال الخيبة وياه ما لحگت اتنفس واتقبل الصار ودخلو عليَّ واحد ثاني.. كتلني كتل شل جسمي وهيچ استمرت الليلة اشوف من الوجع والقهر.. من شافني ابو الشوارب غبت عن الوعي اكثر من مرة منع عني احد يدخلي وافتهمت شمسون دافعلي واشتراني منه ليش وشمعنى ماعرف بس هو الساعدني وتركوني بس على الرقص..

يوم بعد يوم حسيت بنفسي تلعب تعبت وصرت حتى ماكدر ارگص ادوخ واوگع واخاف احچي لاحد لا يكتلوني، بقيت على هذا الوضع الى ان بطني بده ينفخ ويكبر خفت وانرعبت صرت اللبس حزام اضبها لا يكتشفون بس ماكو شي ينخفي عنهم روز لگفتني وعرفت اني حامل..

فوراً اتصلوا بشمسون ما جاوب بقوا اشهر يحاولون يوصلوله اكيد راح يطالب بأبنه ويستفادون همه بس ما اهتم لبشر الى ان اجه يوم رجال اسمه سمير.. سمير اجه يقضي الليلة هنا واختارني من دون كل البنات قدموني اله ما اهتموا اني حامل ولا هو انتبه سكران وطافي..

بچيت وتوسلت بيهم يعفوني دگيت على راسي وخدودي منهارة بس محد اهتم، اخذوني لغرفته وبعد الصار صرت انزف بشكل مخيف وفقدت الوعي بين ايده، حاول يصحيني سمير بس ماكو فائدة ركض بيه للمستشفى بدون لا يحس عليه احد وعرضني على طبيبة..

گلتله اني حامل والطفل مهدد بالاسقاط تخبل وحار بيه، صحيت بس ما صحيت.. صحيت غير وحدة صحيت واحس نفسي بحلم وكأني بغير عالم باوعت لسمير وفصلت بوجهه...

-مسرة: وشصار بعدين؟؟؟

رجعت لوعيها تباوعلي ومبحلقة عيونها عليَّ، ضحكت وكممت فمها وهزت راسها بـ لا هزيتها من متونها صفنت وگالت بنبرة سريعة..

-شهوبي ميقبل اگلچ اني جبته بملهى ولا يقبل اگلچ هو ابن غير شرعي..

ويه جملتها هاي دخل اخر شخص تمنيته يدخل، دخل الغرفة شُهيب! دخل فاتح عيونه وراح لامه لزمها من ايدها وگال بنبرة متوترة..

-يمة يمة حبيبتي يممة رجعي وياي

-ماريا: ما ححيت شهوبي ما گلتلها اني گلتلها شُهيب ميقبل

-شُهيب: يممة

-انتَ زعلان؟ لا تزعل اني اسفة ماكول بعد ماكول مسرة انسي حبابة يله شوف نست والله

وجه شُهيب بعد ميتفسر گام ينطي اللوان وگصته انترست مي من الارتباك، يبلعم ووجهه انطعن ميعرف بعد شيسوي.. حضن امه يمسح على ظهرها وعيونه ما حطهن بعيوني ولا مرة..

اخذها وياه يطلعها مادري وين وبعد ما رجعلي، عرفته خجلان وميگدر يواجهني قررت اني اروحله، دورت على ماريا شفتها متمددة على القنفة وتباوع تلفزيون سألتها على شُهيب گالت كاعد بالحديقة..

باوعتله من الشباك شفته گاعد على المرجوحة بدون لا يهزها وبيده جگارة، طلعت اتمشى على كيفي بدون لا اخلي يحس عليَّ وگعدت بصفه بالمرجوحة.. اللتفت يباوع لجانبه الايسر ودار عيونه فوراً..

-هزهزنا شُهيب

بده يحرك بالمرجوحة على كيفه وللان ميحط عيونه عليَّ حتى بعد سفر دام لفترة طويلة، جريت زنده بين ايدي وحطيت راسي على كتفه اتنهد براحة، حسيت بي ينزل عيونه يباوعلي وبقى يتأملني واني هيج..

-لا تخجل من ماضي امك هموسي

-ما اخجل

-لعد شبيك

-اني اتألم

-سمير هو خالك الي رباك؟

-عرفتي منها سمير مو خالي

-بس انتَ تشوفه خالك

-بس حتى الناس متحس امي عايشة ويه رجال غريب گال عنها اخته واني ابن اخته

-ليش هيج سوه؟

-يگول هو السبب بحالة امي

-وصدگ هو السبب؟

-محد يگدر يعرف هالشي

-يجوز تراكم صدمات شُهيب

-اغلب الاطباء اتفقوا على هالسبب

-شلون سمير طلع امك من ذاك المكان؟

-اشتراها

-وانطوها بسهولة؟

-دفعلهم مبلغ محترم ليش ما ينطوها

-شلون ابوك اعترف بيك شُهيب؟ اسفة على سؤالي بس مستغربة

تحركت تفاحة ادم عنده دليل بلع ريگه، لمست ايده اخفف عنه نزل عيونه وصار يلعب بجكارته..

-سمير قنعه

-شلون؟

-طلب منه يسوي تحاليل ويتأكد

-وابوك سواهة؟

-اي بعد ست او سبع اشهر ياله اعترف بيه

-وشصار وراهة؟

-ولا شي مجرد صار عنده ابن حَسوم ثاني

-شنو معناة هالكلمة؟ هواي اسمعهم يكرروها عليكم

-ايام الحَسوم هي ايام النحس من السنة، ايام باردة كئيبة هواها يقلع الزرع من جذوره محد يحب هاي الايام والكل يتشائم منهن، الي يشتغل بيهن نهاية شغله خسارة، والي يتزوج بيهن نهايته طلاق والي تجيب بيهن يكون ابنها نحس وحظه تعيس، والصدفة لعبت دورها واني واخواني ثلاثتنا اجينا بنفس الشهر ونفس الايام

-وبدوا يصيحولكم أبناء الحَسَوم!

-بالضبط

-طاح حظهم شنو هالخرافات

-بعض الدول العربية يعترفون بيهن واصدقاء ابوية الكبار همه الي فطنوا ابوية وگلوله عندك ابناء حَسَوم

-وسمير؟

-شبي؟

-مات لو شنو؟

-مات اي

-چان زين؟

-كلش

-حبك مو؟

-واني حبيته

-واني احبك

شفت ابتسامة تنرسم على وجهه، بست خده خفيف وهمست بأذنه بنبرة مشاكسة..

-ميهمني اصلك شنو ولا ابوك منو انتَ شُهيبي وبس وطُز بالباقي

كبرت ابتسامته ونزل يبوس راسي، رفعت عيوني اله وهو نزلهن الي..

-اريد اطلب منك شي

-عيوني الچ

-اول شي فلوس اسهم الشركة مالتك بعدهن عندك؟

-اي ما صرفتهن

-اريد تكون شريكي بالشريكة

-شنو؟

-ابيعلك نسبة 60% من الشركة

-بس هاي اكبر من نسبتچ!

-وهو المطلوب

-ليش مسرة تبيعيلي اسهم شركتچ؟

-تعبت واحس مسؤولية دتاخد هواي من وقتي ومحتاجة هموس يعاوني

-مسرة!

-شبيك هو هذا السبب محتاجة تمدلي يد العون زوجي العزيز

-انتِ متأكدة؟

-مية بالمية

-مسرة اذا جاي تسوين هيچ بس حتى ا...

-لا! مو حتى ارجعلك الفقدته بس اني تعبانة اذا متشتريها انتَ راح ابيعها لواحد ثاني ويضيع تعبنا بيد الغريب

-لا تبيعيها لا

-تشتريها؟

-اي

-اييييي همزين من قبلت چنت حاطة ايدي على گلبي.. حياتييي فرحت هواي

حضنت زنده اعصره سعيدة، چذب لا تعبت ولا ناوية ابيعها لبشر بس هذا اقل شي اقدمه اله ارجعله نسبته بالشركة ومنصبه يعز عليَّ اشوفه حاير واحبه يكون متميز بشغله انطيته النسبة الاكبر لغاية وهو حتى الموظفين يشوفوا المسؤول الاول ويعاملوه على هذا الاساس، ثانياً لا تخلوني احمى زايد أساساً هو راح يشتري الاسهم بفلوسه يعني مو صدقة مني واروح اصدگ روحيي..

**

-جنات قميصي الرصاصي وين؟

-جنات: مادري

-مالك: اني متأكد كويته البارحة وين راح جنات عندي اجتماع ما يصير اتأخر

گمت اتأفأف ادور وياه بالحقيقة اني ضميته عناد بي ردت اضوجه بأي طريقة كانت وما اجه ببالي غير اضم قميصه الكواه البارحة.. عنده الف قميص غير هذا بس مالك من يرتب ستايل براسه لو يموت ميغير بعد هذا طبع مزعج عنده..

-مالك: راح اتأخر على ابووووية خررررب

-شبيك شبيك هسة واذا تأخرت على نعلون

-بس ي*** حظي

-اييييع شنو هالفشاير شبيك صاير بيئي مو عيب الطفل هنا!

-اسف بابا اسف حبيبي

باس رامي وهذا يضحك ميدري شكو، گام لابوه يچلب برجله ويجرجر ببنطرونه حتى يباوعله، نزل مالك عيونه عليه ورامي اشرله على الصالة..

-مالك: من ارجع حبيبي

اشر رامي على الصالة بعد يلح، ضحكت اتفرج عليه بعد رامي وراد شغلة فنك لو ما سويتها اله وهسة ديطلب من ابوه يرحون للصالة ويلعبون ختيلان مثل كل يوم..

-مالك: بعدين نلعب حبيبي وعد

-رامي: بابا

-مالك: والله وعد اول ما ارجع اللعب وياك للصبح

جر بنطرونه بعد بمعنى انطيني حلويات حتى ارضى، طلع من جيبه مصاصة وانطاهة اله كيف وراح يركض يفتح بيها ياكلها.. ابتسمت بحب اتأملهم هاي المصاصة متوگع من جيب مالك من تعرف على رامي لهذا اليوم، هو واناقته وكشخته وشخصيته ولو تفتح جيبه راح تلگه مصاصة بجيبه حتى ينطيها لابنه اول ميرجع للبيت..

رحت للغرفة الفوگ طلعت قميصه ونزلت انطي اله، ما سألني وينه لان يعرفني اني المخبيته اخذه مني ولبسه بسرعة، بقيت مبوزة عليه ضحك وخربط شعري..

-شبيچ شبيچ

-اكرهك

-جنات

-اربعة ايام مختفي! مالك اربعة ايام انتَ غايب شبييك متگلي وين تروح؟؟

-جنة

-وتريد تعدل علاقتنا ونرجع ويه بعض مو؟؟ تحلللم مالك تحلم اصيرلك زوجة وانتَ هذا وضعك يومية غايب واليذبح ميبلغني قبل بوقت فجأة يختفي!

-تصير سفرة مفاجأة مو بيدي

-خوش ميهمني! اليوم راجعة لبيت ماريا اني خلي يكون بعلمك

-عادي ابات وياكم

-لو تمووت ماكو منريدك!

-هااا هسة حتى حضني ما تردي حطيتي رامي بدالي!

-اي احط رامي احنه منريدك انتَ بس زايد عدد حاطي وجودك وعدمه وااحد! اكرررهك ماااالك

اخذت رامي وصعدت فوگ ميتة من القهر، وين جان بهاي الاربعة ايام راح اتخبل اسئله يگول مسافر ومن اگله وين ميجاوب دا اشك بي مل مني وراح تزوج عليَّ ويخاف يواجهني يجوز تزوج دارلان!!

ساعة اللوم بروحي واگول اني السبب اذا راح لغيري، اني لهذا اليوم ما رجعت علاقتنا طبيعية ماكدر مدا انسى العشته بدونه.. حملت وجبت وتعذبت وسمعت اشكاال حچي من ابوية وبنات عمي الحياية قسم منهن گالن الطفل مو ابن مالك وميريده وقسم گالن اني خنته وهو هجرني وقسم گالن شافله شوفة عشت المُر بغيابه ويرجعلي وره ما ابنه كبر ويحاول يزحف وحده؟ والله يستاهل اشلع گلبه مثلما شلع گلبي واذاني!

العصر اخذت رامي ورحت لبيت فاهد ماكو هالبشر مختفي لا يجينا ولا بعد سأل على رامي ومن اخابر كيان تگول وضعه مو تمام ونفسيته تعبانة بسبب كلام مالك فـ قررت احسن من وضعه واخذله رامي يشوفه..

دگيت الباب طلعتلي ام خالد دخلتني وگالت فاهد بغرفته اگدر اصعدله، عارضت اني اروحله وگلتلها انتظره هنا بالصالة، دقايق ونزل الابتسامة تارسة وجهه اخذ رامي من ايدي وصار يشمره بالهوا ويضحك على ضحكاته..

-فاهد: ولك ابن الگملة وينك عني انتَ وييين

-جنات: انتَ متزورنا عمو ليش گاطع بينا

-فاهد: وضعي مليوص گملة شسوي

-ليش شبيك؟

-ابوية رجع ومطيح حظ حظنا

-فاهد احلفك بروح امك مالك بعده يشتغل ويه ابوك ويسوي الي يريده؟

-تحلفيني بروح امي شنو هسة فد نعال هي وتحلفيني بيها

-جاوب ثؤالي بدون چذب لعد

-اي يشتغل وصاير يشتغل اضعاف قبل

-اااااخ يالقهر لللليش

-علمود ابنه مالك يخاف لا يقصر بشي وشمسون يطلع حرگته بـ رامي

-يمة ابنيي

-اي ومالك واگع بيها

-زين انتَ شبيك ويه مالك متحاچي ومخلي ميت من القهر؟

-خلينا هيچ جنات

-ليييش

-تشربين شي؟

-لا راح اروح اني

-ولج ما شبعت منه!

-تريده؟ تندل بيته تعال زورنا هناك

-يا نذلة تخليني امام الامر الواقع!

-اي لانك تثتااهل

-سم ومررض بت الزمال

-ديلا ولي ولي باااي

-نعععل مگطعة على ابنچ السلبوووح

طلعته وعفته يفشر ويغلط على روحه وعلى گلبه، ضحكت وطلعت للسايق گتله ينزلي عربانة رامي واتمشى بي قريب الحديقة العامة شوية وارجعه..

افتريت شوية واشتريت موطة الي ومصاصة اله و گعدت على المسطبة الحديقة فارغة تقريباً بس احنه وكم نفر متوزعين، رامي يسولف ويلهلج واني اللاعبه واسولف وياه وكأنه چبير ويفتهم عليَّ صديقي صار هالنتفة..

طلعت تلفوني وفتحت البرنامج مال قصص وبديت اكمل قصتي الصار اسبوع بيها كله من وره روري ميخليني اقره يظل الليل كله يبچي..

وبأثناء ما اني منسجمة بالاحداث ما حسيت على شي وفصلت عن العالم اقره واللتهم الحروف ماگدر اوگف، خف الحدث وهدأت نوعاً ما ذبيت نفس ورفعت عيوني اباوع لـ رامي بس ما لگيته! ما لگيت ابني!! طفرت من مكاني ادوره بعدني ما صحت اسمه وحسيت بواحد ورايه يحط وصلة على خشمي وبعد ما حسيت غير الظلام يحاوطني....

**

"كيان"

مزروعة يم الشباك هذا حالي لا البيه اتنازل واروح لبيته اتطمن عليه ولا البيه اهدأ واستقر بمكاني وانچب، فاهد هد حيلي ماعرف شسوي وياه گلبي نار عليه وبسببه معصبة ومشتاقة زعلانة وقلقانة مشاعر مخربطة عيشني هالبشر..

باوعت للساعة متأملة يجي اليوم وقاطع تأملاتي للساعة صوت طرق باب البيت، نزلت الدرج اريد افتحها وشفت شُهيب يگوم للباب وعيونه بالتلفون ديراسل احد والابتسامة من الاذن للاذن، ضحكت وياه على الواهس والفضول ياكل بيه اعرف منو الي يراسله وهيچ فرحان..

راح للباب يفتحها واني وگفت بنهاية الدرج مادة راسي اشوف منو، جمد جسمي وكلشي بيه من سمعت صوت مميز يگول..

-سلام

مديت راسي اتأكد من الدا اشوفه بس ما احتاجيت ظهر شُهيب الي تشنج بعد جملته التالية چانت كافية..

-فاهد: جبتلك كيلو برتقال

-شُهيب: فاهد

-فاهد: ها

-شُهيب: اجيت حتى تجيبلي برتقال؟

-فاهد: اي.. يعني اني اشتهيته وگلت يمكن انتَ هم مشتهي مثلي

-شُهيب: مشتهي

-فاهد: ههههههههههههههههههه لعد همزين اجيت

صعدت بسرعة قبل لا يفوت ويشوفني، مديت راسي من محجر الدرج اشوف شُهيب مصدوم بس مبتسم وفاهد دخل وبيده چيس برتقال، حطه على الطاولة وگعد على القنفة يريح ظهره..

-فاهد: بيت اخوانك خايس

-شُهيب: گاعد ببيتهم وتعيب عليه؟

-اي

ماعندي شك شُهيب هسة گلب عيونه وگعد على القنفة ما شفت وجهه بس حافظة حركاته..

-فاهد: احم

-شُهيب: احم

-فاهد: الله بالخير

-شُهيب: الله بالخير والعافية

-فاهد: شلونكم

-زينين

-بعد شلونكم

-بخير

-شلونهم اخوانك الخايسين؟

-استغفر الله فاهد

-اكرههم

-ما يهمني

-اموت منهم

-اي ليييش

-لانهم اخذوك من عدنا

لانت نبرة صوته وتغيرت بشكل ملحوظ، رخت اكتاف شُهيب يباوعله وفاهد ثبت عيونه على اخوه وبقوا صامتين لفترة قبل لا فاهد يگول..

-فاهد: راح اسويلك برتقالة

-تمام

-نص الك ونص الي زين؟

-خو سويلك وحدة ثانية

-لا اريد الك نص والي نص

-نفس قبل

-ههههههههههههه اي من نتشارك برتقالة مالك اني اخذ نص وانتَ نص

اخذ نص البرتقالة وانطه النص الثاني وگعدو ياكلوها، فاهد فرحان لدرجة احسه شوية ويطير بمكانه ظل كل شوية يسأل شُهيب..

-طيبة مو؟ طيبة؟؟

-شُهيب: عسل

-اي طبعاً من ايدي هاي

كملوا البرتقالة واصر يسويلهم وحدة جديدة وعلى هاي گعدتهم اكلو خمس برتقالات لا فاهد يتوقف ولا شُهيب يمنعه..

-فاهد

-ها

-شلونك؟

صفن فاهد بوجه شُهيب ثواني واللحقها بدقائق، صفن صفنة طويلة غابت بيها ابتسامته.. هز راسه بـ "لا" وجاوب بصوت مبحوح..

-مو بخير

-منو وياك فاهد؟

-الدنيا

-شسوت بيك

-لعبت بحالي

نزل عيونه وذب السچينة من ايده، ضم كفوف ايده ويه بعض وذب حسرة قوية يردف..

-خلتني احقد على اعز ثنين على گلبي، حاربتك وردت اكتلك اكثر من مرة

-بس ما سويتها ولا مرة

-عقلي يريد وگلبي يرفض

-ادري

-بكل مرة رفعت سلاح على وجهك ما خفت ولا انهزيت ما وخرت عن طريقي حتى واني شارب او متعاطي ما چنت تهتم

-لان اعرفك ما تسويها

سكت فاهد يباوع لعيون اخوه وشُهيب اردف بهدوء شديد..

-الچان يتختل من عيون الحراس حتى يجي ينام يمي بالبرد بره من اتعاقب ما اخاف واني انطي ظهري

-چنت اهددك واضرب طلق عليك شُهيب

-بس ولا وحدة لاحتني

-متعرف بيه بس بوخة

-ههههههههه اعرفك اعرفك

ضحك فاهد يفرك عيونه وشُهيب نزل راسه يباوع لتلفونه بعدما اجته رسالة جديدة، وفجأة ومن العدم گام فاهد من مكانه وباس راس شُهيب وحضنه بقوة..

تصلب جسم شُهيب ما متوقع هالحركة بس ما رده وبادله حضن اخوي حنون، وگفو على حيلهم وبقوا حاضنين بعض فوگ الخمس دقايق، فاهد مغمض عيونه يستشعر دفو اخوه وحنيته عليه وشُهيب نفس الحالة..

-فاهد: مشتاقلك

-شُهيب: مو بگدي خوية مو بگدي

-وراس مالك اموت عليك

-مالك شد راسه هسة من الچذب

ضحك فاهد وضحكت بالكتمة عزه بعينك فهيد طلعت هاي حچاية شُهيب وانتَ بايگهة منه، وخر فاهد من حضن اخو بس بقت ايده على متون شُهيب ابتسم وگال وعيونه تلمع..

-فاهد: يرحولك فدوة اخوانك الجرب

-اهووووووو فاهد

-الا اشگهم بس انطيني مجال

-فنك لو طخيتهم فهود اگعد راحة

-حاضر

-وهسة ولي عن وجهي شبعت منك

-بس اني ما شبعتتتتت

هجم على شُهيب يحضنه وما اكتفى شمر روحه شمر وچنگل رجليه يحاوط خصر شُهيب يخلي يشيله موتني من الضحك وشُهيب يرزل ويعيط عليه حتى ينزل..

-وللللك شثگللك اشتعلت اممك الغبرررة

-جرحت مشاعري العضروطية

-انززل فاهد خرب روح ابووك العار

-خ** على اخوانك عدى كيان كلكم ترحولها فدوة

-هو سوه بيها حالة نفسية وبعده يگول كيان

وخر عنه يوگف مقابيله وگال بجدية..

-مالي عين احاچيها تدري؟

-خلي حمرتك تفيدك

-ولك يا حمرتي وراس مالك لا رايحلها ولا شايفها

-وين چنت كل هالوقت؟

-مسجون

شهگت ضامة حلگي بيدي وفاتحة عيوني على وسعها، ممصدگة كلامه ولا متوقعة اسمع هيجي شي، اردف بنبرة ناصية كلش..

-انشگيت نصين شُهيب طيحو حظي اكو احد موصل الفلاش للشرطة ووگعت براسي الجريمة عفت كيان بدون لا انطيها خبر خفت اكون متورط صدگ وانزل من عينها واحلم اشوف اظفرها بعد بقيت بالع موس وساكت لحدما لزموا ناصر

-ناااصر السبب؟؟

-اي ناصر هذا الي توصلتله الشرطة، طلعوني ولهذا يومك خايف لا اتورط من جديد ماكدر اجازف بعلاقتنا اكثر وماكدر اشرحلها الوضع راح تشوفني مجرم حقيقي وتكرهني بالزايد.. بس احبها شُهيب وداعة سنين فراگنا ميت بيها ورايدها وماريد غيرها

-انتَ وكيان علاقتكم مـ....

-لا تكمل! احلفك بعزيزة گلبك لا تكمل وتكسر خاطري وگلبي اني بنية غير كيان مااريد ولو ابقى انتظرها العمر كله ولو اكبر واحد يتدخل ويصير بيناتنا ما اتنازل عنها حس بيه شُهيب حسس!!

-والحل؟

-الحل اشرحلها كلشي بس محتاج اتأكد من اخر بلية ورطها براسي شمسون اذا طلعت منها برائة فـ ما اعوف اختك لو تصلبوني مصلخخ

-مادري فاهد والله مادري

-ثق بيه والله ما يحتاج اگلك احطها بعيوني لان هي عيوني

-تمام تأكد من سالفتك ويه شمسون ورجعلي خبر

-لااا بشرررفك

-گتلك تأكد ما انطيتك شي اكيد

-خايبين كللللللللووووووش شااايف خير ومستاهلهااا شايف خييير ومستاااهلهاااا وللللج كووووورييييي

صرخت وياه مفزوعة اشوفه يركض يصعد الدرج يريد يجيني وشُهيب راح وراه يجره ينزله..

-ووولك مسوودن وييين

-مسووودن بيها اني ولك ارررريدهاا

-انزل انززل

-احب اختتك احبهاا يا ناااس يالكعبببة احبهااا ولج كوررري اموت عليج وشررف امي البرب***

-فاهد سيطر على اعصابك بس انتبه وياااي

-ها ها انتبهت

-شنو راح تسوي ويه ابوك؟ تبقى بهذا وضعك؟

-ها اي نسيت

-شنو نسيت؟

-نسيت اگلك شنو اريد

-اي شنو؟

-اريدك تساعدني ننهي شمسون.......

يتبع....

━━━━━━  ━━━━━━

وجت وجتتتت 🙊💋🔥🔥🔥🔥

#ابناء_الحسوم "شمسون"

بقلمي: زهراء السلامي ❤︎

لطفاً لتنسون التصويت + التعليق بين الفقرات + متابعة لحسابي 😍.

مُرّة كالقهوة..

لا يتحملني الا عاشقها 🤎

━━━━━━  ━━━━━━

-يلة شبااب اشتغلو بعد يومين عرسي

-نشوان: جاي نشتغل لعنة الله على ابليسك

-مروان: فااضل شبيك هو هيييچ يشيلون الطاوولة

-فاضل: جيب صخاام بعينك جيب خبيرين اعراس أي شي يشتغلون بمكاننا يا فگررر

-مروان: جايب

-نشوان، فاضل: نعمممم؟؟

-مروان: جبت بس خطية خوما كله يشتغلو عيب منهم

-نشوان: عيب منهم شنوو انتَ دافعلهم فلوس لو نوه؟؟

-صبا: مروان ذولة ليش محاربين الانسانية انتو ليش ماعدكم ضمير؟

-نشوان: فاكهة حياتي مو انشگينا نصين لو الانسانية يمنا وتخلص

-صبا: هاي شبيكم شباب اصلاً تحصلون اجر مو سيد؟ اجر لان راح تفرحونا

-فاضل: اجر واني اعرف راح ينگلب العرس ملهى؟ العياذ بالله من الخبث والخبائث استجير بالله من المشاركة في المعاصي

ضحكت وگعدت على الكرسي اشوف شغلهم خطية من الصبح شُهيب انطانه اجازة كلنا واجينا نرتب حديقة القاعة، حلم حياتي يكون عرسي بحديقة چبيرة واخييراً راح يتحقق هالحلم واتزوج من حب حياتي..

طلعت تلفوني اراسل الـ wedding planner اشوف شنو ناقص بعد، دقايق وحسيت بشخص يغطي عيوني من وره.. تلمست الايد وابتسمت ميزت ايديها الناعمة..

-ملااك

-ملاك: ههههههه هلو صبا

-صبا: گلتي متجين

-ملاك: معقولة تطلبيني وما اجي

-صبا: امممم راح اصدگ اي اي خوش

-ملاك: هسة گولي بشنو ترديني اساعد؟

-تعالي

اخذتها للكوشة اخذ رأيها، ملاك تعرفت عليها عن طريق فيروز الي للاسف رجعت للعراق صار فترة بس بقينا على تواصل، بأثناء ما اني وملاك نسولف ونقرر فزينا على صوت صياح جاي من جهة الولد..

-صبا: عزا بعيني مرواان

ركضت لجهتهم ما شافو ملاك من دخلت، نسيت وجودها وركضت اتطمن على مروان والقلق يدب بگلبي.. لگيته واگف كلشي مابي ونشوان وياه لازمين فاضل ثنينهم..

-صبا: شصااار

-مروان: وگعت طاولة الگزاز على رجلين فاضل وانكسرت

كممت فمي مقهورة اشوف الزجاج كل مكان وفاضل متأذي، جروا يگعدو على جهة ونزع شحاطته يشوف الگزاز ماكل رجليه وطاب بيها..

-نشوان: خرب حضك من شوكت تلبس شحااطة يا شحااطة

-فاضل: ااخخ مادري ولك داويني شوفلي چارة طلعلي الگزاز خرب

-نشوان: شصخملك يعني قابل اطلع الگزاز بسنوني

-فاضل: بخس الصديق نشوان بخسس

-نشوان: اگلك لا تظل تخسخس عليَّ ما افتهم هالمصطلحات گوم گوم اخذك للمستشفى احنه شكول اعراس احنه

-ملاك: بس انتَ هم تحتاج مستشفى

نطقت بصوت ناعم هادئ، اللتفتوا الولد ثلاثتهم عليها ونشوان فك عيونه هسة ياله استوعب وجودها وانتبه عليها هنا..

-نشوان: هااا

-ملاك: ايدك مجروحة

-نشوان: شني

-ملاك: ايدك.. شوف يطلع منها دم

تمط بالحچاية وناااازكة اني بنية وانسحل عليها ما اللوم فهاوة نشوان من يشوفها يظل يمتمت والحچاية متطلع من حلگه..

-مروان: اي نشوان صح كلامها ايدك مجروحة وجاي تذب دم

-نشوان: لا لا

-مروان: هو شنو لا لا ولك شوفها

-ملاك: اي انتبه عليها

-نشوان: فدوة الچ

صفنت ملاك وصفن فاضل وصفنت اني وصفنوا اهل القاعة والاهم صفن نشوان على حچايته وفتح عيونه..

-نشوان: اقصد فدوة الكم كلكم شبيكم لا تشخصنوها

مسح ايده بجاكيته ممهتم للدم واخذ فاضل وراد ياخذه وياه للمستشفى ورحنا كلنا وياهم ماعرف شعجب اجت ملاك ويانه بس لاحظت شي على هالبنية ابد ماعدها صديقات نهاائياً وفيروز صديقتها الوحيدة وصرت هسة اني صديقتها ماعرف شعجب..

رحنا للمستشفى يقطبون جروحهم ثنينهم ولا عبالك متأذين گضوها يضحكون وموتونا ضحك وياهم، راحت ملاك تجيب مي وظل نشوان يراقبها من بعيد..

-نشوان: يارب كل يوم توگع طاولة گزاز على رجلين فاضل بجاهك يا موسى بن جعفر

-فاضل: لييش ولكك

-نشوان: خايبين ما شفتوها شلون خايفة عليَّ؟ ولك راحت تجيبلي مااي

-فاضل: هنا من البراد راحت تجيب ما راحت تجيب من ايران

-نشوان: نفس الشي خوية المهم مهتمة، اگلك والعياذ بالله بس لا حرام اشرب الماي منها؟

-فاضل: نعم بي اشكال شرعي

-نشوان: لااااا سيد صدگ تحچي

-فاضل: للاسف

-نشوان: لييش قابل شنو راح يصير اذا شربت الماي؟؟

-فاضل: عزيزم راح تتولد عندك مشاعر محرمة وهذا حكم شرعي لو حتى بالامور الشرعية تريد تدخل وتغيرها؟

-نشوان: بالعباس الا اشرربه

-فاضل: اعوووذ بالله نشوان لا تنسى دينك ومبادئك مقابل شربة ماء من الحبيبة

-نشوان: هو مااي اشتعل عقلك

ضحك مروان يفر بيده واني ميتة ضحك وياه هذا فاضل ناصب على نشوان والفطير مصدگه، بقى حاير لحدما رجعت ملاك وبيدها كاسة مي قدمتها لنشوان بأبتسامة اخذها منها ايده ترجف وعيونه على فاضل..

-فاضل: بكيفك بعد هل تريد الجنة ام النار جونم؟

صفن نشوان على الكاسة فوگ الدقيقة وملاك تباوعلي وترجع تباوعله مستغربة..

-ملاك: تره ما حطيت بيها شي

-نشوان: هههه لا لا ههههههه هسة اشرب

-فاضل: استغفرالله لا قوة الا بالله اللهم احفظنا بحفظك واجرنا نار جهنم

وره جملته التخلي اكبر واحد يتردد تعال يا نشوان واشرب المي كله وباوع لفاضل بعين صلفة، ضحك فاضل بصوت عالي وكلنا ضحكنا وياه بينما نشوان ظل صافن فترة وراهة گال بأنزعاج..

-نشوان: ولكمم ناصبين عليَّ

-مروان: انتَ قشمر

-نشوان: چنت متأكد اكو شي غلط ومو مقنع بهذا الحكم

-مروان: ديلا يلا اني رايح ادفع فلوس المستشفى انتو تحضروا حتى نطلع

راح وبقينا ويه الولد، ملاك هادئة مثل اسمها بالضبط ونشوان گاعد ويحرگ بروحه يريد يحجي وياهة وماعنده الجرأة بس... بس صدمنا كلناا من گال بثقة وبشكل مختصر..

-نشوان: آنسة ملاك تسمحيلنا نزوركم اليوم بالبيت؟

-ملاك: اهلاً وسهلاً بس شنو المناسبة؟

-نشوان: اريد اخطبج

غص فاضل بالمي وملاك رفعت حواحبها ثنينهن مصدومة من سرعة الرد، ضميت حلگي متفاجأة بي انوب هو هم سكت وبعد ما حچى بقى يبحلق بعيونه عليها ووجهه صاير احمر..

-نشوان: اي هو يعني باعي امي.. اقصد مو امي مرت ابوية ماريا تعرفيها مو؟ اي هي شافتج وعجبتيها وهاي بعد هاي رادت تصير واني كلت خليني.. خليني استعجل ليش اماطل

-ملاك: هلا بيكم

-نشوان: يعني نجي؟؟

ابتسمت وتوردت خدوها نزلت عيونها ورجعت رفعتهن وهزت راسها بـ اي..

-نشوان: مستحيل! لا اكو شي غلط

-ملاك: ما فهمت؟

-نشوان: ليش ما صارت مشاكل؟ ليش ما عانينا؟ ليش ما رفضتيني وعفتيني اعيش الوجع والقهر؟ ليش ما انتظرنا سنين ياله صرنا لبعض؟

-ملاك: تريد هيچ يصير انتَ؟

-نشوان: لاا لااا اكيد لاا ولك فااضل وافقتت ولك وااافقت بسرعة واني صارلي سنينن اتلاطم وحدي لو حاچي من الاول چان هسة ابني بطوولي

-فاضل: ولك خزيتتا الله لا يخزيك

-نشوان: ملاك انتَ موافقة؟ موافقة؟؟ لو من اجي اخطبج ترفضيني حتى نكمل تخيلاتي؟؟

-ملاك: بكيفك تريدني ارفضك عادي

-نشوان: لاا شنو ترفضيني وين تلگين احسن مني تره انتِ الخسرانة هااا من هسة اگلچ والله ماكو احن من گلبي

-ملاك: طلعت نرجسي

-نشوان: نرجسي شنو؟ لا اني عراقي

ضحكت تغطي حلگها ودارت وجهها عنه، بدون لا تنتبه عليه صار يهز رگبته واكتافه ويطگ اصبعتين بالهوا فرحان..

-صبا: احم ملاك

توقف نشوان عن الرقص يسوي روحه ثگيل وهي اندارت تواجهني، اشرتلها نطلع سوه من غرفة الولد بس عبرنا باب غرفتهم ذبت نفس ملاك تهفي وجهها متوترة..

-ملاك: عزززه راح اموت صباا

-صبا: ههههه ليش ولج عززا فرحانة صرتي مرت حماية

-ملاك: توترت ماعرفت شنو أجاوبه طلعت من حلگي هلا بيكم والله لو ابوية يعرف يطيح حظي

-بس لا متردي وگلتيها لان استحيتي منه؟؟

-لا لا مو هيج.. شوفي اچذب اذا اگول احبه لان نادر نلتقي بس يعجبني وهو خوش رجال وابوية يمدح بي وبأخوانه من سألته عنهم

-الحمدلله لعد ليش خايفة من ابوج؟

-اخاف لا يعرف بينتله اني موافقة.. باعي قبل لا تجون تخطبون سووا روحكم متعرفوني ولا كأن اني وياچ صديقات تمام؟؟

-صبا: تمام فهمت هذا هو

ضحكت متحمسة وعيونها تلمع كل هالفرحة وتگول متحبه بس هاي فاهية متفرق بين الحب والإعجاب فرحتلهم وتمنيتلهم كل السعادة يتناسبون كلش هو فقير وخوش ولد وهي لطيفة وكلش خوش بنية واهم شي مايعة وساحلته سحلل..

**

"جنات"

فزيت على صوت رامي يبچي من بعيد، رفعت راسي من الگاع دايخة وثگيل بس جرت على روحي وگمت ادور اني وين؟؟ و ابني وينه وليش صوته بعيد عني؟؟

افتر بمكان يشبه الغرفة بس من ركزت بالحيطان انتبهت هذا كرڤان، اختلست خوف ركضت للباب افتح بيها متنفتح وصوت رامي يصرررخ فحط من البچي متت قهر وصرت اضرب بالباب واصيح يفتحولي..

-افتحوووو الباااااااب ابنيييي يبچي فتحوووهااااا

اضرب مثل المخبلة فجأة وخنس صوته انهاريت خوف شصار بي؟؟ شسووله لييش سكت رامي بهالطريقة؟؟ فقدت عقلي وقوتي دگيت الباب لحدما ايدي تزلغت وما فتحوها..

وگعت بالگاع انوح ماعرف شگد مر من الوقت واني ابچي وادعي وانخي منو يجي ببالي، دقايق اخرى مرت وفتحوا باب الكرفان عليَّ طفرت من مكاني اشوف منو دخلولي زلم ثنين ملثمين رگع گلبي بخوف بس تماسكت ومثلت القوة..

-جنات: منو انتو شتردون مني

حچى واحد بيهم بلغة البلد وقدملي ورقة وقلم جاف، تسائلت شنو هاي واشرلي حتى اقراها.. مكتوبة بالعربي مترجميها قريتها وانصدمت! هذا تنازل عام لكل املاكي لـ جعفر شمسون!

-جنات: لووو تموووتوننن

شمرت الورقة عليهم والقلم وثنينهم تقدموا عليَّ قيدو ايدي وكلمن شالني من جهة، صرت ادفر وارافس حتى يعوفوني بس ماكو فائدة، حنجرتي تشخطت من العياط ومحد بيهم اهتملي ولا نزلوني..

طلعوني من الكرفان وضرب جسمي هوا بارد، انتبهت لمكاننا احنه على الساحل الخوف اكلني وتأكدت نهايتي راح تكون هنا بهذا المكان المهجور المجهول..

دخلوني لكرفان ثاني وصوت رامي ماكو! ابني وين اخذو وشسووا بي!! اول ما فوتوني للكفران الجديد جمدت مصدومة من الشفته گبالي واحس بگلبي وگع بين رجليه، شهگت اصيح بأسمه وركضت عليه ودفعني الغبي بعيد عنه خازرني ويأشرلي اطلع بدون ما يطلع صوته..

-شمسون: شوفي راح اتكرم عليج واگلچ الچ حق تطلعين منا هسة بشرط توقعين الاوراق وتنطينا حلويات وياهة

-جنات: حلويات شنو

-شمسون بغمزة: فهمچ كفاية

عطت مفزوعة من وصاخته! وصلت بي المواصيل الي! اني بنت اخوو! من شاف اعتراضي واصراري ما اقبل بعرضه راح لابنه يحرگ بگلبي ويطلع غضبه وحقده بي..

دوى صوت الراشدي بالمكان مخلف صدى يلتهم الكرڤان الفارغ بينما هو بقى على وگفته مستسلم منتظر مَوته آمل يتخلص من هذا العذاب، سحبت ايده اتوسل وارجف بخوف بحياتي ما خفت مثل ما خايفة هسة احس گلبي راح يوگف بأي ثانية..

-امشي ويايه فدوة امشيي تريده يمووتك تره هذا مخبل امشي

-شمسون: تحبين تموتين وياه؟

بلعت ريگ اعصر عيوني ما طايقة اشوف وجهه، استجمعت قوتي وعطت بي..

-شنو من گلب علييك ولك حيوووان انتَ ماعندك مشاااعر ماعندك ضميرر؟؟

-شمسون: تطلعين لو تاكلين المقسوم وياه؟

جاوب ببرود حرگني وابتسامة مشاكسة مرسومة على ثغره، بنفس اللحظة دخلو زلم ثلاثة مقنعين واگفين ينتظرون اوامر منه، مسح شفايفه بأبهامه واشر بعيونه علينا..

بلا كلام اجو المقنعين دفعوني بخفة وجروا مالك مني لزموا من ايده يچتفوه ونزعوه قميصه، اطرافي نملت وراسي راح ينفجر حتى صوتي اختفى من شفتهم يعلگوا من ايده گدامي وبيدهم اسواط من الجلد..

-جنات: ولك حرررام عليك ونبي حرررام عوووفه يالكللللب يالخسيسس

-تطلعين؟ لو.. تاكلين.. المقسوم.. وياه..؟

حچاهه كلمة كلمة وهو ينزع حزامه، تخربط وضعي من صار يتقرب مني والحزام بيده، حاولت ما ابين خوفي بس رجليه خانتني انداريت عليه يعلگون بي ويعيط بيَّ بروح رايحة..

-مالك: طلللعي برررا لا تبقيييين هنااااا

-جنات: مارووح ماعوفك

-وللللج روووووحييييي

صوته يرج بالگرفان رررج اخذتني الرجفة وصرت اراوح بمكاني، منين ما ادير وجهي محاوطيني ناس مجرمين ماكو بگلوبهم رحمة، هزيت راسي بـ لا واخيراً سمحت لدموعي تتحرر..

-ماعوفك

تعب مني نزل راسه وايده معلگه فوگ ورجليه مثبتيهه بالگاع بأصفاد، شهگت بعياط من صارو يضربون بي گدام عيوني بچيت بچي مخابيل اتوسل بيهم يعوفو يضربون من دون رحمة ملخو جسمه وصدره وحتى وجهه ملامحه بعد متبين من الدماية والجروح..

-جنات: الا انتقمممم منكمممم يا كلاااااب ما اطلع بنت امييي اذا ما اخذت حقنا منكممم ولللك ارحم بحاله وشنو تريد انطيك

زدت بالبچي من سمعته يصيح بيه بصوت تعبان بس قوي خلى جسمي يقشعر...

-مالك: لااااااا ولجججج لاااااااااااا اموووتج وحق الله اموووتج انتِ مو تكرههينييي طلعيييي مناااا طلععععييي

-جنات: اذا انتَ حيوان ومتحس من يعذبوك اني احس ارحم بحالي

همستها بتعب بصعوبة طلعت الكلمات من فمي ووگعت بالگاع، رفعت انظاري على ابليس الگدامي بيده الحزام وينظرلي نظرات متوعدة، نزل ينگبص امامي قرب وجهه من وجهي وهمس بأبتسامة مشاكسة بيني وبينه بدون لا يخلي احد يسمع..

-انتِ تحبي؟

حركت راسي لا بحركات عشوائية، هز راسه اي وكبرت ابتسامته وهو يهمس..

-راح اموته تره

-موته

-گدام عيونچ؟

-بكيفك ميهمني

رفع نفسه عني واشرلهم يرجعون يضربوه بقوة اكبر واحد منهم شال سطل مي عرفت بي ملح بسبب شهگته من شمروه عليه ويرجعون يضربوه، انهاريت ركضت اللزم ايده واتوسل..

-انطيك التريده عموو بس عوفه ابوس ايددك عوفه كاافي راح يمووت هذا ابنننك

جاوبني بثقة وهو يطلع جگارة من جيبه وصوت مالك الديعذبوه يرج بالمكان..

-عندي ثنين غيره ما يهمني

-گتلك انطيك التريددده لا تصير مطييي

اللتفت عليه عيونه تجدح وابتسامة ماكرة مليئة بالمعاني الفاسدة نُحتت على وجهه، رفع ايده يأمرهم بشي فوراً واحد منهم شمر بيده علاگة، اخذها وطلع منها دشداشة بيضة شمرها عليه وگال بعجرفة..

-لبسي هاي وانتظريني بالكرفان الي بجانبنا فارغ ماكو احد

اخذتها من ايده والدموع ترست وجهي وعيوني ما اشوف شي كدامي بس اسمع صوت مالك حطم جدران الغرفة انشخط بلعومه راحت روحه ما گدرت ابقى زايد وطلعت ادخل بالكرفان الثاني وعيوني شخصت من المنظر الشفته..

-جنات: فاهد! شُهيب!!

-شُهيب بهمس: اششش

رجفت من شوفتهم هنا، شُهيب وفاهد كلمن لازم بأيده سلاحين ولابسين اسود من فوگ ليجوه وبوتات لونها اسود، خانتني قوتي وگعدت مگنبصة بالگاع..

-جنات: انتو هنا

-فاهد: جنات صوتح لا يطلع، رامي اخذناه وموجود بالسيارة ويه مسرة

بچيت اكثر مهضومة اغطي وجهي بأيدي الترجف، همست بضعف وروح رايحة..

-جنات: مالك.. مالك جوه راح يكتلو

-شُهيب: ما نسمحلهم

تقرب شُهيب يهدأني وعيونه تتطاير منا ومنا اصلاً ماعرف شلون دخلو ووين الحراس وشلون اجتازوا الكل وشلون شمسون ما حس عليهم بس مو مهم المهم اخوانه اجو يساعدوه! اخوانه اجو يسندوه وما عافوه وحده!

وگفت على جهة اسمعهم يتناقشون ويتفقون بس ما افهم لغتهم يحچون مغربي وروسي يخبطون وسرييع كلش، افتهمت من حركاتهم وحركة المسدس الي بيدهم راح يدخلون الكرڤان ويغافلوهم فجأة ويضربون على الحرس يوگعوهم..

-فاهد: تمام فهمت

-شُهيب: طللقة فاهد اريد سرعتك بسررعة الطلقة لا تنتظر تتنفس واضرب الثاني

-فاهد: انطي الخبز لخبازه

ضرب كتفه شُهيب يشجعه وامروني ابقى واگفة هنا ما اتحرك، توترت گمت اطگ سن بسن خوف ورهبة من منظرهم وتحضرهم للهجوم، اشر شُهيب لفاهد يمشي وراه بخطوات غير مسموعة..

چانت ثواني قبل لا شُهيب يضرب الباب برجله يدفرها ويدخل جوه وما سمعت بعد غير صوت صلي الرصاص واحد وره الثاني ولوهم ولية حتى صوت صرخة ما طلعت منهم محد بيهم لحگ يفتح حلگه او على الاقل يطلع السلاح من جيبه..

اختفت الاصوات انرعبت لا يكون صار بواحد من الولد شي ركضت امد عيوني من باب الكرفان وتصنمت جافلة من الگاع صايرة عبارة عن دم! دم مالك المتعذب ودم الحرس الخمسة الواگعين بالگاع فاقدين الوعي او ميتين ماعرف!

مالك بعده معلگ ومغمض عيونه وشمسون متبسمر بمكانه وفاتح عيونه على وسعها يقابل ولده الموجهين السلاح عليه..

-شمسون: ولدي؟

-فاهد: خ** على كلمة ولدي ابن الكلب!!

-شمسون: على كيفك بابا حبيبي لا تعصب

-شُهيب: تريد تكتل ابنك؟؟ وصلت بيك المواصيل تكتل ابنك من دمك ولحمك؟؟

-شمسون: يا هلا بـ نمري

-شُهيب: احنه ويين وانتَ وييين

-شمسون: هو صح كلامك، بس تردون الصراحة؟ اني مبهور بطريقة المداهمة والحركات الشگاگية الصارت عفية ولدي رفعتو راسي ما راحت فلوس تدريباتكم ب**ـة بالشط

-شُهيب: نزل الحزام من ايدك!

-شمسون: ليش؟ بس لا خايف اضربك بي مثل ايام قبل؟

سحب اقسام شُهيب من مسدسه وحطه براس شمسون، بقى صامد المجنون جعفر ولا انهز بالعكس استقبله بأبتسامة وهز راسه راضي..

-شمسون: احسنت

-فاهد: هذا ليش بعده يمسلتتت

-شمسون: چنت منتظر هذا اليوم

سكت يدور عيونه على ولده ثلاثتهم وباقي على ابتسامته، طلع صوت مزعج بحلگه وفر السبحة الجوزية البيده..

-شمسون: منتظر تعرفون الحقيقة وتتحالفون ضدي

-فاهد: حقيقة انتَ لعبت علينا؟؟ لعبت بمشاعرنا وخوتنا؟؟ وهمتنا وهددت مالك لحدما اخذت صحته وعافييته!

-شُهيب: انتَ سلبت حياتنا! سلبت حريتنا وشخصياتنا!! ولدك ماعدهم كلمة وشخصية وميگدرون يخطون خطوة مناا لهنا بسببك! لانك تهددهم بكلشي يحبوه! موقعهم على اتفاقياتت تدمر حاضرهم ومستقبلهمم مسويهم لعابات بيددك تتحكم بيهم!!

-شمسون: صحيح

نزل شُهيب السلاح من راس ابوه ورجعه لبنطرونه، توجه لـ مالك ممهتم لشي وفك القيود عن ايده ورجله وهنا اخيراً مالك فتح عيونه بس شكله ما واعي، حضنه شُهيب يسنده على جسمه وصاح بـ فاهد..

-فاهد جيب اغراضه وياك

تحرك فاهد فوراً ولم اغراض مالك المحطوطات على صفحة وفجأة ومن العدم رفع شمسون الحزام البيده وضرب وجه فاهد على جهة عينه، عطتت مخترعة ويه صوت فاهد العااالي ووگع على ركباته فوراً لازم مكان عينه فاقد توازنه..

-شمسون: هاي حتى كلما تشوف عينك تتذكر ابوك اليحبك فهدي

ثااار شُهيب متخبل، فشر وسب وغلط على ابوه وشمسون يضححك بصوت عالي منتعشة روحه، من القهر تمنيت اني اسحب المسدس واطشر راس هالسايكو واخلص العالم من شره بس ااااخ!

-شُهيب: فااهد!! فاااهد انتَ وياي؟؟ تسمعنني؟؟؟ شبيها عينك جاااوب ولك

-فاهد: مابيه.. مابيه شي

نهض من مكانه حاط ايده على عينه ميقبل يوخرها، اخذله صفنة توعد لابوه وعافه بدون لا يدافع عن نفسه وراح لمالك يسنده ويه شُهيب، مشوا وياهم كلمن لاف ايد مالك على كتفه ومشوه يطلعو من الكرفان تاركين شمسون وحده يضحك ويفر بسبحته..

-جنات: ماالك.. مالك تسمعنيي ماالك اصححى

اللزم بوجهه وامسح الدم عن عيونه وحلگه وراسه، ابعد شعره عن جبينه وبقيت اصيح بأسمه وابچي ميتة من الخوف روحي راحت ياله فتح عيونه وهمس..

-مالك: جنة

-ياا روووح جنتك ماالك

حضنته من رگبته ما اسيطر على نفسي نسيت العيب والفشلة ونسيت وجود اخوته ابچي واضحك فرحانة هو بخير ويسمعني، نزل ايده من اكتاف اخوته وبادلني حضن حاار ذاب ثقل جسمه عليَّ.. باسني على راسي ووجهي ويمسح على ظهري ويأن من الالم..

بقينا على هالحال ابچي اني وهو حاضنني، وخرني عنه يخلينا نتواجه طلعت كلينس من جيبي امسح الدم من وجهه وهو يمسح على خدودي يتطمن اني زينة لو لا بدون لا يحچي عرفت يريد يسأل عن رامي..

-جنات: رامي زين هو بره بأمان

حرك راسه وذب نفس مرتاح، دور عيونه يباوع لجوانبه وعگد حاجبه الميبين من الدم المغطي وجهه، تغيرت ملامحه من الحنية والحب الي للالم والحزن الهم..

-شُهيب: الحمدلله على السلامة

رقت ملامح مالك بطريقة تقهر، اندار لفاهد يشوفه ابتسم فاهد وضرب كتف مالك المشگگ من الجلد، ايد على عينه المتأذية وبالعين الثانية غمز وگال..

-عبالي ما نلحگ عليك ونلگاك مسلمها

-شُهيب: العار ما يموت

ضحكوا ثنينهم بينما مالك بقى ساكت ويدور عيونه بيناتهم، انفاسه تسارعت وعيونه لمع بيهن الدمع، بلع غصته وحچى بصعوبة..

-اخواني

-فاهد: نعم؟ خير؟

-مالك: جنات اخواني هنا لو اتخيل؟

-جنات بدموع: هنا همه والله هنا

ابتسم مالك ما مصدگ بقى هيج عين على شُهيب وعين على فاهد انخبص، ضحك بصوت متناسي اللمه وصاح منفعل..

-ولكم انتو هنااا

-فاهد: اگلك مالك لا تلح مالنا خلگك وعيني جاي تذب دم

ضحك مالك بهستيريا وطفر عليهم ثنينهم يحضنهم، ضحكوا وياه بسعادة وبادلو حضن اخوي دافي عيوني دمعت على فرحتهم وعلى حركاتهم كل شوية يوخر وجهه عنهم يباوع لوجوههم يتأكد ذولة همه لو يتخيل ويرجع يحضنهم..

-مالك: ما جاي اصدگ.. الحمدلله يا رب الحمدلله

-فاهد: اي بس بهالسوالف تتذكر ربك

-مالك: هههههههههه جنات شوفي اخواني ما عافوني شوفيهم اجونيي

هزيت راسي اوافقه ودموعي عشرة عشرة شگدما هو فرحان فرحانتله اضعااف، باس راسه شُهيب وفاهد وثنينهم بوسوه وباسوا ايده وكتفه حضنهم لصدره يمسح على شعرهم وما اسولف على فرحتهم والابتسامة المزينة وجههم كأنهم اطفال ورجعوا لحضن ابوهم..

سندوه من جديد ومشوا بأتجاه سيارة شُهيب، ركضت قبلهم اشوف رامي بيد مسرة وحاط اصبعها بحلگه يمص بي فتحت السيارة واخذته منها ابوس بي واحضنه وابچي محترگ گلبي شلون لهيت عنه وشلون خلال ثواني اخذو مني وما حسيت عليه..

-مسرة: جنات انتِ بخير؟ اذوچ؟؟ احد مد ايده عليج؟؟

-لا لا ما لحگو

انتبهنا لـ شُهيب وفاهد ساندين مالك ويتقربون من السيارة، طفرنا اني ومسرة بالكراسي الوره حتى ينيمون مالك بمكاننا، فتحوا السيارة ودخلوا وشُهيب اشرلي اني اجي اگعد يمه..

-مسرة: جيبي رامي وروحيله انتِ

هزيت راسي وانطيتها الطفل ورحعت لمكاني الاول بقت مسرة وره وفاهد گدام وشُهيب يسوق، حط مالك راسه بحضني عاصر عيونه متألم نزلت دموعي محروگة حرگ ومسحت وجهه بردن بلوزي، حس على حركتي ولزم معصم ايدي وابتسم يهمس..

-خايفة عليَّ

جاوبته بنفس الهمس حتى محد يسمعنا..

-ططوة غبي انتَ

-لسانج لازم نرجع نشوفله حل

-فگر شلون تروحله برجليك شلوون

-هددني بـ رامي جنة رحتله واتفقت وياه وغدرني بآخر لحظة

-چان متت لو ما ملحگين عليك شُهيب وفاهد!

-بس ما متت واجوني اخواني

باس ايدي وابتسم بسعادة بادلته ابتسامة ودرت وجهي عنه اباوع للجامة و ابچي الرجفة بعدها بيه وروحي خارطة من الخوف..

-مالك: ولا ادري تخافين عليَّ هيج

-جنات: اششش كافي لا تلح

اللتفت شُهيب لـ مالك يتطمن عليه واني درت وجهي لرامي ومسرة اشوفهم ابني خانس يمها، لاعبت خده وابتسمت ويه همسة مسرة..

-مسرة: عليج الله مو يخبل؟

-جنات: اي يجنن حبيبي

-مسرة: ووولج

-جنات: ها شكو

-مسرة: حبيبج شنو شو متستحين صايرة رجلج بحضنج وعينج على رجلي

-جنات: عززا تقصدين شُهيب؟؟

-مسرة: ليش منو يخبل هنا غيره؟

-جنات: هههه عابتلج ضحكتيني ومالي نفث (نفس)

-مسرة: ضحكي حبيبي ضحكي الدنيا متسوه شبعنا من هالكلاوات المهم هموسي بخير وطُز بكلشي ثاني

-جنات: خرب روحج مثرة (مسرة)

ضحكت وباست رامي مگزگزة واعرف هالگزگزة لهموسها مو لرامي، بحياتي ما شفت وحدة معجبه ومكرشة وتحب زوجها مثل ما مسرة تحب شُهيب..

-شُهيب: فاهد شبيها عينك؟

-فاهد: زين من احد انتبه

-شُهيب: ولك منتبه بس مالك شتت افكاري شو وخر ايدك عن عينك اشوفها

-فاهد: ما ما

-شُهيب: ديلا يا فاهد

-فاهد: خلي مالك يفيدك ما

-مالك: شو اندارلي اشوفك

-فاهد: مـ...

-شُهيب: راح اللطمك على عينك الثانية واطفيهاا وخر ايدك اشووف

-فاهد: اووي صار عبصي

وخر ايده من عينه واندار النا شهكت رايحة روحي من المنظر!! فاهد عينه عبارة عن ددم عينه تنزف ددم وشخط شكبره بوجهه حافر خده حفرر!! من قوة الجرح والمنظر مالك طفر من مكانه مفزوع وجر وجه فاهد عليه وصاح..

-عيييينك فاااهد انتَ ما تحس بالوووجع؟؟؟

-فاهد: احس بس شسوي

-شُهيب: شلون هيج صار ما جاي افهم!!

-فاهد: ضربني خيسون بحزامه حسيت بالحديدة تطب بعيني وتشخط وجهي تحفره

-شُهيب: شنو هالحديدة؟ معقولة هاي كله من حزام!!

-فاهد: اذا هو يلبس حزام اعرض من الطووط لا تخلوني احچي واطشر العرض هناا

-مالك: اني سؤالي كله ليش ما كتلتو؟ توقعتكم راح تنهون عليه!

-شُهيب: اذا نكتله بسرعة نرحم بحاله ناوي اموته على البطيء نخلي يتمنى الموت

-فاهد: احححح لو تعرف شنو ناويله بس محتاجين وقت، مالك تعرف الگاع ما تريد عاريه وما راح يموت بسهولة لازم نطبخها على نار ناصية ونتأنى

وافقه الكل الرأي وتوجه شُهيب للمستشفى ما قبل مالك ينزل بس فاهد راح يشوف عينه احنه وصلونه للبيت، دخله شُهيب سانده يمشي واني ومسرة نمشي وراهم..

-جنات: شلون عرفتو الصار بينه واجيتو؟

-مسرة: سام

گالتها وضحكت صفنت ممفتهمة قصدها، گلبت شعرها كله على جهة وحدة وكملت..

-مسرة: واحد من الخطفچ يصير صديق سام وبلغه

-جنات: شوف الصدفة!!

-مسرة: مو صدفة لان جماعة سام كلهم حماية وحرس للمافيات الكبار وسام كفوء بشغله ويعرف المن يصادق حتى يعرف كلشي يحيطه ما مخلي واحد يعتب عليه وهذا السبب ابوية ميبدله بحرس الدنيا واني ما ابدل صديق وفي وذكي مثل سام..

-جنات: الحمدلله والشكر يارب وانتِ بلغتي شُهيب؟

-مسرة: اي بسرعة بلغته، حچى لفاهد وفوراً عرفوا الموضوع متعلق بمالك وصلنا للمكان وكأنهم يعرفون ومتأكدين وين راح تتواجدون

حضنتها ممتنة بادلتني الحضن ورامي راح يشرد يلعب بالصالة، گعدتها بالصالة علما اشوف مالك وشُهيب دخلوا لغرفتنا..

-شُهيب: انزلك على الفراش؟

-مالك: لا كلني دم

-ميخالف ما تگدر تمشي عدل

-لا جنات ما تحب ريحة الدم گعدني على الكرسي

ابتسمت بحب احط ايدي على گلبي، حط شُهيب كوشة وره الكرسي وگعده على كيف، وگف يتأكد من راحة اخوه وراح جاب طاولة وحطها گباله نزل ينزعه حذائه وجواريبه وشال رجليه يحطهن على الطاولة.. عيون مالك ما نزلت منه من بعيد دا اشوف لمعتهن وكمية الفرحة الي بوجهه تتسولف..

-شُهيب: مرتاح؟ تريدني اساعدك تسبح؟

-مالك: لا شكراً

-شُهيب: اني رايح للمستشفى اشوف فاهد وارجعلك أي شي تحتاجه بلغ جنات تتصل بيه واني اجيك

هز راسه مالك بدون لا يبتسم باقي بس صافن عليه، رفع شُهيب خصلات شعره النزلت على عيونه واللتفت يريد يطلع واستوقفه مالك، اندار لاخوه يشوف شنو يريد ونهض نفسه مالك من الكرسي ووگف على حيله يتمشى ناحية شُهيب..

بقوا واحد يباوع بوجه الثاني بدون لا يحچون بس نظرات عيون مالك تحچي وتفسر، تفسر اعتذار وندم، اللم وحرمان سنين، تعب وعذاب.. نزل راسه يمسح عيونه الدمعت بأصابعه المنتهية ولزم ايده شُهيب يمنعه، رجع مالك يرفع عيونه يسمح لدموعه تنزل وهز راسه بـ "لا".. ثواني وانتبهت لاكتاف شُهيب تنحني وتهتز، طلعت صوت شهگة قوية منه وشمر نفسه يحضن اخوه..

حضنه مالك بقوة يبچي محترگ گلبه وشُهيب يبچي ويضرب على ظهر مالك من وره ويحچي شي، يحچي كلام مفهوم وما مفهوم مكسور خاطره وگلبه، اوتاره الصوتية مليئة بالخذلان وكلامه يهد جبال من العتاب، نزلت دمعتي من قوة قبضة ايده يضرب على ظهر مالك ويگول بنبرة اخ محروم..

-شُهيب: شلون عفتني هناك وحددي شلوون

-مالك: غصباً عني والله جبروني يا خوية

-شُهيب: انكسر ظهري بغيابكم الغريب والقريب يتشمت بيه

وخره مالك من حضنه يلزم وجه شُهيب بثنين ايده، باس جبينه بوسة مطولة وباس خدوده ومسح على شعره من وره يثبت عيونه بعيون اخوه، حچى بحرگة وروح شايطة..

-مالك: وروحها لأمي يا شُهيب وروحها الغالية ما تركتك وحدك احلفلك براس ابني راقبتك وچنت امشي وراك على الدعسة خايف عليك من ابوك ومن الدنيا ما تركتك ولا لحظة حتى وانتَ نايم ببيتك چنت اتأكد انتَ مرتاح لو لا

-الجواسيس الالگفهم يمشون ورايه ويدخلون الشركة منك؟؟

-اي مني اي

-عبالي مال ابوك واني أشوفهم محد بيهم اذاني او حاول يعترض طريقي

-بكل عثرة چنت وياك وكل سفرة، كل كسرة وكل اللم چنت واگف وراك يا خوية وما تركتك حلم صار اروحلك واحضنك واطبطب على ظهرك بس هالحلم حوله ابوك لكابوس

حضنه شُهيب من جديد وطول عتابهم، طول كلامهم وحديثهم اللتفتت شفت مسرة واگفة وراية تتابع وحاطة ايدها على صدرها متأثرة..

-شُهيب: رغم الصار بيناتنا والعشته بفراگكم والذل العشته بس ما كرهتكم، اول مرة اعترف اني چذاب! چذبت بكل مرة گلت اكرهك وماريد اشوفك چذبت بكل مرة انطيتك ظهري واني گلبي يريد يطلع من صدري من الشوق واللهفة.. گمت اتمنى ننجمع بأي مهمة من ابوك حتى نلتقي واشوف وجهك واشم ريحتك يا مَلك

-مالك: يا حبيبي

رجعوا تحاضنو من جديد وكأنهم ديعوضون كل لحظة انحرموا بيها من بعض، تركتهم وحدهم يكملون كلامهم وركضنا اني ومسرة لـ رامي الصعد الدرج ويريد يذب روحه منه..

-مسرة: ولج هذا شگد وكح

-جنات: جده شمسون وامه جنات وعمه فاهد شنتوقعه يطلع

ضحكت تأيدني واخذته من ايدي ميقبل يتصارع وياهة ميريد احد يشيله مجرد خزرته شو هذا ابني سكت وابتسملها يبوس خدها يتلوگ وخايف..

-مسرة: لا فاهي طلعت بخزرة تتأثر

-جنات: ما متعود على النظرات العنيفة

بوسته وراضته ونيمته بحضنها ومن گدما انخلس غفى، سولفنا وسألتني كم مرة على وضعي وحلفتني تاخذ رامي وياهة حتى ابقى ويه مالك وميزعجه بس اعرفه يريد ابنه ويشتاقله احنه متمالخين ودگ معاير واحد للثاني وبس يجي رامي نسكت ونگعد نلعب وياه ثنينا..

-جنات: انتِ وشُهيب شلونكم عرفت من كيان رجعت علاقتكم

وردت خدودها خجلانة! مسرة خجلت! مو قصدي ابالغ بس حقيقةً هاي اول مرة اشوفها خجلانة ومستحية من شي، لعبت بطرف جاكيتها وگالت وعيونها تلمع سعادة..

-احنه كلش زينين

-على الخيير كلش فرحتلكم والله

-شهوبي يريد يخطبني من ابوية مرة ثانية صح بعدنا متزوجين بس هو يريد يسوي كلشي بالعلن وگدام الناس

-وابوچ راح يوافق؟

-لحد الان هو معارض بس نهايته يوافق حتى يحافظ على علاقتي بي راح يقبل ويقتنع

-وبنتچ؟

-ميوسة عندي اكيد وشُهيب من هسة بده يدور على بيت اكبر يناسبنا خطية متحمس اكثر مني ومنتظر يوم يوم على جمعتنا

-والكعبة متت فرح هاي الاخبار الحلووة

فرحت على فرحتي وطلعت هي وشُهيب واني فتت لغرفتنا شفت مالك ينزع بقميصه المتمزق، ركضت حطيت رامي بچربايته ورحت لمالك اساعده گال يريد يسبح گومته اسنده على ايدي امشي للحمام وگعدته على باية البانيو ركضت للصالة جبت كرسي ورجعت احطه بنص الحمام حتى يگعد وميتعب..

-مالك: هاي شنو

-جنات: اشش لا تحچي

-مالك: تردين تسبحيني ولچ جنة

-جنات: والزهرة ابطل وارجع لابنك

-مالك: لا لا سكتت تعالي ماكدر اسبح وحدي

-لانك ططوة

ضحك وعفس خشمي، ابتسمت وياه من همس "ططة" اعرفه يسويها بالعمدني تعود وعرف شلون اگولها صح وتعلمها بس يحب يستفزني ويگولها "ططة"..

درت مي عليه واشوف گاع الحمام صارت عبارة عن نهر احمر من الدم، ما حسيت على روحي واني ابچي گلبي متگطع من كمية الجروح الي بجسمه لحمه محفور حفر وكلما احط مي عليه تشوغ روحه..

تلمس وجهي يمسح الدموع من وجهي بلل خدي بأيده المبللة، نزلت وجهي ابچي من كل گلبي ميتة من جوه گلبي ينزف احس الوجع بروحي اتذكر شلون شمسون ساومني بشرفي واملاكي حتى ميكتل مالك ورامي وازيد بالبجي..

-لا تبچين جنتي

-امانة خلينا نروح للمثتشفي

-لا حبيبي متعود اداوي جروحي

مسحت وجهي وغسلته بلكت النار الي بگلبي تهدأ، كمل سبح وجبتله مناشف اغطي جسمه ونيمته على الفراش، المنشفة تنگعت بدمه شعوطني وميقبل يروح دكتور..

ركضت اجيب علبة الاسعافات الاولية ورجعت اقطب جروحه واداويهن، شفت بالعلبة حتى ابر بنج عنده انصدمت وما توقعت اشوف هيجي شي..

-هاي شنو مالك؟

-من احتاج اخيط اخذ نسبة بنج موضعي

-شلون تركز وانتَ متخدر؟

-يجي فاهد يخيطلي الجرح

ما جاوبت وكملت اللف بجروحه وهو هادئ واحس بعيونه عليَّ، ذبيت حسرة وجعتني ويه ما لمست الجرح الي بصدره محفور حفر حتى اللحم طالع.. لزم ايدي ثنينهن يمنعني اكمل وجرهم لشفايفه يبوسهن..

-اذا ما تگدرين عوفي اني اكمل

-لو مخلص عليك شلون بيه

-بس ما خلص! انتِ شلون ورحتي تردين تسلمين نفسج الهم؟

-منو الهم؟

زفر نفس متألم من سؤالي، هسة ياله استوعبت وطخت الفكرة براسي شمسون مو هو الراد يعتدي عليَّ راد يخلي حمايته يكملون الموضوع! قشعر جسمي واخذتني الرجفة جسمي صار يهتز واحس عيوني تطلع منها نار، لمني مالك بحضنه وحط راسي على صدره يمسح عليه..

-چنت اريده يعوفك سويتها بس حتى يعوفك وما يموتك مالك

-عيون وروح مالك حذرتچ ما تخطين أي خطوة لخاطر بشر تحطين رامي ونفسج قبل الكل! گتلج لو تشوفيهم ينحروني كدامج لا تتنازلين وتقدميلهم نفسج جناات!

يحچي ويرجف رجيف عصبية وغيرة، حضنته اكثر اهز براسي اي..

-وعد ما اعيدها والله ما راح اعيدها بعد اهده فدوة

-تعرفين شصار بيه من تنازلتي وردتي ترحين؟ تعرفين بشنو حسيت جنات؟؟ تمنيت اموت وما اگعد بعد اخذتي روحي وطلعتي من الكرفان وحققق الله

-اثفة والله اثفة

بست خده اعتذر منه واضم وجهي بصدره مقهورة وكارهة نفسي لان ما فكرت زين وردت اتنازل بس عقل ما ظل براسي من شفته بهالحال كل عقلي راح يعوفه ويحن عليَّ ويعوفني من اذكره اني بنت اخوه..

-خلص حبيبتي لا تبچين وتحرگين بگلبي

هدأت امسح دموعي وبقيت على هالحال حاطة راسي على صدره ومتناسية كلشي فات بيناتنة، كل تعب عشته والم فراق كل اذية نسيتها وراحت من بالي ماريد شي غير هو وابنه يكونون بخير ونعيش بسعادة ابدية..

-ليش حرمتيني منچ كل هالفترة جنة

طلعني من تفكيري وصفنتي صوته الهادئ، رفعت راسي اخلي وجهي يوازي وجهه، رفعت حاجبي وجاوبته بجدية..

-مثلما انتَ حرمتني وحرمت ابنك منك كل الفترة الفاتت

-ههههههههه

-شو تضحك؟

-صلفةة ماگدرلچ

-والله عشتو هو يعوفني ويروح يثرح ويمرح ويه دارلان المشگگة وعايفني اطلگ بأبنه وحدي

-لا تچذبين ما طلگتي

-المهم جبت!

-صحيح، وجبتيلنا احلى ملاك

دار وجهه على فراش رامي النايم بي وابتسم يتأمله، تنهدت بحب اباوع للعنون شلون نايم ومرتاح وما رجعني للواقع الا بوسة مالك السريعة..

-يا عاااار

-هم غلطتي؟؟ تعالي ووولچ

-لا لاا التوبة التوبة اثفة مااعيدهاا

-الا اشلع لسانج ياله تنعدلين

-امشي لللك فگوور اني اشلع لثاانك

هجم عليَّ يكتل بيه بالشقه ويتحارش ياخذ حقه عطت بكتمة لا يگعد رامي ويخترع ورغم وضع مالك المأساوي والضيم الهو بي صار مثل الحصان يمي ولا كأنه قبل شوية طلع من الموت...

عشنا احلى واهدأ يومين، مالك وضعه تحسن نوعاً ما واني اهتميت ببيتي وبي وبـ رامي، عجبني اغير اثاث البيت واسوي كله وردي ومالك صار يلطم بالهندي..

-مالك: وردي؟؟؟

-جنات: شبيك والله كيوت

-مالك: جنااات بس لا هاي تمهيدات لشيي غير متوقع

-قصدك اكون حامل ببنية؟

-خررررب حظي لا تگوليهاا لا تگوووليها

-لا شبيك شلحگ احمل بث يمكن اطلع حامل شمعرفك

-اششش والله اكلب الدنيااا شنوو بزوون وما يفيد وياچ شيي

-يوووه هثة شبيك قابل صدگ حامل وخبصت روحك

عفته ورحت للغرفة اللطم نسيت اخذ الحبة البارحة وحاطة ايدي على گلبي، دعيت ما احمل وبدلت بسرعة اتجهز لعرس صبا ومروان وطلعت للصالة اشوف مالك ورامي يلعبون ركيضان بالبيت متت من الضحك على اشكالهم مالك يركض على كيف ورامي لازم چفچير خشب مادري منين جابه ويلحگه بي يريد يكتله..

تعثرت رجلين مالك بالطاولة وراد يوگع ورامي قلد ابوه وسوه نفس الحركة ميت من الضحك والوناسة لدرجة گعد بالگاع يضحك والچفچير بيده..

-جنات: ها عيني يله كافي لعب خلونه نطلع

-مالك: اجينا حبي

شال رامي باس خده ورامي رجعله البوسة، رفع مالك ايده يسويله طگها ورامي يطگها فرحان، يمكن هالصغيرون يحب ابوه اكثر مني لانه من يكون وياه ميبطل ضحك وفرح ولعب متعلق بمالك تعلق فضييع ومالك نفس الشي، اباوعله واگول بگلبي هذا نفسه الرجال الچان خايف يصير اب ويجيله طفل لا يظلمه؟ سبحان الله..

طلعنا متوجهين لعرس صبا ومروان الاجواء خيالية!! انبهرت بجمال صبا بالبدلة البيضة المحتشمة اختارت بدلة بيها ردان ورقبة عالية اكيد بطلب من مروان حاسة ما ظل شي ويقنعها بالحجاب، طالعة تجنن بكل ما تعنيه الكلمة وكلشي چان مثل الافلام بجماله والحب الواضح بعيونها وعيون مروان ينحچي بي لسنييين عديدة..

مسرة وشُهيب اجو والحب ينفض منهم وكيان اجت وياهم، دورت على فاهد وسألت مالك عنه گال ما راح يجي بسبب عينه المتضررة بعده ما متقبل الجرح الي بوجهه وعينه الي انضربت ميتة قهر عليه ومالك متأذي على اخوه وعجز خلال هاليومين يقنعه شكله حلو وما مأثر عليه.. عن نفسي اشوفه احلى من قبل منطي الجرح شكل جذاب لا ارادي تبقى تباوعله، استغفر الله استغفر الله العياذ بالله من الخبث والخبائث..

ابتسمت من شفت لارا وهارون يتقدمون علينا، صار فترة ما شايفيها واستغربت من شفت بطنها كبرانة شوية.. تسالمنا وياهة ومثل عادتها لارا تضحك وفرحانة وسعيدة وبدون أي مقدمات حطت ايدها على بطنها وگالت بفرحة وصوت عالي..

-ولجن بناات بنااات اني حااامل

-كيان: الففف مبرووك تستاهلووون

-جنات: مبروووك شكد فررحت ياربيي

-لارا: ايي دخلت بشهر الخامس بس ما گلت الا نتشاوف وجه بوجه، تخيلن هارون طااار من الفرح من عرف ولجن اول مرة اشوفه هيجي فرحان حتى تعامله ويايه تغيرر

-كيان: سعيدة كلش بهالشي، ما عرفتي جنس الطفل؟

-لارا: عرفت عرفتت راح اصير ام ضيغم

فرحنالها اضعاف خصوصاً من عرفنا هارون من چان مراهق متمني يكون عنده ولده ويريد يسمي ضيغم وكلنا شفنا والفرحة والسعادة بعيونه من باركنالهم، عكست عينه على كيان البقت تحجي ويه لارا بحماس وتسألها عن حملها وشفت نظراته لصديقتي..

ابتسم يباوعلهن وما عرفت شنو نوع هالابتسامة هل هي سعادة ام حسرة؟ بدون مبالغة بس هذا الدا اشوفه هارون ما شال عيونه من كيان الحفلة كلها ولارا ما منتبهة او يمكن انتبهت وما اهتمت المهم هارون صار الها وهسة هي حامل وصراحة ما اتمنالها غير السعادة..

خلص العرس اللطيف على خير وقبل لا نطلع من حديقة القاعة اجه شُهيب وطلب من مالك يروح وياه لبيت ابو ملاك تسائلنا ليش وفاجأنا من گال يردون يرحون يخطبوها لـ نشوان..

-مالك: اليوم؟؟

-شُهيب: اي احنه ردنا مروان يكون ويانه بس تعرف ابوها مو فارغ وما يتواجد هواي وبس اليوم بالليل عنده وقت فراغ مروان طلب مني اروح وياه واخذ واحد شخصية وياي

-مالك: ههههههه صرت شخصية

-شُهيب: مالك لخاطر الله اذا انتَ مو شخصية منو شخصية فاضل

-فاضل: رحم الله والديك

-شُهيب: هههههه اتشاقه سيد عمي انتَ تاج وباج

-فاضل: لا لا هسة صار مالك بدالي عادي هي هاي غدرة الصحبان معروفة

-مالك: منو گدك وگد اهلك سيد معروفين انتو جيوبكم ثگيلة

غمزله وضحك وفاضل هم ضحك يدردم عليه بالفارسي، طلعوا كلهم بدلنا ببيوتنا بسرعة ورحنا لبيت ملاك مسرة ما گدرت تجي فـ رحنا اني وكيان ومالك وشُهيب ونشوان وفاضل.. استقبلنا ابوها والخدم العدهم ما شاء الله ناس كلش متمكنين وواضح الترف عليهم..

گعدنا شوية ودخلت ملاك تقدم الضيافة مبدلة ملابس العرس ولابسة سوت لونه بيجي وشال ما حاطة نقطة مكياج وتضوي ما شاء الله، گعدت ويانه البنات وكيان تبادلت وياهة اطراف الحديث عرفت هنه مو كلش قريبات على بعض بس كالعادة اني وكيان منو نشوفها نصادقها صرنا صديقات بسرعة وتبادلنا حسابات بعض..

-ابو ملاك: اهلاً وسهلاً بيكم شباب، مسيو مالك، مسيو شُهيب شرفتونا وأنرتو

لابو فاضل ونشوان بمكانهم وبما ان احنه كاعدات قريب عليهم سمعت فاضل يبسبس ويه نشوان..

-فاضل: اگلك مو چنه لبسنا؟

-نشوان: لبسة القندرة اي

-فاضل: يا عيبة العيبة

-نشوان: خلي خوية لو يعرفك ابن منو يدگلك تحية مو بس يرحب بيك بس گالوها الما يعرفك ما يثمنك

-فاضل: يمعود راضي انلبس المهم تصير قسمتكم واخلص منك ومن نگك

-نشوان: بالعباس ارگص شهر گدام لو رضا ابوها

اول من بده الحديث مالك وبنفس اسلوبه الراقي ورزانته المتعودين عليها، بالبداية حچى بنشوان ومدح بي وحول الكلام لـ شُهيب هو يكمل مدح اخوه.. حموا زايد وسووا نشوان ملاك منزه من السماء شوية ويگلولون يملك برج خليفة..

-مالك: الفلوس مو كلشي خوية شُهيب لا والله مو كلشي

-شُهيب: اي اكيد

-مالك: اهم شي اخلاقه ومخافته من الله وروحه الحلوة، تدري ابو ملاك اني قدمت عرض مغري لـ نشوان يشتغل عندي بالشركة ورفضه؟

-نشوان بهمس: هاي شوكت ولك

-شُهيب: اكيد راح يرفض ما استغني عنه اني

-مالك: محظوظ بي ماكول غيرها

-ابو ملاك: اي سمعت بمشاريع نشوان ما شاء الله ربي يزيده

-مالك: اذا صارت قسمة وتم كلشي على خير ادخلك واسطة انتَ تقنع نشوان يشتغل ويايه وويه شُهيب بنفس الوقت ما افوت هيج لقطة

فك حلگه نشوان ممصدگ ضحكت وكيان هم ضحكت وضمينا حلگنه المشكلة نشوان عباله مالك ديبالغ وبس گدام ابو ملاك هيج يحجي لكن بالحقيقة مالك كللش يحب نشوان ومعجب بشغله وديفكر فعلاً يقدمله عرض عمل وهيج راح يكون وارد نشوان اكبر وراتبه مضاعف هم يشتغل لـ شُهيب ومالك بنفس الوقت..

-ابو ملاك: نحتاج وقت نفكر واسأل بنتي وان شاء الله خير

تسالمو وطلعنا من بيت ابو ملاك، غمز مالك لنشوان وگال بثقة..

-يومين ويرجعلك الموافقة لا تخاف

-نشوان: لا بشررفك؟؟ خاف ما يقبل ويگول اني مو من مستواهم المادي

-مالك: لا فيصل الخالدي مو انسان مادي عنده اهم شي الهمة يعجبه الرجل الهميم والذكي ما يحب الخمول

من الفرحة عزمنا نشوان على العشا ما گدرت اروح رامي تنحس علينا ونعس مالك وعدهم شي يوم نلتم وهو الي يعزمهم ببيتنا، رجعنا للبيت نيمت العنون وقضيت باقي الوقت ويه مَلكي..

**

"كيان"

طلعت من دوامي ويه زميلتي خابرت نشوان الطاااير من الفرح بعد موافقة ملاك عليه مثلما گال مالك يومين ضبط ورجعولنا الموافقة وعقدهم اسبوع الجاي، فرحت على فرحة اخوية يستاهل عفونة كل خير اهم شي يتزوج ويخلصنا من جفافه العاطفي..

اليوم علساس رايحين نخطب مسرة لـ شُهيب بس تفاجأنا من ابوها گال ماكو داعي احد يتزحم ويجي يگدر شُهيب يجيب الشيخ يعقدلهم من جديد وياخذها وياه.. شُهيب يگول ابوها چان حزين ومسرة كلش مقهورة بس وعدته ما راح تعوفه وكل يوم تزوره هي وميس..

وفعلاً بنفس اليوم شُهيب جاب الشيخ العصر وتم العقد رغم همه ما تم طلاق شرعي بيناتهم بس فادي راد يعيدون العقد بوجوده وبموافقته.. وهيچ رجعوا طيور الحب سوه وانجمعوا ببيت واحد وعاشت ميوسة بين ام واب يحبها اكثر من ابوها الحقيقي..

كلشي ديمر بـ سلاسة ما شاء الله عيني باردة بس شمسون ابد ما تدخل او حاول يخرب أي شي وعرفنا ليش، مالك گال اول مرة يشوف ابوه هيج خايف وشايل هم لدرجة حرس شمسون ديگولون مشدد حمايته وجايب اكثر من واحد خايف من ولده لا ينتقمون منه عايش برعب حقيقي وديتعذب عذاب نفسي..

والحلو ولده ديلعبوها على البارد وياه، يكملون شغلهم ويمشون بأوامره وهاي الخطة يكملون وياه بدون لا يحسسوا بتغيير وبعدين يضربوا ضربة قاضية بس شمسون ذكي ويعرف اكو شي دينحاك وره ظهره وباقي هيج لا هو اليكدر يضم نفسه ويهرب بسبب اتفاقيات الشغل العاقدها ولا يكدر يصالح ولده..

رجعت للبيت اسوي عشا الي ولنشوان، صبا ومروان بشهر العسل سافروا لـ ايطاليا وديعيشون اجمل ايام حياتهم حسب كلام صبا وفرحة مروان، كملت المعكرونة ونصيت النار ورحت للصالة..

-اگلك شوشو اليوم اتصلت بيه ملاك

-نشوان: شگالتتت ملاك رووحي شگاالت

-اثگل ولك لا تترعن

-دحچي لا اجي و..

-يبوووو راح احجي شبيك مخبل، كالت اشترت فستانها وتريد الخطوبة تكون معزولة زلم عن النسوان حتى تاخذ راحتها تحط مكياج وتلبس فستان مفتوح

-شررررريفة وبالشرف معرووفة وحاير شرد اوصفنهااا

-اي خوش خوش

-هااي النسوان العفيفة الشريفة المؤدبة المحتشمة اروحلها ستين فدووة

-صراحة مال مؤدبة فـ كلش اي ومال محتشمة فـ حشمتها تخبل ومال شريفة اتفق بطريقتي الخاصة عرفت بحياتها ما دخلت علاقة حب ولا عدها اصدقاء شباب

-احوووووي يا فرحتييييي على عناادك عليووي راح اتزوج شرررريفة

ضحكت على سوالفه وحماسه ورجع يگابل الحاسبة يشتغل ويهز رگبة، حطيت العشا ومن فرحته ما قبل ياكل ظل بس يسولف بيها وفكر وين راح يعيشون وشنو يسوي وشلون راح يدللها ويقدملها كلشي تحبه وماعندي شَك راح يقصر وياهة بشي لان هاي طبيعة نشوان يدلل ويحب من كل گلبه..

اندگت الباب راح يفتحها نشوان وفرحنا من شفناهم شُهيب ومسرة وميوسة وجايبين ماريا وياهم، تسالمنا ودخلناهم جوه تبادلنا اطراف الحديث شوية وشُهيب صاحني يريدني، صعدت وياه لغرفتي حسيت يريد يفاتحني بموضوع اشتغل عدهم بالشركة هاي ثالث مرة يگلي واني اتردد احب شغلي وماحب اعوفه بس وگف گلبي وعقلي وكلشي بيه من گال بجدية..

-كيان فاهد زارني البارحة ببيتي

لا ارادي حطيت ايدي على گلبي اداري دگاته اخاف لا تفضحني، تسارعت انفاسي انتظره يكمل بس انشلع گلبي من سكت يفرك بيده..

-كيان: فاهد بي شي؟؟

-شُهيب: لا

-لعد شنو شُهيب شو سكتت؟

-فاهد خطبچ مرة ثانية

فز گلبي وكل جروحي بقيت متصنمة وعيوني مثبتتها بعيونه وهو يكمل..

-هاي الصراحة مو اول مرة، قبل فترة خطبچ وگال يحتاج يتأكد من شغلة بينه وبين شمسون، ورجع خطب بيوم عرس مروان اتصل بيه وگتله انتظر وحلفته ما يحاچيچ هو ما اجالج للدوام مو صح؟

-لا ولا مرة

ضحك وگلب عيونه مستهزأ وگال..

-ماكو حاجة تچذبين كيان اعرفه اجالچ وكل يوم جاي تتشاوفون

-احنه؟؟ لا ابد والله

-كيان؟

-والله العظيم وروح امي وابوية ما شايفته ولا شايفني

-عجيب!

-شنو العجيب؟

-لا خلص انسي، المهم شنو رأيج بالموضوع انتِ مقتنعة بفكرة رجوعكم؟

-مادري

-كيان تتذكرين قبل طلاقكم من گتلج فاهد راح يشوف سارة بالمستشفى؟ هو شرحلي ليش راحلها وفهمني الموضوع مو مثلما متصورين هو نساها وانتهت قصته وياهة قبل لا تبدي والفترة الغاب بيها لانه چان مسجون كيان واني اعرف وهو يعرف وخايف يكون گلبچ بارد ناحيته وما تحبي بعد بس جاي يتوسل تنطي فرصة

سكتت ما رديت عرفت القصة كاملة وعرفت فاهد ما گلي هو بالسجن حتى مينزل من عيني، عرفته چان خايف يكون هو المتورط والمجرم واكرهه، عرفت ليش ما بررلي سبب غيابه، بس الما عرفته هو فاهد عباله اني ماحبه بعد؟ عباله نسيته وما اريده؟ هو ميدري اني لهذا اليوم اسهر للـ 2 بالليل انتظره يجيني جوه شباك غرفتي اتأمل اللگاه هناك ويعلگلي اغنية ويغنيلي وياهة، ولا يدري يفز گلبي من يذكرون اسمه ويهيج گلبي العاشق المجروح..

-شُهيب اريد وقت افكر

-تمام

گام وگال بجدية..

-راح انطيچ اسبوع تفكرين بيها وانتِ المسؤولة عن قرارج

حسيت شُهيب ناشف ويايه مو نفس قبل حنون وحچايته لطيفة، واستغربت اكثر من جملته "انتِ مسؤولة عن قرارج" گالها الي من قبل بس چان عداوة ويه فاهد زين شبي هسة؟

-شهوبي

-نعم

-شبيك شُهيب ليش احسك ضايج؟

-مابيه

-شُهيب بداعتي تحچي شبيك ماتحمل تكون قاسي وياي

-قاسي؟! اني قاسي كيان؟؟

-شبيك شُهيب

-من شوكت انتِ تخافين من عدنا؟؟ من شوكت انتِ تخبين علينا طراگيع كياان!!

-يا طراگيع والله كلشي ممسوية

-فاهد چان صريح وحچالي كلللشي! حچالي عن تهديدات ابوية الج والطيحان الحظ الصارلچ بسببه!؟

شخصت ابصاري وگلبي صار يرعد، ليش حچاله فاهد وشلون شنو استفاد من حچى لـ شُهيب؟؟

-كيان: چنت مجبورة والله

-ادرري مجبورة ادررري حچالي ودافعلج! كال جانت تسوي كلشي يگوله شمسون لانه يهددها بأخوتهاا!

-والله يا شُهيب خفت عليكم والله العظيم اكثرر من مرة وجه قناص على نشواان والله

-چان اجيتيلي!! تعالي احجيييلي

-احچيلك؟ نشوان يموت بنفس اللحظة! ما راح تلحگ عليه اصلاً شُهيب حس بيه واعذر خوفي على اخوووية

-ااااااااخ يالقههههر ولج اني شمسوون يتلاعب بأختي واسكتتله

-حباب فدوة نصي صوتك حبااب لا يسمعون نشوان ومروان

-لا تخافين ما راح يعرفون شي! بس وحق من انزل القراان على محمد يا كيااان اندمه واطلعع كل خوف ورعب عيشه الچ من عيوونه اخلي يتمنى المووت وما يحصله!!

شمرت روحي عليه احضنه وابچي مرعوبة اخاف نتزاعل وبعد شُهيب ميصدگني ويشوفني چذابة..

-شُهيب بيمن احلفلك وتصدگني مو ذنبي

-اصدگچ حبيبتي، لا تبچين والله الا اندمه هالعار

-بس انتبه لنفسك حباب

-خليها عليَّ

باس راسي ومسح دموعي، بعدني ارجف من الخوف لزم ايدي يسيطر على رعشتهن، باسهن وگال بأبتسامة..

-ننتظرچ تفكرين وترديلنا جواب

هزيت راسي بـ اي عافني وطلع من الغرفة عايفني وحدي وگلبي يرررگع هم خوف وهم سعادة بنفس الوقت، افكر شنو نهاية شمسون وفجأة يجي ببالي فاهد ويطغى على تفكيري، احتاجيت اطول بأجابتي حتى ميلزمها عليَّ فهيد ويگول رديتي الموافقة بسرعة اعرفه هالمسودن يكرهني بالساعة الگلت بيها موافقة..

اسبوع مر وشلعت گلبه بيومين بعد ياله رديت الموافقة علما رجعوا مروان وصبا وتم عقد نشوان وملاك، اني گلت اي منا برمشة عين فاهد جاب الامة العربية كلها واجونا للبيت، فكيت حلگي ما مصدگة حتى الشيخ جابه عود يعقدلنا گدام اخواني! عزه بعينه فشلني الرجال گدام العالم وصار يصيح من الدرج..

-حضررري روحج يا مرررة نص ساعة ويعقدلنا الشييخ

-كيان بهمس: گبررر فشلناا

-مسرة: هههههه خلي فرحان ماكو احد غريب شبيچ

ضحكت وبدلت ملابسي بسرعة علساس عگب باجر نعقد بس ماتحمل وجابه واجه، لبست فستان ماروني وحطتلي مكياج مسرة وجنات حطت الشال فوگ راسي علمود العقد.. گعدو الزلم بالاستقبال واني وجنات وماريا ومسرة وملاك وصبا وامها گعدنا بالصالة نسمع الشيخ ياخذ وكالتي..

نطقتها واعتلت الهلاهل من البنات ضحكت من كل گلبي اول مرة يهلهلن بس والله طلع منهن شي، راحت جنات تجيب الضيافة ورحت وياهة خطية متندل كلشي هنا اني محضرة كلشي من الصبح بقى بس واحد يوزعهن..

-نشوان: كيان تعالي

-كيان: اجيت لحظة

-نشوان: ولج تعاليي فضحنا هذا

-ليش شصاير

-يريد ياخذج اليوم

-وين ياخذني؟

-فاهد: اهووووو وينها ولج كووووري

-كيان: عزه بعينيي هاي كدام الزلم ديعيطلي هييج؟؟

-نشوان: لا راحو بقينا بس احنه اخوتج

-فاهد: وخرن ولجن.. بس والله خوش تهلهن سمعت صوت وحدة وچان حلو منو بيجن هاي اعترفن؟

-مسرة: دروح لكوريتك لا تضيع وقت

-فاهد: والعباس كللشي تحچي مسرة قيثارة صح وللللج كووري وينج يا مرررة

دخل للمطبخ چنت متحمسة وسعيدة بشوفته بس جفلت من المنظر، شخط چبير على خده وعينه متضررة، ركز فاهد انظاره عليَّ وگال بجدية عكس المرح الچان بصوته..

-مو وكتها تخترعين مني كيان

بقيت ساكتة وصافنة عليه، بلع ريگ مرتبك وحط ايده يغطي عينه ودار وجهه عني، انتبهت لروحي ولصفنتي الغبية وطلعت من المطبخ بسرعة وركضت اصعد فوك والصدمة بعدها محتلتني..

اجوني البنات يباركولي ويصفگن ويغنون الي ابتسمت مجاملة بس عقلي كله وياه، جنات ما جابتلي طاري فاهد تأذه سألتها كم مرة بس ما گلتلي عينه اليمنى انضربت وجزء من وجهه تشوه!

حضرت جنطتي بعقل سارح والبنات ويايه ما عافوني، ودعت اخواني وطلعت من بيتهم بعدما وصوا فاهد عليَّ بس چان هاادئ، هادئ بطريقة الكل حس بي شي ولاحظ الخمول الصابه..

دخلت وياه السيارة يسوق وباقي على هدوئه، اللتفتت اباوع لوجهه وداخلي يعتصر من الالم ما حسيت على روحي طولت بالصفنة لحدما هو گال..

-راح احاول اصلح الوضع

-كيان: شنو؟

-احاول اصلح وجهي

من كبر الصدمة ما جاوبت! الغباء استولى عليَّ وما رديت عليه اصلاً ماعرفت شنو اگول وشنو انطق.. بلعت ريگي ودرت وجهي عنه وبقينا على الصامت لحدما وصلنا البيت..

نزلت وهو نزل اغراضي وجنطتي دخلت البيت استقبلتني ام خالد بس تعجبت من اسلوبها وملگاها، سعيدة وفرحانة بوجودي أهلت وسهلت بحرارة وركضت تجيبلي عصير وضيافة وتهلهل وتبوس بـ فاهد..

-ام خالد: كلللللللووووش مباارك حبيبي وليدي فهودي مبارك رجعت كوريتك ونورت بيتك

بوسها فاهد وتشكر منها واخذ جنطي وصعدهن لغرفتنا فوگ، اول ما شفته صعد انداريت عليها وسألت مزعوجة ومقهورة..

-شصاير ام خالد؟؟ شبي وجه فاهد؟؟؟

-ام خالد: سودة عليَّ من راح يساعد مالك ابوه ضربه على وجهه وشوهه وشوه عينه الطبيب گال چان انطفت عينه للتالي لو طابة الحديدة للقرنية بس ربج ستر انشخطت شخط ورغم هذا ما يشوف بيها زين يكول مغوش ومايكدر يركز بيها هواي يدوخ

-كيان: وشلوون؟؟ يبقى وجهه هيججيي؟؟؟

صرخت منفعلة محترگ گلبي وحظي النحس ويه سؤالي نزل فاهد، جمد على الدرج يباوع عليَّ وعلى ام خالد عضيت شفتي السفلية وركضت اصعدله افهمه ما اقصد الاهانة وصراخي چان من القهر بس ما سمعني وطب للغرفة وسد الباب وراه..

ظليت بره اللوم بروحي شلون هيج قهرته وكسرت گلبه شجااني، لملمت روحي واستجمعت قوتي ودخلت الغرفة سمعت صوت الدوش بالحمام ينفتح، اخذت ملابس ورحت للحمام الي بالغرفة الثانية سبحت و بدلت ملابسي بسرعة وحضرت روحي تعطرت ومكيجت مكياج خفيف واخذت نفس عميق ورجعت للغرفة لگيته واگف يدور بكنتوره على شي يلبسه..

-كيان: هلو

-امم

انقهرت من رده ورحت اگعد على الچرباية، جر تراك وراح للحمام يلبسه انصدمت بالزايد! يا يوم فاهد بدل بمكان خاص؟ اصلاً فاهد ميلبس ملابس ويتهستر منهن انوب اخذله تراك كامل وراح يلبسه؟؟

گعدت افكر وارتب كلامي شلون راح افهمه اني ما مزعوجة من شكله اني بس مقهورة وميتة من الحرگة على الصار بي، راحت عيونه الصفر الچان يحبهن ويمكن مترجع نفس قبل..

طلع من الحمام منطيني ظهره ابد ابد ما اللتفت عليَّ وخلاني اشوف وجهه، وگف بصف الميز يمشط شعره وانتبهت لظهره من وره عضلاته كبرانة بمعنى چان يذب روحه وحرگته بالجم، گمت من مكاني اوگف وراه ناوية اسولف واشرحله بس كسر گلبي من سبقني وگال..

-حچيت ويه الطبيب گال وجهي راح يتعدل كله مسألة وقت

-وعينك؟

اندارلي يواجهني، يطير عيونه منا ومنا ميخليها عليَّ، تقدمت عليه ولزمت وجهه بثنين ايدي اثبت عيونه بعيوني، همست بخفوت..

-وعيونك فهودي؟

ذب حسرة وهز راسه مأيس، بلع ريگه وگال بحسرة..

-مالها علاج كوري.. طفت عيوني الصفر

-عادي

-شنو؟

-عيوني الكورية كلها الك

ابتسم وصغرت عينه بالزايد، دار وجهه فوراً من شافني اباوعلها هو لحد الان ما متقبل الحقيقة بس مستحيل اعوفه يعيش معاناته وحده واني اعرف شلون اطلعه من حالته..

-شفايتلك انطيك عيوني الكورية بوس ايدك وجه وگفه

-خوش خوش

-كيان: ابو عين العوصة

وهنا وگع قناع فاهد الحزين وصار يضحك بصوت عاااالي، ضحكة حقيقية مو تمثيل ضحكة طالعة من گلبه لدرجة عيونه دمعت، اعرف شلون اغير مزاج المخبل مالتي يتونس على هالسوالف وراح احقق الي يريده، صفگ ايده وگال بمرح..

-خرررب عقلج كوري متت ضحككك اشتعلو اخوانج الجررب

-تروحلهم فدووة

-خاب طييري يرحون فدوة لعيني العوصة ههههههههههههههه

-باوع تعرفني ما اجامل واحچيها بوجهك لان اعرف ماعندك مشاعر ومتحس بس قسماً بالله صاير شكلك هوت بيها

-اي اي هوت صح

-وروح اميي فد لايگتلك العين العوصة وهذا الجرح خاف چان شكلك شوية مال مجرمين هسة صرت مجرم عن حق وحقيق

-احححح افتخررر

-ادري بيك

-تدرين كوري اني هم گلت صاير اشگ دباعي الصكوك

-دوليي منيلك صكوك

-انتِ بس تغارين

-هو منو الچان يضم وجهه عني جدي؟؟

-تره ما جنت اباوع لوجهج حتى ما تلعب نفسي وانحرم من العشا اليوم

-ههههههه نذل

-اموت عليج كوووري مشتاقلج اشتعلتت امي الغبرة

-واني مشتاقتلك حبيبي

-تروح عيني العوصة فدوة لكلمة حبيبي

-ههههههه اموت عليها

وگفت على اطراف اصابعي وبست عينه ابتسم وجرني من خصري يحاوطه، بوس خدي وراسي وقبلني بهدوء..

-شكد مشتاق لريحة الفراولة والكرز

-واني مشتاقة لعيونك الصفر

-تروح تروح وترجع لقنادرري الصفرر

-وظيفتي احافظ على شخصيتك واجرح مشاعرك العضروطية فاهد

-عفية عليج حبيبي

-احبك

-ميت بيج كيان

-جذاب

-اهوووووو بدينا بالتمسلت، بعدين تعالي ليش شليتي گلبي ورجعتي الموافقة وره تسعة ايام؟؟

-لان بكيفي

-عود عبالج اعبرها؟؟؟

-هاااا؟

-اطلع القضى والمضى اطلع هالتسعة ايام من عينچ

-اهووو هو اني ردت ارفضك وجنات قنعتني اوافق

-لو رافضتني ماكووووو...

-اييي شتسوي؟؟؟

-اجي اشگچ واششگ اخواانچ الجرررب

-فنننننك شُهيب يطيح حظك

-عادي واني ارجع اطيح حظج

-عااار

-يعني مو بارد؟

-هههههههههه مسودن

-مسودن بيييييييچ

شالني واني اضحك واضرب بظهره متت من السعادة من صار يسولفلي عن حبه واشتياقه الي ما خلاني انام لحد الصبح احنه سوه ما خلى شي بنفسه حتى طبخ خلانه ننزل نطبخ سوه، المسودن خلانه نطبخ مندي لحم بالستة الصبح!!

-كيان: عزه بعينك فاهد

-فاهد: ولج جوعان خليني اشحن طاقة و...

-كيان بهمس: اششش اسكت ولك ام خالد شفتها تتجسس علينا

-يعني اتطشر العرض؟

-خرررب ولك اشش كافي حباب

-كوري اريد اخذلنا صور وفيديو حتى كلما اسافر واشتاقلج اشوفه

-شنوووو؟؟؟

-شبيچ صور وفيديوات النا واذا هسة يله گولي cheezzzzz

طلع تلفونه واخذلنا صورة ضليت صافنة وجلدت ذاتي من جوه على تفكيري الطايح حظه همزين ما انتبه لـ نيتي وما علق عليها..

خمسة ايام عشتها بالعسل وياه، الي يعيش ويه فاهد مستحيل يضوج او يمل يخترع اختراعات عجيبة حتى يونسني ويغير من مزاجي، باليوم السادس رحت وياه للطبيب وگال عينه مالها چارة ولازم يتأقلم بس حجمها راح يرجع نفس قبل لا يظل باله بس تاخذ وقت..

مرت فترة على زواجنا كلشي تمام ورجع فاهد لدراسته واني لدوامي وجنات هم رجعت للجامعة وحياتنا حلوة وهادئة، صح كل يوم احط ايدي على گلبي اخاف لا شمسون يظهر من جديد ويخرب حياتنا بس ما صار هالشي، وبيوم اني ارتب بالغرفة اجاني فاهد ذب كتابه على الميز وگال..

-اسبوع الجاي نسافر للعراق حبيبتي

-كيان: نسافر؟ يعني حتى اني؟

-اي كلكم البنات

-ليش اكو شي فاهد؟ لا تخوفني فدوة

-لا حب بس عدنا شغل ويه عمامي يله جهزي نفسج....

**

"مسرة"

گلبي لعب من شُهيب گال راح نروح للعراق، اني متأكدة هو شال فكرة السفر من راسه ليش هسة ديريدنا نروح؟ والزاد ضوجتي اكرم ما قبل يجي للمطار وينطي الموافقة لسفر ميس متت قهر وردت ابقى بس تذكرت موضوع امي اريد احچي كلشي للعلوية فـ اضطريت اعوفها ويه صبا ومروان..

صعدنا الطيارة ومالك وجنات وابنهم گاعدين ورانة وكيان وفاهد گدامنا والبنات كلنا نتسائل شنو الموضوع وشنو منتظرنا هناك؟ لحدما وصلنا بيت العلوية الف فكرة وفكرة اجت براسي خصوصاً من سمعت مالك يگول لاخوانه..

-كلشي يطلبه منكم شمسون توافقون عليه تمام؟

-شُهيب، فاهد: تمام

تسالمنا ويه العلوية وولد عمهم وبنات عمهم كلهن هنا، قسم منهم تزوج والقسم الثاني لا ومن ضمنهن فيروز، فرحت بشوفتها وعرفت بعدها ما متزوجة وللان ترفض كل من يتقدملها، توزعنا على التخم والعلوية حاطة رامي بحضنها وتغنيله..

-العلوية: هلا بيك هلاا وبأمك لا هلاا امك لحم هووش تهيج كل بلاا

ضحكت جنات تتذمر على كلام العلوية وبادلتها العلوية بضحكة سعادة بوستها وبوست رامي وگعدتهم بصفها.. هوسة ولمة حلوة واجواء ولا اروع قضينا هالليلة ببيتهم، انطونا كل ثنائي غرفة والعلوية تمشي وتسوي هوسات وگفلات بعوچيتها فرحانة لان الاخوان رجعت علاقتهم حلوة ببعض..

صعدت لغرفتنا، نزعت ملابسي وبدلتهن بشي مال نوم، گمت للميز اسوي روتيني واتعطر واباوع لـ شُهيب من المراية باله مو ويايه صافن بالسگف وباقي على الصامت تسائلت بداخلي ليش مو مثل كل يوم عادةً من اسوي روتيني الليلي نبقى نسولف سوه وكلمن يحچي عن يومه بس شبي اليوم؟

گمت من مكاني ونزعت الروب اعلگه وتمددت بصفه، ما طلع من هدوئه الا من حطيت راسي على صدره وتلمست لحيته..

-مسرة: بالك وين حبيبي

-بالشغل

مديت ايدي سويتها بحركة x وسندتها على صدر شهوبي وحطيت حنچي عليهن، ابتسمت وگلت..

-شغل شنو هذا الماخذك مني

ابتسم على وضعي وحركاتي ومسح على شعري بيده، قربت نفسي اكثر ورفعت حاجبي امثل الضوجة..

-ماقبل يشغلك أي شي عني اغار

-لو هيج الغيرة لو ماريدها

-ههههه اگلك هاي جناوي نست جنطتها اليدوية يمي وبيها ممية رامي خاف تحتاجها وتستحي تجي تاخذها رايحة احطها بباب غرفتهم وارجع انتظرني مو تنام تره ازعل

-ما انام منتظرج

طلعت من الغرفة ورجعني صوته، فز من الچرباية واجه يركض عليَّ فاتح عيونه صايرات بگصته..

-مسرررة لبسسسچ

-ياا نسيت ما منتبهة

جريت روب ثخين وطويل مو نفس الچنت لابسته، شده هو الي وباس راسي ويحچي بين سنونه..

-شددي لا تخبلينا بهالليل

-ههههههه راح اشده والله

-اني اخذ الجنطة انطيني

-يووه هموسي دقايق ما اطول

گوة هدني عبالك راح اروح لغير دولة ضحكت على تعلقه وبقى واگفلي بالباب يراقبني، مثلت دا افتح حبل الروب اللعب بأعصابه خزرني وسوالي اني اعلمج بيده، شديت الروب بسرعة ورگصت شوية بالباب واضحك..

-شُهيب بهمس: اووويلي لو اللزمچ

-مسرة: فننك

-اني اعلمج وديها ورجعي بس انطيني صبر

-تهددني ابن شمسون؟

-اهدد ونص قيثارة

-اوكي اقبل تهددني بس لان شعرك حلو

-ولج يللة لا يكعد احد جيبيها اني اخذها انطيني

-لا لا عيب جنات محجبة خاف تفتح الباب وما لابسة شال

-يله بسرعة

-شو تتأمر؟

-مسرراات

-ههههههه رايحة اووووي ابوسك

سمعت ضحكته الخفيفة وظلينا نتداهر لحدما غبت عن عينه، تمشيت بالبيت اظلم اكيد الكل نام، نويت ادگ بابهم واعلگ الجنطة باليدة واروح.. وصلت قريب غرفتهم وشفت ظل شخص بباب غرفة جنات ومالك فاتح شوية من الباب ويباوع للي بداخل الغرفة..

عگدت حاجبي متسائلة منو ممكن يكون؟ وشديسوي؟ هيئتها مال بنية بس معقولة ما حسوا مالك وجنات اكو شخص ديراقبهم؟ تقربت اكثر بدون لا اطلع صوت وشميت ريحة تلعب النفس گبت.. عبست ملامحي متقززة من الريحة بس ما فكرت بيها زايد بسبب تحرك الشخص الي واگف..

هربت اضم نفسي بالدرج واراقب من مكاني، شفت البنية الواگفة تفتح جبتها وتطلع چيس من جيبها ونثرت محتواه بالباب وتبسبس بكلمات، انخمش گلبي خوف ورهبة فوراً صار عندي هبوط وزارتني دوخة قووية بصعوبة سيطرت على توازني وثبتت نفسي..

ثواني ورفعت راسها تباوع من الباب، نزعت الشال والجبة گدرت اشوف لابسة دشداشة خفيفة وقصيرة، وخرت القراصة من شعرها وفتحته تنثره على اكتافها، دگت باب الغرفة ورجعت تنثر من الچيس وضمته بصدرها اول ما سمعت صوت احد يتقرب، دقيقة وفتحلها الباب مالك بالفانيلة الداخلية وبجامة......

يتبع.....

━━━━━━  ━━━━━━

بارت انلموا بي حبايب القلب كلهم 🙈♥️

عدى فيروز وفاضل 😩

+البارت انقسم لنصفين بسبب طوله!! 🥲

تعالو انستااا يا روحي 🙈🤎

#ابناء_الحسوم "شمسون"

بقلمي: زهراء السلامي ❤︎

لطفاً لتنسون التصويت + التعليق بين الفقرات + متابعة لحسابي 😍.

منذُ اللقاء الأول راهنت ان بيننا طريقٌ طويل، يتّسع لألفِ لقاء... ♥️

━━━━━━  ━━━━━━

ثواني ورفعت راسها تباوع من الباب، نزعت الشال والجبة گدرت اشوف لابسة دشداشة خفيفة وقصيرة، وخرت القراصة من شعرها وفتحته تنثره على اكتافها، دگت باب الغرفة ورجعت تنثر من الچيس وضمته بصدرها اول ما سمعت صوت احد يتقرب، دقيقة وفتحلها الباب مالك بالفانيلة الداخلية وبجامة..

-مالك: هنادي؟

جحظت عيوني مصدومة!! هاي هنادي مرة ابو جنات! بس شنو چانت تسوي وشتريد منهم بنص الليل؟

-هنادي: هلو مالك شلونك

-بخير

-هنادي: اكدر افوت احجي وياكم

-جنات مو هنا نايمة بغرفة العلوية اليوم

-يااا حرامات

-اي هي بغرفة العلوية اذا ترديها

-امممم يله عادي احجي بس وياك اكدر افوت جوه؟

-هسة اني اطلعلچ بس اللبس شي مناسب

-لا لا بسرعة تعال مستعجلة

جرته من ايده تجبره يطلع وهو معارض يريد يفوت يبدل، حسيت اكو شي غلط من شفتها تستقتل تخلي يطلع وتباوع لرجله تريده بس يعبر الباب اكيد الموضوع متعلق بالمادة الذبتها بالگاع.. وصلتني فكرة هاي الحية وشنو براسها ما ترددت ولا ثانية وظهرت نفسي وبيدي جنطة جنات..

-مسرة: مالك همزين شفتك طالع هاي جنطة جناوي بقت عندي.. اووه هاي هنادي هنا؟

-هنادي: هلا مسرة

-مسرة: وين جنات؟

-مالك: بغرفة العلوية واجت هنادي تريد تحاچيها

-مسرة: هاا لعد روحيلها حبي لا تتأخرين الوقت تأخر

-هنادي: لا عادي احاچي مالك وهو يوصله لجنات، مالك اني اوگف هنا انتظرك

راحت توگف على جهة تفرك بيدها وصوتها يرجف، باوعلها مالك وشاف ارتباكها حس بيها شي مو طبيعي.. مديتله الجنطة اخذها من ايدي وهمست همس شفايف..

-مسرة: شفتها ترش شي بباب غرفتكم

عگد حاجبه بس بسرعة فك العگدة يبين روحه طبيعي وهز راسه بـ اي، وصلتله الفكرة اخذ مني الجنطة وگال..

-شكراً مسرة، هنادي من رخصتج اجاني اتصال مهم وراح اتأخر لا تنتظريني اذا تردين احجي ويه جنات مباشرةً.. تصبحون على خير

سد الباب ودخل جوه، فتحت ضوه الممر ابتسمت تك خد وباوعت لهنادي المتوترة، بلعت ريگها ترجف رجف من فوگ ليجوه وعبرتها.. رجعت لغرفتنا وحچيت لـ شُهيب كلللشي فز على حيله وما بيتها ركض للعلوية يحچيلها الصار جنات كامت تلطم وركضت تريد تروح لمالك ولزمتها العلوية..

-العلوية: وين مووليه تردين تدوسين على السحرر

جبرتها تگعد بس هالليلة ومتصعد واتصلوا بمالك يبلغوا ميطلع من الغرفة الا من العلوية تعالج الموضوع، الصبح كملت العلوية وطش الخبر بالبيت كلله انفضحت فضيحة "هنادي سوت سحر لـ جنات ومالك"..

لزمها صاحب ابو جنات وطييح حظها كتلها كتل موت گوة جرتها العلوية منه ومالك طردها من البيت بس جنات ما قبلت لزمتها تبچي دمم وترجف من القهر تصيح بوجهها..

-جنات: لييييش شنو بيناتنااا وتردين تموتيناااا لييييش تردين تدمرين حيااتي

-هنادي: اكررررهچ اكررررررهچ ادعيي ليييل نهااار تموتيننن لو تطلگييين وتديحين بالشواررع متستاهلين رجال مثل مااالك انتِ ما تستاهليي

انطتها جنات راشدي فرت وجهها واللحقته براشدي ثاني وتعيط..

-حقيرررة نذذذلة چلبببببة انتِ هنااادي چلبببببة ما خليتي واااحد يعتب عليج ما خنتي ابوية وياااه واحنه ساترتات عليج وساكتاات بس لهنا وبسسس وصلت بيج المواصيل حطيتي عينج على رجليي؟؟ ولج حتى رجللي ما سلم مننج يا ووصخخة

جرو هنادي من جنات جر ملختها تملخ ايات وهدى وفيروز بصعوبة فاككوهن وطردوا هنادي بره البيت، انهد حيلها المسكينة وماتت قهر العلوية صح حلت موضوع السحر بس انتكس حال جنات وبعد ما طلعت من غرفتها اليوم كله..

المغرب وصل شمسون ووياه هارون واخوانه استقبلهم الكل وحتى ولده بوسوه طبيعي ولا كأن ضايجين منه وگعدوا وياه واكلوا وكلشي طبيعي، گعدنا كلنا حول السفرة وعيني على فيروز الي تباوع لـ شُهيب بنظرات غريبة تفاجأت من تصرفها ومافهمت شبيها الا من لزمتها تسنيم وكالت..

-تسنيم: صلي على محمد فيروزة لو جان خير الج ابوج يوافق حبيبتي

-هدى: لا حبي حتى لو خير ابوها عار وما راح يوافق

-فيروز: فال الله ولا فالج هددى

-هدى: حبي شبيچ اعلني العنوسة ويايه يا روحي

-فيروز: ولج فاضل دزلي رسالة يبلغني باعن باعن..

طلعت الرسالة تراوينا كلنا وقرتها بصوت هامس..

"السلام عليكم انسة فيروز، شلونج ادعو ربي تكونين بخير، فيروز اليوم وصلت للعراق شُهيب اتفق ويايه راح يحچي ويه والدچ بموضوعنا"

-فيروز: واليوم شُهيب حاچاني

-مسرة: شنو حاچاچ؟

-فيروز: باعي، چنت واگفة اساعد بمواعين الغدة هو اجه يحط فنجان الگهوة مالته بالمغسلة، تقرب مني كلش وهمس بيني وبينه..

-فيروز احتاجچ بالحديقة شوية

-مسرة: يمممممااااا

-فيروز: دخليني اكمل خيةة

-مسرة: يله كملي كملي

-هدى: فيروزة نريد تفاصييل عميقة لا تنجلط الفرخة

-فيروز: صار، المهم اني گمت اتراجف شصار بيه گلبي يرعد ونفسي ضاگ خفت صاير شي ويه ابوية وراح يواجهوني بالحقيقة.. نشفت ايدي وطلعتله بسرعة لگيته واگف يدخن..

-فيروز: ها شُهيب؟

-شُهيب: فيروز اتصل بيه فاضل

هو گال اسم فاضل لو الكشرة شگت وجهي گبر طمني فضحت روحي، ضحك شُهيب من شافني ودار وجهه عني مرة ثانية يسوي روحه يتأمل أشجار الحديقة..

-شُهيب: اليوم وصل فاضل للعراق وجايب اهله كلهم راح يخطبوچ رسمي من ابوچ، ما راح ننطي ابوج مجال يرفض بسرعة فاضل جاب ابوه حتى هو يحاچي وجه بوجه ويعرفه عن نفسه

سكتت ماعرف شجاوب، اخذ نفس من جگارته وابتسم..

-راح يوافق من يعرف منو اهل فاضل

-منو اهله؟

-ناس بالا بالا

ابتسمت على كلمته هاي حچاية عمو شمسون من يگول على واحد كلش زنگين، كمل شُهيب يحچيلي عن اهل فاضل وتفاجأت بي ولا ادري اهله هيج متمنكين ومعروفين..

-شُهيب: مشكلة عمي ما انطاه مجال رفض اول ما عرفهم عجم بس فاضل اصله فارسي بس همه واهله كلهم يحچون عراقي مثلي ومثلج

-اي گالت مسرة

-وعمي الله يسلمه عباله فاضل يريد يتزوجچ طمعان بفلوسج بس من يعرف ثروتهم وامكانيتهم راح يرتاح من هالناحية ونلتفت نقنع باقي عمامچ وتتم المسألة

هزيت راسي بـ اي ونزلته خجلانة مهما يكون هو ابن عمي وماعندي ذيچ الميانة وياه، ترخص مني واني شردت جوه وهذا حالي من الظهر لسه گلبي يررررگع..

-فواطم: خية ماطول شُهيب راح يطب بيها يعني تصير لا تخافين

-فيروز: ياارب ادعو ويايه بنات امانة

-مسرة: حبيبتي يارب

دعينا وياهة والمسكينة كاعدة على نار، بقت تلوب بمكانها متوترة حتى عشا ما اكلت وما شفنا ابتسامتها لحدما شفنا شُهيب من بعيد يطلع من الاستقبال وابتسم لـ فيروز وحرك راسه بمعنى "اي"..

طررنا فرح واعتلت الهلاهل من بنات عمها كلهنن العلوية ظلت صافنة متعرف شكو وفيروز انگلبت حمرة من الخجل وضمت وجهها بين ايدها تضحك وفرحانة.. اخيراً ابو فيروز اقتنع بـ فاضل بعد ما عرف اهل فاضل منو وشنو من املاك يملكون وفلوس شايلين عجيب هالبشر شگد طماعين..

-هدى: ولجن بقينا اني وتسنيم عوانسسس

-فواطم: مو تنسوني اني هم

-هدى: اهووو اي ولج ىبقى الخايس غياث ماعرفنا منو يحب

-فواطم: تخيلن يحبني الي هلااااا

-هدى: اني متأكدة يحب فيروزة گولن ليش؟

-البنات كلهن: ليش؟؟

-هدى: لان شفت وجهه اصفر هسة وره ما عمو ابو فيروز حچى بموضوع فاضل وبلغ عمامي

-فيروز: يبووو همزين ما صرتله انتن شايفات غياث والله فاهد الثاني

-كيان: ولي لجج ما اسمحلج تحجين على زوجي سر سعادتي

-فيروز: ما اقصد شي والله بس وحشش غياث وحش بالعضلات والطول من يعبر من يمي هيج ارفع راسي اباوعله چني نملة گدامه

-هدى: وفد مسرررربت وطايح الحظظ جسمه مرگع بالوشوم ابن الصايعة

-تسنيم: لا ولجن تاب

-هدى: اي صح تكول العلوية انعدل ويه فهيد من ترك فاهد المخدرات والشرب كل الشلة تركوا

-فواطم: بشرفج كيان شلون قنعتي فاهد يتغير؟

-كيان: مو اني قنعته هذا شرط اخواني حتى ارجعله وبالعقد انكتب هم

-هدى: خايبات كفووو ذولة الزلم الخشننة

اللتموا الزلم والنسوان كلنا بالصالة الچبيرة ضحك وسوالف وشمسون ماخذ راحته فرحان ومترندح بگعدته، ضحك ضحكته المشهورة وگال وهو يفر بسبحته..

-شمسون: ههااههااهههاهها على شرف گعدتنا ولمتنا اريد اطلب من ابو هيثم شي

-ابو هيثم: تفضل خوية

-شمسون: انتَ تعرف بـ نمري تزوج مو صح؟

انخمش گلبي وعصرت طرف شال فيروز النازل، عيوني مركزة ويه شمسون راح اللتهمه الرجفة اكلت جسمي اكلل ويه جملته القادمة..

-شمسون: بس انتو تعرفون احنه مانريد بناتنا يطلعن للغريب، واحنه عدنا عادي تعدد النسوان وولدنا اغلبهم ماخذين ثنين ولهذا اني اجيت اليوم وتعنيت حتى اطلب ايد تسنيم لـ نمري شُهيب

شهگت طالعة روحي وويه شهگتي گمز شُهيب من مكانه معترض ووگف وياه مالك، بعدهم ما حچو وطفر غياث من مكانه وعاط بحرگة..

-عمي جعفر اني طالبها منه صار سنييين! سنييين واني انتظرهاا انيي رجال عزاابي مقتدر مادياً وشهادة وگدام كللل الحضور ومن رخصة ابوية اطلب ايد بنت عمي تسنيم على سنة الله ورسوله!!

-هدى بهمس: بنات اني بحلم لو بعلمم

-تسنيم: بنات

-البنات: هاااا

-تسنيم: جاي اسمع عدل لو يتخايلي؟

-هدى: عدل خية عدل غياث الساقط خطبج

-شمسون: احنه خطبنا اول عمو غياث

-غياث: عمي اني اولى بيها اني عزابي وحاچي ويه عمي صار اربع سنيين على تسنيم وكلل يوم يأجل موضوعنا ماعرف شنو غايته وليش يسوي هيچ بس والعبااس ابو فاضل وابو راس الحاار اسويهاا دمم لو تسنيم راحت لغيرري

-هدى: احووو

-فيروز: احااا

-كيان: احووو

-مسرة: ولجن راح اگوم ادووس ببطنهمم

-تسنيم: صدگ هذا ديتعارك عليَّ؟؟

قاطع الحديث صوت شُهيب..

-شُهيب: صلي على محمد غياث محد ياخذها منك! ابوية استعجل وخطبها الي اني متزوج ومرتاح بحياتي وما اتزوج على مرتي لو تنگلب الدنيا

-شمسون: شُهيب!!!

-شُهيب: يابة اسمحليي مو قصور ببنت عمي بس اني متزوج وحياتي مستقرة ما مفكر بمرة ثانية لا هسة ولا بعدين

-مسرة: راح اتهور واكوم ابوسه

صارت ملاسنة حادة بين شُهيب وابوه وفزعوله مالك وفاهد بينما غياث شال روحه ورگعها من القهر وميت من عم تسنيم (الوصي عليها) لانه ساكت وما گلهم غياث خاطبها..

-غياث: هسسسة اجيب الشيخ يعقدلناا هسةة

-شمسون: هو بكيفكك؟؟؟ جاي نگلك احنه نريد البنية هسة مَلِك يعقد عليهااا

-مالك: انتَ ظل ظل اشمرها منا ومنا مو هي طووبة

-غياث: لا ملك ولا اميرر تسنيم الي واگص شااربه الي يعترض طريققيي

طلع من الاستقبال مخلف وراه صدمات، ضحكت العلوية وريحت ظهرها على القنفنة، دگت بعوچيتها كم مرة حتى ينتبهون عليها وگالت خاتمة الحديث..

-العلوية: جعيفر ولي غاد لا تظل تزاگط جدامي

-شمسون: يمممة؟!!

-العلوية: وصمممه شني بنيتي لعابة وتشمر بيها على ولدك المتزوجين؟ اگعد لا اهينك اگععد

-شمسون: انتو الخسرانين بكيفكم

-العلوية: راضين بالخسارة، هسة بنيتي تسنيم العاقلة الفاهمة المتدينة تقرر تريد ابن عمها غياث لو تبقى ببيتي واحطها بنص عيني

نزلت راسها تسنيم خجلانة، ضربت كتفها هدى تداهرها وطول الكعدة ما رفعت راسها انكسرت رگبتها وهي على هالحال وزاد خجلها من سناء اخت غياث تقدمت تهمس لـ تسنيم..

-سناء: غياث يحبچ ومتولع بيچ چم مرة خطبچ من عمي وما رضى ينطي وما اسولفلج من خطبوچ لـ شُهيب اول مرة وسافرتي هناك

-هدى: شصار شصار احچي

-سناء: غياث چان بالبصرة ميدري تعرفين دوامه هناك ومن رجع سألني عنج ما كدرت اگله انتِ انخطبتي وسافرتي وره اسبوع عرف من عمي ويا يابة شصار بي والعباس ابو فاضل شهر هو نايم من المرض ميت حرگة الدنيا طلعت من عينه مات اخوي ماات

-تسنيم: من رجعت حاچاني

-فواطم: صدگ؟ شگال؟

-تسنيم: سلم عليَّ بحرارة وچان يضحك وفرحان بطريقة غريبة اني عبالي سكران خفت منه وطبيت جوه اركض

-سناء: ههههههههههههه سودة عليَّ ولج لا ما سكران بس ما مصدگ ماتزوجتي

-كيان: شوف سبحان الله

-مسرة: على شنو؟

-كيان: شلون دارت الدنيا والاحوال وما تزوجت تسنيم شُهيب ورجعت لـ غياث

أيدتها بهزة راس بينما تسنيم بقت هادئة، جبنا حلويات على گعدتنا وگهوة وچاي وفاكهة وبنص الگعدة صاحوا رجع غياث وجايب شيخ يريد هسة يعقد على تسنيم!

-هدى: احااااااا شنو هالحركات الشگاگية ماعرفتك غياثووو

بسرعة بسرعة العلوية اجت لتسنيم تاخذ رأيها بس ابد ما ضغطت عليها، حچتلها غياث چان واحد مسربت زايعته الگاع بس صارله سنة مستعدل ومتغير وضعه وبشهادة الكل هل هي راح تغير حاله للاحسن بعد لو متتحمل هيچ مسؤولية؟

-تسنيم بخجل: اغيره للاحسن

-العلوية: چا سمعونا هلاهل خايباات كللللووووشششش

هلهلوا البنات الها بفرح واشوف وجه شمسون گام ينطي اللوان ميت من القهر..

-تسنيم: بس علوية ماريد اعقد اليوم، خليها ويه فيروزة

-العلوية: تمم وحاضر ومن عيني يا احلى البنات

اجلوا خطبتها لحدما يتم موضوع فيروز بالكامل وهسة صار اكو مخطوبات ثنين بالعشيرة، ادري ادري سمعتها هواي هنا يتزوجون بالجملة مثلما صار ويانه اني وكيان وجنات..

تأخر الوقت صعدت لغرفتنا اتصلت بـ ميوسة وسبحت، كملت روتيني الليلي بالحمام وطلعت لافة روحي بالبرنص وشفت شُهيب هستوه يدخل وينزع بقميصه..

-شُهيب: خابرتي ميس؟

-اي قبل شوية اتصلت كامرا هي زينة وتسلم عليك وتگول گولي لعمو سووهيب اني احبه ومنتظرته يجيبلي باربي

ضحك يرجع راسه ليورة ابتسمت على ضحكته وگعدت على الفراش اتأمله..

-شُهيب: جبتلها اليوم لا تخاف وصيت بنت عمي عبير عدها بنات وگلتلها منين يشترون هي راحت اشترتلي وحدة

-خطية يا عيني

-شوفيها بالكنتور حطيتها

ابتسمت وگمت متحمسة، احب اللعابات والباربيات اكثر من ميس طلعتها من العلاگة تجنن وشكبرها ميوسة راح تطير من الفرح..

-شُهيب: مسرات اليوم حچيت ويه فيروز الظهر

بقيت منطيته ظهري ما اللتفتت، غمضت عيوني وتنهدت مرتاحة وسعيدة لانه شاركني بدون لا اسأل.. انداريت عليه اسوي الوضع طبيعي وسألته..

-ها علمود الشغل؟

-لا على موضوع فاضل...

حچالي بالحرف شنو گالت فيروز بدون زيادة ولا نقصان وسولفلي من اللتقى فاضل بعمه وشلون حلوا الخطوبة بمهر مقدمه 200 مليون ومؤخره 250 مليون!!

-مسرة: بس مو هواي شهوبي؟

-شُهيب: حقچ حبي مو انتِ مهرچ چان ربع دينار مقدم وخمسمية مؤخر

-ههههههههههههههه شُهيب شبييك

-هههههه لا صح كلامج هواي ومبالغ بي بالنسبة للعايشين هنا لان تعرفين دخلهم اقل من الخارج واساساً عمي من طلب هالمهر لبنته حچاهة حتى يطفرهم بس ابو فاضل خيب اماله وقبل بدون معارضة

-ههههههه حييييل

-انجلط عمي وما كفاه مهر قوي راد فاضل يسوي بيت هنا حتى يجيبها ويجي بوقت العطل

-وبيت هناك اكيد مو؟

-اي وشرط كم شرط تعجيزي اني خجلت وطبيت بهدومي من السادة (اهل فاضل) بس ما شاء الله عليهم ناس كرماء ويردون السعادة لابنهم

-هموسي ليش هو ما عايش ويه اهله؟

-عنده عداوة ويه عمامه وسافر لأوربا.. المهم عوفج من فاضل تعالي تعالي شنو هالريحة الطيبة

-يوووه شُهيب ممغيرة عطري

-شنو وردة وتمشي؟ خوما وردة؟

-اسكت شُهيب احسني زعلانة

-يا ستار بدينا

-اي شنو هاي ابوك راد يخطبلك تسنيم!

-خلي يخطب واذا؟ المهم ما قبلت

-احترگت حرگ والله

-ادري وشميت ريحة العطاب وصلتني ما شفتيتي حميت زايد

-هههههههه اكرهك لا تظل تلعب بأعصابي

ضحك وجرني يداهر بيه ويضوجني بسوالفه يتونس من اغار يستمتع واشوف عيونه تلمع سعادة وفرح، للفجر احنه گاعدين جبت كرزات وجلاتين وعصير اناناس ومتونسين ويه بعض، بنص گعدتنا اجاله اشعار من گروب "الاخوة الصالحة"..

فتح الرسالة طلعت بصمة، گلب عيونه بملل وضحك وهو يأشرلي انتبه وياه وهو يفتحها، البصمة من فاضل..

"فاضل: الله اكبر.. الله اكبر.. اشهد ان لا اله الا الله.. اشهد ان لا اله الا الله.. يله اخواني قوموا من نومكم وتوجهوا للعبادة جزاكم الله خير حان الان موعد صلاة الفجر، الذي يكمل صلاته يرسل كلمة (تم)"

متت انتيهت تخربطت من الضحك، ضحكت ضححك مال شهور وشُهيب باقي مبتسم ميضحك عبالك متعود..

-مسرة: عزا شنو هاي شُهيب؟ انوب مسمي الاخوة الصالحة؟؟

-هذا گروبنا مال صلاة وعبادات فاضل كلما يأذن يدزلنا بصمة تذكير

-واختلاف الوقت هسة شلون؟

-شُهيب: اي ما يهتم لازم الكل يصلي، اهاا واول واحد هسة كتب "تم" عمر..

راواني صدگ كتب تم، وفوراً فاضل جاوبه ببصمة..

"فاضل: انچب وين لحگت تصلي وكتبت تم؟ اتقِ الله عمر وعوف امور الدنيا (واتقوا يوماً ترجعون فيهِ الى الله)"

جاوبه عمر ببصمة..

"خوية كملت صلاة كملتتتتت وراس نشوان كملت"

دز نشوان بصمة فوراً يون بيها..

"نشوان: يا بوووية راسي ااااخ يا راسي راح ينفجر راااسي"

"عمر: طايح الحظ شگد عار"

"نشوان: لا تچذب وذب بطلك وگوم صلي"

"فاضل: استغفر الله والعياذ بالله من الخبث والخبائث! لا اسمح بهكذا عبارات فاسقة هنا!!"

"عمر: خاب وعلي ابن ابي طالب چذاب ما شارب ولا ضايگة صار سطعش دهر نشواان وروح ابوي اخرب خطوبتك واخليك تطلع تلطم مصلخ"

"نشوان: لا تجيب عرضي على لسانك اخو عليوي العار"

"علي: ولك اني شكوو اشتعلت روحك"

-شُهيب: تمالخو

-مسرة: والله تونسون

-شُهيب: هاي العركة راح تبقى مستمرة للصبح فـ خليني اگوم اسبح واصلي احسن

-لو تفاككهم حرامات تخرب صداقتهم

-شُهيب: تخرب صداقتهم؟؟ حبي اني وياچ نتخارب وذولة الثلاثي ما يتخاربون يومية على هالرنة احنه

اخذ منشفة ودخل للحمام يسبح، كمل بسرعة وطلع لبس تراك ووگف يمشط شعره، تعطر وطلع سجادة من الميز وفرشها، اذن بصوت خافت كبر وبده يصلي..

متمددة على بطني ورافعة رجلي، مثبته ايدي جوه حنچي واباوعله من وره مبتسمة، كملها لان هي بس ركعتين ولزم تلفونه يشوف الگروب ضحك بخفة واندار عليَّ يگول..

-اجه مروان رزلهم

-مسرة: هههههه يستاهلون

هز راسه بـ اي وكمل يگلب بتلفونه وگاعد على السجادة ما گام، مديت جسمي وقربت نفسي اله وهمست بأذنه..

-شهوباتي

-ههههههه ولج مو واني گاعد على السجادة

ما اهتميتله وكملت اهمس وهو مركز ويايه..

-علمني على الصلاة شُهيب

اللتفت عليَّ بشكل سريع وعگد حاجبه مستغرب وكأن گتله تعال اكتلني وشرحني وگشر جلدي عن جسمي..

-شبيك

-تردين تصلين؟

-اي

غابت ملامح الاستغراب واستبدلها بالجدية بدون لا يسألني شي ويخلي الموقف يصير غريب واستحي من طلبي هز راسه وگام من سجادته..

-بعيني

-اريد اللتزم واصلي وياك كل يوم

-بعيني

-اذا اخربط تنبهني

عدلت گعدتي ويه ما گام، باس خدودي وراسي وابتسم يهمس بيناتنا..

-بعيني بس اول شي لازم تسبحين

هزيت راسي مستجيبة ما سألت ليش اسبح مرة ثانية واني قبل شوية سبحت، طبقت كل تعليماته بدون مرادد نزعت اظافري ومسحت الصمغ، مسحت مكياجي كله حتى الكحلة گال لازم اشيلها ودخلت اسبح متحمسة واغني..

-شهووبي اوبي اووبي لا تلعب بجيوبي

-مسرة يلة يمعودة

-شهوبي اوبي اوبييي لا تلح يا اوبيي

سمعته يضحك ويضرب الباب حتى اطلع بسرعة، كملت وطلعتله لبست ملابسي ومشطت..

-هسة اعلمج على الوضوء

-اعرف اتوضى صبا علمتني

-ممتاز يله بالمرة الجاية تتوضين هسة ما يحتاج لانج غسلتي الغسل الخاص وتطهرتي

-تمام

مدلي احرام صلاة ماعرف منين جابه بس يمكن من دخلت اسبح اخذه من العلوية لان بي ريحتها، لبسته وفرشت سجادتي وعلمني خطوة خطوة.. اچذب اذا اكول ماعرف اصلي نهائياً اعرف بس مو كلشي، بحياتي ما شايفة احد يصلي گدامي غير شُهيب وصبا الي بآخر فترة اللتزمت..

-شُهيب (بصوت عالي): السلام علينا وعلى عباد الله الصالحين السلام عليكم ورحمة الله وبركاته.. الله اكبر الله اكبر الله اكبر

ضربت رجليه ثلاث مرات ضربات خفيفة وباوعتله من اللتفت الي وگال بأبتسامة..

-تقبل الله

-خلصنا؟

-اي صليتي مسرات

ابتسمت سعيدة حسيت وكأني مسوية انجاز عظيم، انجاز افتخر بي وراح اكون مفتخرة واني اسولف لـ صبا وابوية عنه والظاهر فرحتي چانت كلش واضحة بسبب ضحكة شُهيب اللطيفة وهو يبوس طرف انفي ويگول..

-ما اتعب واني اگول احبچ

-احبك شُهيبي، بس سؤال

-جواب

-شلون طلعت شريف وتصلي وابوك شمسون؟

ابتسم وگام من السجادة يلمها، نزعت الاحرام ولميت السجادة حطيتهن على جهة وگعدت بصفه على الچرباية..

-الاعتراف بالذنب فضيلة واعترف اني ساقط

-لااا عاد مو لهدرجة

-لا والله ولوما عمي سلوان (ابو مروان) چان اني دايح بالشوارع ومن مجزرة لمجزرة

-ضبك ويه ولده

-بالضبط، علمني على الصلاة مع العلم عمري چبير چان من بديت اصلي بس بقى يراقبني ويه ولده وما فرق بيناتنا ويا ويله ويا سواد ليله الي يتكاسل ويعوف الصلاة يلعب بينا طوبة

-بس خلاكم تلتزمون بيها

-صح وتعتبرله صدقة جارية هاي بعد مماته ومو بس الصلاة علمنا عليها چان حريص حتى على شغلنا والفلوس الي تدخل لجيبنا وعلى الاكل الي ناكله والشرب الي نشربه.. للامانة هو مو متدين وچان دائماً يگول اريدكم احسن مني

-الله يرحمه

ايدني بهزة راس وتمدد على الچرباية، ضرب على صدره بمعنى تعالي ابتسمت وطفرت عليه احط راسي هناك واسمع دگات گلبه التنبض الي..

غفى بسرعة واني بقيت اللوب بمكاني شگد حاولت انام بس عبث ببالي شي وراح اموت حتى اتممه واريح گلبي، تسحبت من عنده حس بسرعة وگام يشوف وين اروح..

-منعسانة راح انزل للحديقة شوية

فرك عيونه نعسان وگال..

-ماشي اجي وياچ

-لا شُهيب نام انتَ نعسان

-لا لا عادي

اعرفه يقلق عليَّ انزل وحدي خصوصاً وولد عمه هنا، اباوعله عيونه تغفي وتعبان كلش، مسحت على ايده وگلت اطمنه..

-ما راح اروح للحديقة اگعد يم العلوية واذا شفتها نايمة ارجع اصعد

-اخذي تلفونج

-اوكي حبيبي نام

رجع ينام وحضن مخدتي عجيب هالرجال ولا يگدر ينام فارغ اليدين، لبست روب طويل ونزلت اتسحب لغرفة العلوية مثلما توقعت لگيتها گاعدة وصوت ادعيتها تحاوط البيت..

دخلت يمها سلمت وگعدت وهي كملت تدعي الدعاء، بنص دعائها سكتت ويه ما صار صوت انثى تصيح وتبچي وتضرب بالحايط.. انعصر گلبي ويه صوتها ليا درجة واصل عذابها وعلى اثره فقدت عقلها..

-مسرة: هاي بدور؟

-العلوية: اي عمت عيني

-بيبي اتذكر مرة حچيتيلي عن بنية من گرايبكم هربت ويه زوجها ما لگيتوها بعد؟

-لا والله عجز جعفر يدورها مالها اثر

غيمت ملامحي وفبضت على ايدي بقوة، نترت بحقد هامس..

-اكيد ما راح يلگاها علوية!

-ليش؟

-لانه قتلها!

شهگت ودگت صدرها، ويه صوت شهگتها بدور انجنت بالصياح والبجي صوتي لا يمكن يوصلها بس ماعرف ليش صارت تصرخ وحمت الاجواء بالزايد..

-مسرة: البنية الهربت زوجها اسمه فادي الـ^^^^؟

-اي اي!

-غير لقبه ولقب زوجته اول ما سافرو لـ فادي وثرى قيثارة

فتحت عيونها على وسعها ضايعة حروفها، اردفت بنفس النبرة..

-واني بنتهم

ما زادت كلماتي الا صدمة تتلو صدمة للعلوية، ما قصرت وكملت اسردلها القصة كاملة شلون شمسون وهم ابوية راح يوگف وياهم وخلى امي تسجل نص املاكها بأسمه واستغلها واستغل بعدها عن اهلها وبالنهاية قتلها بسيارتها من عرف بيها حامل بولد خاف يكبر هذا الولد ويطالب بأملاك امه متناسي وجودي او مستهين بيه لأني بنية..

-مسرة: وحلفت ما انام ليلي وما ارتاح الا اخذ ثاري من كتال امي!

راح صوتها المسكينة لدقيقة خفت يصير عليها شي من جحظة عيونها ووجها التغير لونه خفت تنجلط من قوة الكلام وصدمتها بأبنها، ردت اگوم اصيح مساعدة يتلاحگولنا وعاقت حركتي من لزمت ايدي ترجعني بمكاني.. باوعت بعيونها الواثقة ولتنفسها الي اعتلى، بلعت ريگي ويه جملتها التالية..

-اخذي حگچ من عيونهم يما!

-شنو؟

-ريحي گلبچ واخذي ثار امچ المظلومة! ما اوگف ويه ابن بطني على غلط جعفر مات بالنسبة للعلوية! عزيني بوفاة وليدي وروحي كملي الاجيتي علموده!

-يعني اكتله؟

عصرت عيونها متألمة، هزت راسها معترضة وگالت وملامحها يقطرن وجع..

-سوي كلشي الا الموت، ادري محروگ دمچ بس لا تخسرين الدنيا والاخرة وتكتلين بشر خلي ربچ ياخذ حگچ من هالناحية

-علوية همه السبب بدمار حياتي! ابوية فقد عقله بسببهم! دمر روحه ودمرني وياه اطب بضيم اطلع من ضيم بسبب شمسون وولده! منو من ولده لحد هاي اللحظة ماعرف بس راح اعرفه وعيونچ الا اعرفه!!

شددت على ايدي بقوة وگالت بصوت متوسل..

-جعفر گدامج بس ولده لا.. احلفج بروح امچ ما تكتليهم كلشي يسووا مجبورين عليه اجيبلج القران واحلفلج انه اعرف احفادي شلون عايشين اقره عيونهم واعرفهم متعذبين بس شبيدي عليهم شبييدي وابني الكافر ما ينكظظ

ما ردت اكسر گلبها واأذيها ترخصت منها ورجعت للغرفة بس حطيت راسي على المخدة نزلت دموعي.. نزلت دموعي لان گلبي الحاقد ما راضي ينسى ولان الي اريد انتقم منهم هسة صار عدهم زوجات وعائلة ومرتاحين ومستقرين والي اريد انتقم منهم يصيرون اخوان زوجي..

نزيت على ايدين شُهيب تحاوط خصري ويدفن وجهه بشعري، عضيت شفتي متألمة ويه صوته الناعس..

-مسرة عوفي اخواني

-سمعت محادثتي ويه العلوية؟

-لا

-لعد شلون عرفت

-من اول مرة اجينا بيها للعراق چنت اعرفج ناوية على شي وحتى زواجنا چان مبني على مصلحة من طرفچ وطرفي

-طرفك؟

-ابوية رادني اتزوجچ كم شهر ونتطلگ حتى نص املاكچ تصير الي

-شُهيب!

-وهذا السبب رفضت الزواج وتفاجأت من حرجني وخطبچ گدام الكل بالحفلة، احبچ ومتمنيچ بس ما ردت ننجمع بهالطريقة وعرفت انتِ قبلتي بيه هم لغاية معينة

-وعرفت الغاية

-قبل حاولت اقراچ اكثر من مرة وما وصلت لنتيجة بس من حچيتيلي عن موضوع امچ بديت اربط وعرفت نزلتي اليوم للعلوية حتى تبلغيها وتنطيها خبر راح تنتقمين

-شُهيب

-ماريد تحطيني بموقف صعب وتخيريني بينچ وبين اخواني مسرة اترجاچ عوفيهم.....

**

"كيان"

الصبح گعدنا واتفقنا نطلع للسوگ، افترينا وتعشينا وكل الاجواء حلوة والكل سعيد.. كملنا اسبوعين احنه بالعراق الاوضاع تمام ورجعنا بعد عقد فيروز وتسنيم چان عقد بسيط وخطية ما لحگن يگعدن ويه خطيبهن بسبب ابو فيروز متخبل وعلى گولة هدى مگروص..

رجع فاضل ويانه بس مطنگر لان ما شاف فيروز زين، ضحك شُهيب يداهر بي وفاضل يرجعها اله من يخابر فيروز گدامها ويتغزل بيها..

-فاضل: يا بعد شُهيب والخلف شُهيب وعمام شُهيب وخوال شُهيب واصدقاء شُهيب واخوان شُهيب و...

-فاهد: هيوووو احنه شعلينااا

-فاضل: اششش خلوني جاي احچي ويه حبيبتي وگلبي وروحي وحياتي الي هي بنت عمكم شرفكم وعرضكم

ضرب رجله مالك مكشول ضحك فاضل وزاد بالغزل احنه البنات دنسمعله وتسرسحنا شلون بـ فيروز، وصلنا بالسلامة ورجعنا كلمن لبيته وحياته الطبيعية ولدواماته..

رجعت من الدوام تعبااانة ومزاجي ضارب اول ما طبيت للبيت شميت ريحة تلعب النفس راح اموت صار فترة اشم ريحة مو حلوة بالبيت ووين ما اروح لاحگتني، طبيت للمطبخ ام خالد واگفة تگلب بالگدر، سلمت عليها وسألت..

-ام خالد شنو هذا على النار؟ شو الريحة مو طيبة كلش

-ام خالد: هههههه اي مطبگ كلم هذا ريحة الكلم مو كلش بس هو طيب

-كيان: ها عاشت ايدج، اني رايحة انام اذا اجه فاهد صبيله غدة فدوة

-بعيني

صعدت للغرفة بس ذبيت ملابسي ونمت والنومة نومة للعشرة بالليل ما گعدني غير مخدة فاهد الي انهبدت على راسي..

-فاهد: بس نوووم بس نوووووم لا اكل لا شرررب لا حياااة بس نوووم

-كيان: هوووو هيچ يگعدوون الوااااحد

-سمم ومرررض خبلتيني اطلع نايمة اطب نايمة اصيع نايمة **** نايمة كااافي

-هاي شبيك فهيد اتعب بالشغل

-كيان بديت اشك بشغلچ كيااان

-خليني انام شوية بعد فدوة

-ماكو گومي اكلي شي ام خالد تگول لا ريوگ ولا غدة على لحم بطنج من البارحة

-فاهد ما اشتهي ماريدد

جرني من ايدي يگومني غصب ودفعته عني ولا ارادي سديت خشمي لعبانة نفسي..

-فاهد: شنو

-فاهد شنو هاي ريحتك شساالفة

-شبيه؟ هستوني سبحت

-ماعرف مو حلوة مو نفس كل يوم

شال قميصه يشم بروحه وانوب شم جوه اباطاته وايده وحتى انفاسه وعاگد حاجبه مستغرب، كتمت انفاسي ماردت اخجله بس صدگ ريحته متنطاق شعجب مو من عوايده..

-فاهد: اروح اسبح مرة ثانية واطلع اللكاج كاعدة وماكلة شي

-تمام

اخذ منشفة وفات يسبح، گمت لميت شعري ولبست روبي ونزلت اصبلي غده بس يممة شصار بيه هاي شلون ياكلوه ريحته استغفر الله متنحمل حشى نعمة الله.. اكلت لگمتين من التمن سادة خشمي وگوة اتجرعة وطلعت لبن من الثلاجة اشرب بلكت معدتي تهدأ تفور وتوجعني..

اجاني فاهد للمطبخ مبدل ملابسه ويعدل بشعره المبلل وگف بصفي يفتح الثلاجة وماتحملت ريحته صارت اسوء ركضت للمغسلة وفرغت كلشيي ببطني اتقيء روحي طلعت وحيلي انهد..

-فاهد: كياان شبيچ يا عيني

يمسح على ظهري وازيد اني، دفعته عني مقهورة من نفسي ليش مدا اطيقه وريحته عبارة عن قرف، ماكدرت اواجهه بهالشي غسلت ومثلت اني زينة وشردت اگعد بالصالة وحدي بس ما خلاني! يبووو ما خلاني وحدي ولحگني..

-شبيچ كوري شنو سالفتج

-فاهد احبك

-واني احبج

-بس تكدر تطلع منا فدوة

-ليش؟

-لان.....

ما كملت الجملة ورجعت اتقيء تخببل على وضعي شالني شيول وركض بيه للحمام وصاح لأم خالد تكول للحارس يحضر السيارة حتى نروح للمستشفى، وگفت ام خالد بباب الحمام تطمن عليَّ وتضحك فرحانة..

-فاهد: ام خالد وكتها هسة تضحكين؟؟

-كيان: تتشمت بيه باعلها باااوع

بچيت مقهورة منها اني بيا حال وهي تتمضحك حرگت گلبي..

-فاهد: شوفي خليتيها تبچي ليش هيج ام خالد مو هاي مريضة خطية

-ام خالد: ههههههههه يمة مو مريضة هاي

-فاهد: وهذا الزواع الذبته شنو؟ ماي ورد؟؟

-ام خالد: ههههههه اظنها حامل ولك فهيد وهاي نساة

رفعت راسي جاحظه عيوني اباوع لفاهد وهو نزل عيونه يباوعلي وفاتح عيونه، رمش كم مرة يستوعب وسألني بسرعة..

-صار شگد؟؟

-كيان: ما انقطعت

-ابد؟

-لا

-فاهد: لا ام خالد مو حامل گومي كوري نروح للمستشفى

-كيان: لا ما احتاج مستشفى صرت احسن بس اريد اتمدد

لح عليَّ ياخذني ما قبلت ما اشوف حالتي تستوجب، اجه يشيلني ماتحملت اشم ريحته وسويت روحي محتاجة مرة ويايه اخذتني ام خالد للغرفة وفاهد يمشي ورانه.. نيمتني على الفراش تغطيت وطفت الاضوية وطلعت واخذت فاهد وياهة..

ماكدرت اغفى شبعانة نوم وضعي استقر ومعدتي تحسنت، تمشيت اطلع من الغرفة وسمعت صوت تبسبس بين ثنين ميزت اصواتهم ام خالد وفاهد يحچون بالصالة الجوه، ردت اعوفهم وارجع بس سمعتهم جابو طاري اسمي وفاهد عصب، وگفت اتسمع عليهم اشوف شنو السالفة..

-ام خالد: لا تعاند فاهد

-فاهد: اهوووو ام خالد انتِ بطلي هالعناد وعوفي البنية بحالها

-ام خالد: صدگني حامل كل اعراض الحمل عدها

-فاهد: كياان مااا تگدر تحمل شنو نسيتي الصار بيهاا!

-ام خالد: لعد تظل هيج طول عمرك بدون بزرة؟

-فاهد: سدي الموضوع للمرة الالف اگولهاا

-ام خالد: بس لو افتهم شمسويتلك هالبنية وهيج مسودن بيها ارتاح

-فاهد: ام خالد تعاملين كيان مثلما تعامليني هي ام البيت وسيدة هذا البيت وطلباتها اوامر اياج واياچ تضوجيها بكلمة اني احبج واعزچ لا تزعليني منج

-ام خالد: حاااضر حاااضر

انقهرت كلش چنت ناسية سالفة الحمل ومو ببالي وحتى هسة ما طخ ببالي الصار ويايه قبل والضربة الصارت على بطني بس فاهد ما نسى وما راح ينسى بيوم خصوصاً وهو متمني يصير عنده اطفال، شوية واجاني للغرفة سويت روحي نايمة واجه گعدني..

-ها كوري شلون صرتي؟

-احسن

-تگومين تسوين هذا؟

مدلي شريط حمل بلعت ريگ متوترة ليش جابه الي وماعندي اعراض حمل، ذب حسرة وباس راسي وگال وهو يگومني على كيف..

-بس حتى اخلص من لسان ام خالد

-فهودي انتَ تعرف وضعي اني ماگدر احمـ..

-ميخالف يله كياني گومي

اخذت الشريط وفتت للحمام اسوي الاختبار، كملت وطلعت لازم انتظر كم دقيقة ياله يبين اجه يوگف بصفي وعينه بالجهاز مركز..

-ايوووو كيان هنا بلـ..

-اششش لا تلعب نفسي اسكت

-شتحسين من سويتي ولج؟

-غيرررر انتَ

-طاح حظج خو كولي ماريد شو بكلشي لسانج شطوله شبيچ بهاي خربتي

-ديلا يلا

-باعي كوري من هسة اگلج زعاطيط ماريد

-دتگول هيچ لان الدكتورة كالت ميصير عندي حمل

-لا والعباس ماريد انوب يجوني لساناتهم شطولها نظل يومية كافش ومكفوش

-اممم

-لا تزعلين ولج والله رامي كافي شبيچ

-اي مو بله؟

-اي والله شنسوي بعد عود نخلي جنات تحمل وتنطينا فرخ مالك يتبرعلنا يقبل

-مو هستوك گلت متريد؟

-هاي الج حتى تحسين بشعور الامومة

-ماشي عود اني افاتحها بالموضـ..... صخاااااام

-عادي عادي لا صخام ولا شي اذا ما قبلوا اني اشتري منهم

-فاااااااهد اني حااااامل

-شنو

-حااامل حاااامل شوف خطين صار

-لا بشرفج

-حااامل احنه حاامل فاهد حااامل

-احنه حامل؟؟؟؟

-والله والله شووف بعينك

ارجف واحچي، صرت اضحك وابچي وانطط بمكاني بسعادة مد راسه يشوف ويايه واخذ التعليمات يقراهة بعيونه يلتهم الكلمات اللتهام، تسارعت انفاسه من وصل لمعلومة اذا صار خطين معناها اكو حمل، شمر الباكيت من ايده وصاح بسعااادة ملت البيت..

-ولج كووووري راح يجينا كوري صغيروون

شالني يفتر بيه يضحك واني اضحك، بوسني الف بوسة وكل شوية يلزم التحليل ويضحك ما مصدگ مسحت دموعي ووگفت بصفه اباوع للجهاز..

-اگلك

-ها

-يعني اني حامل هسة؟

-اي غير

دخلت ام خالد للحمام ويانه ضحكت وباركتلي، ضربت كتف فاهد وگالت بثقة..

-گتلك مرتك حامل عيني مبين عليها سمنانة ومحلوّة

-فاهد: امشيي ركض نروح للمستشفى نتطمن على الطفل

ضحكت متحمسة وياه وأيدته، بسرعة بدلت وانطلقنا للمستشفى، دخلنا على الدكتورة وصدمتنا من گالت..

-انتِ حامل 18 اسبوع

-فاهد: اربعة اشهر وأسبوعين؟؟

-الدكتورة: نعم، معقولة ما انتبهتي على نفسج او صارت عندح اعراض؟

-كيان: لا دكتورة ابد ولشي تغير بس اكو روايح ما اتحملها ونفسي تلعب منها

-الدكتورة: والشهرية؟

-كيان: ما انقطعت

-الدكتور: اها

-فاهد: هاالشي خطر على صحة الطفل؟؟

-الدكتورة: لا ابداً طفلكم بصحة ممتازة وطبيعي تصير هاي الاستثناءات عند بعض النساء

كتبتلي علاجات وشرحتلي شنو لازم اسوي سألتها على ضربتي قبل على الرحم وگالت بيّنت عندي وولادتي ما راح تكون طبيعية لازم تدخل جراحي بس ماهتميت وفرحت كلش كم گالت الطفل بخير وماكو أي خطر على حياته، ضحكني سؤال فاهد المتحمس وابتسمت الدكتورة على ملامح وجهه المبتهجة..

-فاهد: دكتورة نگدر نعرف جنس الطفل هسة لو بعده معصعص؟

-الدكتورة: اي بين عندي بس رجعي على السدية خليني اتأكد

نمت على السدية تعيدلي السونار، عيونها على الشاشة وعيون فاهد وياهة واني عيوني على فاهد الي راح يطفر بمكانه من الفرحة والحماس..

-الدكتورة: راح تجيكم احلى بنوتة

طااار فاهد من السعادة واني طرت وياه، حضنني يباركلي والابتسامة شاگة وجهه ولاول مرة اسمعه يهمس "الحمدلله"..

طلعنا من الدكتورة ايده بيدي والايد الثانية حاطتها على بطني اتحسس بنيتي العنونة بطني ما كبر بشكل ملحوظ توقعت مجرد سمنت عن قبل لان بطلت اروح للجم مچنت اعرف هاي اكو فهودة صغيرة هنا..

-فاهد: ولج كيااان مستوعبة انتِ راح تجينا كورية صغيرة؟؟

-كيان: ههههههه والله ما مستوعبة وتدري اصلاً ما مفكرة بالحمل ولا ببالي سبحان الله

هز راسه مبتسم علگ اغاني بالسيارة يرگص ويطگ اصبعتين وكل دقيقة يجرني يبوسني گدام الدنيا كلها ممهتم، وخرته عني واني اضحك واعيط بي..

-ولك مسوودن فضحتناا

-فاهد: ولج كورري راح تجيني كووووريييية

وهيج بقى لحدما وصلنا وبشرنا ام خالد الي فرحت نفسنا بالضبط، مشت ايامي خف وحامي وصرت اتقبل ريحة فاهد والبيت نوعاً ما، بقيت حريصة على نفسي والطفلة وفاهد حريص اكثر عليَّ وعليها مينام اذا ميبوس بطني ويسولف وياهة الليل كله ويگوللها..

-فاهد: احبچ بنيتي الصغيرة الكورية، ما راح اضوج اذا ما طلعتي كورية عادي لو تطلعين قردة هم راح احبچ وتكونين احلى البنات

-كيان: اسم الله فاهد لا تگول هيج

-فاهد: احبهاا وراس عمچ مالك الراح يشده من ورايه اموت عليج

-يا عمري انتَ

-احبچ كوري واحب بنتچ

-واني احبك يا روحي

-والله الا ادللها دلال وشرف امي المضيعته ما اخلف غيرها حتى تبقى وحيدتي وما اخليها تغار من احد

-متأكدة من هالشي فهودي

-كيان شلون انتظر لحدما تجيبين ما بيها مجال تجيبيها سبيعي؟

-لا حبيبتي اريدها تكمل تسع اشهر حتى تطلع بصحة ممتازة

-يله امري لالله

-فهيد شوكت نگوللهم؟ لو تريد على عزيمة مالك نحچي؟

-اي حتى اگول لـ شُهيب راح تصير عندك بنت اخت وبنت اخو

-ههههههه حلوة هاي

نمت الليلة واني محاطة بالحب من الاب وبنته وگعدت الصبح للدوام فاهد وصلني وراح يمتحن ورجعلي بنص الدوام الا تاخذين اجازة وترحين ترتاحين لان وجهي چان تصفر وصدگ تعبانة..

رجعت والعصر طلعت وياه اشتري ملابس لعزيمة مالك راد يسوي عزيمة ببيته بدون مناسبة معينة، اشتريت فستان فضفاض حتى متبين بطني الصغيرة ونفاجأهم هناك..

العزيمة عبارة عن ضحك ووناسة جنات وفاهد واحد يلاسن الثاني ويتعاركون على رامي واني ونشوان نحچي ويه مالك وفاضل ومروان وصبا وماريا سوه يحچون وملاك هم جاية اما شُهيب گاعد ساكت وبحضنه ميس ويباوع على مسرة الملتهية تسولف ويه ملاك بهدوء..

گام فاهد وبيده كاسة عصير وخاشوگة ضرب الكوب كم ضربة وگال..

-فاهد: احمم احمممم انتباااه ارجووو الانتبااااه

-مالك: ذب الگلاص من ايدك راح ينكسر

-فاهد: فدوة الي المهم عدنا اني وكوري خبر حلو نريد نشارككم بي

توجهت انظار الكل علينا، ابتسمت واحس بخدودي ولعت نار تلمست بطني وباوعت لفاهد الي عيونه ضحكت وگال بنفس المرح..

-فاهد: راح تصير عدنا بنية

-مسرة: كيااان انتِ حامل

-كيان: هههههه اي اي

-فاهد: وراح تجينا بنية

-شُهيب بفرحة: مبارك الج حبيبتي مبارك الك فاهد فرحتلكم ربي يتمم على خير

-فاهد: اي وراح تصير عندي بنية

ضحك شُهيب وبوسنا ثنينهم، باركولي باقي اخواني فرحانين وويه كل واحد فاهد يستفزهم ويگول..

-نشوان راح تصير عدنا بنية خاف ما سمعت

-نشوان: والكاظم والزهرة والعباس والحسن سمعتت

-فاهد: اي اختكم حامل مني خاف نسيتو

-مروان: اهووووووو غير يسكت هسة

ضحك شُهيب وضرب فاهد حيييل على ظهره خلاه ينز ويفتح عيونه ما متوقعها، ابتسم شُهيب وگال وهو رافع تك حاجب..

-شُهيب: حتى تبطل سوالفك العضروطية

-فاهد: بس حبلت اختك

-شُهيب: شگد عااار هالبشر

اللتهينا بالسوالف والمداهر والضحك والمباركات من قبل الجميع، احتاجيت اروح للحمام والحمامين الجوه مشغولات جنات گالت اروح لحمام غرفتها.. فتت للحمام وتقيأت مرتين ماعرف شبيه بس الريحة مال الاكل اذتني، بقيت هنا هادئة اريح نفسي وگعدت على طرف البانيو استريح شوية..

استغربت من سمعت صوت مسرة بالغرفة تحچي ويه احد وانصدمت من عرفت هالاحد مالك! عگدت حاجبي مستغربة وطلعت من الحمام اخبي روحي بالحايط لان الحمام صاير دفن عن الغرفة ومديت بس عيوني اشوف شديسوون بالغرفة سوه؟

-مسرة: عبالي اجت جنات

-مالك: لا اجيت اني انطيچ، تفضلي هذا المقص

اخذت منه مگص حديد چبير ماعرف شتسوي بي بس فوراً جاوبت تساؤلاتي من گالت بجمود..

-مسرة: تمام شكراً ردته علمود افتح الهدية الفاهد جابها لـ ميس

-مالك: شكلچ ضايجة قيثارة؟

سألها من العدم هالسؤال تفاجأت منه وهي هم بيّن عليها استغربت، هزت راسها على كيف وجاوبت ببساطة..

-بس شوية تعبانة

-سلامتج، ما صارلي وقت اتشكرچ على السويتي وياي بالعراق العلوية گالت چان رحنا بيها لو دايس على السحر

-سويتها لخاطر كتكوتك مو الك

-وجنات سعيدة بهذا الشي ولليوم تحچي بموقفچ

-احبها لطيفة كلش

-احنه واضح بعدنا مو على فاق مو صح؟

-صح

ابتسم على صراحتها، ضميت روحي بسرعة ماريده ينتبه لوجودي وبقيت مركزة ويه حديثهم..

-حتى اكون صريح وياچ اني جنت معارض وبشدة رجعتچ ويه شُهيب حتى وره ما عرفت انتِ الي خففتي حكمه وساعدتي بس حتى نكون واقعيين محد حط شُهيب بهذا الموقف غيرچ مسرة

گلبي وجعني من جملته، مديت عيوني مرة ثانية وشفت مسرة جامدة بس واضح تأثرها من الكلام، تنهدت وطبگت رجل على رجل وهي واگفة..

-وبعدك معارض زواجي من اخوك؟

-اي

-حلوة صراحتك مالك شمسون

-وحلوة جرأتچ مسرة قيثارة واحترمها

-جرأتي بشنو بالضبط؟

-لفتينا لوف وراح احچي بدون خجل ما توقعتج بهالقوة ولا تخيلت بيوم راح تنهار اسهمنا ومعارفنا ويدخلون اخواني سجن ويتبهذل حالي واموالي وعلاقاتي بسبب بنية عرفت تلعبها صح

-اخذ مني وقت وجهد وطاقة

-بس نجحتي بالاخير ونجحتي ورجعتي ويه شُهيب ولا كأن سويتي شي

-وين تريد توصل انتَ؟

-اريد اوصل لمفهوم "احترم جرأتج" هاي الجرأة الاحچي عنها

-عبالك بعدني اللعب على شُهيب مو؟

-لا، لو حاس مجرد احساس تلعبين عليه ما راح انتظر مثل اول مرة وبيدي ادمر هالعلاقة

-اممم

-بس اعرفچ ما ناوية على خير واكو شي براسچ واعرف شنو هو

-ذكي، لاحظت عندك نظرة مستقبلية مالك ممكن تقرالي المستقبل وتشوف راح اجيب طفل لهموسي وافرحه لو لا؟

ضحك يهز براسه ممصدگ، كتفت ايدها لصدرها توضح جديتها توقف عن الضحك وگال بأبتسامة..

-انتِ نقذتي حياتي وحياة زوجتي وابني وهذا اعتبره دين برگبتي وحاب ارجعلچ الدين اطلبي شنو تردين مني واني حاضر

-ها حلو صارت بيناتنا ديون

-اي

-تمام.. اريدك تگلي منو كتل امي!

غابت ابتسامته وتغير وضعه ووگفته، بلل شفايفه بلسانه وگال بنبرة سريعة..

-واني شمعرفني؟؟

-مالك لا تغشم روحك عيوني

-وضحي اكثر!

-ثرى قيثارة منو كتلها مالك!!

-ماعرف!

-شوف اني چنت اريد اكتلك واكتل فاهد وابوك وراكم وهذا كرم مني اعترفتلك بهالشي انتبه لروحك

-لا تحاسبين ناس مالهم ذنب مسرة!

-لعد منو اله ذنب؟ جدي؟

-سألي ابوچ!

ضحكت مستهزأة و تقربت منه تنتر بهمس..

-ماالك لا تلعب بأعصابي قسماً عظمااً افرغ سلاحي براس اخوك وابووك وتعرفني مخبلةة واسويهاا

-مسرررة

الوضع حمى والتوتر يقرا الفف هناا، لزمها مالك من متونها فاقد ما منتبه وهي العصبية اخذتها ودفرت ايده عنها ودفعته..

-لا تلمسنييي

-مسرة هالموضوع صارله سنييين وانتهى وراح لييش جاي تدورين بدفاتر عتگ!!

-تمام براحتك

مشت بخطواتها الواثقة تطلع من الغرفة وركض مالك وراهة يجرها من ذراعها يرجعها جوه، ضربته على صدره تمنعه يلمسها بس رجفته توضح هو مشدوه ومو بوعيه..

-وين رايحة وووين

-اروح اكمل ثاري

اول مرة اشوف مالك بهالوضع دائماً هادئ ويسيطر على انفعالاته بس اليوم ما چان خايف چان متوتر من شي، انخمش گلبي من حديثهم الجاي..

-اوگفي دقيقة خلينا نحجي بهدوء

-ماريد احجي بهدوء وماعندي وقت اضيعه!!

-انتِ مخخبلة شلون ترحين تكتلين فاهد وهو ماله ذنب!!

-لعد منو كتلها منوو

-اني!!!

همسها همس عالي، جمدت وجمد الدم بكل جسمي وگلبي لدرجة احسه راح يتوقف بأي دقيقة.. كمل بنفس الهمس يباوع للباب ويرجع يباوعلها..

-ما اتذكر أي شي من هاي الحادثة! ما اتذكر اني الكتلتها لو لا بس ابوية گال اني تمتت المهمة! صدگ يحچي لو يضحك عليَّ مثل الف مهمة قبلها!

-كتلت امي

همستها ودموعها نزلت، ايدها بدت ترجف وصوتها يهتز، حرك راسه مالك بحركات عشوائية وجاوبها بحرگة..

-مسرة وراسه لابني وروحها لامي وغلاوة شُهيب عندي ما اعرف! ماا اعرف ماتذكر شي نهائياً هسة تگولين بكل مرة تكونون متخدرين راح اگلچ اي! بكل مهمة من هذا النوع ابوية ينطينا جرعة مخدر ونتمم الموضوع!

-مسرة: ولك انتَ.. انتَ الكتلتها انتَ بيدك المسدس والهربت انتَ!!

-مالك: بس اني چنت شايل مسدس بوكتها؟؟

-هاا

-بس اني الچنت شايل مسدس بيومها؟؟ تذكري زين!!

-مادري.. ماعرف

-انتِ بنفسج ما متأكدة ولا اني! مستحيل اخبي شي اني مسوي واتردد! ما اخاف واواجه اغلاطي بس هالمرة جاي اگلچ ما اتذكر شي من هاليوم يجوز اني سويتها ويجوز لا!

-انتَ السبب

-گدامج اني شتسوين سوي اخذي حقج مني وارتاحي

-دمرت حياتي

-اني اسف

-تعبتني وكبرتني فوگ العمر عمرين

-شتگولين حقچ

-انتَ تعرف شصار بيه من ماتت امي؟؟ تعرف وين عشت وشلون عشت بغيابها؟؟ ولك گمت انام بكنتور ملابسهااا بكنتورها انااام من الخوف احتاجهااا!! ابوية انههار وعافني وحدي ليل نهاار يبجي عليها وترك بنته الصغيرة تربى ويه الخدم!! ولكم انتو دمرتوو حيااااتي مااات گلبي بسببكم مااااااات

تضرب على صدره بكل قوتها هبدته هبد، تحچي وروحها شايطة وهي تشوفه يمشي على طوله وعايش حياته بعدما سلب حياتها وخبلوها..

-مسرة: ررراح اموووت من القهههر الله لا يوووفقك يا ماالك على حرگة رووحي والجحييم العشته بسببك ولككك

-مالك: گدامچ اني سوي التردي بيه اخذي ثاارها يلةةك

-وشُهيب؟؟؟ شُهيب يموووت قهر لو عرفت اني كتلت اخووه يمووووت

گامت تضربه بيدة المگص الچبير البيدها على متونه وصدره، لزمها من ايدها حيل وگال برجفة..

-كتليني وخلصينيي من هالضيييم سوويهااا

بچت ووگعت بالگاع منهارة رجليها متشيلها روحي فرفحت على حالها متت من القهر تمنيت اطلع اصبرها واحضنها واطبطب على ظهرها واطمنها كلنا وياهة ومحد راح يعوفها..

-مالك: بيناتنا مسررة كتلينيي وخليها بيناتنا

-شنو؟

-اذا مو اني اموت محد راح يرتاح! لا انتِ ولا اخواني ولا حتى جنات و ابني! ابوية راح يبقى وراكم لنهاية العمر مشكلته ويايه وبسس سويهاا وكتليني خليني ارتاح واريحكم

وگفت على حيلها ترعش رعش عصبية وغضب بياض عينها صار احمر وهي تباوعله، شالت المگص بيدها بالجهة الحادة ووجهتها عليه بروح حاقدة وكارهة، بنفس منهارة وتنزف اللم وجروح..

-مالك: سويها مسرة! ماعندي كامرات بالغرفة ومحد راح يعرف انتِ السويتها! تگدرين تطمطمين الجريمة من خلال معارفچ وما يلوحچ شي يلللة سويهاا

روحي لابت تخبلت من الموقف طلعت اظهر نفسي اركض امنعها من هالجريمة بس ما لحگت، برمشة عين بجررة نففس مميتة شالت المگص ودچته بنص گلبه!!!

-لاااااااا

صرخت من عمق روحي وركضت عليه ابچي من الصدمة، ذبت المگص من ايدها ويه هبدة جسده الضخم بالگاع، لزمت مالك من ايده واصرخ بأسمه ما اخلي يفقد الوعي، انداريت على مسرة جافلة بمكانها وعيونها تصب دموع..

-شسووويتي مسرررررة شسوووووويتي

صرخت بيها صوت فزز جروحها، شهگت تبچي مهضومة وطلعت من الغرفة، نزلت عيوني اشوف مالك بعده مفتح عيونه يصارع النفس گمت اركض اصيحلهم واصيح لاحد يساعدني ولزم ايدي يمنعني..

-كيان: هددني اصيح لاخوانك

-لا

-مااالك هدددني لا تموووت

شدد على ضغط ايدي يجر الهوا گوة، حچى بصعوبة وهو يلهث..

-ما ضربتني.. ضربة.. تموت.. ما.. رادت تكتلني

جحظت عيوني مو فاهمة شي وما اهتميت لكلامه وركضت اصيحلهم جوه، اجو اخوانه مخبوصين، فاهد يرجف ويتحلف ويتوعد لو صار لمالك شي ميعديها ولا يسكتلها..

نقلناه للمستشفى وجنات ورامي واحد حاضن الثاني ويبچون، وگفنا گبال غرفة العمليات محد بينا تحرك ننتظر ينطونا نتيجة تبرد گلوبنا.. اقل الساعة وطلع الدكتور الي يعرف حالة ولد شمسون يطمننا ويگول..

-الطعنة مو خطيرة، كانت قريبة من قلبه نعم بس انضربت بمكان مدروس بمعنى الشخص الي ضربه ما راد يموته ويعرفه ما راح يموت

-فاهد: نگدر نشوفه دكتور؟؟

-بس علما يفك منه البنج تگدرون تدخلون

حمدنا الله وشكرناه وجنات تبچي ممصدگة حضنتها اهدأها والكل فرحان وسعيد مالك مابي شي الا شُهيب.. شُهيب كامش بيده ميس والتلفون ما وگع من ايده وهو يحاول يتصل على مسرة يدورها وين..

-الدكتور: راح نفتح محضر اذا تردون لو نتكتم على الموضوع؟

-فاهد: نفتح

-شُهيب: فاهد انطي صبر!

-فاهد: رادت تكتل اخووك شلون تسكت عن الموضوع شُهيب!

-كيان: اريد اگول شي

توجهت انظار الكل الي وبديت اسولفلهم الصار بالتفصيل الممل، كل الحضور بقوا بحالة صدمة وذهول واولهم فاهد الي سمعته يهمس متعجب شلون مسرة ما كتلته ونهت عليه..

-كيان: لان مالك گال ميتذكر شي من جريمة قتل امها واتوقع ما قتلته لان ما رادت تخش بخطيته اذا طلع مو هو

-شُهيب: لا

وهالمرة الكل اندار عليه، ما حچى شي زايد وترك ميس ويه صبا وراح، الرجفة بقت ملازمتني وتعبت كلش انتبهلي فاهد وحضنني نص حضنه يخليني اريح جسمي عليه..

**

"مسرة"

رجعت لبيت ابوية مهدود حيلي، دخلت لغرفتي وانفجرت بكاء وتعب لزمت صورة امي اباوعلها ودموعي تصب اعاتبها وتعاتبني بصورتها، تلفوني ما سكت عن الرن بأسم شُهيب فوگ الستين مكالمة اتصل واعرفه هو بالمستشفى هسة وميگدر يعوف اخوه ويجوز حتى كرهني ويريدنا ننفصل بسبب عملتي..

طفيت الضوة وگعدت بزاوية الغرفة لامة رجلي لجسمي واتذكر كل الصار بيه من ماتت امي لليوم، الي يشوفني يگول شلون عيشة عايشة هالبنية شلون راحة شلون ثراء شلون لبس وطلعة وطبة ميعرفون الي مر عليَّ يصعب على الكافر، ميعرفون الضيم العشته.. العنف، الترهيب، الخوف، الاختطاف، الاغتصاب، الغصب، التدريب، الحب السام الي عشته من ماتت ثرى لسه..

انتبهت لباب الغرفة ينفتح وجسد يمشي بالظلام يتقدم عليَّ، من عطره الهادئ وخطوته المتنسمع عرفته شُهيب..

-شُهيب: مسرة

ما جاوبته، خفت احچي ويسمع الرجفة الي بصوتي، خفت احچي وانفجر بالبكاء وابين ضعفي گدامه.. تقرب مني وگنبص يگعد گبالي يحط ايده على ركباتي..

-مسراتي

عضيت شفتي تنزل دمعتي ويه همسة صوته، مد ايده يمسح دموعي وكأنه يعرف دا ابچي..

-جاوبيني مسرة

-شُهيب

-عيوني انتِ

شهگت بروح تعبانة، حچيت بغصة مرارة منهارة..

-شُهيب.. شهُيب اخوك كتل امي.. هو يتمني وحرمني منها هو شُهيب هو

حضنني لصدره يسمحلي افرغ حزني وكل طاقتي السلبية، بچيت بچي سنيييين على صدره احچيله الضيم العشته المرارة الضگتها، العنف الحصلته، حچيتله كل صغيرة وچبيرة ما ضميت شي حتى علاقتي بأكرم واسلوبه الحقير ويايه حچيته، واخيراً حچيتله الصار بيني وبين مالك قبل شوية وهو بقى يسمعلي وباقي على هدوئه..

-بس ما كتلته، طعنته قريب گلبه واعرف طعنتي ما راح تموته

-ليش؟

-لان فكرت بالكل.. فكرت بـ جنات ظلم تترمل بهالعمر وفكرت برامي حرام يتيتم ويعيش نفس لوعتي، فكرت بيكم واني اعرف شگد متعلقين بي وتحبو واخيراً فكرت بي.. فكرت اذا طلع مو هو الكاتلها وشمسون لاعب لعبته الوصخة وهو الي نهى على حياتها وذبها براس ابنها وين اودي نفسي من عذاب الضمير شُهيب؟ ويين؟؟

-بالضبط، واني اعرف بيج ذكية

دفعته عني ونترت بحقد يوازي غضبي..

-بس ما اسكت وراح انهي ابوك!! اريدك تنطيني الصلاحية اكتتل شمسون بيددي شُهيب واشرررب من دممه!!!

-مو بس انتِ تردين هالشي

-شنو قصدك

-كلنا نريد مسرة وصار اشهر نشتغل على هالموضوع بس قررنا مو احنه النكتله

-ليش؟؟؟

-حتى ما تشوه سمعتنا ويطلع علينا صيت كتالين ابوهم

-ابوك يستحق الموت!!

-بس مو على ايدنا، هو يموت وينطمر ويخلص بس محد راح ينضر غيرنا لازم نلعبها صح وما نشكك احد بينا

هزيت راسي اوافقه الرأي ومن هاليوم بدينا بثار مشترك! ثار اشترك بي الكل وهو سقوط شمسون!! اشتغلنا كلشي بذكاء! بعبقرية!! استغلينا عقل فاهد الاجرامي وشخصية مالك ومحبة الناس اله ووحشية شُهيب المتظهر بس ويه العدو ومعارفي ومشينا بالخطة صح!!

**

"جنات"

صحى مالك وحچالي كلشي بالتفصيل الممل حلف براس رامي هو ميتذكر يوم قتل ثرى وحتى من زعلت وانقهرت من تصرف مسرة ما قبل وگال بالضبط السوته مسرة طبيعي وهي تركته عايش كرم منها ولو واحد بدالها يكتله بمكانه بدون لا يرفله جفن..

-جنات: مالك اني كلش تعبانة

-سلامتج يا روحي

-لو ميت شثوي بروحي شوكت نخلص من هالضيم مالك مو تعبت

-ما بقى شي حبيبتي لا تخافين

-اريد اگلك شي بث اخاف تنجلط

-شنو هو؟

-اوعدني ما راح تضوج خاف جرحك يتأذه

-احچي جنات قلقتيني

-اني حامل

-شنووو

-شوف من هثة اگلك كلامك صح واني مثل البزون وكلشي ميفيد ويايه

-يا ربي

-مالااااك

-لا حبي خلص الحمدلله شنسوي

-فوگاهة هو الما عاحبه؟؟

-ولج مو ما عاجبني بس مصدوم

-انطيك صدمة ثانية؟

-لا بشرفج والله يوگف گلبي وياهة

-اني حامل بتوأم

شمر راسه على المخدة وطلع لسانه يسوي روحه انجلط، ضحكت من كل گلبي وضربته على ايده اگعده..

-گوم گوم لا تنجلط اتشاقه

-شايفة لو صدگ حامل بتوأم والزهرة اتبرع لواحد لشُهيب ومسرة

-ولك تتنازل عن ابننك

-شسوي جنات اني مو مال جهال هو رامي وابتلى بأبو مثلي

ضحكت اهز راسي بـ "لا" هالبشر ميقتنع هو اب مثالي لرامي وابنه يموت عليه بس اكيد راح يجي اليوم ويقتنع بروحه..

-ملوك خلينا نتفق اتفاق اذا جبت بالثلامة انتَ تهتم برامي ومتخلي يزعل او يحث بشي مختلف واني اهتم بهذا الططة الصغيرون

-تمام بعيني

-شوف ومن هثة نتفق على الاثماء اريد...

-الأسماء بريئة منج جنات! لا تظلمين الطفل وتسمي انتِ رجاءاً

-انتَ بث تغار

-اغار ما اغار اني ما مستعد اصير ميز تنمر لفاهد بنهاية عمري

-اي حقك انتَ شايب ومتتحمل صدگ خاف تنجلط

-وانتِ زعطوطة

-امشي لككك انتَ الزعطووط

-ووولج تعالييي

-يبوووو جرحك رااح جرحك انفتحح

-انعل ابو جرحي تعالييي

-يبووو كامرات اكو يبوووو

لصم حلگي يقرقرني ويخليني اضحك مثل المخبلة ممهتم لجرحه، ركض رامي يريد يلعب ويه ابوه وصعد الچرباية يهجم على مالك يدافعلي تالي مالك عافني واللتهى بأبنه يقرقر بي وهذا الطفل صوت ضحكاته وصلت للعراق من علوهن..

-مالك: ههههههههه ططة ولك انتَ راح يصير عندك اخو

-جنات: شحلاتك وانتَ اب حبيبي

-وشحلاتچ وانتِ راح تطيحين حظي بطفل ثاني حبيبتي

-اهووو ملوك كافي صدگ راح ازعل

-اتشاقه يا روحي شفايتلي وجهالي يجون منچ

-لعد منين يجون اذا مو مني؟؟

-لا يعني اقصد...

-ماالك اعترف انتَ تخووونيي؟؟

-ولج لااا خرب طلعت من حلگي ما عرفت اصوغ العبارة

-اييي لانك مغربي كم مرة گتلك يا بني ادم يا رجال يا ابو رامي تعلم عراقيي خليني افتهم علييك

-وجعع شكو تصيحين افتهمنا مو لساني انعوج واني اتعلم عراقي عقلي انترس كلمات عراقية وحياتي انلاست بسببهن!

-مو كافي مو كافي لازم اعلمك بعد يلة كرر ويايه جملة علاوي حبيب گلبي ابو حسين اني خادمكم الصغير انتَ عندك نقص بشخصيتك....

-مالك: ولچ هاي شنوو

-جنات: باچر عندك امتحان بيها يله!

-مالك: كلماتها اصعب من كلمة ططوة!

-لازم تحفظها مالك اذا تحبني ضروري تحفظها ومن هثة اگلك لو صار عدنا ولد راح اثمي علاوي حبيب گلبي ابو حثين

-يعني لو طلعتي حامل بولد تردين نسمي علي؟

-اي اي اموت على هالاثم

-صار

-الله وااافقتت

-اي لان حلو هالاسم لطيف

-يمماااي احبك احبك ملاكيي شكرراً

-واني اموت على جَنتي....

**

"مسرة"

الاوضاع تغيرت بسرعة، الولد بدوا يكملون بالشغل ويه ابوهم بدون لا يحسسوا بشي، اول مهمة دز شمسون الإخوة ثلاثتهم لروسيا يكملوله شغل هناك، واكيد تمموا المهمة بلعبة منهم ومناك اتفقوا ويه موزس يكون الهم سند وقبل بسرعة لان شُهيب صديقه ويعتبره اخوه وهاي چانت اول خطوة لأقتراب نهاية شمسون النذل..

المهمة التالية چانت صدمة! طلب شمسون من مالك وفاهد يرحون يخطفون اطفال بالمغرب.. تمموا المهمة على اكمل وجه واتفقوا ويه شُهيب على اساس هو الخربها ورجع الاطفال لانهم تابعين للاطلس وهو صديقه، فاهد چان ما ناوي على خير وراد يصخم لولا تدخل مالك..

تبعتها سبع مهمات جاية منهن تمت بشكل ممتاز حتى شمسون ما ينتبه لفشلهم ومنهن لا شالوا ايدهم عنها.. خلال هاي الفترة عشنا بجحيييم حقيقي! كلشيي تغير بحياتنا! خوفي على شُهيب يتضاعف كل يوم لا شمسون يعرف بـ نيتهم ويقلب الطاولة عليهم.. اعترف اعتراف جريء هالشمسون مووو سهل!! طرگاعة هالرجال طرگاااعة حقيقية!!

ولادة كيان قربت وفاهد خفف شغله ويه اخوانه علمودها خايف عليها، حددوا هالسبوع يجيبوها عملية قيصرية وتنور حياتهم بنتهم الي لحد هاي اللحظة محد ثبتلها اسم يومية متمالخين كيان وفاهد على الاسم ومدا يقتنعون ولحد هاي اللحظة احنه ملتمين كلنا على العشا عازميهم ببيتنا وميس سمعت نقاشهم عافت دفتر تلوينها واللوانها واجت توگف يم فاهد..

-فاهد: ها زقچة شتردين؟

-ميس: انتَ واحد مو حباب

-فاهد: وااااااه شنو هالمعلومة الجديدة ميس؟

-كيان: وخر عنها فاهد تعالي ميوسة يمي حبيبتي عوفي عمو نفسيته تعبانة جاي يطلگ بدالي

حضنتها كيان تلعب بشعر ميوسة الطويل ويسولفن سوه على البيبي الجديد وفجأة من العدم ميس گالت..

-ميس: خالة سنو اسمها؟

-كيان: بعدنا ما مختارين حبيبتي اني عاجبني نسميها "نغم" وعمچ فاهد يريد اسمها "روبي" الظاهر حبيبته القديمة اسمها روبي وحن الها!!

-فاهد: اااااه روبي والله حاتة چانت

-كيان: فهههههيد!!!

-مالك: چذاب لا تصدگي ما چان عنده حبيبة اسمها روبي

-فاهد: اييي وشمعرفك انتَ عيني

-مالك: يمكن لاني اعرف كل خياساتك فاهد

-فاهد: صح صح، جنات حبيبة مالك القديمة اسمها روبي وچانت اسبانية

جحظت عيون مالك وجنات طفرت من مكانها ممهتمة لبطنها الكبران وصعوبة حركتها..

-جنات: منو هاي ماللك؟؟؟ شو ما ذاكرها من قبببل؟؟

-فاهد: وبعدها على تواصل وياه للمعلومة

-جنات: نعععععععم؟؟؟؟

-مالك: ايااا چذاب!! جنات ما چانت حبيبتي والله العظيم!!

-فاهد: اي بس لعبتوا باح باح سوه

-مالك: چلببب چذااب هذا وغلاوتچ عنددي چذاااب لا تصدگيي فاهد اسكتت لا تجيب علينااا من الغيررة

-فاهد: ههههههههههههههههههههههههه

-جنات: فااهد شبيك راح اموت صدگ تحجي انتَ!!

-فاهد: شبيكم نلطف الجو شوية زين مالك حچالچ عن سيلين لو لا؟

-كيان: فااااهد

صفگ ايده متونس وفرحان وگببها بين مالك وجنات وهو حط رجل على رجل يدخن بجگارة طافية ميشعلها علمود كيان لان حامل وتتأذى..

-ميس: اني عندي اسم حلو

توجهت الانظار على ميوسة الي باقية تتفرج على الكل، ابتسم شُهيب وگال بصيغة امر..

-شُهيب: سكتوا ولكم خلي الاميرة ميس تحچي! اي حبيبتي شنو الاسم؟

-ميس: سموها ليان صح هو اسم لعابتي بس ميخالف اخذو

-شُهيب: ااالله شلون اسم يخخبل فاهد اسم بنتك ليان هذا هو ثبتنا

-فاهد: هو بكيفك ثبتناا ماريد ليان شنو ليان هذا اسم حبيبتي القديمةة

-مالك: تره چذاب لحد يصدگه

-فاهد: اهوووو مالك شنو انتَ حاط جواسيس عليَّ؟؟؟

-مالك: اي

-ميس: عمو فاهد مو باوع

-فاهد: باوعت يله

-ميس: هاي اسمها تيان (كيان) وانتَ مو تحبها؟ سمي بنتت (بنتك) ليان نفسها

-كيان: يااااااي يجنن يجنن اي اتفق فاااهد يخبل حبيت نفس وزن اسمي

-فاهد: هاا؟

-مسرة: صدگ حلو ليان بنت كيان يجنن حبيته

-فاهد: لان بنتج اختارته حبيتي!

-مسرة: عندك مانع؟

-فاهد: لا عمي لا ماعدنا

-كيان: فاهد حلو خلينا نسميها ليان

-فاهد: مادري مادري عود نشوف

الكل عرف بي مقتنع بس يكابر لان اختارت الاسم "ميس الزقچة" مثلما هو يسميها، بس فعلاً بعد مرور اسبوع دخلوا كيان لغرفة العمليات وجابت بنتهم "ليان" وصارو ام واب لبنية بعيون كورية بحت اسمها ليان!

فرحتنا فرحة بحضور هالنتفة بييضة ثلج على امها كللشي بيها يشبه كيان ما ماخذة أي شي من فاهد، عيون وخشم وشفايف وحتى شعرها الاسود الناعم نسخة كيان الصغيرة لدرجة مروان من شافها گال عبالك انعاد الزمن من امه جابت كيان نفس الشكل طبق الاصل..

فرحة فاهد تتسولف ما هدها من ايده متخبل عليها وكل شوية لازم ايدها يتغزل بيهن لان بيض وناعمات لو يتلمس شعرها الاسود الناعم ويگول لميس..

-باعي بنيتي شعرها احلى من شعرچ

-ميس: بس اني هم شعوي حلو مو عمو سووهيب؟

-شُهيب: حبيبتي ليش منو تجي بجمالچ

-ميس: سوف (شوف)

-فاهد: تره يجاملچ بنيتي احلى منج على عنادج

طنگرت ميس تكتف ايدها زعلانة متنا ضحك عليها حتى هو فاهد، ملاحظة فاهد يموت على ميس يعشقها ودائماً يجيب رامي وياه ويزورنا بالبيت علمود يشوفها و يداهرها يخليها تزعل وبعدين يراضيها بـ ايس كويم..

غابت الابتسامات والوجوه تگلبت ويه جية شمسون الكلب! اجه عود يبارك لـ كيان وفاهد والشريف أذن بأذانها حتى تصير مسلمة سودة عليَّ..

تخبلت من شفته احس بكهرباء صارت بكل جسمي صار اشهر ما شايفة خلقته السزز، ترخصت منهم عود اجاني اتصال ورحت لحمامات المستشفى طلعت تلفوني واتصلت بشخص متأكددة راح يگدر يستعجللنا بموضوع شمسون..

دگيت وجاوبتني مساعدته الشخصية، طلبت منها تنطي التلفون ثواني وسمعت لكنته الالمانية الثقيلة.. استغرب من اتصالي سلمت عليه سلام سريع وحچيت بسرعة..

-اريد اطلب منك شي والي تريده يجرالك

-سردار: بنتچ؟

-مسرة: لا بنتي يمي وطليقي مدا يطالب بيها شكراً الك بس الشي الاريده اصعب واخطر

-سردار: ما يصعب شي على سردار

-مسرة: وهذا السبب اجيتك، اريدك تنهيلي شمسون!

-سردار: عنده حصانة من عدونا

-مسرة: تقصد جازمن؟

-سردار: نعم

-مسرة: شالت ايدها جازمن منه

-سردار: شلون؟؟؟

-مسرة: ولده باعوه سردار وهاي فرصتك شمسون بأضعف حالاته حالياً الملعب فارغ وصار دورنا نجول بي!

سديت الخط وكلشي بيه يرتعش اقتربت نهايتك شمسون وعلى ايدي وايد ولدك الربيتهم، شُهيب ميعرف اني اتصلت بـ سردار ولا يعرف اجه عن طريقي ما بلغت بشر بهالموضوع وچانت صدمة الهم من شافوا اسهم شركتهم تهبط بشكل فضييييع وعشرات العقود شمسون چان مربوط بيها وحصانات كلها انفكت وسحبوا نفسهم منه وعافوا وحده..

شمسون انهااار وولده مصدومين يجيني شُهيب يحچيلي ومتفاجئ شنو صار وابوه دينضر لهدرجة؟؟ صح همه الهم ايد بفشله بس مو لهدرجة وبهالسرعة..

لعبتها من بعيد لبعيد ما خليت واحد يعتب عليَّ ما انطيته نقاط ضعف شمسون الي عرفتهن من شُهيب، كل شغلي اكمله ببيت ابوية وارجع لبيتي ولا كأن سويت شي.. ابوية يراقبني من بعيد لبعيد وابتسامة نصر مرسومة على ثغره واليوم اجاني وجابلي كوب شاي اخضر باسني على راسي وهمس بأذني بفخر..

-عفية بـ مسرة قيثارة!!

اللتفتت عليه وبدون لا اجاوبه هزيت راسي! اي اشعر بالفخر واشعر بنشوة السعادة واني اشوف كتال امي تنگص جناحاته وينجر للهاوية! لو بيدي اگصگصه وصل وصل واشرب من دمه مو بس اسقط اعماله وعقوده الي دافع بيهن دم گلبه!

كملت شغلي ورجعت للبيت شفت شُهيب يفتر بالصالة زفوا اله خبر دمار ابوه وانفكاك حصانات جديدة ابتسم وهز براسه سعيد، سد الاتصال واندار الي يبشرني مثلت السعادة وباركتلهم هالتطور وصعدت فوگ..

ممكن البعض يتسائل ليش ما دخلت سردار من الاول وليش هسة ياله گدر يتدخل جوابي راح يكون صريح وسريع.. شمسون چان مسنود من وحدة اسمها "جازمن" راس عملااق هاي وكل البلا بيها، اول ما باعوه ولده بلغوها يردون ينهون شمسون حتى ياخذ مكانه مالك والمافيات روحهم بهالسوالف مال الابن يكتل ابوه حتى ياخده مكانه ويورثه..

جازمن چانت سعيدة خصوصاً من شافت شُهيب لانها چانت احد مدرباته بالسجن الحقير الخلص بي مراهقته، گلي اول ما شافته لزمت ذراعه وهمست بينها وبينه بلغتها الروسية..

-چنت متأكدة راح ترجعلنا شي يوم شُهيب! اني سعيدة لانكم تجرأتو وراح تاخذون مكان ابوكم

اللتزم الصمت بدون لا ينطق، ابتسمت جازمن ابتسامة شيطانية، غمزتله وگالت بالانكليزي..

-?Do you remember

هز راسه شُهيب، سكت لثواني قبل لا يگول بنبرة مظلمة تعاكس شخصية شُهيب الهادئ الناجح بمجال الهندسة..

-THEY SAY MAFIA IS MY MIDDLE NAME

صفگ ايدها وضحكت جازمن سعيدة لانه يتذكر هالعبارة العلمها غوغري لـ شُهيب من طفولته وكررها على مسامعه اكثر من مليون مرة يخلي يحفظها ويجره لعالم المافيا بس.. بس شُهيب چان اله رأي اخر وعرف شلون يشتغل وويامن بدون لا يخسر انسانيته وضميره ما اذى انسان اله اذا اندگ بي او حاول يقتله ولا حارب بشر مظلوم چان دائماً ضد الظُلام والطواغيت واخوته وكل اصدقائه يشهدوله رغم حياته والصعوبة العاشها بس رأيه ما تغير ولا گدر احد يأثر عليه..

طلبوا من جازمن تسقط عنهم كل الاتفاقيات والمستندات الي وقعهم ابوهم عليها بالاكراه واكيييد ما قبلت بسهولة اغروها اغراءات قوية ما اگدر افصح عنها بس چانت تسوه بالنسبة الها، انطتهم الحصانة وباعت شمسون بس ما بلغته بهالشي لان هاي تعتبر خيانة بعالم الجريمة وانما گلبت الطاولة عليه من بعيد لبعيد ويه ولده وضمنولها أي شي يصير وتتغير الخطة تخليهم همه بوجه المدفع وتفرها عليهم..

واول ما عرف سردار جازمن انسحبت من شمسون هو تدخل ولعب جولة، لكن كلشيي ديتم بالسر كللشي! وهاي تعتبر من الخيانات العظمى وممنوعة بعالم المافيات لان يتم التعاقد بالدم وهالنوع من العقود مينفك بسهولة بس ولده جازفوا بنفسهم وأي غلط يصدر توگع بيهم وثلاثتهم راح تكون نهايتهم الموت!

هل نهاية شمسون تستحق مالك وشُهيب وفاهد يقدمون ارواحهم على طبق من ذهب؟ فـ الجواب بالنسبة الهم اي! يستحق ويستحق ويستحق على العذاب العاشوا وشافوا من ابوهم شُهيب حچالي جزء بسيط عن البيت الچانو يتدربون بي وگف شعر راسي تخبلت فقدت عقلي ومصدومة شلون ما انزع من انسانيته وبقى محافظ على ضميره وعقله وگلبه..

شهر جديد مر واندگ باب البيت بهمجية، ركضت افتح الباب صار بوجهي مالك صفنت عليه وصفن عليَّ نهائياً ما حچينا ويه بعض بعد الصار حتى بالزيارات العائلية ما جمعتنا محادثة..

-مالك: شُهيب وين؟

-مسرة: ديبدل فوگ

دخل البيت بدون استأذان وركض يوگف بنص الصالة ويصيح بصوت رج البيت رج..

-شُههههههيب شُهههههههههههيب ويييييينك شُههههيب

ركض شُهيب يطلع من الغرفة ويدگم بقميصه مستغرب من حالة مالك حاله متغير ويلهث ومتخربط وضعه، بنفس اللحظة اندگت الباب وظهر منها فاهد دخل يركض يدور اخوانه ومتوتر..

-فاهد: سمعتوا بالصار!

-شُهيب: شنو شصار؟؟

-مالك: شُهيب سويناها!

-شُهيب: شنو

-مالك: لزمووا شُهيب شمسوون انلزم!!

-شُهيب: من منوو؟؟؟

-فاهد: اني فاراس هسة بلغنيي

ثواني ورن جرس البيت، راح شُهيب يفتحها ورجع وشمسون يمشي وراه! ما فهمت شنو ديصير ولا ولده استوعبوا ابوهم حُر طليق ويمشي على طوله..

لكن هاي اول مرة بحياتي اشوف شمسون بهذا الحال، ملامحه عابسة ويرجف مثل الجريدي الخايف، موقف صعب تفسيره من قوته وهيبته، شمسون بحالة يرثى لها يدور بعيونه على ولده ثلاثتهم وانفاسه تتسارع، لدقايق كان الهدوء سيد الموقف بيناتهم قبل لا يبلع ريگه ونطق بهدوء..

-شمسون: مَلك، نمري، فهدي

باوعوله بدون لا واحد يتحرك، الحقد الشفته بعيون مالك بحياتي كلها ما شايفته من قبل، چان يزفر نار وغضب للحظات توقعته راح يفترس شمسون ويكتله بأيده الثنين يخنگه لحدما يموت..

-شمسون: ها بابا بعتوا ابوكم مو؟

بنبرة خذلان همسها، كذلك محد بيهم جاوبه نظراتهم تسولف كرههم وحقدهم عليه، ما احتاجوا يحچون شي ولا احتاجوا يعاتبوا هو يعرف كلش زين شنو سببلهم وابتسامته المرسومة هسة تشهد..

-شمسون: ارجع واگول چنت منتظر هاليوم

ضحك ضحكته المشهورة وطگطگ بالسبحة الجوزية البيده، تنهد يذب نفس وتقرب من واحد واحد بيهم يباوع بعيونهم ويحچي..

-شمسون: عود تتوقعون من تلعبون عليَّ وتسلموني لأعدائي راح ترجعون بشر؟ راح تبطلون تكونون حيوانات مفترسة هائجة؟ راح تبطلون تكونون عبيد الي؟ لا ولدي لا غلطانين.. غلطانين لانكم وحوش اني صنعتكم وربيتكم على انكم وحوش وراح تبقون وحوش لنهاية عمركم!

سكت يلفض انفاسه والرجفة لازمته بكل جزء من جسمه، خزرهم بحقد واردف..

-الذكاء المارستوا طول هالاشهر تلعبون عليَّ مني! اني علمتكم شلون تلعبون! اني علمتكم شلون تبيعون بعض! انيي علمتكم شلون تكيدون للناس اني علمتكم وعلمتكم وعلمتكم وعلمتكممم!!! كله انيي ولولاي انتو ولا شي!!

ضحك ضحكة عالية يصفگ بيده واردف بطغيانه المعروف..

-لولا شمسون انتو نكرة! نكرررة! تبقون اولاد زنا! تبقون نتيجة غلططة وخطيئة سويتها واني سكران! جايين من نطفة نگسة نتيجة لييلة وحدة ويه امهاتكم! تبقون منبوذين بين الناس حتى لو تزوجتوا! حتى لو فكرتوا تبنون حياة طبيعية ما راح تگدرون لانكم عيبة عبارة عن عيبة!!

-مالك: غلطان

-شمسون: شنو عزيزي مالك؟ ما سمعت شنو گلت؟؟؟

-مالك: غلطان لان لو باقين عليك چان صرنا نفسك، انسان حاقد حاسد نذل خسيس! چان بعنا خوتنا وما بقينا ناكل روحنا بروحنا وواحد يراقب الثاني من بعيد ما گادرين نكره بعض رغم الصار بيناتنا والي تألف علينا.. فـ حاب اخيب املك شمسون واگلك انتَ جبت بشر يحبون من كل گلبهم ويوفوون من عمق روحهم انتَ ردت تحولنا لوحوش بس اصرارنا وتعلقنا ببعض چان اقوى من طغيانك

-فاهد: غلطك الاول عرفتنا على بعض بهذاك البيت ماكو غيره الجمعنا والقربنا وحببنا ببعض

ضحك شمسون للمرة الالف وصفگ بيده..

-حلو حبايبي صايرين گلب على گلب وجاي تبدعون بشرح مشاعركم اهنيكم، شُهيب حبيبي انتَ ماعندك اضافة بعد قبل لا اسحب اوراق الامتحان؟

-شُهيب: عندي

-شمسون: تفضل بس بسرعة ابني اعدائي ينتظرون

-شُهيب: اتذكر مرة العلوية چانت تحچي ويه عمي عماد وگلتله شي

-شمسون: حبيبتي امي مشتاقلها ولو هي اتصلت بيه وتبرت مني بس بعدني احبها شسوي

-شُهيب: من شافت تعاملك ويانه وكلمة "الوحوش" متوگع من لسانك گالت بالضبط "الوحوش الرباهم راح ياكلو"!

رجف فك شمسون تأثراً بالجملة، غرگت عينه بالدمع بس حاربها تنزل، رفع راسه بألم، بتعب، بغرور وكبرياء ما مهتم لشي، بلل شفايفه بلسانه كم مرة من التوتر وگال بثقة...

-شمسون: ما متندم.. اني ما متندم لاني راح انوكل من ايدين زلم اني ربيتهم!! زلم ربيتهم واعرف راح يجي يوم ويكتلوني!!

من قوة جملته جحظت عيون ولده ومن قوة تصرفه الجاي زارت جسدي رعشة قوية، طلع مسدس من جوه قمصلته وگال..

-اني ربيتكم وتعبت عليكم ونتيجة تعبي وسنين عمري الگضيتها وياكم اطلب منكم تكتلوني..

حط المسدس بيد مالك واردف بنبرة حقيرة..

-اكتلني هسة هنا مالك.. اكتلني وريح گلبك اني عذبتك ودمرتك واستغليتك وخطفت مرتك وابنك! ردت اغتصبهاا! اني بنفسي ردت اغتصبها واجيب زلامي يتونسون عليها لحدما تمووت ووراهة اذبح ابنك! اني استلذ من اعذبك واشوفك متألم ومكسور يله ابني يله حبيبي سويها وحط طلقة براسي اكتلني!

بلع ريگه مالك راح ينفجر عيونه صارت بگصته وشمسون استمتع على منظره ابتسم واردف..

-اكتلنييي مالك يللللله اكتلنييييي ما جاي اگدر اكتل نفسييي! نفسيي ما تنطيني اكتل روحي سويها انتَ واخذ حق سنين عمرك الضيعتهااا

ما تجاوب وياه مالك ودار وجهه عنه يداري عصبيته لا يفرغ السلاح براس ابوه، اللتفت شمسون على فاهد وشُهيب وطلب منهم نفس الطلب ونفس الكلام المستفز مطرهم بي..

-انتَ سويها فاهد! اني الخبلتك! اني السلبت عقللك! ما خليت مكاان بجسمك يعتب عليَّ ما عذبتك بي شووف الوشوم بجسمك كلهن مغطيات جروحي كلهن حتى اذانك اذننك هاي اذننك حرگتها بيددي وطلعت رووحك اتذكر لليوم اجيتني تبچي وتگول يابة اذني مااعت ارحمنيي راح تطلع روحي من الوجعع يله اكتلني فااااهد!!

اخذ فاهد السلاح من ايده ينتفض عصبية سحب اقسام وحط المسدس براس ابوه وشُهيب ما سمحله يكمل.. تخبل شمسون وصاح بي..

-شُهيب لا توگف بطريق موتي شُهيب!! اكثثثر واحد اذيته انتَ ولك انتَ المدلل مالتي وانتَ تعرف دلالي شنو! انتَ الچنت اتونس من يعذبوك گدامي احبك واحب اعذبك بحبي احب اغير ملامح وجهك الجامدة واطلعك من هدوئك اخليك تصررخ من العذاب! اتونس واني اهدد اختك واخوتك! اني لعبت بشرف اختك وديتها لأماكن دمرتها واستغليتها!

ما اهتم لكلامه شُهيب وشمر المسدس بالگاع ميتقبل استفزاز شمسون ولا طريقته وهو يستقتل حتى ولده يكتلوه..

-شمسون: انتو ماعدكم كرامة!! ماعدكم غيرة ولا شرف على نسوانكم!!

نزل وشال المسدس من الگاع وحطه بوجهي حتى اخذه..

-شمسون: مسرة قيثارة! مسرة يا مسرة شسويت بيج انتِ وابوج وشلعبت بحالكم واحوالكم.. تدرين منو كتل امچ قيثارة؟ اني كتلتها! اني!! اني البچيت ابوچ دم وبچيت وياه اسوي روحي ماعرف منو كتلها واني اللاعب ومتونس وطالع وطاب بفلوسكم وفلوس امچ المظلومة.. اخذي ثارچ مسرة وكتليني هسة

-شُهيب: اياااچ مسرة اياااچ تسويها!!!

-مسرة: ابن كللللب انتَ شمسون!! انتَ عبارة عن عاار! تونست بكللل لحظة واني اشتغل على هلاكك!!

-شمسون: ولكم كتلووووني وخلصوووني كتلووونيييي ولا تسلموني الهمممم دفعولي دين تعبي وتربيتي الكم وفرغوا هالسلاح براااسي بس لا تسلمووني بيدددهم!!!!

يتوسل والدموع بدت تنزل من عيونه، الرجفة اكلت جسمه وصار يجر بأيد ولده بس يريد واحد يسويها ويكتله ولا يسلموا لأعدائه.. لان يعرف اعدائه ما راح يكتلوه راح يتفننون بطرق تعذيبه ويتونسون عليه راح يذلوه ويدوسون راسه بقندارهم ويخلوا يبوس الايادي والرجلين حتى يكتلوا وما راح يسووها!

طرده شُهيب من البيت ما مهتمله وطلع شمسون من هالباب ودموعه تجري مثل الطفل، هيبته وطغيانه وروحه الشيطانية طفت وانتهت! مجرد عبر من هالابواب شمسون انتهى! انتهى عذاب سنيييين وحرمان سنين! انتهى تعب وجهد سنوات عديدة واخيراً اشرقت الشمس من مشرقها بدون لا يلوثها بروحه الخسيسة!

اسبوع مر على نهاية شمسون توقعت كلشي راح يتحسن بسرعة بس ما صار هالشي، شُهيب منتكس ووضعه مو بخير اتصلت بكيان افتهم منها اذا فاهد نفسه لو لا وصدمتني من كالت فاهد حتى بالليل مدا ينام وجنات تكول مالك نفس الحالة.. استوعبت ان رغم طغيان شمسون ودماره لولده بس يحبوا ومتأذين على الصار بأبوهم ومقهورين..

انقهرت بس اليوم عيد ميلاد شُهيب وفكرت احتفل بي وحدنا بلكي اغير مزاجه، نيمت ميوسة من وكت ورتبت البيت بسرعة ونفخت نفاخ كل مكان بالگاع وعلگت نشرات بگلوبات اللوان وجبت كيكة، وصيت عشا من بره وجهزت الميز وصعدت اركض ابدل..

لبست فستان قصير لونه اخضر غامق هذا لونه المفضل وسويت شعري كيرلي ومكيجت مكياج سموكي، ابتسمت راضية على شكلي واخيراً ختمت اطلالتي بعطري المفضل ونزلت انتظره بالصالة..

نص ساعة وسمعت قفل الباب ينفتح، ركضت طفيت الاضوية القوية وعفت الصالة بضوه خفيف جبت الطگاگطة الي اطگها بوجهه ويتناثر شرايط ملونة ووگفت وره الباب.. بعده ما صاح مسرة وطگيتها بوجهه وعطت بفرحة..

-Happy birthday Shahooobii

فتح عيونه متفاجأ لثواني وراهة طگها بضحكة ما متوقع الصاير هنا.. شاركته ضحكة سعيدة لاني شفته يضحك من بعد اسبوع وحضنته حضن حميمي دافي اتمناله كلشي حلو بهاي الدنيا..

تعشينا وانبهر بالاكل وراهة ضحك من عرف وصيته لان اكيد ماعرف اطبخ واني كسولة لدرجة ما حاولت اصلاً بس يلة المهم ما تركته جوعان، جبت الكيكة قطعتها وصبيت عصاير، گعدنا بالصالة على القنفات يتجرع عصيره بهدوء واني بحضنه اللعب بشعره..

-هموسي جبتلك هدية

-الله يستر من هديتج هالمرة

-ههههههههه شبيك شُهيب لا تخرب واهسي

-حبيبي انتِ احلى هدية ليش متعبة نفسج

-تعبك راحة حبيبي

گمت للمطبخ حاطتها هناك، شلت البوكس الچبير واخذته اله ابتسم متحمس واخذه من ايدي يفتحه، طلع الي بداخله هم بوكس مغلفته فتحه ولگه بوكس ثالث، رفع عيونه مستغرب ضحكت واشرتله يكمل.. فتحه وطلع بوكس رابع! فتحه وطلع بوكس خامس وسادس وسابع..

-شُهيب بأبتسامة: مسرات شنو ناصبة عليَّ

-والله اكو هدية افتحه يله

گلب وجهه بالضحك وفتح البوكس السابع وابتسم على المحتوى، عبارة عن ورقة صغيرة وملزوگ بظهرها شي، فرها يشوف شنو وصفن جافل بمكانه.. بلع ريگه وقره الرسالة بصوت عالي..

"هلو بابا حبيت اگلك المفاجأة هي ان ماما حامل"

نزل عيونه يگلب بالملهي الملزوگ بي الرسالة ويتأمله، ضم شفايفه بداخل فمه ورفع عيونه الي مغرغرات بالدموع، بلع ريگه ونطق بحس يرجف..

-انتِ حامل مسرات؟

-اي

-انتِ حامل

-ههههههههه اي حبيبي حامل

مسح عيونه بأصابعه وضم وجهه بيده وضحك.. ضحك بصوت عاالي كلش ضحكة اول مرة اسمعها منه، ضحكة بيها سعادة وراحة ضحكة بيها حب وحلم سنين، ضحك وكأن الضحكات السابقة چانت كذبة وتمثيل لان ماعندي شَك ان هي هاي ضحكة شُهيب الحقيقية!

استمر بالضحك ويمسح عيونه الخانته ونزلت دموعها وگام على حيله بسرعة يحضنني حضن قوي ويبوس بكلشي يلوحه مني، ضحكت بسعادة على ردة فعله القوية وفرحته وكأن انطيته الدنيا، ما غابت ابتسامة شُهيبي حتى وره ما بعدني عنه يسألني..

-شوكت عرفتي انتِ حامل؟

-اءءءءء

-لا تگوليها

-هههههههههه شُهههيب

-احچي ولج

-امممممم يمكن يمكن يمكنن

-احچيي

-اعرف صار ثلاث اشهر

-ثلاث اشهر حامل وساكتة!!!!

-اي

-مسرة ليش سكتي وما گتيلي؟

-لان وضعك ميسمح وصراحة مچان بيه حيل اجيبلك هدية عيد ميلاد كلت عود انطيك هاي الملهى واسكتك بيها

-هههههههههه ولج مسرة بلووة انتِ بلوووة

-ديلا عيني ابو بلوة اليسمعك انتَ شلونك

-خرب ثلاث اشهر حامل وتمثلين عليَّ وكأن ماكو شي تغير حتى ما حسستني بشي

-لان ما تنسيت بشي صراحة فـ ليش احسسك

ضحك وباسني للمرة الالف، حضني من جديد واسمع تنهيداته المرتاحة يمسح على شعري وظهري وخصري وفجأة وخرني عنه وسأل..

-يعني صارلج ثلاث اشهر حامل؟

-اءءءءء

-مسررررة

-شهوباتيي

-احجي ولج لا تجلطيني

-امممم مادري شوف بعينك

انطيته جانبي ولميت الفستان اللزگه على بطني عگد حاجبه مستغرب من شافها منفوخة شوية، ركز على عيوني وگال..

-عندج بطن

-وهسة ياله انتبهت حضرتك

-اچذب اذا اگولج لا

-يله ميخالف راح اتغاضى ان صارلك ست اشهر ما منتبه لمرتك الحامل ولا تنتبه لنفخة بطنها

-لا مسرة لااا

-اي هموسي اييي اني حامل ببنتك صارلي ست اشهر!

هالمرة ضحكته چانت بصدمة ما مستوعب حامل كل هالمدة وضميت عليه بس حقه لان اني ثلاث اشهر حامل بهالعنونة وماعرف ومن دخلت شهر الخامس شوية بطني بده يبين وحضرته ما انتبه اصلاً..

-شُهيب: واني اگووول متنازلة عن الكعب وصايرة ما تلبسي

-زين من لاحظت

-عذريني حبيبتي تعرفين وضعنا والمرينا بي

-اعرف گلبي وهذا السبب الوحيد الديمنعني ادچك بالسچينة القطعت بيها كيكة عيد ميلادك

ضحك يداهرني ويتحارش بيه واخذني وياه للغرفة وهذا چان احلى عيد ميلاد يمر على شُهيب بحياته كلها ولحد يگول شلون عرفتي.. يعني اكيد راح يكون احلى عيد ميلاد لان اني وبنته موجودات بي شسالفة! ..

بديت بتجهيز بنيتي واميرتي الثانية من الرجال الاعشقه وكل البنات شاركوني بالهشي، جنات الحامل وكيان وصبا وملاك وحتى فيروز وبنات عمها دزولنا كومة اللعاب وملابس من العراق.. جهزها شُهيب من كلشيي وكأنها اميرة وراح تتربع على عرش گلبه..

جابت جنات ابنهم "علي" ميشبه لا مالك ولا جنات ولا رامي متنا ضحك من فاهد كشول وجهه وگال بأنزعاج..

-يشبه العار نعلون!

-مالك: انچب ما اسمحللك

-فاهد: والله باعوله اتخيل حتى صوت ضحكته من يكبر راح يكون هههاهههااههاا

-مالك: استغفررر الله!

-فاهد: مالك شگدما شمسون يحبك راد خليفته وشبيهه يجي منك

ضحكنا كلنا وياه وجنات فرحانة بأبنها علاوب حبيب گلبي ابو حسين، صراحة وللامانة احنه نكره شمسون صح بس محد يكره وسامته وجاذبيته وهالـ علي طلع يشبهه والله يستر منه على گولة فاهد..

اقترب موعد ولادتي والكل مخبوص بيه حتى ميوستي فرحانة لان راح تجيبها اخت، بهاي الفترة مرتين اللتقيت بـ صقر ريماس وبالمرتين يطلب يشتغل ويايه وارفض قبل لا يدري شُهيب وتنگلب الشركة على روسنا..

اخذت اجازة امومة من الشركة واهتميت بنفسي وصحتي اتحضر لولادتي الصارت فجأة واني نايمة فزيت واحس الطفلة راح تموتني من الرفس..

صحت بكتمة متألمة وجريت شعر شُهيب اگعده من النوم، فز مخترع عباله بيه شي ما توقع راح اجيب خصوصاً وهذا اول يوم الي بشهر التاسع..

-ولك شُههههيب راح اموووووت

-راح تجيبين؟؟؟

-ايييييييي يممممة گلبييي راح يوگف گلبييييي

مثل المخبل گام يلبس قميصه وجرلي روب يلبسني فوگ ملابس النوم وشالني يركض بيه واني اعيط مثل المعزاية، فزت ميس من النوم مخترعة بس راحت الخرعة من شُهيب گللها ماما راح تجيب..