في المطبخ في بيت العيلة ليلى بتلم حاجات المطبخ وبتحضر العشا.
ليلى (همس لنفسها): يابوي ميتا بس اليوم ديه يخلص على خير… انا تعبت ربنا يعدي اليوم ديه ويكون هادي مش زي كل يوم… يلا الحمد لله على كل حال…
بيدخل كريم بدون ما تحس. واقف وبيبصلها من بعيد.
كريم (بهدوء مصطنع): إيه ديه يا ليلى؟ لساتك بتجهزي العشا ولا إيه؟ فرجيني اكديه بتطبخي ايه؟
ليلى (بسرعة وهي بتلف ليه): واه واه… خير يا كريم بيه….لاه كله جاهز خلاص تحب أجيبلك حاجه؟ مكنتش تعبت نفسك يابيه كنت نادم علي اجبلك كل اللى رايده لحد عندك…
كريم بيقرب منها ببطء، وبيمد إيده ليلم كوب من على الترابيزة، لكن طريقته غير مريحة.
كريم (بنبرة غريبة): واه ياوليه فتحي مخك عاد… هو العشا مش مهم دلوق… انتي زينه يا ليلى؟ شكلك تعبان رايدك ارتاحي شوي اكديه….
ليلى(متوترة): لاه انا زينه الحمد لله… كتر خيرك يا كريم…. حضرتك محتاج حاجه؟ اتفضل فى المندرة وانا اجبلك كل اللى رايده ومحتاجه دلوق…
كريم بيقرب أكتر، وليلى بتحاول تبعد خطوة لكنه بيحاصرها.
كريم (بصوت أوطى وملامحه مش مريحة): لاه انا بس محتاج أطمن عليكي… انتي لحالك اكديه طول اليوم اهنيه….هو مين يسأل عليكي وياخد بخاطرك غير كريم اللى شايفك تعبانه كيف طول اليوم….
ليلى (بتاخد خطوة لورا): لاه يا بيه أنا زينه الحمد لله كتر خيرك ومنحرمش من سؤالك ابدا….بس لو حضرتك محتاج حاجه ممكن انادم لك حد ولا على سعاد هانم…
كريم قرب اكتر وبيحاول يمسك إيدها لكن هي بتبعد بسرعة، بتبدأ تدور حوالين الترابيزة كأنها بتحاول تحمي نفسها.
ليلى (بصوت عالي شوية): يالله عليك يا كريم بيه الله لا يسيئك… حضرتك متقربش اكديه بالله عليك…. أنا اهنيه بشتغل وبس.. الله يكرمك يا بيه هملني لحالي وسبني اكل عيشي وخالص…
بس كريم بيكمل يضغط عليها، وبعدين بنسمع صوت خبط جامد بيجي من بره المطبخ…
صوت من برا المطبخ لعمر اخو كريم الكبير: إيه الصوت ديه؟! كريم! إنت اهنيه؟ ايه اللى بيوحصول اهنيه…..
كريم فجأة بيتراجع، ووشه بيلف ناحية الباب بخوف. ليلى بتاخد نفسها بصعوبة، وهي بتجري تخرج من المطبخ….
عمر (وهو داخل المطبخ بعصبية): إيه اللي كان بيوحصول اهنيه؟! كريم، إنت كنت بتعمل إيه؟ والبت ديه خلجاتها اكديه ليه وحالتها اكديه كيييف…… انطق يا واكل ناسك….
كريم (بخوف وتوتر): وبعدهالك عاد يا عمر وطي صوتك اكديه متفضحناش عاد….. ايه اللى حوصول يعني ولا حاجه يا عمر… كنا بس بنتكلم انا واياها وخلاص…
عمر بيبص لكريم بغضب، عينه بتلمع بنار. بيشاور ليلى انها تخرج.
عمر (بصوت جامد): اطلعي على فوق دلوق.. وبدلي خجلاتك داي واقعدي فوق…
ليلى بتهرب بسرعة من المطبخ وعمر بيركز على أخوه….
عمر (بصوت هادي وغاضب): وبعدهالك يا كريم عاد…. إنت فاكر نفسك بتلعب اهنيه؟! اللي عملته ديه مينفعش، ولازم تتحاسب عليه! دلعك الماسخ ديه هيودينا فى داهيه وهيجرسنا وسط الخلق وكفاياك اكديه انا خلاص مبقدش قادر الم من وراك اكتر من اكديه وصلت بيك النجاسه تعمل اكديه فى الدار كمان يا نجس يا وسخ….
كريم (بيدافع عن نفسه بس ضعيف): كفاياك عاد يا عمر،متكبرش الموضوع اكديه… دي خدامه يعني، مفيش حاجه حصولت…. البت سكتت ومقلتش حاجه ولا هو اصلا حوصول حاجه… لازمتها ايه عاد المحاضرة داي والحديد اللى ملهوش عازة ديه ولا هو انت رايد تعمل نفسك كبير عليا وخلاص….
عمر (بغضب أكتر): خدامه ولا مش خدامه، مش هي بني آدمه زيها زي أي حد! واللي عملته ديه عيب وقلة أدب… وعلشان ابقى الكبير بصوح انت لازم تتجوزها ودلوق علشان تتعلم تحافظ على بنات الناس وتوقف شغل المسخرة والنجاسه ديه….
كريم (مصدوم): انت بتقول إيه؟! اتجوزها؟ إنت بتتكلم صوح؟! انا عمر ابن عين اعيان الصعيد اتجوز من خدامه وليه علشان اخويا الكبير قال اكديه انت مالكش صالح بيا واصل ولا تتحكم في اى حاجه تخصني….
دخلت سعاد هانم ام كريم وعمر على صوتهم العالي…
سعاد: خير يا عيال مالكم عاد صوتكم مالي الدار…. وبعدهالك عاد يا عمر زعلت اخوك فى ايه كمان المرة داي انا مش قولتلك وقت سابق تسمع كلام اخوك ومتزاعلوش واصل….
عمر: اسمع كلام مين يا اماه ديه رايد اتجوز ليلى الخدامه…. يرضيكي اكديه… وانا بقولهالك اهو وهو سامعني زين جواز من ليلى مش هيوحصول ولو على جثتي…
سعاد بتضرب ايدها على صدرها: واه واه… مين يتجوز مين.. يادي الفضيحه والجرسه ايه الحديدت الماسخ ديه…. ابني انا يتجوز خدامه ليه الدنيا اتقلبت موازينها ولا ايه….
عمر بغضب: ديه كل اللى فارق معاكي يا اماه ان ابنك هيتجوز خدامه ومالها الخدامه عاد مش بني ادمه زيها زينا وعايشه ويانا وفى حمانا يجي ابنك الوسخ يعمل عملته معاها ورايد يسيبها اكديه وانتي خابره زين اهل البلد لو عرفوا حاجه زي داي هيقتلوا ولا يرموها للديابه وكفاياكي جلع فيه عاد جاب نجاسته للدار انتي رايده تجلعي فيه اكتر من اكديه ايه عاد فوقوا بقى….
سعاد: لاه لاه ابني ما يتجوز من الخدامه ولو على غلطته بخلي ابن الغفير ولا جنايني يتجوزها هما من توب بعض ونقفل على الخبر ماجور…. لكن ابني مش هيتجوزها واصل انت رايد تفضحنا وسط الخلق وتخلي سيرتنا على كل لسان عاد يقولو ابن العمدة يتجوز خدامه….
عمر (بنبرة حازمة): الحديدت خلص اهنيه انا بتكلم جد. و أنا مش هسيبه يهرب من اللي عمله…. وحق البنيه هيرجعلها وراسها هتترفع وسط الخلق ومنكسرهاش واصل كفايه كسرت ابنك ليها عاد….
كريم بيسكت، ملامحه بتوضح الخوف والتوتر. وسعاد بتبص لعمر وهى عارفه كويس انه عنيد زي ابوه وهيعمل اللى بيقول عليه مهما حصل..