تحميل رواية «سحر الخراب» PDF

ن

تخيل انك تكون بتعمل حاجه غلط، ولما تقرر تتوب تكتشف ان وقت التوبه فات، او حتى لما ربنا يقبل توبتك بياخد مكانها حاجات تانية

اصل التوبة مش معناها انك لو عملت غلط مش هتتحاسب عليها ممكن ربنا يسامحك على اللي انت عملته لكن هتعمل ايه في دعوه المظلوم؟!

....

رجعت البيت بعد ما رجعت لربنا وتوبت عن كل حاجه عملتها، قولت هاخد دش واصلي ركعتين لله وبعدها هدخل انام.. لكن اول ما دخلت البيت لاحظت ان الاوضه بتاعة ايمان بنتي نورها منور، مش عوايدها تكون صاحيه في وقت زي ده، قولت اكيد صاحيه عشان تصلي الفجر.. قربت من الاوضة ودخلت واتصدمت بنتي كانت على السرير عينيها مفتوحه على الاخر وباصة للسقف وبوقها معوووج وفيه خيط دم نازل من مناخيرها

صرخت وجريت عليها وانا بقول ليه يا رب انا توبت.. ليه اخدتها منى؟!!

....

انا اسمي الشيخ عمر عبد المولى.. شيخ جامع ومعالج روحاني عندي 35 سنة ومتجوز سلمى بنت عمي وعندي منها بنت واحده اسمها ايمان، حياتي مستقره الى حد ما، المشكلة الوحيدة اللي في حياتي هي الماديات.. وكانت مسببه مشاكل كتير ما بيني وما بين مراتي، اصل مرتبي من موضوع شيخ الجامع ده مش بيكفي وانا برفض اخد حاجه في العلاج الروحاني وعامل الموضوع تطوع منى ودي حاجه مكنتش عاجبه سلمى

_ عمر احنا كل يوم مصاريفنا بتزيد، وانت شايف العيشه بقت غاليه ازاي.. وانت في ايدك انك تكسب فلوس بس انت اللي مش عاوز، الناس بتيجي لحد عندك وبتعرض عليك وانت ردك في كل مره ان انا بعمل ده تطوع

= احنا اتكلمنا في الموضوع ده قبل كده يا سلمى، وانا عند رأيي ومش هغيره، الناس اللي بتيجي تطلب مساعدتي دي بتكون متبهدلة وفي حد ابن حرام اذاهم وانا بعمل كده لوجه الله وواثق ان ربنا هيكرمني

_ انت عارف انك كل مره بتقول نفس الكلام، البنت عاوزه مصاريف مدرسه ودروس ولبس، هنجيب كل ده منين وانت مرتبك يا دوب بيكفي اكل وشرب وانت عارف ان الاوقاف مش هتزودك.. اسمع كلامي يا عمر وخد حقك انت بتعرض نفسك للخطر وبتعالج ناس من جن وبلا ازرق وفي الاخر ما تاخدش فلوس يبقى حرام ولا مش حرام

= لا مش حرام وان شاء الله ربنا هيفرجها

...

دي مش اول مره سلمى تتكلم معايا في الموضوع ده، ولكن المره دي الموضوع كان مختلف عشان سلمى خدت ايمان وسابت البيت وراحت عند اهلها، كأنها بتعاقبني عن الخير اللي بعمله، ولما بقيت لوحدي وغيابها طال فكرت في كلامها وبرضو مقتنعتش

لحد ما في يوم اتصلت بيا سلمى عشان تبلغني انها تعبانه وعاوزه تروح للدكتور وان لازم اكون معاها.. صوتها في التليفون مكنش مطمني وده اللي خلاني اروح على البيت عندهم بسرعة.. كان شكلها تعبان فعلاً.. اخدتها وروحت عشان اكشفلها، وهناك اكتشفت ان عندها فيرس سي.. وان لسه عندها فرصه للعلاج ولكن العلاج كان غالي.. كنت حاسس اني في دوامة ومش عارف اتصرف ازاي؟!.. لحد ما في يوم باب البيت خبط ولقيت واحده من اهل البلد اسمها نعمات جاية عندي وكانت متوترة وقالت انها عاوزاني ضروري في موضوع مهم

دخلتها الاوضه اللي بعالج فيها الحالات، وبدأت تتكلم

_ شوف يا مولانا... انت عارف ان ابني صلاح اتجوز من قيمه ست شهور كده، واحده مش من البلد ومن يوم ما دخلت البيت والخراب حل عليه، البت مش بس ساحره لابني دي ساحره كمان لابوه، الاتنين واقفين معاها في كل حاجة ضدي واخرتها الواد ابني كتب الشقه اللي قاعدين فيها باسمها ومن ساعتها وهي بتذلني ذل السنين.. وعشان كده انا جتلك.. دول 50 الف جنية انا عارفه اللي انت بتمر بيه تاخدهم بس اخلص من مرات ابني

= تخلصي منها ازاي مش فاهم؟!

_ هتعملها عمل، عاوزاها تتجنن تبقى في عين ابن قردة تبقى مكروهه من الكل عشان ابني يطلقها وتبعد عننا

=انتي مجنونة؟!.. انا مستحيل اعمل حاجه زي كده وشيلي فلوسك دي وامشي

_ انت محتاج الفلوس دي يا شيخ عمر، عشان تعالج بيها مراتك، انت محتاج فلوس كتير الفتره اللي جاية فكر ومش هتندم

= انا مستحيل اعمل حاجه تغضب ربنا، وانا مش عاوز اسمع كلمه زيادة خدى فلوسك واطلعي بره ووفري على نفسك الكلام عشان انا مش هغير قراري

_ يعني ده اخر كلام عندك، طيب عموما انت عارف عنوان في البيت لو غيرت رأيك هتلاقيني مستنياك

...

خرجت الست نعمات من عندي وانا هتجنن ازاي البشر وصلت للمرحله دي؟!.. ازاي عايز تشوف بني ادم قدامك بيعاني وبيموت وكل ده عشان خاطر الفلوس

المبلغ كان كبير وكان هيساعد في علاج سلمى بس انا مستحيل امشي في طريق الغلط، واحط ايدي في ايد الشيطان

ومر اسبوع، وخلال الاسبوع ده مع مراتي بتتالم بصوت مكتوم وهي جنبي، مش عاوزه تحسسني بوجعها لحد ما في يوم تعبت والتعب زاد عن المعتاد، فأخدتها للدكتور اللي قال

_ لازم تتصرف في العلاج في اقرب وقت، لو الموضوع وصل لتليف الكبد العلاج مش هيكون ليه لازمه، انت عندك فرصه تعالج مراتك

عشان بعد كده مش هينفع معاها غير الغسيل والجلسات دي غالية

...

فضلت افكر كتير وللاسف انا ضعفت، مكنش عندي حل تاني مش هسيبها تموت قدام عينيا.. يومها بالليل روحت على بيت الست نعمات وقولتها اني موافق على العرض وانها تعدي عليا بالليل عشان نعمل العمل.. الست كانت فرحانه انها أخيراً هتخلص من مرات ابنها، وبدأت في تحضير سحر يخلي البنت تتجنن

الست نعمات كانت عندي بالليل ومعاها صورة لمرات ابنها، بدات اكتب على الصوره كلام كتير باللون الاحمر.. اللي اساسه كان دم بشري من الست نعمات نفسها وخصلة من شعر البنت اتلف حوالين الصورة وبعدها بدات اقول الطلاسم ومع كل كلمه كان جسمي بيتنفض.. وبعد ما خلصت طلبت منها تاخد العمل ده وتدفنه في قطر وتدفنه في قبر وهي مكدبتش خبر

وبعد ما خلصت ادتني الفلوس، 50 الف جنية ومن تاني يوم جبت لمراتي العلاج وفضلت متابع مع الدكتور 3 شهور وحالتها كانت بتتحسن.. ولكن في يوم قررت اني هروح البنت اللي انا اذيتها دي حالتها عامله ايه؟!.. خلاص انا مراتي بقت كويسة وانا حاسس بالذنب اروح اصلح غلطتي واعالجها، عرفت ان البنت تعبانة وفي بيت ابوها.. ابوها اسمه الحاج عبد الباسط ومعاه عطاره بيشتغل فيها.. روحت عنده البيت وعرفت ان بنته تعبانة ومش بتاكل وبتقوم بالليل تصرخ وتشد في شعرها وحالتها صعبه جداً

صعبت عليا وطلبت منه يدخلني اشوفها يمكن يكون عندي الحل، الراجل ما صدق اني طلبت منه كده ودخلني عشان اعالجها لكن اول ما دخلت الاوضة لقينا البنت واقفه قدام المراية وماسكه في ايدها سكينة... ابوها اتكلم وقال

_ واقفه كده ليه يا حبيبتي، وايه السكينه اللي في ايدك دي؟

= انا همشي يا بابا، انت هتوحشني اوي بس ما تخافش انا هاجي وازورك كل يوم

...

وقبل ما الراجل يرد عليها رفعت السكينه ودبحت نفسها.. وفجأة

لقيت في ايد بتهزني، فتحت لقيت نفسي نايم على كرسي في مستشفى ومراتي قدامي نايمه على السرير، مكنتش مصدق اني بحلم.. بصيت على اللي كان بيهزني كان الدكتور واتكلم وقال

_ هستاذنك يا شيخ عمر، هو ميعاد الزياره خلص تقدر تروح وتيجي الصبح

= هي سلمى لسه تعبانه؟

_ هي اتحسنت عن الاول طبعا بعد الحقن اللي خدتها، بس لسه كورس العلاج اللي بتاخده مخلصش بس ان شاء الله هنقدر نعالجها وهترجع احسن من الاول

= ان شاء الله يا دكتور

...

خرجت من الاوضة اللي فيها سلمى ولقيت ايمان بنتي قاعده على الكرسي قدام الاوضة كانت نايمه على نفسها صحيتها عشان تيجي معايا واتحركنا على البيت مكنتش متخيل اني هشوف كل ده في الحلم، مراتي اللي بقت كويسه خلاص والبنت اللي انا عملتلها السحر وهي بتنتحر قدام عينيا

وصلنا البيت وطلبت من ايمان تدخل اوضتها وترتاح، دخلت الحمام اتوضيت عشان اصلي ركعتين لله وكان جوايا صوت في دماغي بيقول

: بذمتك هو هيقبل منك الصلاة بعد اللي انت عملته، انت عارف ان اللي عملته ده كفر.. ورغم كده رايح تصلي يا بجاحتك يا اخي

...

حاولت اطرد الاصوات دي من دماغي، وكملت وضوء عشان اصلي واول ما وقفت على سجاده الصلاة حسيت ان في دبابيس في جسمي الم صعب مش قادر اتحمله بس اتحاملت على نفسي وقولت الله اكبر.. بس كل ما كنت اقول حاجة كنت اسمع صدى صوت جاي من ورايا بيكرر... استعذت بالله من الشيطان الرجيم وقومت من على السجادة وبمجرد ما رفعت راسي لقيتها واقفه في وشي عينيها كانت سودة وشها متقطع ومليان دم، رجعت لورا وانا بحاول اهرب ولكن وقعت على ضهري ومحستش بنفسي عشان راسي اتضربت في الارض واغمى عليا

فتحت عيني على صوت ايمان اللي كانت خايفه يكون جرالى حاجة ولكن طمنتها وطبطبت عليها.. وقالت

_ في حد مستنيك بره يا بابا، واحده كده مش كبيره اوي وقالت انها عاوزاك ضروري في امر مهم

= طيب يا ايمان انا هخرج واشوفها

....

خرجت من الاوضه ولقيت واحده في الصاله قاعده في العشرينات من عمرها، باين عليها التعب والارهاق بس انا عرفتها، دي ياسمين جارتنا.. بس اعوذ بالله البنت قبل ما تتجوز كانت زي الفل هو ايه اللي حصلها.. سلمت عليها وطلبت منها ندخل الاوضه بتاعه الشغل عشان حسيت انها تعبانة

وفعلا دخلنا الاوضه واول ما قعدت اتكلمت وقالت

_ انا عارفه انك شيخ محترم وانك هترفض اللي انا جاية عشانه، بس عشان خاطر ربنا ساعدني انا مش عارفة اروح لمين؟

= اهدي يا ياسمين وفهميني في ايه بالضبط؟

_ حماتي مطلعه عين اهلي، ابنها كان عايش بره ولما رجع اتقدملى وبابا وافق عليه واتجوزنا وبعدها هو قال انه هيسافر كام شهر يظبط دنيته هناك وهيرجع تاني عشان ياخدني معاها، لكن الكلام ده اتغير بعد الجواز والبيه سابني مع امه تبهدل فيا وتعمل اللي هي عاوزاه، وبعد ما كنت البنت اللي البلد كلها كانت بتحلف بجمالي بقيت زي ما انت شايف، وانا جيالك النهارده عشان عاوزه اخلص من الست دي، وزي ما قولت في الاول انا عارفه انك شيخ محترم ومش بتاع الكلام ده بس ارجوك ساعدني واعتبرني زي اختك

= انا خلاص فهمت انتي عاوزه ايه... وانا مستحيل اعمل كده، حاولي تتكلمي مع اهلك وتنفصلي عنه بدل ما تغضبي ربنا

_ حاولت بس اهلي رافضين الانفصال.. انا خلاص هموت نفسي واخلص، يمكن اخلص من نعمات اللي مسوده عيشتي

...

الاسم نزل عليا زي جردل الميه الساقعه.. الست نعمات تبقى حماتها، الست اللي جاتني وطلبت مني اعمل عمل لمرات ابنها الاولى، ياسمين مرات ابنها التانيه، انا مكنتش اعرف ان حماتها تبقى نعمات

وحسيت ان من العدل اوافق واعمل لياسمين اللي هي عاوزاه، واهو يبقى اللي حصل جزاء من جنس العمل

رجعت بصيت لياسمين اللي كانت خلاص قايمه ماشيه وقولتلها

= انا موافق.. بس في شويه حاجات هتجيبيها عشان نبدا الطقوس

كانت مستغربه انا ليه غيرت كلامي، بس العمل اللي هعمله الست نعمات مفيش حد هيعرف يفكه أبداً

طلبت منها طلبات صعبة من ضمنها عضم من جثة مفاتش على وفاتها اسبوع.. وكنت فاكر ان ياسمين مش هتعرف تتصرف ولكن ابهرتني بعد يوم واحد وهي جايبه كل الطلبات وبدأت احضر السحر.. كان سحر بالخراب والمرض والموت والعمل ده، حطيته في بق كلب وخيطت عليه والكلب ده اترمى في ميه جارية وده اصعب انواع السحر

...

وبعد اسبوع واحد لقيت باب البيت بيخبط فتحت الباب ولقيت في وشي جوز الست نعمات بيطلب مني اجي معاه البيت بسرعه عشان مراته تعبانة وكان بيقول

_ لازم تيجي معايا، مراتي اتلبست انا بقيت خايفه اقعد معاها في البيت.. دي بقيت بتمشي على ايديها ورجليها زي الحيوانات وعينيها بتقلب للون الابيض وبترجع دم

= طيب اهدى يا حاج وانا جاي معاك اهو، وان شاء الله هتبقى بخير ما تقلقش

_ تعالى معايا شوف بنفسك، يمكن تلحق تعمل حاجة يا شيخ

روحت مع الراجل عشان اشوفها، كان نفسي اخنقها بايديا واقولها انتي اللي وصلتيني لكده، انتي اللي جيتي على وجعي وجبتي رجلي في الحرام دخلت البيت عند الراجل واول ما شوفتها قولت سبحان المعز المذل.. الست اللي كانت ستات البلد كلها بتعملها حساب بقيت جلد على عضم

قربت منها وحطيت ايدي على دماغها، وجوزها كان فاكرني هقول اذكار وقران ولكن انا كنت بخلص عليها بدأت اقول في طلاسم تخليها تتعب اكتر كانت بتصرخ وبتتلوي على الارض لحد ما هديت خالص.. بصيت لجوزها وقولتله

_ هتبقى كويسه يا حاج ما تقلقش

...

وخرجت من عنده من غير ولا كلمه تاني.. وكنت لسه ما طلعتش من الشارع وسمعت الصراخ رهيب جاي من ناحيه البيت

الست نعمات ولعت في نفسها.. وجوزها كان بيحاول يطفيها بالبطانية ولكن النار كانت طالعه من جهنم مش راضيه تسيبها غير لما تخلص عليها.. لحد ما ماتت

حسيت ان الحق رجع لاصحابه، وقدرت انتقم من شيطانة كانت السبب في كل حاجه بتحصلي.. رجعت البيت ودخلت الحمام

ولكن اول ما دخلت النور قطع والباب اترزع.. وسمعت صوت بيقول

: انت حرقتني معاها يا شيخ عمر، مش هسيبك مش هسيبك

...

ولقيت النور رجع والباب اتفتح.. خرجت من الحمام وانا باخد نفسي بالعافيه وفهمت من الكلام اني اذيت الجن اللي على نعمات.. مكنتش عارف هتصرف ازاي؟!

ولكن في اللحظه دي الباب خبط واللي كان على الباب هو الحاج عبد الباسط والد البنت اللي انا عملتلها العمل، الراجل كان بيترجاني اروح الحق بنته وقال انها بتموت، طمنته اني هروح معاه ونزلنا انا وهو بسرعه على بيته جايز اعرف الحقها واصلح الغلطه اللي عملتها وربنا يسامحني، ولو قدرت اعالجها هتوب عمري ما هرجع للطريق ده تاني.. وصلنا البيت عنده وفتح الراجل الباب ودخل ودخلت وراه طلب مني استنى دقيقه وراح خبط على اوضتها بس مكنتش بترد.. فتح باب الاوضه ودخل وسمعته بيصرخ بصوت عالي دخلت وراه وكانت الصدمه..

لقيت البنت واقفه قدام المراية وماسكه في ايدها سكينة، وكانت مبتسمة.. ابوها كان بيحاول يقنعها تسيب السكينة ولكن هي مكنتش بترد عليها.. هي كانت بتكلم حد تاني خالص وبتقوله انا جيالك

حاولت اقرب منها، عشان اخد منها السكينة ولكن في اللحظه دي اتلفتت وبصت ناحيتي وعينيها اتقلبت للون الاسود وابتسمت وقالت بصوت لا يمكن يكون صوت بني ادم

_ ارجع مكانك مش هتعرف تنقذها

= انت عايز منها ايه؟.. سيبها، سيبها واحنا مش هناذيك

ضحك بصوت عالي واتكلم وقال

_ انت مش هتعرف تاذيني يا عمر، انا غير انا مش خادم زي اللي انت حرقته انا من الجن السفلي وعشقتها وهاخدها معايا

= اعوذ بالله من الشيطان الرجيم، اعوذ بكلمات الله التامات من شر ما خلق

_ رجعت للادعية، وسبت الطلاسم يا عمر بعد ايه؟.. بص وراك كده

...

بصيت ورايا لقيت الحاج عبد الباسط حاطط ايديه على ودانه ورجع الصوت ده اتكلم وقال

_ الحاج عبد الباسط مش سامع حاجة، بس انا ممكن اخليه يسمع ايه اللي وصل بنته للمرحله دي

= انت عايز ايه بالظبط؟

_ عايزك تخرج من هنا، وملكش دعوة انا هاخدها وانت مش هتقدر تمنعني

= هحرقك، لا يمكن اسيبك تاخدها حتى لو هرجع استخدم الطلاسم تاني

_ زي ما استخدمتها وكنت السبب في اللي هي فيه، مشكله البني ادم انه يعمل المصيبه وبعد كده يرجع يقولك عذاب الضمير، بس انت في حاجه غفلت عنها ان السحر بيموت بموت اللي عمل السحر او طالب السحر يعني مش انت السبب في اللي بيحصل دلوقتي للبنت انت كنت مجرد تمهيد للطريق

نعمات اللي كانت عامله السحر ماتت وانت عارف ماتت ازاي؟!

بس البنت دي كانت بتصلي وعارفه ربنا ورغم كده كانت ضعيفة ما اهو مش كل اللي بيصلي ايمانه قوي وانت عارف انا اقصد ايه السحر بتاعك بعدها عن الطريق اللي خلاني اكون موجود معاها ودلوقتي هي هتيجي معايا ومش هتقدر تمنعني

= اعوذ بالله من الشيطان الرجيم... اعوذ بالله من الشيطان الرجيم

_ خلاص.. طالما انت مصمم يبقى استحمل

....

في الوقت ده سمعت صوت من ورايا بيقول

_ ايه الكلام اللي انا سمعته ده يا شيخ عمر، يعني انت السبب في اللي حصل لبنتي

بصيت ورايا لقيت الحاج عبد الباسط مبرق ومصدوم بعد ما سمع الحقيقة

= متسمعش الكلام ده يا حاج عبد الباسط، ده بيحاول يشتتنا عشان منلحقش بنتك.. سيبنى الحقها وبعد كده هنتكلم

_ هتلحقها.. تلحق مين؟!... انا بنتي ماتت هو انت مش شايف

...

في اللحظه دي رجعت بصيت قدامي واتصدمت لما لقيت البنت ميته على السرير، وسمعت ضحكه في وداني عرفت منها ان انا مغفل وان الجن قدر يخدعني عشان ينتقم مني

رجعت بصيت للحاج عبد الباسط، وقولتله

= يا حاج كل ده كدب، ده بيحاول يخدعنا

_ هو مين اللي بيحاول يخدعنا، انا عرفت انك انت اللي عملت كده في بنتي، الست نعمات في اخر ايامها جات واعترفت ان هي اللي عملت كده وقالت انك انت اللي عملت العمل وانا جايبك هنا عشان اخد حق بنتي لازم تموت زي ما هي ماتت.. لازم تموت زي ما هي ماتت

_ يا حاج بنتك لسه عايشه، ده بيخدعك عشان يوديك في داهية طيب انت هتموتني، بس انا عندي بنت عاوزه اربيها ما لهاش غيري دلوقتي

= وانا كان ليا بنت، وكان ما لهاش غيري.. عاوزني اسيبك عشان تربي بنتك وانت مسبتنيش ليه يا رب بنتي؟!.. ليه خدعت الناس كلها انك شيخ بتعالج بكتاب ربنا وبتطلع على المنبر تخطب وتتكلم عن الحق وتزهق الباطل وتقول ايه الحلال وايه الحرام

وانت مش بتعمل غير الحرام؟!.. عاوزني اسيبك بعد ما كنت السبب في موتها عشان انت عندك بنت وما لهاش ذنب وانا ايه كان ذنب بنتي يا شيخ عمر

_ عندك حق في كل اللي بتقوله، انا كنت جاي اعالج بنتك، كنت جاي اصلح غلطتي ومكنتش اعرف ان الموضوع وصل لكده

= خلاص خلصت يا شيخ عمر، وانا مش هكون زيك وهسيبك تمشي.. بس كل اللي اقدر اقولهولك اني مش مسامحك، وحسبي الله ونعم الوكيل فيك.. حسبي الله ونعم الوكيل فيك اشوف فيك يوم

_ ارجوك، سامحني

= اطلع بره يا شيخ عمر.. اطلع بره

....

خرجت من بيته وانا منهار من العياط، وعرفت ان الراجل ده عمره ما هيسامحني مهما عملت انا كنت السبب في تمهيد الطريق لجن عاشق كان عاوزها ولكن اللي منعه انها كانت بتصلي وقريبه من ربنا ولكنها كانت ضعيفه بتاخر الصلاه عن ميعادها وساعات بتنسى تصلي وعشان كده السحر اثر فيها، وفتح سكه للجن العاشق عشان يدخل منها، السحر اللي انا كنت عامله انتهى بموت نعمات ولكن هي ماتت خلاص وانا هعيش شايل ذنبها العمر كله

في الوقت ده تليفوني رن واللي كان بيتصل كان الدكتور من المستشفى بيطلب مني اجي بسرعة

قفلت معاه وركبت اول مواصله كانت في وشي ونزلت قدام المستشفى واول ما وصلت عند الاوضه اللي فيها مراتي عرفت اللي حصل... مراتي ماتت

بصيت للدكتور اللي كان باصص في الارض ومش عارف يتكلم وقولتله

_ ازاي؟!.. ماتت ازاي؟

= اجلها.. البقاء لله يا شيخ عمر شد حيلك

_ لا.. متقولش كده سلمي عايشة، سلمى عايشة سلمى هتروح معايا

= يا شيخ عمر.. للاسف مراتك ماتت ربنا يرحمها انت راجل مؤمن وموحد بربنا ودي اعمار، اهدى وصلي على النبي كده

_ عليه افضل الصلاه والسلام.. لا حول ولا قوه الا بالله

...

كل حاجه تمت بسرعة البرق دفنة وعزا.. ولقيت نفسي واقف لوحدي معنديش غير بنتي دلوقتي ولازم اتوب لازم ارجع لربنا لازم ارجع الشيخ عمر الامام اللي كان بيخطب بالناس وكان بيعالجهم من الشياطين.. روحت على بيت ربنا الجامع اتوضيت وصليت ودعيت ربنا انه يسامحني، واني خلاص توبت مش همشي في الطريق ده تاني.

رجعت البيت بعد ما رجعت لربنا وتوبت عن كل حاجه عملتها، قولت هاخد دش واصلي ركعتين لله وبعدها هدخل انام.. لكن اول ما دخلت البيت لاحظت ان الاوضه بتاعة ايمان بنتي نورها منور، مش عوايدها تكون صاحيه في وقت زي ده، قولت اكيد صاحيه عشان تصلي الفجر.. قربت من الاوضة ودخلت واتصدمت بنتي كانت على السرير عينيها مفتوحه على الاخر وباصة للسقف وبوقها معوووج وفيه خيط دم نازل من مناخيرها

صرخت وجريت عليها وانا بقول ليه يا رب انا توبت.. ليه اخدتها منى؟!!

....

مكنتش مصدق اللي حصل كنت واقف في عزاها الناس بتسلم عليا وانا تايه مستني حد يضربني بالقلم ويقولي فوق من الكابوس ده.. لحد ما لقيت واحد بيسلم عليا وبيقول

_ الجزاء من جنس العمل يا شيخ عمر، وزي ما انت عملت كده في بنتي انا عملت كده في بنتك

كان الحاج عبد الباسط، اللي بيعترف بكل سهوله ان هو اللي عمل كده في بنتي هو اللي عمل السحر اللي كان السبب في موتها بالشكل ده.. طيب انا فين دلوقتي؟

انا في مستشفى المجانين بتعالج وبيتقال عليا اني مريض نفسي واني حاولت انتحر والافضل اني ابقى في المستشفى عشان انا بحاول آذي نفسي.

الطريق الغلط اخره غلط والدنيا مش بس فلوس دي حاجه لو كل البشر اقتنعوا بيها هيحمدوا ربنا على نعم كتير في حياتهم لكن الشيطان بيوهمك ان حياتك مش بتمشي غير بالفلوس حتى لو بطريق غلط.. ارجعوا لربنا قبل فوات الاوان قبل ما نهايتكم تكون زي الشيخ عمر.

انتهت احداث الرواية نتمني أن تكون نالت اعجابكم وبانتظار آراءكم في التعليقات