رواية ﮼صفقة ﮼عشك — الفصل 23 — بقلم ﮼الاميره،الموسويه 👑
بقلمي الاميره الموسويه 👑
ما احلل لاي شخص ياخذ كتاباتي وينشرهم (ذمه)
نورالدين .. عفتها ورجعت للبيت ورغم كلامها الي أذاني واهانتها الي عذرتها كلت الي صار مو قليل واني غلطت فأستاهل كل الي تسوي .. ولازم اتحمل.
وصلت للبيت هم لكيته هوسه ، يمان وزوجته مخبرصين الي يشوفهم يكول عدهم عرس مو عيد ميلاد!
سلمت عليهم كالو تعال اكعد هنا يمنا .. كلتلهم تعبان اشويه اريد انام لم تكملون كعدوني احضر الميلاد!
عفتهم وصعدت لغرفتي بدلت واتمددت بفراشي بقيت افكر بكلامها .. اشلون اصلح غلطي اشلون اخليها ترجعلي!!
جريت الموبايل وكلبت بيييي دورت رقمها القديم .. كلت احجي وياها عسى ولعل اتلين اشويه .. تتذكر كلامي وياها قبل وتضعف للذكريات!
اتصلت ع رقمها طلعلي الرقم غير داخل بالخدمه....!
اممممم اكيد مغيرته .. اشلون احصل رقمها .. شلووون ... اي!
ماكو غيره .. محمود اكيد عنده رقمها لان هو السايق مالتهم .. بس كون رقمه نفسه ممغيره!
اتصلت ع محمود رن!!!!!!
بعد عدة رنات .. جاوبني محمود .. سلام وسؤال .. اشلونك شخبارك .. اشوكت رجعت وين هالغيبه ومن هالكلام ......!
كلتله محمود اريد رقم سدن عندك؟!!
محمود .. ها .. باشا .. اني .. هذا .. شسمه !!
نورالدين .. الرقم عندك لو لا؟!
محمود .. اي اي باشا عندي.
نورالدين .. دزه الي هسه اريده.
محمود .. باشا انت ع راسي من فوك بس اني .. مااكدر انطيك الرقم .. سيد بسام وست سدن محذرتني انطي رقمها الحضرتك بالذات.
نورالدين .. اتدزلي الرقم والي يحاجيك اني المسؤول... سدت الخط بوجه وفعلاً ثواني و وصلني مسج بالرقم!
اخذت الرقم واتصلت بيها رن اكثر من مره متجاوب !!
بعدين اتصلت طلعلي تحويل.. الظاهر سوتلي حظر!
ماشي سدن خانم .. خلي اشوف اشون تاليها وياج .. نمت اشويه للعصر كعدت لكيت البيت هدوء !
بالصاله كاعد يمان يباوع ع التلفزون .. سلمت عليه وكعدت .. اشوكت تبدي حفلة ابنك؟!
يمان .. يمعود اسكت أجلناها لباجر.
نورالدين .. ليش؟!
يمان .. غير طلع باجر يوم ميلاده مو اليوم .
نورالدين .. هههههههههه صدك تحجي انت؟!
يمان .. اي والله لارين طلعت مشتبها ع بالها اليوم وهو باجر.
نورالدين .. هههه خرب يومك صدك ضحكتني .. وانتو ع اليوم واكفين دسوو اليوم شنو المشكله؟!
يمان .. مو دااحجي واكول ميفيد امه متقبل الا باجر اتسوي .. اتكول اشلون احتفل قبل ميلاده !
نورالدين .. والله انتو ما عدكم شغل وعمل .. خلي اكوم اشوف شغلي احسن مااضيع وكتي وياك.
يمان .. ولك هو اني لو مرتي .. اوووف النسوان ماعدهن عقل ع اتفه شي يدققن.
نورالدين .. هستوك يلا عرفت .. لو ما انت خبره بهالمجال.
يمان .. يمعود نصي صووووتك لتسمعك وتسويلي مصيبه هسه.
نورالدين .. هههه ماادري بيك جبان لهدرجه.. خلي اكوم قبل لا تستفرد بيك ام ادم.
نورالدين .. بدلت وطلعت للشركه سويت كم شغله لليل رجعت هم كعدنا اشويه بالبيت وبقينا نضحك ع موضوع العيد ميلاد .. بعدها اتعشينا ويمان رجع فتح نفس الموضوع وياي..!
يمان .. ها شقررت ع موضوع زواجك؟!
نورالدين .. حجيت وياها ..
يمان .. اي....!!
نورالدين .. نفس قرارها .. رافضه رفض تام.
يمان .. وانت شكو رحت حجيت وياها ليش محجيت ويا اخوها .. ابوها واطلبها منهم .
نورالدين .. كلتلك مااريد اغصبها .. فكرت احجي وياها عسى ولعل اتلين.
يمان .. انت بطران هذني النسوان اذا ركبن راسهن ميفيد وياهن الكلام صدكني .. هي اتحبك بس اتكابر فأنت استغل الوضع واحجي ويا ابوها ومااعتقد راح يرفضك لان شركته داخله ضمن الشركات بوحده من صفقاتنا يعني مستقبلهم بالسوق كله متوقف علينا.
نورالدين .. ماادري يمان اني محتار .. اخاف اذا جبرتها اتعاند بالزايد.
يمان .. اي اتعاند بس بعدين تخضع للامر الواقع .. وباجر اخوها بسام يجي اني عزمتهم للميلاد اثنينهم .. وانت افتح الموضوع ويا.
نورالدين .. الله كريم.
يمان .. نور لتبقى تتأملها ترضى ترى صدكني ما عدها كل مانع ترتبط بغيرك بس حتى تغيظك مثل ما سوت وياي.
نورالدين .. كلام يمان شعل بگلبي النار لانه صحيح .. هي فعلاً سوت هشكل بيه لما وافقت ع يمان .. فمو غريبه اتكررها مره ثانيه!
خلص اني لازم ما اتهاون بالموضوع ومثل ما كال يمان اجبرها تتزوجني وبعدين اصلح كلشي واخليها تسامحني .. بس اهم شي ما اخسرها.
ع هذا الكلام نمت .. والصبح رحت للشركه خلصت شغلي ومر اليوم عادي للظهر رجعت اتغدينا واتحظرو للحفله لان بدت المعازيم تجي .. سوو الحفله والبيت صار فندق ناس من كل الطبقات اجو الي نعرفهم والي منعرفهم عازمهم يمان .. ماادري هذا اذا ابنه اتزوج شيسوي اذا هو عيد ميلاد عزم نص الكره الارضيه!
نزلت اني سلمت ع الي اعرفهم وبقيت اسولف ويا بعض رجال الاعمال والسياسين الي اعرفهم .. بس بالي كان مشغول بيها ...... يا ترى راح تجي لو لا؟!
اشويه وشفت اخوها بسام دخل وحده .... !!
شافني اخذني بالاحضان اتكول صديق الطفوله ومفاركني .. متملق من يوم يومه.
يمان هم شافه واجه سلم عليه .. سأله كدامي ..
يمان .. شعجب جاي لوحدك لعد ليش الاهل ماكو وياك؟!
بسام .. والله سدن ع اساس تجي وياي حتى هدية ادم اشترتها قبل كم يوم .. بس فجأه غيرت رأيها .. كالت باجر عندي امتحان مهم ولازم اقرا.
يمان .. اهاا .. لا لعد معذوره اهم شي دراستها .
بسام .. اي والله والوالد انت تدري بي مسافر لهذا اني اجيت وحدي.
يمان .. اهلاً وسهلا انت كلش كافي ههههه
نورالدين .. بقو يمان واخوها يحجون ويضحكون .. واني نار مشتعله بيه لهدرجه متريد حتى اتشوفني!!
لاااا لعد كلام يمان صح لازم اجبرها قبل لا تسوي شي اتخليني اندم بي ع اللحظه الي مسمعت كلام يمان.
اخذت بسام للمكتب وحجينا بموضوع الشغل وعن الصفقه الاخيره واشكد هي مهمه لشركتهم !
وهنا فتحت الموضوع ويا...
بسام .. والله يا باشا هذي الصفقه كل حياتنا وشركتنا متوقفه عليها ان شاء الله نربحها.
نورالدين .. اممم .. اتريدها تصير الك؟!
بسام .. يا رييييت والله بس اشلون؟!
نورالدين .. سهله اعتبرها نجحت.
بسام .. مستحيل ... اشلون تصير!!
نورالدين .. مثل ما اكلك الصفقه اعتبرها ناجحه .
بسام .. باشا اكيد انت دتتشاقى وياي .. معقوله بهالبساطه تنجح الصفقه والمنافسين الي داخلين بيها.
نورالدين .. كلتلك الك وخلص.
بسام .. بصدمه والفرحه مسايعته من ارضه .. مدااصدك باشا اشلون اتشكرك بس كلي اشلون ارد جميلك عليه.
نورالدين .. الصفقه الك بس بشرط.
بسام .. كام يبلعم .. هااا .. شرط .. اي اي أمر باشا الغالي يرخصلك.
نورالدين .. سدن هي المقابل.
بسام .. شنووو .......... سدن!!!!!!!!!!!!!
نورالدين .. اي سدن .. مقابل صفقة عمرك .. سدن راح اتكون زوجتي.
بسام .. والله يا باشا مااعرف شنو اكلك بس ... سدن مخطوبه!!!!!!!!!!!!!!!!!!!!!!
نورالدين .. شنووو؟!!!
المن مخطوبه .. ومنو الي خطبها .. واشوكت؟!!
بسام .. اتقدملها قبل كم يوم زميل وياها بالكليه والبارحا قرينه فاتحتهم .
نورالدين .. بأبتسامه ساخره بس الغضب يتطاير من عيونه .. انت اكيد دتمزح.
بسام .. بنبره متلكأه .... لا والله باشا مدااتشاقه .. سدن انخطبت.
نورالدين .. بغضب كمت مااشوف كدامي نسيت اني وين ... لزمته من ركبته ضربت ظهره بالحايط ... وبصوت حاد مليان غضب ... اسمعني زين لك ....
سدن الي .. تعرف شنوو اليي اني الوحيد الي امتلكها فهمت لوووو لا .. ودين الله ورب السماء .. اذا ما لغيت هذا الموضوع لا اقتلك انت وياها والعار الي اتجرأ وخطبها ... وكتاب الله ارتكب بيكم مجزره.
بسام .. كان مصدوم من ردة فعل نورالدين والضربه الي اجته فجأه .. بس باشا الولد يريدهـ...
نورالدين .. اسمعني زين لك وبلا كلام زايد .. اتروح منا تلغي الخطبه من اساسها وهذا الحيوان اتكله ماكو الك مره بطلنا .. فهمت لوووو لا؟!!
والا اعتبر الصفقه مو بس ملغيه .. لا وربك امحي اسمكم من الوجود مو بس من السوك.
بسام .. لا لا لا باشا .. خلص اعتبر الموضوع انتهى.
طلع بسام بسرعه من الحفله بلا اي كلام .. بس الرعب الي اتملكه من منظر نورالدين وكلامه والغضب الي اعترا مراح ينسى ابد .. بوجهه راح للبيت وسوا الي امره بي نورالدين ... خابر الولد وكاله انو الخطوبه انلغت ... وينسى سدن واذا اتعرضلها او حجه وياها ميلوم غير نفسه!
الصبح سدن عرفت بالموضوع وهنا كانت المصيبه .....
سدن .. اول مداومت بالكليه اكو ولد ويانا اسمه لؤي كولش حباب وخلوق .. مرتب وشخصيته حلوه لاحظته مهتم بيه زياده عن اللزوم واني كنت اخاف من موضوع الزمالات والصداقه لانو اعرف بسام ميقبل بهيج شي وميرحمني اذا عرف
بس هذا الولد كولش ارتاحيتله كأه مو اكثر لان اني گلبي اصلاً مليان بحب واحد ومستحيل يملي اخد غيره!
عادي احنا بالدوام نكعد كروبات بس اني ماعندي علاقه بأحد بس اني وصديقتي الي حجيتلكم عنها وهي دائماً اتجرجرني وياها نكعد مع الكروب .. فهذا الولد بدا يحجي وياي وصارت بينا صداقه اني احجي ويا لانه من صدوك خلوق وحباب مو من هذولي العينهم زايغه .. لا شخص ثقيل واخلاقه عاليه!
بمرور الوقت قوت هذي العلاقه .. وفاجأني بأنو هو معجب بيه ويريد يتقدملي ع سنة الله ورسوله!!!!
اني رفضت رفض قاطع وكلتله انت مثل اخويه وشنو هالكلام .. ونهيت حتى صداقتي ويا.
بس هو ما فقد الامل بقى ينتظر مني اغير رأيي .. فأني كمت اتجنبه وماالتقي بي ابد كلت خلي يقطع الامل مني.
الى ان شفت غضب حياتي اول البارحا بالباب وانصدمت !!!
صحيح اني احبه ومجنونه بي بس عندي عقل مصيبه .. ميتفق ويا گلبي نهائياً ولا يسمعلي !
من شفته وسمعت كلامه .. مااعرف اشصارلي كرهته خصوصاً لما هددني بالاخير حسيت بخوف مو طبيعي من كلامه وهو يكولي لتلوميني ع الي راح تشوفي منا رايح!!!
اكيد راح يغصبني عليه .. لو يخلي بسام يجبرني اتزوجه!!
اكيد حتكولون شنو هالتناقض .. انتي مو تحبي لويش متردي؟!!
صحيح اني احبه واريده .. بس شي بداخلي يخليني ارفضه .. شي بداخلي مخوفني منه .. خصوصاً بعد ما ضحه بيه الاخوو .. حسيت نفسي ما اثق بي .. مااطيقه .. لدرجه افضل الموت على ان ارتبط بي .. وبنفس الوقت مااريد ارتبط بغيره!
مخبله مووو ؟!!
اي ادري بنفسي مو طبيعيه مرات احس نفسي مسحوره والله .. لان الي بداخلي تجاهه هو الي مانعني شسويييي احس نفسي ما الي سلطه ع روحي.
مااعرف اشوووووون احلها .. لا اكدر انسى واكمل حياتي .. ولا اكدر ارتبط بي واعيش حياتي.
اول ما راح اتصلت بـ لؤي كلتله اني موافقه بس بشرط اذا تريد تتزوجني هسه تجي تتقدملي وتقرا ويا اهلي الفاتحه غير هيج انسى الموضوع!!
كنت مفكره انو اذا اتقدملي راح اصير ع ذمته وبمنزلة مرته .. محد يكدر يجبرني ع شي لان عندي رجل يدافع عني ......... من غبائي فكرت هشكل!
بس الحقيقه صدمتني!!
المهم ...
بعد كلام وحديييييييث طويل وشروط وافق لؤي .. وفعلاً بالليل بنفس اليوم الي شفته بي ... جاب اهله وتقدملي!!
بسام معترض نهائياً ع الموضوع الظاهر يريد يخلص مني .. بعد ما فقد الامل من الباشا مالته انو يتزوجني .. ميدري بي اليوم اجه وعرض عليه الزواج .. والا مستحيل كان يوافق.
قرو الفاتحه واتفقوا انو بس تخلص امتحانات الكورس الاول نعقد وتصير السالفه رسمي!
ثاني يوم بسام كالي روحي وياي للعيد الميلاد معزومين .. كلتله مااروح عندي دراسه .. خفت لا اروح من اشوفه اضعف .. وخفت لا يعرف اني مخطوبه ويقتلني خلاص ماعنده كل مانع.
لا يستحي ولا يخاف من احد .. يخلي طلقه براسي وموتني اسهل منها ماكو عنده.
راح بسام .. واجه بالليل مو طبيعي !!
حجيت ويا ردت افهم شبي .. عصب عليه وكالي كل المصايب والمشاكل من ورا راسج ولي عن وجهي!!!!
يا هذا شبي؟!
عفته ورحت نمت .. كعدت الصبح ع رساله من لؤي .. !!!
فتحتها والصدمه الي شفتها خبلتني ....
(انتي وحده حقيره وبلا اخلاق.. اذا تحبين وعندج علاقات شكو تدعين الشرف وتضحكين ع الناس .. سويتي نفسج ثگيله براسي حتى اخطبج وانتي عندج حب وعاشكه ، وجهج مااريد اشوفه بعد ولتحاولين تحاجيني لو تبررين اي شي لا صدكي راح افضحج بكل الجامعه.)
سدن .. نورالدين!!!!!!!!!!!!!!!!!!
للحكايه بقيه 💔
رأيكم بالاحداث وتوقعاتكم للبارت القادم
لتنسوووووووون التصويت .. وان شاء الله البارت القادم باجر ينزل 🙋🏻♀️ تعويضاً عن تأخير البارحا 🙏🏻💜