قربت على غرام وأنا بقول بقلق:
__غرام… مشي أمورك شوية. مش لازم تعانديهم كده…
بصتلي بشرود، وردت بهدوء فيه وجع:
__مش عايزة حد يشوفني ضعيفة… مش عايزة حد يستهين بيا… أنا مش كده.
اتنهدت بضيق وقولت:
__حد مين يا بنتي؟ دول ماما وبابا…
سكتت لحظة، وبعدين كملت وأنا ببص لها بجدية:
__العند عمره ما كان حل يا غرام.
ردت ببرود وهي بتشيح بوشها:
__أنا قلتلك قبل كده تصالحينا… بس إنتِ مش موافقة.
بصيت لها نظرة طويلة، وقلت بصوت أهدى بس مليان تعب:
__عشان إنتِ عارفة كلام ماما… عارفة هي ممكن تقول إيه ليا لو حاولت أصالحها عليكي.
ده كفاية كلامها لما بتشوفني بعاملك كويس…
بصتلي بضيق وقالت:
__سيبيني في حالي يا ليان دلوقتي..
___
عدى الوقت… والمشاكل كبرت أكتر.
وفي يوم، غرام كانت واقفة في المطبخ غصب عنها، بعد ما ماما أصرت إنها تغسل المواعين.
كانت بتغسل الحلل بعصبية… صوت الخبط عالي، وحركتها سريعة كأنها بتطلع كل اللي جواها فيها.
إحساسي ساعتها كان بيقولي إن اليوم ده مش هيعدي على خير…
خصوصًا إن بابا كان موجود.
وفجأة…
الغضب سيطر عليه.
جاب الحزام.
شدها بعنف لبرا…
وصوت الضربة شق الهوا.
جسمي كله اتجمد.
ماكنتش شايفة كل حاجة… بس كنت سامعة.
سامعة صوت الضرب… وصوتها وهي بتعيط.
قلبي كان بيتقطع.
كنت عايزة أقوم… أصرخ… أقول “كفاية”…
بس خوفي كبّلني.
كنت عارفة إنها غلطت…
بس اللي بيحصل كان أكبر من أي غلط.
غرام جريت ناحيتي على الأوضة… كأنها بتدور على أمان.
قربت مني…
بس بابا كان أسرع.
دخل وراها… وبدأ يضربها تاني.
دموعي نزلت بغزارة…
ووقتها… صوتها فجأة علي:
__متضربنييش!!
صوتها كان مكسور… بس مليان وجع وغضب:
__مش كل شوية تضربني!!… أنا بكرهككك!!
سكت كل حاجة لحظة.
بصلها بابا بصدمة…
وأنا قلبي وقع.
ماما صرخت فيها بعصبية:
__بس يا قليلة الأدب! إزاي تكلمي أبوكي كده؟!
بابا فضل واقف لحظة… كأنه اتشل.
وبعدين خرج من الأوضة.
ماما خرجت وراه…
وسابوها.
غرام وقعت على الأرض… وفضلت تعيط.
—
قعدت شوية مكاني… مش قادرة أتحرك.
مسحت دموعي… وقربت منها بهدوء.
مديت إيدي بالمنديل.
أخدته من غير ما تبصلي.
كأن كل الكلام اللي بينا…
اتحبس جواها.
وسكت.
