تحميل رواية «توقيت الجريمة» PDF

الجريمة المرادي لغز كبير.. بلاغ يوصل للشرطة من الجيران ان شقه جارهم راشد مفتوحة وانهم لما دخلوا لقوا راشد واقع على الارض ولكن الصدمة انهم لقيوا في ايده سكينه غرقانه دم ولقيوا مراته وبناته الاتنين مقتولين.. لما الشرطة وصلت المكان كان القاتل قدامهم اتقبض عليه واتضح انه كان في حاله سكر، وطبعا التفسير وقتها انه قتلهم وهو مش في وعيه

وهو كان ساكت ومش بيرد على حد، مشيت الاجراءات العاديه من تشريح الطب الشرعي وفحص مسرح الجريمة من رجاله المعمل الجنائي

وبعد التشريح تقرير الطب الشرعي كان في مفاجأة التقرير طلع راشد براءة لان الجريمة تمت حوالي الساعة 4 الفجر.. وراشد داخل بيته الساعه 6 الصبح وده على حسب تفريغ الكاميرات اللي كانت موجودة في الشارع.. وفضل السؤال اللي ما لهوش اجابة لما راشد مقتلهمش.. ايه اللي جاب بصماته على السكينة؟

…

كنت قاعد في مكتبي وقدامي راشد.. الشخص المتهم بقتل مراته وبناته ولكن دلوقتي ظهر دليل يطلعوا براءه من الموضوع ولكن راشد لسه ساكت مش عايز يتكلم!

_ راشد، انا مراعي اللي انت فيه، بس انت لازم تساعدني عشان نقدر نوصل للي عمل كده في مراتك وبناتك

= حضرتك بتقول ايه؟!.. يعني انت عارف اني معملتش حاجة، اومال أنا كنت محبوس هنا على ذمه ايه؟

_ راشد اهدى، كل حاجه في البداية كانت بتقول انك انت القاتل، سلاح الجريمة موجود وفي ايدك وعليه بصماتك، حضرتك كنت في حاله سكر وفي جرايم كتير حصلت واللي عملوا كده بيكونوا مش في وعيهم.. ده غير انك كنت على خلاف مع مراتك والموضوع اعتقد انه كان هيوصل للطلاق، ولكن تقرير الطب الشرعي وتفريغ الكاميرات اللي في الشارع كانوا في صفك، وعشان كده انت اتحولت من متهم لمشتبه فيك وفي نفس الوقت واحد في ايده انه يساعدنا عشان نوصل للي عمل كده في عيلته

= اساعد حضرتك ازاي؟!

_ يعني.. عاوز اعرف هل كان في خلافات ما بينك وما بين حد توصل انه ممكن يعمل كده؟!

=معتقدش، انا اه متجوز واحده تاني وكانت حاصله مشكلة ما بينهم بس ما توصلش للقتل لا، ده غير ان مراتي التانيه عند بيت اهلها دلوقتي

وبعدين انا عايز استاذن سيادتك في حاجة، بما اني طلعت بريء ومعملتش حاجة فسيبني اروح دلوقتي انا منمتش بقالي اربع ايام ومش قادر اركز في اي كلمه بتتقال، سيبني امشي وانا هرجع لحضرتك بنفسي عشان اكون فايق واقدر اجاوب على اي سؤال

_ ماشي يا راشد، عموما انت مش متهم دلوقتي فتقدر تروح بس هستناك ولو افتكرت اي معلومة تعالي واتكلم على طول

…

مشي راشد من قدامي، ودخل الرائد زياد واتكلم وقال

_ طيب وبعدين يا فندم، راشد طالع براءه يبقي مين اللي عملها؟

= هنعرف يا زياد بس كل حاجه واحده واحده، انا عايزك تطلب من فريق البحث الجنائي يعمل تحريات عن راشد وعيلته عاوز اعرف كل كبيره وصغيره وعاوز اعرف تحركات المشتبه فيهم بعد التحريات وبالتحديد في يوم الجريمة، والتحريات دي تكون على مكتبي في خلال 24 ساعة

_ تمام يا مصطفى بيه، وان شاء الله قبل 24 ساعة

…

قام زياد من قدامي وبعد حوالي 20 ساعة.. دخل زياد المكتب ومعاه ملف التحريات واتكلم وقال

_ الموضوع كبير اوي يا فندم، خلينا نبدأ براشد على حسب التحريات انه دلوقتي بيشتغل في ورشه تصليح عربيات وفي يوم الجريمه خرج منها وراح على ملهى ليلي شرب واتبسط ورجع بيته على الساعه 6 الصبح وكانت وقتها الجريمة حصلت

راشد متجوز واحده تانية اسمها وفاء، ووفاء دي قابلت مرات راشد الاولانيه مره واحدة ووقتها الست ياسمين اللي هي مراته الاولى عايرت الست وفاء انها مش بتخلف ودي كانت سبب المشكله اللي حصلت ما بينهم والست وفاء قالت باللفظ في المشكله دي والله لهحسرك عليهم.. يعني تهديد صريح

ولما عملنا تحريات عن وفاء دي طلع ليها اخ سوابق اسمه هيثم وكان محبوس في قضية عاهة مستديمة لواحد ودي مش اول مره يدخل فيها السجن

المشتبه فيه التاني جلال وده يبقى الاخ الاكبر لراشد، جلال مدمن وشمام وكذا مره كان بيطلب فلوس من راشد.. وراشد كان بيرفض

ولكن من كتر ما هو مش في وعيه اتهجم قبل كده على بيت راشد وكان عاوز يسرقه ولكن اخوه عرف يتعامل معاه.. ودلوقتي محدش عارف هو فين؟

النقطه الاخيره ودي الاهم.. ان راشد كان شغال في شركه مقاولات والشركه دي لرجل الاعمال المعروف يوسف محفوظ، وراشد اكتشف تلاعب في اوراق الشركة وان العماير بتتبني على اساسات مش مظبوطه وده بيسبب انها بتقع

ولما راشد حاول يوصل ليوسف محفوظ عشان يبلغه بالكلام ده لقي نفسه لابس قضيه سرقه ولكن قدر يطلع منها ولما طلع لقي نفسه مرفود من الشغل ولكن وقتها قال انه ماسك ورق على الشركه وهيسلموا للنيابة ومن الواضح كده ان يوسف محفوظ عاوز يخلص من راشد عشان الورق اللي معاه

…

وبكده يبقى احنا عندنا 3 متهمين هيثم اخو مدام وفاء، وجلال اخو راشد الكبير، ورجل الاعمال يوسف محفوظ

= طيب يا زياد، انا عايز اتكلم مع مدام وفاء مش عارف ليه حاسس ان الست دي وراها حاجه، وممكن تكون بعتت اخوها رد السجون وهو اللي قام بالجريمة دي

_ تمام يا فندم، هنجيب اذن من النيابه بالاستدعاء

…

وفعلا قدرنا نجيب اذن من النيابه باستدعاء مدام وفاء مرات الاستاذ راشد التانية

_ حضرتك عارفه انتي هنا ليه يا مدام وفاء؟

= اكيد عشان جريمه القتل، بس انا ما ليش دعوه بالموضوع

_ اه بس على حسب تحرياتنا ان كان في مشكله بينك وبين المجني عليها وانك هددتيها بعيالها

= كلام في لحظه عصبية، وبعدين هي استفزتني وعيرتني اني مش بخلف وانا مكنتش عارفه بقول ايه؟!

_ طيب وهيثم اخوكي.. كان عارف بالخلاف ده؟

= هيثم اخويا اه بتاع مشاكل، بس مستحيل يقتل انا عارفه بقول لحضرتك ايه

_ طيب وهو فين دلوقتي؟!.. احنا عاوزين نستدعيه عشان نحقق معاه بس هو مش موجود في بيته، لو هو معملش حاجه هيختفي ليه الاختفاء ده؟!

= هو كده طول عمره بيختفي كتير، بس انا باكد لحضرتك ان هيثم اخويا مستحيل يقتل

…

خلصت كلام معاها ومطلعتش منها بحاجه جديدة.. لكن في الوقت ده.. دخل عليا الرائد زياد واتكلم وقال

_ واضح اننا اتسرعنا في الحكم على راشد وشكله كده هو اللي عملها

= ازاي يبني؟!.. راشد داخل البيت الساعة 6 الصبح والجريمة حصلت 4 الفجر.. يبقى ازاي راشد هو اللي قتل؟!

_ الصبي اللي شغال مع راشد في الورشة شهد وقال ان راشد مشي من الورشة الساعه 3 الفجر، والمفروض انه راح على الملهى الليلي ولكن في كاميرا قبل بيت راشد بشارعين جايبه راشد وهو

رايح ناحيه المنطقه بتاعته في الوقت ده، ولكن المنطقة اللي ساكن فيها راشد كان النور مقطوع فيها.. والفيديو ده بيوضح الكلام اللي انا بقوله

….

مسكت التليفون من الرائد زياد.. وفعلا كان مكتوب التوقيت في الكاميرا حوالي الساعه 3 وربع وراشد كان داخل منطقته، وده معناه انه كذب علينا وانه بقي المتهم في قتل مراته وبناته كنت لسه هقفل الفيديو وهجيب اذن ضبط واحضار لراشد، ولكن في نهايه الفيديو في واحد تاني بيدخل الشارع.. والواحد ده صورته كانت موجوده في ملف التحريات والشخص ده يبقي..

هيثم اخو وفاء مرات راشد التانية، بصيت للرائد زياد وقولتله

_ اكبر غلطه ممكن تعملها زياد انك متراجعش دليل ادانه مجرم باهتمام وبتركيز.. انت جاي تقولي دلوقتي ان راشد دخل المنطقة واكيد ده عليه علامات استفهام انا معاك، ولكن لو راجعت الفيديو للنهاية هتلاقي هيثم اللي المفروض رد سجون داخل المنطقه هو كمان، رغم ان هو ملهوش اي حاجه في المنطقة دي

= عندك حق يا فندم، طيب ايه نجيب اذن النيابة عشان نقبض على الاتنين ونبدأ تحقيق معاهم

_ مالك يا زياد النهاردة، شكلك منمتش كويس انت ناسي اننا خلاص بعتنا ملف القضية للنيابة بعد الطب الشرعي والمعمل الجنائي وبعد تفريغ كاميرات الشارع.. يعني دلوقتي احنا دورنا اننا نقبض على الناس دي بعد ما نحصل على اذن النيابة.. والنيابة هي جهة التحقيق مش احنا

= كلامك مظبوط يا فندم

…

كنت عارف ان زياد مضغوط الفتره اللي فاتت، عشان كده دخلنا في الشغل على طول وجبنا اذن النيابة بضبط واحضار راشد وهيثم وطلعنا ومعانا قوه صغيرة من القسم وقدرنا نجيب راشد بمنتهى السهولة لانه كان قاعد في المنطقة وممشيش ولكن اللي دوخنا وراه شويه عشان نقبض عليه هو هيثم.. ولكن قدرنا نقبض عليه في النهاية بسبب مشكله عملها مع واحد في شبرا والناس بلغت عنه.. وبعد وقت صغير الاتنين كانوا واقفين قدام النيابة وبدأ رئيس النيابة التحقيق معاهم

_ راشد انت للاسف كذبت علينا في نقطة صغيرة، والحاجه اللي طلعتك براءه للاسف دلوقتي ما لهاش وجود فيا ريت تجاوب على الاسئله بتاعتي بمنتهى الصراحه والوضوح ده لو يعني كنت عايز تروح

= انا مش فاهم، حضرتك بتقول كذبت.. كذبت في ايه؟!

_انت قولت في التحقيقات، انك خرجت من الورشة وروحت سهرت في ملهى ليلي والمفروض انك خلصت ورجعت بعد كده على البيت الصبح كنت سكران ووقعت من طولك ولما قومت اتفاجئت بالشرطه وسلاح الجريمه في ايدك.. ولكن في كاميرا بتوضح انك رجعت المنطقة قبل ما تروح وتسهر في المكان ده، والشارع اللي انت كنت ساكن فيه كان النور قاطع فيه وقتها.. فياريت تعرفنا عملت ايه لما رجعت المنطقة عشان ما يتمش توجيه ليك تهمه القتل العمد مع سبق الاصرار والترصد

= انا هكون صريح مع سيادتك، انا رجعت المنطقه فعلاً بس مش على البيت، انا روحت لواحد صاحبي اسمه شريف استلفت منه مبلغ كده عشان اعرف اسهر والراجل ما تاخرش معايا، ممكن حضرتك تستدعيه وتسأله

_ طيب ما انت ما ظهرتش في الكاميرا تاني؟

= عشان في طريق مختصر، من الناحيه التانية وانا خرجت منه وبعد كده حضرتك ممكن تراجع الكاميرات بتاعة المكان اللي كنت سهران فيه وتشوف فرق التوقيت وساعتها تتاكد اننا ما طولتش خالص في المنطقة، يعني مستحيل اكون طلعت البيت اصلا

_ تمام، اكيد هنستدعي شريف صاحبك وهنراجع الكاميرات بس لحد ما ده يحصل انت هتشرفنا شوية

….

راشد خد اربع ايام على ذمه التحقيق، والدور جه على هيثم

_ اظن انك مش اول مره تدخل المكتب ده، مش كده يا هيثم؟!

= كده يا باشا، حضرتك عارف اني دخلت السجن كذا مره قبل كده

_ ومالك فخور اوي كده ليه؟… عموما انا جايبك هنا عشان افرجك على فيديو وعاوز منك رد على اللي انت هتشوفه يعني تفسر وتجيب من الاخر والا هشيلك القضيه من اولها لاخرها والمره دي مش حبس ده اعدام يا هيثم

= قضيه ايه واعدام ايه؟!.. وفيديو ايه ده عدم المؤاخذه؟

_ بص على الفيديو.. كنت بتعمل ايه في المنطقه اللي فيها بيت راشد واللي متجوز فيه مراته الاولى، اظن انك متمتلكش حاجه في المنطقة، واشمعنا في التوقيت ده بالذات

= بص يا باشا انا هجيب من الاخر، وانت عارف هيثم مش بيخاف انا كنت مكمر تليفون كده من عيل ميسواش 3 مليم وفي محل تليفونات في المنطقه دي لا مؤاخذه يعني يا باشا محل شمال بيشتري التليفونات دي من غير كرتونه ولا سين وجيم، روحت بعت التليفون ومشيت وحتى من حظي الزفت ان النور كان قاطع والراجل كان مولع كشاف تليفونه عشان يفحص العدة وكان عاوز ياكلني فيها ابن الحرام

_هههههه.. حلوه ابن الحرام دي ده على اساس انك مش سارق التليفون يعني، طيب يا هيثم انا همشي معاك للاخر واهي سرقة تليفون اهون مليون مرة من جريمه قتل مع سبق الاصرار والترصد بس لو ثبت ان انت اللي عاملها قسما بالله ما هحلك وانت عارف لما بحط حد في دماغي بيروح فين

= طيب انا هروح يا باشا دلوقتي ولا ايه الدنيا؟

_ اقف عدل يلا وانت بتتكلم مع النيابة، انت نسيت نفسك ولا ايه لا يا روح امك انت هتشرف معانا هنا لحد ما نتاكد من كلامك

….

النيابة ادت هيثم كمان اربع ايام على ذمه التحقيق.. وبدأوا يتأكدوا من كلام الاتنين… وفعلا بعد التحريات ثبت ان راشد كان عند صاحبه شريف بيستلف منه فلوس، واتقبض على صاحب محل التليفونات اللي اعترف فعلا ان هيثم جاله عشان يبيع تليفون من غير كرتونه وهما الاتنين اتحجزوا على ذمه القضيه دي اما راشد فقبل ما يخرج من النيابة.. اتسأل عن اخوه

_ اخوك فين يا راشد؟!.. مختفي يعني؟!

= والله يا باشا ما اعرف حاجه عنه، انا نفسي بدور عليه ومش لاقيه ولو طلع هو اللي عمل كده انا اسف يا باشا، انا مش هستنى الحكومه اللي تجيب حقي انا هجيب حقي بايدي واقتله

_ طيب خلي بالك من كلامك، عشان صدقني ممكن تندم عليه بعدين.. انت دلوقتي تقدر تروح بس لو وصلت لاخوك في اي وقت ارجوك اتواصل معايا

….

بعد مرور اسبوع في واحد راح على قسم الشرطة كان شكله مش طبيعي عرقان وهدومه متبهدله واول ما دخل على الظابط قال انه جاي يبلغ ان في واحد مات عنده في الشقة، وان هو معرفش يتصرف، وعشان كده جيه وبلغ

اتحركت قوه من القسم على بيت الشخص ده واللي كان اسمه وائل.. ولما وصلوا كانت الصدمة عشان الجثة دي كانت جثة اخو راشد.. ومن منظر الجثه والحاجات اللي حواليها واضح انه ميت اوفر دوس.. المشكله مش هنا المشكله ان الشخص اللي اسمه وائل ده قال في القسم ان جلال اخو راشد هو اللي قتل مرات اخوه وبناته وكان مستخبي عنده لحد ما يدبر سفريه ويعرف يطلع بره البلد.. ولكن من حظه ان جلال مات عنده بسبب المخدرات اللي كان بيشربها.. الجثه اتنقلت لمصلحه الطب الشرعي وكنا في انتظار نتيجه التشريح ولكن النيابة استدعت وائل اللي بلغ عن جلال عشان تاخد اقواله لكن وائل مرحش وعشان كده طلع اذن ضبط واحضار لوائل.. اتحركت قوه من القسم فور استلام اذن النيابة واول ما وصلوا بيت وائل كانت

المفاجأة..