يعني أي متجوز، إحنا مرتبطين بقالنا سنة ونص جاي تقولي دلوقتي متجوز؟؟
_ماجاش كلام على الموضوع يعني، فكرتك عارفة
_عارفة إنك متجوز، هعرف إنك متجوز و هكمل معاك؟؟
_ لي مكبرة الموضوع يا بيبي أي المشكلة، أنا بحبك أنتِ
_حبك برص أنت مجنون، أنت خاين، كنت بتخونها معايا! يعني أنا الطرف التالت، أنا الحربوقة خطافة الرجالة!!
_ بلاش تكبري الموضوع، لو عايزاني أطلقها، هطلقها، أنا بحبك أنتِ
_ لا أنت مش طبيعي، والله مش طبيعي، أنت مدرك إنك كداب و خاين، سايب بيتك و مراتك، ومقضي حياتك معايا! والله أعلم عندك عيال ولا لا! إزاي طايق نفسك كدا، مش عايزة أعرفك تاني
أخدت شنطتي ومشيت وأنا مش مصدقة إللي حصل، إزاي الرجالة كدا، إزاي عندهم الموضوع بالبساطة دي، طب و مراته إللي عايشة في البيت و مستنية كل يوم جوزها يرجع، نايمة على ودانها! يا ترى كان بيعاملها وحش عشاني!
عيطت لما جت فكرة إن هخرب بيت في دماغي، إن الشريرة إللي سرقت جوز من مراته!!
_______________
_كنت فين كل دا، مستنياك من بدري
_ماحدش قالك تستني
_ أنت بتتكلم كدا لي؟
_ عشانك خنقتيني
_ أنا إللي خانقتك، ولا أنت إللي أسلوبك بقا لا يطاق
_ لو مش عاجبك غوري من وشي
_ أتكلم معايا عدل، أنت مجنون؟ أنت متغير ومش على بعضك، و في حاجة غلط، قول حصل أي في أي؟
_ في إن ماعتش بحبك، في أن مش عايز أكمل معاكي
_ ودا قرار جالك فاجأة ولا حد مالي دماغك بيه
_ دي حاجة متخصكيش، ويلا روحي حطي الغدا قرفتيني
_ لا طلاما قرفتك ومش عاجبك، روح خد هدومك وروح عند مامتك تأكلك أنا مش الخدامة
_ أنتِ بتطرديني من بيتي؟!
_ ما أنت فاكر نفسك سي السيد تأمر و تنهي على مزاجك، في أي كدا فوق، متنمرد على عيشتك لي؟!
_ عشانك بقيتي مملة، و مهملة، و أنا زهقت
_ مملة و مهملة؟ مهملة في أي بقا إن شاء الله، ما هدومك نضيفة ومكوية و البيت زي الفل، و أحسن أكل بيتعمل ليك، مهملة في أي؟!
_ في نفسك، أنتِ مش شايفة نفسك عاملة إزاي؟! مستقبلاني بلبس ريحته طبيخ، و وشك مبهدل
_ مبهدل؟! لا هو أنا لو عايزة ابقى برينسس هبقى برينسس، بس دا لا هيبقى في أكل ولا نيلة، و بعدين أنت مفكر نفسك توم كروز، لو أنا ريحتي طبيخ فأنت ريحتك عرق و مش نصيفة وساكته، روح استحمى و أبقى أتكلم
بص ليا بغضب و سابني ودخل، و أنا دخلت طفيت على الأكل إللي كنت بسخنه، وحطيت لنفسي و قعدت اتغديت، وأنا بفكر في السبب إللي خلاه يتغير بالشكل دا
كان بيحبني، ودايمًا مدلعني، وأنا كنت بحبه، و عملاله صوابعي العشرة شمع
خلصت وقومت نضفت مكاني، ودخلت اخدت شاور وحطيت اسكين كير ولبست لبس تاني وفتحت فيلم وقعدت، وهو خرج، بص ليا بإستغراب
_ فين الأكل؟
_ والله؟ ما تقومي تحطي الأكل!
_ حطه لنفسك، عملت مرطب خلاص
_ و أنتِ من امتى بتحطي مرطب؟
_ من زمان بس أنت إللي أعمى، أو مشغول
_ اتكلمي معايا عدل
_ لما تتعدل أنت الأول أبقى اتعدل أنا
سابني ودخل المطبخ و مسك الموبايل فضل يبعت ماسدجات
لما اتسحبت وراه شوفته بيبعت لواحدة مسميها قلوب حمرا، لكن صورتها على الواتساب كانت صورة بنت جميلة
كان بيبعت ليها ( اسمعيني ارجوكي، أنا مش بحبها، أنا بحبك أنتِ، خلينا نتقابل وهفهمك، أنا مقدرش أعيش منغيرك بلاش تعملي في قلبي كدا، هطلقها، لو عايزاني أطلق مراتي هطلقها، بس ارجعي ليا، أنتِ مش متخيلة هي واحشة ومش مهتميه بيا ولا بالبيت إزاي، مش بتأكلني، و مش بتعمل أي حاجة، أنا مظلوم معاها، ردي بقا)
عيني دمعت وأنا حاسه إن قلبي اتسكر لكن اتصدمت لما لقيتها بعتاله
(بطل قرف يا خا..ين يا بجح، لو كلمتني تاني هفضحك)
وعملتله بلوم
رجعت مكاني في الصالة تاني وأنا مش مصدقة إللي شوفته، بيخوني و بيهيني و بيقول على مراته كل الكلام دا؟!
فضلت متجنباه أيام، وهو كل يوم عصبيته بتزيد، للدرجة دي فعلًا مش عارف يعيش منغيرها؟!!
كنت بفكر أعمل أي، وأي الحل و مفيش في أيدي أي حاجة أثبتها عليه
فضلت اعيط كتير لوحدي على حياتي إللي اتدمرت، و على جوزي إللي اتغير، و اتهامه ليا
لكن قدامه كنت عادي و مش فارق معايا، و كنت بتعامل ببرود جدًا
لحد بعد أسبوع، لقيت الباب بيخبط، ولما روحت فتحت، اتصدمت لما لقيت البنت إللي كان بيكلمها وشوفت صورتها ..
كانت واقفة قدام بابي بكل بجاحة
لكن لقيتها بتقول بإحراج
_ أنا أسمي مريم، .. أنا عارفة إنك متعرفنيش لكن .. أنا كنت عايزاكي في موضوع مهم جدًا بخصوص .. جوزك ….
تفتكروا مريم هتقول أي، أو هتعمل أي ؟!
ورد فعل الزوجة
