الفصل السابع عشر

رواية شتاء ديسمبر الجزء السابع عشر 17 بقلم حميدة عبدالحميد شتاء ديسمبررواية شتاء ديسمبر الحلقة السابعة عشر قالت لي ، يوسف انا اسفة آسفه كتير، كانت بتردد ف الجملة دي وهي بتبكي ، رديت ليها بنبرة صوت حادة وقلت ليها اسفة علي شنو؟ كُنت قاصد إنو اتعامل معاها كدا ، قالت لي اسفة عشان خليتك بالجد انا ندمانة شديد وسافه التراب ، قُلت ليها هو مش الليلة عقدك ولا انا غلطان؟

، قالت لي اي ولمن عقدو ، رديت ليها بنبرة صوت أحدّ من الاول وقلت ليها ي بت الناس انتي مجنونة شي ؟ انتي الآن ف عصمة راجل ، و انتي حاليآ انسانة متزوجة وماعندك اي حق تتصلي لي ، هو الزواج دا عندك لعب ولا شنو؟

،٠٠٠ صادف الباص وقف علشان نفطر وعندنا إستراحة ذي ربع ساعة كدا ، طوالي نزلت وعائشة لحقتني، قعدت ف اقرب كُرسي صادفني ف الكافتيريا، إسراء رجعت واتكلمت تاني وقالت لي يوسف بالجد انت ماف احسن منك وقدر ما حاولت اتقبلوا م قدرت وكل مرة بقارنو بيك وللان مالقيت فيو صفة وحدة من صفاتك ، وحتي هو مابصلي ،وإتصل علي قبيل وقال لي المساء حتكون ف حفلة زفاف وح اطلع بفستان كاشف ومن دون حجاب ، لأنو عايز يحشش بي قدام اصحابو ويقولو مرتو سمحة

وكدا ٠٠ صراحة الكلام دا هزا العمق الاخير من كياني ووجع قلبي شديد ، هو صح انا حاليا م عندي اي مشاعر إتجاه إسراء بس برضو ماف راجل بيرضي يسمع فارغة زي دي ، شلت نفس عميق وانا بمرر يدي ف عمود أنفي من الغضب وقلت ليها شوفي ي إسراء ، انتي من البداية م كنتي عميانة منو صح ؟

وانا م عايز اذكرك بالكلام القلتي لي قبل كم يوم ، وبالواضح كدا انتي وأهلك ي إسراء مِلتو للجانب المادي ونسيتو كل القيم والاخلاق الممكن توافقو عليها، وانا الان معتبرك زي أختي والله ، وإنتي حاليآ ف ذمة راجل تاني وعيب مني ومنك إنو نتكلم مع بعض وبنسبة لي عمايل راجلك دا حاولي ختي اهلك ف الصورة ، وماتوافقي علي طلبو دا نهائي، قالت لي يوسف انا ح اطلق منو وح ارجع ليك ، قلت ليها عفوآ ترجعي لي ؟

، انتي بعتيني بسبب شوية قروش لو ناسيه ، حتي م كلفتي نفسك تتصلي لي وتوريني إنو انتي اتخطبتي، إنتي بكل بساطه م ختيتي لي اي قيمة او إعتبار ولا احترمتي مشاعري الصادقة ، انا كُنت مستعد اضحي عشانك كل حاجة كُنت بعمل فيها عشانك برضو ، بس نقول شنو مافي نصيب وياريت م تحاولي تتكلمي معاي تاني وانا اتجاوزتك والله ، وح اعرس الحمدلله بوحدة م بقدر اوصفها ليك زاتو، انفجرت بالبكاء تاني وقالت لي يوسف عليك الله م تعملها، قفلت الخط طوالي ، وصراحة عكرت لي مزاجي وعملت لي صداع، مسكت راسي وانا قاعد ف الكُرسي وقدامي الطاولة وعائشة كانت قاعدة ف الكُرسي التاني، قالت لي مالها كمان؟

٠٠ حكيت ليها بالكلام الدار بينا كلو ، قالت لي شوف ي يوسف انت عملت العليك واكتر ، وانا ح احظر رقمها زاتو علشان م تفكر تتصل تاني ، قلت ليها تمام، طلبت فطور واتنين موية صحة ، اكلنا ورجعنا الباص تاني لانو زمن الإستراحه انتهي خلاص ، طول الطريق عائشة كانت بتونسي وتضحكني، بحبها ياخ عيوش أُختي ، فخور بيها شديد انا ٠٠

ف تمام ال خامسة مساءً يقف الباص في أحد المواقف لتنتهي الرحلة، يُسرعان بالخروج منهُ وكل منهُما يحمل الأمل والحُب ف قلبه والتفاعل بغدٍ أفضل ، كانت سماء الخرطوم صافية ، ضجيج السيارات وقرع أقدام المارة طقس بارد جدا، يأتي صوت أُم من بعيد وهي تُنادي طفلها الصغير ، بائع الحلوى وهو يسير بجانب الطريق ، رؤية الشمس وهي تغيب ، ينظر إليها بشغف ومن ثم يبتسم وهو ينظر الي أُخته قائلآ لها ٠٠٠٠

= تصدقي ي عيوش ما كُنت مفتكر إنو في يوم انتي ح تجي معاي هنا أو انا أعرس يعني دي كُلها حاجات كانت بعيدة كُل البعد من عقلي وتفكيري، واقول ليك سر ، ياخ انا م عارف بس حاسي إنو أية دي بعرفها وكأنو لي مية سنة ، إتلعقت بيها شديد وحارس يوم بكرة بفارق الصبر عشان نطلبها رسمي من عم بلال ٠٠

=تبتسم وهي تنظر إلي أخيها بكُل حب ومن ثم تُمرر بصرها ف كل جُزء من أجزاء الطريق ، تنظر إلي إمراة عجوز قد بلغت من العمر عتيا ، تجلس علي حافة الطريق وهي تبتسم تارة وتضحك تارة اُخري ، وكأنها تبعث لنا رسالة بأن هذا الشباب لا يدوم ، تسحب نظرها من العجوز ،ومن ثم تنظر إلي غروب الشمس وهي تغمض عيناها ومن ثم تبتسم بتمعُن ، مُرسلة ردها إلي أخيها الذي تقدم ببعض العبارات قبل قليل قائلتآ لهُ ٠٠٠

ولا انا كُنت مُتخيلة انو في يوم من الأيام ممكن اجي الخرطوم ي يوسف ويمكن عشان ماف حاجة بتربطنا بيها ولا عندنا فيها اهل عشان نجيها زيارة ساي ، وسبحان الله القدر ليو رائي اخر ، وتصدق انا برضو مُتحمسه شديد اشوف أيه ، لانو الحب الفي عيونك فاضحك جدا ، وانا مُتأكدة إنو هي زيك كدا ، ابتسم وقال ليها احسن مني بكتير، وارح نمشي بعد دا وقفنا هنا كتير قالت ليو حاضر ، أجروا تاكسي واتحركو مكان عم كمال وسفيان ووليد قاعدين ، مسافة الطريق عائشة حكت لي يوسف بخبر ابوها طلق امها ٠٠

بلسان يوسف٠٠ انا ماعارف نفسي غبت سنة وحاجة ولا غبت مية سنة، معقولة ف الفترة دي كُلها اجي القي الدنيا قايمة وقاعدة ، والصدمة الكبيرة إنو ابوي طلق امي ، استغفرت كتير وقلت لي عائشة، والكلام دا متين حصل ؟ قالت لي حصل اول امس ودا بسبب مشكلة هديل ، قلت ليها وامي ذنبها شنو ، قالت لي علشان كانت بتتستر عليها وماقعد تحكي لي ابوي ، قلت ليها بس يطلقها يعني وهو دا حل ؟

، الحمدلله بس ، قالت لي ياريت تحاول تتكلم مع أبوي، قلت ليها حاضر وسكتنا علي كدا ، م عارف متين ح نخلص من المشاكل دي بس كان عندي احساس بقول لي قربت تهون خلاص ٠٠ لحظات بس ووصلنا الشقة ضربت الجرس وجا سفيان فتحو لي ٠٠٠ اوو سيفو حمدلله علي السلامة ي اخوي ، ابتسم وقال لي الله يقبل حمدك ي بطل ، شكرا ليك ياخ ودا كلو ب فضلك قدرت اطلع ، مسكتو من كتفو وقلت ليو شوف هنا ي سفيان م كل حاجة بتتحلا بالعصبية والعنف والحمدلله

المرة دي عدت علي خير وياريت م تكرر عملتك دي تاني، نزل راسو تحت وم اتكلم ، عاين ل عيوش وضحك وقال ليها انتي جيتي مع يوسف يعني ، عاينت ليو بعدم مُبالا وقالت ليو م بعرف ، ضحك بصوت عالي وقال ليها ، عان قال زعلت عاملة لي جضومك زي الزلابية ، يوسف ضحك معاو وقال ليو سفيان ياخ الله يهديك ، عائشة عاينت ليهم الاتنين ومدت بوزا مترين ودخلت جوا، يوسف عاين لي سفيان وسفيان عاين ليو ، وقال ليو شكلي م بعرف أهاظر ، ضحك وقال ليو المفروض

انت م تهظر نهائي لأنو هظارك بايخ شديد ، ضحكو الاتنين ودخلوا جوا ، كان عم كمال بصلي ف العشاء ووليد كان بتكلم مع مرتو ، وعائشة كانت قاعدة ف الهول ف الكنبة وحارساهم يخلصوا، جا يوسف وقعد جمبها لحظات بس وعم كمال خلص من الصلاة سبح شوية وقام طبق المُصلاية ورفعها فوق ، وجا سلم يوسف بالاحضان سلام حار ، وما فضل ليو إلا يبكي ، وقال ليو والله ي يوسف خجلان منك شديد ، يوسف قال ليو ي ابوي موش قلنا نقفل الموضوع دا ، وساقو قعدو جمبو

وسألو من أحوالو كلها، قال ليو والله ي يوسف الدنيا دي ادتنا درس زي الدرس، يوسف مسح شعرو برفق وهو منزل راسو ف الأرض، وقال ليو ي ابوي ، الليلة انت يا أبوي ومعاك امي الثاث والاعمدة الركيزة ف البيت ونحنا بنطمن بوجودكم الاتنين بيناتنا ، ينفع كدا تطلقوا، ؟

وشتاتك انت وامي بيعني شتاتنا كلنا، نبرة صوتو اتغيرت وحاول ينفعل بس يوسف هدؤ وقال ليو أبوي صلي علي النبي ، وأنعل الشيطان والحمدلله مشكلة وقدرنا نحتويها، وياريت تشوفنا نحنا اول وشوف الأضرار الممكن نتعرض ليها بسبب انفصالكم، شال نفس عميييق وقال ليو والله انا طلقتها ف حالة زعل وان شاءالله ح ترجع ، يوسف فرح شديد وقال ليو تسلم ي ابوي ، وح احكي ليك موضوعي طيب، صادف وليد خلص مكالمتو وجا سلم يوسف ، وعائشة وقال لي عائشة المرة

دي يوسف م قدر يخليك هناك، قالت ليو بالضبط واصلا انا جيت علشان موضوع مهم يخص اخووي الغالي ، يوسف كان بيعاين ليهم ويبتسم ، سفيان جرا الطربيزة وختها قدام يوسف وقعد فيها وقال ليو شنوو ي شفت الموضوع شكلو خطير شديد ، عم كمال قال ليو إتأدب ي ولد ، قال ليو ابوي اسي انا قلت شنو ، يوسف ابتسم وقال ليهم ننهي النقاش دا كلو و اوريكم موضوعي ، طبعا انا يا ابوي عايز اعرس والبت هنا ف الخرطوم ومن أسرة طيبه شديد وابوها مؤذن وانا اتكلمت

معاو وهو وافق مُسبقا و اسي فضل تمشو انتوا ، سفيان كان مُبحلق عيونو وقال ليو كنت حاسي وقسم ، عائشة قالت ليو إحساس لكن كذاب كيف ، قال ليها عائشة اختيني ، ضحكت وقالت ليو ابيت ، وليد جا وبارك ليو وقال ليو الف مبروك ياخ وربنا يتمو علي خير ، عم كمال كان مدنقر راسو تحت بعد مسافة رفعو وإحساس الذنب كان واضح فيو وقال ليو الحمدلله وقت قدرت تنسي البنية ديك وابشر ي ولدي والله نقطع لحمنا ونسوي ليك العرس دا ، ابتسم وقال ليو كفاية

تكونو معاي بس ، خلصو كلامهم كلو ، ويوسف إقترح إنو عائشة تعمل ليهم الأكل، سفيان قال ليو والله انت داير تموتنا من الجوع شلك ، عائشة حمرت ليو طوالي سكت ، وضحكو فيو كلهم

ف صباح اليوم التاني ٠٠٠ عائشة صحت أول وحدة وحضرت الشاي وكل طقوسو ،لحظات بس وصحي سفيان وبعدو يوسف ووليد دا معروف انسان كسلان ، قعدو ف الهول وشغلوا الشاشه وجابو أخبار الحدث، سفيان قال ليهم يغيروها عائشة أبت، بقو يتصارعو ف الريموت ويوسف يعاين ليهم ساي ، قال ليهم انتو شفع والله ، لحظات بس وجا عم كمال ، شربو الشاي وقعدو شوية واستعدو علشان يمشو بيت عم بلال ٠٠