رواية طلاق بسبب الخيانة — الفصل 2 — بقلم اسراء ابراهيم عبدالله
رواية طلاق بسبب الخيانة الفصل الثاني
قبل ما أطلع من حياتك لازم أندمك على كسرة قلبي دي، صدقني مابقتش فارق معايا كأن حب العشرة اتبخر من قلبي أول ما عرفت حقيقتك
فاقت من شرودها على وصول مسج من خالد وهو بيعتذر إنه اتأخر بالرد عليها
فقالت بقرف وهى بتكلمه: مفيش مشكلة، المهم إنك اهتميت لأمري ورديت عليا
وفضل خالد يقولها تعمل إيه في مشكلتها دي وتحلها إزاي
وطبعا خالد وقع في الفخ اللي عملته له نهى وانكشف على حقيقته
وانتهى اليوم على كدا، وطبعا نهى بتتعامل معاه عادي كأنها ماتعرفش عنه حاجة عشان مايشكش فيها
فات يومين وخلاص خالد بيصحى يكلمها ويستنى ترد عليه بقى فاتح الشات بتاعها حتى في شغله
رغم قهرة نهى من اللي بيحصل وإنها خلاص عايزه تقوله طلقني يا خاين بس لسه مش دلوقتي
فسألته وقالت: أنت متجوز؟
خالد: اها متجوز من سنتين يا رنا
هى: يا بختها فكرتك سنجل، بس حلو إن في تعدد وينفع تتجوز تاني ولا أنت مستحيل تعملها ليكونش واخدها عن حب
خالد بضيق: لأ جوازنا صالونات اختيار أمي
هى: اممم بتحبها؟
خالد بتفكير: مش عارف
هى: إزاي مش عارف اومال مكمل معها على أساس إيه؟
خالد: ما سألتش نفسي السؤال دا قبل كدا
بس مكمل عادي زي أي اتنين بيتجوزوا أصل أخرنا هنتجوز فمش فارقة مين هى لكن تكون محترمة
هى: اممم بس أنت بتقول متجوز من سنتين يبقى المفروض حتى يكون بينكم حب عشرة
خالد: مش عارف صراحة يا رنا، بس فكك من موضوع جوازي دا أهو خلاص مبقاش ينفع نفكر اختيار غلط أو صح
هى: طب افرض حبيت واحدة في يوم هتعمل إيه؟
خالد بتفكير: دا هيكون أول مرة أجرب فيها الحب فأكيد مش هفرط فيها وهتجوزها حتى لو مراتي معارضة أو أطلقها لو حبت
كانت نهى بتقرأ كلمه بوجع وحرقة وبتقول في نفسها: للدرجادي يا خالد بايعني؟
خالد: ها رحتي فين؟ شوفتي الرسالة وماردتيش؟
هى: لا بس بتأمل في الكلام، مش خايف مراتك تشوف الشات ما بينا؟
خالد: وأنا هخاف منها ليه؟ كانت مين هى عشان أخاف منها لا بتصرف عليا ولا بشغلها تجيب جنيه
هى: يعني عادي تكلمني قدامها كدا؟ يعني مش خايف على مشاعرها
خالد: أنا مش ينفع أكلمك وهى قاعدة معايا لأن هتقلب اليوم نكد مش قصة خوف منها، وبالنسبة لمشاعرها فشايف إن دا عادي
هى: اممم أنت غريب يا خالد بس عجبتني لدرجة إني بحس إنك بتكلمني أكتر منها
خالد بابتسامة: دا حقيقي يا رنا ببقى مبسوط وأنا بتكلم معك وبعت ايموچي قلب أحمر
هى: ماتكسفنيش يا خالد بقى
بقلم إسراء إبراهيم عبدالله
بعتلها ايموچي ضحك وقال: طب سلام بقى عشان هروح أتعشى
هى: ماشي هتوحشني، لكن مسحت الرسالة بسرعة
فكتب خالد بسرعة بعد لما مسحتها: ليه مسحتيها يا رنا، وكان فرحان جدا بالكلمة دي
هى: خلاص بقى يا خالد عادي كتبتها بالغلط
خالد: يعني مش بوحشك؟
هى: طب أنا بوحشك؟
خالد: يعني بتردي على سؤالي بسؤال بس هجاوبك، بصي يا ستي بقيت بحب أتكلم معك، بس مش عارف إيه الشعور المميز اللي بحس بيه لما بكلمك ببقى طاير من الفرحة دا حتى أول ما بصحى بجري أبعتلك أصبح عليكي
هى: اممم يعني بوحشك؟
خالد: اها
هى: وأنت كمان، يلا بقى سلام روح اتعشى وأنا هشوف اللي ورايا لغاية ما تخلص
خالد: ماشي وبعت لها قلب أحمر
دا كله كانت نهى بتكتبله ودموعها مغرقة وشها
بس قفلت الموبايل بسرعة، وجريت تغسل وشها
ياترى هيكشفها؟