تحميل رواية «عاشقه السفير» PDF

#عاشقة_السفير31

الكاتبةchra kirkuki

إذهبْ..

إذا يوماً مللتَ منّي..

واتهمِ الأقدارَ واتّهمني..

أما أنا فإني..

سأكتفي بدمعي وحزني..

فالصمتُ كبرياءُ

والحزنُ كبرياءُ

إذهبْ..

إذا أتعبكَ البقاءُ

وعندما تحتاجُ كالطفلِ إلى حناني..

فعُدْ إلى قلبي متى تشاءُ.

فتحت عيوني اسمع اصوات بس ماعرف منو شفت خالي وأيد ليان على أيدي تكول

ناجي شوفها كامت فتحت عينها

آيه تسمعيني حبيبتي جاوبي

اني وين

بالمستشفى ماكو شي انتي بخير ساعات ونروح للشقة

حسابج من نوصل للشقة ياخاتون

مو وكتها ناجي متشوف حالتها مصدكنا فتحت عينها

اني رايح للمطار أحتمال اختي وزوجها واصلين هسة وانتي اخذي هاي للشقة الله ياخذها

اريد افتهم ليش اني بالمستشفى شنو صاير خالي شبيه وهمه ليش يمي ليان وين موديتني لحظة اوكفي تذكرت عماد وينه اكيد هو اهنا عفتها ورحت للاستقبال سئلت على اسمه ماكو

آيه شبيج خلي نروح اهلج راح يوصلون هسة

ليان عماد وينه

شنو عماد هو شدخله بالموضوع وزوجج وين آيه راح ينفجر راسي يومين منايمين اني وخالج خلي نرتاح شوية واحجيلي ليش رايحة للمستشفى

انطيني تليفونج اريد اخابر

من كالت عماد حسيت اكو مصيبة وناجي محذرني ماسوي شي بدون علمه روحي غسلي وغيري لبسج بعدين انطيج

دايخه راسي توجعني كلش مناقشتها غسلت وغيرت ملابسي اني جنت لابسه فستان اكيد هاي اللي لابسته هسة من المستشفى مالت ليان سمعت صوت اهلي طلعت للصالة بدل مايحضنوني ويكولولي شصاير بيج من انطيناج للحيوان مهند شفتهم يتهجمون عليه

حسبي الله عليج من بنت هاي اخرتها هاي نهاية تربيتج نلكيج تالي الليل بالمستشفيات جنتي وين متكوليلي وين عايفة زوجج ورايحه ويامنو سالفتج وياذاك الحقير وسكتت عليه هالنوب زوجتج احسن رجال وهاي نهايته رجال يروح للشغل يتعب علمودج وانتي تطلعين من وراه ونلكيج بالمستشفى

بابا يحجي واني مو بوعي ردت اكوم وكعت دا احس بدوخه اتذكرت الي صار صرت ابجي واصيح كافي لاتحجي شي

عندج عين تجاوبين ياحيوانه وين جنتي

بدو خالي وابويه يضربوني

ليان :عوفوها لاتضربوها

اني ماحس بنفسي بالي يم عماد وين صار اخاف ميت اريد اكوم ماكدر وهاي تصيح على زوجها عماد شنو صار بي

ليان: عوفها الله يخليك والله راح اخابر عليكم الشرطة لاتضربوها

شنو عماد ولج لاتكونين طالعه وياه وخلص شغله وياج وداج للمستشفى اذبحج هسة ناجي جيبلي حزام خلي اربيها اني مربيتها عدل

بابا مهند قتل عماد كدامي

وانتي شنو موديج يم عماد خالو احجيلي راح اتخبل ملابسج جان كله دم وانتي يومين متحسين بروحج

يحجي ويضربني امي واكفه تبجي وليان تضربهم تريد توخرهم يمي متكدر واني اردد واكول عماد مات اي اكيد وهاي اني راح اموت وراه خليهم يموتوني مجنت احس بالضرب ولا افتح حلكي الاه مكتومه بداخلي مر عليه شريط ذكرياتي ويا عماد اول ماشفته عيونه أسرتني شلون عشقته وخليته يعشقني وهاي اثنينه انتهينه لا هو وصلي ولا اني وصلتله الدنيا ظلمت لو اني ماشوف ماحس غير صوت ليان تضرب وجهي خفيف

كومي آيه حبيبتي جاوبيني

حسيتها تمسح شفتي ووجهي ويا امي واثنينهم يبجون

ماما ليش هيجي سويتي بنفسج بنتي ترى مهند اهوايه يحبج حتى متحمل سالفتج وانتي تخونيه وياغيره كال اعوفها واسافر والله لو غيره جان ذابحج بس يحبج ميكدر يأذيج شفتي وانتي شسويتي بيه تخوني ويا واحد غيره وبعدين ليش ماخذج للمستشفى

ماعرف شلون وصلت للمستشفى ماما الله يخليج خابري دينا

ليان: آيه يعني متعرفين شلون وصلتي للمستشفى

ناوية تجلطيني اني وابوج اكص لسانج حتى ارتاح من سيرة عماد لادخلين اختج بفضايحج

مجاوبتها سويت نفسي نايمه عرفت ماكو حل وياهم لايسمعوني ولا شي بعد فترة دخلت ليان

كومي آيه سويتلج شوربة

شفت ماكو احد بالغرفة لزمتها عفيه ليان ساعديني الله يخليج اريد اعرف شصار بعماد والله راح اموت من الخوف والقلق

بعدج تسألين عليه وهو مخليج بالمستشفى حتى مخلي رجال يخابر خالج من تليفون عمومي كالوله انتي موجودة بالمستشفى واهلج جانو يدورون عليج لان مهند جان كايللهم آيه ماخذه فلوسها وذهبها ورايحه اني وخالج بنص الليل جينا للمستشفى

عرفت هذا الحقير مهند مسوي فلم وياأهلي كايللهم اني عايفته ورايحه علمود هذا ابويه وخالي ضربوني لزمت ايدها ليان انتي تعرفيني انتي مصدكه اني اسوي هيجي

لا بس مادام عماد بالسالفه فاني اعرفج كلشي تسوين علموده آيه اني ماعاتبج انتي حقج تحبين اللي تردينه وتعيشين وياه بس انتي متزوجه جنتي تنتظرين فترة وتطلكين وترجعين لعماد والله اهلج من البارحه كلبهم خلصان من القهر عليج بس يخابرون كوة حصلو فيزة حتى يجون يمج

ليان الموضوع مو بهالشكل راح احجيلج كل شي بس خابري اخوج خلي يعرف وين عماد الله يخيلج باوعتلي مصدومه

شتريدين منه آيه مكفاج اللي انتي بيه من ورا عماد رحمي نفسج شوية انتي مريضة بشي اسمه عماد

ليان مو وكته بس هالخدمه واني راح ابقى طول عمري ممنونه منج

ولو خالج مهددني بس ماكدر اشوفج بهالشكل ومااساعدج راح اخابرأخويه بشرط تاكلين اكلج كلها واجيج اوك

بديت اكل حلكي جانت توجعني شفتي طعم دم ماحس بالاكل اريد بس اعرف اشصار منو اخذني للمستشفى ومنو مخابر خالي وعماد اشصار عليه كل اللي اتذكره اخر شي صوت سيارات وصوت جلاب وحميد يكولي آيه لاتخافين وصلنا هذا اخر شي انتظرت بعد فترة جتي ليان وجهها عادي كلت بكلبي خاف ميت متريد تكولي ردت أسألها شفت امي دخلت وياها شافتني ماكله شويه فرحت

آيه خابرنا مهند مو راضي يرجع بنتي سافر وطلقج كال ماريد اجبرها تعيش ويايه خلي تشوف حياتها وعد أبوج ميحجي بسالفتكم اللي يسأل نكوله مصار تفاهم ونسد السالفة بعد باجر راح نرجع وترجعين ويانه بنتي وين فلوسج وغراضج المن منطيتها خالج يكول ملكينا شي وياها بالمستشفى حتى تليفون ومحفظه ماكو وليش بعتي الشقه اللي اشترينا الج اني وابوج هديه زواجج احجيلي خلي نعرف

تحجي واني مو يمها ويا كل كلمه اتذكر وجه مهند وهو يرمي عماد فزيت اصيح وماكدر الزم نفسي بعد كتلها كافي يامهند يازوج ماما مشايفه جسمي ماما جيبي ابويا خلي يسمع ابن اخته شمسوي بيا اصيح وابجي كافي من الصبح ضرب واهانات وانتو متعرفون شنو السالفه كافي ظلم اللي صار بيا هالمدة مينحجي بيها شفت ابويه وخالي دخلو

عندج عين تحجين وتصيحين ياحقيرة مع الاسف عليج

ليان :أسكت ناجي خلي نسمع منها شصاير من الصبح بس تحجون عليها وتضربوها كافي

بديت احجيلهم من اول يوم وصلت لبنان لحد هسه انصدمو ابويه اتخربط امي تبجي خالي يباوعلي بندم وقهر

آيه اخويه كال عماد مسافر ألمانيا عنده دوره

يادوره ليان جان يسبح بدمه ولايتنفس شفته بعيني بابا كوه جان يحجي

بنتي تحجين صدك لو لا الله عليج طمنيني لاتلعبين بأعصابي

بست ايده والله العظيم حجي مهند كله جذب واني جنت مربوطة ومحبوسة داخل الشقه غير الضرب والاهانات المستمرة واذا ممصدكني شوفو جسمي كله اثار ضرب

خالي : هذا الحيوان اشسوى بينا خلانا كلنا بحلقه واني اكول هذا مهند ماعنده غيره على زوجته هيجي يطلكها ويسافر بسهولة

شوفتهم جسمي واثار الضرب والله خدعني كالي بس حولي فلوسج بأسمي ارجعج يم اهلج حولته بعدين اخذني لمنطقة بعيدة خله مسدس براسي كالي اطلب فلوس من عماد حتى يعوفني مجنت اعرف ناوي ينتقم منه قتله كدام عيني واني احجي وابجي اني الومكم انتو ورطوني وياه بزواج حتى مسئلتو عليه كأنما اني عار وخلصتو مني حضني بابا وهو يمسح دموعي

والله العظيم يوميا اخابره واسال عليج يجاوبني آيه متريد تحجي وياكم سامحيني بنتي

ابو زيد لعد عماد شلون نتأكد شنو صاير بي ترى هاي قضية مو سهلة الرجال دبلوماسي مقتول بدولة اجنبية اخاف آيه تتورط بالقضيه

اكوللكم هو بألمانيا مصاير بي شي يجوز آيه انتي من الخوف تخيلتي هالشي وهو شافج مغمي عليج موديج للمستشفى

خلي اخابر دينا اسألها بنفسي صدك ناجي احنا نسينا الموضوع الاهم اخاف على آيه من السين والجيم تليفونها مغلق بنتي متعرفين رقم اخو نخابره ونطمن

اخذت الموبايل من ابويه دكيت على رقمه اللي يم حميد مخلي عليه رد صوتي انه عنده دورة وميكدر يرد على احد الرجاء ترك رسالة سديته باوعتلهم ممصدكيني مو

خالو الشغلة متدخل للعقل مهند شلون كدر يغدر بيكم أثنيناتكم بهالشكل وعماد شلون يجي لهالمنطقة لوحده بدون حماية بس لو الزمه الا اذبحه بيدي عديم الرجولة الحقير .

خالي مراسله من تليفوني بأسمي علمود هاي عماد جان جاي .

مقداد وين مسافر اخوك صارله ايام ميخابرني اكو شي مخبى عليه كلبي مو مطمن عليه

مابي شي ماما عنده شغل ميكدر يخابركم بس خابرني بلغني اكوللكم لاتخافون عليه من يخلص هو راح يرجع يمكم ليش خايفة حبيبتي صدكيني ماكو شي

مقداد راح تصير اب وداعتي لاتكذب عليه من تخلي ابنك لو بنتك بحضنك راح تعرف الاهل شلون يحسون بوجع جهالهم سلملي على دينا ديربالك عليها حبيبي

ماما مو كلتلج ماكو شي بس رايح لألمانيا ليش متصدكين

كومي من وجهي شهد اعرفج تكذبين عليه سمعتج بارحه تبجين من سألتج كلتي علمود بنتي عدها مغص

راح اكولج بس أوعديني متسوين شي بنفسج وتكونين هادئة عماد مريض بالمستشفى شفتها فزت وكامت من مكانها كعدي ماما مسوي عمليه بسيطة بس اهناك مو مثلنا ميسمحون المريض يستخدم تليفون

بداعة روح ابوج تحجين الحقيقة مسوي عمليه بسيطة لو لا

ليش هيجي ماما تحلفيني بأبوية لا اني جذابه عماد بين الحياة والموت ادعيله يكوم ويتجاوز هالمحنه ايام واني كوة لازمة نفسي كدامج ماما عماد مو بخير .

حبيباتي اذا كدرت راح اكتب بارت 32 والا عذروني باجر انزلها يومين منايمه متواصلة كلش تعبانه اشكركم على تعليقاتكم الحلوة رجاء تصويت بنجمه وتاك لصديقاتكم

#عاشقة_السفير32

الكاتبة chra kirkuki

عيناكِ كنهري أحـزانِ

نهري موسيقى.. حملاني

لوراءِ، وراءِ الأزمـانِ

نهرَي موسيقى قد ضاعا

سيّدتي.. ثمَّ أضاعـاني

الدمعُ الأسودُ فوقهما

يتساقطُ أنغامَ بيـانِ

عيناكِ وتبغي وكحولي

والقدحُ العاشرُ أعماني

وأنا في المقعدِ محتـرقٌ

نيراني تأكـلُ نيـراني

أأقول أحبّكِ يا قمري؟

حميد لأخر مرة اسألك عماد شجان يسوي بلبنان اني متأكد ماعنده لادورة ولا ندوة ولا مؤتمر اهناك عقلي ميستوعب جان عنده شغل شنو هالشغل

استاذ مقداد مثل مابلغت حضرتك من قبل وارجع اكولك جان ناوي يتاعقد مع شركة هذا اللي عرفته منه

وليش ياسر ماعنده علم من يمتى عماد يتعاقد مع الشركات بنفسه وليش مصاب منو عنده اهناك اعداء

ماعرف استاذ اني جاني اتصال منه كالي تعال لفلان مكان رحت شفته مصاب وضعه مو مال ابقيه اهناك خابرت اشخاص هو يعرفهم دبرولنا طيارة خاصة نقلته لألمانيا وخابرتك بعدها

قصدك بعد يومين مو كل هالوقت شنو جنت تسوي وحدك وياه اهنا مادري شكولك اصلا انت شي يخص عماد متحجي بيها

استاذ اذا ماعندك شي خليني اسافر عندي شغل ومن يكوم سيادة السفير راح ارجع عن اذنك

شلون تعوفه وهو بهالحالة انت الحارس الشخصي ابقى يمه اني راجع للفندق متروح من هنا لحد ماتحجيلي الحقيقة طلعت من المستشفى واني مخنوك اخويه وضعه يسوء يوم عن يوم جنت بدبي ويا دينا جان عندي افتتاح قناه جديده رجعنا للفندق نرتاح دينا حامل واصله لشهرها اخذها ويايه وين ماروح ماكدر بدونها هي كل حياتي ردنا ننام خابرني حميد أستاذ عماد مصاب وحالته حرجه اني انتهيت من مكاني سألته هو وين كالي بمستشفى بألمانيا نقلته من لبنان اني اتخبلت مو جان بالعراق يمتى سافر وليش مكالي وهو وين بيا مستشفى وشصاير كومه أسئله وهو ميعرف جوابها مجرد حالته حرجه

سديت تليفوني جنت احجي ويا أمي بجيت اهواية من عرفت جان متواجد ويا آيه وقت الحادث واللي ضربه مهند اشكد صعب شكول لمقداد من يسألني سمعت صوت المفتاح يريد يفتح الباب حبيبي بشرني شلون صار

حضنتها ماكو اي شي حياتي انتي زينه ديربالج على نفسج سامحيني انشغلت هالايام عنج

لاتحجي هيجي ترى عماد كلش غالي يمي ردت استفسر منه عرف شي لو لا حياتي معرفت شنو اللي صار

لا وحميد مو راضي يحجي متأكد يكذب عليه حتى لو أموته مراح يحجي شي يخص عماد اخ لو بس اعرف منو اجلب ابن الجلب اللي مسوي هيجي امسحه على وجه الارض

مكدرت اكوله لان جان كلش تعبان كوم غسل وارتاح شوية وانشالله يكوم بالسلامه

ياراحه واخويه بين الحيا والموت ماريد ارتاح انتي روحي ارتاحي حامل مو زين عليج القلق والتوتر شبيج احسج مو طبيعيه ليش كل هالدموع

مادري شكولك مقداد بس لاتعصب حاول تتقبل الموضوع بهدوء

كولي لاتخافين اني هادئ

لزمت ايده آيه جانت ويا عماد وقت الحادث

فزيت وخرت ايدها نعم اختج شجانت تسوي وياه مو تزوجت وانتهينا من هالموضوع لحظة لايكون زوجها مسوي هالشي

هزيت راسي بأي مكدرت انطقها

بصياح جاوبيني من يمتى تعرفين هالشي ومخبيته عني تخافين على اختج اكثر مني متشوفين دااموت كل لحظة وثانية علمود اخوية وامي اللي محتركه كلبها عليه

مقداد على كيفك والله العظيم هسة عرفت تليفوني طول هالفترة مغلق فتحته شفت كومه مسجات ومكالمات من اهلي خابرت امي وعرفت منها آيه منهارة

ياريتها ميته احسن مو كل فترة مسوية شي لعماد والحقير مهند وينه

محد يعرف وينه

عفتها ورجعت للمستشفى جان لازم افتهم من البداية حميد مو راضي يحجي لان السالفه بيها آيه.

بابا عرفت وينه لو لا

آيه بنتي من الصبح اخابره مقفول وحتى اختي نفس الشي خابرت جدج هو هم ميعرف بس متأكد هو باقي اهنا مراجع

خالي خلي نروح للشقة الله عليك خلي نشوف موجود لو لا رحنا واني كوة دامشي سئلنا البواب كال الشقه من فترةاشتروها ناس وأستاذ مهند اخذ غراضه وطلع من ايام بعد ماوقع على عقد البيع

ها آيه وين نروح تذكري الاماكن اللي يروحله هو

مادري وين جان يروح غير يجيب بنات للشقة خلي نسأل بالمطار فعلا رحنا بمساعدة اخو ليان دورنا بأسم مهند ماكو خابرنا ملكينه اسمه كال احتمال عن طريق البحر رايح يعني شنو

منكدر نلكي كلش صعب لان رايح يطلع بغير اسم اكيد خلي نرجع وننتظر

هم خسرت عماد وهم هذا هرب وماكدر اخذ حقي منه اخذت تليفون خالي خابرت دينا سألتها على عماد جاوبتني عنده دورة وهي وزوجها راح يروحون بعد ايام يغيرون جو بألمانيا ياربي اني بحلم لو شنو محد يعرف وينه ومسافر وتليفوناته مغلق وهي تكول رايح دورة راح اتخبل شلون راح مو جان ميت اتخبلت اي اني اتخبلت.

جذبت على آيه علمود مصلحتها باوعت على مقداد ميحجي ويايه من عرف آيه بالموضوع يعاقبني بشي اني ماعندي ذنب بي سمعته يحجي

لاتحجين لأهلج عماد اشصاير بيه منريد فضايح وضوجه اعلاميه وانتي هم متريدين اختج يجيبون اسمها بالموضوع .

حبيبي لخاطري اكعد وارتاح ضغطك مرتفع وانت تحاسبني على ذنب غيري

دينا حضري غراضج راح ارجعج يم اهلي اخاف يصير عندج ولادة اني ماكدر اسويلج شي وعقلي ودماغي يم عماد ماريد اخسرج انتي همينه .

رجعنا من لبنان عزلت نفسي بغرفتي عرفت من دينا من رجعت من المانيا عماد يتعالج بس بعده مصاير زين زيارات وحجي وياه ممنوع عمتي سوتلي مشكله جبيره بين اهلي كايلتلهم ابني شافها ويا واحد فضحتني احنا مردينا عليها كلت لابويه وامي خلوها شتريد تكول ماعليكم بيها اهم شي لاتجيبون سيرة عماد ماريد الناس تحجي ويكبرون السالفه كل ليلة قبل لاانام اخابر واتمنى يفتح تليفون ويجاوبني وزعت صوره اللي رسمتهم كلها على جدران غرفتي لا امي ولا ابويه يحجون لو يعاتبوني جنت نايمه سمعت صوت داخل البيت طلعت من غرفتي شفت امي تبجي وتريد تطلع شكو ماما

دينا ولدت وهي هسة بالمستشفى رايحين اني وابوج يمها ديربالج على زيد

شنو اختي ولدت انتظروني جاية وياكم نانا باقية يم زيد ياربي الحمدالله وصلنا شفت ام عماد واخته وياسر نزلت راسي كلت هسة لو يذبحوني لو يرجموني اني شجابني اهنا اول مرة امي وابويه يتواجهون وياهم من تزوجت دينا سلمو علينا ورحبو بينا ولا كأنه صاير شي

جسمي يوجعني احس الالم بصدري أكثر شي فتحت عيوني واني اردد آيه آيه سمعت صوت

حمدالله على سلامتك حبيبي مسحت دموعي مجنت مصدك اشوفه وهو يفتح عيونه بارحه طمنوني الاطباء بان حالته استقرت ساعات ويكوم بسته على راسه حبيبي الله يخليك اليه

لزمت أيده آيه

مخبلتك آيه ليش متكول امي ابني اخويه بس على لسانك آيه بخير خلي اخابر ماما وافرحها واصيحلك الدكتور

انتظرت الدكتور يروح باوعتله حتى يحجي اريد اعرف اشصار عليه وعليها حجالي اللي سمعه من دينا آيه شلون جانت عايشه ويا الحيوان مهند واني شلون شكيت بيها هي مسلمه نفسها ونستني وهي جانت عايشة بجحيم خلي يرخصوني ونطلع منا

شنو وين تطلع عماد رامبو صحتك مو زينه

ماتحمل ابقى اكمل علاجي اهناك من نرجع مشتاق للأهل

الاهل بخير لاتهتم وأذا على آيه راح توصللها لاتستعجل

بقيت طول الاسبوعين ماكل براس الدكاتره اكوللهم طلعوني ميقبلون سمحولي اليوم بس اخابر واحجي قليل بس طلعو من الغرفة خابرت آيه اول ماسمعت صوتها احبج أعشقج ماكو شي راح يبعدنا عن بعض

عماد حبيبي ياربي مو مصدكه عماد صدك هذا انت انت بخير مو

مشتاقلج تذكرين شنو اول شي رسلتيها اليه اني الك

وللموت عماد اني الك ومراح اصير لغيرك انتظرك ترجع وتنور حياتي من جديد اني ولاشي بدونك

سديت منها حسيت نفسي مابي شي كأنما شفيت العشق هيجي داء ودواء حجيت ويا اهلي وكريم كلش ارتاحيت مقداد اريد اسوي لاهلي مفاجأة و آيه لاتكولولها وحتى دينا ايام وارجع بعد ميهمني وضعي زين مو زين الدكتور ميعرف علاجي مو يمه

سيدي تسمحلي اخذ من وقتك دقايق

اكيد حميد اولا اشكرك لان انقذت حياتي وحافظت على سري اطلب عيوني كدامك تدلل

سيدي اني افديك بروحي واللي سويته شي بسيط كدام وكفاتك ويايه حبيت اشوفك شي واعتذر اذا تعديت خصوصيتك بس جنت متاكد راح تكوم بالسلامه لان انت ماكو مثلك والله يحبك ردتك تشوف شي اني نفسي من شفت بعيوني مكدرت امنع نفسي وماخليها لحضرتك ذكرى

مادري شكولك حميد بس من شفت هالصورة حسيت اصابتي نعمه من الله حتى اعرف مقدار هالحب اللي ماكو كلمه توصفه ضليت طول مااني بالمستشفى اباوع على الصورة واتأملها

#عاشقة_السفير33

الليله سأكتب أولى صفحاتي

لفتاة عشقي وإسطورة خيالي

الليله سأراقص نجوم طيفكِ

وأغازل سحر ثغركِ

وأقطف لألئ حسنكِ

وأغوص ببحار عينكِ

وأرتشف طهر قلبكِ

لأحيا وأموت مابين حبك وعشقكِ

أحيا برمشكِ واموت بين شفتيكِ

احيا بقلبكِ واموت بأحضانكِ

احيا بقربكِ واموت ببعدكِ

فاتنتي أحبكِ وأحبكِ وأحبكِ

أحبك شئتي أم أبيتي ..

أحبك وأحب الهمس بقربكِ

أحبك وأحب الخوض بعشقكِ

أحبك وأحب العزف على لحنكِ

أحبك و أحب الموت بحبكِ.

رحنا اني وأمي وابويه لبيت عماد بعد ولادة دينا عزمتنا  امه كلش انسانه راقية ومؤمنه ابويه حجالها السالفة مردنا تعرف من الغريب بس مكال الها اني جنت وياهم وقت الحادث مجرد مهند وعماد وحدهم الحمدالله تفهمت الموضوع

جيتكم على عيني وراسي أبو زيد انت وام زيد احنا بعد صرنا اهل ولو ظروف زواج الاولاد مخلونا نتعرف  وعماد مادام بعده يتنفس كلشي يهون حمدالله على سلامتهم احنا شعدنا غيرهم

تسلمين ام مقداد من طيب اصلج النا الشرف بنسبكم ومثل ماكلتي صرنا اهل وبالنسبة للمرحوم الدكتور اني احلف بالقران وبحياة جهالي ماعندي علاقة بأغتياله ومو اني اللي علمود فلوس ومنصب اقتل روح بني أدم الحمدالله اني من عائلة طول عمرنا شبعانين وممحتاجين وأصلا من شهر قدمت استقالتي

رفعت راسي باوعت على ابويه اكيد سوى هالخطوة علمودي وعلمود دينا حتى يصفى العلاقة بينا وبين بيت عماد كدامهم كمت حضنته وابوس راسه

الماضي اندفن وراح ابو زيد وانتو اصلكم معروف بس شنسوي ويا اللي ميخافون ربهم علمود منصب وفلوس يقتلون الناس ويذبوها براس غيرهم الله ينتقم منهم انشالله واحنا راسنا مرفوع زوجي الدكتور شهيد

ماما شنو رائيج بيهم عائلة دينا مو ناس راقيين وطيبين عبالك اعرفهم من زمان

اي والله كلش طيبين ويدخلون الكلب بس لو اخوج ميعاند ويانا والله خايفة لايرجع يسويلنا مصيبة اذا عرف توفيق جان بيتنا

ههههه ميسويها وداعتج

شنو هالضحكة اللي وراها شي

ماما شنو رائيج ببنتهم آيه مو حبابه وحلوة

اي خطية مع الاسف ابن عمتها هيجي مسوي بيها متستاهل وردة

وهاي الوردة اكو شخص يريدها اكول لو لا حركتلها حواجبي

هالحركات متعلمتها من ياسر مو اني ممربيج على هيجي قصدج آيه جايلها خطابة الله يوفقها

شبيج ماما مفهمتي ابنج يريدها العاشق الولهان عماد

ضحكي على غيري عماد اني غاسلة ايدي منه ميريد يتزوج لو جان يريد من زمان مسويها

كيفج متصدكين من يرجع كوليله سمعت آيه جايلها خطابة شوفي شلون راح يكشف نفسه دينا ليش ساكته  احجيلج شي متشوفين حضرة الوالدة متصدكني

عفتي امج هسة حولتي عليه اني اصلا دايخه من جهالي طول الليل كل دقيقة واحد بيهم يكوم خبلوني

يا دينا هم تعرف وساكته ميخالف اني الكم راح اسوي عليكم حصار متطلعون من البيت لحد مايرجع عماد ومقداد راح اشوفكم وجهي الثاني وانتي دينا راح  اكول لمقداد اريد بعد احفاد

لا خالتي كافي ماريد بعد كمت بست راسها حقج عليه بس هاي خصوصية عماد شلون اكدر اكولج عليها واصلا استحي اكول يحب أختي تاخذين فكرة غلط عنهم

اهم شي عندي يتزوج ويجيب اخ لو اخت لكريم من زمان واني اطلب منه ولا يسمعني الحمدالله راح اشوف هاليوم بعيوني خابري اهلج دينا كوليلهم بعد يومين رايحتلهم زيارة .

مو ناوي ياحضرة السفير تريح كلبي وتكول يمتى راح ترجع ذرة تحمل مباقي عندي اريدك يمي

هسة صرت سفير قبل جنتي تكولين عماد حاف واني انبهج وانتي متسمعين كلامي واني هم مشتاقلج فوك ماتتصورين الدكتور ميسمحلي اطلع لان جرحي اهواية ومصاير زين يحتاج وقت يعني حتى لو ارجع مراح تستفادين شي مني

بكيفي اكول عماد حضرة السفير انت ملكي ماريد شي غير اشوفك كدام عيني والله راضيه تدري من رحنا لبيتكم منزلت عيني على كريم لو ماعيب جنت ابوسه واحضنه لحد مااشبع منه بس هو حتى طبعه مثلك لايقبل ابوسه ولااحضنه بخيل المشاعر

لا ماقبلها شنو تحضنين وتبوسين بابني واني موجود منو بخيل المشاعر اني زين آيه دواج عندي من ارجع

عماد عمري انت مو زعلان علمود بابا راح لبيتكم

ياروح وقلب وعيون عماد اني حجيت وياأمي قبل ماتروحون ابوج ماعنده ذنب كافي اللي راح امي هم متقبل هالعداوة تبقى ولاتنسين اخوية عنده طفلين من أختج يعني صار بيناتنا روابط مشتركة

واني شنو دوري نسيتني مو

انتي الاهم راح تكونين زوجه السفير بس بعد سنين لحد مااطيب وأصير زين

والله ماصبر شهر مو سنه ليش بكيفك راح اجي لبيتكم واطلب ايدك من امك

والله مو بعيدة عليج تسويها مع السلامه حبيبتي لازم انام .

آيه بعدج نايمه كومي ام عماد واختج وصلو صارلهم مدة كاعدين عيب حضرتلج الملابس

صدك نانا ام عماد موجودة ببيتنا حضنتها واني ابوسها احبج يااحلى نانا بالعالم نزلت على السريع سلمت عليهم كعدت سمعتها تطلب ايدي من ابويه وكفت من مكاني اباوع عليهم مصدومه انتظر ابويه يجاوبها باوعتله

احنا موافقين ومراح نلكي احسن من عماد للحلوة آيه كعدي بابا ارتاحي

ها لا من رخصتكم نسيت وين صايرة غرفتي طلعت برا بيتنا واني اسمع ضحكتهم ورايه ياربي صدك راح اتزوج عماد هو داز أمه وممبلغني لو شنو الموضوع كلبي راح يطلع من مكانه

ولج فضحتينا شسويتي هسة شتكول عليج ام عماد مو مصدكه

لا والله مو مصدكه دينا اكرصيني اضربيني بكيفج بس كوليلي اللي سمعته حقيقة لو اني احلم

هههههه لا حقيقة الف مبروك حبيبتي كومي رتبي نفسج تريدج هسه لاتنسين باجر تجين من وكت علمود حفلة طهور ابني

مقداد وأخيرا وصلنا كرهت السفر لاول مرة بحياتي مشتاق لكل شي ببلدي

والله جذاب مشتاق تشوف آيه بس هانت ساعات وتشوفها خليتني اكذب على دينا خطية اسبوع تتوسل بيا ارجع علمود حفلة طهور ابني مكتلها اليوم جايين

وصلنا لبيتنا مخلوني انام امي وكريم وشهد بقيت كاعد وياهم لحد الصبح تعبت اريد انام امي احسها متغيرة مو مثل قبل فرحانه من كل كلبها متتصنع الفرح علمودنا مقداد اول ماشاف دينا وجهاله عافنا وراح لغرفتهم حقه كبرو وهو بعيد عليهم

امي  وشهد حجولي  على زيارات اهل آيه وشلون ابوها متأثر بحالتي

ابني احنا ظلمنا الرجال اهوايه كافي اللي صار واللي راح عيشو حياتكم ويا اخوك بدون منحاول نعرف منو السبب رأسا حكمنا بالخطأ

ماما اريد اتزوج آيه بس اصبر زين شوية نروح نخطبها شفتها عصبت

نعم تتزوج آيه مااسمحلك شهد كومي ودي كريم لغرفته خلي ينام

ليش ماما اول مرة اشوفج تعترضين ضجت كلش متصورت امي تعارض

ههههههه تعيش وتاكل غيرها ياسفير

شنو ماما صرتي تنصبين عليه ميخالف مقبولة منج ماما سويلي شي

شتريد ابني تحس بألم لو جوعان

لا هذا ولا ذاك من يجون صعدي آيه لغرفتي

نعم عيني ميصير

اشبيج ماما لاتخافين ماكدر اسوي شي بيها متشوفين حالتي يعني يرضيج اول مارجع تكسرين كلبي وحالتي حاله

زين حبيبي احاول اشعجب مكلت لأختك 

مو هالطريقه صارت قديمه ماريدها تعرف اني رجعت اسويلها مفاجأة

يعني مسويها قبل انت واختك ادبسز متصورتك هيجي مراهق

ماما  اني تعبان حتى ماكدر اضمها لاتخافين واني اكول بكلبي بس خلي توصلني ماخليها تطلع من هنا بسهوله واني صرت زين مبيه شي حسيتها اتأثرت وهذا المطلوب من أمي مصدكه اني تعبان.

رحنا اني وامي واخويه زيد لحفلة ابن دينا  وهمه جانو عازمين بيت عمهم وعمتهم جنت كاعده طول الوقت امه تبوسني

شنو رايكم بخطيبه عماد مو تخبل

  اي والله عبالك الله خالقهم لبعض

باركولي جاوبتهم وكمت بستهم لان همه اكبر مني علاقتي حلوة بيهم كلهم وخصوصا كريم احسه مثل زيد اخويه كوة يخليني ابوسه يكول

عيب اخاف دادي ميرضى

كرصت خده ماعليك منه بكلبي اكول هو شبعان مني بوسات ومنال من شفتها غرت منها افكر اشجانت تسوي سنه ويا عماد شلون جان يعاملها مثلي لو لا لان عماد ميقبل يحجي بالسالفة كل مااسئله يكولي وانتي شعليج من الماضي عليج بهسة راسه يابس ماكو اي فايده بيه

ايه ديربالج من عماد ترى اخويه اللي مجابته امي و اعتبري كريم اخوج او ابنج لا تخلون احد يأثر على حبكم والف مبروك تتهنون بعض انشالله واي شي تحتاجين اني بالخدمه

جاوبتها من غير نفس تسلمين امه صاحتني كمت رحت وراها للمطبخ عبالي تطلب مني اوزع الحلويات والعصائر مثل سارا وشهد

آيه حبيبتي ممكن تصعدين تجيبيلي الدوا  نسيته بغرفة عماد احس ضغطي مرتفع

خاله انتي مو تكولين رجليه توجعني شوداج بغرفة عماد وهو بالطابق الثالث صفنت محجت شي اني من نفسي استحيت كلت هسة تكول عليه لسانها طويل

بنتي اني من اليوم الي هو مسافر  يتعالج انام بغرفته

بعيني خاله واني اسفه هيجي كتلج مو قصدي  ضحكت

ههههه روحي عادي ماكو شي حبيبتي ولايهمج

صعدت عبالي دا امشي سنه ماريد اوصل شلون ادخل مكان هو مابيها شلون اتحمل اشوف غراضه وسريره احتمال ماطلع اليوم من غرفته وصلت فتحت الباب فتحت الضوة شفت أحلى ماخلق ربي صيحت  حبيبي عماد ركضت عليه جان كاعد كام وكف حضنته

على كيفج نصي صوتج هسة الحرس كلهم يفوتون على صياحج  أحضنيني بعدني تعبان

بجيت مجاوبته ابجي واباوع عليه صدك هذا انت كدامي لو اتخيلك جرني كعدني يمه ايده بأيدي

تعرفين أشكد مشتاقلج بكد الدنيا اول مافتحت عيني سألت عليج واول ماوصلت من المطار تمنيت أشوفج كبالي

نسينا نفسنا بقيت يمه نحجي ونسولف حبی لازم اروح عيب .

آيه لاتروحين لبيتكم ابقي يمي تدرين بيا  تعبان محتاج مدارات

لاوالله عماد افندي ليش ماعرفك  سمعنا صوت الباب جانت شهد

آيه كلنالج جيبي دوا مكلنا داوي امج تنتظرج ضحكت

انتي أختي لو بلوة

فتحو الباب ترى الشيطان شاطر عيب عليكم آيه اذا مفتحتي هسة الباب اجيبلج امي وامج اهنا 

كمت فتحت الباب عماد جان واكف ورايا

شهد من اليوم مترجعين لبيتج لحد ماتزوج آيه تبقين حالي حالج محرومه من زوجج

لا عيني ماعليه بيكم عيني آيه ابقي يمه خطيه تعبان داوي على كيفج لاتقصرين واي شي تحتاجون اني بالخدمه

#عاشقة_السفير34

الليله سأنزع رداء الحزن عني

سأرمي بآهاتي وأدفن باقي صرخاتي

الليله سأطفئ لهيب جراحاتي

وأرسم بالحب المسراتي

سأجعل الدموع تتبخر في أجوائي

لتصبح عطرا يداعب أنفاسي

الليله سأفرد جناحاتي لأعتلي فوق النجوم

سأرفرف عاليا لتتساقط مني الهموم

سأحمل معي أرق الورود ..

لأنثرها على واحات الغيوم

الليله إستباح العشق دمائي

الليله سأعلن حبي و ولائي

لفاتنتي ولب قلبي وكياني

الليله سأكتب أولى صفحاتي

لفتاة عشقي وإسطورة خيالي

سمعت صوت هلاهل أهلي من الطابق الارضي واطلاق العاب نارية من قبل حراسي رغم نبهتهم بس حبو يعبرون عن فرحتهم بيه باوعت على المرايا كل شي تمام مثل ماردت البدلة والقميص وباقي التفاصيل فتحت الخزنه طلعت السلاح اللي جنت شايله من سنين عمري محبيت الزمه بيدي وجوده فقط للأمور الطارئة بس بعد اللي سواها مهند بيه قررت يكون رفيقي وين ماروح نزلت ويا كل خطوة اخطيها تنهال عليه ذكريات سيئة من سنين اهلي شفتهم بنفس الوقفة بنهاية الممر ينتظروني ونفس الفرحه ونفس صوت الهلاهل والورود اللي مطشر بكل مكان باختلاف وجود والدي بيناتهم كل مااقترب احس نفسي راح افقد توازني دعيت يعدي هاليوم على خير اريد ابتسم او اضحك ماكدر ماركزت منو يحضني منو يباركلي منو يبوس بيا لحد ماسمعت صوت أمي

عماد اني ومقداد نجي وياك بيت عمك وياسر راح يسبقونا يالله حبيبي عيب نتأخر عليهم

لا

شفت عماد من ينزل ويمشي مو تمام حسيته  يتذكر الماضي مبين من تعابير وجه نحجي وياه شارد استغربت مو جان يتمنى يخطب آيه والليلة احلى ليلة بعمره من كال لا تأكدت بي شي تقربت منه خير حبيبي صاير شي

ماكو شي مقداد تسلم من كالت امي نجي وياك اني ومقداد خفت عليهم لاتنعاد نفس المأسات ويموتون بحضني رأسا رفضت راح اركب سيارتي لوحدي روحي انتي ومقداد ويا الحراس ماما ابوس ايدج لاتناقشيني راح اطلع قبلكم مشيت من غير مالتفت عليهم وصلت للسرداب رخيت الرباط شوية احس بخنكه صحت على الحارس يجيبلي مفتاح احد سياراتي ركبت وطلعت ليش هاليوم بالذات تنعاد عليه هالشي معقولة ممكتوبلي افرح

اليوم راح يجون بيت عماد لبيتنا علمود حفلة خطوبتنا هو طلب شي بسيط بيناتنا بدون هوسة محبيت اجادله لان بعده تعبان بدلت لبست فستان وردي قصير وفتحت شعري وسويت مكياج بنفسي بمساعدة دينا  نزلت كتلهم موصلو لأمي معرفت بابا جان كاعد

بنتي ترى راح يوصل لاتستعجلين

اتفشلت لا مو قصدي شي بابا مشتاقه لجهال دينا خطية هي من الصبح عايفتهم وتساعدني

ماما :هههه بنتي ايام وتروحين يمه ليش مستعجله

زيد :اخيرا نخلص منج وابقى بالبيت لوحدي راح اصير زعيم عليكم وعلى جهالكم

كرصته وبسته فدوة للزعيم

يع وخري ترى اني زيد مو عماد

عيب ابني شنو هالحجي

والله ماما شفتها هذاك اليوم بالمزرعة لما جنا معزومين عدهم جانت تبوس عماد

اني صرت مي يبو انداريت شفت امي وابويه معصبين متحملو ضحكو عليه كالو بنتي انتظري لاتستعجلين واني اكول بكلبي شنو ماستعجل بنتكم منتهيه تذكرت المزرعه عزمتنا أم عماد حتى نتعارف وعم عماد طلب ايدي من بابا وبنفس الوقت صارت الموافقة بين الطرفين لاول مرة بدون خوف وقلق كدرت ابقى ويا عماد تمشينا بالمزرعه شوفني كل ركن بيها جان متقصد ياخذني بعيد عنهم حتى ياخذ راحته زيد كمز

بابا وصلو تعالي آيه شوفي عماد جاي بسيارة حلوة

جان يجر بيه حتى نركض مثل قبل ميفهم ميصير اني عروسه لازم ابقى بمكاني بس من سمعت اسم عماد بعد اني ماكدر اكعد رغم امي نبهتني مسمعت كلامها طلعت ويا بابا استقبلناهم ويا كل خطوة يتقرب مني كلبي يريد يطلع من مكانه شنو هالجمال والاناقه فدوة للطول وللعيون الله يحميك حبيبي اكو بكلبي لعد ليش كالي اريدها بسيطة وهو متأنق لاخر درجه حسيت نفسي بموقف محرج لبسي ومكياجي مو مال هاليوم تقرب صافح بابا بعدين باس راسي حسيته بارد ضجت  كعدنا الموسيقى تشتغل اني وياه على الكوشة اللي مسويتها امي لهاليوم خليت أيدي بأيده

من لمست أيديا حسيت رجعت للواقع باوعتلها حبيبتي طالعه كلش حلوة اشكرج سمعتي كلامي ماحب التصنع تعجبيني وانتي على طبيعتج

اصلا اشوف نفسي كدامك اتفشل هسة اهلك شيكولون عليه قهرتني عماد واحسك ضايج اصلا حتى بوستك بلا طعم

هههههه من يمتى بوستي بلا طعم  خاتون تردين كدام ابوج ابوس شفايفج ولايهمج هسة اكوم اعتذر منج كدامهم وابوسج بالطريقة اللي تحبيها

مجاوبته اشكد ادبسز صاير ميتحاجه اوف منك اي اضحك عليه اخذنا صور وتعشينا كلنا جانت رغم بساطته الحفلة بس حلوة ودعنا أهله  بقى هو يمنا كعدنا بمسافة بعيدة عن اهلي تقرب مني

حبي ماكو مجال منا ومنا

لا ماكو تريد كدام ابويه رديت عليه مثله انتظر ايام واني يمك

آيه اكولج من هسة ترى ماكو رومانسيات ليله الزواج رأسا ادخل بالموضوع متفقين

ليش متزوجه قروي لو شنو ماعليه اصلا لازم بس تغازلني للصبح وماكو شي تنتظر لحد ماانطيك الضوء الاخضر

لعد ابقي بيتكم

هيجي عماد افندي ميخالف اني اسويلك جو رومانسي وانت عليك البقية

آيه انتي تبدين وانتي تنهين كلشي اني تعبان تدرين بيه ماكدر

صدك جذاب علينا ضحك

اوف منج شيصبرني بعد مو قرينا فاتحة كومي بدلي نطلع بالليل مثل قبل ونعيد ذكريات

لا قبل ولا بعد ماكو اروح انام عندي شغل باجر

يجي منج تعوفين حبيبج ولهان وتروحين تنامين

اي يجي عادي اتعود خلص الدلال واجه وقت الجد راح  خلص تزوجتك وخليتك اليه بعد شريد انتظر ايام واني يمك حبي

بينتي على حقيقتج اني الج ميخالف تدللي هالايام حبي كملي جهازج بسرعه لاتشترين اهواية اشياء لان نسافر  اشتري اهناك براحتج ماريد يتأخر الزواج بعد شهر عندي مؤتمر واحتمال اتأخر بي

يكفيني اسبوع واجهز نفسي حبيبي

طلعتي مستعجلة اكثر مني كومي نروح نطلع كلش ضايج ماكدر ابقى اكثر اخذتها ورحنا على مكانه خليني بحضنج نسيني الماضي

كافي عماد حبيبي موتتني من القهر بيا ولا بيك لخاطري ديربالك على روحك ادري صعب عليك الموضوع

بستها وحضنتها خليت ايدي بشعرها تصدكين من تكونين ويايه احس براحه هاي عيونج البريئة والحلوة تخليني مرتاح تدرين اتمنى ذاك الوقت انتي ويايه يمكن جنت اتجاوز اللي صار بسهولة ديربالج بيوم من الايام تفكرين تعوفيني .

تعالي دينا احجي وياها عقل مظل براسي من وراها تخبلت رسمي تريد تجهز باسبوع يمتى تحضرون قاعه وكروت الدعوة وتجهيزاتج بس فستان العرس يحتاج اسبوع حتى تختارين اللي يناسبج

اي صح آيه شنو بعد اسبوع زواجكم متلحكين والله الرجال ميطير اذا تخافين راح اقفل عليه غرفته بعد شتريدين هههههه

طبعا تضحكين عليه تزوجتي وخلفتي بالج مرتاح مو مثلي من الاخير اني مستعجلة

ومتستحين تكوليها بوجهنا بنات اخر زمن بعدني مناسية فشلتيني ويا امه من اشترينا الذهب تتغزلين بعماد كدامنا اتوقع عماد يخجل اكثر منج

صدك آيه واي شكد عيب اني لحد الان ماخلي يلزم ايدي كدامهم أستحي

عماد حبيبي وبكيفي اتغزل بي ابوسه احضنه حلالي ليش استحي تردون امثل بابا اني ماعرف اكذب وامثل اسوي نفسي خجلانه

وانتي تقارنين نفسج بيها عبالج ممصدكه تتزوج قبل لاانسى صديقتي مديرة مدرسة حكومية مجددين صبغ البناية سئلتني اذا تكدرين تسويلهم شوية رسومات تشجعين الجهال على الدراسة

باجر ماعندي شي اروح شكو بيها يعجبني افرحهم بس اليوم راح اطلع ويا عماد علمود نختار ديكور القاعه والبوفيه يالله باي

رجعي من وكت عندج كومه اشغال الله يحميها خفت عليها تنكسر فرحتها بعد اللي سوا الحقير مهند بيها الحمدالله كدرت اشوفها اليوم وهي بأسعد لحظاتها ويا عماد

جنت مندمجه اصبغ واضحك ويا الاطفال لبست بدلة كابوي وشديت شعري وتيشيرت ابيض ردت ابين صغيرة كدامهم حتى اكدر اتقرب منهم واخذ من افكارهم وارسمها على الحايط جانت مهمتي ارسم حايط صف اول ابتدائي سمعت اصوات وهوسة مهتميت كملت شغلي صوت المديرة وهي تحجي ويا شخص رفعت راسي شفت عماد تمنيت الارض تنشك وتبلعني كلت هسة ميعبرني باوعت بعيونه ابتسملي

شفت آيه من بعيد مندمجه وهي ترسم مكدرت امنع نفسي عنها استاذنت من المديرة وتقربت منها الله يساعدج عروستي شنو هالالوان الحلوة على شعرج وجهج 

معرفت شجاوبه وكعت الفرشة من ايدي هو راح يكمل الجولة سمعت اثنين من المعلمات يحجون عليه وعلى جماله واناقته بقيت اردد ويا نفسي آيه الزمي نفسج بدون فضايح بس شلون واسمعهم واسكت هذا عماد ماكدر طلعت قهري بالرسمه رجعت للبيت ضايجه حتى قفلت تليفوني غسلت وبدلت ملابسي نمت مرضيت حتى اتعشى وياهم حسيت باصابع على شعري عبالي أبويه مفتحت عيني بس لا هاي ريحه تختلف

روحي كومي مشبعتي نوم ليش قافلة تليفونج ظل بالي عليج مكدرت ارجع للبيت بدون مااطمن عليج

كمت باوعتله عماد ليش جيت كلش ضايجه من نفسي محبيت تشوفني بهالشكل تدري خفت تكول شنو هاي اللي متزوجها اخاف تعوفني

بالعكس اني احب عفويتج وحبج لمساعدة الناس جنني لبسج وانتي متلونه كلت اجي واشوفج لوحدنا  شنو هالصور الحلوة اول مرة اعرف اني حلو بهالشكل مصدكت من ابوج كال آيه مخليه غرفتهامعرض مال صورك  بس من هسة اكولج اصباغ متدخل غرفتنا اسويلج غرفة خاصة ترسمين براحتج روحي انتي للموت ماعوفج .

#عاشقة_السفير35

قالت أحبكَ ..

فتوقفت كل المعاني

وتراقصت في السماء النجوم

وباتت سهرتي أحلى سهرة

نبت الربيع على شفاهي

رجف الجسد وجاءت أحلى فرحة

ما أسعد الأيام بين يديّ

سافرت بك هناك لأروع بلد

يا وردة فوق جدار المحبه

حبكِ أكثر عندي ألف .. ألف مرة

يا قدرا جميلا زارني فجأه

فاخضرت ليلتي وتلألأت أجمل زهره

والطيف يسكر من عيون ساحرة

توقفت لسحرها كل المجرة

يا وردة الحسن زيديني

وأروي أيامي عشقا وجمالا

ما أجمل

أن تتوقف الأزمانُ

لحبنا طويلا.. طويلا

تعالي نزرع الكون حبا

يا وردة نبتت

بين الحنايا

فتفتحت كادي وجوري

عشقت صوتك من اول همسه

قالت أحبكَ ..

قلت وأنا أحبك

قبل اليوم بألف .. ألف عام

لا تعجبي هذه حقيقة عمرنا

هذا اليقين وقدرة العلام

منذ التقينا وسكرنا بحبنا

في أحلامنا عبر المنام

هل تذكرين حبيبتي ؟

كيف التقينا هناك مع الأحلام ؟!!

وعشقت حلمي ولم أزل

أعشق عمري معكِ على الأيام

يوم التقينا صدفه

كنا كراما ما أكرم الأحلام

قالت أحبك ...

فاخضر عمري وتاهت الأزمان

قالت أحبك ..

فتبسمت كل الليالي وغنت النجوم

يا لسعدي وجنوني

كم بالحب فرحنا

ما أروع هذا الجنون

حبك كالجنون حبيبتي

يسكرني يغيبني

ويرويني عشقا وحنان

وفوق زهورك

جئتك ظامئا

وانتابني بعشقك الهذيان

وظللت أروي العمر منك حبيبتي

وجعلت من عينيك

أجمل الأوطان

خالي وزوجته ليان رجعو فأمي قررت تسويلهم عشا وطلبو مني أعزم عماد بس ابويه عزم عمه واهله همينه باقي ايام ونتزوج طبعا ليان وزينه صديقتي يصنفون عليه ويضحكون واني مرات اجاوبهم مرات اغلس حتى اغيضهم يساعدوني بالتجهيزات زينة تزوجت وصار عدها ولد عايشة بمصر رجعت علمود حفلتي قررت اطبخ بأيدي بمساعدة نانا طردت زينه وليان من المطبخ جانو يضحكون عليه صوجي اعزمكم مجرمات اوف منكم

على كيفج بنتي ميلوكلج تتعصبين ديربالج لاتحركين الزيت يطلع الريحه مو طيبة بالاكل

متشوفيهم يكولون طلعي من المطبخ قبل لاتسويلنا انفجار بالمطبخ

من غير زعل مخليه ايدي على كلبي خايفة لاتطلع الاكل مو مثل ماتريده امج بعدين تعاقبنا اني وياج

انتي همينه نانا ماشي راح اشوفج شلون يمدحون بطبخي لو ماعماد جاي مجنت افوت من يم المطبخ اصلا كملت وياها الاكل والحلويات غير الجاهز اللي طلبناه من المطعم دخلت لغرفتي خالية من صور عماد كلها اخذهم وياه ليان كومي فزي بس نايمه ممستفيدة منج بشي رتبيلي شعري

رجعت من برا تعبان كلش ندمت استعجلت بحفلة الزواج المفروض اخليها بعد شهر شهرين اني وياسر ومقداد موزعين الشغل بيناتنا غير تأمين مكان الحفلة لان يجون شخصيات سياسية اخذت تصريح من الامن يوفرولنا حماية يتوزعون داير مداير المكان  شفت حميد

سيدي نروح اني وياك مشوار ضروري

تقربت منه عرفت ميريد يحجي كدام مقداد وياسر شكو حميد يادوب الحك ارتاح شوية واروح لبيت آيه

لزمت مهند وديته للمخزن حبسته

ذيب حميد خلي يخيس يوم يومين بعدين اروحله مو وكته هسة بس عينك عليه محد يشوفه واخيرا يانذل وكعت بيدي راح اخليك تنسى حليب امك رحنا على بيت آيه كلما اشوفها احس اول مرة ومشايفها بحياتي بس اليوم طالعه جمالها خرافي دخلت اخر واحد حتى احضنها براحتي

كعدت بصفه من ناكل صبيتله من كل شي كتله لاتفشلني عماد حتى لو موطيب سوي نفسك عاجبك اهواية  سمعت امه

عماد ميحب محاشي من هو صغير يكرهه اليوم اشوفك مستمتع بيها

لا ماما هذا يختلف لان من أيد حبيبتي آيه كلش طيب اول مرة اعرف طعمه هيجي حلو طبعا كوة لازم نفسي لااضحك امي مستغربة مني وآيه تهددني وهي بصفي ها عجبج بعد مدحتج والله احس نهايتي هالليلة بالمستشفى متعرفين اني ماكل هيجي اكلات مرة ثانية لاتحرجيني

تعود حبيبي لان اذا نبقى على وصفاتك اني اموت من الجوع قصدك تتسمم من طبخي بعد ماخلي خدامتك تطبخلك كلشي تاكله لازم اني اكون طابختها اتعشينا رحنا كعدنا بالصاله اني وهو بس نباوع لبعض ناسين اللي حولنا كمت جبتلهم كهوه عمه كال بنتي اتقربي كالي بأذني لما توصلين لعماد خلي ايدج ترجف وكعي الكهوة عليه ضحكت بكلبي كلت اي اسوي بيه هيجي ويكوم يعوفني ابقى بدون زواج من وراك مو

سوينا حفلة حنا عزمنا اصدقائنا اضطريت اسويها بقاعه لان مزرعتنا نعدل بيها مابيها اثاث  ياسر ومقداد يهددوني مااحجي ويا آيه  حتى تشتاقلي واني أصلا ميت من الشوق الها اشوف صورهم اول باول شهد ترسلها اليه مستحيل يفوت هالليله وماشوفها راح اشغلهم وافلت منا

كعدي كافي متعبتي من الرقص باجر متكدرين تكومين من الفراش ارتاحي شوية

عوفيها دينا والله احلى شي اليوم خلينا متونسين كملي آيه بعد طلبي من الدي جي اغاني نركص عليها

ولايهمج ليان لخاطر كرشتج اللي صاير متر وتهزين هيجي لو ماحامل شتسوين دينا عوفينا نركص روحي كعدي ويا العجايز 4 مرات بدلت بالحفلة كل ساعتين البس بدلة كل وحدة احلى من الثانية

والله انتو حالة اني سامعه اللي مثلج هسة بالفراش يرجفون من الخوف والقلق اسبوع قبل الزواج لاياكلون ولا ينامون وانتي ولا يهمج

آيه باجر صيري سباعيه لاتخلين حجي دينا تأثر عليج رفعي راسنا ويا سعادة السفير لاتمثلين دور الخجولة متلوكلج وهو بسرعه يكشفج

طبعا زينه خاتون طالعه عليج بعد باجر اشوفكم عذورية عماد ههههههه اكولج ليان ام المصايب دبريلي شغله اصعد فوك راح اروح ويا عماد شوفي المسج فدوة لحبيبي حتى بأخر الساعات يريد يكملها ويايه

والله حتى عماد خربتي ولج آيه هذا صدك هو الله يرحم ايام زمان مجان ينطيج وجهه هسة يتمنى شوفتج

رتبو غراضي الباقية زين اعتمد عليكم احتمال اتأخر كدرت افلت طلعت من الباب الخلفي لحديقتنا امي عبالها صعدت لغرفتي حتى ارتاح نزل من السيارة وفتحلي الباب سعادة السفير اليوم صاير جنتل تفتح الباب بنفسك

لاتكبرين راسج السيارة جديدة خفت متعرفين تفتحين الباب وتكسرينه ههههههه اضحك وياج خبله شنو هالدموع من صدكج آيه حبي تروحلج السيارة وصاحبها فدوة مسحي دموعج حبي

مكروه وخر لاتحضني اني الك تضحك عليه بس نتزوج الا اتعلم اسوق سيارة واولها هاي اركبها وافلشها حتى تتوب متحب شي اكثر مني

عمري ماكو شي اغلى منكم انتي وكريم شنو هالاناقه والجمال أحسج متغيرة وتنافسيني بالاناقه شنو تحضيراتج لباجر كلشي تمام

اي كلشي تمام بس يخلص الحفلة ادخل للغرفة وانام رأسا باوعتله وماعليه من احد

كولي والله ههههههه زين بس لابعدين تتوسلين بيا اتفقنا مو

لا مو مصدكت على عنادك مانام وابقى احبك عماد

مكدرت اكمل هالليلة بدونج اريد اودع عزوبيتي واني وياج حبي.

كلشي يختلف نفسيتي ضحكتي واني ادور بفستاني الابيض بين صديقاتي واهلي والمسكه اللي بيدي ورود طبيعية هدية من عماد فاجئني بيها قبل مأوصل للصالون حضنت بابا باوعتله يمسح دموعه ويبوس راسي بست ايده بابا لاتبجي حبيبي شوفني اشكد فرحانه حبيبتك آيه اليوم أسعد أيامها

ههههه ياملعونه ليش جنتي عايشة بعذاب يمنا الله يباركلج ياروحي اني كلش فخور بيج بنتي ماريد هالضحكه تروح من شفايفج ابد اريدج قوية وعلى طبيعتج دايما يالله نروح حتى اسلمج للعريس كوليلي بصراحه منو تحبين اكثر ابوج لو عماد

بابا لاتحرجني فدوة تعرف معزتك بكلبي بس عماد حبه غير احس واني امشي رجليه بالسما مو بالارض مشيتنا بخطوات مدروسة تدربنا عليها قبل ايام اني وبابا وحتى الرقصة تدربنا عليها ويا عماد حتى منتعرض لموقف محرج القاعه تجنن والديكور ولا بالأحلام الموسيقى تاخذك لعالم ثاني والطاولات الموزعه عليها الانارة والورود الطبيعيه واشكال الوان ناس متواجده حسيت برهبه العرس مو مثل ماتخيلتها واللي شايفته يختلف جذريا كلشي بنظام غير الحراس داير مداير القاعه هسة حسيت اللي اني متزوجته مو شخص عادي لاول مرة احس عماد يختلف عني غير حتى شخصيته متشبهني بس شنو هالسر اللي يربطنا ويخلينا مترابطين سويه وصلت يمه

سوينا العرس بقاعة جبيرة وعزمنا اهوايه ناس من المسؤولين والاجانب اللي اعرفهم غير اللي حضرو من خارج البلاد انتظر آيه على احر من الجمر  دخلت  وهي بيد ابوها جانت أميرة بكل شي هاي خبله شمسويه بنفسها يمكن ماكمل الحفله اخذها واروح اعوف الناس كلها وصلت يمي بستها من راسها بست ايد ابوها هي هم باست ايد امي وبدت الحفلة باوعتلها أنتي منو  معرفتج

حبيبي أني عاشقه السفير.

خليت ايدي بيدها ورقصنا على انغام موسيقى حياتنا الجديدة اللي تبدي من هاللحظة باوعي بعيوني آيه انسي التوتر خليج طبيعية اعرف تحسين بشنو ماريدج غير تمشين ورا احساسي حبيت اسمي من على لسانج من عاندتيني ومقبلتي تكولين غيرها حبيت لقب السفير منج من تزعلين وتكولين سعادة السفير وهسة حبيتها اكثر عاشقة السفير وانتي تكوليها وبعيونج الاف الكلمات من العشق .

حبيباتي باجر نكمل شكرا على التصويت احبكم اهواية

#عاشقة_السفير36

حبيبي نام ياعمري على صدري وصارحني

وفض الصمت باحساسك وخل الحب لي يجري

وفضفض لي بعد عمري وعاتبني وفهمني

أنا أطري على بالك كثر ما أنته علي تطري؟!

تعال أقرب من أحضاني ترى خدك مواعدني

يبي يلامس شغف روحي ويقطف بوحي من شعري

تعال أنثر هنا ليلك وخل ويلك يولعني

أنا أحبك وأبي قربك.. ترى مني قضى صبري

أنا نبضك زهر أرضك وأنت؟! ايه تملكني

بنحل خصرك ..جمر ثغرك وزود بلونك الخمري

تتوهني .. تغرقني.. ومن بردك تدثرني

وتبكي لي وتشكي لي وله قلبك ومن سحري

أبي دموعك مع أنفاسك بصدق الود تحرقني

وأبي عطرك مع سحرك وآهك بالحشا تسري

أبي همسك يبعثرني غلا ولمسك يلملمني

وأبي عيونك من عيوني تذوب من الولع كثري

وأبي عهدك مع وعدك وأبي كلك تسلمني

أبي أيدك تسافر بي وزهر قدك يلحفني

وأهيم بعالمك عاشق جنوني أنت .. وانت بي تدري

تشوف الجمر بعيوني؟! تشوف الشوق جنني؟!

طلعنا من القاعه بعد ماخلصت الحفلة صارت ساعه 2 بالليل طلعت تليفوني خابرت بعدت عن آيه شوية مردتها تسمع شي

دينا شتكولين احجيلها لو مو وكتها اخاف يصير شي ومتكدر تتصرف

شفنا عماد ابتعد عن آيه فكرت بحجي مقداد اني ماكدر ابلغها اخاف هسة تسويلنا مناحه وتفهم عماد واحنا منريده يعرف

قبل اسبوع مرتين صارت بي الحالة كتله يفهمها مقبل ميريد آيه تنقهر تعالي نروحلها واذا تقرب عماد اني ابعده انتي فهميها ها آيه مناويين تروحون

مادري مقداد عماد يخابر هسة انتظره نطلع الله عليكم متعرفون وين حاجز سفريتنا هو ميكول غششوني انتو

آيه انتي عزيزة عليه واحبج مثل شهد اريدج تعتنين بعماد كلش زين واني اعرفج  عاقلة  واشكد تحبينه

توصيني على روحي ميحتاج راح اخلي بعيوني اصلا احبه اكثر من عيوني

حسيت صعب على مقداد يحجي بموضوع يخص أخوه قاطعته آيه عماد من مات ابوه مرات يشوف كوابيس فيصيح وهو مينتبه على نفسه اذا سمعتي او شفتي متشنج ويصيح لاتخافين ولاتقتربين منه لان احتمال يأذيج وهو مو بوعيه رأسا خابري مقداد

وكعت المسكه من ايدي واني اسمعهم واشوف عماد يتقرب من عدنا ليش مكالي هالموضوع عماد يعاني  يعني مريض

حبيبتي آيه لاتبينين شي سوي روحج طبيعيه زين مانريد ينتبه ميحب احد يعرف بهالموضوع وخصوصا انتي

حبي جاهزة نطلع شنو تردين من مرتي دينا يالله عوفونا كافي آيه ليش صافنه باوعت المسكه بالكاع شلتها بيج شي

لا ماكو تعبت وكعت من ايدي ضحكتله خلي نطلع خليت ايدي بأيده واني اريد ارجع استفسر اكثر عن حالته لحظة عماد رجعت بست وحضنت أبويه بجيت

شنو هاي الدموع ها آيه بابا لاتخربين مكياجج بعدين عماد يعوفج وترجعين ويانه

هههه لا بابا مارجع وياكم يمكن حضنت أبويه بحجه افرغ دموعي حضنت امي وهي تبجي ويايه ماما فرحي فرغتلج الجو ويا توفيق اخذي راحتج وياه غمزتلها

متجوزين من سوالفج حبيبتي راح اشتاقلج طمنيني عنج زين ياروحي الله يحميكم

خليت ايدي بأيدها وصلنا يم سيارتي  فتحتلها باب السيارة مقبلت حراسي يفتحوها النا ساعدتها تركب شغلتلها اغاني واني طول الطريق اتغزل بيها وابوس بأيدها 

سويت نفسي طبيعيه مستمتعه بغزله وهو يبوس بأصابع ايدي حبي وين رايحين مو طلعنا من القاعه كولي يالله

ماكو صبر حسبي منا لساعه ونوصل

يافندق يبعد عنا ساعه وبيتكم هم عشرين دقيقة ونوصل

لابيتنا ولا فندق احلى مكان يمي نروحله تحملي شوية ونوصل اذا تعبانه نامي ومن نوصل اصحيج  راح ارجع كورسيج ليوراة حتى ترتاحين أكثر

عماد من تكون يمي ماحس بتعب بس ياخوفي من تخلص أجازتك  تسافر وتعوفني ماريد اتخيلها اصلا مجرد التخيل يتعبني حسيت اعرف الطريق عماد هاي مو طريق مزرعتكم

مجاوبتها بقيت اسوق وارسل مسجات حسيتها ضايجه غيرت الموضوع احاول الهيها وصلنا نزلت فتحت البوابة دخلت السيارة قريب من الباب الامامي اللي قبل مانوصله بي حديقة كلها ورود فتحتلها الباب نزلي حبي

لا ماصدك عماد ليش هيجي ملكيت مكان غير مزرعتكم ضجت كلش رجعني للبيت ماريد ليلة عمري انام اهنا متخيلتك هيجي تسوي بيا

جاوبتها برود شبيها المزرعه ناخذ راحتنا بدون هوسة نبقى وحدنا اني وانتي بيتنا مناخذ راحتنا وفندق انسي اخذج الها ماكو ثقة

شنو شبيها ولا قطعه اثاث مابيها وين ننام بالحديقة مثلا لو نفرش كراتين على الارض

اني انام على الارض وانتي نامي عليه ههههه

ميضحك السالفه الله عليك عماد انت تنتقم مني جنت احجي ودموعي تنزل

كعدي بالمرجوحه اخابر واجيج لحظة لاتتحركين من مكانج لان اكو حشرات لايصير بيج شي

ماعليك بيا روح خابر براحتك بلكي يجون الحشرات وياكلوني

خلصت تليفوني رجعتلها كعدت يمها انطتني ظهرها حضنتها وخرت ايدي ليش هيجي حبي مو جنتي تكولين اتمنى اكون وياك ومتهمني المكان

مو بهالشكل عماد انت تهيني وتريدين اسكت وارضى راح اموت من القهر

انتي تشكين بحبي الج وانه ممكن بيوم من الايام اخليج مقهورة اخر شي اطلبه منج نفذي وبعدين شتسوين بيا اني راضي نزعت ربطة عنقي ربطت عيونها انطيني ايدج حتى متوكعين

وين موديني ماشوف شي بس لاتاخذني يم جلب الحراسة مالتكم بس هذا باقي اشوفه الليلة اضحك عماد اني الك بس نوصل شوف شسوي بيك لاحب ولا دلال ولا رومانسية أخذ منوم وانام اشبع بهالليلة لوحدك سمعت صوت الباب اشم ريحه ورود وعطور بدا يفتح الرباط فتحت عيني لزمت كلبي وهو واكف كدامي اللي اشوفه شنو لو كاصه لساني مو احسن كل هذا اليه شموع ورود بكل مكان غير بالونات حمرا بأسمي وعبارات حب وغزل كل ماادخل اشوف شي احلى غرفة النوم عبارة عن فراش مفروش  بالارض كله حرير ورود طبيعيه منثورة عليها وطبلة موجودة بزاوية عليها اكل وفواكه كلها مغلفة بأناقة انداريت عليه وهو واكف بالباب اني حماره مو

لا حاشاج حبي عجبتج المفاجأة حضنتني وهي تتأسف مني بستها من راسها ومن عيونها حبيت اسويلج شي مميز مثل حبج أليه حبي رفعي راسج خلي عينج بعيوني اساعدج تبدلين حتى ناخذ شاور ونرتاح

بقينا بالبانيو اهواية نحجي ونتغزل بعض حتى الحمام مزينيها يمتى لحكت تسويها عماد عبالي مو رومانسي تدري اني ضالمتك اهواية بس طلعت ملك الاحساس كل اللي تسوي منفرد بيها جنت اسمع عن ترتيبات ليلة العرس عبارة عن كتابات بالجكليت على الفراش ومرات ورود يخلون عليها بس اللي انت مسويها ولا بالخيال

تستاهلين اكثر حبي لو جان عدنا مجال جنت اسوي اكثر من هذا اليوم وصيت شركه ديكور يسووها خطية خلصوها بوقت قياسي والمفروض اني مبلغهم من شهر اقل شي قبل لا ندخل كملوها وطلعو من الباب الخلفي مشفتيني جنت اخابر كل فترة اكدت عليهم ميقصرون بشي والحمدالله عجبج اذا تردين طلعي وبدلي اني ابقى شوية وجاي وراج

كمت من حضنه لبست الروب كلت امسح مكياجي تقربت من المرايا عا هاي شنو رجعت باوعت عليه خطيه فز وطلع يشوف شبيه

شكو حبي

عماد ساعه تتغزل بشنو واني عبالك باندا الكحل سايل والرموش وحدة واكعه وحدة مادري وين صايرة يافشلتي شنو هالوجه رجعت باوعت عليه واني امسح بسرعه على الاساس مشايفني هو وجه يضوي يفتح النفس واني صايرة فلم رعب طلع قبلي بقيت استعمل كريمات تنظيف وترطيب اي هسة تمام هاي اني من شوكت هيجي وجهي

من اول ماوصلنا وبديتي تبجين تقربي ناكل شي ونكمل سهرتنا حبي حتى لو جنتي طالعه من منجم ميهمني المهم روحج اللي أموت عليها

يعني ساعات واني مسويتلك جو رعب ومطنكرة عليك شفت الاكل كله صحي وفواكه وعصائر كلها طبيعية مكتوب عليها شنو مكوناتها محطوطه بسلات خشبية عماد حتى بهالليله تفكر بهالأشياء

حبي مو معناته ناكل شي دسم ونام عليها اولا موزين وثانيا ماحب هيجي أشياء اني بالنسبة اليه هالليلة مو بس للاكل والنوم احب استمتع بكل لحظة بيها واني وياج حبي ماريدج تخافين مني ابد مو شرط يصير شي اليوم كدامنا العمر كله المهم تنامين بحضني يكفيني

بعد كل اللي سويتها اليه تريدني اخاف  مستحيل كل ماتقترب وقت هالشغلة جنت اكول مراح اخاف بس بصراحه خفت مادري من اللي جنت اسمعها لو شنو بس حسيتها مو صحيحه يبقى على الشخص المقابل نفسه كل واحد واسلوبه وثقافته مادري شوكت نمت لمست الفراش خالي فتحت عيوني عماد ماكو الشمس طالعه وماكو اي صوت هدوء لبست الروب ورتبت الفراش طلعت ادور عليه الباب مسدود رحت غسلت بدلت ملابسي خليت مرطب وملمع عماد ميحب مكياج دخلت للمطبخ شفته دخل من الباب الخلفي اللي صايرة من جهة المطبخ بملابس الرياضه 

هاكسوله هم زين كمتي اروح اغسل وابدل اجيج لاتسوين شي أميرتي اوك

يمتى نام ولحك يكوم يروح يركض شلون عنده خلك بهالصبح واني احس نفسي طالعه من معركه كل جسمي مكسر فتحت الثلاجه كلت اكيد مابيها شي ضحكت على تفكيري متروسه من كل شي يخطر ببالي حضني وهي يطلع الغراض

مستعمله شاور مالتي همينه كسولة مرة ثانية اكومج تركضين ويايه اريدج نشيطة واستعملي اشيائج اريد اشم عطرج مو عطري زين بايد حاضنها وبايد احضر وياها الفطور

مرت اسبوع اني وياه بالمزرعه كل لحظة وكل ساعه استمتعنا بيها نحضر الاكل سويه نطلع نتمشى نسبح ننام محسيت بالوقت ابد رجعنا لبيتهم مسوين عزيمه تمنيت ابقى بالمزرعه طول عمري ولا اطلع منها مادام وياه استلموني دينا وشهد واني بالي مو يمهم افكر شلون اقنعه ياخذني وياه من يسافر ماكدر ابقى وحدي بدونه تعودت كلشي اسوي وياه

لاحول ولاقوة الابالله لحكي اختج دينا مادري عماد شمسوي بيها مو هي ابد ساكته شنو بالع لسانج

اي والله ياريت مزوجيها من زمان وين لسانج احجيلنا شسويتو شلون جانت اول ليلة خلي شوية انتقم منج تذكرين خابرتيني ثاني يوم تسأليني شسويتي ويامقداد من كتلج عيب ميصير شوية وتاكليني الا تردين تعرفين

ماريد اكوللكم اخاف عليكم متتحملون الصدمه وتنجلطون ماريد اشيل ذنب احد بس مادام متعوفوني بحالي فتحت موبايلي شوفتهم صورنا وصور المكان

اخ منك عماد طلعت دهية واني اللي جنت مفتكرة  اخويه ميعرف شي ومسكين كلت آيه راح تتحارش بي هو مو هيجي بس ارجع للبيت راح اخلي ياسر يسويلي شهر عسل جديد انخدعت بي وداني للفندق وبس

نعم شنو اتحارش بي اخوج لامسكين ولاشي بعدين ياشهر عسل وانتي حامل متأكدة مراح ياخذج وانتي دينا انقهر عليج مقداد ميسويلج مفاجأت مثل عماد يضحك عليج بشوية اشعار هاي قبل ماعرف هسة اذا يكولج صباح الخير

لا يكولي صباح الخير واجاوبه مساء الخير لان من ننام الجهال يبقون صاحين ميعرفون شنو يعني النوم بالذات بالليل عبالك احد مسلطهم علينا قلبتي علينا المواجع مو شهد

سافرت لان عندي شغل اهواية متراكم عليه طول الليل تبجي بحضني متقبل اسافر وحدي الا تجي ويايه وعدتها غير مرة حتى السفر كرهتها لان راح يبعدني عنها وصيتها على كريم وامي خليتها تحس هي صاحبه البيت ولازم تتحمل مسؤولية

احس بفراغ من هو ماكو وسافر حتى الفراش احسه سجن ويخنكني انام بالصالة ماكدر انام عليها وهو ماكو يمي مقبل اروح ابات يم اهلي وهو مسافر اقضي اليوم ويا كريم وأمه وجهال دينا لان هي رجعت لشغلها اشغل نفسي بيهم وهي ومقداد بس نشوفهم بالليل مرات يرجعون على الغدا ابويه من تقاعد كل فترة ياخذ أمي ويسافر بعد مانقطعت علاقته بأهله أحسه مقهور بس علمودنا ساكت اخابر زينه وليان دايما وهمه نفس الشي

قبل لا اسافر رحت ويا حميد للمخزن شفت مهند كدامي باوعتله شلونه المكان عاجبك لو لا ياخسيس

هههههه جان لازم اعرف انت ورا الموضوع ياعماد مع الاسف الناس ماخذة فكرة غلط عنك صدكني راح اندمك على حبسك اليه مسوي نفسك شريف وانت تلعب من جوا جوا كلش محظوظ ماعرف شلون نجيت من الموت 5 طلقات ومامتت

شفت شلون لان اني مو مثلك جريت الكرسي كعدت كدامه خليت رجل على رجل تدري ياحيوان انت الشخص الوحيد اللي خلاني اتعامل وياه بهالشكل هسة اكدر بلمح البصر امحيك من الوجود ومحد يدري بس اريدك عايش وتتمنى الموت

المفروض أقتل آيه قبلك لان بسببها انت عايش أكيد هي انقذتك

لاتجيب اسم مرتي على لسانك لااكصه واخليك تبلعه افتهمت

صارت مرتك وهي قبل جانت يمي تعرف يعني شنو يمي لو متعرف انت رجال وتفهم شقصد ظهرها الموشم باقي لو مغيريها

لزمته من ركبته كلمه زيادة عن آيه تشوف شي عمرك متخيلتها احجي ويايه مثل رجال لاتجيب اسم مرة بيناتنا عيب عليك ياعديم الشرف ردت اطلعك منا علمود خالك بس ابقى خيس بهالمكان طلعت بعد ماشبعته ضرب حميد سوي اللي كتلك عليه هذا العار لازم ياخذ جزاته .

البارت طويل  احتمال ماكدر انشر بارت ثاني اليوم حسب الظروف رجاءا تصويت بنجمه

#عاشقة_السفير37

جمالك .. ليس جميلاً بدوني ..

وسحرك ليس قوياً بدوني ..

وكل كنوزك ..

من بعض ما أبدعته ظنوني ..

فمن سيحبك بعدي ؟

إذالم أعطرك يوماً بعطر جنوني ؟؟

كفاكِ غروراً وجهلا ..

فلولاي لم يكُ هذا الجبين جبينا .

ولم تكُ هذي الشفاه شفاها .

فلا تقربي من قصائد شعري

فإنك لستِ على مستواها

سافرت ويا اهلي تعبت من الانتظار ومليت من الوحدة  سته شهور مضت على زواجنا عماد دايما مشغول ومسافر ومن يرجع ينشغل بكريم وبشغل الشركه وحتى من يكون بالبيت يبقى اكثر وقته بالمكتب واني اذا يكون وحده اتحارش بي وماخلي يبقى يشتغل مرات يبادلني ومرات يطلعني برا احس كل مكان بدون عماد مابي طعم الناس تفرح من تسافر وتغير جو اني عكسهم

بنتي ممليتي تكعدين بالغرفة لوحدج تعالي نطلع مثل ايام زمان اني وانتي نروح نتسوق ونتغدا بمطعم شتكولين

ماعرف بابا ماعندي خلق اطلع روحو انتو تونسو لاتخاف عليه اني اباوع على فلم شوية وانام

جريتها من ايدها هسة تبدلين واني انتظرج باللولبي مالت الفندق ماريد اعتراض

صار بابا حبيبي من عيوني خابرت عماد مقفل دزيتله رسالة  حتى ابلغه ماحب اروح لمكان من غير أذنه باوعت على ملابسي محتارة شنو البس وتليق بيا ضحكت على نفسي شلون جنت قبل البس اي شي واطلع المهم يستر بس هسة لا يختلف لازم يكون مرتب والوانه متناسقة الاماكن والاوقات والمناسبات كل لبسه والها وقت ومكان محدد اخ منك عماد حتى هاي غيرتها بيا لو بس متكون قاسي ويايه وتاخذني وياك وين مارحت جنت اني بخير نزلت رحت ويا ابويه اشوفه مثل قبل متحمس يشتريلي غراض واني اعارضه واكوله بابا كبرت ذوقي تغير طلب مني اروح لصالون ارتب نفسي شوية

عمه اني دقايق واوصل يمكم آيه طلعت ويا عمي مثل مااتفقنا زين تسلميلي سديت التليفون اشكد مشتاقلج حبي جنت بغير مكان جيت علمود افاجئها صارلها فترة تلح نسافر سويا واني ماكدر اخذها ويايه لان ابقى طول الوقت مشغول ولازم هي تبقى بالفندق بارحه خابرت امها اتفقت وياها يطلعون آيه شوية لحد ماأوصل يمها حتى من ترجع تفرح بشوفتي وصلت اخذت مفاتيح الغرفة من أمها دخلت ضحكت متتغير الملابس منتشرة بكل مكان مثل كل مرة تطلع برا تحتار شنو تلبس تطلع كل ملابسها وتستقر على وحدة تعوف الباقي من ترجع ترتبهم مرات تتعاجز اهددها مانام يمها اروح يم كريم تصير طيارة تنسى التعب وتكوم تشتغل غسلت ودخلت بالفراش انام شوية لحد ماترجع

الله كلش حلوة طالعه بنتي الله يحفظج اليه وين تردين نروح نرجع للفندق لو ناكل برا

ناكل برا وعلى ذوقك ياتاج راسي اشكرك بابا دايما تنطيني طاقة ايجابية الله لايحرمني منك ياروحي هسة لو امي تشوفنا خطية تكول مخلصت من آيه زوجناها وبعدها تخطف زوجي

بيني وبينج اني اتونس اكثر من اطلع وياج ديربالج تفتنين عليه ها راح تنيمي برا البيت

هههههه لاتخاف سرك ببير باجر نطلع سويا خطية زيد هم طلب مني اخذه للسينما رفضت

والله اشك تعرفينه باجر يالله وصلنا

رجعنا للفندق الحمدالله نفسيتي تحسنت شوية دخلت لغرفتي وكع الغراض والاكياس من ايدي شفت حقائب عماد باوعت نايم بفراشي ركضت عليه جريت اللحاف منه واني ابوسه مشتاقتلك مكروه قاسي ظالم

ههههه كل هذا اني بيا ليش تبوسيني وخري

ماأوخر راح اخنكك انت مالتي يمتى وصلت ضربته على كتفه كلش يكره هالحركه مو كلتلي بعد عندي شغل تضحك عليه مو اي ايدي

لويت ايدها متوبين من هالحركات شسويلج  مجنت مشتاقلج بعدين كسرتي خاطري كلت ميخالف اكسب بيها اجر واروح يمها شفت باب الغرفة مفتوح هاي شنو كومي سدي الباب مسوي بث مباشر للناس وحدة بحضن السفير وهو نايم بالفراش

هههههه  هم زين محد شافنا غير كله منك من شفتك عقلي طار وخر ايدك مادام مو مشتاقلي ليش حاضني

هاي وحدة وكيحه علمتني  هالشي  من اشوفها لا اراديا احضنها اكوم ابدل حتى نطلع برا هالاسبوع اني تحت أمرج راح اخذج لأماكن ولا بالخيال اعرف اهواية اماكن اهنا بس قبلها لازم اسلم على اهلج عيب منهم شفت امج وزيد باقي ابوج

اوف ياحبيبي الله يخليك اشكرك على هالمفاجأة الحلوة جنت كلش ضايجه احس نفسي هسة طايرة متشوقة اطلع وياك واشوف الاماكن اللي تحبها اي خشمي ليش تعضه

مو انتي دايما تعضين اذني واني نايم وتشاكسيني ومتكعدين راحه

بكيفي اعض ابوس اتحارش حضنته وهو يمشط شعره ويشسوره تعبت لحد ماوصلت لهالحضن من حقي اسوي اللي اريده بي

أروحلج فدوة عمري اني كلي ملكج حياتي من غيرج مالها معنى

قضينا احلى اسبوع ويا بعض اخر ليلة جان نايم بقيت اباوع على التلفزيون شفت فلم عائلي كلش عجبتني احداثها شدتني موضوع مجنت مفكره بيها شلون نسيت هالشي هزيته عماد كوم بسرعه

خير حبيبي شبيج كومتيني يادوب ارتاح ساعتين

اريد طفل

شنو منين اجيبلج طفل

عماد صحصح ويايه اريد طفل اني اجيبه شنو اجيبلج قابل تشتريلي

صدك خرعتيني كعدتيني واني نايم علمود طفل نامي احسنلج

ليش مصاير عدنا طفل لحد الان جاوبني

شمعرفني اني ممقصر وبعدين عندي ابن من قبل مصار ويمتى يصير بيد ربج هسة نامي وخليني اسافر واني عقلي براسي

قصدك انت مابيك شي اني السبب لايكون اني عقيمه سوي نفسك نايم ولاتجاوبني بديت ابجي من كل كلبي ياربي بس لاكون ماخلف من صدك والله ممسوية شي مو زين بحياتي غير حبي لعماد

سويت نفسي نايم حتى تسكت وتنام هي همينه سمعتها تبجي وتحجي من كالت ممسوية شي مو زين غير حبي لعماد مكدرت الزم نفسي متت من الضحك جريتها تعالي اسويلج اللي ترديه

رجعت للبيت تعبانه صارلي فترة قدمت اوراقي للجامعه حتى اكمل دراسة الماجستير مقداد يشجعني اهواية ومناك رحت اجيب جهالي يم بيت اهلي شفت عمتي وجدي موجودين يمهم استغربت لان من سالفة آيه قاطعين علاقتهم بينا سلمت وطلعت محبيت ابقى وياهم شفت مقداد وهو بين كومه اوارق كاعد وضايع اكيد يدور على شي من ورا الجهال ماكو شي بمكانه هوايتهم يلعبون بالاوراق

هم زين رجعتي  اشعاري ومقالاتي و ذكريات حبنا راحت من ورا هذولة العفاريت شبيج مو على بعضج مو كلتي راح ابقى يم اهلي لحد الليل

شفت عمتي ام مهند وجدي ابو بابا يمهم ماعرف يمتى متصالحين

دينا اي علاقة بيهم ماكو ميحتاج افهمج لو انبهج ماعندي مانع اهل امج تروحين يمهم يجون يمج بس اهل ابوج اسمحيلي ماكو

اكيد حبيبي ميحتاج تكولي كل ماتذكر آيه واللي صار بيها من وراهم أخذ حذري منهم من تخلص شغلك نروح للمكتبة احتاج كتب

زين نروح مو هسة صار عندي فضول اسأل حميد اذا يعرف شي عن مهند بعد مالزمه عماد حجيت وياه كال اخر شي عماد ضربه وطلب منه يرجعه للمكان اللي جايبه منه باوعتله معرفت احدد يكذب عليه لو لا شلون يعوفه عماد يمشي بهالسهولة

عن اذنك استاذ مقداد لازم اطلع ويا سعادة السفير للشركه مشيت للسيارة وتذكرت بعد ما طلب مني اهتم بي رجعت على مهند كومته باوعت عليه الحمدالله لاعب لعب بي برد كلبي اخ لو ما نبهني وحذرني مااقتله جنت اخلي هسة طلقه براسه وارتاح منه لزمته من شعره وهزيته حتى يرجع لوعيه ها مهند وين تحب اوديك حبس مؤقت لو سجن

ابوس ايدك خلصني منا راح انطيك فلوس اهواية بس طلعني منا جسمي متكسر

بس متكسر الظاهر سيادة السفير ممسوي وياك الواجب بشكل زين ياعار عندك عين تحجي وتطلب هاك هاي ملف شراء حليب فاسد باسم شركتكم وهاي قضية اغتيال رجل دبلوماسي اختار ياهو بيهم اسلمه للشرطة 

هههههه ماعدكم دليل على ضربي لعماد وملف الحليب باسم الشركه يعني خالي يروح بيها ماتصور عماد يضحي بسمعته ويخلي ابو زوجته بالحبس لاتلعبون ويايه

ياعار قبل 5 دقايق تتوسل بيا اخلصك هسة طولت لسانك خلي افهمك الظاهر انت ماعندك مخ اني مو عماد اني حميد اللي يموت ويفدي بروحه لعماد وتربيت بالشوارع مثلك مع اختلاف اني صرت رجال وانت صرت عار وخسيس نروح لمكان الحادث نعيد المشهد من جديد ونصوره ونقدمه للحكومه اللبنانية قضية محاولة اغتيال شخص اجنبي تدري شيسوون بيك يلعبون بيك طوبة اما بالنسبة لملف الفساد فكلها صارت بأسمك ناقصها توقيعك جريت ايده وخليته بالحبر حتى يبصم وهاي هم خلصناها

ياحقراء عديمي الشرف عماد كلب ابن الكلب لو رجال يجي يواجهني بنفسه تردون تورطوني

رجال غصبا ماعليك بس انت منو ياحشرة حتى يجي هو بنفسه يواجهك كوم هسة رتب نفسك راح اخذك اسلمك للشرطة ومن ننزل بيدك سلمهم الملفات

اني الكم راح اطلع منها صدكوني مراح ارحمكم وقبل عماد انت ياحميد شفت السفير صعد سلمت عليه من يكون داخل البيت ميقبل احد يفتحله الباب بس خارج البيت ولايقبل انزل من السيارة واستقبله سلمت عليه

رحت ويا امي لدكتورة صديقتها سويت تحاليل وفحوصات التهيت بهالشي صار هاجس عندي ليش ماصرت حامل التهيت بهالموضوع عماد يروح ويجي اني هذا شغل الشاغلني قبل لايروح للشركه جنت متمددة بالفراش اقرا مجله وهو يبدل ملابسه

احس آيه متغيرة صايرة تفكر اهواية بالجهال خفت لايصير بيها شي لو تروح من كيفها تاخذ ادوية حبيت اساعدها وبنفس الوقت افهمها انه اني هم اريد اصير اب  لجهالها لان هي عبالها اني ماريد حبيبتي اذا تحبين اخابر منال تروحين يمها حتى تتطمنين ماكو شي

نعم ذبيت المجله ليش ماكو احد غيرها دكتورة لو تريد  اي حجه حتى تحجي وياها وتفهمها زوجتك متخلف ومريضة اشكرك عماد كمت من الفراش بسرعه وطلعت من الغرفة راح اموت من القهر كسرت كل اظافيري واني ماحس بنفسي من الغضب سمعت صوت خطواته وهو يتقدم مني حضرت نفسي لاي ضربه تصيبيني منه لان مستحيل يعبر اللي سويته هسة بسهولة

اني مقدر وضعج آيه واعرف تردين تصيرين ام وتجيبلي طفل لان تحبيني بس مااسمحلج تحجين ويايه بهالشكل  ولا تجيبين اسم منال بطريقة محلوة  لاتنسين هي ام كريم ماريد بيوم من الايام تصير بينج وبين كريم حساسية بسبب امه ديربالج افتهمتي اني طالع اذا ردتي شي خابريني اريد من ارجع اشوف حبيبتي آيه مو اللي اشوفها هسة كدامي

مكدرت اجاوبه هو صح اني غلطانه راح وعافني عماد طلع من البيت من غير مايبوسني ويحضني واني اوصله لحد باب المدخل اتسابق وياكريم حتى نوصله من يروح ونودعه كعدت بمكاني خليت ايدي على وجهي وبجيت من كل كلبي ماريد طفل لو يبعدني عن عماد ابجي واصيح

آيه عفية لاتبجين اني ماحب اشوف دموعج كومي غسلي وجهج راح اعزمج بغرفتي نلعب وناكل بالحديقة

كرهت روحي كريم اشكد يحبني ويقدرني يحسسني اني اخته مو زوجه ابوه واني شلون اتجاوزت على امه قبل شوية شفت ايده يريد يكومني لزمته ابوسه وهو يعترض واني اضحك وياه مو تريد تصالحني انطيني بوسه

انتي بوسي دادي ماعليج بيا يمكن طفرتي دادي وكاعده تبجين عليه

ههههه حتى انت تعلمت هالشي. مرت الايام واني احس ابويه كلش فرحان من رجع علاقته بأهله اني مدخلت من اشوفهم اسلم واكعد صامته محبيت اكسر فرحته من طلب مني احجي وياهم .اليوم عيد ميلادي من البارحه انتظر عماد يباركلي لو يلمحلي يعرف باجر عيد ميلادي  ماكو طول الليل اجيبله سالفة منا ومنا هم ميحس الصبح كاعدين نفطر اني وياه وامه همينه وكف ويريد يطلع سلم علينا واني جنت مبدلة جاهزة كلت بلكي يكولي نطلع اوديج مشوار شنو هاي لا ماصدك هسة لو اموته منو يمنعني عماد لحظة

ها عمري ناسي شي  خليت ايدي بجيوبي موبايلي موجود وحتى محفظتي يعني مناسي سويتلها باي بأيدي وكاتم ضحكتي صايرة تنين من العصبية شوية وتنفجر

لا اهم شي موبايلك اني رايحه لبيت اهلي وصلني

تبقين بالليل يمهم

بعد تريدني ابقى يمهم ليش لا اسبوع اذا تحب اخذ راحتك وحتى لاتوصلني اختي اشرتله تطلع اروح وياها عفته ومشيت وصلت يم دينا اخذيني وياج

روحي ويا السايق كلش مستعجلة عندي شغل اهواية

ليش انتي مو اختي لو  ناسيه هالشي اروح مشي ولا منيتج انتي وهو اني الج جهالج اذبهم من الطابق الاخير اذا جبتيهم لعندي اهتم بيهم خلي يولون

هههه لحظة اكلتيني وموتي جهالي تعالي اوصلج امري لله

سديت الباب قوي طلعي بسرعه قبل عماد وين رايحه مو كلتي متاخرة

لحظة نسيت شغلة اجيبها يم صديقتي  نزلت خابرت عماد راح نتاخر ربع ساعه حتى توصل قبلنا رجعتلها شبيج متضايقة هالفترة

مابيا شي متزوجه واحد ميحبني ومااخلف مادري ليش ومانفع لشي واختي ملتهية بعائلتها وشغلها

حبيبتي  لزمت ايدها انتي اكثر وحدة تدرين اني اشكد مشغولة شغل الجمعية ودراستي وجهالي الاثنين والجاهل الاكبر مقداد والله مالحك لشي اني اسفة اذا جنت بعيدة عنج هالفترة اوعدج نخصص يوم اني وانتي نطلع مثل ايام زمان ويا الجهال ونتونس رضيتي عني والطفل راح يجي صدكيني واذا كلش مستعجلة اخذي جهالي الج

لا والله خليهم الج مازعل منج اصلا الله يعينج عندج هالقرودة اني عندي كريم سكتت حتى بكلامي اتذكر شي يخص عماد .

#عاشقة_السفير38

الكاتبةchra kirkuki

ﺳﺄﺟﻤﻊ ﻋﻤﺮﻱ ﻭﺍﻫﺪﻳﻪ ﺍﻟﻴـــــﻚ .....

ﺳﺄﻛﻮﻥ ﺑﺴﻤﺔ ﺗﺮﺳﻤﻬﺎ ﺷﻔﺘﻴﻚ .....

ﺳﺄﻛﻮﻥ ﺷﻤﻌﺔ ﺗﺬﻭﺏ ﻭﺗﻀﻰﺀ ﺍﻟﻌﻤﺮ ﻟﻚ ....

ﻟﻮ ﺃﻧﻲ ﻳﺎ ﻋﻤﺮﻱ ﺍﻣﻠﻚ ﻟﻐﺎﺕ ﺍﻟﻜﻼﻡ .....

ﻭﺗﻌﺎﺑﻴﺮ ﺍﻟﻌﺸـــﺎﻕ ﻟﻨﺴﺠـــﺖ ﻣﻦ ﺣﺒـــﻲ .....

ﻣﻠﺤﻤﺔ ﻋﺸﻖ ﻭﺍﻫﺪﻳﺘﻬﺎ ﺍﻟﻴﻚ .....

ﺑﺪﻭﻧﻚ ﻻ ﺣﻴـــــــــــــــــــﺎﺓ ﻟـــــﻰ .. ..

ﻣﺎ ﺩُﻣﺖُ ﺑﺮﻓﻘﺘﻚ .... ﺁﺷﻌﺮ ﺁﻧﻨــــﻰ ﺁﺣﻴﺎ ...

ﻓﻜﻠــــــﻤﺎﺗُﻚ .. ﻧﺒﻀﺎﺕ ﻗﻠﺒﻰ ...

ﻭﻧﻈـــــــﺮﺍﺗُﻚ .. ﻧﻮﺭ ﺣﻴﺎﺗـــــﻰ ...

ﻭﻟﻤﺴﺎﺗُﻚ ﺭﻭﺣﺎً ﺗﺤﻴﺎ ﻣﻦ ﺟﺪﻳﺪ ﻭﻫـــﻜﺬﺍ ﺁﻋﺸﻘُـــــــــــــﻚ

ياريت الله خالقني بنية وعماد زوجي حظوظ هسة كل هالهوسة والتعب علمود آيه

ليش اني اعمى اباوعلك شنو آيه مامقبولة هاي أميرتك وست البنات أفتهمت اشتغل وانت ساكت

هههههه تستاهل ياسر ملكيت الا آيه تخلي راسك براسها هسة اني اريد بس اشوف الصور المرسومه شنو الفضول قاتل

لاتحاول مقداد هي تفتحها بنفسها ذاك الوقت تشوفها

شنو هاي عماد اخوية قضيت طفولتي ومراهقتي وشبابي كلها وياك ولايوم سويتلي حفلة ومفاجأة اني اختك الوحيدة

نسيتي تكملين بعد شبابج يجي شيباتج ههههه

منو تقصد ياسر اني فوك مامتحمله اللي يصير كدامي وساكته عليك شوف اخوية تعلم الرومانسية والحب لو يرجع الزمن بيا غير اختار وزير سفير

خليني ساكت منو جانت تجي تتوسل بيا حتى اقنع بابا يستعجل بزواجكم ست شهد

اكيد مو اني شنو هالتهمة مقداد توكف بصف ياسر الا اليوم اعلكها ومااسكت دينا تعالي شوفي مقداد شيكول عليج فوك مامعيشج بجفاف عاطفي وشحذ بالمشاعر هسة يشتكي منج

لا تصدميني أكثر مااني مصدوم بعد كل هالسنوات الحب طلع مقداد مو رومانسي وشاعر على ورق بس خدعني باوعتله بزعل تعلم من اخوك شوية

غمزتلها منو خدعج اني منو اللي مجانت تنام اذا متدخل صفحتي تترك تعليقات على اشعاري بأسماء مستعارة اني

دادي وصلت الكيك حميد يكول يدخلوها هسة لو بعدين

ياروح دادي بس انت ريحتني وساعدتني اليوم روح كوله خلي يدخلو اما انتو يا شلة المشاغبين والحاسدين راح تضربوني عين اليوم ماما تقربي واقري المعوذتين بوجههم من غير شي طلعت آيه الصبح زعلانه

شوف اخوك مقداد خايف لا يجي الليل والخانم مترضى علي يروح تعبه بلاش يضطر ينام يم كريم

غلطان ياسر بعدك متعرف آيه مستحيل اذا عماد موجود تخلي ينام بعيد عنها عبالك مثلك شهد دايما تنيمك يم أمك روح ابجي طين على حالك

عوفوهم براحتهم بيكم خير صيرو مثل عماد وانتو شهد ودينا صيرو مثل آيه حبيبة كلبي بس تطلع من البيت يبين مكانها مو مثلكم

لا ماما لا حتى انتي اخذتج بصفها مو كافي اخوية شوية ويتبرى مني عماد ليش مجبت منسق ديكورات يتكفل بكل شي ويطلع تحفه حسب ماتريد يرتبون الحفلات حتى آيه تفرح اكثر

بعدكم متعرفون آيه اللي اني اسويها بأيدي تفرحها اكثر كملت تزيين الحديقة جمعت لوحاتها قبل فترة واخذتها حتى يسوولها اطارات غطيتها حتى محد يشوفها اريدها تفتحها بنفسها حتى الكيك طلبته يكون على شكل قلب ابيض مثل قلبها والبالونات والورود كلها بيضه حبيت كل شي اسوي بايدي طول اليوم بالي يمها لان زعلتها الصبح مجان قصدي بس ردتها تطلع من البيت حتى ابدي اشتغل براحتي صعدت لغرفتنا فتحت العلبة طلعت الفستان اللي جبتها الها من اخر سفريتي مشوفتها خليتها على السرير خابرت أبوها حتى يرجعوها لان كلشي صار جاهز

صعدت لغرفتي اريد ابجي ماكدر احس نفسي مخنوكه عيني على تليفوني اكول هسة يخابرني اكيد شلون ينسى من جان عندي علاقة بي يوم عيد ميلادي يرجع من السفر علمودي واول مااكعد من النوم اشوف رسائل حب وتبريكات وغير من يشوفني هدايا غالية ليش من تزوجنا تغير لايكون علمود سالفة الاطفال يريد يصير عنده وخايف على مشاعري وميكولي صارت دنيا عصر نزلت كلت اكيد اهلي مو مثل عماد مناسين شفتهم عادي ماكو شي يحجون وزيد يلعب ويا بابا وامي ونانا يشربون كهوة

آيه حبيبتي تردين احضرلج شي تاكلين من الصبح مماكله شي لو اسويلج عصير

تسلمين نانا ماريد شي شبعانه بكلبي من اهمالكم اليه

ليش مجبتي كريم وياج آيه

مرة ثانية راح اجيبه زيد

راح اجي وياج من ترجعين اخذت اذن من ماما ابقى يمكم بالليل حتى العب ويا كريم

لا متبقى ميصير اصلا ميقبلون تنام وياه بنفس الغرفة عبالك كريم مثلك مخبل

هو صديقي ويحبني انتي معليج

بنتي ليش تكولين هيجي لأخوج اشبي بعده صغير

ماما الله عليج شنو صغير ديكبر شوفي تصرفاته وقارني ويا كريم فرق بين السما والارض

غيركله من جدج مسوي بي هيجي بارحه ناقشت ابوج بهالموضوع صاير يحجي الفاظ محلوة متعلمه من جدج تدرين شنو مخلي براسه كول لابوك يشتريلك سيارة ويخليها بأسمك

آيه بابا انتي واختج خلي عينكم عليه علموه الصح والغلط لاتكولين كدامه كريم احسن منك لايكرهه بعدين شجعي وخلي يصير عنده ثقة بنفسه

انشالله بابا اسفة حجيت هيجي عفتهم تمشيت بالحديقة كعدت شوية ويا زيد حقه هو هم اهلي دايما مشغولين جدي اهواية يهتم بي هو يحب يروح يبقى يمهم احس بدوخه لو معدتي تكلب يمكن من القهر والجوع شفتهم مبدلين ويريدون يطلعون كالو نوصلج لبيتج ونجي نشوف جهال دينا مشتاقيلهم اوف هسة وكتها ردت ابقى الليلة اهنا على عناد عماد بس لو يصير الليل ماكدر اجذب على روحي ماكدر اكون بمكان بعيد عن عماد وصلنا استأذنت اروح لغرفتي من الصبح بنفس الملابس باقية فتحت الباب شفت فستان على السرير وبصفه ورقه فتحتها هل تسمحين ياأميرتي ان تلبسي هالفستان الذي ما ان يلمس جسدكي يتحول لأيقونه من الجمال وان تتزيني وتتعطري وتشرفي مكاني المتواضع في الحديقة الخلفية محبوبك ينتظركي على نار غسلت وبدلت بسرعه مو مصدكه عماد مو ناسي الحمدالله نزلت ركض للحديقة شفتهم كلهم موجودين حسيت رجلي بالسما واني مرفوعه بين ايدين عماد وهو شايلين يتقدم على الطاولة المزينة بالورود والحلويات نزلني واني بعدني متعلقة بركبته بسته واني ناسية اللي حوالينه احبك احبك

لاتتهورين زايد احنا مو وحدنا رجعنا لايام زمان من تشوفيني تنسين نفسج عجبتج المفاجأة تعالي بعد اكو اهم شي

فتحت اللوحات واني من السعادة ماكدر انطق بشي كعدت على ركبتي وسط استغرابهم من حركتي ياربي الحمدالله والشكر خليتني اشوف هاليوم اشكرك انطيتني عماد واشكرك انطيتني هالعائلة الحلوة واشكرك لان حققت حلمي راح افتح معرض

الف مبروك آيه حبيبتي ولو زعلان منج كل لوحاتج راسمه عماد ماعدا ثلاثه ابوج

بالليل مكدرت انام كل دقيقة ادخل الحمام خربت الجو الرومانسي كله

اعترفي شنو ماكله وصاير بيج هيجي حبيبتي اخذج للمستشفى

لا ماريد مستشفى اوف عماد ساعدني تعبت اروح وارجع الليل كله مكدرنا ننام احلى شي الخوف بعيون عماد خلاني اتمنى اظل هيجي الصبح اخذني غصب للمستشفى يم منال سوتلي فحوصات طول ماكاعدين تحجي وياعماد ومبتسمه اريد اكوم اموتها لحد ماوصلت الظرف كمت اتخيل عندي مرض خطير واموت ومنال تعوف زوجها وترجع يم عماد وتجيب اخوان لكريم صحيت على شرودي من كالت

اريد البشارة عماد والله جنت متأكدة الف مبروك آيه حامل

ها منو حامل شبسرعه

حضنتها وبستها حبيبتي الف مبروك واخيرا راح يهدا بالج شنو منو حامل انتي حامل خليت ايدي على بطنها

اباوعلهم مصدومه بعدني مو مستوعبة يعني مااموت مو وانت متتزوج

كومي راح تفضحينا هم زين منال مو غريبة شكرتها وطلعنا هسة ليش تبجين المفروض هذا احلى يوم بحياتنا

لزمت ايده خليته على كلبي اتحس بيا شلون يدك من الخوف والله عبالي تكول راح تموتين وانت تتزوج غيري حتى بالقبر راح اطلعلكم واخرب ليلتكم

وليش بالليل بالذات النهار كدامنا اخ متوحشه شلون عضه

النهار كدامك مو غيري ماكو وهسة صدك عماد اكو بيبي يارب يطلع يشبهك تتوقع ولد لو بنية

اتوقع لحد منا لحد ماتجيبين تخليني اجيب قبلج 10 مرات

حياتي تغيرت صرت ادلع على عماد ليل نهار حتى من يسافر اخابره وابجي اكوله ارجع اخاف يصير بالبيبي شي وهو مرات يسمعني ويهديني مرات يقفل بوجهي جنت نايمه حسيت بحركه بطني فزيت وصيحت بكل قوتي خرعت عماد

وين يوجعج بشنو تحسين

ماعرف بالضبط احس بشنو يمكن راح اجيب أحس يريد يطلع شبيك تباوعلي مو عاجبك الحجي وين رايح عماد لاتعوفني

انام يم ابني عندي شغل الصبح وانتي نامي بطنج 5 شهر باقيلج اهواية مو حالة كلما يتحرك تسويلنا سالفة

زين عماد عوفني خلي يصير بيا شي مو يكولون اهم شي الحالة النفسية للحامل وانت متقصر تقهرني دايما

رجعت يمها خليت ايدي على بطنها حضنتها هسة لازم تحسين بالامان واني يمج كافي هبطات كل ليلة

بالاسبوع مرتين اطلع اشتري غراض مرات ويا عماد وكريم مرات ويا ابويه وامي بديت اتعلم الشغل من بابا واروح وياه للشركه بس افلام الليلة مستمرة حتى كريم تعود يكول قبل لاينام اليوم شنو الحلقة تجيبين لو يتحرك وبس ويبدي التصنيف من مقداد ودينا عليه واني اجاوب دينا برسالة نحن نختلف عن الاخرون هاي ثمار حب السفير مو مثلكم تهددني تشوفه لمقداد واني اكوللها توبة ماعيدها دخلت شهري سوينا حفلة استقبال وغيرت فستاني اكثر من مرة واخذت كومه صور ويا عماد واهلي واهله ام عماد محضرة كلشي من غراض وتجهيزات بالطابق الارضي واحنا بالطابق الخاص بينا حضرنا غرفة بس خلينا بيها الغراض نمت تعبانه من المشي يوميا قبل مانام غصب يمشيني ولايرحمني حسيت بالم مهتميت كلت مثل كل يوم صار زايد متحملت عماد راح يجي والله ماكذب كوم راح اموت

عبالي مثل كل يوم غلست بس من شفت وجهها ولونها متغير بدلت على السريع واخذناها للمستشفى طبعا طول الطريق تعض بأيدي من وجعها ومتحس بنفسها دخلوها للصالة ضليت اروح واجي مرت فترة وطلعت منال بشرتني صرت اب وآيه صحتها زينه مقداد ودينا ويايه باركولي احس باحساس عجيب كأنما اول مرة يصير عندي طفل لان من صار كريم اني جنت مسافر ادرس شفته بعد ولادته بشهرين محسيت بي مثل هاي

وينها تشبهك لو لا اذا متشبهك رجعها ماريدها

تشبهني واني ابوس بين عيونها النص مفتحه اشكرج ياعمري خليتيني اشوف هاللحظة الحلوة شنسميها حبي

عشق راح نسميها عشق

#عاشقة_السفير39

الكاتبة chra kirkuki

في قربك اعشق

ان اقرا كلماتي في عينيك

اعشق ان اشعر وجودي في روحك

اعشق ان املك الدنيا في دفئك وفي صمتك

اعشق حيرتي لاني افكر فيك

اعشق خوفي لانه ينبض باسمك

اعشق فراقك لانه يبكيني غياابك

اعشق انتظارك لانه سبب كلماتي

اوف نفسي انقطع بس لاهم واصل قبلي اليوم بديت اركض قبله دخلت للبيت حتى اكوله اليوم فزت عليك سمعت صوته وياعشق الوحيدة اللي تنافسني بعماد كالعادة من هو موجود متقبل الاتاكل من ايده ولاتنام الاهو يخليها بفراشها وطلباتها أوامر على الكل من اشوفها شلون تدلع وتدلل على عماد شوية وابجي

شبيج حبيبتي مبينه تعبانه روحي غسلي تعالي اكلي ويانا

لا آيه لا بس اني وانت ناكل هذا فطورنا

على عنادج راح اكل هذا حبيبي قبلج اكول يمتى راح افوز عليك متت من التعب عبالي وصلت قبلك

من اكولج لاتسهرين ونامي من وكت حتى يصير عندج نشاط متسمعين كلامي

غمزتله من يسهرني غيرك كافي توكلها هلكد مبقتلي شي

يالله عشق روحي صحي كريم حضنتها كلي ملكج هاي شنو ام دميعه تغارين من بنتج كلت من تصير ام تكبر وتبطل غيرة صرتي اسوء

انت تهتم بيها اكثر مني لاتخليني ارجعها لبطني

هههههه شلون ترجعيها مو انتي ليل نهار تبجين تريدين طفل بالعافية عليج هسة تحملي

يمتى راح تخلص اجازتك احس براحه من نجي للمزرعه كلما نوصل لباب المزرعه اتذكر يوم زواجنا بس اني وانت ومدللني اخر دلال هسة بنتك اخذت حصة اخوها وحصتي حتى ابويه يحبها اكثر مني

بعد يومين ارجعكم للبيت واسافر ويا كريم محضرله مفاجأة اخذه يشوف لعبة كرة قدم النادي المفضل اله

حبيتبي لو مابارد اهناك جنت اخذج انتي وعشق همينه

عمري اعرف متقصر بس كريم يستاهل خطية تعب هواية بالامتحانات وبعدين متعرف اشكد احب كريم

صباح الخير عليكم دادي اليوم الشمس من وين طالعه آيه تحبني نسيتي ايام زمان تنافسيني على دادي من جتي عشق صرتي حليفتي

خربت شعره اخ منك لاتذكرني بالماضي جنا اني وانت متوازيين بقلب عماد جتي عشق قلبت الموازيين صرنا مثل الهرم هي بالمقدمه واني وانت على الجوانب

لا مو هيجي اني بالمقدمه وعشق على الجانبين وانتي الله وياج

لاحبيبي آيه بالمقدمه وانت واختك على الجوانب طبعا شوية وتوكع من القهر باوعتلها من كلت هيجي ارتاحت نفسيا بقينا اني وكريم كعدنا نحجي كبر صار عمره 17 سنة كل مايكبر يشبهني أكثر كلش محظوظ بي عاقل مؤدب وذكي يحب دراسته اهواية جنت اخاف على نفسيته من تزوجت آيه لايصير بي عقدة بس الحمدالله صارو مثل أصدقاء واكثر يحب آيه اهواية وهي نفس الشي من جتي عشق للدنيا كلنا بالبيت شلنا هم كريم يتقبل بعد ماصار عمره 12 سنه وجود اخت بحياته رغم هو عنده من أمه بس اني اختلف كلش متعلق بيا ويحبني بس شفنا العكس يداريها ويدللها اهواية اكثر مني من تمرض هو يتخبل يظل يحجي على آيه ويعاتبني بشكل غير مباشر شفت دلوعتي جتي كعدت بحضني ضحكت عليها من اني موجود متروح يم احد من اسافر تلزك بكريم ومتكول لأمها ماما تكول آيه اهواية حاولت واياها متقبل احسهم ضراير مو ام وبنتها عشق بعد شوية راح ترجعين ويا اخوج للبيت زين ماريد اعتراض كريم حضر غراضك راح يجي حميد ياخذكم بعد يومين اني وآيه نرجع واخذك نسافر

رجعت للغرفة قفلت الباب ضحكت من كل كلبي خفت لاينسى عيد زواجنا كل يوم يبهرني بشي جديد ابد مينسى لاذكرى ولا موقف ولا مناسبه دايما يسبقني ويفاجأني تقربت من المرايا باوعت على نفسي كلشي بيا تغير وجهي ملامحي شعري تصرفاتي اكلي لبسي صرت اكل مثله والعب رياضة اخصص جزء من يومي لنفسي مثل ماعلمني كل مايمر على زواجنا سنه نرجع للبداية بنفس اللهفة والحب كأنه متزوجين جديد حتى عتبه وعصبيته يختلف عن غيره طلعت العلبة الساعه اللي طلبتها قبل فترة من نوع عماد المفضل كعدت اغلفه بورقه بيضه داخلها صورته من رسمي اسمع اصواتهم وهمه يروحون من يكون يمي هو يشيل مسؤولية عشق وكريم واصير وياهم ارجع نفسي طفلة من يسافر ارجع لدور الامومه والمسؤولية .

ودعتهم رحت كعدت بالصالة سويت شوية اتصالات ضرورية وحجيت ويا ابو آيه ردت منه شوية معلومات هانت مباقي شي واوصل لقاتل ابويه تعبت كل هالسنين واني ادور وماريد اظلم احد حتى منصبي مرتين قدمت استقاله مقبلوها مني اريد اتحرر احس هالمنصب مقيدني ماكدر استغله لشغلي الخاص اشكد اتعب واسافر بس من ارجع اشوف البسمه ونظرات العشق بعيون آيه ونظرات الفخر بعيون كريم وحركات دلع عشق انسى كل شي واحاول اعوضهم غيابي طلعت من الصالة حضرت غراض الشوي اليوم نحتفل بعيد زواجنا السابع

الله على الحرية واني استفرد بيك وحدي شتسوي خلي اساعدك

اتخيلج ناوية تفترسيني اليوم شنو هالجمال حبي

ناويلك على نية ديربالك مني وبعدين اني كل لحظة ودقيقة من تصير عيوني بعيونك اصير احلى شنو المناسبة رجعتهم حتى نبقى وحدنا

مسويه نفسها متعرف اعرف الاعيبها من غير متكول عيونها تفضحها اريد اعوضج غيابي وادللج

خليت نفسي بحضنه احب يشتغل واني ايدي بأيده هيجي راح يطلع الاكل اطيب مو فرشنا برا وكعدنا ناكل بعد تمددنا واحد بصف الثاني واحنا نحجي على كل يووم حب مرت بينا الصبح انطيته هديته طبعا من البارحه انتظر هو شنو جايبلي مكال شي اجيبه منا ومنا حتى يكول بس اعرفه اذا كال وريحني مو عماد اخر شي متحملت عماد لايكون ناسي عيد زواجنا

ههههههه والله عرفت متتحملين من البارحه متعرفين شتسوين مو اهنا هديتج بالبيت حبيبي تتصورين اني انسى احلى لحظات حياتي ذوقج تحفه كلش عجبني مرة ثانية لاتسويها لان مكلفتج اهواية الرسمه تكفيني

لاتهتم من فلوسك ياريت اكدر انطيك روحي قليل بحقك غششني شنو هي راح انجلط تعال وين رايح مو احجي وياك ركضت وراه وصلت للمسبح هو ماكو ردت اندار وكعني وياه للمسبح يذكرني بحركتي من سويتها بي قبل لانرتبط بعلاقة سافر عماد وياكريم رحت لبيت اهلي حتى عشق تبقى يم امي واني اروح ويا ابوية للشركه الصبح طلعنا شفت سيارة كدام باب بيت اهلي حميد تقدم مني وانطاني علبة وراح فتحته بيها مفتاح السيارة وقصاصات ورق كلها احبج

بعد آيه متركب ويايه صار عدها سيارة لا على هالدكه عماد جان هذا الشي الوحيد يخليني اشوفها يوميا لازم اخابره واعاتبه راح انحرم منج

لا بابا لاتعاتبه فديته حبيبي مصدكت اقتنع يخليني اسوق شوف ظلمته كاتب بورقه متسوقين سيارتج للشركه تروحين ويا ابوج يعني بس اجي واروح بيها للبيت

اي هذا عماد ابني هسة مو اللي قبل شوية الله لايحرمكم من بعض حبيبتي طول عمره صاحب واجب واصول والله احبهم هو ومقداد مثل زيد

لاتذكرني بزيد تخبل من عرف كريم مسافر شوية وينجلط خطية جان ناوي يجي للمزرعه ويا ماما حتى يبقى ويا كريم بس اني زعلانه منك بابا صرت تحب عشق اكثر مني

لا آيه عشق محد ينافسها هاي حبيبتي احبها اكثر من روحي اذا دينا سمعت راح تموتنا غير والله الها وحشه هي وجهالها

هانت بابا كلها شهر وترجعلنا حضرة الدكتورة يوميا تكولي شلون تمشين الشغل اكيد بس تلعبين لو كاعدة ترسمين عماد ومتسويين شي وبابا يدافعلج

من ناحية تحجي صدك من يسافر عقلج يوكف واني ابتلي بيج اصحح اخطائج بس من ناحية ثانية انتي متقصرين احسن منها ومن زيد راح تكونين يوم من الايام بمكاني وتستلمين كل الشغل وانتي كدها واثق بيج لاخر حدود

وصلنا للشركه دخلت للمكتب واني اتذكر اول ماجبت عشق مجنت اطلع من البيت من خوفي وحرصي عليها سنتين جنت وياها ليل نهار ماخلي الخدم يتقربون منها حتى من عماد يكولي تعالي ويايه من يسافر جنت اخاف اعوفها بس هو مقبل اضل هيجي خيرني لو اقرا واقدم على دراسات مثل دينا لو ارجع اشتغل طبعا اني بعيدة كل البعد عن الدراسة رجعت اشتغلت ويا ابويه بالبداية جان مجرد تسلية بس عماد حريص دايما يسألني شسوي ومااسوي من عرف مجرد تسلية علمني على الشغل ويعاقبني من يسألني شي وماعرف اجاوبه يروح ينام يم كريم لو يم عشق حتى هو تعبان يخصصلي وقت حبيت الشغل لان هو يعلمني عليه كملت شغلي رحت يم مكتب بابا سمعت صوت مهند الكريه رجعت لمكتبي هذا اشجابه لهنا مو خلصنا منه وبابا انطاهم حصة عمتي لو يعرف عماد اكيد يزعل محذرني مالتقي بي ولا احجي وياه جان مسجون بقضية تزوير عرفت من امي وصارله شهور من خرج ويشتغل وحده هسة وخاطب جديد خابرني عماد يحجي ويايه دخل مهند لغرفتي وسلم عليه انصدمت

آيه انتي بالشركه اني اسمع صوت مهند شيسوي يمج

ها لا مو ردت اكوله مو هو قفل التليفون باوعت على مهند كانه مو هو متغير اطلع برا

اني جيت حتى اعتذر منج اذيتج اهواية واي شي تكولي حقج مو زعلان منج ياريت تسامحيني علمود ابوج لان مثل ماتعرفين اني اقرب واحد اله وجنت اشتغل وياه اتمنالج حياة سعيدة ويا عماد

طول مايحجي اركز ويا كلامه شنو اللي غيره حتى مكدرت اجاوبه طلع وعافني وحدي رجعت خابرت عماد مقفل رجعت للبيت ويا ابويه جان يحجي عن عائلته وانه ميكدر الواحد يعيش بدون اهله حسيت من كلامه انه هو مسامح مهند ويريدني اتقبل الموضوع واني بالي يم عماد لو يسمع هالحجي يطير راسي وصلنا شلت عشق وديتها للحمام غسلتها وغيرت ملابسها نزلت جدي وعمتي ومهند موجودين سلمت عليهم وعشق بحضن ابويه تريد تنام سمعت جدي يكول

هاي تشبه منو توفيق متشبه آيه ولا تشبهكم

بابا هاي الحلوة تشبه ابوها حبيبة كلبي عشق شوفها تخبل

عفية عليك ابني بنت عماد صايرة اغلى من اهلك اللي تخليت عنهم علمود بناتك يتزوجون ناس غربة ومهند شنو جان بي بهذلتو بهالشكل ها آيه خاتون يوميه مرجعج لبيت اهلج وهو دايح من دولة لدولة

جدي عماد مو دايح عنده شغل عن اذنكم اخذ عشق تنام بمكانها ردت اخذها من حضن ابويه مقبلت

جدو آيه تحب عماد اهواية من شفت الوشم عليها أسم عماد قررت ماألمسها وفترة واعوفها حتى يتزوجون

مع الاسف لا انت ولا خالك رياجيل لو متربية مجانت تسوي هالشي صوج أمها اللي متعرف بنتها شتسوي من وراهم

مهند لو سمحت الزم حدودك زين اني وانت نعرف شنو صار لاتمثل دور الضحية

صدك متستحين لاعبه ويا غيره وعندج عين تحجين عليه زواجج من عماد حتى يتستر عليج مو

بابا شنو هالحجي مهند سامحتك مو معناته تتجاوز حدودك ويا بنتي وعماد والنعم منه هو الوحيد يستاهل آيه

لا خالي فهمتوني غلط مو قصدي شي مو زين على آيه واني ممنون منك سامحتني وكلتلك غلطة ومتتكرر لان ماعندي غيركم

أخويه ابني مكال شي غلط كلنا نعرف شلون تزوجت بنتك ليش هسة من واحد يحجي الحقيقة تهاجمو واني اول وحدة باركت الها من جابت عشق ونسيت اللي صار بأبني لايصير كلبكم أسود

عفتهم وصعدت لغرفتي شوية وانفجر من القهر شفت كومه مكالمات من عماد شلون نسيت تليفوني بالغرفة اول مافتحته صار يحجي عليه

رجعي للبيت بدون نقاش افتهمتي حسابج بعدين

اني مو طفلة تحجي عليه بكيفك كافي تعبت منك ومن عصبيتك مارجع راح ابقى

زين آيه براحتج ابقي يم اهلج بس بنتي اخذها مااسمحلج تخلين بنتي بوسط اهل ابوج

سديت التليفون كعدت ابجي ليش هيجي حجيت وياه وهو ليش معصب بهالشكل وشلون ويا هذولة لو ممصالحهم ابوية مو احسن رفعت راسي شفت زيد واكف كدامي شتريد زيد

ليش كذبتي عليه مو كلتي كريم مسافر وميرجع شوفي هو رجع ماعليه تاخذيني لبيتكم من ترجعين مشتاق لكريم شوفي جايبلي هدية

اخذت الايباد منه باوعت على الصور كريم ويا عماد ويمهم منال شنو هاي لايكون هي مسافرة وياهم روح هسة باجر من ارجع اخذك يمه لو اخابره هو يجي يمكم انت وعشق

مو تنسين زين آيه والله ازعل منج هالمرة .

هاي الحسابات والوصولات كلها وهذا cdموجود عليها البيانات اكو مشروع اريد اناقشك بيها ارباحها مضمونه

مو هسة ياسر اني كلش مشغول هالفترة ماكدر اركز بشي

عماد ارتاح شوية يعني جيت من السفر مباشرة للشغل والحسابات يااخي ارحم نفسك شوية اني لو منك ارجع مرتي واروح انام بغرفتي وماطلع منها ايام يعني بذمتك مو مشتاق الها

ياريت اكدر ارتاح مرجعت من السفر غير لشي منتظره من زمان اتمنى تتحقق انشالله قربت اوصله

لايكون بعدك تفكر بقاتل خالو عماد مو على الاساس الموضوع انتهى وربك يحاسبهم

مراح ينتهي ابد عوف السجلات بعدين راح اراجعها بنفسي روح للبيت ارتاح تعبتك ويايه

ميفيد وياك شي من تغير الموضوع محد يكدر عليك بطران اروح انام يم مرتي مو احسن منك يالمتعاجز

ودعته كعدت اقرا الملفات والدلائل وقائمه الاشخاص المشبوهين بأغتيال ابويه وغيره من الاساتذة والعباقرة لازم اكون حذر هالمرة تذكرت آيه وشلون قابلت مهند بعد هالسنوات ليش رجع يمكن الدرس اللي انطيته مجاب نتيجه صرت بين نارين ابعد مهند عن عائلتي لو أدور على قاتل أبويه وآيه اللي مو راضية تسمع كلامي وتعاندني فتحت المجرات طلعت باكيت الجكاير اللي نادرا أدخنها بس موجود دايما سويت لنفسي قهوة وكعدت اصفن على حياتي وعيني على شاشة كاميرات المراقبة شفت سيارة آيه تقترب لايكون جاية وحدها بنص الليل احس العروق اللي بركبتي راح تنفجر من العصبية

شفت الخدامه تنزل عشق من السيارة والخاتون تنزل الغراض مكمت من مكاني ماريد اشوفها بهاللحظة لا اتصرف تصرف محلو وياها

مكدرت اصبر أكثر من شفت صورة منال كلت للخدامه تحضر غراض عشق بدلت على السريع وركبت سيارتي اهلي جانو نايمين طبعا كلش جنت خايفة اول مرة اسوق بالليل مبقيت ادعية مقريتها لحد ماوصلت ونزلت الغراض وخلينا عشق بسريرها ودخلت لغرفتي السرير مثل ماهو مرتب فتحت غرفة الملابس كل شي بمكانه اكيد كالعادة اول مايرجع يوصي الخدامه ترجع الغراض وترتب اشيائه بمكانه خابرت الحارس علمود اسئله موجود بالبيت لو طالع عرفت موجود بالمكتب نزلت فتحت الباب بدون ماادك عليه وانتظره يسمحلي ادخل لو لا سديت الباب وكعدت مقابيله

كومي طلعي لغرفتج عندي شغل هسة ماعندي وقت اضيعه وياج

أي حقك استاذ عماد ليش تضيع وقتك ويايه وعندك البديل كمت من مكاني اريد اطلع مادري شلون وصلني بغمضة عين ومسك ايدي

شنو هالتصرفات والحركات الجديدة آيه وضحي كلامج لاعبالج اسكت على اللي سويتي اليوم

اسأل نفسك حضرة السفير رايح تسافر ويا ابنك حتى يتونس لو انت تتونس ويا منال

شنو اللي كلتي خاتون بدل ماتبررين وتعتذرين اللي سويتي اليوم تزيدين الطين بلة رفعت أيدي اضربها مكدرت نزلته روحي من وجهي بسرعه ياناقصة عقل

اشكرك عماد اضربني استاهل مراح اسامحك ابد عفته وصعدت للغرفة لااكدر انام ولا اكدر اسكت على هالأهانه غيرت ملابسي وتعطرت كعدت اخلي مكياج واني ابجي يسيح وامسحه واخلي من جديد يمكن تخبلت دخلت بالفراش انام تقلبت يمين شمال ميجيني نوم واني على خلاف ويا عماد انتظرته يصعد ماكو متحملت لبست فوك قميص النوم فستان طويل ونزلت للمكتبة من جديد وقفلت الباب باوعتله هالمرة بعيون ترجى لاتحجي شي رجاءا ماكدر انام وانت مو يمي باجر عاقبني بكيفك خليت نفسي بحضنه

تجاوزتي حدودج اهواية آيه ماريد تكررين االي صار اليوم ماحب اعاقبج انتي روحي وحياتي كومي نصعد لغرفتنا

لا ماريد اصعد خلي ننام اهنا على هذا القنفه ماريد ابعد عنك سم احس نفسي مخنوكه كلش وجودك يمي يخليني اتنفس وارتاح .

#عاشقة_السفير40

الكاتبةchra kirkuki

رياح سماوية أتت بهذه الأفكار

إلى القمر المتضائل نوره مع مرور الوقت،

حاولت أن أكون قويّةً مثلك

،لكن الأزهار الفواحة برائحة الحب

كالكلمات التي لا تصل إليك

تتحول إلى هباء من ضعفها

كنت لأحلق في سمائك

لو أنني أمتلك أجنحة كالفراشة

ولا أبالي بما قد أصبح عليه

وما قد أشعر به من ألم وحزن في سبيل ذلك.

آيه كتلج تجين ماكو اي أعذار حتى لو اضطريت اخابر عماد بنفسي اريدكم انتي وماما وبابا ويايه تشوفون نتيجة تعبي

احاول وياه والله كلش متشوقة أشوفج وانتي تستلمين الشهادة واني دايما فخورة بيج دينا يااحلى دكتورة بالعالم رفعتي راسنا لو هو مو مسافر عادي نجي سويا على حظج قبل يومين راح حتى كريم وعشق ضايجين لان هالفترة هو كله مشغول

احسج ضايجه صاير شي اني ماعرفه

عماد بطلني من الشغل علمود مهند حتى ميصير بيناتنا لقائات لان يوميه هسة يم بابا بالشركه كل يوم بحجه

واحنا منخلص من هذولة الحمدالله صار سنين مشايفتهم

حتى ميقبل اروح ابات يم بيت بابا لايجي مهند على غفلة

احسن ابتعدي عنهم مشفنا منهم غير الأذية حتى جدج كل ماجان يشوفني يحجي كومه عليه علمود تزوجت مقداد ومحسبت اله حساب المهم ماعلينا منهم هسة انتظرج تنطيني خبر

زين حبيبتي مع السلامه سديت منها طلعت من الصالة واني ادور على عشق شفتهم بالحديقة ويا حماتي كاعدة تلعب وهي تقرا كتاب باوعت عليها من بعيد بعد ماتفطر اذا الجو حلو تكعد ساعات بالحديقة تقرا كتاب وتشرب قهوة لو تخابر لو تطلع زيارات يمكن نهايتي تصير مثلها بس هي احسن مني عدها حرية تروح تجي بكيفها تقربت منهم وكعدت العب ويا عشق

ها آيه شبيج بنتي مبين ضايجه صاير شي اهلج بخير

ماكو شي خالة الحمدالله كلهم بخير خابرت عماد حتى اترخص منه علمود نسافر يم دينا بس مجاوبني ودينا تنتظر اردلها خبر حتى أهلي ينتظروني

ميخالف حبيبتي متعرفين من يصير مشغول ميكدر يجاوب هو بعدين راح يخابرج

بكلبي اي بعد يومين هذا اذا صار عنده مجال لاتخافين تعودت على طبعه

هههههه هاي النبرة جديدة اول مرة اسمعج ضايجه من عماد حبيبي كريم تعال يمي لو مجاي اليوم جنت اجي بنفسي ازورك كلش مشتاقتلك

واني هم بيبي الله يخليج اليه شلونج آيه حبيبة اخوها عشق تعالي بسرعه شوفي شنو جبتلج

الحمدالله بخير انت شلونك تونست بالعطلة

اي الحمدالله بس كله كملنا بالمزرعه امي مكدرت تسافر هالسنه مشغولة كلش هسة حجيت ويا دادي مراح يجي هالأسبوع يمتى تسافرون انتو راح اجي وياكم مشتاق لعمو مقداد اهواية

ردت اجاوبه واكوله لعد ليش ميخابرني سمعت صوت تليفوني كمت وابتعدت عنهم شوية كلش ضايجه من تصرفاته احس نفسي اخر اهتمامته جاوبته من غير نفس

عشقي عمري شلونج مشتاقلج اهواية حبيبتي

اني آيه مو عشق حتى أسمي نسيته

واني أكدر أنسى روحي انتي عشقي وبنتج عشق اكو اختلاف احبج

يومين متخابرني ومشتاقلي اذا مو مشتاق يمتى تخابرني بعد سنه عماد لو تاخذني وياك هالمرة لو متروح ماكدر اتحمل بعد

جنت مريض كلش حرارتي ارتفعت اليوم شوية صرت أحسن روحي لاتفكرين ولا لحظة انساج دايما انتي عالبال

أحبك عماد مشتاقتلك اهواية حبي تسمحلي اسافر ويا اهلي دينا أكدت عليه اهواية حتى اروح يمها لخاطري لاتكول لا

اصلا منطيتيني مجال أحجي سألتني وجاوبتي نفسج روحي وياهم ميخالف هسة راح احولج فلوس على حسابج آيه ميحتاج اوصيج ديربالج من حركاتج وتصرفاتج زين

ماريد فلوس عندي تسلم ياروحي خلي ابلغها خطية تنتظرني

فلوسج الخاص خليها الج متصرفين منها ماريد اعيد الموضوع اني مسؤول على مصاريفج الشخصية ومصاريف عشق من تطلعون خابريني هسة انطيني بنتي احجي وياها شوية

مصدكت حضرت غراضي بسرعه وخابرت اهلي انطيتهم خبر راح اروح للمطار ويالسايق اهناك انتظرهم كلش متحمسة اشوف دينا وجهالها وكريم متحمس يشوف عمه صارلنا سنه مشايفيهم وصلنا للمطار شفت اهلي سلمت عليهم كريم وزيد اول مايشوفون بعض يندمجون وينسون اللي حواليهم وعشق اول ماتشوف ابويه تروح تتعلق بي حتى يشيلها بحضنه حسيت امي ضايجه ابويه راح ويا عشق ماما شبيج

وشنو مابيه عمتج وجدج جايين ويانا حاجزين دكتور اهناك ردت اكولج ابوج مقبل كال اخاف تبطل ومتجي

ماعلينا منهم لاتضوجين نفسج اهم شي فرحه دينا ردنا نركب الطيارة بعد ماكملنا الاجراءات شفت مهند وياهم شلون مصيبة هاي شكول لعماد لا وشايل عشق همينه كريم واكف بصفي راح اخذها منه ورجع باوعلي وسكت خفت لايكول لعماد اللي صار شيخلصني منه كعد كريم بصفي وعشق بيناتنا جان يحجي وياها اني كرهت السفرة تمنيت مرايحه احسن اليه

حميد بعد ساعه راح يوصلون اني خابرت مقداد بلغته انت تروح للمطار تاخذهم ومثل ماوصيتك رجلك على رجلهم من يطلعون لأي مكان قفلت التليفون منه اول ماطلبت آيه تسافر طلبت من حميد يروح قبلهم ويستقبلهم من يوصلون ماعندي ثقة بأهل ابوها وخصوصا مهند وجده واحد ألعن من الثاني باوعت على الصورة اللي اخذها ويايه وين ماسافر آيه وكريم وبيانتهم عشق يلعبون بالثلج فكرة آيه خابرت صديقي وصيته يراقبلي شخص من اللي عليهم شبه بقتل أبويه

عماد مادري شكولك المعلومات كلها طلعت مو صحيحة اعتذر منك مكدرنا نحصل على شي

مستحيل تطلع مو صحيحة هذا اخر أمل للقضية

والله وغلاتك مقصرت مبقيت شي مااستفسر واسوي تحريات واستجواب تمنيت أخدمك بشي عمري ماانسى وقفاتكم ويايه أنت ومقداد

ولا يهمك ماكو بينا هالكلام اشكرك سديته راسي راح ينفجر كلما اكول هاهي انتهى وصلت للنهاية ارجع لنقطة الصفر كملت لبسي وحضرت مؤتمر كوة لزمت نفسي من الحركات السخيفة والاسئلة اللي مالها معنى من الصحافه والهوسة احس نفسي بدوامه اردد بداخلي يارب عدي هالليلة على خير لايصير بيا شي كدام كل هالناس

وصلنا نزلنا من الطيارة كريم سبقني وياعشق طلعت حقيبتي سمعت صوت مهند

آيه اذا وجودي يمكم يسببلج مشكله اني اعتذر لان شفت حركة ابن عماد من اخذ مني عشق محلوة خفت لا يحجي شي لأبوه

اسمه كريم وبعدين ليش تحسسني انه اني وانت بيناتنا شي ولازم اخاف منه وتصرفه وياك من اخذ عشق عادي أخته وانت غريب بالنسبة اله اكيد ميقبل يشوفها بحضنك الولد جبير مو صغير

هو يعرف اني جنت زوجج وابوه اخذج مني

باوعتله بغضب لاتشوفني ساكته تحجي بكيفك حسن الفاظك كافي مهند

اشبيج آيه انتي ليش تاخذين المواضيع من منظور ثاني اني حجيت اللي حسيته وبس اصلا اعتبرج أختي

عفته ومشيت وصلت للصالة شفت حميد وهو يحضن عشق وكريم انداريت مهند يمشي ورايه وحميد عينه علينا اني جنت شايلة هم مقداد يجي ورانا ويشوفه معرفت حميد موجود شيفهمه هذا الموضوع

حمدالله على السلامه ست آيه اذا ماعندج شي خلينا نروح اهلج بالسيارة والجنط اني اتكفل بيها ماعليج انتي جنت احجي وياها وعيني على مهند سويتله بأيدي حركه يعني بسيطة هو من شافني معرف وين يختفي

الله يسلمك حميد يمتى جيت عماد وياك

لا سيادة السفير عنده مؤتمر اجيت حتى اشوف طلباتكم خلال فترة تواجدكم اهنا بطلب منه

ودعنا عمتي وجدي ومهند حسيت هم وانزاح على قلبي ولو عمتي قبل لا تروح سمت بدني من شافت حميد كالت شنو زوجج مو واثق بيكم جاوبتها بالعكس حريص على حياتي ويدور راحتي بس بداخلي انقهرت على حركته ليش مانطاني خبر قبلها التهيت ويا دينا وتحضيرات حفلتها كلش تونسنا بالحفلة اخر ليلة قبل رجوعنا طلعت ويا ابويه لوحدنا نتسوق ونروح للمكتبات هو يشتري كتب واني فرش وألوان

عبالي كبرتي من صرتي أم بعدج تشترين هالأصباغ عندج مجال ترسمين مثل قبل

24 ساعه بالبيت ليش ماعندي مجال والغرفة اللي مسويها عماد أليه ينطيني طاقه أرسم من ادخل بي انسى نفسي لحد ماتجي عشق تخرب المكان اضطر اطلعها واقفل الباب جنا نمشي ونحجي لزم ايدي

تدرين من جبتي عشق حسيت الله انطاني الدنيا ومابيها كلش فرحت واني اشوفج صرتي أم ياترى آيه انتي سعيدة بحياتج مثل مانشوفج ظاهريا عماد يستحقج لو لا جاوبيني وريحي كلبي

بابا انت تسألني عن عماد ماعندي اي وصف واي أحساس اعبر بيها عنه لان قليل بحقه اخاف اظلم مشاعري

الله الله بعد شيريد عماد هنياله الله يخليكم لبعض ريحتيني الله يريحج دنيا وأخرة أخوج زيد خليج دايما قريبة منه ابد لاتعوفي

بابا ليش تخوفني اكو شي مادري كلامك الليلة ينطيني احساس سلبي

اطمن عليكم ماكو شي حبيبتي نرجع ناخذ عشا ويانا لو ناكل وحدنا

ناخذه ويانا احسن وصلنا للشقة اللي عايشين بيها دينا ومقداد خلينا الاكل بالمطبخ كريم أشرلي اروح للغرفة اللي ننام بيها اني وامي

دادي خابرج انتي ناسية تليفونج كلتله رايحه ويا عمو خابري

تسلم حبيبي هسة اخابره

آيه كوليله على موضوع مهند بنفسج احسن مايسمعها من غيرج

لحظة كريم شنو تقصد

اني مو صغير كبرت واعرف وافتهم كلش زين وانتي عزيزة على كلبي واحبج اهواية ماريد تتورطين بمشاكل اي شي تحتاجينه طلبي مني زين

ياريت عماد اهنا ويشوفك صاير رجال وتحجي بثقة جان يفرح اهواية فديتك حبيبي خلي اخابر دادي ديربالك على عشق اول ماسمعت صوته عرفت نبرة الغضب بي

آيه من سافر كريم وياج اخذتي أذن من منال لو لا

4 ايام ممخابرني وتليفونك مقفل وهسة تخابر علمود تسألني هالسؤال واني ليش اخذ اذن منها ابنك مو طفل كبر 17 سنه تليفونك لمنال مفتوح ولزوجتك مقفل

بلا حجي سخيف هسة تخابريها وتعتذرين منها الف مرة كتلج شي يخص كريم خابريها ليش تخليها تاخذ فكرة مو زينه عليج حتى كريم أفندي ممبلغها خطية اليوم عرفت من أمي كريم مسافر خابرتني تعاتبني ليش ممبلغها

ماعتذر لان ممسوية شي غلط وهي من اول يوم كالتلي اعتبري كريم اخوج لو ابنج

آيه لاطوليها وهي قصيرة ماريد حزازيات ومشاكل وسوالف نسوان ابنها ومن حقها تعرف شيسوي ومايسوي وين يروح

ابنها مو وهو يشوفني اكثر منكم اني دايما وياه من هي مشغولة ببيتها وشغلها وانت وسفرياتك عماد اذا طلبت مني مرة ثانية اعتذر لمنال شوف شسوي

براحتج آيه مراح أضغط عليج قبل لا انسى مهند اذا سمعت يحجي وياج كلمه اندمه على وجوده بالدنيا

مجاوبته اكيد عرف من حميد انسدت نفسي عن الاكل بقيت كاعده وياهم نحجي ونسولف واني اجاملهم بس اباوع على كريم وزيد يلعبون العاب الكترونية مادري ليش عندي احساس هاللمه الحلوة راح تنتهي

ها حضرت السفيرة كلنا احجي بتليفون زوجج ومشتاقة بس مو ساعتين متنا من الجوع وبعدين طلعتي شبعانه راح الانتظار على الفاضي

شبعانة رزايل عبالها حبيات جاوبتها طبعا مشتاقين لبعض ومن اسمع صوته احس بشبع وراحه نفسية يعني دينا انتي مو هيجي ويا مقداد

هاي آيه اللي اعرفها العاشقة المتمردة لا اني ومقداد نعبر بالأشعار مو مثلكم مو ناوية تجيبين طفل ثاني

بلي بس عماد ميقبل حاليا أصلا هالفترة تركت الموانع بس ممبين شي اريد اجيب اخ لكريم وعشق يشبهني هالمرة

انشالله حبيبتي يصير عندج بس لاتكعدين بالبيت وتضيعين احلامج حاولي تشغلين نفسج بشي لو رجعي على رسوماتج وطوري شغلج فتحي معارض وشاركي بعدج شابة والحياة كدامج

رجعنا من السفر كريم راح يم أمه حسدتها للحظات وهو شلون جان يختارلها هدية ويعبر عن حبه واعتزازه بيها ذكرت نفسي عشق من تكبر هم تصير مثله بعد ايام عماد رجع بس متغير عبالك مو هو كلشي بي بارد سلامه حضنه أمي عزمتنا على العشا هو مجان راضي يجي حسيته مغصوب بس متجادلت ويايه اول ماخلصنا الاكل راح ويا ابويا لغرفة الضيوف بقينا اني وامي بالصالة نحجي ونباوع على التلفزيون جنا نسمع صوتهم مرات يرتفع بس منعرف شنو الموضوع

بنتي زوجج شبي مبين مو تمام صاير بيناتكم شي

لا ماما ماكو شي بس هو تعبان من الشغل اول ماوصل راح على الشركه يمكن عدهم مشاكل بيها شفناهم طلعو وابويه يكوله لاتضيع روحك ترخص منهم ودعهم حتى مباوع بوجهي ولا كلي نروح عافني وراح صرت بحيرة شنو اللي يخلي عماد هيجي ويايه لايكون علمود سالفه مهند

ليش مكلتي بنتي ناويين تباتون يمنا انتي وعشق

خليها ام زيد الليلة عشق تنام يم جدو تعالي حبيبتي نروح

بابا شنو جنتو تحجون انت وعماد

كومي آيه رجعي لبيتج خلي عشق يمنا دير بالج عليه عنده ظروف هالفترة اخذي سيارتي كمت رجعت وحدي وصلت غيرت ملابسي هو جان نايم انطيته ظهري مسحت دموعي احس نفسي ولا شي بالنسبة لعماد كوة نمت سمعت صوت صراخ فزيت عماد جسمه متصلب عبالك خشب هزيته حتى يكوم تذكرت من يمر بأزمة يصير عنده كوابيس من خوفي نسيت تعليمات مقداد أخابره لو اخابر حميد اول مافتح عينه صاح عليه

كومي طلعي منا بسرعه عوفيني وحدي

ماروح ولا اعوفك كافي ليش متغير شفته يريد يخابر كأنه ميسمعني واني احجي وياه من كال حميد كمت ورحت لغرفة عشق وسديت الباب

من ضربت الابرة حسيت بأسترخاء شوية هديت هم زين امي وكريم مو بالبيت محبيت آيه تشوفني بهالطريقة نسيت نفسي وصيحت عليها قررت من يطلع الصبح أصالحها وافهمها حالتي .