تحميل رواية «تعنيف» PDF

ـ طلقني وارتاح وريحني

قرب مني واتكلم ببرود وهو بيضغط على دراعي

ـ بعينك هسيبك كدا وأذلك عمرك كله يا زينة

اتكلمت بكره كِبر جوايا تجاهه كره وغضب منه ومن نفسي

ـ أنت واحد مر يض ومش راجل

آخر كلمه كانت بداية لضرب مبرح ليا بدأ يضربني بشكل بشع

مش مراعي أي شيء ولا حتى إني حامل وممكن يحصل للطفل حاجة، بِعد من مدة وكنت مرمية قدامه مش قادرة اتحرك

جسمي كله بيوجعني لكن وجع روحي كان أكبر بكتير بصلي بقرف وسابني مرمية على الأرض وخرج من البيت فضلت مكاني ودموعي نازلة بقهر على حالي واللي وصلتله

زحفت لحد ما وصلت للتليفون اللي كان على الترابيزة مسكته بالعافية وطلبت أول رقم ظهر قدامي

ـ الحقني

بعدها الدنيا اسودت في وشي محستش بحاجة

ـ حمد الله على سلامتك

فتحت عيني بالراحة وجع جسمي خف شوية بصيت حواليا المكان غريب بصيت لمصدر الصوت لقيتها ممرضة ففهمت إني في مستشفى قولت أول سؤال جه في بالي

ـ جيت هنا إزاي ؟

ـ شاب جابك هنا وهو منتظر برة

حطيت ايدي على بطني افتكرت النزيف اللي حصلي اتكلمت وأنا مرعو.بة

ـ أنا حامل حصل حاجة للطفل ؟

قدام الغرفة واقف دمه بيغلي من شكلها واللي زاد الوضع سوء كلام الدكتور اللي قاله بعد ما خرج من عند زينة

ـ جسمها مليان كدمات دا غير النزيف اللي حصلها وكمان ضعيفة وفيه أثر كدمات كانت بدأت تروح

المريضة شكلها بتتعرض لعنف مستمر لازم أبلغ

قال كلامه بعملية وسابه ومشي يكمل شغله مش مستوعب

أثر كلامه عليه

فاق من أفكاره على الممرضة وهي بتبلغه إن المريضة فاقت

وقف قدام باب القوضة متردد عايز يجري يطمن عليها وفي نفس الوقت خايف يدخل يشوفها كدا لكن اللي متأكد منه إن حقها هيجيبه لو هيكلفه حياته

أخد نفس يحاول يهدي نفسه وفتح الباب ودخل بهدوء لقاها شارده مش حاسه بحاجة فضل باصص ليها شوية

إزاي اتحولت كدا مش دي زينة اللي يعرفها

انتبهت له أخيرًا لما قال اسمها بهدوء.

لفيت لقيت آخر شخص ممكن أشوفه دلوقتي لكن أول ما لمحته دموعي نزلت لوحدها همست باسمه وأنا مش مصدقه أنه قدامي

ـ حسن !

قرب منها بسرعة أول ما قالت اسمه قعد على ركبه جنب السرير ومسك ايديها اللي كانت بتترعش مش عارف من الخوف ولا البرد

ـ يا عُمر حسن، حصلك إيه يا زينة

بكيت لأول مرة بصوت عالي وأنا بفتكر كل اللي حصلي في غيابه اتكلمت بعد ما هديت شوية

ـ اتبهدلت يا حسن ضر.ب وإهانة حطيت ايدي على بطني وكملت ـ وابني ما.ت قبل ما أشوفه مو.تني بالحيا وموت ابني يا حسن

باس ايدي واتكلم بهدوء

ـ والله العظيم لهجيب حقك وأندمه على اللي عمله مش محمود اللي عمل فيكي كدا ؟

قبل ما ترد كان الباب اتفتح بعنف ودخل منه محمود جوزها

اتكلم بصوت عالي وهو شايف ضهر حسن فاتكلم بشك وعصبية

ـ ما الحلوة مش لوحدها ومعاها حبيب القلب أهو

حسن لف أول ما سمع صوته بصله من فوق لتحت وعرف إن دا محمود سبب عذ.اب أخته اللي لسه ميعرفش عنه حاجة لكن يكفي منظرها قدامه دلوقتي

قرب محمود من حسن اللي لسه واقف وماسك ايد زينة بهدوء لكن يسبق عاصفة

من رعشة ايديها اتأكد أكتر إن دا جوزها

اتكلم محمود وهو بيبص لزينة بعد ما شاف حسن اللي عرفه من صورته اللي ملازمة زينة من يوم جوازها اتكلم كأنه مشكش فيها مش لحظة

ـ دا حسن مش كدا ؟

ـ أنا كابوسك

كان رد حسن عليه بهدوء مرعب محمود اتهز من نبرة صوته لكن حاول يفضل ثابت

ـ طب لما المحروسه تقف على رجليها ابقى هاتها البيت أكيد عارفه

قبل ما يقول كلمة زيادة كان حسن ساب ايديها وبدأ بضر.به في وشه أكتر من مرة بعدها جره بره الأوضة وقبل ما يقفل الباب

ـ مش هخليك تلمح طيفها وهوريك العذ.اب بس أطمن عليها الأول

قفل الباب فوشه أما التاني وقف مدهوش ومصدوم من رد الفعل اللي حصل إزاي أخوها يعمل معاه كدا هو عمل إيه جديد يعني ؟

خاف يدخل تاني من حسن فاتحرك علشان يرجع بيته اللي أكيد زينة أول ما تخف هترجعله تاني مهي مش أول مرة

في الأوضة حسن واقف قدام زينة اللي نايمة على السرير بضعف ودموع مغرقة وشها اتكلم بعد ما شد كرسي وقعد عليه

ـ احكيلي إيه اللي بيحصل معاكي بالظبط ومن كلامه بيوضح إن دي مش أول مرة ولو كان بيبهدلك كدا إزاي كنتي بترجعيله تاني ؟ وأنا فين من كل دا وبابا فين ؟

قررت تتكلم وتحكي يمكن حقها يرجع أو حتى لو مرجعش يمكن تخلص من محمود سبب الرعب في حياتها

سكتت شوية وهو احترم سكوتها سابها تلملم نفسها علشان تقدر تتكلم بعد فترة بدأت تحكي

ـ بعد ما أنت مشيت بكام شهر لقيت والدك بيقولي إن فيه عريس متقدم وهو وافق وكتب الكتاب آخر الشهر يعني بعد أسبوع تقريبا رفضت وقتها ولما لقيته مصمم بشكل غريب حاولت أتصل بيك أستنجد بسندي في الدنيا بعد ربنا

لكن والدك هددني و

قبل ما تكمل كلامها الدكتور دخل يطمن عليها وقبل ما يخرج

اتكلمت وهي باصة لحسن

– عايزة أخرج من هنا يا حسن

بس للدكتور فاتكلم

– تقدر تخرج لكن محتاجة راحة

الدكتور خرج وقبل ما حسن يقول أي شيء زينة سبقته

– خرجني من هنا لأي مكان بعيد عن محمود وأنا هكملك اللي حصل مش هخبي عليك حاجة والله لأني تعبت من الكتمان والسكوت بس خرجني من هنا علشان خاطري

– خاطرك غالي يا زينة حاضر هتخرجي

قبل ما يخرج من الأوضة علشان ينهي إجراءات الخروج ويدفع الحساب قابلة شخص على الباب

– أنا رحيم عبد الرحمن ظابط

حسن فهم إن الدكتور بالفعل بلّغ فوسعله علشان يدخل بعد ما بص لأخته

رحيم دخل وقعد على كرسي ومعاه واحد بدفتر يكتب أقوال زينة

اتكلم بشكل مباشر بعد ما بص ليها بشكل سريع وشاف الكدمات اللي ظاهرة للأعمى في وشها

– إيه اللي حصل يا مدام ومين عمل فيكي كدا ؟

قبل ما تقول أي حرف بصت بخوف لحسن اللي كان واقف جنبها بيدعمها بصلها باطمئنان علشان تتكلم

بصت للظابط واتشجعت تتكلم أخوها معاها ومش هيسيبها

خلاص كفاية سكوت لحد كدا كفاية خوف مسيطر عليها بقاله سنة كاملة

– جوزي محمود الشرقاوي اللي عمل فيا كدا وكمان السبب في قتل ابني قبل ما يشوف النور

رحيم أخد أقوالها وخرج من عندها ووراه حسن علشان ينهي إجراءات الخروج من المستشفى بعد ساعتين كانت في شقة بسيطة ومريحة بالنسبة ليها في مكان هادي كانت شقة أخوها اللي اشتراها بعيد عن بيتهم علشان لما ينوي يتجوز

– تعالي ارتاحي شوية على ما أطلب أكل

اتحركت معاه علشان تقعد باس جبينها وقعد جنبها

– تحبي تاكلي إيه يا عيوني ؟

ميلت راسها على كتفه بارهاق وردت

– أي حاجة

طلب أكل وفضلوا ساكتين شوية لحد ما قررت تكسر الصمت وتتكلم

– أبوك هددني لقيت مسد.س قدامي وصورتك جنبه بيهددني بيك مش هو لوحده هو ومحمود

محمود قال إن له صاحب هناك مستعد يخدمه ويخلص عليك لو رفضت مصدقتش في الأول قولت أكيد بيخو.فوني لحد ما محمود خرج موبايله وعمل مكالمة وادالي الموبايل لقيتك قدامي كنت قاعد في كافيه مركز في اللاب قدامك أول ما شوفتك صدقت إن ممكن يأذوك مستحملتش ووافقت

ولما كلمتني قولتلك متنزلش واترجيتك كنت خايفة عليك

معرفش كنت بفكر إزاي وقتها بس همي كله إنك تكون بخير

كنت كل ما تكلمني بقول إني بخير وكويسة بس أنا كنت بمو.ت

كل مرة كان يضربني فيها على أسباب تفاهه زي ما يكون بيستمتع بضربي وعذ.ابي كان أبوك يرجعني له تاني ويوصيني عليه يا بنتي خدي بالك من بيتك أكيد عصبتيه، عارف المرادي انضربت ليه ؟ علشان قفشته بيبص على جارتنا من شباك المطبخ ولما قولتله طلقني هـ.ـجم عليا زي ما شوفتني كدا

رفعت راسها وبصتله لقت دموعه نازلة بصلها فكملت وهي بتفتكر أسوأ فترة في حياتها

– أبوك باعني بالرخيص طلع وافق عليه علشان معاه فلوس وهيدفع كويس عارف يعني إيه سندك في الدنيا وأمانك يبقى سبب خوفك وقهرتك في الدنيا ؟

أبوك اللي المفروض يحميني من غدر الدنيا هو اللي رماني لعذابي وكان بيقبض التمن

حضنها مكنش عنده كلام يقدر يواسيها بيه حضنها وبكوا الاتنين لكن كانت بتعيط من غير صوت زي ما يكون صوتها راح من كتر ما بكت ومحدش اهتم ولا واساها حتى

اتكلم وهو بيطبطب على ضهرها

– لو كنت أعرف كنت نزلت وعرفته مقامه ومكنتش خليتك تتجوزيه أنا أول ما نزلت امبارح سألت عليكي علشان أجيلك لكنه منعني بحجة إن الوقت اتأخر سكت وقولت أجيلك تاني يوم الصبح قولت أعملهالك مفاجأة، لكن لقيتك بترني على تلفون بابا ولحسن الحظ إنه مكنش جنبه فرديت أنا لكن لقيت صوتك بيستنجد بيا

أخدت منه العنوان بالعافية وجيت جري أول ما لقيتك على الأرض مش بتنطقي حسيت الأرض اتهزت من تحتي إيه عمل فيكي كدا فكرته حرامي مجاش في بالي محمود من كتر ما بتشكروا فيه لكن في المستشفى ومن كلامك اتأكدت إن هو

بس من النهاردة مافيش محمود تاني هخلصك منه وهجبلك حقك

بعدوا عن بعض بسبب جرس الباب قام فتح بعد ما مسح دموعه أخد الأكل ورجعلها تاني فرده قدامها

– فراخ زي ما بتحبي كلي كويس يا زينة البيت

ابتسمت بحزن على اللقب اللي دايما كان بيقوله ليها يا ريته ماكان سافر

مقدرش ياكل بعد اللي سمعه منها ولا هي أكلت يدوب كام لقمة علشان ميزعلش

أخدها في أوضة ترتاح باس جبينها

– ارتاحي ونامي أنتِ هنا في أمان بعيد عن أي أذى متخافيش

فضل جنبها لحد ما راحت في النوم قام بهدوء وخرج من الأوضة ومنها لباب الشقة علشان يخرج طول الطريق بيفكر في أخته وفي اللي عاشته علشان بس تحميه إزاي زينة الرقيقة يحصل فيها كل دا ؟

زينة اللي مكانش بيستحمل دمعة تنزل منها تتهان وتتعنف وهو مش عارف

قلبه كان بيـ.ـغلي من الحزن عليها والغل من محمود وأبوه

سمع باب الشقة بيخبط اتحرك ببطء علشان يفتح أكيد زينة راجعة زي كل مرة لكن اتفاجئ بحسن قدامه ومنظره مش بيوحي بالخير أبدًا خصوصًا لما ملقاش زينة معاه لكنه اتكلم بشكل طبيعي يمكن هي طالعة وراه بِعد عن الباب وبدأ يشتكي

– حسن اتفضل، ينفع اللي أختك عملته بتكتب فيا محضر وقال إيه الظابط بيقولي متهم وبتاع ومضاني على عدم تعرض وبيقول لو زينة متنزلتش الموضوع هيكبر ينفع اللي أختك عملته دا ؟

دخل حسن بهدوء وهو مستغرب من اللي قدامه إزاي كدا ؟ يبقى هو اللي ضاربها وقـ.ـتل ابنه بايده وهو اللي مستغرب رد فعلها ؟

قفل الباب وراه وقرب منه واتكلم بصوت واطي جنب ودنه

– أختي فعلًا غلطانة؛ علشان سكتت لكلب زيك بس ملحوقة يا حودة