تحميل رواية «ظابط احتياطي» PDF

• أنتي ظابط إزاي!

: هو أي إللي ظابط إزاي أنت أول مرة تشوف بنت ظابط

• يعني حضرتك كنتي مخلياني تموية ليكي عشان اتضرب؟

: مش كده والله بس إللي حصل

• واللي جري ده مجرم؟

: ايوة بيبع مخدرات

• ينهار أبيض ينهار أبيض

: استهدي بالله بس

• انا غلطان أني جيت هنا انا عارف المكان ده مش كويس من الأول

: أمال أي إللي جابك

• جيت لواحد صاحبي

: طب حصل خير وأنا بعتذرلك

روحت لواحد صاحبي في منطقة مشبوهة شوية، أنا كنت بسمع عنها من زمان، ولكن متخيلتش أني اتحط في موقف زي ده نهائي، كنا طالبين أوردر من مطعم ونزلت عشان استلمه، ولسه همشي لقيت واحدة راكبة موتسيكل بتنادي عليا ..

: لو سمحت

• نعم

: حضرتك داخل في العمارة دي؟

• ايوة

: طب معلش بستأذنك توصل الاوردر ده لشقة رقم 5 الدور التاني عشان مستعجلة وهتأخر

• مفيش مشكلة حاضر

أخدت الاوردر وأنا على نياتي مش عامل حساب لأي حاجة هتحصل، أصل هيحصل أي يعني لواحد بيعمل خير مثلًا، خبطت علىٰ باب الشقة ولسه يدوب بمد أيدي لقيت الراجل سحبني لجوه وبدأ الضرب فيا، وقال جملة كده غريبة ..

: فاكرين أنكم هتقبضوا عليا بسهولة كده

أنا مفهمتش مين دول إللي هيقبضوا عليه بسهولة لحد ما دخلت البنت إللي أدتني الأوردر وفي ايديها مسدس وبتقوله ..

: أرفع إيدك فوق دماغك ومتتحركش أنت مقبوض عليك

رفع إيده فوق دماغه ولسه معداش كام ثانية راح مسك الاباجورة وضربها بيها وجري من الشباك، وكان اختفىٰ تمامًا .

: أنا هفهمك أنا كنت مكلفة بمهمة القبض علىٰ كل إللي بيبيعوا مخدرات في المنطقة دي، فأنا تسرعت واخدت خطوة من غير ما أبلغ حد ولا اخد معايا حد

• وملقتيش فكرة تانية غير أنك تعملي نفسك دليفري

: دي كانت انسب طريقة وعشان محدش يشك فيا خليتك أنت توصله

• بس هو كان عارف أن في حد رايحله عشان يقبض عليه

: ماهو أنا معرفش هو عرف إزاي

• أكيد في حد بلغه أنك جاية

: واللي بلغه عرف إزاي بردو أنا مقولتش لحد

بصيت عليها من الجنب كده لقيت المسدس إللي معاها واضح وضوح الشمس لأي أعمى مبيشوفش ..

• مأخدتيش بالك من المسدس مثلًا إللي في جمبك

: المسدس فعلاً أنا معملتش حسابه خالص

• أبقي خلي بالك بعد كده عشان التفاصيل إللي زي دي بتفرق

: حاضر وانا بعتذرلك مرة تانية وفرصة سعيدة

• لا ولا يهمك وهي فرصة منيلة بنيلة وأتمنى متتكررش تاني .

موقف خلىٰ اعصابي باظت خالص حقيقي، مكنتش متخيل أن حاجة زي دي تحصل معايا أبدا .

• عملتك كوبري يعني

: يا بني بقا متهزرش كانت فكرة زفت علىٰ دماغك

• خلاص سيبك هي حلوة؟

: هي أي إللي حلوة ولا وحشة دي ظابط ياحبيبي يعني اخرها لو هتتعامل معاك هتبقى مجرم بالنسبالها

• عندك بس خلاص إللي حصل حصل

سبته ومشيت بعد إللي حصل الليلة دي، وأنا حلفت أني مش رايح المنطقة دي تاني بعد إللي حصل .

• صباح الخير يا يوسف

: صباح الخير يا يوسف مرة واحدة أنتي متعرفيش أن العربية بايظة ولا أي

• أمال هروح الكلية إزاي معلش

: مأنا عارف أن صباح الخير دي وراها هروح الكلية إزاي وأنا متاخرة وأنت اخ مش جدع وأنا مش مهمة في حياتك ودي أخرة إللي اخوها مش بيحبها انتو لقيتوني قدام باب جامع ربنا يسامحك يا ماما

• طب سيبلي حاجة أقولها طيب حرقتلي الدنيا

: العربية بايظة أهدي بقا

• أمال عربية مين إللي جاي متأخر بيها إمبارح

: واحد صاحبي

• وصاحبك هيسيبلك مفاتيح العربية بتاعته ليه؟

: محبة

• طب هات فلوس المواصلات

: عايزة كام

• الف جنية

: الف جنية مواصلات ليه رايحة الإمارات

• أنت مش عارف البنزين بقي بكام

: هو أنا كل ما حد يكلمني يقولي أنت مش عارف البنزين بقي بكام، بتاع العيش وبتاع الطماطم وبتاع الطعمية وبتاع القهوة انتو كلكم بتحرقوا بنزين في أي يجدعان

• طب انا متأخرة

: 500 جنية أهم ومتسألنيش علىٰ فلوس لأخر الشهر

• ربنا يسهل مع السلامة

إللي مصبرني علىٰ رحمة أنها أختي بس، غير كده كنت رميتها من البلكونة ومكنتش هاخد فيها ساعة سجن .

فطرت ونزلت صلحت العربية عشان أروح اجيب فاطمة من الكلية بما أني اجازة من الشغل النهاردة .

: طب وعمل أي الراجل معاكي؟

• ولا حاجة فهمته الموضوع وتعاطف معايا

: ماهو لازم يتعاطف معاكي باللي عملتيه هو في حد عاقل يعمل كده

• رحمة اسكتي أنا ضميري بيأنب فيا من ساعتها بسبب الحوار ده

: المهم تكوني اعتذرتيله بس

• اعتذرتله

: وقِبل الإعتذار؟

• أيوة

: قال أي؟

• قال ولا يهمك وفرصة منيلة بنيلة وأتمنى متتكررش تاني

: لا واضح أنه قبل الإعتذار فعلاً

• بتضحكي طب والله أنا غلطانة أني جيتلك عشان اتطمن عليكي

: حقك عليا والله أصله موقف يضحك

• هو موقف يضحك وقولت اعدي عليكي أحكيلك

: ماشي يا ستي تعالي نتمشىٰ لحد بره أخويا جاي ياخدني بالعربية بتاعته

• وانا راكنة العربية بتاعتي بره بردو

: طب يلا بينا

ضميري فعلاً بيأنب فيا بسبب الموقف إللي اتحط فيه الشخص بسببي، معرفش فكرت إزاي كده واني اخليه يتصدر مكاني، مكنتش أعرف أن المجرم يعرف أن في حد هيقبض عليه، ولكن هي حركة عبثية مني من الأول، مكنش ينفع أعمل أي حاجة من غير أذن .

كنت واقف مستني رحمة بالعربية قصاد الكلية بتاعتها عشان اخدها وامشي، لقيتها جاية بتشاورلي من بعيد، روحت بالعربية نحيتها ووقفت مرة واحدة من غير ما اخد بالي أن في حد جاي ورايا ولقيت في حد دخل في العربية من ورا، نزلت أشوف العربية لقيتها متبهدلة خالص، والشنطة شبه اتدشملت، بصيت علىٰ العربية إللي دخلت في عربيتي ولقيتها ..

• أنتي تاني!

: أنا اسفة أنت إللي وقفت مرة واحدة

• العربية باظت أنتي بتقولي أي وأنا كنت عامل إشارة وقوف

: مشفتهاش والله

• يادي النيلة

لقيت رحمة جت نحيتها ووقفت معاها ..

• حصل أي؟

: معرفش هو إللي وقف مرة واحدة قدامي وخبطت فيه

بصيتلها وفضلت ادوس علىٰ سناني من الغضب إللي كنت فيه وانا مش عارف ماسك نفسي عليها إزاي ..

• أنتي تعرفيها يا رحمة؟

: ايوة تيسير صحبتي

• صحبتك من ساعة ما ظهرتلي وهي بتعمل حاجات غريبة ومبوظالي الدنيا

: أنت تعرفها

• لا طبعًا اعرفها بتاع أي هي بيجي من وراها خير عشان تتعرف

لقيتها قلعت النضارة وجت وقفت قصادي انا ورحمة ..

: علىٰ فكرة أنت إللي كل شوية تظهرلي أنا مش مستقصداك يعني

• ظهرلك فين!

: ماهو ده إللي حكيتلك عنه

• متهزريش يوسف أخويا إللي كان بيودي الأوردر!

: أيوة

لقيت رحمة واقفة بتضحك معاها معرفش أي السبب وأنا واقف متعصب بسبب العربية وهما في وادي تاني، لقيتها بتكلم حد في التليفون وقفلت معاه ..

: في حد هيجي ياخد العربية يصلحها واتفضلوا أنا هوصلكم

• لا شكرًا إحنا هنتصرف

لقيت العبيطة رحمة ركبت وفضلت

تنادي عليا، دي إللي فضحانا في كل حتة، ركبت العربية معاهم ووصلتنا لحد البيت، وأنا مش طايق ابص في وشها حقيقي، وصلنا قدام البيت وسبتهم بيسلموا علىٰ بعض وأنا دخلت على طول من غير ما أقول أي حاجة، لأني حاسس لو اتكلمت هبوظ الدنيا أكتر ماهي بايظة .

: أي يابني قلة الذوق إللي بتتعامل بيها دي

• أنا إللي قليل الذوق بعد ما حطتني في موقف زي الزفت مع مجرم واتضربت، وبعدين تخبط عربيتي وأنا إللي قليل الذوق؟ المفروض يكون رد فعلي عامل إزاي بعد كل ده، أقوم احضنها ولا اشكرها ؟

• محصلش حاجة يا يوسف يعني هي اعتذرتلك والعربية وهتتصلح محصلش حاجة

: رحمة اقعدي علىٰ جنب أنتي محموقة لصحبتك ومش زعلانة لأخوكي

• مين قال كده بس أنا بحاول أصلح الدنيا إللي بايظة

: متصلحيش حاجة شكرًا ليكي

• أنا غلطانة أصلًا

واتقمصت ومشيت علىٰ أساس أني هدخل اصالحها بعد إللي حصل، سبتها ودخلت اوضتي وغيرت هدومي وقعدت علىٰ التليفون شوية، ومحستش بنفسي وروحت في النوم .

• أنتي لو مستقصداه مش هتعملي كل ده

: حسيت والله معرفش اشمعنا هو

• وكان رد فعله أي؟

: ولا حاجة الحمدلله ستر ربنا أن اخته كانت معانا

• إللي هي صحبتك!

: ايوة رحمة اتعرفت عليها في كورس خارجي كده وبقينا صحاب رغم أني أكبر منها

• طب كويس أنه عدى على خير

: الحمدلله

مش عارفة حاسة بالذنب ليه تجاهه رغم أني مقصدتش أعمل أي حاجة من كل ده، يمكن النصيب خلاه يكون هو إللي يتحط في الموقف ده معايا، معرفش لو حد غيره كان أي إللي حصل ساعتها، عدىٰ اليوم علىٰ خير، وتاني يوم بعد العصر كلمني حد من التوكيل عشان يبلغني أن العربية اتصلحت، وفي حد هيروح يوصلهاله لحد البيت كمان، كلمت رحمة وقولتلها أن العربية اتصلحت ورايحالكم في الطريق لحد البيت .

• صباح الخير يا يوسف

: صباح النور هفطر بس وهوصلك الكلية حاضر يا رحوم

• طب والله أجدع اخ في الدنيا

: ولو العربية كانت بايظة؟

• كنت هتبقىٰ مبتحبنيش وأنك مش جدع ولقيتوني علىٰ باب جامع وربنا يسامحك يا ماما

: هو المسلسل الهندي ده إسمه اي؟

• العشق الممنوع

: لا ده العبط المرغوب

• مش هتفرق المهم توصلني

: انزلي قدامي يلا

شربت الشاي ونزلت عشان اوصلها للكلية بتاعتها، لقيتها قاعدة في العربية بتفرك عشان مستعجلة ومتاخرة وأنا بتعامل ببرود جدًا.

• أي محصلش أي مشاكل تاني

: مشاكل أي؟

• يعني من حد كده

: قصدك حضرت الظابط؟

• أيوة سعادتها طبعًا

: لا الحمدلله مظهرتش تاني وأتمنى متظهرش أنا مش ناقص دوشة

• أنت فعلاً مش وش بهدلة

: مانتي عارفة اهو

• طيب يا سيدي شكرًا علىٰ التوصيلة

: لا شكر أي أنتي بليل تعملي صينية بشاميل نتعشى بيها

• وده ليه؟

: خدمة توصيل وضرايب أنتي مش عارفة البنزين بكام دلوقتي

• أنت بتردهالي؟

: عاجبك؟

• عاجبني نردهالك في الأفراح ياحبيبي

: يلا طيري وخلي بالك من نفسك

وصلتها لحد باب الكلية ومشيت الحمدلله من غير حوادث، عدىٰ أسبوع علىٰ إللي حصل من حضرت الظابط تيسير في المرتين إللي شفتها فيهم، وأتمنى منتقابلش تاني نهائي .

: لا طبعًا مستحيل يوافق يوسف ما صدق أنه بطل يشوفك

• هو لحق يتعقد مني!

: المرتين إللي شافك فيهم كانوا قادرين يعقدوه منك

• عنده حق عامةً بس حقيقي انا مضطرة لأن كل الموجودين في القسم اشكالهم معروفة وأنا عايزاه عشان شكله مناسب

: صدقيني مش هيوافق يوسف مستحيل يرضىٰ أصلًا

• معلش نحاول

: تيسير!

• خلاص بقا عشان خاطري

حاولت افهمها أني فعلاً محتاجاه المرة دي بجد، وهيكون عنده علم يعني مش هخليه يتغفل ولا حاجة، ولكن الله يباركلها رحمة بشرتني أنه مش هيوافق، وهي عارفاه أكتر مني يبقىٰ أكيد مش هيوافق ..

: أي إللي بتقوليه ده لا طبعًا أنا مش هتعامل مع مجرمين

• بس الموضوع المرة دي مختلف اوعدك أنه مش هيحصل حاجة

: أستاذة تيسير بالله عليكي أنا معنديش مشكلة اساعدك أو اساعد غيرك بس بعيد عن المشاكل

• مفيش مشاكل بجد هما كلهم كلمتين هنعرفوهم منه

: وأنا مش موافق ومش هعمل حاجة زي دي

كنت حاسة أنه مش هيوافق، طبيعي بعد إللي حصل ميوافقش أصلًا، أنا مش عارفة جايبة العشم ده كله منين ..

: تيسير

أخدت شنطتي ومشيت، ولسه هفتح الباب عشان أخرج لقيته بينادي عليا .

: أنا موافق اساعدك

• موافق تبقىٰ ظابط!

: ايوة بس بشرط، دي انتحال شخصية وفيها سجن، بس أي حاجة هتحصل أنا مش مسؤل

• مفيش حاجة هتحصل ولو حصل حاجة متقلقش أنا إللي هتصدر المشهد

: ماشي المفروض هعمل أي!

• هقولك

أضطريت اوافق أني اساعدها رغم الموضوع صعب وخطير وفيها سجن، ولكن حسيت انها فعلاً محتاجالي، وأنا عشان شخص عاطفي بيصعب عليه الناس كلها وبضطر اساعدهم حتىٰ لو علىٰ حساب نفسي، ووافقت اساعدها وانتحل شخصية ظابط شرطة عشان أعرف كام معلومة هيفيدوها في القضية بتاعتها إللي واقفة علىٰ الترقية بسببها .

: حاسس أن القميص لونه مش حلو

• حلو ولا مش حلو أنت مش رايح تتقدم لبنت خالتك أنت رايح تقعد مع مجرم

: عندك حق بس البنطلون ده مش ذوقي

• ذوقك أي دلوقتي

: أي والله اكنسل وامشي أنا واقفلك علىٰ الوحدة

• أستاذ يوسف معلش استحمل الخمس دقايق دول وابقى أحرق البنطلون متلبسوش تاني، بعد إذنك بس مشي الدنيا دلوقتي ممكن؟

: ممكن هاتي العنوان

لبست الطقم إللي قالتلي عليه أنه بتاع ظباط وبتاع، وهو أصلًا قميص وبنطلون عاديين مش يونيفورم يعني، مكنتش مرتاح فيهم لأني أول مرة البس حاجة زي كده، أخدت العنوان منها ولما روحت عرفت أنه قاعد علىٰ القهوة، تقمصت دور الظابط وفتحت صدري وشديت جسمي، واخدت وضعية الثبات الانفعالي، أول ما قربت علىٰ القهوة لمحته قاعد بيلعب طاولة مع واحد تاني، أول ما وصلت عندهم قفلت اللعبة وقلعت النضارة وقعدت جمبهم ..

• إسماعيل الاطرش مش كده!

استأذنت من إللي كان معاه يقوم يمشي عشان عايز إسماعيل في كلمتين، وفعلًا الراجل مشي من غير دوشة ..

: إزيك يا إسماعيل

• أنت مين!

: أي مش هتضايفني في مكانك ولا أنت بخيل؟

• تشرب أي؟

: لا أنا مش جاي اشرب أنا جاي في حاجة أهم من الشرب

• خير اتفضل

: عايز أعرف مين إللي كان بيوزع المخدرات في المنطقة الأسبوع اللي فات

• مش فاهم!

: هفهمك يا إسماعيل عايز أعرف مين إللي وزع شحنة المخدرات في المنطقة الأسبوع اللي فات من عمارة الحج صبحي إللي كان واخد الشقة ليلتين

• معرفش يا باشا والله أنا بطلت من زمان

: إسماعيل ياحبيبي أنت عارف وانا عارف أن السكة الشمال صحابها مبيعرفوش يمشوا يمين أبدا، فـ تعالي معايا يمين بدل ما اجيلك أنا شمال

• ماهو أصل يا باشا ..

وشه بدأ يتلون أحمر والعرق ظهر في وشه، في ثانية لقيته بيسحب التليفون بتاعه عشان يجري ولكن قبل ما يسحبه حطيت ايدي علىٰ إيده ..

• وأنت لما تجري فاكر نفسك هتجري مترين علىٰ بعضهم، بص حواليك كده هتلاقي الرجاله عينها عليك مستنياك تتحرك عشان ناخدك نقضي السهرة عليك في القسم

: يا باشا والله معرفش أنا بطـ..

• إسماعيل يا اطرش آخر مرة هقولك مين إللي وزع شحنة المخدرات!

: توفيق الشيخ هو إللي بيوزعها

• وتوفيق الشيخ ده الاقيه فين؟

: في الخرابة إللي في وسط البلد

• ماشي يا إسماعيل وهنشوف بعض كتير الأيام الجاية فـ خليك جدع كده ومتعوجهاش

: هي أي دي إللي معوجهاش؟

• هقولك بس مش دلوقتي

ولبست النضارة واخدت التليفون بتاعي وقمت مشيت وأنا لسه متقمص دور الظابط .

: فظيع بجد أنت عملت دور ظابط أكتر من الظابط نفسه

• كنت عايش الدور جدًا

: لا وكمان لما كان هيجري ومسكته من إيده وقولتله بص حواليك هتلاقي الرجاله عينها عليك ومستنياك تتحرك وهو أصلًا مكنش في حد معاك

• ماهو كان لازم أعمل اي دوشة عشان ميحسش أني بضحك عليه وبستغفله

: لا بجد شابو ليك

• هتعملي أي دلوقتي؟

: هبلغ النيابة بمكان الشيخ وهاخد اذن بالقبض عليه

• وأنا دوري خلص كده!

: اه خلاص خلص وبجد شكرًا ليك

• لا العفو علىٰ أي معملتش حاجة

سلمت عليها واخدت رحمة بالعربية ومشيت، معرفش كنت حاسس بشعور غريب إللي هو خلاص مفيش مشاكل تاني وهرجع لحياتي الطبيعية، لقيت رحمة بتبص عليا وبدأت تلاحظ تكشيرة وشي، ولكن حاولت مبينش حاجة لحد ما وصلنا البيت، ويدوب غيرت هدومي واكلت ودخلت اوضتي ونمت علىٰ طول .

: يوسف إزيك عامل أي؟

• الحمدلله يا شهد

: فينك كده مختفي كل ما اجي لعمتي الاقيك مش موجود

• أكيد بيصادف أني في الشغل ساعتها

: ايوة ماهي كانت بتقولي أنك بتكون في الشغل

• وأنتي عاملة أي دلوقتي!

: أنا كويسة اهو زي مانت شايف

• أكيد ما سمعت أن فرحك بعد العيد كمان

: لا محصلش نصيب

• يعني أي!

: سبنا بعض

• متهزريش

: لا حقيقي اكتشفت فيه صفة مستحيل حد يستحملها في شريك حياته

• صفة أي دي!

: طلع بيّاع مش باقي علىٰ حد في حياته، أي مشكلة أو خلاف بيهد كل حاجة علىٰ إللي حواليه

• وأنتي اكتشفتي ده دلوقتي

: معرفش يا يوسف أنا كنت فكراه مضغوط وبيحبني وأنا كنت موهومة لحد ما اكتشفت أن ده اسلوبه الطبيعي أصلًا وبيعامل الكل كده، أنا لو اتجوزت وحصلت مشكلة ممكن يبيعني في أي لحظة مبيتمسكش بأي حاجة

• مش ده إللي خربتي الدنيا وزعلتي أهلك عشانه وعشان بيحبك ومكنتيش بتاكلي ولا تشربي وبتتعبي عشانه

: وفهمت متأخر ولحقت نفسي

• الحمدلله أنك لحقتي نفسك وإلا كنتي هتلبسي في الحيط

محتاج تسأل نفسك وأنت رايح تحب، هو أنا عايز أي من الحب، وعايز الحب ليه، عايز تحب وتتحب عشان تتجوز وتعمل بيت وعيلة وتستقر، ولا عايز تحب عشان تسد خانة فراغ جواك، ولا عايز تلاقي إهتمام ومشاعر من غير حساب ولا وعي، ولا عايز تدخل في علاقة تسد جوعك العاطفي، ولو عرفت أنت عايز أي من الحب، عرفت أنت هتحب مين؟ عرفت شخصيته، عرفت أسلوبه، عرفت حياته وأهله وظروفه وامكانياته، عرفت دول مناسبين ليك ولا لا، عرفت هتقدر تعيش مع الشخص إللي حبيته ولا لا، سألت قبل ما تحب عن الحاجات دي، الحاجات إللي بتكتشفها بعد ما تحب وتتعلق وبتبقى خلاص مش قادر تستغنى وترضىٰ بكل حاجة سواء كانت حلوة أو وحشة، ومش مهم أنت مرتاح ولا لا، مبسوط ولا لا، جيت علىٰ نفسك ولا لا، اغلبنا بيقع في نفس الغلطة، الغلطة إللي عمرها ما بتتصلح، واللي لو اتصلحت هتخسر قصادها حاجات كتير هتسيب جواك جرح مش بيخف ولا بيطيب .

• أي قاعد سرحان في أي؟

: ولا حاجة بشرب القهوة بس

• ولا البت شهد صعبت عليك

: هي صعبت عليا فعلاً بس في الأول والآخر الحمدلله أنها لحقت نفسها

• الموضوع صعب وكويس أنها قدرت تعمل كده

: ربنا يوفقها

• وتيسير

: مالها تيسير؟

• كويسة الحمدلله بتسأل عليك

: أبقي سلميلي عليها

• حاضر .. أنا نازلة اقابلها كمان شوية يعني لو هتقدر توصلني، بس لو العربية بايظة ممكن اخد اوبر عادي

بصيتلها لقيتها بتتكلم بطريقة خبيثة شوية علىٰ أساس أني يعني هفرح وهطير البس القميص البُني والبنطلون الأسود والكوتشي الأبيض وانزل اوصلها بالعربية كمان، ماهو ده إللي ناقص

..

:

بس القميص شكله حلو عليك

• بجد!

: اه بس محتاج تفتح أول زرارين كده عشان تبقى شيك أكتر

• طب والساعة؟

: خطيرة

• والبرفيوم؟

: تحفة

• متاكدة؟

: عريس في ليلة زفافه

• طيب يلا بينا

أكيد يعني مش واضح أني مهتم بيها ولا مبسوط أني هشوفها، لا عادي خالص أنا عشان رحمة بس مينفعش تروح لوحدها وتركب اوبر منعرفوش، كان لازم اوصلها يعني .

وصلنا المكان إللي كانوا هيتقابلوا فيه، ونزلت رحمة عشان تروحلها وفضلت أنا قاعد في العربية مستنيها لحد ما تخلص، معرفش كنت متحمس ليه أني هشوفها وفجأة حسيت أنه ملوش داعي لأنهم متفقين مع بعض وهتبقىٰ مش حلوة في حقي وهبان شخص ملزق، سرحت وأنا قاعد في العربية لحد ما لقيت حد بيخبط علىٰ الازاز من بره ..

• يا رب خير

: وأنا هيجي من ورايا خير يا أستاذ يوسف بردو متقولش كده يا راجل عيب في حقي

• حضرت الظابط تيسير إزيك

: كويسة الحمدلله

• طب الحمدلله اختفائك ده حاجة كويسة عشاني وطالما أنتي كويسة فأنا متطمن أن مفيش حاجة هتحصلي

: معقول يعني هستقصدك ده أنا حتىٰ كيوت

• كيوت إزاي معلش ده إنتي انشف من نص صحابي

: لا ميغركش الأسلوب بتاعي أنا في العادي هادية وكيوت خالص

• مشوفناش يعني

: وأنت مهتم تشوف ليه!

• لا مش مهتم ولا حاجة عادي يعني

: ماشي يا سيدي عامةً متقلقش كل حاجة تمام واوعدك أن مفيش حاجة هتحصل تاني

ومعداش علىٰ كلامها كام ثانية وسمعت صوت ضرب نار جاي نحية العربية، ولقيت تيسير وقعت الأرض .

: أنتي لسه عايشة!

• مأنا لابسة واقي من رصاص

: يعني لابسة واقي رصاص تحت الفستان ده!

• ممكن تقعد ساكت وتشيلني

: اشيلك فين!

• توديني المستشفىٰ رد فعل الرصاصة في الواقي جرحني

: ولما يقولولي مين اللي عمل فيها كده اقولهم اي ولا اشيل مصيبة مش بتاعتي ليه

• تصدق أنك ندل

: بس معنديش أعداء

اخدتها في العربية ووديتها المستشفىٰ، وطلعت فعلاً لابسة سترة مضادة لرصاص، ولكن تقريبًا حصلتلها حاجة بردو من شدة الرصاصة، قعدت مستني بره الغرفة بتاعت الجراحة لحد ما تخلص، ولقيت حد من أهلها جه وسألني عليها، وفضل مستنيها لحد ما خرجت ودخلت اوضة الرعاية .

: أنتي كويسة؟

• الحمدلله

: حاسة بأي دلوقتي

• جعانة

: أي؟

• جعانة بجد عايز اكل

: حاضر هنزل اجيبلك

سبتها قاعدة مع قريبتها ولا صحبتها ونزلت اجيبلها أكل، معرفش دي بتحب أي أصلًا، مجاش في بالي حاجة غير الفراخ، روحت جبتلها فرخة مشوية مع السلطات بتاعتها والطحينة وأنا جوعت أصلًا من المنظر بتاعها، رجعت المستشفىٰ بعد ما جبت الأكل، ولكن انا وداخل لمحت إتنين واقفين مع الممرضة بيدوروا علىٰ حد، قولت أكيد حد من أهل تيسير وجايين ليها، روحتلهم عشان اشوفهم ولكن لقيت واحد فيهم بيتكلم في التليفون ..

: لسه عايشة يا باشا وهي موجودة في المستشفىٰ، تمام حاضر هنفذ

وأنا سمعت الكلمتين دول وضربات قلبي زادت وروحت علىٰ الاوضة إللي كانت فيها جري ..

: يلا بينا من هنا بسرعة

• ليه!

: مفيش وقت يلا

يدوب نزلت من على السرير مقدرتش تمشي، شلتها ومشيت بيها نحيت الاسانسير، ولكن شكيت أنهم طالعين فيه، روحت اخدتها ونزلنا من السلم الخلفي للمستشفىٰ، كانت متوترة ومش فاهمة في أي، وأنا جسمي كله بينتفض من الخوف لأحسن حد يشوفها، لقيت تاكسي واقف دخلتها في التاكسي وركبت، والراجل مكنش فاهم أي حاجة، قولتله يمشي بسرعة لحد ما خرجنا من المنطقة كلها .

: أي إللي حصل مش فاهمة حاجة

• إللي ضربوا عليكي نار كانوا في المستشفىٰ بيدوروا عليكي

: وأنت عرفت إزاي؟

• انا أول ما شفتهم جايين بيدوروا علىٰ حد قولت أكيد أهلك وبيسالوا عليكي وقلقانين، ولما قربت منهم لقيت واحد بيكلم حد في التليفون وبيقوله لسه عايشة مماتش وهنفذ

: وأنت كنت رايح تقولهم علىٰ مكانى!

• مأنا لحقت نفسي ولحقتك

لقيتها سكتت مرة واحدة وفضلت باصة لسما كأنها بتفكر هتعمل أي، أو بتفكر لي كل ده بيحصل معاها دلوقتي، لحد ما بصيت علىٰ الساعة ولقيتها 2 بليل ..

: طب يلا نمشي

• علىٰ فين!

: علىٰ البيت هاخدك تقعدي مع رحمة

• وده ليه؟

: عشان بيتك مبقاش أمان وهتلاقيهم بيدوروا عليكي، لحد ما نعرف هنعمل أي الصبح

• أنا بكره الصبح هروح قطاع الأمن عشان ابلغهم باللي حصل

: ولحد ما يجي الصبح هتباتي مع رحمة عشان ابقىٰ متطمن عليكي

• ماشي

اخدتها ومشينا كتير لحد ما لقينا عربية وصلتنا لحد البيت، وكانت العربية بتاعتي لسه عند المستشفىٰ هجيبها الصبح، روحنا البيت وكنت كلمت رحمة وقولتلها أني جايب تيسير وجايين البيت من غير ما أقولها أي حاجة، ولقيتها واقفة قدام الباب واستلمتنا أول ما نزلنا من العربية ..

: بردو ابقىٰ جيالك مخصوص ومتجيش وتبقي مع اخويا

• طب أهدي ندخل وافهمك

: أنت تسكت وحسابك معايا

ولقيتها لاحظت أن تيسير بتمشي بالعافية وشايلة دراعها عشان الرصاصة، وجريت عليها تسندها ..

: هو حصل أي مالها كده؟

• اتضربت بالنار!

: ماهي لسه عايشة

• مأنا كمان مستغرب أنها لسه عايشة

: وهو ده وقت هزار

• اعمل أي يعني ما دي الحقيقة

لقيت تيسير بتضحك ومش قادرة ترد على حد فينا، كأنها بتحوش كل ده جواها عشان تطلعه مرة واحدة علينا، دخلوا وامي استقبلت تيسير وحكيتلها كل حاجة، وأنا اخدتي بعضي وطلعت الشقة إللي فوق قعدت مع عمي، بما أنه قاعد لوحده ومش متجوز ولا مخلف، قولت اروح أبات معاه أونسه ..

: عايز أي يزفت أنت في ساعة زي دي

• جاي أنام عندك

: والعمارة كلها مش مكفياك جاي تنام عندي

• ماهو انت الوحيد إللي قاعد شقة طويلة عريضة لوحدك قولت اونسك

: واوضتك مالها

• مطرود منها

: ادخل يا يوسف أدخل أنت محدش طايقك أصلًا

• تسلم يا عمي كلك ذوق

دخلت نمت في الصالة بعد ما جابلي لحاف وفرشته ونمت لحد الصبح .

صحيت الصبح بعد معاناة، وكل ما أصحى أنام تاني وأقول لسه بدري لسه بدري وأنام، لحد ما جت الساعة 2 الضهر، قومت نزلت الشقة بتاعتنا ودخلت لقيت رحمة قاعدة قدام التلفزيون ..

: أمال فين تيسير!

مردتش عليا ولقيت صوت تيسير جاي من ورايا ..

: خير عايز أي؟

• كنت بشوفك عشان اوديكي القطاع

: مأنا روحت وجيت من بدري أنت لسه فاكر

• وعملتي أي؟

: حكيتلهم إللي حصل واخدت أجازة بسبب الجرح

• طب والناس إللي كانوا عايزين يقتلوكي!

: قالولي هيبعتوا حراسة عند البيت

• طب واي إللي جابك هنا؟

لقيت أمي جايبة الأكل وجاية من المطبخ ..

: أنا إللي قولتلها تيجي تقعد معانا مينفعش تقعد في البيت لوحدها

• لوحدها إزاي!

: أهلها مسافرين وبعدين وانت مالك شقتي وانا حرة

• هو أنا اعترضت يا ماما ما تنورنا أنتي بتشيلي العيب ليه

: لا ياحبيبي متشيلش العيب سيبهولي

غريبة أمي دي والله، قعدت معاهم فطرت وهما أصلًا كانوا بيتغدوا، اكلنا وشربت الشاي وخرجت روحت الشقة أقعد مع عمي عشان اسيبهم ياخدوا راحتهم .

: تعالي اغيرلك علىٰ الجرح

• عايزة تشوفي كتفي يا متحرشة

: يعم اقعدي بقا بكتفك إللي عامل زي كتف الفرخة ده

• طب براحة عشان حاسة أن كتفي مشلول

: قوليلي أي إللي حصل

• بجد كان كابوس يا رحمة معرفش أي إللي حصل ولا خلص إزاي ولا عديت إزاي من كل ده والله، اتضرب عليا نار، وناس بيجروا ورانا عشان يقتلوني، وليلة كابوس بجد، لولىٰ يوسف شالني في المستشفى وجري بيا كان زمانهم مسكوني

: يوسف شالك؟

• لولىٰ يوسف كان زماني ميتة دلوقتي

: بعد الشر عنك .. يوسف بردو جدع وشهم وبيفهم

• دي حقيقة والله انا مستنية افوق بس واشكره علىٰ كل إللي عمله معايا

: يوسف مبيعملش حاجة عشان حد يشكره أو بيستنى مقابل من حد

• بس هو كان مجبر مكنش برضاه

: خلاص يا تيسير بقا إللي حصل حصل المهم أنك بخير ووسطنا

• والله مش عارفة اقولكم أي بجد بسبب إللي بتعملوه معايا

: بس يا عبيطة اسكتي أي إللي بتقوليه ده

ولقيت رحمة بتاخدني في حضنها ولأول مرة احس أني متطمنة وعايشة وسط أهلي بجد، بتصرفاتهم وحنيتهم وكلامهم وخوفهم عليا، قعدنا شوية نرغي في اوضتها وقولتلها تعالي ننزل نجيب حاجة من السوبر ماركت نتسلىٰ بيها في السهرة، لبسنا ونزلنا روحنا السوبر ماركت، ولبست سترة واقي الرصاص ربما حد يضرب عليا نار تاني، روحنا السوبر ماركت وجبنا كل حاجة عايزينها، وقبل ما ندخل باب العمارة وقفت عربية نزل منها إتنين، واحد زق رحمة وقعها علىٰ الأرض، والتاني

شالني ورماني في العربية، ولقيت حد بيحط منديل علىٰ وشي لحد ما فقدت الوعي تمامًا .

بدأت افوق شوية وحاسة أن جسمي كله متكسر من الوجع، الدنيا كلها سواد ولكن اكتشفت أن في حاجة محطوطة علىٰ عيني، وكنت سامعة إتنين بيتكلموا مع بعض بصوت عالي ..

: وأنت إزاي تعمل كده!

• عشان المصلحة متضيعش مني، وانت بعت رجاله عشان تخلص وتاخد الفلوس رغم أنك عارف أن دي مهمتي أنا إللي هنفذها

: واي إللي خلاك تستنىٰ كل ده

• مجاش الوقت المناسب وأنت عارف أنه مينفعش نعمل كده من غير ما نكون متأكدين مليون في المية أن مفيش حد هيشك فينا

: طب يلا خلص المهمة

لقيت حد بيشيل إللي كان علىٰ وشي، بدأت أفتح عيني بالعافيه من النور إللي كان ضارب في عيني، فتحتها واحدة واحدة لحد ما ظهر يوسف قدامي!

• اقتـلها يلا عشان نخلص من الحوار إللي كبرته علىٰ الفاضي

كنت شايفها بتبصلي بنظرة مش مفهومة، نظرة مليانة اسأله كتير جدًا عايزة تعرف إجابة كل سؤال فيهم، ولكن في حاجات يا تيسير مينفعش نعرف اجابتها، مسكت المسدس ورفعته نحيتها، فضلت متردد كام ثانية، كام ثانية عدىٰ فيهم كل لحظة شفتها فيها، الشريط كله عدىٰ قصاد عيني، ومرة واحدة دوست علىٰ الزناد ووقعت تيسير علىٰ الارض .

: أنت بتضرب عليا نار أنت متخلف!

• مأنا عارف أنك لابسة السترة

: وافرض مكنتش لابساها كان زماني ميتة دلوقتي

• السترة كانت ظاهرة من الهدوم بتاعتك وبعدين الطلقة مجتش جمبك أصلًا دي اخترقت اطراف هدومك والسترة

: اه قصدك تقول أنك قاصد متجيبهاش فيا مش كانت ضربة حظ

• لا مش ضربة حظ أنا فعلاً قاصد مجيبهاش فيكي

: وبعدين حطيتني في شنطة العربية ليه!

• لا المفروض اخدك من وسطهم احطك جمبي واشغلك التكييف ولا بالمرة اوديكي المستشفى يلحقوكي

: أنت كمان زعلان وبتقلب التربيزة بعد ما ضربت عليا نار وكنت هتموتني أنت متخلف

• دي تاني مرة تقولي متخلف أنا لو متخلف فعلاً مكنش زمانك قدامي

ولقيت رحمة نازلة بتجري علينا قدام البيت بعد ما وصلنت بالعربية ..

: أي إللي حصل يا تيسير وكنتي فين؟

• أخوكي طلع شغال مع إللي خطفوني وضرب عليا نار

: يوسف!

• ايوة أستاذ يوسف ولما قالهم هاخدها ارميها بعيد عن هنا حطني في الشنطة

: يعني أنتي لسه طالعة من الشنطة؟

• أيوة

: ويوسف ضرب نار عليكي؟

• بالظبط

: وأنتي واقفة وبتحكيلي؟

• هتجننيني أنتي كمان يا رحمة

بصيت لـ رحمة عشان تاخدها وتطلع بيها لفوق، وأنا ركبت العربية وروحت مشوار علىٰ السريع عشان أنهي الحوار ده خالص .

: أنت كده بتخاطر بروحها

• بالعكس أنا خلصتها منهم

: لولىٰ القدر كان زمانها ماتت

• المسدس مكنش في ايد واحد هاوي حضرتك

: مأنا عارف يا يوسف عشان كده اخترتك

• وبعدين انا مكنتش أعرف أنها هتعمل كده المفروض مكنش حد يكلفها بحاجة زي دي

: هي كانت مكلفة تجيب عيل ولا اتنين من إللي بيوزعوا بس الظاهر أن إللي كان وراهم أكبر بكتير

• عشان كده قدرت أدخل وسطهم بسهولة لأن رجالتهم كتير واعمل أني واحد منهم

: وأنت كنت مسمي نفسك أي وسطهم؟

• برشامة

: هاهاها فظيع يا يوسف دماغك دي إللي مخلياك شخص ناجح

• تحت أمرك يا باشا

: اتفضل طيب روح أنت وخلي بالك منها مش ناقصين دوشة

• أمي شيلاها في عينها

: لا طالما مع والدتك أبقى أنا اتطمنت

• تمام يا باشا بعد إذنك

ركبت العربية ورجعت البيت وانا عارف أني أول ما أوصل البيت هبقىٰ قصاد مليون سؤال محتاج اجاوب عليهم، ولكن هعمل أي مضطر اجاوب عشان سلامتها، وعشان ابقىٰ مركز ومش شايل ذنب أي حاجة هتحصل بعدين .

• يعني أنت ظابط وظهورك ليا وانا عاملة بتاع دليفري مكنش صدفة، ووجودي هنا مكنش صدفة، ولا وجودك هناك معاهم مش صدفة!

: أنا كنت قاعد في شقة فوق إسماعيل الاطرش ده من أهم إللي بيوزعوا المخدرات لتوفيق الشيخ وانا كنت براقبه عشان اعرف إللي بياخدوا منه، لأن دي شجرة كبيرة والافرع بتاعتها واسعة، فـ لما اقطع الشجرة يبقىٰ اقطعها من جدرها ومسيبش فيها فرع سليم عشان مينبتش تاني

• طب وخالد بيه كان عارف؟

: لا مكنش عارف آخر المستجدات لحد ما دخلتي أنتي علىٰ الخط وأنا كنت متعمد اجيبك هنا عشان ابعدك عن العين

• وأنت كنت عامل واحد من إللي شغالين معاهم عشان كده قدرت تسحبني من وسطهم

: ماهو لو مكنتيش ظهرتي مكنش هيحصل كل ده

• طب واي إللي هيحصل دلوقتي!

: أنا بلغت خالد بيه وهو هيكلم الوزارة

سبتهم ودخلت غيرت هدومي وطلعت أبات عند عمي فوق عشان ياخدوا راحتهم ..

: يابني أنت ملكش بيت يلمك

• وبيت يلمني ليه وشقة عمي موجودة

: عمك زهق منك ياخي

• بس ميقدرش يستغنى عني

: في دي عندك حق

• أنت مش جعان؟

: أنا ميت من الجوع

• طب هدخل المطبخ اطبخلنا حاجة كده ناكلها

: مش بقولك مقدرش استغنىٰ عنك

• حبيبي والله

: واحكيلي بقا أي قصة البنت إللي عندكم

• دي قصة طويلة

: تعالىٰ هدخل معاك المطبخ اساعدك وتحكيلي كل حاجة

دخلت المطبخ أعمل أي حاجة عشان ناكل لأني جعان وعمي كمان جعان، عملنا أكل وحكيتله القصة كلها من أول الأوردر إللي اخدته لحد الطلقة إللي ضربتها عليها .

: وأنتي كنتي عارفة يا رحمة ومتقوليش ليا؟

• مكنش ينفع يا تيسير ده شغل ومتعلق بحياتك ويوسف حذرنا منقولش حاجة ليكي

: أنا مكنتش متوقعة أن كل ده يطلع مترتب مش صدفة زي ما كنت فاكرة

• بس خبطة العربية إللي خبطتيهاله عند الكلية كانت صدفة والله مش مقصودة

: والله جد

• اه وآلله

فضلنا قاعدين بنتكلم لحد ما النوم غلبنا ونمنا علىٰ طول، فضلت سرحانة بفكر في كل الأحداث إللي حصلت من أول ما شوفت يوسف أول مرة لحد ما كان بيرفع المسدس في وشي وبيضرب عليا نار، مكنتش قادرة استوعب أي حاجة، وكأني كنت في حلم لدرجة أني مش مصدقة أنه ظابط أصلًا وكل ده كان متخططله، ماهو بردو قعدته مع إسماعيل عشان ياخد منه المعلومات دي مكانتش قعدت واحد عادي، ولا دي حركات واحد عادي، ولا دي لغة تواصل واستجواب واحد عادي، كل دول تصرفات ظابط فاهم هو بيعمل أي وعاوز أي من إللي قدامه، لدرجة أنه لما ضرب عليا نار أنا صدقت أنه معاهم فعلاً، ورغم أن الرصاصة ملمستنيش ولكن صدقت أنها جت فيا من كتر ماهو كان بيتعامل بجدية، واهله إللي حسسوني أني وسط أهلي مش وسط ناس اعرفهم من يومين، من كتر مأنا مش مستوعبة حاسة أني بحلم وهصحى في أي وقت وكأن مفيش حاجة حصلت من كل ده .

عدىٰ أسبوع ومكنش في أي حاجة جديدة حصلت ولا أي حاجة جت من الوزارة، وأنا كنت قاعد مع عمي عشان تيسير لسه قاعدة عندنا بسبب الاجازة إللي واخداها والجرح إللي لسه مخفش، كنت قاعد قدام التلفزيون ولقيت الباب بيخبط، روحت افتح لأن عمي كان في الشغل ومكنش في حد غيري في الشقة ..

: خير يا تيسير في حاجة؟

ولقيت رحمة جاية من وراها ..

• لا يخويا مفيش حاجة كنا جايين وجايبينلك تاكل بدل ما أنت بتكسل تنزل تاكل معانا

: فيكم الخير والله كويس أنكم افتكرتوني

• لا البت تيسير هي إللي سألت عليك إنما إحنا عارفين أنك لو قعدت سنة مأكلتش مش هيحصل حاجة

: مأنا عارف حركة الجدعنة دي متجيش منكم

كانت واقفة تيسير منطقتش بأي كلمة لحد ما دخلوا جوا قعدوا معايا في الصالة وأنا كنت باكل ..

: انا هقوم أعمل شاي اعملكم معايا؟

• اه ياريت

دخلت رحمة المطبخ تعملنا شاي وأنا كنت لسه باكل ..

: وعلى كده يا تيسير أنتي خطيبك موافق أنك تقعدي بعيد عن أهلك وتشتغلي في الشرطة

• انا مش مخطوبة أصلًا

: أمال الدبلة إللي في إيدك دي أي!

• لا ده خاتم جدتي الله يرحمها ادتهولي هدية قبل ما تتوفىٰ

: ربنا يرحمها

• وبعدين مأنت عارف أن الموضوع هيبقى صعب

: مأنا عارف عشان كده مأخدتش الخطوة دي

• وعلى كده لما تفكر تاخد الخطوة هتتجوز واحدة بتشتغل؟

: أي المانع في أني اتجوزها وهي كانت بتشتغل

• مش فاهمة؟

: هتجوزها بتشتغل وبعد

الجواز هخليها تبطل

• دي عافية بقا

: لا بالذوق والادب والاصول والحنية والحب مفيش حاجة بتيجي بالعافية أي حاجة بتتعمل بالعافية نتيجتها بتكون عكسية

• اه أنت هتقنعها يعني

: بالظبط

• طب كويس

جابت رحمة الشاي وشربنا الشاي وقعدنا قدام التلفزيون، وسمعت الباب بيخبط روحت أفتح لقيت واحد غريب واقف لسه بسأله أنت مين لقيته ضربني بضهر المسدس في مناخيرة وقعت علىٰ الأرض من شدة الضربة وفقدت الوعي .

: حمدلله على السلامة يا حضرت الظابط

فوقت بالعافية بعد الضربة إللي اخدتها، لقيت نفسي مربوط في كرسي، والنور ضارب في وشي، شوفت إللي بيتكلم بالعافية ..

• اسماعيل؟

: اه اسماعيل يا برشامة ولا أقولك يا حضرت الظابط، تبقىٰ بتشتغل معانا وعامل فيها الكلب الوفي وبعدين تطلع مزروع وسطنا يلا

• وبعدين هتعمل أي!

: لا إحنا مش هنعمل أنا هسيب المعلم لما يجي هو إللي يعمل معاك

مشيوا كلهم وسابوني مربوط في الكرسي، حاولت أفك نفسي بالعافية معرفتش اعمل أي حاجة لحد ما حسيت بتعب ودوخة وكأن روحي بتتسحب .

: أنتي رايحة فين!

• رايح لـ يوسف يا رحمة مش هسيبه

: مينفعش تروحي إحنا لازم نبلغ

• مش هستنى لحد ما الحكومة تجيبه أنا هدور عليه

: تدوري عليه فين بس استني

لبست هدومي ونزلت بسرعة أعمل تحريات عن الناس والعربية واللي اخدوا فيها يوسف بعد ما شفت الارقام بتاعتها في كاميرات المراقبة، كلمت حد في المرور يجيبلي خط سير العربية لحد ما بعتلي بياناتها كلها، ومكنتش محتاجة أعرف خط سيرها لأني كنت عارفة هلاقي يوسف فين بعد ما عرفت صاحب العربية .

حسيت بحد بيهز فيا جامد، مكنتش قادر أفتح عيني من التعب، لحد ما سمعت صوت تيسير ..

: يوسف فوق بالله عليك خلينا نمشي من هنا

مكنتش قادر اتحرك من التعب، راحت هي سندتني ومشيت بيا لحد آخر المخزن، ولقيتها دلقت عليا جردل مية لحد ما فوقت بالعافية .

سمعت صوت ضرب نار جاي نحيتنا، بعد ما اكتشفوا أن في حد دخل وفك يوسف وشافونا ..

• المسدس بتاعك فين!

: معايا

• هاتيه

طلع يوسف من الركن اللي كنا فيه وفضل يضرب نار تجاه رجالة توفيق الشيخ، لاحظت وجود مأسورة انابيب كبيرة بتوصل من أول المخزن لاخرة، جتلي فكرة ممكن تبقىٰ آخر حاجة هعملها في حياتي ولكن غامرت ودخلت الانابيب لحد ما لقيت نفسي واقفة ورا رجالة توفيق الشيخ، مسكت ماسورة حديد، ضربت إللي كان مستخبي ورا العمود واخدت البندقية الآلي بتاعته، خلصت الخزنة كلها فيه هو الإتنين إللي كانوا معاه، وشاورت لـ يوسف يوقف ضرب ..

: وصلتي عندك إزاي!

• من مواسير الأنابيب

: أنتي متخلفة كنتي ممكن تموتي

• مأنا لو متخلفة مكنش زماني واقفة قدامك

: بترديهالي!

• بالظبط

فضلنا نضحك ومفيش كام ثانية ولقينا باقي الرجالة جت والضرب اشتغل تاني، اخدنا ساتر وفضلنا علىٰ الحال ده لحد ما حاوطونا من كل حتة والذخيرة إللي معانا خلصت .

مسكوا يوسف وفضلوا يضربوا فيه جامد لحد ما بقي جسمه يجيب دم من كل حتة، وأنا واقفة بعيد وفي إتنين ماسكيني، ولقيت توفيق الشيخ بيطلع المسدس وبيوجهه نحية يوسف وبيبص نحيتي وبيبتسم بإبتسامة مليانة سخرية وإنتصار، وفي لحظة خرجت الرصاصة من مسدس توفيق رشقت في كتف يوسف ووقع علىٰ الأرض .

: يوسف يا يوووسف رد عليا

العقيد خالد بيه دخل وكانت معاه القوات كلها وقبضوا عليهم، جريت نحية يوسف، الدم بيخرج من كل حتة في جسمة، صوت صراخي مكنش بيهدى مكنش بيوطى، مكنتش عارفه انا بصرخ كده إزاي، دموعي بتنزل بغزارة، يوسف مش بينطق ولا بيتكلم ولا بيتحرك، الدنيا أسودت في وشي وفقدت الوعي .

: أنا اسفة يا يوسف يمكن مقدرتش أفديك بحياتي زي ما عملت معايا ولكن كنت عاجزة أني أعمل كده مقدرتش

كنت واقفة علىٰ القبر بتاعه، دموعي مش بتسكت، دماغي مش راضية تفصل، الدنيا كلها ساكته إلا دماغي، مسحت وشي ومشيت، مشيت وأنا مش حاسة أن خسرت حاجات كتير، اولهم روحي إللي لقيتها مع يوسف وأهله، خسرت ذكرىٰ حلوة كنت ممكن اعيش عشانها العمر كله، عملت المستحيل عشان أعيش حياة هادية، ولكن المستحيل مكنش كفاية .

تمت ..